𑁧𑁧. 𑀚𑀫𑁆𑀩𑀼𑀓𑀢𑁆𑀣𑁂𑀭𑀯𑀢𑁆𑀣𑀼

𑀫𑀸𑀲𑁂 𑀫𑀸𑀲𑁂𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀯𑁂𑀴𑀼𑀯𑀦𑁂 𑀯𑀺𑀳𑀭𑀦𑁆𑀢𑁄 𑀚𑀫𑁆𑀩𑀼𑀓𑀁 𑀆𑀚𑀻𑀯𑀓𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀅𑀢𑀻𑀢𑁂 𑀓𑀺𑀭 𑀓𑀲𑁆𑀲𑀧𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀓𑀸𑀮𑁂 𑀕𑀸𑀫𑀯𑀸𑀲𑀻 𑀏𑀓𑁄 𑀓𑀼𑀝𑀼𑀫𑁆𑀩𑀺𑀓𑁄 𑀏𑀓𑀲𑁆𑀲 𑀣𑁂𑀭𑀲𑁆𑀲 𑀯𑀺𑀳𑀸𑀭𑀁 𑀓𑀢𑁆𑀯𑀸 𑀢𑀁 𑀢𑀢𑁆𑀣 𑀯𑀺𑀳𑀭𑀦𑁆𑀢𑀁 𑀘𑀢𑀽𑀳𑀺 𑀧𑀘𑁆𑀘𑀬𑁂𑀳𑀺 𑀉𑀧𑀝𑁆𑀞𑀳𑀺. 𑀣𑁂𑀭𑁄 𑀢𑀲𑁆𑀲 𑀕𑁂𑀳𑁂 𑀦𑀺𑀩𑀤𑁆𑀥𑀁 𑀪𑀼𑀜𑁆𑀚𑀢𑀺. 𑀅𑀣𑁂𑀓𑁄 𑀔𑀻𑀡𑀸𑀲𑀯𑁄 𑀪𑀺𑀓𑁆𑀔𑀼 𑀤𑀺𑀯𑀸 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑁄 𑀢𑀲𑁆𑀲 𑀕𑁂𑀳𑀤𑁆𑀯𑀸𑀭𑀁 𑀧𑀸𑀧𑀼𑀡𑀺. 𑀓𑀼𑀝𑀼𑀫𑁆𑀩𑀺𑀓𑁄 𑀢𑀁 𑀤𑀺𑀲𑁆𑀯𑀸 𑀢𑀲𑁆𑀲 𑀇𑀭𑀺𑀬𑀸𑀧𑀣𑁂 𑀧𑀲𑀦𑁆𑀦𑁄 𑀕𑁂𑀳𑀁 𑀧𑀯𑁂𑀲𑁂𑀢𑁆𑀯𑀸 𑀲𑀓𑁆𑀓𑀘𑁆𑀘𑀁 𑀧𑀡𑀻𑀢𑁂𑀦 𑀪𑁄𑀚𑀦𑁂𑀦 𑀧𑀭𑀺𑀯𑀺𑀲𑀺𑀢𑁆𑀯𑀸, ‘‘𑀪𑀦𑁆𑀢𑁂, 𑀇𑀫𑀁 𑀲𑀸𑀝𑀓𑀁 𑀭𑀚𑀺𑀢𑁆𑀯𑀸 𑀦𑀺𑀯𑀸𑀲𑁂𑀬𑁆𑀬𑀸𑀣𑀸’’𑀢𑀺 𑀫𑀳𑀦𑁆𑀢𑀁 𑀲𑀸𑀝𑀓𑀁 𑀤𑀢𑁆𑀯𑀸, ‘‘𑀪𑀦𑁆𑀢𑁂, 𑀓𑁂𑀲𑀸 𑀯𑁄 𑀤𑀻𑀖𑀸, 𑀢𑀼𑀫𑁆𑀳𑀸𑀓𑀁 𑀓𑁂𑀲𑁄𑀭𑁄𑀧𑀦𑀢𑁆𑀣𑀸𑀬 𑀦𑁆𑀳𑀸𑀧𑀺𑀢𑀁 𑀆𑀦𑁂𑀲𑁆𑀲𑀸𑀫𑀺, 𑀲𑀬𑀦𑀢𑁆𑀣𑀸𑀬 𑀘 𑀯𑁄 𑀫𑀜𑁆𑀘𑀓𑀁 𑀕𑀸𑀳𑀸𑀧𑁂𑀢𑁆𑀯𑀸 𑀆𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀆𑀳. 𑀦𑀺𑀩𑀤𑁆𑀥𑀁 𑀕𑁂𑀳𑁂 𑀪𑀼𑀜𑁆𑀚𑀦𑁆𑀢𑁄 𑀓𑀼𑀮𑀽𑀧𑀓𑁄 𑀪𑀺𑀓𑁆𑀔𑀼 𑀢𑀁 𑀢𑀲𑁆𑀲 𑀲𑀓𑁆𑀓𑀸𑀭𑀁 𑀤𑀺𑀲𑁆𑀯𑀸 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑀼𑀁 𑀦𑀸𑀲𑀓𑁆𑀔𑀺, ‘‘𑀅𑀬𑀁 𑀢𑀁 𑀫𑀼𑀳𑀼𑀢𑁆𑀢𑀁 𑀤𑀺𑀝𑁆𑀞𑀓𑀲𑁆𑀲 𑀏𑀯𑀭𑀽𑀧𑀁 𑀲𑀓𑁆𑀓𑀸𑀭𑀁 𑀓𑀭𑁄𑀢𑀺, 𑀦𑀺𑀩𑀤𑁆𑀥𑀁 𑀕𑁂𑀳𑁂 𑀪𑀼𑀜𑁆𑀚𑀦𑁆𑀢𑀲𑁆𑀲 𑀧𑀦 𑀫𑀬𑁆𑀳𑀁 𑀦 𑀓𑀭𑁄𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀯𑀺𑀳𑀸𑀭𑀁 𑀅𑀕𑀫𑀸𑀲𑀺. 𑀇𑀢𑀭𑁄𑀧𑀺 𑀢𑁂𑀦𑁂𑀯 𑀲𑀤𑁆𑀥𑀺𑀁 𑀕𑀦𑁆𑀢𑁆𑀯𑀸 𑀓𑀼𑀝𑀼𑀫𑁆𑀩𑀺𑀓𑁂𑀦 𑀤𑀺𑀦𑁆𑀦𑀲𑀸𑀝𑀓𑀁 𑀭𑀚𑀺𑀢𑁆𑀯𑀸 𑀦𑀺𑀯𑀸𑀲𑁂𑀲𑀺. 𑀓𑀼𑀝𑀫𑁆𑀩𑀺𑀓𑁄𑀧𑀺 𑀦𑁆𑀳𑀸𑀧𑀺𑀢𑀁 𑀆𑀤𑀸𑀬 𑀕𑀦𑁆𑀢𑁆𑀯𑀸 𑀣𑁂𑀭𑀲𑁆𑀲 𑀓𑁂𑀲𑁂 𑀑𑀳𑀸𑀭𑀸𑀧𑁂𑀢𑁆𑀯𑀸 𑀫𑀜𑁆𑀘𑀓𑀁 𑀅𑀢𑁆𑀣𑀭𑀸𑀧𑁂𑀢𑁆𑀯𑀸, ‘‘𑀪𑀦𑁆𑀢𑁂, 𑀇𑀫𑀲𑁆𑀫𑀺𑀁𑀬𑁂𑀯 𑀫𑀜𑁆𑀘𑀓𑁂 𑀲𑀬𑀣𑀸’’𑀢𑀺 𑀯𑀢𑁆𑀯𑀸 𑀤𑁆𑀯𑁂𑀧𑀺 𑀣𑁂𑀭𑁂 𑀲𑁆𑀯𑀸𑀢𑀦𑀸𑀬 𑀦𑀺𑀫𑀦𑁆𑀢𑁂𑀢𑁆𑀯𑀸 𑀧𑀓𑁆𑀓𑀸𑀫𑀺.

