𑁧𑁫. 𑀧𑀦𑁆𑀦𑀭𑀲𑀫𑀯𑀕𑁆𑀕𑁄

𑁧. 𑀧𑀘𑁆𑀘𑀬𑀢𑀸𑀓𑀣𑀸𑀯𑀡𑁆𑀡𑀦𑀸

𑁭𑁧𑁧-𑁭𑁧𑁭. 𑀇𑀤𑀸𑀦𑀺 𑀧𑀘𑁆𑀘𑀬𑀢𑀸𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀣 𑀬𑁄 𑀥𑀫𑁆𑀫𑁄 𑀳𑁂𑀢𑀼𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄, 𑀲𑁄 𑀬𑁂𑀲𑀁 𑀳𑁂𑀢𑀼𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄, 𑀢𑁂𑀲𑀜𑁆𑀜𑁂𑀯 𑀬𑀲𑁆𑀫𑀸 𑀆𑀭𑀫𑁆𑀫𑀡𑀸𑀦𑀦𑁆𑀢𑀭𑀲𑀫𑀦𑀦𑁆𑀢𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄 𑀦 𑀳𑁄𑀢𑀺, 𑀬𑁄 𑀯𑀸 𑀆𑀭𑀫𑁆𑀫𑀡𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄, 𑀲𑁄 𑀬𑀲𑁆𑀫𑀸 𑀢𑁂𑀲𑀁𑀬𑁂𑀯 𑀅𑀦𑀦𑁆𑀢𑀭𑀲𑀫𑀦𑀦𑁆𑀢𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄 𑀦 𑀳𑁄𑀢𑀺, 𑀢𑀲𑁆𑀫𑀸 𑀧𑀘𑁆𑀘𑀬𑀢𑀸 𑀯𑀯𑀢𑁆𑀣𑀺𑀢𑀸𑀢𑀺 𑀬𑁂𑀲𑀁 𑀮𑀤𑁆𑀥𑀺, 𑀲𑁂𑀬𑁆𑀬𑀣𑀸𑀧𑀺 𑀫𑀳𑀸𑀲𑀗𑁆𑀖𑀺𑀓𑀸𑀦𑀁; 𑀢𑁂 𑀲𑀦𑁆𑀥𑀸𑀬 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀧𑀝𑀺𑀜𑁆𑀜𑀸 𑀇𑀢𑀭𑀲𑁆𑀲. 𑀲𑁂𑀲𑀫𑁂𑀢𑁆𑀣 𑀬𑀣𑀸𑀧𑀸𑀴𑀺𑀫𑁂𑀯 𑀦𑀺𑀬𑁆𑀬𑀸𑀢𑀻𑀢𑀺.

𑀧𑀘𑁆𑀘𑀬𑀢𑀸𑀓𑀣𑀸𑀯𑀡𑁆𑀡𑀦𑀸.

𑁨. 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀓𑀣𑀸𑀯𑀡𑁆𑀡𑀦𑀸

𑁭𑁧𑁮-𑁭𑁧𑁯. 𑀇𑀤𑀸𑀦𑀺 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀣 𑀬𑁂𑀲𑀁 𑀲𑀫𑀬𑁂 ‘‘𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸’’𑀢𑀺 𑀅𑀬𑀫𑁂𑀯 𑀢𑀦𑁆𑀢𑀺, ‘‘𑀲𑀗𑁆𑀔𑀸𑀭𑀧𑀘𑁆𑀘𑀬𑀸𑀧𑀺 𑀅𑀯𑀺𑀚𑁆𑀚𑀸’’𑀢𑀺 𑀅𑀬𑀁 𑀦𑀢𑁆𑀣𑀺, 𑀢𑀲𑁆𑀫𑀸 𑀅𑀯𑀺𑀚𑁆𑀚𑀸𑀯 𑀲𑀗𑁆𑀔𑀸𑀭𑀸𑀦𑀁 𑀧𑀘𑁆𑀘𑀬𑁄, 𑀦 𑀧𑀦 𑀲𑀗𑁆𑀔𑀸𑀭𑀸 𑀅𑀯𑀺𑀚𑁆𑀚𑀸𑀬𑀸𑀢𑀺 𑀮𑀤𑁆𑀥𑀺, 𑀲𑁂𑀬𑁆𑀬𑀣𑀸𑀧𑀺 𑀫𑀳𑀸𑀲𑀗𑁆𑀖𑀺𑀓𑀸𑀦𑀁; 𑀢𑁂 𑀲𑀦𑁆𑀥𑀸𑀬 𑀅𑀯𑀺𑀚𑁆𑀚𑀸𑀲𑀗𑁆𑀔𑀸𑀭𑀸𑀤𑀻𑀦𑀁 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀢𑀸𑀧𑀺 𑀅𑀢𑁆𑀣𑀻𑀢𑀺 𑀤𑀲𑁆𑀲𑁂𑀢𑀼𑀁 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀧𑀝𑀺𑀜𑁆𑀜𑀸 𑀇𑀢𑀭𑀲𑁆𑀲. 𑀅𑀯𑀺𑀚𑁆𑀚𑀸 𑀲𑀗𑁆𑀔𑀸𑀭𑁂𑀦𑀸𑀢𑀺 𑀏𑀢𑁆𑀣 𑀅𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁄𑀯 𑀕𑀳𑀺𑀢𑁄. 𑀢𑀲𑁆𑀫𑀸 𑀲𑀗𑁆𑀔𑀸𑀭𑀧𑀘𑁆𑀘𑀬𑀸𑀧𑀺 𑀅𑀯𑀺𑀚𑁆𑀚𑀸𑀢𑀺 𑀏𑀢𑁆𑀣 𑀲𑀳𑀚𑀸𑀢𑀅𑀜𑁆𑀜𑀫𑀜𑁆𑀜𑀅𑀢𑁆𑀣𑀺𑀅𑀯𑀺𑀕𑀢𑀲𑀫𑁆𑀧𑀬𑀼𑀢𑁆𑀢𑀯𑀲𑁂𑀦 𑀧𑀘𑁆𑀘𑀬𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀉𑀧𑀸𑀤𑀸𑀦𑀧𑀘𑁆𑀘𑀬𑀸𑀧𑀺 𑀢𑀡𑁆𑀳𑀸𑀢𑀺 𑀏𑀢𑁆𑀣 𑀞𑀧𑁂𑀢𑁆𑀯𑀸 𑀓𑀸𑀫𑀼𑀧𑀸𑀤𑀸𑀦𑀁 𑀲𑁂𑀲𑀸𑀦𑀺 𑀢𑀻𑀡𑀺 𑀉𑀧𑀸𑀤𑀸𑀦𑀸𑀦𑀺 𑀅𑀯𑀺𑀚𑁆𑀚𑀸𑀬 𑀲𑀗𑁆𑀔𑀸𑀭𑀸 𑀯𑀺𑀬 𑀢𑀡𑁆𑀳𑀸𑀬 𑀧𑀘𑁆𑀘𑀬𑀸 𑀳𑁄𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀲𑁂𑀲𑀁 𑀬𑀣𑀸𑀧𑀸𑀴𑀺𑀫𑁂𑀯 𑀦𑀺𑀬𑁆𑀬𑀸𑀢𑀺. 𑀚𑀭𑀸𑀫𑀭𑀡𑀧𑀘𑁆𑀘𑀬𑀸𑀢𑀺 𑀧𑀼𑀘𑁆𑀙𑀸 𑀧𑀭𑀯𑀸𑀤𑀺𑀲𑁆𑀲, 𑀦𑀸𑀫𑀭𑀽𑀧𑀁 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸𑀢𑀺 𑀲𑀓𑀯𑀸𑀤𑀺𑀲𑁆𑀲𑀸𑀢𑀺.

𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀓𑀣𑀸𑀯𑀡𑁆𑀡𑀦𑀸.

𑁩. 𑀅𑀤𑁆𑀥𑀸𑀓𑀣𑀸𑀯𑀡𑁆𑀡𑀦𑀸

𑁭𑁨𑁦-𑁭𑁨𑁧. 𑀇𑀤𑀸𑀦𑀺 𑀅𑀤𑁆𑀥𑀸𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀣 ‘‘𑀢𑀻𑀡𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀓𑀣𑀸𑀯𑀢𑁆𑀣𑀽𑀦𑀻’’𑀢𑀺 (𑀅. 𑀦𑀺. 𑁩.𑁬𑁮) 𑀲𑀼𑀢𑁆𑀢𑀁 𑀦𑀺𑀲𑁆𑀲𑀸𑀬 𑀓𑀸𑀮𑀲𑀗𑁆𑀔𑀸𑀢𑁄 𑀅𑀤𑁆𑀥𑀸 𑀦𑀸𑀫 𑀧𑀭𑀺𑀦𑀺𑀧𑁆𑀨𑀦𑁆𑀦𑁄 𑀅𑀢𑁆𑀣𑀻𑀢𑀺 𑀬𑁂𑀲𑀁 𑀮𑀤𑁆𑀥𑀺; 𑀢𑁂𑀲𑀁 ‘‘𑀅𑀤𑁆𑀥𑀸 𑀦𑀸𑀫 𑀓𑁄𑀘𑀺 𑀧𑀭𑀺𑀦𑀺𑀧𑁆𑀨𑀦𑁆𑀦𑁄 𑀦𑀢𑁆𑀣𑀺 𑀅𑀜𑁆𑀜𑀢𑁆𑀭 𑀓𑀸𑀮𑀧𑀜𑁆𑀜𑀢𑁆𑀢𑀺𑀫𑀢𑁆𑀢𑀸. 𑀭𑀽𑀧𑀸𑀤𑀬𑁄 𑀧𑀦 𑀔𑀦𑁆𑀥𑀸𑀯 𑀧𑀭𑀺𑀦𑀺𑀧𑁆𑀨𑀦𑁆𑀦𑀸’’𑀢𑀺 𑀯𑀺𑀪𑀸𑀕𑀁 𑀤𑀲𑁆𑀲𑁂𑀢𑀼𑀁 𑀅𑀤𑁆𑀥𑀸 𑀧𑀭𑀺𑀦𑀺𑀧𑁆𑀨𑀦𑁆𑀦𑁄𑀢𑀺 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀧𑀝𑀺𑀜𑁆𑀜𑀸 𑀇𑀢𑀭𑀲𑁆𑀲. 𑀅𑀣 𑀦𑀁 ‘‘𑀲𑀘𑁂 𑀲𑁄 𑀧𑀭𑀺𑀦𑀺𑀧𑁆𑀨𑀦𑁆𑀦𑁄, 𑀭𑀽𑀧𑀸𑀤𑀻𑀲𑀼 𑀅𑀦𑁂𑀦 𑀅𑀜𑁆𑀜𑀢𑀭𑁂𑀦 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀘𑁄𑀤𑁂𑀢𑀼𑀁 𑀭𑀽𑀧𑀦𑁆𑀢𑀺𑀆𑀤𑀺𑀫𑀸𑀳. 𑀇𑀢𑀭𑁄 𑀧𑀝𑀺𑀓𑁆𑀔𑀺𑀧𑀢𑀺. 𑀲𑁂𑀲𑀁 𑀬𑀣𑀸𑀧𑀸𑀴𑀺𑀫𑁂𑀯 𑀦𑀺𑀬𑁆𑀬𑀸𑀢𑀻𑀢𑀺.

𑀅𑀤𑁆𑀥𑀸𑀓𑀣𑀸𑀯𑀡𑁆𑀡𑀦𑀸.

𑁪. 𑀔𑀡𑀮𑀬𑀫𑀼𑀳𑀼𑀢𑁆𑀢𑀓𑀣𑀸𑀯𑀡𑁆𑀡𑀦𑀸

𑁭𑁨𑁨-𑁭𑁨𑁩. 𑀔𑀡𑀮𑀬𑀫𑀼𑀳𑀼𑀢𑁆𑀢𑀓𑀣𑀸𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀲𑀩𑁆𑀩𑁂𑀧𑀺 𑀳𑁂𑀢𑁂 𑀔𑀡𑀸𑀤𑀬𑁄 𑀅𑀤𑁆𑀥𑀸𑀧𑀭𑀺𑀬𑀸𑀬𑀸 𑀏𑀯𑀸𑀢𑀺.

𑀔𑀡𑀮𑀬𑀫𑀼𑀳𑀼𑀢𑁆𑀢𑀓𑀣𑀸𑀯𑀡𑁆𑀡𑀦𑀸.

