𑁫. 𑀉𑀧𑁄𑀲𑀣𑀯𑀕𑁆𑀕𑁄

𑁪. 𑀯𑀸𑀲𑁂𑀝𑁆𑀞𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁪. 𑀧𑀜𑁆𑀘𑀫𑀲𑁆𑀲 𑀘𑀢𑀼𑀢𑁆𑀣𑁂 𑀇𑀫𑁂 𑀘𑁂𑀧𑀺, 𑀯𑀸𑀲𑁂𑀝𑁆𑀞, 𑀫𑀳𑀸𑀲𑀸𑀮𑀸𑀢𑀺 𑀧𑀼𑀭𑀢𑁄 𑀞𑀺𑀢𑁂 𑀤𑁆𑀯𑁂 𑀲𑀸𑀮𑀭𑀼𑀓𑁆𑀔𑁂 𑀤𑀲𑁆𑀲𑁂𑀦𑁆𑀢𑁄 𑀧𑀭𑀺𑀓𑀧𑁆𑀧𑁄𑀧𑀫𑀁 𑀆𑀳. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀇𑀫𑁂 𑀢𑀸𑀯 𑀫𑀳𑀸𑀲𑀸𑀮𑀸 𑀅𑀘𑁂𑀢𑀦𑀸. 𑀲𑀘𑁂 𑀏𑀢𑁂𑀧𑀺 𑀲𑀘𑁂𑀢𑀦𑀸 𑀳𑀼𑀢𑁆𑀯𑀸 𑀅𑀝𑁆𑀞𑀗𑁆𑀕𑀲𑀫𑀦𑁆𑀦𑀸𑀕𑀢𑀁 𑀉𑀧𑁄𑀲𑀣𑀁 𑀉𑀧𑀯𑀲𑁂𑀬𑁆𑀬𑀼𑀁, 𑀏𑀢𑁂𑀲𑀫𑁆𑀧𑀺 𑀲𑁄 𑀉𑀧𑁄𑀲𑀣𑀯𑀸𑀲𑁄 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬 𑀅𑀲𑁆𑀲. 𑀪𑀽𑀢𑁂 𑀧𑀦 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀻𑀢𑀺.

𑁬. 𑀅𑀦𑀼𑀭𑀼𑀤𑁆𑀥𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁬. 𑀙𑀝𑁆𑀞𑁂 𑀬𑁂𑀦𑀸𑀬𑀲𑁆𑀫𑀸 𑀅𑀦𑀼𑀭𑀼𑀤𑁆𑀥𑁄𑀢𑀺 𑀢𑀸 𑀓𑀺𑀭 𑀤𑁂𑀯𑀢𑀸 𑀅𑀢𑁆𑀢𑀦𑁄 𑀲𑀫𑁆𑀧𑀢𑁆𑀢𑀺𑀁 𑀑𑀮𑁄𑀓𑁂𑀢𑁆𑀯𑀸 ‘‘𑀓𑀺𑀁 𑀦𑀼 𑀔𑁄 𑀦𑀺𑀲𑁆𑀲𑀸𑀬 𑀅𑀬𑀁 𑀲𑀫𑁆𑀧𑀢𑁆𑀢𑀺 