𑁧𑁭. 𑀲𑀢𑁆𑀢𑀭𑀲𑀫𑀯𑀕𑁆𑀕𑁄

𑁧. 𑀅𑀢𑁆𑀣𑀺 𑀅𑀭𑀳𑀢𑁄 𑀧𑀼𑀜𑁆𑀜𑀽𑀧𑀘𑀬𑀓𑀣𑀸𑀯𑀡𑁆𑀡𑀦𑀸

𑁭𑁭𑁬-𑁭𑁭𑁯. 𑀇𑀤𑀸𑀦𑀺 𑀅𑀢𑁆𑀣𑀺 𑀅𑀭𑀳𑀢𑁄 𑀧𑀼𑀜𑁆𑀜𑀽𑀧𑀘𑀬𑁄𑀢𑀺𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀣 𑀬𑁂𑀲𑀁 𑀅𑀭𑀳𑀢𑁄 𑀤𑀸𑀦𑀲𑀁𑀯𑀺𑀪𑀸𑀕𑀘𑁂𑀢𑀺𑀬𑀯𑀦𑁆𑀤𑀦𑀸𑀤𑀻𑀦𑀺 𑀓𑀫𑁆𑀫𑀸𑀦𑀺 𑀤𑀺𑀲𑁆𑀯𑀸 𑀅𑀢𑁆𑀣𑀺 𑀅𑀭𑀳𑀢𑁄 𑀧𑀼𑀜𑁆𑀜𑀽𑀧𑀘𑀬𑁄𑀢𑀺 𑀮𑀤𑁆𑀥𑀺, 𑀲𑁂𑀬𑁆𑀬𑀣𑀸𑀧𑀺 𑀅𑀦𑁆𑀥𑀓𑀸𑀦𑀁; 𑀢𑁂 𑀲𑀦𑁆𑀥𑀸𑀬 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀧𑀝𑀺𑀜𑁆𑀜𑀸 𑀇𑀢𑀭𑀲𑁆𑀲. 𑀅𑀣 𑀦𑀁 ‘‘𑀅𑀭𑀳𑀸 𑀦𑀸𑀫 𑀧𑀳𑀻𑀦𑀧𑀼𑀜𑁆𑀜𑀧𑀸𑀧𑁄, 𑀲𑁄 𑀬𑀤𑀺 𑀧𑀼𑀜𑁆𑀜𑀁 𑀓𑀭𑁂𑀬𑁆𑀬, 𑀧𑀸𑀧𑀫𑁆𑀧𑀺 𑀓𑀭𑁂𑀬𑁆𑀬𑀸’’𑀢𑀺 𑀘𑁄𑀤𑁂𑀢𑀼𑀁 𑀅𑀧𑀼𑀜𑁆𑀜𑀽𑀧𑀘𑀬𑁄𑀢𑀺 𑀆𑀳. 𑀇𑀢𑀭𑁄 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀓𑀺𑀭𑀺𑀬𑀁 𑀅𑀧𑀲𑁆𑀲𑀦𑁆𑀢𑁄 𑀧𑀝𑀺𑀓𑁆𑀔𑀺𑀧𑀢𑀺. 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀦𑁆𑀢𑀺𑀆𑀤𑀻𑀲𑀼 𑀪𑀯𑀕𑀸𑀫𑀺𑀓𑀫𑁆𑀫𑀁 𑀅𑀭𑀳𑀢𑁄 𑀦𑀢𑁆𑀣𑀻𑀢𑀺 𑀧𑀝𑀺𑀓𑁆𑀔𑀺𑀧𑀢𑀺. 𑀤𑀸𑀦𑀁 𑀤𑀤𑁂𑀬𑁆𑀬𑀸𑀢𑀺𑀆𑀤𑀻𑀲𑀼 𑀓𑀺𑀭𑀺𑀬𑀘𑀺𑀢𑁆𑀢𑁂𑀦 𑀤𑀸𑀦𑀸𑀤𑀺𑀧𑀯𑀢𑁆𑀢𑀺𑀲𑀩𑁆𑀪𑀸𑀯𑀢𑁄 𑀲𑀓𑀯𑀸𑀤𑀻 𑀧𑀝𑀺𑀚𑀸𑀦𑀸𑀢𑀺. 𑀇𑀢𑀭𑁄 𑀘𑀺𑀢𑁆𑀢𑀁 𑀅𑀦𑀸𑀤𑀺𑀬𑀺𑀢𑁆𑀯𑀸 𑀓𑀺𑀭𑀺𑀬𑀸𑀧𑀯𑀢𑁆𑀢𑀺𑀫𑀢𑁆𑀢𑀤𑀲𑁆𑀲𑀦𑁂𑀦𑁂𑀯 𑀮𑀤𑁆𑀥𑀺𑀁 𑀧𑀢𑀺𑀝𑁆𑀞𑀧𑁂𑀢𑀺. 𑀲𑀸 𑀧𑀦 𑀅𑀬𑁄𑀦𑀺𑀲𑁄 𑀧𑀢𑀺𑀝𑁆𑀞𑀸𑀧𑀺𑀢𑀢𑁆𑀢𑀸 𑀅𑀧𑁆𑀧𑀢𑀺𑀝𑁆𑀞𑀸𑀧𑀺𑀢𑀸 𑀳𑁄𑀢𑀻𑀢𑀺.

𑀅𑀢𑁆𑀣𑀺 𑀅𑀭𑀳𑀢𑁄 𑀧𑀼𑀜𑁆𑀜𑀽𑀧𑀘𑀬𑁄𑀢𑀺𑀓𑀣𑀸𑀯𑀡𑁆𑀡𑀦𑀸.

𑁨. 𑀦𑀢𑁆𑀣𑀺 𑀅𑀭𑀳𑀢𑁄 𑀅𑀓𑀸𑀮𑀫𑀘𑁆𑀘𑀽𑀢𑀺𑀓𑀣𑀸𑀯𑀡𑁆𑀡𑀦𑀸

𑁭𑁮𑁦. 𑀇𑀤𑀸𑀦𑀺 𑀦𑀢𑁆𑀣𑀺 𑀅𑀭𑀳𑀢𑁄 𑀅𑀓𑀸𑀮𑀫𑀘𑁆𑀘𑀽𑀢𑀺𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀣 ‘‘𑀦𑀸𑀳𑀁, 𑀪𑀺𑀓𑁆𑀔𑀯𑁂, 𑀲𑀜𑁆𑀘𑁂𑀢𑀦𑀺𑀓𑀸𑀦𑀁 𑀓𑀫𑁆𑀫𑀸𑀦𑀁 𑀓𑀢𑀸𑀦𑀁 𑀉𑀧𑀘𑀺𑀢𑀸𑀦𑀁 𑀅𑀧𑀝𑀺𑀲𑀁𑀯𑁂𑀤𑀺𑀢𑁆𑀯𑀸 𑀩𑁆𑀬𑀦𑁆𑀢𑀻𑀪𑀸𑀯𑀁 𑀯𑀤𑀸𑀫𑀻’’𑀢𑀺 (𑀅. 𑀦𑀺. 𑁧𑁦.𑁨𑁧𑁭) 𑀲𑀼𑀢𑁆𑀢𑀲𑁆𑀲 𑀅𑀢𑁆𑀣𑀁 𑀅𑀬𑁄𑀦𑀺𑀲𑁄 𑀕𑀳𑁂𑀢𑁆𑀯𑀸 ‘‘𑀅𑀭𑀳𑀢𑀸 𑀦𑀸𑀫 𑀲𑀩𑁆𑀩𑀓𑀫𑁆𑀫𑀯𑀺𑀧𑀸𑀓𑀁 𑀧𑀝𑀺𑀲𑀁𑀯𑁂𑀤𑀬𑀺𑀢𑁆𑀯𑀸𑀯 𑀧𑀭𑀺𑀦𑀺𑀩𑁆𑀩𑀸𑀬𑀺𑀢𑀩𑁆𑀩𑀁, 𑀢𑀲𑁆𑀫𑀸 𑀦𑀢𑁆𑀣𑀺, 𑀅𑀭𑀳𑀢𑁄 𑀅𑀓𑀸𑀮𑀫𑀘𑁆𑀘𑀽’’𑀢𑀺 𑀬𑁂𑀲𑀁 𑀮𑀤𑁆𑀥𑀺, 𑀲𑁂𑀬𑁆𑀬𑀣𑀸𑀧𑀺 𑀭𑀸𑀚𑀕𑀺𑀭𑀺𑀓𑀸𑀦𑀜𑁆𑀘𑁂𑀯 𑀲𑀺𑀤𑁆𑀥𑀢𑁆𑀣𑀺𑀓𑀸𑀦𑀜𑁆𑀘; 𑀢𑁂 𑀲𑀦𑁆𑀥𑀸𑀬 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀧𑀝𑀺𑀜𑁆𑀜𑀸 𑀇𑀢𑀭𑀲𑁆𑀲. 𑀅𑀣 𑀦𑀁 ‘‘𑀲𑀘𑁂 𑀢𑀲𑁆𑀲 𑀦𑀢𑁆𑀣𑀺 𑀅𑀓𑀸𑀮𑀫𑀘𑁆𑀘𑀼, 𑀅𑀭𑀳𑀦𑁆𑀢𑀖𑀸𑀢𑀓𑁂𑀦 𑀦𑀸𑀫 𑀦 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀘𑁄𑀤𑁂𑀢𑀼𑀁 𑀦𑀢𑁆𑀣𑀺 𑀅𑀭𑀳𑀦𑁆𑀢𑀖𑀸𑀢𑀓𑁄𑀢𑀺 𑀆𑀳. 𑀇𑀢𑀭𑁄 𑀆𑀦𑀦𑁆𑀢𑀭𑀺𑀬𑀓𑀫𑁆𑀫𑀲𑁆𑀲 𑀘𑁂𑀯 𑀢𑀸𑀤𑀺𑀲𑀸𑀦𑀜𑁆𑀘 𑀧𑀼𑀕𑁆𑀕𑀮𑀸𑀦𑀁 𑀲𑀩𑁆𑀪𑀸𑀯𑀢𑁄 𑀧𑀝𑀺𑀓𑁆𑀔𑀺𑀧𑀢𑀺.