𑁫. 𑀆𑀲𑀯𑀓𑀣𑀸𑀯𑀡𑁆𑀡𑀦𑀸

𑁭𑁨𑁪-𑁭𑁨𑁫. 𑀇𑀤𑀸𑀦𑀺 𑀆𑀲𑀯𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀣 𑀬𑀲𑁆𑀫𑀸 𑀘𑀢𑀽𑀳𑀺 𑀆𑀲𑀯𑁂𑀳𑀺 𑀉𑀢𑁆𑀢𑀭𑀺 𑀅𑀜𑁆𑀜𑁄 𑀆𑀲𑀯𑁄 𑀦𑀸𑀫 𑀦𑀢𑁆𑀣𑀺, 𑀬𑁂𑀦 𑀘𑀢𑁆𑀢𑀸𑀭𑁄 𑀆𑀲𑀯𑀸 𑀲𑀸𑀲𑀯𑀸 𑀲𑀺𑀬𑀼𑀁, 𑀢𑀲𑁆𑀫𑀸 𑀘𑀢𑁆𑀢𑀸𑀭𑁄 𑀆𑀲𑀯𑀸 𑀅𑀦𑀸𑀲𑀯𑀸𑀢𑀺 𑀬𑁂𑀲𑀁 𑀮𑀤𑁆𑀥𑀺, 𑀲𑁂𑀬𑁆𑀬𑀣𑀸𑀧𑀺 𑀳𑁂𑀢𑀼𑀯𑀸𑀤𑀸𑀦𑀁; 𑀢𑁂 𑀲𑀦𑁆𑀥𑀸𑀬 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀧𑀝𑀺𑀜𑁆𑀜𑀸 𑀇𑀢𑀭𑀲𑁆𑀲. 𑀅𑀣 𑀦𑀁 ‘‘𑀬𑀤𑀺 𑀢𑁂 𑀆𑀲𑀯𑀸 𑀅𑀦𑀸𑀲𑀯𑀸, 𑀏𑀯𑀁 𑀲𑀦𑁆𑀢𑁂 𑀢𑁂𑀳𑀺 𑀫𑀕𑁆𑀕𑀸𑀤𑀺𑀮𑀓𑁆𑀔𑀡𑀧𑁆𑀧𑀢𑁆𑀢𑁂𑀳𑀺 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀘𑁄𑀤𑁂𑀢𑀼𑀁 𑀫𑀕𑁆𑀕𑁄𑀢𑀺𑀆𑀤𑀺𑀫𑀸𑀳. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀆𑀲𑀯𑀓𑀣𑀸𑀯𑀡𑁆𑀡𑀦𑀸.

𑁬. 𑀚𑀭𑀸𑀫𑀭𑀡𑀓𑀣𑀸𑀯𑀡𑁆𑀡𑀦𑀸

𑁭𑁨𑁬-𑁭𑁨𑁭. 𑀇𑀤𑀸𑀦𑀺 𑀚𑀭𑀸𑀫𑀭𑀡𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀣 𑀚𑀭𑀸𑀫𑀭𑀡𑀁 𑀦𑀸𑀫 𑀅𑀧𑀭𑀺𑀦𑀺𑀧𑁆𑀨𑀦𑁆𑀦𑀢𑁆𑀢𑀸 𑀮𑁄𑀓𑀺𑀬𑀦𑁆𑀢𑀺 𑀯𑀸 𑀮𑁄𑀓𑀼𑀢𑁆𑀢𑀭𑀦𑁆𑀢𑀺 𑀯𑀸 𑀦 𑀯𑀢𑁆𑀢𑀩𑁆𑀩𑀁. ‘‘𑀮𑁄𑀓𑀺𑀬𑀸 𑀥𑀫𑁆𑀫𑀸 𑀮𑁄𑀓𑀼𑀢𑁆𑀢𑀭𑀸 𑀥𑀫𑁆𑀫𑀸’’𑀢𑀺 𑀳𑀺 𑀤𑀼𑀓𑁂 𑀚𑀭𑀸𑀫𑀭𑀡𑀁 𑀦𑁂𑀯 𑀮𑁄𑀓𑀺𑀬𑀧𑀤𑁂, 𑀦 𑀮𑁄𑀓𑀼𑀢𑁆𑀢𑀭𑀧𑀤𑁂 𑀦𑀺𑀤𑁆𑀤𑀺𑀝𑁆𑀞𑀁. 𑀢𑀢𑁆𑀣 𑀬𑁂𑀲𑀁 𑀇𑀫𑀁 𑀮𑀓𑁆𑀔𑀡𑀁 𑀅𑀦𑀸𑀤𑀺𑀬𑀺𑀢𑁆𑀯𑀸 𑀮𑁄𑀓𑀼𑀢𑁆𑀢𑀭𑀸𑀦𑀁 𑀥𑀫𑁆𑀫𑀸𑀦𑀁 𑀚𑀭𑀸𑀫𑀭𑀡𑀁 𑀮𑁄𑀓𑀼𑀢𑁆𑀢𑀭𑀦𑁆𑀢𑀺 𑀮𑀤𑁆𑀥𑀺, 𑀲𑁂𑀬𑁆𑀬𑀣𑀸𑀧𑀺 𑀫𑀳𑀸𑀲𑀗𑁆𑀖𑀺𑀓𑀸𑀦𑀁, 𑀢𑁂 𑀲𑀦𑁆𑀥𑀸𑀬 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀧𑀝𑀺𑀜𑁆𑀜𑀸 𑀇𑀢𑀭𑀲𑁆𑀲. 𑀲𑁂𑀲𑀫𑁂𑀢𑁆𑀣 𑀬𑀣𑀸𑀧𑀸𑀴𑀺𑀫𑁂𑀯 𑀦𑀺𑀬𑁆𑀬𑀸𑀢𑀻𑀢𑀺.

𑀚𑀭𑀸𑀫𑀭𑀡𑀓𑀣𑀸𑀯𑀡𑁆𑀡𑀦𑀸.

