𑁧𑁩. 𑀲𑀝𑁆𑀞𑀺𑀓𑀽𑀝𑀧𑁂𑀢𑀯𑀢𑁆𑀣𑀼

𑀬𑀸𑀯𑀤𑁂𑀯 𑀅𑀦𑀢𑁆𑀣𑀸𑀬𑀸𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀯𑁂𑀴𑀼𑀯𑀦𑁂 𑀯𑀺𑀳𑀭𑀦𑁆𑀢𑁄 𑀲𑀝𑁆𑀞𑀺𑀓𑀽𑀝𑀧𑁂𑀢𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀧𑀼𑀭𑀺𑀫𑀦𑀬𑁂𑀦𑁂𑀯 𑀳𑀺 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑁄 𑀮𑀓𑁆𑀔𑀡𑀢𑁆𑀣𑁂𑀭𑁂𑀦 𑀲𑀤𑁆𑀥𑀺𑀁 𑀕𑀺𑀚𑁆𑀛𑀓𑀽𑀝𑀸 𑀑𑀭𑁄𑀳𑀦𑁆𑀢𑁄 𑀅𑀜𑁆𑀜𑀢𑀭𑀲𑁆𑀫𑀺𑀁 𑀧𑀤𑁂𑀲𑁂 𑀲𑀺𑀢𑀁 𑀧𑀸𑀢𑁆𑀯𑀸𑀓𑀸𑀲𑀺. 𑀣𑁂𑀭𑁂𑀦 𑀲𑀺𑀢𑀓𑀸𑀭𑀡𑀁 𑀧𑀼𑀝𑁆𑀞𑁄 ‘‘𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀫𑀁 𑀧𑀼𑀘𑁆𑀙𑁂𑀬𑁆𑀬𑀸𑀲𑀻’’𑀢𑀺 𑀯𑀢𑁆𑀯𑀸 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑀓𑀸𑀮𑁂 𑀧𑀼𑀦 𑀧𑀼𑀝𑁆𑀞𑁄 𑀆𑀳 𑁋 ‘‘𑀅𑀳𑀁, 𑀆𑀯𑀼𑀲𑁄, 𑀏𑀓𑀁 𑀧𑁂𑀢𑀁 𑀅𑀤𑁆𑀤𑀲𑀁 𑀢𑀺𑀕𑀸𑀯𑀼𑀢𑀧𑁆𑀧𑀫𑀸𑀡𑁂𑀦 𑀅𑀢𑁆𑀢𑀪𑀸𑀯𑁂𑀦, 𑀢𑀲𑁆𑀲 𑀲𑀝𑁆𑀞𑀺 𑀅𑀬𑀓𑀽𑀝𑀲𑀳𑀲𑁆𑀲𑀸𑀦𑀺 𑀆𑀤𑀺𑀢𑁆𑀢𑀸𑀦𑀺 𑀲𑀫𑁆𑀧𑀚𑁆𑀚𑀮𑀺𑀢𑀸𑀦𑀺 𑀉𑀧𑀭𑀺𑀫𑀢𑁆𑀣𑀓𑁂 𑀧𑀢𑀺𑀢𑁆𑀯𑀸 𑀧𑀢𑀺𑀢𑁆𑀯𑀸 𑀉𑀝𑁆𑀞𑀳𑀦𑁆𑀢𑀺 𑀲𑀻𑀲𑀁 𑀪𑀺𑀦𑁆𑀤𑀦𑁆𑀢𑀺, 𑀪𑀺𑀦𑁆𑀦𑀁 𑀪𑀺𑀦𑁆𑀦𑀁 𑀧𑀼𑀦 𑀲𑀫𑀼𑀝𑁆𑀞𑀳𑀢𑀺, 𑀇𑀫𑀺𑀦𑀸 𑀅𑀢𑁆𑀢𑀪𑀸𑀯𑁂𑀦 𑀫𑀬𑀸 𑀏𑀯𑀭𑀽𑀧𑁄 𑀅𑀢𑁆𑀢𑀪𑀸𑀯𑁄 𑀦 𑀤𑀺𑀝𑁆𑀞𑀧𑀼𑀩𑁆𑀩𑁄, 𑀅𑀳𑀁 𑀢𑀁 𑀤𑀺𑀲𑁆𑀯𑀸 𑀲𑀺𑀢𑀁 𑀧𑀸𑀢𑁆𑀯𑀸𑀓𑀸𑀲𑀺’’𑀦𑁆𑀢𑀺. 𑀧𑁂𑀢𑀯𑀢𑁆𑀣𑀼𑀲𑁆𑀫𑀺𑀜𑁆𑀳𑀺 𑁋

‘‘𑀲𑀝𑁆𑀞𑀺 𑀓𑀽𑀝𑀲𑀳𑀲𑁆𑀲𑀸𑀦𑀺, 𑀧𑀭𑀺𑀧𑀼𑀡𑁆𑀡𑀸𑀦𑀺 𑀲𑀩𑁆𑀩𑀲𑁄;

