𑁨. 𑀤𑀼𑀢𑀺𑀬𑀧𑀡𑁆𑀡𑀸𑀲𑀓𑀁

(𑁬) 𑁧. 𑀕𑁄𑀢𑀫𑀻𑀯𑀕𑁆𑀕𑁄

𑁧. 𑀕𑁄𑀢𑀫𑀻𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁧. 𑀙𑀝𑁆𑀞𑀲𑁆𑀲 𑀧𑀞𑀫𑁂 𑀲𑀓𑁆𑀓𑁂𑀲𑀼 𑀯𑀺𑀳𑀭𑀢𑀻𑀢𑀺 𑀧𑀞𑀫𑀕𑀫𑀦𑁂𑀦 𑀕𑀦𑁆𑀢𑁆𑀯𑀸 𑀯𑀺𑀳𑀭𑀢𑀺. 𑀫𑀳𑀸𑀧𑀚𑀸𑀧𑀢𑀻𑀢𑀺 𑀧𑀼𑀢𑁆𑀢𑀧𑀚𑀸𑀬 𑀘𑁂𑀯 𑀥𑀻𑀢𑀼𑀧𑀚𑀸𑀬 𑀘 𑀫𑀳𑀦𑁆𑀢𑀢𑁆𑀢𑀸 𑀏𑀯𑀁𑀮𑀤𑁆𑀥𑀦𑀸𑀫𑀸. 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀻𑀢𑀺 𑀪𑀕𑀯𑀸 𑀓𑀧𑀺𑀮𑀧𑀼𑀭𑀁 𑀕𑀦𑁆𑀢𑁆𑀯𑀸 𑀧𑀞𑀫𑀫𑁂𑀯 𑀦𑀦𑁆𑀤𑀁 𑀧𑀩𑁆𑀩𑀸𑀚𑁂𑀲𑀺, 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀭𑀸𑀳𑀼𑀮𑀓𑀼𑀫𑀸𑀭𑀁. 𑀘𑀼𑀫𑁆𑀩𑀝𑀓𑀓𑀮𑀳𑁂 (𑀤𑀻. 𑀦𑀺. 𑀅𑀝𑁆𑀞. 𑁨.𑁩𑁩𑁧; 𑀲𑀁. 𑀦𑀺. 𑀅𑀝𑁆𑀞. 𑁧.𑁧.𑁩𑁭) 𑀧𑀦 𑀉𑀪𑀬𑀦𑀕𑀭𑀯𑀸𑀲𑀺𑀓𑁂𑀲𑀼 𑀬𑀼𑀤𑁆𑀥𑀢𑁆𑀣𑀸𑀬 𑀦𑀺𑀓𑁆𑀔𑀦𑁆𑀢𑁂𑀲𑀼 𑀲𑀢𑁆𑀣𑀸 𑀕𑀦𑁆𑀢𑁆𑀯𑀸 𑀢𑁂 𑀭𑀸𑀚𑀸𑀦𑁄 𑀲𑀜𑁆𑀜𑀸𑀧𑁂𑀢𑁆𑀯𑀸 𑀅𑀢𑁆𑀢𑀤𑀡𑁆𑀟𑀲𑀼𑀢𑁆𑀢𑀁 (𑀲𑀼. 𑀦𑀺. 𑁯𑁪𑁧 𑀆𑀤𑀬𑁄; 𑀫𑀳𑀸𑀦𑀺. 𑁧𑁭𑁦 𑀆𑀤𑀬𑁄) 𑀓𑀣𑁂𑀲𑀺. 𑀭𑀸𑀚𑀸𑀦𑁄 𑀧𑀲𑀻𑀤𑀺𑀢𑁆𑀯𑀸 𑀅𑀟𑁆𑀠𑀢𑀺𑀬𑀲𑀢𑁂 𑀅𑀟𑁆𑀠𑀢𑀺𑀬𑀲𑀢𑁂 𑀓𑀼𑀫𑀸𑀭𑁂 𑀅𑀤𑀁𑀲𑀼, 𑀢𑀸𑀦𑀺 𑀧𑀜𑁆𑀘 𑀓𑀼𑀫𑀸𑀭𑀲𑀢𑀸𑀦𑀺 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀁𑀲𑀼, 𑀅𑀣 𑀦𑁂𑀲𑀁 𑀧𑀚𑀸𑀧𑀢𑀺𑀬𑁄 𑀲𑀸𑀲𑀦𑀁 𑀧𑁂𑀲𑁂𑀢𑁆𑀯𑀸 𑀅𑀦𑀪𑀺𑀭𑀢𑀺𑀁 𑀉𑀧𑁆𑀧𑀸𑀤𑀬𑀺𑀁𑀲𑀼. 𑀲𑀢𑁆𑀣𑀸 𑀢𑁂𑀲𑀁 𑀅𑀦𑀪𑀺𑀭𑀢𑀺𑀬𑀸 𑀉𑀧𑁆𑀧𑀦𑁆𑀦𑀪𑀸𑀯𑀁 𑀜𑀢𑁆𑀯𑀸 𑀢𑁂 𑀧𑀜𑁆𑀘𑀲𑀢𑁂 𑀤𑀳𑀭𑀪𑀺𑀓𑁆𑀔𑀽 𑀓𑀼𑀡𑀸𑀮𑀤𑀳𑀁 𑀦𑁂𑀢𑁆𑀯𑀸 𑀅𑀢𑁆𑀢𑀦𑁄 𑀓𑀼𑀡𑀸𑀮𑀓𑀸𑀮𑁂 𑀦𑀺𑀲𑀺𑀦𑁆𑀦𑀧𑀼𑀩𑁆𑀩𑁂 𑀧𑀸𑀲𑀸𑀡𑀢𑀮𑁂 𑀦𑀺𑀲𑀻𑀤𑀺𑀢𑁆𑀯𑀸 𑀓𑀼𑀡𑀸𑀮𑀚𑀸𑀢𑀓𑀓𑀣𑀸𑀬 (𑀚𑀸. 𑁨.𑁨𑁧.𑀓𑀼𑀡𑀸𑀮𑀚𑀸𑀢𑀓) 𑀢𑁂𑀲𑀁 𑀅𑀦𑀪𑀺𑀭𑀢𑀺𑀁 𑀯𑀺𑀦𑁄𑀤𑁂𑀢𑁆𑀯𑀸 𑀲𑀩𑁆𑀩𑁂𑀧𑀺 𑀢𑁂 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀸𑀧𑁂𑀲𑀺, 𑀧𑀼𑀦 𑀫𑀳𑀸𑀯𑀦𑀁 𑀆𑀦𑁂𑀢𑁆𑀯𑀸 𑀅𑀭𑀳𑀢𑁆𑀢𑀨𑀮𑁂𑀢𑀺. 𑀢𑁂𑀲𑀁 𑀘𑀺𑀢𑁆𑀢𑀚𑀸𑀦𑀦𑀢𑁆𑀣𑀁 𑀧𑀼𑀦𑀧𑀺 𑀧𑀚𑀸𑀧𑀢𑀺𑀬𑁄 𑀲𑀸𑀲𑀦𑀁 𑀧𑀳𑀺𑀡𑀺𑀁𑀲𑀼. 𑀢𑁂 ‘‘𑀅𑀪𑀩𑁆𑀩𑀸 𑀫𑀬𑀁 𑀖𑀭𑀸𑀯𑀸𑀲𑀲𑁆𑀲𑀸’’𑀢𑀺 𑀧𑀝𑀺𑀲𑀸𑀲𑀦𑀁 𑀧𑀳𑀺𑀡𑀺𑀁𑀲𑀼. 𑀢𑀸 ‘‘𑀦 𑀤𑀸𑀦𑀺 𑀅𑀫𑁆𑀳𑀸𑀓𑀁 𑀖𑀭𑀁 𑀕𑀦𑁆𑀢𑀼𑀁 𑀬𑀼𑀢𑁆𑀢𑀁, 𑀫𑀳𑀸𑀧𑀚𑀸𑀧𑀢𑀺𑀬𑀸 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀧𑀩𑁆𑀩𑀚𑁆𑀚𑀁 𑀅𑀦𑀼𑀚𑀸𑀦𑀸𑀧𑁂𑀢𑁆𑀯𑀸 𑀧𑀩𑁆𑀩𑀚𑀺𑀲𑁆𑀲𑀸𑀫𑀸’’𑀢𑀺 𑀧𑀜𑁆𑀘𑀲𑀢𑀸𑀧𑀺 𑀫𑀳𑀸𑀧𑀚𑀸𑀧𑀢𑀺𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀅𑀬𑁆𑀬𑁂, 𑀅𑀫𑁆𑀳𑀸𑀓𑀁 𑀧𑀩𑁆𑀩𑀚𑁆𑀚𑀁 𑀅𑀦𑀼𑀚𑀸𑀦𑀸𑀧𑁂𑀣𑀸’’𑀢𑀺 𑀆𑀳𑀁𑀲𑀼. 𑀫𑀳𑀸𑀧𑀚𑀸𑀧𑀢𑀻 𑀢𑀸 𑀇𑀢𑁆𑀣𑀺𑀬𑁄 𑀕𑀳𑁂𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺. 𑀲𑁂𑀢𑀘𑁆𑀙𑀢𑁆𑀢𑀲𑁆𑀲 𑀳𑁂𑀝𑁆𑀞𑀸 𑀭𑀜𑁆𑀜𑁄 𑀧𑀭𑀺𑀦𑀺𑀩𑁆𑀩𑀼𑀢𑀓𑀸𑀮𑁂 𑀉𑀧𑀲𑀗𑁆𑀓𑀫𑀻𑀢𑀺𑀧𑀺 𑀯𑀤𑀦𑁆𑀢𑀺𑀬𑁂𑀯.

𑀅𑀮𑀁 𑀕𑁄𑀢𑀫𑀺, 𑀫𑀸 𑀢𑁂 𑀭𑀼𑀘𑁆𑀘𑀻𑀢𑀺 𑀓𑀲𑁆𑀫𑀸 𑀧𑀝𑀺𑀓𑁆𑀔𑀺𑀧𑀺, 𑀦𑀦𑀼 𑀲𑀩𑁆𑀩𑁂𑀲𑀫𑁆𑀧𑀺 𑀩𑀼𑀤𑁆𑀥𑀸𑀦𑀁 𑀘𑀢𑀲𑁆𑀲𑁄 𑀧𑀭𑀺𑀲𑀸 𑀳𑁄𑀦𑁆𑀢𑀻𑀢𑀺? 𑀓𑀸𑀫𑀁 𑀳𑁄𑀦𑁆𑀢𑀺, 𑀓𑀺𑀮𑀫𑁂𑀢𑁆𑀯𑀸 𑀧𑀦 𑀅𑀦𑁂𑀓𑀯𑀸𑀭𑀁 𑀬𑀸𑀘𑀺𑀢𑁂 𑀅𑀦𑀼𑀜𑁆𑀜𑀸𑀢𑀁 𑀧𑀩𑁆𑀩𑀚𑁆𑀚𑀁 ‘‘𑀤𑀼𑀓𑁆𑀔𑁂𑀦 𑀮𑀤𑁆𑀥𑀸’’𑀢𑀺 𑀲𑀫𑁆𑀫𑀸 𑀧𑀭𑀺𑀧𑀸𑀮𑁂𑀲𑁆𑀲𑀦𑁆𑀢𑀻𑀢𑀺 𑀕𑀭𑀼𑀁 𑀓𑀢𑁆𑀯𑀸 𑀅𑀦𑀼𑀜𑁆𑀜𑀸𑀢𑀼𑀓𑀸𑀫𑁄 𑀧𑀝𑀺𑀓𑁆𑀔𑀺𑀧𑀺. 𑀧𑀓𑁆𑀓𑀸𑀫𑀻𑀢𑀺 𑀧𑀼𑀦 𑀓𑀧𑀺𑀮𑀧𑀼𑀭𑀫𑁂𑀯 𑀧𑀸𑀯𑀺𑀲𑀺. 𑀬𑀣𑀸𑀪𑀺𑀭𑀦𑁆𑀢𑀁 𑀯𑀺𑀳𑀭𑀺𑀢𑁆𑀯𑀸𑀢𑀺 𑀩𑁄𑀥𑀦𑁂𑀬𑁆𑀬𑀲𑀢𑁆𑀢𑀸𑀦𑀁 𑀉𑀧𑀦𑀺𑀲𑁆𑀲𑀬𑀁 𑀑𑀮𑁄𑀓𑁂𑀦𑁆𑀢𑁄 𑀬𑀣𑀸𑀚𑁆𑀛𑀸𑀲𑀬𑀦𑁂 𑀯𑀺𑀳𑀭𑀺𑀢𑁆𑀯𑀸. 𑀘𑀸𑀭𑀺𑀓𑀁 𑀧𑀓𑁆𑀓𑀸𑀫𑀻𑀢𑀺 𑀫𑀳𑀸𑀚𑀦𑀲𑀗𑁆𑀕𑀳𑀁 𑀓𑀭𑁄𑀦𑁆𑀢𑁄 𑀉𑀢𑁆𑀢𑀫𑀸𑀬 𑀩𑀼𑀤𑁆𑀥𑀲𑀺𑀭𑀺𑀬𑀸 𑀅𑀦𑁄𑀧𑀫𑁂𑀦 𑀩𑀼𑀤𑁆𑀥𑀯𑀺𑀮𑀸𑀲𑁂𑀦 𑀅𑀢𑀼𑀭𑀺𑀢𑀘𑀸𑀭𑀺𑀓𑀁 𑀧𑀓𑁆𑀓𑀸𑀫𑀺.

𑀲𑀫𑁆𑀩𑀳𑀼𑀮𑀸𑀳𑀺 𑀲𑀸𑀓𑀺𑀬𑀸𑀦𑀻𑀳𑀺 𑀲𑀤𑁆𑀥𑀺𑀦𑁆𑀢𑀺 𑀅𑀦𑁆𑀢𑁄𑀦𑀺𑀯𑁂𑀲𑀦𑀫𑁆𑀳𑀺𑀬𑁂𑀯 𑀤𑀲𑀩𑀮𑀁 𑀉𑀤𑁆𑀤𑀺𑀲𑁆𑀲 𑀧𑀩𑁆𑀩𑀚𑁆𑀚𑀸𑀯𑁂𑀲𑀁 𑀕𑀳𑁂𑀢𑁆𑀯𑀸 𑀧𑀜𑁆𑀘𑀲𑀢𑀸 𑀲𑀸𑀓𑀺𑀬𑀸𑀦𑀺𑀬𑁄 𑀧𑀩𑁆𑀩𑀚𑁆𑀚𑀸𑀯𑁂𑀲𑀁𑀬𑁂𑀯 𑀕𑀸𑀳𑀸𑀧𑁂𑀢𑁆𑀯𑀸 𑀲𑀩𑁆𑀩𑀸𑀳𑀺𑀧𑀺 𑀢𑀸𑀳𑀺 𑀲𑀫𑁆𑀩𑀳𑀼𑀮𑀸𑀳𑀺 𑀲𑀸𑀓𑀺𑀬𑀸𑀦𑀻𑀳𑀺 𑀲𑀤𑁆𑀥𑀺𑀁. 𑀘𑀸𑀭𑀺𑀓𑀁 𑀧𑀓𑁆𑀓𑀸𑀫𑀻𑀢𑀺 𑀕𑀫𑀦𑀁 𑀅𑀪𑀺𑀦𑀻𑀳𑀭𑀺. 𑀕𑀫𑀦𑀸𑀪𑀺𑀦𑀻𑀳𑀭𑀡𑀓𑀸𑀮𑁂 𑀧𑀦 𑀢𑀸 𑀲𑀼𑀔𑀼𑀫𑀸𑀮𑀸 𑀭𑀸𑀚𑀺𑀢𑁆𑀣𑀺𑀬𑁄 𑀧𑀤𑀲𑀸 𑀕𑀦𑁆𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀦𑁆𑀢𑀻𑀢𑀺 𑀲𑀸𑀓𑀺𑀬𑀓𑁄𑀮𑀺𑀬𑀭𑀸𑀚𑀸𑀦𑁄 𑀲𑁄𑀯𑀡𑁆𑀡𑀲𑀺𑀯𑀺𑀓𑀸𑀬𑁄 𑀉𑀧𑀝𑁆𑀞𑀸𑀧𑀬𑀺𑀁𑀲𑀼. 𑀢𑀸 𑀧𑀦 ‘‘𑀬𑀸𑀦𑁂 𑀆𑀭𑀼𑀬𑁆𑀳 𑀕𑀘𑁆𑀙𑀦𑁆𑀢𑀻𑀢𑀺 𑀲𑀢𑁆𑀣𑀭𑀺 𑀅𑀕𑀸𑀭𑀯𑁄 𑀓𑀢𑁄 𑀳𑁄𑀢𑀻’’𑀢𑀺 𑀏𑀓𑀧𑀡𑁆𑀡𑀸𑀲𑀬𑁄𑀚𑀦𑀺𑀓𑀁 𑀧𑀤𑀲𑀸𑀯 𑀧𑀝𑀺𑀧𑀚𑁆𑀚𑀺𑀁𑀲𑀼. 𑀭𑀸𑀚𑀸𑀦𑁄𑀧𑀺 𑀧𑀼𑀭𑀢𑁄 𑀘 𑀧𑀘𑁆𑀙𑀢𑁄 𑀘 𑀆𑀭𑀓𑁆𑀔𑀁 𑀲𑀁𑀯𑀺𑀤𑀳𑀸𑀧𑁂𑀢𑁆𑀯𑀸 𑀢𑀡𑁆𑀟𑀼𑀮𑀲𑀧𑁆𑀧𑀺𑀢𑁂𑀮𑀸𑀤𑀻𑀦𑀁 𑀲𑀓𑀝𑀸𑀦𑀺 𑀧𑀽𑀭𑀸𑀧𑁂𑀢𑁆𑀯𑀸 ‘‘𑀕𑀢𑀝𑁆𑀞𑀸𑀦𑁂 𑀕𑀢𑀝𑁆𑀞𑀸𑀦𑁂 𑀆𑀳𑀸𑀭𑀁 𑀧𑀝𑀺𑀬𑀸𑀤𑁂𑀣𑀸’’𑀢𑀺 𑀧𑀼𑀭𑀺𑀲𑁂 𑀧𑁂𑀲𑀬𑀺𑀁𑀲𑀼. 𑀲𑀽𑀦𑁂𑀳𑀺 𑀧𑀸𑀤𑁂𑀳𑀻𑀢𑀺 𑀢𑀸𑀲𑀜𑁆𑀳𑀺 𑀲𑀼𑀔𑀼𑀫𑀸𑀮𑀢𑁆𑀢𑀸 𑀧𑀸𑀤𑁂𑀲𑀼 𑀏𑀓𑁄 𑀨𑁄𑀝𑁄 𑀉𑀝𑁆𑀞𑁂𑀢𑀺, 𑀏𑀓𑁄 𑀪𑀺𑀚𑁆𑀚𑀢𑀺. 𑀉𑀪𑁄 𑀧𑀸𑀤𑀸 𑀓𑀢𑀓𑀝𑁆𑀞𑀺𑀲𑀫𑁆𑀧𑀭𑀺𑀓𑀺𑀡𑁆𑀡𑀸 𑀯𑀺𑀬 𑀳𑀼𑀢𑁆𑀯𑀸 𑀉𑀤𑁆𑀥𑀼𑀫𑀸𑀢𑀸 𑀚𑀸𑀢𑀸. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀲𑀽𑀦𑁂𑀳𑀺 𑀧𑀸𑀤𑁂𑀳𑀻’’𑀢𑀺. 𑀩𑀳𑀺𑀤𑁆𑀯𑀸𑀭𑀓𑁄𑀝𑁆𑀞𑀓𑁂𑀢𑀺 𑀤𑁆𑀯𑀸𑀭𑀓𑁄𑀝𑁆𑀞𑀓𑀢𑁄 𑀩𑀳𑀺. 𑀓𑀲𑁆𑀫𑀸 𑀧𑀦𑁂𑀯𑀁 𑀞𑀺𑀢𑀸𑀢𑀺? 𑀏𑀯𑀁 𑀓𑀺𑀭𑀲𑁆𑀲𑀸 𑀅𑀳𑁄𑀲𑀺 𑁋 ‘‘𑀅𑀳𑀁 𑀢𑀣𑀸𑀕𑀢𑁂𑀦 𑀅𑀦𑀦𑀼𑀜𑁆𑀜𑀸𑀢𑀸 𑀲𑀬𑀫𑁂𑀯 𑀧𑀩𑁆𑀩𑀚𑁆𑀚𑀸𑀯𑁂𑀲𑀁 𑀅𑀕𑁆𑀕𑀳𑁂𑀲𑀺𑀁, 𑀏𑀯𑀁 𑀕𑀳𑀺𑀢𑀪𑀸𑀯𑁄 𑀘 𑀧𑀦 𑀫𑁂 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀧𑀸𑀓𑀝𑁄 𑀚𑀸𑀢𑁄. 𑀲𑀘𑁂 𑀲𑀢𑁆𑀣𑀸 𑀧𑀩𑁆𑀩𑀚𑁆𑀚𑀁 𑀅𑀦𑀼𑀚𑀸𑀦𑀸𑀢𑀺, 𑀇𑀘𑁆𑀘𑁂𑀢𑀁 𑀓𑀼𑀲𑀮𑀁. 𑀲𑀘𑁂 𑀧𑀦 𑀦𑀸𑀦𑀼𑀚𑀸𑀦𑀺𑀲𑁆𑀲𑀢𑀺, 𑀫𑀳𑀢𑀻 𑀕𑀭𑀳𑀸 𑀪𑀯𑀺𑀲𑁆𑀲𑀢𑀻’’𑀢𑀺 𑀯𑀺𑀳𑀸𑀭𑀁 𑀧𑀯𑀺𑀲𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀻 𑀭𑁄𑀤𑀫𑀸𑀦𑀸𑀯 𑀅𑀝𑁆𑀞𑀸𑀲𑀺.

𑀓𑀺𑀁 𑀦𑀼 𑀢𑁆𑀯𑀁 𑀕𑁄𑀢𑀫𑀻𑀢𑀺 𑀓𑀺𑀁 𑀦𑀼 𑀭𑀸𑀚𑀓𑀼𑀮𑀸𑀦𑀁 𑀯𑀺𑀧𑀢𑁆𑀢𑀺 𑀉𑀧𑁆𑀧𑀦𑁆𑀦𑀸, 𑀓𑁂𑀦 𑀢𑁆𑀯𑀁 𑀓𑀸𑀭𑀡𑁂𑀦 𑀏𑀯𑀁 𑀯𑀺𑀯𑀡𑁆𑀡𑀪𑀸𑀯𑀁 𑀧𑀢𑁆𑀢𑀸, 𑀲𑀽𑀦𑁂𑀳𑀺 𑀧𑀸𑀤𑁂𑀳𑀺…𑀧𑁂… 𑀞𑀺𑀢𑀸𑀢𑀺. 𑀅𑀜𑁆𑀜𑁂𑀦𑀧𑀺 𑀧𑀭𑀺𑀬𑀸𑀬𑁂𑀦𑀸𑀢𑀺 𑀅𑀜𑁆𑀜𑁂𑀦𑀧𑀺 𑀓𑀸𑀭𑀡𑁂𑀦. 𑀩𑀳𑀼𑀓𑀸𑀭𑀸, 𑀪𑀦𑁆𑀢𑁂𑀢𑀺𑀆𑀤𑀺𑀦𑀸 𑀢𑀲𑁆𑀲𑀸 𑀕𑀼𑀡𑀁 𑀓𑀣𑁂𑀢𑁆𑀯𑀸 𑀧𑀼𑀦 𑀧𑀩𑁆𑀩𑀚𑁆𑀚𑀁 𑀬𑀸𑀘𑀦𑁆𑀢𑁄 𑀏𑀯𑀫𑀸𑀳. 𑀲𑀢𑁆𑀣𑀸𑀧𑀺 ‘‘𑀇𑀢𑁆𑀣𑀺𑀬𑁄 𑀦𑀸𑀫 𑀧𑀭𑀺𑀢𑁆𑀢𑀧𑀜𑁆𑀜𑀸, 𑀏𑀓𑀬𑀸𑀘𑀺𑀢𑀫𑀢𑁆𑀢𑁂𑀦 𑀧𑀩𑁆𑀩𑀚𑁆𑀚𑀸𑀬 𑀅𑀦𑀼𑀜𑁆𑀜𑀸𑀢𑀸𑀬 𑀦 𑀫𑀫 𑀲𑀸𑀲𑀦𑀁 𑀕𑀭𑀼𑀁 𑀓𑀢𑁆𑀯𑀸 𑀕𑀡𑁆𑀳𑀺𑀲𑁆𑀲𑀦𑁆𑀢𑀻’’𑀢𑀺 𑀢𑀺𑀓𑁆𑀔𑀢𑁆𑀢𑀼𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀇𑀤𑀸𑀦𑀺 𑀕𑀭𑀼𑀁 𑀓𑀢𑁆𑀯𑀸 𑀕𑀸𑀳𑀸𑀧𑁂𑀢𑀼𑀓𑀸𑀫𑀢𑀸𑀬 𑀲𑀘𑁂, 𑀆𑀦𑀦𑁆𑀤, 𑀫𑀳𑀸𑀧𑀚𑀸𑀧𑀢𑀻 𑀕𑁄𑀢𑀫𑀻 𑀅𑀝𑁆𑀞 𑀕𑀭𑀼𑀥𑀫𑁆𑀫𑁂 𑀧𑀝𑀺𑀕𑁆𑀕𑀡𑁆𑀳𑀸𑀢𑀺, 𑀲𑀸𑀯’𑀲𑁆𑀲𑀸 𑀳𑁄𑀢𑀼 𑀉𑀧𑀲𑀫𑁆𑀧𑀤𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀸𑀯𑀲𑁆𑀲𑀸𑀢𑀺 𑀲𑀸 𑀏𑀯 𑀅𑀲𑁆𑀲𑀸 𑀧𑀩𑁆𑀩𑀚𑁆𑀚𑀸𑀧𑀺 𑀉𑀧𑀲𑀫𑁆𑀧𑀤𑀸𑀧𑀺 𑀳𑁄𑀢𑀼.

