𑁧𑁬. 𑀲𑁄𑀴𑀲𑀫𑀯𑀕𑁆𑀕𑁄

𑁧. 𑀦𑀺𑀕𑁆𑀕𑀳𑀓𑀣𑀸𑀯𑀡𑁆𑀡𑀦𑀸

𑁭𑁪𑁩-𑁭𑁪𑁪. 𑀇𑀤𑀸𑀦𑀺 𑀦𑀺𑀕𑁆𑀕𑀳𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀣 𑀬𑁂 𑀮𑁄𑀓𑁂 𑀩𑀮𑀧𑁆𑀧𑀢𑁆𑀢𑀸 𑀯𑀲𑀻𑀪𑀽𑀢𑀸, 𑀢𑁂 𑀬𑀤𑀺 𑀧𑀭𑀲𑁆𑀲 𑀘𑀺𑀢𑁆𑀢𑀁 𑀦𑀺𑀕𑁆𑀕𑀡𑁆𑀳𑀺𑀢𑀼𑀁 𑀦 𑀲𑀓𑁆𑀓𑀼𑀡𑁂𑀬𑁆𑀬𑀼𑀁, 𑀓𑀸 𑀢𑁂𑀲𑀁 𑀩𑀮𑀧𑁆𑀧𑀢𑁆𑀢𑀺, 𑀓𑁄 𑀯𑀲𑀻𑀪𑀸𑀯𑁄. 𑀩𑀮𑀧𑁆𑀧𑀢𑁆𑀢𑀺𑀬𑀸 𑀧𑀦 𑀯𑀲𑀻𑀪𑀸𑀯𑁂𑀦 𑀘 𑀅𑀤𑁆𑀥𑀸 𑀢𑁂 𑀧𑀭𑀲𑁆𑀲 𑀘𑀺𑀢𑁆𑀢𑀁 𑀦𑀺𑀕𑁆𑀕𑀡𑁆𑀳𑀦𑁆𑀢𑀻𑀢𑀺 𑀬𑁂𑀲𑀁 𑀮𑀤𑁆𑀥𑀺, 𑀲𑁂𑀬𑁆𑀬𑀣𑀸𑀧𑀺 𑀫𑀳𑀸𑀲𑀗𑁆𑀖𑀺𑀓𑀸𑀦𑀁; 𑀢𑁂 𑀲𑀦𑁆𑀥𑀸𑀬 𑀧𑀭𑁄 𑀧𑀭𑀲𑁆𑀲𑀸𑀢𑀺 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀧𑀝𑀺𑀜𑁆𑀜𑀸 𑀇𑀢𑀭𑀲𑁆𑀲. 𑀢𑀢𑁆𑀣 𑀦𑀺𑀕𑁆𑀕𑀡𑁆𑀳𑀸𑀢𑀻𑀢𑀺 𑀲𑀁𑀓𑀺𑀮𑁂𑀲𑀸𑀧𑀢𑁆𑀢𑀺𑀢𑁄 𑀦𑀺𑀯𑀸𑀭𑁂𑀢𑀺. 𑀲𑁂𑀲𑀫𑁂𑀢𑁆𑀣 𑀬𑀣𑀸𑀧𑀸𑀴𑀺𑀫𑁂𑀯 𑀦𑀺𑀬𑁆𑀬𑀸𑀢𑀻𑀢𑀺. 𑀧𑀕𑁆𑀕𑀳𑀓𑀣𑀸𑀬𑀧𑀺 𑀏𑀲𑁂𑀯 𑀦𑀬𑁄.

𑀦𑀺𑀕𑁆𑀕𑀳𑀓𑀣𑀸𑀯𑀡𑁆𑀡𑀦𑀸.

