𑁭. 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁭. 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑁂 𑀲𑀳𑀚𑀸𑀢𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀲𑁆𑀲 𑀧𑀼𑀭𑀺𑀫𑀸𑀦𑀁 𑀢𑀺𑀡𑁆𑀡𑀁 𑀓𑁄𑀝𑁆𑀞𑀸𑀲𑀸𑀦𑀁 𑀯𑀲𑁂𑀦 𑀧𑀸𑀴𑀺 𑀆𑀕𑀢𑀸. 𑀢𑀲𑁆𑀲𑀸 𑀢𑀢𑁆𑀣 𑀯𑀼𑀢𑁆𑀢𑀲𑀤𑀺𑀲𑀸𑀯 𑀯𑀡𑁆𑀡𑀦𑀸𑀢𑀺 𑀧𑀼𑀦 𑀦 𑀕𑀳𑀺𑀢𑀸. 𑀅𑀬𑀫𑁆𑀧𑀺 𑀘 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑁄 𑀚𑀸𑀢𑀺𑀯𑀲𑁂𑀦 𑀓𑀼𑀲𑀮𑁄 𑀅𑀓𑀼𑀲𑀮𑁄 𑀯𑀺𑀧𑀸𑀓𑁄 𑀓𑀺𑀭𑀺𑀬𑀁 𑀭𑀽𑀧𑀦𑁆𑀢𑀺 𑀧𑀜𑁆𑀘𑀥𑀸 𑀪𑀺𑀦𑁆𑀦𑁄. 𑀢𑀢𑁆𑀣 𑀓𑀼𑀲𑀮𑁄 𑀪𑀽𑀫𑀺𑀢𑁄 𑀘𑀢𑀼𑀩𑁆𑀩𑀺𑀥𑁄. 𑀲𑀩𑁆𑀩𑀁 𑀧𑀼𑀭𑀺𑀫𑀲𑀤𑀺𑀲𑀫𑁂𑀯𑀸𑀢𑀺 𑀏𑀯𑀫𑁂𑀢𑁆𑀣 𑀦𑀸𑀦𑀧𑁆𑀧𑀓𑀸𑀭𑀪𑁂𑀤𑀢𑁄 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄.

𑀏𑀯𑀁 𑀪𑀺𑀦𑁆𑀦𑁂 𑀧𑀦𑁂𑀢𑁆𑀣 𑀲𑀩𑁆𑀩𑀫𑁆𑀧𑀺 𑀘𑀢𑀼𑀪𑀽𑀫𑀓𑀁 𑀓𑀼𑀲𑀮𑀁 𑀅𑀢𑁆𑀢𑀦𑀸 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. 𑀢𑀣𑀸 𑀅𑀓𑀼𑀲𑀮𑀁. 𑀯𑀺𑀧𑀸𑀓𑁂 𑀧𑀦 𑀓𑀸𑀫𑀸𑀯𑀘𑀭𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑀁 𑀧𑀝𑀺𑀲𑀦𑁆𑀥𑀺𑀬𑀁 𑀯𑀢𑁆𑀣𑀼𑀭𑀽𑀧𑀲𑁆𑀲, 𑀧𑀯𑀢𑁆𑀢𑁂 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀜𑁆𑀜𑁂𑀯. 𑀅𑀭𑀽𑀧𑀸𑀯𑀘𑀭𑀮𑁄𑀓𑀼𑀢𑁆𑀢𑀭𑀯𑀺𑀧𑀸𑀓𑀁 𑀅𑀢𑁆𑀢𑀦𑀸 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀜𑁆𑀜𑁂𑀯 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. 𑀲𑀩𑁆𑀩𑀫𑁆𑀧𑀺 𑀓𑀺𑀭𑀺𑀬𑀁 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀜𑁆𑀜𑁂𑀯 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. 𑀘𑀢𑀼𑀲𑀫𑀼𑀝𑁆𑀞𑀸𑀦𑀺𑀓𑀭𑀽𑀧𑀲𑁆𑀲 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑁂 𑀏𑀓𑀁 𑀫𑀳𑀸𑀪𑀽𑀢𑀁 𑀢𑀺𑀡𑁆𑀡𑀁, 𑀢𑀻𑀡𑀺 𑀏𑀓𑀲𑁆𑀲, 𑀤𑁆𑀯𑁂 𑀤𑁆𑀯𑀺𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. 𑀓𑀸𑀫𑀸𑀯𑀘𑀭𑀭𑀽𑀧𑀸𑀯𑀘𑀭𑀧𑀝𑀺𑀲𑀦𑁆𑀥𑀺𑀬𑀁 𑀯𑀢𑁆𑀣𑀼𑀭𑀽𑀧𑀁 𑀯𑀺𑀧𑀸𑀓𑀓𑁆𑀔𑀦𑁆𑀥𑀸𑀦𑀁 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. 𑀉𑀢𑀼𑀘𑀺𑀢𑁆𑀢𑀸𑀳𑀸𑀭𑀲𑀫𑀼𑀝𑁆𑀞𑀸𑀦𑁂𑀲𑀼 𑀫𑀳𑀸𑀪𑀽𑀢𑀸𑀦𑁂𑀯 𑀫𑀳𑀸𑀪𑀽𑀢𑀸𑀦𑀁 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄𑀢𑀺 𑀏𑀯𑀫𑁂𑀢𑁆𑀣 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀢𑁄𑀧𑀺 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄𑀢𑀺.

𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸.