𑁧𑁪. 𑀘𑀼𑀤𑁆𑀤𑀲𑀫𑀯𑀕𑁆𑀕𑁄

𑁧. 𑀓𑀼𑀲𑀮𑀸𑀓𑀼𑀲𑀮𑀧𑀝𑀺𑀲𑀦𑁆𑀤𑀳𑀦𑀓𑀣𑀸𑀯𑀡𑁆𑀡𑀦𑀸

𑁬𑁮𑁬-𑁬𑁯𑁦. 𑀇𑀤𑀸𑀦𑀺 𑀓𑀼𑀲𑀮𑀸𑀓𑀼𑀲𑀮𑀧𑀝𑀺𑀲𑀦𑁆𑀤𑀳𑀦𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀣 𑀓𑀼𑀲𑀮𑀁 𑀯𑀸 𑀅𑀓𑀼𑀲𑀮𑀲𑁆𑀲, 𑀅𑀓𑀼𑀲𑀮𑀁 𑀯𑀸 𑀓𑀼𑀲𑀮𑀲𑁆𑀲 𑀅𑀦𑀦𑁆𑀢𑀭𑀸 𑀉𑀧𑁆𑀧𑀚𑁆𑀚𑀦𑀓𑀁 𑀦𑀸𑀫 𑀦𑀢𑁆𑀣𑀻𑀢𑀺 𑀢𑁂𑀲𑀁 𑀅𑀜𑁆𑀜𑀫𑀜𑁆𑀜𑀁 𑀧𑀝𑀺𑀲𑀦𑁆𑀥𑀸𑀦𑀁 𑀦 𑀬𑀼𑀚𑁆𑀚𑀢𑀺. 𑀬𑁂 𑀧𑀦 𑀬𑀲𑁆𑀫𑀸 𑀏𑀓𑀯𑀢𑁆𑀣𑀼𑀲𑁆𑀫𑀺𑀜𑁆𑀜𑁂𑀯 𑀭𑀚𑁆𑀚𑀢𑀺 𑀯𑀺𑀭𑀚𑁆𑀚𑀢𑀺 𑀘, 𑀢𑀲𑁆𑀫𑀸 𑀢𑀁 𑀅𑀜𑁆𑀜𑀫𑀜𑁆𑀜𑀁 𑀧𑀝𑀺𑀲𑀦𑁆𑀤𑀳𑀢𑀻𑀢𑀺 𑀮𑀤𑁆𑀥𑀺𑀁 𑀕𑀳𑁂𑀢𑁆𑀯𑀸 𑀞𑀺𑀢𑀸, 𑀲𑁂𑀬𑁆𑀬𑀣𑀸𑀧𑀺 𑀫𑀳𑀸𑀲𑀗𑁆𑀖𑀺𑀓𑀸; 𑀢𑁂 𑀲𑀦𑁆𑀥𑀸𑀬 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲; 𑀧𑀝𑀺𑀜𑁆𑀜𑀸 𑀇𑀢𑀭𑀲𑁆𑀲. 𑀆𑀯𑀝𑁆𑀝𑀦𑀸 𑀧𑀡𑀺𑀥𑀻𑀢𑀺 𑀉𑀪𑀬𑀁 𑀆𑀯𑀚𑁆𑀚𑀦𑀲𑁆𑀲𑁂𑀯 𑀦𑀸𑀫𑀁. 𑀢𑀜𑁆𑀳𑀺 𑀪𑀯𑀗𑁆𑀕𑀁 𑀆𑀯𑀝𑁆𑀝𑁂𑀢𑀻𑀢𑀺 𑀆𑀯𑀝𑁆𑀝𑀦𑀸. 𑀪𑀯𑀗𑁆𑀕𑀸𑀭𑀫𑁆𑀫𑀡𑀢𑁄 𑀅𑀜𑁆𑀜𑀲𑁆𑀫𑀺𑀁 𑀆𑀭𑀫𑁆𑀫𑀡𑁂 𑀘𑀺𑀢𑁆𑀢𑀁 𑀧𑀡𑀺𑀤𑀳𑀢𑀺 𑀞𑀧𑁂𑀢𑀻𑀢𑀺 𑀧𑀡𑀺𑀥𑀺. 𑀓𑀼𑀲𑀮𑀁 𑀅𑀦𑀸𑀯𑀝𑁆𑀝𑁂𑀦𑁆𑀢𑀲𑁆𑀲𑀸𑀢𑀺 𑀬𑀁 𑀢𑀁 𑀅𑀓𑀼𑀲𑀮𑀸𑀦𑀦𑁆𑀢𑀭𑀁 𑀧𑀝𑀺𑀲𑀦𑁆𑀤𑀳𑀦𑁆𑀢𑀁 𑀓𑀼𑀲𑀮𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀁 𑀅𑀦𑀸𑀯𑀝𑁆𑀝𑁂𑀦𑁆𑀢𑀲𑁆𑀲 𑀉𑀧𑁆𑀧𑀚𑁆𑀚𑀢𑀻𑀢𑀺 𑀧𑀼𑀘𑁆𑀙𑀢𑀺. 𑀇𑀢𑀭𑁄 𑀧𑀦 𑀯𑀺𑀦𑀸 𑀆𑀯𑀚𑁆𑀚𑀦𑁂𑀦 𑀓𑀼𑀲𑀮𑀲𑁆𑀲 𑀉𑀧𑁆𑀧𑀢𑁆𑀢𑀺𑀁 𑀅𑀧𑀲𑁆𑀲𑀦𑁆𑀢𑁄 𑀧𑀝𑀺𑀓𑁆𑀔𑀺𑀧𑀢𑀺. 𑀓𑀼𑀲𑀮𑀁 𑀅𑀬𑁄𑀦𑀺𑀲𑁄 𑀫𑀦𑀲𑀺𑀓𑀭𑁄𑀢𑁄𑀢𑀺 𑀇𑀤𑀁 𑀬𑀤𑀺 𑀅𑀓𑀼𑀲𑀮𑀸𑀦𑀦𑁆𑀢𑀭𑀁 𑀓𑀼𑀲𑀮𑀁 𑀉𑀧𑁆𑀧𑀚𑁆𑀚𑁂𑀬𑁆𑀬, 𑀅𑀓𑀼𑀲𑀮𑀲𑁆𑀲𑁂𑀯 𑀆𑀯𑀚𑁆𑀚𑀦𑁂𑀦 𑀅𑀬𑁄𑀦𑀺𑀲𑁄 𑀫𑀦𑀲𑀺𑀓𑀭𑁄𑀢𑁄 𑀉𑀧𑁆𑀧𑀚𑁆𑀚𑁂𑀬𑁆𑀬𑀸𑀢𑀺 𑀘𑁄𑀤𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀲𑁂𑀲𑀁 𑀬𑀣𑀸𑀧𑀸𑀴𑀺𑀫𑁂𑀯 𑀦𑀺𑀬𑁆𑀬𑀸𑀢𑀺. 𑀦𑀦𑀼 𑀬𑀲𑁆𑀫𑀺𑀁𑀬𑁂𑀯 𑀯𑀢𑁆𑀣𑀼𑀲𑁆𑀫𑀺𑀦𑁆𑀢𑀺 𑀯𑀘𑀦𑀁 𑀏𑀓𑀸𑀭𑀫𑁆𑀫𑀡𑁂 𑀲𑀭𑀸𑀕𑀯𑀺𑀭𑀸𑀕𑀼𑀧𑁆𑀧𑀢𑁆𑀢𑀺𑀁 𑀤𑀻𑀧𑁂𑀢𑀺, 𑀦 𑀓𑀼𑀲𑀮𑀸𑀓𑀼𑀲𑀮𑀸𑀦𑀁 𑀅𑀦𑀦𑁆𑀢𑀭𑀢𑀁, 𑀢𑀲𑁆𑀫𑀸 𑀅𑀲𑀸𑀥𑀓𑀦𑁆𑀢𑀺.