𑁩. 𑀲𑀼𑀔𑀸𑀦𑀼𑀧𑁆𑀧𑀤𑀸𑀦𑀓𑀣𑀸𑀯𑀡𑁆𑀡𑀦𑀸

𑁭𑁪𑁭-𑁭𑁪𑁮. 𑀇𑀤𑀸𑀦𑀺 𑀲𑀼𑀔𑀸𑀦𑀼𑀧𑁆𑀧𑀤𑀸𑀦𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀣 ‘‘𑀩𑀳𑀽𑀦𑀁 𑀯𑀢 𑀦𑁄 𑀪𑀕𑀯𑀸 𑀲𑀼𑀔𑀥𑀫𑁆𑀫𑀸𑀦𑀁 𑀉𑀧𑀳𑀢𑁆𑀢𑀸’’𑀢𑀺 (𑀫. 𑀦𑀺. 𑁨.𑁧𑁪𑁮) 𑀲𑀼𑀢𑁆𑀢𑀁 𑀦𑀺𑀲𑁆𑀲𑀸𑀬 𑀧𑀭𑁄 𑀧𑀭𑀲𑁆𑀲 𑀲𑀼𑀔𑀁 𑀅𑀦𑀼𑀧𑁆𑀧𑀤𑁂𑀢𑀻𑀢𑀺 𑀬𑁂𑀲𑀁 𑀮𑀤𑁆𑀥𑀺, 𑀲𑁂𑀬𑁆𑀬𑀣𑀸𑀧𑀺 𑀳𑁂𑀢𑀼𑀯𑀸𑀤𑀸𑀦𑀁; 𑀢𑁂 𑀲𑀦𑁆𑀥𑀸𑀬 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀧𑀝𑀺𑀜𑁆𑀜𑀸 𑀇𑀢𑀭𑀲𑁆𑀲. 𑀤𑀼𑀓𑁆𑀔𑀁 𑀅𑀦𑀼𑀧𑁆𑀧𑀤𑁂𑀢𑀻𑀢𑀺 𑀧𑀼𑀝𑁆𑀞𑁄 𑀧𑀦 𑀢𑀸𑀤𑀺𑀲𑀁 𑀲𑀼𑀢𑁆𑀢𑀧𑀤𑀁 𑀅𑀧𑀲𑁆𑀲𑀦𑁆𑀢𑁄 𑀧𑀝𑀺𑀓𑁆𑀔𑀺𑀧𑀢𑀺. 𑀅𑀢𑁆𑀢𑀦𑁄 𑀲𑀼𑀔𑀦𑁆𑀢𑀺𑀆𑀤𑀺𑀧𑀜𑁆𑀳𑁂 𑀬𑀁 𑀅𑀢𑁆𑀢𑀦𑁄 𑀧𑀭𑀲𑁆𑀲 𑀯𑀸, 𑀢𑀁 𑀅𑀦𑀼𑀧𑁆𑀧𑀤𑀸𑀢𑀼𑀁 𑀦 𑀲𑀓𑁆𑀓𑀸. 𑀬𑀁 𑀢𑀲𑁆𑀲𑁂𑀯, 𑀓𑀺𑀁 𑀢𑀢𑁆𑀣 𑀅𑀦𑀼𑀧𑁆𑀧𑀤𑀸𑀦𑀁 𑀦𑀸𑀫𑀸𑀢𑀺 𑀧𑀝𑀺𑀓𑁆𑀔𑀺𑀧𑀢𑀺. 𑀦𑁂𑀯𑀢𑁆𑀢𑀦𑁄𑀢𑀺𑀆𑀤𑀺𑀧𑀜𑁆𑀳𑁂 𑀧𑀦 𑀬𑀁 𑀏𑀯𑀭𑀽𑀧𑀁, 𑀦 𑀢𑀁 𑀅𑀦𑀼𑀧𑁆𑀧𑀤𑀺𑀦𑁆𑀦𑀁 𑀦𑀸𑀫 𑀪𑀯𑀺𑀢𑀼𑀫𑀭𑀳𑀢𑀻𑀢𑀺 𑀮𑀤𑁆𑀥𑀺𑀬𑀸𑀧𑀝𑀺𑀚𑀸𑀦𑀸𑀢𑀺. 𑀦𑁄 𑀘 𑀯𑀢 𑀭𑁂𑀢𑀺𑀢𑀸𑀤𑀺𑀲𑀲𑁆𑀲 𑀲𑀼𑀔𑀲𑁆𑀲 𑀅𑀪𑀸𑀯𑀸 𑀯𑀼𑀢𑁆𑀢𑀁. 𑀲𑀼𑀔𑀥𑀫𑁆𑀫𑀸𑀦𑀁 𑀉𑀧𑀳𑀢𑁆𑀢𑀸𑀢𑀺𑀯𑀘𑀦𑀁 𑀪𑀕𑀯𑀢𑁄 𑀧𑀭𑁂𑀲𑀁 𑀲𑀼𑀔𑀼𑀧𑁆𑀧𑀢𑁆𑀢𑀺𑀬𑀸 𑀧𑀘𑁆𑀘𑀬𑀪𑀸𑀯𑀁 𑀤𑀻𑀧𑁂𑀢𑀺, 𑀦 𑀅𑀦𑁆𑀦𑀸𑀤𑀻𑀦𑀁 𑀯𑀺𑀬 𑀲𑀼𑀔𑀲𑁆𑀲 𑀅𑀦𑀼𑀧𑁆𑀧𑀤𑀸𑀦𑀁, 𑀢𑀲𑁆𑀫𑀸 𑀅𑀲𑀸𑀥𑀓𑀦𑁆𑀢𑀺.

𑀲𑀼𑀔𑀸𑀦𑀼𑀧𑁆𑀧𑀤𑀸𑀦𑀓𑀣𑀸𑀯𑀡𑁆𑀡𑀦𑀸.

