𑁪. 𑀤𑀸𑀦𑀯𑀕𑁆𑀕𑁄

𑁧. 𑀧𑀞𑀫𑀤𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁧. 𑀘𑀢𑀼𑀢𑁆𑀣𑀲𑁆𑀲 𑀧𑀞𑀫𑁂 𑀆𑀲𑀚𑁆𑀚 𑀤𑀸𑀦𑀁 𑀤𑁂𑀢𑀻𑀢𑀺 𑀧𑀢𑁆𑀯𑀸 𑀤𑀸𑀦𑀁 𑀤𑁂𑀢𑀺. 𑀆𑀕𑀢𑀁 𑀤𑀺𑀲𑁆𑀯𑀸 𑀢𑀁 𑀫𑀼𑀳𑀼𑀢𑁆𑀢𑀁𑀬𑁂𑀯 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀲𑀓𑁆𑀓𑀸𑀭𑀁 𑀓𑀢𑁆𑀯𑀸 𑀤𑀸𑀦𑀁 𑀤𑁂𑀢𑀺, 𑀤𑀲𑁆𑀲𑀸𑀫𑀻𑀢𑀺 𑀦 𑀓𑀺𑀮𑀫𑁂𑀢𑀺. 𑀪𑀬𑀸𑀢𑀺 ‘‘𑀅𑀬𑀁 𑀅𑀤𑀸𑀬𑀓𑁄 𑀅𑀓𑀸𑀭𑀓𑁄’’𑀢𑀺 𑀕𑀭𑀳𑀪𑀬𑀸, 𑀅𑀧𑀸𑀬𑀪𑀬𑀸 𑀯𑀸. 𑀅𑀤𑀸𑀲𑀺 𑀫𑁂𑀢𑀺 𑀫𑀬𑁆𑀳𑀁 𑀧𑀼𑀩𑁆𑀩𑁂 𑀏𑀲 𑀇𑀤𑀁 𑀦𑀸𑀫 𑀅𑀤𑀸𑀲𑀻𑀢𑀺 𑀤𑁂𑀢𑀺. 𑀤𑀲𑁆𑀲𑀢𑀺 𑀫𑁂𑀢𑀺 𑀅𑀦𑀸𑀕𑀢𑁂 𑀇𑀤𑀁 𑀦𑀸𑀫 𑀤𑀲𑁆𑀲𑀢𑀻𑀢𑀺 𑀤𑁂𑀢𑀺. 𑀲𑀸𑀳𑀼 𑀤𑀸𑀦𑀦𑁆𑀢𑀺 𑀤𑀸𑀦𑀁 𑀦𑀸𑀫 𑀲𑀸𑀥𑀼 𑀲𑀼𑀦𑁆𑀤𑀭𑀁 𑀩𑀼𑀤𑁆𑀥𑀸𑀤𑀻𑀳𑀺 𑀧𑀡𑁆𑀟𑀺𑀢𑁂𑀳𑀺 𑀧𑀲𑀢𑁆𑀣𑀦𑁆𑀢𑀺 𑀤𑁂𑀢𑀺. 𑀘𑀺𑀢𑁆𑀢𑀸𑀮𑀗𑁆𑀓𑀸𑀭𑀘𑀺𑀢𑁆𑀢𑀧𑀭𑀺𑀓𑁆𑀔𑀸𑀭𑀢𑁆𑀣𑀁 𑀤𑀸𑀦𑀁 𑀤𑁂𑀢𑀻𑀢𑀺 𑀲𑀫𑀣𑀯𑀺𑀧𑀲𑁆𑀲𑀦𑀸𑀘𑀺𑀢𑁆𑀢𑀲𑁆𑀲 𑀅𑀮𑀗𑁆𑀓𑀸𑀭𑀢𑁆𑀣𑀜𑁆𑀘𑁂𑀯 𑀧𑀭𑀺𑀓𑁆𑀔𑀸𑀭𑀢𑁆𑀣𑀜𑁆𑀘 𑀤𑁂𑀢𑀺. 𑀤𑀸𑀦𑀜𑁆𑀳𑀺 𑀘𑀺𑀢𑁆𑀢𑀁 𑀫𑀼𑀤𑀼𑀁 𑀓𑀭𑁄𑀢𑀺. 𑀬𑁂𑀦 𑀮𑀤𑁆𑀥𑁄, 𑀲𑁄 ‘‘𑀮𑀤𑁆𑀥𑀁 𑀫𑁂’’𑀢𑀺 𑀫𑀼𑀤𑀼𑀘𑀺𑀢𑁆𑀢𑁄 𑀳𑁄𑀢𑀺. 𑀬𑁂𑀦 𑀤𑀺𑀦𑁆𑀦𑀁, 𑀲𑁄𑀧𑀺 ‘‘𑀤𑀺𑀦𑁆𑀦𑀁 𑀫𑀬𑀸’’𑀢𑀺 𑀫𑀼𑀤𑀼𑀘𑀺𑀢𑁆𑀢𑁄 𑀳𑁄𑀢𑀺. 𑀇𑀢𑀺 𑀉𑀪𑀺𑀦𑁆𑀦𑀁 𑀘𑀺𑀢𑁆𑀢𑀁 𑀫𑀼𑀤𑀼𑀁 𑀓𑀭𑁄𑀢𑀺. 𑀢𑁂𑀦𑁂𑀯 ‘‘𑀅𑀤𑀦𑁆𑀢𑀤𑀫𑀦’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀬𑀣𑀸𑀳 𑁋

‘‘𑀅𑀤𑀦𑁆𑀢𑀤𑀫𑀦𑀁 𑀤𑀸𑀦𑀁, 𑀅𑀤𑀸𑀦𑀁 𑀤𑀦𑁆𑀢𑀤𑀽𑀲𑀓𑀁;

𑀤𑀸𑀦𑁂𑀦 𑀧𑀺𑀬𑀯𑀸𑀘𑀸𑀬, 𑀉𑀦𑁆𑀦𑀫𑀦𑁆𑀢𑀺 𑀦𑀫𑀦𑁆𑀢𑀺 𑀘𑀸’’𑀢𑀺.

𑀇𑀫𑁂𑀲𑀼 𑀧𑀦 𑀅𑀝𑁆𑀞𑀲𑀼 𑀤𑀸𑀦𑁂𑀲𑀼 𑀘𑀺𑀢𑁆𑀢𑀸𑀮𑀗𑁆𑀓𑀸𑀭𑀤𑀸𑀦𑀫𑁂𑀯 𑀉𑀢𑁆𑀢𑀫𑀦𑁆𑀢𑀺.

