𑁫. 𑀥𑀫𑁆𑀫𑀺𑀓𑀯𑀕𑁆𑀕𑁄

𑁧. 𑀦𑀸𑀕𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁩. 𑀧𑀜𑁆𑀘𑀫𑀲𑁆𑀲 𑀧𑀞𑀫𑁂 𑀆𑀬𑀲𑁆𑀫𑀢𑀸 𑀆𑀦𑀦𑁆𑀤𑁂𑀦 𑀲𑀤𑁆𑀥𑀺𑀦𑁆𑀢𑀺 𑀇𑀤𑀁 ‘‘𑀆𑀬𑀸𑀫𑀸𑀦𑀦𑁆𑀤𑀸’’𑀢𑀺 𑀣𑁂𑀭𑀁 𑀆𑀫𑀦𑁆𑀢𑁂𑀢𑁆𑀯𑀸 𑀕𑀢𑀢𑁆𑀢𑀸 𑀯𑀼𑀢𑁆𑀢𑀁, 𑀲𑀢𑁆𑀣𑀸 𑀧𑀦 𑀅𑀦𑀽𑀦𑁂𑀳𑀺 𑀧𑀜𑁆𑀘𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺 𑀧𑀭𑀺𑀯𑀼𑀢𑁄 𑀢𑀢𑁆𑀣 𑀅𑀕𑀫𑀸𑀲𑀻𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀢𑁂𑀦𑀼𑀧𑀲𑀗𑁆𑀓𑀫𑀻𑀢𑀺 𑀢𑁂𑀳𑁂𑀯 𑀧𑀜𑁆𑀘𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺 𑀧𑀭𑀺𑀯𑀼𑀢𑁄 𑀉𑀧𑀲𑀗𑁆𑀓𑀫𑀺. 𑀧𑀭𑀺𑀲𑀺𑀜𑁆𑀘𑀺𑀢𑁆𑀯𑀸𑀢𑀺 𑀯𑁄𑀳𑀸𑀭𑀯𑀘𑀦𑀫𑁂𑀢𑀁, 𑀦𑁆𑀳𑀸𑀬𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀧𑀼𑀩𑁆𑀩𑀸𑀧𑀬𑀫𑀸𑀦𑁄𑀢𑀺 𑀭𑀢𑁆𑀢𑀤𑀼𑀧𑀝𑁆𑀝𑀁 𑀦𑀺𑀯𑀸𑀲𑁂𑀢𑁆𑀯𑀸 𑀉𑀢𑁆𑀢𑀭𑀸𑀲𑀗𑁆𑀕𑀘𑀻𑀯𑀭𑀁 𑀤𑁆𑀯𑀻𑀳𑀺 𑀳𑀢𑁆𑀣𑁂𑀳𑀺 𑀕𑀳𑁂𑀢𑁆𑀯𑀸 𑀧𑀘𑁆𑀙𑀺𑀫𑀮𑁄𑀓𑀥𑀸𑀢𑀼𑀁 𑀧𑀺𑀝𑁆𑀞𑀺𑀢𑁄 𑀓𑀢𑁆𑀯𑀸 𑀧𑀼𑀭𑀢𑁆𑀣𑀺𑀫𑀮𑁄𑀓𑀥𑀸𑀢𑀼𑀁 𑀅𑀪𑀺𑀫𑀼𑀔𑁄 𑀯𑁄𑀤𑀓𑀪𑀸𑀯𑁂𑀦 𑀕𑀢𑁆𑀢𑀸𑀦𑀺 𑀧𑀼𑀩𑁆𑀩𑀲𑀤𑀺𑀲𑀸𑀦𑀺 𑀓𑀼𑀭𑀼𑀫𑀸𑀦𑁄 𑀅𑀝𑁆𑀞𑀸𑀲𑀻𑀢𑀺 𑀅𑀢𑁆𑀣𑁄. 