𑀲𑀻𑀲𑁂 𑀢𑀼𑀬𑁆𑀳𑀁 𑀦𑀺𑀧𑀢𑀦𑁆𑀢𑀺, 𑀯𑁄𑀪𑀺𑀦𑁆𑀤𑀦𑁆𑀢𑁂𑀯 𑀫𑀢𑁆𑀣𑀓’’𑀦𑁆𑀢𑀺. (𑀧𑁂. 𑀯. 𑁮𑁦𑁮, 𑁮𑁧𑁦, 𑁮𑁧𑁩) 𑀆𑀤𑀺 𑁋

𑀇𑀫𑀫𑁂𑀯 𑀧𑁂𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀲𑀢𑁆𑀣𑀸 𑀣𑁂𑀭𑀲𑁆𑀲 𑀓𑀣𑀁 𑀲𑀼𑀢𑁆𑀯𑀸𑀯, ‘‘𑀪𑀺𑀓𑁆𑀔𑀯𑁂, 𑀫𑀬𑀸𑀧𑁂𑀲 𑀲𑀢𑁆𑀢𑁄 𑀩𑁄𑀥𑀺𑀫𑀡𑁆𑀟𑁂 𑀦𑀺𑀲𑀺𑀦𑁆𑀦𑁂𑀦𑁂𑀯 𑀤𑀺𑀝𑁆𑀞𑁄 ‘𑀬𑁂 𑀘 𑀧𑀦 𑀫𑁂 𑀯𑀘𑀦𑀁 𑀦 𑀲𑀤𑁆𑀤𑀳𑁂𑀬𑁆𑀬𑀼𑀁, 𑀢𑁂𑀲𑀁 𑀅𑀳𑀺𑀢𑀸𑀬 𑀪𑀯𑁂𑀬𑁆𑀬𑀸’𑀢𑀺 𑀧𑀭𑁂𑀲𑀁 𑀅𑀦𑀼𑀓𑀫𑁆𑀧𑀸𑀬 𑀦 𑀓𑀣𑁂𑀲𑀺𑀁, 𑀇𑀤𑀸𑀦𑀺 𑀧𑀦 𑀫𑁄𑀕𑁆𑀕𑀮𑁆𑀮𑀸𑀦𑀲𑁆𑀲 𑀲𑀓𑁆𑀔𑀻 𑀳𑀼𑀢𑁆𑀯𑀸 𑀓𑀣𑁂𑀫𑀻’’𑀢𑀺 𑀆𑀳. 𑀢𑀁 𑀲𑀼𑀢𑁆𑀯𑀸 𑀪𑀺𑀓𑁆𑀔𑀽 𑀢𑀲𑁆𑀲 𑀧𑀼𑀩𑁆𑀩𑀓𑀫𑁆𑀫𑀁 𑀧𑀼𑀘𑁆𑀙𑀺𑀁𑀲𑀼. 𑀲𑀢𑁆𑀣𑀸𑀧𑀺 𑀦𑁂𑀲𑀁 𑀓𑀣𑁂𑀲𑀺 𑁋

𑀅𑀢𑀻𑀢𑁂 𑀓𑀺𑀭 𑀩𑀸𑀭𑀸𑀡𑀲𑀺𑀬𑀁 𑀲𑀸𑀴𑀺𑀢𑁆𑀢𑀓𑀲𑀺𑀧𑁆𑀧𑁂 𑀦𑀺𑀧𑁆𑀨𑀢𑁆𑀢𑀺𑀁 𑀧𑀢𑁆𑀢𑁄 𑀏𑀓𑁄 𑀧𑀻𑀞𑀲𑀧𑁆𑀧𑀺 𑀅𑀳𑁄𑀲𑀺. 𑀲𑁄 𑀦𑀕𑀭𑀤𑁆𑀯𑀸𑀭𑁂 𑀏𑀓𑀲𑁆𑀲 𑀯𑀝𑀭𑀼𑀓𑁆𑀔𑀲𑁆𑀲 𑀳𑁂𑀝𑁆𑀞𑀸 𑀦𑀺𑀲𑀺𑀦𑁆𑀦𑁄 𑀲𑀓𑁆𑀔𑀭𑀸𑀦𑀺 𑀔𑀺𑀧𑀺𑀢𑁆𑀯𑀸 𑀢𑀲𑁆𑀲 𑀧𑀡𑁆𑀡𑀸𑀦𑀺 𑀙𑀺𑀦𑁆𑀤𑀦𑁆𑀢𑁄 ‘‘𑀳𑀢𑁆𑀣𑀺𑀭𑀽𑀧𑀓𑀁 𑀦𑁄 𑀤𑀲𑁆𑀲𑁂𑀳𑀺, 𑀅𑀲𑁆𑀲𑀭𑀽𑀧𑀓𑀁 𑀦𑁄 𑀤𑀲𑁆𑀲𑁂𑀳𑀻’’𑀢𑀺 𑀕𑀸𑀫𑀤𑀸𑀭𑀓𑁂𑀳𑀺 𑀯𑀼𑀘𑁆𑀘𑀫𑀸𑀦𑁄 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀸𑀦𑀺 𑀭𑀽𑀧𑀸𑀦𑀺 𑀤𑀲𑁆𑀲𑁂𑀢𑁆𑀯𑀸 𑀢𑁂𑀲𑀁 𑀲𑀦𑁆𑀢𑀺𑀓𑀸 𑀔𑀸𑀤𑀦𑀻𑀬𑀸𑀤𑀻𑀦𑀺 𑀮𑀪𑀢𑀺. 𑀅𑀣𑁂𑀓𑀤𑀺𑀯𑀲𑀁 𑀭𑀸𑀚𑀸 𑀉𑀬𑁆𑀬𑀸𑀦𑀁 𑀕𑀘𑁆𑀙𑀦𑁆𑀢𑁄 𑀢𑀁 𑀧𑀤𑁂𑀲𑀁 𑀧𑀸𑀧𑀼𑀡𑀺. 𑀤𑀸𑀭𑀓𑀸 𑀧𑀻𑀞𑀲𑀧𑁆𑀧𑀺𑀁 𑀧𑀸𑀭𑁄𑀳𑀦𑁆𑀢𑀭𑁂 𑀓𑀢𑁆𑀯𑀸 𑀧𑀮𑀸𑀬𑀺𑀁𑀲𑀼. 