𑀓𑀼𑀲𑀮𑀸𑀓𑀼𑀲𑀮𑀧𑀝𑀺𑀲𑀦𑁆𑀤𑀳𑀦𑀓𑀣𑀸𑀯𑀡𑁆𑀡𑀦𑀸.

𑁨. 𑀲𑀴𑀸𑀬𑀢𑀦𑀼𑀧𑁆𑀧𑀢𑁆𑀢𑀺𑀓𑀣𑀸𑀯𑀡𑁆𑀡𑀦𑀸

𑁬𑁯𑁧-𑁬𑁯𑁨. 𑀇𑀤𑀸𑀦𑀺 𑀲𑀴𑀸𑀬𑀢𑀦𑀼𑀧𑁆𑀧𑀢𑁆𑀢𑀺𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀣 𑀉𑀧𑀧𑀢𑁆𑀢𑁂𑀲𑀺𑀬𑁂𑀦 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑁂𑀦 𑀲𑀳𑁂𑀯 𑀑𑀧𑀧𑀸𑀢𑀺𑀓𑀸𑀦𑀁 𑀲𑀴𑀸𑀬𑀢𑀦𑀁 𑀉𑀧𑁆𑀧𑀚𑁆𑀚𑀢𑀺. 𑀕𑀩𑁆𑀪𑀲𑁂𑀬𑁆𑀬𑀓𑀸𑀦𑀁 𑀅𑀚𑁆𑀛𑀢𑁆𑀢𑀺𑀓𑀸𑀬𑀢𑀦𑁂𑀲𑀼 𑀫𑀦𑀸𑀬𑀢𑀦𑀓𑀸𑀬𑀸𑀬𑀢𑀦𑀸𑀦𑁂𑀯 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀲𑁂𑀲𑀸𑀦𑀺 𑀘𑀢𑁆𑀢𑀸𑀭𑀺 𑀲𑀢𑁆𑀢𑀲𑀢𑁆𑀢𑀢𑀺𑀭𑀢𑁆𑀢𑀺𑀫𑁆𑀳𑀺. 𑀢𑀸𑀦𑀺 𑀘 𑀔𑁄 𑀬𑁂𑀦 𑀓𑀫𑁆𑀫𑀼𑀦𑀸 𑀧𑀝𑀺𑀲𑀦𑁆𑀥𑀺 𑀕𑀳𑀺𑀢𑀸, 𑀢𑀲𑁆𑀲𑁂𑀯 𑀅𑀜𑁆𑀜𑀲𑁆𑀲 𑀯𑀸 𑀓𑀢𑀢𑁆𑀢𑀸𑀢𑀺 𑀅𑀬𑀁 𑀲𑀓𑀲𑀫𑀬𑁂 𑀯𑀸𑀤𑁄. 𑀬𑁂𑀲𑀁 𑀧𑀦 𑀏𑀓𑀓𑀫𑁆𑀫𑀲𑀫𑁆𑀪𑀯𑀢𑁆𑀢𑀸 𑀲𑀫𑁆𑀧𑀦𑁆𑀦𑀲𑀸𑀔𑀸𑀯𑀺𑀝𑀧𑀸𑀦𑀁 𑀭𑀼𑀓𑁆𑀔𑀸𑀤𑀻𑀦𑀁 𑀅𑀁𑀓𑀼𑀭𑁄 𑀯𑀺𑀬 𑀩𑀻𑀚𑀫𑀢𑁆𑀢𑀁 𑀲𑀴𑀸𑀬𑀢𑀦𑀁 𑀫𑀸𑀢𑀼𑀓𑀼𑀘𑁆𑀙𑀺𑀲𑁆𑀫𑀺𑀁 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂𑀬𑁂𑀯 𑀉𑀧𑁆𑀧𑀚𑁆𑀚𑀢𑀻𑀢𑀺 𑀮𑀤𑁆𑀥𑀺, 𑀲𑁂𑀬𑁆𑀬𑀣𑀸𑀧𑀺 𑀧𑀼𑀩𑁆𑀩𑀲𑁂𑀮𑀺𑀬𑀸𑀦𑀁; 𑀢𑁂 𑀲𑀦𑁆𑀥𑀸𑀬 𑀲𑀴𑀸𑀬𑀢𑀦𑀦𑁆𑀢𑀺 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀧𑀝𑀺𑀜𑁆𑀜𑀸 𑀇𑀢𑀭𑀲𑁆𑀲. 𑀲𑀩𑁆𑀩𑀗𑁆𑀕𑀧𑀘𑁆𑀘𑀗𑁆𑀕𑀻𑀢𑀺𑀆𑀤𑀺 𑀲𑀴𑀸𑀬𑀢𑀦𑁂 𑀲𑀢𑀺 𑀏𑀯𑀭𑀽𑀧𑁄 𑀳𑀼𑀢𑁆𑀯𑀸 𑀑𑀓𑁆𑀓𑀫𑁂𑀬𑁆𑀬𑀸𑀢𑀺 𑀘𑁄𑀤𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀫𑀸𑀢𑀼𑀓𑀼𑀘𑁆𑀙𑀺𑀕𑀢𑀲𑁆𑀲𑀸𑀢𑀺 𑀧𑀼𑀘𑁆𑀙𑀸 𑀧𑀭𑀯𑀸𑀤𑀺𑀲𑁆𑀲. 𑀧𑀭𑀢𑁄 𑀫𑀸𑀢𑀼𑀓𑀼𑀘𑁆𑀙𑀺𑀕𑀢𑀲𑁆𑀲 𑀧𑀘𑁆𑀙𑀸 𑀓𑁂𑀲𑀸𑀢𑀺 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀲𑀴𑀸𑀬𑀢𑀦𑀼𑀧𑁆𑀧𑀢𑁆𑀢𑀺𑀓𑀣𑀸𑀯𑀡𑁆𑀡𑀦𑀸.