𑁨. 𑀤𑀼𑀢𑀺𑀬𑀤𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁨. 𑀤𑀼𑀢𑀺𑀬𑁂 𑀲𑀤𑁆𑀥𑀸𑀢𑀺 𑀬𑀸𑀬 𑀲𑀤𑁆𑀥𑀸𑀬 𑀤𑀸𑀦𑀁 𑀤𑁂𑀢𑀺, 𑀲𑀸 𑀲𑀤𑁆𑀥𑀸. 𑀳𑀺𑀭𑀺𑀬𑀦𑁆𑀢𑀺 𑀬𑀸𑀬 𑀳𑀺𑀭𑀺𑀬𑀸 𑀤𑀸𑀦𑀁 𑀤𑁂𑀢𑀺, 𑀲𑀸𑀯 𑀅𑀥𑀺𑀧𑁆𑀧𑁂𑀢𑀸. 𑀓𑀼𑀲𑀮𑀜𑁆𑀘 𑀤𑀸𑀦𑀦𑁆𑀢𑀺 𑀅𑀦𑀯𑀚𑁆𑀚𑀜𑁆𑀘 𑀤𑀸𑀦𑀁. 𑀤𑀺𑀯𑀺𑀬𑀦𑁆𑀢𑀺 𑀤𑀺𑀯𑀗𑁆𑀕𑀫𑀁.

𑁩. 𑀤𑀸𑀦𑀯𑀢𑁆𑀣𑀼𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁩. 𑀢𑀢𑀺𑀬𑁂 𑀤𑀸𑀦𑀯𑀢𑁆𑀣𑀽𑀦𑀻𑀢𑀺 𑀤𑀸𑀦𑀓𑀸𑀭𑀡𑀸𑀦𑀺. 𑀙𑀦𑁆𑀤𑀸 𑀤𑀸𑀦𑀁 𑀤𑁂𑀢𑀻𑀢𑀺 𑀧𑁂𑀫𑁂𑀦 𑀤𑀸𑀦𑀁 𑀤𑁂𑀢𑀺. 𑀤𑁄𑀲𑀸𑀢𑀺 𑀤𑁄𑀲𑁂𑀦 𑀓𑀼𑀤𑁆𑀥𑁄 𑀳𑀼𑀢𑁆𑀯𑀸 𑀬𑀁 𑀅𑀢𑁆𑀣𑀺, 𑀢𑀁 𑀯𑁂𑀕𑁂𑀦 𑀕𑀡𑁆𑀳𑀺𑀢𑁆𑀯𑀸 𑀤𑁂𑀢𑀺. 𑀫𑁄𑀳𑀸𑀢𑀺 𑀫𑁄𑀳𑁂𑀦 𑀫𑀽𑀴𑁆𑀳𑁄 𑀤𑁂𑀢𑀺. 𑀪𑀬𑀸𑀢𑀺 𑀕𑀭𑀳𑀪𑀬𑁂𑀦 𑀯𑀸 𑀅𑀧𑀸𑀬𑀪𑀬𑁂𑀦 𑀯𑀸, 𑀢𑀲𑁆𑀲 𑀢𑀲𑁆𑀲𑁂𑀯 𑀯𑀸 𑀧𑀦 𑀪𑀬𑁂𑀦 𑀤𑁂𑀢𑀺. 𑀓𑀼𑀮𑀯𑀁𑀲𑀦𑁆𑀢𑀺 𑀓𑀼𑀮𑀧𑀯𑁂𑀡𑀺𑀁.

𑁪. 𑀔𑁂𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁪. 𑀘𑀢𑀼𑀢𑁆𑀣𑁂 𑀦 𑀫𑀳𑀧𑁆𑀨𑀮𑀁 𑀳𑁄𑀢𑀻𑀢𑀺 𑀥𑀜𑁆𑀜𑀨𑀮𑁂𑀦 𑀫𑀳𑀧𑁆𑀨𑀮𑀁 𑀦 𑀳𑁄𑀢𑀺. 𑀦 𑀫𑀳𑀲𑁆𑀲𑀸𑀤𑀦𑁆𑀢𑀺 𑀬𑀫𑁆𑀧𑀺𑀲𑁆𑀲 𑀨𑀮𑀁 𑀳𑁄𑀢𑀺, 𑀢𑀲𑁆𑀲 𑀅𑀲𑁆𑀲𑀸𑀤𑁄 𑀦 𑀫𑀳𑀸 𑀳𑁄𑀢𑀺 𑀫𑀦𑁆𑀤𑀲𑁆𑀲𑀸𑀤𑀁 𑀦 𑀫𑀥𑀼𑀭𑀁. 𑀦 𑀨𑀸𑀢𑀺𑀲𑁂𑀬𑁆𑀬𑀦𑁆𑀢𑀺 𑀲𑁂𑀬𑁆𑀬𑀸𑀧𑀺𑀲𑁆𑀲 𑀦 𑀳𑁄𑀢𑀺 𑀯𑀼𑀟𑁆𑀠𑀺, 𑀢𑀲𑁆𑀲 𑀫𑀳𑀦𑁆𑀢𑀁 𑀯𑀻𑀳𑀺𑀣𑀫𑁆𑀪𑀲𑀦𑁆𑀦𑀺𑀯𑁂𑀲𑀁 𑀦 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀉𑀦𑁆𑀦𑀸𑀫𑀦𑀺𑀦𑁆𑀦𑀸𑀫𑀻𑀢𑀺 𑀣𑀮𑀦𑀺𑀦𑁆𑀦𑀯𑀲𑁂𑀦 𑀯𑀺𑀲𑀫𑀢𑀮𑀁. 𑀢𑀢𑁆𑀣 𑀣𑀮𑁂 𑀉𑀤𑀓𑀁 𑀦 𑀲𑀡𑁆𑀞𑀸𑀢𑀺, 𑀦𑀺𑀦𑁆𑀦𑁂 𑀅𑀢𑀺𑀩𑀳𑀼 𑀢𑀺𑀝𑁆𑀞𑀢𑀺. 𑀧𑀸𑀲𑀸𑀡𑀲𑀓𑁆𑀔𑀭𑀺𑀓𑀦𑁆𑀢𑀺 𑀧𑀢𑁆𑀣𑀭𑀺𑀢𑁆𑀯𑀸 𑀞𑀺𑀢𑀧𑀺𑀝𑁆𑀞𑀺𑀧𑀸𑀲𑀸𑀡𑁂𑀳𑀺 𑀘 𑀔𑀼𑀤𑁆𑀤𑀓𑀧𑀸𑀲𑀸𑀡𑁂𑀳𑀺 𑀘 𑀲𑀓𑁆𑀔𑀭𑀸𑀳𑀺 𑀘 𑀲𑀫𑀦𑁆𑀦𑀸𑀕𑀢𑀁. 𑀊𑀲𑀭𑀦𑁆𑀢𑀺 𑀉𑀩𑁆𑀪𑀺𑀦𑁆𑀦𑀮𑁄𑀡𑀁. 𑀦 𑀘 𑀕𑀫𑁆𑀪𑀻𑀭𑀲𑀺𑀢𑀦𑁆𑀢𑀺 𑀣𑀤𑁆𑀥𑀪𑀽𑀫𑀺𑀢𑀸𑀬 𑀕𑀫𑁆𑀪𑀻𑀭𑀸𑀦𑀼𑀕𑀢𑀁, 𑀦𑀗𑁆𑀕𑀮𑀫𑀕𑁆𑀕𑀁 𑀓𑀢𑁆𑀯𑀸 𑀓𑀲𑀺𑀢𑀼𑀁 𑀦 𑀲𑀓𑁆𑀓𑀸 𑀳𑁄𑀢𑀺, 𑀉𑀢𑁆𑀢𑀸𑀦𑀦𑀗𑁆𑀕𑀮𑀫𑀕𑁆𑀕𑀫𑁂𑀯 𑀳𑁄𑀢𑀺. 𑀦 𑀆𑀬𑀲𑀫𑁆𑀧𑀦𑁆𑀦𑀦𑁆𑀢𑀺 𑀦 𑀉𑀤𑀓𑀸𑀕𑀫𑀦𑀲𑀫𑁆𑀧𑀦𑁆𑀦𑀁. 𑀦 𑀅𑀧𑀸𑀬𑀲𑀫𑁆𑀧𑀦𑁆𑀦𑀦𑁆𑀢𑀺 𑀧𑀘𑁆𑀙𑀸𑀪𑀸𑀕𑁂 𑀉𑀤𑀓𑀦𑀺𑀕𑁆𑀕𑀫𑀦𑀫𑀕𑁆𑀕𑀲𑀫𑁆𑀧𑀦𑁆𑀦𑀁 𑀦 𑀳𑁄𑀢𑀺. 𑀦 𑀫𑀸𑀢𑀺𑀓𑀸𑀲𑀫𑁆𑀧𑀦𑁆𑀦𑀦𑁆𑀢𑀺 𑀦 𑀔𑀼𑀤𑁆𑀤𑀓𑀫𑀳𑀦𑁆𑀢𑀻𑀳𑀺 𑀉𑀤𑀓𑀫𑀸𑀢𑀺𑀓𑀸𑀳𑀺 𑀲𑀫𑁆𑀧𑀦𑁆𑀦𑀁 𑀳𑁄𑀢𑀺. 𑀦 𑀫𑀭𑀺𑀬𑀸𑀤𑀲𑀫𑁆𑀧𑀦𑁆𑀦𑀦𑁆𑀢𑀺 𑀦 𑀓𑁂𑀤𑀸𑀭𑀫𑀭𑀺𑀬𑀸𑀤𑀸𑀳𑀺 𑀲𑀫𑁆𑀧𑀦𑁆𑀦𑀁. 𑀦 𑀫𑀳𑀧𑁆𑀨𑀮𑀦𑁆𑀢𑀺𑀆𑀤𑀻𑀦𑀺 𑀲𑀩𑁆𑀩𑀸𑀦𑀺 𑀯𑀺𑀧𑀸𑀓𑀨𑀮𑀯𑀲𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸𑀦𑀺.