𑀭𑀜𑁆𑀜𑁄 𑀞𑀺𑀢𑀫𑀚𑁆𑀛𑀦𑁆𑀳𑀺𑀓𑁂 𑀭𑀼𑀓𑁆𑀔𑀫𑀽𑀮𑀁 𑀧𑀯𑀺𑀝𑁆𑀞𑀲𑁆𑀲 𑀙𑀺𑀤𑁆𑀤𑀸𑀯𑀙𑀺𑀤𑁆𑀤𑀘𑁆𑀙𑀸𑀬𑀸 𑀲𑀭𑀻𑀭𑀁 𑀨𑀭𑀺. 𑀲𑁄 ‘‘𑀓𑀺𑀁 𑀦𑀼 𑀔𑁄 𑀏𑀢’’𑀦𑁆𑀢𑀺 𑀉𑀤𑁆𑀥𑀁 𑀑𑀮𑁄𑀓𑁂𑀦𑁆𑀢𑁄 𑀭𑀼𑀓𑁆𑀔𑀧𑀡𑁆𑀡𑁂𑀲𑀼 𑀳𑀢𑁆𑀣𑀺𑀭𑀽𑀧𑀓𑀸𑀤𑀻𑀦𑀺 𑀤𑀺𑀲𑁆𑀯𑀸 ‘‘𑀓𑀲𑁆𑀲𑁂𑀢𑀁 𑀓𑀫𑁆𑀫’’𑀦𑁆𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀧𑀻𑀞𑀲𑀧𑁆𑀧𑀺𑀦𑁄’’𑀢𑀺 𑀲𑀼𑀢𑁆𑀯𑀸 𑀢𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀆𑀳 𑁋 ‘‘𑀫𑀬𑁆𑀳𑀁 𑀧𑀼𑀭𑁄𑀳𑀺𑀢𑁄 𑀅𑀢𑀺𑀫𑀼𑀔𑀭𑁄 𑀅𑀧𑁆𑀧𑀫𑀢𑁆𑀢𑀓𑁂𑀧𑀺 𑀯𑀼𑀢𑁆𑀢𑁂 𑀩𑀳𑀼𑀁 𑀪𑀡𑀦𑁆𑀢𑁄 𑀫𑀁 𑀉𑀧𑀤𑁆𑀤𑀯𑁂𑀢𑀺, 𑀲𑀓𑁆𑀔𑀺𑀲𑁆𑀲𑀲𑀺 𑀢𑀲𑁆𑀲 𑀫𑀼𑀔𑁂 𑀦𑀸𑀴𑀺𑀫𑀢𑁆𑀢𑀸 𑀅𑀚𑀮𑀡𑁆𑀟𑀺𑀓𑀸 𑀔𑀺𑀧𑀺𑀢𑀼’’𑀦𑁆𑀢𑀺? ‘‘𑀲𑀓𑁆𑀔𑀺𑀲𑁆𑀲𑀸𑀫𑀺, 𑀤𑁂𑀯. 𑀅𑀚𑀮𑀡𑁆𑀟𑀺𑀓𑀸 𑀆𑀳𑀭𑀸𑀧𑁂𑀢𑁆𑀯𑀸 𑀧𑀼𑀭𑁄𑀳𑀺𑀢𑁂𑀦 𑀲𑀤𑁆𑀥𑀺𑀁 𑀢𑀼𑀫𑁆𑀳𑁂 𑀅𑀦𑁆𑀢𑁄𑀲𑀸𑀡𑀺𑀬𑀁 𑀦𑀺𑀲𑀻𑀤𑀣, 𑀅𑀳𑀫𑁂𑀢𑁆𑀣 𑀓𑀢𑁆𑀢𑀩𑁆𑀩𑀁 𑀚𑀸𑀦𑀺𑀲𑁆𑀲𑀸𑀫𑀻’’𑀢𑀺. 𑀅𑀣 𑀭𑀸𑀚𑀸 𑀢𑀣𑀸 𑀓𑀸𑀭𑁂𑀲𑀺. 𑀇𑀢𑀭𑁄 𑀓𑀢𑁆𑀢𑀭𑀺𑀬𑀕𑁆𑀕𑁂𑀦 𑀲𑀸𑀡𑀺𑀬𑀸 𑀙𑀺𑀤𑁆𑀤𑀁 𑀓𑀢𑁆𑀯𑀸 𑀧𑀼𑀭𑁄𑀳𑀺𑀢𑀲𑁆𑀲 𑀭𑀜𑁆𑀜𑀸 𑀲𑀤𑁆𑀥𑀺𑀁 𑀓𑀣𑁂𑀦𑁆𑀢𑀲𑁆𑀲 𑀫𑀼𑀔𑁂 𑀯𑀺𑀯𑀝𑀫𑀢𑁆𑀢𑁂 𑀏𑀓𑁂𑀓𑀁 𑀅𑀚𑀮𑀡𑁆𑀟𑀺𑀓𑀁 𑀔𑀺𑀧𑀺. 𑀧𑀼𑀭𑁄𑀳𑀺𑀢𑁄 𑀫𑀼𑀔𑀁 𑀧𑀯𑀺𑀝𑁆𑀞𑀁 𑀧𑀯𑀺𑀝𑁆𑀞𑀁 𑀕𑀺𑀮𑀺. 𑀧𑀻𑀞𑀲𑀧𑁆𑀧𑀻 𑀔𑀻𑀡𑀸𑀲𑀼 𑀅𑀚𑀮𑀡𑁆𑀟𑀺𑀓𑀸𑀲𑀼 𑀲𑀸𑀡𑀺𑀁 𑀘𑀸𑀮𑁂𑀲𑀺. 