𑁨𑁦. 𑀯𑀻𑀲𑀢𑀺𑀫𑀯𑀕𑁆𑀕𑁄

𑁧. 𑀅𑀲𑀜𑁆𑀘𑀺𑀘𑁆𑀘𑀓𑀣𑀸𑀯𑀡𑁆𑀡𑀦𑀸

𑁮𑁫𑁭-𑁮𑁬𑁨. 𑀇𑀤𑀸𑀦𑀺 𑀅𑀲𑀜𑁆𑀘𑀺𑀘𑁆𑀘𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀣 ‘‘𑀆𑀦𑀦𑁆𑀢𑀭𑀺𑀬𑀯𑀢𑁆𑀣𑀽𑀦𑀺 𑀦𑀸𑀫 𑀕𑀭𑀽𑀦𑀺 𑀪𑀸𑀭𑀺𑀬𑀸𑀦𑀺, 𑀢𑀲𑁆𑀫𑀸 𑀅𑀲𑀜𑁆𑀘𑀺𑀘𑁆𑀘𑀸𑀧𑀺 𑀢𑁂𑀲𑀼 𑀯𑀢𑁆𑀣𑀽𑀲𑀼 𑀯𑀺𑀓𑁄𑀧𑀺𑀢𑁂𑀲𑀼 𑀆𑀦𑀦𑁆𑀢𑀭𑀺𑀓𑁄 𑀳𑁄𑀢𑀻’’𑀢𑀺 𑀬𑁂𑀲𑀁 𑀮𑀤𑁆𑀥𑀺, 𑀲𑁂𑀬𑁆𑀬𑀣𑀸𑀧𑀺 𑀏𑀓𑀘𑁆𑀘𑀸𑀦𑀁 𑀉𑀢𑁆𑀢𑀭𑀸𑀧𑀣𑀓𑀸𑀦𑀁; 𑀢𑁂 𑀲𑀦𑁆𑀥𑀸𑀬 𑀅𑀲𑀜𑁆𑀘𑀺𑀘𑁆𑀘𑀸𑀢𑀺 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀮𑀤𑁆𑀥𑀺𑀯𑀲𑁂𑀦 𑀧𑀝𑀺𑀜𑁆𑀜𑀸 𑀇𑀢𑀭𑀲𑁆𑀲. 𑀅𑀣 𑀦𑀁 ‘‘𑀬𑀲𑁆𑀫𑀸 𑀆𑀦𑀦𑁆𑀢𑀭𑀺𑀬𑀓𑀫𑁆𑀫𑀁 𑀦𑀸𑀫 𑀓𑀫𑁆𑀫𑀧𑀣𑀧𑁆𑀧𑀢𑁆𑀢𑀁. 𑀬𑀤𑀺 𑀘 𑀅𑀲𑀜𑁆𑀘𑀺𑀘𑁆𑀘 𑀓𑀫𑁆𑀫𑀧𑀣𑀪𑁂𑀤𑁄 𑀲𑀺𑀬𑀸, 𑀅𑀯𑀲𑁂𑀲𑀸 𑀧𑀸𑀡𑀸𑀢𑀺𑀧𑀸𑀢𑀸𑀤𑀬𑁄𑀧𑀺 𑀅𑀲𑀜𑁆𑀘𑀺𑀘𑁆𑀘 𑀪𑀯𑁂𑀬𑁆𑀬𑀼’’𑀦𑁆𑀢𑀺 𑀘𑁄𑀤𑀦𑀢𑁆𑀣𑀁 𑀅𑀲𑀜𑁆𑀘𑀺𑀘𑁆𑀘𑀧𑀸𑀡𑀁 𑀳𑀦𑁆𑀢𑁆𑀯𑀸𑀢𑀺𑀆𑀤𑀺𑀫𑀸𑀳. 𑀇𑀢𑀭𑁄 𑀢𑀣𑀸𑀭𑀽𑀧𑀸𑀬 𑀮𑀤𑁆𑀥𑀺𑀬𑀸 𑀅𑀪𑀸𑀯𑁂𑀦 𑀧𑀝𑀺𑀓𑁆𑀔𑀺𑀧𑀢𑀺. 𑀲𑁂𑀲𑀁 𑀬𑀣𑀸𑀧𑀸𑀴𑀺𑀫𑁂𑀯 𑀦𑀺𑀬𑁆𑀬𑀸𑀢𑀺. 𑀦 𑀯𑀢𑁆𑀢𑀩𑁆𑀩𑀁 𑀫𑀸𑀢𑀼𑀖𑀸𑀢𑀓𑁄𑀢𑀺 𑀧𑀼𑀘𑁆𑀙𑀸 𑀧𑀭𑀯𑀸𑀤𑀺𑀲𑁆𑀲, 𑀭𑁄𑀕𑀧𑀝𑀺𑀓𑀸𑀭𑀸𑀤𑀺𑀓𑀸𑀮𑁂 𑀅𑀲𑀜𑁆𑀘𑀺𑀘𑁆𑀘 𑀖𑀸𑀢𑀁 𑀲𑀦𑁆𑀥𑀸𑀬 𑀧𑀝𑀺𑀜𑁆𑀜𑀸 𑀲𑀓𑀯𑀸𑀤𑀺𑀲𑁆𑀲. 𑀦𑀦𑀼 𑀫𑀸𑀢𑀸 𑀚𑀻𑀯𑀺𑀢𑀸 𑀯𑁄𑀭𑁄𑀧𑀺𑀢𑀸𑀢𑀺 𑀧𑀜𑁆𑀳𑁂𑀧𑀺 𑀅𑀲𑀜𑁆𑀘𑀺𑀘𑁆𑀘 𑀯𑁄𑀭𑁄𑀧𑀺𑀢𑀁 𑀲𑀦𑁆𑀥𑀸𑀬 𑀧𑀝𑀺𑀜𑁆𑀜𑀸 𑀲𑀓𑀯𑀸𑀤𑀺𑀲𑁆𑀲𑁂𑀯. 