𑀦𑁂𑀯𑀸𑀲𑀺𑀓𑁄 𑀢𑀲𑁆𑀲 𑀢𑀁 𑀲𑀓𑁆𑀓𑀸𑀭𑀁 𑀓𑀬𑀺𑀭𑀫𑀸𑀦𑀁 𑀅𑀥𑀺𑀯𑀸𑀲𑁂𑀢𑀼𑀁 𑀦𑀸𑀲𑀓𑁆𑀔𑀺. 𑀅𑀣𑀲𑁆𑀲 𑀲𑁄 𑀲𑀸𑀬𑀁 𑀣𑁂𑀭𑀲𑁆𑀲 𑀦𑀺𑀧𑀦𑁆𑀦𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀘𑀢𑀽𑀳𑀸𑀓𑀸𑀭𑁂𑀳𑀺 𑀣𑁂𑀭𑀁 𑀅𑀓𑁆𑀓𑁄𑀲𑀺, ‘‘𑀆𑀯𑀼𑀲𑁄, 𑀆𑀕𑀦𑁆𑀢𑀼𑀓 𑀓𑀼𑀝𑀼𑀫𑁆𑀩𑀺𑀓𑀲𑁆𑀲 𑀢𑁂 𑀕𑁂𑀳𑁂 𑀪𑀢𑁆𑀢𑀁 𑀪𑀼𑀜𑁆𑀚𑀦𑀢𑁄 𑀯𑀭𑀢𑀭𑀁 𑀫𑀻𑀴𑁆𑀳𑀁 𑀔𑀸𑀤𑀺𑀢𑀼𑀁, 𑀓𑀼𑀝𑀼𑀫𑁆𑀩𑀺𑀓𑁂𑀦 𑀆𑀦𑀻𑀢𑀦𑁆𑀳𑀸𑀧𑀺𑀢𑁂𑀦 𑀓𑁂𑀲𑁄𑀳𑀸𑀭𑀸𑀧𑀦𑀢𑁄 𑀯𑀭𑀢𑀭𑀁 𑀢𑀸𑀮𑀝𑁆𑀞𑀺𑀓𑁂𑀦 𑀓𑁂𑀲𑁂 𑀮𑀼𑀜𑁆𑀘𑀸𑀧𑁂𑀢𑀼𑀁. 𑀓𑀼𑀝𑀼𑀫𑁆𑀩𑀺𑀓𑁂𑀦 𑀤𑀺𑀦𑁆𑀦𑀲𑀸𑀝𑀓𑀦𑀺𑀯𑀸𑀲𑀦𑀢𑁄 𑀯𑀭𑀢𑀭𑀁 𑀦𑀕𑁆𑀕𑁂𑀦 𑀯𑀺𑀘𑀭𑀺𑀢𑀼𑀁, 𑀓𑀼𑀝𑀼𑀫𑁆𑀩𑀺𑀓𑁂𑀦 𑀆𑀪𑀢𑀫𑀜𑁆𑀘𑀓𑁂 𑀦𑀺𑀧𑀚𑁆𑀚𑀦𑀢𑁄 𑀯𑀭𑀢𑀭𑀁 𑀪𑀽𑀫𑀺𑀬𑀁 𑀦𑀺𑀧𑀚𑁆𑀚𑀺𑀢𑀼’’𑀦𑁆𑀢𑀺. 𑀣𑁂𑀭𑁄𑀧𑀺 ‘‘𑀫𑀸 𑀏𑀲 𑀩𑀸𑀮𑁄 𑀫𑀁 𑀦𑀺𑀲𑁆𑀲𑀸𑀬 𑀦𑀲𑁆𑀲𑀻’’𑀢𑀺 𑀦𑀺𑀫𑀦𑁆𑀢𑀦𑀁 𑀅𑀦𑀸𑀤𑀺𑀬𑀺𑀢𑁆𑀯𑀸 𑀧𑀸𑀢𑁄𑀯 𑀉𑀝𑁆𑀞𑀸𑀬 𑀬𑀣𑀸𑀲𑀼𑀔𑀁 𑀅𑀕𑀫𑀸𑀲𑀺. 𑀦𑁂𑀯𑀸𑀲𑀺𑀓𑁄𑀧𑀺 𑀧𑀸𑀢𑁄𑀯 𑀯𑀺𑀳𑀸𑀭𑁂 𑀓𑀢𑁆𑀢𑀩𑁆𑀩𑀯𑀢𑁆𑀢𑀁 𑀓𑀢𑁆𑀯𑀸 𑀪𑀺𑀓𑁆𑀔𑀸𑀘𑀸𑀭𑀯𑁂𑀮𑀸𑀬 ‘‘𑀇𑀤𑀸𑀦𑀺𑀧𑀺 𑀆𑀕𑀦𑁆𑀢𑀼𑀓𑁄 𑀦𑀺𑀤𑁆𑀤𑀸𑀬𑀢𑀺, 𑀖𑀡𑁆𑀟𑀺𑀓𑀲𑀤𑁆𑀤𑁂𑀦 𑀧𑀩𑀼𑀚𑁆𑀛𑁂𑀬𑁆𑀬𑀸’’𑀢𑀺 𑀲𑀜𑁆𑀜𑀸𑀬 𑀦𑀔𑀧𑀺𑀝𑁆𑀞𑁂𑀦𑁂𑀯 𑀖𑀡𑁆𑀟𑀺𑀁 𑀧𑀳𑀭𑀺𑀢𑁆𑀯𑀸 𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺. 𑀓𑀼𑀝𑀼𑀫𑁆𑀩𑀺𑀓𑁄𑀧𑀺 𑀲𑀓𑁆𑀓𑀸𑀭𑀁 𑀓𑀢𑁆𑀯𑀸 𑀣𑁂𑀭𑀸𑀦𑀁 𑀆𑀕𑀫𑀦𑀫𑀕𑁆𑀕𑀁 𑀑𑀮𑁄𑀓𑁂𑀦𑁆𑀢𑁄 𑀦𑁂𑀯𑀸𑀲𑀺𑀓𑀁 𑀤𑀺𑀲𑁆𑀯𑀸, ‘‘𑀪𑀦𑁆𑀢𑁂, 𑀣𑁂𑀭𑁄 𑀓𑀼𑀳𑀺’’𑀦𑁆𑀢𑀺 𑀧𑀼𑀘𑁆𑀙𑀺. 𑀅𑀣 𑀦𑀁 𑀦𑁂𑀯𑀸𑀲𑀺𑀓𑁄 ‘‘𑀫𑀸, 𑀆𑀯𑀼𑀲𑁄, 𑀓𑀺𑀜𑁆𑀘𑀺 𑀅𑀯𑀘, 𑀢𑀼𑀬𑁆𑀳𑀁 𑀓𑀼𑀮𑀽𑀧𑀓𑁄 𑀳𑀺𑀬𑁆𑀬𑁄, 𑀢𑀯 𑀦𑀺𑀓𑁆𑀔𑀦𑁆𑀢𑀯𑁂𑀮𑀸𑀬 𑀑𑀯𑀭𑀓𑀁 𑀧𑀯𑀺𑀲𑀺𑀢𑁆𑀯𑀸 𑀦𑀺𑀤𑁆𑀤𑀁 𑀑𑀓𑁆𑀓𑀦𑁆𑀢𑁄 𑀧𑀸𑀢𑁄𑀯 𑀉𑀝𑁆𑀞𑀸𑀬 𑀫𑀫 𑀯𑀺𑀳𑀸𑀭𑀲𑀫𑁆𑀫𑀚𑁆𑀚𑀦𑀲𑀤𑁆𑀤𑀫𑁆𑀧𑀺 𑀧𑀸𑀦𑀻𑀬𑀖𑀝𑀧𑀭𑀺𑀪𑁄𑀚𑀦𑀻𑀬𑀖𑀝𑁂𑀲𑀼 𑀉𑀤𑀓𑀲𑀺𑀜𑁆𑀘𑀦𑀲𑀤𑁆𑀤𑀫𑁆𑀧𑀺 𑀖𑀡𑁆𑀟𑀺𑀓𑀲𑀤𑁆𑀤𑀫𑁆𑀧𑀺 𑀓𑀭𑁄𑀦𑁆𑀢𑀲𑁆𑀲 𑀦 𑀚𑀸𑀦𑀸𑀢𑀻’’𑀢𑀺 𑀆𑀳. 𑀓𑀼𑀝𑀼𑀫𑁆𑀩𑀺𑀓𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀢𑀸𑀤𑀺𑀲𑀸𑀬 𑀇𑀭𑀺𑀬𑀸𑀧𑀣𑀲𑀫𑁆𑀧𑀢𑁆𑀢𑀺𑀬𑀸 𑀲𑀫𑀦𑁆𑀦𑀸𑀕𑀢𑀲𑁆𑀲 𑀫𑁂 𑀅𑀬𑁆𑀬𑀲𑁆𑀲 𑀬𑀸𑀯 𑀇𑀫𑀫𑁆𑀳𑀸 𑀓𑀸𑀮𑀸 𑀦𑀺𑀤𑁆𑀤𑀸𑀬𑀦𑀁 𑀦𑀸𑀫 𑀦𑀢𑁆𑀣𑀺, 𑀫𑀁 𑀧𑀦 𑀢𑀲𑁆𑀲 𑀲𑀓𑁆𑀓𑀸𑀭𑀁 𑀓𑀭𑁄𑀦𑁆𑀢𑀁 𑀤𑀺𑀲𑁆𑀯𑀸 𑀅𑀤𑁆𑀥𑀸 𑀇𑀫𑀺𑀦𑀸 𑀪𑀤𑀦𑁆𑀢𑁂𑀦 𑀓𑀺𑀜𑁆𑀘𑀺 𑀯𑀼𑀢𑁆𑀢𑀁 𑀪𑀯𑀺𑀲𑁆𑀲𑀢𑀻’’𑀢𑀺. 𑀲𑁄 𑀅𑀢𑁆𑀢𑀦𑁄 𑀧𑀡𑁆𑀟𑀺𑀢𑀪𑀸𑀯𑁂𑀦 𑀢𑀁 𑀲𑀓𑁆𑀓𑀘𑁆𑀘𑀁 𑀪𑁄𑀚𑁂𑀢𑁆𑀯𑀸 𑀢𑀲𑁆𑀲 𑀧𑀢𑁆𑀢𑀁 𑀲𑀸𑀥𑀼𑀓𑀁 𑀥𑁄𑀯𑀺𑀢𑁆𑀯𑀸 𑀦𑀸𑀦𑀕𑁆𑀕𑀭𑀲𑀪𑁄𑀚𑀦𑀲𑁆𑀲 𑀧𑀽𑀭𑁂𑀢𑁆𑀯𑀸, ‘‘𑀪𑀦𑁆𑀢𑁂, 𑀲𑀘𑁂 𑀫𑁂 𑀅𑀬𑁆𑀬𑀁 𑀧𑀲𑁆𑀲𑁂𑀬𑁆𑀬𑀸𑀣, 𑀇𑀫𑀫𑀲𑁆𑀲 𑀧𑀺𑀡𑁆𑀟𑀧𑀸𑀢𑀁 𑀤𑀤𑁂𑀬𑁆𑀬𑀸𑀣𑀸’’𑀢𑀺 𑀆𑀳.

𑀇𑀢𑀭𑁄 𑀢𑀁 𑀕𑀳𑁂𑀢𑁆𑀯𑀸𑀯 𑀘𑀺𑀦𑁆𑀢𑁂𑀲𑀺 𑁋 ‘‘𑀲𑀘𑁂 𑀲𑁄 𑀏𑀯𑀭𑀽𑀧𑀁 𑀧𑀺𑀡𑁆𑀟𑀧𑀸𑀢𑀁 𑀪𑀼𑀜𑁆𑀚𑀺𑀲𑁆𑀲𑀢𑀺, 𑀇𑀫𑀲𑁆𑀫𑀺𑀁𑀬𑁂𑀯 𑀞𑀸𑀦𑁂 𑀧𑀮𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀅𑀦𑁆𑀢𑀭𑀸𑀫𑀕𑁆𑀕𑁂 𑀢𑀁 𑀧𑀺𑀡𑁆𑀟𑀧𑀸𑀢𑀁 𑀙𑀟𑁆𑀟𑁂𑀢𑁆𑀯𑀸 𑀣𑁂𑀭𑀲𑁆𑀲 𑀯𑀲𑀦𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀢𑀁 𑀢𑀢𑁆𑀣 𑀑𑀮𑁄𑀓𑁂𑀦𑁆𑀢𑁄 𑀦 𑀅𑀤𑁆𑀤𑀲. 𑀅𑀣 𑀦𑀁 𑀏𑀢𑁆𑀢𑀓𑀲𑁆𑀲 𑀓𑀫𑁆𑀫𑀲𑁆𑀲 𑀓𑀢𑀢𑁆𑀢𑀸 𑀯𑀻𑀲𑀢𑀺𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀓𑀢𑁄𑀧𑀺 𑀲𑀫𑀡𑀥𑀫𑁆𑀫𑁄 𑀭𑀓𑁆𑀔𑀺𑀢𑀼𑀁 𑀦𑀸𑀲𑀓𑁆𑀔𑀺. 𑀆𑀬𑀼𑀧𑀭𑀺𑀬𑁄𑀲𑀸𑀦𑁂 𑀧𑀦 𑀓𑀸𑀮𑀁 𑀓𑀢𑁆𑀯𑀸 𑀅𑀯𑀻𑀘𑀺𑀫𑁆𑀳𑀺 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀏𑀓𑀁 𑀩𑀼𑀤𑁆𑀥𑀦𑁆𑀢𑀭𑀁 𑀫𑀳𑀸𑀤𑀼𑀓𑁆𑀔𑀁 𑀅𑀦𑀼𑀪𑀯𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀭𑀸𑀚𑀕𑀳𑀦𑀕𑀭𑁂 𑀏𑀓𑀲𑁆𑀫𑀺𑀁 𑀩𑀳𑁆𑀯𑀦𑁆𑀦𑀧𑀸𑀦𑁂 𑀓𑀼𑀮𑀖𑀭𑁂 𑀦𑀺𑀩𑁆𑀩𑀢𑁆𑀢𑀺. 𑀲𑁄 𑀧𑀤𑀲𑀸 𑀕𑀫𑀦𑀓𑀸𑀮𑀢𑁄 𑀧𑀝𑁆𑀞𑀸𑀬 𑀦𑁂𑀯 𑀲𑀬𑀦𑁂 𑀲𑀬𑀺𑀢𑀼𑀁, 𑀦 𑀪𑀢𑁆𑀢𑀁 𑀪𑀼𑀜𑁆𑀚𑀺𑀢𑀼𑀁 𑀇𑀘𑁆𑀙𑀢𑀺, 𑀅𑀢𑁆𑀢𑀦𑁄 𑀲𑀭𑀻𑀭𑀯𑀮𑀜𑁆𑀚𑀫𑁂𑀯 𑀔𑀸𑀤𑀢𑀺. ‘‘𑀩𑀸𑀮𑀢𑀸𑀬 𑀅𑀚𑀸𑀦𑀦𑁆𑀢𑁄 𑀓𑀭𑁄𑀢𑀻’’𑀢𑀺 𑀢𑀁 𑀧𑁄𑀲𑀬𑀺𑀁𑀲𑀼. 𑀫𑀳𑀮𑁆𑀮𑀓𑀓𑀸𑀮𑁂𑀧𑀺 𑀯𑀢𑁆𑀣𑀁 𑀦𑀺𑀯𑀸𑀲𑁂𑀢𑀼𑀁 𑀦 𑀇𑀘𑁆𑀙𑀢𑀺, 𑀦𑀕𑁆𑀕𑁄𑀯 𑀯𑀺𑀘𑀭𑀢𑀺, 𑀪𑀽𑀫𑀺𑀬𑀁 𑀲𑀬𑀢𑀺, 𑀅𑀢𑁆𑀢𑀦𑁄 𑀲𑀭𑀻𑀭𑀯𑀮𑀜𑁆𑀚𑀫𑁂𑀯 𑀔𑀸𑀤𑀢𑀺. 𑀅𑀣𑀲𑁆𑀲 𑀫𑀸𑀢𑀸𑀧𑀺𑀢𑀭𑁄 ‘‘𑀦𑀸𑀬𑀁 𑀓𑀼𑀮𑀖𑀭𑀲𑁆𑀲 𑀅𑀦𑀼𑀘𑁆𑀙𑀯𑀺𑀓𑁄, 𑀓𑁂𑀯𑀮𑀁 𑀅𑀮𑀚𑁆𑀚𑀦𑀓𑁄 𑀆𑀚𑀻𑀯𑀓𑀸𑀦𑀁 𑀏𑀲 𑀅𑀦𑀼𑀘𑁆𑀙𑀯𑀺𑀓𑁄’’𑀢𑀺 𑀢𑁂𑀲𑀁 𑀲𑀦𑁆𑀢𑀺𑀓𑀁 𑀦𑁂𑀢𑁆𑀯𑀸 ‘‘𑀇𑀫𑀁 𑀤𑀸𑀭𑀓𑀁 𑀧𑀩𑁆𑀩𑀸𑀚𑁂𑀣𑀸’’𑀢𑀺 𑀅𑀤𑀁𑀲𑀼. 𑀅𑀣 𑀦𑀁 𑀢𑁂 𑀧𑀩𑁆𑀩𑀸𑀚𑁂𑀲𑀼𑀁. 𑀧𑀩𑁆𑀩𑀸𑀚𑁂𑀦𑁆𑀢𑀸 𑀘 𑀧𑀦 𑀕𑀮𑀧𑁆𑀧𑀫𑀸𑀡𑁂 𑀆𑀯𑀸𑀝𑁂 𑀞𑀧𑁂𑀢𑁆𑀯𑀸 𑀤𑁆𑀯𑀺𑀦𑁆𑀦𑀁 𑀅𑀁𑀲𑀓𑀽𑀝𑀸𑀦𑀁 𑀉𑀧𑀭𑀺𑀁 𑀧𑀤𑀭𑀸𑀦𑀺 𑀤𑀢𑁆𑀯𑀸 𑀢𑁂𑀲𑀁 𑀉𑀧𑀭𑀺 𑀦𑀺𑀲𑀻𑀤𑀺𑀢𑁆𑀯𑀸 𑀢𑀸𑀮𑀝𑁆𑀞𑀺𑀔𑀡𑁆𑀟𑁂𑀦 𑀓𑁂𑀲𑁂 𑀮𑀼𑀜𑁆𑀘𑀺𑀁𑀲𑀼. 𑀅𑀣 𑀦𑁂 𑀢𑀲𑁆𑀲 𑀫𑀸𑀢𑀸𑀧𑀺𑀢𑀭𑁄 𑀲𑁆𑀯𑀸𑀢𑀦𑀸𑀬 𑀦𑀺𑀫𑀦𑁆𑀢𑁂𑀢𑁆𑀯𑀸 𑀧𑀓𑁆𑀓𑀫𑀺𑀁𑀲𑀼.