𑀭𑀸𑀚𑀸 𑀢𑀸𑀬 𑀲𑀜𑁆𑀜𑀸𑀬 𑀅𑀚𑀮𑀡𑁆𑀟𑀺𑀓𑀸𑀦𑀁 𑀔𑀻𑀡𑀪𑀸𑀯𑀁 𑀜𑀢𑁆𑀯𑀸 𑀆𑀳 𑁋 ‘‘𑀆𑀘𑀭𑀺𑀬, 𑀅𑀳𑀁 𑀢𑀼𑀫𑁆𑀳𑁂𑀳𑀺 𑀲𑀤𑁆𑀥𑀺𑀁 𑀓𑀣𑁂𑀦𑁆𑀢𑁄 𑀓𑀣𑀁 𑀦𑀺𑀢𑁆𑀣𑀭𑀺𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀸𑀫𑀺, 𑀢𑀼𑀫𑁆𑀳𑁂 𑀅𑀢𑀺𑀫𑀼𑀔𑀭𑀢𑀸𑀬 𑀦𑀸𑀴𑀺𑀫𑀢𑁆𑀢𑀸 𑀅𑀚𑀮𑀡𑁆𑀟𑀺𑀓𑀸 𑀕𑀺𑀮𑀦𑁆𑀢𑀸𑀧𑀺 𑀢𑀼𑀡𑁆𑀳𑀻𑀪𑀸𑀯𑀁 𑀦𑀸𑀧𑀚𑁆𑀚𑀣𑀸’’𑀢𑀺. 𑀩𑁆𑀭𑀸𑀳𑁆𑀫𑀡𑁄 𑀫𑀗𑁆𑀕𑀼𑀉𑀪𑀸𑀯𑀁 𑀆𑀧𑀚𑁆𑀚𑀺𑀢𑁆𑀯𑀸 𑀢𑀢𑁄 𑀧𑀝𑁆𑀞𑀸𑀬 𑀫𑀼𑀔𑀁 𑀯𑀺𑀯𑀭𑀺𑀢𑁆𑀯𑀸 𑀭𑀜𑁆𑀜𑀸 𑀲𑀤𑁆𑀥𑀺𑀁 𑀲𑀮𑁆𑀮𑀧𑀺𑀢𑀼𑀁 𑀦𑀲𑀓𑁆𑀔𑀺. 𑀭𑀸𑀚𑀸 𑀧𑀻𑀞𑀲𑀧𑁆𑀧𑀺𑀕𑀼𑀡𑀁 𑀅𑀦𑀼𑀲𑁆𑀲𑀭𑀺𑀢𑁆𑀯𑀸 𑀢𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀢𑀁 𑀦𑀺𑀲𑁆𑀲𑀸𑀬 𑀫𑁂 𑀲𑀼𑀔𑀁 𑀮𑀤𑁆𑀥’’𑀦𑁆𑀢𑀺 𑀢𑀼𑀝𑁆𑀞𑁄 𑀢𑀲𑁆𑀲 𑀲𑀩𑁆𑀩𑀝𑁆𑀞𑀓𑀁 𑀦𑀸𑀫 𑀥𑀦𑀁 𑀤𑀢𑁆𑀯𑀸 𑀦𑀕𑀭𑀲𑁆𑀲 𑀘𑀢𑀽𑀲𑀼 𑀤𑀺𑀲𑀸𑀲𑀼 𑀘𑀢𑁆𑀢𑀸𑀭𑁄 𑀯𑀭𑀕𑀸𑀫𑁂 𑀅𑀤𑀸𑀲𑀺. 𑀢𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸 𑀭𑀜𑁆𑀜𑁄 𑀅𑀢𑁆𑀣𑀥𑀫𑁆𑀫𑀸𑀦𑀼𑀲𑀸𑀲𑀓𑁄 𑀅𑀫𑀘𑁆𑀘𑁄 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀲𑀸𑀥𑀼 𑀔𑁄 𑀲𑀺𑀧𑁆𑀧𑀓𑀁 𑀦𑀸𑀫, 𑀅𑀧𑀺 𑀬𑀸𑀤𑀺𑀲 𑀓𑀻𑀤𑀺𑀲𑀁;

𑀧𑀲𑁆𑀲 𑀔𑀜𑁆𑀚𑀧𑁆𑀧𑀳𑀸𑀭𑁂𑀦, 𑀮𑀤𑁆𑀥𑀸 𑀕𑀸𑀫𑀸 𑀘𑀢𑀼𑀤𑁆𑀤𑀺𑀲𑀸’’𑀢𑀺. (𑀚𑀸. 𑁧.𑁧.𑁧𑁦𑁭);

𑀲𑁄 𑀧𑀦 𑀅𑀫𑀘𑁆𑀘𑁄 𑀢𑁂𑀦 𑀲𑀫𑀬𑁂𑀦 𑀅𑀬𑀫𑁂𑀯 𑀪𑀕𑀯𑀸 𑀅𑀳𑁄𑀲𑀺. 𑀅𑀣𑁂𑀓𑁄 𑀧𑀼𑀭𑀺𑀲𑁄 𑀧𑀻𑀞𑀲𑀧𑁆𑀧𑀺𑀦𑀸 𑀮𑀤𑁆𑀥𑀲𑀫𑁆𑀧𑀢𑁆𑀢𑀺𑀁 𑀤𑀺𑀲𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀬𑀁 𑀦𑀸𑀫 𑀧𑀻𑀞𑀲𑀧𑁆𑀧𑀻 𑀳𑀼𑀢𑁆𑀯𑀸 𑀇𑀫𑀁 𑀲𑀺𑀧𑁆𑀧𑀁 𑀦𑀺𑀲𑁆𑀲𑀸𑀬 𑀫𑀳𑀸𑀲𑀫𑁆𑀧𑀢𑁆𑀢𑀺𑀁 𑀧𑀢𑁆𑀢𑁄, 𑀫𑀬𑀸𑀧𑁂𑀢𑀁 𑀲𑀺𑀓𑁆𑀔𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺. 