𑁭𑁮𑁧. 𑀯𑀺𑀲𑀁 𑀦 𑀓𑀫𑁂𑀬𑁆𑀬𑀸𑀢𑀺 𑀧𑀜𑁆𑀳𑁂 ‘‘𑀬𑀸𑀯 𑀧𑀼𑀩𑁆𑀩𑁂 𑀓𑀢𑀓𑀫𑁆𑀫𑀁 𑀧𑀭𑀺𑀓𑁆𑀔𑀬𑀁 𑀦 𑀕𑀘𑁆𑀙𑀢𑀺, 𑀢𑀸𑀯 𑀦 𑀓𑀫𑀢𑀻’’𑀢𑀺 𑀮𑀤𑁆𑀥𑀺𑀬𑀸 𑀧𑀝𑀺𑀓𑁆𑀔𑀺𑀧𑀢𑀺. 𑀲𑁂𑀲𑀫𑁂𑀢𑁆𑀣 𑀬𑀣𑀸𑀧𑀸𑀴𑀺𑀫𑁂𑀯 𑀦𑀺𑀬𑁆𑀬𑀸𑀢𑀺.

𑁭𑁮𑁨. 𑀦𑀸𑀳𑀁, 𑀪𑀺𑀓𑁆𑀔𑀯𑁂𑀢𑀺 𑀲𑀼𑀢𑁆𑀢𑀁 𑀇𑀤𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋 𑀲𑀜𑁆𑀘𑁂𑀢𑀦𑀺𑀓𑀸𑀦𑀁 𑀓𑀫𑁆𑀫𑀸𑀦𑀁 𑀓𑀢𑀸𑀦𑀁 𑀯𑀺𑀧𑀸𑀓𑀁 𑀅𑀧𑀝𑀺𑀲𑀁𑀯𑁂𑀤𑀺𑀢𑁆𑀯𑀸 𑀅𑀯𑀺𑀦𑁆𑀤𑀺𑀢𑁆𑀯𑀸 𑀅𑀦𑀦𑀼𑀪𑀯𑀺𑀢𑁆𑀯𑀸 𑀩𑁆𑀬𑀦𑁆𑀢𑀻𑀪𑀸𑀯𑀁 𑀢𑁂𑀲𑀁 𑀓𑀫𑁆𑀫𑀸𑀦𑀁 𑀧𑀭𑀺𑀯𑀝𑀼𑀫𑀧𑀭𑀺𑀘𑁆𑀙𑀺𑀦𑁆𑀦𑀪𑀸𑀯𑀁 𑀦 𑀯𑀤𑀸𑀫𑀺, 𑀢𑀜𑁆𑀘 𑀔𑁄 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀸𑀦𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂, 𑀦 𑀢𑀢𑁄 𑀧𑀭𑀁, 𑀉𑀧𑀧𑀚𑁆𑀚𑀯𑁂𑀤𑀦𑀻𑀬𑀸𑀦𑀁 𑀅𑀦𑀦𑁆𑀢𑀭𑀁 𑀉𑀧𑀧𑀢𑁆𑀢𑀺𑀁 𑀉𑀧𑀧𑀚𑁆𑀚𑀺𑀢𑁆𑀯𑀸𑀯 𑀦 𑀢𑀢𑁄 𑀧𑀭𑀁, 𑀅𑀧𑀭𑀸𑀧𑀭𑀺𑀬𑀯𑁂𑀤𑀦𑀻𑀬𑀸𑀦𑀁 𑀬𑀤𑀸 𑀯𑀺𑀧𑀸𑀓𑁄𑀓𑀸𑀲𑀁 𑀮𑀪𑀦𑁆𑀢𑀺, 𑀢𑀣𑀸𑀭𑀽𑀧𑁂 𑀅𑀧𑀭𑀸𑀧𑀭𑁂 𑀯𑀸 𑀧𑀭𑀺𑀬𑀸𑀬𑁂. 𑀏𑀯𑀁 𑀲𑀩𑁆𑀩𑀣𑀸𑀧𑀺 𑀲𑀁𑀲𑀸𑀭𑀧𑀯𑀢𑁆𑀢𑁂 𑀲𑀢𑀺 𑀮𑀤𑁆𑀥𑀯𑀺𑀧𑀸𑀓𑀯𑀸𑀭𑁂 𑀓𑀫𑁆𑀫𑁂 𑀦 𑀯𑀺𑀚𑁆𑀚𑀢𑁂𑀲𑁄 𑀚𑀕𑀢𑀺𑀧𑁆𑀧𑀤𑁂𑀲𑁄, 𑀬𑀢𑁆𑀣𑀝𑁆𑀞𑀺𑀢𑁄 𑀫𑀼𑀘𑁆𑀘𑁂𑀬𑁆𑀬 𑀧𑀸𑀧𑀓𑀫𑁆𑀫𑀸𑀢𑀺. 𑀏𑀯𑀁 𑀲𑀦𑁆𑀢𑁂 𑀬𑀤𑁂𑀢𑀁 ‘‘𑀅𑀮𑀤𑁆𑀥𑀯𑀺𑀧𑀸𑀓𑀯𑀸𑀭𑀫𑁆𑀧𑀺 𑀓𑀫𑁆𑀫𑀁 𑀅𑀯𑀲𑁆𑀲𑀁 𑀅𑀭𑀳𑀢𑁄 𑀧𑀝𑀺𑀲𑀁𑀯𑁂𑀤𑀺𑀢𑀩𑁆𑀩’’𑀦𑁆𑀢𑀺 𑀓𑀧𑁆𑀧𑀦𑀸𑀯𑀲𑁂𑀦 ‘‘𑀦𑀢𑁆𑀣𑀺 𑀅𑀭𑀳𑀢𑁄 𑀅𑀓𑀸𑀮𑀫𑀘𑁆𑀘𑀽’’𑀢𑀺 𑀮𑀤𑁆𑀥𑀺𑀧𑀢𑀺𑀝𑁆𑀞𑀸𑀧𑀦𑀁 𑀓𑀢𑀁, 𑀢𑀁 𑀤𑀼𑀓𑁆𑀓𑀝𑀫𑁂𑀯𑀸𑀢𑀺.

𑀦𑀢𑁆𑀣𑀺 𑀅𑀭𑀳𑀢𑁄 𑀅𑀓𑀸𑀮𑀫𑀘𑁆𑀘𑀽𑀢𑀺𑀓𑀣𑀸𑀯𑀡𑁆𑀡𑀦𑀸.

𑁩. 𑀲𑀩𑁆𑀩𑀫𑀺𑀤𑀁 𑀓𑀫𑁆𑀫𑀢𑁄𑀢𑀺𑀓𑀣𑀸𑀯𑀡𑁆𑀡𑀦𑀸

𑁭𑁮𑁩. 𑀇𑀤𑀸𑀦𑀺 𑀲𑀩𑁆𑀩𑀫𑀺𑀤𑀁 𑀓𑀫𑁆𑀫𑀢𑁄𑀢𑀺𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀣 ‘‘𑀓𑀫𑁆𑀫𑀼𑀦𑀸 𑀯𑀢𑁆𑀢𑀢𑀺 𑀮𑁄𑀓𑁄’’𑀢𑀺 𑀲𑀼𑀢𑁆𑀢𑀁 𑀦𑀺𑀲𑁆𑀲𑀸𑀬 ‘‘𑀲𑀩𑁆𑀩𑀫𑀺𑀤𑀁 𑀓𑀫𑁆𑀫𑀓𑀺𑀮𑁂𑀲𑀯𑀺𑀧𑀸𑀓𑀯𑀝𑁆𑀝𑀁 𑀓𑀫𑁆𑀫𑀢𑁄𑀯 𑀳𑁄𑀢𑀻’’𑀢𑀺 𑀬𑁂𑀲𑀁 𑀮𑀤𑁆𑀥𑀺, 𑀲𑁂𑀬𑁆𑀬𑀣𑀸𑀧𑀺 𑀭𑀸𑀚𑀕𑀺𑀭𑀺𑀓𑀸𑀦𑀜𑁆𑀘𑁂𑀯 𑀲𑀺𑀤𑁆𑀥𑀢𑁆𑀣𑀺𑀓𑀸𑀦𑀜𑁆𑀘; 𑀢𑁂 𑀲𑀦𑁆𑀥𑀸𑀬 𑀲𑀩𑁆𑀩𑀫𑀺𑀤𑀦𑁆𑀢𑀺 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀧𑀝𑀺𑀜𑁆𑀜𑀸 𑀇𑀢𑀭𑀲𑁆𑀲. 𑀅𑀣 𑀦𑀁 ‘‘𑀏𑀯𑀁 𑀲𑀦𑁆𑀢𑁂 𑀓𑀫𑁆𑀫𑀫𑁆𑀧𑀺 𑀓𑀫𑁆𑀫𑀢𑁄 𑀆𑀧𑀚𑁆𑀚𑀢𑀻’’𑀢𑀺 𑀘𑁄𑀤𑁂𑀢𑀼𑀁 𑀓𑀫𑁆𑀫𑀫𑁆𑀧𑀺 𑀓𑀫𑁆𑀫𑀢𑁄𑀢𑀺 𑀆𑀳. 𑀇𑀢𑀭𑁄 𑀬𑀤𑀺 𑀓𑀫𑁆𑀫𑀫𑁆𑀧𑀺 𑀓𑀫𑁆𑀫𑀢𑁄𑀯 𑀦𑀸𑀫 𑀢𑀁 𑀓𑀫𑁆𑀫𑀁 𑀯𑀺𑀧𑀸𑀓𑁄𑀬𑁂𑀯 𑀲𑀺𑀬𑀸𑀢𑀺 𑀧𑀝𑀺𑀓𑁆𑀔𑀺𑀧𑀢𑀺. 𑀧𑀼𑀩𑁆𑀩𑁂𑀓𑀢𑀳𑁂𑀢𑀽𑀢𑀺 ‘‘𑀬𑀤𑀺 𑀲𑀩𑁆𑀩𑀫𑀺𑀤𑀁 𑀓𑀫𑁆𑀫𑀢𑁄, 𑀧𑀼𑀩𑁆𑀩𑁂𑀓𑀢𑀳𑁂𑀢𑀼𑀦𑀸 𑀢𑁂𑀦 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀘𑁄𑀤𑁂𑀢𑀼𑀁 𑀧𑀼𑀘𑁆𑀙𑀢𑀺, 𑀇𑀢𑀭𑁄 𑀧𑀼𑀩𑁆𑀩𑁂𑀓𑀢𑀳𑁂𑀢𑀼𑀯𑀸𑀤𑀪𑀬𑁂𑀦 𑀧𑀝𑀺𑀓𑁆𑀔𑀺𑀧𑀢𑀺.