𑀧𑀼𑀦𑀤𑀺𑀯𑀲𑁂 𑀆𑀚𑀻𑀯𑀓𑀸 ‘‘𑀏𑀳𑀺, 𑀕𑀸𑀫𑀁 𑀧𑀯𑀺𑀲𑀺𑀲𑁆𑀲𑀸𑀫𑀸’’𑀢𑀺 𑀢𑀁 𑀯𑀤𑀺𑀁𑀲𑀼. 𑀲𑁄 ‘‘𑀕𑀘𑁆𑀙𑀣 𑀢𑀼𑀫𑁆𑀳𑁂, 𑀅𑀳𑀁 𑀇𑀥𑁂𑀯 𑀪𑀯𑀺𑀲𑁆𑀲𑀸𑀫𑀻’’𑀢𑀺 𑀦 𑀇𑀘𑁆𑀙𑀺. 𑀅𑀣 𑀦𑀁 𑀧𑀼𑀦𑀧𑁆𑀧𑀼𑀦𑀁 𑀯𑀢𑁆𑀯𑀸 𑀅𑀦𑀺𑀘𑁆𑀙𑀫𑀸𑀦𑀁 𑀑𑀳𑀸𑀬 𑀅𑀕𑀫𑀁𑀲𑀼. 𑀲𑁄𑀧𑀺 𑀢𑁂𑀲𑀁 𑀕𑀢𑀪𑀸𑀯𑀁 𑀜𑀢𑁆𑀯𑀸 𑀯𑀘𑁆𑀘𑀓𑀼𑀝𑀺𑀬𑀸 𑀧𑀤𑀭𑀁 𑀯𑀺𑀯𑀭𑀺𑀢𑁆𑀯𑀸 𑀑𑀭𑀼𑀬𑁆𑀳 𑀉𑀪𑁄𑀳𑀺 𑀳𑀢𑁆𑀣𑁂𑀳𑀺 𑀆𑀮𑁄𑀧𑀁 𑀆𑀮𑁄𑀧𑀁 𑀓𑀢𑁆𑀯𑀸 𑀕𑀽𑀣𑀁 𑀔𑀸𑀤𑀺. 𑀆𑀚𑀻𑀯𑀓𑀸 𑀢𑀲𑁆𑀲 𑀅𑀦𑁆𑀢𑁄𑀕𑀸𑀫𑀢𑁄 𑀆𑀳𑀸𑀭𑀁 𑀧𑀳𑀺𑀡𑀺𑀁𑀲𑀼. 𑀢𑀫𑁆𑀧𑀺 𑀦 𑀇𑀘𑁆𑀙𑀺. 𑀧𑀼𑀦𑀧𑁆𑀧𑀼𑀦𑀁 𑀯𑀼𑀘𑁆𑀘𑀫𑀸𑀦𑁄𑀧𑀺 ‘‘𑀦 𑀫𑁂 𑀇𑀫𑀺𑀦𑀸 𑀅𑀢𑁆𑀣𑁄. 𑀮𑀤𑁆𑀥𑁄 𑀫𑁂 𑀆𑀳𑀸𑀭𑁄’’𑀢𑀺 𑀆𑀳. ‘‘𑀓𑀳𑀁 𑀮𑀤𑁆𑀥𑁄’’𑀢𑀺? ‘‘𑀇𑀥𑁂𑀯 𑀮𑀤𑁆𑀥𑁄’’𑀢𑀺. 𑀏𑀯𑀁 𑀤𑀼𑀢𑀺𑀬𑁂 𑀢𑀢𑀺𑀬𑁂 𑀘𑀢𑀼𑀢𑁆𑀣𑁂𑀧𑀺 𑀤𑀺𑀯𑀲𑁂 𑀢𑁂𑀳𑀺 𑀩𑀳𑀼𑀫𑁆𑀧𑀺 𑀯𑀼𑀘𑁆𑀘𑀫𑀸𑀦𑁄 ‘‘𑀅𑀳𑀁 𑀇𑀥𑁂𑀯 𑀪𑀯𑀺𑀲𑁆𑀲𑀸𑀫𑀻’’𑀢𑀺 𑀕𑀸𑀫𑀁 𑀕𑀦𑁆𑀢𑀼𑀁 𑀦 𑀇𑀘𑁆𑀙𑀺. 𑀆𑀚𑀻𑀯𑀓𑀸 ‘‘𑀅𑀬𑀁 𑀤𑀺𑀯𑀲𑁂 𑀤𑀺𑀯𑀲𑁂 𑀦𑁂𑀯 𑀕𑀸𑀫𑀁 𑀧𑀯𑀺𑀲𑀺𑀢𑀼𑀁 𑀇𑀘𑁆𑀙𑀢𑀺, 𑀦 𑀅𑀫𑁆𑀳𑁂𑀳𑀺 𑀧𑀳𑀺𑀢𑀸𑀳𑀸𑀭𑀁 𑀆𑀳𑀭𑀺𑀢𑀼𑀁 𑀇𑀘𑁆𑀙𑀢𑀺, ‘𑀇𑀥𑁂𑀯 𑀫𑁂 𑀮𑀤𑁆𑀥𑁄’𑀢𑀺 𑀯𑀤𑀢𑀺, 𑀓𑀺𑀁 𑀦𑀼 𑀔𑁄 𑀓𑀭𑁄𑀢𑀺, 𑀧𑀭𑀺𑀕𑁆𑀕𑀡𑁆𑀳𑀺𑀲𑁆𑀲𑀸𑀫 𑀦’’𑀦𑁆𑀢𑀺 𑀕𑀸𑀫𑀁 𑀧𑀯𑀺𑀲𑀦𑁆𑀢𑀸 𑀏𑀓𑀁 𑀤𑁆𑀯𑁂 𑀚𑀦𑁂 𑀢𑀲𑁆𑀲 𑀧𑀭𑀺𑀕𑁆𑀕𑀡𑁆𑀳𑀦𑀢𑁆𑀣𑀁 𑀑𑀳𑀸𑀬 𑀕𑀫𑀺𑀁𑀲𑀼. 𑀢𑁂 𑀧𑀘𑁆𑀙𑀢𑁄 𑀕𑀘𑁆𑀙𑀦𑁆𑀢𑀸 𑀯𑀺𑀬 𑀳𑀼𑀢𑁆𑀯𑀸 𑀦𑀺𑀮𑀻𑀬𑀺𑀁𑀲𑀼. 𑀲𑁄𑀧𑀺 𑀢𑁂𑀲𑀁 𑀕𑀢𑀪𑀸𑀯𑀁 𑀜𑀢𑁆𑀯𑀸 𑀧𑀼𑀭𑀺𑀫𑀦𑀬𑁂𑀦𑁂𑀯 𑀯𑀘𑁆𑀘𑀓𑀼𑀝𑀺𑀁 𑀑𑀭𑀼𑀬𑁆𑀳 𑀕𑀽𑀣𑀁 𑀔𑀸𑀤𑀺.

