.𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲.
𑀅𑀗𑁆𑀕𑀼𑀢𑁆𑀢𑀭𑀦𑀺𑀓𑀸𑀬𑁂
𑀅𑀝𑁆𑀞𑀓𑀦𑀺𑀧𑀸𑀢-𑀅𑀝𑁆𑀞𑀓𑀣𑀸
𑁧. 𑀧𑀞𑀫𑀧𑀡𑁆𑀡𑀸𑀲𑀓𑀁
𑁧. 𑀫𑁂𑀢𑁆𑀢𑀸𑀯𑀕𑁆𑀕𑁄
𑁧. 𑀫𑁂𑀢𑁆𑀢𑀸𑀲𑀼𑀢𑁆𑀢𑀯𑀡𑁆𑀡𑀦𑀸
𑁧. 𑀅𑀝𑁆𑀞𑀓𑀦𑀺𑀧𑀸𑀢𑀲𑁆𑀲 𑀧𑀞𑀫𑁂 𑀆𑀲𑁂𑀯𑀺𑀢𑀸𑀬𑀸𑀢𑀺 𑀆𑀤𑀭𑁂𑀦 𑀲𑁂𑀯𑀺𑀢𑀸𑀬. 𑀪𑀸𑀯𑀺𑀢𑀸𑀬𑀸𑀢𑀺 𑀯𑀟𑁆𑀠𑀺𑀢𑀸𑀬. 𑀩𑀳𑀼𑀮𑀻𑀓𑀢𑀸𑀬𑀸𑀢𑀺 𑀧𑀼𑀦𑀧𑁆𑀧𑀼𑀦𑀁 𑀓𑀢𑀸𑀬. 𑀬𑀸𑀦𑀺𑀓𑀢𑀸𑀬𑀸𑀢𑀺 𑀬𑀼𑀢𑁆𑀢𑀬𑀸𑀦𑀲𑀤𑀺𑀲𑀓𑀢𑀸𑀬. 𑀯𑀢𑁆𑀣𑀼𑀓𑀢𑀸𑀬𑀸𑀢𑀺 𑀧𑀢𑀺𑀝𑁆𑀞𑀸𑀦𑀝𑁆𑀞𑁂𑀦 𑀯𑀢𑁆𑀣𑀼 𑀯𑀺𑀬 𑀓𑀢𑀸𑀬. 𑀅𑀦𑀼𑀝𑁆𑀞𑀺𑀢𑀸𑀬𑀸𑀢𑀺 𑀧𑀘𑁆𑀘𑀼𑀧𑀝𑁆𑀞𑀺𑀢𑀸𑀬. 𑀧𑀭𑀺𑀘𑀺𑀢𑀸𑀬𑀸𑀢𑀺 𑀲𑀫𑀦𑁆𑀢𑀢𑁄 𑀘𑀺𑀢𑀸𑀬 𑀉𑀧𑀘𑀺𑀢𑀸𑀬. 𑀲𑀼𑀲𑀫𑀸𑀭𑀤𑁆𑀥𑀸𑀬𑀸𑀢𑀺 𑀲𑀼𑀝𑁆𑀞𑀼 𑀲𑀫𑀸𑀭𑀤𑁆𑀥𑀸𑀬 𑀲𑀼𑀓𑀢𑀸𑀬. 𑀆𑀦𑀺𑀲𑀁𑀲𑀸𑀢𑀺 𑀕𑀼𑀡𑀸. 𑀲𑀼𑀔𑀁 𑀲𑀼𑀧𑀢𑀻𑀢𑀺𑀆𑀤𑀻𑀲𑀼 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀏𑀓𑀸𑀤𑀲𑀓𑀦𑀺𑀧𑀸𑀢𑁂 𑀯𑀓𑁆𑀔𑀸𑀫.
𑀅𑀧𑁆𑀧𑀫𑀸𑀡𑀦𑁆𑀢𑀺 𑀨𑀭𑀡𑀯𑀲𑁂𑀦 𑀅𑀧𑁆𑀧𑀫𑀸𑀡𑀁. 𑀢𑀦𑀽 𑀲𑀁𑀬𑁄𑀚𑀦𑀸 𑀳𑁄𑀦𑁆𑀢𑀺, 𑀧𑀲𑁆𑀲𑀢𑁄 𑀉𑀧𑀥𑀺𑀓𑁆𑀔𑀬𑀦𑁆𑀢𑀺 𑀫𑁂𑀢𑁆𑀢𑀸𑀧𑀤𑀝𑁆𑀞𑀸𑀦𑀸𑀬 𑀯𑀺𑀧𑀲𑁆𑀲𑀦𑀸𑀬 𑀅𑀦𑀼𑀓𑁆𑀓𑀫𑁂𑀦 𑀉𑀧𑀥𑀺𑀓𑁆𑀔𑀬𑀲𑀗𑁆𑀔𑀸𑀢𑀁 𑀅𑀭𑀳𑀢𑁆𑀢𑀁 𑀧𑀢𑁆𑀢𑀲𑁆𑀲 𑀤𑀲 𑀲𑀁𑀬𑁄𑀚𑀦𑀸 𑀧𑀳𑀻𑀬𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀢𑀦𑀽 𑀲𑀁𑀬𑁄𑀚𑀦𑀸 𑀳𑁄𑀦𑁆𑀢𑀻𑀢𑀺 𑀧𑀝𑀺𑀖𑀜𑁆𑀘𑁂𑀯 𑀧𑀝𑀺𑀖𑀲𑀫𑁆𑀧𑀬𑀼𑀢𑁆𑀢𑀲𑀁𑀬𑁄𑀚𑀦𑀸 𑀘 𑀢𑀦𑀼𑀓𑀸 𑀳𑁄𑀦𑁆𑀢𑀺. 𑀧𑀲𑁆𑀲𑀢𑁄 𑀉𑀧𑀥𑀺𑀓𑁆𑀔𑀬𑀦𑁆𑀢𑀺 𑀢𑁂𑀲𑀁𑀬𑁂𑀯 𑀓𑀺𑀮𑁂𑀲𑀽𑀧𑀥𑀻𑀦𑀁 𑀔𑀬𑀲𑀗𑁆𑀔𑀸𑀢𑀁 𑀫𑁂𑀢𑁆𑀢𑀁 𑀅𑀥𑀺𑀕𑀫𑀯𑀲𑁂𑀦 𑀧𑀲𑁆𑀲𑀦𑁆𑀢𑀲𑁆𑀲. 𑀓𑀼𑀲𑀮𑀻 𑀢𑁂𑀦 𑀳𑁄𑀢𑀻𑀢𑀺 𑀢𑁂𑀦 𑀫𑁂𑀢𑁆𑀢𑀸𑀬𑀦𑁂𑀦 𑀓𑀼𑀲𑀮𑁄 𑀳𑁄𑀢𑀺. 𑀲𑀢𑁆𑀢𑀲𑀡𑁆𑀟𑀦𑁆𑀢𑀺 𑀲𑀢𑁆𑀢𑀲𑀗𑁆𑀔𑀸𑀢𑁂𑀦 𑀲𑀡𑁆𑀟𑁂𑀦 𑀲𑀫𑀦𑁆𑀦𑀸𑀕𑀢𑀁, 𑀲𑀢𑁆𑀢𑀪𑀭𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀯𑀺𑀚𑁂𑀢𑁆𑀯𑀸𑀢𑀺 𑀅𑀤𑀡𑁆𑀟𑁂𑀦 𑀅𑀲𑀢𑁆𑀣𑁂𑀦 𑀥𑀫𑁆𑀫𑁂𑀦𑁂𑀯 𑀯𑀺𑀚𑀺𑀦𑀺𑀢𑁆𑀯𑀸. 𑀭𑀸𑀚𑀺𑀲𑀬𑁄𑀢𑀺 𑀇𑀲𑀺𑀲𑀤𑀺𑀲𑀸 𑀥𑀫𑁆𑀫𑀺𑀓𑀭𑀸𑀚𑀸𑀦𑁄. 𑀬𑀚𑀫𑀸𑀦𑀸𑀢𑀺 𑀤𑀸𑀦𑀸𑀦𑀺 𑀤𑀤𑀫𑀸𑀦𑀸. 𑀅𑀦𑀼𑀧𑀭𑀺𑀬𑀕𑀸𑀢𑀺 𑀯𑀺𑀘𑀭𑀺𑀁𑀲𑀼.
𑀅𑀲𑁆𑀲𑀫𑁂𑀥𑀦𑁆𑀢𑀺𑀆𑀤𑀻𑀲𑀼 𑀧𑁄𑀭𑀸𑀡𑀓𑀭𑀸𑀚𑀓𑀸𑀮𑁂 𑀓𑀺𑀭 𑀲𑀲𑁆𑀲𑀫𑁂𑀥𑀁, 𑀧𑀼𑀭𑀺𑀲𑀫𑁂𑀥𑀁, 𑀲𑀫𑁆𑀫𑀸𑀧𑀸𑀲𑀁, 𑀯𑀸𑀘𑀸𑀧𑁂𑀬𑁆𑀬𑀦𑁆𑀢𑀺 𑀘𑀢𑁆𑀢𑀸𑀭𑀺 𑀲𑀗𑁆𑀕𑀳𑀯𑀢𑁆𑀣𑀽𑀦𑀺 𑀅𑀳𑁂𑀲𑀼𑀁, 𑀬𑁂𑀳𑀺 𑀭𑀸𑀚𑀸𑀦𑁄 𑀮𑁄𑀓𑀁 𑀲𑀗𑁆𑀕𑀡𑁆𑀳𑀺𑀁𑀲𑀼. 𑀢𑀢𑁆𑀣 𑀦𑀺𑀧𑁆𑀨𑀦𑁆𑀦𑀲𑀲𑁆𑀲𑀢𑁄 𑀤𑀲𑀫𑀪𑀸𑀕𑀕𑁆𑀕𑀳𑀡𑀁 𑀲𑀲𑁆𑀲𑀫𑁂𑀥𑀁 𑀦𑀸𑀫, 𑀲𑀲𑁆𑀲𑀲𑀫𑁆𑀧𑀸𑀤𑀦𑁂 𑀫𑁂𑀥𑀸𑀯𑀺𑀢𑀸𑀢𑀺 𑀅𑀢𑁆𑀣𑁄. 𑀫𑀳𑀸𑀬𑁄𑀥𑀸𑀦𑀁 𑀙𑀫𑀸𑀲𑀺𑀓𑀁 𑀪𑀢𑁆𑀢𑀯𑁂𑀢𑀦𑀸𑀦𑀼𑀧𑁆𑀧𑀤𑀸𑀦𑀁 𑀧𑀼𑀭𑀺𑀲𑀫𑁂𑀥𑀁 𑀦𑀸𑀫, 𑀧𑀼𑀭𑀺𑀲𑀲𑀗𑁆𑀕𑀡𑁆𑀳𑀦𑁂 𑀫𑁂𑀥𑀸𑀯𑀺𑀢𑀸𑀢𑀺 𑀅𑀢𑁆𑀣𑁄. 𑀤𑀮𑀺𑀤𑁆𑀤𑀫𑀦𑀼𑀲𑁆𑀲𑀸𑀦𑀁 𑀳𑀢𑁆𑀣𑀢𑁄 𑀮𑁂𑀔𑀁 𑀕𑀳𑁂𑀢𑁆𑀯𑀸 𑀢𑀻𑀡𑀺 𑀯𑀲𑁆𑀲𑀸𑀦𑀺 𑀯𑀺𑀦𑀸 𑀯𑀟𑁆𑀠𑀺𑀬𑀸 𑀲𑀳𑀲𑁆𑀲𑀤𑁆𑀯𑀺𑀲𑀳𑀲𑁆𑀲𑀫𑀢𑁆𑀢𑀥𑀦𑀸𑀦𑀼𑀧𑁆𑀧𑀤𑀸𑀦𑀁 𑀲𑀫𑁆𑀫𑀸𑀧𑀸𑀲𑀁 𑀦𑀸𑀫. 𑀢𑀜𑁆𑀳𑀺 𑀲𑀫𑁆𑀫𑀸 𑀫𑀦𑀼𑀲𑁆𑀲𑁂 𑀧𑀸𑀲𑁂𑀢𑀺 𑀳𑀤𑀬𑁂 𑀩𑀦𑁆𑀥𑀺𑀢𑁆𑀯𑀸 𑀯𑀺𑀬 𑀞𑀧𑁂𑀢𑀺, 𑀢𑀲𑁆𑀫𑀸 𑀲𑀫𑁆𑀫𑀸𑀧𑀸𑀲𑀦𑁆𑀢𑀺 𑀯𑀼𑀘𑁆𑀘𑀢𑀺. ‘‘𑀢𑀸𑀢, 𑀫𑀸𑀢𑀼𑀮𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀧𑀦 𑀲𑀡𑁆𑀳𑀯𑀸𑀘𑀸𑀪𑀡𑀦𑀁 𑀯𑀸𑀘𑀸𑀧𑁂𑀬𑁆𑀬𑀁 𑀦𑀸𑀫, 𑀧𑀺𑀬𑀯𑀸𑀘𑀸𑀢𑀺 𑀅𑀢𑁆𑀣𑁄. 𑀏𑀯𑀁 𑀘𑀢𑀽𑀳𑀺 𑀲𑀗𑁆𑀕𑀳𑀯𑀢𑁆𑀣𑀽𑀳𑀺 𑀲𑀗𑁆𑀕𑀳𑀺𑀢𑀁 𑀭𑀝𑁆𑀞𑀁 𑀇𑀤𑁆𑀥𑀜𑁆𑀘𑁂𑀯 𑀳𑁄𑀢𑀺, 𑀨𑀻𑀢𑀜𑁆𑀘, 𑀩𑀳𑀼𑀅𑀦𑁆𑀦𑀧𑀸𑀦𑀁, 𑀔𑁂𑀫𑀁, 𑀦𑀺𑀭𑀩𑁆𑀩𑀼𑀤𑀁. 𑀫𑀦𑀼𑀲𑁆𑀲𑀸 𑀫𑀼𑀤𑀸 𑀫𑁄𑀤𑀫𑀸𑀦𑀸 𑀉𑀭𑁂 𑀧𑀼𑀢𑁆𑀢𑁂 𑀦𑀘𑁆𑀘𑁂𑀦𑁆𑀢𑀸 𑀅𑀧𑀸𑀭𑀼𑀢𑀖𑀭𑀸 𑀯𑀺𑀳𑀭𑀦𑁆𑀢𑀺. 𑀇𑀤𑀁 𑀖𑀭𑀤𑁆𑀯𑀸𑀭𑁂𑀲𑀼 𑀅𑀕𑁆𑀕𑀴𑀸𑀦𑀁 𑀅𑀪𑀸𑀯𑀢𑁄 𑀦𑀺𑀭𑀕𑁆𑀕𑀴𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀅𑀬𑀁 𑀧𑁄𑀭𑀸𑀡𑀺𑀓𑀸 𑀧𑀯𑁂𑀡𑀺.
𑀅𑀧𑀭𑀪𑀸𑀕𑁂 𑀧𑀦 𑀑𑀓𑁆𑀓𑀸𑀓𑀭𑀸𑀚𑀓𑀸𑀮𑁂 𑀩𑁆𑀭𑀸𑀳𑁆𑀫𑀡𑀸 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀲𑀗𑁆𑀕𑀳𑀯𑀢𑁆𑀣𑀽𑀦𑀺 𑀇𑀫𑀜𑁆𑀘 𑀭𑀝𑁆𑀞𑀲𑀫𑁆𑀧𑀢𑁆𑀢𑀺𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀉𑀤𑁆𑀥𑀁𑀫𑀽𑀮𑀓𑀁 𑀓𑀢𑁆𑀯𑀸 𑀅𑀲𑁆𑀲𑀫𑁂𑀥𑀁 𑀧𑀼𑀭𑀺𑀲𑀫𑁂𑀥𑀦𑁆𑀢𑀺𑀆𑀤𑀺𑀓𑁂 𑀧𑀜𑁆𑀘 𑀬𑀜𑁆𑀜𑁂 𑀦𑀸𑀫 𑀅𑀓𑀁𑀲𑀼. 𑀢𑁂𑀲𑀼 𑀅𑀲𑁆𑀲𑀫𑁂𑀢𑁆𑀣 𑀫𑁂𑀥𑀦𑁆𑀢𑀺 𑀯𑀥𑁂𑀦𑁆𑀢𑀻𑀢𑀺 𑀅𑀲𑁆𑀲𑀫𑁂𑀥𑁄. 𑀤𑁆𑀯𑀻𑀳𑀺 𑀧𑀭𑀺𑀬𑀜𑁆𑀜𑁂𑀳𑀺 𑀬𑀚𑀺𑀢𑀩𑁆𑀩𑀲𑁆𑀲 𑀏𑀓𑀯𑀻𑀲𑀢𑀺𑀬𑀽𑀧𑀲𑁆𑀲 𑀏𑀓𑀲𑁆𑀫𑀺𑀁 𑀧𑀘𑁆𑀙𑀺𑀫𑀤𑀺𑀯𑀲𑁂𑀬𑁂𑀯 𑀲𑀢𑁆𑀢𑀦𑀯𑀼𑀢𑀺𑀧𑀜𑁆𑀘𑀧𑀲𑀼𑀲𑀢𑀖𑀸𑀢𑀪𑀺𑀁𑀲𑀦𑀲𑁆𑀲 𑀞𑀧𑁂𑀢𑁆𑀯𑀸 𑀪𑀽𑀫𑀺𑀜𑁆𑀘 𑀧𑀼𑀭𑀺𑀲𑁂 𑀘 𑀅𑀯𑀲𑁂𑀲𑀲𑀩𑁆𑀩𑀯𑀺𑀪𑀯𑀤𑀓𑁆𑀔𑀺𑀡𑀲𑁆𑀲 𑀬𑀜𑁆𑀜𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀧𑀼𑀭𑀺𑀲𑀫𑁂𑀢𑁆𑀣 𑀫𑁂𑀥𑀦𑁆𑀢𑀻𑀢𑀺 𑀧𑀼𑀭𑀺𑀲𑀫𑁂𑀥𑁄. 𑀘𑀢𑀽𑀳𑀺 𑀧𑀭𑀺𑀬𑀜𑁆𑀜𑁂𑀳𑀺 𑀬𑀚𑀺𑀢𑀩𑁆𑀩𑀲𑁆𑀲 𑀲𑀤𑁆𑀥𑀺𑀁 𑀪𑀽𑀫𑀺𑀬𑀸 𑀅𑀲𑁆𑀲𑀫𑁂𑀥𑁂 𑀯𑀼𑀢𑁆𑀢𑀯𑀺𑀪𑀯𑀤𑀓𑁆𑀔𑀺𑀡𑀲𑁆𑀲 𑀬𑀜𑁆𑀜𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀲𑀫𑁆𑀫𑀫𑁂𑀢𑁆𑀣 𑀧𑀸𑀲𑀦𑁆𑀢𑀻𑀢𑀺 𑀲𑀫𑁆𑀫𑀸𑀧𑀸𑀲𑁄. 𑀤𑀺𑀯𑀲𑁂 𑀤𑀺𑀯𑀲𑁂 𑀬𑀼𑀕𑀘𑁆𑀙𑀺𑀕𑁆𑀕𑀴𑁂 𑀧𑀯𑁂𑀲𑀦𑀤𑀡𑁆𑀟𑀓𑀲𑀗𑁆𑀔𑀸𑀢𑀁 𑀲𑀫𑁆𑀫𑀁 𑀔𑀺𑀧𑀺𑀢𑁆𑀯𑀸 𑀢𑀲𑁆𑀲 𑀧𑀢𑀺𑀢𑁄𑀓𑀸𑀲𑁂 𑀯𑁂𑀤𑀺𑀁 𑀓𑀢𑁆𑀯𑀸 𑀲𑀁𑀳𑀸𑀭𑀺𑀫𑁂𑀳𑀺 𑀬𑀽𑀧𑀸𑀤𑀻𑀳𑀺 𑀲𑀭𑀲𑁆𑀲𑀢𑀻𑀦𑀤𑀺𑀬𑀸 𑀦𑀺𑀫𑀼𑀕𑁆𑀕𑁄𑀓𑀸𑀲𑀢𑁄 𑀧𑀪𑀼𑀢𑀺 𑀧𑀝𑀺𑀮𑁄𑀫𑀁 𑀕𑀘𑁆𑀙𑀦𑁆𑀢𑁂𑀦 𑀬𑀚𑀺𑀢𑀩𑁆𑀩𑀲𑁆𑀲 𑀲𑀢𑁆𑀭𑀬𑀸𑀕𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀯𑀸𑀚𑀫𑁂𑀢𑁆𑀣 𑀧𑀺𑀯𑀦𑁆𑀢𑀻𑀢𑀺 𑀯𑀸𑀚𑀧𑁂𑀬𑁆𑀬𑁄. 𑀏𑀓𑁂𑀦 𑀧𑀭𑀺𑀬𑀜𑁆𑀜𑁂𑀦 𑀲𑀢𑁆𑀢𑀭𑀲𑀳𑀺 𑀧𑀲𑀽𑀳𑀺 𑀬𑀚𑀺𑀢𑀩𑁆𑀩𑀲𑁆𑀲 𑀩𑁂𑀮𑀼𑀯𑀬𑀽𑀧𑀲𑁆𑀲 𑀲𑀢𑁆𑀢𑀭𑀲𑀓𑀤𑀓𑁆𑀔𑀺𑀡𑀲𑁆𑀲 𑀬𑀜𑁆𑀜𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀦𑀢𑁆𑀣𑀺 𑀏𑀢𑁆𑀣 𑀅𑀕𑁆𑀕𑀴𑀸𑀢𑀺 𑀦𑀺𑀭𑀕𑁆𑀕𑀴𑁄. 𑀦𑀯𑀳𑀺 𑀧𑀭𑀺𑀬𑀜𑁆𑀜𑁂𑀳𑀺 𑀬𑀚𑀺𑀢𑀩𑁆𑀩𑀲𑁆𑀲 𑀲𑀤𑁆𑀥𑀺𑀁 𑀪𑀽𑀫𑀺𑀬𑀸 𑀘 𑀧𑀼𑀭𑀺𑀲𑁂𑀳𑀺 𑀘 𑀅𑀲𑁆𑀲𑀫𑁂𑀥𑁂 𑀯𑀼𑀢𑁆𑀢𑀯𑀺𑀪𑀯𑀤𑀓𑁆𑀔𑀺𑀡𑀲𑁆𑀲 𑀲𑀩𑁆𑀩𑀫𑁂𑀥𑀧𑀭𑀺𑀬𑀸𑀬𑀦𑀸𑀫𑀲𑁆𑀲 𑀅𑀲𑁆𑀲𑀫𑁂𑀥𑀯𑀺𑀓𑀧𑁆𑀧𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁.
𑀓𑀮𑀫𑁆𑀧𑀺 𑀢𑁂 𑀦𑀸𑀦𑀼𑀪𑀯𑀦𑁆𑀢𑀺 𑀲𑁄𑀴𑀲𑀺𑀦𑁆𑀢𑀺 𑀢𑁂 𑀲𑀩𑁆𑀩𑁂𑀧𑀺 𑀫𑀳𑀸𑀬𑀸𑀕𑀸 𑀏𑀓𑀲𑁆𑀲 𑀫𑁂𑀢𑁆𑀢𑀸𑀘𑀺𑀢𑁆𑀢𑀲𑁆𑀲 𑀯𑀺𑀧𑀸𑀓𑀫𑀳𑀦𑁆𑀢𑀢𑀸𑀬 𑀲𑁄𑀴𑀲𑀺𑀁 𑀓𑀮𑀁 𑀦 𑀅𑀕𑁆𑀖𑀦𑁆𑀢𑀺, 𑀲𑁄𑀴𑀲𑀫𑀁 𑀪𑀸𑀕𑀁 𑀦 𑀧𑀸𑀧𑀼𑀡𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀦 𑀚𑀺𑀦𑀸𑀢𑀻𑀢𑀺 𑀦 𑀅𑀢𑁆𑀢𑀦𑀸 𑀧𑀭𑀲𑁆𑀲 𑀚𑀸𑀦𑀺𑀁 𑀓𑀭𑁄𑀢𑀺. 𑀦 𑀚𑀸𑀧𑀬𑁂𑀢𑀺 𑀦 𑀧𑀭𑁂𑀦 𑀧𑀭𑀲𑁆𑀲 𑀚𑀸𑀦𑀺𑀁 𑀓𑀸𑀭𑁂𑀢𑀺. 𑀫𑁂𑀢𑁆𑀢𑀁𑀲𑁄𑀢𑀺 𑀫𑁂𑀢𑁆𑀢𑀸𑀬𑀫𑀸𑀦𑀘𑀺𑀢𑁆𑀢𑀓𑁄𑀝𑁆𑀞𑀸𑀲𑁄 𑀳𑀼𑀢𑁆𑀯𑀸. 𑀲𑀩𑁆𑀩𑀪𑀽𑀢𑀸𑀦𑀦𑁆𑀢𑀺 𑀲𑀩𑁆𑀩𑀲𑀢𑁆𑀢𑁂𑀲𑀼. 𑀯𑁂𑀭𑀁 𑀢𑀲𑁆𑀲 𑀦 𑀓𑁂𑀦𑀘𑀻𑀢𑀺 𑀢𑀲𑁆𑀲 𑀓𑁂𑀦𑀘𑀺 𑀲𑀤𑁆𑀥𑀺𑀁 𑀅𑀓𑀼𑀲𑀮𑀯𑁂𑀭𑀁 𑀯𑀸 𑀧𑀼𑀕𑁆𑀕𑀮𑀯𑁂𑀭𑀁 𑀯𑀸 𑀦𑀢𑁆𑀣𑀺.
𑁨. 𑀧𑀜𑁆𑀜𑀸𑀲𑀼𑀢𑁆𑀢𑀯𑀡𑁆𑀡𑀦𑀸
𑁨. 𑀤𑀼𑀢𑀺𑀬𑁂 𑀆𑀤𑀺𑀩𑁆𑀭𑀳𑁆𑀫𑀘𑀭𑀺𑀬𑀺𑀓𑀸𑀬𑀸𑀢𑀺 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀆𑀤𑀺𑀪𑀽𑀢𑀸𑀬. 𑀧𑀜𑁆𑀜𑀸𑀬𑀸𑀢𑀺 𑀯𑀺𑀧𑀲𑁆𑀲𑀦𑀸𑀬. 𑀕𑀭𑀼𑀝𑁆𑀞𑀸𑀦𑀺𑀬𑀦𑁆𑀢𑀺 𑀕𑀸𑀭𑀯𑀼𑀧𑁆𑀧𑀢𑁆𑀢𑀺𑀧𑀘𑁆𑀘𑀬𑀪𑀽𑀢𑀁 𑀕𑀭𑀼𑀪𑀸𑀯𑀦𑀻𑀬𑀁. 𑀢𑀺𑀩𑁆𑀩𑀦𑁆𑀢𑀺 𑀩𑀳𑀮𑀁. 𑀧𑀭𑀺𑀧𑀼𑀘𑁆𑀙𑀢𑀻𑀢𑀺 𑀅𑀢𑁆𑀣𑀧𑀸𑀴𑀺𑀅𑀦𑀼𑀲𑀦𑁆𑀥𑀺𑀧𑀼𑀩𑁆𑀩𑀸𑀧𑀭𑀁 𑀧𑀼𑀘𑁆𑀙𑀢𑀺. 𑀧𑀭𑀺𑀧𑀜𑁆𑀳𑀢𑀻𑀢𑀺 𑀧𑀜𑁆𑀳𑀁 𑀓𑀭𑁄𑀢𑀺, 𑀇𑀤𑀜𑁆𑀘𑀺𑀤𑀜𑁆𑀘 𑀧𑀝𑀺𑀧𑀼𑀘𑁆𑀙𑀺𑀲𑁆𑀲𑀸𑀫𑀻𑀢𑀺 𑀯𑀺𑀢𑀓𑁆𑀓𑁂𑀢𑀺. 𑀤𑁆𑀯𑀬𑁂𑀦𑀸𑀢𑀺 𑀤𑀼𑀯𑀺𑀥𑁂𑀦. 𑀅𑀦𑀸𑀦𑀸𑀓𑀣𑀺𑀓𑁄𑀢𑀺 𑀅𑀦𑀸𑀦𑀢𑁆𑀢𑀓𑀣𑀺𑀓𑁄 𑀳𑁄𑀢𑀺. 𑀅𑀢𑀺𑀭𑀘𑁆𑀙𑀸𑀦𑀓𑀣𑀺𑀓𑁄𑀢𑀺 𑀦𑀸𑀦𑀸𑀯𑀺𑀥𑀁 𑀢𑀺𑀭𑀘𑁆𑀙𑀸𑀦𑀓𑀣𑀁 𑀦 𑀓𑀣𑁂𑀢𑀺. 𑀅𑀭𑀺𑀬𑀁 𑀯𑀸 𑀢𑀼𑀡𑁆𑀳𑀻𑀪𑀸𑀯𑀦𑁆𑀢𑀺 𑀅𑀭𑀺𑀬𑀢𑀼𑀡𑁆𑀳𑀻𑀪𑀸𑀯𑁄 𑀦𑀸𑀫 𑀘𑀢𑀼𑀢𑁆𑀣𑀚𑁆𑀛𑀸𑀦𑀁, 𑀲𑁂𑀲𑀓𑀫𑁆𑀫𑀝𑁆𑀞𑀸𑀦𑀫𑀦𑀲𑀺𑀓𑀸𑀭𑁄𑀧𑀺 𑀯𑀝𑁆𑀝𑀢𑀺. 𑀚𑀸𑀦𑀁 𑀚𑀸𑀦𑀸𑀢𑀻𑀢𑀺 𑀚𑀸𑀦𑀺𑀢𑀩𑁆𑀩𑀓𑀁 𑀚𑀸𑀦𑀸𑀢𑀺. 𑀧𑀲𑁆𑀲𑀁 𑀧𑀲𑁆𑀲𑀢𑀻𑀢𑀺 𑀧𑀲𑁆𑀲𑀺𑀢𑀩𑁆𑀩𑀓𑀁 𑀧𑀲𑁆𑀲𑀢𑀺. 𑀧𑀺𑀬𑀢𑁆𑀢𑀸𑀬𑀸𑀢𑀺 𑀧𑀺𑀬𑀪𑀸𑀯𑀢𑁆𑀣𑀸𑀬. 𑀕𑀭𑀼𑀢𑁆𑀢𑀸𑀬𑀸𑀢𑀺 𑀕𑀭𑀼𑀪𑀸𑀯𑀢𑁆𑀣𑀸𑀬. 𑀪𑀸𑀯𑀦𑀸𑀬𑀸𑀢𑀺 𑀪𑀸𑀯𑀦𑀢𑁆𑀣𑀸𑀬 𑀕𑀼𑀡𑀲𑀫𑁆𑀪𑀸𑀯𑀦𑀸𑀬 𑀯𑀸. 𑀲𑀸𑀫𑀜𑁆𑀜𑀸𑀬𑀸𑀢𑀺 𑀲𑀫𑀡𑀥𑀫𑁆𑀫𑀢𑁆𑀣𑀸𑀬. 𑀏𑀓𑀻𑀪𑀸𑀯𑀸𑀬𑀸𑀢𑀺 𑀦𑀺𑀭𑀦𑁆𑀢𑀭𑀪𑀸𑀯𑀢𑁆𑀣𑀸𑀬.
𑁩-𑁪. 𑀅𑀧𑁆𑀧𑀺𑀬𑀲𑀼𑀢𑁆𑀢𑀤𑁆𑀯𑀬𑀯𑀡𑁆𑀡𑀦𑀸
𑁩-𑁪. 𑀢𑀢𑀺𑀬𑁂 𑀅𑀧𑁆𑀧𑀺𑀬𑀧𑀲𑀁𑀲𑀻𑀢𑀺 𑀅𑀧𑁆𑀧𑀺𑀬𑀚𑀦𑀲𑁆𑀲 𑀧𑀲𑀁𑀲𑀓𑁄 𑀯𑀡𑁆𑀡𑀪𑀸𑀡𑀻. 𑀧𑀺𑀬𑀕𑀭𑀳𑀻𑀢𑀺 𑀧𑀺𑀬𑀚𑀦𑀲𑁆𑀲 𑀦𑀺𑀦𑁆𑀤𑀓𑁄 𑀕𑀭𑀳𑀓𑁄. 𑀘𑀢𑀼𑀢𑁆𑀣𑁂 𑀅𑀦𑀯𑀜𑁆𑀜𑀢𑁆𑀢𑀺𑀓𑀸𑀫𑁄𑀢𑀺 ‘‘𑀅𑀳𑁄 𑀯𑀢 𑀫𑀁 𑀅𑀜𑁆𑀜𑁂𑀦 𑀅𑀯𑀚𑀸𑀦𑁂𑀬𑁆𑀬𑀼’’𑀦𑁆𑀢𑀺 𑀅𑀦𑀯𑀚𑀸𑀦𑀦𑀓𑀸𑀫𑁄. 𑀅𑀓𑀸𑀮𑀜𑁆𑀜𑀽𑀢𑀺 𑀓𑀣𑀸𑀓𑀸𑀮𑀁 𑀦 𑀚𑀸𑀦𑀸𑀢𑀺, 𑀅𑀓𑀸𑀮𑁂 𑀓𑀣𑁂𑀢𑀺. 𑀅𑀲𑀼𑀘𑀻𑀢𑀺 𑀅𑀲𑀼𑀘𑀻𑀳𑀺 𑀓𑀸𑀬𑀓𑀫𑁆𑀫𑀸𑀤𑀻𑀳𑀺 𑀲𑀫𑀦𑁆𑀦𑀸𑀕𑀢𑁄.
𑁫. 𑀧𑀞𑀫𑀮𑁄𑀓𑀥𑀫𑁆𑀫𑀲𑀼𑀢𑁆𑀢𑀯𑀡𑁆𑀡𑀦𑀸
𑁫. 𑀧𑀜𑁆𑀘𑀫𑁂 𑀮𑁄𑀓𑀲𑁆𑀲 𑀥𑀫𑁆𑀫𑀸𑀢𑀺 𑀮𑁄𑀓𑀥𑀫𑁆𑀫𑀸. 𑀏𑀢𑁂𑀳𑀺 𑀫𑀼𑀢𑁆𑀢𑀸 𑀦𑀸𑀫 𑀦𑀢𑁆𑀣𑀺, 𑀩𑀼𑀤𑁆𑀥𑀸𑀦𑀫𑁆𑀧𑀺 𑀳𑁄𑀦𑁆𑀢𑀺. 𑀢𑁂𑀦𑁂𑀯𑀸𑀳 𑁋 𑀮𑁄𑀓𑀁 𑀅𑀦𑀼𑀧𑀭𑀺𑀯𑀢𑁆𑀢𑀦𑁆𑀢𑀻𑀢𑀺 𑀅𑀦𑀼𑀩𑀦𑁆𑀥𑀦𑁆𑀢𑀺 𑀦𑀧𑁆𑀧𑀚𑀳𑀦𑁆𑀢𑀺, 𑀮𑁄𑀓𑀢𑁄 𑀦 𑀦𑀺𑀯𑀢𑁆𑀢𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀮𑁄𑀓𑁄 𑀘 𑀅𑀝𑁆𑀞 𑀮𑁄𑀓𑀥𑀫𑁆𑀫𑁂 𑀅𑀦𑀼𑀧𑀭𑀺𑀯𑀢𑁆𑀢𑀢𑀻𑀢𑀺 𑀅𑀬𑀜𑁆𑀘 𑀮𑁄𑀓𑁄 𑀏𑀢𑁂 𑀅𑀦𑀼𑀩𑀦𑁆𑀥𑀢𑀺 𑀦 𑀧𑀚𑀳𑀢𑀺, 𑀢𑁂𑀳𑀺 𑀥𑀫𑁆𑀫𑁂𑀳𑀺 𑀦 𑀦𑀺𑀯𑀢𑁆𑀢𑀢𑀻𑀢𑀺 𑀅𑀢𑁆𑀣𑁄.
𑀮𑀸𑀪𑁄 𑀅𑀮𑀸𑀪𑁄𑀢𑀺 𑀮𑀸𑀪𑁂 𑀆𑀕𑀢𑁂 𑀅𑀮𑀸𑀪𑁄 𑀆𑀕𑀢𑁄𑀬𑁂𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀅𑀬𑀲𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀅𑀯𑁂𑀓𑁆𑀔𑀢𑀺 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑁂𑀢𑀺 ‘‘𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀸 𑀇𑀫𑁂’’𑀢𑀺 𑀏𑀯𑀁 𑀅𑀯𑁂𑀓𑁆𑀔𑀢𑀺. 𑀯𑀺𑀥𑀽𑀧𑀺𑀢𑀸𑀢𑀺 𑀯𑀺𑀥𑀫𑀺𑀢𑀸 𑀯𑀺𑀤𑁆𑀥𑀁𑀲𑀺𑀢𑀸. 𑀧𑀤𑀜𑁆𑀘 𑀜𑀢𑁆𑀯𑀸𑀢𑀺 𑀦𑀺𑀩𑁆𑀩𑀸𑀦𑀧𑀤𑀁 𑀚𑀸𑀦𑀺𑀢𑁆𑀯𑀸. 𑀲𑀫𑁆𑀫𑀧𑁆𑀧𑀚𑀸𑀦𑀸𑀢𑀺 𑀪𑀯𑀲𑁆𑀲 𑀧𑀸𑀭𑀕𑀽𑀢𑀺 𑀪𑀯𑀲𑁆𑀲 𑀧𑀸𑀭𑀁 𑀕𑀢𑁄 𑀦𑀺𑀧𑁆𑀨𑀢𑁆𑀢𑀺𑀁 𑀫𑀢𑁆𑀣𑀓𑀁 𑀧𑀢𑁆𑀢𑁄, 𑀦𑀺𑀩𑁆𑀩𑀸𑀦𑀧𑀤𑀁 𑀜𑀢𑁆𑀯𑀸𑀯 𑀢𑀁 𑀧𑀸𑀭𑀁 𑀕𑀢𑀪𑀸𑀯𑀁 𑀲𑀫𑁆𑀫𑀧𑁆𑀧𑀚𑀸𑀦𑀸𑀢𑀻𑀢𑀺. 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀯𑀝𑁆𑀝𑀯𑀺𑀯𑀝𑁆𑀝𑀁 𑀓𑀣𑀺𑀢𑀁.
𑁬. 𑀤𑀼𑀢𑀺𑀬𑀮𑁄𑀓𑀥𑀫𑁆𑀫𑀲𑀼𑀢𑁆𑀢𑀯𑀡𑁆𑀡𑀦𑀸
𑁬. 𑀙𑀝𑁆𑀞𑁂 𑀓𑁄 𑀯𑀺𑀲𑁂𑀲𑁄𑀢𑀺 𑀓𑀺𑀁 𑀯𑀺𑀲𑁂𑀲𑀓𑀸𑀭𑀡𑀁. 𑀓𑁄 𑀅𑀥𑀺𑀧𑁆𑀧𑀬𑀸𑀲𑁄𑀢𑀺 𑀓𑁄 𑀅𑀥𑀺𑀓𑀧𑁆𑀧𑀬𑁄𑀕𑁄. 𑀧𑀭𑀺𑀬𑀸𑀤𑀸𑀬𑀸𑀢𑀺 𑀕𑀳𑁂𑀢𑁆𑀯𑀸 𑀧𑀭𑀺𑀦𑀺𑀝𑁆𑀞𑀧𑁂𑀢𑁆𑀯𑀸. 𑀇𑀥𑀸𑀧𑀺 𑀯𑀝𑁆𑀝𑀯𑀺𑀯𑀝𑁆𑀝𑀫𑁂𑀯 𑀓𑀣𑀺𑀢𑀁.
𑁭. 𑀤𑁂𑀯𑀤𑀢𑁆𑀢𑀯𑀺𑀧𑀢𑁆𑀢𑀺𑀲𑀼𑀢𑁆𑀢𑀯𑀡𑁆𑀡𑀦𑀸
𑁭. 𑀲𑀢𑁆𑀢𑀫𑁂 𑀅𑀘𑀺𑀭𑀧𑀓𑁆𑀓𑀦𑁆𑀢𑁂𑀢𑀺 𑀲𑀗𑁆𑀖𑀁 𑀪𑀺𑀦𑁆𑀤𑀺𑀢𑁆𑀯𑀸 𑀦 𑀘𑀺𑀭𑀧𑀓𑁆𑀓𑀦𑁆𑀢𑁂. 𑀆𑀭𑀩𑁆𑀪𑀸𑀢𑀺 𑀆𑀕𑀫𑁆𑀫 𑀧𑀝𑀺𑀘𑁆𑀘 𑀲𑀦𑁆𑀥𑀸𑀬. 𑀅𑀢𑁆𑀢𑀯𑀺𑀧𑀢𑁆𑀢𑀺𑀦𑁆𑀢𑀺 𑀅𑀢𑁆𑀢𑀦𑁄 𑀯𑀺𑀧𑀢𑁆𑀢𑀺𑀁 𑀯𑀺𑀧𑀦𑁆𑀦𑀸𑀓𑀸𑀭𑀁. 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀅𑀪𑀺𑀪𑀼𑀬𑁆𑀬𑀸𑀢𑀺 𑀅𑀪𑀺𑀪𑀯𑀺𑀢𑁆𑀯𑀸 𑀫𑀤𑁆𑀤𑀺𑀢𑁆𑀯𑀸.
𑁮. 𑀉𑀢𑁆𑀢𑀭𑀯𑀺𑀧𑀢𑁆𑀢𑀺𑀲𑀼𑀢𑁆𑀢𑀯𑀡𑁆𑀡𑀦𑀸
𑁮. 𑀅𑀝𑁆𑀞𑀫𑁂 𑀯𑀝𑀚𑀸𑀮𑀺𑀓𑀸𑀬𑀦𑁆𑀢𑀺 𑀏𑀯𑀁𑀦𑀸𑀫𑀓𑁂 𑀯𑀺𑀳𑀸𑀭𑁂. 𑀲𑁄 𑀓𑀺𑀭 𑀯𑀝𑀯𑀦𑁂 𑀦𑀺𑀯𑀺𑀝𑁆𑀞𑀢𑁆𑀢𑀸 𑀯𑀝𑀚𑀸𑀮𑀺𑀓𑀸𑀢𑀺 𑀲𑀗𑁆𑀔𑀁 𑀕𑀢𑁄. 𑀧𑀸𑀢𑀼𑀭𑀳𑁄𑀲𑀻𑀢𑀺 𑀇𑀫𑀫𑀢𑁆𑀣𑀁 𑀤𑁂𑀯𑀭𑀜𑁆𑀜𑁄 𑀆𑀭𑁄𑀘𑁂𑀲𑁆𑀲𑀸𑀫𑀻𑀢𑀺 𑀕𑀦𑁆𑀢𑁆𑀯𑀸 𑀧𑀸𑀓𑀝𑁄 𑀅𑀳𑁄𑀲𑀺. 𑀆𑀤𑀺𑀩𑁆𑀭𑀳𑁆𑀫𑀘𑀭𑀺𑀬𑀓𑁄𑀢𑀺 𑀲𑀺𑀓𑁆𑀔𑀢𑁆𑀢𑀬𑀲𑀗𑁆𑀕𑀳𑀲𑁆𑀲 𑀲𑀓𑀮𑀲𑀸𑀲𑀦𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀆𑀤𑀺𑀪𑀽𑀢𑁄.
𑁯. 𑀦𑀦𑁆𑀤𑀲𑀼𑀢𑁆𑀢𑀯𑀡𑁆𑀡𑀦𑀸
𑁯. 𑀦𑀯𑀫𑁂 𑀓𑀼𑀮𑀧𑀼𑀢𑁆𑀢𑁄𑀢𑀺 𑀚𑀸𑀢𑀺𑀓𑀼𑀮𑀧𑀼𑀢𑁆𑀢𑁄. 𑀩𑀮𑀯𑀸𑀢𑀺 𑀣𑀸𑀫𑀲𑀫𑁆𑀧𑀦𑁆𑀦𑁄. 𑀧𑀸𑀲𑀸𑀤𑀺𑀓𑁄𑀢𑀺 𑀭𑀽𑀧𑀲𑀫𑁆𑀧𑀢𑁆𑀢𑀺𑀬𑀸 𑀧𑀲𑀸𑀤𑀚𑀦𑀓𑁄. 𑀢𑀺𑀩𑁆𑀩𑀭𑀸𑀕𑁄𑀢𑀺 𑀩𑀳𑀮𑀭𑀸𑀕𑁄. 𑀓𑀺𑀫𑀜𑁆𑀜𑀢𑁆𑀭𑀸𑀢𑀺𑀆𑀤𑀻𑀲𑀼 𑀅𑀬𑀫𑀢𑁆𑀣𑁄 𑁋 𑀓𑀺𑀁 𑀅𑀜𑁆𑀜𑁂𑀦 𑀓𑀸𑀭𑀡𑁂𑀦 𑀓𑀣𑀺𑀢𑁂𑀦, 𑀅𑀬𑀁 𑀦𑀦𑁆𑀤𑁄 𑀇𑀦𑁆𑀤𑁆𑀭𑀺𑀬𑁂𑀲𑀼 𑀕𑀼𑀢𑁆𑀢𑀤𑁆𑀯𑀸𑀭𑁄 𑀪𑁄𑀚𑀦𑁂 𑀫𑀢𑁆𑀢𑀜𑁆𑀜𑀽 𑀚𑀸𑀕𑀭𑀺𑀬𑀫𑀦𑀼𑀬𑀼𑀢𑁆𑀢𑁄 𑀲𑀢𑀺𑀲𑀫𑁆𑀧𑀚𑀜𑁆𑀜𑁂𑀦 𑀲𑀫𑀦𑁆𑀦𑀸𑀕𑀢𑁄, 𑀬𑁂𑀳𑀺 𑀦𑀦𑁆𑀤𑁄 𑀲𑀓𑁆𑀓𑁄𑀢𑀺 𑀧𑀭𑀺𑀧𑀼𑀡𑁆𑀡𑀁 𑀧𑀭𑀺𑀲𑀼𑀤𑁆𑀥𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀺𑀢𑀼𑀁. 𑀲𑀘𑁂 𑀇𑀫𑁂𑀳𑀺 𑀓𑀸𑀭𑀡𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀦𑀸𑀪𑀯𑀺𑀲𑁆𑀲, 𑀦 𑀲𑀓𑁆𑀓𑀼𑀡𑁂𑀬𑁆𑀬𑀸𑀢𑀺. 𑀇𑀢𑀺𑀳 𑀢𑀢𑁆𑀣𑀸𑀢𑀺 𑀏𑀯𑀁 𑀢𑀢𑁆𑀣. 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀯𑀝𑁆𑀝𑀫𑁂𑀯 𑀓𑀣𑀺𑀢𑀁.
𑁧𑁦. 𑀓𑀸𑀭𑀡𑁆𑀟𑀯𑀲𑀼𑀢𑁆𑀢𑀯𑀡𑁆𑀡𑀦𑀸
𑁧𑁦. 𑀤𑀲𑀫𑁂 𑀅𑀜𑁆𑀜𑁂𑀦𑀸𑀜𑁆𑀜𑀁 𑀧𑀝𑀺𑀘𑀭𑀢𑀻𑀢𑀺 𑀅𑀜𑁆𑀜𑁂𑀦 𑀓𑀸𑀭𑀡𑁂𑀦 𑀯𑀘𑀦𑁂𑀦 𑀯𑀸 𑀅𑀜𑁆𑀜𑀁 𑀓𑀸𑀭𑀡𑀁 𑀯𑀘𑀦𑀁 𑀯𑀸 𑀧𑀝𑀺𑀘𑁆𑀙𑀸𑀤𑁂𑀢𑀺. 𑀩𑀳𑀺𑀤𑁆𑀥𑀸 𑀓𑀣𑀁 𑀅𑀧𑀦𑀸𑀫𑁂𑀢𑀻𑀢𑀺 𑀩𑀸𑀳𑀺𑀭𑀢𑁄 𑀅𑀜𑁆𑀜𑀁 𑀆𑀕𑀦𑁆𑀢𑀼𑀓𑀓𑀣𑀁 𑀑𑀢𑀸𑀭𑁂𑀢𑀺. 𑀅𑀧𑀦𑁂𑀬𑁆𑀬𑁂𑀲𑁄𑀢𑀺 𑀅𑀧𑀦𑁂𑀬𑁆𑀬𑁄 𑀦𑀻𑀳𑀭𑀺𑀢𑀩𑁆𑀩𑁄 𑀏𑀲. 𑀲𑀫𑀡𑀤𑀽𑀲𑀻𑀢𑀺 𑀲𑀫𑀡𑀤𑀽𑀲𑀓𑁄. 𑀲𑀫𑀡𑀧𑀮𑀸𑀧𑁄𑀢𑀺 𑀯𑀻𑀳𑀻𑀲𑀼 𑀯𑀻𑀳𑀺𑀧𑀮𑀸𑀧𑁄 𑀯𑀺𑀬 𑀦𑀺𑀲𑁆𑀲𑀸𑀭𑀢𑀸𑀬 𑀲𑀫𑀡𑁂𑀲𑀼 𑀲𑀫𑀡𑀧𑀮𑀸𑀧𑁄. 𑀲𑀫𑀡𑀓𑀸𑀭𑀡𑁆𑀟𑀯𑁄𑀢𑀺 𑀲𑀫𑀡𑀓𑀘𑀯𑀭𑁄. 𑀩𑀳𑀺𑀤𑁆𑀥𑀸 𑀦𑀸𑀲𑁂𑀦𑁆𑀢𑀻𑀢𑀺 𑀩𑀳𑀺 𑀦𑀻𑀳𑀭𑀦𑁆𑀢𑀺. 𑀬𑀯𑀓𑀭𑀡𑁂𑀢𑀺 𑀬𑀯𑀔𑁂𑀢𑁆𑀢𑁂. 𑀨𑀼𑀡𑀫𑀸𑀦𑀲𑁆𑀲𑀸𑀢𑀺 𑀉𑀘𑁆𑀘𑁂 𑀞𑀸𑀦𑁂 𑀞𑀢𑁆𑀯𑀸 𑀫𑀳𑀸𑀯𑀸𑀢𑁂 𑀑𑀧𑀼𑀦𑀺𑀬𑀫𑀸𑀦𑀲𑁆𑀲. 𑀅𑀧𑀲𑀫𑁆𑀫𑀚𑁆𑀚𑀦𑁆𑀢𑀻𑀢𑀺 𑀲𑀸𑀭𑀥𑀜𑁆𑀜𑀸𑀦𑀁 𑀏𑀓𑀢𑁄 𑀤𑀼𑀩𑁆𑀩𑀮𑀥𑀜𑁆𑀜𑀸𑀦𑀁 𑀏𑀓𑀢𑁄 𑀓𑀭𑀡𑀢𑁆𑀣𑀁 𑀧𑀼𑀦𑀧𑁆𑀧𑀼𑀦𑀁 𑀅𑀧𑀲𑀫𑁆𑀫𑀚𑁆𑀚𑀦𑁆𑀢𑀺, 𑀅𑀧𑀲𑀫𑁆𑀫𑀚𑁆𑀚𑀦𑀺𑀲𑀗𑁆𑀔𑀸𑀢𑁂𑀦 𑀯𑀸𑀢𑀕𑁆𑀕𑀸𑀳𑀺𑀦𑀸 𑀲𑀼𑀧𑁆𑀧𑁂𑀦 𑀯𑀸 𑀯𑀢𑁆𑀣𑁂𑀦 𑀯𑀸 𑀦𑀻𑀳𑀭𑀦𑁆𑀢𑀺. 𑀤𑀤𑁆𑀤𑀭𑀦𑁆𑀢𑀺 𑀤𑀤𑁆𑀤𑀭𑀲𑀤𑁆𑀤𑀁.
𑀲𑀁𑀯𑀸𑀲𑀸𑀬𑀦𑁆𑀢𑀺 𑀲𑀁𑀯𑀸𑀲𑁂𑀦 𑀅𑀬𑀁. 𑀯𑀺𑀚𑀸𑀦𑀸𑀣𑀸𑀢𑀺 𑀚𑀸𑀦𑁂𑀬𑁆𑀬𑀸𑀣. 𑀲𑀦𑁆𑀢𑀯𑀸𑀘𑁄𑀢𑀺 𑀲𑀡𑁆𑀳𑀯𑀸𑀘𑁄. 𑀚𑀦𑀯𑀢𑀻𑀢𑀺 𑀚𑀦𑀫𑀚𑁆𑀛𑁂. 𑀭𑀳𑁄 𑀓𑀭𑁄𑀢𑀺 𑀓𑀭𑀡𑀦𑁆𑀢𑀺 𑀓𑀭𑀡𑀁 𑀯𑀼𑀘𑁆𑀘𑀢𑀺 𑀧𑀸𑀧𑀓𑀫𑁆𑀫𑀁, 𑀢𑀁 𑀭𑀳𑁄 𑀧𑀝𑀺𑀘𑁆𑀙𑀦𑁆𑀦𑁄 𑀳𑀼𑀢𑁆𑀯𑀸 𑀓𑀭𑁄𑀢𑀺. 𑀲𑀁𑀲𑀧𑁆𑀧𑀻 𑀘 𑀫𑀼𑀲𑀸𑀯𑀸𑀤𑀻𑀢𑀺 𑀲𑀁𑀲𑀧𑁆𑀧𑀺𑀢𑁆𑀯𑀸 𑀫𑀼𑀲𑀸𑀯𑀸𑀤𑀻, 𑀫𑀼𑀲𑀸 𑀪𑀡𑀦𑁆𑀢𑁄 𑀲𑀁𑀲𑀧𑁆𑀧𑀢𑀺 𑀨𑀦𑁆𑀤𑀢𑀻𑀢𑀺 𑀅𑀢𑁆𑀣𑁄. 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀯𑀝𑁆𑀝𑀫𑁂𑀯 𑀓𑀣𑁂𑀢𑁆𑀯𑀸 𑀕𑀸𑀣𑀸𑀲𑀼 𑀯𑀝𑁆𑀝𑀯𑀺𑀯𑀝𑁆𑀝𑀁 𑀓𑀣𑀺𑀢𑀦𑁆𑀢𑀺.
𑀫𑁂𑀢𑁆𑀢𑀸𑀯𑀕𑁆𑀕𑁄 𑀧𑀞𑀫𑁄.
𑁨. 𑀫𑀳𑀸𑀯𑀕𑁆𑀕𑁄
𑁧. 𑀯𑁂𑀭𑀜𑁆𑀚𑀲𑀼𑀢𑁆𑀢𑀯𑀡𑁆𑀡𑀦𑀸
𑁧𑁧. 𑀤𑀼𑀢𑀺𑀬𑀲𑁆𑀲 𑀧𑀞𑀫𑁂 𑀅𑀪𑀺𑀯𑀸𑀤𑁂𑀢𑀻𑀢𑀺 𑀏𑀯𑀫𑀸𑀤𑀻𑀦𑀺 𑀦 𑀲𑀫𑀡𑁄 𑀕𑁄𑀢𑀫𑁄𑀢𑀺 𑀏𑀢𑁆𑀣 𑀯𑀼𑀢𑁆𑀢𑀦𑀓𑀸𑀭𑁂𑀦 𑀬𑁄𑀚𑁂𑀢𑁆𑀯𑀸 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄 ‘‘𑀦 𑀯𑀦𑁆𑀤𑀢𑀺 𑀦𑀸𑀲𑀦𑀸 𑀯𑀼𑀝𑁆𑀞𑀸𑀢𑀺, 𑀦𑀸𑀧𑀺 ‘𑀇𑀥 𑀪𑁄𑀦𑁆𑀢𑁄 𑀦𑀺𑀲𑀻𑀤𑀦𑁆𑀢𑀽’𑀢𑀺 𑀏𑀯𑀁 𑀆𑀲𑀦𑁂𑀦 𑀯𑀸 𑀦𑀺𑀫𑀦𑁆𑀢𑁂𑀢𑀻’’𑀢𑀺. 𑀏𑀢𑁆𑀣 𑀳𑀺 𑀯𑀸-𑀲𑀤𑁆𑀤𑁄 𑀯𑀺𑀪𑀸𑀯𑀦𑁂 𑀦𑀸𑀫 𑀅𑀢𑁆𑀣𑁂 ‘‘𑀭𑀽𑀧𑀁 𑀦𑀺𑀘𑁆𑀘𑀁 𑀯𑀸 𑀅𑀦𑀺𑀘𑁆𑀘𑀁 𑀯𑀸’’𑀢𑀺𑀆𑀤𑀻𑀲𑀼 𑀯𑀺𑀬. 𑀏𑀯𑀁 𑀯𑀢𑁆𑀯𑀸 𑀅𑀣 𑀅𑀢𑁆𑀢𑀦𑁄 𑀅𑀪𑀺𑀯𑀸𑀤𑀦𑀸𑀤𑀻𑀦𑀺 𑀅𑀓𑀭𑁄𑀦𑁆𑀢𑀁 𑀪𑀕𑀯𑀦𑁆𑀢𑀁 𑀤𑀺𑀲𑁆𑀯𑀸 𑀆𑀳 𑁋 𑀢𑀬𑀺𑀤𑀁, 𑀪𑁄 𑀕𑁄𑀢𑀫, 𑀢𑀣𑁂𑀯𑀸𑀢𑀺. 𑀬𑀁 𑀢𑀁 𑀫𑀬𑀸 𑀲𑀼𑀢𑀁, 𑀢𑀁 𑀢𑀣𑁂𑀯, 𑀢𑀁 𑀲𑀯𑀦𑀜𑁆𑀘 𑀫𑁂 𑀤𑀲𑁆𑀲𑀦𑀜𑁆𑀘 𑀲𑀁𑀲𑀦𑁆𑀤𑀢𑀺 𑀲𑀫𑁂𑀢𑀺, 𑀅𑀢𑁆𑀣𑀢𑁄 𑀏𑀓𑀻𑀪𑀸𑀯𑀁 𑀕𑀘𑁆𑀙𑀢𑀺. 𑀦 𑀳𑀺 𑀪𑀯𑀁 𑀕𑁄𑀢𑀫𑁄…𑀧𑁂… 𑀆𑀲𑀦𑁂𑀦 𑀯𑀸 𑀦𑀺𑀫𑀦𑁆𑀢𑁂𑀢𑀻𑀢𑀺. 𑀏𑀯𑀁 𑀅𑀢𑁆𑀢𑀦𑀸 𑀲𑀼𑀢𑀁 𑀤𑀺𑀝𑁆𑀞𑁂𑀦 𑀦𑀺𑀕𑀫𑁂𑀢𑁆𑀯𑀸 𑀦𑀺𑀦𑁆𑀤𑀦𑁆𑀢𑁄 𑀆𑀳 𑁋 𑀢𑀬𑀺𑀤𑀁, 𑀪𑁄 𑀕𑁄𑀢𑀫, 𑀦 𑀲𑀫𑁆𑀧𑀦𑁆𑀦𑀫𑁂𑀯𑀸𑀢𑀺 𑀢𑀁 𑀅𑀪𑀺𑀯𑀸𑀤𑀦𑀸𑀤𑀻𑀦𑀁 𑀅𑀓𑀭𑀡𑀁 𑀅𑀬𑀼𑀢𑁆𑀢𑀫𑁂𑀯𑀸𑀢𑀺.