𑁭. 𑀲𑀜𑁆𑀜𑀸𑀯𑁂𑀤𑀬𑀺𑀢𑀓𑀣𑀸𑀯𑀡𑁆𑀡𑀦𑀸

𑁭𑁨𑁮-𑁭𑁨𑁯. 𑀇𑀤𑀸𑀦𑀺 𑀲𑀜𑁆𑀜𑀸𑀯𑁂𑀤𑀬𑀺𑀢𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀣 𑀲𑀜𑁆𑀜𑀸𑀯𑁂𑀤𑀬𑀺𑀢𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺 𑀦𑀸𑀫 𑀦 𑀓𑁄𑀘𑀺 𑀥𑀫𑁆𑀫𑁄, 𑀘𑀢𑀼𑀦𑁆𑀦𑀁 𑀧𑀦 𑀔𑀦𑁆𑀥𑀸𑀦𑀁 𑀦𑀺𑀭𑁄𑀥𑁄. 𑀇𑀢𑀺 𑀲𑀸 𑀦𑁂𑀯 𑀮𑁄𑀓𑀺𑀬𑀸 𑀦 𑀮𑁄𑀓𑀼𑀢𑁆𑀢𑀭𑀸. 𑀬𑀲𑁆𑀫𑀸 𑀧𑀦 𑀮𑁄𑀓𑀺𑀬𑀸 𑀦 𑀳𑁄𑀢𑀺, 𑀢𑀲𑁆𑀫𑀸 𑀮𑁄𑀓𑀼𑀢𑁆𑀢𑀭𑀸𑀢𑀺 𑀬𑁂𑀲𑀁 𑀮𑀤𑁆𑀥𑀺, 𑀲𑁂𑀬𑁆𑀬𑀣𑀸𑀧𑀺 𑀳𑁂𑀢𑀼𑀯𑀸𑀤𑀸𑀦𑀁𑀬𑁂𑀯; 𑀢𑁂 𑀲𑀦𑁆𑀥𑀸𑀬 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀧𑀝𑀺𑀜𑁆𑀜𑀸 𑀇𑀢𑀭𑀲𑁆𑀲. 𑀲𑁂𑀲𑀁 𑀧𑀼𑀭𑀺𑀫𑀓𑀣𑀸𑀲𑀤𑀺𑀲𑀫𑁂𑀯𑀸𑀢𑀺.

𑀲𑀜𑁆𑀜𑀸𑀯𑁂𑀤𑀬𑀺𑀢𑀓𑀣𑀸𑀯𑀡𑁆𑀡𑀦𑀸.

𑁮. 𑀤𑀼𑀢𑀺𑀬𑀲𑀜𑁆𑀜𑀸𑀯𑁂𑀤𑀬𑀺𑀢𑀓𑀣𑀸𑀯𑀡𑁆𑀡𑀦𑀸

𑁭𑁩𑁦-𑁭𑁩𑁧. 𑀇𑀤𑀸𑀦𑀺 𑀬𑀲𑁆𑀫𑀸 𑀲𑀸 𑀮𑁄𑀓𑀼𑀢𑁆𑀢𑀭𑀸 𑀦 𑀳𑁄𑀢𑀺, 𑀢𑀲𑁆𑀫𑀸 𑀮𑁄𑀓𑀺𑀬𑀸𑀢𑀺 𑀬𑁂𑀲𑀁 𑀮𑀤𑁆𑀥𑀺, 𑀲𑁂𑀬𑁆𑀬𑀣𑀸𑀧𑀺 𑀳𑁂𑀢𑀼𑀯𑀸𑀤𑀸𑀦𑀁, 𑀢𑁂 𑀲𑀦𑁆𑀥𑀸𑀬 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀧𑀝𑀺𑀜𑁆𑀜𑀸 𑀇𑀢𑀭𑀲𑁆𑀲. 𑀲𑁂𑀲𑀁 𑀧𑀼𑀭𑀺𑀫𑀲𑀤𑀺𑀲𑀫𑁂𑀯𑀸𑀢𑀺.

𑀤𑀼𑀢𑀺𑀬𑀲𑀜𑁆𑀜𑀸𑀯𑁂𑀤𑀬𑀺𑀢𑀓𑀣𑀸𑀯𑀡𑁆𑀡𑀦𑀸.

𑁯. 𑀢𑀢𑀺𑀬𑀲𑀜𑁆𑀜𑀸𑀯𑁂𑀤𑀬𑀺𑀢𑀓𑀣𑀸𑀯𑀡𑁆𑀡𑀦𑀸

𑁭𑁩𑁨. 𑀇𑀤𑀸𑀦𑀺 𑀬𑀲𑁆𑀫𑀸 ‘‘𑀅𑀲𑀼𑀓𑁄 𑀫𑀭𑀡𑀥𑀫𑁆𑀫𑁄, 𑀅𑀲𑀼𑀓𑁄 𑀦 𑀫𑀭𑀡𑀥𑀫𑁆𑀫𑁄’’𑀢𑀺 𑀲𑀢𑁆𑀢𑀸𑀦𑀁 𑀫𑀭𑀡𑀥𑀫𑁆𑀫𑀢𑀸𑀬 𑀦𑀺𑀬𑀸𑀫𑁄 𑀦𑀢𑁆𑀣𑀻𑀢𑀺 𑀲𑀜𑁆𑀜𑀸𑀯𑁂𑀤𑀬𑀺𑀢𑀦𑀺𑀭𑁄𑀥𑀁 𑀲𑀫𑀸𑀧𑀦𑁆𑀦𑁄𑀧𑀺 𑀓𑀸𑀮𑀁 𑀓𑀭𑁂𑀬𑁆𑀬𑀸𑀢𑀺 𑀬𑁂𑀲𑀁 𑀮𑀤𑁆𑀥𑀺, 𑀲𑁂𑀬𑁆𑀬𑀣𑀸𑀧𑀺 𑀭𑀸𑀚𑀕𑀺𑀭𑀺𑀓𑀸𑀦𑀁; 𑀢𑁂𑀲𑀁 𑀲𑀫𑀸𑀧𑀦𑁆𑀦𑀸𑀬𑀧𑀺 𑀫𑀭𑀡𑀥𑀫𑁆𑀫𑀢𑀸𑀬 𑀫𑀭𑀡𑀲𑀫𑀬𑀜𑁆𑀘 𑀅𑀫𑀭𑀡𑀲𑀫𑀬𑀜𑁆𑀘 𑀤𑀲𑁆𑀲𑁂𑀢𑀼𑀁 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀧𑀝𑀺𑀜𑁆𑀜𑀸 𑀇𑀢𑀭𑀲𑁆𑀲. 𑀅𑀣 𑀦𑀁 𑀬𑀲𑁆𑀫𑀸 𑀓𑀸𑀮𑀁 𑀓𑀭𑁄𑀦𑁆𑀢𑀲𑁆𑀲 𑀦𑀸𑀫 𑀫𑀭𑀡𑀦𑁆𑀢𑀺𑀓𑁂𑀳𑀺 𑀨𑀲𑁆𑀲𑀸𑀤𑀻𑀳𑀺 𑀪𑀯𑀺𑀢𑀩𑁆𑀩𑀁, 𑀢𑀲𑁆𑀫𑀸 𑀢𑁂𑀦𑀸𑀓𑀸𑀭𑁂𑀦 𑀘𑁄𑀤𑁂𑀢𑀼𑀁 𑀅𑀢𑁆𑀣𑀻𑀢𑀺𑀆𑀤𑀺𑀫𑀸𑀳.