𑁪. 𑀅𑀥𑀺𑀕𑀬𑁆𑀳𑀫𑀦𑀲𑀺𑀓𑀸𑀭𑀓𑀣𑀸𑀯𑀡𑁆𑀡𑀦𑀸

𑁭𑁪𑁯-𑁭𑁫𑁩. 𑀇𑀤𑀸𑀦𑀺 𑀅𑀥𑀺𑀕𑀬𑁆𑀳 𑀫𑀦𑀲𑀺𑀓𑀸𑀭𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀣 𑀤𑀼𑀯𑀺𑀥𑁄 𑀫𑀦𑀲𑀺𑀓𑀸𑀭𑁄 𑀦𑀬𑀢𑁄 𑀘 𑀆𑀭𑀫𑁆𑀫𑀡𑀢𑁄 𑀘. 𑀢𑀢𑁆𑀣 𑀏𑀓𑀲𑀗𑁆𑀔𑀸𑀭𑀲𑁆𑀲𑀸𑀧𑀺 𑀅𑀦𑀺𑀘𑁆𑀘𑀢𑀸𑀬 𑀤𑀺𑀝𑁆𑀞𑀸𑀬 𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀸𑀢𑀺 𑀅𑀯𑀲𑁂𑀲𑁂𑀲𑀼 𑀦𑀬𑀢𑁄 𑀫𑀦𑀲𑀺𑀓𑀸𑀭𑁄 𑀳𑁄𑀢𑀺. 𑀅𑀢𑀻𑀢𑁂 𑀧𑀦 𑀲𑀗𑁆𑀔𑀸𑀭𑁂 𑀫𑀦𑀲𑀺𑀓𑀭𑁄𑀦𑁆𑀢𑁄 𑀦 𑀅𑀦𑀸𑀕𑀢𑁂 𑀫𑀦𑀲𑀺𑀓𑀸𑀢𑀼𑀁 𑀲𑀓𑁆𑀓𑁄𑀢𑀺. 𑀅𑀢𑀻𑀢𑀸𑀤𑀻𑀲𑀼 𑀅𑀜𑁆𑀜𑀢𑀭𑀁 𑀫𑀦𑀲𑀺𑀓𑀭𑁄𑀢𑁄 𑀆𑀭𑀫𑁆𑀫𑀡𑀢𑁄 𑀫𑀦𑀲𑀺𑀓𑀸𑀭𑁄 𑀳𑁄𑀢𑀺. 𑀢𑀢𑁆𑀣 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀫𑀦𑀲𑀺𑀓𑀭𑁄𑀦𑁆𑀢𑁄 𑀬𑁂𑀦 𑀘𑀺𑀢𑁆𑀢𑁂𑀦 𑀢𑁂 𑀫𑀦𑀲𑀺𑀓𑀭𑁄𑀢𑀺, 𑀢𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀓𑁆𑀔𑀡𑁂 𑀫𑀦𑀲𑀺𑀓𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀢𑀢𑁆𑀣 𑀬𑁂𑀲𑀁 ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀸’’𑀢𑀺𑀆𑀤𑀺𑀯𑀘𑀦𑀁 𑀦𑀺𑀲𑁆𑀲𑀸𑀬 ‘‘𑀫𑀦𑀲𑀺𑀓𑀭𑁄𑀦𑁆𑀢𑁄 𑀦𑀸𑀫 𑀅𑀥𑀺𑀕𑀬𑁆𑀳 𑀅𑀥𑀺𑀕𑀡𑁆𑀳𑀺𑀢𑁆𑀯𑀸 𑀲𑀗𑁆𑀕𑀡𑁆𑀳𑀺𑀢𑁆𑀯𑀸 𑀲𑀩𑁆𑀩𑁂 𑀲𑀗𑁆𑀔𑀸𑀭𑁂 𑀏𑀓𑀢𑁄 𑀫𑀦𑀲𑀺𑀓𑀭𑁄𑀢𑀻’’𑀢𑀺 𑀮𑀤𑁆𑀥𑀺, 𑀲𑁂𑀬𑁆𑀬𑀣𑀸𑀧𑀺 𑀧𑀼𑀩𑁆𑀩𑀲𑁂𑀮𑀺𑀬𑀸𑀧𑀭𑀲𑁂𑀮𑀺𑀬𑀸𑀦𑀁; 𑀢𑁂 𑀲𑀦𑁆𑀥𑀸𑀬 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀧𑀝𑀺𑀜𑁆𑀜𑀸 𑀇𑀢𑀭𑀲𑁆𑀲.

