𑁨𑁧. 𑀏𑀓𑀯𑀻𑀲𑀢𑀺𑀫𑀯𑀕𑁆𑀕𑁄

𑁧. 𑀲𑀸𑀲𑀦𑀓𑀣𑀸𑀯𑀡𑁆𑀡𑀦𑀸

𑁮𑁭𑁮. 𑀇𑀤𑀸𑀦𑀺 𑀲𑀸𑀲𑀦𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀣 𑀢𑀺𑀲𑁆𑀲𑁄 𑀲𑀗𑁆𑀕𑀻𑀢𑀺𑀬𑁄 𑀲𑀦𑁆𑀥𑀸𑀬 ‘‘𑀲𑀸𑀲𑀦𑀁 𑀦𑀯𑀁 𑀓𑀢’’𑀦𑁆𑀢𑀺 𑀘 ‘‘𑀅𑀢𑁆𑀣𑀺 𑀓𑁄𑀘𑀺 𑀢𑀣𑀸𑀕𑀢𑀲𑁆𑀲 𑀲𑀸𑀲𑀦𑀁 𑀦𑀯𑀁 𑀓𑀭𑁄𑀢𑀻’’𑀢𑀺 𑀘 ‘‘𑀮𑀩𑁆𑀪𑀸 𑀢𑀣𑀸𑀕𑀢𑀲𑁆𑀲 𑀲𑀸𑀲𑀦𑀁 𑀦𑀯𑀁 𑀓𑀸𑀢𑀼’’𑀦𑁆𑀢𑀺 𑀘 𑀬𑁂𑀲𑀁 𑀮𑀤𑁆𑀥𑀺, 𑀲𑁂𑀬𑁆𑀬𑀣𑀸𑀧𑀺 𑀏𑀓𑀘𑁆𑀘𑀸𑀦𑀁 𑀉𑀢𑁆𑀢𑀭𑀸𑀧𑀣𑀓𑀸𑀦𑀁; 𑀢𑁂 𑀲𑀦𑁆𑀥𑀸𑀬 𑀢𑀻𑀲𑀼𑀧𑀺 𑀓𑀣𑀸𑀲𑀼 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀧𑀝𑀺𑀜𑁆𑀜𑀸 𑀇𑀢𑀭𑀲𑁆𑀲. 𑀲𑀢𑀺𑀧𑀝𑁆𑀞𑀸𑀦𑀸𑀢𑀺𑀆𑀤𑀺 𑀲𑀸𑀲𑀦𑀁 𑀦𑀸𑀫 𑀲𑀢𑀺𑀧𑀝𑁆𑀞𑀸𑀦𑀸𑀤𑀬𑁄 𑀘𑁂𑀯 𑀅𑀭𑀺𑀬𑀥𑀫𑁆𑀫𑀸, 𑀓𑀼𑀲𑀮𑀸𑀤𑀻𑀦𑀜𑁆𑀘 𑀤𑁂𑀲𑀦𑀸. 𑀢𑀢𑁆𑀣 𑀬𑁂𑀲𑀁 𑀪𑀕𑀯𑀢𑀸 𑀤𑁂𑀲𑀺𑀢𑀸 𑀲𑀢𑀺𑀧𑀝𑁆𑀞𑀸𑀦𑀸𑀤𑀬𑁄, 𑀞𑀧𑁂𑀢𑁆𑀯𑀸 𑀢𑁂 𑀅𑀜𑁆𑀜𑁂𑀲𑀁 𑀯𑀸 𑀲𑀢𑀺𑀧𑀝𑁆𑀞𑀸𑀦𑀸𑀤𑀻𑀦𑀁 𑀓𑀭𑀡𑁂𑀦 𑀅𑀓𑀼𑀲𑀮𑀸𑀤𑀻𑀦𑀁 𑀯𑀸 𑀓𑀼𑀲𑀮𑀸𑀤𑀺𑀪𑀸𑀯𑀓𑀭𑀡𑁂𑀦 𑀲𑀸𑀲𑀦𑀁 𑀦𑀯𑀁𑀓𑀢𑀁 𑀦𑀸𑀫 𑀪𑀯𑁂𑀬𑁆𑀬, 𑀓𑀺𑀁 𑀢𑀁 𑀏𑀯𑀁 𑀓𑀢𑀁 𑀓𑁂𑀦𑀘𑀺, 𑀅𑀢𑁆𑀣𑀺 𑀯𑀸 𑀓𑁄𑀘𑀺 𑀏𑀯𑀁 𑀓𑀭𑁄𑀢𑀺, 𑀮𑀩𑁆𑀪𑀸 𑀯𑀸 𑀏𑀯𑀁 𑀓𑀸𑀢𑀼𑀦𑁆𑀢𑀺 𑀢𑀻𑀲𑀼𑀧𑀺 𑀧𑀼𑀘𑁆𑀙𑀸𑀲𑀼 𑀘𑁄𑀤𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀬𑀣𑀸𑀧𑀸𑀴𑀺𑀫𑁂𑀯 𑀦𑀺𑀬𑁆𑀬𑀸𑀢𑀻𑀢𑀺.