𑀅𑀫𑁆𑀳𑁂𑀳𑀺 𑀮𑀤𑁆𑀥𑀸’’𑀢𑀺 𑀆𑀯𑀚𑁆𑀚𑀫𑀸𑀦𑀸 𑀣𑁂𑀭𑀁 𑀤𑀺𑀲𑁆𑀯𑀸 ‘‘𑀫𑀬𑀁 𑀅𑀫𑁆𑀳𑀸𑀓𑀁 𑀅𑀬𑁆𑀬𑀲𑁆𑀲 𑀧𑀼𑀩𑁆𑀩𑁂 𑀘𑀓𑁆𑀓𑀯𑀢𑁆𑀢𑀺𑀭𑀚𑁆𑀚𑀁 𑀓𑀭𑁄𑀦𑁆𑀢𑀲𑁆𑀲 𑀧𑀸𑀤𑀧𑀭𑀺𑀘𑀸𑀭𑀺𑀓𑀸 𑀳𑀼𑀢𑁆𑀯𑀸 𑀢𑁂𑀦 𑀤𑀺𑀦𑁆𑀦𑁄𑀯𑀸𑀤𑁂 𑀞𑀢𑁆𑀯𑀸 𑀇𑀫𑀁 𑀲𑀫𑁆𑀧𑀢𑁆𑀢𑀺𑀁 𑀮𑀪𑀺𑀫𑁆𑀳, 𑀕𑀘𑁆𑀙𑀸𑀫 𑀣𑁂𑀭𑀁 𑀆𑀦𑁂𑀢𑁆𑀯𑀸 𑀇𑀫𑀁 𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀺𑀲𑁆𑀲𑀸𑀫𑀸’’𑀢𑀺 𑀤𑀺𑀯𑀸 𑀬𑁂𑀦𑀸𑀬𑀲𑁆𑀫𑀸 𑀅𑀦𑀼𑀭𑀼𑀤𑁆𑀥𑁄 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼. 𑀢𑀻𑀲𑀼 𑀞𑀸𑀦𑁂𑀲𑀽𑀢𑀺 𑀢𑀻𑀲𑀼 𑀓𑀸𑀭𑀡𑁂𑀲𑀼. 𑀞𑀸𑀦𑀲𑁄 𑀧𑀝𑀺𑀮𑀪𑀸𑀫𑀸𑀢𑀺 𑀔𑀡𑁂𑀦𑁂𑀯 𑀮𑀪𑀸𑀫. 𑀲𑀭𑀦𑁆𑀢𑀺 𑀯𑀘𑀦𑀲𑀤𑁆𑀤𑀁 𑀯𑀸 𑀕𑀻𑀢𑀲𑀤𑁆𑀤𑀁 𑀯𑀸 𑀆𑀪𑀭𑀡𑀲𑀤𑁆𑀤𑀁 𑀯𑀸. 𑀧𑀻𑀢𑀸 𑀅𑀲𑁆𑀲𑀽𑀢𑀺𑀆𑀤𑀻𑀦𑀺 𑀦𑀻𑀮𑀸 𑀢𑀸𑀯 𑀚𑀸𑀢𑀸, 𑀧𑀻𑀢𑀸 𑀪𑀯𑀺𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀦𑁆𑀢𑀻𑀢𑀺𑀆𑀤𑀺𑀦𑀸 𑀦𑀬𑁂𑀦 𑀘𑀺𑀦𑁆𑀢𑁂𑀢𑁆𑀯𑀸 𑀯𑀺𑀢𑀓𑁆𑀓𑁂𑀢𑀺. 𑀢𑀸𑀧𑀺 ‘‘𑀇𑀤𑀸𑀦𑀺 𑀅𑀬𑁆𑀬𑁄 𑀅𑀫𑁆𑀳𑀸𑀓𑀁 𑀧𑀻𑀢𑀪𑀸𑀯𑀁 𑀇𑀘𑁆𑀙𑀢𑀺, 𑀇𑀤𑀸𑀦𑀺 𑀮𑁄𑀳𑀺𑀢𑀪𑀸𑀯’’𑀦𑁆𑀢𑀺 𑀢𑀸𑀤𑀺𑀲𑀸𑀯 𑀅𑀳𑁂𑀲𑀼𑀁.