𑁭𑁮𑁪. 𑀓𑀫𑁆𑀫𑀯𑀺𑀧𑀸𑀓𑀢𑁄𑀢𑀺 ‘‘𑀬𑀤𑀺 𑀲𑀩𑁆𑀩𑀫𑀺𑀤𑀁 𑀓𑀫𑁆𑀫𑀢𑁄, 𑀬𑀁 𑀅𑀢𑀻𑀢𑀪𑀯𑁂 𑀧𑀯𑀢𑁆𑀢𑀲𑁆𑀲 𑀳𑁂𑀢𑀼𑀪𑀽𑀢𑀁 𑀓𑀫𑁆𑀫𑀁, 𑀢𑀫𑁆𑀧𑀺 𑀧𑀼𑀭𑀺𑀫𑀢𑀭𑁂 𑀪𑀯𑁂 𑀓𑀫𑁆𑀫𑀢𑁄𑀢𑀺 𑀓𑀫𑁆𑀫𑀯𑀺𑀧𑀸𑀓𑁄 𑀲𑀫𑁆𑀧𑀚𑁆𑀚𑀢𑀺, 𑀢𑁂𑀦 𑀢𑁂 𑀲𑀩𑁆𑀩𑀫𑀺𑀤𑀁 𑀓𑀫𑁆𑀫𑀯𑀺𑀧𑀸𑀓𑀢𑁄 𑀆𑀧𑀚𑁆𑀚𑀢𑀻’’𑀢𑀺 𑀘𑁄𑀤𑁂𑀢𑀼𑀁 𑀧𑀼𑀘𑁆𑀙𑀢𑀺. 𑀇𑀢𑀭𑁄 𑀩𑀻𑀚𑀢𑁄 𑀅𑀁𑀓𑀼𑀭𑀲𑁆𑀲𑁂𑀯 𑀧𑀘𑁆𑀘𑀼𑀧𑁆𑀧𑀦𑁆𑀦𑀧𑀯𑀢𑁆𑀢𑀲𑁆𑀲 𑀓𑀫𑁆𑀫𑀢𑁄 𑀦𑀺𑀩𑁆𑀩𑀢𑁆𑀢𑀺𑀁 𑀲𑀦𑁆𑀥𑀸𑀬 𑀧𑀝𑀺𑀓𑁆𑀔𑀺𑀧𑀢𑀺. 𑀤𑀼𑀢𑀺𑀬𑀁 𑀧𑀼𑀝𑁆𑀞𑁄 𑀢𑀲𑁆𑀲𑀸𑀧𑀺 𑀓𑀫𑁆𑀫𑀲𑁆𑀲 𑀩𑀻𑀚𑀲𑁆𑀲 𑀧𑀼𑀭𑀺𑀫𑀩𑀻𑀚𑀢𑁄 𑀯𑀺𑀬 𑀧𑀼𑀭𑀺𑀫𑀓𑀫𑁆𑀫𑀢𑁄 𑀧𑀯𑀢𑁆𑀢𑀢𑁆𑀢𑀸 𑀧𑀝𑀺𑀚𑀸𑀦𑀸𑀢𑀺. 𑀧𑀸𑀡𑀁 𑀳𑀦𑁂𑀬𑁆𑀬𑀸𑀢𑀺𑀆𑀤𑀺 ‘‘𑀬𑀤𑀺 𑀲𑀩𑁆𑀩𑀁 𑀓𑀫𑁆𑀫𑀯𑀺𑀧𑀸𑀓𑀢𑁄, 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀦𑀺 𑀓𑀫𑁆𑀫𑀯𑀺𑀧𑀸𑀓𑁂𑀦𑁂𑀯 𑀓𑀭𑁂𑀬𑁆𑀬𑀸’’𑀢𑀺 𑀘𑁄𑀤𑁂𑀢𑀼𑀁 𑀯𑀼𑀢𑁆𑀢𑀁. 𑀇𑀢𑀭𑁄 𑀤𑀼𑀲𑁆𑀲𑀻𑀮𑁆𑀬𑀘𑁂𑀢𑀦𑀸𑀧𑀺 𑀧𑀼𑀭𑀺𑀫𑀓𑀫𑁆𑀫𑀦𑀺𑀩𑁆𑀩𑀢𑁆𑀢𑀸 𑀏𑀓𑁂𑀦 𑀧𑀭𑀺𑀬𑀸𑀬𑁂𑀦 𑀯𑀺𑀧𑀸𑀓𑁄𑀬𑁂𑀯𑀸𑀢𑀺 𑀮𑀤𑁆𑀥𑀺𑀬𑀸 𑀧𑀝𑀺𑀚𑀸𑀦𑀸𑀢𑀺. 𑀅𑀣 𑀦𑀁 ‘‘𑀬𑀤𑀺 𑀢𑁂 𑀧𑀸𑀡𑀸𑀢𑀺𑀧𑀸𑀢𑁄 𑀓𑀫𑁆𑀫𑀯𑀺𑀧𑀸𑀓𑀢𑁄 𑀦𑀺𑀩𑁆𑀩𑀢𑁆𑀢𑀢𑀺, 𑀧𑀸𑀡𑀸𑀢𑀺𑀧𑀸𑀢𑁄 𑀯𑀺𑀬 𑀯𑀺𑀧𑀸𑀓𑁄𑀧𑀺 𑀲𑀨𑀮𑁄 𑀆𑀧𑀚𑁆𑀚𑀢𑀻’’𑀢𑀺 𑀘𑁄𑀤𑁂𑀢𑀼𑀁 𑀲𑀨𑀮𑁄𑀢𑀺 𑀆𑀳. 𑀇𑀢𑀭𑁄 𑀧𑀸𑀡𑀸𑀢𑀺𑀧𑀸𑀢𑀲𑁆𑀲 𑀦𑀺𑀭𑀬𑀲𑀁𑀯𑀢𑁆𑀢𑀦𑀺𑀓𑀸𑀤𑀺𑀪𑀸𑀯𑀢𑁄 𑀲𑀨𑀮𑀢𑀁 𑀧𑀲𑁆𑀲𑀦𑁆𑀢𑁄 𑀧𑀝𑀺𑀚𑀸𑀦𑀸𑀢𑀺. 𑀓𑀫𑁆𑀫𑀯𑀺𑀧𑀸𑀓𑀲𑁆𑀲 𑀧𑀦 𑀇𑀤𑀁 𑀦𑀸𑀫 𑀨𑀮𑀦𑁆𑀢𑀺 𑀯𑀼𑀢𑁆𑀢𑀝𑁆𑀞𑀸𑀦𑀁 𑀅𑀧𑀲𑁆𑀲𑀦𑁆𑀢𑁄 𑀧𑀝𑀺𑀓𑁆𑀔𑀺𑀧𑀢𑀺. 𑀅𑀤𑀺𑀦𑁆𑀦𑀸𑀤𑀸𑀦𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑁄 𑀲𑀨𑀮𑁄𑀢𑀺 𑀤𑁂𑀬𑁆𑀬𑀥𑀫𑁆𑀫𑀯𑀲𑁂𑀦 𑀤𑀸𑀦𑀨𑀮𑀁 𑀧𑀼𑀘𑁆𑀙𑀢𑀺. 𑀓𑀫𑁆𑀫𑀼𑀦𑀸 𑀯𑀢𑁆𑀢𑀢𑀻𑀢𑀺 𑀲𑀼𑀢𑁆𑀢𑀁 ‘‘𑀦𑀢𑁆𑀣𑀺 𑀓𑀫𑁆𑀫’’𑀦𑁆𑀢𑀺 𑀅𑀓𑀫𑁆𑀫𑀯𑀸𑀤𑀺𑀢𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 ‘‘𑀅𑀢𑁆𑀣𑀺 𑀓𑀫𑁆𑀫’’𑀦𑁆𑀢𑀺 𑀓𑀫𑁆𑀫𑀯𑀸𑀤𑀺𑀢𑀁 𑀓𑀫𑁆𑀫𑀲𑁆𑀲𑀓𑀢𑀁 𑀤𑀻𑀧𑁂𑀢𑀺. 𑀦 𑀲𑀩𑁆𑀩𑀲𑁆𑀲𑁂𑀯 𑀓𑀫𑁆𑀫𑀢𑁄 𑀦𑀺𑀩𑁆𑀩𑀢𑁆𑀢𑀺𑀁, 𑀢𑀲𑁆𑀫𑀸 𑀅𑀲𑀸𑀥𑀓𑀦𑁆𑀢𑀺.