𑀅𑀨𑀲𑁆𑀲𑀓𑀲𑁆𑀲 𑀓𑀸𑀮𑀓𑀺𑀭𑀺𑀬𑀸𑀢𑀺𑀆𑀤𑀻𑀦𑀺 𑀧𑀼𑀝𑁆𑀞𑁄 𑀲𑁂𑀲𑀲𑀢𑁆𑀢𑁂 𑀲𑀦𑁆𑀥𑀸𑀬 𑀧𑀝𑀺𑀓𑁆𑀔𑀺𑀧𑀢𑀺 𑀯𑀺𑀲𑀁 𑀓𑀫𑁂𑀬𑁆𑀬𑀸𑀢𑀺𑀆𑀤𑀻𑀦𑀺 𑀧𑀼𑀝𑁆𑀞𑁄 𑀲𑀫𑀸𑀧𑀢𑁆𑀢𑀺𑀆𑀦𑀼𑀪𑀸𑀯𑀁 𑀲𑀦𑁆𑀥𑀸𑀬 𑀧𑀝𑀺𑀓𑁆𑀔𑀺𑀧𑀢𑀺. 𑀤𑀼𑀢𑀺𑀬𑀯𑀸𑀭𑁂 𑀲𑀭𑀻𑀭𑀧𑀓𑀢𑀺𑀁 𑀲𑀦𑁆𑀥𑀸𑀬 𑀧𑀝𑀺𑀚𑀸𑀦𑀸𑀢𑀺. 𑀏𑀯𑀁 𑀲𑀦𑁆𑀢𑁂 𑀧𑀦 𑀲𑀫𑀸𑀧𑀢𑁆𑀢𑀺𑀆𑀦𑀼𑀪𑀸𑀯𑁄 𑀦𑀸𑀫 𑀦 𑀳𑁄𑀢𑀺, 𑀢𑁂𑀦𑁂𑀯 𑀦 𑀦𑀺𑀭𑁄𑀥𑀲𑀫𑀸𑀧𑀦𑁆𑀦𑁄𑀢𑀺 𑀅𑀦𑀼𑀬𑀼𑀜𑁆𑀚𑀢𑀺.

𑁭𑁩𑁩-𑁭𑁩𑁪. 𑀦 𑀓𑀸𑀮𑀁 𑀓𑀭𑁂𑀬𑁆𑀬𑀸𑀢𑀺 𑀧𑀼𑀘𑁆𑀙𑀸 𑀧𑀭𑀯𑀸𑀤𑀺𑀲𑁆𑀲. 𑀅𑀢𑁆𑀣𑀺 𑀲𑁄 𑀦𑀺𑀬𑀸𑀫𑁄𑀢𑀺 𑀧𑀭𑀯𑀸𑀤𑀺𑀲𑁆𑀲 𑀧𑀜𑁆𑀳𑁂 𑀧𑀦 𑀬𑀲𑁆𑀫𑀸 𑀏𑀯𑀭𑀽𑀧𑁄 𑀦𑀺𑀬𑀸𑀫𑁄 𑀦𑀸𑀫 𑀦𑀢𑁆𑀣𑀺, 𑀢𑀲𑁆𑀫𑀸 𑀧𑀝𑀺𑀓𑁆𑀔𑀺𑀧𑀢𑀺. 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑀫𑀗𑁆𑀕𑀻𑀢𑀺𑀆𑀤𑀺 𑀲𑀓𑀯𑀸𑀤𑀺𑀦𑀸 ‘‘𑀦𑀺𑀬𑀸𑀫𑁂 𑀅𑀲𑀦𑁆𑀢𑁂𑀧𑀺 𑀫𑀭𑀡𑀲𑀫𑀬𑁂𑀦𑁂𑀯 𑀫𑀭𑀢𑀺, 𑀦𑀸𑀲𑀫𑀬𑁂𑀦𑀸’’𑀢𑀺 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁. 𑀢𑀢𑁆𑀭𑀸𑀬𑀫𑀥𑀺𑀧𑁆𑀧𑀸𑀬𑁄 𑁋 𑀬𑀤𑀺 𑀦𑀺𑀬𑀸𑀫𑀸𑀪𑀸𑀯𑁂𑀦 𑀓𑀸𑀮𑀓𑀺𑀭𑀺𑀬𑀸 𑀪𑀯𑁂𑀬𑁆𑀬, 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑀫𑀗𑁆𑀕𑀺𑀦𑁄𑀧𑀺 𑀪𑀯𑁂𑀬𑁆𑀬. 𑀢𑀢𑁄 ‘‘𑀧𑀜𑁆𑀘𑀳𑀺 𑀯𑀺𑀜𑁆𑀜𑀸𑀡𑁂𑀳𑀺 𑀦 𑀘𑀯𑀢𑀺, 𑀦 𑀉𑀧𑀧𑀚𑁆𑀚𑀢𑀻’’𑀢𑀺 𑀲𑀼𑀢𑁆𑀢𑀯𑀺𑀭𑁄𑀥𑁄 𑀲𑀺𑀬𑀸. 𑀬𑀣𑀸 𑀧𑀦 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑀫𑀗𑁆𑀕𑀺𑀲𑁆𑀲 𑀓𑀸𑀮𑀓𑀺𑀭𑀺𑀬𑀸 𑀦 𑀳𑁄𑀢𑀺, 𑀢𑀣𑀸 𑀦𑀺𑀭𑁄𑀥𑀲𑀫𑀸𑀧𑀦𑁆𑀦𑀲𑁆𑀲𑀸𑀧𑀻𑀢𑀺.

