𑁮. 𑀯𑀺𑀲𑀸𑀔𑀸𑀯𑀢𑁆𑀣𑀼

𑀬𑀣𑀸𑀧𑀺 𑀧𑀼𑀧𑁆𑀨𑀭𑀸𑀲𑀺𑀫𑁆𑀳𑀸𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀲𑀸𑀯𑀢𑁆𑀣𑀺𑀬𑀁 𑀉𑀧𑀦𑀺𑀲𑁆𑀲𑀸𑀬 𑀧𑀼𑀩𑁆𑀩𑀸𑀭𑀸𑀫𑁂 𑀯𑀺𑀳𑀭𑀦𑁆𑀢𑁄 𑀯𑀺𑀲𑀸𑀔𑀁 𑀉𑀧𑀸𑀲𑀺𑀓𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀲𑀸 𑀓𑀺𑀭 𑀅𑀗𑁆𑀕𑀭𑀝𑁆𑀞𑁂 𑀪𑀤𑁆𑀤𑀺𑀬𑀦𑀕𑀭𑁂 𑀫𑁂𑀡𑁆𑀟𑀓𑀲𑁂𑀝𑁆𑀞𑀺𑀧𑀼𑀢𑁆𑀢𑀲𑁆𑀲 𑀥𑀦𑀜𑁆𑀘𑀬𑀲𑁂𑀝𑁆𑀞𑀺𑀦𑁄 𑀅𑀕𑁆𑀕𑀫𑀳𑁂𑀲𑀺𑀬𑀸 𑀲𑀼𑀫𑀦𑀤𑁂𑀯𑀺𑀬𑀸 𑀓𑀼𑀘𑁆𑀙𑀺𑀲𑁆𑀫𑀺𑀁 𑀦𑀺𑀩𑁆𑀩𑀢𑁆𑀢𑀺. 𑀢𑀲𑁆𑀲𑀸 𑀲𑀢𑁆𑀢𑀯𑀲𑁆𑀲𑀺𑀓𑀓𑀸𑀮𑁂 𑀲𑀢𑁆𑀣𑀸 𑀲𑁂𑀮𑀩𑁆𑀭𑀸𑀳𑁆𑀫𑀡𑀸𑀤𑀻𑀦𑀁 𑀩𑁄𑀥𑀦𑁂𑀬𑁆𑀬𑀩𑀦𑁆𑀥𑀯𑀸𑀦𑀁 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀤𑀁 𑀤𑀺𑀲𑁆𑀯𑀸 𑀫𑀳𑀸𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀸𑀭𑁄 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀢𑀁 𑀦𑀕𑀭𑀁 𑀧𑀸𑀧𑀼𑀡𑀺.

𑀢𑀲𑁆𑀫𑀺𑀜𑁆𑀘 𑀲𑀫𑀬𑁂 𑀫𑁂𑀡𑁆𑀟𑀓𑁄, 𑀕𑀳𑀧𑀢𑀺, 𑀢𑀲𑁆𑀫𑀺𑀁 𑀦𑀕𑀭𑁂 𑀧𑀜𑁆𑀘𑀦𑁆𑀦𑀁 𑀫𑀳𑀸𑀧𑀼𑀜𑁆𑀜𑀸𑀦𑀁 𑀚𑁂𑀝𑁆𑀞𑀓𑁄 𑀳𑀼𑀢𑁆𑀯𑀸 𑀲𑁂𑀝𑁆𑀞𑀺𑀝𑁆𑀞𑀸𑀦𑀁 𑀓𑀭𑁄𑀢𑀺. 𑀧𑀜𑁆𑀘 𑀫𑀳𑀸𑀧𑀼𑀜𑁆𑀜𑀸 𑀦𑀸𑀫 𑀫𑁂𑀡𑁆𑀟𑀓𑁄 𑀲𑁂𑀝𑁆𑀞𑀺, 𑀘𑀦𑁆𑀤𑀧𑀤𑀼𑀫𑀸 𑀦𑀸𑀫 𑀢𑀲𑁆𑀲𑁂𑀯 𑀚𑁂𑀝𑁆𑀞𑀓𑀪𑀭𑀺𑀬𑀸, 𑀢𑀲𑁆𑀲𑁂𑀯 𑀚𑁂𑀝𑁆𑀞𑀓𑀧𑀼𑀢𑁆𑀢𑁄 𑀥𑀦𑀜𑁆𑀘𑀬𑁄 𑀦𑀸𑀫, 𑀢𑀲𑁆𑀲 𑀪𑀭𑀺𑀬𑀸 𑀲𑀼𑀫𑀦𑀤𑁂𑀯𑀻 𑀦𑀸𑀫, 𑀫𑁂𑀡𑁆𑀟𑀓𑀲𑁂𑀝𑁆𑀞𑀺𑀦𑁄 𑀤𑀸𑀲𑁄 𑀧𑀼𑀡𑁆𑀡𑁄 𑀦𑀸𑀫𑀸𑀢𑀺. 𑀦 𑀓𑁂𑀯𑀮𑀜𑁆𑀘 𑀫𑁂𑀡𑁆𑀟𑀓𑀲𑁂𑀝𑁆𑀞𑀺𑀬𑁂𑀯, 𑀩𑀺𑀫𑁆𑀩𑀺𑀲𑀸𑀭𑀭𑀜𑁆𑀜𑁄 𑀧𑀦 𑀯𑀺𑀚𑀺𑀢𑁂 𑀧𑀜𑁆𑀘 𑀅𑀫𑀺𑀢𑀪𑁄𑀕𑀸 𑀦𑀸𑀫 𑀅𑀳𑁂𑀲𑀼𑀁 𑁋 𑀚𑁄𑀢𑀺𑀓𑁄, 𑀚𑀝𑀺𑀮𑁄, 𑀫𑁂𑀡𑁆𑀟𑀓𑁄, 𑀧𑀼𑀡𑁆𑀡𑀓𑁄, 𑀓𑀸𑀓𑀯𑀮𑀺𑀬𑁄𑀢𑀺. 𑀢𑁂𑀲𑀼 𑀅𑀬𑀁 𑀫𑁂𑀡𑁆𑀟𑀓𑀲𑁂𑀝𑁆𑀞𑀺 𑀤𑀲𑀩𑀮𑀲𑁆𑀲 𑀅𑀢𑁆𑀢𑀦𑁄 𑀦𑀕𑀭𑀁 𑀲𑀫𑁆𑀧𑀢𑁆𑀢𑀪𑀸𑀯𑀁 𑀜𑀢𑁆𑀯𑀸 𑀧𑀼𑀢𑁆𑀢𑀲𑁆𑀲 𑀥𑀦𑀜𑁆𑀘𑀬𑀲𑁂𑀝𑁆𑀞𑀺𑀦𑁄 𑀥𑀻𑀢𑀭𑀁 𑀯𑀺𑀲𑀸𑀔𑀁 𑀤𑀸𑀭𑀺𑀓𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀆𑀳 𑁋 ‘‘𑀅𑀫𑁆𑀫, 𑀢𑀼𑀬𑁆𑀳𑀫𑁆𑀧𑀺 𑀫𑀗𑁆𑀕𑀮𑀁, 𑀅𑀫𑁆𑀳𑀸𑀓𑀫𑁆𑀧𑀺 𑀫𑀗𑁆𑀕𑀮𑀁, 𑀢𑀯 𑀧𑀭𑀺𑀯𑀸𑀭𑁂𑀳𑀺 𑀧𑀜𑁆𑀘𑀳𑀺 𑀤𑀸𑀭𑀺𑀓𑀸𑀲𑀢𑁂𑀳𑀺 𑀲𑀤𑁆𑀥𑀺𑀁 𑀧𑀜𑁆𑀘 𑀭𑀣𑀲𑀢𑀸𑀦𑀺 𑀆𑀭𑀼𑀬𑁆𑀳 𑀧𑀜𑁆𑀘𑀳𑀺 𑀤𑀸𑀲𑀺𑀲𑀢𑁂𑀳𑀺 𑀧𑀭𑀺𑀯𑀼𑀢𑀸 𑀤𑀲𑀩𑀮𑀲𑁆𑀲 𑀧𑀘𑁆𑀘𑀼𑀕𑁆𑀕𑀫𑀦𑀁 𑀓𑀭𑁄𑀳𑀻’’𑀢𑀺. 𑀲𑀸 ‘‘𑀲𑀸𑀥𑀽’’𑀢𑀺 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 𑀢𑀣𑀸 𑀅𑀓𑀸𑀲𑀺. 𑀓𑀸𑀭𑀡𑀸𑀓𑀸𑀭𑀡𑁂𑀲𑀼 𑀧𑀦 𑀓𑀼𑀲𑀮𑀢𑁆𑀢𑀸 𑀬𑀸𑀯𑀢𑀺𑀓𑀸 𑀬𑀸𑀦𑀲𑁆𑀲 𑀪𑀽𑀫𑀺, 𑀬𑀸𑀦𑁂𑀦 𑀕𑀦𑁆𑀢𑁆𑀯𑀸 𑀬𑀸𑀦𑀸 𑀧𑀘𑁆𑀘𑁄𑀭𑁄𑀳𑀺𑀢𑁆𑀯𑀸 𑀧𑀢𑁆𑀢𑀺𑀓𑀸𑀯 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀅𑀣𑀲𑁆𑀲𑀸 𑀘𑀭𑀺𑀬𑀸𑀯𑀲𑁂𑀦 𑀲𑀢𑁆𑀣𑀸 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀲𑀸 𑀤𑁂𑀲𑀦𑀸𑀯𑀲𑀸𑀦𑁂 𑀧𑀜𑁆𑀘𑀳𑀺 𑀤𑀸𑀭𑀺𑀓𑀸𑀲𑀢𑁂𑀳𑀺 𑀲𑀤𑁆𑀥𑀺𑀁 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺. 𑀫𑁂𑀡𑁆𑀟𑀓𑀲𑁂𑀝𑁆𑀞𑀺𑀧𑀺 𑀔𑁄 𑀲𑀢𑁆𑀣𑀸𑀭𑀫𑀼𑀧𑀲𑀗𑁆𑀓𑀫𑀺𑀢𑁆𑀯𑀸 𑀥𑀫𑁆𑀫𑀓𑀣𑀁 𑀲𑀼𑀢𑁆𑀯𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀸𑀬 𑀲𑁆𑀯𑀸𑀢𑀦𑀸𑀬 𑀦𑀺𑀫𑀦𑁆𑀢𑁂𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀅𑀢𑁆𑀢𑀦𑁄 𑀦𑀺𑀯𑁂𑀲𑀦𑁂 𑀧𑀡𑀻𑀢𑁂𑀦 𑀔𑀸𑀤𑀦𑀻𑀬𑁂𑀦 𑀪𑁄𑀚𑀦𑀻𑀬𑁂𑀦 𑀩𑀼𑀤𑁆𑀥𑀧𑁆𑀧𑀫𑀼𑀔𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀭𑀺𑀯𑀺𑀲𑀺𑀢𑁆𑀯𑀸 𑀏𑀢𑁂𑀦𑁂𑀯 𑀉𑀧𑀸𑀬𑁂𑀦 𑀅𑀟𑁆𑀠𑀫𑀸𑀲𑀁 𑀫𑀳𑀸𑀤𑀸𑀦𑀫𑀤𑀸𑀲𑀺. 𑀲𑀢𑁆𑀣𑀸 𑀪𑀤𑁆𑀤𑀺𑀬𑀦𑀕𑀭𑁂 𑀬𑀣𑀸𑀪𑀺𑀭𑀦𑁆𑀢𑀁 𑀯𑀺𑀳𑀭𑀺𑀢𑁆𑀯𑀸 𑀧𑀓𑁆𑀓𑀸𑀫𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀩𑀺𑀫𑁆𑀩𑀺𑀲𑀸𑀭𑁄 𑀘 𑀧𑀲𑁂𑀦𑀤𑀺 𑀓𑁄𑀲𑀮𑁄 𑀘 𑀅𑀜𑁆𑀜𑀫𑀜𑁆𑀜𑀁 𑀪𑀕𑀺𑀦𑀺𑀧𑀢𑀺𑀓𑀸 𑀳𑁄𑀦𑁆𑀢𑀺. 𑀅𑀣𑁂𑀓𑀤𑀺𑀯𑀲𑀁 𑀓𑁄𑀲𑀮𑀭𑀸𑀚𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀩𑀺𑀫𑁆𑀩𑀺𑀲𑀸𑀭𑀲𑁆𑀲 𑀯𑀺𑀚𑀺𑀢𑁂 𑀧𑀜𑁆𑀘 𑀅𑀫𑀺𑀢𑀪𑁄𑀕𑀸 𑀫𑀳𑀸𑀧𑀼𑀜𑁆𑀜𑀸 𑀯𑀲𑀦𑁆𑀢𑀺, 𑀫𑀬𑁆𑀳𑀁 𑀯𑀺𑀚𑀺𑀢𑁂 𑀏𑀓𑁄𑀧𑀺 𑀢𑀸𑀤𑀺𑀲𑁄 𑀦𑀢𑁆𑀣𑀺, 𑀬𑀁𑀦𑀽𑀦𑀸𑀳𑀁 𑀩𑀺𑀫𑁆𑀩𑀺𑀲𑀸𑀭𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀏𑀓𑀁 𑀫𑀳𑀸𑀧𑀼𑀜𑁆𑀜𑀁 𑀬𑀸𑀘𑁂𑀬𑁆𑀬’’𑀦𑁆𑀢𑀺. 𑀲𑁄 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀭𑀜𑁆𑀜𑀸 𑀓𑀢𑀧𑀝𑀺𑀲𑀦𑁆𑀣𑀸𑀭𑁄 ‘‘𑀓𑀺𑀁 𑀓𑀸𑀭𑀡𑀸 𑀆𑀕𑀢𑁄𑀲𑀻’’𑀢𑀺 𑀧𑀼𑀝𑁆𑀞𑁄 ‘‘‘𑀢𑀼𑀫𑁆𑀳𑀸𑀓𑀁 𑀯𑀺𑀚𑀺𑀢𑁂 𑀧𑀜𑁆𑀘 𑀅𑀫𑀺𑀢𑀪𑁄𑀕𑀸 𑀫𑀳𑀸𑀧𑀼𑀜𑁆𑀜𑀸 𑀯𑀲𑀦𑁆𑀢𑀺, 𑀢𑀢𑁄 𑀏𑀓𑀁 𑀕𑀳𑁂𑀢𑁆𑀯𑀸 𑀕𑀫𑀺𑀲𑁆𑀲𑀸𑀫𑀻’𑀢𑀺 𑀆𑀕𑀢𑁄𑀫𑁆𑀳𑀺, 𑀢𑁂𑀲𑀼 𑀫𑁂 𑀏𑀓𑀁 𑀤𑁂𑀣𑀸’’𑀢𑀺 𑀆𑀳. ‘‘𑀫𑀳𑀸𑀓𑀼𑀮𑀸𑀦𑀺 𑀅𑀫𑁆𑀳𑁂𑀳𑀺 𑀘𑀸𑀮𑁂𑀢𑀼𑀁 𑀦 𑀲𑀓𑁆𑀓𑀸’’𑀢𑀺 𑀆𑀳. ‘‘𑀅𑀳𑀁 𑀅𑀮𑀤𑁆𑀥𑀸 𑀦 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀆𑀳. 𑀭𑀸𑀚𑀸 𑀅𑀫𑀘𑁆𑀘𑁂𑀳𑀺 𑀲𑀤𑁆𑀥𑀺𑀁 𑀫𑀦𑁆𑀢𑁂𑀢𑁆𑀯𑀸 ‘‘𑀚𑁄𑀢𑀺𑀓𑀸𑀤𑀻𑀦𑀁 𑀫𑀳𑀸𑀓𑀼𑀮𑀸𑀦𑀁 𑀘𑀸𑀮𑀦𑀁 𑀦𑀸𑀫 𑀫𑀳𑀸𑀧𑀣𑀯𑀺𑀬𑀸 𑀘𑀸𑀮𑀦𑀲𑀤𑀺𑀲𑀁, 𑀫𑁂𑀡𑁆𑀟𑀓𑀫𑀳𑀸𑀲𑁂𑀝𑁆𑀞𑀺𑀲𑁆𑀲 𑀧𑀼𑀢𑁆𑀢𑁄 𑀥𑀦𑀜𑁆𑀘𑀬𑀲𑁂𑀝𑁆𑀞𑀺 𑀦𑀸𑀫 𑀅𑀢𑁆𑀣𑀺, 𑀢𑁂𑀦 𑀲𑀤𑁆𑀥𑀺𑀁 𑀫𑀦𑁆𑀢𑁂𑀢𑁆𑀯𑀸 𑀧𑀝𑀺𑀯𑀘𑀦𑀁 𑀢𑁂 𑀤𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀢𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸, 𑀢𑀸𑀢, 𑀓𑁄𑀲𑀮𑀭𑀸𑀚𑀸 ‘‘‘𑀏𑀓𑀁 𑀥𑀦𑀲𑁂𑀝𑁆𑀞𑀺𑀁 𑀕𑀳𑁂𑀢𑁆𑀯𑀸 𑀕𑀫𑀺𑀲𑁆𑀲𑀸𑀫𑀻’𑀢𑀺 𑀯𑀤𑀢𑀺, 𑀢𑁆𑀯𑀁 𑀢𑁂𑀦 𑀲𑀤𑁆𑀥𑀺𑀁 𑀕𑀘𑁆𑀙𑀸𑀳𑀻’’𑀢𑀺. ‘‘𑀢𑀼𑀫𑁆𑀳𑁂𑀲𑀼 𑀧𑀳𑀺𑀡𑀦𑁆𑀢𑁂𑀲𑀼 𑀕𑀫𑀺𑀲𑁆𑀲𑀸𑀫𑀺, 𑀤𑁂𑀯𑀸’’𑀢𑀺. ‘‘𑀢𑁂𑀦 𑀳𑀺 𑀧𑀭𑀺𑀯𑀘𑁆𑀙𑀁 𑀓𑀢𑁆𑀯𑀸 𑀕𑀘𑁆𑀙, 𑀢𑀸𑀢𑀸’’𑀢𑀺. 𑀲𑁄 𑀅𑀢𑁆𑀢𑀦𑁄 𑀓𑀢𑁆𑀢𑀩𑁆𑀩𑀬𑀼𑀢𑁆𑀢𑀓𑀫𑀓𑀸𑀲𑀺. 𑀭𑀸𑀚𑀸𑀧𑀺𑀲𑁆𑀲 𑀫𑀳𑀦𑁆𑀢𑀁 𑀲𑀓𑁆𑀓𑀸𑀭𑀁 𑀓𑀢𑁆𑀯𑀸, ‘‘𑀇𑀫𑀁 𑀆𑀤𑀸𑀬 𑀕𑀘𑁆𑀙𑀣𑀸’’𑀢𑀺 𑀧𑀲𑁂𑀦𑀤𑀺𑀭𑀸𑀚𑀸𑀦𑀁 𑀉𑀬𑁆𑀬𑁄𑀚𑁂𑀲𑀺. 𑀲𑁄 𑀢𑀁 𑀆𑀤𑀸𑀬 𑀲𑀩𑁆𑀩𑀢𑁆𑀣 𑀏𑀓𑀭𑀢𑁆𑀢𑀺𑀯𑀸𑀲𑁂𑀦 𑀕𑀘𑁆𑀙𑀦𑁆𑀢𑁄 𑀏𑀓𑀁 𑀨𑀸𑀲𑀼𑀓𑀝𑁆𑀞𑀸𑀦𑀁 𑀧𑀢𑁆𑀯𑀸 𑀦𑀺𑀯𑀸𑀲𑀁 𑀕𑀡𑁆𑀳𑀺, 𑀅𑀣 𑀦𑀁 𑀥𑀦𑀜𑁆𑀘𑀬𑀲𑁂𑀝𑁆𑀞𑀺 𑀧𑀼𑀘𑁆𑀙𑀺 𑁋 ‘‘𑀇𑀤𑀁 𑀓𑀲𑁆𑀲 𑀯𑀺𑀚𑀺𑀢’’𑀦𑁆𑀢𑀺? ‘‘𑀫𑀬𑁆𑀳𑀁, 𑀲𑁂𑀝𑁆𑀞𑀻’’𑀢𑀺. ‘‘𑀓𑀻𑀯 𑀤𑀽𑀭𑁄 𑀇𑀢𑁄 𑀲𑀸𑀯𑀢𑁆𑀣𑀻’’𑀢𑀺? ‘‘𑀲𑀢𑁆𑀢𑀬𑁄𑀚𑀦𑀫𑀢𑁆𑀣𑀓𑁂’’𑀢𑀺. ‘‘𑀅𑀦𑁆𑀢𑁄𑀦𑀕𑀭𑀁 𑀲𑀫𑁆𑀩𑀸𑀥𑀁, 𑀅𑀫𑁆𑀳𑀸𑀓𑀁 𑀧𑀭𑀺𑀚𑀦𑁄 𑀫𑀳𑀦𑁆𑀢𑁄, 𑀲𑀘𑁂 𑀭𑁄𑀘𑁂𑀣, 𑀇𑀥𑁂𑀯 𑀯𑀲𑁂𑀬𑁆𑀬𑀸𑀫, 𑀤𑁂𑀯𑀸’’𑀢𑀺. 𑀭𑀸𑀚𑀸 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀢𑀲𑁆𑀫𑀺𑀁 𑀞𑀸𑀦𑁂 𑀦𑀕𑀭𑀁 𑀫𑀸𑀧𑁂𑀢𑁆𑀯𑀸 𑀢𑀲𑁆𑀲 𑀤𑀢𑁆𑀯𑀸 𑀅𑀕𑀫𑀸𑀲𑀺. 𑀢𑀲𑁆𑀫𑀺𑀁 𑀧𑀤𑁂𑀲𑁂 𑀲𑀬𑀁 𑀯𑀲𑀦𑀝𑁆𑀞𑀸𑀦𑀲𑁆𑀲 𑀕𑀳𑀺𑀢𑀢𑁆𑀢𑀸 𑀦𑀕𑀭𑀲𑁆𑀲 𑀲𑀸𑀓𑁂𑀢𑀦𑁆𑀢𑁆𑀯𑁂𑀯 𑀦𑀸𑀫𑀁 𑀅𑀳𑁄𑀲𑀺.

𑀲𑀸𑀯𑀢𑁆𑀣𑀺𑀬𑀫𑁆𑀧𑀺 𑀔𑁄 𑀫𑀺𑀕𑀸𑀭𑀲𑁂𑀝𑁆𑀞𑀺𑀦𑁄 𑀧𑀼𑀢𑁆𑀢𑁄 𑀧𑀼𑀡𑁆𑀡𑀯𑀟𑁆𑀠𑀦𑀓𑀼𑀫𑀸𑀭𑁄 𑀦𑀸𑀫 𑀯𑀬𑀧𑁆𑀧𑀢𑁆𑀢𑁄 𑀅𑀳𑁄𑀲𑀺. 𑀅𑀣 𑀦𑀁 𑀫𑀸𑀢𑀸𑀧𑀺𑀢𑀭𑁄 𑀯𑀤𑀺𑀁𑀲𑀼 𑁋 ‘‘𑀢𑀸𑀢, 𑀢𑀯 𑀭𑀼𑀘𑁆𑀘𑀦𑀝𑁆𑀞𑀸𑀦𑁂 𑀏𑀓𑀁 𑀤𑀸𑀭𑀺𑀓𑀁 𑀉𑀧𑀥𑀸𑀭𑁂𑀳𑀻’’𑀢𑀺. ‘‘‘𑀫𑀬𑁆𑀳𑀁 𑀏𑀯𑀭𑀽𑀧𑀸𑀬 𑀪𑀭𑀺𑀬𑀸𑀬 𑀓𑀺𑀘𑁆𑀘𑀁 𑀦𑀢𑁆𑀣𑀻’𑀢𑀺, 𑀧𑀼𑀢𑁆𑀢, 𑀫𑀸 𑀏𑀯𑀁 𑀓𑀭𑀺, 𑀓𑀼𑀮𑀁 𑀦𑀸𑀫 𑀅𑀧𑀼𑀢𑁆𑀢𑀓𑀁 𑀦 𑀢𑀺𑀝𑁆𑀞𑀢𑀻’’𑀢𑀺. 𑀲𑁄 𑀧𑀼𑀦𑀧𑁆𑀧𑀼𑀦𑀁 𑀯𑀼𑀘𑁆𑀘𑀫𑀸𑀦𑁄 ‘‘𑀢𑁂𑀦 𑀳𑀺 𑀧𑀜𑁆𑀘𑀓𑀮𑁆𑀬𑀸𑀡𑀲𑀫𑀦𑁆𑀦𑀸𑀕𑀢𑀁 𑀤𑀸𑀭𑀺𑀓𑀁 𑀮𑀪𑀫𑀸𑀦𑁄 𑀢𑀼𑀫𑁆𑀳𑀸𑀓𑀁 𑀯𑀘𑀦𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀆𑀳. ‘‘𑀓𑀸𑀦𑀺 𑀧𑀦𑁂𑀢𑀸𑀦𑀺 𑀧𑀜𑁆𑀘 𑀓𑀮𑁆𑀬𑀸𑀡𑀸𑀦𑀺 𑀦𑀸𑀫, 𑀢𑀸𑀢𑀸’’𑀢𑀺. 𑀓𑁂𑀲𑀓𑀮𑁆𑀬𑀸𑀡𑀁, 𑀫𑀁𑀲𑀓𑀮𑁆𑀬𑀸𑀡𑀁, 𑀅𑀝𑁆𑀞𑀺𑀓𑀮𑁆𑀬𑀸𑀡𑀁, 𑀙𑀯𑀺𑀓𑀮𑁆𑀬𑀸𑀡𑀁, 𑀯𑀬𑀓𑀮𑁆𑀬𑀸𑀡𑀦𑁆𑀢𑀺. 𑀫𑀳𑀸𑀧𑀼𑀜𑁆𑀜𑀸𑀬 𑀳𑀺 𑀇𑀢𑁆𑀣𑀺𑀬𑀸 𑀓𑁂𑀲𑀸 𑀫𑁄𑀭𑀓𑀮𑀸𑀧𑀲𑀤𑀺𑀲𑀸 𑀳𑀼𑀢𑁆𑀯𑀸 𑀫𑀼𑀜𑁆𑀘𑀺𑀢𑁆𑀯𑀸 𑀯𑀺𑀲𑁆𑀲𑀝𑁆𑀞𑀸 𑀦𑀺𑀯𑀸𑀲𑀦𑀦𑁆𑀢𑀁 𑀧𑀳𑀭𑀺𑀢𑁆𑀯𑀸 𑀦𑀺𑀯𑀢𑁆𑀢𑀺𑀢𑁆𑀯𑀸 𑀉𑀤𑁆𑀥𑀕𑁆𑀕𑀸 𑀢𑀺𑀝𑁆𑀞𑀦𑁆𑀢𑀺, 𑀇𑀤𑀁 𑀓𑁂𑀲𑀓𑀮𑁆𑀬𑀸𑀡𑀁 𑀦𑀸𑀫, 𑀤𑀦𑁆𑀢𑀸𑀯𑀭𑀡𑀁 𑀩𑀺𑀫𑁆𑀩𑀨𑀮𑀲𑀤𑀺𑀲𑀁 𑀯𑀡𑁆𑀡𑀲𑀫𑁆𑀧𑀦𑁆𑀦𑀁 𑀲𑀫𑀁 𑀲𑀼𑀨𑀼𑀲𑀺𑀢𑀁 𑀳𑁄𑀢𑀺, 𑀇𑀤𑀁 𑀫𑀁𑀲𑀓𑀮𑁆𑀬𑀸𑀡𑀁 𑀦𑀸𑀫, 𑀤𑀦𑁆𑀢𑀸 𑀲𑀼𑀓𑁆𑀓𑀸 𑀲𑀫𑀸 𑀅𑀯𑀺𑀭𑀴𑀸 𑀉𑀲𑁆𑀲𑀸𑀧𑁂𑀢𑁆𑀯𑀸 𑀞𑀧𑀺𑀢𑀯𑀚𑀺𑀭𑀧𑀦𑁆𑀢𑀺 𑀯𑀺𑀬 𑀲𑀫𑀘𑁆𑀙𑀺𑀦𑁆𑀦𑀲𑀗𑁆𑀔𑀧𑀦𑁆𑀢𑀺 𑀯𑀺𑀬 𑀘 𑀲𑁄𑀪𑀦𑁆𑀢𑀺, 𑀇𑀤𑀁 𑀅𑀝𑁆𑀞𑀺𑀓𑀮𑁆𑀬𑀸𑀡𑀁 𑀦𑀸𑀫, 𑀓𑀸𑀴𑀺𑀬𑀸 𑀘𑀼𑀡𑁆𑀡𑀓𑀸𑀤𑀻𑀳𑀺 𑀅𑀯𑀺𑀮𑀺𑀢𑁆𑀢𑁄 𑀏𑀯 𑀙𑀯𑀺𑀯𑀡𑁆𑀡𑁄 𑀲𑀺𑀦𑀺𑀤𑁆𑀥𑁄 𑀦𑀻𑀮𑀼𑀧𑁆𑀧𑀮𑀤𑀸𑀫𑀲𑀤𑀺𑀲𑁄 𑀳𑁄𑀢𑀺, 𑀑𑀤𑀸𑀢𑀸𑀬 𑀘 𑀓𑀡𑀺𑀓𑀸𑀭𑀧𑀼𑀧𑁆𑀨𑀤𑀸𑀫𑀲𑀤𑀺𑀲𑁄 𑀳𑁄𑀢𑀺, 𑀇𑀤𑀁 𑀙𑀯𑀺𑀓𑀮𑁆𑀬𑀸𑀡𑀁 𑀦𑀸𑀫, 𑀤𑀲𑀓𑁆𑀔𑀢𑁆𑀢𑀼𑀁 𑀯𑀺𑀚𑀸𑀢𑀸𑀧𑀺 𑀔𑁄 𑀧𑀦 𑀲𑀓𑀺𑀁 𑀯𑀺𑀚𑀸𑀢𑀸 𑀯𑀺𑀬 𑀅𑀯𑀺𑀕𑀢𑀬𑁄𑀩𑁆𑀩𑀦𑀸𑀬𑁂𑀯 𑀳𑁄𑀢𑀺, 𑀇𑀤𑀁 𑀯𑀬𑀓𑀮𑁆𑀬𑀸𑀡𑀁 𑀦𑀸𑀫 𑀳𑁄𑀢𑀺. 𑀅𑀣𑀲𑁆𑀲 𑀫𑀸𑀢𑀸𑀧𑀺𑀢𑀭𑁄 𑀅𑀝𑁆𑀞𑀼𑀢𑁆𑀢𑀭𑀲𑀢𑀩𑁆𑀭𑀸𑀳𑁆𑀫𑀡𑁂 𑀦𑀺𑀫𑀦𑁆𑀢𑁂𑀢𑁆𑀯𑀸 𑀪𑁄𑀚𑁂𑀢𑁆𑀯𑀸 ‘‘𑀧𑀜𑁆𑀘𑀓𑀮𑁆𑀬𑀸𑀡𑀲𑀫𑀦𑁆𑀦𑀸𑀕𑀢𑀸 𑀇𑀢𑁆𑀣𑀺𑀬𑁄 𑀦𑀸𑀫 𑀳𑁄𑀦𑁆𑀢𑀻’’𑀢𑀺 𑀧𑀼𑀘𑁆𑀙𑀺𑀁𑀲𑀼. ‘‘𑀆𑀫, 𑀳𑁄𑀦𑁆𑀢𑀻’’𑀢𑀺. ‘‘𑀢𑁂𑀦 𑀳𑀺 𑀏𑀯𑀭𑀽𑀧𑀁 𑀤𑀸𑀭𑀺𑀓𑀁 𑀧𑀭𑀺𑀬𑁂𑀲𑀺𑀢𑀼𑀁 𑀅𑀝𑁆𑀞 𑀚𑀦𑀸 𑀕𑀘𑁆𑀙𑀦𑁆𑀢𑀽’’𑀢𑀺 𑀩𑀳𑀼𑀁 𑀥𑀦𑀁 𑀤𑀢𑁆𑀯𑀸 ‘‘𑀆𑀕𑀢𑀓𑀸𑀮𑁂 𑀯𑁄 𑀓𑀢𑁆𑀢𑀩𑁆𑀩𑀁 𑀚𑀸𑀦𑀺𑀲𑁆𑀲𑀸𑀫, 𑀕𑀘𑁆𑀙𑀣, 𑀏𑀯𑀭𑀽𑀧𑀁 𑀤𑀸𑀭𑀺𑀓𑀁 𑀧𑀭𑀺𑀬𑁂𑀲𑀣, 𑀤𑀺𑀝𑁆𑀞𑀓𑀸𑀮𑁂 𑀘 𑀇𑀫𑀁 𑀧𑀺𑀮𑀦𑁆𑀥𑀦𑀁 𑀤𑀤𑁂𑀬𑁆𑀬𑀸𑀣𑀸’’𑀢𑀺 𑀲𑀢𑀲𑀳𑀲𑁆𑀲𑀕𑁆𑀖𑀦𑀺𑀓𑀁 𑀲𑀼𑀯𑀡𑁆𑀡𑀫𑀸𑀮𑀁 𑀤𑀢𑁆𑀯𑀸 𑀉𑀬𑁆𑀬𑁄𑀚𑁂𑀲𑀼𑀁.

