𑁪. 𑀧𑀼𑀧𑁆𑀨𑀯𑀕𑁆𑀕𑁄

𑁧. 𑀧𑀣𑀯𑀺𑀓𑀣𑀸𑀧𑀲𑀼𑀢𑀧𑀜𑁆𑀘𑀲𑀢𑀪𑀺𑀓𑁆𑀔𑀼𑀯𑀢𑁆𑀣𑀼

𑀓𑁄 𑀇𑀫𑀁 𑀧𑀣𑀯𑀺𑀁 𑀯𑀺𑀘𑁂𑀲𑁆𑀲𑀢𑀻𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀦𑁆𑀢𑁄 𑀧𑀣𑀯𑀺𑀓𑀣𑀸𑀧𑀲𑀼𑀢𑁂 𑀧𑀜𑁆𑀘𑀲𑀢𑁂 𑀪𑀺𑀓𑁆𑀔𑀽 𑀆𑀭𑀩𑁆𑀪 𑀓𑀣𑁂𑀲𑀺.

𑀢𑁂 𑀓𑀺𑀭 𑀪𑀕𑀯𑀢𑀸 𑀲𑀤𑁆𑀥𑀺𑀁 𑀚𑀦𑀧𑀤𑀘𑀸𑀭𑀺𑀓𑀁 𑀘𑀭𑀺𑀢𑁆𑀯𑀸 𑀚𑁂𑀢𑀯𑀦𑀁 𑀆𑀕𑀦𑁆𑀢𑁆𑀯𑀸 𑀲𑀸𑀬𑀦𑁆𑀳𑀲𑀫𑀬𑁂 𑀉𑀧𑀝𑁆𑀞𑀸𑀦𑀲𑀸𑀮𑀸𑀬𑀁 𑀲𑀦𑁆𑀦𑀺𑀲𑀺𑀦𑁆𑀦𑀸 𑀅𑀢𑁆𑀢𑀦𑀸 𑀕𑀢𑀕𑀢𑀝𑁆𑀞𑀸𑀦𑁂𑀲𑀼 ‘‘𑀅𑀲𑀼𑀓𑀕𑀸𑀫𑀢𑁄 𑀅𑀲𑀼𑀓𑀕𑀸𑀫𑀕𑀫𑀦𑀝𑁆𑀞𑀸𑀦𑁂 𑀲𑀫𑀁 𑀯𑀺𑀲𑀫𑀁 𑀓𑀤𑁆𑀤𑀫𑀩𑀳𑀼𑀮𑀁 𑀲𑀓𑁆𑀔𑀭𑀩𑀳𑀼𑀮𑀁 𑀓𑀸𑀴𑀫𑀢𑁆𑀢𑀺𑀓𑀁 𑀢𑀫𑁆𑀩𑀫𑀢𑁆𑀢𑀺𑀓’’𑀦𑁆𑀢𑀺 𑀧𑀣𑀯𑀺𑀓𑀣𑀁 𑀓𑀣𑁂𑀲𑀼𑀁. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸, ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸, ‘‘𑀪𑀦𑁆𑀢𑁂, 𑀅𑀫𑁆𑀳𑁂𑀳𑀺 𑀯𑀺𑀘𑀭𑀺𑀢𑀝𑁆𑀞𑀸𑀦𑁂 𑀧𑀣𑀯𑀺𑀓𑀣𑀸𑀬𑀸’’𑀢𑀺 𑀯𑀼𑀢𑁆𑀢𑁂, ‘‘𑀪𑀺𑀓𑁆𑀔𑀯𑁂, 𑀏𑀲𑀸 𑀩𑀸𑀳𑀺𑀭𑀧𑀣𑀯𑀻 𑀦𑀸𑀫, 𑀢𑀼𑀫𑁆𑀳𑁂𑀳𑀺 𑀅𑀚𑁆𑀛𑀼𑀢𑁆𑀢𑀺𑀓𑀧𑀣𑀯𑀺𑀬𑀁 𑀧𑀭𑀺𑀓𑀫𑁆𑀫𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀢𑁆𑀯𑀸 𑀇𑀫𑀸 𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺 𑁋

𑁪𑁪. ‘‘𑀓𑁄 𑀇𑀫𑀁 𑀧𑀣𑀯𑀺𑀁 𑀯𑀺𑀘𑁂𑀲𑁆𑀲𑀢𑀺,

𑀬𑀫𑀮𑁄𑀓𑀜𑁆𑀘 𑀇𑀫𑀁 𑀲𑀤𑁂𑀯𑀓𑀁;

𑀓𑁄 𑀥𑀫𑁆𑀫𑀧𑀤𑀁 𑀲𑀼𑀤𑁂𑀲𑀺𑀢𑀁,

𑀓𑀼𑀲𑀮𑁄 𑀧𑀼𑀧𑁆𑀨𑀫𑀺𑀯 𑀧𑀘𑁂𑀲𑁆𑀲𑀢𑀺.

𑁪𑁫. ‘‘𑀲𑁂𑀔𑁄 𑀧𑀣𑀯𑀺𑀁 𑀯𑀺𑀘𑁂𑀲𑁆𑀲𑀢𑀺,

𑀬𑀫𑀮𑁄𑀓𑀜𑁆𑀘 𑀇𑀫𑀁 𑀲𑀤𑁂𑀯𑀓𑀁;

𑀲𑁂𑀔𑁄 𑀥𑀫𑁆𑀫𑀧𑀤𑀁 𑀲𑀼𑀤𑁂𑀲𑀺𑀢𑀁,

𑀓𑀼𑀲𑀮𑁄 𑀧𑀼𑀧𑁆𑀨𑀫𑀺𑀯 𑀧𑀘𑁂𑀲𑁆𑀲𑀢𑀻’’𑀢𑀺.

𑀢𑀢𑁆𑀣 𑀓𑁄 𑀇𑀫𑀦𑁆𑀢𑀺 𑀓𑁄 𑀇𑀫𑀁 𑀅𑀢𑁆𑀢𑀪𑀸𑀯𑀲𑀗𑁆𑀔𑀸𑀢𑀁 𑀧𑀣𑀯𑀺𑀁. 𑀯𑀺𑀘𑁂𑀲𑁆𑀲𑀢𑀻𑀢𑀺 𑀅𑀢𑁆𑀢𑀦𑁄 𑀜𑀸𑀡𑁂𑀦 𑀯𑀺𑀘𑀺𑀦𑀺𑀲𑁆𑀲𑀢𑀺 𑀯𑀺𑀚𑀸𑀦𑀺𑀲𑁆𑀲𑀢𑀺, 𑀧𑀝𑀺𑀯𑀺𑀚𑁆𑀛𑀺𑀲𑁆𑀲𑀢𑀺, 𑀲𑀘𑁆𑀙𑀺𑀓𑀭𑀺𑀲𑁆𑀲𑀢𑀻𑀢𑀺 𑀅𑀢𑁆𑀣𑁄. 𑀬𑀫𑀮𑁄𑀓𑀜𑁆𑀘𑀸𑀢𑀺 𑀘𑀢𑀼𑀩𑁆𑀩𑀺𑀥𑀁 𑀅𑀧𑀸𑀬𑀮𑁄𑀓𑀜𑁆𑀘. 𑀇𑀫𑀁 𑀲𑀤𑁂𑀯𑀓𑀦𑁆𑀢𑀺 𑀇𑀫𑀁 𑀫𑀦𑀼𑀲𑁆𑀲𑀮𑁄𑀓𑀜𑁆𑀘 𑀤𑁂𑀯𑀮𑁄𑀓𑁂𑀦 𑀲𑀤𑁆𑀥𑀺𑀁 𑀓𑁄 𑀯𑀺𑀘𑁂𑀲𑁆𑀲𑀢𑀺 𑀯𑀺𑀘𑀺𑀦𑀺𑀲𑁆𑀲𑀢𑀺 𑀯𑀺𑀚𑀸𑀦𑀺𑀲𑁆𑀲𑀢𑀺 𑀧𑀝𑀺𑀯𑀺𑀚𑁆𑀛𑀺𑀲𑁆𑀲𑀢𑀺 𑀲𑀘𑁆𑀙𑀺𑀓𑀭𑀺𑀲𑁆𑀲𑀢𑀻𑀢𑀺 𑀧𑀼𑀘𑁆𑀙𑀺. 𑀓𑁄𑀥𑀫𑁆𑀫𑀧𑀤𑀁 𑀲𑀼𑀤𑁂𑀲𑀺𑀢𑀦𑁆𑀢𑀺 𑀬𑀣𑀸𑀲𑀪𑀸𑀯𑀢𑁄 𑀓𑀣𑀺𑀢𑀢𑁆𑀢𑀸 𑀲𑀼𑀤𑁂𑀲𑀺𑀢𑀁 𑀲𑀢𑁆𑀢𑀢𑀺𑀁𑀲𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑀲𑀗𑁆𑀔𑀸𑀢𑀁 𑀥𑀫𑁆𑀫𑀧𑀤𑀁 𑀓𑀼𑀲𑀮𑁄 𑀫𑀸𑀮𑀸𑀓𑀸𑀭𑁄 𑀧𑀼𑀧𑁆𑀨𑀁 𑀯𑀺𑀘𑀺𑀦𑀦𑁆𑀢𑁄 𑀯𑀺𑀬 𑀓𑁄 𑀧𑀘𑁂𑀲𑁆𑀲𑀢𑀺 𑀯𑀺𑀘𑀺𑀦𑀺𑀲𑁆𑀲𑀢𑀺 𑀯𑀺𑀚𑀸𑀦𑀺𑀲𑁆𑀲𑀢𑀺 𑀉𑀧𑀧𑀭𑀺𑀓𑁆𑀔𑀺𑀲𑁆𑀲𑀢𑀺 𑀧𑀝𑀺𑀯𑀺𑀚𑁆𑀛𑀺𑀲𑁆𑀲𑀢𑀺, 𑀲𑀘𑁆𑀙𑀺𑀓𑀭𑀺𑀲𑁆𑀲𑀢𑀻𑀢𑀺 𑀅𑀢𑁆𑀣𑁄. 𑀲𑁂𑀔𑁄𑀢𑀺 𑀅𑀥𑀺𑀲𑀻𑀮𑀲𑀺𑀓𑁆𑀔𑀸, 𑀅𑀥𑀺𑀘𑀺𑀢𑁆𑀢𑀲𑀺𑀓𑁆𑀔𑀸, 𑀅𑀥𑀺𑀧𑀜𑁆𑀜𑀸𑀲𑀺𑀓𑁆𑀔𑀸𑀢𑀺 𑀇𑀫𑀸 𑀢𑀺𑀲𑁆𑀲𑁄 𑀲𑀺𑀓𑁆𑀔𑀸 𑀲𑀺𑀓𑁆𑀔𑀦𑀢𑁄 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀝𑁆𑀞𑀁 𑀆𑀤𑀺𑀁 𑀓𑀢𑁆𑀯𑀸 𑀬𑀸𑀯 𑀅𑀭𑀳𑀢𑁆𑀢𑀫𑀕𑁆𑀕𑀝𑁆𑀞𑀸 𑀲𑀢𑁆𑀢𑀯𑀺𑀥𑁄 𑀲𑁂𑀔𑁄 𑀇𑀫𑀁 𑀅𑀢𑁆𑀢𑀪𑀸𑀯𑀲𑀗𑁆𑀔𑀸𑀢𑀁 𑀧𑀣𑀯𑀺𑀁 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀢𑀢𑁄 𑀙𑀦𑁆𑀤𑀭𑀸𑀕𑀁 𑀅𑀧𑀓𑀟𑁆𑀠𑀦𑁆𑀢𑁄 𑀯𑀺𑀘𑁂𑀲𑁆𑀲𑀢𑀺 𑀯𑀺𑀘𑀺𑀦𑀺𑀲𑁆𑀲𑀢𑀺 𑀯𑀺𑀚𑀸𑀦𑀺𑀲𑁆𑀲𑀢𑀺 𑀧𑀝𑀺𑀯𑀺𑀚𑁆𑀛𑀺𑀲𑁆𑀲𑀢𑀺 𑀲𑀘𑁆𑀙𑀺𑀓𑀭𑀺𑀲𑁆𑀲𑀢𑀺. 𑀬𑀫𑀮𑁄𑀓𑀜𑁆𑀘𑀸𑀢𑀺 𑀢𑀁 𑀬𑀣𑀸𑀯𑀼𑀢𑁆𑀢𑀧𑀓𑀸𑀭𑀁 𑀬𑀫𑀮𑁄𑀓𑀜𑁆𑀘 𑀇𑀫𑀁 𑀫𑀦𑀼𑀲𑁆𑀲𑀮𑁄𑀓𑀜𑁆𑀘 𑀲𑀳 𑀤𑁂𑀯𑁂𑀳𑀺 𑀲𑀤𑁂𑀯𑀓𑀁 𑀲𑁆𑀯𑁂𑀯 𑀯𑀺𑀘𑁂𑀲𑁆𑀲𑀢𑀺 𑀯𑀺𑀘𑀺𑀦𑀺𑀲𑁆𑀲𑀢𑀺 𑀯𑀺𑀚𑀸𑀦𑀺𑀲𑁆𑀲𑀢𑀺 𑀧𑀝𑀺𑀯𑀺𑀚𑁆𑀛𑀺𑀲𑁆𑀲𑀢𑀺 𑀲𑀘𑁆𑀙𑀺𑀓𑀭𑀺𑀲𑁆𑀲𑀢𑀺. 𑀲𑁂𑀔𑁄𑀢𑀺 𑀲𑁆𑀯𑁂𑀯 𑀲𑀢𑁆𑀢𑀯𑀺𑀥𑁄 𑀲𑁂𑀔𑁄, 𑀬𑀣𑀸 𑀦𑀸𑀫 𑀓𑀼𑀲𑀮𑁄 𑀫𑀸𑀮𑀸𑀓𑀸𑀭𑁄 𑀧𑀼𑀧𑁆𑀨𑀸𑀭𑀸𑀫𑀁 𑀧𑀯𑀺𑀲𑀺𑀢𑁆𑀯𑀸 𑀢𑀭𑀼𑀡𑀫𑀓𑀼𑀴𑀸𑀦𑀺 𑀘 𑀧𑀸𑀡𑀓𑀯𑀺𑀤𑁆𑀥𑀸𑀦𑀺 𑀘 𑀫𑀺𑀮𑀸𑀢𑀸𑀦𑀺 𑀘 𑀕𑀡𑁆𑀞𑀺𑀓𑀚𑀸𑀢𑀸𑀦𑀺 𑀘 𑀧𑀼𑀧𑁆𑀨𑀸𑀦𑀺 𑀯𑀚𑁆𑀚𑁂𑀢𑁆𑀯𑀸 𑀲𑁄𑀪𑀦𑀸𑀦𑀺 𑀲𑀼𑀚𑀸𑀢𑀲𑀼𑀚𑀸𑀢𑀸𑀦𑁂𑀯 𑀧𑀼𑀧𑁆𑀨𑀸𑀦𑀺 𑀯𑀺𑀘𑀺𑀦𑀸𑀢𑀺, 𑀏𑀯𑀫𑁂𑀯 𑀇𑀫𑀁 𑀲𑀼𑀓𑀣𑀺𑀢𑀁 𑀲𑀼𑀦𑀺𑀤𑁆𑀤𑀺𑀝𑁆𑀞𑀁 𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑀧𑀤𑀫𑁆𑀧𑀺 𑀧𑀜𑁆𑀜𑀸𑀬 𑀧𑀘𑁂𑀲𑁆𑀲𑀢𑀺 𑀯𑀺𑀘𑀺𑀦𑀺𑀲𑁆𑀲𑀢𑀺 𑀉𑀧𑀧𑀭𑀺𑀓𑁆𑀔𑀺𑀲𑁆𑀲𑀢𑀺 𑀧𑀝𑀺𑀯𑀺𑀚𑁆𑀛𑀺𑀲𑁆𑀲𑀢𑀺 𑀲𑀘𑁆𑀙𑀺𑀓𑀭𑀺𑀲𑁆𑀲𑀢𑀻𑀢𑀺 𑀲𑀢𑁆𑀣𑀸 𑀲𑀬𑀫𑁂𑀯 𑀧𑀜𑁆𑀳𑀁 𑀯𑀺𑀲𑁆𑀲𑀚𑁆𑀚𑁂𑀲𑀺.

𑀤𑁂𑀲𑀦𑀸𑀯𑀲𑀸𑀦𑁂 𑀧𑀜𑁆𑀘𑀲𑀢𑀸𑀧𑀺 𑀪𑀺𑀓𑁆𑀔𑀽 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀁𑀲𑀼. 𑀲𑀫𑁆𑀧𑀢𑁆𑀢𑀧𑀭𑀺𑀲𑀸𑀬𑀧𑀺 𑀲𑀸𑀢𑁆𑀣𑀺𑀓𑀸 𑀥𑀫𑁆𑀫𑀤𑁂𑀲𑀦𑀸 𑀅𑀳𑁄𑀲𑀻𑀢𑀺.

𑀧𑀣𑀯𑀺𑀓𑀣𑀸𑀧𑀲𑀼𑀢𑀧𑀜𑁆𑀘𑀲𑀢𑀪𑀺𑀓𑁆𑀔𑀼𑀯𑀢𑁆𑀣𑀼 𑀧𑀞𑀫𑀁.

𑁨. 𑀫𑀭𑀻𑀘𑀺𑀓𑀫𑁆𑀫𑀝𑁆𑀞𑀸𑀦𑀺𑀓𑀢𑁆𑀣𑁂𑀭𑀯𑀢𑁆𑀣𑀼

𑀨𑁂𑀡𑀽𑀧𑀫𑀦𑁆𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀦𑁆𑀢𑁄 𑀅𑀜𑁆𑀜𑀢𑀭𑀁 𑀫𑀭𑀻𑀘𑀺𑀓𑀫𑁆𑀫𑀝𑁆𑀞𑀸𑀦𑀺𑀓𑀁 𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀲𑁄 𑀓𑀺𑀭 𑀪𑀺𑀓𑁆𑀔𑀼 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸, ‘‘𑀲𑀫𑀡𑀥𑀫𑁆𑀫𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀖𑀝𑁂𑀢𑁆𑀯𑀸 𑀯𑀸𑀬𑀫𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀢𑁆𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 ‘‘𑀯𑀺𑀲𑁂𑀲𑁂𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑀁 𑀓𑀣𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀆𑀕𑀘𑁆𑀙𑀦𑁆𑀢𑁄 𑀅𑀦𑁆𑀢𑀭𑀸𑀫𑀕𑁆𑀕𑁂 𑀫𑀭𑀻𑀘𑀺𑀁 𑀤𑀺𑀲𑁆𑀯𑀸, ‘‘𑀬𑀣𑀸 𑀅𑀬𑀁 𑀕𑀺𑀫𑁆𑀳𑀲𑀫𑀬𑁂 𑀉𑀝𑁆𑀞𑀺𑀢𑀸 𑀫𑀭𑀻𑀘𑀺 𑀤𑀽𑀭𑁂 𑀞𑀺𑀢𑀸𑀦𑀁 𑀭𑀽𑀧𑀕𑀢𑀸 𑀯𑀺𑀬 𑀧𑀜𑁆𑀜𑀸𑀬𑀢𑀺, 𑀲𑀦𑁆𑀢𑀺𑀓𑀁 𑀆𑀕𑀘𑁆𑀙𑀦𑁆𑀢𑀸𑀦𑀁 𑀦𑁂𑀯 𑀧𑀜𑁆𑀜𑀸𑀬𑀢𑀺, 𑀅𑀬𑀁 𑀅𑀢𑁆𑀢𑀪𑀸𑀯𑁄𑀧𑀺 𑀉𑀧𑁆𑀧𑀸𑀤𑀯𑀬𑀝𑁆𑀞𑁂𑀦 𑀏𑀯𑀭𑀽𑀧𑁄’’𑀢𑀺 𑀫𑀭𑀻𑀘𑀺𑀓𑀫𑁆𑀫𑀝𑁆𑀞𑀸𑀦𑀁 𑀪𑀸𑀯𑁂𑀦𑁆𑀢𑁄 𑀆𑀕𑀦𑁆𑀢𑁆𑀯𑀸 𑀫𑀕𑁆𑀕𑀓𑀺𑀮𑀦𑁆𑀢𑁄 𑀅𑀘𑀺𑀭𑀯𑀢𑀺𑀬𑀁 𑀦𑁆𑀳𑀸𑀬𑀺𑀢𑁆𑀯𑀸 𑀏𑀓𑀲𑁆𑀫𑀺𑀁 𑀘𑀡𑁆𑀟𑀲𑁄𑀢𑀢𑀻𑀭𑁂 𑀭𑀼𑀓𑁆𑀔𑀙𑀸𑀬𑀸𑀬 𑀦𑀺𑀲𑀺𑀦𑁆𑀦𑁄 𑀉𑀤𑀓𑀯𑁂𑀕𑀸𑀪𑀺𑀖𑀸𑀢𑁂𑀦 𑀉𑀝𑁆𑀞𑀳𑀺𑀢𑁆𑀯𑀸 𑀫𑀳𑀦𑁆𑀢𑁂 𑀫𑀳𑀦𑁆𑀢𑁂 𑀨𑁂𑀡𑀧𑀺𑀡𑁆𑀟𑁂 𑀪𑀺𑀚𑁆𑀚𑀫𑀸𑀦𑁂 𑀤𑀺𑀲𑁆𑀯𑀸, ‘‘𑀅𑀬𑀁 𑀅𑀢𑁆𑀢𑀪𑀸𑀯𑁄𑀧𑀺 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀪𑀺𑀚𑁆𑀚𑀦𑀝𑁆𑀞𑁂𑀦 𑀏𑀯𑀭𑀽𑀧𑁄𑀬𑁂𑀯𑀸’’𑀢𑀺 𑀆𑀭𑀫𑁆𑀫𑀡𑀁 𑀅𑀕𑁆𑀕𑀳𑁂𑀲𑀺. 𑀲𑀢𑁆𑀣𑀸 𑀕𑀦𑁆𑀥𑀓𑀼𑀝𑀺𑀬𑀁 𑀞𑀺𑀢𑁄𑀯 𑀢𑀁 𑀣𑁂𑀭𑀁 𑀤𑀺𑀲𑁆𑀯𑀸, ‘‘𑀏𑀯𑀫𑁂𑀯, 𑀪𑀺𑀓𑁆𑀔𑀼, 𑀏𑀯𑀭𑀽𑀧𑁄𑀯𑀸𑀬𑀁 𑀅𑀢𑁆𑀢𑀪𑀸𑀯𑁄 𑀨𑁂𑀡𑀧𑀺𑀡𑁆𑀟𑁄 𑀯𑀺𑀬 𑀫𑀭𑀻𑀘𑀺 𑀯𑀺𑀬 𑀉𑀧𑁆𑀧𑀚𑁆𑀚𑀦𑀪𑀺𑀚𑁆𑀚𑀦𑀲𑀪𑀸𑀯𑁄𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁪𑁬. ‘‘𑀨𑁂𑀡𑀽𑀧𑀫𑀁 𑀓𑀸𑀬𑀫𑀺𑀫𑀁 𑀯𑀺𑀤𑀺𑀢𑁆𑀯𑀸,

𑀫𑀭𑀻𑀘𑀺𑀥𑀫𑁆𑀫𑀁 𑀅𑀪𑀺𑀲𑀫𑁆𑀩𑀼𑀥𑀸𑀦𑁄;

𑀙𑁂𑀢𑁆𑀯𑀸𑀦 𑀫𑀸𑀭𑀲𑁆𑀲 𑀧𑀧𑀼𑀧𑁆𑀨𑀓𑀸𑀦𑀺,

𑀅𑀤𑀲𑁆𑀲𑀦𑀁 𑀫𑀘𑁆𑀘𑀼𑀭𑀸𑀚𑀲𑁆𑀲 𑀕𑀘𑁆𑀙𑁂’’𑀢𑀺.

𑀢𑀢𑁆𑀣 𑀨𑁂𑀡𑀽𑀧𑀫𑀦𑁆𑀢𑀺 𑀇𑀫𑀁 𑀓𑁂𑀲𑀸𑀤𑀺𑀲𑀫𑀽𑀳𑀲𑀗𑁆𑀔𑀸𑀢𑀁 𑀓𑀸𑀬𑀁 𑀅𑀩𑀮𑀤𑀼𑀩𑁆𑀩𑀮𑀝𑁆𑀞𑁂𑀦 𑀅𑀦𑀤𑁆𑀥𑀦𑀺𑀬𑀢𑀸𑀯𑀓𑀸𑀮𑀺𑀓𑀝𑁆𑀞𑁂𑀦 𑀨𑁂𑀡𑀧𑀺𑀡𑁆𑀟𑀲𑀭𑀺𑀓𑁆𑀔𑀓𑁄𑀢𑀺 𑀯𑀺𑀤𑀺𑀢𑁆𑀯𑀸. 𑀫𑀭𑀻𑀘𑀺𑀥𑀫𑁆𑀫𑀦𑁆𑀢𑀺 𑀬𑀣𑀸 𑀫𑀭𑀻𑀘𑀺 𑀤𑀽𑀭𑁂 𑀞𑀺𑀢𑀸𑀦𑀁 𑀭𑀽𑀧𑀕𑀢𑀸 𑀯𑀺𑀬 𑀕𑀬𑁆𑀳𑀽𑀧𑀕𑀸 𑀯𑀺𑀬 𑀳𑁄𑀢𑀺, 𑀲𑀦𑁆𑀢𑀺𑀓𑁂 𑀉𑀧𑀕𑀘𑁆𑀙𑀦𑁆𑀢𑀸𑀦𑀁 𑀭𑀺𑀢𑁆𑀢𑀸 𑀢𑀼𑀘𑁆𑀙𑀸 𑀅𑀕𑀬𑁆𑀳𑀽𑀧𑀕𑀸 𑀲𑀫𑁆𑀧𑀚𑁆𑀚𑀢𑀺, 𑀏𑀯𑀫𑁂𑀯 𑀔𑀡𑀺𑀓𑀇𑀢𑁆𑀢𑀭𑀧𑀘𑁆𑀘𑀼𑀧𑀝𑁆𑀞𑀸𑀦𑀝𑁆𑀞𑁂𑀦 𑀅𑀬𑀁 𑀓𑀸𑀬𑁄𑀧𑀺 𑀫𑀭𑀻𑀘𑀺𑀥𑀫𑁆𑀫𑁄𑀢𑀺 𑀅𑀪𑀺𑀲𑀫𑁆𑀩𑀼𑀥𑀸𑀦𑁄 𑀩𑀼𑀚𑁆𑀛𑀦𑁆𑀢𑁄, 𑀚𑀸𑀦𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀫𑀸𑀭𑀲𑁆𑀲 𑀧𑀧𑀼𑀧𑁆𑀨𑀓𑀸𑀦𑀻𑀢𑀺 𑀫𑀸𑀭𑀲𑁆𑀲 𑀧𑀧𑀼𑀧𑁆𑀨𑀓𑀲𑀗𑁆𑀔𑀸𑀢𑀸𑀦𑀺 𑀢𑁂𑀪𑀽𑀫𑀓𑀸𑀦𑀺 𑀯𑀝𑁆𑀝𑀸𑀦𑀺 𑀅𑀭𑀺𑀬𑀫𑀕𑁆𑀕𑁂𑀦 𑀙𑀺𑀦𑁆𑀤𑀺𑀢𑁆𑀯𑀸 𑀔𑀻𑀡𑀸𑀲𑀯𑁄 𑀪𑀺𑀓𑁆𑀔𑀼 𑀫𑀘𑁆𑀘𑀼𑀭𑀸𑀚𑀲𑁆𑀲 𑀅𑀤𑀲𑁆𑀲𑀦𑀁 𑀅𑀯𑀺𑀲𑀬𑀁 𑀅𑀫𑀢𑀫𑀳𑀸𑀦𑀺𑀩𑁆𑀩𑀸𑀦𑀁 𑀕𑀘𑁆𑀙𑁂𑀬𑁆𑀬𑀸𑀢𑀺.

𑀕𑀸𑀣𑀸𑀧𑀭𑀺𑀬𑁄𑀲𑀸𑀦𑁂 𑀣𑁂𑀭𑁄 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀲𑀢𑁆𑀣𑀼 𑀲𑀼𑀯𑀡𑁆𑀡𑀯𑀡𑁆𑀡𑀁 𑀲𑀭𑀻𑀭𑀁 𑀣𑁄𑀫𑁂𑀦𑁆𑀢𑁄 𑀯𑀡𑁆𑀡𑁂𑀦𑁆𑀢𑁄 𑀯𑀦𑁆𑀤𑀦𑁆𑀢𑁄𑀯 𑀆𑀕𑀢𑁄𑀢𑀺.

𑀫𑀭𑀻𑀘𑀺𑀓𑀫𑁆𑀫𑀝𑁆𑀞𑀸𑀦𑀺𑀓𑀢𑁆𑀣𑁂𑀭𑀯𑀢𑁆𑀣𑀼 𑀤𑀼𑀢𑀺𑀬𑀁.

𑁩. 𑀯𑀺𑀝𑀝𑀽𑀪𑀯𑀢𑁆𑀣𑀼

𑀧𑀼𑀧𑁆𑀨𑀸𑀦𑀺𑀳𑁂𑀯 𑀧𑀘𑀺𑀦𑀦𑁆𑀢𑀦𑁆𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀦𑁆𑀢𑁄 𑀲𑀧𑀭𑀺𑀲𑀁 𑀫𑀳𑁄𑀖𑁂𑀦 𑀅𑀚𑁆𑀛𑁄𑀢𑁆𑀣𑀭𑀺𑀢𑁆𑀯𑀸 𑀫𑀸𑀭𑀺𑀢𑀁 𑀯𑀺𑀝𑀝𑀽𑀪𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀢𑀢𑁆𑀭𑀸𑀬𑀁 𑀅𑀦𑀼𑀧𑀼𑀩𑁆𑀩𑀺𑀓𑀣𑀸 𑁋 𑀲𑀸𑀯𑀢𑁆𑀣𑀺𑀬𑀜𑁆𑀳𑀺 𑀫𑀳𑀸𑀓𑁄𑀲𑀮𑀭𑀜𑁆𑀜𑁄 𑀧𑀼𑀢𑁆𑀢𑁄 𑀧𑀲𑁂𑀦𑀤𑀺𑀓𑀼𑀫𑀸𑀭𑁄 𑀦𑀸𑀫. 𑀯𑁂𑀲𑀸𑀮𑀺𑀬𑀁 𑀮𑀺𑀘𑁆𑀙𑀯𑀺𑀭𑀜𑁆𑀜𑁄 𑀧𑀼𑀢𑁆𑀢𑁄 𑀮𑀺𑀘𑁆𑀙𑀯𑀺𑀓𑀼𑀫𑀸𑀭𑁄 𑀫𑀳𑀸𑀮𑀺 𑀦𑀸𑀫, 𑀓𑀼𑀲𑀺𑀦𑀸𑀭𑀸𑀬𑀁 𑀫𑀮𑁆𑀮𑀭𑀸𑀚𑀧𑀼𑀢𑁆𑀢𑁄 𑀩𑀦𑁆𑀥𑀼𑀮𑁄 𑀦𑀸𑀫𑀸𑀢𑀺 𑀇𑀫𑁂 𑀢𑀬𑁄 𑀤𑀺𑀲𑀸𑀧𑀸𑀫𑁄𑀓𑁆𑀔𑀲𑁆𑀲𑀸𑀘𑀭𑀺𑀬𑀲𑁆𑀲 𑀲𑀦𑁆𑀢𑀺𑀓𑁂 𑀲𑀺𑀧𑁆𑀧𑀼𑀕𑁆𑀕𑀳𑀡𑀢𑁆𑀣𑀁 𑀢𑀓𑁆𑀓𑀲𑀺𑀮𑀁 𑀕𑀦𑁆𑀢𑁆𑀯𑀸 𑀩𑀳𑀺𑀦𑀕𑀭𑁂 𑀲𑀸𑀮𑀸𑀬 𑀲𑀫𑀸𑀕𑀢𑀸 𑀅𑀜𑁆𑀜𑀫𑀜𑁆𑀜𑀲𑁆𑀲 𑀆𑀕𑀢𑀓𑀸𑀭𑀡𑀜𑁆𑀘 𑀓𑀼𑀮𑀜𑁆𑀘 𑀦𑀸𑀫𑀜𑁆𑀘 𑀧𑀼𑀘𑁆𑀙𑀺𑀢𑁆𑀯𑀸 𑀲𑀳𑀸𑀬𑀓𑀸 𑀳𑀼𑀢𑁆𑀯𑀸 𑀏𑀓𑀢𑁄𑀯 𑀆𑀘𑀭𑀺𑀬𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀲𑀺𑀧𑁆𑀧𑀁 𑀲𑀺𑀓𑁆𑀔𑀦𑁆𑀢𑀸 𑀦 𑀘𑀺𑀭𑀲𑁆𑀲𑁂𑀯 𑀉𑀕𑁆𑀕𑀳𑀺𑀢𑀲𑀺𑀧𑁆𑀧𑀸 𑀆𑀘𑀭𑀺𑀬𑀁 𑀆𑀧𑀼𑀘𑁆𑀙𑀺𑀢𑁆𑀯𑀸 𑀏𑀓𑀢𑁄𑀯 𑀦𑀺𑀓𑁆𑀔𑀫𑀺𑀢𑁆𑀯𑀸 𑀲𑀓𑀲𑀓𑀝𑁆𑀞𑀸𑀦𑀸𑀦𑀺 𑀅𑀕𑀫𑀁𑀲𑀼. 𑀢𑁂𑀲𑀼 𑀧𑀲𑁂𑀦𑀤𑀺𑀓𑀼𑀫𑀸𑀭𑁄 𑀧𑀺𑀢𑀼 𑀲𑀺𑀧𑁆𑀧𑀁 𑀤𑀲𑁆𑀲𑁂𑀢𑁆𑀯𑀸 𑀧𑀲𑀦𑁆𑀦𑁂𑀦 𑀧𑀺𑀢𑀭𑀸 𑀭𑀚𑁆𑀚𑁂 𑀅𑀪𑀺𑀲𑀺𑀢𑁆𑀢𑁄. 𑀫𑀳𑀸𑀮𑀺𑀓𑀼𑀫𑀸𑀭𑁄 𑀮𑀺𑀘𑁆𑀙𑀯𑀻𑀦𑀁 𑀲𑀺𑀧𑁆𑀧𑀁 𑀤𑀲𑁆𑀲𑁂𑀦𑁆𑀢𑁄 𑀫𑀳𑀦𑁆𑀢𑁂𑀦 𑀉𑀲𑁆𑀲𑀸𑀳𑁂𑀦 𑀤𑀲𑁆𑀲𑁂𑀲𑀺, 𑀢𑀲𑁆𑀲 𑀅𑀓𑁆𑀔𑀻𑀦𑀺 𑀪𑀺𑀚𑁆𑀚𑀺𑀢𑁆𑀯𑀸 𑀅𑀕𑀫𑀁𑀲𑀼. 𑀮𑀺𑀘𑁆𑀙𑀯𑀺𑀭𑀸𑀚𑀸𑀦𑁄 ‘‘𑀅𑀳𑁄 𑀯𑀢 𑀅𑀫𑁆𑀳𑀸𑀓𑀁 𑀆𑀘𑀭𑀺𑀬𑁄 𑀅𑀓𑁆𑀔𑀺𑀯𑀺𑀦𑀸𑀲𑀁 𑀧𑀢𑁆𑀢𑁄, 𑀦 𑀦𑀁 𑀧𑀭𑀺𑀘𑁆𑀘𑀚𑀺𑀲𑁆𑀲𑀸𑀫, 𑀉𑀧𑀝𑁆𑀞𑀳𑀺𑀲𑁆𑀲𑀸𑀫 𑀦’’𑀦𑁆𑀢𑀺 𑀢𑀲𑁆𑀲 𑀲𑀢𑀲𑀳𑀲𑁆𑀲𑀼𑀝𑁆𑀞𑀸𑀦𑀓𑀁 𑀏𑀓𑀁 𑀤𑁆𑀯𑀸𑀭𑀁 𑀅𑀤𑀁𑀲𑀼. 𑀲𑁄 𑀢𑀁 𑀦𑀺𑀲𑁆𑀲𑀸𑀬 𑀧𑀜𑁆𑀘𑀲𑀢𑁂 𑀮𑀺𑀘𑁆𑀙𑀯𑀺𑀭𑀸𑀚𑀧𑀼𑀢𑁆𑀢𑁂 𑀲𑀺𑀧𑁆𑀧𑀁 𑀲𑀺𑀓𑁆𑀔𑀸𑀧𑁂𑀦𑁆𑀢𑁄 𑀯𑀲𑀺. 𑀩𑀦𑁆𑀥𑀼𑀮𑀓𑀼𑀫𑀸𑀭𑁄 𑀲𑀝𑁆𑀞𑀺𑀁 𑀲𑀝𑁆𑀞𑀺𑀁 𑀯𑁂𑀴𑀽 𑀕𑀳𑁂𑀢𑁆𑀯𑀸 𑀫𑀚𑁆𑀛𑁂 𑀅𑀬𑀲𑀮𑀸𑀓𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀲𑀝𑁆𑀞𑀺𑀓𑀮𑀸𑀧𑁂 𑀉𑀲𑁆𑀲𑀸𑀧𑁂𑀢𑁆𑀯𑀸 𑀞𑀧𑀺𑀢𑁂 𑀫𑀮𑁆𑀮𑀭𑀸𑀚𑀓𑀼𑀮𑁂𑀳𑀺 ‘‘𑀇𑀫𑁂 𑀓𑀧𑁆𑀧𑁂𑀢𑀽’’𑀢𑀺 𑀯𑀼𑀢𑁆𑀢𑁄 𑀅𑀲𑀻𑀢𑀺𑀳𑀢𑁆𑀣𑀁 𑀆𑀓𑀸𑀲𑀁 𑀉𑀮𑁆𑀮𑀗𑁆𑀖𑀺𑀢𑁆𑀯𑀸 𑀅𑀲𑀺𑀦𑀸 𑀓𑀧𑁆𑀧𑁂𑀦𑁆𑀢𑁄 𑀅𑀕𑀫𑀸𑀲𑀺. 𑀲𑁄 𑀑𑀲𑀸𑀦𑀓𑀮𑀸𑀧𑁂 𑀅𑀬𑀲𑀮𑀸𑀓𑀸𑀬 ‘‘𑀓𑀺𑀭𑀻’’𑀢𑀺 𑀲𑀤𑁆𑀤𑀁 𑀲𑀼𑀢𑁆𑀯𑀸, ‘‘𑀓𑀺𑀁 𑀏𑀢’’𑀦𑁆𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑀲𑀩𑁆𑀩𑀓𑀮𑀸𑀧𑁂𑀲𑀼 𑀅𑀬𑀲𑀮𑀸𑀓𑀸𑀦𑀁 𑀞𑀧𑀺𑀢𑀪𑀸𑀯𑀁 𑀜𑀢𑁆𑀯𑀸 𑀅𑀲𑀺𑀁 𑀙𑀟𑁆𑀟𑁂𑀢𑁆𑀯𑀸 𑀭𑁄𑀤𑀫𑀸𑀦𑁄 ‘‘𑀫𑀬𑁆𑀳𑀁 𑀏𑀢𑁆𑀢𑀓𑁂𑀲𑀼 𑀜𑀸𑀢𑀺𑀲𑀼𑀳𑀚𑁆𑀚𑁂𑀲𑀼 𑀏𑀓𑁄𑀧𑀺 𑀲𑀲𑀺𑀦𑁂𑀳𑁄 𑀳𑀼𑀢𑁆𑀯𑀸 𑀇𑀫𑀁 𑀓𑀸𑀭𑀡𑀁 𑀦𑀸𑀘𑀺𑀓𑁆𑀔𑀺. 𑀲𑀘𑁂 𑀳𑀺 𑀅𑀳𑀁 𑀚𑀸𑀦𑁂𑀬𑁆𑀬𑀁, 𑀅𑀬𑀲𑀮𑀸𑀓𑀸𑀬 𑀲𑀤𑁆𑀤𑀁 𑀅𑀦𑀼𑀝𑁆𑀞𑀸𑀧𑁂𑀦𑁆𑀢𑁄𑀯 𑀙𑀺𑀦𑁆𑀤𑁂𑀬𑁆𑀬’’𑀦𑁆𑀢𑀺 𑀯𑀢𑁆𑀯𑀸, ‘‘𑀲𑀩𑁆𑀩𑁂𑀧𑀺𑀫𑁂 𑀫𑀸𑀭𑁂𑀢𑁆𑀯𑀸 𑀭𑀚𑁆𑀚𑀁 𑀓𑀭𑁂𑀬𑁆𑀬’’𑀦𑁆𑀢𑀺 𑀫𑀸𑀢𑀸𑀧𑀺𑀢𑀽𑀦𑀁 𑀓𑀣𑁂𑀲𑀺. 𑀢𑁂𑀳𑀺 ‘‘𑀧𑀯𑁂𑀡𑀺𑀭𑀚𑁆𑀚𑀁 𑀦𑀸𑀫, 𑀢𑀸𑀢, 𑀇𑀤𑀁 𑀦 𑀮𑀩𑁆𑀪𑀸 𑀏𑀯𑀁 𑀓𑀸𑀢𑀼’’𑀦𑁆𑀢𑀺 𑀦𑀸𑀦𑀧𑁆𑀧𑀓𑀸𑀭𑁂𑀦 𑀯𑀸𑀭𑀺𑀢𑁄 ‘‘𑀢𑁂𑀦 𑀳𑀺 𑀫𑀫 𑀲𑀳𑀸𑀬𑀓𑀲𑁆𑀲 𑀲𑀦𑁆𑀢𑀺𑀓𑀁 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀲𑀸𑀯𑀢𑁆𑀣𑀺𑀁 𑀅𑀕𑀫𑀸𑀲𑀺.

𑀧𑀲𑁂𑀦𑀤𑀺 𑀓𑁄𑀲𑀮𑁄 𑀭𑀸𑀚𑀸 𑀢𑀲𑁆𑀲𑀸𑀕𑀫𑀦𑀁 𑀲𑀼𑀢𑁆𑀯𑀸 𑀧𑀘𑁆𑀘𑀼𑀕𑁆𑀕𑀦𑁆𑀢𑁆𑀯𑀸 𑀫𑀳𑀦𑁆𑀢𑁂𑀦 𑀲𑀓𑁆𑀓𑀸𑀭𑁂𑀦 𑀢𑀁 𑀦𑀕𑀭𑀁 𑀧𑀯𑁂𑀲𑁂𑀢𑁆𑀯𑀸 𑀲𑁂𑀦𑀸𑀧𑀢𑀺𑀝𑁆𑀞𑀸𑀦𑁂 𑀞𑀧𑁂𑀲𑀺. 𑀲𑁄 𑀫𑀸𑀢𑀸𑀧𑀺𑀢𑀭𑁄 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀢𑀢𑁆𑀣𑁂𑀯 𑀯𑀸𑀲𑀁 𑀓𑀧𑁆𑀧𑁂𑀲𑀺. 𑀅𑀣𑁂𑀓𑀤𑀺𑀯𑀲𑀁 𑀭𑀸𑀚𑀸 𑀉𑀧𑀭𑀺𑀧𑀸𑀲𑀸𑀤𑁂 𑀞𑀺𑀢𑁄 𑀅𑀦𑁆𑀢𑀭𑀯𑀻𑀣𑀺𑀁 𑀑𑀮𑁄𑀓𑀬𑀫𑀸𑀦𑁄 ‘‘𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀘𑀽𑀴𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀯𑀺𑀲𑀸𑀔𑀸𑀬 𑀲𑀼𑀧𑁆𑀧𑀯𑀸𑀲𑀸𑀬𑀸’’𑀢𑀺 𑀏𑀢𑁂𑀲𑀁 𑀕𑁂𑀳𑁂 𑀦𑀺𑀘𑁆𑀘𑀁 𑀪𑀢𑁆𑀢𑀓𑀺𑀘𑁆𑀘𑀢𑁆𑀣𑀸𑀬 𑀕𑀘𑁆𑀙𑀦𑁆𑀢𑁂 𑀅𑀦𑁂𑀓𑀲𑀳𑀲𑁆𑀲𑁂 𑀪𑀺𑀓𑁆𑀔𑀽 𑀤𑀺𑀲𑁆𑀯𑀸, ‘‘𑀓𑀳𑀁, 𑀅𑀬𑁆𑀬𑀸, 𑀕𑀘𑁆𑀙𑀦𑁆𑀢𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸, ‘‘𑀤𑁂𑀯, 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀕𑁂𑀳𑁂 𑀦𑀺𑀘𑁆𑀘𑀪𑀢𑁆𑀢𑀲𑀮𑀸𑀓𑀪𑀢𑁆𑀢𑀕𑀺𑀮𑀸𑀦𑀪𑀢𑁆𑀢𑀸𑀤𑀻𑀦𑀁 𑀅𑀢𑁆𑀣𑀸𑀬 𑀤𑁂𑀯𑀲𑀺𑀓𑀁 𑀤𑁆𑀯𑁂 𑀪𑀺𑀓𑁆𑀔𑀼𑀲𑀳𑀲𑁆𑀲𑀸𑀦𑀺 𑀕𑀘𑁆𑀙𑀦𑁆𑀢𑀺, 𑀘𑀽𑀴𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀕𑁂𑀳𑁂 𑀧𑀜𑁆𑀘𑀲𑀢𑀸𑀦𑀺, 𑀢𑀣𑀸 𑀯𑀺𑀲𑀸𑀔𑀸𑀬 𑀢𑀣𑀸 𑀲𑀼𑀧𑁆𑀧𑀯𑀸𑀲𑀸𑀬𑀸’’𑀢𑀺 𑀯𑀼𑀢𑁆𑀢𑁂 𑀲𑀬𑀫𑁆𑀧𑀺 𑀪𑀺𑀓𑁆𑀔𑀼𑀲𑀗𑁆𑀖𑀁 𑀉𑀧𑀝𑁆𑀞𑀳𑀺𑀢𑀼𑀓𑀸𑀫𑁄 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀪𑀺𑀓𑁆𑀔𑀼𑀲𑀳𑀲𑁆𑀲𑁂𑀦 𑀲𑀤𑁆𑀥𑀺𑀁 𑀲𑀢𑁆𑀣𑀸𑀭𑀁 𑀦𑀺𑀫𑀦𑁆𑀢𑁂𑀢𑁆𑀯𑀸 𑀲𑀢𑁆𑀢𑀸𑀳𑀁 𑀲𑀳𑀢𑁆𑀣𑀸 𑀤𑀸𑀦𑀁 𑀤𑀢𑁆𑀯𑀸 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸, ‘‘𑀪𑀦𑁆𑀢𑁂, 𑀧𑀜𑁆𑀘𑀳𑀺 𑀫𑁂 𑀪𑀺𑀓𑁆𑀔𑀼𑀲𑀢𑁂𑀳𑀺 𑀲𑀤𑁆𑀥𑀺𑀁 𑀦𑀺𑀩𑀤𑁆𑀥𑀁 𑀪𑀺𑀓𑁆𑀔𑀁 𑀕𑀡𑁆𑀳𑀣𑀸’’𑀢𑀺 𑀆𑀳. ‘‘𑀫𑀳𑀸𑀭𑀸𑀚 𑀩𑀼𑀤𑁆𑀥𑀸 𑀦𑀸𑀫 𑀏𑀓𑀝𑁆𑀞𑀸𑀦𑁂 𑀦𑀺𑀩𑀤𑁆𑀥𑀁 𑀪𑀺𑀓𑁆𑀔𑀁 𑀦 𑀕𑀡𑁆𑀳𑀦𑁆𑀢𑀺, 𑀩𑀳𑀽 𑀚𑀦𑀸 𑀩𑀼𑀤𑁆𑀥𑀸𑀦𑀁 𑀆𑀕𑀫𑀦𑀁 𑀧𑀘𑁆𑀘𑀸𑀲𑀻𑀲𑀦𑁆𑀢𑀻’’𑀢𑀺. ‘‘𑀢𑁂𑀦 𑀳𑀺 𑀏𑀓𑀁 𑀪𑀺𑀓𑁆𑀔𑀼𑀁 𑀦𑀺𑀩𑀤𑁆𑀥𑀁 𑀧𑁂𑀲𑁂𑀣𑀸’’𑀢𑀺 𑀆𑀳. 𑀲𑀢𑁆𑀣𑀸 𑀆𑀦𑀦𑁆𑀤𑀢𑁆𑀣𑁂𑀭𑀲𑁆𑀲 𑀪𑀸𑀭𑀁 𑀅𑀓𑀸𑀲𑀺. 𑀭𑀸𑀚𑀸 𑀪𑀺𑀓𑁆𑀔𑀼𑀲𑀗𑁆𑀖𑁂 𑀆𑀕𑀢𑁂 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸, ‘‘𑀇𑀫𑁂 𑀦𑀸𑀫 𑀧𑀭𑀺𑀯𑀺𑀲𑀦𑁆𑀢𑀽’’𑀢𑀺 𑀅𑀯𑀺𑀘𑀸𑀭𑁂𑀢𑁆𑀯𑀸𑀯 𑀲𑀢𑁆𑀢𑀸𑀳𑀁 𑀲𑀬𑀫𑁂𑀯 𑀧𑀭𑀺𑀯𑀺𑀲𑀺𑀢𑁆𑀯𑀸 𑀅𑀝𑁆𑀞𑀫𑁂 𑀤𑀺𑀯𑀲𑁂 𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑁄 𑀧𑀫𑀚𑁆𑀚𑀫𑀓𑀸𑀲𑀺. 𑀭𑀸𑀚𑀓𑀼𑀮𑁂 𑀦𑀸𑀫 𑀅𑀦𑀸𑀡𑀢𑁆𑀢𑀸 𑀆𑀲𑀦𑀸𑀦𑀺 𑀧𑀜𑁆𑀜𑀸𑀧𑁂𑀢𑁆𑀯𑀸 𑀪𑀺𑀓𑁆𑀔𑀽 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀧𑀭𑀺𑀯𑀺𑀲𑀺𑀢𑀼𑀁 𑀦 𑀮𑀪𑀦𑁆𑀢𑀺 ‘‘𑀦 𑀫𑀬𑀁 𑀇𑀥 𑀞𑀸𑀢𑀼𑀁 𑀲𑀓𑁆𑀔𑀺𑀲𑁆𑀲𑀸𑀫𑀸’’𑀢𑀺 𑀩𑀳𑀽 𑀪𑀺𑀓𑁆𑀔𑀽 𑀧𑀓𑁆𑀓𑀫𑀺𑀁𑀲𑀼. 𑀭𑀸𑀚𑀸 𑀤𑀼𑀢𑀺𑀬𑀤𑀺𑀯𑀲𑁂𑀧𑀺 𑀧𑀫𑀚𑁆𑀚𑀺, 𑀤𑀼𑀢𑀺𑀬𑀤𑀺𑀯𑀲𑁂𑀧𑀺 𑀩𑀳𑀽 𑀪𑀺𑀓𑁆𑀔𑀽 𑀧𑀓𑁆𑀓𑀫𑀺𑀁𑀲𑀼. 𑀢𑀢𑀺𑀬𑀤𑀺𑀯𑀲𑁂𑀧𑀺 𑀧𑀫𑀚𑁆𑀚𑀺, 𑀢𑀤𑀸 𑀆𑀦𑀦𑁆𑀤𑀢𑁆𑀣𑁂𑀭𑀁 𑀏𑀓𑀓𑀫𑁂𑀯 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑀸 𑀧𑀓𑁆𑀓𑀫𑀺𑀁𑀲𑀼. 𑀧𑀼𑀜𑁆𑀜𑀯𑀦𑁆𑀢𑀸 𑀦𑀸𑀫 𑀓𑀸𑀭𑀡𑀯𑀲𑀺𑀓𑀸 𑀳𑁄𑀦𑁆𑀢𑀺, 𑀓𑀼𑀮𑀸𑀦𑀁 𑀧𑀲𑀸𑀤𑀁 𑀭𑀓𑁆𑀔𑀦𑁆𑀢𑀺. 𑀢𑀣𑀸𑀕𑀢𑀲𑁆𑀲 𑀘 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑁄𑀢𑀺 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑀸, 𑀔𑁂𑀫𑀸 𑀉𑀧𑁆𑀧𑀮𑀯𑀡𑁆𑀡𑀸𑀢𑀺 𑀤𑁆𑀯𑁂 𑀅𑀕𑁆𑀕𑀲𑀸𑀯𑀺𑀓𑀸, 𑀉𑀧𑀸𑀲𑀓𑁂𑀲𑀼 𑀘𑀺𑀢𑁆𑀢𑁄, 𑀕𑀳𑀧𑀢𑀺, 𑀳𑀢𑁆𑀣𑀓𑁄 𑀆𑀴𑀯𑀓𑁄𑀢𑀺 𑀤𑁆𑀯𑁂 𑀅𑀕𑁆𑀕𑀉𑀧𑀸𑀲𑀓𑀸, 𑀉𑀧𑀸𑀲𑀺𑀓𑀸𑀲𑀼 𑀯𑁂𑀴𑀼𑀓𑀡𑁆𑀞𑀓𑀻 𑀦𑀦𑁆𑀤𑀫𑀸𑀢𑀸, 𑀔𑀼𑀚𑁆𑀚𑀼𑀢𑁆𑀢𑀭𑀸𑀢𑀺 𑀤𑁆𑀯𑁂 𑀅𑀕𑁆𑀕𑀉𑀧𑀸𑀲𑀺𑀓𑀸, 𑀇𑀢𑀺 𑀇𑀫𑁂 𑀅𑀝𑁆𑀞 𑀚𑀦𑁂 𑀆𑀤𑀺𑀁 𑀓𑀢𑁆𑀯𑀸 𑀞𑀸𑀦𑀦𑁆𑀢𑀭𑀧𑀢𑁆𑀢𑀸 𑀲𑀩𑁆𑀩𑁂𑀧𑀺 𑀲𑀸𑀯𑀓𑀸 𑀏𑀓𑀤𑁂𑀲𑁂𑀦 𑀤𑀲𑀦𑁆𑀦𑀁 𑀧𑀸𑀭𑀫𑀻𑀦𑀁 𑀧𑀽𑀭𑀺𑀢𑀢𑁆𑀢𑀸 𑀫𑀳𑀸𑀧𑀼𑀜𑁆𑀜𑀸 𑀅𑀪𑀺𑀦𑀻𑀳𑀸𑀭𑀲𑀫𑁆𑀧𑀦𑁆𑀦𑀸. 𑀆𑀦𑀦𑁆𑀤𑀢𑁆𑀣𑁂𑀭𑁄𑀧𑀺 𑀓𑀧𑁆𑀧𑀲𑀢𑀲𑀳𑀲𑁆𑀲𑀁 𑀧𑀽𑀭𑀺𑀢𑀧𑀸𑀭𑀫𑀻 𑀅𑀪𑀺𑀦𑀻𑀳𑀸𑀭𑀲𑀫𑁆𑀧𑀦𑁆𑀦𑁄 𑀫𑀳𑀸𑀧𑀼𑀜𑁆𑀜𑁄 𑀅𑀢𑁆𑀢𑀦𑁄 𑀓𑀸𑀭𑀡𑀯𑀲𑀺𑀓𑀢𑀸𑀬 𑀓𑀼𑀮𑀲𑁆𑀲 𑀧𑀲𑀸𑀤𑀁 𑀭𑀓𑁆𑀔𑀦𑁆𑀢𑁄 𑀅𑀝𑁆𑀞𑀸𑀲𑀺. 𑀢𑀁 𑀏𑀓𑀓𑀫𑁂𑀯 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀧𑀭𑀺𑀯𑀺𑀲𑀺𑀁𑀲𑀼.

𑀭𑀸𑀚𑀸 𑀪𑀺𑀓𑁆𑀔𑀽𑀦𑀁 𑀕𑀢𑀓𑀸𑀮𑁂 𑀆𑀕𑀦𑁆𑀢𑁆𑀯𑀸 𑀔𑀸𑀤𑀦𑀻𑀬𑀪𑁄𑀚𑀦𑀻𑀬𑀸𑀦𑀺 𑀢𑀣𑁂𑀯 𑀞𑀺𑀢𑀸𑀦𑀺 𑀤𑀺𑀲𑁆𑀯𑀸, ‘‘𑀓𑀺𑀁, 𑀅𑀬𑁆𑀬𑀸, 𑀦𑀸𑀕𑀫𑀺𑀁𑀲𑀽’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸, ‘‘𑀆𑀦𑀦𑁆𑀤𑀢𑁆𑀣𑁂𑀭𑁄 𑀏𑀓𑀓𑁄𑀯 𑀆𑀕𑀢𑁄 𑀤𑁂𑀯𑀸’’𑀢𑀺 𑀲𑀼𑀢𑁆𑀯𑀸, ‘‘𑀅𑀤𑁆𑀥𑀸 𑀏𑀢𑁆𑀢𑀓𑀁 𑀫𑁂 𑀪𑀢𑁆𑀢𑀘𑁆𑀙𑁂𑀤𑀦𑀫𑀓𑀁𑀲𑀽’’𑀢𑀺 𑀪𑀺𑀓𑁆𑀔𑀽𑀦𑀁 𑀓𑀼𑀤𑁆𑀥𑁄 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸, ‘‘𑀪𑀦𑁆𑀢𑁂, 𑀫𑀬𑀸 𑀧𑀜𑁆𑀘𑀦𑁆𑀦𑀁 𑀪𑀺𑀓𑁆𑀔𑀼𑀲𑀢𑀸𑀦𑀁 𑀪𑀺𑀓𑁆𑀔𑀸 𑀧𑀝𑀺𑀬𑀢𑁆𑀢𑀸, 𑀆𑀦𑀦𑁆𑀤𑀢𑁆𑀣𑁂𑀭𑁄 𑀓𑀺𑀭 𑀏𑀓𑀓𑁄𑀯𑀸𑀕𑀢𑁄, 𑀧𑀝𑀺𑀬𑀢𑁆𑀢𑀸 𑀪𑀺𑀓𑁆𑀔𑀸 𑀢𑀣𑁂𑀯 𑀞𑀺𑀢𑀸, 𑀧𑀜𑁆𑀘𑀲𑀢𑀸 𑀪𑀺𑀓𑁆𑀔𑀽 𑀫𑀫 𑀕𑁂𑀳𑁂 𑀲𑀜𑁆𑀜𑀁 𑀦 𑀓𑀭𑀺𑀁𑀲𑀼, 𑀓𑀺𑀁 𑀦𑀼 𑀔𑁄 𑀓𑀸𑀭𑀡’’𑀦𑁆𑀢𑀺 𑀆𑀳. 𑀲𑀢𑁆𑀣𑀸 𑀪𑀺𑀓𑁆𑀔𑀽𑀦𑀁 𑀤𑁄𑀲𑀁 𑀅𑀯𑀢𑁆𑀯𑀸, ‘‘𑀫𑀳𑀸𑀭𑀸𑀚, 𑀫𑀫 𑀲𑀸𑀯𑀓𑀸𑀦𑀁 𑀢𑀼𑀫𑁆𑀳𑁂𑀳𑀺 𑀲𑀤𑁆𑀥𑀺𑀁 𑀯𑀺𑀲𑁆𑀲𑀸𑀲𑁄 𑀦𑀢𑁆𑀣𑀺, 𑀢𑁂𑀦 𑀦 𑀕𑀢𑀸 𑀪𑀯𑀺𑀲𑁆𑀲𑀦𑁆𑀢𑀻’’𑀢𑀺 𑀯𑀢𑁆𑀯𑀸 𑀓𑀼𑀮𑀸𑀦𑀁 𑀅𑀦𑀼𑀧𑀕𑀫𑀦𑀓𑀸𑀭𑀡𑀜𑁆𑀘 𑀉𑀧𑀕𑀫𑀦𑀓𑀸𑀭𑀡𑀜𑁆𑀘 𑀧𑀓𑀸𑀲𑁂𑀦𑁆𑀢𑁄 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀢𑁆𑀯𑀸 𑀇𑀫𑀁 𑀲𑀼𑀢𑁆𑀢𑀫𑀸𑀳 𑁋

‘‘𑀦𑀯𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀓𑀼𑀮𑀁 𑀅𑀦𑀼𑀧𑀕𑀦𑁆𑀢𑁆𑀯𑀸 𑀯𑀸 𑀦𑀸𑀮𑀁 𑀉𑀧𑀕𑀦𑁆𑀢𑀼𑀁, 𑀉𑀧𑀕𑀦𑁆𑀢𑁆𑀯𑀸 𑀯𑀸 𑀦𑀸𑀮𑀁 𑀉𑀧𑀦𑀺𑀲𑀻𑀤𑀺𑀢𑀼𑀁. 𑀓𑀢𑀫𑁂𑀳𑀺 𑀦𑀯𑀳𑀺? 𑀦 𑀫𑀦𑀸𑀧𑁂𑀦 𑀧𑀘𑁆𑀘𑀼𑀝𑁆𑀞𑁂𑀦𑁆𑀢𑀺, 𑀦 𑀫𑀦𑀸𑀧𑁂𑀦 𑀅𑀪𑀺𑀯𑀸𑀤𑁂𑀦𑁆𑀢𑀺, 𑀦 𑀫𑀦𑀸𑀧𑁂𑀦 𑀆𑀲𑀦𑀁 𑀤𑁂𑀦𑁆𑀢𑀺, 𑀲𑀦𑁆𑀢𑀫𑀲𑁆𑀲 𑀧𑀭𑀺𑀕𑀼𑀳𑀦𑁆𑀢𑀺, 𑀩𑀳𑀼𑀓𑀫𑁆𑀧𑀺 𑀣𑁄𑀓𑀁 𑀤𑁂𑀦𑁆𑀢𑀺, 𑀧𑀡𑀻𑀢𑀫𑁆𑀧𑀺 𑀮𑀽𑀔𑀁 𑀤𑁂𑀦𑁆𑀢𑀺, 𑀅𑀲𑀓𑁆𑀓𑀘𑁆𑀘𑀁 𑀤𑁂𑀦𑁆𑀢𑀺 𑀦𑁄 𑀲𑀓𑁆𑀓𑀘𑁆𑀘𑀁, 𑀦 𑀉𑀧𑀦𑀺𑀲𑀻𑀤𑀦𑁆𑀢𑀺 𑀥𑀫𑁆𑀫𑀲𑁆𑀲𑀯𑀦𑀸𑀬, 𑀪𑀸𑀲𑀺𑀢𑀫𑀲𑁆𑀲 𑀦 𑀲𑀼𑀲𑁆𑀲𑀽𑀲𑀦𑁆𑀢𑀺. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀦𑀯𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀓𑀼𑀮𑀁 𑀅𑀦𑀼𑀧𑀕𑀦𑁆𑀢𑁆𑀯𑀸 𑀯𑀸 𑀦𑀸𑀮𑀁 𑀉𑀧𑀕𑀦𑁆𑀢𑀼𑀁, 𑀉𑀧𑀕𑀦𑁆𑀢𑁆𑀯𑀸 𑀯𑀸 𑀦𑀸𑀮𑀁 𑀉𑀧𑀦𑀺𑀲𑀻𑀤𑀺𑀢𑀼𑀁.

‘‘𑀦𑀯𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀓𑀼𑀮𑀁 𑀅𑀦𑀼𑀧𑀕𑀦𑁆𑀢𑁆𑀯𑀸 𑀯𑀸 𑀅𑀮𑀁 𑀉𑀧𑀕𑀦𑁆𑀢𑀼𑀁, 𑀉𑀧𑀕𑀦𑁆𑀢𑁆𑀯𑀸 𑀯𑀸 𑀅𑀮𑀁 𑀉𑀧𑀦𑀺𑀲𑀻𑀤𑀺𑀢𑀼𑀁. 𑀓𑀢𑀫𑁂𑀳𑀺 𑀦𑀯𑀳𑀺? 𑀫𑀦𑀸𑀧𑁂𑀦 𑀧𑀘𑁆𑀘𑀼𑀝𑁆𑀞𑁂𑀦𑁆𑀢𑀺, 𑀫𑀦𑀸𑀧𑁂𑀦 𑀅𑀪𑀺𑀯𑀸𑀤𑁂𑀦𑁆𑀢𑀺, 𑀫𑀦𑀸𑀧𑁂𑀦 𑀆𑀲𑀦𑀁 𑀤𑁂𑀦𑁆𑀢𑀺, 𑀲𑀦𑁆𑀢𑀫𑀲𑁆𑀲 𑀦 𑀧𑀭𑀺𑀕𑀼𑀳𑀦𑁆𑀢𑀺, 𑀩𑀳𑀼𑀓𑀫𑁆𑀧𑀺 𑀩𑀳𑀼𑀓𑀁 𑀤𑁂𑀦𑁆𑀢𑀺, 𑀧𑀡𑀻𑀢𑀫𑁆𑀧𑀺 𑀧𑀡𑀻𑀢𑀁 𑀤𑁂𑀦𑁆𑀢𑀺, 𑀲𑀓𑁆𑀓𑀘𑁆𑀘𑀁 𑀤𑁂𑀦𑁆𑀢𑀺 𑀦𑁄 𑀅𑀲𑀓𑁆𑀓𑀘𑁆𑀘𑀁, 𑀉𑀧𑀦𑀺𑀲𑀻𑀤𑀦𑁆𑀢𑀺 𑀥𑀫𑁆𑀫𑀲𑁆𑀲𑀯𑀦𑀸𑀬, 𑀪𑀸𑀲𑀺𑀢𑀫𑀲𑁆𑀲 𑀲𑀼𑀲𑁆𑀲𑀽𑀲𑀦𑁆𑀢𑀺. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀦𑀯𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀓𑀼𑀮𑀁 𑀅𑀦𑀼𑀧𑀕𑀦𑁆𑀢𑁆𑀯𑀸 𑀯𑀸 𑀅𑀮𑀁 𑀉𑀧𑀕𑀦𑁆𑀢𑀼𑀁, 𑀉𑀧𑀕𑀦𑁆𑀢𑁆𑀯𑀸 𑀯𑀸 𑀅𑀮𑀁 𑀉𑀧𑀦𑀺𑀲𑀻𑀤𑀺𑀢𑀼’’𑀦𑁆𑀢𑀺 (𑀅. 𑀦𑀺. 𑁯.𑁧𑁭).

𑀇𑀢𑀺 𑀔𑁄, 𑀫𑀳𑀸𑀭𑀸𑀚, 𑀫𑀫 𑀲𑀸𑀯𑀓𑀸 𑀢𑀼𑀫𑁆𑀳𑀸𑀓𑀁 𑀲𑀦𑁆𑀢𑀺𑀓𑀸 𑀯𑀺𑀲𑁆𑀲𑀸𑀲𑀁 𑀅𑀮𑀪𑀦𑁆𑀢𑀸 𑀦 𑀕𑀢𑀸 𑀪𑀯𑀺𑀲𑁆𑀲𑀦𑁆𑀢𑀻𑀢𑀺. 𑀧𑁄𑀭𑀸𑀡𑀓𑀧𑀡𑁆𑀟𑀺𑀢𑀸𑀧𑀺 𑀳𑀺 𑀅𑀯𑀺𑀲𑁆𑀲𑀸𑀲𑀺𑀓𑀝𑁆𑀞𑀸𑀦𑁂 𑀲𑀓𑁆𑀓𑀘𑁆𑀘𑀁 𑀉𑀧𑀝𑁆𑀞𑀺𑀬𑀫𑀸𑀦𑀸𑀧𑀺 𑀫𑀸𑀭𑀡𑀦𑁆𑀢𑀺𑀓𑀁 𑀯𑁂𑀤𑀦𑀁 𑀧𑀢𑁆𑀯𑀸 𑀯𑀺𑀲𑁆𑀲𑀸𑀲𑀺𑀓𑀝𑁆𑀞𑀸𑀦𑀫𑁂𑀯 𑀅𑀕𑀫𑀺𑀁𑀲𑀽𑀢𑀺. ‘‘𑀓𑀤𑀸, 𑀪𑀦𑁆𑀢𑁂’’𑀢𑀺 𑀭𑀜𑁆𑀜𑀸 𑀧𑀼𑀝𑁆𑀞𑁄 𑀅𑀢𑀻𑀢𑀁 𑀆𑀳𑀭𑀺 𑁋

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀓𑁂𑀲𑀯𑁄 𑀦𑀸𑀫 𑀭𑀸𑀚𑀸 𑀭𑀚𑁆𑀚𑀁 𑀧𑀳𑀸𑀬 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺. 𑀢𑀁 𑀧𑀜𑁆𑀘 𑀧𑀼𑀭𑀺𑀲𑀲𑀢𑀸𑀦𑀺 𑀅𑀦𑀼𑀧𑀩𑁆𑀩𑀚𑀺𑀁𑀲𑀼. 𑀲𑁄 𑀓𑁂𑀲𑀯𑀢𑀸𑀧𑀲𑁄 𑀦𑀸𑀫 𑀅𑀳𑁄𑀲𑀺. 𑀧𑀲𑀸𑀥𑀦𑀓𑀧𑁆𑀧𑀓𑁄 𑀧𑀦𑀲𑁆𑀲 𑀅𑀦𑀼𑀧𑀩𑁆𑀩𑀚𑀺𑀢𑁆𑀯𑀸 𑀓𑀧𑁆𑀧𑀓𑁄 𑀦𑀸𑀫 𑀅𑀦𑁆𑀢𑁂𑀯𑀸𑀲𑀺𑀓𑁄 𑀅𑀳𑁄𑀲𑀺. 𑀓𑁂𑀲𑀯𑀢𑀸𑀧𑀲𑁄 𑀧𑀭𑀺𑀲𑀸𑀬 𑀲𑀤𑁆𑀥𑀺𑀁 𑀅𑀝𑁆𑀞 𑀫𑀸𑀲𑁂 𑀳𑀺𑀫𑀯𑀦𑁆𑀢𑁂 𑀯𑀲𑀺𑀢𑁆𑀯𑀸 𑀯𑀲𑁆𑀲𑀸𑀭𑀢𑁆𑀢𑀲𑀫𑀬𑁂 𑀮𑁄𑀡𑀫𑁆𑀩𑀺𑀮𑀲𑁂𑀯𑀦𑀢𑁆𑀣𑀸𑀬 𑀩𑀸𑀭𑀸𑀡𑀲𑀺𑀁 𑀧𑀢𑁆𑀯𑀸 𑀪𑀺𑀓𑁆𑀔𑀸𑀬 𑀧𑀸𑀯𑀺𑀲𑀺. 𑀅𑀣 𑀦𑀁 𑀭𑀸𑀚𑀸 𑀤𑀺𑀲𑁆𑀯𑀸 𑀧𑀲𑀻𑀤𑀺𑀢𑁆𑀯𑀸 𑀘𑀢𑀼𑀫𑀸𑀲𑀁 𑀅𑀢𑁆𑀢𑀦𑁄 𑀲𑀦𑁆𑀢𑀺𑀓𑁂 𑀯𑀲𑀦𑀢𑁆𑀣𑀸𑀬 𑀧𑀝𑀺𑀜𑁆𑀜𑀁 𑀕𑀳𑁂𑀢𑁆𑀯𑀸 𑀉𑀬𑁆𑀬𑀸𑀦𑁂𑀯 𑀯𑀲𑀸𑀧𑁂𑀦𑁆𑀢𑁄 𑀲𑀬𑀁 𑀲𑀸𑀬𑀁𑀧𑀸𑀢𑀁 𑀅𑀲𑁆𑀲 𑀉𑀧𑀝𑁆𑀞𑀸𑀦𑀁 𑀕𑀘𑁆𑀙𑀢𑀺. 𑀅𑀯𑀲𑁂𑀲𑀸 𑀢𑀸𑀧𑀲𑀸 𑀓𑀢𑀺𑀧𑀸𑀳𑀁 𑀯𑀲𑀺𑀢𑁆𑀯𑀸 𑀳𑀢𑁆𑀣𑀺𑀲𑀤𑁆𑀤𑀸𑀤𑀻𑀳𑀺 𑀉𑀩𑁆𑀩𑀸𑀴𑁆𑀳𑀸 𑀳𑀼𑀢𑁆𑀯𑀸 𑀉𑀓𑁆𑀓𑀡𑁆𑀞𑀺𑀢𑁆𑀯𑀸, ‘‘𑀆𑀘𑀭𑀺𑀬, 𑀉𑀓𑁆𑀓𑀡𑁆𑀞𑀺𑀢𑀫𑁆𑀳𑀸, 𑀕𑀘𑁆𑀙𑀸𑀫𑀸’’𑀢𑀺 𑀆𑀳𑀁𑀲𑀼. ‘‘𑀓𑀳𑀁, 𑀢𑀸𑀢𑀸’’𑀢𑀺? ‘‘𑀳𑀺𑀫𑀯𑀦𑁆𑀢𑀁, 𑀆𑀘𑀭𑀺𑀬𑀸’’𑀢𑀺. 𑀭𑀸𑀚𑀸 𑀅𑀫𑁆𑀳𑀸𑀓𑀁 𑀆𑀕𑀢𑀤𑀺𑀯𑀲𑁂𑀬𑁂𑀯 𑀘𑀢𑀼𑀫𑀸𑀲𑀁 𑀇𑀥 𑀯𑀲𑀦𑀢𑁆𑀣𑀸𑀬 𑀧𑀝𑀺𑀜𑁆𑀜𑀁 𑀕𑀡𑁆𑀳𑀺. ‘‘𑀓𑀣𑀁 𑀕𑀫𑀺𑀲𑁆𑀲𑀣, 𑀢𑀸𑀢𑀸’’𑀢𑀺? ‘‘𑀢𑀼𑀫𑁆𑀳𑁂𑀳𑀺 𑀅𑀫𑁆𑀳𑀸𑀓𑀁 𑀅𑀦𑀸𑀘𑀺𑀓𑁆𑀔𑀺𑀢𑁆𑀯𑀸𑀯 𑀧𑀝𑀺𑀜𑁆𑀜𑀸 𑀤𑀺𑀦𑁆𑀦𑀸, 𑀫𑀬𑀁 𑀇𑀥 𑀦 𑀲𑀓𑁆𑀓𑁄𑀫 𑀯𑀲𑀺𑀢𑀼𑀁, 𑀇𑀢𑁄 𑀅𑀯𑀺𑀤𑀽𑀭𑁂 𑀢𑀼𑀫𑁆𑀳𑀸𑀓𑀁 𑀧𑀯𑀢𑁆𑀢𑀺𑀲𑁆𑀲𑀯𑀦𑀝𑁆𑀞𑀸𑀦𑁂 𑀯𑀲𑀺𑀲𑁆𑀲𑀸𑀫𑀸’’𑀢𑀺 𑀯𑀦𑁆𑀤𑀺𑀢𑁆𑀯𑀸 𑀧𑀓𑁆𑀓𑀫𑀺𑀁𑀲𑀼. 𑀓𑀧𑁆𑀧𑀦𑁆𑀢𑁂𑀯𑀸𑀲𑀺𑀓𑁂𑀦 𑀲𑀤𑁆𑀥𑀺𑀁 𑀆𑀘𑀭𑀺𑀬𑁄 𑀑𑀳𑀻𑀬𑀺.

