𑁬. 𑀬𑀲𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁬. 𑀙𑀝𑁆𑀞𑁂 𑀫𑀸 𑀘 𑀫𑀬𑀸 𑀬𑀲𑁄𑀢𑀺 𑀬𑀲𑁄 𑀘 𑀫𑀬𑀸 𑀲𑀤𑁆𑀥𑀺𑀁 𑀫𑀸 𑀕𑀜𑁆𑀙𑀺. 𑀅𑀓𑀲𑀺𑀭𑀮𑀸𑀪𑀻𑀢𑀺 𑀯𑀺𑀧𑀼𑀮𑀮𑀸𑀪𑀻. 𑀲𑀻𑀮𑀧𑀜𑁆𑀜𑀸𑀡𑀦𑁆𑀢𑀺 𑀲𑀻𑀮𑀜𑁆𑀘𑁂𑀯 𑀜𑀸𑀡𑀜𑁆𑀘. 𑀲𑀗𑁆𑀕𑀫𑁆𑀫𑀸𑀢𑀺 𑀲𑀦𑁆𑀦𑀺𑀧𑀢𑀺𑀢𑁆𑀯𑀸. 𑀲𑀫𑀸𑀕𑀫𑁆𑀫𑀸𑀢𑀺 𑀲𑀫𑀸𑀕𑀦𑁆𑀢𑁆𑀯𑀸. 𑀲𑀗𑁆𑀕𑀡𑀺𑀓𑀯𑀺𑀳𑀸𑀭𑀦𑁆𑀢𑀺 𑀕𑀡𑀲𑀗𑁆𑀕𑀡𑀺𑀓𑀯𑀺𑀳𑀸𑀭𑀁. 𑀦 𑀳𑀺 𑀦𑀽𑀦𑀫𑁂𑀢𑀺 𑀦 𑀳𑀺 𑀦𑀽𑀦 𑀇𑀫𑁂. 𑀢𑀣𑀸 𑀳𑀺 𑀧𑀦𑀫𑁂𑀢𑀺 𑀢𑀣𑀸 𑀳𑀺 𑀧𑀦 𑀇𑀫𑁂. 𑀅𑀗𑁆𑀕𑀼𑀮𑀺𑀧𑀢𑁄𑀤𑀓𑁂𑀳𑀻𑀢𑀺 𑀅𑀗𑁆𑀕𑀼𑀮𑀺𑀧𑀢𑁄𑀤𑀬𑀝𑁆𑀞𑀺𑀁 𑀓𑀢𑁆𑀯𑀸 𑀯𑀺𑀚𑁆𑀛𑀦𑁂𑀦. 𑀲𑀜𑁆𑀚𑀕𑁆𑀖𑀦𑁆𑀢𑁂𑀢𑀺 𑀫𑀳𑀸𑀳𑀲𑀺𑀢𑀁 𑀳𑀲𑀦𑁆𑀢𑁂. 𑀲𑀁𑀓𑀻𑀴𑀦𑁆𑀢𑁂𑀢𑀺 𑀓𑁂𑀴𑀺𑀁 𑀓𑀭𑁄𑀦𑁆𑀢𑁂.