𑀢𑁂 𑀫𑀳𑀦𑁆𑀢𑀫𑀳𑀦𑁆𑀢𑀸𑀦𑀺 𑀦𑀕𑀭𑀸𑀦𑀺 𑀕𑀦𑁆𑀢𑁆𑀯𑀸 𑀧𑀭𑀺𑀬𑁂𑀲𑀫𑀸𑀦𑀸 𑀧𑀜𑁆𑀘𑀓𑀮𑁆𑀬𑀸𑀡𑀲𑀫𑀦𑁆𑀦𑀸𑀕𑀢𑀁 𑀤𑀸𑀭𑀺𑀓𑀁 𑀅𑀤𑀺𑀲𑁆𑀯𑀸 𑀦𑀺𑀯𑀢𑁆𑀢𑀺𑀢𑁆𑀯𑀸 𑀆𑀕𑀘𑁆𑀙𑀦𑁆𑀢𑀸 𑀯𑀺𑀯𑀝𑀦𑀓𑁆𑀔𑀢𑁆𑀢𑀤𑀺𑀯𑀲𑁂 𑀲𑀸𑀓𑁂𑀢𑀁 𑀅𑀦𑀼𑀧𑁆𑀧𑀢𑁆𑀢𑀸 𑁋 ‘‘𑀅𑀚𑁆𑀚 𑀅𑀫𑁆𑀳𑀸𑀓𑀁 𑀓𑀫𑁆𑀫𑀁 𑀦𑀺𑀧𑁆𑀨𑀚𑁆𑀚𑀺𑀲𑁆𑀲𑀢𑀻’’𑀢𑀺 𑀘𑀺𑀦𑁆𑀢𑀬𑀺𑀁𑀲𑀼. 𑀢𑀲𑁆𑀫𑀺𑀁 𑀧𑀦 𑀦𑀕𑀭𑁂 𑀅𑀦𑀼𑀲𑀁𑀯𑀘𑁆𑀙𑀭𑀁 𑀯𑀺𑀯𑀝𑀦𑀓𑁆𑀔𑀢𑁆𑀢𑀁 𑀦𑀸𑀫 𑀳𑁄𑀢𑀺. 𑀢𑀤𑀸 𑀩𑀳𑀺 𑀅𑀦𑀺𑀓𑁆𑀔𑀫𑀦𑀓𑀼𑀮𑀸𑀦𑀺𑀧𑀺 𑀧𑀭𑀺𑀯𑀸𑀭𑁂𑀦 𑀲𑀤𑁆𑀥𑀺𑀁 𑀕𑁂𑀳𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑁂𑀦 𑀲𑀭𑀻𑀭𑁂𑀦 𑀧𑀤𑀲𑀸𑀯 𑀦𑀤𑀻𑀢𑀻𑀭𑀁 𑀕𑀘𑁆𑀙𑀦𑁆𑀢𑀺. 𑀢𑀲𑁆𑀫𑀺𑀁 𑀤𑀺𑀯𑀲𑁂 𑀔𑀢𑁆𑀢𑀺𑀬𑀫𑀳𑀸𑀲𑀸𑀮𑀸𑀤𑀻𑀦𑀁 𑀧𑀼𑀢𑁆𑀢𑀸𑀧𑀺 ‘‘𑀅𑀢𑁆𑀢𑀦𑁄 𑀲𑀫𑀸𑀦𑀚𑀸𑀢𑀺𑀓𑀁 𑀫𑀦𑀸𑀧𑀁 𑀓𑀼𑀮𑀤𑀸𑀭𑀺𑀓𑀁 𑀤𑀺𑀲𑁆𑀯𑀸 𑀫𑀸𑀮𑀸𑀕𑀼𑀴𑁂𑀦 𑀧𑀭𑀺𑀓𑁆𑀔𑀺𑀧𑀺𑀲𑁆𑀲𑀸𑀫𑀸’’𑀢𑀺 𑀢𑀁 𑀢𑀁 𑀫𑀕𑁆𑀕𑀁 𑀦𑀺𑀲𑁆𑀲𑀸𑀬 𑀢𑀺𑀝𑁆𑀞𑀦𑁆𑀢𑀺. 𑀢𑁂𑀧𑀺 𑀔𑁄 𑀩𑁆𑀭𑀸𑀳𑁆𑀫𑀡𑀸 𑀦𑀤𑀻𑀢𑀻𑀭𑁂 𑀏𑀓𑀁 𑀲𑀸𑀮𑀁 𑀧𑀯𑀺𑀲𑀺𑀢𑁆𑀯𑀸 𑀅𑀝𑁆𑀞𑀁𑀲𑀼. ‘‘𑀢𑀲𑁆𑀫𑀺𑀁 𑀔𑀡𑁂 𑀯𑀺𑀲𑀸𑀔𑀸 𑀧𑀦𑁆𑀦𑀭𑀲𑀲𑁄𑀴𑀲𑀯𑀲𑁆𑀲𑀼𑀤𑁆𑀤𑁂𑀲𑀺𑀓𑀸 𑀳𑀼𑀢𑁆𑀯𑀸 𑀲𑀩𑁆𑀩𑀸𑀪𑀭𑀡𑀧𑀝𑀺𑀫𑀡𑁆𑀟𑀺𑀢𑀸 𑀧𑀜𑁆𑀘𑀳𑀺 𑀓𑀼𑀫𑀸𑀭𑀺𑀓𑀸𑀲𑀢𑁂𑀳𑀺 𑀧𑀭𑀺𑀯𑀼𑀢𑀸 𑀦𑀤𑀺𑀁 𑀕𑀦𑁆𑀢𑁆𑀯𑀸 𑀦𑁆𑀳𑀸𑀬𑀺𑀲𑁆𑀲𑀸𑀫𑀻’’𑀢𑀺 𑀢𑀁 𑀧𑀤𑁂𑀲𑀁 𑀧𑀢𑁆𑀢𑀸, 𑀅𑀣 𑀔𑁄 𑀫𑁂𑀖𑁄 𑀉𑀝𑁆𑀞𑀳𑀺𑀢𑁆𑀯𑀸 𑀧𑀸𑀯𑀲𑁆𑀲𑀺. 𑀧𑀜𑁆𑀘𑀲𑀢𑀸 𑀓𑀼𑀫𑀸𑀭𑀺𑀓𑀸𑀬𑁄 𑀯𑁂𑀕𑁂𑀦 𑀕𑀦𑁆𑀢𑁆𑀯𑀸 𑀲𑀸𑀮𑀁 𑀧𑀯𑀺𑀲𑀺𑀁𑀲𑀼. 𑀩𑁆𑀭𑀸𑀳𑁆𑀫𑀡𑀸 𑀑𑀮𑁄𑀓𑁂𑀦𑁆𑀢𑀸 𑀢𑀸𑀲𑀼 𑀏𑀓𑀫𑁆𑀧𑀺 𑀧𑀜𑁆𑀘𑀓𑀮𑁆𑀬𑀸𑀡𑀲𑀫𑀦𑁆𑀦𑀸𑀕𑀢𑀁 𑀦 𑀧𑀲𑁆𑀲𑀺𑀁𑀲𑀼. 𑀅𑀣 𑀯𑀺𑀲𑀸𑀔𑀸 𑀧𑀓𑀢𑀺𑀕𑀫𑀦𑁂𑀦𑁂𑀯 𑀲𑀸𑀮𑀁 𑀧𑀸𑀯𑀺𑀲𑀺, 𑀯𑀢𑁆𑀣𑀸𑀪𑀭𑀡𑀸𑀦𑀺 𑀢𑁂𑀫𑀺𑀁𑀲𑀼. 𑀩𑁆𑀭𑀸𑀳𑁆𑀫𑀡𑀸 𑀢𑀲𑁆𑀲𑀸 𑀘𑀢𑁆𑀢𑀸𑀭𑀺 𑀓𑀮𑁆𑀬𑀸𑀡𑀸𑀦𑀺 𑀤𑀺𑀲𑁆𑀯𑀸 𑀤𑀦𑁆𑀢𑁂 𑀧𑀲𑁆𑀲𑀺𑀢𑀼𑀓𑀸𑀫𑀸 ‘‘𑀅𑀮𑀲𑀚𑀸𑀢𑀺𑀓𑀸 𑀅𑀫𑁆𑀳𑀸𑀓𑀁 𑀥𑀻𑀢𑀸, 𑀏𑀢𑀺𑀲𑁆𑀲𑀸 𑀲𑀸𑀫𑀺𑀓𑁄 𑀓𑀜𑁆𑀚𑀺𑀓𑀫𑀢𑁆𑀢𑀫𑁆𑀧𑀺 𑀦 𑀮𑀪𑀺𑀲𑁆𑀲𑀢𑀺 𑀫𑀜𑁆𑀜𑁂’’𑀢𑀺 𑀅𑀜𑁆𑀜𑀫𑀜𑁆𑀜𑀁 𑀓𑀣𑀬𑀺𑀁𑀲𑀼. 𑀅𑀣 𑀦𑁂 𑀯𑀺𑀲𑀸𑀔𑀸 𑀆𑀳 𑁋 ‘‘𑀓𑀁 𑀯𑀤𑁂𑀣 𑀢𑀼𑀫𑁆𑀳𑁂’’𑀢𑀺? ‘‘𑀢𑀁 𑀓𑀣𑁂𑀫, 𑀅𑀫𑁆𑀫𑀸’’𑀢𑀺. 𑀫𑀥𑀼𑀭𑁄 𑀳𑀺 𑀢𑀲𑁆𑀲𑀸 𑀲𑀤𑁆𑀤𑁄 𑀓𑀁𑀲𑀢𑀸𑀴𑀲𑀭𑁄 𑀯𑀺𑀬 𑀦𑀺𑀘𑁆𑀙𑀭𑀢𑀺. 𑀅𑀣 𑀦𑁂 𑀧𑀼𑀦 𑀫𑀥𑀼𑀭𑀲𑀤𑁆𑀤𑁂𑀦 ‘‘𑀓𑀺𑀁 𑀓𑀸𑀭𑀡𑀸 𑀪𑀡𑀣𑀸’’𑀢𑀺 𑀧𑀼𑀘𑁆𑀙𑀺. ‘‘𑀢𑀯 𑀧𑀭𑀺𑀯𑀸𑀭𑀺𑀢𑁆𑀣𑀺𑀬𑁄 𑀯𑀢𑁆𑀣𑀸𑀮𑀗𑁆𑀓𑀸𑀭𑁂 𑀅𑀢𑁂𑀫𑁂𑀢𑁆𑀯𑀸 𑀯𑁂𑀕𑁂𑀦 𑀲𑀸𑀮𑀁 𑀧𑀯𑀺𑀝𑁆𑀞𑀸, 𑀢𑀼𑀬𑁆𑀳𑀁 𑀏𑀢𑁆𑀢𑀓𑀁 𑀞𑀸𑀦𑀁 𑀯𑁂𑀕𑁂𑀦 𑀆𑀕𑀫𑀦𑀫𑀢𑁆𑀢𑀫𑁆𑀧𑀺 𑀦𑀢𑁆𑀣𑀺, 𑀯𑀢𑁆𑀣𑀸𑀪𑀭𑀡𑀸𑀦𑀺 𑀢𑁂𑀫𑁂𑀢𑁆𑀯𑀸 𑀆𑀕𑀢𑀸𑀲𑀺. 𑀢𑀲𑁆𑀫𑀸 𑀓𑀣𑁂𑀫, 𑀅𑀫𑁆𑀫𑀸’’𑀢𑀺.

‘‘𑀢𑀸𑀢𑀸, 𑀏𑀯𑀁 𑀫𑀸 𑀯𑀤𑁂𑀣, 𑀅𑀳𑀁 𑀏𑀢𑀸𑀳𑀺 𑀩𑀮𑀯𑀢𑀭𑀸, 𑀓𑀸𑀭𑀡𑀁 𑀧𑀦 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀚𑀯𑁂𑀦 𑀦𑀸𑀕𑀢𑀸𑀫𑁆𑀳𑀻’’𑀢𑀺. ‘‘𑀓𑀺𑀁, 𑀅𑀫𑁆𑀫𑀸’’𑀢𑀺? ‘‘𑀢𑀸𑀢𑀸, 𑀘𑀢𑁆𑀢𑀸𑀭𑁄 𑀚𑀦𑀸 𑀚𑀯𑀫𑀸𑀦𑀸 𑀦 𑀲𑁄𑀪𑀦𑁆𑀢𑀺, 𑀅𑀧𑀭𑀫𑁆𑀧𑀺 𑀓𑀸𑀭𑀡𑀁 𑀅𑀢𑁆𑀣𑀻’’𑀢𑀺. ‘‘𑀓𑀢𑀫𑁂 𑀘𑀢𑁆𑀢𑀸𑀭𑁄 𑀚𑀦𑀸 𑀚𑀯𑀫𑀸𑀦𑀸 𑀦 𑀲𑁄𑀪𑀦𑁆𑀢𑀺, 𑀅𑀫𑁆𑀫𑀸’’𑀢𑀺? 𑀢𑀸𑀢𑀸, 𑀅𑀪𑀺𑀲𑀺𑀢𑁆𑀢𑀭𑀸𑀚𑀸 𑀢𑀸𑀯 𑀲𑀩𑁆𑀩𑀸𑀪𑀭𑀡𑀧𑀝𑀺𑀫𑀡𑁆𑀟𑀺𑀢𑁄 𑀓𑀘𑁆𑀙𑀁 𑀩𑀦𑁆𑀥𑀺𑀢𑁆𑀯𑀸 𑀭𑀸𑀚𑀗𑁆𑀕𑀡𑁂 𑀚𑀯𑀫𑀸𑀦𑁄 𑀦 𑀲𑁄𑀪𑀢𑀺, ‘‘𑀓𑀺𑀁 𑀅𑀬𑀁 𑀭𑀸𑀚𑀸 𑀕𑀳𑀧𑀢𑀺𑀓𑁄 𑀯𑀺𑀬 𑀥𑀸𑀯𑀢𑀻’’𑀢𑀺 𑀅𑀜𑁆𑀜𑀤𑀢𑁆𑀣𑀼 𑀕𑀭𑀳𑀁 𑀮𑀪𑀢𑀺, 𑀲𑀡𑀺𑀓𑀁 𑀕𑀘𑁆𑀙𑀦𑁆𑀢𑁄𑀯 𑀲𑁄𑀪𑀢𑀺. 𑀭𑀜𑁆𑀜𑁄 𑀫𑀗𑁆𑀕𑀮𑀳𑀢𑁆𑀣𑀻𑀧𑀺 𑀅𑀮𑀗𑁆𑀓𑀢𑁄 𑀚𑀯𑀫𑀸𑀦𑁄 𑀦 𑀲𑁄𑀪𑀢𑀺, 𑀯𑀸𑀭𑀡𑀮𑀻𑀴𑀸𑀬 𑀕𑀘𑁆𑀙𑀦𑁆𑀢𑁄𑀯 𑀲𑁄𑀪𑀢𑀺. 𑀧𑀩𑁆𑀩𑀚𑀺𑀢𑁄 𑀚𑀯𑀫𑀸𑀦𑁄 𑀦 𑀲𑁄𑀪𑀢𑀺, ‘‘𑀓𑀺𑀁 𑀅𑀬𑀁 𑀲𑀫𑀡𑁄 𑀕𑀺𑀳𑀻 𑀯𑀺𑀬 𑀥𑀸𑀯𑀢𑀻’’𑀢𑀺 𑀓𑁂𑀯𑀮𑀁 𑀕𑀭𑀳𑀫𑁂𑀯 𑀮𑀪𑀢𑀺, 𑀲𑀫𑀺𑀢𑀕𑀫𑀦𑁂𑀦 𑀧𑀦 𑀲𑁄𑀪𑀢𑀺. 𑀇𑀢𑁆𑀣𑀻 𑀚𑀯𑀫𑀸𑀦𑀸 𑀦 𑀲𑁄𑀪𑀢𑀺, ‘‘𑀓𑀺𑀁 𑀏𑀲𑀸 𑀇𑀢𑁆𑀣𑀻 𑀧𑀼𑀭𑀺𑀲𑁄 𑀯𑀺𑀬 𑀥𑀸𑀯𑀢𑀻’’𑀢𑀺 𑀕𑀭𑀳𑀺𑀢𑀩𑁆𑀩𑀸𑀯 𑀳𑁄𑀢𑀺, ‘‘𑀇𑀫𑁂 𑀘𑀢𑁆𑀢𑀸𑀭𑁄 𑀚𑀦𑀸 𑀚𑀯𑀫𑀸𑀦𑀸 𑀦 𑀲𑁄𑀪𑀦𑁆𑀢𑀺, 𑀢𑀸𑀢𑀸’’𑀢𑀺. ‘‘𑀓𑀢𑀫𑀁 𑀧𑀦 𑀅𑀧𑀭𑀁 𑀓𑀸𑀭𑀡𑀁, 𑀅𑀫𑁆𑀫𑀸’’𑀢𑀺? ‘‘𑀢𑀸𑀢𑀸, 𑀫𑀸𑀢𑀸𑀧𑀺𑀢𑀭𑁄 𑀦𑀸𑀫 𑀥𑀻𑀢𑀭𑀁 𑀅𑀗𑁆𑀕𑀧𑀘𑁆𑀘𑀗𑁆𑀕𑀸𑀦𑀺 𑀲𑀡𑁆𑀞𑀸𑀧𑁂𑀢𑁆𑀯𑀸 𑀧𑁄𑀲𑁂𑀦𑁆𑀢𑀺. 𑀫𑀬𑀜𑁆𑀳𑀺 𑀯𑀺𑀓𑁆𑀓𑀺𑀡𑁂𑀬𑁆𑀬𑀪𑀡𑁆𑀟𑀁 𑀦𑀸𑀫, 𑀅𑀫𑁆𑀳𑁂 𑀧𑀭𑀓𑀼𑀮𑀧𑁂𑀲𑀦𑀢𑁆𑀣𑀸𑀬 𑀧𑁄𑀲𑁂𑀦𑁆𑀢𑀺. 𑀲𑀘𑁂 𑀚𑀯𑀫𑀸𑀦𑀸𑀦𑀁 𑀦𑀺𑀯𑀢𑁆𑀣𑀤𑀼𑀲𑁆𑀲𑀓𑀡𑁆𑀡𑁂 𑀯𑀸 𑀅𑀓𑁆𑀓𑀫𑀺𑀢𑁆𑀯𑀸 𑀪𑀽𑀫𑀺𑀬𑀁 𑀯𑀸 𑀧𑀓𑁆𑀔𑀮𑀺𑀢𑁆𑀯𑀸 𑀧𑀢𑀺𑀢𑀓𑀸𑀮𑁂 𑀳𑀢𑁆𑀣𑁄 𑀯𑀸 𑀧𑀸𑀤𑁄 𑀯𑀸 𑀪𑀺𑀚𑁆𑀚𑁂𑀬𑁆𑀬, 𑀓𑀼𑀮𑀲𑁆𑀲𑁂𑀯 𑀪𑀸𑀭𑁄 𑀪𑀯𑁂𑀬𑁆𑀬, 𑀧𑀲𑀸𑀥𑀦𑀪𑀡𑁆𑀟𑀁 𑀧𑀦 𑀫𑁂 𑀢𑁂𑀫𑁂𑀢𑁆𑀯𑀸 𑀲𑀼𑀲𑁆𑀲𑀺𑀲𑁆𑀲𑀢𑀺. 𑀇𑀫𑀁 𑀓𑀸𑀭𑀡𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀦 𑀥𑀸𑀯𑀺𑀢𑀸𑀫𑁆𑀳𑀺, 𑀢𑀸𑀢𑀸’’𑀢𑀺.

𑀩𑁆𑀭𑀸𑀳𑁆𑀫𑀡𑀸 𑀢𑀲𑁆𑀲𑀸 𑀓𑀣𑀦𑀓𑀸𑀮𑁂 𑀤𑀦𑁆𑀢𑀲𑀫𑁆𑀧𑀢𑁆𑀢𑀺𑀁 𑀤𑀺𑀲𑁆𑀯𑀸 ‘‘𑀏𑀯𑀭𑀽𑀧𑀸 𑀦𑁄 𑀤𑀦𑁆𑀢𑀲𑀫𑁆𑀧𑀢𑁆𑀢𑀺 𑀤𑀺𑀝𑁆𑀞𑀧𑀼𑀩𑁆𑀩𑀸’’𑀢𑀺 𑀢𑀲𑁆𑀲𑀸 𑀲𑀸𑀥𑀼𑀓𑀸𑀭𑀁 𑀤𑀢𑁆𑀯𑀸, ‘‘𑀅𑀫𑁆𑀫, 𑀢𑀼𑀬𑁆𑀳𑀫𑁂𑀯𑁂𑀲𑀸 𑀅𑀦𑀼𑀘𑁆𑀙𑀯𑀺𑀓𑀸’’𑀢𑀺 𑀯𑀢𑁆𑀯𑀸 𑀢𑀁 𑀲𑀼𑀯𑀡𑁆𑀡𑀫𑀸𑀮𑀁 𑀧𑀺𑀮𑀦𑁆𑀥𑀬𑀺𑀁𑀲𑀼. 𑀅𑀣 𑀦𑁂 𑀧𑀼𑀘𑁆𑀙𑀺 𑁋 ‘‘𑀓𑀢𑀭𑀦𑀕𑀭𑀢𑁄 𑀆𑀕𑀢𑀸𑀢𑁆𑀣, 𑀢𑀸𑀢𑀸’’𑀢𑀺? ‘‘𑀲𑀸𑀯𑀢𑁆𑀣𑀺𑀢𑁄, 𑀅𑀫𑁆𑀫𑀸’’𑀢𑀺. ‘‘𑀲𑁂𑀝𑁆𑀞𑀺𑀓𑀼𑀮𑀁 𑀓𑀢𑀭𑀁 𑀦𑀸𑀫𑀸’’𑀢𑀺? ‘‘𑀫𑀺𑀕𑀸𑀭𑀲𑁂𑀝𑁆𑀞𑀺 𑀦𑀸𑀫, 𑀅𑀫𑁆𑀫𑀸’’𑀢𑀺. ‘‘𑀅𑀬𑁆𑀬𑀧𑀼𑀢𑁆𑀢𑁄 𑀓𑁄 𑀦𑀸𑀫𑀸’’𑀢𑀺? ‘‘𑀧𑀼𑀡𑁆𑀡𑀯𑀟𑁆𑀠𑀦𑀓𑀼𑀫𑀸𑀭𑁄 𑀦𑀸𑀫, 𑀅𑀫𑁆𑀫𑀸’’𑀢𑀺. 𑀲𑀸 ‘‘𑀲𑀫𑀸𑀦𑀚𑀸𑀢𑀺𑀓𑀁 𑀦𑁄 𑀓𑀼𑀮’’𑀦𑁆𑀢𑀺 𑀅𑀥𑀺𑀯𑀸𑀲𑁂𑀢𑁆𑀯𑀸 𑀧𑀺𑀢𑀼 𑀲𑀸𑀲𑀦𑀁 𑀧𑀳𑀺𑀡𑀺 ‘‘𑀅𑀫𑁆𑀳𑀸𑀓𑀁 𑀭𑀣𑀁 𑀧𑁂𑀲𑁂𑀢𑀽’’𑀢𑀺. 𑀓𑀺𑀜𑁆𑀘𑀸𑀧𑀺 𑀳𑀺 𑀲𑀸 𑀆𑀕𑀫𑀦𑀓𑀸𑀮𑁂 𑀧𑀤𑀲𑀸 𑀆𑀕𑀢𑀸, 𑀲𑀼𑀯𑀡𑁆𑀡𑀫𑀸𑀮𑀸𑀬 𑀧𑀦 𑀧𑀺𑀮𑀦𑁆𑀥𑀦𑀓𑀸𑀮𑀢𑁄 𑀧𑀝𑁆𑀞𑀸𑀬 𑀢𑀣𑀸 𑀕𑀦𑁆𑀢𑀼𑀁 𑀦 𑀮𑀪𑀢𑀺, 𑀇𑀲𑁆𑀲𑀭𑀤𑀸𑀭𑀺𑀓𑀸 𑀭𑀣𑀸𑀤𑀻𑀳𑀺 𑀕𑀘𑁆𑀙𑀦𑁆𑀢𑀺, 𑀇𑀢𑀭𑀸 𑀧𑀓𑀢𑀺𑀬𑀸𑀦𑀓𑀁 𑀯𑀸 𑀅𑀪𑀺𑀭𑀼𑀳𑀦𑁆𑀢𑀺, 𑀙𑀢𑁆𑀢𑀁 𑀯𑀸 𑀢𑀸𑀮𑀧𑀡𑁆𑀡𑀁 𑀯𑀸 𑀉𑀧𑀭𑀺 𑀓𑀭𑁄𑀦𑁆𑀢𑀺, 𑀢𑀲𑁆𑀫𑀺𑀫𑁆𑀧𑀺 𑀅𑀲𑀢𑀺 𑀦𑀺𑀯𑀢𑁆𑀣𑀲𑀸𑀝𑀓𑀲𑁆𑀲 𑀤𑀲𑀦𑁆𑀢𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀅𑀁𑀲𑁂 𑀔𑀺𑀧𑀦𑁆𑀢𑀸 𑀕𑀘𑁆𑀙𑀦𑁆𑀢𑀺 𑀏𑀯. 𑀢𑀲𑁆𑀲𑀸 𑀧𑀦 𑀧𑀺𑀢𑀸 𑀧𑀜𑁆𑀘 𑀭𑀣𑀲𑀢𑀸𑀦𑀺 𑀧𑁂𑀲𑁂𑀲𑀺. 𑀲𑀸 𑀲𑀧𑀭𑀺𑀯𑀸𑀭𑀸 𑀭𑀣𑀁 𑀆𑀭𑀼𑀬𑁆𑀳 𑀕𑀢𑀸. 𑀩𑁆𑀭𑀸𑀳𑁆𑀫𑀡𑀸𑀧𑀺 𑀏𑀓𑀢𑁄𑀯 𑀅𑀕𑀫𑀁𑀲𑀼. 𑀅𑀣 𑀦𑁂 𑀲𑁂𑀝𑁆𑀞𑀺 𑀧𑀼𑀘𑁆𑀙𑀺 𑁋 ‘‘𑀓𑀼𑀢𑁄 𑀆𑀕𑀢𑀸𑀢𑁆𑀣𑀸’’𑀢𑀺? ‘‘𑀲𑀸𑀯𑀢𑁆𑀣𑀺𑀢𑁄 𑀫𑀳𑀸𑀲𑁂𑀝𑁆𑀞𑀻’’𑀢𑀺. ‘‘𑀲𑁂𑀝𑁆𑀞𑀺 𑀓𑀢𑀭𑁄 𑀦𑀸𑀫𑀸’’𑀢𑀺? ‘‘𑀫𑀺𑀕𑀸𑀭𑀲𑁂𑀝𑁆𑀞𑀺 𑀦𑀸𑀫𑀸’’𑀢𑀺. ‘‘𑀧𑀼𑀢𑁆𑀢𑁄 𑀓𑁄 𑀦𑀸𑀫𑀸’’𑀢𑀺? ‘‘𑀧𑀼𑀡𑁆𑀡𑀯𑀟𑁆𑀠𑀦𑀓𑀼𑀫𑀸𑀭𑁄 𑀦𑀸𑀫 𑀫𑀳𑀸𑀲𑁂𑀝𑁆𑀞𑀻’’𑀢𑀺. ‘‘𑀥𑀦𑀁 𑀓𑀺𑀢𑁆𑀢𑀓’’𑀦𑁆𑀢𑀺? ‘‘𑀘𑀢𑁆𑀢𑀸𑀮𑀻𑀲𑀓𑁄𑀝𑀺𑀬𑁄 𑀫𑀳𑀸𑀲𑁂𑀝𑁆𑀞𑀻’’𑀢𑀺. ‘‘𑀥𑀦𑀁 𑀢𑀸𑀯 𑀅𑀫𑁆𑀳𑀸𑀓𑀁 𑀥𑀦𑀁 𑀉𑀧𑀸𑀤𑀸𑀬 𑀓𑀸𑀓𑀡𑀺𑀓𑀫𑀢𑁆𑀢𑀁, 𑀤𑀸𑀭𑀺𑀓𑀸𑀬 𑀧𑀦 𑀆𑀭𑀓𑁆𑀔𑀫𑀢𑁆𑀢𑀸𑀬 𑀮𑀤𑁆𑀥𑀓𑀸𑀮𑀢𑁄 𑀧𑀝𑁆𑀞𑀸𑀬 𑀓𑀺𑀁 𑀅𑀜𑁆𑀜𑁂𑀦 𑀓𑀸𑀭𑀡𑁂𑀦𑀸’’𑀢𑀺 𑀅𑀥𑀺𑀯𑀸𑀲𑁂𑀲𑀺. 𑀲𑁄 𑀢𑁂𑀲𑀁 𑀲𑀓𑁆𑀓𑀸𑀭𑀁 𑀓𑀢𑁆𑀯𑀸 𑀏𑀓𑀸𑀳𑀤𑁆𑀯𑀻𑀳𑀁 𑀯𑀲𑀸𑀧𑁂𑀢𑁆𑀯𑀸 𑀉𑀬𑁆𑀬𑁄𑀚𑁂𑀲𑀺.

𑀢𑁂 𑀲𑀸𑀯𑀢𑁆𑀣𑀺𑀁 𑀕𑀦𑁆𑀢𑁆𑀯𑀸 𑀫𑀺𑀕𑀸𑀭𑀲𑁂𑀝𑁆𑀞𑀺𑀲𑁆𑀲 ‘‘𑀮𑀤𑁆𑀥𑀸 𑀦𑁄 𑀤𑀸𑀭𑀺𑀓𑀸’’𑀢𑀺 𑀆𑀭𑁄𑀘𑀬𑀺𑀁𑀲𑀼. ‘‘𑀓𑀲𑁆𑀲 𑀥𑀻𑀢𑀸’’𑀢𑀺? ‘‘𑀥𑀦𑀜𑁆𑀘𑀬𑀲𑁂𑀝𑁆𑀞𑀺𑀦𑁄’’𑀢𑀺. 𑀲𑁄 ‘‘𑀫𑀳𑀸𑀓𑀼𑀮𑀲𑁆𑀲 𑀫𑁂 𑀤𑀸𑀭𑀺𑀓𑀸 𑀮𑀤𑁆𑀥𑀸, 𑀔𑀺𑀧𑁆𑀧𑀫𑁂𑀯 𑀦𑀁 𑀆𑀦𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀢𑀢𑁆𑀣 𑀕𑀫𑀦𑀢𑁆𑀣𑀁 𑀭𑀜𑁆𑀜𑁄 𑀆𑀭𑁄𑀘𑁂𑀲𑀺. 𑀭𑀸𑀚𑀸 ‘‘‘𑀫𑀳𑀸𑀓𑀼𑀮𑀁 𑀏𑀢𑀁 𑀫𑀬𑀸 𑀩𑀺𑀫𑁆𑀩𑀺𑀲𑀸𑀭𑀲𑁆𑀲 𑀲𑀦𑁆𑀢𑀺𑀓𑀸 𑀆𑀦𑁂𑀢𑁆𑀯𑀸 𑀲𑀸𑀓𑁂𑀢𑁂 𑀦𑀺𑀯𑁂𑀲𑀺𑀢𑀁, 𑀢𑀲𑁆𑀲 𑀲𑀫𑁆𑀫𑀸𑀦𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻’𑀢𑀺 𑀅𑀳𑀫𑁆𑀧𑀺 𑀆𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀆𑀳, 𑀲𑁄 ‘‘𑀲𑀸𑀥𑀼, 𑀤𑁂𑀯𑀸’’𑀢𑀺 𑀯𑀢𑁆𑀯𑀸 𑀥𑀦𑀜𑁆𑀘𑀬𑀲𑁂𑀝𑁆𑀞𑀺𑀦𑁄 𑀲𑀸𑀲𑀦𑀁 𑀧𑁂𑀲𑁂𑀲𑀺 𑁋 ‘‘𑀫𑀬𑀺 𑀆𑀕𑀘𑁆𑀙𑀦𑁆𑀢𑁂 𑀭𑀸𑀚𑀸𑀧𑀺 𑀆𑀕𑀫𑀺𑀲𑁆𑀲𑀢𑀺, 𑀫𑀳𑀦𑁆𑀢𑀁 𑀭𑀸𑀚𑀩𑀮𑀁 𑀏𑀢𑁆𑀢𑀓𑀲𑁆𑀲 𑀚𑀦𑀲𑁆𑀲 𑀓𑀢𑁆𑀢𑀩𑁆𑀩𑀬𑀼𑀢𑁆𑀢𑀓𑀁 𑀓𑀸𑀢𑀼𑀁 𑀲𑀓𑁆𑀔𑀺𑀲𑁆𑀲𑀲𑀺, 𑀦 𑀲𑀓𑁆𑀔𑀺𑀲𑁆𑀲𑀲𑀻’’𑀢𑀺? 𑀇𑀢𑀭𑁄𑀧𑀺 ‘‘𑀲𑀘𑁂𑀧𑀺 𑀤𑀲 𑀭𑀸𑀚𑀸𑀦𑁄 𑀆𑀕𑀘𑁆𑀙𑀦𑁆𑀢𑀺, 𑀆𑀕𑀘𑁆𑀙𑀦𑁆𑀢𑀽’’𑀢𑀺 𑀧𑀝𑀺𑀲𑀸𑀲𑀦𑀁 𑀧𑁂𑀲𑁂𑀲𑀺. 𑀫𑀺𑀕𑀸𑀭𑀲𑁂𑀝𑁆𑀞𑀺 𑀢𑀸𑀯 𑀫𑀳𑀦𑁆𑀢𑁂 𑀦𑀕𑀭𑁂 𑀕𑁂𑀳𑀕𑁄𑀧𑀓𑀫𑀢𑁆𑀢𑀁 𑀞𑀧𑁂𑀢𑁆𑀯𑀸 𑀲𑁂𑀲𑀚𑀦𑀁 𑀆𑀤𑀸𑀬 𑀕𑀦𑁆𑀢𑁆𑀯𑀸 𑀅𑀟𑁆𑀠𑀬𑁄𑀚𑀦𑀫𑀢𑁆𑀢𑁂 𑀞𑀸𑀦𑁂 𑀞𑀢𑁆𑀯𑀸 ‘‘𑀆𑀕𑀢𑀸𑀫𑁆𑀳𑀸’’𑀢𑀺 𑀲𑀸𑀲𑀦𑀁 𑀧𑀳𑀺𑀡𑀺. 𑀥𑀦𑀜𑁆𑀘𑀬𑀲𑁂𑀝𑁆𑀞𑀺 𑀩𑀳𑀼𑀧𑀡𑁆𑀡𑀸𑀓𑀸𑀭𑀁 𑀧𑁂𑀲𑁂𑀢𑁆𑀯𑀸 𑀥𑀻𑀢𑀭𑀸 𑀲𑀤𑁆𑀥𑀺𑀁 𑀫𑀦𑁆𑀢𑁂𑀲𑀺, ‘‘𑀅𑀫𑁆𑀫, 𑀲𑀲𑀼𑀭𑁄 𑀓𑀺𑀭 𑀢𑁂 𑀓𑁄𑀲𑀮𑀭𑀜𑁆𑀜𑀸 𑀲𑀤𑁆𑀥𑀺𑀁 𑀆𑀕𑀢𑁄, 𑀢𑀲𑁆𑀲 𑀓𑀢𑀭𑀁 𑀕𑁂𑀳𑀁 𑀧𑀝𑀺𑀚𑀕𑁆𑀕𑀺𑀢𑀩𑁆𑀩𑀁, 𑀭𑀜𑁆𑀜𑁄 𑀓𑀢𑀭𑀁, 𑀉𑀧𑀭𑀸𑀚𑀸𑀤𑀻𑀦𑀁 𑀓𑀢𑀭𑀸𑀦𑀻’’𑀢𑀺? 𑀧𑀡𑁆𑀟𑀺𑀢𑀸 𑀲𑁂𑀝𑁆𑀞𑀺𑀥𑀻𑀢𑀸 𑀯𑀚𑀺𑀭𑀕𑁆𑀕𑀢𑀺𑀔𑀺𑀡𑀜𑀸𑀡𑀸 𑀓𑀧𑁆𑀧𑀲𑀢𑀲𑀳𑀲𑁆𑀲𑀁 𑀧𑀢𑁆𑀣𑀺𑀢𑀧𑀢𑁆𑀣𑀦𑀸 𑀅𑀪𑀺𑀦𑀻𑀳𑀸𑀭𑀲𑀫𑁆𑀧𑀦𑁆𑀦𑀸 ‘‘𑀲𑀲𑀼𑀭𑀲𑁆𑀲 𑀫𑁂 𑀅𑀲𑀼𑀓𑀕𑁂𑀳𑀁 𑀧𑀝𑀺𑀚𑀕𑁆𑀕𑀣, 𑀭𑀜𑁆𑀜𑁄 𑀅𑀲𑀼𑀓𑀕𑁂𑀳𑀁, 𑀉𑀧𑀭𑀸𑀚𑀸𑀤𑀻𑀦𑀁 𑀅𑀲𑀼𑀓𑀸𑀦𑀻’’𑀢𑀺 𑀲𑀁𑀯𑀺𑀤𑀳𑀺𑀢𑁆𑀯𑀸 𑀤𑀸𑀲𑀓𑀫𑁆𑀫𑀓𑀭𑁂 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀏𑀢𑁆𑀢𑀓𑀸 𑀭𑀜𑁆𑀜𑁄 𑀓𑀢𑁆𑀢𑀩𑁆𑀩𑀓𑀺𑀘𑁆𑀘𑀁 𑀓𑀭𑁄𑀣, 𑀏𑀢𑁆𑀢𑀓𑀸 𑀉𑀧𑀭𑀸𑀚𑀸𑀤𑀻𑀦𑀁, 𑀳𑀢𑁆𑀣𑀺𑀅𑀲𑁆𑀲𑀸𑀤𑀬𑁄𑀧𑀺 𑀢𑀼𑀫𑁆𑀳𑁂𑀬𑁂𑀯 𑀧𑀝𑀺𑀚𑀕𑁆𑀕𑀣, 𑀅𑀲𑁆𑀲𑀩𑀦𑁆𑀥𑀸𑀤𑀬𑁄𑀧𑀺 𑀆𑀕𑀦𑁆𑀢𑁆𑀯𑀸 𑀫𑀗𑁆𑀕𑀮𑀙𑀡𑀁 𑀅𑀦𑀼𑀪𑀯𑀺𑀲𑁆𑀲𑀦𑁆𑀢𑀻’’𑀢𑀺 𑀲𑀁𑀯𑀺𑀤𑀳𑀺. ‘‘𑀓𑀺𑀁 𑀓𑀸𑀭𑀡𑀸’’? ‘‘‘𑀫𑀬𑀁 𑀯𑀺𑀲𑀸𑀔𑀸𑀬 𑀫𑀗𑁆𑀕𑀮𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀦 𑀓𑀺𑀜𑁆𑀘𑀺 𑀮𑀪𑀺𑀫𑁆𑀳, 𑀅𑀲𑁆𑀲𑀭𑀓𑁆𑀔𑀡𑀸𑀤𑀻𑀦𑀺 𑀓𑀭𑁄𑀦𑁆𑀢𑀸 𑀲𑀼𑀔𑀁 𑀦 𑀯𑀺𑀘𑀭𑀺𑀫𑁆𑀳𑀸’𑀢𑀺 𑀓𑁂𑀘𑀺 𑀯𑀢𑁆𑀢𑀼𑀁 𑀫𑀸 𑀮𑀪𑀺𑀁𑀲𑀽’’𑀢𑀺.