𑀭𑀸𑀚𑀸 𑀉𑀧𑀝𑁆𑀞𑀸𑀦𑀁 𑀆𑀕𑀢𑁄, ‘‘𑀓𑀳𑀁, 𑀅𑀬𑁆𑀬𑀸’’𑀢𑀺 𑀧𑀼𑀘𑁆𑀙𑀺. ‘‘𑀲𑀩𑁆𑀩𑁂 𑀉𑀓𑁆𑀓𑀡𑁆𑀞𑀺𑀢𑀫𑁆𑀳𑀸𑀢𑀺 𑀯𑀢𑁆𑀯𑀸 𑀳𑀺𑀫𑀯𑀦𑁆𑀢𑀁 𑀕𑀢𑀸, 𑀫𑀳𑀸𑀭𑀸𑀚𑀸’’𑀢𑀺 𑀆𑀳. 𑀓𑀧𑁆𑀧𑀓𑁄𑀧𑀺 𑀦 𑀘𑀺𑀭𑀲𑁆𑀲𑁂𑀯 𑀉𑀓𑁆𑀓𑀡𑁆𑀞𑀺𑀢𑁆𑀯𑀸 𑀆𑀘𑀭𑀺𑀬𑁂𑀦 𑀧𑀼𑀦𑀧𑁆𑀧𑀼𑀦𑀁 𑀯𑀸𑀭𑀺𑀬𑀫𑀸𑀦𑁄𑀧𑀺 ‘‘𑀦 𑀲𑀓𑁆𑀓𑁄𑀫𑀻’’𑀢𑀺 𑀯𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀇𑀢𑀭𑁂𑀲𑀁 𑀧𑀦 𑀲𑀦𑁆𑀢𑀺𑀓𑀁 𑀅𑀕𑀦𑁆𑀢𑁆𑀯𑀸 𑀆𑀘𑀭𑀺𑀬𑀲𑁆𑀲 𑀧𑀯𑀢𑁆𑀢𑀺𑀁 𑀲𑀼𑀡𑀦𑁆𑀢𑁄 𑀅𑀯𑀺𑀤𑀽𑀭𑁂 𑀞𑀸𑀦𑁂 𑀯𑀲𑀺. 𑀅𑀧𑀭𑀪𑀸𑀕𑁂 𑀆𑀘𑀭𑀺𑀬𑀲𑁆𑀲 𑀅𑀦𑁆𑀢𑁂𑀯𑀸𑀲𑀺𑀓𑁂 𑀅𑀦𑀼𑀲𑁆𑀲𑀭𑀦𑁆𑀢𑀲𑁆𑀲 𑀓𑀼𑀘𑁆𑀙𑀺𑀭𑁄𑀕𑁄 𑀉𑀧𑁆𑀧𑀚𑁆𑀚𑀺. 𑀭𑀸𑀚𑀸 𑀯𑁂𑀚𑁆𑀚𑁂𑀳𑀺 𑀢𑀺𑀓𑀺𑀘𑁆𑀙𑀸𑀧𑁂𑀲𑀺, 𑀭𑁄𑀕𑁄 𑀦 𑀯𑀽𑀧𑀲𑀫𑁆𑀫𑀢𑀺. 𑀢𑀸𑀧𑀲𑁄 𑀆𑀳 𑁋 ‘‘𑀓𑀺𑀁, 𑀫𑀳𑀸𑀭𑀸𑀚, 𑀇𑀘𑁆𑀙𑀲𑀺 𑀫𑁂 𑀭𑁄𑀕𑀯𑀽𑀧𑀲𑀫’’𑀦𑁆𑀢𑀺? ‘‘𑀪𑀦𑁆𑀢𑁂, 𑀲𑀘𑀸𑀳𑀁 𑀲𑀓𑁆𑀓𑀼𑀡𑁂𑀬𑁆𑀬𑀁, 𑀇𑀤𑀸𑀦𑁂𑀯 𑀯𑁄 𑀨𑀸𑀲𑀼𑀓𑀁 𑀓𑀭𑁂𑀬𑁆𑀬’’𑀦𑁆𑀢𑀺. ‘‘𑀫𑀳𑀸𑀭𑀸𑀚, 𑀲𑀘𑁂 𑀫𑁂 𑀨𑀸𑀲𑀼𑀓𑀁 𑀇𑀘𑁆𑀙𑀲𑀺, 𑀫𑀁 𑀅𑀦𑁆𑀢𑁂𑀯𑀸𑀲𑀺𑀓𑀸𑀦𑀁 𑀲𑀦𑁆𑀢𑀺𑀓𑀁 𑀧𑁂𑀲𑁂𑀳𑀻’’𑀢𑀺. 𑀭𑀸𑀚𑀸 ‘‘𑀲𑀸𑀥𑀼, 𑀪𑀦𑁆𑀢𑁂’’𑀢𑀺 𑀢𑀁 𑀫𑀜𑁆𑀘𑀓𑁂 𑀦𑀺𑀧𑀚𑁆𑀚𑀸𑀧𑁂𑀢𑁆𑀯𑀸 𑀦𑀸𑀭𑀤𑀅𑀫𑀘𑁆𑀘𑀧𑁆𑀧𑀫𑀼𑀔𑁂 𑀘𑀢𑁆𑀢𑀸𑀭𑁄 𑀅𑀫𑀘𑁆𑀘𑁂 ‘‘𑀫𑀫 𑀅𑀬𑁆𑀬𑀲𑁆𑀲 𑀧𑀯𑀢𑁆𑀢𑀺𑀁 𑀜𑀢𑁆𑀯𑀸, 𑀫𑀬𑁆𑀳𑀁 𑀲𑀸𑀲𑀦𑀁 𑀧𑀳𑀺𑀡𑁂𑀬𑁆𑀬𑀸𑀣𑀸’’𑀢𑀺 𑀉𑀬𑁆𑀬𑁄𑀚𑁂𑀲𑀺. 𑀓𑀧𑁆𑀧𑀦𑁆𑀢𑁂𑀯𑀸𑀲𑀺𑀓𑁄 𑀆𑀘𑀭𑀺𑀬𑀲𑁆𑀲 𑀆𑀕𑀫𑀦𑀁 𑀲𑀼𑀢𑁆𑀯𑀸 𑀧𑀘𑁆𑀘𑀼𑀕𑁆𑀕𑀫𑀦𑀁 𑀓𑀢𑁆𑀯𑀸 𑀇𑀢𑀭𑁂 ‘‘𑀓𑀳’’𑀦𑁆𑀢𑀺 𑀯𑀼𑀢𑁆𑀢𑁂, ‘‘𑀅𑀲𑀼𑀓𑀝𑁆𑀞𑀸𑀦𑁂 𑀓𑀺𑀭 𑀯𑀲𑀦𑁆𑀢𑀻’’𑀢𑀺 𑀆𑀳. 𑀢𑁂𑀧𑀺 𑀆𑀘𑀭𑀺𑀬𑀲𑁆𑀲𑀸𑀕𑀫𑀦𑀪𑀸𑀯𑀁 𑀲𑀼𑀢𑁆𑀯𑀸 𑀢𑀢𑁆𑀣𑁂𑀯 𑀲𑀫𑁄𑀲𑀭𑀺𑀢𑁆𑀯𑀸 𑀆𑀘𑀭𑀺𑀬𑀲𑁆𑀲 𑀉𑀡𑁆𑀳𑁄𑀤𑀓𑀁 𑀤𑀢𑁆𑀯𑀸 𑀨𑀮𑀸𑀨𑀮𑀁 𑀅𑀤𑀁𑀲𑀼. 𑀢𑀁 𑀔𑀡𑀜𑁆𑀜𑁂𑀯 𑀭𑁄𑀕𑁄 𑀯𑀽𑀧𑀲𑀫𑁆𑀫𑀢𑀺. 𑀲𑁄 𑀓𑀢𑀺𑀧𑀸𑀳𑁂𑀦𑁂𑀯 𑀲𑀼𑀯𑀡𑁆𑀡𑀯𑀡𑁆𑀡𑁄 𑀅𑀳𑁄𑀲𑀺. 𑀅𑀣 𑀦𑀁 𑀦𑀸𑀭𑀤𑁄 𑀧𑀼𑀘𑁆𑀙𑀺 𑁋

‘‘𑀫𑀦𑀼𑀲𑁆𑀲𑀺𑀦𑁆𑀤𑀁 𑀚𑀳𑀺𑀢𑁆𑀯𑀸𑀦, 𑀲𑀩𑁆𑀩𑀓𑀸𑀫𑀲𑀫𑀺𑀤𑁆𑀥𑀺𑀦𑀁;

𑀓𑀣𑀁 𑀦𑀼 𑀪𑀕𑀯𑀸 𑀓𑁂𑀲𑀻, 𑀓𑀧𑁆𑀧𑀲𑁆𑀲 𑀭𑀫𑀢𑀺 𑀅𑀲𑁆𑀲𑀫𑁂.

‘‘𑀲𑀸𑀤𑀽𑀦𑀺 𑀭𑀫𑀡𑀻𑀬𑀸𑀦𑀺, 𑀲𑀦𑁆𑀢𑀺 𑀯𑀓𑁆𑀔𑀸 𑀫𑀦𑁄𑀭𑀫𑀸;

𑀲𑀼𑀪𑀸𑀲𑀺𑀢𑀸𑀦𑀺 𑀓𑀧𑁆𑀧𑀲𑁆𑀲, 𑀦𑀸𑀭𑀤 𑀭𑀫𑀬𑀦𑁆𑀢𑀺 𑀫𑀁.

‘‘𑀲𑀸𑀮𑀻𑀦𑀁 𑀑𑀤𑀦𑀁 𑀪𑀼𑀜𑁆𑀚𑁂, 𑀲𑀼𑀘𑀺𑀁 𑀫𑀁𑀲𑀽𑀧𑀲𑁂𑀘𑀦𑀁;

𑀓𑀣𑀁 𑀲𑀸𑀫𑀸𑀓𑀦𑀻𑀯𑀸𑀭𑀁, 𑀅𑀮𑁄𑀡𑀁 𑀙𑀸𑀤𑀬𑀦𑁆𑀢𑀺 𑀢𑀁.

‘‘𑀲𑀸𑀤𑀼𑀁 𑀯𑀸 𑀬𑀤𑀺 𑀯𑀸𑀲𑀸𑀤𑀼𑀁, 𑀅𑀧𑁆𑀧𑀁 𑀯𑀸 𑀬𑀤𑀺 𑀯𑀸 𑀩𑀳𑀼𑀁;

𑀯𑀺𑀲𑁆𑀲𑀢𑁆𑀣𑁄 𑀬𑀢𑁆𑀣 𑀪𑀼𑀜𑁆𑀚𑁂𑀬𑁆𑀬, 𑀯𑀺𑀲𑁆𑀲𑀸𑀲𑀧𑀭𑀫𑀸 𑀭𑀲𑀸’’𑀢𑀺. (𑀚𑀸. 𑁧.𑁪.𑁧𑁮𑁧-𑁧𑁮𑁪);

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀦𑁆𑀢𑁄 ‘‘𑀢𑀤𑀸 𑀭𑀸𑀚𑀸 𑀫𑁄𑀕𑁆𑀕𑀮𑁆𑀮𑀸𑀦𑁄 𑀅𑀳𑁄𑀲𑀺, 𑀦𑀸𑀭𑀤𑁄 𑀲𑀸𑀭𑀺𑀧𑀼𑀢𑁆𑀢𑁄, 𑀓𑀧𑁆𑀧𑀦𑁆𑀢𑁂𑀯𑀸𑀲𑀺𑀓𑁄 𑀆𑀦𑀦𑁆𑀤𑁄, 𑀓𑁂𑀲𑀯𑀢𑀸𑀧𑀲𑁄 𑀅𑀳𑀫𑁂𑀯𑀸’’𑀢𑀺 𑀯𑀢𑁆𑀯𑀸, ‘‘𑀏𑀯𑀁, 𑀫𑀳𑀸𑀭𑀸𑀚, 𑀧𑀼𑀩𑁆𑀩𑁂𑀧𑀺 𑀧𑀡𑁆𑀟𑀺𑀢𑀸 𑀫𑀸𑀭𑀡𑀦𑁆𑀢𑀺𑀓𑀁 𑀯𑁂𑀤𑀦𑀁 𑀧𑀢𑁆𑀯𑀸 𑀯𑀺𑀲𑁆𑀲𑀸𑀲𑀺𑀓𑀝𑁆𑀞𑀸𑀦𑀁 𑀕𑀫𑀺𑀁𑀲𑀼, 𑀫𑀫 𑀲𑀸𑀯𑀓𑀸 𑀢𑀼𑀫𑁆𑀳𑀸𑀓𑀁 𑀲𑀦𑁆𑀢𑀺𑀓𑁂 𑀯𑀺𑀲𑁆𑀲𑀸𑀲𑀁 𑀦 𑀮𑀪𑀦𑁆𑀢𑀺 𑀫𑀜𑁆𑀜𑁂’’𑀢𑀺 𑀆𑀳. 𑀭𑀸𑀚𑀸 ‘‘𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀫𑀬𑀸 𑀯𑀺𑀲𑁆𑀲𑀸𑀲𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺, 𑀓𑀣𑀁 𑀦𑀼 𑀔𑁄 𑀓𑀭𑀺𑀲𑁆𑀲𑀸𑀫𑀻𑀢𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀜𑀸𑀢𑀺𑀥𑀻𑀢𑀭𑀁 𑀫𑀫 𑀕𑁂𑀳𑁂 𑀓𑀸𑀢𑀼𑀁 𑀯𑀝𑁆𑀝𑀢𑀺, 𑀏𑀯𑀁 𑀲𑀦𑁆𑀢𑁂 ‘𑀤𑀳𑀭𑀸 𑀘 𑀲𑀸𑀫𑀡𑁂𑀭𑀸 𑀘 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀜𑀸𑀢𑀺𑀭𑀸𑀚𑀸’𑀢𑀺 𑀫𑀫 𑀲𑀦𑁆𑀢𑀺𑀓𑀁 𑀯𑀺𑀲𑁆𑀲𑀢𑁆𑀣𑀸 𑀦𑀺𑀩𑀤𑁆𑀥𑀁 𑀆𑀕𑀫𑀺𑀲𑁆𑀲𑀦𑁆𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑁋 ‘‘𑀏𑀓𑀁 𑀫𑁂 𑀥𑀻𑀢𑀭𑀁 𑀤𑁂𑀦𑁆𑀢𑀽’’𑀢𑀺 𑀲𑀸𑀓𑀺𑀬𑀸𑀦𑀁 𑀲𑀦𑁆𑀢𑀺𑀓𑀁 𑀲𑀸𑀲𑀦𑀁 𑀧𑁂𑀲𑁂𑀲𑀺. ‘‘𑀓𑀢𑀭𑀲𑁆𑀲 𑀲𑀓𑁆𑀬𑀲𑁆𑀲 𑀥𑀻𑀢𑀸’’𑀢𑀺 𑀘 𑀧𑀼𑀘𑁆𑀙𑀺𑀢𑁆𑀯𑀸, ‘‘𑀜𑀢𑁆𑀯𑀸 𑀆𑀕𑀘𑁆𑀙𑁂𑀬𑁆𑀬𑀸𑀣𑀸’’𑀢𑀺 𑀯𑀢𑁆𑀯𑀸 𑀤𑀽𑀢𑁂 𑀆𑀡𑀸𑀧𑁂𑀲𑀺. 𑀤𑀽𑀢𑀸 𑀕𑀦𑁆𑀢𑁆𑀯𑀸 𑀲𑀸𑀓𑀺𑀬𑁂 𑀤𑀸𑀭𑀺𑀓𑀁 𑀬𑀸𑀘𑀺𑀁𑀲𑀼. 𑀢𑁂 𑀲𑀦𑁆𑀦𑀺𑀧𑀢𑀺𑀢𑁆𑀯𑀸, ‘‘𑀧𑀓𑁆𑀔𑀦𑁆𑀢𑀭𑀺𑀓𑁄 𑀭𑀸𑀚𑀸, 𑀲𑀘𑁂 𑀦 𑀤𑀲𑁆𑀲𑀸𑀫, 𑀯𑀺𑀦𑀸𑀲𑁂𑀲𑁆𑀲𑀢𑀺 𑀦𑁄, 𑀦 𑀔𑁄 𑀧𑀦 𑀅𑀫𑁆𑀳𑁂𑀳𑀺 𑀓𑀼𑀮𑁂𑀦 𑀲𑀤𑀺𑀲𑁄, 𑀓𑀺𑀁 𑀦𑀼 𑀔𑁄 𑀓𑀸𑀢𑀩𑁆𑀩’’𑀦𑁆𑀢𑀺 𑀫𑀦𑁆𑀢𑀬𑀺𑀁𑀲𑀼. 𑀫𑀳𑀸𑀦𑀸𑀫𑁄 ‘‘𑀫𑀫 𑀤𑀸𑀲𑀺𑀬𑀸 𑀓𑀼𑀘𑁆𑀙𑀺𑀫𑁆𑀳𑀺 𑀚𑀸𑀢𑀸 𑀯𑀸𑀲𑀪𑀔𑀢𑁆𑀢𑀺𑀬𑀸 𑀦𑀸𑀫 𑀥𑀻𑀢𑀸 𑀭𑀽𑀧𑀲𑁄𑀪𑀕𑁆𑀕𑀧𑁆𑀧𑀢𑁆𑀢𑀸 𑀅𑀢𑁆𑀣𑀺, 𑀢𑀁 𑀤𑀲𑁆𑀲𑀸𑀫𑀸’’𑀢𑀺 𑀯𑀢𑁆𑀯𑀸 𑀤𑀽𑀢𑁂 𑀆𑀳 𑁋 ‘‘𑀲𑀸𑀥𑀼, 𑀭𑀜𑁆𑀜𑁄 𑀤𑀸𑀭𑀺𑀓𑀁 𑀤𑀲𑁆𑀲𑀸𑀫𑀸’’𑀢𑀺. ‘‘𑀲𑀸 𑀓𑀲𑁆𑀲, 𑀥𑀻𑀢𑀸’’𑀢𑀺? ‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀘𑀽𑀴𑀧𑀺𑀢𑀼𑀧𑀼𑀢𑁆𑀢𑀲𑁆𑀲 𑀫𑀳𑀸𑀦𑀸𑀫𑀲𑁆𑀲 𑀲𑀓𑁆𑀓𑀲𑁆𑀲 𑀥𑀻𑀢𑀸 𑀯𑀸𑀲𑀪𑀔𑀢𑁆𑀢𑀺𑀬𑀸 𑀦𑀸𑀫𑀸’’𑀢𑀺.

𑀢𑁂 𑀕𑀦𑁆𑀢𑁆𑀯𑀸 𑀭𑀜𑁆𑀜𑁄 𑀆𑀭𑁄𑀘𑀬𑀺𑀁𑀲𑀼. 𑀭𑀸𑀚𑀸 ‘‘𑀬𑀤𑀺 𑀏𑀯𑀁, 𑀲𑀸𑀥𑀼, 𑀲𑀻𑀖𑀁 𑀆𑀦𑁂𑀣, 𑀔𑀢𑁆𑀢𑀺𑀬𑀸 𑀘 𑀦𑀸𑀫 𑀩𑀳𑀼𑀫𑀸𑀬𑀸, 𑀤𑀸𑀲𑀺𑀥𑀻𑀢𑀭𑀫𑁆𑀧𑀺 𑀧𑀳𑀺𑀡𑁂𑀬𑁆𑀬𑀼𑀁, 𑀧𑀺𑀢𑀭𑀸 𑀲𑀤𑁆𑀥𑀺𑀁 𑀏𑀓𑀪𑀸𑀚𑀦𑁂 𑀪𑀼𑀜𑁆𑀚𑀦𑁆𑀢𑀺𑀁 𑀆𑀦𑁂𑀬𑁆𑀬𑀸𑀣𑀸’’𑀢𑀺 𑀧𑁂𑀲𑁂𑀲𑀺. 𑀢𑁂 𑀕𑀦𑁆𑀢𑁆𑀯𑀸, ‘‘𑀤𑁂𑀯, 𑀢𑀼𑀫𑁆𑀳𑁂𑀳𑀺 𑀲𑀤𑁆𑀥𑀺𑀁 𑀏𑀓𑀢𑁄 𑀪𑀼𑀜𑁆𑀚𑀦𑁆𑀢𑀺𑀁 𑀭𑀸𑀚𑀸 𑀇𑀘𑁆𑀙𑀢𑀻’’𑀢𑀺 𑀆𑀳𑀁𑀲𑀼. 𑀫𑀳𑀸𑀦𑀸𑀫𑁄 ‘‘𑀲𑀸𑀥𑀼, 𑀢𑀸𑀢𑀸’’𑀢𑀺 𑀢𑀁 𑀅𑀮𑀗𑁆𑀓𑀸𑀭𑀸𑀧𑁂𑀢𑁆𑀯𑀸 𑀅𑀢𑁆𑀢𑀦𑁄 𑀪𑁄𑀚𑀦𑀓𑀸𑀮𑁂 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀢𑀸𑀬 𑀲𑀤𑁆𑀥𑀺𑀁 𑀏𑀓𑀢𑁄 𑀪𑀼𑀜𑁆𑀚𑀦𑀸𑀓𑀸𑀭𑀁 𑀤𑀲𑁆𑀲𑁂𑀢𑁆𑀯𑀸 𑀤𑀽𑀢𑀸𑀦𑀁 𑀦𑀺𑀬𑁆𑀬𑀸𑀤𑁂𑀲𑀺. 𑀢𑁂 𑀢𑀁 𑀆𑀤𑀸𑀬 𑀲𑀸𑀯𑀢𑁆𑀣𑀺𑀁 𑀕𑀦𑁆𑀢𑁆𑀯𑀸 𑀢𑀁 𑀧𑀯𑀢𑁆𑀢𑀺𑀁 𑀭𑀜𑁆𑀜𑁄 𑀆𑀭𑁄𑀘𑁂𑀲𑀼𑀁. 𑀭𑀸𑀚𑀸 𑀢𑀼𑀝𑁆𑀞𑀫𑀸𑀦𑀲𑁄 𑀢𑀁 𑀧𑀜𑁆𑀘𑀦𑁆𑀦𑀁 𑀇𑀢𑁆𑀣𑀺𑀲𑀢𑀸𑀦𑀁 𑀚𑁂𑀝𑁆𑀞𑀺𑀓𑀁 𑀓𑀢𑁆𑀯𑀸 𑀅𑀕𑁆𑀕𑀫𑀳𑁂𑀲𑀺𑀝𑁆𑀞𑀸𑀦𑁂 𑀅𑀪𑀺𑀲𑀺𑀜𑁆𑀘𑀺. 𑀲𑀸 𑀦 𑀘𑀺𑀭𑀲𑁆𑀲𑁂𑀯 𑀲𑀼𑀯𑀡𑁆𑀡𑀯𑀡𑁆𑀡𑀁 𑀧𑀼𑀢𑁆𑀢𑀁 𑀯𑀺𑀚𑀸𑀬𑀺.

𑀅𑀣𑀲𑁆𑀲 𑀦𑀸𑀫𑀕𑁆𑀕𑀳𑀡𑀤𑀺𑀯𑀲𑁂 𑀭𑀸𑀚𑀸 𑀤𑀸𑀭𑀓𑀲𑁆𑀲 𑀅𑀬𑁆𑀬𑀓𑀲𑁆𑀲 𑀲𑀦𑁆𑀢𑀺𑀓𑀁 𑀧𑁂𑀲𑁂𑀲𑀺 ‘‘𑀲𑀓𑁆𑀬𑀭𑀸𑀚𑀥𑀻𑀢𑀸 𑀯𑀸𑀲𑀪𑀔𑀢𑁆𑀢𑀺𑀬𑀸 𑀧𑀼𑀢𑁆𑀢𑀁 𑀯𑀺𑀚𑀸𑀢𑀸, 𑀓𑀺𑀫𑀲𑁆𑀲 𑀦𑀸𑀫𑀁 𑀓𑀭𑁄𑀫𑀸’’𑀢𑀺? 𑀢𑀁 𑀧𑀦 𑀲𑀸𑀲𑀦𑀁 𑀕𑀳𑁂𑀢𑁆𑀯𑀸 𑀕𑀢𑁄 𑀅𑀫𑀘𑁆𑀘𑁄 𑀣𑁄𑀓𑀁 𑀩𑀥𑀺𑀭𑀥𑀸𑀢𑀼𑀓𑁄, 𑀲𑁄 𑀕𑀦𑁆𑀢𑁆𑀯𑀸 𑀭𑀜𑁆𑀜𑁄 𑀅𑀬𑁆𑀬𑀓𑀲𑁆𑀲 𑀆𑀭𑁄𑀘𑁂𑀲𑀺, 𑀲𑁄 𑀢𑀁 𑀲𑀼𑀢𑁆𑀯𑀸 ‘‘𑀯𑀸𑀲𑀪𑀔𑀢𑁆𑀢𑀺𑀬𑀸 𑀧𑀼𑀢𑁆𑀢𑀁 𑀅𑀯𑀺𑀚𑀸𑀬𑀺𑀢𑁆𑀯𑀸𑀧𑀺 𑀲𑀩𑁆𑀩𑀚𑀦𑀁 𑀅𑀪𑀺𑀪𑀯𑀺, 𑀇𑀤𑀸𑀦𑀺 𑀧𑀦 𑀭𑀜𑁆𑀜𑁄 𑀅𑀢𑀺𑀯𑀺𑀬 𑀯𑀮𑁆𑀮𑀪𑀸 𑀪𑀯𑀺𑀲𑁆𑀲𑀢𑀻’’𑀢𑀺 𑀆𑀳. 𑀩𑀥𑀺𑀭𑁄 𑀅𑀫𑀘𑁆𑀘𑁄 ‘‘𑀯𑀮𑁆𑀮𑀪𑀸’’𑀢𑀺 𑀯𑀘𑀦𑀁 𑀤𑀼𑀲𑁆𑀲𑀼𑀢𑀁 𑀲𑀼𑀢𑁆𑀯𑀸 ‘‘𑀯𑀺𑀝𑀝𑀽𑀪𑁄’’𑀢𑀺 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀭𑀸𑀚𑀸𑀦𑀁 𑀉𑀧𑀕𑀦𑁆𑀢𑁆𑀯𑀸, ‘‘𑀤𑁂𑀯, 𑀓𑀼𑀫𑀸𑀭𑀲𑁆𑀲 𑀓𑀺𑀭 ‘𑀯𑀺𑀝𑀝𑀽𑀪𑁄’𑀢𑀺 𑀦𑀸𑀫𑀁 𑀓𑀭𑁄𑀣𑀸’’𑀢𑀺 𑀆𑀳. 𑀭𑀸𑀚𑀸 ‘‘𑀧𑁄𑀭𑀸𑀡𑀓𑀁 𑀦𑁄 𑀓𑀼𑀮𑀲𑀦𑁆𑀢𑀓𑀁 𑀦𑀸𑀫𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀢𑀁 𑀦𑀸𑀫𑀁 𑀅𑀓𑀸𑀲𑀺. 𑀅𑀣𑀲𑁆𑀲 𑀤𑀳𑀭𑀓𑀸𑀮𑁂𑀬𑁂𑀯 𑀭𑀸𑀚𑀸 ‘‘𑀲𑀢𑁆𑀣𑀼 𑀧𑀺𑀬𑀁 𑀓𑀭𑁄𑀫𑀻’’𑀢𑀺 𑀲𑁂𑀦𑀸𑀧𑀢𑀺𑀝𑁆𑀞𑀸𑀦𑀁 𑀅𑀤𑀸𑀲𑀺.

𑀲𑁄 𑀓𑀼𑀫𑀸𑀭𑀧𑀭𑀺𑀳𑀸𑀭𑁂𑀦 𑀯𑀟𑁆𑀠𑀦𑁆𑀢𑁄 𑀲𑀢𑁆𑀢𑀯𑀲𑁆𑀲𑀺𑀓𑀓𑀸𑀮𑁂 𑀅𑀜𑁆𑀜𑁂𑀲𑀁 𑀓𑀼𑀫𑀸𑀭𑀸𑀦𑀁 𑀫𑀸𑀢𑀸𑀫𑀳𑀓𑀼𑀮𑀢𑁄 𑀳𑀢𑁆𑀣𑀺𑀭𑀽𑀧𑀓𑀅𑀲𑁆𑀲𑀭𑀽𑀧𑀓𑀸𑀤𑀻𑀦𑀺 𑀆𑀳𑀭𑀺𑀬𑀫𑀸𑀦𑀸𑀦𑀺 𑀤𑀺𑀲𑁆𑀯𑀸 𑀫𑀸𑀢𑀭𑀁 𑀧𑀼𑀘𑁆𑀙𑀺 𑁋 ‘‘𑀅𑀫𑁆𑀫, 𑀅𑀜𑁆𑀜𑁂𑀲𑀁 𑀫𑀸𑀢𑀸𑀫𑀳𑀓𑀼𑀮𑀢𑁄 𑀧𑀡𑁆𑀡𑀸𑀓𑀸𑀭𑁄 𑀆𑀳𑀭𑀻𑀬𑀢𑀺, 𑀫𑀬𑁆𑀳𑀁 𑀓𑁄𑀘𑀺 𑀓𑀺𑀜𑁆𑀘𑀺 𑀦 𑀧𑁂𑀲𑁂𑀲𑀺, 𑀓𑀺𑀁 𑀢𑁆𑀯𑀁 𑀦𑀺𑀫𑀸𑀢𑀸 𑀦𑀺𑀧𑀺𑀢𑀸’’𑀢𑀺? 𑀅𑀣 𑀦𑀁 𑀲𑀸, ‘‘𑀢𑀸𑀢, 𑀢𑀯 𑀲𑀓𑁆𑀬𑀭𑀸𑀚𑀸𑀦𑁄 𑀫𑀸𑀢𑀸𑀫𑀳𑀸 𑀤𑀽𑀭𑁂 𑀧𑀦 𑀯𑀲𑀦𑁆𑀢𑀺, 𑀢𑁂𑀦 𑀢𑁂 𑀓𑀺𑀜𑁆𑀘𑀺 𑀦 𑀧𑁂𑀲𑁂𑀦𑁆𑀢𑀻’’𑀢𑀺 𑀯𑀜𑁆𑀘𑁂𑀲𑀺. 𑀲𑁄𑀴𑀲𑀯𑀲𑁆𑀲𑀺𑀓𑀓𑀸𑀮𑁂, ‘‘𑀅𑀫𑁆𑀫, 𑀢𑀯 𑀫𑀸𑀢𑀸𑀫𑀳𑀓𑀼𑀮𑀁 𑀧𑀲𑁆𑀲𑀺𑀢𑀼𑀓𑀸𑀫𑁄𑀫𑁆𑀳𑀻’’𑀢𑀺 𑀯𑀢𑁆𑀯𑀸, ‘‘𑀅𑀮𑀁, 𑀢𑀸𑀢, 𑀓𑀺𑀁 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀓𑀭𑀺𑀲𑁆𑀲𑀢𑀻’’𑀢𑀺 𑀯𑀸𑀭𑀺𑀬𑀫𑀸𑀦𑁄𑀧𑀺 𑀧𑀼𑀦𑀧𑁆𑀧𑀼𑀦𑀁 𑀬𑀸𑀘𑀺. 𑀅𑀣𑀲𑁆𑀲 𑀫𑀸𑀢𑀸 ‘‘𑀢𑁂𑀦 𑀳𑀺 𑀕𑀘𑁆𑀙𑀸’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺. 𑀲𑁄 𑀧𑀺𑀢𑀼 𑀆𑀭𑁄𑀘𑁂𑀢𑁆𑀯𑀸 𑀫𑀳𑀦𑁆𑀢𑁂𑀦 𑀧𑀭𑀺𑀯𑀸𑀭𑁂𑀦 𑀦𑀺𑀓𑁆𑀔𑀫𑀺. 𑀯𑀸𑀲𑀪𑀔𑀢𑁆𑀢𑀺𑀬𑀸 𑀧𑀼𑀭𑁂𑀢𑀭𑀁 𑀧𑀡𑁆𑀡𑀁 𑀧𑁂𑀲𑁂𑀲𑀺 𑁋 ‘‘𑀅𑀳𑀁 𑀇𑀥 𑀲𑀼𑀔𑀁 𑀯𑀲𑀸𑀫𑀺, 𑀫𑀸𑀲𑁆𑀲 𑀓𑀺𑀜𑁆𑀘𑀺 𑀲𑀸𑀫𑀺𑀦𑁄 𑀅𑀦𑁆𑀢𑀭𑀁 𑀤𑀲𑁆𑀲𑀬𑀺𑀁𑀲𑀽’’𑀢𑀺. 𑀲𑀸𑀓𑀺𑀬𑀸 𑀯𑀺𑀝𑀝𑀽𑀪𑀲𑁆𑀲 𑀆𑀕𑀫𑀦𑀁 𑀜𑀢𑁆𑀯𑀸, ‘‘𑀯𑀦𑁆𑀤𑀺𑀢𑀼𑀁 𑀦 𑀲𑀓𑁆𑀓𑁄𑀫𑀸’’𑀢𑀺 𑀢𑀲𑁆𑀲 𑀤𑀳𑀭𑀤𑀳𑀭𑁂 𑀓𑀼𑀫𑀸𑀭𑁂 𑀚𑀦𑀧𑀤𑀁 𑀧𑀳𑀺𑀡𑀺𑀢𑁆𑀯𑀸 𑀢𑀲𑁆𑀫𑀺𑀁 𑀓𑀧𑀺𑀮𑀧𑀼𑀭𑀁 𑀲𑀫𑁆𑀧𑀢𑁆𑀢𑁂 𑀲𑀦𑁆𑀣𑀸𑀕𑀸𑀭𑁂 𑀲𑀦𑁆𑀦𑀺𑀧𑀢𑀺𑀁𑀲𑀼. 𑀓𑀼𑀫𑀸𑀭𑁄 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀅𑀝𑁆𑀞𑀸𑀲𑀺.

𑀅𑀣 𑀦𑀁 ‘‘𑀅𑀬𑀁 𑀢𑁂, 𑀢𑀸𑀢, 𑀫𑀸𑀢𑀸𑀫𑀳𑁄, 𑀅𑀬𑀁 𑀫𑀸𑀢𑀼𑀮𑁄’’𑀢𑀺 𑀯𑀢𑁆𑀯𑀸 𑀯𑀦𑁆𑀤𑀸𑀧𑁂𑀲𑀼𑀁. 𑀲𑁄 𑀲𑀩𑁆𑀩𑁂 𑀯𑀦𑁆𑀤𑀫𑀸𑀦𑁄 𑀯𑀺𑀘𑀭𑀺𑀢𑁆𑀯𑀸 𑀏𑀓𑀫𑁆𑀧𑀺 𑀅𑀢𑁆𑀢𑀸𑀦𑀁 𑀯𑀦𑁆𑀤𑀦𑁆𑀢𑀁 𑀅𑀤𑀺𑀲𑁆𑀯𑀸 ‘‘𑀓𑀺𑀁 𑀦𑀼 𑀔𑁄 𑀫𑀁 𑀯𑀦𑁆𑀤𑀦𑁆𑀢𑀸 𑀦𑀢𑁆𑀣𑀻’’𑀢𑀺 𑀧𑀼𑀘𑁆𑀙𑀺. 𑀲𑀸𑀓𑀺𑀬𑀸, ‘‘𑀢𑀸𑀢, 𑀢𑁂 𑀓𑀦𑀺𑀝𑁆𑀞𑀓𑀼𑀫𑀸𑀭𑀸 𑀚𑀦𑀧𑀤𑀁 𑀕𑀢𑀸’’𑀢𑀺 𑀯𑀢𑁆𑀯𑀸 𑀢𑀲𑁆𑀲 𑀫𑀳𑀦𑁆𑀢𑀁 𑀲𑀓𑁆𑀓𑀸𑀭𑀁 𑀓𑀭𑀺𑀁𑀲𑀼. 𑀲𑁄 𑀓𑀢𑀺𑀧𑀸𑀳𑀁 𑀯𑀲𑀺𑀢𑁆𑀯𑀸 𑀫𑀳𑀦𑁆𑀢𑁂𑀦 𑀧𑀭𑀺𑀯𑀸𑀭𑁂𑀦 𑀦𑀺𑀓𑁆𑀔𑀫𑀺. 𑀅𑀣𑁂𑀓𑀸 𑀤𑀸𑀲𑀻 𑀲𑀦𑁆𑀣𑀸𑀕𑀸𑀭𑁂 𑀢𑁂𑀦 𑀦𑀺𑀲𑀺𑀦𑁆𑀦𑀨𑀮𑀓𑀁 ‘‘𑀇𑀤𑀁 𑀯𑀸𑀲𑀪𑀔𑀢𑁆𑀢𑀺𑀬𑀸𑀬 𑀤𑀸𑀲𑀺𑀬𑀸 𑀧𑀼𑀢𑁆𑀢𑀲𑁆𑀲 𑀦𑀺𑀲𑀺𑀦𑁆𑀦𑀨𑀮𑀓’’𑀦𑁆𑀢𑀺 𑀅𑀓𑁆𑀓𑁄𑀲𑀺𑀢𑁆𑀯𑀸 𑀧𑀭𑀺𑀪𑀸𑀲𑀺𑀢𑁆𑀯𑀸 𑀔𑀻𑀭𑁄𑀤𑀓𑁂𑀦 𑀥𑁄𑀯𑀺. 𑀏𑀓𑁄 𑀧𑀼𑀭𑀺𑀲𑁄 𑀅𑀢𑁆𑀢𑀦𑁄 𑀆𑀯𑀼𑀥𑀁 𑀧𑀫𑀼𑀲𑁆𑀲𑀺𑀢𑁆𑀯𑀸 𑀦𑀺𑀯𑀢𑁆𑀢𑁄 𑀢𑀁 𑀕𑀡𑁆𑀳𑀦𑁆𑀢𑁄 𑀯𑀺𑀝𑀝𑀽𑀪𑀓𑀼𑀫𑀸𑀭𑀲𑁆𑀲 𑀅𑀓𑁆𑀓𑁄𑀲𑀦𑀲𑀤𑁆𑀤𑀁 𑀲𑀼𑀢𑁆𑀯𑀸 𑀢𑀁 𑀓𑀸𑀭𑀡𑀁 𑀧𑀼𑀘𑁆𑀙𑀺𑀢𑁆𑀯𑀸, ‘‘𑀯𑀸𑀲𑀪𑀔𑀢𑁆𑀢𑀺𑀬𑀸 𑀤𑀸𑀲𑀺𑀬𑀸 𑀓𑀼𑀘𑁆𑀙𑀺𑀫𑁆𑀳𑀺 𑀫𑀳𑀸𑀦𑀸𑀫𑀲𑀓𑁆𑀓𑀁 𑀧𑀝𑀺𑀘𑁆𑀘 𑀚𑀸𑀢𑀸’’𑀢𑀺 𑀜𑀢𑁆𑀯𑀸 𑀩𑀮𑀓𑀸𑀬𑀲𑁆𑀲 𑀓𑀣𑁂𑀲𑀺. ‘‘𑀯𑀸𑀲𑀪𑀔𑀢𑁆𑀢𑀺𑀬𑀸 𑀓𑀺𑀭 𑀤𑀸𑀲𑀺𑀥𑀻𑀢𑀸’’𑀢𑀺 𑀫𑀳𑀸𑀓𑁄𑀮𑀸𑀳𑀮𑀁 𑀅𑀳𑁄𑀲𑀺. 𑀢𑀁 𑀲𑀼𑀢𑁆𑀯𑀸 𑀯𑀺𑀝𑀝𑀽𑀪𑁄 ‘‘𑀏𑀢𑁂 𑀢𑀸𑀯 𑀫𑀫 𑀦𑀺𑀲𑀺𑀦𑁆𑀦𑀨𑀮𑀓𑀁 𑀔𑀻𑀭𑁄𑀤𑀓𑁂𑀦 𑀥𑁄𑀯𑀦𑁆𑀢𑀼, 𑀅𑀳𑀁 𑀧𑀦 𑀭𑀚𑁆𑀚𑁂 𑀧𑀢𑀺𑀝𑁆𑀞𑀺𑀢𑀓𑀸𑀮𑁂 𑀏𑀢𑁂𑀲𑀁 𑀕𑀮𑀮𑁄𑀳𑀺𑀢𑀁 𑀕𑀳𑁂𑀢𑁆𑀯𑀸 𑀫𑀫 𑀦𑀺𑀲𑀺𑀦𑁆𑀦𑀨𑀮𑀓𑀁 𑀥𑁄𑀯𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀢𑁆𑀢𑀁 𑀧𑀝𑁆𑀞𑀧𑁂𑀲𑀺. 𑀢𑀲𑁆𑀫𑀺𑀁 𑀲𑀸𑀯𑀢𑁆𑀣𑀺𑀁 𑀕𑀢𑁂 𑀅𑀫𑀘𑁆𑀘𑀸 𑀢𑀁 𑀧𑀯𑀢𑁆𑀢𑀺𑀁 𑀭𑀜𑁆𑀜𑁄 𑀆𑀭𑁄𑀘𑀬𑀺𑀁𑀲𑀼. 𑀭𑀸𑀚𑀸 ‘‘𑀫𑀬𑁆𑀳𑀁 𑀤𑀸𑀲𑀺𑀥𑀻𑀢𑀭𑀁 𑀅𑀤𑀁𑀲𑀽’’𑀢𑀺 𑀲𑀸𑀓𑀺𑀬𑀸𑀦𑀁 𑀓𑀼𑀚𑁆𑀛𑀺𑀢𑁆𑀯𑀸 𑀯𑀸𑀲𑀪𑀔𑀢𑁆𑀢𑀺𑀬𑀸𑀬 𑀘 𑀧𑀼𑀢𑁆𑀢𑀲𑁆𑀲 𑀘 𑀤𑀺𑀦𑁆𑀦𑀧𑀭𑀺𑀳𑀸𑀭𑀁 𑀅𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀤𑀸𑀲𑀤𑀸𑀲𑀻𑀳𑀺 𑀮𑀤𑁆𑀥𑀩𑁆𑀩𑀫𑀢𑁆𑀢𑀫𑁂𑀯 𑀤𑀸𑀧𑁂𑀲𑀺.

𑀢𑀢𑁄 𑀓𑀢𑀺𑀧𑀸𑀳𑀘𑁆𑀘𑀬𑁂𑀦 𑀲𑀢𑁆𑀣𑀸 𑀭𑀸𑀚𑀦𑀺𑀯𑁂𑀲𑀦𑀁 𑀕𑀦𑁆𑀢𑁆𑀯𑀸 𑀧𑀜𑁆𑀜𑀢𑁆𑀢𑀸𑀲𑀦𑁂 𑀦𑀺𑀲𑀻𑀤𑀺. 𑀭𑀸𑀚𑀸 𑀆𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸, ‘‘𑀪𑀦𑁆𑀢𑁂, 𑀢𑀼𑀫𑁆𑀳𑀸𑀓𑀁 𑀓𑀺𑀭 𑀜𑀸𑀢𑀓𑁂𑀳𑀺 𑀤𑀸𑀲𑀺𑀥𑀻𑀢𑀸 𑀫𑀬𑁆𑀳𑀁 𑀤𑀺𑀦𑁆𑀦𑀸, 𑀢𑁂𑀦𑀲𑁆𑀲𑀸 𑀅𑀳𑀁 𑀲𑀧𑀼𑀢𑁆𑀢𑀸𑀬 𑀧𑀭𑀺𑀳𑀸𑀭𑀁 𑀅𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀤𑀸𑀲𑀤𑀸𑀲𑀻𑀳𑀺 𑀮𑀤𑁆𑀥𑀩𑁆𑀩𑀫𑀢𑁆𑀢𑀫𑁂𑀯 𑀤𑀸𑀧𑁂𑀲𑀺’’𑀦𑁆𑀢𑀺 𑀆𑀳. 𑀲𑀢𑁆𑀣𑀸 ‘‘𑀅𑀬𑀼𑀢𑁆𑀢𑀁, 𑀫𑀳𑀸𑀭𑀸𑀚, 𑀲𑀸𑀓𑀺𑀬𑁂𑀳𑀺 𑀓𑀢𑀁, 𑀤𑀤𑀦𑁆𑀢𑁂𑀳𑀺 𑀦𑀸𑀫 𑀲𑀫𑀸𑀦𑀚𑀸𑀢𑀺𑀓𑀸 𑀤𑀸𑀢𑀩𑁆𑀩𑀸 𑀅𑀲𑁆𑀲, 𑀢𑀁 𑀧𑀦, 𑀫𑀳𑀸𑀭𑀸𑀚, 𑀯𑀤𑀸𑀫𑀺, 𑀯𑀸𑀲𑀪𑀔𑀢𑁆𑀢𑀺𑀬𑀸 𑀔𑀢𑁆𑀢𑀺𑀬𑀭𑀸𑀚𑀥𑀻𑀢𑀸 𑀔𑀢𑁆𑀢𑀺𑀬𑀭𑀜𑁆𑀜𑁄 𑀕𑁂𑀳𑁂 𑀅𑀪𑀺𑀲𑁂𑀓𑀁 𑀮𑀪𑀺. 𑀯𑀺𑀝𑀝𑀽𑀪𑁄𑀧𑀺 𑀔𑀢𑁆𑀢𑀺𑀬𑀭𑀸𑀚𑀸𑀦𑀫𑁂𑀯 𑀧𑀝𑀺𑀘𑁆𑀘 𑀚𑀸𑀢𑁄, 𑀫𑀸𑀢𑀼𑀕𑁄𑀢𑁆𑀢𑀁 𑀦𑀸𑀫 𑀓𑀺𑀁 𑀓𑀭𑀺𑀲𑁆𑀲𑀢𑀺, 𑀧𑀺𑀢𑀼𑀕𑁄𑀢𑁆𑀢𑀫𑁂𑀯 𑀧𑀫𑀸𑀡𑀦𑁆𑀢𑀺. 𑀧𑁄𑀭𑀸𑀡𑀓𑀧𑀡𑁆𑀟𑀺𑀢𑀸 𑀤𑀮𑀺𑀤𑁆𑀤𑀺𑀢𑁆𑀣𑀺𑀬𑀸 𑀓𑀝𑁆𑀞𑀳𑀸𑀭𑀺𑀓𑀸𑀬 𑀅𑀕𑁆𑀕𑀫𑀳𑁂𑀲𑀺𑀝𑁆𑀞𑀸𑀦𑀁 𑀅𑀤𑀁𑀲𑀼, 𑀢𑀲𑁆𑀲𑀸 𑀘 𑀓𑀼𑀘𑁆𑀙𑀺𑀫𑁆𑀳𑀺 𑀚𑀸𑀢𑀓𑀼𑀫𑀸𑀭𑁄 𑀤𑁆𑀯𑀸𑀤𑀲𑀬𑁄𑀚𑀦𑀺𑀓𑀸𑀬 𑀩𑀸𑀭𑀸𑀡𑀲𑀺𑀬𑀸 𑀭𑀚𑁆𑀚𑀁 𑀧𑀢𑁆𑀯𑀸 𑀓𑀝𑁆𑀞𑀯𑀸𑀳𑀦𑀭𑀸𑀚𑀸 𑀦𑀸𑀫 𑀚𑀸𑀢𑁄’’𑀢𑀺 𑀓𑀝𑁆𑀞𑀳𑀸𑀭𑀺𑀚𑀸𑀢𑀓𑀁 (𑀚𑀸. 𑁧.𑁧.𑁭) 𑀓𑀣𑁂𑀲𑀺. 𑀭𑀸𑀚𑀸 𑀥𑀫𑁆𑀫𑀓𑀣𑀁 𑀲𑀼𑀢𑁆𑀯𑀸 ‘‘𑀧𑀺𑀢𑀼𑀕𑁄𑀢𑁆𑀢𑀫𑁂𑀯 𑀓𑀺𑀭 𑀧𑀫𑀸𑀡’’𑀦𑁆𑀢𑀺 𑀢𑀼𑀲𑁆𑀲𑀺𑀢𑁆𑀯𑀸 𑀯𑀸𑀲𑀪𑀔𑀢𑁆𑀢𑀺𑀬𑀸𑀬 𑀘 𑀧𑀼𑀢𑁆𑀢𑀲𑁆𑀲 𑀘 𑀧𑀓𑀢𑀺𑀧𑀭𑀺𑀳𑀸𑀭𑀫𑁂𑀯 𑀤𑀸𑀧𑁂𑀲𑀺.

𑀩𑀦𑁆𑀥𑀼𑀮𑀲𑁂𑀦𑀸𑀧𑀢𑀺𑀲𑁆𑀲𑀧𑀺 𑀔𑁄 𑀓𑀼𑀲𑀺𑀦𑀸𑀭𑀸𑀬𑀁 𑀫𑀮𑁆𑀮𑀭𑀸𑀚𑀥𑀻𑀢𑀸 𑀫𑀮𑁆𑀮𑀺𑀓𑀸 𑀦𑀸𑀫 𑀪𑀭𑀺𑀬𑀸 𑀤𑀻𑀖𑀭𑀢𑁆𑀢𑀁 𑀧𑀼𑀢𑁆𑀢𑀁 𑀦 𑀯𑀺𑀚𑀸𑀬𑀺. 𑀅𑀣 𑀦𑀁 𑀩𑀦𑁆𑀥𑀼𑀮𑁄 ‘‘𑀅𑀢𑁆𑀢𑀦𑁄 𑀓𑀼𑀮𑀖𑀭𑀫𑁂𑀯 𑀕𑀘𑁆𑀙𑀸’’𑀢𑀺 𑀉𑀬𑁆𑀬𑁄𑀚𑁂𑀲𑀺. 𑀲𑀸 ‘‘𑀲𑀢𑁆𑀣𑀸𑀭𑀁 𑀤𑀺𑀲𑁆𑀯𑀸𑀯 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀚𑁂𑀢𑀯𑀦𑀁 𑀧𑀯𑀺𑀲𑀺𑀢𑁆𑀯𑀸 𑀢𑀣𑀸𑀕𑀢𑀁 𑀯𑀦𑁆𑀤𑀺𑀢𑁆𑀯𑀸 𑀞𑀺𑀢𑀸, ‘‘𑀓𑀳𑀁 𑀕𑀘𑁆𑀙𑀲𑀻’’𑀢𑀺 𑀯𑀼𑀢𑁆𑀢𑀸 ‘‘𑀲𑀸𑀫𑀺𑀓𑁄 𑀫𑀁 𑀪𑀦𑁆𑀢𑁂, 𑀓𑀼𑀮𑀖𑀭𑀁 𑀧𑁂𑀲𑁂𑀢𑀻’’ 𑀆𑀳. ‘‘𑀓𑀺𑀁 𑀓𑀸𑀭𑀡𑀸’’𑀢𑀺? ‘‘𑀯𑀜𑁆𑀛𑀸 𑀓𑀺𑀭𑀲𑁆𑀫𑀺 𑀅𑀧𑀼𑀢𑁆𑀢𑀺𑀓𑀸’’𑀢𑀺. ‘‘𑀬𑀤𑀺 𑀏𑀯𑀁, 𑀕𑀫𑀦𑀓𑀺𑀘𑁆𑀘𑀁 𑀦𑀢𑁆𑀣𑀺, 𑀦𑀺𑀯𑀢𑁆𑀢𑀲𑁆𑀲𑀽’’𑀢𑀺. 𑀲𑀸 𑀢𑀼𑀝𑁆𑀞𑀫𑀸𑀦𑀲𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀦𑀺𑀯𑁂𑀲𑀦𑀁 𑀕𑀦𑁆𑀢𑁆𑀯𑀸 ‘‘𑀓𑀲𑁆𑀫𑀸 𑀦𑀺𑀯𑀢𑁆𑀢𑀸𑀲𑀻’’𑀢𑀺 𑀯𑀼𑀢𑁆𑀢𑀸 ‘‘𑀤𑀲𑀩𑀮𑁂𑀦 𑀦𑀺𑀯𑀢𑁆𑀢𑀺𑀢𑀸𑀫𑁆𑀳𑀻’’𑀢𑀺 𑀆𑀳 𑀩𑀦𑁆𑀥𑀼𑀮𑁄 ‘‘𑀤𑀺𑀝𑁆𑀞𑀁 𑀪𑀯𑀺𑀲𑁆𑀲𑀢𑀺 𑀤𑀻𑀖𑀤𑀲𑁆𑀲𑀺𑀦𑀸 𑀓𑀸𑀭𑀡’’𑀦𑁆𑀢𑀺 𑀲𑀫𑁆𑀧𑀝𑀺𑀘𑁆𑀙𑀺. 𑀲𑀸 𑀦 𑀘𑀺𑀭𑀲𑁆𑀲𑁂𑀯 𑀕𑀩𑁆𑀪𑀁 𑀧𑀝𑀺𑀮𑀪𑀺𑀢𑁆𑀯𑀸 𑀉𑀧𑁆𑀧𑀦𑁆𑀦𑀤𑀸𑀳𑀴𑀸 ‘‘𑀤𑁄𑀳𑀴𑁄 𑀫𑁂 𑀉𑀧𑁆𑀧𑀦𑁆𑀦𑁄’’𑀢𑀺 𑀆𑀭𑁄𑀘𑁂𑀲𑀺. ‘‘𑀓𑀺𑀁 𑀤𑁄𑀳𑀴𑁄’’𑀢𑀺? ‘‘𑀯𑁂𑀲𑀸𑀮𑀺𑀦𑀕𑀭𑁂 𑀕𑀡𑀭𑀸𑀚𑀓𑀼𑀮𑀸𑀦𑀁 𑀅𑀪𑀺𑀲𑁂𑀓𑀫𑀗𑁆𑀕𑀮𑀧𑁄𑀓𑁆𑀔𑀭𑀡𑀺𑀬𑀁 𑀑𑀢𑀭𑀺𑀢𑁆𑀯𑀸 𑀦𑁆𑀳𑀢𑁆𑀯𑀸 𑀧𑀸𑀦𑀻𑀬𑀁 𑀧𑀸𑀢𑀼𑀓𑀸𑀫𑀸𑀫𑁆𑀳𑀺, 𑀲𑀸𑀫𑀻’’𑀢𑀺. 𑀩𑀦𑁆𑀥𑀼𑀮𑁄 ‘‘𑀲𑀸𑀥𑀽’’𑀢𑀺 𑀯𑀢𑁆𑀯𑀸 𑀲𑀳𑀲𑁆𑀲𑀣𑀸𑀫𑀥𑀦𑀼𑀁 𑀕𑀳𑁂𑀢𑁆𑀯𑀸 𑀢𑀁 𑀭𑀣𑀁 𑀆𑀭𑁄𑀧𑁂𑀢𑁆𑀯𑀸 𑀲𑀸𑀯𑀢𑁆𑀣𑀺𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀭𑀣𑀁 𑀧𑀸𑀚𑁂𑀦𑁆𑀢𑁄 𑀫𑀳𑀸𑀮𑀺𑀮𑀺𑀘𑁆𑀙𑀯𑀺𑀦𑁄 𑀤𑀺𑀦𑁆𑀦𑀤𑁆𑀯𑀸𑀭𑁂𑀦 𑀯𑁂𑀲𑀸𑀮𑀺𑀁 𑀧𑀸𑀯𑀺𑀲𑀺. 𑀫𑀳𑀸𑀮𑀺𑀮𑀺𑀘𑁆𑀙𑀯𑀺𑀦𑁄 𑀘 𑀤𑁆𑀯𑀸𑀭𑀲𑀫𑀻𑀧𑁂 𑀏𑀯 𑀦𑀺𑀯𑁂𑀲𑀦𑀁 𑀳𑁄𑀢𑀺. 𑀲𑁄 𑀭𑀣𑀲𑁆𑀲 𑀉𑀫𑁆𑀫𑀸𑀭𑁂 𑀧𑀦𑀺𑀖𑀸𑀢𑀲𑀤𑁆𑀤𑀁 𑀲𑀼𑀢𑁆𑀯𑀸𑀯 ‘‘𑀩𑀦𑁆𑀥𑀼𑀮𑀲𑁆𑀲 𑀭𑀣𑀲𑀤𑁆𑀤𑁄 𑀏𑀲𑁄, 𑀅𑀚𑁆𑀚 𑀮𑀺𑀘𑁆𑀙𑀯𑀻𑀦𑀁 𑀪𑀬𑀁 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻’’𑀢𑀺 𑀆𑀳.

𑀧𑁄𑀓𑁆𑀔𑀭𑀡𑀺𑀬𑀸 𑀅𑀦𑁆𑀢𑁄 𑀘 𑀩𑀳𑀺 𑀘 𑀆𑀭𑀓𑁆𑀔𑀸 𑀩𑀮𑀯𑀢𑀻, 𑀉𑀧𑀭𑀺 𑀮𑁄𑀳𑀚𑀸𑀮𑀁 𑀧𑀢𑁆𑀣𑀝𑀁, 𑀲𑀓𑀼𑀡𑀸𑀦𑀫𑁆𑀧𑀺 𑀑𑀓𑀸𑀲𑁄 𑀦𑀢𑁆𑀣𑀺. 𑀩𑀦𑁆𑀥𑀼𑀮𑀲𑁂𑀦𑀸𑀧𑀢𑀺 𑀧𑀦 𑀭𑀣𑀸 𑀑𑀢𑀭𑀺𑀢𑁆𑀯𑀸 𑀆𑀭𑀓𑁆𑀔𑀓𑁂 𑀫𑀦𑀼𑀲𑁆𑀲𑁂 𑀯𑁂𑀢𑁆𑀢𑁂𑀦 𑀧𑀳𑀭𑀦𑁆𑀢𑁄 𑀧𑀮𑀸𑀧𑁂𑀢𑁆𑀯𑀸 𑀮𑁄𑀳𑀚𑀸𑀮𑀁 𑀙𑀺𑀦𑁆𑀤𑀺𑀢𑁆𑀯𑀸 𑀅𑀦𑁆𑀢𑁄𑀧𑁄𑀓𑁆𑀔𑀭𑀡𑀻𑀬𑀁 𑀪𑀭𑀺𑀬𑀁 𑀦𑁆𑀳𑀸𑀧𑁂𑀢𑁆𑀯𑀸 𑀲𑀬𑀫𑁆𑀧𑀺 𑀦𑁆𑀳𑀢𑁆𑀯𑀸 𑀧𑀼𑀦 𑀢𑀁 𑀭𑀣𑀁 𑀆𑀭𑁄𑀧𑁂𑀢𑁆𑀯𑀸 𑀦𑀕𑀭𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀆𑀕𑀢𑀫𑀕𑁆𑀕𑁂𑀦𑁂𑀯 𑀧𑀸𑀬𑀸𑀲𑀺. 𑀢𑁂 𑀆𑀭𑀓𑁆𑀔𑀫𑀦𑀼𑀲𑁆𑀲𑀸 𑀮𑀺𑀘𑁆𑀙𑀯𑀺𑀭𑀸𑀚𑀽𑀦𑀁 𑀆𑀭𑁄𑀘𑁂𑀲𑀼𑀁. 𑀮𑀺𑀘𑁆𑀙𑀯𑀺𑀭𑀸𑀚𑀸𑀦𑁄 𑀓𑀼𑀚𑁆𑀛𑀺𑀢𑁆𑀯𑀸 𑀧𑀜𑁆𑀘 𑀭𑀣𑀲𑀢𑀸𑀦𑀺 𑀆𑀭𑀼𑀬𑁆𑀳 ‘‘𑀩𑀦𑁆𑀥𑀼𑀮𑀫𑀮𑁆𑀮𑀁 𑀕𑀡𑁆𑀳𑀺𑀲𑁆𑀲𑀸𑀫𑀸’’𑀢𑀺 𑀦𑀺𑀓𑁆𑀔𑀫𑀺𑀁𑀲𑀼. 𑀢𑀁 𑀧𑀯𑀢𑁆𑀢𑀺𑀁 𑀫𑀳𑀸𑀮𑀺𑀲𑁆𑀲 𑀆𑀭𑁄𑀘𑁂𑀲𑀼𑀁. 𑀫𑀳𑀸𑀮𑀺, ‘‘𑀫𑀸 𑀕𑀫𑀺𑀢𑁆𑀣, 𑀲𑁄 𑀳𑀺 𑀯𑁄 𑀲𑀩𑁆𑀩𑁂 𑀖𑁄𑀢𑁂𑀲𑁆𑀲𑀢𑀻’’𑀢𑀺 𑀆𑀳. 𑀢𑁂𑀧𑀺 ‘‘𑀫𑀬𑀁 𑀕𑀫𑀺𑀲𑁆𑀲𑀸𑀫 𑀏𑀯𑀸’’𑀢𑀺 𑀯𑀤𑀺𑀁𑀲𑀼. ‘‘𑀢𑁂𑀦 𑀳𑀺 𑀢𑀲𑁆𑀲 𑀭𑀣𑀘𑀓𑁆𑀓𑀲𑁆𑀲 𑀬𑀸𑀯 𑀦𑀸𑀪𑀺𑀢𑁄 𑀧𑀣𑀯𑀺𑀁 𑀧𑀯𑀺𑀝𑁆𑀞𑀝𑁆𑀞𑀸𑀦𑀁 𑀤𑀺𑀲𑁆𑀯𑀸 𑀦𑀺𑀯𑀢𑁆𑀢𑁂𑀬𑁆𑀬𑀸𑀣, 𑀢𑀢𑁄 𑀅𑀦𑀺𑀯𑀢𑁆𑀢𑀦𑁆𑀢𑀸 𑀧𑀼𑀭𑀢𑁄 𑀅𑀲𑀦𑀺𑀲𑀤𑁆𑀤𑀁 𑀯𑀺𑀬 𑀲𑀼𑀡𑀺𑀲𑁆𑀲𑀣, 𑀢𑀫𑁆𑀳𑀸 𑀞𑀸𑀦𑀸 𑀦𑀺𑀯𑀢𑁆𑀢𑁂𑀬𑁆𑀬𑀸𑀣. 𑀢𑀢𑁄 𑀅𑀦𑀺𑀯𑀢𑁆𑀢𑀦𑁆𑀢𑀸 𑀢𑀼𑀫𑁆𑀳𑀸𑀓𑀁 𑀭𑀣𑀥𑀼𑀭𑁂𑀲𑀼 𑀙𑀺𑀤𑁆𑀤𑀁 𑀧𑀲𑁆𑀲𑀺𑀲𑁆𑀲𑀣, 𑀢𑀫𑁆𑀳𑀸 𑀞𑀸𑀦𑀸 𑀦𑀺𑀯𑀢𑁆𑀢𑁂𑀬𑁆𑀬𑀸𑀣, 𑀧𑀼𑀭𑀢𑁄 𑀫𑀸 𑀕𑀫𑀺𑀢𑁆𑀣𑀸’’𑀢𑀺. 𑀢𑁂 𑀢𑀲𑁆𑀲 𑀯𑀘𑀦𑁂𑀦 𑀅𑀦𑀺𑀯𑀢𑁆𑀢𑀺𑀢𑁆𑀯𑀸 𑀢𑀁 𑀅𑀦𑀼𑀩𑀦𑁆𑀥𑀺𑀁𑀲𑀼 𑀏𑀯. 𑀫𑀮𑁆𑀮𑀺𑀓𑀸 𑀤𑀺𑀲𑁆𑀯𑀸, ‘‘𑀭𑀣𑀸, 𑀲𑀸𑀫𑀺, 𑀧𑀜𑁆𑀜𑀸𑀬𑀦𑁆𑀢𑀻’’𑀢𑀺 𑀆𑀳. ‘‘𑀢𑁂𑀦 𑀳𑀺 𑀏𑀓𑀲𑁆𑀲𑁂𑀯 𑀭𑀣𑀲𑁆𑀲 𑀧𑀜𑁆𑀜𑀸𑀬𑀦𑀓𑀸𑀮𑁂 𑀫𑀁 𑀆𑀭𑁄𑀘𑁂𑀬𑁆𑀬𑀸𑀲𑀻’’𑀢𑀺. 𑀲𑀸 𑀬𑀤𑀸 𑀲𑀩𑁆𑀩𑁂 𑀭𑀣𑀸 𑀏𑀓𑁄 𑀯𑀺𑀬 𑀳𑀼𑀢𑁆𑀯𑀸 𑀧𑀜𑁆𑀜𑀸𑀬𑀺𑀁𑀲𑀼, 𑀢𑀤𑀸 ‘‘𑀏𑀓𑀫𑁂𑀯, 𑀲𑀸𑀫𑀺, 𑀭𑀣𑀲𑀻𑀲𑀁 𑀧𑀜𑁆𑀜𑀸𑀬𑀢𑀻’’𑀢𑀺 𑀆𑀳. 𑀩𑀦𑁆𑀥𑀼𑀮𑁄 ‘‘𑀢𑁂𑀦 𑀳𑀺 𑀇𑀫𑀸 𑀭𑀲𑁆𑀫𑀺𑀬𑁄 𑀕𑀡𑁆𑀳𑀸𑀳𑀻’’𑀢𑀺 𑀢𑀲𑁆𑀲𑀸 𑀭𑀲𑁆𑀫𑀺𑀬𑁄 𑀤𑀢𑁆𑀯𑀸 𑀭𑀣𑁂 𑀞𑀺𑀢𑁄𑀯 𑀥𑀦𑀼𑀁 𑀆𑀭𑁄𑀧𑁂𑀲𑀺, 𑀭𑀣𑀘𑀓𑁆𑀓𑀁 𑀬𑀸𑀯 𑀦𑀸𑀪𑀺𑀢𑁄 𑀧𑀣𑀯𑀺𑀁 𑀧𑀸𑀯𑀺𑀲𑀺.

