𑁧𑁨. 𑀕𑀭𑀳𑀤𑀺𑀦𑁆𑀦𑀯𑀢𑁆𑀣𑀼

𑀬𑀣𑀸 𑀲𑀗𑁆𑀓𑀸𑀭𑀝𑁆𑀞𑀸𑀦𑀲𑁆𑀫𑀺𑀦𑁆𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀕𑀭𑀳𑀤𑀺𑀦𑁆𑀦𑀁 𑀦𑀸𑀫 𑀦𑀺𑀕𑀡𑁆𑀞𑀲𑀸𑀯𑀓𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀲𑀸𑀯𑀢𑁆𑀣𑀺𑀬𑀜𑁆𑀳𑀺 𑀲𑀺𑀭𑀺𑀕𑀼𑀢𑁆𑀢𑁄 𑀘 𑀕𑀭𑀳𑀤𑀺𑀦𑁆𑀦𑁄 𑀘𑀸𑀢𑀺 𑀤𑁆𑀯𑁂 𑀲𑀳𑀸𑀬𑀓𑀸 𑀅𑀳𑁂𑀲𑀼𑀁. 𑀢𑁂𑀲𑀼 𑀲𑀺𑀭𑀺𑀕𑀼𑀢𑁆𑀢𑁄 𑀉𑀧𑀸𑀲𑀓𑁄 𑀩𑀼𑀤𑁆𑀥𑀲𑀸𑀯𑀓𑁄, 𑀕𑀭𑀳𑀤𑀺𑀦𑁆𑀦𑁄 𑀦𑀺𑀕𑀡𑁆𑀞𑀲𑀸𑀯𑀓𑁄. 𑀢𑀁 𑀦𑀺𑀕𑀡𑁆𑀞𑀸 𑀅𑀪𑀺𑀓𑁆𑀔𑀡𑀁 𑀏𑀯𑀁 𑀯𑀤𑀦𑁆𑀢𑀺 𑁋 ‘‘𑀢𑀯 𑀲𑀳𑀸𑀬𑀓𑀁 𑀲𑀺𑀭𑀺𑀕𑀼𑀢𑁆𑀢𑀁 ‘𑀓𑀺𑀁 𑀢𑁆𑀯𑀁 𑀲𑀫𑀡𑀁 𑀕𑁄𑀢𑀫𑀁 𑀉𑀧𑀲𑀗𑁆𑀓𑀫𑀲𑀺, 𑀢𑀲𑁆𑀲 𑀲𑀦𑁆𑀢𑀺𑀓𑁂 𑀓𑀺𑀁 𑀮𑀪𑀺𑀲𑁆𑀲𑀲𑀻’𑀢𑀺 𑀯𑀢𑁆𑀯𑀸 𑀬𑀣𑀸 𑀅𑀫𑁆𑀳𑁂 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀅𑀫𑁆𑀳𑀸𑀓𑀜𑁆𑀘 𑀤𑁂𑀬𑁆𑀬𑀥𑀫𑁆𑀫𑀁 𑀤𑀲𑁆𑀲𑀢𑀺, 𑀓𑀺𑀁 𑀏𑀯𑀁 𑀑𑀯𑀤𑀺𑀢𑀼𑀁 𑀦 𑀯𑀝𑁆𑀝𑀢𑀻’’𑀢𑀺. 𑀕𑀭𑀳𑀤𑀺𑀦𑁆𑀦𑁄 𑀢𑁂𑀲𑀁 𑀯𑀘𑀦𑀁 𑀲𑀼𑀢𑁆𑀯𑀸 𑀅𑀪𑀺𑀓𑁆𑀔𑀡𑀁 𑀕𑀦𑁆𑀢𑁆𑀯𑀸 𑀞𑀺𑀢𑀦𑀺𑀲𑀺𑀦𑁆𑀦𑀝𑁆𑀞𑀸𑀦𑀸𑀤𑀻𑀲𑀼 𑀲𑀺𑀭𑀺𑀕𑀼𑀢𑁆𑀢𑀁 𑀏𑀯𑀁 𑀑𑀯𑀤𑀢𑀺 𑁋 ‘‘𑀲𑀫𑁆𑀫, 𑀓𑀺𑀁 𑀢𑁂 𑀲𑀫𑀡𑁂𑀦 𑀕𑁄𑀢𑀫𑁂𑀦, 𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀓𑀺𑀁 𑀮𑀪𑀺𑀲𑁆𑀲𑀲𑀺, 𑀓𑀺𑀁 𑀢𑁂 𑀫𑀫, 𑀅𑀬𑁆𑀬𑁂, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑁂𑀲𑀁 𑀤𑀸𑀦𑀁 𑀤𑀸𑀢𑀼𑀁 𑀦 𑀯𑀝𑁆𑀝𑀢𑀻’’𑀢𑀺? 𑀲𑀺𑀭𑀺𑀕𑀼𑀢𑁆𑀢𑁄 𑀢𑀲𑁆𑀲 𑀓𑀣𑀁 𑀲𑀼𑀢𑁆𑀯𑀸𑀧𑀺 𑀩𑀳𑀽 𑀤𑀺𑀯𑀲𑁂 𑀢𑀼𑀡𑁆𑀳𑀻 𑀳𑀼𑀢𑁆𑀯𑀸 𑀦𑀺𑀩𑁆𑀩𑀺𑀚𑁆𑀚𑀺𑀢𑁆𑀯𑀸 𑀏𑀓𑀤𑀺𑀯𑀲𑀁, ‘‘𑀲𑀫𑁆𑀫, 𑀢𑁆𑀯𑀁 𑀅𑀪𑀺𑀓𑁆𑀔𑀡𑀁 𑀆𑀕𑀦𑁆𑀢𑁆𑀯𑀸 𑀫𑀁 𑀞𑀺𑀢𑀝𑁆𑀞𑀸𑀦𑀸𑀤𑀻𑀲𑀼 𑀏𑀯𑀁 𑀯𑀤𑁂𑀲𑀺, ‘𑀲𑀫𑀡𑀁 𑀕𑁄𑀢𑀫𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀓𑀺𑀁 𑀮𑀪𑀺𑀲𑁆𑀲𑀲𑀺, 𑀫𑀫, 𑀅𑀬𑁆𑀬𑁂, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑁂𑀲𑀁 𑀤𑀸𑀦𑀁 𑀤𑁂𑀳𑀻’𑀢𑀺, 𑀓𑀣𑁂𑀳𑀺 𑀢𑀸𑀯 𑀫𑁂, 𑀢𑀯, 𑀅𑀬𑁆𑀬𑀸, 𑀓𑀺𑀁 𑀚𑀸𑀦𑀦𑁆𑀢𑀻’’𑀢𑀺? ‘‘‘𑀅𑀳𑁄, 𑀲𑀸𑀫𑀺, 𑀫𑀸 𑀏𑀯𑀁 𑀯𑀤, 𑀫𑀫 𑀅𑀬𑁆𑀬𑀸𑀦𑀁 𑀅𑀜𑁆𑀜𑀸𑀢𑀁 𑀦𑀸𑀫 𑀦𑀢𑁆𑀣𑀺, 𑀲𑀩𑁆𑀩𑀁 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀲𑀩𑁆𑀩𑀁 𑀓𑀸𑀬𑀯𑀘𑀻𑀫𑀦𑁄𑀓𑀫𑁆𑀫𑀁 𑀇𑀤𑀁 𑀪𑀯𑀺𑀲𑁆𑀲𑀢𑀺, 𑀇𑀤𑀁 𑀦 𑀪𑀯𑀺𑀲𑁆𑀲𑀢𑀻’𑀢𑀺 𑀲𑀩𑁆𑀩𑀁 𑀪𑀩𑁆𑀩𑀸𑀪𑀩𑁆𑀩𑀁 𑀚𑀸𑀦𑀦𑁆𑀢𑀻’’𑀢𑀺? ‘‘𑀏𑀯𑀁 𑀯𑀤𑁂𑀲𑀻’’𑀢𑀺. ‘‘𑀆𑀫, 𑀯𑀤𑁂𑀫𑀻’’𑀢𑀺. ‘‘𑀬𑀤𑀺 𑀏𑀯𑀁, 𑀅𑀢𑀺𑀪𑀸𑀭𑀺𑀬𑀁 𑀢𑁂 𑀓𑀢𑀁, 𑀏𑀢𑁆𑀢𑀓𑀁 𑀓𑀸𑀮𑀁 𑀫𑀬𑁆𑀳𑀁 𑀏𑀢𑀫𑀢𑁆𑀣𑀁 𑀅𑀦𑀸𑀘𑀺𑀓𑁆𑀔𑀦𑁆𑀢𑁂𑀦, 𑀅𑀚𑁆𑀚 𑀫𑀬𑀸 𑀅𑀬𑁆𑀬𑀸𑀦𑀁 𑀜𑀸𑀡𑀸𑀦𑀼𑀪𑀸𑀯𑁄 𑀜𑀸𑀢𑁄, 𑀕𑀘𑁆𑀙, 𑀲𑀫𑁆𑀫, 𑀅𑀬𑁆𑀬𑁂, 𑀫𑀫 𑀯𑀘𑀦𑁂𑀦 𑀦𑀺𑀫𑀦𑁆𑀢𑁂𑀳𑀻’’𑀢𑀺. 𑀲𑁄 𑀦𑀺𑀕𑀡𑁆𑀞𑀸𑀦𑀁 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀢𑁂 𑀯𑀦𑁆𑀤𑀺𑀢𑁆𑀯𑀸 ‘‘𑀫𑀬𑁆𑀳𑀁 𑀲𑀳𑀸𑀬𑀓𑁄 𑀲𑀺𑀭𑀺𑀕𑀼𑀢𑁆𑀢𑁄 𑀲𑁆𑀯𑀸𑀢𑀦𑀸𑀬 𑀢𑀼𑀫𑁆𑀳𑁂 𑀦𑀺𑀫𑀦𑁆𑀢𑁂𑀢𑀻’’𑀢𑀺 𑀆𑀳. ‘‘𑀲𑀺𑀭𑀺𑀕𑀼𑀢𑁆𑀢𑁂𑀦 𑀲𑀸𑀫𑀁 𑀢𑁆𑀯𑀁 𑀯𑀼𑀢𑁆𑀢𑁄’’𑀢𑀺? ‘‘𑀆𑀫, 𑀅𑀬𑁆𑀬𑀸’’𑀢𑀺. 𑀢𑁂 𑀳𑀝𑁆𑀞𑀢𑀼𑀝𑁆𑀞𑀸 𑀳𑀼𑀢𑁆𑀯𑀸 ‘‘𑀦𑀺𑀧𑁆𑀨𑀦𑁆𑀦𑀁 𑀦𑁄 𑀓𑀺𑀘𑁆𑀘𑀁, 𑀲𑀺𑀭𑀺𑀕𑀼𑀢𑁆𑀢𑀲𑁆𑀲 𑀅𑀫𑁆𑀳𑁂𑀲𑀼 𑀧𑀲𑀦𑁆𑀦𑀓𑀸𑀮𑀢𑁄 𑀧𑀝𑁆𑀞𑀸𑀬 𑀓𑀸 𑀦𑀸𑀫 𑀲𑀫𑁆𑀧𑀢𑁆𑀢𑀺 𑀅𑀫𑁆𑀳𑀸𑀓𑀁 𑀦 𑀪𑀯𑀺𑀲𑁆𑀲𑀢𑀻’’𑀢𑀺 𑀯𑀤𑀺𑀁𑀲𑀼.