𑀢𑀤𑀳𑀽𑀧𑀲𑀫𑁆𑀧𑀦𑁆𑀦𑀲𑁆𑀲𑀸𑀢𑀺 𑀢𑀁𑀤𑀺𑀯𑀲𑀁 𑀉𑀧𑀲𑀫𑁆𑀧𑀦𑁆𑀦𑀲𑁆𑀲. 𑀅𑀪𑀺𑀯𑀸𑀤𑀦𑀁 𑀧𑀘𑁆𑀘𑀼𑀝𑁆𑀞𑀸𑀦𑀁 𑀅𑀜𑁆𑀚𑀮𑀺𑀓𑀫𑁆𑀫𑀁 𑀲𑀸𑀫𑀻𑀘𑀺𑀓𑀫𑁆𑀫𑀁 𑀓𑀢𑁆𑀢𑀩𑁆𑀩𑀦𑁆𑀢𑀺 𑀑𑀫𑀸𑀦𑀸𑀢𑀺𑀫𑀸𑀦𑁂 𑀅𑀓𑀢𑁆𑀯𑀸 𑀧𑀜𑁆𑀘𑀧𑀢𑀺𑀝𑁆𑀞𑀺𑀢𑁂𑀦 𑀅𑀪𑀺𑀯𑀸𑀤𑀦𑀁, 𑀆𑀲𑀦𑀸 𑀧𑀘𑁆𑀘𑀼𑀝𑁆𑀞𑀸𑀬 𑀧𑀘𑁆𑀘𑀼𑀕𑁆𑀕𑀫𑀦𑀯𑀲𑁂𑀦 𑀧𑀘𑁆𑀘𑀼𑀝𑁆𑀞𑀸𑀦𑀁, 𑀤𑀲𑀦𑀔𑁂 𑀲𑀫𑁄𑀥𑀸𑀦𑁂𑀢𑁆𑀯𑀸 𑀅𑀜𑁆𑀚𑀮𑀺𑀓𑀫𑁆𑀫𑀁, 𑀆𑀲𑀦𑀧𑀜𑁆𑀜𑀸𑀧𑀦𑀩𑀻𑀚𑀦𑀸𑀤𑀺𑀓𑀁 𑀅𑀦𑀼𑀘𑁆𑀙𑀯𑀺𑀓𑀓𑀫𑁆𑀫𑀲𑀗𑁆𑀔𑀸𑀢𑀁 𑀲𑀸𑀫𑀻𑀘𑀺𑀓𑀫𑁆𑀫𑀜𑁆𑀘 𑀓𑀢𑀩𑁆𑀩𑀁. 𑀅𑀪𑀺𑀓𑁆𑀔𑀼𑀓𑁂 𑀆𑀯𑀸𑀲𑁂𑀢𑀺 𑀬𑀢𑁆𑀣 𑀯𑀲𑀦𑁆𑀢𑀺𑀬𑀸 𑀅𑀦𑀦𑁆𑀢𑀭𑀸𑀬𑁂𑀦 𑀑𑀯𑀸𑀤𑀢𑁆𑀣𑀸𑀬 𑀉𑀧𑀲𑀗𑁆𑀓𑀫𑀦𑀝𑁆𑀞𑀸𑀦𑁂 𑀑𑀯𑀸𑀤𑀤𑀸𑀬𑀓𑁄 𑀆𑀘𑀭𑀺𑀬𑁄 𑀦𑀢𑁆𑀣𑀺, 𑀅𑀬𑀁 𑀅𑀪𑀺𑀓𑁆𑀔𑀼𑀓𑁄 𑀆𑀯𑀸𑀲𑁄 𑀦𑀸𑀫. 𑀏𑀯𑀭𑀽𑀧𑁂 𑀆𑀯𑀸𑀲𑁂 𑀯𑀲𑁆𑀲𑀁 𑀦 𑀉𑀧𑀕𑀦𑁆𑀢𑀩𑁆𑀩𑀁. 𑀅𑀦𑁆𑀯𑀟𑁆𑀠𑀫𑀸𑀲𑀦𑁆𑀢𑀺 𑀅𑀦𑀼𑀧𑁄𑀲𑀣𑀺𑀓𑀁. 𑀑𑀯𑀸𑀤𑀽𑀧𑀲𑀗𑁆𑀓𑀫𑀦𑀦𑁆𑀢𑀺 𑀑𑀯𑀸𑀤𑀢𑁆𑀣𑀸𑀬 𑀉𑀧𑀲𑀗𑁆𑀓𑀫𑀦𑀁. 𑀤𑀺𑀝𑁆𑀞𑁂𑀦𑀸𑀢𑀺 𑀘𑀓𑁆𑀔𑀼𑀦𑀸 𑀤𑀺𑀝𑁆𑀞𑁂𑀦. 𑀲𑀼𑀢𑁂𑀦𑀸𑀢𑀺 𑀲𑁄𑀢𑁂𑀦 𑀲𑀼𑀢𑁂𑀦. 𑀧𑀭𑀺𑀲𑀗𑁆𑀓𑀸𑀬𑀸𑀢𑀺 𑀤𑀺𑀝𑁆𑀞𑀲𑀼𑀢𑀯𑀲𑁂𑀦 𑀧𑀭𑀺𑀲𑀗𑁆𑀓𑀺𑀢𑁂𑀦. 𑀕𑀭𑀼𑀥𑀫𑁆𑀫𑀦𑁆𑀢𑀺 𑀕𑀭𑀼𑀓𑀁 𑀲𑀗𑁆𑀖𑀸𑀤𑀺𑀲𑁂𑀲𑀸𑀧𑀢𑁆𑀢𑀺𑀁. 𑀧𑀓𑁆𑀔𑀫𑀸𑀦𑀢𑁆𑀢𑀦𑁆𑀢𑀺 𑀅𑀦𑀽𑀦𑀸𑀦𑀺 𑀧𑀦𑁆𑀦𑀭𑀲 𑀤𑀺𑀯𑀲𑀸𑀦𑀺 𑀫𑀸𑀦𑀢𑁆𑀢𑀁. 𑀙𑀲𑀼 𑀥𑀫𑁆𑀫𑁂𑀲𑀽𑀢𑀺 𑀯𑀺𑀓𑀸𑀮𑀪𑁄𑀚𑀦𑀘𑁆𑀙𑀝𑁆𑀞𑁂𑀲𑀼 𑀲𑀺𑀓𑁆𑀔𑀸𑀧𑀤𑁂𑀲𑀼. 𑀲𑀺𑀓𑁆𑀔𑀺𑀢𑀲𑀺𑀓𑁆𑀔𑀸𑀬𑀸𑀢𑀺 𑀏𑀓𑀲𑀺𑀓𑁆𑀔𑀫𑁆𑀧𑀺 𑀅𑀔𑀡𑁆𑀟𑀁 𑀓𑀢𑁆𑀯𑀸 𑀧𑀽𑀭𑀺𑀢𑀲𑀺𑀓𑁆𑀔𑀸𑀬. 𑀅𑀓𑁆𑀓𑁄𑀲𑀺𑀢𑀩𑁆𑀩𑁄 𑀧𑀭𑀺𑀪𑀸𑀲𑀺𑀢𑀩𑁆𑀩𑁄𑀢𑀺 𑀤𑀲𑀦𑁆𑀦𑀁 𑀅𑀓𑁆𑀓𑁄𑀲𑀯𑀢𑁆𑀣𑀽𑀦𑀁 𑀅𑀜𑁆𑀜𑀢𑀭𑁂𑀦 𑀅𑀓𑁆𑀓𑁄𑀲𑀯𑀢𑁆𑀣𑀼𑀦𑀸 𑀦 𑀅𑀓𑁆𑀓𑁄𑀲𑀺𑀢𑀩𑁆𑀩𑁄, 𑀪𑀬𑀽𑀧𑀤𑀁𑀲𑀦𑀸𑀬 𑀬𑀸𑀬 𑀓𑀸𑀬𑀘𑀺 𑀧𑀭𑀺𑀪𑀸𑀲𑀸𑀬 𑀦 𑀧𑀭𑀺𑀪𑀸𑀲𑀺𑀢𑀩𑁆𑀩𑁄.

𑀑𑀯𑀝𑁄 𑀪𑀺𑀓𑁆𑀔𑀼𑀦𑀻𑀦𑀁 𑀪𑀺𑀓𑁆𑀔𑀽𑀲𑀼 𑀯𑀘𑀦𑀧𑀣𑁄𑀢𑀺 𑀑𑀯𑀸𑀤𑀸𑀦𑀼𑀲𑀸𑀲𑀦𑀥𑀫𑁆𑀫𑀓𑀣𑀸𑀲𑀗𑁆𑀔𑀸𑀢𑁄 𑀯𑀘𑀦𑀧𑀣𑁄 𑀪𑀺𑀓𑁆𑀔𑀼𑀦𑀻𑀦𑀁 𑀪𑀺𑀓𑁆𑀔𑀽𑀲𑀼 𑀑𑀯𑀭𑀺𑀢𑁄 𑀧𑀺𑀳𑀺𑀢𑁄, 𑀦 𑀪𑀺𑀓𑁆𑀔𑀼𑀦𑀺𑀬𑀸 𑀓𑁄𑀘𑀺 𑀪𑀺𑀓𑁆𑀔𑀼 𑀑𑀯𑀤𑀺𑀢𑀩𑁆𑀩𑁄 𑀅𑀦𑀼𑀲𑀸𑀲𑀺𑀢𑀩𑁆𑀩𑁄 𑀯𑀸 ‘‘𑀪𑀦𑁆𑀢𑁂, 𑀧𑁄𑀭𑀸𑀡𑀓𑀢𑁆𑀣𑁂𑀭𑀸 𑀇𑀤𑀁 𑀘𑀻𑀯𑀭𑀯𑀢𑁆𑀢𑀁 𑀧𑀽𑀭𑀬𑀺𑀁𑀲𑀽’’𑀢𑀺 𑀏𑀯𑀁 𑀧𑀦 𑀧𑀯𑁂𑀡𑀺𑀯𑀲𑁂𑀦 𑀓𑀣𑁂𑀢𑀼𑀁 𑀯𑀝𑁆𑀝𑀢𑀺. 𑀅𑀦𑁄𑀯𑀝𑁄 𑀪𑀺𑀓𑁆𑀔𑀽𑀦𑀁 𑀪𑀺𑀓𑁆𑀔𑀼𑀦𑀻𑀲𑀼 𑀯𑀘𑀦𑀧𑀣𑁄𑀢𑀺 𑀪𑀺𑀓𑁆𑀔𑀽𑀦𑀁 𑀧𑀦 𑀪𑀺𑀓𑁆𑀔𑀼𑀦𑀻𑀲𑀼 𑀯𑀘𑀦𑀧𑀣𑁄 𑀅𑀦𑀺𑀯𑀸𑀭𑀺𑀢𑁄, 𑀬𑀣𑀸𑀭𑀼𑀘𑀺 𑀑𑀯𑀤𑀺𑀢𑀼𑀁 𑀅𑀦𑀼𑀲𑀸𑀲𑀺𑀢𑀼𑀁 𑀥𑀫𑁆𑀫𑀓𑀣𑀁 𑀓𑀣𑁂𑀢𑀼𑀦𑁆𑀢𑀺 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑀢𑁄 𑀧𑀦𑁂𑀲𑀸 𑀕𑀭𑀼𑀥𑀫𑁆𑀫𑀓𑀣𑀸 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬 𑀯𑀺𑀦𑀬𑀲𑀁𑀯𑀡𑁆𑀡𑀦𑀸𑀬 (𑀧𑀸𑀘𑀺. 𑀅𑀝𑁆𑀞. 𑁧𑁪𑁮) 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸.

𑀇𑀫𑁂 𑀧𑀦 𑀅𑀝𑁆𑀞 𑀕𑀭𑀼𑀥𑀫𑁆𑀫𑁂 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀉𑀕𑁆𑀕𑀳𑁂𑀢𑁆𑀯𑀸 𑀣𑁂𑀭𑁂𑀦 𑀅𑀢𑁆𑀢𑀦𑁄 𑀆𑀭𑁄𑀘𑀺𑀬𑀫𑀸𑀦𑁂 𑀲𑀼𑀢𑁆𑀯𑀸𑀯 𑀫𑀳𑀸𑀧𑀚𑀸𑀧𑀢𑀺𑀬𑀸 𑀢𑀸𑀯 𑀫𑀳𑀦𑁆𑀢𑀁 𑀤𑁄𑀫𑀦𑀲𑁆𑀲𑀁 𑀔𑀡𑁂𑀦 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀺, 𑀅𑀦𑁄𑀢𑀢𑁆𑀢𑀤𑀳𑀢𑁄 𑀆𑀪𑀢𑁂𑀦 𑀲𑀻𑀢𑀼𑀤𑀓𑀲𑁆𑀲 𑀖𑀝𑀲𑀢𑁂𑀦 𑀫𑀢𑁆𑀣𑀓𑁂 𑀧𑀭𑀺𑀲𑀺𑀢𑁆𑀢𑀸 𑀯𑀺𑀬 𑀯𑀺𑀕𑀢𑀧𑀭𑀺𑀴𑀸𑀳𑀸 𑀅𑀢𑁆𑀢𑀫𑀦𑀸 𑀳𑀼𑀢𑁆𑀯𑀸 𑀕𑀭𑀼𑀥𑀫𑁆𑀫𑀧𑀝𑀺𑀕𑁆𑀕𑀳𑀡𑁂𑀦 𑀉𑀧𑁆𑀧𑀦𑁆𑀦𑀧𑀻𑀢𑀺𑀧𑀸𑀫𑁄𑀚𑁆𑀚𑀁 𑀆𑀯𑀺𑀓𑀭𑁄𑀦𑁆𑀢𑀻 𑀲𑁂𑀬𑁆𑀬𑀣𑀸𑀧𑀺, 𑀪𑀦𑁆𑀢𑁂𑀢𑀺𑀆𑀤𑀺𑀓𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺.

𑀓𑀼𑀫𑁆𑀪𑀢𑁆𑀣𑁂𑀦𑀓𑁂𑀳𑀻𑀢𑀺 𑀓𑀼𑀫𑁆𑀪𑁂 𑀤𑀻𑀧𑀁 𑀚𑀸𑀮𑁂𑀢𑁆𑀯𑀸 𑀢𑁂𑀦 𑀆𑀮𑁄𑀓𑁂𑀦 𑀧𑀭𑀖𑀭𑁂 𑀪𑀡𑁆𑀟𑀁 𑀯𑀺𑀘𑀺𑀦𑀺𑀢𑁆𑀯𑀸 𑀣𑁂𑀦𑀓𑀘𑁄𑀭𑁂𑀳𑀺. 𑀲𑁂𑀢𑀝𑁆𑀞𑀺𑀓𑀸 𑀦𑀸𑀫 𑀭𑁄𑀕𑀚𑀸𑀢𑀻𑀢𑀺 𑀏𑀓𑁄 𑀧𑀸𑀡𑀓𑁄 𑀦𑀸𑀴𑀫𑀚𑁆𑀛𑀕𑀢𑀁 𑀓𑀡𑁆𑀟𑀁 𑀯𑀺𑀚𑁆𑀛𑀢𑀺, 𑀬𑁂𑀦 𑀯𑀺𑀤𑁆𑀥𑀸 𑀓𑀡𑁆𑀟𑀸 𑀦𑀺𑀓𑁆𑀔𑀦𑁆𑀢𑀫𑁆𑀧𑀺 𑀲𑀸𑀮𑀺𑀲𑀻𑀲𑀁 𑀔𑀻𑀭𑀁 𑀕𑀳𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀫𑀜𑁆𑀚𑀺𑀝𑁆𑀞𑀺𑀓𑀸 𑀦𑀸𑀫 𑀭𑁄𑀕𑀚𑀸𑀢𑀻𑀢𑀺 𑀉𑀘𑁆𑀙𑀽𑀦𑀁 𑀅𑀦𑁆𑀢𑁄𑀭𑀢𑁆𑀢𑀪𑀸𑀯𑁄.

𑀫𑀳𑀢𑁄 𑀢𑀴𑀸𑀓𑀲𑁆𑀲 𑀧𑀝𑀺𑀓𑀘𑁆𑀘𑁂𑀯 𑀆𑀴𑀺𑀦𑁆𑀢𑀺 𑀇𑀫𑀺𑀦𑀸 𑀧𑀦 𑀏𑀢𑀫𑀢𑁆𑀣𑀁 𑀤𑀲𑁆𑀲𑁂𑀢𑀺 𑁋 𑀬𑀣𑀸 𑀫𑀳𑀢𑁄 𑀢𑀴𑀸𑀓𑀲𑁆𑀲 𑀧𑀸𑀴𑀺𑀬𑀸 𑀅𑀩𑀤𑁆𑀥𑀸𑀬𑀧𑀺 𑀓𑀺𑀜𑁆𑀘𑀺 𑀉𑀤𑀓𑀁 𑀢𑀺𑀝𑁆𑀞𑀢𑁂𑀯, 𑀧𑀞𑀫𑀫𑁂𑀯 𑀩𑀤𑁆𑀥𑀸𑀬 𑀧𑀦 𑀬𑀁 𑀅𑀩𑀤𑁆𑀥𑀧𑀘𑁆𑀘𑀬𑀸 𑀦 𑀢𑀺𑀝𑁆𑀞𑁂𑀬𑁆𑀬, 𑀢𑀫𑁆𑀧𑀺 𑀢𑀺𑀝𑁆𑀞𑁂𑀬𑁆𑀬, 𑀏𑀯𑀫𑁂𑀯 𑀬𑁂 𑀇𑀫𑁂 𑀅𑀦𑀼𑀧𑁆𑀧𑀦𑁆𑀦𑁂 𑀯𑀢𑁆𑀣𑀼𑀲𑁆𑀫𑀺𑀁 𑀧𑀝𑀺𑀓𑀘𑁆𑀘𑁂𑀯 𑀅𑀦𑀢𑀺𑀓𑁆𑀓𑀫𑀦𑀢𑁆𑀣𑀸𑀬 𑀕𑀭𑀼𑀥𑀫𑁆𑀫𑀸 𑀧𑀜𑁆𑀜𑀢𑁆𑀢𑀸, 𑀢𑁂𑀲𑀼 𑀅𑀧𑀜𑁆𑀜𑀢𑁆𑀢𑁂𑀲𑀼 𑀫𑀸𑀢𑀼𑀕𑀸𑀫𑀲𑁆𑀲 𑀧𑀩𑁆𑀩𑀚𑀺𑀢𑀢𑁆𑀢𑀸 𑀧𑀜𑁆𑀘 𑀯𑀲𑁆𑀲𑀲𑀢𑀸𑀦𑀺 𑀲𑀤𑁆𑀥𑀫𑁆𑀫𑁄 𑀢𑀺𑀝𑁆𑀞𑁂𑀬𑁆𑀬. 𑀧𑀝𑀺𑀓𑀘𑁆𑀘𑁂𑀯 𑀧𑀜𑁆𑀜𑀢𑁆𑀢𑀢𑁆𑀢𑀸 𑀧𑀦 𑀅𑀧𑀭𑀸𑀦𑀺𑀧𑀺 𑀧𑀜𑁆𑀘 𑀯𑀲𑁆𑀲𑀲𑀢𑀸𑀦𑀺 𑀞𑀲𑁆𑀲𑀢𑀻𑀢𑀺 𑀏𑀯𑀁 𑀧𑀞𑀫𑀁 𑀯𑀼𑀢𑁆𑀢𑀯𑀲𑁆𑀲𑀲𑀳𑀲𑁆𑀲𑀫𑁂𑀯 𑀞𑀲𑁆𑀲𑀢𑀺. 𑀯𑀲𑁆𑀲𑀲𑀳𑀲𑁆𑀲𑀦𑁆𑀢𑀺 𑀘𑁂𑀢𑀁 𑀧𑀝𑀺𑀲𑀫𑁆𑀪𑀺𑀤𑀸𑀧𑀪𑁂𑀤𑀧𑁆𑀧𑀢𑁆𑀢𑀔𑀻𑀡𑀸𑀲𑀯𑀸𑀦𑀁 𑀯𑀲𑁂𑀦𑁂𑀯 𑀯𑀼𑀢𑁆𑀢𑀁, 𑀢𑀢𑁄 𑀧𑀦 𑀉𑀢𑁆𑀢𑀭𑀺𑀧𑀺 𑀲𑀼𑀓𑁆𑀔𑀯𑀺𑀧𑀲𑁆𑀲𑀓𑀔𑀻𑀡𑀸𑀲𑀯𑀯𑀲𑁂𑀦 𑀯𑀲𑁆𑀲𑀲𑀳𑀲𑁆𑀲𑀁, 𑀅𑀦𑀸𑀕𑀸𑀫𑀺𑀯𑀲𑁂𑀦 𑀯𑀲𑁆𑀲𑀲𑀳𑀲𑁆𑀲𑀁, 𑀲𑀓𑀤𑀸𑀕𑀸𑀫𑀺𑀯𑀲𑁂𑀦 𑀯𑀲𑁆𑀲𑀲𑀳𑀲𑁆𑀲𑀁, 𑀲𑁄𑀢𑀸𑀧𑀦𑁆𑀦𑀯𑀲𑁂𑀦 𑀯𑀲𑁆𑀲𑀲𑀳𑀲𑁆𑀲𑀦𑁆𑀢𑀺 𑀏𑀯𑀁 𑀧𑀜𑁆𑀘𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀧𑀝𑀺𑀯𑁂𑀥𑀲𑀤𑁆𑀥𑀫𑁆𑀫𑁄 𑀞𑀲𑁆𑀲𑀢𑀺. 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑁄𑀧𑀺 𑀢𑀸𑀦𑀺𑀬𑁂𑀯. 𑀦 𑀳𑀺 𑀧𑀭𑀺𑀬𑀢𑁆𑀢𑀺𑀬𑀸 𑀅𑀲𑀢𑀺 𑀧𑀝𑀺𑀯𑁂𑀥𑁄 𑀅𑀢𑁆𑀣𑀺, 𑀦𑀸𑀧𑀺 𑀧𑀭𑀺𑀬𑀢𑁆𑀢𑀺𑀬𑀸 𑀲𑀢𑀺 𑀧𑀝𑀺𑀯𑁂𑀥𑁄 𑀦 𑀳𑁄𑀢𑀺. 𑀮𑀺𑀗𑁆𑀕𑀁 𑀧𑀦 𑀧𑀭𑀺𑀬𑀢𑁆𑀢𑀺𑀬𑀸 𑀅𑀦𑁆𑀢𑀭𑀳𑀺𑀢𑀸𑀬𑀧𑀺 𑀘𑀺𑀭𑀁 𑀧𑀯𑀢𑁆𑀢𑀺𑀲𑁆𑀲𑀢𑀻𑀢𑀺.

𑁨. 𑀑𑀯𑀸𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁨. 𑀤𑀼𑀢𑀺𑀬𑁂 𑀩𑀳𑀼𑀲𑁆𑀲𑀼𑀢𑁄𑀢𑀺 𑀇𑀥 𑀲𑀓𑀮𑀲𑁆𑀲𑀧𑀺 𑀩𑀼𑀤𑁆𑀥𑀯𑀘𑀦𑀲𑁆𑀲 𑀯𑀲𑁂𑀦 𑀩𑀳𑀼𑀲𑁆𑀲𑀼𑀢𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀕𑀭𑀼𑀥𑀫𑁆𑀫𑀦𑁆𑀢𑀺 𑀓𑀸𑀬𑀲𑀁𑀲𑀕𑁆𑀕𑀁. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄. 𑀪𑀺𑀓𑁆𑀔𑀼𑀦𑁄𑀯𑀸𑀤𑀓𑀯𑀺𑀦𑀺𑀘𑁆𑀙𑀬𑁄 𑀧𑀦 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬 (𑀧𑀸𑀘𑀺. 𑀅𑀝𑁆𑀞. 𑁧𑁪𑁪 𑀆𑀤𑀬𑁄) 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄.

𑁩. 𑀲𑀁𑀔𑀺𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁩. 𑀢𑀢𑀺𑀬𑁂 𑀲𑀭𑀸𑀕𑀸𑀬𑀸𑀢𑀺 𑀲𑀭𑀸𑀕𑀢𑁆𑀣𑀸𑀬. 𑀯𑀺𑀭𑀸𑀕𑀸𑀬𑀸𑀢𑀺 𑀯𑀺𑀭𑀚𑁆𑀚𑀦𑀢𑁆𑀣𑀸𑀬. 𑀲𑀁𑀬𑁄𑀕𑀸𑀬𑀸𑀢𑀺 𑀯𑀝𑁆𑀝𑁂 𑀲𑀁𑀬𑁄𑀕𑀢𑁆𑀣𑀸𑀬. 𑀯𑀺𑀲𑀁𑀬𑁄𑀕𑀸𑀬𑀸𑀢𑀺 𑀯𑀝𑁆𑀝𑁂 𑀯𑀺𑀲𑀁𑀬𑁄𑀕𑀪𑀸𑀯𑀢𑁆𑀣𑀸𑀬. 𑀆𑀘𑀬𑀸𑀬𑀸𑀢𑀺 𑀯𑀝𑁆𑀝𑀲𑁆𑀲 𑀯𑀟𑁆𑀠𑀦𑀢𑁆𑀣𑀸𑀬. 𑀦𑁄 𑀅𑀧𑀘𑀬𑀸𑀬𑀸𑀢𑀺 𑀦 𑀯𑀝𑁆𑀝𑀯𑀺𑀤𑁆𑀥𑀁𑀲𑀦𑀢𑁆𑀣𑀸𑀬. 𑀤𑀼𑀩𑁆𑀪𑀭𑀢𑀸𑀬𑀸𑀢𑀺 𑀤𑀼𑀧𑁆𑀧𑁄𑀲𑀦𑀢𑁆𑀣𑀸𑀬. 𑀦𑁄 𑀲𑀼𑀪𑀭𑀢𑀸𑀬𑀸𑀢𑀺 𑀦 𑀲𑀼𑀔𑀧𑁄𑀲𑀦𑀢𑁆𑀣𑀸𑀬. 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀧𑀞𑀫𑀯𑀸𑀭𑁂𑀦 𑀯𑀝𑁆𑀝𑀁 𑀓𑀣𑀺𑀢𑀁, 𑀤𑀼𑀢𑀺𑀬𑀯𑀸𑀭𑁂𑀦 𑀯𑀺𑀯𑀝𑁆𑀝𑀁 𑀓𑀣𑀺𑀢𑀁. 𑀇𑀫𑀺𑀦𑀸 𑀘 𑀧𑀦 𑀑𑀯𑀸𑀤𑁂𑀦 𑀕𑁄𑀢𑀫𑀻 𑀅𑀭𑀳𑀢𑁆𑀢𑀁 𑀧𑀢𑁆𑀢𑀸𑀢𑀺.

𑁪. 𑀤𑀻𑀖𑀚𑀸𑀡𑀼𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁪. 𑀘𑀢𑀼𑀢𑁆𑀣𑁂 𑀩𑁆𑀬𑀕𑁆𑀖𑀧𑀚𑁆𑀚𑀸𑀢𑀺 𑀇𑀤𑀫𑀲𑁆𑀲 𑀧𑀯𑁂𑀡𑀺 𑀦𑀸𑀫 𑀯𑀲𑁂𑀦 𑀆𑀮𑀧𑀦𑀁. 𑀢𑀲𑁆𑀲 𑀳𑀺 𑀧𑀼𑀩𑁆𑀩𑀧𑀼𑀭𑀺𑀲𑀸 𑀩𑁆𑀬𑀕𑁆𑀖𑀧𑀣𑁂 𑀚𑀸𑀢𑀸𑀢𑀺 𑀢𑀲𑁆𑀫𑀺𑀁 𑀓𑀼𑀮𑁂 𑀫𑀦𑀼𑀲𑁆𑀲𑀸 𑀩𑁆𑀬𑀕𑁆𑀖𑀧𑀚𑁆𑀚𑀸𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀇𑀲𑁆𑀲𑀢𑁆𑀣𑁂𑀦𑀸𑀢𑀺 𑀇𑀲𑁆𑀲𑀸𑀲𑀓𑀫𑁆𑀫𑁂𑀦. 𑀢𑀢𑁆𑀭𑀼𑀧𑀸𑀬𑀸𑀬𑀸𑀢𑀺 ‘‘𑀇𑀫𑀲𑁆𑀫𑀺𑀁 𑀓𑀸𑀮𑁂 𑀇𑀤𑀁 𑀦𑀸𑀫 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀚𑀸𑀦𑀦𑁂 𑀉𑀧𑀸𑀬𑀪𑀽𑀢𑀸𑀬. 𑀯𑀼𑀤𑁆𑀥𑀲𑀻𑀮𑀺𑀦𑁄𑀢𑀺 𑀯𑀟𑁆𑀠𑀺𑀢𑀲𑀻𑀮𑀸 𑀯𑀼𑀤𑁆𑀥𑀲𑀫𑀸𑀘𑀸𑀭𑀸. 𑀆𑀬𑀦𑁆𑀢𑀺 𑀆𑀕𑀫𑀦𑀁. 𑀦𑀸𑀘𑁆𑀘𑁄𑀕𑀸𑀴𑁆𑀳𑀦𑁆𑀢𑀺 𑀦𑀸𑀢𑀺𑀫𑀳𑀦𑁆𑀢𑀁. 𑀦𑀸𑀢𑀺𑀳𑀻𑀦𑀦𑁆𑀢𑀺 𑀦𑀸𑀢𑀺𑀓𑀲𑀺𑀭𑀁. 𑀧𑀭𑀺𑀬𑀸𑀤𑀸𑀬𑀸𑀢𑀺 𑀕𑀳𑁂𑀢𑁆𑀯𑀸 𑀔𑁂𑀧𑁂𑀢𑁆𑀯𑀸. 𑀢𑀢𑁆𑀣 𑀬𑀲𑁆𑀲 𑀯𑀬𑀢𑁄 𑀤𑀺𑀕𑀼𑀡𑁄 𑀆𑀬𑁄, 𑀢𑀲𑁆𑀲 𑀯𑀬𑁄 𑀆𑀬𑀁 𑀧𑀭𑀺𑀬𑀸𑀤𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺.

‘‘𑀘𑀢𑀼𑀥𑀸 𑀯𑀺𑀪𑀚𑁂 𑀪𑁄𑀕𑁂, 𑀧𑀡𑁆𑀟𑀺𑀢𑁄 𑀖𑀭𑀫𑀸𑀯𑀲𑀁;

𑀏𑀓𑁂𑀦 𑀪𑁄𑀕𑁂 𑀪𑀼𑀜𑁆𑀚𑁂𑀬𑁆𑀬, 𑀤𑁆𑀯𑀻𑀳𑀺 𑀓𑀫𑁆𑀫𑀁 𑀧𑀬𑁄𑀚𑀬𑁂;

𑀘𑀢𑀼𑀢𑁆𑀣𑀜𑁆𑀘 𑀦𑀺𑀥𑀸𑀧𑁂𑀬𑁆𑀬, 𑀆𑀧𑀤𑀸𑀲𑀼 𑀪𑀯𑀺𑀲𑁆𑀲𑀢𑀻’’𑀢𑀺. (𑀤𑀻. 𑀦𑀺. 𑁩.𑁨𑁬𑁫) 𑁋

𑀏𑀯𑀁 𑀧𑀝𑀺𑀧𑀚𑁆𑀚𑀢𑁄 𑀧𑀦 𑀯𑀬𑁄 𑀆𑀬𑀁 𑀧𑀭𑀺𑀬𑀸𑀤𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺𑀬𑁂𑀯.

𑀉𑀤𑀼𑀫𑁆𑀩𑀭𑀔𑀸𑀤𑀻𑀯𑀸𑀢𑀺 𑀬𑀣𑀸 𑀉𑀤𑀼𑀫𑁆𑀩𑀭𑀸𑀦𑀺 𑀔𑀸𑀤𑀺𑀢𑀼𑀓𑀸𑀫𑁂𑀦 𑀧𑀓𑁆𑀓𑁂 𑀉𑀤𑀼𑀫𑁆𑀩𑀭𑀭𑀼𑀓𑁆𑀔𑁂 𑀘𑀸𑀮𑀺𑀢𑁂 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀩𑀳𑀽𑀦𑀺 𑀨𑀮𑀸𑀦𑀺 𑀧𑀢𑀦𑁆𑀢𑀺, 𑀲𑁄 𑀔𑀸𑀤𑀺𑀢𑀩𑁆𑀩𑀬𑀼𑀢𑁆𑀢𑀓𑀸𑀦𑀺 𑀔𑀸𑀤𑀺𑀢𑁆𑀯𑀸 𑀇𑀢𑀭𑀸𑀦𑀺 𑀩𑀳𑀼𑀢𑀭𑀸𑀦𑀺 𑀧𑀳𑀸𑀬 𑀕𑀘𑁆𑀙𑀢𑀺, 𑀏𑀯𑀫𑁂𑀯𑀁 𑀬𑁄 𑀆𑀬𑀢𑁄 𑀯𑀬𑀁 𑀩𑀳𑀼𑀢𑀭𑀁 𑀓𑀢𑁆𑀯𑀸 𑀯𑀺𑀧𑁆𑀧𑀓𑀺𑀭𑀦𑁆𑀢𑁄 𑀪𑁄𑀕𑁂 𑀧𑀭𑀺𑀪𑀼𑀜𑁆𑀚𑀢𑀺, 𑀲𑁄 ‘‘𑀉𑀤𑀼𑀫𑁆𑀩𑀭𑀔𑀸𑀤𑀺𑀓𑀁𑀯𑀸𑀬𑀁 𑀓𑀼𑀮𑀧𑀼𑀢𑁆𑀢𑁄 𑀪𑁄𑀕𑁂 𑀔𑀸𑀤𑀢𑀻’’𑀢𑀺 𑀯𑀼𑀘𑁆𑀘𑀢𑀺. 𑀅𑀚𑁂𑀝𑁆𑀞𑀫𑀭𑀡𑀦𑁆𑀢𑀺 𑀅𑀦𑀸𑀬𑀓𑀫𑀭𑀡𑀁. 𑀲𑀫𑀁 𑀚𑀻𑀯𑀺𑀓𑀁 𑀓𑀧𑁆𑀧𑁂𑀢𑀻𑀢𑀺 𑀲𑀫𑁆𑀫𑀸 𑀚𑀻𑀯𑀺𑀓𑀁 𑀓𑀧𑁆𑀧𑁂𑀢𑀺. 𑀲𑀫𑀚𑀻𑀯𑀺𑀢𑀸𑀢𑀺 𑀲𑀫𑀚𑀻𑀯𑀺𑀢𑀸𑀬 𑀚𑀻𑀯𑀺𑀢𑀸. 𑀅𑀧𑀸𑀬𑀫𑀼𑀔𑀸𑀦𑀻𑀢𑀺 𑀯𑀺𑀦𑀸𑀲𑀲𑁆𑀲 𑀞𑀸𑀦𑀸𑀦𑀺.