𑀅𑀣𑀲𑁆𑀲 𑀪𑀕𑀯𑀸 𑀅𑀢𑁆𑀢𑀼𑀓𑁆𑀓𑀁𑀲𑀦𑀧𑀭𑀯𑀫𑁆𑀪𑀦𑀤𑁄𑀲𑀁 𑀅𑀦𑀼𑀧𑀕𑀫𑁆𑀫 𑀓𑀭𑀼𑀡𑀸𑀲𑀻𑀢𑀮𑁂𑀦 𑀳𑀤𑀬𑁂𑀦 𑀢𑀁 𑀅𑀜𑁆𑀜𑀸𑀡𑀁 𑀯𑀺𑀥𑀫𑀺𑀢𑁆𑀯𑀸 𑀬𑀼𑀢𑁆𑀢𑀪𑀸𑀯𑀁 𑀤𑀲𑁆𑀲𑁂𑀢𑀼𑀓𑀸𑀫𑁄 𑀦𑀸𑀳𑀁 𑀢𑀁 𑀩𑁆𑀭𑀸𑀳𑁆𑀫𑀡𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀭𑀸𑀬𑀁 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀅𑀳𑀁, 𑀩𑁆𑀭𑀸𑀳𑁆𑀫𑀡, 𑀅𑀧𑁆𑀧𑀝𑀺𑀳𑀢𑁂𑀦 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀘𑀓𑁆𑀔𑀼𑀦𑀸 𑀑𑀮𑁄𑀓𑁂𑀦𑁆𑀢𑁄𑀧𑀺 𑀢𑀁 𑀧𑀼𑀕𑁆𑀕𑀮𑀁 𑀏𑀢𑀲𑁆𑀫𑀺𑀁 𑀲𑀤𑁂𑀯𑀓𑀸𑀤𑀺𑀪𑁂𑀤𑁂 𑀮𑁄𑀓𑁂 𑀦 𑀧𑀲𑁆𑀲𑀸𑀫𑀺, 𑀬𑀫𑀳𑀁 𑀅𑀪𑀺𑀯𑀸𑀤𑁂𑀬𑁆𑀬𑀁 𑀯𑀸 𑀧𑀘𑁆𑀘𑀼𑀝𑁆𑀞𑁂𑀬𑁆𑀬𑀁 𑀯𑀸 𑀆𑀲𑀦𑁂𑀦 𑀯𑀸 𑀦𑀺𑀫𑀦𑁆𑀢𑁂𑀬𑁆𑀬𑀁. 𑀅𑀦𑀘𑁆𑀙𑀭𑀺𑀬𑀁 𑀯𑀸 𑀏𑀢𑀁, 𑀲𑁆𑀯𑀸𑀳𑀁 𑀅𑀚𑁆𑀚 𑀲𑀩𑁆𑀩𑀜𑁆𑀜𑀼𑀢𑀁 𑀧𑀢𑁆𑀢𑁄 𑀏𑀯𑀭𑀽𑀧𑀁 𑀦𑀺𑀧𑀘𑁆𑀘𑀸𑀓𑀸𑀭𑀸𑀭𑀳𑀁 𑀧𑀼𑀕𑁆𑀕𑀮𑀁 𑀦 𑀧𑀲𑁆𑀲𑀸𑀫𑀺. 𑀅𑀧𑀺𑀘 𑀔𑁄 𑀬𑀤𑀸𑀧𑀸𑀳𑀁 𑀲𑀫𑁆𑀧𑀢𑀺𑀚𑀸𑀢𑁄𑀯 𑀉𑀢𑁆𑀢𑀭𑁂𑀦 𑀫𑀼𑀔𑁄 𑀲𑀢𑁆𑀢𑀧𑀤𑀯𑀻𑀢𑀺𑀳𑀸𑀭𑁂𑀦 𑀕𑀦𑁆𑀢𑁆𑀯𑀸 𑀲𑀓𑀮𑀁 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀁 𑀑𑀮𑁄𑀓𑁂𑀲𑀺𑀁, 𑀢𑀤𑀸𑀧𑀺 𑀏𑀢𑀲𑁆𑀫𑀺𑀁 𑀲𑀤𑁂𑀯𑀓𑀸𑀤𑀺𑀪𑁂𑀤𑁂 𑀮𑁄𑀓𑁂 𑀢𑀁 𑀧𑀼𑀕𑁆𑀕𑀮𑀁 𑀦 𑀧𑀲𑁆𑀲𑀸𑀫𑀺, 𑀬𑀫𑀳𑀁 𑀏𑀯𑀭𑀽𑀧𑀁 𑀦𑀺𑀧𑀘𑁆𑀘𑀓𑀸𑀭𑀁 𑀓𑀭𑁂𑀬𑁆𑀬𑀁. 𑀅𑀣 𑀔𑁄 𑀫𑀁 𑀲𑁄𑀴𑀲𑀓𑀧𑁆𑀧𑀲𑀳𑀲𑁆𑀲𑀸𑀬𑀼𑀓𑁄 𑀔𑀻𑀡𑀸𑀲𑀯𑀫𑀳𑀸𑀩𑁆𑀭𑀳𑁆𑀫𑀸𑀧𑀺 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸 ‘‘𑀢𑁆𑀯𑀁 𑀮𑁄𑀓𑁂 𑀫𑀳𑀸𑀧𑀼𑀭𑀺𑀲𑁄, 𑀢𑁆𑀯𑀁 𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲 𑀅𑀕𑁆𑀕𑁄 𑀘 𑀚𑁂𑀝𑁆𑀞𑁄 𑀘 𑀲𑁂𑀝𑁆𑀞𑁄 𑀘, 𑀦𑀢𑁆𑀣𑀺 𑀢𑀬𑀸 𑀉𑀢𑁆𑀢𑀭𑀺𑀢𑀭𑁄’’𑀢𑀺 𑀲𑀜𑁆𑀚𑀸𑀢𑀲𑁄𑀫𑀦𑀲𑁆𑀲𑁄 𑀧𑀢𑀺𑀫𑀸𑀦𑁂𑀲𑀺. 𑀢𑀤𑀸𑀧𑀺 𑀘𑀸𑀳𑀁 𑀅𑀢𑁆𑀢𑀦𑀸 𑀉𑀢𑁆𑀢𑀭𑀺𑀢𑀭𑀁 𑀅𑀧𑀲𑁆𑀲𑀦𑁆𑀢𑁄 𑀆𑀲𑀪𑀺𑀁 𑀯𑀸𑀘𑀁 𑀦𑀺𑀘𑁆𑀙𑀸𑀭𑁂𑀲𑀺𑀁 𑁋 ‘‘𑀅𑀕𑁆𑀕𑁄𑀳𑀫𑀲𑁆𑀫𑀺 𑀮𑁄𑀓𑀲𑁆𑀲, 𑀚𑁂𑀝𑁆𑀞𑁄𑀳𑀫𑀲𑁆𑀫𑀺 𑀮𑁄𑀓𑀲𑁆𑀲, 𑀲𑁂𑀝𑁆𑀞𑁄𑀳𑀫𑀲𑁆𑀫𑀺 𑀮𑁄𑀓𑀲𑁆𑀲𑀸’’𑀢𑀺. 𑀏𑀯𑀁 𑀲𑀫𑁆𑀧𑀢𑀺𑀚𑀸𑀢𑀲𑁆𑀲𑀸𑀧𑀺 𑀫𑀬𑁆𑀳𑀁 𑀅𑀪𑀺𑀯𑀸𑀤𑀦𑀸𑀤𑀺𑀭𑀳𑁄 𑀧𑀼𑀕𑁆𑀕𑀮𑁄 𑀦𑀢𑁆𑀣𑀺, 𑀲𑁆𑀯𑀸𑀳𑀁 𑀇𑀤𑀸𑀦𑀺 𑀲𑀩𑁆𑀩𑀜𑁆𑀜𑀼𑀢𑀁 𑀧𑀢𑁆𑀢𑁄 𑀓𑀁 𑀅𑀪𑀺𑀯𑀸𑀤𑁂𑀬𑁆𑀬𑀁. 𑀢𑀲𑁆𑀫𑀸 𑀢𑁆𑀯𑀁, 𑀩𑁆𑀭𑀸𑀳𑁆𑀫𑀡, 𑀫𑀸 𑀢𑀣𑀸𑀕𑀢𑀸 𑀏𑀯𑀭𑀽𑀧𑀁 𑀧𑀭𑀫𑀦𑀺𑀧𑀘𑁆𑀘𑀓𑀸𑀭𑀁 𑀧𑀢𑁆𑀣𑀬𑀺. 𑀬𑀜𑁆𑀳𑀺, 𑀩𑁆𑀭𑀸𑀳𑁆𑀫𑀡, 𑀢𑀣𑀸𑀕𑀢𑁄 𑀅𑀪𑀺𑀯𑀸𑀤𑁂𑀬𑁆𑀬 𑀯𑀸…𑀧𑁂… 𑀆𑀲𑀦𑁂𑀦 𑀯𑀸 𑀦𑀺𑀫𑀦𑁆𑀢𑁂𑀬𑁆𑀬, 𑀫𑀼𑀤𑁆𑀥𑀸𑀧𑀺 𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀭𑀢𑁆𑀢𑀺𑀧𑀭𑀺𑀬𑁄𑀲𑀸𑀦𑁂 𑀧𑀭𑀺𑀧𑀸𑀓𑀲𑀺𑀣𑀺𑀮𑀩𑀦𑁆𑀥𑀦𑀁 𑀯𑀡𑁆𑀝𑀸 𑀫𑀼𑀢𑁆𑀢𑀢𑀸𑀮𑀨𑀮𑀁 𑀯𑀺𑀬 𑀕𑀻𑀯𑀢𑁄 𑀙𑀺𑀚𑁆𑀚𑀺𑀢𑁆𑀯𑀸 𑀲𑀳𑀲𑀸𑀯 𑀪𑀽𑀫𑀺𑀬𑀁 𑀦𑀺𑀧𑀢𑁂𑀬𑁆𑀬.
𑀏𑀯𑀁 𑀯𑀼𑀢𑁆𑀢𑁂𑀧𑀺 𑀩𑁆𑀭𑀸𑀳𑁆𑀫𑀡𑁄 𑀤𑀼𑀧𑁆𑀧𑀜𑁆𑀜𑀢𑀸𑀬 𑀢𑀣𑀸𑀕𑀢𑀲𑁆𑀲 𑀮𑁄𑀓𑀚𑁂𑀝𑁆𑀞𑀪𑀸𑀯𑀁 𑀅𑀲𑀮𑁆𑀮𑀓𑁆𑀔𑁂𑀦𑁆𑀢𑁄 𑀓𑁂𑀯𑀮𑀁 𑀢𑀁 𑀯𑀘𑀦𑀁 𑀅𑀲𑀳𑀫𑀸𑀦𑁄 𑀆𑀳 𑁋 𑀅𑀭𑀲𑀭𑀽𑀧𑁄 𑀪𑀯𑀁 𑀕𑁄𑀢𑀫𑁄𑀢𑀺. 𑀅𑀬𑀁 𑀓𑀺𑀭𑀲𑁆𑀲 𑀅𑀥𑀺𑀧𑁆𑀧𑀸𑀬𑁄 𑁋 𑀬𑀁 𑀮𑁄𑀓𑁂 𑀅𑀪𑀺𑀯𑀸𑀤𑀦𑀧𑀘𑁆𑀘𑀼𑀝𑁆𑀞𑀸𑀦𑀅𑀜𑁆𑀚𑀮𑀺𑀓𑀫𑁆𑀫𑀲𑀸𑀫𑀻𑀘𑀺𑀓𑀫𑁆𑀫𑀁 ‘‘𑀲𑀸𑀫𑀕𑁆𑀕𑀺𑀭𑀲𑁄’’𑀢𑀺 𑀯𑀼𑀘𑁆𑀘𑀢𑀺, 𑀢𑀁 𑀪𑁄𑀢𑁄 𑀕𑁄𑀢𑀫𑀲𑁆𑀲 𑀦𑀢𑁆𑀣𑀺. 𑀢𑀲𑁆𑀫𑀸 𑀅𑀭𑀲𑀭𑀽𑀧𑁄 𑀪𑀯𑀁 𑀕𑁄𑀢𑀫𑁄, 𑀅𑀭𑀲𑀚𑀸𑀢𑀺𑀓𑁄 𑀅𑀭𑀲𑀲𑀪𑀸𑀯𑁄𑀢𑀺. 𑀅𑀣𑀲𑁆𑀲 𑀪𑀕𑀯𑀸 𑀘𑀺𑀢𑁆𑀢𑀫𑀼𑀤𑀼𑀪𑀸𑀯𑀚𑀦𑀦𑀢𑁆𑀣𑀁 𑀉𑀚𑀼𑀯𑀺𑀧𑀘𑁆𑀘𑀦𑀻𑀓𑀪𑀸𑀯𑀁 𑀧𑀭𑀺𑀳𑀭𑀦𑁆𑀢𑁄 𑀅𑀜𑁆𑀜𑀣𑀸 𑀢𑀲𑁆𑀲 𑀯𑀘𑀦𑀲𑁆𑀲 𑀅𑀢𑁆𑀣𑀁 𑀅𑀢𑁆𑀢𑀦𑀺 𑀲𑀦𑁆𑀤𑀲𑁆𑀲𑁂𑀦𑁆𑀢𑁄 𑀅𑀢𑁆𑀣𑀺 𑀔𑁆𑀯𑁂𑀲, 𑀩𑁆𑀭𑀸𑀳𑁆𑀫𑀡, 𑀧𑀭𑀺𑀬𑀸𑀬𑁄𑀢𑀺𑀆𑀤𑀺𑀫𑀸𑀳.
𑀢𑀢𑁆𑀣 𑀅𑀢𑁆𑀣𑀺 𑀔𑁆𑀯𑁂𑀲𑀸𑀢𑀺 𑀅𑀢𑁆𑀣𑀺 𑀔𑁄 𑀏𑀲. 𑀧𑀭𑀺𑀬𑀸𑀬𑁄𑀢𑀺 𑀓𑀸𑀭𑀡𑀁. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀅𑀢𑁆𑀣𑀺 𑀔𑁄, 𑀩𑁆𑀭𑀸𑀳𑁆𑀫𑀡, 𑀏𑀢𑀁 𑀓𑀸𑀭𑀡𑀁, 𑀬𑁂𑀦 𑀓𑀸𑀭𑀡𑁂𑀦 𑀫𑀁 ‘‘𑀅𑀭𑀲𑀭𑀽𑀧𑁄 𑀪𑀯𑀁 𑀕𑁄𑀢𑀫𑁄’’𑀢𑀺 𑀯𑀤𑀫𑀸𑀦𑁄 𑀧𑀼𑀕𑁆𑀕𑀮𑁄 𑀲𑀫𑁆𑀫𑀸 𑀯𑀤𑁂𑀬𑁆𑀬, 𑀅𑀯𑀺𑀢𑀣𑀯𑀸𑀤𑀻𑀢𑀺 𑀲𑀗𑁆𑀔𑀁 𑀕𑀘𑁆𑀙𑁂𑀬𑁆𑀬. 𑀓𑀢𑀫𑁄 𑀧𑀦 𑀲𑁄𑀢𑀺? 𑀬𑁂 𑀢𑁂, 𑀩𑁆𑀭𑀸𑀳𑁆𑀫𑀡, 𑀭𑀽𑀧𑀭𑀲𑀸…𑀧𑁂… 𑀨𑁄𑀝𑁆𑀞𑀩𑁆𑀩𑀭𑀲𑀸, 𑀢𑁂 𑀢𑀣𑀸𑀕𑀢𑀲𑁆𑀲 𑀧𑀳𑀻𑀦𑀸𑀢𑀺. 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺? 𑀬𑁂 𑀢𑁂 𑀚𑀸𑀢𑀺𑀯𑀲𑁂𑀦 𑀯𑀸 𑀉𑀧𑀧𑀢𑁆𑀢𑀺𑀯𑀲𑁂𑀦 𑀯𑀸 𑀲𑁂𑀝𑁆𑀞𑀲𑀫𑁆𑀫𑀢𑀸𑀦𑀫𑁆𑀧𑀺 𑀧𑀼𑀣𑀼𑀚𑁆𑀚𑀦𑀸𑀦𑀁 𑀭𑀽𑀧𑀸𑀭𑀫𑁆𑀫𑀡𑀸𑀤𑀻𑀦𑀺 𑀅𑀲𑁆𑀲𑀸𑀤𑁂𑀦𑁆𑀢𑀸𑀦𑀁 𑀅𑀪𑀺𑀦𑀦𑁆𑀤𑀦𑁆𑀢𑀸𑀦𑀁 𑀭𑀚𑁆𑀚𑀦𑁆𑀢𑀸𑀦𑀁 𑀉𑀧𑁆𑀧𑀚𑁆𑀚𑀦𑁆𑀢𑀺 𑀓𑀸𑀫𑀲𑀼𑀔𑀲𑁆𑀲𑀸𑀤𑀲𑀗𑁆𑀔𑀸𑀢𑀸 𑀭𑀽𑀧𑀭𑀲𑀸, 𑀲𑀤𑁆𑀤𑀭𑀲𑀸, 𑀕𑀦𑁆𑀥𑀭𑀲𑀸, 𑀭𑀲𑀭𑀲𑀸, 𑀨𑁄𑀝𑁆𑀞𑀩𑁆𑀩𑀭𑀲𑀸, 𑀬𑁂 𑀇𑀫𑀁 𑀮𑁄𑀓𑀁 𑀕𑀻𑀯𑀸𑀬 𑀩𑀦𑁆𑀥𑀺𑀢𑁆𑀯𑀸 𑀯𑀺𑀬 𑀆𑀯𑀺𑀜𑁆𑀙𑀦𑁆𑀢𑀺, 𑀯𑀢𑁆𑀣𑀸𑀭𑀫𑁆𑀫𑀡𑀸𑀤𑀺𑀲𑀸𑀫𑀕𑁆𑀕𑀺𑀬𑀜𑁆𑀘 𑀉𑀧𑁆𑀧𑀦𑁆𑀦𑀢𑁆𑀢𑀸 𑀲𑀸𑀫𑀕𑁆𑀕𑀺𑀭𑀲𑀸𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀢𑁂 𑀲𑀩𑁆𑀩𑁂𑀧𑀺 𑀢𑀣𑀸𑀕𑀢𑀲𑁆𑀲 𑀧𑀳𑀻𑀦𑀸. ‘‘𑀫𑀬𑁆𑀳𑀁 𑀧𑀳𑀻𑀦𑀸’’𑀢𑀺 𑀯𑀢𑁆𑀢𑀩𑁆𑀩𑁂𑀧𑀺 𑀫𑀫𑀸𑀓𑀸𑀭𑁂𑀦 𑀅𑀢𑁆𑀢𑀸𑀦𑀁 𑀅𑀦𑀼𑀓𑁆𑀔𑀺𑀧𑀦𑁆𑀢𑁄 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀤𑁂𑀲𑀦𑀸𑀯𑀺𑀮𑀸𑀲𑁄 𑀯𑀸 𑀏𑀲 𑀢𑀣𑀸𑀕𑀢𑀲𑁆𑀲.
𑀢𑀢𑁆𑀣 𑀧𑀳𑀻𑀦𑀸𑀢𑀺 𑀘𑀺𑀢𑁆𑀢𑀲𑀦𑁆𑀢𑀸𑀦𑀢𑁄 𑀯𑀺𑀕𑀢𑀸, 𑀧𑀚𑀳𑀺𑀢𑀸 𑀯𑀸. 𑀏𑀢𑀲𑁆𑀫𑀺𑀁 𑀧𑀦𑀢𑁆𑀣𑁂 𑀓𑀭𑀡𑁂 𑀲𑀸𑀫𑀺𑀯𑀘𑀦𑀁 𑀤𑀝𑁆𑀞𑀩𑁆𑀩𑀁. 𑀅𑀭𑀺𑀬𑀫𑀕𑁆𑀕𑀲𑀢𑁆𑀣𑁂𑀦 𑀉𑀘𑁆𑀙𑀺𑀦𑁆𑀦𑀁 𑀢𑀡𑁆𑀳𑀸𑀯𑀺𑀚𑁆𑀚𑀸𑀫𑀬𑀁 𑀫𑀽𑀮𑀁 𑀏𑀢𑁂𑀲𑀦𑁆𑀢𑀺 𑀉𑀘𑁆𑀙𑀺𑀦𑁆𑀦𑀫𑀽𑀮𑀸. 𑀢𑀸𑀮𑀯𑀢𑁆𑀣𑀼 𑀯𑀺𑀬 𑀦𑁂𑀲𑀁 𑀯𑀢𑁆𑀣𑀼 𑀓𑀢𑀦𑁆𑀢𑀺 𑀢𑀸𑀮𑀸𑀯𑀢𑁆𑀣𑀼𑀓𑀢𑀸. 𑀬𑀣𑀸 𑀳𑀺 𑀢𑀸𑀮𑀭𑀼𑀓𑁆𑀔𑀁 𑀲𑀫𑀽𑀮𑀁 𑀉𑀤𑁆𑀥𑀭𑀺𑀢𑁆𑀯𑀸 𑀢𑀲𑁆𑀲 𑀯𑀢𑁆𑀣𑀼𑀫𑀢𑁆𑀢𑁂 𑀢𑀲𑁆𑀫𑀺𑀁 𑀧𑀤𑁂𑀲𑁂 𑀓𑀢𑁂 𑀦 𑀧𑀼𑀦 𑀢𑀲𑁆𑀲 𑀢𑀸𑀮𑀲𑁆𑀲 𑀉𑀧𑁆𑀧𑀢𑁆𑀢𑀺 𑀧𑀜𑁆𑀜𑀸𑀬𑀢𑀺, 𑀏𑀯𑀁 𑀅𑀭𑀺𑀬𑀫𑀕𑁆𑀕𑀲𑀢𑁆𑀣𑁂𑀦 𑀲𑀫𑀽𑀮𑁂 𑀭𑀽𑀧𑀸𑀤𑀺𑀭𑀲𑁂 𑀉𑀤𑁆𑀥𑀭𑀺𑀢𑁆𑀯𑀸 𑀢𑁂𑀲𑀁 𑀧𑀼𑀩𑁆𑀩𑁂 𑀉𑀧𑁆𑀧𑀦𑁆𑀦𑀧𑀼𑀩𑁆𑀩𑀪𑀸𑀯𑁂𑀦 𑀯𑀢𑁆𑀣𑀼𑀫𑀢𑁆𑀢𑁂 𑀘𑀺𑀢𑁆𑀢𑀲𑀦𑁆𑀢𑀸𑀦𑁂 𑀓𑀢𑁂 𑀲𑀩𑁆𑀩𑁂𑀧𑀺 𑀢𑁂 𑀢𑀸𑀮𑀸𑀯𑀢𑁆𑀣𑀼𑀓𑀢𑀸𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀅𑀯𑀺𑀭𑀼𑀴𑁆𑀳𑀺𑀥𑀫𑁆𑀫𑀢𑁆𑀢𑀸 𑀯𑀸 𑀫𑀢𑁆𑀣𑀓𑀘𑁆𑀙𑀺𑀦𑁆𑀦𑀢𑀸𑀮𑁄 𑀯𑀺𑀬 𑀓𑀢𑀸𑀢𑀺 𑀢𑀸𑀮𑀸𑀯𑀢𑁆𑀣𑀼𑀓𑀢𑀸. 𑀬𑀲𑁆𑀫𑀸 𑀧𑀦 𑀏𑀯𑀁 𑀢𑀸𑀮𑀸𑀯𑀢𑁆𑀣𑀼𑀓𑀢𑀸 𑀅𑀦𑀪𑀸𑀯𑀁𑀓𑀢𑀸 𑀳𑁄𑀦𑁆𑀢𑀺, 𑀬𑀣𑀸 𑀦𑁂𑀲𑀁 𑀧𑀘𑁆𑀙𑀸𑀪𑀸𑀯𑁄 𑀦 𑀳𑁄𑀢𑀺, 𑀢𑀣𑀸 𑀓𑀢𑀸 𑀳𑁄𑀦𑁆𑀢𑀺. 𑀢𑀲𑁆𑀫𑀸 𑀆𑀳 𑁋 𑀅𑀦𑀪𑀸𑀯𑀁𑀓𑀢𑀸𑀢𑀺. 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀸𑀢𑀺 𑀅𑀦𑀸𑀕𑀢𑁂 𑀅𑀦𑀼𑀧𑁆𑀧𑀚𑁆𑀚𑀦𑀓𑀲𑀪𑀸𑀯𑀸.
𑀦𑁄 𑀘 𑀔𑁄 𑀬𑀁 𑀢𑁆𑀯𑀁 𑀲𑀦𑁆𑀥𑀸𑀬 𑀯𑀤𑁂𑀲𑀻𑀢𑀺 𑀬𑀜𑁆𑀘 𑀔𑁄 𑀢𑁆𑀯𑀁 𑀲𑀦𑁆𑀥𑀸𑀬 𑀯𑀤𑁂𑀲𑀺, 𑀲𑁄 𑀧𑀭𑀺𑀬𑀸𑀬𑁄 𑀦 𑀳𑁄𑀢𑀺. 𑀦𑀦𑀼 𑀘 𑀏𑀯𑀁 𑀯𑀼𑀢𑁆𑀢𑁂 𑀬𑁄 𑀩𑁆𑀭𑀸𑀳𑁆𑀫𑀡𑁂𑀦 𑀯𑀼𑀢𑁆𑀢𑁄 𑀲𑀸𑀫𑀕𑁆𑀕𑀺𑀭𑀲𑁄, 𑀢𑀲𑁆𑀲 𑀅𑀢𑁆𑀢𑀦𑀺 𑀯𑀺𑀚𑁆𑀚𑀫𑀸𑀦𑀢𑀸 𑀅𑀦𑀼𑀜𑁆𑀜𑀸𑀢𑀸 𑀳𑁄𑀢𑀻𑀢𑀺? 𑀦 𑀳𑁄𑀢𑀺. 𑀬𑁄 𑀳𑀺 𑀦𑀁 𑀲𑀸𑀫𑀕𑁆𑀕𑀺𑀭𑀲𑀁 𑀓𑀸𑀢𑀼𑀁 𑀪𑀩𑁆𑀩𑁄 𑀳𑀼𑀢𑁆𑀯𑀸 𑀦 𑀓𑀭𑁄𑀢𑀺, 𑀲𑁄 𑀢𑀤𑀪𑀸𑀯𑁂𑀦 𑀅𑀭𑀲𑀭𑀽𑀧𑁄𑀢𑀺 𑀯𑀢𑁆𑀢𑀩𑁆𑀩𑀢𑀁 𑀅𑀭𑀳𑀢𑀺. 𑀪𑀕𑀯𑀸 𑀧𑀦 𑀅𑀪𑀩𑁆𑀩𑁄𑀯 𑀏𑀢𑀁 𑀓𑀸𑀢𑀼𑀁, 𑀢𑁂𑀦𑀲𑁆𑀲 𑀓𑀸𑀭𑀡𑁂 𑀅𑀪𑀩𑁆𑀩𑀢𑀁 𑀧𑀓𑀸𑀲𑁂𑀦𑁆𑀢𑁄 𑀆𑀳 𑁋 ‘‘𑀦𑁄 𑀘 𑀔𑁄 𑀬𑀁 𑀢𑁆𑀯𑀁 𑀲𑀦𑁆𑀥𑀸𑀬 𑀯𑀤𑁂𑀲𑀻’’𑀢𑀺. 𑀬𑀁 𑀧𑀭𑀺𑀬𑀸𑀬𑀁 𑀲𑀦𑁆𑀥𑀸𑀬 𑀢𑁆𑀯𑀁 𑀫𑀁 ‘‘𑀅𑀭𑀲𑀭𑀽𑀧𑁄’’𑀢𑀺 𑀯𑀤𑁂𑀲𑀺, 𑀲𑁄 𑀅𑀫𑁆𑀳𑁂𑀲𑀼 𑀦𑁂𑀯 𑀯𑀢𑁆𑀢𑀩𑁆𑀩𑁄𑀢𑀺.
𑀏𑀯𑀁 𑀩𑁆𑀭𑀸𑀳𑁆𑀫𑀡𑁄 𑀅𑀢𑁆𑀢𑀦𑀸 𑀅𑀥𑀺𑀧𑁆𑀧𑁂𑀢𑀁 𑀅𑀭𑀲𑀭𑀽𑀧𑀢𑀁 𑀆𑀭𑁄𑀧𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀅𑀣𑀸𑀧𑀭𑀁 𑀦𑀺𑀩𑁆𑀪𑁄𑀕𑁄 𑀪𑀯𑀦𑁆𑀢𑀺𑀆𑀤𑀺𑀫𑀸𑀳. 𑀲𑀩𑁆𑀩𑀧𑀭𑀺𑀬𑀸𑀬𑁂𑀲𑀼 𑀘𑁂𑀢𑁆𑀣 𑀯𑀼𑀢𑁆𑀢𑀦𑀬𑁂𑀦𑁂𑀯 𑀬𑁄𑀚𑀦𑀸𑀓𑁆𑀓𑀫𑀁 𑀯𑀺𑀤𑀺𑀢𑁆𑀯𑀸 𑀲𑀦𑁆𑀥𑀸𑀬𑀪𑀸𑀲𑀺𑀢𑀫𑀢𑁆𑀣𑀁 𑀏𑀯𑀁 𑀯𑁂𑀤𑀺𑀢𑀩𑁆𑀩𑀁 𑁋 𑀩𑁆𑀭𑀸𑀳𑁆𑀫𑀡𑁄 𑀢𑀤𑁂𑀯 𑀯𑀬𑁄𑀯𑀼𑀤𑁆𑀥𑀸𑀦𑀁 𑀅𑀪𑀺𑀯𑀸𑀤𑀦𑀸𑀤𑀺𑀓𑀫𑁆𑀫𑀁 𑀮𑁄𑀓𑁂 ‘‘𑀲𑀸𑀫𑀕𑁆𑀕𑀺𑀧𑀭𑀺𑀪𑁄𑀕𑁄’’𑀢𑀺 𑀫𑀜𑁆𑀜𑀫𑀸𑀦𑁄 𑀢𑀤𑀪𑀸𑀯𑁂𑀦 𑀘 𑀪𑀕𑀯𑀦𑁆𑀢𑀁 ‘‘𑀦𑀺𑀩𑁆𑀪𑁄𑀕𑁄’’𑀢𑀺𑀆𑀤𑀺𑀫𑀸𑀳. 𑀪𑀕𑀯𑀸 𑀘 𑀬𑁆𑀯𑀸𑀬𑀁 𑀭𑀽𑀧𑀸𑀤𑀻𑀲𑀼 𑀲𑀢𑁆𑀢𑀸𑀦𑀁 𑀙𑀦𑁆𑀤𑀭𑀸𑀕𑀧𑀭𑀺𑀪𑁄𑀕𑁄, 𑀢𑀤𑀪𑀸𑀯𑀁 𑀅𑀢𑁆𑀢𑀦𑀺 𑀲𑀫𑁆𑀧𑀲𑁆𑀲𑀫𑀸𑀦𑁄 𑀅𑀧𑀭𑀁 𑀧𑀭𑀺𑀬𑀸𑀬𑀫𑀦𑀼𑀚𑀸𑀦𑀺.
𑀧𑀼𑀦 𑀩𑁆𑀭𑀸𑀳𑁆𑀫𑀡𑁄 𑀬𑀁 𑀮𑁄𑀓𑁂 𑀯𑀬𑁄𑀯𑀼𑀤𑁆𑀥𑀸𑀦𑀁 𑀅𑀪𑀺𑀯𑀸𑀤𑀦𑀸𑀤𑀺𑀓𑀼𑀮𑀲𑀫𑀼𑀤𑀸𑀘𑀸𑀭𑀓𑀫𑁆𑀫𑀁 𑀮𑁄𑀓𑀺𑀬𑀸 𑀓𑀭𑁄𑀦𑁆𑀢𑀺, 𑀢𑀲𑁆𑀲 𑀅𑀓𑀺𑀭𑀺𑀬𑀁 𑀲𑀫𑁆𑀧𑀲𑁆𑀲𑀫𑀸𑀦𑁄 𑀪𑀕𑀯𑀦𑁆𑀢𑀁 𑀅𑀓𑀺𑀭𑀺𑀬𑀯𑀸𑀤𑁄𑀢𑀺 𑀆𑀳. 𑀪𑀕𑀯𑀸 𑀧𑀦 𑀬𑀲𑁆𑀫𑀸 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀻𑀦𑀁 𑀅𑀓𑀺𑀭𑀺𑀬𑀁 𑀯𑀤𑀢𑀺, 𑀢𑀲𑁆𑀫𑀸 𑀢𑀁 𑀅𑀓𑀺𑀭𑀺𑀬𑀯𑀸𑀤𑀺𑀢𑀁 𑀅𑀢𑁆𑀢𑀦𑀺 𑀲𑀫𑁆𑀧𑀲𑁆𑀲𑀫𑀸𑀦𑁄 𑀅𑀧𑀭𑀁 𑀧𑀭𑀺𑀬𑀸𑀬𑀫𑀦𑀼𑀚𑀸𑀦𑀺. 𑀢𑀢𑁆𑀣 𑀞𑀧𑁂𑀢𑁆𑀯𑀸 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀻𑀦𑀺 𑀅𑀯𑀲𑁂𑀲𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀦𑁂𑀓𑀯𑀺𑀳𑀺𑀢𑀸 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.
𑀧𑀼𑀦 𑀩𑁆𑀭𑀸𑀳𑁆𑀫𑀡𑁄 𑀢𑀤𑁂𑀯 𑀅𑀪𑀺𑀯𑀸𑀤𑀦𑀸𑀤𑀺𑀓𑀫𑁆𑀫𑀁 𑀪𑀕𑀯𑀢𑀺 𑀅𑀧𑀲𑁆𑀲𑀦𑁆𑀢𑁄 ‘‘𑀇𑀫𑀁 𑀆𑀕𑀫𑁆𑀫 𑀅𑀬𑀁 𑀮𑁄𑀓𑀢𑀦𑁆𑀢𑀺 𑀮𑁄𑀓𑀧𑀯𑁂𑀡𑀻 𑀉𑀘𑁆𑀙𑀺𑀚𑁆𑀚𑀢𑀻’’𑀢𑀺 𑀫𑀜𑁆𑀜𑀫𑀸𑀦𑁄 𑀪𑀕𑀯𑀦𑁆𑀢𑀁 𑀉𑀘𑁆𑀙𑁂𑀤𑀯𑀸𑀤𑁄𑀢𑀺 𑀆𑀳. 𑀪𑀕𑀯𑀸 𑀧𑀦 𑀬𑀲𑁆𑀫𑀸 𑀧𑀜𑁆𑀘𑀓𑀸𑀫𑀕𑀼𑀡𑀺𑀓𑀭𑀸𑀕𑀲𑁆𑀲 𑀘𑁂𑀯 𑀅𑀓𑀼𑀲𑀮𑀘𑀺𑀢𑁆𑀢𑀤𑁆𑀯𑀬𑀲𑀫𑁆𑀧𑀬𑀼𑀢𑁆𑀢𑀲𑁆𑀲 𑀘 𑀤𑁄𑀲𑀲𑁆𑀲 𑀅𑀦𑀸𑀕𑀸𑀫𑀺𑀫𑀕𑁆𑀕𑁂𑀦 𑀉𑀘𑁆𑀙𑁂𑀤𑀁 𑀯𑀤𑀢𑀺, 𑀲𑀩𑁆𑀩𑀸𑀓𑀼𑀲𑀮𑀲𑀫𑁆𑀪𑀯𑀲𑁆𑀲 𑀧𑀦 𑀫𑁄𑀳𑀲𑁆𑀲 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀉𑀘𑁆𑀙𑁂𑀤𑀁 𑀯𑀤𑀢𑀺, 𑀞𑀧𑁂𑀢𑁆𑀯𑀸 𑀢𑁂 𑀢𑀬𑁄 𑀅𑀯𑀲𑁂𑀲𑀸𑀦𑀁 𑀧𑀸𑀧𑀓𑀸𑀦𑀁 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀬𑀣𑀸𑀦𑀼𑀭𑀽𑀧𑀁 𑀘𑀢𑀽𑀳𑀺 𑀫𑀕𑁆𑀕𑁂𑀳𑀺 𑀉𑀘𑁆𑀙𑁂𑀤𑀁 𑀯𑀤𑀢𑀺, 𑀢𑀲𑁆𑀫𑀸 𑀢𑀁 𑀉𑀘𑁆𑀙𑁂𑀤𑀯𑀸𑀤𑀁 𑀅𑀢𑁆𑀢𑀦𑀺 𑀲𑀫𑁆𑀧𑀲𑁆𑀲𑀫𑀸𑀦𑁄 𑀅𑀧𑀭𑀁 𑀧𑀭𑀺𑀬𑀸𑀬𑀫𑀦𑀼𑀚𑀸𑀦𑀺.
𑀧𑀼𑀦 𑀩𑁆𑀭𑀸𑀳𑁆𑀫𑀡𑁄 ‘‘𑀚𑀺𑀕𑀼𑀘𑁆𑀙𑀢𑀺 𑀫𑀜𑁆𑀜𑁂 𑀲𑀫𑀡𑁄 𑀕𑁄𑀢𑀫𑁄 𑀇𑀤𑀁 𑀯𑀬𑁄𑀯𑀼𑀤𑁆𑀥𑀸𑀦𑀁 𑀅𑀪𑀺𑀯𑀸𑀤𑀦𑀸𑀤𑀺𑀓𑀼𑀮𑀲𑀫𑀼𑀤𑀸𑀘𑀸𑀭𑀓𑀫𑁆𑀫𑀁, 𑀢𑁂𑀦 𑀢𑀁 𑀦 𑀓𑀭𑁄𑀢𑀻’’𑀢𑀺 𑀫𑀜𑁆𑀜𑀫𑀸𑀦𑁄 𑀪𑀕𑀯𑀦𑁆𑀢𑀁 𑀚𑁂𑀕𑀼𑀘𑁆𑀙𑀻𑀢𑀺 𑀆𑀳. 𑀪𑀕𑀯𑀸 𑀧𑀦 𑀬𑀲𑁆𑀫𑀸 𑀚𑀺𑀕𑀼𑀘𑁆𑀙𑀢𑀺 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀻𑀳𑀺, 𑀬𑀸𑀦𑀺 𑀓𑀸𑀬𑀯𑀘𑀻𑀫𑀦𑁄𑀤𑀼𑀘𑁆𑀘𑀭𑀺𑀢𑀸𑀦𑀺 𑀘𑁂𑀯 𑀬𑀸𑀯 𑀘 𑀅𑀓𑀼𑀲𑀮𑀸𑀦𑀁 𑀮𑀸𑀫𑀓𑀥𑀫𑁆𑀫𑀸𑀦𑀁 𑀲𑀫𑀸𑀧𑀢𑁆𑀢𑀺 𑀲𑀫𑀸𑀧𑀚𑁆𑀚𑀦𑀸 𑀲𑀫𑀗𑁆𑀕𑀺𑀪𑀸𑀯𑁄, 𑀢𑀁 𑀲𑀩𑁆𑀩𑀫𑁆𑀧𑀺 𑀕𑀽𑀣𑀁 𑀯𑀺𑀬 𑀫𑀡𑁆𑀟𑀦𑀓𑀚𑀸𑀢𑀺𑀓𑁄 𑀧𑀼𑀭𑀺𑀲𑁄 𑀚𑀺𑀕𑀼𑀘𑁆𑀙𑀢𑀺 𑀳𑀺𑀭𑀻𑀬𑀢𑀺, 𑀢𑀲𑁆𑀫𑀸 𑀢𑀁 𑀚𑁂𑀕𑀼𑀘𑁆𑀙𑀺𑀢𑀁 𑀅𑀢𑁆𑀢𑀦𑀺 𑀲𑀫𑁆𑀧𑀲𑁆𑀲𑀫𑀸𑀦𑁄 𑀅𑀧𑀭𑀁 𑀧𑀭𑀺𑀬𑀸𑀬𑀫𑀦𑀼𑀚𑀸𑀦𑀺. 𑀢𑀢𑁆𑀣 𑀓𑀸𑀬𑀤𑀼𑀘𑁆𑀘𑀭𑀺𑀢𑁂𑀦𑀸𑀢𑀺𑀆𑀤𑀺 𑀓𑀭𑀡𑀯𑀘𑀦𑀁 𑀉𑀧𑀬𑁄𑀕𑀢𑁆𑀣𑁂 𑀤𑀝𑁆𑀞𑀩𑁆𑀩𑀁.
𑀧𑀼𑀦 𑀩𑁆𑀭𑀸𑀳𑁆𑀫𑀡𑁄 𑀢𑀤𑁂𑀯 𑀅𑀪𑀺𑀯𑀸𑀤𑀦𑀸𑀤𑀺𑀓𑀫𑁆𑀫𑀁 𑀪𑀕𑀯𑀢𑀺 𑀅𑀧𑀲𑁆𑀲𑀦𑁆𑀢𑁄 ‘‘𑀅𑀬𑀁 𑀇𑀤𑀁 𑀮𑁄𑀓𑀚𑁂𑀝𑁆𑀞𑀓𑀓𑀫𑁆𑀫𑀁 𑀯𑀺𑀦𑁂𑀢𑀺 𑀯𑀺𑀦𑀸𑀲𑁂𑀢𑀺, 𑀅𑀣 𑀯𑀸 𑀬𑀲𑁆𑀫𑀸 𑀏𑀢𑀁 𑀲𑀸𑀫𑀻𑀘𑀺𑀓𑀫𑁆𑀫𑀁 𑀦 𑀓𑀭𑁄𑀢𑀺, 𑀢𑀲𑁆𑀫𑀸 𑀅𑀬𑀁 𑀯𑀺𑀦𑁂𑀢𑀩𑁆𑀩𑁄 𑀦𑀺𑀕𑁆𑀕𑀡𑁆𑀳𑀺𑀢𑀩𑁆𑀩𑁄’’𑀢𑀺 𑀫𑀜𑁆𑀜𑀫𑀸𑀦𑁄 𑀪𑀕𑀯𑀦𑁆𑀢𑀁 𑀯𑁂𑀦𑀬𑀺𑀓𑁄𑀢𑀺 𑀆𑀳. 𑀢𑀢𑁆𑀭𑀸𑀬𑀁 𑀧𑀤𑀢𑁆𑀣𑁄 𑁋 𑀯𑀺𑀦𑀬𑀢𑀻𑀢𑀺 𑀯𑀺𑀦𑀬𑁄, 𑀯𑀺𑀦𑀸𑀲𑁂𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀯𑀺𑀦𑀬𑁄 𑀏𑀯 𑀯𑁂𑀦𑀬𑀺𑀓𑁄. 𑀯𑀺𑀦𑀬𑀁 𑀯𑀸 𑀅𑀭𑀳𑀢𑀻𑀢𑀺 𑀯𑁂𑀦𑀬𑀺𑀓𑁄, 𑀦𑀺𑀕𑁆𑀕𑀳𑀁 𑀅𑀭𑀳𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀪𑀕𑀯𑀸 𑀧𑀦 𑀬𑀲𑁆𑀫𑀸 𑀭𑀸𑀕𑀸𑀤𑀻𑀦𑀁 𑀯𑀺𑀦𑀬𑀸𑀬 𑀯𑀽𑀧𑀲𑀫𑀸𑀬 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀢𑀲𑁆𑀫𑀸 𑀯𑁂𑀦𑀬𑀺𑀓𑁄 𑀳𑁄𑀢𑀺. 𑀅𑀬𑀫𑁂𑀯 𑀘𑁂𑀢𑁆𑀣 𑀧𑀤𑀢𑁆𑀣𑁄 𑁋 𑀯𑀺𑀦𑀬𑀸𑀬 𑀥𑀫𑁆𑀫𑀁 𑀤𑁂𑀲𑁂𑀢𑀻𑀢𑀺 𑀯𑁂𑀦𑀬𑀺𑀓𑁄. 𑀯𑀺𑀘𑀺𑀢𑁆𑀭𑀸 𑀳𑀺 𑀢𑀤𑁆𑀥𑀺𑀢𑀯𑀼𑀢𑁆𑀢𑀺. 𑀲𑁆𑀯𑀸𑀬𑀁 𑀢𑀁 𑀯𑁂𑀦𑀬𑀺𑀓𑀪𑀸𑀯𑀁 𑀅𑀢𑁆𑀢𑀦𑀺 𑀲𑀫𑁆𑀧𑀲𑁆𑀲𑀫𑀸𑀦𑁄 𑀅𑀧𑀭𑀁 𑀧𑀭𑀺𑀬𑀸𑀬𑀫𑀦𑀼𑀚𑀸𑀦𑀺.
𑀧𑀼𑀦 𑀩𑁆𑀭𑀸𑀳𑁆𑀫𑀡𑁄 𑀬𑀲𑁆𑀫𑀸 𑀅𑀪𑀺𑀯𑀸𑀤𑀦𑀸𑀤𑀻𑀦𑀺 𑀲𑀸𑀫𑀻𑀘𑀺𑀓𑀫𑁆𑀫𑀸𑀦𑀺 𑀓𑀭𑁄𑀦𑁆𑀢𑀸 𑀯𑀬𑁄𑀯𑀼𑀤𑁆𑀥𑁂 𑀢𑁄𑀲𑁂𑀦𑁆𑀢𑀺 𑀳𑀸𑀲𑁂𑀦𑁆𑀢𑀺, 𑀅𑀓𑀭𑁄𑀦𑁆𑀢𑀸 𑀧𑀦 𑀢𑀸𑀧𑁂𑀦𑁆𑀢𑀺 𑀯𑀺𑀳𑁂𑀲𑁂𑀦𑁆𑀢𑀺 𑀤𑁄𑀫𑀦𑀲𑁆𑀲𑀁 𑀦𑁂𑀲𑀁 𑀉𑀧𑁆𑀧𑀸𑀤𑁂𑀦𑁆𑀢𑀺, 𑀪𑀕𑀯𑀸 𑀘 𑀢𑀸𑀦𑀺 𑀦 𑀓𑀭𑁄𑀢𑀺, 𑀢𑀲𑁆𑀫𑀸 ‘‘𑀅𑀬𑀁 𑀯𑀬𑁄𑀯𑀼𑀤𑁆𑀥𑁂 𑀢𑀧𑀢𑀻’’𑀢𑀺 𑀫𑀜𑁆𑀜𑀫𑀸𑀦𑁄 𑀲𑀧𑁆𑀧𑀼𑀭𑀺𑀲𑀸𑀘𑀸𑀭𑀯𑀺𑀭𑀳𑀺𑀢𑀢𑁆𑀢𑀸 𑀯𑀸 ‘‘𑀓𑀧𑀡𑀧𑀼𑀭𑀺𑀲𑁄 𑀅𑀬’’𑀦𑁆𑀢𑀺 𑀫𑀜𑁆𑀜𑀫𑀸𑀦𑁄 𑀪𑀕𑀯𑀦𑁆𑀢𑀁 𑀢𑀧𑀲𑁆𑀲𑀻𑀢𑀺 𑀆𑀳. 𑀢𑀢𑁆𑀭𑀸𑀬𑀁 𑀧𑀤𑀢𑁆𑀣𑁄 𑁋 𑀢𑀧𑀢𑀻𑀢𑀺 𑀢𑀧𑁄, 𑀭𑁄𑀲𑁂𑀢𑀺 𑀯𑀺𑀳𑁂𑀲𑁂𑀢𑀻𑀢𑀺 𑀅𑀢𑁆𑀣𑁄. 𑀲𑀸𑀫𑀻𑀘𑀺𑀓𑀫𑁆𑀫𑀸𑀓𑀭𑀡𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀢𑀧𑁄 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀢𑀧𑀲𑁆𑀲𑀻. 𑀤𑀼𑀢𑀺𑀬𑁂 𑀅𑀢𑁆𑀣𑀯𑀺𑀓𑀧𑁆𑀧𑁂 𑀩𑁆𑀬𑀜𑁆𑀚𑀦𑀸𑀦𑀺 𑀅𑀯𑀺𑀘𑀸𑀭𑁂𑀢𑁆𑀯𑀸 𑀮𑁄𑀓𑁂 𑀓𑀧𑀡𑀧𑀼𑀭𑀺𑀲𑁄 𑀢𑀧𑀲𑁆𑀲𑀻𑀢𑀺 𑀯𑀼𑀘𑁆𑀘𑀢𑀺. 𑀪𑀕𑀯𑀸 𑀧𑀦 𑀬𑁂 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀮𑁄𑀓𑀁 𑀢𑀧𑀦𑀢𑁄 𑀢𑀧𑀦𑀻𑀬𑀸𑀦𑀺 𑀯𑀼𑀘𑁆𑀘𑀦𑁆𑀢𑀺, 𑀢𑁂𑀲𑀁 𑀧𑀳𑀻𑀦𑀢𑁆𑀢𑀸 𑀬𑀲𑁆𑀫𑀸 𑀢𑀧𑀲𑁆𑀲𑀻𑀢𑀺 𑀲𑀗𑁆𑀔𑀁 𑀕𑀢𑁄. 𑀢𑀲𑁆𑀫𑀸 𑀢𑀁 𑀢𑀧𑀲𑁆𑀲𑀺𑀢𑀁 𑀅𑀢𑁆𑀢𑀦𑀺 𑀲𑀫𑁆𑀧𑀲𑁆𑀲𑀫𑀸𑀦𑁄 𑀅𑀧𑀭𑀁 𑀧𑀭𑀺𑀬𑀸𑀬𑀫𑀦𑀼𑀚𑀸𑀦𑀺. 𑀢𑀢𑁆𑀭𑀸𑀬𑀁 𑀯𑀘𑀦𑀢𑁆𑀣𑁄 𑁋 𑀢𑀧𑀦𑁆𑀢𑀻𑀢𑀺 𑀢𑀧𑀸, 𑀅𑀓𑀼𑀲𑀮𑀥𑀫𑁆𑀫𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀁. 𑀢𑁂 𑀢𑀧𑁂 𑀅𑀲𑁆𑀲𑀺 𑀦𑀺𑀭𑀲𑁆𑀲𑀺 𑀧𑀳𑀸𑀲𑀺 𑀯𑀺𑀤𑁆𑀥𑀁𑀲𑀻𑀢𑀺 𑀢𑀧𑀲𑁆𑀲𑀻.
𑀧𑀼𑀦 𑀩𑁆𑀭𑀸𑀳𑁆𑀫𑀡𑁄 𑀢𑀁 𑀅𑀪𑀺𑀯𑀸𑀤𑀦𑀸𑀤𑀺𑀓𑀫𑁆𑀫𑀁 𑀤𑁂𑀯𑀮𑁄𑀓𑀕𑀩𑁆𑀪𑀲𑀫𑁆𑀧𑀢𑁆𑀢𑀺𑀬𑀸 𑀤𑁂𑀯𑀮𑁄𑀓𑀧𑀝𑀺𑀲𑀦𑁆𑀥𑀺𑀧𑀝𑀺𑀮𑀸𑀪𑀸𑀬 𑀲𑀁𑀯𑀢𑁆𑀢𑀢𑀻𑀢𑀺 𑀫𑀜𑁆𑀜𑀫𑀸𑀦𑁄 𑀪𑀕𑀯𑀢𑀺 𑀘𑀲𑁆𑀲 𑀅𑀪𑀸𑀯𑀁 𑀤𑀺𑀲𑁆𑀯𑀸 𑀪𑀕𑀯𑀦𑁆𑀢𑀁 𑀅𑀧𑀕𑀩𑁆𑀪𑁄𑀢𑀺 𑀆𑀳. 𑀓𑁄𑀥𑀯𑀲𑁂𑀦 𑀯𑀸 𑀪𑀕𑀯𑀢𑁄 𑀫𑀸𑀢𑀼𑀓𑀼𑀘𑁆𑀙𑀺𑀲𑁆𑀫𑀺𑀁 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑁂 𑀤𑁄𑀲𑀁 𑀤𑀲𑁆𑀲𑁂𑀦𑁆𑀢𑁄𑀧𑀺 𑀏𑀯𑀫𑀸𑀳. 𑀢𑀢𑁆𑀭𑀸𑀬𑀁 𑀯𑀘𑀦𑀢𑁆𑀣𑁄 𑁋 𑀕𑀩𑁆𑀪𑀢𑁄 𑀅𑀧𑀕𑀢𑁄𑀢𑀺 𑀅𑀧𑀕𑀩𑁆𑀪𑁄, 𑀅𑀪𑀩𑁆𑀩𑁄 𑀤𑁂𑀯𑀮𑁄𑀓𑀽𑀧𑀧𑀢𑁆𑀢𑀺𑀁 𑀧𑀸𑀧𑀼𑀡𑀺𑀢𑀼𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀳𑀻𑀦𑁄 𑀯𑀸 𑀕𑀩𑁆𑀪𑁄 𑀅𑀲𑁆𑀲𑀸𑀢𑀺 𑀅𑀧𑀕𑀩𑁆𑀪𑁄. 𑀤𑁂𑀯𑀮𑁄𑀓𑀕𑀩𑁆𑀪𑀧𑀭𑀺𑀩𑀸𑀳𑀺𑀭𑀢𑁆𑀢𑀸 𑀆𑀬𑀢𑀺𑀁 𑀳𑀻𑀦𑀕𑀩𑁆𑀪𑀧𑀝𑀺𑀮𑀸𑀪𑀪𑀸𑀕𑀻𑀢𑀺. 𑀳𑀻𑀦𑁄 𑀯𑀸𑀲𑁆𑀲 𑀫𑀸𑀢𑀼𑀓𑀼𑀘𑁆𑀙𑀺𑀲𑁆𑀫𑀺𑀁 𑀕𑀩𑁆𑀪𑀯𑀸𑀲𑁄 𑀅𑀳𑁄𑀲𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀪𑀕𑀯𑀢𑁄 𑀧𑀦 𑀬𑀲𑁆𑀫𑀸 𑀆𑀬𑀢𑀺𑀁 𑀕𑀩𑁆𑀪𑀲𑁂𑀬𑁆𑀬𑀸 𑀅𑀧𑀕𑀢𑀸, 𑀢𑀲𑁆𑀫𑀸 𑀲𑁄 𑀢𑀁 𑀅𑀧𑀕𑀩𑁆𑀪𑀢𑀁 𑀅𑀢𑁆𑀢𑀦𑀺 𑀲𑀫𑁆𑀧𑀲𑁆𑀲𑀫𑀸𑀦𑁄 𑀅𑀧𑀭𑀁 𑀧𑀭𑀺𑀬𑀸𑀬𑀫𑀦𑀼𑀚𑀸𑀦𑀺. 𑀢𑀢𑁆𑀭 𑀘 𑀬𑀲𑁆𑀲 𑀔𑁄, 𑀩𑁆𑀭𑀸𑀳𑁆𑀫𑀡, 𑀆𑀬𑀢𑀺𑀁 𑀕𑀩𑁆𑀪𑀲𑁂𑀬𑁆𑀬𑀸 𑀧𑀼𑀦𑀩𑁆𑀪𑀯𑀸𑀪𑀺𑀦𑀺𑀩𑁆𑀩𑀢𑁆𑀢𑀺 𑀧𑀳𑀻𑀦𑀸𑀢𑀺 𑀏𑀢𑁂𑀲𑀁 𑀧𑀤𑀸𑀦𑀁 𑀏𑀯𑀫𑀢𑁆𑀣𑁄 𑀤𑀝𑁆𑀞𑀩𑁆𑀩𑁄 𑁋 ‘‘𑀩𑁆𑀭𑀸𑀳𑁆𑀫𑀡, 𑀬𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀅𑀦𑀸𑀕𑀢𑁂 𑀕𑀩𑁆𑀪𑀲𑁂𑀬𑁆𑀬𑀸 𑀧𑀼𑀦𑀩𑁆𑀪𑀯𑁂 𑀘 𑀅𑀪𑀺𑀦𑀺𑀩𑁆𑀩𑀢𑁆𑀢𑀺 𑀅𑀦𑀼𑀢𑁆𑀢𑀭𑁂𑀦 𑀫𑀕𑁆𑀕𑁂𑀦 𑀯𑀺𑀳𑀢𑀓𑀸𑀭𑀡𑀢𑁆𑀢𑀸 𑀧𑀳𑀻𑀦𑀸. 𑀕𑀩𑁆𑀪𑀲𑁂𑀬𑁆𑀬𑀸𑀕𑀳𑀡𑁂𑀦 𑀘𑁂𑀢𑁆𑀣 𑀚𑀮𑀸𑀩𑀼𑀚𑀬𑁄𑀦𑀺 𑀕𑀳𑀺𑀢𑀸, 𑀧𑀼𑀦𑀩𑁆𑀪𑀯𑀸𑀪𑀺𑀦𑀺𑀩𑁆𑀩𑀢𑁆𑀢𑀺𑀕𑁆𑀕𑀳𑀡𑁂𑀦 𑀇𑀢𑀭𑀸 𑀢𑀺𑀲𑁆𑀲𑁄’’𑀧𑀺.
𑀅𑀧𑀺𑀘 𑀕𑀩𑁆𑀪𑀲𑁆𑀲 𑀲𑁂𑀬𑁆𑀬𑀸 𑀕𑀩𑁆𑀪𑀲𑁂𑀬𑁆𑀬𑀸. 𑀧𑀼𑀦𑀩𑁆𑀪𑀯𑁄 𑀏𑀯 𑀅𑀪𑀺𑀦𑀺𑀩𑁆𑀩𑀢𑁆𑀢𑀺 𑀧𑀼𑀦𑀩𑁆𑀪𑀯𑀸𑀪𑀺𑀦𑀺𑀩𑁆𑀩𑀢𑁆𑀢𑀻𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀬𑀣𑀸 𑀘 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀻𑀢𑀺 𑀯𑀼𑀢𑁆𑀢𑁂𑀧𑀺 𑀦 𑀯𑀺𑀜𑁆𑀜𑀸𑀡𑀢𑁄 𑀅𑀜𑁆𑀜𑀸 𑀞𑀺𑀢𑀺 𑀅𑀢𑁆𑀣𑀺, 𑀏𑀯𑀫𑀺𑀥𑀸𑀧𑀺 𑀦 𑀕𑀩𑁆𑀪𑀢𑁄 𑀅𑀜𑁆𑀜𑀸 𑀲𑁂𑀬𑁆𑀬𑀸 𑀯𑁂𑀤𑀺𑀢𑀩𑁆𑀩𑀸. 𑀅𑀪𑀺𑀦𑀺𑀩𑁆𑀩𑀢𑁆𑀢𑀺 𑀘 𑀦𑀸𑀫 𑀬𑀲𑁆𑀫𑀸 𑀧𑀼𑀦𑀩𑁆𑀪𑀯𑀪𑀽𑀢𑀸𑀧𑀺 𑀅𑀧𑀼𑀦𑀩𑁆𑀪𑀯𑀪𑀽𑀢𑀸𑀧𑀺 𑀅𑀢𑁆𑀣𑀺, 𑀇𑀥 𑀘 𑀧𑀼𑀦𑀩𑁆𑀪𑀯𑀪𑀽𑀢𑀸 𑀅𑀥𑀺𑀧𑁆𑀧𑁂𑀢𑀸, 𑀢𑀲𑁆𑀫𑀸 𑀯𑀼𑀢𑁆𑀢𑀁 𑁋 ‘‘𑀧𑀼𑀦𑀩𑁆𑀪𑀯𑁄 𑀏𑀯 𑀅𑀪𑀺𑀦𑀺𑀩𑁆𑀩𑀢𑁆𑀢𑀺 𑀧𑀼𑀦𑀩𑁆𑀪𑀯𑀸𑀪𑀺𑀦𑀺𑀩𑁆𑀩𑀢𑁆𑀢𑀻’’𑀢𑀺.