𑀲𑀺𑀭𑀺𑀕𑀼𑀢𑁆𑀢𑀲𑁆𑀲𑀸𑀧𑀺 𑀫𑀳𑀦𑁆𑀢𑀁 𑀦𑀺𑀯𑁂𑀲𑀦𑀁. 𑀲𑁄 𑀢𑀲𑁆𑀫𑀺𑀁 𑀤𑁆𑀯𑀺𑀦𑁆𑀦𑀁 𑀕𑁂𑀳𑀸𑀦𑀁 𑀅𑀦𑁆𑀢𑀭𑁂 𑀉𑀪𑀢𑁄 𑀤𑀻𑀖𑀁 𑀆𑀯𑀸𑀝𑀁 𑀔𑀡𑀸𑀧𑁂𑀢𑁆𑀯𑀸 𑀕𑀽𑀣𑀓𑀮𑀮𑀲𑁆𑀲 𑀧𑀽𑀭𑀸𑀧𑁂𑀲𑀺. 𑀩𑀳𑀺𑀆𑀯𑀸𑀝𑁂 𑀤𑁆𑀯𑀻𑀲𑀼 𑀧𑀭𑀺𑀬𑀦𑁆𑀢𑁂𑀲𑀼 𑀔𑀸𑀡𑀼𑀓𑁂 𑀓𑁄𑀝𑁆𑀝𑀸𑀧𑁂𑀢𑁆𑀯𑀸 𑀢𑁂𑀲𑀼 𑀭𑀚𑁆𑀚𑀼𑀬𑁄 𑀩𑀦𑁆𑀥𑀸𑀧𑁂𑀢𑁆𑀯𑀸 𑀆𑀲𑀦𑀸𑀦𑀁 𑀧𑀼𑀭𑀺𑀫𑀧𑀸𑀤𑁂 𑀆𑀯𑀸𑀝𑀲𑁆𑀲 𑀧𑀼𑀭𑀺𑀫𑀧𑀲𑁆𑀲𑁂 𑀞𑀧𑀸𑀧𑁂𑀢𑁆𑀯𑀸 𑀧𑀘𑁆𑀙𑀺𑀫𑀧𑀸𑀤𑁂 𑀭𑀚𑁆𑀚𑀼𑀓𑁂𑀲𑀼 𑀞𑀧𑀸𑀧𑁂𑀲𑀺. ‘‘𑀏𑀯𑀁 𑀦𑀺𑀲𑀺𑀦𑁆𑀦𑀓𑀸𑀮𑁂 𑀏𑀯𑀁 𑀅𑀯𑀁𑀲𑀺𑀭𑀸 𑀧𑀢𑀺𑀲𑁆𑀲𑀦𑁆𑀢𑀻’’𑀢𑀺 𑀫𑀜𑁆𑀜𑀫𑀸𑀦𑁄 𑀬𑀣𑀸 𑀆𑀯𑀸𑀝𑁄 𑀦 𑀧𑀜𑁆𑀜𑀸𑀬𑀢𑀺, 𑀏𑀯𑀁 𑀆𑀲𑀦𑀸𑀦𑀁 𑀉𑀧𑀭𑀺 𑀧𑀘𑁆𑀘𑀢𑁆𑀣𑀭𑀡𑀸𑀦𑀺 𑀤𑀸𑀧𑁂𑀲𑀺. 𑀫𑀳𑀦𑁆𑀢𑀸 𑀫𑀳𑀦𑁆𑀢𑀸 𑀘𑀸𑀝𑀺𑀬𑁄 𑀞𑀧𑀸𑀧𑁂𑀢𑁆𑀯𑀸 𑀓𑀤𑀮𑀺𑀧𑀡𑁆𑀡𑁂𑀳𑀺 𑀘 𑀲𑁂𑀢𑀧𑀺𑀮𑁄𑀢𑀺𑀓𑀸𑀳𑀺 𑀘 𑀫𑀼𑀔𑀸𑀦𑀺 𑀩𑀦𑁆𑀥𑀸𑀧𑁂𑀢𑁆𑀯𑀸 𑀢𑀸 𑀢𑀼𑀘𑁆𑀙𑀸 𑀏𑀯 𑀕𑁂𑀳𑀲𑁆𑀲 𑀧𑀘𑁆𑀙𑀺𑀫𑀪𑀸𑀕𑁂 𑀩𑀳𑀺 𑀬𑀸𑀕𑀼𑀪𑀢𑁆𑀢𑀲𑀺𑀢𑁆𑀣𑀲𑀧𑁆𑀧𑀺𑀢𑁂𑀮𑀫𑀥𑀼𑀨𑀸𑀡𑀺𑀢𑀧𑀽𑀯𑀘𑀼𑀡𑁆𑀡𑀫𑀓𑁆𑀔𑀺𑀢𑀸 𑀓𑀢𑁆𑀯𑀸 𑀞𑀧𑀸𑀧𑁂𑀲𑀺. 𑀕𑀭𑀳𑀤𑀺𑀦𑁆𑀦𑁄 𑀧𑀸𑀢𑁄𑀯 𑀢𑀲𑁆𑀲 𑀖𑀭𑀁 𑀯𑁂𑀕𑁂𑀦 𑀕𑀦𑁆𑀢𑁆𑀯𑀸, ‘‘𑀅𑀬𑁆𑀬𑀸𑀦𑀁 𑀲𑀓𑁆𑀓𑀸𑀭𑁄 𑀲𑀚𑁆𑀚𑀺𑀢𑁄’’𑀢𑀺 𑀧𑀼𑀘𑁆𑀙𑀺. ‘‘𑀆𑀫, 𑀲𑀫𑁆𑀫, 𑀲𑀚𑁆𑀚𑀺𑀢𑁄’’𑀢𑀺. ‘‘𑀓𑀳𑀁 𑀧𑀦 𑀏𑀲𑁄’’𑀢𑀺. ‘‘𑀏𑀢𑀸𑀲𑀼 𑀏𑀢𑁆𑀢𑀺𑀓𑀸𑀲𑀼 𑀘𑀸𑀝𑀻𑀲𑀼 𑀬𑀸𑀕𑀼, 𑀏𑀢𑁆𑀢𑀺𑀓𑀸𑀲𑀼 𑀪𑀢𑁆𑀢𑀁, 𑀏𑀢𑁆𑀢𑀺𑀓𑀸𑀲𑀼 𑀲𑀧𑁆𑀧𑀺𑀨𑀸𑀡𑀺𑀢𑀧𑀽𑀯𑀸𑀤𑀻𑀦𑀺 𑀧𑀽𑀭𑀺𑀢𑀸𑀦𑀺, 𑀆𑀲𑀦𑀸𑀦𑀺 𑀧𑀜𑁆𑀜𑀢𑁆𑀢𑀸𑀦𑀻’’𑀢𑀺. 𑀲𑁄 ‘‘𑀲𑀸𑀥𑀽’’𑀢𑀺 𑀯𑀢𑁆𑀯𑀸 𑀕𑀢𑁄 𑀢𑀲𑁆𑀲 𑀕𑀢𑀓𑀸𑀮𑁂 𑀧𑀜𑁆𑀘𑀲𑀢𑀸 𑀦𑀺𑀕𑀡𑁆𑀞𑀸 𑀆𑀕𑀫𑀺𑀁𑀲𑀼. 𑀲𑀺𑀭𑀺𑀕𑀼𑀢𑁆𑀢𑁄 𑀕𑁂𑀳𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀜𑁆𑀘𑀧𑀢𑀺𑀝𑁆𑀞𑀺𑀢𑁂𑀦 𑀦𑀺𑀕𑀡𑁆𑀞𑁂 𑀯𑀦𑁆𑀤𑀺𑀢𑁆𑀯𑀸 𑀢𑁂𑀲𑀁 𑀧𑀼𑀭𑀢𑁄 𑀅𑀜𑁆𑀚𑀮𑀺𑀁 𑀧𑀕𑁆𑀕𑀬𑁆𑀳 𑀞𑀺𑀢𑁄 𑀏𑀯𑀁 𑀘𑀺𑀦𑁆𑀢𑁂𑀲𑀺 𑁋 ‘‘𑀢𑀼𑀫𑁆𑀳𑁂 𑀓𑀺𑀭 𑀅𑀢𑀻𑀢𑀸𑀤𑀺𑀪𑁂𑀤𑀁 𑀲𑀩𑁆𑀩𑀁 𑀚𑀸𑀦𑀸𑀣, 𑀏𑀯𑀁 𑀢𑀼𑀫𑁆𑀳𑀸𑀓𑀁 𑀉𑀧𑀝𑁆𑀞𑀸𑀓𑁂𑀦 𑀫𑀬𑁆𑀳𑀁 𑀓𑀣𑀺𑀢𑀁. 𑀲𑀘𑁂 𑀲𑀩𑁆𑀩𑀁 𑀢𑀼𑀫𑁆𑀳𑁂 𑀚𑀸𑀦𑀸𑀣, 𑀫𑀬𑁆𑀳𑀁 𑀕𑁂𑀳𑀁 𑀫𑀸 𑀧𑀯𑀺𑀲𑀺𑀢𑁆𑀣. 𑀫𑀫 𑀕𑁂𑀳𑀁 𑀧𑀯𑀺𑀝𑁆𑀞𑀸𑀦𑀜𑁆𑀳𑀺 𑀯𑁄 𑀦𑁂𑀯 𑀬𑀸𑀕𑀼 𑀅𑀢𑁆𑀣𑀺, 𑀦 𑀪𑀢𑁆𑀢𑀸𑀤𑀻𑀦𑀺. 𑀲𑀘𑁂 𑀅𑀚𑀸𑀦𑀺𑀢𑁆𑀯𑀸 𑀧𑀯𑀺𑀲𑀺𑀲𑁆𑀲𑀣, 𑀕𑀽𑀣𑀆𑀯𑀸𑀝𑁂 𑀯𑁄 𑀧𑀸𑀢𑁂𑀢𑁆𑀯𑀸 𑀧𑁄𑀣𑁂𑀲𑁆𑀲𑀸𑀫𑀻’’𑀢𑀺 𑀏𑀯𑀁 𑀘𑀺𑀦𑁆𑀢𑁂𑀢𑁆𑀯𑀸 𑀧𑀼𑀭𑀺𑀲𑀸𑀦𑀁 𑀲𑀜𑁆𑀜𑀁 𑀅𑀤𑀸𑀲𑀺. 𑀏𑀯𑀁 𑀢𑁂𑀲𑀁 𑀦𑀺𑀲𑀻𑀤𑀦𑀪𑀸𑀯𑀁 𑀜𑀢𑁆𑀯𑀸 𑀧𑀘𑁆𑀙𑀺𑀫𑀧𑀲𑁆𑀲𑁂 𑀞𑀢𑁆𑀯𑀸 𑀆𑀲𑀦𑀸𑀦𑀁 𑀉𑀧𑀭𑀺 𑀧𑀘𑁆𑀘𑀢𑁆𑀣𑀭𑀡𑀸𑀦𑀺 𑀅𑀧𑀦𑁂𑀬𑁆𑀬𑀸𑀣, 𑀫𑀸 𑀢𑀸𑀦𑀺 𑀅𑀲𑀼𑀘𑀺𑀦𑀸 𑀫𑀓𑁆𑀔𑀬𑀺𑀁𑀲𑀽𑀢𑀺.