𑀢𑀁 𑀤𑀺𑀯𑀲𑀫𑁂𑀯 𑀯𑀺𑀲𑀸𑀔𑀸𑀬 𑀧𑀺𑀢𑀸 𑀧𑀜𑁆𑀘𑀲𑀢𑁂 𑀲𑀼𑀯𑀡𑁆𑀡𑀓𑀸𑀭𑁂 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀥𑀻𑀢𑀼 𑀫𑁂 𑀫𑀳𑀸𑀮𑀢𑀸𑀧𑀲𑀸𑀥𑀦𑀁 𑀦𑀸𑀫 𑀓𑀭𑁄𑀣𑀸’’𑀢𑀺 𑀭𑀢𑁆𑀢𑀲𑀼𑀯𑀡𑁆𑀡𑀲𑁆𑀲 𑀦𑀺𑀓𑁆𑀔𑀲𑀳𑀲𑁆𑀲𑀁, 𑀢𑀤𑀦𑀼𑀭𑀽𑀧𑀸𑀦𑀺 𑀘 𑀭𑀚𑀢𑀫𑀡𑀺𑀫𑀼𑀢𑁆𑀢𑀸𑀧𑀯𑀸𑀴𑀯𑀚𑀺𑀭𑀸𑀤𑀻𑀦𑀺 𑀤𑀸𑀧𑁂𑀲𑀺. 𑀭𑀸𑀚𑀸 𑀓𑀢𑀺𑀧𑀸𑀳𑀁 𑀯𑀲𑀺𑀢𑁆𑀯𑀸𑀯 𑀥𑀦𑀜𑁆𑀘𑀬𑀲𑁂𑀝𑁆𑀞𑀺𑀲𑁆𑀲 𑀲𑀸𑀲𑀦𑀁 𑀧𑀳𑀺𑀡𑀺 ‘‘𑀦 𑀲𑀓𑁆𑀓𑀸 𑀲𑁂𑀝𑁆𑀞𑀺𑀦𑀸 𑀅𑀫𑁆𑀳𑀸𑀓𑀁 𑀘𑀺𑀭𑀁 𑀧𑁄𑀲𑀦𑀁 𑀦𑀸𑀫 𑀓𑀸𑀢𑀼𑀁, 𑀤𑀸𑀦𑀺 𑀤𑀸𑀭𑀺𑀓𑀸𑀬 𑀕𑀫𑀦𑀓𑀸𑀮𑀁 𑀚𑀸𑀦𑀸𑀢𑀽’’𑀢𑀺. 𑀲𑁄𑀧𑀺 𑀭𑀜𑁆𑀜𑁄 𑀲𑀸𑀲𑀦𑀁 𑀧𑁂𑀲𑁂𑀲𑀺 𑁋 ‘‘𑀇𑀤𑀸𑀦𑀺 𑀯𑀲𑁆𑀲𑀓𑀸𑀮𑁄 𑀆𑀕𑀢𑁄, 𑀦 𑀲𑀓𑁆𑀓𑀸 𑀘𑀢𑀼𑀫𑀸𑀲𑀁 𑀯𑀺𑀘𑀭𑀺𑀢𑀼𑀁, 𑀢𑀼𑀫𑁆𑀳𑀸𑀓𑀁 𑀩𑀮𑀓𑀸𑀬𑀲𑁆𑀲 𑀬𑀁 𑀬𑀁 𑀮𑀤𑁆𑀥𑀼𑀁 𑀯𑀝𑁆𑀝𑀢𑀺, 𑀲𑀩𑁆𑀩𑀁 𑀢𑀁 𑀫𑀫 𑀪𑀸𑀭𑁄, 𑀫𑀬𑀸 𑀧𑁂𑀲𑀺𑀢𑀓𑀸𑀮𑁂 𑀤𑁂𑀯𑁄 𑀕𑀫𑀺𑀲𑁆𑀲𑀢𑀻’’𑀢𑀺. 𑀢𑀢𑁄 𑀧𑀝𑁆𑀞𑀸𑀬 𑀲𑀸𑀓𑁂𑀢𑀦𑀕𑀭𑀁 𑀦𑀺𑀘𑁆𑀘𑀦𑀓𑁆𑀔𑀢𑁆𑀢𑀁 𑀯𑀺𑀬 𑀅𑀳𑁄𑀲𑀺. 𑀭𑀸𑀚𑀸𑀦𑀁 𑀆𑀤𑀺𑀁 𑀓𑀢𑁆𑀯𑀸 𑀲𑀩𑁆𑀩𑁂𑀲𑀁 𑀫𑀸𑀮𑀸𑀕𑀦𑁆𑀥𑀯𑀢𑁆𑀣𑀸𑀤𑀻𑀦𑀺 𑀧𑀝𑀺𑀬𑀢𑁆𑀢𑀸𑀦𑁂𑀯 𑀳𑁄𑀦𑁆𑀢𑀺. 𑀢𑀢𑁄 𑀢𑁂 𑀚𑀦𑀸 𑀘𑀺𑀦𑁆𑀢𑀬𑀺𑀁𑀲𑀼 𑁋 ‘‘𑀲𑁂𑀝𑁆𑀞𑀺 𑀅𑀫𑁆𑀳𑀸𑀓𑀫𑁂𑀯 𑀲𑀓𑁆𑀓𑀸𑀭𑀁 𑀓𑀭𑁄𑀢𑀻’’𑀢𑀺, 𑀏𑀯𑀁 𑀢𑀬𑁄 𑀫𑀸𑀲𑀸 𑀅𑀢𑀺𑀓𑁆𑀓𑀦𑁆𑀢𑀸, 𑀧𑀲𑀸𑀥𑀦𑀁 𑀧𑀦 𑀢𑀸𑀯 𑀦 𑀦𑀺𑀝𑁆𑀞𑀸𑀢𑀺. 𑀓𑀫𑁆𑀫𑀦𑁆𑀢𑀸𑀥𑀺𑀝𑁆𑀞𑀸𑀬𑀓𑀸 𑀆𑀕𑀦𑁆𑀢𑁆𑀯𑀸 𑀲𑁂𑀝𑁆𑀞𑀺𑀦𑁄 𑀆𑀭𑁄𑀘𑁂𑀲𑀼𑀁 𑁋 ‘‘𑀅𑀜𑁆𑀜𑀁 𑀅𑀲𑀦𑁆𑀢𑀁 𑀦𑀸𑀫 𑀦𑀢𑁆𑀣𑀺, 𑀩𑀮𑀓𑀸𑀬𑀲𑁆𑀲 𑀧𑀦 𑀪𑀢𑁆𑀢𑀧𑀘𑀦𑀤𑀸𑀭𑀽𑀦𑀺 𑀦𑀧𑁆𑀧𑀳𑁄𑀦𑁆𑀢𑀻’’𑀢𑀺. ‘‘𑀕𑀘𑁆𑀙𑀣, 𑀢𑀸𑀢𑀸, 𑀇𑀫𑀲𑁆𑀫𑀺𑀁 𑀦𑀕𑀭𑁂 𑀧𑀭𑀺𑀚𑀺𑀡𑁆𑀡𑀸 𑀳𑀢𑁆𑀣𑀺𑀲𑀸𑀮𑀸𑀤𑀬𑁄 𑀘𑁂𑀯 𑀧𑀭𑀺𑀚𑀺𑀡𑁆𑀡𑀓𑀸𑀦𑀺 𑀘 𑀕𑁂𑀳𑀸𑀦𑀺 𑀕𑀳𑁂𑀢𑁆𑀯𑀸 𑀧𑀘𑀣𑀸’’𑀢𑀺. 𑀏𑀯𑀁 𑀧𑀘𑀦𑁆𑀢𑀸𑀦𑀫𑁆𑀧𑀺 𑀅𑀟𑁆𑀠𑀫𑀸𑀲𑁄 𑀅𑀢𑀺𑀓𑁆𑀓𑀦𑁆𑀢𑁄. 𑀢𑀢𑁄 𑀧𑀼𑀦𑀧𑀺 ‘‘𑀤𑀸𑀭𑀽𑀦𑀺 𑀦𑀢𑁆𑀣𑀻’’𑀢𑀺 𑀆𑀭𑁄𑀘𑀬𑀺𑀁𑀲𑀼. ‘‘𑀇𑀫𑀲𑁆𑀫𑀺𑀁 𑀓𑀸𑀮𑁂 𑀦 𑀲𑀓𑁆𑀓𑀸 𑀤𑀸𑀭𑀽𑀦𑀺 𑀮𑀤𑁆𑀥𑀼𑀁, 𑀤𑀼𑀲𑁆𑀲𑀓𑁄𑀝𑁆𑀞𑀸𑀕𑀸𑀭𑀸𑀦𑀺 𑀯𑀺𑀯𑀭𑀺𑀢𑁆𑀯𑀸 𑀣𑀽𑀮𑀲𑀸𑀝𑀓𑁂𑀳𑀺 𑀯𑀝𑁆𑀝𑀺𑀬𑁄 𑀓𑀢𑁆𑀯𑀸 𑀢𑁂𑀮𑀘𑀸𑀝𑀻𑀲𑀼 𑀢𑁂𑀫𑁂𑀢𑁆𑀯𑀸 𑀪𑀢𑁆𑀢𑀁 𑀧𑀘𑀣𑀸’’𑀢𑀺. 𑀢𑁂 𑀅𑀟𑁆𑀠𑀫𑀸𑀲𑀁 𑀢𑀣𑀸 𑀅𑀓𑀁𑀲𑀼. 𑀏𑀯𑀁 𑀘𑀢𑁆𑀢𑀸𑀭𑁄 𑀫𑀸𑀲𑀸 𑀅𑀢𑀺𑀓𑁆𑀓𑀦𑁆𑀢𑀸, 𑀧𑀲𑀸𑀥𑀦𑀫𑁆𑀧𑀺 𑀦𑀺𑀝𑁆𑀞𑀺𑀢𑀁.

𑀢𑀲𑁆𑀫𑀺𑀁 𑀧𑀲𑀸𑀥𑀦𑁂 𑀘𑀢𑀲𑁆𑀲𑁄 𑀯𑀚𑀺𑀭𑀦𑀸𑀴𑀺𑀬𑁄 𑀉𑀧𑀬𑁄𑀕𑀁 𑀅𑀕𑀫𑀁𑀲𑀼, 𑀫𑀼𑀢𑁆𑀢𑀸𑀦𑀁 𑀏𑀓𑀸𑀤𑀲 𑀦𑀸𑀴𑀺𑀬𑁄, 𑀧𑀯𑀸𑀴𑀲𑁆𑀲 𑀩𑀸𑀯𑀻𑀲𑀢𑀺 𑀦𑀸𑀴𑀺𑀬𑁄, 𑀫𑀡𑀻𑀦𑀁 𑀢𑁂𑀢𑁆𑀢𑀺𑀁𑀲 𑀦𑀸𑀴𑀺𑀬𑁄. 𑀇𑀢𑀺 𑀏𑀢𑁂𑀳𑀺 𑀘 𑀅𑀜𑁆𑀜𑁂𑀳𑀺 𑀘 𑀭𑀢𑀦𑁂𑀳𑀺 𑀦𑀺𑀝𑁆𑀞𑀸𑀦𑀁 𑀅𑀕𑀫𑀸𑀲𑀺. 𑀅𑀲𑀼𑀢𑁆𑀢𑀫𑀬𑀁 𑀧𑀲𑀸𑀥𑀦𑀁 𑀭𑀚𑀢𑁂𑀦 𑀲𑀼𑀢𑁆𑀢𑀓𑀺𑀘𑁆𑀘𑀁 𑀓𑀭𑀺𑀁𑀲𑀼. 𑀢𑀁 𑀲𑀻𑀲𑁂 𑀧𑀝𑀺𑀫𑀼𑀓𑁆𑀓𑀁 𑀧𑀸𑀤𑀧𑀺𑀝𑁆𑀞𑀺𑀁 𑀕𑀘𑁆𑀙𑀢𑀺. 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀞𑀸𑀦𑁂 𑀫𑀼𑀤𑁆𑀤𑀺𑀓𑀸 𑀬𑁄𑀚𑁂𑀢𑁆𑀯𑀸 𑀓𑀢𑀸 𑀲𑀼𑀯𑀡𑁆𑀡𑀫𑀬𑀸 𑀕𑀡𑁆𑀞𑀺𑀓𑀸 𑀳𑁄𑀦𑁆𑀢𑀺, 𑀭𑀚𑀢𑀫𑀬𑀸 𑀧𑀸𑀲𑀓𑀸, 𑀫𑀢𑁆𑀣𑀓𑀫𑀚𑁆𑀛𑁂 𑀏𑀓𑀸 𑀫𑀼𑀤𑁆𑀤𑀺𑀓𑀸, 𑀤𑁆𑀯𑀻𑀲𑀼 𑀓𑀡𑁆𑀡𑀧𑀺𑀝𑁆𑀞𑀻𑀲𑀼 𑀤𑁆𑀯𑁂, 𑀕𑀮𑀯𑀸𑀝𑀓𑁂 𑀏𑀓𑀸, 𑀤𑁆𑀯𑀻𑀲𑀼 𑀚𑀢𑁆𑀢𑀽𑀲𑀼 𑀤𑁆𑀯𑁂, 𑀤𑁆𑀯𑀻𑀲𑀼 𑀓𑀧𑁆𑀧𑀭𑁂𑀲𑀼 𑀤𑁆𑀯𑁂, 𑀤𑁆𑀯𑀻𑀲𑀼 𑀓𑀝𑀺𑀧𑀲𑁆𑀲𑁂𑀲𑀼 𑀤𑁆𑀯𑁂𑀢𑀺. 𑀢𑀲𑁆𑀫𑀺𑀁 𑀔𑁄 𑀧𑀦 𑀧𑀲𑀸𑀥𑀦𑁂 𑀏𑀓𑀁 𑀫𑁄𑀭𑀁 𑀓𑀭𑀺𑀁𑀲𑀼, 𑀢𑀲𑁆𑀲 𑀤𑀓𑁆𑀔𑀺𑀡𑀧𑀓𑁆𑀔𑁂 𑀭𑀢𑁆𑀢𑀲𑀼𑀯𑀡𑁆𑀡𑀫𑀬𑀸𑀦𑀺 𑀧𑀜𑁆𑀘 𑀧𑀢𑁆𑀢𑀲𑀢𑀸𑀦𑀺 𑀅𑀳𑁂𑀲𑀼𑀁, 𑀯𑀸𑀫𑀧𑀓𑁆𑀔𑁂 𑀧𑀜𑁆𑀘 𑀧𑀢𑁆𑀢𑀲𑀢𑀸𑀦𑀺, 𑀢𑀼𑀡𑁆𑀟𑀁 𑀧𑀯𑀸𑀴𑀫𑀬𑀁, 𑀅𑀓𑁆𑀔𑀻𑀦𑀺 𑀫𑀡𑀺𑀫𑀬𑀸𑀦𑀺, 𑀢𑀣𑀸 𑀕𑀻𑀯𑀸 𑀘 𑀧𑀺𑀜𑁆𑀙𑀸𑀦𑀺 𑀘, 𑀧𑀢𑁆𑀢𑀦𑀸𑀴𑀺𑀬𑁄 𑀭𑀚𑀢𑀫𑀬𑀸, 𑀢𑀣𑀸 𑀚𑀗𑁆𑀖𑀸𑀬𑁄. 𑀲𑁄 𑀯𑀺𑀲𑀸𑀔𑀸𑀬 𑀫𑀢𑁆𑀣𑀓𑀫𑀚𑁆𑀛𑁂 𑀧𑀩𑁆𑀩𑀢𑀓𑀽𑀝𑁂 𑀞𑀢𑁆𑀯𑀸 𑀦𑀘𑁆𑀘𑀦𑀫𑀬𑀽𑀭𑁄 𑀯𑀺𑀬 𑀔𑀸𑀬𑀢𑀺. 𑀧𑀢𑁆𑀢𑀦𑀸𑀴𑀺𑀲𑀳𑀲𑁆𑀲𑀲𑁆𑀲 𑀲𑀤𑁆𑀤𑁄 𑀤𑀺𑀩𑁆𑀩𑀲𑀗𑁆𑀕𑀻𑀢𑀁 𑀯𑀺𑀬 𑀧𑀜𑁆𑀘𑀗𑁆𑀕𑀺𑀓𑀢𑀽𑀭𑀺𑀬𑀖𑁄𑀲𑁄 𑀯𑀺𑀬 𑀘 𑀧𑀯𑀢𑁆𑀢𑀢𑀺. 𑀲𑀦𑁆𑀢𑀺𑀓𑀁 𑀉𑀧𑀕𑀢𑀸𑀬𑁂𑀯 𑀢𑀲𑁆𑀲𑀸 𑀅𑀫𑁄𑀭𑀪𑀸𑀯𑀁 𑀚𑀸𑀦𑀦𑁆𑀢𑀺. 𑀧𑀲𑀸𑀥𑀦𑀁 𑀦𑀯𑀓𑁄𑀝𑀺𑀅𑀕𑁆𑀖𑀦𑀓𑀁 𑀅𑀳𑁄𑀲𑀺, 𑀲𑀢𑀲𑀳𑀲𑁆𑀲𑀁 𑀳𑀢𑁆𑀣𑀓𑀫𑁆𑀫𑀫𑀽𑀮𑀁 𑀤𑀻𑀬𑀺𑀢𑁆𑀣.

‘‘𑀓𑀺𑀲𑁆𑀲 𑀧𑀦 𑀦𑀺𑀲𑁆𑀲𑀦𑁆𑀤𑁂𑀦 𑀢𑀸𑀬𑁂𑀢𑀁 𑀧𑀲𑀸𑀥𑀦𑀁 𑀮𑀤𑁆𑀥’’𑀦𑁆𑀢𑀺? 𑀲𑀸 𑀓𑀺𑀭 𑀓𑀲𑁆𑀲𑀧𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀓𑀸𑀮𑁂 𑀯𑀻𑀲𑀢𑀺𑀬𑀸 𑀪𑀺𑀓𑁆𑀔𑀼𑀲𑀳𑀲𑁆𑀲𑀸𑀦𑀁 𑀘𑀻𑀯𑀭𑀲𑀸𑀝𑀓𑀁 𑀤𑀢𑁆𑀯𑀸 𑀲𑀼𑀢𑁆𑀢𑀫𑁆𑀧𑀺 𑀲𑀽𑀘𑀺𑀬𑁄𑀧𑀺 𑀭𑀚𑀦𑀫𑁆𑀧𑀺 𑀅𑀢𑁆𑀢𑀦𑁄 𑀲𑀦𑁆𑀢𑀓𑀫𑁂𑀯 𑀅𑀤𑀸𑀲𑀺. 𑀢𑀲𑁆𑀲 𑀘𑀻𑀯𑀭𑀤𑀸𑀦𑀲𑁆𑀲 𑀦𑀺𑀲𑁆𑀲𑀦𑁆𑀤𑁂𑀦 𑀇𑀫𑀁 𑀫𑀳𑀸𑀮𑀢𑀸𑀧𑀲𑀸𑀥𑀦𑀁 𑀮𑀪𑀺. 𑀇𑀢𑁆𑀣𑀻𑀦𑀜𑁆𑀳𑀺 𑀘𑀻𑀯𑀭𑀤𑀸𑀦𑀁 𑀫𑀳𑀸𑀮𑀢𑀸𑀧𑀲𑀸𑀥𑀦𑀪𑀡𑁆𑀟𑁂𑀦 𑀫𑀢𑁆𑀣𑀓𑀁 𑀧𑀧𑁆𑀧𑁄𑀢𑀺, 𑀧𑀼𑀭𑀺𑀲𑀸𑀦𑀁 𑀇𑀤𑁆𑀥𑀺𑀫𑀬𑀧𑀢𑁆𑀢𑀘𑀻𑀯𑀭𑁂𑀦𑀸𑀢𑀺. 𑀏𑀯𑀁 𑀫𑀳𑀸𑀲𑁂𑀝𑁆𑀞𑀺 𑀘𑀢𑀽𑀳𑀺 𑀫𑀸𑀲𑁂𑀳𑀺 𑀥𑀻𑀢𑀼 𑀧𑀭𑀺𑀯𑀘𑁆𑀙𑀁 𑀓𑀢𑁆𑀯𑀸 𑀢𑀲𑁆𑀲𑀸 𑀤𑁂𑀬𑁆𑀬𑀥𑀫𑁆𑀫𑀁 𑀤𑀤𑀫𑀸𑀦𑁄 𑀓𑀳𑀸𑀧𑀡𑀧𑀽𑀭𑀸𑀦𑀺 𑀧𑀜𑁆𑀘 𑀲𑀓𑀝𑀲𑀢𑀸𑀦𑀺 𑀅𑀤𑀸𑀲𑀺, 𑀲𑀼𑀯𑀡𑁆𑀡𑀪𑀸𑀚𑀦𑀧𑀽𑀭𑀸𑀦𑀺 𑀧𑀜𑁆𑀘, 𑀭𑀚𑀢𑀪𑀸𑀚𑀦𑀧𑀽𑀭𑀸𑀦𑀺 𑀧𑀜𑁆𑀘, 𑀢𑀫𑁆𑀩𑀪𑀸𑀚𑀦𑀧𑀽𑀭𑀸𑀦𑀺 𑀧𑀜𑁆𑀘, 𑀧𑀢𑁆𑀢𑀼𑀡𑁆𑀡𑀯𑀢𑁆𑀣𑀓𑁄𑀲𑁂𑀬𑁆𑀬𑀯𑀢𑁆𑀣𑀧𑀽𑀭𑀸𑀦𑀺 𑀧𑀜𑁆𑀘, 𑀲𑀧𑁆𑀧𑀺𑀧𑀽𑀭𑀸𑀦𑀺 𑀧𑀜𑁆𑀘, 𑀢𑁂𑀮𑀧𑀽𑀭𑀸𑀦𑀺 𑀧𑀜𑁆𑀘, 𑀲𑀸𑀮𑀺𑀢𑀡𑁆𑀟𑀼𑀮𑀧𑀽𑀭𑀸𑀦𑀺 𑀧𑀜𑁆𑀘, 𑀦𑀗𑁆𑀕𑀮𑀨𑀸𑀮𑀸𑀤𑀺𑀉𑀧𑀓𑀭𑀡𑀧𑀽𑀭𑀸𑀦𑀺 𑀧𑀜𑁆𑀘𑀲𑀓𑀝𑀲𑀢𑀸𑀦𑀺 𑀅𑀤𑀸𑀲𑀺. 𑀏𑀯𑀁 𑀓𑀺𑀭𑀲𑁆𑀲 𑀅𑀳𑁄𑀲𑀺 𑁋 ‘‘𑀫𑀫 𑀥𑀻𑀢𑀼 𑀕𑀢𑀝𑁆𑀞𑀸𑀦𑁂 ‘𑀅𑀲𑀼𑀓𑁂𑀦 𑀦𑀸𑀫 𑀫𑁂 𑀅𑀢𑁆𑀣𑁄’𑀢𑀺 𑀫𑀸 𑀧𑀭𑀲𑁆𑀲 𑀕𑁂𑀳𑀤𑁆𑀯𑀸𑀭𑀁 𑀧𑀳𑀺𑀡𑀻’’𑀢𑀺. 𑀢𑀲𑁆𑀫𑀸 𑀲𑀩𑁆𑀩𑀽𑀧𑀓𑀭𑀡𑀸𑀦𑀺 𑀤𑀸𑀧𑁂𑀲𑀺. 𑀏𑀓𑁂𑀓𑀲𑁆𑀫𑀺𑀁 𑀭𑀣𑁂 𑀲𑀩𑁆𑀩𑀸𑀮𑀗𑁆𑀓𑀸𑀭𑀧𑀝𑀺𑀫𑀡𑁆𑀟𑀺𑀢𑀸 𑀢𑀺𑀲𑁆𑀲𑁄 𑀢𑀺𑀲𑁆𑀲𑁄 𑀯𑀡𑁆𑀡𑀤𑀸𑀲𑀺𑀬𑁄 𑀞𑀧𑁂𑀢𑁆𑀯𑀸 𑀧𑀜𑁆𑀘 𑀭𑀣𑀲𑀢𑀸𑀦𑀺 𑀅𑀤𑀸𑀲𑀺. ‘‘𑀏𑀢𑀁 𑀦𑁆𑀳𑀸𑀧𑁂𑀦𑁆𑀢𑀺𑀬𑁄 𑀪𑁄𑀚𑁂𑀦𑁆𑀢𑀺𑀬𑁄 𑀅𑀮𑀗𑁆𑀓𑀭𑁄𑀦𑁆𑀢𑀺𑀬𑁄 𑀯𑀺𑀘𑀭𑀣𑀸’’𑀢𑀺 𑀤𑀺𑀬𑀟𑁆𑀠𑀲𑀳𑀲𑁆𑀲𑀧𑀭𑀺𑀘𑀸𑀭𑀺𑀓𑀸𑀬𑁄 𑀅𑀤𑀸𑀲𑀺. 𑀅𑀣𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀫𑀫 𑀥𑀻𑀢𑀼 𑀕𑀸𑀯𑁄 𑀤𑀲𑁆𑀲𑀸𑀫𑀻’’𑀢𑀺. 𑀲𑁄 𑀧𑀼𑀭𑀺𑀲𑁂 𑀆𑀡𑀸𑀧𑁂𑀲𑀺 𑁋 ‘‘𑀕𑀘𑁆𑀙𑀣 𑀪𑀡𑁂 𑀘𑀽𑀴𑀯𑀚𑀲𑁆𑀲 𑀤𑁆𑀯𑀸𑀭𑀁 𑀯𑀺𑀯𑀭𑀺𑀢𑁆𑀯𑀸 𑀢𑀻𑀲𑀼 𑀕𑀸𑀯𑀼𑀢𑁂𑀲𑀼 𑀢𑀺𑀲𑁆𑀲𑁄 𑀪𑁂𑀭𑀺𑀬𑁄 𑀕𑀳𑁂𑀢𑁆𑀯𑀸 𑀢𑀺𑀝𑁆𑀞𑀣, 𑀧𑀼𑀣𑀼𑀮𑀢𑁄 𑀉𑀲𑀪𑀫𑀢𑁆𑀢𑁂 𑀞𑀸𑀦𑁂 𑀉𑀪𑁄𑀲𑀼 𑀧𑀲𑁆𑀲𑁂𑀲𑀼 𑀢𑀺𑀝𑁆𑀞𑀣. 𑀕𑀸𑀯𑀻𑀦𑀁 𑀢𑀢𑁄 𑀧𑀭𑀁 𑀕𑀦𑁆𑀢𑀼𑀁 𑀫𑀸 𑀅𑀤𑀢𑁆𑀣. 𑀏𑀯𑀁 𑀞𑀺𑀢𑀓𑀸𑀮𑁂 𑀪𑁂𑀭𑀺𑀲𑀜𑁆𑀜𑀁 𑀓𑀭𑁂𑀬𑁆𑀬𑀸𑀣𑀸’’𑀢𑀺. 𑀢𑁂 𑀢𑀣𑀸 𑀅𑀓𑀁𑀲𑀼. 𑀢𑁂 𑀕𑀸𑀯𑀻𑀦𑀁 𑀯𑀚𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀕𑀸𑀯𑀼𑀢𑀁 𑀕𑀢𑀓𑀸𑀮𑁂 𑀪𑁂𑀭𑀺𑀲𑀜𑁆𑀜𑀁 𑀅𑀓𑀁𑀲𑀼, 𑀧𑀼𑀦 𑀅𑀟𑁆𑀠𑀬𑁄𑀚𑀦𑀁 𑀕𑀢𑀓𑀸𑀮𑁂 𑀅𑀓𑀁𑀲𑀼. 𑀧𑀼𑀦𑀧𑀺 𑀢𑀺𑀕𑀸𑀯𑀼𑀢𑀁 𑀕𑀢𑀓𑀸𑀮𑁂 𑀪𑁂𑀭𑀺𑀲𑀜𑁆𑀜𑀁 𑀅𑀓𑀁𑀲𑀼, 𑀧𑀼𑀣𑀼𑀮𑀢𑁄 𑀕𑀫𑀦𑀜𑁆𑀘 𑀦𑀺𑀯𑀸𑀭𑁂𑀲𑀼𑀁. 𑀏𑀯𑀁 𑀤𑀻𑀖𑀢𑁄 𑀢𑀺𑀕𑀸𑀯𑀼𑀢𑁂, 𑀧𑀼𑀣𑀼𑀮𑀢𑁄 𑀉𑀲𑀪𑀫𑀢𑁆𑀢𑁂 𑀞𑀸𑀦𑁂 𑀕𑀸𑀯𑀺𑀬𑁄 𑀅𑀜𑁆𑀜𑀫𑀜𑁆𑀜𑀁 𑀦𑀺𑀖𑀁𑀲𑀦𑁆𑀢𑀺𑀬𑁄 𑀅𑀝𑁆𑀞𑀁𑀲𑀼.

𑀫𑀳𑀸𑀲𑁂𑀝𑁆𑀞𑀺 ‘‘𑀫𑀫 𑀥𑀻𑀢𑀼 𑀏𑀢𑁆𑀢𑀓𑀸 𑀕𑀸𑀯𑁄 𑀅𑀮𑀁, 𑀤𑁆𑀯𑀸𑀭𑀁 𑀧𑀺𑀤𑀳𑀣𑀸’’𑀢𑀺 𑀯𑀚𑀤𑁆𑀯𑀸𑀭𑀁 𑀧𑀺𑀤𑀳𑀸𑀧𑁂𑀲𑀺. 𑀤𑁆𑀯𑀸𑀭𑀲𑁆𑀫𑀺𑀁 𑀧𑀺𑀤𑀳𑀺𑀢𑁂 𑀯𑀺𑀲𑀸𑀔𑀸𑀬 𑀧𑀼𑀜𑁆𑀜𑀩𑀮𑁂𑀦 𑀩𑀮𑀯𑀕𑀸𑀯𑁄 𑀘 𑀥𑁂𑀦𑀼𑀬𑁄 𑀘 𑀉𑀧𑁆𑀧𑀢𑀺𑀢𑁆𑀯𑀸 𑀉𑀧𑁆𑀧𑀢𑀺𑀢𑁆𑀯𑀸 𑀦𑀺𑀓𑁆𑀔𑀫𑀺𑀁𑀲𑀼. 𑀫𑀦𑀼𑀲𑁆𑀲𑀸𑀦𑀁 𑀯𑀸𑀭𑁂𑀦𑁆𑀢𑀸𑀦𑀁 𑀯𑀸𑀭𑁂𑀦𑁆𑀢𑀸𑀦𑀫𑁂𑀯 𑀲𑀝𑁆𑀞𑀺𑀲𑀳𑀲𑁆𑀲𑀸 𑀩𑀮𑀯𑀕𑀸𑀯𑁄 𑀘 𑀲𑀝𑁆𑀞𑀺𑀲𑀳𑀲𑁆𑀲𑀸 𑀥𑁂𑀦𑀼𑀬𑁄 𑀘 𑀦𑀺𑀓𑁆𑀔𑀦𑁆𑀢𑀸, 𑀢𑀢𑁆𑀢𑀓𑀸 𑀩𑀮𑀯𑀯𑀘𑁆𑀙𑀸 𑀢𑀸𑀲𑀁 𑀥𑁂𑀦𑀽𑀦𑀁 𑀉𑀲𑀪𑀸 𑀉𑀧𑁆𑀧𑀢𑀺𑀢𑁆𑀯𑀸 𑀅𑀦𑀼𑀩𑀦𑁆𑀥𑀸 𑀅𑀳𑁂𑀲𑀼𑀁. ‘‘𑀓𑀺𑀲𑁆𑀲 𑀧𑀦 𑀦𑀺𑀲𑁆𑀲𑀦𑁆𑀤𑁂𑀦 𑀏𑀯𑀁 𑀕𑀸𑀯𑁄 𑀕𑀢𑀸’’𑀢𑀺? 𑀦𑀺𑀯𑀸𑀭𑁂𑀦𑁆𑀢𑀸𑀦𑀁 𑀦𑀺𑀯𑀸𑀭𑁂𑀦𑁆𑀢𑀸𑀦𑀁 𑀤𑀺𑀦𑁆𑀦𑀤𑀸𑀦𑀲𑁆𑀲. 𑀲𑀸 𑀓𑀺𑀭 𑀓𑀲𑁆𑀲𑀧𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀓𑀸𑀮𑁂 𑀓𑀺𑀓𑀺𑀲𑁆𑀲 𑀭𑀜𑁆𑀜𑁄 𑀲𑀢𑁆𑀢𑀦𑁆𑀦𑀁 𑀥𑀻𑀢𑀸𑀦𑀁 𑀓𑀦𑀺𑀝𑁆𑀞𑀸 𑀲𑀗𑁆𑀖𑀤𑀸𑀲𑀻 𑀦𑀸𑀫 𑀳𑀼𑀢𑁆𑀯𑀸 𑀯𑀻𑀲𑀢𑀺𑀬𑀸 𑀪𑀺𑀓𑁆𑀔𑀼𑀲𑀳𑀲𑁆𑀲𑀸𑀦𑀁 𑀧𑀜𑁆𑀘𑀕𑁄𑀭𑀲𑀤𑀸𑀦𑀁 𑀤𑀤𑀫𑀸𑀦𑀸 𑀣𑁂𑀭𑀸𑀦𑀜𑁆𑀘 𑀤𑀳𑀭𑀸𑀦𑀜𑁆𑀘 𑀲𑀸𑀫𑀡𑁂𑀭𑀸𑀦𑀜𑁆𑀘 𑀧𑀢𑁆𑀢𑀁 𑀧𑀺𑀤𑀳𑀺𑀢𑁆𑀯𑀸, ‘‘𑀅𑀮𑀁, 𑀅𑀮’’𑀦𑁆𑀢𑀺 𑀦𑀺𑀯𑀸𑀭𑁂𑀦𑁆𑀢𑀸𑀦𑀫𑁆𑀧𑀺 ‘‘𑀇𑀤𑀁 𑀫𑀥𑀼𑀭𑀁, 𑀇𑀤𑀁 𑀫𑀦𑀸𑀧’’𑀦𑁆𑀢𑀺 𑀅𑀤𑀸𑀲𑀺. 𑀏𑀯𑀁 𑀢𑀲𑁆𑀲 𑀦𑀺𑀲𑁆𑀲𑀦𑁆𑀤𑁂𑀦 𑀯𑀸𑀭𑀺𑀬𑀫𑀸𑀦𑀸𑀧𑀺 𑀕𑀸𑀯𑁄 𑀦𑀺𑀓𑁆𑀔𑀫𑀺𑀁𑀲𑀼. 𑀲𑁂𑀝𑁆𑀞𑀺𑀦𑀸 𑀏𑀢𑁆𑀢𑀓𑀲𑁆𑀲 𑀥𑀦𑀲𑁆𑀲 𑀤𑀺𑀦𑁆𑀦𑀓𑀸𑀮𑁂 𑀲𑁂𑀝𑁆𑀞𑀺𑀪𑀭𑀺𑀬𑀸 𑀆𑀳 𑁋 ‘‘𑀢𑀼𑀫𑁆𑀳𑁂𑀳𑀺 𑀫𑀬𑁆𑀳𑀁 𑀥𑀻𑀢𑀼 𑀲𑀩𑁆𑀩𑀁 𑀲𑀁𑀯𑀺𑀤𑀳𑀺𑀢𑀁, 𑀯𑁂𑀬𑁆𑀬𑀸𑀯𑀘𑁆𑀘𑀓𑀭𑀸 𑀧𑀦 𑀤𑀸𑀲𑀤𑀸𑀲𑀺𑀬𑁄 𑀦 𑀲𑀁𑀯𑀺𑀤𑀳𑀺𑀢𑀸, 𑀓𑀺𑀁 𑀓𑀸𑀭𑀡𑀸’’𑀢𑀺? ‘‘𑀫𑀫 𑀥𑀻𑀢𑀭𑀺 𑀲𑀲𑀺𑀦𑁂𑀳𑀦𑀺𑀲𑁆𑀲𑀺𑀦𑁂𑀳𑀸𑀦𑀁 𑀚𑀸𑀦𑀦𑀢𑁆𑀣𑀁. 𑀅𑀳𑀜𑁆𑀳𑀺 𑀢𑀸𑀬 𑀲𑀤𑁆𑀥𑀺𑀁 𑀆𑀕𑀘𑁆𑀙𑀫𑀸𑀦𑀓𑁂 𑀕𑀻𑀯𑀸𑀬 𑀕𑀳𑁂𑀢𑁆𑀯𑀸 𑀦 𑀧𑀳𑀺𑀡𑀸𑀫𑀺, 𑀬𑀸𑀦𑀁 𑀆𑀭𑀼𑀬𑁆𑀳 𑀕𑀫𑀦𑀓𑀸𑀮𑁂𑀬𑁂𑀯 𑀏𑀢𑀸𑀬 𑀲𑀤𑁆𑀥𑀺𑀁 𑀕𑀦𑁆𑀢𑀼𑀓𑀸𑀫𑀸 𑀕𑀘𑁆𑀙𑀦𑁆𑀢𑀼, 𑀫𑀸 𑀅𑀕𑀦𑁆𑀢𑀼𑀓𑀸𑀫𑀸𑀢𑀺 𑀯𑀓𑁆𑀔𑀸𑀫𑀻’’𑀢𑀺 𑀆𑀳.

𑀅𑀣 ‘‘𑀲𑁆𑀯𑁂 𑀫𑀫 𑀥𑀻𑀢𑀸 𑀕𑀫𑀺𑀲𑁆𑀲𑀢𑀻’’𑀢𑀺 𑀕𑀩𑁆𑀪𑁂 𑀦𑀺𑀲𑀺𑀦𑁆𑀦𑁄 𑀥𑀻𑀢𑀭𑀁 𑀲𑀫𑀻𑀧𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸, ‘‘𑀅𑀫𑁆𑀫, 𑀧𑀢𑀺𑀓𑀼𑀮𑁂 𑀯𑀲𑀦𑁆𑀢𑀺𑀬𑀸 𑀦𑀸𑀫 𑀇𑀫𑀜𑁆𑀘 𑀇𑀫𑀜𑁆𑀘 𑀆𑀘𑀸𑀭𑀁 𑀭𑀓𑁆𑀔𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀑𑀯𑀸𑀤𑀫𑀤𑀸𑀲𑀺. 𑀅𑀬𑀫𑁆𑀧𑀺 𑀫𑀺𑀕𑀸𑀭𑀲𑁂𑀝𑁆𑀞𑀺 𑀅𑀦𑀦𑁆𑀢𑀭𑀕𑀩𑁆𑀪𑁂 𑀦𑀺𑀲𑀺𑀦𑁆𑀦𑁄 𑀥𑀦𑀜𑁆𑀘𑀬𑀲𑁂𑀝𑁆𑀞𑀺𑀦𑁄 𑀑𑀯𑀸𑀤𑀁 𑀅𑀲𑁆𑀲𑁄𑀲𑀺. 𑀲𑁄𑀧𑀺 𑀲𑁂𑀝𑁆𑀞𑀺 𑀥𑀻𑀢𑀭𑀁 𑀏𑀯𑀁 𑀑𑀯𑀤𑀺 𑁋

‘‘𑀅𑀫𑁆𑀫, 𑀲𑀲𑀼𑀭𑀓𑀼𑀮𑁂 𑀯𑀲𑀦𑁆𑀢𑀺𑀬𑀸 𑀦𑀸𑀫 𑀅𑀦𑁆𑀢𑁄𑀅𑀕𑁆𑀕𑀺 𑀩𑀳𑀺 𑀦 𑀦𑀻𑀳𑀭𑀺𑀢𑀩𑁆𑀩𑁄, 𑀩𑀳𑀺𑀅𑀕𑁆𑀕𑀺 𑀅𑀦𑁆𑀢𑁄 𑀦 𑀧𑀯𑁂𑀲𑁂𑀢𑀩𑁆𑀩𑁄, 𑀤𑀤𑀦𑁆𑀢𑀲𑁆𑀲𑁂𑀯 𑀤𑀸𑀢𑀩𑁆𑀩𑀁, 𑀅𑀤𑀤𑀦𑁆𑀢𑀲𑁆𑀲 𑀦 𑀤𑀸𑀢𑀩𑁆𑀩𑀁, 𑀤𑀤𑀦𑁆𑀢𑀲𑁆𑀲𑀸𑀧𑀺 𑀅𑀤𑀤𑀦𑁆𑀢𑀲𑁆𑀲𑀸𑀧𑀺 𑀤𑀸𑀢𑀩𑁆𑀩𑀁, 𑀲𑀼𑀔𑀁 𑀦𑀺𑀲𑀻𑀤𑀺𑀢𑀩𑁆𑀩𑀁, 𑀲𑀼𑀔𑀁 𑀪𑀼𑀜𑁆𑀚𑀺𑀢𑀩𑁆𑀩𑀁, 𑀲𑀼𑀔𑀁 𑀦𑀺𑀧𑀚𑁆𑀚𑀺𑀢𑀩𑁆𑀩𑀁, 𑀅𑀕𑁆𑀕𑀺 𑀧𑀭𑀺𑀘𑀭𑀺𑀢𑀩𑁆𑀩𑁄, 𑀅𑀦𑁆𑀢𑁄𑀤𑁂𑀯𑀢𑀸 𑀦𑀫𑀲𑁆𑀲𑀺𑀢𑀩𑁆𑀩𑀸’’𑀢𑀺.