𑀮𑀺𑀘𑁆𑀙𑀯𑀺𑀦𑁄 𑀢𑀁 𑀞𑀸𑀦𑀁 𑀤𑀺𑀲𑁆𑀯𑀸𑀧𑀺 𑀦 𑀦𑀺𑀯𑀢𑁆𑀢𑀺𑀁𑀲𑀼. 𑀇𑀢𑀭𑁄 𑀣𑁄𑀓𑀁 𑀕𑀦𑁆𑀢𑁆𑀯𑀸 𑀚𑀺𑀬𑀁 𑀧𑁄𑀣𑁂𑀲𑀺, 𑀅𑀲𑀦𑀺𑀲𑀤𑁆𑀤𑁄 𑀯𑀺𑀬 𑀅𑀳𑁄𑀲𑀺. 𑀢𑁂 𑀢𑀢𑁄𑀧𑀺 𑀦 𑀦𑀺𑀯𑀢𑁆𑀢𑀺𑀁𑀲𑀼, 𑀅𑀦𑀼𑀩𑀦𑁆𑀥𑀦𑁆𑀢𑀸 𑀕𑀘𑁆𑀙𑀦𑁆𑀢𑁂𑀯. 𑀩𑀦𑁆𑀥𑀼𑀮𑁄 𑀭𑀣𑁂 𑀞𑀺𑀢𑀓𑁄𑀯 𑀏𑀓𑀲𑀭𑀁 𑀔𑀺𑀧𑀺, 𑀲𑁄 𑀧𑀜𑁆𑀘𑀦𑁆𑀦𑀁 𑀭𑀣𑀲𑀢𑀸𑀦𑀁 𑀭𑀣𑀲𑀻𑀲𑁂 𑀙𑀺𑀤𑁆𑀤𑀁 𑀓𑀢𑁆𑀯𑀸 𑀧𑀜𑁆𑀘 𑀭𑀸𑀚𑀲𑀢𑀸𑀦𑀺 𑀧𑀭𑀺𑀓𑀭𑀩𑀦𑁆𑀥𑀦𑀝𑁆𑀞𑀸𑀦𑁂 𑀯𑀺𑀦𑀺𑀯𑀺𑀚𑁆𑀛𑀺𑀢𑁆𑀯𑀸 𑀧𑀣𑀯𑀺𑀁 𑀧𑀸𑀯𑀺𑀲𑀺. 𑀢𑁂 𑀅𑀢𑁆𑀢𑀦𑁄 𑀧𑀯𑀺𑀤𑁆𑀥𑀪𑀸𑀯𑀁 𑀅𑀚𑀸𑀦𑀺𑀢𑁆𑀯𑀸, ‘‘𑀢𑀺𑀝𑁆𑀞, 𑀭𑁂, 𑀢𑀺𑀝𑁆𑀞, 𑀭𑁂’’𑀢𑀺 𑀯𑀤𑀦𑁆𑀢𑀸 𑀅𑀦𑀼𑀩𑀦𑁆𑀥𑀺𑀁𑀲𑀼 𑀏𑀯. 𑀩𑀦𑁆𑀥𑀼𑀮𑁄 𑀭𑀣𑀁 𑀞𑀧𑁂𑀢𑁆𑀯𑀸 ‘‘𑀢𑀼𑀫𑁆𑀳𑁂 𑀫𑀢𑀓𑀸, 𑀫𑀢𑀓𑁂𑀳𑀺 𑀲𑀤𑁆𑀥𑀺𑀁 𑀫𑀬𑁆𑀳𑀁 𑀬𑀼𑀤𑁆𑀥𑀁 𑀦𑀸𑀫 𑀦𑀢𑁆𑀣𑀻’’𑀢𑀺 𑀆𑀳. ‘‘𑀫𑀢𑀓𑀸 𑀦𑀸𑀫 𑀅𑀫𑁆𑀳𑀸𑀤𑀺𑀲𑀸 𑀦 𑀳𑁄𑀦𑁆𑀢𑀻’’𑀢𑀺. ‘‘𑀢𑁂𑀦 𑀳𑀺 𑀲𑀩𑁆𑀩𑀧𑀘𑁆𑀙𑀺𑀫𑀲𑁆𑀲 𑀧𑀭𑀺𑀓𑀭𑀁 𑀫𑁄𑀘𑁂𑀣𑀸’’𑀢𑀺. 𑀢𑁂 𑀫𑁄𑀘𑀬𑀺𑀁𑀲𑀼. 𑀲𑁄 𑀫𑀼𑀢𑁆𑀢𑀫𑀢𑁆𑀢𑁂 𑀏𑀯 𑀫𑀭𑀺𑀢𑁆𑀯𑀸 𑀧𑀢𑀺𑀢𑁄. 𑀅𑀣 𑀢𑁂 𑀲𑀩𑁆𑀩𑁂𑀧𑀺 ‘‘𑀢𑀼𑀫𑁆𑀳𑁂 𑀏𑀯𑀭𑀽𑀧𑀸, 𑀅𑀢𑁆𑀢𑀦𑁄 𑀖𑀭𑀸𑀦𑀺 𑀕𑀦𑁆𑀢𑁆𑀯𑀸 𑀲𑀁𑀯𑀺𑀥𑀸𑀢𑀩𑁆𑀩𑀁 𑀲𑀁𑀯𑀺𑀤𑀳𑀺𑀢𑁆𑀯𑀸 𑀧𑀼𑀢𑁆𑀢𑀤𑀸𑀭𑀁 𑀅𑀦𑀼𑀲𑀸𑀲𑀺𑀢𑁆𑀯𑀸 𑀲𑀦𑁆𑀦𑀸𑀳𑀁 𑀫𑁄𑀘𑁂𑀣𑀸’’𑀢𑀺 𑀆𑀳. 𑀢𑁂 𑀢𑀣𑀸 𑀓𑀢𑁆𑀯𑀸 𑀲𑀩𑁆𑀩𑁂𑀧𑀺 𑀚𑀻𑀯𑀺𑀢𑀓𑁆𑀔𑀬𑀁 𑀧𑀢𑁆𑀢𑀸. 𑀩𑀦𑁆𑀥𑀼𑀮𑁄𑀧𑀺 𑀫𑀮𑁆𑀮𑀺𑀓𑀁 𑀲𑀸𑀯𑀢𑁆𑀣𑀺𑀁 𑀆𑀦𑁂𑀲𑀺. 𑀲𑀸 𑀲𑁄𑀴𑀲𑀓𑁆𑀔𑀢𑁆𑀢𑀼𑀁 𑀬𑀫𑀓𑁂 𑀬𑀫𑀓𑁂 𑀧𑀼𑀢𑁆𑀢𑁂 𑀯𑀺𑀚𑀸𑀬𑀺. 𑀲𑀩𑁆𑀩𑁂𑀧𑀺 𑀲𑀽𑀭𑀸 𑀣𑀸𑀫𑀲𑀫𑁆𑀧𑀦𑁆𑀦𑀸 𑀅𑀳𑁂𑀲𑀼𑀁, 𑀲𑀩𑁆𑀩𑀲𑀺𑀧𑁆𑀧𑀸𑀦𑀁 𑀦𑀺𑀧𑁆𑀨𑀢𑁆𑀢𑀺𑀁 𑀧𑀸𑀧𑀼𑀡𑀺𑀁𑀲𑀼. 𑀏𑀓𑁂𑀓𑀲𑁆𑀲 𑀧𑀼𑀭𑀺𑀲𑀲𑀳𑀲𑁆𑀲𑀁 𑀧𑀭𑀺𑀯𑀸𑀭𑁄 𑀅𑀳𑁄𑀲𑀺. 𑀧𑀺𑀢𑀭𑀸 𑀲𑀤𑁆𑀥𑀺𑀁 𑀭𑀸𑀚𑀦𑀺𑀯𑁂𑀲𑀦𑀁 𑀕𑀘𑁆𑀙𑀦𑁆𑀢𑁂𑀳𑀺 𑀢𑁂𑀳𑁂𑀯 𑀭𑀸𑀚𑀗𑁆𑀕𑀡𑀁 𑀧𑀭𑀺𑀧𑀽𑀭𑀺.

𑀅𑀣𑁂𑀓𑀤𑀺𑀯𑀲𑀁 𑀯𑀺𑀦𑀺𑀘𑁆𑀙𑀬𑁂 𑀓𑀽𑀝𑀝𑁆𑀝𑀧𑀭𑀸𑀚𑀺𑀢𑀸 𑀫𑀦𑀼𑀲𑁆𑀲𑀸 𑀩𑀦𑁆𑀥𑀼𑀮𑀁 𑀆𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 𑀫𑀳𑀸𑀯𑀺𑀭𑀯𑀁 𑀯𑀺𑀭𑀯𑀦𑁆𑀢𑀸 𑀯𑀺𑀦𑀺𑀘𑁆𑀙𑀬𑀅𑀫𑀘𑁆𑀘𑀸𑀦𑀁 𑀓𑀽𑀝𑀝𑁆𑀝𑀓𑀭𑀡𑀁 𑀢𑀲𑁆𑀲 𑀆𑀭𑁄𑀘𑁂𑀲𑀼𑀁. 𑀲𑁄 𑀯𑀺𑀦𑀺𑀘𑁆𑀙𑀬𑀁 𑀕𑀦𑁆𑀢𑁆𑀯𑀸 𑀢𑀁 𑀅𑀝𑁆𑀝𑀁 𑀯𑀺𑀘𑀸𑀭𑁂𑀢𑁆𑀯𑀸 𑀲𑀸𑀫𑀺𑀓𑀫𑁂𑀯 𑀲𑀸𑀫𑀺𑀓𑀁 𑀅𑀓𑀸𑀲𑀺. 𑀫𑀳𑀸𑀚𑀦𑁄 𑀫𑀳𑀸𑀲𑀤𑁆𑀤𑁂𑀦 𑀲𑀸𑀥𑀼𑀓𑀸𑀭𑀁 𑀧𑀯𑀢𑁆𑀢𑁂𑀢𑀺. 𑀭𑀸𑀚𑀸 ‘‘𑀓𑀺𑀁 𑀇𑀤’’𑀦𑁆𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑀢𑀫𑀢𑁆𑀣𑀁 𑀲𑀼𑀢𑁆𑀯𑀸 𑀢𑀼𑀲𑁆𑀲𑀺𑀢𑁆𑀯𑀸 𑀲𑀩𑁆𑀩𑁂𑀧𑀺 𑀢𑁂 𑀅𑀫𑀘𑁆𑀘𑁂 𑀳𑀸𑀭𑁂𑀢𑁆𑀯𑀸 𑀩𑀦𑁆𑀥𑀼𑀮𑀲𑁆𑀲𑁂𑀯 𑀯𑀺𑀦𑀺𑀘𑁆𑀙𑀬𑀁 𑀦𑀺𑀬𑁆𑀬𑀸𑀤𑁂𑀲𑀺. 𑀲𑁄 𑀢𑀢𑁄 𑀧𑀝𑁆𑀞𑀸𑀬 𑀲𑀫𑁆𑀫𑀸 𑀯𑀺𑀦𑀺𑀘𑁆𑀙𑀬𑀺. 𑀢𑀢𑁄 𑀢𑁂 𑀧𑁄𑀭𑀸𑀡𑀓𑀯𑀺𑀦𑀺𑀘𑁆𑀙𑀬𑀺𑀓𑀸 𑀅𑀫𑀘𑁆𑀘𑀸 𑀓𑀺𑀜𑁆𑀘𑀺 𑀮𑀜𑁆𑀚𑀁 𑀅𑀮𑀪𑀦𑁆𑀢𑀸 𑀅𑀧𑁆𑀧𑀮𑀸𑀪𑀸 𑀳𑀼𑀢𑁆𑀯𑀸 ‘‘𑀩𑀦𑁆𑀥𑀼𑀮𑁄 𑀭𑀚𑁆𑀚𑀁 𑀧𑀢𑁆𑀣𑁂𑀢𑀻’’𑀢𑀺 𑀭𑀸𑀚𑀓𑀼𑀮𑁂 𑀧𑀭𑀺𑀪𑀺𑀦𑁆𑀤𑀺𑀁𑀲𑀼. 𑀭𑀸𑀚𑀸 𑀢𑁂𑀲𑀁 𑀓𑀣𑀁 𑀲𑀤𑁆𑀤𑀳𑀺𑀢𑁆𑀯𑀸 𑀘𑀺𑀢𑁆𑀢𑀁 𑀦𑀺𑀕𑁆𑀕𑀳𑁂𑀢𑀼𑀁 𑀦𑀸𑀲𑀓𑁆𑀔𑀺. ‘‘𑀇𑀫𑀲𑁆𑀫𑀺𑀁 𑀇𑀥𑁂𑀯 𑀖𑀸𑀢𑀺𑀬𑀫𑀸𑀦𑁂 𑀕𑀭𑀳𑀸 𑀫𑁂 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻’’𑀢𑀺 𑀧𑀼𑀦 𑀘𑀺𑀦𑁆𑀢𑁂𑀢𑁆𑀯𑀸 𑀧𑀬𑀼𑀢𑁆𑀢𑀧𑀼𑀭𑀺𑀲𑁂𑀳𑀺 𑀧𑀘𑁆𑀘𑀦𑁆𑀢𑀁 𑀧𑀳𑀸𑀭𑀸𑀧𑁂𑀢𑁆𑀯𑀸 𑀩𑀦𑁆𑀥𑀼𑀮𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸, ‘‘𑀧𑀘𑁆𑀘𑀦𑁆𑀢𑁄 𑀓𑀺𑀭 𑀓𑀼𑀧𑀺𑀢𑁄, 𑀢𑀯 𑀧𑀼𑀢𑁆𑀢𑁂𑀳𑀺 𑀲𑀤𑁆𑀥𑀺𑀁 𑀕𑀦𑁆𑀢𑁆𑀯𑀸, 𑀘𑁄𑀭𑁂 𑀕𑀡𑁆𑀳𑀸𑀳𑀻’’𑀢𑀺 𑀧𑀳𑀺𑀡𑀺𑀢𑁆𑀯𑀸, ‘‘𑀏𑀢𑁆𑀣𑁂𑀯𑀲𑁆𑀲 𑀤𑁆𑀯𑀢𑁆𑀢𑀺𑀁𑀲𑀸𑀬 𑀧𑀼𑀢𑁆𑀢𑁂𑀳𑀺 𑀲𑀤𑁆𑀥𑀺𑀁 𑀲𑀻𑀲𑀁 𑀙𑀺𑀦𑁆𑀤𑀺𑀢𑁆𑀯𑀸 𑀆𑀳𑀭𑀣𑀸’’𑀢𑀺 𑀢𑁂𑀳𑀺 𑀲𑀤𑁆𑀥𑀺𑀁 𑀅𑀜𑁆𑀜𑁂𑀧𑀺 𑀲𑀫𑀢𑁆𑀣𑁂 𑀫𑀳𑀸𑀬𑁄𑀥𑁂 𑀧𑁂𑀲𑁂𑀲𑀺. 𑀢𑀲𑁆𑀫𑀺𑀁 𑀧𑀘𑁆𑀘𑀦𑁆𑀢𑀁 𑀕𑀘𑁆𑀙𑀦𑁆𑀢𑁂𑀬𑁂𑀯 ‘‘𑀲𑁂𑀦𑀸𑀧𑀢𑀺 𑀓𑀺𑀭 𑀆𑀕𑀘𑁆𑀙𑀢𑀻’’𑀢𑀺 𑀧𑀬𑀼𑀢𑁆𑀢𑀘𑁄𑀭𑀸 𑀧𑀮𑀸𑀬𑀺𑀁𑀲𑀼. 𑀲𑁄 𑀢𑀁 𑀧𑀤𑁂𑀲𑀁 𑀆𑀯𑀸𑀲𑀸𑀧𑁂𑀢𑁆𑀯𑀸 𑀲𑀡𑁆𑀞𑀸𑀧𑁂𑀢𑁆𑀯𑀸 𑀦𑀺𑀯𑀢𑁆𑀢𑀺.

𑀅𑀣𑀲𑁆𑀲 𑀦𑀕𑀭𑀢𑁄 𑀅𑀯𑀺𑀤𑀽𑀭𑁂 𑀞𑀸𑀦𑁂 𑀢𑁂 𑀬𑁄𑀥𑀸 𑀧𑀼𑀢𑁆𑀢𑁂𑀳𑀺 𑀲𑀤𑁆𑀥𑀺𑀁 𑀲𑀻𑀲𑀁 𑀙𑀺𑀦𑁆𑀤𑀺𑀁𑀲𑀼. 𑀢𑀁 𑀤𑀺𑀯𑀲𑀁 𑀫𑀮𑁆𑀮𑀺𑀓𑀸𑀬 𑀧𑀜𑁆𑀘𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺 𑀲𑀤𑁆𑀥𑀺𑀁 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑀸 𑀦𑀺𑀫𑀦𑁆𑀢𑀺𑀢𑀸 𑀳𑁄𑀦𑁆𑀢𑀺. 𑀅𑀣𑀲𑁆𑀲𑀸 𑀧𑀼𑀩𑁆𑀩𑀡𑁆𑀳𑁂 𑀏𑀯 ‘‘𑀲𑀸𑀫𑀺𑀓𑀲𑁆𑀲 𑀢𑁂 𑀲𑀤𑁆𑀥𑀺𑀁 𑀧𑀼𑀢𑁆𑀢𑁂𑀳𑀺 𑀲𑀻𑀲𑀁 𑀙𑀺𑀦𑁆𑀦’’𑀦𑁆𑀢𑀺 𑀧𑀡𑁆𑀡𑀁 𑀆𑀳𑀭𑀺𑀢𑁆𑀯𑀸 𑀅𑀤𑀁𑀲𑀼. 𑀲𑀸 𑀢𑀁 𑀧𑀯𑀢𑁆𑀢𑀺𑀁 𑀜𑀢𑁆𑀯𑀸 𑀓𑀲𑁆𑀲𑀘𑀺 𑀓𑀺𑀜𑁆𑀘𑀺 𑀅𑀯𑀢𑁆𑀯𑀸 𑀧𑀡𑁆𑀡𑀁 𑀉𑀘𑁆𑀙𑀗𑁆𑀕𑁂 𑀞𑀧𑁂𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀫𑁂𑀯 𑀧𑀭𑀺𑀯𑀺𑀲𑀺. 𑀅𑀣𑀲𑁆𑀲𑀸 𑀧𑀭𑀺𑀘𑀸𑀭𑀺𑀓𑀸𑀬𑁄 𑀪𑀺𑀓𑁆𑀔𑀽𑀦𑀁 𑀪𑀢𑁆𑀢𑀁 𑀤𑀢𑁆𑀯𑀸 𑀲𑀧𑁆𑀧𑀺𑀘𑀸𑀝𑀺𑀁 𑀆𑀳𑀭𑀦𑁆𑀢𑀺𑀬𑁄 𑀣𑁂𑀭𑀸𑀦𑀁 𑀧𑀼𑀭𑀢𑁄 𑀲𑀧𑁆𑀧𑀺𑀘𑀸𑀝𑀺𑀁 𑀪𑀺𑀦𑁆𑀤𑀺𑀁𑀲𑀼. 𑀥𑀫𑁆𑀫𑀲𑁂𑀦𑀸𑀧𑀢𑀺 ‘‘𑀪𑁂𑀤𑀦𑀥𑀫𑁆𑀫𑀁 𑀪𑀺𑀦𑁆𑀦𑀁, 𑀦 𑀘𑀺𑀦𑁆𑀢𑀺𑀢𑀩𑁆𑀩’’𑀦𑁆𑀢𑀺 𑀆𑀳. 𑀲𑀸 𑀉𑀘𑁆𑀙𑀗𑁆𑀕𑀢𑁄 𑀧𑀡𑁆𑀡𑀁 𑀦𑀻𑀳𑀭𑀺𑀢𑁆𑀯𑀸 ‘‘𑀤𑁆𑀯𑀢𑁆𑀢𑀺𑀁𑀲𑀸𑀬 𑀧𑀼𑀢𑁆𑀢𑁂𑀳𑀺 𑀲𑀤𑁆𑀥𑀺𑀁 𑀧𑀺𑀢𑀼𑀲𑀻𑀲𑀁 𑀙𑀺𑀦𑁆𑀦𑀦𑁆𑀢𑀺 𑀫𑁂 𑀇𑀫𑀁 𑀧𑀡𑁆𑀡𑀁 𑀆𑀳𑀭𑀺𑀁𑀲𑀼, 𑀅𑀳𑀁 𑀇𑀤𑀁 𑀲𑀼𑀢𑁆𑀯𑀸𑀧𑀺 𑀦 𑀘𑀺𑀦𑁆𑀢𑁂𑀫𑀺, 𑀲𑀧𑁆𑀧𑀺𑀘𑀸𑀝𑀺𑀬𑀸 𑀪𑀺𑀦𑁆𑀦𑀸𑀬 𑀓𑀺𑀁 𑀘𑀺𑀦𑁆𑀢𑀬𑀺𑀲𑁆𑀲𑀸𑀫𑀺, 𑀪𑀦𑁆𑀢𑁂’’𑀢𑀺 𑀆𑀳. 𑀥𑀫𑁆𑀫𑀲𑁂𑀦𑀸𑀧𑀢𑀺 ‘‘𑀅𑀦𑀺𑀫𑀺𑀢𑁆𑀢𑀫𑀦𑀜𑁆𑀜𑀸𑀢𑀁, 𑀫𑀘𑁆𑀘𑀸𑀦𑀁 𑀇𑀥 𑀚𑀻𑀯𑀺𑀢’’𑀦𑁆𑀢𑀺𑀆𑀤𑀻𑀦𑀺 (𑀲𑀼. 𑀦𑀺. 𑁫𑁭𑁯) 𑀯𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀯𑀺𑀳𑀸𑀭𑀁 𑀅𑀕𑀫𑀸𑀲𑀺. 𑀲𑀸𑀧𑀺 𑀤𑁆𑀯𑀢𑁆𑀢𑀺𑀁𑀲 𑀲𑀼𑀡𑀺𑀲𑀸𑀬𑁄 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸, ‘‘𑀢𑀼𑀫𑁆𑀳𑀸𑀓𑀁 𑀲𑀸𑀫𑀺𑀓𑀸 𑀦𑀺𑀭𑀧𑀭𑀸𑀥𑀸 𑀅𑀢𑁆𑀢𑀦𑁄 𑀧𑀼𑀭𑀺𑀫𑀓𑀫𑁆𑀫𑀨𑀮𑀁 𑀮𑀪𑀺𑀁𑀲𑀼, 𑀢𑀼𑀫𑁆𑀳𑁂 𑀫𑀸 𑀲𑁄𑀘𑀬𑀺𑀢𑁆𑀣, 𑀫𑀸 𑀧𑀭𑀺𑀤𑁂𑀯𑀺𑀢𑁆𑀣, 𑀭𑀜𑁆𑀜𑁄 𑀉𑀧𑀭𑀺 𑀫𑀦𑁄𑀧𑀤𑁄𑀲𑀁 𑀫𑀸 𑀓𑀭𑀺𑀢𑁆𑀣𑀸’’𑀢𑀺 𑀑𑀯𑀤𑀺.

𑀭𑀜𑁆𑀜𑁄 𑀘𑀭𑀧𑀼𑀭𑀺𑀲𑀸 𑀢𑀁 𑀓𑀣𑀁 𑀲𑀼𑀢𑁆𑀯𑀸 𑀕𑀦𑁆𑀢𑁆𑀯𑀸 𑀢𑁂𑀲𑀁 𑀦𑀺𑀤𑁆𑀤𑁄𑀲𑀪𑀸𑀯𑀁 𑀭𑀜𑁆𑀜𑁄 𑀓𑀣𑀬𑀺𑀁𑀲𑀼. 𑀭𑀸𑀚𑀸 𑀲𑀁𑀯𑁂𑀕𑀧𑁆𑀧𑀢𑁆𑀢𑁄 𑀢𑀲𑁆𑀲𑀸 𑀦𑀺𑀯𑁂𑀲𑀦𑀁 𑀕𑀦𑁆𑀢𑁆𑀯𑀸 𑀫𑀮𑁆𑀮𑀺𑀓𑀜𑁆𑀘 𑀲𑀼𑀡𑀺𑀲𑀸𑀬𑁄 𑀘𑀲𑁆𑀲𑀸 𑀔𑀫𑀸𑀧𑁂𑀢𑁆𑀯𑀸 𑀫𑀮𑁆𑀮𑀺𑀓𑀸𑀬 𑀯𑀭𑀁 𑀅𑀤𑀸𑀲𑀺. 𑀲𑀸 ‘‘𑀯𑀭𑁄 𑀕𑀳𑀺𑀢𑁄 𑀫𑁂 𑀳𑁄𑀢𑀽’’𑀢𑀺 𑀯𑀢𑁆𑀯𑀸 𑀢𑀲𑁆𑀫𑀺𑀁 𑀕𑀢𑁂 𑀫𑀢𑀓𑀪𑀢𑁆𑀢𑀁 𑀤𑀢𑁆𑀯𑀸 𑀦𑁆𑀳𑀢𑁆𑀯𑀸 𑀭𑀸𑀚𑀸𑀦𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸, ‘‘𑀤𑁂𑀯, 𑀢𑀼𑀫𑁆𑀳𑁂𑀳𑀺 𑀫𑀬𑁆𑀳𑀁 𑀯𑀭𑁄 𑀤𑀺𑀦𑁆𑀦𑁄, 𑀫𑀬𑁆𑀳𑀜𑁆𑀘 𑀅𑀜𑁆𑀜𑁂𑀦 𑀅𑀢𑁆𑀣𑁄 𑀦𑀢𑁆𑀣𑀺, 𑀤𑁆𑀯𑀢𑁆𑀢𑀺𑀁𑀲𑀸𑀬 𑀫𑁂 𑀲𑀼𑀡𑀺𑀲𑀸𑀦𑀁 𑀫𑀫𑀜𑁆𑀘 𑀓𑀼𑀮𑀖𑀭𑀕𑀫𑀦𑀁 𑀅𑀦𑀼𑀚𑀸𑀦𑀸𑀣𑀸’’𑀢𑀺 𑀆𑀳. 𑀭𑀸𑀚𑀸 𑀲𑀫𑁆𑀧𑀝𑀺𑀘𑁆𑀙𑀺. 𑀲𑀸 𑀤𑁆𑀯𑀢𑁆𑀢𑀺𑀁𑀲 𑀲𑀼𑀡𑀺𑀲𑀸𑀬𑁄 𑀬𑀣𑀸𑀲𑀓𑀸𑀦𑀺 𑀓𑀼𑀮𑀸𑀦𑀺 𑀧𑁂𑀲𑁂𑀲𑀺, 𑀲𑀬𑀫𑁆𑀧𑀺 𑀓𑀼𑀲𑀺𑀦𑀸𑀭𑀸𑀦𑀕𑀭𑁂 𑀅𑀢𑁆𑀢𑀦𑁄 𑀓𑀼𑀮𑀖𑀭𑀁 𑀅𑀕𑀫𑀸𑀲𑀺.

𑀭𑀸𑀚𑀸𑀧𑀺 𑀩𑀦𑁆𑀥𑀼𑀮𑀲𑁂𑀦𑀸𑀧𑀢𑀺𑀦𑁄 𑀪𑀸𑀕𑀺𑀦𑁂𑀬𑁆𑀬𑀲𑁆𑀲 𑀤𑀻𑀖𑀓𑀸𑀭𑀸𑀬𑀦𑀲𑁆𑀲 𑀦𑀸𑀫 𑀲𑁂𑀦𑀸𑀧𑀢𑀺𑀝𑁆𑀞𑀸𑀦𑀁 𑀅𑀤𑀸𑀲𑀺. 𑀲𑁄 𑀧𑀦 ‘‘𑀫𑀸𑀢𑀼𑀮𑁄 𑀫𑁂 𑀇𑀫𑀺𑀦𑀸 𑀫𑀸𑀭𑀺𑀢𑁄’’𑀢𑀺 𑀭𑀜𑁆𑀜𑁄 𑀑𑀢𑀸𑀭𑀁 𑀕𑀯𑁂𑀲𑀦𑁆𑀢𑁄 𑀯𑀺𑀘𑀭𑀢𑀺. 𑀭𑀸𑀚𑀸𑀧𑀺 𑀦𑀺𑀭𑀧𑀭𑀸𑀥𑀲𑁆𑀲 𑀩𑀦𑁆𑀥𑀼𑀮𑀲𑁆𑀲 𑀫𑀸𑀭𑀺𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀯𑀺𑀧𑁆𑀧𑀝𑀺𑀲𑀸𑀭𑀻 𑀳𑀼𑀢𑁆𑀯𑀸 𑀘𑀺𑀢𑁆𑀢𑀲𑁆𑀲𑀸𑀤𑀁 𑀦 𑀮𑀪𑀢𑀺, 𑀭𑀚𑁆𑀚𑀲𑀼𑀔𑀁 𑀦𑀸𑀦𑀼𑀪𑁄𑀢𑀺. 𑀢𑀤𑀸 𑀲𑀢𑁆𑀣𑀸 𑀲𑀓𑁆𑀬𑀸𑀦𑀁 𑀫𑁂𑀤𑀸𑀴𑀼𑀧𑀁 𑀦𑀸𑀫 𑀦𑀺𑀕𑀫𑀁 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑀢𑀺. 𑀭𑀸𑀚𑀸 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀆𑀭𑀸𑀫𑀢𑁄 𑀅𑀯𑀺𑀤𑀽𑀭𑁂 𑀔𑀦𑁆𑀥𑀸𑀯𑀸𑀭𑀁 𑀦𑀺𑀯𑀸𑀲𑁂𑀢𑁆𑀯𑀸, ‘‘𑀫𑀦𑁆𑀤𑁂𑀦 𑀧𑀭𑀺𑀯𑀸𑀭𑁂𑀦 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀲𑁆𑀲𑀸𑀫𑀻’’𑀢𑀺 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀧𑀜𑁆𑀘𑀭𑀸𑀚𑀸𑀓𑀓𑀼𑀥𑀪𑀡𑁆𑀟𑀸𑀦𑀺 𑀤𑀻𑀖𑀓𑀸𑀭𑀸𑀬𑀦𑀲𑁆𑀲 𑀤𑀢𑁆𑀯𑀸 𑀏𑀓𑀓𑁄𑀯 𑀕𑀦𑁆𑀥𑀓𑀼𑀝𑀺𑀁 𑀧𑀸𑀯𑀺𑀲𑀺. 𑀲𑀩𑁆𑀩𑀁 𑀥𑀫𑁆𑀫𑀘𑁂𑀢𑀺𑀬𑀲𑀼𑀢𑁆𑀢𑀦𑀺𑀬𑀸𑀫𑁂𑀦 (𑀫. 𑀦𑀺. 𑁨.𑁩𑁬𑁪 𑀆𑀤𑀬𑁄) 𑀤𑀻𑀧𑁂𑀢𑀩𑁆𑀩𑀁. 𑀢𑀲𑁆𑀫𑀺𑀁 𑀕𑀦𑁆𑀥𑀓𑀼𑀝𑀺𑀁 𑀧𑀯𑀺𑀝𑁆𑀞𑁂 𑀤𑀻𑀖𑀓𑀸𑀭𑀸𑀬𑀦𑁄 𑀢𑀸𑀦𑀺 𑀧𑀜𑁆𑀘 𑀭𑀸𑀚𑀓𑀓𑀼𑀥𑀪𑀡𑁆𑀟𑀸𑀦𑀺 𑀕𑀳𑁂𑀢𑁆𑀯𑀸 𑀯𑀺𑀝𑀝𑀽𑀪𑀁 𑀭𑀸𑀚𑀸𑀦𑀁 𑀓𑀢𑁆𑀯𑀸 𑀭𑀜𑁆𑀜𑁄 𑀏𑀓𑀁 𑀅𑀲𑁆𑀲𑀁 𑀏𑀓𑀜𑁆𑀘 𑀉𑀧𑀝𑁆𑀞𑀸𑀦𑀓𑀸𑀭𑀺𑀓𑀁 𑀫𑀸𑀢𑀼𑀕𑀸𑀫𑀁 𑀞𑀧𑁂𑀢𑁆𑀯𑀸 𑀦𑀺𑀯𑀢𑁆𑀢𑁂𑀢𑁆𑀯𑀸 𑀲𑀸𑀯𑀢𑁆𑀣𑀺𑀁 𑀅𑀕𑀫𑀸𑀲𑀺.

𑀭𑀸𑀚𑀸 𑀲𑀢𑁆𑀣𑀸𑀭𑀸 𑀲𑀤𑁆𑀥𑀺𑀁 𑀧𑀺𑀬𑀓𑀣𑀁 𑀓𑀣𑁂𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀦𑀺𑀓𑁆𑀔𑀦𑁆𑀢𑁄 𑀲𑁂𑀦𑀁 𑀅𑀤𑀺𑀲𑁆𑀯𑀸 𑀢𑀁 𑀫𑀸𑀢𑀼𑀕𑀸𑀫𑀁 𑀧𑀼𑀘𑁆𑀙𑀺𑀢𑁆𑀯𑀸 𑀢𑀁 𑀧𑀯𑀢𑁆𑀢𑀺𑀁 𑀲𑀼𑀢𑁆𑀯𑀸, ‘‘𑀅𑀳𑀁 𑀪𑀸𑀕𑀺𑀦𑁂𑀬𑁆𑀬𑀁 𑀆𑀤𑀸𑀬 𑀕𑀦𑁆𑀢𑁆𑀯𑀸, 𑀯𑀺𑀝𑀝𑀽𑀪𑀁 𑀕𑀳𑁂𑀲𑁆𑀲𑀸𑀫𑀻’’𑀢𑀺 𑀭𑀸𑀚𑀕𑀳𑀦𑀕𑀭𑀁 𑀕𑀘𑁆𑀙𑀦𑁆𑀢𑁄 𑀯𑀺𑀓𑀸𑀮𑁂 𑀤𑁆𑀯𑀸𑀭𑁂𑀲𑀼 𑀧𑀺𑀤𑀳𑀺𑀢𑁂𑀲𑀼 𑀦𑀕𑀭𑀁 𑀧𑀢𑁆𑀯𑀸 𑀏𑀓𑀺𑀲𑁆𑀲𑀸 𑀲𑀸𑀮𑀸𑀬 𑀦𑀺𑀧𑀚𑁆𑀚𑀺𑀢𑁆𑀯𑀸 𑀯𑀸𑀢𑀸𑀢𑀧𑁂𑀳𑀺 𑀓𑀺𑀮𑀦𑁆𑀢𑁄 𑀭𑀢𑁆𑀢𑀺𑀪𑀸𑀕𑁂 𑀢𑀢𑁆𑀣𑁂𑀯 𑀓𑀸𑀮𑀫𑀓𑀸𑀲𑀺. 𑀯𑀺𑀪𑀸𑀢𑀸𑀬 𑀭𑀢𑁆𑀢𑀺𑀬𑀸, ‘‘𑀤𑁂𑀯, 𑀓𑁄𑀲𑀮𑀦𑀭𑀺𑀦𑁆𑀤 𑀅𑀦𑀸𑀣𑁄 𑀚𑀸𑀢𑁄𑀲𑀻’’𑀢𑀺 𑀯𑀺𑀧𑁆𑀧𑀮𑀧𑀦𑁆𑀢𑀺𑀬𑀸 𑀢𑀲𑁆𑀲𑀸 𑀇𑀢𑁆𑀣𑀺𑀬𑀸 𑀲𑀤𑁆𑀤𑀁 𑀲𑀼𑀢𑁆𑀯𑀸 𑀭𑀜𑁆𑀜𑁄 𑀆𑀭𑁄𑀘𑁂𑀲𑀼𑀁. 𑀲𑁄 𑀫𑀸𑀢𑀼𑀮𑀲𑁆𑀲 𑀫𑀳𑀦𑁆𑀢𑁂𑀦 𑀲𑀓𑁆𑀓𑀸𑀭𑁂𑀦 𑀲𑀭𑀻𑀭𑀓𑀺𑀘𑁆𑀘𑀁 𑀓𑀸𑀭𑁂𑀲𑀺.

𑀯𑀺𑀝𑀝𑀽𑀪𑁄𑀧𑀺 𑀭𑀚𑁆𑀚𑀁 𑀮𑀪𑀺𑀢𑁆𑀯𑀸 𑀢𑀁 𑀯𑁂𑀭𑀁 𑀲𑀭𑀺𑀢𑁆𑀯𑀸 ‘‘𑀲𑀩𑁆𑀩𑁂𑀧𑀺 𑀲𑀸𑀓𑀺𑀬𑁂 𑀫𑀸𑀭𑁂𑀲𑁆𑀲𑀸𑀫𑀻’’𑀢𑀺 𑀫𑀳𑀢𑀺𑀬𑀸 𑀲𑁂𑀦𑀸𑀬 𑀦𑀺𑀓𑁆𑀔𑀫𑀺. 𑀢𑀁 𑀤𑀺𑀯𑀲𑀁 𑀲𑀢𑁆𑀣𑀸 𑀧𑀘𑁆𑀘𑀽𑀲𑀓𑀸𑀮𑁂 𑀮𑁄𑀓𑀁 𑀯𑁄𑀮𑁄𑀓𑁂𑀦𑁆𑀢𑁄 𑀜𑀸𑀢𑀺𑀲𑀗𑁆𑀖𑀲𑁆𑀲 𑀯𑀺𑀦𑀸𑀲𑀁 𑀤𑀺𑀲𑁆𑀯𑀸, ‘‘𑀜𑀸𑀢𑀺𑀲𑀗𑁆𑀕𑀳𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀧𑀼𑀩𑁆𑀩𑀡𑁆𑀳𑀲𑀫𑀬𑁂 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸, 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀦𑁆𑀢𑁄 𑀕𑀦𑁆𑀥𑀓𑀼𑀝𑀺𑀬𑀁 𑀲𑀻𑀳𑀲𑁂𑀬𑁆𑀬𑀁 𑀓𑀧𑁆𑀧𑁂𑀢𑁆𑀯𑀸, 𑀲𑀸𑀬𑀦𑁆𑀳𑀲𑀫𑀬𑁂 𑀆𑀓𑀸𑀲𑁂𑀦 𑀕𑀦𑁆𑀢𑁆𑀯𑀸, 𑀓𑀧𑀺𑀮𑀯𑀢𑁆𑀣𑀼𑀲𑀸𑀫𑀦𑁆𑀢𑁂 𑀏𑀓𑀲𑁆𑀫𑀺𑀁 𑀓𑀩𑀭𑀘𑁆𑀙𑀸𑀬𑁂 𑀭𑀼𑀓𑁆𑀔𑀫𑀽𑀮𑁂 𑀦𑀺𑀲𑀻𑀤𑀺. 𑀢𑀢𑁄 𑀯𑀺𑀝𑀝𑀽𑀪𑀲𑁆𑀲 𑀭𑀚𑁆𑀚𑀲𑀻𑀫𑀸𑀬 𑀫𑀳𑀦𑁆𑀢𑁄 𑀲𑀦𑁆𑀤𑀘𑁆𑀙𑀸𑀬𑁄 𑀦𑀺𑀕𑁆𑀭𑁄𑀥𑁄 𑀅𑀢𑁆𑀣𑀺. 𑀯𑀺𑀝𑀝𑀽𑀪𑁄 𑀲𑀢𑁆𑀣𑀸𑀭𑀁 𑀤𑀺𑀲𑁆𑀯𑀸 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸, ‘‘𑀪𑀦𑁆𑀢𑁂, 𑀓𑀺𑀁 𑀓𑀸𑀭𑀡𑀸 𑀏𑀯𑀭𑀽𑀧𑀸𑀬 𑀉𑀡𑁆𑀳𑀯𑁂𑀮𑀸𑀬 𑀇𑀫𑀲𑁆𑀫𑀺𑀁 𑀓𑀩𑀭𑀘𑁆𑀙𑀸𑀬𑁂 𑀭𑀼𑀓𑁆𑀔𑀫𑀽𑀮𑁂 𑀦𑀺𑀲𑀻𑀤𑀣, 𑀏𑀢𑀲𑁆𑀫𑀺𑀁 𑀲𑀦𑁆𑀤𑀘𑁆𑀙𑀸𑀬𑁂 𑀦𑀺𑀕𑁆𑀭𑁄𑀥𑀫𑀽𑀮𑁂 𑀦𑀺𑀲𑀻𑀤𑀣, 𑀪𑀦𑁆𑀢𑁂’’𑀢𑀺 𑀯𑀢𑁆𑀯𑀸, ‘‘𑀳𑁄𑀢𑀼, 𑀫𑀳𑀸𑀭𑀸𑀚, 𑀜𑀸𑀢𑀓𑀸𑀦𑀁 𑀙𑀸𑀬𑀸 𑀦𑀸𑀫 𑀲𑀻𑀢𑀮𑀸’’𑀢𑀺 𑀯𑀼𑀢𑁆𑀢𑁂, ‘‘𑀜𑀸𑀢𑀓𑀸𑀦𑀼𑀭𑀓𑁆𑀔𑀦𑀢𑁆𑀣𑀸𑀬 𑀲𑀢𑁆𑀣𑀸 𑀆𑀕𑀢𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀦𑀺𑀯𑀢𑁆𑀢𑀺𑀢𑁆𑀯𑀸 𑀲𑀸𑀯𑀢𑁆𑀣𑀺𑀁𑀬𑁂𑀯 𑀧𑀘𑁆𑀘𑀸𑀕𑀫𑀺. 𑀲𑀢𑁆𑀣𑀸𑀧𑀺 𑀉𑀧𑁆𑀧𑀢𑀺𑀢𑁆𑀯𑀸 𑀚𑁂𑀢𑀯𑀦𑀫𑁂𑀯 𑀕𑀢𑁄.

𑀭𑀸𑀚𑀸 𑀲𑀸𑀓𑀺𑀬𑀸𑀦𑀁 𑀤𑁄𑀲𑀁 𑀲𑀭𑀺𑀢𑁆𑀯𑀸 𑀤𑀼𑀢𑀺𑀬𑀫𑁆𑀧𑀺 𑀦𑀺𑀓𑁆𑀔𑀫𑀺𑀢𑁆𑀯𑀸 𑀢𑀣𑁂𑀯 𑀲𑀢𑁆𑀣𑀸𑀭𑀁 𑀧𑀲𑁆𑀲𑀺𑀢𑁆𑀯𑀸 𑀧𑀼𑀦 𑀦𑀺𑀯𑀢𑁆𑀢𑀺. 𑀢𑀢𑀺𑀬𑀯𑀸𑀭𑁂𑀧𑀺 𑀦𑀺𑀓𑁆𑀔𑀫𑀺𑀢𑁆𑀯𑀸 𑀢𑀣𑁂𑀯 𑀲𑀢𑁆𑀣𑀸𑀭𑀁 𑀧𑀲𑁆𑀲𑀺𑀢𑁆𑀯𑀸 𑀧𑀼𑀦 𑀦𑀺𑀯𑀢𑁆𑀢𑀺. 𑀘𑀢𑀼𑀢𑁆𑀣𑀯𑀸𑀭𑁂 𑀧𑀦 𑀢𑀲𑁆𑀫𑀺𑀁 𑀦𑀺𑀓𑁆𑀔𑀦𑁆𑀢𑁂 𑀲𑀢𑁆𑀣𑀸 𑀲𑀸𑀓𑀺𑀬𑀸𑀦𑀁 𑀧𑀼𑀩𑁆𑀩𑀓𑀫𑁆𑀫𑀁 𑀑𑀮𑁄𑀓𑁂𑀢𑁆𑀯𑀸 𑀢𑁂𑀲𑀁 𑀏𑀓𑀤𑀺𑀯𑀲𑀁 𑀦𑀤𑀺𑀬𑀁 𑀯𑀺𑀲𑀧𑀓𑁆𑀔𑀺𑀧𑀦𑀧𑀸𑀧𑀓𑀫𑁆𑀫𑀲𑁆𑀲 𑀅𑀧𑁆𑀧𑀝𑀺𑀩𑀸𑀳𑀺𑀬𑀪𑀸𑀯𑀁 𑀜𑀢𑁆𑀯𑀸 𑀘𑀢𑀼𑀢𑁆𑀣𑀯𑀸𑀭𑁂 𑀦𑀸𑀕𑀫𑀸𑀲𑀺. 𑀯𑀺𑀝𑀝𑀽𑀪𑁄 ‘‘𑀲𑀸𑀓𑀺𑀬𑁂 𑀖𑀸𑀢𑁂𑀲𑁆𑀲𑀸𑀫𑀻’’𑀢𑀺 𑀫𑀳𑀦𑁆𑀢𑁂𑀦 𑀩𑀮𑀓𑀸𑀬𑁂𑀦 𑀦𑀺𑀓𑁆𑀔𑀫𑀺. 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀧𑀦 𑀜𑀸𑀢𑀓𑀸 𑀅𑀲𑀢𑁆𑀢𑀖𑀸𑀢𑀓𑀸 𑀦𑀸𑀫, 𑀅𑀢𑁆𑀢𑀦𑀸 𑀫𑀭𑀦𑁆𑀢𑀸𑀧𑀺 𑀧𑀭𑁂𑀲𑀁 𑀚𑀻𑀯𑀺𑀢𑀁 𑀦 𑀯𑁄𑀭𑁄𑀧𑁂𑀦𑁆𑀢𑀺. 𑀢𑁂 𑀘𑀺𑀦𑁆𑀢𑀬𑀺𑀁𑀲𑀼 𑁋 ‘‘𑀫𑀬𑀁 𑀲𑀼𑀲𑀺𑀓𑁆𑀔𑀺𑀢𑀸 𑀓𑀢𑀳𑀢𑁆𑀣𑀸 𑀓𑀢𑀽𑀧𑀸𑀲𑀦𑀸 𑀫𑀳𑀺𑀲𑁆𑀲𑀸𑀲𑀸, 𑀦 𑀔𑁄 𑀧𑀦 𑀲𑀓𑁆𑀓𑀸 𑀅𑀫𑁆𑀳𑁂𑀳𑀺 𑀧𑀭𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀢𑀼𑀁, 𑀅𑀢𑁆𑀢𑀦𑁄 𑀓𑀫𑁆𑀫𑀁 𑀤𑀲𑁆𑀲𑁂𑀢𑁆𑀯𑀸 𑀧𑀮𑀸𑀧𑁂𑀲𑁆𑀲𑀸𑀫𑀸’’𑀢𑀺 𑀢𑁂 𑀓𑀢𑀲𑀦𑁆𑀦𑀸𑀳𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀬𑀼𑀤𑁆𑀥𑀁 𑀆𑀭𑀪𑀺𑀁𑀲𑀼. 𑀢𑁂𑀳𑀺 𑀔𑀺𑀢𑁆𑀢𑀸 𑀲𑀭𑀸 𑀯𑀺𑀝𑀝𑀽𑀪𑀲𑁆𑀲 𑀧𑀼𑀭𑀺𑀲𑀸𑀦𑀁 𑀅𑀦𑁆𑀢𑀭𑀦𑁆𑀢𑀭𑁂𑀦 𑀕𑀘𑁆𑀙𑀦𑁆𑀢𑀺, 𑀨𑀮𑀓𑀦𑁆𑀢𑀭𑀓𑀡𑁆𑀡𑀙𑀺𑀤𑁆𑀤𑀦𑁆𑀢𑀭𑀸𑀤𑀻𑀳𑀺 𑀦𑀺𑀓𑁆𑀔𑀫𑀦𑁆𑀢𑀺. 𑀯𑀺𑀝𑀝𑀽𑀪𑁄 𑀤𑀺𑀲𑁆𑀯𑀸 𑀦𑀦𑀼 𑀪𑀡𑁂 ‘‘𑀲𑀸𑀓𑀺𑀬𑀸 𑀅𑀲𑀢𑁆𑀢𑀖𑀸𑀢𑀓𑀸𑀫𑁆𑀳𑀸’’𑀢𑀺 𑀯𑀤𑀦𑁆𑀢𑀺, 𑀅𑀣 𑀘 𑀧𑀦 𑀫𑁂 𑀧𑀼𑀭𑀺𑀲𑁂 𑀦𑀸𑀲𑁂𑀦𑁆𑀢𑀻𑀢𑀺.

𑀅𑀣 𑀦𑀁 𑀏𑀓𑁄 𑀧𑀼𑀭𑀺𑀲𑁄 𑀆𑀳 𑁋 ‘‘𑀓𑀺𑀁 𑀲𑀸𑀫𑀺, 𑀦𑀺𑀯𑀢𑁆𑀢𑀺𑀢𑁆𑀯𑀸 𑀑𑀮𑁄𑀓𑁂𑀲𑀻’’𑀢𑀺? ‘‘𑀲𑀸𑀓𑀺𑀬𑀸 𑀫𑁂 𑀧𑀼𑀭𑀺𑀲𑁂 𑀦𑀸𑀲𑁂𑀦𑁆𑀢𑀻’’𑀢𑀺. ‘‘𑀢𑀼𑀫𑁆𑀳𑀸𑀓𑀁 𑀓𑁄𑀘𑀺 𑀧𑀼𑀭𑀺𑀲𑁄 𑀫𑀢𑁄 𑀦𑀸𑀫 𑀦𑀢𑁆𑀣𑀺. 𑀇𑀗𑁆𑀖 𑀢𑁂 𑀕𑀡𑀸𑀧𑁂𑀣𑀸’’𑀢𑀺. 𑀕𑀡𑀸𑀧𑁂𑀦𑁆𑀢𑁄 𑀏𑀓𑀲𑁆𑀲𑀧𑀺 𑀔𑀬𑀁 𑀦 𑀧𑀲𑁆𑀲𑀺. 𑀲𑁄 𑀢𑀢𑁄 𑀦𑀺𑀯𑀢𑁆𑀢𑀺𑀢𑁆𑀯𑀸 ‘‘𑀬𑁂 𑀬𑁂 𑀧𑀦 𑀪𑀡𑁂 ‘𑀲𑀸𑀓𑀺𑀬𑀫𑁆𑀳𑀸’𑀢𑀺 𑀪𑀡𑀦𑁆𑀢𑀺, 𑀲𑀩𑁆𑀩𑁂 𑀫𑀸𑀭𑁂𑀣, 𑀫𑀸𑀢𑀸𑀫𑀳𑀲𑁆𑀲 𑀧𑀦 𑀫𑀳𑀸𑀦𑀸𑀫𑀲𑀓𑁆𑀓𑀲𑁆𑀲 𑀲𑀦𑁆𑀢𑀺𑀓𑁂 𑀞𑀺𑀢𑀸𑀦𑀁 𑀚𑀻𑀯𑀺𑀢𑀁 𑀤𑁂𑀣𑀸’’𑀢𑀺 𑀆𑀳. 𑀲𑀸𑀓𑀺𑀬𑀸 𑀕𑀳𑁂𑀢𑀩𑁆𑀩𑀕𑀳𑀡𑀁 𑀅𑀧𑀲𑁆𑀲𑀦𑁆𑀢𑀸 𑀏𑀓𑀘𑁆𑀘𑁂 𑀢𑀺𑀡𑀁 𑀟𑀁𑀲𑀺𑀢𑁆𑀯𑀸, 𑀏𑀓𑀘𑁆𑀘𑁂 𑀦𑀴𑀁 𑀕𑀳𑁂𑀢𑁆𑀯𑀸 𑀅𑀝𑁆𑀞𑀁𑀲𑀼. ‘‘𑀢𑀼𑀫𑁆𑀳𑁂 𑀲𑀸𑀓𑀺𑀬𑀸, 𑀦𑁄’’𑀢𑀺 𑀧𑀼𑀘𑁆𑀙𑀺𑀢𑀸 𑀬𑀲𑁆𑀫𑀸 𑀢𑁂 𑀫𑀭𑀦𑁆𑀢𑀸𑀧𑀺 𑀫𑀼𑀲𑀸𑀯𑀸𑀤𑀁 𑀦 𑀪𑀡𑀦𑁆𑀢𑀺, 𑀢𑀲𑁆𑀫𑀸 𑀢𑀺𑀡𑀁 𑀟𑀁𑀲𑀺𑀢𑁆𑀯𑀸 𑀞𑀺𑀢𑀸 ‘‘𑀦𑁄 𑀲𑀸𑀓𑁄, 𑀢𑀺𑀡’’𑀦𑁆𑀢𑀺 𑀯𑀤𑀦𑁆𑀢𑀺. 𑀦𑀴𑀁 𑀕𑀳𑁂𑀢𑁆𑀯𑀸 𑀞𑀺𑀢𑀸 ‘‘𑀦𑁄 𑀲𑀸𑀓𑁄, 𑀦𑀴𑁄’’𑀢𑀺 𑀯𑀤𑀦𑁆𑀢𑀺. 𑀬𑁂 𑀘 𑀫𑀳𑀸𑀦𑀸𑀫𑀲𑁆𑀲 𑀲𑀦𑁆𑀢𑀺𑀓𑁂 𑀞𑀺𑀢𑀸, 𑀢𑁂 𑀘 𑀚𑀻𑀯𑀺𑀢𑀁 𑀮𑀪𑀺𑀁𑀲𑀼. 𑀢𑁂𑀲𑀼 𑀢𑀺𑀡𑀁 𑀟𑀁𑀲𑀺𑀢𑁆𑀯𑀸 𑀞𑀺𑀢𑀸 𑀢𑀺𑀡𑀲𑀸𑀓𑀺𑀬𑀸 𑀦𑀸𑀫, 𑀦𑀴𑀁 𑀕𑀳𑁂𑀢𑁆𑀯𑀸 𑀞𑀺𑀢𑀸 𑀦𑀴𑀲𑀸𑀓𑀺𑀬𑀸 𑀦𑀸𑀫 𑀚𑀸𑀢𑀸𑀢𑀺, 𑀯𑀺𑀝𑀝𑀽𑀪𑁄 𑀅𑀯𑀲𑁂𑀲𑁂 𑀔𑀻𑀭𑀧𑀓𑁂𑀧𑀺 𑀤𑀸𑀭𑀓𑁂 𑀅𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀖𑀸𑀢𑀸𑀧𑁂𑀦𑁆𑀢𑁄 𑀮𑁄𑀳𑀺𑀢𑀦𑀤𑀺𑀁 𑀧𑀯𑀢𑁆𑀢𑁂𑀢𑁆𑀯𑀸 𑀢𑁂𑀲𑀁 𑀕𑀮𑀮𑁄𑀳𑀺𑀢𑁂𑀦 𑀨𑀮𑀓𑀁 𑀥𑁄𑀯𑀸𑀧𑁂𑀲𑀺. 𑀏𑀯𑀁 𑀲𑀸𑀓𑀺𑀬𑀯𑀁𑀲𑁄 𑀯𑀺𑀝𑀝𑀽𑀪𑁂𑀦 𑀉𑀧𑀘𑁆𑀙𑀺𑀦𑁆𑀦𑁄.

𑀲𑁄 𑀫𑀳𑀸𑀦𑀸𑀫𑀲𑀓𑁆𑀓𑀁 𑀕𑀸𑀳𑀸𑀧𑁂𑀢𑁆𑀯𑀸 𑀦𑀺𑀯𑀢𑁆𑀢𑁄 ‘‘𑀧𑀸𑀢𑀭𑀸𑀲𑀯𑁂𑀮𑀸𑀬 𑀧𑀸𑀢𑀭𑀸𑀲𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀏𑀓𑀲𑁆𑀫𑀺𑀁 𑀞𑀸𑀦𑁂 𑀑𑀢𑀭𑀺𑀢𑁆𑀯𑀸 𑀪𑁄𑀚𑀦𑁂 𑀉𑀧𑀦𑀻𑀢𑁂 ‘‘𑀏𑀓𑀢𑁄𑀯 𑀪𑀼𑀜𑁆𑀚𑀺𑀲𑁆𑀲𑀸𑀫𑀸’’𑀢𑀺 𑀅𑀬𑁆𑀬𑀓𑀁 𑀧𑀓𑁆𑀓𑁄𑀲𑀸𑀧𑁂𑀲𑀺. 𑀔𑀢𑁆𑀢𑀺𑀬𑀸 𑀧𑀦 𑀚𑀻𑀯𑀺𑀢𑀁 𑀘𑀚𑀦𑁆𑀢𑀸𑀧𑀺 𑀤𑀸𑀲𑀺𑀧𑀼𑀢𑁆𑀢𑁂𑀳𑀺 𑀲𑀤𑁆𑀥𑀺𑀁 𑀦 𑀪𑀼𑀜𑁆𑀚𑀦𑁆𑀢𑀺. 𑀢𑀲𑁆𑀫𑀸 𑀫𑀳𑀸𑀦𑀸𑀫𑁄 𑀏𑀓𑀁 𑀲𑀭𑀁 𑀑𑀮𑁄𑀓𑁂𑀢𑁆𑀯𑀸 ‘‘𑀓𑀺𑀮𑀺𑀝𑁆𑀞𑀕𑀢𑁆𑀢𑁄𑀫𑁆𑀳𑀺, 𑀦𑁆𑀳𑀸𑀬𑀺𑀲𑁆𑀲𑀸𑀫𑀺, 𑀢𑀸𑀢𑀸’’𑀢𑀺 𑀆𑀳. ‘‘𑀲𑀸𑀥𑀼, 𑀅𑀬𑁆𑀬𑀓, 𑀦𑁆𑀳𑀸𑀬𑀣𑀸’’𑀢𑀺. 𑀲𑁄 ‘‘𑀅𑀬𑀁 𑀫𑀁 𑀏𑀓𑀢𑁄 𑀅𑀪𑀼𑀜𑁆𑀚𑀦𑁆𑀢𑀁 𑀖𑀸𑀢𑁂𑀲𑁆𑀲𑀢𑀺, 𑀲𑀬𑀫𑁂𑀯 𑀫𑁂 𑀫𑀢𑀁 𑀲𑁂𑀬𑁆𑀬𑁄’’𑀢𑀺 𑀓𑁂𑀲𑁂 𑀫𑀼𑀜𑁆𑀘𑀺𑀢𑁆𑀯𑀸 𑀅𑀕𑁆𑀕𑁂 𑀕𑀡𑁆𑀞𑀺𑀁 𑀓𑀢𑁆𑀯𑀸 𑀓𑁂𑀲𑁂𑀲𑀼 𑀧𑀸𑀤𑀗𑁆𑀕𑀼𑀝𑁆𑀞𑀓𑁂 𑀧𑀯𑁂𑀲𑁂𑀢𑁆𑀯𑀸 𑀉𑀤𑀓𑁂 𑀦𑀺𑀫𑀼𑀚𑁆𑀚𑀺. 𑀢𑀲𑁆𑀲 𑀕𑀼𑀡𑀢𑁂𑀚𑁂𑀦 𑀦𑀸𑀕𑀪𑀯𑀦𑀁 𑀉𑀡𑁆𑀳𑀸𑀓𑀸𑀭𑀁 𑀤𑀲𑁆𑀲𑁂𑀲𑀺. 𑀦𑀸𑀕𑀭𑀸𑀚𑀸 ‘‘𑀓𑀺𑀁 𑀦𑀼 𑀔𑁄’’𑀢𑀺 𑀉𑀧𑀥𑀸𑀭𑁂𑀦𑁆𑀢𑁄 𑀢𑀁 𑀜𑀢𑁆𑀯𑀸 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀆𑀕𑀦𑁆𑀢𑁆𑀯𑀸 𑀢𑀁 𑀅𑀢𑁆𑀢𑀦𑁄 𑀨𑀡𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀦𑀸𑀕𑀪𑀯𑀦𑀁 𑀧𑀯𑁂𑀲𑁂𑀲𑀺. 𑀲𑁄 𑀤𑁆𑀯𑀸𑀤𑀲𑁆𑀲 𑀯𑀲𑁆𑀲𑀸𑀦𑀺 𑀢𑀢𑁆𑀣𑁂𑀯 𑀯𑀲𑀺. 𑀯𑀺𑀝𑀝𑀽𑀪𑁄𑀧𑀺 ‘‘𑀫𑀬𑁆𑀳𑀁 𑀅𑀬𑁆𑀬𑀓𑁄 𑀇𑀤𑀸𑀦𑀺 𑀆𑀕𑀫𑀺𑀲𑁆𑀲𑀢𑀺, 𑀇𑀤𑀸𑀦𑀺 𑀆𑀕𑀫𑀺𑀲𑁆𑀲𑀢𑀻’’𑀢𑀺 𑀆𑀕𑀫𑀬𑀫𑀸𑀦𑁄𑀯 𑀦𑀺𑀲𑀻𑀤𑀺. 𑀢𑀲𑁆𑀫𑀺𑀁 𑀅𑀢𑀺𑀘𑀺𑀭𑀸𑀬𑀦𑁆𑀢𑁂 𑀲𑀭𑀁 𑀯𑀺𑀘𑀺𑀦𑀸𑀧𑁂𑀢𑁆𑀯𑀸 𑀤𑀻𑀧𑀸𑀮𑁄𑀓𑁂𑀦 𑀧𑀼𑀭𑀺𑀲𑀩𑁆𑀪𑀦𑁆𑀢𑀭𑀸𑀦𑀺𑀧𑀺 𑀑𑀮𑁄𑀓𑁂𑀢𑁆𑀯𑀸 𑀅𑀤𑀺𑀲𑁆𑀯𑀸 ‘‘𑀕𑀢𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀧𑀓𑁆𑀓𑀸𑀫𑀺. 𑀲𑁄 𑀭𑀢𑁆𑀢𑀺𑀪𑀸𑀕𑁂 𑀅𑀘𑀺𑀭𑀯𑀢𑀺𑀁 𑀧𑀢𑁆𑀯𑀸 𑀔𑀦𑁆𑀥𑀸𑀯𑀸𑀭𑀁 𑀦𑀺𑀯𑀸𑀲𑁂𑀲𑀺. 𑀏𑀓𑀘𑁆𑀘𑁂 𑀅𑀦𑁆𑀢𑁄𑀦𑀤𑀺𑀬𑀁 𑀯𑀸𑀮𑀼𑀓𑀸𑀧𑀼𑀮𑀺𑀦𑁂 𑀦𑀺𑀧𑀚𑁆𑀚𑀺𑀁𑀲𑀼, 𑀏𑀓𑀘𑁆𑀘𑁂 𑀩𑀳𑀺𑀣𑀮𑁂, 𑀅𑀦𑁆𑀢𑁄𑀦𑀺𑀧𑀦𑁆𑀦𑁂𑀲𑀼𑀧𑀺 𑀧𑀼𑀩𑁆𑀩𑁂 𑀅𑀓𑀢𑀧𑀸𑀧𑀓𑀫𑁆𑀫𑀸 𑀅𑀢𑁆𑀣𑀺, 𑀩𑀳𑀺𑀦𑀺𑀧𑀦𑁆𑀦𑁂𑀲𑀼𑀧𑀺 𑀧𑀼𑀩𑁆𑀩𑁂 𑀓𑀢𑀧𑀸𑀧𑀓𑀫𑁆𑀫𑀸 𑀅𑀢𑁆𑀣𑀺, 𑀢𑁂𑀲𑀁 𑀦𑀺𑀧𑀦𑁆𑀦𑀝𑁆𑀞𑀸𑀦𑁂𑀲𑀼 𑀓𑀺𑀧𑀺𑀮𑁆𑀮𑀺𑀓𑀸 𑀉𑀝𑁆𑀞𑀳𑀺𑀁𑀲𑀼. 𑀢𑁂 ‘‘𑀫𑀬𑁆𑀳𑀁 𑀦𑀺𑀧𑀦𑁆𑀦𑀝𑁆𑀞𑀸𑀦𑁂 𑀓𑀺𑀧𑀺𑀮𑁆𑀮𑀺𑀓𑀸, 𑀫𑀬𑁆𑀳𑀁 𑀦𑀺𑀧𑀦𑁆𑀦𑀝𑁆𑀞𑀸𑀦𑁂 𑀓𑀺𑀧𑀺𑀮𑁆𑀮𑀺𑀓𑀸’’𑀢𑀺 𑀉𑀝𑁆𑀞𑀳𑀺𑀢𑁆𑀯𑀸 𑀅𑀓𑀢𑀧𑀸𑀧𑀓𑀫𑁆𑀫𑀸 𑀉𑀢𑁆𑀢𑀭𑀺𑀢𑁆𑀯𑀸 𑀣𑀮𑁂 𑀦𑀺𑀧𑀚𑁆𑀚𑀺𑀁𑀲𑀼, 𑀓𑀢𑀧𑀸𑀧𑀓𑀫𑁆𑀫𑀸 𑀑𑀢𑀭𑀺𑀢𑁆𑀯𑀸 𑀯𑀸𑀮𑀼𑀓𑀸𑀧𑀼𑀮𑀺𑀦𑁂 𑀦𑀺𑀧𑀚𑁆𑀚𑀺𑀁𑀲𑀼. 𑀢𑀲𑁆𑀫𑀺𑀁 𑀔𑀡𑁂 𑀫𑀳𑀸𑀫𑁂𑀖𑁄 𑀉𑀝𑁆𑀞𑀳𑀺𑀢𑁆𑀯𑀸 𑀖𑀦𑀯𑀲𑁆𑀲𑀁 𑀯𑀲𑁆𑀲𑀺. 𑀦𑀤𑀺𑀬𑀸 𑀑𑀖𑁄 𑀆𑀕𑀦𑁆𑀢𑁆𑀯𑀸 𑀯𑀺𑀝𑀝𑀽𑀪𑀁 𑀲𑀤𑁆𑀥𑀺𑀁 𑀧𑀭𑀺𑀲𑀸𑀬 𑀲𑀫𑀼𑀤𑁆𑀤𑀫𑁂𑀯 𑀧𑀸𑀧𑁂𑀲𑀺. 𑀲𑀩𑁆𑀩𑁂 𑀢𑀢𑁆𑀣 𑀫𑀘𑁆𑀙𑀓𑀘𑁆𑀙𑀧𑀪𑀓𑁆𑀔𑀸 𑀅𑀳𑁂𑀲𑀼𑀁.

𑀫𑀳𑀸𑀚𑀦𑁄 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀺 ‘‘𑀲𑀸𑀓𑀺𑀬𑀸𑀦𑀁 𑀫𑀭𑀡𑀁 𑀅𑀬𑀼𑀢𑁆𑀢𑀁, ‘𑀏𑀯𑀁 𑀦𑀸𑀫 𑀓𑁄𑀝𑁆𑀝𑁂𑀢𑁆𑀯𑀸 𑀓𑁄𑀝𑁆𑀝𑁂𑀢𑁆𑀯𑀸 𑀲𑀸𑀓𑀺𑀬𑀸 𑀫𑀸𑀭𑁂𑀢𑀩𑁆𑀩𑀸’𑀢𑀺 𑀅𑀦𑀦𑀼𑀘𑁆𑀙𑀯𑀺𑀓𑀫𑁂𑀢’’𑀦𑁆𑀢𑀺. 𑀲𑀢𑁆𑀣𑀸 𑀢𑀁 𑀓𑀣𑀁 𑀲𑀼𑀢𑁆𑀯𑀸, ‘‘𑀪𑀺𑀓𑁆𑀔𑀯𑁂, 𑀇𑀫𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂 𑀓𑀺𑀜𑁆𑀘𑀸𑀧𑀺 𑀲𑀸𑀓𑀺𑀬𑀸𑀦𑀁 𑀏𑀯𑀁 𑀫𑀭𑀡𑀁 𑀅𑀬𑀼𑀢𑁆𑀢𑀁, 𑀧𑀼𑀩𑁆𑀩𑁂 𑀓𑀢𑀧𑀸𑀧𑀓𑀫𑁆𑀫𑀯𑀲𑁂𑀦 𑀧𑀦 𑀬𑀼𑀢𑁆𑀢𑀫𑁂𑀯𑁂𑀢𑁂𑀳𑀺 𑀮𑀤𑁆𑀥’’𑀦𑁆𑀢𑀺 𑀆𑀳. ‘‘𑀓𑀺𑀁 𑀧𑀦, 𑀪𑀦𑁆𑀢𑁂, 𑀏𑀢𑁂 𑀧𑀼𑀩𑁆𑀩𑁂 𑀅𑀓𑀁𑀲𑀽’’𑀢𑀺? 𑀲𑀩𑁆𑀩𑁂 𑀏𑀓𑀢𑁄 𑀳𑀼𑀢𑁆𑀯𑀸 𑀦𑀤𑀺𑀬𑀁 𑀯𑀺𑀲𑀁 𑀧𑀓𑁆𑀔𑀺𑀧𑀺𑀁𑀲𑀽𑀢𑀺. 𑀧𑀼𑀦𑁂𑀓𑀤𑀺𑀯𑀲𑀁 𑀥𑀫𑁆𑀫𑀲𑀪𑀸𑀬𑀁 𑀪𑀺𑀓𑁆𑀔𑀽 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 𑁋 ‘‘𑀯𑀺𑀝𑀝𑀽𑀪𑁄 𑀏𑀢𑁆𑀢𑀓𑁂 𑀲𑀸𑀓𑀺𑀬𑁂 𑀫𑀸𑀭𑁂𑀢𑁆𑀯𑀸 𑀆𑀕𑀘𑁆𑀙𑀦𑁆𑀢𑁄 𑀅𑀢𑁆𑀢𑀦𑁄 𑀫𑀦𑁄𑀭𑀣𑁂 𑀫𑀢𑁆𑀣𑀓𑀁 𑀅𑀧𑁆𑀧𑀢𑁆𑀢𑁂𑀬𑁂𑀯 𑀏𑀢𑁆𑀢𑀓𑀁 𑀚𑀦𑀁 𑀆𑀤𑀸𑀬 𑀫𑀳𑀸𑀲𑀫𑀼𑀤𑁆𑀤𑁂 𑀫𑀘𑁆𑀙𑀓𑀘𑁆𑀙𑀧𑀪𑀓𑁆𑀔𑁄 𑀚𑀸𑀢𑁄’’𑀢𑀺. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂, ‘‘𑀇𑀫𑁂𑀲𑀁 𑀲𑀢𑁆𑀢𑀸𑀦𑀁 𑀫𑀦𑁄𑀭𑀣𑁂 𑀫𑀢𑁆𑀣𑀓𑀁 𑀅𑀧𑁆𑀧𑀢𑁆𑀢𑁂𑀬𑁂𑀯 𑀫𑀘𑁆𑀘𑀼𑀭𑀸𑀚𑀸 𑀲𑀼𑀢𑁆𑀢𑀁 𑀕𑀸𑀫𑀁 𑀅𑀚𑁆𑀛𑁄𑀢𑁆𑀣𑀭𑀦𑁆𑀢𑁄 𑀫𑀳𑁄𑀖𑁄 𑀯𑀺𑀬 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀙𑀺𑀦𑁆𑀤𑀺𑀢𑁆𑀯𑀸 𑀘𑀢𑀽𑀲𑀼 𑀅𑀧𑀸𑀬𑀲𑀫𑀼𑀤𑁆𑀤𑁂𑀲𑀼 𑀦𑀺𑀫𑀼𑀚𑁆𑀚𑀸𑀧𑁂𑀢𑀻’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁪𑁭. ‘‘𑀧𑀼𑀧𑁆𑀨𑀸𑀦𑀺 𑀳𑁂𑀯 𑀧𑀘𑀺𑀦𑀦𑁆𑀢𑀁, 𑀩𑁆𑀬𑀸𑀲𑀢𑁆𑀢𑀫𑀦𑀲𑀁 𑀦𑀭𑀁;

𑀲𑀼𑀢𑁆𑀢𑀁 𑀕𑀸𑀫𑀁 𑀫𑀳𑁄𑀖𑁄𑀯, 𑀫𑀘𑁆𑀘𑀼 𑀆𑀤𑀸𑀬 𑀕𑀘𑁆𑀙𑀢𑀻’’𑀢𑀺.