𑀏𑀯𑀁 𑀆𑀕𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀅𑀭𑀲𑀭𑀽𑀧𑀢𑀸𑀤𑀻𑀳𑀺 𑀅𑀝𑁆𑀞𑀳𑀺 𑀅𑀓𑁆𑀓𑁄𑀲𑀯𑀢𑁆𑀣𑀽𑀳𑀺 𑀅𑀓𑁆𑀓𑁄𑀲𑀦𑁆𑀢𑀫𑁆𑀧𑀺 𑀩𑁆𑀭𑀸𑀳𑁆𑀫𑀡𑀁 𑀪𑀕𑀯𑀸 𑀥𑀫𑁆𑀫𑀺𑀲𑁆𑀲𑀭𑁄 𑀥𑀫𑁆𑀫𑀭𑀸𑀚𑀸 𑀥𑀫𑁆𑀫𑀲𑀸𑀫𑀻 𑀢𑀣𑀸𑀕𑀢𑁄 𑀅𑀦𑀼𑀓𑀫𑁆𑀧𑀸𑀬 𑀲𑀻𑀢𑀮𑁂𑀦𑁂𑀯 𑀘𑀓𑁆𑀔𑀼𑀦𑀸 𑀩𑁆𑀭𑀸𑀳𑁆𑀫𑀡𑀁 𑀑𑀮𑁂𑀓𑁂𑀦𑁆𑀢𑁄 𑀬𑀁 𑀥𑀫𑁆𑀫𑀥𑀸𑀢𑀼𑀁 𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸 𑀤𑁂𑀲𑀦𑀸𑀯𑀺𑀮𑀸𑀲𑀧𑁆𑀧𑀢𑁆𑀢𑀸 𑀦𑀸𑀫 𑀳𑁄𑀢𑀺, 𑀢𑀲𑁆𑀲𑀸 𑀥𑀫𑁆𑀫𑀥𑀸𑀢𑀼𑀬𑀸 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑀢𑁆𑀢𑀸 𑀯𑀺𑀕𑀢𑀯𑀮𑀸𑀳𑀓𑁂 𑀦𑀪𑁂 𑀧𑀼𑀡𑁆𑀡𑀘𑀦𑁆𑀤𑁄 𑀯𑀺𑀬 𑀘 𑀲𑀭𑀤𑀓𑀸𑀮𑁂 𑀲𑀽𑀭𑀺𑀬𑁄 𑀯𑀺𑀬 𑀘 𑀩𑁆𑀭𑀸𑀳𑁆𑀫𑀡𑀲𑁆𑀲 𑀳𑀤𑀬𑀦𑁆𑀥𑀓𑀸𑀭𑀁 𑀯𑀺𑀥𑀫𑁂𑀦𑁆𑀢𑁄 𑀢𑀸𑀦𑀺𑀬𑁂𑀯 𑀅𑀓𑁆𑀓𑁄𑀲𑀯𑀢𑁆𑀣𑀽𑀦𑀺 𑀢𑁂𑀦 𑀢𑁂𑀦 𑀧𑀭𑀺𑀬𑀸𑀬𑁂𑀦 𑀅𑀜𑁆𑀜𑀣𑀸 𑀤𑀲𑁆𑀲𑁂𑀢𑁆𑀯𑀸 𑀧𑀼𑀦𑀧𑀺 𑀅𑀢𑁆𑀢𑀦𑁄 𑀓𑀭𑀼𑀡𑀸𑀯𑀺𑀧𑁆𑀨𑀸𑀭𑀁 𑀅𑀝𑁆𑀞𑀳𑀺 𑀮𑁄𑀓𑀥𑀫𑁆𑀫𑁂𑀳𑀺 𑀅𑀓𑀫𑁆𑀧𑀺𑀬𑀪𑀸𑀯𑁂𑀦 𑀧𑀝𑀺𑀮𑀤𑁆𑀥𑀢𑀸𑀤𑀺𑀕𑀼𑀡𑀮𑀓𑁆𑀔𑀡𑀁 𑀧𑀣𑀯𑀺𑀲𑀫𑀘𑀺𑀢𑁆𑀢𑀢𑀁 𑀅𑀓𑀼𑀧𑁆𑀧𑀥𑀫𑁆𑀫𑀢𑀜𑁆𑀘 𑀧𑀓𑀸𑀲𑁂𑀦𑁆𑀢𑁄 ‘‘𑀅𑀬𑀁 𑀩𑁆𑀭𑀸𑀳𑁆𑀫𑀡𑁄 𑀓𑁂𑀯𑀮𑀁 𑀧𑀮𑀺𑀢𑀲𑀺𑀭𑀔𑀡𑁆𑀟𑀤𑀦𑁆𑀢𑀯𑀮𑀺𑀢𑁆𑀢𑀘𑀢𑀸𑀤𑀻𑀳𑀺 𑀅𑀢𑁆𑀢𑀦𑁄 𑀯𑀼𑀤𑁆𑀥𑀪𑀸𑀯𑀁 𑀲𑀮𑁆𑀮𑀓𑁆𑀔𑁂𑀢𑀺, 𑀦𑁄 𑀘 𑀔𑁄 𑀚𑀸𑀦𑀸𑀢𑀺 𑀅𑀢𑁆𑀢𑀸𑀦𑀁 𑀚𑀸𑀢𑀺𑀬𑀸 𑀅𑀦𑀼𑀕𑀢𑀁 𑀚𑀭𑀸𑀬 𑀅𑀦𑀼𑀲𑀝𑀁 𑀩𑁆𑀬𑀸𑀥𑀺𑀦𑁄 𑀅𑀥𑀺𑀪𑀽𑀢𑀁 𑀫𑀭𑀡𑁂𑀦 𑀅𑀩𑁆𑀪𑀸𑀳𑀢𑀁 𑀅𑀚𑁆𑀚 𑀫𑀭𑀺𑀢𑁆𑀯𑀸 𑀧𑀼𑀦 𑀲𑁆𑀯𑁂𑀯 𑀉𑀢𑁆𑀢𑀸𑀦𑀲𑁂𑀬𑁆𑀬𑀤𑀸𑀭𑀓𑀪𑀸𑀯𑀕𑀫𑀦𑀻𑀬𑀁. 𑀫𑀳𑀦𑁆𑀢𑁂𑀦 𑀔𑁄 𑀧𑀦 𑀉𑀲𑁆𑀲𑀸𑀳𑁂𑀦 𑀫𑀫 𑀲𑀦𑁆𑀢𑀺𑀓𑀁 𑀆𑀕𑀢𑁄, 𑀢𑀤𑀲𑁆𑀲 𑀆𑀕𑀫𑀦𑀁 𑀲𑀸𑀢𑁆𑀣𑀓𑀁 𑀳𑁄𑀢𑀽’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀇𑀫𑀲𑁆𑀫𑀺𑀁 𑀮𑁄𑀓𑁂 𑀅𑀢𑁆𑀢𑀦𑁄 𑀅𑀧𑁆𑀧𑀝𑀺𑀲𑀫𑀁 𑀧𑀼𑀭𑁂𑀚𑀸𑀢𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 𑀲𑁂𑀬𑁆𑀬𑀣𑀸𑀧𑀺, 𑀩𑁆𑀭𑀸𑀳𑁆𑀫𑀡𑀸𑀢𑀺𑀆𑀤𑀺𑀦𑀸 𑀦𑀬𑁂𑀦 𑀩𑁆𑀭𑀸𑀳𑁆𑀫𑀡𑀲𑁆𑀲 𑀥𑀫𑁆𑀫𑀤𑁂𑀲𑀦𑀁 𑀯𑀟𑁆𑀠𑁂𑀲𑀺.
𑀢𑀢𑁆𑀣 𑀲𑁂𑀬𑁆𑀬𑀣𑀸𑀧𑀻𑀢𑀺𑀆𑀤𑀻𑀦𑀁 𑀳𑁂𑀝𑁆𑀞𑀸 𑀯𑀼𑀢𑀦𑀬𑁂𑀦𑁂𑀯 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀬𑀁 𑀧𑀦 𑀯𑀺𑀲𑁂𑀲𑁄 𑁋 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀳𑀺 𑀢𑁂 𑀓𑀼𑀓𑁆𑀓𑀼𑀝𑀧𑁄𑀢𑀓𑀸 𑀧𑀓𑁆𑀔𑁂 𑀯𑀺𑀥𑀼𑀦𑀦𑁆𑀢𑀸 𑀢𑀁𑀔𑀡𑀸𑀦𑀼𑀭𑀽𑀧𑀁 𑀯𑀺𑀭𑀯𑀦𑁆𑀢𑀸 𑀦𑀺𑀓𑁆𑀔𑀫𑀦𑁆𑀢𑀺. 𑀏𑀯𑀁 𑀦𑀺𑀓𑁆𑀔𑀫𑀦𑁆𑀢𑀸𑀦𑀜𑁆𑀘 𑀢𑁂𑀲𑀁 𑀬𑁄 𑀧𑀞𑀫𑀢𑀭𑀁 𑀦𑀺𑀓𑁆𑀔𑀫𑀢𑀺, 𑀲𑁄 𑀚𑁂𑀝𑁆𑀞𑁄𑀢𑀺 𑀯𑀼𑀘𑁆𑀘𑀢𑀺. 𑀢𑀲𑁆𑀫𑀸 𑀪𑀕𑀯𑀸 𑀢𑀸𑀬 𑀉𑀧𑀫𑀸𑀬 𑀅𑀢𑁆𑀢𑀦𑁄 𑀚𑁂𑀝𑁆𑀞𑀪𑀸𑀯𑀁 𑀲𑀸𑀥𑁂𑀢𑀼𑀓𑀸𑀫𑁄 𑀩𑁆𑀭𑀸𑀳𑁆𑀫𑀡𑀁 𑀧𑀼𑀘𑁆𑀙𑀢𑀺 𑁋 𑀬𑁄 𑀦𑀼 𑀔𑁄 𑀢𑁂𑀲𑀁 𑀓𑀼𑀓𑁆𑀓𑀼𑀝𑀘𑁆𑀙𑀸𑀧𑁄𑀢𑀓𑀸𑀦𑀁…𑀧𑁂… 𑀓𑀺𑀦𑁆𑀢𑀺 𑀲𑁆𑀯𑀸𑀲𑁆𑀲 𑀯𑀘𑀦𑀻𑀬𑁄𑀢𑀺. 𑀢𑀢𑁆𑀣 𑀓𑀼𑀓𑁆𑀓𑀼𑀝𑀘𑁆𑀙𑀸𑀧𑀓𑀸𑀦𑀦𑁆𑀢𑀺 𑀓𑀼𑀓𑁆𑀓𑀼𑀝𑀧𑁄𑀢𑀓𑀸𑀦𑀁. 𑀓𑀺𑀦𑁆𑀢𑀺 𑀲𑁆𑀯𑀸𑀲𑁆𑀲 𑀯𑀘𑀦𑀻𑀬𑁄𑀢𑀺 𑀲𑁄 𑀓𑀺𑀦𑁆𑀢𑀺 𑀯𑀘𑀦𑀻𑀬𑁄 𑀅𑀲𑁆𑀲, 𑀓𑀺𑀁 𑀯𑀢𑁆𑀢𑀩𑁆𑀩𑁄 𑀪𑀯𑁂𑀬𑁆𑀬 𑀚𑁂𑀝𑁆𑀞𑁄 𑀯𑀸 𑀓𑀦𑀺𑀝𑁆𑀞𑁄 𑀯𑀸𑀢𑀺.
‘‘𑀚𑁂𑀝𑁆𑀞𑁄’’𑀢𑀺𑀲𑁆𑀲, 𑀪𑁄 𑀕𑁄𑀢𑀫, 𑀯𑀘𑀦𑀻𑀬𑁄𑀢𑀺, 𑀪𑁄 𑀕𑁄𑀢𑀫, 𑀲𑁄 𑀚𑁂𑀝𑁆𑀞𑁄 𑀇𑀢𑀺 𑀅𑀲𑁆𑀲 𑀯𑀘𑀦𑀻𑀬𑁄. 𑀓𑀲𑁆𑀫𑀸𑀢𑀺 𑀘𑁂? 𑀲𑁄 𑀳𑀺 𑀦𑁂𑀲𑀁 𑀚𑁂𑀝𑁆𑀞𑁄𑀢𑀺, 𑀬𑀲𑁆𑀫𑀸 𑀲𑁄 𑀦𑁂𑀲𑀁 𑀯𑀼𑀤𑁆𑀥𑀢𑀭𑁄𑀢𑀺 𑀅𑀢𑁆𑀣𑁄. 𑀅𑀣𑀲𑁆𑀲 𑀪𑀕𑀯𑀸 𑀑𑀧𑀫𑁆𑀫𑀁 𑀲𑀫𑁆𑀧𑀝𑀺𑀧𑀸𑀤𑁂𑀦𑁆𑀢𑁄 𑀏𑀯𑀫𑁂𑀯 𑀔𑁄𑀢𑀺 𑀆𑀳, 𑀬𑀣𑀸 𑀲𑁄 𑀓𑀼𑀓𑁆𑀓𑀼𑀝𑀧𑁄𑀢𑀓𑁄, 𑀏𑀯𑀁 𑀅𑀳𑀫𑁆𑀧𑀺. 𑀅𑀯𑀺𑀚𑁆𑀚𑀸𑀕𑀢𑀸𑀬 𑀧𑀚𑀸𑀬𑀸𑀢𑀺 𑀅𑀯𑀺𑀚𑁆𑀚𑀸 𑀯𑀼𑀘𑁆𑀘𑀢𑀺 𑀅𑀜𑁆𑀜𑀸𑀡𑀁, 𑀢𑀢𑁆𑀣 𑀕𑀢𑀸𑀬. 𑀧𑀚𑀸𑀬𑀸𑀢𑀺 𑀲𑀢𑁆𑀢𑀥𑀺𑀯𑀘𑀦𑀫𑁂𑀢𑀁, 𑀅𑀯𑀺𑀚𑁆𑀚𑀸𑀓𑁄𑀲𑀲𑁆𑀲 𑀅𑀦𑁆𑀢𑁄 𑀧𑀯𑀺𑀝𑁆𑀞𑁂𑀲𑀼 𑀲𑀢𑁆𑀢𑁂𑀲𑀽𑀧𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀡𑁆𑀟𑀪𑀽𑀢𑀸𑀬𑀸𑀢𑀺 𑀅𑀡𑁆𑀟𑁂 𑀪𑀽𑀢𑀸𑀬 𑀧𑀚𑀸𑀢𑀸𑀬 𑀲𑀜𑁆𑀚𑀸𑀢𑀸𑀬. 𑀬𑀣𑀸 𑀳𑀺 𑀅𑀡𑁆𑀟𑁂 𑀦𑀺𑀩𑁆𑀩𑀢𑁆𑀢𑀸 𑀏𑀓𑀘𑁆𑀘𑁂 𑀲𑀢𑁆𑀢𑀸 𑀅𑀡𑁆𑀟𑀪𑀽𑀢𑀸𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀏𑀯𑀫𑀬𑀁 𑀲𑀩𑁆𑀩𑀸𑀧𑀺 𑀧𑀚𑀸 𑀅𑀯𑀺𑀚𑁆𑀚𑀡𑁆𑀟𑀓𑁄𑀲𑁂 𑀦𑀺𑀩𑁆𑀩𑀢𑁆𑀢𑀢𑁆𑀢𑀸 𑀅𑀡𑁆𑀟𑀪𑀽𑀢𑀸𑀢𑀺 𑀯𑀼𑀘𑁆𑀘𑀢𑀺. 𑀧𑀭𑀺𑀬𑁄𑀦𑀤𑁆𑀥𑀸𑀬𑀸𑀢𑀺 𑀢𑁂𑀦 𑀅𑀯𑀺𑀚𑁆𑀚𑀡𑁆𑀟𑀓𑁄𑀲𑁂𑀦 𑀲𑀫𑀦𑁆𑀢𑀢𑁄 𑀑𑀦𑀤𑁆𑀥𑀸𑀬 𑀩𑀤𑁆𑀥𑀸𑀬 𑀯𑁂𑀞𑀺𑀢𑀸𑀬. 𑀅𑀯𑀺𑀚𑁆𑀚𑀡𑁆𑀟𑀓𑁄𑀲𑀁 𑀧𑀤𑀸𑀮𑁂𑀢𑁆𑀯𑀸𑀢𑀺 𑀢𑀁 𑀅𑀯𑀺𑀚𑁆𑀚𑀸𑀫𑀬𑀁 𑀅𑀡𑁆𑀟𑀓𑁄𑀲𑀁 𑀪𑀺𑀦𑁆𑀤𑀺𑀢𑁆𑀯𑀸. 𑀏𑀓𑁄𑀯 𑀮𑁄𑀓𑁂𑀢𑀺 𑀲𑀓𑀮𑁂𑀧𑀺 𑀮𑁄𑀓𑀲𑀦𑁆𑀦𑀺𑀯𑀸𑀲𑁂 𑀅𑀳𑀫𑁂𑀯 𑀏𑀓𑁄 𑀅𑀤𑀼𑀢𑀺𑀬𑁄. 𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑁄𑀢𑀺 𑀉𑀢𑁆𑀢𑀭𑀭𑀳𑀺𑀢𑀁 𑀲𑀩𑁆𑀩𑀲𑁂𑀝𑁆𑀞𑀁 𑀲𑀫𑁆𑀫𑀸 𑀲𑀸𑀫𑀜𑁆𑀘 𑀩𑁄𑀥𑀺𑀁, 𑀅𑀣 𑀯𑀸 𑀧𑀲𑀢𑁆𑀣𑀁 𑀲𑀼𑀦𑁆𑀤𑀭𑀜𑁆𑀘 𑀩𑁄𑀥𑀺𑀁. 𑀅𑀭𑀳𑀢𑁆𑀢𑀫𑀕𑁆𑀕𑀜𑀸𑀡𑀲𑁆𑀲𑁂𑀢𑀁 𑀦𑀸𑀫𑀁, 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑁆𑀲𑀸𑀧𑀺 𑀦𑀸𑀫𑀫𑁂𑀯. 𑀉𑀪𑀬𑀫𑁆𑀧𑀺 𑀯𑀝𑁆𑀝𑀢𑀺. 𑀅𑀜𑁆𑀜𑁂𑀲𑀁 𑀅𑀭𑀳𑀢𑁆𑀢𑀫𑀕𑁆𑀕𑁄 𑀅𑀦𑀼𑀢𑁆𑀢𑀭𑀸 𑀩𑁄𑀥𑀺 𑀳𑁄𑀢𑀺, 𑀦 𑀳𑁄𑀢𑀻𑀢𑀺? 𑀦 𑀳𑁄𑀢𑀺. 𑀓𑀲𑁆𑀫𑀸? 𑀅𑀲𑀩𑁆𑀩𑀕𑀼𑀡𑀤𑀸𑀬𑀓𑀢𑁆𑀢𑀸. 𑀢𑁂𑀲𑀜𑁆𑀳𑀺 𑀓𑀲𑁆𑀲𑀘𑀺 𑀅𑀭𑀳𑀢𑁆𑀢𑀫𑀕𑁆𑀕𑁄 𑀅𑀭𑀳𑀢𑁆𑀢𑀨𑀮𑀫𑁂𑀯 𑀤𑁂𑀢𑀺, 𑀓𑀲𑁆𑀲𑀘𑀺 𑀢𑀺𑀲𑁆𑀲𑁄 𑀯𑀺𑀚𑁆𑀚𑀸, 𑀓𑀲𑁆𑀲𑀘𑀺 𑀙 𑀅𑀪𑀺𑀜𑁆𑀜𑀸, 𑀓𑀲𑁆𑀲𑀘𑀺 𑀘𑀢𑀲𑁆𑀲𑁄 𑀧𑀝𑀺𑀲𑀫𑁆𑀪𑀺𑀤𑀸, 𑀓𑀲𑁆𑀲𑀘𑀺 𑀲𑀸𑀯𑀓𑀧𑀸𑀭𑀫𑀺𑀜𑀸𑀡𑀁. 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀫𑁆𑀧𑀺 𑀧𑀘𑁆𑀘𑁂𑀓𑀩𑁄𑀥𑀺𑀜𑀸𑀡𑀫𑁂𑀯 𑀤𑁂𑀢𑀺, 𑀩𑀼𑀤𑁆𑀥𑀸𑀦𑀁 𑀧𑀦 𑀲𑀩𑁆𑀩𑀕𑀼𑀡𑀲𑀫𑁆𑀧𑀢𑁆𑀢𑀺𑀁 𑀤𑁂𑀢𑀺 𑀅𑀪𑀺𑀲𑁂𑀓𑁄 𑀯𑀺𑀬 𑀭𑀜𑁆𑀜𑁄 𑀲𑀩𑁆𑀩𑀮𑁄𑀓𑀺𑀲𑁆𑀲𑀭𑀪𑀸𑀯𑀁. 𑀢𑀲𑁆𑀫𑀸 𑀅𑀜𑁆𑀜𑀲𑁆𑀲 𑀓𑀲𑁆𑀲𑀘𑀺𑀧𑀺 𑀅𑀦𑀼𑀢𑁆𑀢𑀭𑀸 𑀩𑁄𑀥𑀺 𑀦 𑀳𑁄𑀢𑀻𑀢𑀺. 𑀅𑀪𑀺𑀲𑀫𑁆𑀩𑀼𑀤𑁆𑀥𑁄𑀢𑀺 𑀅𑀩𑁆𑀪𑀜𑁆𑀜𑀸𑀲𑀺𑀁 𑀧𑀝𑀺𑀯𑀺𑀚𑁆𑀛𑀺𑀁, 𑀧𑀢𑁆𑀢𑁄𑀫𑁆𑀳𑀺 𑀅𑀥𑀺𑀕𑀢𑁄𑀫𑁆𑀳𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.
𑀇𑀤𑀸𑀦𑀺 𑀬𑀤𑁂𑀢𑀁 𑀪𑀕𑀯𑀢𑀸 ‘‘𑀏𑀯𑀫𑁂𑀯 𑀔𑁄’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀼𑀢𑁆𑀢𑀁 𑀑𑀧𑀫𑁆𑀫𑀲𑀫𑁆𑀧𑀝𑀺𑀧𑀸𑀤𑀦𑀁, 𑀢𑀁 𑀏𑀯𑀁 𑀅𑀢𑁆𑀣𑁂𑀦 𑀲𑀁𑀲𑀦𑁆𑀤𑀺𑀢𑁆𑀯𑀸 𑀯𑁂𑀤𑀺𑀢𑀩𑁆𑀩𑀁 𑁋 𑀬𑀣𑀸 𑀳𑀺 𑀢𑀲𑁆𑀲𑀸 𑀓𑀼𑀓𑁆𑀓𑀼𑀝𑀺𑀬𑀸 𑀅𑀢𑁆𑀢𑀦𑁄 𑀅𑀡𑁆𑀟𑁂𑀲𑀼 𑀅𑀥𑀺𑀲𑀬𑀦𑀸𑀤𑀺𑀢𑀺𑀯𑀺𑀥𑀓𑀺𑀭𑀺𑀬𑀸𑀓𑀭𑀡𑀁, 𑀏𑀯𑀁 𑀩𑁄𑀥𑀺𑀧𑀮𑁆𑀮𑀗𑁆𑀓𑁂 𑀦𑀺𑀲𑀺𑀦𑁆𑀦𑀲𑁆𑀲 𑀩𑁄𑀥𑀺𑀲𑀢𑁆𑀢𑀪𑀽𑀢𑀲𑁆𑀲 𑀪𑀕𑀯𑀢𑁄 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑁂 𑀅𑀦𑀺𑀘𑁆𑀘𑀁, 𑀤𑀼𑀓𑁆𑀔𑀁, 𑀅𑀦𑀢𑁆𑀢𑀸𑀢𑀺 𑀢𑀺𑀯𑀺𑀥𑀸𑀦𑀼𑀧𑀲𑁆𑀲𑀦𑀸𑀓𑀭𑀡𑀁. 𑀓𑀼𑀓𑁆𑀓𑀼𑀝𑀺𑀬𑀸 𑀢𑀺𑀯𑀺𑀥𑀓𑀺𑀭𑀺𑀬𑀸𑀲𑀫𑁆𑀧𑀸𑀤𑀦𑁂𑀦 𑀅𑀡𑁆𑀟𑀸𑀦𑀁 𑀅𑀧𑀽𑀢𑀺𑀪𑀸𑀯𑁄 𑀯𑀺𑀬 𑀩𑁄𑀥𑀺𑀲𑀢𑁆𑀢𑀪𑀽𑀢𑀲𑁆𑀲 𑀪𑀕𑀯𑀢𑁄 𑀢𑀺𑀯𑀺𑀥𑀸𑀦𑀼𑀧𑀲𑁆𑀲𑀦𑀸𑀲𑀫𑁆𑀧𑀸𑀤𑀦𑁂𑀦 𑀯𑀺𑀧𑀲𑁆𑀲𑀦𑀸𑀜𑀸𑀡𑀲𑁆𑀲 𑀅𑀧𑀭𑀺𑀳𑀸𑀦𑀺. 𑀓𑀼𑀓𑁆𑀓𑀼𑀝𑀺𑀬𑀸 𑀢𑀺𑀯𑀺𑀥𑀓𑀺𑀭𑀺𑀬𑀸𑀓𑀭𑀡𑁂𑀦 𑀅𑀡𑁆𑀟𑀸𑀦𑀁 𑀅𑀮𑁆𑀮𑀲𑀺𑀦𑁂𑀳𑀧𑀭𑀺𑀬𑀸𑀤𑀸𑀦𑀁 𑀯𑀺𑀬 𑀩𑁄𑀥𑀺𑀲𑀢𑁆𑀢𑀪𑀽𑀢𑀲𑁆𑀲 𑀪𑀕𑀯𑀢𑁄 𑀢𑀺𑀯𑀺𑀥𑀸𑀦𑀼𑀧𑀲𑁆𑀲𑀦𑀸𑀲𑀫𑁆𑀧𑀸𑀤𑀦𑁂𑀦 𑀪𑀯𑀢𑁆𑀢𑀬𑀸𑀦𑀼𑀕𑀢𑀦𑀺𑀓𑀦𑁆𑀢𑀺𑀲𑀺𑀦𑁂𑀳𑀧𑀭𑀺𑀬𑀸𑀤𑀸𑀦𑀁. 𑀓𑀼𑀓𑁆𑀓𑀼𑀝𑀺𑀬𑀸 𑀢𑀺𑀯𑀺𑀥𑀓𑀺𑀭𑀺𑀬𑀸𑀓𑀭𑀡𑁂𑀦 𑀅𑀡𑁆𑀟𑀓𑀧𑀸𑀮𑀸𑀦𑀁 𑀢𑀦𑀼𑀪𑀸𑀯𑁄 𑀯𑀺𑀬 𑀩𑁄𑀥𑀺𑀲𑀢𑁆𑀢𑀪𑀽𑀢𑀲𑁆𑀲 𑀪𑀕𑀯𑀢𑁄 𑀢𑀺𑀯𑀺𑀥𑀸𑀦𑀼𑀧𑀲𑁆𑀲𑀦𑀸𑀲𑀫𑁆𑀧𑀸𑀤𑀦𑁂𑀦 𑀅𑀯𑀺𑀚𑁆𑀚𑀡𑁆𑀟𑀓𑁄𑀲𑀲𑁆𑀲 𑀢𑀦𑀼𑀪𑀸𑀯𑁄, 𑀓𑀼𑀓𑁆𑀓𑀼𑀝𑀺𑀬𑀸 𑀢𑀺𑀯𑀺𑀥𑀓𑀺𑀭𑀺𑀬𑀸𑀓𑀭𑀡𑁂𑀦 𑀓𑀼𑀓𑁆𑀓𑀼𑀝𑀧𑁄𑀢𑀓𑀲𑁆𑀲 𑀧𑀸𑀤𑀦𑀔𑀢𑀼𑀡𑁆𑀟𑀓𑀸𑀦𑀁 𑀣𑀤𑁆𑀥𑀔𑀭𑀪𑀸𑀯𑁄 𑀯𑀺𑀬 𑀩𑁄𑀥𑀺𑀲𑀢𑁆𑀢𑀪𑀽𑀢𑀲𑁆𑀲 𑀪𑀕𑀯𑀢𑁄 𑀢𑀺𑀯𑀺𑀥𑀸𑀦𑀼𑀧𑀲𑁆𑀲𑀦𑀸𑀲𑀫𑁆𑀧𑀸𑀤𑀦𑁂𑀦 𑀯𑀺𑀧𑀲𑁆𑀲𑀦𑀸𑀜𑀸𑀡𑀲𑁆𑀲 𑀢𑀺𑀓𑁆𑀔𑀔𑀭𑀯𑀺𑀧𑁆𑀧𑀲𑀦𑁆𑀦𑀲𑀽𑀭𑀪𑀸𑀯𑁄. 𑀓𑀼𑀓𑁆𑀓𑀼𑀝𑀺𑀬𑀸 𑀢𑀺𑀯𑀺𑀥𑀓𑀺𑀭𑀺𑀬𑀸𑀓𑀭𑀡𑁂𑀦 𑀓𑀼𑀓𑁆𑀓𑀼𑀝𑀧𑁄𑀢𑀓𑀲𑁆𑀲 𑀧𑀭𑀺𑀡𑀸𑀫𑀓𑀸𑀮𑁄 𑀯𑀺𑀬 𑀩𑁄𑀥𑀺𑀲𑀢𑁆𑀢𑀪𑀽𑀢𑀲𑁆𑀲 𑀪𑀕𑀯𑀢𑁄 𑀢𑀺𑀯𑀺𑀥𑀸𑀦𑀼𑀧𑀲𑁆𑀲𑀦𑀸𑀲𑀫𑁆𑀧𑀸𑀤𑀦𑁂𑀦 𑀯𑀺𑀧𑀲𑁆𑀲𑀦𑀸𑀜𑀸𑀡𑀲𑁆𑀲 𑀧𑀭𑀺𑀡𑀸𑀫𑀓𑀸𑀮𑁄 𑀯𑀟𑁆𑀠𑀺𑀓𑀸𑀮𑁄 𑀕𑀩𑁆𑀪𑀕𑁆𑀕𑀳𑀡𑀓𑀸𑀮𑁄. 𑀓𑀼𑀓𑁆𑀓𑀼𑀝𑀺𑀬𑀸 𑀢𑀺𑀯𑀺𑀥𑀓𑀺𑀭𑀺𑀬𑀸𑀓𑀭𑀡𑁂𑀦 𑀓𑀼𑀓𑁆𑀓𑀼𑀝𑀧𑁄𑀢𑀓𑀲𑁆𑀲 𑀧𑀸𑀤𑀦𑀔𑀲𑀺𑀔𑀸𑀬 𑀯𑀸 𑀫𑀼𑀔𑀢𑀼𑀡𑁆𑀟𑀓𑁂𑀦 𑀯𑀸 𑀅𑀡𑁆𑀟𑀓𑁄𑀲𑀁 𑀧𑀤𑀸𑀮𑁂𑀢𑁆𑀯𑀸 𑀧𑀓𑁆𑀔𑁂 𑀧𑀧𑁆𑀨𑁄𑀝𑁂𑀢𑁆𑀯𑀸 𑀲𑁄𑀢𑁆𑀣𑀺𑀦𑀸 𑀅𑀪𑀺𑀦𑀺𑀩𑁆𑀪𑀺𑀤𑀸𑀓𑀸𑀮𑁄 𑀯𑀺𑀬 𑀪𑀕𑀯𑀢𑁄 𑀢𑀺𑀯𑀺𑀥𑀸𑀦𑀼𑀧𑀲𑁆𑀲𑀦𑀸𑀲𑀫𑁆𑀧𑀸𑀤𑀦𑁂𑀦 𑀯𑀺𑀧𑀲𑁆𑀲𑀦𑀸𑀜𑀸𑀡𑀕𑀩𑁆𑀪𑀁 𑀕𑀡𑁆𑀳𑀸𑀧𑁂𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑀸𑀥𑀺𑀕𑀢𑁂𑀦 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀅𑀯𑀺𑀚𑁆𑀚𑀡𑁆𑀟𑀓𑁄𑀲𑀁 𑀧𑀤𑀸𑀮𑁂𑀢𑁆𑀯𑀸 𑀅𑀪𑀺𑀜𑁆𑀜𑀸𑀧𑀓𑁆𑀔𑁂 𑀧𑀧𑁆𑀨𑁄𑀝𑁂𑀢𑁆𑀯𑀸 𑀲𑁄𑀢𑁆𑀣𑀺𑀦𑀸 𑀲𑀓𑀮𑀩𑀼𑀤𑁆𑀥𑀕𑀼𑀡𑀲𑀘𑁆𑀙𑀺𑀓𑀢𑀓𑀸𑀮𑁄 𑀯𑁂𑀤𑀺𑀢𑀩𑁆𑀩𑁄.
𑀅𑀳𑀜𑁆𑀳𑀺, 𑀩𑁆𑀭𑀸𑀳𑁆𑀫𑀡, 𑀚𑁂𑀝𑁆𑀞𑁄 𑀲𑁂𑀝𑁆𑀞𑁄 𑀮𑁄𑀓𑀲𑁆𑀲𑀸𑀢𑀺, 𑀩𑁆𑀭𑀸𑀳𑁆𑀫𑀡, 𑀬𑀣𑀸 𑀢𑁂𑀲𑀁 𑀓𑀼𑀓𑁆𑀓𑀼𑀝𑀧𑁄𑀢𑀓𑀸𑀦𑀁 𑀧𑀞𑀫𑀢𑀭𑀁 𑀅𑀡𑁆𑀟𑀓𑁄𑀲𑀁 𑀧𑀤𑀸𑀮𑁂𑀢𑁆𑀯𑀸 𑀅𑀪𑀺𑀦𑀺𑀩𑁆𑀩𑀢𑁆𑀢𑁄 𑀓𑀼𑀓𑁆𑀓𑀼𑀝𑀧𑁄𑀢𑀓𑁄 𑀚𑁂𑀝𑁆𑀞𑁄 𑀳𑁄𑀢𑀺, 𑀏𑀯𑀁 𑀅𑀯𑀺𑀚𑁆𑀚𑀸𑀕𑀢𑀸𑀬 𑀧𑀚𑀸𑀬 𑀢𑀁 𑀅𑀯𑀺𑀚𑁆𑀚𑀡𑁆𑀟𑀓𑁄𑀲𑀁 𑀧𑀤𑀸𑀮𑁂𑀢𑁆𑀯𑀸 𑀧𑀞𑀫𑀢𑀭𑀁 𑀅𑀭𑀺𑀬𑀸𑀬 𑀚𑀸𑀢𑀺𑀬𑀸 𑀚𑀸𑀢𑀢𑁆𑀢𑀸 𑀅𑀳𑀜𑁆𑀳𑀺 𑀚𑁂𑀝𑁆𑀞𑁄 𑀯𑀼𑀤𑁆𑀥𑀢𑀫𑁄𑀢𑀺 𑀲𑀗𑁆𑀔𑀁 𑀕𑀢𑁄, 𑀲𑀩𑁆𑀩𑀕𑀼𑀡𑁂𑀳𑀺 𑀧𑀦 𑀅𑀧𑁆𑀧𑀝𑀺𑀲𑀫𑀢𑁆𑀢𑀸 𑀲𑁂𑀝𑁆𑀞𑁄𑀢𑀺.
𑀏𑀯𑀁 𑀪𑀕𑀯𑀸 𑀅𑀢𑁆𑀢𑀦𑁄 𑀅𑀦𑀼𑀢𑁆𑀢𑀭𑀁 𑀚𑁂𑀝𑁆𑀞𑀲𑁂𑀝𑁆𑀞𑀪𑀸𑀯𑀁 𑀩𑁆𑀭𑀸𑀳𑁆𑀫𑀡𑀲𑁆𑀲 𑀧𑀓𑀸𑀲𑁂𑀢𑁆𑀯𑀸 𑀇𑀤𑀸𑀦𑀺 𑀬𑀸𑀬 𑀧𑀝𑀺𑀧𑀤𑀸𑀬 𑀢𑀁 𑀅𑀥𑀺𑀕𑀢𑁄, 𑀢𑀁 𑀧𑀝𑀺𑀧𑀤𑀁 𑀧𑀼𑀩𑁆𑀩𑀪𑀸𑀕𑀢𑁄 𑀧𑀪𑀼𑀢𑀺 𑀤𑀲𑁆𑀲𑁂𑀢𑀼𑀁 𑀆𑀭𑀤𑁆𑀥𑀁 𑀔𑁄 𑀧𑀦 𑀫𑁂, 𑀩𑁆𑀭𑀸𑀳𑁆𑀫𑀡𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀆𑀭𑀤𑁆𑀥𑀁 𑀔𑁄 𑀧𑀦 𑀫𑁂, 𑀩𑁆𑀭𑀸𑀳𑁆𑀫𑀡, 𑀯𑀻𑀭𑀺𑀬𑀁 𑀅𑀳𑁄𑀲𑀻𑀢𑀺, 𑀩𑁆𑀭𑀸𑀳𑁆𑀫𑀡, 𑀦 𑀫𑀬𑀸 𑀅𑀬𑀁 𑀅𑀦𑀼𑀢𑁆𑀢𑀭𑁄 𑀚𑁂𑀝𑁆𑀞𑀲𑁂𑀝𑁆𑀞𑀪𑀸𑀯𑁄 𑀓𑀼𑀲𑀻𑀢𑁂𑀦 𑀫𑀼𑀝𑁆𑀞𑀲𑁆𑀲𑀢𑀺𑀦𑀸 𑀲𑀸𑀭𑀤𑁆𑀥𑀓𑀸𑀬𑁂𑀦 𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁂𑀦 𑀅𑀥𑀺𑀕𑀢𑁄, 𑀅𑀧𑀺𑀘 𑀔𑁄 𑀢𑀤𑀥𑀺𑀕𑀫𑀸𑀬 𑀆𑀭𑀤𑁆𑀥𑀁 𑀔𑁄 𑀧𑀦 𑀫𑁂 𑀯𑀻𑀭𑀺𑀬𑀁 𑀅𑀳𑁄𑀲𑀺. 𑀩𑁄𑀥𑀺𑀫𑀡𑁆𑀟𑁂 𑀦𑀺𑀲𑀺𑀦𑁆𑀦𑁂𑀦 𑀫𑀬𑀸 𑀘𑀢𑀼𑀲𑀫𑁆𑀫𑀧𑁆𑀧𑀥𑀸𑀦𑀪𑁂𑀤𑀁 𑀯𑀻𑀭𑀺𑀬𑀁 𑀆𑀭𑀤𑁆𑀥𑀁 𑀅𑀳𑁄𑀲𑀺, 𑀧𑀕𑁆𑀕𑀳𑀺𑀢𑀁 𑀅𑀲𑀺𑀣𑀺𑀮𑀧𑁆𑀧𑀯𑀢𑁆𑀢𑀺𑀢𑀁. 𑀆𑀭𑀤𑁆𑀥𑀢𑁆𑀢𑀸𑀬𑁂𑀯 𑀘 𑀫𑁂 𑀢𑀁 𑀅𑀲𑀮𑁆𑀮𑀻𑀦𑀁 𑀅𑀳𑁄𑀲𑀺. 𑀦 𑀓𑁂𑀯𑀮𑀜𑁆𑀘 𑀯𑀻𑀭𑀺𑀬𑀫𑁂𑀯, 𑀲𑀢𑀺𑀧𑀺 𑀫𑁂 𑀆𑀭𑀫𑁆𑀫𑀡𑀸𑀪𑀺𑀫𑀼𑀔𑀪𑀸𑀯𑁂𑀦 𑀉𑀧𑀝𑁆𑀞𑀺𑀢𑀸 𑀅𑀳𑁄𑀲𑀺, 𑀉𑀧𑀝𑁆𑀞𑀺𑀢𑀢𑁆𑀢𑀸𑀬𑁂𑀯 𑀘 𑀅𑀲𑀫𑁆𑀫𑀼𑀝𑁆𑀞𑀸. 𑀧𑀲𑁆𑀲𑀤𑁆𑀥𑁄 𑀓𑀸𑀬𑁄 𑀅𑀲𑀸𑀭𑀤𑁆𑀥𑁄𑀢𑀺 𑀓𑀸𑀬𑀘𑀺𑀢𑁆𑀢𑀧𑁆𑀧𑀲𑁆𑀲𑀤𑁆𑀥𑀺𑀯𑀲𑁂𑀦 𑀓𑀸𑀬𑁄𑀧𑀺 𑀫𑁂 𑀧𑀲𑁆𑀲𑀤𑁆𑀥𑁄 𑀅𑀳𑁄𑀲𑀺. 𑀢𑀢𑁆𑀣 𑀬𑀲𑁆𑀫𑀸 𑀦𑀸𑀫𑀓𑀸𑀬𑁂 𑀧𑀲𑁆𑀲𑀤𑁆𑀥𑁂 𑀭𑀽𑀧𑀓𑀸𑀬𑁄𑀧𑀺 𑀧𑀲𑁆𑀲𑀤𑁆𑀥𑁄𑀬𑁂𑀯 𑀳𑁄𑀢𑀺, 𑀢𑀲𑁆𑀫𑀸 ‘‘𑀦𑀸𑀫𑀓𑀸𑀬𑁄 𑀭𑀽𑀧𑀓𑀸𑀬𑁄’’𑀢𑀺 𑀅𑀯𑀺𑀲𑁂𑀲𑁂𑀢𑁆𑀯𑀸𑀯 ‘‘𑀧𑀲𑁆𑀲𑀤𑁆𑀥𑁄 𑀓𑀸𑀬𑁄’’𑀢𑀺 𑀯𑀼𑀢𑁆𑀢𑀁. 𑀅𑀲𑀸𑀭𑀤𑁆𑀥𑁄𑀢𑀺 𑀲𑁄 𑀘 𑀔𑁄 𑀧𑀲𑁆𑀲𑀤𑁆𑀥𑀢𑁆𑀢𑀸𑀬𑁂𑀯 𑀅𑀲𑀸𑀭𑀤𑁆𑀥𑁄, 𑀯𑀺𑀕𑀢𑀤𑀭𑀣𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀫𑀸𑀳𑀺𑀢𑀁 𑀘𑀺𑀢𑁆𑀢𑀁 𑀏𑀓𑀕𑁆𑀕𑀦𑁆𑀢𑀺 𑀘𑀺𑀢𑁆𑀢𑀫𑁆𑀧𑀺 𑀫𑁂 𑀲𑀫𑁆𑀫𑀸 𑀆𑀳𑀺𑀢𑀁 𑀲𑀼𑀝𑁆𑀞𑀼 𑀞𑀧𑀺𑀢𑀁 𑀅𑀧𑁆𑀧𑀺𑀢𑀁 𑀯𑀺𑀬 𑀅𑀳𑁄𑀲𑀺, 𑀲𑀫𑀸𑀳𑀺𑀢𑀢𑁆𑀢𑀸 𑀏𑀯 𑀘 𑀏𑀓𑀕𑁆𑀕𑀁 𑀅𑀘𑀮𑀁 𑀦𑀺𑀧𑁆𑀨𑀦𑁆𑀤𑀦𑀦𑁆𑀢𑀺. 𑀏𑀢𑁆𑀢𑀸𑀯𑀢𑀸 𑀛𑀸𑀦𑀲𑁆𑀲 𑀧𑀼𑀩𑁆𑀩𑀪𑀸𑀕𑀧𑀝𑀺𑀧𑀤𑀸 𑀓𑀣𑀺𑀢𑀸 𑀳𑁄𑀢𑀺.
𑀇𑀤𑀸𑀦𑀺 𑀇𑀫𑀸𑀬 𑀧𑀝𑀺𑀧𑀤𑀸𑀬 𑀅𑀥𑀺𑀕𑀢𑀁 𑀧𑀞𑀫𑀚𑁆𑀛𑀸𑀦𑀁 𑀆𑀤𑀺𑀁 𑀓𑀢𑁆𑀯𑀸 𑀯𑀺𑀚𑁆𑀚𑀸𑀢𑁆𑀢𑀬𑀧𑀭𑀺𑀬𑁄𑀲𑀸𑀦𑀁 𑀯𑀺𑀲𑁂𑀲𑀁 𑀤𑀲𑁆𑀲𑁂𑀦𑁆𑀢𑁄 𑀲𑁄 𑀔𑁄 𑀅𑀳𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀬𑀁 𑀬𑀸𑀯 𑀯𑀺𑀦𑀺𑀘𑁆𑀙𑀬𑀦𑀬𑁂𑀦 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸, 𑀢𑀁 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁧.𑁬𑁯) 𑀯𑀼𑀢𑁆𑀢𑀫𑁂𑀯.
𑀅𑀬𑀁 𑀔𑁄 𑀫𑁂, 𑀩𑁆𑀭𑀸𑀳𑁆𑀫𑀡𑀸𑀢𑀺𑀆𑀤𑀻𑀲𑀼 𑀧𑀦 𑀯𑀺𑀚𑁆𑀚𑀸𑀢𑀺 𑀯𑀺𑀤𑀺𑀢𑀓𑀭𑀡𑀝𑁆𑀞𑁂𑀦 𑀯𑀺𑀚𑁆𑀚𑀸. 𑀓𑀺𑀁 𑀯𑀺𑀤𑀺𑀢𑀁 𑀓𑀭𑁄𑀢𑀺? 𑀧𑀼𑀩𑁆𑀩𑁂𑀦𑀺𑀯𑀸𑀲𑀁. 𑀅𑀯𑀺𑀚𑁆𑀚𑀸𑀢𑀺 𑀢𑀲𑁆𑀲𑁂𑀯 𑀧𑀼𑀩𑁆𑀩𑁂𑀦𑀺𑀯𑀸𑀲𑀲𑁆𑀲 𑀅𑀯𑀺𑀤𑀺𑀢𑀓𑀭𑀡𑀝𑁆𑀞𑁂𑀦 𑀢𑀧𑁆𑀧𑀝𑀺𑀘𑁆𑀙𑀸𑀤𑀓𑀫𑁄𑀳𑁄. 𑀢𑀫𑁄𑀢𑀺 𑀲𑁆𑀯𑁂𑀯 𑀫𑁄𑀳𑁄 𑀢𑀧𑁆𑀧𑀝𑀺𑀘𑁆𑀙𑀸𑀤𑀓𑀝𑁆𑀞𑁂𑀦 𑀢𑀫𑁄 𑀦𑀸𑀫. 𑀆𑀮𑁄𑀓𑁄𑀢𑀺 𑀲𑀸 𑀏𑀯 𑀯𑀺𑀚𑁆𑀚𑀸 𑀑𑀪𑀸𑀲𑀓𑀭𑀡𑀝𑁆𑀞𑁂𑀦 𑀆𑀮𑁄𑀓𑁄𑀢𑀺. 𑀏𑀢𑁆𑀣 𑀘 𑀯𑀺𑀚𑁆𑀚𑀸 𑀅𑀥𑀺𑀕𑀢𑀸𑀢𑀺 𑀅𑀢𑁆𑀣𑁄, 𑀲𑁂𑀲𑀁 𑀧𑀲𑀁𑀲𑀸𑀯𑀘𑀦𑀁. 𑀬𑁄𑀚𑀦𑀸 𑀧𑀦𑁂𑀢𑁆𑀣 𑁋 𑀅𑀬𑀁 𑀔𑁄 𑀫𑁂 𑀯𑀺𑀚𑁆𑀚𑀸 𑀅𑀥𑀺𑀕𑀢𑀸, 𑀢𑀲𑁆𑀲 𑀫𑁂 𑀅𑀥𑀺𑀕𑀢𑀯𑀺𑀚𑁆𑀚𑀲𑁆𑀲 𑀅𑀯𑀺𑀚𑁆𑀚𑀸 𑀯𑀺𑀳𑀢𑀸, 𑀯𑀺𑀦𑀝𑁆𑀞𑀸𑀢𑀺 𑀅𑀢𑁆𑀣𑁄. 𑀓𑀲𑁆𑀫𑀸? 𑀬𑀲𑁆𑀫𑀸 𑀯𑀺𑀚𑁆𑀚𑀸 𑀉𑀧𑁆𑀧𑀦𑁆𑀦𑀸. 𑀏𑀲 𑀦𑀬𑁄 𑀇𑀢𑀭𑀲𑁆𑀫𑀺𑀫𑁆𑀧𑀺 𑀧𑀤𑀤𑁆𑀯𑀬𑁂. 𑀬𑀣𑀸 𑀢𑀦𑁆𑀢𑀺 𑀏𑀢𑁆𑀣 𑀢𑀦𑁆𑀢𑀺 𑀦𑀺𑀧𑀸𑀢𑀫𑀢𑁆𑀢𑀁. 𑀲𑀢𑀺𑀬𑀸 𑀅𑀯𑀺𑀧𑁆𑀧𑀯𑀸𑀲𑁂𑀦 𑀅𑀧𑁆𑀧𑀫𑀢𑁆𑀢𑀲𑁆𑀲 𑀯𑀻𑀭𑀺𑀬𑀸𑀢𑀸𑀧𑁂𑀦 𑀆𑀢𑀸𑀧𑀺𑀦𑁄 𑀓𑀸𑀬𑁂 𑀘 𑀚𑀻𑀯𑀺𑀢𑁂 𑀘 𑀅𑀦𑀧𑁂𑀓𑁆𑀔𑀸𑀢𑀸𑀬 𑀧𑀳𑀺𑀢𑀢𑁆𑀢𑀲𑁆𑀲 𑀧𑁂𑀲𑀺𑀢𑀢𑁆𑀢𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀣𑀸 𑀅𑀧𑁆𑀧𑀫𑀢𑁆𑀢𑀲𑁆𑀲 𑀆𑀢𑀸𑀧𑀺𑀦𑁄 𑀧𑀳𑀺𑀢𑀢𑁆𑀢𑀲𑁆𑀲 𑀯𑀺𑀳𑀭𑀢𑁄 𑀅𑀯𑀺𑀚𑁆𑀚𑀸 𑀯𑀺𑀳𑀜𑁆𑀜𑁂𑀬𑁆𑀬, 𑀯𑀺𑀚𑁆𑀚𑀸 𑀉𑀧𑁆𑀧𑀚𑁆𑀚𑁂𑀬𑁆𑀬 𑀢𑀫𑁄 𑀯𑀺𑀳𑀜𑁆𑀜𑁂𑀬𑁆𑀬, 𑀆𑀮𑁄𑀓𑁄 𑀉𑀧𑁆𑀧𑀚𑁆𑀚𑁂𑀬𑁆𑀬, 𑀏𑀯𑀫𑁂𑀯 𑀫𑀫 𑀅𑀯𑀺𑀚𑁆𑀚𑀸 𑀯𑀺𑀳𑀢𑀸, 𑀯𑀺𑀚𑁆𑀚𑀸 𑀉𑀧𑁆𑀧𑀦𑁆𑀦𑀸, 𑀢𑀫𑁄 𑀯𑀺𑀳𑀢𑁄, 𑀆𑀮𑁄𑀓𑁄 𑀉𑀧𑁆𑀧𑀦𑁆𑀦𑁄. 𑀏𑀢𑀲𑁆𑀲 𑀫𑁂 𑀧𑀥𑀸𑀦𑀸𑀦𑀼𑀬𑁄𑀕𑀲𑁆𑀲 𑀅𑀦𑀼𑀭𑀽𑀧𑀫𑁂𑀯 𑀨𑀮𑀁 𑀮𑀤𑁆𑀥𑀦𑁆𑀢𑀺.
𑀅𑀬𑀁 𑀔𑁄 𑀫𑁂, 𑀩𑁆𑀭𑀸𑀳𑁆𑀫𑀡, 𑀧𑀞𑀫𑀸 𑀅𑀪𑀺𑀦𑀺𑀩𑁆𑀪𑀺𑀤𑀸 𑀅𑀳𑁄𑀲𑀺 𑀓𑀼𑀓𑁆𑀓𑀼𑀝𑀘𑁆𑀙𑀸𑀧𑀓𑀲𑁆𑀲𑁂𑀯 𑀅𑀡𑁆𑀟𑀓𑁄𑀲𑀫𑁆𑀳𑀸𑀢𑀺 𑀅𑀬𑀁 𑀔𑁄 𑀫𑀫, 𑀩𑁆𑀭𑀸𑀳𑁆𑀫𑀡, 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑀫𑀼𑀔𑀢𑀼𑀡𑁆𑀟𑀓𑁂𑀦 𑀧𑀼𑀩𑁆𑀩𑁂 𑀦𑀺𑀯𑀼𑀢𑁆𑀣𑀔𑀦𑁆𑀥𑀧𑁆𑀧𑀝𑀺𑀘𑁆𑀙𑀸𑀤𑀓𑀁 𑀅𑀯𑀺𑀚𑁆𑀚𑀡𑁆𑀟𑀓𑁄𑀲𑀁 𑀧𑀤𑀸𑀮𑁂𑀢𑁆𑀯𑀸 𑀧𑀞𑀫𑀸 𑀅𑀪𑀺𑀦𑀺𑀩𑁆𑀪𑀺𑀤𑀸 𑀧𑀞𑀫𑀸 𑀦𑀺𑀓𑁆𑀔𑀦𑁆𑀢𑀺 𑀧𑀞𑀫𑀸 𑀅𑀭𑀺𑀬𑀸𑀚𑀸𑀢𑀺 𑀅𑀳𑁄𑀲𑀺 𑀓𑀼𑀓𑁆𑀓𑀼𑀝𑀘𑁆𑀙𑀸𑀧𑀓𑀲𑁆𑀲𑁂𑀯 𑀫𑀼𑀔𑀢𑀼𑀡𑁆𑀟𑀓𑁂𑀦 𑀯𑀸 𑀧𑀸𑀤𑀦𑀔𑀲𑀺𑀔𑀸𑀬 𑀯𑀸 𑀅𑀡𑁆𑀟𑀓𑁄𑀲𑀁 𑀧𑀤𑀸𑀮𑁂𑀢𑁆𑀯𑀸 𑀢𑀫𑁆𑀳𑀸 𑀅𑀡𑁆𑀟𑀓𑁄𑀲𑀫𑁆𑀳𑀸 𑀅𑀪𑀺𑀦𑀺𑀩𑁆𑀪𑀺𑀤𑀸 𑀦𑀺𑀓𑁆𑀔𑀦𑁆𑀢𑀺 𑀓𑀼𑀓𑁆𑀓𑀼𑀝𑀦𑀺𑀓𑀸𑀬𑁂 𑀧𑀘𑁆𑀘𑀸𑀚𑀸𑀢𑀻𑀢𑀺. 𑀅𑀬𑀁 𑀢𑀸𑀯 𑀧𑀼𑀩𑁆𑀩𑁂𑀦𑀺𑀯𑀸𑀲𑀓𑀣𑀸𑀬𑀁 𑀦𑀬𑁄.
𑀘𑀼𑀢𑀼𑀧𑀧𑀸𑀢𑀓𑀣𑀸𑀬 𑀧𑀦 𑀯𑀺𑀚𑁆𑀚𑀸𑀢𑀺 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀯𑀺𑀚𑁆𑀚𑀸. 𑀅𑀯𑀺𑀚𑁆𑀚𑀸𑀢𑀺 𑀘𑀼𑀢𑀼𑀧𑀧𑀸𑀢𑀧𑁆𑀧𑀝𑀺𑀘𑁆𑀙𑀸𑀤𑀺𑀓𑀸 𑀅𑀯𑀺𑀚𑁆𑀚𑀸. 𑀬𑀣𑀸 𑀧𑀦 𑀧𑀼𑀩𑁆𑀩𑁂𑀦𑀺𑀯𑀸𑀲𑀓𑀣𑀸𑀬𑀁 ‘‘𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑀫𑀼𑀔𑀢𑀼𑀡𑁆𑀟𑀓𑁂𑀦 𑀧𑀼𑀩𑁆𑀩𑁂 𑀦𑀺𑀯𑀼𑀢𑁆𑀣𑀓𑁆𑀔𑀦𑁆𑀥𑀧𑁆𑀧𑀝𑀺𑀘𑁆𑀙𑀸𑀤𑀓𑀁 𑀅𑀯𑀺𑀚𑁆𑀚𑀡𑁆𑀟𑀓𑁄𑀲𑀁 𑀧𑀤𑀸𑀮𑁂𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀁, 𑀏𑀯𑀫𑀺𑀥 ‘‘𑀘𑀼𑀢𑀼𑀧𑀧𑀸𑀢𑀜𑀸𑀡𑀫𑀼𑀔𑀢𑀼𑀡𑁆𑀟𑀓𑁂𑀦 𑀘𑀼𑀢𑀼𑀧𑀧𑀸𑀢𑀧𑁆𑀧𑀝𑀺𑀘𑁆𑀙𑀸𑀤𑀓𑀁 𑀅𑀯𑀺𑀚𑁆𑀚𑀡𑁆𑀟𑀓𑁄𑀲𑀁 𑀧𑀤𑀸𑀮𑁂𑀢𑁆𑀯𑀸’’𑀢𑀺 𑀯𑀢𑁆𑀢𑀩𑁆𑀩𑀁.
𑀬𑀁 𑀧𑀦𑁂𑀢𑀁 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀧𑀭𑀺𑀕𑁆𑀕𑀳𑀺𑀢𑀁 𑀆𑀲𑀯𑀸𑀦𑀁 𑀔𑀬𑀜𑀸𑀡𑀸𑀥𑀺𑀕𑀫𑀁 𑀩𑁆𑀭𑀸𑀳𑁆𑀫𑀡𑀲𑁆𑀲 𑀤𑀲𑁆𑀲𑁂𑀦𑁆𑀢𑁄 𑀅𑀬𑀁 𑀔𑁄 𑀫𑁂, 𑀩𑁆𑀭𑀸𑀳𑁆𑀫𑀡, 𑀢𑀢𑀺𑀬𑀸 𑀯𑀺𑀚𑁆𑀚𑀸𑀢𑀺𑀆𑀤𑀺𑀫𑀸𑀳, 𑀢𑀢𑁆𑀣 𑀯𑀺𑀚𑁆𑀚𑀸𑀢𑀺 𑀅𑀭𑀳𑀢𑁆𑀢𑀫𑀕𑁆𑀕𑀯𑀺𑀚𑁆𑀚𑀸. 𑀅𑀯𑀺𑀚𑁆𑀚𑀸𑀢𑀺 𑀘𑀢𑀼𑀲𑀘𑁆𑀘𑀧𑁆𑀧𑀝𑀺𑀘𑁆𑀙𑀸𑀤𑀺𑀓𑀸 𑀅𑀯𑀺𑀚𑁆𑀚𑀸. 𑀅𑀬𑀁 𑀔𑁄 𑀫𑁂, 𑀩𑁆𑀭𑀸𑀳𑁆𑀫𑀡, 𑀢𑀢𑀺𑀬𑀸 𑀅𑀪𑀺𑀦𑀺𑀩𑁆𑀪𑀺𑀤𑀸 𑀅𑀳𑁄𑀲𑀻𑀢𑀺 𑀏𑀢𑁆𑀣 𑀅𑀬𑀁 𑀔𑁄 𑀫𑀫, 𑀩𑁆𑀭𑀸𑀳𑁆𑀫𑀡, 𑀆𑀲𑀯𑀸𑀦𑀁 𑀔𑀬𑀜𑀸𑀡𑀫𑀼𑀔𑀢𑀼𑀡𑁆𑀟𑀓𑁂𑀦 𑀘𑀢𑀼𑀲𑀘𑁆𑀘𑀧𑀝𑀺𑀘𑁆𑀙𑀸𑀤𑀓𑀁 𑀅𑀯𑀺𑀚𑁆𑀚𑀡𑁆𑀟𑀓𑁄𑀲𑀁 𑀧𑀤𑀸𑀮𑁂𑀢𑁆𑀯𑀸 𑀢𑀢𑀺𑀬𑀸 𑀅𑀪𑀺𑀦𑀺𑀩𑁆𑀪𑀺𑀤𑀸 𑀢𑀢𑀺𑀬𑀸 𑀦𑀺𑀓𑁆𑀔𑀦𑁆𑀢𑀺 𑀢𑀢𑀺𑀬𑀸 𑀅𑀭𑀺𑀬𑀚𑀸𑀢𑀺 𑀅𑀳𑁄𑀲𑀺 𑀓𑀼𑀓𑁆𑀓𑀼𑀝𑀘𑁆𑀙𑀸𑀧𑀓𑀲𑁆𑀲𑁂𑀯 𑀫𑀼𑀔𑀢𑀼𑀡𑁆𑀟𑀓𑁂𑀦 𑀯𑀸 𑀧𑀸𑀤𑀦𑀔𑀲𑀺𑀔𑀸𑀬 𑀯𑀸 𑀅𑀡𑁆𑀟𑀓𑁄𑀲𑀁 𑀧𑀤𑀸𑀮𑁂𑀢𑁆𑀯𑀸 𑀢𑀫𑁆𑀳𑀸 𑀅𑀡𑁆𑀟𑀓𑁄𑀲𑀫𑁆𑀳𑀸 𑀅𑀪𑀺𑀦𑀺𑀩𑁆𑀪𑀺𑀤𑀸 𑀦𑀺𑀓𑁆𑀔𑀦𑁆𑀢𑀺 𑀓𑀼𑀓𑁆𑀓𑀼𑀝𑀦𑀺𑀓𑀸𑀬𑁂 𑀧𑀘𑁆𑀘𑀸𑀚𑀸𑀢𑀻𑀢𑀺.