𑀇𑀫𑀁 𑀤𑀲𑀯𑀺𑀥𑀁 𑀑𑀯𑀸𑀤𑀁 𑀤𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀲𑀩𑁆𑀩𑀸 𑀲𑁂𑀦𑀺𑀬𑁄 𑀲𑀦𑁆𑀦𑀺𑀧𑀸𑀢𑁂𑀢𑁆𑀯𑀸 𑀭𑀸𑀚𑀲𑁂𑀦𑀸𑀬 𑀫𑀚𑁆𑀛𑁂 𑀅𑀝𑁆𑀞 𑀓𑀼𑀝𑀼𑀫𑁆𑀩𑀺𑀓𑁂 𑀧𑀸𑀝𑀺𑀪𑁄𑀕𑁂 𑀕𑀳𑁂𑀢𑁆𑀯𑀸, ‘‘𑀲𑀘𑁂 𑀫𑁂 𑀕𑀢𑀝𑁆𑀞𑀸𑀦𑁂 𑀥𑀻𑀢𑀼 𑀤𑁄𑀲𑁄 𑀉𑀧𑁆𑀧𑀚𑁆𑀚𑀢𑀺, 𑀢𑀼𑀫𑁆𑀳𑁂𑀳𑀺 𑀲𑁄𑀥𑁂𑀢𑀩𑁆𑀩𑁄’’𑀢𑀺 𑀯𑀢𑁆𑀯𑀸 𑀦𑀯𑀓𑁄𑀝𑀺𑀅𑀕𑁆𑀖𑀦𑀓𑁂𑀦 𑀫𑀳𑀸𑀮𑀢𑀸𑀧𑀲𑀸𑀥𑀦𑁂𑀦 𑀥𑀻𑀢𑀭𑀁 𑀧𑀲𑀸𑀥𑁂𑀢𑁆𑀯𑀸 𑀦𑁆𑀳𑀸𑀦𑀘𑀼𑀡𑁆𑀡𑀫𑀽𑀮𑀓𑀁 𑀘𑀢𑀼𑀧𑀡𑁆𑀡𑀸𑀲𑀓𑁄𑀝𑀺𑀥𑀦𑀁 𑀤𑀢𑁆𑀯𑀸 𑀬𑀸𑀦𑀁 𑀆𑀭𑁄𑀧𑁂𑀢𑁆𑀯𑀸 𑀲𑀸𑀓𑁂𑀢𑀲𑁆𑀲 𑀲𑀸𑀫𑀦𑁆𑀢𑀸 𑀅𑀢𑁆𑀢𑀦𑁄 𑀲𑀦𑁆𑀢𑀓𑁂𑀲𑀼 𑀅𑀦𑀼𑀭𑀸𑀥𑀧𑀼𑀭𑀫𑀢𑁆𑀢𑁂𑀲𑀼 𑀘𑀼𑀤𑁆𑀤𑀲𑀲𑀼 𑀪𑀢𑁆𑀢𑀕𑀸𑀫𑁂𑀲𑀼 𑀪𑁂𑀭𑀺𑀁 𑀘𑀭𑀸𑀧𑁂𑀲𑀺 𑁋 ‘‘𑀫𑀫 𑀥𑀻𑀢𑀭𑀸 𑀲𑀤𑁆𑀥𑀺𑀁 𑀕𑀦𑁆𑀢𑀼𑀓𑀸𑀫𑀸 𑀕𑀘𑁆𑀙𑀦𑁆𑀢𑀽’’𑀢𑀺. 𑀢𑁂 𑀲𑀤𑁆𑀤𑀁 𑀲𑀼𑀢𑁆𑀯𑀸𑀯 𑁋 ‘‘𑀅𑀫𑁆𑀳𑀸𑀓𑀁 𑀅𑀬𑁆𑀬𑀸𑀬 𑀕𑀫𑀦𑀓𑀸𑀮𑁂 𑀓𑀺𑀁 𑀅𑀫𑁆𑀳𑀸𑀓𑀁 𑀇𑀥𑀸’’𑀢𑀺 𑀘𑀼𑀤𑁆𑀤𑀲 𑀕𑀸𑀫𑀓𑀸 𑀓𑀺𑀜𑁆𑀘𑀺 𑀅𑀲𑁂𑀲𑁂𑀢𑁆𑀯𑀸 𑀦𑀺𑀓𑁆𑀔𑀫𑀺𑀁𑀲𑀼? 𑀥𑀦𑀜𑁆𑀘𑀬𑀲𑁂𑀝𑁆𑀞𑀺𑀧𑀺 𑀭𑀜𑁆𑀜𑁄 𑀘 𑀫𑀺𑀕𑀸𑀭𑀲𑁂𑀝𑁆𑀞𑀺𑀦𑁄 𑀘 𑀲𑀓𑁆𑀓𑀸𑀭𑀁 𑀓𑀢𑁆𑀯𑀸 𑀣𑁄𑀓𑀁 𑀅𑀦𑀼𑀕𑀦𑁆𑀢𑁆𑀯𑀸 𑀢𑁂𑀳𑀺 𑀲𑀤𑁆𑀥𑀺𑀁 𑀥𑀻𑀢𑀭𑀁 𑀉𑀬𑁆𑀬𑁄𑀚𑁂𑀲𑀺.

𑀫𑀺𑀕𑀸𑀭𑀲𑁂𑀝𑁆𑀞𑀺𑀧𑀺 𑀲𑀩𑁆𑀩𑀧𑀘𑁆𑀙𑀢𑁄 𑀬𑀸𑀦𑀓𑁂 𑀦𑀺𑀲𑀻𑀤𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑁄 𑀩𑀮𑀓𑀸𑀬𑀁 𑀤𑀺𑀲𑁆𑀯𑀸, ‘‘𑀓𑁂 𑀦𑀸𑀫𑁂𑀢𑁂’’𑀢𑀺 𑀧𑀼𑀘𑁆𑀙𑀺. ‘‘𑀲𑀼𑀡𑀺𑀲𑀸𑀬 𑀯𑁄 𑀯𑁂𑀬𑁆𑀬𑀸𑀯𑀘𑁆𑀘𑀓𑀭𑀸 𑀤𑀸𑀲𑀺𑀤𑀸𑀲𑀸’’𑀢𑀺. ‘‘𑀏𑀢𑁆𑀢𑀓𑁂 𑀓𑁄 𑀧𑁄𑀲𑁂𑀲𑁆𑀲’’𑀢𑀺? ‘‘𑀧𑁄𑀣𑁂𑀢𑁆𑀯𑀸 𑀢𑁂 𑀧𑀮𑀸𑀧𑁂𑀣, 𑀅𑀧𑀮𑀸𑀬𑀦𑁆𑀢𑁂 𑀇𑀢𑁄 𑀤𑀡𑁆𑀟𑀁 𑀓𑀭𑁄𑀣𑀸’’𑀢𑀺. 𑀯𑀺𑀲𑀸𑀔𑀸 𑀧𑀦 ‘‘𑀅𑀧𑁂𑀣, 𑀫𑀸 𑀯𑀸𑀭𑁂𑀣, 𑀩𑀮𑀫𑁂𑀯 𑀩𑀮𑀲𑁆𑀲 𑀪𑀢𑁆𑀢𑀁 𑀤𑀲𑁆𑀲𑀢𑀻’’𑀢𑀺 𑀆𑀳. 𑀲𑁂𑀝𑁆𑀞𑀺 𑀏𑀯𑀁 𑀯𑀼𑀢𑁆𑀢𑁂𑀧𑀺, ‘‘𑀅𑀫𑁆𑀫, 𑀦𑀢𑁆𑀣𑀺 𑀅𑀫𑁆𑀳𑀸𑀓𑀁 𑀏𑀢𑁂𑀳𑀺 𑀅𑀢𑁆𑀣𑁄, 𑀓𑁄 𑀏𑀢𑁂 𑀧𑁄𑀲𑁂𑀲𑁆𑀲𑀢𑀻’’𑀢𑀺 𑀮𑁂𑀟𑁆𑀟𑀼𑀤𑀡𑁆𑀟𑀸𑀤𑀻𑀳𑀺 𑀧𑁄𑀣𑁂𑀢𑁆𑀯𑀸 𑀧𑀮𑀸𑀧𑁂𑀢𑁆𑀯𑀸 𑀲𑁂𑀲𑀓𑁂 ‘‘𑀅𑀮𑀁 𑀅𑀫𑁆𑀳𑀸𑀓𑀁 𑀏𑀢𑁆𑀢𑀓𑁂𑀳𑀻’’𑀢𑀺 𑀕𑀳𑁂𑀢𑁆𑀯𑀸 𑀧𑀸𑀬𑀸𑀲𑀺. 𑀅𑀣 𑀯𑀺𑀲𑀸𑀔𑀸 𑀲𑀸𑀯𑀢𑁆𑀣𑀺𑀦𑀕𑀭𑀤𑁆𑀯𑀸𑀭𑀁 𑀲𑀫𑁆𑀧𑀢𑁆𑀢𑀓𑀸𑀮𑁂 𑀘𑀺𑀦𑁆𑀢𑁂𑀲𑀺 𑁋 ‘‘𑀧𑀝𑀺𑀘𑁆𑀙𑀦𑁆𑀦𑀬𑀸𑀦𑀲𑁆𑀫𑀺𑀁 𑀦𑀼 𑀔𑁄 𑀦𑀺𑀲𑀻𑀤𑀺𑀢𑁆𑀯𑀸 𑀧𑀯𑀺𑀲𑀺𑀲𑁆𑀲𑀸𑀫𑀺, 𑀉𑀤𑀸𑀳𑀼 𑀭𑀣𑁂 𑀞𑀢𑁆𑀯𑀸’’𑀢𑀺. 𑀅𑀣𑀲𑁆𑀲𑀸 𑀏𑀢𑀤𑀳𑁄𑀲𑀺 𑁋 ‘‘𑀧𑀝𑀺𑀘𑁆𑀙𑀦𑁆𑀦𑀬𑀸𑀦𑁂𑀦 𑀫𑁂 𑀧𑀯𑀺𑀲𑀦𑁆𑀢𑀺𑀬𑀸 𑀫𑀳𑀸𑀮𑀢𑀸𑀧𑀲𑀸𑀥𑀦𑀲𑁆𑀲 𑀯𑀺𑀲𑁂𑀲𑁄 𑀦 𑀧𑀜𑁆𑀜𑀸𑀬𑀺𑀲𑁆𑀲𑀢𑀻’’𑀢𑀺. 𑀲𑀸 𑀲𑀓𑀮𑀦𑀕𑀭𑀲𑁆𑀲 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀦𑁆𑀢𑀻 𑀭𑀣𑁂 𑀞𑀢𑁆𑀯𑀸 𑀦𑀕𑀭𑀁 𑀧𑀸𑀯𑀺𑀲𑀺. 𑀲𑀸𑀯𑀢𑁆𑀣𑀺𑀯𑀸𑀲𑀺𑀦𑁄 𑀯𑀺𑀲𑀸𑀔𑀸𑀬 𑀲𑀫𑁆𑀧𑀢𑁆𑀢𑀺𑀁 𑀤𑀺𑀲𑁆𑀯𑀸, ‘‘𑀏𑀲𑀸 𑀓𑀺𑀭 𑀯𑀺𑀲𑀸𑀔𑀸 𑀦𑀸𑀫, 𑀏𑀯𑀭𑀽𑀧𑀸 𑀅𑀬𑀁 𑀲𑀫𑁆𑀧𑀢𑁆𑀢𑀺 𑀏𑀢𑀺𑀲𑁆𑀲𑀸𑀯 𑀅𑀦𑀼𑀘𑁆𑀙𑀯𑀺𑀓𑀸’’𑀢𑀺 𑀆𑀳𑀁𑀲𑀼. 𑀇𑀢𑀺 𑀲𑀸 𑀫𑀳𑀸𑀲𑀫𑁆𑀧𑀢𑁆𑀢𑀺𑀬𑀸 𑀲𑁂𑀝𑁆𑀞𑀺𑀦𑁄 𑀕𑁂𑀳𑀁 𑀧𑀸𑀯𑀺𑀲𑀺. 𑀕𑀢𑀤𑀺𑀯𑀲𑁂 𑀘𑀲𑁆𑀲𑀸 𑀲𑀓𑀮𑀦𑀕𑀭𑀯𑀸𑀲𑀺𑀦𑁄 ‘‘𑀅𑀫𑁆𑀳𑀸𑀓𑀁 𑀥𑀦𑀜𑁆𑀘𑀬𑀲𑁂𑀝𑁆𑀞𑀺 𑀅𑀢𑁆𑀢𑀦𑁄 𑀦𑀕𑀭𑀁 𑀲𑀫𑁆𑀧𑀢𑁆𑀢𑀸𑀦𑀁 𑀫𑀳𑀸𑀲𑀓𑁆𑀓𑀸𑀭𑀁 𑀅𑀓𑀸𑀲𑀻’’𑀢𑀺 𑀬𑀣𑀸𑀲𑀢𑁆𑀢𑀺 𑀬𑀣𑀸𑀩𑀮𑀁 𑀧𑀡𑁆𑀡𑀸𑀓𑀸𑀭𑀁 𑀧𑀳𑀺𑀡𑀺𑀁𑀲𑀼. 𑀯𑀺𑀲𑀸𑀔𑀸 𑀧𑀳𑀺𑀢𑀧𑀳𑀺𑀢𑀁 𑀧𑀡𑁆𑀡𑀸𑀓𑀸𑀭𑀁 𑀢𑀲𑁆𑀫𑀺𑀁𑀬𑁂𑀯 𑀦𑀕𑀭𑁂 𑀅𑀜𑁆𑀜𑀫𑀜𑁆𑀜𑁂𑀲𑀼 𑀓𑀼𑀮𑁂𑀲𑀼 𑀲𑀩𑁆𑀩𑀢𑁆𑀣𑀓𑀫𑁂𑀯 𑀤𑀸𑀧𑁂𑀲𑀺. 𑀇𑀢𑀺 𑀲𑀸 ‘‘𑀇𑀤𑀁 𑀫𑀬𑁆𑀳𑀁 𑀫𑀸𑀢𑀼 𑀤𑁂𑀣, 𑀇𑀤𑀁 𑀫𑀬𑁆𑀳𑀁 𑀧𑀺𑀢𑀼 𑀤𑁂𑀣, 𑀇𑀤𑀁 𑀫𑀬𑁆𑀳𑀁 𑀪𑀸𑀢𑀼 𑀤𑁂𑀣, 𑀇𑀤𑀁 𑀫𑀬𑁆𑀳𑀁 𑀪𑀕𑀺𑀦𑀺𑀬𑀸 𑀤𑁂𑀣𑀸’’𑀢𑀺 𑀢𑁂𑀲𑀁 𑀢𑁂𑀲𑀁 𑀯𑀬𑀸𑀦𑀼𑀭𑀽𑀧𑀁 𑀧𑀺𑀬𑀯𑀘𑀦𑀁 𑀯𑀢𑁆𑀯𑀸 𑀧𑀡𑁆𑀡𑀸𑀓𑀸𑀭𑀁 𑀧𑁂𑀲𑁂𑀦𑁆𑀢𑀻 𑀲𑀓𑀮𑀦𑀕𑀭𑀯𑀸𑀲𑀺𑀦𑁄 𑀜𑀸𑀢𑀓𑁂 𑀯𑀺𑀬 𑀅𑀓𑀸𑀲𑀺. 𑀅𑀣𑀲𑁆𑀲𑀸 𑀭𑀢𑁆𑀢𑀺𑀪𑀸𑀕𑀲𑀫𑀦𑀦𑁆𑀢𑀭𑁂 𑀆𑀚𑀜𑁆𑀜𑀯𑀴𑀯𑀸𑀬 𑀕𑀩𑁆𑀪𑀯𑀼𑀝𑁆𑀞𑀸𑀦𑀁 𑀅𑀳𑁄𑀲𑀺. 𑀲𑀸 𑀤𑀸𑀲𑀻𑀳𑀺 𑀤𑀡𑁆𑀟𑀤𑀻𑀧𑀺𑀓𑀸 𑀕𑀸𑀳𑀸𑀧𑁂𑀢𑁆𑀯𑀸 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀯𑀴𑀯𑀁 𑀉𑀡𑁆𑀳𑁄𑀤𑀓𑁂𑀦 𑀦𑁆𑀳𑀸𑀧𑁂𑀢𑁆𑀯𑀸 𑀢𑁂𑀮𑁂𑀦 𑀫𑀓𑁆𑀔𑀸𑀧𑁂𑀢𑁆𑀯𑀸 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀫𑁂𑀯 𑀅𑀕𑀫𑀸𑀲𑀺.

𑀫𑀺𑀕𑀸𑀭𑀲𑁂𑀝𑁆𑀞𑀺𑀧𑀺 𑀧𑀼𑀢𑁆𑀢𑀲𑁆𑀲 𑀆𑀯𑀸𑀳𑀫𑀗𑁆𑀕𑀮𑀁 𑀓𑀭𑁄𑀦𑁆𑀢𑁄 𑀥𑀼𑀭𑀯𑀺𑀳𑀸𑀭𑁂 𑀯𑀲𑀦𑁆𑀢𑀫𑁆𑀧𑀺 𑀢𑀣𑀸𑀕𑀢𑀁 𑀅𑀫𑀦𑀲𑀺𑀓𑀭𑀺𑀢𑁆𑀯𑀸 𑀤𑀻𑀖𑀭𑀢𑁆𑀢𑀁 𑀦𑀕𑁆𑀕𑀲𑀫𑀡𑀓𑁂𑀲𑀼 𑀧𑀢𑀺𑀝𑁆𑀞𑀺𑀢𑁂𑀦 𑀧𑁂𑀫𑁂𑀦 𑀘𑁄𑀤𑀺𑀬𑀫𑀸𑀦𑁄 ‘‘𑀫𑀬𑁆𑀳𑀁 𑀅𑀬𑁆𑀬𑀸𑀦𑀫𑁆𑀧𑀺 𑀲𑀓𑁆𑀓𑀸𑀭𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀏𑀓𑀤𑀺𑀯𑀲𑀁 𑀅𑀦𑁂𑀓𑀲𑀢𑁂𑀲𑀼 𑀦𑀯𑀪𑀸𑀚𑀦𑁂𑀲𑀼 𑀦𑀺𑀭𑀼𑀤𑀓𑀧𑀸𑀬𑀸𑀲𑀁 𑀧𑀘𑀸𑀧𑁂𑀢𑁆𑀯𑀸 𑀧𑀜𑁆𑀘𑀲𑀢𑁂 𑀅𑀘𑁂𑀮𑀓𑁂 𑀦𑀺𑀫𑀦𑁆𑀢𑀸𑀧𑁂𑀢𑁆𑀯𑀸 𑀅𑀦𑁆𑀢𑁄𑀕𑁂𑀳𑀁 𑀧𑀯𑁂𑀲𑁂𑀢𑁆𑀯𑀸, ‘‘𑀆𑀕𑀘𑁆𑀙𑀢𑀼 𑀫𑁂 𑀲𑀼𑀡𑀺𑀲𑀸, 𑀅𑀭𑀳𑀦𑁆𑀢𑁂 𑀯𑀦𑁆𑀤𑀢𑀽’’𑀢𑀺 𑀯𑀺𑀲𑀸𑀔𑀸𑀬 𑀲𑀸𑀲𑀦𑀁 𑀧𑀳𑀺𑀡𑀺. 𑀲𑀸 ‘‘𑀅𑀭𑀳𑀦𑁆𑀢𑁄’’𑀢𑀺 𑀯𑀘𑀦𑀁 𑀲𑀼𑀢𑁆𑀯𑀸 𑀲𑁄𑀢𑀸𑀧𑀦𑁆𑀦𑀸 𑀅𑀭𑀺𑀬𑀲𑀸𑀯𑀺𑀓𑀸 𑀳𑀝𑁆𑀞𑀢𑀼𑀝𑁆𑀞𑀸 𑀳𑀼𑀢𑁆𑀯𑀸 𑀢𑁂𑀲𑀁 𑀪𑁄𑀚𑀦𑀝𑁆𑀞𑀸𑀦𑀁 𑀆𑀕𑀦𑁆𑀢𑁆𑀯𑀸 𑀢𑁂 𑀑𑀮𑁄𑀓𑁂𑀢𑁆𑀯𑀸, ‘‘𑀏𑀯𑀭𑀽𑀧𑀸 𑀳𑀺𑀭𑁄𑀢𑁆𑀢𑀧𑁆𑀧𑀯𑀺𑀭𑀳𑀺𑀢𑀸 𑀅𑀭𑀳𑀦𑁆𑀢𑀸 𑀦𑀸𑀫 𑀦 𑀳𑁄𑀦𑁆𑀢𑀺, 𑀓𑀲𑁆𑀫𑀸 𑀫𑀁 𑀲𑀲𑀼𑀭𑁄 𑀧𑀓𑁆𑀓𑁄𑀲𑀸𑀧𑁂𑀲𑀻’’𑀢𑀺, ‘‘𑀥𑀻, 𑀥𑀻’’𑀢𑀺 𑀲𑁂𑀝𑁆𑀞𑀺𑀁 𑀕𑀭𑀳𑀺𑀢𑁆𑀯𑀸 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀫𑁂𑀯 𑀕𑀢𑀸. 𑀅𑀘𑁂𑀮𑀓𑀸 𑀢𑀁 𑀤𑀺𑀲𑁆𑀯𑀸 𑀲𑀩𑁆𑀩𑁂 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀲𑁂𑀝𑁆𑀞𑀺𑀁 𑀕𑀭𑀳𑀺𑀁𑀲𑀼 𑁋 ‘‘𑀓𑀺𑀁 𑀢𑁆𑀯𑀁, 𑀕𑀳𑀧𑀢𑀺, 𑀅𑀜𑁆𑀜𑀁 𑀦𑀸𑀮𑀢𑁆𑀣, 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀲𑀸𑀯𑀺𑀓𑀁 𑀫𑀳𑀸𑀓𑀸𑀴𑀓𑀡𑁆𑀡𑀺𑀁 𑀇𑀥 𑀧𑀯𑁂𑀲𑁂𑀲𑀺, 𑀯𑁂𑀕𑁂𑀦 𑀦𑀁 𑀇𑀫𑀲𑁆𑀫𑀸 𑀕𑁂𑀳𑀸 𑀦𑀺𑀓𑁆𑀓𑀟𑁆𑀠𑀸𑀧𑁂𑀳𑀻’’𑀢𑀺. 𑀲𑁄 ‘‘𑀦 𑀲𑀓𑁆𑀓𑀸 𑀫𑀬𑀸 𑀇𑀫𑁂𑀲𑀁 𑀯𑀘𑀦𑀫𑀢𑁆𑀢𑁂𑀦𑁂𑀯 𑀦𑀺𑀓𑁆𑀓𑀟𑁆𑀠𑀸𑀧𑁂𑀢𑀼𑀁, 𑀫𑀳𑀸𑀓𑀼𑀮𑀲𑁆𑀲 𑀲𑀸 𑀥𑀻𑀢𑀸’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸, ‘‘𑀅𑀬𑁆𑀬𑀸, 𑀤𑀳𑀭𑀸 𑀦𑀸𑀫 𑀚𑀸𑀦𑀺𑀢𑁆𑀯𑀸 𑀯𑀸 𑀅𑀚𑀸𑀦𑀺𑀢𑁆𑀯𑀸 𑀯𑀸 𑀓𑀭𑁂𑀬𑁆𑀬𑀼𑀁, 𑀢𑀼𑀫𑁆𑀳𑁂 𑀢𑀼𑀡𑁆𑀳𑀻 𑀳𑁄𑀣𑀸’’𑀢𑀺 𑀢𑁂 𑀉𑀬𑁆𑀬𑁄𑀚𑁂𑀢𑁆𑀯𑀸 𑀲𑀬𑀁 𑀫𑀳𑀸𑀭𑀳𑁂 𑀆𑀲𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀲𑀼𑀯𑀡𑁆𑀡𑀧𑀸𑀢𑀺𑀬𑀁 𑀦𑀺𑀭𑀼𑀤𑀓𑀁 𑀫𑀥𑀼𑀧𑀸𑀬𑀸𑀲𑀁 𑀧𑀭𑀺𑀪𑀼𑀜𑁆𑀚𑀺.

𑀢𑀲𑁆𑀫𑀺𑀁 𑀲𑀫𑀬𑁂 𑀏𑀓𑁄 𑀧𑀺𑀡𑁆𑀟𑀧𑀸𑀢𑀺𑀓𑀢𑁆𑀣𑁂𑀭𑁄 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑁄 𑀢𑀁 𑀦𑀺𑀯𑁂𑀲𑀦𑀁 𑀧𑀸𑀯𑀺𑀲𑀺. 𑀯𑀺𑀲𑀸𑀔𑀸 𑀲𑀲𑀼𑀭𑀁 𑀩𑀻𑀚𑀬𑀫𑀸𑀦𑀸 𑀞𑀺𑀢𑀸 𑀢𑀁 𑀤𑀺𑀲𑁆𑀯𑀸 ‘‘𑀲𑀲𑀼𑀭𑀲𑁆𑀲 𑀆𑀘𑀺𑀓𑁆𑀔𑀺𑀢𑀼𑀁 𑀅𑀬𑀼𑀢𑁆𑀢’’𑀦𑁆𑀢𑀺 𑀬𑀣𑀸 𑀲𑁄 𑀣𑁂𑀭𑀁 𑀧𑀲𑁆𑀲𑀢𑀺, 𑀏𑀯𑀁 𑀅𑀧𑀕𑀦𑁆𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀲𑁄 𑀧𑀦 𑀩𑀸𑀮𑁄 𑀣𑁂𑀭𑀁 𑀤𑀺𑀲𑁆𑀯𑀸𑀧𑀺 𑀅𑀧𑀲𑁆𑀲𑀦𑁆𑀢𑁄 𑀯𑀺𑀬 𑀳𑀼𑀢𑁆𑀯𑀸 𑀅𑀥𑁄𑀫𑀼𑀔𑁄 𑀪𑀼𑀜𑁆𑀚𑀢𑁂𑀯. 𑀯𑀺𑀲𑀸𑀔𑀸 ‘‘𑀣𑁂𑀭𑀁 𑀤𑀺𑀲𑁆𑀯𑀸𑀧𑀺 𑀫𑁂 𑀲𑀲𑀼𑀭𑁄 𑀲𑀜𑁆𑀜𑀁 𑀦 𑀓𑀭𑁄𑀢𑀻’’𑀢𑀺 𑀜𑀢𑁆𑀯𑀸, ‘‘𑀅𑀢𑀺𑀘𑁆𑀙𑀣, 𑀪𑀦𑁆𑀢𑁂, 𑀫𑀬𑁆𑀳𑀁 𑀲𑀲𑀼𑀭𑁄 𑀧𑀼𑀭𑀸𑀡𑀁 𑀔𑀸𑀤𑀢𑀻’’𑀢𑀺 𑀆𑀳. 𑀲𑁄 𑀦𑀺𑀕𑀡𑁆𑀞𑁂𑀳𑀺 𑀓𑀣𑀺𑀢𑀓𑀸𑀮𑁂 𑀅𑀥𑀺𑀯𑀸𑀲𑁂𑀢𑁆𑀯𑀸𑀧𑀺 ‘‘𑀧𑀼𑀭𑀸𑀡𑀁 𑀔𑀸𑀤𑀢𑀻’’𑀢𑀺 𑀯𑀼𑀢𑁆𑀢𑀓𑁆𑀔𑀡𑁂𑀬𑁂𑀯 𑀳𑀢𑁆𑀣𑀁 𑀅𑀧𑀦𑁂𑀢𑁆𑀯𑀸, ‘‘𑀇𑀫𑀁 𑀧𑀸𑀬𑀸𑀲𑀁 𑀇𑀢𑁄 𑀦𑀻𑀳𑀭𑀣, 𑀏𑀢𑀁 𑀇𑀫𑀲𑁆𑀫𑀸 𑀕𑁂𑀳𑀸 𑀦𑀺𑀓𑁆𑀓𑀟𑁆𑀠𑀣, 𑀅𑀬𑀁 𑀫𑀁 𑀏𑀯𑀭𑀽𑀧𑁂 𑀫𑀗𑁆𑀕𑀮𑀓𑀸𑀮𑁂 𑀅𑀲𑀼𑀘𑀺𑀔𑀸𑀤𑀓𑀁 𑀦𑀸𑀫 𑀓𑀭𑁄𑀢𑀻’’𑀢𑀺 𑀆𑀳. 𑀢𑀲𑁆𑀫𑀺𑀁 𑀔𑁄 𑀧𑀦 𑀦𑀺𑀯𑁂𑀲𑀦𑁂 𑀲𑀩𑁆𑀩𑁂𑀧𑀺 𑀤𑀸𑀲𑀓𑀫𑁆𑀫𑀓𑀭𑀸 𑀯𑀺𑀲𑀸𑀔𑀸𑀬 𑀲𑀦𑁆𑀢𑀓𑀸𑀯, 𑀓𑁄 𑀦𑀁 𑀳𑀢𑁆𑀣𑁂 𑀯𑀸 𑀧𑀸𑀤𑁂 𑀯𑀸 𑀕𑀡𑁆𑀳𑀺𑀲𑁆𑀲𑀢𑀺, 𑀫𑀼𑀔𑁂𑀦 𑀓𑀣𑁂𑀢𑀼𑀁 𑀲𑀫𑀢𑁆𑀣𑁄𑀧𑀺 𑀦𑀢𑁆𑀣𑀺. 𑀯𑀺𑀲𑀸𑀔𑀸 𑀲𑀲𑀼𑀭𑀲𑁆𑀲 𑀓𑀣𑀁 𑀲𑀼𑀢𑁆𑀯𑀸 𑀆𑀳 𑁋 ‘‘𑀢𑀸𑀢, 𑀦 𑀏𑀢𑁆𑀢𑀓𑁂𑀦𑁂𑀯 𑀫𑀬𑀁 𑀦𑀺𑀓𑁆𑀔𑀫𑀸𑀫, 𑀦𑀸𑀳𑀁 𑀢𑀼𑀫𑁆𑀳𑁂𑀳𑀺 𑀉𑀤𑀓𑀢𑀺𑀢𑁆𑀣𑀢𑁄 𑀓𑀼𑀫𑁆𑀪𑀤𑀸𑀲𑀻 𑀯𑀺𑀬 𑀆𑀦𑀻𑀢𑀸, 𑀥𑀭𑀫𑀸𑀦𑀓𑀫𑀸𑀢𑀸𑀧𑀺𑀢𑀽𑀦𑀁 𑀥𑀻𑀢𑀭𑁄 𑀦𑀸𑀫 𑀦 𑀏𑀢𑁆𑀢𑀓𑁂𑀦𑁂𑀯 𑀦𑀺𑀓𑁆𑀔𑀫𑀦𑁆𑀢𑀺, 𑀏𑀢𑁂𑀦𑁂𑀯 𑀫𑁂 𑀓𑀸𑀭𑀡𑁂𑀦 𑀧𑀺𑀢𑀸 𑀇𑀥𑀸𑀕𑀫𑀦𑀓𑀸𑀮𑁂 𑀅𑀝𑁆𑀞 𑀓𑀼𑀝𑀼𑀫𑁆𑀩𑀺𑀓𑁂 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘𑀲𑀘𑁂 𑀫𑁂 𑀥𑀻𑀢𑀼 𑀤𑁄𑀲𑁄 𑀉𑀧𑁆𑀧𑀚𑁆𑀚𑀢𑀺, 𑀲𑁄𑀥𑁂𑀬𑁆𑀬𑀸𑀣𑀸’𑀢𑀺 𑀯𑀢𑁆𑀯𑀸 𑀫𑀁 𑀢𑁂𑀲𑀁 𑀳𑀢𑁆𑀣𑁂 𑀞𑀧𑁂𑀲𑀺, 𑀢𑁂 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀫𑀬𑁆𑀳𑀁 𑀤𑁄𑀲𑀸𑀤𑁄𑀲𑀁 𑀲𑁄𑀥𑀸𑀧𑁂𑀣𑀸’’𑀢𑀺.