𑀢𑀢𑁆𑀣 𑀩𑁆𑀬𑀸𑀲𑀢𑁆𑀢𑀫𑀦𑀲𑀁 𑀦𑀭𑀦𑁆𑀢𑀺 𑀲𑀫𑁆𑀧𑀢𑁆𑀢𑁂 𑀯𑀸 𑀅𑀲𑀫𑁆𑀧𑀢𑁆𑀢𑁂 𑀯𑀸 𑀮𑀕𑁆𑀕𑀫𑀸𑀦𑀲𑀁. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀣𑀸 𑀫𑀸𑀮𑀸𑀓𑀸𑀭𑁄 𑀧𑀼𑀧𑁆𑀨𑀸𑀭𑀸𑀫𑀁 𑀧𑀯𑀺𑀲𑀺𑀢𑁆𑀯𑀸 ‘‘𑀧𑀼𑀧𑁆𑀨𑀸𑀦𑀺 𑀧𑀘𑀺𑀦𑀺𑀲𑁆𑀲𑀸𑀫𑀻’’𑀢𑀺 𑀢𑀢𑁄 𑀧𑀼𑀧𑁆𑀨𑀸𑀦𑀺 𑀕𑀳𑁂𑀢𑁆𑀯𑀸 𑀅𑀜𑁆𑀜𑀫𑀜𑁆𑀜𑀁 𑀯𑀸 𑀕𑀘𑁆𑀙𑀁 𑀧𑀢𑁆𑀣𑁂𑀦𑁆𑀢𑁄 𑀲𑀓𑀮𑁂 𑀧𑀼𑀧𑁆𑀨𑀸𑀭𑀸𑀫𑁂 𑀫𑀦𑀁 𑀧𑁂𑀲𑁂𑀢𑀺, ‘‘𑀇𑀢𑁄 𑀘𑀺𑀢𑁄 𑀘 𑀧𑀼𑀧𑁆𑀨𑀸𑀦𑀺 𑀧𑀘𑀺𑀦𑀺𑀲𑁆𑀲𑀸𑀫𑀻’’𑀢𑀺 𑀢𑀢𑁄 𑀧𑀼𑀧𑁆𑀨𑀸𑀦𑀺 𑀅𑀕𑁆𑀕𑀳𑁂𑀢𑁆𑀯𑀸 𑀅𑀜𑁆𑀜𑀢𑁆𑀣 𑀫𑀦𑀁 𑀧𑁂𑀲𑁂𑀲𑀺, 𑀢𑀫𑁂𑀯 𑀕𑀘𑁆𑀙𑀁 𑀧𑀘𑀺𑀦𑀦𑁆𑀢𑁄 𑀧𑀫𑀸𑀤𑀫𑀸𑀧𑀚𑁆𑀚𑀢𑀺, 𑀏𑀯𑀫𑁂𑀯 𑀏𑀓𑀘𑁆𑀘𑁄 𑀧𑀼𑀧𑁆𑀨𑀸𑀭𑀸𑀫𑀲𑀤𑀺𑀲𑀁 𑀧𑀜𑁆𑀘𑀓𑀸𑀫𑀕𑀼𑀡𑀫𑀚𑁆𑀛𑀁 𑀑𑀢𑀭𑀺𑀢𑁆𑀯𑀸 𑀫𑀦𑁄𑀭𑀫𑀁 𑀭𑀽𑀧𑀁 𑀮𑀪𑀺𑀢𑁆𑀯𑀸 𑀫𑀦𑁄𑀭𑀫𑀸𑀦𑀁 𑀲𑀤𑁆𑀤𑀕𑀦𑁆𑀥𑀭𑀲𑀨𑁄𑀝𑁆𑀞𑀩𑁆𑀩𑀸𑀦𑀁 𑀅𑀜𑁆𑀜𑀢𑀭𑀁 𑀧𑀢𑁆𑀣𑁂𑀢𑀺. 𑀅𑀜𑁆𑀜𑁄 𑀢𑁂𑀲𑀼 𑀯𑀸 𑀅𑀜𑁆𑀜𑀢𑀭𑀁 𑀮𑀪𑀺𑀢𑁆𑀯𑀸 𑀅𑀜𑁆𑀜𑀢𑀭𑀁 𑀧𑀢𑁆𑀣𑁂𑀢𑀺, 𑀭𑀽𑀧𑀫𑁂𑀯 𑀯𑀸 𑀮𑀪𑀺𑀢𑁆𑀯𑀸 𑀅𑀜𑁆𑀜𑀁 𑀅𑀧𑀢𑁆𑀣𑁂𑀦𑁆𑀢𑁄 𑀢𑀫𑁂𑀯 𑀅𑀲𑁆𑀲𑀸𑀤𑁂𑀢𑀺, 𑀲𑀤𑁆𑀤𑀸𑀤𑀻𑀲𑀼 𑀯𑀸 𑀅𑀜𑁆𑀜𑀢𑀭𑀁. 𑀏𑀲𑁂𑀯 𑀦𑀬𑁄 𑀕𑁄𑀫𑀳𑀺𑀁𑀲𑀤𑀸𑀲𑀺𑀤𑀸𑀲𑀔𑁂𑀢𑁆𑀢𑀯𑀢𑁆𑀣𑀼𑀕𑀸𑀫𑀦𑀺𑀕𑀫𑀚𑀦𑀧𑀤𑀸𑀤𑀻𑀲𑀼, 𑀧𑀩𑁆𑀩𑀚𑀺𑀢𑀸𑀦𑀫𑁆𑀧𑀺 𑀧𑀭𑀺𑀯𑁂𑀡𑀯𑀺𑀳𑀸𑀭𑀧𑀢𑁆𑀢𑀘𑀻𑀯𑀭𑀸𑀤𑀻𑀲𑀽𑀢𑀺 𑀏𑀯𑀁 𑀧𑀜𑁆𑀘𑀓𑀸𑀫𑀕𑀼𑀡𑀲𑀗𑁆𑀔𑀸𑀢𑀸𑀦𑀺 𑀧𑀼𑀧𑁆𑀨𑀸𑀦𑀺 𑀏𑀯 𑀧𑀘𑀺𑀦𑀦𑁆𑀢𑀁 𑀲𑀫𑁆𑀧𑀢𑁆𑀢𑁂 𑀯𑀸 𑀅𑀲𑀫𑁆𑀧𑀢𑁆𑀢𑁂 𑀯𑀸 𑀓𑀸𑀫𑀕𑀼𑀡𑁂 𑀩𑁆𑀬𑀸𑀲𑀢𑁆𑀢𑀫𑀦𑀲𑀁 𑀦𑀭𑀁. 𑀲𑀼𑀢𑁆𑀢𑀁 𑀕𑀸𑀫𑀦𑁆𑀢𑀺 𑀕𑀸𑀫𑀲𑁆𑀲 𑀕𑁂𑀳𑀪𑀺𑀢𑁆𑀢𑀺𑀆𑀤𑀻𑀦𑀁 𑀧𑀦 𑀲𑀼𑀧𑀦𑀯𑀲𑁂𑀦 𑀲𑀼𑀧𑀦𑀁 𑀦𑀸𑀫 𑀦𑀢𑁆𑀣𑀺, 𑀲𑀢𑁆𑀢𑀸𑀦𑀁 𑀧𑀦 𑀲𑀼𑀢𑁆𑀢𑀧𑀫𑀢𑁆𑀢𑀢𑀁 𑀉𑀧𑀸𑀤𑀸𑀬 𑀲𑀼𑀢𑁆𑀢𑁄 𑀦𑀸𑀫 𑀳𑁄𑀢𑀺. 𑀏𑀯𑀁 𑀲𑀼𑀢𑁆𑀢𑀁 𑀕𑀸𑀫𑀁 𑀤𑁆𑀯𑁂 𑀢𑀻𑀡𑀺 𑀬𑁄𑀚𑀦𑀸𑀦𑀺 𑀆𑀬𑀢𑀕𑀫𑁆𑀪𑀻𑀭𑁄 𑀫𑀳𑁄𑀖𑁄𑀯 𑀫𑀘𑁆𑀘𑀼 𑀆𑀤𑀸𑀬 𑀕𑀘𑁆𑀙𑀢𑀺. 𑀬𑀣𑀸 𑀲𑁄 𑀫𑀳𑁄𑀖𑁄 𑀇𑀢𑁆𑀣𑀺𑀧𑀼𑀭𑀺𑀲𑀕𑁄𑀫𑀳𑀺𑀁𑀲𑀓𑀼𑀓𑁆𑀓𑀼𑀝𑀸𑀤𑀻𑀲𑀼 𑀓𑀺𑀜𑁆𑀘𑀺 𑀅𑀦𑀯𑀲𑁂𑀲𑁂𑀢𑁆𑀯𑀸 𑀲𑀩𑁆𑀩𑀁 𑀢𑀁 𑀕𑀸𑀫𑀁 𑀲𑀫𑀼𑀤𑁆𑀤𑀁 𑀧𑀸𑀧𑁂𑀢𑁆𑀯𑀸 𑀫𑀘𑁆𑀙𑀓𑀘𑁆𑀙𑀧𑀪𑀓𑁆𑀔𑀁 𑀓𑀭𑁄𑀢𑀺, 𑀏𑀯𑀫𑁂𑀯 𑀩𑁆𑀬𑀸𑀲𑀢𑁆𑀢𑀫𑀦𑀲𑀁 𑀦𑀭𑀁 𑀫𑀘𑁆𑀘𑀼 𑀆𑀤𑀸𑀬 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀫𑀲𑁆𑀲 𑀙𑀺𑀦𑁆𑀤𑀺𑀢𑁆𑀯𑀸 𑀘𑀢𑀽𑀲𑀼 𑀅𑀧𑀸𑀬𑀲𑀫𑀼𑀤𑁆𑀤𑁂𑀲𑀼 𑀦𑀺𑀫𑀼𑀚𑁆𑀚𑀸𑀧𑁂𑀢𑀻𑀢𑀺.

𑀤𑁂𑀲𑀦𑀸𑀯𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀢𑁆𑀢𑀸. 𑀫𑀳𑀸𑀚𑀦𑀲𑁆𑀲 𑀲𑀸𑀢𑁆𑀣𑀺𑀓𑀸 𑀤𑁂𑀲𑀦𑀸 𑀚𑀸𑀢𑀸𑀢𑀺.

𑀯𑀺𑀝𑀝𑀽𑀪𑀯𑀢𑁆𑀣𑀼 𑀢𑀢𑀺𑀬𑀁.

𑁪. 𑀧𑀢𑀺𑀧𑀽𑀚𑀺𑀓𑀓𑀼𑀫𑀸𑀭𑀺𑀯𑀢𑁆𑀣𑀼

𑀧𑀼𑀧𑁆𑀨𑀸𑀦𑀺 𑀳𑁂𑀯𑀸𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀦𑁆𑀢𑁄 𑀧𑀢𑀺𑀧𑀽𑀚𑀺𑀓𑀁 𑀦𑀸𑀫 𑀓𑀼𑀫𑀸𑀭𑀺𑀓𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀯𑀢𑁆𑀣𑀼 𑀢𑀸𑀯𑀢𑀺𑀁𑀲𑀤𑁂𑀯𑀮𑁄𑀓𑁂 𑀲𑀫𑀼𑀝𑁆𑀞𑀺𑀢𑀁.

𑀢𑀢𑁆𑀣 𑀓𑀺𑀭 𑀫𑀸𑀮𑀪𑀸𑀭𑀻 𑀦𑀸𑀫 𑀤𑁂𑀯𑀧𑀼𑀢𑁆𑀢𑁄 𑀅𑀘𑁆𑀙𑀭𑀸𑀲𑀳𑀲𑁆𑀲𑀧𑀭𑀺𑀯𑀼𑀢𑁄 𑀉𑀬𑁆𑀬𑀸𑀦𑀁 𑀧𑀸𑀯𑀺𑀲𑀺. 𑀧𑀜𑁆𑀘𑀲𑀢𑀸 𑀤𑁂𑀯𑀥𑀻𑀢𑀭𑁄 𑀭𑀼𑀓𑁆𑀔𑀁 𑀆𑀭𑀼𑀬𑁆𑀳 𑀧𑀼𑀧𑁆𑀨𑀸𑀦𑀺 𑀧𑀸𑀢𑁂𑀦𑁆𑀢𑀺, 𑀧𑀜𑁆𑀘𑀲𑀢𑀸 𑀧𑀢𑀺𑀢𑀸𑀦𑀺 𑀧𑀼𑀧𑁆𑀨𑀸𑀦𑀺 𑀕𑀳𑁂𑀢𑁆𑀯𑀸 𑀤𑁂𑀯𑀧𑀼𑀢𑁆𑀢𑀁 𑀅𑀮𑀗𑁆𑀓𑀭𑁄𑀦𑁆𑀢𑀺. 𑀢𑀸𑀲𑀼 𑀏𑀓𑀸 𑀤𑁂𑀯𑀥𑀻𑀢𑀸 𑀭𑀼𑀓𑁆𑀔𑀲𑀸𑀔𑀸𑀬𑀫𑁂𑀯 𑀘𑀼𑀢𑀸, 𑀲𑀭𑀻𑀭𑀁 𑀤𑀻𑀧𑀲𑀺𑀔𑀸 𑀯𑀺𑀬 𑀦𑀺𑀩𑁆𑀩𑀸𑀬𑀺. 𑀲𑀸 𑀲𑀸𑀯𑀢𑁆𑀣𑀺𑀬𑀁 𑀏𑀓𑀲𑁆𑀫𑀺𑀁 𑀓𑀼𑀮𑀕𑁂𑀳𑁂 𑀧𑀝𑀺𑀲𑀦𑁆𑀥𑀺𑀁 𑀕𑀳𑁂𑀢𑁆𑀯𑀸 𑀚𑀸𑀢𑀓𑀸𑀮𑁂 𑀚𑀸𑀢𑀺𑀲𑁆𑀲𑀭𑀸 𑀳𑀼𑀢𑁆𑀯𑀸 ‘‘𑀫𑀸𑀮𑀪𑀸𑀭𑀻𑀤𑁂𑀯𑀧𑀼𑀢𑁆𑀢𑀲𑁆𑀲 𑀪𑀭𑀺𑀬𑀸𑀫𑁆𑀳𑀻’’𑀢𑀺 𑀅𑀦𑀼𑀲𑁆𑀲𑀭𑀦𑁆𑀢𑀻 𑀯𑀼𑀟𑁆𑀠𑀺𑀫𑀦𑁆𑀯𑀸𑀬 𑀕𑀦𑁆𑀥𑀫𑀸𑀮𑀸𑀤𑀻𑀳𑀺 𑀧𑀽𑀚𑀁 𑀓𑀢𑁆𑀯𑀸 𑀲𑀸𑀫𑀺𑀓𑀲𑁆𑀲 𑀲𑀦𑁆𑀢𑀺𑀓𑁂 𑀅𑀪𑀺𑀦𑀺𑀩𑁆𑀩𑀢𑁆𑀢𑀺𑀁 𑀧𑀢𑁆𑀣𑁂𑀲𑀺. 𑀲𑀸 𑀲𑁄𑀴𑀲𑀯𑀲𑁆𑀲𑀓𑀸𑀮𑁂 𑀧𑀭𑀓𑀼𑀮𑀁 𑀕𑀢𑀸𑀧𑀺 𑀲𑀮𑀸𑀓𑀪𑀢𑁆𑀢𑀧𑀓𑁆𑀔𑀺𑀓𑀪𑀢𑁆𑀢𑀯𑀲𑁆𑀲𑀸𑀯𑀸𑀲𑀺𑀓𑀸𑀤𑀻𑀦𑀺 𑀤𑀢𑁆𑀯𑀸, ‘‘𑀅𑀬𑀁 𑀫𑁂 𑀲𑀸𑀫𑀺𑀓𑀲𑁆𑀲 𑀲𑀦𑁆𑀢𑀺𑀓𑁂 𑀦𑀺𑀩𑁆𑀩𑀢𑁆𑀢𑀦𑀢𑁆𑀣𑀸𑀬 𑀧𑀘𑁆𑀘𑀬𑁄 𑀳𑁄𑀢𑀽’’𑀢𑀺 𑀯𑀤𑀢𑀺. 𑀅𑀣𑀲𑁆𑀲𑀸 𑀪𑀺𑀓𑁆𑀔𑀽 ‘‘𑀅𑀬𑀁 𑀓𑀼𑀫𑀸𑀭𑀺𑀓𑀸 𑀉𑀝𑁆𑀞𑀸𑀬 𑀲𑀫𑀼𑀝𑁆𑀞𑀸𑀬 𑀧𑀢𑀺𑀫𑁂𑀯 𑀧𑀢𑁆𑀣𑁂𑀢𑀻𑀢𑀺 𑀧𑀢𑀺𑀧𑀽𑀚𑀺𑀓𑀸’’𑀢𑀺 𑀦𑀸𑀫𑀁 𑀓𑀭𑀺𑀁𑀲𑀼. 𑀲𑀸𑀧𑀺 𑀦𑀺𑀩𑀤𑁆𑀥𑀁 𑀆𑀲𑀦𑀲𑀸𑀮𑀁 𑀧𑀝𑀺𑀚𑀕𑁆𑀕𑀢𑀺, 𑀧𑀸𑀦𑀻𑀬𑀁 𑀉𑀧𑀝𑁆𑀞𑀧𑁂𑀢𑀺, 𑀆𑀲𑀦𑀸𑀦𑀺 𑀧𑀜𑁆𑀜𑀧𑁂𑀢𑀺. 𑀅𑀜𑁆𑀜𑁂𑀧𑀺 𑀫𑀦𑀼𑀲𑁆𑀲𑀸 𑀲𑀮𑀸𑀓𑀪𑀢𑁆𑀢𑀸𑀤𑀻𑀦𑀺 𑀤𑀸𑀢𑀼𑀓𑀸𑀫𑀸, ‘‘𑀅𑀫𑁆𑀫, 𑀇𑀫𑀸𑀦𑀺𑀧𑀺 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀧𑀝𑀺𑀧𑀸𑀤𑁂𑀬𑁆𑀬𑀸𑀲𑀻’’𑀢𑀺 𑀯𑀢𑁆𑀯𑀸 𑀆𑀳𑀭𑀺𑀢𑁆𑀯𑀸 𑀤𑁂𑀦𑁆𑀢𑀺. 𑀲𑀸𑀧𑀺 𑀏𑀢𑁂𑀦 𑀦𑀺𑀬𑀸𑀫𑁂𑀦 𑀆𑀕𑀘𑁆𑀙𑀦𑁆𑀢𑀻 𑀕𑀘𑁆𑀙𑀦𑁆𑀢𑀻 𑀏𑀓𑀧𑀤𑀯𑀸𑀭𑁂 𑀙𑀧𑀜𑁆𑀜𑀸𑀲 𑀓𑀼𑀲𑀮𑀥𑀫𑁆𑀫𑁂 (𑀥. 𑀲. 𑁧; 𑀥. 𑀲. 𑀅𑀝𑁆𑀞. 𑁧 𑀬𑁂𑀯𑀸𑀧𑀦𑀓𑀯𑀡𑁆𑀡𑀦𑀸) 𑀧𑀝𑀺𑀮𑀪𑀢𑀺. 𑀢𑀲𑁆𑀲𑀸 𑀓𑀼𑀘𑁆𑀙𑀺𑀬𑀁 𑀕𑀩𑁆𑀪𑁄 𑀧𑀢𑀺𑀝𑁆𑀞𑀳𑀺. 𑀲𑀸 𑀤𑀲𑀫𑀸𑀲𑀘𑁆𑀘𑀬𑁂𑀦 𑀧𑀼𑀢𑁆𑀢𑀁 𑀯𑀺𑀚𑀸𑀬𑀺. 𑀢𑀲𑁆𑀲 𑀧𑀤𑀲𑀸 𑀕𑀫𑀦𑀓𑀸𑀮𑁂 𑀅𑀜𑁆𑀜𑀫𑁆𑀧𑀺 𑀅𑀜𑁆𑀜𑀫𑁆𑀧𑀻𑀢𑀺 𑀘𑀢𑁆𑀢𑀸𑀭𑁄 𑀧𑀼𑀢𑁆𑀢𑁂 𑀧𑀝𑀺𑀮𑀪𑀺.

𑀲𑀸 𑀏𑀓𑀤𑀺𑀯𑀲𑀁 𑀤𑀸𑀦𑀁 𑀤𑀢𑁆𑀯𑀸 𑀧𑀽𑀚𑀁 𑀓𑀢𑁆𑀯𑀸 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀲𑀺𑀓𑁆𑀔𑀸𑀧𑀤𑀸𑀦𑀺 𑀭𑀓𑁆𑀔𑀺𑀢𑁆𑀯𑀸 𑀤𑀺𑀯𑀲𑀧𑀭𑀺𑀬𑁄𑀲𑀸𑀦𑁂 𑀢𑀁 𑀔𑀡𑀁 𑀦𑀺𑀩𑁆𑀩𑀢𑁆𑀢𑁂𑀦 𑀓𑁂𑀦𑀘𑀺 𑀭𑁄𑀕𑁂𑀦 𑀓𑀸𑀮𑀁 𑀓𑀢𑁆𑀯𑀸 𑀅𑀢𑁆𑀢𑀦𑁄 𑀲𑀸𑀫𑀺𑀓𑀲𑁆𑀲𑁂𑀯 𑀲𑀦𑁆𑀢𑀺𑀓𑁂 𑀦𑀺𑀩𑁆𑀩𑀢𑁆𑀢𑀺. 𑀇𑀢𑀭𑀸𑀧𑀺 𑀏𑀢𑁆𑀢𑀓𑀁 𑀓𑀸𑀮𑀁 𑀤𑁂𑀯𑀧𑀼𑀢𑁆𑀢𑀁 𑀅𑀮𑀗𑁆𑀓𑀭𑁄𑀦𑁆𑀢𑀺 𑀏𑀯. 𑀤𑁂𑀯𑀧𑀼𑀢𑁆𑀢𑁄 𑀢𑀁 𑀤𑀺𑀲𑁆𑀯𑀸 ‘‘𑀢𑁆𑀯𑀁 𑀧𑀸𑀢𑁄𑀯 𑀧𑀝𑁆𑀞𑀸𑀬 𑀦 𑀤𑀺𑀲𑁆𑀲𑀲𑀺, 𑀓𑀼𑀳𑀺𑀁 𑀕𑀢𑀸𑀲𑀻’’𑀢𑀺 𑀆𑀳. ‘‘𑀘𑀼𑀢𑀸𑀫𑁆𑀳𑀺 𑀲𑀸𑀫𑀻’’𑀢𑀺. ‘‘𑀓𑀺𑀁 𑀯𑀤𑁂𑀲𑀻’’𑀢𑀺? ‘‘𑀏𑀯𑀫𑁂𑀢𑀁, 𑀲𑀸𑀫𑀻’’𑀢𑀺. ‘‘𑀓𑀼𑀳𑀺𑀁 𑀦𑀺𑀩𑁆𑀩𑀢𑁆𑀢𑀸𑀲𑀻’’𑀢𑀺? ‘‘𑀲𑀸𑀯𑀢𑁆𑀣𑀺𑀬𑀁 𑀓𑀼𑀮𑀕𑁂𑀳𑁂’’𑀢𑀺. ‘‘𑀓𑀺𑀢𑁆𑀢𑀓𑀁 𑀓𑀸𑀮𑀁 𑀢𑀢𑁆𑀣 𑀞𑀺𑀢𑀸𑀲𑀻’’𑀢𑀺? ‘‘𑀤𑀲𑀫𑀸𑀲𑀘𑁆𑀘𑀬𑁂𑀦 𑀫𑀸𑀢𑀼 𑀓𑀼𑀘𑁆𑀙𑀺𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀲𑁄𑀴𑀲𑀯𑀲𑁆𑀲𑀓𑀸𑀮𑁂 𑀧𑀭𑀓𑀼𑀮𑀁 𑀕𑀦𑁆𑀢𑁆𑀯𑀸 𑀘𑀢𑁆𑀢𑀸𑀭𑁄 𑀧𑀼𑀢𑁆𑀢𑁂 𑀯𑀺𑀚𑀸𑀬𑀺𑀢𑁆𑀯𑀸 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀢𑀼𑀫𑁆𑀳𑁂 𑀧𑀢𑁆𑀣𑁂𑀢𑁆𑀯𑀸 𑀆𑀕𑀦𑁆𑀢𑁆𑀯𑀸 𑀢𑀼𑀫𑁆𑀳𑀸𑀓𑀫𑁂𑀯 𑀲𑀦𑁆𑀢𑀺𑀓𑁂 𑀦𑀺𑀩𑁆𑀩𑀢𑁆𑀢𑀸𑀫𑁆𑀳𑀺, 𑀲𑀸𑀫𑀻’’𑀢𑀺. ‘‘𑀫𑀦𑀼𑀲𑁆𑀲𑀸𑀦𑀁 𑀓𑀺𑀢𑁆𑀢𑀓𑀁 𑀆𑀬𑀽’’𑀢𑀺? ‘‘𑀯𑀲𑁆𑀲𑀲𑀢𑀫𑀢𑁆𑀢’’𑀦𑁆𑀢𑀺. ‘‘𑀏𑀢𑁆𑀢𑀓𑀫𑁂𑀯𑀸’’𑀢𑀺? ‘‘𑀆𑀫, 𑀲𑀸𑀫𑀻’’𑀢𑀺. ‘‘𑀏𑀢𑁆𑀢𑀓𑀁 𑀆𑀬𑀼𑀁 𑀕𑀳𑁂𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀫𑀦𑀼𑀲𑁆𑀲𑀸 𑀓𑀺𑀁 𑀦𑀼 𑀔𑁄 𑀲𑀼𑀢𑁆𑀢𑀧𑀫𑀢𑁆𑀢𑀸 𑀓𑀸𑀮𑀁 𑀅𑀢𑀺𑀓𑁆𑀓𑀸𑀫𑁂𑀦𑁆𑀢𑀺, 𑀉𑀤𑀸𑀳𑀼 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺 𑀓𑀭𑁄𑀦𑁆𑀢𑀻’’𑀢𑀺. ‘‘𑀓𑀺𑀁 𑀯𑀤𑁂𑀣, 𑀲𑀸𑀫𑀺’’? ‘‘𑀅𑀲𑀗𑁆𑀔𑁆𑀬𑁂𑀬𑁆𑀬𑀁 𑀆𑀬𑀼𑀁 𑀕𑀳𑁂𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀸 𑀯𑀺𑀬 𑀅𑀚𑀭𑀸𑀫𑀭𑀸 𑀯𑀺𑀬 𑀘 𑀦𑀺𑀘𑁆𑀘𑀁 𑀧𑀫𑀢𑁆𑀢𑀸, 𑀫𑀦𑀼𑀲𑁆𑀲𑀸’’𑀢𑀺. 𑀫𑀸𑀮𑀪𑀸𑀭𑀻𑀤𑁂𑀯𑀧𑀼𑀢𑁆𑀢𑀲𑁆𑀲 𑀫𑀳𑀸𑀲𑀁𑀯𑁂𑀕𑁄 𑀉𑀤𑀧𑀸𑀤𑀺 ‘‘𑀯𑀲𑁆𑀲𑀲𑀢𑀫𑀢𑁆𑀢𑀫𑀸𑀬𑀼𑀁 𑀕𑀳𑁂𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀫𑀦𑀼𑀲𑁆𑀲𑀸 𑀓𑀺𑀭 𑀧𑀫𑀢𑁆𑀢𑀸 𑀦𑀺𑀧𑀚𑁆𑀚𑀺𑀢𑁆𑀯𑀸 𑀦𑀺𑀤𑁆𑀤𑀸𑀬𑀦𑁆𑀢𑀺, 𑀓𑀤𑀸 𑀦𑀼 𑀔𑁄 𑀤𑀼𑀓𑁆𑀔𑀸 𑀫𑀼𑀘𑁆𑀘𑀺𑀲𑁆𑀲𑀦𑁆𑀢𑀻’’𑀢𑀺? 𑀫𑀦𑀼𑀲𑁆𑀲𑀸𑀦𑀁 𑀧𑀦 𑀯𑀲𑁆𑀲𑀲𑀢𑀁 𑀢𑀸𑀯𑀢𑀺𑀁𑀲𑀸𑀦𑀁 𑀤𑁂𑀯𑀸𑀦𑀁 𑀏𑀓𑁄 𑀭𑀢𑁆𑀢𑀺𑀦𑁆𑀤𑀺𑀯𑁄, 𑀢𑀸𑀬 𑀭𑀢𑁆𑀢𑀺𑀬𑀸 𑀢𑀺𑀁𑀲𑀭𑀢𑁆𑀢𑀺𑀬𑁄 𑀫𑀸𑀲𑁄, 𑀢𑁂𑀦 𑀫𑀸𑀲𑁂𑀦 𑀤𑁆𑀯𑀸𑀤𑀲𑀫𑀸𑀲𑀺𑀓𑁄 𑀲𑀁𑀯𑀘𑁆𑀙𑀭𑁄, 𑀢𑁂𑀦 𑀲𑀁𑀯𑀘𑁆𑀙𑀭𑁂𑀦 𑀤𑀺𑀩𑁆𑀩𑀯𑀲𑁆𑀲𑀲𑀳𑀲𑁆𑀲𑀁 𑀆𑀬𑀼𑀧𑁆𑀧𑀫𑀸𑀡𑀁, 𑀢𑀁 𑀫𑀦𑀼𑀲𑁆𑀲𑀕𑀡𑀦𑀸𑀬 𑀢𑀺𑀲𑁆𑀲𑁄 𑀯𑀲𑁆𑀲𑀓𑁄𑀝𑀺𑀬𑁄, 𑀲𑀝𑁆𑀞𑀺 𑀘 𑀯𑀲𑁆𑀲𑀲𑀢𑀲𑀳𑀲𑁆𑀲𑀸𑀦𑀺 𑀳𑁄𑀦𑁆𑀢𑀺. 𑀢𑀲𑁆𑀫𑀸 𑀢𑀲𑁆𑀲 𑀤𑁂𑀯𑀧𑀼𑀢𑁆𑀢𑀲𑁆𑀲 𑀏𑀓𑀤𑀺𑀯𑀲𑁄𑀧𑀺 𑀦𑀸𑀢𑀺𑀓𑁆𑀓𑀦𑁆𑀢𑁄 𑀫𑀼𑀳𑀼𑀢𑁆𑀢𑀲𑀤𑀺𑀲𑁄𑀯 𑀓𑀸𑀮𑁄 𑀅𑀳𑁄𑀲𑀺. 𑀏𑀯𑀁 𑀅𑀧𑁆𑀧𑀸𑀬𑀼𑀓𑀫𑀦𑀼𑀲𑁆𑀲𑀸𑀦𑀁 𑀧𑀫𑀸𑀤𑁄 𑀦𑀸𑀫 𑀅𑀢𑀺𑀯𑀺𑀬 𑀅𑀬𑀼𑀢𑁆𑀢𑁄𑀢𑀺.

𑀧𑀼𑀦𑀤𑀺𑀯𑀲𑁂 𑀪𑀺𑀓𑁆𑀔𑀽 𑀕𑀸𑀫𑀁 𑀧𑀯𑀺𑀝𑁆𑀞𑀸 𑀆𑀲𑀦𑀲𑀸𑀮𑀁 𑀅𑀧𑀝𑀺𑀚𑀕𑁆𑀕𑀺𑀢𑀁, 𑀆𑀲𑀦𑀸𑀦𑀺 𑀅𑀧𑀜𑁆𑀜𑀢𑁆𑀢𑀸𑀦𑀺, 𑀧𑀸𑀦𑀻𑀬𑀁 𑀅𑀦𑀼𑀝𑁆𑀞𑀧𑀺𑀢𑀁 𑀤𑀺𑀲𑁆𑀯𑀸, ‘‘𑀓𑀳𑀁 𑀧𑀢𑀺𑀧𑀽𑀚𑀺𑀓𑀸’’𑀢𑀺 𑀆𑀳𑀁𑀲𑀼. ‘‘𑀪𑀦𑁆𑀢𑁂, 𑀓𑀳𑀁 𑀢𑀼𑀫𑁆𑀳𑁂 𑀢𑀁 𑀤𑀓𑁆𑀔𑀺𑀲𑁆𑀲𑀣, 𑀳𑀺𑀬𑁆𑀬𑁄 𑀅𑀬𑁆𑀬𑁂𑀲𑀼 𑀪𑀼𑀜𑁆𑀚𑀺𑀢𑁆𑀯𑀸 𑀕𑀢𑁂𑀲𑀼 𑀲𑀸𑀬𑀦𑁆𑀳𑀲𑀫𑀬𑁂 𑀫𑀢𑀸’’𑀢𑀺. 𑀢𑀁 𑀲𑀼𑀢𑁆𑀯𑀸 𑀧𑀼𑀣𑀼𑀚𑁆𑀚𑀦𑀸 𑀪𑀺𑀓𑁆𑀔𑀽 𑀢𑀲𑁆𑀲𑀸 𑀉𑀧𑀓𑀸𑀭𑀁 𑀲𑀭𑀦𑁆𑀢𑀸 𑀅𑀲𑁆𑀲𑀽𑀦𑀺 𑀲𑀦𑁆𑀥𑀸𑀭𑁂𑀢𑀼𑀁 𑀦𑀸𑀲𑀓𑁆𑀔𑀺𑀁𑀲𑀼. 𑀔𑀻𑀡𑀸𑀲𑀯𑀸𑀦𑀁 𑀥𑀫𑁆𑀫𑀲𑀁𑀯𑁂𑀕𑁄 𑀉𑀤𑀧𑀸𑀤𑀺. 𑀢𑁂 𑀪𑀢𑁆𑀢𑀓𑀺𑀘𑁆𑀘𑀁 𑀓𑀢𑁆𑀯𑀸 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀧𑀼𑀘𑁆𑀙𑀺𑀁𑀲𑀼 𑁋 ‘‘𑀪𑀦𑁆𑀢𑁂, 𑀧𑀢𑀺𑀧𑀽𑀚𑀺𑀓𑀸 𑀦𑀸𑀫 𑀉𑀧𑀸𑀲𑀺𑀓𑀸 𑀉𑀝𑁆𑀞𑀸𑀬 𑀲𑀫𑀼𑀝𑁆𑀞𑀸𑀬 𑀦𑀸𑀦𑀧𑁆𑀧𑀓𑀸𑀭𑀸𑀦𑀺 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀲𑀸𑀫𑀺𑀓𑀫𑁂𑀯 𑀧𑀢𑁆𑀣𑁂𑀲𑀺, 𑀲𑀸 𑀇𑀤𑀸𑀦𑀺 𑀫𑀢𑀸, 𑀓𑀳𑀁 𑀦𑀼 𑀔𑁄 𑀦𑀺𑀩𑁆𑀩𑀢𑁆𑀢𑀸’’𑀢𑀺? ‘‘𑀅𑀢𑁆𑀢𑀦𑁄 𑀲𑀸𑀫𑀺𑀓𑀲𑁆𑀲𑁂𑀯 𑀲𑀦𑁆𑀢𑀺𑀓𑁂, 𑀪𑀺𑀓𑁆𑀔𑀯𑁂’’𑀢𑀺. ‘‘𑀦𑀢𑁆𑀣𑀺, 𑀪𑀦𑁆𑀢𑁂, 𑀲𑀸𑀫𑀺𑀓𑀲𑁆𑀲 𑀲𑀦𑁆𑀢𑀺𑀓𑁂’’𑀢𑀺. ‘‘𑀦 𑀲𑀸, 𑀪𑀺𑀓𑁆𑀔𑀯𑁂, 𑀏𑀢𑀁 𑀲𑀸𑀫𑀺𑀓𑀁 𑀧𑀢𑁆𑀣𑁂𑀢𑀺, 𑀢𑀸𑀯𑀢𑀺𑀁𑀲𑀪𑀯𑀦𑁂 𑀢𑀲𑁆𑀲𑀸 𑀫𑀸𑀮𑀪𑀸𑀭𑀻𑀤𑁂𑀯𑀧𑀼𑀢𑁆𑀢𑁄 𑀦𑀸𑀫 𑀲𑀸𑀫𑀺𑀓𑁄, 𑀲𑀸 𑀢𑀲𑁆𑀲 𑀧𑀼𑀧𑁆𑀨𑀧𑀺𑀮𑀦𑁆𑀥𑀦𑀝𑁆𑀞𑀸𑀦𑀢𑁄 𑀘𑀯𑀺𑀢𑁆𑀯𑀸 𑀧𑀼𑀦 𑀕𑀦𑁆𑀢𑁆𑀯𑀸 𑀢𑀲𑁆𑀲𑁂𑀯 𑀲𑀦𑁆𑀢𑀺𑀓𑁂 𑀦𑀺𑀩𑁆𑀩𑀢𑁆𑀢𑀸’’𑀢𑀺. ‘‘𑀏𑀯𑀁 𑀓𑀺𑀭, 𑀪𑀦𑁆𑀢𑁂’’𑀢𑀺. ‘‘𑀆𑀫, 𑀪𑀺𑀓𑁆𑀔𑀯𑁂’’𑀢𑀺. ‘‘𑀅𑀳𑁄 𑀧𑀭𑀺𑀢𑁆𑀢𑀁, 𑀪𑀦𑁆𑀢𑁂, 𑀲𑀢𑁆𑀢𑀸𑀦𑀁 𑀚𑀻𑀯𑀺𑀢𑀁, 𑀧𑀸𑀢𑁄𑀯 𑀅𑀫𑁆𑀳𑁂 𑀧𑀭𑀺𑀯𑀺𑀲𑀺𑀢𑁆𑀯𑀸 𑀲𑀸𑀬𑀁 𑀉𑀧𑁆𑀧𑀦𑁆𑀦𑀩𑁆𑀬𑀸𑀥𑀺𑀦𑀸 𑀫𑀢𑀸’’𑀢𑀺. 𑀲𑀢𑁆𑀣𑀸 ‘‘𑀆𑀫, 𑀪𑀺𑀓𑁆𑀔𑀯𑁂, 𑀧𑀭𑀺𑀢𑁆𑀢𑀁 𑀲𑀢𑁆𑀢𑀸𑀦𑀁 𑀚𑀻𑀯𑀺𑀢𑀁 𑀦𑀸𑀫, 𑀢𑁂𑀦𑁂𑀯 𑀇𑀫𑁂 𑀲𑀢𑁆𑀢𑁂 𑀯𑀢𑁆𑀣𑀼𑀓𑀸𑀫𑁂𑀳𑀺 𑀘𑁂𑀯 𑀓𑀺𑀮𑁂𑀲𑀓𑀸𑀫𑁂𑀳𑀺 𑀘 𑀅𑀢𑀺𑀢𑁆𑀢𑁂 𑀏𑀯 𑀅𑀦𑁆𑀢𑀓𑁄 𑀅𑀢𑁆𑀢𑀦𑁄 𑀯𑀲𑁂 𑀯𑀢𑁆𑀢𑁂𑀢𑁆𑀯𑀸 𑀓𑀦𑁆𑀤𑀦𑁆𑀢𑁂 𑀧𑀭𑀺𑀤𑁂𑀯𑀦𑁆𑀢𑁂 𑀕𑀳𑁂𑀢𑁆𑀯𑀸 𑀕𑀘𑁆𑀙𑀢𑀻’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁪𑁮. ‘‘𑀧𑀼𑀧𑁆𑀨𑀸𑀦𑀺 𑀳𑁂𑀯 𑀧𑀘𑀺𑀦𑀦𑁆𑀢𑀁, 𑀩𑁆𑀬𑀸𑀲𑀢𑁆𑀢𑀫𑀦𑀲𑀁 𑀦𑀭𑀁;

𑀅𑀢𑀺𑀢𑁆𑀢𑀁𑀬𑁂𑀯 𑀓𑀸𑀫𑁂𑀲𑀼, 𑀅𑀦𑁆𑀢𑀓𑁄 𑀓𑀼𑀭𑀼𑀢𑁂 𑀯𑀲’’𑀦𑁆𑀢𑀺.

𑀢𑀢𑁆𑀣 𑀧𑀼𑀧𑁆𑀨𑀸𑀦𑀺 𑀳𑁂𑀯 𑀧𑀘𑀺𑀦𑀦𑁆𑀢𑀦𑁆𑀢𑀺 𑀧𑀼𑀧𑁆𑀨𑀸𑀭𑀸𑀫𑁂 𑀫𑀸𑀮𑀸𑀓𑀸𑀭𑁄 𑀦𑀸𑀦𑀸𑀧𑀼𑀧𑁆𑀨𑀸𑀦𑀺 𑀯𑀺𑀬 𑀅𑀢𑁆𑀢𑀪𑀸𑀯𑀧𑀝𑀺𑀩𑀤𑁆𑀥𑀸𑀦𑀺 𑀘𑁂𑀯 𑀉𑀧𑀓𑀭𑀡𑀧𑀝𑀺𑀩𑀤𑁆𑀥𑀸𑀦𑀺 𑀘 𑀓𑀸𑀫𑀕𑀼𑀡𑀧𑀼𑀧𑁆𑀨𑀸𑀦𑀺 𑀑𑀘𑀺𑀦𑀦𑁆𑀢𑀫𑁂𑀯. 𑀩𑁆𑀬𑀸𑀲𑀢𑁆𑀢𑀫𑀦𑀲𑀁 𑀦𑀭𑀦𑁆𑀢𑀺 𑀅𑀲𑀫𑁆𑀧𑀢𑁆𑀢𑁂𑀲𑀼 𑀧𑀢𑁆𑀣𑀦𑀸𑀯𑀲𑁂𑀦, 𑀲𑀫𑁆𑀧𑀢𑁆𑀢𑁂𑀲𑀼 𑀕𑁂𑀥𑀯𑀲𑁂𑀦 𑀯𑀺𑀯𑀺𑀥𑁂𑀦𑀸𑀓𑀸𑀭𑁂𑀦 𑀆𑀲𑀢𑁆𑀢𑀘𑀺𑀢𑁆𑀢𑀁. 𑀅𑀢𑀺𑀢𑁆𑀢𑀁𑀬𑁂𑀯 𑀓𑀸𑀫𑁂𑀲𑀽𑀢𑀺 𑀯𑀢𑁆𑀣𑀼𑀓𑀸𑀫𑀓𑀺𑀮𑁂𑀲𑀓𑀸𑀫𑁂𑀲𑀼 𑀧𑀭𑀺𑀬𑁂𑀲𑀦𑁂𑀦𑀧𑀺 𑀧𑀝𑀺𑀮𑀸𑀪𑁂𑀦𑀧𑀺 𑀧𑀭𑀺𑀪𑁄𑀕𑁂𑀦𑀧𑀺 𑀦𑀺𑀥𑀸𑀦𑁂𑀦𑀧𑀺 𑀅𑀢𑀺𑀢𑁆𑀢𑀁 𑀏𑀯 𑀲𑀫𑀸𑀦𑀁. 𑀅𑀦𑁆𑀢𑀓𑁄 𑀓𑀼𑀭𑀼𑀢𑁂 𑀯𑀲𑀦𑁆𑀢𑀺 𑀫𑀭𑀡𑀲𑀗𑁆𑀔𑀸𑀢𑁄 𑀅𑀦𑁆𑀢𑀓𑁄 𑀓𑀦𑁆𑀤𑀦𑁆𑀢𑀁 𑀧𑀭𑀺𑀤𑁂𑀯𑀦𑁆𑀢𑀁 𑀕𑀳𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑁄 𑀅𑀢𑁆𑀢𑀦𑁄 𑀯𑀲𑀁 𑀧𑀸𑀧𑁂𑀢𑀻𑀢𑀺 𑀅𑀢𑁆𑀣𑁄.

𑀤𑁂𑀲𑀦𑀸𑀯𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀢𑁆𑀢𑀸, 𑀤𑁂𑀲𑀦𑀸 𑀫𑀳𑀸𑀚𑀦𑀲𑁆𑀲 𑀲𑀸𑀢𑁆𑀣𑀺𑀓𑀸 𑀚𑀸𑀢𑀸𑀢𑀺.

𑀧𑀢𑀺𑀧𑀽𑀚𑀺𑀓𑀓𑀼𑀫𑀸𑀭𑀺𑀯𑀢𑁆𑀣𑀼 𑀘𑀢𑀼𑀢𑁆𑀣𑀁.

𑁫. 𑀫𑀘𑁆𑀙𑀭𑀺𑀬𑀓𑁄𑀲𑀺𑀬𑀲𑁂𑀝𑁆𑀞𑀺𑀯𑀢𑁆𑀣𑀼

𑀬𑀣𑀸𑀧𑀺 𑀪𑀫𑀭𑁄 𑀧𑀼𑀧𑁆𑀨𑀦𑁆𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀦𑁆𑀢𑁄 𑀫𑀘𑁆𑀙𑀭𑀺𑀬𑀓𑁄𑀲𑀺𑀬𑀲𑁂𑀝𑁆𑀞𑀺𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀢𑀲𑁆𑀲 𑀯𑀢𑁆𑀣𑀼 𑀭𑀸𑀚𑀕𑀳𑁂 𑀲𑀫𑀼𑀝𑁆𑀞𑀺𑀢𑀁.

𑀭𑀸𑀚𑀕𑀳𑀦𑀕𑀭𑀲𑁆𑀲 𑀓𑀺𑀭 𑀅𑀯𑀺𑀤𑀽𑀭𑁂 𑀲𑀓𑁆𑀓𑀸𑀭𑀁 𑀦𑀸𑀫 𑀦𑀺𑀕𑀫𑁄 𑀅𑀳𑁄𑀲𑀺. 𑀢𑀢𑁆𑀣𑁂𑀓𑁄 𑀫𑀘𑁆𑀙𑀭𑀺𑀬𑀓𑁄𑀲𑀺𑀬𑁄 𑀦𑀸𑀫 𑀲𑁂𑀝𑁆𑀞𑀺 𑀅𑀲𑀻𑀢𑀺𑀓𑁄𑀝𑀺𑀯𑀺𑀪𑀯𑁄 𑀧𑀝𑀺𑀯𑀲𑀢𑀺. 𑀲𑁄 𑀢𑀺𑀡𑀕𑁆𑀕𑁂𑀦 𑀢𑁂𑀮𑀩𑀺𑀦𑁆𑀤𑀼𑀫𑁆𑀧𑀺 𑀧𑀭𑁂𑀲𑀁 𑀦 𑀤𑁂𑀢𑀺, 𑀦 𑀅𑀢𑁆𑀢𑀦𑀸 𑀧𑀭𑀺𑀪𑀼𑀜𑁆𑀚𑀢𑀺. 𑀇𑀢𑀺𑀲𑁆𑀲 𑀢𑀁 𑀯𑀺𑀪𑀯𑀚𑀸𑀢𑀁 𑀦𑁂𑀯 𑀧𑀼𑀢𑁆𑀢𑀤𑀸𑀭𑀸𑀤𑀻𑀦𑀁, 𑀦 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀅𑀢𑁆𑀣𑀁 𑀅𑀦𑀼𑀪𑁄𑀢𑀺, 𑀭𑀓𑁆𑀔𑀲𑀧𑀭𑀺𑀕𑁆𑀕𑀳𑀺𑀢𑀸 𑀧𑁄𑀓𑁆𑀔𑀭𑀡𑀻 𑀯𑀺𑀬 𑀅𑀧𑀭𑀺𑀪𑁄𑀕𑀁 𑀢𑀺𑀝𑁆𑀞𑀢𑀺. 𑀲𑀢𑁆𑀣𑀸 𑀏𑀓𑀤𑀺𑀯𑀲𑀁 𑀧𑀘𑁆𑀘𑀽𑀲𑀲𑀫𑀬𑁂 𑀫𑀳𑀸𑀓𑀭𑀼𑀡𑀸𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀬 𑀲𑀓𑀮𑀮𑁄𑀓𑀥𑀸𑀢𑀼𑀬𑀁 𑀩𑁄𑀥𑀦𑁂𑀬𑁆𑀬𑀩𑀦𑁆𑀥𑀯𑁂 𑀑𑀮𑁄𑀓𑁂𑀦𑁆𑀢𑁄 𑀧𑀜𑁆𑀘𑀘𑀢𑁆𑀢𑀸𑀮𑀻𑀲𑀬𑁄𑀚𑀦𑀫𑀢𑁆𑀣𑀓𑁂 𑀯𑀲𑀦𑁆𑀢𑀲𑁆𑀲 𑀲𑁂𑀝𑁆𑀞𑀺𑀦𑁄 𑀲𑀧𑀚𑀸𑀧𑀢𑀺𑀓𑀲𑁆𑀲 𑀲𑁄𑀢𑀸𑀧𑀢𑁆𑀢𑀺𑀨𑀮𑀲𑁆𑀲 𑀉𑀧𑀦𑀺𑀲𑁆𑀲𑀬𑀁 𑀅𑀤𑁆𑀤𑀲. 𑀢𑀢𑁄 𑀧𑀼𑀭𑀺𑀫𑀤𑀺𑀯𑀲𑁂 𑀧𑀦 𑀲𑁄 𑀭𑀸𑀚𑀸𑀦𑀁 𑀉𑀧𑀝𑁆𑀞𑀸𑀢𑀼𑀁 𑀭𑀸𑀚𑀕𑁂𑀳𑀁 𑀕𑀦𑁆𑀢𑁆𑀯𑀸 𑀭𑀸𑀚𑀽𑀧𑀝𑁆𑀞𑀸𑀦𑀁 𑀓𑀢𑁆𑀯𑀸 𑀆𑀕𑀘𑁆𑀙𑀦𑁆𑀢𑁄 𑀏𑀓𑀁 𑀙𑀸𑀢𑀚𑁆𑀛𑀢𑁆𑀢𑀁 𑀚𑀦𑀧𑀤𑀫𑀦𑀼𑀲𑁆𑀲𑀁 𑀓𑀼𑀫𑁆𑀫𑀸𑀲𑀧𑀽𑀭𑀁 𑀓𑀧𑀮𑁆𑀮𑀓𑀧𑀽𑀯𑀁 𑀔𑀸𑀤𑀦𑁆𑀢𑀁 𑀤𑀺𑀲𑁆𑀯𑀸 𑀢𑀢𑁆𑀣 𑀧𑀺𑀧𑀸𑀲𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀅𑀢𑁆𑀢𑀦𑁄 𑀖𑀭𑀁 𑀕𑀦𑁆𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀲𑀘𑀸𑀳𑀁 𑀓𑀧𑀮𑁆𑀮𑀓𑀧𑀽𑀯𑀁 𑀔𑀸𑀤𑀺𑀢𑀼𑀓𑀸𑀫𑁄𑀫𑁆𑀳𑀻𑀢𑀺 𑀯𑀓𑁆𑀔𑀸𑀫𑀺, 𑀩𑀳𑀽 𑀫𑀦𑀼𑀲𑁆𑀲𑀸 𑀫𑀬𑀸 𑀲𑀤𑁆𑀥𑀺𑀁 𑀔𑀸𑀤𑀺𑀢𑀼𑀓𑀸𑀫𑀸 𑀪𑀯𑀺𑀲𑁆𑀲𑀦𑁆𑀢𑀺, 𑀏𑀯𑀁 𑀫𑁂 𑀩𑀳𑀽𑀦𑀺 𑀢𑀺𑀮𑀢𑀡𑁆𑀟𑀼𑀮𑀲𑀧𑁆𑀧𑀺𑀨𑀸𑀡𑀺𑀢𑀸𑀤𑀻𑀦𑀺 𑀧𑀭𑀺𑀓𑁆𑀔𑀬𑀁 𑀕𑀫𑀺𑀲𑁆𑀲𑀦𑁆𑀢𑀺, 𑀦 𑀓𑀲𑁆𑀲𑀘𑀺 𑀓𑀣𑁂𑀲𑁆𑀲𑀸𑀫𑀻’’𑀢𑀺 𑀢𑀡𑁆𑀳𑀁 𑀅𑀥𑀺𑀯𑀸𑀲𑁂𑀦𑁆𑀢𑁄 𑀘𑀭𑀢𑀺. 𑀲𑁄 𑀕𑀘𑁆𑀙𑀦𑁆𑀢𑁂 𑀕𑀘𑁆𑀙𑀦𑁆𑀢𑁂 𑀓𑀸𑀮𑁂 𑀉𑀧𑁆𑀧𑀡𑁆𑀟𑀼𑀧𑁆𑀧𑀡𑁆𑀟𑀼𑀓𑀚𑀸𑀢𑁄 𑀥𑀫𑀦𑀺𑀲𑀦𑁆𑀣𑀢𑀕𑀢𑁆𑀢𑁄 𑀚𑀸𑀢𑁄. 𑀢𑀢𑁄 𑀢𑀡𑁆𑀳𑀁 𑀅𑀥𑀺𑀯𑀸𑀲𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀕𑀩𑁆𑀪𑀁 𑀧𑀯𑀺𑀲𑀺𑀢𑁆𑀯𑀸 𑀫𑀜𑁆𑀘𑀓𑁂 𑀉𑀧𑀕𑀽𑀳𑀺𑀢𑁆𑀯𑀸 𑀦𑀺𑀧𑀚𑁆𑀚𑀺. 𑀏𑀯𑀁 𑀕𑀢𑁄𑀧𑀺 𑀥𑀦𑀳𑀸𑀦𑀺𑀪𑀬𑁂𑀦 𑀦 𑀓𑀲𑁆𑀲𑀘𑀺 𑀓𑀺𑀜𑁆𑀘𑀺 𑀓𑀣𑁂𑀲𑀺.

𑀅𑀣 𑀦𑀁 𑀪𑀭𑀺𑀬𑀸 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀺𑀝𑁆𑀞𑀺𑀁 𑀧𑀭𑀺𑀫𑀚𑁆𑀚𑀺𑀢𑁆𑀯𑀸, ‘‘𑀓𑀺𑀁 𑀢𑁂, 𑀲𑀸𑀫𑀺, 𑀅𑀨𑀸𑀲𑀼𑀓𑀁 𑀚𑀸𑀢’’𑀦𑁆𑀢𑀺 𑀧𑀼𑀘𑁆𑀙𑀺. ‘‘𑀦 𑀫𑁂 𑀓𑀺𑀜𑁆𑀘𑀺 𑀅𑀨𑀸𑀲𑀼𑀓𑀁 𑀅𑀢𑁆𑀣𑀻’’𑀢𑀺. ‘‘𑀓𑀺𑀁 𑀦𑀼 𑀔𑁄 𑀢𑁂 𑀭𑀸𑀚𑀸 𑀓𑀼𑀧𑀺𑀢𑁄’’𑀢𑀺? ‘‘𑀭𑀸𑀚𑀸𑀧𑀺 𑀫𑁂 𑀦 𑀓𑀼𑀧𑁆𑀧𑀢𑀻’’𑀢𑀺. ‘‘𑀅𑀣 𑀓𑀺𑀁 𑀢𑁂 𑀧𑀼𑀢𑁆𑀢𑀥𑀻𑀢𑀸𑀳𑀺 𑀯𑀸 𑀤𑀸𑀲𑀓𑀫𑁆𑀫𑀓𑀭𑀸𑀤𑀻𑀳𑀺 𑀯𑀸 𑀓𑀺𑀜𑁆𑀘𑀺 𑀅𑀫𑀦𑀸𑀧𑀁 𑀓𑀢𑀁 𑀅𑀢𑁆𑀣𑀻’’𑀢𑀺? ‘‘𑀏𑀯𑀭𑀽𑀧𑀫𑁆𑀧𑀺 𑀦𑀢𑁆𑀣𑀻’’𑀢𑀺. ‘‘𑀓𑀺𑀲𑁆𑀫𑀺𑀜𑁆𑀘𑀺 𑀧𑀦 𑀢𑁂 𑀢𑀡𑁆𑀳𑀸 𑀅𑀢𑁆𑀣𑀻’’𑀢𑀺? 𑀏𑀯𑀁 𑀯𑀼𑀢𑁆𑀢𑁂𑀧𑀺 𑀥𑀦𑀳𑀸𑀦𑀺𑀪𑀬𑁂𑀦 𑀓𑀺𑀜𑁆𑀘𑀺 𑀅𑀯𑀢𑁆𑀯𑀸 𑀦𑀺𑀲𑁆𑀲𑀤𑁆𑀤𑁄𑀯 𑀦𑀺𑀧𑀚𑁆𑀚𑀺, 𑀅𑀣 𑀦𑀁 𑀪𑀭𑀺𑀬𑀸 ‘‘𑀓𑀣𑁂𑀳𑀺, 𑀲𑀸𑀫𑀺 𑀓𑀺𑀲𑁆𑀫𑀺𑀜𑁆𑀘𑀺 𑀢𑁂 𑀢𑀡𑁆𑀳𑀸 𑀅𑀢𑁆𑀣𑀻’’𑀢𑀺 𑀆𑀳. 𑀲𑁄 𑀯𑀘𑀦𑀁 𑀧𑀭𑀺𑀕𑀺𑀮𑀦𑁆𑀢𑁄 𑀯𑀺𑀬 ‘‘𑀅𑀢𑁆𑀣𑀺 𑀫𑁂 𑀢𑀡𑁆𑀳𑀸’’𑀢𑀺 𑀆𑀳. ‘‘𑀓𑀺𑀁 𑀢𑀡𑁆𑀳𑀸, 𑀲𑀸𑀫𑀻’’𑀢𑀺? ‘‘𑀓𑀧𑀮𑁆𑀮𑀓𑀧𑀽𑀯𑀁 𑀔𑀸𑀤𑀺𑀢𑀼𑀓𑀸𑀫𑁄𑀫𑁆𑀳𑀻’’𑀢𑀺. ‘‘𑀅𑀣 𑀓𑀺𑀫𑀢𑁆𑀣𑀁 𑀫𑁂 𑀦 𑀓𑀣𑁂𑀲𑀺, 𑀓𑀺𑀁 𑀢𑁆𑀯𑀁 𑀤𑀮𑀺𑀤𑁆𑀤𑁄𑀲𑀺, 𑀇𑀤𑀸𑀦𑀺 𑀲𑀓𑀮𑀦𑀺𑀕𑀫𑀯𑀸𑀲𑀻𑀦𑀁 𑀧𑀳𑁄𑀦𑀓𑁂 𑀓𑀧𑀮𑁆𑀮𑀓𑀧𑀽𑀯𑁂 𑀧𑀘𑀺𑀲𑁆𑀲𑀸𑀫𑀻’’𑀢𑀺. ‘‘𑀓𑀺𑀁 𑀢𑁂 𑀏𑀢𑁂𑀳𑀺, 𑀅𑀢𑁆𑀢𑀦𑁄 𑀓𑀫𑁆𑀫𑀁 𑀓𑀢𑁆𑀯𑀸 𑀔𑀸𑀤𑀺𑀲𑁆𑀲𑀦𑁆𑀢𑀻’’𑀢𑀺? ‘‘𑀢𑁂𑀦 𑀳𑀺 𑀏𑀓𑀭𑀘𑁆𑀙𑀯𑀸𑀲𑀻𑀦𑀁 𑀧𑀳𑁄𑀦𑀓𑁂 𑀧𑀘𑀺𑀲𑁆𑀲𑀸𑀫𑀻’’𑀢𑀺. ‘‘𑀚𑀸𑀦𑀸𑀫𑀳𑀁 𑀢𑀯 𑀫𑀳𑀤𑁆𑀥𑀦𑀪𑀸𑀯’’𑀦𑁆𑀢𑀺. ‘‘𑀇𑀫𑀲𑁆𑀫𑀺𑀁 𑀕𑁂𑀳𑀲𑀸𑀫𑀦𑁆𑀢𑁂 𑀲𑀩𑁆𑀩𑁂𑀲𑀁 𑀧𑀳𑁄𑀦𑀓𑀁 𑀓𑀢𑁆𑀯𑀸 𑀧𑀘𑀸𑀫𑀻’’𑀢𑀺. ‘‘𑀚𑀸𑀦𑀸𑀫𑀳𑀁 𑀢𑀯 𑀫𑀳𑀚𑁆𑀛𑀸𑀲𑀬𑀪𑀸𑀯’’𑀦𑁆𑀢𑀺. ‘‘𑀢𑁂𑀦 𑀳𑀺 𑀢𑁂 𑀧𑀼𑀢𑁆𑀢𑀤𑀸𑀭𑀫𑀢𑁆𑀢𑀲𑁆𑀲𑁂𑀯 𑀧𑀳𑁄𑀦𑀓𑀁 𑀓𑀢𑁆𑀯𑀸 𑀧𑀘𑀸𑀫𑀻’’𑀢𑀺. ‘‘𑀓𑀺𑀁 𑀢𑁂 𑀏𑀢𑁂𑀳𑀻’’𑀢𑀺? ‘‘𑀓𑀺𑀁 𑀧𑀦 𑀢𑀼𑀬𑁆𑀳𑀜𑁆𑀘 𑀫𑀬𑁆𑀳𑀜𑁆𑀘 𑀧𑀳𑁄𑀦𑀓𑀁 𑀓𑀢𑁆𑀯𑀸 𑀧𑀘𑀸𑀫𑀻’’𑀢𑀺? ‘‘𑀢𑁆𑀯𑀁 𑀓𑀺𑀁 𑀓𑀭𑀺𑀲𑁆𑀲𑀲𑀻’’𑀢𑀺? ‘‘𑀢𑁂𑀦 𑀳𑀺 𑀏𑀓𑀓𑀲𑁆𑀲𑁂𑀯 𑀢𑁂 𑀧𑀳𑁄𑀦𑀓𑀁 𑀓𑀢𑁆𑀯𑀸 𑀧𑀘𑀸𑀫𑀻’’𑀢𑀺. ‘‘𑀇𑀫𑀲𑁆𑀫𑀺𑀁 𑀞𑀸𑀦𑁂 𑀧𑀘𑀫𑀸𑀦𑁂 𑀩𑀳𑀽 𑀧𑀘𑁆𑀘𑀸𑀲𑀻𑀲𑀦𑁆𑀢𑀺. 𑀲𑀓𑀮𑀢𑀡𑁆𑀟𑀼𑀮𑁂 𑀞𑀧𑁂𑀢𑁆𑀯𑀸 𑀪𑀺𑀦𑁆𑀦𑀢𑀡𑁆𑀟𑀼𑀮𑁂 𑀘 𑀉𑀤𑁆𑀥𑀦𑀓𑀧𑀮𑁆𑀮𑀸𑀦𑀺 𑀘 𑀆𑀤𑀸𑀬 𑀣𑁄𑀓𑀁 𑀔𑀻𑀭𑀲𑀧𑁆𑀧𑀺𑀫𑀥𑀼𑀨𑀸𑀡𑀺𑀢𑀜𑁆𑀘 𑀕𑀳𑁂𑀢𑁆𑀯𑀸 𑀲𑀢𑁆𑀢𑀪𑀽𑀫𑀺𑀓𑀲𑁆𑀲 𑀧𑀸𑀲𑀸𑀤𑀲𑁆𑀲 𑀉𑀧𑀭𑀺𑀫𑀢𑀮𑀁 𑀆𑀭𑀼𑀬𑁆𑀳 𑀧𑀘, 𑀢𑀢𑁆𑀣𑀸𑀳𑀁 𑀏𑀓𑀓𑁄𑀯 𑀦𑀺𑀲𑀻𑀤𑀺𑀢𑁆𑀯𑀸 𑀔𑀸𑀤𑀺𑀲𑁆𑀲𑀸𑀫𑀻’’𑀢𑀺. 𑀲𑀸 ‘‘𑀲𑀸𑀥𑀽’’𑀢𑀺 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 𑀕𑀳𑁂𑀢𑀩𑁆𑀩𑀁 𑀕𑀸𑀳𑀸𑀧𑁂𑀢𑁆𑀯𑀸 𑀧𑀸𑀲𑀸𑀤𑀁 𑀅𑀪𑀺𑀭𑀼𑀬𑁆𑀳 𑀤𑀸𑀲𑀺𑀬𑁄 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀲𑁂𑀝𑁆𑀞𑀺𑀁 𑀧𑀓𑁆𑀓𑁄𑀲𑀸𑀧𑁂𑀲𑀺, 𑀲𑁄 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀤𑁆𑀯𑀸𑀭𑀸𑀦𑀺 𑀧𑀺𑀤𑀳𑀦𑁆𑀢𑁄 𑀲𑀩𑁆𑀩𑀤𑁆𑀯𑀸𑀭𑁂𑀲𑀼 𑀲𑀽𑀘𑀺𑀖𑀝𑀺𑀓𑀁 𑀤𑀢𑁆𑀯𑀸 𑀲𑀢𑁆𑀢𑀫𑀢𑀮𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀢𑀢𑁆𑀣𑀧𑀺 𑀤𑁆𑀯𑀸𑀭𑀁 𑀧𑀺𑀤𑀳𑀺𑀢𑁆𑀯𑀸 𑀦𑀺𑀲𑀻𑀤𑀺. 𑀪𑀭𑀺𑀬𑀸𑀧𑀺𑀲𑁆𑀲 𑀉𑀤𑁆𑀥𑀦𑁂 𑀅𑀕𑁆𑀕𑀺𑀁 𑀚𑀸𑀮𑁂𑀢𑁆𑀯𑀸 𑀓𑀧𑀮𑁆𑀮𑀁 𑀆𑀭𑁄𑀧𑁂𑀢𑁆𑀯𑀸 𑀧𑀽𑀯𑁂 𑀧𑀘𑀺𑀢𑀼𑀁 𑀆𑀭𑀪𑀺.

𑀅𑀣 𑀲𑀢𑁆𑀣𑀸 𑀧𑀸𑀢𑁄𑀯 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀏𑀲𑁄, 𑀫𑁄𑀕𑁆𑀕𑀮𑁆𑀮𑀸𑀦, 𑀭𑀸𑀚𑀕𑀳𑀲𑁆𑀲 𑀅𑀯𑀺𑀤𑀽𑀭𑁂 𑀲𑀓𑁆𑀓𑀸𑀭𑀦𑀺𑀕𑀫𑁂 𑀫𑀘𑁆𑀙𑀭𑀺𑀬𑀲𑁂𑀝𑁆𑀞𑀺 ‘𑀓𑀧𑀮𑁆𑀮𑀓𑀧𑀽𑀯𑁂 𑀔𑀸𑀤𑀺𑀲𑁆𑀲𑀸𑀫𑀻’𑀢𑀺 𑀅𑀜𑁆𑀜𑁂𑀲𑀁 𑀤𑀲𑁆𑀲𑀦𑀪𑀬𑁂𑀦 𑀲𑀢𑁆𑀢𑀪𑀽𑀫𑀺𑀓𑁂 𑀧𑀸𑀲𑀸𑀤𑁂 𑀓𑀧𑀮𑁆𑀮𑀓𑀧𑀽𑀯𑁂 𑀧𑀘𑀸𑀧𑁂𑀢𑀺, 𑀢𑁆𑀯𑀁 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀲𑁂𑀝𑁆𑀞𑀺𑀁 𑀤𑀫𑁂𑀢𑁆𑀯𑀸 𑀦𑀺𑀩𑁆𑀩𑀺𑀲𑁂𑀯𑀦𑀁 𑀓𑀢𑁆𑀯𑀸 𑀉𑀪𑁄𑀧𑀺 𑀚𑀸𑀬𑀫𑁆𑀧𑀢𑀺𑀓𑁂 𑀧𑀽𑀯𑁂 𑀘 𑀔𑀻𑀭𑀲𑀧𑁆𑀧𑀺𑀫𑀥𑀼𑀨𑀸𑀡𑀺𑀢𑀸𑀦𑀺 𑀘 𑀕𑀸𑀳𑀸𑀧𑁂𑀢𑁆𑀯𑀸 𑀅𑀢𑁆𑀢𑀦𑁄 𑀩𑀮𑁂𑀦 𑀚𑁂𑀢𑀯𑀦𑀁 𑀆𑀦𑁂𑀳𑀺, 𑀅𑀚𑁆𑀚𑀸𑀳𑀁 𑀧𑀜𑁆𑀘𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺 𑀲𑀤𑁆𑀥𑀺𑀁 𑀯𑀺𑀳𑀸𑀭𑁂 𑀏𑀯 𑀦𑀺𑀲𑀻𑀤𑀺𑀲𑁆𑀲𑀸𑀫𑀺, 𑀧𑀽𑀯𑁂𑀳𑁂𑀯 𑀪𑀢𑁆𑀢𑀓𑀺𑀘𑁆𑀘𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺.

𑀣𑁂𑀭𑁄 ‘‘𑀲𑀸𑀥𑀼, 𑀪𑀦𑁆𑀢𑁂’’𑀢𑀺 𑀲𑀢𑁆𑀣𑀼 𑀯𑀘𑀦𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀢𑀸𑀯𑀤𑁂𑀯 𑀇𑀤𑁆𑀥𑀺𑀩𑀮𑁂𑀦 𑀢𑀁 𑀦𑀺𑀕𑀫𑀁 𑀕𑀦𑁆𑀢𑁆𑀯𑀸 𑀢𑀲𑁆𑀲 𑀧𑀸𑀲𑀸𑀤𑀲𑁆𑀲 𑀲𑀻𑀳𑀧𑀜𑁆𑀚𑀭𑀤𑁆𑀯𑀸𑀭𑁂 𑀲𑀼𑀦𑀺𑀯𑀢𑁆𑀣𑁄 𑀲𑀼𑀧𑀸𑀭𑀼𑀢𑁄 𑀆𑀓𑀸𑀲𑁂 𑀏𑀯 𑀫𑀡𑀺𑀭𑀽𑀧𑀓𑀁 𑀯𑀺𑀬 𑀅𑀝𑁆𑀞𑀸𑀲𑀺. 𑀫𑀳𑀸𑀲𑁂𑀝𑁆𑀞𑀺𑀦𑁄 𑀣𑁂𑀭𑀁 𑀤𑀺𑀲𑁆𑀯𑀸𑀯 𑀳𑀤𑀬𑀫𑀁𑀲𑀁 𑀓𑀫𑁆𑀧𑀺. 𑀲𑁄 𑀅𑀳𑀁 𑀏𑀯𑀭𑀽𑀧𑀸𑀦𑀁𑀬𑁂𑀯 𑀤𑀲𑁆𑀲𑀦𑀪𑀬𑁂𑀦 𑀇𑀫𑀁 𑀞𑀸𑀦𑀫𑀸𑀕𑀢𑁄, 𑀅𑀬𑀜𑁆𑀘 𑀪𑀺𑀓𑁆𑀔𑀼 𑀆𑀓𑀸𑀲𑁂𑀦𑀸𑀕𑀦𑁆𑀢𑁆𑀯𑀸 𑀯𑀸𑀢𑀧𑀸𑀦𑀤𑁆𑀯𑀸𑀭𑁂 𑀞𑀺𑀢𑁄𑀢𑀺. 𑀲𑁄 𑀕𑀳𑁂𑀢𑀩𑁆𑀩𑀕𑀳𑀡𑀁 𑀅𑀧𑀲𑁆𑀲𑀦𑁆𑀢𑁄 𑀅𑀕𑁆𑀕𑀺𑀫𑁆𑀳𑀺 𑀧𑀓𑁆𑀔𑀺𑀢𑁆𑀢𑀮𑁄𑀡𑀲𑀓𑁆𑀔𑀭𑀸 𑀯𑀺𑀬 𑀤𑁄𑀲𑁂𑀦 𑀢𑀝𑀢𑀝𑀸𑀬𑀦𑁆𑀢𑁄 𑀏𑀯𑀫𑀸𑀳 𑁋 ‘‘𑀲𑀫𑀡, 𑀆𑀓𑀸𑀲𑁂 𑀞𑀢𑁆𑀯𑀸𑀧𑀺 𑀓𑀺𑀁 𑀮𑀪𑀺𑀲𑁆𑀲𑀲𑀺, 𑀆𑀓𑀸𑀲𑁂 𑀅𑀧𑀤𑁂 𑀧𑀤𑀁 𑀤𑀲𑁆𑀲𑁂𑀢𑁆𑀯𑀸 𑀘𑀗𑁆𑀓𑀫𑀦𑁆𑀢𑁄𑀧𑀺 𑀦𑁂𑀯 𑀮𑀪𑀺𑀲𑁆𑀲𑀲𑀻’’𑀢𑀺. 𑀣𑁂𑀭𑁄 𑀢𑀲𑁆𑀫𑀺𑀁 𑀏𑀯 𑀞𑀸𑀦𑁂 𑀅𑀧𑀭𑀸𑀧𑀭𑀁 𑀘𑀗𑁆𑀓𑀫𑀺. 𑀲𑁂𑀝𑁆𑀞𑀺 ‘‘𑀘𑀗𑁆𑀓𑀫𑀦𑁆𑀢𑁄 𑀓𑀺𑀁 𑀮𑀪𑀺𑀲𑁆𑀲𑀲𑀺, 𑀆𑀓𑀸𑀲𑁂 𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀻𑀤𑀦𑁆𑀢𑁄𑀧𑀺 𑀦 𑀮𑀪𑀺𑀲𑁆𑀲𑀲𑀺𑀬𑁂𑀯𑀸’’𑀢𑀺 𑀆𑀳. 𑀣𑁂𑀭𑁄 𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸 𑀦𑀺𑀲𑀻𑀤𑀺. 𑀅𑀣 𑀦𑀁 ‘‘𑀆𑀓𑀸𑀲𑁂 𑀦𑀺𑀲𑀺𑀦𑁆𑀦𑁄 𑀓𑀺𑀁 𑀮𑀪𑀺𑀲𑁆𑀲𑀲𑀺, 𑀆𑀕𑀦𑁆𑀢𑁆𑀯𑀸 𑀯𑀸𑀢𑀧𑀸𑀦𑀲𑁆𑀲 𑀉𑀫𑁆𑀫𑀸𑀭𑁂 𑀞𑀺𑀢𑁄𑀧𑀺 𑀦 𑀮𑀪𑀺𑀲𑁆𑀲𑀲𑀻’’𑀢𑀺 𑀆𑀳. 𑀣𑁂𑀭𑁄 𑀉𑀫𑁆𑀫𑀸𑀭𑁂 𑀞𑀺𑀢𑁄. ‘‘𑀉𑀫𑁆𑀫𑀸𑀭𑁂 𑀞𑀺𑀢𑁄𑀧𑀺 𑀓𑀺𑀁 𑀮𑀪𑀺𑀲𑁆𑀲𑀲𑀺, 𑀥𑀽𑀫𑀸𑀬𑀦𑁆𑀢𑁄𑀧𑀺 𑀦 𑀮𑀪𑀺𑀲𑁆𑀲𑀲𑀺 𑀏𑀯𑀸’’𑀢𑀺 𑀆𑀳. 𑀣𑁂𑀭𑁄𑀧𑀺 𑀥𑀽𑀫𑀸𑀬𑀺. 𑀲𑀓𑀮𑀧𑀸𑀲𑀸𑀤𑁄 𑀏𑀓𑀥𑀽𑀫𑁄 𑀅𑀳𑁄𑀲𑀺. 𑀲𑁂𑀝𑁆𑀞𑀺𑀦𑁄 𑀅𑀓𑁆𑀔𑀻𑀦𑀁 𑀲𑀽𑀘𑀺𑀬𑀸 𑀯𑀺𑀚𑁆𑀛𑀦𑀓𑀸𑀮𑁄 𑀯𑀺𑀬 𑀅𑀳𑁄𑀲𑀺, 𑀕𑁂𑀳𑀚𑁆𑀛𑀸𑀬𑀦𑀪𑀬𑁂𑀦 𑀧𑀦 ‘‘𑀢𑁆𑀯𑀁 𑀧𑀚𑁆𑀚𑀮𑀦𑁆𑀢𑁄𑀧𑀺 𑀦 𑀮𑀪𑀺𑀲𑁆𑀲𑀲𑀻’’𑀢𑀺 𑀅𑀯𑀢𑁆𑀯𑀸 ‘‘𑀅𑀬𑀁 𑀲𑀫𑀡𑁄 𑀲𑀼𑀝𑁆𑀞𑀼 𑀮𑀕𑁆𑀕𑁄, 𑀅𑀮𑀤𑁆𑀥𑀸 𑀦 𑀕𑀫𑀺𑀲𑁆𑀲𑀢𑀺, 𑀏𑀓𑀫𑀲𑁆𑀲 𑀧𑀽𑀯𑀁 𑀤𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀪𑀭𑀺𑀬𑀁 𑀆𑀳 𑁋 ‘‘𑀪𑀤𑁆𑀤𑁂 𑀏𑀓𑀁 𑀔𑀼𑀤𑁆𑀤𑀓𑀧𑀽𑀯𑀁 𑀧𑀘𑀺𑀢𑁆𑀯𑀸 𑀲𑀫𑀡𑀲𑁆𑀲 𑀤𑀢𑁆𑀯𑀸 𑀉𑀬𑁆𑀬𑁄𑀚𑁂𑀳𑀺 𑀦’’𑀦𑁆𑀢𑀺. 𑀲𑀸 𑀣𑁄𑀓𑀁 𑀏𑀯 𑀧𑀺𑀝𑁆𑀞𑀁 𑀓𑀧𑀮𑁆𑀮𑀧𑀸𑀢𑀺𑀬𑀁 𑀧𑀓𑁆𑀔𑀺𑀧𑀺, 𑀫𑀳𑀸𑀧𑀽𑀯𑁄 𑀳𑀼𑀢𑁆𑀯𑀸 𑀲𑀓𑀮𑀧𑀸𑀢𑀺𑀁 𑀧𑀽𑀭𑁂𑀢𑁆𑀯𑀸 𑀉𑀤𑁆𑀥𑀼𑀫𑀸𑀢𑁄 𑀳𑀼𑀢𑁆𑀯𑀸 𑀅𑀝𑁆𑀞𑀸𑀲𑀺.