𑀉𑀝𑁆𑀞𑀸𑀢𑀸 𑀓𑀫𑁆𑀫𑀥𑁂𑀬𑁆𑀬𑁂𑀲𑀽𑀢𑀺 𑀓𑀫𑁆𑀫𑀓𑀭𑀡𑀝𑁆𑀞𑀸𑀦𑁂𑀲𑀼 𑀉𑀝𑁆𑀞𑀸𑀦𑀯𑀻𑀭𑀺𑀬𑀲𑀫𑁆𑀧𑀦𑁆𑀦𑁄. 𑀯𑀺𑀥𑀸𑀦𑀯𑀸𑀢𑀺 𑀯𑀺𑀤𑀳𑀦𑀲𑀫𑁆𑀧𑀦𑁆𑀦𑁄. 𑀲𑁄𑀢𑁆𑀣𑀸𑀦𑀁 𑀲𑀫𑁆𑀧𑀭𑀸𑀬𑀺𑀓𑀦𑁆𑀢𑀺 𑀲𑁄𑀢𑁆𑀣𑀺𑀪𑀽𑀢𑀁 𑀲𑀫𑁆𑀧𑀭𑀸𑀬𑀺𑀓𑀁. 𑀲𑀘𑁆𑀘𑀦𑀸𑀫𑁂𑀦𑀸𑀢𑀺 𑀩𑀼𑀤𑁆𑀥𑀢𑁆𑀢𑀸𑀬𑁂𑀯 𑀩𑀼𑀤𑁆𑀥𑁄𑀢𑀺 𑀏𑀯𑀁 𑀅𑀯𑀺𑀢𑀣𑀦𑀸𑀫𑁂𑀦. 𑀘𑀸𑀕𑁄 𑀧𑀼𑀜𑁆𑀜𑀁 𑀧𑀯𑀟𑁆𑀠𑀢𑀻𑀢𑀺 𑀘𑀸𑀕𑁄 𑀘 𑀲𑁂𑀲𑀧𑀼𑀜𑁆𑀜𑀜𑁆𑀘 𑀧𑀯𑀟𑁆𑀠𑀢𑀺. 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀲𑀤𑁆𑀥𑀸𑀤𑀬𑁄 𑀫𑀺𑀲𑁆𑀲𑀓𑀸 𑀓𑀣𑀺𑀢𑀸. 𑀧𑀜𑁆𑀘𑀫𑀁 𑀉𑀢𑁆𑀢𑀸𑀦𑀫𑁂𑀯.

𑁬. 𑀪𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁬. 𑀙𑀝𑁆𑀞𑁂 𑀕𑀩𑁆𑀪𑁄𑀢𑀺 𑀕𑀩𑁆𑀪𑀯𑀸𑀲𑁄. 𑀤𑀺𑀝𑁆𑀞𑀥𑀫𑁆𑀫𑀺𑀓𑀸𑀧𑀻𑀢𑀺 𑀲𑀦𑁆𑀤𑀺𑀝𑁆𑀞𑀺𑀓𑀸 𑀕𑀩𑁆𑀪𑀯𑀸𑀲𑀲𑀤𑀺𑀲𑀸 𑀧𑀼𑀦𑀧𑀺 𑀫𑀦𑀼𑀲𑁆𑀲𑀕𑀩𑁆𑀪𑀸. 𑀲𑀫𑁆𑀧𑀭𑀸𑀬𑀺𑀓𑀸𑀧𑀻𑀢𑀺 𑀞𑀧𑁂𑀢𑁆𑀯𑀸 𑀫𑀦𑀼𑀲𑁆𑀲𑀕𑀩𑁆𑀪𑁂 𑀲𑁂𑀲𑀕𑀩𑁆𑀪𑀸. 𑀉𑀪𑀬𑀁 𑀏𑀢𑁂 𑀓𑀸𑀫𑀸 𑀧𑀯𑀼𑀘𑁆𑀘𑀦𑁆𑀢𑀻𑀢𑀺 𑀪𑀬𑀜𑁆𑀘 𑀤𑀼𑀓𑁆𑀔𑀜𑁆𑀘, 𑀪𑀬𑀜𑁆𑀘 𑀭𑁄𑀕𑁄 𑀘, 𑀪𑀬𑀜𑁆𑀘 𑀕𑀡𑁆𑀟𑁄 𑀘, 𑀪𑀬𑀜𑁆𑀘 𑀲𑀮𑁆𑀮𑀜𑁆𑀘, 𑀪𑀬𑀜𑁆𑀘 𑀲𑀗𑁆𑀕𑁄 𑀘, 𑀪𑀬𑀜𑁆𑀘 𑀧𑀗𑁆𑀓𑁄 𑀘, 𑀪𑀬𑀜𑁆𑀘 𑀕𑀩𑁆𑀪𑁄 𑀘𑀸𑀢𑀺 𑀏𑀯𑀁 𑀉𑀪𑀬𑀁 𑀏𑀢𑁂 𑀓𑀸𑀫𑀸 𑀧𑀯𑀼𑀘𑁆𑀘𑀦𑁆𑀢𑀺. 𑀲𑀸𑀢𑀭𑀽𑀧𑁂𑀦𑀸𑀢𑀺 𑀓𑀸𑀫𑀲𑀼𑀔𑁂𑀦. 𑀧𑀮𑀺𑀧𑀣𑀦𑁆𑀢𑀺 𑀯𑀝𑁆𑀝𑀧𑀮𑀺𑀧𑀣𑀁. 𑀅𑀢𑀺𑀓𑁆𑀓𑀫𑁆𑀫𑀸𑀢𑀺 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀅𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀪𑀸𑀯𑁄 𑀕𑀳𑀺𑀢𑁄. 𑀏𑀯𑀭𑀽𑀧𑀁 𑀧𑀚𑀁 𑀚𑀸𑀢𑀺𑀚𑀭𑀽𑀧𑁂𑀢𑀁 𑀢𑀻𑀲𑀼 𑀪𑀯𑁂𑀲𑀼 𑀨𑀦𑁆𑀤𑀫𑀸𑀦𑀁 𑀅𑀯𑁂𑀓𑁆𑀔𑀢𑀻𑀢𑀺 𑀲𑀼𑀢𑁆𑀢𑁂 𑀯𑀝𑁆𑀝𑀁 𑀓𑀣𑁂𑀢𑁆𑀯𑀸 𑀕𑀸𑀣𑀸𑀲𑀼 𑀯𑀺𑀯𑀝𑁆𑀝𑀁 𑀓𑀣𑀺𑀢𑀦𑁆𑀢𑀺. 𑀲𑀢𑁆𑀢𑀫𑀝𑁆𑀞𑀫𑀸𑀦𑀺 𑀉𑀢𑁆𑀢𑀸𑀦𑀢𑁆𑀣𑀸𑀦𑁂𑀯.

𑁯-𑁧𑁦. 𑀧𑀼𑀕𑁆𑀕𑀮𑀲𑀼𑀢𑁆𑀢𑀤𑁆𑀯𑀬𑀯𑀡𑁆𑀡𑀦𑀸

𑁫𑁯-𑁬𑁦. 𑀦𑀯𑀫𑁂 𑀉𑀚𑀼𑀪𑀽𑀢𑁄𑀢𑀺 𑀓𑀸𑀬𑀯𑀗𑁆𑀓𑀸𑀤𑀻𑀦𑀁 𑀅𑀪𑀸𑀯𑁂𑀦 𑀉𑀚𑀼𑀓𑁄. 𑀧𑀜𑁆𑀜𑀸𑀲𑀻𑀮𑀲𑀫𑀸𑀳𑀺𑀢𑁄𑀢𑀺 𑀧𑀜𑁆𑀜𑀸𑀬 𑀘 𑀲𑀻𑀮𑁂𑀦 𑀘 𑀲𑀫𑀦𑁆𑀦𑀸𑀕𑀢𑁄. 𑀬𑀚𑀫𑀸𑀦𑀸𑀦𑀦𑁆𑀢𑀺 𑀤𑀸𑀦𑀁 𑀤𑀤𑀦𑁆𑀢𑀸𑀦𑀁. 𑀧𑀼𑀜𑁆𑀜𑀧𑁂𑀓𑁆𑀔𑀸𑀦𑀦𑁆𑀢𑀺 𑀧𑀼𑀜𑁆𑀜𑀁 𑀑𑀮𑁄𑀓𑁂𑀦𑁆𑀢𑀸𑀦𑀁 𑀕𑀯𑁂𑀲𑀦𑁆𑀢𑀸𑀦𑀁. 𑀑𑀧𑀥𑀺𑀓𑀦𑁆𑀢𑀺 𑀉𑀧𑀥𑀺𑀯𑀺𑀧𑀸𑀓𑀁, 𑀑𑀧𑀥𑀺𑀪𑀽𑀢𑀁 𑀞𑀸𑀦𑀁 𑀅𑀧𑁆𑀧𑀫𑀸𑀡𑀁. 𑀤𑀲𑀫𑁂 𑀲𑀫𑀼𑀓𑁆𑀓𑀝𑁆𑀞𑁄𑀢𑀺 𑀉𑀓𑁆𑀓𑀝𑁆𑀞𑁄 𑀉𑀢𑁆𑀢𑀫𑁄. 𑀲𑀢𑁆𑀢𑀸𑀦𑀦𑁆𑀢𑀺 𑀲𑀩𑁆𑀩𑀲𑀢𑁆𑀢𑀸𑀦𑀁. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀕𑁄𑀢𑀫𑀻𑀯𑀕𑁆𑀕𑁄 𑀙𑀝𑁆𑀞𑁄.

(𑁭) 𑁨. 𑀪𑀽𑀫𑀺𑀘𑀸𑀮𑀯𑀕𑁆𑀕𑁄

𑁧. 𑀇𑀘𑁆𑀙𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁬𑁧. 𑀲𑀢𑁆𑀢𑀫𑀲𑁆𑀲 𑀧𑀞𑀫𑁂 𑀧𑀯𑀺𑀯𑀺𑀢𑁆𑀢𑀲𑁆𑀲𑀸𑀢𑀺 𑀓𑀸𑀬𑀯𑀺𑀯𑁂𑀓𑁂𑀦 𑀯𑀺𑀯𑀺𑀢𑁆𑀢𑀲𑁆𑀲. 𑀦𑀺𑀭𑀸𑀬𑀢𑁆𑀢𑀯𑀼𑀢𑁆𑀢𑀺𑀦𑁄𑀢𑀺 𑀓𑀢𑁆𑀣𑀘𑀺 𑀅𑀦𑀸𑀬𑀢𑁆𑀢𑀯𑀼𑀢𑁆𑀢𑀺𑀦𑁄 𑀯𑀺𑀧𑀲𑁆𑀲𑀦𑀸𑀓𑀫𑁆𑀫𑀺𑀓𑀲𑁆𑀲. 𑀮𑀸𑀪𑀸𑀬𑀸𑀢𑀺 𑀘𑀢𑀼𑀧𑀘𑁆𑀘𑀬𑀮𑀸𑀪𑀸𑀬. 𑀲𑁄𑀘𑀻 𑀘 𑀧𑀭𑀺𑀤𑁂𑀯𑀻 𑀘𑀸𑀢𑀺 𑀲𑁄𑀓𑀻 𑀘 𑀧𑀭𑀺𑀤𑁂𑀯𑀻 𑀘. 𑀲𑁄𑀘𑀺𑀘𑁆𑀘 𑀧𑀭𑀺𑀤𑁂𑀯𑀺𑀘𑁆𑀘𑀸𑀢𑀺𑀧𑀺 𑀧𑀸𑀞𑁄. 𑀘𑀼𑀢𑁄 𑀘 𑀲𑀤𑁆𑀥𑀫𑁆𑀫𑀸𑀢𑀺 𑀢𑀁𑀔𑀡𑀁𑀬𑁂𑀯 𑀯𑀺𑀧𑀲𑁆𑀲𑀦𑀸𑀲𑀤𑁆𑀥𑀫𑁆𑀫𑀸 𑀘𑀼𑀢𑁄. 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀯𑀝𑁆𑀝𑀯𑀺𑀯𑀝𑁆𑀝𑀁 𑀓𑀣𑀺𑀢𑀁.

𑁨. 𑀅𑀮𑀁𑀲𑀼𑀢𑁆𑀢𑀯𑀡𑁆𑀡𑀦𑀸

𑁬𑁨. 𑀤𑀼𑀢𑀺𑀬𑁂 𑀅𑀮𑀁 𑀅𑀢𑁆𑀢𑀦𑁄 𑀅𑀮𑀁 𑀧𑀭𑁂𑀲𑀦𑁆𑀢𑀺 𑀅𑀢𑁆𑀢𑀦𑁄 𑀘 𑀧𑀭𑁂𑀲𑀜𑁆𑀘 𑀳𑀺𑀢𑀧𑀝𑀺𑀧𑀢𑁆𑀢𑀺𑀬𑀁 𑀲𑀫𑀢𑁆𑀣𑁄 𑀧𑀭𑀺𑀬𑀢𑁆𑀢𑁄 𑀅𑀦𑀼𑀘𑁆𑀙𑀯𑀺𑀓𑁄. 𑀔𑀺𑀧𑁆𑀧𑀦𑀺𑀲𑀦𑁆𑀢𑀻𑀢𑀺 𑀔𑀺𑀧𑁆𑀧𑀁 𑀉𑀧𑀥𑀸𑀭𑁂𑀢𑀺, 𑀔𑀦𑁆𑀥𑀥𑀸𑀢𑀼𑀆𑀬𑀢𑀦𑀸𑀤𑀻𑀲𑀼 𑀓𑀣𑀺𑀬𑀫𑀸𑀦𑁂𑀲𑀼 𑀢𑁂 𑀥𑀫𑁆𑀫𑁂 𑀔𑀺𑀧𑁆𑀧𑀁 𑀚𑀸𑀦𑀸𑀢𑀻𑀢𑀺 𑀅𑀢𑁆𑀣𑁄. 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀲𑀫𑀣𑀯𑀺𑀧𑀲𑁆𑀲𑀦𑀸 𑀓𑀣𑀺𑀢𑀸. 𑀧𑀼𑀕𑁆𑀕𑀮𑀚𑁆𑀛𑀸𑀲𑀬𑁂𑀦 𑀧𑀦 𑀤𑁂𑀲𑀦𑀸𑀯𑀺𑀮𑀸𑀲𑁂𑀦 𑀘𑁂𑀢𑀁 𑀫𑀢𑁆𑀣𑀓𑀢𑁄 𑀧𑀝𑁆𑀞𑀸𑀬 𑀳𑁂𑀝𑁆𑀞𑀸 𑀑𑀢𑀭𑀦𑁆𑀢𑀁 𑀓𑀣𑀺𑀢𑀦𑁆𑀢𑀺.

𑁩. 𑀲𑀁𑀔𑀺𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁬𑁩. 𑀢𑀢𑀺𑀬𑁂 𑀏𑀯𑀫𑁂𑀯𑀸𑀢𑀺 𑀦𑀺𑀓𑁆𑀓𑀸𑀭𑀡𑁂𑀦𑁂𑀯. 𑀬𑀣𑀸 𑀯𑀸 𑀅𑀬𑀁 𑀬𑀸𑀘𑀢𑀺, 𑀏𑀯𑀫𑁂𑀯. 𑀫𑁄𑀖𑀧𑀼𑀭𑀺𑀲𑀸𑀢𑀺 𑀫𑀽𑀴𑁆𑀳𑀧𑀼𑀭𑀺𑀲𑀸 𑀢𑀼𑀘𑁆𑀙𑀧𑀼𑀭𑀺𑀲𑀸. 𑀅𑀚𑁆𑀛𑁂𑀲𑀦𑁆𑀢𑀻𑀢𑀺 𑀬𑀸𑀘𑀦𑁆𑀢𑀺. 𑀅𑀦𑀼𑀩𑀦𑁆𑀥𑀺𑀢𑀩𑁆𑀩𑀦𑁆𑀢𑀺 𑀇𑀭𑀺𑀬𑀸𑀧𑀣𑀸𑀦𑀼𑀕𑀫𑀦𑁂𑀦 𑀅𑀦𑀼𑀩𑀦𑁆𑀥𑀺𑀢𑀩𑁆𑀩𑀁 𑀫𑀁 𑀦 𑀯𑀺𑀚𑀳𑀺𑀢𑀩𑁆𑀩𑀁 𑀫𑀜𑁆𑀜𑀦𑁆𑀢𑀺. 𑀆𑀚𑀸𑀦𑀦𑀢𑁆𑀣𑀁 𑀅𑀧𑀲𑀸𑀤𑁂𑀦𑁆𑀢𑁄 𑀏𑀯𑀫𑀸𑀳. 𑀏𑀲 𑀓𑀺𑀭 𑀪𑀺𑀓𑁆𑀔𑀼 𑀑𑀯𑀸𑀤𑁂 𑀤𑀺𑀦𑁆𑀦𑁂𑀧𑀺 𑀧𑀫𑀸𑀤𑀫𑁂𑀯 𑀅𑀦𑀼𑀬𑀼𑀜𑁆𑀚𑀢𑀺, 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀢𑀢𑁆𑀣𑁂𑀯 𑀯𑀲𑀢𑀺, 𑀲𑀫𑀡𑀥𑀫𑁆𑀫𑀁 𑀓𑀸𑀢𑀼𑀁 𑀦 𑀇𑀘𑁆𑀙𑀢𑀺. 𑀢𑀲𑁆𑀫𑀸 𑀪𑀕𑀯𑀸 𑀏𑀯𑀁 𑀅𑀧𑀲𑀸𑀤𑁂𑀢𑁆𑀯𑀸 𑀧𑀼𑀦 𑀬𑀲𑁆𑀫𑀸 𑀲𑁄 𑀅𑀭𑀳𑀢𑁆𑀢𑀲𑁆𑀲 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀦𑁆𑀦𑁄, 𑀢𑀲𑁆𑀫𑀸 𑀢𑀁 𑀑𑀯𑀤𑀦𑁆𑀢𑁄 𑀢𑀲𑁆𑀫𑀸𑀢𑀺𑀳 𑀢𑁂 𑀪𑀺𑀓𑁆𑀔𑀼 𑀏𑀯𑀁 𑀲𑀺𑀓𑁆𑀔𑀺𑀢𑀩𑁆𑀩𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀚𑁆𑀛𑀢𑁆𑀢𑀁 𑀫𑁂 𑀘𑀺𑀢𑁆𑀢𑀁 𑀞𑀺𑀢𑀁 𑀪𑀯𑀺𑀲𑁆𑀲𑀢𑀺 𑀲𑀼𑀲𑀡𑁆𑀞𑀺𑀢𑀁, 𑀦 𑀘 𑀉𑀧𑁆𑀧𑀦𑁆𑀦𑀸 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀸𑀬 𑀞𑀲𑁆𑀲𑀦𑁆𑀢𑀻𑀢𑀺 𑀇𑀫𑀺𑀦𑀸 𑀢𑀸𑀯𑀲𑁆𑀲 𑀑𑀯𑀸𑀤𑁂𑀦 𑀦𑀺𑀬𑀓𑀚𑁆𑀛𑀢𑁆𑀢𑀯𑀲𑁂𑀦 𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀫𑀢𑁆𑀢𑁄 𑀫𑀽𑀮𑀲𑀫𑀸𑀥𑀺 𑀯𑀼𑀢𑁆𑀢𑁄.

𑀢𑀢𑁄 ‘‘𑀏𑀢𑁆𑀢𑀓𑁂𑀦𑁂𑀯 𑀲𑀦𑁆𑀢𑀼𑀝𑁆𑀞𑀺𑀁 𑀅𑀦𑀸𑀧𑀚𑁆𑀚𑀺𑀢𑁆𑀯𑀸 𑀏𑀯𑀁 𑀲𑁄 𑀲𑀫𑀸𑀥𑀺 𑀯𑀟𑁆𑀠𑁂𑀢𑀩𑁆𑀩𑁄’’𑀢𑀺 𑀤𑀲𑁆𑀲𑁂𑀢𑀼𑀁 𑀬𑀢𑁄 𑀔𑁄 𑀢𑁂 𑀪𑀺𑀓𑁆𑀔𑀼 𑀅𑀚𑁆𑀛𑀢𑁆𑀢𑀁 𑀘𑀺𑀢𑁆𑀢𑀁 𑀞𑀺𑀢𑀁 𑀳𑁄𑀢𑀺 𑀲𑀼𑀲𑀡𑁆𑀞𑀺𑀢𑀁, 𑀦 𑀘 𑀉𑀧𑁆𑀧𑀦𑁆𑀦𑀸 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀸𑀬 𑀢𑀺𑀝𑁆𑀞𑀦𑁆𑀢𑀺, 𑀢𑀢𑁄 𑀢𑁂 𑀪𑀺𑀓𑁆𑀔𑀼 𑀏𑀯𑀁 𑀲𑀺𑀓𑁆𑀔𑀺𑀢𑀩𑁆𑀩𑀁 ‘‘𑀫𑁂𑀢𑁆𑀢𑀸 𑀫𑁂 𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑀪𑀸𑀯𑀺𑀢𑀸 𑀪𑀯𑀺𑀲𑁆𑀲𑀢𑀺…𑀧𑁂… 𑀲𑀼𑀲𑀫𑀸𑀭𑀤𑁆𑀥𑀸’’𑀢𑀺 𑀏𑀯𑀫𑀲𑁆𑀲 𑀫𑁂𑀢𑁆𑀢𑀸𑀯𑀲𑁂𑀦 𑀪𑀸𑀯𑀦𑀁 𑀯𑀟𑁆𑀠𑁂𑀢𑁆𑀯𑀸 𑀧𑀼𑀦 𑀬𑀢𑁄 𑀔𑁄 𑀢𑁂 𑀪𑀺𑀓𑁆𑀔𑀼 𑀅𑀬𑀁 𑀲𑀫𑀸𑀥𑀺 𑀏𑀯𑀁 𑀪𑀸𑀯𑀺𑀢𑁄 𑀳𑁄𑀢𑀺 𑀩𑀳𑀼𑀮𑀻𑀓𑀢𑁄, 𑀢𑀢𑁄 𑀢𑁆𑀯𑀁 𑀪𑀺𑀓𑁆𑀔𑀼 𑀇𑀫𑀁 𑀲𑀫𑀸𑀥𑀺𑀁 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑀫𑁆𑀧𑀺 𑀪𑀸𑀯𑁂𑀬𑁆𑀬𑀸𑀲𑀻𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀲𑁆𑀲𑀢𑁆𑀣𑁄 𑁋 𑀬𑀤𑀸 𑀢𑁂 𑀪𑀺𑀓𑁆𑀔𑀼 𑀅𑀬𑀁 𑀫𑀽𑀮𑀲𑀫𑀸𑀥𑀺 𑀏𑀯𑀁 𑀫𑁂𑀢𑁆𑀢𑀸𑀯𑀲𑁂𑀦 𑀪𑀸𑀯𑀺𑀢𑁄 𑀳𑁄𑀢𑀺, 𑀢𑀤𑀸 𑀢𑁆𑀯𑀁 𑀢𑀸𑀯𑀢𑀓𑁂𑀦𑀧𑀺 𑀢𑀼𑀝𑁆𑀞𑀺𑀁 𑀅𑀦𑀸𑀧𑀚𑁆𑀚𑀺𑀢𑁆𑀯𑀸𑀯 𑀇𑀫𑀁 𑀫𑀽𑀮𑀲𑀫𑀸𑀥𑀺𑀁 𑀅𑀜𑁆𑀜𑁂𑀲𑀼𑀧𑀺 𑀆𑀭𑀫𑁆𑀫𑀡𑁂𑀲𑀼 𑀘𑀢𑀼𑀓𑁆𑀓𑀧𑀜𑁆𑀘𑀓𑀚𑁆𑀛𑀸𑀦𑀸𑀦𑀺 𑀧𑀸𑀧𑀬𑀫𑀸𑀦𑁄 ‘‘𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑀫𑁆𑀧𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀪𑀸𑀯𑁂𑀬𑁆𑀬𑀸𑀲𑀻𑀢𑀺.

𑀏𑀯𑀁 𑀯𑀢𑁆𑀯𑀸 𑀘 𑀧𑀦 𑀅𑀯𑀲𑁂𑀲𑀩𑁆𑀭𑀳𑁆𑀫𑀯𑀺𑀳𑀸𑀭𑀧𑀼𑀩𑁆𑀩𑀗𑁆𑀕𑀫𑀫𑁆𑀧𑀺𑀲𑁆𑀲 𑀅𑀜𑁆𑀜𑁂𑀲𑀼 𑀆𑀭𑀫𑁆𑀫𑀡𑁂𑀲𑀼 𑀘𑀢𑀼𑀓𑁆𑀓𑀧𑀜𑁆𑀘𑀓𑀚𑁆𑀛𑀸𑀦𑀪𑀸𑀯𑀦𑀁 𑀓𑀭𑁂𑀬𑁆𑀬𑀸𑀲𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 𑀬𑀢𑁄 𑀔𑁄 𑀢𑁂 𑀪𑀺𑀓𑁆𑀔𑀼 𑀅𑀬𑀁 𑀲𑀫𑀸𑀥𑀺 𑀏𑀯𑀁 𑀪𑀸𑀯𑀺𑀢𑁄 𑀳𑁄𑀢𑀺 𑀲𑀼𑀪𑀸𑀯𑀺𑀢𑁄, 𑀢𑀢𑁄 𑀢𑁂 𑀪𑀺𑀓𑁆𑀔𑀼 𑀏𑀯𑀁 𑀲𑀺𑀓𑁆𑀔𑀺𑀢𑀩𑁆𑀩𑀁 ‘‘𑀓𑀭𑀼𑀡𑀸 𑀫𑁂 𑀘𑁂𑀢𑁄𑀯𑀺𑀫𑀼𑀢𑁆𑀢𑀻’’𑀢𑀺𑀆𑀤𑀺𑀫𑀸𑀳. 𑀏𑀯𑀁 𑀫𑁂𑀢𑁆𑀢𑀸𑀧𑀼𑀩𑁆𑀩𑀗𑁆𑀕𑀫𑀁 𑀘𑀢𑀼𑀓𑁆𑀓𑀧𑀜𑁆𑀘𑀓𑀚𑁆𑀛𑀸𑀦𑀪𑀸𑀯𑀦𑀁 𑀤𑀲𑁆𑀲𑁂𑀢𑁆𑀯𑀸 𑀧𑀼𑀦 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀤𑀺𑀧𑀼𑀩𑁆𑀩𑀗𑁆𑀕𑀫𑀁 𑀤𑀲𑁆𑀲𑁂𑀢𑀼𑀁 𑀬𑀢𑁄 𑀔𑁄 𑀢𑁂 𑀪𑀺𑀓𑁆𑀔𑀼 𑀅𑀬𑀁 𑀲𑀫𑀸𑀥𑀺 𑀏𑀯𑀁 𑀪𑀸𑀯𑀺𑀢𑁄 𑀳𑁄𑀢𑀺 𑀲𑀼𑀪𑀸𑀯𑀺𑀢𑁄, 𑀢𑀢𑁄 𑀢𑁂 𑀪𑀺𑀓𑁆𑀔𑀼 𑀏𑀯𑀁 𑀲𑀺𑀓𑁆𑀔𑀺𑀢𑀩𑁆𑀩𑀁 ‘‘𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻’’𑀢𑀺𑀆𑀤𑀺𑀁 𑀯𑀢𑁆𑀯𑀸 𑀬𑀢𑁄 𑀔𑁄 𑀢𑁂 𑀪𑀺𑀓𑁆𑀔𑀼 𑀅𑀬𑀁 𑀲𑀫𑀸𑀥𑀺 𑀏𑀯𑀁 𑀪𑀸𑀯𑀺𑀢𑁄 𑀳𑁄𑀢𑀺 𑀲𑀼𑀪𑀸𑀯𑀺𑀢𑁄, 𑀢𑀢𑁄 𑀢𑁆𑀯𑀁 𑀪𑀺𑀓𑁆𑀔𑀼 𑀬𑁂𑀦 𑀬𑁂𑀦𑁂𑀯 𑀕𑀕𑁆𑀖𑀲𑀻𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀕𑀕𑁆𑀖𑀲𑀻𑀢𑀺 𑀕𑀫𑀺𑀲𑁆𑀲𑀲𑀺. 𑀨𑀸𑀲𑀼𑀁𑀬𑁂𑀯𑀸𑀢𑀺 𑀇𑀫𑀺𑀦𑀸 𑀅𑀭𑀳𑀢𑁆𑀢𑀁 𑀤𑀲𑁆𑀲𑁂𑀢𑀺. 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑁄 𑀳𑀺 𑀲𑀩𑁆𑀩𑀺𑀭𑀺𑀬𑀸𑀧𑀣𑁂𑀲𑀼 𑀨𑀸𑀲𑀼 𑀯𑀺𑀳𑀭𑀢𑀺 𑀦𑀸𑀫.