𑀏𑀯𑀁 𑀅𑀥𑀺𑀧𑁆𑀧𑀸𑀬𑀁 𑀧𑀦 𑀅𑀕𑁆𑀕𑀳𑁂𑀢𑁆𑀯𑀸 𑀳𑀜𑁆𑀘𑀻𑀢𑀺 𑀮𑀤𑁆𑀥𑀺𑀧𑀢𑀺𑀝𑁆𑀞𑀸𑀧𑀦𑀁 𑀇𑀢𑀭𑀲𑁆𑀲. 𑀢𑀁 𑀅𑀬𑁄𑀦𑀺𑀲𑁄 𑀧𑀢𑀺𑀝𑁆𑀞𑀸𑀧𑀺𑀢𑀢𑁆𑀢𑀸 𑀅𑀧𑁆𑀧𑀢𑀺𑀝𑁆𑀞𑀺𑀢𑀫𑁂𑀯. 𑀧𑀺𑀢𑀼𑀖𑀸𑀢𑀓𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀲𑀗𑁆𑀖𑀪𑁂𑀤𑀓𑁂 𑀧𑀦 𑀥𑀫𑁆𑀫𑀲𑀜𑁆𑀜𑀺𑀁 𑀲𑀦𑁆𑀥𑀸𑀬 𑀲𑀗𑁆𑀖𑀪𑁂𑀤𑁄 𑀆𑀦𑀦𑁆𑀢𑀭𑀺𑀓𑁄𑀢𑀺 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, ‘‘𑀲𑀗𑁆𑀖𑀁 𑀲𑀫𑀕𑁆𑀕𑀁 𑀪𑁂𑀢𑁆𑀯𑀸𑀦, 𑀓𑀧𑁆𑀧𑀁 𑀦𑀺𑀭𑀬𑀫𑁆𑀳𑀺 𑀧𑀘𑁆𑀘𑀢𑀻’’𑀢𑀺 𑀯𑀘𑀦𑀁 𑀅𑀬𑁄𑀦𑀺𑀲𑁄 𑀕𑀳𑁂𑀢𑁆𑀯𑀸 𑀧𑀝𑀺𑀜𑁆𑀜𑀸 𑀧𑀭𑀯𑀸𑀤𑀺𑀲𑁆𑀲. 𑀧𑀼𑀦 𑀲𑀩𑁆𑀩𑁂𑀢𑀺 𑀧𑀼𑀝𑁆𑀞𑁄 𑀲𑀓𑀧𑀓𑁆𑀔𑁂 𑀥𑀫𑁆𑀫𑀲𑀜𑁆𑀜𑀺𑀁 𑀲𑀦𑁆𑀥𑀸𑀬 𑀧𑀝𑀺𑀓𑁆𑀔𑀺𑀧𑀢𑀺, 𑀧𑀭𑀧𑀓𑁆𑀔𑁂 𑀥𑀫𑁆𑀫𑀲𑀜𑁆𑀜𑀺𑀁 𑀲𑀦𑁆𑀥𑀸𑀬 𑀧𑀝𑀺𑀚𑀸𑀦𑀸𑀢𑀺. 𑀥𑀫𑁆𑀫𑀲𑀜𑁆𑀜𑀻𑀢𑀺 𑀧𑀜𑁆𑀳𑀤𑁆𑀯𑀬𑁂𑀧𑀺 𑀏𑀲𑁂𑀯 𑀦𑀬𑁄. 𑀦𑀦𑀼 𑀯𑀼𑀢𑁆𑀢𑀁 𑀪𑀕𑀯𑀢𑀸𑀢𑀺 𑀲𑀼𑀢𑁆𑀢𑀁 𑀏𑀓𑀦𑁆𑀢𑁂𑀦𑁂𑀯 𑀥𑀫𑁆𑀫𑀯𑀸𑀤𑀺𑀲𑁆𑀲 𑀆𑀦𑀦𑁆𑀢𑀭𑀺𑀓𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀆𑀧𑀸𑀬𑀺𑀓𑁄 𑀦𑁂𑀭𑀬𑀺𑀓𑁄𑀢𑀺 𑀕𑀸𑀣𑀸𑀬𑀧𑀺 𑀅𑀥𑀫𑁆𑀫𑀯𑀸𑀤𑀻𑀬𑁂𑀯 𑀅𑀥𑀺𑀧𑁆𑀧𑁂𑀢𑁄. 𑀇𑀢𑀭𑁄 𑀧𑀦 𑀅𑀥𑀺𑀧𑁆𑀧𑀸𑀬𑀁 𑀅𑀕𑁆𑀕𑀳𑁂𑀢𑁆𑀯𑀸 𑀮𑀤𑁆𑀥𑀺𑀁 𑀧𑀢𑀺𑀝𑁆𑀞𑀧𑁂𑀢𑀺. 𑀲𑀸 𑀅𑀬𑁄𑀦𑀺𑀲𑁄 𑀧𑀢𑀺𑀝𑁆𑀞𑀸𑀧𑀺𑀢𑀢𑁆𑀢𑀸 𑀅𑀧𑁆𑀧𑀢𑀺𑀝𑁆𑀞𑀺𑀢𑀸𑀬𑁂𑀯𑀸𑀢𑀺.

