𑁧𑁨. 𑀅𑀳𑀺𑀧𑁂𑀢𑀯𑀢𑁆𑀣𑀼

𑀦 𑀳𑀺 𑀧𑀸𑀧𑀁 𑀓𑀢𑀁 𑀓𑀫𑁆𑀫𑀦𑁆𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀯𑁂𑀴𑀼𑀯𑀦𑁂 𑀯𑀺𑀳𑀭𑀦𑁆𑀢𑁄 𑀅𑀜𑁆𑀜𑀢𑀭𑀁 𑀅𑀳𑀺𑀧𑁂𑀢𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀏𑀓𑀲𑁆𑀫𑀺𑀜𑁆𑀳𑀺 𑀤𑀺𑀯𑀲𑁂 𑀚𑀝𑀺𑀮𑀲𑀳𑀲𑁆𑀲𑀲𑁆𑀲 𑀅𑀩𑁆𑀪𑀦𑁆𑀢𑀭𑁄 𑀆𑀬𑀲𑁆𑀫𑀸 𑀮𑀓𑁆𑀔𑀡𑀢𑁆𑀣𑁂𑀭𑁄 𑀘 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑁄 𑀘 ‘‘𑀭𑀸𑀚𑀕𑀳𑁂 𑀧𑀺𑀡𑁆𑀟𑀸𑀬 𑀘𑀭𑀺𑀲𑁆𑀲𑀸𑀫𑀸’’𑀢𑀺 𑀕𑀺𑀚𑁆𑀛𑀓𑀽𑀝𑀢𑁄 𑀑𑀢𑀭𑀦𑁆𑀢𑀺. 𑀢𑁂𑀲𑀼 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑁄 𑀏𑀓𑀁 𑀅𑀳𑀺𑀧𑁂𑀢𑀁 𑀤𑀺𑀲𑁆𑀯𑀸 𑀲𑀺𑀢𑀁 𑀧𑀸𑀢𑁆𑀯𑀸𑀓𑀸𑀲𑀺. 𑀅𑀣 𑀦𑀁 𑀮𑀓𑁆𑀔𑀡𑀢𑁆𑀣𑁂𑀭𑁄 ‘‘𑀓𑀲𑁆𑀫𑀸, 𑀆𑀯𑀼𑀲𑁄, 𑀲𑀺𑀢𑀁 𑀧𑀸𑀢𑀼𑀓𑀭𑁄𑀲𑀻’’𑀢𑀺 𑀲𑀺𑀢𑀓𑀸𑀭𑀡𑀁 𑀧𑀼𑀘𑁆𑀙𑀺. ‘‘𑀅𑀓𑀸𑀮𑁄, 𑀆𑀯𑀼𑀲𑁄 𑀮𑀓𑁆𑀔𑀡, 𑀇𑀫𑀲𑁆𑀲 𑀧𑀜𑁆𑀳𑀲𑁆𑀲, 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀫𑀁 𑀧𑀼𑀘𑁆𑀙𑁂𑀬𑁆𑀬𑀸𑀲𑀻’’𑀢𑀺 𑀣𑁂𑀭𑁄 𑀆𑀳. 𑀢𑁂𑀲𑀼 𑀭𑀸𑀚𑀕𑀳𑁂 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀪𑀕𑀯𑀢𑁄 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀦𑀺𑀲𑀺𑀦𑁆𑀦𑁂𑀲𑀼 𑀮𑀓𑁆𑀔𑀡𑀢𑁆𑀣𑁂𑀭𑁄 𑀧𑀼𑀘𑁆𑀙𑀺, ‘‘𑀆𑀯𑀼𑀲𑁄, 𑀫𑁄𑀕𑁆𑀕𑀮𑁆𑀮𑀸𑀦𑀁 𑀢𑁆𑀯𑀁 𑀕𑀺𑀚𑁆𑀛𑀓𑀽𑀝𑀸 𑀑𑀢𑀭𑀦𑁆𑀢𑁄 𑀲𑀺𑀢𑀁 𑀧𑀸𑀢𑀼𑀓𑀭𑀺𑀢𑁆𑀯𑀸 𑀫𑀬𑀸 𑀲𑀺𑀢𑀓𑀸𑀭𑀡𑀁 𑀧𑀼𑀝𑁆𑀞𑁄 ‘𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀫𑀁 𑀧𑀼𑀘𑁆𑀙𑁂𑀬𑁆𑀬𑀸𑀲𑀻’𑀢𑀺 𑀅𑀯𑀘, 𑀓𑀣𑁂𑀳𑀺 𑀇𑀤𑀸𑀦𑀺 𑀢𑀁 𑀓𑀸𑀭𑀡’’𑀦𑁆𑀢𑀺. 