𑁩. 𑀅𑀦𑀦𑁆𑀢𑀭𑀧𑀘𑁆𑀘𑀬𑀓𑀣𑀸𑀯𑀡𑁆𑀡𑀦𑀸

𑁬𑁯𑁩-𑁬𑁯𑁭. 𑀇𑀤𑀸𑀦𑀺 𑀅𑀦𑀦𑁆𑀢𑀭𑀧𑀘𑁆𑀘𑀬𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀣 𑀦𑀘𑁆𑀘𑀕𑀻𑀢𑀸𑀤𑀻𑀲𑀼 𑀭𑀽𑀧𑀤𑀲𑁆𑀲𑀦𑀲𑀤𑁆𑀤𑀲𑀯𑀦𑀸𑀤𑀻𑀦𑀁 𑀮𑀳𑀼𑀧𑀭𑀺𑀯𑀢𑁆𑀢𑀺𑀢𑀁 𑀤𑀺𑀲𑁆𑀯𑀸 ‘‘𑀇𑀫𑀸𑀦𑀺 𑀯𑀺𑀜𑁆𑀜𑀸𑀡𑀸𑀦𑀺 𑀅𑀜𑁆𑀜𑀫𑀜𑁆𑀜𑀲𑁆𑀲 𑀅𑀦𑀦𑁆𑀢𑀭𑀸 𑀉𑀧𑁆𑀧𑀚𑁆𑀚𑀦𑁆𑀢𑀻’’𑀢𑀺 𑀬𑁂𑀲𑀁 𑀮𑀤𑁆𑀥𑀺, 𑀲𑁂𑀬𑁆𑀬𑀣𑀸𑀧𑀺 𑀉𑀢𑁆𑀢𑀭𑀸𑀧𑀣𑀓𑀸𑀦𑀁; 𑀢𑁂 𑀲𑀦𑁆𑀥𑀸𑀬 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲𑀸𑀢𑀺 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀧𑀝𑀺𑀜𑁆𑀜𑀸 𑀇𑀢𑀭𑀲𑁆𑀲. 𑀲𑁄𑀢𑀯𑀺𑀜𑁆𑀜𑀸𑀡𑀁 𑀭𑀽𑀧𑀸𑀭𑀫𑁆𑀫𑀡𑀁𑀬𑁂𑀯𑀸𑀢𑀺 𑀬𑀤𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲 𑀅𑀦𑀦𑁆𑀢𑀭𑀸 𑀉𑀧𑁆𑀧𑀚𑁆𑀚𑁂𑀬𑁆𑀬, 𑀯𑀺𑀧𑀸𑀓𑀫𑀦𑁄𑀥𑀸𑀢𑀼 𑀯𑀺𑀬 𑀭𑀽𑀧𑀸𑀭𑀫𑁆𑀫𑀡𑀁 𑀲𑀺𑀬𑀸𑀢𑀺 𑀘𑁄𑀤𑁂𑀢𑀼𑀁 𑀯𑀼𑀢𑁆𑀢𑀁. 𑀘𑀓𑁆𑀔𑀼𑀜𑁆𑀘 𑀧𑀝𑀺𑀘𑁆𑀘 𑀭𑀽𑀧𑁂 𑀘 𑀉𑀧𑁆𑀧𑀚𑁆𑀚𑀢𑀺 𑀲𑁄𑀢𑀯𑀺𑀜𑁆𑀜𑀸𑀡𑀦𑁆𑀢𑀺 𑀧𑀜𑁆𑀳𑁂𑀲𑀼 𑀲𑀼𑀢𑁆𑀢𑀸𑀪𑀸𑀯𑁂𑀦 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀅𑀦𑀦𑁆𑀢𑀭𑀼𑀧𑁆𑀧𑀢𑁆𑀢𑀺𑀁 𑀲𑀮𑁆𑀮𑀓𑁆𑀔𑁂𑀦𑁆𑀢𑁄 𑀮𑀤𑁆𑀥𑀺𑀯𑀲𑁂𑀦 𑀧𑀝𑀺𑀚𑀸𑀦𑀸𑀢𑀺. 𑀢𑀜𑁆𑀜𑁂𑀯 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀢𑀁 𑀲𑁄𑀢𑀯𑀺𑀜𑁆𑀜𑀸𑀡𑀦𑁆𑀢𑀺 𑀬𑀣𑀸 𑀧𑀞𑀫𑀚𑀯𑀦𑀸𑀦𑀦𑁆𑀢𑀭𑀁 𑀤𑀼𑀢𑀺𑀬𑀚𑀯𑀦𑀁 𑀫𑀦𑁄𑀯𑀺𑀜𑁆𑀜𑀸𑀡𑀪𑀸𑀯𑁂𑀦 𑀢𑀜𑁆𑀜𑁂𑀯 𑀳𑁄𑀢𑀺, 𑀓𑀺𑀁 𑀢𑁂 𑀢𑀣𑀸 𑀏𑀢𑀫𑁆𑀧𑀺 𑀤𑁆𑀯𑀬𑀁 𑀏𑀓𑀫𑁂𑀯𑀸𑀢𑀺 𑀧𑀼𑀘𑁆𑀙𑀢𑀺. 𑀇𑀫𑀺𑀦𑀸 𑀦𑀬𑁂𑀦 𑀲𑀩𑁆𑀩𑀯𑀸𑀭𑁂𑀲𑀼 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀦𑀘𑁆𑀘𑀢𑀺 𑀕𑀸𑀬𑀢𑀻𑀢𑀺𑀆𑀤𑀺𑀯𑀘𑀦𑀁 𑀆𑀭𑀫𑁆𑀫𑀡𑀲𑀫𑁄𑀥𑀸𑀦𑁂 𑀮𑀳𑀼𑀧𑀭𑀺𑀯𑀢𑁆𑀢𑀺𑀢𑀸𑀬 𑀯𑁄𑀓𑀺𑀡𑁆𑀡𑀪𑀸𑀯𑀁 𑀤𑀻𑀧𑁂𑀢𑀺, 𑀦 𑀅𑀦𑀦𑁆𑀢𑀭𑀧𑀘𑁆𑀘𑀬𑀢𑀁, 𑀢𑀲𑁆𑀫𑀸 𑀅𑀲𑀸𑀥𑀓𑀦𑁆𑀢𑀺.