𑀅𑀲𑀜𑁆𑀘𑀺𑀘𑁆𑀘𑀓𑀣𑀸𑀯𑀡𑁆𑀡𑀦𑀸.

𑁨. 𑀜𑀸𑀡𑀓𑀣𑀸𑀯𑀡𑁆𑀡𑀦𑀸

𑁮𑁬𑁩-𑁮𑁬𑁫. 𑀇𑀤𑀸𑀦𑀺 𑀜𑀸𑀡𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀣 𑀤𑀼𑀯𑀺𑀥𑀁 𑀜𑀸𑀡𑀁 𑁋 𑀮𑁄𑀓𑀺𑀬𑀜𑁆𑀘 𑀮𑁄𑀓𑀼𑀢𑁆𑀢𑀭𑀜𑁆𑀘. 𑀮𑁄𑀓𑀺𑀬𑀁 𑀲𑀫𑀸𑀧𑀢𑁆𑀢𑀺𑀜𑀸𑀡𑀫𑁆𑀧𑀺 𑀳𑁄𑀢𑀺 𑀤𑀸𑀦𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀁 𑀓𑀫𑁆𑀫𑀲𑁆𑀲𑀓𑀢𑀜𑀸𑀡𑀫𑁆𑀧𑀺; 𑀮𑁄𑀓𑀼𑀢𑁆𑀢𑀭𑀁 𑀲𑀘𑁆𑀘𑀧𑀭𑀺𑀘𑁆𑀙𑁂𑀤𑀓𑀁 𑀫𑀕𑁆𑀕𑀜𑀸𑀡𑀫𑁆𑀧𑀺 𑀨𑀮𑀜𑀸𑀡𑀫𑁆𑀧𑀺. 𑀇𑀫𑀁 𑀧𑀦 𑀯𑀺𑀪𑀸𑀕𑀁 𑀅𑀓𑀢𑁆𑀯𑀸 ‘‘𑀲𑀘𑁆𑀘𑀧𑀭𑀺𑀘𑁆𑀙𑁂𑀤𑀓𑀫𑁂𑀯 𑀜𑀸𑀡𑀁 𑀦 𑀇𑀢𑀭𑀁, 𑀢𑀲𑁆𑀫𑀸 𑀦𑀢𑁆𑀣𑀺 𑀧𑀼𑀣𑀼𑀚𑁆𑀚𑀦𑀲𑁆𑀲 𑀜𑀸𑀡’’𑀦𑁆𑀢𑀺 𑀬𑁂𑀲𑀁 𑀮𑀤𑁆𑀥𑀺, 𑀲𑁂𑀬𑁆𑀬𑀣𑀸𑀧𑀺 𑀳𑁂𑀢𑀼𑀯𑀸𑀤𑀸𑀦𑀁, 𑀢𑁂 𑀲𑀦𑁆𑀥𑀸𑀬 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀧𑀝𑀺𑀜𑁆𑀜𑀸 𑀇𑀢𑀭𑀲𑁆𑀲. 𑀧𑀜𑁆𑀜𑀸𑀢𑀺𑀆𑀤𑀺 𑀜𑀸𑀡𑀯𑁂𑀯𑀘𑀦𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀢𑁂𑀦𑁂𑀢𑀁 𑀤𑀻𑀧𑁂𑀢𑀺 𑁋 𑀬𑀤𑀺 𑀢𑀲𑁆𑀲 𑀜𑀸𑀡𑀁 𑀦𑀢𑁆𑀣𑀺, 𑀧𑀜𑁆𑀜𑀸𑀤𑀬𑁄𑀧𑀺 𑀦𑀢𑁆𑀣𑀺. 𑀅𑀣 𑀧𑀜𑁆𑀜𑀸𑀤𑀬𑁄 𑀅𑀢𑁆𑀣𑀺, 𑀜𑀸𑀡𑀫𑁆𑀧𑀺 𑀅𑀢𑁆𑀣𑀺. 𑀓𑀲𑁆𑀫𑀸? 𑀧𑀜𑁆𑀜𑀸𑀤𑀻𑀦𑀁 𑀜𑀸𑀡𑀢𑁄 𑀅𑀦𑀜𑁆𑀜𑀢𑁆𑀢𑀸𑀢𑀺. 𑀧𑀞𑀫𑀁 𑀛𑀸𑀦𑀦𑁆𑀢𑀺𑀆𑀤𑀺 𑀲𑀫𑀸𑀧𑀢𑁆𑀢𑀺𑀜𑀸𑀡𑀲𑁆𑀲 𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀤𑀸𑀦𑀁 𑀤𑀤𑁂𑀬𑁆𑀬𑀸𑀢𑀺𑀆𑀤𑀺 𑀓𑀫𑁆𑀫𑀲𑁆𑀲𑀓𑀢𑀜𑀸𑀡𑀲𑁆𑀲. 𑀤𑀼𑀓𑁆𑀔𑀁 𑀧𑀭𑀺𑀚𑀸𑀦𑀸𑀢𑀻𑀢𑀺 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑀜𑀸𑀡𑀫𑁂𑀯 𑀤𑀻𑀧𑁂𑀢𑀺, 𑀦 𑀘 𑀮𑁄𑀓𑀼𑀢𑁆𑀢𑀭𑀫𑁂𑀯 𑀜𑀸𑀡𑀦𑁆𑀢𑀺.

