𑁯. 𑀆𑀦𑀦𑁆𑀤𑀢𑁆𑀣𑁂𑀭𑀧𑀜𑁆𑀳𑀸𑀯𑀢𑁆𑀣𑀼

𑀦 𑀧𑀼𑀧𑁆𑀨𑀕𑀦𑁆𑀥𑁄 𑀧𑀝𑀺𑀯𑀸𑀢𑀫𑁂𑀢𑀻𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀦𑁆𑀢𑁄 𑀆𑀦𑀦𑁆𑀤𑀢𑁆𑀣𑁂𑀭𑀲𑁆𑀲 𑀧𑀜𑁆𑀳𑀁 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑁄 𑀓𑀣𑁂𑀲𑀺.

𑀣𑁂𑀭𑁄 𑀓𑀺𑀭 𑀲𑀸𑀬𑀦𑁆𑀳𑀲𑀫𑀬𑁂 𑀧𑀝𑀺𑀲𑀮𑁆𑀮𑀻𑀦𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀪𑀕𑀯𑀢𑀸 𑀫𑀽𑀮𑀕𑀦𑁆𑀥𑁄, 𑀲𑀸𑀭𑀕𑀦𑁆𑀥𑁄, 𑀧𑀼𑀧𑁆𑀨𑀕𑀦𑁆𑀥𑁄𑀢𑀺 𑀢𑀬𑁄 𑀉𑀢𑁆𑀢𑀫𑀕𑀦𑁆𑀥𑀸 𑀯𑀼𑀢𑁆𑀢𑀸, 𑀢𑁂𑀲𑀁 𑀅𑀦𑀼𑀯𑀸𑀢𑀫𑁂𑀯 𑀕𑀦𑁆𑀥𑁄 𑀕𑀘𑁆𑀙𑀢𑀺, 𑀦𑁄 𑀧𑀝𑀺𑀯𑀸𑀢𑀁. 𑀅𑀢𑁆𑀣𑀺 𑀦𑀼 𑀔𑁄 𑀢𑀁 𑀕𑀦𑁆𑀥𑀚𑀸𑀢𑀁, 𑀬𑀲𑁆𑀲 𑀧𑀝𑀺𑀯𑀸𑀢𑀫𑁆𑀧𑀺 𑀕𑀦𑁆𑀥𑁄 𑀕𑀘𑁆𑀙𑀢𑀻’’𑀢𑀺. 𑀅𑀣𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀓𑀺𑀁 𑀫𑀬𑁆𑀳𑀁 𑀅𑀢𑁆𑀢𑀦𑀸 𑀯𑀺𑀦𑀺𑀘𑁆𑀙𑀺𑀢𑁂𑀦, 𑀲𑀢𑁆𑀣𑀸𑀭𑀁𑀬𑁂𑀯 𑀧𑀼𑀘𑁆𑀙𑀺𑀲𑁆𑀲𑀸𑀫𑀻’’𑀢𑀺. 𑀲𑁄 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀼𑀘𑁆𑀙𑀺. 𑀢𑁂𑀦 𑀯𑀼𑀢𑁆𑀢𑀁 𑁋

‘‘𑀅𑀣 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀲𑀸𑀬𑀦𑁆𑀳𑀲𑀫𑀬𑁂 𑀧𑀝𑀺𑀲𑀮𑁆𑀮𑀸𑀦𑀸 𑀯𑀼𑀝𑁆𑀞𑀺𑀢𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺, 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋

‘‘𑀢𑀻𑀡𑀺𑀫𑀸𑀦𑀺, 𑀪𑀦𑁆𑀢𑁂, 𑀕𑀦𑁆𑀥𑀚𑀸𑀢𑀸𑀦𑀺, 𑀬𑁂𑀲𑀁 𑀅𑀦𑀼𑀯𑀸𑀢𑀫𑁂𑀯 𑀕𑀦𑁆𑀥𑁄 𑀕𑀘𑁆𑀙𑀢𑀺, 𑀦𑁄 𑀧𑀝𑀺𑀯𑀸𑀢𑀁. 𑀓𑀢𑀫𑀸𑀦𑀺 𑀢𑀻𑀡𑀺? 𑀫𑀽𑀮𑀕𑀦𑁆𑀥𑁄, 𑀲𑀸𑀭𑀕𑀦𑁆𑀥𑁄, 𑀧𑀼𑀧𑁆𑀨𑀕𑀦𑁆𑀥𑁄, 𑀇𑀫𑀸𑀦𑀺 𑀔𑁄, 𑀪𑀦𑁆𑀢𑁂, 𑀢𑀻𑀡𑀺 𑀕𑀦𑁆𑀥𑀚𑀸𑀢𑀸𑀦𑀺. 𑀬𑁂𑀲𑀁 𑀅𑀦𑀼𑀯𑀸𑀢𑀫𑁂𑀯 𑀕𑀦𑁆𑀥𑁄 𑀕𑀘𑁆𑀙𑀢𑀺, 𑀦𑁄 𑀧𑀝𑀺𑀯𑀸𑀢𑀁. 𑀅𑀢𑁆𑀣𑀺 𑀦𑀼 𑀔𑁄, 𑀪𑀦𑁆𑀢𑁂, 𑀓𑀺𑀜𑁆𑀘𑀺 𑀕𑀦𑁆𑀥𑀚𑀸𑀢𑀁 𑀬𑀲𑁆𑀲 𑀅𑀦𑀼𑀯𑀸𑀢𑀫𑁆𑀧𑀺 𑀕𑀦𑁆𑀥𑁄 𑀕𑀘𑁆𑀙𑀢𑀺, 𑀧𑀝𑀺𑀯𑀸𑀢𑀫𑁆𑀧𑀺 𑀕𑀦𑁆𑀥𑁄 𑀕𑀘𑁆𑀙𑀢𑀺, 𑀅𑀦𑀼𑀯𑀸𑀢𑀧𑀝𑀺𑀯𑀸𑀢𑀫𑁆𑀧𑀺 𑀕𑀦𑁆𑀥𑁄 𑀕𑀘𑁆𑀙𑀢𑀻’’𑀢𑀺? (𑀅. 𑀦𑀺. 𑁩.𑁮𑁦)

𑀅𑀣𑀲𑁆𑀲 𑀪𑀕𑀯𑀸 𑀧𑀜𑁆𑀳𑀁 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑁄 𑁋

‘‘𑀅𑀢𑁆𑀣𑀸𑀦𑀦𑁆𑀤, 𑀓𑀺𑀜𑁆𑀘𑀺 𑀕𑀦𑁆𑀥𑀚𑀸𑀢𑀁, 𑀬𑀲𑁆𑀲 𑀅𑀦𑀼𑀯𑀸𑀢𑀫𑁆𑀧𑀺 𑀕𑀦𑁆𑀥𑁄 𑀕𑀘𑁆𑀙𑀢𑀺, 𑀧𑀝𑀺𑀯𑀸𑀢𑀫𑁆𑀧𑀺 𑀕𑀦𑁆𑀥𑁄 𑀕𑀘𑁆𑀙𑀢𑀺, 𑀅𑀦𑀼𑀯𑀸𑀢𑀧𑀝𑀺𑀯𑀸𑀢𑀫𑁆𑀧𑀺 𑀕𑀦𑁆𑀥𑁄 𑀕𑀘𑁆𑀙𑀢𑀻’’𑀢𑀺. ‘‘𑀓𑀢𑀫𑀁 𑀧𑀦 𑀢𑀁, 𑀪𑀦𑁆𑀢𑁂, 𑀕𑀦𑁆𑀥𑀚𑀸𑀢𑀁’’? ‘‘𑀬𑀲𑁆𑀲 𑀅𑀦𑀼𑀯𑀸𑀢𑀫𑁆𑀧𑀺 𑀕𑀦𑁆𑀥𑁄 𑀕𑀘𑁆𑀙𑀢𑀺, 𑀧𑀝𑀺𑀯𑀸𑀢𑀫𑁆𑀧𑀺 𑀕𑀦𑁆𑀥𑁄 𑀕𑀘𑁆𑀙𑀢𑀺, 𑀅𑀦𑀼𑀯𑀸𑀢𑀧𑀝𑀺𑀯𑀸𑀢𑀫𑁆𑀧𑀺 𑀕𑀦𑁆𑀥𑁄 𑀕𑀘𑁆𑀙𑀢𑀻’’𑀢𑀺?