𑁪. 𑀕𑀬𑀸𑀲𑀻𑀲𑀲𑀼𑀢𑁆𑀢𑀯𑀡𑁆𑀡𑀦𑀸

𑁬𑁪. 𑀘𑀢𑀼𑀢𑁆𑀣𑁂 𑀏𑀢𑀤𑀯𑁄𑀘𑀸𑀢𑀺 𑀅𑀢𑁆𑀢𑀦𑁄 𑀧𑀥𑀸𑀦𑀪𑀽𑀫𑀺𑀬𑀁 𑀉𑀧𑁆𑀧𑀦𑁆𑀦𑀁 𑀯𑀺𑀢𑀓𑁆𑀓𑀁 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀆𑀭𑁄𑀘𑁂𑀢𑀼𑀁 𑁋 ‘‘𑀧𑀼𑀩𑁆𑀩𑀸𑀳𑀁, 𑀪𑀺𑀓𑁆𑀔𑀯𑁂’’𑀢𑀺𑀆𑀤𑀺𑀯𑀘𑀦𑀁 𑀅𑀯𑁄𑀘. 𑀑𑀪𑀸𑀲𑀦𑁆𑀢𑀺 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑁄𑀪𑀸𑀲𑀁. 𑀜𑀸𑀡𑀤𑀲𑁆𑀲𑀦𑀦𑁆𑀢𑀺 𑀤𑀺𑀩𑁆𑀩𑀘𑀓𑁆𑀔𑀼𑀪𑀽𑀢𑀁 𑀜𑀸𑀡𑀲𑀗𑁆𑀔𑀸𑀢𑀁 𑀤𑀲𑁆𑀲𑀦𑀁. 𑀲𑀦𑁆𑀦𑀺𑀯𑀼𑀢𑁆𑀣𑀧𑀼𑀩𑁆𑀩𑀦𑁆𑀢𑀺 𑀏𑀓𑀢𑁄 𑀯𑀲𑀺𑀢𑀧𑀼𑀩𑁆𑀩𑀁. 𑀇𑀫𑀲𑁆𑀫𑀺𑀁 𑀧𑀦 𑀲𑀼𑀢𑁆𑀢𑁂 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀁, 𑀇𑀤𑁆𑀥𑀺𑀯𑀺𑀥𑀜𑀸𑀡𑀁, 𑀘𑁂𑀢𑁄𑀧𑀭𑀺𑀬𑀜𑀸𑀡𑀁, 𑀬𑀣𑀸𑀓𑀫𑁆𑀫𑀼𑀧𑀕𑀜𑀸𑀡𑀁, 𑀅𑀦𑀸𑀕𑀢𑀁𑀲𑀜𑀸𑀡𑀁, 𑀧𑀘𑁆𑀘𑀼𑀧𑁆𑀧𑀦𑁆𑀦𑀁𑀲𑀜𑀸𑀡𑀁, 𑀅𑀢𑀻𑀢𑀁𑀲𑀜𑀸𑀡𑀁, 𑀧𑀼𑀩𑁆𑀩𑁂𑀦𑀺𑀯𑀸𑀲𑀜𑀸𑀡𑀦𑁆𑀢𑀺 𑀇𑀫𑀸𑀦𑀺 𑀢𑀸𑀯 𑀅𑀝𑁆𑀞 𑀜𑀸𑀡𑀸𑀦𑀺 𑀧𑀸𑀴𑀺𑀬𑀁𑀬𑁂𑀯 𑀆𑀕𑀢𑀸𑀦𑀺, 𑀢𑁂𑀳𑀺 𑀧𑀦 𑀲𑀤𑁆𑀥𑀺𑀁 𑀯𑀺𑀧𑀲𑁆𑀲𑀦𑀸𑀜𑀸𑀡𑀸𑀦𑀺 𑀘𑀢𑁆𑀢𑀸𑀭𑀺 𑀫𑀕𑁆𑀕𑀜𑀸𑀡𑀸𑀦𑀺, 𑀘𑀢𑁆𑀢𑀸𑀭𑀺 𑀨𑀮𑀜𑀸𑀡𑀸𑀦𑀺, 𑀘𑀢𑁆𑀢𑀸𑀭𑀺 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀸𑀦𑀺, 𑀘𑀢𑁆𑀢𑀸𑀭𑀺 𑀧𑀝𑀺𑀲𑀫𑁆𑀪𑀺𑀤𑀸𑀜𑀸𑀡𑀸𑀦𑀺 𑀙 𑀅𑀲𑀸𑀥𑀸𑀭𑀡𑀜𑀸𑀡𑀸𑀦𑀻𑀢𑀺 𑀏𑀢𑀸𑀦𑀺 𑀜𑀸𑀡𑀸𑀦𑀺 𑀲𑀫𑁄𑀥𑀸𑀦𑁂𑀢𑁆𑀯𑀸 𑀓𑀣𑁂𑀦𑁆𑀢𑁂𑀦 𑀏𑀯𑀁 𑀇𑀤𑀁 𑀲𑀼𑀢𑁆𑀢𑀁 𑀓𑀣𑀺𑀢𑀁 𑀦𑀸𑀫 𑀳𑁄𑀢𑀺.

𑁫. 𑀅𑀪𑀺𑀪𑀸𑀬𑀢𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁬𑁫. 𑀧𑀜𑁆𑀘𑀫𑁂 𑀅𑀪𑀺𑀪𑀸𑀬𑀢𑀦𑀸𑀦𑀻𑀢𑀺 𑀅𑀪𑀺𑀪𑀯𑀦𑀓𑀸𑀭𑀡𑀸𑀦𑀺. 𑀓𑀺𑀁 𑀅𑀪𑀺𑀪𑀯𑀦𑁆𑀢𑀺? 𑀧𑀘𑁆𑀘𑀦𑀻𑀓𑀥𑀫𑁆𑀫𑁂𑀧𑀺 𑀆𑀭𑀫𑁆𑀫𑀡𑀸𑀦𑀺𑀧𑀺. 𑀢𑀸𑀦𑀺 𑀳𑀺 𑀧𑀝𑀺𑀧𑀓𑁆𑀔𑀪𑀸𑀯𑁂𑀦 𑀧𑀘𑁆𑀘𑀦𑀻𑀓𑀥𑀫𑁆𑀫𑁂 𑀅𑀪𑀺𑀪𑀯𑀦𑁆𑀢𑀺, 𑀧𑀼𑀕𑁆𑀕𑀮𑀲𑁆𑀲 𑀜𑀸𑀡𑀼𑀢𑁆𑀢𑀭𑀺𑀬𑀢𑀸𑀬 𑀆𑀭𑀫𑁆𑀫𑀡𑀸𑀦𑀺. 𑀅𑀚𑁆𑀛𑀢𑁆𑀢𑀁 𑀭𑀽𑀧𑀲𑀜𑁆𑀜𑀻𑀢𑀺𑀆𑀤𑀻𑀲𑀼 𑀧𑀦 𑀅𑀚𑁆𑀛𑀢𑁆𑀢𑀭𑀽𑀧𑁂 𑀧𑀭𑀺𑀓𑀫𑁆𑀫𑀯𑀲𑁂𑀦 𑀅𑀚𑁆𑀛𑀢𑁆𑀢𑀁 𑀭𑀽𑀧𑀲𑀜𑁆𑀜𑀻 𑀦𑀸𑀫 𑀳𑁄𑀢𑀺. 𑀅𑀚𑁆𑀛𑀢𑁆𑀢𑀜𑁆𑀳𑀺 𑀦𑀻𑀮𑀧𑀭𑀺𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 𑀓𑁂𑀲𑁂 𑀯𑀸 𑀧𑀺𑀢𑁆𑀢𑁂 𑀯𑀸 𑀅𑀓𑁆𑀔𑀺𑀢𑀸𑀭𑀓𑀸𑀬 𑀯𑀸 𑀓𑀭𑁄𑀢𑀺. 𑀧𑀻𑀢𑀧𑀭𑀺𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 𑀫𑁂𑀤𑁂 𑀯𑀸 𑀙𑀯𑀺𑀬𑀸 𑀯𑀸 𑀳𑀢𑁆𑀣𑀢𑀮𑀧𑀸𑀤𑀢𑀮𑁂𑀲𑀼 𑀯𑀸 𑀅𑀓𑁆𑀔𑀻𑀦𑀁 𑀧𑀻𑀢𑀝𑁆𑀞𑀸𑀦𑁂 𑀯𑀸 𑀓𑀭𑁄𑀢𑀺. 𑀮𑁄𑀳𑀺𑀢𑀧𑀭𑀺𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 𑀫𑀁𑀲𑁂 𑀯𑀸 𑀮𑁄𑀳𑀺𑀢𑁂 𑀯𑀸 𑀚𑀺𑀯𑁆𑀳𑀸𑀬 𑀯𑀸 𑀅𑀓𑁆𑀔𑀻𑀦𑀁 𑀭𑀢𑁆𑀢𑀝𑁆𑀞𑀸𑀦𑁂 𑀯𑀸 𑀓𑀭𑁄𑀢𑀺. 𑀑𑀤𑀸𑀢𑀧𑀭𑀺𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 𑀅𑀝𑁆𑀞𑀺𑀫𑁆𑀳𑀺 𑀯𑀸 𑀤𑀦𑁆𑀢𑁂 𑀯𑀸 𑀦𑀔𑁂 𑀯𑀸 𑀅𑀓𑁆𑀔𑀻𑀦𑀁 𑀲𑁂𑀢𑀝𑁆𑀞𑀸𑀦𑁂 𑀯𑀸 𑀓𑀭𑁄𑀢𑀺. 𑀢𑀁 𑀧𑀦 𑀲𑀼𑀦𑀻𑀮𑀓𑀁 𑀲𑀼𑀧𑀻𑀢𑀓𑀁 𑀲𑀼𑀮𑁄𑀳𑀺𑀢𑀓𑀁 𑀲𑀼𑀑𑀤𑀸𑀢𑀁 𑀦 𑀳𑁄𑀢𑀺, 𑀅𑀯𑀺𑀲𑀼𑀤𑁆𑀥𑀫𑁂𑀯 𑀳𑁄𑀢𑀺.

𑀏𑀓𑁄 𑀩𑀳𑀺𑀤𑁆𑀥𑀸 𑀭𑀽𑀧𑀸𑀦𑀺 𑀧𑀲𑁆𑀲𑀢𑀻𑀢𑀺 𑀬𑀲𑁆𑀲𑁂𑀯𑀁 𑀧𑀭𑀺𑀓𑀫𑁆𑀫𑀁 𑀅𑀚𑁆𑀛𑀢𑁆𑀢𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺, 𑀦𑀺𑀫𑀺𑀢𑁆𑀢𑀁 𑀧𑀦 𑀩𑀳𑀺𑀤𑁆𑀥𑀸, 𑀲𑁄 𑀏𑀯𑀁 𑀅𑀚𑁆𑀛𑀢𑁆𑀢𑀁 𑀧𑀭𑀺𑀓𑀫𑁆𑀫𑀲𑁆𑀲 𑀩𑀳𑀺𑀤𑁆𑀥𑀸 𑀘 𑀅𑀧𑁆𑀧𑀦𑀸𑀬 𑀯𑀲𑁂𑀦 ‘‘𑀅𑀚𑁆𑀛𑀢𑁆𑀢𑀁 𑀭𑀽𑀧𑀲𑀜𑁆𑀜𑀻 𑀏𑀓𑁄 𑀩𑀳𑀺𑀤𑁆𑀥𑀸 𑀭𑀽𑀧𑀸𑀦𑀺 𑀧𑀲𑁆𑀲𑀢𑀻’’𑀢𑀺 𑀯𑀼𑀘𑁆𑀘𑀢𑀺. 𑀧𑀭𑀺𑀢𑁆𑀢𑀸𑀦𑀻𑀢𑀺 𑀅𑀯𑀟𑁆𑀠𑀺𑀢𑀸𑀦𑀺. 𑀲𑀼𑀯𑀡𑁆𑀡𑀤𑀼𑀩𑁆𑀩𑀡𑁆𑀡𑀸𑀦𑀻𑀢𑀺 𑀲𑀼𑀯𑀡𑁆𑀡𑀸𑀦𑀺 𑀯𑀸 𑀳𑁄𑀦𑁆𑀢𑀼 𑀤𑀼𑀩𑁆𑀩𑀡𑁆𑀡𑀸𑀦𑀺 𑀯𑀸, 𑀧𑀭𑀺𑀢𑁆𑀢𑀯𑀲𑁂𑀦𑁂𑀯 𑀇𑀤𑀁 𑀅𑀪𑀺𑀪𑀸𑀬𑀢𑀦𑀁 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀸𑀦𑀺 𑀅𑀪𑀺𑀪𑀼𑀬𑁆𑀬𑀸𑀢𑀺 𑀬𑀣𑀸 𑀦𑀸𑀫 𑀲𑀫𑁆𑀧𑀦𑁆𑀦𑀕𑁆𑀕𑀳𑀡𑀺𑀓𑁄 𑀓𑀝𑀘𑁆𑀙𑀼𑀫𑀢𑁆𑀢𑀁 𑀪𑀢𑁆𑀢𑀁 𑀮𑀪𑀺𑀢𑁆𑀯𑀸 ‘‘𑀓𑀺𑀁 𑀏𑀢𑁆𑀣 𑀪𑀼𑀜𑁆𑀚𑀺𑀢𑀩𑁆𑀩𑀁 𑀅𑀢𑁆𑀣𑀻’’𑀢𑀺 𑀲𑀁𑀓𑀟𑁆𑀠𑀺𑀢𑁆𑀯𑀸 𑀏𑀓𑀓𑀩𑀴𑀫𑁂𑀯 𑀓𑀭𑁄𑀢𑀺, 𑀏𑀯𑀫𑁂𑀯 𑀜𑀸𑀡𑀼𑀢𑁆𑀢𑀭𑀺𑀓𑁄 𑀧𑀼𑀕𑁆𑀕𑀮𑁄 𑀯𑀺𑀲𑀤𑀜𑀸𑀡𑁄 ‘‘𑀓𑀺𑀫𑁂𑀢𑁆𑀣 𑀧𑀭𑀺𑀢𑁆𑀢𑀓𑁂 𑀆𑀭𑀫𑁆𑀫𑀡𑁂 𑀲𑀫𑀸𑀧𑀚𑁆𑀚𑀺𑀢𑀩𑁆𑀩𑀁 𑀅𑀢𑁆𑀣𑀺, 𑀦𑀸𑀬𑀁 𑀫𑀫 𑀪𑀸𑀭𑁄’’𑀢𑀺 𑀢𑀸𑀦𑀺 𑀭𑀽𑀧𑀸𑀦𑀺 𑀅𑀪𑀺𑀪𑀯𑀺𑀢𑁆𑀯𑀸 𑀲𑀫𑀸𑀧𑀚𑁆𑀚𑀢𑀺, 𑀲𑀳 𑀦𑀺𑀫𑀺𑀢𑁆𑀢𑀼𑀧𑁆𑀧𑀸𑀤𑁂𑀦𑁂𑀯𑁂𑀢𑁆𑀣 𑀅𑀧𑁆𑀧𑀦𑀁 𑀧𑀸𑀧𑁂𑀢𑀻𑀢𑀺 𑀅𑀢𑁆𑀣𑁄. 𑀚𑀸𑀦𑀸𑀫𑀺 𑀧𑀲𑁆𑀲𑀸𑀫𑀻𑀢𑀺 𑀇𑀫𑀺𑀦𑀸 𑀧𑀦𑀲𑁆𑀲 𑀆𑀪𑁄𑀕𑁄 𑀓𑀣𑀺𑀢𑁄. 𑀲𑁄 𑀘 𑀔𑁄 𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀺𑀢𑀲𑁆𑀲, 𑀦 𑀅𑀦𑁆𑀢𑁄𑀲𑀫𑀸𑀧𑀢𑁆𑀢𑀺𑀬𑀁. 𑀏𑀯𑀁𑀲𑀜𑁆𑀜𑀻 𑀳𑁄𑀢𑀻𑀢𑀺 𑀆𑀪𑁄𑀕𑀲𑀜𑁆𑀜𑀸𑀬𑀧𑀺 𑀛𑀸𑀦𑀲𑀜𑁆𑀜𑀸𑀬𑀧𑀺 𑀏𑀯𑀁𑀲𑀜𑁆𑀜𑀻 𑀳𑁄𑀢𑀺. 𑀅𑀪𑀺𑀪𑀯𑀦𑀲𑀜𑁆𑀜𑀸 𑀳𑀺𑀲𑁆𑀲 𑀅𑀦𑁆𑀢𑁄𑀲𑀫𑀸𑀧𑀢𑁆𑀢𑀺𑀬𑀫𑁆𑀧𑀺 𑀅𑀢𑁆𑀣𑀺, 𑀆𑀪𑁄𑀕𑀲𑀜𑁆𑀜𑀸 𑀧𑀦 𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀺𑀢𑀲𑁆𑀲𑁂𑀯.

𑀅𑀧𑁆𑀧𑀫𑀸𑀡𑀸𑀦𑀻𑀢𑀺 𑀯𑀟𑁆𑀠𑀺𑀢𑀧𑁆𑀧𑀫𑀸𑀡𑀸𑀦𑀺, 𑀫𑀳𑀦𑁆𑀢𑀸𑀦𑀻𑀢𑀺 𑀅𑀢𑁆𑀣𑁄. 𑀅𑀪𑀺𑀪𑀼𑀬𑁆𑀬𑀸𑀢𑀺 𑀏𑀢𑁆𑀣 𑀘 𑀧𑀦 𑀬𑀣𑀸 𑀫𑀳𑀕𑁆𑀖𑀲𑁄 𑀧𑀼𑀭𑀺𑀲𑁄 𑀏𑀓𑀁 𑀪𑀢𑁆𑀢𑀯𑀟𑁆𑀠𑀺𑀢𑀓𑀁 𑀮𑀪𑀺𑀢𑁆𑀯𑀸 ‘‘𑀅𑀜𑁆𑀜𑀸𑀧𑀺 𑀳𑁄𑀢𑀼, 𑀅𑀜𑁆𑀜𑀸𑀧𑀺 𑀳𑁄𑀢𑀼, 𑀓𑀺𑀁 𑀏𑀲𑀸 𑀫𑀬𑁆𑀳𑀁 𑀓𑀭𑀺𑀲𑁆𑀲𑀢𑀻’’𑀢𑀺 𑀦 𑀢𑀁 𑀫𑀳𑀦𑁆𑀢𑀢𑁄 𑀧𑀲𑁆𑀲𑀢𑀺, 𑀏𑀯𑀫𑁂𑀯 𑀜𑀸𑀡𑀼𑀢𑁆𑀢𑀭𑁄 𑀧𑀼𑀕𑁆𑀕𑀮𑁄 𑀯𑀺𑀲𑀤𑀜𑀸𑀡𑁄 ‘‘𑀓𑀺𑀁 𑀏𑀢𑁆𑀣 𑀲𑀫𑀸𑀧𑀚𑁆𑀚𑀺𑀢𑀩𑁆𑀩𑀁, 𑀦𑀬𑀺𑀤𑀁 𑀅𑀧𑁆𑀧𑀫𑀸𑀡𑀁, 𑀦 𑀫𑀬𑁆𑀳𑀁 𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀓𑀭𑀡𑁂 𑀪𑀸𑀭𑁄 𑀅𑀢𑁆𑀣𑀻’’𑀢𑀺 𑀅𑀪𑀺𑀪𑀯𑀺𑀢𑁆𑀯𑀸 𑀲𑀫𑀸𑀧𑀚𑁆𑀚𑀢𑀺, 𑀲𑀳 𑀦𑀺𑀫𑀺𑀢𑁆𑀢𑀼𑀧𑁆𑀧𑀸𑀤𑀦𑁂𑀯𑁂𑀢𑁆𑀣 𑀅𑀧𑁆𑀧𑀦𑀁 𑀧𑀸𑀧𑁂𑀢𑀻𑀢𑀺 𑀅𑀢𑁆𑀣𑁄.

𑀅𑀚𑁆𑀛𑀢𑁆𑀢𑀁 𑀅𑀭𑀽𑀧𑀲𑀜𑁆𑀜𑀻𑀢𑀺 𑀅𑀮𑀸𑀪𑀺𑀢𑀸𑀬 𑀯𑀸 𑀅𑀦𑀢𑁆𑀣𑀺𑀓𑀢𑀸𑀬 𑀯𑀸 𑀅𑀚𑁆𑀛𑀢𑁆𑀢𑀭𑀽𑀧𑁂 𑀧𑀭𑀺𑀓𑀫𑁆𑀫𑀲𑀜𑁆𑀜𑀸𑀯𑀺𑀭𑀳𑀺𑀢𑁄.

𑀏𑀓𑁄 𑀩𑀳𑀺𑀤𑁆𑀥𑀸 𑀭𑀽𑀧𑀸𑀦𑀺 𑀧𑀲𑁆𑀲𑀢𑀻𑀢𑀺 𑀬𑀲𑁆𑀲 𑀧𑀭𑀺𑀓𑀫𑁆𑀫𑀫𑁆𑀧𑀺 𑀦𑀺𑀫𑀺𑀢𑁆𑀢𑀫𑁆𑀧𑀺 𑀩𑀳𑀺𑀤𑁆𑀥𑀸 𑀉𑀧𑁆𑀧𑀦𑁆𑀦𑀁, 𑀲𑁄 𑀏𑀯𑀁 𑀩𑀳𑀺𑀤𑁆𑀥𑀸 𑀧𑀭𑀺𑀓𑀫𑁆𑀫𑀲𑁆𑀲 𑀘𑁂𑀯 𑀅𑀧𑁆𑀧𑀦𑀸𑀬 𑀘 𑀯𑀲𑁂𑀦 ‘‘𑀅𑀚𑁆𑀛𑀢𑁆𑀢𑀁 𑀅𑀭𑀽𑀧𑀲𑀜𑁆𑀜𑀻 𑀏𑀓𑁄 𑀩𑀳𑀺𑀤𑁆𑀥𑀸 𑀭𑀽𑀧𑀸𑀦𑀺 𑀧𑀲𑁆𑀲𑀢𑀻’’𑀢𑀺 𑀯𑀼𑀘𑁆𑀘𑀢𑀺. 𑀲𑁂𑀲𑀫𑁂𑀢𑁆𑀣 𑀘𑀢𑀼𑀢𑁆𑀣𑀸𑀪𑀺𑀪𑀸𑀬𑀢𑀦𑁂 𑀘 𑀯𑀼𑀢𑁆𑀢𑀦𑀬𑀫𑁂𑀯. 𑀇𑀫𑁂𑀲𑀼 𑀧𑀦 𑀘𑀢𑀽𑀲𑀼 𑀧𑀭𑀺𑀢𑁆𑀢𑀁 𑀯𑀺𑀢𑀓𑁆𑀓𑀘𑀭𑀺𑀢𑀯𑀲𑁂𑀦 𑀆𑀕𑀢𑀁, 𑀅𑀧𑁆𑀧𑀫𑀸𑀡𑀁 𑀫𑁄𑀳𑀘𑀭𑀺𑀢𑀯𑀲𑁂𑀦, 𑀲𑀼𑀯𑀡𑁆𑀡𑀁 𑀤𑁄𑀲𑀘𑀭𑀺𑀢𑀯𑀲𑁂𑀦, 𑀤𑀼𑀩𑁆𑀩𑀡𑁆𑀡𑀁 𑀭𑀸𑀕𑀘𑀭𑀺𑀢𑀯𑀲𑁂𑀦. 𑀏𑀢𑁂𑀲𑀜𑁆𑀳𑀺 𑀏𑀢𑀸𑀦𑀺 𑀲𑀧𑁆𑀧𑀸𑀬𑀸𑀦𑀺. 𑀲𑀸 𑀘 𑀦𑁂𑀲𑀁 𑀲𑀧𑁆𑀧𑀸𑀬𑀢𑀸 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁧.𑁪𑁩) 𑀘𑀭𑀺𑀬𑀦𑀺𑀤𑁆𑀤𑁂𑀲𑁂 𑀯𑀼𑀢𑁆𑀢𑀸.

𑀧𑀜𑁆𑀘𑀫𑀅𑀪𑀺𑀪𑀸𑀬𑀢𑀦𑀸𑀤𑀻𑀲𑀼 𑀦𑀻𑀮𑀸𑀦𑀻𑀢𑀺 𑀲𑀩𑁆𑀩𑀲𑀗𑁆𑀕𑀸𑀳𑀺𑀓𑀯𑀲𑁂𑀦 𑀯𑀼𑀢𑁆𑀢𑀁. 𑀦𑀻𑀮𑀯𑀡𑁆𑀡𑀸𑀦𑀻𑀢𑀺 𑀯𑀡𑁆𑀡𑀯𑀲𑁂𑀦. 𑀦𑀻𑀮𑀦𑀺𑀤𑀲𑁆𑀲𑀦𑀸𑀦𑀻𑀢𑀺 𑀦𑀺𑀤𑀲𑁆𑀲𑀦𑀯𑀲𑁂𑀦. 𑀅𑀧𑀜𑁆𑀜𑀸𑀬𑀫𑀸𑀦𑀯𑀺𑀯𑀭𑀸𑀦𑀺 𑀅𑀲𑀫𑁆𑀪𑀺𑀦𑁆𑀦𑀯𑀡𑁆𑀡𑀸𑀦𑀺 𑀏𑀓𑀦𑀻𑀮𑀸𑀦𑁂𑀯 𑀳𑀼𑀢𑁆𑀯𑀸 𑀤𑀺𑀲𑁆𑀲𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀦𑀻𑀮𑀦𑀺𑀪𑀸𑀲𑀸𑀦𑀻𑀢𑀺 𑀇𑀤𑀁 𑀧𑀦 𑀑𑀪𑀸𑀲𑀯𑀲𑁂𑀦 𑀯𑀼𑀢𑁆𑀢𑀁, 𑀦𑀻𑀮𑁄𑀪𑀸𑀲𑀸𑀦𑀺 𑀦𑀻𑀮𑀧𑁆𑀧𑀪𑀸𑀬𑀼𑀢𑁆𑀢𑀸𑀦𑀻𑀢𑀺 𑀅𑀢𑁆𑀣𑁄. 𑀏𑀢𑁂𑀦 𑀦𑁂𑀲𑀁 𑀲𑀼𑀯𑀺𑀲𑀼𑀤𑁆𑀥𑀢𑀁 𑀤𑀲𑁆𑀲𑁂𑀢𑀺. 𑀯𑀺𑀲𑀼𑀤𑁆𑀥𑀯𑀡𑁆𑀡𑀯𑀲𑁂𑀦𑁂𑀯 𑀳𑀺 𑀇𑀫𑀸𑀦𑀺 𑀅𑀪𑀺𑀪𑀸𑀬𑀢𑀦𑀸𑀦𑀺 𑀯𑀼𑀢𑁆𑀢𑀸𑀦𑀺. ‘‘𑀦𑀻𑀮𑀓𑀲𑀺𑀡𑀁 𑀉𑀕𑁆𑀕𑀡𑁆𑀳𑀦𑁆𑀢𑁄 𑀦𑀻𑀮𑀲𑁆𑀫𑀺𑀁 𑀦𑀺𑀫𑀺𑀢𑁆𑀢𑀁 𑀕𑀡𑁆𑀳𑀸𑀢𑀺 𑀧𑀼𑀧𑁆𑀨𑀲𑁆𑀫𑀺𑀁 𑀯𑀸 𑀯𑀢𑁆𑀣𑀲𑁆𑀫𑀺𑀁 𑀯𑀸 𑀯𑀡𑁆𑀡𑀥𑀸𑀢𑀼𑀬𑀸 𑀯𑀸’’𑀢𑀺𑀆𑀤𑀺𑀓𑀁 𑀧𑀦𑁂𑀢𑁆𑀣 𑀓𑀲𑀺𑀡𑀓𑀭𑀡𑀜𑁆𑀘 𑀧𑀭𑀺𑀓𑀫𑁆𑀫𑀜𑁆𑀘 𑀅𑀧𑁆𑀧𑀦𑀸𑀯𑀺𑀥𑀸𑀦𑀜𑁆𑀘 𑀲𑀩𑁆𑀩𑀁 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁧.𑁫𑁫) 𑀯𑀺𑀢𑁆𑀣𑀸𑀭𑀢𑁄 𑀯𑀼𑀢𑁆𑀢𑀫𑁂𑀯𑀸𑀢𑀺.

𑁬. 𑀯𑀺𑀫𑁄𑀓𑁆𑀔𑀲𑀼𑀢𑁆𑀢𑀯𑀡𑁆𑀡𑀦𑀸

𑁬𑁬. 𑀯𑀺𑀫𑁄𑀓𑁆𑀔𑀸𑀢𑀺 𑀓𑁂𑀦𑀝𑁆𑀞𑁂𑀦 𑀯𑀺𑀫𑁄𑀓𑁆𑀔𑀸? 𑀅𑀥𑀺𑀫𑀼𑀘𑁆𑀘𑀦𑀝𑁆𑀞𑁂𑀦. 𑀓𑁄 𑀧𑀦𑀸𑀬𑀁 𑀅𑀥𑀺𑀫𑀼𑀘𑁆𑀘𑀦𑀝𑁆𑀞𑁄 𑀦𑀸𑀫? 𑀧𑀘𑁆𑀘𑀦𑀻𑀓𑀥𑀫𑁆𑀫𑁂𑀳𑀺 𑀘 𑀲𑀼𑀝𑁆𑀞𑀼 𑀫𑀼𑀘𑁆𑀘𑀦𑀝𑁆𑀞𑁄, 𑀆𑀭𑀫𑁆𑀫𑀡𑁂 𑀘 𑀅𑀪𑀺𑀭𑀢𑀺𑀯𑀲𑁂𑀦 𑀲𑀼𑀝𑁆𑀞𑀼 𑀫𑀼𑀘𑁆𑀘𑀦𑀝𑁆𑀞𑁄, 𑀧𑀺𑀢𑀼𑀅𑀗𑁆𑀓𑁂 𑀯𑀺𑀲𑁆𑀲𑀝𑁆𑀞𑀗𑁆𑀕𑀧𑀘𑁆𑀘𑀗𑁆𑀕𑀲𑁆𑀲 𑀤𑀸𑀭𑀓𑀲𑁆𑀲 𑀲𑀬𑀦𑀁 𑀯𑀺𑀬 𑀅𑀦𑀺𑀕𑁆𑀕𑀳𑀺𑀢𑀪𑀸𑀯𑁂𑀦 𑀦𑀺𑀭𑀸𑀲𑀗𑁆𑀓𑀢𑀸𑀬 𑀆𑀭𑀫𑁆𑀫𑀡𑁂 𑀧𑀯𑀢𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀬𑀁 𑀧𑀦𑀢𑁆𑀣𑁄 𑀧𑀘𑁆𑀙𑀺𑀫𑁂 𑀯𑀺𑀫𑁄𑀓𑁆𑀔𑁂 𑀦𑀢𑁆𑀣𑀺, 𑀧𑀼𑀭𑀺𑀫𑁂𑀲𑀼 𑀯𑀺𑀫𑁄𑀓𑁆𑀔𑁂𑀲𑀼 𑀅𑀢𑁆𑀣𑀺.