𑀇𑀢𑀭𑁂 𑀢𑀲𑁆𑀲 𑀓𑀺𑀭𑀺𑀬𑀁 𑀤𑀺𑀲𑁆𑀯𑀸 𑀆𑀚𑀻𑀯𑀓𑀸𑀦𑀁 𑀆𑀭𑁄𑀘𑀬𑀺𑀁𑀲𑀼. 𑀢𑀁 𑀲𑀼𑀢𑁆𑀯𑀸 𑀆𑀚𑀻𑀯𑀓𑀸 ‘‘𑀅𑀳𑁄 𑀪𑀸𑀭𑀺𑀬𑀁 𑀓𑀫𑁆𑀫𑀁, 𑀲𑀘𑁂 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀲𑀸𑀯𑀓𑀸 𑀚𑀸𑀦𑁂𑀬𑁆𑀬𑀼𑀁, ‘𑀆𑀚𑀻𑀯𑀓𑀸 𑀕𑀽𑀣𑀁 𑀔𑀸𑀤𑀫𑀸𑀦𑀸 𑀯𑀺𑀘𑀭𑀦𑁆𑀢𑀻’𑀢𑀺 𑀅𑀫𑁆𑀳𑀸𑀓𑀁 𑀅𑀓𑀺𑀢𑁆𑀢𑀺𑀁 𑀧𑀓𑀸𑀲𑁂𑀬𑁆𑀬𑀼𑀁, 𑀦𑀸𑀬𑀁 𑀅𑀫𑁆𑀳𑀸𑀓𑀁 𑀅𑀦𑀼𑀘𑁆𑀙𑀯𑀺𑀓𑁄’’𑀢𑀺 𑀢𑀁 𑀅𑀢𑁆𑀢𑀦𑁄 𑀲𑀦𑁆𑀢𑀺𑀓𑀸 𑀦𑀻𑀳𑀭𑀺𑀁𑀲𑀼. 𑀲𑁄 𑀢𑁂𑀳𑀺 𑀦𑀻𑀳𑀭𑀺𑀢𑁄 𑀫𑀳𑀸𑀚𑀦𑀲𑁆𑀲 𑀉𑀘𑁆𑀘𑀸𑀭𑀓𑀭𑀡𑀝𑁆𑀞𑀸𑀦𑁂 𑀧𑀢𑁆𑀣𑀭𑀺𑀢𑁄 𑀏𑀓𑁄 𑀧𑀺𑀝𑁆𑀞𑀺𑀧𑀸𑀲𑀸𑀡𑁄 𑀅𑀢𑁆𑀣𑀺. 𑀢𑀲𑁆𑀫𑀺𑀁 𑀫𑀳𑀦𑁆𑀢𑀁 𑀲𑁄𑀡𑁆𑀟𑀺, 𑀧𑀺𑀝𑁆𑀞𑀺𑀧𑀸𑀲𑀸𑀡𑀁 𑀦𑀺𑀲𑁆𑀲𑀸𑀬 𑀫𑀳𑀸𑀚𑀦𑀲𑁆𑀲 𑀉𑀘𑁆𑀘𑀸𑀭𑀓𑀭𑀡𑀝𑁆𑀞𑀸𑀦𑀁. 𑀲𑁄 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀭𑀢𑁆𑀢𑀺𑀁 𑀕𑀽𑀣𑀁 𑀔𑀸𑀤𑀺𑀢𑁆𑀯𑀸 𑀫𑀳𑀸𑀚𑀦𑀲𑁆𑀲 𑀲𑀭𑀻𑀭𑀯𑀮𑀜𑁆𑀚𑀦𑀢𑁆𑀣𑀸𑀬 𑀆𑀕𑀫𑀦𑀓𑀸𑀮𑁂 𑀏𑀓𑁂𑀦 𑀳𑀢𑁆𑀣𑁂𑀦 𑀧𑀸𑀲𑀸𑀡𑀲𑁆𑀲 𑀏𑀓𑀁 𑀅𑀦𑁆𑀢𑀁 𑀑𑀮𑀼𑀩𑁆𑀪 𑀏𑀓𑀁 𑀧𑀸𑀤𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀚𑀡𑁆𑀡𑀼𑀓𑁂 𑀞𑀧𑁂𑀢𑁆𑀯𑀸 𑀉𑀤𑁆𑀥𑀁𑀯𑀸𑀢𑀸𑀪𑀺𑀫𑀼𑀔𑁄 𑀫𑀼𑀔𑀁 𑀯𑀺𑀯𑀭𑀺𑀢𑁆𑀯𑀸 𑀢𑀺𑀝𑁆𑀞𑀢𑀺. 𑀫𑀳𑀸𑀚𑀦𑁄 𑀢𑀁 𑀤𑀺𑀲𑁆𑀯𑀸 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸, ‘‘𑀪𑀦𑁆𑀢𑁂, 𑀓𑀲𑁆𑀫𑀸 𑀅𑀬𑁆𑀬𑁄 𑀫𑀼𑀔𑀁 𑀯𑀺𑀯𑀭𑀺𑀢𑁆𑀯𑀸 𑀞𑀺𑀢𑁄’’𑀢𑀺 𑀧𑀼𑀘𑁆𑀙𑀢𑀺. ‘‘𑀅𑀳𑀁 𑀯𑀸𑀢𑀪𑀓𑁆𑀔𑁄, 𑀅𑀜𑁆𑀜𑁄 𑀫𑁂 𑀆𑀳𑀸𑀭𑁄 𑀦𑀢𑁆𑀣𑀻’’𑀢𑀺. 𑀅𑀣 ‘‘𑀓𑀲𑁆𑀫𑀸 𑀏𑀓𑀁 𑀧𑀸𑀤𑀁 𑀚𑀡𑁆𑀡𑀼𑀓𑁂 𑀓𑀢𑁆𑀯𑀸 𑀞𑀺𑀢𑁄𑀲𑀺, 𑀪𑀦𑁆𑀢𑁂’’𑀢𑀺? ‘‘𑀅𑀳𑀁 𑀉𑀕𑁆𑀕𑀢𑀧𑁄 𑀖𑁄𑀭𑀢𑀧𑁄, 𑀫𑀬𑀸 𑀤𑁆𑀯𑀻𑀳𑀺 𑀧𑀸𑀤𑁂𑀳𑀺 𑀅𑀓𑁆𑀓𑀦𑁆𑀢𑀸 𑀧𑀣𑀯𑀻 𑀓𑀫𑁆𑀧𑀢𑀺, 𑀢𑀲𑁆𑀫𑀸 𑀏𑀓𑀁 𑀧𑀸𑀤𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀚𑀡𑁆𑀡𑀼𑀓𑁂 𑀞𑀧𑁂𑀢𑁆𑀯𑀸 𑀞𑀺𑀢𑁄𑀫𑁆𑀳𑀺. 𑀅𑀳𑀜𑁆𑀳𑀺 𑀭𑀢𑁆𑀢𑀺𑀦𑁆𑀤𑀺𑀯𑀁 𑀞𑀺𑀢𑀓𑁄𑀯 𑀯𑀻𑀢𑀺𑀦𑀸𑀫𑁂𑀫𑀺, 𑀦 𑀦𑀺𑀲𑀻𑀤𑀸𑀫𑀺, 𑀦 𑀦𑀺𑀧𑀚𑁆𑀚𑀸𑀫𑀻’’𑀢𑀺. 𑀫𑀦𑀼𑀲𑁆𑀲𑀸 𑀦𑀸𑀫 𑀬𑁂𑀪𑀼𑀬𑁆𑀬𑁂𑀦 𑀯𑀘𑀦𑀫𑀢𑁆𑀢𑀫𑁂𑀯 𑀲𑀤𑁆𑀤𑀳𑀦𑁆𑀢𑀺, 𑀢𑀲𑁆𑀫𑀸 ‘‘𑀅𑀳𑁄 𑀅𑀘𑁆𑀙𑀭𑀺𑀬𑀁, 𑀏𑀯𑀭𑀽𑀧𑀸𑀧𑀺 𑀦𑀸𑀫 𑀢𑀧𑀲𑁆𑀲𑀺𑀦𑁄 𑀳𑁄𑀦𑁆𑀢𑀺, 𑀦 𑀦𑁄 𑀏𑀯𑀭𑀽𑀧𑀸 𑀤𑀺𑀝𑁆𑀞𑀧𑀼𑀩𑁆𑀩𑀸’’𑀢𑀺 𑀬𑁂𑀪𑀼𑀬𑁆𑀬𑁂𑀦 𑀅𑀗𑁆𑀕𑀫𑀕𑀥𑀯𑀸𑀲𑀺𑀦𑁄 𑀲𑀗𑁆𑀔𑀼𑀪𑀺𑀢𑁆𑀯𑀸 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀫𑀸𑀲𑁂 𑀫𑀸𑀲𑁂 𑀫𑀳𑀦𑁆𑀢𑀁 𑀲𑀓𑁆𑀓𑀸𑀭𑀁 𑀅𑀪𑀺𑀳𑀭𑀦𑁆𑀢𑀺. 𑀲𑁄 ‘‘𑀅𑀳𑀁 𑀯𑀸𑀢𑀫𑁂𑀯 𑀪𑀓𑁆𑀔𑀸𑀫𑀺, 𑀦 𑀅𑀜𑁆𑀜𑀁 𑀆𑀳𑀸𑀭𑀁. 𑀅𑀜𑁆𑀜𑀜𑁆𑀳𑀺 𑀫𑁂 𑀔𑀸𑀤𑀦𑁆𑀢𑀲𑁆𑀲 𑀢𑀧𑁄 𑀦𑀲𑁆𑀲𑀢𑀻’’𑀢𑀺 𑀢𑁂𑀳𑀺 𑀅𑀪𑀺𑀳𑀝𑀁 𑀦 𑀓𑀺𑀜𑁆𑀘𑀺 𑀇𑀘𑁆𑀙𑀢𑀺. 𑀫𑀦𑀼𑀲𑁆𑀲𑀸 ‘‘𑀫𑀸 𑀦𑁄, 𑀪𑀦𑁆𑀢𑁂, 𑀦𑀸𑀲𑁂𑀣, 𑀢𑀼𑀫𑁆𑀳𑀸𑀤𑀺𑀲𑁂𑀦 𑀖𑁄𑀭𑀢𑀧𑁂𑀦 𑀧𑀭𑀺𑀪𑁄𑀕𑁂 𑀓𑀢𑁂 𑀅𑀫𑁆𑀳𑀸𑀓𑀁 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬 𑀲𑀁𑀯𑀢𑁆𑀢𑀢𑀻’’𑀢𑀺 𑀧𑀼𑀦𑀧𑁆𑀧𑀼𑀦𑀁 𑀬𑀸𑀘𑀦𑁆𑀢𑀺. 𑀢𑀲𑁆𑀲 𑀅𑀜𑁆𑀜𑁄 𑀆𑀳𑀸𑀭𑁄 𑀦 𑀭𑀼𑀘𑁆𑀘𑀢𑀺. 𑀫𑀳𑀸𑀚𑀦𑀲𑁆𑀲 𑀧𑀦 𑀬𑀸𑀘𑀦𑀸𑀬 𑀧𑀻𑀴𑀺𑀢𑁄 𑀢𑁂𑀳𑀺 𑀆𑀪𑀢𑀸𑀦𑀺 𑀲𑀧𑁆𑀧𑀺𑀨𑀸𑀡𑀺𑀢𑀸𑀤𑀻𑀦𑀺 𑀓𑀼𑀲𑀕𑁆𑀕𑁂𑀦 𑀚𑀺𑀯𑁆𑀳𑀕𑁆𑀕𑁂 𑀞𑀧𑁂𑀢𑁆𑀯𑀸 ‘‘𑀕𑀘𑁆𑀙𑀣, 𑀅𑀮𑀁 𑀯𑁄 𑀏𑀢𑁆𑀢𑀓𑀁 𑀳𑀺𑀢𑀸𑀬 𑀲𑀼𑀔𑀸𑀬 𑀘𑀸’’𑀢𑀺 𑀉𑀬𑁆𑀬𑁄𑀚𑁂𑀲𑀺. 𑀏𑀯𑀁 𑀲𑁄 𑀧𑀜𑁆𑀘𑀧𑀜𑁆𑀜𑀸𑀲 𑀯𑀲𑁆𑀲𑀸𑀦𑀺 𑀦𑀕𑁆𑀕𑁄 𑀕𑀽𑀣𑀁 𑀔𑀸𑀤𑀦𑁆𑀢𑁄 𑀓𑁂𑀲𑁂 𑀮𑀼𑀜𑁆𑀘𑀦𑁆𑀢𑁄 𑀪𑀽𑀫𑀺𑀬𑀁 𑀲𑀬𑀫𑀸𑀦𑁄 𑀯𑀻𑀢𑀺𑀦𑀸𑀫𑁂𑀲𑀺.

𑀩𑀼𑀤𑁆𑀥𑀸𑀦𑀫𑁆𑀧𑀺 𑀔𑁄 𑀧𑀘𑁆𑀘𑀽𑀲𑀓𑀸𑀮𑁂 𑀮𑁄𑀓𑀯𑁄𑀮𑁄𑀓𑀦𑀁 𑀅𑀯𑀺𑀚𑀳𑀺𑀢𑀫𑁂𑀯 𑀳𑁄𑀢𑀺. 𑀢𑀲𑁆𑀫𑀸 𑀏𑀓𑀤𑀺𑀯𑀲𑀁 𑀪𑀕𑀯𑀢𑁄 𑀧𑀘𑁆𑀘𑀽𑀲𑀲𑀫𑀬𑁂 𑀮𑁄𑀓𑀁 𑀯𑁄𑀮𑁄𑀓𑁂𑀦𑁆𑀢𑀲𑁆𑀲 𑀅𑀬𑀁 𑀚𑀫𑁆𑀩𑀼𑀓𑀸𑀚𑀻𑀯𑀓𑁄 𑀜𑀸𑀡𑀚𑀸𑀮𑀲𑁆𑀲 𑀅𑀦𑁆𑀢𑁄 𑀧𑀜𑁆𑀜𑀸𑀬𑀺. 𑀲𑀢𑁆𑀣𑀸 ‘‘𑀓𑀺𑀁 𑀦𑀼 𑀔𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀆𑀯𑀚𑁆𑀚𑁂𑀢𑁆𑀯𑀸 𑀢𑀲𑁆𑀲 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀲𑁆𑀲𑀽𑀧𑀦𑀺𑀲𑁆𑀲𑀬𑀁 𑀤𑀺𑀲𑁆𑀯𑀸 ‘‘𑀅𑀳𑀁 𑀏𑀢𑀁 𑀆𑀤𑀺𑀁 𑀓𑀢𑁆𑀯𑀸 𑀏𑀓𑀁 𑀕𑀸𑀣𑀁 𑀪𑀸𑀲𑀺𑀲𑁆𑀲𑀸𑀫𑀺, 𑀕𑀸𑀣𑀸𑀯𑀲𑀸𑀦𑁂 𑀘𑀢𑀼𑀭𑀸𑀲𑀻𑀢𑀺𑀬𑀸 𑀧𑀸𑀡𑀲𑀳𑀲𑁆𑀲𑀸𑀦𑀁 𑀥𑀫𑁆𑀫𑀸𑀪𑀺𑀲𑀫𑀬𑁄 𑀪𑀯𑀺𑀲𑁆𑀲𑀢𑀺. 𑀇𑀫𑀁 𑀓𑀼𑀮𑀧𑀼𑀢𑁆𑀢𑀁 𑀦𑀺𑀲𑁆𑀲𑀸𑀬 𑀫𑀳𑀸𑀚𑀦𑁄 𑀲𑁄𑀢𑁆𑀣𑀺𑀪𑀸𑀯𑀁 𑀧𑀸𑀧𑀼𑀡𑀺𑀲𑁆𑀲𑀢𑀻’’𑀢𑀺 𑀜𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀭𑀸𑀚𑀕𑀳𑁂 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀦𑁆𑀢𑁄 𑀆𑀦𑀦𑁆𑀤𑀢𑁆𑀣𑁂𑀭𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀆𑀦𑀦𑁆𑀤, 𑀚𑀫𑁆𑀩𑀼𑀓𑀸𑀚𑀻𑀯𑀓𑀲𑁆𑀲 𑀲𑀦𑁆𑀢𑀺𑀓𑀁 𑀕𑀫𑀺𑀲𑁆𑀲𑀸𑀫𑀻’’𑀢𑀺. ‘‘𑀪𑀦𑁆𑀢𑁂, 𑀓𑀺𑀁 𑀢𑀼𑀫𑁆𑀳𑁂𑀬𑁂𑀯 𑀕𑀫𑀺𑀲𑁆𑀲𑀣𑀸’’𑀢𑀺? ‘‘𑀆𑀫, 𑀅𑀳𑀫𑁂𑀯𑀸’’𑀢𑀺 𑀏𑀯𑀁 𑀯𑀢𑁆𑀯𑀸 𑀲𑀢𑁆𑀣𑀸 𑀯𑀟𑁆𑀠𑀫𑀸𑀦𑀓𑀘𑁆𑀙𑀸𑀬𑀸𑀬 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀧𑀸𑀬𑀸𑀲𑀺.