𑀲𑁂𑀝𑁆𑀞𑀺 𑀢𑀁 𑀤𑀺𑀲𑁆𑀯𑀸 ‘‘𑀩𑀳𑀼𑀁 𑀢𑀬𑀸 𑀧𑀺𑀝𑁆𑀞𑀁 𑀕𑀳𑀺𑀢𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀲𑀬𑀫𑁂𑀯 𑀤𑀩𑁆𑀩𑀺𑀓𑀡𑁆𑀡𑁂𑀦 𑀣𑁄𑀓𑀁 𑀧𑀺𑀝𑁆𑀞𑀁 𑀕𑀳𑁂𑀢𑁆𑀯𑀸 𑀧𑀓𑁆𑀔𑀺𑀧𑀺, 𑀧𑀽𑀯𑁄 𑀧𑀼𑀭𑀺𑀫𑀧𑀽𑀯𑀢𑁄 𑀫𑀳𑀦𑁆𑀢𑀢𑀭𑁄 𑀚𑀸𑀢𑁄. 𑀏𑀯𑀁 𑀬𑀁 𑀬𑀁 𑀧𑀘𑀢𑀺, 𑀲𑁄 𑀲𑁄 𑀫𑀳𑀦𑁆𑀢𑀫𑀳𑀦𑁆𑀢𑁄𑀯 𑀳𑁄𑀢𑀺. 𑀲𑁄 𑀦𑀺𑀩𑁆𑀩𑀺𑀦𑁆𑀦𑁄 𑀪𑀭𑀺𑀬𑀁 𑀆𑀳 𑁋 ‘‘𑀪𑀤𑁆𑀤𑁂, 𑀇𑀫𑀲𑁆𑀲 𑀏𑀓𑀁 𑀧𑀽𑀯𑀁 𑀤𑁂𑀳𑀻’’𑀢𑀺. 𑀢𑀲𑁆𑀲𑀸 𑀧𑀘𑁆𑀙𑀺𑀢𑁄 𑀏𑀓𑀁 𑀧𑀽𑀯𑀁 𑀕𑀡𑁆𑀳𑀦𑁆𑀢𑀺𑀬𑀸 𑀲𑀩𑁆𑀩𑁂 𑀏𑀓𑀸𑀩𑀤𑁆𑀥𑀸 𑀅𑀮𑁆𑀮𑀻𑀬𑀺𑀁𑀲𑀼. 𑀲𑀸 𑀲𑁂𑀝𑁆𑀞𑀺𑀁 𑀆𑀳 𑁋 ‘‘𑀲𑀸𑀫𑀺, 𑀲𑀩𑁆𑀩𑁂 𑀧𑀽𑀯𑀸 𑀏𑀓𑀢𑁄 𑀮𑀕𑁆𑀕𑀸, 𑀯𑀺𑀲𑀼𑀁 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀫𑀻’’𑀢𑀺. ‘‘𑀅𑀳𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀲𑁄𑀧𑀺 𑀓𑀸𑀢𑀼𑀁 𑀦𑀸𑀲𑀓𑁆𑀔𑀺. 𑀉𑀪𑁄𑀧𑀺 𑀚𑀦𑀸 𑀓𑁄𑀝𑀺𑀬𑀁 𑀕𑀳𑁂𑀢𑁆𑀯𑀸 𑀓𑀟𑁆𑀠𑀦𑁆𑀢𑀸𑀧𑀺 𑀯𑀺𑀬𑁄𑀚𑁂𑀢𑀼𑀁 𑀦𑀸𑀲𑀓𑁆𑀔𑀺𑀁𑀲𑀼 𑀏𑀯. 𑀅𑀣𑀲𑁆𑀲 𑀧𑀽𑀯𑁂𑀳𑀺 𑀲𑀤𑁆𑀥𑀺𑀁 𑀯𑀸𑀬𑀫𑀦𑁆𑀢𑀲𑁆𑀲𑁂𑀯 𑀲𑀭𑀻𑀭𑀢𑁄 𑀲𑁂𑀤𑀸 𑀫𑀼𑀘𑁆𑀘𑀺𑀁𑀲𑀼, 𑀧𑀺𑀧𑀸𑀲𑀸 𑀉𑀧𑀘𑁆𑀙𑀺𑀚𑁆𑀚𑀺. 𑀢𑀢𑁄 𑀪𑀭𑀺𑀬𑀁 𑀆𑀳 𑁋 ‘‘𑀪𑀤𑁆𑀤𑁂, 𑀦 𑀫𑁂 𑀧𑀽𑀯𑁂𑀳𑀺 𑀅𑀢𑁆𑀣𑁄, 𑀧𑀘𑁆𑀙𑀺𑀬𑀸 𑀲𑀤𑁆𑀥𑀺𑀁𑀬𑁂𑀯 𑀇𑀫𑀲𑁆𑀲 𑀤𑁂𑀳𑀻’’𑀢𑀺. 𑀲𑀸 𑀧𑀘𑁆𑀙𑀺𑀁 𑀆𑀤𑀸𑀬 𑀣𑁂𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀅𑀤𑀸𑀲𑀺. 𑀣𑁂𑀭𑁄 𑀉𑀪𑀺𑀦𑁆𑀦𑀫𑁆𑀧𑀺 𑀥𑀫𑁆𑀫𑀁 𑀤𑁂𑀲𑁂𑀲𑀺, 𑀢𑀺𑀡𑁆𑀡𑀁 𑀭𑀢𑀦𑀸𑀦𑀁 𑀕𑀼𑀡𑀁 𑀓𑀣𑁂𑀲𑀺, ‘‘𑀅𑀢𑁆𑀣𑀺 𑀤𑀺𑀦𑁆𑀦𑀁, 𑀅𑀢𑁆𑀣𑀺 𑀬𑀺𑀝𑁆𑀞’’𑀦𑁆𑀢𑀺 𑀤𑀺𑀦𑁆𑀦𑀤𑀸𑀦𑀸𑀤𑀻𑀦𑀁 𑀨𑀮𑀁 𑀕𑀕𑀦𑀢𑀮𑁂 𑀧𑀼𑀡𑁆𑀡𑀘𑀦𑁆𑀤𑀁 𑀯𑀺𑀬 𑀤𑀲𑁆𑀲𑁂𑀲𑀺.

𑀢𑀁 𑀲𑀼𑀢𑁆𑀯𑀸 𑀧𑀲𑀦𑁆𑀦𑀘𑀺𑀢𑁆𑀢𑁄 𑀳𑀼𑀢𑁆𑀯𑀸 𑀲𑁂𑀝𑁆𑀞𑀺 ‘‘𑀪𑀦𑁆𑀢𑁂, 𑀆𑀕𑀦𑁆𑀢𑁆𑀯𑀸 𑀇𑀫𑀲𑁆𑀫𑀺𑀁 𑀧𑀮𑁆𑀮𑀗𑁆𑀓𑁂 𑀦𑀺𑀲𑀻𑀤𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀣𑀸’’𑀢𑀺 𑀆𑀳. 𑀣𑁂𑀭𑁄, ‘‘𑀫𑀳𑀸𑀲𑁂𑀝𑁆𑀞𑀺, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 ‘𑀧𑀽𑀯𑁂 𑀔𑀸𑀤𑀺𑀲𑁆𑀲𑀸𑀫𑀻’𑀢𑀺 𑀧𑀜𑁆𑀘𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺 𑀲𑀤𑁆𑀥𑀺𑀁 𑀯𑀺𑀳𑀸𑀭𑁂 𑀦𑀺𑀲𑀺𑀦𑁆𑀦𑁄, 𑀢𑀼𑀫𑁆𑀳𑀸𑀓𑀁 𑀭𑀼𑀘𑀺𑀬𑀸 𑀲𑀢𑀺 𑀅𑀳𑀁 𑀯𑁄 𑀦𑁂𑀲𑁆𑀲𑀸𑀫𑀺, 𑀲𑁂𑀝𑁆𑀞𑀺𑀪𑀭𑀺𑀬𑀁 𑀧𑀽𑀯𑁂 𑀘 𑀔𑀻𑀭𑀸𑀤𑀻𑀦𑀺 𑀘 𑀕𑀡𑁆𑀳𑀸𑀧𑁂𑀣, 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀫𑀺𑀲𑁆𑀲𑀸𑀫𑀸’’𑀢𑀺 𑀆𑀳. ‘‘𑀓𑀳𑀁 𑀧𑀦, 𑀪𑀦𑁆𑀢𑁂, 𑀏𑀢𑀭𑀳𑀺 𑀲𑀢𑁆𑀣𑀸’’𑀢𑀺? ‘‘𑀇𑀢𑁄 𑀧𑀜𑁆𑀘𑀘𑀢𑁆𑀢𑀸𑀮𑀻𑀲𑀬𑁄𑀚𑀦𑀫𑀢𑁆𑀣𑀓𑁂 𑀚𑁂𑀢𑀯𑀦𑀯𑀺𑀳𑀸𑀭𑁂, 𑀫𑀳𑀸𑀲𑁂𑀝𑁆𑀞𑀻’’𑀢𑀺. ‘‘𑀪𑀦𑁆𑀢𑁂, 𑀓𑀸𑀮𑀁 𑀅𑀦𑀢𑀺𑀓𑁆𑀓𑀫𑀺𑀢𑁆𑀯𑀸 𑀏𑀢𑁆𑀢𑀓𑀁 𑀅𑀤𑁆𑀥𑀸𑀦𑀁 𑀓𑀣𑀁 𑀕𑀫𑀺𑀲𑁆𑀲𑀸𑀫𑀸’’𑀢𑀺. ‘‘𑀫𑀳𑀸𑀲𑁂𑀝𑁆𑀞𑀺, 𑀢𑀼𑀫𑁆𑀳𑀸𑀓𑀁 𑀭𑀼𑀘𑀺𑀬𑀸 𑀲𑀢𑀺 𑀅𑀳𑀁 𑀯𑁄 𑀅𑀢𑁆𑀢𑀦𑁄 𑀇𑀤𑁆𑀥𑀺𑀩𑀮𑁂𑀦 𑀦𑁂𑀲𑁆𑀲𑀸𑀫𑀺, 𑀢𑀼𑀫𑁆𑀳𑀸𑀓𑀁 𑀧𑀸𑀲𑀸𑀤𑁂 𑀲𑁄𑀧𑀸𑀦𑀲𑀻𑀲𑀁 𑀅𑀢𑁆𑀢𑀦𑁄 𑀞𑀸𑀦𑁂 𑀏𑀯 𑀪𑀯𑀺𑀲𑁆𑀲𑀢𑀺, 𑀲𑁄𑀧𑀸𑀦𑀧𑀭𑀺𑀬𑁄𑀲𑀸𑀦𑀁 𑀧𑀦 𑀯𑁄 𑀚𑁂𑀢𑀯𑀦𑀤𑁆𑀯𑀸𑀭𑀓𑁄𑀝𑁆𑀞𑀓𑁂 𑀪𑀯𑀺𑀲𑁆𑀲𑀢𑀺, 𑀉𑀧𑀭𑀺𑀧𑀸𑀲𑀸𑀤𑀸 𑀳𑁂𑀝𑁆𑀞𑀸𑀧𑀸𑀲𑀸𑀤𑀁 𑀑𑀢𑀭𑀡𑀓𑀸𑀮𑀫𑀢𑁆𑀢𑁂𑀦𑁂𑀯 𑀚𑁂𑀢𑀯𑀦𑀁 𑀦𑁂𑀲𑁆𑀲𑀸𑀫𑀻’’𑀢𑀺. 𑀲𑁄 ‘‘𑀲𑀸𑀥𑀼, 𑀪𑀦𑁆𑀢𑁂’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺.

𑀣𑁂𑀭𑁄 𑀲𑁄𑀧𑀸𑀦𑀲𑀻𑀲𑀁 𑀢𑀢𑁆𑀣𑁂𑀯 𑀓𑀢𑁆𑀯𑀸 ‘‘𑀲𑁄𑀧𑀸𑀦𑀧𑀸𑀤𑀫𑀽𑀮𑀁 𑀚𑁂𑀢𑀯𑀦𑀤𑁆𑀯𑀸𑀭𑀓𑁄𑀝𑁆𑀞𑀓𑁂 𑀳𑁄𑀢𑀽’’𑀢𑀺 𑀅𑀥𑀺𑀝𑁆𑀞𑀸𑀲𑀺. 𑀢𑀣𑁂𑀯 𑀅𑀳𑁄𑀲𑀺. 𑀇𑀢𑀺 𑀣𑁂𑀭𑁄 𑀲𑁂𑀝𑁆𑀞𑀺𑀜𑁆𑀘 𑀲𑁂𑀝𑁆𑀞𑀺𑀪𑀭𑀺𑀬𑀜𑁆𑀘 𑀉𑀧𑀭𑀺𑀧𑀸𑀲𑀸𑀤𑀸 𑀳𑁂𑀝𑁆𑀞𑀸𑀧𑀸𑀲𑀸𑀤𑀁 𑀑𑀢𑀭𑀡𑀓𑀸𑀮𑀢𑁄 𑀔𑀺𑀧𑁆𑀧𑀢𑀭𑀁 𑀚𑁂𑀢𑀯𑀦𑀁 𑀲𑀫𑁆𑀧𑀸𑀧𑁂𑀲𑀺. 𑀢𑁂 𑀉𑀪𑁄𑀧𑀺 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀓𑀸𑀮𑀁 𑀆𑀭𑁄𑀘𑁂𑀲𑀼𑀁. 𑀲𑀢𑁆𑀣𑀸 𑀪𑀢𑁆𑀢𑀕𑁆𑀕𑀁 𑀧𑀯𑀺𑀲𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑀯𑀭𑀩𑀼𑀤𑁆𑀥𑀸𑀲𑀦𑁂 𑀦𑀺𑀲𑀻𑀤𑀺 𑀲𑀤𑁆𑀥𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑁂𑀦. 𑀫𑀳𑀸𑀲𑁂𑀝𑁆𑀞𑀺 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀤𑀓𑁆𑀔𑀺𑀡𑁄𑀤𑀓𑀁 𑀅𑀤𑀸𑀲𑀺. 𑀪𑀭𑀺𑀬𑀸𑀧𑀺𑀲𑁆𑀲 𑀢𑀣𑀸𑀕𑀢𑀲𑁆𑀲 𑀧𑀢𑁆𑀢𑁂 𑀧𑀽𑀯𑀁 𑀧𑀢𑀺𑀝𑁆𑀞𑀸𑀧𑁂𑀲𑀺. 𑀲𑀢𑁆𑀣𑀸 𑀅𑀢𑁆𑀢𑀦𑁄 𑀬𑀸𑀧𑀦𑀫𑀢𑁆𑀢𑀁 𑀕𑀡𑁆𑀳𑀺, 𑀧𑀜𑁆𑀘𑀲𑀢𑀸 𑀪𑀺𑀓𑁆𑀔𑀽𑀧𑀺 𑀬𑀸𑀧𑀦𑀫𑀢𑁆𑀢𑀁 𑀕𑀡𑁆𑀳𑀺𑀁𑀲𑀼. 𑀲𑁂𑀝𑁆𑀞𑀺 𑀔𑀻𑀭𑀲𑀧𑁆𑀧𑀺𑀫𑀥𑀼𑀲𑀓𑁆𑀔𑀭𑀸𑀤𑀻𑀦𑀺 𑀤𑀤𑀫𑀸𑀦𑁄 𑀦 𑀔𑀬𑀁 𑀅𑀕𑀫𑀸𑀲𑀺. 𑀲𑀢𑁆𑀣𑀸 𑀧𑀜𑁆𑀘𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺 𑀲𑀤𑁆𑀥𑀺𑀁 𑀪𑀢𑁆𑀢𑀓𑀺𑀘𑁆𑀘𑀁 𑀦𑀺𑀝𑁆𑀞𑀸𑀧𑁂𑀲𑀺. 𑀫𑀳𑀸𑀲𑁂𑀝𑁆𑀞𑀺𑀧𑀺 𑀲𑀤𑁆𑀥𑀺𑀁 𑀪𑀭𑀺𑀬𑀸𑀬 𑀬𑀸𑀯𑀤𑀢𑁆𑀣𑀁 𑀔𑀸𑀤𑀺. 𑀧𑀽𑀯𑀸𑀦𑀁 𑀧𑀭𑀺𑀬𑁄𑀲𑀸𑀦𑀫𑁂𑀯 𑀦 𑀧𑀜𑁆𑀜𑀸𑀬𑀢𑀺. 𑀲𑀓𑀮𑀯𑀺𑀳𑀸𑀭𑁂 𑀪𑀺𑀓𑁆𑀔𑀽𑀦𑀜𑁆𑀘 𑀯𑀺𑀖𑀸𑀲𑀸𑀤𑀸𑀦𑀜𑁆𑀘 𑀤𑀺𑀦𑁆𑀦𑁂𑀲𑀼𑀧𑀺 𑀧𑀭𑀺𑀬𑀦𑁆𑀢𑁄 𑀦 𑀧𑀜𑁆𑀜𑀸𑀬𑀢𑁂𑀯. ‘‘𑀪𑀦𑁆𑀢𑁂, 𑀧𑀽𑀯𑀸 𑀧𑀭𑀺𑀓𑁆𑀔𑀬𑀁 𑀦 𑀕𑀘𑁆𑀙𑀦𑁆𑀢𑀻’’𑀢𑀺 𑀪𑀕𑀯𑀢𑁄 𑀆𑀭𑁄𑀘𑁂𑀲𑀼𑀁. ‘‘𑀢𑁂𑀦 𑀳𑀺 𑀚𑁂𑀢𑀯𑀦𑀤𑁆𑀯𑀸𑀭𑀓𑁄𑀝𑁆𑀞𑀓𑁂 𑀙𑀟𑁆𑀟𑁂𑀣𑀸’’𑀢𑀺. 𑀅𑀣 𑀦𑁂 𑀤𑁆𑀯𑀸𑀭𑀓𑁄𑀝𑁆𑀞𑀓𑀲𑁆𑀲 𑀅𑀯𑀺𑀤𑀽𑀭𑁂 𑀧𑀩𑁆𑀪𑀸𑀭𑀝𑁆𑀞𑀸𑀦𑁂 𑀙𑀟𑁆𑀟𑀬𑀺𑀁𑀲𑀼. 𑀬𑀸𑀯𑀚𑁆𑀚𑀢𑀦𑀸𑀧𑀺 𑀢𑀁 𑀞𑀸𑀦𑀁 𑀓𑀧𑀮𑁆𑀮𑀓𑀧𑀽𑀯𑀧𑀩𑁆𑀪𑀸𑀭𑀦𑁆𑀢𑁂𑀯 𑀧𑀜𑁆𑀜𑀸𑀬𑀢𑀺. 𑀫𑀳𑀸𑀲𑁂𑀝𑁆𑀞𑀺 𑀲𑀳 𑀪𑀭𑀺𑀬𑀸𑀬 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀪𑀕𑀯𑀸 𑀅𑀦𑀼𑀫𑁄𑀤𑀦𑀫𑀓𑀸𑀲𑀺. 𑀅𑀦𑀼𑀫𑁄𑀤𑀦𑀸𑀯𑀲𑀸𑀦𑁂 𑀉𑀪𑁄𑀧𑀺 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀸𑀬 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀤𑁆𑀯𑀸𑀭𑀓𑁄𑀝𑁆𑀞𑀓𑁂 𑀲𑁄𑀧𑀸𑀦𑀁 𑀆𑀭𑀼𑀬𑁆𑀳 𑀅𑀢𑁆𑀢𑀦𑁄 𑀧𑀸𑀲𑀸𑀤𑁂𑀬𑁂𑀯 𑀧𑀢𑀺𑀝𑁆𑀞𑀳𑀺𑀁𑀲𑀼.

𑀢𑀢𑁄 𑀧𑀝𑁆𑀞𑀸𑀬 𑀲𑁂𑀝𑁆𑀞𑀺 𑀅𑀲𑀻𑀢𑀺𑀓𑁄𑀝𑀺𑀥𑀦𑀁 𑀩𑀼𑀤𑁆𑀥𑀲𑀸𑀲𑀦𑁂𑀬𑁂𑀯 𑀯𑀺𑀓𑁆𑀓𑀺𑀭𑀺. 𑀧𑀼𑀦𑀤𑀺𑀯𑀲𑁂 𑀲𑀸𑀬𑀦𑁆𑀳𑀲𑀫𑀬𑁂 𑀥𑀫𑁆𑀫𑀲𑀪𑀸𑀬𑀁 𑀲𑀦𑁆𑀦𑀺𑀲𑀺𑀦𑁆𑀦𑀸 𑀪𑀺𑀓𑁆𑀔𑀽 ‘‘𑀧𑀲𑁆𑀲𑀣𑀸𑀯𑀼𑀲𑁄, 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑀲𑁆𑀲 𑀆𑀦𑀼𑀪𑀸𑀯𑀁, 𑀅𑀦𑀼𑀧𑀳𑀘𑁆𑀘 𑀦𑀸𑀫 𑀲𑀤𑁆𑀥𑀁, 𑀅𑀦𑀼𑀧𑀳𑀘𑁆𑀘 𑀪𑁄𑀕𑁂 𑀫𑀘𑁆𑀙𑀭𑀺𑀬𑀲𑁂𑀝𑁆𑀞𑀺𑀁 𑀫𑀼𑀳𑀼𑀢𑁆𑀢𑁂𑀦𑁂𑀯 𑀤𑀫𑁂𑀢𑁆𑀯𑀸 𑀦𑀺𑀩𑁆𑀩𑀺𑀲𑁂𑀯𑀦𑀁 𑀓𑀢𑁆𑀯𑀸 𑀧𑀽𑀯𑁂 𑀕𑀸𑀳𑀸𑀧𑁂𑀢𑁆𑀯𑀸 𑀚𑁂𑀢𑀯𑀦𑀁 𑀆𑀦𑁂𑀢𑁆𑀯𑀸 𑀲𑀢𑁆𑀣𑀼 𑀲𑀫𑁆𑀫𑀼𑀔𑀁 𑀓𑀢𑁆𑀯𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀸𑀧𑁂𑀲𑀺, 𑀅𑀳𑁄 𑀫𑀳𑀸𑀦𑀼𑀪𑀸𑀯𑁄 𑀣𑁂𑀭𑁄’’𑀢𑀺 𑀣𑁂𑀭𑀲𑁆𑀲 𑀕𑀼𑀡𑀁 𑀓𑀣𑁂𑀦𑁆𑀢𑀸 𑀦𑀺𑀲𑀻𑀤𑀺𑀁𑀲𑀼. 𑀲𑀢𑁆𑀣𑀸 𑀤𑀺𑀩𑁆𑀩𑀸𑀬 𑀲𑁄𑀢𑀥𑀸𑀢𑀼𑀬𑀸 𑀓𑀣𑀁 𑀲𑀼𑀢𑁆𑀯𑀸 𑀆𑀕𑀦𑁆𑀢𑁆𑀯𑀸, ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸, ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂, ‘‘𑀪𑀺𑀓𑁆𑀔𑀯𑁂, 𑀓𑀼𑀮𑀤𑀫𑀓𑁂𑀦 𑀦𑀸𑀫 𑀪𑀺𑀓𑁆𑀔𑀼𑀦𑀸 𑀅𑀦𑀼𑀧𑀳𑀘𑁆𑀘 𑀲𑀤𑁆𑀥𑀁, 𑀅𑀦𑀼𑀧𑀳𑀘𑁆𑀘 𑀪𑁄𑀕𑁂, 𑀓𑀼𑀮𑀁 𑀅𑀓𑀺𑀮𑀫𑁂𑀢𑁆𑀯𑀸 𑀅𑀯𑀺𑀳𑁂𑀞𑁂𑀢𑁆𑀯𑀸 𑀧𑀼𑀧𑁆𑀨𑀢𑁄 𑀭𑁂𑀡𑀼𑀁 𑀕𑀡𑁆𑀳𑀦𑁆𑀢𑁂𑀦 𑀪𑀫𑀭𑁂𑀦 𑀯𑀺𑀬 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀩𑀼𑀤𑁆𑀥𑀕𑀼𑀡𑀁 𑀚𑀸𑀦𑀸𑀧𑁂𑀢𑀩𑁆𑀩𑀁, 𑀢𑀸𑀤𑀺𑀲𑁄 𑀫𑀫 𑀧𑀼𑀢𑁆𑀢𑁄 𑀫𑁄𑀕𑁆𑀕𑀮𑁆𑀮𑀸𑀦𑁄’’𑀢𑀺 𑀣𑁂𑀭𑀁 𑀧𑀲𑀁𑀲𑀺𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁪𑁯. ‘‘𑀬𑀣𑀸𑀧𑀺 𑀪𑀫𑀭𑁄 𑀧𑀼𑀧𑁆𑀨𑀁, 𑀯𑀡𑁆𑀡𑀕𑀦𑁆𑀥𑀫𑀳𑁂𑀞𑀬𑀁;

𑀧𑀮𑁂𑀢𑀺 𑀭𑀲𑀫𑀸𑀤𑀸𑀬, 𑀏𑀯𑀁 𑀕𑀸𑀫𑁂 𑀫𑀼𑀦𑀻 𑀘𑀭𑁂’’𑀢𑀺.

𑀢𑀢𑁆𑀣 𑀪𑀫𑀭𑁄𑀢𑀺 𑀬𑀸 𑀓𑀸𑀘𑀺 𑀫𑀥𑀼𑀓𑀭𑀚𑀸𑀢𑀺. 𑀧𑀼𑀧𑁆𑀨𑀦𑁆𑀢𑀺 𑀧𑀼𑀧𑁆𑀨𑀸𑀭𑀸𑀫𑁂 𑀘𑀭𑀦𑁆𑀢𑁄 𑀧𑀼𑀧𑁆𑀨𑀜𑁆𑀘 𑀯𑀡𑁆𑀡𑀜𑁆𑀘 𑀕𑀦𑁆𑀥𑀜𑁆𑀘 𑀅𑀳𑁂𑀞𑀬𑀦𑁆𑀢𑁄 𑀅𑀯𑀺𑀦𑀸𑀲𑁂𑀦𑁆𑀢𑁄 𑀯𑀺𑀘𑀭𑀢𑀻𑀢𑀺 𑀅𑀢𑁆𑀣𑁄. 𑀧𑀮𑁂𑀢𑀻𑀢𑀺 𑀏𑀯𑀁 𑀘𑀭𑀺𑀢𑁆𑀯𑀸 𑀬𑀸𑀯𑀤𑀢𑁆𑀣𑀁 𑀭𑀲𑀁 𑀧𑀺𑀯𑀺𑀢𑁆𑀯𑀸 𑀅𑀧𑀭𑀫𑁆𑀧𑀺 𑀫𑀥𑀼𑀓𑀭𑀡𑀢𑁆𑀣𑀸𑀬 𑀆𑀤𑀸𑀬 𑀧𑀮𑁂𑀢𑀺, 𑀲𑁄 𑀏𑀯𑀁 𑀯𑀦𑀕𑀳𑀦𑀁 𑀅𑀚𑁆𑀛𑁄𑀕𑀸𑀳𑁂𑀢𑁆𑀯𑀸 𑀏𑀓𑀲𑁆𑀫𑀺𑀁 𑀭𑀼𑀓𑁆𑀔𑀲𑀼𑀲𑀺𑀭𑁂 𑀢𑀁 𑀭𑀚𑀫𑀺𑀲𑁆𑀲𑀓𑀁 𑀭𑀲𑀁 𑀞𑀧𑁂𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀫𑀥𑀼𑀭𑀭𑀲𑀁 𑀫𑀥𑀼𑀁 𑀓𑀭𑁄𑀢𑀺, 𑀦 𑀢𑀲𑁆𑀲 𑀧𑀼𑀧𑁆𑀨𑀸𑀭𑀸𑀫𑁂 𑀯𑀺𑀘𑀭𑀺𑀢𑀧𑀘𑁆𑀘𑀬𑀸 𑀧𑀼𑀧𑁆𑀨𑀁 𑀯𑀸 𑀯𑀡𑁆𑀡𑀕𑀦𑁆𑀥𑀁 𑀯𑀸𑀲𑁆𑀲 𑀯𑀺𑀕𑀘𑁆𑀙𑀢𑀺, 𑀅𑀣 𑀔𑁄 𑀲𑀩𑁆𑀩𑀁 𑀧𑀸𑀓𑀢𑀺𑀓𑀫𑁂𑀯 𑀳𑁄𑀢𑀺. 𑀏𑀯𑀁 𑀕𑀸𑀫𑁂 𑀫𑀼𑀦𑀻 𑀘𑀭𑁂𑀢𑀺 𑀏𑀯𑀁 𑀲𑁂𑀔𑀸𑀲𑁂𑀔𑀪𑁂𑀤𑁄 𑀅𑀦𑀸𑀕𑀸𑀭𑀺𑀬𑀫𑀼𑀦𑀺 𑀓𑀼𑀮𑀧𑀝𑀺𑀧𑀸𑀝𑀺𑀬𑀸 𑀕𑀸𑀫𑁂 𑀪𑀺𑀓𑁆𑀔𑀁 𑀕𑀡𑁆𑀳𑀦𑁆𑀢𑁄 𑀯𑀺𑀘𑀭𑀢𑀻𑀢𑀺 𑀅𑀢𑁆𑀣𑁄. 𑀦 𑀳𑀺 𑀢𑀲𑁆𑀲 𑀕𑀸𑀫𑁂 𑀘𑀭𑀡𑀧𑀘𑁆𑀘𑀬𑀸 𑀓𑀼𑀮𑀸𑀦𑀁 𑀲𑀤𑁆𑀥𑀸𑀳𑀸𑀦𑀺 𑀯𑀸 𑀪𑁄𑀕𑀳𑀸𑀦𑀺 𑀯𑀸 𑀳𑁄𑀦𑁆𑀢𑀺. 𑀲𑀤𑁆𑀥𑀸𑀧𑀺 𑀪𑁄𑀕𑀸𑀧𑀺 𑀧𑀸𑀓𑀢𑀺𑀓𑀸𑀯 𑀳𑁄𑀦𑁆𑀢𑀺. 𑀏𑀯𑀁 𑀘𑀭𑀺𑀢𑁆𑀯𑀸 𑀘 𑀧𑀦 𑀦𑀺𑀓𑁆𑀔𑀫𑀺𑀢𑁆𑀯𑀸 𑀲𑁂𑀔𑀫𑀼𑀦𑀺 𑀢𑀸𑀯 𑀩𑀳𑀺𑀕𑀸𑀫𑁂 𑀉𑀤𑀓𑀨𑀸𑀲𑀼𑀓𑀝𑁆𑀞𑀸𑀦𑁂 𑀲𑀗𑁆𑀖𑀸𑀝𑀺𑀁 𑀧𑀜𑁆𑀜𑀸𑀧𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑁄 𑀅𑀓𑁆𑀔𑀪𑀜𑁆𑀚𑀦𑀯𑀡𑀧𑀝𑀺𑀘𑁆𑀙𑀸𑀤𑀦𑀧𑀼𑀢𑁆𑀢𑀫𑀁𑀲𑀽𑀧𑀫𑀸𑀤𑀺𑀯𑀲𑁂𑀦 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑁄 𑀧𑀺𑀡𑁆𑀟𑀧𑀸𑀢𑀁 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀢𑀣𑀸𑀭𑀽𑀧𑀁 𑀯𑀦𑀲𑀡𑁆𑀟𑀁 𑀅𑀦𑀼𑀧𑀯𑀺𑀲𑀺𑀢𑁆𑀯𑀸 𑀅𑀚𑁆𑀛𑀢𑁆𑀢𑀺𑀓𑀓𑀫𑁆𑀫𑀝𑁆𑀞𑀸𑀦𑀁 𑀲𑀫𑁆𑀫𑀲𑀦𑁆𑀢𑁄 𑀘𑀢𑁆𑀢𑀸𑀭𑁄 𑀫𑀕𑁆𑀕𑁂, 𑀘𑀢𑁆𑀢𑀸𑀭𑀺 𑀘 𑀲𑀸𑀫𑀜𑁆𑀜𑀨𑀮𑀸𑀦𑀺 𑀳𑀢𑁆𑀣𑀕𑀢𑀸𑀦𑁂𑀯 𑀓𑀭𑁄𑀢𑀺. 𑀅𑀲𑁂𑀔𑀫𑀼𑀦𑀺 𑀧𑀦 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀫𑀦𑀼𑀬𑀼𑀜𑁆𑀚𑀢𑀺. 𑀅𑀬𑀫𑀲𑁆𑀲 𑀪𑀫𑀭𑁂𑀦 𑀲𑀤𑁆𑀥𑀺𑀁 𑀫𑀥𑀼𑀓𑀭𑀡𑀲𑀭𑀺𑀓𑁆𑀔𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀇𑀥 𑀧𑀦 𑀔𑀻𑀡𑀸𑀲𑀯𑁄𑀯 𑀅𑀥𑀺𑀧𑁆𑀧𑁂𑀢𑁄.

𑀤𑁂𑀲𑀦𑀸𑀯𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀽𑀢𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀯𑀢𑁆𑀯𑀸 𑀉𑀢𑁆𑀢𑀭𑀺𑀧𑀺 𑀣𑁂𑀭𑀲𑁆𑀲 𑀕𑀼𑀡𑀁 𑀧𑀓𑀸𑀲𑁂𑀢𑀼𑀁 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯 𑀫𑁄𑀕𑁆𑀕𑀮𑁆𑀮𑀸𑀦𑁂𑀦 𑀫𑀘𑁆𑀙𑀭𑀺𑀬𑀲𑁂𑀝𑁆𑀞𑀺 𑀤𑀫𑀺𑀢𑁄, 𑀧𑀼𑀩𑁆𑀩𑁂𑀧𑀺 𑀦𑀁 𑀤𑀫𑁂𑀢𑁆𑀯𑀸 𑀓𑀫𑁆𑀫𑀨𑀮𑀲𑀫𑁆𑀩𑀦𑁆𑀥𑀁 𑀚𑀸𑀦𑀸𑀧𑁂𑀲𑀺 𑀏𑀯𑀸’’𑀢𑀺 𑀯𑀢𑁆𑀯𑀸 𑀇𑀫𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁄 𑀅𑀢𑀻𑀢𑀁 𑀆𑀳𑀭𑀺𑀢𑁆𑀯𑀸 𑁋

‘‘𑀉𑀪𑁄 𑀔𑀜𑁆𑀚𑀸 𑀉𑀪𑁄 𑀓𑀼𑀡𑀻, 𑀉𑀪𑁄 𑀯𑀺𑀲𑀫𑀘𑀓𑁆𑀔𑀼𑀓𑀸;

𑀉𑀪𑀺𑀦𑁆𑀦𑀁 𑀧𑀺𑀴𑀓𑀸 𑀚𑀸𑀢𑀸, 𑀦𑀸𑀳𑀁 𑀧𑀲𑁆𑀲𑀸𑀫𑀺 𑀇𑀮𑁆𑀮𑀺𑀲’’𑀦𑁆𑀢𑀺. (𑀚𑀸. 𑁧.𑁧.𑁭𑁮) 𑁋

𑀇𑀫𑀁 𑀇𑀮𑁆𑀮𑀺𑀲𑀚𑀸𑀢𑀓𑀁 𑀓𑀣𑁂𑀲𑀻𑀢𑀺.

𑀫𑀘𑁆𑀙𑀭𑀺𑀬𑀓𑁄𑀲𑀺𑀬𑀲𑁂𑀝𑁆𑀞𑀺𑀯𑀢𑁆𑀣𑀼 𑀧𑀜𑁆𑀘𑀫𑀁.

𑁬. 𑀧𑀸𑀯𑁂𑀬𑁆𑀬𑀓𑀸𑀚𑀻𑀯𑀓𑀯𑀢𑁆𑀣𑀼

𑀦 𑀧𑀭𑁂𑀲𑀁 𑀯𑀺𑀮𑁄𑀫𑀸𑀦𑀻𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀦𑁆𑀢𑁄 𑀧𑀸𑀯𑁂𑀬𑁆𑀬𑀁 𑀦𑀸𑀫 𑀆𑀚𑀻𑀯𑀓𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀲𑀸𑀯𑀢𑁆𑀣𑀺𑀬𑀁 𑀓𑀺𑀭𑁂𑀓𑀸 𑀕𑀳𑀧𑀢𑀸𑀦𑀻 𑀧𑀼𑀢𑁆𑀢𑀝𑁆𑀞𑀸𑀦𑁂 𑀞𑀧𑁂𑀢𑁆𑀯𑀸 𑀧𑀸𑀯𑁂𑀬𑁆𑀬𑀁 𑀦𑀸𑀫 𑀆𑀚𑀻𑀯𑀓𑀁 𑀧𑀝𑀺𑀚𑀕𑁆𑀕𑀺. 𑀢𑀲𑁆𑀲𑀸𑀦𑀦𑁆𑀢𑀭𑀖𑀭𑁂𑀲𑀼 𑀫𑀦𑀼𑀲𑁆𑀲𑀸 𑀲𑀢𑁆𑀣𑀼 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀆𑀕𑀦𑁆𑀢𑁆𑀯𑀸, ‘‘𑀅𑀳𑁄 𑀅𑀘𑁆𑀙𑀭𑀺𑀬𑀸 𑀩𑀼𑀤𑁆𑀥𑀸𑀦𑀁 𑀥𑀫𑁆𑀫𑀤𑁂𑀲𑀦𑀸’’𑀢𑀺 𑀦𑀸𑀦𑀧𑁆𑀧𑀓𑀸𑀭𑁂𑀳𑀺 𑀩𑀼𑀤𑁆𑀥𑀕𑀼𑀡𑁂 𑀯𑀡𑁆𑀡𑁂𑀦𑁆𑀢𑀺. 𑀲𑀸 𑀩𑀼𑀤𑁆𑀥𑀸𑀦𑀁 𑀕𑀼𑀡𑀓𑀣𑀁 𑀲𑀼𑀢𑁆𑀯𑀸 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀥𑀫𑁆𑀫𑀁 𑀲𑁄𑀢𑀼𑀓𑀸𑀫𑀸 𑀆𑀚𑀻𑀯𑀓𑀲𑁆𑀲 𑀏𑀢𑀫𑀢𑁆𑀣𑀁 𑀓𑀣𑁂𑀢𑁆𑀯𑀸, ‘‘𑀕𑀘𑁆𑀙𑀺𑀲𑁆𑀲𑀸𑀫𑀺 𑀅𑀳𑀁 𑀩𑀼𑀤𑁆𑀥𑀲𑀦𑁆𑀢𑀺𑀓𑀁, 𑀅𑀬𑁆𑀬𑀸’’𑀢𑀺 𑀆𑀳. 𑀲𑁄 ‘‘𑀫𑀸 𑀕𑀘𑁆𑀙𑀸𑀳𑀻’’𑀢𑀺 𑀦𑀺𑀯𑀸𑀭𑁂𑀢𑁆𑀯𑀸 𑀢𑀁 𑀧𑀼𑀦𑀧𑁆𑀧𑀼𑀦𑀁 𑀬𑀸𑀘𑀫𑀸𑀦𑀫𑁆𑀧𑀺 𑀦𑀺𑀯𑀸𑀭𑁂𑀲𑀺 𑀏𑀯. 𑀲𑀸 ‘‘𑀅𑀬𑀁 𑀫𑀫 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀥𑀫𑁆𑀫𑀁 𑀲𑁄𑀢𑀼𑀁 𑀦 𑀤𑁂𑀢𑀺, 𑀲𑀢𑁆𑀣𑀸𑀭𑀁 𑀦𑀺𑀫𑀦𑁆𑀢𑁂𑀢𑁆𑀯𑀸 𑀇𑀥𑁂𑀯 𑀥𑀫𑁆𑀫𑀁 𑀲𑀼𑀡𑀺𑀲𑁆𑀲𑀸𑀫𑀻’’𑀢𑀺 𑀲𑀸𑀬𑀦𑁆𑀳𑀲𑀫𑀬𑁂 𑀧𑀼𑀢𑁆𑀢𑀁 𑀧𑀓𑁆𑀓𑁄𑀲𑀺𑀢𑁆𑀯𑀸, ‘‘𑀕𑀘𑁆𑀙, 𑀢𑀸𑀢, 𑀲𑁆𑀯𑀸𑀢𑀦𑀸𑀬 𑀲𑀢𑁆𑀣𑀸𑀭𑀁 𑀦𑀺𑀫𑀦𑁆𑀢𑁂𑀳𑀻’’𑀢𑀺 𑀧𑁂𑀲𑁂𑀲𑀺. 𑀲𑁄 𑀕𑀘𑁆𑀙𑀦𑁆𑀢𑁄 𑀧𑀞𑀫𑀢𑀭𑀁 𑀆𑀚𑀻𑀯𑀓𑀲𑁆𑀲 𑀯𑀲𑀦𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀢𑀁 𑀯𑀦𑁆𑀤𑀺𑀢𑁆𑀯𑀸 𑀦𑀺𑀲𑀻𑀤𑀺. 𑀅𑀣 𑀦𑀁 𑀲𑁄 ‘‘𑀓𑀳𑀁 𑀕𑀘𑁆𑀙𑀲𑀻’’𑀢𑀺 𑀆𑀳. ‘‘𑀫𑀸𑀢𑀼 𑀯𑀘𑀦𑁂𑀦 𑀲𑀢𑁆𑀣𑀸𑀭𑀁 𑀦𑀺𑀫𑀦𑁆𑀢𑁂𑀢𑀼𑀁 𑀕𑀘𑁆𑀙𑀸𑀫𑀻’’𑀢𑀺 𑀆𑀳. ‘‘𑀫𑀸 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀘𑁆𑀙𑀸𑀳𑀻’’𑀢𑀺. ‘‘𑀅𑀮𑀁, 𑀅𑀬𑁆𑀬, 𑀫𑀫 𑀫𑀸𑀢𑀼 𑀪𑀸𑀬𑀸𑀫𑀺, 𑀕𑀘𑁆𑀙𑀺𑀲𑁆𑀲𑀸𑀫𑀳’’𑀦𑁆𑀢𑀺. ‘‘𑀏𑀢𑀲𑁆𑀲 𑀓𑀢𑀲𑀓𑁆𑀓𑀸𑀭𑀁 𑀉𑀪𑁄𑀧𑀺 𑀔𑀸𑀤𑀺𑀲𑁆𑀲𑀸𑀫, 𑀫𑀸 𑀕𑀘𑁆𑀙𑀸𑀳𑀻’’𑀢𑀺. ‘‘𑀅𑀮𑀁, 𑀅𑀬𑁆𑀬, 𑀫𑀸𑀢𑀸 𑀫𑁂 𑀢𑀚𑁆𑀚𑁂𑀲𑁆𑀲𑀢𑀻’’𑀢𑀺. 𑀢𑁂𑀦 𑀳𑀺 𑀕𑀘𑁆𑀙, 𑀕𑀦𑁆𑀢𑁆𑀯𑀸 𑀧𑀦 𑀦𑀺𑀫𑀦𑁆𑀢𑁂𑀢𑁆𑀯𑀸, ‘‘𑀅𑀫𑁆𑀳𑀸𑀓𑀁 𑀕𑁂𑀳𑀁 𑀅𑀲𑀼𑀓𑀝𑁆𑀞𑀸𑀦𑁂 𑀯𑀸 𑀅𑀲𑀼𑀓𑀯𑀻𑀣𑀺𑀬𑀁 𑀯𑀸 𑀅𑀲𑀼𑀓𑀫𑀕𑁆𑀕𑁂𑀦 𑀯𑀸 𑀕𑀦𑁆𑀢𑀩𑁆𑀩’’𑀦𑁆𑀢𑀺 𑀫𑀸 𑀆𑀘𑀺𑀓𑁆𑀔𑀺. ‘‘𑀲𑀦𑁆𑀢𑀺𑀓𑁂 𑀞𑀺𑀢𑁄 𑀯𑀺𑀬 𑀅𑀜𑁆𑀜𑁂𑀦 𑀫𑀕𑁆𑀕𑁂𑀦 𑀕𑀘𑁆𑀙𑀦𑁆𑀢𑁄 𑀯𑀺𑀬 𑀧𑀮𑀸𑀬𑀺𑀢𑁆𑀯𑀸 𑀏𑀳𑀻’’𑀢𑀺. 𑀲𑁄 𑀆𑀚𑀻𑀯𑀓𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀦𑀺𑀫𑀦𑁆𑀢𑁂𑀢𑁆𑀯𑀸 𑀆𑀚𑀻𑀯𑀓𑁂𑀦 𑀯𑀼𑀢𑁆𑀢𑀦𑀺𑀬𑀸𑀫𑁂𑀦𑁂𑀯 𑀲𑀩𑁆𑀩𑀁 𑀓𑀢𑁆𑀯𑀸 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸, ‘‘𑀓𑀺𑀁 𑀢𑁂 𑀓𑀢’’𑀦𑁆𑀢𑀺 𑀧𑀼𑀝𑁆𑀞𑁄, ‘‘𑀲𑀩𑁆𑀩𑀁 𑀓𑀢𑀁, 𑀅𑀬𑁆𑀬𑀸’’𑀢𑀺 𑀆𑀳. ‘‘𑀪𑀤𑁆𑀤𑀓𑀁 𑀢𑁂 𑀓𑀢𑀁, 𑀢𑀲𑁆𑀲 𑀲𑀓𑁆𑀓𑀸𑀭𑀁 𑀉𑀪𑁄𑀧𑀺 𑀔𑀸𑀤𑀺𑀲𑁆𑀲𑀸𑀫𑀸’’𑀢𑀺 𑀯𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀆𑀚𑀻𑀯𑀓𑁄 𑀧𑀸𑀢𑁄𑀯 𑀢𑀁 𑀕𑁂𑀳𑀁 𑀅𑀕𑀫𑀸𑀲𑀺. 𑀢𑀁 𑀕𑀳𑁂𑀢𑁆𑀯𑀸 𑀧𑀘𑁆𑀙𑀸𑀕𑀩𑁆𑀪𑁂 𑀦𑀺𑀲𑀻𑀤𑀸𑀧𑁂𑀲𑀼𑀁.

𑀧𑀝𑀺𑀯𑀺𑀲𑁆𑀲𑀓𑀫𑀦𑀼𑀲𑁆𑀲𑀸 𑀢𑀁 𑀕𑁂𑀳𑀁 𑀅𑀮𑁆𑀮𑀕𑁄𑀫𑀬𑁂𑀦 𑀉𑀧𑀮𑀺𑀫𑁆𑀧𑀺𑀢𑁆𑀯𑀸 𑀮𑀸𑀚𑀧𑀜𑁆𑀘𑀫𑀸𑀦𑀺 𑀧𑀼𑀧𑁆𑀨𑀸𑀦𑀺 𑀯𑀺𑀓𑀺𑀭𑀺𑀢𑁆𑀯𑀸 𑀲𑀢𑁆𑀣𑀼 𑀦𑀺𑀲𑀻𑀤𑀦𑀢𑁆𑀣𑀸𑀬 𑀫𑀳𑀸𑀭𑀳𑀁 𑀆𑀲𑀦𑀁 𑀧𑀜𑁆𑀜𑀸𑀧𑁂𑀲𑀼𑀁. 𑀩𑀼𑀤𑁆𑀥𑁂𑀳𑀺 𑀲𑀤𑁆𑀥𑀺𑀁 𑀅𑀧𑀭𑀺𑀘𑀺𑀢𑀫𑀦𑀼𑀲𑁆𑀲𑀸 𑀳𑀺 𑀆𑀲𑀦𑀧𑀜𑁆𑀜𑀢𑁆𑀢𑀺𑀁 𑀦 𑀚𑀸𑀦𑀦𑁆𑀢𑀺, 𑀩𑀼𑀤𑁆𑀥𑀸𑀦𑀜𑁆𑀘 𑀫𑀕𑁆𑀕𑀤𑁂𑀲𑀓𑁂𑀦 𑀓𑀺𑀘𑁆𑀘𑀁 𑀦𑀸𑀫 𑀦𑀢𑁆𑀣𑀺, 𑀩𑁄𑀥𑀺𑀫𑀽𑀮𑁂 𑀤𑀲𑀲𑀳𑀲𑁆𑀲𑀺𑀲𑁄𑀓𑀥𑀸𑀢𑀼𑀁 𑀓𑀫𑁆𑀧𑁂𑀢𑁆𑀯𑀸 𑀲𑀫𑁆𑀩𑁄𑀥𑀺𑀁 𑀧𑀢𑁆𑀢𑀤𑀺𑀯𑀲𑁂𑀬𑁂𑀯 𑀳𑀺 𑀦𑁂𑀲𑀁 ‘‘𑀅𑀬𑀁 𑀫𑀕𑁆𑀕𑁄 𑀦𑀺𑀭𑀬𑀁 𑀕𑀘𑁆𑀙𑀢𑀺, 𑀅𑀬𑀁 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀁, 𑀅𑀬𑀁 𑀧𑁂𑀢𑁆𑀢𑀺𑀯𑀺𑀲𑀬𑀁, 𑀅𑀬𑀁 𑀫𑀦𑀼𑀲𑁆𑀲𑀮𑁄𑀓𑀁, 𑀅𑀬𑀁 𑀤𑁂𑀯𑀮𑁄𑀓𑀁, 𑀅𑀬𑀁 𑀅𑀫𑀢𑀫𑀳𑀸𑀦𑀺𑀩𑁆𑀩𑀸𑀦’’𑀦𑁆𑀢𑀺 𑀲𑀩𑁆𑀩𑁂 𑀫𑀕𑁆𑀕𑀸 𑀆𑀯𑀺𑀪𑀽𑀢𑀸. 𑀕𑀸𑀫𑀦𑀺𑀕𑀫𑀸𑀤𑀻𑀦𑀁 𑀧𑀦 𑀫𑀕𑁆𑀕𑁂 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺. 𑀢𑀲𑁆𑀫𑀸 𑀲𑀢𑁆𑀣𑀸 𑀧𑀸𑀢𑁄𑀯 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀫𑀳𑀸𑀉𑀧𑀸𑀲𑀺𑀓𑀸𑀬 𑀕𑁂𑀳𑀤𑁆𑀯𑀸𑀭𑀁 𑀕𑀢𑁄. 𑀲𑀸 𑀕𑁂𑀳𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀲𑀢𑁆𑀣𑀸𑀭𑀁 𑀧𑀜𑁆𑀘𑀧𑀢𑀺𑀝𑁆𑀞𑀺𑀢𑁂𑀦 𑀯𑀦𑁆𑀤𑀺𑀢𑁆𑀯𑀸 𑀅𑀦𑁆𑀢𑁄𑀦𑀺𑀯𑁂𑀲𑀦𑀁 𑀧𑀯𑁂𑀲𑁂𑀢𑁆𑀯𑀸 𑀆𑀲𑀦𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀤𑀓𑁆𑀔𑀺𑀡𑁄𑀤𑀓𑀁 𑀤𑀢𑁆𑀯𑀸 𑀧𑀡𑀻𑀢𑁂𑀦 𑀔𑀸𑀤𑀦𑀻𑀬𑁂𑀦 𑀪𑁄𑀚𑀦𑀻𑀬𑁂𑀦 𑀧𑀭𑀺𑀯𑀺𑀲𑀺. 𑀉𑀧𑀸𑀲𑀺𑀓𑀸 𑀓𑀢𑀪𑀢𑁆𑀢𑀓𑀺𑀘𑁆𑀘𑀲𑁆𑀲 𑀲𑀢𑁆𑀣𑀼𑀦𑁄 𑀅𑀦𑀼𑀫𑁄𑀤𑀦𑀁 𑀓𑀸𑀭𑁂𑀢𑀼𑀓𑀸𑀫𑀸 𑀧𑀢𑁆𑀢𑀁 𑀕𑀡𑁆𑀳𑀺. 𑀲𑀢𑁆𑀣𑀸 𑀫𑀥𑀼𑀭𑀲𑁆𑀲𑀭𑁂𑀦 𑀅𑀦𑀼𑀫𑁄𑀤𑀦𑀥𑀫𑁆𑀫𑀓𑀣𑀁 𑀆𑀭𑀪𑀺. 𑀉𑀧𑀸𑀲𑀺𑀓𑀸 ‘‘𑀲𑀸𑀥𑀼, 𑀲𑀸𑀥𑀽’’𑀢𑀺 𑀲𑀸𑀥𑀼𑀓𑀸𑀭𑀁 𑀤𑀤𑀫𑀸𑀦𑀸 𑀥𑀫𑁆𑀫𑀁 𑀲𑀼𑀡𑀺. 𑀆𑀚𑀻𑀯𑀓𑁄𑀧𑀺 𑀧𑀘𑁆𑀙𑀸𑀕𑀩𑁆𑀪𑁂 𑀦𑀺𑀲𑀺𑀦𑁆𑀦𑁄𑀯 𑀢𑀲𑁆𑀲𑀸 𑀲𑀸𑀥𑀼𑀓𑀸𑀭𑀁 𑀤𑀢𑁆𑀯𑀸 𑀥𑀫𑁆𑀫𑀁 𑀲𑀼𑀡𑀦𑁆𑀢𑀺𑀬𑀸 𑀲𑀤𑁆𑀤𑀁 𑀲𑀼𑀢𑁆𑀯𑀸 𑀲𑀦𑁆𑀥𑀸𑀭𑁂𑀢𑀼𑀁 𑀦𑀸𑀲𑀓𑁆𑀔𑀺. ‘‘𑀦 𑀇𑀤𑀸𑀦𑁂𑀲𑀸 𑀫𑀬𑁆𑀳’’𑀦𑁆𑀢𑀺 𑀦𑀺𑀓𑁆𑀔𑀫𑀺𑀢𑁆𑀯𑀸 ‘‘𑀦𑀝𑁆𑀞𑀸𑀲𑀺 𑀓𑀸𑀴𑀓𑀡𑁆𑀡𑀺, 𑀏𑀢𑀲𑁆𑀲 𑀏𑀯𑀁 𑀲𑀓𑁆𑀓𑀸𑀭𑀁 𑀓𑀭𑁄𑀢𑀻’’𑀢𑀺 𑀦𑀸𑀦𑀧𑁆𑀧𑀓𑀸𑀭𑁂𑀦 𑀉𑀧𑀸𑀲𑀺𑀓𑀜𑁆𑀘 𑀲𑀢𑁆𑀣𑀸𑀭𑀜𑁆𑀘 𑀅𑀓𑁆𑀓𑁄𑀲𑀦𑁆𑀢𑁄 𑀧𑀮𑀸𑀬𑀺. 𑀉𑀧𑀸𑀲𑀺𑀓𑀸 𑀢𑀲𑁆𑀲 𑀓𑀣𑀸𑀬 𑀮𑀚𑁆𑀚𑀺𑀢𑀸 𑀅𑀜𑁆𑀜𑀣𑀢𑁆𑀢𑀁 𑀕𑀢𑀁 𑀘𑀺𑀢𑁆𑀢𑀁 𑀤𑁂𑀲𑀦𑀸𑀦𑀼𑀲𑀸𑀭𑁂𑀦 𑀜𑀸𑀡𑀁 𑀧𑁂𑀲𑁂𑀢𑀼𑀁 𑀦𑀸𑀲𑀓𑁆𑀔𑀺. 𑀅𑀣 𑀦𑀁 𑀲𑀢𑁆𑀣𑀸 ‘‘𑀓𑀺𑀁 𑀉𑀧𑀸𑀲𑀺𑀓𑁂 𑀘𑀺𑀢𑁆𑀢𑀁 𑀤𑁂𑀲𑀦𑀸𑀦𑀼𑀕𑀢𑀁 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀲𑀻’’𑀢𑀺? ‘‘𑀪𑀦𑁆𑀢𑁂, 𑀏𑀢𑀲𑁆𑀲 𑀫𑁂 𑀓𑀣𑀸𑀬 𑀘𑀺𑀢𑁆𑀢𑀁 𑀅𑀜𑁆𑀜𑀣𑀢𑁆𑀢𑀁 𑀉𑀧𑀕𑀢’’𑀦𑁆𑀢𑀺. 𑀲𑀢𑁆𑀣𑀸 ‘‘𑀏𑀯𑀭𑀽𑀧𑀲𑁆𑀲 𑀯𑀺𑀲𑀪𑀸𑀕𑀚𑀦𑀲𑁆𑀲 𑀓𑀣𑀺𑀢𑀁 𑀓𑀣𑀁 𑀦𑀸𑀫 𑀆𑀯𑀚𑁆𑀚𑀺𑀢𑀼𑀁 𑀦 𑀯𑀝𑁆𑀝𑀢𑀺, 𑀏𑀯𑀭𑀽𑀧𑀁 𑀅𑀲𑀫𑀦𑁆𑀦𑀸𑀳𑀭𑀺𑀢𑁆𑀯𑀸 𑀅𑀢𑁆𑀢𑀦𑁄 𑀓𑀢𑀸𑀓𑀢𑀫𑁂𑀯 𑀑𑀮𑁄𑀓𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁫𑁦. ‘‘𑀦 𑀧𑀭𑁂𑀲𑀁 𑀯𑀺𑀮𑁄𑀫𑀸𑀦𑀺, 𑀦 𑀧𑀭𑁂𑀲𑀁 𑀓𑀢𑀸𑀓𑀢𑀁;

𑀅𑀢𑁆𑀢𑀦𑁄𑀯 𑀅𑀯𑁂𑀓𑁆𑀔𑁂𑀬𑁆𑀬, 𑀓𑀢𑀸𑀦𑀺 𑀅𑀓𑀢𑀸𑀦𑀺 𑀘𑀸’’𑀢𑀺.

𑀢𑀢𑁆𑀣 𑀦 𑀧𑀭𑁂𑀲𑀁 𑀯𑀺𑀮𑁄𑀫𑀸𑀦𑀻𑀢𑀺 𑀧𑀭𑁂𑀲𑀁 𑀯𑀺𑀮𑁄𑀫𑀸𑀦𑀺 𑀨𑀭𑀼𑀲𑀸𑀦𑀺 𑀫𑀫𑁆𑀫𑀘𑁆𑀙𑁂𑀤𑀓𑀯𑀘𑀦𑀸𑀦𑀺 𑀦 𑀫𑀦𑀲𑀺𑀓𑀸𑀢𑀩𑁆𑀩𑀸𑀦𑀺. 𑀦 𑀧𑀭𑁂𑀲𑀁 𑀓𑀢𑀸𑀓𑀢𑀦𑁆𑀢𑀺 ‘‘𑀅𑀲𑀼𑀓𑁄 𑀉𑀧𑀸𑀲𑀓𑁄 𑀅𑀲𑁆𑀲𑀤𑁆𑀥𑁄 𑀅𑀧𑁆𑀧𑀲𑀦𑁆𑀦𑁄, 𑀦𑀸𑀧𑀺𑀲𑁆𑀲 𑀕𑁂𑀳𑁂 𑀓𑀝𑀘𑁆𑀙𑀼𑀪𑀺𑀓𑁆𑀔𑀸𑀤𑀻𑀦𑀺 𑀤𑀺𑀬𑁆𑀬𑀦𑁆𑀢𑀺, 𑀦 𑀲𑀮𑀸𑀓𑀪𑀢𑁆𑀢𑀸𑀤𑀻𑀦𑀺, 𑀦 𑀘𑀻𑀯𑀭𑀸𑀤𑀺𑀧𑀘𑁆𑀘𑀬𑀤𑀸𑀦𑀁 𑀏𑀢𑀲𑁆𑀲 𑀅𑀢𑁆𑀣𑀺, 𑀢𑀣𑀸 𑀅𑀲𑀼𑀓𑀸 𑀉𑀧𑀸𑀲𑀺𑀓𑀸 𑀅𑀲𑁆𑀲𑀤𑁆𑀥𑀸 𑀅𑀧𑁆𑀧𑀲𑀦𑁆𑀦𑀸, 𑀦𑀸𑀧𑀺𑀲𑁆𑀲𑀸 𑀕𑁂𑀳𑁂 𑀓𑀝𑀘𑁆𑀙𑀼𑀪𑀺𑀓𑁆𑀔𑀸𑀤𑀻𑀦𑀺 𑀤𑀺𑀬𑁆𑀬𑀦𑁆𑀢𑀺, 𑀦 𑀲𑀮𑀸𑀓𑀪𑀢𑁆𑀢𑀸𑀤𑀻𑀦𑀺, 𑀦 𑀘𑀻𑀯𑀭𑀸𑀤𑀺𑀧𑀘𑁆𑀘𑀬𑀤𑀸𑀦𑀁 𑀏𑀢𑀺𑀲𑁆𑀲𑀸 𑀅𑀢𑁆𑀣𑀺, 𑀢𑀣𑀸 𑀅𑀲𑀼𑀓𑁄 𑀪𑀺𑀓𑁆𑀔𑀼 𑀅𑀲𑁆𑀲𑀤𑁆𑀥𑁄 𑀅𑀧𑁆𑀧𑀲𑀦𑁆𑀦𑁄, 𑀦𑀸𑀧𑀺 𑀉𑀧𑀚𑁆𑀛𑀸𑀬𑀯𑀢𑁆𑀢𑀁 𑀓𑀭𑁄𑀢𑀺, 𑀦 𑀆𑀘𑀭𑀺𑀬𑀯𑀢𑁆𑀢𑀁, 𑀦 𑀆𑀕𑀦𑁆𑀢𑀼𑀓𑀯𑀢𑁆𑀢𑀁, 𑀦 𑀕𑀫𑀺𑀓𑀯𑀢𑁆𑀢𑀁, 𑀦 𑀘𑁂𑀢𑀺𑀬𑀗𑁆𑀕𑀡𑀯𑀢𑁆𑀢𑀁, 𑀦 𑀉𑀧𑁄𑀲𑀣𑀸𑀕𑀸𑀭𑀯𑀢𑁆𑀢𑀁, 𑀦 𑀪𑁄𑀚𑀦𑀲𑀸𑀮𑀸𑀯𑀢𑁆𑀢𑀁, 𑀦 𑀚𑀦𑁆𑀢𑀸𑀖𑀭𑀯𑀢𑁆𑀢𑀸𑀤𑀻𑀦𑀺, 𑀦𑀸𑀧𑀺𑀲𑁆𑀲 𑀓𑀺𑀜𑁆𑀘𑀺 𑀥𑀼𑀢𑀗𑁆𑀕𑀁 𑀅𑀢𑁆𑀣𑀺, 𑀦 𑀪𑀸𑀯𑀦𑀸𑀭𑀸𑀫𑀢𑀸𑀬 𑀉𑀲𑁆𑀲𑀸𑀳𑀫𑀢𑁆𑀢𑀫𑁆𑀧𑀻’’𑀢𑀺 𑀏𑀯𑀁 𑀧𑀭𑁂𑀲𑀁 𑀓𑀢𑀸𑀓𑀢𑀁 𑀦𑀸𑀫 𑀦 𑀑𑀮𑁄𑀓𑁂𑀢𑀩𑁆𑀩𑀁. 𑀅𑀢𑁆𑀢𑀦𑁄𑀯 𑀅𑀯𑁂𑀓𑁆𑀔𑁂𑀬𑁆𑀬𑀸𑀢𑀺 ‘‘𑀓𑀣𑀁 𑀪𑀽𑀢𑀲𑁆𑀲 𑀫𑁂 𑀭𑀢𑁆𑀢𑀺𑀦𑁆𑀤𑀺𑀯𑀸 𑀯𑀻𑀢𑀺𑀯𑀢𑁆𑀢𑀦𑁆𑀢𑀻𑀢𑀺 𑀧𑀩𑁆𑀩𑀚𑀺𑀢𑁂𑀦 𑀅𑀪𑀺𑀡𑁆𑀳𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩’’𑀦𑁆𑀢𑀺 (𑀅. 𑀦𑀺. 𑁧𑁦.𑁪𑁮) 𑀇𑀫𑀁 𑀑𑀯𑀸𑀤𑀁 𑀅𑀦𑀼𑀲𑁆𑀲𑀭𑀦𑁆𑀢𑁄 𑀲𑀤𑁆𑀥𑀸𑀧𑀩𑁆𑀩𑀚𑀺𑀢𑁄 𑀓𑀼𑀮𑀧𑀼𑀢𑁆𑀢𑁄 ‘‘𑀓𑀺𑀁 𑀦𑀼 𑀔𑁄 𑀅𑀳𑀁 ‘𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀅𑀦𑀢𑁆𑀢𑀸’𑀢𑀺 𑀢𑀺𑀮𑀓𑁆𑀔𑀡𑀁 𑀆𑀭𑁄𑀧𑁂𑀢𑁆𑀯𑀸 𑀬𑁄𑀕𑁂 𑀓𑀫𑁆𑀫𑀁 𑀓𑀸𑀢𑀼𑀁 𑀲𑀓𑁆𑀔𑀺𑀁, 𑀦𑀸𑀲𑀓𑁆𑀔𑀺’’𑀦𑁆𑀢𑀺 𑀏𑀯𑀁 𑀅𑀢𑁆𑀢𑀦𑁄 𑀓𑀢𑀸𑀓𑀢𑀸𑀦𑀺 𑀑𑀮𑁄𑀓𑁂𑀬𑁆𑀬𑀸𑀢𑀺.

𑀤𑁂𑀲𑀦𑀸𑀯𑀲𑀸𑀦𑁂 𑀲𑀸 𑀉𑀧𑀸𑀲𑀺𑀓𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀺𑀢𑀸, 𑀤𑁂𑀲𑀦𑀸 𑀫𑀳𑀸𑀚𑀦𑀲𑁆𑀲 𑀲𑀸𑀢𑁆𑀣𑀺𑀓𑀸 𑀚𑀸𑀢𑀸𑀢𑀺.

𑀧𑀸𑀯𑁂𑀬𑁆𑀬𑀓𑀸𑀚𑀻𑀯𑀓𑀯𑀢𑁆𑀣𑀼 𑀙𑀝𑁆𑀞𑀁.