𑀜𑀸𑀡𑀓𑀣𑀸𑀯𑀡𑁆𑀡𑀦𑀸.

𑁩. 𑀦𑀺𑀭𑀬𑀧𑀸𑀮𑀓𑀣𑀸𑀯𑀡𑁆𑀡𑀦𑀸

𑁮𑁬𑁬. 𑀇𑀤𑀸𑀦𑀺 𑀦𑀺𑀭𑀬𑀧𑀸𑀮𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀣 ‘‘𑀦𑀺𑀭𑀬𑁂 𑀦𑁂𑀭𑀬𑀺𑀓𑀓𑀫𑁆𑀫𑀸𑀦𑁂𑀯 𑀦𑀺𑀭𑀬𑀧𑀸𑀮𑀭𑀽𑀧𑀯𑀲𑁂𑀦 𑀯𑀥𑁂𑀦𑁆𑀢𑀺, 𑀦𑀢𑁆𑀣𑀺 𑀦𑀺𑀭𑀬𑀧𑀸𑀮𑀸 𑀦𑀸𑀫 𑀲𑀢𑁆𑀢𑀸’’𑀢𑀺 𑀬𑁂𑀲𑀁 𑀮𑀤𑁆𑀥𑀺, 𑀲𑁂𑀬𑁆𑀬𑀣𑀸𑀧𑀺 𑀅𑀦𑁆𑀥𑀓𑀸𑀦𑀁; 𑀢𑁂 𑀲𑀦𑁆𑀥𑀸𑀬 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀧𑀝𑀺𑀜𑁆𑀜𑀸 𑀇𑀢𑀭𑀲𑁆𑀲. 𑀅𑀣 𑀦𑀁 ‘‘𑀬𑀤𑀺 𑀢𑀢𑁆𑀣 𑀦𑀺𑀭𑀬𑀧𑀸𑀮𑀸 𑀦 𑀲𑀺𑀬𑀼𑀁, 𑀓𑀫𑁆𑀫𑀓𑀸𑀭𑀡𑀸𑀧𑀺 𑀦 𑀪𑀯𑁂𑀬𑁆𑀬𑀼𑀁. 𑀓𑀸𑀭𑀡𑀺𑀓𑁂𑀲𑀼 𑀳𑀺 𑀲𑀢𑀺 𑀓𑀸𑀭𑀡𑀸’’𑀢𑀺 𑀘𑁄𑀤𑁂𑀢𑀼𑀁 𑀦𑀢𑁆𑀣𑀺 𑀦𑀺𑀭𑀬𑁂𑀲𑀽𑀢𑀺𑀆𑀤𑀺𑀫𑀸𑀳.