𑀣𑁂𑀭𑁄 𑀆𑀳 𑁋 ‘‘𑀅𑀳𑀁, 𑀆𑀯𑀼𑀲𑁄, 𑀏𑀓𑀁 𑀧𑁂𑀢𑀁 𑀤𑀺𑀲𑁆𑀯𑀸 𑀲𑀺𑀢𑀁 𑀧𑀸𑀢𑁆𑀯𑀸𑀓𑀸𑀲𑀺𑀁. 𑀢𑀲𑁆𑀲 𑀏𑀯𑀭𑀽𑀧𑁄 𑀅𑀢𑁆𑀢𑀪𑀸𑀯𑁄 𑁋 𑀫𑀦𑀼𑀲𑁆𑀲𑀲𑀻𑀲𑀁 𑀯𑀺𑀬 𑀅𑀲𑁆𑀲 𑀲𑀻𑀲𑀁, 𑀅𑀳𑀺𑀲𑁆𑀲 𑀯𑀺𑀬 𑀲𑁂𑀲𑁄 𑀅𑀢𑁆𑀢𑀪𑀸𑀯𑁄, 𑀅𑀳𑀺𑀧𑁂𑀢𑁄 𑀦𑀸𑀫𑁂𑀲 𑀧𑀫𑀸𑀡𑀢𑁄 𑀧𑀜𑁆𑀘𑀯𑀻𑀲𑀢𑀺𑀬𑁄𑀚𑀦𑀺𑀓𑁄, 𑀢𑀲𑁆𑀲 𑀲𑀻𑀲𑀢𑁄 𑀉𑀝𑁆𑀞𑀺𑀢𑀸 𑀅𑀕𑁆𑀕𑀺𑀚𑀸𑀮𑀸 𑀬𑀸𑀯 𑀦𑀗𑁆𑀕𑀼𑀝𑁆𑀞𑀸 𑀕𑀘𑁆𑀙𑀦𑁆𑀢𑀺, 𑀦𑀗𑁆𑀕𑀼𑀝𑁆𑀞𑀢𑁄 𑀉𑀝𑁆𑀞𑀺𑀢𑀸 𑀅𑀕𑁆𑀕𑀺𑀚𑀸𑀮𑀸 𑀬𑀸𑀯 𑀲𑀻𑀲𑀸, 𑀫𑀚𑁆𑀛𑁂𑀲𑀻𑀲𑀢𑁄 𑀉𑀝𑁆𑀞𑀺𑀢𑀸 𑀤𑁆𑀯𑁂 𑀧𑀲𑁆𑀲𑀸𑀦𑀺 𑀕𑀘𑁆𑀙𑀦𑁆𑀢𑀺, 𑀤𑁆𑀯𑀻𑀳𑀺 𑀧𑀲𑁆𑀲𑁂𑀳𑀺 𑀉𑀝𑁆𑀞𑀺𑀢𑀸 𑀫𑀚𑁆𑀛𑁂 𑀑𑀢𑀭𑀦𑁆𑀢𑀻’’𑀢𑀺. 𑀤𑁆𑀯𑀺𑀦𑁆𑀦𑀁𑀬𑁂𑀯 𑀓𑀺𑀭 𑀧𑁂𑀢𑀸𑀦𑀁 𑀅𑀢𑁆𑀢𑀪𑀸𑀯𑁄 𑀧𑀜𑁆𑀘𑀯𑀻𑀲𑀢𑀺𑀬𑁄𑀚𑀦𑀺𑀓𑁄, 𑀅𑀯𑀲𑁂𑀲𑀸𑀦𑀁 𑀢𑀺𑀕𑀸𑀯𑀼𑀢𑀧𑁆𑀧𑀫𑀸𑀡𑁄. 𑀇𑀫𑀲𑁆𑀲 𑀘𑁂𑀯 𑀅𑀳𑀺𑀧𑁂𑀢𑀲𑁆𑀲 𑀓𑀸𑀓𑀧𑁂𑀢𑀲𑁆𑀲 𑀘 𑀧𑀜𑁆𑀘𑀯𑀻𑀲𑀢𑀺𑀬𑁄𑀚𑀦𑀺𑀓𑁄. 𑀢𑁂𑀲𑀼 𑀅𑀬𑀁 𑀢𑀸𑀯 𑀅𑀳𑀺𑀧𑁂𑀢𑁄. 𑀓𑀸𑀓𑀧𑁂𑀢𑀫𑁆𑀧𑀺 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀕𑀺𑀚𑁆𑀛𑀓𑀽𑀝𑀫𑀢𑁆𑀣𑀓𑁂 𑀧𑀘𑁆𑀘𑀫𑀸𑀦𑀁 𑀤𑀺𑀲𑁆𑀯𑀸 𑀢𑀲𑁆𑀲 𑀧𑀼𑀩𑁆𑀩𑀓𑀫𑁆𑀫𑀁 𑀧𑀼𑀘𑁆𑀙𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀧𑀜𑁆𑀘𑀬𑁄𑀚𑀦𑀺𑀓𑀸 𑀚𑀺𑀯𑁆𑀳𑀸, 𑀲𑀻𑀲𑀁 𑀢𑁂 𑀦𑀯𑀬𑁄𑀚𑀦𑀁;

𑀓𑀸𑀬𑁄 𑀅𑀘𑁆𑀘𑀼𑀕𑁆𑀕𑀢𑁄 𑀢𑀼𑀬𑁆𑀳𑀁, 𑀧𑀜𑁆𑀘𑀯𑀻𑀲𑀢𑀺𑀬𑁄𑀚𑀦𑀁;

𑀓𑀺𑀁 𑀦𑀼 𑀓𑀫𑁆𑀫𑀁 𑀓𑀭𑀺𑀢𑁆𑀯𑀸𑀦, 𑀧𑀢𑁆𑀢𑁄𑀲𑀺 𑀤𑀼𑀓𑁆𑀔𑀫𑀻𑀤𑀺𑀲’’𑀦𑁆𑀢𑀺.