𑀭𑀽𑀧𑀻 𑀭𑀽𑀧𑀸𑀦𑀺 𑀧𑀲𑁆𑀲𑀢𑀻𑀢𑀺 𑀏𑀢𑁆𑀣 𑀅𑀚𑁆𑀛𑀢𑁆𑀢𑀁 𑀓𑁂𑀲𑀸𑀤𑀻𑀲𑀼 𑀦𑀻𑀮𑀓𑀲𑀺𑀡𑀸𑀤𑀺𑀯𑀲𑁂𑀦 𑀉𑀧𑁆𑀧𑀸𑀤𑀺𑀢𑀁 𑀭𑀽𑀧𑀚𑁆𑀛𑀸𑀦𑀁 𑀭𑀽𑀧𑀁, 𑀢𑀤𑀲𑁆𑀲𑀢𑁆𑀣𑀻𑀢𑀺 𑀭𑀽𑀧𑀻. 𑀩𑀳𑀺𑀤𑁆𑀥𑀸𑀧𑀺 𑀦𑀻𑀮𑀓𑀲𑀺𑀡𑀸𑀤𑀻𑀦𑀺 𑀭𑀽𑀧𑀸𑀦𑀺 𑀛𑀸𑀦𑀘𑀓𑁆𑀔𑀼𑀦𑀸 𑀧𑀲𑁆𑀲𑀢𑀺. 𑀇𑀫𑀺𑀦𑀸 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀯𑀢𑁆𑀣𑀼𑀓𑁂𑀲𑀼 𑀓𑀲𑀺𑀡𑁂𑀲𑀼 𑀉𑀧𑁆𑀧𑀸𑀤𑀺𑀢𑀚𑁆𑀛𑀸𑀦𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀘𑀢𑁆𑀢𑀸𑀭𑀺 𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀸𑀦𑀺 𑀤𑀲𑁆𑀲𑀺𑀢𑀸𑀦𑀺. 𑀅𑀚𑁆𑀛𑀢𑁆𑀢𑀁 𑀅𑀭𑀽𑀧𑀲𑀜𑁆𑀜𑀻𑀢𑀺 𑀅𑀚𑁆𑀛𑀢𑁆𑀢𑀁 𑀦 𑀭𑀽𑀧𑀲𑀜𑁆𑀜𑀻, 𑀅𑀢𑁆𑀢𑀦𑁄 𑀓𑁂𑀲𑀸𑀤𑀻𑀲𑀼 𑀅𑀦𑀼𑀧𑁆𑀧𑀸𑀤𑀺𑀢𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑁄𑀢𑀺 𑀅𑀢𑁆𑀣𑁄. 𑀇𑀫𑀺𑀦𑀸 𑀩𑀳𑀺𑀤𑁆𑀥𑀸 𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸 𑀩𑀳𑀺𑀤𑁆𑀥𑀸𑀯 𑀉𑀧𑁆𑀧𑀸𑀤𑀺𑀢𑀚𑁆𑀛𑀸𑀦𑀲𑁆𑀲 𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀸𑀦𑀺 𑀤𑀲𑁆𑀲𑀺𑀢𑀸𑀦𑀺.

𑀲𑀼𑀪𑀦𑁆𑀢𑁂𑀯 𑀅𑀥𑀺𑀫𑀼𑀢𑁆𑀢𑁄 𑀳𑁄𑀢𑀻𑀢𑀺 𑀇𑀫𑀺𑀦𑀸 𑀲𑀼𑀯𑀺𑀲𑀼𑀤𑁆𑀥𑁂𑀲𑀼 𑀦𑀻𑀮𑀸𑀤𑀻𑀲𑀼 𑀯𑀡𑁆𑀡𑀓𑀲𑀺𑀡𑁂𑀲𑀼 𑀛𑀸𑀦𑀸𑀦𑀺 𑀤𑀲𑁆𑀲𑀺𑀢𑀸𑀦𑀺. 𑀢𑀢𑁆𑀣 𑀓𑀺𑀜𑁆𑀘𑀸𑀧𑀺 𑀅𑀦𑁆𑀢𑁄𑀅𑀧𑁆𑀧𑀦𑀸𑀬 ‘‘𑀲𑀼𑀪’’𑀦𑁆𑀢𑀺 𑀆𑀪𑁄𑀕𑁄 𑀦𑀢𑁆𑀣𑀺, 𑀬𑁄 𑀧𑀦 𑀲𑀼𑀯𑀺𑀲𑀼𑀤𑁆𑀥𑀁 𑀲𑀼𑀪𑀁 𑀓𑀲𑀺𑀡𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀯𑀺𑀳𑀭𑀢𑀺, 𑀲𑁄 𑀬𑀲𑁆𑀫𑀸 ‘‘𑀲𑀼𑀪𑀦𑁆𑀢𑀺 𑀅𑀥𑀺𑀫𑀼𑀢𑁆𑀢𑁄 𑀳𑁄𑀢𑀻’’𑀢𑀺 𑀯𑀢𑁆𑀢𑀩𑁆𑀩𑀢𑀁 𑀆𑀧𑀚𑁆𑀚𑀢𑀺, 𑀢𑀲𑁆𑀫𑀸 𑀏𑀯𑀁 𑀤𑁂𑀲𑀦𑀸 𑀓𑀢𑀸. 𑀧𑀝𑀺𑀲𑀫𑁆𑀪𑀺𑀤𑀸𑀫𑀕𑁆𑀕𑁂 𑀧𑀦 𑁋

‘‘𑀓𑀣𑀁 𑀲𑀼𑀪𑀦𑁆𑀢𑁂𑀯 𑀅𑀥𑀺𑀫𑀼𑀢𑁆𑀢𑁄 𑀳𑁄𑀢𑀻𑀢𑀺 𑀯𑀺𑀫𑁄𑀓𑁆𑀔𑁄? 𑀇𑀥 𑀪𑀺𑀓𑁆𑀔𑀼 𑀫𑁂𑀢𑁆𑀢𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀏𑀓𑀁 𑀤𑀺𑀲𑀁 …𑀧𑁂… 𑀯𑀺𑀳𑀭𑀢𑀺. 𑀫𑁂𑀢𑁆𑀢𑀸𑀬 𑀪𑀸𑀯𑀺𑀢𑀢𑁆𑀢𑀸 𑀲𑀢𑁆𑀢𑀸 𑀅𑀧𑁆𑀧𑀝𑀺𑀓𑀽𑀮𑀸 𑀳𑁄𑀦𑁆𑀢𑀺. 𑀓𑀭𑀼𑀡𑀸𑀲𑀳𑀕𑀢𑁂𑀦…𑀧𑁂… 𑀫𑀼𑀤𑀺𑀢𑀸𑀲𑀳𑀕𑀢𑁂𑀦 …𑀧𑁂… 𑀉𑀧𑁂𑀓𑁆𑀔𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀏𑀓𑀁 𑀤𑀺𑀲𑀁…𑀧𑁂… 𑀯𑀺𑀳𑀭𑀢𑀺. 𑀉𑀧𑁂𑀓𑁆𑀔𑀸𑀬 𑀪𑀸𑀯𑀺𑀢𑀢𑁆𑀢𑀸 𑀲𑀢𑁆𑀢𑀸 𑀅𑀧𑁆𑀧𑀝𑀺𑀓𑀽𑀮𑀸 𑀳𑁄𑀦𑁆𑀢𑀺. 𑀏𑀯𑀁 𑀲𑀼𑀪𑀦𑁆𑀢𑁂𑀯 𑀅𑀥𑀺𑀫𑀼𑀢𑁆𑀢𑁄 𑀳𑁄𑀢𑀻𑀢𑀺 𑀯𑀺𑀫𑁄𑀓𑁆𑀔𑁄’’𑀢𑀺 (𑀧𑀝𑀺. 𑀫. 𑁧.𑁨𑁧𑁨) 𑀯𑀼𑀢𑁆𑀢𑀁.

𑀲𑀩𑁆𑀩𑀲𑁄 𑀭𑀽𑀧𑀲𑀜𑁆𑀜𑀸𑀦𑀦𑁆𑀢𑀺𑀆𑀤𑀻𑀲𑀼 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁧.𑁨𑁭𑁬-𑁨𑁭𑁭) 𑀯𑀼𑀢𑁆𑀢𑀫𑁂𑀯. 𑀅𑀬𑀁 𑀅𑀝𑁆𑀞𑀫𑁄 𑀯𑀺𑀫𑁄𑀓𑁆𑀔𑁄𑀢𑀺 𑀅𑀬𑀁 𑀘𑀢𑀼𑀦𑁆𑀦𑀁 𑀔𑀦𑁆𑀥𑀸𑀦𑀁 𑀲𑀩𑁆𑀩𑀲𑁄 𑀯𑀺𑀲𑁆𑀲𑀝𑁆𑀞𑀢𑁆𑀢𑀸 𑀯𑀺𑀫𑀼𑀢𑁆𑀢𑀢𑁆𑀢𑀸 𑀅𑀝𑁆𑀞𑀫𑁄 𑀉𑀢𑁆𑀢𑀫𑁄 𑀯𑀺𑀫𑁄𑀓𑁆𑀔𑁄 𑀦𑀸𑀫.

𑁭-𑁮. 𑀅𑀦𑀭𑀺𑀬𑀯𑁄𑀳𑀸𑀭𑀲𑀼𑀢𑁆𑀢𑀯𑀡𑁆𑀡𑀦𑀸

𑁬𑁭-𑁬𑁮. 𑀲𑀢𑁆𑀢𑀫𑁂 𑀅𑀦𑀭𑀺𑀬𑀯𑁄𑀳𑀸𑀭𑀸𑀢𑀺 𑀦 𑀅𑀭𑀺𑀬𑀓𑀣𑀸 𑀲𑀤𑁄𑀲𑀓𑀣𑀸. 𑀬𑀸𑀳𑀺 𑀘𑁂𑀢𑀦𑀸𑀳𑀺 𑀢𑁂 𑀯𑁄𑀳𑀸𑀭𑁂 𑀯𑁄𑀳𑀭𑀦𑁆𑀢𑀺, 𑀢𑀸𑀲𑀁 𑀏𑀢𑀁 𑀦𑀸𑀫𑀁. 𑀅𑀝𑁆𑀞𑀫𑁂 𑀯𑀼𑀢𑁆𑀢𑀧𑀝𑀺𑀧𑀓𑁆𑀔𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑁯. 𑀧𑀭𑀺𑀲𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁬𑁯. 𑀦𑀯𑀫𑁂 𑀔𑀢𑁆𑀢𑀺𑀬𑀧𑀭𑀺𑀲𑀸𑀢𑀺 𑀔𑀢𑁆𑀢𑀺𑀬𑀸𑀦𑀁 𑀧𑀭𑀺𑀲𑀸𑀦𑀁 𑀲𑀦𑁆𑀦𑀺𑀧𑀸𑀢𑁄 𑀲𑀫𑀸𑀕𑀫𑁄. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣. 𑀅𑀦𑁂𑀓𑀲𑀢𑀁 𑀔𑀢𑁆𑀢𑀺𑀬𑀧𑀭𑀺𑀲𑀦𑁆𑀢𑀺 𑀩𑀺𑀫𑁆𑀩𑀺𑀲𑀸𑀭𑀲𑀫𑀸𑀕𑀫-𑀜𑀸𑀢𑀺𑀲𑀫𑀸𑀕𑀫-𑀮𑀺𑀘𑁆𑀙𑀯𑀺𑀲𑀫𑀸𑀕𑀫𑀸𑀤𑀺𑀲𑀤𑀺𑀲𑀁, 𑀅𑀜𑁆𑀜𑁂𑀲𑀼 𑀘𑀓𑁆𑀓𑀯𑀸𑀴𑁂𑀲𑀼𑀧𑀺 𑀮𑀩𑁆𑀪𑀢𑁂𑀯. 𑀲𑀮𑁆𑀮𑀧𑀺𑀢𑀧𑀼𑀩𑁆𑀩𑀦𑁆𑀢𑀺 𑀆𑀮𑀸𑀧𑀲𑀮𑁆𑀮𑀸𑀧𑁄 𑀓𑀢𑀧𑀼𑀩𑁆𑀩𑁄. 𑀲𑀸𑀓𑀘𑁆𑀙𑀸𑀢𑀺 𑀥𑀫𑁆𑀫𑀲𑀸𑀓𑀘𑁆𑀙𑀸𑀧𑀺 𑀲𑀫𑀸𑀧𑀚𑁆𑀚𑀺𑀢𑀧𑀼𑀩𑁆𑀩𑀸. 𑀬𑀸𑀤𑀺𑀲𑀓𑁄 𑀢𑁂𑀲𑀁 𑀯𑀡𑁆𑀡𑁄𑀢𑀺 𑀢𑁂 𑀑𑀤𑀸𑀢𑀸𑀧𑀺 𑀳𑁄𑀦𑁆𑀢𑀺 𑀓𑀸𑀴𑀸𑀧𑀺 𑀫𑀗𑁆𑀕𑀼𑀭𑀘𑁆𑀙𑀯𑀻𑀧𑀺, 𑀲𑀢𑁆𑀣𑀸 𑀲𑀼𑀯𑀡𑁆𑀡𑀯𑀡𑁆𑀡𑁄. 𑀇𑀤𑀁 𑀧𑀦 𑀲𑀡𑁆𑀞𑀸𑀦𑀁 𑀧𑀝𑀺𑀘𑁆𑀘 𑀓𑀣𑀺𑀢𑀁. 𑀲𑀡𑁆𑀞𑀸𑀦𑀫𑁆𑀧𑀺 𑀘 𑀓𑁂𑀯𑀮𑀁 𑀢𑁂𑀲𑀁 𑀧𑀜𑁆𑀜𑀸𑀬𑀢𑀺𑀬𑁂𑀯. 𑀦 𑀧𑀦 𑀪𑀕𑀯𑀸 𑀫𑀺𑀮𑀓𑁆𑀔𑀲𑀤𑀺𑀲𑁄 𑀳𑁄𑀢𑀺, 𑀦𑀸𑀧𑀺 𑀆𑀫𑀼𑀢𑁆𑀢𑀫𑀡𑀺𑀓𑀼𑀡𑁆𑀟𑀮𑁄, 𑀩𑀼𑀤𑁆𑀥𑀯𑁂𑀲𑁂𑀦𑁂𑀯 𑀦𑀺𑀲𑀻𑀤𑀢𑀺. 𑀢𑁂𑀧𑀺 𑀅𑀢𑁆𑀢𑀦𑁄 𑀲𑀫𑀸𑀦𑀲𑀡𑁆𑀞𑀸𑀦𑀫𑁂𑀯 𑀧𑀲𑁆𑀲𑀦𑁆𑀢𑀺. 𑀬𑀸𑀤𑀺𑀲𑀓𑁄 𑀢𑁂𑀲𑀁 𑀲𑀭𑁄𑀢𑀺 𑀢𑁂 𑀙𑀺𑀦𑁆𑀦𑀲𑁆𑀲𑀭𑀸𑀧𑀺 𑀳𑁄𑀦𑁆𑀢𑀺 𑀕𑀕𑁆𑀕𑀲𑁆𑀲𑀭𑀸𑀧𑀺 𑀓𑀸𑀓𑀲𑁆𑀲𑀭𑀸𑀧𑀺, 𑀲𑀢𑁆𑀣𑀸 𑀩𑁆𑀭𑀳𑁆𑀫𑀲𑁆𑀲𑀭𑁄𑀯. 𑀇𑀤𑀁 𑀧𑀦 𑀪𑀸𑀲𑀦𑁆𑀢𑀭𑀁 𑀲𑀦𑁆𑀥𑀸𑀬 𑀓𑀣𑀺𑀢𑀁. 𑀲𑀘𑁂𑀧𑀺 𑀳𑀺 𑀲𑀢𑁆𑀣𑀸 𑀭𑀸𑀚𑀸𑀲𑀦𑁂 𑀦𑀺𑀲𑀺𑀦𑁆𑀦𑁄 𑀓𑀣𑁂𑀢𑀺, ‘‘𑀅𑀚𑁆𑀚 𑀭𑀸𑀚𑀸 𑀫𑀥𑀼𑀭𑁂𑀦 𑀓𑀣𑁂𑀢𑀻’’𑀢𑀺 𑀦𑁂𑀲𑀁 𑀳𑁄𑀢𑀺. 𑀓𑀣𑁂𑀢𑁆𑀯𑀸 𑀧𑀓𑁆𑀓𑀦𑁆𑀢𑁂 𑀧𑀦 𑀪𑀕𑀯𑀢𑀺 𑀧𑀼𑀦 𑀭𑀸𑀚𑀸𑀦𑀁 𑀆𑀕𑀢𑀁 𑀤𑀺𑀲𑁆𑀯𑀸 ‘‘𑀓𑁄 𑀦𑀼 𑀔𑁄 𑀅𑀬’’𑀦𑁆𑀢𑀺 𑀯𑀻𑀫𑀁𑀲𑀸 𑀉𑀧𑁆𑀧𑀚𑁆𑀚𑀢𑀺. 𑀢𑀢𑁆𑀣 𑀓𑁄 𑀦𑀼 𑀔𑁄 𑀅𑀬𑀦𑁆𑀢𑀺 ‘‘𑀇𑀫𑀲𑁆𑀫𑀺𑀁 𑀞𑀸𑀦𑁂 𑀇𑀤𑀸𑀦𑁂𑀯 𑀫𑀸𑀕𑀥𑀪𑀸𑀲𑀸𑀬 𑀲𑀻𑀳𑀴𑀪𑀸𑀲𑀸𑀬 𑀫𑀥𑀼𑀭𑁂𑀦 𑀆𑀓𑀸𑀭𑁂𑀦 𑀓𑀣𑁂𑀦𑁆𑀢𑁄 𑀓𑁄 𑀦𑀼 𑀔𑁄 𑀅𑀬𑀁 𑀅𑀦𑁆𑀢𑀭𑀳𑀺𑀢𑁄, 𑀓𑀺𑀁 𑀤𑁂𑀯𑁄 𑀉𑀤𑀸𑀳𑀼 𑀫𑀦𑀼𑀲𑁆𑀲𑁄’’𑀢𑀺 𑀏𑀯𑀁 𑀯𑀻𑀫𑀁𑀲𑀦𑁆𑀢𑀸𑀧𑀺 𑀦 𑀚𑀸𑀦𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀓𑀺𑀫𑀢𑁆𑀣𑀁 𑀧𑀦𑁂𑀯𑀁 𑀅𑀚𑀸𑀦𑀦𑁆𑀢𑀸𑀦𑀁 𑀥𑀫𑁆𑀫𑀁 𑀤𑁂𑀲𑁂𑀢𑀻𑀢𑀺? 𑀯𑀸𑀲𑀦𑀢𑁆𑀣𑀸𑀬. 𑀏𑀯𑀁 𑀲𑀼𑀢𑁄𑀧𑀺 𑀳𑀺 𑀥𑀫𑁆𑀫𑁄 𑀅𑀦𑀸𑀕𑀢𑁂 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀅𑀦𑀸𑀕𑀢𑀁 𑀧𑀝𑀺𑀘𑁆𑀘 𑀤𑁂𑀲𑁂𑀢𑀺. 𑀅𑀦𑁂𑀓𑀲𑀢𑀁 𑀩𑁆𑀭𑀸𑀳𑁆𑀫𑀡𑀧𑀭𑀺𑀲𑀦𑁆𑀢𑀺𑀆𑀤𑀺𑀦𑀁 𑀲𑁄𑀡𑀤𑀡𑁆𑀟𑀲𑀫𑀸𑀕𑀫𑀸𑀤𑀺𑀯𑀲𑁂𑀦 𑀘𑁂𑀯 𑀅𑀜𑁆𑀜𑀘𑀓𑁆𑀓𑀯𑀸𑀴𑀯𑀲𑁂𑀦 𑀘 𑀲𑀫𑁆𑀪𑀯𑁄 𑀯𑁂𑀤𑀺𑀢𑀩𑁆𑀩𑁄.

𑁧𑁦. 𑀪𑀽𑀫𑀺𑀘𑀸𑀮𑀲𑀼𑀢𑁆𑀢𑀯𑀡𑁆𑀡𑀦𑀸

𑁭𑁦. 𑀤𑀲𑀫𑁂 𑀦𑀺𑀲𑀻𑀤𑀦𑀦𑁆𑀢𑀺 𑀇𑀥 𑀘𑀫𑁆𑀫𑀔𑀡𑁆𑀟𑀁 𑀅𑀥𑀺𑀧𑁆𑀧𑁂𑀢𑀁. 𑀉𑀤𑁂𑀦𑀁 𑀘𑁂𑀢𑀺𑀬𑀦𑁆𑀢𑀺 𑀉𑀤𑁂𑀦𑀬𑀓𑁆𑀔𑀲𑁆𑀲 𑀯𑀲𑀦𑀝𑁆𑀞𑀸𑀦𑁂 𑀓𑀢𑀯𑀺𑀳𑀸𑀭𑁄 𑀯𑀼𑀘𑁆𑀘𑀢𑀺. 𑀕𑁄𑀢𑀫𑀓𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀪𑀸𑀯𑀺𑀢𑀸𑀢𑀺 𑀯𑀟𑁆𑀠𑀺𑀢𑀸. 𑀩𑀳𑀼𑀮𑀻𑀓𑀢𑀸𑀢𑀺 𑀧𑀼𑀦𑀧𑁆𑀧𑀼𑀦𑀁 𑀓𑀢𑀸. 𑀬𑀸𑀦𑀻𑀓𑀢𑀸𑀢𑀺 𑀬𑀼𑀢𑁆𑀢𑀬𑀸𑀦𑀁 𑀯𑀺𑀬 𑀓𑀢𑀸. 𑀯𑀢𑁆𑀣𑀼𑀓𑀢𑀸𑀢𑀺 𑀧𑀢𑀺𑀝𑁆𑀞𑀸𑀦𑀝𑁆𑀞𑁂𑀦 𑀯𑀢𑁆𑀣𑀼 𑀯𑀺𑀬 𑀓𑀢𑀸. 𑀅𑀦𑀼𑀝𑁆𑀞𑀺𑀢𑀸𑀢𑀺 𑀅𑀥𑀺𑀝𑁆𑀞𑀺𑀢𑀸. 𑀧𑀭𑀺𑀘𑀺𑀢𑀸𑀢𑀺 𑀲𑀫𑀦𑁆𑀢𑀢𑁄 𑀘𑀺𑀢𑀸 𑀲𑀼𑀯𑀟𑁆𑀠𑀺𑀢𑀸. 𑀲𑀼𑀲𑀫𑀸𑀭𑀤𑁆𑀥𑀸𑀢𑀺 𑀲𑀼𑀝𑁆𑀞𑀼 𑀲𑀫𑀸𑀭𑀤𑁆𑀥𑀸.

𑀇𑀢𑀺 𑀅𑀦𑀺𑀬𑀫𑁂𑀦 𑀓𑀣𑁂𑀢𑁆𑀯𑀸 𑀧𑀼𑀦 𑀦𑀺𑀬𑀫𑁂𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 𑀢𑀣𑀸𑀕𑀢𑀲𑁆𑀲 𑀔𑁄𑀢𑀺𑀆𑀤𑀺𑀫𑀸𑀳. 𑀏𑀢𑁆𑀣 𑀓𑀧𑁆𑀧𑀦𑁆𑀢𑀺 𑀆𑀬𑀼𑀓𑀧𑁆𑀧𑀁. 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀓𑀸𑀮𑁂 𑀬𑀁 𑀫𑀦𑀼𑀲𑁆𑀲𑀸𑀦𑀁 𑀆𑀬𑀼𑀧𑁆𑀧𑀫𑀸𑀡𑀁, 𑀢𑀁 𑀧𑀭𑀺𑀧𑀼𑀡𑁆𑀡𑀁 𑀓𑀭𑁄𑀦𑁆𑀢𑁄 𑀢𑀺𑀝𑁆𑀞𑁂𑀬𑁆𑀬. 𑀓𑀧𑁆𑀧𑀸𑀯𑀲𑁂𑀲𑀁 𑀯𑀸𑀢𑀺 ‘‘𑀅𑀧𑁆𑀧𑀁 𑀯𑀸 𑀪𑀺𑀬𑁆𑀬𑁄’’𑀢𑀺 𑀯𑀼𑀢𑁆𑀢𑀯𑀲𑁆𑀲𑀲𑀢𑀢𑁄 𑀅𑀢𑀺𑀭𑁂𑀓𑀁 𑀯𑀸. 𑀫𑀳𑀸𑀲𑀻𑀯𑀢𑁆𑀣𑁂𑀭𑁄 𑀧𑀦𑀸𑀳 𑁋 ‘‘𑀩𑀼𑀤𑁆𑀥𑀸𑀦𑀁 𑀅𑀝𑁆𑀞𑀸𑀦𑁂 𑀕𑀚𑁆𑀚𑀺𑀢𑀁 𑀦𑀸𑀫 𑀦𑀢𑁆𑀣𑀺, 𑀧𑀼𑀦𑀧𑁆𑀧𑀼𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀫𑀭𑀡𑀦𑁆𑀢𑀺𑀓𑀯𑁂𑀤𑀦𑀁 𑀯𑀺𑀓𑁆𑀔𑀫𑁆𑀪𑁂𑀦𑁆𑀢𑁄 𑀪𑀤𑁆𑀤𑀓𑀧𑁆𑀧𑀫𑁂𑀯 𑀢𑀺𑀝𑁆𑀞𑁂𑀬𑁆𑀬. 𑀓𑀲𑁆𑀫𑀸 𑀧𑀦 𑀦 𑀞𑀺𑀢𑁄𑀢𑀺? 𑀉𑀧𑀸𑀤𑀺𑀦𑁆𑀦𑀓𑀲𑀭𑀻𑀭𑀁 𑀦𑀸𑀫 𑀔𑀡𑁆𑀟𑀺𑀘𑁆𑀘𑀸𑀤𑀻𑀳𑀺 𑀅𑀪𑀺𑀪𑀼𑀬𑁆𑀬𑀢𑀺, 𑀩𑀼𑀤𑁆𑀥𑀸 𑀘 𑀔𑀡𑁆𑀟𑀺𑀘𑁆𑀘𑀸𑀤𑀺𑀪𑀸𑀯𑀁 𑀅𑀧𑁆𑀧𑀢𑁆𑀯𑀸 𑀧𑀜𑁆𑀘𑀫𑁂 𑀆𑀬𑀼𑀓𑁄𑀝𑁆𑀞𑀸𑀲𑁂 𑀩𑀳𑀼𑀚𑀦𑀲𑁆𑀲 𑀧𑀺𑀬𑀫𑀦𑀸𑀧𑀓𑀸𑀮𑁂𑀬𑁂𑀯 𑀧𑀭𑀺𑀦𑀺𑀩𑁆𑀩𑀸𑀬𑀦𑁆𑀢𑀺. 𑀩𑀼𑀤𑁆𑀥𑀸𑀦𑀼𑀩𑀼𑀤𑁆𑀥𑁂𑀲𑀼 𑀘 𑀫𑀳𑀸𑀲𑀸𑀯𑀓𑁂𑀲𑀼 𑀧𑀭𑀺𑀦𑀺𑀩𑁆𑀩𑀼𑀢𑁂𑀲𑀼 𑀏𑀓𑀓𑁂𑀦𑁂𑀯 𑀔𑀸𑀡𑀼𑀓𑁂𑀦 𑀯𑀺𑀬 𑀞𑀸𑀢𑀩𑁆𑀩𑀁 𑀳𑁄𑀢𑀺 𑀤𑀳𑀭𑀲𑀸𑀫𑀡𑁂𑀭𑀧𑀭𑀺𑀯𑀸𑀭𑁂𑀦 𑀯𑀸, 𑀢𑀢𑁄 ‘𑀅𑀳𑁄 𑀩𑀼𑀤𑁆𑀥𑀸𑀦𑀁 𑀧𑀭𑀺𑀲𑀸’𑀢𑀺 𑀳𑀻𑀴𑁂𑀢𑀩𑁆𑀩𑀢𑀁 𑀆𑀧𑀚𑁆𑀚𑁂𑀬𑁆𑀬. 𑀢𑀲𑁆𑀫𑀸 𑀦 𑀞𑀺𑀢𑁄’’𑀢𑀺. 𑀏𑀯𑀁 𑀯𑀼𑀢𑁆𑀢𑁂𑀧𑀺 𑀬𑁄 𑀧𑀦 𑀯𑀼𑀘𑁆𑀘𑀢𑀺 ‘‘𑀆𑀬𑀼𑀓𑀧𑁆𑀧𑁄’’𑀢𑀺, 𑀇𑀤𑀫𑁂𑀯 𑀅𑀝𑁆𑀞𑀓𑀣𑀸𑀬 𑀦𑀺𑀬𑀸𑀫𑀺𑀢𑀁.