𑀅𑀘𑁆𑀙𑀭𑀁 𑀯𑀸𑀤𑁂𑀲𑀻𑀢𑀺 𑀧𑀸𑀡𑀺𑀢𑀮𑀁 𑀯𑀸𑀤𑁂𑀲𑀺. 𑀧𑀜𑁆𑀘𑀗𑁆𑀕𑀺𑀓𑀲𑁆𑀲𑀸𑀢𑀺 𑀆𑀢𑀢𑀁, 𑀯𑀺𑀢𑀢𑀁, 𑀆𑀢𑀢𑀯𑀺𑀢𑀢𑀁, 𑀖𑀦𑀁, 𑀲𑀼𑀲𑀺𑀭𑀦𑁆𑀢𑀺 𑀇𑀫𑁂𑀳𑀺 𑀧𑀜𑁆𑀘𑀳𑀺 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲. 𑀢𑀢𑁆𑀣 𑀆𑀢𑀢𑀁 𑀦𑀸𑀫 𑀘𑀫𑁆𑀫𑀧𑀭𑀺𑀬𑁄𑀦𑀤𑁆𑀥𑁂𑀲𑀼 𑀪𑁂𑀭𑀺𑀆𑀤𑀻𑀲𑀼 𑀏𑀓𑀢𑀮𑀢𑀽𑀭𑀺𑀬𑀁, 𑀯𑀺𑀢𑀢𑀁 𑀦𑀸𑀫 𑀉𑀪𑀬𑀢𑀮𑀁, 𑀆𑀢𑀢𑀯𑀺𑀢𑀢𑀁 𑀦𑀸𑀫 𑀲𑀩𑁆𑀩𑀲𑁄 𑀧𑀭𑀺𑀬𑁄𑀦𑀤𑁆𑀥𑀁, 𑀲𑀼𑀲𑀺𑀭𑀁 𑀯𑀁𑀲𑀸𑀤𑀺, 𑀖𑀦𑀁 𑀲𑀫𑁆𑀫𑀸𑀤𑀺. 𑀲𑀼𑀯𑀺𑀦𑀻𑀢𑀲𑁆𑀲𑀸𑀢𑀺 𑀆𑀓𑀟𑁆𑀠𑀦𑀲𑀺𑀣𑀺𑀮𑀓𑀭𑀡𑀸𑀤𑀻𑀳𑀺 𑀲𑀫𑀼𑀘𑁆𑀙𑀺𑀢𑀲𑁆𑀲. 𑀲𑀼𑀧𑁆𑀧𑀝𑀺𑀧𑀢𑀸𑀴𑀺𑀢𑀲𑁆𑀲𑀸𑀢𑀺 𑀧𑀫𑀸𑀡𑁂 𑀞𑀺𑀢𑀪𑀸𑀯𑀚𑀸𑀦𑀦𑀢𑁆𑀣𑀁 𑀲𑀼𑀝𑁆𑀞𑀼 𑀧𑀝𑀺𑀧𑀢𑀸𑀴𑀺𑀢𑀲𑁆𑀲. 𑀓𑀼𑀲𑀮𑁂𑀳𑀺 𑀲𑀼𑀲𑀫𑀦𑁆𑀦𑀸𑀳𑀢𑀲𑁆𑀲𑀸𑀢𑀺 𑀬𑁂 𑀯𑀸𑀤𑁂𑀢𑀼𑀁 𑀓𑀼𑀲𑀮𑀸 𑀙𑁂𑀓𑀸, 𑀢𑁂𑀳𑀺 𑀯𑀸𑀤𑀺𑀢𑀲𑁆𑀲. 𑀯𑀕𑁆𑀕𑀽𑀢𑀺 𑀙𑁂𑀓𑁄 𑀲𑀼𑀦𑁆𑀤𑀭𑁄. 𑀭𑀚𑀦𑀻𑀬𑁄𑀢𑀺 𑀭𑀜𑁆𑀚𑁂𑀢𑀼𑀁 𑀲𑀫𑀢𑁆𑀣𑁄. 𑀓𑀫𑀦𑀻𑀬𑁄𑀢𑀺 𑀓𑀸𑀫𑁂𑀢𑀩𑁆𑀩𑀬𑀼𑀢𑁆𑀢𑁄. 𑀔𑀫𑀦𑀻𑀬𑁄𑀢𑀺 𑀯𑀸 𑀧𑀸𑀞𑁄, 𑀤𑀺𑀯𑀲𑀫𑁆𑀧𑀺 𑀲𑀼𑀬𑁆𑀬𑀫𑀸𑀦𑁄 𑀔𑀫𑀢𑁂𑀯, 𑀦 𑀦𑀺𑀩𑁆𑀩𑀺𑀦𑁆𑀤𑀢𑀻𑀢𑀺 𑀅𑀢𑁆𑀣𑁄. 