𑀅𑀣𑀲𑁆𑀲 𑀧𑁂𑀢𑁄 𑀆𑀘𑀺𑀓𑁆𑀔𑀦𑁆𑀢𑁄 𑁋

‘‘𑀅𑀳𑀁 𑀪𑀦𑁆𑀢𑁂 𑀫𑁄𑀕𑁆𑀕𑀮𑁆𑀮𑀸𑀦, 𑀓𑀲𑁆𑀲𑀧𑀲𑁆𑀲 𑀫𑀳𑁂𑀲𑀺𑀦𑁄;

𑀲𑀗𑁆𑀖𑀲𑁆𑀲 𑀆𑀪𑀢𑀁 𑀪𑀢𑁆𑀢𑀁, 𑀆𑀳𑀸𑀭𑁂𑀲𑀺𑀁 𑀬𑀤𑀺𑀘𑁆𑀙𑀓’’𑀦𑁆𑀢𑀺. 𑁋

𑀕𑀸𑀣𑀁 𑀯𑀢𑁆𑀯𑀸 𑀆𑀳 𑁋 ‘‘𑀪𑀦𑁆𑀢𑁂, 𑀓𑀲𑁆𑀲𑀧𑀩𑀼𑀤𑁆𑀥𑀓𑀸𑀮𑁂 𑀲𑀫𑁆𑀩𑀳𑀼𑀮𑀸 𑀪𑀺𑀓𑁆𑀔𑀽 𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀯𑀺𑀲𑀺𑀁𑀲𑀼,. 𑀫𑀦𑀼𑀲𑁆𑀲𑀸 𑀣𑁂𑀭𑁂 𑀤𑀺𑀲𑁆𑀯𑀸 𑀲𑀫𑁆𑀧𑀺𑀬𑀸𑀬𑀫𑀸𑀦𑀸 𑀆𑀲𑀦𑀲𑀸𑀮𑀸𑀬𑀁 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀧𑀸𑀤𑁂 𑀥𑁄𑀯𑀺𑀢𑁆𑀯𑀸 𑀢𑁂𑀮𑀁 𑀫𑀓𑁆𑀔𑁂𑀢𑁆𑀯𑀸 𑀬𑀸𑀕𑀼𑀁 𑀧𑀸𑀬𑁂𑀢𑁆𑀯𑀸 𑀔𑀚𑁆𑀚𑀓𑀁 𑀤𑀢𑁆𑀯𑀸 𑀧𑀺𑀡𑁆𑀟𑀧𑀸𑀢𑀓𑀸𑀮𑀁 𑀆𑀕𑀫𑀬𑀫𑀸𑀦𑀸 𑀥𑀫𑁆𑀫𑀁 𑀲𑀼𑀡𑀦𑁆𑀢𑀸 𑀦𑀺𑀲𑀻𑀤𑀺𑀁𑀲𑀼. 𑀥𑀫𑁆𑀫𑀓𑀣𑀸𑀯𑀲𑀸𑀦𑁂 𑀣𑁂𑀭𑀸𑀦𑀁 𑀧𑀢𑁆𑀢𑁂 𑀆𑀤𑀸𑀬 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀕𑁂𑀳𑀸 𑀦𑀸𑀦𑀕𑁆𑀕𑀭𑀲𑀪𑁄𑀚𑀦𑀲𑁆𑀲 𑀧𑀽𑀭𑁂𑀢𑁆𑀯𑀸 𑀆𑀳𑀭𑀺𑀁𑀲𑀼. 