𑀲𑀸𑀲𑀦𑀓𑀣𑀸𑀯𑀡𑁆𑀡𑀦𑀸.

𑁨. 𑀅𑀯𑀺𑀯𑀺𑀢𑁆𑀢𑀓𑀣𑀸𑀯𑀡𑁆𑀡𑀦𑀸

𑁮𑁭𑁯-𑁮𑁮𑁦. 𑀇𑀤𑀸𑀦𑀺 𑀅𑀯𑀺𑀯𑀺𑀢𑁆𑀢𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀣 𑀬𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀬𑁄 𑀥𑀫𑁆𑀫𑁄 𑀧𑀘𑁆𑀘𑀼𑀧𑁆𑀧𑀦𑁆𑀦𑁄, 𑀲𑁄 𑀢𑁂𑀦 𑀅𑀯𑀺𑀯𑀺𑀢𑁆𑀢𑁄 𑀦𑀸𑀫𑀸𑀢𑀺 𑀇𑀤𑀁 𑀲𑀓𑀲𑀫𑀬𑁂 𑀲𑀦𑁆𑀦𑀺𑀝𑁆𑀞𑀸𑀦𑀁. 𑀬𑀲𑁆𑀫𑀸 𑀧𑀦 𑀧𑀼𑀣𑀼𑀚𑁆𑀚𑀦𑁂𑀦 𑀢𑁂𑀥𑀸𑀢𑀼𑀓𑀸 𑀥𑀫𑁆𑀫𑀸 𑀅𑀧𑀭𑀺𑀜𑁆𑀜𑀸𑀢𑀸, 𑀢𑀲𑁆𑀫𑀸 𑀲𑁄 𑀏𑀓𑀓𑁆𑀔𑀡𑁂𑀬𑁂𑀯 𑀲𑀩𑁆𑀩𑁂𑀳𑀺𑀧𑀺 𑀢𑁂𑀥𑀸𑀢𑀼𑀓𑁂𑀳𑀺 𑀥𑀫𑁆𑀫𑁂𑀳𑀺 𑀅𑀯𑀺𑀯𑀺𑀢𑁆𑀢𑁄𑀢𑀺 𑀬𑁂𑀲𑀁 𑀮𑀤𑁆𑀥𑀺, 𑀲𑁂𑀬𑁆𑀬𑀣𑀸𑀧𑀺 𑀢𑁂𑀲𑀜𑁆𑀜𑁂𑀯, 𑀢𑁂 𑀲𑀦𑁆𑀥𑀸𑀬 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀧𑀝𑀺𑀜𑁆𑀜𑀸 𑀇𑀢𑀭𑀲𑁆𑀲. 𑀨𑀲𑁆𑀲𑁂𑀳𑀻𑀢𑀺𑀆𑀤𑀺 𑀲𑀩𑁆𑀩𑁂𑀲𑀁 𑀨𑀲𑁆𑀲𑀸𑀤𑀻𑀦𑀁 𑀏𑀓𑀓𑁆𑀔𑀡𑁂 𑀧𑀯𑀢𑁆𑀢𑀺𑀤𑁄𑀲𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀅𑀯𑀺𑀯𑀺𑀢𑁆𑀢𑀓𑀣𑀸𑀯𑀡𑁆𑀡𑀦𑀸.