𑀅𑀣 𑀦𑀁 𑀬𑀲𑁆𑀫𑀸 𑀲𑀩𑁆𑀩𑁂 𑀏𑀓𑀢𑁄 𑀫𑀦𑀲𑀺𑀓𑀭𑁄𑀦𑁆𑀢𑁂𑀦 𑀬𑁂𑀦 𑀘𑀺𑀢𑁆𑀢𑁂𑀦 𑀢𑁂 𑀫𑀦𑀲𑀺𑀓𑀭𑁄𑀢𑀺, 𑀢𑀫𑁆𑀧𑀺 𑀫𑀦𑀲𑀺𑀓𑀸𑀢𑀩𑁆𑀩𑀁 𑀳𑁄𑀢𑀺. 𑀢𑀲𑁆𑀫𑀸 𑀢𑀁𑀘𑀺𑀢𑁆𑀢𑀢𑀸𑀬 𑀘𑁄𑀤𑁂𑀢𑀼𑀁 𑀢𑁂𑀦 𑀘𑀺𑀢𑁆𑀢𑁂𑀦𑀸𑀢𑀺 𑀆𑀳. 𑀇𑀢𑀭𑁄 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀦 𑀲𑀓𑁆𑀓𑀸 𑀚𑀸𑀦𑀺𑀢𑀼𑀦𑁆𑀢𑀺 𑀲𑀦𑁆𑀥𑀸𑀬 𑀧𑀝𑀺𑀓𑁆𑀔𑀺𑀧𑀢𑀺. 𑀏𑀯𑀁𑀮𑀓𑁆𑀔𑀡𑀁 𑀘𑀺𑀢𑁆𑀢𑀦𑁆𑀢𑀺 𑀜𑀸𑀢𑀢𑁆𑀢𑀸 𑀧𑀦 𑀢𑀫𑁆𑀧𑀺 𑀘𑀺𑀢𑁆𑀢𑀁 𑀜𑀸𑀢𑀫𑁂𑀯 𑀳𑁄𑀢𑀻𑀢𑀺 𑀲𑀦𑁆𑀥𑀸𑀬 𑀧𑀝𑀺𑀚𑀸𑀦𑀸𑀢𑀺. 𑀅𑀣 𑀯𑀸 𑀢𑀜𑁆𑀜𑁂𑀯 𑀢𑀲𑁆𑀲 𑀆𑀭𑀫𑁆𑀫𑀡𑀁 𑀦 𑀳𑁄𑀢𑀻𑀢𑀺 𑀧𑀝𑀺𑀓𑁆𑀔𑀺𑀧𑀢𑀺. ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀸, 𑀬𑀤𑀸 𑀧𑀜𑁆𑀜𑀸𑀬 𑀧𑀲𑁆𑀲𑀢𑀻’’𑀢𑀺𑀆𑀤𑀻𑀦𑀺 𑀦𑀺𑀲𑁆𑀲𑀸𑀬 𑀉𑀧𑁆𑀧𑀦𑁆𑀦𑀮𑀤𑁆𑀥𑀺𑀯𑀲𑁂𑀦 𑀧𑀝𑀺𑀚𑀸𑀦𑀸𑀢𑀺. 𑀲𑁂𑀲𑀧𑀜𑁆𑀳𑀤𑁆𑀯𑀬𑁂𑀧𑀺 𑀏𑀲𑁂𑀯 𑀦𑀬𑁄. 𑀢𑁂𑀦 𑀨𑀲𑁆𑀲𑁂𑀦𑀸𑀢𑀺𑀆𑀤𑀻𑀲𑀼 𑀧𑀦 𑀢𑀣𑀸𑀭𑀽𑀧𑀁 𑀲𑀼𑀢𑁆𑀢𑀁 𑀅𑀧𑀲𑁆𑀲𑀦𑁆𑀢𑁄 𑀧𑀝𑀺𑀓𑁆𑀔𑀺𑀧𑀢𑁂𑀯. 𑀅𑀢𑀻𑀢𑀸𑀤𑀺𑀧𑀜𑁆𑀳𑁂𑀲𑀼 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀧𑀝𑀺𑀓𑁆𑀔𑁂𑀧𑀧𑀝𑀺𑀜𑁆𑀜𑀸 𑀯𑁂𑀤𑀺𑀢𑀩𑁆𑀩𑀸. 𑀲𑁂𑀲𑀁 𑀬𑀣𑀸𑀧𑀸𑀴𑀺𑀫𑁂𑀯 𑀦𑀺𑀬𑁆𑀬𑀸𑀢𑀻𑀢𑀺. 𑀲𑀩𑁆𑀩𑁂 𑀲𑀗𑁆𑀔𑀸𑀭𑀸𑀢𑀺𑀆𑀤𑀺𑀯𑀘𑀦𑀁 𑀦𑀬𑀢𑁄 𑀤𑀲𑁆𑀲𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀦 𑀏𑀓𑀓𑁆𑀔𑀡𑁂 𑀆𑀭𑀫𑁆𑀫𑀡𑀢𑁄, 𑀢𑀲𑁆𑀫𑀸 𑀅𑀲𑀸𑀥𑀓𑀦𑁆𑀢𑀺.