𑀅𑀦𑀦𑁆𑀢𑀭𑀧𑀘𑁆𑀘𑀬𑀓𑀣𑀸𑀯𑀡𑁆𑀡𑀦𑀸.

𑁪. 𑀅𑀭𑀺𑀬𑀭𑀽𑀧𑀓𑀣𑀸𑀯𑀡𑁆𑀡𑀦𑀸

𑁬𑁯𑁮-𑁬𑁯𑁯. 𑀇𑀤𑀸𑀦𑀺 𑀅𑀭𑀺𑀬𑀭𑀽𑀧𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀣 𑀲𑀫𑁆𑀫𑀸𑀯𑀸𑀘𑀸𑀓𑀫𑁆𑀫𑀦𑁆𑀢𑀸 𑀭𑀽𑀧𑀁, 𑀢𑀜𑁆𑀘 𑀔𑁄 ‘‘𑀲𑀩𑁆𑀩𑀁 𑀭𑀽𑀧𑀁 𑀘𑀢𑁆𑀢𑀸𑀭𑀺 𑀘 𑀫𑀳𑀸𑀪𑀽𑀢𑀸𑀦𑀺 𑀘𑀢𑀼𑀦𑁆𑀦𑀜𑁆𑀘 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬𑀭𑀽𑀧’’𑀦𑁆𑀢𑀺 (𑀫. 𑀦𑀺. 𑁩.𑁬𑁭) 𑀯𑀘𑀦𑀢𑁄 𑀉𑀧𑀸𑀤𑀸𑀬𑀭𑀽𑀧𑀦𑁆𑀢𑀺 𑀬𑁂𑀲𑀁 𑀮𑀤𑁆𑀥𑀺, 𑀲𑁂𑀬𑁆𑀬𑀣𑀸𑀧𑀺 𑀉𑀢𑁆𑀢𑀭𑀸𑀧𑀣𑀓𑀸𑀦𑀁; 𑀢𑁂 𑀲𑀦𑁆𑀥𑀸𑀬 𑀅𑀭𑀺𑀬𑀭𑀽𑀧𑀁 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬𑀸𑀢𑀺 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲. 𑀢𑀢𑁆𑀣 𑀅𑀭𑀺𑀬𑀸𑀦𑀁 𑀭𑀽𑀧𑀁, 𑀅𑀭𑀺𑀬𑀁 𑀯𑀸 𑀭𑀽𑀧𑀦𑁆𑀢𑀺 𑀅𑀭𑀺𑀬𑀭𑀽𑀧𑀁. 𑀆𑀫𑀦𑁆𑀢𑀸𑀢𑀺 𑀮𑀤𑁆𑀥𑀺𑀬𑀁 𑀞𑀢𑁆𑀯𑀸 𑀧𑀝𑀺𑀜𑁆𑀜𑀸 𑀇𑀢𑀭𑀲𑁆𑀲. 𑀓𑀼𑀲𑀮𑀦𑁆𑀢𑀺 𑀧𑀼𑀝𑁆𑀞𑁄 𑀮𑀤𑁆𑀥𑀺𑀯𑀲𑁂𑀦𑁂𑀯 𑀧𑀝𑀺𑀚𑀸𑀦𑀸𑀢𑀺. 𑀅𑀦𑀸𑀲𑀯𑀧𑀼𑀘𑁆𑀙𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀬𑀁 𑀓𑀺𑀜𑁆𑀘𑀺 𑀭𑀽𑀧𑀦𑁆𑀢𑀺 𑀲𑀼𑀢𑁆𑀢𑀁 𑀞𑀧𑁂𑀢𑁆𑀯𑀸 𑀪𑀽𑀢𑀸𑀦𑀺 𑀲𑁂𑀲𑀭𑀽𑀧𑀲𑁆𑀲 𑀉𑀧𑀸𑀤𑀸𑀪𑀸𑀯𑀁 𑀤𑀻𑀧𑁂𑀢𑀺, 𑀦 𑀲𑀫𑁆𑀫𑀸𑀯𑀸𑀘𑀸𑀓𑀫𑁆𑀫𑀦𑁆𑀢𑀸𑀦𑀁. 𑀢𑁂𑀲𑀜𑁆𑀳𑀺 𑀭𑀽𑀧𑀫𑀢𑁆𑀢𑀜𑁆𑀜𑁂𑀯 𑀅𑀲𑀺𑀤𑁆𑀥𑀁, 𑀓𑀼𑀢𑁄 𑀉𑀧𑀸𑀤𑀸𑀭𑀽𑀧𑀢𑀸; 𑀢𑀲𑁆𑀫𑀸 𑀅𑀲𑀸𑀥𑀓𑀦𑁆𑀢𑀺.