‘‘𑀇𑀥𑀸𑀦𑀦𑁆𑀤, 𑀬𑀲𑁆𑀫𑀺𑀁 𑀕𑀸𑀫𑁂 𑀯𑀸 𑀦𑀺𑀕𑀫𑁂 𑀯𑀸 𑀇𑀢𑁆𑀣𑀻 𑀯𑀸 𑀧𑀼𑀭𑀺𑀲𑁄 𑀯𑀸 𑀩𑀼𑀤𑁆𑀥𑀁 𑀲𑀭𑀡𑀁 𑀕𑀢𑁄 𑀳𑁄𑀢𑀺, 𑀥𑀫𑁆𑀫𑀁 𑀲𑀭𑀡𑀁 𑀕𑀢𑁄 𑀳𑁄𑀢𑀺, 𑀲𑀗𑁆𑀖𑀁 𑀲𑀭𑀡𑀁 𑀕𑀢𑁄 𑀳𑁄𑀢𑀺, 𑀧𑀸𑀡𑀸𑀢𑀺𑀧𑀸𑀢𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀅𑀤𑀺𑀦𑁆𑀦𑀸𑀤𑀸𑀦𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀫𑀼𑀲𑀸𑀯𑀸𑀤𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑀫𑀸𑀤𑀝𑁆𑀞𑀸𑀦𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀲𑀻𑀮𑀯𑀸 𑀳𑁄𑀢𑀺 𑀓𑀮𑁆𑀬𑀸𑀡𑀥𑀫𑁆𑀫𑁄, 𑀯𑀺𑀕𑀢𑀫𑀮𑀫𑀘𑁆𑀙𑁂𑀭𑁂𑀦 𑀘𑁂𑀢𑀲𑀸 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀢𑀺 𑀫𑀼𑀢𑁆𑀢𑀘𑀸𑀕𑁄 𑀧𑀬𑀢𑀧𑀸𑀡𑀺 𑀯𑁄𑀲𑁆𑀲𑀕𑁆𑀕𑀭𑀢𑁄 𑀬𑀸𑀘𑀬𑁄𑀕𑁄 𑀤𑀸𑀦𑀲𑀁𑀯𑀺𑀪𑀸𑀕𑀭𑀢𑁄.

‘‘𑀢𑀲𑁆𑀲 𑀤𑀺𑀲𑀸𑀲𑀼 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀯𑀡𑁆𑀡𑀁 𑀪𑀸𑀲𑀦𑁆𑀢𑀺, ‘𑀅𑀫𑀼𑀓𑀲𑁆𑀫𑀺𑀁 𑀦𑀸𑀫 𑀕𑀸𑀫𑁂 𑀯𑀸 𑀦𑀺𑀕𑀫𑁂 𑀯𑀸 𑀇𑀢𑁆𑀣𑀻 𑀯𑀸 𑀧𑀼𑀭𑀺𑀲𑁄 𑀯𑀸 𑀩𑀼𑀤𑁆𑀥𑀁 𑀲𑀭𑀡𑀁 𑀕𑀢𑁄 𑀳𑁄𑀢𑀺, 𑀥𑀫𑁆𑀫𑀁 𑀲𑀭𑀡𑀁 𑀕𑀢𑁄 𑀳𑁄𑀢𑀺, 𑀲𑀗𑁆𑀖𑀁 𑀲𑀭𑀡𑀁 𑀕𑀢𑁄 𑀳𑁄𑀢𑀺…𑀧𑁂… 𑀤𑀸𑀦𑀲𑀁𑀯𑀺𑀪𑀸𑀕𑀭𑀢𑁄’’’𑀢𑀺.