𑀲𑀫𑁆𑀧𑀦𑁆𑀦𑁂𑀢𑀺 𑀧𑀭𑀺𑀧𑀼𑀡𑁆𑀡𑁂 𑀲𑀫𑁆𑀧𑀢𑁆𑀢𑀺𑀬𑀼𑀢𑁆𑀢𑁂. 𑀧𑀯𑀼𑀢𑁆𑀢𑀸 𑀩𑀻𑀚𑀲𑀫𑁆𑀧𑀤𑀸𑀢𑀺 𑀲𑀫𑁆𑀧𑀦𑁆𑀦𑀁 𑀩𑀻𑀚𑀁 𑀭𑁄𑀧𑀺𑀢𑀁. 𑀤𑁂𑀯𑁂 𑀲𑀫𑁆𑀧𑀸𑀤𑀬𑀦𑁆𑀢𑀫𑁆𑀳𑀻𑀢𑀺 𑀤𑁂𑀯𑁂 𑀲𑀫𑁆𑀫𑀸 𑀯𑀲𑁆𑀲𑀦𑁆𑀢𑁂. 𑀅𑀦𑀻𑀢𑀺𑀲𑀫𑁆𑀧𑀤𑀸 𑀳𑁄𑀢𑀻𑀢𑀺 𑀓𑀻𑀝𑀓𑀺𑀫𑀺𑀆𑀤𑀺𑀧𑀸𑀡𑀓𑀈𑀢𑀺𑀬𑀸 𑀅𑀪𑀸𑀯𑁄 𑀏𑀓𑀸 𑀲𑀫𑁆𑀧𑀤𑀸 𑀳𑁄𑀢𑀺. 𑀯𑀺𑀭𑀽𑀴𑁆𑀳𑀻𑀢𑀺 𑀯𑀟𑁆𑀠𑀺 𑀤𑀼𑀢𑀺𑀬𑀸 𑀲𑀫𑁆𑀧𑀤𑀸 𑀳𑁄𑀢𑀺. 𑀯𑁂𑀧𑀼𑀮𑁆𑀮𑀦𑁆𑀢𑀺 𑀯𑀺𑀧𑀼𑀮𑀪𑀸𑀯𑁄 𑀢𑀢𑀺𑀬𑀸 𑀲𑀫𑁆𑀧𑀤𑀸 𑀳𑁄𑀢𑀺. 𑀨𑀮𑀦𑁆𑀢𑀺 𑀧𑀭𑀺𑀧𑀼𑀡𑁆𑀡𑀨𑀮𑀁 𑀘𑀢𑀼𑀢𑁆𑀣𑀻 𑀲𑀫𑁆𑀧𑀤𑀸 𑀳𑁄𑀢𑀺. 𑀲𑀫𑁆𑀧𑀦𑁆𑀦𑀲𑀻𑀮𑁂𑀲𑀽𑀢𑀺 𑀧𑀭𑀺𑀧𑀼𑀡𑁆𑀡𑀲𑀻𑀮𑁂𑀲𑀼. 𑀪𑁄𑀚𑀦𑀲𑀫𑁆𑀧𑀤𑀸𑀢𑀺 𑀲𑀫𑁆𑀧𑀦𑁆𑀦𑀁 𑀯𑀺𑀯𑀺𑀥𑀪𑁄𑀚𑀦𑀁. 𑀲𑀫𑁆𑀧𑀤𑀸𑀦𑀦𑁆𑀢𑀺 𑀢𑀺𑀯𑀺𑀥𑀁 𑀓𑀼𑀲𑀮𑀲𑀫𑁆𑀧𑀤𑀁. 𑀉𑀧𑀦𑁂𑀢𑀻𑀢𑀺 𑀲𑀸 𑀪𑁄𑀚𑀦𑀲𑀫𑁆𑀧𑀤𑀸 𑀉𑀧𑀦𑀬𑀢𑀺. 𑀓𑀲𑁆𑀫𑀸? 𑀲𑀫𑁆𑀧𑀦𑁆𑀦𑀜𑁆𑀳𑀺𑀲𑁆𑀲 𑀢𑀁 𑀓𑀢𑀁, 𑀬𑀲𑁆𑀫𑀸𑀲𑁆𑀲 𑀢𑀁 𑀓𑀢𑀓𑀫𑁆𑀫𑀁 𑀲𑀫𑁆𑀧𑀦𑁆𑀦𑀁 𑀧𑀭𑀺𑀧𑀼𑀡𑁆𑀡𑀦𑁆𑀢𑀺 𑀅𑀢𑁆𑀣𑁄. 𑀲𑀫𑁆𑀧𑀦𑁆𑀦𑀢𑁆𑀣𑀽𑀥𑀸𑀢𑀺 𑀲𑀫𑁆𑀧𑀦𑁆𑀦𑁄 𑀅𑀢𑁆𑀣𑀼 𑀇𑀥. 𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀦𑁆𑀦𑁄𑀢𑀺 𑀢𑀻𑀳𑀺 𑀯𑀺𑀚𑁆𑀚𑀸𑀳𑀺 𑀘 𑀧𑀜𑁆𑀘𑀤𑀲𑀳𑀺 𑀘𑀭𑀡𑀥𑀫𑁆𑀫𑁂𑀳𑀺 𑀘 𑀲𑀫𑀦𑁆𑀦𑀸𑀕𑀢𑁄. 𑀮𑀤𑁆𑀥𑀸𑀢𑀺 𑀏𑀯𑀭𑀽𑀧𑁄 𑀧𑀼𑀕𑁆𑀕𑀮𑁄 𑀘𑀺𑀢𑁆𑀢𑀲𑁆𑀲 𑀲𑀫𑁆𑀧𑀤𑀁 𑀅𑀯𑁂𑀓𑀮𑁆𑀮𑀧𑀭𑀺𑀧𑀼𑀡𑁆𑀡𑀪𑀸𑀯𑀁 𑀮𑀪𑀺𑀢𑁆𑀯𑀸. 𑀓𑀭𑁄𑀢𑀺 𑀓𑀫𑁆𑀫𑀲𑀫𑁆𑀧𑀤𑀦𑁆𑀢𑀺 𑀧𑀭𑀺𑀧𑀼𑀡𑁆𑀡𑀓𑀫𑁆𑀫𑀁 𑀓𑀭𑁄𑀢𑀺. 𑀮𑀪𑀢𑀺 𑀘𑀢𑁆𑀣𑀲𑀫𑁆𑀧𑀤𑀦𑁆𑀢𑀺 𑀅𑀢𑁆𑀣𑀜𑁆𑀘 𑀧𑀭𑀺𑀧𑀼𑀡𑁆𑀡𑀁 𑀮𑀪𑀢𑀺. 𑀤𑀺𑀝𑁆𑀞𑀺𑀲𑀫𑁆𑀧𑀤𑀦𑁆𑀢𑀺 𑀯𑀺𑀧𑀲𑁆𑀲𑀦𑀸𑀤𑀺𑀝𑁆𑀞𑀺𑀁. 𑀫𑀕𑁆𑀕𑀲𑀫𑁆𑀧𑀤𑀦𑁆𑀢𑀺 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀁. 𑀬𑀸𑀢𑀺 𑀲𑀫𑁆𑀧𑀦𑁆𑀦𑀫𑀸𑀦𑀲𑁄𑀢𑀺 𑀧𑀭𑀺𑀧𑀼𑀡𑁆𑀡𑀘𑀺𑀢𑁆𑀢𑁄 𑀳𑀼𑀢𑁆𑀯𑀸 𑀅𑀭𑀳𑀢𑁆𑀢𑀁 𑀬𑀸𑀢𑀺. 𑀲𑀸 𑀳𑁄𑀢𑀺 𑀲𑀩𑁆𑀩𑀲𑀫𑁆𑀧𑀤𑀸𑀢𑀺 𑀲𑀸 𑀲𑀩𑁆𑀩𑀤𑀼𑀓𑁆𑀔𑁂𑀳𑀺 𑀯𑀺𑀫𑀼𑀢𑁆𑀢𑀺 𑀲𑀩𑁆𑀩𑀲𑀫𑁆𑀧𑀤𑀸 𑀦𑀸𑀫 𑀳𑁄𑀢𑀻𑀢𑀺.