𑁭. 𑀙𑀢𑁆𑀢𑀧𑀸𑀡𑀺𑀉𑀧𑀸𑀲𑀓𑀯𑀢𑁆𑀣𑀼

𑀬𑀣𑀸𑀧𑀺 𑀭𑀼𑀘𑀺𑀭𑀁 𑀧𑀼𑀧𑁆𑀨𑀦𑁆𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀦𑁆𑀢𑁄 𑀙𑀢𑁆𑀢𑀧𑀸𑀡𑀺𑀉𑀧𑀸𑀲𑀓𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀲𑀸𑀯𑀢𑁆𑀣𑀺𑀬𑀜𑁆𑀳𑀺 𑀙𑀢𑁆𑀢𑀧𑀸𑀡𑀺 𑀦𑀸𑀫 𑀉𑀧𑀸𑀲𑀓𑁄 𑀢𑀺𑀧𑀺𑀝𑀓𑀥𑀭𑁄 𑀅𑀦𑀸𑀕𑀸𑀫𑀻. 𑀲𑁄 𑀧𑀸𑀢𑁄𑀯 𑀉𑀧𑁄𑀲𑀣𑀺𑀓𑁄 𑀳𑀼𑀢𑁆𑀯𑀸 𑀲𑀢𑁆𑀣𑀼 𑀉𑀧𑀝𑁆𑀞𑀸𑀦𑀁 𑀅𑀕𑀫𑀸𑀲𑀺. 𑀅𑀦𑀸𑀕𑀸𑀫𑀺𑀅𑀭𑀺𑀬𑀲𑀸𑀯𑀓𑀸𑀦𑀜𑁆𑀳𑀺 𑀲𑀫𑀸𑀤𑀸𑀦𑀯𑀲𑁂𑀦 𑀉𑀧𑁄𑀲𑀣𑀓𑀫𑁆𑀫𑀁 𑀦𑀸𑀫 𑀦𑀢𑁆𑀣𑀺, 𑀫𑀕𑁆𑀕𑁂𑀦𑁂𑀯 𑀢𑁂𑀲𑀁 𑀩𑁆𑀭𑀳𑁆𑀫𑀘𑀭𑀺𑀬𑀜𑁆𑀘 𑀏𑀓𑀪𑀢𑁆𑀢𑀺𑀓𑀜𑁆𑀘 𑀆𑀕𑀢𑀁. 𑀢𑁂𑀦𑁂𑀯𑀸𑀳 𑁋 ‘‘𑀖𑀝𑀺𑀓𑀸𑀭𑁄 𑀔𑁄, 𑀫𑀳𑀸𑀭𑀸𑀚, 𑀓𑀼𑀫𑁆𑀪𑀓𑀸𑀭𑁄 𑀏𑀓𑀪𑀢𑁆𑀢𑀺𑀓𑁄 𑀩𑁆𑀭𑀳𑁆𑀫𑀘𑀸𑀭𑀻 𑀲𑀻𑀮𑀯𑀸 𑀓𑀮𑁆𑀬𑀸𑀡𑀥𑀫𑁆𑀫𑁄’’𑀢𑀺 (𑀫. 𑀦𑀺. 𑁨.𑁨𑁮𑁮). 𑀏𑀯𑀁 𑀅𑀦𑀸𑀕𑀸𑀫𑀺𑀦𑁄 𑀧𑀓𑀢𑀺𑀬𑀸𑀯 𑀏𑀓𑀪𑀢𑁆𑀢𑀺𑀓𑀸 𑀘 𑀩𑁆𑀭𑀳𑁆𑀫𑀘𑀸𑀭𑀺𑀦𑁄 𑀘 𑀳𑁄𑀦𑁆𑀢𑀺. 𑀲𑁄𑀧𑀺 𑀢𑀣𑁂𑀯 𑀉𑀧𑁄𑀲𑀣𑀺𑀓𑁄 𑀳𑀼𑀢𑁆𑀯𑀸 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀥𑀫𑁆𑀫𑀓𑀣𑀁 𑀲𑀼𑀡𑀦𑁆𑀢𑁄 𑀦𑀺𑀲𑀻𑀤𑀺. 𑀢𑀲𑁆𑀫𑀺𑀁 𑀲𑀫𑀬𑁂 𑀭𑀸𑀚𑀸 𑀧𑀲𑁂𑀦𑀤𑀺 𑀓𑁄𑀲𑀮𑁄 𑀲𑀢𑁆𑀣𑀼 𑀉𑀧𑀝𑁆𑀞𑀸𑀦𑀁 𑀅𑀕𑀫𑀸𑀲𑀺. 𑀙𑀢𑁆𑀢𑀧𑀸𑀡𑀺 𑀉𑀧𑀸𑀲𑀓𑁄 𑀢𑀁 𑀆𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 ‘‘𑀉𑀝𑁆𑀞𑀸𑀢𑀩𑁆𑀩𑀁 𑀦𑀼 𑀔𑁄, 𑀦𑁄’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑁋 ‘‘𑀅𑀳𑀁 𑀅𑀕𑁆𑀕𑀭𑀸𑀚𑀲𑁆𑀲 𑀲𑀦𑁆𑀢𑀺𑀓𑁂 𑀦𑀺𑀲𑀺𑀦𑁆𑀦𑁄, 𑀢𑀲𑁆𑀲 𑀫𑁂 𑀧𑀤𑁂𑀲𑀭𑀸𑀚𑀸𑀦𑀁 𑀤𑀺𑀲𑁆𑀯𑀸 𑀉𑀝𑁆𑀞𑀸𑀢𑀼𑀁 𑀦 𑀬𑀼𑀢𑁆𑀢𑀁, 𑀭𑀸𑀚𑀸 𑀔𑁄 𑀧𑀦 𑀫𑁂 𑀅𑀦𑀼𑀝𑁆𑀞𑀳𑀦𑁆𑀢𑀲𑁆𑀲 𑀓𑀼𑀚𑁆𑀛𑀺𑀲𑁆𑀲𑀢𑀺, 𑀏𑀢𑀲𑁆𑀫𑀺𑀁 𑀓𑀼𑀚𑁆𑀛𑀦𑁆𑀢𑁂𑀧𑀺 𑀦𑁂𑀯 𑀉𑀝𑁆𑀞𑀳𑀺𑀲𑁆𑀲𑀸𑀫𑀺. 𑀭𑀸𑀚𑀸𑀦𑀁 𑀤𑀺𑀲𑁆𑀯𑀸 𑀉𑀝𑁆𑀞𑀳𑀦𑁆𑀢𑁂𑀦 𑀳𑀺 𑀭𑀸𑀚𑀸 𑀕𑀭𑀼𑀓𑀢𑁄 𑀳𑁄𑀢𑀺, 𑀦𑁄 𑀲𑀢𑁆𑀣𑀸, 𑀢𑀲𑁆𑀫𑀸 𑀦𑁂𑀯 𑀉𑀝𑁆𑀞𑀳𑀺𑀲𑁆𑀲𑀸𑀫𑀻’’𑀢𑀺 𑀦 𑀉𑀝𑁆𑀞𑀳𑀺. 𑀧𑀡𑁆𑀟𑀺𑀢𑀧𑀼𑀭𑀺𑀲𑀸 𑀦𑀸𑀫 𑀕𑀭𑀼𑀢𑀭𑀸𑀦𑀁 𑀲𑀦𑁆𑀢𑀺𑀓𑁂 𑀦𑀺𑀲𑀻𑀤𑀺𑀢𑁆𑀯𑀸 𑀅𑀦𑀼𑀝𑁆𑀞𑀳𑀦𑁆𑀢𑀁 𑀤𑀺𑀲𑁆𑀯𑀸 𑀦 𑀓𑀼𑀚𑁆𑀛𑀦𑁆𑀢𑀺. 𑀭𑀸𑀚𑀸 𑀧𑀦 𑀢𑀁 𑀅𑀦𑀼𑀝𑁆𑀞𑀳𑀦𑁆𑀢𑀁 𑀤𑀺𑀲𑁆𑀯𑀸 𑀓𑀼𑀧𑀺𑀢𑀫𑀸𑀦𑀲𑁄 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀲𑀢𑁆𑀣𑀸 𑀓𑀼𑀧𑀺𑀢𑀪𑀸𑀯𑀁 𑀜𑀢𑁆𑀯𑀸, ‘‘𑀫𑀳𑀸𑀭𑀸𑀚, 𑀅𑀬𑀁 𑀙𑀢𑁆𑀢𑀧𑀸𑀡𑀺 𑀉𑀧𑀸𑀲𑀓𑁄 𑀧𑀡𑁆𑀟𑀺𑀢𑁄 𑀤𑀺𑀝𑁆𑀞𑀥𑀫𑁆𑀫𑁄 𑀢𑀺𑀧𑀺𑀝𑀓𑀥𑀭𑁄 𑀅𑀢𑁆𑀣𑀸𑀦𑀢𑁆𑀣𑀓𑀼𑀲𑀮𑁄’’𑀢𑀺 𑀉𑀧𑀸𑀲𑀓𑀲𑁆𑀲 𑀕𑀼𑀡𑀁 𑀓𑀣𑁂𑀲𑀺. 𑀭𑀜𑁆𑀜𑁄 𑀢𑀲𑁆𑀲 𑀕𑀼𑀡𑀓𑀣𑀁 𑀲𑀼𑀡𑀦𑁆𑀢𑀲𑁆𑀲𑁂𑀯 𑀘𑀺𑀢𑁆𑀢𑀁 𑀫𑀼𑀤𑀼𑀓𑀁 𑀚𑀸𑀢𑀁.

𑀅𑀣𑁂𑀓𑀤𑀺𑀯𑀲𑀁 𑀭𑀸𑀚𑀸 𑀉𑀧𑀭𑀺𑀧𑀸𑀲𑀸𑀤𑁂 𑀞𑀺𑀢𑁄 𑀙𑀢𑁆𑀢𑀧𑀸𑀡𑀺𑀁 𑀉𑀧𑀸𑀲𑀓𑀁 𑀓𑀢𑀪𑀢𑁆𑀢𑀓𑀺𑀘𑁆𑀘𑀁 𑀙𑀢𑁆𑀢𑀫𑀸𑀤𑀸𑀬 𑀉𑀧𑀸𑀳𑀦𑀫𑀸𑀭𑀼𑀬𑁆𑀳 𑀭𑀸𑀚𑀗𑁆𑀕𑀡𑁂𑀦 𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 𑀧𑀓𑁆𑀓𑁄𑀲𑀸𑀧𑁂𑀲𑀺. 𑀲𑁄 𑀙𑀢𑁆𑀢𑀼𑀧𑀸𑀳𑀦𑀁 𑀅𑀧𑀦𑁂𑀢𑁆𑀯𑀸 𑀭𑀸𑀚𑀸𑀦𑀫𑀼𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀅𑀣 𑀦𑀁 𑀭𑀸𑀚𑀸 𑀆𑀳 𑁋 ‘‘𑀪𑁄 𑀉𑀧𑀸𑀲𑀓, 𑀓𑀺𑀦𑁆𑀢𑁂 𑀙𑀢𑁆𑀢𑀼𑀧𑀸𑀳𑀦𑀁 𑀅𑀧𑀦𑀻𑀢’’𑀦𑁆𑀢𑀺. ‘‘‘𑀭𑀸𑀚𑀸 𑀧𑀓𑁆𑀓𑁄𑀲𑀢𑀻’𑀢𑀺 𑀲𑀼𑀢𑁆𑀯𑀸 𑀅𑀧𑀦𑁂𑀢𑁆𑀯𑀸 𑀆𑀕𑀢𑁄𑀫𑁆𑀳𑀻’’𑀢𑀺. ‘‘𑀅𑀚𑁆𑀚 𑀅𑀫𑁆𑀳𑀸𑀓𑀁 𑀭𑀸𑀚𑀪𑀸𑀯𑁄 𑀢𑀼𑀫𑁆𑀳𑁂𑀳𑀺 𑀜𑀸𑀢𑁄 𑀪𑀯𑀺𑀲𑁆𑀲𑀢𑀻’’𑀢𑀺. ‘‘𑀲𑀤𑀸𑀧𑀺 𑀫𑀬𑀁, 𑀤𑁂𑀯, 𑀢𑀼𑀫𑁆𑀳𑀸𑀓𑀁 𑀭𑀸𑀚𑀪𑀸𑀯𑀁 𑀚𑀸𑀦𑀸𑀫𑀸’’𑀢𑀺. ‘‘𑀬𑀤𑀺 𑀏𑀯𑀁 𑀓𑀲𑁆𑀫𑀸 𑀧𑀼𑀭𑀺𑀫𑀤𑀺𑀯𑀲𑁂 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀦𑀺𑀲𑀺𑀦𑁆𑀦𑁄 𑀫𑀁 𑀤𑀺𑀲𑁆𑀯𑀸 𑀦 𑀉𑀝𑁆𑀞𑀳𑀻’’𑀢𑀺? ‘‘𑀫𑀳𑀸𑀭𑀸𑀚, 𑀅𑀳𑀁 𑀅𑀕𑁆𑀕𑀭𑀸𑀚𑀲𑁆𑀲 𑀲𑀦𑁆𑀢𑀺𑀓𑁂 𑀦𑀺𑀲𑀺𑀦𑁆𑀦𑁄, 𑀧𑀤𑁂𑀲𑀭𑀸𑀚𑀸𑀦𑀁 𑀤𑀺𑀲𑁆𑀯𑀸 𑀉𑀝𑁆𑀞𑀳𑀦𑁆𑀢𑁄 𑀲𑀢𑁆𑀣𑀭𑀺 𑀅𑀕𑀸𑀭𑀯𑀁 𑀧𑀯𑁂𑀤𑁂𑀬𑁆𑀬𑀁, 𑀢𑀲𑁆𑀫𑀸 𑀦 𑀉𑀝𑁆𑀞𑀳𑀺’’𑀦𑁆𑀢𑀺. ‘‘𑀳𑁄𑀢𑀼, 𑀪𑁄, 𑀢𑀺𑀝𑁆𑀞𑀢𑁂𑀢𑀁’’. ‘‘𑀢𑀼𑀫𑁆𑀳𑁂 𑀓𑀺𑀭 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀸𑀦𑀁 𑀅𑀢𑁆𑀣𑀸𑀦𑀢𑁆𑀣𑀸𑀦𑀁 𑀓𑀼𑀲𑀮𑀸 𑀢𑀺𑀧𑀺𑀝𑀓𑀥𑀭𑀸 𑀅𑀫𑁆𑀳𑀸𑀓𑀁 𑀅𑀦𑁆𑀢𑁂𑀧𑀼𑀭𑁂 𑀥𑀫𑁆𑀫𑀁 𑀯𑀸𑀘𑁂𑀣𑀸’’𑀢𑀺. ‘‘𑀦 𑀲𑀓𑁆𑀓𑁄𑀫𑀺, 𑀤𑁂𑀯𑀸’’𑀢𑀺. ‘‘𑀓𑀺𑀁 𑀓𑀸𑀭𑀡𑀸’’𑀢𑀺? ‘‘𑀭𑀸𑀚𑀕𑁂𑀳𑀁 𑀦𑀸𑀫 𑀫𑀳𑀸𑀲𑀸𑀯𑀚𑁆𑀚𑀁, 𑀤𑀼𑀬𑀼𑀢𑁆𑀢𑀲𑀼𑀬𑀼𑀢𑁆𑀢𑀓𑀸𑀦𑀺 𑀕𑀭𑀼𑀓𑀸𑀦𑁂𑀢𑁆𑀣, 𑀤𑁂𑀯𑀸’’𑀢𑀺. ‘‘𑀫𑀸 𑀏𑀯𑀁 𑀯𑀤𑁂𑀣, ‘𑀧𑀼𑀭𑀺𑀫𑀤𑀺𑀯𑀲𑁂 𑀫𑀁 𑀤𑀺𑀲𑁆𑀯𑀸 𑀦 𑀉𑀝𑁆𑀞𑀺𑀢𑁄𑀫𑁆𑀳𑀻’𑀢𑀺 𑀫𑀸 𑀓𑀼𑀓𑁆𑀓𑀼𑀘𑁆𑀘𑀁 𑀓𑀭𑁄𑀣𑀸’’𑀢𑀺. ‘‘𑀤𑁂𑀯, 𑀕𑀺𑀳𑀻𑀦𑀁 𑀯𑀺𑀘𑀭𑀡𑀝𑁆𑀞𑀸𑀦𑀁 𑀦𑀸𑀫 𑀫𑀳𑀸𑀲𑀸𑀯𑀚𑁆𑀚𑀁, 𑀏𑀓𑀁 𑀧𑀩𑁆𑀩𑀚𑀺𑀢𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀥𑀫𑁆𑀫𑀁 𑀯𑀸𑀘𑀸𑀧𑁂𑀣𑀸’’𑀢𑀺. 𑀭𑀸𑀚𑀸 ‘‘𑀲𑀸𑀥𑀼, 𑀪𑁄, 𑀕𑀘𑁆𑀙𑀣 𑀢𑀼𑀫𑁆𑀳𑁂’’𑀢𑀺 𑀢𑀁 𑀉𑀬𑁆𑀬𑁄𑀚𑁂𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀲𑀢𑁆𑀣𑀸𑀭𑀁 𑀬𑀸𑀘𑀺, ‘‘𑀪𑀦𑁆𑀢𑁂, 𑀫𑀮𑁆𑀮𑀺𑀓𑀸 𑀘 𑀤𑁂𑀯𑀻 𑀯𑀸𑀲𑀪𑀔𑀢𑁆𑀢𑀺𑀬𑀸 𑀘 𑀥𑀫𑁆𑀫𑀁 𑀧𑀭𑀺𑀬𑀸𑀧𑀼𑀡𑀺𑀲𑁆𑀲𑀸𑀫𑀸𑀢𑀺 𑀯𑀤𑀦𑁆𑀢𑀺, 𑀧𑀜𑁆𑀘𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺 𑀲𑀤𑁆𑀥𑀺𑀁 𑀦𑀺𑀩𑀤𑁆𑀥𑀁 𑀫𑀫 𑀕𑁂𑀳𑀁 𑀕𑀦𑁆𑀢𑁆𑀯𑀸 𑀢𑀸𑀲𑀁 𑀥𑀫𑁆𑀫𑀁 𑀉𑀤𑁆𑀤𑀺𑀲𑀣𑀸’’𑀢𑀺. ‘‘𑀩𑀼𑀤𑁆𑀥𑀸𑀦𑀁 𑀦𑀺𑀩𑀤𑁆𑀥𑀁 𑀏𑀓𑀝𑁆𑀞𑀸𑀦𑀕𑀫𑀦𑀁 𑀦𑀸𑀫 𑀦𑀢𑁆𑀣𑀺, 𑀫𑀳𑀸𑀭𑀸𑀚𑀸’’𑀢𑀺. ‘‘𑀢𑁂𑀦 𑀳𑀺, 𑀪𑀦𑁆𑀢𑁂, 𑀅𑀜𑁆𑀜𑀁 𑀏𑀓𑀁 𑀪𑀺𑀓𑁆𑀔𑀼𑀁 𑀤𑁂𑀣𑀸’’𑀢𑀺. 𑀲𑀢𑁆𑀣𑀸 𑀆𑀦𑀦𑁆𑀤𑀢𑁆𑀣𑁂𑀭𑀲𑁆𑀲 𑀪𑀸𑀭𑀫𑀓𑀸𑀲𑀺. 𑀣𑁂𑀭𑁄 𑀦𑀺𑀩𑀤𑁆𑀥𑀁 𑀕𑀦𑁆𑀢𑁆𑀯𑀸 𑀢𑀸𑀲𑀁 𑀉𑀤𑁆𑀤𑁂𑀲𑀁 𑀉𑀤𑁆𑀤𑀺𑀲𑀢𑀺. 𑀢𑀸𑀲𑀼 𑀫𑀮𑁆𑀮𑀺𑀓𑀸 𑀲𑀓𑁆𑀓𑀘𑁆𑀘𑀁 𑀕𑀳𑁂𑀢𑁆𑀯𑀸 𑀲𑀚𑁆𑀛𑀸𑀬𑀺𑀢𑁆𑀯𑀸 𑀉𑀤𑁆𑀤𑁂𑀲𑀁 𑀧𑀝𑀺𑀘𑁆𑀙𑀸𑀧𑁂𑀲𑀺. 𑀯𑀸𑀲𑀪𑀔𑀢𑁆𑀢𑀺𑀬𑀸 𑀧𑀦 𑀦𑁂𑀯 𑀲𑀓𑁆𑀓𑀘𑁆𑀘𑀁 𑀕𑀡𑁆𑀳𑀸𑀢𑀺, 𑀦 𑀲𑀚𑁆𑀛𑀸𑀬𑀢𑀺, 𑀦 𑀉𑀤𑁆𑀤𑁂𑀲𑀁 𑀧𑀝𑀺𑀘𑁆𑀙𑀸𑀧𑁂𑀢𑀼𑀁 𑀲𑀓𑁆𑀓𑁄𑀢𑀺.

𑀅𑀣𑁂𑀓𑀤𑀺𑀯𑀲𑀁 𑀲𑀢𑁆𑀣𑀸 𑀣𑁂𑀭𑀁 𑀧𑀼𑀘𑁆𑀙𑀺 𑁋 ‘‘𑀓𑀺𑀫𑀸𑀦𑀦𑁆𑀤, 𑀉𑀧𑀸𑀲𑀺𑀓𑀸 𑀥𑀫𑁆𑀫𑀁 𑀧𑀭𑀺𑀬𑀸𑀧𑀼𑀡𑀦𑁆𑀢𑀻’’𑀢𑀺? ‘‘𑀆𑀫, 𑀪𑀦𑁆𑀢𑁂’’𑀢𑀺. ‘‘𑀓𑀸 𑀲𑀓𑁆𑀓𑀘𑁆𑀘𑀁 𑀕𑀡𑁆𑀳𑀸𑀢𑀻’’𑀢𑀺? ‘‘𑀫𑀮𑁆𑀮𑀺𑀓𑀸, 𑀪𑀦𑁆𑀢𑁂, 𑀲𑀓𑁆𑀓𑀘𑁆𑀘𑀁 𑀕𑀡𑁆𑀳𑀸𑀢𑀺, 𑀲𑀓𑁆𑀓𑀘𑁆𑀘𑀁 𑀲𑀚𑁆𑀛𑀸𑀬𑀢𑀺, 𑀲𑀓𑁆𑀓𑀘𑁆𑀘𑀁 𑀉𑀤𑁆𑀤𑁂𑀲𑀁 𑀧𑀝𑀺𑀘𑁆𑀙𑀸𑀧𑁂𑀢𑀼𑀁 𑀲𑀓𑁆𑀓𑁄𑀢𑀺. 𑀢𑀼𑀫𑁆𑀳𑀸𑀓𑀁 𑀧𑀦 𑀜𑀸𑀢𑀺𑀥𑀻𑀢𑀸 𑀦𑁂𑀯 𑀲𑀓𑁆𑀓𑀘𑁆𑀘𑀁 𑀕𑀡𑁆𑀳𑀸𑀢𑀺, 𑀦 𑀲𑀚𑁆𑀛𑀸𑀬𑀢𑀺, 𑀦 𑀉𑀤𑁆𑀤𑁂𑀲𑀁 𑀧𑀝𑀺𑀘𑁆𑀙𑀸𑀧𑁂𑀢𑀼𑀁 𑀲𑀓𑁆𑀓𑁄𑀢𑀻’’𑀢𑀺. 𑀲𑀢𑁆𑀣𑀸 𑀣𑁂𑀭𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸, ‘‘𑀆𑀦𑀦𑁆𑀤, 𑀫𑀬𑀸 𑀓𑀣𑀺𑀢𑀥𑀫𑁆𑀫𑁄 𑀦𑀸𑀫 𑀲𑀓𑁆𑀓𑀘𑁆𑀘𑀫𑀲𑀼𑀡𑀦𑁆𑀢𑀲𑁆𑀲 𑀅𑀕𑁆𑀕𑀡𑁆𑀳𑀦𑁆𑀢𑀲𑁆𑀲 𑀅𑀲𑀚𑁆𑀛𑀸𑀬𑀦𑁆𑀢𑀲𑁆𑀲 𑀅𑀤𑁂𑀲𑁂𑀦𑁆𑀢𑀲𑁆𑀲 𑀯𑀡𑁆𑀡𑀲𑀫𑁆𑀧𑀦𑁆𑀦𑀁 𑀅𑀕𑀦𑁆𑀥𑀓𑀧𑀼𑀧𑁆𑀨𑀁 𑀯𑀺𑀬 𑀅𑀨𑀮𑁄 𑀳𑁄𑀢𑀺, 𑀲𑀓𑁆𑀓𑀘𑁆𑀘𑀁 𑀧𑀦 𑀲𑀯𑀦𑀸𑀤𑀻𑀦𑀺 𑀓𑀭𑁄𑀦𑁆𑀢𑀲𑁆𑀲 𑀫𑀳𑀧𑁆𑀨𑀮𑁄 𑀳𑁄𑀢𑀺 𑀫𑀳𑀸𑀦𑀺𑀲𑀁𑀲𑁄’’𑀢𑀺 𑀯𑀢𑁆𑀯𑀸 𑀇𑀫𑀸 𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺 𑁋

𑁫𑁧. ‘‘𑀬𑀣𑀸𑀧𑀺 𑀭𑀼𑀘𑀺𑀭𑀁 𑀧𑀼𑀧𑁆𑀨𑀁, 𑀯𑀡𑁆𑀡𑀯𑀦𑁆𑀢𑀁 𑀅𑀕𑀦𑁆𑀥𑀓𑀁;

𑀏𑀯𑀁 𑀲𑀼𑀪𑀸𑀲𑀺𑀢𑀸 𑀯𑀸𑀘𑀸, 𑀅𑀨𑀮𑀸 𑀳𑁄𑀢𑀺 𑀅𑀓𑀼𑀩𑁆𑀩𑀢𑁄.

𑁫𑁨. ‘‘𑀬𑀣𑀸𑀧𑀺 𑀭𑀼𑀘𑀺𑀭𑀁 𑀧𑀼𑀧𑁆𑀨𑀁, 𑀯𑀡𑁆𑀡𑀯𑀦𑁆𑀢𑀁 𑀲𑀕𑀦𑁆𑀥𑀓𑀁;

𑀏𑀯𑀁 𑀲𑀼𑀪𑀸𑀲𑀺𑀢𑀸 𑀯𑀸𑀘𑀸, 𑀲𑀨𑀮𑀸 𑀳𑁄𑀢𑀺 𑀓𑀼𑀩𑁆𑀩𑀢𑁄’’𑀢𑀺.

𑀢𑀢𑁆𑀣 𑀭𑀼𑀘𑀺𑀭𑀦𑁆𑀢𑀺 𑀲𑁄𑀪𑀦𑀁. 𑀯𑀡𑁆𑀡𑀯𑀦𑁆𑀢𑀦𑁆𑀢𑀺 𑀯𑀡𑁆𑀡𑀲𑀡𑁆𑀞𑀸𑀦𑀲𑀫𑁆𑀧𑀦𑁆𑀦𑀁, 𑀅𑀕𑀦𑁆𑀥𑀓𑀦𑁆𑀢𑀺 𑀕𑀦𑁆𑀥𑀯𑀺𑀭𑀳𑀺𑀢𑀁 𑀧𑀸𑀮𑀺𑀪𑀤𑁆𑀤𑀓𑀕𑀺𑀭𑀺𑀓𑀡𑁆𑀡𑀺𑀓𑀚𑀬𑀲𑀼𑀫𑀦𑀸𑀤𑀺𑀪𑁂𑀤𑀁. 𑀏𑀯𑀁 𑀲𑀼𑀪𑀸𑀲𑀺𑀢𑀸 𑀯𑀸𑀘𑀸𑀢𑀺 𑀲𑀼𑀪𑀸𑀲𑀺𑀢𑀸 𑀯𑀸𑀘𑀸 𑀦𑀸𑀫 𑀢𑁂𑀧𑀺𑀝𑀓𑀁 𑀩𑀼𑀤𑁆𑀥𑀯𑀘𑀦𑀁. 𑀢𑀁 𑀯𑀡𑁆𑀡𑀲𑀡𑁆𑀞𑀸𑀦𑀲𑀫𑁆𑀧𑀦𑁆𑀦𑀁 𑀅𑀕𑀦𑁆𑀥𑀓𑀧𑀼𑀧𑁆𑀨𑀲𑀤𑀺𑀲𑀁. 𑀬𑀣𑀸 𑀧𑀦 𑀅𑀕𑀦𑁆𑀥𑀓𑀧𑀼𑀧𑁆𑀨𑀁 𑀬𑁄 𑀦𑀁 𑀥𑀸𑀭𑁂𑀢𑀺, 𑀢𑀲𑁆𑀲 𑀲𑀭𑀻𑀭𑁂 𑀕𑀦𑁆𑀥𑀁 𑀦 𑀨𑀭𑀢𑀺, 𑀏𑀯𑀁 𑀏𑀢𑀫𑁆𑀧𑀺 𑀬𑁄 𑀦𑀁 𑀲𑀓𑁆𑀓𑀘𑁆𑀘𑀁 𑀲𑀯𑀦𑀸𑀤𑀻𑀳𑀺 𑀦 𑀲𑀫𑀸𑀘𑀭𑀢𑀺, 𑀢𑀲𑁆𑀲 𑀲𑀓𑁆𑀓𑀘𑁆𑀘𑀁 𑀅𑀲𑀫𑀸𑀘𑀭𑀦𑁆𑀢𑀲𑁆𑀲 𑀬𑀁 𑀢𑀢𑁆𑀣 𑀓𑀢𑁆𑀢𑀩𑁆𑀩𑀁, 𑀢𑀁 𑀅𑀓𑀼𑀩𑁆𑀩𑀢𑁄 𑀲𑀼𑀢𑀕𑀦𑁆𑀥𑀜𑁆𑀘 𑀯𑀸𑀘𑀸𑀕𑀦𑁆𑀥𑀜𑁆𑀘 𑀧𑀝𑀺𑀧𑀢𑁆𑀢𑀺𑀕𑀦𑁆𑀥𑀜𑁆𑀘 𑀦 𑀆𑀯𑀳𑀢𑀺 𑀅𑀨𑀮𑀸 𑀳𑁄𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀏𑀯𑀁 𑀲𑀼𑀪𑀸𑀲𑀺𑀢𑀸 𑀯𑀸𑀘𑀸, 𑀅𑀨𑀮𑀸 𑀳𑁄𑀢𑀺 𑀅𑀓𑀼𑀩𑁆𑀩𑀢𑁄’’𑀢𑀺. 𑀲𑀕𑀦𑁆𑀥𑀓𑀦𑁆𑀢𑀺 𑀘𑀫𑁆𑀧𑀓𑀦𑀻𑀮𑀼𑀧𑁆𑀧𑀮𑀸𑀤𑀺𑀪𑁂𑀤𑀁. 𑀏𑀯𑀦𑁆𑀢𑀺 𑀬𑀣𑀸 𑀢𑀁 𑀧𑀼𑀧𑁆𑀨𑀁 𑀥𑀸𑀭𑁂𑀦𑁆𑀢𑀲𑁆𑀲 𑀲𑀭𑀻𑀭𑁂 𑀕𑀦𑁆𑀥𑁄 𑀨𑀭𑀢𑀺, 𑀏𑀯𑀁 𑀢𑁂𑀧𑀺𑀝𑀓𑀩𑀼𑀤𑁆𑀥𑀯𑀘𑀦𑀲𑀗𑁆𑀔𑀸𑀢𑀸 𑀲𑀼𑀪𑀸𑀲𑀺𑀢𑀸 𑀯𑀸𑀘𑀸𑀧𑀺. 𑀓𑀼𑀩𑁆𑀩𑀢𑁄𑀢𑀺 𑀬𑁄 𑀲𑀓𑁆𑀓𑀘𑁆𑀘𑀁 𑀲𑀯𑀦𑀸𑀤𑀻𑀳𑀺 𑀢𑀢𑁆𑀣 𑀓𑀢𑁆𑀢𑀩𑁆𑀩𑀁 𑀓𑀭𑁄𑀢𑀺, 𑀲𑀸 𑀅𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀲𑀨𑀮𑀸 𑀳𑁄𑀢𑀺, 𑀲𑀼𑀢𑀕𑀦𑁆𑀥𑀯𑀸𑀘𑀸𑀕𑀦𑁆𑀥𑀧𑀝𑀺𑀧𑀢𑁆𑀢𑀺𑀕𑀦𑁆𑀥𑀸𑀦𑀁 𑀆𑀯𑀳𑀦𑀢𑁄 𑀫𑀳𑀧𑁆𑀨𑀮𑀸 𑀳𑁄𑀢𑀺, 𑀫𑀳𑀸𑀦𑀺𑀲𑀁𑀲𑀸𑀢𑀺 𑀅𑀢𑁆𑀣𑁄.

𑀤𑁂𑀲𑀦𑀸𑀯𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀢𑁆𑀢𑀸. 𑀤𑁂𑀲𑀦𑀸 𑀫𑀳𑀸𑀚𑀦𑀲𑁆𑀲 𑀲𑀸𑀢𑁆𑀣𑀺𑀓𑀸 𑀚𑀸𑀢𑀸𑀢𑀺.

𑀙𑀢𑁆𑀢𑀧𑀸𑀡𑀺𑀉𑀧𑀸𑀲𑀓𑀯𑀢𑁆𑀣𑀼 𑀲𑀢𑁆𑀢𑀫𑀁.

𑁮. 𑀯𑀺𑀲𑀸𑀔𑀸𑀯𑀢𑁆𑀣𑀼

𑀬𑀣𑀸𑀧𑀺 𑀧𑀼𑀧𑁆𑀨𑀭𑀸𑀲𑀺𑀫𑁆𑀳𑀸𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀲𑀸𑀯𑀢𑁆𑀣𑀺𑀬𑀁 𑀉𑀧𑀦𑀺𑀲𑁆𑀲𑀸𑀬 𑀧𑀼𑀩𑁆𑀩𑀸𑀭𑀸𑀫𑁂 𑀯𑀺𑀳𑀭𑀦𑁆𑀢𑁄 𑀯𑀺𑀲𑀸𑀔𑀁 𑀉𑀧𑀸𑀲𑀺𑀓𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀲𑀸 𑀓𑀺𑀭 𑀅𑀗𑁆𑀕𑀭𑀝𑁆𑀞𑁂 𑀪𑀤𑁆𑀤𑀺𑀬𑀦𑀕𑀭𑁂 𑀫𑁂𑀡𑁆𑀟𑀓𑀲𑁂𑀝𑁆𑀞𑀺𑀧𑀼𑀢𑁆𑀢𑀲𑁆𑀲 𑀥𑀦𑀜𑁆𑀘𑀬𑀲𑁂𑀝𑁆𑀞𑀺𑀦𑁄 𑀅𑀕𑁆𑀕𑀫𑀳𑁂𑀲𑀺𑀬𑀸 𑀲𑀼𑀫𑀦𑀤𑁂𑀯𑀺𑀬𑀸 𑀓𑀼𑀘𑁆𑀙𑀺𑀲𑁆𑀫𑀺𑀁 𑀦𑀺𑀩𑁆𑀩𑀢𑁆𑀢𑀺. 𑀢𑀲𑁆𑀲𑀸 𑀲𑀢𑁆𑀢𑀯𑀲𑁆𑀲𑀺𑀓𑀓𑀸𑀮𑁂 𑀲𑀢𑁆𑀣𑀸 𑀲𑁂𑀮𑀩𑁆𑀭𑀸𑀳𑁆𑀫𑀡𑀸𑀤𑀻𑀦𑀁 𑀩𑁄𑀥𑀦𑁂𑀬𑁆𑀬𑀩𑀦𑁆𑀥𑀯𑀸𑀦𑀁 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀤𑀁 𑀤𑀺𑀲𑁆𑀯𑀸 𑀫𑀳𑀸𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀸𑀭𑁄 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀢𑀁 𑀦𑀕𑀭𑀁 𑀧𑀸𑀧𑀼𑀡𑀺.

𑀢𑀲𑁆𑀫𑀺𑀜𑁆𑀘 𑀲𑀫𑀬𑁂 𑀫𑁂𑀡𑁆𑀟𑀓𑁄, 𑀕𑀳𑀧𑀢𑀺, 𑀢𑀲𑁆𑀫𑀺𑀁 𑀦𑀕𑀭𑁂 𑀧𑀜𑁆𑀘𑀦𑁆𑀦𑀁 𑀫𑀳𑀸𑀧𑀼𑀜𑁆𑀜𑀸𑀦𑀁 𑀚𑁂𑀝𑁆𑀞𑀓𑁄 𑀳𑀼𑀢𑁆𑀯𑀸 𑀲𑁂𑀝𑁆𑀞𑀺𑀝𑁆𑀞𑀸𑀦𑀁 𑀓𑀭𑁄𑀢𑀺. 𑀧𑀜𑁆𑀘 𑀫𑀳𑀸𑀧𑀼𑀜𑁆𑀜𑀸 𑀦𑀸𑀫 𑀫𑁂𑀡𑁆𑀟𑀓𑁄 𑀲𑁂𑀝𑁆𑀞𑀺, 𑀘𑀦𑁆𑀤𑀧𑀤𑀼𑀫𑀸 𑀦𑀸𑀫 𑀢𑀲𑁆𑀲𑁂𑀯 𑀚𑁂𑀝𑁆𑀞𑀓𑀪𑀭𑀺𑀬𑀸, 𑀢𑀲𑁆𑀲𑁂𑀯 𑀚𑁂𑀝𑁆𑀞𑀓𑀧𑀼𑀢𑁆𑀢𑁄 𑀥𑀦𑀜𑁆𑀘𑀬𑁄 𑀦𑀸𑀫, 𑀢𑀲𑁆𑀲 𑀪𑀭𑀺𑀬𑀸 𑀲𑀼𑀫𑀦𑀤𑁂𑀯𑀻 𑀦𑀸𑀫, 𑀫𑁂𑀡𑁆𑀟𑀓𑀲𑁂𑀝𑁆𑀞𑀺𑀦𑁄 𑀤𑀸𑀲𑁄 𑀧𑀼𑀡𑁆𑀡𑁄 𑀦𑀸𑀫𑀸𑀢𑀺. 𑀦 𑀓𑁂𑀯𑀮𑀜𑁆𑀘 𑀫𑁂𑀡𑁆𑀟𑀓𑀲𑁂𑀝𑁆𑀞𑀺𑀬𑁂𑀯, 𑀩𑀺𑀫𑁆𑀩𑀺𑀲𑀸𑀭𑀭𑀜𑁆𑀜𑁄 𑀧𑀦 𑀯𑀺𑀚𑀺𑀢𑁂 𑀧𑀜𑁆𑀘 𑀅𑀫𑀺𑀢𑀪𑁄𑀕𑀸 𑀦𑀸𑀫 𑀅𑀳𑁂𑀲𑀼𑀁 𑁋 𑀚𑁄𑀢𑀺𑀓𑁄, 𑀚𑀝𑀺𑀮𑁄, 𑀫𑁂𑀡𑁆𑀟𑀓𑁄, 𑀧𑀼𑀡𑁆𑀡𑀓𑁄, 𑀓𑀸𑀓𑀯𑀮𑀺𑀬𑁄𑀢𑀺. 𑀢𑁂𑀲𑀼 𑀅𑀬𑀁 𑀫𑁂𑀡𑁆𑀟𑀓𑀲𑁂𑀝𑁆𑀞𑀺 𑀤𑀲𑀩𑀮𑀲𑁆𑀲 𑀅𑀢𑁆𑀢𑀦𑁄 𑀦𑀕𑀭𑀁 𑀲𑀫𑁆𑀧𑀢𑁆𑀢𑀪𑀸𑀯𑀁 𑀜𑀢𑁆𑀯𑀸 𑀧𑀼𑀢𑁆𑀢𑀲𑁆𑀲 𑀥𑀦𑀜𑁆𑀘𑀬𑀲𑁂𑀝𑁆𑀞𑀺𑀦𑁄 𑀥𑀻𑀢𑀭𑀁 𑀯𑀺𑀲𑀸𑀔𑀁 𑀤𑀸𑀭𑀺𑀓𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀆𑀳 𑁋 ‘‘𑀅𑀫𑁆𑀫, 𑀢𑀼𑀬𑁆𑀳𑀫𑁆𑀧𑀺 𑀫𑀗𑁆𑀕𑀮𑀁, 𑀅𑀫𑁆𑀳𑀸𑀓𑀫𑁆𑀧𑀺 𑀫𑀗𑁆𑀕𑀮𑀁, 𑀢𑀯 𑀧𑀭𑀺𑀯𑀸𑀭𑁂𑀳𑀺 𑀧𑀜𑁆𑀘𑀳𑀺 𑀤𑀸𑀭𑀺𑀓𑀸𑀲𑀢𑁂𑀳𑀺 𑀲𑀤𑁆𑀥𑀺𑀁 𑀧𑀜𑁆𑀘 𑀭𑀣𑀲𑀢𑀸𑀦𑀺 𑀆𑀭𑀼𑀬𑁆𑀳 𑀧𑀜𑁆𑀘𑀳𑀺 𑀤𑀸𑀲𑀺𑀲𑀢𑁂𑀳𑀺 𑀧𑀭𑀺𑀯𑀼𑀢𑀸 𑀤𑀲𑀩𑀮𑀲𑁆𑀲 𑀧𑀘𑁆𑀘𑀼𑀕𑁆𑀕𑀫𑀦𑀁 𑀓𑀭𑁄𑀳𑀻’’𑀢𑀺. 𑀲𑀸 ‘‘𑀲𑀸𑀥𑀽’’𑀢𑀺 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 𑀢𑀣𑀸 𑀅𑀓𑀸𑀲𑀺. 𑀓𑀸𑀭𑀡𑀸𑀓𑀸𑀭𑀡𑁂𑀲𑀼 𑀧𑀦 𑀓𑀼𑀲𑀮𑀢𑁆𑀢𑀸 𑀬𑀸𑀯𑀢𑀺𑀓𑀸 𑀬𑀸𑀦𑀲𑁆𑀲 𑀪𑀽𑀫𑀺, 𑀬𑀸𑀦𑁂𑀦 𑀕𑀦𑁆𑀢𑁆𑀯𑀸 𑀬𑀸𑀦𑀸 𑀧𑀘𑁆𑀘𑁄𑀭𑁄𑀳𑀺𑀢𑁆𑀯𑀸 𑀧𑀢𑁆𑀢𑀺𑀓𑀸𑀯 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀅𑀣𑀲𑁆𑀲𑀸 𑀘𑀭𑀺𑀬𑀸𑀯𑀲𑁂𑀦 𑀲𑀢𑁆𑀣𑀸 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀲𑀸 𑀤𑁂𑀲𑀦𑀸𑀯𑀲𑀸𑀦𑁂 𑀧𑀜𑁆𑀘𑀳𑀺 𑀤𑀸𑀭𑀺𑀓𑀸𑀲𑀢𑁂𑀳𑀺 𑀲𑀤𑁆𑀥𑀺𑀁 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺. 𑀫𑁂𑀡𑁆𑀟𑀓𑀲𑁂𑀝𑁆𑀞𑀺𑀧𑀺 𑀔𑁄 𑀲𑀢𑁆𑀣𑀸𑀭𑀫𑀼𑀧𑀲𑀗𑁆𑀓𑀫𑀺𑀢𑁆𑀯𑀸 𑀥𑀫𑁆𑀫𑀓𑀣𑀁 𑀲𑀼𑀢𑁆𑀯𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀸𑀬 𑀲𑁆𑀯𑀸𑀢𑀦𑀸𑀬 𑀦𑀺𑀫𑀦𑁆𑀢𑁂𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀅𑀢𑁆𑀢𑀦𑁄 𑀦𑀺𑀯𑁂𑀲𑀦𑁂 𑀧𑀡𑀻𑀢𑁂𑀦 𑀔𑀸𑀤𑀦𑀻𑀬𑁂𑀦 𑀪𑁄𑀚𑀦𑀻𑀬𑁂𑀦 𑀩𑀼𑀤𑁆𑀥𑀧𑁆𑀧𑀫𑀼𑀔𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀭𑀺𑀯𑀺𑀲𑀺𑀢𑁆𑀯𑀸 𑀏𑀢𑁂𑀦𑁂𑀯 𑀉𑀧𑀸𑀬𑁂𑀦 𑀅𑀟𑁆𑀠𑀫𑀸𑀲𑀁 𑀫𑀳𑀸𑀤𑀸𑀦𑀫𑀤𑀸𑀲𑀺. 𑀲𑀢𑁆𑀣𑀸 𑀪𑀤𑁆𑀤𑀺𑀬𑀦𑀕𑀭𑁂 𑀬𑀣𑀸𑀪𑀺𑀭𑀦𑁆𑀢𑀁 𑀯𑀺𑀳𑀭𑀺𑀢𑁆𑀯𑀸 𑀧𑀓𑁆𑀓𑀸𑀫𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀩𑀺𑀫𑁆𑀩𑀺𑀲𑀸𑀭𑁄 𑀘 𑀧𑀲𑁂𑀦𑀤𑀺 𑀓𑁄𑀲𑀮𑁄 𑀘 𑀅𑀜𑁆𑀜𑀫𑀜𑁆𑀜𑀁 𑀪𑀕𑀺𑀦𑀺𑀧𑀢𑀺𑀓𑀸 𑀳𑁄𑀦𑁆𑀢𑀺. 𑀅𑀣𑁂𑀓𑀤𑀺𑀯𑀲𑀁 𑀓𑁄𑀲𑀮𑀭𑀸𑀚𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀩𑀺𑀫𑁆𑀩𑀺𑀲𑀸𑀭𑀲𑁆𑀲 𑀯𑀺𑀚𑀺𑀢𑁂 𑀧𑀜𑁆𑀘 𑀅𑀫𑀺𑀢𑀪𑁄𑀕𑀸 𑀫𑀳𑀸𑀧𑀼𑀜𑁆𑀜𑀸 𑀯𑀲𑀦𑁆𑀢𑀺, 𑀫𑀬𑁆𑀳𑀁 𑀯𑀺𑀚𑀺𑀢𑁂 𑀏𑀓𑁄𑀧𑀺 𑀢𑀸𑀤𑀺𑀲𑁄 𑀦𑀢𑁆𑀣𑀺, 𑀬𑀁𑀦𑀽𑀦𑀸𑀳𑀁 𑀩𑀺𑀫𑁆𑀩𑀺𑀲𑀸𑀭𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀏𑀓𑀁 𑀫𑀳𑀸𑀧𑀼𑀜𑁆𑀜𑀁 𑀬𑀸𑀘𑁂𑀬𑁆𑀬’’𑀦𑁆𑀢𑀺. 𑀲𑁄 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀭𑀜𑁆𑀜𑀸 𑀓𑀢𑀧𑀝𑀺𑀲𑀦𑁆𑀣𑀸𑀭𑁄 ‘‘𑀓𑀺𑀁 𑀓𑀸𑀭𑀡𑀸 𑀆𑀕𑀢𑁄𑀲𑀻’’𑀢𑀺 𑀧𑀼𑀝𑁆𑀞𑁄 ‘‘‘𑀢𑀼𑀫𑁆𑀳𑀸𑀓𑀁 𑀯𑀺𑀚𑀺𑀢𑁂 𑀧𑀜𑁆𑀘 𑀅𑀫𑀺𑀢𑀪𑁄𑀕𑀸 𑀫𑀳𑀸𑀧𑀼𑀜𑁆𑀜𑀸 𑀯𑀲𑀦𑁆𑀢𑀺, 𑀢𑀢𑁄 𑀏𑀓𑀁 𑀕𑀳𑁂𑀢𑁆𑀯𑀸 𑀕𑀫𑀺𑀲𑁆𑀲𑀸𑀫𑀻’𑀢𑀺 𑀆𑀕𑀢𑁄𑀫𑁆𑀳𑀺, 𑀢𑁂𑀲𑀼 𑀫𑁂 𑀏𑀓𑀁 𑀤𑁂𑀣𑀸’’𑀢𑀺 𑀆𑀳. ‘‘𑀫𑀳𑀸𑀓𑀼𑀮𑀸𑀦𑀺 𑀅𑀫𑁆𑀳𑁂𑀳𑀺 𑀘𑀸𑀮𑁂𑀢𑀼𑀁 𑀦 𑀲𑀓𑁆𑀓𑀸’’𑀢𑀺 𑀆𑀳. ‘‘𑀅𑀳𑀁 𑀅𑀮𑀤𑁆𑀥𑀸 𑀦 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀆𑀳. 𑀭𑀸𑀚𑀸 𑀅𑀫𑀘𑁆𑀘𑁂𑀳𑀺 𑀲𑀤𑁆𑀥𑀺𑀁 𑀫𑀦𑁆𑀢𑁂𑀢𑁆𑀯𑀸 ‘‘𑀚𑁄𑀢𑀺𑀓𑀸𑀤𑀻𑀦𑀁 𑀫𑀳𑀸𑀓𑀼𑀮𑀸𑀦𑀁 𑀘𑀸𑀮𑀦𑀁 𑀦𑀸𑀫 𑀫𑀳𑀸𑀧𑀣𑀯𑀺𑀬𑀸 𑀘𑀸𑀮𑀦𑀲𑀤𑀺𑀲𑀁, 𑀫𑁂𑀡𑁆𑀟𑀓𑀫𑀳𑀸𑀲𑁂𑀝𑁆𑀞𑀺𑀲𑁆𑀲 𑀧𑀼𑀢𑁆𑀢𑁄 𑀥𑀦𑀜𑁆𑀘𑀬𑀲𑁂𑀝𑁆𑀞𑀺 𑀦𑀸𑀫 𑀅𑀢𑁆𑀣𑀺, 𑀢𑁂𑀦 𑀲𑀤𑁆𑀥𑀺𑀁 𑀫𑀦𑁆𑀢𑁂𑀢𑁆𑀯𑀸 𑀧𑀝𑀺𑀯𑀘𑀦𑀁 𑀢𑁂 𑀤𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀢𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸, 𑀢𑀸𑀢, 𑀓𑁄𑀲𑀮𑀭𑀸𑀚𑀸 ‘‘‘𑀏𑀓𑀁 𑀥𑀦𑀲𑁂𑀝𑁆𑀞𑀺𑀁 𑀕𑀳𑁂𑀢𑁆𑀯𑀸 𑀕𑀫𑀺𑀲𑁆𑀲𑀸𑀫𑀻’𑀢𑀺 𑀯𑀤𑀢𑀺, 𑀢𑁆𑀯𑀁 𑀢𑁂𑀦 𑀲𑀤𑁆𑀥𑀺𑀁 𑀕𑀘𑁆𑀙𑀸𑀳𑀻’’𑀢𑀺. ‘‘𑀢𑀼𑀫𑁆𑀳𑁂𑀲𑀼 𑀧𑀳𑀺𑀡𑀦𑁆𑀢𑁂𑀲𑀼 𑀕𑀫𑀺𑀲𑁆𑀲𑀸𑀫𑀺, 𑀤𑁂𑀯𑀸’’𑀢𑀺. ‘‘𑀢𑁂𑀦 𑀳𑀺 𑀧𑀭𑀺𑀯𑀘𑁆𑀙𑀁 𑀓𑀢𑁆𑀯𑀸 𑀕𑀘𑁆𑀙, 𑀢𑀸𑀢𑀸’’𑀢𑀺. 𑀲𑁄 𑀅𑀢𑁆𑀢𑀦𑁄 𑀓𑀢𑁆𑀢𑀩𑁆𑀩𑀬𑀼𑀢𑁆𑀢𑀓𑀫𑀓𑀸𑀲𑀺. 𑀭𑀸𑀚𑀸𑀧𑀺𑀲𑁆𑀲 𑀫𑀳𑀦𑁆𑀢𑀁 𑀲𑀓𑁆𑀓𑀸𑀭𑀁 𑀓𑀢𑁆𑀯𑀸, ‘‘𑀇𑀫𑀁 𑀆𑀤𑀸𑀬 𑀕𑀘𑁆𑀙𑀣𑀸’’𑀢𑀺 𑀧𑀲𑁂𑀦𑀤𑀺𑀭𑀸𑀚𑀸𑀦𑀁 𑀉𑀬𑁆𑀬𑁄𑀚𑁂𑀲𑀺. 𑀲𑁄 𑀢𑀁 𑀆𑀤𑀸𑀬 𑀲𑀩𑁆𑀩𑀢𑁆𑀣 𑀏𑀓𑀭𑀢𑁆𑀢𑀺𑀯𑀸𑀲𑁂𑀦 𑀕𑀘𑁆𑀙𑀦𑁆𑀢𑁄 𑀏𑀓𑀁 𑀨𑀸𑀲𑀼𑀓𑀝𑁆𑀞𑀸𑀦𑀁 𑀧𑀢𑁆𑀯𑀸 𑀦𑀺𑀯𑀸𑀲𑀁 𑀕𑀡𑁆𑀳𑀺, 𑀅𑀣 𑀦𑀁 𑀥𑀦𑀜𑁆𑀘𑀬𑀲𑁂𑀝𑁆𑀞𑀺 𑀧𑀼𑀘𑁆𑀙𑀺 𑁋 ‘‘𑀇𑀤𑀁 𑀓𑀲𑁆𑀲 𑀯𑀺𑀚𑀺𑀢’’𑀦𑁆𑀢𑀺? ‘‘𑀫𑀬𑁆𑀳𑀁, 𑀲𑁂𑀝𑁆𑀞𑀻’’𑀢𑀺. ‘‘𑀓𑀻𑀯 𑀤𑀽𑀭𑁄 𑀇𑀢𑁄 𑀲𑀸𑀯𑀢𑁆𑀣𑀻’’𑀢𑀺? ‘‘𑀲𑀢𑁆𑀢𑀬𑁄𑀚𑀦𑀫𑀢𑁆𑀣𑀓𑁂’’𑀢𑀺. ‘‘𑀅𑀦𑁆𑀢𑁄𑀦𑀕𑀭𑀁 𑀲𑀫𑁆𑀩𑀸𑀥𑀁, 𑀅𑀫𑁆𑀳𑀸𑀓𑀁 𑀧𑀭𑀺𑀚𑀦𑁄 𑀫𑀳𑀦𑁆𑀢𑁄, 𑀲𑀘𑁂 𑀭𑁄𑀘𑁂𑀣, 𑀇𑀥𑁂𑀯 𑀯𑀲𑁂𑀬𑁆𑀬𑀸𑀫, 𑀤𑁂𑀯𑀸’’𑀢𑀺. 𑀭𑀸𑀚𑀸 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀢𑀲𑁆𑀫𑀺𑀁 𑀞𑀸𑀦𑁂 𑀦𑀕𑀭𑀁 𑀫𑀸𑀧𑁂𑀢𑁆𑀯𑀸 𑀢𑀲𑁆𑀲 𑀤𑀢𑁆𑀯𑀸 𑀅𑀕𑀫𑀸𑀲𑀺. 𑀢𑀲𑁆𑀫𑀺𑀁 𑀧𑀤𑁂𑀲𑁂 𑀲𑀬𑀁 𑀯𑀲𑀦𑀝𑁆𑀞𑀸𑀦𑀲𑁆𑀲 𑀕𑀳𑀺𑀢𑀢𑁆𑀢𑀸 𑀦𑀕𑀭𑀲𑁆𑀲 𑀲𑀸𑀓𑁂𑀢𑀦𑁆𑀢𑁆𑀯𑁂𑀯 𑀦𑀸𑀫𑀁 𑀅𑀳𑁄𑀲𑀺.

𑀲𑀸𑀯𑀢𑁆𑀣𑀺𑀬𑀫𑁆𑀧𑀺 𑀔𑁄 𑀫𑀺𑀕𑀸𑀭𑀲𑁂𑀝𑁆𑀞𑀺𑀦𑁄 𑀧𑀼𑀢𑁆𑀢𑁄 𑀧𑀼𑀡𑁆𑀡𑀯𑀟𑁆𑀠𑀦𑀓𑀼𑀫𑀸𑀭𑁄 𑀦𑀸𑀫 𑀯𑀬𑀧𑁆𑀧𑀢𑁆𑀢𑁄 𑀅𑀳𑁄𑀲𑀺. 𑀅𑀣 𑀦𑀁 𑀫𑀸𑀢𑀸𑀧𑀺𑀢𑀭𑁄 𑀯𑀤𑀺𑀁𑀲𑀼 𑁋 ‘‘𑀢𑀸𑀢, 𑀢𑀯 𑀭𑀼𑀘𑁆𑀘𑀦𑀝𑁆𑀞𑀸𑀦𑁂 𑀏𑀓𑀁 𑀤𑀸𑀭𑀺𑀓𑀁 𑀉𑀧𑀥𑀸𑀭𑁂𑀳𑀻’’𑀢𑀺. ‘‘‘𑀫𑀬𑁆𑀳𑀁 𑀏𑀯𑀭𑀽𑀧𑀸𑀬 𑀪𑀭𑀺𑀬𑀸𑀬 𑀓𑀺𑀘𑁆𑀘𑀁 𑀦𑀢𑁆𑀣𑀻’𑀢𑀺, 𑀧𑀼𑀢𑁆𑀢, 𑀫𑀸 𑀏𑀯𑀁 𑀓𑀭𑀺, 𑀓𑀼𑀮𑀁 𑀦𑀸𑀫 𑀅𑀧𑀼𑀢𑁆𑀢𑀓𑀁 𑀦 𑀢𑀺𑀝𑁆𑀞𑀢𑀻’’𑀢𑀺. 𑀲𑁄 𑀧𑀼𑀦𑀧𑁆𑀧𑀼𑀦𑀁 𑀯𑀼𑀘𑁆𑀘𑀫𑀸𑀦𑁄 ‘‘𑀢𑁂𑀦 𑀳𑀺 𑀧𑀜𑁆𑀘𑀓𑀮𑁆𑀬𑀸𑀡𑀲𑀫𑀦𑁆𑀦𑀸𑀕𑀢𑀁 𑀤𑀸𑀭𑀺𑀓𑀁 𑀮𑀪𑀫𑀸𑀦𑁄 𑀢𑀼𑀫𑁆𑀳𑀸𑀓𑀁 𑀯𑀘𑀦𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀆𑀳. ‘‘𑀓𑀸𑀦𑀺 𑀧𑀦𑁂𑀢𑀸𑀦𑀺 𑀧𑀜𑁆𑀘 𑀓𑀮𑁆𑀬𑀸𑀡𑀸𑀦𑀺 𑀦𑀸𑀫, 𑀢𑀸𑀢𑀸’’𑀢𑀺. 𑀓𑁂𑀲𑀓𑀮𑁆𑀬𑀸𑀡𑀁, 𑀫𑀁𑀲𑀓𑀮𑁆𑀬𑀸𑀡𑀁, 𑀅𑀝𑁆𑀞𑀺𑀓𑀮𑁆𑀬𑀸𑀡𑀁, 𑀙𑀯𑀺𑀓𑀮𑁆𑀬𑀸𑀡𑀁, 𑀯𑀬𑀓𑀮𑁆𑀬𑀸𑀡𑀦𑁆𑀢𑀺. 𑀫𑀳𑀸𑀧𑀼𑀜𑁆𑀜𑀸𑀬 𑀳𑀺 𑀇𑀢𑁆𑀣𑀺𑀬𑀸 𑀓𑁂𑀲𑀸 𑀫𑁄𑀭𑀓𑀮𑀸𑀧𑀲𑀤𑀺𑀲𑀸 𑀳𑀼𑀢𑁆𑀯𑀸 𑀫𑀼𑀜𑁆𑀘𑀺𑀢𑁆𑀯𑀸 𑀯𑀺𑀲𑁆𑀲𑀝𑁆𑀞𑀸 𑀦𑀺𑀯𑀸𑀲𑀦𑀦𑁆𑀢𑀁 𑀧𑀳𑀭𑀺𑀢𑁆𑀯𑀸 𑀦𑀺𑀯𑀢𑁆𑀢𑀺𑀢𑁆𑀯𑀸 𑀉𑀤𑁆𑀥𑀕𑁆𑀕𑀸 𑀢𑀺𑀝𑁆𑀞𑀦𑁆𑀢𑀺, 𑀇𑀤𑀁 𑀓𑁂𑀲𑀓𑀮𑁆𑀬𑀸𑀡𑀁 𑀦𑀸𑀫, 𑀤𑀦𑁆𑀢𑀸𑀯𑀭𑀡𑀁 𑀩𑀺𑀫𑁆𑀩𑀨𑀮𑀲𑀤𑀺𑀲𑀁 𑀯𑀡𑁆𑀡𑀲𑀫𑁆𑀧𑀦𑁆𑀦𑀁 𑀲𑀫𑀁 𑀲𑀼𑀨𑀼𑀲𑀺𑀢𑀁 𑀳𑁄𑀢𑀺, 𑀇𑀤𑀁 𑀫𑀁𑀲𑀓𑀮𑁆𑀬𑀸𑀡𑀁 𑀦𑀸𑀫, 𑀤𑀦𑁆𑀢𑀸 𑀲𑀼𑀓𑁆𑀓𑀸 𑀲𑀫𑀸 𑀅𑀯𑀺𑀭𑀴𑀸 𑀉𑀲𑁆𑀲𑀸𑀧𑁂𑀢𑁆𑀯𑀸 𑀞𑀧𑀺𑀢𑀯𑀚𑀺𑀭𑀧𑀦𑁆𑀢𑀺 𑀯𑀺𑀬 𑀲𑀫𑀘𑁆𑀙𑀺𑀦𑁆𑀦𑀲𑀗𑁆𑀔𑀧𑀦𑁆𑀢𑀺 𑀯𑀺𑀬 𑀘 𑀲𑁄𑀪𑀦𑁆𑀢𑀺, 𑀇𑀤𑀁 𑀅𑀝𑁆𑀞𑀺𑀓𑀮𑁆𑀬𑀸𑀡𑀁 𑀦𑀸𑀫, 𑀓𑀸𑀴𑀺𑀬𑀸 𑀘𑀼𑀡𑁆𑀡𑀓𑀸𑀤𑀻𑀳𑀺 𑀅𑀯𑀺𑀮𑀺𑀢𑁆𑀢𑁄 𑀏𑀯 𑀙𑀯𑀺𑀯𑀡𑁆𑀡𑁄 𑀲𑀺𑀦𑀺𑀤𑁆𑀥𑁄 𑀦𑀻𑀮𑀼𑀧𑁆𑀧𑀮𑀤𑀸𑀫𑀲𑀤𑀺𑀲𑁄 𑀳𑁄𑀢𑀺, 𑀑𑀤𑀸𑀢𑀸𑀬 𑀘 𑀓𑀡𑀺𑀓𑀸𑀭𑀧𑀼𑀧𑁆𑀨𑀤𑀸𑀫𑀲𑀤𑀺𑀲𑁄 𑀳𑁄𑀢𑀺, 𑀇𑀤𑀁 𑀙𑀯𑀺𑀓𑀮𑁆𑀬𑀸𑀡𑀁 𑀦𑀸𑀫, 𑀤𑀲𑀓𑁆𑀔𑀢𑁆𑀢𑀼𑀁 𑀯𑀺𑀚𑀸𑀢𑀸𑀧𑀺 𑀔𑁄 𑀧𑀦 𑀲𑀓𑀺𑀁 𑀯𑀺𑀚𑀸𑀢𑀸 𑀯𑀺𑀬 𑀅𑀯𑀺𑀕𑀢𑀬𑁄𑀩𑁆𑀩𑀦𑀸𑀬𑁂𑀯 𑀳𑁄𑀢𑀺, 𑀇𑀤𑀁 𑀯𑀬𑀓𑀮𑁆𑀬𑀸𑀡𑀁 𑀦𑀸𑀫 𑀳𑁄𑀢𑀺. 𑀅𑀣𑀲𑁆𑀲 𑀫𑀸𑀢𑀸𑀧𑀺𑀢𑀭𑁄 𑀅𑀝𑁆𑀞𑀼𑀢𑁆𑀢𑀭𑀲𑀢𑀩𑁆𑀭𑀸𑀳𑁆𑀫𑀡𑁂 𑀦𑀺𑀫𑀦𑁆𑀢𑁂𑀢𑁆𑀯𑀸 𑀪𑁄𑀚𑁂𑀢𑁆𑀯𑀸 ‘‘𑀧𑀜𑁆𑀘𑀓𑀮𑁆𑀬𑀸𑀡𑀲𑀫𑀦𑁆𑀦𑀸𑀕𑀢𑀸 𑀇𑀢𑁆𑀣𑀺𑀬𑁄 𑀦𑀸𑀫 𑀳𑁄𑀦𑁆𑀢𑀻’’𑀢𑀺 𑀧𑀼𑀘𑁆𑀙𑀺𑀁𑀲𑀼. ‘‘𑀆𑀫, 𑀳𑁄𑀦𑁆𑀢𑀻’’𑀢𑀺. ‘‘𑀢𑁂𑀦 𑀳𑀺 𑀏𑀯𑀭𑀽𑀧𑀁 𑀤𑀸𑀭𑀺𑀓𑀁 𑀧𑀭𑀺𑀬𑁂𑀲𑀺𑀢𑀼𑀁 𑀅𑀝𑁆𑀞 𑀚𑀦𑀸 𑀕𑀘𑁆𑀙𑀦𑁆𑀢𑀽’’𑀢𑀺 𑀩𑀳𑀼𑀁 𑀥𑀦𑀁 𑀤𑀢𑁆𑀯𑀸 ‘‘𑀆𑀕𑀢𑀓𑀸𑀮𑁂 𑀯𑁄 𑀓𑀢𑁆𑀢𑀩𑁆𑀩𑀁 𑀚𑀸𑀦𑀺𑀲𑁆𑀲𑀸𑀫, 𑀕𑀘𑁆𑀙𑀣, 𑀏𑀯𑀭𑀽𑀧𑀁 𑀤𑀸𑀭𑀺𑀓𑀁 𑀧𑀭𑀺𑀬𑁂𑀲𑀣, 𑀤𑀺𑀝𑁆𑀞𑀓𑀸𑀮𑁂 𑀘 𑀇𑀫𑀁 𑀧𑀺𑀮𑀦𑁆𑀥𑀦𑀁 𑀤𑀤𑁂𑀬𑁆𑀬𑀸𑀣𑀸’’𑀢𑀺 𑀲𑀢𑀲𑀳𑀲𑁆𑀲𑀕𑁆𑀖𑀦𑀺𑀓𑀁 𑀲𑀼𑀯𑀡𑁆𑀡𑀫𑀸𑀮𑀁 𑀤𑀢𑁆𑀯𑀸 𑀉𑀬𑁆𑀬𑁄𑀚𑁂𑀲𑀼𑀁.

𑀢𑁂 𑀫𑀳𑀦𑁆𑀢𑀫𑀳𑀦𑁆𑀢𑀸𑀦𑀺 𑀦𑀕𑀭𑀸𑀦𑀺 𑀕𑀦𑁆𑀢𑁆𑀯𑀸 𑀧𑀭𑀺𑀬𑁂𑀲𑀫𑀸𑀦𑀸 𑀧𑀜𑁆𑀘𑀓𑀮𑁆𑀬𑀸𑀡𑀲𑀫𑀦𑁆𑀦𑀸𑀕𑀢𑀁 𑀤𑀸𑀭𑀺𑀓𑀁 𑀅𑀤𑀺𑀲𑁆𑀯𑀸 𑀦𑀺𑀯𑀢𑁆𑀢𑀺𑀢𑁆𑀯𑀸 𑀆𑀕𑀘𑁆𑀙𑀦𑁆𑀢𑀸 𑀯𑀺𑀯𑀝𑀦𑀓𑁆𑀔𑀢𑁆𑀢𑀤𑀺𑀯𑀲𑁂 𑀲𑀸𑀓𑁂𑀢𑀁 𑀅𑀦𑀼𑀧𑁆𑀧𑀢𑁆𑀢𑀸 𑁋 ‘‘𑀅𑀚𑁆𑀚 𑀅𑀫𑁆𑀳𑀸𑀓𑀁 𑀓𑀫𑁆𑀫𑀁 𑀦𑀺𑀧𑁆𑀨𑀚𑁆𑀚𑀺𑀲𑁆𑀲𑀢𑀻’’𑀢𑀺 𑀘𑀺𑀦𑁆𑀢𑀬𑀺𑀁𑀲𑀼. 𑀢𑀲𑁆𑀫𑀺𑀁 𑀧𑀦 𑀦𑀕𑀭𑁂 𑀅𑀦𑀼𑀲𑀁𑀯𑀘𑁆𑀙𑀭𑀁 𑀯𑀺𑀯𑀝𑀦𑀓𑁆𑀔𑀢𑁆𑀢𑀁 𑀦𑀸𑀫 𑀳𑁄𑀢𑀺. 𑀢𑀤𑀸 𑀩𑀳𑀺 𑀅𑀦𑀺𑀓𑁆𑀔𑀫𑀦𑀓𑀼𑀮𑀸𑀦𑀺𑀧𑀺 𑀧𑀭𑀺𑀯𑀸𑀭𑁂𑀦 𑀲𑀤𑁆𑀥𑀺𑀁 𑀕𑁂𑀳𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑁂𑀦 𑀲𑀭𑀻𑀭𑁂𑀦 𑀧𑀤𑀲𑀸𑀯 𑀦𑀤𑀻𑀢𑀻𑀭𑀁 𑀕𑀘𑁆𑀙𑀦𑁆𑀢𑀺. 𑀢𑀲𑁆𑀫𑀺𑀁 𑀤𑀺𑀯𑀲𑁂 𑀔𑀢𑁆𑀢𑀺𑀬𑀫𑀳𑀸𑀲𑀸𑀮𑀸𑀤𑀻𑀦𑀁 𑀧𑀼𑀢𑁆𑀢𑀸𑀧𑀺 ‘‘𑀅𑀢𑁆𑀢𑀦𑁄 𑀲𑀫𑀸𑀦𑀚𑀸𑀢𑀺𑀓𑀁 𑀫𑀦𑀸𑀧𑀁 𑀓𑀼𑀮𑀤𑀸𑀭𑀺𑀓𑀁 𑀤𑀺𑀲𑁆𑀯𑀸 𑀫𑀸𑀮𑀸𑀕𑀼𑀴𑁂𑀦 𑀧𑀭𑀺𑀓𑁆𑀔𑀺𑀧𑀺𑀲𑁆𑀲𑀸𑀫𑀸’’𑀢𑀺 𑀢𑀁 𑀢𑀁 𑀫𑀕𑁆𑀕𑀁 𑀦𑀺𑀲𑁆𑀲𑀸𑀬 𑀢𑀺𑀝𑁆𑀞𑀦𑁆𑀢𑀺. 𑀢𑁂𑀧𑀺 𑀔𑁄 𑀩𑁆𑀭𑀸𑀳𑁆𑀫𑀡𑀸 𑀦𑀤𑀻𑀢𑀻𑀭𑁂 𑀏𑀓𑀁 𑀲𑀸𑀮𑀁 𑀧𑀯𑀺𑀲𑀺𑀢𑁆𑀯𑀸 𑀅𑀝𑁆𑀞𑀁𑀲𑀼. ‘‘𑀢𑀲𑁆𑀫𑀺𑀁 𑀔𑀡𑁂 𑀯𑀺𑀲𑀸𑀔𑀸 𑀧𑀦𑁆𑀦𑀭𑀲𑀲𑁄𑀴𑀲𑀯𑀲𑁆𑀲𑀼𑀤𑁆𑀤𑁂𑀲𑀺𑀓𑀸 𑀳𑀼𑀢𑁆𑀯𑀸 𑀲𑀩𑁆𑀩𑀸𑀪𑀭𑀡𑀧𑀝𑀺𑀫𑀡𑁆𑀟𑀺𑀢𑀸 𑀧𑀜𑁆𑀘𑀳𑀺 𑀓𑀼𑀫𑀸𑀭𑀺𑀓𑀸𑀲𑀢𑁂𑀳𑀺 𑀧𑀭𑀺𑀯𑀼𑀢𑀸 𑀦𑀤𑀺𑀁 𑀕𑀦𑁆𑀢𑁆𑀯𑀸 𑀦𑁆𑀳𑀸𑀬𑀺𑀲𑁆𑀲𑀸𑀫𑀻’’𑀢𑀺 𑀢𑀁 𑀧𑀤𑁂𑀲𑀁 𑀧𑀢𑁆𑀢𑀸, 𑀅𑀣 𑀔𑁄 𑀫𑁂𑀖𑁄 𑀉𑀝𑁆𑀞𑀳𑀺𑀢𑁆𑀯𑀸 𑀧𑀸𑀯𑀲𑁆𑀲𑀺. 𑀧𑀜𑁆𑀘𑀲𑀢𑀸 𑀓𑀼𑀫𑀸𑀭𑀺𑀓𑀸𑀬𑁄 𑀯𑁂𑀕𑁂𑀦 𑀕𑀦𑁆𑀢𑁆𑀯𑀸 𑀲𑀸𑀮𑀁 𑀧𑀯𑀺𑀲𑀺𑀁𑀲𑀼. 𑀩𑁆𑀭𑀸𑀳𑁆𑀫𑀡𑀸 𑀑𑀮𑁄𑀓𑁂𑀦𑁆𑀢𑀸 𑀢𑀸𑀲𑀼 𑀏𑀓𑀫𑁆𑀧𑀺 𑀧𑀜𑁆𑀘𑀓𑀮𑁆𑀬𑀸𑀡𑀲𑀫𑀦𑁆𑀦𑀸𑀕𑀢𑀁 𑀦 𑀧𑀲𑁆𑀲𑀺𑀁𑀲𑀼. 𑀅𑀣 𑀯𑀺𑀲𑀸𑀔𑀸 𑀧𑀓𑀢𑀺𑀕𑀫𑀦𑁂𑀦𑁂𑀯 𑀲𑀸𑀮𑀁 𑀧𑀸𑀯𑀺𑀲𑀺, 𑀯𑀢𑁆𑀣𑀸𑀪𑀭𑀡𑀸𑀦𑀺 𑀢𑁂𑀫𑀺𑀁𑀲𑀼. 𑀩𑁆𑀭𑀸𑀳𑁆𑀫𑀡𑀸 𑀢𑀲𑁆𑀲𑀸 𑀘𑀢𑁆𑀢𑀸𑀭𑀺 𑀓𑀮𑁆𑀬𑀸𑀡𑀸𑀦𑀺 𑀤𑀺𑀲𑁆𑀯𑀸 𑀤𑀦𑁆𑀢𑁂 𑀧𑀲𑁆𑀲𑀺𑀢𑀼𑀓𑀸𑀫𑀸 ‘‘𑀅𑀮𑀲𑀚𑀸𑀢𑀺𑀓𑀸 𑀅𑀫𑁆𑀳𑀸𑀓𑀁 𑀥𑀻𑀢𑀸, 𑀏𑀢𑀺𑀲𑁆𑀲𑀸 𑀲𑀸𑀫𑀺𑀓𑁄 𑀓𑀜𑁆𑀚𑀺𑀓𑀫𑀢𑁆𑀢𑀫𑁆𑀧𑀺 𑀦 𑀮𑀪𑀺𑀲𑁆𑀲𑀢𑀺 𑀫𑀜𑁆𑀜𑁂’’𑀢𑀺 𑀅𑀜𑁆𑀜𑀫𑀜𑁆𑀜𑀁 𑀓𑀣𑀬𑀺𑀁𑀲𑀼. 𑀅𑀣 𑀦𑁂 𑀯𑀺𑀲𑀸𑀔𑀸 𑀆𑀳 𑁋 ‘‘𑀓𑀁 𑀯𑀤𑁂𑀣 𑀢𑀼𑀫𑁆𑀳𑁂’’𑀢𑀺? ‘‘𑀢𑀁 𑀓𑀣𑁂𑀫, 𑀅𑀫𑁆𑀫𑀸’’𑀢𑀺. 𑀫𑀥𑀼𑀭𑁄 𑀳𑀺 𑀢𑀲𑁆𑀲𑀸 𑀲𑀤𑁆𑀤𑁄 𑀓𑀁𑀲𑀢𑀸𑀴𑀲𑀭𑁄 𑀯𑀺𑀬 𑀦𑀺𑀘𑁆𑀙𑀭𑀢𑀺. 𑀅𑀣 𑀦𑁂 𑀧𑀼𑀦 𑀫𑀥𑀼𑀭𑀲𑀤𑁆𑀤𑁂𑀦 ‘‘𑀓𑀺𑀁 𑀓𑀸𑀭𑀡𑀸 𑀪𑀡𑀣𑀸’’𑀢𑀺 𑀧𑀼𑀘𑁆𑀙𑀺. ‘‘𑀢𑀯 𑀧𑀭𑀺𑀯𑀸𑀭𑀺𑀢𑁆𑀣𑀺𑀬𑁄 𑀯𑀢𑁆𑀣𑀸𑀮𑀗𑁆𑀓𑀸𑀭𑁂 𑀅𑀢𑁂𑀫𑁂𑀢𑁆𑀯𑀸 𑀯𑁂𑀕𑁂𑀦 𑀲𑀸𑀮𑀁 𑀧𑀯𑀺𑀝𑁆𑀞𑀸, 𑀢𑀼𑀬𑁆𑀳𑀁 𑀏𑀢𑁆𑀢𑀓𑀁 𑀞𑀸𑀦𑀁 𑀯𑁂𑀕𑁂𑀦 𑀆𑀕𑀫𑀦𑀫𑀢𑁆𑀢𑀫𑁆𑀧𑀺 𑀦𑀢𑁆𑀣𑀺, 𑀯𑀢𑁆𑀣𑀸𑀪𑀭𑀡𑀸𑀦𑀺 𑀢𑁂𑀫𑁂𑀢𑁆𑀯𑀸 𑀆𑀕𑀢𑀸𑀲𑀺. 𑀢𑀲𑁆𑀫𑀸 𑀓𑀣𑁂𑀫, 𑀅𑀫𑁆𑀫𑀸’’𑀢𑀺.