𑀅𑀭𑀺𑀬𑀭𑀽𑀧𑀓𑀣𑀸𑀯𑀡𑁆𑀡𑀦𑀸.

𑁫. 𑀅𑀜𑁆𑀜𑁄 𑀅𑀦𑀼𑀲𑀬𑁄𑀢𑀺𑀓𑀣𑀸𑀯𑀡𑁆𑀡𑀦𑀸

𑁭𑁦𑁦-𑁭𑁦𑁧. 𑀇𑀤𑀸𑀦𑀺 𑀅𑀜𑁆𑀜𑁄 𑀅𑀦𑀼𑀲𑀬𑁄𑀢𑀺𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀣 𑀬𑀲𑁆𑀫𑀸 𑀧𑀼𑀣𑀼𑀚𑁆𑀚𑀦𑁄 𑀓𑀼𑀲𑀮𑀸𑀩𑁆𑀬𑀸𑀓𑀢𑁂 𑀘𑀺𑀢𑁆𑀢𑁂 𑀯𑀢𑁆𑀢𑀫𑀸𑀦𑁂 𑀲𑀸𑀦𑀼𑀲𑀬𑁄𑀢𑀺 𑀯𑀢𑁆𑀢𑀩𑁆𑀩𑁄, 𑀦 𑀧𑀭𑀺𑀬𑀼𑀝𑁆𑀞𑀺𑀢𑁄𑀢𑀺 𑀢𑀲𑁆𑀫𑀸 𑀅𑀜𑁆𑀜𑁄 𑀅𑀦𑀼𑀲𑀬𑁄, 𑀅𑀜𑁆𑀜𑀁 𑀧𑀭𑀺𑀬𑀼𑀝𑁆𑀞𑀸𑀦𑀦𑁆𑀢𑀺 𑀬𑁂𑀲𑀁 𑀮𑀤𑁆𑀥𑀺, 𑀲𑁂𑀬𑁆𑀬𑀣𑀸𑀧𑀺 𑀅𑀦𑁆𑀥𑀓𑀸𑀦𑀁; 𑀢𑁂 𑀲𑀦𑁆𑀥𑀸𑀬 𑀅𑀜𑁆𑀜𑁄 𑀓𑀸𑀫𑀭𑀸𑀕𑀸𑀦𑀼𑀲𑀬𑁄𑀢𑀺 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲 𑀧𑀝𑀺𑀜𑁆𑀜𑀸 𑀇𑀢𑀭𑀲𑁆𑀲. 𑀲𑁂𑀲𑀁 𑀳𑁂𑀝𑁆𑀞𑀸 𑀅𑀦𑀼𑀲𑀬𑀓𑀣𑀸𑀬𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀲𑀸𑀦𑀼𑀲𑀬𑁄𑀢𑀺𑀆𑀤𑀺 𑀧𑀦 𑀢𑀲𑁆𑀫𑀺𑀁 𑀲𑀫𑀬𑁂 𑀅𑀦𑀼𑀲𑀬𑀲𑁆𑀲 𑀅𑀧𑁆𑀧𑀳𑀻𑀦𑀢𑁆𑀢𑀸 𑀲𑀸𑀦𑀼𑀲𑀬𑁄𑀢𑀺 𑀯𑀢𑁆𑀢𑀩𑁆𑀩𑀢𑀁, 𑀅𑀦𑀼𑀧𑁆𑀧𑀦𑁆𑀦𑀢𑁆𑀢𑀸 𑀘 𑀧𑀭𑀺𑀬𑀼𑀝𑁆𑀞𑀺𑀢𑁄𑀢𑀺 𑀅𑀯𑀢𑁆𑀢𑀩𑁆𑀩𑀢𑀁 𑀤𑀻𑀧𑁂𑀢𑀺, 𑀦 𑀅𑀦𑀼𑀲𑀬𑀧𑀭𑀺𑀬𑀼𑀝𑁆𑀞𑀸𑀦𑀸𑀦𑀁 𑀅𑀜𑁆𑀜𑀢𑁆𑀢𑀁, 𑀢𑀲𑁆𑀫𑀸 𑀅𑀲𑀸𑀥𑀓𑀦𑁆𑀢𑀺.