𑁫. 𑀤𑀸𑀦𑀽𑀧𑀧𑀢𑁆𑀢𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁫. 𑀧𑀜𑁆𑀘𑀫𑁂 𑀤𑀸𑀦𑀽𑀧𑀧𑀢𑁆𑀢𑀺𑀬𑁄𑀢𑀺 𑀤𑀸𑀦𑀧𑀘𑁆𑀘𑀬𑀸 𑀉𑀧𑀧𑀢𑁆𑀢𑀺𑀬𑁄. 𑀤𑀳𑀢𑀻𑀢𑀺 𑀞𑀧𑁂𑀢𑀺. 𑀅𑀥𑀺𑀝𑁆𑀞𑀸𑀢𑀻𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀪𑀸𑀯𑁂𑀢𑀻𑀢𑀺 𑀯𑀟𑁆𑀠𑁂𑀢𑀺. 𑀳𑀻𑀦𑁂 𑀯𑀺𑀫𑀼𑀢𑁆𑀢𑀦𑁆𑀢𑀺 𑀳𑀻𑀦𑁂𑀲𑀼 𑀧𑀜𑁆𑀘𑀲𑀼 𑀓𑀸𑀫𑀕𑀼𑀡𑁂𑀲𑀼 𑀯𑀺𑀫𑀼𑀢𑁆𑀢𑀁. 𑀉𑀢𑁆𑀢𑀭𑀺 𑀅𑀪𑀸𑀯𑀺𑀢𑀦𑁆𑀢𑀺 𑀢𑀢𑁄 𑀉𑀢𑁆𑀢𑀭𑀺𑀫𑀕𑁆𑀕𑀨𑀮𑀢𑁆𑀣𑀸𑀬 𑀅𑀪𑀸𑀯𑀺𑀢𑀁. 𑀢𑀢𑁆𑀭𑀽𑀧𑀧𑀢𑁆𑀢𑀺𑀬𑀸 𑀲𑀁𑀯𑀢𑁆𑀢𑀢𑀻𑀢𑀺 𑀬𑀁 𑀞𑀸𑀦𑀁 𑀧𑀢𑁆𑀣𑁂𑀢𑁆𑀯𑀸 𑀓𑀼𑀲𑀮𑀁 𑀓𑀢𑀁, 𑀢𑀢𑁆𑀣 𑀦𑀺𑀩𑁆𑀩𑀢𑁆𑀢𑀦𑀢𑁆𑀣𑀸𑀬 𑀲𑀁𑀯𑀢𑁆𑀢𑀢𑀺. 𑀯𑀻𑀢𑀭𑀸𑀕𑀲𑁆𑀲𑀸𑀢𑀺 𑀫𑀕𑁆𑀕𑁂𑀦 𑀯𑀸 𑀲𑀫𑀼𑀘𑁆𑀙𑀺𑀦𑁆𑀦𑀭𑀸𑀕𑀲𑁆𑀲 𑀲𑀫𑀸𑀧𑀢𑁆𑀢𑀺𑀬𑀸 𑀯𑀸 𑀯𑀺𑀓𑁆𑀔𑀫𑁆𑀪𑀺𑀢𑀭𑀸𑀕𑀲𑁆𑀲. 𑀤𑀸𑀦𑀫𑀢𑁆𑀢𑁂𑀦𑁂𑀯 𑀳𑀺 𑀩𑁆𑀭𑀳𑁆𑀫𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺𑀢𑀼𑀁 𑀦 𑀲𑀓𑁆𑀓𑀸, 𑀤𑀸𑀦𑀁 𑀧𑀦 𑀲𑀫𑀸𑀥𑀺𑀯𑀺𑀧𑀲𑁆𑀲𑀦𑀸𑀘𑀺𑀢𑁆𑀢𑀲𑁆𑀲 𑀅𑀮𑀗𑁆𑀓𑀸𑀭𑀧𑀭𑀺𑀯𑀸𑀭𑀁 𑀳𑁄𑀢𑀺. 𑀢𑀢𑁄 𑀤𑀸𑀦𑁂𑀦 𑀫𑀼𑀤𑀼𑀘𑀺𑀢𑁆𑀢𑁄 𑀩𑁆𑀭𑀳𑁆𑀫𑀯𑀺𑀳𑀸𑀭𑁂 𑀪𑀸𑀯𑁂𑀢𑁆𑀯𑀸 𑀩𑁆𑀭𑀳𑁆𑀫𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀯𑀻𑀢𑀭𑀸𑀕𑀲𑁆𑀲 𑀦𑁄 𑀲𑀭𑀸𑀕𑀲𑁆𑀲𑀸’’𑀢𑀺.