𑀪𑀺𑀓𑁆𑀔𑀼𑀲𑀗𑁆𑀖𑁄𑀧𑀺 𑀢𑁂𑀦 𑀢𑁂𑀦 𑀞𑀸𑀦𑁂𑀦 𑀑𑀢𑀭𑀺𑀢𑁆𑀯𑀸 𑀦𑁆𑀳𑀢𑁆𑀯𑀸 𑀧𑀘𑁆𑀘𑀼𑀢𑁆𑀢𑀭𑀺𑀢𑁆𑀯𑀸 𑀲𑀢𑁆𑀣𑀸𑀭𑀁𑀬𑁂𑀯 𑀧𑀭𑀺𑀯𑀸𑀭𑁂𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀇𑀢𑀺 𑀢𑀲𑁆𑀫𑀺𑀁 𑀲𑀫𑀬𑁂 𑀆𑀓𑀸𑀲𑀢𑁄 𑀧𑀢𑀫𑀸𑀦𑀁 𑀭𑀢𑁆𑀢𑀲𑀼𑀯𑀡𑁆𑀡𑀓𑀼𑀡𑁆𑀟𑀮𑀁 𑀯𑀺𑀬 𑀲𑀽𑀭𑀺𑀬𑁄 𑀧𑀘𑁆𑀙𑀺𑀫𑀮𑁄𑀓𑀥𑀸𑀢𑀼𑀁 𑀧𑀝𑀺𑀧𑀚𑁆𑀚𑀺, 𑀧𑀭𑀺𑀲𑀼𑀤𑁆𑀥𑀭𑀚𑀢𑀫𑀡𑁆𑀟𑀮𑁄 𑀯𑀺𑀬 𑀧𑀸𑀘𑀻𑀦𑀮𑁄𑀓𑀥𑀸𑀢𑀼𑀢𑁄 𑀘𑀦𑁆𑀤𑁄 𑀅𑀩𑁆𑀪𑀼𑀕𑁆𑀕𑀜𑁆𑀙𑀺, 𑀫𑀚𑁆𑀛𑀝𑁆𑀞𑀸𑀦𑁂𑀧𑀺 𑀧𑀜𑁆𑀘𑀪𑀺𑀓𑁆𑀔𑀼𑀲𑀢𑀧𑀭𑀺𑀯𑀸𑀭𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀙𑀩𑁆𑀩𑀡𑁆𑀡𑀩𑀼𑀤𑁆𑀥𑀭𑀲𑁆𑀫𑀺𑀬𑁄 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀧𑀼𑀩𑁆𑀩𑀓𑁄𑀝𑁆𑀞𑀓𑀦𑀤𑀻𑀢𑀻𑀭𑁂 𑀮𑁄𑀓𑀁 𑀅𑀮𑀗𑁆𑀓𑀼𑀭𑀼𑀫𑀸𑀦𑁄 𑀅𑀝𑁆𑀞𑀸𑀲𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦…𑀧𑁂… 𑀲𑁂𑀢𑁄 𑀦𑀸𑀫 𑀦𑀸𑀕𑁄𑀢𑀺 𑀲𑁂𑀢𑀯𑀡𑁆𑀡𑀢𑀸𑀬 𑀏𑀯𑀁 𑀮𑀤𑁆𑀥𑀦𑀸𑀫𑁄 𑀳𑀢𑁆𑀣𑀺𑀦𑀸𑀕𑁄. 