𑀢𑀤𑀸 𑀅𑀳𑀁 𑀓𑀸𑀓𑁄 𑀳𑀼𑀢𑁆𑀯𑀸 𑀆𑀲𑀦𑀲𑀸𑀮𑀸𑀬 𑀙𑀤𑀦𑀧𑀺𑀝𑁆𑀞𑁂 𑀦𑀺𑀮𑀻𑀦𑁄 𑀢𑀁 𑀤𑀺𑀲𑁆𑀯𑀸 𑀏𑀓𑁂𑀦 𑀕𑀳𑀺𑀢𑀧𑀢𑁆𑀢𑀢𑁄 𑀢𑀺𑀓𑁆𑀔𑀢𑁆𑀢𑀼𑀁 𑀫𑀼𑀔𑀁 𑀧𑀽𑀭𑁂𑀦𑁆𑀢𑁄 𑀢𑀬𑁄 𑀓𑀩𑀴𑁂 𑀅𑀕𑁆𑀕𑀳𑁂𑀲𑀺𑀁. 𑀢𑀁 𑀧𑀦 𑀪𑀢𑁆𑀢𑀁 𑀦𑁂𑀯 𑀲𑀗𑁆𑀖𑀲𑁆𑀲 𑀲𑀦𑁆𑀢𑀓𑀁, 𑀦 𑀲𑀗𑁆𑀖𑀲𑁆𑀲 𑀦𑀺𑀬𑀫𑁂𑀢𑁆𑀯𑀸 𑀤𑀺𑀦𑁆𑀦𑀁, 𑀦 𑀪𑀺𑀓𑁆𑀔𑀽𑀳𑀺 𑀕𑀳𑀺𑀢𑀸𑀯𑀲𑁂𑀲𑀓𑀁. 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀕𑁂𑀳𑀁 𑀦𑁂𑀢𑁆𑀯𑀸 𑀫𑀦𑀼𑀲𑁆𑀲𑁂𑀳𑀺 𑀪𑀼𑀜𑁆𑀚𑀺𑀢𑀩𑁆𑀩𑀓𑀁, 𑀓𑁂𑀯𑀮𑀁 𑀲𑀗𑁆𑀖𑀁 𑀉𑀤𑁆𑀤𑀺𑀲𑁆𑀲 𑀅𑀪𑀺𑀳𑀝𑀫𑀢𑁆𑀢𑀫𑁂𑀯. 𑀢𑀢𑁄 𑀫𑀬𑀸 𑀢𑀬𑁄 𑀓𑀩𑀴𑀸 𑀕𑀳𑀺𑀢𑀸, 𑀏𑀢𑁆𑀢𑀓𑀁 𑀫𑁂 𑀧𑀼𑀩𑁆𑀩𑀓𑀫𑁆𑀫𑀁. 𑀲𑁆𑀯𑀸𑀳𑀁 𑀓𑀸𑀮𑀁 𑀓𑀢𑁆𑀯𑀸 𑀢𑀲𑁆𑀲 𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑁂𑀦 𑀅𑀯𑀻𑀘𑀺𑀫𑁆𑀳𑀺 𑀧𑀘𑁆𑀘𑀺𑀢𑁆𑀯𑀸 𑀢𑀢𑁆𑀣 𑀧𑀓𑁆𑀓𑀸𑀯𑀲𑁂𑀲𑁂𑀦 𑀇𑀤𑀸𑀦𑀺 𑀕𑀺𑀚𑁆𑀛𑀓𑀽𑀝𑁂 𑀓𑀸𑀓𑀧𑁂𑀢𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑁄 𑀇𑀫𑀁 𑀤𑀼𑀓𑁆𑀔𑀁 𑀧𑀘𑁆𑀘𑀸𑀦𑀼𑀪𑁄𑀫𑀻’’𑀢𑀺. 𑀇𑀤𑀁 𑀓𑀸𑀓𑀧𑁂𑀢𑀲𑁆𑀲 𑀯𑀢𑁆𑀣𑀼.