𑀲𑁄 𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 ‘‘𑀇𑀤𑀁 𑀫𑁂, 𑀆𑀘𑀭𑀺𑀬, 𑀲𑀺𑀧𑁆𑀧𑀁 𑀤𑁂𑀣𑀸’’𑀢𑀺 𑀆𑀳. ‘‘𑀦 𑀲𑀓𑁆𑀓𑀸, 𑀢𑀸𑀢, 𑀤𑀸𑀢𑀼’’𑀦𑁆𑀢𑀺. 𑀲𑁄 𑀢𑁂𑀦 𑀧𑀝𑀺𑀓𑁆𑀔𑀺𑀢𑁆𑀢𑁄 ‘‘𑀳𑁄𑀢𑀼, 𑀆𑀭𑀸𑀥𑁂𑀲𑁆𑀲𑀸𑀫𑀺 𑀦’’𑀦𑁆𑀢𑀺 𑀢𑀲𑁆𑀲 𑀳𑀢𑁆𑀣𑀧𑀸𑀤𑀧𑀭𑀺𑀓𑀫𑁆𑀫𑀸𑀤𑀻𑀦𑀺 𑀓𑀭𑁄𑀦𑁆𑀢𑁄 𑀘𑀺𑀭𑀲𑁆𑀲𑀁 𑀢𑀁 𑀆𑀭𑀸𑀥𑁂𑀢𑁆𑀯𑀸 𑀧𑀼𑀦𑀧𑁆𑀧𑀼𑀦𑀁 𑀬𑀸𑀘𑀺, 𑀧𑀻𑀞𑀲𑀧𑁆𑀧𑀻 ‘‘𑀅𑀬𑀁 𑀫𑁂 𑀅𑀢𑀺𑀯𑀺𑀬 𑀉𑀧𑀓𑀸𑀭𑁄’’𑀢𑀺 𑀢𑀁 𑀧𑀝𑀺𑀩𑀸𑀳𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀲𑀺𑀧𑁆𑀧𑀁 𑀲𑀺𑀓𑁆𑀔𑀸𑀧𑁂𑀢𑁆𑀯𑀸 ‘‘𑀦𑀺𑀧𑁆𑀨𑀦𑁆𑀦𑀁 𑀢𑁂, 𑀢𑀸𑀢, 𑀲𑀺𑀧𑁆𑀧𑀁, 𑀇𑀤𑀸𑀦𑀺 𑀓𑀺𑀁 𑀓𑀭𑀺𑀲𑁆𑀲𑀲𑀻’’𑀢𑀺 𑀆𑀳. ‘‘𑀩𑀳𑀺 𑀕𑀦𑁆𑀢𑁆𑀯𑀸 𑀲𑀺𑀧𑁆𑀧𑀁 𑀯𑀻𑀫𑀁𑀲𑀺𑀲𑁆𑀲𑀸𑀫𑀻’’𑀢𑀺. ‘‘𑀓𑀺𑀁 𑀓𑀭𑀺𑀲𑁆𑀲𑀲𑀻’’𑀢𑀺? ‘‘𑀕𑀸𑀯𑀺𑀁 𑀯𑀸 𑀫𑀦𑀼𑀲𑁆𑀲𑀁 𑀯𑀸 𑀧𑀳𑀭𑀺𑀢𑁆𑀯𑀸 𑀫𑀸𑀭𑁂𑀲𑁆𑀲𑀸𑀫𑀻’’𑀢𑀺. ‘‘𑀢𑀸𑀢𑀸, 𑀕𑀸𑀯𑀺𑀁 𑀫𑀸𑀭𑁂𑀦𑁆𑀢𑀲𑁆𑀲 𑀲𑀢𑀁 𑀤𑀡𑁆𑀟𑁄 𑀳𑁄𑀢𑀺 𑀫𑀦𑀼𑀲𑁆𑀲𑀁 𑀫𑀸𑀭𑁂𑀦𑁆𑀢𑀲𑁆𑀲 𑀲𑀳𑀲𑁆𑀲𑀁, 𑀢𑁆𑀯𑀁 𑀲𑀧𑀼𑀢𑁆𑀢𑀤𑀸𑀭𑁄𑀧𑀺 𑀢𑀁 𑀦𑀺𑀢𑁆𑀣𑀭𑀺𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀲𑀺, 𑀫𑀸 𑀯𑀺𑀦𑀲𑁆𑀲, 𑀬𑀫𑁆𑀳𑀺 𑀧𑀳𑀝𑁂 𑀤𑀡𑁆𑀟𑁄 𑀦𑀢𑁆𑀣𑀺, 𑀢𑀸𑀤𑀺𑀲𑀁 𑀦𑀺𑀫𑀸𑀢𑀸𑀧𑀺𑀢𑀺𑀓𑀁 𑀓𑀜𑁆𑀘𑀺 𑀉𑀧𑀥𑀸𑀭𑁂𑀳𑀻’’𑀢𑀺. 