𑀅𑀥𑀺𑀕𑀬𑁆𑀳𑀫𑀦𑀲𑀺𑀓𑀸𑀭𑀓𑀣𑀸𑀯𑀡𑁆𑀡𑀦𑀸.

𑁫. 𑀭𑀽𑀧𑀁 𑀳𑁂𑀢𑀽𑀢𑀺𑀓𑀣𑀸𑀯𑀡𑁆𑀡𑀦𑀸

𑁭𑁫𑁪-𑁭𑁫𑁬. 𑀇𑀤𑀸𑀦𑀺 𑀭𑀽𑀧𑀁 𑀳𑁂𑀢𑀽𑀢𑀺 𑀓𑀣𑀸𑀦𑀸𑀫 𑀳𑁄𑀢𑀺. 𑀢𑀢𑁆𑀣 𑀳𑁂𑀢𑀽𑀢𑀺 𑀓𑀼𑀲𑀮𑀫𑀽𑀮𑀸𑀤𑀺𑀦𑁄 𑀳𑁂𑀢𑀼𑀳𑁂𑀢𑀼𑀲𑁆𑀲𑀸𑀧𑀺 𑀦𑀸𑀫𑀁, 𑀬𑀲𑁆𑀲 𑀓𑀲𑁆𑀲𑀘𑀺 𑀧𑀘𑁆𑀘𑀬𑀲𑁆𑀲𑀸𑀧𑀺. 𑀇𑀫𑀁 𑀧𑀦 𑀯𑀺𑀪𑀸𑀕𑀁 𑀅𑀓𑀢𑁆𑀯𑀸 ‘‘𑀘𑀢𑁆𑀢𑀸𑀭𑁄 𑀫𑀳𑀸𑀪𑀽𑀢𑀸 𑀳𑁂𑀢𑀽’’𑀢𑀺 𑀯𑀘𑀦𑀫𑀢𑁆𑀢𑀁 𑀦𑀺𑀲𑁆𑀲𑀸𑀬 𑀅𑀯𑀺𑀲𑁂𑀲𑁂𑀦𑁂𑀯 𑀭𑀽𑀧𑀁 𑀳𑁂𑀢𑀽𑀢𑀺 𑀬𑁂𑀲𑀁 𑀮𑀤𑁆𑀥𑀺, 𑀲𑁂𑀬𑁆𑀬𑀣𑀸𑀧𑀺 𑀉𑀢𑁆𑀢𑀭𑀸𑀧𑀣𑀓𑀸𑀦𑀁; 𑀢𑁂 𑀲𑀦𑁆𑀥𑀸𑀬 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀧𑀝𑀺𑀜𑁆𑀜𑀸 𑀇𑀢𑀭𑀲𑁆𑀲. 𑀅𑀮𑁄𑀪𑁄 𑀳𑁂𑀢𑀽𑀢𑀺 𑀓𑀺𑀁 𑀢𑁂 𑀭𑀽𑀧𑀁 𑀅𑀮𑁄𑀪𑀲𑀗𑁆𑀔𑀸𑀢𑁄 𑀳𑁂𑀢𑀽𑀢𑀺 𑀧𑀼𑀘𑁆𑀙𑀢𑀺, 𑀇𑀢𑀭𑁄 𑀧𑀝𑀺𑀓𑁆𑀔𑀺𑀧𑀢𑀺. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀫𑀳𑀸𑀪𑀽𑀢𑀸 𑀉𑀧𑀸𑀤𑀸𑀬𑀭𑀽𑀧𑀸𑀦𑀁 𑀉𑀧𑀸𑀤𑀸𑀬𑀳𑁂𑀢𑀽𑀢𑀺 𑀏𑀢𑁆𑀣 𑀧𑀘𑁆𑀘𑀬𑀝𑁆𑀞𑁂𑀦 𑀳𑁂𑀢𑀼𑀪𑀸𑀯𑁄 𑀯𑀼𑀢𑁆𑀢𑁄, 𑀦 𑀫𑀽𑀮𑀝𑁆𑀞𑁂𑀦, 𑀢𑀲𑁆𑀫𑀸 𑀅𑀲𑀸𑀥𑀓𑀦𑁆𑀢𑀺.

𑀭𑀽𑀧𑀁 𑀳𑁂𑀢𑀽𑀢𑀺𑀓𑀣𑀸𑀯𑀡𑁆𑀡𑀦𑀸.

𑁭𑁫𑁭-𑁭𑁫𑁯. 𑀲𑀳𑁂𑀢𑀼𑀓𑀓𑀣𑀸𑀬𑀫𑁆𑀧𑀺 𑀇𑀫𑀺𑀦𑀸𑀯 𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄𑀢𑀺.