𑀬𑀣𑀸 𑀢𑀁 𑀫𑀸𑀭𑁂𑀦 𑀧𑀭𑀺𑀬𑀼𑀝𑁆𑀞𑀺𑀢𑀘𑀺𑀢𑁆𑀢𑁄𑀢𑀺 𑀏𑀢𑁆𑀣 𑀢𑀦𑁆𑀢𑀺 𑀦𑀺𑀧𑀸𑀢𑀫𑀢𑁆𑀢𑀁, 𑀬𑀣𑀸 𑀫𑀸𑀭𑁂𑀦 𑀧𑀭𑀺𑀬𑀼𑀝𑁆𑀞𑀺𑀢𑀘𑀺𑀢𑁆𑀢𑁄 𑀅𑀚𑁆𑀛𑁄𑀢𑁆𑀣𑀝𑀘𑀺𑀢𑁆𑀢𑁄 𑀅𑀜𑁆𑀜𑁄𑀧𑀺 𑀓𑁄𑀘𑀺 𑀧𑀼𑀣𑀼𑀚𑁆𑀚𑀦𑁄 𑀧𑀝𑀺𑀯𑀺𑀚𑁆𑀛𑀺𑀢𑀼𑀁 𑀦 𑀲𑀓𑁆𑀓𑀼𑀡𑁂𑀬𑁆𑀬, 𑀏𑀯𑀫𑁂𑀯 𑀦𑀸𑀲𑀓𑁆𑀔𑀺 𑀧𑀝𑀺𑀯𑀺𑀚𑁆𑀛𑀺𑀢𑀼𑀦𑁆𑀢𑀺 𑀅𑀢𑁆𑀣𑁄. 𑀫𑀸𑀭𑁄 𑀳𑀺 𑀬𑀲𑁆𑀲 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀤𑁆𑀯𑀸𑀤𑀲 𑀯𑀺𑀧𑀮𑁆𑀮𑀸𑀲𑀸 𑀅𑀧𑁆𑀧𑀳𑀻𑀦𑀸, 𑀢𑀲𑁆𑀲 𑀘𑀺𑀢𑁆𑀢𑀁 𑀧𑀭𑀺𑀬𑀼𑀝𑁆𑀞𑀸𑀢𑀺. 𑀣𑁂𑀭𑀲𑁆𑀲 𑀘 𑀘𑀢𑁆𑀢𑀸𑀭𑁄 𑀯𑀺𑀧𑀮𑁆𑀮𑀸𑀲𑀸 𑀅𑀧𑁆𑀧𑀳𑀻𑀦𑀸, 𑀢𑁂𑀦𑀲𑁆𑀲 𑀫𑀸𑀭𑁄 𑀘𑀺𑀢𑁆𑀢𑀁 𑀧𑀭𑀺𑀬𑀼𑀝𑁆𑀞𑀸𑀲𑀺. 𑀲𑁄 𑀧𑀦 𑀘𑀺𑀢𑁆𑀢𑀧𑀭𑀺𑀬𑀼𑀝𑁆𑀞𑀸𑀦𑀁 𑀓𑀭𑁄𑀦𑁆𑀢𑁄 𑀓𑀺𑀁 𑀓𑀭𑁄𑀢𑀻𑀢𑀺? 𑀪𑁂𑀭𑀯𑀁 𑀭𑀽𑀧𑀸𑀭𑀫𑁆𑀫𑀡𑀁 𑀯𑀸 𑀤𑀲𑁆𑀲𑁂𑀢𑀺, 𑀲𑀤𑁆𑀤𑀸𑀭𑀫𑁆𑀫𑀡𑀁 𑀯𑀸 𑀲𑀸𑀯𑁂𑀢𑀺. 𑀢𑀢𑁄 𑀲𑀢𑁆𑀢𑀸 𑀢𑀁 𑀤𑀺𑀲𑁆𑀯𑀸 𑀯𑀸 𑀲𑀼𑀢𑁆𑀯𑀸 𑀯𑀸 𑀲𑀢𑀺𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀯𑀺𑀯𑀝𑀫𑀼𑀔𑀸 𑀳𑁄𑀦𑁆𑀢𑀺, 𑀢𑁂𑀲𑀁 𑀫𑀼𑀔𑁂𑀦 𑀳𑀢𑁆𑀣𑀁 𑀧𑀯𑁂𑀲𑁂𑀢𑁆𑀯𑀸 𑀳𑀤𑀬𑀁 𑀫𑀤𑁆𑀤𑀢𑀺, 𑀢𑀢𑁄 𑀯𑀺𑀲𑀜𑁆𑀜𑀸𑀯 𑀳𑀼𑀢𑁆𑀯𑀸 𑀢𑀺𑀝𑁆𑀞𑀦𑁆𑀢𑀺. 𑀣𑁂𑀭𑀲𑁆𑀲 𑀧𑀦𑁂𑀲 𑀫𑀼𑀔𑁂 𑀳𑀢𑁆𑀣𑀁 𑀧𑀯𑁂𑀲𑁂𑀢𑀼𑀁 𑀓𑀺𑀁 𑀲𑀓𑁆𑀔𑀺𑀲𑁆𑀲𑀢𑀺, 𑀪𑁂𑀭𑀯𑀸𑀭𑀫𑁆𑀫𑀡𑀁 𑀧𑀦 𑀤𑀲𑁆𑀲𑁂𑀲𑀺. 𑀢𑀁 𑀤𑀺𑀲𑁆𑀯𑀸 𑀣𑁂𑀭𑁄 𑀦𑀺𑀫𑀺𑀢𑁆𑀢𑁄𑀪𑀸𑀲𑀁 𑀦𑀧𑁆𑀧𑀝𑀺𑀯𑀺𑀚𑁆𑀛𑀺. 𑀪𑀕𑀯𑀸 𑀚𑀸𑀦𑀦𑁆𑀢𑁄𑀬𑁂𑀯 𑀓𑀺𑀫𑀢𑁆𑀣𑀁 𑀬𑀸𑀯 𑀢𑀢𑀺𑀬𑀁 𑀆𑀫𑀦𑁆𑀢𑁂𑀲𑀻𑀢𑀺? 𑀧𑀭𑀢𑁄 ‘‘𑀢𑀺𑀝𑁆𑀞𑀢𑀼, 𑀪𑀦𑁆𑀢𑁂 𑀪𑀕𑀯𑀸’’𑀢𑀺 𑀬𑀸𑀘𑀺𑀢𑁂 ‘‘𑀢𑀼𑀬𑁆𑀳𑁂𑀯𑁂𑀢𑀁 𑀤𑀼𑀓𑁆𑀓𑀝𑀁, 𑀢𑀼𑀬𑁆𑀳𑁂𑀯𑁂𑀢𑀁 𑀅𑀧𑀭𑀤𑁆𑀥’’𑀦𑁆𑀢𑀺 𑀤𑁄𑀲𑀸𑀭𑁄𑀧𑀦𑁂𑀦 𑀲𑁄 𑀓𑀢𑀦𑀼𑀓𑀭𑀡𑀢𑁆𑀣𑀁.

𑀫𑀸𑀭𑁄 𑀧𑀸𑀧𑀺𑀫𑀸𑀢𑀺 𑀏𑀢𑁆𑀣 𑀲𑀢𑁆𑀢𑁂 𑀅𑀦𑀢𑁆𑀣𑁂 𑀦𑀺𑀬𑁄𑀚𑁂𑀦𑁆𑀢𑁄 𑀫𑀸𑀭𑁂𑀢𑀻𑀢𑀺 𑀫𑀸𑀭𑁄. 𑀧𑀸𑀧𑀺𑀫𑀸𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀲𑁄 𑀳𑀺 𑀧𑀸𑀧𑀥𑀫𑁆𑀫𑀲𑀫𑀦𑁆𑀦𑀸𑀕𑀢𑀢𑁆𑀢𑀸 ‘‘𑀧𑀸𑀧𑀺𑀫𑀸’’𑀢𑀺 𑀯𑀼𑀘𑁆𑀘𑀢𑀺. 𑀓𑀡𑁆𑀳𑁄, 𑀅𑀦𑁆𑀢𑀓𑁄, 𑀦𑀫𑀼𑀘𑀺, 𑀧𑀫𑀢𑁆𑀢𑀩𑀦𑁆𑀥𑀽𑀢𑀺𑀧𑀺 𑀢𑀲𑁆𑀲𑁂𑀯 𑀦𑀸𑀫𑀸𑀦𑀺. 𑀪𑀸𑀲𑀺𑀢𑀸 𑀔𑁄 𑀧𑀦𑁂𑀲𑀸𑀢𑀺 𑀅𑀬𑀜𑁆𑀳𑀺 𑀪𑀕𑀯𑀢𑁄 𑀲𑀫𑁆𑀩𑁄𑀥𑀺𑀧𑀢𑁆𑀢𑀺𑀬𑀸 𑀅𑀝𑁆𑀞𑀫𑁂 𑀲𑀢𑁆𑀢𑀸𑀳𑁂 𑀩𑁄𑀥𑀺𑀫𑀡𑁆𑀟𑁂𑀬𑁂𑀯 𑀆𑀕𑀦𑁆𑀢𑁆𑀯𑀸 ‘‘𑀪𑀕𑀯𑀸 𑀬𑀤𑀢𑁆𑀣𑀁 𑀢𑀼𑀫𑁆𑀳𑁂𑀳𑀺 𑀧𑀸𑀭𑀫𑀺𑀬𑁄 𑀧𑀽𑀭𑀺𑀢𑀸, 𑀲𑁄 𑀯𑁄 𑀅𑀢𑁆𑀣𑁄 𑀅𑀦𑀼𑀧𑁆𑀧𑀢𑁆𑀢𑁄, 𑀧𑀝𑀺𑀯𑀺𑀤𑁆𑀥𑀁 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁, 𑀓𑀺𑀁 𑀢𑁂 𑀮𑁄𑀓𑀯𑀺𑀘𑀸𑀭𑀡𑁂𑀦𑀸’’𑀢𑀺 𑀯𑀢𑁆𑀯𑀸 𑀬𑀣𑀸 𑀅𑀚𑁆𑀚, 𑀏𑀯𑀫𑁂𑀯 ‘‘𑀧𑀭𑀺𑀦𑀺𑀩𑁆𑀩𑀸𑀢𑀼 𑀤𑀸𑀦𑀺, 𑀪𑀦𑁆𑀢𑁂 𑀪𑀕𑀯𑀸’’𑀢𑀺 𑀬𑀸𑀘𑀺. 𑀪𑀕𑀯𑀸 𑀘𑀲𑁆𑀲 ‘‘𑀦 𑀢𑀸𑀯𑀸𑀳’’𑀦𑁆𑀢𑀺𑀆𑀤𑀻𑀦𑀺 𑀯𑀢𑁆𑀯𑀸 𑀧𑀝𑀺𑀓𑁆𑀔𑀺𑀧𑀺. 𑀢𑀁 𑀲𑀦𑁆𑀥𑀸𑀬 𑁋 ‘‘𑀪𑀸𑀲𑀺𑀢𑀸 𑀔𑁄 𑀧𑀦𑁂𑀲𑀸, 𑀪𑀦𑁆𑀢𑁂’’𑀢𑀺𑀆𑀤𑀺𑀫𑀸𑀳.

𑀢𑀢𑁆𑀣 𑀯𑀺𑀬𑀢𑁆𑀢𑀸𑀢𑀺 𑀫𑀕𑁆𑀕𑀯𑀲𑁂𑀦 𑀩𑁆𑀬𑀢𑁆𑀢𑀸, 𑀢𑀣𑁂𑀯 𑀯𑀺𑀦𑀻𑀢𑀸, 𑀢𑀣𑀸 𑀯𑀺𑀲𑀸𑀭𑀤𑀸. 𑀩𑀳𑀼𑀲𑁆𑀲𑀼𑀢𑀸𑀢𑀺 𑀢𑁂𑀧𑀺𑀝𑀓𑀯𑀲𑁂𑀦 𑀩𑀳𑀼 𑀲𑀼𑀢𑀁 𑀏𑀢𑁂𑀲𑀦𑁆𑀢𑀺 𑀩𑀳𑀼𑀲𑁆𑀲𑀼𑀢𑀸. 𑀢𑀫𑁂𑀯 𑀥𑀫𑁆𑀫𑀁 𑀥𑀸𑀭𑁂𑀦𑁆𑀢𑀻𑀢𑀺 𑀥𑀫𑁆𑀫𑀥𑀭𑀸. 𑀅𑀣 𑀯𑀸 𑀧𑀭𑀺𑀬𑀢𑁆𑀢𑀺𑀩𑀳𑀼𑀲𑁆𑀲𑀼𑀢𑀸 𑀘𑁂𑀯 𑀧𑀝𑀺𑀯𑁂𑀥𑀩𑀳𑀼𑀲𑁆𑀲𑀼𑀢𑀸 𑀘. 𑀧𑀭𑀺𑀬𑀢𑁆𑀢𑀺𑀧𑀝𑀺𑀯𑁂𑀥𑀥𑀫𑁆𑀫𑀸𑀦𑀁𑀬𑁂𑀯 𑀥𑀸𑀭𑀡𑀢𑁄 𑀥𑀫𑁆𑀫𑀥𑀭𑀸𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑁆𑀧𑀝𑀺𑀧𑀦𑁆𑀦𑀸𑀢𑀺 𑀅𑀭𑀺𑀬𑀥𑀫𑁆𑀫𑀲𑁆𑀲 𑀅𑀦𑀼𑀥𑀫𑁆𑀫𑀪𑀽𑀢𑀁 𑀯𑀺𑀧𑀲𑁆𑀲𑀦𑀸𑀥𑀫𑁆𑀫𑀁 𑀧𑀝𑀺𑀧𑀦𑁆𑀦𑀸. 𑀲𑀸𑀫𑀻𑀘𑀺𑀧𑁆𑀧𑀝𑀺𑀧𑀦𑁆𑀦𑀸𑀢𑀺 𑀅𑀦𑀼𑀘𑁆𑀙𑀯𑀺𑀓𑀧𑀝𑀺𑀧𑀤𑀁 𑀧𑀝𑀺𑀧𑀦𑁆𑀦𑀸. 𑀅𑀦𑀼𑀥𑀫𑁆𑀫𑀘𑀸𑀭𑀺𑀦𑁄𑀢𑀺 𑀅𑀦𑀼𑀥𑀫𑁆𑀫𑀁 𑀘𑀭𑀡𑀲𑀻𑀮𑀸. 𑀲𑀓𑀁 𑀆𑀘𑀭𑀺𑀬𑀓𑀦𑁆𑀢𑀺 𑀅𑀢𑁆𑀢𑀦𑁄 𑀆𑀘𑀭𑀺𑀬𑀯𑀸𑀤𑀁. 𑀆𑀘𑀺𑀓𑁆𑀔𑀺𑀲𑁆𑀲𑀦𑁆𑀢𑀻𑀢𑀺𑀆𑀤𑀻𑀦𑀺 𑀲𑀩𑁆𑀩𑀸𑀦𑀺 𑀅𑀜𑁆𑀜𑀫𑀜𑁆𑀜𑀯𑁂𑀯𑀘𑀦𑀸𑀦𑀺. 𑀲𑀳𑀥𑀫𑁆𑀫𑁂𑀦𑀸𑀢𑀺 𑀲𑀳𑁂𑀢𑀼𑀓𑁂𑀦 𑀲𑀓𑀸𑀭𑀡𑁂𑀦 𑀯𑀘𑀦𑁂𑀦. 𑀲𑀧𑁆𑀧𑀸𑀝𑀺𑀳𑀸𑀭𑀺𑀬𑀦𑁆𑀢𑀺 𑀬𑀸𑀯 𑀦𑀺𑀬𑁆𑀬𑀸𑀦𑀺𑀓𑀁 𑀓𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀲𑁆𑀲𑀦𑁆𑀢𑀺.

𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀺 𑀲𑀺𑀓𑁆𑀔𑀸𑀢𑁆𑀢𑀬𑀲𑀗𑁆𑀕𑀳𑀺𑀢𑀁 𑀲𑀓𑀮𑀁 𑀲𑀸𑀲𑀦𑀩𑁆𑀭𑀳𑁆𑀫𑀘𑀭𑀺𑀬𑀁. 𑀇𑀤𑁆𑀥𑀦𑁆𑀢𑀺 𑀲𑀫𑀺𑀤𑁆𑀥𑀁 𑀛𑀸𑀦𑀲𑁆𑀲𑀸𑀤𑀯𑀲𑁂𑀦. 𑀨𑀻𑀢𑀦𑁆𑀢𑀺 𑀯𑀼𑀤𑁆𑀥𑀺𑀧𑀢𑁆𑀢𑀁 𑀲𑀩𑁆𑀩𑀧𑀸𑀮𑀺𑀨𑀼𑀮𑁆𑀮𑀁 𑀯𑀺𑀬 𑀅𑀪𑀺𑀜𑁆𑀜𑀸𑀲𑀫𑁆𑀧𑀢𑁆𑀢𑀺𑀯𑀲𑁂𑀦. 𑀯𑀺𑀢𑁆𑀣𑀸𑀭𑀺𑀓𑀦𑁆𑀢𑀺 𑀯𑀺𑀢𑁆𑀣𑀢𑀁 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀤𑀺𑀲𑀸𑀪𑀸𑀕𑁂 𑀧𑀢𑀺𑀝𑁆𑀞𑀺𑀢𑀯𑀲𑁂𑀦. 𑀩𑀸𑀳𑀼𑀚𑀜𑁆𑀜𑀦𑁆𑀢𑀺 𑀩𑀳𑀽𑀳𑀺 𑀜𑀸𑀢𑀁 𑀧𑀝𑀺𑀯𑀺𑀤𑁆𑀥𑀁 𑀫𑀳𑀸𑀚𑀦𑀸𑀪𑀺𑀲𑀫𑀬𑀯𑀲𑁂𑀦. 𑀧𑀼𑀣𑀼𑀪𑀽𑀢𑀦𑁆𑀢𑀺 𑀲𑀩𑁆𑀩𑀸𑀓𑀸𑀭𑁂𑀦 𑀧𑀼𑀣𑀼𑀮𑀪𑀸𑀯𑀧𑁆𑀧𑀢𑁆𑀢𑀁. 𑀓𑀣𑀁? 𑀬𑀸𑀯 𑀤𑁂𑀯𑀫𑀦𑀼𑀲𑁆𑀲𑁂𑀳𑀺 𑀲𑀼𑀧𑁆𑀧𑀓𑀸𑀲𑀺𑀢𑀦𑁆𑀢𑀺, 𑀬𑀢𑁆𑀢𑀓𑀸 𑀯𑀺𑀜𑁆𑀜𑀼𑀚𑀸𑀢𑀺𑀓𑀸 𑀤𑁂𑀯𑀸 𑀘𑁂𑀯 𑀫𑀦𑀼𑀲𑁆𑀲𑀸 𑀘 𑀅𑀢𑁆𑀣𑀺, 𑀲𑀩𑁆𑀩𑁂𑀳𑀺 𑀲𑀼𑀝𑁆𑀞𑀼 𑀧𑀓𑀸𑀲𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑁄𑀢𑀺 𑀦𑀺𑀭𑀸𑀮𑀬𑁄. 𑀢𑁆𑀯𑀜𑁆𑀳𑀺 𑀧𑀸𑀧𑀺𑀫 𑀅𑀝𑁆𑀞𑀫𑀲𑀢𑁆𑀢𑀸𑀳𑀢𑁄 𑀧𑀝𑁆𑀞𑀸𑀬 ‘‘𑀧𑀭𑀺𑀦𑀺𑀩𑁆𑀩𑀸𑀢𑀼 𑀤𑀸𑀦𑀺, 𑀪𑀦𑁆𑀢𑁂 𑀪𑀕𑀯𑀸, 𑀧𑀭𑀺𑀦𑀺𑀩𑁆𑀩𑀸𑀢𑀼 𑀲𑀼𑀕𑀢𑁄’’𑀢𑀺 𑀯𑀺𑀭𑀯𑀦𑁆𑀢𑁄 𑀆𑀳𑀺𑀡𑁆𑀟𑀺𑀢𑁆𑀣. 𑀅𑀚𑁆𑀚 𑀤𑀸𑀦𑀺 𑀧𑀝𑁆𑀞𑀸𑀬 𑀯𑀺𑀕𑀢𑀼𑀲𑁆𑀲𑀸𑀳𑁄 𑀳𑁄𑀳𑀺, 𑀫𑀸 𑀫𑀬𑁆𑀳𑀁 𑀧𑀭𑀺𑀦𑀺𑀩𑁆𑀩𑀸𑀦𑀢𑁆𑀣𑀁 𑀯𑀸𑀬𑀸𑀫𑀁 𑀓𑀭𑁄𑀳𑀻𑀢𑀺 𑀯𑀤𑀢𑀺.

𑀲𑀢𑁄 𑀲𑀫𑁆𑀧𑀚𑀸𑀦𑁄 𑀆𑀬𑀼𑀲𑀗𑁆𑀔𑀸𑀭𑀁 𑀑𑀲𑁆𑀲𑀚𑁆𑀚𑀻𑀢𑀺 𑀲𑀢𑀺𑀁 𑀲𑀽𑀧𑀝𑁆𑀞𑀺𑀢𑀁 𑀓𑀢𑁆𑀯𑀸 𑀜𑀸𑀡𑁂𑀦 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀆𑀬𑀼𑀲𑀗𑁆𑀔𑀸𑀭𑀁 𑀯𑀺𑀲𑁆𑀲𑀚𑁆𑀚𑀺 𑀧𑀚𑀳𑀺. 𑀢𑀢𑁆𑀣 𑀦 𑀪𑀕𑀯𑀸 𑀳𑀢𑁆𑀣𑁂𑀦 𑀮𑁂𑀟𑁆𑀟𑀼𑀁 𑀯𑀺𑀬 𑀆𑀬𑀼𑀲𑀗𑁆𑀔𑀸𑀭𑀁 𑀑𑀲𑁆𑀲𑀚𑀺, 𑀢𑁂𑀫𑀸𑀲𑀫𑀢𑁆𑀢𑀫𑁂𑀯 𑀧𑀦 𑀨𑀮𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀢𑀢𑁄 𑀧𑀭𑀁 𑀦 𑀲𑀫𑀸𑀧𑀚𑁆𑀚𑀺𑀲𑁆𑀲𑀸𑀫𑀻𑀢𑀺 𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑁂𑀲𑀺. 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀑𑀲𑁆𑀲𑀚𑀻’’𑀢𑀺. 𑀉𑀲𑁆𑀲𑀚𑀻𑀢𑀺𑀧𑀺 𑀧𑀸𑀞𑁄. 𑀫𑀳𑀸𑀪𑀽𑀫𑀺𑀘𑀸𑀮𑁄𑀢𑀺 𑀫𑀳𑀦𑁆𑀢𑁄 𑀧𑀣𑀯𑀻𑀓𑀫𑁆𑀧𑁄. 𑀢𑀤𑀸 𑀓𑀺𑀭 𑀤𑀲𑀲𑀳𑀲𑁆𑀲𑀻 𑀮𑁄𑀓𑀥𑀸𑀢𑀼 𑀓𑀫𑁆𑀧𑀺𑀢𑁆𑀣. 𑀪𑀺𑀁𑀲𑀦𑀓𑁄𑀢𑀺 𑀪𑀬𑀚𑀦𑀓𑁄. 𑀤𑁂𑀯𑀤𑀼𑀦𑁆𑀤𑀼𑀪𑀺𑀬𑁄 𑀘 𑀨𑀮𑀺𑀁𑀲𑀽𑀢𑀺 𑀤𑁂𑀯𑀪𑁂𑀭𑀺𑀬𑁄 𑀨𑀮𑀺𑀁𑀲𑀼, 𑀤𑁂𑀯𑁄 𑀲𑀼𑀓𑁆𑀔𑀕𑀚𑁆𑀚𑀺𑀢𑀁 𑀕𑀚𑁆𑀚𑀺, 𑀅𑀓𑀸𑀮𑀯𑀺𑀚𑁆𑀚𑀼𑀮𑀢𑀸 𑀦𑀺𑀘𑁆𑀙𑀭𑀺𑀁𑀲𑀼, 𑀔𑀡𑀺𑀓𑀯𑀲𑁆𑀲𑀁 𑀯𑀲𑁆𑀲𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀉𑀤𑀸𑀦𑀁 𑀉𑀤𑀸𑀦𑁂𑀲𑀻𑀢𑀺 𑀓𑀲𑁆𑀫𑀸 𑀉𑀤𑀸𑀦𑁂𑀲𑀺? 𑀓𑁄𑀘𑀺 𑀦𑀸𑀫 𑀯𑀤𑁂𑀬𑁆𑀬 ‘‘𑀪𑀕𑀯𑀸 𑀧𑀘𑁆𑀙𑀢𑁄 𑀧𑀘𑁆𑀙𑀢𑁄 𑀅𑀦𑀼𑀩𑀦𑁆𑀥𑀺𑀢𑁆𑀯𑀸 ‘𑀧𑀭𑀺𑀦𑀺𑀩𑁆𑀩𑀸𑀢𑀼, 𑀪𑀦𑁆𑀢𑁂’𑀢𑀺 𑀉𑀧𑀤𑁆𑀤𑀼𑀢𑁄 𑀪𑀬𑁂𑀦 𑀆𑀬𑀼𑀲𑀗𑁆𑀔𑀸𑀭𑀁 𑀯𑀺𑀲𑁆𑀲𑀚𑁆𑀚𑁂𑀲𑀻’’𑀢𑀺, 𑀢𑀲𑁆𑀲𑁄𑀓𑀸𑀲𑁄 𑀫𑀸 𑀳𑁄𑀢𑀼, 𑀪𑀻𑀢𑀲𑁆𑀲 𑀳𑀺 𑀉𑀤𑀸𑀦𑀁 𑀦𑀸𑀫 𑀦𑀢𑁆𑀣𑀻𑀢𑀺 𑀧𑀻𑀢𑀺𑀯𑁂𑀕𑀯𑀺𑀲𑁆𑀲𑀝𑁆𑀞𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺.

𑀢𑀢𑁆𑀣 𑀲𑀩𑁆𑀩𑁂𑀲𑀁 𑀲𑁄𑀡𑀲𑀺𑀗𑁆𑀕𑀸𑀮𑀸𑀤𑀻𑀦𑀫𑁆𑀧𑀺 𑀧𑀘𑁆𑀘𑀓𑁆𑀔𑀪𑀸𑀯𑀢𑁄 𑀢𑀼𑀮𑀺𑀢𑀁 𑀧𑀭𑀺𑀘𑁆𑀙𑀺𑀦𑁆𑀦𑀦𑁆𑀢𑀺 𑀢𑀼𑀮𑀁. 𑀓𑀺𑀁 𑀢𑀁? 𑀓𑀸𑀫𑀸𑀯𑀘𑀭𑀓𑀫𑁆𑀫𑀁. 𑀦 𑀢𑀼𑀮𑀁, 𑀦 𑀯𑀸 𑀢𑀼𑀮𑀁 𑀲𑀤𑀺𑀲𑀫𑀲𑁆𑀲 𑀅𑀜𑁆𑀜𑀁 𑀮𑁄𑀓𑀺𑀬𑀁 𑀓𑀫𑁆𑀫𑀁 𑀅𑀢𑁆𑀣𑀻𑀢𑀺 𑀅𑀢𑀼𑀮𑀁. 𑀓𑀺𑀁 𑀢𑀁? 𑀫𑀳𑀕𑁆𑀕𑀢𑀓𑀫𑁆𑀫𑀁. 𑀅𑀣 𑀯𑀸 𑀓𑀸𑀫𑀸𑀯𑀘𑀭𑀁 𑀭𑀽𑀧𑀸𑀯𑀘𑀭𑀁 𑀢𑀼𑀮𑀁, 𑀅𑀭𑀽𑀧𑀸𑀯𑀘𑀭𑀁 𑀅𑀢𑀼𑀮𑀁. 𑀅𑀧𑁆𑀧𑀯𑀺𑀧𑀸𑀓𑀁 𑀯𑀸 𑀢𑀼𑀮𑀁, 𑀩𑀳𑀼𑀯𑀺𑀧𑀸𑀓𑀁 𑀅𑀢𑀼𑀮𑀁. 𑀲𑀫𑁆𑀪𑀯𑀦𑁆𑀢𑀺 𑀲𑀫𑁆𑀪𑀯𑀳𑁂𑀢𑀼𑀪𑀽𑀢𑀁, 𑀭𑀸𑀲𑀺𑀓𑀸𑀭𑀓𑀁 𑀧𑀺𑀡𑁆𑀟𑀓𑀸𑀭𑀓𑀦𑁆𑀢𑀺 𑀅𑀢𑁆𑀣𑁄. 𑀪𑀯𑀲𑀗𑁆𑀔𑀸𑀭𑀦𑁆𑀢𑀺 𑀧𑀼𑀦𑀩𑁆𑀪𑀯𑀲𑀗𑁆𑀔𑀸𑀭𑀡𑀓𑀁. 𑀅𑀯𑀲𑁆𑀲𑀚𑀻𑀢𑀺 𑀯𑀺𑀲𑁆𑀲𑀚𑁆𑀚𑁂𑀲𑀺. 𑀫𑀼𑀦𑀻𑀢𑀺 𑀩𑀼𑀤𑁆𑀥𑀫𑀼𑀦𑀺. 𑀅𑀚𑁆𑀛𑀢𑁆𑀢𑀭𑀢𑁄𑀢𑀺 𑀦𑀺𑀬𑀓𑀚𑁆𑀛𑀢𑁆𑀢𑀭𑀢𑁄. 𑀲𑀫𑀸𑀳𑀺𑀢𑁄𑀢𑀺 𑀉𑀧𑀘𑀸𑀭𑀧𑁆𑀧𑀦𑀸𑀲𑀫𑀸𑀥𑀺𑀯𑀲𑁂𑀦 𑀲𑀫𑀸𑀳𑀺𑀢𑁄. 𑀅𑀪𑀺𑀦𑁆𑀤𑀺 𑀓𑀯𑀘𑀫𑀺𑀯𑀸𑀢𑀺 𑀓𑀯𑀘𑀁 𑀯𑀺𑀬 𑀅𑀪𑀺𑀦𑁆𑀤𑀺. 𑀅𑀢𑁆𑀢𑀲𑀫𑁆𑀪𑀯𑀦𑁆𑀢𑀺 𑀅𑀢𑁆𑀢𑀦𑀺 𑀲𑀜𑁆𑀚𑀸𑀢𑀁 𑀓𑀺𑀮𑁂𑀲𑀁. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀲𑀯𑀺𑀧𑀸𑀓𑀝𑁆𑀞𑁂𑀦 𑀲𑀫𑁆𑀪𑀯𑀁, 𑀪𑀯𑀸𑀪𑀺𑀲𑀗𑁆𑀔𑀭𑀡𑀝𑁆𑀞𑁂𑀦 𑀪𑀯𑀲𑀗𑁆𑀔𑀸𑀭𑀦𑁆𑀢𑀺 𑀘 𑀮𑀤𑁆𑀥𑀦𑀸𑀫𑀁 𑀢𑀼𑀮𑀸𑀢𑀼𑀮𑀲𑀗𑁆𑀔𑀸𑀢𑀁 𑀮𑁄𑀓𑀺𑀬𑀓𑀫𑁆𑀫𑀜𑁆𑀘 𑀑𑀲𑁆𑀲𑀚𑀺, 𑀲𑀗𑁆𑀕𑀸𑀫𑀲𑀻𑀲𑁂 𑀫𑀳𑀸𑀬𑁄𑀥𑁄 𑀓𑀯𑀘𑀁 𑀯𑀺𑀬 𑀅𑀢𑁆𑀢𑀲𑀫𑁆𑀪𑀯𑀁 𑀓𑀺𑀮𑁂𑀲𑀜𑁆𑀘 𑀅𑀚𑁆𑀛𑀢𑁆𑀢𑀭𑀢𑁄 𑀳𑀼𑀢𑁆𑀯𑀸 𑀲𑀫𑀸𑀳𑀺𑀢𑁄 𑀳𑀼𑀢𑁆𑀯𑀸 𑀅𑀪𑀺𑀦𑁆𑀤𑀻𑀢𑀺.