𑀇𑀥 𑀧𑀦 𑀣𑁂𑀭𑁄 ‘‘𑀅𑀳𑀺𑀧𑁂𑀢𑀁 𑀤𑀺𑀲𑁆𑀯𑀸 𑀲𑀺𑀢𑀁 𑀧𑀸𑀢𑁆𑀯𑀸𑀓𑀸𑀲𑀺’’𑀦𑁆𑀢𑀺 𑀆𑀳. 𑀅𑀣𑀲𑁆𑀲 𑀲𑀢𑁆𑀣𑀸 𑀲𑀓𑁆𑀔𑀻 𑀳𑀼𑀢𑁆𑀯𑀸𑀧𑀺 𑀉𑀝𑁆𑀞𑀸𑀬 ‘‘𑀲𑀘𑁆𑀘𑀁, 𑀪𑀺𑀓𑁆𑀔𑀯𑁂, 𑀫𑁄𑀕𑁆𑀕𑀮𑁆𑀮𑀸𑀦𑁄 𑀆𑀳. 𑀫𑀬𑀸𑀧𑁂𑀲 𑀲𑀫𑁆𑀩𑁄𑀥𑀺𑀧𑀢𑁆𑀢𑀤𑀺𑀯𑀲𑁂𑀬𑁂𑀯 𑀤𑀺𑀝𑁆𑀞𑁄, 𑀅𑀧𑀺𑀘𑀸𑀳𑀁 ‘𑀬𑁂 𑀫𑁂 𑀯𑀘𑀦𑀁 𑀦 𑀲𑀤𑁆𑀤𑀳𑁂𑀬𑁆𑀬𑀼𑀁, 𑀢𑁂𑀲𑀁 𑀅𑀳𑀺𑀢𑀸𑀬 𑀪𑀯𑁂𑀬𑁆𑀬𑀸’𑀢𑀺 𑀧𑀭𑀸𑀦𑀼𑀤𑁆𑀤𑀬𑀸𑀬 𑀦 𑀓𑀣𑁂𑀲𑀺’’𑀦𑁆𑀢𑀺 𑀆𑀳. 𑀮𑀓𑁆𑀔𑀡𑀲𑀁𑀬𑀼𑀢𑁆𑀢𑁂𑀧𑀺 (𑀲𑀁. 𑀦𑀺. 𑁨.𑁨𑁦𑁨 𑀆𑀤𑀬𑁄) 𑀳𑀺 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁂𑀦 𑀤𑀺𑀝𑁆𑀞𑀓𑀸𑀮𑁂𑀬𑁂𑀯 𑀲𑀢𑁆𑀣𑀸 𑀢𑀲𑁆𑀲 𑀲𑀓𑁆𑀔𑀻 𑀳𑀼𑀢𑁆𑀯𑀸 𑀯𑀺𑀦𑀻𑀢𑀯𑀢𑁆𑀣𑀽𑀦𑀺 𑀓𑀣𑁂𑀲𑀺, 𑀇𑀤𑀫𑁆𑀧𑀺 𑀢𑁂𑀦 𑀢𑀣𑁂𑀯 𑀓𑀣𑀺𑀢𑀁. 𑀢𑀁 𑀲𑀼𑀢𑁆𑀯𑀸 𑀪𑀺𑀓𑁆𑀔𑀽 𑀢𑀲𑁆𑀲 𑀧𑀼𑀩𑁆𑀩𑀓𑀫𑁆𑀫𑀁 𑀧𑀼𑀘𑁆𑀙𑀺𑀁𑀲𑀼. 𑀲𑀢𑁆𑀣𑀸𑀧𑀺 𑀢𑁂𑀲𑀁 𑀓𑀣𑁂𑀲𑀺 𑁋

𑀅𑀢𑀻𑀢𑁂 𑀓𑀺𑀭 𑀩𑀸𑀭𑀸𑀡𑀲𑀺𑀁 𑀦𑀺𑀲𑁆𑀲𑀸𑀬 𑀦𑀤𑀻𑀢𑀻𑀭𑁂 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲 𑀧𑀡𑁆𑀡𑀲𑀸𑀮𑀁 𑀓𑀭𑀺𑀁𑀲𑀼. 𑀲𑁄 𑀢𑀢𑁆𑀣 𑀯𑀺𑀳𑀭𑀦𑁆𑀢𑁄 𑀦𑀺𑀩𑀤𑁆𑀥𑀁 𑀦𑀕𑀭𑁂 𑀧𑀺𑀡𑁆𑀟𑀸𑀬 𑀘𑀭𑀢𑀺. 𑀦𑀸𑀕𑀭𑀸𑀧𑀺 𑀲𑀸𑀬𑀁𑀧𑀸𑀢𑀁 𑀕𑀦𑁆𑀥𑀧𑀼𑀧𑁆𑀨𑀸𑀤𑀺𑀳𑀢𑁆𑀣𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲𑀽𑀧𑀝𑁆𑀞𑀸𑀦𑀁 𑀕𑀘𑁆𑀙𑀦𑁆𑀢𑀺. 𑀏𑀓𑁄 𑀩𑀸𑀭𑀸𑀡𑀲𑀺𑀯𑀸𑀲𑀻 𑀧𑀼𑀭𑀺𑀲𑁄 𑀢𑀁 𑀫𑀕𑁆𑀕𑀁 𑀦𑀺𑀲𑁆𑀲𑀸𑀬 𑀔𑁂𑀢𑁆𑀢𑀁 𑀓𑀲𑀺. 