𑁮𑁬𑁭-𑁮𑁬𑁮. 𑀅𑀢𑁆𑀣𑀺 𑀫𑀦𑀼𑀲𑁆𑀲𑁂𑀲𑀽𑀢𑀺 𑀧𑀘𑁆𑀘𑀓𑁆𑀔𑁂𑀦 𑀜𑀸𑀧𑀦𑀢𑁆𑀣𑀁. 𑀬𑀣𑀸 𑀳𑀺 𑀫𑀦𑀼𑀲𑁆𑀲𑁂𑀲𑀼 𑀲𑀢𑀺 𑀓𑀸𑀭𑀡𑀺𑀓𑁂𑀲𑀼 𑀓𑀸𑀭𑀡𑀸, 𑀏𑀯𑀁 𑀢𑀢𑁆𑀣𑀸𑀧𑀻𑀢𑀺 𑀅𑀬𑀫𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄. 𑀅𑀢𑁆𑀣𑀺 𑀦𑀺𑀭𑀬𑁂𑀲𑀽𑀢𑀺 𑀧𑀼𑀘𑁆𑀙𑀸 𑀧𑀭𑀯𑀸𑀤𑀺𑀲𑁆𑀲, 𑀧𑀝𑀺𑀜𑁆𑀜𑀸 𑀇𑀢𑀭𑀲𑁆𑀲. 𑀦 𑀯𑁂𑀲𑁆𑀲𑀪𑀽 𑀦𑁄𑀧𑀺 𑀘 𑀧𑁂𑀢𑁆𑀢𑀺𑀭𑀸𑀚𑀸𑀢𑀺 𑀧𑀭𑀯𑀸𑀤𑀺𑀦𑀸 𑀲𑀓𑀲𑀫𑀬𑀢𑁄 𑀲𑀼𑀢𑁆𑀢𑀁 𑀆𑀪𑀢𑀁. 𑀢𑀁 𑀧𑀦 𑀲𑀸𑀲𑀦𑀸𑀯𑀘𑀭𑀺𑀓𑀦𑁆𑀢𑀺 𑀲𑀓𑀯𑀸𑀤𑀺𑀦𑀸 𑀅𑀦𑀼𑀜𑁆𑀜𑀸𑀢𑀁. 𑀢𑀢𑁆𑀣 𑀯𑁂𑀲𑁆𑀲𑀪𑀽𑀢𑀺 𑀏𑀓𑁄 𑀤𑁂𑀯𑁄. 𑀧𑁂𑀢𑁆𑀢𑀺𑀭𑀸𑀚𑀸𑀢𑀺 𑀧𑁂𑀢𑁆𑀢𑀺𑀯𑀺𑀲𑀬𑁂 𑀧𑁂𑀢𑀫𑀳𑀺𑀤𑁆𑀥𑀺𑀓𑁄. 𑀲𑁄𑀫𑀸𑀤𑀬𑁄 𑀧𑀸𑀓𑀝𑀸 𑀏𑀯. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀅𑀢𑁆𑀢𑀦𑁄 𑀓𑀫𑁆𑀫𑁂𑀳𑀺 𑀇𑀢𑁄 𑀧𑀡𑀼𑀦𑁆𑀦𑀁 𑀧𑀭𑀮𑁄𑀓𑀁 𑀧𑀢𑁆𑀢𑀁 𑀧𑀼𑀭𑀺𑀲𑀁 𑀦 𑀏𑀢𑁂 𑀯𑁂𑀲𑁆𑀲𑀪𑀽𑀆𑀤𑀬𑁄 𑀳𑀦𑀦𑁆𑀢𑀺. 𑀬𑁂𑀳𑀺 𑀧𑀦 𑀲𑁄 𑀓𑀫𑁆𑀫𑁂𑀳𑀺 𑀢𑀢𑁆𑀣 𑀧𑀡𑀼𑀦𑁆𑀦𑁄, 𑀢𑀸𑀦𑀺 𑀲𑀓𑀸𑀦𑀺 𑀓𑀫𑁆𑀫𑀸𑀦𑀺𑀬𑁂𑀯 𑀦𑀁 𑀢𑀢𑁆𑀣 𑀳𑀦𑀦𑁆𑀢𑀻𑀢𑀺 𑀓𑀫𑁆𑀫𑀲𑁆𑀲𑀓𑀢𑀁 𑀤𑀻𑀧𑁂𑀢𑀺, 𑀦 𑀦𑀺𑀭𑀬𑀧𑀸𑀮𑀸𑀦𑀁 𑀅𑀪𑀸𑀯𑀁. 𑀲𑀓𑀯𑀸𑀤𑀺𑀦𑀸 𑀧𑀦 𑀢𑀫𑁂𑀦𑀁, 𑀪𑀺𑀓𑁆𑀔𑀯𑁂𑀢𑀺 𑀆𑀪𑀢𑀸𑀦𑀺 𑀲𑀼𑀢𑁆𑀢𑀧𑀤𑀸𑀦𑀺 𑀦𑀻𑀢𑀢𑁆𑀣𑀸𑀦𑁂𑀯𑀸𑀢𑀺.

𑀦𑀺𑀭𑀬𑀧𑀸𑀮𑀓𑀣𑀸𑀯𑀡𑁆𑀡𑀦𑀸.

