𑁬. 𑀜𑀸𑀡𑀓𑀣𑀸𑀯𑀡𑁆𑀡𑀦𑀸

𑁮𑁭𑁬-𑁮𑁭𑁭. 𑀇𑀤𑀸𑀦𑀺 𑀜𑀸𑀡𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀣 𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑁂 𑀤𑁆𑀯𑀸𑀤𑀲𑀸𑀓𑀸𑀭𑀜𑀸𑀡𑀁 𑀲𑀦𑁆𑀥𑀸𑀬 ‘‘𑀤𑁆𑀯𑀸𑀤𑀲𑀯𑀢𑁆𑀣𑀼𑀓𑀁 𑀜𑀸𑀡𑀁 𑀮𑁄𑀓𑀼𑀢𑁆𑀢𑀭’’𑀦𑁆𑀢𑀺 𑀬𑁂𑀲𑀁 𑀮𑀤𑁆𑀥𑀺, 𑀲𑁂𑀬𑁆𑀬𑀣𑀸𑀧𑀺 𑀧𑀼𑀩𑁆𑀩𑀲𑁂𑀮𑀺𑀬𑀸𑀦𑀁, 𑀢𑁂 𑀲𑀦𑁆𑀥𑀸𑀬 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀧𑀝𑀺𑀜𑁆𑀜𑀸 𑀇𑀢𑀭𑀲𑁆𑀲. 𑀅𑀣 𑀦𑀁 ‘‘𑀲𑀘𑁂 𑀢𑀁 𑀤𑁆𑀯𑀸𑀤𑀲𑀯𑀢𑁆𑀣𑀼𑀓𑀁, 𑀤𑁆𑀯𑀸𑀤𑀲𑀳𑀺 𑀫𑀕𑁆𑀕𑀜𑀸𑀡𑁂𑀳𑀺 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀘𑁄𑀤𑁂𑀢𑀼𑀁 𑀤𑁆𑀯𑀸𑀤𑀲𑀸𑀢𑀺𑀆𑀤𑀺𑀫𑀸𑀳. 𑀇𑀢𑀭𑁄 𑀫𑀕𑁆𑀕𑀲𑁆𑀲 𑀏𑀓𑀢𑁆𑀢𑀁 𑀲𑀦𑁆𑀥𑀸𑀬 𑀧𑀝𑀺𑀓𑁆𑀔𑀺𑀧𑀢𑀺, 𑀏𑀓𑁂𑀓𑀲𑁆𑀫𑀺𑀁 𑀲𑀘𑁆𑀘𑁂 𑀲𑀘𑁆𑀘𑀜𑀸𑀡𑀓𑀺𑀘𑁆𑀘𑀜𑀸𑀡𑀓𑀢𑀜𑀸𑀡𑀸𑀦𑀁 𑀯𑀲𑁂𑀦 𑀜𑀸𑀡𑀦𑀸𑀦𑀢𑁆𑀢𑀁 𑀲𑀦𑁆𑀥𑀸𑀬 𑀧𑀝𑀺𑀚𑀸𑀦𑀸𑀢𑀺. 𑀤𑁆𑀯𑀸𑀤𑀲 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀸𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀦𑀦𑀼 𑀯𑀼𑀢𑁆𑀢𑀁 𑀪𑀕𑀯𑀢𑀸𑀢𑀺 𑀲𑀼𑀢𑁆𑀢𑀁 𑀲𑀤𑁆𑀥𑀺𑀁 𑀧𑀼𑀩𑁆𑀩𑀪𑀸𑀕𑀧𑀭𑀪𑀸𑀕𑁂𑀳𑀺 𑀜𑀸𑀡𑀦𑀸𑀦𑀢𑁆𑀢𑀁 𑀤𑀻𑀧𑁂𑀢𑀺, 𑀦 𑀅𑀭𑀺𑀬𑀫𑀕𑁆𑀕𑀲𑁆𑀲 𑀤𑁆𑀯𑀸𑀤𑀲 𑀜𑀸𑀡𑀢𑀁. 𑀢𑀲𑁆𑀫𑀸 𑀅𑀲𑀸𑀥𑀓𑀦𑁆𑀢𑀺.

𑀜𑀸𑀡𑀓𑀣𑀸𑀯𑀡𑁆𑀡𑀦𑀸.

𑀯𑀻𑀲𑀢𑀺𑀫𑁄 𑀯𑀕𑁆𑀕𑁄.

𑀘𑀢𑀼𑀢𑁆𑀣𑀧𑀡𑁆𑀡𑀸𑀲𑀓𑁄 𑀲𑀫𑀢𑁆𑀢𑁄.