𑀅𑀣 𑀦𑀺𑀕𑀡𑁆𑀞𑁂 ‘‘𑀇𑀢𑁄 𑀏𑀣, 𑀪𑀦𑁆𑀢𑁂’’𑀢𑀺 𑀆𑀳. 𑀦𑀺𑀕𑀡𑁆𑀞𑀸 𑀧𑀯𑀺𑀲𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑀸𑀲𑀦𑁂𑀲𑀼 𑀦𑀺𑀲𑀻𑀤𑀺𑀢𑀼𑀁 𑀆𑀭𑀪𑀺𑀁𑀲𑀼. 𑀅𑀣 𑀦𑁂 𑀫𑀦𑀼𑀲𑁆𑀲𑀸 𑀯𑀤𑀺𑀁𑀲𑀼 𑁋 ‘‘𑀆𑀕𑀫𑁂𑀣, 𑀪𑀦𑁆𑀢𑁂, 𑀫𑀸 𑀢𑀸𑀯 𑀦𑀺𑀲𑀻𑀤𑀣𑀸’’𑀢𑀺. ‘‘𑀓𑀺𑀁 𑀓𑀸𑀭𑀡𑀸’’𑀢𑀺? ‘‘𑀅𑀫𑁆𑀳𑀸𑀓𑀁 𑀕𑁂𑀳𑀁 𑀧𑀯𑀺𑀝𑁆𑀞𑀸𑀦𑀁 𑀅𑀬𑁆𑀬𑀸𑀦𑀁 𑀯𑀢𑁆𑀢𑀁 𑀜𑀢𑁆𑀯𑀸 𑀦𑀺𑀲𑀻𑀤𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺. ‘‘𑀓𑀺𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺, 𑀆𑀯𑀼𑀲𑁄’’𑀢𑀺? ‘‘𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀧𑀢𑁆𑀢𑀸𑀲𑀦𑀫𑀽𑀮𑁂𑀲𑀼 𑀞𑀢𑁆𑀯𑀸 𑀲𑀩𑁆𑀩𑁂𑀧𑀺 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀦𑀺𑀲𑀻𑀤𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺. 𑀇𑀤𑀁 𑀓𑀺𑀭𑀲𑁆𑀲 𑀅𑀥𑀺𑀧𑁆𑀧𑀸𑀬𑁄 𑁋 ‘‘𑀏𑀓𑀲𑁆𑀫𑀺𑀁 𑀆𑀯𑀸𑀝𑁂 𑀧𑀢𑀺𑀢𑁂 ‘𑀫𑀸, 𑀆𑀯𑀼𑀲𑁄, 𑀅𑀯𑀲𑁂𑀲𑀸 𑀆𑀲𑀦𑁂 𑀦𑀺𑀲𑀻𑀤𑀦𑁆𑀢𑀽’𑀢𑀺 𑀯𑀢𑁆𑀢𑀼𑀁 𑀫𑀸 𑀮𑀪𑀢𑀽’’𑀢𑀺. 𑀢𑁂 ‘‘𑀲𑀸𑀥𑀽’’𑀢𑀺 𑀯𑀢𑁆𑀯𑀸 ‘‘𑀇𑀫𑁂𑀳𑀺 𑀓𑀣𑀺𑀢𑀓𑀣𑀁 𑀅𑀫𑁆𑀳𑁂𑀳𑀺 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀘𑀺𑀦𑁆𑀢𑀬𑀺𑀁𑀲𑀼. 𑀅𑀣 𑀲𑀩𑁆𑀩𑁂 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀧𑀢𑁆𑀢𑀸𑀲𑀦𑀫𑀽𑀮𑁂 𑀧𑀝𑀺𑀧𑀸𑀝𑀺𑀬𑀸 𑀅𑀝𑁆𑀞𑀁𑀲𑀼. 𑀅𑀣 𑀦𑁂, ‘‘𑀪𑀦𑁆𑀢𑁂, 𑀔𑀺𑀧𑁆𑀧𑀁 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀦𑀺𑀲𑀻𑀤𑀣𑀸’’𑀢𑀺 𑀯𑀢𑁆𑀯𑀸 𑀢𑁂𑀲𑀁 𑀦𑀺𑀲𑀺𑀦𑁆𑀦𑀪𑀸𑀯𑀁 𑀜𑀢𑁆𑀯𑀸 𑀆𑀲𑀦𑀸𑀦𑀁 𑀉𑀧𑀭𑀺 𑀧𑀘𑁆𑀘𑀢𑁆𑀣𑀭𑀡𑀸𑀦𑀺 𑀦𑀻𑀳𑀭𑀺𑀁𑀲𑀼. 𑀦𑀺𑀕𑀡𑁆𑀞𑀸 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀦𑀺𑀲𑀺𑀦𑁆𑀦𑀸, 𑀭𑀚𑁆𑀚𑀽𑀦𑀁 𑀉𑀧𑀭𑀺 𑀞𑀧𑀺𑀢𑀸 𑀆𑀲𑀦𑀧𑀸𑀤𑀸 𑀪𑀝𑁆𑀞𑀸, 𑀦𑀺𑀕𑀡𑁆𑀞𑀸 𑀅𑀯𑀁𑀲𑀺𑀭𑀸 𑀆𑀯𑀸𑀝𑁂 𑀧𑀢𑀺𑀁𑀲𑀼. 𑀲𑀺𑀭𑀺𑀕𑀼𑀢𑁆𑀢𑁄 𑀢𑁂𑀲𑀼 𑀧𑀢𑀺𑀢𑁂𑀲𑀼 𑀤𑁆𑀯𑀸𑀭𑀁 𑀧𑀺𑀤𑀳𑀺𑀢𑁆𑀯𑀸 𑀢𑁂 𑀉𑀢𑁆𑀢𑀺𑀡𑁆𑀡𑀼𑀢𑁆𑀢𑀺𑀡𑁆𑀡𑁂 ‘‘𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀓𑀲𑁆𑀫𑀸 𑀦 𑀚𑀸𑀦𑀸𑀣𑀸’’𑀢𑀺 𑀤𑀡𑁆𑀟𑁂𑀳𑀺 𑀧𑀸𑀣𑁂𑀢𑁆𑀯𑀸 ‘‘𑀏𑀢𑁆𑀢𑀓𑀁 𑀏𑀢𑁂𑀲𑀁 𑀯𑀝𑁆𑀝𑀺𑀲𑁆𑀲𑀢𑀻’’𑀢𑀺 𑀤𑁆𑀯𑀸𑀭𑀁 𑀯𑀺𑀯𑀭𑀸𑀧𑁂𑀲𑀺. 𑀢𑁂 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀮𑀸𑀬𑀺𑀢𑀼𑀁 𑀆𑀭𑀪𑀺𑀁𑀲𑀼. 𑀕𑀫𑀦𑀫𑀕𑁆𑀕𑁂 𑀧𑀦 𑀢𑁂𑀲𑀁 𑀲𑀼𑀥𑀸𑀧𑀭𑀺𑀓𑀫𑁆𑀫𑀓𑀢𑀁 𑀪𑀽𑀫𑀺𑀁 𑀧𑀺𑀘𑁆𑀙𑀺𑀮𑀁 𑀓𑀸𑀭𑀸𑀧𑁂𑀲𑀺. 𑀢𑁂 𑀢𑀢𑁆𑀣 𑀅𑀲𑀡𑁆𑀞𑀳𑀺𑀢𑁆𑀯𑀸 𑀧𑀢𑀺𑀢𑁂 𑀧𑀢𑀺𑀢𑁂 𑀧𑀼𑀦 𑀧𑁄𑀣𑀸𑀧𑁂𑀢𑁆𑀯𑀸 ‘‘𑀅𑀮𑀁 𑀏𑀢𑁆𑀢𑀓𑀁 𑀢𑀼𑀫𑁆𑀳𑀸𑀓’’𑀦𑁆𑀢𑀺 𑀉𑀬𑁆𑀬𑁄𑀚𑁂𑀲𑀺. 𑀢𑁂 ‘‘𑀦𑀸𑀲𑀺𑀢𑀫𑁆𑀳𑀸 𑀢𑀬𑀸, 𑀦𑀸𑀲𑀺𑀢𑀫𑁆𑀳𑀸 𑀢𑀬𑀸’’𑀢𑀺 𑀓𑀦𑁆𑀤𑀦𑁆𑀢𑀸 𑀉𑀧𑀝𑁆𑀞𑀸𑀓𑀲𑁆𑀲 𑀕𑁂𑀳𑀤𑁆𑀯𑀸𑀭𑀁 𑀅𑀕𑀫𑀁𑀲𑀼.

𑀕𑀭𑀳𑀤𑀺𑀦𑁆𑀦𑁄 𑀢𑀁 𑀯𑀺𑀧𑁆𑀧𑀓𑀸𑀭𑀁 𑀤𑀺𑀲𑁆𑀯𑀸 𑀓𑀼𑀤𑁆𑀥𑁄 ‘‘𑀦𑀸𑀲𑀺𑀢𑀫𑁆𑀳𑀺 𑀲𑀺𑀭𑀺𑀕𑀼𑀢𑁆𑀢𑁂𑀦, 𑀳𑀢𑁆𑀣𑀁 𑀧𑀲𑀸𑀭𑁂𑀢𑁆𑀯𑀸 𑀯𑀦𑁆𑀤𑀦𑁆𑀢𑀸𑀦𑀁 𑀲𑀤𑁂𑀯𑀓𑁂 𑀮𑁄𑀓𑁂 𑀬𑀣𑀸𑀭𑀼𑀘𑀺𑀬𑀸 𑀤𑀸𑀢𑀼𑀁 𑀲𑀫𑀢𑁆𑀣𑁂 𑀦𑀸𑀫 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀪𑀽𑀢𑁂 𑀫𑀫, 𑀅𑀬𑁆𑀬𑁂, 𑀧𑁄𑀣𑀸𑀧𑁂𑀢𑁆𑀯𑀸 𑀩𑁆𑀬𑀲𑀦𑀁 𑀧𑀸𑀧𑁂𑀲𑀻’’𑀢𑀺 𑀭𑀸𑀚𑀓𑀼𑀮𑀁 𑀕𑀦𑁆𑀢𑁆𑀯𑀸 𑀢𑀲𑁆𑀲 𑀓𑀳𑀸𑀧𑀡𑀲𑀳𑀲𑁆𑀲𑀁 𑀤𑀡𑁆𑀟𑀁 𑀓𑀸𑀭𑁂𑀲𑀺. 𑀅𑀣𑀲𑁆𑀲 𑀭𑀸𑀚𑀸 𑀲𑀸𑀲𑀦𑀁 𑀧𑁂𑀲𑁂𑀲𑀺. 𑀲𑁄 𑀕𑀦𑁆𑀢𑁆𑀯𑀸 𑀭𑀸𑀚𑀸𑀦𑀁 𑀯𑀦𑁆𑀤𑀺𑀢𑁆𑀯𑀸, ‘‘𑀤𑁂𑀯, 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸 𑀤𑀡𑁆𑀟𑀁 𑀕𑀡𑁆𑀳𑀣, 𑀫𑀸 𑀅𑀦𑀼𑀧𑀧𑀭𑀺𑀓𑁆𑀔𑀺𑀢𑁆𑀯𑀸’’𑀢𑀺 𑀆𑀳. ‘‘𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺. ‘‘𑀲𑀸𑀥𑀼, 𑀤𑁂𑀯𑀸’’𑀢𑀺. ‘‘𑀢𑁂𑀦 𑀳𑀺 𑀕𑀡𑁆𑀳𑀸𑀳𑀻’’𑀢𑀺. 𑀤𑁂𑀯, 𑀫𑀬𑁆𑀳𑀁 𑀲𑀳𑀸𑀬𑀓𑁄 𑀦𑀺𑀕𑀡𑁆𑀞𑀲𑀸𑀯𑀓𑁄 𑀫𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀞𑀺𑀢𑀦𑀺𑀲𑀺𑀦𑁆𑀦𑀝𑁆𑀞𑀸𑀦𑀸𑀤𑀻𑀲𑀼 𑀅𑀪𑀺𑀡𑁆𑀳𑀁 𑀏𑀯𑀁 𑀯𑀤𑁂𑀲𑀺 𑁋 ‘‘𑀲𑀫𑁆𑀫, 𑀓𑀺𑀁 𑀢𑁂 𑀲𑀫𑀡𑁂𑀦 𑀕𑁄𑀢𑀫𑁂𑀦, 𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀓𑀺𑀁 𑀮𑀪𑀺𑀲𑁆𑀲𑀲𑀻’’𑀢𑀺 𑀇𑀤𑀁 𑀆𑀤𑀺𑀁 𑀓𑀢𑁆𑀯𑀸 𑀲𑀺𑀭𑀺𑀕𑀼𑀢𑁆𑀢𑁄 𑀲𑀩𑁆𑀩𑀁 𑀢𑀁 𑀧𑀯𑀢𑁆𑀢𑀺𑀁 𑀆𑀭𑁄𑀘𑁂𑀢𑁆𑀯𑀸 ‘‘𑀤𑁂𑀯, 𑀲𑀘𑁂 𑀇𑀫𑀲𑁆𑀫𑀺𑀁 𑀓𑀸𑀭𑀡𑁂 𑀤𑀡𑁆𑀟𑀁 𑀕𑀳𑁂𑀢𑀼𑀁 𑀬𑀼𑀢𑁆𑀢𑀁, 𑀕𑀡𑁆𑀳𑀣𑀸’’𑀢𑀺. 𑀭𑀸𑀚𑀸 𑀕𑀭𑀳𑀤𑀺𑀦𑁆𑀦𑀁 𑀑𑀮𑁄𑀓𑁂𑀢𑁆𑀯𑀸 ‘‘𑀲𑀘𑁆𑀘𑀁 𑀓𑀺𑀭 𑀢𑁂 𑀏𑀯𑀁 𑀯𑀼𑀢𑁆𑀢’’𑀦𑁆𑀢𑀺 𑀆𑀳. ‘‘𑀲𑀘𑁆𑀘𑀁, 𑀤𑁂𑀯𑀸’’𑀢𑀺. 𑀢𑁆𑀯𑀁 𑀏𑀢𑁆𑀢𑀓𑀫𑁆𑀧𑀺 𑀅𑀚𑀸𑀦𑀦𑁆𑀢𑁂 𑀲𑀢𑁆𑀣𑀸𑀭𑁄𑀢𑀺 𑀕𑀳𑁂𑀢𑁆𑀯𑀸 𑀯𑀺𑀘𑀭𑀦𑁆𑀢𑁄 ‘‘𑀲𑀩𑁆𑀩𑀁 𑀚𑀸𑀦𑀦𑁆𑀢𑀻’’𑀢𑀺 𑀓𑀺𑀁 𑀓𑀸𑀭𑀡𑀸 𑀢𑀣𑀸𑀕𑀢𑀲𑀸𑀯𑀓𑀲𑁆𑀲 𑀓𑀣𑁂𑀲𑀺. ‘‘𑀢𑀬𑀸 𑀆𑀭𑁄𑀧𑀺𑀢𑀤𑀡𑁆𑀟𑁄 𑀢𑀼𑀬𑁆𑀳𑀫𑁂𑀯 𑀳𑁄𑀢𑀽’’𑀢𑀺 𑀏𑀯𑀁 𑀲𑁆𑀯𑁂𑀯 𑀤𑀡𑁆𑀟𑀁 𑀧𑀸𑀧𑀺𑀢𑁄, 𑀢𑀲𑁆𑀲𑁂𑀯 𑀓𑀼𑀮𑀽𑀧𑀓𑀸 𑀧𑁄𑀣𑁂𑀢𑁆𑀯𑀸 𑀦𑀻𑀳𑀝𑀸.

𑀲𑁄 𑀢𑀁 𑀓𑀼𑀚𑁆𑀛𑀺𑀢𑁆𑀯𑀸 𑀢𑀢𑁄 𑀧𑀝𑁆𑀞𑀸𑀬 𑀅𑀟𑁆𑀠𑀫𑀸𑀲𑀫𑀢𑁆𑀢𑀫𑁆𑀧𑀺 𑀲𑀺𑀭𑀺𑀕𑀼𑀢𑁆𑀢𑁂𑀦 𑀲𑀤𑁆𑀥𑀺𑀁 𑀅𑀓𑀣𑁂𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀏𑀯𑀁 𑀯𑀺𑀘𑀭𑀺𑀢𑀼𑀁 𑀫𑀬𑁆𑀳𑀁 𑀅𑀬𑀼𑀢𑁆𑀢𑀁, 𑀏𑀢𑀲𑁆𑀲 𑀓𑀼𑀮𑀽𑀧𑀓𑀸𑀦𑀫𑁆𑀧𑀺 𑀫𑀬𑀸 𑀩𑁆𑀬𑀲𑀦𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀲𑀺𑀭𑀺𑀕𑀼𑀢𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀳 𑁋 ‘‘𑀲𑀳𑀸𑀬 𑀲𑀺𑀭𑀺𑀕𑀼𑀢𑁆𑀢𑀸’’𑀢𑀺. ‘‘𑀓𑀺𑀁, 𑀲𑀫𑁆𑀫𑀸’’𑀢𑀺? ‘‘𑀜𑀸𑀢𑀺𑀲𑀼𑀳𑀚𑁆𑀚𑀸𑀦𑀁 𑀦𑀸𑀫 𑀓𑀮𑀳𑁄𑀧𑀺 𑀳𑁄𑀢𑀺 𑀯𑀺𑀯𑀸𑀤𑁄𑀧𑀺, 𑀓𑀺𑀁 𑀢𑁆𑀯𑀁 𑀓𑀺𑀜𑁆𑀘𑀺 𑀦 𑀓𑀣𑁂𑀲𑀺, 𑀓𑀲𑁆𑀫𑀸 𑀏𑀯𑀁 𑀓𑀭𑁄𑀲𑀻’’𑀢𑀺? ‘‘𑀲𑀫𑁆𑀫, 𑀢𑀯 𑀫𑀬𑀸 𑀲𑀤𑁆𑀥𑀺𑀁 𑀅𑀓𑀣𑀦𑀢𑁄 𑀦 𑀓𑀣𑁂𑀫𑀻’’𑀢𑀺. ‘‘𑀬𑀁, 𑀲𑀫𑁆𑀫, 𑀓𑀢𑀁, 𑀓𑀢𑀫𑁂𑀯 𑀢𑀁 𑀦 𑀫𑀬𑀁 𑀫𑁂𑀢𑁆𑀢𑀺𑀁 𑀪𑀺𑀦𑁆𑀤𑀺𑀲𑁆𑀲𑀸𑀫𑀸’’𑀢𑀺. 𑀢𑀢𑁄 𑀧𑀝𑁆𑀞𑀸𑀬 𑀉𑀪𑁄𑀧𑀺 𑀏𑀓𑀝𑁆𑀞𑀸𑀦𑁂 𑀢𑀺𑀝𑁆𑀞𑀦𑁆𑀢𑀺 𑀦𑀺𑀲𑀻𑀤𑀦𑁆𑀢𑀺. 𑀅𑀣𑁂𑀓𑀤𑀺𑀯𑀲𑀁 𑀲𑀺𑀭𑀺𑀕𑀼𑀢𑁆𑀢𑁄 𑀕𑀭𑀳𑀤𑀺𑀦𑁆𑀦𑀁 𑀆𑀳 𑁋 ‘‘𑀓𑀺𑀁 𑀢𑁂 𑀦𑀺𑀕𑀡𑁆𑀞𑁂𑀳𑀺, 𑀢𑁂 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀓𑀺𑀁 𑀮𑀪𑀺𑀲𑁆𑀲𑀲𑀺, 𑀫𑀫 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑀼𑀁 𑀯𑀸 𑀅𑀬𑁆𑀬𑀸𑀦𑀁 𑀤𑀸𑀦𑀁 𑀤𑀸𑀢𑀼𑀁 𑀯𑀸 𑀓𑀺𑀁 𑀢𑁂 𑀦 𑀯𑀝𑁆𑀝𑀢𑀻’’𑀢𑀺? 𑀲𑁄𑀧𑀺 𑀏𑀢𑀫𑁂𑀯 𑀧𑀘𑁆𑀘𑀸𑀲𑀻𑀲𑀢𑀺, 𑀢𑁂𑀦𑀲𑁆𑀲 𑀓𑀡𑁆𑀟𑀼𑀯𑀦𑀝𑁆𑀞𑀸𑀦𑁂 𑀦𑀔𑁂𑀦 𑀯𑀺𑀮𑁂𑀔𑀺𑀢𑀁 𑀯𑀺𑀬 𑀅𑀳𑁄𑀲𑀺. 𑀲𑁄, ‘‘𑀲𑀺𑀭𑀺𑀕𑀼𑀢𑁆𑀢, 𑀢𑀯 𑀲𑀢𑁆𑀣𑀸 𑀓𑀺𑀁 𑀚𑀸𑀦𑀸𑀢𑀻’’𑀢𑀺 𑀧𑀼𑀘𑁆𑀙𑀺. ‘‘𑀅𑀫𑁆𑀪𑁄, 𑀫𑀸 𑀏𑀯𑀁 𑀯𑀤, 𑀲𑀢𑁆𑀣𑀼 𑀫𑁂 𑀅𑀚𑀸𑀦𑀺𑀢𑀩𑁆𑀩𑀁 𑀦𑀸𑀫 𑀦𑀢𑁆𑀣𑀺, 𑀅𑀢𑀻𑀢𑀸𑀤𑀺𑀪𑁂𑀤𑀁 𑀲𑀩𑁆𑀩𑀁 𑀚𑀸𑀦𑀸𑀢𑀺, 𑀲𑁄𑀴𑀲𑀳𑀸𑀓𑀸𑀭𑁂𑀳𑀺 𑀲𑀢𑁆𑀢𑀸𑀦𑀁 𑀘𑀺𑀢𑁆𑀢𑀁 𑀧𑀭𑀺𑀘𑁆𑀙𑀺𑀦𑁆𑀤𑀢𑀻’’𑀢𑀺. ‘‘𑀅𑀳𑀁 𑀏𑀯𑀁 𑀦 𑀚𑀸𑀦𑀸𑀫𑀺, 𑀓𑀲𑁆𑀫𑀸 𑀫𑀬𑁆𑀳𑀁 𑀏𑀢𑁆𑀢𑀓𑀁 𑀓𑀸𑀮𑀁 𑀦 𑀓𑀣𑁂𑀲𑀺, 𑀢𑁂𑀦 𑀳𑀺 𑀢𑁆𑀯𑀁 𑀕𑀘𑁆𑀙, 𑀢𑀯 𑀲𑀢𑁆𑀣𑀸𑀭𑀁 𑀲𑁆𑀯𑀸𑀢𑀦𑀸𑀬 𑀦𑀺𑀫𑀦𑁆𑀢𑁂𑀳𑀺, 𑀪𑁄𑀚𑁂𑀲𑁆𑀲𑀸𑀫𑀺, 𑀧𑀜𑁆𑀘𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺 𑀲𑀤𑁆𑀥𑀺𑀁 𑀫𑀫 𑀪𑀺𑀓𑁆𑀔𑀁 𑀕𑀡𑁆𑀳𑀺𑀢𑀼𑀁 𑀯𑀤𑁂𑀳𑀻’’𑀢𑀺.