𑀅𑀣 𑀯𑀸 𑀢𑀼𑀮𑀦𑁆𑀢𑀺 𑀢𑀼𑀮𑁂𑀦𑁆𑀢𑁄 𑀢𑀻𑀭𑁂𑀦𑁆𑀢𑁄. 𑀅𑀢𑀼𑀮𑀜𑁆𑀘 𑀲𑀫𑁆𑀪𑀯𑀦𑁆𑀢𑀺 𑀦𑀺𑀩𑁆𑀩𑀸𑀦𑀜𑁆𑀘𑁂𑀯 𑀲𑀫𑁆𑀪𑀯𑀜𑁆𑀘. 𑀪𑀯𑀲𑀗𑁆𑀔𑀸𑀭𑀦𑁆𑀢𑀺 𑀪𑀯𑀕𑀸𑀫𑀺𑀓𑀫𑁆𑀫𑀁. 𑀅𑀯𑀲𑁆𑀲𑀚𑀺 𑀫𑀼𑀦𑀻𑀢𑀺 ‘‘𑀧𑀜𑁆𑀘𑀓𑁆𑀔𑀦𑁆𑀥𑀸 𑀅𑀦𑀺𑀘𑁆𑀘𑀸, 𑀧𑀜𑁆𑀘𑀦𑁆𑀦𑀁 𑀔𑀦𑁆𑀥𑀸𑀦𑀁 𑀦𑀺𑀭𑁄𑀥𑁄 𑀦𑀺𑀩𑁆𑀩𑀸𑀦𑀁 𑀦𑀺𑀘𑁆𑀘’’𑀦𑁆𑀢𑀺𑀆𑀤𑀺𑀦𑀸 (𑀧𑀝𑀺. 𑀫. 𑁩.𑁩𑁭-𑁩𑁮) 𑀦𑀬𑁂𑀦 𑀢𑀼𑀮𑀬𑀦𑁆𑀢𑁄 𑀩𑀼𑀤𑁆𑀥𑀫𑀼𑀦𑀺 𑀪𑀯𑁂 𑀆𑀤𑀻𑀦𑀯𑀁, 𑀦𑀺𑀩𑁆𑀩𑀸𑀦𑁂 𑀘 𑀆𑀦𑀺𑀲𑀁𑀲𑀁 𑀤𑀺𑀲𑁆𑀯𑀸 𑀢𑀁 𑀔𑀦𑁆𑀥𑀸𑀦𑀁 𑀫𑀽𑀮𑀪𑀽𑀢𑀁 𑀪𑀯𑀲𑀗𑁆𑀔𑀸𑀭𑀁 𑀓𑀫𑁆𑀫𑀁 ‘‘𑀓𑀫𑁆𑀫𑀓𑁆𑀔𑀬𑀸𑀬 𑀲𑀁𑀯𑀢𑁆𑀢𑀢𑀻’’𑀢𑀺 (𑀫. 𑀦𑀺. 𑁨.𑁮𑁧; 𑀅. 𑀦𑀺. 𑁪.𑁨𑁩𑁨-𑁨𑁩𑁩) 𑀏𑀯𑀁 𑀯𑀼𑀢𑁆𑀢𑁂𑀦 𑀓𑀫𑁆𑀫𑀓𑁆𑀔𑀬𑀓𑀭𑁂𑀦 𑀅𑀭𑀺𑀬𑀫𑀕𑁆𑀕𑁂𑀦 𑀅𑀯𑀲𑁆𑀲𑀚𑀺. 𑀓𑀣𑀁? 𑀅𑀚𑁆𑀛𑀢𑁆𑀢𑀭𑀢𑁄 𑀲𑀫𑀸𑀳𑀺𑀢𑁄, 𑀅𑀪𑀺𑀦𑁆𑀤𑀺 𑀓𑀯𑀘𑀫𑀺𑀯𑀢𑁆𑀢𑀲𑀫𑁆𑀪𑀯𑀁. 𑀲𑁄 𑀳𑀺 𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀅𑀚𑁆𑀛𑀢𑁆𑀢𑀭𑀢𑁄, 𑀲𑀫𑀣𑀯𑀲𑁂𑀦 𑀲𑀫𑀸𑀳𑀺𑀢𑁄𑀢𑀺 𑀏𑀯𑀁 𑀧𑀼𑀩𑁆𑀩𑀪𑀸𑀕𑀢𑁄 𑀧𑀝𑁆𑀞𑀸𑀬 𑀲𑀫𑀣𑀯𑀺𑀧𑀲𑁆𑀲𑀦𑀸𑀩𑀮𑁂𑀦 𑀓𑀯𑀘𑀫𑀺𑀯 𑀅𑀢𑁆𑀢𑀪𑀸𑀯𑀁 𑀧𑀭𑀺𑀬𑁄𑀦𑀦𑁆𑀥𑀺𑀢𑁆𑀯𑀸 𑀞𑀺𑀢𑀁, 𑀅𑀢𑁆𑀢𑀦𑀺 𑀲𑀫𑁆𑀪𑀯𑀢𑁆𑀢𑀸 ‘‘𑀅𑀢𑁆𑀢𑀲𑀫𑁆𑀪𑀯’’𑀦𑁆𑀢𑀺 𑀮𑀤𑁆𑀥𑀦𑀸𑀫𑀁 𑀲𑀩𑁆𑀩𑀓𑀺𑀮𑁂𑀲𑀚𑀸𑀮𑀁 𑀅𑀪𑀺𑀦𑁆𑀤𑀺. 𑀓𑀺𑀮𑁂𑀲𑀸𑀪𑀸𑀯𑁂𑀦 𑀘 𑀓𑀢𑀁 𑀓𑀫𑁆𑀫𑀁 𑀅𑀧𑁆𑀧𑀝𑀺𑀲𑀦𑁆𑀥𑀺𑀓𑀢𑁆𑀢𑀸 𑀅𑀯𑀲𑁆𑀲𑀝𑁆𑀞𑀁 𑀦𑀸𑀫 𑀳𑁄𑀢𑀻𑀢𑀺 𑀏𑀯𑀁 𑀓𑀺𑀮𑁂𑀲𑀧𑁆𑀧𑀳𑀸𑀦𑁂𑀦 𑀓𑀫𑁆𑀫𑀁 𑀧𑀚𑀳𑀺. 𑀧𑀳𑀻𑀦𑀓𑀺𑀮𑁂𑀲𑀲𑁆𑀲 𑀘 𑀪𑀬𑀁 𑀦𑀸𑀫 𑀦𑀢𑁆𑀣𑀺, 𑀢𑀲𑁆𑀫𑀸 𑀅𑀪𑀻𑀢𑁄𑀯 𑀆𑀬𑀼𑀲𑀗𑁆𑀔𑀸𑀭𑀁 𑀑𑀲𑁆𑀲𑀚𑁆𑀚𑀺, 𑀅𑀪𑀻𑀢𑀪𑀸𑀯𑀜𑀸𑀧𑀦𑀢𑁆𑀣𑀜𑁆𑀘 𑀉𑀤𑀸𑀦𑀁 𑀉𑀤𑀸𑀦𑁂𑀲𑀻𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀬𑀁 𑀫𑀳𑀸𑀯𑀸𑀢𑀸𑀢𑀺 𑀬𑁂𑀦 𑀲𑀫𑀬𑁂𑀦 𑀬𑀲𑁆𑀫𑀺𑀁 𑀯𑀸 𑀲𑀫𑀬𑁂 𑀫𑀳𑀸𑀯𑀸𑀢𑀸. 𑀯𑀸𑀬𑀦𑁆𑀢𑀻𑀢𑀺 𑀉𑀧𑀓𑁆𑀔𑁂𑀧𑀓𑀯𑀸𑀢𑀸 𑀦𑀸𑀫 𑀉𑀝𑁆𑀞𑀳𑀦𑁆𑀢𑀺, 𑀢𑁂 𑀯𑀸𑀬𑀦𑁆𑀢𑀸 𑀲𑀝𑁆𑀞𑀺𑀲𑀳𑀲𑁆𑀲𑀸𑀥𑀺𑀓𑀦𑀯𑀬𑁄𑀚𑀦𑀲𑀢𑀲𑀳𑀲𑁆𑀲𑀩𑀳𑀮𑀁 𑀉𑀤𑀓𑀲𑀦𑁆𑀥𑀸𑀭𑀓𑀯𑀸𑀢𑀁 𑀉𑀧𑀘𑁆𑀙𑀺𑀦𑁆𑀤𑀦𑁆𑀢𑀺, 𑀢𑀢𑁄 𑀆𑀓𑀸𑀲𑁂 𑀉𑀤𑀓𑀁 𑀪𑀲𑁆𑀲𑀢𑀺, 𑀢𑀲𑁆𑀫𑀺𑀁 𑀪𑀲𑁆𑀲𑀦𑁆𑀢𑁂 𑀧𑀣𑀯𑀻 𑀪𑀲𑁆𑀲𑀢𑀺, 𑀧𑀼𑀦 𑀯𑀸𑀢𑁄 𑀅𑀢𑁆𑀢𑀦𑁄 𑀩𑀮𑁂𑀦 𑀅𑀦𑁆𑀢𑁄𑀥𑀫𑁆𑀫𑀓𑀭𑀡𑁂 𑀯𑀺𑀬 𑀉𑀤𑀓𑀁 𑀆𑀩𑀦𑁆𑀥𑀺𑀢𑁆𑀯𑀸 𑀕𑀡𑁆𑀳𑀸𑀢𑀺, 𑀢𑀢𑁄 𑀉𑀤𑀓𑀁 𑀉𑀕𑁆𑀕𑀘𑁆𑀙𑀢𑀺, 𑀢𑀲𑁆𑀫𑀺𑀁 𑀉𑀕𑁆𑀕𑀘𑁆𑀙𑀦𑁆𑀢𑁂 𑀧𑀣𑀯𑀻 𑀉𑀕𑁆𑀕𑀘𑁆𑀙𑀢𑀺. 𑀏𑀯𑀁 𑀉𑀤𑀓𑀁 𑀓𑀫𑁆𑀧𑀺𑀢𑀁 𑀧𑀣𑀯𑀺𑀁 𑀓𑀫𑁆𑀧𑁂𑀢𑀺. 𑀏𑀢𑀜𑁆𑀘 𑀓𑀫𑁆𑀧𑀦𑀁 𑀬𑀸𑀯𑀚𑁆𑀚𑀓𑀸𑀮𑀸𑀧𑀺 𑀳𑁄𑀢𑀺𑀬𑁂𑀯, 𑀩𑀳𑀼𑀪𑀸𑀯𑁂𑀦 𑀧𑀦 𑀑𑀕𑀘𑁆𑀙𑀦𑀼𑀕𑁆𑀕𑀘𑁆𑀙𑀦𑀁 𑀦 𑀧𑀜𑁆𑀜𑀸𑀬𑀢𑀺.

𑀫𑀳𑀺𑀤𑁆𑀥𑀺𑀓𑀸 𑀫𑀳𑀸𑀦𑀼𑀪𑀸𑀯𑀸𑀢𑀺 𑀇𑀚𑁆𑀛𑀦𑀲𑁆𑀲 𑀫𑀳𑀦𑁆𑀢𑀢𑀸𑀬 𑀫𑀳𑀺𑀤𑁆𑀥𑀺𑀓𑀸, 𑀅𑀦𑀼𑀪𑀯𑀺𑀢𑀩𑁆𑀩𑀲𑁆𑀲 𑀫𑀳𑀦𑁆𑀢𑀢𑀸𑀬 𑀫𑀳𑀸𑀦𑀼𑀪𑀸𑀯𑀸. 𑀧𑀭𑀺𑀢𑁆𑀢𑀸𑀢𑀺 𑀤𑀼𑀩𑁆𑀩𑀮𑀸. 𑀅𑀧𑁆𑀧𑀫𑀸𑀡𑀸𑀢𑀺 𑀩𑀮𑀯𑀸. 𑀲𑁄 𑀇𑀫𑀁 𑀧𑀣𑀯𑀺𑀁 𑀓𑀫𑁆𑀧𑁂𑀢𑀻𑀢𑀺 𑀲𑁄 𑀇𑀤𑁆𑀥𑀺𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀲𑀁𑀯𑁂𑀚𑁂𑀦𑁆𑀢𑁄 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀯𑀺𑀬, 𑀯𑀻𑀫𑀁𑀲𑀦𑁆𑀢𑁄 𑀯𑀸 𑀫𑀳𑀸𑀦𑀸𑀕𑀢𑁆𑀣𑁂𑀭𑀲𑁆𑀲 𑀪𑀸𑀕𑀺𑀦𑁂𑀬𑁆𑀬𑁄 𑀲𑀗𑁆𑀖𑀭𑀓𑁆𑀔𑀺𑀢𑀲𑀸𑀫𑀡𑁂𑀭𑁄 𑀯𑀺𑀬 𑀧𑀣𑀯𑀺𑀁 𑀓𑀫𑁆𑀧𑁂𑀢𑀺. 𑀲𑀗𑁆𑀓𑀫𑁆𑀧𑁂𑀢𑀻𑀢𑀺 𑀲𑀫𑀦𑁆𑀢𑀢𑁄 𑀓𑀫𑁆𑀧𑁂𑀢𑀺. 𑀲𑀫𑁆𑀧𑀓𑀫𑁆𑀧𑁂𑀢𑀻𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀇𑀢𑀺 𑀇𑀫𑁂𑀲𑀼 𑀅𑀝𑁆𑀞𑀲𑀼 𑀧𑀣𑀯𑀺𑀓𑀫𑁆𑀧𑁂𑀲𑀼 𑀧𑀞𑀫𑁄 𑀥𑀸𑀢𑀼𑀓𑁄𑀧𑁂𑀦, 𑀤𑀼𑀢𑀺𑀬𑁄 𑀇𑀤𑁆𑀥𑀸𑀦𑀼𑀪𑀸𑀯𑁂𑀦, 𑀢𑀢𑀺𑀬𑀘𑀢𑀼𑀢𑁆𑀣𑀸 𑀧𑀼𑀜𑁆𑀜𑀢𑁂𑀚𑁂𑀦, 𑀧𑀜𑁆𑀘𑀫𑁄 𑀜𑀸𑀡𑀢𑁂𑀚𑁂𑀦, 𑀙𑀝𑁆𑀞𑁄 𑀲𑀸𑀥𑀼𑀓𑀸𑀭𑀤𑀸𑀦𑀯𑀲𑁂𑀦, 𑀲𑀢𑁆𑀢𑀫𑁄 𑀓𑀸𑀭𑀼𑀜𑁆𑀜𑀲𑀪𑀸𑀯𑁂𑀦, 𑀅𑀝𑁆𑀞𑀫𑁄 𑀆𑀭𑁄𑀤𑀦𑁂𑀦. 𑀫𑀸𑀢𑀼𑀓𑀼𑀘𑁆𑀙𑀺𑀁 𑀑𑀓𑁆𑀓𑀫𑀦𑁆𑀢𑁂 𑀘 𑀢𑀢𑁄 𑀦𑀺𑀓𑁆𑀔𑀫𑀦𑁆𑀢𑁂 𑀘 𑀫𑀳𑀸𑀲𑀢𑁆𑀢𑁂 𑀢𑀲𑁆𑀲 𑀧𑀼𑀜𑁆𑀜𑀢𑁂𑀚𑁂𑀦 𑀧𑀣𑀯𑀻 𑀅𑀓𑀫𑁆𑀧𑀺𑀢𑁆𑀣, 𑀅𑀪𑀺𑀲𑀫𑁆𑀩𑁄𑀥𑀺𑀬𑀁 𑀜𑀸𑀡𑀢𑁂𑀚𑀸𑀪𑀺𑀳𑀢𑀸 𑀳𑀼𑀢𑁆𑀯𑀸 𑀅𑀓𑀫𑁆𑀧𑀺𑀢𑁆𑀣, 𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑁂 𑀲𑀸𑀥𑀼𑀓𑀸𑀭𑀪𑀸𑀯𑀲𑀡𑁆𑀞𑀺𑀢𑀸 𑀲𑀸𑀥𑀼𑀓𑀸𑀭𑀁 𑀤𑀤𑀫𑀸𑀦𑀸 𑀅𑀓𑀫𑁆𑀧𑀺𑀢𑁆𑀣, 𑀆𑀬𑀼𑀲𑀗𑁆𑀔𑀸𑀭𑀑𑀲𑁆𑀲𑀚𑁆𑀚𑀦𑁂 𑀓𑀸𑀭𑀼𑀜𑁆𑀜𑀲𑀪𑀸𑀯𑀲𑀡𑁆𑀞𑀺𑀢𑀸 𑀘𑀺𑀢𑁆𑀢𑀲𑀗𑁆𑀔𑁄𑀪𑀁 𑀅𑀲𑀳𑀫𑀸𑀦𑀸 𑀅𑀓𑀫𑁆𑀧𑀺𑀢𑁆𑀣, 𑀧𑀭𑀺𑀦𑀺𑀩𑁆𑀩𑀸𑀦𑁂 𑀆𑀭𑁄𑀤𑀦𑀯𑁂𑀕𑀢𑀼𑀦𑁆𑀦𑀸 𑀳𑀼𑀢𑁆𑀯𑀸 𑀅𑀓𑀫𑁆𑀧𑀺𑀢𑁆𑀣. 𑀅𑀬𑀁 𑀧𑀦𑀢𑁆𑀣𑁄 𑀧𑀣𑀯𑀺𑀤𑁂𑀯𑀢𑀸𑀬 𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀫𑀳𑀸𑀪𑀽𑀢𑀧𑀣𑀯𑀺𑀬𑀸 𑀧𑀦𑁂𑀢𑀁 𑀦𑀢𑁆𑀣𑀺 𑀅𑀘𑁂𑀢𑀦𑀢𑁆𑀢𑀸. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀪𑀽𑀫𑀺𑀘𑀸𑀮𑀯𑀕𑁆𑀕𑁄 𑀲𑀢𑁆𑀢𑀫𑁄.

(𑁮) 𑁩. 𑀬𑀫𑀓𑀯𑀕𑁆𑀕𑁄

𑁧-𑁨. 𑀲𑀤𑁆𑀥𑀸𑀲𑀼𑀢𑁆𑀢𑀤𑁆𑀯𑀬𑀯𑀡𑁆𑀡𑀦𑀸

𑁭𑁧-𑁭𑁨. 𑀅𑀝𑁆𑀞𑀫𑀲𑁆𑀲 𑀧𑀞𑀫𑁂 𑀦𑁄 𑀘 𑀲𑀻𑀮𑀯𑀸𑀢𑀺 𑀦 𑀲𑀻𑀮𑁂𑀲𑀼 𑀧𑀭𑀺𑀧𑀽𑀭𑀓𑀸𑀭𑀻. 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑁄𑀢𑀺 𑀲𑀫𑀦𑁆𑀢𑀢𑁄 𑀧𑀲𑀸𑀤𑀚𑀦𑀓𑁄. 𑀲𑀩𑁆𑀩𑀸𑀓𑀸𑀭𑀧𑀭𑀺𑀧𑀽𑀭𑁄𑀢𑀺 𑀲𑀩𑁆𑀩𑁂𑀳𑀺 𑀲𑀫𑀡𑀸𑀓𑀸𑀭𑁂𑀳𑀺 𑀲𑀫𑀡𑀥𑀫𑁆𑀫𑀓𑁄𑀝𑁆𑀞𑀸𑀲𑁂𑀳𑀺 𑀧𑀭𑀺𑀧𑀽𑀭𑁄. 𑀤𑀼𑀢𑀺𑀬𑁂 𑀲𑀦𑁆𑀢𑀸𑀢𑀺 𑀧𑀘𑁆𑀘𑀦𑀻𑀓𑀲𑀦𑁆𑀢𑀢𑀸𑀬 𑀲𑀦𑁆𑀢𑀸. 𑀯𑀺𑀫𑁄𑀓𑁆𑀔𑀸𑀢𑀺 𑀧𑀘𑁆𑀘𑀦𑀻𑀓𑀥𑀫𑁆𑀫𑁂𑀳𑀺 𑀯𑀺𑀫𑀼𑀢𑁆𑀢𑀢𑁆𑀢𑀸 𑀘 𑀯𑀺𑀫𑁄𑀓𑁆𑀔𑀸.

𑁩-𑁯. 𑀫𑀭𑀡𑀲𑁆𑀲𑀢𑀺𑀲𑀼𑀢𑁆𑀢𑀤𑁆𑀯𑀬𑀸𑀤𑀺𑀯𑀡𑁆𑀡𑀦𑀸

𑁭𑁩-𑁭𑁯. 𑀢𑀢𑀺𑀬𑁂 𑀪𑀸𑀯𑁂𑀣 𑀦𑁄𑀢𑀺 𑀪𑀸𑀯𑁂𑀣 𑀦𑀼. 𑀲𑀸𑀲𑀦𑀦𑁆𑀢𑀺 𑀅𑀦𑀼𑀲𑀺𑀝𑁆𑀞𑀺. 𑀆𑀲𑀯𑀸𑀦𑀁 𑀔𑀬𑀸𑀬𑀸𑀢𑀺 𑀅𑀭𑀳𑀢𑁆𑀢𑀨𑀮𑀢𑁆𑀣𑀸𑀬. 𑀘𑀢𑀼𑀢𑁆𑀣𑁂 𑀧𑀢𑀺𑀳𑀺𑀢𑀸𑀬𑀸𑀢𑀺 𑀧𑀝𑀺𑀧𑀦𑁆𑀦𑀸𑀬. 𑀲𑁄 𑀫𑀫𑀲𑁆𑀲 𑀅𑀦𑁆𑀢𑀭𑀸𑀬𑁄𑀢𑀺 𑀲𑁄 𑀫𑀫 𑀚𑀻𑀯𑀺𑀢𑀦𑁆𑀢𑀭𑀸𑀬𑁄𑀧𑀺, 𑀧𑀼𑀣𑀼𑀚𑁆𑀚𑀦𑀓𑀸𑀮𑀓𑀺𑀭𑀺𑀬𑀁 𑀓𑀭𑁄𑀦𑁆𑀢𑀲𑁆𑀲 𑀲𑀕𑁆𑀕𑀦𑁆𑀢𑀭𑀸𑀬𑁄𑀧𑀺 𑀫𑀕𑁆𑀕𑀦𑁆𑀢𑀭𑀸𑀬𑁄𑀧𑀺 𑀅𑀲𑁆𑀲. 𑀲𑀢𑁆𑀣𑀓𑀸 𑀯𑀸 𑀫𑁂 𑀯𑀸𑀢𑀸𑀢𑀺 𑀲𑀢𑁆𑀣𑀁 𑀯𑀺𑀬 𑀅𑀗𑁆𑀕𑀫𑀗𑁆𑀕𑀸𑀦𑀺 𑀓𑀦𑁆𑀢𑀦𑁆𑀢𑀻𑀢𑀺 𑀲𑀢𑁆𑀣𑀓𑀸. 𑀧𑀜𑁆𑀘𑀫𑀸𑀤𑀻𑀦𑀺 𑀯𑀼𑀢𑁆𑀢𑀦𑀬𑀸𑀦𑁂𑀯. 𑀦𑀯𑀫𑁂 𑀲𑀁𑀲𑀕𑁆𑀕𑀸𑀭𑀸𑀫𑀢𑀸𑀢𑀺 𑀧𑀜𑁆𑀘𑀯𑀺𑀥𑁂 𑀲𑀁𑀲𑀕𑁆𑀕𑁂 𑀆𑀭𑀸𑀫𑀢𑀸.

𑁧𑁦. 𑀓𑀼𑀲𑀻𑀢𑀸𑀭𑀫𑁆𑀪𑀯𑀢𑁆𑀣𑀼𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁦. 𑀤𑀲𑀫𑁂 𑀓𑀼𑀲𑀻𑀢𑀯𑀢𑁆𑀣𑀽𑀦𑀻𑀢𑀺 𑀓𑀼𑀲𑀻𑀢𑀲𑁆𑀲 𑀅𑀮𑀲𑀲𑁆𑀲 𑀯𑀢𑁆𑀣𑀽𑀦𑀺 𑀧𑀢𑀺𑀝𑁆𑀞𑀸, 𑀓𑁄𑀲𑀚𑁆𑀚𑀓𑀸𑀭𑀡𑀸𑀦𑀻𑀢𑀺 𑀅𑀢𑁆𑀣𑁄. 𑀓𑀫𑁆𑀫𑀁 𑀓𑀢𑁆𑀢𑀩𑁆𑀩𑀁 𑀳𑁄𑀢𑀻𑀢𑀺 𑀘𑀻𑀯𑀭𑀯𑀺𑀘𑀸𑀭𑀡𑀸𑀤𑀺𑀓𑀫𑁆𑀫𑀁 𑀓𑀢𑁆𑀢𑀩𑁆𑀩𑀁 𑀳𑁄𑀢𑀺. 𑀦 𑀯𑀻𑀭𑀺𑀬𑀁 𑀆𑀭𑀪𑀢𑀻𑀢𑀺 𑀤𑀼𑀯𑀺𑀥𑀫𑁆𑀧𑀺 𑀯𑀻𑀭𑀺𑀬𑀁 𑀦𑀸𑀭𑀪𑀢𑀺. 𑀅𑀧𑁆𑀧𑀢𑁆𑀢𑀲𑁆𑀲𑀸𑀢𑀺 𑀛𑀸𑀦𑀯𑀺𑀧𑀲𑁆𑀲𑀦𑀸𑀫𑀕𑁆𑀕𑀨𑀮𑀥𑀫𑁆𑀫𑀲𑁆𑀲 𑀅𑀧𑁆𑀧𑀢𑁆𑀢𑀲𑁆𑀲 𑀧𑀢𑁆𑀢𑀺𑀬𑀸. 𑀅𑀦𑀥𑀺𑀕𑀢𑀲𑁆𑀲𑀸𑀢𑀺 𑀢𑀲𑁆𑀲𑁂𑀯 𑀅𑀦𑀥𑀺𑀕𑀢𑀲𑁆𑀲 𑀅𑀥𑀺𑀕𑀫𑀢𑁆𑀣𑀸𑀬. 𑀅𑀲𑀘𑁆𑀙𑀺𑀓𑀢𑀲𑁆𑀲𑀸𑀢𑀺 𑀢𑀤𑁂𑀯 𑀅𑀲𑀘𑁆𑀙𑀺𑀓𑀢𑀲𑁆𑀲 𑀲𑀘𑁆𑀙𑀺𑀓𑀭𑀡𑀢𑁆𑀣𑀸𑀬. 𑀇𑀤𑀁 𑀧𑀞𑀫𑀦𑁆𑀢𑀺 𑀇𑀤𑀁 ‘‘𑀳𑀦𑁆𑀤𑀸𑀳𑀁 𑀦𑀺𑀧𑀚𑁆𑀚𑀸𑀫𑀻’’𑀢𑀺 𑀏𑀯𑀁 𑀑𑀲𑀻𑀤𑀦𑀁 𑀧𑀞𑀫𑀁 𑀓𑀼𑀲𑀻𑀢𑀯𑀢𑁆𑀣𑀼. 𑀇𑀫𑀺𑀦𑀸 𑀦𑀬𑁂𑀦 𑀲𑀩𑁆𑀩𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀫𑀸𑀲𑀸𑀘𑀺𑀢𑀓𑀁 𑀫𑀜𑁆𑀜𑁂𑀢𑀺 𑀏𑀢𑁆𑀣 𑀧𑀦 𑀫𑀸𑀲𑀸𑀘𑀺𑀢𑀁 𑀦𑀸𑀫 𑀢𑀺𑀦𑁆𑀢𑀫𑀸𑀲𑁄. 𑀬𑀣𑀸 𑀢𑀺𑀦𑁆𑀢𑀫𑀸𑀲𑁄 𑀕𑀭𑀼𑀓𑁄 𑀳𑁄𑀢𑀺, 𑀏𑀯𑀁 𑀕𑀭𑀼𑀓𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀕𑀺𑀮𑀸𑀦𑀸 𑀯𑀼𑀝𑁆𑀞𑀺𑀢𑁄 𑀳𑁄𑀢𑀻𑀢𑀺 𑀕𑀺𑀮𑀸𑀦𑁄 𑀳𑀼𑀢𑁆𑀯𑀸 𑀧𑀘𑁆𑀙𑀸 𑀯𑀼𑀝𑁆𑀞𑀺𑀢𑁄 𑀳𑁄𑀢𑀺. 𑀆𑀭𑀫𑁆𑀪𑀯𑀢𑁆𑀣𑀽𑀦𑀻𑀢𑀺 𑀯𑀻𑀭𑀺𑀬𑀓𑀸𑀭𑀡𑀸𑀦𑀺. 𑀢𑁂𑀲𑀫𑁆𑀧𑀺 𑀇𑀫𑀺𑀦𑀸𑀯 𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀬𑀫𑀓𑀯𑀕𑁆𑀕𑁄 𑀅𑀝𑁆𑀞𑀫𑁄.