‘‘𑀢𑀸𑀢𑀸, 𑀏𑀯𑀁 𑀫𑀸 𑀯𑀤𑁂𑀣, 𑀅𑀳𑀁 𑀏𑀢𑀸𑀳𑀺 𑀩𑀮𑀯𑀢𑀭𑀸, 𑀓𑀸𑀭𑀡𑀁 𑀧𑀦 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀚𑀯𑁂𑀦 𑀦𑀸𑀕𑀢𑀸𑀫𑁆𑀳𑀻’’𑀢𑀺. ‘‘𑀓𑀺𑀁, 𑀅𑀫𑁆𑀫𑀸’’𑀢𑀺? ‘‘𑀢𑀸𑀢𑀸, 𑀘𑀢𑁆𑀢𑀸𑀭𑁄 𑀚𑀦𑀸 𑀚𑀯𑀫𑀸𑀦𑀸 𑀦 𑀲𑁄𑀪𑀦𑁆𑀢𑀺, 𑀅𑀧𑀭𑀫𑁆𑀧𑀺 𑀓𑀸𑀭𑀡𑀁 𑀅𑀢𑁆𑀣𑀻’’𑀢𑀺. ‘‘𑀓𑀢𑀫𑁂 𑀘𑀢𑁆𑀢𑀸𑀭𑁄 𑀚𑀦𑀸 𑀚𑀯𑀫𑀸𑀦𑀸 𑀦 𑀲𑁄𑀪𑀦𑁆𑀢𑀺, 𑀅𑀫𑁆𑀫𑀸’’𑀢𑀺? 𑀢𑀸𑀢𑀸, 𑀅𑀪𑀺𑀲𑀺𑀢𑁆𑀢𑀭𑀸𑀚𑀸 𑀢𑀸𑀯 𑀲𑀩𑁆𑀩𑀸𑀪𑀭𑀡𑀧𑀝𑀺𑀫𑀡𑁆𑀟𑀺𑀢𑁄 𑀓𑀘𑁆𑀙𑀁 𑀩𑀦𑁆𑀥𑀺𑀢𑁆𑀯𑀸 𑀭𑀸𑀚𑀗𑁆𑀕𑀡𑁂 𑀚𑀯𑀫𑀸𑀦𑁄 𑀦 𑀲𑁄𑀪𑀢𑀺, ‘‘𑀓𑀺𑀁 𑀅𑀬𑀁 𑀭𑀸𑀚𑀸 𑀕𑀳𑀧𑀢𑀺𑀓𑁄 𑀯𑀺𑀬 𑀥𑀸𑀯𑀢𑀻’’𑀢𑀺 𑀅𑀜𑁆𑀜𑀤𑀢𑁆𑀣𑀼 𑀕𑀭𑀳𑀁 𑀮𑀪𑀢𑀺, 𑀲𑀡𑀺𑀓𑀁 𑀕𑀘𑁆𑀙𑀦𑁆𑀢𑁄𑀯 𑀲𑁄𑀪𑀢𑀺. 𑀭𑀜𑁆𑀜𑁄 𑀫𑀗𑁆𑀕𑀮𑀳𑀢𑁆𑀣𑀻𑀧𑀺 𑀅𑀮𑀗𑁆𑀓𑀢𑁄 𑀚𑀯𑀫𑀸𑀦𑁄 𑀦 𑀲𑁄𑀪𑀢𑀺, 𑀯𑀸𑀭𑀡𑀮𑀻𑀴𑀸𑀬 𑀕𑀘𑁆𑀙𑀦𑁆𑀢𑁄𑀯 𑀲𑁄𑀪𑀢𑀺. 𑀧𑀩𑁆𑀩𑀚𑀺𑀢𑁄 𑀚𑀯𑀫𑀸𑀦𑁄 𑀦 𑀲𑁄𑀪𑀢𑀺, ‘‘𑀓𑀺𑀁 𑀅𑀬𑀁 𑀲𑀫𑀡𑁄 𑀕𑀺𑀳𑀻 𑀯𑀺𑀬 𑀥𑀸𑀯𑀢𑀻’’𑀢𑀺 𑀓𑁂𑀯𑀮𑀁 𑀕𑀭𑀳𑀫𑁂𑀯 𑀮𑀪𑀢𑀺, 𑀲𑀫𑀺𑀢𑀕𑀫𑀦𑁂𑀦 𑀧𑀦 𑀲𑁄𑀪𑀢𑀺. 𑀇𑀢𑁆𑀣𑀻 𑀚𑀯𑀫𑀸𑀦𑀸 𑀦 𑀲𑁄𑀪𑀢𑀺, ‘‘𑀓𑀺𑀁 𑀏𑀲𑀸 𑀇𑀢𑁆𑀣𑀻 𑀧𑀼𑀭𑀺𑀲𑁄 𑀯𑀺𑀬 𑀥𑀸𑀯𑀢𑀻’’𑀢𑀺 𑀕𑀭𑀳𑀺𑀢𑀩𑁆𑀩𑀸𑀯 𑀳𑁄𑀢𑀺, ‘‘𑀇𑀫𑁂 𑀘𑀢𑁆𑀢𑀸𑀭𑁄 𑀚𑀦𑀸 𑀚𑀯𑀫𑀸𑀦𑀸 𑀦 𑀲𑁄𑀪𑀦𑁆𑀢𑀺, 𑀢𑀸𑀢𑀸’’𑀢𑀺. ‘‘𑀓𑀢𑀫𑀁 𑀧𑀦 𑀅𑀧𑀭𑀁 𑀓𑀸𑀭𑀡𑀁, 𑀅𑀫𑁆𑀫𑀸’’𑀢𑀺? ‘‘𑀢𑀸𑀢𑀸, 𑀫𑀸𑀢𑀸𑀧𑀺𑀢𑀭𑁄 𑀦𑀸𑀫 𑀥𑀻𑀢𑀭𑀁 𑀅𑀗𑁆𑀕𑀧𑀘𑁆𑀘𑀗𑁆𑀕𑀸𑀦𑀺 𑀲𑀡𑁆𑀞𑀸𑀧𑁂𑀢𑁆𑀯𑀸 𑀧𑁄𑀲𑁂𑀦𑁆𑀢𑀺. 𑀫𑀬𑀜𑁆𑀳𑀺 𑀯𑀺𑀓𑁆𑀓𑀺𑀡𑁂𑀬𑁆𑀬𑀪𑀡𑁆𑀟𑀁 𑀦𑀸𑀫, 𑀅𑀫𑁆𑀳𑁂 𑀧𑀭𑀓𑀼𑀮𑀧𑁂𑀲𑀦𑀢𑁆𑀣𑀸𑀬 𑀧𑁄𑀲𑁂𑀦𑁆𑀢𑀺. 𑀲𑀘𑁂 𑀚𑀯𑀫𑀸𑀦𑀸𑀦𑀁 𑀦𑀺𑀯𑀢𑁆𑀣𑀤𑀼𑀲𑁆𑀲𑀓𑀡𑁆𑀡𑁂 𑀯𑀸 𑀅𑀓𑁆𑀓𑀫𑀺𑀢𑁆𑀯𑀸 𑀪𑀽𑀫𑀺𑀬𑀁 𑀯𑀸 𑀧𑀓𑁆𑀔𑀮𑀺𑀢𑁆𑀯𑀸 𑀧𑀢𑀺𑀢𑀓𑀸𑀮𑁂 𑀳𑀢𑁆𑀣𑁄 𑀯𑀸 𑀧𑀸𑀤𑁄 𑀯𑀸 𑀪𑀺𑀚𑁆𑀚𑁂𑀬𑁆𑀬, 𑀓𑀼𑀮𑀲𑁆𑀲𑁂𑀯 𑀪𑀸𑀭𑁄 𑀪𑀯𑁂𑀬𑁆𑀬, 𑀧𑀲𑀸𑀥𑀦𑀪𑀡𑁆𑀟𑀁 𑀧𑀦 𑀫𑁂 𑀢𑁂𑀫𑁂𑀢𑁆𑀯𑀸 𑀲𑀼𑀲𑁆𑀲𑀺𑀲𑁆𑀲𑀢𑀺. 𑀇𑀫𑀁 𑀓𑀸𑀭𑀡𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀦 𑀥𑀸𑀯𑀺𑀢𑀸𑀫𑁆𑀳𑀺, 𑀢𑀸𑀢𑀸’’𑀢𑀺.

𑀩𑁆𑀭𑀸𑀳𑁆𑀫𑀡𑀸 𑀢𑀲𑁆𑀲𑀸 𑀓𑀣𑀦𑀓𑀸𑀮𑁂 𑀤𑀦𑁆𑀢𑀲𑀫𑁆𑀧𑀢𑁆𑀢𑀺𑀁 𑀤𑀺𑀲𑁆𑀯𑀸 ‘‘𑀏𑀯𑀭𑀽𑀧𑀸 𑀦𑁄 𑀤𑀦𑁆𑀢𑀲𑀫𑁆𑀧𑀢𑁆𑀢𑀺 𑀤𑀺𑀝𑁆𑀞𑀧𑀼𑀩𑁆𑀩𑀸’’𑀢𑀺 𑀢𑀲𑁆𑀲𑀸 𑀲𑀸𑀥𑀼𑀓𑀸𑀭𑀁 𑀤𑀢𑁆𑀯𑀸, ‘‘𑀅𑀫𑁆𑀫, 𑀢𑀼𑀬𑁆𑀳𑀫𑁂𑀯𑁂𑀲𑀸 𑀅𑀦𑀼𑀘𑁆𑀙𑀯𑀺𑀓𑀸’’𑀢𑀺 𑀯𑀢𑁆𑀯𑀸 𑀢𑀁 𑀲𑀼𑀯𑀡𑁆𑀡𑀫𑀸𑀮𑀁 𑀧𑀺𑀮𑀦𑁆𑀥𑀬𑀺𑀁𑀲𑀼. 𑀅𑀣 𑀦𑁂 𑀧𑀼𑀘𑁆𑀙𑀺 𑁋 ‘‘𑀓𑀢𑀭𑀦𑀕𑀭𑀢𑁄 𑀆𑀕𑀢𑀸𑀢𑁆𑀣, 𑀢𑀸𑀢𑀸’’𑀢𑀺? ‘‘𑀲𑀸𑀯𑀢𑁆𑀣𑀺𑀢𑁄, 𑀅𑀫𑁆𑀫𑀸’’𑀢𑀺. ‘‘𑀲𑁂𑀝𑁆𑀞𑀺𑀓𑀼𑀮𑀁 𑀓𑀢𑀭𑀁 𑀦𑀸𑀫𑀸’’𑀢𑀺? ‘‘𑀫𑀺𑀕𑀸𑀭𑀲𑁂𑀝𑁆𑀞𑀺 𑀦𑀸𑀫, 𑀅𑀫𑁆𑀫𑀸’’𑀢𑀺. ‘‘𑀅𑀬𑁆𑀬𑀧𑀼𑀢𑁆𑀢𑁄 𑀓𑁄 𑀦𑀸𑀫𑀸’’𑀢𑀺? ‘‘𑀧𑀼𑀡𑁆𑀡𑀯𑀟𑁆𑀠𑀦𑀓𑀼𑀫𑀸𑀭𑁄 𑀦𑀸𑀫, 𑀅𑀫𑁆𑀫𑀸’’𑀢𑀺. 𑀲𑀸 ‘‘𑀲𑀫𑀸𑀦𑀚𑀸𑀢𑀺𑀓𑀁 𑀦𑁄 𑀓𑀼𑀮’’𑀦𑁆𑀢𑀺 𑀅𑀥𑀺𑀯𑀸𑀲𑁂𑀢𑁆𑀯𑀸 𑀧𑀺𑀢𑀼 𑀲𑀸𑀲𑀦𑀁 𑀧𑀳𑀺𑀡𑀺 ‘‘𑀅𑀫𑁆𑀳𑀸𑀓𑀁 𑀭𑀣𑀁 𑀧𑁂𑀲𑁂𑀢𑀽’’𑀢𑀺. 𑀓𑀺𑀜𑁆𑀘𑀸𑀧𑀺 𑀳𑀺 𑀲𑀸 𑀆𑀕𑀫𑀦𑀓𑀸𑀮𑁂 𑀧𑀤𑀲𑀸 𑀆𑀕𑀢𑀸, 𑀲𑀼𑀯𑀡𑁆𑀡𑀫𑀸𑀮𑀸𑀬 𑀧𑀦 𑀧𑀺𑀮𑀦𑁆𑀥𑀦𑀓𑀸𑀮𑀢𑁄 𑀧𑀝𑁆𑀞𑀸𑀬 𑀢𑀣𑀸 𑀕𑀦𑁆𑀢𑀼𑀁 𑀦 𑀮𑀪𑀢𑀺, 𑀇𑀲𑁆𑀲𑀭𑀤𑀸𑀭𑀺𑀓𑀸 𑀭𑀣𑀸𑀤𑀻𑀳𑀺 𑀕𑀘𑁆𑀙𑀦𑁆𑀢𑀺, 𑀇𑀢𑀭𑀸 𑀧𑀓𑀢𑀺𑀬𑀸𑀦𑀓𑀁 𑀯𑀸 𑀅𑀪𑀺𑀭𑀼𑀳𑀦𑁆𑀢𑀺, 𑀙𑀢𑁆𑀢𑀁 𑀯𑀸 𑀢𑀸𑀮𑀧𑀡𑁆𑀡𑀁 𑀯𑀸 𑀉𑀧𑀭𑀺 𑀓𑀭𑁄𑀦𑁆𑀢𑀺, 𑀢𑀲𑁆𑀫𑀺𑀫𑁆𑀧𑀺 𑀅𑀲𑀢𑀺 𑀦𑀺𑀯𑀢𑁆𑀣𑀲𑀸𑀝𑀓𑀲𑁆𑀲 𑀤𑀲𑀦𑁆𑀢𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀅𑀁𑀲𑁂 𑀔𑀺𑀧𑀦𑁆𑀢𑀸 𑀕𑀘𑁆𑀙𑀦𑁆𑀢𑀺 𑀏𑀯. 𑀢𑀲𑁆𑀲𑀸 𑀧𑀦 𑀧𑀺𑀢𑀸 𑀧𑀜𑁆𑀘 𑀭𑀣𑀲𑀢𑀸𑀦𑀺 𑀧𑁂𑀲𑁂𑀲𑀺. 𑀲𑀸 𑀲𑀧𑀭𑀺𑀯𑀸𑀭𑀸 𑀭𑀣𑀁 𑀆𑀭𑀼𑀬𑁆𑀳 𑀕𑀢𑀸. 𑀩𑁆𑀭𑀸𑀳𑁆𑀫𑀡𑀸𑀧𑀺 𑀏𑀓𑀢𑁄𑀯 𑀅𑀕𑀫𑀁𑀲𑀼. 𑀅𑀣 𑀦𑁂 𑀲𑁂𑀝𑁆𑀞𑀺 𑀧𑀼𑀘𑁆𑀙𑀺 𑁋 ‘‘𑀓𑀼𑀢𑁄 𑀆𑀕𑀢𑀸𑀢𑁆𑀣𑀸’’𑀢𑀺? ‘‘𑀲𑀸𑀯𑀢𑁆𑀣𑀺𑀢𑁄 𑀫𑀳𑀸𑀲𑁂𑀝𑁆𑀞𑀻’’𑀢𑀺. ‘‘𑀲𑁂𑀝𑁆𑀞𑀺 𑀓𑀢𑀭𑁄 𑀦𑀸𑀫𑀸’’𑀢𑀺? ‘‘𑀫𑀺𑀕𑀸𑀭𑀲𑁂𑀝𑁆𑀞𑀺 𑀦𑀸𑀫𑀸’’𑀢𑀺. ‘‘𑀧𑀼𑀢𑁆𑀢𑁄 𑀓𑁄 𑀦𑀸𑀫𑀸’’𑀢𑀺? ‘‘𑀧𑀼𑀡𑁆𑀡𑀯𑀟𑁆𑀠𑀦𑀓𑀼𑀫𑀸𑀭𑁄 𑀦𑀸𑀫 𑀫𑀳𑀸𑀲𑁂𑀝𑁆𑀞𑀻’’𑀢𑀺. ‘‘𑀥𑀦𑀁 𑀓𑀺𑀢𑁆𑀢𑀓’’𑀦𑁆𑀢𑀺? ‘‘𑀘𑀢𑁆𑀢𑀸𑀮𑀻𑀲𑀓𑁄𑀝𑀺𑀬𑁄 𑀫𑀳𑀸𑀲𑁂𑀝𑁆𑀞𑀻’’𑀢𑀺. ‘‘𑀥𑀦𑀁 𑀢𑀸𑀯 𑀅𑀫𑁆𑀳𑀸𑀓𑀁 𑀥𑀦𑀁 𑀉𑀧𑀸𑀤𑀸𑀬 𑀓𑀸𑀓𑀡𑀺𑀓𑀫𑀢𑁆𑀢𑀁, 𑀤𑀸𑀭𑀺𑀓𑀸𑀬 𑀧𑀦 𑀆𑀭𑀓𑁆𑀔𑀫𑀢𑁆𑀢𑀸𑀬 𑀮𑀤𑁆𑀥𑀓𑀸𑀮𑀢𑁄 𑀧𑀝𑁆𑀞𑀸𑀬 𑀓𑀺𑀁 𑀅𑀜𑁆𑀜𑁂𑀦 𑀓𑀸𑀭𑀡𑁂𑀦𑀸’’𑀢𑀺 𑀅𑀥𑀺𑀯𑀸𑀲𑁂𑀲𑀺. 𑀲𑁄 𑀢𑁂𑀲𑀁 𑀲𑀓𑁆𑀓𑀸𑀭𑀁 𑀓𑀢𑁆𑀯𑀸 𑀏𑀓𑀸𑀳𑀤𑁆𑀯𑀻𑀳𑀁 𑀯𑀲𑀸𑀧𑁂𑀢𑁆𑀯𑀸 𑀉𑀬𑁆𑀬𑁄𑀚𑁂𑀲𑀺.

𑀢𑁂 𑀲𑀸𑀯𑀢𑁆𑀣𑀺𑀁 𑀕𑀦𑁆𑀢𑁆𑀯𑀸 𑀫𑀺𑀕𑀸𑀭𑀲𑁂𑀝𑁆𑀞𑀺𑀲𑁆𑀲 ‘‘𑀮𑀤𑁆𑀥𑀸 𑀦𑁄 𑀤𑀸𑀭𑀺𑀓𑀸’’𑀢𑀺 𑀆𑀭𑁄𑀘𑀬𑀺𑀁𑀲𑀼. ‘‘𑀓𑀲𑁆𑀲 𑀥𑀻𑀢𑀸’’𑀢𑀺? ‘‘𑀥𑀦𑀜𑁆𑀘𑀬𑀲𑁂𑀝𑁆𑀞𑀺𑀦𑁄’’𑀢𑀺. 𑀲𑁄 ‘‘𑀫𑀳𑀸𑀓𑀼𑀮𑀲𑁆𑀲 𑀫𑁂 𑀤𑀸𑀭𑀺𑀓𑀸 𑀮𑀤𑁆𑀥𑀸, 𑀔𑀺𑀧𑁆𑀧𑀫𑁂𑀯 𑀦𑀁 𑀆𑀦𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀢𑀢𑁆𑀣 𑀕𑀫𑀦𑀢𑁆𑀣𑀁 𑀭𑀜𑁆𑀜𑁄 𑀆𑀭𑁄𑀘𑁂𑀲𑀺. 𑀭𑀸𑀚𑀸 ‘‘‘𑀫𑀳𑀸𑀓𑀼𑀮𑀁 𑀏𑀢𑀁 𑀫𑀬𑀸 𑀩𑀺𑀫𑁆𑀩𑀺𑀲𑀸𑀭𑀲𑁆𑀲 𑀲𑀦𑁆𑀢𑀺𑀓𑀸 𑀆𑀦𑁂𑀢𑁆𑀯𑀸 𑀲𑀸𑀓𑁂𑀢𑁂 𑀦𑀺𑀯𑁂𑀲𑀺𑀢𑀁, 𑀢𑀲𑁆𑀲 𑀲𑀫𑁆𑀫𑀸𑀦𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻’𑀢𑀺 𑀅𑀳𑀫𑁆𑀧𑀺 𑀆𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀆𑀳, 𑀲𑁄 ‘‘𑀲𑀸𑀥𑀼, 𑀤𑁂𑀯𑀸’’𑀢𑀺 𑀯𑀢𑁆𑀯𑀸 𑀥𑀦𑀜𑁆𑀘𑀬𑀲𑁂𑀝𑁆𑀞𑀺𑀦𑁄 𑀲𑀸𑀲𑀦𑀁 𑀧𑁂𑀲𑁂𑀲𑀺 𑁋 ‘‘𑀫𑀬𑀺 𑀆𑀕𑀘𑁆𑀙𑀦𑁆𑀢𑁂 𑀭𑀸𑀚𑀸𑀧𑀺 𑀆𑀕𑀫𑀺𑀲𑁆𑀲𑀢𑀺, 𑀫𑀳𑀦𑁆𑀢𑀁 𑀭𑀸𑀚𑀩𑀮𑀁 𑀏𑀢𑁆𑀢𑀓𑀲𑁆𑀲 𑀚𑀦𑀲𑁆𑀲 𑀓𑀢𑁆𑀢𑀩𑁆𑀩𑀬𑀼𑀢𑁆𑀢𑀓𑀁 𑀓𑀸𑀢𑀼𑀁 𑀲𑀓𑁆𑀔𑀺𑀲𑁆𑀲𑀲𑀺, 𑀦 𑀲𑀓𑁆𑀔𑀺𑀲𑁆𑀲𑀲𑀻’’𑀢𑀺? 𑀇𑀢𑀭𑁄𑀧𑀺 ‘‘𑀲𑀘𑁂𑀧𑀺 𑀤𑀲 𑀭𑀸𑀚𑀸𑀦𑁄 𑀆𑀕𑀘𑁆𑀙𑀦𑁆𑀢𑀺, 𑀆𑀕𑀘𑁆𑀙𑀦𑁆𑀢𑀽’’𑀢𑀺 𑀧𑀝𑀺𑀲𑀸𑀲𑀦𑀁 𑀧𑁂𑀲𑁂𑀲𑀺. 𑀫𑀺𑀕𑀸𑀭𑀲𑁂𑀝𑁆𑀞𑀺 𑀢𑀸𑀯 𑀫𑀳𑀦𑁆𑀢𑁂 𑀦𑀕𑀭𑁂 𑀕𑁂𑀳𑀕𑁄𑀧𑀓𑀫𑀢𑁆𑀢𑀁 𑀞𑀧𑁂𑀢𑁆𑀯𑀸 𑀲𑁂𑀲𑀚𑀦𑀁 𑀆𑀤𑀸𑀬 𑀕𑀦𑁆𑀢𑁆𑀯𑀸 𑀅𑀟𑁆𑀠𑀬𑁄𑀚𑀦𑀫𑀢𑁆𑀢𑁂 𑀞𑀸𑀦𑁂 𑀞𑀢𑁆𑀯𑀸 ‘‘𑀆𑀕𑀢𑀸𑀫𑁆𑀳𑀸’’𑀢𑀺 𑀲𑀸𑀲𑀦𑀁 𑀧𑀳𑀺𑀡𑀺. 𑀥𑀦𑀜𑁆𑀘𑀬𑀲𑁂𑀝𑁆𑀞𑀺 𑀩𑀳𑀼𑀧𑀡𑁆𑀡𑀸𑀓𑀸𑀭𑀁 𑀧𑁂𑀲𑁂𑀢𑁆𑀯𑀸 𑀥𑀻𑀢𑀭𑀸 𑀲𑀤𑁆𑀥𑀺𑀁 𑀫𑀦𑁆𑀢𑁂𑀲𑀺, ‘‘𑀅𑀫𑁆𑀫, 𑀲𑀲𑀼𑀭𑁄 𑀓𑀺𑀭 𑀢𑁂 𑀓𑁄𑀲𑀮𑀭𑀜𑁆𑀜𑀸 𑀲𑀤𑁆𑀥𑀺𑀁 𑀆𑀕𑀢𑁄, 𑀢𑀲𑁆𑀲 𑀓𑀢𑀭𑀁 𑀕𑁂𑀳𑀁 𑀧𑀝𑀺𑀚𑀕𑁆𑀕𑀺𑀢𑀩𑁆𑀩𑀁, 𑀭𑀜𑁆𑀜𑁄 𑀓𑀢𑀭𑀁, 𑀉𑀧𑀭𑀸𑀚𑀸𑀤𑀻𑀦𑀁 𑀓𑀢𑀭𑀸𑀦𑀻’’𑀢𑀺? 𑀧𑀡𑁆𑀟𑀺𑀢𑀸 𑀲𑁂𑀝𑁆𑀞𑀺𑀥𑀻𑀢𑀸 𑀯𑀚𑀺𑀭𑀕𑁆𑀕𑀢𑀺𑀔𑀺𑀡𑀜𑀸𑀡𑀸 𑀓𑀧𑁆𑀧𑀲𑀢𑀲𑀳𑀲𑁆𑀲𑀁 𑀧𑀢𑁆𑀣𑀺𑀢𑀧𑀢𑁆𑀣𑀦𑀸 𑀅𑀪𑀺𑀦𑀻𑀳𑀸𑀭𑀲𑀫𑁆𑀧𑀦𑁆𑀦𑀸 ‘‘𑀲𑀲𑀼𑀭𑀲𑁆𑀲 𑀫𑁂 𑀅𑀲𑀼𑀓𑀕𑁂𑀳𑀁 𑀧𑀝𑀺𑀚𑀕𑁆𑀕𑀣, 𑀭𑀜𑁆𑀜𑁄 𑀅𑀲𑀼𑀓𑀕𑁂𑀳𑀁, 𑀉𑀧𑀭𑀸𑀚𑀸𑀤𑀻𑀦𑀁 𑀅𑀲𑀼𑀓𑀸𑀦𑀻’’𑀢𑀺 𑀲𑀁𑀯𑀺𑀤𑀳𑀺𑀢𑁆𑀯𑀸 𑀤𑀸𑀲𑀓𑀫𑁆𑀫𑀓𑀭𑁂 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀏𑀢𑁆𑀢𑀓𑀸 𑀭𑀜𑁆𑀜𑁄 𑀓𑀢𑁆𑀢𑀩𑁆𑀩𑀓𑀺𑀘𑁆𑀘𑀁 𑀓𑀭𑁄𑀣, 𑀏𑀢𑁆𑀢𑀓𑀸 𑀉𑀧𑀭𑀸𑀚𑀸𑀤𑀻𑀦𑀁, 𑀳𑀢𑁆𑀣𑀺𑀅𑀲𑁆𑀲𑀸𑀤𑀬𑁄𑀧𑀺 𑀢𑀼𑀫𑁆𑀳𑁂𑀬𑁂𑀯 𑀧𑀝𑀺𑀚𑀕𑁆𑀕𑀣, 𑀅𑀲𑁆𑀲𑀩𑀦𑁆𑀥𑀸𑀤𑀬𑁄𑀧𑀺 𑀆𑀕𑀦𑁆𑀢𑁆𑀯𑀸 𑀫𑀗𑁆𑀕𑀮𑀙𑀡𑀁 𑀅𑀦𑀼𑀪𑀯𑀺𑀲𑁆𑀲𑀦𑁆𑀢𑀻’’𑀢𑀺 𑀲𑀁𑀯𑀺𑀤𑀳𑀺. ‘‘𑀓𑀺𑀁 𑀓𑀸𑀭𑀡𑀸’’? ‘‘‘𑀫𑀬𑀁 𑀯𑀺𑀲𑀸𑀔𑀸𑀬 𑀫𑀗𑁆𑀕𑀮𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀦 𑀓𑀺𑀜𑁆𑀘𑀺 𑀮𑀪𑀺𑀫𑁆𑀳, 𑀅𑀲𑁆𑀲𑀭𑀓𑁆𑀔𑀡𑀸𑀤𑀻𑀦𑀺 𑀓𑀭𑁄𑀦𑁆𑀢𑀸 𑀲𑀼𑀔𑀁 𑀦 𑀯𑀺𑀘𑀭𑀺𑀫𑁆𑀳𑀸’𑀢𑀺 𑀓𑁂𑀘𑀺 𑀯𑀢𑁆𑀢𑀼𑀁 𑀫𑀸 𑀮𑀪𑀺𑀁𑀲𑀽’’𑀢𑀺.

𑀢𑀁 𑀤𑀺𑀯𑀲𑀫𑁂𑀯 𑀯𑀺𑀲𑀸𑀔𑀸𑀬 𑀧𑀺𑀢𑀸 𑀧𑀜𑁆𑀘𑀲𑀢𑁂 𑀲𑀼𑀯𑀡𑁆𑀡𑀓𑀸𑀭𑁂 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀥𑀻𑀢𑀼 𑀫𑁂 𑀫𑀳𑀸𑀮𑀢𑀸𑀧𑀲𑀸𑀥𑀦𑀁 𑀦𑀸𑀫 𑀓𑀭𑁄𑀣𑀸’’𑀢𑀺 𑀭𑀢𑁆𑀢𑀲𑀼𑀯𑀡𑁆𑀡𑀲𑁆𑀲 𑀦𑀺𑀓𑁆𑀔𑀲𑀳𑀲𑁆𑀲𑀁, 𑀢𑀤𑀦𑀼𑀭𑀽𑀧𑀸𑀦𑀺 𑀘 𑀭𑀚𑀢𑀫𑀡𑀺𑀫𑀼𑀢𑁆𑀢𑀸𑀧𑀯𑀸𑀴𑀯𑀚𑀺𑀭𑀸𑀤𑀻𑀦𑀺 𑀤𑀸𑀧𑁂𑀲𑀺. 𑀭𑀸𑀚𑀸 𑀓𑀢𑀺𑀧𑀸𑀳𑀁 𑀯𑀲𑀺𑀢𑁆𑀯𑀸𑀯 𑀥𑀦𑀜𑁆𑀘𑀬𑀲𑁂𑀝𑁆𑀞𑀺𑀲𑁆𑀲 𑀲𑀸𑀲𑀦𑀁 𑀧𑀳𑀺𑀡𑀺 ‘‘𑀦 𑀲𑀓𑁆𑀓𑀸 𑀲𑁂𑀝𑁆𑀞𑀺𑀦𑀸 𑀅𑀫𑁆𑀳𑀸𑀓𑀁 𑀘𑀺𑀭𑀁 𑀧𑁄𑀲𑀦𑀁 𑀦𑀸𑀫 𑀓𑀸𑀢𑀼𑀁, 𑀤𑀸𑀦𑀺 𑀤𑀸𑀭𑀺𑀓𑀸𑀬 𑀕𑀫𑀦𑀓𑀸𑀮𑀁 𑀚𑀸𑀦𑀸𑀢𑀽’’𑀢𑀺. 𑀲𑁄𑀧𑀺 𑀭𑀜𑁆𑀜𑁄 𑀲𑀸𑀲𑀦𑀁 𑀧𑁂𑀲𑁂𑀲𑀺 𑁋 ‘‘𑀇𑀤𑀸𑀦𑀺 𑀯𑀲𑁆𑀲𑀓𑀸𑀮𑁄 𑀆𑀕𑀢𑁄, 𑀦 𑀲𑀓𑁆𑀓𑀸 𑀘𑀢𑀼𑀫𑀸𑀲𑀁 𑀯𑀺𑀘𑀭𑀺𑀢𑀼𑀁, 𑀢𑀼𑀫𑁆𑀳𑀸𑀓𑀁 𑀩𑀮𑀓𑀸𑀬𑀲𑁆𑀲 𑀬𑀁 𑀬𑀁 𑀮𑀤𑁆𑀥𑀼𑀁 𑀯𑀝𑁆𑀝𑀢𑀺, 𑀲𑀩𑁆𑀩𑀁 𑀢𑀁 𑀫𑀫 𑀪𑀸𑀭𑁄, 𑀫𑀬𑀸 𑀧𑁂𑀲𑀺𑀢𑀓𑀸𑀮𑁂 𑀤𑁂𑀯𑁄 𑀕𑀫𑀺𑀲𑁆𑀲𑀢𑀻’’𑀢𑀺. 𑀢𑀢𑁄 𑀧𑀝𑁆𑀞𑀸𑀬 𑀲𑀸𑀓𑁂𑀢𑀦𑀕𑀭𑀁 𑀦𑀺𑀘𑁆𑀘𑀦𑀓𑁆𑀔𑀢𑁆𑀢𑀁 𑀯𑀺𑀬 𑀅𑀳𑁄𑀲𑀺. 𑀭𑀸𑀚𑀸𑀦𑀁 𑀆𑀤𑀺𑀁 𑀓𑀢𑁆𑀯𑀸 𑀲𑀩𑁆𑀩𑁂𑀲𑀁 𑀫𑀸𑀮𑀸𑀕𑀦𑁆𑀥𑀯𑀢𑁆𑀣𑀸𑀤𑀻𑀦𑀺 𑀧𑀝𑀺𑀬𑀢𑁆𑀢𑀸𑀦𑁂𑀯 𑀳𑁄𑀦𑁆𑀢𑀺. 𑀢𑀢𑁄 𑀢𑁂 𑀚𑀦𑀸 𑀘𑀺𑀦𑁆𑀢𑀬𑀺𑀁𑀲𑀼 𑁋 ‘‘𑀲𑁂𑀝𑁆𑀞𑀺 𑀅𑀫𑁆𑀳𑀸𑀓𑀫𑁂𑀯 𑀲𑀓𑁆𑀓𑀸𑀭𑀁 𑀓𑀭𑁄𑀢𑀻’’𑀢𑀺, 𑀏𑀯𑀁 𑀢𑀬𑁄 𑀫𑀸𑀲𑀸 𑀅𑀢𑀺𑀓𑁆𑀓𑀦𑁆𑀢𑀸, 𑀧𑀲𑀸𑀥𑀦𑀁 𑀧𑀦 𑀢𑀸𑀯 𑀦 𑀦𑀺𑀝𑁆𑀞𑀸𑀢𑀺. 𑀓𑀫𑁆𑀫𑀦𑁆𑀢𑀸𑀥𑀺𑀝𑁆𑀞𑀸𑀬𑀓𑀸 𑀆𑀕𑀦𑁆𑀢𑁆𑀯𑀸 𑀲𑁂𑀝𑁆𑀞𑀺𑀦𑁄 𑀆𑀭𑁄𑀘𑁂𑀲𑀼𑀁 𑁋 ‘‘𑀅𑀜𑁆𑀜𑀁 𑀅𑀲𑀦𑁆𑀢𑀁 𑀦𑀸𑀫 𑀦𑀢𑁆𑀣𑀺, 𑀩𑀮𑀓𑀸𑀬𑀲𑁆𑀲 𑀧𑀦 𑀪𑀢𑁆𑀢𑀧𑀘𑀦𑀤𑀸𑀭𑀽𑀦𑀺 𑀦𑀧𑁆𑀧𑀳𑁄𑀦𑁆𑀢𑀻’’𑀢𑀺. ‘‘𑀕𑀘𑁆𑀙𑀣, 𑀢𑀸𑀢𑀸, 𑀇𑀫𑀲𑁆𑀫𑀺𑀁 𑀦𑀕𑀭𑁂 𑀧𑀭𑀺𑀚𑀺𑀡𑁆𑀡𑀸 𑀳𑀢𑁆𑀣𑀺𑀲𑀸𑀮𑀸𑀤𑀬𑁄 𑀘𑁂𑀯 𑀧𑀭𑀺𑀚𑀺𑀡𑁆𑀡𑀓𑀸𑀦𑀺 𑀘 𑀕𑁂𑀳𑀸𑀦𑀺 𑀕𑀳𑁂𑀢𑁆𑀯𑀸 𑀧𑀘𑀣𑀸’’𑀢𑀺. 𑀏𑀯𑀁 𑀧𑀘𑀦𑁆𑀢𑀸𑀦𑀫𑁆𑀧𑀺 𑀅𑀟𑁆𑀠𑀫𑀸𑀲𑁄 𑀅𑀢𑀺𑀓𑁆𑀓𑀦𑁆𑀢𑁄. 𑀢𑀢𑁄 𑀧𑀼𑀦𑀧𑀺 ‘‘𑀤𑀸𑀭𑀽𑀦𑀺 𑀦𑀢𑁆𑀣𑀻’’𑀢𑀺 𑀆𑀭𑁄𑀘𑀬𑀺𑀁𑀲𑀼. ‘‘𑀇𑀫𑀲𑁆𑀫𑀺𑀁 𑀓𑀸𑀮𑁂 𑀦 𑀲𑀓𑁆𑀓𑀸 𑀤𑀸𑀭𑀽𑀦𑀺 𑀮𑀤𑁆𑀥𑀼𑀁, 𑀤𑀼𑀲𑁆𑀲𑀓𑁄𑀝𑁆𑀞𑀸𑀕𑀸𑀭𑀸𑀦𑀺 𑀯𑀺𑀯𑀭𑀺𑀢𑁆𑀯𑀸 𑀣𑀽𑀮𑀲𑀸𑀝𑀓𑁂𑀳𑀺 𑀯𑀝𑁆𑀝𑀺𑀬𑁄 𑀓𑀢𑁆𑀯𑀸 𑀢𑁂𑀮𑀘𑀸𑀝𑀻𑀲𑀼 𑀢𑁂𑀫𑁂𑀢𑁆𑀯𑀸 𑀪𑀢𑁆𑀢𑀁 𑀧𑀘𑀣𑀸’’𑀢𑀺. 𑀢𑁂 𑀅𑀟𑁆𑀠𑀫𑀸𑀲𑀁 𑀢𑀣𑀸 𑀅𑀓𑀁𑀲𑀼. 𑀏𑀯𑀁 𑀘𑀢𑁆𑀢𑀸𑀭𑁄 𑀫𑀸𑀲𑀸 𑀅𑀢𑀺𑀓𑁆𑀓𑀦𑁆𑀢𑀸, 𑀧𑀲𑀸𑀥𑀦𑀫𑁆𑀧𑀺 𑀦𑀺𑀝𑁆𑀞𑀺𑀢𑀁.

𑀢𑀲𑁆𑀫𑀺𑀁 𑀧𑀲𑀸𑀥𑀦𑁂 𑀘𑀢𑀲𑁆𑀲𑁄 𑀯𑀚𑀺𑀭𑀦𑀸𑀴𑀺𑀬𑁄 𑀉𑀧𑀬𑁄𑀕𑀁 𑀅𑀕𑀫𑀁𑀲𑀼, 𑀫𑀼𑀢𑁆𑀢𑀸𑀦𑀁 𑀏𑀓𑀸𑀤𑀲 𑀦𑀸𑀴𑀺𑀬𑁄, 𑀧𑀯𑀸𑀴𑀲𑁆𑀲 𑀩𑀸𑀯𑀻𑀲𑀢𑀺 𑀦𑀸𑀴𑀺𑀬𑁄, 𑀫𑀡𑀻𑀦𑀁 𑀢𑁂𑀢𑁆𑀢𑀺𑀁𑀲 𑀦𑀸𑀴𑀺𑀬𑁄. 𑀇𑀢𑀺 𑀏𑀢𑁂𑀳𑀺 𑀘 𑀅𑀜𑁆𑀜𑁂𑀳𑀺 𑀘 𑀭𑀢𑀦𑁂𑀳𑀺 𑀦𑀺𑀝𑁆𑀞𑀸𑀦𑀁 𑀅𑀕𑀫𑀸𑀲𑀺. 𑀅𑀲𑀼𑀢𑁆𑀢𑀫𑀬𑀁 𑀧𑀲𑀸𑀥𑀦𑀁 𑀭𑀚𑀢𑁂𑀦 𑀲𑀼𑀢𑁆𑀢𑀓𑀺𑀘𑁆𑀘𑀁 𑀓𑀭𑀺𑀁𑀲𑀼. 𑀢𑀁 𑀲𑀻𑀲𑁂 𑀧𑀝𑀺𑀫𑀼𑀓𑁆𑀓𑀁 𑀧𑀸𑀤𑀧𑀺𑀝𑁆𑀞𑀺𑀁 𑀕𑀘𑁆𑀙𑀢𑀺. 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀞𑀸𑀦𑁂 𑀫𑀼𑀤𑁆𑀤𑀺𑀓𑀸 𑀬𑁄𑀚𑁂𑀢𑁆𑀯𑀸 𑀓𑀢𑀸 𑀲𑀼𑀯𑀡𑁆𑀡𑀫𑀬𑀸 𑀕𑀡𑁆𑀞𑀺𑀓𑀸 𑀳𑁄𑀦𑁆𑀢𑀺, 𑀭𑀚𑀢𑀫𑀬𑀸 𑀧𑀸𑀲𑀓𑀸, 𑀫𑀢𑁆𑀣𑀓𑀫𑀚𑁆𑀛𑁂 𑀏𑀓𑀸 𑀫𑀼𑀤𑁆𑀤𑀺𑀓𑀸, 𑀤𑁆𑀯𑀻𑀲𑀼 𑀓𑀡𑁆𑀡𑀧𑀺𑀝𑁆𑀞𑀻𑀲𑀼 𑀤𑁆𑀯𑁂, 𑀕𑀮𑀯𑀸𑀝𑀓𑁂 𑀏𑀓𑀸, 𑀤𑁆𑀯𑀻𑀲𑀼 𑀚𑀢𑁆𑀢𑀽𑀲𑀼 𑀤𑁆𑀯𑁂, 𑀤𑁆𑀯𑀻𑀲𑀼 𑀓𑀧𑁆𑀧𑀭𑁂𑀲𑀼 𑀤𑁆𑀯𑁂, 𑀤𑁆𑀯𑀻𑀲𑀼 𑀓𑀝𑀺𑀧𑀲𑁆𑀲𑁂𑀲𑀼 𑀤𑁆𑀯𑁂𑀢𑀺. 𑀢𑀲𑁆𑀫𑀺𑀁 𑀔𑁄 𑀧𑀦 𑀧𑀲𑀸𑀥𑀦𑁂 𑀏𑀓𑀁 𑀫𑁄𑀭𑀁 𑀓𑀭𑀺𑀁𑀲𑀼, 𑀢𑀲𑁆𑀲 𑀤𑀓𑁆𑀔𑀺𑀡𑀧𑀓𑁆𑀔𑁂 𑀭𑀢𑁆𑀢𑀲𑀼𑀯𑀡𑁆𑀡𑀫𑀬𑀸𑀦𑀺 𑀧𑀜𑁆𑀘 𑀧𑀢𑁆𑀢𑀲𑀢𑀸𑀦𑀺 𑀅𑀳𑁂𑀲𑀼𑀁, 𑀯𑀸𑀫𑀧𑀓𑁆𑀔𑁂 𑀧𑀜𑁆𑀘 𑀧𑀢𑁆𑀢𑀲𑀢𑀸𑀦𑀺, 𑀢𑀼𑀡𑁆𑀟𑀁 𑀧𑀯𑀸𑀴𑀫𑀬𑀁, 𑀅𑀓𑁆𑀔𑀻𑀦𑀺 𑀫𑀡𑀺𑀫𑀬𑀸𑀦𑀺, 𑀢𑀣𑀸 𑀕𑀻𑀯𑀸 𑀘 𑀧𑀺𑀜𑁆𑀙𑀸𑀦𑀺 𑀘, 𑀧𑀢𑁆𑀢𑀦𑀸𑀴𑀺𑀬𑁄 𑀭𑀚𑀢𑀫𑀬𑀸, 𑀢𑀣𑀸 𑀚𑀗𑁆𑀖𑀸𑀬𑁄. 𑀲𑁄 𑀯𑀺𑀲𑀸𑀔𑀸𑀬 𑀫𑀢𑁆𑀣𑀓𑀫𑀚𑁆𑀛𑁂 𑀧𑀩𑁆𑀩𑀢𑀓𑀽𑀝𑁂 𑀞𑀢𑁆𑀯𑀸 𑀦𑀘𑁆𑀘𑀦𑀫𑀬𑀽𑀭𑁄 𑀯𑀺𑀬 𑀔𑀸𑀬𑀢𑀺. 𑀧𑀢𑁆𑀢𑀦𑀸𑀴𑀺𑀲𑀳𑀲𑁆𑀲𑀲𑁆𑀲 𑀲𑀤𑁆𑀤𑁄 𑀤𑀺𑀩𑁆𑀩𑀲𑀗𑁆𑀕𑀻𑀢𑀁 𑀯𑀺𑀬 𑀧𑀜𑁆𑀘𑀗𑁆𑀕𑀺𑀓𑀢𑀽𑀭𑀺𑀬𑀖𑁄𑀲𑁄 𑀯𑀺𑀬 𑀘 𑀧𑀯𑀢𑁆𑀢𑀢𑀺. 𑀲𑀦𑁆𑀢𑀺𑀓𑀁 𑀉𑀧𑀕𑀢𑀸𑀬𑁂𑀯 𑀢𑀲𑁆𑀲𑀸 𑀅𑀫𑁄𑀭𑀪𑀸𑀯𑀁 𑀚𑀸𑀦𑀦𑁆𑀢𑀺. 𑀧𑀲𑀸𑀥𑀦𑀁 𑀦𑀯𑀓𑁄𑀝𑀺𑀅𑀕𑁆𑀖𑀦𑀓𑀁 𑀅𑀳𑁄𑀲𑀺, 𑀲𑀢𑀲𑀳𑀲𑁆𑀲𑀁 𑀳𑀢𑁆𑀣𑀓𑀫𑁆𑀫𑀫𑀽𑀮𑀁 𑀤𑀻𑀬𑀺𑀢𑁆𑀣.

‘‘𑀓𑀺𑀲𑁆𑀲 𑀧𑀦 𑀦𑀺𑀲𑁆𑀲𑀦𑁆𑀤𑁂𑀦 𑀢𑀸𑀬𑁂𑀢𑀁 𑀧𑀲𑀸𑀥𑀦𑀁 𑀮𑀤𑁆𑀥’’𑀦𑁆𑀢𑀺? 𑀲𑀸 𑀓𑀺𑀭 𑀓𑀲𑁆𑀲𑀧𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀓𑀸𑀮𑁂 𑀯𑀻𑀲𑀢𑀺𑀬𑀸 𑀪𑀺𑀓𑁆𑀔𑀼𑀲𑀳𑀲𑁆𑀲𑀸𑀦𑀁 𑀘𑀻𑀯𑀭𑀲𑀸𑀝𑀓𑀁 𑀤𑀢𑁆𑀯𑀸 𑀲𑀼𑀢𑁆𑀢𑀫𑁆𑀧𑀺 𑀲𑀽𑀘𑀺𑀬𑁄𑀧𑀺 𑀭𑀚𑀦𑀫𑁆𑀧𑀺 𑀅𑀢𑁆𑀢𑀦𑁄 𑀲𑀦𑁆𑀢𑀓𑀫𑁂𑀯 𑀅𑀤𑀸𑀲𑀺. 𑀢𑀲𑁆𑀲 𑀘𑀻𑀯𑀭𑀤𑀸𑀦𑀲𑁆𑀲 𑀦𑀺𑀲𑁆𑀲𑀦𑁆𑀤𑁂𑀦 𑀇𑀫𑀁 𑀫𑀳𑀸𑀮𑀢𑀸𑀧𑀲𑀸𑀥𑀦𑀁 𑀮𑀪𑀺. 𑀇𑀢𑁆𑀣𑀻𑀦𑀜𑁆𑀳𑀺 𑀘𑀻𑀯𑀭𑀤𑀸𑀦𑀁 𑀫𑀳𑀸𑀮𑀢𑀸𑀧𑀲𑀸𑀥𑀦𑀪𑀡𑁆𑀟𑁂𑀦 𑀫𑀢𑁆𑀣𑀓𑀁 𑀧𑀧𑁆𑀧𑁄𑀢𑀺, 𑀧𑀼𑀭𑀺𑀲𑀸𑀦𑀁 𑀇𑀤𑁆𑀥𑀺𑀫𑀬𑀧𑀢𑁆𑀢𑀘𑀻𑀯𑀭𑁂𑀦𑀸𑀢𑀺. 𑀏𑀯𑀁 𑀫𑀳𑀸𑀲𑁂𑀝𑁆𑀞𑀺 𑀘𑀢𑀽𑀳𑀺 𑀫𑀸𑀲𑁂𑀳𑀺 𑀥𑀻𑀢𑀼 𑀧𑀭𑀺𑀯𑀘𑁆𑀙𑀁 𑀓𑀢𑁆𑀯𑀸 𑀢𑀲𑁆𑀲𑀸 𑀤𑁂𑀬𑁆𑀬𑀥𑀫𑁆𑀫𑀁 𑀤𑀤𑀫𑀸𑀦𑁄 𑀓𑀳𑀸𑀧𑀡𑀧𑀽𑀭𑀸𑀦𑀺 𑀧𑀜𑁆𑀘 𑀲𑀓𑀝𑀲𑀢𑀸𑀦𑀺 𑀅𑀤𑀸𑀲𑀺, 𑀲𑀼𑀯𑀡𑁆𑀡𑀪𑀸𑀚𑀦𑀧𑀽𑀭𑀸𑀦𑀺 𑀧𑀜𑁆𑀘, 𑀭𑀚𑀢𑀪𑀸𑀚𑀦𑀧𑀽𑀭𑀸𑀦𑀺 𑀧𑀜𑁆𑀘, 𑀢𑀫𑁆𑀩𑀪𑀸𑀚𑀦𑀧𑀽𑀭𑀸𑀦𑀺 𑀧𑀜𑁆𑀘, 𑀧𑀢𑁆𑀢𑀼𑀡𑁆𑀡𑀯𑀢𑁆𑀣𑀓𑁄𑀲𑁂𑀬𑁆𑀬𑀯𑀢𑁆𑀣𑀧𑀽𑀭𑀸𑀦𑀺 𑀧𑀜𑁆𑀘, 𑀲𑀧𑁆𑀧𑀺𑀧𑀽𑀭𑀸𑀦𑀺 𑀧𑀜𑁆𑀘, 𑀢𑁂𑀮𑀧𑀽𑀭𑀸𑀦𑀺 𑀧𑀜𑁆𑀘, 𑀲𑀸𑀮𑀺𑀢𑀡𑁆𑀟𑀼𑀮𑀧𑀽𑀭𑀸𑀦𑀺 𑀧𑀜𑁆𑀘, 𑀦𑀗𑁆𑀕𑀮𑀨𑀸𑀮𑀸𑀤𑀺𑀉𑀧𑀓𑀭𑀡𑀧𑀽𑀭𑀸𑀦𑀺 𑀧𑀜𑁆𑀘𑀲𑀓𑀝𑀲𑀢𑀸𑀦𑀺 𑀅𑀤𑀸𑀲𑀺. 𑀏𑀯𑀁 𑀓𑀺𑀭𑀲𑁆𑀲 𑀅𑀳𑁄𑀲𑀺 𑁋 ‘‘𑀫𑀫 𑀥𑀻𑀢𑀼 𑀕𑀢𑀝𑁆𑀞𑀸𑀦𑁂 ‘𑀅𑀲𑀼𑀓𑁂𑀦 𑀦𑀸𑀫 𑀫𑁂 𑀅𑀢𑁆𑀣𑁄’𑀢𑀺 𑀫𑀸 𑀧𑀭𑀲𑁆𑀲 𑀕𑁂𑀳𑀤𑁆𑀯𑀸𑀭𑀁 𑀧𑀳𑀺𑀡𑀻’’𑀢𑀺. 𑀢𑀲𑁆𑀫𑀸 𑀲𑀩𑁆𑀩𑀽𑀧𑀓𑀭𑀡𑀸𑀦𑀺 𑀤𑀸𑀧𑁂𑀲𑀺. 𑀏𑀓𑁂𑀓𑀲𑁆𑀫𑀺𑀁 𑀭𑀣𑁂 𑀲𑀩𑁆𑀩𑀸𑀮𑀗𑁆𑀓𑀸𑀭𑀧𑀝𑀺𑀫𑀡𑁆𑀟𑀺𑀢𑀸 𑀢𑀺𑀲𑁆𑀲𑁄 𑀢𑀺𑀲𑁆𑀲𑁄 𑀯𑀡𑁆𑀡𑀤𑀸𑀲𑀺𑀬𑁄 𑀞𑀧𑁂𑀢𑁆𑀯𑀸 𑀧𑀜𑁆𑀘 𑀭𑀣𑀲𑀢𑀸𑀦𑀺 𑀅𑀤𑀸𑀲𑀺. ‘‘𑀏𑀢𑀁 𑀦𑁆𑀳𑀸𑀧𑁂𑀦𑁆𑀢𑀺𑀬𑁄 𑀪𑁄𑀚𑁂𑀦𑁆𑀢𑀺𑀬𑁄 𑀅𑀮𑀗𑁆𑀓𑀭𑁄𑀦𑁆𑀢𑀺𑀬𑁄 𑀯𑀺𑀘𑀭𑀣𑀸’’𑀢𑀺 𑀤𑀺𑀬𑀟𑁆𑀠𑀲𑀳𑀲𑁆𑀲𑀧𑀭𑀺𑀘𑀸𑀭𑀺𑀓𑀸𑀬𑁄 𑀅𑀤𑀸𑀲𑀺. 𑀅𑀣𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀫𑀫 𑀥𑀻𑀢𑀼 𑀕𑀸𑀯𑁄 𑀤𑀲𑁆𑀲𑀸𑀫𑀻’’𑀢𑀺. 𑀲𑁄 𑀧𑀼𑀭𑀺𑀲𑁂 𑀆𑀡𑀸𑀧𑁂𑀲𑀺 𑁋 ‘‘𑀕𑀘𑁆𑀙𑀣 𑀪𑀡𑁂 𑀘𑀽𑀴𑀯𑀚𑀲𑁆𑀲 𑀤𑁆𑀯𑀸𑀭𑀁 𑀯𑀺𑀯𑀭𑀺𑀢𑁆𑀯𑀸 𑀢𑀻𑀲𑀼 𑀕𑀸𑀯𑀼𑀢𑁂𑀲𑀼 𑀢𑀺𑀲𑁆𑀲𑁄 𑀪𑁂𑀭𑀺𑀬𑁄 𑀕𑀳𑁂𑀢𑁆𑀯𑀸 𑀢𑀺𑀝𑁆𑀞𑀣, 𑀧𑀼𑀣𑀼𑀮𑀢𑁄 𑀉𑀲𑀪𑀫𑀢𑁆𑀢𑁂 𑀞𑀸𑀦𑁂 𑀉𑀪𑁄𑀲𑀼 𑀧𑀲𑁆𑀲𑁂𑀲𑀼 𑀢𑀺𑀝𑁆𑀞𑀣. 𑀕𑀸𑀯𑀻𑀦𑀁 𑀢𑀢𑁄 𑀧𑀭𑀁 𑀕𑀦𑁆𑀢𑀼𑀁 𑀫𑀸 𑀅𑀤𑀢𑁆𑀣. 𑀏𑀯𑀁 𑀞𑀺𑀢𑀓𑀸𑀮𑁂 𑀪𑁂𑀭𑀺𑀲𑀜𑁆𑀜𑀁 𑀓𑀭𑁂𑀬𑁆𑀬𑀸𑀣𑀸’’𑀢𑀺. 𑀢𑁂 𑀢𑀣𑀸 𑀅𑀓𑀁𑀲𑀼. 𑀢𑁂 𑀕𑀸𑀯𑀻𑀦𑀁 𑀯𑀚𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀕𑀸𑀯𑀼𑀢𑀁 𑀕𑀢𑀓𑀸𑀮𑁂 𑀪𑁂𑀭𑀺𑀲𑀜𑁆𑀜𑀁 𑀅𑀓𑀁𑀲𑀼, 𑀧𑀼𑀦 𑀅𑀟𑁆𑀠𑀬𑁄𑀚𑀦𑀁 𑀕𑀢𑀓𑀸𑀮𑁂 𑀅𑀓𑀁𑀲𑀼. 𑀧𑀼𑀦𑀧𑀺 𑀢𑀺𑀕𑀸𑀯𑀼𑀢𑀁 𑀕𑀢𑀓𑀸𑀮𑁂 𑀪𑁂𑀭𑀺𑀲𑀜𑁆𑀜𑀁 𑀅𑀓𑀁𑀲𑀼, 𑀧𑀼𑀣𑀼𑀮𑀢𑁄 𑀕𑀫𑀦𑀜𑁆𑀘 𑀦𑀺𑀯𑀸𑀭𑁂𑀲𑀼𑀁. 𑀏𑀯𑀁 𑀤𑀻𑀖𑀢𑁄 𑀢𑀺𑀕𑀸𑀯𑀼𑀢𑁂, 𑀧𑀼𑀣𑀼𑀮𑀢𑁄 𑀉𑀲𑀪𑀫𑀢𑁆𑀢𑁂 𑀞𑀸𑀦𑁂 𑀕𑀸𑀯𑀺𑀬𑁄 𑀅𑀜𑁆𑀜𑀫𑀜𑁆𑀜𑀁 𑀦𑀺𑀖𑀁𑀲𑀦𑁆𑀢𑀺𑀬𑁄 𑀅𑀝𑁆𑀞𑀁𑀲𑀼.

𑀫𑀳𑀸𑀲𑁂𑀝𑁆𑀞𑀺 ‘‘𑀫𑀫 𑀥𑀻𑀢𑀼 𑀏𑀢𑁆𑀢𑀓𑀸 𑀕𑀸𑀯𑁄 𑀅𑀮𑀁, 𑀤𑁆𑀯𑀸𑀭𑀁 𑀧𑀺𑀤𑀳𑀣𑀸’’𑀢𑀺 𑀯𑀚𑀤𑁆𑀯𑀸𑀭𑀁 𑀧𑀺𑀤𑀳𑀸𑀧𑁂𑀲𑀺. 𑀤𑁆𑀯𑀸𑀭𑀲𑁆𑀫𑀺𑀁 𑀧𑀺𑀤𑀳𑀺𑀢𑁂 𑀯𑀺𑀲𑀸𑀔𑀸𑀬 𑀧𑀼𑀜𑁆𑀜𑀩𑀮𑁂𑀦 𑀩𑀮𑀯𑀕𑀸𑀯𑁄 𑀘 𑀥𑁂𑀦𑀼𑀬𑁄 𑀘 𑀉𑀧𑁆𑀧𑀢𑀺𑀢𑁆𑀯𑀸 𑀉𑀧𑁆𑀧𑀢𑀺𑀢𑁆𑀯𑀸 𑀦𑀺𑀓𑁆𑀔𑀫𑀺𑀁𑀲𑀼. 𑀫𑀦𑀼𑀲𑁆𑀲𑀸𑀦𑀁 𑀯𑀸𑀭𑁂𑀦𑁆𑀢𑀸𑀦𑀁 𑀯𑀸𑀭𑁂𑀦𑁆𑀢𑀸𑀦𑀫𑁂𑀯 𑀲𑀝𑁆𑀞𑀺𑀲𑀳𑀲𑁆𑀲𑀸 𑀩𑀮𑀯𑀕𑀸𑀯𑁄 𑀘 𑀲𑀝𑁆𑀞𑀺𑀲𑀳𑀲𑁆𑀲𑀸 𑀥𑁂𑀦𑀼𑀬𑁄 𑀘 𑀦𑀺𑀓𑁆𑀔𑀦𑁆𑀢𑀸, 𑀢𑀢𑁆𑀢𑀓𑀸 𑀩𑀮𑀯𑀯𑀘𑁆𑀙𑀸 𑀢𑀸𑀲𑀁 𑀥𑁂𑀦𑀽𑀦𑀁 𑀉𑀲𑀪𑀸 𑀉𑀧𑁆𑀧𑀢𑀺𑀢𑁆𑀯𑀸 𑀅𑀦𑀼𑀩𑀦𑁆𑀥𑀸 𑀅𑀳𑁂𑀲𑀼𑀁. ‘‘𑀓𑀺𑀲𑁆𑀲 𑀧𑀦 𑀦𑀺𑀲𑁆𑀲𑀦𑁆𑀤𑁂𑀦 𑀏𑀯𑀁 𑀕𑀸𑀯𑁄 𑀕𑀢𑀸’’𑀢𑀺? 𑀦𑀺𑀯𑀸𑀭𑁂𑀦𑁆𑀢𑀸𑀦𑀁 𑀦𑀺𑀯𑀸𑀭𑁂𑀦𑁆𑀢𑀸𑀦𑀁 𑀤𑀺𑀦𑁆𑀦𑀤𑀸𑀦𑀲𑁆𑀲. 𑀲𑀸 𑀓𑀺𑀭 𑀓𑀲𑁆𑀲𑀧𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀓𑀸𑀮𑁂 𑀓𑀺𑀓𑀺𑀲𑁆𑀲 𑀭𑀜𑁆𑀜𑁄 𑀲𑀢𑁆𑀢𑀦𑁆𑀦𑀁 𑀥𑀻𑀢𑀸𑀦𑀁 𑀓𑀦𑀺𑀝𑁆𑀞𑀸 𑀲𑀗𑁆𑀖𑀤𑀸𑀲𑀻 𑀦𑀸𑀫 𑀳𑀼𑀢𑁆𑀯𑀸 𑀯𑀻𑀲𑀢𑀺𑀬𑀸 𑀪𑀺𑀓𑁆𑀔𑀼𑀲𑀳𑀲𑁆𑀲𑀸𑀦𑀁 𑀧𑀜𑁆𑀘𑀕𑁄𑀭𑀲𑀤𑀸𑀦𑀁 𑀤𑀤𑀫𑀸𑀦𑀸 𑀣𑁂𑀭𑀸𑀦𑀜𑁆𑀘 𑀤𑀳𑀭𑀸𑀦𑀜𑁆𑀘 𑀲𑀸𑀫𑀡𑁂𑀭𑀸𑀦𑀜𑁆𑀘 𑀧𑀢𑁆𑀢𑀁 𑀧𑀺𑀤𑀳𑀺𑀢𑁆𑀯𑀸, ‘‘𑀅𑀮𑀁, 𑀅𑀮’’𑀦𑁆𑀢𑀺 𑀦𑀺𑀯𑀸𑀭𑁂𑀦𑁆𑀢𑀸𑀦𑀫𑁆𑀧𑀺 ‘‘𑀇𑀤𑀁 𑀫𑀥𑀼𑀭𑀁, 𑀇𑀤𑀁 𑀫𑀦𑀸𑀧’’𑀦𑁆𑀢𑀺 𑀅𑀤𑀸𑀲𑀺. 𑀏𑀯𑀁 𑀢𑀲𑁆𑀲 𑀦𑀺𑀲𑁆𑀲𑀦𑁆𑀤𑁂𑀦 𑀯𑀸𑀭𑀺𑀬𑀫𑀸𑀦𑀸𑀧𑀺 𑀕𑀸𑀯𑁄 𑀦𑀺𑀓𑁆𑀔𑀫𑀺𑀁𑀲𑀼. 𑀲𑁂𑀝𑁆𑀞𑀺𑀦𑀸 𑀏𑀢𑁆𑀢𑀓𑀲𑁆𑀲 𑀥𑀦𑀲𑁆𑀲 𑀤𑀺𑀦𑁆𑀦𑀓𑀸𑀮𑁂 𑀲𑁂𑀝𑁆𑀞𑀺𑀪𑀭𑀺𑀬𑀸 𑀆𑀳 𑁋 ‘‘𑀢𑀼𑀫𑁆𑀳𑁂𑀳𑀺 𑀫𑀬𑁆𑀳𑀁 𑀥𑀻𑀢𑀼 𑀲𑀩𑁆𑀩𑀁 𑀲𑀁𑀯𑀺𑀤𑀳𑀺𑀢𑀁, 𑀯𑁂𑀬𑁆𑀬𑀸𑀯𑀘𑁆𑀘𑀓𑀭𑀸 𑀧𑀦 𑀤𑀸𑀲𑀤𑀸𑀲𑀺𑀬𑁄 𑀦 𑀲𑀁𑀯𑀺𑀤𑀳𑀺𑀢𑀸, 𑀓𑀺𑀁 𑀓𑀸𑀭𑀡𑀸’’𑀢𑀺? ‘‘𑀫𑀫 𑀥𑀻𑀢𑀭𑀺 𑀲𑀲𑀺𑀦𑁂𑀳𑀦𑀺𑀲𑁆𑀲𑀺𑀦𑁂𑀳𑀸𑀦𑀁 𑀚𑀸𑀦𑀦𑀢𑁆𑀣𑀁. 𑀅𑀳𑀜𑁆𑀳𑀺 𑀢𑀸𑀬 𑀲𑀤𑁆𑀥𑀺𑀁 𑀆𑀕𑀘𑁆𑀙𑀫𑀸𑀦𑀓𑁂 𑀕𑀻𑀯𑀸𑀬 𑀕𑀳𑁂𑀢𑁆𑀯𑀸 𑀦 𑀧𑀳𑀺𑀡𑀸𑀫𑀺, 𑀬𑀸𑀦𑀁 𑀆𑀭𑀼𑀬𑁆𑀳 𑀕𑀫𑀦𑀓𑀸𑀮𑁂𑀬𑁂𑀯 𑀏𑀢𑀸𑀬 𑀲𑀤𑁆𑀥𑀺𑀁 𑀕𑀦𑁆𑀢𑀼𑀓𑀸𑀫𑀸 𑀕𑀘𑁆𑀙𑀦𑁆𑀢𑀼, 𑀫𑀸 𑀅𑀕𑀦𑁆𑀢𑀼𑀓𑀸𑀫𑀸𑀢𑀺 𑀯𑀓𑁆𑀔𑀸𑀫𑀻’’𑀢𑀺 𑀆𑀳.