𑀫𑀤𑀦𑀻𑀬𑁄𑀢𑀺 𑀫𑀸𑀦𑀫𑀤𑀧𑀼𑀭𑀺𑀲𑀫𑀤𑀚𑀦𑀦𑁄. 𑀇𑀦𑁆𑀤𑁆𑀭𑀺𑀬𑀸𑀦𑀺 𑀑𑀓𑁆𑀔𑀺𑀧𑀻𑀢𑀺 ‘‘𑀅𑀲𑀸𑀭𑀼𑀧𑁆𑀧𑀁 𑀇𑀫𑀸 𑀤𑁂𑀯𑀢𑀸 𑀓𑀭𑁄𑀦𑁆𑀢𑀻’’𑀢𑀺 𑀇𑀦𑁆𑀤𑁆𑀭𑀺𑀬𑀸𑀦𑀺 𑀳𑁂𑀝𑁆𑀞𑀸 𑀔𑀺𑀧𑀺, 𑀦 𑀅𑀓𑁆𑀔𑀻𑀦𑀺 𑀉𑀫𑁆𑀫𑀻𑀮𑁂𑀢𑁆𑀯𑀸 𑀑𑀮𑁄𑀓𑁂𑀲𑀺. 𑀦 𑀔𑁆𑀯𑀬𑁆𑀬𑁄 𑀅𑀦𑀼𑀭𑀼𑀤𑁆𑀥𑁄 𑀲𑀸𑀤𑀺𑀬𑀢𑀻𑀢𑀺 ‘‘𑀫𑀬𑀁 𑀦𑀘𑁆𑀘𑀸𑀫 𑀕𑀸𑀬𑀸𑀫, 𑀅𑀬𑁆𑀬𑁄 𑀧𑀦 𑀅𑀦𑀼𑀭𑀼𑀤𑁆𑀥𑁄 𑀦 𑀔𑁄 𑀲𑀸𑀤𑀺𑀬𑀢𑀺, 𑀅𑀓𑁆𑀔𑀻𑀦𑀺 𑀉𑀫𑁆𑀫𑀻𑀮𑁂𑀢𑁆𑀯𑀸 𑀦 𑀑𑀮𑁄𑀓𑁂𑀢𑀺, 𑀓𑀺𑀁 𑀫𑀬𑀁 𑀦𑀘𑁆𑀘𑀺𑀢𑁆𑀯𑀸 𑀯𑀸 𑀕𑀸𑀬𑀺𑀢𑁆𑀯𑀸 𑀯𑀸 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀢𑀢𑁆𑀣𑁂𑀯 𑀅𑀦𑁆𑀢𑀭𑀥𑀸𑀬𑀺𑀁𑀲𑀼. 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀻𑀢𑀺 𑀢𑀸𑀲𑀁 𑀤𑁂𑀯𑀢𑀸𑀦𑀁 𑀆𑀦𑀼𑀪𑀸𑀯𑀁 𑀤𑀺𑀲𑁆𑀯𑀸 ‘‘𑀓𑀢𑀺𑀳𑀺 𑀦𑀼 𑀔𑁄 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀫𑀸𑀢𑀼𑀕𑀸𑀫𑁄 𑀫𑀦𑀸𑀧𑀓𑀸𑀬𑀺𑀓𑁂 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀢𑀻’’𑀢𑀺 𑀇𑀫𑀫𑀢𑁆𑀣𑀁 𑀧𑀼𑀘𑁆𑀙𑀺𑀢𑀼𑀁 𑀉𑀧𑀲𑀗𑁆𑀓𑀫𑀺.