𑀢𑀢𑀺𑀬𑀲𑀜𑁆𑀜𑀸𑀯𑁂𑀤𑀬𑀺𑀢𑀓𑀣𑀸𑀯𑀡𑁆𑀡𑀦𑀸.

𑁧𑁦. 𑀅𑀲𑀜𑁆𑀜𑀲𑀢𑁆𑀢𑀼𑀧𑀺𑀓𑀸𑀓𑀣𑀸𑀯𑀡𑁆𑀡𑀦𑀸

𑁭𑁩𑁫. 𑀇𑀤𑀸𑀦𑀺 𑀅𑀲𑀜𑁆𑀜𑀲𑀢𑁆𑀢𑀼𑀧𑀺𑀓𑀸𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀣 𑀲𑀜𑁆𑀜𑀸𑀯𑀺𑀭𑀸𑀕𑀯𑀲𑁂𑀦 𑀧𑀯𑀢𑁆𑀢𑀪𑀸𑀯𑀦𑀸 𑀅𑀲𑀜𑁆𑀜𑀲𑀫𑀸𑀧𑀢𑁆𑀢𑀺𑀧𑀺 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀧𑀺 𑀲𑀜𑁆𑀜𑀸𑀯𑁂𑀤𑀬𑀺𑀢𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺 𑀦𑀸𑀫. 𑀇𑀢𑀺 𑀤𑁆𑀯𑁂 𑀲𑀜𑁆𑀜𑀸𑀯𑁂𑀤𑀬𑀺𑀢𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀬𑁄 𑀮𑁄𑀓𑀺𑀬𑀸 𑀘 𑀮𑁄𑀓𑀼𑀢𑁆𑀢𑀭𑀸 𑀘. 𑀢𑀢𑁆𑀣 𑀮𑁄𑀓𑀺𑀬𑀸 𑀧𑀼𑀣𑀼𑀚𑁆𑀚𑀦𑀲𑁆𑀲 𑀅𑀲𑀜𑁆𑀜𑀲𑀢𑁆𑀢𑀼𑀧𑀺𑀓𑀸 𑀳𑁄𑀢𑀺, 𑀮𑁄𑀓𑀼𑀢𑁆𑀢𑀭𑀸 𑀅𑀭𑀺𑀬𑀸𑀦𑀁, 𑀲𑀸 𑀘 𑀦𑀸𑀲𑀜𑁆𑀜𑀲𑀢𑁆𑀢𑀼𑀧𑀺𑀓𑀸. 𑀇𑀫𑀁 𑀧𑀦 𑀯𑀺𑀪𑀸𑀕𑀁 𑀅𑀓𑀢𑁆𑀯𑀸 𑀅𑀯𑀺𑀲𑁂𑀲𑁂𑀦 𑀲𑀜𑁆𑀜𑀸𑀯𑁂𑀤𑀬𑀺𑀢𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺 𑀅𑀲𑀜𑁆𑀜𑀲𑀢𑁆𑀢𑀼𑀧𑀺𑀓𑀸𑀢𑀺 𑀬𑁂𑀲𑀁 𑀮𑀤𑁆𑀥𑀺, 𑀲𑁂𑀬𑁆𑀬𑀣𑀸𑀧𑀺 𑀳𑁂𑀢𑀼𑀯𑀸𑀤𑀸𑀦𑀁; 𑀢𑁂 𑀲𑀦𑁆𑀥𑀸𑀬 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀧𑀝𑀺𑀜𑁆𑀜𑀸 𑀇𑀢𑀭𑀲𑁆𑀲. 𑀅𑀣 𑀦𑀁 𑀬𑀲𑁆𑀫𑀸 𑀅𑀲𑀜𑁆𑀜𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀦𑁆𑀦𑀲𑁆𑀲 𑀅𑀮𑁄𑀪𑀸𑀤𑀬𑁄 𑀅𑀢𑁆𑀣𑀺, 𑀦 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀁, 𑀢𑀲𑁆𑀫𑀸 𑀢𑁂𑀲𑀁 𑀯𑀲𑁂𑀦 𑀘𑁄𑀤𑁂𑀢𑀼𑀁 𑀅𑀢𑁆𑀣𑀻𑀢𑀺𑀆𑀤𑀺𑀫𑀸𑀳.

𑁭𑁩𑁬. 𑀇𑀥𑀸𑀧𑀺 𑀅𑀲𑀜𑁆𑀜𑀻𑀢𑀺 𑀧𑀜𑁆𑀳𑁂 𑀇𑀥 𑀲𑀜𑁆𑀜𑀸𑀯𑀺𑀭𑀸𑀕𑀯𑀲𑁂𑀦 𑀲𑀫𑀸𑀧𑀦𑁆𑀦𑀢𑁆𑀢𑀸 𑀅𑀲𑀜𑁆𑀜𑀺𑀢𑀸 𑀅𑀦𑀼𑀜𑁆𑀜𑀸𑀢𑀸, 𑀢𑀢𑁆𑀭𑀸𑀧𑀺 𑀅𑀲𑀜𑁆𑀜𑀲𑀢𑁆𑀢𑁂𑀦𑁂𑀯. 𑀢𑀲𑁆𑀫𑀸 𑀇𑀫𑀁 𑀧𑀝𑀺𑀜𑁆𑀜𑀁 𑀕𑀳𑁂𑀢𑁆𑀯𑀸 𑀮𑀤𑁆𑀥𑀺𑀁 𑀧𑀢𑀺𑀝𑁆𑀞𑀧𑁂𑀦𑁆𑀢𑁂𑀦 𑀙𑀮𑁂𑀦 𑀧𑀢𑀺𑀝𑁆𑀞𑀸𑀧𑀺𑀢𑀸 𑀳𑁄𑀢𑀺. 𑀇𑀥 𑀯𑀸 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀁 𑀲𑀦𑁆𑀥𑀸𑀬 𑀅𑀲𑀜𑁆𑀜𑀺𑀢𑀸 𑀅𑀦𑀼𑀜𑁆𑀜𑀸𑀢𑀸. 𑀢𑀢𑁆𑀭𑀸𑀧𑀺 𑀇𑀢𑁄 𑀘𑀼𑀢𑀲𑁆𑀲 𑀅𑀦𑀸𑀕𑀸𑀫𑀺𑀦𑁄 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀫𑁂𑀯 𑀢𑀲𑁆𑀫𑀸𑀧𑀺 𑀇𑀫𑀸𑀬 𑀧𑀝𑀺𑀜𑁆𑀜𑀸𑀬 𑀧𑀢𑀺𑀝𑁆𑀞𑀸𑀧𑀺𑀢𑀸 𑀮𑀤𑁆𑀥𑀺 𑀅𑀧𑁆𑀧𑀢𑀺𑀝𑁆𑀞𑀺𑀢𑀸𑀬𑁂𑀯𑀸𑀢𑀺.