𑀅𑀜𑁆𑀜𑁄 𑀅𑀦𑀼𑀲𑀬𑁄𑀢𑀺𑀓𑀣𑀸𑀯𑀡𑁆𑀡𑀦𑀸.

𑁬. 𑀧𑀭𑀺𑀬𑀼𑀝𑁆𑀞𑀸𑀦𑀁 𑀘𑀺𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑀦𑁆𑀢𑀺𑀓𑀣𑀸𑀯𑀡𑁆𑀡𑀦𑀸

𑁭𑁦𑁨. 𑀇𑀤𑀸𑀦𑀺 𑀧𑀭𑀺𑀬𑀼𑀝𑁆𑀞𑀸𑀦𑀁 𑀘𑀺𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑀦𑁆𑀢𑀺𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀣 𑀬𑀲𑁆𑀫𑀸 𑀅𑀦𑀺𑀘𑁆𑀘𑀸𑀤𑀺𑀢𑁄 𑀫𑀦𑀲𑀺𑀓𑀭𑁄𑀢𑁄𑀧𑀺 𑀭𑀸𑀕𑀸𑀤𑀬𑁄 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋 ‘‘𑀅𑀧𑁆𑀧𑁂𑀓𑀤𑀸, 𑀪𑁄 𑀪𑀸𑀭𑀤𑁆𑀯𑀸𑀚, 𑀅𑀲𑀼𑀪𑀢𑁄 𑀫𑀦𑀲𑀺𑀓𑀭𑀺𑀲𑁆𑀲𑀸𑀫𑀻𑀢𑀺 𑀲𑀼𑀪𑀢𑁄𑀯 𑀫𑀦𑀲𑀺𑀓𑀭𑁄𑀢𑀻’’𑀢𑀺 (𑀲𑀁. 𑀦𑀺. 𑁪.𑁧𑁨𑁭). 𑀢𑀲𑁆𑀫𑀸 𑀧𑀭𑀺𑀬𑀼𑀝𑁆𑀞𑀸𑀦𑀁 𑀘𑀺𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑀦𑁆𑀢𑀺 𑀬𑁂𑀲𑀁 𑀮𑀤𑁆𑀥𑀺, 𑀲𑁂𑀬𑁆𑀬𑀣𑀸𑀧𑀺 𑀅𑀦𑁆𑀥𑀓𑀸𑀦𑀁𑀬𑁂𑀯; 𑀢𑁂 𑀲𑀦𑁆𑀥𑀸𑀬 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀧𑀝𑀺𑀜𑁆𑀜𑀸 𑀇𑀢𑀭𑀲𑁆𑀲. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀧𑀭𑀺𑀬𑀼𑀝𑁆𑀞𑀸𑀦𑀁 𑀘𑀺𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑀦𑁆𑀢𑀺𑀓𑀣𑀸𑀯𑀡𑁆𑀡𑀦𑀸.