𑀲𑀩𑁆𑀩𑀫𑀺𑀤𑀁 𑀓𑀫𑁆𑀫𑀢𑁄𑀢𑀺𑀓𑀣𑀸𑀯𑀡𑁆𑀡𑀦𑀸.

𑁪. 𑀇𑀦𑁆𑀤𑁆𑀭𑀺𑀬𑀩𑀤𑁆𑀥𑀓𑀣𑀸𑀯𑀡𑁆𑀡𑀦𑀸

𑁭𑁮𑁬-𑁭𑁮𑁭. 𑀇𑀤𑀸𑀦𑀺 𑀇𑀦𑁆𑀤𑁆𑀭𑀺𑀬𑀩𑀤𑁆𑀥𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀣 𑀤𑀼𑀯𑀺𑀥𑀁 𑀤𑀼𑀓𑁆𑀔𑀁 𑁋 𑀇𑀦𑁆𑀤𑁆𑀭𑀺𑀬𑀩𑀤𑁆𑀥𑀁, 𑀅𑀦𑀺𑀦𑁆𑀤𑁆𑀭𑀺𑀬𑀩𑀤𑁆𑀥𑀜𑁆𑀘. 𑀇𑀦𑁆𑀤𑁆𑀭𑀺𑀬𑀩𑀤𑁆𑀥𑀁 𑀤𑀼𑀓𑁆𑀔𑀯𑀢𑁆𑀣𑀼𑀢𑀸𑀬 𑀤𑀼𑀓𑁆𑀔𑀁, 𑀅𑀦𑀺𑀦𑁆𑀤𑁆𑀭𑀺𑀬𑀩𑀤𑁆𑀥𑀁 𑀉𑀤𑀬𑀩𑁆𑀩𑀬𑀧𑀝𑀺𑀧𑀻𑀴𑀦𑀝𑁆𑀞𑁂𑀦 ‘‘𑀬𑀤𑀦𑀺𑀘𑁆𑀘𑀁 𑀢𑀁 𑀤𑀼𑀓𑁆𑀔’’𑀦𑁆𑀢𑀺 𑀲𑀗𑁆𑀕𑀳𑀺𑀢𑀢𑁆𑀢𑀸 𑀤𑀼𑀓𑁆𑀔𑀁. 𑀇𑀫𑀁 𑀯𑀺𑀪𑀸𑀕𑀁 𑀅𑀕𑁆𑀕𑀳𑁂𑀢𑁆𑀯𑀸 ‘‘𑀬𑀲𑁆𑀲 𑀧𑀭𑀺𑀜𑁆𑀜𑀸𑀬 𑀪𑀕𑀯𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀯𑀼𑀲𑁆𑀲𑀢𑀺, 𑀢𑀁 𑀇𑀦𑁆𑀤𑁆𑀭𑀺𑀬𑀩𑀤𑁆𑀥𑀫𑁂𑀯 𑀤𑀼𑀓𑁆𑀔𑀁, 𑀦 𑀇𑀢𑀭’’𑀦𑁆𑀢𑀺 𑀬𑁂𑀲𑀁 𑀮𑀤𑁆𑀥𑀺, 𑀲𑁂𑀬𑁆𑀬𑀣𑀸𑀧𑀺 𑀳𑁂𑀢𑀼𑀯𑀸𑀤𑀸𑀦𑀁, 𑀢𑁂𑀲𑀁 𑀇𑀢𑀭𑀲𑁆𑀲𑀸𑀧𑀺 𑀤𑀼𑀓𑁆𑀔𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 𑀇𑀦𑁆𑀤𑁆𑀭𑀺𑀬𑀩𑀤𑁆𑀥𑀜𑁆𑀜𑁂𑀯𑀸𑀢𑀺 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀧𑀝𑀺𑀜𑁆𑀜𑀸 𑀇𑀢𑀭𑀲𑁆𑀲. 𑀅𑀣 𑀦𑀁 ‘‘𑀬𑀲𑁆𑀫𑀸 𑀪𑀕𑀯𑀢𑀸 ‘𑀬𑀤𑀦𑀺𑀘𑁆𑀘𑀁 𑀢𑀁 𑀤𑀼𑀓𑁆𑀔’𑀦𑁆𑀢𑀺 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀇𑀦𑁆𑀤𑁆𑀭𑀺𑀬𑀩𑀤𑁆𑀥𑁂𑀦𑁂𑀯 𑀢𑁂𑀦 𑀅𑀦𑀺𑀘𑁆𑀘𑁂𑀦 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀘𑁄𑀤𑁂𑀢𑀼𑀁 𑀇𑀦𑁆𑀤𑁆𑀭𑀺𑀬𑀩𑀤𑁆𑀥𑀜𑁆𑀜𑁂𑀯 𑀅𑀦𑀺𑀘𑁆𑀘𑀦𑁆𑀢𑀺𑀆𑀤𑀺𑀫𑀸𑀳. 𑀦𑀦𑀼 𑀅𑀦𑀺𑀦𑁆𑀤𑁆𑀭𑀺𑀬𑀩𑀤𑁆𑀥𑀁 𑀅𑀦𑀺𑀘𑁆𑀘𑀦𑁆𑀢𑀺 𑀦𑀦𑀼 𑀧𑀣𑀯𑀻𑀧𑀩𑁆𑀩𑀢𑀧𑀸𑀲𑀸𑀡𑀸𑀤𑀺 𑀅𑀦𑀺𑀦𑁆𑀤𑁆𑀭𑀺𑀬𑀩𑀤𑁆𑀥𑀫𑁆𑀧𑀺 𑀅𑀦𑀺𑀘𑁆𑀘𑀦𑁆𑀢𑀺 𑀅𑀢𑁆𑀣𑁄.

𑁭𑁮𑁮. 𑀦 𑀯𑀢𑁆𑀢𑀩𑁆𑀩𑀁 𑀇𑀦𑁆𑀤𑁆𑀭𑀺𑀬𑀩𑀤𑁆𑀥𑀜𑁆𑀜𑁂𑀯 𑀤𑀼𑀓𑁆𑀔𑀦𑁆𑀢𑀺 𑀧𑀜𑁆𑀳𑁂 𑀆𑀫𑀦𑁆𑀢𑀸𑀢𑀺 𑀧𑀝𑀺𑀜𑁆𑀜𑀸 𑀲𑀓𑀯𑀸𑀤𑀺𑀲𑁆𑀲. 𑀅𑀦𑀺𑀦𑁆𑀤𑁆𑀭𑀺𑀬𑀩𑀤𑁆𑀥𑀜𑁆𑀳𑀺 𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀸𑀦𑀁 𑀆𑀭𑀫𑁆𑀫𑀡𑀁 𑀳𑁄𑀢𑀺. 𑀉𑀡𑁆𑀳𑀓𑀸𑀮𑀲𑁆𑀫𑀺𑀜𑁆𑀳𑀺 𑀅𑀕𑁆𑀕𑀺 𑀲𑀻𑀢𑀓𑀸𑀮𑁂 𑀘 𑀯𑀸𑀢𑁄 𑀤𑀼𑀓𑁆𑀔𑀲𑁆𑀲 𑀆𑀭𑀫𑁆𑀫𑀡𑀁, 𑀦𑀺𑀘𑁆𑀘𑀫𑁆𑀧𑀺 𑀪𑁄𑀕𑀯𑀺𑀦𑀸𑀲𑀸𑀤𑀬𑁄 𑀤𑁄𑀫𑀦𑀲𑁆𑀲𑀲𑁆𑀲. 𑀢𑀲𑁆𑀫𑀸 𑀯𑀺𑀦𑀸𑀧𑀺 𑀅𑀦𑀺𑀘𑁆𑀘𑀝𑁆𑀞𑁂𑀦 𑀅𑀦𑀺𑀦𑁆𑀤𑁆𑀭𑀺𑀬𑀩𑀤𑁆𑀥𑀁 𑀤𑀼𑀓𑁆𑀔𑀦𑁆𑀢𑀺 𑀯𑀢𑁆𑀢𑀩𑁆𑀩𑀁. 𑀓𑀫𑁆𑀫𑀓𑀺𑀮𑁂𑀲𑁂𑀳𑀺 𑀧𑀦 𑀅𑀦𑀺𑀩𑁆𑀩𑀢𑁆𑀢𑀢𑁆𑀢𑀸 𑀤𑀼𑀓𑁆𑀔𑀁 𑀅𑀭𑀺𑀬𑀲𑀘𑁆𑀘𑀦𑁆𑀢𑀺 𑀦 𑀯𑀢𑁆𑀢𑀩𑁆𑀩𑀁, 𑀢𑀣𑀸 𑀫𑀕𑁆𑀕𑁂𑀦 𑀅𑀧𑀭𑀺𑀜𑁆𑀜𑁂𑀬𑁆𑀬𑀢𑁆𑀢𑀸. 𑀬𑀲𑁆𑀫𑀸 𑀧𑀦 𑀢𑀺𑀡𑀓𑀝𑁆𑀞𑀸𑀤𑀺𑀦𑀺𑀭𑁄𑀥𑁄 𑀯𑀸 𑀉𑀢𑀼𑀩𑀻𑀚𑀸𑀤𑀺𑀦𑀺𑀭𑁄𑀥𑁄 𑀯𑀸 𑀤𑀼𑀓𑁆𑀔𑀦𑀺𑀭𑁄𑀥𑀁 𑀅𑀭𑀺𑀬𑀲𑀘𑁆𑀘𑀁 𑀦𑀸𑀫 𑀦 𑀳𑁄𑀢𑀺, 𑀢𑀲𑁆𑀫𑀸 𑀇𑀦𑁆𑀤𑁆𑀭𑀺𑀬𑀩𑀤𑁆𑀥𑀁 𑀤𑀼𑀓𑁆𑀔𑀜𑁆𑀘𑁂𑀯 𑀅𑀭𑀺𑀬𑀲𑀘𑁆𑀘𑀜𑁆𑀘, 𑀇𑀢𑀭𑀁 𑀧𑀦 𑀤𑀼𑀓𑁆𑀔𑀫𑁂𑀯𑀸𑀢𑀺 𑀇𑀤𑀁 𑀦𑀸𑀦𑀢𑁆𑀢𑀁 𑀤𑀲𑁆𑀲𑁂𑀢𑀼𑀁 𑀧𑀝𑀺𑀚𑀸𑀦𑀸𑀢𑀺. 𑀬𑀣𑀸 𑀇𑀦𑁆𑀤𑁆𑀭𑀺𑀬𑀩𑀤𑁆𑀥𑀲𑁆𑀲𑀸𑀢𑀺𑀆𑀤𑀺𑀯𑀘𑀦𑀁 𑀇𑀦𑁆𑀤𑁆𑀭𑀺𑀬𑀩𑀤𑁆𑀥𑀲𑁆𑀲 𑀧𑀭𑀺𑀜𑁆𑀜𑀸𑀬 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑀁 𑀧𑀭𑀺𑀜𑁆𑀜𑀸𑀢𑀲𑁆𑀲 𑀧𑀼𑀦 𑀅𑀦𑀼𑀧𑁆𑀧𑀢𑁆𑀢𑀺𑀁 𑀤𑀻𑀧𑁂𑀢𑀺. 𑀢𑁂𑀦𑁂𑀯𑁂𑀢𑁆𑀣 𑀲𑀓𑀯𑀸𑀤𑀺𑀦𑀸 𑀧𑀝𑀺𑀓𑁆𑀔𑁂𑀧𑁄 𑀓𑀢𑁄. ‘‘𑀬𑀤𑀦𑀺𑀘𑁆𑀘𑀁 𑀢𑀁 𑀤𑀼𑀓𑁆𑀔’’𑀦𑁆𑀢𑀺 𑀯𑀘𑀦𑁂𑀦 𑀧𑀦 𑀲𑀗𑁆𑀕𑀳𑀺𑀢𑀲𑁆𑀲 𑀅𑀦𑀺𑀦𑁆𑀤𑁆𑀭𑀺𑀬𑀩𑀤𑁆𑀥𑀲𑁆𑀲 𑀤𑀼𑀓𑁆𑀔𑀪𑀸𑀯𑀁 𑀧𑀝𑀺𑀲𑁂𑀥𑁂𑀢𑀼𑀁 𑀦 𑀲𑀓𑁆𑀓𑀸𑀢𑀺, 𑀢𑀲𑁆𑀫𑀸 𑀅𑀲𑀸𑀥𑀓𑀦𑁆𑀢𑀺.