𑀤𑁂𑀯𑀢𑀸 𑀘𑀺𑀦𑁆𑀢𑀬𑀺𑀁𑀲𑀼 𑁋 ‘‘𑀲𑀢𑁆𑀣𑀸 𑀲𑀸𑀬𑀁 𑀚𑀫𑁆𑀩𑀼𑀓𑀸𑀚𑀻𑀯𑀓𑀲𑁆𑀲 𑀲𑀦𑁆𑀢𑀺𑀓𑀁 𑀕𑀘𑁆𑀙𑀢𑀺, 𑀲𑁄 𑀘 𑀚𑁂𑀕𑀼𑀘𑁆𑀙𑁂 𑀉𑀘𑁆𑀘𑀸𑀭𑀧𑀲𑁆𑀲𑀸𑀯𑀤𑀦𑁆𑀢𑀓𑀝𑁆𑀞𑀓𑀺𑀮𑀺𑀝𑁆𑀞𑁂 𑀧𑀺𑀝𑁆𑀞𑀺𑀧𑀸𑀲𑀸𑀡𑁂 𑀯𑀲𑀢𑀺, 𑀤𑁂𑀯𑀁 𑀯𑀲𑁆𑀲𑀸𑀧𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀅𑀢𑁆𑀢𑀦𑁄 𑀆𑀦𑀼𑀪𑀸𑀯𑁂𑀦 𑀢𑀁 𑀫𑀼𑀳𑀼𑀢𑁆𑀢𑀁𑀬𑁂𑀯 𑀤𑁂𑀯𑀁 𑀯𑀲𑁆𑀲𑀸𑀧𑁂𑀲𑀼𑀁. 𑀧𑀺𑀝𑁆𑀞𑀺𑀧𑀸𑀲𑀸𑀡𑁄 𑀲𑀼𑀘𑀺 𑀦𑀺𑀫𑁆𑀫𑀮𑁄 𑀅𑀳𑁄𑀲𑀺. 𑀅𑀣𑀲𑁆𑀲 𑀉𑀧𑀭𑀺 𑀧𑀜𑁆𑀘𑀯𑀡𑁆𑀡𑀁 𑀧𑀼𑀧𑁆𑀨𑀯𑀲𑁆𑀲𑀁 𑀯𑀲𑁆𑀲𑀸𑀧𑁂𑀲𑀼𑀁. 𑀲𑀢𑁆𑀣𑀸 𑀲𑀸𑀬𑀁 𑀚𑀫𑁆𑀩𑀼𑀓𑀸𑀚𑀻𑀯𑀓𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀚𑀫𑁆𑀩𑀼𑀓𑀸’’𑀢𑀺 𑀲𑀤𑁆𑀤𑀫𑀓𑀸𑀲𑀺. 𑀚𑀫𑁆𑀩𑀼𑀓𑁄 ‘‘𑀓𑁄 𑀦𑀼 𑀔𑁄 𑀏𑀲, 𑀤𑀼𑀚𑁆𑀚𑀦𑁄 𑀫𑀁 𑀚𑀫𑁆𑀩𑀼𑀓𑀯𑀸𑀤𑁂𑀦 𑀯𑀤𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀓𑁄 𑀏𑀲𑁄’’𑀢𑀺 𑀆𑀳. ‘‘𑀅𑀳𑀁 𑀲𑀫𑀡𑁄’’𑀢𑀺. ‘‘𑀓𑀺𑀁 𑀫𑀳𑀸𑀲𑀫𑀡𑀸’’𑀢𑀺? ‘‘𑀅𑀚𑁆𑀚 𑀫𑁂 𑀏𑀓𑀭𑀢𑁆𑀢𑀺𑀁 𑀇𑀥 𑀯𑀲𑀦𑀝𑁆𑀞𑀸𑀦𑀁 𑀤𑁂𑀳𑀻’’𑀢𑀺. ‘‘𑀦𑀢𑁆𑀣𑀺, 𑀫𑀳𑀸𑀲𑀫𑀡, 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀯𑀲𑀦𑀝𑁆𑀞𑀸𑀦’’𑀦𑁆𑀢𑀺. ‘‘𑀚𑀫𑁆𑀩𑀼𑀓, 𑀫𑀸 𑀏𑀯𑀁 𑀓𑀭𑀺, 𑀏𑀓𑀭𑀢𑁆𑀢𑀺𑀁 𑀫𑁂 𑀯𑀲𑀦𑀝𑁆𑀞𑀸𑀦𑀁 𑀤𑁂𑀳𑀺, 𑀧𑀩𑁆𑀩𑀚𑀺𑀢𑀸 𑀦𑀸𑀫 𑀧𑀩𑁆𑀩𑀚𑀺𑀢𑀁 𑀧𑀢𑁆𑀣𑁂𑀦𑁆𑀢𑀺, 𑀫𑀦𑀼𑀲𑁆𑀲𑀸 𑀫𑀦𑀼𑀲𑁆𑀲𑀁, 𑀧𑀲𑀯𑁄 𑀧𑀲𑀯’’𑀦𑁆𑀢𑀺. ‘‘𑀓𑀺𑀁 𑀧𑀦 𑀢𑁆𑀯𑀁 𑀧𑀩𑁆𑀩𑀚𑀺𑀢𑁄’’𑀢𑀺? ‘‘𑀆𑀫, 𑀧𑀩𑁆𑀩𑀚𑀺𑀢𑁄𑀫𑁆𑀳𑀻’’𑀢𑀺. ‘‘𑀲𑀘𑁂 𑀢𑁆𑀯𑀁 𑀧𑀩𑁆𑀩𑀚𑀺𑀢𑁄, 𑀓𑀳𑀁 𑀢𑁂 𑀮𑀸𑀩𑀼𑀓𑀁, 𑀓𑀳𑀁 𑀥𑀽𑀫𑀓𑀝𑀘𑁆𑀙𑀼𑀓𑁄, 𑀓𑀳𑀁 𑀬𑀜𑁆𑀜𑀲𑀼𑀢𑁆𑀢𑀓’’𑀦𑁆𑀢𑀺? ‘‘‘𑀅𑀢𑁆𑀣𑁂𑀢𑀁 𑀫𑀬𑁆𑀳𑀁, 𑀯𑀺𑀲𑀼𑀁 𑀯𑀺𑀲𑀼𑀁 𑀧𑀦 𑀕𑀳𑁂𑀢𑁆𑀯𑀸 𑀯𑀺𑀘𑀭𑀡𑀁 𑀤𑀼𑀓𑁆𑀔’𑀦𑁆𑀢𑀺 𑀅𑀩𑁆𑀪𑀦𑁆𑀢𑀭𑁂𑀦𑁂𑀯 𑀕𑀳𑁂𑀢𑁆𑀯𑀸 𑀘𑀭𑀸𑀫𑀻’’𑀢𑀺. 𑀲𑁄 ‘‘𑀘𑀭𑀺𑀲𑁆𑀲𑀲𑀺 𑀢𑁆𑀯𑀁 𑀏𑀢𑀁 𑀅𑀕𑁆𑀕𑀡𑁆𑀳𑀺𑀢𑁆𑀯𑀸’’𑀢𑀺 𑀓𑀼𑀚𑁆𑀛𑀺. 𑀅𑀣 𑀦𑀁 𑀲𑀢𑁆𑀣𑀸 𑀆𑀳 𑁋 ‘‘𑀳𑁄𑀢𑀼, 𑀚𑀫𑁆𑀩𑀼𑀓, 𑀫𑀸 𑀓𑀼𑀚𑁆𑀛, 𑀯𑀲𑀦𑀝𑁆𑀞𑀸𑀦𑀁 𑀫𑁂 𑀆𑀘𑀺𑀓𑁆𑀔𑀸’’𑀢𑀺. ‘‘𑀦𑀢𑁆𑀣𑀺, 𑀫𑀳𑀸𑀲𑀫𑀡, 𑀏𑀢𑁆𑀣 𑀯𑀲𑀦𑀝𑁆𑀞𑀸𑀦’’𑀦𑁆𑀢𑀺.