𑀫𑀳𑀸𑀚𑀦𑁄 𑀲𑀸𑀬𑀁𑀧𑀸𑀢𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲𑀽𑀧𑀝𑁆𑀞𑀸𑀦𑀁 𑀕𑀘𑁆𑀙𑀦𑁆𑀢𑁄 𑀢𑀁 𑀔𑁂𑀢𑁆𑀢𑀁 𑀫𑀤𑁆𑀤𑀦𑁆𑀢𑁄 𑀕𑀘𑁆𑀙𑀢𑀺. 𑀓𑀲𑁆𑀲𑀓𑁄 𑀘 ‘‘𑀫𑀸 𑀫𑁂 𑀔𑁂𑀢𑁆𑀢𑀁 𑀫𑀤𑁆𑀤𑀣𑀸’’𑀢𑀺 𑀯𑀸𑀭𑁂𑀦𑁆𑀢𑁄𑀧𑀺 𑀯𑀸𑀭𑁂𑀢𑀼𑀁 𑀦𑀸𑀲𑀓𑁆𑀔𑀺. 𑀅𑀣𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀲𑀘𑁂 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲 𑀧𑀡𑁆𑀡𑀲𑀸𑀮𑀸 𑀦 𑀪𑀯𑁂𑀬𑁆𑀬, 𑀦 𑀫𑁂 𑀔𑁂𑀢𑁆𑀢𑀁 𑀫𑀤𑁆𑀤𑁂𑀬𑁆𑀬𑀼’’𑀦𑁆𑀢𑀺. 𑀲𑁄 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲 𑀧𑀺𑀡𑁆𑀟𑀸𑀬 𑀧𑀯𑀺𑀝𑁆𑀞𑀓𑀸𑀮𑁂 𑀧𑀭𑀺𑀪𑁄𑀕𑀪𑀸𑀚𑀦𑀸𑀦𑀺 𑀪𑀺𑀦𑁆𑀤𑀺𑀢𑁆𑀯𑀸 𑀧𑀡𑁆𑀡𑀲𑀸𑀮𑀁 𑀛𑀸𑀧𑁂𑀲𑀺. 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀢𑀁 𑀛𑀸𑀫𑀁 𑀤𑀺𑀲𑁆𑀯𑀸 𑀬𑀣𑀸𑀲𑀼𑀔𑀁 𑀧𑀓𑁆𑀓𑀸𑀫𑀺. 𑀫𑀳𑀸𑀚𑀦𑁄 𑀕𑀦𑁆𑀥𑀫𑀸𑀮𑀁 𑀆𑀤𑀸𑀬 𑀆𑀕𑀢𑁄 𑀛𑀸𑀫𑀧𑀡𑁆𑀡𑀲𑀸𑀮𑀁 𑀤𑀺𑀲𑁆𑀯𑀸 ‘‘𑀓𑀳𑀁 𑀦𑀼 𑀔𑁄 𑀦𑁄 𑀅𑀬𑁆𑀬𑁄 𑀕𑀢𑁄’’𑀢𑀺 𑀆𑀳. 𑀲𑁄𑀧𑀺 𑀫𑀳𑀸𑀚𑀦𑁂𑀦𑁂𑀯 𑀲𑀤𑁆𑀥𑀺𑀁 𑀕𑀢𑁄 𑀫𑀳𑀸𑀚𑀦𑀫𑀚𑁆𑀛𑁂 𑀞𑀺𑀢𑀓𑁄𑀯 𑀏𑀯𑀫𑀸𑀳 𑁋 ‘‘𑀫𑀬𑀸 𑀢𑀲𑁆𑀲 𑀧𑀡𑁆𑀡𑀲𑀸𑀮𑀸 𑀛𑀸𑀧𑀺𑀢𑀸’’𑀢𑀺. 𑀅𑀣 𑀦𑀁 ‘‘𑀕𑀡𑁆𑀳𑀣, 𑀇𑀫𑀁 𑀧𑀸𑀧𑀺𑀫𑀁 𑀦𑀺𑀲𑁆𑀲𑀸𑀬 𑀫𑀬𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑀁 𑀤𑀝𑁆𑀞𑀼𑀁 𑀦 𑀮𑀪𑀺𑀫𑁆𑀳𑀸’’𑀢𑀺 𑀤𑀡𑁆𑀟𑀸𑀤𑀻𑀳𑀺 𑀧𑁄𑀣𑁂𑀢𑁆𑀯𑀸 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑁂𑀲𑀼𑀁. 