𑀇𑀦𑁆𑀤𑁆𑀭𑀺𑀬𑀩𑀤𑁆𑀥𑀓𑀣𑀸𑀯𑀡𑁆𑀡𑀦𑀸.

𑁫. 𑀞𑀧𑁂𑀢𑁆𑀯𑀸 𑀅𑀭𑀺𑀬𑀫𑀕𑁆𑀕𑀦𑁆𑀢𑀺𑀓𑀣𑀸𑀯𑀡𑁆𑀡𑀦𑀸

𑁭𑁮𑁯-𑁭𑁯𑁦. 𑀇𑀤𑀸𑀦𑀺 𑀞𑀧𑁂𑀢𑁆𑀯𑀸 𑀅𑀭𑀺𑀬𑀫𑀕𑁆𑀕𑀦𑁆𑀢𑀺𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀣 ‘‘𑀬𑀲𑁆𑀫𑀸 𑀅𑀭𑀺𑀬𑀫𑀕𑁆𑀕𑁄 ‘𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀺𑀧𑀝𑀺𑀧𑀤𑀸’𑀢𑀺 𑀯𑀼𑀢𑁆𑀢𑁄, 𑀢𑀲𑁆𑀫𑀸 𑀞𑀧𑁂𑀢𑁆𑀯𑀸 𑀅𑀭𑀺𑀬𑀫𑀕𑁆𑀕𑀁 𑀅𑀯𑀲𑁂𑀲𑀸 𑀲𑀗𑁆𑀔𑀸𑀭𑀸 𑀤𑀼𑀓𑁆𑀔𑀸’’𑀢𑀺 𑀬𑁂𑀲𑀁 𑀮𑀤𑁆𑀥𑀺, 𑀲𑁂𑀬𑁆𑀬𑀣𑀸𑀧𑀺 𑀳𑁂𑀢𑀼𑀯𑀸𑀤𑀸𑀦𑀁; 𑀢𑁂 𑀲𑀦𑁆𑀥𑀸𑀬 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀧𑀝𑀺𑀜𑁆𑀜𑀸 𑀇𑀢𑀭𑀲𑁆𑀲. 𑀅𑀣 𑀦𑀁 ‘‘𑀬𑀤𑀺 𑀏𑀯𑀁 𑀲𑀫𑀼𑀤𑀬𑀲𑁆𑀲𑀸𑀧𑀺 𑀤𑀼𑀓𑁆𑀔𑀪𑀸𑀯𑁄 𑀆𑀧𑀚𑁆𑀚𑀢𑀻’’𑀢𑀺 𑀘𑁄𑀤𑁂𑀢𑀼𑀁 𑀤𑀼𑀓𑁆𑀔𑀲𑀫𑀼𑀤𑀬𑁄𑀧𑀻𑀢𑀺 𑀆𑀳. 𑀇𑀢𑀭𑁄 𑀳𑁂𑀢𑀼𑀮𑀓𑁆𑀔𑀡𑀁 𑀲𑀦𑁆𑀥𑀸𑀬 𑀧𑀝𑀺𑀓𑁆𑀔𑀺𑀧𑀢𑀺. 𑀧𑀼𑀦 𑀧𑀼𑀝𑁆𑀞𑁄 𑀧𑀯𑀢𑁆𑀢𑀧𑀭𑀺𑀬𑀸𑀧𑀦𑁆𑀦𑀪𑀸𑀯𑀁 𑀲𑀦𑁆𑀥𑀸𑀬 𑀧𑀝𑀺𑀚𑀸𑀦𑀸𑀢𑀺. 𑀢𑀻𑀡𑁂𑀯𑀸𑀢𑀺 𑀧𑀜𑁆𑀳𑁂𑀲𑀼 𑀲𑀼𑀢𑁆𑀢𑀯𑀺𑀭𑁄𑀥𑀪𑀬𑁂𑀦 𑀧𑀝𑀺𑀓𑁆𑀔𑀺𑀧𑀢𑀺, 𑀮𑀤𑁆𑀥𑀺𑀯𑀲𑁂𑀦 𑀧𑀝𑀺𑀚𑀸𑀦𑀸𑀢𑀺. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀞𑀧𑁂𑀢𑁆𑀯𑀸 𑀅𑀭𑀺𑀬𑀫𑀕𑁆𑀕𑀦𑁆𑀢𑀺𑀓𑀣𑀸𑀯𑀡𑁆𑀡𑀦𑀸.