‘‘𑀤𑁂𑀯𑀢𑀸𑀧𑀺𑀲𑁆𑀲 𑀯𑀡𑁆𑀡𑀁 𑀪𑀸𑀲𑀦𑁆𑀢𑀺, ‘𑀅𑀫𑀼𑀓𑀲𑁆𑀫𑀺𑀁 𑀦𑀸𑀫 𑀕𑀸𑀫𑁂 𑀯𑀸 𑀦𑀺𑀕𑀫𑁂 𑀯𑀸 𑀇𑀢𑁆𑀣𑀻 𑀯𑀸 𑀧𑀼𑀭𑀺𑀲𑁄 𑀯𑀸 𑀩𑀼𑀤𑁆𑀥𑀁 𑀲𑀭𑀡𑀁 𑀕𑀢𑁄 𑀳𑁄𑀢𑀺, 𑀥𑀫𑁆𑀫𑀁 𑀲𑀭𑀡𑀁 𑀕𑀢𑁄 𑀳𑁄𑀢𑀺, 𑀲𑀗𑁆𑀖𑀁 𑀲𑀭𑀡𑀁 𑀕𑀢𑁄 𑀳𑁄𑀢𑀺…𑀧𑁂… 𑀤𑀸𑀦𑀲𑀁𑀯𑀺𑀪𑀸𑀕𑀭𑀢𑁄’’’𑀢𑀺. ‘‘𑀇𑀤𑀁 𑀔𑁄 𑀢𑀁, 𑀆𑀦𑀦𑁆𑀤, 𑀕𑀦𑁆𑀥𑀚𑀸𑀢𑀁, 𑀬𑀲𑁆𑀲 𑀅𑀦𑀼𑀯𑀸𑀢𑀫𑁆𑀧𑀺 𑀕𑀦𑁆𑀥𑁄 𑀕𑀘𑁆𑀙𑀢𑀺, 𑀧𑀝𑀺𑀯𑀸𑀢𑀫𑁆𑀧𑀺 𑀕𑀦𑁆𑀥𑁄 𑀕𑀘𑁆𑀙𑀢𑀺, 𑀅𑀦𑀼𑀯𑀸𑀢𑀧𑀝𑀺𑀯𑀸𑀢𑀫𑁆𑀧𑀺 𑀕𑀦𑁆𑀥𑁄 𑀕𑀘𑁆𑀙𑀢𑀻’’𑀢𑀺 (𑀅. 𑀦𑀺. 𑁩.𑁮𑁦) 𑀯𑀢𑁆𑀯𑀸 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺 𑁋

𑁫𑁪. ‘‘𑀦 𑀧𑀼𑀧𑁆𑀨𑀕𑀦𑁆𑀥𑁄 𑀧𑀝𑀺𑀯𑀸𑀢𑀫𑁂𑀢𑀺,

𑀦 𑀘𑀦𑁆𑀤𑀦𑀁 𑀢𑀕𑀭𑀫𑀮𑁆𑀮𑀺𑀓𑀸 𑀯𑀸;

𑀲𑀢𑀜𑁆𑀘 𑀕𑀦𑁆𑀥𑁄 𑀧𑀝𑀺𑀯𑀸𑀢𑀫𑁂𑀢𑀺,

𑀲𑀩𑁆𑀩𑀸 𑀤𑀺𑀲𑀸 𑀲𑀧𑁆𑀧𑀼𑀭𑀺𑀲𑁄 𑀧𑀯𑀸𑀬𑀢𑀺. (𑀅. 𑀦𑀺. 𑁩.𑁮𑁦);