𑀏𑀢𑁆𑀢𑀸𑀯𑀢𑀸 𑀓𑀺𑀁 𑀤𑀲𑁆𑀲𑁂𑀲𑀻𑀢𑀺? 𑀲𑁄 𑀳𑀺, 𑀩𑁆𑀭𑀸𑀳𑁆𑀫𑀡, 𑀓𑀼𑀓𑁆𑀓𑀼𑀝𑀘𑁆𑀙𑀸𑀧𑀓𑁄 𑀅𑀡𑁆𑀟𑀓𑁄𑀲𑀁 𑀧𑀤𑀸𑀮𑁂𑀢𑁆𑀯𑀸 𑀢𑀢𑁄 𑀦𑀺𑀓𑁆𑀔𑀫𑀦𑁆𑀢𑁄 𑀲𑀓𑀺𑀫𑁂𑀯 𑀚𑀸𑀬𑀢𑀺, 𑀅𑀳𑀁 𑀧𑀦 𑀧𑀼𑀩𑁆𑀩𑁂𑀦𑀺𑀯𑀼𑀢𑁆𑀣𑀓𑁆𑀔𑀦𑁆𑀥𑀧𑁆𑀧𑀝𑀺𑀘𑁆𑀙𑀸𑀤𑀓𑀁 𑀅𑀯𑀺𑀚𑁆𑀚𑀡𑁆𑀟𑀓𑁄𑀲𑀁 𑀪𑀺𑀦𑁆𑀤𑀺𑀢𑁆𑀯𑀸 𑀧𑀞𑀫𑀁 𑀢𑀸𑀯 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑀯𑀺𑀚𑁆𑀚𑀸𑀬 𑀚𑀸𑀢𑁄. 𑀢𑀢𑁄 𑀲𑀢𑁆𑀢𑀸𑀦𑀁 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀧𑁆𑀧𑀝𑀺𑀘𑁆𑀙𑀸𑀤𑀓𑀁 𑀅𑀯𑀺𑀚𑁆𑀚𑀡𑁆𑀟𑀓𑁄𑀲𑀁 𑀧𑀤𑀸𑀮𑁂𑀢𑁆𑀯𑀸 𑀤𑀼𑀢𑀺𑀬𑀁 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀯𑀺𑀚𑁆𑀚𑀸𑀬 𑀚𑀸𑀢𑁄, 𑀧𑀼𑀦 𑀘𑀢𑀼𑀲𑀘𑁆𑀘𑀧𑁆𑀧𑀝𑀺𑀘𑁆𑀙𑀸𑀤𑀓𑀁 𑀅𑀯𑀺𑀚𑁆𑀚𑀡𑁆𑀟𑀓𑁄𑀲𑀁 𑀧𑀤𑀸𑀮𑁂𑀢𑁆𑀯𑀸 𑀢𑀢𑀺𑀬𑀁 𑀆𑀲𑀯𑀸𑀦𑀁 𑀔𑀬𑀜𑀸𑀡𑀯𑀺𑀚𑁆𑀚𑀸𑀬 𑀚𑀸𑀢𑁄. 𑀏𑀯𑀁 𑀢𑀻𑀳𑀺 𑀯𑀺𑀚𑁆𑀚𑀸𑀳𑀺 𑀢𑀺𑀓𑁆𑀔𑀢𑁆𑀢𑀼𑀁 𑀚𑀸𑀢𑁄𑀫𑁆𑀳𑀺. 𑀲𑀸 𑀘 𑀫𑁂 𑀚𑀸𑀢𑀺 𑀅𑀭𑀺𑀬𑀸 𑀲𑀼𑀧𑀭𑀺𑀲𑀼𑀤𑁆𑀥𑀸𑀢𑀺 𑀇𑀤𑀁 𑀤𑀲𑁆𑀲𑁂𑀢𑀺. 𑀏𑀯𑀁𑀤𑀲𑁆𑀲𑁂𑀦𑁆𑀢𑁄 𑀘 𑀧𑀼𑀩𑁆𑀩𑁂𑀦𑀺𑀯𑀸𑀲𑀜𑀸𑀡𑁂𑀦 𑀅𑀢𑀻𑀢𑀁𑀲𑀜𑀸𑀡𑀁, 𑀤𑀺𑀩𑁆𑀩𑀘𑀓𑁆𑀔𑀼𑀦𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀸𑀕𑀢𑀁𑀲𑀜𑀸𑀡𑀁, 𑀆𑀲𑀯𑀓𑁆𑀔𑀬𑁂𑀦 𑀲𑀓𑀮𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀕𑀼𑀡𑀦𑁆𑀢𑀺 𑀏𑀯𑀁 𑀢𑀻𑀳𑀺 𑀯𑀺𑀚𑁆𑀚𑀸𑀳𑀺 𑀲𑀩𑁆𑀩𑁂𑀧𑀺 𑀲𑀩𑁆𑀩𑀜𑁆𑀜𑀼𑀕𑀼𑀡𑁂 𑀧𑀓𑀸𑀲𑁂𑀢𑁆𑀯𑀸 𑀅𑀢𑁆𑀢𑀦𑁄 𑀅𑀭𑀺𑀬𑀸𑀬 𑀚𑀸𑀢𑀺𑀬𑀸 𑀚𑁂𑀝𑁆𑀞𑀲𑁂𑀝𑁆𑀞𑀪𑀸𑀯𑀁 𑀩𑁆𑀭𑀸𑀳𑁆𑀫𑀡𑀲𑁆𑀲 𑀤𑀲𑁆𑀲𑁂𑀲𑀺.
𑀏𑀯𑀁 𑀯𑀼𑀢𑁆𑀢𑁂 𑀯𑁂𑀭𑀜𑁆𑀚𑁄 𑀩𑁆𑀭𑀸𑀳𑁆𑀫𑀡𑁄𑀢𑀺 𑀏𑀯𑀁 𑀪𑀕𑀯𑀢𑀸 𑀮𑁄𑀓𑀸𑀦𑀼𑀓𑀫𑁆𑀧𑀓𑁂𑀦 𑀩𑁆𑀭𑀸𑀳𑁆𑀫𑀡𑀁 𑀅𑀦𑀼𑀓𑀫𑁆𑀧𑀫𑀸𑀦𑁂𑀦 𑀦𑀺𑀕𑀼𑀳𑀺𑀢𑀩𑁆𑀩𑁂𑀧𑀺 𑀅𑀢𑁆𑀢𑀦𑁄 𑀅𑀭𑀺𑀬𑀸𑀬 𑀚𑀸𑀢𑀺𑀬𑀸 𑀚𑁂𑀝𑁆𑀞𑀲𑁂𑀝𑁆𑀞𑀪𑀸𑀯𑁂 𑀯𑀺𑀚𑁆𑀚𑀸𑀢𑁆𑀢𑀬𑀧𑀓𑀸𑀲𑀺𑀓𑀸𑀬 𑀥𑀫𑁆𑀫𑀤𑁂𑀲𑀦𑀸𑀬 𑀯𑀼𑀢𑁆𑀢𑁂 𑀧𑀻𑀢𑀺𑀯𑀺𑀧𑁆𑀨𑀸𑀭𑀧𑀭𑀺𑀧𑀼𑀡𑁆𑀡𑀕𑀢𑁆𑀢𑀘𑀺𑀢𑁆𑀢𑁄 𑀯𑁂𑀭𑀜𑁆𑀚𑁄 𑀩𑁆𑀭𑀸𑀳𑁆𑀫𑀡𑁄 𑀢𑀁 𑀪𑀕𑀯𑀢𑁄 𑀅𑀭𑀺𑀬𑀸𑀬 𑀚𑀸𑀢𑀺𑀬𑀸 𑀚𑁂𑀝𑁆𑀞𑀲𑁂𑀝𑁆𑀞𑀪𑀸𑀯𑀁 𑀯𑀺𑀤𑀺𑀢𑁆𑀯𑀸 ‘‘𑀈𑀤𑀺𑀲𑀁 𑀦𑀸𑀫𑀸𑀳𑀁 𑀲𑀩𑁆𑀩𑀮𑁄𑀓𑀚𑁂𑀝𑁆𑀞𑀁 𑀲𑀩𑁆𑀩𑀕𑀼𑀡𑀲𑀫𑀦𑁆𑀦𑀸𑀕𑀢𑀁 𑀲𑀩𑁆𑀩𑀜𑁆𑀜𑀼𑀁 ‘𑀅𑀜𑁆𑀜𑁂𑀲𑀁 𑀅𑀪𑀺𑀯𑀸𑀤𑀦𑀸𑀤𑀺𑀓𑀫𑁆𑀫𑀁 𑀦 𑀓𑀭𑁄𑀢𑀻’𑀢𑀺 𑀅𑀯𑀘𑀁, 𑀥𑀺𑀭𑀢𑁆𑀣𑀼 𑀯𑀢, 𑀪𑁄, 𑀅𑀜𑁆𑀜𑀸𑀡’’𑀦𑁆𑀢𑀺 𑀅𑀢𑁆𑀢𑀸𑀦𑀁 𑀕𑀭𑀳𑀺𑀢𑁆𑀯𑀸 ‘‘𑀅𑀬𑀁 𑀤𑀸𑀦𑀺 𑀮𑁄𑀓𑁂 𑀅𑀭𑀺𑀬𑀸𑀬 𑀚𑀸𑀢𑀺𑀬𑀸 𑀧𑀼𑀭𑁂𑀚𑀸𑀢𑀝𑁆𑀞𑁂𑀦 𑀚𑁂𑀝𑁆𑀞𑁄, 𑀲𑀩𑁆𑀩𑀕𑀼𑀡𑁂𑀳𑀺 𑀅𑀧𑁆𑀧𑀝𑀺𑀲𑀫𑀝𑁆𑀞𑁂𑀦 𑀲𑁂𑀝𑁆𑀞𑁄’’𑀢𑀺 𑀦𑀺𑀝𑁆𑀞𑀁 𑀕𑀦𑁆𑀢𑁆𑀯𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 𑀚𑁂𑀝𑁆𑀞𑁄 𑀪𑀯𑀁 𑀕𑁄𑀢𑀫𑁄 𑀲𑁂𑀝𑁆𑀞𑁄 𑀪𑀯𑀁 𑀕𑁄𑀢𑀫𑁄𑀢𑀺. 𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 𑀧𑀼𑀦 𑀢𑀁 𑀪𑀕𑀯𑀢𑁄 𑀥𑀫𑁆𑀫𑀤𑁂𑀲𑀦𑀁 𑀅𑀩𑁆𑀪𑀦𑀼𑀫𑁄𑀤𑀫𑀸𑀦𑁄 𑀅𑀪𑀺𑀓𑁆𑀓𑀦𑁆𑀢𑀁 𑀪𑁄 𑀕𑁄𑀢𑀫𑀸𑀢𑀺𑀆𑀤𑀺𑀫𑀸𑀳. 𑀢𑀁 𑀯𑀼𑀢𑁆𑀢𑀢𑁆𑀣𑀫𑁂𑀯𑀸𑀢𑀺.
𑁨. 𑀲𑀻𑀳𑀲𑀼𑀢𑁆𑀢𑀯𑀡𑁆𑀡𑀦𑀸
𑁧𑁨. 𑀤𑀼𑀢𑀺𑀬𑁂 𑀅𑀪𑀺𑀜𑁆𑀜𑀸𑀢𑀸𑀢𑀺 𑀜𑀸𑀢𑀸 𑀧𑀜𑁆𑀜𑀸𑀢𑀸 𑀧𑀸𑀓𑀝𑀸. 𑀲𑀦𑁆𑀣𑀸𑀕𑀸𑀭𑁂𑀢𑀺 𑀫𑀳𑀸𑀚𑀦𑀲𑁆𑀲 𑀯𑀺𑀲𑁆𑀲𑀫𑀦𑀢𑁆𑀣𑀸𑀬 𑀓𑀢𑁂 𑀅𑀕𑀸𑀭𑁂. 𑀲𑀸 𑀓𑀺𑀭 𑀲𑀦𑁆𑀣𑀸𑀕𑀸𑀭𑀲𑀸𑀮𑀸 𑀦𑀕𑀭𑀫𑀚𑁆𑀛𑁂 𑀅𑀳𑁄𑀲𑀺, 𑀘𑀢𑀽𑀲𑀼 𑀞𑀸𑀦𑁂𑀲𑀼 𑀞𑀺𑀢𑀸𑀦𑀁 𑀧𑀜𑁆𑀜𑀸𑀬𑀢𑀺, 𑀘𑀢𑀽𑀳𑀺 𑀤𑀺𑀲𑀸𑀳𑀺 𑀆𑀕𑀢𑀫𑀦𑀼𑀲𑁆𑀲𑀸 𑀧𑀞𑀫𑀁 𑀢𑀢𑁆𑀣 𑀯𑀺𑀲𑁆𑀲𑀫𑀺𑀢𑁆𑀯𑀸 𑀧𑀘𑁆𑀙𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀨𑀸𑀲𑀼𑀓𑀝𑁆𑀞𑀸𑀦𑀁 𑀕𑀘𑁆𑀙𑀦𑁆𑀢𑀺. 𑀭𑀸𑀚𑀓𑀼𑀮𑀸𑀦𑀁 𑀭𑀚𑁆𑀚𑀓𑀺𑀘𑁆𑀘𑀲𑀦𑁆𑀣𑀭𑀡𑀢𑁆𑀣𑀸𑀬 𑀓𑀢𑀁 𑀅𑀕𑀸𑀭𑀦𑁆𑀢𑀺𑀧𑀺 𑀯𑀤𑀦𑁆𑀢𑀺𑀬𑁂𑀯. 𑀢𑀢𑁆𑀣 𑀳𑀺 𑀦𑀺𑀲𑀻𑀤𑀺𑀢𑁆𑀯𑀸 𑀮𑀺𑀘𑁆𑀙𑀯𑀺𑀭𑀸𑀚𑀸𑀦𑁄 𑀭𑀚𑁆𑀚𑀓𑀺𑀘𑁆𑀘𑀁 𑀲𑀦𑁆𑀣𑀭𑀦𑁆𑀢𑀺 𑀓𑀭𑁄𑀦𑁆𑀢𑀺 𑀯𑀺𑀘𑀸𑀭𑁂𑀦𑁆𑀢𑀺. 𑀲𑀦𑁆𑀦𑀺𑀲𑀺𑀦𑁆𑀦𑀸𑀢𑀺 𑀢𑁂𑀲𑀁 𑀦𑀺𑀲𑀻𑀤𑀦𑀢𑁆𑀣𑀜𑁆𑀜𑁂𑀯 𑀧𑀜𑁆𑀜𑀢𑁆𑀢𑁂𑀲𑀼 𑀫𑀳𑀸𑀭𑀳𑀯𑀭𑀧𑀘𑁆𑀘𑀢𑁆𑀣𑀭𑀡𑁂𑀲𑀼 𑀲𑀫𑀼𑀲𑁆𑀲𑀺𑀢𑀲𑁂𑀢𑀘𑁆𑀙𑀢𑁆𑀢𑁂𑀲𑀼 𑀆𑀲𑀦𑁂𑀲𑀼 𑀲𑀦𑁆𑀦𑀺𑀲𑀺𑀦𑁆𑀦𑀸. 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀩𑀼𑀤𑁆𑀥𑀲𑁆𑀲 𑀯𑀡𑁆𑀡𑀁 𑀪𑀸𑀲𑀦𑁆𑀢𑀻𑀢𑀺 𑀭𑀸𑀚𑀓𑀼𑀮𑁂 𑀓𑀺𑀘𑁆𑀘𑀜𑁆𑀘𑁂𑀯 𑀮𑁄𑀓𑀢𑁆𑀣𑀘𑀭𑀺𑀬𑀜𑁆𑀘 𑀯𑀺𑀘𑀸𑀭𑁂𑀢𑁆𑀯𑀸 𑀅𑀦𑁂𑀓𑁂𑀳𑀺 𑀓𑀸𑀭𑀡𑁂𑀳𑀺 𑀩𑀼𑀤𑁆𑀥𑀲𑁆𑀲 𑀯𑀡𑁆𑀡𑀁 𑀪𑀸𑀲𑀦𑁆𑀢𑀺 𑀓𑀣𑁂𑀦𑁆𑀢𑀺 𑀤𑀻𑀧𑁂𑀦𑁆𑀢𑀺. 𑀧𑀡𑁆𑀟𑀺𑀢𑀸 𑀳𑀺 𑀢𑁂 𑀭𑀸𑀚𑀸𑀦𑁄 𑀲𑀤𑁆𑀥𑀸 𑀧𑀲𑀦𑁆𑀦𑀸 𑀲𑁄𑀢𑀸𑀧𑀦𑁆𑀦𑀸𑀧𑀺 𑀲𑀓𑀤𑀸𑀕𑀸𑀫𑀺𑀦𑁄𑀧𑀺 𑀅𑀦𑀸𑀕𑀸𑀫𑀺𑀦𑁄𑀧𑀺 𑀅𑀭𑀺𑀬𑀲𑀸𑀯𑀓𑀸, 𑀢𑁂 𑀲𑀩𑁆𑀩𑁂𑀧𑀺 𑀮𑁄𑀓𑀺𑀬𑀚𑀝𑀁 𑀙𑀺𑀦𑁆𑀤𑀺𑀢𑁆𑀯𑀸 𑀩𑀼𑀤𑁆𑀥𑀸𑀤𑀻𑀦𑀁 𑀢𑀺𑀡𑁆𑀡𑀁 𑀭𑀢𑀦𑀸𑀦𑀁 𑀯𑀡𑁆𑀡𑀁 𑀪𑀸𑀲𑀦𑁆𑀢𑀺. 𑀢𑀢𑁆𑀣 𑀢𑀺𑀯𑀺𑀥𑁄 𑀩𑀼𑀤𑁆𑀥𑀯𑀡𑁆𑀡𑁄 𑀦𑀸𑀫 𑀘𑀭𑀺𑀬𑀯𑀡𑁆𑀡𑁄, 𑀲𑀭𑀻𑀭𑀯𑀡𑁆𑀡𑁄, 𑀕𑀼𑀡𑀯𑀡𑁆𑀡𑁄𑀢𑀺. 𑀢𑀢𑁆𑀭𑀺𑀫𑁂 𑀭𑀸𑀚𑀸𑀦𑁄 𑀘𑀭𑀺𑀬𑀸𑀬 𑀯𑀡𑁆𑀡𑀁 𑀆𑀭𑀪𑀺𑀁𑀲𑀼 𑁋 ‘‘𑀤𑀼𑀓𑁆𑀓𑀭𑀁 𑀯𑀢 𑀓𑀢𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀓𑀧𑁆𑀧𑀲𑀢𑀲𑀳𑀲𑁆𑀲𑀸𑀥𑀺𑀓𑀸𑀦𑀺 𑀘𑀢𑁆𑀢𑀸𑀭𑀺 𑀅𑀲𑀗𑁆𑀔𑁂𑀬𑁆𑀬𑀸𑀦𑀺 𑀤𑀲 𑀧𑀸𑀭𑀫𑀺𑀬𑁄, 𑀤𑀲 𑀉𑀧𑀧𑀸𑀭𑀫𑀺𑀬𑁄, 𑀤𑀲 𑀧𑀭𑀫𑀢𑁆𑀣𑀧𑀸𑀭𑀫𑀺𑀬𑁄𑀢𑀺 𑀲𑀫𑀢𑁆𑀢𑀺𑀁𑀲 𑀧𑀸𑀭𑀫𑀺𑀬𑁄 𑀧𑀽𑀭𑁂𑀦𑁆𑀢𑁂𑀦, 𑀜𑀸𑀢𑀢𑁆𑀣𑀘𑀭𑀺𑀬𑀁, 𑀮𑁄𑀓𑀢𑁆𑀣𑀘𑀭𑀺𑀬𑀁, 𑀩𑀼𑀤𑁆𑀥𑀘𑀭𑀺𑀬𑀁 𑀫𑀢𑁆𑀣𑀓𑀁 𑀧𑀸𑀧𑁂𑀢𑁆𑀯𑀸 𑀧𑀜𑁆𑀘 𑀫𑀳𑀸𑀧𑀭𑀺𑀘𑁆𑀘𑀸𑀕𑁂 𑀧𑀭𑀺𑀘𑁆𑀘𑀚𑀦𑁆𑀢𑁂𑀦𑀸’’𑀢𑀺 𑀅𑀟𑁆𑀠𑀘𑁆𑀙𑀓𑁆𑀓𑁂𑀳𑀺 𑀚𑀸𑀢𑀓𑀲𑀢𑁂𑀳𑀺 𑀩𑀼𑀤𑁆𑀥𑀯𑀡𑁆𑀡𑀁 𑀓𑀣𑁂𑀦𑁆𑀢𑀸 𑀢𑀼𑀲𑀺𑀢𑀪𑀯𑀦𑀁 𑀧𑀸𑀧𑁂𑀢𑁆𑀯𑀸 𑀞𑀧𑀬𑀺𑀁𑀲𑀼.
𑀥𑀫𑁆𑀫𑀲𑁆𑀲 𑀯𑀡𑁆𑀡𑀁 𑀪𑀸𑀲𑀦𑁆𑀢𑀸 𑀧𑀦 ‘‘𑀢𑁂𑀦 𑀪𑀕𑀯𑀢𑀸 𑀥𑀫𑁆𑀫𑁄 𑀤𑁂𑀲𑀺𑀢𑁄, 𑀦𑀺𑀓𑀸𑀬𑀢𑁄 𑀧𑀜𑁆𑀘 𑀦𑀺𑀓𑀸𑀬𑀸, 𑀧𑀺𑀝𑀓𑀢𑁄 𑀢𑀻𑀡𑀺 𑀧𑀺𑀝𑀓𑀸𑀦𑀺, 𑀅𑀗𑁆𑀕𑀢𑁄 𑀦𑀯 𑀅𑀗𑁆𑀕𑀸𑀦𑀺, 𑀔𑀦𑁆𑀥𑀢𑁄 𑀘𑀢𑀼𑀭𑀸𑀲𑀻𑀢𑀺𑀥𑀫𑁆𑀫𑀓𑁆𑀔𑀦𑁆𑀥𑀲𑀳𑀲𑁆𑀲𑀸𑀦𑀻’’𑀢𑀺 𑀓𑁄𑀝𑁆𑀞𑀸𑀲𑀯𑀲𑁂𑀦 𑀥𑀫𑁆𑀫𑀕𑀼𑀡𑀁 𑀓𑀣𑀬𑀺𑀁𑀲𑀼.
𑀲𑀗𑁆𑀖𑀲𑁆𑀲 𑀯𑀡𑁆𑀡𑀁 𑀪𑀸𑀲𑀦𑁆𑀢𑀸 𑀲𑀢𑁆𑀣𑀼 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 ‘‘𑀧𑀝𑀺𑀮𑀤𑁆𑀥𑀲𑀤𑁆𑀥𑀸 𑀓𑀼𑀮𑀧𑀼𑀢𑁆𑀢𑀸 𑀪𑁄𑀕𑀓𑁆𑀔𑀦𑁆𑀥𑀜𑁆𑀘𑁂𑀯 𑀜𑀸𑀢𑀺𑀧𑀭𑀺𑀯𑀝𑁆𑀝𑀜𑁆𑀘 𑀧𑀳𑀸𑀬 𑀲𑁂𑀢𑀘𑁆𑀙𑀢𑁆𑀢𑀁 𑀑𑀧𑀭𑀚𑁆𑀚𑀁 𑀲𑁂𑀦𑀸𑀧𑀢𑀺𑀲𑁂𑀝𑁆𑀞𑀺𑀪𑀡𑁆𑀟𑀸𑀕𑀸𑀭𑀺𑀓𑀝𑁆𑀞𑀸𑀦𑀦𑁆𑀢𑀭𑀸𑀤𑀻𑀦𑀺 𑀅𑀕𑀡𑁂𑀢𑁆𑀯𑀸 𑀦𑀺𑀓𑁆𑀔𑀫𑁆𑀫 𑀲𑀢𑁆𑀣𑀼 𑀯𑀭𑀲𑀸𑀲𑀦𑁂 𑀧𑀩𑁆𑀩𑀚𑀦𑁆𑀢𑀺. 𑀲𑁂𑀢𑀘𑁆𑀙𑀢𑁆𑀢𑀁 𑀧𑀳𑀸𑀬 𑀧𑀩𑁆𑀩𑀚𑀺𑀢𑀸𑀦𑀁 𑀪𑀤𑁆𑀤𑀺𑀬𑀭𑀸𑀚𑀫𑀳𑀸𑀓𑀧𑁆𑀧𑀺𑀦𑀧𑀼𑀓𑁆𑀓𑀼𑀲𑀸𑀢𑀺𑀆𑀤𑀻𑀦𑀁 𑀭𑀸𑀚𑀧𑀩𑁆𑀩𑀚𑀺𑀢𑀸𑀦𑀁𑀬𑁂𑀯 𑀩𑀼𑀤𑁆𑀥𑀓𑀸𑀮𑁂 𑀅𑀲𑀻𑀢𑀺𑀲𑀳𑀲𑁆𑀲𑀸𑀦𑀺 𑀅𑀳𑁂𑀲𑀼𑀁. 𑀅𑀦𑁂𑀓𑀓𑁄𑀝𑀺𑀲𑀢𑀁 𑀥𑀦𑀁 𑀧𑀳𑀸𑀬 𑀧𑀩𑁆𑀩𑀚𑀺𑀢𑀸𑀦𑀁 𑀧𑀦 𑀬𑀲𑀓𑀼𑀮𑀧𑀼𑀢𑁆𑀢𑀲𑁄𑀡𑀲𑁂𑀝𑁆𑀞𑀺𑀧𑀼𑀢𑁆𑀢𑀭𑀝𑁆𑀞𑀧𑀸𑀮𑀓𑀼𑀮𑀧𑀼𑀢𑁆𑀢𑀸𑀤𑀻𑀦𑀁 𑀧𑀭𑀺𑀘𑁆𑀙𑁂𑀤𑁄 𑀦𑀢𑁆𑀣𑀺. 𑀏𑀯𑀭𑀽𑀧𑀸 𑀘 𑀏𑀯𑀭𑀽𑀧𑀸 𑀘 𑀓𑀼𑀮𑀧𑀼𑀢𑁆𑀢𑀸 𑀲𑀢𑁆𑀣𑀼 𑀲𑀸𑀲𑀦𑁂 𑀧𑀩𑁆𑀩𑀚𑀦𑁆𑀢𑀻’’𑀢𑀺 𑀧𑀩𑁆𑀩𑀚𑁆𑀚𑀸𑀲𑀗𑁆𑀔𑁂𑀧𑀯𑀲𑁂𑀦 𑀲𑀗𑁆𑀖𑀕𑀼𑀡𑁂 𑀓𑀣𑀬𑀺𑀁𑀲𑀼.
𑀲𑀻𑀳𑁄 𑀲𑁂𑀦𑀸𑀧𑀢𑀻𑀢𑀺 𑀏𑀯𑀁𑀦𑀸𑀫𑀓𑁄 𑀲𑁂𑀦𑀸𑀬 𑀅𑀥𑀺𑀧𑀢𑀺. 𑀯𑁂𑀲𑀸𑀮𑀺𑀬𑀜𑁆𑀳𑀺 𑀲𑀢𑁆𑀢 𑀲𑀳𑀲𑁆𑀲𑀸𑀦𑀺 𑀲𑀢𑁆𑀢 𑀲𑀢𑀸𑀦𑀺 𑀲𑀢𑁆𑀢 𑀘 𑀭𑀸𑀚𑀸𑀦𑁄. 𑀢𑁂 𑀲𑀩𑁆𑀩𑁂𑀧𑀺 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀲𑀩𑁆𑀩𑁂𑀲𑀁 𑀫𑀦𑀁 𑀕𑀳𑁂𑀢𑁆𑀯𑀸 ‘‘𑀭𑀝𑁆𑀞𑀁 𑀯𑀺𑀘𑀸𑀭𑁂𑀢𑀼𑀁 𑀲𑀫𑀢𑁆𑀣𑀁 𑀏𑀓𑀁 𑀯𑀺𑀘𑀺𑀦𑀣𑀸’’𑀢𑀺 𑀯𑀺𑀘𑀺𑀦𑀦𑁆𑀢𑀸 𑀲𑀻𑀳𑀁 𑀭𑀸𑀚𑀓𑀼𑀫𑀸𑀭𑀁 𑀤𑀺𑀲𑁆𑀯𑀸 ‘‘𑀅𑀬𑀁 𑀲𑀓𑁆𑀔𑀺𑀲𑁆𑀲𑀢𑀻’’𑀢𑀺 𑀲𑀦𑁆𑀦𑀺𑀝𑁆𑀞𑀸𑀦𑀁 𑀓𑀢𑁆𑀯𑀸 𑀢𑀲𑁆𑀲 𑀭𑀢𑁆𑀢𑀫𑀡𑀺𑀯𑀡𑁆𑀡𑀁 𑀓𑀫𑁆𑀩𑀮𑀧𑀭𑀺𑀬𑁄𑀦𑀤𑁆𑀥𑀁 𑀲𑁂𑀦𑀸𑀧𑀢𑀺𑀘𑁆𑀙𑀢𑁆𑀢𑀁 𑀅𑀤𑀁𑀲𑀼. 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋 ‘‘𑀲𑀻𑀳𑁄 𑀲𑁂𑀦𑀸𑀧𑀢𑀻’’𑀢𑀺. 𑀦𑀺𑀕𑀡𑁆𑀞𑀲𑀸𑀯𑀓𑁄𑀢𑀺 𑀦𑀺𑀕𑀡𑁆𑀞𑀲𑁆𑀲 𑀦𑀸𑀝𑀧𑀼𑀢𑁆𑀢𑀲𑁆𑀲 𑀧𑀘𑁆𑀘𑀬𑀤𑀸𑀬𑀓𑁄 𑀉𑀧𑀝𑁆𑀞𑀸𑀓𑁄. 𑀚𑀫𑁆𑀩𑀼𑀤𑀻𑀧𑀢𑀮𑀲𑁆𑀫𑀺𑀜𑁆𑀳𑀺 𑀢𑀬𑁄 𑀚𑀦𑀸 𑀦𑀺𑀕𑀡𑁆𑀞𑀸𑀦𑀁 𑀅𑀕𑁆𑀕𑀼𑀧𑀝𑁆𑀞𑀸𑀓𑀸 𑁋 𑀦𑀸𑀴𑀦𑁆𑀤𑀸𑀬𑀁, 𑀉𑀧𑀸𑀮𑀺 𑀕𑀳𑀧𑀢𑀺, 𑀓𑀧𑀺𑀮𑀧𑀼𑀭𑁂 𑀯𑀧𑁆𑀧𑁄 𑀲𑀓𑁆𑀓𑁄, 𑀯𑁂𑀲𑀸𑀮𑀺𑀬𑀁 𑀅𑀬𑀁 𑀲𑀻𑀳𑁄 𑀲𑁂𑀦𑀸𑀧𑀢𑀻𑀢𑀺. 𑀦𑀺𑀲𑀺𑀦𑁆𑀦𑁄 𑀳𑁄𑀢𑀻𑀢𑀺 𑀲𑁂𑀲𑀭𑀸𑀚𑀽𑀦𑀁 𑀧𑀭𑀺𑀲𑀸𑀬 𑀅𑀦𑁆𑀢𑀭𑀦𑁆𑀢𑀭𑁂 𑀆𑀲𑀦𑀸𑀦𑀺 𑀧𑀜𑁆𑀜𑀸𑀧𑀬𑀺𑀁𑀲𑀼, 𑀲𑀻𑀳𑀲𑁆𑀲 𑀧𑀦 𑀫𑀚𑁆𑀛𑁂 𑀞𑀸𑀦𑁂𑀢𑀺 𑀢𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑁂 𑀫𑀳𑀸𑀭𑀳𑁂 𑀭𑀸𑀚𑀸𑀲𑀦𑁂 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺. 𑀦𑀺𑀲𑁆𑀲𑀁𑀲𑀬𑀦𑁆𑀢𑀺 𑀦𑀺𑀩𑁆𑀩𑀺𑀘𑀺𑀓𑀺𑀘𑁆𑀙𑀁 𑀅𑀤𑁆𑀥𑀸 𑀏𑀓𑀁𑀲𑁂𑀦, 𑀦 𑀳𑁂𑀢𑁂 𑀬𑀲𑁆𑀲 𑀯𑀸 𑀢𑀲𑁆𑀲 𑀯𑀸 𑀅𑀧𑁆𑀧𑁂𑀲𑀓𑁆𑀔𑀲𑁆𑀲 𑀏𑀯𑀁 𑀅𑀦𑁂𑀓𑀲𑀢𑁂𑀳𑀺 𑀓𑀸𑀭𑀡𑁂𑀳𑀺 𑀯𑀡𑁆𑀡𑀁 𑀪𑀸𑀲𑀦𑁆𑀢𑀺.
𑀬𑁂𑀦 𑀦𑀺𑀕𑀡𑁆𑀞𑁄 𑀦𑀸𑀝𑀧𑀼𑀢𑁆𑀢𑁄 𑀢𑁂𑀦𑀼𑀧𑀲𑀗𑁆𑀓𑀫𑀻𑀢𑀺 𑀦𑀺𑀕𑀡𑁆𑀞𑁄 𑀓𑀺𑀭 𑀦𑀸𑀝𑀧𑀼𑀢𑁆𑀢𑁄 ‘‘𑀲𑀘𑀸𑀬𑀁 𑀲𑀻𑀳𑁄 𑀓𑀲𑁆𑀲𑀘𑀺𑀤𑁂𑀯 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀯𑀡𑁆𑀡𑀁 𑀓𑀣𑁂𑀦𑁆𑀢𑀲𑁆𑀲 𑀲𑀼𑀢𑁆𑀯𑀸 𑀲𑀫𑀡𑀁 𑀕𑁄𑀢𑀫𑀁 𑀤𑀲𑁆𑀲𑀦𑀸𑀬 𑀉𑀧𑀲𑀗𑁆𑀓𑀫𑀺𑀲𑁆𑀲𑀢𑀺, 𑀫𑀬𑁆𑀳𑀁 𑀧𑀭𑀺𑀳𑀸𑀦𑀺 𑀪𑀯𑀺𑀲𑁆𑀲𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀧𑀞𑀫𑀢𑀭𑀁𑀬𑁂𑀯 𑀲𑀻𑀳𑀁 𑀲𑁂𑀦𑀸𑀧𑀢𑀺𑀁 𑀏𑀢𑀤𑀯𑁄𑀘 𑁋 ‘‘𑀲𑁂𑀦𑀸𑀧𑀢𑀺 𑀇𑀫𑀲𑁆𑀫𑀺𑀁 𑀮𑁄𑀓𑁂 ‘𑀅𑀳𑀁 𑀩𑀼𑀤𑁆𑀥𑁄 𑀅𑀳𑀁 𑀩𑀼𑀤𑁆𑀥𑁄’𑀢𑀺 𑀩𑀳𑀽 𑀯𑀺𑀘𑀭𑀦𑁆𑀢𑀺. 𑀲𑀘𑁂 𑀢𑁆𑀯𑀁 𑀓𑀲𑁆𑀲𑀘𑀺 𑀤𑀲𑁆𑀲𑀦𑀸𑀬 𑀉𑀧𑀲𑀗𑁆𑀓𑀫𑀺𑀢𑀼𑀓𑀸𑀫𑁄 𑀅𑀳𑁄𑀲𑀺, 𑀫𑀁 𑀧𑀼𑀘𑁆𑀙𑁂𑀬𑁆𑀬𑀸𑀲𑀺. 𑀅𑀳𑀁 𑀢𑁂 𑀬𑀼𑀢𑁆𑀢𑀝𑁆𑀞𑀸𑀦𑀁 𑀧𑁂𑀲𑁂𑀲𑁆𑀲𑀸𑀫𑀺, 𑀅𑀬𑀼𑀢𑁆𑀢𑀝𑁆𑀞𑀸𑀦𑀢𑁄 𑀦𑀺𑀯𑀸𑀭𑁂𑀲𑁆𑀲𑀸𑀫𑀻’’𑀢𑀺. 𑀲𑁄 𑀢𑀁 𑀓𑀣𑀁 𑀅𑀦𑀼𑀲𑁆𑀲𑀭𑀺𑀢𑁆𑀯𑀸 ‘‘𑀲𑀘𑁂 𑀫𑀁 𑀧𑁂𑀲𑁂𑀲𑁆𑀲𑀢𑀺, 𑀕𑀫𑀺𑀲𑁆𑀲𑀸𑀫𑀺. 𑀦𑁄 𑀘𑁂, 𑀦 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀬𑁂𑀦 𑀦𑀺𑀕𑀡𑁆𑀞𑁄 𑀦𑀸𑀝𑀧𑀼𑀢𑁆𑀢𑁄, 𑀢𑁂𑀦𑀼𑀧𑀲𑀗𑁆𑀓𑀫𑀺.
𑀅𑀣𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀦𑀺𑀕𑀡𑁆𑀞𑁄 𑀫𑀳𑀸𑀧𑀩𑁆𑀩𑀢𑁂𑀦 𑀯𑀺𑀬 𑀩𑀮𑀯𑀲𑁄𑀓𑁂𑀦 𑀑𑀢𑁆𑀣𑀝𑁄 ‘‘𑀬𑀢𑁆𑀣 𑀤𑀸𑀦𑀺𑀲𑁆𑀲𑀸𑀳𑀁 𑀕𑀫𑀦𑀁 𑀦 𑀇𑀘𑁆𑀙𑀸𑀫𑀺, 𑀢𑀢𑁆𑀣𑁂𑀯 𑀕𑀦𑁆𑀢𑀼𑀓𑀸𑀫𑁄 𑀚𑀸𑀢𑁄, 𑀳𑀢𑁄𑀳𑀫𑀲𑁆𑀫𑀻’’𑀢𑀺 𑀅𑀦𑀢𑁆𑀢𑀫𑀦𑁄 𑀳𑀼𑀢𑁆𑀯𑀸 ‘‘𑀧𑀝𑀺𑀩𑀸𑀳𑀦𑀼𑀧𑀸𑀬𑀫𑀲𑁆𑀲 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀓𑀺𑀁 𑀧𑀦 𑀢𑁆𑀯𑀦𑁆𑀢𑀺𑀆𑀤𑀺𑀫𑀸𑀳. 𑀏𑀯𑀁 𑀯𑀤𑀦𑁆𑀢𑁄 𑀯𑀺𑀘𑀭𑀦𑁆𑀢𑀁 𑀕𑁄𑀡𑀁 𑀤𑀡𑁆𑀟𑁂𑀦 𑀧𑀳𑀭𑀦𑁆𑀢𑁄 𑀯𑀺𑀬 𑀚𑀮𑀫𑀸𑀦𑀁 𑀧𑀤𑀻𑀧𑀁 𑀦𑀺𑀩𑁆𑀩𑀸𑀧𑁂𑀦𑁆𑀢𑁄 𑀯𑀺𑀬 𑀪𑀢𑁆𑀢𑀪𑀭𑀺𑀢𑀁 𑀧𑀢𑁆𑀢𑀁 𑀦𑀺𑀓𑁆𑀓𑀼𑀚𑁆𑀚𑀦𑁆𑀢𑁄 𑀯𑀺𑀬 𑀘 𑀲𑀻𑀳𑀲𑁆𑀲 𑀉𑀧𑁆𑀧𑀦𑁆𑀦𑀧𑀻𑀢𑀺𑀁 𑀯𑀺𑀦𑀸𑀲𑁂𑀲𑀺. 𑀕𑀫𑀺𑀬𑀸𑀪𑀺𑀲𑀗𑁆𑀔𑀸𑀭𑁄𑀢𑀺 𑀳𑀢𑁆𑀣𑀺𑀬𑀸𑀦𑀸𑀤𑀻𑀦𑀁 𑀬𑁄𑀚𑀸𑀧𑀦𑀕𑀦𑁆𑀥𑀫𑀸𑀮𑀸𑀤𑀺𑀕𑁆𑀕𑀳𑀡𑀯𑀲𑁂𑀦 𑀧𑀯𑀢𑁆𑀢𑁄 𑀧𑀬𑁄𑀕𑁄. 𑀲𑁄 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀻𑀢𑀺 𑀲𑁄 𑀯𑀽𑀧𑀲𑀦𑁆𑀢𑁄.
𑀤𑀼𑀢𑀺𑀬𑀫𑁆𑀧𑀺 𑀔𑁄𑀢𑀺 𑀤𑀼𑀢𑀺𑀬𑀯𑀸𑀭𑀫𑁆𑀧𑀺. 𑀇𑀫𑀲𑁆𑀫𑀺𑀜𑁆𑀘 𑀯𑀸𑀭𑁂 𑀩𑀼𑀤𑁆𑀥𑀲𑁆𑀲 𑀯𑀡𑁆𑀡𑀁 𑀪𑀸𑀲𑀦𑁆𑀢𑀸 𑀢𑀼𑀲𑀺𑀢𑀪𑀯𑀦𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀫𑀳𑀸𑀩𑁄𑀥𑀺𑀧𑀮𑁆𑀮𑀗𑁆𑀓𑀸 𑀤𑀲𑀩𑀮𑀲𑁆𑀲 𑀳𑁂𑀝𑁆𑀞𑀸 𑀧𑀸𑀤𑀢𑀮𑁂𑀳𑀺 𑀉𑀧𑀭𑀺 𑀓𑁂𑀲𑀕𑁆𑀕𑁂𑀳𑀺 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀤𑁆𑀯𑀢𑁆𑀢𑀺𑀁𑀲𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀅𑀲𑀻𑀢𑀺𑀅𑀦𑀼𑀩𑁆𑀬𑀜𑁆𑀚𑀦𑀩𑁆𑀬𑀸𑀫𑀧𑁆𑀧𑀪𑀸𑀦𑀁 𑀯𑀲𑁂𑀦 𑀲𑀭𑀻𑀭𑀯𑀡𑁆𑀡𑀁 𑀓𑀣𑀬𑀺𑀁𑀲𑀼. 𑀥𑀫𑁆𑀫𑀲𑁆𑀲 𑀯𑀡𑁆𑀡𑀁 𑀪𑀸𑀲𑀦𑁆𑀢𑀸 ‘‘𑀏𑀓𑀧𑀤𑁂𑀧𑀺 𑀏𑀓𑀩𑁆𑀬𑀜𑁆𑀚𑀦𑁂𑀧𑀺 𑀅𑀯𑀔𑀮𑀺𑀢𑀁 𑀦𑀸𑀫 𑀦𑀢𑁆𑀣𑀻’’𑀢𑀺 𑀲𑀼𑀓𑀣𑀺𑀢𑀯𑀲𑁂𑀦𑁂𑀯 𑀥𑀫𑁆𑀫𑀕𑀼𑀡𑀁 𑀓𑀣𑀬𑀺𑀁𑀲𑀼. 𑀲𑀗𑁆𑀖𑀲𑁆𑀲 𑀯𑀡𑁆𑀡𑀁 𑀪𑀸𑀲𑀦𑁆𑀢𑀸 ‘‘𑀏𑀯𑀭𑀽𑀧𑀁 𑀬𑀲𑀲𑀺𑀭𑀺𑀯𑀺𑀪𑀯𑀁 𑀧𑀳𑀸𑀬 𑀲𑀢𑁆𑀣𑀼 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑀸 𑀦 𑀓𑁄𑀲𑀚𑁆𑀚𑀧𑀓𑀢𑀺𑀓𑀸 𑀳𑁄𑀦𑁆𑀢𑀺, 𑀢𑁂𑀭𑀲𑀲𑀼 𑀧𑀦 𑀥𑀼𑀢𑀗𑁆𑀕𑀕𑀼𑀡𑁂𑀲𑀼 𑀧𑀭𑀺𑀧𑀽𑀭𑀓𑀸𑀭𑀺𑀦𑁄 𑀳𑀼𑀢𑁆𑀯𑀸 𑀲𑀢𑁆𑀢𑀲𑀼 𑀅𑀦𑀼𑀧𑀲𑁆𑀲𑀦𑀸𑀲𑀼 𑀓𑀫𑁆𑀫𑀁 𑀓𑀭𑁄𑀦𑁆𑀢𑀺, 𑀅𑀝𑁆𑀞𑀢𑀺𑀁𑀲𑀸𑀭𑀫𑁆𑀫𑀡𑀯𑀺𑀪𑀢𑁆𑀢𑀺𑀬𑁄 𑀯𑀴𑀜𑁆𑀚𑁂𑀦𑁆𑀢𑀻’’𑀢𑀺 𑀧𑀝𑀺𑀧𑀤𑀸𑀯𑀲𑁂𑀦 𑀲𑀗𑁆𑀖𑀕𑀼𑀡𑁂 𑀓𑀣𑀬𑀺𑀁𑀲𑀼.
𑀢𑀢𑀺𑀬𑀯𑀸𑀭𑁂 𑀧𑀦 𑀩𑀼𑀤𑁆𑀥𑀲𑁆𑀲 𑀯𑀡𑁆𑀡𑀁 𑀪𑀸𑀲𑀫𑀸𑀦𑀸 ‘‘𑀇𑀢𑀺𑀧𑀺 𑀲𑁄 𑀪𑀕𑀯𑀸’’𑀢𑀺 𑀲𑀼𑀢𑁆𑀢𑀦𑁆𑀢𑀧𑀭𑀺𑀬𑀸𑀬𑁂𑀦𑁂𑀯 𑀩𑀼𑀤𑁆𑀥𑀕𑀼𑀡𑁂 𑀓𑀣𑀬𑀺𑀁𑀲𑀼, ‘‘𑀲𑁆𑀯𑀸𑀓𑁆𑀔𑀸𑀢𑁄 𑀪𑀕𑀯𑀢𑀸 𑀥𑀫𑁆𑀫𑁄’’𑀢𑀺𑀆𑀤𑀺𑀦𑀸 𑀲𑀼𑀢𑁆𑀢𑀦𑁆𑀢𑀧𑀭𑀺𑀬𑀸𑀬𑁂𑀦𑁂𑀯 𑀥𑀫𑁆𑀫𑀕𑀼𑀡𑁂, ‘‘𑀲𑀼𑀧𑁆𑀧𑀝𑀺𑀧𑀦𑁆𑀦𑁄 𑀪𑀕𑀯𑀢𑁄 𑀲𑀸𑀯𑀓𑀲𑀗𑁆𑀖𑁄’’𑀢𑀺𑀆𑀤𑀺𑀦𑀸 𑀲𑀼𑀢𑁆𑀢𑀦𑁆𑀢𑀧𑀭𑀺𑀬𑀸𑀬𑁂𑀦𑁂𑀯 𑀲𑀗𑁆𑀖𑀕𑀼𑀡𑁂 𑀘 𑀓𑀣𑀬𑀺𑀁𑀲𑀼. 𑀢𑀢𑁄 𑀲𑀻𑀳𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀇𑀫𑁂𑀲𑀜𑁆𑀘 𑀮𑀺𑀘𑁆𑀙𑀯𑀺𑀭𑀸𑀚𑀓𑀼𑀫𑀸𑀭𑀸𑀦𑀁 𑀢𑀢𑀺𑀬𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀩𑀼𑀤𑁆𑀥𑀥𑀫𑁆𑀫𑀲𑀗𑁆𑀖𑀕𑀼𑀡𑁂 𑀓𑀣𑁂𑀦𑁆𑀢𑀸𑀦𑀁 𑀫𑀼𑀔𑀁 𑀦𑀧𑁆𑀧𑀳𑁄𑀢𑀺, 𑀅𑀤𑁆𑀥𑀸 𑀅𑀦𑁄𑀫𑀕𑀼𑀡𑁂𑀦 𑀲𑀫𑀦𑁆𑀦𑀸𑀕𑀢𑀸 𑀲𑁄 𑀪𑀕𑀯𑀸, 𑀇𑀫𑀁 𑀤𑀸𑀦𑀺 𑀉𑀧𑁆𑀧𑀦𑁆𑀦𑀁 𑀧𑀻𑀢𑀺𑀁 𑀅𑀯𑀺𑀚𑀳𑀺𑀢𑁆𑀯𑀸𑀯 𑀅𑀳𑀁 𑀅𑀚𑁆𑀚 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁 𑀧𑀲𑁆𑀲𑀺𑀲𑁆𑀲𑀸𑀫𑀻’’𑀢𑀺. 𑀅𑀣𑀲𑁆𑀲 ‘‘𑀓𑀺𑀁 𑀳𑀺 𑀫𑁂 𑀓𑀭𑀺𑀲𑁆𑀲𑀦𑁆𑀢𑀺 𑀦𑀺𑀕𑀡𑁆𑀞𑀸’’𑀢𑀺 𑀯𑀺𑀢𑀓𑁆𑀓𑁄 𑀉𑀤𑀧𑀸𑀤𑀺. 𑀢𑀢𑁆𑀣 𑀓𑀺𑀁 𑀳𑀺 𑀫𑁂 𑀓𑀭𑀺𑀲𑁆𑀲𑀦𑁆𑀢𑀻𑀢𑀺 𑀓𑀺𑀁 𑀦𑀸𑀫 𑀫𑀬𑁆𑀳𑀁 𑀦𑀺𑀕𑀡𑁆𑀞𑀸 𑀓𑀭𑀺𑀲𑁆𑀲𑀦𑁆𑀢𑀺. 𑀅𑀧𑀮𑁄𑀓𑀺𑀢𑀸 𑀯𑀸 𑀅𑀦𑀧𑀮𑁄𑀓𑀺𑀢𑀸 𑀯𑀸𑀢𑀺 𑀆𑀧𑀼𑀘𑁆𑀙𑀺𑀢𑀸 𑀯𑀸 𑀅𑀦𑀸𑀧𑀼𑀘𑁆𑀙𑀺𑀢𑀸 𑀯𑀸. 𑀦 𑀳𑀺 𑀫𑁂 𑀢𑁂 𑀆𑀧𑀼𑀘𑁆𑀙𑀺𑀢𑀸 𑀬𑀸𑀦𑀯𑀸𑀳𑀦𑀲𑀫𑁆𑀧𑀢𑁆𑀢𑀺𑀁, 𑀦 𑀘 𑀇𑀲𑁆𑀲𑀭𑀺𑀬𑀯𑀺𑀲𑁂𑀲𑀁 𑀤𑀲𑁆𑀲𑀦𑁆𑀢𑀺, 𑀦𑀸𑀧𑀺 𑀅𑀦𑀸𑀧𑀼𑀘𑁆𑀙𑀺𑀢𑀸 𑀳𑀭𑀺𑀲𑁆𑀲𑀦𑁆𑀢𑀺, 𑀅𑀨𑀮𑀁 𑀏𑀢𑁂𑀲𑀁 𑀆𑀧𑀼𑀘𑁆𑀙𑀦𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄.
𑀯𑁂𑀲𑀸𑀮𑀺𑀬𑀸 𑀦𑀺𑀬𑁆𑀬𑀸𑀲𑀻𑀢𑀺 𑀬𑀣𑀸 𑀳𑀺 𑀕𑀺𑀫𑁆𑀳𑀓𑀸𑀮𑁂 𑀤𑁂𑀯𑁂 𑀯𑀼𑀝𑁆𑀞𑁂 𑀉𑀤𑀓𑀁 𑀲𑀦𑁆𑀤𑀫𑀸𑀦𑀁 𑀦𑀤𑀺𑀁 𑀑𑀢𑀭𑀺𑀢𑁆𑀯𑀸 𑀣𑁄𑀓𑀫𑁂𑀯 𑀕𑀦𑁆𑀢𑁆𑀯𑀸 𑀢𑀺𑀝𑁆𑀞𑀢𑀺 𑀦𑀧𑁆𑀧𑀯𑀢𑁆𑀢𑀢𑀺, 𑀏𑀯𑀁 𑀲𑀻𑀳𑀲𑁆𑀲 𑀧𑀞𑀫𑀤𑀺𑀯𑀲𑁂 ‘‘𑀤𑀲𑀩𑀮𑀁 𑀧𑀲𑁆𑀲𑀺𑀲𑁆𑀲𑀸𑀫𑀻’’𑀢𑀺 𑀉𑀧𑁆𑀧𑀦𑁆𑀦𑀸𑀬 𑀧𑀻𑀢𑀺𑀬𑀸 𑀦𑀺𑀕𑀡𑁆𑀞𑁂𑀦 𑀧𑀝𑀺𑀩𑀸𑀳𑀺𑀢𑀓𑀸𑀮𑁄. 𑀬𑀣𑀸𑀧𑀺 𑀤𑀼𑀢𑀺𑀬𑀤𑀺𑀯𑀲𑁂 𑀤𑁂𑀯𑁂 𑀯𑀼𑀝𑁆𑀞𑁂 𑀉𑀤𑀓𑀁 𑀲𑀦𑁆𑀤𑀫𑀸𑀦𑀁 𑀦𑀤𑀺𑀁 𑀑𑀢𑀭𑀺𑀢𑁆𑀯𑀸 𑀣𑁄𑀓𑀁 𑀕𑀦𑁆𑀢𑁆𑀯𑀸 𑀯𑀸𑀮𑀺𑀓𑀸𑀧𑀼𑀜𑁆𑀚𑀁 𑀧𑀳𑀭𑀺𑀢𑁆𑀯𑀸 𑀅𑀧𑁆𑀧𑀯𑀢𑁆𑀢𑀁 𑀳𑁄𑀢𑀺, 𑀏𑀯𑀁 𑀲𑀻𑀳𑀲𑁆𑀲 𑀤𑀼𑀢𑀺𑀬𑀤𑀺𑀯𑀲𑁂 ‘‘𑀤𑀲𑀩𑀮𑀁 𑀧𑀲𑁆𑀲𑀺𑀲𑁆𑀲𑀸𑀫𑀻’’𑀢𑀺 𑀉𑀧𑁆𑀧𑀦𑁆𑀦𑀸𑀬 𑀧𑀻𑀢𑀺𑀬𑀸 𑀦𑀺𑀕𑀡𑁆𑀞𑁂𑀦 𑀧𑀝𑀺𑀩𑀸𑀳𑀺𑀢𑀓𑀸𑀮𑁄. 𑀬𑀣𑀸 𑀢𑀢𑀺𑀬𑀤𑀺𑀯𑀲𑁂 𑀤𑁂𑀯𑁂 𑀯𑀼𑀝𑁆𑀞𑁂 𑀉𑀤𑀓𑀁 𑀲𑀦𑁆𑀤𑀫𑀸𑀦𑀁 𑀦𑀤𑀺𑀁 𑀑𑀢𑀭𑀺𑀢𑁆𑀯𑀸 𑀧𑀼𑀭𑀸𑀡𑀧𑀡𑁆𑀡𑀲𑀼𑀓𑁆𑀔𑀤𑀡𑁆𑀟𑀓𑀝𑁆𑀞𑀓𑀘𑀯𑀭𑀸𑀤𑀻𑀦𑀺 𑀧𑀭𑀺𑀓𑀟𑁆𑀠𑀦𑁆𑀢𑀁 𑀯𑀸𑀮𑀺𑀓𑀸𑀧𑀼𑀜𑁆𑀚𑀁 𑀪𑀺𑀦𑁆𑀤𑀺𑀢𑁆𑀯𑀸 𑀲𑀫𑀼𑀤𑁆𑀤𑀦𑀺𑀦𑁆𑀦𑀫𑁂𑀯 𑀳𑁄𑀢𑀺, 𑀏𑀯𑀁 𑀲𑀻𑀳𑁄 𑀢𑀢𑀺𑀬𑀤𑀺𑀯𑀲𑁂 𑀢𑀺𑀡𑁆𑀡𑀁 𑀯𑀢𑁆𑀣𑀽𑀦𑀁 𑀕𑀼𑀡𑀓𑀣𑀁 𑀲𑀼𑀢𑁆𑀯𑀸 𑀉𑀧𑁆𑀧𑀦𑁆𑀦𑁂 𑀧𑀻𑀢𑀺𑀧𑀸𑀫𑁄𑀚𑁆𑀚𑁂 ‘‘𑀅𑀨𑀮𑀸 𑀦𑀺𑀕𑀡𑁆𑀞𑀸 𑀦𑀺𑀧𑁆𑀨𑀮𑀸 𑀦𑀺𑀕𑀡𑁆𑀞𑀸, 𑀓𑀺𑀁 𑀫𑁂 𑀇𑀫𑁂 𑀓𑀭𑀺𑀲𑁆𑀲𑀦𑁆𑀢𑀺, 𑀕𑀫𑀺𑀲𑁆𑀲𑀸𑀫𑀳𑀁 𑀲𑀢𑁆𑀣𑀼𑀲𑀦𑁆𑀢𑀺𑀓’’𑀦𑁆𑀢𑀺 𑀫𑀦𑀁 𑀅𑀪𑀺𑀦𑀻𑀳𑀭𑀺𑀢𑁆𑀯𑀸 𑀯𑁂𑀲𑀸𑀮𑀺𑀬𑀸 𑀦𑀺𑀬𑁆𑀬𑀸𑀲𑀺. 𑀦𑀺𑀬𑁆𑀬𑀦𑁆𑀢𑁄 𑀘 ‘‘𑀘𑀺𑀭𑀲𑁆𑀲𑀸𑀳𑀁 𑀤𑀲𑀩𑀮𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑀼𑀓𑀸𑀫𑁄 𑀚𑀸𑀢𑁄, 𑀦 𑀔𑁄 𑀧𑀦 𑀫𑁂 𑀬𑀼𑀢𑁆𑀢𑀁 𑀅𑀜𑁆𑀜𑀸𑀢𑀓𑀯𑁂𑀲𑁂𑀦 𑀕𑀦𑁆𑀢𑀼’’𑀦𑁆𑀢𑀺 ‘‘𑀬𑁂𑀓𑁂𑀘𑀺 𑀤𑀲𑀩𑀮𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑀼𑀓𑀸𑀫𑀸, 𑀲𑀩𑁆𑀩𑁂 𑀦𑀺𑀓𑁆𑀔𑀫𑀦𑁆𑀢𑀽’’𑀢𑀺 𑀖𑁄𑀲𑀦𑀁 𑀓𑀸𑀭𑁂𑀢𑁆𑀯𑀸 𑀧𑀜𑁆𑀘𑀭𑀣𑀲𑀢𑀸𑀦𑀺 𑀬𑁄𑀚𑀸𑀧𑁂𑀢𑁆𑀯𑀸 𑀉𑀢𑁆𑀢𑀫𑀭𑀣𑁂 𑀞𑀺𑀢𑁄 𑀢𑁂𑀳𑀺 𑀘𑁂𑀯 𑀧𑀜𑁆𑀘𑀳𑀺 𑀭𑀣𑀲𑀢𑁂𑀳𑀺 𑀫𑀳𑀢𑀺𑀬𑀸 𑀘 𑀧𑀭𑀺𑀲𑀸𑀬 𑀧𑀭𑀺𑀯𑀼𑀢𑁄 𑀕𑀦𑁆𑀥𑀧𑀼𑀧𑁆𑀨𑀘𑀼𑀡𑁆𑀡𑀯𑀸𑀲𑀸𑀤𑀻𑀦𑀺 𑀕𑀸𑀳𑀸𑀧𑁂𑀢𑁆𑀯𑀸 𑀦𑀺𑀬𑁆𑀬𑀸𑀲𑀺. 𑀤𑀺𑀯𑀸 𑀤𑀺𑀯𑀲𑁆𑀲𑀸𑀢𑀺 𑀤𑀺𑀯𑀲𑀲𑁆𑀲 𑀘 𑀤𑀺𑀯𑀸, 𑀫𑀚𑁆𑀛𑀦𑁆𑀳𑀺𑀓𑁂 𑀅𑀢𑀺𑀓𑁆𑀓𑀦𑁆𑀢𑀫𑀢𑁆𑀢𑁂.
𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀻𑀢𑀺 𑀆𑀭𑀸𑀫𑀁 𑀧𑀯𑀺𑀲𑀦𑁆𑀢𑁄 𑀤𑀽𑀭𑀢𑁄𑀯 𑀅𑀲𑀻𑀢𑀺-𑀅𑀦𑀼𑀩𑁆𑀬𑀜𑁆𑀚𑀦-𑀩𑁆𑀬𑀸𑀫𑀧𑁆𑀧𑀪𑀸-𑀤𑁆𑀯𑀢𑁆𑀢𑀺𑀁𑀲-𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀸𑀦𑀺 𑀙𑀩𑁆𑀩𑀡𑁆𑀡𑀖𑀦𑀩𑀼𑀤𑁆𑀥𑀭𑀲𑁆𑀫𑀺𑀬𑁄 𑀘 𑀤𑀺𑀲𑁆𑀯𑀸 ‘‘𑀏𑀯𑀭𑀽𑀧𑀁 𑀦𑀸𑀫 𑀧𑀼𑀭𑀺𑀲𑀁 𑀏𑀯𑀁 𑀆𑀲𑀦𑁆𑀦𑁂 𑀯𑀲𑀦𑁆𑀢𑀁 𑀏𑀢𑁆𑀢𑀓𑀁 𑀓𑀸𑀮𑀁 𑀦𑀸𑀤𑁆𑀤𑀲𑀁, 𑀯𑀜𑁆𑀘𑀺𑀢𑁄 𑀯𑀢𑀫𑁆𑀳𑀺, 𑀅𑀮𑀸𑀪𑀸 𑀯𑀢 𑀫𑁂’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀫𑀳𑀸𑀦𑀺𑀥𑀺𑀁 𑀤𑀺𑀲𑁆𑀯𑀸 𑀤𑀮𑀺𑀤𑁆𑀤𑀧𑀼𑀭𑀺𑀲𑁄 𑀯𑀺𑀬 𑀲𑀜𑁆𑀚𑀸𑀢𑀧𑀻𑀢𑀺𑀧𑀸𑀫𑁄𑀚𑁆𑀚𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺. 𑀥𑀫𑁆𑀫𑀲𑁆𑀲 𑀘𑀸𑀦𑀼𑀥𑀫𑁆𑀫𑀁 𑀩𑁆𑀬𑀸𑀓𑀭𑁄𑀦𑁆𑀢𑀻𑀢𑀺 𑀪𑁄𑀢𑀸 𑀕𑁄𑀢𑀫𑁂𑀦 𑀯𑀼𑀢𑁆𑀢𑀓𑀸𑀭𑀡𑀲𑁆𑀲 𑀅𑀦𑀼𑀓𑀸𑀭𑀡𑀁 𑀓𑀣𑁂𑀦𑁆𑀢𑀺. 𑀓𑀸𑀭𑀡𑀯𑀘𑀦𑁄 𑀳𑁂𑀢𑁆𑀣 𑀥𑀫𑁆𑀫𑀲𑀤𑁆𑀤𑁄 ‘‘𑀳𑁂𑀢𑀼𑀫𑁆𑀳𑀺 𑀜𑀸𑀡𑀁 𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑀸’’𑀢𑀺𑀆𑀤𑀻𑀲𑀼 (𑀯𑀺𑀪. 𑁭𑁨𑁦) 𑀯𑀺𑀬. 𑀓𑀸𑀭𑀡𑀦𑁆𑀢𑀺 𑀘𑁂𑀢𑁆𑀣 𑀢𑀣𑀸𑀧𑀯𑀢𑁆𑀢𑀲𑁆𑀲 𑀲𑀤𑁆𑀤𑀲𑁆𑀲 𑀅𑀢𑁆𑀣𑁄 𑀅𑀥𑀺𑀧𑁆𑀧𑁂𑀢𑁄 𑀢𑀲𑁆𑀲 𑀧𑀯𑀢𑁆𑀢𑀺𑀳𑁂𑀢𑀼𑀪𑀸𑀯𑀢𑁄. 𑀅𑀢𑁆𑀣𑀧𑁆𑀧𑀬𑀼𑀢𑁆𑀢𑁄 𑀳𑀺 𑀲𑀤𑁆𑀤𑀧𑁆𑀧𑀬𑁄𑀕𑁄. 𑀅𑀦𑀼𑀓𑀸𑀭𑀡𑀦𑁆𑀢𑀺 𑀏𑀲𑁄 𑀏𑀯 𑀧𑀭𑁂𑀳𑀺 𑀢𑀣𑀸 𑀯𑀼𑀘𑁆𑀘𑀫𑀸𑀦𑁄. 𑀲𑀳𑀥𑀫𑁆𑀫𑀺𑀓𑁄 𑀯𑀸𑀤𑀸𑀦𑀼𑀯𑀸𑀤𑁄𑀢𑀺. 𑀧𑀭𑁂𑀳𑀺 𑀯𑀼𑀢𑁆𑀢𑀓𑀸𑀭𑀡𑁂𑀳𑀺 𑀲𑀓𑀸𑀭𑀡𑁄 𑀳𑀼𑀢𑁆𑀯𑀸 𑀢𑀼𑀫𑁆𑀳𑀸𑀓𑀁 𑀯𑀸𑀤𑁄 𑀯𑀸 𑀢𑀢𑁄 𑀧𑀭𑀁 𑀢𑀲𑁆𑀲 𑀅𑀦𑀼𑀯𑀸𑀤𑁄 𑀯𑀸 𑀓𑁄𑀘𑀺 𑀅𑀧𑁆𑀧𑀫𑀢𑁆𑀢𑀓𑁄𑀧𑀺 𑀯𑀺𑀜𑁆𑀜𑀽𑀳𑀺 𑀕𑀭𑀳𑀺𑀢𑀩𑁆𑀩𑀁 𑀞𑀸𑀦𑀁 𑀓𑀸𑀭𑀡𑀁 𑀦 𑀆𑀕𑀘𑁆𑀙𑀢𑀺. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀓𑀺𑀁 𑀲𑀩𑁆𑀩𑀸𑀓𑀸𑀭𑁂𑀦𑀧𑀺 𑀢𑀯 𑀯𑀸𑀤𑁂 𑀕𑀸𑀭𑀬𑁆𑀳𑀁 𑀓𑀸𑀭𑀡𑀁 𑀦𑀢𑁆𑀣𑀻𑀢𑀺. 𑀅𑀦𑀩𑁆𑀪𑀓𑁆𑀔𑀸𑀢𑀼𑀓𑀸𑀫𑀸𑀢𑀺 𑀦 𑀅𑀪𑀽𑀢𑁂𑀦 𑀯𑀢𑁆𑀢𑀼𑀓𑀸𑀫𑀸. 𑀅𑀢𑁆𑀣𑀺 𑀲𑀻𑀳𑀧𑀭𑀺𑀬𑀸𑀬𑁄𑀢𑀺𑀆𑀤𑀻𑀦𑀁 𑀅𑀢𑁆𑀣𑁄 𑀯𑁂𑀭𑀜𑁆𑀚𑀓𑀡𑁆𑀟𑁂 𑀆𑀕𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀧𑀭𑀫𑁂𑀦 𑀅𑀲𑁆𑀲𑀸𑀲𑁂𑀦𑀸𑀢𑀺 𑀘𑀢𑀼𑀫𑀕𑁆𑀕𑀘𑀢𑀼𑀨𑀮𑀲𑀗𑁆𑀔𑀸𑀢𑁂𑀦 𑀉𑀢𑁆𑀢𑀫𑁂𑀦. 𑀅𑀲𑁆𑀲𑀸𑀲𑀸𑀬 𑀥𑀫𑁆𑀫𑀁 𑀤𑁂𑀲𑁂𑀫𑀻𑀢𑀺 𑀅𑀲𑁆𑀲𑀸𑀲𑀦𑀢𑁆𑀣𑀸𑀬 𑀲𑀦𑁆𑀣𑀫𑁆𑀪𑀦𑀢𑁆𑀣𑀸𑀬 𑀥𑀫𑁆𑀫𑀁 𑀤𑁂𑀲𑁂𑀫𑀺. 𑀇𑀢𑀺 𑀪𑀕𑀯𑀸 𑀅𑀝𑁆𑀞𑀳𑀗𑁆𑀕𑁂𑀳𑀺 𑀲𑀻𑀳𑀲𑁆𑀲 𑀲𑁂𑀦𑀸𑀧𑀢𑀺𑀲𑁆𑀲 𑀥𑀫𑁆𑀫𑀁 𑀤𑁂𑀲𑁂𑀲𑀺.
𑀅𑀦𑀼𑀯𑀺𑀘𑁆𑀘𑀓𑀸𑀭𑀦𑁆𑀢𑀺 𑀅𑀦𑀼𑀯𑀺𑀤𑀺𑀢𑁆𑀯𑀸 𑀘𑀺𑀦𑁆𑀢𑁂𑀢𑁆𑀯𑀸 𑀢𑀼𑀮𑀬𑀺𑀢𑁆𑀯𑀸 𑀓𑀢𑁆𑀢𑀩𑁆𑀩𑀁 𑀓𑀭𑁄𑀳𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀸𑀥𑀼 𑀳𑁄𑀢𑀻𑀢𑀺 𑀲𑀼𑀦𑁆𑀤𑀭𑁄 𑀳𑁄𑀢𑀺. 𑀢𑀼𑀫𑁆𑀳𑀸𑀤𑀺𑀲𑀲𑁆𑀫𑀺𑀜𑁆𑀳𑀺 𑀫𑀁 𑀤𑀺𑀲𑁆𑀯𑀸 𑀫𑀁 𑀲𑀭𑀡𑀁 𑀕𑀘𑁆𑀙𑀦𑁆𑀢𑁂 𑀦𑀺𑀕𑀡𑁆𑀞𑀁 𑀤𑀺𑀲𑁆𑀯𑀸 𑀦𑀺𑀕𑀡𑁆𑀞𑀁 𑀲𑀭𑀡𑀁 𑀕𑀘𑁆𑀙𑀦𑁆𑀢𑁂 ‘‘𑀓𑀺𑀁 𑀅𑀬𑀁 𑀲𑀻𑀳𑁄 𑀤𑀺𑀝𑁆𑀞𑀤𑀺𑀝𑁆𑀞𑀫𑁂𑀯 𑀲𑀭𑀡𑀁 𑀕𑀘𑁆𑀙𑀢𑀻’’𑀢𑀺 𑀕𑀭𑀳𑀸 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀫𑀸 𑀅𑀦𑀼𑀯𑀺𑀘𑁆𑀘𑀓𑀸𑀭𑁄 𑀢𑀼𑀫𑁆𑀳𑀸𑀤𑀺𑀲𑀸𑀦𑀁 𑀲𑀸𑀥𑀽𑀢𑀺 𑀤𑀲𑁆𑀲𑁂𑀢𑀺. 𑀧𑀝𑀸𑀓𑀁 𑀧𑀭𑀺𑀳𑀭𑁂𑀬𑁆𑀬𑀼𑀦𑁆𑀢𑀺 𑀢𑁂 𑀓𑀺𑀭 𑀏𑀯𑀭𑀽𑀧𑀁 𑀲𑀸𑀯𑀓𑀁 𑀮𑀪𑀺𑀢𑁆𑀯𑀸 ‘‘𑀅𑀲𑀼𑀓𑁄 𑀦𑀸𑀫 𑀭𑀸𑀚𑀸 𑀯𑀸 𑀭𑀸𑀚𑀫𑀳𑀸𑀫𑀢𑁆𑀢𑁄 𑀯𑀸 𑀲𑁂𑀝𑁆𑀞𑀺 𑀯𑀸 𑀅𑀫𑁆𑀳𑀸𑀓𑀁 𑀲𑀭𑀡𑀁 𑀕𑀢𑁄 𑀲𑀸𑀯𑀓𑁄 𑀚𑀸𑀢𑁄’’𑀢𑀺 𑀧𑀝𑀸𑀓𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀦𑀕𑀭𑁂 𑀖𑁄𑀲𑁂𑀦𑁆𑀢𑀸 𑀆𑀳𑀺𑀡𑁆𑀟𑀦𑁆𑀢𑀺. 𑀓𑀲𑁆𑀫𑀸? 𑀏𑀯𑀁 𑀦𑁄 𑀫𑀳𑀦𑁆𑀢𑀪𑀸𑀯𑁄 𑀆𑀯𑀺𑀪𑀯𑀺𑀲𑁆𑀲𑀢𑀻𑀢𑀺 𑀘. 𑀲𑀘𑁂 𑀧𑀦𑀲𑁆𑀲 ‘‘𑀓𑀺𑀫𑀳𑀁 𑀏𑀢𑁂𑀲𑀁 𑀲𑀭𑀡𑀁 𑀕𑀢𑁄’’𑀢𑀺 𑀯𑀺𑀧𑁆𑀧𑀝𑀺𑀲𑀸𑀭𑁄 𑀉𑀧𑁆𑀧𑀚𑁆𑀚𑁂𑀬𑁆𑀬, 𑀢𑀫𑁆𑀧𑀺 𑀲𑁄 ‘‘𑀏𑀢𑁂𑀲𑀁 𑀫𑁂 𑀲𑀭𑀡𑀕𑀢𑀪𑀸𑀯𑀁 𑀩𑀳𑀽 𑀚𑀸𑀦𑀦𑁆𑀢𑀺, 𑀤𑀼𑀓𑁆𑀔𑀁 𑀇𑀤𑀸𑀦𑀺 𑀧𑀝𑀺𑀦𑀺𑀯𑀢𑁆𑀢𑀺𑀢𑀼’’𑀦𑁆𑀢𑀺 𑀯𑀺𑀦𑁄𑀤𑁂𑀢𑁆𑀯𑀸 𑀦 𑀧𑀝𑀺𑀓𑁆𑀓𑀫𑀺𑀲𑁆𑀲𑀢𑀻𑀢𑀺 𑀘. 𑀢𑁂𑀦𑀸𑀳 𑁋 ‘‘𑀧𑀝𑀸𑀓𑀁 𑀧𑀭𑀺𑀳𑀭𑁂𑀬𑁆𑀬𑀼’’𑀦𑁆𑀢𑀺. 𑀑𑀧𑀸𑀦𑀪𑀽𑀢𑀦𑁆𑀢𑀺 𑀧𑀝𑀺𑀬𑀢𑁆𑀢𑀉𑀤𑀧𑀸𑀦𑁄 𑀯𑀺𑀬 𑀞𑀺𑀢𑀁. 𑀓𑀼𑀮𑀦𑁆𑀢𑀺 𑀢𑀯 𑀦𑀺𑀯𑁂𑀲𑀦𑀁. 𑀤𑀸𑀢𑀩𑁆𑀩𑀁 𑀫𑀜𑁆𑀜𑁂𑀬𑁆𑀬𑀸𑀲𑀻𑀢𑀺 𑀧𑀼𑀩𑁆𑀩𑁂 𑀤𑀲𑀧𑀺 𑀯𑀻𑀲𑀢𑀺𑀧𑀺 𑀲𑀝𑁆𑀞𑀺𑀧𑀺 𑀚𑀦𑁂 𑀆𑀕𑀢𑁂 𑀤𑀺𑀲𑁆𑀯𑀸 𑀦𑀢𑁆𑀣𑀻𑀢𑀺 𑀅𑀯𑀢𑁆𑀯𑀸 𑀤𑁂𑀲𑀺, 𑀇𑀤𑀸𑀦𑀺 𑀫𑀁 𑀲𑀭𑀡𑀁 𑀕𑀢𑀓𑀸𑀭𑀡𑀫𑀢𑁆𑀢𑁂𑀦𑁂𑀯 𑀫𑀸 𑀇𑀫𑁂𑀲𑀁 𑀤𑁂𑀬𑁆𑀬𑀥𑀫𑁆𑀫𑀁 𑀉𑀧𑀘𑁆𑀙𑀺𑀦𑁆𑀤𑀺. 𑀲𑀫𑁆𑀧𑀢𑁆𑀢𑀸𑀦𑀜𑁆𑀳𑀺 𑀤𑀸𑀢𑀩𑁆𑀩𑀫𑁂𑀯𑀸𑀢𑀺 𑀑𑀯𑀤𑀺. 𑀲𑀼𑀢𑀁 𑀫𑁂𑀢𑀁, 𑀪𑀦𑁆𑀢𑁂𑀢𑀺 𑀓𑀼𑀢𑁄 𑀲𑀼𑀢𑀦𑁆𑀢𑀺? 𑀦𑀺𑀕𑀡𑁆𑀞𑀸𑀦𑀁 𑀲𑀦𑁆𑀢𑀺𑀓𑀸. 𑀢𑁂 𑀓𑀺𑀭 𑀓𑀼𑀮𑀖𑀭𑁂𑀲𑀼 𑀏𑀯𑀁 𑀧𑀓𑀸𑀲𑁂𑀦𑁆𑀢𑀺 ‘‘𑀫𑀬𑀁 𑀬𑀲𑁆𑀲 𑀓𑀲𑁆𑀲𑀘𑀺 𑀲𑀫𑁆𑀧𑀢𑁆𑀢𑀲𑁆𑀲 𑀤𑀸𑀢𑀩𑁆𑀩𑀦𑁆𑀢𑀺 𑀯𑀤𑀸𑀫, 𑀲𑀫𑀡𑁄 𑀧𑀦 𑀕𑁄𑀢𑀫𑁄 ‘𑀫𑀬𑁆𑀳𑀫𑁂𑀯 𑀤𑀸𑀦𑀁 𑀤𑀸𑀢𑀩𑁆𑀩𑀁 𑀦𑀸𑀜𑁆𑀜𑁂𑀲𑀁, 𑀫𑀬𑁆𑀳𑀫𑁂𑀯 𑀲𑀸𑀯𑀓𑀸𑀦𑀁 𑀤𑀸𑀦𑀁 𑀤𑀸𑀢𑀩𑁆𑀩𑀁, 𑀦𑀸𑀜𑁆𑀜𑁂𑀲𑀁 𑀲𑀸𑀯𑀓𑀸𑀦𑀁, 𑀫𑀬𑁆𑀳𑀫𑁂𑀯 𑀤𑀺𑀦𑁆𑀦𑀁 𑀤𑀸𑀦𑀁 𑀫𑀳𑀧𑁆𑀨𑀮𑀁, 𑀦𑀸𑀜𑁆𑀜𑁂𑀲𑀁, 𑀫𑀬𑁆𑀳𑀫𑁂𑀯 𑀲𑀸𑀯𑀓𑀸𑀦𑀁 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮𑀁, 𑀦𑀸𑀜𑁆𑀜𑁂𑀲’𑀦𑁆𑀢𑀺 𑀏𑀯𑀁 𑀯𑀤𑀢𑀻’’𑀢𑀺. 𑀢𑀁 𑀲𑀦𑁆𑀥𑀸𑀬 𑀅𑀬𑀁 ‘‘𑀲𑀼𑀢𑀁 𑀫𑁂𑀢’’𑀦𑁆𑀢𑀺 𑀆𑀳.
𑀅𑀦𑀼𑀧𑀼𑀩𑁆𑀩𑀺𑀁 𑀓𑀣𑀦𑁆𑀢𑀺 𑀤𑀸𑀦𑀸𑀦𑀦𑁆𑀢𑀭𑀁 𑀲𑀻𑀮𑀁, 𑀲𑀻𑀮𑀸𑀦𑀦𑁆𑀢𑀭𑀁 𑀲𑀕𑁆𑀕𑀁, 𑀲𑀕𑁆𑀕𑀸𑀦𑀦𑁆𑀢𑀭𑀁 𑀫𑀕𑁆𑀕𑀦𑁆𑀢𑀺 𑀏𑀯𑀁 𑀅𑀦𑀼𑀧𑀝𑀺𑀧𑀸𑀝𑀺𑀓𑀣𑀁. 𑀢𑀢𑁆𑀣 𑀤𑀸𑀦𑀓𑀣𑀦𑁆𑀢𑀺 𑀇𑀤𑀁 𑀤𑀸𑀦𑀁 𑀦𑀸𑀫 𑀲𑀼𑀔𑀸𑀦𑀁 𑀦𑀺𑀤𑀸𑀦𑀁, 𑀲𑀫𑁆𑀧𑀢𑁆𑀢𑀻𑀦𑀁 𑀫𑀽𑀮𑀁, 𑀪𑁄𑀕𑀸𑀦𑀁 𑀧𑀢𑀺𑀝𑁆𑀞𑀸, 𑀯𑀺𑀲𑀫𑀕𑀢𑀲𑁆𑀲 𑀢𑀸𑀡𑀁 𑀮𑁂𑀡𑀁 𑀕𑀢𑀺 𑀧𑀭𑀸𑀬𑀡𑀁, 𑀇𑀥𑀮𑁄𑀓𑀧𑀭𑀮𑁄𑀓𑁂𑀲𑀼 𑀤𑀸𑀦𑀲𑀤𑀺𑀲𑁄 𑀅𑀯𑀲𑁆𑀲𑀬𑁄 𑀧𑀢𑀺𑀝𑁆𑀞𑀸 𑀆𑀭𑀫𑁆𑀫𑀡𑀁 𑀢𑀸𑀡𑀁 𑀮𑁂𑀡𑀁 𑀕𑀢𑀺 𑀧𑀭𑀸𑀬𑀡𑀁 𑀦𑀢𑁆𑀣𑀺. 𑀇𑀤𑀜𑁆𑀳𑀺 𑀅𑀯𑀲𑁆𑀲𑀬𑀝𑁆𑀞𑁂𑀦 𑀭𑀢𑀦𑀫𑀬𑀲𑀻𑀳𑀸𑀲𑀦𑀲𑀤𑀺𑀲𑀁, 𑀧𑀢𑀺𑀝𑁆𑀞𑀸𑀦𑀝𑁆𑀞𑁂𑀦 𑀫𑀳𑀸𑀧𑀣𑀯𑀻𑀲𑀤𑀺𑀲𑀁, 𑀆𑀭𑀫𑁆𑀫𑀡𑀝𑁆𑀞𑁂𑀦 𑀆𑀮𑀫𑁆𑀩𑀦𑀭𑀚𑁆𑀚𑀼𑀲𑀤𑀺𑀲𑀁. 𑀇𑀤𑀜𑁆𑀳𑀺 𑀤𑀼𑀓𑁆𑀔𑀦𑀺𑀢𑁆𑀣𑀭𑀡𑀝𑁆𑀞𑁂𑀦 𑀦𑀸𑀯𑀸, 𑀲𑀫𑀲𑁆𑀲𑀸𑀲𑀦𑀝𑁆𑀞𑁂𑀦 𑀲𑀗𑁆𑀕𑀸𑀫𑀲𑀽𑀭𑁄, 𑀪𑀬𑀧𑀭𑀺𑀢𑁆𑀢𑀸𑀡𑀝𑁆𑀞𑁂𑀦 𑀲𑀼𑀲𑀗𑁆𑀔𑀢𑀦𑀕𑀭𑀁, 𑀫𑀘𑁆𑀙𑁂𑀭𑀫𑀮𑀸𑀤𑀻𑀳𑀺 𑀅𑀦𑀼𑀧𑀮𑀺𑀢𑁆𑀢𑀝𑁆𑀞𑁂𑀦 𑀧𑀤𑀼𑀫𑀁, 𑀢𑁂𑀲𑀁 𑀦𑀺𑀤𑀳𑀦𑀝𑁆𑀞𑁂𑀦 𑀅𑀕𑁆𑀕𑀺, 𑀤𑀼𑀭𑀸𑀲𑀤𑀝𑁆𑀞𑁂𑀦 𑀆𑀲𑀺𑀯𑀺𑀲𑁄, 𑀅𑀲𑀦𑁆𑀢𑀸𑀲𑀦𑀝𑁆𑀞𑁂𑀦 𑀲𑀻𑀳𑁄, 𑀩𑀮𑀯𑀦𑁆𑀢𑀝𑁆𑀞𑁂𑀦 𑀳𑀢𑁆𑀣𑀻, 𑀅𑀪𑀺𑀫𑀗𑁆𑀕𑀮𑀲𑀫𑁆𑀫𑀢𑀝𑁆𑀞𑁂𑀦 𑀲𑁂𑀢𑀯𑀲𑀪𑁄, 𑀔𑁂𑀫𑀦𑁆𑀢𑀪𑀽𑀫𑀺𑀲𑀫𑁆𑀧𑀸𑀧𑀦𑀝𑁆𑀞𑁂𑀦 𑀯𑀮𑀸𑀳𑀓𑁄 𑀅𑀲𑁆𑀲𑀭𑀸𑀚𑀸. 𑀤𑀸𑀦𑀁 𑀦𑀸𑀫𑁂𑀢𑀁 𑀫𑀬𑀸 𑀕𑀢𑀫𑀕𑁆𑀕𑁄, 𑀫𑀬𑁆𑀳𑁂𑀲𑁄 𑀯𑀁𑀲𑁄, 𑀫𑀬𑀸 𑀤𑀲 𑀧𑀸𑀭𑀫𑀺𑀬𑁄 𑀧𑀽𑀭𑁂𑀦𑁆𑀢𑁂𑀦 𑀯𑁂𑀮𑀸𑀫𑀫𑀳𑀸𑀬𑀜𑁆𑀜𑁄, 𑀫𑀳𑀸𑀕𑁄𑀯𑀺𑀦𑁆𑀤𑀫𑀳𑀸𑀬𑀜𑁆𑀜𑁄, 𑀫𑀳𑀸𑀲𑀼𑀤𑀲𑁆𑀲𑀦𑀫𑀳𑀸𑀬𑀜𑁆𑀜𑁄, 𑀯𑁂𑀲𑁆𑀲𑀦𑁆𑀢𑀭𑀫𑀳𑀸𑀬𑀜𑁆𑀜𑁄𑀢𑀺, 𑀅𑀦𑁂𑀓𑀫𑀳𑀸𑀬𑀜𑁆𑀜𑀸 𑀧𑀯𑀢𑁆𑀢𑀺𑀢𑀸, 𑀲𑀲𑀪𑀽𑀢𑁂𑀦 𑀚𑀮𑀺𑀢𑀅𑀕𑁆𑀕𑀺𑀓𑁆𑀔𑀦𑁆𑀥𑁂 𑀅𑀢𑁆𑀢𑀸𑀦𑀁 𑀦𑀺𑀬𑁆𑀬𑀸𑀤𑁂𑀦𑁆𑀢𑁂𑀦 𑀲𑀫𑁆𑀧𑀢𑁆𑀢𑀬𑀸𑀘𑀓𑀸𑀦𑀁 𑀘𑀺𑀢𑁆𑀢𑀁 𑀕𑀳𑀺𑀢𑀁. 𑀤𑀸𑀦𑀜𑁆𑀳𑀺 𑀮𑁄𑀓𑁂 𑀲𑀓𑁆𑀓𑀲𑀫𑁆𑀧𑀢𑁆𑀢𑀺𑀁 𑀤𑁂𑀢𑀺 𑀫𑀸𑀭𑀲𑀫𑁆𑀧𑀢𑁆𑀢𑀺𑀁 𑀩𑁆𑀭𑀳𑁆𑀫𑀲𑀫𑁆𑀧𑀢𑁆𑀢𑀺𑀁, 𑀘𑀓𑁆𑀓𑀯𑀢𑁆𑀢𑀺𑀲𑀫𑁆𑀧𑀢𑁆𑀢𑀺𑀁, 𑀲𑀸𑀯𑀓𑀧𑀸𑀭𑀫𑀻𑀜𑀸𑀡𑀁, 𑀧𑀘𑁆𑀘𑁂𑀓𑀩𑁄𑀥𑀺𑀜𑀸𑀡𑀁, 𑀅𑀪𑀺𑀲𑀫𑁆𑀩𑁄𑀥𑀺𑀜𑀸𑀡𑀁 𑀤𑁂𑀢𑀻𑀢𑀺 𑀏𑀯𑀫𑀸𑀤𑀺𑀤𑀸𑀦𑀕𑀼𑀡𑀧𑁆𑀧𑀝𑀺𑀲𑀁𑀬𑀼𑀢𑁆𑀢𑀁 𑀓𑀣𑀁.
𑀬𑀲𑁆𑀫𑀸 𑀧𑀦 𑀤𑀸𑀦𑀁 𑀤𑁂𑀦𑁆𑀢𑁄 𑀲𑀻𑀮𑀁 𑀲𑀫𑀸𑀤𑀸𑀢𑀼𑀁 𑀲𑀓𑁆𑀓𑁄𑀢𑀺, 𑀢𑀲𑁆𑀫𑀸 𑀢𑀤𑀦𑀦𑁆𑀢𑀭𑀁 𑀲𑀻𑀮𑀓𑀣𑀁 𑀓𑀣𑁂𑀲𑀺. 𑀲𑀻𑀮𑀓𑀣𑀦𑁆𑀢𑀺 𑀲𑀻𑀮𑀁 𑀦𑀸𑀫𑁂𑀢𑀁 𑀅𑀯𑀲𑁆𑀲𑀬𑁄 𑀧𑀢𑀺𑀝𑁆𑀞𑀸 𑀆𑀭𑀫𑁆𑀫𑀡𑀁 𑀢𑀸𑀡𑀁 𑀮𑁂𑀡𑀁 𑀕𑀢𑀺 𑀧𑀭𑀸𑀬𑀡𑀁. 𑀲𑀻𑀮𑀁 𑀦𑀸𑀫𑁂𑀢𑀁 𑀫𑀫 𑀯𑀁𑀲𑁄, 𑀅𑀳𑀁 𑀲𑀗𑁆𑀔𑀧𑀸𑀮𑀦𑀸𑀕𑀭𑀸𑀚𑀓𑀸𑀮𑁂 𑀪𑀽𑀭𑀺𑀤𑀢𑁆𑀢𑀦𑀸𑀕𑀭𑀸𑀚𑀓𑀸𑀮𑁂 𑀘𑀫𑁆𑀧𑁂𑀬𑁆𑀬𑀦𑀸𑀕𑀭𑀸𑀚𑀓𑀸𑀮𑁂 𑀲𑀻𑀮𑀯𑀭𑀸𑀚𑀓𑀸𑀮𑁂 𑀫𑀸𑀢𑀼𑀧𑁄𑀲𑀓𑀳𑀢𑁆𑀣𑀺𑀭𑀸𑀚𑀓𑀸𑀮𑁂 𑀙𑀤𑁆𑀤𑀦𑁆𑀢𑀳𑀢𑁆𑀣𑀺𑀭𑀸𑀚𑀓𑀸𑀮𑁂𑀢𑀺 𑀅𑀦𑀦𑁆𑀢𑁂𑀲𑀼 𑀅𑀢𑁆𑀢𑀪𑀸𑀯𑁂𑀲𑀼 𑀲𑀻𑀮𑀁 𑀧𑀭𑀺𑀧𑀽𑀭𑁂𑀲𑀺𑀁. 𑀇𑀥𑀮𑁄𑀓𑀧𑀭𑀮𑁄𑀓𑀲𑀫𑁆𑀧𑀢𑁆𑀢𑀻𑀦𑀜𑁆𑀳𑀺 𑀲𑀻𑀮𑀲𑀤𑀺𑀲𑁄 𑀅𑀯𑀲𑁆𑀲𑀬𑁄 𑀧𑀢𑀺𑀝𑁆𑀞𑀸 𑀆𑀭𑀫𑁆𑀫𑀡𑀁 𑀢𑀸𑀡𑀁 𑀮𑁂𑀡𑀁 𑀕𑀢𑀺 𑀧𑀭𑀸𑀬𑀡𑀁 𑀦𑀢𑁆𑀣𑀺, 𑀲𑀻𑀮𑀸𑀮𑀗𑁆𑀓𑀸𑀭𑀲𑀤𑀺𑀲𑁄 𑀅𑀮𑀗𑁆𑀓𑀸𑀭𑁄 𑀦𑀢𑁆𑀣𑀺, 𑀲𑀻𑀮𑀧𑀼𑀧𑁆𑀨𑀲𑀤𑀺𑀲𑀁 𑀧𑀼𑀧𑁆𑀨𑀁 𑀦𑀢𑁆𑀣𑀺, 𑀲𑀻𑀮𑀕𑀦𑁆𑀥𑀲𑀤𑀺𑀲𑁄 𑀕𑀦𑁆𑀥𑁄 𑀦𑀢𑁆𑀣𑀺. 𑀲𑀻𑀮𑀸𑀮𑀗𑁆𑀓𑀸𑀭𑁂𑀦 𑀳𑀺 𑀅𑀮𑀗𑁆𑀓𑀢𑀁 𑀲𑀻𑀮𑀕𑀦𑁆𑀥𑀸𑀦𑀼𑀮𑀺𑀢𑁆𑀢𑀁 𑀲𑀤𑁂𑀯𑀓𑁄𑀧𑀺 𑀮𑁄𑀓𑁄 𑀑𑀮𑁄𑀓𑁂𑀦𑁆𑀢𑁄 𑀢𑀺𑀢𑁆𑀢𑀺𑀁 𑀦 𑀕𑀘𑁆𑀙𑀢𑀻𑀢𑀺 𑀏𑀯𑀫𑀸𑀤𑀺𑀲𑀻𑀮𑀕𑀼𑀡𑀧𑁆𑀧𑀝𑀺𑀲𑀁𑀬𑀼𑀢𑁆𑀢𑀁 𑀓𑀣𑀁.
‘‘𑀇𑀤𑀁 𑀧𑀦 𑀲𑀻𑀮𑀁 𑀦𑀺𑀲𑁆𑀲𑀸𑀬 𑀅𑀬𑀁 𑀲𑀕𑁆𑀕𑁄 𑀮𑀩𑁆𑀪𑀢𑀻’’𑀢𑀺 𑀤𑀲𑁆𑀲𑁂𑀢𑀼𑀁 𑀲𑀻𑀮𑀸𑀦𑀦𑁆𑀢𑀭𑀁 𑀲𑀕𑁆𑀕𑀓𑀣𑀁 𑀓𑀣𑁂𑀲𑀺. 𑀲𑀕𑁆𑀕𑀓𑀣𑀦𑁆𑀢𑀺 ‘‘𑀅𑀬𑀁 𑀲𑀕𑁆𑀕𑁄 𑀦𑀸𑀫 𑀇𑀝𑁆𑀞𑁄 𑀓𑀦𑁆𑀢𑁄 𑀫𑀦𑀸𑀧𑁄, 𑀦𑀺𑀘𑁆𑀘𑀫𑁂𑀢𑁆𑀣 𑀓𑀻𑀴𑀸, 𑀦𑀺𑀘𑁆𑀘𑀁 𑀲𑀫𑁆𑀧𑀢𑁆𑀢𑀺𑀬𑁄 𑀮𑀩𑁆𑀪𑀦𑁆𑀢𑀺, 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸 𑀤𑁂𑀯𑀸 𑀦𑀯𑀼𑀢𑀺𑀯𑀲𑁆𑀲𑀲𑀢𑀲𑀳𑀲𑁆𑀲𑀸𑀦𑀺 𑀤𑀺𑀩𑁆𑀩𑀲𑀼𑀔𑀁 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀦𑁆𑀢𑀺, 𑀢𑀸𑀯𑀢𑀺𑀁𑀲𑀸 𑀢𑀺𑀲𑁆𑀲𑁄 𑀘 𑀯𑀲𑁆𑀲𑀓𑁄𑀝𑀺𑀬𑁄 𑀲𑀝𑁆𑀞𑀺 𑀘 𑀯𑀲𑁆𑀲𑀲𑀢𑀲𑀳𑀲𑁆𑀲𑀸𑀦𑀻’’𑀢𑀺 𑀏𑀯𑀫𑀸𑀤𑀺𑀲𑀕𑁆𑀕𑀕𑀼𑀡𑀧𑁆𑀧𑀝𑀺𑀲𑀁𑀬𑀼𑀢𑁆𑀢𑀁 𑀓𑀣𑀁. 𑀲𑀕𑁆𑀕𑀲𑀫𑁆𑀧𑀢𑁆𑀢𑀺𑀁 𑀓𑀣𑀬𑀦𑁆𑀢𑀸𑀦𑀜𑁆𑀳𑀺 𑀩𑀼𑀤𑁆𑀥𑀸𑀦𑀁 𑀫𑀼𑀔𑀁 𑀦𑀧𑁆𑀧𑀳𑁄𑀢𑀺. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋 ‘‘𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀔𑁆𑀯𑀸𑀳𑀁, 𑀪𑀺𑀓𑁆𑀔𑀯𑁂, 𑀲𑀕𑁆𑀕𑀓𑀣𑀁 𑀓𑀣𑁂𑀬𑁆𑀬’’𑀦𑁆𑀢𑀺𑀆𑀤𑀺 (𑀫. 𑀦𑀺. 𑁩.𑁨𑁫𑁫).
𑀏𑀯𑀁 𑀲𑀕𑁆𑀕𑀓𑀣𑀸𑀬 𑀧𑀮𑁄𑀪𑁂𑀢𑁆𑀯𑀸 𑀧𑀦 𑀳𑀢𑁆𑀣𑀺𑀁 𑀅𑀮𑀗𑁆𑀓𑀭𑀺𑀢𑁆𑀯𑀸 𑀢𑀲𑁆𑀲 𑀲𑁄𑀡𑁆𑀟𑀁 𑀙𑀺𑀦𑁆𑀤𑀦𑁆𑀢𑁄 𑀯𑀺𑀬 ‘‘𑀅𑀬𑀫𑁆𑀧𑀺 𑀲𑀕𑁆𑀕𑁄 𑀅𑀦𑀺𑀘𑁆𑀘𑁄 𑀅𑀤𑁆𑀥𑀼𑀯𑁄, 𑀦 𑀏𑀢𑁆𑀣 𑀙𑀦𑁆𑀤𑀭𑀸𑀕𑁄 𑀓𑀢𑁆𑀢𑀩𑁆𑀩𑁄’’𑀢𑀺 𑀤𑀲𑁆𑀲𑀦𑀢𑁆𑀣𑀁 ‘‘𑀅𑀧𑁆𑀧𑀲𑁆𑀲𑀸𑀤𑀸 𑀓𑀸𑀫𑀸 𑀩𑀳𑀼𑀤𑀼𑀓𑁆𑀔𑀸 𑀩𑀳𑀼𑀧𑀸𑀬𑀸𑀲𑀸, 𑀆𑀤𑀻𑀦𑀯𑁄 𑀏𑀢𑁆𑀣 𑀪𑀺𑀬𑁆𑀬𑁄’’𑀢𑀺𑀆𑀤𑀺𑀦𑀸 (𑀫. 𑀦𑀺. 𑁧.𑁨𑁩𑁫-𑁨𑁩𑁬; 𑁨.𑁪𑁨) 𑀦𑀬𑁂𑀦 𑀓𑀸𑀫𑀸𑀦𑀁 𑀆𑀤𑀻𑀦𑀯𑀁 𑀑𑀓𑀸𑀭𑀁 𑀲𑀁𑀓𑀺𑀮𑁂𑀲𑀁 𑀓𑀣𑁂𑀲𑀺. 𑀢𑀢𑁆𑀣 𑀆𑀤𑀻𑀦𑀯𑁄𑀢𑀺 𑀤𑁄𑀲𑁄. 𑀑𑀓𑀸𑀭𑁄𑀢𑀺 𑀅𑀯𑀓𑀸𑀭𑁄 𑀮𑀸𑀫𑀓𑀪𑀸𑀯𑁄. 𑀲𑀁𑀓𑀺𑀮𑁂𑀲𑁄𑀢𑀺 𑀢𑁂𑀳𑀺 𑀲𑀢𑁆𑀢𑀸𑀦𑀁 𑀲𑀁𑀲𑀸𑀭𑁂 𑀲𑀁𑀓𑀺𑀮𑀺𑀲𑁆𑀲𑀦𑀁. 𑀬𑀣𑀸𑀳 𑁋 ‘‘𑀲𑀁𑀓𑀺𑀮𑀺𑀲𑁆𑀲𑀦𑁆𑀢𑀺 𑀯𑀢, 𑀪𑁄, 𑀲𑀢𑁆𑀢𑀸’’𑀢𑀺 (𑀫. 𑀦𑀺. 𑁨.𑁩𑁫𑁧).
𑀏𑀯𑀁 𑀓𑀸𑀫𑀸𑀤𑀻𑀦𑀯𑁂𑀦 𑀢𑀚𑁆𑀚𑁂𑀢𑁆𑀯𑀸 𑀦𑁂𑀓𑁆𑀔𑀫𑁆𑀫𑁂 𑀆𑀦𑀺𑀲𑀁𑀲𑀁 𑀧𑀓𑀸𑀲𑁂𑀲𑀺. 𑀓𑀮𑁆𑀮𑀘𑀺𑀢𑁆𑀢𑀦𑁆𑀢𑀺 𑀅𑀭𑁄𑀕𑀘𑀺𑀢𑁆𑀢𑀁. 𑀲𑀸𑀫𑀼𑀓𑁆𑀓𑀁𑀲𑀺𑀓𑀸𑀢𑀺 𑀲𑀸𑀫𑀁 𑀉𑀓𑁆𑀓𑀁𑀲𑀺𑀓𑀸 𑀅𑀢𑁆𑀢𑀦𑀸𑀬𑁂𑀯 𑀉𑀤𑁆𑀥𑀭𑀺𑀢𑁆𑀯𑀸 𑀕𑀳𑀺𑀢𑀸, 𑀲𑀬𑀫𑁆𑀪𑀼𑀜𑀸𑀡𑁂𑀦 𑀤𑀺𑀝𑁆𑀞𑀸 𑀅𑀲𑀸𑀥𑀸𑀭𑀡𑀸 𑀅𑀜𑁆𑀜𑁂𑀲𑀦𑁆𑀢𑀺 𑀅𑀢𑁆𑀣𑁄. 𑀓𑀸 𑀧𑀦 𑀲𑀸𑀢𑀺? 𑀅𑀭𑀺𑀬𑀲𑀘𑁆𑀘𑀤𑁂𑀲𑀦𑀸. 𑀢𑁂𑀦𑁂𑀯𑀸𑀳 𑁋 𑀤𑀼𑀓𑁆𑀔𑀁 𑀲𑀫𑀼𑀤𑀬𑀁 𑀦𑀺𑀭𑁄𑀥𑀁 𑀫𑀕𑁆𑀕𑀦𑁆𑀢𑀺. 𑀯𑀺𑀭𑀚𑀁 𑀯𑀻𑀢𑀫𑀮𑀦𑁆𑀢𑀺 𑀭𑀸𑀕𑀭𑀚𑀸𑀤𑀻𑀦𑀁 𑀅𑀪𑀸𑀯𑀸 𑀯𑀺𑀭𑀚𑀁, 𑀭𑀸𑀕𑀫𑀮𑀸𑀤𑀻𑀦𑀁 𑀯𑀺𑀕𑀢𑀢𑁆𑀢𑀸 𑀯𑀻𑀢𑀫𑀮𑀁. 𑀥𑀫𑁆𑀫𑀘𑀓𑁆𑀔𑀼𑀦𑁆𑀢𑀺 𑀇𑀥 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁄 𑀅𑀥𑀺𑀧𑁆𑀧𑁂𑀢𑁄. 𑀢𑀲𑁆𑀲 𑀉𑀧𑁆𑀧𑀢𑁆𑀢𑀺𑀆𑀓𑀸𑀭𑀤𑀲𑁆𑀲𑀦𑀢𑁆𑀣𑀁 𑀬𑀁𑀓𑀺𑀜𑁆𑀘𑀺 𑀲𑀫𑀼𑀤𑀬𑀥𑀫𑁆𑀫𑀁 𑀲𑀩𑁆𑀩𑀁 𑀢𑀁 𑀦𑀺𑀭𑁄𑀥𑀥𑀫𑁆𑀫𑀦𑁆𑀢𑀺 𑀆𑀳. 𑀢𑀜𑁆𑀳𑀺 𑀦𑀺𑀭𑁄𑀥𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀓𑀺𑀘𑁆𑀘𑀯𑀲𑁂𑀦 𑀏𑀯𑀁 𑀲𑀩𑁆𑀩𑀲𑀗𑁆𑀔𑀢𑀁 𑀧𑀝𑀺𑀯𑀺𑀚𑁆𑀛𑀦𑁆𑀢𑀁 𑀉𑀧𑁆𑀧𑀚𑁆𑀚𑀢𑀺. 𑀤𑀺𑀝𑁆𑀞𑁄 𑀅𑀭𑀺𑀬𑀲𑀘𑁆𑀘𑀥𑀫𑁆𑀫𑁄 𑀏𑀢𑁂𑀦𑀸𑀢𑀺 𑀤𑀺𑀝𑁆𑀞𑀥𑀫𑁆𑀫𑁄. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺. 𑀢𑀺𑀡𑁆𑀡𑀸 𑀯𑀺𑀘𑀺𑀓𑀺𑀘𑁆𑀙𑀸 𑀅𑀦𑁂𑀦𑀸𑀢𑀺 𑀢𑀺𑀡𑁆𑀡𑀯𑀺𑀘𑀺𑀓𑀺𑀘𑁆𑀙𑁄. 𑀯𑀺𑀕𑀢𑀸 𑀓𑀣𑀁𑀓𑀣𑀸 𑀅𑀲𑁆𑀲𑀸𑀢𑀺 𑀯𑀺𑀕𑀢𑀓𑀣𑀁𑀓𑀣𑁄. 𑀯𑀺𑀲𑀸𑀭𑀚𑁆𑀚𑀁 𑀧𑀢𑁆𑀢𑁄𑀢𑀺 𑀯𑁂𑀲𑀸𑀭𑀚𑁆𑀚𑀧𑁆𑀧𑀢𑁆𑀢𑁄. 𑀓𑀢𑁆𑀣? 𑀲𑀢𑁆𑀣𑀼𑀲𑀸𑀲𑀦𑁂. 𑀦𑀸𑀲𑁆𑀲 𑀧𑀭𑁄 𑀧𑀘𑁆𑀘𑀬𑁄, 𑀦 𑀧𑀭𑀁 𑀲𑀤𑁆𑀥𑀸𑀬 𑀏𑀢𑁆𑀣 𑀯𑀢𑁆𑀢𑀢𑀻𑀢𑀺 𑀅𑀧𑀭𑀧𑁆𑀧𑀘𑁆𑀘𑀬𑁄.
𑀧𑀯𑀢𑁆𑀢𑀫𑀁𑀲𑀦𑁆𑀢𑀺 𑀧𑀓𑀢𑀺𑀬𑀸 𑀧𑀯𑀢𑁆𑀢𑀁 𑀓𑀧𑁆𑀧𑀺𑀬𑀫𑀁𑀲𑀁 𑀫𑀽𑀮𑀁 𑀕𑀳𑁂𑀢𑁆𑀯𑀸 𑀅𑀦𑁆𑀢𑀭𑀸𑀧𑀡𑁂 𑀧𑀭𑀺𑀬𑁂𑀲𑀸𑀳𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀫𑁆𑀩𑀳𑀼𑀮𑀸 𑀦𑀺𑀕𑀡𑁆𑀞𑀸𑀢𑀺 𑀧𑀜𑁆𑀘𑀲𑀢𑀫𑀢𑁆𑀢𑀸 𑀦𑀺𑀕𑀡𑁆𑀞𑀸. 𑀣𑀽𑀮𑀁 𑀧𑀲𑀼𑀦𑁆𑀢𑀺 𑀣𑀽𑀮𑀁 𑀫𑀳𑀸𑀲𑀭𑀻𑀭𑀁 𑀕𑁄𑀓𑀡𑁆𑀡𑀫𑀳𑀺𑀁𑀲𑀲𑀽𑀓𑀭𑀲𑀗𑁆𑀔𑀸𑀢𑀁 𑀧𑀲𑀼𑀁. 𑀉𑀤𑁆𑀤𑀺𑀲𑁆𑀲𑀓𑀢𑀦𑁆𑀢𑀺 𑀅𑀢𑁆𑀢𑀸𑀦𑀁 𑀉𑀤𑁆𑀤𑀺𑀲𑀺𑀢𑁆𑀯𑀸 𑀓𑀢𑀁, 𑀫𑀸𑀭𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀧𑀝𑀺𑀘𑁆𑀘𑀓𑀫𑁆𑀫𑀦𑁆𑀢𑀺 𑀲𑁆𑀯𑀸𑀬𑀁 𑀢𑀁 𑀫𑀁𑀲𑀁 𑀧𑀝𑀺𑀘𑁆𑀘 𑀢𑀁 𑀧𑀸𑀡𑀯𑀥𑀓𑀫𑁆𑀫𑀁 𑀨𑀼𑀲𑀢𑀺. 𑀢𑀜𑁆𑀳𑀺 𑀅𑀓𑀼𑀲𑀮𑀁 𑀉𑀧𑀟𑁆𑀠𑀁 𑀤𑀸𑀬𑀓𑀲𑁆𑀲, 𑀉𑀧𑀟𑁆𑀠𑀁 𑀧𑀝𑀺𑀕𑁆𑀕𑀸𑀳𑀓𑀲𑁆𑀲 𑀳𑁄𑀢𑀻𑀢𑀺 𑀦𑁂𑀲𑀁 𑀮𑀤𑁆𑀥𑀺. 𑀅𑀧𑀭𑁄 𑀦𑀬𑁄 𑁋 𑀧𑀝𑀺𑀘𑁆𑀘𑀓𑀫𑁆𑀫𑀦𑁆𑀢𑀺 𑀅𑀢𑁆𑀢𑀸𑀦𑀁 𑀧𑀝𑀺𑀘𑁆𑀘𑀓𑀢𑀁. 𑀅𑀣 𑀯𑀸 𑀧𑀝𑀺𑀘𑁆𑀘𑀓𑀫𑁆𑀫𑀦𑁆𑀢𑀺 𑀦𑀺𑀫𑀺𑀢𑁆𑀢𑀓𑀫𑁆𑀫𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁, 𑀢𑀁 𑀧𑀝𑀺𑀘𑁆𑀘𑀓𑀫𑁆𑀫𑀁 𑀏𑀢𑁆𑀣 𑀅𑀢𑁆𑀣𑀻𑀢𑀺 𑀫𑀁𑀲𑀫𑁆𑀧𑀺 𑀧𑀝𑀺𑀘𑁆𑀘𑀓𑀫𑁆𑀫𑀦𑁆𑀢𑀺 𑀯𑀼𑀢𑁆𑀢𑀁. 𑀉𑀧𑀓𑀡𑁆𑀡𑀓𑁂𑀢𑀺 𑀓𑀡𑁆𑀡𑀫𑀽𑀮𑁂. 𑀅𑀮𑀦𑁆𑀢𑀺 𑀧𑀝𑀺𑀓𑁆𑀔𑁂𑀧𑀯𑀘𑀦𑀁, 𑀓𑀺𑀁 𑀇𑀫𑀺𑀦𑀸𑀢𑀺 𑀅𑀢𑁆𑀣𑁄. 𑀦 𑀘 𑀧𑀦𑁂𑀢𑁂𑀢𑀺 𑀏𑀢𑁂 𑀆𑀬𑀲𑁆𑀫𑀦𑁆𑀢𑁄 𑀤𑀻𑀖𑀭𑀢𑁆𑀢𑀁 𑀅𑀯𑀡𑁆𑀡𑀓𑀸𑀫𑀸 𑀳𑀼𑀢𑁆𑀯𑀸 𑀅𑀯𑀡𑁆𑀡𑀁 𑀪𑀸𑀲𑀦𑁆𑀢𑀸𑀧𑀺 𑀅𑀩𑁆𑀪𑀸𑀘𑀺𑀓𑁆𑀔𑀦𑁆𑀢𑀸 𑀦 𑀚𑀺𑀭𑀺𑀤𑀦𑁆𑀢𑀺, 𑀅𑀩𑁆𑀪𑀓𑁆𑀔𑀸𑀦𑀲𑁆𑀲 𑀅𑀦𑁆𑀢𑀁 𑀦 𑀕𑀘𑁆𑀙𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀮𑀚𑁆𑀚𑀦𑀢𑁆𑀣𑁂 𑀇𑀤𑀁 𑀚𑀺𑀭𑀺𑀤𑀦𑁆𑀢𑀻𑀢𑀺 𑀧𑀤𑀁 𑀤𑀝𑁆𑀞𑀩𑁆𑀩𑀁, 𑀦 𑀮𑀚𑁆𑀚𑀦𑁆𑀢𑀻𑀢𑀺 𑀅𑀢𑁆𑀣𑁄.
𑁩. 𑀅𑀲𑁆𑀲𑀸𑀚𑀸𑀦𑀻𑀬𑀲𑀼𑀢𑁆𑀢𑀯𑀡𑁆𑀡𑀦𑀸
𑁧𑁩. 𑀢𑀢𑀺𑀬𑁂 𑀅𑀗𑁆𑀕𑁂𑀳𑀻𑀢𑀺 𑀕𑀼𑀡𑀗𑁆𑀕𑁂𑀳𑀺. 𑀢𑀲𑁆𑀲𑀁 𑀤𑀺𑀲𑀸𑀬𑀁 𑀚𑀸𑀢𑁄 𑀳𑁄𑀢𑀻𑀢𑀺 𑀢𑀲𑁆𑀲𑀁 𑀲𑀺𑀦𑁆𑀥𑀼𑀦𑀤𑀻𑀢𑀻𑀭𑀤𑀺𑀲𑀸𑀬𑀁 𑀚𑀸𑀢𑁄 𑀳𑁄𑀢𑀺. 𑀅𑀜𑁆𑀜𑁂𑀧𑀺 𑀪𑀤𑁆𑀭𑀸 𑀅𑀲𑁆𑀲𑀸𑀚𑀸𑀦𑀻𑀬𑀸 𑀢𑀢𑁆𑀣𑁂𑀯 𑀚𑀸𑀬𑀦𑁆𑀢𑀺. 𑀅𑀮𑁆𑀮𑀁 𑀯𑀸 𑀲𑀼𑀓𑁆𑀔𑀁 𑀯𑀸𑀢𑀺 𑀅𑀮𑁆𑀮𑀢𑀺𑀡𑀁 𑀯𑀸 𑀲𑀼𑀓𑁆𑀔𑀢𑀺𑀡𑀁 𑀯𑀸. 𑀦𑀸𑀜𑁆𑀜𑁂 𑀅𑀲𑁆𑀲𑁂 𑀉𑀩𑁆𑀩𑁂𑀚𑁂𑀢𑀸𑀢𑀺 𑀅𑀜𑁆𑀜𑁂 𑀅𑀲𑁆𑀲𑁂 𑀦 𑀉𑀩𑁆𑀩𑁂𑀚𑁂𑀢𑀺 𑀦 𑀧𑀳𑀭𑀢𑀺 𑀦 𑀟𑀁𑀲𑀢𑀺 𑀦 𑀓𑀮𑀳𑀁 𑀓𑀭𑁄𑀢𑀺. 𑀲𑀸𑀞𑁂𑀬𑁆𑀬𑀸𑀦𑀻𑀢𑀺 𑀲𑀞𑀪𑀸𑀯𑁄. 𑀓𑀽𑀝𑁂𑀬𑁆𑀬𑀸𑀦𑀻𑀢𑀺 𑀓𑀽𑀝𑀪𑀸𑀯𑁄. 𑀚𑀺𑀫𑁆𑀳𑁂𑀬𑁆𑀬𑀸𑀦𑀻𑀢𑀺 𑀚𑀺𑀫𑁆𑀳𑀪𑀸𑀯𑁄. 𑀯𑀗𑁆𑀓𑁂𑀬𑁆𑀬𑀸𑀦𑀻𑀢𑀺 𑀯𑀗𑁆𑀓𑀪𑀸𑀯𑀸. 𑀇𑀘𑁆𑀘𑀲𑁆𑀲 𑀘𑀢𑀽𑀳𑀺𑀧𑀺 𑀧𑀤𑁂𑀳𑀺 𑀅𑀲𑀺𑀓𑁆𑀔𑀺𑀢𑀪𑀸𑀯𑁄𑀯 𑀓𑀣𑀺𑀢𑁄. 𑀯𑀸𑀳𑀻𑀢𑀺 𑀯𑀳𑀦𑀲𑀪𑀸𑀯𑁄 𑀤𑀺𑀦𑁆𑀦𑁄𑀯𑀸𑀤𑀧𑀝𑀺𑀓𑀭𑁄. 𑀬𑀸𑀯 𑀚𑀻𑀯𑀺𑀢𑀫𑀭𑀡𑀧𑀭𑀺𑀬𑀸𑀤𑀸𑀦𑀸𑀢𑀺 𑀬𑀸𑀯 𑀚𑀻𑀯𑀺𑀢𑀲𑁆𑀲 𑀫𑀭𑀡𑁂𑀦 𑀧𑀭𑀺𑀬𑁄𑀲𑀸𑀦𑀸. 𑀲𑀓𑁆𑀓𑀘𑁆𑀘𑀁 𑀧𑀭𑀺𑀪𑀼𑀜𑁆𑀚𑀢𑀻𑀢𑀺 𑀅𑀫𑀢𑀁 𑀯𑀺𑀬 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀢𑀺. 𑀧𑀼𑀭𑀺𑀲𑀣𑀸𑀫𑁂𑀦𑀸𑀢𑀺𑀆𑀤𑀻𑀲𑀼 𑀜𑀸𑀡𑀣𑀸𑀫𑀸𑀤𑀬𑁄 𑀓𑀣𑀺𑀢𑀸. 𑀲𑀡𑁆𑀞𑀸𑀦𑀦𑁆𑀢𑀺 𑀑𑀲𑀓𑁆𑀓𑀦𑀁 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺.
𑁪. 𑀅𑀲𑁆𑀲𑀔𑀴𑀼𑀗𑁆𑀓𑀲𑀼𑀢𑁆𑀢𑀯𑀡𑁆𑀡𑀦𑀸
𑁧𑁪. 𑀘𑀢𑀼𑀢𑁆𑀣𑁂 ‘‘𑀧𑁂𑀳𑀻’’𑀢𑀺 𑀯𑀼𑀢𑁆𑀢𑁄𑀢𑀺 ‘‘𑀕𑀘𑁆𑀙𑀸’’𑀢𑀺 𑀯𑀼𑀢𑁆𑀢𑁄. 𑀧𑀺𑀝𑁆𑀞𑀺𑀢𑁄 𑀭𑀣𑀁 𑀧𑀯𑀢𑁆𑀢𑁂𑀢𑀻𑀢𑀺 𑀔𑀦𑁆𑀥𑀝𑁆𑀞𑀺𑀓𑁂𑀦 𑀬𑀼𑀕𑀁 𑀉𑀧𑁆𑀧𑀻𑀴𑀺𑀢𑁆𑀯𑀸 𑀧𑀘𑁆𑀙𑀺𑀫𑀪𑀸𑀕𑁂𑀦 𑀭𑀣𑀁 𑀧𑀯𑀝𑁆𑀝𑁂𑀦𑁆𑀢𑁄 𑀑𑀲𑀓𑁆𑀓𑀢𑀺. 𑀧𑀘𑁆𑀙𑀸 𑀮𑀗𑁆𑀖𑀢𑀺, 𑀓𑀼𑀩𑁆𑀩𑀭𑀁 𑀳𑀦𑀢𑀻𑀢𑀺 𑀤𑁆𑀯𑁂 𑀧𑀘𑁆𑀙𑀺𑀫𑀧𑀸𑀤𑁂 𑀉𑀓𑁆𑀔𑀺𑀧𑀺𑀢𑁆𑀯𑀸 𑀢𑁂𑀳𑀺 𑀧𑀳𑀭𑀺𑀢𑁆𑀯𑀸 𑀭𑀣𑀓𑀼𑀩𑁆𑀩𑀭𑀁 𑀪𑀺𑀦𑁆𑀤𑀢𑀺. 𑀢𑀺𑀤𑀡𑁆𑀟𑀁 𑀪𑀜𑁆𑀚𑀢𑀻𑀢𑀺 𑀭𑀣𑀲𑁆𑀲 𑀧𑀼𑀭𑀢𑁄 𑀢𑀬𑁄 𑀤𑀡𑁆𑀟𑀓𑀸 𑀳𑁄𑀦𑁆𑀢𑀺, 𑀢𑁂 𑀪𑀜𑁆𑀚𑀢𑀺. 𑀭𑀣𑀻𑀲𑀸𑀬 𑀲𑀢𑁆𑀣𑀺𑀁 𑀉𑀲𑁆𑀲𑀚𑁆𑀚𑀺𑀢𑁆𑀯𑀸𑀢𑀺 𑀲𑀻𑀲𑀁 𑀦𑀸𑀫𑁂𑀢𑁆𑀯𑀸 𑀬𑀼𑀕𑀁 𑀪𑀽𑀫𑀺𑀬𑀁 𑀧𑀸𑀢𑁂𑀢𑁆𑀯𑀸 𑀲𑀢𑁆𑀣𑀺𑀦𑀸 𑀭𑀣𑀻𑀲𑀁 𑀧𑀳𑀭𑀺𑀢𑁆𑀯𑀸. 𑀅𑀚𑁆𑀛𑁄𑀫𑀤𑁆𑀤𑀢𑀻𑀢𑀺 𑀤𑁆𑀯𑀻𑀳𑀺 𑀧𑀼𑀭𑀺𑀫𑀧𑀸𑀤𑁂𑀳𑀺 𑀈𑀲𑀁 𑀫𑀤𑁆𑀤𑀦𑁆𑀢𑁄 𑀢𑀺𑀝𑁆𑀞𑀢𑀺. 𑀉𑀩𑁆𑀩𑀝𑀼𑀫𑀁 𑀭𑀣𑀁 𑀓𑀭𑁄𑀢𑀻𑀢𑀺 𑀣𑀮𑀁 𑀯𑀸 𑀓𑀡𑁆𑀟𑀓𑀝𑁆𑀞𑀸𑀦𑀁 𑀯𑀸 𑀭𑀣𑀁 𑀆𑀭𑁄𑀧𑁂𑀢𑀺. 𑀅𑀦𑀸𑀤𑀺𑀬𑀺𑀢𑁆𑀯𑀸𑀢𑀺 𑀅𑀫𑀦𑀲𑀺𑀓𑀢𑁆𑀯𑀸 𑀅𑀕𑀡𑀺𑀢𑁆𑀯𑀸. 𑀫𑀼𑀔𑀸𑀥𑀸𑀦𑀦𑁆𑀢𑀺 𑀫𑀼𑀔𑀞𑀧𑀦𑀢𑁆𑀣𑀸𑀬 𑀤𑀺𑀦𑁆𑀦𑀁 𑀅𑀬𑀲𑀗𑁆𑀔𑀮𑀺𑀓𑀁. 𑀔𑀻𑀮𑀝𑁆𑀞𑀸𑀬𑀻𑀢𑀺 𑀘𑀢𑁆𑀢𑀸𑀭𑁄 𑀧𑀸𑀤𑁂 𑀣𑀫𑁆𑀪𑁂 𑀯𑀺𑀬 𑀦𑀺𑀘𑁆𑀘𑀮𑀁 𑀞𑀧𑁂𑀢𑁆𑀯𑀸 𑀔𑀻𑀮𑀝𑁆𑀞𑀸𑀦𑀲𑀤𑀺𑀲𑁂𑀦 𑀞𑀸𑀦𑁂𑀦 𑀢𑀺𑀝𑁆𑀞𑀢𑀺. 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀯𑀝𑁆𑀝𑀫𑁂𑀯 𑀓𑀣𑀺𑀢𑀁.