𑁩. 𑀲𑀜𑁆𑀜𑁄𑀚𑀦𑀓𑀣𑀸𑀯𑀡𑁆𑀡𑀦𑀸

𑁮𑁮𑁧-𑁮𑁮𑁨. 𑀇𑀤𑀸𑀦𑀺 𑀲𑀜𑁆𑀜𑁄𑀚𑀦𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀣 𑀬𑀲𑁆𑀫𑀸 𑀅𑀭𑀳𑀸 𑀲𑀩𑁆𑀩𑀁 𑀩𑀼𑀤𑁆𑀥𑀯𑀺𑀲𑀬𑀁 𑀦 𑀚𑀸𑀦𑀸𑀢𑀺, 𑀢𑀲𑁆𑀫𑀸 𑀢𑀲𑁆𑀲 𑀢𑀢𑁆𑀣 𑀅𑀯𑀺𑀚𑁆𑀚𑀸𑀯𑀺𑀘𑀺𑀓𑀺𑀘𑁆𑀙𑀸𑀳𑀺 𑀅𑀧𑁆𑀧𑀳𑀻𑀦𑀸𑀳𑀺 𑀪𑀯𑀺𑀢𑀩𑁆𑀩𑀦𑁆𑀢𑀺 𑀲𑀜𑁆𑀜𑀸𑀬 ‘‘𑀅𑀢𑁆𑀣𑀺 𑀓𑀺𑀜𑁆𑀘𑀺 𑀲𑀜𑁆𑀜𑁄𑀚𑀦𑀁 𑀅𑀧𑁆𑀧𑀳𑀸𑀬 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀻’’𑀢𑀺 𑀬𑁂𑀲𑀁 𑀮𑀤𑁆𑀥𑀺, 𑀲𑁂𑀬𑁆𑀬𑀣𑀸𑀧𑀺 𑀫𑀳𑀸𑀲𑀗𑁆𑀖𑀺𑀓𑀸𑀦𑀁, 𑀢𑁂 𑀲𑀦𑁆𑀥𑀸𑀬 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀧𑀝𑀺𑀜𑁆𑀜𑀸 𑀇𑀢𑀭𑀲𑁆𑀲. 𑀅𑀢𑁆𑀣𑀺 𑀓𑀺𑀜𑁆𑀘𑀺 𑀲𑀓𑁆𑀓𑀸𑀬𑀤𑀺𑀝𑁆𑀞𑀻𑀢𑀺𑀆𑀤𑀺 𑀅𑀭𑀳𑀢𑁄 𑀲𑀩𑁆𑀩𑀲𑀁𑀬𑁄𑀚𑀦𑀧𑁆𑀧𑀳𑀸𑀦𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀲𑀩𑁆𑀩𑀁 𑀩𑀼𑀤𑁆𑀥𑀯𑀺𑀲𑀬𑀦𑁆𑀢𑀺 𑀧𑀜𑁆𑀳𑀤𑁆𑀯𑀬𑁂 𑀅𑀭𑀳𑀢𑁄 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀸𑀪𑀸𑀯𑁂𑀦 𑀧𑀝𑀺𑀲𑁂𑀥𑁄 𑀓𑀢𑁄, 𑀦 𑀅𑀯𑀺𑀚𑁆𑀚𑀸𑀯𑀺𑀘𑀺𑀓𑀺𑀘𑁆𑀙𑀸𑀦𑀁 𑀅𑀧𑁆𑀧𑀳𑀸𑀦𑁂𑀦. 𑀇𑀢𑀭𑁄 𑀧𑀦 𑀢𑁂𑀲𑀁 𑀅𑀧𑁆𑀧𑀳𑀻𑀦𑀢𑀁 𑀲𑀦𑁆𑀥𑀸𑀬 𑀢𑁂𑀦 𑀳𑀻𑀢𑀺 𑀮𑀤𑁆𑀥𑀺𑀁 𑀧𑀢𑀺𑀝𑁆𑀞𑀧𑁂𑀢𑀺. 𑀲𑀸 𑀅𑀬𑁄𑀦𑀺𑀲𑁄 𑀧𑀢𑀺𑀝𑁆𑀞𑀸𑀧𑀺𑀢𑀢𑁆𑀢𑀸 𑀅𑀧𑁆𑀧𑀢𑀺𑀝𑁆𑀞𑀺𑀢𑀸𑀯 𑀳𑁄𑀢𑀻𑀢𑀺.

𑀲𑀜𑁆𑀜𑁄𑀚𑀦𑀓𑀣𑀸𑀯𑀡𑁆𑀡𑀦𑀸.