𑁫𑁫. ‘‘𑀘𑀦𑁆𑀤𑀦𑀁 𑀢𑀕𑀭𑀁 𑀯𑀸𑀧𑀺, 𑀉𑀧𑁆𑀧𑀮𑀁 𑀅𑀣 𑀯𑀲𑁆𑀲𑀺𑀓𑀻;

𑀏𑀢𑁂𑀲𑀁 𑀕𑀦𑁆𑀥𑀚𑀸𑀢𑀸𑀦𑀁, 𑀲𑀻𑀮𑀕𑀦𑁆𑀥𑁄 𑀅𑀦𑀼𑀢𑁆𑀢𑀭𑁄’’𑀢𑀺.

𑀢𑀢𑁆𑀣 𑀦 𑀧𑀼𑀧𑁆𑀨𑀕𑀦𑁆𑀥𑁄𑀢𑀺 𑀢𑀸𑀯𑀢𑀺𑀁𑀲𑀪𑀯𑀦𑁂 𑀧𑀭𑀺𑀘𑁆𑀙𑀢𑁆𑀢𑀓𑀭𑀼𑀓𑁆𑀔𑁄 𑀆𑀬𑀸𑀫𑀢𑁄 𑀘 𑀯𑀺𑀢𑁆𑀣𑀸𑀭𑀢𑁄 𑀘 𑀬𑁄𑀚𑀦𑀲𑀢𑀺𑀓𑁄, 𑀢𑀲𑁆𑀲 𑀧𑀼𑀧𑁆𑀨𑀸𑀦𑀁 𑀆𑀪𑀸 𑀧𑀜𑁆𑀜𑀸𑀲 𑀬𑁄𑀚𑀦𑀸𑀦𑀺 𑀕𑀘𑁆𑀙𑀢𑀺, 𑀕𑀦𑁆𑀥𑁄 𑀬𑁄𑀚𑀦𑀲𑀢𑀁, 𑀲𑁄𑀧𑀺 𑀅𑀦𑀼𑀯𑀸𑀢𑀫𑁂𑀯 𑀕𑀘𑁆𑀙𑀢𑀺, 𑀧𑀝𑀺𑀯𑀸𑀢𑀁 𑀧𑀦 𑀅𑀝𑁆𑀞𑀗𑁆𑀕𑀼𑀮𑀫𑀢𑁆𑀢𑀫𑁆𑀧𑀺 𑀕𑀦𑁆𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀏𑀯𑀭𑀽𑀧𑁄𑀧𑀺 𑀦 𑀧𑀼𑀧𑁆𑀨𑀕𑀦𑁆𑀥𑁄 𑀧𑀝𑀺𑀯𑀸𑀢𑀫𑁂𑀢𑀺. 𑀘𑀦𑁆𑀤𑀦𑀦𑁆𑀢𑀺 𑀘𑀦𑁆𑀤𑀦𑀕𑀦𑁆𑀥𑁄. 𑀢𑀕𑀭𑀫𑀮𑁆𑀮𑀺𑀓𑀸 𑀯𑀸𑀢𑀺 𑀇𑀫𑁂𑀲𑀫𑁆𑀧𑀺 𑀕𑀦𑁆𑀥𑁄 𑀏𑀯 𑀅𑀥𑀺𑀧𑁆𑀧𑁂𑀢𑁄. 𑀲𑀸𑀭𑀕𑀦𑁆𑀥𑀸𑀦𑀁 𑀅𑀕𑁆𑀕𑀲𑁆𑀲 𑀳𑀺 𑀮𑁄𑀳𑀺𑀢𑀘𑀦𑁆𑀤𑀦𑀲𑁆𑀲𑀸𑀧𑀺 𑀢𑀕𑀭𑀲𑁆𑀲𑀧𑀺 𑀫𑀮𑁆𑀮𑀺𑀓𑀸𑀬𑀧𑀺 𑀅𑀦𑀼𑀯𑀸𑀢𑀫𑁂𑀯 𑀯𑀸𑀬𑀢𑀺, 𑀦𑁄 𑀧𑀝𑀺𑀯𑀸𑀢𑀁. 