𑀲𑁄 ‘‘𑀲𑀸𑀥𑀽’’𑀢𑀺 𑀲𑀓𑁆𑀔𑀭𑀸 𑀉𑀘𑁆𑀙𑀗𑁆𑀕𑁂 𑀓𑀢𑁆𑀯𑀸 𑀢𑀸𑀤𑀺𑀲𑀁 𑀉𑀧𑀥𑀸𑀭𑀬𑀫𑀸𑀦𑁄 𑀯𑀺𑀘𑀭𑀦𑁆𑀢𑁄 𑀕𑀸𑀯𑀺𑀁 𑀤𑀺𑀲𑁆𑀯𑀸 ‘‘𑀅𑀬𑀁 𑀲𑀲𑀸𑀫𑀺𑀓𑀸’’𑀢𑀺 𑀧𑀳𑀭𑀺𑀢𑀼𑀁 𑀦 𑀯𑀺𑀲𑀳𑀺, 𑀫𑀦𑀼𑀲𑁆𑀲𑀁 𑀤𑀺𑀲𑁆𑀯𑀸 ‘‘𑀅𑀬𑀁 𑀲𑀫𑀸𑀢𑀸𑀧𑀺𑀢𑀺𑀓𑁄’’𑀢𑀺 𑀧𑀳𑀭𑀺𑀢𑀼𑀁 𑀦 𑀯𑀺𑀲𑀢𑀺.

𑀢𑁂𑀦 𑀲𑀫𑀬𑁂𑀦 𑀲𑀼𑀦𑁂𑀢𑁆𑀢𑁄 𑀦𑀸𑀫 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀢𑀁 𑀦𑀕𑀭𑀁 𑀦𑀺𑀲𑁆𑀲𑀸𑀬 𑀧𑀡𑁆𑀡𑀲𑀸𑀮𑀸𑀬 𑀯𑀺𑀳𑀭𑀢𑀺. 𑀲𑁄 𑀢𑀁 𑀧𑀺𑀡𑁆𑀟𑀸𑀬 𑀧𑀯𑀺𑀲𑀦𑁆𑀢𑀁 𑀦𑀕𑀭𑀤𑁆𑀯𑀸𑀭𑀦𑁆𑀢𑀭𑁂 𑀤𑀺𑀲𑁆𑀯𑀸 ‘‘𑀅𑀬𑀁 𑀦𑀺𑀫𑀸𑀢𑀸𑀧𑀺𑀢𑀺𑀓𑁄, 𑀇𑀫𑀲𑁆𑀫𑀺𑀁 𑀧𑀳𑀝𑁂 𑀤𑀡𑁆𑀟𑁄 𑀦𑀢𑁆𑀣𑀺, 𑀇𑀫𑀁 𑀧𑀳𑀭𑀺𑀢𑁆𑀯𑀸 𑀲𑀺𑀧𑁆𑀧𑀁 𑀯𑀻𑀫𑀁𑀲𑀺𑀲𑁆𑀲𑀸𑀫𑀻’’𑀢𑀺 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲 𑀤𑀓𑁆𑀔𑀺𑀡𑀓𑀡𑁆𑀡𑀲𑁄𑀢𑀁 𑀲𑀦𑁆𑀥𑀸𑀬 𑀲𑀓𑁆𑀔𑀭𑀁 𑀔𑀺𑀧𑀺. 𑀲𑀸 𑀤𑀓𑁆𑀔𑀺𑀡𑀓𑀡𑁆𑀡𑀲𑁄𑀢𑁂𑀦 𑀧𑀯𑀺𑀲𑀺𑀢𑁆𑀯𑀸 𑀯𑀸𑀫𑁂𑀦 𑀦𑀺𑀓𑁆𑀔𑀫𑀺, 𑀤𑀼𑀓𑁆𑀔𑀸 𑀯𑁂𑀤𑀦𑀸 𑀉𑀧𑁆𑀧𑀚𑁆𑀚𑀺. 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀪𑀺𑀓𑁆𑀔𑀸𑀬 𑀘𑀭𑀺𑀢𑀼𑀁 𑀦𑀸𑀲𑀓𑁆𑀔𑀺, 𑀆𑀓𑀸𑀲𑁂𑀦 𑀧𑀡𑁆𑀡𑀲𑀸𑀮𑀁 𑀕𑀦𑁆𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀺. 𑀫𑀦𑀼𑀲𑁆𑀲𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑁂 𑀅𑀦𑀸𑀕𑀘𑁆𑀙𑀦𑁆𑀢𑁂 ‘‘𑀓𑀺𑀜𑁆𑀘𑀺 𑀅𑀨𑀸𑀲𑀼𑀓𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀢𑀁 𑀧𑀭𑀺𑀦𑀺𑀩𑁆𑀩𑀼𑀢𑀁 𑀤𑀺𑀲𑁆𑀯𑀸 𑀭𑁄𑀤𑀺𑀁𑀲𑀼 𑀧𑀭𑀺𑀤𑁂𑀯𑀺𑀁𑀲𑀼. 