𑀲𑁂𑀝𑁆𑀞𑀺 ‘‘𑀓𑀮𑁆𑀬𑀸𑀡𑀁 𑀏𑀲𑀸 𑀓𑀣𑁂𑀢𑀻’’𑀢𑀺 𑀅𑀝𑁆𑀞 𑀓𑀼𑀝𑀼𑀫𑁆𑀩𑀺𑀓𑁂 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸, ‘‘𑀅𑀬𑀁 𑀤𑀸𑀭𑀺𑀓𑀸 𑀫𑀗𑁆𑀕𑀮𑀓𑀸𑀮𑁂 𑀦𑀺𑀲𑀻𑀤𑀺𑀢𑁆𑀯𑀸 𑀲𑀼𑀯𑀡𑁆𑀡𑀧𑀸𑀢𑀺𑀬𑀁 𑀦𑀺𑀭𑀼𑀤𑀓𑀧𑀸𑀬𑀸𑀲𑀁 𑀧𑀭𑀺𑀪𑀼𑀜𑁆𑀚𑀦𑁆𑀢𑀁 𑀫𑀁 ‘𑀅𑀲𑀼𑀘𑀺𑀔𑀸𑀤𑀓𑁄’𑀢𑀺 𑀯𑀤𑀢𑀻’’𑀢𑀺 𑀆𑀳, ‘‘𑀇𑀫𑀺𑀲𑁆𑀲𑀸 𑀤𑁄𑀲𑀁 𑀆𑀭𑁄𑀧𑁂𑀢𑁆𑀯𑀸 𑀇𑀫𑀁 𑀕𑁂𑀳𑀢𑁄 𑀦𑀺𑀓𑁆𑀓𑀟𑁆𑀠𑀣𑀸’’𑀢𑀺. ‘‘𑀏𑀯𑀁 𑀓𑀺𑀭, 𑀅𑀫𑁆𑀫𑀸’’𑀢𑀺. 𑀦𑀸𑀳𑀁 𑀏𑀯𑀁 𑀯𑀤𑀸𑀫𑀺, 𑀏𑀓𑀲𑁆𑀫𑀺𑀁 𑀧𑀦 𑀧𑀺𑀡𑁆𑀟𑀧𑀸𑀢𑀺𑀓𑀢𑁆𑀣𑁂𑀭𑁂 𑀖𑀭𑀤𑁆𑀯𑀸𑀭𑁂 𑀞𑀺𑀢𑁂 𑀲𑀲𑀼𑀭𑁄 𑀫𑁂 𑀅𑀧𑁆𑀧𑁄𑀤𑀓𑀁 𑀫𑀥𑀼𑀧𑀸𑀬𑀸𑀲𑀁 𑀧𑀭𑀺𑀪𑀼𑀜𑁆𑀚𑀦𑁆𑀢𑁄 𑀢𑀁 𑀦 𑀫𑀦𑀲𑀺𑀓𑀭𑁄𑀢𑀺, 𑀅𑀳𑀁 ‘‘𑀫𑀬𑁆𑀳𑀁 𑀲𑀲𑀼𑀭𑁄 𑀇𑀫𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂 𑀧𑀼𑀜𑁆𑀜𑀁 𑀦 𑀓𑀭𑁄𑀢𑀺, 𑀧𑀼𑀭𑀸𑀡𑀧𑀼𑀜𑁆𑀜𑀫𑁂𑀯 𑀔𑀸𑀤𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸, ‘‘𑀅𑀢𑀺𑀘𑁆𑀙𑀣, 𑀪𑀦𑁆𑀢𑁂, 𑀫𑀬𑁆𑀳𑀁 𑀲𑀲𑀼𑀭𑁄 𑀧𑀼𑀭𑀸𑀡𑀁 𑀔𑀸𑀤𑀢𑀻’’𑀢𑀺 𑀅𑀯𑀘𑀁, ‘‘𑀏𑀢𑁆𑀣 𑀫𑁂 𑀓𑁄 𑀤𑁄𑀲𑁄’’𑀢𑀺? ‘‘𑀅𑀬𑁆𑀬, 𑀇𑀥 𑀤𑁄𑀲𑁄 𑀦𑀢𑁆𑀣𑀺, 𑀅𑀫𑁆𑀳𑀸𑀓𑀁 𑀥𑀻𑀢𑀸 𑀬𑀼𑀢𑁆𑀢𑀁 𑀓𑀣𑁂𑀢𑀺, 𑀢𑁆𑀯𑀁 𑀓𑀲𑁆𑀫𑀸 𑀓𑀼𑀚𑁆𑀛𑀲𑀻’’𑀢𑀺? ‘‘𑀅𑀬𑁆𑀬𑀸, 𑀏𑀲 𑀢𑀸𑀯 𑀤𑁄𑀲𑁄 𑀫𑀸 𑀳𑁄𑀢𑀼, 𑀅𑀬𑀁 𑀧𑀦 𑀏𑀓𑀤𑀺𑀯𑀲𑀁 𑀫𑀚𑁆𑀛𑀺𑀫𑀬𑀸𑀫𑁂 𑀤𑀸𑀲𑀻𑀧𑀭𑀺𑀯𑀼𑀢𑀸 𑀧𑀘𑁆𑀙𑀸𑀕𑁂𑀳𑀁 𑀅𑀕𑀫𑀸𑀲𑀻’’𑀢𑀺. ‘‘𑀏𑀯𑀁 𑀓𑀺𑀭, 𑀅𑀫𑁆𑀫𑀸’’𑀢𑀺. ‘‘𑀢𑀸𑀢𑀸, 𑀦𑀸𑀳𑀁 𑀅𑀜𑁆𑀜𑁂𑀦 𑀓𑀸𑀭𑀡𑁂𑀦 𑀕𑀢𑀸, 𑀇𑀫𑀲𑁆𑀫𑀺𑀁 𑀧𑀦 𑀕𑁂𑀳𑁂 𑀆𑀚𑀸𑀦𑁂𑀬𑁆𑀬𑀯𑀴𑀯𑀸𑀬 𑀯𑀺𑀚𑀸𑀢𑀸𑀬 𑀲𑀜𑁆𑀜𑀫𑁆𑀧𑀺 𑀅𑀓𑀢𑁆𑀯𑀸 𑀦𑀺𑀲𑀻𑀤𑀺𑀢𑀼𑀁 𑀦𑀸𑀫 𑀅𑀬𑀼𑀢𑁆𑀢’’𑀦𑁆𑀢𑀺 𑀤𑀡𑁆𑀟𑀤𑀻𑀧𑀺𑀓𑀸 𑀕𑀸𑀳𑀸𑀧𑁂𑀢𑁆𑀯𑀸 𑀉𑀡𑁆𑀳𑁄𑀤𑀓𑀸𑀤𑀻𑀦𑀺𑀧𑀺 𑀕𑀸𑀳𑀸𑀧𑁂𑀢𑁆𑀯𑀸 𑀤𑀸𑀲𑀻𑀳𑀺 𑀲𑀤𑁆𑀥𑀺𑀁 𑀕𑀦𑁆𑀢𑁆𑀯𑀸 𑀯𑀴𑀯𑀸𑀬 𑀯𑀺𑀚𑀸𑀢𑀧𑀭𑀺𑀳𑀸𑀭𑀁 𑀓𑀸𑀭𑀸𑀧𑁂𑀲𑀺𑀁, ‘‘𑀏𑀢𑁆𑀣 𑀫𑁂 𑀓𑁄 𑀤𑁄𑀲𑁄’’𑀢𑀺? ‘‘𑀅𑀬𑁆𑀬, 𑀇𑀥 𑀤𑁄𑀲𑁄 𑀦𑀢𑁆𑀣𑀺, 𑀅𑀫𑁆𑀳𑀸𑀓𑀁 𑀥𑀻𑀢𑀸 𑀢𑀯 𑀕𑁂𑀳𑁂 𑀤𑀸𑀲𑀻𑀳𑀺𑀧𑀺 𑀅𑀓𑀢𑁆𑀢𑀩𑁆𑀩𑀬𑀼𑀢𑁆𑀢𑀓𑀁 𑀓𑀫𑁆𑀫𑀁 𑀓𑀭𑁄𑀢𑀺, 𑀢𑁆𑀯𑀁 𑀓𑀺𑀁 𑀏𑀢𑁆𑀣 𑀤𑁄𑀲𑀁 𑀧𑀲𑁆𑀲𑀲𑀻’’𑀢𑀺?

𑀅𑀬𑁆𑀬𑀸, 𑀇𑀥𑀸𑀧𑀺 𑀢𑀸𑀯 𑀤𑁄𑀲𑁄 𑀫𑀸 𑀳𑁄𑀢𑀼, 𑀇𑀫𑀺𑀲𑁆𑀲𑀸 𑀧𑀦 𑀧𑀺𑀢𑀸 𑀇𑀥𑀸𑀕𑀫𑀦𑀓𑀸𑀮𑁂 𑀇𑀫𑀁 𑀑𑀯𑀤𑀦𑁆𑀢𑁄 𑀕𑀼𑀬𑁆𑀳𑁂 𑀧𑀝𑀺𑀘𑁆𑀙𑀦𑁆𑀦𑁂 𑀤𑀲 𑀑𑀯𑀸𑀤𑁂 𑀅𑀤𑀸𑀲𑀺, 𑀢𑁂𑀲𑀁 𑀅𑀢𑁆𑀣𑀁 𑀦 𑀚𑀸𑀦𑀸𑀫𑀺, 𑀢𑁂𑀲𑀁 𑀫𑁂 𑀅𑀢𑁆𑀣𑀁 𑀓𑀣𑁂𑀢𑀼. 𑀇𑀫𑀺𑀲𑁆𑀲𑀸 𑀧𑀦 𑀧𑀺𑀢𑀸 ‘‘𑀅𑀦𑁆𑀢𑁄𑀅𑀕𑁆𑀕𑀺 𑀩𑀳𑀺 𑀦 𑀦𑀻𑀳𑀭𑀺𑀢𑀩𑁆𑀩𑁄’’𑀢𑀺 𑀆𑀳, ‘‘𑀲𑀓𑁆𑀓𑀸 𑀦𑀼 𑀔𑁄 𑀅𑀫𑁆𑀳𑁂𑀳𑀺 𑀉𑀪𑀢𑁄 𑀧𑀝𑀺𑀯𑀺𑀲𑁆𑀲𑀓𑀕𑁂𑀳𑀸𑀦𑀁 𑀅𑀕𑁆𑀕𑀺𑀁 𑀅𑀤𑀢𑁆𑀯𑀸 𑀯𑀲𑀺𑀢𑀼’’𑀦𑁆𑀢𑀺? ‘‘𑀏𑀯𑀁 𑀓𑀺𑀭, 𑀅𑀫𑁆𑀫𑀸’’𑀢𑀺. ‘‘𑀢𑀸𑀢𑀸, 𑀫𑀬𑁆𑀳𑀁 𑀧𑀺𑀢𑀸 𑀦 𑀏𑀢𑀁 𑀲𑀦𑁆𑀥𑀸𑀬 𑀓𑀣𑁂𑀲𑀺. 𑀇𑀤𑀁 𑀧𑀦 𑀲𑀦𑁆𑀥𑀸𑀬 𑀓𑀣𑁂𑀲𑀺 𑁋 ‘𑀅𑀫𑁆𑀫, 𑀢𑀯 𑀲𑀲𑁆𑀲𑀼𑀲𑀲𑀼𑀭𑀲𑀸𑀫𑀺𑀓𑀸𑀦𑀁 𑀅𑀕𑀼𑀡𑀁 𑀤𑀺𑀲𑁆𑀯𑀸 𑀩𑀳𑀺 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀕𑁂𑀳𑁂 𑀞𑀢𑁆𑀯𑀸 𑀫𑀸 𑀓𑀣𑁂𑀲𑀺. 𑀏𑀯𑀭𑀽𑀧𑁄 𑀳𑀺 𑀅𑀕𑁆𑀕𑀺𑀲𑀤𑀺𑀲𑁄 𑀅𑀕𑁆𑀕𑀺 𑀦𑀸𑀫 𑀦𑀢𑁆𑀣𑀻’’’𑀢𑀺.

𑀅𑀬𑁆𑀬𑀸, 𑀏𑀢𑀁 𑀢𑀸𑀯 𑀏𑀯𑀁 𑀳𑁄𑀢𑀼, 𑀇𑀫𑀺𑀲𑁆𑀲𑀸 𑀧𑀦 𑀧𑀺𑀢𑀸 ‘‘𑀩𑀸𑀳𑀺𑀭𑀢𑁄 𑀅𑀕𑁆𑀕𑀺 𑀦 𑀅𑀦𑁆𑀢𑁄 𑀧𑀯𑁂𑀲𑁂𑀢𑀩𑁆𑀩𑁄’’𑀢𑀺 𑀆𑀳, ‘‘𑀓𑀺𑀁 𑀲𑀓𑁆𑀓𑀸 𑀅𑀫𑁆𑀳𑁂𑀳𑀺 𑀅𑀦𑁆𑀢𑁄 𑀅𑀕𑁆𑀕𑀺𑀫𑁆𑀳𑀺 𑀦𑀺𑀩𑁆𑀩𑀼𑀢𑁂 𑀩𑀸𑀳𑀺𑀭𑀢𑁄 𑀅𑀕𑁆𑀕𑀺𑀁 𑀅𑀦𑀸𑀳𑀭𑀺𑀢𑀼’’𑀦𑁆𑀢𑀺? ‘‘𑀏𑀯𑀁 𑀓𑀺𑀭, 𑀅𑀫𑁆𑀫𑀸’’𑀢𑀺. 𑀢𑀸𑀢𑀸, 𑀫𑀬𑁆𑀳𑀁 𑀧𑀺𑀢𑀸 𑀦 𑀏𑀢𑀁 𑀲𑀦𑁆𑀥𑀸𑀬 𑀓𑀣𑁂𑀲𑀺, 𑀇𑀤𑀁 𑀧𑀦 𑀲𑀦𑁆𑀥𑀸𑀬 𑀓𑀣𑁂𑀲𑀺 𑁋 𑀲𑀘𑁂 𑀧𑀝𑀺𑀯𑀺𑀲𑁆𑀲𑀓𑀕𑁂𑀳𑁂𑀲𑀼 𑀇𑀢𑁆𑀣𑀺𑀬𑁄 𑀯𑀸 𑀧𑀼𑀭𑀺𑀲𑀸 𑀯𑀸 𑀲𑀲𑁆𑀲𑀼𑀲𑀲𑀼𑀭𑀲𑀸𑀫𑀺𑀓𑀸𑀦𑀁 𑀅𑀕𑀼𑀡𑀁 𑀓𑀣𑁂𑀦𑁆𑀢𑀺, 𑀢𑁂𑀳𑀺 𑀓𑀣𑀺𑀢𑀁 𑀆𑀳𑀭𑀺𑀢𑁆𑀯𑀸 ‘‘𑀅𑀲𑀼𑀓𑁄 𑀦𑀸𑀫 𑀢𑀼𑀫𑁆𑀳𑀸𑀓𑀁 𑀏𑀯𑀜𑁆𑀘 𑀏𑀯𑀜𑁆𑀘 𑀅𑀕𑀼𑀡𑀁 𑀓𑀣𑁂𑀢𑀻’’𑀢𑀺 𑀧𑀼𑀦 𑀫𑀸 𑀓𑀣𑁂𑀬𑁆𑀬𑀸𑀲𑀺. ‘‘𑀏𑀢𑁂𑀦 𑀳𑀺 𑀅𑀕𑁆𑀕𑀺𑀦𑀸 𑀲𑀤𑀺𑀲𑁄 𑀅𑀕𑁆𑀕𑀺 𑀦𑀸𑀫 𑀦𑀢𑁆𑀣𑀻’’𑀢𑀺. 𑀏𑀯𑀁 𑀇𑀫𑀲𑁆𑀫𑀺𑀫𑁆𑀧𑀺 𑀓𑀸𑀭𑀡𑁂 𑀲𑀸 𑀦𑀺𑀤𑁆𑀤𑁄𑀲𑀸𑀯 𑀅𑀳𑁄𑀲𑀺. 𑀬𑀣𑀸 𑀘 𑀏𑀢𑁆𑀣, 𑀏𑀯𑀁 𑀲𑁂𑀲𑁂𑀲𑀼𑀧𑀺.

𑀢𑁂𑀲𑀼 𑀧𑀦 𑀅𑀬𑀫𑀥𑀺𑀧𑁆𑀧𑀸𑀬𑁄 𑁋 𑀬𑀫𑁆𑀧𑀺 𑀳𑀺 𑀢𑀲𑁆𑀲𑀸 𑀧𑀺𑀢𑀭𑀸 ‘‘𑀬𑁂 𑀤𑀤𑀦𑁆𑀢𑀺, 𑀢𑁂𑀲𑀁𑀬𑁂𑀯 𑀤𑀸𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀁 ‘‘𑀬𑀸𑀘𑀺𑀢𑀓𑀁 𑀉𑀧𑀓𑀭𑀡𑀁 𑀕𑀳𑁂𑀢𑁆𑀯𑀸 𑀬𑁂 𑀧𑀝𑀺𑀤𑁂𑀦𑁆𑀢𑀺, 𑀢𑁂𑀲𑀜𑁆𑀜𑁂𑀯 𑀤𑀸𑀢𑀩𑁆𑀩’’𑀦𑁆𑀢𑀺 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁.

‘‘𑀬𑁂 𑀦 𑀤𑁂𑀦𑁆𑀢𑀺, 𑀢𑁂𑀲𑀁 𑀦 𑀤𑀸𑀢𑀩𑁆𑀩’’𑀦𑁆𑀢𑀺 𑀇𑀤𑀫𑁆𑀧𑀺 𑀬𑁂 𑀬𑀸𑀘𑀺𑀢𑀓𑀁 𑀕𑀳𑁂𑀢𑁆𑀯𑀸 𑀦 𑀧𑀝𑀺𑀤𑁂𑀦𑁆𑀢𑀺, 𑀢𑁂𑀲𑀁 𑀦 𑀤𑀸𑀢𑀩𑁆𑀩𑀦𑁆𑀢𑀺 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁.

‘‘𑀤𑀤𑀦𑁆𑀢𑀲𑁆𑀲𑀸𑀧𑀺 𑀅𑀤𑀤𑀦𑁆𑀢𑀲𑁆𑀲𑀸𑀧𑀺 𑀤𑀸𑀢𑀩𑁆𑀩’’𑀦𑁆𑀢𑀺 𑀇𑀤𑀁 𑀧𑀦 𑀤𑀮𑀺𑀤𑁆𑀤𑁂𑀲𑀼 𑀜𑀸𑀢𑀺𑀫𑀺𑀢𑁆𑀢𑁂𑀲𑀼 𑀲𑀫𑁆𑀧𑀢𑁆𑀢𑁂𑀲𑀼 𑀢𑁂 𑀧𑀝𑀺𑀤𑀸𑀢𑀼𑀁 𑀲𑀓𑁆𑀓𑁄𑀦𑁆𑀢𑀼 𑀯𑀸 𑀫𑀸 𑀯𑀸, 𑀢𑁂𑀲𑀁 𑀤𑀸𑀢𑀼𑀫𑁂𑀯 𑀯𑀝𑁆𑀝𑀢𑀻𑀢𑀺 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁.

‘‘𑀲𑀼𑀔𑀁 𑀦𑀺𑀲𑀻𑀤𑀺𑀢𑀩𑁆𑀩’’𑀦𑁆𑀢𑀺 𑀇𑀤𑀫𑁆𑀧𑀺 𑀲𑀲𑁆𑀲𑀼𑀲𑀲𑀼𑀭𑀲𑀸𑀫𑀺𑀓𑁂 𑀤𑀺𑀲𑁆𑀯𑀸 𑀯𑀼𑀝𑁆𑀞𑀸𑀢𑀩𑁆𑀩𑀝𑁆𑀞𑀸𑀦𑁂 𑀦𑀺𑀲𑀻𑀤𑀺𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁.

‘‘𑀲𑀼𑀔𑀁 𑀪𑀼𑀜𑁆𑀚𑀺𑀢𑀩𑁆𑀩’’𑀦𑁆𑀢𑀺 𑀇𑀤𑀁 𑀧𑀦 𑀲𑀲𑁆𑀲𑀼𑀲𑀲𑀼𑀭𑀲𑀸𑀫𑀺𑀓𑁂𑀳𑀺 𑀧𑀼𑀭𑁂𑀢𑀭𑀁 𑀅𑀪𑀼𑀜𑁆𑀚𑀺𑀢𑁆𑀯𑀸 𑀢𑁂 𑀧𑀭𑀺𑀯𑀺𑀲𑀺𑀢𑁆𑀯𑀸 𑀲𑀩𑁆𑀩𑁂𑀳𑀺 𑀮𑀤𑁆𑀥𑀸𑀮𑀤𑁆𑀥𑀁 𑀜𑀢𑁆𑀯𑀸 𑀧𑀘𑁆𑀙𑀸 𑀲𑀬𑀁 𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁.

‘‘𑀲𑀼𑀔𑀁 𑀦𑀺𑀧𑀚𑁆𑀚𑀺𑀢𑀩𑁆𑀩’’𑀦𑁆𑀢𑀺 𑀇𑀤𑀫𑁆𑀧𑀺 𑀲𑀲𑁆𑀲𑀼𑀲𑀲𑀼𑀭𑀲𑀸𑀫𑀺𑀓𑁂𑀳𑀺 𑀧𑀼𑀭𑁂𑀢𑀭𑀁 𑀲𑀬𑀦𑀁 𑀆𑀭𑀼𑀬𑁆𑀳 𑀦 𑀦𑀺𑀧𑀚𑁆𑀚𑀺𑀢𑀩𑁆𑀩𑀁, 𑀢𑁂𑀲𑀁 𑀓𑀢𑁆𑀢𑀩𑁆𑀩𑀬𑀼𑀢𑁆𑀢𑀓𑀁 𑀯𑀢𑁆𑀢𑀧𑀝𑀺𑀯𑀢𑁆𑀢𑀁 𑀓𑀢𑁆𑀯𑀸 𑀧𑀘𑁆𑀙𑀸 𑀲𑀬𑀁 𑀦𑀺𑀧𑀚𑁆𑀚𑀺𑀢𑀼𑀁 𑀬𑀼𑀢𑁆𑀢𑀦𑁆𑀢𑀺 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁.

‘‘𑀅𑀕𑁆𑀕𑀺 𑀧𑀭𑀺𑀘𑀭𑀺𑀢𑀩𑁆𑀩𑁄’’𑀢𑀺 𑀇𑀤𑀁 𑀧𑀦 𑀲𑀲𑁆𑀲𑀼𑀫𑁆𑀧𑀺 𑀲𑀲𑀼𑀭𑀫𑁆𑀧𑀺 𑀲𑀸𑀫𑀺𑀓𑀫𑁆𑀧𑀺 𑀅𑀕𑁆𑀕𑀺𑀓𑁆𑀔𑀦𑁆𑀥𑀁 𑀯𑀺𑀬 𑀉𑀭𑀕𑀭𑀸𑀚𑀸𑀦𑀁 𑀯𑀺𑀬 𑀘 𑀓𑀢𑁆𑀯𑀸 𑀧𑀲𑁆𑀲𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁.

‘‘𑀅𑀦𑁆𑀢𑁄𑀤𑁂𑀯𑀢𑀸 𑀦𑀫𑀲𑁆𑀲𑀺𑀢𑀩𑁆𑀩𑀸’’𑀢𑀺 𑀇𑀤𑀫𑁆𑀧𑀺 𑀲𑀲𑁆𑀲𑀼𑀜𑁆𑀘 𑀲𑀲𑀼𑀭𑀜𑁆𑀘 𑀲𑀸𑀫𑀺𑀓𑀜𑁆𑀘 𑀤𑁂𑀯𑀢𑀸 𑀯𑀺𑀬 𑀓𑀢𑁆𑀯𑀸 𑀤𑀝𑁆𑀞𑀼𑀁 𑀯𑀝𑁆𑀝𑀢𑀻𑀢𑀺 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀏𑀯𑀁 𑀲𑁂𑀝𑁆𑀞𑀺 𑀇𑀫𑁂𑀲𑀁 𑀤𑀲𑀑𑀯𑀸𑀤𑀸𑀦𑀁 𑀅𑀢𑁆𑀣𑀁 𑀲𑀼𑀢𑁆𑀯𑀸 𑀧𑀝𑀺𑀯𑀘𑀦𑀁 𑀅𑀧𑀲𑁆𑀲𑀦𑁆𑀢𑁄 𑀅𑀥𑁄𑀫𑀼𑀔𑁄 𑀦𑀺𑀲𑀻𑀤𑀺.

𑀅𑀣 𑀦𑀁 𑀓𑀼𑀝𑀼𑀫𑁆𑀩𑀺𑀓𑀸 ‘‘𑀓𑀺𑀁 𑀲𑁂𑀝𑁆𑀞𑀺 𑀅𑀜𑁆𑀜𑁄𑀧𑀺 𑀅𑀫𑁆𑀳𑀸𑀓𑀁 𑀥𑀻𑀢𑀼 𑀤𑁄𑀲𑁄 𑀅𑀢𑁆𑀣𑀻’’𑀢𑀺 𑀧𑀼𑀘𑁆𑀙𑀺𑀁𑀲𑀼. ‘‘𑀦𑀢𑁆𑀣𑀺, 𑀅𑀬𑁆𑀬𑀸’’𑀢𑀺. ‘‘𑀅𑀣 𑀓𑀲𑁆𑀫𑀸 𑀦𑀁 𑀦𑀺𑀤𑁆𑀤𑁄𑀲𑀁 𑀅𑀓𑀸𑀭𑀡𑁂𑀦 𑀕𑁂𑀳𑀸 𑀦𑀺𑀓𑁆𑀓𑀟𑁆𑀠𑀸𑀧𑁂𑀲𑀻’’𑀢𑀺 𑀏𑀯𑀁 𑀯𑀼𑀢𑁆𑀢𑁂 𑀯𑀺𑀲𑀸𑀔𑀸 𑀆𑀳 𑁋 ‘‘𑀢𑀸𑀢𑀸, 𑀓𑀺𑀜𑁆𑀘𑀸𑀧𑀺 𑀫𑀬𑁆𑀳𑀁 𑀲𑀲𑀼𑀭𑀲𑁆𑀲 𑀯𑀘𑀦𑁂𑀦 𑀧𑀞𑀫𑀫𑁂𑀯 𑀕𑀫𑀦𑀁 𑀦 𑀬𑀼𑀢𑁆𑀢𑀁, 𑀧𑀺𑀢𑀸 𑀧𑀦 𑀫𑁂 𑀆𑀕𑀫𑀦𑀓𑀸𑀮𑁂 𑀫𑀫 𑀤𑁄𑀲𑀲𑁄𑀥𑀦𑀢𑁆𑀣𑀸𑀬 𑀫𑀁 𑀢𑀼𑀫𑁆𑀳𑀸𑀓𑀁 𑀳𑀢𑁆𑀣𑁂 𑀞𑀧𑁂𑀲𑀺, 𑀢𑀼𑀫𑁆𑀳𑁂𑀳𑀺 𑀘 𑀫𑁂 𑀦𑀺𑀤𑁆𑀤𑁄𑀲𑀪𑀸𑀯𑁄 𑀜𑀸𑀢𑁄, 𑀇𑀤𑀸𑀦𑀺 𑀘 𑀫𑀬𑁆𑀳𑀁 𑀕𑀦𑁆𑀢𑀼𑀁 𑀬𑀼𑀢𑁆𑀢’’𑀦𑁆𑀢𑀺 𑀤𑀸𑀲𑀺𑀤𑀸𑀲𑁂 ‘‘𑀬𑀸𑀦𑀸𑀤𑀻𑀳𑀺 𑀲𑀚𑁆𑀚𑀸𑀧𑁂𑀣𑀸’’𑀢𑀺 𑀆𑀡𑀸𑀧𑁂𑀲𑀺. 𑀅𑀣 𑀦𑀁 𑀲𑁂𑀝𑁆𑀞𑀺 𑀓𑀼𑀝𑀼𑀫𑁆𑀩𑀺𑀓𑁂 𑀕𑀳𑁂𑀢𑁆𑀯𑀸 ‘‘𑀅𑀫𑁆𑀫, 𑀫𑀬𑀸 𑀅𑀚𑀸𑀦𑀺𑀢𑁆𑀯𑀸𑀯 𑀓𑀣𑀺𑀢𑀁, 𑀔𑀫𑀸𑀳𑀺 𑀫𑁂’’𑀢𑀺 𑀆𑀳. ‘‘𑀢𑀸𑀢, 𑀢𑀼𑀫𑁆𑀳𑀸𑀓𑀁 𑀔𑀫𑀺𑀢𑀩𑁆𑀩𑀁 𑀢𑀸𑀯 𑀔𑀫𑀸𑀫𑀺, 𑀅𑀳𑀁 𑀧𑀦 𑀩𑀼𑀤𑁆𑀥𑀲𑀸𑀲𑀦𑁂 𑀅𑀯𑁂𑀘𑁆𑀘𑀧𑁆𑀧𑀲𑀦𑁆𑀦𑀲𑁆𑀲 𑀓𑀼𑀮𑀲𑁆𑀲 𑀥𑀻𑀢𑀸, 𑀦 𑀫𑀬𑀁 𑀯𑀺𑀦𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀯𑀢𑁆𑀢𑀸𑀫, 𑀲𑀘𑁂 𑀫𑀫 𑀭𑀼𑀘𑀺𑀬𑀸 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀝𑀺𑀚𑀕𑁆𑀕𑀺𑀢𑀼𑀁 𑀮𑀪𑀸𑀫𑀺, 𑀯𑀲𑀺𑀲𑁆𑀲𑀸𑀫𑀻’’𑀢𑀺. ‘‘𑀅𑀫𑁆𑀫, 𑀢𑁆𑀯𑀁 𑀬𑀣𑀸𑀭𑀼𑀘𑀺𑀬𑀸 𑀢𑀯 𑀲𑀫𑀡𑁂 𑀧𑀝𑀺𑀚𑀕𑁆𑀕𑀸’’𑀢𑀺 𑀆𑀳.

𑀯𑀺𑀲𑀸𑀔𑀸 𑀤𑀲𑀩𑀮𑀁 𑀦𑀺𑀫𑀦𑁆𑀢𑀸𑀧𑁂𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀦𑀺𑀯𑁂𑀲𑀦𑀁 𑀧𑀯𑁂𑀲𑁂𑀲𑀺. 𑀦𑀕𑁆𑀕𑀲𑀫𑀡𑀸𑀧𑀺 𑀲𑀢𑁆𑀣𑀼 𑀫𑀺𑀕𑀸𑀭𑀲𑁂𑀝𑁆𑀞𑀺𑀦𑁄 𑀕𑁂𑀳𑀁 𑀕𑀫𑀦𑀪𑀸𑀯𑀁 𑀲𑀼𑀢𑁆𑀯𑀸 𑀕𑀦𑁆𑀢𑁆𑀯𑀸 𑀕𑁂𑀳𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀦𑀺𑀲𑀻𑀤𑀺𑀁𑀲𑀼. 𑀯𑀺𑀲𑀸𑀔𑀸 𑀤𑀓𑁆𑀔𑀺𑀡𑁄𑀤𑀓𑀁 𑀤𑀢𑁆𑀯𑀸 ‘‘𑀲𑀩𑁆𑀩𑁄 𑀲𑀓𑁆𑀓𑀸𑀭𑁄 𑀧𑀝𑀺𑀬𑀸𑀤𑀺𑀢𑁄, 𑀲𑀲𑀼𑀭𑁄 𑀫𑁂 𑀆𑀕𑀦𑁆𑀢𑁆𑀯𑀸 𑀤𑀲𑀩𑀮𑀁 𑀧𑀭𑀺𑀯𑀺𑀲𑀢𑀽’’𑀢𑀺 𑀲𑀸𑀲𑀦𑀁 𑀧𑁂𑀲𑁂𑀲𑀺. 𑀅𑀣 𑀦𑀁 𑀕𑀦𑁆𑀢𑀼𑀓𑀸𑀫𑀁 𑀆𑀚𑀻𑀯𑀓𑀸 ‘‘𑀫𑀸 𑀔𑁄 𑀢𑁆𑀯𑀁, 𑀕𑀳𑀧𑀢𑀺, 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀲𑀦𑁆𑀢𑀺𑀓𑀁 𑀕𑀘𑁆𑀙𑀸’’𑀢𑀺 𑀦𑀺𑀯𑀸𑀭𑁂𑀲𑀼𑀁. 𑀲𑁄 ‘‘𑀲𑀼𑀡𑁆𑀳𑀸 𑀫𑁂 𑀲𑀬𑀫𑁂𑀯 𑀧𑀭𑀺𑀯𑀺𑀲𑀢𑀽’’𑀢𑀺 𑀲𑀸𑀲𑀦𑀁 𑀧𑀳𑀺𑀡𑀺. 𑀲𑀸 𑀩𑀼𑀤𑁆𑀥𑀧𑁆𑀧𑀫𑀼𑀔𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀭𑀺𑀯𑀺𑀲𑀺𑀢𑁆𑀯𑀸 𑀦𑀺𑀝𑁆𑀞𑀺𑀢𑁂 𑀪𑀢𑁆𑀢𑀓𑀺𑀘𑁆𑀘𑁂 𑀧𑀼𑀦 𑀲𑀸𑀲𑀦𑀁 𑀧𑁂𑀲𑁂𑀲𑀺 𑁋 ‘‘𑀲𑀲𑀼𑀭𑁄 𑀫𑁂 𑀆𑀕𑀦𑁆𑀢𑁆𑀯𑀸 𑀥𑀫𑁆𑀫𑀓𑀣𑀁 𑀲𑀼𑀡𑀸𑀢𑀽’’𑀢𑀺. 𑀅𑀣 𑀦𑀁 ‘‘𑀇𑀤𑀸𑀦𑀺 𑀅𑀕𑀫𑀦𑀁 𑀦𑀸𑀫 𑀅𑀢𑀺𑀯𑀺𑀬 𑀅𑀬𑀼𑀢𑁆𑀢’’𑀦𑁆𑀢𑀺 𑀥𑀫𑁆𑀫𑀁 𑀲𑁄𑀢𑀼𑀓𑀸𑀫𑀢𑀸𑀬 𑀕𑀘𑁆𑀙𑀦𑁆𑀢𑀁 𑀧𑀼𑀦 𑀢𑁂 𑀆𑀳𑀁𑀲𑀼 𑁋 ‘‘𑀢𑁂𑀦 𑀳𑀺 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀥𑀫𑁆𑀫𑀁 𑀲𑀼𑀡𑀦𑁆𑀢𑁄 𑀩𑀳𑀺𑀲𑀸𑀡𑀺𑀬𑀸 𑀦𑀺𑀲𑀻𑀤𑀺𑀢𑁆𑀯𑀸 𑀲𑀼𑀡𑀸𑀳𑀻’’𑀢𑀺. 𑀧𑀼𑀭𑁂𑀢𑀭𑀫𑁂𑀯𑀲𑁆𑀲 𑀕𑀦𑁆𑀢𑁆𑀯𑀸 𑀲𑀸𑀡𑀺𑀁 𑀧𑀭𑀺𑀓𑁆𑀔𑀺𑀧𑀺𑀁𑀲𑀼. 𑀲𑁄 𑀕𑀦𑁆𑀢𑁆𑀯𑀸 𑀩𑀳𑀺𑀲𑀸𑀡𑀺𑀬𑀁 𑀦𑀺𑀲𑀻𑀤𑀺. 𑀲𑀢𑁆𑀣𑀸 ‘‘𑀢𑁆𑀯𑀁 𑀩𑀳𑀺𑀲𑀸𑀡𑀺𑀬𑀁 𑀯𑀸 𑀦𑀺𑀲𑀻𑀤, 𑀧𑀭𑀓𑀼𑀝𑁆𑀝𑁂 𑀯𑀸 𑀧𑀭𑀲𑁂𑀮𑁂 𑀯𑀸 𑀧𑀭𑀘𑀓𑁆𑀓𑀯𑀸𑀴𑁂 𑀯𑀸 𑀧𑀦 𑀦𑀺𑀲𑀻𑀤, 𑀅𑀳𑀁 𑀩𑀼𑀤𑁆𑀥𑁄 𑀦𑀸𑀫 𑀲𑀓𑁆𑀓𑁄𑀫𑀺 𑀢𑀁 𑀫𑀫 𑀲𑀤𑁆𑀤𑀁 𑀲𑀸𑀯𑁂𑀢𑀼’’𑀦𑁆𑀢𑀺 𑀫𑀳𑀸𑀚𑀫𑁆𑀩𑀼𑀁 𑀔𑀦𑁆𑀥𑁂 𑀕𑀳𑁂𑀢𑁆𑀯𑀸 𑀘𑀸𑀮𑁂𑀦𑁆𑀢𑁄 𑀯𑀺𑀬 𑀅𑀫𑀢𑀯𑀲𑁆𑀲𑀁 𑀯𑀲𑁆𑀲𑁂𑀦𑁆𑀢𑁄 𑀯𑀺𑀬 𑀘 𑀥𑀫𑁆𑀫𑀁 𑀤𑁂𑀲𑁂𑀢𑀼𑀁 𑀅𑀦𑀼𑀧𑀼𑀩𑁆𑀩𑀺𑀁 𑀓𑀣𑀁 𑀆𑀭𑀪𑀺.

𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂 𑀘 𑀧𑀦 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁂 𑀧𑀼𑀭𑀢𑁄 𑀞𑀺𑀢𑀸𑀧𑀺 𑀧𑀘𑁆𑀙𑀢𑁄 𑀞𑀺𑀢𑀸𑀧𑀺 𑀘𑀓𑁆𑀓𑀯𑀸𑀴𑀲𑀢𑀁 𑀘𑀓𑁆𑀓𑀯𑀸𑀴𑀲𑀳𑀲𑁆𑀲𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀞𑀺𑀢𑀸𑀧𑀺 𑀅𑀓𑀦𑀺𑀝𑁆𑀞𑀪𑀯𑀦𑁂 𑀞𑀺𑀢𑀸𑀧𑀺 ‘‘𑀲𑀢𑁆𑀣𑀸 𑀫𑀫𑀜𑁆𑀜𑁂𑀯 𑀑𑀮𑁄𑀓𑁂𑀢𑀺, 𑀫𑀬𑁆𑀳𑀫𑁂𑀯 𑀥𑀫𑁆𑀫𑀁 𑀤𑁂𑀲𑁂𑀢𑀻’’𑀢𑀺 𑀯𑀤𑀦𑁆𑀢𑀺. 𑀲𑀢𑁆𑀣𑀸 𑀳𑀺 𑀢𑀁 𑀢𑀁 𑀑𑀮𑁄𑀓𑁂𑀦𑁆𑀢𑁄 𑀯𑀺𑀬 𑀢𑁂𑀦 𑀢𑁂𑀦 𑀲𑀤𑁆𑀥𑀺𑀁 𑀲𑀮𑁆𑀮𑀧𑀦𑁆𑀢𑁄 𑀯𑀺𑀬 𑀘 𑀅𑀳𑁄𑀲𑀺. 𑀘𑀦𑁆𑀤𑀲𑀫𑀸 𑀓𑀺𑀭 𑀩𑀼𑀤𑁆𑀥𑀸. 𑀬𑀣𑀸 𑀘𑀦𑁆𑀤𑁄 𑀕𑀕𑀦𑀫𑀚𑁆𑀛𑁂 𑀞𑀺𑀢𑁄 ‘‘𑀫𑀬𑁆𑀳𑀁 𑀉𑀧𑀭𑀺 𑀘𑀦𑁆𑀤𑁄, 𑀫𑀬𑁆𑀳𑀁 𑀉𑀧𑀭𑀺 𑀘𑀦𑁆𑀤𑁄’’𑀢𑀺 𑀲𑀩𑁆𑀩𑀲𑀢𑁆𑀢𑀸𑀦𑀁 𑀔𑀸𑀬𑀢𑀺, 𑀏𑀯𑀫𑁂𑀯 𑀬𑀢𑁆𑀣 𑀓𑀢𑁆𑀣𑀘𑀺 𑀞𑀺𑀢𑀸𑀦𑀁 𑀅𑀪𑀺𑀫𑀼𑀔𑁂 𑀞𑀺𑀢𑀸 𑀯𑀺𑀬 𑀔𑀸𑀬𑀦𑁆𑀢𑀺. 𑀇𑀤𑀁 𑀓𑀺𑀭 𑀢𑁂𑀲𑀁 𑀅𑀮𑀗𑁆𑀓𑀢𑀲𑀻𑀲𑀁 𑀙𑀺𑀦𑁆𑀤𑀺𑀢𑁆𑀯𑀸 𑀅𑀜𑁆𑀚𑀺𑀢𑀅𑀓𑁆𑀔𑀻𑀦𑀺 𑀉𑀧𑁆𑀧𑀸𑀝𑁂𑀢𑁆𑀯𑀸 𑀳𑀤𑀬𑀫𑀁𑀲𑀁 𑀉𑀧𑁆𑀧𑀸𑀝𑁂𑀢𑁆𑀯𑀸 𑀧𑀭𑀲𑁆𑀲 𑀤𑀸𑀲𑀢𑁆𑀣𑀸𑀬 𑀚𑀸𑀮𑀺𑀲𑀤𑀺𑀲𑁂 𑀧𑀼𑀢𑁆𑀢𑁂 𑀓𑀡𑁆𑀳𑀸𑀚𑀺𑀦𑀸𑀲𑀤𑀺𑀲𑀸 𑀥𑀻𑀢𑀭𑁄 𑀫𑀤𑁆𑀤𑀺𑀲𑀤𑀺𑀲𑀸 𑀧𑀚𑀸𑀧𑀢𑀺𑀬𑁄 𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀤𑀺𑀦𑁆𑀦𑀤𑀸𑀦𑀲𑁆𑀲 𑀨𑀮𑀁. 𑀫𑀺𑀕𑀸𑀭𑀲𑁂𑀝𑁆𑀞𑀺𑀧𑀺 𑀔𑁄 𑀢𑀣𑀸𑀕𑀢𑁂 𑀥𑀫𑁆𑀫𑀤𑁂𑀲𑀦𑀁 𑀯𑀺𑀦𑀺𑀯𑀢𑁆𑀢𑁂𑀦𑁆𑀢𑁂 𑀩𑀳𑀺𑀲𑀸𑀡𑀺𑀬𑀁 𑀦𑀺𑀲𑀺𑀦𑁆𑀦𑁄𑀯 𑀲𑀳𑀲𑁆𑀲 𑀦𑀬𑀧𑀝𑀺𑀫𑀡𑁆𑀟𑀺𑀢𑁂 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀸𑀬 𑀅𑀘𑀮𑀸𑀬 𑀲𑀤𑁆𑀥𑀸𑀬 𑀲𑀫𑀦𑁆𑀦𑀸𑀕𑀢𑁄 𑀢𑀻𑀲𑀼 𑀭𑀢𑀦𑁂𑀲𑀼 𑀦𑀺𑀓𑁆𑀓𑀗𑁆𑀔𑁄 𑀳𑀼𑀢𑁆𑀯𑀸 𑀲𑀸𑀡𑀺𑀓𑀡𑁆𑀡𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀆𑀕𑀦𑁆𑀢𑁆𑀯𑀸 𑀲𑀼𑀡𑁆𑀳𑀸𑀬 𑀣𑀦𑀁 𑀫𑀼𑀔𑁂𑀦 𑀕𑀳𑁂𑀢𑁆𑀯𑀸, ‘‘𑀢𑁆𑀯𑀁 𑀫𑁂 𑀅𑀚𑁆𑀚𑀢𑁄 𑀧𑀝𑁆𑀞𑀸𑀬 𑀫𑀸𑀢𑀸’’𑀢𑀺 𑀢𑀁 𑀫𑀸𑀢𑀼𑀝𑁆𑀞𑀸𑀦𑁂 𑀞𑀧𑁂𑀲𑀺. 𑀢𑀢𑁄 𑀧𑀝𑁆𑀞𑀸𑀬 𑀫𑀺𑀕𑀸𑀭𑀫𑀸𑀢𑀸 𑀦𑀸𑀫 𑀚𑀸𑀢𑀸. 𑀧𑀘𑁆𑀙𑀸𑀪𑀸𑀕𑁂 𑀧𑀼𑀢𑁆𑀢𑀁 𑀮𑀪𑀺𑀢𑁆𑀯𑀸𑀧𑀺 𑀫𑀺𑀕𑀸𑀭𑁄𑀢𑀺𑀲𑁆𑀲 𑀦𑀸𑀫𑀫𑀓𑀸𑀲𑀺.