𑁬. 𑀦 𑀯𑀢𑁆𑀢𑀩𑁆𑀩𑀁 𑀲𑀗𑁆𑀖𑁄 𑀤𑀓𑁆𑀔𑀺𑀡𑀁 𑀧𑀝𑀺𑀕𑁆𑀕𑀡𑁆𑀳𑀸𑀢𑀻𑀢𑀺𑀓𑀣𑀸𑀯𑀡𑁆𑀡𑀦𑀸

𑁭𑁯𑁧-𑁭𑁯𑁨. 𑀇𑀤𑀸𑀦𑀺 𑀦 𑀯𑀢𑁆𑀢𑀩𑁆𑀩𑀁 𑀲𑀗𑁆𑀖𑁄 𑀤𑀓𑁆𑀔𑀺𑀡𑀁 𑀧𑀝𑀺𑀕𑁆𑀕𑀡𑁆𑀳𑀸𑀢𑀻𑀢𑀺𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀣 ‘‘𑀧𑀭𑀫𑀢𑁆𑀣𑀢𑁄 𑀫𑀕𑁆𑀕𑀨𑀮𑀸𑀦𑁂𑀯 𑀲𑀗𑁆𑀖𑁄, 𑀫𑀕𑁆𑀕𑀨𑀮𑁂𑀳𑀺 𑀅𑀜𑁆𑀜𑁄 𑀲𑀗𑁆𑀖𑁄 𑀦𑀸𑀫 𑀦𑀢𑁆𑀣𑀺, 𑀫𑀕𑁆𑀕𑀨𑀮𑀸𑀦𑀺 𑀘 𑀦 𑀓𑀺𑀜𑁆𑀘𑀺 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑀺, 𑀢𑀲𑁆𑀫𑀸 𑀦 𑀯𑀢𑁆𑀢𑀩𑁆𑀩𑀁 𑀲𑀗𑁆𑀖𑁄 𑀤𑀓𑁆𑀔𑀺𑀡𑀁 𑀧𑀝𑀺𑀕𑁆𑀕𑀡𑁆𑀳𑀸𑀢𑀻’’𑀢𑀺 𑀬𑁂𑀲𑀁 𑀮𑀤𑁆𑀥𑀺, 𑀲𑁂𑀬𑁆𑀬𑀣𑀸𑀧𑀺 𑀏𑀢𑀭𑀳𑀺 𑀫𑀳𑀸𑀧𑀼𑀜𑁆𑀜𑀯𑀸𑀤𑀻𑀲𑀗𑁆𑀔𑀸𑀢𑀸𑀦𑀁 𑀯𑁂𑀢𑀼𑀮𑁆𑀮𑀓𑀸𑀦𑀁; 𑀢𑁂 𑀲𑀦𑁆𑀥𑀸𑀬 𑀦 𑀯𑀢𑁆𑀢𑀩𑁆𑀩𑀦𑁆𑀢𑀺 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀧𑀝𑀺𑀜𑁆𑀜𑀸 𑀇𑀢𑀭𑀲𑁆𑀲. 𑀅𑀣 𑀦𑀁 ‘‘𑀬𑀤𑀺 𑀲𑀗𑁆𑀖𑁄 𑀦 𑀧𑀝𑀺𑀕𑁆𑀕𑀡𑁆𑀳𑁂𑀬𑁆𑀬, 𑀦 𑀦𑀁 𑀲𑀢𑁆𑀣𑀸 𑀆𑀳𑀼𑀦𑁂𑀬𑁆𑀬𑀸𑀢𑀺𑀆𑀤𑀻𑀳𑀺 𑀣𑁄𑀫𑁂𑀬𑁆𑀬𑀸’’𑀢𑀺 𑀘𑁄𑀤𑁂𑀢𑀼𑀁 𑀦𑀦𑀼 𑀲𑀗𑁆𑀖𑁄 𑀆𑀳𑀼𑀦𑁂𑀬𑁆𑀬𑁄𑀢𑀺𑀆𑀤𑀺𑀫𑀸𑀳. 𑀲𑀗𑁆𑀖𑀲𑁆𑀲 𑀤𑀸𑀦𑀁 𑀤𑁂𑀦𑁆𑀢𑀻𑀢𑀺 ‘‘𑀬𑁂 𑀢𑁂 𑀲𑀗𑁆𑀖𑀲𑁆𑀲 𑀤𑁂𑀦𑁆𑀢𑀺, 𑀢𑁂 𑀧𑀝𑀺𑀕𑁆𑀕𑀸𑀳𑀓𑁂𑀲𑀼 𑀅𑀲𑀢𑀺 𑀓𑀲𑁆𑀲 𑀤𑀤𑁂𑀬𑁆𑀬𑀼’’𑀦𑁆𑀢𑀺 𑀘𑁄𑀤𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀆𑀳𑀼𑀢𑀺𑀁 𑀚𑀸𑀢𑀯𑁂𑀤𑁄 𑀯𑀸𑀢𑀺 𑀲𑀼𑀢𑁆𑀢𑀁 𑀧𑀭𑀲𑀫𑀬𑀢𑁄 𑀆𑀕𑀢𑀁. 𑀢𑀢𑁆𑀣 𑀫𑀳𑀸𑀫𑁂𑀖𑀦𑁆𑀢𑀺 𑀫𑁂𑀖𑀯𑀼𑀝𑁆𑀞𑀺𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀯𑀼𑀝𑁆𑀞𑀺𑀜𑁆𑀳𑀺 𑀫𑁂𑀤𑀦𑀻 𑀧𑀝𑀺𑀕𑁆𑀕𑀡𑁆𑀳𑀸𑀢𑀺, 𑀦 𑀫𑁂𑀖𑀫𑁂𑀯. 𑀫𑀕𑁆𑀕𑁄 𑀧𑀝𑀺𑀕𑁆𑀕𑀡𑁆𑀳𑀸𑀢𑀻𑀢𑀺 ‘‘𑀫𑀕𑁆𑀕𑀨𑀮𑀸𑀦𑀺 𑀲𑀗𑁆𑀖𑁄’’𑀢𑀺 𑀮𑀤𑁆𑀥𑀺𑀬𑀸 𑀯𑀤𑀢𑀺, 𑀦 𑀘 𑀫𑀕𑁆𑀕𑀨𑀮𑀸𑀦𑁂𑀯 𑀲𑀗𑁆𑀖𑁄. 𑀫𑀕𑁆𑀕𑀨𑀮𑀧𑀸𑀢𑀼𑀪𑀸𑀯𑀧𑀭𑀺𑀲𑀼𑀤𑁆𑀥𑁂 𑀧𑀦 𑀔𑀦𑁆𑀥𑁂 𑀉𑀧𑀸𑀤𑀸𑀬 𑀧𑀜𑁆𑀜𑀢𑁆𑀢𑀸 𑀅𑀝𑁆𑀞 𑀧𑀼𑀕𑁆𑀕𑀮𑀸 𑀲𑀗𑁆𑀖𑁄, 𑀢𑀲𑁆𑀫𑀸 𑀅𑀲𑀸𑀥𑀓𑀫𑁂𑀢𑀦𑁆𑀢𑀺.

𑀦 𑀯𑀢𑁆𑀢𑀩𑁆𑀩𑀁 𑀲𑀗𑁆𑀖𑁄 𑀤𑀓𑁆𑀔𑀺𑀡𑀁 𑀧𑀝𑀺𑀕𑁆𑀕𑀡𑁆𑀳𑀸𑀢𑀻𑀢𑀺𑀓𑀣𑀸𑀯𑀡𑁆𑀡𑀦𑀸.

𑁭. 𑀦 𑀯𑀢𑁆𑀢𑀩𑁆𑀩𑀁 𑀲𑀗𑁆𑀖𑁄 𑀤𑀓𑁆𑀔𑀺𑀡𑀁 𑀯𑀺𑀲𑁄𑀥𑁂𑀢𑀻𑀢𑀺𑀓𑀣𑀸𑀯𑀡𑁆𑀡𑀦𑀸

𑁭𑁯𑁩-𑁭𑁯𑁪. 𑀇𑀤𑀸𑀦𑀺 𑀦 𑀯𑀢𑁆𑀢𑀩𑁆𑀩𑀁 𑀲𑀗𑁆𑀖𑁄 𑀤𑀓𑁆𑀔𑀺𑀡𑀁 𑀯𑀺𑀲𑁄𑀥𑁂𑀢𑀻𑀢𑀺𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀣 ‘‘𑀫𑀕𑁆𑀕𑀨𑀮𑀸𑀦𑁂𑀯 𑀲𑀗𑁆𑀖𑁄 𑀦𑀸𑀫, 𑀦 𑀘 𑀢𑀸𑀦𑀺 𑀤𑀓𑁆𑀔𑀺𑀡𑀁 𑀯𑀺𑀲𑁄𑀥𑁂𑀢𑀼𑀁 𑀲𑀓𑁆𑀓𑁄𑀦𑁆𑀢𑀺, 𑀢𑀲𑁆𑀫𑀸 𑀦 𑀯𑀢𑁆𑀢𑀩𑁆𑀩𑀁 𑀲𑀗𑁆𑀖𑁄 𑀤𑀓𑁆𑀔𑀺𑀡𑀁 𑀯𑀺𑀲𑁄𑀥𑁂𑀢𑀻’’𑀢𑀺 𑀬𑁂𑀲𑀁 𑀮𑀤𑁆𑀥𑀺, 𑀲𑁂𑀬𑁆𑀬𑀣𑀸𑀧𑀺 𑀢𑁂𑀲𑀜𑁆𑀜𑁂𑀯; 𑀢𑁂 𑀲𑀦𑁆𑀥𑀸𑀬 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀧𑀝𑀺𑀜𑁆𑀜𑀸 𑀇𑀢𑀭𑀲𑁆𑀲. 𑀆𑀳𑀼𑀦𑁂𑀬𑁆𑀬𑁄𑀢𑀺𑀆𑀤𑀺 ‘‘𑀬𑀤𑀺 𑀲𑀗𑁆𑀖𑁄 𑀤𑀓𑁆𑀔𑀺𑀡𑀁 𑀯𑀺𑀲𑁄𑀥𑁂𑀢𑀼𑀁 𑀦 𑀲𑀓𑁆𑀓𑀼𑀡𑁂𑀬𑁆𑀬, 𑀦 𑀦𑀁 𑀲𑀢𑁆𑀣𑀸 𑀏𑀯𑀁 𑀣𑁄𑀫𑁂𑀬𑁆𑀬𑀸’’𑀢𑀺 𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀯𑀺𑀲𑁄𑀥𑁂𑀢𑀻𑀢𑀺 𑀫𑀳𑀧𑁆𑀨𑀮𑀁 𑀓𑀭𑁄𑀢𑀺. 𑀲𑀗𑁆𑀖𑀲𑁆𑀫𑀺𑀜𑁆𑀳𑀺 𑀅𑀧𑁆𑀧𑀁 𑀤𑀺𑀦𑁆𑀦𑀁 𑀩𑀳𑀼 𑀳𑁄𑀢𑀺, 𑀩𑀳𑀼 𑀤𑀺𑀦𑁆𑀦𑀁 𑀩𑀳𑀼𑀢𑀭𑀁. 𑀤𑀓𑁆𑀔𑀺𑀡𑁂𑀬𑁆𑀬𑀸𑀢𑀺 𑀤𑀓𑁆𑀔𑀺𑀡𑀸𑀭𑀳𑀸 𑀤𑀓𑁆𑀔𑀺𑀡𑀸𑀬 𑀅𑀦𑀼𑀘𑁆𑀙𑀯𑀺𑀓𑀸, 𑀤𑀓𑁆𑀔𑀺𑀡𑀁 𑀯𑀺𑀲𑁄𑀥𑁂𑀢𑀼𑀁 𑀲𑀫𑀢𑁆𑀣𑀸𑀢𑀺 𑀅𑀢𑁆𑀣𑁄. 𑀤𑀓𑁆𑀔𑀺𑀡𑀁 𑀆𑀭𑀸𑀥𑁂𑀦𑁆𑀢𑀻𑀢𑀺 𑀲𑀫𑁆𑀧𑀸𑀤𑁂𑀦𑁆𑀢𑀺, 𑀅𑀧𑁆𑀧𑀫𑀢𑁆𑀢𑀺𑀓𑀸𑀬𑀧𑀺 𑀤𑀓𑁆𑀔𑀺𑀡𑀸𑀬 𑀫𑀳𑀦𑁆𑀢𑀁 𑀨𑀮𑀁 𑀧𑀸𑀧𑀼𑀡𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀫𑁂𑀯𑀸𑀢𑀺.