𑁫. 𑀫𑀮𑀲𑀼𑀢𑁆𑀢𑀯𑀡𑁆𑀡𑀦𑀸
𑁧𑁫. 𑀧𑀜𑁆𑀘𑀫𑁂 𑀅𑀲𑀚𑁆𑀛𑀸𑀬𑀫𑀮𑀸𑀢𑀺 𑀉𑀕𑁆𑀕𑀳𑀺𑀢𑀫𑀦𑁆𑀢𑀸𑀦𑀁 𑀅𑀲𑀚𑁆𑀛𑀸𑀬𑀓𑀭𑀡𑀁 𑀫𑀮𑀁 𑀦𑀸𑀫 𑀳𑁄𑀢𑀺. 𑀅𑀦𑀼𑀝𑁆𑀞𑀸𑀦𑀫𑀮𑀸 𑀖𑀭𑀸𑀢𑀺 𑀉𑀝𑁆𑀞𑀸𑀦𑀯𑀻𑀭𑀺𑀬𑀸𑀪𑀸𑀯𑁄 𑀖𑀭𑀸𑀦𑀁 𑀫𑀮𑀁 𑀦𑀸𑀫. 𑀯𑀡𑁆𑀡𑀲𑁆𑀲𑀸𑀢𑀺 𑀲𑀭𑀻𑀭𑀯𑀡𑁆𑀡𑀲𑁆𑀲. 𑀭𑀓𑁆𑀔𑀢𑁄𑀢𑀺 𑀬𑀁𑀓𑀺𑀜𑁆𑀘𑀺 𑀅𑀢𑁆𑀢𑀦𑁄 𑀲𑀦𑁆𑀢𑀓𑀁 𑀭𑀓𑁆𑀔𑀦𑁆𑀢𑀲𑁆𑀲. 𑀅𑀯𑀺𑀚𑁆𑀚𑀸 𑀧𑀭𑀫𑀁 𑀫𑀮𑀦𑁆𑀢𑀺 𑀢𑀢𑁄 𑀲𑁂𑀲𑀸𑀓𑀼𑀲𑀮𑀥𑀫𑁆𑀫𑀫𑀮𑀢𑁄 𑀅𑀝𑁆𑀞𑀲𑀼 𑀞𑀸𑀦𑁂𑀲𑀼 𑀅𑀜𑁆𑀜𑀸𑀡𑀪𑀽𑀢𑀸 𑀯𑀝𑁆𑀝𑀫𑀽𑀮𑀲𑀗𑁆𑀔𑀸𑀢𑀸 𑀩𑀳𑀮𑀦𑁆𑀥𑀓𑀸𑀭𑀅𑀯𑀺𑀚𑁆𑀚𑀸 𑀧𑀭𑀫𑀁 𑀫𑀮𑀁. 𑀢𑀢𑁄 𑀳𑀺 𑀫𑀮𑀢𑀭𑀁 𑀦𑀸𑀫 𑀦𑀢𑁆𑀣𑀺. 𑀇𑀫𑀲𑁆𑀫𑀺𑀫𑁆𑀧𑀺 𑀲𑀼𑀢𑁆𑀢𑁂 𑀯𑀝𑁆𑀝𑀫𑁂𑀯 𑀓𑀣𑀺𑀢𑀁.
𑁬. 𑀤𑀽𑀢𑁂𑀬𑁆𑀬𑀲𑀼𑀢𑁆𑀢𑀯𑀡𑁆𑀡𑀦𑀸
𑁧𑁬. 𑀙𑀝𑁆𑀞𑁂 𑀤𑀽𑀢𑁂𑀬𑁆𑀬𑀦𑁆𑀢𑀺 𑀤𑀽𑀢𑀓𑀫𑁆𑀫𑀁. 𑀕𑀦𑁆𑀢𑀼𑀫𑀭𑀳𑀢𑀻𑀢𑀺 𑀢𑀁 𑀤𑀽𑀢𑁂𑀬𑁆𑀬𑀲𑀗𑁆𑀔𑀸𑀢𑀁 𑀲𑀸𑀲𑀦𑀁 𑀥𑀸𑀭𑁂𑀢𑁆𑀯𑀸 𑀳𑀭𑀺𑀢𑀼𑀁 𑀅𑀭𑀳𑀢𑀺. 𑀲𑁄𑀢𑀸𑀢𑀺 𑀬𑁄 𑀢𑀁 𑀅𑀲𑁆𑀲 𑀲𑀸𑀲𑀦𑀁 𑀤𑁂𑀢𑀺, 𑀢𑀲𑁆𑀲 𑀲𑁄𑀢𑀸. 𑀲𑀸𑀯𑁂𑀢𑀸𑀢𑀺 𑀢𑀁 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 ‘‘𑀇𑀤𑀁 𑀦𑀸𑀫 𑀢𑀼𑀫𑁆𑀳𑁂𑀳𑀺 𑀯𑀼𑀢𑁆𑀢’’𑀦𑁆𑀢𑀺 𑀧𑀝𑀺𑀲𑀸𑀯𑁂𑀢𑀸. 𑀉𑀕𑁆𑀕𑀳𑁂𑀢𑀸𑀢𑀺 𑀲𑀼𑀕𑁆𑀕𑀳𑀺𑀢𑀁 𑀓𑀢𑁆𑀯𑀸 𑀉𑀕𑁆𑀕𑀳𑁂𑀢𑀸. 𑀥𑀸𑀭𑁂𑀢𑀸𑀢𑀺 𑀲𑀼𑀥𑀸𑀭𑀺𑀢𑀁 𑀓𑀢𑁆𑀯𑀸 𑀥𑀸𑀭𑁂𑀢𑀸. 𑀯𑀺𑀜𑁆𑀜𑀸𑀢𑀺 𑀅𑀢𑁆𑀣𑀸𑀦𑀢𑁆𑀣𑀲𑁆𑀲 𑀅𑀢𑁆𑀣𑀁 𑀚𑀸𑀦𑀺𑀢𑀸. 𑀯𑀺𑀜𑁆𑀜𑀸𑀧𑁂𑀢𑀸𑀢𑀺 𑀧𑀭𑀁 𑀯𑀺𑀚𑀸𑀦𑀸𑀧𑁂𑀢𑀸. 𑀲𑀳𑀺𑀢𑀸 𑀲𑀳𑀺𑀢𑀲𑁆𑀲𑀸𑀢𑀺 𑀇𑀤𑀁 𑀲𑀳𑀺𑀢𑀁, 𑀇𑀤𑀁 𑀅𑀲𑀳𑀺𑀢𑀦𑁆𑀢𑀺 𑀏𑀯𑀁 𑀲𑀳𑀺𑀢𑀸𑀲𑀳𑀺𑀢𑀲𑁆𑀲 𑀓𑀼𑀲𑀮𑁄, 𑀉𑀧𑀕𑀢𑀸𑀦𑀼𑀧𑀕𑀢𑁂𑀲𑀼 𑀙𑁂𑀓𑁄 𑀲𑀸𑀲𑀦𑀁 𑀆𑀭𑁄𑀘𑁂𑀦𑁆𑀢𑁄 𑀲𑀳𑀺𑀢𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀆𑀭𑁄𑀘𑁂𑀢𑀺. 𑀦 𑀩𑁆𑀬𑀣𑀢𑀻𑀢𑀺 𑀯𑁂𑀥𑀢𑀺 𑀦 𑀙𑀫𑁆𑀪𑀢𑀺. 𑀅𑀲𑀦𑁆𑀤𑀺𑀤𑁆𑀥𑀦𑁆𑀢𑀺 𑀦𑀺𑀲𑁆𑀲𑀦𑁆𑀤𑁂𑀳𑀁 𑀯𑀺𑀕𑀢𑀲𑀁𑀲𑀬𑀁. 𑀧𑀼𑀘𑁆𑀙𑀺𑀢𑁄𑀢𑀺 𑀧𑀜𑁆𑀳𑀢𑁆𑀣𑀸𑀬 𑀧𑀼𑀘𑁆𑀙𑀺𑀢𑁄.
𑁭-𑁮. 𑀩𑀦𑁆𑀥𑀦𑀲𑀼𑀢𑁆𑀢𑀤𑁆𑀯𑀬𑀯𑀡𑁆𑀡𑀦𑀸
𑁧𑁭-𑁧𑁮. 𑀲𑀢𑁆𑀢𑀫𑁂 𑀭𑀼𑀡𑁆𑀡𑁂𑀦𑀸𑀢𑀺 𑀭𑀼𑀤𑀺𑀢𑁂𑀦. 𑀆𑀓𑀧𑁆𑀧𑁂𑀦𑀸𑀢𑀺 𑀦𑀺𑀯𑀸𑀲𑀦𑀧𑀸𑀭𑀼𑀧𑀦𑀸𑀤𑀺𑀦𑀸 𑀯𑀺𑀥𑀸𑀦𑁂𑀦. 𑀯𑀦𑀪𑀗𑁆𑀕𑁂𑀦𑀸𑀢𑀺 𑀯𑀦𑀢𑁄 𑀪𑀜𑁆𑀚𑀺𑀢𑁆𑀯𑀸 𑀆𑀳𑀝𑁂𑀦 𑀧𑀼𑀧𑁆𑀨𑀨𑀮𑀸𑀤𑀺𑀧𑀡𑁆𑀡𑀸𑀓𑀸𑀭𑁂𑀦. 𑀅𑀝𑁆𑀞𑀫𑁂𑀧𑀺 𑀏𑀲𑁂𑀯 𑀦𑀬𑁄.
𑁯. 𑀧𑀳𑀸𑀭𑀸𑀤𑀲𑀼𑀢𑁆𑀢𑀯𑀡𑁆𑀡𑀦𑀸
𑁧𑁯. 𑀦𑀯𑀫𑁂 𑀧𑀳𑀸𑀭𑀸𑀤𑁄𑀢𑀺 𑀏𑀯𑀁𑀦𑀸𑀫𑀓𑁄. 𑀅𑀲𑀼𑀭𑀺𑀦𑁆𑀤𑁄𑀢𑀺 𑀅𑀲𑀼𑀭𑀚𑁂𑀝𑁆𑀞𑀓𑁄. 𑀅𑀲𑀼𑀭𑁂𑀲𑀼 𑀳𑀺 𑀯𑁂𑀧𑀘𑀺𑀢𑁆𑀢𑀺 𑀭𑀸𑀳𑀼 𑀧𑀳𑀸𑀭𑀸𑀤𑁄𑀢𑀺 𑀇𑀫𑁂 𑀢𑀬𑁄 𑀚𑁂𑀝𑁆𑀞𑀓𑀸. 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀻𑀢𑀺 𑀤𑀲𑀩𑀮𑀲𑁆𑀲 𑀅𑀪𑀺𑀲𑀫𑁆𑀩𑀼𑀤𑁆𑀥𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 ‘‘𑀅𑀚𑁆𑀚 𑀕𑀫𑀺𑀲𑁆𑀲𑀸𑀫𑀺 𑀲𑁆𑀯𑁂 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀏𑀓𑀸𑀤𑀲 𑀯𑀲𑁆𑀲𑀸𑀦𑀺 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀤𑁆𑀯𑀸𑀤𑀲𑀫𑁂 𑀯𑀲𑁆𑀲𑁂 𑀲𑀢𑁆𑀣𑀼 𑀯𑁂𑀭𑀜𑁆𑀚𑀸𑀬𑀁 𑀯𑀲𑀦𑀓𑀸𑀮𑁂 ‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀲𑀦𑁆𑀢𑀺𑀓𑀁 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 ‘‘𑀫𑀫 ‘𑀅𑀚𑁆𑀚 𑀲𑁆𑀯𑁂’𑀢𑀺 𑀤𑁆𑀯𑀸𑀤𑀲 𑀯𑀲𑁆𑀲𑀸𑀦𑀺 𑀚𑀸𑀢𑀸𑀦𑀺, 𑀳𑀦𑁆𑀤𑀸𑀳𑀁 𑀇𑀤𑀸𑀦𑁂𑀯 𑀕𑀘𑁆𑀙𑀸𑀫𑀻’’𑀢𑀺 𑀢𑀗𑁆𑀔𑀡𑀁𑀬𑁂𑀯 𑀅𑀲𑀼𑀭𑀕𑀡𑀧𑀭𑀺𑀯𑀼𑀢𑁄 𑀅𑀲𑀼𑀭𑀪𑀯𑀦𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀤𑀺𑀯𑀸 𑀤𑀺𑀯𑀲𑁆𑀲 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀻𑀢𑀺 𑀲𑁄 𑀓𑀺𑀭 ‘‘𑀢𑀣𑀸𑀕𑀢𑀁 𑀧𑀜𑁆𑀳𑀁 𑀧𑀼𑀘𑁆𑀙𑀺𑀢𑁆𑀯𑀸 𑀏𑀯 𑀥𑀫𑁆𑀫𑀁 𑀲𑀼𑀡𑀺𑀲𑁆𑀲𑀸𑀫𑀻’’𑀢𑀺 𑀆𑀕𑀢𑁄, 𑀢𑀣𑀸𑀕𑀢𑀲𑁆𑀲 𑀧𑀦 𑀤𑀺𑀝𑁆𑀞𑀓𑀸𑀮𑀢𑁄 𑀧𑀝𑁆𑀞𑀸𑀬 𑀩𑀼𑀤𑁆𑀥𑀕𑀸𑀭𑀯𑁂𑀦 𑀧𑀼𑀘𑁆𑀙𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀅𑀧𑀺 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀢𑀢𑁄 𑀲𑀢𑁆𑀣𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀬𑀁 𑀧𑀳𑀸𑀭𑀸𑀤𑁄 𑀫𑀬𑀺 𑀅𑀓𑀣𑁂𑀦𑁆𑀢𑁂 𑀧𑀞𑀫𑀢𑀭𑀁 𑀓𑀣𑁂𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀢𑀺, 𑀘𑀺𑀡𑁆𑀡𑀯𑀲𑀺𑀝𑁆𑀞𑀸𑀦𑁂𑀬𑁂𑀯 𑀦𑀁 𑀓𑀣𑀸𑀲𑀫𑀼𑀝𑁆𑀞𑀸𑀧𑀦𑀢𑁆𑀣𑀁 𑀏𑀓𑀁 𑀧𑀜𑁆𑀳𑀁 𑀧𑀼𑀘𑁆𑀙𑀺𑀲𑁆𑀲𑀸𑀫𑀻’’𑀢𑀺.
𑀅𑀣 𑀦𑀁 𑀧𑀼𑀘𑁆𑀙𑀦𑁆𑀢𑁄 𑀅𑀧𑀺 𑀧𑀦 𑀧𑀳𑀸𑀭𑀸𑀤𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀪𑀺𑀭𑀫𑀦𑁆𑀢𑀻𑀢𑀺 𑀭𑀢𑀺𑀁 𑀯𑀺𑀦𑁆𑀤𑀦𑁆𑀢𑀺, 𑀅𑀦𑀼𑀓𑁆𑀓𑀡𑁆𑀞𑀫𑀸𑀦𑀸 𑀯𑀲𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀲𑁄 ‘‘𑀧𑀭𑀺𑀘𑀺𑀡𑁆𑀡𑀝𑁆𑀞𑀸𑀦𑁂𑀬𑁂𑀯 𑀫𑀁 𑀪𑀕𑀯𑀸 𑀧𑀼𑀘𑁆𑀙𑀢𑀻’’𑀢𑀺 𑀅𑀢𑁆𑀢𑀫𑀦𑁄 𑀳𑀼𑀢𑁆𑀯𑀸 𑀅𑀪𑀺𑀭𑀫𑀦𑁆𑀢𑀺, 𑀪𑀦𑁆𑀢𑁂𑀢𑀺 𑀆𑀳. 𑀅𑀦𑀼𑀧𑀼𑀩𑁆𑀩𑀦𑀺𑀦𑁆𑀦𑁄𑀢𑀺𑀆𑀤𑀻𑀦𑀺 𑀲𑀩𑁆𑀩𑀸𑀦𑀺 𑀅𑀦𑀼𑀧𑀝𑀺𑀧𑀸𑀝𑀺𑀬𑀸 𑀦𑀺𑀦𑁆𑀦𑀪𑀸𑀯𑀲𑁆𑀲 𑀯𑁂𑀯𑀘𑀦𑀸𑀦𑀺. 𑀦 𑀆𑀬𑀢𑀓𑁂𑀦𑁂𑀯 𑀧𑀧𑀸𑀢𑁄𑀢𑀺 𑀦 𑀙𑀺𑀦𑁆𑀦𑀢𑀝𑀫𑀳𑀸𑀲𑁄𑀩𑁆𑀪𑁄 𑀯𑀺𑀬 𑀆𑀤𑀺𑀢𑁄𑀯 𑀧𑀧𑀸𑀢𑁄. 𑀲𑁄 𑀳𑀺 𑀢𑀻𑀭𑀢𑁄 𑀧𑀝𑁆𑀞𑀸𑀬 𑀏𑀓𑀗𑁆𑀕𑀼𑀮𑀤𑁆𑀯𑀗𑁆𑀕𑀼𑀮𑀯𑀺𑀤𑀢𑁆𑀣𑀺𑀭𑀢𑀦𑀬𑀝𑁆𑀞𑀺𑀉𑀲𑀪𑀅𑀟𑁆𑀠𑀕𑀸𑀯𑀼𑀢𑀕𑀸𑀯𑀼𑀢𑀅𑀟𑁆𑀠𑀬𑁄𑀚𑀦𑀸𑀤𑀺𑀯𑀲𑁂𑀦 𑀕𑀫𑁆𑀪𑀻𑀭𑁄 𑀳𑀼𑀢𑁆𑀯𑀸 𑀕𑀘𑁆𑀙𑀦𑁆𑀢𑁄 𑀲𑀺𑀦𑁂𑀭𑀼𑀧𑀸𑀤𑀫𑀽𑀮𑁂 𑀘𑀢𑀼𑀭𑀸𑀲𑀻𑀢𑀺𑀬𑁄𑀚𑀦𑀲𑀳𑀲𑁆𑀲𑀕𑀫𑁆𑀪𑀻𑀭𑁄 𑀳𑀼𑀢𑁆𑀯𑀸 𑀞𑀺𑀢𑁄𑀢𑀺 𑀤𑀲𑁆𑀲𑁂𑀢𑀺.
𑀞𑀺𑀢𑀥𑀫𑁆𑀫𑁄𑀢𑀺 𑀞𑀺𑀢𑀲𑀪𑀸𑀯𑁄. 𑀓𑀼𑀡𑀧𑁂𑀦𑀸𑀢𑀺 𑀬𑁂𑀦 𑀓𑁂𑀦𑀘𑀺 𑀳𑀢𑁆𑀣𑀺𑀅𑀲𑁆𑀲𑀸𑀤𑀻𑀦𑀁 𑀓𑀴𑁂𑀯𑀭𑁂𑀦. 𑀣𑀮𑀁 𑀉𑀲𑁆𑀲𑀸𑀭𑁂𑀢𑀻𑀢𑀺 𑀳𑀢𑁆𑀣𑁂𑀦 𑀕𑀳𑁂𑀢𑁆𑀯𑀸 𑀯𑀺𑀬 𑀯𑀻𑀘𑀺𑀧𑀳𑀸𑀭𑁂𑀦𑁂𑀯 𑀣𑀮𑀁 𑀔𑀺𑀧𑀢𑀺.
𑀕𑀗𑁆𑀕𑀸𑀬𑀫𑀼𑀦𑀸𑀢𑀺 𑀇𑀥 𑀞𑀢𑁆𑀯𑀸 𑀇𑀫𑀸𑀲𑀁 𑀦𑀤𑀻𑀦𑀁 𑀉𑀧𑁆𑀧𑀢𑁆𑀢𑀺𑀓𑀣𑀁 𑀓𑀣𑁂𑀢𑀼𑀁 𑀯𑀝𑁆𑀝𑀢𑀺. 𑀅𑀬𑀁 𑀢𑀸𑀯 𑀚𑀫𑁆𑀩𑀼𑀤𑀻𑀧𑁄 𑀤𑀲𑀲𑀳𑀲𑁆𑀲𑀬𑁄𑀚𑀦𑀧𑀭𑀺𑀫𑀸𑀡𑁄, 𑀢𑀢𑁆𑀣 𑀘𑀢𑀼𑀲𑀳𑀲𑁆𑀲𑀬𑁄𑀚𑀦𑀧𑀭𑀺𑀫𑀸𑀡𑁄 𑀧𑀤𑁂𑀲𑁄 𑀉𑀤𑀓𑁂𑀦 𑀅𑀚𑁆𑀛𑁄𑀢𑁆𑀣𑀝𑁄 𑀫𑀳𑀸𑀲𑀫𑀼𑀤𑁆𑀤𑁄𑀢𑀺 𑀲𑀗𑁆𑀔𑀁 𑀕𑀢𑁄, 𑀢𑀺𑀲𑀳𑀲𑁆𑀲𑀬𑁄𑀚𑀦𑀧𑁆𑀧𑀫𑀸𑀡𑁂 𑀫𑀦𑀼𑀲𑁆𑀲𑀸 𑀯𑀲𑀦𑁆𑀢𑀺, 𑀢𑀺𑀲𑀳𑀲𑁆𑀲𑀬𑁄𑀚𑀦𑀧𑁆𑀧𑀫𑀸𑀡𑁂 𑀳𑀺𑀫𑀯𑀸 𑀧𑀢𑀺𑀝𑁆𑀞𑀺𑀢𑁄 𑀉𑀩𑁆𑀩𑁂𑀥𑁂𑀦 𑀧𑀜𑁆𑀘𑀬𑁄𑀚𑀦𑀲𑀢𑀺𑀓𑁄 𑀘𑀢𑀼𑀭𑀸𑀲𑀻𑀢𑀺𑀓𑀽𑀝𑀲𑀳𑀲𑁆𑀲𑀧𑀝𑀺𑀫𑀡𑁆𑀟𑀺𑀢𑁄 𑀲𑀫𑀦𑁆𑀢𑀢𑁄 𑀲𑀦𑁆𑀤𑀫𑀸𑀦𑀧𑀜𑁆𑀘𑀲𑀢𑀦𑀤𑀻𑀯𑀺𑀘𑀺𑀢𑁆𑀢𑁄, 𑀬𑀢𑁆𑀣 𑀆𑀬𑀸𑀫𑀯𑀺𑀢𑁆𑀣𑀸𑀭𑁂𑀦 𑀘 𑀕𑀫𑁆𑀪𑀻𑀭𑀢𑁄 𑀘 𑀧𑀡𑁆𑀡𑀸𑀲𑀧𑀡𑁆𑀡𑀸𑀲𑀬𑁄𑀚𑀦𑀸 𑀤𑀺𑀬𑀟𑁆𑀠𑀬𑁄𑀚𑀦𑀲𑀢𑀧𑀭𑀺𑀫𑀡𑁆𑀟𑀮𑀸 𑀅𑀦𑁄𑀢𑀢𑁆𑀢𑀤𑀳𑁄 𑀓𑀡𑁆𑀡𑀫𑀼𑀡𑁆𑀟𑀤𑀳𑁄 𑀭𑀣𑀓𑀸𑀭𑀤𑀳𑁄 𑀙𑀤𑁆𑀤𑀦𑁆𑀢𑀤𑀳𑁄 𑀓𑀼𑀡𑀸𑀮𑀤𑀳𑁄 𑀫𑀦𑁆𑀤𑀸𑀓𑀺𑀦𑀺𑀤𑀳𑁄 𑀲𑀻𑀳𑀧𑁆𑀧𑀧𑀸𑀢𑀤𑀳𑁄𑀢𑀺 𑀲𑀢𑁆𑀢 𑀫𑀳𑀸𑀲𑀭𑀸 𑀧𑀢𑀺𑀝𑁆𑀞𑀳𑀦𑁆𑀢𑀺.
𑀢𑁂𑀲𑀼 𑀅𑀦𑁄𑀢𑀢𑁆𑀢𑁄 𑀲𑀼𑀤𑀲𑁆𑀲𑀦𑀓𑀽𑀝𑀁 𑀘𑀺𑀢𑁆𑀢𑀓𑀽𑀝𑀁 𑀓𑀸𑀴𑀓𑀽𑀝𑀁 𑀕𑀦𑁆𑀥𑀫𑀸𑀤𑀦𑀓𑀽𑀝𑀁 𑀓𑁂𑀮𑀸𑀲𑀓𑀽𑀝𑀦𑁆𑀢𑀺 𑀇𑀫𑁂𑀳𑀺 𑀧𑀜𑁆𑀘𑀳𑀺 𑀧𑀩𑁆𑀩𑀢𑁂𑀳𑀺 𑀧𑀭𑀺𑀓𑁆𑀔𑀺𑀢𑁆𑀢𑁄. 𑀢𑀢𑁆𑀣 𑀲𑀼𑀤𑀲𑁆𑀲𑀦𑀓𑀽𑀝𑀁 𑀲𑁄𑀯𑀡𑁆𑀡𑀫𑀬𑀁 𑀤𑁆𑀯𑀺𑀬𑁄𑀚𑀦𑀲𑀢𑀼𑀩𑁆𑀩𑁂𑀥𑀁 𑀅𑀦𑁆𑀢𑁄𑀯𑀗𑁆𑀓𑀁 𑀓𑀸𑀓𑀫𑀼𑀔𑀲𑀡𑁆𑀞𑀸𑀦𑀁 𑀢𑀫𑁂𑀯 𑀲𑀭𑀁 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀢𑀺𑀝𑁆𑀞𑀢𑀺, 𑀘𑀺𑀢𑁆𑀢𑀓𑀽𑀝𑀁 𑀲𑀩𑁆𑀩𑀭𑀢𑀦𑀫𑀬𑀁, 𑀓𑀸𑀴𑀓𑀽𑀝𑀁 𑀅𑀜𑁆𑀚𑀦𑀫𑀬𑀁, 𑀕𑀦𑁆𑀥𑀫𑀸𑀤𑀦𑀓𑀽𑀝𑀁 𑀲𑀸𑀦𑀼𑀫𑀬𑀁 𑀅𑀩𑁆𑀪𑀦𑁆𑀢𑀭𑁂 𑀫𑀼𑀕𑁆𑀕𑀯𑀡𑁆𑀡𑀁, 𑀫𑀽𑀮𑀕𑀦𑁆𑀥𑁄 𑀲𑀸𑀭𑀕𑀦𑁆𑀥𑁄 𑀨𑁂𑀕𑁆𑀕𑀼𑀕𑀦𑁆𑀥𑁄 𑀢𑀘𑀕𑀦𑁆𑀥𑁄 𑀧𑀧𑀝𑀺𑀓𑀸𑀕𑀦𑁆𑀥𑁄 𑀭𑀲𑀕𑀦𑁆𑀥𑁄 𑀧𑀢𑁆𑀢𑀕𑀦𑁆𑀥𑁄 𑀧𑀼𑀧𑁆𑀨𑀕𑀦𑁆𑀥𑁄 𑀨𑀮𑀕𑀦𑁆𑀥𑁄 𑀕𑀦𑁆𑀥𑀕𑀦𑁆𑀥𑁄𑀢𑀺 𑀇𑀫𑁂𑀳𑀺 𑀤𑀲𑀳𑀺 𑀕𑀦𑁆𑀥𑁂𑀳𑀺 𑀉𑀲𑁆𑀲𑀦𑁆𑀦𑀁, 𑀦𑀸𑀦𑀧𑁆𑀧𑀓𑀸𑀭𑀑𑀲𑀥𑀲𑀜𑁆𑀙𑀦𑁆𑀦𑀁 𑀓𑀸𑀴𑀧𑀓𑁆𑀔𑀉𑀧𑁄𑀲𑀣𑀤𑀺𑀯𑀲𑁂 𑀆𑀤𑀺𑀢𑁆𑀢𑀫𑀺𑀯 𑀅𑀗𑁆𑀕𑀸𑀭𑀁 𑀚𑀮𑀦𑁆𑀢𑀁 𑀢𑀺𑀝𑁆𑀞𑀢𑀺, 𑀓𑁂𑀮𑀸𑀲𑀓𑀽𑀝𑀁 𑀭𑀚𑀢𑀫𑀬𑀁. 𑀲𑀩𑁆𑀩𑀸𑀦𑀺 𑀲𑀼𑀤𑀲𑁆𑀲𑀦𑁂𑀦 𑀲𑀫𑀸𑀦𑀼𑀩𑁆𑀩𑁂𑀥𑀲𑀡𑁆𑀞𑀸𑀦𑀸𑀦𑀺 𑀢𑀫𑁂𑀯 𑀲𑀭𑀁 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀞𑀺𑀢𑀸𑀦𑀺. 𑀢𑀸𑀦𑀺 𑀲𑀩𑁆𑀩𑀸𑀦𑀺 𑀤𑁂𑀯𑀸𑀦𑀼𑀪𑀸𑀯𑁂𑀦 𑀦𑀸𑀕𑀸𑀦𑀼𑀪𑀸𑀯𑁂𑀦 𑀘 𑀯𑀲𑁆𑀲𑀦𑁆𑀢𑀺, 𑀦𑀤𑀺𑀬𑁄 𑀘𑁂𑀢𑁂𑀲𑀼 𑀲𑀦𑁆𑀤𑀦𑁆𑀢𑀺. 𑀢𑀁 𑀲𑀩𑁆𑀩𑀫𑁆𑀧𑀺 𑀉𑀤𑀓𑀁 𑀅𑀦𑁄𑀢𑀢𑁆𑀢𑀫𑁂𑀯 𑀧𑀯𑀺𑀲𑀢𑀺. 𑀘𑀦𑁆𑀤𑀺𑀫𑀲𑀽𑀭𑀺𑀬𑀸 𑀤𑀓𑁆𑀔𑀺𑀡𑁂𑀦 𑀯𑀸 𑀉𑀢𑁆𑀢𑀭𑁂𑀦 𑀯𑀸 𑀕𑀘𑁆𑀙𑀦𑁆𑀢𑀸 𑀧𑀩𑁆𑀩𑀢𑀦𑁆𑀢𑀭𑁂𑀦 𑀢𑀢𑁆𑀣 𑀑𑀪𑀸𑀲𑀁 𑀓𑀭𑁄𑀦𑁆𑀢𑀺, 𑀉𑀚𑀼𑀁 𑀕𑀘𑁆𑀙𑀦𑁆𑀢𑀸 𑀦 𑀓𑀭𑁄𑀦𑁆𑀢𑀺. 𑀢𑁂𑀦𑁂𑀯𑀲𑁆𑀲 𑀅𑀦𑁄𑀢𑀢𑁆𑀢𑁄 𑀢𑀺𑀲𑀗𑁆𑀔𑀸 𑀉𑀤𑀧𑀸𑀤𑀺.
𑀢𑀢𑁆𑀣 𑀫𑀦𑁄𑀳𑀭𑀲𑀺𑀮𑀸𑀢𑀮𑀸𑀦𑀺 𑀦𑀺𑀫𑁆𑀫𑀘𑁆𑀙𑀓𑀘𑁆𑀙𑀧𑀸𑀦𑀺 𑀨𑀮𑀺𑀓𑀲𑀤𑀺𑀲𑀦𑀺𑀫𑁆𑀫𑀮𑁄𑀤𑀓𑀸𑀦𑀺 𑀦𑁆𑀳𑀸𑀦𑀢𑀺𑀢𑁆𑀣𑀸𑀦𑀺 𑀲𑀼𑀧𑀝𑀺𑀬𑀢𑁆𑀢𑀸𑀦𑀺 𑀳𑁄𑀦𑁆𑀢𑀺, 𑀬𑁂𑀲𑀼 𑀩𑀼𑀤𑁆𑀥𑀸 𑀔𑀻𑀡𑀸𑀲𑀯𑀸 𑀘 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀘 𑀇𑀤𑁆𑀥𑀺𑀫𑀦𑁆𑀢𑀸 𑀘 𑀇𑀲𑀬𑁄 𑀦𑁆𑀳𑀸𑀬𑀦𑁆𑀢𑀺, 𑀤𑁂𑀯𑀬𑀓𑁆𑀔𑀸𑀤𑀬𑁄 𑀉𑀤𑀓𑀓𑀻𑀴𑀁 𑀓𑀻𑀴𑀦𑁆𑀢𑀺.
𑀢𑀲𑁆𑀲 𑀘𑀢𑀽𑀲𑀼 𑀧𑀲𑁆𑀲𑁂𑀲𑀼 𑀲𑀻𑀳𑀫𑀼𑀔𑀁, 𑀳𑀢𑁆𑀣𑀺𑀫𑀼𑀔𑀁, 𑀅𑀲𑁆𑀲𑀫𑀼𑀔𑀁, 𑀉𑀲𑀪𑀫𑀼𑀔𑀦𑁆𑀢𑀺 𑀘𑀢𑁆𑀢𑀸𑀭𑀺 𑀫𑀼𑀔𑀸𑀦𑀺 𑀳𑁄𑀦𑁆𑀢𑀺, 𑀬𑁂𑀳𑀺 𑀘𑀢𑀲𑁆𑀲𑁄 𑀦𑀤𑀺𑀬𑁄 𑀲𑀦𑁆𑀤𑀦𑁆𑀢𑀺. 𑀲𑀻𑀳𑀫𑀼𑀔𑁂𑀦 𑀦𑀺𑀓𑁆𑀔𑀦𑁆𑀢𑀦𑀤𑀻𑀢𑀻𑀭𑁂 𑀲𑀻𑀳𑀸 𑀩𑀳𑀼𑀢𑀭𑀸 𑀳𑁄𑀦𑁆𑀢𑀺, 𑀳𑀢𑁆𑀣𑀺𑀫𑀼𑀔𑀸𑀤𑀻𑀳𑀺 𑀳𑀢𑁆𑀣𑀺𑀅𑀲𑁆𑀲𑀉𑀲𑀪𑀸. 𑀧𑀼𑀭𑀢𑁆𑀣𑀺𑀫𑀤𑀺𑀲𑀢𑁄 𑀦𑀺𑀓𑁆𑀔𑀦𑁆𑀢𑀦𑀤𑀻 𑀅𑀦𑁄𑀢𑀢𑁆𑀢𑀁 𑀢𑀺𑀓𑁆𑀔𑀢𑁆𑀢𑀼𑀁 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀇𑀢𑀭𑀸 𑀢𑀺𑀲𑁆𑀲𑁄 𑀦𑀤𑀺𑀬𑁄 𑀅𑀦𑀼𑀧𑀕𑀫𑁆𑀫 𑀧𑀸𑀘𑀻𑀦𑀳𑀺𑀫𑀯𑀦𑁆𑀢𑁂𑀦𑁂𑀯 𑀅𑀫𑀦𑀼𑀲𑁆𑀲𑀧𑀣𑀁 𑀕𑀦𑁆𑀢𑁆𑀯𑀸 𑀫𑀳𑀸𑀲𑀫𑀼𑀤𑁆𑀤𑀁 𑀧𑀯𑀺𑀲𑀢𑀺. 𑀧𑀘𑁆𑀙𑀺𑀫𑀤𑀺𑀲𑀢𑁄 𑀘 𑀉𑀢𑁆𑀢𑀭𑀤𑀺𑀲𑀢𑁄 𑀘 𑀦𑀺𑀓𑁆𑀔𑀦𑁆𑀢𑀦𑀤𑀺𑀬𑁄𑀧𑀺 𑀢𑀣𑁂𑀯 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀧𑀘𑁆𑀙𑀺𑀫𑀳𑀺𑀫𑀯𑀦𑁆𑀢𑁂𑀦𑁂𑀯 𑀉𑀢𑁆𑀢𑀭𑀳𑀺𑀫𑀯𑀦𑁆𑀢𑁂𑀦𑁂𑀯 𑀘 𑀅𑀫𑀦𑀼𑀲𑁆𑀲𑀧𑀣𑀁 𑀕𑀦𑁆𑀢𑁆𑀯𑀸 𑀫𑀳𑀸𑀲𑀫𑀼𑀤𑁆𑀤𑀁 𑀧𑀯𑀺𑀲𑀦𑁆𑀢𑀺. 𑀤𑀓𑁆𑀔𑀺𑀡𑀫𑀼𑀔𑀢𑁄 𑀦𑀺𑀓𑁆𑀔𑀦𑁆𑀢𑀦𑀤𑀻 𑀧𑀦 𑀢𑀁 𑀢𑀺𑀓𑁆𑀔𑀢𑁆𑀢𑀼𑀁 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀉𑀢𑁆𑀢𑀭𑁂𑀦 𑀉𑀚𑀼𑀓𑀁 𑀧𑀸𑀲𑀸𑀡𑀧𑀺𑀝𑁆𑀞𑁂𑀦𑁂𑀯 𑀲𑀝𑁆𑀞𑀺 𑀬𑁄𑀚𑀦𑀸𑀦𑀺 𑀕𑀦𑁆𑀢𑁆𑀯𑀸 𑀧𑀩𑁆𑀩𑀢𑀁 𑀧𑀳𑀭𑀺𑀢𑁆𑀯𑀸 𑀉𑀝𑁆𑀞𑀸𑀬 𑀧𑀭𑀺𑀓𑁆𑀔𑁂𑀧𑁂𑀦 𑀢𑀺𑀕𑀸𑀯𑀼𑀢𑀧𑁆𑀧𑀫𑀸𑀡𑀸 𑀉𑀤𑀓𑀥𑀸𑀭𑀸 𑀳𑀼𑀢𑁆𑀯𑀸 𑀆𑀓𑀸𑀲𑁂𑀦 𑀲𑀝𑁆𑀞𑀺 𑀬𑁄𑀚𑀦𑀸𑀦𑀺 𑀕𑀦𑁆𑀢𑁆𑀯𑀸 𑀢𑀺𑀬𑀕𑁆𑀕𑀴𑁂 𑀦𑀸𑀫 𑀧𑀸𑀲𑀸𑀡𑁂 𑀧𑀢𑀺𑀢𑀸, 𑀧𑀸𑀲𑀸𑀡𑁄 𑀉𑀤𑀓𑀥𑀸𑀭𑀸𑀯𑁂𑀕𑁂𑀦 𑀪𑀺𑀦𑁆𑀦𑁄. 𑀢𑀢𑁆𑀣 𑀧𑀜𑁆𑀜𑀸𑀲𑀬𑁄𑀚𑀦𑀧𑁆𑀧𑀫𑀸𑀡𑀸 𑀢𑀺𑀬𑀕𑁆𑀕𑀴𑀸 𑀦𑀸𑀫 𑀫𑀳𑀸𑀧𑁄𑀓𑁆𑀔𑀭𑀡𑀻 𑀚𑀸𑀢𑀸, 𑀧𑁄𑀓𑁆𑀔𑀭𑀡𑀺𑀬𑀸 𑀓𑀽𑀮𑀁 𑀪𑀺𑀦𑁆𑀤𑀺𑀢𑁆𑀯𑀸 𑀧𑀸𑀲𑀸𑀡𑀁 𑀧𑀯𑀺𑀲𑀺𑀢𑁆𑀯𑀸 𑀲𑀝𑁆𑀞𑀺 𑀬𑁄𑀚𑀦𑀸𑀦𑀺 𑀕𑀢𑀸. 𑀢𑀢𑁄 𑀖𑀦𑀧𑀣𑀯𑀺𑀁 𑀪𑀺𑀦𑁆𑀤𑀺𑀢𑁆𑀯𑀸 𑀉𑀫𑁆𑀫𑀗𑁆𑀕𑁂𑀦 𑀲𑀝𑁆𑀞𑀺 𑀬𑁄𑀚𑀦𑀸𑀦𑀺 𑀕𑀦𑁆𑀢𑁆𑀯𑀸 𑀕𑀺𑀜𑁆𑀛𑀁 𑀦𑀸𑀫 𑀢𑀺𑀭𑀘𑁆𑀙𑀸𑀦𑀧𑀩𑁆𑀩𑀢𑀁 𑀧𑀳𑀭𑀺𑀢𑁆𑀯𑀸 𑀳𑀢𑁆𑀣𑀢𑀮𑁂 𑀧𑀜𑁆𑀘𑀗𑁆𑀕𑀼𑀮𑀺𑀲𑀤𑀺𑀲𑀸 𑀧𑀜𑁆𑀘 𑀥𑀸𑀭𑀸 𑀳𑀼𑀢𑁆𑀯𑀸 𑀧𑀯𑀢𑁆𑀢𑀢𑀺. 𑀲𑀸 𑀢𑀺𑀓𑁆𑀔𑀢𑁆𑀢𑀼𑀁 𑀅𑀦𑁄𑀢𑀢𑁆𑀢𑀁 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀕𑀢𑀝𑁆𑀞𑀸𑀦𑁂 𑀆𑀯𑀢𑁆𑀢𑀕𑀗𑁆𑀕𑀸𑀢𑀺 𑀯𑀼𑀘𑁆𑀘𑀢𑀺. 𑀉𑀚𑀼𑀓𑀁 𑀧𑀸𑀲𑀸𑀡𑀧𑀺𑀝𑁆𑀞𑁂𑀦 𑀲𑀝𑁆𑀞𑀺 𑀬𑁄𑀚𑀦𑀸𑀦𑀺 𑀕𑀢𑀝𑁆𑀞𑀸𑀦𑁂 𑀓𑀡𑁆𑀳𑀕𑀗𑁆𑀕𑀸, 𑀆𑀓𑀸𑀲𑁂𑀦 𑀲𑀝𑁆𑀞𑀺 𑀬𑁄𑀚𑀦𑀸𑀦𑀺 𑀕𑀢𑀝𑁆𑀞𑀸𑀦𑁂 𑀆𑀓𑀸𑀲𑀕𑀗𑁆𑀕𑀸, 𑀢𑀺𑀬𑀕𑁆𑀕𑀴𑀧𑀸𑀲𑀸𑀡𑁂 𑀧𑀜𑁆𑀜𑀸𑀲𑀬𑁄𑀚𑀦𑁄𑀓𑀸𑀲𑁂 𑀞𑀺𑀢𑀸 𑀢𑀺𑀬𑀕𑁆𑀕𑀴𑀧𑁄𑀓𑁆𑀔𑀭𑀡𑀻, 𑀓𑀽𑀮𑀁 𑀪𑀺𑀦𑁆𑀤𑀺𑀢𑁆𑀯𑀸 𑀧𑀸𑀲𑀸𑀡𑀁 𑀧𑀯𑀺𑀲𑀺𑀢𑁆𑀯𑀸 𑀲𑀝𑁆𑀞𑀺 𑀬𑁄𑀚𑀦𑀸𑀦𑀺 𑀕𑀢𑀝𑁆𑀞𑀸𑀦𑁂 𑀩𑀳𑀮𑀕𑀗𑁆𑀕𑀸𑀢𑀺, 𑀉𑀫𑀗𑁆𑀕𑁂𑀦 𑀲𑀝𑁆𑀞𑀺 𑀬𑁄𑀚𑀦𑀸𑀦𑀺 𑀕𑀢𑀝𑁆𑀞𑀸𑀦𑁂 𑀉𑀫𑀗𑁆𑀕𑀕𑀗𑁆𑀕𑀸𑀢𑀺 𑀯𑀼𑀘𑁆𑀘𑀢𑀺. 𑀯𑀺𑀜𑁆𑀛𑀁 𑀦𑀸𑀫 𑀢𑀺𑀭𑀘𑁆𑀙𑀸𑀦𑀧𑀩𑁆𑀩𑀢𑀁 𑀧𑀳𑀭𑀺𑀢𑁆𑀯𑀸 𑀧𑀜𑁆𑀘 𑀥𑀸𑀭𑀸 𑀳𑀼𑀢𑁆𑀯𑀸 𑀧𑀯𑀢𑁆𑀢𑀦𑀝𑁆𑀞𑀸𑀦𑁂 𑀧𑀦 𑀕𑀗𑁆𑀕𑀸, 𑀬𑀫𑀼𑀦𑀸, 𑀅𑀘𑀺𑀭𑀯𑀢𑀻, 𑀲𑀭𑀪𑀽, 𑀫𑀳𑀻𑀢𑀺 𑀧𑀜𑁆𑀘 𑀲𑀗𑁆𑀔𑀁 𑀕𑀢𑀸. 𑀏𑀯𑀫𑁂𑀢𑀸 𑀧𑀜𑁆𑀘 𑀫𑀳𑀸𑀦𑀤𑀺𑀬𑁄 𑀳𑀺𑀫𑀯𑀦𑁆𑀢𑀢𑁄 𑀧𑀯𑀢𑁆𑀢𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸.
𑀲𑀯𑀦𑁆𑀢𑀺𑀬𑁄𑀢𑀺 𑀬𑀸 𑀓𑀸𑀘𑀺 𑀲𑀯𑀫𑀸𑀦𑀸 𑀕𑀘𑁆𑀙𑀦𑁆𑀢𑀻 𑀫𑀳𑀸𑀦𑀤𑀺𑀬𑁄 𑀯𑀸 𑀓𑀼𑀦𑁆𑀦𑀤𑀺𑀬𑁄 𑀯𑀸. 𑀅𑀧𑁆𑀧𑁂𑀦𑁆𑀢𑀻𑀢𑀺 𑀅𑀮𑁆𑀮𑀻𑀬𑀦𑁆𑀢𑀺 𑀑𑀲𑀭𑀦𑁆𑀢𑀺. 𑀥𑀸𑀭𑀸𑀢𑀺 𑀯𑀼𑀝𑁆𑀞𑀺𑀥𑀸𑀭𑀸. 𑀧𑀽𑀭𑀢𑁆𑀢𑀦𑁆𑀢𑀺 𑀧𑀼𑀡𑁆𑀡𑀪𑀸𑀯𑁄. 𑀫𑀳𑀸𑀲𑀫𑀼𑀤𑁆𑀤𑀲𑁆𑀲 𑀳𑀺 𑀅𑀬𑀁 𑀥𑀫𑁆𑀫𑀢𑀸 𑁋 ‘‘𑀇𑀫𑀲𑁆𑀫𑀺𑀁 𑀓𑀸𑀮𑁂 𑀤𑁂𑀯𑁄 𑀫𑀦𑁆𑀤𑁄 𑀚𑀸𑀢𑁄, 𑀚𑀸𑀮𑀓𑁆𑀔𑀺𑀧𑀸𑀤𑀻𑀦𑀺 𑀆𑀤𑀸𑀬 𑀫𑀘𑁆𑀙𑀓𑀘𑁆𑀙𑀧𑁂 𑀕𑀡𑁆𑀳𑀺𑀲𑁆𑀲𑀸𑀫𑀸’’𑀢𑀺 𑀯𑀸 ‘‘𑀇𑀫𑀲𑁆𑀫𑀺𑀁 𑀓𑀸𑀮𑁂 𑀫𑀳𑀦𑁆𑀢𑀸 𑀯𑀼𑀝𑁆𑀞𑀺, 𑀮𑀪𑀺𑀲𑁆𑀲𑀸𑀫 𑀦𑀼 𑀔𑁄 𑀧𑀺𑀝𑁆𑀞𑀺𑀧𑀲𑀸𑀭𑀡𑀝𑁆𑀞𑀸𑀦’’𑀦𑁆𑀢𑀺 𑀯𑀸 𑀯𑀢𑁆𑀢𑀼𑀁 𑀦 𑀲𑀓𑁆𑀓𑀸. 𑀧𑀞𑀫𑀓𑀧𑁆𑀧𑀺𑀓𑀓𑀸𑀮𑀢𑁄 𑀧𑀝𑁆𑀞𑀸𑀬 𑀳𑀺 𑀬𑀁 𑀲𑀺𑀦𑁂𑀭𑀼𑀫𑁂𑀔𑀮𑀁 𑀆𑀳𑀘𑁆𑀘 𑀉𑀤𑀓𑀁 𑀞𑀺𑀢𑀁, 𑀢𑀢𑁄 𑀏𑀓𑀗𑁆𑀕𑀼𑀮𑀫𑀢𑁆𑀢𑀫𑁆𑀧𑀺 𑀉𑀤𑀓𑀁 𑀦𑁂𑀯 𑀳𑁂𑀝𑁆𑀞𑀸 𑀑𑀲𑀻𑀤𑀢𑀺, 𑀦 𑀉𑀤𑁆𑀥𑀁 𑀉𑀢𑁆𑀢𑀭𑀢𑀺. 𑀏𑀓𑀭𑀲𑁄𑀢𑀺 𑀅𑀲𑀫𑁆𑀪𑀺𑀦𑁆𑀦𑀭𑀲𑁄.
𑀫𑀼𑀢𑁆𑀢𑀸𑀢𑀺 𑀔𑀼𑀤𑁆𑀤𑀓𑀫𑀳𑀦𑁆𑀢𑀯𑀝𑁆𑀝𑀤𑀻𑀖𑀸𑀤𑀺𑀪𑁂𑀤𑀸 𑀅𑀦𑁂𑀓𑀯𑀺𑀥𑀸. 𑀫𑀡𑀻𑀢𑀺 𑀭𑀢𑁆𑀢𑀦𑀻𑀮𑀸𑀤𑀺𑀪𑁂𑀤𑁄 𑀅𑀦𑁂𑀓𑀯𑀺𑀥𑁄. 𑀯𑁂𑀴𑀼𑀭𑀺𑀬𑁄𑀢𑀺 𑀯𑀁𑀲𑀯𑀡𑁆𑀡𑀲𑀺𑀭𑀻𑀲𑀧𑀼𑀧𑁆𑀨𑀯𑀡𑁆𑀡𑀸𑀤𑀺𑀪𑁂𑀤𑁄 𑀅𑀦𑁂𑀓𑀯𑀺𑀥𑁄. 𑀲𑀗𑁆𑀔𑁄𑀢𑀺 𑀤𑀓𑁆𑀔𑀺𑀡𑀸𑀯𑀝𑁆𑀝𑀢𑀫𑁆𑀩𑀓𑀼𑀘𑁆𑀙𑀺𑀓𑀥𑀫𑀦𑀲𑀗𑁆𑀔𑀸𑀤𑀺𑀪𑁂𑀤𑁄 𑀅𑀦𑁂𑀓𑀯𑀺𑀥𑁄. 𑀲𑀺𑀮𑀸𑀢𑀺 𑀲𑁂𑀢𑀓𑀸𑀴𑀫𑀼𑀕𑁆𑀕𑀯𑀡𑁆𑀡𑀸𑀤𑀺𑀪𑁂𑀤𑁄 𑀅𑀦𑁂𑀓𑀯𑀺𑀥𑀸. 𑀧𑀯𑀸𑀴𑀦𑁆𑀢𑀺 𑀔𑀼𑀤𑁆𑀤𑀓𑀫𑀳𑀦𑁆𑀢𑀭𑀢𑁆𑀢𑀖𑀦𑀭𑀢𑁆𑀢𑀸𑀤𑀺𑀪𑁂𑀤𑀁 𑀅𑀦𑁂𑀓𑀯𑀺𑀥𑀁. 𑀫𑀲𑀸𑀭𑀕𑀮𑁆𑀮𑀦𑁆𑀢𑀺 𑀓𑀩𑀭𑀫𑀡𑀺. 𑀦𑀸𑀕𑀸𑀢𑀺 𑀊𑀫𑀺𑀧𑀺𑀝𑁆𑀞𑀯𑀸𑀲𑀺𑀦𑁄𑀧𑀺 𑀯𑀺𑀫𑀸𑀦𑀝𑁆𑀞𑀓𑀸 𑀦𑀸𑀕𑀸𑀧𑀺.
𑀅𑀝𑁆𑀞 𑀧𑀳𑀸𑀭𑀸𑀤𑀸𑀢𑀺 𑀲𑀢𑁆𑀣𑀸 𑀅𑀝𑁆𑀞𑀧𑀺 𑀥𑀫𑁆𑀫𑁂 𑀯𑀢𑁆𑀢𑀼𑀁 𑀲𑀓𑁆𑀓𑁄𑀢𑀺, 𑀲𑁄𑀴𑀲𑀧𑀺 𑀩𑀸𑀢𑁆𑀢𑀺𑀁𑀲𑀧𑀺 𑀘𑀢𑀼𑀲𑀝𑁆𑀞𑀺𑀧𑀺 𑀲𑀳𑀲𑁆𑀲𑀫𑁆𑀧𑀺, 𑀧𑀳𑀸𑀭𑀸𑀤𑁂𑀦 𑀧𑀦 𑀅𑀝𑁆𑀞 𑀓𑀣𑀺𑀢𑀸, 𑀅𑀳𑀫𑁆𑀧𑀺 𑀢𑁂𑀳𑁂𑀯 𑀲𑀭𑀺𑀓𑁆𑀔𑀓𑁂 𑀓𑀢𑁆𑀯𑀸 𑀓𑀣𑁂𑀲𑁆𑀲𑀸𑀫𑀻𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀏𑀯𑀫𑀸𑀳. 𑀅𑀦𑀼𑀧𑀼𑀩𑁆𑀩𑀲𑀺𑀓𑁆𑀔𑀸𑀢𑀺𑀆𑀤𑀻𑀲𑀼 𑀅𑀦𑀼𑀧𑀼𑀩𑁆𑀩𑀲𑀺𑀓𑁆𑀔𑀸𑀬 𑀢𑀺𑀲𑁆𑀲𑁄 𑀲𑀺𑀓𑁆𑀔𑀸 𑀕𑀳𑀺𑀢𑀸, 𑀅𑀦𑀼𑀧𑀼𑀩𑁆𑀩𑀓𑀺𑀭𑀺𑀬𑀸𑀬 𑀢𑁂𑀭𑀲 𑀥𑀼𑀢𑀗𑁆𑀕𑀸𑀦𑀺, 𑀅𑀦𑀼𑀧𑀼𑀩𑁆𑀩𑀧𑀝𑀺𑀧𑀤𑀸𑀬 𑀲𑀢𑁆𑀢 𑀅𑀦𑀼𑀧𑀲𑁆𑀲𑀦𑀸 𑀅𑀝𑁆𑀞𑀸𑀭𑀲 𑀫𑀳𑀸𑀯𑀺𑀧𑀲𑁆𑀲𑀦𑀸 𑀅𑀝𑁆𑀞𑀢𑀺𑀁𑀲 𑀆𑀭𑀫𑁆𑀫𑀡𑀯𑀺𑀪𑀢𑁆𑀢𑀺𑀬𑁄 𑀲𑀢𑁆𑀢𑀢𑀺𑀁𑀲 𑀩𑁄𑀥𑀧𑀓𑁆𑀔𑀺𑀬𑀥𑀫𑁆𑀫𑀸. 𑀦 𑀆𑀬𑀢𑀓𑁂𑀦𑁂𑀯 𑀅𑀜𑁆𑀜𑀸𑀧𑀝𑀺𑀯𑁂𑀥𑁄𑀢𑀺 𑀫𑀡𑁆𑀟𑀽𑀓𑀲𑁆𑀲 𑀉𑀧𑁆𑀧𑀢𑀺𑀢𑁆𑀯𑀸 𑀕𑀫𑀦𑀁 𑀯𑀺𑀬 𑀆𑀤𑀺𑀢𑁄𑀯 𑀲𑀻𑀮𑀧𑀽𑀭𑀡𑀸𑀤𑀺𑀁 𑀅𑀓𑀢𑁆𑀯𑀸 𑀅𑀭𑀳𑀢𑁆𑀢𑀧𑁆𑀧𑀝𑀺𑀯𑁂𑀥𑁄 𑀦𑀸𑀫 𑀦𑀢𑁆𑀣𑀺, 𑀧𑀝𑀺𑀧𑀸𑀝𑀺𑀬𑀸 𑀧𑀦 𑀲𑀻𑀮𑀲𑀫𑀸𑀥𑀺𑀧𑀜𑁆𑀜𑀸𑀬𑁄 𑀧𑀽𑀭𑁂𑀢𑁆𑀯𑀸𑀯 𑀲𑀓𑁆𑀓𑀸 𑀅𑀭𑀳𑀢𑁆𑀢𑀁 𑀧𑀢𑁆𑀢𑀼𑀦𑁆𑀢𑀺 𑀅𑀢𑁆𑀣𑁄.
𑀆𑀭𑀓𑀸𑀯𑀸𑀢𑀺 𑀤𑀽𑀭𑁂𑀬𑁂𑀯. 𑀦 𑀢𑁂𑀦 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀊𑀦𑀢𑁆𑀢𑀁 𑀯𑀸 𑀧𑀽𑀭𑀢𑁆𑀢𑀁 𑀯𑀸𑀢𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑁂𑀧𑀺 𑀓𑀧𑁆𑀧𑁂 𑀩𑀼𑀤𑁆𑀥𑁂𑀲𑀼 𑀅𑀦𑀼𑀧𑁆𑀧𑀦𑁆𑀦𑁂𑀲𑀼 𑀏𑀓𑀲𑀢𑁆𑀢𑁄𑀧𑀺 𑀧𑀭𑀺𑀦𑀺𑀩𑁆𑀩𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀢𑀤𑀸𑀧𑀺 ‘‘𑀢𑀼𑀘𑁆𑀙𑀸 𑀦𑀺𑀩𑁆𑀩𑀸𑀦𑀥𑀸𑀢𑀽’’𑀢𑀺 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁. 𑀩𑀼𑀤𑁆𑀥𑀓𑀸𑀮𑁂 𑀘 𑀧𑀦 𑀏𑀓𑁂𑀓𑀲𑁆𑀫𑀺𑀁 𑀲𑀫𑀸𑀕𑀫𑁂 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀧𑀺 𑀲𑀢𑁆𑀢𑀸 𑀅𑀫𑀢𑀁 𑀆𑀭𑀸𑀥𑁂𑀦𑁆𑀢𑀺, 𑀢𑀤𑀸𑀧𑀺 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁 𑁋 ‘‘𑀧𑀽𑀭𑀸 𑀦𑀺𑀩𑁆𑀩𑀸𑀦𑀥𑀸𑀢𑀽’’𑀢𑀺.