𑀭𑀽𑀧𑀁 𑀲𑀳𑁂𑀢𑀼𑀓𑀦𑁆𑀢𑀺𑀓𑀣𑀸𑀯𑀡𑁆𑀡𑀦𑀸.

𑁭. 𑀭𑀽𑀧𑀁 𑀓𑀼𑀲𑀮𑀸𑀓𑀼𑀲𑀮𑀦𑁆𑀢𑀺𑀓𑀣𑀸𑀯𑀡𑁆𑀡𑀦𑀸

𑁭𑁬𑁦-𑁭𑁬𑁪. 𑀇𑀤𑀸𑀦𑀺 𑀭𑀽𑀧𑀁 𑀓𑀼𑀲𑀮𑀸𑀓𑀼𑀲𑀮𑀦𑁆𑀢𑀺𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀣 ‘‘𑀓𑀸𑀬𑀓𑀫𑁆𑀫𑀁 𑀯𑀘𑀻𑀓𑀫𑁆𑀫𑀁 𑀓𑀼𑀲𑀮𑀫𑁆𑀧𑀺 𑀅𑀓𑀼𑀲𑀮𑀫𑁆𑀧𑀻’’𑀢𑀺𑀯𑀘𑀦𑀁 𑀦𑀺𑀲𑁆𑀲𑀸𑀬 𑀓𑀸𑀬𑀯𑀘𑀻𑀓𑀫𑁆𑀫𑀲𑀗𑁆𑀔𑀸𑀢𑀁 𑀓𑀸𑀬𑀯𑀺𑀜𑁆𑀜𑀢𑁆𑀢𑀺𑀯𑀘𑀻𑀯𑀺𑀜𑁆𑀜𑀢𑁆𑀢𑀺𑀭𑀽𑀧𑀁 𑀓𑀼𑀲𑀮𑀫𑁆𑀧𑀺 𑀅𑀓𑀼𑀲𑀮𑀫𑁆𑀧𑀻𑀢𑀺 𑀬𑁂𑀲𑀁 𑀮𑀤𑁆𑀥𑀺, 𑀲𑁂𑀬𑁆𑀬𑀣𑀸𑀧𑀺 𑀫𑀳𑀺𑀲𑀸𑀲𑀓𑀸𑀦𑀜𑁆𑀘𑁂𑀯 𑀲𑀫𑁆𑀫𑀺𑀢𑀺𑀬𑀸𑀦𑀜𑁆𑀘; 𑀢𑁂 𑀲𑀦𑁆𑀥𑀸𑀬 𑀭𑀽𑀧𑀁 𑀓𑀼𑀲𑀮𑀦𑁆𑀢𑀺 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲 𑀧𑀝𑀺𑀜𑁆𑀜𑀸 𑀇𑀢𑀭𑀲𑁆𑀲. 𑀅𑀣 𑀦𑀁 ‘‘𑀬𑀤𑀺 𑀢𑁂 𑀭𑀽𑀧𑀁 𑀓𑀼𑀲𑀮𑀁, 𑀏𑀯𑀁𑀯𑀺𑀥𑁂𑀦 𑀅𑀦𑁂𑀦 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀘𑁄𑀤𑁂𑀢𑀼𑀁 𑀲𑀸𑀭𑀫𑁆𑀫𑀡𑀦𑁆𑀢𑀺 𑀆𑀤𑀺𑀫𑀸𑀳. 𑀧𑀭𑀢𑁄 𑀅𑀓𑀼𑀲𑀮𑀧𑀜𑁆𑀳𑁂𑀧𑀺 𑀏𑀲𑁂𑀯 𑀦𑀬𑁄. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀭𑀽𑀧𑀁 𑀓𑀼𑀲𑀮𑀸𑀓𑀼𑀲𑀮𑀦𑁆𑀢𑀺𑀓𑀣𑀸𑀯𑀡𑁆𑀡𑀦𑀸.