𑁪. 𑀢𑀺𑀭𑀘𑁆𑀙𑀸𑀦𑀓𑀣𑀸𑀯𑀡𑁆𑀡𑀦𑀸

𑁮𑁬𑁯-𑁮𑁭𑁧. 𑀇𑀤𑀸𑀦𑀺 𑀢𑀺𑀭𑀘𑁆𑀙𑀸𑀦𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀣 𑀤𑁂𑀯𑁂𑀲𑀼 𑀏𑀭𑀸𑀯𑀡𑀸𑀤𑀬𑁄 𑀤𑁂𑀯𑀧𑀼𑀢𑁆𑀢𑀸 𑀳𑀢𑁆𑀣𑀺𑀯𑀡𑁆𑀡𑀁 𑀅𑀲𑁆𑀲𑀯𑀡𑁆𑀡𑀁 𑀯𑀺𑀓𑀼𑀩𑁆𑀩𑀦𑁆𑀢𑀺, 𑀦𑀢𑁆𑀣𑀺 𑀢𑀢𑁆𑀣 𑀢𑀺𑀭𑀘𑁆𑀙𑀸𑀦𑀕𑀢𑀸. 𑀬𑁂𑀲𑀁 𑀧𑀦 𑀢𑀺𑀭𑀘𑁆𑀙𑀸𑀦𑀯𑀡𑁆𑀡𑀺𑀦𑁄 𑀤𑁂𑀯𑀧𑀼𑀢𑁆𑀢𑁂 𑀤𑀺𑀲𑁆𑀯𑀸 ‘‘𑀅𑀢𑁆𑀣𑀺 𑀤𑁂𑀯𑁂𑀲𑀼 𑀢𑀺𑀭𑀘𑁆𑀙𑀸𑀦𑀕𑀢𑀸’’𑀢𑀺 𑀮𑀤𑁆𑀥𑀺, 𑀲𑁂𑀬𑁆𑀬𑀣𑀸𑀧𑀺 𑀅𑀦𑁆𑀥𑀓𑀸𑀦𑀁; 𑀢𑁂 𑀲𑀦𑁆𑀥𑀸𑀬 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀧𑀝𑀺𑀜𑁆𑀜𑀸 𑀇𑀢𑀭𑀲𑁆𑀲. 𑀅𑀣 𑀦𑀁 ‘‘𑀬𑀤𑀺 𑀤𑁂𑀯𑀬𑁄𑀦𑀺𑀬𑀁 𑀢𑀺𑀭𑀘𑁆𑀙𑀸𑀦𑀕𑀢𑀸 𑀲𑀺𑀬𑀼𑀁, 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀬𑀫𑁆𑀧𑀺 𑀤𑁂𑀯𑀸 𑀲𑀺𑀬𑀼’’𑀦𑁆𑀢𑀺 𑀘𑁄𑀤𑁂𑀢𑀼𑀁 𑀅𑀢𑁆𑀣𑀺 𑀢𑀺𑀭𑀘𑁆𑀙𑀸𑀦𑀕𑀢𑁂𑀲𑀽𑀢𑀺𑀆𑀤𑀺𑀫𑀸𑀳. 𑀓𑀻𑀝𑀸𑀢𑀺𑀆𑀤𑀺 𑀬𑁂𑀲𑀁 𑀲𑁄 𑀅𑀪𑀸𑀯𑀁 𑀇𑀘𑁆𑀙𑀢𑀺, 𑀢𑁂 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁. 𑀏𑀭𑀸𑀯𑀡𑁄𑀢𑀺 𑀧𑀜𑁆𑀳𑁂 𑀢𑀲𑁆𑀲 𑀅𑀢𑁆𑀣𑀺𑀢𑀸𑀬 𑀧𑀝𑀺𑀜𑁆𑀜𑀸 𑀲𑀓𑀯𑀸𑀤𑀺𑀲𑁆𑀲, 𑀦 𑀢𑀺𑀭𑀘𑁆𑀙𑀸𑀦𑀕𑀢𑀲𑁆𑀲. 𑀳𑀢𑁆𑀣𑀺𑀩𑀦𑁆𑀥𑀸𑀢𑀺𑀆𑀤𑀺 ‘‘𑀬𑀤𑀺 𑀢𑀢𑁆𑀣 𑀳𑀢𑁆𑀣𑀺𑀆𑀤𑀬𑁄 𑀲𑀺𑀬𑀼𑀁, 𑀳𑀢𑁆𑀣𑀺𑀩𑀦𑁆𑀥𑀸𑀤𑀬𑁄𑀧𑀺 𑀲𑀺𑀬𑀼’’𑀦𑁆𑀢𑀺 𑀘𑁄𑀤𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀢𑀢𑁆𑀣 𑀬𑀸𑀯𑀲𑀺𑀓𑀸𑀢𑀺 𑀬𑀯𑀲𑁆𑀲 𑀤𑀸𑀬𑀓𑀸. 𑀓𑀸𑀭𑀡𑀺𑀓𑀸𑀢𑀺 𑀳𑀢𑁆𑀣𑀸𑀘𑀭𑀺𑀬𑀸𑀤𑀬𑁄, 𑀬𑁂𑀳𑀺 𑀢𑁂 𑀦𑀸𑀦𑀸𑀯𑀺𑀥𑀁 𑀓𑀸𑀭𑀡𑀁 𑀓𑀭𑁂𑀬𑁆𑀬𑀼𑀁. 𑀪𑀢𑁆𑀢𑀓𑀸𑀭𑀓𑀸𑀢𑀺 𑀳𑀢𑁆𑀣𑀺𑀆𑀤𑀻𑀦𑀁 𑀪𑀢𑁆𑀢𑀭𑀦𑁆𑀥𑀓𑀸. 𑀦 𑀳𑁂𑀯𑀦𑁆𑀢𑀺 𑀢𑀣𑀸 𑀅𑀦𑀺𑀘𑁆𑀙𑀦𑁆𑀢𑁄 𑀧𑀝𑀺𑀓𑁆𑀔𑀺𑀧𑀢𑀻𑀢𑀺.

𑀢𑀺𑀭𑀘𑁆𑀙𑀸𑀦𑀓𑀣𑀸𑀯𑀡𑁆𑀡𑀦𑀸.