𑀲𑁄 𑀅𑀯𑀻𑀘𑀺𑀫𑁆𑀳𑀺 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀬𑀸𑀯𑀸𑀬𑀁 𑀫𑀳𑀸𑀧𑀣𑀯𑀻 𑀬𑁄𑀚𑀦𑀫𑀢𑁆𑀢𑀁 𑀉𑀲𑁆𑀲𑀦𑁆𑀦𑀸, 𑀢𑀸𑀯 𑀦𑀺𑀭𑀬𑁂 𑀧𑀘𑁆𑀘𑀺𑀢𑁆𑀯𑀸 𑀧𑀓𑁆𑀓𑀸𑀯𑀲𑁂𑀲𑁂𑀦 𑀕𑀺𑀚𑁆𑀛𑀓𑀽𑀝𑁂 𑀅𑀳𑀺𑀧𑁂𑀢𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀲𑀢𑁆𑀣𑀸 𑀇𑀤𑀁 𑀢𑀲𑁆𑀲 𑀧𑀼𑀩𑁆𑀩𑀓𑀫𑁆𑀫𑀁 𑀓𑀣𑁂𑀢𑁆𑀯𑀸, ‘‘𑀪𑀺𑀓𑁆𑀔𑀯𑁂, 𑀧𑀸𑀧𑀓𑀫𑁆𑀫𑀁 𑀦𑀸𑀫𑁂𑀢𑀁 𑀔𑀻𑀭𑀲𑀤𑀺𑀲𑀁, 𑀬𑀣𑀸 𑀔𑀻𑀭𑀁 𑀤𑀼𑀬𑁆𑀳𑀫𑀸𑀦𑀫𑁂𑀯 𑀦 𑀧𑀭𑀺𑀡𑀫𑀢𑀺. 𑀢𑀣𑀸 𑀓𑀫𑁆𑀫𑀁 𑀓𑀬𑀺𑀭𑀫𑀸𑀦𑀫𑁂𑀯 𑀦 𑀯𑀺𑀧𑀘𑁆𑀘𑀢𑀺. 𑀬𑀤𑀸 𑀧𑀦 𑀯𑀺𑀧𑀘𑁆𑀘𑀢𑀺, 𑀢𑀤𑀸 𑀏𑀯𑀭𑀽𑀧𑁂𑀦 𑀤𑀼𑀓𑁆𑀔𑁂𑀦 𑀲𑁄𑀘𑀢𑀻’’𑀢𑀺 𑀅𑀦𑀼𑀲𑀦𑁆𑀥𑀺𑀁 𑀖𑀝𑁂𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳 𑁋

𑁭𑁧. ‘‘𑀦 𑀳𑀺 𑀧𑀸𑀧𑀁 𑀓𑀢𑀁 𑀓𑀫𑁆𑀫𑀁, 𑀲𑀚𑁆𑀚𑀼𑀔𑀻𑀭𑀁𑀯 𑀫𑀼𑀘𑁆𑀘𑀢𑀺;

𑀟𑀳𑀦𑁆𑀢𑀁 𑀩𑀸𑀮𑀫𑀦𑁆𑀯𑁂𑀢𑀺, 𑀪𑀲𑁆𑀫𑀘𑁆𑀙𑀦𑁆𑀦𑁄𑀯 𑀧𑀸𑀯𑀓𑁄’’𑀢𑀺.

𑀢𑀢𑁆𑀣 𑀲𑀚𑁆𑀚𑀼𑀔𑀻𑀭𑀁 𑀯𑀸𑀢𑀺 𑀢𑀁 𑀔𑀡𑀁𑀬𑁂𑀯 𑀥𑁂𑀦𑀼𑀬𑀸 𑀣𑀦𑁂𑀳𑀺 𑀦𑀺𑀓𑁆𑀔𑀦𑁆𑀢𑀁 𑀅𑀩𑁆𑀪𑀼𑀡𑁆𑀳𑀁 𑀔𑀻𑀭𑀁 𑀦 𑀫𑀼𑀘𑁆𑀘𑀢𑀺 𑀦 𑀧𑀭𑀺𑀡𑀫𑀢𑀺. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀣𑀸 𑀇𑀤𑀁 𑀲𑀚𑁆𑀚𑀼𑀔𑀻𑀭𑀁 𑀢𑀁 𑀔𑀡𑀜𑁆𑀜𑁂𑀯 𑀦 𑀫𑀼𑀘𑁆𑀘𑀢𑀺 𑀦 𑀧𑀭𑀺𑀡𑀫𑀢𑀺 𑀦 𑀧𑀓𑀢𑀺𑀁 𑀯𑀺𑀚𑀳𑀢𑀺. 