𑁭. 𑀧𑀭𑀺𑀬𑀸𑀧𑀦𑁆𑀦𑀓𑀣𑀸𑀯𑀡𑁆𑀡𑀦𑀸

𑁭𑁦𑁩-𑁭𑁦𑁫. 𑀇𑀤𑀸𑀦𑀺 𑀧𑀭𑀺𑀬𑀸𑀧𑀦𑁆𑀦𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀣 𑀬𑀲𑁆𑀫𑀸 𑀓𑀸𑀫𑀭𑀸𑀕𑁄 𑀓𑀸𑀫𑀥𑀸𑀢𑀼𑀁 𑀅𑀦𑀼𑀲𑁂𑀢𑀺, 𑀓𑀸𑀫𑀥𑀸𑀢𑀼𑀧𑀭𑀺𑀬𑀸𑀧𑀦𑁆𑀦𑁄𑀢𑀺 𑀘 𑀯𑀼𑀘𑁆𑀘𑀢𑀺, 𑀢𑀲𑁆𑀫𑀸 𑀭𑀽𑀧𑀭𑀸𑀕𑀸𑀭𑀽𑀧𑀭𑀸𑀕𑀸𑀧𑀺 𑀭𑀽𑀧𑀥𑀸𑀢𑀼𑀅𑀭𑀽𑀧𑀥𑀸𑀢𑀼𑀬𑁄 𑀅𑀦𑀼𑀲𑁂𑀦𑁆𑀢𑀺. 𑀭𑀽𑀧𑀥𑀸𑀢𑀼𑀅𑀭𑀽𑀧𑀥𑀸𑀢𑀼𑀧𑀭𑀺𑀬𑀸𑀧𑀦𑁆𑀦𑀸𑀬𑁂𑀯 𑀘 𑀦𑀸𑀫 𑀳𑁄𑀦𑁆𑀢𑀻𑀢𑀺 𑀬𑁂𑀲𑀁 𑀮𑀤𑁆𑀥𑀺, 𑀲𑁂𑀬𑁆𑀬𑀣𑀸𑀧𑀺 𑀅𑀦𑁆𑀥𑀓𑀸𑀦𑀜𑁆𑀘𑁂𑀯 𑀲𑀫𑁆𑀫𑀺𑀢𑀺𑀬𑀸𑀦𑀜𑁆𑀘; 𑀢𑁂 𑀲𑀦𑁆𑀥𑀸𑀬 𑀭𑀽𑀧𑀭𑀸𑀕𑁄𑀢𑀺 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀧𑀝𑀺𑀜𑁆𑀜𑀸 𑀇𑀢𑀭𑀲𑁆𑀲. 𑀢𑀢𑁆𑀣 𑀅𑀦𑀼𑀲𑁂𑀢𑀻𑀢𑀺 𑀬𑀣𑀸 𑀓𑀸𑀫𑀭𑀸𑀕𑁄 𑀓𑀸𑀫𑀯𑀺𑀢𑀓𑁆𑀓𑀲𑀗𑁆𑀔𑀸𑀢𑀁 𑀓𑀸𑀫𑀥𑀸𑀢𑀼𑀁 𑀲𑀳𑀚𑀸𑀢𑀯𑀲𑁂𑀦 𑀅𑀦𑀼𑀲𑁂𑀢𑀺, 𑀓𑀺𑀁 𑀢𑁂 𑀏𑀯𑀁 𑀭𑀽𑀧𑀭𑀸𑀕𑁄 𑀭𑀽𑀧𑀥𑀸𑀢𑀼𑀦𑁆𑀢𑀺 𑀧𑀼𑀘𑁆𑀙𑀢𑀺. 𑀧𑀭𑀺𑀬𑀸𑀧𑀦𑁆𑀦𑁄𑀢𑀺 𑀬𑀣𑀸 𑀘 𑀲𑁄 𑀢𑀺𑀯𑀺𑀥𑀸𑀬 𑀓𑀸𑀫𑀥𑀸𑀢𑀼𑀬𑀸 𑀓𑀺𑀮𑁂𑀲𑀓𑀸𑀫𑀯𑀲𑁂𑀦 𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸 𑀓𑀸𑀫𑀥𑀸𑀢𑀼𑀧𑀭𑀺𑀬𑀸𑀧𑀦𑁆𑀦𑁄, 𑀓𑀺𑀁 𑀢𑁂 𑀏𑀯𑀁 𑀭𑀽𑀧𑀭𑀸𑀕𑁄𑀧𑀺 𑀭𑀽𑀧𑀥𑀸𑀢𑀼𑀧𑀭𑀺𑀬𑀸𑀧𑀦𑁆𑀦𑁄𑀢𑀺 𑀧𑀼𑀘𑁆𑀙𑀢𑀺. 𑀇𑀢𑀭𑁄 𑀧𑀦𑀲𑁆𑀲 𑀅𑀥𑀺𑀧𑁆𑀧𑀸𑀬𑀁 𑀅𑀲𑀮𑁆𑀮𑀓𑁆𑀔𑁂𑀦𑁆𑀢𑁄 𑀓𑁂𑀯𑀮𑀁 𑀮𑀤𑁆𑀥𑀺𑀯𑀲𑁂𑀦 𑀆𑀫𑀦𑁆𑀢𑀸𑀢𑀺 𑀧𑀝𑀺𑀚𑀸𑀦𑀸𑀢𑀺. 𑀅𑀣 𑀦𑀁 𑀢𑀫𑀢𑁆𑀣𑀁 𑀲𑀮𑁆𑀮𑀓𑁆𑀔𑀸𑀧𑁂𑀢𑀼𑀁 𑀓𑀼𑀲𑀮𑀯𑀺𑀧𑀸𑀓𑀓𑀺𑀭𑀺𑀬𑀲𑀗𑁆𑀔𑀸𑀢𑁂𑀳𑀺 𑀲𑀫𑀸𑀧𑀢𑁆𑀢𑁂𑀲𑀺𑀬𑀸𑀤𑀻𑀳𑀺 𑀲𑀁𑀲𑀦𑁆𑀤𑀺𑀢𑁆𑀯𑀸 𑀧𑀼𑀘𑁆𑀙𑀺𑀢𑀼𑀁 𑀲𑀫𑀸𑀧𑀢𑁆𑀢𑁂𑀲𑀺𑀬𑁄𑀢𑀺𑀆𑀤𑀺𑀫𑀸𑀳. 𑀲𑁂𑀲𑀫𑁂𑀢𑁆𑀣 𑀬𑀣𑀸𑀧𑀸𑀴𑀺𑀫𑁂𑀯 𑀦𑀺𑀬𑁆𑀬𑀸𑀢𑀺. 𑀦𑀦𑀼 𑀓𑀸𑀫𑀭𑀸𑀕𑁄𑀢𑀺𑀆𑀤𑀺𑀯𑀘𑀦𑀫𑁆𑀧𑀺 𑀓𑀸𑀫𑀭𑀸𑀕𑀲𑁆𑀲𑁂𑀯 𑀓𑀸𑀫𑀥𑀸𑀢𑀼𑀬𑀁 𑀅𑀦𑀼𑀲𑀬𑀪𑀸𑀯𑀁 𑀧𑀭𑀺𑀬𑀸𑀧𑀦𑁆𑀦𑀢𑀜𑁆𑀘 𑀤𑀻𑀧𑁂𑀢𑀺, 𑀦 𑀇𑀢𑀭𑁂𑀲𑀁 𑀇𑀢𑀭𑀥𑀸𑀢𑀽𑀲𑀽𑀢𑀺.

𑀧𑀭𑀺𑀬𑀸𑀧𑀦𑁆𑀦𑀓𑀣𑀸𑀯𑀡𑁆𑀡𑀦𑀸.