𑀅𑀲𑀜𑁆𑀜𑀲𑀢𑁆𑀢𑀼𑀧𑀺𑀓𑀸𑀓𑀣𑀸𑀯𑀡𑁆𑀡𑀦𑀸.

𑁧𑁧. 𑀓𑀫𑁆𑀫𑀽𑀧𑀘𑀬𑀓𑀣𑀸𑀯𑀡𑁆𑀡𑀦𑀸

𑁭𑁩𑁭. 𑀇𑀤𑀸𑀦𑀺 𑀓𑀫𑁆𑀫𑀽𑀧𑀘𑀬𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀣 𑀬𑁂𑀲𑀁 𑀓𑀫𑁆𑀫𑀽𑀧𑀘𑀬𑁄 𑀦𑀸𑀫 𑀓𑀫𑁆𑀫𑀢𑁄 𑀅𑀜𑁆𑀜𑁄 𑀘𑀺𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑁄 𑀅𑀩𑁆𑀬𑀸𑀓𑀢𑁄 𑀅𑀦𑀸𑀭𑀫𑁆𑀫𑀡𑁄𑀢𑀺 𑀮𑀤𑁆𑀥𑀺, 𑀲𑁂𑀬𑁆𑀬𑀣𑀸𑀧𑀺 𑀅𑀦𑁆𑀥𑀓𑀸𑀦𑀜𑁆𑀘𑁂𑀯 𑀲𑀫𑁆𑀫𑀺𑀢𑀺𑀬𑀸𑀦𑀜𑁆𑀘; 𑀢𑁂 𑀲𑀦𑁆𑀥𑀸𑀬 𑀅𑀜𑁆𑀜𑀁 𑀓𑀫𑁆𑀫𑀦𑁆𑀢𑀺 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀧𑀝𑀺𑀜𑁆𑀜𑀸 𑀇𑀢𑀭𑀲𑁆𑀲. 𑀅𑀣 𑀦𑀁 ‘‘𑀬𑀤𑀺 𑀓𑀫𑁆𑀫𑀢𑁄 𑀅𑀜𑁆𑀜𑁄 𑀓𑀫𑁆𑀫𑀽𑀧𑀘𑀬𑁄, 𑀨𑀲𑁆𑀲𑀸𑀤𑀺𑀢𑁄𑀧𑀺 𑀅𑀜𑁆𑀜𑁂𑀦 𑀨𑀲𑁆𑀲𑀽𑀧𑀘𑀬𑀸𑀤𑀺𑀦𑀸 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀘𑁄𑀤𑁂𑀢𑀼𑀁 𑀅𑀜𑁆𑀜𑁄 𑀨𑀲𑁆𑀲𑁄𑀢𑀺𑀆𑀤𑀺𑀫𑀸𑀳. 𑀇𑀢𑀭𑁄 𑀮𑀤𑁆𑀥𑀺𑀬𑀸 𑀅𑀪𑀸𑀯𑁂𑀦 𑀧𑀝𑀺𑀓𑁆𑀔𑀺𑀧𑀢𑀺.

𑁭𑁩𑁮-𑁭𑁩𑁯. 𑀓𑀫𑁆𑀫𑁂𑀦 𑀲𑀳𑀚𑀸𑀢𑁄𑀢𑀺 𑀧𑀜𑁆𑀳𑁂𑀲𑀼 𑀘𑀺𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑀁 𑀲𑀦𑁆𑀥𑀸𑀬 𑀧𑀝𑀺𑀓𑁆𑀔𑀺𑀧𑀢𑀺, 𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀁 𑀲𑀦𑁆𑀥𑀸𑀬 𑀧𑀝𑀺𑀚𑀸𑀦𑀸𑀢𑀺. 𑀓𑀼𑀲𑀮𑁄𑀢𑀺 𑀧𑀜𑁆𑀳𑁂𑀲𑀼𑀧𑀺 𑀘𑀺𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑀁 𑀲𑀦𑁆𑀥𑀸𑀬 𑀧𑀝𑀺𑀚𑀸𑀦𑀸𑀢𑀺. 𑀧𑀭𑀢𑁄 𑀅𑀓𑀼𑀲𑀮𑁄𑀢𑀺𑀧𑀜𑁆𑀳𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑁭𑁪𑁦. 𑀲𑀸𑀭𑀫𑁆𑀫𑀡𑁄𑀢𑀺 𑀧𑀼𑀝𑁆𑀞𑁄 𑀧𑀦 𑀏𑀓𑀦𑁆𑀢𑀁 𑀅𑀦𑀸𑀭𑀫𑁆𑀫𑀡𑀫𑁂𑀯 𑀇𑀘𑁆𑀙𑀢𑀺, 𑀢𑀲𑁆𑀫𑀸 𑀧𑀝𑀺𑀓𑁆𑀔𑀺𑀧𑀢𑀺. 𑀘𑀺𑀢𑁆𑀢𑀁 𑀪𑀺𑀚𑁆𑀚𑀫𑀸𑀦𑀦𑁆𑀢𑀺 𑀬𑀤𑀸 𑀘𑀺𑀢𑁆𑀢𑀁 𑀪𑀺𑀚𑁆𑀚𑀫𑀸𑀦𑀁 𑀳𑁄𑀢𑀺, 𑀢𑀤𑀸 𑀓𑀫𑁆𑀫𑀁 𑀪𑀺𑀚𑁆𑀚𑀢𑀻𑀢𑀺 𑀅𑀢𑁆𑀣𑁄. 𑀪𑀼𑀫𑁆𑀫𑀢𑁆𑀣𑁂 𑀯𑀸 𑀧𑀘𑁆𑀘𑀢𑁆𑀢𑀁, 𑀘𑀺𑀢𑁆𑀢𑁂 𑀪𑀺𑀚𑁆𑀚𑀫𑀸𑀦𑁂𑀢𑀺 𑀅𑀢𑁆𑀣𑁄. 𑀅𑀬𑀫𑁂𑀯 𑀯𑀸 𑀧𑀸𑀞𑁄. 𑀢𑀢𑁆𑀣 𑀬𑀲𑁆𑀫𑀸 𑀲𑀫𑁆𑀧𑀬𑀼𑀢𑁆𑀢𑁄 𑀪𑀺𑀚𑁆𑀚𑀢𑀺, 𑀯𑀺𑀧𑁆𑀧𑀬𑀼𑀢𑁆𑀢𑁄 𑀦 𑀪𑀺𑀚𑁆𑀚𑀢𑀺, 𑀢𑀲𑁆𑀫𑀸 𑀧𑀝𑀺𑀚𑀸𑀦𑀸𑀢𑀺 𑀘𑁂𑀯 𑀧𑀝𑀺𑀓𑁆𑀔𑀺𑀧𑀢𑀺 𑀘.