𑁮. 𑀭𑀽𑀧𑀁 𑀯𑀺𑀧𑀸𑀓𑁄𑀢𑀺𑀓𑀣𑀸𑀯𑀡𑁆𑀡𑀦𑀸

𑁭𑁬𑁫-𑁭𑁬𑁭. 𑀇𑀤𑀸𑀦𑀺 𑀭𑀽𑀧𑀁 𑀯𑀺𑀧𑀸𑀓𑁄𑀢𑀺𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀣 𑀬𑀁 𑀓𑀫𑁆𑀫𑀲𑁆𑀲 𑀓𑀢𑀢𑁆𑀢𑀸 𑀉𑀧𑁆𑀧𑀦𑁆𑀦𑀸 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀯𑀺𑀬 𑀓𑀫𑁆𑀫𑀲𑁆𑀲 𑀓𑀢𑀢𑁆𑀢𑀸 𑀉𑀧𑁆𑀧𑀦𑁆𑀦𑀁 𑀢𑀁 𑀭𑀽𑀧𑀫𑁆𑀧𑀺 𑀯𑀺𑀧𑀸𑀓𑁄𑀢𑀺 𑀬𑁂𑀲𑀁 𑀮𑀤𑁆𑀥𑀺, 𑀲𑁂𑀬𑁆𑀬𑀣𑀸𑀧𑀺 𑀅𑀦𑁆𑀥𑀓𑀸𑀦𑀜𑁆𑀘𑁂𑀯 𑀲𑀫𑁆𑀫𑀺𑀢𑀺𑀬𑀸𑀦𑀜𑁆𑀘; 𑀢𑁂 𑀲𑀦𑁆𑀥𑀸𑀬 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀧𑀝𑀺𑀜𑁆𑀜𑀸 𑀇𑀢𑀭𑀲𑁆𑀲. 𑀅𑀣 𑀦𑀁 ‘‘𑀬𑀤𑀺 𑀢𑁂 𑀭𑀽𑀧𑀁 𑀯𑀺𑀧𑀸𑀓𑁄, 𑀏𑀯𑀁𑀯𑀺𑀥𑁂𑀦 𑀅𑀦𑁂𑀦 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀘𑁄𑀤𑁂𑀢𑀼𑀁 𑀲𑀼𑀔𑀯𑁂𑀤𑀦𑀻𑀬𑀦𑁆𑀢𑀺𑀆𑀤𑀺𑀫𑀸𑀳. 𑀲𑁂𑀲𑀁 𑀬𑀣𑀸𑀧𑀸𑀴𑀺𑀫𑁂𑀯 𑀦𑀺𑀬𑁆𑀬𑀸𑀢𑀻𑀢𑀺.

𑀭𑀽𑀧𑀁 𑀯𑀺𑀧𑀸𑀓𑁄𑀢𑀺𑀓𑀣𑀸𑀯𑀡𑁆𑀡𑀦𑀸.

𑁯. 𑀭𑀽𑀧𑀁 𑀭𑀽𑀧𑀸𑀯𑀘𑀭𑀸𑀭𑀽𑀧𑀸𑀯𑀘𑀭𑀦𑁆𑀢𑀺𑀓𑀣𑀸𑀯𑀡𑁆𑀡𑀦𑀸

𑁭𑁬𑁮-𑁭𑁭𑁦. 𑀇𑀤𑀸𑀦𑀺 𑀭𑀽𑀧𑀁 𑀭𑀽𑀧𑀸𑀯𑀘𑀭𑀸𑀭𑀽𑀧𑀸𑀯𑀘𑀭𑀦𑁆𑀢𑀺𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀣 𑀬𑀁 𑀓𑀸𑀫𑀸𑀯𑀘𑀭𑀓𑀫𑁆𑀫𑀲𑁆𑀲 𑀓𑀢𑀢𑁆𑀢𑀸 𑀭𑀽𑀧𑀁, 𑀢𑀁 𑀬𑀲𑁆𑀫𑀸 𑀓𑀸𑀫𑀸𑀯𑀘𑀭𑀁, 𑀢𑀲𑁆𑀫𑀸 𑀭𑀽𑀧𑀸𑀯𑀘𑀭𑀸𑀭𑀽𑀧𑀸𑀯𑀘𑀭𑀓𑀫𑁆𑀫𑀸𑀦𑀫𑁆𑀧𑀺 𑀓𑀢𑀢𑁆𑀢𑀸 𑀭𑀽𑀧𑁂𑀦 𑀭𑀽𑀧𑀸𑀯𑀘𑀭𑀸𑀭𑀽𑀧𑀸𑀯𑀘𑀭𑁂𑀦 𑀪𑀯𑀺𑀢𑀩𑁆𑀩𑀦𑁆𑀢𑀺 𑀬𑁂𑀲𑀁 𑀮𑀤𑁆𑀥𑀺, 𑀲𑁂𑀬𑁆𑀬𑀣𑀸𑀧𑀺 𑀅𑀦𑁆𑀥𑀓𑀸𑀦𑀁; 𑀢𑁂 𑀲𑀦𑁆𑀥𑀸𑀬 𑀅𑀢𑁆𑀣𑀺 𑀭𑀽𑀧𑀁 𑀭𑀽𑀧𑀸𑀯𑀘𑀭𑀸𑀭𑀽𑀧𑀸𑀯𑀘𑀭𑀦𑁆𑀢𑀺 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀧𑀝𑀺𑀜𑁆𑀜𑀸 𑀇𑀢𑀭𑀲𑁆𑀲. 𑀲𑁂𑀲𑀫𑁂𑀢𑁆𑀣 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀫𑁂𑀯𑀸𑀢𑀺.