(𑁯) 𑁪. 𑀲𑀢𑀺𑀯𑀕𑁆𑀕𑁄

𑁧-𑁨. 𑀲𑀢𑀺𑀲𑀫𑁆𑀧𑀚𑀜𑁆𑀜𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁧-𑁮𑁨. 𑀦𑀯𑀫𑀲𑁆𑀲 𑀧𑀞𑀫𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀫𑁂𑀯. 𑀤𑀼𑀢𑀺𑀬𑁂 𑀲𑀤𑁆𑀥𑁄𑀢𑀺 𑀤𑀼𑀯𑀺𑀥𑀸𑀬 𑀲𑀤𑁆𑀥𑀸𑀬 𑀲𑀫𑀦𑁆𑀦𑀸𑀕𑀢𑁄. 𑀦𑁄 𑀘𑀼𑀧𑀲𑀗𑁆𑀓𑀫𑀺𑀢𑀸𑀢𑀺 𑀦 𑀉𑀧𑀝𑁆𑀞𑀳𑀢𑀺. 𑀦𑁄 𑀘 𑀧𑀭𑀺𑀧𑀼𑀘𑁆𑀙𑀺𑀢𑀸𑀢𑀺 𑀅𑀢𑁆𑀣𑀸𑀦𑀢𑁆𑀣𑀁 𑀓𑀸𑀭𑀡𑀸𑀓𑀸𑀭𑀡𑀁 𑀧𑀭𑀺𑀧𑀼𑀘𑁆𑀙𑀺𑀢𑀸 𑀦 𑀳𑁄𑀢𑀺. 𑀲𑀫𑀦𑁆𑀦𑀸𑀕𑀢𑁄𑀢𑀺 𑀲𑀸𑀫𑀺𑀅𑀢𑁆𑀣𑁂 𑀧𑀘𑁆𑀘𑀢𑁆𑀢𑀁, 𑀲𑀫𑀦𑁆𑀦𑀸𑀕𑀢𑀲𑁆𑀲𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀓𑀦𑁆𑀢𑀧𑀝𑀺𑀪𑀸𑀦𑀸 𑀢𑀣𑀸𑀕𑀢𑀁 𑀥𑀫𑁆𑀫𑀤𑁂𑀲𑀦𑀸 𑀳𑁄𑀢𑀻𑀢𑀺 𑀢𑀣𑀸𑀕𑀢𑀲𑁆𑀲 𑀏𑀓𑀦𑁆𑀢𑀧𑀝𑀺𑀪𑀸𑀦𑀸 𑀥𑀫𑁆𑀫𑀤𑁂𑀲𑀦𑀸 𑀳𑁄𑀢𑀺, 𑀏𑀓𑀦𑁆𑀢𑁂𑀦𑁂𑀯 𑀧𑀝𑀺𑀪𑀸𑀢𑀺 𑀉𑀧𑀝𑁆𑀞𑀸𑀢𑀻𑀢𑀺 𑀅𑀢𑁆𑀣𑁄.

𑁩. 𑀫𑀽𑀮𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁩. 𑀢𑀢𑀺𑀬𑁂 𑀲𑀩𑁆𑀩𑁂 𑀥𑀫𑁆𑀫𑀸𑀢𑀺 𑀧𑀜𑁆𑀘𑀓𑁆𑀔𑀦𑁆𑀥𑀸. 𑀙𑀦𑁆𑀤𑀫𑀽𑀮𑀓𑀸𑀢𑀺 𑀅𑀚𑁆𑀛𑀸𑀲𑀬𑀘𑁆𑀙𑀦𑁆𑀤𑁄 𑀓𑀢𑁆𑀢𑀼𑀓𑀫𑁆𑀬𑀢𑀸𑀙𑀦𑁆𑀤𑁄 𑀢𑀁 𑀫𑀽𑀮𑀁 𑀏𑀢𑁂𑀲𑀦𑁆𑀢𑀺 𑀙𑀦𑁆𑀤𑀫𑀽𑀮𑀓𑀸. 𑀫𑀦𑀲𑀺𑀓𑀸𑀭𑀢𑁄 𑀲𑀫𑁆𑀪𑀯𑀦𑁆𑀢𑀻𑀢𑀺 𑀫𑀦𑀲𑀺𑀓𑀸𑀭𑀲𑀫𑁆𑀪𑀯𑀸. 𑀨𑀲𑁆𑀲𑀢𑁄 𑀲𑀫𑀼𑀤𑁂𑀦𑁆𑀢𑀺 𑀭𑀸𑀲𑀻 𑀪𑀯𑀦𑁆𑀢𑀻𑀢𑀺 𑀨𑀲𑁆𑀲𑀲𑀫𑀼𑀤𑀬𑀸. 𑀯𑁂𑀤𑀦𑀸𑀬 𑀲𑀫𑁄𑀲𑀭𑀦𑁆𑀢𑀻𑀢𑀺 𑀯𑁂𑀤𑀦𑀸𑀲𑀫𑁄𑀲𑀭𑀡𑀸. 𑀲𑀫𑀸𑀥𑀺 𑀏𑀢𑁂𑀲𑀁 𑀧𑀫𑀼𑀔𑁄𑀢𑀺 𑀲𑀫𑀸𑀥𑀺𑀧𑁆𑀧𑀫𑀼𑀔𑀸. 𑀚𑁂𑀝𑁆𑀞𑀓𑀝𑁆𑀞𑁂𑀦 𑀲𑀢𑀺 𑀅𑀥𑀺𑀧𑀢𑀺 𑀏𑀢𑁂𑀲𑀦𑁆𑀢𑀺 𑀲𑀢𑀸𑀥𑀺𑀧𑀢𑁂𑀬𑁆𑀬𑀸, 𑀲𑀢𑀺𑀚𑁂𑀝𑁆𑀞𑀓𑀸𑀢𑀺 𑀅𑀢𑁆𑀣𑁄. 𑀧𑀜𑁆𑀜𑀸 𑀉𑀢𑁆𑀢𑀭𑀸 𑀏𑀢𑁂𑀲𑀦𑁆𑀢𑀺 𑀧𑀜𑁆𑀜𑀼𑀢𑁆𑀢𑀭𑀸. 𑀯𑀺𑀫𑀼𑀢𑁆𑀢𑀺 𑀏𑀯 𑀲𑀸𑀭𑁄 𑀏𑀢𑁂𑀲𑀦𑁆𑀢𑀺 𑀯𑀺𑀫𑀼𑀢𑁆𑀢𑀺𑀲𑀸𑀭𑀸. 𑀏𑀢𑁆𑀣 𑀘 𑀙𑀦𑁆𑀤𑀫𑀽𑀮𑀓𑀸𑀤𑀬𑁄 𑀘𑀢𑁆𑀢𑀸𑀭𑁄𑀧𑀺 𑀮𑁄𑀓𑀺𑀬𑀸 𑀓𑀣𑀺𑀢𑀸, 𑀲𑁂𑀲𑀸 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀫𑀺𑀲𑁆𑀲𑀓𑀸𑀢𑀺.

𑁪. 𑀘𑁄𑀭𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁪. 𑀘𑀢𑀼𑀢𑁆𑀣𑁂 𑀫𑀳𑀸𑀘𑁄𑀭𑁄𑀢𑀺 𑀭𑀚𑁆𑀚𑀦𑁆𑀢𑀭𑁂 𑀤𑀼𑀩𑁆𑀪𑀺𑀢𑀼𑀁 𑀲𑀫𑀢𑁆𑀣𑁄 𑀫𑀳𑀸𑀘𑁄𑀭𑁄. 𑀧𑀭𑀺𑀬𑀸𑀧𑀚𑁆𑀚𑀢𑀻𑀢𑀺 𑀧𑀭𑀺𑀬𑀸𑀤𑀸𑀦𑀁 𑀕𑀘𑁆𑀙𑀢𑀺. 𑀦 𑀘𑀺𑀭𑀝𑁆𑀞𑀺𑀢𑀺𑀓𑁄 𑀳𑁄𑀢𑀻𑀢𑀺 𑀅𑀤𑁆𑀥𑀸𑀦𑀁 𑀧𑀸𑀮𑁂𑀦𑁆𑀢𑁄 𑀞𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀅𑀧𑁆𑀧𑀳𑀭𑀦𑁆𑀢𑀲𑁆𑀲 𑀧𑀳𑀭𑀢𑀻𑀢𑀺 𑀅𑀢𑁆𑀢𑀦𑁄 𑀅𑀯𑁂𑀭𑀺𑀦𑁂 𑀅𑀧𑁆𑀧𑀳𑀭𑀦𑁆𑀢𑁂 𑀕𑀼𑀡𑀲𑀫𑁆𑀧𑀦𑁆𑀦𑁂 𑀘 𑀫𑀳𑀮𑁆𑀮𑀓𑁂 𑀘 𑀢𑀭𑀼𑀡𑀤𑀸𑀭𑀓𑁂 𑀘 𑀅𑀧𑁆𑀧𑀳𑀭𑀺𑀢𑀩𑁆𑀩𑀬𑀼𑀢𑁆𑀢𑀓𑁂 𑀧𑀳𑀭𑀢𑀺. 𑀅𑀦𑀯𑀲𑁂𑀲𑀁 𑀆𑀤𑀺𑀬𑀢𑀻𑀢𑀺 𑀦𑀺𑀲𑁆𑀲𑁂𑀲𑀁 𑀕𑀡𑁆𑀳𑀸𑀢𑀺. 𑀩𑁆𑀬𑀢𑁆𑀢𑀘𑁄𑀭𑀸𑀦𑀜𑁆𑀳𑀺 𑀇𑀤𑀁 𑀯𑀢𑁆𑀢𑀁 𑁋 𑀧𑀭𑀲𑁆𑀲 𑀤𑁆𑀯𑀻𑀲𑀼 𑀲𑀸𑀝𑀓𑁂𑀲𑀼 𑀏𑀓𑁄 𑀕𑀳𑁂𑀢𑀩𑁆𑀩𑁄, 𑀏𑀓𑀲𑁆𑀫𑀺𑀁 𑀲𑀦𑁆𑀢𑁂 𑀤𑀼𑀩𑁆𑀩𑀮𑀁 𑀤𑀢𑁆𑀯𑀸 𑀣𑀺𑀭𑁄 𑀕𑀳𑁂𑀢𑀩𑁆𑀩𑁄. 𑀧𑀼𑀝𑀪𑀢𑁆𑀢𑀢𑀡𑁆𑀟𑀼𑀮𑀸𑀤𑀻𑀲𑀼 𑀏𑀓𑀁 𑀓𑁄𑀝𑁆𑀞𑀸𑀲𑀁 𑀤𑀢𑁆𑀯𑀸 𑀏𑀓𑁄 𑀕𑀳𑁂𑀢𑀩𑁆𑀩𑁄𑀢𑀺. 𑀅𑀘𑁆𑀘𑀸𑀲𑀦𑁆𑀦𑁂 𑀓𑀫𑁆𑀫𑀁 𑀓𑀭𑁄𑀢𑀻𑀢𑀺 𑀕𑀸𑀫𑀦𑀺𑀕𑀫𑀭𑀸𑀚𑀥𑀸𑀦𑀻𑀦𑀁 𑀆𑀲𑀦𑁆𑀦𑀝𑁆𑀞𑀸𑀦𑁂 𑀘𑁄𑀭𑀺𑀓𑀓𑀫𑁆𑀫𑀁 𑀓𑀭𑁄𑀢𑀺. 𑀦 𑀘 𑀦𑀺𑀥𑀸𑀦𑀓𑀼𑀲𑀮𑁄 𑀳𑁄𑀢𑀻𑀢𑀺 𑀬𑀁 𑀮𑀤𑁆𑀥𑀁, 𑀢𑀁 𑀤𑀓𑁆𑀔𑀺𑀡𑁂𑀬𑁆𑀬𑁂 𑀦𑀺𑀤𑀳𑀺𑀢𑀼𑀁 𑀙𑁂𑀓𑁄 𑀦 𑀳𑁄𑀢𑀺, 𑀧𑀭𑀮𑁄𑀓𑀫𑀕𑁆𑀕𑀁 𑀦 𑀲𑁄𑀥𑁂𑀢𑀺.

𑁫. 𑀲𑀫𑀡𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁫. 𑀧𑀜𑁆𑀘𑀫𑁂 𑀬𑀁 𑀲𑀫𑀡𑁂𑀦𑀸𑀢𑀺 𑀬𑀁 𑀕𑀼𑀡𑀚𑀸𑀢𑀁 𑀲𑀫𑀡𑁂𑀦 𑀧𑀢𑁆𑀢𑀩𑁆𑀩𑀁. 𑀯𑀼𑀲𑀻𑀫𑀢𑀸𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑀁𑀯𑀼𑀢𑁂𑀦. 𑀫𑀼𑀢𑁆𑀢𑁄 𑀫𑁄𑀘𑁂𑀫𑀺 𑀩𑀦𑁆𑀥𑀦𑀸𑀢𑀺 𑀅𑀳𑀁 𑀲𑀩𑁆𑀩𑀩𑀦𑁆𑀥𑀦𑁂𑀳𑀺 𑀫𑀼𑀢𑁆𑀢𑁄 𑀳𑀼𑀢𑁆𑀯𑀸 𑀫𑀳𑀸𑀚𑀦𑀫𑁆𑀧𑀺 𑀭𑀸𑀕𑀸𑀤𑀺𑀩𑀦𑁆𑀥𑀦𑀢𑁄 𑀫𑁄𑀘𑁂𑀫𑀺. 𑀧𑀭𑀫𑀤𑀦𑁆𑀢𑁄𑀢𑀺 𑀅𑀜𑁆𑀜𑁂𑀦 𑀓𑁂𑀦𑀘𑀺 𑀅𑀲𑀺𑀓𑁆𑀔𑀸𑀧𑀺𑀢𑁄 𑀅𑀘𑁄𑀤𑀺𑀢𑁄 𑀲𑀬𑀫𑁆𑀪𑀼𑀜𑀸𑀡𑁂𑀦 𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸 𑀧𑀭𑀫𑀤𑀫𑀣𑁂𑀦 𑀤𑀦𑁆𑀢𑀢𑁆𑀢𑀸 𑀧𑀭𑀫𑀤𑀦𑁆𑀢𑁄 𑀦𑀸𑀫. 𑀧𑀭𑀺𑀦𑀺𑀩𑁆𑀩𑀼𑀢𑁄𑀢𑀺 𑀓𑀺𑀮𑁂𑀲𑀧𑀭𑀺𑀦𑀺𑀩𑁆𑀩𑀸𑀦𑁂𑀦 𑀧𑀭𑀺𑀦𑀺𑀩𑁆𑀩𑀼𑀢𑁄.

𑁬. 𑀬𑀲𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁬. 𑀙𑀝𑁆𑀞𑁂 𑀫𑀸 𑀘 𑀫𑀬𑀸 𑀬𑀲𑁄𑀢𑀺 𑀬𑀲𑁄 𑀘 𑀫𑀬𑀸 𑀲𑀤𑁆𑀥𑀺𑀁 𑀫𑀸 𑀕𑀜𑁆𑀙𑀺. 𑀅𑀓𑀲𑀺𑀭𑀮𑀸𑀪𑀻𑀢𑀺 𑀯𑀺𑀧𑀼𑀮𑀮𑀸𑀪𑀻. 𑀲𑀻𑀮𑀧𑀜𑁆𑀜𑀸𑀡𑀦𑁆𑀢𑀺 𑀲𑀻𑀮𑀜𑁆𑀘𑁂𑀯 𑀜𑀸𑀡𑀜𑁆𑀘. 𑀲𑀗𑁆𑀕𑀫𑁆𑀫𑀸𑀢𑀺 𑀲𑀦𑁆𑀦𑀺𑀧𑀢𑀺𑀢𑁆𑀯𑀸. 𑀲𑀫𑀸𑀕𑀫𑁆𑀫𑀸𑀢𑀺 𑀲𑀫𑀸𑀕𑀦𑁆𑀢𑁆𑀯𑀸. 𑀲𑀗𑁆𑀕𑀡𑀺𑀓𑀯𑀺𑀳𑀸𑀭𑀦𑁆𑀢𑀺 𑀕𑀡𑀲𑀗𑁆𑀕𑀡𑀺𑀓𑀯𑀺𑀳𑀸𑀭𑀁. 𑀦 𑀳𑀺 𑀦𑀽𑀦𑀫𑁂𑀢𑀺 𑀦 𑀳𑀺 𑀦𑀽𑀦 𑀇𑀫𑁂. 𑀢𑀣𑀸 𑀳𑀺 𑀧𑀦𑀫𑁂𑀢𑀺 𑀢𑀣𑀸 𑀳𑀺 𑀧𑀦 𑀇𑀫𑁂. 𑀅𑀗𑁆𑀕𑀼𑀮𑀺𑀧𑀢𑁄𑀤𑀓𑁂𑀳𑀻𑀢𑀺 𑀅𑀗𑁆𑀕𑀼𑀮𑀺𑀧𑀢𑁄𑀤𑀬𑀝𑁆𑀞𑀺𑀁 𑀓𑀢𑁆𑀯𑀸 𑀯𑀺𑀚𑁆𑀛𑀦𑁂𑀦. 𑀲𑀜𑁆𑀚𑀕𑁆𑀖𑀦𑁆𑀢𑁂𑀢𑀺 𑀫𑀳𑀸𑀳𑀲𑀺𑀢𑀁 𑀳𑀲𑀦𑁆𑀢𑁂. 𑀲𑀁𑀓𑀻𑀴𑀦𑁆𑀢𑁂𑀢𑀺 𑀓𑁂𑀴𑀺𑀁 𑀓𑀭𑁄𑀦𑁆𑀢𑁂.

𑁭. 𑀧𑀢𑁆𑀢𑀦𑀺𑀓𑀼𑀚𑁆𑀚𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁭. 𑀲𑀢𑁆𑀢𑀫𑁂 𑀦𑀺𑀓𑁆𑀓𑀼𑀚𑁆𑀚𑁂𑀬𑁆𑀬𑀸𑀢𑀺 𑀢𑁂𑀦 𑀤𑀺𑀦𑁆𑀦𑀲𑁆𑀲 𑀤𑁂𑀬𑁆𑀬𑀥𑀫𑁆𑀫𑀲𑁆𑀲 𑀅𑀧𑁆𑀧𑀝𑀺𑀕𑁆𑀕𑀳𑀡𑀢𑁆𑀣𑀁 𑀧𑀢𑁆𑀢𑀦𑀺𑀓𑁆𑀓𑀼𑀚𑁆𑀚𑀦𑀓𑀫𑁆𑀫𑀯𑀸𑀘𑀸𑀬 𑀦𑀺𑀓𑀼𑀚𑁆𑀚𑁂𑀬𑁆𑀬, 𑀦 𑀅𑀥𑁄𑀫𑀼𑀔𑀞𑀧𑀦𑁂𑀦. 𑀅𑀮𑀸𑀪𑀸𑀬𑀸𑀢𑀺 𑀘𑀢𑀼𑀦𑁆𑀦𑀁 𑀧𑀘𑁆𑀘𑀬𑀸𑀦𑀁 𑀅𑀮𑀸𑀪𑀢𑁆𑀣𑀸𑀬. 𑀅𑀦𑀢𑁆𑀣𑀸𑀬𑀸𑀢𑀺 𑀉𑀧𑀤𑁆𑀤𑀯𑀸𑀬 𑀅𑀯𑀟𑁆𑀠𑀺𑀬𑀸. 𑀉𑀓𑁆𑀓𑀼𑀚𑁆𑀚𑁂𑀬𑁆𑀬𑀸𑀢𑀺 𑀉𑀓𑁆𑀓𑀼𑀚𑁆𑀚𑀦𑀓𑀫𑁆𑀫𑀯𑀸𑀘𑀸𑀬 𑀉𑀓𑁆𑀓𑀼𑀚𑁆𑀚𑁂𑀬𑁆𑀬.

𑁮. 𑀅𑀧𑁆𑀧𑀲𑀸𑀤𑀧𑀯𑁂𑀤𑀦𑀻𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁮. 𑀅𑀝𑁆𑀞𑀫𑁂 𑀅𑀧𑁆𑀧𑀲𑀸𑀤𑀁 𑀧𑀯𑁂𑀤𑁂𑀬𑁆𑀬𑀼𑀦𑁆𑀢𑀺 𑀅𑀧𑁆𑀧𑀲𑀦𑁆𑀦𑀪𑀸𑀯𑀁 𑀚𑀸𑀦𑀸𑀧𑁂𑀬𑁆𑀬𑀼𑀁. 𑀅𑀧𑁆𑀧𑀲𑀸𑀤𑀁 𑀧𑀯𑁂𑀤𑁂𑀦𑁆𑀢𑁂𑀦 𑀧𑀦 𑀓𑀺𑀁 𑀓𑀸𑀢𑀩𑁆𑀩𑀦𑁆𑀢𑀺? 𑀦𑀺𑀲𑀺𑀦𑁆𑀦𑀸𑀲𑀦𑀢𑁄 𑀦 𑀉𑀝𑁆𑀞𑀸𑀢𑀩𑁆𑀩𑀁 𑀦 𑀯𑀦𑁆𑀤𑀺𑀢𑀩𑁆𑀩𑀁 𑀦 𑀧𑀘𑁆𑀘𑀼𑀕𑁆𑀕𑀫𑀦𑀁 𑀓𑀸𑀢𑀩𑁆𑀩𑀁, 𑀦 𑀤𑁂𑀬𑁆𑀬𑀥𑀫𑁆𑀫𑁄 𑀤𑀸𑀢𑀩𑁆𑀩𑁄. 𑀅𑀕𑁄𑀘𑀭𑁂𑀢𑀺 𑀧𑀜𑁆𑀘𑀯𑀺𑀥𑁂 𑀅𑀕𑁄𑀘𑀭𑁂.

𑁯. 𑀧𑀝𑀺𑀲𑀸𑀭𑀡𑀻𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁯. 𑀦𑀯𑀫𑁂 𑀥𑀫𑁆𑀫𑀺𑀓𑀜𑁆𑀘 𑀕𑀺𑀳𑀺𑀧𑀝𑀺𑀲𑁆𑀲𑀯𑀦𑁆𑀢𑀺 ‘‘𑀇𑀫𑀁 𑀢𑁂𑀫𑀸𑀲𑀁 𑀇𑀥𑁂𑀯 𑀯𑀲𑀺𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑁄 ‘‘𑀏𑀯𑀁 𑀳𑁄𑀢𑀽’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀧𑀝𑀺𑀲𑁆𑀲𑀯𑀁. 𑀦 𑀲𑀘𑁆𑀘𑀸𑀧𑁂𑀢𑀻𑀢𑀺 𑀯𑀼𑀢𑁆𑀢𑀁 𑀦 𑀲𑀘𑁆𑀘𑀁 𑀓𑀭𑁄𑀢𑀺 𑀯𑀺𑀲𑀁𑀯𑀸𑀤𑁂𑀢𑀺.

𑁧𑁦. 𑀲𑀫𑁆𑀫𑀸𑀯𑀢𑁆𑀢𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁯𑁦. 𑀤𑀲𑀫𑁂 𑀧𑀘𑁆𑀘𑁂𑀓𑀝𑁆𑀞𑀸𑀦𑁂𑀢𑀺 𑀅𑀥𑀺𑀧𑀢𑀺𑀝𑁆𑀞𑀸𑀦𑁂 𑀚𑁂𑀝𑁆𑀞𑀓𑀝𑁆𑀞𑀸𑀦𑁂. 𑀢𑀜𑁆𑀳𑀺 𑀚𑁂𑀝𑁆𑀞𑀓𑀁 𑀓𑀢𑁆𑀯𑀸 𑀓𑀺𑀜𑁆𑀘𑀺 𑀲𑀗𑁆𑀖𑀓𑀫𑁆𑀫𑀁 𑀓𑀸𑀢𑀼𑀁 𑀦 𑀮𑀪𑀢𑀺. 𑀦 𑀘 𑀢𑁂𑀦 𑀫𑀽𑀮𑁂𑀦 𑀯𑀼𑀝𑁆𑀞𑀸𑀧𑁂𑀢𑀩𑁆𑀩𑁄𑀢𑀺 𑀢𑀁 𑀫𑀽𑀮𑀁 𑀓𑀢𑁆𑀯𑀸 𑀅𑀩𑁆𑀪𑀸𑀦𑀓𑀫𑁆𑀫𑀁 𑀓𑀸𑀢𑀼𑀁 𑀦 𑀮𑀪𑀢𑀺. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀲𑀢𑀺𑀯𑀕𑁆𑀕𑁄 𑀦𑀯𑀫𑁄.

(𑁧𑁦) 𑁫. 𑀲𑀸𑀫𑀜𑁆𑀜𑀯𑀕𑁆𑀕𑁄

𑁯𑁧. 𑀇𑀢𑁄 𑀧𑀭𑀁 𑀅𑀣 𑀔𑁄 𑀩𑁄𑀚𑁆𑀛𑀸 𑀉𑀧𑀸𑀲𑀺𑀓𑀸𑀢𑀺𑀆𑀤𑀻𑀲𑀼 𑀩𑁄𑀚𑁆𑀛𑀸 𑀉𑀧𑀸𑀲𑀺𑀓𑀸, 𑀲𑀺𑀭𑀺𑀫𑀸 𑀉𑀧𑀸𑀲𑀺𑀓𑀸, 𑀧𑀤𑀼𑀫𑀸 𑀉𑀧𑀸𑀲𑀺𑀓𑀸, 𑀲𑀼𑀢𑀦𑀸 𑀉𑀧𑀸𑀲𑀺𑀓𑀸, 𑀫𑀦𑀼𑀚𑀸 𑀉𑀧𑀸𑀲𑀺𑀓𑀸, 𑀉𑀢𑁆𑀢𑀭𑀸 𑀉𑀧𑀸𑀲𑀺𑀓𑀸, 𑀫𑀼𑀢𑁆𑀢𑀸 𑀉𑀧𑀸𑀲𑀺𑀓𑀸, 𑀔𑁂𑀫𑀸 𑀉𑀧𑀸𑀲𑀺𑀓𑀸, 𑀭𑀼𑀘𑀻 𑀉𑀧𑀸𑀲𑀺𑀓𑀸, 𑀘𑀼𑀦𑁆𑀤𑀻 𑀭𑀸𑀚𑀓𑀼𑀫𑀸𑀭𑀻, 𑀩𑀺𑀫𑁆𑀩𑀻 𑀉𑀧𑀸𑀲𑀺𑀓𑀸, 𑀲𑀼𑀫𑀦𑀸 𑀭𑀸𑀚𑀓𑀼𑀫𑀸𑀭𑀻, 𑀫𑀮𑁆𑀮𑀺𑀓𑀸 𑀤𑁂𑀯𑀻, 𑀢𑀺𑀲𑁆𑀲𑀸 𑀉𑀧𑀸𑀲𑀺𑀓𑀸, 𑀢𑀺𑀲𑁆𑀲𑀸𑀫𑀸𑀢𑀸 𑀉𑀧𑀸𑀲𑀺𑀓𑀸, 𑀲𑁄𑀡𑀸 𑀉𑀧𑀸𑀲𑀺𑀓𑀸, 𑀲𑁄𑀡𑀸𑀬 𑀫𑀸𑀢𑀸 𑀉𑀧𑀸𑀲𑀺𑀓𑀸, 𑀓𑀸𑀡𑀸 𑀉𑀧𑀸𑀲𑀺𑀓𑀸, 𑀓𑀸𑀡𑀫𑀸𑀢𑀸 𑀉𑀧𑀸𑀲𑀺𑀓𑀸, 𑀉𑀢𑁆𑀢𑀭𑀸 𑀦𑀦𑁆𑀤𑀫𑀸𑀢𑀸, 𑀯𑀺𑀲𑀸𑀔𑀸 𑀫𑀺𑀕𑀸𑀭𑀫𑀸𑀢𑀸, 𑀔𑀼𑀚𑁆𑀚𑀼𑀢𑁆𑀢𑀭𑀸 𑀉𑀧𑀸𑀲𑀺𑀓𑀸, 𑀲𑀸𑀫𑀸𑀯𑀢𑀻 𑀉𑀧𑀸𑀲𑀺𑀓𑀸, 𑀲𑀼𑀧𑁆𑀧𑀯𑀸𑀲𑀸 𑀓𑁄𑀮𑀺𑀬𑀥𑀻𑀢𑀸, 𑀲𑀼𑀧𑁆𑀧𑀺𑀬𑀸 𑀉𑀧𑀸𑀲𑀺𑀓𑀸, 𑀦𑀓𑀼𑀮𑀫𑀸𑀢𑀸 𑀕𑀳𑀧𑀢𑀸𑀦𑀻𑀢𑀺 𑀇𑀫𑀸𑀲𑀁 𑀏𑀢𑁆𑀢𑀓𑀸𑀦𑀁 𑀅𑀝𑁆𑀞𑀗𑁆𑀕𑀲𑀫𑀦𑁆𑀦𑀸𑀕𑀢𑀁 𑀉𑀧𑁄𑀲𑀣𑀓𑀫𑁆𑀫𑀫𑁂𑀯 𑀓𑀣𑀺𑀢𑀁. 𑀇𑀘𑁆𑀙𑀦𑁆𑀢𑁂𑀦 𑀯𑀺𑀢𑁆𑀣𑀸𑀭𑁂𑀢𑁆𑀯𑀸 𑀓𑀣𑁂𑀢𑀩𑁆𑀩𑀁. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.