𑁬. 𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀼𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁬. 𑀙𑀝𑁆𑀞𑁂 𑀧𑀼𑀜𑁆𑀜𑀓𑀺𑀭𑀺𑀬𑀸𑀦𑀺 𑀘 𑀢𑀸𑀦𑀺 𑀢𑁂𑀲𑀁 𑀢𑁂𑀲𑀁 𑀆𑀦𑀺𑀲𑀁𑀲𑀸𑀦𑀁 𑀯𑀢𑁆𑀣𑀽𑀦𑀺 𑀘𑀸𑀢𑀺 𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀽𑀦𑀺. 𑀤𑀸𑀦𑀸𑀤𑀻𑀦𑀜𑁆𑀳𑀺 𑀮𑀓𑁆𑀔𑀡𑁂 𑀘𑀺𑀢𑁆𑀢𑀁 𑀞𑀧𑁂𑀢𑁆𑀯𑀸 ‘‘𑀏𑀯𑀭𑀽𑀧𑀁 𑀦𑀸𑀫 𑀅𑀫𑁆𑀳𑁂𑀳𑀺 𑀤𑀸𑀦𑀁 𑀤𑀸𑀢𑀩𑁆𑀩𑀁, 𑀲𑀻𑀮𑀁 𑀭𑀓𑁆𑀔𑀺𑀢𑀩𑁆𑀩𑀁, 𑀪𑀸𑀯𑀦𑀸 𑀪𑀸𑀯𑁂𑀢𑀩𑁆𑀩𑀸’’𑀢𑀺 𑀲𑀢𑁆𑀢𑀸 𑀧𑀼𑀜𑁆𑀜𑀸𑀦𑀺 𑀓𑀭𑁄𑀦𑁆𑀢𑀺. 𑀤𑀸𑀦𑀫𑁂𑀯 𑀤𑀸𑀦𑀫𑀬𑀁, 𑀤𑀸𑀦𑀘𑁂𑀢𑀦𑀸𑀲𑀼 𑀯𑀸 𑀧𑀼𑀭𑀺𑀫𑀘𑁂𑀢𑀦𑀸𑀢𑁄 𑀦𑀺𑀧𑁆𑀨𑀦𑁆𑀦𑀸 𑀲𑀦𑁆𑀦𑀺𑀝𑁆𑀞𑀸𑀧𑀓𑀘𑁂𑀢𑀦𑀸 𑀤𑀸𑀦𑀫𑀬𑀁 𑀲𑀻𑀮𑀸𑀤𑀻𑀳𑀺 𑀲𑀻𑀮𑀫𑀬𑀸𑀤𑀻𑀦𑀺 𑀯𑀺𑀬. 𑀲𑁂𑀲𑀤𑁆𑀯𑀬𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀧𑀭𑀺𑀢𑁆𑀢𑀁 𑀓𑀢𑀁 𑀳𑁄𑀢𑀻𑀢𑀺 𑀣𑁄𑀓𑀁 𑀫𑀦𑁆𑀤𑀁 𑀓𑀢𑀁 𑀳𑁄𑀢𑀺. 𑀦𑀸𑀪𑀺𑀲𑀫𑁆𑀪𑁄𑀢𑀻𑀢𑀺 𑀦 𑀦𑀺𑀧𑁆𑀨𑀚𑁆𑀚𑀢𑀺. 𑀅𑀓𑀢𑀁 𑀳𑁄𑀢𑀻𑀢𑀺 𑀪𑀸𑀯𑀦𑀸𑀬𑀬𑁄𑀕𑁄𑀬𑁂𑀯 𑀅𑀦𑀸𑀭𑀤𑁆𑀥𑁄 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀫𑀦𑀼𑀲𑁆𑀲𑀤𑁄𑀪𑀕𑁆𑀬𑀦𑁆𑀢𑀺 𑀫𑀦𑀼𑀲𑁆𑀲𑁂𑀲𑀼 𑀲𑀫𑁆𑀧𑀢𑁆𑀢𑀺𑀭𑀳𑀺𑀢𑀁 𑀧𑀜𑁆𑀘𑀯𑀺𑀥𑀁 𑀦𑀻𑀘𑀓𑀼𑀮𑀁. 𑀉𑀧𑀧𑀚𑁆𑀚𑀢𑀻𑀢𑀺 𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀉𑀧𑀕𑀘𑁆𑀙𑀢𑀺, 𑀢𑀢𑁆𑀣 𑀦𑀺𑀩𑁆𑀩𑀢𑁆𑀢𑀢𑀻𑀢𑀺 𑀅𑀢𑁆𑀣𑁄. 𑀫𑀢𑁆𑀢𑀲𑁄 𑀓𑀢𑀦𑁆𑀢𑀺 𑀧𑀫𑀸𑀡𑁂𑀦 𑀓𑀢𑀁, 𑀣𑁄𑀓𑀁 𑀦 𑀩𑀳𑀼. 𑀫𑀦𑀼𑀲𑁆𑀲𑀲𑁄𑀪𑀕𑁆𑀬𑀦𑁆𑀢𑀺 𑀫𑀦𑀼𑀲𑁆𑀲𑁂𑀲𑀼 𑀲𑀼𑀪𑀕𑀪𑀸𑀯𑀁 𑀢𑀺𑀯𑀺𑀥𑀓𑀼𑀮𑀲𑀫𑁆𑀧𑀢𑁆𑀢𑀺𑀁. 𑀅𑀥𑀺𑀫𑀢𑁆𑀢𑀦𑁆𑀢𑀺 𑀅𑀥𑀺𑀓𑀧𑁆𑀧𑀫𑀸𑀡𑀁 𑀩𑀮𑀯𑀁 𑀯𑀸. 𑀅𑀥𑀺𑀕𑀡𑁆𑀳𑀦𑁆𑀢𑀻𑀢𑀺 𑀅𑀪𑀺𑀪𑀯𑀺𑀢𑁆𑀯𑀸 𑀕𑀡𑁆𑀳𑀦𑁆𑀢𑀺, 𑀯𑀺𑀲𑀺𑀝𑁆𑀞𑀢𑀭𑀸 𑀚𑁂𑀝𑁆𑀞𑀓𑀸 𑀳𑁄𑀦𑁆𑀢𑀻𑀢𑀺 𑀅𑀢𑁆𑀣𑁄.