𑀫𑀳𑀸𑀢𑀽𑀭𑀺𑀬𑀢𑀸𑀴𑀺𑀢𑀯𑀸𑀤𑀺𑀢𑁂𑀦𑀸𑀢𑀺 𑀫𑀳𑀦𑁆𑀢𑁂𑀦 𑀢𑀽𑀭𑀺𑀬𑀢𑀸𑀴𑀺𑀢𑀯𑀸𑀤𑀺𑀢𑁂𑀦. 𑀢𑀢𑁆𑀣 𑀧𑀞𑀫𑀁 𑀲𑀗𑁆𑀖𑀝𑁆𑀝𑀦𑀁 𑀢𑀸𑀴𑀺𑀢𑀁 𑀦𑀸𑀫 𑀳𑁄𑀢𑀺, 𑀢𑀢𑁄 𑀧𑀭𑀁 𑀯𑀸𑀤𑀺𑀢𑀁. 𑀚𑀦𑁄𑀢𑀺 𑀳𑀢𑁆𑀣𑀺𑀤𑀲𑁆𑀲𑀦𑀢𑁆𑀣𑀁 𑀲𑀦𑁆𑀦𑀺𑀧𑀢𑀺𑀢𑀫𑀳𑀸𑀚𑀦𑁄. 𑀤𑀺𑀲𑁆𑀯𑀸 𑀏𑀯𑀫𑀸𑀳𑀸𑀢𑀺 𑀅𑀗𑁆𑀕𑀧𑀘𑁆𑀘𑀗𑁆𑀕𑀸𑀦𑀺 𑀖𑀁𑀲𑀺𑀢𑁆𑀯𑀸 𑀦𑁆𑀳𑀸𑀧𑁂𑀢𑁆𑀯𑀸 𑀉𑀢𑁆𑀢𑀸𑀭𑁂𑀢𑁆𑀯𑀸 𑀩𑀳𑀺𑀢𑀻𑀭𑁂 𑀞𑀧𑁂𑀢𑁆𑀯𑀸 𑀕𑀢𑁆𑀢𑀸𑀦𑀺 𑀯𑁄𑀤𑀓𑀸𑀦𑀺 𑀓𑀢𑁆𑀯𑀸 𑀳𑀢𑁆𑀣𑀸𑀮𑀗𑁆𑀓𑀸𑀭𑁂𑀦 𑀅𑀮𑀗𑁆𑀓𑀢𑀁 𑀢𑀁 𑀫𑀳𑀸𑀦𑀸𑀕𑀁 𑀤𑀺𑀲𑁆𑀯𑀸 𑀇𑀤𑀁 ‘‘𑀅𑀪𑀺𑀭𑀽𑀧𑁄 𑀯𑀢, 𑀪𑁄’’𑀢𑀺 𑀧𑀲𑀁𑀲𑀸𑀯𑀘𑀦𑀫𑀸𑀳. 𑀓𑀸𑀬𑀼𑀧𑀧𑀦𑁆𑀦𑁄𑀢𑀺 𑀲𑀭𑀻𑀭𑀲𑀫𑁆𑀧𑀢𑁆𑀢𑀺𑀬𑀸 𑀉𑀧𑀧𑀦𑁆𑀦𑁄, 𑀧𑀭𑀺𑀧𑀼𑀡𑁆𑀡𑀗𑁆𑀕𑀧𑀘𑁆𑀘𑀗𑁆𑀕𑁄𑀢𑀺 𑀅𑀢𑁆𑀣𑁄. 𑀆𑀬𑀲𑁆𑀫𑀸 𑀉𑀤𑀸𑀬𑀻𑀢𑀺 𑀧𑀝𑀺𑀲𑀫𑁆𑀪𑀺𑀤𑀸𑀧𑁆𑀧𑀢𑁆𑀢𑁄 𑀓𑀸𑀴𑀼𑀤𑀸𑀬𑀺𑀢𑁆𑀣𑁂𑀭𑁄. 𑀏𑀢𑀤𑀯𑁄𑀘𑀸𑀢𑀺 𑀢𑀁 𑀫𑀳𑀸𑀚𑀦𑀁 𑀳𑀢𑁆𑀣𑀺𑀲𑁆𑀲 𑀯𑀡𑁆𑀡𑀁 𑀪𑀡𑀦𑁆𑀢𑀁 𑀤𑀺𑀲𑁆𑀯𑀸 ‘‘𑀅𑀬𑀁 𑀚𑀦𑁄 𑀅𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀬𑀁 𑀦𑀺𑀩𑁆𑀩𑀢𑁆𑀢𑀳𑀢𑁆𑀣𑀺𑀦𑁄 𑀯𑀡𑁆𑀡𑀁 𑀓𑀣𑁂𑀢𑀺, 𑀦 𑀩𑀼𑀤𑁆𑀥𑀳𑀢𑁆𑀣𑀺𑀲𑁆𑀲. 