𑀲𑀺𑀭𑀺𑀕𑀼𑀢𑁆𑀢𑁄 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀏𑀯𑀫𑀸𑀳 𑁋 ‘‘𑀪𑀦𑁆𑀢𑁂, 𑀫𑀫 𑀲𑀳𑀸𑀬𑀓𑁄 𑀕𑀭𑀳𑀤𑀺𑀦𑁆𑀦𑁄 𑀢𑀼𑀫𑁆𑀳𑁂 𑀦𑀺𑀫𑀦𑁆𑀢𑀸𑀧𑁂𑀢𑀺, 𑀧𑀜𑁆𑀘𑀳𑀺 𑀓𑀺𑀭 𑀪𑀺𑀓𑁆𑀔𑀼𑀲𑀢𑁂𑀳𑀺 𑀲𑀤𑁆𑀥𑀺𑀁 𑀲𑁆𑀯𑁂 𑀢𑀲𑁆𑀲 𑀪𑀺𑀓𑁆𑀔𑀁 𑀕𑀡𑁆𑀳𑀣, 𑀧𑀼𑀭𑀺𑀫𑀤𑀺𑀯𑀲𑁂 𑀔𑁄 𑀧𑀦 𑀢𑀲𑁆𑀲 𑀓𑀼𑀮𑀽𑀧𑀓𑀸𑀦𑀁 𑀫𑀬𑀸 𑀇𑀤𑀁 𑀦𑀸𑀫 𑀓𑀢𑀁, 𑀫𑀬𑀸 𑀓𑀢𑀲𑁆𑀲 𑀧𑀝𑀺𑀓𑀭𑀡𑀫𑁆𑀧𑀺 𑀦 𑀚𑀸𑀦𑀸𑀫𑀺, 𑀢𑀼𑀫𑁆𑀳𑀸𑀓𑀁 𑀲𑀼𑀤𑁆𑀥𑀘𑀺𑀢𑁆𑀢𑁂𑀦 𑀪𑀺𑀓𑁆𑀔𑀁 𑀤𑀸𑀢𑀼𑀓𑀸𑀫𑀢𑀫𑁆𑀧𑀺 𑀦 𑀚𑀸𑀦𑀸𑀫𑀺, 𑀆𑀯𑀚𑁆𑀚𑁂𑀢𑁆𑀯𑀸 𑀬𑀼𑀢𑁆𑀢𑀁 𑀘𑁂, 𑀅𑀥𑀺𑀯𑀸𑀲𑁂𑀣. 𑀦𑁄 𑀘𑁂, 𑀫𑀸 𑀅𑀥𑀺𑀯𑀸𑀲𑀬𑀺𑀢𑁆𑀣𑀸’’𑀢𑀺. 𑀲𑀢𑁆𑀣𑀸 ‘‘𑀓𑀺𑀁 𑀦𑀼 𑀔𑁄 𑀲𑁄 𑀅𑀫𑁆𑀳𑀸𑀓𑀁 𑀓𑀸𑀢𑀼 𑀓𑀸𑀫𑁄’’𑀢𑀺 𑀆𑀯𑀚𑁆𑀚𑁂𑀢𑁆𑀯𑀸 𑀅𑀤𑁆𑀤𑀲 ‘‘𑀤𑁆𑀯𑀺𑀦𑁆𑀦𑀁 𑀕𑁂𑀳𑀸𑀦𑀁 𑀅𑀦𑁆𑀢𑀭𑁂 𑀫𑀳𑀦𑁆𑀢𑀁 𑀆𑀯𑀸𑀝𑀁 𑀔𑀡𑀸𑀧𑁂𑀢𑁆𑀯𑀸 𑀅𑀲𑀻𑀢𑀺𑀲𑀓𑀝𑀫𑀢𑁆𑀢𑀸𑀦𑀺 𑀔𑀤𑀺𑀭𑀤𑀸𑀭𑀽𑀦𑀺 𑀆𑀳𑀭𑀸𑀧𑁂𑀢𑁆𑀯𑀸 𑀧𑀽𑀭𑀸𑀧𑁂𑀢𑁆𑀯𑀸 𑀅𑀕𑁆𑀕𑀺𑀁 𑀤𑀢𑁆𑀯𑀸 𑀅𑀫𑁆𑀳𑁂 𑀅𑀗𑁆𑀕𑀸𑀭𑀆𑀯𑀸𑀝𑁂 𑀧𑀸𑀢𑁂𑀢𑁆𑀯𑀸 𑀦𑀺𑀕𑁆𑀕𑀡𑁆𑀳𑀺𑀢𑀼𑀓𑀸𑀫𑁄’’𑀢𑀺. 𑀧𑀼𑀦 𑀆𑀯𑀚𑁆𑀚𑁂𑀲𑀺 𑁋 ‘‘𑀓𑀺𑀁 𑀦𑀼 𑀔𑁄 𑀢𑀢𑁆𑀣 𑀕𑀢𑀧𑀘𑁆𑀘𑀬𑀸 𑀅𑀢𑁆𑀣𑁄 𑀅𑀢𑁆𑀣𑀺, 𑀦𑀢𑁆𑀣𑀻’’𑀢𑀺. 𑀢𑀢𑁄 𑀇𑀤𑀁 𑀅𑀤𑁆𑀤𑀲 𑁋 ‘‘𑀅𑀳𑀁 𑀅𑀗𑁆𑀕𑀸𑀭𑀆𑀯𑀸𑀝𑁂 𑀧𑀸𑀤𑀁 𑀧𑀲𑀸𑀭𑁂𑀲𑁆𑀲𑀸𑀫𑀺, 𑀢𑀁 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀞𑀧𑀺𑀢𑀓𑀺𑀮𑀜𑁆𑀚𑀁 𑀅𑀦𑁆𑀢𑀭𑀥𑀸𑀬𑀺𑀲𑁆𑀲𑀢𑀺, 𑀅𑀗𑁆𑀕𑀸𑀭𑀓𑀸𑀲𑀼𑀁 𑀪𑀺𑀦𑁆𑀤𑀺𑀢𑁆𑀯𑀸 𑀘𑀓𑁆𑀓𑀫𑀢𑁆𑀢𑀁 𑀫𑀳𑀸𑀧𑀤𑀼𑀫𑀁 𑀉𑀝𑁆𑀞𑀳𑀺𑀲𑁆𑀲𑀢𑀺, 𑀅𑀣𑀸𑀳𑀁 𑀧𑀤𑀼𑀫𑀓𑀡𑁆𑀡𑀺𑀓𑀸 𑀅𑀓𑁆𑀓𑀫𑀦𑁆𑀢𑁄 𑀆𑀲𑀦𑁂 𑀦𑀺𑀲𑀻𑀤𑀺𑀲𑁆𑀲𑀸𑀫𑀺, 𑀧𑀜𑁆𑀘𑀲𑀢𑀸 𑀪𑀺𑀓𑁆𑀔𑀽𑀧𑀺 𑀢𑀣𑁂𑀯 𑀕𑀦𑁆𑀢𑁆𑀯𑀸 𑀦𑀺𑀲𑀻𑀤𑀺𑀲𑁆𑀲𑀦𑁆𑀢𑀺, 𑀫𑀳𑀸𑀚𑀦𑁄 𑀲𑀦𑁆𑀦𑀺𑀧𑀢𑀺𑀲𑁆𑀲𑀢𑀺, 𑀅𑀳𑀁 𑀢𑀲𑁆𑀫𑀺𑀁 𑀲𑀫𑀸𑀕𑀫𑁂 𑀤𑁆𑀯𑀻𑀳𑀺 𑀕𑀸𑀣𑀸𑀳𑀺 𑀅𑀦𑀼𑀫𑁄𑀤𑀦𑀁 𑀓𑀭𑀺𑀲𑁆𑀲𑀸𑀫𑀺, 𑀅𑀦𑀼𑀫𑁄𑀤𑀦𑀧𑀭𑀺𑀬𑁄𑀲𑀸𑀦𑁂 𑀘𑀢𑀼𑀭𑀸𑀲𑀻𑀢𑀺𑀬𑀸 𑀧𑀸𑀡𑀲𑀳𑀲𑁆𑀲𑀸𑀦𑀁 𑀥𑀫𑁆𑀫𑀸𑀪𑀺𑀲𑀫𑀬𑁄 𑀪𑀯𑀺𑀲𑁆𑀲𑀢𑀺, 𑀲𑀺𑀭𑀺𑀕𑀼𑀢𑁆𑀢𑁄 𑀘 𑀕𑀭𑀳𑀤𑀺𑀦𑁆𑀦𑁄 𑀘 𑀲𑁄𑀢𑀸𑀧𑀦𑁆𑀦𑀸 𑀪𑀯𑀺𑀲𑁆𑀲𑀦𑁆𑀢𑀺, 𑀅𑀢𑁆𑀢𑀦𑁄 𑀘 𑀥𑀦𑀭𑀸𑀲𑀺𑀁 𑀲𑀸𑀲𑀦𑁂 𑀯𑀺𑀓𑀺𑀭𑀺𑀲𑁆𑀲𑀦𑁆𑀢𑀺, 𑀇𑀫𑀁 𑀓𑀼𑀮𑀧𑀼𑀢𑁆𑀢𑀁 𑀦𑀺𑀲𑁆𑀲𑀸𑀬 𑀫𑀬𑀸 𑀕𑀦𑁆𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀪𑀺𑀓𑁆𑀔𑀁 𑀅𑀥𑀺𑀯𑀸𑀲𑁂𑀲𑀺.