𑀲𑀢𑁆𑀣𑀸 𑀢𑀲𑁆𑀲 𑀯𑀲𑀦𑀝𑁆𑀞𑀸𑀦𑀢𑁄 𑀅𑀯𑀺𑀤𑀽𑀭𑁂 𑀏𑀓𑀁 𑀧𑀩𑁆𑀪𑀸𑀭𑀁 𑀅𑀢𑁆𑀣𑀺, 𑀢𑀁 𑀦𑀺𑀤𑁆𑀤𑀺𑀲𑀦𑁆𑀢𑁄 ‘‘𑀏𑀢𑀲𑁆𑀫𑀺𑀁 𑀧𑀩𑁆𑀪𑀸𑀭𑁂 𑀓𑁄 𑀯𑀲𑀢𑀻’’𑀢𑀺 𑀆𑀳. ‘‘𑀦𑀢𑁆𑀣𑀺 𑀓𑁄𑀘𑀺, 𑀫𑀳𑀸𑀲𑀫𑀡𑀸’’𑀢𑀺. ‘‘𑀢𑁂𑀦 𑀳𑀺 𑀏𑀢𑀁 𑀫𑀬𑁆𑀳𑀁 𑀤𑁂𑀳𑀻’’𑀢𑀺. ‘‘𑀢𑁆𑀯𑀜𑁆𑀜𑁂𑀯 𑀚𑀸𑀦, 𑀫𑀳𑀸𑀲𑀫𑀡𑀸’’𑀢𑀺. 𑀲𑀢𑁆𑀣𑀸 𑀧𑀩𑁆𑀪𑀸𑀭𑁂 𑀦𑀺𑀲𑀻𑀤𑀦𑀁 𑀧𑀜𑁆𑀜𑀸𑀧𑁂𑀢𑁆𑀯𑀸 𑀦𑀺𑀲𑀻𑀤𑀺. 𑀧𑀞𑀫𑀬𑀸𑀫𑁂 𑀘𑀢𑁆𑀢𑀸𑀭𑁄 𑀫𑀳𑀸𑀭𑀸𑀚𑀸𑀦𑁄 𑀘𑀢𑀼𑀤𑁆𑀤𑀺𑀲𑀁 𑀏𑀓𑁄𑀪𑀸𑀲𑀁 𑀓𑀭𑁄𑀦𑁆𑀢𑀸 𑀲𑀢𑁆𑀣𑀼 𑀉𑀧𑀝𑁆𑀞𑀸𑀦𑀁 𑀆𑀕𑀫𑀺𑀁𑀲𑀼. 𑀚𑀫𑁆𑀩𑀼𑀓𑁄 𑀑𑀪𑀸𑀲𑀁 𑀤𑀺𑀲𑁆𑀯𑀸 ‘‘𑀓𑁄 𑀑𑀪𑀸𑀲𑁄 𑀦𑀸𑀫𑁂𑀲𑁄’’𑀢𑀺 𑀘𑀺𑀦𑁆𑀢𑁂𑀲𑀺. 𑀫𑀚𑁆𑀛𑀺𑀫𑀬𑀸𑀫𑁂 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 𑀆𑀕𑀫𑀺. 𑀚𑀫𑁆𑀩𑀼𑀓𑁄 𑀢𑀫𑁆𑀧𑀺 𑀤𑀺𑀲𑁆𑀯𑀸 ‘‘𑀓𑁄 𑀦𑀸𑀫𑁂𑀲𑁄’’𑀢𑀺 𑀘𑀺𑀦𑁆𑀢𑁂𑀲𑀺. 𑀧𑀘𑁆𑀙𑀺𑀫𑀬𑀸𑀫𑁂 𑀏𑀓𑀸𑀬 𑀅𑀗𑁆𑀕𑀼𑀮𑀺𑀬𑀸 𑀏𑀓𑀁, 𑀤𑁆𑀯𑀻𑀳𑀺 𑀤𑁆𑀯𑁂, 𑀤𑀲𑀳𑀺 𑀤𑀲 𑀘𑀓𑁆𑀓𑀯𑀸𑀴𑀸𑀦𑀺 𑀑𑀪𑀸𑀲𑁂𑀢𑀼𑀁 𑀲𑀫𑀢𑁆𑀣𑁄 𑀫𑀳𑀸𑀩𑁆𑀭𑀳𑁆𑀫𑀸 𑀲𑀓𑀮𑀁 𑀅𑀭𑀜𑁆𑀜𑀁 𑀏𑀓𑁄𑀪𑀸𑀲𑀁 𑀓𑀭𑁄𑀦𑁆𑀢𑁄 𑀆𑀕𑀫𑀺. 𑀚𑀫𑁆𑀩𑀼𑀓𑁄 𑀢𑀫𑁆𑀧𑀺 𑀤𑀺𑀲𑁆𑀯𑀸 ‘‘𑀓𑁄 𑀦𑀼 𑀔𑁄 𑀏𑀲𑁄’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀧𑀸𑀢𑁄𑀯 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀧𑀝𑀺𑀲𑀦𑁆𑀣𑀸𑀭𑀁 𑀓𑀢𑁆𑀯𑀸 𑀏𑀓𑀫𑀦𑁆𑀢𑀁 𑀞𑀺𑀢𑁄 𑀲𑀢𑁆𑀣𑀸𑀭𑀁 𑀧𑀼𑀘𑁆𑀙𑀺 𑁋 ‘‘𑀫𑀳𑀸𑀲𑀫𑀡, 𑀢𑀼𑀫𑁆𑀳𑀸𑀓𑀁 𑀲𑀦𑁆𑀢𑀺𑀓𑀁 𑀘𑀢𑀲𑁆𑀲𑁄 𑀤𑀺𑀲𑀸 𑀑𑀪𑀸𑀲𑁂𑀦𑁆𑀢𑁄 𑀓𑁂 𑀆𑀕𑀢𑀸’’𑀢𑀺? ‘‘𑀘𑀢𑁆𑀢𑀸𑀭𑁄 𑀫𑀳𑀸𑀭𑀸𑀚𑀸𑀦𑁄’’𑀢𑀺. ‘‘𑀓𑀺𑀁 𑀓𑀸𑀭𑀡𑀸’’𑀢𑀺? ‘‘𑀫𑀁 𑀉𑀧𑀝𑁆𑀞𑀸𑀢𑀼’’𑀦𑁆𑀢𑀺. ‘‘𑀓𑀺𑀁 𑀧𑀦 𑀢𑁆𑀯𑀁 𑀘𑀢𑀽𑀳𑀺 𑀫𑀳𑀸𑀭𑀸𑀚𑁂𑀳𑀺 𑀉𑀢𑁆𑀢𑀭𑀺𑀢𑀭𑁄’’𑀢𑀺? ‘‘𑀆𑀫, 𑀚𑀫𑁆𑀩𑀼𑀓, 𑀫𑀳𑀸𑀭𑀸𑀚𑀽𑀦𑀫𑁆𑀧𑀺 𑀅𑀢𑀺𑀭𑀸𑀚𑀸’’𑀢𑀺. ‘‘𑀫𑀚𑁆𑀛𑀺𑀫𑀬𑀸𑀫𑁂 𑀧𑀦 𑀓𑁄 𑀆𑀕𑀢𑁄’’𑀢𑀺? ‘‘𑀲𑀓𑁆𑀓𑁄 𑀤𑁂𑀯𑀭𑀸𑀚𑀸, 𑀚𑀫𑁆𑀩𑀼𑀓𑀸’’𑀢𑀺. ‘‘𑀓𑀺𑀁 𑀓𑀸𑀭𑀡𑀸’’𑀢𑀺? ‘‘𑀫𑀁 𑀉𑀧𑀝𑁆𑀞𑀸𑀢𑀼𑀫𑁂𑀯𑀸’’𑀢𑀺. ‘‘𑀓𑀺𑀁 𑀧𑀦 𑀢𑁆𑀯𑀁 𑀲𑀓𑁆𑀓𑀤𑁂𑀯𑀭𑀸𑀚𑀢𑁄𑀧𑀺 𑀉𑀢𑁆𑀢𑀭𑀺𑀢𑀭𑁄’’𑀢𑀺? ‘‘𑀆𑀫, 𑀚𑀫𑁆𑀩𑀼𑀓, 𑀲𑀓𑁆𑀓𑀢𑁄𑀧𑀺 𑀉𑀢𑁆𑀢𑀭𑀺𑀢𑀭𑁄𑀫𑁆𑀳𑀺, 𑀏𑀲𑁄 𑀧𑀦 𑀫𑀬𑁆𑀳𑀁 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑁄 𑀓𑀧𑁆𑀧𑀺𑀬𑀓𑀸𑀭𑀓𑀲𑀸𑀫𑀡𑁂𑀭𑀲𑀤𑀺𑀲𑁄’’𑀢𑀺. ‘‘𑀧𑀘𑁆𑀙𑀺𑀫𑀬𑀸𑀫𑁂 𑀲𑀓𑀮𑀁 𑀅𑀭𑀜𑁆𑀜𑀁 𑀑𑀪𑀸𑀲𑁂𑀢𑁆𑀯𑀸 𑀓𑁄 𑀆𑀕𑀢𑁄’’𑀢𑀺? ‘‘𑀬𑀁 𑀮𑁄𑀓𑁂 𑀩𑁆𑀭𑀸𑀳𑁆𑀫𑀡𑀸𑀤𑀬𑁄 𑀔𑀺𑀧𑀺𑀢𑁆𑀯𑀸 𑀧𑀓𑁆𑀔𑀮𑀺𑀢𑁆𑀯𑀸 ‘𑀦𑀫𑁄 𑀫𑀳𑀸𑀩𑁆𑀭𑀳𑁆𑀫𑀼𑀦𑁄’𑀢𑀺 𑀯𑀤𑀦𑁆𑀢𑀺, 𑀲𑁄 𑀏𑀯 𑀫𑀳𑀸𑀩𑁆𑀭𑀳𑁆𑀫𑀸’’𑀢𑀺. ‘‘𑀓𑀺𑀁 𑀧𑀦 𑀢𑁆𑀯𑀁 𑀫𑀳𑀸𑀩𑁆𑀭𑀳𑁆𑀫𑀢𑁄𑀧𑀺 𑀉𑀢𑁆𑀢𑀭𑀺𑀢𑀭𑁄’’𑀢𑀺? ‘‘𑀆𑀫, 𑀚𑀫𑁆𑀩𑀼𑀓, 𑀅𑀳𑀜𑁆𑀳𑀺 𑀩𑁆𑀭𑀳𑁆𑀫𑀼𑀦𑀸𑀧𑀺 𑀅𑀢𑀺𑀩𑁆𑀭𑀳𑁆𑀫𑀸’’𑀢𑀺. ‘‘𑀅𑀘𑁆𑀙𑀭𑀺𑀬𑁄𑀲𑀺 𑀢𑁆𑀯𑀁, 𑀫𑀳𑀸𑀲𑀫𑀡, 𑀫𑀬𑁆𑀳𑀁 𑀧𑀦 𑀧𑀜𑁆𑀘 𑀧𑀜𑁆𑀜𑀸𑀲 𑀯𑀲𑁆𑀲𑀸𑀦𑀺 𑀇𑀥 𑀯𑀲𑀦𑁆𑀢𑀲𑁆𑀲 𑀏𑀢𑁂𑀲𑀼 𑀏𑀓𑁄𑀧𑀺 𑀫𑀁 𑀉𑀧𑀝𑁆𑀞𑀸𑀢𑀼𑀁 𑀦𑀸𑀕𑀢𑀧𑀼𑀩𑁆𑀩𑁄. 𑀅𑀳𑀜𑁆𑀳𑀺 𑀏𑀢𑁆𑀢𑀓𑀁 𑀅𑀤𑁆𑀥𑀸𑀦𑀁 𑀯𑀸𑀢𑀪𑀓𑁆𑀔𑁄 𑀳𑀼𑀢𑁆𑀯𑀸 𑀞𑀺𑀢𑀓𑁄𑀯 𑀯𑀻𑀢𑀺𑀦𑀸𑀫𑁂𑀲𑀺𑀁, 𑀦 𑀢𑀸𑀯 𑀢𑁂 𑀫𑀬𑁆𑀳𑀁 𑀉𑀧𑀝𑁆𑀞𑀸𑀦𑀁 𑀆𑀕𑀢𑀧𑀼𑀩𑁆𑀩𑀸’’𑀢𑀺.