𑀅𑀳𑀁 𑀤𑀸𑀦𑀺 𑀇𑀫𑀺𑀦𑀸 𑀳𑀢𑁆𑀣𑀺𑀦𑀸𑀕𑁂𑀦 𑀉𑀧𑀫𑀁 𑀓𑀢𑁆𑀯𑀸 𑀩𑀼𑀤𑁆𑀥𑀦𑀸𑀕𑀲𑁆𑀲 𑀯𑀡𑁆𑀡𑀁 𑀓𑀣𑁂𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀏𑀢𑀁 ‘‘𑀳𑀢𑁆𑀣𑀺𑀫𑁂𑀯 𑀦𑀼 𑀔𑁄, 𑀪𑀦𑁆𑀢𑁂’’𑀢𑀺𑀆𑀤𑀺𑀯𑀘𑀦𑀁 𑀅𑀯𑁄𑀘. 𑀢𑀢𑁆𑀣 𑀫𑀳𑀦𑁆𑀢𑀦𑁆𑀢𑀺 𑀆𑀭𑁄𑀳𑀲𑀫𑁆𑀧𑀦𑁆𑀦𑀁. 𑀩𑁆𑀭𑀳𑀦𑁆𑀢𑀦𑁆𑀢𑀺 𑀧𑀭𑀺𑀡𑀸𑀳𑀲𑀫𑁆𑀧𑀦𑁆𑀦𑀁. 𑀏𑀯𑀫𑀸𑀳𑀸𑀢𑀺 𑀏𑀯𑀁 𑀯𑀤𑀢𑀺. 𑀅𑀣 𑀪𑀕𑀯𑀸 𑀬𑀲𑁆𑀫𑀸 𑀅𑀬𑀁 𑀦𑀸𑀕𑀲𑀤𑁆𑀤𑁄 𑀳𑀢𑁆𑀣𑀺𑀫𑁆𑀳𑀺𑀘𑁂𑀯 𑀅𑀲𑁆𑀲𑀕𑁄𑀡𑀉𑀭𑀕𑀭𑀼𑀓𑁆𑀔𑀫𑀦𑀼𑀲𑁆𑀲𑁂𑀲𑀼 𑀘𑀸𑀧𑀺 𑀧𑀯𑀢𑁆𑀢𑀢𑀺, 𑀢𑀲𑁆𑀫𑀸 𑀳𑀢𑁆𑀣𑀺𑀫𑁆𑀧𑀺 𑀔𑁄𑀢𑀺𑀆𑀤𑀺𑀫𑀸𑀳.

𑀆𑀕𑀼𑀦𑁆𑀢𑀺 𑀧𑀸𑀧𑀓𑀁 𑀮𑀸𑀫𑀓𑀁 𑀅𑀓𑀼𑀲𑀮𑀥𑀫𑁆𑀫𑀁. 𑀢𑀫𑀳𑀁 𑀦𑀸𑀕𑁄𑀢𑀺 𑀩𑁆𑀭𑀽𑀫𑀻𑀢𑀺 𑀢𑀁 𑀅𑀳𑀁 𑀇𑀫𑁂𑀳𑀺 𑀢𑀻𑀳𑀺 𑀤𑁆𑀯𑀸𑀭𑁂𑀳𑀺 𑀤𑀲𑀦𑁆𑀦𑀁 𑀅𑀓𑀼𑀲𑀮𑀓𑀫𑁆𑀫𑀧𑀣𑀸𑀦𑀁 𑀤𑁆𑀯𑀸𑀤𑀲𑀦𑁆𑀦𑀜𑁆𑀘 𑀅𑀓𑀼𑀲𑀮𑀘𑀺𑀢𑁆𑀢𑀸𑀦𑀁 𑀅𑀓𑀭𑀡𑀢𑁄 𑀦𑀸𑀕𑁄𑀢𑀺 𑀯𑀤𑀸𑀫𑀺. 𑀅𑀬𑀜𑁆𑀳𑀺 𑀦 𑀆𑀕𑀼𑀁 𑀓𑀭𑁄𑀢𑀻𑀢𑀺 𑀇𑀫𑀺𑀦𑀸 𑀅𑀢𑁆𑀣𑁂𑀦 𑀦𑀸𑀕𑁄. 𑀇𑀫𑀸𑀳𑀺 𑀕𑀸𑀣𑀸𑀳𑀺 𑀅𑀦𑀼𑀫𑁄𑀤𑀸𑀫𑀻𑀢𑀺 𑀇𑀫𑀸𑀳𑀺 𑀘𑀢𑀼𑀲𑀝𑁆𑀞𑀺𑀧𑀤𑀸𑀳𑀺 𑀲𑁄𑀴𑀲𑀳𑀺 𑀕𑀸𑀣𑀸𑀳𑀺 𑀅𑀦𑀼𑀫𑁄𑀤𑀸𑀫𑀺 𑀅𑀪𑀺𑀦𑀦𑁆𑀤𑀸𑀫𑀺.