𑁭. 𑀲𑀧𑁆𑀧𑀼𑀭𑀺𑀲𑀤𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁭. 𑀲𑀢𑁆𑀢𑀫𑁂 𑀲𑀼𑀘𑀺𑀦𑁆𑀢𑀺 𑀧𑀭𑀺𑀲𑀼𑀤𑁆𑀥𑀁 𑀯𑀡𑁆𑀡𑀲𑀫𑁆𑀧𑀦𑁆𑀦𑀁 𑀤𑁂𑀢𑀺. 𑀧𑀡𑀻𑀢𑀦𑁆𑀢𑀺 𑀭𑀲𑀽𑀧𑀧𑀦𑁆𑀦𑀁. 𑀓𑀸𑀮𑁂𑀦𑀸𑀢𑀺 𑀬𑀼𑀢𑁆𑀢𑀧𑀢𑁆𑀢𑀓𑀸𑀮𑁂𑀦. 𑀓𑀧𑁆𑀧𑀺𑀬𑀦𑁆𑀢𑀺 𑀬𑀁 𑀓𑀧𑁆𑀧𑀺𑀬𑀁, 𑀢𑀁 𑀤𑁂𑀢𑀺. 𑀯𑀺𑀘𑁂𑀬𑁆𑀬 𑀤𑁂𑀢𑀻𑀢𑀺 ‘‘𑀇𑀫𑀲𑁆𑀲 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮𑀁 𑀪𑀯𑀺𑀲𑁆𑀲𑀢𑀺, 𑀇𑀫𑀲𑁆𑀲 𑀦 𑀫𑀳𑀧𑁆𑀨𑀮’’𑀦𑁆𑀢𑀺 𑀏𑀯𑀁 𑀧𑀝𑀺𑀕𑁆𑀕𑀸𑀳𑀓𑀧𑀭𑀺𑀬𑁂𑀲𑀦𑀯𑀲𑁂𑀦 𑀤𑀸𑀦𑀁 𑀯𑀸 𑀧𑀡𑀺𑀥𑀸𑀬𑀯𑀲𑁂𑀦 𑀤𑀸𑀦𑀁 𑀯𑀸 𑀯𑀺𑀘𑀺𑀦𑀺𑀢𑁆𑀯𑀸 𑀤𑁂𑀢𑀺.

𑁮. 𑀲𑀧𑁆𑀧𑀼𑀭𑀺𑀲𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁮. 𑀅𑀝𑁆𑀞𑀫𑁂 𑀅𑀢𑁆𑀣𑀸𑀬𑀸𑀢𑀺 𑀅𑀢𑁆𑀣𑀢𑁆𑀣𑀸𑀬. 𑀳𑀺𑀢𑀸𑀬 𑀲𑀼𑀔𑀸𑀬𑀸𑀢𑀺 𑀳𑀺𑀢𑀢𑁆𑀣𑀸𑀬 𑀲𑀼𑀔𑀢𑁆𑀣𑀸𑀬. 𑀧𑀼𑀩𑁆𑀩𑀧𑁂𑀢𑀸𑀦𑀦𑁆𑀢𑀺 𑀧𑀭𑀮𑁄𑀓𑀕𑀢𑀸𑀦𑀁 𑀜𑀸𑀢𑀻𑀦𑀁. 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀅𑀦𑀼𑀧𑁆𑀧𑀦𑁆𑀦𑁂 𑀩𑀼𑀤𑁆𑀥𑁂 𑀘𑀓𑁆𑀓𑀯𑀢𑁆𑀢𑀺𑀭𑀸𑀚𑀸𑀦𑁄 𑀩𑁄𑀥𑀺𑀲𑀢𑁆𑀢𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀮𑀩𑁆𑀪𑀦𑁆𑀢𑀺, 𑀩𑀼𑀤𑁆𑀥𑀓𑀸𑀮𑁂 𑀩𑀼𑀤𑁆𑀥𑀸 𑀘𑁂𑀯 𑀩𑀼𑀤𑁆𑀥𑀲𑀸𑀯𑀓𑀸 𑀘. 𑀬𑀣𑀸𑀯𑀼𑀢𑁆𑀢𑀸𑀦𑀜𑁆𑀳𑀺 𑀏𑀢𑁂𑀲𑀁 𑀅𑀢𑁆𑀣𑀸𑀬 𑀳𑀺𑀢𑀸𑀬 𑀲𑀼𑀔𑀸𑀬 𑀲𑀁𑀯𑀢𑁆𑀢𑀦𑁆𑀢𑀺. 𑀩𑀳𑀼𑀦𑁆𑀦𑀁 𑀯𑀢 𑀅𑀢𑁆𑀣𑀸𑀬, 𑀲𑀧𑁆𑀧𑀜𑁆𑀜𑁄 𑀖𑀭𑀫𑀸𑀯𑀲𑀦𑁆𑀢𑀺 𑀲𑀧𑁆𑀧𑀜𑁆𑀜𑁄 𑀖𑀭𑁂 𑀯𑀲𑀦𑁆𑀢𑁄 𑀩𑀳𑀽𑀦𑀁 𑀯𑀢 𑀅𑀢𑁆𑀣𑀸𑀬 𑀳𑁄𑀢𑀺. 𑀧𑀼𑀩𑁆𑀩𑁂𑀢𑀺 𑀧𑀞𑀫𑁂𑀯. 𑀧𑀼𑀩𑁆𑀩𑁂𑀓𑀢𑀫𑀦𑀼𑀲𑁆𑀲𑀭𑀦𑁆𑀢𑀺 𑀫𑀸𑀢𑀸𑀧𑀺𑀢𑀽𑀦𑀁 𑀧𑀼𑀩𑁆𑀩𑀓𑀸𑀭𑀕𑀼𑀡𑁂 𑀅𑀦𑀼𑀲𑁆𑀲𑀭𑀦𑁆𑀢𑁄. 𑀲𑀳𑀥𑀫𑁆𑀫𑁂𑀦𑀸𑀢𑀺 𑀲𑀓𑀸𑀭𑀡𑁂𑀦 𑀧𑀘𑁆𑀘𑀬𑀧𑀽𑀚𑀦𑁂𑀦 𑀧𑀽𑀚𑁂𑀢𑀺. 𑀅𑀧𑀘𑁂 𑀩𑁆𑀭𑀳𑁆𑀫𑀘𑀸𑀭𑀬𑁄𑀢𑀺 𑀩𑁆𑀭𑀳𑁆𑀫𑀘𑀸𑀭𑀺𑀦𑁄 𑀅𑀧𑀘𑀬𑀢𑀺, 𑀦𑀻𑀘𑀯𑀼𑀢𑁆𑀢𑀺𑀢𑀁 𑀦𑁂𑀲𑀁 𑀆𑀧𑀚𑁆𑀚𑀢𑀺. 𑀧𑁂𑀲𑀮𑁄𑀢𑀺 𑀧𑀺𑀬𑀲𑀻𑀮𑁄.