𑁧𑁦. 𑀉𑀧𑁄𑀲𑀣𑀲𑀼𑀢𑁆𑀢𑀯𑀡𑁆𑀡𑀦𑀸
𑁨𑁦. 𑀤𑀲𑀫𑁂 𑀦𑀺𑀲𑀺𑀦𑁆𑀦𑁄 𑀳𑁄𑀢𑀻𑀢𑀺 𑀉𑀧𑁄𑀲𑀣𑀓𑀭𑀡𑀢𑁆𑀣𑀸𑀬 𑀉𑀧𑀸𑀲𑀺𑀓𑀸𑀬 𑀭𑀢𑀦𑀧𑀸𑀲𑀸𑀤𑁂 𑀦𑀺𑀲𑀺𑀦𑁆𑀦𑁄. 𑀦𑀺𑀲𑀚𑁆𑀚 𑀧𑀦 𑀪𑀺𑀓𑁆𑀔𑀽𑀦𑀁 𑀘𑀺𑀢𑁆𑀢𑀸𑀦𑀺 𑀑𑀮𑁄𑀓𑁂𑀦𑁆𑀢𑁄 𑀏𑀓𑀁 𑀤𑀼𑀲𑁆𑀲𑀻𑀮𑀧𑀼𑀕𑁆𑀕𑀮𑀁 𑀤𑀺𑀲𑁆𑀯𑀸 ‘‘𑀲𑀘𑀸𑀳𑀁 𑀇𑀫𑀲𑁆𑀫𑀺𑀁 𑀧𑀼𑀕𑁆𑀕𑀮𑁂 𑀦𑀺𑀲𑀺𑀦𑁆𑀦𑁂𑀬𑁂𑀯 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺𑀲𑁆𑀲𑀸𑀫𑀺, 𑀲𑀢𑁆𑀢𑀥𑀸 𑀢𑀲𑁆𑀲 𑀫𑀼𑀤𑁆𑀥𑀸 𑀨𑀮𑀺𑀲𑁆𑀲𑀢𑀻’’𑀢𑀺 𑀢𑀲𑁆𑀲 𑀅𑀦𑀼𑀓𑀫𑁆𑀧𑀸𑀬 𑀢𑀼𑀡𑁆𑀳𑀻𑀬𑁂𑀯 𑀅𑀳𑁄𑀲𑀺. 𑀅𑀪𑀺𑀓𑁆𑀓𑀦𑁆𑀢𑀸𑀢𑀺 𑀅𑀢𑀺𑀓𑁆𑀓𑀦𑁆𑀢𑀸 𑀧𑀭𑀺𑀓𑁆𑀔𑀻𑀡𑀸. 𑀉𑀤𑁆𑀥𑀲𑁆𑀢𑁂 𑀅𑀭𑀼𑀡𑁂𑀢𑀺 𑀉𑀕𑁆𑀕𑀢𑁂 𑀅𑀭𑀼𑀡𑀲𑀻𑀲𑁂. 𑀦𑀦𑁆𑀤𑀺𑀫𑀼𑀔𑀺𑀬𑀸𑀢𑀺 𑀢𑀼𑀝𑁆𑀞𑀫𑀼𑀔𑀺𑀬𑀸. 𑀅𑀧𑀭𑀺𑀲𑀼𑀤𑁆𑀥𑀸, 𑀆𑀦𑀦𑁆𑀤, 𑀧𑀭𑀺𑀲𑀸𑀢𑀺 ‘‘𑀅𑀲𑀼𑀓𑀧𑀼𑀕𑁆𑀕𑀮𑁄 𑀅𑀧𑀭𑀺𑀲𑀼𑀤𑁆𑀥𑁄’’𑀢𑀺 𑀅𑀯𑀢𑁆𑀯𑀸 ‘‘𑀅𑀧𑀭𑀺𑀲𑀼𑀤𑁆𑀥𑀸, 𑀆𑀦𑀦𑁆𑀤, 𑀧𑀭𑀺𑀲𑀸’’𑀢𑀺 𑀆𑀳. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.
𑀫𑀳𑀸𑀯𑀕𑁆𑀕𑁄 𑀤𑀼𑀢𑀺𑀬𑁄.
𑁩. 𑀕𑀳𑀧𑀢𑀺𑀯𑀕𑁆𑀕𑁄
𑁧. 𑀧𑀞𑀫𑀉𑀕𑁆𑀕𑀲𑀼𑀢𑁆𑀢𑀯𑀡𑁆𑀡𑀦𑀸
𑁨𑁧. 𑀢𑀢𑀺𑀬𑀲𑁆𑀲 𑀧𑀞𑀫𑁂 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀻𑀢𑀺 𑀢𑀲𑁆𑀲 𑀓𑀺𑀭 𑀖𑀭𑁂 𑀧𑀜𑁆𑀘𑀦𑁆𑀦𑀁 𑀪𑀺𑀓𑁆𑀔𑀼𑀲𑀢𑀸𑀦𑀁 𑀧𑀜𑁆𑀘 𑀆𑀲𑀦𑀲𑀢𑀸𑀦𑀺 𑀦𑀺𑀘𑁆𑀘𑀁 𑀧𑀜𑁆𑀜𑀢𑁆𑀢𑀸𑀦𑁂𑀯 𑀳𑁄𑀦𑁆𑀢𑀺, 𑀢𑁂𑀲𑀼 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀲𑀦𑁂 𑀦𑀺𑀲𑀻𑀤𑀺. 𑀢𑀁 𑀲𑀼𑀡𑀸𑀳𑀻𑀢𑀺 𑀢𑁂 𑀲𑀼𑀡𑀸𑀳𑀺, 𑀢𑀁 𑀯𑀸 𑀅𑀝𑁆𑀞𑀯𑀺𑀥𑀁 𑀅𑀘𑁆𑀙𑀭𑀺𑀬𑀥𑀫𑁆𑀫𑀁 𑀲𑀼𑀡𑀸𑀳𑀺. 𑀘𑀺𑀢𑁆𑀢𑀁 𑀧𑀲𑀻𑀤𑀻𑀢𑀺 ‘‘𑀩𑀼𑀤𑁆𑀥𑁄 𑀦𑀼 𑀔𑁄 𑀦 𑀩𑀼𑀤𑁆𑀥𑁄 𑀦𑀼 𑀔𑁄’’𑀢𑀺 𑀯𑀺𑀢𑀓𑁆𑀓𑀫𑀢𑁆𑀢𑀫𑁆𑀧𑀺 𑀦 𑀉𑀧𑁆𑀧𑀚𑁆𑀚𑀺, 𑀅𑀬𑀫𑁂𑀯 𑀩𑀼𑀤𑁆𑀥𑁄𑀢𑀺 𑀘𑀺𑀢𑁆𑀢𑀼𑀧𑁆𑀧𑀸𑀤𑁄 𑀧𑀲𑀦𑁆𑀦𑁄 𑀅𑀦𑀸𑀯𑀺𑀮𑁄 𑀅𑀳𑁄𑀲𑀺. 𑀲𑀓𑀸𑀦𑀺 𑀯𑀸 𑀜𑀸𑀢𑀺𑀓𑀼𑀮𑀸𑀦𑀻𑀢𑀺 𑀅𑀢𑁆𑀢𑀦𑁄 𑀬𑀸𑀧𑀦𑀫𑀢𑁆𑀢𑀁 𑀥𑀦𑀁 𑀕𑀳𑁂𑀢𑁆𑀯𑀸 𑀜𑀸𑀢𑀺𑀖𑀭𑀸𑀦𑀺 𑀕𑀘𑁆𑀙𑀢𑀼. 𑀓𑀲𑁆𑀲 𑀯𑁄 𑀤𑀫𑁆𑀫𑀻𑀢𑀺 𑀓𑀢𑀭𑀧𑀼𑀭𑀺𑀲𑀲𑁆𑀲 𑀢𑀼𑀫𑁆𑀳𑁂 𑀤𑀤𑀸𑀫𑀺, 𑀆𑀭𑁄𑀘𑁂𑀣 𑀫𑁂 𑀅𑀢𑁆𑀢𑀦𑁄 𑀅𑀥𑀺𑀧𑁆𑀧𑀸𑀬𑀁. 𑀅𑀧𑁆𑀧𑀝𑀺𑀯𑀺𑀪𑀢𑁆𑀢𑀸𑀢𑀺 ‘‘𑀏𑀢𑁆𑀢𑀓𑀁 𑀤𑀲𑁆𑀲𑀸𑀫𑀺 𑀏𑀢𑁆𑀢𑀓𑀁 𑀦 𑀤𑀲𑁆𑀲𑀸𑀫𑀺, 𑀇𑀤𑀁 𑀤𑀲𑁆𑀲𑀸𑀫𑀺 𑀇𑀤𑀁 𑀦 𑀤𑀲𑁆𑀲𑀸𑀫𑀻’’𑀢𑀺 𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑁂𑀦𑁆𑀢𑁂𑀦 𑀳𑀺 𑀧𑀝𑀺𑀯𑀺𑀪𑀢𑁆𑀢𑀸 𑀦𑀸𑀫 𑀳𑁄𑀢𑀺, 𑀫𑀬𑁆𑀳𑀁 𑀧𑀦 𑀦 𑀏𑀯𑀁. 𑀅𑀣 𑀔𑁄 𑀲𑀗𑁆𑀖𑀺𑀓𑀸 𑀯𑀺𑀬 𑀕𑀡𑀲𑀦𑁆𑀢𑀓𑀸 𑀯𑀺𑀬 𑀘 𑀲𑀻𑀮𑀯𑀦𑁆𑀢𑁂𑀳𑀺 𑀲𑀤𑁆𑀥𑀺𑀁 𑀲𑀸𑀥𑀸𑀭𑀡𑀸𑀬𑁂𑀯. 𑀲𑀓𑁆𑀓𑀘𑁆𑀘𑀁𑀬𑁂𑀯 𑀧𑀬𑀺𑀭𑀼𑀧𑀸𑀲𑀸𑀫𑀻𑀢𑀺 𑀲𑀳𑀢𑁆𑀣𑀸 𑀉𑀧𑀝𑁆𑀞𑀳𑀸𑀫𑀺, 𑀘𑀺𑀢𑁆𑀢𑀻𑀓𑀸𑀭𑁂𑀦 𑀉𑀧𑀲𑀗𑁆𑀓𑀫𑀸𑀫𑀺.
𑀅𑀦𑀘𑁆𑀙𑀭𑀺𑀬𑀁 𑀔𑁄 𑀧𑀦 𑀫𑀁, 𑀪𑀦𑁆𑀢𑁂𑀢𑀺, 𑀪𑀦𑁆𑀢𑁂, 𑀬𑀁 𑀫𑀁 𑀤𑁂𑀯𑀢𑀸 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀯𑀁 𑀆𑀭𑁄𑀘𑁂𑀦𑁆𑀢𑀺, 𑀇𑀤𑀁 𑀦 𑀅𑀘𑁆𑀙𑀭𑀺𑀬𑀁. 𑀬𑀁 𑀧𑀦𑀸𑀳𑀁 𑀢𑀢𑁄𑀦𑀺𑀤𑀸𑀦𑀁 𑀘𑀺𑀢𑁆𑀢𑀲𑁆𑀲 𑀉𑀡𑁆𑀡𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀢𑀁 𑀏𑀯 𑀅𑀘𑁆𑀙𑀭𑀺𑀬𑀦𑁆𑀢𑀺 𑀯𑀤𑀢𑀺. 𑀲𑀸𑀥𑀼 𑀲𑀸𑀥𑀼, 𑀪𑀺𑀓𑁆𑀔𑀽𑀢𑀺 𑀏𑀢𑁆𑀣 𑀓𑀺𑀜𑁆𑀘𑀸𑀧𑀺 𑀪𑀺𑀓𑁆𑀔𑀼𑀁 𑀆𑀫𑀦𑁆𑀢𑁂𑀢𑀺, 𑀉𑀧𑀸𑀲𑀓𑀲𑁆𑀲𑁂𑀯 𑀧𑀦 𑀯𑁂𑀬𑁆𑀬𑀸𑀓𑀭𑀡𑀲𑀫𑁆𑀧𑀳𑀁𑀲𑀦𑁂 𑀏𑀲 𑀲𑀸𑀥𑀼𑀓𑀸𑀭𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.
𑁨. 𑀤𑀼𑀢𑀺𑀬𑀉𑀕𑁆𑀕𑀲𑀼𑀢𑁆𑀢𑀯𑀡𑁆𑀡𑀦𑀸
𑁨𑁨. 𑀤𑀼𑀢𑀺𑀬𑁂 𑀦𑀸𑀕𑀯𑀦𑁂𑀢𑀺 𑀢𑀲𑁆𑀲 𑀓𑀺𑀭 𑀲𑁂𑀝𑁆𑀞𑀺𑀦𑁄 𑀦𑀸𑀕𑀯𑀦𑀁 𑀦𑀸𑀫 𑀉𑀬𑁆𑀬𑀸𑀦𑀁, 𑀲𑁄 𑀢𑀢𑁆𑀣 𑀧𑀼𑀭𑁂𑀪𑀢𑁆𑀢𑀁 𑀕𑀦𑁆𑀥𑀫𑀸𑀮𑀸𑀤𑀻𑀦𑀺 𑀕𑀸𑀳𑀸𑀧𑁂𑀢𑁆𑀯𑀸 𑀉𑀬𑁆𑀬𑀸𑀦𑀓𑀻𑀴𑀺𑀓𑀁 𑀓𑀻𑀴𑀺𑀢𑀼𑀓𑀸𑀫𑁄 𑀕𑀦𑁆𑀢𑁆𑀯𑀸 𑀧𑀭𑀺𑀘𑀸𑀭𑀺𑀬𑀫𑀸𑀦𑁄 𑀪𑀕𑀯𑀦𑁆𑀢𑀁 𑀅𑀤𑁆𑀤𑀲. 𑀲𑀳 𑀤𑀲𑁆𑀲𑀦𑁂𑀦𑁂𑀯𑀲𑁆𑀲 𑀧𑀼𑀭𑀺𑀫𑀦𑀬𑁂𑀦𑁂𑀯 𑀘𑀺𑀢𑁆𑀢𑀁 𑀧𑀲𑀻𑀤𑀺, 𑀲𑀼𑀭𑀸𑀧𑀸𑀦𑁂𑀦 𑀘 𑀉𑀧𑁆𑀧𑀦𑁆𑀦𑀫𑀦𑁆𑀤𑁄 𑀢𑀗𑁆𑀔𑀡𑀁𑀬𑁂𑀯 𑀧𑀳𑀻𑀬𑀺. 𑀢𑀁 𑀲𑀦𑁆𑀥𑀸𑀬𑁂𑀯𑀫𑀸𑀳. 𑀑𑀡𑁄𑀚𑁂𑀲𑀺𑀦𑁆𑀢𑀺 𑀉𑀤𑀓𑀁 𑀳𑀢𑁆𑀣𑁂 𑀧𑀸𑀢𑁂𑀢𑁆𑀯𑀸 𑀅𑀤𑀸𑀲𑀺𑀁. 𑀅𑀲𑀼𑀓𑁄𑀢𑀺 𑀅𑀫𑀼𑀓𑁄. 𑀲𑀫𑀘𑀺𑀢𑁆𑀢𑁄𑀯 𑀤𑁂𑀫𑀻𑀢𑀺 ‘‘𑀇𑀫𑀲𑁆𑀲 𑀣𑁄𑀓𑀁, 𑀇𑀫𑀲𑁆𑀲 𑀩𑀳𑀼𑀓’’𑀦𑁆𑀢𑀺 𑀏𑀯𑀁 𑀘𑀺𑀢𑁆𑀢𑀦𑀸𑀦𑀢𑁆𑀢𑀁 𑀦 𑀓𑀭𑁄𑀫𑀺, 𑀤𑁂𑀬𑁆𑀬𑀥𑀫𑁆𑀫𑀁 𑀧𑀦 𑀏𑀓𑀲𑀤𑀺𑀲𑀁 𑀓𑀭𑁄𑀫𑀻𑀢𑀺 𑀤𑀲𑁆𑀲𑁂𑀢𑀺. 𑀆𑀭𑁄𑀘𑁂𑀦𑁆𑀢𑀻𑀢𑀺 𑀆𑀓𑀸𑀲𑁂 𑀞𑀢𑁆𑀯𑀸 𑀆𑀭𑁄𑀘𑁂𑀦𑁆𑀢𑀺. 𑀦𑀢𑁆𑀣𑀺 𑀢𑀁 𑀲𑀁𑀬𑁄𑀚𑀦𑀦𑁆𑀢𑀺 𑀇𑀫𑀺𑀦𑀸 𑀉𑀧𑀸𑀲𑀓𑁄 𑀅𑀢𑁆𑀢𑀦𑁄 𑀅𑀦𑀸𑀕𑀸𑀫𑀺𑀨𑀮𑀁 𑀩𑁆𑀬𑀸𑀓𑀭𑁄𑀢𑀺.
𑁩. 𑀧𑀞𑀫𑀳𑀢𑁆𑀣𑀓𑀲𑀼𑀢𑁆𑀢𑀯𑀡𑁆𑀡𑀦𑀸
𑁨𑁩. 𑀢𑀢𑀺𑀬𑁂 𑀳𑀢𑁆𑀣𑀓𑁄 𑀆𑀴𑀯𑀓𑁄𑀢𑀺 𑀪𑀕𑀯𑀢𑀸 𑀆𑀴𑀯𑀓𑀬𑀓𑁆𑀔𑀲𑁆𑀲 𑀳𑀢𑁆𑀣𑀢𑁄 𑀳𑀢𑁆𑀣𑁂𑀳𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑀢𑁆𑀢𑀸 𑀳𑀢𑁆𑀣𑀓𑁄𑀢𑀺 𑀮𑀤𑁆𑀥𑀦𑀸𑀫𑁄 𑀭𑀸𑀚𑀓𑀼𑀫𑀸𑀭𑁄. 𑀲𑀻𑀮𑀯𑀸𑀢𑀺 𑀧𑀜𑁆𑀘𑀲𑀻𑀮𑀤𑀲𑀲𑀻𑀮𑁂𑀦 𑀲𑀻𑀮𑀯𑀸. 𑀘𑀸𑀕𑀯𑀸𑀢𑀺 𑀘𑀸𑀕𑀲𑀫𑁆𑀧𑀦𑁆𑀦𑁄. 𑀓𑀘𑁆𑀘𑀺𑀢𑁆𑀣, 𑀪𑀦𑁆𑀢𑁂𑀢𑀺, 𑀪𑀦𑁆𑀢𑁂, 𑀓𑀘𑁆𑀘𑀺 𑀏𑀢𑁆𑀣 𑀪𑀕𑀯𑀢𑁄 𑀩𑁆𑀬𑀸𑀓𑀭𑀡𑀝𑁆𑀞𑀸𑀦𑁂. 𑀅𑀧𑁆𑀧𑀺𑀘𑁆𑀙𑁄𑀢𑀺 𑀅𑀥𑀺𑀕𑀫𑀧𑁆𑀧𑀺𑀘𑁆𑀙𑀢𑀸𑀬 𑀅𑀧𑁆𑀧𑀺𑀘𑁆𑀙𑁄.
𑁪. 𑀤𑀼𑀢𑀺𑀬𑀳𑀢𑁆𑀣𑀓𑀲𑀼𑀢𑁆𑀢𑀯𑀡𑁆𑀡𑀦𑀸
𑁨𑁪. 𑀘𑀢𑀼𑀢𑁆𑀣𑁂 𑀧𑀜𑁆𑀘𑀫𑀢𑁆𑀢𑁂𑀳𑀺 𑀉𑀧𑀸𑀲𑀓𑀲𑀢𑁂𑀳𑀻𑀢𑀺 𑀲𑁄𑀢𑀸𑀧𑀦𑁆𑀦𑀲𑀓𑀤𑀸𑀕𑀸𑀫𑀻𑀦𑀁𑀬𑁂𑀯 𑀅𑀭𑀺𑀬𑀲𑀸𑀯𑀓𑀉𑀧𑀸𑀲𑀓𑀸𑀦𑀁 𑀧𑀜𑁆𑀘𑀳𑀺 𑀲𑀢𑁂𑀳𑀺 𑀧𑀭𑀺𑀯𑀼𑀢𑁄 𑀪𑀼𑀢𑁆𑀢𑀧𑀸𑀢𑀭𑀸𑀲𑁄 𑀕𑀦𑁆𑀥𑀫𑀸𑀮𑀯𑀺𑀮𑁂𑀧𑁂𑀦𑀘𑀼𑀡𑁆𑀡𑀸𑀦𑀺 𑀕𑀳𑁂𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺. 𑀲𑀗𑁆𑀕𑀳𑀯𑀢𑁆𑀣𑀽𑀦𑀻𑀢𑀺 𑀲𑀗𑁆𑀕𑀡𑁆𑀳𑀦𑀓𑀸𑀭𑀡𑀸𑀦𑀺. 𑀢𑁂𑀳𑀸𑀳𑀦𑁆𑀢𑀺 𑀢𑁂𑀳𑀺 𑀅𑀳𑀁. 𑀢𑀁 𑀤𑀸𑀦𑁂𑀦 𑀲𑀗𑁆𑀕𑀡𑁆𑀳𑀸𑀫𑀻𑀢𑀺 𑀦𑀗𑁆𑀕𑀮𑀩𑀮𑀺𑀩𑀤𑁆𑀤𑀪𑀢𑁆𑀢𑀩𑀻𑀚𑀸𑀤𑀻𑀦𑀺 𑀘𑁂𑀯 𑀕𑀦𑁆𑀥𑀫𑀸𑀮𑀫𑀽𑀮𑀸𑀤𑀻𑀦𑀺 𑀘 𑀤𑀢𑁆𑀯𑀸 𑀲𑀗𑁆𑀕𑀡𑁆𑀳𑀸𑀫𑀺. 𑀧𑁂𑀬𑁆𑀬𑀯𑀚𑁆𑀚𑁂𑀦𑀸𑀢𑀺 𑀅𑀫𑁆𑀫, 𑀢𑀸𑀢, 𑀪𑀸𑀢𑀭, 𑀪𑀕𑀺𑀦𑀻𑀢𑀺𑀆𑀤𑀺𑀓𑁂𑀦 𑀓𑀡𑁆𑀡𑀲𑀼𑀔𑁂𑀦 𑀫𑀼𑀤𑀼𑀓𑁂𑀦 𑀧𑀺𑀬𑀯𑀘𑀦𑁂𑀦 𑀲𑀗𑁆𑀕𑀡𑁆𑀳𑀸𑀫𑀺. 𑀅𑀢𑁆𑀣𑀘𑀭𑀺𑀬𑀸𑀬𑀸𑀢𑀺 ‘‘𑀇𑀫𑀲𑁆𑀲 𑀤𑀸𑀦𑁂𑀦 𑀯𑀸 𑀧𑀺𑀬𑀯𑀘𑀦𑁂𑀦 𑀯𑀸 𑀓𑀺𑀘𑁆𑀘𑀁 𑀦𑀢𑁆𑀣𑀺, 𑀅𑀢𑁆𑀣𑀘𑀭𑀺𑀬𑀸𑀬 𑀲𑀗𑁆𑀕𑀡𑁆𑀳𑀺𑀢𑀩𑁆𑀩𑀬𑀼𑀢𑁆𑀢𑀓𑁄 𑀅𑀬’’𑀦𑁆𑀢𑀺 𑀜𑀢𑁆𑀯𑀸 𑀉𑀧𑁆𑀧𑀦𑁆𑀦𑀓𑀺𑀘𑁆𑀘𑀦𑀺𑀢𑁆𑀣𑀭𑀡𑀲𑀗𑁆𑀔𑀸𑀢𑀸𑀬 𑀅𑀢𑁆𑀣𑀘𑀭𑀺𑀬𑀸𑀬 𑀲𑀗𑁆𑀕𑀡𑁆𑀳𑀸𑀫𑀺. 𑀲𑀫𑀸𑀦𑀢𑁆𑀢𑀢𑀸𑀬𑀸𑀢𑀺 ‘‘𑀇𑀫𑀲𑁆𑀲 𑀤𑀸𑀦𑀸𑀤𑀻𑀳𑀺 𑀓𑀺𑀘𑁆𑀘𑀁 𑀦𑀢𑁆𑀣𑀺, 𑀲𑀫𑀸𑀦𑀢𑁆𑀢𑀢𑀸𑀬 𑀲𑀗𑁆𑀕𑀡𑁆𑀳𑀺𑀢𑀩𑁆𑀩𑁄 𑀅𑀬’’𑀦𑁆𑀢𑀺 𑀏𑀓𑀢𑁄 𑀔𑀸𑀤𑀦𑀧𑀺𑀯𑀦𑀦𑀺𑀲𑀚𑁆𑀚𑀸𑀤𑀻𑀳𑀺 𑀅𑀢𑁆𑀢𑀦𑀸 𑀲𑀫𑀸𑀦𑀁 𑀓𑀢𑁆𑀯𑀸 𑀲𑀗𑁆𑀕𑀡𑁆𑀳𑀸𑀫𑀺. 𑀤𑀮𑀺𑀤𑁆𑀤𑀲𑁆𑀲 𑀔𑁄 𑀦𑁄 𑀢𑀣𑀸 𑀲𑁄𑀢𑀩𑁆𑀩𑀁 𑀫𑀜𑁆𑀜𑀦𑁆𑀢𑀻𑀢𑀺 𑀤𑀮𑀺𑀤𑁆𑀤𑀲𑁆𑀲 𑀓𑀺𑀜𑁆𑀘𑀺 𑀤𑀸𑀢𑀼𑀁 𑀯𑀸 𑀓𑀸𑀢𑀼𑀁 𑀯𑀸 𑀅𑀲𑀓𑁆𑀓𑁄𑀦𑁆𑀢𑀲𑁆𑀲, 𑀬𑀣𑀸 𑀤𑀮𑀺𑀤𑁆𑀤𑀲𑁆𑀲 𑀦𑁄 𑀢𑀣𑀸 𑀲𑁄𑀢𑀩𑁆𑀩𑀁 𑀫𑀜𑁆𑀜𑀦𑁆𑀢𑀺, 𑀫𑀫 𑀧𑀦 𑀲𑁄𑀢𑀩𑁆𑀩𑀁 𑀫𑀜𑁆𑀜𑀦𑁆𑀢𑀺, 𑀤𑀺𑀦𑁆𑀦𑁄𑀯𑀸𑀤𑁂 𑀢𑀺𑀝𑁆𑀞𑀦𑁆𑀢𑀺, 𑀦 𑀫𑁂 𑀅𑀦𑀼𑀲𑀸𑀲𑀦𑀺𑀁 𑀅𑀢𑀺𑀓𑁆𑀓𑀫𑀺𑀢𑀩𑁆𑀩𑀁 𑀫𑀜𑁆𑀜𑀦𑁆𑀢𑀺. 𑀬𑁄𑀦𑀺 𑀔𑁄 𑀢𑁆𑀬𑀸𑀬𑀦𑁆𑀢𑀺 𑀉𑀧𑀸𑀬𑁄 𑀔𑁄 𑀢𑁂 𑀅𑀬𑀁. 𑀇𑀫𑁂𑀲𑀼 𑀧𑀦 𑀤𑁆𑀯𑀻𑀲𑀼𑀧𑀺 𑀲𑀼𑀢𑁆𑀢𑁂𑀲𑀼 𑀲𑀢𑁆𑀣𑀸𑀭𑀸 𑀲𑀻𑀮𑀘𑀸𑀕𑀧𑀜𑁆𑀜𑀸 𑀫𑀺𑀲𑁆𑀲𑀓𑀸 𑀓𑀣𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.
𑁫-𑁬. 𑀫𑀳𑀸𑀦𑀸𑀫𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸
𑁨𑁫-𑁨𑁬. 𑀧𑀜𑁆𑀘𑀫𑁂 𑀅𑀢𑁆𑀣𑀽𑀧𑀧𑀭𑀺𑀓𑁆𑀔𑀺𑀢𑀸 𑀳𑁄𑀢𑀻𑀢𑀺 𑀅𑀢𑁆𑀣𑀸𑀦𑀢𑁆𑀣𑀁 𑀓𑀸𑀭𑀡𑀸𑀓𑀸𑀭𑀡𑀁 𑀉𑀧𑀧𑀭𑀺𑀓𑁆𑀔𑀺𑀢𑀸 𑀳𑁄𑀢𑀺. 𑀙𑀝𑁆𑀞𑁂 𑀲𑀤𑁆𑀥𑀸𑀲𑀻𑀮𑀘𑀸𑀕𑀸 𑀫𑀺𑀲𑁆𑀲𑀓𑀸 𑀓𑀣𑀺𑀢𑀸.
𑁭. 𑀧𑀞𑀫𑀩𑀮𑀲𑀼𑀢𑁆𑀢𑀯𑀡𑁆𑀡𑀦𑀸
𑁨𑁭. 𑀲𑀢𑁆𑀢𑀫𑁂 𑀉𑀚𑁆𑀛𑀢𑁆𑀢𑀺𑀩𑀮𑀸𑀢𑀺 𑀉𑀚𑁆𑀛𑀸𑀦𑀩𑀮𑀸. 𑀩𑀸𑀮𑀸𑀦𑀜𑁆𑀳𑀺 ‘‘𑀬𑀁 𑀅𑀲𑀼𑀓𑁄 𑀇𑀤𑀜𑁆𑀘𑀺𑀤𑀜𑁆𑀘 𑀆𑀳, 𑀫𑀁 𑀲𑁄 𑀆𑀳, 𑀦 𑀅𑀜𑁆𑀜’’𑀦𑁆𑀢𑀺 𑀏𑀯𑀁 𑀉𑀚𑁆𑀛𑀸𑀦𑀫𑁂𑀯 𑀩𑀮𑀁. 𑀦𑀺𑀚𑁆𑀛𑀢𑁆𑀢𑀺𑀩𑀮𑀸𑀢𑀺 ‘‘𑀦 𑀇𑀤𑀁 𑀏𑀯𑀁, 𑀏𑀯𑀁 𑀦𑀸𑀫𑁂𑀢’’𑀦𑁆𑀢𑀺 𑀅𑀢𑁆𑀣𑀸𑀦𑀢𑁆𑀣𑀦𑀺𑀚𑁆𑀛𑀸𑀧𑀦𑀁𑀬𑁂𑀯 𑀩𑀮𑀁. 𑀧𑀝𑀺𑀲𑀗𑁆𑀔𑀸𑀦𑀩𑀮𑀸𑀢𑀺 𑀧𑀘𑁆𑀘𑀯𑁂𑀓𑁆𑀔𑀡𑀩𑀮𑀸. 𑀔𑀦𑁆𑀢𑀺𑀩𑀮𑀸𑀢𑀺 𑀅𑀥𑀺𑀯𑀸𑀲𑀦𑀩𑀮𑀸.
𑁮. 𑀤𑀼𑀢𑀺𑀬𑀩𑀮𑀲𑀼𑀢𑁆𑀢𑀯𑀡𑁆𑀡𑀦𑀸
𑁨𑁮. 𑀅𑀝𑁆𑀞𑀫𑁂 𑀩𑀮𑀸𑀦𑀻𑀢𑀺 𑀜𑀸𑀡𑀩𑀮𑀸𑀦𑀺. 𑀆𑀲𑀯𑀸𑀦𑀁 𑀔𑀬𑀁 𑀧𑀝𑀺𑀚𑀸𑀦𑀸𑀢𑀻𑀢𑀺 𑀅𑀭𑀳𑀢𑁆𑀢𑀁 𑀧𑀝𑀺𑀚𑀸𑀦𑀸𑀢𑀺. 𑀅𑀦𑀺𑀘𑁆𑀘𑀢𑁄𑀢𑀺 𑀳𑀼𑀢𑁆𑀯𑀸 𑀅𑀪𑀸𑀯𑀸𑀓𑀸𑀭𑁂𑀦. 𑀬𑀣𑀸𑀪𑀽𑀢𑀦𑁆𑀢𑀺 𑀬𑀣𑀸𑀲𑀪𑀸𑀯𑀢𑁄. 𑀲𑀫𑁆𑀫𑀧𑁆𑀧𑀜𑁆𑀜𑀸𑀬𑀸𑀢𑀺 𑀲𑀳𑀯𑀺𑀧𑀲𑁆𑀲𑀦𑀸𑀬 𑀫𑀕𑁆𑀕𑀧𑀜𑁆𑀜𑀸𑀬. 𑀅𑀗𑁆𑀕𑀸𑀭𑀓𑀸𑀲𑀽𑀧𑀫𑀸𑀢𑀺 𑀲𑀦𑁆𑀢𑀸𑀧𑀦𑀝𑁆𑀞𑁂𑀦 𑀅𑀗𑁆𑀕𑀸𑀭𑀓𑀸𑀲𑀼𑀬𑀸 𑀉𑀧𑀫𑀺𑀢𑀸 𑀇𑀫𑁂 𑀓𑀸𑀫𑀸𑀢𑀺. 𑀯𑀺𑀯𑁂𑀓𑀦𑀺𑀦𑁆𑀦𑀦𑁆𑀢𑀺 𑀨𑀮𑀲𑀫𑀸𑀧𑀢𑁆𑀢𑀺𑀯𑀲𑁂𑀦 𑀦𑀺𑀩𑁆𑀩𑀸𑀦𑀦𑀺𑀦𑁆𑀦𑀁. 𑀯𑀺𑀯𑁂𑀓𑀝𑁆𑀞𑀦𑁆𑀢𑀺 𑀓𑀺𑀮𑁂𑀲𑁂𑀳𑀺 𑀯𑀚𑁆𑀚𑀺𑀢𑀁 𑀤𑀽𑀭𑀻𑀪𑀽𑀢𑀁 𑀯𑀸. 𑀦𑁂𑀓𑁆𑀔𑀫𑁆𑀫𑀸𑀪𑀺𑀭𑀢𑀦𑁆𑀢𑀺 𑀧𑀩𑁆𑀩𑀚𑁆𑀚𑀸𑀪𑀺𑀭𑀢𑀁. 𑀩𑁆𑀬𑀦𑁆𑀢𑀺𑀪𑀽𑀢𑀦𑁆𑀢𑀺 𑀯𑀺𑀕𑀢𑀦𑁆𑀢𑀪𑀽𑀢𑀁 𑀏𑀓𑀤𑁂𑀲𑁂𑀦𑀸𑀧𑀺 𑀅𑀦𑀮𑁆𑀮𑀻𑀦𑀁 𑀯𑀺𑀲𑀁𑀬𑀼𑀢𑁆𑀢𑀁 𑀯𑀺𑀲𑀁𑀲𑀝𑁆𑀞𑀁. 𑀆𑀲𑀯𑀝𑁆𑀞𑀸𑀦𑀺𑀬𑁂𑀳𑀻𑀢𑀺 𑀲𑀫𑁆𑀧𑀬𑁄𑀕𑀯𑀲𑁂𑀦 𑀆𑀲𑀯𑀸𑀦𑀁 𑀓𑀸𑀭𑀡𑀪𑀽𑀢𑁂𑀳𑀺, 𑀓𑀺𑀮𑁂𑀲𑀥𑀫𑁆𑀫𑁂𑀳𑀻𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀩𑁆𑀬𑀦𑁆𑀢𑀺𑀪𑀽𑀢𑀦𑁆𑀢𑀺 𑀯𑀺𑀕𑀢𑀯𑀸𑀬𑀦𑁆𑀢𑀺 𑀅𑀢𑁆𑀣𑁄. 𑀓𑀼𑀢𑁄? 𑀲𑀩𑁆𑀩𑀲𑁄 𑀆𑀲𑀯𑀝𑁆𑀞𑀸𑀦𑀺𑀬𑁂𑀳𑀺 𑀥𑀫𑁆𑀫𑁂𑀳𑀺, 𑀲𑀩𑁆𑀩𑁂𑀳𑀺 𑀢𑁂𑀪𑀽𑀫𑀓𑀥𑀫𑁆𑀫𑁂𑀳𑀻𑀢𑀺 𑀅𑀢𑁆𑀣𑁄. 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀅𑀭𑀺𑀬𑀫𑀕𑁆𑀕𑁄 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑁄 𑀓𑀣𑀺𑀢𑁄.
𑁯. 𑀅𑀓𑁆𑀔𑀡𑀲𑀼𑀢𑁆𑀢𑀯𑀡𑁆𑀡𑀦𑀸
𑁨𑁯. 𑀦𑀯𑀫𑁂 𑀔𑀡𑁂 𑀓𑀺𑀘𑁆𑀘𑀸𑀦𑀺 𑀓𑀭𑁄𑀢𑀻𑀢𑀺 𑀔𑀡𑀓𑀺𑀘𑁆𑀘𑁄, 𑀑𑀓𑀸𑀲𑀁 𑀮𑀪𑀺𑀢𑁆𑀯𑀸𑀯 𑀓𑀺𑀘𑁆𑀘𑀸𑀦𑀺 𑀓𑀭𑁄𑀢𑀻𑀢𑀺 𑀅𑀢𑁆𑀣𑁄. 𑀥𑀫𑁆𑀫𑁄𑀢𑀺 𑀘𑀢𑀼𑀲𑀘𑁆𑀘𑀥𑀫𑁆𑀫𑁄. 𑀑𑀧𑀲𑀫𑀺𑀓𑁄𑀢𑀺 𑀓𑀺𑀮𑁂𑀲𑀽𑀧𑀲𑀫𑀸𑀯𑀳𑁄. 𑀧𑀭𑀺𑀦𑀺𑀩𑁆𑀩𑀸𑀬𑀺𑀓𑁄𑀢𑀺 𑀓𑀺𑀮𑁂𑀲𑀧𑀭𑀺𑀦𑀺𑀩𑁆𑀩𑀸𑀦𑀓𑀭𑁄. 𑀘𑀢𑀼𑀫𑀕𑁆𑀕𑀜𑀸𑀡𑀲𑀗𑁆𑀔𑀸𑀢𑀁 𑀲𑀫𑁆𑀩𑁄𑀥𑀺𑀁 𑀕𑀘𑁆𑀙𑀢𑀺 𑀲𑀫𑁆𑀧𑀸𑀧𑀼𑀡𑀸𑀢𑀻𑀢𑀺 𑀲𑀫𑁆𑀩𑁄𑀥𑀕𑀸𑀫𑀻. 𑀤𑀻𑀖𑀸𑀬𑀼𑀓𑀁 𑀤𑁂𑀯𑀦𑀺𑀓𑀸𑀬𑀦𑁆𑀢𑀺 𑀇𑀤𑀁 𑀅𑀲𑀜𑁆𑀜𑀁 𑀤𑁂𑀯𑀦𑀺𑀓𑀸𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀅𑀯𑀺𑀜𑁆𑀜𑀸𑀢𑀸𑀭𑁂𑀲𑀽𑀢𑀺 𑀅𑀢𑀺𑀯𑀺𑀬 𑀅𑀯𑀺𑀜𑁆𑀜𑀽𑀲𑀼.
𑀲𑀼𑀧𑁆𑀧𑀯𑁂𑀤𑀺𑀢𑁂𑀢𑀺 𑀲𑀼𑀓𑀣𑀺𑀢𑁂. 𑀅𑀦𑁆𑀢𑀭𑀸𑀬𑀺𑀓𑀸𑀢𑀺 𑀅𑀦𑁆𑀢𑀭𑀸𑀬𑀓𑀭𑀸. 𑀔𑀡𑁄 𑀯𑁂 𑀫𑀸 𑀉𑀧𑀘𑁆𑀘𑀕𑀸𑀢𑀺 𑀅𑀬𑀁 𑀮𑀤𑁆𑀥𑁄 𑀔𑀡𑁄 𑀫𑀸 𑀅𑀢𑀺𑀓𑁆𑀓𑀫𑀺. 𑀇𑀥 𑀘𑁂𑀯 𑀦𑀁 𑀯𑀺𑀭𑀸𑀥𑁂𑀢𑀻𑀢𑀺 𑀲𑀘𑁂 𑀓𑁄𑀘𑀺 𑀧𑀫𑀢𑁆𑀢𑀘𑀸𑀭𑀻 𑀇𑀥 𑀇𑀫𑀁 𑀔𑀡𑀁 𑀮𑀪𑀺𑀢𑁆𑀯𑀸𑀧𑀺 𑀲𑀤𑁆𑀥𑀫𑁆𑀫𑀲𑁆𑀲 𑀦𑀺𑀬𑀸𑀫𑀢𑀁 𑀅𑀭𑀺𑀬𑀫𑀕𑁆𑀕𑀁 𑀯𑀺𑀭𑀸𑀥𑁂𑀢𑀺 𑀦 𑀲𑀫𑁆𑀧𑀸𑀤𑁂𑀢𑀺. 𑀅𑀢𑀻𑀢𑀢𑁆𑀣𑁄𑀢𑀺 𑀳𑀸𑀧𑀺𑀢𑀢𑁆𑀣𑁄. 𑀘𑀺𑀭𑀢𑁆𑀢𑀁 𑀅𑀦𑀼𑀢𑀧𑀺𑀲𑁆𑀲𑀢𑀻𑀢𑀺 𑀘𑀺𑀭𑀭𑀢𑁆𑀢𑀁 𑀲𑁄𑀘𑀺𑀲𑁆𑀲𑀢𑀺. 𑀬𑀣𑀸 𑀳𑀺 ‘‘𑀅𑀲𑀼𑀓𑀝𑁆𑀞𑀸𑀦𑁂 𑀪𑀡𑁆𑀟𑀁 𑀲𑀫𑀼𑀧𑁆𑀧𑀦𑁆𑀦’’𑀦𑁆𑀢𑀺 𑀲𑀼𑀢𑁆𑀯𑀸 𑀏𑀓𑁄 𑀯𑀸𑀡𑀺𑀚𑁄 𑀦 𑀕𑀘𑁆𑀙𑁂𑀬𑁆𑀬, 𑀅𑀜𑁆𑀜𑁂 𑀕𑀦𑁆𑀢𑁆𑀯𑀸 𑀕𑀡𑁆𑀳𑁂𑀬𑁆𑀬𑀼𑀁, 𑀢𑁂𑀲𑀁 𑀢𑀁 𑀅𑀝𑁆𑀞𑀕𑀼𑀡𑀫𑁆𑀧𑀺 𑀤𑀲𑀕𑀼𑀡𑀫𑁆𑀧𑀺 𑀪𑀯𑁂𑀬𑁆𑀬. 𑀅𑀣 𑀇𑀢𑀭𑁄 ‘‘𑀫𑀫 𑀅𑀢𑁆𑀣𑁄 𑀅𑀢𑀺𑀓𑁆𑀓𑀦𑁆𑀢𑁄’’𑀢𑀺 𑀅𑀦𑀼𑀢𑀧𑁂𑀬𑁆𑀬, 𑀏𑀯𑀁 𑀬𑁄 𑀇𑀥 𑀔𑀡𑀁 𑀮𑀪𑀺𑀢𑁆𑀯𑀸 𑀅𑀧𑁆𑀧𑀝𑀺𑀧𑀚𑁆𑀚𑀦𑁆𑀢𑁄 𑀲𑀤𑁆𑀥𑀫𑁆𑀫𑀲𑁆𑀲 𑀦𑀺𑀬𑀸𑀫𑀢𑀁 𑀯𑀺𑀭𑀸𑀥𑁂𑀢𑀺, 𑀲𑁄 𑀅𑀬𑀁 𑀯𑀸𑀡𑀺𑀚𑁄𑀯 𑀅𑀢𑀻𑀢𑀢𑁆𑀣𑁄 𑀘𑀺𑀭𑀁 𑀅𑀦𑀼𑀢𑀧𑀺𑀲𑁆𑀲𑀢𑀺 𑀲𑁄𑀘𑀺𑀲𑁆𑀲𑀢𑀺. 𑀓𑀺𑀜𑁆𑀘 𑀪𑀺𑀬𑁆𑀬𑁄 𑀅𑀯𑀺𑀚𑁆𑀚𑀸𑀦𑀺𑀯𑀼𑀢𑁄𑀢𑀺 𑀢𑀣𑀸. 𑀧𑀘𑁆𑀘𑀯𑀺𑀤𑀼𑀦𑁆𑀢𑀺 𑀧𑀝𑀺𑀯𑀺𑀚𑁆𑀛𑀺𑀁𑀲𑀼. 𑀲𑀁𑀯𑀭𑀸𑀢𑀺 𑀲𑀻𑀮𑀲𑀁𑀯𑀭𑀸. 𑀫𑀸𑀭𑀥𑁂𑀬𑁆𑀬𑀧𑀭𑀸𑀦𑀼𑀕𑁂𑀢𑀺 𑀫𑀸𑀭𑀥𑁂𑀬𑁆𑀬𑀲𑀗𑁆𑀔𑀸𑀢𑀁 𑀲𑀁𑀲𑀸𑀭𑀁 𑀅𑀦𑀼𑀕𑀢𑁂. 𑀧𑀸𑀭𑀗𑁆𑀕𑀢𑀸𑀢𑀺 𑀦𑀺𑀩𑁆𑀩𑀸𑀦𑀁 𑀕𑀢𑀸. 𑀬𑁂 𑀧𑀢𑁆𑀢𑀸 𑀆𑀲𑀯𑀓𑁆𑀔𑀬𑀦𑁆𑀢𑀺 𑀬𑁂 𑀅𑀭𑀳𑀢𑁆𑀢𑀁 𑀧𑀢𑁆𑀢𑀸. 𑀏𑀯𑀫𑀺𑀥 𑀕𑀸𑀣𑀸𑀲𑀼 𑀯𑀝𑁆𑀝𑀯𑀺𑀯𑀝𑁆𑀝𑀁 𑀓𑀣𑀺𑀢𑀁.
𑁧𑁦. 𑀅𑀦𑀼𑀭𑀼𑀤𑁆𑀥𑀫𑀳𑀸𑀯𑀺𑀢𑀓𑁆𑀓𑀲𑀼𑀢𑁆𑀢𑀯𑀡𑁆𑀡𑀦𑀸
𑁩𑁦. 𑀤𑀲𑀫𑁂 𑀘𑁂𑀢𑀻𑀲𑀽𑀢𑀺 𑀘𑁂𑀢𑀺𑀦𑀸𑀫𑀓𑀸𑀦𑀁 𑀭𑀸𑀚𑀽𑀦𑀁 𑀦𑀺𑀯𑀸𑀲𑀝𑁆𑀞𑀸𑀦𑀢𑁆𑀢𑀸 𑀏𑀯𑀁𑀮𑀤𑁆𑀥𑀯𑁄𑀳𑀸𑀭𑁂 𑀭𑀝𑁆𑀞𑁂. 𑀧𑀸𑀘𑀻𑀦𑀯𑀁𑀲𑀤𑀸𑀬𑁂𑀢𑀺 𑀤𑀲𑀩𑀮𑀲𑁆𑀲 𑀯𑀲𑀦𑀝𑁆𑀞𑀸𑀦𑀢𑁄 𑀧𑀸𑀘𑀻𑀦𑀤𑀺𑀲𑀸𑀬 𑀞𑀺𑀢𑁂 𑀯𑀁𑀲𑀤𑀸𑀬𑁂 𑀦𑀻𑀮𑁄𑀪𑀸𑀲𑁂𑀳𑀺 𑀯𑁂𑀴𑀽𑀳𑀺 𑀲𑀜𑁆𑀙𑀦𑁆𑀦𑁂 𑀅𑀭𑀜𑁆𑀜𑁂. 𑀏𑀯𑀁 𑀘𑁂𑀢𑀲𑁄 𑀧𑀭𑀺𑀯𑀺𑀢𑀓𑁆𑀓𑁄 𑀉𑀤𑀧𑀸𑀤𑀻𑀢𑀺 𑀣𑁂𑀭𑁄 𑀓𑀺𑀭 𑀧𑀩𑁆𑀩𑀚𑀺𑀢𑁆𑀯𑀸 𑀧𑀞𑀫𑀅𑀦𑁆𑀢𑁄𑀯𑀲𑁆𑀲𑀫𑁆𑀳𑀺𑀬𑁂𑀯 𑀲𑀫𑀸𑀧𑀢𑁆𑀢𑀺𑀮𑀸𑀪𑀻 𑀳𑀼𑀢𑁆𑀯𑀸 𑀲𑀳𑀲𑁆𑀲𑀮𑁄𑀓𑀥𑀸𑀢𑀼𑀤𑀲𑁆𑀲𑀦𑀲𑀫𑀢𑁆𑀣𑀁 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀁 𑀉𑀧𑁆𑀧𑀸𑀤𑁂𑀲𑀺. 𑀲𑁄 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀏𑀯𑀫𑀸𑀳 𑁋 ‘‘𑀇𑀥𑀸𑀳𑀁, 𑀆𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢, 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀯𑀺𑀲𑀼𑀤𑁆𑀥𑁂𑀦 𑀅𑀢𑀺𑀓𑁆𑀓𑀦𑁆𑀢𑀫𑀸𑀦𑀼𑀲𑀓𑁂𑀦 𑀲𑀳𑀲𑁆𑀲𑀮𑁄𑀓𑀁 𑀑𑀮𑁄𑀓𑁂𑀫𑀺. 𑀆𑀭𑀤𑁆𑀥𑀁 𑀔𑁄 𑀧𑀦 𑀫𑁂 𑀯𑀻𑀭𑀺𑀬𑀁 𑀅𑀲𑀮𑁆𑀮𑀻𑀦𑀁, 𑀉𑀧𑀝𑁆𑀞𑀺𑀢𑀸 𑀲𑀢𑀺 𑀅𑀲𑀫𑁆𑀫𑀼𑀝𑁆𑀞𑀸, 𑀧𑀲𑁆𑀲𑀤𑁆𑀥𑁄 𑀓𑀸𑀬𑁄 𑀅𑀲𑀸𑀭𑀤𑁆𑀥𑁄, 𑀲𑀫𑀸𑀳𑀺𑀢𑀁 𑀘𑀺𑀢𑁆𑀢𑀁 𑀏𑀓𑀕𑁆𑀕𑀁. 𑀅𑀣 𑀘 𑀧𑀦 𑀫𑁂 𑀅𑀦𑀼𑀧𑀸𑀤𑀸𑀬 𑀆𑀲𑀯𑁂𑀳𑀺 𑀘𑀺𑀢𑁆𑀢𑀁 𑀦 𑀯𑀺𑀫𑀼𑀘𑁆𑀘𑀢𑀻’’𑀢𑀺. 𑀅𑀣 𑀦𑀁 𑀣𑁂𑀭𑁄 𑀆𑀳 𑁋 ‘‘𑀬𑀁 𑀔𑁄 𑀢𑁂, 𑀆𑀯𑀼𑀲𑁄 𑀅𑀦𑀼𑀭𑀼𑀤𑁆𑀥, 𑀏𑀯𑀁 𑀳𑁄𑀢𑀺 ‘𑀅𑀳𑀁 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸…𑀧𑁂… 𑀑𑀮𑁄𑀓𑁂𑀫𑀻’𑀢𑀺, 𑀇𑀤𑀁 𑀢𑁂 𑀫𑀸𑀦𑀲𑁆𑀫𑀺𑀁. 𑀬𑀫𑁆𑀧𑀺 𑀢𑁂, 𑀆𑀯𑀼𑀲𑁄, 𑀅𑀦𑀼𑀭𑀼𑀤𑁆𑀥 𑀏𑀯𑀁 𑀳𑁄𑀢𑀺 ‘𑀆𑀭𑀤𑁆𑀥𑀁 𑀔𑁄 𑀧𑀦 𑀫𑁂 𑀯𑀻𑀭𑀺𑀬𑀁…𑀧𑁂… 𑀏𑀓𑀕𑁆𑀕’𑀦𑁆𑀢𑀺, 𑀇𑀤𑀁 𑀢𑁂 𑀉𑀤𑁆𑀥𑀘𑁆𑀘𑀲𑁆𑀫𑀺𑀁. 𑀬𑀫𑁆𑀧𑀺 𑀢𑁂, 𑀆𑀯𑀼𑀲𑁄 𑀅𑀦𑀼𑀭𑀼𑀤𑁆𑀥, 𑀏𑀯𑀁 𑀳𑁄𑀢𑀺 ‘𑀅𑀣 𑀘 𑀧𑀦 𑀫𑁂 𑀅𑀦𑀼𑀧𑀸𑀤𑀸𑀬 𑀆𑀲𑀯𑁂𑀳𑀺 𑀘𑀺𑀢𑁆𑀢𑀁 𑀦 𑀯𑀺𑀫𑀼𑀘𑁆𑀘𑀢𑀻’𑀢𑀺, 𑀇𑀤𑀁 𑀢𑁂 𑀓𑀼𑀓𑁆𑀓𑀼𑀘𑁆𑀘𑀲𑁆𑀫𑀺𑀁. 𑀲𑀸𑀥𑀼 𑀯𑀢𑀸𑀬𑀲𑁆𑀫𑀸 𑀅𑀦𑀼𑀭𑀼𑀤𑁆𑀥𑁄 𑀇𑀫𑁂 𑀢𑀬𑁄 𑀥𑀫𑁆𑀫𑁂 𑀧𑀳𑀸𑀬 𑀇𑀫𑁂 𑀢𑀬𑁄 𑀥𑀫𑁆𑀫𑁂 𑀅𑀫𑀦𑀲𑀺𑀓𑀭𑀺𑀢𑁆𑀯𑀸 𑀅𑀫𑀢𑀸𑀬 𑀥𑀸𑀢𑀼𑀬𑀸 𑀘𑀺𑀢𑁆𑀢𑀁 𑀉𑀧𑀲𑀁𑀳𑀭𑀢𑀽’’𑀢𑀺 𑀏𑀯𑀫𑀲𑁆𑀲 𑀣𑁂𑀭𑁄 𑀓𑀫𑁆𑀫𑀝𑁆𑀞𑀸𑀦𑀁 𑀓𑀣𑁂𑀲𑀺. 𑀲𑁄 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀲𑀢𑁆𑀣𑀸𑀭𑀁 𑀆𑀧𑀼𑀘𑁆𑀙𑀺𑀢𑁆𑀯𑀸 𑀘𑁂𑀢𑀺𑀭𑀝𑁆𑀞𑀁 𑀕𑀦𑁆𑀢𑁆𑀯𑀸 𑀲𑀫𑀡𑀥𑀫𑁆𑀫𑀁 𑀓𑀭𑁄𑀦𑁆𑀢𑁄 𑀅𑀝𑁆𑀞𑀫𑀸𑀲𑀁 𑀘𑀗𑁆𑀓𑀫𑁂𑀦 𑀯𑀻𑀢𑀺𑀦𑀸𑀫𑁂𑀲𑀺. 𑀲𑁄 𑀧𑀥𑀸𑀦𑀯𑁂𑀕𑀦𑀺𑀫𑁆𑀫𑀣𑀺𑀢𑀢𑁆𑀢𑀸 𑀓𑀺𑀮𑀦𑁆𑀢𑀓𑀸𑀬𑁄 𑀏𑀓𑀲𑁆𑀲 𑀯𑁂𑀴𑀼𑀕𑀼𑀫𑁆𑀩𑀲𑁆𑀲 𑀳𑁂𑀝𑁆𑀞𑀸 𑀦𑀺𑀲𑀻𑀤𑀺. 𑀅𑀣𑀲𑁆𑀲𑀸𑀬𑀁 𑀏𑀯𑀁 𑀘𑁂𑀢𑀲𑁄 𑀧𑀭𑀺𑀯𑀺𑀢𑀓𑁆𑀓𑁄 𑀉𑀤𑀧𑀸𑀤𑀺, 𑀏𑀲 𑀫𑀳𑀸𑀧𑀼𑀭𑀺𑀲𑀯𑀺𑀢𑀓𑁆𑀓𑁄 𑀉𑀧𑁆𑀧𑀚𑁆𑀚𑀻𑀢𑀺 𑀅𑀢𑁆𑀣𑁄.
𑀅𑀧𑁆𑀧𑀺𑀘𑁆𑀙𑀲𑁆𑀲𑀸𑀢𑀺 𑀏𑀢𑁆𑀣 𑀧𑀘𑁆𑀘𑀬𑀧𑁆𑀧𑀺𑀘𑁆𑀙𑁄, 𑀅𑀥𑀺𑀕𑀫𑀧𑁆𑀧𑀺𑀘𑁆𑀙𑁄, 𑀧𑀭𑀺𑀬𑀢𑁆𑀢𑀺𑀅𑀧𑁆𑀧𑀺𑀘𑁆𑀙𑁄, 𑀥𑀼𑀢𑀗𑁆𑀕𑀧𑁆𑀧𑀺𑀘𑁆𑀙𑁄𑀢𑀺 𑀘𑀢𑁆𑀢𑀸𑀭𑁄 𑀅𑀧𑁆𑀧𑀺𑀘𑁆𑀙𑀸. 𑀢𑀢𑁆𑀣 𑀧𑀘𑁆𑀘𑀬𑀧𑁆𑀧𑀺𑀘𑁆𑀙𑁄 𑀩𑀳𑀼𑀁 𑀤𑁂𑀦𑁆𑀢𑁂 𑀅𑀧𑁆𑀧𑀁 𑀕𑀡𑁆𑀳𑀸𑀢𑀺, 𑀅𑀧𑁆𑀧𑀁 𑀤𑁂𑀦𑁆𑀢𑁂 𑀅𑀧𑁆𑀧𑀢𑀭𑀁 𑀕𑀡𑁆𑀳𑀸𑀢𑀺, 𑀦 𑀅𑀦𑀯𑀲𑁂𑀲𑀕𑁆𑀕𑀸𑀳𑀻 𑀳𑁄𑀢𑀺. 𑀅𑀥𑀺𑀕𑀫𑀧𑁆𑀧𑀺𑀘𑁆𑀙𑁄 𑀫𑀚𑁆𑀛𑀦𑁆𑀢𑀺𑀓𑀢𑁆𑀣𑁂𑀭𑁄 𑀯𑀺𑀬 𑀅𑀢𑁆𑀢𑀦𑁄 𑀅𑀥𑀺𑀕𑀫𑀁 𑀅𑀜𑁆𑀜𑁂𑀲𑀁 𑀚𑀸𑀦𑀺𑀢𑀼𑀁 𑀦 𑀤𑁂𑀢𑀺. 𑀧𑀭𑀺𑀬𑀢𑁆𑀢𑀺𑀅𑀧𑁆𑀧𑀺𑀘𑁆𑀙𑁄 𑀢𑁂𑀧𑀺𑀝𑀓𑁄𑀧𑀺 𑀲𑀫𑀸𑀦𑁄 𑀦 𑀩𑀳𑀼𑀲𑁆𑀲𑀼𑀢𑀪𑀸𑀯𑀁 𑀚𑀸𑀦𑀸𑀧𑁂𑀢𑀼𑀓𑀸𑀫𑁄 𑀳𑁄𑀢𑀺 𑀲𑀸𑀓𑁂𑀢𑀢𑀺𑀲𑁆𑀲𑀢𑁆𑀣𑁂𑀭𑁄 𑀯𑀺𑀬. 𑀥𑀼𑀢𑀗𑁆𑀕𑀧𑁆𑀧𑀺𑀘𑁆𑀙𑁄 𑀥𑀼𑀢𑀗𑁆𑀕𑀧𑀭𑀺𑀳𑀭𑀡𑀪𑀸𑀯𑀁 𑀅𑀜𑁆𑀜𑁂𑀲𑀁 𑀚𑀸𑀦𑀺𑀢𑀼𑀁 𑀦 𑀤𑁂𑀢𑀺 𑀤𑁆𑀯𑁂𑀪𑀸𑀢𑀺𑀓𑀢𑁆𑀣𑁂𑀭𑁂𑀲𑀼 𑀚𑁂𑀝𑁆𑀞𑀢𑁆𑀣𑁂𑀭𑁄 𑀯𑀺𑀬. 𑀯𑀢𑁆𑀣𑀼 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀓𑀣𑀺𑀢𑀁. 𑀅𑀬𑀁 𑀥𑀫𑁆𑀫𑁄𑀢𑀺 𑀏𑀯𑀁 𑀲𑀦𑁆𑀢𑀕𑀼𑀡𑀦𑀺𑀕𑀼𑀳𑀦𑁂𑀦 𑀘 𑀧𑀝𑀺𑀕𑁆𑀕𑀳𑀡𑁂 𑀫𑀢𑁆𑀢𑀜𑁆𑀜𑀼𑀢𑀸𑀬 𑀘 𑀅𑀧𑁆𑀧𑀺𑀘𑁆𑀙𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀅𑀬𑀁 𑀦𑀯𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁄 𑀲𑀫𑁆𑀧𑀚𑁆𑀚𑀢𑀺, 𑀦𑁄 𑀫𑀳𑀺𑀘𑁆𑀙𑀲𑁆𑀲. 𑀏𑀯𑀁 𑀲𑀩𑁆𑀩𑀢𑁆𑀣 𑀬𑁄𑀚𑁂𑀢𑀩𑁆𑀩𑀁.