𑀫𑀳𑀸𑀲𑁂𑀝𑁆𑀞𑀺 𑀲𑀼𑀡𑁆𑀳𑀸𑀬 𑀣𑀦𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀕𑀦𑁆𑀢𑁆𑀯𑀸 𑀪𑀕𑀯𑀢𑁄 𑀤𑁆𑀯𑀻𑀲𑀼 𑀧𑀸𑀤𑁂𑀲𑀼 𑀲𑀺𑀭𑀲𑀸 𑀦𑀺𑀧𑀢𑀺𑀢𑁆𑀯𑀸 𑀧𑀸𑀤𑁂 𑀧𑀸𑀡𑀻𑀳𑀺 𑀘 𑀧𑀭𑀺𑀲𑀫𑁆𑀩𑀸𑀳𑀦𑁆𑀢𑁄 𑀫𑀼𑀔𑁂𑀦 𑀘 𑀧𑀭𑀺𑀘𑀼𑀫𑁆𑀩𑀦𑁆𑀢𑁄 ‘‘𑀫𑀺𑀕𑀸𑀭𑁄 𑀅𑀳𑀁, 𑀪𑀦𑁆𑀢𑁂, 𑀫𑀺𑀕𑀸𑀭𑁄 𑀅𑀳𑀁, 𑀪𑀦𑁆𑀢𑁂’’𑀢𑀺 𑀢𑀺𑀓𑁆𑀔𑀢𑁆𑀢𑀼𑀁 𑀦𑀸𑀫𑀁 𑀲𑀸𑀯𑁂𑀢𑁆𑀯𑀸, ‘‘𑀅𑀳𑀁, 𑀪𑀦𑁆𑀢𑁂, 𑀏𑀢𑁆𑀢𑀓𑀁 𑀓𑀸𑀮𑀁 𑀬𑀢𑁆𑀣 𑀦𑀸𑀫 𑀤𑁆𑀯𑀺𑀦𑁆𑀦𑀁 𑀫𑀳𑀧𑁆𑀨𑀮𑀦𑁆𑀢𑀺 𑀦 𑀚𑀸𑀦𑀸𑀫𑀺, 𑀇𑀤𑀸𑀦𑀺 𑀘 𑀫𑁂 𑀲𑀼𑀡𑀺𑀲𑀁 𑀦𑀺𑀲𑁆𑀲𑀸𑀬 𑀜𑀸𑀢𑀁, 𑀲𑀩𑁆𑀩𑀸 𑀅𑀧𑀸𑀬𑀤𑀼𑀓𑁆𑀔𑀸 𑀫𑀼𑀢𑁆𑀢𑁄𑀫𑁆𑀳𑀺, 𑀲𑀼𑀡𑀺𑀲𑀸 𑀫𑁂 𑀇𑀫𑀁 𑀕𑁂𑀳𑀁 𑀆𑀕𑀘𑁆𑀙𑀦𑁆𑀢𑀻 𑀫𑀫 𑀅𑀢𑁆𑀣𑀸𑀬 𑀳𑀺𑀢𑀸𑀬 𑀲𑀼𑀔𑀸𑀬 𑀆𑀕𑀢𑀸’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀲𑁄𑀳𑀁 𑀅𑀚𑁆𑀚 𑀧𑀚𑀸𑀦𑀸𑀫𑀺, 𑀬𑀢𑁆𑀣 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮𑀁;

𑀅𑀢𑁆𑀣𑀸𑀬 𑀯𑀢 𑀫𑁂 𑀪𑀤𑁆𑀤𑀸, 𑀲𑀼𑀡𑀺𑀲𑀸 𑀖𑀭𑀫𑀸𑀕𑀢𑀸’’𑀢𑀺.

𑀯𑀺𑀲𑀸𑀔𑀸 𑀧𑀼𑀦𑀤𑀺𑀯𑀲𑀢𑁆𑀣𑀸𑀬𑀧𑀺 𑀲𑀢𑁆𑀣𑀸𑀭𑀁 𑀦𑀺𑀫𑀦𑁆𑀢𑁂𑀲𑀺. 𑀅𑀣𑀲𑁆𑀲𑀸 𑀧𑀼𑀦𑀤𑀺𑀯𑀲𑁂𑀧𑀺 𑀲𑀲𑁆𑀲𑀼 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀧𑀢𑁆𑀢𑀸. 𑀢𑀢𑁄 𑀧𑀝𑁆𑀞𑀸𑀬 𑀢𑀁 𑀕𑁂𑀳𑀁 𑀲𑀸𑀲𑀦𑀲𑁆𑀲 𑀯𑀺𑀯𑀝𑀤𑁆𑀯𑀸𑀭𑀁 𑀅𑀳𑁄𑀲𑀺. 𑀢𑀢𑁄 𑀲𑁂𑀝𑁆𑀞𑀺 𑀘𑀺𑀦𑁆𑀢𑁂𑀲𑀺 𑁋 ‘‘𑀩𑀳𑀽𑀧𑀓𑀸𑀭𑀸 𑀫𑁂 𑀲𑀼𑀡𑀺𑀲𑀸 𑀧𑀲𑀦𑁆𑀦𑀸𑀓𑀸𑀭𑀫𑀲𑁆𑀲𑀸 𑀓𑀭𑀺𑀲𑁆𑀲𑀸𑀫𑀺, 𑀏𑀢𑀺𑀲𑁆𑀲𑀸 𑀪𑀸𑀭𑀺𑀬𑀁 𑀧𑀲𑀸𑀥𑀦𑀁 𑀦𑀺𑀘𑁆𑀘𑀓𑀸𑀮𑀁 𑀧𑀲𑀸𑀥𑁂𑀢𑀼𑀁 𑀦 𑀲𑀓𑁆𑀓𑀸, 𑀲𑀮𑁆𑀮𑀳𑀼𑀓𑀫𑀲𑁆𑀲𑀸 𑀤𑀺𑀯𑀸 𑀘 𑀭𑀢𑁆𑀢𑁄 𑀘 𑀲𑀩𑁆𑀩𑀇𑀭𑀺𑀬𑀸𑀧𑀣𑁂𑀲𑀼 𑀧𑀲𑀸𑀥𑀦𑀬𑁄𑀕𑁆𑀕𑀁 𑀧𑀲𑀸𑀥𑀦𑀁 𑀓𑀸𑀭𑁂𑀲𑁆𑀲𑀸𑀫𑀻’’𑀢𑀺 𑀲𑀢𑀲𑀳𑀲𑁆𑀲𑀕𑁆𑀖𑀦𑀓𑀁 𑀖𑀦𑀫𑀝𑁆𑀞𑀓𑀁 𑀦𑀸𑀫 𑀧𑀲𑀸𑀥𑀦𑀁 𑀓𑀸𑀭𑁂𑀢𑁆𑀯𑀸 𑀢𑀲𑁆𑀫𑀺𑀁 𑀦𑀺𑀝𑁆𑀞𑀺𑀢𑁂 𑀩𑀼𑀤𑁆𑀥𑀧𑁆𑀧𑀫𑀼𑀔𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀦𑀺𑀫𑀦𑁆𑀢𑁂𑀢𑁆𑀯𑀸 𑀲𑀓𑁆𑀓𑀘𑁆𑀘𑀁 𑀪𑁄𑀚𑁂𑀢𑁆𑀯𑀸 𑀯𑀺𑀲𑀸𑀔𑀁 𑀲𑁄𑀴𑀲𑀳𑀺 𑀕𑀦𑁆𑀥𑁄𑀤𑀓𑀖𑀝𑁂𑀳𑀺 𑀦𑁆𑀳𑀸𑀧𑁂𑀢𑁆𑀯𑀸 𑀲𑀢𑁆𑀣𑀼 𑀲𑀫𑁆𑀫𑀼𑀔𑁂 𑀞𑀧𑁂𑀢𑁆𑀯𑀸 𑀧𑀲𑀸𑀥𑁂𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀸𑀧𑁂𑀲𑀺. 𑀲𑀢𑁆𑀣𑀸 𑀅𑀦𑀼𑀫𑁄𑀤𑀦𑀁 𑀓𑀢𑁆𑀯𑀸 𑀯𑀺𑀳𑀸𑀭𑀫𑁂𑀯 𑀕𑀢𑁄. 𑀯𑀺𑀲𑀸𑀔𑀸𑀧𑀺 𑀢𑀢𑁄 𑀧𑀝𑁆𑀞𑀸𑀬 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺 𑀓𑀭𑁄𑀦𑁆𑀢𑀻 𑀲𑀢𑁆𑀣𑀼 𑀲𑀦𑁆𑀢𑀺𑀓𑀸 𑀅𑀝𑁆𑀞 𑀯𑀭𑁂 (𑀫𑀳𑀸𑀯. 𑁩𑁫𑁦) 𑀮𑀪𑀺𑀢𑁆𑀯𑀸 𑀕𑀕𑀦𑀢𑀮𑁂 𑀘𑀦𑁆𑀤𑀮𑁂𑀔𑀸 𑀯𑀺𑀬 𑀧𑀜𑁆𑀜𑀸𑀬𑀫𑀸𑀦𑀸 𑀧𑀼𑀢𑁆𑀢𑀥𑀻𑀢𑀸𑀳𑀺 𑀯𑀼𑀟𑁆𑀠𑀺𑀁 𑀧𑀸𑀧𑀼𑀡𑀺. 𑀢𑀲𑁆𑀲𑀸 𑀓𑀺𑀭 𑀤𑀲 𑀧𑀼𑀢𑁆𑀢𑀸 𑀤𑀲 𑀥𑀻𑀢𑀭𑁄 𑀘 𑀅𑀳𑁂𑀲𑀼𑀁. 𑀢𑁂𑀲𑀼 𑀏𑀓𑁂𑀓𑀲𑁆𑀲 𑀤𑀲 𑀤𑀲 𑀧𑀼𑀢𑁆𑀢𑀸 𑀤𑀲 𑀤𑀲 𑀥𑀻𑀢𑀭𑁄 𑀅𑀳𑁂𑀲𑀼𑀁. 𑀢𑁂𑀲𑀼 𑀢𑁂𑀲𑀼𑀧𑀺 𑀏𑀓𑁂𑀓𑀲𑁆𑀲 𑀤𑀲 𑀤𑀲 𑀧𑀼𑀢𑁆𑀢𑀸 𑀤𑀲 𑀤𑀲 𑀥𑀻𑀢𑀭𑁄 𑀘𑀸𑀢𑀺 𑀏𑀯𑀫𑀲𑁆𑀲𑀸 𑀧𑀼𑀢𑁆𑀢𑀦𑀢𑁆𑀢𑀧𑀦𑀢𑁆𑀢𑀲𑀦𑁆𑀢𑀸𑀦𑀯𑀲𑁂𑀦 𑀧𑀯𑀢𑁆𑀢𑀸𑀦𑀺 𑀯𑀻𑀲𑀸𑀥𑀺𑀓𑀸𑀦𑀺 𑀘𑀢𑁆𑀢𑀸𑀭𑀺 𑀲𑀢𑀸𑀦𑀺 𑀅𑀝𑁆𑀞 𑀘 𑀧𑀸𑀡𑀲𑀳𑀲𑁆𑀲𑀸𑀦𑀺 𑀅𑀳𑁂𑀲𑀼𑀁. 𑀢𑁂𑀦𑀸𑀳𑀼 𑀧𑁄𑀭𑀸𑀡𑀸 𑁋

‘‘𑀯𑀺𑀲𑀸𑀔𑀸 𑀯𑀻𑀲𑀢𑀺 𑀧𑀼𑀢𑁆𑀢𑀸, 𑀦𑀢𑁆𑀢𑀸 𑀘 𑀘𑀢𑀼𑀭𑁄 𑀲𑀢𑀸;

𑀧𑀦𑀢𑁆𑀢𑀸 𑀅𑀝𑁆𑀞𑀲𑀳𑀲𑁆𑀲𑀸, 𑀚𑀫𑁆𑀩𑀼𑀤𑀻𑀧𑁂 𑀲𑀼𑀧𑀸𑀓𑀝𑀸’’𑀢𑀺.

𑀆𑀬𑀼 𑀯𑀻𑀲𑀯𑀲𑁆𑀲𑀲𑀢𑀁 𑀅𑀳𑁄𑀲𑀺, 𑀲𑀻𑀲𑁂 𑀏𑀓𑀫𑁆𑀧𑀺 𑀧𑀮𑀺𑀢𑀁 𑀦𑀸𑀫 𑀦𑀸𑀳𑁄𑀲𑀺, 𑀦𑀺𑀘𑁆𑀘𑀁 𑀲𑁄𑀴𑀲𑀯𑀲𑁆𑀲𑀼𑀤𑁆𑀤𑁂𑀲𑀺𑀓𑀸 𑀯𑀺𑀬 𑀅𑀳𑁄𑀲𑀺. 𑀢𑀁 𑀧𑀼𑀢𑁆𑀢𑀦𑀢𑁆𑀢𑀧𑀦𑀢𑁆𑀢𑀧𑀭𑀺𑀯𑀸𑀭𑀁 𑀯𑀺𑀳𑀸𑀭𑀁 𑀕𑀘𑁆𑀙𑀦𑁆𑀢𑀺𑀁 𑀤𑀺𑀲𑁆𑀯𑀸, ‘‘𑀓𑀢𑀫𑀸 𑀏𑀢𑁆𑀣 𑀯𑀺𑀲𑀸𑀔𑀸’’𑀢𑀺 𑀧𑀭𑀺𑀧𑀼𑀘𑁆𑀙𑀺𑀢𑀸𑀭𑁄 𑀳𑁄𑀦𑁆𑀢𑀺? 𑀬𑁂 𑀦𑀁 𑀕𑀘𑁆𑀙𑀦𑁆𑀢𑀺𑀁 𑀧𑀲𑁆𑀲𑀦𑁆𑀢𑀺, ‘‘𑀇𑀤𑀸𑀦𑀺 𑀣𑁄𑀓𑀁 𑀕𑀘𑁆𑀙𑀢𑀼, 𑀕𑀘𑁆𑀙𑀫𑀸𑀦𑀸𑀯 𑀦𑁄, 𑀅𑀬𑁆𑀬𑀸 𑀲𑁄𑀪𑀢𑀻’’𑀢𑀺, 𑀘𑀺𑀦𑁆𑀢𑁂𑀦𑁆𑀢𑀺. 𑀬𑁂 𑀦𑀁 𑀞𑀺𑀢𑀁 𑀦𑀺𑀲𑀺𑀦𑁆𑀦𑀁 𑀦𑀺𑀧𑀦𑁆𑀦𑀁 𑀧𑀲𑁆𑀲𑀦𑁆𑀢𑀺, ‘‘𑀇𑀤𑀸𑀦𑀺 𑀣𑁄𑀓𑀁 𑀦𑀺𑀧𑀚𑁆𑀚𑀢𑀼, 𑀦𑀺𑀧𑀦𑁆𑀦𑀸𑀯 𑀦𑁄, 𑀅𑀬𑁆𑀬𑀸, 𑀲𑁄𑀪𑀢𑀻’’𑀢𑀺 𑀘𑀺𑀦𑁆𑀢𑁂𑀦𑁆𑀢𑀺. 𑀇𑀢𑀺 𑀲𑀸 ‘‘𑀘𑀢𑀽𑀲𑀼 𑀇𑀭𑀺𑀬𑀸𑀧𑀣𑁂𑀲𑀼 𑀅𑀲𑀼𑀓𑀇𑀭𑀺𑀬𑀸𑀧𑀣𑁂𑀦 𑀦𑀸𑀫 𑀦 𑀲𑁄𑀪𑀢𑀻’’𑀢𑀺 𑀯𑀢𑁆𑀢𑀩𑁆𑀩𑀸 𑀦 𑀳𑁄𑀢𑀺. 𑀧𑀜𑁆𑀘𑀦𑁆𑀦𑀁 𑀔𑁄 𑀧𑀦 𑀳𑀢𑁆𑀣𑀻𑀦𑀁 𑀩𑀮𑀁 𑀥𑀸𑀭𑁂𑀢𑀺. 𑀭𑀸𑀚𑀸 ‘‘𑀯𑀺𑀲𑀸𑀔𑀸 𑀓𑀺𑀭 𑀧𑀜𑁆𑀘𑀦𑁆𑀦𑀁 𑀳𑀢𑁆𑀣𑀻𑀦𑀁 𑀩𑀮𑀁 𑀥𑀸𑀭𑁂𑀢𑀻’’𑀢𑀺 𑀲𑀼𑀢𑁆𑀯𑀸 𑀢𑀲𑁆𑀲𑀸 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀆𑀕𑀫𑀦𑀯𑁂𑀮𑀸𑀬 𑀣𑀸𑀫𑀁 𑀯𑀻𑀫𑀁𑀲𑀺𑀢𑀼𑀓𑀸𑀫𑁄 𑀳𑀢𑁆𑀣𑀺𑀁 𑀯𑀺𑀲𑁆𑀲𑀚𑁆𑀚𑀸𑀧𑁂𑀲𑀺, 𑀲𑁄 𑀲𑁄𑀡𑁆𑀟𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀯𑀺𑀲𑀸𑀔𑀸𑀪𑀺𑀫𑀼𑀔𑁄 𑀅𑀕𑀫𑀸𑀲𑀺. 𑀢𑀲𑁆𑀲𑀸 𑀧𑀭𑀺𑀯𑀸𑀭𑀺𑀢𑁆𑀣𑀺𑀬𑁄 𑀧𑀜𑁆𑀘𑀲𑀢𑀸 𑀏𑀓𑀘𑁆𑀘𑀸 𑀧𑀮𑀸𑀬𑀺𑀁𑀲𑀼, 𑀏𑀓𑀘𑁆𑀘𑀸 𑀦 𑀧𑀭𑀺𑀲𑁆𑀲𑀚𑁆𑀚𑀺𑀢𑁆𑀯𑀸 ‘‘𑀓𑀺𑀁 𑀇𑀤’’𑀦𑁆𑀢𑀺 𑀯𑀼𑀢𑁆𑀢𑁂 𑁋 ‘‘𑀭𑀸𑀚𑀸 𑀓𑀺𑀭 𑀢𑁂, 𑀅𑀬𑁆𑀬𑁂, 𑀩𑀮𑀁 𑀯𑀻𑀫𑀁𑀲𑀺𑀢𑀼𑀓𑀸𑀫𑁄 𑀳𑀢𑁆𑀣𑀺𑀁 𑀯𑀺𑀲𑁆𑀲𑀚𑁆𑀚𑀸𑀧𑁂𑀲𑀻’’𑀢𑀺 𑀯𑀤𑀺𑀁𑀲𑀼. 𑀯𑀺𑀲𑀸𑀔𑀸 𑀇𑀫𑀁 𑀤𑀺𑀲𑁆𑀯𑀸, ‘‘𑀓𑀺𑀁 𑀧𑀮𑀸𑀬𑀺𑀢𑁂𑀦, 𑀓𑀣𑀁 𑀦𑀼 𑀔𑁄 𑀢𑀁 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸, ‘‘𑀲𑀘𑁂 𑀢𑀁 𑀤𑀴𑁆𑀳𑀁 𑀕𑀡𑁆𑀳𑀺𑀲𑁆𑀲𑀸𑀫𑀺, 𑀯𑀺𑀦𑀲𑁆𑀲𑁂𑀬𑁆𑀬𑀸’’𑀢𑀺 𑀤𑁆𑀯𑀻𑀳𑀺 𑀅𑀗𑁆𑀕𑀼𑀮𑀻𑀳𑀺 𑀲𑁄𑀡𑁆𑀟𑀸𑀬 𑀕𑀳𑁂𑀢𑁆𑀯𑀸 𑀧𑀝𑀺𑀧𑀡𑀸𑀫𑁂𑀲𑀺. 𑀳𑀢𑁆𑀣𑀻 𑀅𑀢𑁆𑀢𑀸𑀦𑀁 𑀲𑀦𑁆𑀥𑀸𑀭𑁂𑀢𑁆𑀯𑀸 𑀞𑀸𑀢𑀼𑀁 𑀦𑀸𑀲𑀓𑁆𑀔𑀺, 𑀭𑀸𑀚𑀗𑁆𑀕𑀡𑁂 𑀉𑀓𑁆𑀓𑀼𑀝𑀺𑀓𑁄 𑀳𑀼𑀢𑁆𑀯𑀸 𑀧𑀢𑀺𑀢𑁄. 𑀫𑀳𑀸𑀚𑀦𑁄 𑀲𑀸𑀥𑀼𑀓𑀸𑀭𑀁 𑀅𑀤𑀸𑀲𑀺. 𑀲𑀸𑀧𑀺 𑀲𑀧𑀭𑀺𑀯𑀸𑀭𑀸 𑀲𑁄𑀢𑁆𑀣𑀺𑀦𑀸 𑀕𑁂𑀳𑀁 𑀅𑀕𑀫𑀸𑀲𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀸𑀯𑀢𑁆𑀣𑀺𑀬𑀁 𑀯𑀺𑀲𑀸𑀔𑀸 𑀫𑀺𑀕𑀸𑀭𑀫𑀸𑀢𑀸 𑀩𑀳𑀼𑀧𑀼𑀢𑁆𑀢𑀸 𑀳𑁄𑀢𑀺 𑀩𑀳𑀼𑀦𑀢𑁆𑀢𑀸 𑀅𑀭𑁄𑀕𑀧𑀼𑀢𑁆𑀢𑀸 𑀅𑀭𑁄𑀕𑀦𑀢𑁆𑀢𑀸 𑀅𑀪𑀺𑀫𑀗𑁆𑀕𑀮𑀲𑀫𑁆𑀫𑀢𑀸, 𑀢𑀸𑀯𑀢𑀓𑁂𑀲𑀼 𑀧𑀼𑀢𑁆𑀢𑀦𑀢𑁆𑀢𑁂𑀲𑀼 𑀏𑀓𑁄𑀧𑀺 𑀅𑀦𑁆𑀢𑀭𑀸 𑀫𑀭𑀡𑀁 𑀧𑀢𑁆𑀢𑁄 𑀦𑀸𑀫 𑀦𑀸𑀳𑁄𑀲𑀺. 𑀲𑀸𑀯𑀢𑁆𑀣𑀺𑀯𑀸𑀲𑀺𑀦𑁄 𑀫𑀗𑁆𑀕𑀮𑁂𑀲𑀼 𑀙𑀡𑁂𑀲𑀼 𑀯𑀺𑀲𑀸𑀔𑀁 𑀧𑀞𑀫𑀁 𑀦𑀺𑀫𑀦𑁆𑀢𑁂𑀢𑁆𑀯𑀸 𑀪𑁄𑀚𑁂𑀦𑁆𑀢𑀺. 𑀅𑀣𑁂𑀓𑀲𑁆𑀫𑀺𑀁 𑀉𑀲𑁆𑀲𑀯𑀤𑀺𑀯𑀲𑁂 𑀫𑀳𑀸𑀚𑀦𑁂 𑀫𑀡𑁆𑀟𑀺𑀢𑀧𑀲𑀸𑀥𑀺𑀢𑁂 𑀥𑀫𑁆𑀫𑀲𑁆𑀲𑀯𑀦𑀸𑀬 𑀯𑀺𑀳𑀸𑀭𑀁 𑀕𑀘𑁆𑀙𑀦𑁆𑀢𑁂 𑀯𑀺𑀲𑀸𑀔𑀸𑀧𑀺 𑀦𑀺𑀫𑀦𑁆𑀢𑀺𑀢𑀝𑁆𑀞𑀸𑀦𑁂 𑀪𑀼𑀜𑁆𑀚𑀺𑀢𑁆𑀯𑀸 𑀫𑀳𑀸𑀮𑀢𑀸𑀧𑀲𑀸𑀥𑀦𑀁 𑀧𑀲𑀸𑀥𑁂𑀢𑁆𑀯𑀸 𑀫𑀳𑀸𑀚𑀦𑁂𑀦 𑀲𑀤𑁆𑀥𑀺𑀁 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀆𑀪𑀭𑀡𑀸𑀦𑀺 𑀑𑀫𑀼𑀜𑁆𑀘𑀺𑀢𑁆𑀯𑀸 𑀉𑀢𑁆𑀢𑀭𑀸𑀲𑀗𑁆𑀕𑁂𑀦 𑀪𑀡𑁆𑀟𑀺𑀓𑀁 𑀩𑀦𑁆𑀥𑀺𑀢𑁆𑀯𑀸 𑀤𑀸𑀲𑀺𑀬𑀸 𑀅𑀤𑀸𑀲𑀺. 𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋

‘‘𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀸𑀯𑀢𑁆𑀣𑀺𑀬𑀁 𑀉𑀲𑁆𑀲𑀯𑁄 𑀳𑁄𑀢𑀺, 𑀫𑀦𑀼𑀲𑁆𑀲𑀸 𑀅𑀮𑀗𑁆𑀓𑀢𑀧𑀝𑀺𑀬𑀢𑁆𑀢𑀸 𑀆𑀭𑀸𑀫𑀁 𑀕𑀘𑁆𑀙𑀦𑁆𑀢𑀺, 𑀯𑀺𑀲𑀸𑀔𑀸𑀧𑀺 𑀫𑀺𑀕𑀸𑀭𑀫𑀸𑀢𑀸 𑀅𑀮𑀗𑁆𑀓𑀢𑀧𑀝𑀺𑀬𑀢𑁆𑀢𑀸 𑀯𑀺𑀳𑀸𑀭𑀁 𑀕𑀘𑁆𑀙𑀢𑀺. 𑀅𑀣 𑀔𑁄 𑀯𑀺𑀲𑀸𑀔𑀸 𑀫𑀺𑀕𑀸𑀭𑀫𑀸𑀢𑀸 𑀆𑀪𑀭𑀡𑀸𑀦𑀺 𑀑𑀫𑀼𑀜𑁆𑀘𑀺𑀢𑁆𑀯𑀸 𑀉𑀢𑁆𑀢𑀭𑀸𑀲𑀗𑁆𑀕𑁂𑀦 𑀪𑀡𑁆𑀟𑀺𑀓𑀁 𑀩𑀦𑁆𑀥𑀺𑀢𑁆𑀯𑀸 𑀤𑀸𑀲𑀺𑀬𑀸 𑀅𑀤𑀸𑀲𑀺 ‘𑀳𑀦𑁆𑀤 𑀚𑁂 𑀇𑀫𑀁 𑀪𑀡𑁆𑀟𑀺𑀓𑀁 𑀕𑀡𑁆𑀳𑀸𑀳𑀻’’’𑀢𑀺 (𑀧𑀸𑀘𑀺. 𑁫𑁦𑁩).

𑀲𑀸 𑀓𑀺𑀭 𑀯𑀺𑀳𑀸𑀭𑀁 𑀕𑀘𑁆𑀙𑀦𑁆𑀢𑀻 𑀘𑀺𑀦𑁆𑀢𑁂𑀲𑀺 𑁋 ‘‘𑀏𑀯𑀭𑀽𑀧𑀁 𑀫𑀳𑀕𑁆𑀖𑀁 𑀧𑀲𑀸𑀥𑀦𑀁 𑀲𑀻𑀲𑁂 𑀧𑀝𑀺𑀫𑀼𑀓𑁆𑀓𑀁 𑀬𑀸𑀯 𑀧𑀸𑀤𑀧𑀺𑀝𑁆𑀞𑀺𑀁 𑀅𑀮𑀗𑁆𑀓𑀸𑀭𑀁 𑀅𑀮𑀗𑁆𑀓𑀭𑀺𑀢𑁆𑀯𑀸 𑀯𑀺𑀳𑀸𑀭𑀁 𑀧𑀯𑀺𑀲𑀺𑀢𑀼𑀁 𑀅𑀬𑀼𑀢𑁆𑀢’’𑀦𑁆𑀢𑀺 𑀦𑀁 𑀑𑀫𑀼𑀜𑁆𑀘𑀺𑀢𑁆𑀯𑀸 𑀪𑀡𑁆𑀟𑀺𑀓𑀁 𑀓𑀢𑁆𑀯𑀸 𑀅𑀢𑁆𑀢𑀦𑁄 𑀧𑀼𑀜𑁆𑀜𑁂𑀦𑁂𑀯 𑀦𑀺𑀩𑁆𑀩𑀢𑁆𑀢𑀸𑀬 𑀧𑀜𑁆𑀘𑀳𑀢𑁆𑀣𑀺𑀣𑀸𑀫𑀥𑀭𑀸𑀬 𑀤𑀸𑀲𑀺𑀬𑀸 𑀳𑀢𑁆𑀣𑁂 𑀅𑀤𑀸𑀲𑀺. 𑀲𑀸 𑀏𑀯 𑀓𑀺𑀭 𑀢𑀁 𑀕𑀡𑁆𑀳𑀺𑀢𑀼𑀁 𑀲𑀓𑁆𑀓𑁄𑀢𑀺. 𑀢𑁂𑀦 𑀦𑀁 𑀆𑀳 𑁋 ‘‘𑀅𑀫𑁆𑀫, 𑀇𑀫𑀁 𑀧𑀲𑀸𑀥𑀦𑀁 𑀕𑀡𑁆𑀳, 𑀲𑀢𑁆𑀣𑀼𑀲𑀦𑁆𑀢𑀺𑀓𑀸 𑀦𑀺𑀯𑀢𑁆𑀢𑀦𑀓𑀸𑀮𑁂 𑀧𑀲𑀸𑀥𑁂𑀲𑁆𑀲𑀸𑀫𑀺 𑀦’’𑀦𑁆𑀢𑀺. 𑀢𑀁 𑀧𑀦 𑀤𑀢𑁆𑀯𑀸 𑀖𑀦𑀫𑀝𑁆𑀞𑀓𑀁 𑀧𑀲𑀸𑀥𑀦𑀁 𑀧𑀲𑀸𑀥𑁂𑀢𑁆𑀯𑀸 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀥𑀫𑁆𑀫𑀁 𑀅𑀲𑁆𑀲𑁄𑀲𑀺, 𑀥𑀫𑁆𑀫𑀲𑁆𑀲𑀯𑀦𑀸𑀯𑀲𑀸𑀦𑁂 𑀪𑀕𑀯𑀦𑁆𑀢𑀁 𑀯𑀦𑁆𑀤𑀺𑀢𑁆𑀯𑀸 𑀉𑀝𑁆𑀞𑀸𑀬 𑀧𑀓𑁆𑀓𑀸𑀫𑀺. 𑀲𑀸𑀧𑀺𑀲𑁆𑀲𑀸 𑀤𑀸𑀲𑀻 𑀢𑀁 𑀧𑀲𑀸𑀥𑀦𑀁 𑀧𑀫𑀼𑀝𑁆𑀞𑀸. 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀧𑀦 𑀧𑀓𑁆𑀓𑀦𑁆𑀢𑀸𑀬 𑀧𑀭𑀺𑀲𑀸𑀬 𑀲𑀘𑁂 𑀓𑀺𑀜𑁆𑀘𑀺 𑀧𑀫𑀼𑀝𑁆𑀞𑀁 𑀳𑁄𑀢𑀺, 𑀢𑀁 𑀆𑀦𑀦𑁆𑀤𑀢𑁆𑀣𑁂𑀭𑁄 𑀧𑀝𑀺𑀲𑀸𑀫𑁂𑀢𑀺. 𑀇𑀢𑀺 𑀲𑁄 𑀢𑀁 𑀤𑀺𑀯𑀲𑀁 𑀫𑀳𑀸𑀮𑀢𑀸𑀧𑀲𑀸𑀥𑀦𑀁 𑀤𑀺𑀲𑁆𑀯𑀸 𑀲𑀢𑁆𑀣𑀼 𑀆𑀭𑁄𑀘𑁂𑀲𑀺 𑁋 ‘‘𑀪𑀦𑁆𑀢𑁂, 𑀯𑀺𑀲𑀸𑀔𑀸 𑀧𑀲𑀸𑀥𑀦𑀁 𑀧𑀫𑀼𑀲𑁆𑀲𑀺𑀢𑁆𑀯𑀸 𑀕𑀢𑀸’’𑀢𑀺. ‘‘𑀏𑀓𑀫𑀦𑁆𑀢𑀁 𑀞𑀧𑁂𑀳𑀺, 𑀆𑀦𑀦𑁆𑀤𑀸’’𑀢𑀺. 𑀣𑁂𑀭𑁄 𑀢𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀲𑁄𑀧𑀸𑀦𑀧𑀲𑁆𑀲𑁂 𑀮𑀕𑁆𑀕𑁂𑀢𑁆𑀯𑀸 𑀞𑀧𑁂𑀲𑀺.