𑁯. 𑀅𑀪𑀺𑀲𑀦𑁆𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁯. 𑀦𑀯𑀫𑁂 𑀤𑀸𑀦𑀸𑀦𑀻𑀢𑀺 𑀘𑁂𑀢𑀦𑀸𑀤𑀸𑀦𑀸𑀦𑀺. 𑀅𑀕𑁆𑀕𑀜𑁆𑀜𑀸𑀦𑀻𑀢𑀺𑀆𑀤𑀻𑀦𑀁 𑀅𑀢𑁆𑀣𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑁄𑀬𑁂𑀯.

𑁧𑁦. 𑀤𑀼𑀘𑁆𑀘𑀭𑀺𑀢𑀯𑀺𑀧𑀸𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁦. 𑀤𑀲𑀫𑁂 𑀧𑀸𑀡𑀸𑀢𑀺𑀧𑀸𑀢𑁄𑀢𑀺 𑀧𑀸𑀡𑀸𑀢𑀺𑀧𑀸𑀢𑀘𑁂𑀢𑀦𑀸. 𑀲𑀩𑁆𑀩𑀮𑀳𑀼𑀲𑁄𑀢𑀺 𑀲𑀩𑁆𑀩𑀮𑀳𑀼𑀓𑁄. 𑀅𑀧𑁆𑀧𑀸𑀬𑀼𑀓𑀲𑀁𑀯𑀢𑁆𑀢𑀦𑀺𑀓𑁄𑀢𑀺 𑀢𑁂𑀦 𑀧𑀭𑀺𑀢𑁆𑀢𑀓𑁂𑀦 𑀓𑀫𑁆𑀫𑀯𑀺𑀧𑀸𑀓𑁂𑀦 𑀅𑀧𑁆𑀧𑀸𑀬𑀼𑀓𑁄 𑀳𑁄𑀢𑀺, 𑀤𑀺𑀦𑁆𑀦𑀫𑀢𑁆𑀢𑀸𑀬 𑀯𑀸 𑀧𑀝𑀺𑀲𑀦𑁆𑀥𑀺𑀬𑀸 𑀯𑀺𑀮𑀻𑀬𑀢𑀺 𑀫𑀸𑀢𑀼𑀓𑀼𑀘𑁆𑀙𑀺𑀢𑁄 𑀦𑀺𑀓𑁆𑀔𑀦𑁆𑀢𑀫𑀢𑁆𑀢𑁂 𑀯𑀸. 𑀏𑀯𑀭𑀽𑀧𑁄 𑀳𑀺 𑀦 𑀅𑀜𑁆𑀜𑀲𑁆𑀲 𑀓𑀲𑁆𑀲𑀘𑀺 𑀦𑀺𑀲𑁆𑀲𑀦𑁆𑀤𑁄, 𑀧𑀸𑀡𑀸𑀢𑀺𑀧𑀸𑀢𑀲𑁆𑀲𑁂𑀯 𑀕𑀢𑀫𑀕𑁆𑀕𑁄 𑀏𑀲𑁄𑀢𑀺. 𑀪𑁄𑀕𑀩𑁆𑀬𑀲𑀦𑀲𑀁𑀯𑀢𑁆𑀢𑀦𑀺𑀓𑁄𑀢𑀺 𑀬𑀣𑀸 𑀓𑀸𑀓𑀡𑀺𑀓𑀸𑀫𑀢𑁆𑀢𑀫𑁆𑀧𑀺 𑀳𑀢𑁆𑀣𑁂 𑀦 𑀢𑀺𑀝𑁆𑀞𑀢𑀺, 𑀏𑀯𑀁 𑀪𑁄𑀕𑀩𑁆𑀬𑀲𑀦𑀁 𑀲𑀁𑀯𑀢𑁆𑀢𑁂𑀢𑀺. 𑀲𑀧𑀢𑁆𑀢𑀯𑁂𑀭𑀲𑀁𑀯𑀢𑁆𑀢𑀦𑀺𑀓𑁄 𑀳𑁄𑀢𑀻𑀢𑀺 𑀲𑀳 𑀲𑀧𑀢𑁆𑀢𑁂𑀳𑀺 𑀯𑁂𑀭𑀁 𑀲𑀁𑀯𑀢𑁆𑀢𑁂𑀢𑀺. 𑀢𑀲𑁆𑀲 𑀳𑀺 𑀲𑀧𑀢𑁆𑀢𑀸 𑀘 𑀩𑀳𑀼𑀓𑀸 𑀳𑁄𑀦𑁆𑀢𑀺. 𑀬𑁄 𑀘 𑀦𑀁 𑀧𑀲𑁆𑀲𑀢𑀺, 𑀢𑀲𑁆𑀫𑀺𑀁 𑀯𑁂𑀭𑀫𑁂𑀯 𑀉𑀧𑁆𑀧𑀸𑀤𑁂𑀢𑀺 𑀦 𑀦𑀺𑀩𑁆𑀩𑀸𑀬𑀢𑀺. 𑀏𑀯𑀭𑀽𑀧𑁄 𑀳𑀺 𑀧𑀭𑀲𑁆𑀲 𑀭𑀓𑁆𑀔𑀺𑀢𑀕𑁄𑀧𑀺𑀢𑀪𑀡𑁆𑀟𑁂 𑀅𑀧𑀭𑀸𑀥𑀲𑁆𑀲 𑀦𑀺𑀲𑁆𑀲𑀦𑁆𑀤𑁄.

