𑁪. 𑀅𑀭𑀺𑀬𑀭𑀽𑀧𑀓𑀣𑀸𑀯𑀡𑁆𑀡𑀦𑀸

𑁬𑁯𑁮-𑁬𑁯𑁯. 𑀇𑀤𑀸𑀦𑀺 𑀅𑀭𑀺𑀬𑀭𑀽𑀧𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀣 𑀲𑀫𑁆𑀫𑀸𑀯𑀸𑀘𑀸𑀓𑀫𑁆𑀫𑀦𑁆𑀢𑀸 𑀭𑀽𑀧𑀁, 𑀢𑀜𑁆𑀘 𑀔𑁄 ‘‘𑀲𑀩𑁆𑀩𑀁 𑀭𑀽𑀧𑀁 𑀘𑀢𑁆𑀢𑀸𑀭𑀺 𑀘 𑀫𑀳𑀸𑀪𑀽𑀢𑀸𑀦𑀺 𑀘𑀢𑀼𑀦𑁆𑀦𑀜𑁆𑀘 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬𑀭𑀽𑀧’’𑀦𑁆𑀢𑀺 (𑀫. 𑀦𑀺. 𑁩.𑁬𑁭) 𑀯𑀘𑀦𑀢𑁄 𑀉𑀧𑀸𑀤𑀸𑀬𑀭𑀽𑀧𑀦𑁆𑀢𑀺 𑀬𑁂𑀲𑀁 𑀮𑀤𑁆𑀥𑀺, 𑀲𑁂𑀬𑁆𑀬𑀣𑀸𑀧𑀺 𑀉𑀢𑁆𑀢𑀭𑀸𑀧𑀣𑀓𑀸𑀦𑀁; 𑀢𑁂 𑀲𑀦𑁆𑀥𑀸𑀬 𑀅𑀭𑀺𑀬𑀭𑀽𑀧𑀁 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬𑀸𑀢𑀺 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲. 𑀢𑀢𑁆𑀣 𑀅𑀭𑀺𑀬𑀸𑀦𑀁 𑀭𑀽𑀧𑀁, 𑀅𑀭𑀺𑀬𑀁 𑀯𑀸 𑀭𑀽𑀧𑀦𑁆𑀢𑀺 𑀅𑀭𑀺𑀬𑀭𑀽𑀧𑀁. 𑀆𑀫𑀦𑁆𑀢𑀸𑀢𑀺 𑀮𑀤𑁆𑀥𑀺𑀬𑀁 𑀞𑀢𑁆𑀯𑀸 𑀧𑀝𑀺𑀜𑁆𑀜𑀸 𑀇𑀢𑀭𑀲𑁆𑀲. 𑀓𑀼𑀲𑀮𑀦𑁆𑀢𑀺 𑀧𑀼𑀝𑁆𑀞𑁄 𑀮𑀤𑁆𑀥𑀺𑀯𑀲𑁂𑀦𑁂𑀯 𑀧𑀝𑀺𑀚𑀸𑀦𑀸𑀢𑀺. 𑀅𑀦𑀸𑀲𑀯𑀧𑀼𑀘𑁆𑀙𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀬𑀁 𑀓𑀺𑀜𑁆𑀘𑀺 𑀭𑀽𑀧𑀦𑁆𑀢𑀺 𑀲𑀼𑀢𑁆𑀢𑀁 𑀞𑀧𑁂𑀢𑁆𑀯𑀸 𑀪𑀽𑀢𑀸𑀦𑀺 𑀲𑁂𑀲𑀭𑀽𑀧𑀲𑁆𑀲 𑀉𑀧𑀸𑀤𑀸𑀪𑀸𑀯𑀁 𑀤𑀻𑀧𑁂𑀢𑀺, 𑀦 𑀲𑀫𑁆𑀫𑀸𑀯𑀸𑀘𑀸𑀓𑀫𑁆𑀫𑀦𑁆𑀢𑀸𑀦𑀁. 𑀢𑁂𑀲𑀜𑁆𑀳𑀺 𑀭𑀽𑀧𑀫𑀢𑁆𑀢𑀜𑁆𑀜𑁂𑀯 𑀅𑀲𑀺𑀤𑁆𑀥𑀁, 𑀓𑀼𑀢𑁄 𑀉𑀧𑀸𑀤𑀸𑀭𑀽𑀧𑀢𑀸; 𑀢𑀲𑁆𑀫𑀸 𑀅𑀲𑀸𑀥𑀓𑀦𑁆𑀢𑀺.

𑀅𑀭𑀺𑀬𑀭𑀽𑀧𑀓𑀣𑀸𑀯𑀡𑁆𑀡𑀦𑀸.