𑁪. 𑀇𑀤𑁆𑀥𑀺𑀓𑀣𑀸𑀯𑀡𑁆𑀡𑀦𑀸

𑁮𑁮𑁩-𑁮𑁮𑁪. 𑀇𑀤𑀸𑀦𑀺 𑀇𑀤𑁆𑀥𑀺𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀣 𑀇𑀤𑁆𑀥𑀺 𑀦𑀸𑀫𑁂𑀲𑀸 𑀓𑀢𑁆𑀣𑀘𑀺 𑀇𑀚𑁆𑀛𑀢𑀺, 𑀓𑀢𑁆𑀣𑀘𑀺 𑀦 𑀇𑀚𑁆𑀛𑀢𑀺, 𑀅𑀦𑀺𑀘𑁆𑀘𑀸𑀤𑀻𑀦𑀁 𑀦𑀺𑀘𑁆𑀘𑀸𑀤𑀺𑀓𑀭𑀡𑁂 𑀏𑀓𑀦𑁆𑀢𑁂𑀦𑁂𑀯 𑀦 𑀇𑀚𑁆𑀛𑀢𑀺. 𑀲𑀪𑀸𑀕𑀲𑀦𑁆𑀢𑀢𑀺𑀁 𑀧𑀦 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀯𑀺𑀲𑀪𑀸𑀕𑀲𑀦𑁆𑀢𑀢𑀺𑀓𑀭𑀡𑁂 𑀯𑀸 𑀲𑀪𑀸𑀕𑀲𑀦𑁆𑀢𑀢𑀺𑀯𑀲𑁂𑀦𑁂𑀯 𑀘𑀺𑀭𑀢𑀭𑀧𑁆𑀧𑀯𑀢𑁆𑀢𑀦𑁂 𑀯𑀸 𑀬𑁂𑀲𑀁 𑀅𑀢𑁆𑀣𑀸𑀬 𑀓𑀭𑀺𑀬𑀢𑀺, 𑀢𑁂𑀲𑀁 𑀧𑀼𑀜𑁆𑀜𑀸𑀤𑀻𑀦𑀺 𑀓𑀸𑀭𑀡𑀸𑀦𑀺 𑀦𑀺𑀲𑁆𑀲𑀸𑀬 𑀓𑀢𑁆𑀣𑀘𑀺 𑀇𑀚𑁆𑀛𑀢𑀺, 𑀪𑀺𑀓𑁆𑀔𑀽𑀦𑀁 𑀅𑀢𑁆𑀣𑀸𑀬 𑀧𑀸𑀦𑀻𑀬𑀲𑁆𑀲 𑀲𑀧𑁆𑀧𑀺𑀔𑀻𑀭𑀸𑀤𑀺𑀓𑀭𑀡𑁂 𑀯𑀺𑀬 𑀫𑀳𑀸𑀥𑀸𑀢𑀼𑀦𑀺𑀥𑀸𑀦𑁂 𑀤𑀻𑀧𑀸𑀤𑀻𑀦𑀁 𑀘𑀺𑀭𑀲𑀦𑁆𑀢𑀸𑀦𑀧𑁆𑀧𑀯𑀢𑁆𑀢𑀦𑁂 𑀯𑀺𑀬 𑀘𑀸𑀢𑀺 𑀇𑀤𑀁 𑀲𑀓𑀲𑀫𑀬𑁂 𑀲𑀦𑁆𑀦𑀺𑀝𑁆𑀞𑀸𑀦𑀁. 𑀬𑀁 𑀧𑀦 𑀆𑀬𑀲𑁆𑀫𑀸 𑀧𑀺𑀮𑀺𑀦𑁆𑀤𑀯𑀘𑁆𑀙𑁄 𑀭𑀜𑁆𑀜𑁄 𑀧𑀸𑀲𑀸𑀤𑀁 𑀲𑀼𑀯𑀡𑁆𑀡𑀦𑁆𑀢𑁆𑀯𑁂𑀯 𑀅𑀥𑀺𑀫𑀼𑀘𑁆𑀘𑀺, 𑀢𑀁 𑀦𑀺𑀲𑁆𑀲𑀸𑀬 𑀬𑁂𑀲𑀁 ‘‘𑀅𑀢𑁆𑀣𑀺 𑀅𑀥𑀺𑀧𑁆𑀧𑀸𑀬𑀇𑀤𑁆𑀥𑀻’’𑀢𑀺 𑀮𑀤𑁆𑀥𑀺, 𑀲𑁂𑀬𑁆𑀬𑀣𑀸𑀧𑀺 𑀅𑀦𑁆𑀥𑀓𑀸𑀦𑀁; 𑀢𑁂 𑀲𑀦𑁆𑀥𑀸𑀬 𑀅𑀢𑁆𑀣𑀺 𑀅𑀥𑀺𑀧𑁆𑀧𑀸𑀬𑀇𑀤𑁆𑀥𑀻𑀢𑀺 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲. 𑀢𑀢𑁆𑀣 𑀅𑀥𑀺𑀧𑁆𑀧𑀸𑀬𑀇𑀤𑁆𑀥𑀻𑀢𑀺 𑀅𑀥𑀺𑀧𑁆𑀧𑀸𑀬𑀇𑀤𑁆𑀥𑀺, 𑀬𑀣𑀸𑀥𑀺𑀧𑁆𑀧𑀸𑀬𑀁 𑀇𑀚𑁆𑀛𑀦𑀇𑀤𑁆𑀥𑀻𑀢𑀺 𑀅𑀢𑁆𑀣𑁄. 𑀆𑀫𑀦𑁆𑀢𑀸𑀢𑀺 𑀮𑀤𑁆𑀥𑀺𑀫𑀢𑁆𑀢𑁂 𑀞𑀢𑁆𑀯𑀸 𑀧𑀝𑀺𑀜𑁆𑀜𑀸 𑀧𑀭𑀯𑀸𑀤𑀺𑀲𑁆𑀲. 𑀅𑀣 𑀦𑀁 𑀅𑀦𑀺𑀘𑁆𑀘𑀸𑀤𑀻𑀦𑀁 𑀦𑀺𑀘𑁆𑀘𑀸𑀤𑀺𑀢𑀸𑀬 𑀅𑀦𑀼𑀬𑀼𑀜𑁆𑀚𑀺𑀢𑀼𑀁 𑀦𑀺𑀘𑁆𑀘𑀧𑀡𑁆𑀡𑀸 𑀭𑀼𑀓𑁆𑀔𑀸 𑀳𑁄𑀦𑁆𑀢𑀽𑀢𑀺𑀆𑀤𑀺𑀫𑀸𑀳. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯. 𑀮𑀤𑁆𑀥𑀺𑀧𑀢𑀺𑀝𑁆𑀞𑀸𑀧𑀦𑁂 𑀲𑀼𑀯𑀡𑁆𑀡𑁄 𑀘 𑀧𑀦𑀸𑀲𑀻𑀢𑀺 𑀭𑀜𑁆𑀜𑁄 𑀧𑀼𑀜𑁆𑀜𑀽𑀧𑀦𑀺𑀲𑁆𑀲𑀬𑁂𑀦 𑀆𑀲𑀺, 𑀦 𑀓𑁂𑀯𑀮𑀁 𑀣𑁂𑀭𑀲𑁆𑀲 𑀅𑀥𑀺𑀧𑁆𑀧𑀸𑀬𑁂𑀦𑁂𑀯. 𑀢𑀲𑁆𑀫𑀸 𑀅𑀲𑀸𑀥𑀓𑀫𑁂𑀢𑀦𑁆𑀢𑀺.