𑁭𑁪𑁧. 𑀓𑀫𑁆𑀫𑀫𑁆𑀳𑀺 𑀓𑀫𑁆𑀫𑀽𑀧𑀘𑀬𑁄𑀢𑀺 𑀓𑀫𑁆𑀫𑁂 𑀲𑀢𑀺 𑀓𑀫𑁆𑀫𑀽𑀧𑀘𑀬𑁄, 𑀓𑀫𑁆𑀫𑁂 𑀯𑀸 𑀧𑀢𑀺𑀝𑁆𑀞𑀺𑀢𑁂 𑀓𑀫𑁆𑀫𑀽𑀧𑀘𑀬𑁄, 𑀓𑀫𑁆𑀫𑀽𑀧𑀘𑀬𑀢𑁄𑀯 𑀯𑀺𑀧𑀸𑀓𑁄 𑀦𑀺𑀩𑁆𑀩𑀢𑁆𑀢𑀢𑀺. 𑀢𑀲𑁆𑀫𑀺𑀁 𑀧𑀦 𑀓𑀫𑁆𑀫𑁂 𑀦𑀺𑀭𑀼𑀤𑁆𑀥𑁂 𑀬𑀸𑀯 𑀅𑀁𑀓𑀼𑀭𑀼𑀧𑁆𑀧𑀸𑀤𑀸 𑀩𑀻𑀚𑀁 𑀯𑀺𑀬 𑀬𑀸𑀯 𑀯𑀺𑀧𑀸𑀓𑀼𑀧𑁆𑀧𑀸𑀤𑀸 𑀓𑀫𑁆𑀫𑀽𑀧𑀘𑀬𑁄 𑀢𑀺𑀝𑁆𑀞𑀢𑀻𑀢𑀺𑀲𑁆𑀲 𑀮𑀤𑁆𑀥𑀺, 𑀢𑀲𑁆𑀫𑀸 𑀧𑀝𑀺𑀚𑀸𑀦𑀸𑀢𑀺. 𑀢𑀜𑁆𑀜𑁂𑀯 𑀓𑀫𑁆𑀫𑀁, 𑀲𑁄 𑀓𑀫𑁆𑀫𑀽𑀧𑀘𑀬𑁄, 𑀲𑁄 𑀓𑀫𑁆𑀫𑀯𑀺𑀧𑀸𑀓𑁄𑀢𑀺 𑀬𑀲𑁆𑀫𑀸 𑀓𑀫𑁆𑀫𑀫𑁆𑀳𑀺 𑀓𑀫𑁆𑀫𑀽𑀧𑀘𑀬𑁄, 𑀲𑁄 𑀘 𑀬𑀸𑀯 𑀯𑀺𑀧𑀸𑀓𑀼𑀧𑁆𑀧𑀸𑀤𑀸 𑀢𑀺𑀝𑁆𑀞𑀢𑀻𑀢𑀺𑀲𑁆𑀲 𑀮𑀤𑁆𑀥𑀺, 𑀢𑀲𑁆𑀫𑀸 𑀦𑀁 𑀢𑁂𑀲𑀁 𑀢𑀺𑀡𑁆𑀡𑀫𑁆𑀧𑀺 𑀏𑀓𑀢𑁆𑀢𑀁 𑀧𑀼𑀘𑁆𑀙𑀢𑀺 𑀯𑀺𑀧𑀸𑀓𑁄 𑀲𑀸𑀭𑀫𑁆𑀫𑀡𑁄𑀢𑀺 𑀇𑀤𑀁 𑀯𑀺𑀧𑀸𑀓𑁄 𑀯𑀺𑀬 𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑁄𑀧𑀺 𑀆𑀭𑀫𑁆𑀫𑀡𑀧𑀝𑀺𑀩𑀤𑁆𑀥𑁄𑀬𑁂𑀯𑀸𑀢𑀺 𑀘𑁄𑀤𑀦𑀢𑁆𑀣𑀁 𑀧𑀼𑀘𑁆𑀙𑀢𑀺. 𑀇𑀢𑀭𑁄 𑀧𑀦 𑀮𑀤𑁆𑀥𑀺𑀯𑀲𑁂𑀦𑁂𑀓𑀁 𑀧𑀝𑀺𑀚𑀸𑀦𑀸𑀢𑀺, 𑀏𑀓𑀁 𑀧𑀝𑀺𑀓𑁆𑀔𑀺𑀧𑀢𑀺. 𑀧𑀝𑀺𑀮𑁄𑀫𑁂𑀧𑀺 𑀏𑀲𑁂𑀯 𑀦𑀬𑁄. 𑀲𑁂𑀲𑀫𑁂𑀢𑁆𑀣 𑀬𑀣𑀸𑀧𑀸𑀴𑀺𑀫𑁂𑀯 𑀦𑀺𑀬𑁆𑀬𑀸𑀢𑀻𑀢𑀺.

𑀓𑀫𑁆𑀫𑀽𑀧𑀘𑀬𑀓𑀣𑀸𑀯𑀡𑁆𑀡𑀦𑀸.

𑀧𑀦𑁆𑀦𑀭𑀲𑀫𑁄 𑀯𑀕𑁆𑀕𑁄.

𑀢𑀢𑀺𑀬𑀧𑀡𑁆𑀡𑀸𑀲𑀓𑁄 𑀲𑀫𑀢𑁆𑀢𑁄.