𑀲𑁄𑀧𑀺 𑀫𑀳𑀸𑀚𑀦𑀁 𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀁 𑀲𑀜𑁆𑀚𑀸𑀦𑀺𑀢𑁆𑀯𑀸 ‘‘𑀅𑀬𑀁 𑀧𑀺𑀡𑁆𑀟𑀸𑀬 𑀧𑀯𑀺𑀲𑀦𑁆𑀢𑁄 𑀤𑁆𑀯𑀸𑀭𑀦𑁆𑀢𑀭𑁂 𑀫𑀫 𑀲𑀫𑁆𑀫𑀼𑀔𑀻𑀪𑀽𑀢𑁄, 𑀅𑀳𑀁 𑀅𑀢𑁆𑀢𑀦𑁄 𑀲𑀺𑀧𑁆𑀧𑀁 𑀯𑀻𑀫𑀁𑀲𑀦𑁆𑀢𑁄 𑀇𑀫𑀁 𑀧𑀳𑀭𑀺’’𑀦𑁆𑀢𑀺 𑀆𑀳. 𑀫𑀦𑀼𑀲𑁆𑀲𑀸 ‘‘𑀇𑀫𑀺𑀦𑀸 𑀓𑀺𑀭 𑀧𑀸𑀧𑀓𑁂𑀦 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀧𑀳𑀝𑁄, 𑀕𑀡𑁆𑀳𑀣 𑀕𑀡𑁆𑀳𑀣𑀸’’𑀢𑀺 𑀧𑁄𑀣𑁂𑀢𑁆𑀯𑀸 𑀢𑀢𑁆𑀣𑁂𑀯 𑀦𑀁 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑁂𑀲𑀼𑀁. 𑀲𑁄 𑀅𑀯𑀻𑀘𑀺𑀫𑁆𑀳𑀺 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀬𑀸𑀯𑀸𑀬𑀁 𑀫𑀳𑀸𑀧𑀣𑀯𑀻 𑀬𑁄𑀚𑀦𑀫𑀢𑁆𑀢𑀁 𑀉𑀲𑁆𑀲𑀦𑁆𑀦𑀸, 𑀢𑀸𑀯 𑀧𑀘𑁆𑀘𑀺𑀢𑁆𑀯𑀸 𑀯𑀺𑀧𑀸𑀓𑀸𑀯𑀲𑁂𑀲𑁂𑀦 𑀕𑀺𑀚𑁆𑀛𑀓𑀽𑀝𑀫𑀢𑁆𑀣𑀓𑁂 𑀲𑀝𑁆𑀞𑀺𑀓𑀽𑀝𑀧𑁂𑀢𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀲𑀢𑁆𑀣𑀸 𑀢𑀲𑁆𑀲 𑀇𑀫𑀁 𑀧𑀼𑀩𑁆𑀩𑀓𑀫𑁆𑀫𑀁 𑀓𑀣𑁂𑀢𑁆𑀯𑀸, ‘‘𑀪𑀺𑀓𑁆𑀔𑀯𑁂, 𑀩𑀸𑀮𑀲𑁆𑀲 𑀦𑀸𑀫 𑀲𑀺𑀧𑁆𑀧𑀁 𑀯𑀸 𑀇𑀲𑁆𑀲𑀭𑀺𑀬𑀁 𑀯𑀸 𑀉𑀧𑁆𑀧𑀚𑁆𑀚𑀫𑀸𑀦𑀁 𑀅𑀦𑀢𑁆𑀣𑀸𑀬 𑀉𑀧𑁆𑀧𑀚𑁆𑀚𑀢𑀺. 𑀩𑀸𑀮𑁄 𑀳𑀺 𑀲𑀺𑀧𑁆𑀧𑀁 𑀯𑀸 𑀇𑀲𑁆𑀲𑀭𑀺𑀬𑀁 𑀯𑀸 𑀮𑀪𑀺𑀢𑁆𑀯𑀸 𑀅𑀢𑁆𑀢𑀦𑁄 𑀅𑀦𑀢𑁆𑀣𑀫𑁂𑀯 𑀓𑀭𑁄𑀢𑀻’’𑀢𑀺 𑀅𑀦𑀼𑀲𑀦𑁆𑀥𑀺𑀁 𑀖𑀝𑁂𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳.

𑁭𑁨. ‘‘𑀬𑀸𑀯𑀤𑁂𑀯 𑀅𑀦𑀢𑁆𑀣𑀸𑀬, 𑀜𑀢𑁆𑀢𑀁 𑀩𑀸𑀮𑀲𑁆𑀲 𑀚𑀸𑀬𑀢𑀺;

𑀳𑀦𑁆𑀢𑀺 𑀩𑀸𑀮𑀲𑁆𑀲 𑀲𑀼𑀓𑁆𑀓𑀁𑀲𑀁, 𑀫𑀼𑀤𑁆𑀥𑀫𑀲𑁆𑀲 𑀯𑀺𑀧𑀸𑀢𑀬’’𑀦𑁆𑀢𑀺.

𑀢𑀢𑁆𑀣 𑀬𑀸𑀯𑀤𑁂𑀯𑀸𑀢𑀺 𑀅𑀯𑀥𑀺𑀧𑀭𑀺𑀘𑁆𑀙𑁂𑀤𑀦𑀢𑁆𑀣𑁂 𑀦𑀺𑀧𑀸𑀢𑁄. 𑀜𑀢𑁆𑀢𑀦𑁆𑀢𑀺 𑀚𑀸𑀦𑀦𑀲𑀪𑀸𑀯𑁄. 𑀬𑀁 𑀲𑀺𑀧𑁆𑀧𑀁 𑀚𑀸𑀦𑀸𑀢𑀺, 𑀬𑀫𑁆𑀳𑀺 𑀯𑀸 𑀇𑀲𑁆𑀲𑀭𑀺𑀬𑁂 𑀬𑀲𑁂 𑀲𑀫𑁆𑀧𑀢𑁆𑀢𑀺𑀬𑀜𑁆𑀘 𑀞𑀺𑀢𑁄 𑀚𑀦𑁂𑀦 𑀜𑀸𑀬𑀢𑀺, 𑀧𑀸𑀓𑀝𑁄 𑀧𑀜𑁆𑀜𑀸𑀢𑁄 𑀳𑁄𑀢𑀺, 𑀢𑀲𑁆𑀲𑁂𑀢𑀁 𑀦𑀸𑀫𑀁. 𑀲𑀺𑀧𑁆𑀧𑀁 𑀯𑀸 𑀳𑀺 𑀇𑀲𑁆𑀲𑀭𑀺𑀬𑀸𑀤𑀺𑀪𑀸𑀯𑁄 𑀯𑀸 𑀩𑀸𑀮𑀲𑁆𑀲 𑀅𑀦𑀢𑁆𑀣𑀸𑀬𑁂𑀯 𑀚𑀸𑀬𑀢𑀺. 𑀢𑀁 𑀦𑀺𑀲𑁆𑀲𑀸𑀬 𑀲𑁄 𑀅𑀢𑁆𑀢𑀦𑁄 𑀅𑀦𑀢𑁆𑀣𑀫𑁂𑀯 𑀓𑀭𑁄𑀢𑀺. 𑀳𑀦𑁆𑀢𑀻𑀢𑀺 𑀯𑀺𑀦𑀸𑀲𑁂𑀢𑀺. 𑀲𑀼𑀓𑁆𑀓𑀁𑀲𑀦𑁆𑀢𑀺 𑀓𑀼𑀲𑀮𑀓𑁄𑀝𑁆𑀞𑀸𑀲𑀁, 𑀩𑀸𑀮𑀲𑁆𑀲 𑀳𑀺 𑀲𑀺𑀧𑁆𑀧𑀁 𑀯𑀸 𑀇𑀲𑁆𑀲𑀭𑀺𑀬𑀁 𑀯𑀸 𑀉𑀧𑁆𑀧𑀚𑁆𑀚𑀫𑀸𑀦𑀁 𑀓𑀼𑀲𑀮𑀓𑁄𑀝𑁆𑀞𑀸𑀲𑀁 𑀖𑀸𑀢𑁂𑀦𑁆𑀢𑀫𑁂𑀯 𑀉𑀧𑁆𑀧𑀚𑁆𑀚𑀢𑀺. 𑀫𑀼𑀤𑁆𑀥𑀦𑁆𑀢𑀺 𑀧𑀜𑁆𑀜𑀸𑀬𑁂𑀢𑀁 𑀦𑀸𑀫𑀁. 𑀯𑀺𑀧𑀸𑀢𑀬𑀦𑁆𑀢𑀺 𑀯𑀺𑀤𑁆𑀥𑀁𑀲𑀬𑀫𑀸𑀦𑀁. 𑀢𑀲𑁆𑀲 𑀳𑀺 𑀢𑀁 𑀲𑀼𑀓𑁆𑀓𑀁𑀲𑀁 𑀳𑀦𑀦𑁆𑀢𑀁 𑀧𑀜𑁆𑀜𑀸𑀲𑀗𑁆𑀔𑀸𑀢𑀁 𑀫𑀼𑀤𑁆𑀥𑀁 𑀯𑀺𑀧𑀸𑀢𑁂𑀦𑁆𑀢𑀁 𑀯𑀺𑀤𑁆𑀥𑀁𑀲𑁂𑀦𑁆𑀢𑀫𑁂𑀯 𑀳𑀦𑁆𑀢𑀻𑀢𑀺.

𑀤𑁂𑀲𑀦𑀸𑀯𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀼.

𑀲𑀝𑁆𑀞𑀺𑀓𑀽𑀝𑀧𑁂𑀢𑀯𑀢𑁆𑀣𑀼 𑀢𑁂𑀭𑀲𑀫𑀁.