𑀇𑀤𑁆𑀥𑀺𑀓𑀣𑀸𑀯𑀡𑁆𑀡𑀦𑀸.

𑁫. 𑀩𑀼𑀤𑁆𑀥𑀓𑀣𑀸𑀯𑀡𑁆𑀡𑀦𑀸

𑁮𑁮𑁫. 𑀇𑀤𑀸𑀦𑀺 𑀩𑀼𑀤𑁆𑀥𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀣 𑀞𑀧𑁂𑀢𑁆𑀯𑀸 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀓𑀸𑀮𑁂 𑀲𑀭𑀻𑀭𑀯𑁂𑀫𑀢𑁆𑀢𑀢𑀁 𑀆𑀬𑀼𑀯𑁂𑀫𑀢𑁆𑀢𑀢𑀁 𑀧𑀪𑀸𑀯𑁂𑀫𑀢𑁆𑀢𑀢𑀜𑁆𑀘 𑀲𑁂𑀲𑁂𑀳𑀺 𑀩𑀼𑀤𑁆𑀥𑀥𑀫𑁆𑀫𑁂𑀳𑀺 𑀩𑀼𑀤𑁆𑀥𑀸𑀦𑀁 𑀩𑀼𑀤𑁆𑀥𑁂𑀳𑀺 𑀳𑀻𑀦𑀸𑀢𑀺𑀭𑁂𑀓𑀢𑀸 𑀦𑀸𑀫 𑀦𑀢𑁆𑀣𑀺. 𑀬𑁂𑀲𑀁 𑀧𑀦 𑀅𑀯𑀺𑀲𑁂𑀲𑁂𑀦𑁂𑀯 𑀅𑀢𑁆𑀣𑀻𑀢𑀺 𑀮𑀤𑁆𑀥𑀺, 𑀲𑁂𑀬𑁆𑀬𑀣𑀸𑀧𑀺 𑀅𑀦𑁆𑀥𑀓𑀸𑀦𑀁; 𑀢𑁂 𑀲𑀦𑁆𑀥𑀸𑀬 𑀅𑀢𑁆𑀣𑀺 𑀩𑀼𑀤𑁆𑀥𑀸𑀦𑀦𑁆𑀢𑀺 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀧𑀝𑀺𑀜𑁆𑀜𑀸 𑀇𑀢𑀭𑀲𑁆𑀲. 𑀅𑀣 𑀦𑀁 𑀩𑀼𑀤𑁆𑀥𑀥𑀫𑁆𑀫𑁂𑀳𑀺 𑀅𑀦𑀼𑀬𑀼𑀜𑁆𑀚𑀺𑀢𑀼𑀁 𑀲𑀢𑀺𑀧𑀝𑁆𑀞𑀸𑀦𑀢𑁄𑀢𑀺𑀆𑀤𑀺𑀫𑀸𑀳. 𑀇𑀢𑀭𑁄 𑀢𑁂𑀲𑀁 𑀯𑀲𑁂𑀦 𑀳𑀻𑀦𑀸𑀢𑀺𑀭𑁂𑀓𑀢𑀁 𑀅𑀧𑀲𑁆𑀲𑀦𑁆𑀢𑁄 𑀧𑀝𑀺𑀓𑁆𑀔𑀺𑀧𑀢𑀺𑀬𑁂𑀯𑀸𑀢𑀺.

𑀩𑀼𑀤𑁆𑀥𑀓𑀣𑀸𑀯𑀡𑁆𑀡𑀦𑀸.