𑀲𑀺𑀭𑀺𑀕𑀼𑀢𑁆𑀢𑁄 𑀕𑀦𑁆𑀢𑁆𑀯𑀸 𑀲𑀢𑁆𑀣𑀼 𑀅𑀥𑀺𑀯𑀸𑀲𑀦𑀁 𑀕𑀭𑀳𑀤𑀺𑀦𑁆𑀦𑀲𑁆𑀲 𑀆𑀭𑁄𑀘𑁂𑀢𑁆𑀯𑀸 ‘‘𑀮𑁄𑀓𑀚𑁂𑀝𑁆𑀞𑀲𑁆𑀲 𑀲𑀓𑁆𑀓𑀸𑀭𑀁 𑀓𑀭𑁄𑀳𑀻’’𑀢𑀺 𑀆𑀳. 𑀕𑀭𑀳𑀤𑀺𑀦𑁆𑀦𑁄 ‘‘𑀇𑀤𑀸𑀦𑀺𑀲𑁆𑀲 𑀓𑀢𑁆𑀢𑀩𑁆𑀩𑀬𑀼𑀢𑁆𑀢𑀓𑀁 𑀚𑀸𑀦𑀺𑀲𑁆𑀲𑀸𑀫𑀻’’𑀢𑀺 𑀤𑁆𑀯𑀺𑀦𑁆𑀦𑀁 𑀕𑁂𑀳𑀸𑀦𑀁 𑀅𑀦𑁆𑀢𑀭𑁂 𑀫𑀳𑀦𑁆𑀢𑀁 𑀆𑀯𑀸𑀝𑀁 𑀔𑀡𑀸𑀧𑁂𑀢𑁆𑀯𑀸 𑀅𑀲𑀻𑀢𑀺𑀲𑀓𑀝𑀫𑀢𑁆𑀢𑀸𑀦𑀺 𑀔𑀤𑀺𑀭𑀤𑀸𑀭𑀽𑀦𑀺 𑀆𑀳𑀭𑀸𑀧𑁂𑀢𑁆𑀯𑀸 𑀧𑀽𑀭𑀸𑀧𑁂𑀢𑁆𑀯𑀸 𑀅𑀕𑁆𑀕𑀺𑀁 𑀤𑀢𑁆𑀯𑀸 𑀔𑀤𑀺𑀭𑀗𑁆𑀕𑀸𑀭𑀭𑀸𑀲𑀻𑀦𑀁 𑀬𑁄𑀚𑀸𑀧𑁂𑀢𑁆𑀯𑀸 𑀲𑀩𑁆𑀩𑀭𑀢𑁆𑀢𑀺𑀁 𑀥𑀫𑀸𑀧𑁂𑀢𑁆𑀯𑀸 𑀔𑀤𑀺𑀭𑀗𑁆𑀕𑀸𑀭𑀭𑀸𑀲𑀺𑀁 𑀓𑀸𑀭𑀸𑀧𑁂𑀢𑁆𑀯𑀸 𑀆𑀯𑀸𑀝𑀫𑀢𑁆𑀣𑀓𑁂 𑀭𑀼𑀓𑁆𑀔𑀧𑀤𑀭𑀸𑀦𑀺 𑀞𑀧𑀸𑀧𑁂𑀢𑁆𑀯𑀸 𑀓𑀺𑀮𑀜𑁆𑀚𑁂𑀦 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀕𑁄𑀫𑀬𑁂𑀦 𑀮𑀺𑀫𑁆𑀧𑀸𑀧𑁂𑀢𑁆𑀯𑀸 𑀏𑀓𑁂𑀦 𑀧𑀲𑁆𑀲𑁂𑀦 𑀤𑀼𑀩𑁆𑀩𑀮𑀤𑀡𑁆𑀟𑀓𑁂 𑀅𑀢𑁆𑀣𑀭𑀺𑀢𑁆𑀯𑀸 𑀕𑀫𑀦𑀫𑀕𑁆𑀕𑀁 𑀓𑀸𑀭𑁂𑀲𑀺, ‘‘𑀏𑀯𑀁 𑀅𑀓𑁆𑀓𑀦𑁆𑀢𑀅𑀓𑁆𑀓𑀦𑁆𑀢𑀓𑀸𑀮𑁂 𑀤𑀡𑁆𑀟𑀓𑁂𑀲𑀼 𑀪𑀕𑁆𑀕𑁂𑀲𑀼 𑀧𑀭𑀺𑀯𑀝𑁆𑀝𑁂𑀢𑁆𑀯𑀸 𑀅𑀗𑁆𑀕𑀸𑀭𑀓𑀸𑀲𑀼𑀬𑀁 𑀧𑀢𑀺𑀲𑁆𑀲𑀦𑁆𑀢𑀻’’𑀢𑀺 𑀫𑀜𑁆𑀜𑀫𑀸𑀦𑁄 𑀕𑁂𑀳𑀧𑀘𑁆𑀙𑀸𑀪𑀸𑀕𑁂 𑀲𑀺𑀭𑀺𑀕𑀼𑀢𑁆𑀢𑁂𑀦 𑀞𑀧𑀺𑀢𑀦𑀺𑀬𑀸𑀫𑁂𑀦𑁂𑀯 𑀘𑀸𑀝𑀺𑀬𑁄 𑀞𑀧𑀸𑀧𑁂𑀲𑀺, 𑀆𑀲𑀦𑀸𑀦𑀺𑀧𑀺 𑀢𑀣𑁂𑀯 𑀧𑀜𑁆𑀜𑀸𑀧𑁂𑀲𑀺. 𑀲𑀺𑀭𑀺𑀕𑀼𑀢𑁆𑀢𑁄 𑀧𑀸𑀢𑁄𑀯 𑀢𑀲𑁆𑀲 𑀕𑁂𑀳𑀁 𑀕𑀦𑁆𑀢𑁆𑀯𑀸 ‘‘𑀓𑀢𑁄 𑀢𑁂, 𑀲𑀫𑁆𑀫, 𑀲𑀓𑁆𑀓𑀸𑀭𑁄’’𑀢𑀺 𑀆𑀳. ‘‘𑀆𑀫, 𑀲𑀫𑁆𑀫𑀸’’𑀢𑀺. ‘‘𑀓𑀳𑀁 𑀧𑀦 𑀲𑁄’’𑀢𑀺? ‘‘𑀏𑀳𑀺, 𑀧𑀲𑁆𑀲𑀸𑀫𑀸’’𑀢𑀺 𑀲𑀩𑁆𑀩𑀁 𑀲𑀺𑀭𑀺𑀕𑀼𑀢𑁆𑀢𑁂𑀦 𑀤𑀲𑁆𑀲𑀺𑀢𑀦𑀬𑁂𑀦𑁂𑀯 𑀤𑀲𑁆𑀲𑁂𑀲𑀺. 𑀲𑀺𑀭𑀺𑀕𑀼𑀢𑁆𑀢𑁄 ‘‘𑀲𑀸𑀥𑀼, 𑀲𑀫𑁆𑀫𑀸’’𑀢𑀺 𑀆𑀳. 𑀫𑀳𑀸𑀚𑀦𑁄 𑀲𑀦𑁆𑀦𑀺𑀧𑀢𑀺. 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑁂𑀦 𑀳𑀺 𑀦𑀺𑀫𑀦𑁆𑀢𑀺𑀢𑁂 𑀫𑀳𑀦𑁆𑀢𑁄 𑀲𑀦𑁆𑀦𑀺𑀧𑀸𑀢𑁄 𑀅𑀳𑁄𑀲𑀺. 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀸𑀧𑀺 ‘‘𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀯𑀺𑀧𑁆𑀧𑀓𑀸𑀭𑀁 𑀧𑀲𑁆𑀲𑀺𑀲𑁆𑀲𑀸𑀫𑀸’’𑀢𑀺 𑀲𑀦𑁆𑀦𑀺𑀧𑀢𑀦𑁆𑀢𑀺, 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑀸𑀧𑀺 ‘‘𑀅𑀚𑁆𑀚 𑀲𑀢𑁆𑀣𑀸 𑀫𑀳𑀸𑀥𑀫𑁆𑀫𑀤𑁂𑀲𑀦𑀁 𑀤𑁂𑀲𑁂𑀲𑁆𑀲𑀢𑀺, 𑀩𑀼𑀤𑁆𑀥𑀯𑀺𑀲𑀬𑀁 𑀩𑀼𑀤𑁆𑀥𑀮𑀻𑀮𑀁 𑀉𑀧𑀥𑀸𑀭𑁂𑀲𑁆𑀲𑀸𑀫𑀸’’𑀢𑀺 𑀲𑀦𑁆𑀦𑀺𑀧𑀢𑀦𑁆𑀢𑀺.

𑀧𑀼𑀦𑀤𑀺𑀯𑀲𑁂 𑀲𑀢𑁆𑀣𑀸 𑀧𑀜𑁆𑀘𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺 𑀲𑀤𑁆𑀥𑀺𑀁 𑀕𑀭𑀳𑀤𑀺𑀦𑁆𑀦𑀲𑁆𑀲 𑀕𑁂𑀳𑀤𑁆𑀯𑀸𑀭𑀁 𑀅𑀕𑀫𑀸𑀲𑀺. 𑀲𑁄 𑀕𑁂𑀳𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀜𑁆𑀘𑀧𑀢𑀺𑀝𑁆𑀞𑀺𑀢𑁂𑀦 𑀯𑀦𑁆𑀤𑀺𑀢𑁆𑀯𑀸 𑀧𑀼𑀭𑀢𑁄 𑀅𑀜𑁆𑀚𑀮𑀺𑀁 𑀧𑀕𑁆𑀕𑀬𑁆𑀳 𑀞𑀺𑀢𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀪𑀦𑁆𑀢𑁂, ‘𑀢𑀼𑀫𑁆𑀳𑁂 𑀓𑀺𑀭 𑀅𑀢𑀻𑀢𑀸𑀤𑀺𑀪𑁂𑀤𑀁 𑀲𑀩𑁆𑀩𑀁 𑀚𑀸𑀦𑀸𑀣, 𑀲𑀢𑁆𑀢𑀸𑀦𑀁 𑀲𑁄𑀴𑀲𑀳𑀸𑀓𑀸𑀭𑁂𑀳𑀺 𑀘𑀺𑀢𑁆𑀢𑀁 𑀧𑀭𑀺𑀘𑁆𑀙𑀺𑀦𑁆𑀤𑀣𑀸’𑀢𑀺 𑀏𑀯𑀁 𑀢𑀼𑀫𑁆𑀳𑀸𑀓𑀁 𑀉𑀧𑀝𑁆𑀞𑀸𑀓𑁂𑀦 𑀫𑀬𑁆𑀳𑀁 𑀓𑀣𑀺𑀢𑀁. 𑀲𑀘𑁂 𑀚𑀸𑀦𑀸𑀣, 𑀫𑀬𑁆𑀳𑀁 𑀕𑁂𑀳𑀁 𑀫𑀸 𑀧𑀯𑀺𑀲𑀺𑀢𑁆𑀣. 𑀧𑀯𑀺𑀝𑁆𑀞𑀸𑀦𑀜𑁆𑀳𑀺 𑀯𑁄 𑀦𑁂𑀯 𑀬𑀸𑀕𑀼 𑀅𑀢𑁆𑀣𑀺, 𑀦 𑀪𑀢𑁆𑀢𑀸𑀤𑀻𑀦𑀺, 𑀲𑀩𑁆𑀩𑁂 𑀔𑁄 𑀧𑀦 𑀢𑀼𑀫𑁆𑀳𑁂 𑀅𑀗𑁆𑀕𑀸𑀭𑀓𑀸𑀲𑀼𑀬𑀁 𑀧𑀸𑀢𑁂𑀢𑁆𑀯𑀸 𑀦𑀺𑀕𑁆𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺. 𑀏𑀯𑀁 𑀘𑀺𑀦𑁆𑀢𑁂𑀢𑁆𑀯𑀸 𑀲𑀢𑁆𑀣𑀼 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 ‘‘𑀇𑀢𑁄 𑀏𑀣 𑀪𑀕𑀯𑀸’’𑀢𑀺 𑀯𑀢𑁆𑀯𑀸, ‘‘𑀪𑀦𑁆𑀢𑁂, 𑀅𑀫𑁆𑀳𑀸𑀓𑀁 𑀕𑁂𑀳𑀁 𑀆𑀕𑀢𑀸𑀦𑀁 𑀯𑀢𑁆𑀢𑀁 𑀜𑀢𑁆𑀯𑀸 𑀆𑀕𑀦𑁆𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀆𑀳. ‘‘𑀓𑀺𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺, 𑀆𑀯𑀼𑀲𑁄’’𑀢𑀺? ‘‘𑀏𑀓𑁂𑀓𑀲𑁆𑀲 𑀧𑀯𑀺𑀲𑀺𑀢𑁆𑀯𑀸 𑀧𑀼𑀭𑀢𑁄 𑀕𑀦𑁆𑀢𑁆𑀯𑀸 𑀦𑀺𑀲𑀺𑀦𑁆𑀦𑀓𑀸𑀮𑁂 𑀧𑀘𑁆𑀙𑀸 𑀅𑀜𑁆𑀜𑁂𑀦 𑀆𑀕𑀦𑁆𑀢𑀼𑀁 𑀯𑀝𑁆𑀝𑀢𑀻’’𑀢𑀺. 𑀏𑀯𑀁 𑀓𑀺𑀭𑀲𑁆𑀲 𑀅𑀳𑁄𑀲𑀺 𑁋 ‘‘𑀧𑀼𑀭𑀢𑁄 𑀕𑀘𑁆𑀙𑀦𑁆𑀢𑀁 𑀅𑀗𑁆𑀕𑀸𑀭𑀓𑀸𑀲𑀼𑀬𑀁 𑀧𑀢𑀺𑀢𑀁 𑀤𑀺𑀲𑁆𑀯𑀸 𑀅𑀯𑀲𑁂𑀲𑀸 𑀦 𑀆𑀕𑀘𑁆𑀙𑀺𑀲𑁆𑀲𑀦𑁆𑀢𑀺, 𑀏𑀓𑁂𑀓𑀫𑁂𑀯 𑀧𑀸𑀢𑁂𑀢𑁆𑀯𑀸 𑀦𑀺𑀕𑁆𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺. 𑀲𑀢𑁆𑀣𑀸 ‘‘𑀲𑀸𑀥𑀽’’𑀢𑀺 𑀯𑀢𑁆𑀯𑀸 𑀏𑀓𑀓𑁄𑀯 𑀧𑀸𑀬𑀸𑀲𑀺. 𑀕𑀭𑀳𑀤𑀺𑀦𑁆𑀦𑁄 𑀅𑀗𑁆𑀕𑀸𑀭𑀓𑀸𑀲𑀼𑀁 𑀧𑀢𑁆𑀯𑀸 𑀅𑀧𑀲𑀓𑁆𑀓𑀺𑀢𑁆𑀯𑀸 𑀞𑀺𑀢𑁄 ‘‘𑀧𑀼𑀭𑀢𑁄 𑀬𑀸𑀣, 𑀪𑀦𑁆𑀢𑁂’’𑀢𑀺 𑀆𑀳. 𑀅𑀣 𑀲𑀢𑁆𑀣𑀸 𑀅𑀗𑁆𑀕𑀸𑀭𑀓𑀸𑀲𑀼𑀫𑀢𑁆𑀣𑀓𑁂 𑀧𑀸𑀤𑀁 𑀧𑀲𑀸𑀭𑁂𑀲𑀺, 𑀓𑀺𑀮𑀜𑁆𑀚𑀁 𑀅𑀦𑁆𑀢𑀭𑀥𑀸𑀬𑀺, 𑀅𑀗𑁆𑀕𑀸𑀭𑀓𑀸𑀲𑀼𑀁 𑀪𑀺𑀦𑁆𑀤𑀺𑀢𑁆𑀯𑀸 𑀘𑀓𑁆𑀓𑀫𑀢𑁆𑀢𑀸𑀦𑀺 𑀧𑀤𑀼𑀫𑀸𑀦𑀺 𑀉𑀝𑁆𑀞𑀳𑀺𑀁𑀲𑀼. 𑀲𑀢𑁆𑀣𑀸 𑀧𑀤𑀼𑀫𑀓𑀡𑁆𑀡𑀺𑀓𑀸 𑀅𑀓𑁆𑀓𑀫𑀦𑁆𑀢𑁄 𑀕𑀦𑁆𑀢𑁆𑀯𑀸 𑀧𑀜𑁆𑀜𑀢𑁆𑀢𑁂 𑀩𑀼𑀤𑁆𑀥𑀸𑀲𑀦𑁂 𑀦𑀺𑀲𑀻𑀤𑀺, 𑀪𑀺𑀓𑁆𑀔𑀽𑀧𑀺 𑀢𑀣𑁂𑀯 𑀕𑀦𑁆𑀢𑁆𑀯𑀸 𑀦𑀺𑀲𑀻𑀤𑀺𑀁𑀲𑀼. 𑀕𑀭𑀳𑀤𑀺𑀦𑁆𑀦𑀲𑁆𑀲 𑀓𑀸𑀬𑀢𑁄 𑀟𑀸𑀳𑁄 𑀉𑀝𑁆𑀞𑀳𑀺.

