𑁩. 𑀫𑀽𑀮𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁩. 𑀢𑀢𑀺𑀬𑁂 𑀲𑀩𑁆𑀩𑁂 𑀥𑀫𑁆𑀫𑀸𑀢𑀺 𑀧𑀜𑁆𑀘𑀓𑁆𑀔𑀦𑁆𑀥𑀸. 𑀙𑀦𑁆𑀤𑀫𑀽𑀮𑀓𑀸𑀢𑀺 𑀅𑀚𑁆𑀛𑀸𑀲𑀬𑀘𑁆𑀙𑀦𑁆𑀤𑁄 𑀓𑀢𑁆𑀢𑀼𑀓𑀫𑁆𑀬𑀢𑀸𑀙𑀦𑁆𑀤𑁄 𑀢𑀁 𑀫𑀽𑀮𑀁 𑀏𑀢𑁂𑀲𑀦𑁆𑀢𑀺 𑀙𑀦𑁆𑀤𑀫𑀽𑀮𑀓𑀸. 𑀫𑀦𑀲𑀺𑀓𑀸𑀭𑀢𑁄 𑀲𑀫𑁆𑀪𑀯𑀦𑁆𑀢𑀻𑀢𑀺 𑀫𑀦𑀲𑀺𑀓𑀸𑀭𑀲𑀫𑁆𑀪𑀯𑀸. 𑀨𑀲𑁆𑀲𑀢𑁄 𑀲𑀫𑀼𑀤𑁂𑀦𑁆𑀢𑀺 𑀭𑀸𑀲𑀻 𑀪𑀯𑀦𑁆𑀢𑀻𑀢𑀺 𑀨𑀲𑁆𑀲𑀲𑀫𑀼𑀤𑀬𑀸. 𑀯𑁂𑀤𑀦𑀸𑀬 𑀲𑀫𑁄𑀲𑀭𑀦𑁆𑀢𑀻𑀢𑀺 𑀯𑁂𑀤𑀦𑀸𑀲𑀫𑁄𑀲𑀭𑀡𑀸. 𑀲𑀫𑀸𑀥𑀺 𑀏𑀢𑁂𑀲𑀁 𑀧𑀫𑀼𑀔𑁄𑀢𑀺 𑀲𑀫𑀸𑀥𑀺𑀧𑁆𑀧𑀫𑀼𑀔𑀸. 𑀚𑁂𑀝𑁆𑀞𑀓𑀝𑁆𑀞𑁂𑀦 𑀲𑀢𑀺 𑀅𑀥𑀺𑀧𑀢𑀺 𑀏𑀢𑁂𑀲𑀦𑁆𑀢𑀺 𑀲𑀢𑀸𑀥𑀺𑀧𑀢𑁂𑀬𑁆𑀬𑀸, 𑀲𑀢𑀺𑀚𑁂𑀝𑁆𑀞𑀓𑀸𑀢𑀺 𑀅𑀢𑁆𑀣𑁄. 𑀧𑀜𑁆𑀜𑀸 𑀉𑀢𑁆𑀢𑀭𑀸 𑀏𑀢𑁂𑀲𑀦𑁆𑀢𑀺 𑀧𑀜𑁆𑀜𑀼𑀢𑁆𑀢𑀭𑀸. 𑀯𑀺𑀫𑀼𑀢𑁆𑀢𑀺 𑀏𑀯 𑀲𑀸𑀭𑁄 𑀏𑀢𑁂𑀲𑀦𑁆𑀢𑀺 𑀯𑀺𑀫𑀼𑀢𑁆𑀢𑀺𑀲𑀸𑀭𑀸. 𑀏𑀢𑁆𑀣 𑀘 𑀙𑀦𑁆𑀤𑀫𑀽𑀮𑀓𑀸𑀤𑀬𑁄 𑀘𑀢𑁆𑀢𑀸𑀭𑁄𑀧𑀺 𑀮𑁄𑀓𑀺𑀬𑀸 𑀓𑀣𑀺𑀢𑀸, 𑀲𑁂𑀲𑀸 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀫𑀺𑀲𑁆𑀲𑀓𑀸𑀢𑀺.