𑁬. 𑀲𑀩𑁆𑀩𑀤𑀺𑀲𑀸𑀓𑀣𑀸𑀯𑀡𑁆𑀡𑀦𑀸

𑁮𑁮𑁬. 𑀇𑀤𑀸𑀦𑀺 𑀲𑀩𑁆𑀩𑀤𑀺𑀲𑀸𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀣 𑀘𑀢𑀽𑀲𑀼 𑀤𑀺𑀲𑀸𑀲𑀼 𑀳𑁂𑀝𑁆𑀞𑀸 𑀉𑀧𑀭𑀻𑀢𑀺 𑀲𑀫𑀦𑁆𑀢𑀢𑁄 𑀮𑁄𑀓𑀥𑀸𑀢𑀼𑀲𑀦𑁆𑀦𑀺𑀯𑀸𑀲𑀁, 𑀲𑀩𑁆𑀩𑀮𑁄𑀓𑀥𑀸𑀢𑀽𑀲𑀼 𑀘 𑀩𑀼𑀤𑁆𑀥𑀸 𑀅𑀢𑁆𑀣𑀻𑀢𑀺 𑀅𑀢𑁆𑀢𑀦𑁄 𑀯𑀺𑀓𑀧𑁆𑀧𑀲𑀺𑀧𑁆𑀧𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 ‘‘𑀲𑀩𑁆𑀩𑀤𑀺𑀲𑀸𑀲𑀼 𑀩𑀼𑀤𑁆𑀥𑀸 𑀢𑀺𑀝𑁆𑀞𑀦𑁆𑀢𑀻’’𑀢𑀺 𑀬𑁂𑀲𑀁 𑀮𑀤𑁆𑀥𑀺, 𑀲𑁂𑀬𑁆𑀬𑀣𑀸𑀧𑀺 𑀫𑀳𑀸𑀲𑀗𑁆𑀖𑀺𑀓𑀸𑀦𑀁; 𑀢𑁂 𑀲𑀦𑁆𑀥𑀸𑀬 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀧𑀝𑀺𑀜𑁆𑀜𑀸 𑀇𑀢𑀭𑀲𑁆𑀲. 𑀧𑀼𑀭𑀢𑁆𑀣𑀺𑀫𑀸𑀬𑀸𑀢𑀺 𑀧𑀼𑀝𑁆𑀞𑁄 𑀲𑀓𑁆𑀬𑀫𑀼𑀦𑀺𑀁 𑀲𑀦𑁆𑀥𑀸𑀬 𑀧𑀝𑀺𑀓𑁆𑀔𑀺𑀧𑀢𑀺. 𑀧𑀼𑀦 𑀧𑀼𑀝𑁆𑀞𑁄 𑀮𑀤𑁆𑀥𑀺𑀯𑀲𑁂𑀦 𑀅𑀜𑁆𑀜𑀮𑁄𑀓𑀥𑀸𑀢𑀼𑀬𑀁 𑀞𑀺𑀢𑀁 𑀲𑀦𑁆𑀥𑀸𑀬 𑀧𑀝𑀺𑀚𑀸𑀦𑀸𑀢𑀺. 𑀓𑀺𑀦𑁆𑀦𑀸𑀫𑁄 𑀲𑁄 𑀪𑀕𑀯𑀸𑀢𑀺𑀆𑀤𑀺 ‘‘𑀲𑀘𑁂 𑀢𑁆𑀯𑀁 𑀚𑀸𑀦𑀸𑀲𑀺, 𑀦𑀸𑀫𑀸𑀤𑀺𑀯𑀲𑁂𑀦 𑀦𑀁 𑀓𑀣𑁂𑀳𑀻’’𑀢𑀺 𑀘𑁄𑀤𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀇𑀫𑀺𑀦𑀸 𑀉𑀧𑀸𑀬𑁂𑀦 𑀲𑀩𑁆𑀩𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄𑀢𑀺.

𑀲𑀩𑁆𑀩𑀤𑀺𑀲𑀸𑀓𑀣𑀸𑀯𑀡𑁆𑀡𑀦𑀸.