𑁫. 𑀫𑀕𑁆𑀕𑀓𑀣𑀸𑀯𑀡𑁆𑀡𑀦𑀸

𑁮𑁭𑁨-𑁮𑁭𑁫. 𑀇𑀤𑀸𑀦𑀺 𑀫𑀕𑁆𑀕𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀣 𑀬𑁂𑀲𑀁 ‘‘𑀧𑀼𑀩𑁆𑀩𑁂𑀯 𑀔𑁄 𑀧𑀦𑀲𑁆𑀲 𑀓𑀸𑀬𑀓𑀫𑁆𑀫𑀁 𑀯𑀘𑀻𑀓𑀫𑁆𑀫𑀁 𑀆𑀚𑀻𑀯𑁄 𑀲𑀼𑀧𑀭𑀺𑀲𑀼𑀤𑁆𑀥𑁄 𑀳𑁄𑀢𑀻’’𑀢𑀺 (𑀅. 𑀦𑀺. 𑁩.𑁪𑁩𑁧) 𑀇𑀤𑀜𑁆𑀘𑁂𑀯 𑀲𑀼𑀢𑁆𑀢𑀁 𑀲𑀫𑁆𑀫𑀸𑀯𑀸𑀘𑀸𑀓𑀫𑁆𑀫𑀦𑁆𑀢𑀸𑀚𑀻𑀯𑀸𑀦𑀜𑁆𑀘 𑀘𑀺𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑀢𑀁 𑀦𑀺𑀲𑁆𑀲𑀸𑀬 ‘‘𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀧𑀜𑁆𑀘𑀗𑁆𑀕𑀺𑀓𑁄𑀯 𑀫𑀕𑁆𑀕𑁄’’𑀢𑀺 𑀮𑀤𑁆𑀥𑀺, 𑀲𑁂𑀬𑁆𑀬𑀣𑀸𑀧𑀺 𑀫𑀳𑀺𑀲𑀸𑀲𑀓𑀸𑀦𑀁, 𑀢𑁂 𑀲𑀦𑁆𑀥𑀸𑀬 𑀧𑀜𑁆𑀘𑀗𑁆𑀕𑀺𑀓𑁄𑀢𑀺 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀧𑀝𑀺𑀜𑁆𑀜𑀸 𑀇𑀢𑀭𑀲𑁆𑀲. 𑀲𑀫𑁆𑀫𑀸𑀯𑀸𑀘𑀸 𑀫𑀕𑁆𑀕𑀗𑁆𑀕𑀁, 𑀲𑀸 𑀘 𑀦 𑀫𑀕𑁆𑀕𑁄𑀢𑀺𑀆𑀤𑀺 𑀧𑀭𑀲𑀫𑀬𑀯𑀲𑁂𑀦 𑀯𑀼𑀢𑁆𑀢𑀁. 𑀧𑀭𑀲𑀫𑀬𑀲𑁆𑀫𑀺𑀜𑁆𑀳𑀺 𑀲𑀫𑁆𑀫𑀸𑀯𑀸𑀘𑀸𑀤𑀬𑁄 𑀫𑀕𑁆𑀕𑀗𑁆𑀕𑀦𑁆𑀢𑀺 𑀆𑀕𑀢𑀸. 𑀭𑀽𑀧𑀢𑁆𑀢𑀸 𑀧𑀦 𑀫𑀕𑁆𑀕𑁄 𑀦 𑀳𑁄𑀢𑀻𑀢𑀺 𑀯𑀡𑁆𑀡𑀺𑀢𑀸. 𑀲𑀫𑁆𑀫𑀸𑀤𑀺𑀝𑁆𑀞𑀺 𑀫𑀕𑁆𑀕𑀗𑁆𑀕𑀦𑁆𑀢𑀺𑀆𑀤𑀺 𑀫𑀕𑁆𑀕𑀗𑁆𑀕𑀲𑁆𑀲 𑀅𑀫𑀕𑁆𑀕𑀢𑀸 𑀦𑀸𑀫 𑀦𑀢𑁆𑀣𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀧𑀼𑀩𑁆𑀩𑁂𑀯 𑀔𑁄 𑀧𑀦𑀲𑁆𑀲𑀸𑀢𑀺 𑀲𑀼𑀢𑁆𑀢𑁂 𑀧𑀭𑀺𑀲𑀼𑀤𑁆𑀥𑀲𑀻𑀮𑀲𑁆𑀲 𑀫𑀕𑁆𑀕𑀪𑀸𑀯𑀦𑀸 𑀦𑀸𑀫 𑀳𑁄𑀢𑀺, 𑀦 𑀇𑀢𑀭𑀲𑁆𑀲𑀸𑀢𑀺 𑀆𑀕𑀫𑀦𑀺𑀬𑀧𑀝𑀺𑀧𑀤𑀸𑀬 𑀯𑀺𑀲𑀼𑀤𑁆𑀥𑀺𑀪𑀸𑀯𑀤𑀲𑁆𑀲𑀦𑀢𑁆𑀣𑀁 ‘‘𑀓𑀸𑀬𑀓𑀫𑁆𑀫𑀁 𑀯𑀘𑀻𑀓𑀫𑁆𑀫𑀁 𑀆𑀚𑀻𑀯𑁄 𑀲𑀼𑀧𑀭𑀺𑀲𑀼𑀤𑁆𑀥𑁄 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀁, 𑀦 𑀇𑀫𑁂𑀳𑀺 𑀯𑀺𑀦𑀸 𑀧𑀜𑁆𑀘𑀗𑁆𑀕𑀺𑀓𑀪𑀸𑀯𑀤𑀲𑁆𑀲𑀦𑀢𑁆𑀣𑀁. 𑀢𑁂𑀦𑁂𑀯𑀸𑀳 ‘‘𑀏𑀯𑀫𑀲𑁆𑀲𑀸𑀬𑀁 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀢𑀻’’𑀢𑀺. 𑀲𑀓𑀯𑀸𑀤𑀺𑀦𑀸 𑀆𑀪𑀢𑀲𑀼𑀢𑁆𑀢𑀁 𑀦𑀻𑀢𑀢𑁆𑀣𑀫𑁂𑀯𑀸𑀢𑀺.