𑀲𑀦𑁆𑀢𑀼𑀝𑁆𑀞𑀲𑁆𑀲𑀸𑀢𑀺 𑀘𑀢𑀽𑀲𑀼 𑀧𑀘𑁆𑀘𑀬𑁂𑀲𑀼 𑀢𑀻𑀳𑀺 𑀲𑀦𑁆𑀢𑁄𑀲𑁂𑀳𑀺 𑀲𑀦𑁆𑀢𑀼𑀝𑁆𑀞𑀲𑁆𑀲. 𑀧𑀯𑀺𑀯𑀺𑀢𑁆𑀢𑀲𑁆𑀲𑀸𑀢𑀺 𑀓𑀸𑀬𑀘𑀺𑀢𑁆𑀢𑀉𑀧𑀥𑀺𑀯𑀺𑀯𑁂𑀓𑁂𑀳𑀺 𑀯𑀺𑀯𑀺𑀢𑁆𑀢𑀲𑁆𑀲. 𑀢𑀢𑁆𑀣 𑀓𑀸𑀬𑀯𑀺𑀯𑁂𑀓𑁄 𑀦𑀸𑀫 𑀕𑀡𑀲𑀗𑁆𑀕𑀡𑀺𑀓𑀁 𑀯𑀺𑀦𑁄𑀤𑁂𑀢𑁆𑀯𑀸 𑀆𑀭𑀫𑁆𑀪𑀯𑀢𑁆𑀣𑀼𑀯𑀲𑁂𑀦 𑀏𑀓𑀻𑀪𑀸𑀯𑁄. 𑀏𑀓𑀻𑀪𑀸𑀯𑀫𑀢𑁆𑀢𑁂𑀦𑁂𑀯 𑀓𑀫𑁆𑀫𑀁 𑀦 𑀦𑀺𑀧𑁆𑀨𑀚𑁆𑀚𑀢𑀻𑀢𑀺 𑀓𑀲𑀺𑀡𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄 𑀦𑀺𑀩𑁆𑀩𑀢𑁆𑀢𑁂𑀢𑀺, 𑀅𑀬𑀁 𑀘𑀺𑀢𑁆𑀢𑀯𑀺𑀯𑁂𑀓𑁄 𑀦𑀸𑀫. 𑀲𑀫𑀸𑀧𑀢𑁆𑀢𑀺𑀫𑀢𑁆𑀢𑁂𑀦𑁂𑀯 𑀓𑀫𑁆𑀫𑀁 𑀦 𑀦𑀺𑀧𑁆𑀨𑀚𑁆𑀚𑀢𑀻𑀢𑀺 𑀛𑀸𑀦𑀁 𑀧𑀸𑀤𑀓𑀁 𑀓𑀢𑁆𑀯𑀸 𑀲𑀗𑁆𑀔𑀸𑀭𑁂 𑀲𑀫𑁆𑀫𑀲𑀺𑀢𑁆𑀯𑀸 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀸𑀢𑀺, 𑀅𑀬𑀁 𑀲𑀩𑁆𑀩𑀸𑀓𑀸𑀭𑀢𑁄 𑀉𑀧𑀥𑀺𑀯𑀺𑀯𑁂𑀓𑁄 𑀦𑀸𑀫. 𑀢𑁂𑀦𑀸𑀳 𑀪𑀕𑀯𑀸 𑁋 ‘‘𑀓𑀸𑀬𑀯𑀺𑀯𑁂𑀓𑁄 𑀘 𑀯𑀺𑀯𑁂𑀓𑀝𑁆𑀞𑀓𑀸𑀬𑀸𑀦𑀁 𑀦𑁂𑀓𑁆𑀔𑀫𑁆𑀫𑀸𑀪𑀺𑀭𑀢𑀸𑀦𑀁, 𑀘𑀺𑀢𑁆𑀢𑀯𑀺𑀯𑁂𑀓𑁄 𑀘 𑀧𑀭𑀺𑀲𑀼𑀤𑁆𑀥𑀘𑀺𑀢𑁆𑀢𑀸𑀦𑀁 𑀧𑀭𑀫𑀯𑁄𑀤𑀸𑀦𑀧𑁆𑀧𑀢𑁆𑀢𑀸𑀦𑀁, 𑀉𑀧𑀥𑀺𑀯𑀺𑀯𑁂𑀓𑁄 𑀘 𑀦𑀺𑀭𑀼𑀧𑀥𑀻𑀦𑀁 𑀧𑀼𑀕𑁆𑀕𑀮𑀸𑀦𑀁 𑀯𑀺𑀲𑀗𑁆𑀔𑀸𑀭𑀕𑀢𑀸𑀦’’𑀦𑁆𑀢𑀺 (𑀫𑀳𑀸𑀦𑀺. 𑁭, 𑁪𑁯).
𑀲𑀗𑁆𑀕𑀡𑀺𑀓𑀸𑀭𑀸𑀫𑀲𑁆𑀲𑀸𑀢𑀺 𑀕𑀡𑀲𑀗𑁆𑀕𑀡𑀺𑀓𑀸𑀬 𑀘𑁂𑀯 𑀓𑀺𑀮𑁂𑀲𑀲𑀗𑁆𑀕𑀡𑀺𑀓𑀸𑀬 𑀘 𑀭𑀢𑀲𑁆𑀲. 𑀆𑀭𑀤𑁆𑀥𑀯𑀻𑀭𑀺𑀬𑀲𑁆𑀲𑀸𑀢𑀺 𑀓𑀸𑀬𑀺𑀓𑀘𑁂𑀢𑀲𑀺𑀓𑀯𑀻𑀭𑀺𑀬𑀯𑀲𑁂𑀦 𑀆𑀭𑀤𑁆𑀥𑀯𑀻𑀭𑀺𑀬𑀲𑁆𑀲. 𑀉𑀧𑀝𑁆𑀞𑀺𑀢𑀲𑁆𑀲𑀢𑀺𑀲𑁆𑀲𑀸𑀢𑀺 𑀘𑀢𑀼𑀲𑀢𑀺𑀧𑀝𑁆𑀞𑀸𑀦𑀯𑀲𑁂𑀦 𑀉𑀧𑀝𑁆𑀞𑀺𑀢𑀲𑁆𑀲𑀢𑀺𑀲𑁆𑀲. 𑀲𑀫𑀸𑀳𑀺𑀢𑀲𑁆𑀲𑀸𑀢𑀺 𑀏𑀓𑀕𑁆𑀕𑀘𑀺𑀢𑁆𑀢𑀲𑁆𑀲. 𑀧𑀜𑁆𑀜𑀯𑀢𑁄𑀢𑀺 𑀓𑀫𑁆𑀫𑀲𑁆𑀲𑀓𑀢𑀧𑀜𑁆𑀜𑀸𑀬 𑀧𑀜𑁆𑀜𑀯𑀢𑁄.
𑀲𑀸𑀥𑀼 𑀲𑀸𑀥𑀽𑀢𑀺 𑀣𑁂𑀭𑀲𑁆𑀲 𑀯𑀺𑀢𑀓𑁆𑀓𑀁 𑀲𑀫𑁆𑀧𑀳𑀁𑀲𑁂𑀦𑁆𑀢𑁄 𑀏𑀯𑀫𑀸𑀳. 𑀇𑀫𑀁 𑀅𑀝𑁆𑀞𑀫𑀦𑁆𑀢𑀺 𑀲𑀢𑁆𑀢 𑀦𑀺𑀥𑀻 𑀮𑀤𑁆𑀥𑀧𑀼𑀭𑀺𑀲𑀲𑁆𑀲 𑀅𑀝𑁆𑀞𑀫𑀁 𑀤𑁂𑀦𑁆𑀢𑁄 𑀯𑀺𑀬, 𑀲𑀢𑁆𑀢 𑀫𑀡𑀺𑀭𑀢𑀦𑀸𑀦𑀺, 𑀲𑀢𑁆𑀢 𑀳𑀢𑁆𑀣𑀺𑀭𑀢𑀦𑀸𑀦𑀺, 𑀲𑀢𑁆𑀢 𑀅𑀲𑁆𑀲𑀭𑀢𑀦𑀸𑀦𑀺 𑀮𑀤𑁆𑀥𑀧𑀼𑀭𑀺𑀲𑀲𑁆𑀲 𑀅𑀝𑁆𑀞𑀫𑀁 𑀤𑁂𑀦𑁆𑀢𑁄 𑀯𑀺𑀬 𑀲𑀢𑁆𑀢 𑀫𑀳𑀸𑀧𑀼𑀭𑀺𑀲𑀯𑀺𑀢𑀓𑁆𑀓𑁂 𑀯𑀺𑀢𑀓𑁆𑀓𑁂𑀢𑁆𑀯𑀸 𑀞𑀺𑀢𑀲𑁆𑀲 𑀅𑀝𑁆𑀞𑀫𑀁 𑀆𑀘𑀺𑀓𑁆𑀔𑀦𑁆𑀢𑁄 𑀏𑀯𑀫𑀸𑀳. 𑀦𑀺𑀧𑁆𑀧𑀧𑀜𑁆𑀘𑀸𑀭𑀸𑀫𑀲𑁆𑀲𑀸𑀢𑀺 𑀢𑀡𑁆𑀳𑀸𑀫𑀸𑀦𑀤𑀺𑀝𑁆𑀞𑀺𑀧𑀧𑀜𑁆𑀘𑀭𑀳𑀺𑀢𑀢𑁆𑀢𑀸 𑀦𑀺𑀧𑁆𑀧𑀧𑀜𑁆𑀘𑀲𑀗𑁆𑀔𑀸𑀢𑁂 𑀦𑀺𑀩𑁆𑀩𑀸𑀦𑀧𑀤𑁂 𑀅𑀪𑀺𑀭𑀢𑀲𑁆𑀲. 𑀇𑀢𑀭𑀁 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀧𑀧𑀜𑁆𑀘𑀸𑀭𑀸𑀫𑀲𑁆𑀲𑀸𑀢𑀺 𑀬𑀣𑀸𑀯𑀼𑀢𑁆𑀢𑁂𑀲𑀼 𑀧𑀧𑀜𑁆𑀘𑁂𑀲𑀼 𑀅𑀪𑀺𑀭𑀢𑀲𑁆𑀲. 𑀇𑀢𑀭𑀁 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁.
𑀬𑀢𑁄𑀢𑀺 𑀬𑀤𑀸. 𑀢𑀢𑁄𑀢𑀺 𑀢𑀤𑀸. 𑀦𑀸𑀦𑀸𑀭𑀢𑁆𑀢𑀸𑀦𑀦𑁆𑀢𑀺 𑀦𑀺𑀮𑀧𑀻𑀢𑀮𑁄𑀳𑀺𑀢𑁄𑀤𑀸𑀢𑀯𑀡𑁆𑀡𑁂𑀳𑀺 𑀦𑀸𑀦𑀸𑀭𑀚𑀦𑁂𑀳𑀺 𑀭𑀢𑁆𑀢𑀸𑀦𑀁. 𑀧𑀁𑀲𑀼𑀓𑀽𑀮𑀦𑁆𑀢𑀺 𑀢𑁂𑀯𑀻𑀲𑀢𑀺𑀬𑀸 𑀔𑁂𑀢𑁆𑀢𑁂𑀲𑀼 𑀞𑀺𑀢𑀧𑀁𑀲𑀼𑀓𑀽𑀮𑀘𑀻𑀯𑀭𑀁. 𑀔𑀸𑀬𑀺𑀲𑁆𑀲𑀢𑀻𑀢𑀺 𑀬𑀣𑀸 𑀢𑀲𑁆𑀲 𑀧𑀼𑀩𑁆𑀩𑀡𑁆𑀳𑀲𑀫𑀬𑀸𑀤𑀻𑀲𑀼 𑀬𑀲𑁆𑀫𑀺𑀁 𑀲𑀫𑀬𑁂 𑀬𑀁 𑀇𑀘𑁆𑀙𑀢𑀺, 𑀢𑀲𑁆𑀫𑀺𑀁 𑀲𑀫𑀬𑁂 𑀢𑀁 𑀧𑀸𑀭𑀼𑀧𑀦𑁆𑀢𑀲𑁆𑀲 𑀲𑁄 𑀤𑀼𑀲𑁆𑀲𑀓𑀭𑀡𑁆𑀟𑀓𑁄 𑀫𑀦𑀸𑀧𑁄 𑀳𑀼𑀢𑁆𑀯𑀸 𑀔𑀸𑀬𑀢𑀺, 𑀏𑀯𑀁 𑀢𑀼𑀬𑁆𑀳𑀫𑁆𑀧𑀺 𑀘𑀻𑀯𑀭𑀲𑀦𑁆𑀢𑁄𑀲𑀫𑀳𑀸𑀅𑀭𑀺𑀬𑀯𑀁𑀲𑁂𑀦 𑀢𑀼𑀝𑁆𑀞𑀲𑁆𑀲 𑀯𑀺𑀳𑀭𑀢𑁄 𑀧𑀁𑀲𑀼𑀓𑀽𑀮𑀘𑀻𑀯𑀭𑀁 𑀔𑀸𑀬𑀺𑀲𑁆𑀲𑀢𑀺 𑀉𑀧𑀝𑁆𑀞𑀳𑀺𑀲𑁆𑀲𑀢𑀺. 𑀭𑀢𑀺𑀬𑀸𑀢𑀺 𑀭𑀢𑀺𑀅𑀢𑁆𑀣𑀸𑀬. 𑀅𑀧𑀭𑀺𑀢𑀲𑁆𑀲𑀸𑀬𑀸𑀢𑀺 𑀢𑀡𑁆𑀳𑀸𑀤𑀺𑀝𑁆𑀞𑀺𑀧𑀭𑀺𑀢𑀲𑁆𑀲𑀦𑀸𑀳𑀺 𑀅𑀧𑀭𑀺𑀢𑀲𑁆𑀲𑀦𑀢𑁆𑀣𑀸𑀬. 𑀨𑀸𑀲𑀼𑀯𑀺𑀳𑀸𑀭𑀸𑀬𑀸𑀢𑀺 𑀲𑀼𑀔𑀯𑀺𑀳𑀸𑀭𑀢𑁆𑀣𑀸𑀬. 𑀑𑀓𑁆𑀓𑀫𑀦𑀸𑀬 𑀦𑀺𑀩𑁆𑀩𑀸𑀦𑀲𑁆𑀲𑀸𑀢𑀺 𑀅𑀫𑀢𑀁 𑀦𑀺𑀩𑁆𑀩𑀸𑀦𑀁 𑀑𑀢𑀭𑀡𑀢𑁆𑀣𑀸𑀬.
𑀧𑀺𑀡𑁆𑀟𑀺𑀬𑀸𑀮𑁄𑀧𑀪𑁄𑀚𑀦𑀦𑁆𑀢𑀺 𑀕𑀸𑀫𑀦𑀺𑀕𑀫𑀭𑀸𑀚𑀥𑀸𑀦𑀻𑀲𑀼 𑀚𑀗𑁆𑀖𑀸𑀩𑀮𑀁 𑀦𑀺𑀲𑁆𑀲𑀸𑀬 𑀖𑀭𑀧𑀝𑀺𑀧𑀸𑀝𑀺𑀬𑀸 𑀘𑀭𑀦𑁆𑀢𑁂𑀦 𑀮𑀤𑁆𑀥𑀧𑀺𑀡𑁆𑀟𑀺𑀬𑀸𑀮𑁄𑀧𑀪𑁄𑀚𑀦𑀁. 𑀔𑀸𑀬𑀺𑀲𑁆𑀲𑀢𑀻𑀢𑀺 𑀢𑀲𑁆𑀲 𑀕𑀳𑀧𑀢𑀺𑀦𑁄 𑀦𑀸𑀦𑀕𑁆𑀕𑀭𑀲𑀪𑁄𑀚𑀦𑀁 𑀯𑀺𑀬 𑀉𑀧𑀝𑁆𑀞𑀳𑀺𑀲𑁆𑀲𑀢𑀺. 𑀲𑀦𑁆𑀢𑀼𑀝𑁆𑀞𑀲𑁆𑀲 𑀯𑀺𑀳𑀭𑀢𑁄𑀢𑀺 𑀧𑀺𑀡𑁆𑀟𑀧𑀸𑀢𑀲𑀦𑁆𑀢𑁄𑀲𑀫𑀳𑀸𑀅𑀭𑀺𑀬𑀯𑀁𑀲𑁂𑀦 𑀲𑀦𑁆𑀢𑀼𑀝𑁆𑀞𑀲𑁆𑀲 𑀯𑀺𑀳𑀭𑀢𑁄. 𑀭𑀼𑀓𑁆𑀔𑀫𑀽𑀮𑀲𑁂𑀦𑀸𑀲𑀦𑀁 𑀔𑀸𑀬𑀺𑀲𑁆𑀲𑀢𑀻𑀢𑀺 𑀢𑀲𑁆𑀲 𑀕𑀳𑀧𑀢𑀺𑀦𑁄 𑀢𑁂𑀪𑀽𑀫𑀓𑀧𑀸𑀲𑀸𑀤𑁂 𑀕𑀦𑁆𑀥𑀓𑀼𑀲𑀼𑀫𑀯𑀸𑀲𑀲𑀼𑀕𑀦𑁆𑀥𑀁 𑀓𑀽𑀝𑀸𑀕𑀸𑀭𑀁 𑀯𑀺𑀬 𑀭𑀼𑀓𑁆𑀔𑀫𑀽𑀮𑀁 𑀉𑀧𑀝𑁆𑀞𑀳𑀺𑀲𑁆𑀲𑀢𑀺. 𑀲𑀦𑁆𑀢𑀼𑀝𑁆𑀞𑀲𑁆𑀲𑀸𑀢𑀺 𑀲𑁂𑀦𑀸𑀲𑀦𑀲𑀦𑁆𑀢𑁄𑀲𑀫𑀳𑀸𑀅𑀭𑀺𑀬𑀯𑀁𑀲𑁂𑀦 𑀲𑀦𑁆𑀢𑀼𑀝𑁆𑀞𑀲𑁆𑀲. 𑀢𑀺𑀡𑀲𑀦𑁆𑀣𑀸𑀭𑀓𑁄𑀢𑀺 𑀢𑀺𑀡𑁂𑀳𑀺 𑀯𑀸 𑀧𑀡𑁆𑀡𑁂𑀳𑀺 𑀯𑀸 𑀪𑀽𑀫𑀺𑀬𑀁 𑀯𑀸 𑀨𑀮𑀓𑀧𑀸𑀲𑀸𑀡𑀢𑀮𑀸𑀦𑀺 𑀯𑀸 𑀅𑀜𑁆𑀜𑀢𑀭𑀲𑁆𑀫𑀺𑀁 𑀲𑀦𑁆𑀣𑀢𑀲𑀦𑁆𑀣𑀢𑁄. 𑀧𑀽𑀢𑀺𑀫𑀼𑀢𑁆𑀢𑀦𑁆𑀢𑀺 𑀬𑀁𑀓𑀺𑀜𑁆𑀘𑀺 𑀫𑀼𑀢𑁆𑀢𑀁. 𑀢𑀗𑁆𑀔𑀡𑁂 𑀕𑀳𑀺𑀢𑀫𑁆𑀧𑀺 𑀧𑀽𑀢𑀺𑀫𑀼𑀢𑁆𑀢𑀫𑁂𑀯 𑀯𑀼𑀘𑁆𑀘𑀢𑀺 𑀤𑀼𑀕𑁆𑀕𑀦𑁆𑀥𑀢𑁆𑀢𑀸. 𑀲𑀦𑁆𑀢𑀼𑀝𑁆𑀞𑀲𑁆𑀲 𑀯𑀺𑀳𑀭𑀢𑁄𑀢𑀺 𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀲𑀦𑁆𑀢𑁄𑀲𑁂𑀦 𑀲𑀦𑁆𑀢𑀼𑀝𑁆𑀞𑀲𑁆𑀲 𑀯𑀺𑀳𑀭𑀢𑁄.
𑀇𑀢𑀺 𑀪𑀕𑀯𑀸 𑀘𑀢𑀽𑀲𑀼 𑀞𑀸𑀦𑁂𑀲𑀼 𑀅𑀭𑀳𑀢𑁆𑀢𑀁 𑀧𑀓𑁆𑀔𑀺𑀧𑀦𑁆𑀢𑁄 𑀓𑀫𑁆𑀫𑀝𑁆𑀞𑀸𑀦𑀁 𑀓𑀣𑁂𑀢𑁆𑀯𑀸 ‘‘𑀓𑀢𑀭𑀲𑁂𑀦𑀸𑀲𑀦𑁂 𑀦𑀼 𑀔𑁄 𑀯𑀲𑀦𑁆𑀢𑀲𑁆𑀲 𑀓𑀫𑁆𑀫𑀝𑁆𑀞𑀸𑀦𑀁 𑀲𑀧𑁆𑀧𑀸𑀬𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀆𑀯𑀚𑁆𑀚𑁂𑀦𑁆𑀢𑁄 ‘‘𑀢𑀲𑁆𑀫𑀺𑀜𑁆𑀜𑁂𑀯 𑀯𑀲𑀦𑁆𑀢𑀲𑁆𑀲𑀸’’𑀢𑀺 𑀜𑀢𑁆𑀯𑀸 𑀢𑁂𑀦 𑀳𑀺 𑀢𑁆𑀯𑀁, 𑀅𑀦𑀼𑀭𑀼𑀤𑁆𑀥𑀸𑀢𑀺𑀆𑀤𑀺𑀫𑀸𑀳. 𑀧𑀯𑀺𑀯𑀺𑀢𑁆𑀢𑀲𑁆𑀲 𑀯𑀺𑀳𑀭𑀢𑁄𑀢𑀺 𑀢𑀻𑀳𑀺 𑀯𑀺𑀯𑁂𑀓𑁂𑀳𑀺 𑀯𑀺𑀯𑀺𑀢𑁆𑀢𑀲𑁆𑀲 𑀯𑀺𑀳𑀭𑀦𑁆𑀢𑀲𑁆𑀲. 𑀉𑀬𑁆𑀬𑁄𑀚𑀦𑀺𑀓𑀧𑀝𑀺𑀲𑀁𑀬𑀼𑀢𑁆𑀢𑀦𑁆𑀢𑀺 𑀉𑀬𑁆𑀬𑁄𑀚𑀦𑀺𑀓𑁂𑀳𑁂𑀯 𑀯𑀘𑀦𑁂𑀳𑀺 𑀧𑀝𑀺𑀲𑀁𑀬𑀼𑀢𑁆𑀢𑀁, 𑀢𑁂𑀲𑀁 𑀉𑀧𑀝𑁆𑀞𑀸𑀦𑀕𑀫𑀦𑀓𑀁𑀬𑁂𑀯𑀸𑀢𑀺 𑀅𑀢𑁆𑀣𑁄. 𑀧𑀧𑀜𑁆𑀘𑀦𑀺𑀭𑁄𑀥𑁂𑀢𑀺 𑀦𑀺𑀩𑁆𑀩𑀸𑀦𑀧𑀤𑁂. 𑀧𑀓𑁆𑀔𑀦𑁆𑀤𑀢𑀻𑀢𑀺 𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦 𑀧𑀓𑁆𑀔𑀦𑁆𑀤𑀢𑀺. 𑀧𑀲𑀻𑀤𑀢𑀻𑀢𑀺𑀆𑀤𑀻𑀲𑀼𑀧𑀺 𑀆𑀭𑀫𑁆𑀫𑀡𑀯𑀲𑁂𑀦𑁂𑀯 𑀧𑀲𑀻𑀤𑀦𑀲𑀦𑁆𑀢𑀺𑀝𑁆𑀞𑀦𑀫𑀼𑀘𑁆𑀘𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀇𑀢𑀺 𑀪𑀕𑀯𑀸 𑀘𑁂𑀢𑀺𑀭𑀝𑁆𑀞𑁂 𑀧𑀸𑀘𑀻𑀦𑀯𑀁𑀲𑀤𑀸𑀬𑁂 𑀆𑀬𑀲𑁆𑀫𑀢𑁄 𑀅𑀦𑀼𑀭𑀼𑀤𑁆𑀥𑀲𑁆𑀲 𑀓𑀣𑀺𑀢𑁂 𑀅𑀝𑁆𑀞 𑀫𑀳𑀸𑀧𑀼𑀭𑀺𑀲𑀯𑀺𑀢𑀓𑁆𑀓𑁂 𑀧𑀼𑀦 𑀪𑁂𑀲𑀓𑀴𑀸𑀯𑀦𑀫𑀳𑀸𑀯𑀺𑀳𑀸𑀭𑁂 𑀦𑀺𑀲𑀻𑀤𑀺𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀯𑀺𑀢𑁆𑀣𑀸𑀭𑁂𑀦 𑀓𑀣𑁂𑀲𑀺.
𑀫𑀦𑁄𑀫𑀬𑁂𑀦𑀸𑀢𑀺 𑀫𑀦𑁂𑀦 𑀦𑀺𑀩𑁆𑀩𑀢𑁆𑀢𑀺𑀢𑀓𑀸𑀬𑁄𑀧𑀺 𑀫𑀦𑁄𑀫𑀬𑁄𑀢𑀺 𑀯𑀼𑀘𑁆𑀘𑀢𑀺 𑀫𑀦𑁂𑀦 𑀕𑀢𑀓𑀸𑀬𑁄𑀧𑀺, 𑀇𑀥 𑀫𑀦𑁂𑀦 𑀕𑀢𑀓𑀸𑀬𑀁 𑀲𑀦𑁆𑀥𑀸𑀬𑁂𑀯𑀫𑀸𑀳. 𑀬𑀣𑀸 𑀫𑁂 𑀅𑀳𑀼 𑀲𑀗𑁆𑀓𑀧𑁆𑀧𑁄𑀢𑀺 𑀬𑀣𑀸 𑀫𑀬𑁆𑀳𑀁 𑀯𑀺𑀢𑀓𑁆𑀓𑁄 𑀅𑀳𑁄𑀲𑀺, 𑀢𑀢𑁄 𑀉𑀢𑁆𑀢𑀭𑀺 𑀅𑀝𑁆𑀞𑀫𑀁 𑀫𑀳𑀸𑀧𑀼𑀭𑀺𑀲𑀯𑀺𑀢𑀓𑁆𑀓𑀁 𑀤𑀲𑁆𑀲𑁂𑀦𑁆𑀢𑁄 𑀢𑀢𑁄 𑀉𑀢𑁆𑀢𑀭𑀺𑀁 𑀤𑁂𑀲𑀬𑀺. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.
𑀕𑀳𑀧𑀢𑀺𑀯𑀕𑁆𑀕𑁄 𑀢𑀢𑀺𑀬𑁄.
𑁪. 𑀤𑀸𑀦𑀯𑀕𑁆𑀕𑁄
𑁧. 𑀧𑀞𑀫𑀤𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸
𑁩𑁧. 𑀘𑀢𑀼𑀢𑁆𑀣𑀲𑁆𑀲 𑀧𑀞𑀫𑁂 𑀆𑀲𑀚𑁆𑀚 𑀤𑀸𑀦𑀁 𑀤𑁂𑀢𑀻𑀢𑀺 𑀧𑀢𑁆𑀯𑀸 𑀤𑀸𑀦𑀁 𑀤𑁂𑀢𑀺. 𑀆𑀕𑀢𑀁 𑀤𑀺𑀲𑁆𑀯𑀸 𑀢𑀁 𑀫𑀼𑀳𑀼𑀢𑁆𑀢𑀁𑀬𑁂𑀯 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀲𑀓𑁆𑀓𑀸𑀭𑀁 𑀓𑀢𑁆𑀯𑀸 𑀤𑀸𑀦𑀁 𑀤𑁂𑀢𑀺, 𑀤𑀲𑁆𑀲𑀸𑀫𑀻𑀢𑀺 𑀦 𑀓𑀺𑀮𑀫𑁂𑀢𑀺. 𑀪𑀬𑀸𑀢𑀺 ‘‘𑀅𑀬𑀁 𑀅𑀤𑀸𑀬𑀓𑁄 𑀅𑀓𑀸𑀭𑀓𑁄’’𑀢𑀺 𑀕𑀭𑀳𑀪𑀬𑀸, 𑀅𑀧𑀸𑀬𑀪𑀬𑀸 𑀯𑀸. 𑀅𑀤𑀸𑀲𑀺 𑀫𑁂𑀢𑀺 𑀫𑀬𑁆𑀳𑀁 𑀧𑀼𑀩𑁆𑀩𑁂 𑀏𑀲 𑀇𑀤𑀁 𑀦𑀸𑀫 𑀅𑀤𑀸𑀲𑀻𑀢𑀺 𑀤𑁂𑀢𑀺. 𑀤𑀲𑁆𑀲𑀢𑀺 𑀫𑁂𑀢𑀺 𑀅𑀦𑀸𑀕𑀢𑁂 𑀇𑀤𑀁 𑀦𑀸𑀫 𑀤𑀲𑁆𑀲𑀢𑀻𑀢𑀺 𑀤𑁂𑀢𑀺. 𑀲𑀸𑀳𑀼 𑀤𑀸𑀦𑀦𑁆𑀢𑀺 𑀤𑀸𑀦𑀁 𑀦𑀸𑀫 𑀲𑀸𑀥𑀼 𑀲𑀼𑀦𑁆𑀤𑀭𑀁 𑀩𑀼𑀤𑁆𑀥𑀸𑀤𑀻𑀳𑀺 𑀧𑀡𑁆𑀟𑀺𑀢𑁂𑀳𑀺 𑀧𑀲𑀢𑁆𑀣𑀦𑁆𑀢𑀺 𑀤𑁂𑀢𑀺. 𑀘𑀺𑀢𑁆𑀢𑀸𑀮𑀗𑁆𑀓𑀸𑀭𑀘𑀺𑀢𑁆𑀢𑀧𑀭𑀺𑀓𑁆𑀔𑀸𑀭𑀢𑁆𑀣𑀁 𑀤𑀸𑀦𑀁 𑀤𑁂𑀢𑀻𑀢𑀺 𑀲𑀫𑀣𑀯𑀺𑀧𑀲𑁆𑀲𑀦𑀸𑀘𑀺𑀢𑁆𑀢𑀲𑁆𑀲 𑀅𑀮𑀗𑁆𑀓𑀸𑀭𑀢𑁆𑀣𑀜𑁆𑀘𑁂𑀯 𑀧𑀭𑀺𑀓𑁆𑀔𑀸𑀭𑀢𑁆𑀣𑀜𑁆𑀘 𑀤𑁂𑀢𑀺. 𑀤𑀸𑀦𑀜𑁆𑀳𑀺 𑀘𑀺𑀢𑁆𑀢𑀁 𑀫𑀼𑀤𑀼𑀁 𑀓𑀭𑁄𑀢𑀺. 𑀬𑁂𑀦 𑀮𑀤𑁆𑀥𑁄, 𑀲𑁄 ‘‘𑀮𑀤𑁆𑀥𑀁 𑀫𑁂’’𑀢𑀺 𑀫𑀼𑀤𑀼𑀘𑀺𑀢𑁆𑀢𑁄 𑀳𑁄𑀢𑀺. 𑀬𑁂𑀦 𑀤𑀺𑀦𑁆𑀦𑀁, 𑀲𑁄𑀧𑀺 ‘‘𑀤𑀺𑀦𑁆𑀦𑀁 𑀫𑀬𑀸’’𑀢𑀺 𑀫𑀼𑀤𑀼𑀘𑀺𑀢𑁆𑀢𑁄 𑀳𑁄𑀢𑀺. 𑀇𑀢𑀺 𑀉𑀪𑀺𑀦𑁆𑀦𑀁 𑀘𑀺𑀢𑁆𑀢𑀁 𑀫𑀼𑀤𑀼𑀁 𑀓𑀭𑁄𑀢𑀺. 𑀢𑁂𑀦𑁂𑀯 ‘‘𑀅𑀤𑀦𑁆𑀢𑀤𑀫𑀦’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀬𑀣𑀸𑀳 𑁋
‘‘𑀅𑀤𑀦𑁆𑀢𑀤𑀫𑀦𑀁 𑀤𑀸𑀦𑀁, 𑀅𑀤𑀸𑀦𑀁 𑀤𑀦𑁆𑀢𑀤𑀽𑀲𑀓𑀁;
𑀤𑀸𑀦𑁂𑀦 𑀧𑀺𑀬𑀯𑀸𑀘𑀸𑀬, 𑀉𑀦𑁆𑀦𑀫𑀦𑁆𑀢𑀺 𑀦𑀫𑀦𑁆𑀢𑀺 𑀘𑀸’’𑀢𑀺.
𑀇𑀫𑁂𑀲𑀼 𑀧𑀦 𑀅𑀝𑁆𑀞𑀲𑀼 𑀤𑀸𑀦𑁂𑀲𑀼 𑀘𑀺𑀢𑁆𑀢𑀸𑀮𑀗𑁆𑀓𑀸𑀭𑀤𑀸𑀦𑀫𑁂𑀯 𑀉𑀢𑁆𑀢𑀫𑀦𑁆𑀢𑀺.
𑁨. 𑀤𑀼𑀢𑀺𑀬𑀤𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸
𑁩𑁨. 𑀤𑀼𑀢𑀺𑀬𑁂 𑀲𑀤𑁆𑀥𑀸𑀢𑀺 𑀬𑀸𑀬 𑀲𑀤𑁆𑀥𑀸𑀬 𑀤𑀸𑀦𑀁 𑀤𑁂𑀢𑀺, 𑀲𑀸 𑀲𑀤𑁆𑀥𑀸. 𑀳𑀺𑀭𑀺𑀬𑀦𑁆𑀢𑀺 𑀬𑀸𑀬 𑀳𑀺𑀭𑀺𑀬𑀸 𑀤𑀸𑀦𑀁 𑀤𑁂𑀢𑀺, 𑀲𑀸𑀯 𑀅𑀥𑀺𑀧𑁆𑀧𑁂𑀢𑀸. 𑀓𑀼𑀲𑀮𑀜𑁆𑀘 𑀤𑀸𑀦𑀦𑁆𑀢𑀺 𑀅𑀦𑀯𑀚𑁆𑀚𑀜𑁆𑀘 𑀤𑀸𑀦𑀁. 𑀤𑀺𑀯𑀺𑀬𑀦𑁆𑀢𑀺 𑀤𑀺𑀯𑀗𑁆𑀕𑀫𑀁.
𑁩. 𑀤𑀸𑀦𑀯𑀢𑁆𑀣𑀼𑀲𑀼𑀢𑁆𑀢𑀯𑀡𑁆𑀡𑀦𑀸
𑁩𑁩. 𑀢𑀢𑀺𑀬𑁂 𑀤𑀸𑀦𑀯𑀢𑁆𑀣𑀽𑀦𑀻𑀢𑀺 𑀤𑀸𑀦𑀓𑀸𑀭𑀡𑀸𑀦𑀺. 𑀙𑀦𑁆𑀤𑀸 𑀤𑀸𑀦𑀁 𑀤𑁂𑀢𑀻𑀢𑀺 𑀧𑁂𑀫𑁂𑀦 𑀤𑀸𑀦𑀁 𑀤𑁂𑀢𑀺. 𑀤𑁄𑀲𑀸𑀢𑀺 𑀤𑁄𑀲𑁂𑀦 𑀓𑀼𑀤𑁆𑀥𑁄 𑀳𑀼𑀢𑁆𑀯𑀸 𑀬𑀁 𑀅𑀢𑁆𑀣𑀺, 𑀢𑀁 𑀯𑁂𑀕𑁂𑀦 𑀕𑀡𑁆𑀳𑀺𑀢𑁆𑀯𑀸 𑀤𑁂𑀢𑀺. 𑀫𑁄𑀳𑀸𑀢𑀺 𑀫𑁄𑀳𑁂𑀦 𑀫𑀽𑀴𑁆𑀳𑁄 𑀤𑁂𑀢𑀺. 𑀪𑀬𑀸𑀢𑀺 𑀕𑀭𑀳𑀪𑀬𑁂𑀦 𑀯𑀸 𑀅𑀧𑀸𑀬𑀪𑀬𑁂𑀦 𑀯𑀸, 𑀢𑀲𑁆𑀲 𑀢𑀲𑁆𑀲𑁂𑀯 𑀯𑀸 𑀧𑀦 𑀪𑀬𑁂𑀦 𑀤𑁂𑀢𑀺. 𑀓𑀼𑀮𑀯𑀁𑀲𑀦𑁆𑀢𑀺 𑀓𑀼𑀮𑀧𑀯𑁂𑀡𑀺𑀁.
𑁪. 𑀔𑁂𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸
𑁩𑁪. 𑀘𑀢𑀼𑀢𑁆𑀣𑁂 𑀦 𑀫𑀳𑀧𑁆𑀨𑀮𑀁 𑀳𑁄𑀢𑀻𑀢𑀺 𑀥𑀜𑁆𑀜𑀨𑀮𑁂𑀦 𑀫𑀳𑀧𑁆𑀨𑀮𑀁 𑀦 𑀳𑁄𑀢𑀺. 𑀦 𑀫𑀳𑀲𑁆𑀲𑀸𑀤𑀦𑁆𑀢𑀺 𑀬𑀫𑁆𑀧𑀺𑀲𑁆𑀲 𑀨𑀮𑀁 𑀳𑁄𑀢𑀺, 𑀢𑀲𑁆𑀲 𑀅𑀲𑁆𑀲𑀸𑀤𑁄 𑀦 𑀫𑀳𑀸 𑀳𑁄𑀢𑀺 𑀫𑀦𑁆𑀤𑀲𑁆𑀲𑀸𑀤𑀁 𑀦 𑀫𑀥𑀼𑀭𑀁. 𑀦 𑀨𑀸𑀢𑀺𑀲𑁂𑀬𑁆𑀬𑀦𑁆𑀢𑀺 𑀲𑁂𑀬𑁆𑀬𑀸𑀧𑀺𑀲𑁆𑀲 𑀦 𑀳𑁄𑀢𑀺 𑀯𑀼𑀟𑁆𑀠𑀺, 𑀢𑀲𑁆𑀲 𑀫𑀳𑀦𑁆𑀢𑀁 𑀯𑀻𑀳𑀺𑀣𑀫𑁆𑀪𑀲𑀦𑁆𑀦𑀺𑀯𑁂𑀲𑀁 𑀦 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀉𑀦𑁆𑀦𑀸𑀫𑀦𑀺𑀦𑁆𑀦𑀸𑀫𑀻𑀢𑀺 𑀣𑀮𑀦𑀺𑀦𑁆𑀦𑀯𑀲𑁂𑀦 𑀯𑀺𑀲𑀫𑀢𑀮𑀁. 𑀢𑀢𑁆𑀣 𑀣𑀮𑁂 𑀉𑀤𑀓𑀁 𑀦 𑀲𑀡𑁆𑀞𑀸𑀢𑀺, 𑀦𑀺𑀦𑁆𑀦𑁂 𑀅𑀢𑀺𑀩𑀳𑀼 𑀢𑀺𑀝𑁆𑀞𑀢𑀺. 𑀧𑀸𑀲𑀸𑀡𑀲𑀓𑁆𑀔𑀭𑀺𑀓𑀦𑁆𑀢𑀺 𑀧𑀢𑁆𑀣𑀭𑀺𑀢𑁆𑀯𑀸 𑀞𑀺𑀢𑀧𑀺𑀝𑁆𑀞𑀺𑀧𑀸𑀲𑀸𑀡𑁂𑀳𑀺 𑀘 𑀔𑀼𑀤𑁆𑀤𑀓𑀧𑀸𑀲𑀸𑀡𑁂𑀳𑀺 𑀘 𑀲𑀓𑁆𑀔𑀭𑀸𑀳𑀺 𑀘 𑀲𑀫𑀦𑁆𑀦𑀸𑀕𑀢𑀁. 𑀊𑀲𑀭𑀦𑁆𑀢𑀺 𑀉𑀩𑁆𑀪𑀺𑀦𑁆𑀦𑀮𑁄𑀡𑀁. 𑀦 𑀘 𑀕𑀫𑁆𑀪𑀻𑀭𑀲𑀺𑀢𑀦𑁆𑀢𑀺 𑀣𑀤𑁆𑀥𑀪𑀽𑀫𑀺𑀢𑀸𑀬 𑀕𑀫𑁆𑀪𑀻𑀭𑀸𑀦𑀼𑀕𑀢𑀁, 𑀦𑀗𑁆𑀕𑀮𑀫𑀕𑁆𑀕𑀁 𑀓𑀢𑁆𑀯𑀸 𑀓𑀲𑀺𑀢𑀼𑀁 𑀦 𑀲𑀓𑁆𑀓𑀸 𑀳𑁄𑀢𑀺, 𑀉𑀢𑁆𑀢𑀸𑀦𑀦𑀗𑁆𑀕𑀮𑀫𑀕𑁆𑀕𑀫𑁂𑀯 𑀳𑁄𑀢𑀺. 𑀦 𑀆𑀬𑀲𑀫𑁆𑀧𑀦𑁆𑀦𑀦𑁆𑀢𑀺 𑀦 𑀉𑀤𑀓𑀸𑀕𑀫𑀦𑀲𑀫𑁆𑀧𑀦𑁆𑀦𑀁. 𑀦 𑀅𑀧𑀸𑀬𑀲𑀫𑁆𑀧𑀦𑁆𑀦𑀦𑁆𑀢𑀺 𑀧𑀘𑁆𑀙𑀸𑀪𑀸𑀕𑁂 𑀉𑀤𑀓𑀦𑀺𑀕𑁆𑀕𑀫𑀦𑀫𑀕𑁆𑀕𑀲𑀫𑁆𑀧𑀦𑁆𑀦𑀁 𑀦 𑀳𑁄𑀢𑀺. 𑀦 𑀫𑀸𑀢𑀺𑀓𑀸𑀲𑀫𑁆𑀧𑀦𑁆𑀦𑀦𑁆𑀢𑀺 𑀦 𑀔𑀼𑀤𑁆𑀤𑀓𑀫𑀳𑀦𑁆𑀢𑀻𑀳𑀺 𑀉𑀤𑀓𑀫𑀸𑀢𑀺𑀓𑀸𑀳𑀺 𑀲𑀫𑁆𑀧𑀦𑁆𑀦𑀁 𑀳𑁄𑀢𑀺. 𑀦 𑀫𑀭𑀺𑀬𑀸𑀤𑀲𑀫𑁆𑀧𑀦𑁆𑀦𑀦𑁆𑀢𑀺 𑀦 𑀓𑁂𑀤𑀸𑀭𑀫𑀭𑀺𑀬𑀸𑀤𑀸𑀳𑀺 𑀲𑀫𑁆𑀧𑀦𑁆𑀦𑀁. 𑀦 𑀫𑀳𑀧𑁆𑀨𑀮𑀦𑁆𑀢𑀺𑀆𑀤𑀻𑀦𑀺 𑀲𑀩𑁆𑀩𑀸𑀦𑀺 𑀯𑀺𑀧𑀸𑀓𑀨𑀮𑀯𑀲𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸𑀦𑀺.
𑀲𑀫𑁆𑀧𑀦𑁆𑀦𑁂𑀢𑀺 𑀧𑀭𑀺𑀧𑀼𑀡𑁆𑀡𑁂 𑀲𑀫𑁆𑀧𑀢𑁆𑀢𑀺𑀬𑀼𑀢𑁆𑀢𑁂. 𑀧𑀯𑀼𑀢𑁆𑀢𑀸 𑀩𑀻𑀚𑀲𑀫𑁆𑀧𑀤𑀸𑀢𑀺 𑀲𑀫𑁆𑀧𑀦𑁆𑀦𑀁 𑀩𑀻𑀚𑀁 𑀭𑁄𑀧𑀺𑀢𑀁. 𑀤𑁂𑀯𑁂 𑀲𑀫𑁆𑀧𑀸𑀤𑀬𑀦𑁆𑀢𑀫𑁆𑀳𑀻𑀢𑀺 𑀤𑁂𑀯𑁂 𑀲𑀫𑁆𑀫𑀸 𑀯𑀲𑁆𑀲𑀦𑁆𑀢𑁂. 𑀅𑀦𑀻𑀢𑀺𑀲𑀫𑁆𑀧𑀤𑀸 𑀳𑁄𑀢𑀻𑀢𑀺 𑀓𑀻𑀝𑀓𑀺𑀫𑀺𑀆𑀤𑀺𑀧𑀸𑀡𑀓𑀈𑀢𑀺𑀬𑀸 𑀅𑀪𑀸𑀯𑁄 𑀏𑀓𑀸 𑀲𑀫𑁆𑀧𑀤𑀸 𑀳𑁄𑀢𑀺. 𑀯𑀺𑀭𑀽𑀴𑁆𑀳𑀻𑀢𑀺 𑀯𑀟𑁆𑀠𑀺 𑀤𑀼𑀢𑀺𑀬𑀸 𑀲𑀫𑁆𑀧𑀤𑀸 𑀳𑁄𑀢𑀺. 𑀯𑁂𑀧𑀼𑀮𑁆𑀮𑀦𑁆𑀢𑀺 𑀯𑀺𑀧𑀼𑀮𑀪𑀸𑀯𑁄 𑀢𑀢𑀺𑀬𑀸 𑀲𑀫𑁆𑀧𑀤𑀸 𑀳𑁄𑀢𑀺. 𑀨𑀮𑀦𑁆𑀢𑀺 𑀧𑀭𑀺𑀧𑀼𑀡𑁆𑀡𑀨𑀮𑀁 𑀘𑀢𑀼𑀢𑁆𑀣𑀻 𑀲𑀫𑁆𑀧𑀤𑀸 𑀳𑁄𑀢𑀺. 𑀲𑀫𑁆𑀧𑀦𑁆𑀦𑀲𑀻𑀮𑁂𑀲𑀽𑀢𑀺 𑀧𑀭𑀺𑀧𑀼𑀡𑁆𑀡𑀲𑀻𑀮𑁂𑀲𑀼. 𑀪𑁄𑀚𑀦𑀲𑀫𑁆𑀧𑀤𑀸𑀢𑀺 𑀲𑀫𑁆𑀧𑀦𑁆𑀦𑀁 𑀯𑀺𑀯𑀺𑀥𑀪𑁄𑀚𑀦𑀁. 𑀲𑀫𑁆𑀧𑀤𑀸𑀦𑀦𑁆𑀢𑀺 𑀢𑀺𑀯𑀺𑀥𑀁 𑀓𑀼𑀲𑀮𑀲𑀫𑁆𑀧𑀤𑀁. 𑀉𑀧𑀦𑁂𑀢𑀻𑀢𑀺 𑀲𑀸 𑀪𑁄𑀚𑀦𑀲𑀫𑁆𑀧𑀤𑀸 𑀉𑀧𑀦𑀬𑀢𑀺. 𑀓𑀲𑁆𑀫𑀸? 𑀲𑀫𑁆𑀧𑀦𑁆𑀦𑀜𑁆𑀳𑀺𑀲𑁆𑀲 𑀢𑀁 𑀓𑀢𑀁, 𑀬𑀲𑁆𑀫𑀸𑀲𑁆𑀲 𑀢𑀁 𑀓𑀢𑀓𑀫𑁆𑀫𑀁 𑀲𑀫𑁆𑀧𑀦𑁆𑀦𑀁 𑀧𑀭𑀺𑀧𑀼𑀡𑁆𑀡𑀦𑁆𑀢𑀺 𑀅𑀢𑁆𑀣𑁄. 𑀲𑀫𑁆𑀧𑀦𑁆𑀦𑀢𑁆𑀣𑀽𑀥𑀸𑀢𑀺 𑀲𑀫𑁆𑀧𑀦𑁆𑀦𑁄 𑀅𑀢𑁆𑀣𑀼 𑀇𑀥. 𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀦𑁆𑀦𑁄𑀢𑀺 𑀢𑀻𑀳𑀺 𑀯𑀺𑀚𑁆𑀚𑀸𑀳𑀺 𑀘 𑀧𑀜𑁆𑀘𑀤𑀲𑀳𑀺 𑀘𑀭𑀡𑀥𑀫𑁆𑀫𑁂𑀳𑀺 𑀘 𑀲𑀫𑀦𑁆𑀦𑀸𑀕𑀢𑁄. 𑀮𑀤𑁆𑀥𑀸𑀢𑀺 𑀏𑀯𑀭𑀽𑀧𑁄 𑀧𑀼𑀕𑁆𑀕𑀮𑁄 𑀘𑀺𑀢𑁆𑀢𑀲𑁆𑀲 𑀲𑀫𑁆𑀧𑀤𑀁 𑀅𑀯𑁂𑀓𑀮𑁆𑀮𑀧𑀭𑀺𑀧𑀼𑀡𑁆𑀡𑀪𑀸𑀯𑀁 𑀮𑀪𑀺𑀢𑁆𑀯𑀸. 𑀓𑀭𑁄𑀢𑀺 𑀓𑀫𑁆𑀫𑀲𑀫𑁆𑀧𑀤𑀦𑁆𑀢𑀺 𑀧𑀭𑀺𑀧𑀼𑀡𑁆𑀡𑀓𑀫𑁆𑀫𑀁 𑀓𑀭𑁄𑀢𑀺. 𑀮𑀪𑀢𑀺 𑀘𑀢𑁆𑀣𑀲𑀫𑁆𑀧𑀤𑀦𑁆𑀢𑀺 𑀅𑀢𑁆𑀣𑀜𑁆𑀘 𑀧𑀭𑀺𑀧𑀼𑀡𑁆𑀡𑀁 𑀮𑀪𑀢𑀺. 𑀤𑀺𑀝𑁆𑀞𑀺𑀲𑀫𑁆𑀧𑀤𑀦𑁆𑀢𑀺 𑀯𑀺𑀧𑀲𑁆𑀲𑀦𑀸𑀤𑀺𑀝𑁆𑀞𑀺𑀁. 𑀫𑀕𑁆𑀕𑀲𑀫𑁆𑀧𑀤𑀦𑁆𑀢𑀺 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀁. 𑀬𑀸𑀢𑀺 𑀲𑀫𑁆𑀧𑀦𑁆𑀦𑀫𑀸𑀦𑀲𑁄𑀢𑀺 𑀧𑀭𑀺𑀧𑀼𑀡𑁆𑀡𑀘𑀺𑀢𑁆𑀢𑁄 𑀳𑀼𑀢𑁆𑀯𑀸 𑀅𑀭𑀳𑀢𑁆𑀢𑀁 𑀬𑀸𑀢𑀺. 𑀲𑀸 𑀳𑁄𑀢𑀺 𑀲𑀩𑁆𑀩𑀲𑀫𑁆𑀧𑀤𑀸𑀢𑀺 𑀲𑀸 𑀲𑀩𑁆𑀩𑀤𑀼𑀓𑁆𑀔𑁂𑀳𑀺 𑀯𑀺𑀫𑀼𑀢𑁆𑀢𑀺 𑀲𑀩𑁆𑀩𑀲𑀫𑁆𑀧𑀤𑀸 𑀦𑀸𑀫 𑀳𑁄𑀢𑀻𑀢𑀺.
𑁫. 𑀤𑀸𑀦𑀽𑀧𑀧𑀢𑁆𑀢𑀺𑀲𑀼𑀢𑁆𑀢𑀯𑀡𑁆𑀡𑀦𑀸
𑁩𑁫. 𑀧𑀜𑁆𑀘𑀫𑁂 𑀤𑀸𑀦𑀽𑀧𑀧𑀢𑁆𑀢𑀺𑀬𑁄𑀢𑀺 𑀤𑀸𑀦𑀧𑀘𑁆𑀘𑀬𑀸 𑀉𑀧𑀧𑀢𑁆𑀢𑀺𑀬𑁄. 𑀤𑀳𑀢𑀻𑀢𑀺 𑀞𑀧𑁂𑀢𑀺. 𑀅𑀥𑀺𑀝𑁆𑀞𑀸𑀢𑀻𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀪𑀸𑀯𑁂𑀢𑀻𑀢𑀺 𑀯𑀟𑁆𑀠𑁂𑀢𑀺. 𑀳𑀻𑀦𑁂 𑀯𑀺𑀫𑀼𑀢𑁆𑀢𑀦𑁆𑀢𑀺 𑀳𑀻𑀦𑁂𑀲𑀼 𑀧𑀜𑁆𑀘𑀲𑀼 𑀓𑀸𑀫𑀕𑀼𑀡𑁂𑀲𑀼 𑀯𑀺𑀫𑀼𑀢𑁆𑀢𑀁. 𑀉𑀢𑁆𑀢𑀭𑀺 𑀅𑀪𑀸𑀯𑀺𑀢𑀦𑁆𑀢𑀺 𑀢𑀢𑁄 𑀉𑀢𑁆𑀢𑀭𑀺𑀫𑀕𑁆𑀕𑀨𑀮𑀢𑁆𑀣𑀸𑀬 𑀅𑀪𑀸𑀯𑀺𑀢𑀁. 𑀢𑀢𑁆𑀭𑀽𑀧𑀧𑀢𑁆𑀢𑀺𑀬𑀸 𑀲𑀁𑀯𑀢𑁆𑀢𑀢𑀻𑀢𑀺 𑀬𑀁 𑀞𑀸𑀦𑀁 𑀧𑀢𑁆𑀣𑁂𑀢𑁆𑀯𑀸 𑀓𑀼𑀲𑀮𑀁 𑀓𑀢𑀁, 𑀢𑀢𑁆𑀣 𑀦𑀺𑀩𑁆𑀩𑀢𑁆𑀢𑀦𑀢𑁆𑀣𑀸𑀬 𑀲𑀁𑀯𑀢𑁆𑀢𑀢𑀺. 𑀯𑀻𑀢𑀭𑀸𑀕𑀲𑁆𑀲𑀸𑀢𑀺 𑀫𑀕𑁆𑀕𑁂𑀦 𑀯𑀸 𑀲𑀫𑀼𑀘𑁆𑀙𑀺𑀦𑁆𑀦𑀭𑀸𑀕𑀲𑁆𑀲 𑀲𑀫𑀸𑀧𑀢𑁆𑀢𑀺𑀬𑀸 𑀯𑀸 𑀯𑀺𑀓𑁆𑀔𑀫𑁆𑀪𑀺𑀢𑀭𑀸𑀕𑀲𑁆𑀲. 𑀤𑀸𑀦𑀫𑀢𑁆𑀢𑁂𑀦𑁂𑀯 𑀳𑀺 𑀩𑁆𑀭𑀳𑁆𑀫𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺𑀢𑀼𑀁 𑀦 𑀲𑀓𑁆𑀓𑀸, 𑀤𑀸𑀦𑀁 𑀧𑀦 𑀲𑀫𑀸𑀥𑀺𑀯𑀺𑀧𑀲𑁆𑀲𑀦𑀸𑀘𑀺𑀢𑁆𑀢𑀲𑁆𑀲 𑀅𑀮𑀗𑁆𑀓𑀸𑀭𑀧𑀭𑀺𑀯𑀸𑀭𑀁 𑀳𑁄𑀢𑀺. 𑀢𑀢𑁄 𑀤𑀸𑀦𑁂𑀦 𑀫𑀼𑀤𑀼𑀘𑀺𑀢𑁆𑀢𑁄 𑀩𑁆𑀭𑀳𑁆𑀫𑀯𑀺𑀳𑀸𑀭𑁂 𑀪𑀸𑀯𑁂𑀢𑁆𑀯𑀸 𑀩𑁆𑀭𑀳𑁆𑀫𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀯𑀻𑀢𑀭𑀸𑀕𑀲𑁆𑀲 𑀦𑁄 𑀲𑀭𑀸𑀕𑀲𑁆𑀲𑀸’’𑀢𑀺.
𑁬. 𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀼𑀲𑀼𑀢𑁆𑀢𑀯𑀡𑁆𑀡𑀦𑀸
𑁩𑁬. 𑀙𑀝𑁆𑀞𑁂 𑀧𑀼𑀜𑁆𑀜𑀓𑀺𑀭𑀺𑀬𑀸𑀦𑀺 𑀘 𑀢𑀸𑀦𑀺 𑀢𑁂𑀲𑀁 𑀢𑁂𑀲𑀁 𑀆𑀦𑀺𑀲𑀁𑀲𑀸𑀦𑀁 𑀯𑀢𑁆𑀣𑀽𑀦𑀺 𑀘𑀸𑀢𑀺 𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀽𑀦𑀺. 𑀤𑀸𑀦𑀸𑀤𑀻𑀦𑀜𑁆𑀳𑀺 𑀮𑀓𑁆𑀔𑀡𑁂 𑀘𑀺𑀢𑁆𑀢𑀁 𑀞𑀧𑁂𑀢𑁆𑀯𑀸 ‘‘𑀏𑀯𑀭𑀽𑀧𑀁 𑀦𑀸𑀫 𑀅𑀫𑁆𑀳𑁂𑀳𑀺 𑀤𑀸𑀦𑀁 𑀤𑀸𑀢𑀩𑁆𑀩𑀁, 𑀲𑀻𑀮𑀁 𑀭𑀓𑁆𑀔𑀺𑀢𑀩𑁆𑀩𑀁, 𑀪𑀸𑀯𑀦𑀸 𑀪𑀸𑀯𑁂𑀢𑀩𑁆𑀩𑀸’’𑀢𑀺 𑀲𑀢𑁆𑀢𑀸 𑀧𑀼𑀜𑁆𑀜𑀸𑀦𑀺 𑀓𑀭𑁄𑀦𑁆𑀢𑀺. 𑀤𑀸𑀦𑀫𑁂𑀯 𑀤𑀸𑀦𑀫𑀬𑀁, 𑀤𑀸𑀦𑀘𑁂𑀢𑀦𑀸𑀲𑀼 𑀯𑀸 𑀧𑀼𑀭𑀺𑀫𑀘𑁂𑀢𑀦𑀸𑀢𑁄 𑀦𑀺𑀧𑁆𑀨𑀦𑁆𑀦𑀸 𑀲𑀦𑁆𑀦𑀺𑀝𑁆𑀞𑀸𑀧𑀓𑀘𑁂𑀢𑀦𑀸 𑀤𑀸𑀦𑀫𑀬𑀁 𑀲𑀻𑀮𑀸𑀤𑀻𑀳𑀺 𑀲𑀻𑀮𑀫𑀬𑀸𑀤𑀻𑀦𑀺 𑀯𑀺𑀬. 𑀲𑁂𑀲𑀤𑁆𑀯𑀬𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀧𑀭𑀺𑀢𑁆𑀢𑀁 𑀓𑀢𑀁 𑀳𑁄𑀢𑀻𑀢𑀺 𑀣𑁄𑀓𑀁 𑀫𑀦𑁆𑀤𑀁 𑀓𑀢𑀁 𑀳𑁄𑀢𑀺. 𑀦𑀸𑀪𑀺𑀲𑀫𑁆𑀪𑁄𑀢𑀻𑀢𑀺 𑀦 𑀦𑀺𑀧𑁆𑀨𑀚𑁆𑀚𑀢𑀺. 𑀅𑀓𑀢𑀁 𑀳𑁄𑀢𑀻𑀢𑀺 𑀪𑀸𑀯𑀦𑀸𑀬𑀬𑁄𑀕𑁄𑀬𑁂𑀯 𑀅𑀦𑀸𑀭𑀤𑁆𑀥𑁄 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀫𑀦𑀼𑀲𑁆𑀲𑀤𑁄𑀪𑀕𑁆𑀬𑀦𑁆𑀢𑀺 𑀫𑀦𑀼𑀲𑁆𑀲𑁂𑀲𑀼 𑀲𑀫𑁆𑀧𑀢𑁆𑀢𑀺𑀭𑀳𑀺𑀢𑀁 𑀧𑀜𑁆𑀘𑀯𑀺𑀥𑀁 𑀦𑀻𑀘𑀓𑀼𑀮𑀁. 𑀉𑀧𑀧𑀚𑁆𑀚𑀢𑀻𑀢𑀺 𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀉𑀧𑀕𑀘𑁆𑀙𑀢𑀺, 𑀢𑀢𑁆𑀣 𑀦𑀺𑀩𑁆𑀩𑀢𑁆𑀢𑀢𑀻𑀢𑀺 𑀅𑀢𑁆𑀣𑁄. 𑀫𑀢𑁆𑀢𑀲𑁄 𑀓𑀢𑀦𑁆𑀢𑀺 𑀧𑀫𑀸𑀡𑁂𑀦 𑀓𑀢𑀁, 𑀣𑁄𑀓𑀁 𑀦 𑀩𑀳𑀼. 𑀫𑀦𑀼𑀲𑁆𑀲𑀲𑁄𑀪𑀕𑁆𑀬𑀦𑁆𑀢𑀺 𑀫𑀦𑀼𑀲𑁆𑀲𑁂𑀲𑀼 𑀲𑀼𑀪𑀕𑀪𑀸𑀯𑀁 𑀢𑀺𑀯𑀺𑀥𑀓𑀼𑀮𑀲𑀫𑁆𑀧𑀢𑁆𑀢𑀺𑀁. 𑀅𑀥𑀺𑀫𑀢𑁆𑀢𑀦𑁆𑀢𑀺 𑀅𑀥𑀺𑀓𑀧𑁆𑀧𑀫𑀸𑀡𑀁 𑀩𑀮𑀯𑀁 𑀯𑀸. 𑀅𑀥𑀺𑀕𑀡𑁆𑀳𑀦𑁆𑀢𑀻𑀢𑀺 𑀅𑀪𑀺𑀪𑀯𑀺𑀢𑁆𑀯𑀸 𑀕𑀡𑁆𑀳𑀦𑁆𑀢𑀺, 𑀯𑀺𑀲𑀺𑀝𑁆𑀞𑀢𑀭𑀸 𑀚𑁂𑀝𑁆𑀞𑀓𑀸 𑀳𑁄𑀦𑁆𑀢𑀻𑀢𑀺 𑀅𑀢𑁆𑀣𑁄.