𑀭𑀽𑀧𑀁 𑀭𑀽𑀧𑀸𑀯𑀘𑀭𑀸𑀭𑀽𑀧𑀸𑀯𑀘𑀭𑀦𑁆𑀢𑀺𑀓𑀣𑀸𑀯𑀡𑁆𑀡𑀦𑀸.

𑁧𑁦. 𑀭𑀽𑀧𑀸𑀭𑀽𑀧𑀥𑀸𑀢𑀼𑀧𑀭𑀺𑀬𑀸𑀧𑀦𑁆𑀦𑀓𑀣𑀸𑀯𑀡𑁆𑀡𑀦𑀸

𑁭𑁭𑁧-𑁭𑁭𑁫. 𑀇𑀤𑀸𑀦𑀺 𑀭𑀽𑀧𑀭𑀸𑀕𑁄 𑀭𑀽𑀧𑀥𑀸𑀢𑀼𑀧𑀭𑀺𑀬𑀸𑀧𑀦𑁆𑀦𑁄 𑀅𑀭𑀽𑀧𑀭𑀸𑀕𑁄 𑀅𑀭𑀽𑀧𑀥𑀸𑀢𑀼𑀧𑀭𑀺𑀬𑀸𑀧𑀦𑁆𑀦𑁄𑀢𑀺 𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀣 𑀬𑀲𑁆𑀫𑀸 𑀓𑀸𑀫𑀭𑀸𑀕𑁄 𑀓𑀸𑀫𑀥𑀸𑀢𑀼𑀧𑀭𑀺𑀬𑀸𑀧𑀦𑁆𑀦𑁄, 𑀢𑀲𑁆𑀫𑀸 𑀭𑀽𑀧𑀭𑀸𑀕𑀸𑀭𑀽𑀧𑀭𑀸𑀕𑁂𑀳𑀺𑀧𑀺 𑀭𑀽𑀧𑀥𑀸𑀢𑀼𑀅𑀭𑀽𑀧𑀥𑀸𑀢𑀼𑀧𑀭𑀺𑀬𑀸𑀧𑀦𑁆𑀦𑁂𑀳𑀺 𑀪𑀯𑀺𑀢𑀩𑁆𑀩𑀦𑁆𑀢𑀺 𑀬𑁂𑀲𑀁 𑀮𑀤𑁆𑀥𑀺, 𑀲𑁂𑀬𑁆𑀬𑀣𑀸𑀧𑀺 𑀅𑀦𑁆𑀥𑀓𑀸𑀦𑀁, 𑀢𑁂 𑀲𑀦𑁆𑀥𑀸𑀬 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀧𑀝𑀺𑀜𑁆𑀜𑀸 𑀇𑀢𑀭𑀲𑁆𑀲. 𑀲𑁂𑀲𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀓𑁂𑀯𑀮𑀜𑁆𑀳𑀺 𑀢𑀢𑁆𑀣 ‘‘𑀭𑀽𑀧𑀥𑀸𑀢𑀼𑀁 𑀅𑀦𑀼𑀲𑁂𑀢𑀺, 𑀅𑀭𑀽𑀧𑀥𑀸𑀢𑀼𑀁 𑀅𑀦𑀼𑀲𑁂𑀢𑀻’’𑀢𑀺 𑀧𑀤𑀁 𑀯𑀺𑀲𑁂𑀲𑁄. 𑀲𑀸 𑀘 𑀮𑀤𑁆𑀥𑀺 𑀅𑀦𑁆𑀥𑀓𑀸𑀦𑀜𑁆𑀘𑁂𑀯 𑀲𑀫𑁆𑀫𑀺𑀢𑀺𑀬𑀸𑀦𑀜𑁆𑀘. 𑀅𑀬𑀁 𑀅𑀦𑁆𑀥𑀓𑀸𑀦𑀁𑀬𑁂𑀯𑀸𑀢𑀺.

𑀭𑀽𑀧𑀭𑀸𑀕𑁄 𑀭𑀽𑀧𑀥𑀸𑀢𑀼𑀧𑀭𑀺𑀬𑀸𑀧𑀦𑁆𑀦𑁄 𑀅𑀭𑀽𑀧𑀭𑀸𑀕𑁄 𑀅𑀭𑀽𑀧𑀥𑀸𑀢𑀼𑀧𑀭𑀺𑀬𑀸𑀧𑀦𑁆𑀦𑁄𑀢𑀺𑀓𑀣𑀸𑀯𑀡𑁆𑀡𑀦𑀸.

𑀭𑀽𑀧𑀸𑀭𑀽𑀧𑀥𑀸𑀢𑀼𑀧𑀭𑀺𑀬𑀸𑀧𑀦𑁆𑀦𑀓𑀣𑀸𑀯𑀡𑁆𑀡𑀦𑀸.

𑀲𑁄𑀴𑀲𑀫𑁄 𑀯𑀕𑁆𑀕𑁄.