𑀅𑀪𑀽𑀢𑀩𑁆𑀪𑀓𑁆𑀔𑀸𑀦𑀲𑀁𑀯𑀢𑁆𑀢𑀦𑀺𑀓𑁄 𑀳𑁄𑀢𑀻𑀢𑀺 𑀅𑀪𑀽𑀢𑁂𑀦 𑀅𑀩𑁆𑀪𑀓𑁆𑀔𑀸𑀦𑀁 𑀲𑀁𑀯𑀢𑁆𑀢𑁂𑀢𑀺, 𑀬𑁂𑀦 𑀓𑁂𑀦𑀘𑀺 𑀓𑀢𑀁 𑀢𑀲𑁆𑀲𑁂𑀯 𑀉𑀧𑀭𑀺 𑀧𑀢𑀢𑀺. 𑀫𑀺𑀢𑁆𑀢𑁂𑀳𑀺 𑀪𑁂𑀤𑀦𑀲𑀁𑀯𑀢𑁆𑀢𑀦𑀺𑀓𑁄𑀢𑀺 𑀫𑀺𑀢𑁆𑀢𑁂𑀳𑀺 𑀪𑁂𑀤𑀁 𑀲𑀁𑀯𑀢𑁆𑀢𑁂𑀢𑀺. 𑀬𑀁 𑀬𑀁 𑀫𑀺𑀢𑁆𑀢𑀁 𑀓𑀭𑁄𑀢𑀺, 𑀲𑁄 𑀲𑁄 𑀪𑀺𑀚𑁆𑀚𑀢𑀺𑀬𑁂𑀯. 𑀅𑀫𑀦𑀸𑀧𑀲𑀤𑁆𑀤𑀲𑀁𑀯𑀢𑁆𑀢𑀦𑀺𑀓𑁄𑀢𑀺 𑀅𑀫𑀦𑀸𑀧𑀲𑀤𑁆𑀤𑀁 𑀲𑀁𑀯𑀢𑁆𑀢𑁂𑀢𑀺. 𑀬𑀸 𑀲𑀸 𑀯𑀸𑀘𑀸 𑀓𑀡𑁆𑀝𑀓𑀸 𑀓𑀓𑁆𑀓𑀲𑀸 𑀓𑀝𑀼𑀓𑀸 𑀅𑀪𑀺𑀲𑀚𑁆𑀚𑀦𑀻 𑀫𑀫𑁆𑀫𑀘𑁆𑀙𑁂𑀤𑀺𑀓𑀸, 𑀕𑀢𑀕𑀢𑀝𑁆𑀞𑀸𑀦𑁂 𑀢𑀫𑁂𑀯 𑀲𑀼𑀡𑀸𑀢𑀺, 𑀫𑀦𑀸𑀧𑀲𑀤𑁆𑀤𑀲𑀯𑀦𑀁 𑀦𑀸𑀫 𑀦 𑀮𑀪𑀢𑀺. 𑀏𑀯𑀭𑀽𑀧𑁄 𑀨𑀭𑀼𑀲𑀯𑀸𑀘𑀸𑀬 𑀕𑀢𑀫𑀕𑁆𑀕𑁄 𑀦𑀸𑀫. 𑀅𑀦𑀸𑀤𑁂𑀬𑁆𑀬𑀯𑀸𑀘𑀸𑀲𑀁𑀯𑀢𑁆𑀢𑀦𑀺𑀓𑁄𑀢𑀺 𑀅𑀕𑁆𑀕𑀳𑁂𑀢𑀩𑁆𑀩𑀯𑀘𑀦𑀢𑀁 𑀲𑀁𑀯𑀢𑁆𑀢𑁂𑀢𑀺, ‘‘𑀢𑁆𑀯𑀁 𑀓𑀲𑁆𑀫𑀸 𑀓𑀣𑁂𑀲𑀺, 𑀓𑁄 𑀳𑀺 𑀢𑀯 𑀯𑀘𑀦𑀁 𑀕𑀳𑁂𑀲𑁆𑀲𑀢𑀻’’𑀢𑀺 𑀯𑀢𑁆𑀢𑀩𑁆𑀩𑀢𑀁 𑀆𑀧𑀚𑁆𑀚𑀢𑀺. 𑀅𑀬𑀁 𑀲𑀫𑁆𑀨𑀧𑁆𑀧𑀮𑀸𑀧𑀲𑁆𑀲 𑀕𑀢𑀫𑀕𑁆𑀕𑁄. 𑀉𑀫𑁆𑀫𑀢𑁆𑀢𑀓𑀲𑀁𑀯𑀢𑁆𑀢𑀦𑀺𑀓𑁄 𑀳𑁄𑀢𑀻𑀢𑀺 𑀉𑀫𑁆𑀫𑀢𑁆𑀢𑀓𑀪𑀸𑀯𑀁 𑀲𑀁𑀯𑀢𑁆𑀢𑁂𑀢𑀺. 𑀢𑁂𑀦 𑀳𑀺 𑀫𑀦𑀼𑀲𑁆𑀲𑁄 𑀉𑀫𑁆𑀫𑀢𑁆𑀢𑁄 𑀯𑀸 𑀔𑀺𑀢𑁆𑀢𑀘𑀺𑀢𑁆𑀢𑁄 𑀯𑀸 𑀏𑀴𑀫𑀽𑀕𑁄 𑀯𑀸 𑀳𑁄𑀢𑀺. 𑀅𑀬𑀁 𑀲𑀼𑀭𑀸𑀧𑀸𑀦𑀲𑁆𑀲 𑀦𑀺𑀲𑁆𑀲𑀦𑁆𑀤𑁄. 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀯𑀝𑁆𑀝𑀫𑁂𑀯 𑀓𑀣𑀺𑀢𑀦𑁆𑀢𑀺.

𑀤𑀸𑀦𑀯𑀕𑁆𑀕𑁄 𑀘𑀢𑀼𑀢𑁆𑀣𑁄.