𑀲𑁄 𑀯𑁂𑀕𑁂𑀦 𑀕𑀦𑁆𑀢𑁆𑀯𑀸 𑀲𑀺𑀭𑀺𑀕𑀼𑀢𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸, ‘‘𑀲𑀸𑀫𑀺, 𑀫𑁂 𑀢𑀸𑀡𑀁 𑀳𑁄𑀳𑀻’’𑀢𑀺 𑀆𑀳. ‘‘𑀓𑀺𑀁 𑀏𑀢’’𑀦𑁆𑀢𑀺? ‘‘𑀧𑀜𑁆𑀘𑀦𑁆𑀦𑀁 𑀪𑀺𑀓𑁆𑀔𑀼𑀲𑀢𑀸𑀦𑀁 𑀕𑁂𑀳𑁂 𑀬𑀸𑀕𑀼 𑀯𑀸 𑀪𑀢𑁆𑀢𑀸𑀤𑀻𑀦𑀺 𑀯𑀸 𑀦𑀢𑁆𑀣𑀺, 𑀓𑀺𑀁 𑀦𑀼 𑀔𑁄 𑀓𑀭𑁄𑀫𑀻’’𑀢𑀺? ‘‘𑀓𑀺𑀁 𑀧𑀦 𑀢𑀬𑀸 𑀓𑀢’’𑀦𑁆𑀢𑀺 𑀆𑀳. 𑀅𑀳𑀁 𑀤𑁆𑀯𑀺𑀦𑁆𑀦𑀁 𑀕𑁂𑀳𑀸𑀦𑀁 𑀅𑀦𑁆𑀢𑀭𑁂 𑀫𑀳𑀦𑁆𑀢𑀁 𑀆𑀯𑀸𑀝𑀁 𑀅𑀗𑁆𑀕𑀸𑀭𑀲𑁆𑀲 𑀧𑀽𑀭𑀁 𑀓𑀸𑀭𑁂𑀲𑀺𑀁 𑁋 ‘‘𑀢𑀢𑁆𑀣 𑀧𑀸𑀢𑁂𑀢𑁆𑀯𑀸 𑀦𑀺𑀕𑁆𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺. ‘‘𑀅𑀣 𑀦𑀁 𑀪𑀺𑀦𑁆𑀤𑀺𑀢𑁆𑀯𑀸 𑀫𑀳𑀸𑀧𑀤𑀼𑀫𑀸𑀦𑀺 𑀉𑀝𑁆𑀞𑀳𑀺𑀁𑀲𑀼. 𑀲𑀩𑁆𑀩𑁂 𑀧𑀤𑀼𑀫𑀓𑀡𑁆𑀡𑀺𑀓𑀸 𑀅𑀓𑁆𑀓𑀫𑀺𑀢𑁆𑀯𑀸 𑀕𑀦𑁆𑀢𑁆𑀯𑀸 𑀧𑀜𑁆𑀜𑀢𑁆𑀢𑀸𑀲𑀦𑁂𑀲𑀼 𑀦𑀺𑀲𑀺𑀦𑁆𑀦𑀸, 𑀇𑀤𑀸𑀦𑀺 𑀓𑀺𑀁 𑀓𑀭𑁄𑀫𑀺, 𑀲𑀸𑀫𑀻’’𑀢𑀺? 𑀦𑀦𑀼 𑀢𑁆𑀯𑀁 𑀇𑀤𑀸𑀦𑁂𑀯 𑀫𑀬𑁆𑀳𑀁 ‘‘‘𑀏𑀢𑁆𑀢𑀺𑀓𑀸 𑀘𑀸𑀝𑀺𑀬𑁄, 𑀏𑀢𑁆𑀢𑀺𑀓𑀸 𑀬𑀸𑀕𑀼, 𑀏𑀢𑁆𑀢𑀓𑀸𑀦𑀺 𑀲𑀢𑁆𑀢𑀸𑀤𑀻𑀦𑀻’𑀢𑀺 𑀤𑀲𑁆𑀲𑁂𑀲𑀻’’𑀢𑀺. ‘‘𑀫𑀼𑀲𑀸 𑀢𑀁, 𑀲𑀸𑀫𑀺, 𑀢𑀼𑀘𑁆𑀙𑀸𑀯 𑀘𑀸𑀝𑀺𑀬𑁄’’𑀢𑀺. 𑀳𑁄𑀢𑀼, ‘‘𑀕𑀘𑁆𑀙, 𑀢𑀸𑀲𑀼 𑀘𑀸𑀝𑀻𑀲𑀼 𑀬𑀸𑀕𑀼𑀆𑀤𑀻𑀦𑀺 𑀑𑀮𑁄𑀓𑁂𑀳𑀻’’𑀢𑀺. 𑀢𑀁 𑀔𑀡𑀜𑁆𑀜𑁂𑀯 𑀢𑁂𑀦 𑀬𑀸𑀲𑀼 𑀘𑀸𑀝𑀻𑀲𑀼 ‘‘𑀬𑀸𑀕𑀽’’𑀢𑀺 𑀯𑀼𑀢𑁆𑀢𑀁, 𑀢𑀸 𑀬𑀸𑀕𑀼𑀬𑀸 𑀧𑀽𑀭𑀬𑀺𑀁𑀲𑀼, 𑀬𑀸𑀲𑀼 ‘‘𑀪𑀢𑁆𑀢𑀸𑀤𑀻𑀦𑀻’’𑀢𑀺 𑀯𑀼𑀢𑁆𑀢𑀁, 𑀢𑀸 𑀪𑀢𑁆𑀢𑀸𑀤𑀻𑀦𑀁 𑀧𑀭𑀺𑀧𑀼𑀡𑁆𑀡𑀸𑀯 𑀅𑀳𑁂𑀲𑀼𑀁. 𑀢𑀁 𑀲𑀫𑁆𑀧𑀢𑁆𑀢𑀺𑀁 𑀤𑀺𑀲𑁆𑀯𑀸𑀯 𑀕𑀭𑀳𑀤𑀺𑀦𑁆𑀦𑀲𑁆𑀲 𑀲𑀭𑀻𑀭𑀁 𑀧𑀻𑀢𑀺𑀧𑀸𑀫𑁄𑀚𑁆𑀚𑁂𑀦 𑀧𑀭𑀺𑀧𑀽𑀭𑀺𑀢𑀁, 𑀘𑀺𑀢𑁆𑀢𑀁 𑀧𑀲𑀦𑁆𑀦𑀁. 𑀲𑁄 𑀲𑀓𑁆𑀓𑀘𑁆𑀘𑀁 𑀩𑀼𑀤𑁆𑀥𑀧𑁆𑀧𑀫𑀼𑀔𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀭𑀺𑀯𑀺𑀲𑀺𑀢𑁆𑀯𑀸 𑀓𑀢𑀪𑀢𑁆𑀢𑀓𑀺𑀘𑁆𑀘𑀲𑁆𑀲 𑀲𑀢𑁆𑀣𑀼𑀦𑁄 𑀅𑀦𑀼𑀫𑁄𑀤𑀦𑀁 𑀓𑀸𑀭𑁂𑀢𑀼𑀓𑀸𑀫𑁄 𑀧𑀢𑁆𑀢𑀁 𑀕𑀡𑁆𑀳𑀺. 𑀲𑀢𑁆𑀣𑀸 𑀅𑀦𑀼𑀫𑁄𑀤𑀦𑀁 𑀓𑀭𑁄𑀦𑁆𑀢𑁄 ‘‘𑀇𑀫𑁂 𑀲𑀢𑁆𑀢𑀸 𑀧𑀜𑁆𑀜𑀸𑀘𑀓𑁆𑀔𑀼𑀦𑁄 𑀅𑀪𑀸𑀯𑁂𑀦𑁂𑀯 𑀫𑀫 𑀲𑀸𑀯𑀓𑀸𑀦𑀁 𑀩𑀼𑀤𑁆𑀥𑀲𑀸𑀲𑀦𑀲𑁆𑀲 𑀕𑀼𑀡𑀁 𑀦 𑀚𑀸𑀦𑀦𑁆𑀢𑀺. 𑀧𑀜𑁆𑀜𑀸𑀘𑀓𑁆𑀔𑀼𑀯𑀺𑀭𑀳𑀺𑀢𑀸 𑀳𑀺 𑀅𑀦𑁆𑀥𑀸 𑀦𑀸𑀫, 𑀧𑀜𑁆𑀜𑀯𑀦𑁆𑀢𑁄 𑀲𑀘𑀓𑁆𑀔𑀼𑀓𑀸 𑀦𑀸𑀫𑀸’’𑀢𑀺 𑀯𑀢𑁆𑀯𑀸 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺 𑁋

𑁫𑁮. ‘‘𑀬𑀣𑀸 𑀲𑀗𑁆𑀓𑀸𑀭𑀥𑀸𑀦𑀲𑁆𑀫𑀺𑀁, 𑀉𑀚𑁆𑀛𑀺𑀢𑀲𑁆𑀫𑀺𑀁 𑀫𑀳𑀸𑀧𑀣𑁂;

𑀧𑀤𑀼𑀫𑀁 𑀢𑀢𑁆𑀣 𑀚𑀸𑀬𑁂𑀣, 𑀲𑀼𑀘𑀺𑀕𑀦𑁆𑀥𑀁 𑀫𑀦𑁄𑀭𑀫𑀁.

𑁫𑁯. ‘‘𑀏𑀯𑀁 𑀲𑀗𑁆𑀓𑀸𑀭𑀪𑀽𑀢𑁂𑀲𑀼, 𑀅𑀦𑁆𑀥𑀪𑀽𑀢𑁂 𑀧𑀼𑀣𑀼𑀚𑁆𑀚𑀦𑁂;

𑀅𑀢𑀺𑀭𑁄𑀘𑀢𑀺 𑀧𑀜𑁆𑀜𑀸𑀬, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑀸𑀯𑀓𑁄’’𑀢𑀺.