𑀅𑀣 𑀦𑀁 𑀲𑀢𑁆𑀣𑀸 𑀆𑀳 𑁋 𑀚𑀫𑁆𑀩𑀼𑀓, 𑀢𑁆𑀯𑀁 𑀮𑁄𑀓𑀲𑁆𑀫𑀺𑀁 𑀅𑀦𑁆𑀥𑀩𑀸𑀮𑀁 𑀫𑀳𑀸𑀚𑀦𑀁 𑀯𑀜𑁆𑀘𑀬𑀫𑀸𑀦𑁄 𑀫𑀫𑁆𑀧𑀺 𑀯𑀜𑁆𑀘𑁂𑀢𑀼𑀓𑀸𑀫𑁄 𑀚𑀸𑀢𑁄, 𑀦𑀦𑀼 𑀢𑁆𑀯𑀁 𑀧𑀜𑁆𑀘𑀧𑀜𑁆𑀜𑀸𑀲 𑀯𑀲𑁆𑀲𑀸𑀦𑀺 𑀕𑀽𑀣𑀫𑁂𑀯 𑀔𑀸𑀤𑀺, 𑀪𑀽𑀫𑀺𑀬𑀁𑀬𑁂𑀯 𑀦𑀺𑀧𑀚𑁆𑀚𑀺, 𑀦𑀕𑁆𑀕𑁄 𑀳𑀼𑀢𑁆𑀯𑀸 𑀯𑀺𑀘𑀭𑀺, 𑀢𑀸𑀮𑀝𑁆𑀞𑀺𑀔𑀡𑁆𑀟𑁂𑀦 𑀓𑁂𑀲𑁂 𑀮𑀼𑀜𑁆𑀘𑀺. 𑀅𑀣 𑀘 𑀧𑀦 𑀮𑁄𑀓𑀁 𑀯𑀜𑁆𑀘𑁂𑀦𑁆𑀢𑁄 ‘‘𑀅𑀳𑀁 𑀯𑀸𑀢𑀪𑀓𑁆𑀔𑁄, 𑀏𑀓𑀧𑀸𑀤𑁂𑀦 𑀢𑀺𑀝𑁆𑀞𑀸𑀫𑀺, 𑀦 𑀦𑀺𑀲𑀻𑀤𑀸𑀫𑀺, 𑀦 𑀦𑀺𑀧𑀚𑁆𑀚𑀸𑀫𑀻’’𑀢𑀺 𑀯𑀤𑁂𑀲𑀺, ‘‘𑀫𑀫𑀫𑁆𑀧𑀺 𑀯𑀜𑁆𑀘𑁂𑀢𑀼𑀓𑀸𑀫𑁄𑀲𑀺 𑀧𑀼𑀩𑁆𑀩𑁂𑀧𑀺 𑀢𑁆𑀯𑀁 𑀧𑀸𑀧𑀺𑀓𑀁 𑀮𑀸𑀫𑀺𑀓𑀁 𑀤𑀺𑀝𑁆𑀞𑀺𑀁 𑀦𑀺𑀲𑁆𑀲𑀸𑀬 𑀏𑀢𑁆𑀢𑀓𑀁 𑀓𑀸𑀮𑀁 𑀕𑀽𑀣𑀪𑀓𑁆𑀔𑁄 𑀪𑀽𑀫𑀺𑀲𑀬𑁄 𑀦𑀕𑁆𑀕𑁄 𑀯𑀺𑀘𑀭𑀦𑁆𑀢𑁄 𑀢𑀸𑀮𑀝𑁆𑀞𑀺𑀔𑀡𑁆𑀟𑁂𑀦 𑀓𑁂𑀲𑀮𑀼𑀜𑁆𑀘𑀦𑀁 𑀧𑀢𑁆𑀢𑁄, 𑀇𑀤𑀸𑀦𑀺𑀧𑀺 𑀧𑀸𑀧𑀺𑀓𑀁 𑀮𑀸𑀫𑀺𑀓𑀁 𑀤𑀺𑀝𑁆𑀞𑀺𑀫𑁂𑀯 𑀕𑀡𑁆𑀳𑀸𑀲𑀻’’𑀢𑀺. ‘‘𑀓𑀺𑀁 𑀧𑀦 𑀫𑀬𑀸 𑀓𑀢𑀁, 𑀫𑀳𑀸𑀲𑀫𑀡𑀸’’𑀢𑀺? 𑀅𑀣𑀲𑁆𑀲 𑀲𑀢𑁆𑀣𑀸 𑀧𑀼𑀩𑁆𑀩𑁂 𑀓𑀢𑀓𑀫𑁆𑀫𑀁 𑀆𑀘𑀺𑀓𑁆𑀔𑀺. 𑀢𑀲𑁆𑀲 𑀲𑀢𑁆𑀣𑀭𑀺 𑀓𑀣𑁂𑀦𑁆𑀢𑁂𑀬𑁂𑀯 𑀲𑀁𑀯𑁂𑀕𑁄 𑀉𑀧𑁆𑀧𑀚𑁆𑀚𑀺, 𑀳𑀺𑀭𑁄𑀢𑁆𑀢𑀧𑁆𑀧𑀁 𑀉𑀧𑀝𑁆𑀞𑀺𑀢𑀁, 𑀲𑁄 𑀉𑀓𑁆𑀓𑀼𑀝𑀺𑀓𑁄 𑀦𑀺𑀲𑀻𑀤𑀺. 𑀅𑀣𑀲𑁆𑀲 𑀲𑀢𑁆𑀣𑀸 𑀉𑀤𑀓𑀲𑀸𑀝𑀺𑀓𑀁 𑀔𑀺𑀧𑀺𑀢𑁆𑀯𑀸 𑀅𑀤𑀸𑀲𑀺. 𑀲𑁄 𑀢𑀁 𑀦𑀺𑀯𑀸𑀲𑁂𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀲𑀢𑁆𑀣𑀸𑀧𑀺𑀲𑁆𑀲 𑀅𑀦𑀼𑀧𑀼𑀩𑁆𑀩𑀺𑀁 𑀓𑀣𑀁 𑀓𑀣𑁂𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀲𑁄 𑀤𑁂𑀲𑀦𑀸𑀯𑀲𑀸𑀦𑁂 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀧𑀩𑁆𑀩𑀚𑁆𑀚𑀜𑁆𑀘 𑀉𑀧𑀲𑀫𑁆𑀧𑀤𑀜𑁆𑀘 𑀬𑀸𑀘𑀺. 𑀏𑀢𑁆𑀢𑀸𑀯𑀢𑀸 𑀢𑀲𑁆𑀲 𑀧𑀼𑀭𑀺𑀫𑀓𑀫𑁆𑀫𑀁 𑀧𑀭𑀺𑀓𑁆𑀔𑀻𑀡𑀁. 𑀅𑀬𑀜𑁆𑀳𑀺 𑀔𑀻𑀡𑀸𑀲𑀯𑀫𑀳𑀸𑀣𑁂𑀭𑀁 𑀘𑀢𑀽𑀳𑀺 𑀅𑀓𑁆𑀓𑁄𑀲𑁂𑀳𑀺 𑀅𑀓𑁆𑀓𑁄𑀲𑀺𑀢𑁆𑀯𑀸 𑀬𑀸𑀯𑀸𑀬𑀁 𑀫𑀳𑀸𑀧𑀣𑀯𑀻 𑀢𑀺𑀕𑀸𑀯𑀼𑀢𑀸𑀥𑀺𑀓𑀁 𑀬𑁄𑀚𑀦𑀁 𑀉𑀲𑁆𑀲𑀦𑁆𑀦𑀸, 𑀢𑀸𑀯 𑀅𑀯𑀻𑀘𑀺𑀫𑁆𑀳𑀺 𑀧𑀘𑁆𑀘𑀺𑀢𑁆𑀯𑀸 𑀢𑀢𑁆𑀣 𑀧𑀓𑁆𑀓𑀸𑀯𑀲𑁂𑀲𑁂𑀦 𑀧𑀜𑁆𑀘𑀧𑀜𑁆𑀜𑀸𑀲 𑀯𑀲𑁆𑀲𑀸𑀦𑀺 𑀇𑀫𑀁 𑀯𑀺𑀧𑁆𑀧𑀓𑀸𑀭𑀁 𑀧𑀢𑁆𑀢𑁄. 𑀢𑁂𑀦𑀲𑁆𑀲 𑀢𑀁 𑀓𑀫𑁆𑀫𑀁 𑀔𑀻𑀡𑀁. 𑀯𑀻𑀲𑀢𑀺 𑀧𑀦 𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀇𑀫𑀺𑀦𑀸 𑀓𑀢𑀲𑁆𑀲 𑀲𑀫𑀡𑀥𑀫𑁆𑀫𑀲𑁆𑀲 𑀨𑀮𑀁 𑀦𑀸𑀲𑁂𑀢𑀼𑀁 𑀦 𑀲𑀓𑁆𑀓𑀸. 𑀢𑀲𑁆𑀫𑀸 𑀲𑀢𑁆𑀣𑀸 𑀤𑀓𑁆𑀔𑀺𑀡𑀳𑀢𑁆𑀣𑀁 𑀧𑀲𑀸𑀭𑁂𑀢𑁆𑀯𑀸 ‘‘𑀏𑀳𑀺, 𑀪𑀺𑀓𑁆𑀔𑀼, 𑀘𑀭 𑀩𑁆𑀭𑀳𑁆𑀫𑀘𑀭𑀺𑀬𑀁 𑀲𑀫𑁆𑀫𑀸 𑀤𑀼𑀓𑁆𑀔𑀲𑁆𑀲 𑀅𑀦𑁆𑀢𑀓𑀺𑀭𑀺𑀬𑀸𑀬𑀸’’𑀢𑀺 𑀆𑀳. 𑀢𑀸𑀯𑀤𑁂𑀯𑀲𑁆𑀲 𑀕𑀺𑀳𑀺𑀮𑀺𑀗𑁆𑀕𑀁 𑀅𑀦𑁆𑀢𑀭𑀥𑀸𑀬𑀺 𑀅𑀝𑁆𑀞𑀧𑀭𑀺𑀓𑁆𑀔𑀸𑀭𑀥𑀭𑁄 𑀲𑀝𑁆𑀞𑀺𑀯𑀲𑁆𑀲𑀺𑀓𑀫𑀳𑀸𑀣𑁂𑀭𑁄 𑀯𑀺𑀬 𑀅𑀳𑁄𑀲𑀺.