𑀦 𑀯𑀢𑁆𑀢𑀩𑁆𑀩𑀁 𑀲𑀗𑁆𑀖𑁄 𑀤𑀓𑁆𑀔𑀺𑀡𑀁 𑀯𑀺𑀲𑁄𑀥𑁂𑀢𑀻𑀢𑀺𑀓𑀣𑀸𑀯𑀡𑁆𑀡𑀦𑀸.

𑁮. 𑀦 𑀯𑀢𑁆𑀢𑀩𑁆𑀩𑀁 𑀲𑀗𑁆𑀖𑁄 𑀪𑀼𑀜𑁆𑀚𑀢𑀻𑀢𑀺𑀓𑀣𑀸𑀯𑀡𑁆𑀡𑀦𑀸

𑁭𑁯𑁫-𑁭𑁯𑁬. 𑀇𑀤𑀸𑀦𑀺 𑀦 𑀯𑀢𑁆𑀢𑀩𑁆𑀩𑀁 𑀲𑀗𑁆𑀖𑁄 𑀪𑀼𑀜𑁆𑀚𑀢𑀻𑀢𑀺𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀭𑀸𑀧𑀺 ‘‘𑀫𑀕𑁆𑀕𑀨𑀮𑀸𑀦𑁂𑀯 𑀲𑀗𑁆𑀖𑁄 𑀦𑀸𑀫, 𑀦 𑀘 𑀢𑀸𑀦𑀺 𑀓𑀺𑀜𑁆𑀘𑀺 𑀪𑀼𑀜𑁆𑀚𑀦𑁆𑀢𑀺, 𑀢𑀲𑁆𑀫𑀸 𑀦 𑀯𑀢𑁆𑀢𑀩𑁆𑀩𑀁 𑀲𑀗𑁆𑀖𑁄 𑀪𑀼𑀜𑁆𑀚𑀢𑀺, 𑀧𑀺𑀯𑀢𑀺, 𑀔𑀸𑀤𑀢𑀺, 𑀲𑀸𑀬𑀢𑀻’’𑀢𑀺 𑀬𑁂𑀲𑀁 𑀮𑀤𑁆𑀥𑀺, 𑀲𑁂𑀬𑁆𑀬𑀣𑀸𑀧𑀺 𑀢𑁂𑀲𑀁𑀬𑁂𑀯; 𑀢𑁂 𑀲𑀦𑁆𑀥𑀸𑀬 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀧𑀝𑀺𑀜𑁆𑀜𑀸 𑀇𑀢𑀭𑀲𑁆𑀲. 𑀅𑀣 𑀦𑀁 ‘‘𑀬𑀤𑀺 𑀲𑀗𑁆𑀖𑁄 𑀦 𑀪𑀼𑀜𑁆𑀚𑁂𑀬𑁆𑀬, 𑀲𑀗𑁆𑀖𑀪𑀢𑁆𑀢𑀸𑀤𑀺𑀓𑀭𑀡𑀁 𑀦𑀺𑀭𑀢𑁆𑀣𑀓𑀁 𑀪𑀯𑁂𑀬𑁆𑀬𑀸’’𑀢𑀺 𑀘𑁄𑀤𑁂𑀢𑀼𑀁 𑀦𑀦𑀼 𑀅𑀢𑁆𑀣𑀺 𑀓𑁂𑀘𑀺 𑀲𑀗𑁆𑀖𑀪𑀢𑁆𑀢𑀸𑀦𑀺 𑀓𑀭𑁄𑀦𑁆𑀢𑀻𑀢𑀺𑀆𑀤𑀺𑀫𑀸𑀳. 𑀕𑀡𑀪𑁄𑀚𑀦𑀦𑁆𑀢𑀺𑀆𑀤𑀺 ‘‘𑀬𑀤𑀺 𑀲𑀗𑁆𑀖𑁄 𑀦 𑀪𑀼𑀜𑁆𑀚𑁂𑀬𑁆𑀬, 𑀓𑀲𑁆𑀲 𑀕𑀡𑀪𑁄𑀚𑀦𑀸𑀤𑀻𑀦𑀺 𑀲𑀺𑀬𑀼’’𑀦𑁆𑀢𑀺 𑀘𑁄𑀤𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀅𑀝𑁆𑀞 𑀧𑀸𑀦𑀸𑀦𑀻𑀢𑀺 𑀇𑀤𑀫𑁆𑀧𑀺 ‘‘𑀬𑀤𑀺 𑀲𑀗𑁆𑀖𑁄 𑀦 𑀧𑀺𑀯𑁂𑀬𑁆𑀬, 𑀓𑀲𑁆𑀲𑁂𑀢𑀸𑀦𑀺 𑀧𑀸𑀦𑀸𑀦𑀺 𑀲𑀢𑁆𑀣𑀸 𑀅𑀦𑀼𑀚𑀸𑀦𑁂𑀬𑁆𑀬𑀸’’𑀢𑀺 𑀘𑁄𑀤𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀲𑁂𑀲𑀫𑀺𑀥𑀸𑀧𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀦𑁆𑀢𑀺.

𑀦 𑀯𑀢𑁆𑀢𑀩𑁆𑀩𑀁 𑀲𑀗𑁆𑀖𑁄 𑀪𑀼𑀜𑁆𑀚𑀢𑀻𑀢𑀺𑀓𑀣𑀸𑀯𑀡𑁆𑀡𑀦𑀸.

𑁯. 𑀦 𑀯𑀢𑁆𑀢𑀩𑁆𑀩𑀁 𑀲𑀗𑁆𑀖𑀲𑁆𑀲 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮𑀦𑁆𑀢𑀺𑀓𑀣𑀸𑀯𑀡𑁆𑀡𑀦𑀸

𑁭𑁯𑁭-𑁭𑁯𑁮. 𑀇𑀤𑀸𑀦𑀺 𑀦 𑀯𑀢𑁆𑀢𑀩𑁆𑀩𑀁 𑀲𑀗𑁆𑀖𑀲𑁆𑀲 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮𑀦𑁆𑀢𑀺𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀭𑀸𑀧𑀺 ‘‘𑀫𑀕𑁆𑀕𑀨𑀮𑀸𑀦𑁂𑀯 𑀲𑀗𑁆𑀖𑁄 𑀦𑀸𑀫, 𑀦 𑀘 𑀲𑀓𑁆𑀓𑀸 𑀢𑁂𑀲𑀁 𑀓𑀺𑀜𑁆𑀘𑀺 𑀤𑀸𑀢𑀼𑀁, 𑀦 𑀘 𑀢𑁂𑀳𑀺 𑀧𑀝𑀺𑀕𑁆𑀕𑀡𑁆𑀳𑀺𑀢𑀼𑀁, 𑀦𑀸𑀧𑀺 𑀢𑁂𑀲𑀁 𑀤𑀸𑀦𑁂𑀦 𑀓𑁄𑀘𑀺 𑀉𑀧𑀓𑀸𑀭𑁄 𑀇𑀚𑁆𑀛𑀢𑀺, 𑀢𑀲𑁆𑀫𑀸 𑀦 𑀯𑀢𑁆𑀢𑀩𑁆𑀩𑀁 𑀲𑀗𑁆𑀖𑀲𑁆𑀲 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮’’𑀦𑁆𑀢𑀺 𑀬𑁂𑀲𑀁 𑀮𑀤𑁆𑀥𑀺, 𑀲𑁂𑀬𑁆𑀬𑀣𑀸𑀧𑀺 𑀢𑁂𑀲𑀁𑀬𑁂𑀯; 𑀢𑁂 𑀲𑀦𑁆𑀥𑀸𑀬 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀧𑀝𑀺𑀜𑁆𑀜𑀸 𑀇𑀢𑀭𑀲𑁆𑀲. 𑀆𑀳𑀼𑀦𑁂𑀬𑁆𑀬𑁄𑀢𑀺𑀆𑀤𑀺 ‘‘𑀬𑀤𑀺 𑀲𑀗𑁆𑀖𑀲𑁆𑀲 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮𑀁 𑀦 𑀪𑀯𑁂𑀬𑁆𑀬, 𑀦 𑀦𑀁 𑀲𑀢𑁆𑀣𑀸 𑀏𑀯𑀁 𑀣𑁄𑀫𑁂𑀬𑁆𑀬𑀸’’𑀢𑀺 𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀲𑁂𑀲𑀁 𑀬𑀣𑀸𑀧𑀸𑀴𑀺𑀫𑁂𑀯 𑀦𑀺𑀬𑁆𑀬𑀸𑀢𑀻𑀢𑀺.

𑀦 𑀯𑀢𑁆𑀢𑀩𑁆𑀩𑀁 𑀲𑀗𑁆𑀖𑀲𑁆𑀲 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮𑀦𑁆𑀢𑀺𑀓𑀣𑀸𑀯𑀡𑁆𑀡𑀦𑀸.