𑀢𑀢𑁆𑀣 𑀲𑀗𑁆𑀓𑀸𑀭𑀥𑀸𑀦𑀲𑁆𑀫𑀺𑀦𑁆𑀢𑀺 𑀲𑀗𑁆𑀓𑀸𑀭𑀞𑀸𑀦𑀲𑁆𑀫𑀺𑀁, 𑀓𑀘𑀯𑀭𑀭𑀸𑀲𑀺𑀫𑁆𑀳𑀻𑀢𑀺 𑀅𑀢𑁆𑀣𑁄. 𑀉𑀚𑁆𑀛𑀺𑀢𑀲𑁆𑀫𑀺𑀁 𑀫𑀳𑀸𑀧𑀣𑁂𑀢𑀺 𑀫𑀳𑀸𑀫𑀕𑁆𑀕𑁂 𑀙𑀟𑁆𑀟𑀺𑀢𑀲𑁆𑀫𑀺𑀁. 𑀲𑀼𑀘𑀺𑀕𑀦𑁆𑀥𑀦𑁆𑀢𑀺 𑀲𑀼𑀭𑀪𑀺𑀕𑀦𑁆𑀥𑀁. 𑀫𑀦𑁄 𑀏𑀢𑁆𑀣 𑀭𑀫𑀢𑀻𑀢𑀺 𑀫𑀦𑁄𑀭𑀫𑀁. 𑀲𑀗𑁆𑀓𑀸𑀭𑀪𑀽𑀢𑁂𑀲𑀽𑀢𑀺 𑀲𑀗𑁆𑀓𑀸𑀭𑀫𑀺𑀯 𑀪𑀽𑀢𑁂𑀲𑀼. 𑀧𑀼𑀣𑀼𑀚𑁆𑀚𑀦𑁂𑀢𑀺 𑀧𑀼𑀣𑀽𑀦𑀁 𑀓𑀺𑀮𑁂𑀲𑀸𑀦𑀁 𑀚𑀦𑀦𑀢𑁄 𑀏𑀯𑀁𑀮𑀤𑁆𑀥𑀦𑀸𑀫𑁂 𑀮𑁄𑀓𑀺𑀬𑀫𑀳𑀸𑀚𑀦𑁂. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀣𑀸 𑀦𑀸𑀫 𑀫𑀳𑀸𑀧𑀣𑁂 𑀙𑀟𑁆𑀟𑀺𑀢𑁂 𑀲𑀗𑁆𑀓𑀸𑀭𑀭𑀸𑀲𑀺𑀫𑁆𑀳𑀺 𑀅𑀲𑀼𑀘𑀺𑀚𑁂𑀕𑀼𑀘𑁆𑀙𑀺𑀬𑀧𑀝𑀺𑀓𑀽𑀮𑁂𑀧𑀺 𑀲𑀼𑀘𑀺𑀕𑀦𑁆𑀥𑀁 𑀧𑀤𑀼𑀫𑀁 𑀚𑀸𑀬𑁂𑀣, 𑀢𑀁 𑀭𑀸𑀚𑀭𑀸𑀚𑀫𑀳𑀸𑀫𑀢𑁆𑀢𑀸𑀤𑀻𑀦𑀁 𑀫𑀦𑁄𑀭𑀫𑀁 𑀧𑀺𑀬𑀁 𑀫𑀦𑀸𑀧𑀁 𑀉𑀧𑀭𑀺𑀫𑀢𑁆𑀣𑀓𑁂 𑀧𑀢𑀺𑀝𑁆𑀞𑀸𑀦𑀸𑀭𑀳𑀫𑁂𑀯 𑀪𑀯𑁂𑀬𑁆𑀬, 𑀏𑀯𑀫𑁂𑀯 𑀲𑀗𑁆𑀓𑀸𑀭𑀪𑀽𑀢𑁂𑀲𑀼𑀧𑀺 𑀧𑀼𑀣𑀼𑀚𑁆𑀚𑀦𑁂𑀲𑀼 𑀚𑀸𑀢𑁄 𑀦𑀺𑀧𑁆𑀧𑀜𑁆𑀜𑀲𑁆𑀲 𑀫𑀳𑀸𑀚𑀦𑀲𑁆𑀲 𑀅𑀘𑀓𑁆𑀔𑀼𑀓𑀲𑁆𑀲 𑀅𑀦𑁆𑀢𑀭𑁂 𑀦𑀺𑀩𑁆𑀩𑀢𑁆𑀢𑁄𑀧𑀺 𑀅𑀢𑁆𑀢𑀦𑁄 𑀧𑀜𑁆𑀜𑀸𑀩𑀮𑁂𑀦 𑀓𑀸𑀫𑁂𑀲𑀼 𑀆𑀤𑀻𑀦𑀯𑀁, 𑀦𑁂𑀓𑁆𑀔𑀫𑁆𑀫𑁂 𑀘 𑀆𑀦𑀺𑀲𑀁𑀲𑀁 𑀤𑀺𑀲𑁆𑀯𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀩𑁆𑀩𑀚𑀺𑀢𑁄 𑀧𑀩𑁆𑀩𑀚𑁆𑀚𑀸𑀫𑀢𑁆𑀢𑁂𑀦𑀧𑀺, 𑀓𑀢𑁄 𑀉𑀢𑁆𑀢𑀭𑀺𑀁 𑀲𑀻𑀮𑀲𑀫𑀸𑀥𑀺𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀸𑀦𑀺 𑀆𑀭𑀸𑀥𑁂𑀢𑁆𑀯𑀸𑀧𑀺 𑀅𑀢𑀺𑀭𑁄𑀘𑀢𑀺. 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑀸𑀯𑀓𑁄 𑀳𑀺 𑀔𑀻𑀡𑀸𑀲𑀯𑁄 𑀪𑀺𑀓𑁆𑀔𑀼 𑀅𑀦𑁆𑀥𑀪𑀽𑀢𑁂 𑀧𑀼𑀣𑀼𑀚𑁆𑀚𑀦𑁂 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀭𑁄𑀘𑀢𑀺 𑀯𑀺𑀭𑁄𑀘𑀢𑀺 𑀲𑁄𑀪𑀢𑀻𑀢𑀺.

𑀤𑁂𑀲𑀦𑀸𑀯𑀲𑀸𑀦𑁂 𑀘𑀢𑀼𑀭𑀸𑀲𑀻𑀢𑀺𑀬𑀸 𑀧𑀸𑀡𑀲𑀳𑀲𑁆𑀲𑀸𑀦𑀁 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀺. 𑀕𑀭𑀳𑀤𑀺𑀦𑁆𑀦𑁄 𑀘 𑀲𑀺𑀭𑀺𑀕𑀼𑀢𑁆𑀢𑁄 𑀘 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀧𑀸𑀧𑀼𑀡𑀺𑀁𑀲𑀼. 𑀢𑁂 𑀲𑀩𑁆𑀩𑀁 𑀅𑀢𑁆𑀢𑀦𑁄 𑀥𑀦𑀁 𑀩𑀼𑀤𑁆𑀥𑀲𑀸𑀲𑀦𑁂 𑀯𑀺𑀧𑁆𑀧𑀓𑀺𑀭𑀺𑀁𑀲𑀼. 𑀲𑀢𑁆𑀣𑀸 𑀉𑀝𑁆𑀞𑀸𑀬𑀸𑀲𑀦𑀸 𑀯𑀺𑀳𑀸𑀭𑀫𑀕𑀫𑀸𑀲𑀺. 𑀪𑀺𑀓𑁆𑀔𑀽 𑀲𑀸𑀬𑀦𑁆𑀳𑀲𑀫𑀬𑁂 𑀥𑀫𑁆𑀫𑀲𑀪𑀸𑀬𑀁 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 𑁋 ‘‘𑀅𑀳𑁄 𑀅𑀘𑁆𑀙𑀭𑀺𑀬𑀸 𑀩𑀼𑀤𑁆𑀥𑀕𑀼𑀡𑀸 𑀦𑀸𑀫, 𑀢𑀣𑀸𑀭𑀽𑀧𑀁 𑀦𑀸𑀫 𑀔𑀤𑀺𑀭𑀗𑁆𑀕𑀸𑀭𑀭𑀸𑀲𑀺𑀁 𑀪𑀺𑀦𑁆𑀤𑀺𑀢𑁆𑀯𑀸 𑀧𑀤𑀼𑀫𑀸𑀦𑀺 𑀉𑀝𑁆𑀞𑀳𑀺𑀁𑀲𑀽’’𑀢𑀺. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸, ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 𑁋 ‘‘𑀅𑀦𑀘𑁆𑀙𑀭𑀺𑀬𑀁, 𑀪𑀺𑀓𑁆𑀔𑀯𑁂, 𑀬𑀁 𑀫𑀫 𑀏𑀢𑀭𑀳𑀺 𑀩𑀼𑀤𑁆𑀥𑀪𑀽𑀢𑀲𑁆𑀲 𑀅𑀗𑁆𑀕𑀸𑀭𑀭𑀸𑀲𑀺𑀫𑁆𑀳𑀸 𑀧𑀤𑀼𑀫𑀸𑀦𑀺 𑀉𑀝𑁆𑀞𑀺𑀢𑀸𑀦𑀺, 𑀅𑀧𑀭𑀺𑀧𑀓𑁆𑀓𑁂 𑀜𑀸𑀡𑁂 𑀯𑀢𑁆𑀢𑀫𑀸𑀦𑀲𑁆𑀲 𑀩𑁄𑀥𑀺𑀲𑀢𑁆𑀢𑀪𑀽𑀢𑀲𑁆𑀲𑀧𑀺 𑀫𑁂 𑀉𑀝𑁆𑀞𑀳𑀺𑀁𑀲𑀽’’𑀢𑀺 𑀯𑀢𑁆𑀯𑀸, ‘‘𑀓𑀤𑀸, 𑀪𑀦𑁆𑀢𑁂, 𑀆𑀘𑀺𑀓𑁆𑀔𑀣 𑀦𑁄’’𑀢𑀺 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺𑀢𑁆𑀯𑀸 𑁋

‘‘𑀓𑀸𑀫𑀁 𑀧𑀢𑀸𑀫𑀺 𑀦𑀺𑀭𑀬𑀁, 𑀉𑀤𑁆𑀥𑀁𑀧𑀸𑀤𑁄 𑀅𑀯𑀁𑀲𑀺𑀭𑁄;

𑀦𑀸𑀦𑀭𑀺𑀬𑀁 𑀓𑀭𑀺𑀲𑁆𑀲𑀸𑀫𑀺, 𑀳𑀦𑁆𑀤 𑀧𑀺𑀡𑁆𑀟𑀁 𑀧𑀝𑀺𑀕𑁆𑀕𑀳𑀸’’𑀢𑀺. (𑀚𑀸. 𑁧.𑁧.𑁪𑁦) 𑁋

𑀇𑀤𑀁 𑀔𑀤𑀺𑀭𑀗𑁆𑀕𑀸𑀭𑀚𑀸𑀢𑀓𑀁 𑀯𑀺𑀢𑁆𑀣𑀸𑀭𑁂𑀢𑁆𑀯𑀸 𑀓𑀣𑁂𑀲𑀻𑀢𑀺.

𑀕𑀭𑀳𑀤𑀺𑀦𑁆𑀦𑀯𑀢𑁆𑀣𑀼 𑀤𑁆𑀯𑀸𑀤𑀲𑀫𑀁.

𑀧𑀼𑀧𑁆𑀨𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀘𑀢𑀼𑀢𑁆𑀣𑁄 𑀯𑀕𑁆𑀕𑁄.