𑀫𑀕𑁆𑀕𑀓𑀣𑀸𑀯𑀡𑁆𑀡𑀦𑀸.

𑁬. 𑀜𑀸𑀡𑀓𑀣𑀸𑀯𑀡𑁆𑀡𑀦𑀸

𑁮𑁭𑁬-𑁮𑁭𑁭. 𑀇𑀤𑀸𑀦𑀺 𑀜𑀸𑀡𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀣 𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑁂 𑀤𑁆𑀯𑀸𑀤𑀲𑀸𑀓𑀸𑀭𑀜𑀸𑀡𑀁 𑀲𑀦𑁆𑀥𑀸𑀬 ‘‘𑀤𑁆𑀯𑀸𑀤𑀲𑀯𑀢𑁆𑀣𑀼𑀓𑀁 𑀜𑀸𑀡𑀁 𑀮𑁄𑀓𑀼𑀢𑁆𑀢𑀭’’𑀦𑁆𑀢𑀺 𑀬𑁂𑀲𑀁 𑀮𑀤𑁆𑀥𑀺, 𑀲𑁂𑀬𑁆𑀬𑀣𑀸𑀧𑀺 𑀧𑀼𑀩𑁆𑀩𑀲𑁂𑀮𑀺𑀬𑀸𑀦𑀁, 𑀢𑁂 𑀲𑀦𑁆𑀥𑀸𑀬 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀧𑀝𑀺𑀜𑁆𑀜𑀸 𑀇𑀢𑀭𑀲𑁆𑀲. 𑀅𑀣 𑀦𑀁 ‘‘𑀲𑀘𑁂 𑀢𑀁 𑀤𑁆𑀯𑀸𑀤𑀲𑀯𑀢𑁆𑀣𑀼𑀓𑀁, 𑀤𑁆𑀯𑀸𑀤𑀲𑀳𑀺 𑀫𑀕𑁆𑀕𑀜𑀸𑀡𑁂𑀳𑀺 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀘𑁄𑀤𑁂𑀢𑀼𑀁 𑀤𑁆𑀯𑀸𑀤𑀲𑀸𑀢𑀺𑀆𑀤𑀺𑀫𑀸𑀳. 𑀇𑀢𑀭𑁄 𑀫𑀕𑁆𑀕𑀲𑁆𑀲 𑀏𑀓𑀢𑁆𑀢𑀁 𑀲𑀦𑁆𑀥𑀸𑀬 𑀧𑀝𑀺𑀓𑁆𑀔𑀺𑀧𑀢𑀺, 𑀏𑀓𑁂𑀓𑀲𑁆𑀫𑀺𑀁 𑀲𑀘𑁆𑀘𑁂 𑀲𑀘𑁆𑀘𑀜𑀸𑀡𑀓𑀺𑀘𑁆𑀘𑀜𑀸𑀡𑀓𑀢𑀜𑀸𑀡𑀸𑀦𑀁 𑀯𑀲𑁂𑀦 𑀜𑀸𑀡𑀦𑀸𑀦𑀢𑁆𑀢𑀁 𑀲𑀦𑁆𑀥𑀸𑀬 𑀧𑀝𑀺𑀚𑀸𑀦𑀸𑀢𑀺. 𑀤𑁆𑀯𑀸𑀤𑀲 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀸𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀦𑀦𑀼 𑀯𑀼𑀢𑁆𑀢𑀁 𑀪𑀕𑀯𑀢𑀸𑀢𑀺 𑀲𑀼𑀢𑁆𑀢𑀁 𑀲𑀤𑁆𑀥𑀺𑀁 𑀧𑀼𑀩𑁆𑀩𑀪𑀸𑀕𑀧𑀭𑀪𑀸𑀕𑁂𑀳𑀺 𑀜𑀸𑀡𑀦𑀸𑀦𑀢𑁆𑀢𑀁 𑀤𑀻𑀧𑁂𑀢𑀺, 𑀦 𑀅𑀭𑀺𑀬𑀫𑀕𑁆𑀕𑀲𑁆𑀲 𑀤𑁆𑀯𑀸𑀤𑀲 𑀜𑀸𑀡𑀢𑀁. 𑀢𑀲𑁆𑀫𑀸 𑀅𑀲𑀸𑀥𑀓𑀦𑁆𑀢𑀺.

𑀜𑀸𑀡𑀓𑀣𑀸𑀯𑀡𑁆𑀡𑀦𑀸.

𑀯𑀻𑀲𑀢𑀺𑀫𑁄 𑀯𑀕𑁆𑀕𑁄.

𑀘𑀢𑀼𑀢𑁆𑀣𑀧𑀡𑁆𑀡𑀸𑀲𑀓𑁄 𑀲𑀫𑀢𑁆𑀢𑁄.