𑁯-𑁧𑁦. 𑀇𑀥𑀮𑁄𑀓𑀺𑀓𑀲𑀼𑀢𑁆𑀢𑀤𑁆𑀯𑀬𑀯𑀡𑁆𑀡𑀦𑀸

𑁪𑁯-𑁫𑁦. 𑀦𑀯𑀫𑁂 𑀅𑀬𑀁’𑀲 𑀮𑁄𑀓𑁄 𑀆𑀭𑀤𑁆𑀥𑁄 𑀳𑁄𑀢𑀻𑀢𑀺 𑀅𑀬𑀫𑀲𑁆𑀲 𑀮𑁄𑀓𑁄 𑀇𑀥𑀮𑁄𑀓𑁂 𑀓𑀭𑀡𑀫𑀢𑁆𑀢𑀸𑀬 𑀆𑀭𑀤𑁆𑀥𑀢𑁆𑀢𑀸 𑀧𑀭𑀺𑀧𑀼𑀡𑁆𑀡𑀢𑁆𑀢𑀸 𑀆𑀭𑀤𑁆𑀥𑁄 𑀳𑁄𑀢𑀺 𑀧𑀭𑀺𑀧𑀼𑀡𑁆𑀡𑁄. 𑀲𑁄𑀴𑀲𑀸𑀓𑀸𑀭𑀲𑀫𑁆𑀧𑀦𑁆𑀦𑀸𑀢𑀺 𑀲𑀼𑀢𑁆𑀢𑁂 𑀯𑀼𑀢𑁆𑀢𑁂𑀳𑀺 𑀅𑀝𑁆𑀞𑀳𑀺, 𑀕𑀸𑀣𑀸𑀲𑀼 𑀅𑀝𑁆𑀞𑀳𑀻𑀢𑀺 𑀲𑁄𑀴𑀲𑀳𑀺 𑀆𑀓𑀸𑀭𑁂𑀳𑀺 𑀲𑀫𑀦𑁆𑀦𑀸𑀕𑀢𑀸, 𑀬𑀸𑀦𑀺 𑀯𑀸 𑀅𑀝𑁆𑀞𑀗𑁆𑀕𑀸𑀦𑀺 𑀧𑀭𑀫𑁆𑀧𑀺 𑀢𑁂𑀲𑀼 𑀲𑀫𑀸𑀤𑀧𑁂𑀢𑀻𑀢𑀺 𑀏𑀯𑀫𑁆𑀧𑀺 𑀲𑁄𑀴𑀲𑀸𑀓𑀸𑀭𑀲𑀫𑁆𑀧𑀦𑁆𑀦𑀸𑀢𑀺 𑀏𑀓𑁂. 𑀲𑀤𑁆𑀥𑀸𑀲𑀻𑀮𑀧𑀜𑁆𑀜𑀸 𑀧𑀦𑁂𑀢𑁆𑀣 𑀫𑀺𑀲𑁆𑀲𑀺𑀓𑀸 𑀓𑀣𑀺𑀢𑀸. 𑀤𑀲𑀫𑀁 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀓𑀣𑀺𑀢𑀁. 𑀲𑀩𑁆𑀩𑀲𑀼𑀢𑁆𑀢𑁂𑀲𑀼 𑀧𑀦 𑀬𑀁 𑀦 𑀯𑀼𑀢𑁆𑀢𑀁, 𑀢𑀁 𑀳𑁂𑀝𑁆𑀞𑀸 𑀆𑀕𑀢𑀦𑀬𑀢𑁆𑀢𑀸 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀉𑀧𑁄𑀲𑀣𑀯𑀕𑁆𑀕𑁄 𑀧𑀜𑁆𑀘𑀫𑁄.