𑁭. 𑀥𑀫𑁆𑀫𑀓𑀣𑀸𑀯𑀡𑁆𑀡𑀦𑀸

𑁮𑁮𑁭-𑁮𑁮𑁮. 𑀇𑀤𑀸𑀦𑀺 𑀥𑀫𑁆𑀫𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀣 𑀬𑀲𑁆𑀫𑀸 𑀭𑀽𑀧𑀸𑀤𑀬𑁄 𑀭𑀽𑀧𑀸𑀤𑀺𑀲𑀪𑀸𑀯𑁂𑀦 𑀦𑀺𑀬𑀢𑀸 𑀦 𑀢𑀁 𑀲𑀪𑀸𑀯𑀁 𑀯𑀺𑀚𑀳𑀦𑁆𑀢𑀺, 𑀢𑀲𑁆𑀫𑀸 𑀲𑀩𑁆𑀩𑀥𑀫𑁆𑀫𑀸 𑀦𑀺𑀬𑀢𑀸𑀢𑀺 𑀬𑁂𑀲𑀁 𑀮𑀤𑁆𑀥𑀺, 𑀲𑁂𑀬𑁆𑀬𑀣𑀸𑀧𑀺 𑀅𑀦𑁆𑀥𑀓𑀸𑀦𑀜𑁆𑀘𑁂𑀯 𑀏𑀓𑀘𑁆𑀘𑀸𑀦𑀜𑁆𑀘 𑀉𑀢𑁆𑀢𑀭𑀸𑀧𑀣𑀓𑀸𑀦𑀁; 𑀢𑁂 𑀲𑀦𑁆𑀥𑀸𑀬 𑀲𑀩𑁆𑀩𑁂 𑀥𑀫𑁆𑀫𑀸𑀢𑀺 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀧𑀝𑀺𑀜𑁆𑀜𑀸 𑀇𑀢𑀭𑀲𑁆𑀲. 𑀅𑀣 𑀦𑀁 ‘‘𑀲𑀘𑁂 𑀢𑁂 𑀦𑀺𑀬𑀢𑀸, 𑀫𑀺𑀘𑁆𑀙𑀢𑁆𑀢𑀦𑀺𑀬𑀢𑀸 𑀯𑀸 𑀲𑀺𑀬𑀼𑀁 𑀲𑀫𑁆𑀫𑀢𑁆𑀢𑀦𑀺𑀬𑀢𑀸 𑀯𑀸, 𑀇𑀢𑁄 𑀅𑀜𑁆𑀜𑁄 𑀦𑀺𑀬𑀸𑀫𑁄 𑀦𑀸𑀫 𑀦𑀢𑁆𑀣𑀻’’𑀢𑀺 𑀘𑁄𑀤𑁂𑀢𑀼𑀁 𑀫𑀺𑀘𑁆𑀙𑀢𑁆𑀢𑀦𑀺𑀬𑀢𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀧𑀝𑀺𑀓𑁆𑀔𑁂𑀧𑁄 𑀘 𑀧𑀝𑀺𑀜𑁆𑀜𑀸 𑀘 𑀧𑀭𑀯𑀸𑀤𑀺𑀲𑁆𑀲. 𑀭𑀽𑀧𑀁 𑀭𑀽𑀧𑀝𑁆𑀞𑁂𑀦𑀸𑀢𑀺𑀆𑀤𑀺 𑀬𑁂𑀦𑀢𑁆𑀣𑁂𑀦 𑀦𑀺𑀬𑀢𑀸𑀢𑀺 𑀯𑀤𑀢𑀺, 𑀢𑀲𑁆𑀲 𑀯𑀲𑁂𑀦 𑀘𑁄𑀤𑁂𑀢𑀼𑀁 𑀯𑀼𑀢𑁆𑀢𑀁. 𑀢𑀢𑁆𑀭𑀸𑀬𑀁 𑀅𑀥𑀺𑀧𑁆𑀧𑀸𑀬𑁄 𑁋 𑀭𑀽𑀧𑀜𑁆𑀳𑀺 𑀭𑀽𑀧𑀝𑁆𑀞𑁂𑀦 𑀦𑀺𑀬𑀢𑀦𑁆𑀢𑀺 𑀭𑀽𑀧𑀁 𑀭𑀽𑀧𑀫𑁂𑀯, 𑀦 𑀯𑁂𑀤𑀦𑀸𑀤𑀺𑀲𑀪𑀸𑀯𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀯𑀢𑁆𑀢𑀩𑁆𑀩𑀁, 𑀇𑀢𑁄 𑀅𑀜𑁆𑀜𑀣𑀸 𑀦 𑀯𑀢𑁆𑀢𑀩𑁆𑀩𑀁. 𑀓𑀲𑁆𑀫𑀸? 𑀭𑀽𑀧𑀝𑁆𑀞𑀢𑁄 𑀅𑀜𑁆𑀜𑀲𑁆𑀲 𑀭𑀽𑀧𑀲𑁆𑀲 𑀅𑀪𑀸𑀯𑀸. 𑀭𑀽𑀧𑀲𑀪𑀸𑀯𑁄 𑀳𑀺 𑀭𑀽𑀧𑀝𑁆𑀞𑁄, 𑀭𑀽𑀧𑀲𑀪𑀸𑀯𑁄 𑀘 𑀭𑀽𑀧𑀫𑁂𑀯, 𑀦 𑀭𑀽𑀧𑀢𑁄 𑀅𑀜𑁆𑀜𑁄. 𑀯𑁂𑀤𑀦𑀸𑀤𑀻𑀳𑀺 𑀧𑀦𑀲𑁆𑀲 𑀦𑀸𑀦𑀢𑁆𑀢𑀧𑀜𑁆𑀜𑀸𑀧𑀦𑀢𑁆𑀣𑀁 𑀏𑀲 𑀯𑁄𑀳𑀸𑀭𑁄 𑀳𑁄𑀢𑀻𑀢𑀺. 𑀢𑀲𑁆𑀫𑀸 ‘‘𑀭𑀽𑀧𑀁 𑀭𑀽𑀧𑀝𑁆𑀞𑁂𑀦 𑀦𑀺𑀬𑀢’’𑀦𑁆𑀢𑀺 𑀯𑀤𑀦𑁆𑀢𑁂𑀦 𑀭𑀽𑀧𑀁 𑀦𑀺𑀬𑀢𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀦𑀺𑀬𑀢𑀜𑁆𑀘 𑀦𑀸𑀫 𑀫𑀺𑀘𑁆𑀙𑀢𑁆𑀢𑀦𑀺𑀬𑀢𑀁 𑀯𑀸 𑀲𑀺𑀬𑀸 𑀲𑀫𑁆𑀫𑀢𑁆𑀢𑀦𑀺𑀬𑀢𑀁 𑀯𑀸, 𑀇𑀢𑁄 𑀅𑀜𑁆𑀜𑁄 𑀦𑀺𑀬𑀸𑀫𑁄 𑀦𑀸𑀫 𑀦𑀢𑁆𑀣𑀻𑀢𑀺. 𑀅𑀣 𑀓𑀲𑁆𑀫𑀸 𑀧𑀝𑀺𑀚𑀸𑀦𑀸𑀢𑀻𑀢𑀺? 𑀅𑀢𑁆𑀣𑀦𑁆𑀢𑀭𑀯𑀲𑁂𑀦. 𑀭𑀽𑀧𑀁 𑀭𑀽𑀧𑀝𑁆𑀞𑁂𑀦 𑀦𑀺𑀬𑀢𑀦𑁆𑀢𑀺 𑀏𑀢𑁆𑀣 𑀳𑀺 𑀭𑀽𑀧𑀁 𑀭𑀽𑀧𑀫𑁂𑀯, 𑀦 𑀯𑁂𑀤𑀦𑀸𑀤𑀺𑀲𑀪𑀸𑀯𑀦𑁆𑀢𑀺 𑀅𑀬𑀫𑀢𑁆𑀣𑁄. 𑀢𑀲𑁆𑀫𑀸 𑀧𑀝𑀺𑀚𑀸𑀦𑀸𑀢𑀺. 𑀇𑀢𑁄 𑀅𑀜𑁆𑀜𑀣𑀸 𑀧𑀦𑀲𑁆𑀲 𑀦𑀺𑀬𑀢𑀢𑁆𑀢𑀁 𑀦𑀢𑁆𑀣𑀻𑀢𑀺 𑀧𑀼𑀦 𑀢𑁂𑀦𑁂𑀯 𑀦𑀬𑁂𑀦 𑀘𑁄𑀤𑁂𑀢𑀼𑀁 𑀫𑀺𑀘𑁆𑀙𑀢𑁆𑀢𑀦𑀺𑀬𑀢𑀦𑁆𑀢𑀺𑀆𑀤𑀺𑀫𑀸𑀳. 𑀢𑀁 𑀲𑀩𑁆𑀩𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯. 𑀢𑁂𑀦 𑀳𑀺 𑀭𑀽𑀧𑀦𑁆𑀢𑀺 𑀮𑀤𑁆𑀥𑀺𑀧𑀺 𑀅𑀬𑁄𑀦𑀺𑀲𑁄 𑀧𑀢𑀺𑀝𑁆𑀞𑀸𑀧𑀺𑀢𑀢𑁆𑀢𑀸 𑀅𑀧𑁆𑀧𑀢𑀺𑀝𑁆𑀞𑀺𑀢𑀸𑀯 𑀳𑁄𑀢𑀻𑀢𑀺.