𑀯𑀺𑀲𑀸𑀔𑀸𑀧𑀺 𑀲𑀼𑀧𑁆𑀧𑀺𑀬𑀸𑀬 𑀲𑀤𑁆𑀥𑀺𑀁 ‘‘𑀆𑀕𑀦𑁆𑀢𑀼𑀓𑀕𑀫𑀺𑀓𑀕𑀺𑀮𑀸𑀦𑀸𑀤𑀻𑀦𑀁 𑀓𑀢𑁆𑀢𑀩𑁆𑀩𑀬𑀼𑀢𑁆𑀢𑀓𑀁 𑀚𑀸𑀦𑀺𑀲𑁆𑀲𑀸𑀫𑀻’’𑀢𑀺 𑀅𑀦𑁆𑀢𑁄𑀯𑀺𑀳𑀸𑀭𑁂 𑀯𑀺𑀘𑀭𑀺. 𑀢𑀸 𑀧𑀦 𑀉𑀧𑀸𑀲𑀺𑀓𑀸𑀬𑁄 𑀅𑀦𑁆𑀢𑁄𑀯𑀺𑀳𑀸𑀭𑁂 𑀤𑀺𑀲𑁆𑀯𑀸 𑀲𑀧𑁆𑀧𑀺𑀫𑀥𑀼𑀢𑁂𑀮𑀸𑀤𑀻𑀳𑀺 𑀅𑀢𑁆𑀣𑀺𑀓𑀸 𑀧𑀓𑀢𑀺𑀬𑀸𑀯 𑀤𑀳𑀭𑀸 𑀘 𑀲𑀸𑀫𑀡𑁂𑀭𑀸 𑀘 𑀣𑀸𑀮𑀓𑀸𑀤𑀻𑀦𑀺 𑀕𑀳𑁂𑀢𑁆𑀯𑀸 𑀉𑀧𑀲𑀗𑁆𑀓𑀫𑀦𑁆𑀢𑀺. 𑀢𑀲𑁆𑀫𑀺𑀫𑁆𑀧𑀺 𑀤𑀺𑀯𑀲𑁂 𑀢𑀣𑁂𑀯 𑀓𑀭𑀺𑀁𑀲𑀼. 𑀅𑀣𑁂𑀓𑀁 𑀕𑀺𑀮𑀸𑀦𑀁 𑀪𑀺𑀓𑁆𑀔𑀼𑀁 𑀤𑀺𑀲𑁆𑀯𑀸 𑀲𑀼𑀧𑁆𑀧𑀺𑀬𑀸 (𑀫𑀳𑀸𑀯. 𑁨𑁮𑁦) ‘‘𑀓𑁂𑀦𑀢𑁆𑀣𑁄 𑀅𑀬𑁆𑀬𑀲𑁆𑀲𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀧𑀝𑀺𑀘𑁆𑀙𑀸𑀤𑀦𑀻𑀬𑁂𑀦𑀸’’𑀢𑀺 𑀯𑀼𑀢𑁆𑀢𑁂 𑀳𑁄𑀢𑀼, 𑀅𑀬𑁆𑀬, 𑀧𑁂𑀲𑁂𑀲𑁆𑀲𑀸𑀫𑀻𑀢𑀺 𑀤𑀼𑀢𑀺𑀬𑀤𑀺𑀯𑀲𑁂 𑀓𑀧𑁆𑀧𑀺𑀬𑀫𑀁𑀲𑀁 𑀅𑀮𑀪𑀦𑁆𑀢𑀻 𑀅𑀢𑁆𑀢𑀦𑁄 𑀊𑀭𑀼𑀫𑀁𑀲𑁂𑀦 𑀓𑀢𑁆𑀢𑀩𑁆𑀩𑀓𑀺𑀘𑁆𑀘𑀁 𑀓𑀢𑁆𑀯𑀸 𑀧𑀼𑀦 𑀲𑀢𑁆𑀣𑀭𑀺 𑀧𑀲𑀸𑀤𑁂𑀦 𑀧𑀸𑀓𑀢𑀺𑀓𑀲𑀭𑀻𑀭𑀸𑀯 𑀅𑀳𑁄𑀲𑀺. 𑀯𑀺𑀲𑀸𑀔𑀸𑀧𑀺 𑀕𑀺𑀮𑀸𑀦𑁂 𑀘 𑀤𑀳𑀭𑁂 𑀘 𑀲𑀸𑀫𑀡𑁂𑀭𑁂 𑀘 𑀑𑀮𑁄𑀓𑁂𑀢𑁆𑀯𑀸 𑀅𑀜𑁆𑀜𑁂𑀦 𑀤𑁆𑀯𑀸𑀭𑁂𑀦 𑀦𑀺𑀓𑁆𑀔𑀫𑀺𑀢𑁆𑀯𑀸 𑀯𑀺𑀳𑀸𑀭𑀽𑀧𑀘𑀸𑀭𑁂 𑀞𑀺𑀢𑀸, ‘‘𑀅𑀫𑁆𑀫, 𑀧𑀲𑀸𑀥𑀦𑀁 𑀆𑀳𑀭 𑀧𑀲𑀸𑀥𑁂𑀲𑁆𑀲𑀸𑀫𑀻’’𑀢𑀺 𑀆𑀳. 𑀢𑀲𑁆𑀫𑀺𑀁 𑀔𑀡𑁂 𑀲𑀸 𑀤𑀸𑀲𑀻 𑀧𑀫𑀼𑀲𑁆𑀲𑀺𑀢𑁆𑀯𑀸 𑀦𑀺𑀓𑁆𑀔𑀦𑁆𑀢𑀪𑀸𑀯𑀁 𑀜𑀢𑁆𑀯𑀸, ‘‘𑀅𑀬𑁆𑀬𑁂, 𑀧𑀫𑀼𑀝𑁆𑀞𑀸𑀫𑁆𑀳𑀻’’𑀢𑀺 𑀆𑀳. ‘‘𑀢𑁂𑀦 𑀳𑀺 𑀕𑀦𑁆𑀢𑁆𑀯𑀸 𑀕𑀡𑁆𑀳𑀺𑀢𑁆𑀯𑀸 𑀏𑀳𑀺, 𑀲𑀘𑁂 𑀧𑀦 𑀫𑀬𑁆𑀳𑀁 𑀅𑀬𑁆𑀬𑁂𑀦 𑀆𑀦𑀦𑁆𑀤𑀢𑁆𑀣𑁂𑀭𑁂𑀦 𑀉𑀓𑁆𑀔𑀺𑀧𑀺𑀢𑁆𑀯𑀸 𑀅𑀜𑁆𑀜𑀲𑁆𑀫𑀺𑀁 𑀞𑀸𑀦𑁂 𑀞𑀧𑀺𑀢𑀁 𑀳𑁄𑀢𑀺, 𑀫𑀸 𑀆𑀳𑀭𑁂𑀬𑁆𑀬𑀸𑀲𑀺, 𑀅𑀬𑁆𑀬𑀲𑁆𑀲𑁂𑀯 𑀢𑀁 𑀫𑀬𑀸 𑀧𑀭𑀺𑀘𑁆𑀘𑀢𑁆𑀢’’𑀦𑁆𑀢𑀺. 𑀚𑀸𑀦𑀸𑀢𑀺 𑀓𑀺𑀭 𑀲𑀸 ‘‘𑀓𑀼𑀮𑀫𑀦𑀼𑀲𑁆𑀲𑀸𑀦𑀁 𑀧𑀫𑀼𑀝𑁆𑀞𑀪𑀡𑁆𑀟𑀓𑀁 𑀣𑁂𑀭𑁄 𑀧𑀝𑀺𑀲𑀸𑀫𑁂𑀢𑀻’’𑀢𑀺; 𑀢𑀲𑁆𑀫𑀸 𑀏𑀯𑀫𑀸𑀳. 𑀣𑁂𑀭𑁄𑀧𑀺 𑀢𑀁 𑀤𑀸𑀲𑀺𑀁 𑀤𑀺𑀲𑁆𑀯𑀸𑀯 ‘‘𑀓𑀺𑀫𑀢𑁆𑀣𑀁 𑀆𑀕𑀢𑀸𑀲𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸, ‘‘𑀅𑀬𑁆𑀬𑀸𑀬 𑀫𑁂 𑀧𑀲𑀸𑀥𑀦𑀁 𑀧𑀫𑀼𑀲𑁆𑀲𑀺𑀢𑁆𑀯𑀸 𑀆𑀕𑀢𑀸𑀫𑁆𑀳𑀻’’𑀢𑀺 𑀯𑀼𑀢𑁆𑀢𑁂, ‘‘𑀏𑀢𑀲𑁆𑀫𑀺𑀁 𑀫𑁂 𑀲𑁄𑀧𑀸𑀦𑀧𑀲𑁆𑀲𑁂 𑀞𑀧𑀺𑀢𑀁, 𑀕𑀘𑁆𑀙 𑀦𑀁 𑀕𑀡𑁆𑀳𑀸𑀳𑀻’’𑀢𑀺 𑀆𑀳. 𑀲𑀸, ‘‘𑀅𑀬𑁆𑀬, 𑀢𑀼𑀫𑁆𑀳𑀸𑀓𑀁 𑀳𑀢𑁆𑀣𑁂𑀦 𑀆𑀫𑀝𑁆𑀞𑀪𑀡𑁆𑀟𑀓𑀁 𑀫𑀬𑁆𑀳𑀁 𑀅𑀬𑁆𑀬𑀸𑀬 𑀅𑀦𑀸𑀳𑀸𑀭𑀺𑀬𑀁 𑀓𑀢’’𑀦𑁆𑀢𑀺 𑀯𑀢𑁆𑀯𑀸 𑀢𑀼𑀘𑁆𑀙𑀳𑀢𑁆𑀣𑀸𑀯 𑀕𑀦𑁆𑀢𑁆𑀯𑀸, ‘‘𑀓𑀺𑀁, 𑀅𑀫𑁆𑀫𑀸’’𑀢𑀺 𑀯𑀺𑀲𑀸𑀔𑀸𑀬 𑀧𑀼𑀝𑁆𑀞𑀸 𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. ‘‘𑀅𑀫𑁆𑀫, 𑀦𑀸𑀳𑀁 𑀫𑀫 𑀅𑀬𑁆𑀬𑁂𑀦 𑀆𑀫𑀝𑁆𑀞𑀪𑀡𑁆𑀟𑀁 𑀧𑀺𑀮𑀦𑁆𑀥𑀺𑀲𑁆𑀲𑀸𑀫𑀺, 𑀧𑀭𑀺𑀘𑁆𑀘𑀢𑁆𑀢𑀁 𑀫𑀬𑀸. 𑀅𑀬𑁆𑀬𑀸𑀦𑀁 𑀧𑀦 𑀧𑀝𑀺𑀚𑀕𑁆𑀕𑀺𑀢𑀼𑀁 𑀤𑀼𑀓𑁆𑀔𑀁, 𑀢𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀓𑀧𑁆𑀧𑀺𑀬𑀪𑀡𑁆𑀟𑀁 𑀉𑀧𑀦𑁂𑀲𑁆𑀲𑀸𑀫𑀺, 𑀕𑀘𑁆𑀙, 𑀢𑀁 𑀆𑀳𑀭𑀸𑀳𑀻’’𑀢𑀺. 𑀲𑀸 𑀕𑀦𑁆𑀢𑁆𑀯𑀸 𑀆𑀳𑀭𑀺. 𑀯𑀺𑀲𑀸𑀔𑀸 𑀢𑀁 𑀅𑀧𑀺𑀮𑀦𑁆𑀥𑀺𑀢𑁆𑀯𑀸𑀯 𑀓𑀫𑁆𑀫𑀸𑀭𑁂 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀅𑀕𑁆𑀖𑀸𑀧𑁂𑀲𑀺. 𑀢𑁂𑀳𑀺 ‘‘𑀦𑀯 𑀓𑁄𑀝𑀺𑀬𑁄 𑀅𑀕𑁆𑀖𑀢𑀺, 𑀳𑀢𑁆𑀣𑀓𑀸𑀭𑀸𑀧𑀡𑀺𑀬𑀁 𑀧𑀦𑀲𑁆𑀲 𑀲𑀢𑀲𑀳𑀲𑁆𑀲’’𑀦𑁆𑀢𑀺 𑀯𑀼𑀢𑁆𑀢𑁂 𑀧𑀲𑀸𑀥𑀦𑀁 𑀬𑀸𑀦𑁂 𑀞𑀧𑀸𑀧𑁂𑀢𑁆𑀯𑀸 ‘‘𑀢𑁂𑀦 𑀳𑀺 𑀢𑀁 𑀯𑀺𑀓𑁆𑀓𑀺𑀡𑀣𑀸’’𑀢𑀺 𑀆𑀳. 𑀪𑀢𑁆𑀢𑀓𑀁 𑀥𑀦𑀁 𑀤𑀢𑁆𑀯𑀸 𑀕𑀡𑁆𑀳𑀺𑀁𑀢𑀼 𑀦 𑀓𑁄𑀘𑀺 𑀲𑀓𑁆𑀔𑀺𑀲𑁆𑀲𑀢𑀺. 𑀢𑀜𑁆𑀳𑀺 𑀧𑀲𑀸𑀥𑀦𑀁 𑀧𑀲𑀸𑀥𑁂𑀢𑀼𑀁 𑀅𑀦𑀼𑀘𑁆𑀙𑀯𑀺𑀓𑀸 𑀇𑀢𑁆𑀣𑀺𑀬𑁄 𑀦𑀸𑀫 𑀤𑀼𑀮𑁆𑀮𑀪𑀸. 𑀧𑀣𑀯𑀺𑀫𑀡𑁆𑀟𑀮𑀲𑁆𑀫𑀺𑀜𑁆𑀳𑀺 𑀢𑀺𑀲𑁆𑀲𑁄𑀯 𑀇𑀢𑁆𑀣𑀺𑀬𑁄 𑀫𑀳𑀸𑀮𑀢𑀸𑀧𑀲𑀸𑀥𑀦𑀁 𑀮𑀪𑀺𑀁𑀲𑀼 𑀯𑀺𑀲𑀸𑀔𑀸 𑀫𑀳𑀸𑀉𑀧𑀸𑀲𑀺𑀓𑀸, 𑀩𑀦𑁆𑀥𑀼𑀮𑀫𑀮𑁆𑀮𑀲𑁂𑀦𑀸𑀧𑀢𑀺𑀲𑁆𑀲 𑀪𑀭𑀺𑀬𑀸, 𑀫𑀮𑁆𑀮𑀺𑀓𑀸, 𑀩𑀸𑀭𑀸𑀡𑀲𑀻𑀲𑁂𑀝𑁆𑀞𑀺𑀦𑁄 𑀥𑀻𑀢𑀸𑀢𑀺.

𑀢𑀲𑁆𑀫𑀸 𑀯𑀺𑀲𑀸𑀔𑀸 𑀲𑀬𑀫𑁂𑀯 𑀢𑀲𑁆𑀲 𑀫𑀽𑀮𑀁 𑀤𑀢𑁆𑀯𑀸 𑀲𑀢𑀲𑀳𑀲𑁆𑀲𑀸𑀥𑀺𑀓𑀸 𑀦𑀯 𑀓𑁄𑀝𑀺𑀬𑁄 𑀲𑀓𑀝𑁂 𑀆𑀭𑁄𑀧𑁂𑀢𑁆𑀯𑀸 𑀯𑀺𑀳𑀸𑀭𑀁 𑀦𑁂𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸, ‘‘𑀪𑀦𑁆𑀢𑁂, 𑀫𑀬𑁆𑀳𑀁 𑀅𑀬𑁆𑀬𑁂𑀦 𑀆𑀦𑀦𑁆𑀤𑀢𑁆𑀣𑁂𑀭𑁂𑀦 𑀫𑀫 𑀧𑀲𑀸𑀥𑀦𑀁 𑀳𑀢𑁆𑀣𑁂𑀦 𑀆𑀫𑀝𑁆𑀞𑀁, 𑀢𑁂𑀦 𑀆𑀫𑀝𑁆𑀞𑀓𑀸𑀮𑀢𑁄 𑀧𑀝𑁆𑀞𑀸𑀬 𑀦 𑀲𑀓𑁆𑀓𑀸 𑀢𑀁 𑀫𑀬𑀸 𑀧𑀺𑀮𑀦𑁆𑀥𑀺𑀢𑀼𑀁. 𑀢𑀁 𑀧𑀦 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀓𑀧𑁆𑀧𑀺𑀬𑀁 𑀉𑀧𑀦𑁂𑀲𑁆𑀲𑀸𑀫𑀻𑀢𑀺 𑀯𑀺𑀓𑁆𑀓𑀺𑀡𑀸𑀧𑁂𑀦𑁆𑀢𑀻 𑀅𑀜𑁆𑀜𑀁 𑀢𑀁 𑀕𑀡𑁆𑀳𑀺𑀢𑀼𑀁 𑀲𑀫𑀢𑁆𑀣𑀁 𑀅𑀤𑀺𑀲𑁆𑀯𑀸 𑀅𑀳𑀫𑁂𑀯 𑀢𑀲𑁆𑀲 𑀫𑀽𑀮𑀁 𑀕𑀸𑀳𑀸𑀧𑁂𑀢𑁆𑀯𑀸 𑀆𑀕𑀢𑀸, 𑀘𑀢𑀽𑀲𑀼 𑀧𑀘𑁆𑀘𑀬𑁂𑀲𑀼 𑀓𑀢𑀭𑀧𑀘𑁆𑀘𑀬𑁂𑀦 𑀉𑀧𑀦𑁂𑀲𑁆𑀲𑀸𑀫𑀺, 𑀪𑀦𑁆𑀢𑁂’’𑀢𑀺. 𑀧𑀸𑀘𑀻𑀦𑀤𑁆𑀯𑀸𑀭𑁂 𑀲𑀗𑁆𑀖𑀲𑁆𑀲 𑀯𑀲𑀦𑀝𑁆𑀞𑀸𑀦𑀁 𑀓𑀸𑀢𑀼𑀁 𑀢𑁂 𑀬𑀼𑀢𑁆𑀢𑀁 𑀯𑀺𑀲𑀸𑀔𑁂𑀢𑀺 ‘‘𑀬𑀼𑀢𑁆𑀢𑀁, 𑀪𑀦𑁆𑀢𑁂’’𑀢𑀺 𑀯𑀺𑀲𑀸𑀔𑀸 𑀢𑀼𑀝𑁆𑀞𑀫𑀸𑀦𑀲𑀸 𑀦𑀯𑀓𑁄𑀝𑀻𑀳𑀺 𑀪𑀽𑀫𑀺𑀫𑁂𑀯 𑀕𑀡𑁆𑀳𑀺. 𑀅𑀧𑀭𑀸𑀳𑀺 𑀦𑀯𑀓𑁄𑀝𑀻𑀳𑀺 𑀯𑀺𑀳𑀸𑀭𑀁 𑀓𑀸𑀢𑀼𑀁 𑀆𑀭𑀪𑀺.

𑀅𑀣𑁂𑀓𑀤𑀺𑀯𑀲𑀁 𑀲𑀢𑁆𑀣𑀸 𑀧𑀘𑁆𑀘𑀽𑀲𑀲𑀫𑀬𑁂 𑀮𑁄𑀓𑀁 𑀯𑁄𑀮𑁄𑀓𑁂𑀦𑁆𑀢𑁄 𑀤𑁂𑀯𑀮𑁄𑀓𑀸 𑀘𑀯𑀺𑀢𑁆𑀯𑀸 𑀪𑀤𑁆𑀤𑀺𑀬𑀦𑀕𑀭𑁂 𑀲𑁂𑀝𑁆𑀞𑀺𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀲𑁆𑀲 𑀪𑀤𑁆𑀤𑀺𑀬𑀲𑁆𑀲 𑀦𑀸𑀫 𑀲𑁂𑀝𑁆𑀞𑀺𑀧𑀼𑀢𑁆𑀢𑀲𑁆𑀲 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀢𑁆𑀢𑀺𑀁 𑀤𑀺𑀲𑁆𑀯𑀸 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀕𑁂𑀳𑁂 𑀪𑀢𑁆𑀢𑀓𑀺𑀘𑁆𑀘𑀁 𑀓𑀢𑁆𑀯𑀸 𑀉𑀢𑁆𑀢𑀭𑀤𑁆𑀯𑀸𑀭𑀸𑀪𑀺𑀫𑀼𑀔𑁄 𑀅𑀳𑁄𑀲𑀺. 𑀧𑀓𑀢𑀺𑀬𑀸 𑀳𑀺 𑀲𑀢𑁆𑀣𑀸 𑀯𑀺𑀲𑀸𑀔𑀸𑀬 𑀕𑁂𑀳𑁂 𑀪𑀺𑀓𑁆𑀔𑀁 𑀕𑀡𑁆𑀳𑀺𑀢𑁆𑀯𑀸 𑀤𑀓𑁆𑀔𑀺𑀡𑀤𑁆𑀯𑀸𑀭𑁂𑀦 𑀦𑀺𑀓𑁆𑀔𑀫𑀺𑀢𑁆𑀯𑀸 𑀚𑁂𑀢𑀯𑀦𑁂 𑀯𑀲𑀢𑀺. 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀕𑁂𑀳𑁂 𑀪𑀺𑀓𑁆𑀔𑀁 𑀕𑀳𑁂𑀢𑁆𑀯𑀸 𑀧𑀸𑀘𑀻𑀦𑀤𑁆𑀯𑀸𑀭𑁂𑀦 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀼𑀩𑁆𑀩𑀸𑀭𑀸𑀫𑁂 𑀯𑀲𑀢𑀺. 𑀉𑀢𑁆𑀢𑀭𑀤𑁆𑀯𑀸𑀭𑀁 𑀲𑀦𑁆𑀥𑀸𑀬 𑀕𑀘𑁆𑀙𑀦𑁆𑀢𑀁𑀬𑁂𑀯 𑀪𑀕𑀯𑀦𑁆𑀢𑀁 𑀤𑀺𑀲𑁆𑀯𑀸, ‘‘𑀘𑀸𑀭𑀺𑀓𑀁 𑀧𑀓𑁆𑀓𑀫𑀺𑀲𑁆𑀲𑀢𑀻’’𑀢𑀺 𑀚𑀸𑀦𑀦𑁆𑀢𑀺. 𑀯𑀺𑀲𑀸𑀔𑀸𑀧𑀺 𑀢𑀁 𑀤𑀺𑀯𑀲𑀁 ‘‘𑀲𑀢𑁆𑀣𑀸 𑀉𑀢𑁆𑀢𑀭𑀤𑁆𑀯𑀸𑀭𑀸𑀪𑀺𑀫𑀼𑀔𑁄 𑀕𑀢𑁄’’𑀢𑀺 𑀲𑀼𑀢𑁆𑀯𑀸 𑀯𑁂𑀕𑁂𑀦 𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀆𑀳 𑁋 ‘‘𑀘𑀸𑀭𑀺𑀓𑀁 𑀕𑀦𑁆𑀢𑀼𑀓𑀸𑀫𑀢𑁆𑀣, 𑀪𑀦𑁆𑀢𑁂’’𑀢𑀺? ‘‘𑀆𑀫, 𑀯𑀺𑀲𑀸𑀔𑁂’’𑀢𑀺. ‘‘𑀪𑀦𑁆𑀢𑁂, 𑀏𑀢𑁆𑀢𑀓𑀁 𑀥𑀦𑀁 𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀢𑀼𑀫𑁆𑀳𑀸𑀓𑀁 𑀯𑀺𑀳𑀸𑀭𑀁 𑀓𑀸𑀭𑁂𑀫𑀺, 𑀦𑀺𑀯𑀢𑁆𑀢𑀣, 𑀪𑀦𑁆𑀢𑁂’’𑀢𑀺. ‘‘𑀅𑀦𑀺𑀯𑀢𑁆𑀢𑀕𑀫𑀦𑀁 𑀇𑀤𑀁 𑀯𑀺𑀲𑀸𑀔𑁂’’𑀢𑀺. 𑀲𑀸 ‘‘𑀅𑀤𑁆𑀥𑀸 𑀳𑁂𑀢𑀼𑀲𑀫𑁆𑀧𑀦𑁆𑀦𑀁 𑀓𑀜𑁆𑀘𑀺 𑀧𑀲𑁆𑀲𑀺𑀲𑁆𑀲𑀢𑀺 𑀪𑀕𑀯𑀸’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸, ‘‘𑀢𑁂𑀦 𑀳𑀺, 𑀪𑀦𑁆𑀢𑁂, 𑀫𑀬𑁆𑀳𑀁 𑀓𑀢𑀸𑀓𑀢𑀯𑀺𑀚𑀸𑀦𑀦𑀓𑀁 𑀏𑀓𑀁 𑀪𑀺𑀓𑁆𑀔𑀼𑀁 𑀦𑀺𑀯𑀢𑁆𑀢𑁂𑀢𑁆𑀯𑀸 𑀕𑀘𑁆𑀙𑀣𑀸’’𑀢𑀺 𑀆𑀳. ‘‘𑀬𑀁 𑀭𑀼𑀘𑁆𑀘𑀲𑀺, 𑀢𑀲𑁆𑀲 𑀧𑀢𑁆𑀢𑀁 𑀕𑀡𑁆𑀳 𑀯𑀺𑀲𑀸𑀔𑁂’’𑀢𑀺 𑀆𑀳. 𑀲𑀸 𑀓𑀺𑀜𑁆𑀘𑀸𑀧𑀺 𑀆𑀦𑀦𑁆𑀤𑀢𑁆𑀣𑁂𑀭𑀁 𑀧𑀺𑀬𑀸𑀬𑀢𑀺, ‘‘𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑁄 𑀇𑀤𑁆𑀥𑀺𑀫𑀸, 𑀏𑀢𑀁 𑀫𑁂 𑀦𑀺𑀲𑁆𑀲𑀸𑀬 𑀓𑀫𑁆𑀫𑀁 𑀮𑀳𑀼𑀁 𑀦𑀺𑀧𑁆𑀨𑀚𑁆𑀚𑀺𑀲𑁆𑀲𑀢𑀻’’𑀢𑀺 𑀧𑀦 𑀘𑀺𑀦𑁆𑀢𑁂𑀢𑁆𑀯𑀸 𑀣𑁂𑀭𑀲𑁆𑀲 𑀧𑀢𑁆𑀢𑀁 𑀕𑀡𑁆𑀳𑀺. 𑀣𑁂𑀭𑁄 𑀲𑀢𑁆𑀣𑀸𑀭𑀁 𑀑𑀮𑁄𑀓𑁂𑀲𑀺. 𑀲𑀢𑁆𑀣𑀸 ‘‘𑀢𑀯 𑀧𑀭𑀺𑀯𑀸𑀭𑁂 𑀧𑀜𑁆𑀘𑀲𑀢𑁂 𑀪𑀺𑀓𑁆𑀔𑀽 𑀕𑀳𑁂𑀢𑁆𑀯𑀸 𑀦𑀺𑀯𑀢𑁆𑀢 𑀫𑁄𑀕𑁆𑀕𑀮𑁆𑀮𑀸𑀦𑀸’’𑀢𑀺 𑀆𑀳. 𑀲𑁄 𑀢𑀣𑀸 𑀅𑀓𑀸𑀲𑀺. 𑀢𑀲𑁆𑀲𑀸𑀦𑀼𑀪𑀸𑀯𑁂𑀦 𑀧𑀜𑁆𑀜𑀸𑀲𑀲𑀝𑁆𑀞𑀺𑀬𑁄𑀚𑀦𑀸𑀦𑀺𑀧𑀺 𑀭𑀼𑀓𑁆𑀔𑀢𑁆𑀣𑀸𑀬 𑀘 𑀧𑀸𑀲𑀸𑀡𑀢𑁆𑀣𑀸𑀬 𑀘 𑀕𑀢𑀸 𑀫𑀦𑀼𑀲𑁆𑀲𑀸 𑀫𑀳𑀦𑁆𑀢𑁂 𑀫𑀳𑀦𑁆𑀢𑁂 𑀭𑀼𑀓𑁆𑀔𑁂 𑀘 𑀧𑀸𑀲𑀸𑀡𑁂 𑀘 𑀕𑀳𑁂𑀢𑁆𑀯𑀸 𑀢𑀁 𑀤𑀺𑀯𑀲𑀫𑁂𑀯 𑀆𑀕𑀘𑁆𑀙𑀦𑁆𑀢𑀺, 𑀦𑁂𑀯 𑀲𑀓𑀝𑁂 𑀭𑀼𑀓𑁆𑀔𑀧𑀸𑀲𑀸𑀡𑁂 𑀆𑀭𑁄𑀧𑁂𑀦𑁆𑀢𑀸 𑀓𑀺𑀮𑀫𑀦𑁆𑀢𑀺, 𑀦 𑀅𑀓𑁆𑀔𑁄 𑀪𑀺𑀚𑁆𑀚𑀢𑀺. 𑀦 𑀘𑀺𑀭𑀲𑁆𑀲𑁂𑀯 𑀤𑁆𑀯𑁂𑀪𑀽𑀫𑀺𑀓𑀁 𑀧𑀸𑀲𑀸𑀤𑀁 𑀓𑀭𑀺𑀁𑀲𑀼. 𑀳𑁂𑀝𑁆𑀞𑀸𑀪𑀽𑀫𑀺𑀬𑀁 𑀧𑀜𑁆𑀘 𑀕𑀩𑁆𑀪𑀲𑀢𑀸𑀦𑀺, 𑀉𑀧𑀭𑀺𑀪𑀽𑀫𑀺𑀬𑀁 𑀧𑀜𑁆𑀘 𑀕𑀩𑁆𑀪𑀲𑀢𑀸𑀦𑀻𑀢𑀺 𑀕𑀩𑁆𑀪𑀲𑀳𑀲𑁆𑀲𑀧𑀝𑀺𑀫𑀡𑁆𑀟𑀺𑀢𑁄 𑀧𑀸𑀲𑀸𑀤𑁄 𑀅𑀳𑁄𑀲𑀺. 𑀅𑀝𑁆𑀞𑀓𑀭𑀻𑀲𑁂 𑀧𑀭𑀺𑀲𑀼𑀤𑁆𑀥𑁂 𑀪𑀽𑀫𑀺𑀪𑀸𑀕𑁂 𑀧𑀸𑀲𑀸𑀤𑀁 𑀓𑀸𑀭𑀸𑀧𑁂𑀲𑀺, ‘‘𑀲𑀼𑀤𑁆𑀥𑀧𑀸𑀲𑀸𑀤𑁄 𑀧𑀦 𑀦 𑀲𑁄𑀪𑀢𑀻’’𑀢𑀺 𑀢𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀧𑀜𑁆𑀘 𑀧𑀥𑀸𑀦𑀯𑁂𑀢𑁆𑀢𑀕𑁂𑀳𑀲𑀢𑀸𑀦𑀺, 𑀧𑀜𑁆𑀘 𑀘𑀽𑀴𑀧𑀸𑀲𑀸𑀤𑀲𑀢𑀸𑀦𑀺, 𑀧𑀜𑁆𑀘 𑀤𑀻𑀖𑀫𑀸𑀴𑀓𑀲𑀢𑀸𑀦𑀺 𑀓𑀸𑀭𑀸𑀧𑁂𑀲𑀺.

𑀅𑀣 𑀲𑀢𑁆𑀣𑀸 𑀦𑀯𑀳𑀺 𑀫𑀸𑀲𑁂𑀳𑀺 𑀘𑀸𑀭𑀺𑀓𑀁 𑀘𑀭𑀺𑀢𑁆𑀯𑀸 𑀧𑀼𑀦 𑀲𑀸𑀯𑀢𑁆𑀣𑀺𑀁 𑀅𑀕𑀫𑀸𑀲𑀺. 𑀯𑀺𑀲𑀸𑀔𑀸𑀬𑀧𑀺 𑀧𑀸𑀲𑀸𑀤𑁂 𑀓𑀫𑁆𑀫𑀁 𑀦𑀯𑀳𑀺 𑀫𑀸𑀲𑁂𑀳𑀺 𑀦𑀺𑀝𑁆𑀞𑀺𑀢𑀁. 𑀧𑀸𑀲𑀸𑀤𑀓𑀽𑀝𑀁 𑀖𑀦𑀓𑁄𑀝𑁆𑀝𑀺𑀢𑀭𑀢𑁆𑀢𑀲𑀼𑀯𑀡𑁆𑀡𑁂𑀦𑁂𑀯 𑀲𑀝𑁆𑀞𑀺𑀉𑀤𑀓𑀖𑀝𑀕𑀡𑁆𑀳𑀦𑀓𑀁 𑀓𑀸𑀭𑀸𑀧𑁂𑀲𑀺. ‘‘𑀲𑀢𑁆𑀣𑀸 𑀚𑁂𑀢𑀯𑀦𑀯𑀺𑀳𑀸𑀭𑀁 𑀕𑀘𑁆𑀙𑀢𑀻’’𑀢𑀺 𑀘 𑀲𑀼𑀢𑁆𑀯𑀸 𑀧𑀘𑁆𑀘𑀼𑀕𑁆𑀕𑀫𑀦𑀁 𑀓𑀢𑁆𑀯𑀸 𑀲𑀢𑁆𑀣𑀸𑀭𑀁 𑀅𑀢𑁆𑀢𑀦𑁄 𑀯𑀺𑀳𑀸𑀭𑀁 𑀦𑁂𑀢𑁆𑀯𑀸 𑀧𑀝𑀺𑀜𑁆𑀜𑀁 𑀕𑀡𑁆𑀳𑀺, ‘‘𑀪𑀦𑁆𑀢𑁂, 𑀇𑀫𑀁 𑀘𑀢𑀼𑀫𑀸𑀲𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀕𑀳𑁂𑀢𑁆𑀯𑀸 𑀇𑀥𑁂𑀯 𑀯𑀲𑀣, 𑀧𑀸𑀲𑀸𑀤𑀫𑀳𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺. 𑀲𑀢𑁆𑀣𑀸 𑀅𑀥𑀺𑀯𑀸𑀲𑁂𑀲𑀺. 𑀲𑀸 𑀢𑀢𑁄 𑀧𑀝𑁆𑀞𑀸𑀬 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀯𑀺𑀳𑀸𑀭𑁂 𑀏𑀯 𑀤𑀸𑀦𑀁 𑀤𑁂𑀢𑀺. 𑀅𑀣𑀲𑁆𑀲𑀸 𑀏𑀓𑀸 𑀲𑀳𑀸𑀬𑀺𑀓𑀸 𑀲𑀢𑀲𑀳𑀲𑁆𑀲𑀕𑁆𑀖𑀦𑀓𑀁 𑀏𑀓𑀁 𑀯𑀢𑁆𑀣𑀁 𑀆𑀤𑀸𑀬 𑀆𑀕𑀦𑁆𑀢𑁆𑀯𑀸, ‘‘𑀲𑀳𑀸𑀬𑀺𑀓𑁂 𑀅𑀳𑀁 𑀇𑀫𑀁 𑀯𑀢𑁆𑀣𑀁 𑀢𑀯 𑀧𑀸𑀲𑀸𑀤𑁂 𑀪𑀽𑀫𑀢𑁆𑀣𑀭𑀡𑀲𑀗𑁆𑀔𑁂𑀧𑁂𑀦 𑀅𑀢𑁆𑀣𑀭𑀺𑀢𑀼𑀓𑀸𑀫𑀸, 𑀅𑀢𑁆𑀣𑀭𑀡𑀝𑁆𑀞𑀸𑀦𑀁 𑀫𑁂 𑀆𑀘𑀺𑀓𑁆𑀔𑀣𑀸’’𑀢𑀺 𑀆𑀳. ‘‘𑀲𑀸𑀥𑀼 𑀲𑀳𑀸𑀬𑀺𑀓𑁂, 𑀲𑀘𑁂 𑀢𑁆𑀬𑀸𑀳𑀁 ‘𑀑𑀓𑀸𑀲𑁄 𑀦𑀢𑁆𑀣𑀻’𑀢𑀺 𑀯𑀓𑁆𑀔𑀸𑀫𑀺, 𑀢𑁆𑀯𑀁 ‘𑀫𑁂 𑀑𑀓𑀸𑀲𑀁 𑀅𑀤𑀸𑀢𑀼𑀓𑀸𑀫𑀸’𑀢𑀺 𑀫𑀜𑁆𑀜𑀺𑀲𑁆𑀲𑀲𑀺, 𑀲𑀬𑀫𑁂𑀯 𑀧𑀸𑀲𑀸𑀤𑀲𑁆𑀲 𑀤𑁆𑀯𑁂 𑀪𑀽𑀫𑀺𑀬𑁄 𑀕𑀩𑁆𑀪𑀲𑀳𑀲𑁆𑀲𑀜𑁆𑀘 𑀑𑀮𑁄𑀓𑁂𑀢𑁆𑀯𑀸 𑀅𑀢𑁆𑀣𑀭𑀡𑀝𑁆𑀞𑀸𑀦𑀁 𑀚𑀸𑀦𑀸𑀳𑀻’’𑀢𑀺 𑀆𑀳. 𑀲𑀸 𑀲𑀢𑀲𑀳𑀲𑁆𑀲𑀕𑁆𑀖𑀦𑀓𑀁 𑀯𑀢𑁆𑀣𑀁 𑀕𑀳𑁂𑀢𑁆𑀯𑀸 𑀢𑀢𑁆𑀣 𑀢𑀢𑁆𑀣 𑀯𑀺𑀘𑀭𑀦𑁆𑀢𑀻 𑀢𑀢𑁄 𑀅𑀧𑁆𑀧𑀢𑀭𑀫𑀽𑀮𑀁 𑀯𑀢𑁆𑀣𑀁 𑀅𑀤𑀺𑀲𑁆𑀯𑀸 ‘‘𑀦𑀸𑀳𑀁 𑀇𑀫𑀲𑁆𑀫𑀺𑀁 𑀧𑀸𑀲𑀸𑀤𑁂 𑀧𑀼𑀜𑁆𑀜𑀪𑀸𑀕𑀁 𑀮𑀪𑀸𑀫𑀻’’𑀢𑀺 𑀤𑁄𑀫𑀦𑀲𑁆𑀲𑀧𑁆𑀧𑀢𑁆𑀢𑀸 𑀏𑀓𑀲𑁆𑀫𑀺𑀁 𑀞𑀸𑀦𑁂 𑀭𑁄𑀤𑀦𑁆𑀢𑀻 𑀅𑀝𑁆𑀞𑀸𑀲𑀺. 𑀅𑀣 𑀦𑀁 𑀆𑀦𑀦𑁆𑀤𑀢𑁆𑀣𑁂𑀭𑁄 𑀤𑀺𑀲𑁆𑀯𑀸, ‘‘𑀓𑀲𑁆𑀫𑀸 𑀭𑁄𑀤𑀲𑀻’’𑀢𑀺 𑀧𑀼𑀘𑁆𑀙𑀺. 𑀲𑀸 𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. 𑀣𑁂𑀭𑁄 ‘‘𑀫𑀸 𑀘𑀺𑀦𑁆𑀢𑀬𑀺, 𑀅𑀳𑀁 𑀢𑁂 𑀅𑀢𑁆𑀣𑀭𑀡𑀝𑁆𑀞𑀸𑀦𑀁 𑀆𑀘𑀺𑀓𑁆𑀔𑀺𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸, ‘‘𑀲𑁄𑀧𑀸𑀦𑀧𑀸𑀤𑀫𑀽𑀮𑁂 𑀧𑀸𑀤𑀥𑁄𑀯𑀦𑀝𑁆𑀞𑀸𑀦𑁂 𑀇𑀫𑀁 𑀧𑀸𑀤𑀧𑀼𑀜𑁆𑀙𑀦𑀓𑀁 𑀓𑀢𑁆𑀯𑀸 𑀅𑀢𑁆𑀣𑀭𑀸𑀳𑀺, 𑀪𑀺𑀓𑁆𑀔𑀽 𑀧𑀸𑀤𑁂 𑀥𑁄𑀯𑀺𑀢𑁆𑀯𑀸 𑀧𑀞𑀫𑀁 𑀏𑀢𑁆𑀣 𑀧𑀸𑀤𑀁 𑀧𑀼𑀜𑁆𑀙𑀺𑀢𑁆𑀯𑀸 𑀅𑀦𑁆𑀢𑁄 𑀧𑀯𑀺𑀲𑀺𑀲𑁆𑀲𑀦𑁆𑀢𑀺, 𑀏𑀯𑀁 𑀢𑁂 𑀫𑀳𑀧𑁆𑀨𑀮𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀆𑀳. 𑀯𑀺𑀲𑀸𑀔𑀸𑀬 𑀓𑀺𑀭𑁂𑀢𑀁 𑀅𑀲𑀮𑁆𑀮𑀓𑁆𑀔𑀺𑀢𑀝𑁆𑀞𑀸𑀦𑀁.