𑀅𑀗𑁆𑀕𑀫𑀕𑀥𑀯𑀸𑀲𑀻𑀦𑀁 𑀢𑀲𑁆𑀲 𑀲𑀓𑁆𑀓𑀸𑀭𑀁 𑀕𑀳𑁂𑀢𑁆𑀯𑀸 𑀆𑀕𑀢𑀤𑀺𑀯𑀲𑁄 𑀓𑀺𑀭𑁂𑀲, 𑀢𑀲𑁆𑀫𑀸 𑀉𑀪𑀬𑀭𑀝𑁆𑀞𑀯𑀸𑀲𑀺𑀦𑁄 𑀲𑀓𑁆𑀓𑀸𑀭𑀁 𑀕𑀳𑁂𑀢𑁆𑀯𑀸 𑀆𑀕𑀢𑀸 𑀢𑀣𑀸𑀕𑀢𑀁 𑀤𑀺𑀲𑁆𑀯𑀸 ‘‘𑀓𑀺𑀁 𑀦𑀼 𑀔𑁄 𑀅𑀫𑁆𑀳𑀸𑀓𑀁 𑀅𑀬𑁆𑀬𑁄 𑀚𑀫𑁆𑀩𑀼𑀓𑁄 𑀫𑀳𑀸, 𑀉𑀤𑀸𑀳𑀼 𑀲𑀫𑀡𑁄 𑀕𑁄𑀢𑀫𑁄’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀲𑀘𑁂 𑀲𑀫𑀡𑁄 𑀕𑁄𑀢𑀫𑁄 𑀫𑀳𑀸 𑀪𑀯𑁂𑀬𑁆𑀬, 𑀅𑀬𑀁 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀲𑀦𑁆𑀢𑀺𑀓𑀁 𑀕𑀘𑁆𑀙𑁂𑀬𑁆𑀬, 𑀚𑀫𑁆𑀩𑀼𑀓𑀸𑀚𑀻𑀯𑀓𑀲𑁆𑀲 𑀧𑀦 𑀫𑀳𑀦𑁆𑀢𑀢𑀸𑀬 𑀲𑀫𑀡𑁄 𑀕𑁄𑀢𑀫𑁄 𑀇𑀫𑀲𑁆𑀲 𑀲𑀦𑁆𑀢𑀺𑀓𑀁 𑀆𑀕𑀢𑁄’’𑀢𑀺 𑀘𑀺𑀦𑁆𑀢𑀬𑀺𑀁𑀲𑀼. 𑀲𑀢𑁆𑀣𑀸 𑀫𑀳𑀸𑀚𑀦𑀲𑁆𑀲 𑀧𑀭𑀺𑀯𑀺𑀢𑀓𑁆𑀓𑀁 𑀜𑀢𑁆𑀯𑀸, ‘‘𑀚𑀫𑁆𑀩𑀼𑀓, 𑀢𑀯 𑀉𑀧𑀝𑁆𑀞𑀸𑀓𑀸𑀦𑀁 𑀓𑀗𑁆𑀔𑀁 𑀙𑀺𑀦𑁆𑀤𑀸𑀳𑀻’’𑀢𑀺 𑀆𑀳, 𑀲𑁄 ‘‘𑀅𑀳𑀫𑁆𑀧𑀺, 𑀪𑀦𑁆𑀢𑁂, 𑀏𑀢𑁆𑀢𑀓𑀫𑁂𑀯 𑀧𑀘𑁆𑀘𑀸𑀲𑀻𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀉𑀝𑁆𑀞𑀸𑀬 𑀢𑀸𑀮𑀧𑁆𑀧𑀫𑀸𑀡𑀁 𑀯𑁂𑀳𑀸𑀲𑀁 𑀅𑀩𑁆𑀪𑀼𑀕𑁆𑀕𑀦𑁆𑀢𑁆𑀯𑀸 ‘‘𑀲𑀢𑁆𑀣𑀸 𑀫𑁂, 𑀪𑀦𑁆𑀢𑁂 𑀪𑀕𑀯𑀸, 𑀲𑀸𑀯𑀓𑁄𑀳𑀫𑀲𑁆𑀫𑀻’’𑀢𑀺 𑀯𑀢𑁆𑀯𑀸 𑀑𑀭𑀼𑀬𑁆𑀳 𑀯𑀦𑁆𑀤𑀺𑀢𑁆𑀯𑀸 𑀧𑀼𑀦 𑀤𑁆𑀯𑀺𑀢𑀸𑀮𑀫𑀢𑁆𑀢𑀁 𑀢𑀺𑀢𑀸𑀮𑀫𑀢𑁆𑀢𑀦𑁆𑀢𑀺 𑀏𑀯𑀁 𑀲𑀢𑁆𑀢𑀢𑀸𑀮𑀫𑀢𑁆𑀢𑀁 𑀯𑁂𑀳𑀸𑀲𑀁 𑀅𑀩𑁆𑀪𑀼𑀕𑁆𑀕𑀦𑁆𑀢𑁆𑀯𑀸 𑀑𑀭𑀼𑀬𑁆𑀳 𑀅𑀢𑁆𑀢𑀦𑁄 𑀲𑀸𑀯𑀓𑀪𑀸𑀯𑀁 𑀚𑀸𑀦𑀸𑀧𑁂𑀲𑀺. 𑀢𑀁 𑀤𑀺𑀲𑁆𑀯𑀸 𑀫𑀳𑀸𑀚𑀦𑁄 ‘‘𑀅𑀳𑁄 𑀩𑀼𑀤𑁆𑀥𑀸 𑀦𑀸𑀫 𑀅𑀘𑁆𑀙𑀭𑀺𑀬𑀸 𑀅𑀦𑁄𑀧𑀫𑀕𑀼𑀡𑀸’’𑀢𑀺 𑀘𑀺𑀦𑁆𑀢𑁂𑀲𑀺. 𑀲𑀢𑁆𑀣𑀸 𑀫𑀳𑀸𑀚𑀦𑁂𑀦 𑀲𑀤𑁆𑀥𑀺𑀁 𑀓𑀣𑁂𑀦𑁆𑀢𑁄 𑀏𑀯𑀫𑀸𑀳 𑁋 ‘‘𑀅𑀬𑀁 𑀏𑀢𑁆𑀢𑀓𑀁 𑀓𑀸𑀮𑀁 𑀢𑀼𑀫𑁆𑀳𑁂𑀳𑀺 𑀆𑀪𑀢𑀁 𑀲𑀓𑁆𑀓𑀸𑀭𑀁 𑀓𑀼𑀲𑀕𑁆𑀕𑁂𑀦 𑀚𑀺𑀯𑁆𑀳𑀕𑁆𑀕𑁂 𑀞𑀧𑁂𑀢𑁆𑀯𑀸 ‘𑀢𑀧𑀘𑀭𑀡𑀁 𑀧𑀽𑀭𑁂𑀫𑀻’𑀢𑀺 𑀇𑀥 𑀦𑀺𑀯𑀼𑀝𑁆𑀞𑁄, 𑀲𑀘𑁂𑀧𑀺 𑀇𑀫𑀺𑀦𑀸 𑀉𑀧𑀸𑀬𑁂𑀦 𑀯𑀲𑁆𑀲𑀲𑀢𑀁 𑀢𑀧𑀘𑀭𑀡𑀁 𑀧𑀽𑀭𑁂𑀬𑁆𑀬, 𑀬𑀸 𑀘𑀲𑁆𑀲 𑀇𑀤𑀸𑀦𑀺 𑀓𑀸𑀮𑀁 𑀯𑀸 𑀪𑀢𑁆𑀢𑀁 𑀯𑀸 𑀓𑀼𑀓𑁆𑀓𑀼𑀘𑁆𑀘𑀸𑀬𑀺𑀢𑁆𑀯𑀸 𑀅𑀪𑀼𑀜𑁆𑀚𑀦𑁆𑀢𑀲𑁆𑀲 𑀪𑀢𑁆𑀢𑀘𑁆𑀙𑁂𑀤𑀦𑀓𑀼𑀲𑀮𑀘𑁂𑀢𑀦𑀸, 𑀢𑀲𑁆𑀲𑀸 𑀢𑀁 𑀢𑀧𑀘𑀭𑀡𑀁 𑀲𑁄𑀴𑀲𑀺𑀁 𑀓𑀮𑀫𑁆𑀧𑀺 𑀦 𑀅𑀕𑁆𑀖𑀢𑀻’’𑀢𑀺 𑀅𑀦𑀼𑀲𑀦𑁆𑀥𑀺𑀁 𑀖𑀝𑁂𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳 𑁋

𑁭𑁦. ‘‘𑀫𑀸𑀲𑁂 𑀫𑀸𑀲𑁂 𑀓𑀼𑀲𑀕𑁆𑀕𑁂𑀦, 𑀩𑀸𑀮𑁄 𑀪𑀼𑀜𑁆𑀚𑁂𑀬𑁆𑀬 𑀪𑁄𑀚𑀦𑀁;

𑀦 𑀲𑁄 𑀲𑀗𑁆𑀔𑀸𑀢𑀥𑀫𑁆𑀫𑀸𑀦𑀁, 𑀓𑀮𑀁 𑀅𑀕𑁆𑀖𑀢𑀺 𑀲𑁄𑀴𑀲𑀺’’𑀦𑁆𑀢𑀺.

𑀢𑀲𑁆𑀲𑀢𑁆𑀣𑁄 𑁋 𑀲𑀘𑁂 𑀩𑀸𑀮𑁄 𑀅𑀧𑀭𑀺𑀜𑁆𑀜𑀸𑀢𑀥𑀫𑁆𑀫𑁄 𑀲𑀻𑀮𑀸𑀤𑀺𑀕𑀼𑀡𑀸 𑀧𑀭𑀺𑀩𑀸𑀳𑀺𑀭𑁄 𑀢𑀺𑀢𑁆𑀣𑀸𑀬𑀢𑀦𑁂 𑀧𑀩𑁆𑀩𑀚𑀺𑀢𑁄 ‘‘𑀢𑀧𑀘𑀭𑀡𑀁 𑀧𑀽𑀭𑁂𑀲𑁆𑀲𑀸𑀫𑀻’’𑀢𑀺 𑀫𑀸𑀲𑁂 𑀫𑀸𑀲𑁂 𑀧𑀢𑁆𑀢𑁂 𑀓𑀼𑀲𑀕𑁆𑀕𑁂𑀦 𑀪𑁄𑀚𑀦𑀁 𑀪𑀼𑀜𑁆𑀚𑀦𑁆𑀢𑁄 𑀯𑀲𑁆𑀲𑀲𑀢𑀁 𑀪𑀼𑀜𑁆𑀚𑁂𑀬𑁆𑀬 𑀪𑁄𑀚𑀦𑀁. 𑀦 𑀲𑁄 𑀲𑀗𑁆𑀔𑀸𑀢𑀥𑀫𑁆𑀫𑀸𑀦𑀁, 𑀓𑀮𑀁 𑀅𑀕𑁆𑀖𑀢𑀺 𑀲𑁄𑀴𑀲𑀺𑀦𑁆𑀢𑀺 𑀲𑀗𑁆𑀔𑀸𑀢𑀥𑀫𑁆𑀫𑀸 𑀯𑀼𑀘𑁆𑀘𑀦𑁆𑀢𑀺 𑀜𑀸𑀢𑀥𑀫𑁆𑀫𑀸 𑀢𑀼𑀮𑀺𑀢𑀥𑀫𑁆𑀫𑀸. 𑀢𑁂𑀲𑀼 𑀳𑁂𑀝𑁆𑀞𑀺𑀫𑀓𑁄𑀝𑀺𑀬𑀸 𑀲𑁄𑀢𑀸𑀧𑀦𑁆𑀦𑁄 𑀲𑀗𑁆𑀔𑀸𑀢𑀥𑀫𑁆𑀫𑁄, 𑀉𑀧𑀭𑀺𑀫𑀓𑁄𑀝𑀺𑀬𑀸 𑀔𑀻𑀡𑀸𑀲𑀯𑁄. 𑀇𑀫𑁂𑀲𑀁 𑀲𑀗𑁆𑀔𑀸𑀢𑀥𑀫𑁆𑀫𑀸𑀦𑀁 𑀲𑁄 𑀩𑀸𑀮𑁄 𑀓𑀮𑀁 𑀦 𑀅𑀕𑁆𑀖𑀢𑀺 𑀲𑁄𑀴𑀲𑀺𑀦𑁆𑀢𑀺 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑀸 𑀤𑁂𑀲𑀦𑀸. 𑀅𑀬𑀁 𑀧𑀦𑁂𑀢𑁆𑀣 𑀅𑀢𑁆𑀣𑁄 𑁋 𑀬𑀸 𑀘𑀲𑁆𑀲 𑀢𑀣𑀸 𑀢𑀧𑀘𑀭𑀡𑀁 𑀧𑀽𑀭𑁂𑀦𑁆𑀢𑀲𑁆𑀲 𑀯𑀲𑁆𑀲𑀲𑀢𑀁 𑀘𑁂𑀢𑀦𑀸 𑀬𑀸 𑀘 𑀲𑀗𑁆𑀔𑀸𑀢𑀥𑀫𑁆𑀫𑀸𑀦𑀁 𑀓𑀸𑀮𑀁 𑀯𑀸 𑀪𑀢𑁆𑀢𑀁 𑀯𑀸 𑀓𑀼𑀓𑁆𑀓𑀼𑀘𑁆𑀘𑀸𑀬𑀺𑀢𑁆𑀯𑀸 𑀅𑀪𑀼𑀜𑁆𑀚𑀦𑁆𑀢𑀸𑀦𑀁 𑀏𑀓𑀸 𑀪𑀢𑁆𑀢𑀘𑁆𑀙𑁂𑀤𑀦𑀓𑀼𑀲𑀮𑀘𑁂𑀢𑀦𑀸, 𑀢𑀲𑁆𑀲𑀸 𑀘𑁂𑀢𑀦𑀸𑀬 𑀲𑀸 𑀢𑀸𑀯 𑀤𑀻𑀖𑀭𑀢𑁆𑀢𑀁 𑀧𑀯𑀢𑁆𑀢𑀘𑁂𑀢𑀦𑀸 𑀲𑁄𑀴𑀲𑀺𑀁 𑀓𑀮𑀁 𑀦 𑀅𑀕𑁆𑀖𑀢𑀺. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀁 𑀢𑀲𑁆𑀲𑀸 𑀲𑀗𑁆𑀔𑀸𑀢𑀥𑀫𑁆𑀫𑀸𑀦𑀁 𑀘𑁂𑀢𑀦𑀸𑀬 𑀨𑀮𑀁, 𑀢𑀁 𑀲𑁄𑀴𑀲 𑀓𑁄𑀝𑁆𑀞𑀸𑀲𑁂 𑀓𑀢𑁆𑀯𑀸 𑀢𑀢𑁄 𑀏𑀓𑁂𑀓𑀁 𑀧𑀼𑀦 𑀲𑁄𑀴𑀲 𑀲𑁄𑀴𑀲 𑀓𑁄𑀝𑁆𑀞𑀸𑀲𑁂 𑀓𑀢𑁆𑀯𑀸 𑀢𑀢𑁄 𑀏𑀓𑀲𑁆𑀲 𑀓𑁄𑀝𑁆𑀞𑀸𑀲𑀲𑁆𑀲 𑀬𑀁 𑀨𑀮𑀁, 𑀢𑀤𑁂𑀯 𑀢𑀲𑁆𑀲 𑀩𑀸𑀮𑀲𑁆𑀲 𑀢𑀧𑀘𑀭𑀡𑀢𑁄 𑀫𑀳𑀧𑁆𑀨𑀮𑀢𑀭𑀦𑁆𑀢𑀺.

𑀤𑁂𑀲𑀦𑀸𑀯𑀲𑀸𑀦𑁂 𑀘𑀢𑀼𑀭𑀸𑀲𑀻𑀢𑀺𑀬𑀸 𑀧𑀸𑀡𑀲𑀳𑀲𑁆𑀲𑀸𑀦𑀁 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀻𑀢𑀺.

𑀚𑀫𑁆𑀩𑀼𑀓𑀢𑁆𑀣𑁂𑀭𑀯𑀢𑁆𑀣𑀼 𑀏𑀓𑀸𑀤𑀲𑀫𑀁.