𑁧𑁦. 𑀦 𑀯𑀢𑁆𑀢𑀩𑁆𑀩𑀁 𑀩𑀼𑀤𑁆𑀥𑀲𑁆𑀲 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮𑀦𑁆𑀢𑀺𑀓𑀣𑀸𑀯𑀡𑁆𑀡𑀦𑀸

𑁭𑁯𑁯. 𑀇𑀤𑀸𑀦𑀺 𑀦 𑀯𑀢𑁆𑀢𑀩𑁆𑀩𑀁 𑀩𑀼𑀤𑁆𑀥𑀲𑁆𑀲 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮𑀦𑁆𑀢𑀺𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀣 ‘‘𑀩𑀼𑀤𑁆𑀥𑁄 𑀪𑀕𑀯𑀸 𑀦 𑀓𑀺𑀜𑁆𑀘𑀺 𑀧𑀭𑀺𑀪𑀼𑀜𑁆𑀚𑀢𑀺, 𑀮𑁄𑀓𑀸𑀦𑀼𑀯𑀢𑁆𑀢𑀦𑀢𑁆𑀣𑀁 𑀧𑀦 𑀧𑀭𑀺𑀪𑀼𑀜𑁆𑀚𑀫𑀸𑀦𑀁 𑀯𑀺𑀬 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀢𑀺, 𑀢𑀲𑁆𑀫𑀸 𑀦𑀺𑀭𑀼𑀧𑀓𑀸𑀭𑀢𑁆𑀢𑀸 𑀦 𑀯𑀢𑁆𑀢𑀩𑁆𑀩𑀁 𑀢𑀲𑁆𑀫𑀺𑀁 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮’’𑀦𑁆𑀢𑀺 𑀬𑁂𑀲𑀁 𑀮𑀤𑁆𑀥𑀺, 𑀲𑁂𑀬𑁆𑀬𑀣𑀸𑀧𑀺 𑀢𑁂𑀲𑀁𑀬𑁂𑀯; 𑀢𑁂 𑀲𑀦𑁆𑀥𑀸𑀬 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀧𑀝𑀺𑀜𑁆𑀜𑀸 𑀇𑀢𑀭𑀲𑁆𑀲. 𑀤𑁆𑀯𑀺𑀧𑀤𑀸𑀦𑀁 𑀅𑀕𑁆𑀕𑁄𑀢𑀺𑀆𑀤𑀺 ‘‘𑀫𑀦𑀼𑀲𑁆𑀲𑀤𑀼𑀲𑁆𑀲𑀻𑀮𑁂𑀧𑀺 𑀤𑀸𑀦𑀁 𑀲𑀳𑀲𑁆𑀲𑀕𑀼𑀡𑀁 𑀳𑁄𑀢𑀺, 𑀓𑀺𑀫𑀗𑁆𑀕𑀁 𑀧𑀦 𑀏𑀯𑀭𑀽𑀧𑁂 𑀅𑀕𑁆𑀕𑀧𑀼𑀕𑁆𑀕𑀮𑁂’’𑀢𑀺 𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀲𑁂𑀲𑀫𑁂𑀢𑁆𑀣 𑀬𑀣𑀸𑀧𑀸𑀴𑀺𑀫𑁂𑀯 𑀦𑀺𑀬𑁆𑀬𑀸𑀢𑀻𑀢𑀺.

𑀦 𑀯𑀢𑁆𑀢𑀩𑁆𑀩𑀁 𑀩𑀼𑀤𑁆𑀥𑀲𑁆𑀲 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮𑀦𑁆𑀢𑀺𑀓𑀣𑀸𑀯𑀡𑁆𑀡𑀦𑀸.

𑁧𑁧. 𑀤𑀓𑁆𑀔𑀺𑀡𑀸𑀯𑀺𑀲𑀼𑀤𑁆𑀥𑀺𑀓𑀣𑀸𑀯𑀡𑁆𑀡𑀦𑀸

𑁮𑁦𑁦-𑁮𑁦𑁧. 𑀇𑀤𑀸𑀦𑀺 𑀤𑀓𑁆𑀔𑀺𑀡𑀸𑀯𑀺𑀲𑀼𑀤𑁆𑀥𑀺𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀣 ‘‘𑀬𑀤𑀺 𑀧𑀝𑀺𑀕𑁆𑀕𑀸𑀳𑀓𑀢𑁄 𑀤𑀓𑁆𑀔𑀺𑀡𑀸 𑀯𑀺𑀲𑀼𑀚𑁆𑀛𑁂𑀬𑁆𑀬, 𑀫𑀳𑀧𑁆𑀨𑀮𑀸 𑀪𑀯𑁂𑀬𑁆𑀬. 𑀤𑀸𑀬𑀓𑁂𑀦 𑀤𑀸𑀦𑀁 𑀤𑀺𑀦𑁆𑀦𑀁, 𑀧𑀝𑀺𑀕𑁆𑀕𑀸𑀳𑀓𑁂𑀦 𑀯𑀺𑀧𑀸𑀓𑁄 𑀦𑀺𑀩𑁆𑀩𑀢𑁆𑀢𑀺𑀢𑁄𑀢𑀺 𑀅𑀜𑁆𑀜𑁄 𑀅𑀜𑁆𑀜𑀲𑁆𑀲 𑀓𑀸𑀭𑀓𑁄 𑀪𑀯𑁂𑀬𑁆𑀬, 𑀧𑀭𑀁𑀓𑀢𑀁 𑀲𑀼𑀔𑀤𑀼𑀓𑁆𑀔𑀁 𑀆𑀧𑀚𑁆𑀚𑁂𑀬𑁆𑀬, 𑀅𑀜𑁆𑀜𑁄 𑀓𑀭𑁂𑀬𑁆𑀬, 𑀅𑀜𑁆𑀜𑁄 𑀧𑀝𑀺𑀲𑀁𑀯𑁂𑀤𑁂𑀬𑁆𑀬. 𑀢𑀲𑁆𑀫𑀸 𑀤𑀸𑀬𑀓𑀢𑁄𑀯 𑀤𑀸𑀦𑀁 𑀯𑀺𑀲𑀼𑀚𑁆𑀛𑀢𑀺, 𑀦𑁄 𑀧𑀝𑀺𑀕𑁆𑀕𑀸𑀳𑀓𑀢𑁄, 𑀤𑀸𑀬𑀓𑀲𑁆𑀲𑁂𑀯 𑀘𑀺𑀢𑁆𑀢𑀯𑀺𑀲𑀼𑀤𑁆𑀥𑀺 𑀯𑀺𑀧𑀸𑀓𑀤𑀸𑀬𑀺𑀓𑀸 𑀳𑁄𑀢𑀻’’𑀢𑀺 𑀬𑁂𑀲𑀁 𑀮𑀤𑁆𑀥𑀺, 𑀲𑁂𑀬𑁆𑀬𑀣𑀸𑀧𑀺 𑀉𑀢𑁆𑀢𑀭𑀸𑀧𑀣𑀓𑀸𑀦𑀁; 𑀢𑁂 𑀲𑀦𑁆𑀥𑀸𑀬 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀧𑀝𑀺𑀜𑁆𑀜𑀸 𑀇𑀢𑀭𑀲𑁆𑀲. 𑀆𑀳𑀼𑀦𑁂𑀬𑁆𑀬𑀸𑀢𑀺𑀆𑀤𑀺 ‘‘𑀬𑀤𑀺 𑀧𑀝𑀺𑀕𑁆𑀕𑀸𑀳𑀓𑀢𑁄 𑀤𑀸𑀦𑀁 𑀦 𑀯𑀺𑀲𑀼𑀚𑁆𑀛𑁂𑀬𑁆𑀬, 𑀓𑀺𑀫𑀲𑁆𑀲 𑀆𑀳𑀼𑀦𑁂𑀬𑁆𑀬𑀸𑀤𑀺𑀪𑀸𑀯𑁄 𑀓𑀭𑁂𑀬𑁆𑀬𑀸’’𑀢𑀺 𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀅𑀜𑁆𑀜𑁄 𑀅𑀜𑁆𑀜𑀲𑁆𑀲 𑀓𑀸𑀭𑀓𑁄𑀢𑀺 𑀬𑀤𑀺 𑀤𑀸𑀬𑀓𑀲𑁆𑀲 𑀤𑀸𑀦𑀘𑁂𑀢𑀦𑀸 𑀧𑀝𑀺𑀕𑁆𑀕𑀸𑀳𑀓𑁂𑀦 𑀓𑀢𑀸 𑀪𑀯𑁂𑀬𑁆𑀬, 𑀬𑀼𑀢𑁆𑀢𑀭𑀽𑀧𑀁 𑀲𑀺𑀬𑀸. 𑀢𑀲𑁆𑀲 𑀧𑀦 𑀤𑀸𑀦𑀘𑁂𑀢𑀦𑀸 𑀧𑀭𑀺𑀲𑀼𑀤𑁆𑀥𑀸 𑀧𑀝𑀺𑀕𑁆𑀕𑀸𑀳𑀓𑀲𑀗𑁆𑀔𑀸𑀢𑀁 𑀯𑀢𑁆𑀣𑀼𑀁 𑀧𑀝𑀺𑀘𑁆𑀘 𑀫𑀳𑀸𑀯𑀺𑀧𑀸𑀓𑀝𑁆𑀞𑁂𑀦 𑀯𑀺𑀲𑀼𑀚𑁆𑀛𑀢𑀺, 𑀢𑀲𑁆𑀫𑀸 𑀅𑀘𑁄𑀤𑀦𑀸 𑀏𑀲𑀸 ‘‘𑀧𑀝𑀺𑀕𑁆𑀕𑀸𑀳𑀓𑀢𑁄 𑀤𑀸𑀦𑀁 𑀯𑀺𑀲𑀼𑀚𑁆𑀛𑀢𑀻’’𑀢𑀺.

𑀤𑀓𑁆𑀔𑀺𑀡𑀸𑀯𑀺𑀲𑀼𑀤𑁆𑀥𑀺𑀓𑀣𑀸𑀯𑀡𑁆𑀡𑀦𑀸.

𑀲𑀢𑁆𑀢𑀭𑀲𑀫𑁄 𑀯𑀕𑁆𑀕𑁄.