𑀯𑀺𑀲𑀸𑀔𑀸 𑀘𑀢𑁆𑀢𑀸𑀭𑁄 𑀫𑀸𑀲𑁂 𑀅𑀦𑁆𑀢𑁄𑀯𑀺𑀳𑀸𑀭𑁂 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀤𑀸𑀦𑀁 𑀅𑀤𑀸𑀲𑀺, 𑀅𑀯𑀲𑀸𑀦𑀤𑀺𑀯𑀲𑁂 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀘𑀻𑀯𑀭𑀲𑀸𑀝𑀓𑁂 𑀅𑀤𑀸𑀲𑀺. 𑀲𑀗𑁆𑀖𑀦𑀯𑀓𑁂𑀦 𑀮𑀤𑁆𑀥𑀘𑀻𑀯𑀭𑀲𑀸𑀝𑀓𑀸 𑀲𑀳𑀲𑁆𑀲𑀕𑁆𑀖𑀦𑀓𑀸 𑀳𑁄𑀦𑁆𑀢𑀺. 𑀲𑀩𑁆𑀩𑁂𑀲𑀁 𑀧𑀢𑁆𑀢𑀸𑀦𑀺 𑀧𑀽𑀭𑁂𑀢𑁆𑀯𑀸 𑀪𑁂𑀲𑀚𑁆𑀚𑀁 𑀅𑀤𑀸𑀲𑀺. 𑀤𑀸𑀦𑀧𑀭𑀺𑀘𑁆𑀘𑀸𑀕𑁂 𑀦𑀯 𑀓𑁄𑀝𑀺𑀬𑁄 𑀅𑀕𑀫𑀁𑀲𑀼. 𑀇𑀢𑀺 𑀯𑀺𑀳𑀸𑀭𑀲𑁆𑀲 𑀪𑀽𑀫𑀺𑀕𑁆𑀕𑀳𑀡𑁂 𑀦𑀯 𑀓𑁄𑀝𑀺𑀬𑁄, 𑀯𑀺𑀳𑀸𑀭𑀲𑁆𑀲 𑀓𑀸𑀭𑀸𑀧𑀦𑁂 𑀦𑀯, 𑀯𑀺𑀳𑀸𑀭𑀫𑀳𑁂 𑀦𑀯𑀸𑀢𑀺 𑀲𑀩𑁆𑀩𑀸𑀧𑀺 𑀲𑀢𑁆𑀢𑀯𑀻𑀲𑀢𑀺 𑀓𑁄𑀝𑀺𑀬𑁄 𑀲𑀸 𑀩𑀼𑀤𑁆𑀥𑀲𑀸𑀲𑀦𑁂 𑀧𑀭𑀺𑀘𑁆𑀘𑀚𑀺. 𑀇𑀢𑁆𑀣𑀺𑀪𑀸𑀯𑁂 𑀞𑀢𑁆𑀯𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀲𑁆𑀲 𑀕𑁂𑀳𑁂 𑀯𑀲𑀫𑀸𑀦𑀸𑀬 𑀏𑀯𑀭𑀽𑀧𑁄 𑀫𑀳𑀸𑀧𑀭𑀺𑀘𑁆𑀘𑀸𑀕𑁄 𑀦𑀸𑀫 𑀅𑀜𑁆𑀜𑀺𑀲𑁆𑀲𑀸 𑀦𑀢𑁆𑀣𑀺. 𑀲𑀸 𑀯𑀺𑀳𑀸𑀭𑀫𑀳𑀲𑁆𑀲 𑀦𑀺𑀝𑁆𑀞𑀺𑀢𑀤𑀺𑀯𑀲𑁂 𑀯𑀟𑁆𑀠𑀫𑀸𑀦𑀓𑀘𑁆𑀙𑀸𑀬𑀸𑀬 𑀧𑀼𑀢𑁆𑀢𑀦𑀢𑁆𑀢𑀧𑀦𑀢𑁆𑀢𑀧𑀭𑀺𑀯𑀼𑀢𑀸 ‘‘𑀬𑀁 𑀬𑀁 𑀫𑀬𑀸 𑀧𑀼𑀩𑁆𑀩𑁂 𑀧𑀢𑁆𑀣𑀺𑀢𑀁, 𑀲𑀩𑁆𑀩𑀫𑁂𑀯 𑀫𑀢𑁆𑀣𑀓𑀁 𑀧𑀢𑁆𑀢’’𑀦𑁆𑀢𑀺 𑀧𑀸𑀲𑀸𑀤𑀁 𑀅𑀦𑀼𑀧𑀭𑀺𑀬𑀸𑀬𑀦𑁆𑀢𑀻 𑀧𑀜𑁆𑀘𑀳𑀺 𑀕𑀸𑀣𑀸𑀳𑀺 𑀫𑀥𑀼𑀭𑀲𑀤𑁆𑀤𑁂𑀦 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺 𑁋

‘‘𑀓𑀤𑀸𑀳𑀁 𑀧𑀸𑀲𑀸𑀤𑀁 𑀭𑀫𑁆𑀫𑀁, 𑀲𑀼𑀥𑀸𑀫𑀢𑁆𑀢𑀺𑀓𑀮𑁂𑀧𑀦𑀁;

𑀯𑀺𑀳𑀸𑀭𑀤𑀸𑀦𑀁 𑀤𑀲𑁆𑀲𑀸𑀫𑀺, 𑀲𑀗𑁆𑀓𑀧𑁆𑀧𑁄 𑀫𑀬𑁆𑀳 𑀧𑀽𑀭𑀺𑀢𑁄.

‘‘𑀓𑀤𑀸𑀳𑀁 𑀫𑀜𑁆𑀘𑀧𑀻𑀞𑀜𑁆𑀘, 𑀪𑀺𑀲𑀺𑀩𑀺𑀫𑁆𑀩𑁄𑀳𑀦𑀸𑀦𑀺 𑀘;

𑀲𑁂𑀦𑀸𑀲𑀦𑀪𑀡𑁆𑀟𑀁 𑀤𑀲𑁆𑀲𑀸𑀫𑀺, 𑀲𑀗𑁆𑀓𑀧𑁆𑀧𑁄 𑀫𑀬𑁆𑀳 𑀧𑀽𑀭𑀺𑀢𑁄.

‘‘𑀓𑀤𑀸𑀳𑀁 𑀲𑀮𑀸𑀓𑀪𑀢𑁆𑀢𑀁, 𑀲𑀼𑀘𑀺𑀁 𑀫𑀁𑀲𑀽𑀧𑀲𑁂𑀘𑀦𑀁;

𑀪𑁄𑀚𑀦𑀤𑀸𑀦𑀁 𑀤𑀲𑁆𑀲𑀸𑀫𑀺, 𑀲𑀗𑁆𑀓𑀧𑁆𑀧𑁄 𑀫𑀬𑁆𑀳 𑀧𑀽𑀭𑀺𑀢𑁄.

‘‘𑀓𑀤𑀸𑀳𑀁 𑀓𑀸𑀲𑀺𑀓𑀁 𑀯𑀢𑁆𑀣𑀁, 𑀔𑁄𑀫𑀓𑀧𑁆𑀧𑀸𑀲𑀺𑀓𑀸𑀦𑀺 𑀘;

𑀘𑀻𑀯𑀭𑀤𑀸𑀦𑀁 𑀤𑀲𑁆𑀲𑀸𑀫𑀺, 𑀲𑀗𑁆𑀓𑀧𑁆𑀧𑁄 𑀫𑀬𑁆𑀳 𑀧𑀽𑀭𑀺𑀢𑁄.

‘‘𑀓𑀤𑀸𑀳𑀁 𑀲𑀧𑁆𑀧𑀺𑀦𑀯𑀦𑀻𑀢𑀁, 𑀫𑀥𑀼𑀢𑁂𑀮𑀜𑁆𑀘 𑀨𑀸𑀡𑀺𑀢𑀁;

𑀪𑁂𑀲𑀚𑁆𑀚𑀤𑀸𑀦𑀁 𑀤𑀲𑁆𑀲𑀸𑀫𑀺, 𑀲𑀗𑁆𑀓𑀧𑁆𑀧𑁄 𑀫𑀬𑁆𑀳 𑀧𑀽𑀭𑀺𑀢𑁄’’𑀢𑀺.

𑀪𑀺𑀓𑁆𑀔𑀽 𑀢𑀲𑁆𑀲𑀸 𑀲𑀤𑁆𑀤𑀁 𑀲𑀼𑀢𑁆𑀯𑀸 𑀲𑀢𑁆𑀣𑀼 𑀆𑀭𑁄𑀘𑀬𑀺𑀁𑀲𑀼 𑁋 ‘‘𑀪𑀦𑁆𑀢𑁂, 𑀅𑀫𑁆𑀳𑁂𑀳𑀺 𑀏𑀢𑁆𑀢𑀓𑁂 𑀅𑀤𑁆𑀥𑀸𑀦𑁂 𑀯𑀺𑀲𑀸𑀔𑀸𑀬 𑀕𑀸𑀬𑀦𑀁 𑀦𑀸𑀫 𑀦 𑀤𑀺𑀝𑁆𑀞𑀧𑀼𑀩𑁆𑀩𑀁, 𑀲𑀸 𑀅𑀚𑁆𑀚 𑀧𑀼𑀢𑁆𑀢𑀦𑀢𑁆𑀢𑀧𑀦𑀢𑁆𑀢𑀧𑀭𑀺𑀯𑀼𑀢𑀸 𑀕𑀸𑀬𑀫𑀸𑀦𑀸 𑀧𑀸𑀲𑀸𑀤𑀁 𑀅𑀦𑀼𑀧𑀭𑀺𑀬𑀸𑀬𑀢𑀺, 𑀓𑀺𑀁 𑀦𑀼 𑀔𑁆𑀯𑀲𑁆𑀲𑀸 𑀧𑀺𑀢𑁆𑀢𑀁 𑀯𑀸 𑀓𑀼𑀧𑀺𑀢𑀁, 𑀉𑀤𑀸𑀳𑀼 𑀉𑀫𑁆𑀫𑀢𑁆𑀢𑀺𑀓𑀸 𑀚𑀸𑀢𑀸’’𑀢𑀺? 𑀲𑀢𑁆𑀣𑀸 ‘‘𑀦, 𑀪𑀺𑀓𑁆𑀔𑀯𑁂, 𑀫𑀬𑁆𑀳𑀁 𑀥𑀻𑀢𑀸 𑀕𑀸𑀬𑀢𑀺, 𑀅𑀢𑁆𑀢𑀦𑁄 𑀧𑀦𑀲𑁆𑀲𑀸 𑀅𑀚𑁆𑀛𑀸𑀲𑀬𑁄 𑀧𑀭𑀺𑀧𑀼𑀡𑁆𑀡𑁄, 𑀲𑀸 ‘𑀧𑀢𑁆𑀣𑀺𑀢𑀧𑀢𑁆𑀣𑀦𑀸 𑀫𑁂 𑀫𑀢𑁆𑀣𑀓𑀁 𑀧𑀢𑁆𑀢𑀸’𑀢𑀺 𑀢𑀼𑀝𑁆𑀞𑀫𑀸𑀦𑀲𑀸 𑀉𑀤𑀸𑀦𑀁 𑀉𑀤𑀸𑀦𑁂𑀦𑁆𑀢𑀻 𑀯𑀺𑀘𑀭𑀢𑀻’’𑀢𑀺 𑀯𑀢𑁆𑀯𑀸 ‘‘𑀓𑀤𑀸 𑀧𑀦, 𑀪𑀦𑁆𑀢𑁂, 𑀢𑀸𑀬 𑀧𑀢𑁆𑀣𑀦𑀸 𑀧𑀢𑁆𑀣𑀺𑀢𑀸’’𑀢𑀺? ‘‘𑀲𑀼𑀡𑀺𑀲𑁆𑀲𑀣, 𑀪𑀺𑀓𑁆𑀔𑀯𑁂’’𑀢𑀺. ‘‘𑀲𑀼𑀡𑀺𑀲𑁆𑀲𑀸𑀫, 𑀪𑀦𑁆𑀢𑁂’’𑀢𑀺 𑀯𑀼𑀢𑁆𑀢𑁂 𑀅𑀢𑀻𑀢𑀁 𑀆𑀳𑀭𑀺 𑁋

‘‘𑀅𑀢𑀻𑀢𑁂, 𑀪𑀺𑀓𑁆𑀔𑀯𑁂, 𑀇𑀢𑁄 𑀓𑀧𑁆𑀧𑀲𑀢𑀲𑀳𑀲𑁆𑀲𑀫𑀢𑁆𑀣𑀓𑁂 𑀧𑀤𑀼𑀫𑀼𑀢𑁆𑀢𑀭𑁄 𑀦𑀸𑀫 𑀩𑀼𑀤𑁆𑀥𑁄 𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺. 𑀢𑀲𑁆𑀲 𑀯𑀲𑁆𑀲𑀲𑀢𑀲𑀳𑀲𑁆𑀲𑀁 𑀆𑀬𑀼 𑀅𑀳𑁄𑀲𑀺, 𑀔𑀻𑀡𑀸𑀲𑀯𑀸𑀦𑀁 𑀲𑀢𑀲𑀳𑀲𑁆𑀲𑀧𑀭𑀺𑀯𑀸𑀭𑁄, 𑀦𑀕𑀭𑀁 𑀳𑀁𑀲𑀯𑀢𑀻 𑀦𑀸𑀫, 𑀧𑀺𑀢𑀸 𑀲𑀼𑀦𑀦𑁆𑀤𑁄 𑀦𑀸𑀫 𑀭𑀸𑀚𑀸, 𑀫𑀸𑀢𑀸 𑀲𑀼𑀚𑀸𑀢𑀸 𑀦𑀸𑀫 𑀤𑁂𑀯𑀻, 𑀢𑀲𑁆𑀲 𑀅𑀕𑁆𑀕𑀉𑀧𑀝𑁆𑀞𑀸𑀬𑀺𑀓𑀸 𑀏𑀓𑀸 𑀉𑀧𑀸𑀲𑀺𑀓𑀸 𑀅𑀝𑁆𑀞 𑀯𑀭𑁂 𑀬𑀸𑀘𑀺𑀢𑁆𑀯𑀸 𑀫𑀸𑀢𑀼𑀝𑁆𑀞𑀸𑀦𑁂 𑀞𑀢𑁆𑀯𑀸 𑀲𑀢𑁆𑀣𑀸𑀭𑀁 𑀘𑀢𑀽𑀳𑀺 𑀧𑀘𑁆𑀘𑀬𑁂𑀳𑀺 𑀧𑀝𑀺𑀚𑀕𑁆𑀕𑀦𑁆𑀢𑀻 𑀲𑀸𑀬𑀁𑀧𑀸𑀢𑀁 𑀉𑀧𑀝𑁆𑀞𑀸𑀦𑀁 𑀕𑀘𑁆𑀙𑀢𑀺. 𑀢𑀲𑁆𑀲𑀸 𑀏𑀓𑀸 𑀲𑀳𑀸𑀬𑀺𑀓𑀸 𑀢𑀸𑀬 𑀲𑀤𑁆𑀥𑀺𑀁 𑀯𑀺𑀳𑀸𑀭𑀁 𑀦𑀺𑀩𑀤𑁆𑀥𑀁 𑀕𑀘𑁆𑀙𑀢𑀺. 𑀲𑀸 𑀢𑀲𑁆𑀲𑀸 𑀲𑀢𑁆𑀣𑀸𑀭𑀸 𑀲𑀤𑁆𑀥𑀺𑀁 𑀯𑀺𑀲𑁆𑀲𑀸𑀲𑁂𑀦 𑀓𑀣𑀦𑀜𑁆𑀘 𑀯𑀮𑁆𑀮𑀪𑀪𑀸𑀯𑀜𑁆𑀘 𑀤𑀺𑀲𑁆𑀯𑀸, ‘𑀓𑀺𑀁 𑀦𑀼 𑀔𑁄 𑀓𑀢𑁆𑀯𑀸 𑀏𑀯𑀁 𑀩𑀼𑀤𑁆𑀥𑀸𑀦𑀁 𑀯𑀮𑁆𑀮𑀢𑀸 𑀳𑁄𑀢𑀻’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀲𑀢𑁆𑀣𑀸𑀭𑀁 𑀧𑀼𑀘𑁆𑀙𑀺 𑁋 ‘𑀪𑀦𑁆𑀢𑁂, 𑀏𑀲𑀸 𑀇𑀢𑁆𑀣𑀻 𑀢𑀼𑀫𑁆𑀳𑀸𑀓𑀁 𑀓𑀺𑀁 𑀳𑁄𑀢𑀻’’’𑀢𑀺? ‘‘𑀉𑀧𑀝𑁆𑀞𑀸𑀬𑀺𑀓𑀸𑀦𑀁 𑀅𑀕𑁆𑀕𑀸’’𑀢𑀺. ‘‘𑀪𑀦𑁆𑀢𑁂, 𑀓𑀺𑀁 𑀓𑀢𑁆𑀯𑀸 𑀉𑀧𑀝𑁆𑀞𑀸𑀬𑀺𑀓𑀸𑀦𑀁 𑀅𑀕𑁆𑀕𑀸 𑀳𑁄𑀢𑀻’’𑀢𑀺? ‘‘𑀓𑀧𑁆𑀧𑀲𑀢𑀲𑀳𑀲𑁆𑀲𑀁 𑀧𑀢𑁆𑀣𑀦𑀁 𑀧𑀢𑁆𑀣𑁂𑀢𑁆𑀯𑀸’’𑀢𑀺. ‘‘𑀇𑀤𑀸𑀦𑀺 𑀧𑀢𑁆𑀣𑁂𑀢𑁆𑀯𑀸 𑀮𑀤𑁆𑀥𑀼𑀁 𑀲𑀓𑁆𑀓𑀸, 𑀪𑀦𑁆𑀢𑁂’’𑀢𑀺. ‘‘𑀆𑀫, 𑀲𑀓𑁆𑀓𑀸’’𑀢𑀺. ‘‘𑀢𑁂𑀦 𑀳𑀺, 𑀪𑀦𑁆𑀢𑁂, 𑀪𑀺𑀓𑁆𑀔𑀼𑀲𑀢𑀲𑀳𑀲𑁆𑀲𑁂𑀦 𑀲𑀤𑁆𑀥𑀺𑀁 𑀲𑀢𑁆𑀢𑀸𑀳𑀁 𑀫𑀬𑁆𑀳𑀁 𑀪𑀺𑀓𑁆𑀔𑀁 𑀕𑀡𑁆𑀳𑀣𑀸’’𑀢𑀺 𑀆𑀳. 𑀲𑀢𑁆𑀣𑀸 𑀅𑀥𑀺𑀯𑀸𑀲𑁂𑀲𑀺. 𑀲𑀸 𑀲𑀢𑁆𑀢𑀸𑀳𑀁 𑀤𑀸𑀦𑀁 𑀤𑀢𑁆𑀯𑀸 𑀑𑀲𑀸𑀦𑀤𑀺𑀯𑀲𑁂 𑀘𑀻𑀯𑀭𑀲𑀸𑀝𑀓𑁂 𑀤𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀧𑀸𑀤𑀫𑀽𑀮𑁂 𑀦𑀺𑀧𑀚𑁆𑀚𑀺𑀢𑁆𑀯𑀸, ‘‘𑀪𑀦𑁆𑀢𑁂, 𑀦𑀸𑀳𑀁 𑀇𑀫𑀲𑁆𑀲 𑀤𑀸𑀦𑀲𑁆𑀲 𑀨𑀮𑁂𑀦 𑀤𑁂𑀯𑀺𑀲𑁆𑀲𑀭𑀺𑀬𑀸𑀤𑀻𑀦𑀁 𑀅𑀜𑁆𑀜𑀢𑀭𑀁 𑀧𑀢𑁆𑀣𑁂𑀫𑀺, 𑀢𑀼𑀫𑁆𑀳𑀸𑀤𑀺𑀲𑀲𑁆𑀲 𑀧𑀦𑁂𑀓𑀲𑁆𑀲 𑀩𑀼𑀤𑁆𑀥𑀲𑁆𑀲 𑀲𑀦𑁆𑀢𑀺𑀓𑁂 𑀅𑀝𑁆𑀞 𑀯𑀭𑁂 𑀮𑀪𑀺𑀢𑁆𑀯𑀸 𑀫𑀸𑀢𑀼𑀝𑁆𑀞𑀸𑀦𑁂 𑀞𑀢𑁆𑀯𑀸 𑀘𑀢𑀽𑀳𑀺 𑀧𑀘𑁆𑀘𑀬𑁂𑀳𑀺 𑀧𑀝𑀺𑀚𑀕𑁆𑀕𑀺𑀢𑀼𑀁 𑀲𑀫𑀢𑁆𑀣𑀸𑀦𑀁 𑀅𑀕𑁆𑀕𑀸 𑀪𑀯𑁂𑀬𑁆𑀬’’𑀦𑁆𑀢𑀺 𑀧𑀢𑁆𑀣𑀦𑀁 𑀧𑀝𑁆𑀞𑀧𑁂𑀲𑀺. 𑀲𑀢𑁆𑀣𑀸 ‘‘𑀲𑀫𑀺𑀚𑁆𑀛𑀺𑀲𑁆𑀲𑀢𑀺 𑀦𑀼 𑀔𑁄 𑀇𑀫𑀺𑀲𑁆𑀲𑀸 𑀧𑀢𑁆𑀣𑀦𑀸’’𑀢𑀺 𑀅𑀦𑀸𑀕𑀢𑀁 𑀆𑀯𑀚𑁆𑀚𑁂𑀦𑁆𑀢𑁄 𑀓𑀧𑁆𑀧𑀲𑀢𑀲𑀳𑀲𑁆𑀲𑀁 𑀑𑀮𑁄𑀓𑁂𑀢𑁆𑀯𑀸 ‘‘𑀓𑀧𑁆𑀧𑀲𑀢𑀲𑀳𑀲𑁆𑀲𑀧𑀭𑀺𑀬𑁄𑀲𑀸𑀦𑁂 𑀕𑁄𑀢𑀫𑁄 𑀦𑀸𑀫 𑀩𑀼𑀤𑁆𑀥𑁄 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀢𑀤𑀸 𑀢𑁆𑀯𑀁 𑀯𑀺𑀲𑀸𑀔𑀸 𑀦𑀸𑀫 𑀉𑀧𑀸𑀲𑀺𑀓𑀸 𑀳𑀼𑀢𑁆𑀯𑀸 𑀢𑀲𑁆𑀲 𑀲𑀦𑁆𑀢𑀺𑀓𑁂 𑀅𑀝𑁆𑀞 𑀯𑀭𑁂 𑀮𑀪𑀺𑀢𑁆𑀯𑀸 𑀫𑀸𑀢𑀼𑀝𑁆𑀞𑀸𑀦𑁂 𑀞𑀢𑁆𑀯𑀸 𑀘𑀢𑀽𑀳𑀺 𑀧𑀘𑁆𑀘𑀬𑁂𑀳𑀺 𑀧𑀝𑀺𑀚𑀕𑁆𑀕𑀦𑁆𑀢𑀻𑀦𑀁 𑀉𑀧𑀝𑁆𑀞𑀸𑀬𑀺𑀓𑀸𑀦𑀁 𑀅𑀕𑁆𑀕𑀸 𑀪𑀯𑀺𑀲𑁆𑀲𑀲𑀻’’𑀢𑀺 𑀆𑀳. 𑀢𑀲𑁆𑀲𑀸 𑀲𑀸 𑀲𑀫𑁆𑀧𑀢𑁆𑀢𑀺 𑀲𑁆𑀯𑁂𑀯 𑀮𑀤𑁆𑀥𑀩𑁆𑀩𑀸 𑀯𑀺𑀬 𑀅𑀳𑁄𑀲𑀺.

𑀲𑀸 𑀬𑀸𑀯𑀢𑀸𑀬𑀼𑀓𑀁 𑀧𑀼𑀜𑁆𑀜𑀁 𑀓𑀢𑁆𑀯𑀸 𑀢𑀢𑁄 𑀘𑀼𑀢𑀸 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑀻 𑀓𑀲𑁆𑀲𑀧𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀓𑀸𑀮𑁂 𑀓𑀺𑀓𑀺𑀲𑁆𑀲 𑀓𑀸𑀲𑀺𑀭𑀜𑁆𑀜𑁄 𑀲𑀢𑁆𑀢𑀦𑁆𑀦𑀁 𑀥𑀻𑀢𑀸𑀦𑀁 𑀓𑀦𑀺𑀝𑁆𑀞𑀸 𑀲𑀗𑁆𑀖𑀤𑀸𑀲𑀻 𑀦𑀸𑀫 𑀳𑀼𑀢𑁆𑀯𑀸 𑀧𑀭𑀓𑀼𑀮𑀁 𑀅𑀕𑀦𑁆𑀢𑁆𑀯𑀸 𑀢𑀸𑀳𑀺 𑀚𑁂𑀝𑁆𑀞𑀪𑀕𑀺𑀦𑀻𑀳𑀺 𑀲𑀤𑁆𑀥𑀺𑀁 𑀤𑀻𑀖𑀭𑀢𑁆𑀢𑀁 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀓𑀲𑁆𑀲𑀧𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀧𑀸𑀤𑀫𑀽𑀮𑁂𑀧𑀺 ‘‘𑀅𑀦𑀸𑀕𑀢𑁂 𑀢𑀼𑀫𑁆𑀳𑀸𑀤𑀺𑀲𑀲𑁆𑀲 𑀩𑀼𑀤𑁆𑀥𑀲𑁆𑀲 𑀫𑀸𑀢𑀼𑀝𑁆𑀞𑀸𑀦𑁂 𑀞𑀢𑁆𑀯𑀸 𑀘𑀢𑀼𑀧𑀘𑁆𑀘𑀬𑀤𑀸𑀬𑀺𑀓𑀸𑀦𑀁 𑀅𑀕𑁆𑀕𑀸 𑀪𑀯𑁂𑀬𑁆𑀬’’𑀦𑁆𑀢𑀺 𑀧𑀢𑁆𑀣𑀦𑀁 𑀅𑀓𑀸𑀲𑀺. 𑀲𑀸 𑀢𑀢𑁄 𑀧𑀝𑁆𑀞𑀸𑀬 𑀧𑀦 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑀻 𑀇𑀫𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂 𑀫𑁂𑀡𑁆𑀟𑀓𑀲𑁂𑀝𑁆𑀞𑀺𑀧𑀼𑀢𑁆𑀢𑀲𑁆𑀲 𑀥𑀦𑀜𑁆𑀘𑀬𑀲𑁂𑀝𑁆𑀞𑀺𑀦𑁄 𑀥𑀻𑀢𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀸. 𑀫𑀬𑁆𑀳𑀁 𑀲𑀸𑀲𑀦𑁂 𑀩𑀳𑀽𑀦𑀺 𑀧𑀼𑀜𑁆𑀜𑀸𑀦𑀺 𑀅𑀓𑀸𑀲𑀺. 𑀇𑀢𑀺 𑀔𑁄, 𑀪𑀺𑀓𑁆𑀔𑀯𑁂, ‘‘𑀦 𑀫𑀬𑁆𑀳𑀁 𑀥𑀻𑀢𑀸 𑀕𑀸𑀬𑀢𑀺, 𑀧𑀢𑁆𑀣𑀺𑀢𑀧𑀢𑁆𑀣𑀦𑀸𑀬 𑀧𑀦 𑀦𑀺𑀧𑁆𑀨𑀢𑁆𑀢𑀺𑀁 𑀤𑀺𑀲𑁆𑀯𑀸 𑀉𑀤𑀸𑀦𑀁 𑀉𑀤𑀸𑀦𑁂𑀢𑀻’’𑀢𑀺 𑀯𑀢𑁆𑀯𑀸 𑀲𑀢𑁆𑀣𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄, ‘‘𑀪𑀺𑀓𑁆𑀔𑀯𑁂, 𑀬𑀣𑀸 𑀦𑀸𑀫 𑀙𑁂𑀓𑁄 𑀫𑀸𑀮𑀸𑀓𑀸𑀭𑁄 𑀦𑀸𑀦𑀸𑀧𑀼𑀧𑁆𑀨𑀸𑀦𑀁 𑀫𑀳𑀦𑁆𑀢𑀁 𑀭𑀸𑀲𑀺𑀁 𑀓𑀢𑁆𑀯𑀸 𑀦𑀸𑀦𑀧𑁆𑀧𑀓𑀸𑀭𑁂 𑀫𑀸𑀮𑀸𑀕𑀼𑀡𑁂 𑀓𑀭𑁄𑀢𑀺, 𑀏𑀯𑀫𑁂𑀯 𑀯𑀺𑀲𑀸𑀔𑀸𑀬 𑀦𑀸𑀦𑀧𑁆𑀧𑀓𑀸𑀭𑀸𑀦𑀺 𑀧𑀼𑀜𑁆𑀜𑀸𑀦𑀺 𑀓𑀸𑀢𑀼𑀁 𑀘𑀺𑀢𑁆𑀢𑀁 𑀦𑀫𑀢𑀻’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁫𑁩. ‘‘𑀬𑀣𑀸𑀧𑀺 𑀧𑀼𑀧𑁆𑀨𑀭𑀸𑀲𑀺𑀫𑁆𑀳𑀸, 𑀓𑀬𑀺𑀭𑀸 𑀫𑀸𑀮𑀸𑀕𑀼𑀡𑁂 𑀩𑀳𑀽;

𑀏𑀯𑀁 𑀚𑀸𑀢𑁂𑀦 𑀫𑀘𑁆𑀘𑁂𑀦, 𑀓𑀢𑁆𑀢𑀩𑁆𑀩𑀁 𑀓𑀼𑀲𑀮𑀁 𑀩𑀳𑀼’’𑀦𑁆𑀢𑀺.

𑀢𑀢𑁆𑀣 𑀧𑀼𑀧𑁆𑀨𑀭𑀸𑀲𑀺𑀫𑁆𑀳𑀸𑀢𑀺 𑀦𑀸𑀦𑀧𑁆𑀧𑀓𑀸𑀭𑀸𑀦𑀁 𑀧𑀼𑀧𑁆𑀨𑀸𑀦𑀁 𑀭𑀸𑀲𑀺𑀫𑁆𑀳𑀸. 𑀓𑀬𑀺𑀭𑀸𑀢𑀺 𑀓𑀭𑁂𑀬𑁆𑀬. 𑀫𑀸𑀮𑀸𑀕𑀼𑀡𑁂 𑀩𑀳𑀽𑀢𑀺 𑀏𑀓𑀢𑁄 𑀯𑀡𑁆𑀝𑀺𑀓𑀫𑀸𑀮𑀸𑀤𑀺𑀪𑁂𑀤𑀸 𑀦𑀸𑀦𑀧𑁆𑀧𑀓𑀸𑀭𑀸 𑀫𑀸𑀮𑀸𑀯𑀺𑀓𑀢𑀺𑀬𑁄. 𑀫𑀘𑁆𑀘𑁂𑀦𑀸𑀢𑀺 𑀫𑀭𑀺𑀢𑀩𑁆𑀩𑀲𑀪𑀸𑀯𑀢𑀸𑀬 ‘‘𑀫𑀘𑁆𑀘𑁄’’𑀢𑀺 𑀮𑀤𑁆𑀥𑀦𑀸𑀫𑁂𑀦 𑀲𑀢𑁆𑀢𑁂𑀦 𑀘𑀻𑀯𑀭𑀤𑀸𑀦𑀸𑀤𑀺𑀪𑁂𑀤𑀁 𑀩𑀳𑀼𑀁 𑀓𑀼𑀲𑀮𑀁 𑀓𑀢𑁆𑀢𑀩𑁆𑀩𑀁. 𑀢𑀢𑁆𑀣 𑀧𑀼𑀧𑁆𑀨𑀭𑀸𑀲𑀺𑀕𑁆𑀕𑀳𑀡𑀁 𑀩𑀳𑀼𑀧𑀼𑀧𑁆𑀨𑀤𑀲𑁆𑀲𑀦𑀢𑁆𑀣𑀁. 𑀲𑀘𑁂 𑀳𑀺 𑀅𑀧𑁆𑀧𑀸𑀦𑀺 𑀧𑀼𑀧𑁆𑀨𑀸𑀦𑀺 𑀳𑁄𑀦𑁆𑀢𑀺, 𑀫𑀸𑀮𑀸𑀓𑀸𑀭𑁄 𑀘 𑀙𑁂𑀓𑁄 𑀦𑁂𑀯 𑀩𑀳𑀽 𑀫𑀸𑀮𑀸𑀕𑀼𑀡𑁂 𑀓𑀸𑀢𑀼𑀁 𑀲𑀓𑁆𑀓𑁄𑀢𑀺, 𑀅𑀙𑁂𑀓𑁄 𑀧𑀦 𑀅𑀧𑁆𑀧𑁂𑀲𑀼 𑀩𑀳𑀽𑀲𑀼𑀧𑀺 𑀧𑀼𑀧𑁆𑀨𑁂𑀲𑀼 𑀦 𑀲𑀓𑁆𑀓𑁄𑀢𑀺𑀬𑁂𑀯. 𑀩𑀳𑀽𑀲𑀼 𑀧𑀦 𑀧𑀼𑀧𑁆𑀨𑁂𑀲𑀼 𑀲𑀢𑀺 𑀙𑁂𑀓𑁄 𑀫𑀸𑀮𑀸𑀓𑀸𑀭𑁄 𑀤𑀓𑁆𑀔𑁄 𑀓𑀼𑀲𑀮𑁄 𑀩𑀳𑀽 𑀫𑀸𑀮𑀸𑀕𑀼𑀡𑁂 𑀓𑀭𑁄𑀢𑀺, 𑀏𑀯𑀫𑁂𑀯 𑀲𑀘𑁂 𑀏𑀓𑀘𑁆𑀘𑀲𑁆𑀲 𑀲𑀤𑁆𑀥𑀸 𑀫𑀦𑁆𑀤𑀸 𑀳𑁄𑀢𑀺, 𑀪𑁄𑀕𑀸 𑀘 𑀩𑀳𑀽 𑀲𑀁𑀯𑀺𑀚𑁆𑀚𑀦𑁆𑀢𑀺, 𑀦𑁂𑀯 𑀲𑀓𑁆𑀓𑁄𑀢𑀺 𑀩𑀳𑀽𑀦𑀺 𑀓𑀼𑀲𑀮𑀸𑀦𑀺 𑀓𑀸𑀢𑀼𑀁, 𑀫𑀦𑁆𑀤𑀸𑀬 𑀘 𑀧𑀦 𑀲𑀤𑁆𑀥𑀸𑀬 𑀫𑀦𑁆𑀤𑁂𑀲𑀼 𑀘 𑀧𑀦 𑀪𑁄𑀕𑁂𑀲𑀼 𑀦 𑀲𑀓𑁆𑀓𑁄𑀢𑀺. 𑀉𑀴𑀸𑀭𑀸𑀬 𑀘 𑀧𑀦 𑀲𑀤𑁆𑀥𑀸𑀬 𑀫𑀦𑁆𑀤𑁂𑀲𑀼 𑀘 𑀪𑁄𑀕𑁂𑀲𑀼 𑀦 𑀲𑀓𑁆𑀓𑁄𑀢𑀺𑀬𑁂𑀯. 𑀉𑀴𑀸𑀭𑀸𑀬 𑀘 𑀧𑀦 𑀲𑀤𑁆𑀥𑀸𑀬 𑀉𑀴𑀸𑀭𑁂𑀲𑀼 𑀘 𑀪𑁄𑀕𑁂𑀲𑀼 𑀲𑀢𑀺 𑀲𑀓𑁆𑀓𑁄𑀢𑀺. 𑀢𑀣𑀸𑀭𑀽𑀧𑀸 𑀘 𑀯𑀺𑀲𑀸𑀔𑀸 𑀉𑀧𑀸𑀲𑀺𑀓𑀸. 𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁 𑁋 ‘‘𑀬𑀣𑀸𑀧𑀺…𑀧𑁂… 𑀓𑀢𑁆𑀢𑀩𑁆𑀩𑀁 𑀓𑀼𑀲𑀮𑀁 𑀩𑀳𑀼’’𑀦𑁆𑀢𑀺.

𑀤𑁂𑀲𑀦𑀸𑀯𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀦𑁆𑀦𑀸𑀤𑀬𑁄 𑀅𑀳𑁂𑀲𑀼𑀁. 𑀫𑀳𑀸𑀚𑀦𑀲𑁆𑀲 𑀲𑀸𑀢𑁆𑀣𑀺𑀓𑀸 𑀥𑀫𑁆𑀫𑀤𑁂𑀲𑀦𑀸 𑀚𑀸𑀢𑀸𑀢𑀺.

𑀯𑀺𑀲𑀸𑀔𑀸𑀯𑀢𑁆𑀣𑀼 𑀅𑀝𑁆𑀞𑀫𑀁