𑁮. 𑀅𑀩𑁆𑀬𑀸𑀓𑀢𑀓𑀣𑀸𑀯𑀡𑁆𑀡𑀦𑀸

𑁭𑁦𑁬-𑁭𑁦𑁮. 𑀇𑀤𑀸𑀦𑀺 𑀅𑀩𑁆𑀬𑀸𑀓𑀢𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀣 𑀯𑀺𑀧𑀸𑀓𑀓𑀺𑀭𑀺𑀬𑀭𑀽𑀧𑀦𑀺𑀩𑁆𑀩𑀸𑀦𑀲𑀗𑁆𑀔𑀸𑀢𑀁 𑀘𑀢𑀼𑀩𑁆𑀩𑀺𑀥𑀁 𑀅𑀩𑁆𑀬𑀸𑀓𑀢𑀁 𑀅𑀯𑀺𑀧𑀸𑀓𑀢𑁆𑀢𑀸 𑀅𑀩𑁆𑀬𑀸𑀓𑀢𑀦𑁆𑀢𑀺 𑀯𑀼𑀢𑁆𑀢𑀁. 𑀤𑀺𑀝𑁆𑀞𑀺𑀕𑀢𑀁 ‘‘𑀲𑀲𑁆𑀲𑀢𑁄 𑀮𑁄𑀓𑁄𑀢𑀺 𑀔𑁄, 𑀯𑀘𑁆𑀙, 𑀅𑀩𑁆𑀬𑀸𑀓𑀢𑀫𑁂𑀢’’𑀦𑁆𑀢𑀺 (𑀲𑀁. 𑀦𑀺. 𑁪.𑁪𑁧𑁬 𑀣𑁄𑀓𑀁 𑀯𑀺𑀲𑀤𑀺𑀲𑀁) 𑀲𑀲𑁆𑀲𑀢𑀸𑀤𑀺𑀪𑀸𑀯𑁂𑀦 𑀅𑀓𑀣𑀺𑀢𑀢𑁆𑀢𑀸. 𑀬𑁂𑀲𑀁 𑀧𑀦 𑀇𑀫𑀁 𑀯𑀺𑀪𑀸𑀕𑀁 𑀅𑀕𑁆𑀕𑀳𑁂𑀢𑁆𑀯𑀸 𑀧𑀼𑀭𑀺𑀫𑀸𑀩𑁆𑀬𑀸𑀓𑀢𑀁 𑀯𑀺𑀬 𑀤𑀺𑀝𑁆𑀞𑀺𑀕𑀢𑀫𑁆𑀧𑀺 𑀅𑀩𑁆𑀬𑀸𑀓𑀢𑀦𑁆𑀢𑀺 𑀮𑀤𑁆𑀥𑀺, 𑀲𑁂𑀬𑁆𑀬𑀣𑀸𑀧𑀺 𑀅𑀦𑁆𑀥𑀓𑀸𑀦𑀜𑁆𑀘𑁂𑀯 𑀉𑀢𑁆𑀢𑀭𑀸𑀧𑀣𑀓𑀸𑀦𑀜𑁆𑀘; 𑀢𑁂𑀲𑀁 𑀢𑀁 𑀯𑀺𑀪𑀸𑀕𑀁 𑀤𑀲𑁆𑀲𑁂𑀢𑀼𑀁 𑀤𑀺𑀝𑁆𑀞𑀺𑀕𑀢𑀁 𑀅𑀩𑁆𑀬𑀸𑀓𑀢𑀦𑁆𑀢𑀺 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀧𑀝𑀺𑀜𑁆𑀜𑀸 𑀇𑀢𑀭𑀲𑁆𑀲. 𑀲𑁂𑀲𑀫𑁂𑀢𑁆𑀣 𑀬𑀣𑀸𑀧𑀸𑀴𑀺𑀫𑁂𑀯 𑀦𑀺𑀬𑁆𑀬𑀸𑀢𑀻𑀢𑀺.

𑀅𑀩𑁆𑀬𑀸𑀓𑀢𑀓𑀣𑀸𑀯𑀡𑁆𑀡𑀦𑀸.

𑁯. 𑀅𑀧𑀭𑀺𑀬𑀸𑀧𑀦𑁆𑀦𑀓𑀣𑀸𑀯𑀡𑁆𑀡𑀦𑀸

𑁭𑁦𑁯-𑁭𑁧𑁦. 𑀇𑀤𑀸𑀦𑀺 𑀅𑀧𑀭𑀺𑀬𑀸𑀧𑀦𑁆𑀦𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀣 𑀬𑀲𑁆𑀫𑀸 𑀧𑀼𑀣𑀼𑀚𑁆𑀚𑀦𑁄 𑀛𑀸𑀦𑀮𑀸𑀪𑀻 𑀓𑀸𑀫𑁂𑀲𑀼 𑀯𑀻𑀢𑀭𑀸𑀕𑁄𑀢𑀺 𑀯𑀢𑁆𑀢𑀩𑁆𑀩𑁄 𑀳𑁄𑀢𑀺, 𑀦 𑀧𑀦 𑀯𑀺𑀕𑀢𑀤𑀺𑀝𑁆𑀞𑀺𑀓𑁄𑀢𑀺, 𑀢𑀲𑁆𑀫𑀸 𑀤𑀺𑀝𑁆𑀞𑀺𑀕𑀢𑀁 𑀅𑀧𑀭𑀺𑀬𑀸𑀧𑀦𑁆𑀦𑀦𑁆𑀢𑀺 𑀬𑁂𑀲𑀁 𑀮𑀤𑁆𑀥𑀺, 𑀲𑁂𑀬𑁆𑀬𑀣𑀸𑀧𑀺 𑀧𑀼𑀩𑁆𑀩𑀲𑁂𑀮𑀺𑀬𑀸𑀦𑀁; 𑀢𑁂 𑀲𑀦𑁆𑀥𑀸𑀬 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀧𑀝𑀺𑀜𑁆𑀜𑀸 𑀇𑀢𑀭𑀲𑁆𑀲. 𑀲𑁂𑀲𑀫𑁂𑀢𑁆𑀣 𑀬𑀣𑀸𑀧𑀸𑀴𑀺𑀫𑁂𑀯 𑀦𑀺𑀬𑁆𑀬𑀸𑀢𑀻𑀢𑀺.

𑀅𑀧𑀭𑀺𑀬𑀸𑀧𑀦𑁆𑀦𑀓𑀣𑀸𑀯𑀡𑁆𑀡𑀦𑀸.

𑀘𑀼𑀤𑁆𑀤𑀲𑀫𑁄 𑀯𑀕𑁆𑀕𑁄.