𑀅𑀣 ‘‘𑀲𑁆𑀯𑁂 𑀫𑀫 𑀥𑀻𑀢𑀸 𑀕𑀫𑀺𑀲𑁆𑀲𑀢𑀻’’𑀢𑀺 𑀕𑀩𑁆𑀪𑁂 𑀦𑀺𑀲𑀺𑀦𑁆𑀦𑁄 𑀥𑀻𑀢𑀭𑀁 𑀲𑀫𑀻𑀧𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸, ‘‘𑀅𑀫𑁆𑀫, 𑀧𑀢𑀺𑀓𑀼𑀮𑁂 𑀯𑀲𑀦𑁆𑀢𑀺𑀬𑀸 𑀦𑀸𑀫 𑀇𑀫𑀜𑁆𑀘 𑀇𑀫𑀜𑁆𑀘 𑀆𑀘𑀸𑀭𑀁 𑀭𑀓𑁆𑀔𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀑𑀯𑀸𑀤𑀫𑀤𑀸𑀲𑀺. 𑀅𑀬𑀫𑁆𑀧𑀺 𑀫𑀺𑀕𑀸𑀭𑀲𑁂𑀝𑁆𑀞𑀺 𑀅𑀦𑀦𑁆𑀢𑀭𑀕𑀩𑁆𑀪𑁂 𑀦𑀺𑀲𑀺𑀦𑁆𑀦𑁄 𑀥𑀦𑀜𑁆𑀘𑀬𑀲𑁂𑀝𑁆𑀞𑀺𑀦𑁄 𑀑𑀯𑀸𑀤𑀁 𑀅𑀲𑁆𑀲𑁄𑀲𑀺. 𑀲𑁄𑀧𑀺 𑀲𑁂𑀝𑁆𑀞𑀺 𑀥𑀻𑀢𑀭𑀁 𑀏𑀯𑀁 𑀑𑀯𑀤𑀺 𑁋

‘‘𑀅𑀫𑁆𑀫, 𑀲𑀲𑀼𑀭𑀓𑀼𑀮𑁂 𑀯𑀲𑀦𑁆𑀢𑀺𑀬𑀸 𑀦𑀸𑀫 𑀅𑀦𑁆𑀢𑁄𑀅𑀕𑁆𑀕𑀺 𑀩𑀳𑀺 𑀦 𑀦𑀻𑀳𑀭𑀺𑀢𑀩𑁆𑀩𑁄, 𑀩𑀳𑀺𑀅𑀕𑁆𑀕𑀺 𑀅𑀦𑁆𑀢𑁄 𑀦 𑀧𑀯𑁂𑀲𑁂𑀢𑀩𑁆𑀩𑁄, 𑀤𑀤𑀦𑁆𑀢𑀲𑁆𑀲𑁂𑀯 𑀤𑀸𑀢𑀩𑁆𑀩𑀁, 𑀅𑀤𑀤𑀦𑁆𑀢𑀲𑁆𑀲 𑀦 𑀤𑀸𑀢𑀩𑁆𑀩𑀁, 𑀤𑀤𑀦𑁆𑀢𑀲𑁆𑀲𑀸𑀧𑀺 𑀅𑀤𑀤𑀦𑁆𑀢𑀲𑁆𑀲𑀸𑀧𑀺 𑀤𑀸𑀢𑀩𑁆𑀩𑀁, 𑀲𑀼𑀔𑀁 𑀦𑀺𑀲𑀻𑀤𑀺𑀢𑀩𑁆𑀩𑀁, 𑀲𑀼𑀔𑀁 𑀪𑀼𑀜𑁆𑀚𑀺𑀢𑀩𑁆𑀩𑀁, 𑀲𑀼𑀔𑀁 𑀦𑀺𑀧𑀚𑁆𑀚𑀺𑀢𑀩𑁆𑀩𑀁, 𑀅𑀕𑁆𑀕𑀺 𑀧𑀭𑀺𑀘𑀭𑀺𑀢𑀩𑁆𑀩𑁄, 𑀅𑀦𑁆𑀢𑁄𑀤𑁂𑀯𑀢𑀸 𑀦𑀫𑀲𑁆𑀲𑀺𑀢𑀩𑁆𑀩𑀸’’𑀢𑀺.

𑀇𑀫𑀁 𑀤𑀲𑀯𑀺𑀥𑀁 𑀑𑀯𑀸𑀤𑀁 𑀤𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀲𑀩𑁆𑀩𑀸 𑀲𑁂𑀦𑀺𑀬𑁄 𑀲𑀦𑁆𑀦𑀺𑀧𑀸𑀢𑁂𑀢𑁆𑀯𑀸 𑀭𑀸𑀚𑀲𑁂𑀦𑀸𑀬 𑀫𑀚𑁆𑀛𑁂 𑀅𑀝𑁆𑀞 𑀓𑀼𑀝𑀼𑀫𑁆𑀩𑀺𑀓𑁂 𑀧𑀸𑀝𑀺𑀪𑁄𑀕𑁂 𑀕𑀳𑁂𑀢𑁆𑀯𑀸, ‘‘𑀲𑀘𑁂 𑀫𑁂 𑀕𑀢𑀝𑁆𑀞𑀸𑀦𑁂 𑀥𑀻𑀢𑀼 𑀤𑁄𑀲𑁄 𑀉𑀧𑁆𑀧𑀚𑁆𑀚𑀢𑀺, 𑀢𑀼𑀫𑁆𑀳𑁂𑀳𑀺 𑀲𑁄𑀥𑁂𑀢𑀩𑁆𑀩𑁄’’𑀢𑀺 𑀯𑀢𑁆𑀯𑀸 𑀦𑀯𑀓𑁄𑀝𑀺𑀅𑀕𑁆𑀖𑀦𑀓𑁂𑀦 𑀫𑀳𑀸𑀮𑀢𑀸𑀧𑀲𑀸𑀥𑀦𑁂𑀦 𑀥𑀻𑀢𑀭𑀁 𑀧𑀲𑀸𑀥𑁂𑀢𑁆𑀯𑀸 𑀦𑁆𑀳𑀸𑀦𑀘𑀼𑀡𑁆𑀡𑀫𑀽𑀮𑀓𑀁 𑀘𑀢𑀼𑀧𑀡𑁆𑀡𑀸𑀲𑀓𑁄𑀝𑀺𑀥𑀦𑀁 𑀤𑀢𑁆𑀯𑀸 𑀬𑀸𑀦𑀁 𑀆𑀭𑁄𑀧𑁂𑀢𑁆𑀯𑀸 𑀲𑀸𑀓𑁂𑀢𑀲𑁆𑀲 𑀲𑀸𑀫𑀦𑁆𑀢𑀸 𑀅𑀢𑁆𑀢𑀦𑁄 𑀲𑀦𑁆𑀢𑀓𑁂𑀲𑀼 𑀅𑀦𑀼𑀭𑀸𑀥𑀧𑀼𑀭𑀫𑀢𑁆𑀢𑁂𑀲𑀼 𑀘𑀼𑀤𑁆𑀤𑀲𑀲𑀼 𑀪𑀢𑁆𑀢𑀕𑀸𑀫𑁂𑀲𑀼 𑀪𑁂𑀭𑀺𑀁 𑀘𑀭𑀸𑀧𑁂𑀲𑀺 𑁋 ‘‘𑀫𑀫 𑀥𑀻𑀢𑀭𑀸 𑀲𑀤𑁆𑀥𑀺𑀁 𑀕𑀦𑁆𑀢𑀼𑀓𑀸𑀫𑀸 𑀕𑀘𑁆𑀙𑀦𑁆𑀢𑀽’’𑀢𑀺. 𑀢𑁂 𑀲𑀤𑁆𑀤𑀁 𑀲𑀼𑀢𑁆𑀯𑀸𑀯 𑁋 ‘‘𑀅𑀫𑁆𑀳𑀸𑀓𑀁 𑀅𑀬𑁆𑀬𑀸𑀬 𑀕𑀫𑀦𑀓𑀸𑀮𑁂 𑀓𑀺𑀁 𑀅𑀫𑁆𑀳𑀸𑀓𑀁 𑀇𑀥𑀸’’𑀢𑀺 𑀘𑀼𑀤𑁆𑀤𑀲 𑀕𑀸𑀫𑀓𑀸 𑀓𑀺𑀜𑁆𑀘𑀺 𑀅𑀲𑁂𑀲𑁂𑀢𑁆𑀯𑀸 𑀦𑀺𑀓𑁆𑀔𑀫𑀺𑀁𑀲𑀼? 𑀥𑀦𑀜𑁆𑀘𑀬𑀲𑁂𑀝𑁆𑀞𑀺𑀧𑀺 𑀭𑀜𑁆𑀜𑁄 𑀘 𑀫𑀺𑀕𑀸𑀭𑀲𑁂𑀝𑁆𑀞𑀺𑀦𑁄 𑀘 𑀲𑀓𑁆𑀓𑀸𑀭𑀁 𑀓𑀢𑁆𑀯𑀸 𑀣𑁄𑀓𑀁 𑀅𑀦𑀼𑀕𑀦𑁆𑀢𑁆𑀯𑀸 𑀢𑁂𑀳𑀺 𑀲𑀤𑁆𑀥𑀺𑀁 𑀥𑀻𑀢𑀭𑀁 𑀉𑀬𑁆𑀬𑁄𑀚𑁂𑀲𑀺.

𑀫𑀺𑀕𑀸𑀭𑀲𑁂𑀝𑁆𑀞𑀺𑀧𑀺 𑀲𑀩𑁆𑀩𑀧𑀘𑁆𑀙𑀢𑁄 𑀬𑀸𑀦𑀓𑁂 𑀦𑀺𑀲𑀻𑀤𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑁄 𑀩𑀮𑀓𑀸𑀬𑀁 𑀤𑀺𑀲𑁆𑀯𑀸, ‘‘𑀓𑁂 𑀦𑀸𑀫𑁂𑀢𑁂’’𑀢𑀺 𑀧𑀼𑀘𑁆𑀙𑀺. ‘‘𑀲𑀼𑀡𑀺𑀲𑀸𑀬 𑀯𑁄 𑀯𑁂𑀬𑁆𑀬𑀸𑀯𑀘𑁆𑀘𑀓𑀭𑀸 𑀤𑀸𑀲𑀺𑀤𑀸𑀲𑀸’’𑀢𑀺. ‘‘𑀏𑀢𑁆𑀢𑀓𑁂 𑀓𑁄 𑀧𑁄𑀲𑁂𑀲𑁆𑀲’’𑀢𑀺? ‘‘𑀧𑁄𑀣𑁂𑀢𑁆𑀯𑀸 𑀢𑁂 𑀧𑀮𑀸𑀧𑁂𑀣, 𑀅𑀧𑀮𑀸𑀬𑀦𑁆𑀢𑁂 𑀇𑀢𑁄 𑀤𑀡𑁆𑀟𑀁 𑀓𑀭𑁄𑀣𑀸’’𑀢𑀺. 𑀯𑀺𑀲𑀸𑀔𑀸 𑀧𑀦 ‘‘𑀅𑀧𑁂𑀣, 𑀫𑀸 𑀯𑀸𑀭𑁂𑀣, 𑀩𑀮𑀫𑁂𑀯 𑀩𑀮𑀲𑁆𑀲 𑀪𑀢𑁆𑀢𑀁 𑀤𑀲𑁆𑀲𑀢𑀻’’𑀢𑀺 𑀆𑀳. 𑀲𑁂𑀝𑁆𑀞𑀺 𑀏𑀯𑀁 𑀯𑀼𑀢𑁆𑀢𑁂𑀧𑀺, ‘‘𑀅𑀫𑁆𑀫, 𑀦𑀢𑁆𑀣𑀺 𑀅𑀫𑁆𑀳𑀸𑀓𑀁 𑀏𑀢𑁂𑀳𑀺 𑀅𑀢𑁆𑀣𑁄, 𑀓𑁄 𑀏𑀢𑁂 𑀧𑁄𑀲𑁂𑀲𑁆𑀲𑀢𑀻’’𑀢𑀺 𑀮𑁂𑀟𑁆𑀟𑀼𑀤𑀡𑁆𑀟𑀸𑀤𑀻𑀳𑀺 𑀧𑁄𑀣𑁂𑀢𑁆𑀯𑀸 𑀧𑀮𑀸𑀧𑁂𑀢𑁆𑀯𑀸 𑀲𑁂𑀲𑀓𑁂 ‘‘𑀅𑀮𑀁 𑀅𑀫𑁆𑀳𑀸𑀓𑀁 𑀏𑀢𑁆𑀢𑀓𑁂𑀳𑀻’’𑀢𑀺 𑀕𑀳𑁂𑀢𑁆𑀯𑀸 𑀧𑀸𑀬𑀸𑀲𑀺. 𑀅𑀣 𑀯𑀺𑀲𑀸𑀔𑀸 𑀲𑀸𑀯𑀢𑁆𑀣𑀺𑀦𑀕𑀭𑀤𑁆𑀯𑀸𑀭𑀁 𑀲𑀫𑁆𑀧𑀢𑁆𑀢𑀓𑀸𑀮𑁂 𑀘𑀺𑀦𑁆𑀢𑁂𑀲𑀺 𑁋 ‘‘𑀧𑀝𑀺𑀘𑁆𑀙𑀦𑁆𑀦𑀬𑀸𑀦𑀲𑁆𑀫𑀺𑀁 𑀦𑀼 𑀔𑁄 𑀦𑀺𑀲𑀻𑀤𑀺𑀢𑁆𑀯𑀸 𑀧𑀯𑀺𑀲𑀺𑀲𑁆𑀲𑀸𑀫𑀺, 𑀉𑀤𑀸𑀳𑀼 𑀭𑀣𑁂 𑀞𑀢𑁆𑀯𑀸’’𑀢𑀺. 𑀅𑀣𑀲𑁆𑀲𑀸 𑀏𑀢𑀤𑀳𑁄𑀲𑀺 𑁋 ‘‘𑀧𑀝𑀺𑀘𑁆𑀙𑀦𑁆𑀦𑀬𑀸𑀦𑁂𑀦 𑀫𑁂 𑀧𑀯𑀺𑀲𑀦𑁆𑀢𑀺𑀬𑀸 𑀫𑀳𑀸𑀮𑀢𑀸𑀧𑀲𑀸𑀥𑀦𑀲𑁆𑀲 𑀯𑀺𑀲𑁂𑀲𑁄 𑀦 𑀧𑀜𑁆𑀜𑀸𑀬𑀺𑀲𑁆𑀲𑀢𑀻’’𑀢𑀺. 𑀲𑀸 𑀲𑀓𑀮𑀦𑀕𑀭𑀲𑁆𑀲 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀦𑁆𑀢𑀻 𑀭𑀣𑁂 𑀞𑀢𑁆𑀯𑀸 𑀦𑀕𑀭𑀁 𑀧𑀸𑀯𑀺𑀲𑀺. 𑀲𑀸𑀯𑀢𑁆𑀣𑀺𑀯𑀸𑀲𑀺𑀦𑁄 𑀯𑀺𑀲𑀸𑀔𑀸𑀬 𑀲𑀫𑁆𑀧𑀢𑁆𑀢𑀺𑀁 𑀤𑀺𑀲𑁆𑀯𑀸, ‘‘𑀏𑀲𑀸 𑀓𑀺𑀭 𑀯𑀺𑀲𑀸𑀔𑀸 𑀦𑀸𑀫, 𑀏𑀯𑀭𑀽𑀧𑀸 𑀅𑀬𑀁 𑀲𑀫𑁆𑀧𑀢𑁆𑀢𑀺 𑀏𑀢𑀺𑀲𑁆𑀲𑀸𑀯 𑀅𑀦𑀼𑀘𑁆𑀙𑀯𑀺𑀓𑀸’’𑀢𑀺 𑀆𑀳𑀁𑀲𑀼. 𑀇𑀢𑀺 𑀲𑀸 𑀫𑀳𑀸𑀲𑀫𑁆𑀧𑀢𑁆𑀢𑀺𑀬𑀸 𑀲𑁂𑀝𑁆𑀞𑀺𑀦𑁄 𑀕𑁂𑀳𑀁 𑀧𑀸𑀯𑀺𑀲𑀺. 𑀕𑀢𑀤𑀺𑀯𑀲𑁂 𑀘𑀲𑁆𑀲𑀸 𑀲𑀓𑀮𑀦𑀕𑀭𑀯𑀸𑀲𑀺𑀦𑁄 ‘‘𑀅𑀫𑁆𑀳𑀸𑀓𑀁 𑀥𑀦𑀜𑁆𑀘𑀬𑀲𑁂𑀝𑁆𑀞𑀺 𑀅𑀢𑁆𑀢𑀦𑁄 𑀦𑀕𑀭𑀁 𑀲𑀫𑁆𑀧𑀢𑁆𑀢𑀸𑀦𑀁 𑀫𑀳𑀸𑀲𑀓𑁆𑀓𑀸𑀭𑀁 𑀅𑀓𑀸𑀲𑀻’’𑀢𑀺 𑀬𑀣𑀸𑀲𑀢𑁆𑀢𑀺 𑀬𑀣𑀸𑀩𑀮𑀁 𑀧𑀡𑁆𑀡𑀸𑀓𑀸𑀭𑀁 𑀧𑀳𑀺𑀡𑀺𑀁𑀲𑀼. 𑀯𑀺𑀲𑀸𑀔𑀸 𑀧𑀳𑀺𑀢𑀧𑀳𑀺𑀢𑀁 𑀧𑀡𑁆𑀡𑀸𑀓𑀸𑀭𑀁 𑀢𑀲𑁆𑀫𑀺𑀁𑀬𑁂𑀯 𑀦𑀕𑀭𑁂 𑀅𑀜𑁆𑀜𑀫𑀜𑁆𑀜𑁂𑀲𑀼 𑀓𑀼𑀮𑁂𑀲𑀼 𑀲𑀩𑁆𑀩𑀢𑁆𑀣𑀓𑀫𑁂𑀯 𑀤𑀸𑀧𑁂𑀲𑀺. 𑀇𑀢𑀺 𑀲𑀸 ‘‘𑀇𑀤𑀁 𑀫𑀬𑁆𑀳𑀁 𑀫𑀸𑀢𑀼 𑀤𑁂𑀣, 𑀇𑀤𑀁 𑀫𑀬𑁆𑀳𑀁 𑀧𑀺𑀢𑀼 𑀤𑁂𑀣, 𑀇𑀤𑀁 𑀫𑀬𑁆𑀳𑀁 𑀪𑀸𑀢𑀼 𑀤𑁂𑀣, 𑀇𑀤𑀁 𑀫𑀬𑁆𑀳𑀁 𑀪𑀕𑀺𑀦𑀺𑀬𑀸 𑀤𑁂𑀣𑀸’’𑀢𑀺 𑀢𑁂𑀲𑀁 𑀢𑁂𑀲𑀁 𑀯𑀬𑀸𑀦𑀼𑀭𑀽𑀧𑀁 𑀧𑀺𑀬𑀯𑀘𑀦𑀁 𑀯𑀢𑁆𑀯𑀸 𑀧𑀡𑁆𑀡𑀸𑀓𑀸𑀭𑀁 𑀧𑁂𑀲𑁂𑀦𑁆𑀢𑀻 𑀲𑀓𑀮𑀦𑀕𑀭𑀯𑀸𑀲𑀺𑀦𑁄 𑀜𑀸𑀢𑀓𑁂 𑀯𑀺𑀬 𑀅𑀓𑀸𑀲𑀺. 𑀅𑀣𑀲𑁆𑀲𑀸 𑀭𑀢𑁆𑀢𑀺𑀪𑀸𑀕𑀲𑀫𑀦𑀦𑁆𑀢𑀭𑁂 𑀆𑀚𑀜𑁆𑀜𑀯𑀴𑀯𑀸𑀬 𑀕𑀩𑁆𑀪𑀯𑀼𑀝𑁆𑀞𑀸𑀦𑀁 𑀅𑀳𑁄𑀲𑀺. 𑀲𑀸 𑀤𑀸𑀲𑀻𑀳𑀺 𑀤𑀡𑁆𑀟𑀤𑀻𑀧𑀺𑀓𑀸 𑀕𑀸𑀳𑀸𑀧𑁂𑀢𑁆𑀯𑀸 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀯𑀴𑀯𑀁 𑀉𑀡𑁆𑀳𑁄𑀤𑀓𑁂𑀦 𑀦𑁆𑀳𑀸𑀧𑁂𑀢𑁆𑀯𑀸 𑀢𑁂𑀮𑁂𑀦 𑀫𑀓𑁆𑀔𑀸𑀧𑁂𑀢𑁆𑀯𑀸 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀫𑁂𑀯 𑀅𑀕𑀫𑀸𑀲𑀺.

𑀫𑀺𑀕𑀸𑀭𑀲𑁂𑀝𑁆𑀞𑀺𑀧𑀺 𑀧𑀼𑀢𑁆𑀢𑀲𑁆𑀲 𑀆𑀯𑀸𑀳𑀫𑀗𑁆𑀕𑀮𑀁 𑀓𑀭𑁄𑀦𑁆𑀢𑁄 𑀥𑀼𑀭𑀯𑀺𑀳𑀸𑀭𑁂 𑀯𑀲𑀦𑁆𑀢𑀫𑁆𑀧𑀺 𑀢𑀣𑀸𑀕𑀢𑀁 𑀅𑀫𑀦𑀲𑀺𑀓𑀭𑀺𑀢𑁆𑀯𑀸 𑀤𑀻𑀖𑀭𑀢𑁆𑀢𑀁 𑀦𑀕𑁆𑀕𑀲𑀫𑀡𑀓𑁂𑀲𑀼 𑀧𑀢𑀺𑀝𑁆𑀞𑀺𑀢𑁂𑀦 𑀧𑁂𑀫𑁂𑀦 𑀘𑁄𑀤𑀺𑀬𑀫𑀸𑀦𑁄 ‘‘𑀫𑀬𑁆𑀳𑀁 𑀅𑀬𑁆𑀬𑀸𑀦𑀫𑁆𑀧𑀺 𑀲𑀓𑁆𑀓𑀸𑀭𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀏𑀓𑀤𑀺𑀯𑀲𑀁 𑀅𑀦𑁂𑀓𑀲𑀢𑁂𑀲𑀼 𑀦𑀯𑀪𑀸𑀚𑀦𑁂𑀲𑀼 𑀦𑀺𑀭𑀼𑀤𑀓𑀧𑀸𑀬𑀸𑀲𑀁 𑀧𑀘𑀸𑀧𑁂𑀢𑁆𑀯𑀸 𑀧𑀜𑁆𑀘𑀲𑀢𑁂 𑀅𑀘𑁂𑀮𑀓𑁂 𑀦𑀺𑀫𑀦𑁆𑀢𑀸𑀧𑁂𑀢𑁆𑀯𑀸 𑀅𑀦𑁆𑀢𑁄𑀕𑁂𑀳𑀁 𑀧𑀯𑁂𑀲𑁂𑀢𑁆𑀯𑀸, ‘‘𑀆𑀕𑀘𑁆𑀙𑀢𑀼 𑀫𑁂 𑀲𑀼𑀡𑀺𑀲𑀸, 𑀅𑀭𑀳𑀦𑁆𑀢𑁂 𑀯𑀦𑁆𑀤𑀢𑀽’’𑀢𑀺 𑀯𑀺𑀲𑀸𑀔𑀸𑀬 𑀲𑀸𑀲𑀦𑀁 𑀧𑀳𑀺𑀡𑀺. 𑀲𑀸 ‘‘𑀅𑀭𑀳𑀦𑁆𑀢𑁄’’𑀢𑀺 𑀯𑀘𑀦𑀁 𑀲𑀼𑀢𑁆𑀯𑀸 𑀲𑁄𑀢𑀸𑀧𑀦𑁆𑀦𑀸 𑀅𑀭𑀺𑀬𑀲𑀸𑀯𑀺𑀓𑀸 𑀳𑀝𑁆𑀞𑀢𑀼𑀝𑁆𑀞𑀸 𑀳𑀼𑀢𑁆𑀯𑀸 𑀢𑁂𑀲𑀁 𑀪𑁄𑀚𑀦𑀝𑁆𑀞𑀸𑀦𑀁 𑀆𑀕𑀦𑁆𑀢𑁆𑀯𑀸 𑀢𑁂 𑀑𑀮𑁄𑀓𑁂𑀢𑁆𑀯𑀸, ‘‘𑀏𑀯𑀭𑀽𑀧𑀸 𑀳𑀺𑀭𑁄𑀢𑁆𑀢𑀧𑁆𑀧𑀯𑀺𑀭𑀳𑀺𑀢𑀸 𑀅𑀭𑀳𑀦𑁆𑀢𑀸 𑀦𑀸𑀫 𑀦 𑀳𑁄𑀦𑁆𑀢𑀺, 𑀓𑀲𑁆𑀫𑀸 𑀫𑀁 𑀲𑀲𑀼𑀭𑁄 𑀧𑀓𑁆𑀓𑁄𑀲𑀸𑀧𑁂𑀲𑀻’’𑀢𑀺, ‘‘𑀥𑀻, 𑀥𑀻’’𑀢𑀺 𑀲𑁂𑀝𑁆𑀞𑀺𑀁 𑀕𑀭𑀳𑀺𑀢𑁆𑀯𑀸 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀫𑁂𑀯 𑀕𑀢𑀸. 𑀅𑀘𑁂𑀮𑀓𑀸 𑀢𑀁 𑀤𑀺𑀲𑁆𑀯𑀸 𑀲𑀩𑁆𑀩𑁂 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀲𑁂𑀝𑁆𑀞𑀺𑀁 𑀕𑀭𑀳𑀺𑀁𑀲𑀼 𑁋 ‘‘𑀓𑀺𑀁 𑀢𑁆𑀯𑀁, 𑀕𑀳𑀧𑀢𑀺, 𑀅𑀜𑁆𑀜𑀁 𑀦𑀸𑀮𑀢𑁆𑀣, 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀲𑀸𑀯𑀺𑀓𑀁 𑀫𑀳𑀸𑀓𑀸𑀴𑀓𑀡𑁆𑀡𑀺𑀁 𑀇𑀥 𑀧𑀯𑁂𑀲𑁂𑀲𑀺, 𑀯𑁂𑀕𑁂𑀦 𑀦𑀁 𑀇𑀫𑀲𑁆𑀫𑀸 𑀕𑁂𑀳𑀸 𑀦𑀺𑀓𑁆𑀓𑀟𑁆𑀠𑀸𑀧𑁂𑀳𑀻’’𑀢𑀺. 𑀲𑁄 ‘‘𑀦 𑀲𑀓𑁆𑀓𑀸 𑀫𑀬𑀸 𑀇𑀫𑁂𑀲𑀁 𑀯𑀘𑀦𑀫𑀢𑁆𑀢𑁂𑀦𑁂𑀯 𑀦𑀺𑀓𑁆𑀓𑀟𑁆𑀠𑀸𑀧𑁂𑀢𑀼𑀁, 𑀫𑀳𑀸𑀓𑀼𑀮𑀲𑁆𑀲 𑀲𑀸 𑀥𑀻𑀢𑀸’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸, ‘‘𑀅𑀬𑁆𑀬𑀸, 𑀤𑀳𑀭𑀸 𑀦𑀸𑀫 𑀚𑀸𑀦𑀺𑀢𑁆𑀯𑀸 𑀯𑀸 𑀅𑀚𑀸𑀦𑀺𑀢𑁆𑀯𑀸 𑀯𑀸 𑀓𑀭𑁂𑀬𑁆𑀬𑀼𑀁, 𑀢𑀼𑀫𑁆𑀳𑁂 𑀢𑀼𑀡𑁆𑀳𑀻 𑀳𑁄𑀣𑀸’’𑀢𑀺 𑀢𑁂 𑀉𑀬𑁆𑀬𑁄𑀚𑁂𑀢𑁆𑀯𑀸 𑀲𑀬𑀁 𑀫𑀳𑀸𑀭𑀳𑁂 𑀆𑀲𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀲𑀼𑀯𑀡𑁆𑀡𑀧𑀸𑀢𑀺𑀬𑀁 𑀦𑀺𑀭𑀼𑀤𑀓𑀁 𑀫𑀥𑀼𑀧𑀸𑀬𑀸𑀲𑀁 𑀧𑀭𑀺𑀪𑀼𑀜𑁆𑀚𑀺.

𑀢𑀲𑁆𑀫𑀺𑀁 𑀲𑀫𑀬𑁂 𑀏𑀓𑁄 𑀧𑀺𑀡𑁆𑀟𑀧𑀸𑀢𑀺𑀓𑀢𑁆𑀣𑁂𑀭𑁄 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑁄 𑀢𑀁 𑀦𑀺𑀯𑁂𑀲𑀦𑀁 𑀧𑀸𑀯𑀺𑀲𑀺. 𑀯𑀺𑀲𑀸𑀔𑀸 𑀲𑀲𑀼𑀭𑀁 𑀩𑀻𑀚𑀬𑀫𑀸𑀦𑀸 𑀞𑀺𑀢𑀸 𑀢𑀁 𑀤𑀺𑀲𑁆𑀯𑀸 ‘‘𑀲𑀲𑀼𑀭𑀲𑁆𑀲 𑀆𑀘𑀺𑀓𑁆𑀔𑀺𑀢𑀼𑀁 𑀅𑀬𑀼𑀢𑁆𑀢’’𑀦𑁆𑀢𑀺 𑀬𑀣𑀸 𑀲𑁄 𑀣𑁂𑀭𑀁 𑀧𑀲𑁆𑀲𑀢𑀺, 𑀏𑀯𑀁 𑀅𑀧𑀕𑀦𑁆𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀲𑁄 𑀧𑀦 𑀩𑀸𑀮𑁄 𑀣𑁂𑀭𑀁 𑀤𑀺𑀲𑁆𑀯𑀸𑀧𑀺 𑀅𑀧𑀲𑁆𑀲𑀦𑁆𑀢𑁄 𑀯𑀺𑀬 𑀳𑀼𑀢𑁆𑀯𑀸 𑀅𑀥𑁄𑀫𑀼𑀔𑁄 𑀪𑀼𑀜𑁆𑀚𑀢𑁂𑀯. 𑀯𑀺𑀲𑀸𑀔𑀸 ‘‘𑀣𑁂𑀭𑀁 𑀤𑀺𑀲𑁆𑀯𑀸𑀧𑀺 𑀫𑁂 𑀲𑀲𑀼𑀭𑁄 𑀲𑀜𑁆𑀜𑀁 𑀦 𑀓𑀭𑁄𑀢𑀻’’𑀢𑀺 𑀜𑀢𑁆𑀯𑀸, ‘‘𑀅𑀢𑀺𑀘𑁆𑀙𑀣, 𑀪𑀦𑁆𑀢𑁂, 𑀫𑀬𑁆𑀳𑀁 𑀲𑀲𑀼𑀭𑁄 𑀧𑀼𑀭𑀸𑀡𑀁 𑀔𑀸𑀤𑀢𑀻’’𑀢𑀺 𑀆𑀳. 𑀲𑁄 𑀦𑀺𑀕𑀡𑁆𑀞𑁂𑀳𑀺 𑀓𑀣𑀺𑀢𑀓𑀸𑀮𑁂 𑀅𑀥𑀺𑀯𑀸𑀲𑁂𑀢𑁆𑀯𑀸𑀧𑀺 ‘‘𑀧𑀼𑀭𑀸𑀡𑀁 𑀔𑀸𑀤𑀢𑀻’’𑀢𑀺 𑀯𑀼𑀢𑁆𑀢𑀓𑁆𑀔𑀡𑁂𑀬𑁂𑀯 𑀳𑀢𑁆𑀣𑀁 𑀅𑀧𑀦𑁂𑀢𑁆𑀯𑀸, ‘‘𑀇𑀫𑀁 𑀧𑀸𑀬𑀸𑀲𑀁 𑀇𑀢𑁄 𑀦𑀻𑀳𑀭𑀣, 𑀏𑀢𑀁 𑀇𑀫𑀲𑁆𑀫𑀸 𑀕𑁂𑀳𑀸 𑀦𑀺𑀓𑁆𑀓𑀟𑁆𑀠𑀣, 𑀅𑀬𑀁 𑀫𑀁 𑀏𑀯𑀭𑀽𑀧𑁂 𑀫𑀗𑁆𑀕𑀮𑀓𑀸𑀮𑁂 𑀅𑀲𑀼𑀘𑀺𑀔𑀸𑀤𑀓𑀁 𑀦𑀸𑀫 𑀓𑀭𑁄𑀢𑀻’’𑀢𑀺 𑀆𑀳. 𑀢𑀲𑁆𑀫𑀺𑀁 𑀔𑁄 𑀧𑀦 𑀦𑀺𑀯𑁂𑀲𑀦𑁂 𑀲𑀩𑁆𑀩𑁂𑀧𑀺 𑀤𑀸𑀲𑀓𑀫𑁆𑀫𑀓𑀭𑀸 𑀯𑀺𑀲𑀸𑀔𑀸𑀬 𑀲𑀦𑁆𑀢𑀓𑀸𑀯, 𑀓𑁄 𑀦𑀁 𑀳𑀢𑁆𑀣𑁂 𑀯𑀸 𑀧𑀸𑀤𑁂 𑀯𑀸 𑀕𑀡𑁆𑀳𑀺𑀲𑁆𑀲𑀢𑀺, 𑀫𑀼𑀔𑁂𑀦 𑀓𑀣𑁂𑀢𑀼𑀁 𑀲𑀫𑀢𑁆𑀣𑁄𑀧𑀺 𑀦𑀢𑁆𑀣𑀺. 𑀯𑀺𑀲𑀸𑀔𑀸 𑀲𑀲𑀼𑀭𑀲𑁆𑀲 𑀓𑀣𑀁 𑀲𑀼𑀢𑁆𑀯𑀸 𑀆𑀳 𑁋 ‘‘𑀢𑀸𑀢, 𑀦 𑀏𑀢𑁆𑀢𑀓𑁂𑀦𑁂𑀯 𑀫𑀬𑀁 𑀦𑀺𑀓𑁆𑀔𑀫𑀸𑀫, 𑀦𑀸𑀳𑀁 𑀢𑀼𑀫𑁆𑀳𑁂𑀳𑀺 𑀉𑀤𑀓𑀢𑀺𑀢𑁆𑀣𑀢𑁄 𑀓𑀼𑀫𑁆𑀪𑀤𑀸𑀲𑀻 𑀯𑀺𑀬 𑀆𑀦𑀻𑀢𑀸, 𑀥𑀭𑀫𑀸𑀦𑀓𑀫𑀸𑀢𑀸𑀧𑀺𑀢𑀽𑀦𑀁 𑀥𑀻𑀢𑀭𑁄 𑀦𑀸𑀫 𑀦 𑀏𑀢𑁆𑀢𑀓𑁂𑀦𑁂𑀯 𑀦𑀺𑀓𑁆𑀔𑀫𑀦𑁆𑀢𑀺, 𑀏𑀢𑁂𑀦𑁂𑀯 𑀫𑁂 𑀓𑀸𑀭𑀡𑁂𑀦 𑀧𑀺𑀢𑀸 𑀇𑀥𑀸𑀕𑀫𑀦𑀓𑀸𑀮𑁂 𑀅𑀝𑁆𑀞 𑀓𑀼𑀝𑀼𑀫𑁆𑀩𑀺𑀓𑁂 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘𑀲𑀘𑁂 𑀫𑁂 𑀥𑀻𑀢𑀼 𑀤𑁄𑀲𑁄 𑀉𑀧𑁆𑀧𑀚𑁆𑀚𑀢𑀺, 𑀲𑁄𑀥𑁂𑀬𑁆𑀬𑀸𑀣𑀸’𑀢𑀺 𑀯𑀢𑁆𑀯𑀸 𑀫𑀁 𑀢𑁂𑀲𑀁 𑀳𑀢𑁆𑀣𑁂 𑀞𑀧𑁂𑀲𑀺, 𑀢𑁂 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀫𑀬𑁆𑀳𑀁 𑀤𑁄𑀲𑀸𑀤𑁄𑀲𑀁 𑀲𑁄𑀥𑀸𑀧𑁂𑀣𑀸’’𑀢𑀺.

𑀲𑁂𑀝𑁆𑀞𑀺 ‘‘𑀓𑀮𑁆𑀬𑀸𑀡𑀁 𑀏𑀲𑀸 𑀓𑀣𑁂𑀢𑀻’’𑀢𑀺 𑀅𑀝𑁆𑀞 𑀓𑀼𑀝𑀼𑀫𑁆𑀩𑀺𑀓𑁂 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸, ‘‘𑀅𑀬𑀁 𑀤𑀸𑀭𑀺𑀓𑀸 𑀫𑀗𑁆𑀕𑀮𑀓𑀸𑀮𑁂 𑀦𑀺𑀲𑀻𑀤𑀺𑀢𑁆𑀯𑀸 𑀲𑀼𑀯𑀡𑁆𑀡𑀧𑀸𑀢𑀺𑀬𑀁 𑀦𑀺𑀭𑀼𑀤𑀓𑀧𑀸𑀬𑀸𑀲𑀁 𑀧𑀭𑀺𑀪𑀼𑀜𑁆𑀚𑀦𑁆𑀢𑀁 𑀫𑀁 ‘𑀅𑀲𑀼𑀘𑀺𑀔𑀸𑀤𑀓𑁄’𑀢𑀺 𑀯𑀤𑀢𑀻’’𑀢𑀺 𑀆𑀳, ‘‘𑀇𑀫𑀺𑀲𑁆𑀲𑀸 𑀤𑁄𑀲𑀁 𑀆𑀭𑁄𑀧𑁂𑀢𑁆𑀯𑀸 𑀇𑀫𑀁 𑀕𑁂𑀳𑀢𑁄 𑀦𑀺𑀓𑁆𑀓𑀟𑁆𑀠𑀣𑀸’’𑀢𑀺. ‘‘𑀏𑀯𑀁 𑀓𑀺𑀭, 𑀅𑀫𑁆𑀫𑀸’’𑀢𑀺. 𑀦𑀸𑀳𑀁 𑀏𑀯𑀁 𑀯𑀤𑀸𑀫𑀺, 𑀏𑀓𑀲𑁆𑀫𑀺𑀁 𑀧𑀦 𑀧𑀺𑀡𑁆𑀟𑀧𑀸𑀢𑀺𑀓𑀢𑁆𑀣𑁂𑀭𑁂 𑀖𑀭𑀤𑁆𑀯𑀸𑀭𑁂 𑀞𑀺𑀢𑁂 𑀲𑀲𑀼𑀭𑁄 𑀫𑁂 𑀅𑀧𑁆𑀧𑁄𑀤𑀓𑀁 𑀫𑀥𑀼𑀧𑀸𑀬𑀸𑀲𑀁 𑀧𑀭𑀺𑀪𑀼𑀜𑁆𑀚𑀦𑁆𑀢𑁄 𑀢𑀁 𑀦 𑀫𑀦𑀲𑀺𑀓𑀭𑁄𑀢𑀺, 𑀅𑀳𑀁 ‘‘𑀫𑀬𑁆𑀳𑀁 𑀲𑀲𑀼𑀭𑁄 𑀇𑀫𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂 𑀧𑀼𑀜𑁆𑀜𑀁 𑀦 𑀓𑀭𑁄𑀢𑀺, 𑀧𑀼𑀭𑀸𑀡𑀧𑀼𑀜𑁆𑀜𑀫𑁂𑀯 𑀔𑀸𑀤𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸, ‘‘𑀅𑀢𑀺𑀘𑁆𑀙𑀣, 𑀪𑀦𑁆𑀢𑁂, 𑀫𑀬𑁆𑀳𑀁 𑀲𑀲𑀼𑀭𑁄 𑀧𑀼𑀭𑀸𑀡𑀁 𑀔𑀸𑀤𑀢𑀻’’𑀢𑀺 𑀅𑀯𑀘𑀁, ‘‘𑀏𑀢𑁆𑀣 𑀫𑁂 𑀓𑁄 𑀤𑁄𑀲𑁄’’𑀢𑀺? ‘‘𑀅𑀬𑁆𑀬, 𑀇𑀥 𑀤𑁄𑀲𑁄 𑀦𑀢𑁆𑀣𑀺, 𑀅𑀫𑁆𑀳𑀸𑀓𑀁 𑀥𑀻𑀢𑀸 𑀬𑀼𑀢𑁆𑀢𑀁 𑀓𑀣𑁂𑀢𑀺, 𑀢𑁆𑀯𑀁 𑀓𑀲𑁆𑀫𑀸 𑀓𑀼𑀚𑁆𑀛𑀲𑀻’’𑀢𑀺? ‘‘𑀅𑀬𑁆𑀬𑀸, 𑀏𑀲 𑀢𑀸𑀯 𑀤𑁄𑀲𑁄 𑀫𑀸 𑀳𑁄𑀢𑀼, 𑀅𑀬𑀁 𑀧𑀦 𑀏𑀓𑀤𑀺𑀯𑀲𑀁 𑀫𑀚𑁆𑀛𑀺𑀫𑀬𑀸𑀫𑁂 𑀤𑀸𑀲𑀻𑀧𑀭𑀺𑀯𑀼𑀢𑀸 𑀧𑀘𑁆𑀙𑀸𑀕𑁂𑀳𑀁 𑀅𑀕𑀫𑀸𑀲𑀻’’𑀢𑀺. ‘‘𑀏𑀯𑀁 𑀓𑀺𑀭, 𑀅𑀫𑁆𑀫𑀸’’𑀢𑀺. ‘‘𑀢𑀸𑀢𑀸, 𑀦𑀸𑀳𑀁 𑀅𑀜𑁆𑀜𑁂𑀦 𑀓𑀸𑀭𑀡𑁂𑀦 𑀕𑀢𑀸, 𑀇𑀫𑀲𑁆𑀫𑀺𑀁 𑀧𑀦 𑀕𑁂𑀳𑁂 𑀆𑀚𑀸𑀦𑁂𑀬𑁆𑀬𑀯𑀴𑀯𑀸𑀬 𑀯𑀺𑀚𑀸𑀢𑀸𑀬 𑀲𑀜𑁆𑀜𑀫𑁆𑀧𑀺 𑀅𑀓𑀢𑁆𑀯𑀸 𑀦𑀺𑀲𑀻𑀤𑀺𑀢𑀼𑀁 𑀦𑀸𑀫 𑀅𑀬𑀼𑀢𑁆𑀢’’𑀦𑁆𑀢𑀺 𑀤𑀡𑁆𑀟𑀤𑀻𑀧𑀺𑀓𑀸 𑀕𑀸𑀳𑀸𑀧𑁂𑀢𑁆𑀯𑀸 𑀉𑀡𑁆𑀳𑁄𑀤𑀓𑀸𑀤𑀻𑀦𑀺𑀧𑀺 𑀕𑀸𑀳𑀸𑀧𑁂𑀢𑁆𑀯𑀸 𑀤𑀸𑀲𑀻𑀳𑀺 𑀲𑀤𑁆𑀥𑀺𑀁 𑀕𑀦𑁆𑀢𑁆𑀯𑀸 𑀯𑀴𑀯𑀸𑀬 𑀯𑀺𑀚𑀸𑀢𑀧𑀭𑀺𑀳𑀸𑀭𑀁 𑀓𑀸𑀭𑀸𑀧𑁂𑀲𑀺𑀁, ‘‘𑀏𑀢𑁆𑀣 𑀫𑁂 𑀓𑁄 𑀤𑁄𑀲𑁄’’𑀢𑀺? ‘‘𑀅𑀬𑁆𑀬, 𑀇𑀥 𑀤𑁄𑀲𑁄 𑀦𑀢𑁆𑀣𑀺, 𑀅𑀫𑁆𑀳𑀸𑀓𑀁 𑀥𑀻𑀢𑀸 𑀢𑀯 𑀕𑁂𑀳𑁂 𑀤𑀸𑀲𑀻𑀳𑀺𑀧𑀺 𑀅𑀓𑀢𑁆𑀢𑀩𑁆𑀩𑀬𑀼𑀢𑁆𑀢𑀓𑀁 𑀓𑀫𑁆𑀫𑀁 𑀓𑀭𑁄𑀢𑀺, 𑀢𑁆𑀯𑀁 𑀓𑀺𑀁 𑀏𑀢𑁆𑀣 𑀤𑁄𑀲𑀁 𑀧𑀲𑁆𑀲𑀲𑀻’’𑀢𑀺?

𑀅𑀬𑁆𑀬𑀸, 𑀇𑀥𑀸𑀧𑀺 𑀢𑀸𑀯 𑀤𑁄𑀲𑁄 𑀫𑀸 𑀳𑁄𑀢𑀼, 𑀇𑀫𑀺𑀲𑁆𑀲𑀸 𑀧𑀦 𑀧𑀺𑀢𑀸 𑀇𑀥𑀸𑀕𑀫𑀦𑀓𑀸𑀮𑁂 𑀇𑀫𑀁 𑀑𑀯𑀤𑀦𑁆𑀢𑁄 𑀕𑀼𑀬𑁆𑀳𑁂 𑀧𑀝𑀺𑀘𑁆𑀙𑀦𑁆𑀦𑁂 𑀤𑀲 𑀑𑀯𑀸𑀤𑁂 𑀅𑀤𑀸𑀲𑀺, 𑀢𑁂𑀲𑀁 𑀅𑀢𑁆𑀣𑀁 𑀦 𑀚𑀸𑀦𑀸𑀫𑀺, 𑀢𑁂𑀲𑀁 𑀫𑁂 𑀅𑀢𑁆𑀣𑀁 𑀓𑀣𑁂𑀢𑀼. 𑀇𑀫𑀺𑀲𑁆𑀲𑀸 𑀧𑀦 𑀧𑀺𑀢𑀸 ‘‘𑀅𑀦𑁆𑀢𑁄𑀅𑀕𑁆𑀕𑀺 𑀩𑀳𑀺 𑀦 𑀦𑀻𑀳𑀭𑀺𑀢𑀩𑁆𑀩𑁄’’𑀢𑀺 𑀆𑀳, ‘‘𑀲𑀓𑁆𑀓𑀸 𑀦𑀼 𑀔𑁄 𑀅𑀫𑁆𑀳𑁂𑀳𑀺 𑀉𑀪𑀢𑁄 𑀧𑀝𑀺𑀯𑀺𑀲𑁆𑀲𑀓𑀕𑁂𑀳𑀸𑀦𑀁 𑀅𑀕𑁆𑀕𑀺𑀁 𑀅𑀤𑀢𑁆𑀯𑀸 𑀯𑀲𑀺𑀢𑀼’’𑀦𑁆𑀢𑀺? ‘‘𑀏𑀯𑀁 𑀓𑀺𑀭, 𑀅𑀫𑁆𑀫𑀸’’𑀢𑀺. ‘‘𑀢𑀸𑀢𑀸, 𑀫𑀬𑁆𑀳𑀁 𑀧𑀺𑀢𑀸 𑀦 𑀏𑀢𑀁 𑀲𑀦𑁆𑀥𑀸𑀬 𑀓𑀣𑁂𑀲𑀺. 𑀇𑀤𑀁 𑀧𑀦 𑀲𑀦𑁆𑀥𑀸𑀬 𑀓𑀣𑁂𑀲𑀺 𑁋 ‘𑀅𑀫𑁆𑀫, 𑀢𑀯 𑀲𑀲𑁆𑀲𑀼𑀲𑀲𑀼𑀭𑀲𑀸𑀫𑀺𑀓𑀸𑀦𑀁 𑀅𑀕𑀼𑀡𑀁 𑀤𑀺𑀲𑁆𑀯𑀸 𑀩𑀳𑀺 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀕𑁂𑀳𑁂 𑀞𑀢𑁆𑀯𑀸 𑀫𑀸 𑀓𑀣𑁂𑀲𑀺. 𑀏𑀯𑀭𑀽𑀧𑁄 𑀳𑀺 𑀅𑀕𑁆𑀕𑀺𑀲𑀤𑀺𑀲𑁄 𑀅𑀕𑁆𑀕𑀺 𑀦𑀸𑀫 𑀦𑀢𑁆𑀣𑀻’’’𑀢𑀺.

𑀅𑀬𑁆𑀬𑀸, 𑀏𑀢𑀁 𑀢𑀸𑀯 𑀏𑀯𑀁 𑀳𑁄𑀢𑀼, 𑀇𑀫𑀺𑀲𑁆𑀲𑀸 𑀧𑀦 𑀧𑀺𑀢𑀸 ‘‘𑀩𑀸𑀳𑀺𑀭𑀢𑁄 𑀅𑀕𑁆𑀕𑀺 𑀦 𑀅𑀦𑁆𑀢𑁄 𑀧𑀯𑁂𑀲𑁂𑀢𑀩𑁆𑀩𑁄’’𑀢𑀺 𑀆𑀳, ‘‘𑀓𑀺𑀁 𑀲𑀓𑁆𑀓𑀸 𑀅𑀫𑁆𑀳𑁂𑀳𑀺 𑀅𑀦𑁆𑀢𑁄 𑀅𑀕𑁆𑀕𑀺𑀫𑁆𑀳𑀺 𑀦𑀺𑀩𑁆𑀩𑀼𑀢𑁂 𑀩𑀸𑀳𑀺𑀭𑀢𑁄 𑀅𑀕𑁆𑀕𑀺𑀁 𑀅𑀦𑀸𑀳𑀭𑀺𑀢𑀼’’𑀦𑁆𑀢𑀺? ‘‘𑀏𑀯𑀁 𑀓𑀺𑀭, 𑀅𑀫𑁆𑀫𑀸’’𑀢𑀺. 𑀢𑀸𑀢𑀸, 𑀫𑀬𑁆𑀳𑀁 𑀧𑀺𑀢𑀸 𑀦 𑀏𑀢𑀁 𑀲𑀦𑁆𑀥𑀸𑀬 𑀓𑀣𑁂𑀲𑀺, 𑀇𑀤𑀁 𑀧𑀦 𑀲𑀦𑁆𑀥𑀸𑀬 𑀓𑀣𑁂𑀲𑀺 𑁋 𑀲𑀘𑁂 𑀧𑀝𑀺𑀯𑀺𑀲𑁆𑀲𑀓𑀕𑁂𑀳𑁂𑀲𑀼 𑀇𑀢𑁆𑀣𑀺𑀬𑁄 𑀯𑀸 𑀧𑀼𑀭𑀺𑀲𑀸 𑀯𑀸 𑀲𑀲𑁆𑀲𑀼𑀲𑀲𑀼𑀭𑀲𑀸𑀫𑀺𑀓𑀸𑀦𑀁 𑀅𑀕𑀼𑀡𑀁 𑀓𑀣𑁂𑀦𑁆𑀢𑀺, 𑀢𑁂𑀳𑀺 𑀓𑀣𑀺𑀢𑀁 𑀆𑀳𑀭𑀺𑀢𑁆𑀯𑀸 ‘‘𑀅𑀲𑀼𑀓𑁄 𑀦𑀸𑀫 𑀢𑀼𑀫𑁆𑀳𑀸𑀓𑀁 𑀏𑀯𑀜𑁆𑀘 𑀏𑀯𑀜𑁆𑀘 𑀅𑀕𑀼𑀡𑀁 𑀓𑀣𑁂𑀢𑀻’’𑀢𑀺 𑀧𑀼𑀦 𑀫𑀸 𑀓𑀣𑁂𑀬𑁆𑀬𑀸𑀲𑀺. ‘‘𑀏𑀢𑁂𑀦 𑀳𑀺 𑀅𑀕𑁆𑀕𑀺𑀦𑀸 𑀲𑀤𑀺𑀲𑁄 𑀅𑀕𑁆𑀕𑀺 𑀦𑀸𑀫 𑀦𑀢𑁆𑀣𑀻’’𑀢𑀺. 𑀏𑀯𑀁 𑀇𑀫𑀲𑁆𑀫𑀺𑀫𑁆𑀧𑀺 𑀓𑀸𑀭𑀡𑁂 𑀲𑀸 𑀦𑀺𑀤𑁆𑀤𑁄𑀲𑀸𑀯 𑀅𑀳𑁄𑀲𑀺. 𑀬𑀣𑀸 𑀘 𑀏𑀢𑁆𑀣, 𑀏𑀯𑀁 𑀲𑁂𑀲𑁂𑀲𑀼𑀧𑀺.

𑀢𑁂𑀲𑀼 𑀧𑀦 𑀅𑀬𑀫𑀥𑀺𑀧𑁆𑀧𑀸𑀬𑁄 𑁋 𑀬𑀫𑁆𑀧𑀺 𑀳𑀺 𑀢𑀲𑁆𑀲𑀸 𑀧𑀺𑀢𑀭𑀸 ‘‘𑀬𑁂 𑀤𑀤𑀦𑁆𑀢𑀺, 𑀢𑁂𑀲𑀁𑀬𑁂𑀯 𑀤𑀸𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀁 ‘‘𑀬𑀸𑀘𑀺𑀢𑀓𑀁 𑀉𑀧𑀓𑀭𑀡𑀁 𑀕𑀳𑁂𑀢𑁆𑀯𑀸 𑀬𑁂 𑀧𑀝𑀺𑀤𑁂𑀦𑁆𑀢𑀺, 𑀢𑁂𑀲𑀜𑁆𑀜𑁂𑀯 𑀤𑀸𑀢𑀩𑁆𑀩’’𑀦𑁆𑀢𑀺 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁.

‘‘𑀬𑁂 𑀦 𑀤𑁂𑀦𑁆𑀢𑀺, 𑀢𑁂𑀲𑀁 𑀦 𑀤𑀸𑀢𑀩𑁆𑀩’’𑀦𑁆𑀢𑀺 𑀇𑀤𑀫𑁆𑀧𑀺 𑀬𑁂 𑀬𑀸𑀘𑀺𑀢𑀓𑀁 𑀕𑀳𑁂𑀢𑁆𑀯𑀸 𑀦 𑀧𑀝𑀺𑀤𑁂𑀦𑁆𑀢𑀺, 𑀢𑁂𑀲𑀁 𑀦 𑀤𑀸𑀢𑀩𑁆𑀩𑀦𑁆𑀢𑀺 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁.

‘‘𑀤𑀤𑀦𑁆𑀢𑀲𑁆𑀲𑀸𑀧𑀺 𑀅𑀤𑀤𑀦𑁆𑀢𑀲𑁆𑀲𑀸𑀧𑀺 𑀤𑀸𑀢𑀩𑁆𑀩’’𑀦𑁆𑀢𑀺 𑀇𑀤𑀁 𑀧𑀦 𑀤𑀮𑀺𑀤𑁆𑀤𑁂𑀲𑀼 𑀜𑀸𑀢𑀺𑀫𑀺𑀢𑁆𑀢𑁂𑀲𑀼 𑀲𑀫𑁆𑀧𑀢𑁆𑀢𑁂𑀲𑀼 𑀢𑁂 𑀧𑀝𑀺𑀤𑀸𑀢𑀼𑀁 𑀲𑀓𑁆𑀓𑁄𑀦𑁆𑀢𑀼 𑀯𑀸 𑀫𑀸 𑀯𑀸, 𑀢𑁂𑀲𑀁 𑀤𑀸𑀢𑀼𑀫𑁂𑀯 𑀯𑀝𑁆𑀝𑀢𑀻𑀢𑀺 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁.

‘‘𑀲𑀼𑀔𑀁 𑀦𑀺𑀲𑀻𑀤𑀺𑀢𑀩𑁆𑀩’’𑀦𑁆𑀢𑀺 𑀇𑀤𑀫𑁆𑀧𑀺 𑀲𑀲𑁆𑀲𑀼𑀲𑀲𑀼𑀭𑀲𑀸𑀫𑀺𑀓𑁂 𑀤𑀺𑀲𑁆𑀯𑀸 𑀯𑀼𑀝𑁆𑀞𑀸𑀢𑀩𑁆𑀩𑀝𑁆𑀞𑀸𑀦𑁂 𑀦𑀺𑀲𑀻𑀤𑀺𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁.

‘‘𑀲𑀼𑀔𑀁 𑀪𑀼𑀜𑁆𑀚𑀺𑀢𑀩𑁆𑀩’’𑀦𑁆𑀢𑀺 𑀇𑀤𑀁 𑀧𑀦 𑀲𑀲𑁆𑀲𑀼𑀲𑀲𑀼𑀭𑀲𑀸𑀫𑀺𑀓𑁂𑀳𑀺 𑀧𑀼𑀭𑁂𑀢𑀭𑀁 𑀅𑀪𑀼𑀜𑁆𑀚𑀺𑀢𑁆𑀯𑀸 𑀢𑁂 𑀧𑀭𑀺𑀯𑀺𑀲𑀺𑀢𑁆𑀯𑀸 𑀲𑀩𑁆𑀩𑁂𑀳𑀺 𑀮𑀤𑁆𑀥𑀸𑀮𑀤𑁆𑀥𑀁 𑀜𑀢𑁆𑀯𑀸 𑀧𑀘𑁆𑀙𑀸 𑀲𑀬𑀁 𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁.

‘‘𑀲𑀼𑀔𑀁 𑀦𑀺𑀧𑀚𑁆𑀚𑀺𑀢𑀩𑁆𑀩’’𑀦𑁆𑀢𑀺 𑀇𑀤𑀫𑁆𑀧𑀺 𑀲𑀲𑁆𑀲𑀼𑀲𑀲𑀼𑀭𑀲𑀸𑀫𑀺𑀓𑁂𑀳𑀺 𑀧𑀼𑀭𑁂𑀢𑀭𑀁 𑀲𑀬𑀦𑀁 𑀆𑀭𑀼𑀬𑁆𑀳 𑀦 𑀦𑀺𑀧𑀚𑁆𑀚𑀺𑀢𑀩𑁆𑀩𑀁, 𑀢𑁂𑀲𑀁 𑀓𑀢𑁆𑀢𑀩𑁆𑀩𑀬𑀼𑀢𑁆𑀢𑀓𑀁 𑀯𑀢𑁆𑀢𑀧𑀝𑀺𑀯𑀢𑁆𑀢𑀁 𑀓𑀢𑁆𑀯𑀸 𑀧𑀘𑁆𑀙𑀸 𑀲𑀬𑀁 𑀦𑀺𑀧𑀚𑁆𑀚𑀺𑀢𑀼𑀁 𑀬𑀼𑀢𑁆𑀢𑀦𑁆𑀢𑀺 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁.

‘‘𑀅𑀕𑁆𑀕𑀺 𑀧𑀭𑀺𑀘𑀭𑀺𑀢𑀩𑁆𑀩𑁄’’𑀢𑀺 𑀇𑀤𑀁 𑀧𑀦 𑀲𑀲𑁆𑀲𑀼𑀫𑁆𑀧𑀺 𑀲𑀲𑀼𑀭𑀫𑁆𑀧𑀺 𑀲𑀸𑀫𑀺𑀓𑀫𑁆𑀧𑀺 𑀅𑀕𑁆𑀕𑀺𑀓𑁆𑀔𑀦𑁆𑀥𑀁 𑀯𑀺𑀬 𑀉𑀭𑀕𑀭𑀸𑀚𑀸𑀦𑀁 𑀯𑀺𑀬 𑀘 𑀓𑀢𑁆𑀯𑀸 𑀧𑀲𑁆𑀲𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁.

‘‘𑀅𑀦𑁆𑀢𑁄𑀤𑁂𑀯𑀢𑀸 𑀦𑀫𑀲𑁆𑀲𑀺𑀢𑀩𑁆𑀩𑀸’’𑀢𑀺 𑀇𑀤𑀫𑁆𑀧𑀺 𑀲𑀲𑁆𑀲𑀼𑀜𑁆𑀘 𑀲𑀲𑀼𑀭𑀜𑁆𑀘 𑀲𑀸𑀫𑀺𑀓𑀜𑁆𑀘 𑀤𑁂𑀯𑀢𑀸 𑀯𑀺𑀬 𑀓𑀢𑁆𑀯𑀸 𑀤𑀝𑁆𑀞𑀼𑀁 𑀯𑀝𑁆𑀝𑀢𑀻𑀢𑀺 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀏𑀯𑀁 𑀲𑁂𑀝𑁆𑀞𑀺 𑀇𑀫𑁂𑀲𑀁 𑀤𑀲𑀑𑀯𑀸𑀤𑀸𑀦𑀁 𑀅𑀢𑁆𑀣𑀁 𑀲𑀼𑀢𑁆𑀯𑀸 𑀧𑀝𑀺𑀯𑀘𑀦𑀁 𑀅𑀧𑀲𑁆𑀲𑀦𑁆𑀢𑁄 𑀅𑀥𑁄𑀫𑀼𑀔𑁄 𑀦𑀺𑀲𑀻𑀤𑀺.

𑀅𑀣 𑀦𑀁 𑀓𑀼𑀝𑀼𑀫𑁆𑀩𑀺𑀓𑀸 ‘‘𑀓𑀺𑀁 𑀲𑁂𑀝𑁆𑀞𑀺 𑀅𑀜𑁆𑀜𑁄𑀧𑀺 𑀅𑀫𑁆𑀳𑀸𑀓𑀁 𑀥𑀻𑀢𑀼 𑀤𑁄𑀲𑁄 𑀅𑀢𑁆𑀣𑀻’’𑀢𑀺 𑀧𑀼𑀘𑁆𑀙𑀺𑀁𑀲𑀼. ‘‘𑀦𑀢𑁆𑀣𑀺, 𑀅𑀬𑁆𑀬𑀸’’𑀢𑀺. ‘‘𑀅𑀣 𑀓𑀲𑁆𑀫𑀸 𑀦𑀁 𑀦𑀺𑀤𑁆𑀤𑁄𑀲𑀁 𑀅𑀓𑀸𑀭𑀡𑁂𑀦 𑀕𑁂𑀳𑀸 𑀦𑀺𑀓𑁆𑀓𑀟𑁆𑀠𑀸𑀧𑁂𑀲𑀻’’𑀢𑀺 𑀏𑀯𑀁 𑀯𑀼𑀢𑁆𑀢𑁂 𑀯𑀺𑀲𑀸𑀔𑀸 𑀆𑀳 𑁋 ‘‘𑀢𑀸𑀢𑀸, 𑀓𑀺𑀜𑁆𑀘𑀸𑀧𑀺 𑀫𑀬𑁆𑀳𑀁 𑀲𑀲𑀼𑀭𑀲𑁆𑀲 𑀯𑀘𑀦𑁂𑀦 𑀧𑀞𑀫𑀫𑁂𑀯 𑀕𑀫𑀦𑀁 𑀦 𑀬𑀼𑀢𑁆𑀢𑀁, 𑀧𑀺𑀢𑀸 𑀧𑀦 𑀫𑁂 𑀆𑀕𑀫𑀦𑀓𑀸𑀮𑁂 𑀫𑀫 𑀤𑁄𑀲𑀲𑁄𑀥𑀦𑀢𑁆𑀣𑀸𑀬 𑀫𑀁 𑀢𑀼𑀫𑁆𑀳𑀸𑀓𑀁 𑀳𑀢𑁆𑀣𑁂 𑀞𑀧𑁂𑀲𑀺, 𑀢𑀼𑀫𑁆𑀳𑁂𑀳𑀺 𑀘 𑀫𑁂 𑀦𑀺𑀤𑁆𑀤𑁄𑀲𑀪𑀸𑀯𑁄 𑀜𑀸𑀢𑁄, 𑀇𑀤𑀸𑀦𑀺 𑀘 𑀫𑀬𑁆𑀳𑀁 𑀕𑀦𑁆𑀢𑀼𑀁 𑀬𑀼𑀢𑁆𑀢’’𑀦𑁆𑀢𑀺 𑀤𑀸𑀲𑀺𑀤𑀸𑀲𑁂 ‘‘𑀬𑀸𑀦𑀸𑀤𑀻𑀳𑀺 𑀲𑀚𑁆𑀚𑀸𑀧𑁂𑀣𑀸’’𑀢𑀺 𑀆𑀡𑀸𑀧𑁂𑀲𑀺. 𑀅𑀣 𑀦𑀁 𑀲𑁂𑀝𑁆𑀞𑀺 𑀓𑀼𑀝𑀼𑀫𑁆𑀩𑀺𑀓𑁂 𑀕𑀳𑁂𑀢𑁆𑀯𑀸 ‘‘𑀅𑀫𑁆𑀫, 𑀫𑀬𑀸 𑀅𑀚𑀸𑀦𑀺𑀢𑁆𑀯𑀸𑀯 𑀓𑀣𑀺𑀢𑀁, 𑀔𑀫𑀸𑀳𑀺 𑀫𑁂’’𑀢𑀺 𑀆𑀳. ‘‘𑀢𑀸𑀢, 𑀢𑀼𑀫𑁆𑀳𑀸𑀓𑀁 𑀔𑀫𑀺𑀢𑀩𑁆𑀩𑀁 𑀢𑀸𑀯 𑀔𑀫𑀸𑀫𑀺, 𑀅𑀳𑀁 𑀧𑀦 𑀩𑀼𑀤𑁆𑀥𑀲𑀸𑀲𑀦𑁂 𑀅𑀯𑁂𑀘𑁆𑀘𑀧𑁆𑀧𑀲𑀦𑁆𑀦𑀲𑁆𑀲 𑀓𑀼𑀮𑀲𑁆𑀲 𑀥𑀻𑀢𑀸, 𑀦 𑀫𑀬𑀁 𑀯𑀺𑀦𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀯𑀢𑁆𑀢𑀸𑀫, 𑀲𑀘𑁂 𑀫𑀫 𑀭𑀼𑀘𑀺𑀬𑀸 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀝𑀺𑀚𑀕𑁆𑀕𑀺𑀢𑀼𑀁 𑀮𑀪𑀸𑀫𑀺, 𑀯𑀲𑀺𑀲𑁆𑀲𑀸𑀫𑀻’’𑀢𑀺. ‘‘𑀅𑀫𑁆𑀫, 𑀢𑁆𑀯𑀁 𑀬𑀣𑀸𑀭𑀼𑀘𑀺𑀬𑀸 𑀢𑀯 𑀲𑀫𑀡𑁂 𑀧𑀝𑀺𑀚𑀕𑁆𑀕𑀸’’𑀢𑀺 𑀆𑀳.

𑀯𑀺𑀲𑀸𑀔𑀸 𑀤𑀲𑀩𑀮𑀁 𑀦𑀺𑀫𑀦𑁆𑀢𑀸𑀧𑁂𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀦𑀺𑀯𑁂𑀲𑀦𑀁 𑀧𑀯𑁂𑀲𑁂𑀲𑀺. 𑀦𑀕𑁆𑀕𑀲𑀫𑀡𑀸𑀧𑀺 𑀲𑀢𑁆𑀣𑀼 𑀫𑀺𑀕𑀸𑀭𑀲𑁂𑀝𑁆𑀞𑀺𑀦𑁄 𑀕𑁂𑀳𑀁 𑀕𑀫𑀦𑀪𑀸𑀯𑀁 𑀲𑀼𑀢𑁆𑀯𑀸 𑀕𑀦𑁆𑀢𑁆𑀯𑀸 𑀕𑁂𑀳𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀦𑀺𑀲𑀻𑀤𑀺𑀁𑀲𑀼. 𑀯𑀺𑀲𑀸𑀔𑀸 𑀤𑀓𑁆𑀔𑀺𑀡𑁄𑀤𑀓𑀁 𑀤𑀢𑁆𑀯𑀸 ‘‘𑀲𑀩𑁆𑀩𑁄 𑀲𑀓𑁆𑀓𑀸𑀭𑁄 𑀧𑀝𑀺𑀬𑀸𑀤𑀺𑀢𑁄, 𑀲𑀲𑀼𑀭𑁄 𑀫𑁂 𑀆𑀕𑀦𑁆𑀢𑁆𑀯𑀸 𑀤𑀲𑀩𑀮𑀁 𑀧𑀭𑀺𑀯𑀺𑀲𑀢𑀽’’𑀢𑀺 𑀲𑀸𑀲𑀦𑀁 𑀧𑁂𑀲𑁂𑀲𑀺. 𑀅𑀣 𑀦𑀁 𑀕𑀦𑁆𑀢𑀼𑀓𑀸𑀫𑀁 𑀆𑀚𑀻𑀯𑀓𑀸 ‘‘𑀫𑀸 𑀔𑁄 𑀢𑁆𑀯𑀁, 𑀕𑀳𑀧𑀢𑀺, 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀲𑀦𑁆𑀢𑀺𑀓𑀁 𑀕𑀘𑁆𑀙𑀸’’𑀢𑀺 𑀦𑀺𑀯𑀸𑀭𑁂𑀲𑀼𑀁. 𑀲𑁄 ‘‘𑀲𑀼𑀡𑁆𑀳𑀸 𑀫𑁂 𑀲𑀬𑀫𑁂𑀯 𑀧𑀭𑀺𑀯𑀺𑀲𑀢𑀽’’𑀢𑀺 𑀲𑀸𑀲𑀦𑀁 𑀧𑀳𑀺𑀡𑀺. 𑀲𑀸 𑀩𑀼𑀤𑁆𑀥𑀧𑁆𑀧𑀫𑀼𑀔𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀭𑀺𑀯𑀺𑀲𑀺𑀢𑁆𑀯𑀸 𑀦𑀺𑀝𑁆𑀞𑀺𑀢𑁂 𑀪𑀢𑁆𑀢𑀓𑀺𑀘𑁆𑀘𑁂 𑀧𑀼𑀦 𑀲𑀸𑀲𑀦𑀁 𑀧𑁂𑀲𑁂𑀲𑀺 𑁋 ‘‘𑀲𑀲𑀼𑀭𑁄 𑀫𑁂 𑀆𑀕𑀦𑁆𑀢𑁆𑀯𑀸 𑀥𑀫𑁆𑀫𑀓𑀣𑀁 𑀲𑀼𑀡𑀸𑀢𑀽’’𑀢𑀺. 𑀅𑀣 𑀦𑀁 ‘‘𑀇𑀤𑀸𑀦𑀺 𑀅𑀕𑀫𑀦𑀁 𑀦𑀸𑀫 𑀅𑀢𑀺𑀯𑀺𑀬 𑀅𑀬𑀼𑀢𑁆𑀢’’𑀦𑁆𑀢𑀺 𑀥𑀫𑁆𑀫𑀁 𑀲𑁄𑀢𑀼𑀓𑀸𑀫𑀢𑀸𑀬 𑀕𑀘𑁆𑀙𑀦𑁆𑀢𑀁 𑀧𑀼𑀦 𑀢𑁂 𑀆𑀳𑀁𑀲𑀼 𑁋 ‘‘𑀢𑁂𑀦 𑀳𑀺 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀥𑀫𑁆𑀫𑀁 𑀲𑀼𑀡𑀦𑁆𑀢𑁄 𑀩𑀳𑀺𑀲𑀸𑀡𑀺𑀬𑀸 𑀦𑀺𑀲𑀻𑀤𑀺𑀢𑁆𑀯𑀸 𑀲𑀼𑀡𑀸𑀳𑀻’’𑀢𑀺. 𑀧𑀼𑀭𑁂𑀢𑀭𑀫𑁂𑀯𑀲𑁆𑀲 𑀕𑀦𑁆𑀢𑁆𑀯𑀸 𑀲𑀸𑀡𑀺𑀁 𑀧𑀭𑀺𑀓𑁆𑀔𑀺𑀧𑀺𑀁𑀲𑀼. 𑀲𑁄 𑀕𑀦𑁆𑀢𑁆𑀯𑀸 𑀩𑀳𑀺𑀲𑀸𑀡𑀺𑀬𑀁 𑀦𑀺𑀲𑀻𑀤𑀺. 𑀲𑀢𑁆𑀣𑀸 ‘‘𑀢𑁆𑀯𑀁 𑀩𑀳𑀺𑀲𑀸𑀡𑀺𑀬𑀁 𑀯𑀸 𑀦𑀺𑀲𑀻𑀤, 𑀧𑀭𑀓𑀼𑀝𑁆𑀝𑁂 𑀯𑀸 𑀧𑀭𑀲𑁂𑀮𑁂 𑀯𑀸 𑀧𑀭𑀘𑀓𑁆𑀓𑀯𑀸𑀴𑁂 𑀯𑀸 𑀧𑀦 𑀦𑀺𑀲𑀻𑀤, 𑀅𑀳𑀁 𑀩𑀼𑀤𑁆𑀥𑁄 𑀦𑀸𑀫 𑀲𑀓𑁆𑀓𑁄𑀫𑀺 𑀢𑀁 𑀫𑀫 𑀲𑀤𑁆𑀤𑀁 𑀲𑀸𑀯𑁂𑀢𑀼’’𑀦𑁆𑀢𑀺 𑀫𑀳𑀸𑀚𑀫𑁆𑀩𑀼𑀁 𑀔𑀦𑁆𑀥𑁂 𑀕𑀳𑁂𑀢𑁆𑀯𑀸 𑀘𑀸𑀮𑁂𑀦𑁆𑀢𑁄 𑀯𑀺𑀬 𑀅𑀫𑀢𑀯𑀲𑁆𑀲𑀁 𑀯𑀲𑁆𑀲𑁂𑀦𑁆𑀢𑁄 𑀯𑀺𑀬 𑀘 𑀥𑀫𑁆𑀫𑀁 𑀤𑁂𑀲𑁂𑀢𑀼𑀁 𑀅𑀦𑀼𑀧𑀼𑀩𑁆𑀩𑀺𑀁 𑀓𑀣𑀁 𑀆𑀭𑀪𑀺.