𑀥𑀫𑁆𑀫𑀓𑀣𑀸𑀯𑀡𑁆𑀡𑀦𑀸.

𑁮. 𑀓𑀫𑁆𑀫𑀓𑀣𑀸𑀯𑀡𑁆𑀡𑀦𑀸

𑁮𑁮𑁯-𑁮𑁯𑁧. 𑀇𑀤𑀸𑀦𑀺 𑀓𑀫𑁆𑀫𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀣 ‘‘𑀬𑀲𑁆𑀫𑀸 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀸𑀤𑀻𑀦𑀺 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀝𑁆𑀞𑀸𑀤𑀻𑀳𑀺 𑀦𑀺𑀬𑀢𑀸𑀦𑀺, 𑀢𑀲𑁆𑀫𑀸 𑀲𑀩𑁆𑀩𑁂 𑀓𑀫𑁆𑀫𑀸 𑀦𑀺𑀬𑀢𑀸’’𑀢𑀺 𑀬𑁂𑀲𑀁 𑀮𑀤𑁆𑀥𑀺, 𑀲𑁂𑀬𑁆𑀬𑀣𑀸𑀧𑀺 𑀢𑁂𑀲𑀜𑁆𑀜𑁂𑀯; 𑀢𑁂 𑀲𑀦𑁆𑀥𑀸𑀬 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀧𑀝𑀺𑀜𑁆𑀜𑀸 𑀇𑀢𑀭𑀲𑁆𑀲. 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀝𑁆𑀞𑁂𑀦 𑀦𑀺𑀬𑀢𑀦𑁆𑀢𑀺 𑀏𑀢𑁆𑀣 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀁 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀝𑁆𑀞𑀫𑁂𑀯. 𑀲𑀘𑁂 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀯𑀺𑀧𑀸𑀓𑀁 𑀤𑀸𑀢𑀼𑀁 𑀲𑀓𑁆𑀓𑁄𑀢𑀺 𑀤𑁂𑀢𑀺, 𑀦𑁄 𑀘𑁂 𑀅𑀳𑁄𑀲𑀺𑀓𑀫𑁆𑀫𑀁 𑀦𑀸𑀫 𑀳𑁄𑀢𑀻𑀢𑀺 𑀇𑀫𑀫𑀢𑁆𑀣𑀁 𑀲𑀦𑁆𑀥𑀸𑀬 𑀧𑀝𑀺𑀜𑁆𑀜𑀸 𑀲𑀓𑀯𑀸𑀤𑀺𑀲𑁆𑀲. 𑀫𑀺𑀘𑁆𑀙𑀢𑁆𑀢𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑀯𑀲𑁂𑀦 𑀧𑀦𑁂𑀢𑀁 𑀅𑀦𑀺𑀬𑀢𑀫𑁂𑀯𑀸𑀢𑀺 𑀲𑀩𑁆𑀩𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀦𑁆𑀢𑀺.

𑀓𑀫𑁆𑀫𑀓𑀣𑀸𑀯𑀡𑁆𑀡𑀦𑀸.

𑀏𑀓𑀯𑀻𑀲𑀢𑀺𑀫𑁄 𑀯𑀕𑁆𑀕𑁄.