𑀲𑀢𑀜𑁆𑀘 𑀕𑀦𑁆𑀥𑁄𑀢𑀺 𑀲𑀧𑁆𑀧𑀼𑀭𑀺𑀲𑀸𑀦𑀁 𑀧𑀦 𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑀸𑀯𑀓𑀸𑀦𑀁 𑀲𑀻𑀮𑀕𑀦𑁆𑀥𑁄 𑀧𑀝𑀺𑀯𑀸𑀢𑀫𑁂𑀢𑀺. 𑀓𑀺𑀁 𑀓𑀸𑀭𑀡𑀸? 𑀲𑀩𑁆𑀩𑀸 𑀤𑀺𑀲𑀸 𑀲𑀧𑁆𑀧𑀼𑀭𑀺𑀲𑁄 𑀧𑀯𑀸𑀬𑀢𑀺 𑀬𑀲𑁆𑀫𑀸 𑀧𑀦 𑀲𑀧𑁆𑀧𑀼𑀭𑀺𑀲𑁄 𑀲𑀻𑀮𑀕𑀦𑁆𑀥𑁂𑀦 𑀲𑀩𑁆𑀩𑀸𑀧𑀺 𑀤𑀺𑀲𑀸 𑀅𑀚𑁆𑀛𑁄𑀢𑁆𑀣𑀭𑀺𑀢𑁆𑀯𑀸𑀯 𑀕𑀘𑁆𑀙𑀢𑀺, 𑀢𑀲𑁆𑀫𑀸 ‘‘𑀢𑀲𑁆𑀲 𑀕𑀦𑁆𑀥𑁄 𑀦 𑀧𑀝𑀺𑀯𑀸𑀢𑀫𑁂𑀢𑀻’’𑀢𑀺 𑀦 𑀯𑀢𑁆𑀢𑀩𑁆𑀩𑁄. 𑀢𑁂𑀦 𑀯𑀼𑀢𑁆𑀢𑀁 ‘‘𑀧𑀝𑀺𑀯𑀸𑀢𑀫𑁂𑀢𑀻’’𑀢𑀺. 𑀯𑀲𑁆𑀲𑀺𑀓𑀻𑀢𑀺 𑀚𑀸𑀢𑀺𑀲𑀼𑀫𑀦𑀸. 𑀏𑀢𑁂𑀲𑀦𑁆𑀢𑀺 𑀇𑀫𑁂𑀲𑀁 𑀘𑀦𑁆𑀤𑀦𑀸𑀤𑀻𑀦𑀁 𑀕𑀦𑁆𑀥𑀚𑀸𑀢𑀸𑀦𑀁 𑀕𑀦𑁆𑀥𑀢𑁄 𑀲𑀻𑀮𑀯𑀦𑁆𑀢𑀸𑀦𑀁 𑀲𑀧𑁆𑀧𑀼𑀭𑀺𑀲𑀸𑀦𑀁 𑀲𑀻𑀮𑀕𑀦𑁆𑀥𑁄𑀯 𑀅𑀦𑀼𑀢𑁆𑀢𑀭𑁄 𑀅𑀲𑀤𑀺𑀲𑁄 𑀅𑀧𑀝𑀺𑀪𑀸𑀕𑁄𑀢𑀺.

𑀤𑁂𑀲𑀦𑀸𑀯𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀢𑁆𑀢𑀸. 𑀤𑁂𑀲𑀦𑀸 𑀫𑀳𑀸𑀚𑀦𑀲𑁆𑀲 𑀲𑀸𑀢𑁆𑀣𑀺𑀓𑀸 𑀚𑀸𑀢𑀸𑀢𑀺.

𑀆𑀦𑀦𑁆𑀤𑀢𑁆𑀣𑁂𑀭𑀧𑀜𑁆𑀳𑀸𑀯𑀢𑁆𑀣𑀼 𑀦𑀯𑀫𑀁.