𑀬𑀲𑁆𑀫𑀺𑀁 𑀧𑀦 𑀪𑀸𑀚𑀦𑁂 𑀤𑀼𑀳𑀺𑀢𑁆𑀯𑀸 𑀕𑀳𑀺𑀢𑀁 𑀬𑀸𑀯 𑀢𑀢𑁆𑀣 𑀢𑀓𑁆𑀓𑀸𑀤𑀺𑀅𑀫𑁆𑀩𑀺𑀮𑀁 𑀦 𑀧𑀓𑁆𑀔𑀺𑀧𑀢𑀺, 𑀬𑀸𑀯 𑀤𑀥𑀺𑀪𑀸𑀚𑀦𑀸𑀤𑀺𑀓𑀁 𑀅𑀫𑁆𑀩𑀺𑀮𑀪𑀸𑀚𑀦𑀁 𑀦 𑀧𑀸𑀧𑀼𑀡𑀸𑀢𑀺, 𑀢𑀸𑀯 𑀧𑀓𑀢𑀺𑀁 𑀅𑀯𑀺𑀚𑀳𑀺𑀢𑁆𑀯𑀸 𑀧𑀘𑁆𑀙𑀸 𑀚𑀳𑀢𑀺, 𑀏𑀯𑀫𑁂𑀯 𑀧𑀸𑀧𑀓𑀫𑁆𑀫𑀫𑁆𑀧𑀺 𑀓𑀭𑀺𑀬𑀫𑀸𑀦𑀫𑁂𑀯 𑀦 𑀯𑀺𑀧𑀘𑁆𑀘𑀢𑀺. 𑀬𑀤𑀺 𑀯𑀺𑀧𑀘𑁆𑀘𑁂𑀬𑁆𑀬, 𑀦 𑀓𑁄𑀘𑀺 𑀧𑀸𑀧𑀓𑀫𑁆𑀫𑀁 𑀓𑀸𑀢𑀼𑀁 𑀯𑀺𑀲𑀳𑁂𑀬𑁆𑀬. 𑀬𑀸𑀯 𑀧𑀦 𑀓𑀼𑀲𑀮𑀸𑀪𑀺𑀦𑀺𑀩𑁆𑀩𑀢𑁆𑀢𑀸 𑀔𑀦𑁆𑀥𑀸 𑀥𑀭𑀦𑁆𑀢𑀺, 𑀢𑀸𑀯 𑀦𑀁 𑀢𑁂 𑀭𑀓𑁆𑀔𑀦𑁆𑀢𑀺. 𑀢𑁂𑀲𑀁 𑀪𑁂𑀤𑀸 𑀅𑀧𑀸𑀬𑁂 𑀦𑀺𑀩𑁆𑀩𑀢𑁆𑀢𑀓𑁆𑀔𑀦𑁆𑀥𑁂𑀲𑀼 𑀯𑀺𑀧𑀘𑁆𑀘𑀢𑀺, 𑀯𑀺𑀧𑀘𑁆𑀘𑀫𑀸𑀦𑀜𑁆𑀘 𑀟𑀳𑀦𑁆𑀢𑀁 𑀩𑀸𑀮𑀫𑀦𑁆𑀯𑁂𑀢𑀺.‘‘𑀓𑀺𑀁 𑀯𑀺𑀬𑀸’’𑀢𑀺? ‘‘𑀪𑀲𑁆𑀫𑀘𑁆𑀙𑀦𑁆𑀦𑁄𑀯 𑀧𑀸𑀯𑀓𑁄’’𑀢𑀺. 𑀬𑀣𑀸 𑀳𑀺 𑀙𑀸𑀭𑀺𑀓𑀸𑀬 𑀧𑀝𑀺𑀘𑁆𑀙𑀦𑁆𑀦𑁄 𑀯𑀻𑀢𑀘𑁆𑀘𑀺𑀢𑀗𑁆𑀕𑀸𑀭𑁄 𑀅𑀓𑁆𑀓𑀦𑁆𑀢𑁄𑀧𑀺 𑀙𑀸𑀭𑀺𑀓𑀸𑀬 𑀧𑀝𑀺𑀘𑁆𑀙𑀦𑁆𑀦𑀢𑁆𑀢𑀸 𑀦 𑀢𑀸𑀯 𑀟𑀳𑀢𑀺, 𑀙𑀸𑀭𑀺𑀓𑀁 𑀧𑀦 𑀢𑀸𑀧𑁂𑀢𑁆𑀯𑀸 𑀘𑀫𑁆𑀫𑀸𑀤𑀻𑀦𑀁 𑀟𑀳𑀦𑀯𑀲𑁂𑀦 𑀬𑀸𑀯 𑀫𑀢𑁆𑀣𑀮𑀼𑀗𑁆𑀕𑀸 𑀟𑀳𑀦𑁆𑀢𑁄 𑀕𑀘𑁆𑀙𑀢𑀺, 𑀏𑀯𑀫𑁂𑀯 𑀧𑀸𑀧𑀓𑀫𑁆𑀫𑀫𑁆𑀧𑀺 𑀬𑁂𑀦 𑀓𑀢𑀁 𑀳𑁄𑀢𑀺, 𑀢𑀁 𑀩𑀸𑀮𑀁 𑀤𑀼𑀢𑀺𑀬𑁂 𑀯𑀸 𑀢𑀢𑀺𑀬𑁂 𑀯𑀸 𑀅𑀢𑁆𑀢𑀪𑀸𑀯𑁂 𑀦𑀺𑀭𑀬𑀸𑀤𑀻𑀲𑀼 𑀦𑀺𑀩𑁆𑀩𑀢𑁆𑀢𑀁 𑀟𑀳𑀦𑁆𑀢𑀁 𑀅𑀦𑀼𑀕𑀘𑁆𑀙𑀢𑀻𑀢𑀺.

𑀤𑁂𑀲𑀦𑀸𑀯𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀦𑁆𑀦𑀸𑀤𑀬𑁄 𑀅𑀳𑁂𑀲𑀼𑀦𑁆𑀢𑀺.

𑀅𑀳𑀺𑀧𑁂𑀢𑀯𑀢𑁆𑀣𑀼 𑀤𑁆𑀯𑀸𑀤𑀲𑀫𑀁.