𑀫𑀦𑀼𑀲𑁆𑀲𑀪𑀽𑀢𑀦𑁆𑀢𑀺 𑀤𑁂𑀯𑀸𑀤𑀺𑀪𑀸𑀯𑀁 𑀅𑀦𑀼𑀧𑀕𑀦𑁆𑀢𑁆𑀯𑀸 𑀫𑀦𑀼𑀲𑁆𑀲𑀫𑁂𑀯 𑀪𑀽𑀢𑀁. 𑀅𑀢𑁆𑀢𑀤𑀦𑁆𑀢𑀦𑁆𑀢𑀺 𑀅𑀢𑁆𑀢𑀦𑀸𑀬𑁂𑀯 𑀤𑀦𑁆𑀢𑀁, 𑀦 𑀅𑀜𑁆𑀜𑁂𑀳𑀺 𑀤𑀫𑀣𑀁 𑀉𑀧𑀦𑀻𑀢𑀁. 𑀪𑀕𑀯𑀸 𑀳𑀺 𑀅𑀢𑁆𑀢𑀦𑀸 𑀉𑀧𑁆𑀧𑀸𑀤𑀺𑀢𑁂𑀦𑁂𑀯 𑀫𑀕𑁆𑀕𑀤𑀫𑀣𑁂𑀦 𑀘𑀓𑁆𑀔𑀼𑀢𑁄𑀧𑀺 𑀤𑀦𑁆𑀢𑁄, 𑀲𑁄𑀢𑀢𑁄𑀧𑀺, 𑀖𑀸𑀦𑀢𑁄𑀧𑀺, 𑀚𑀺𑀯𑁆𑀳𑀸𑀢𑁄𑀧𑀺, 𑀓𑀸𑀬𑀢𑁄𑀧𑀺, 𑀫𑀦𑀢𑁄𑀧𑀻𑀢𑀺 𑀇𑀫𑁂𑀲𑀼 𑀙𑀲𑀼 𑀞𑀸𑀦𑁂𑀲𑀼 𑀤𑀦𑁆𑀢𑁄 𑀲𑀦𑁆𑀢𑁄 𑀦𑀺𑀩𑁆𑀩𑀼𑀢𑁄 𑀧𑀭𑀺𑀦𑀺𑀩𑁆𑀩𑀼𑀢𑁄. 𑀢𑁂𑀦𑀸𑀳 𑁋 ‘‘𑀅𑀢𑁆𑀢𑀤𑀦𑁆𑀢’’𑀦𑁆𑀢𑀺. 𑀲𑀫𑀸𑀳𑀺𑀢𑀦𑁆𑀢𑀺 𑀤𑀼𑀯𑀺𑀥𑁂𑀦𑀸𑀧𑀺 𑀲𑀫𑀸𑀥𑀺𑀦𑀸 𑀲𑀫𑀸𑀳𑀺𑀢𑀁. 𑀇𑀭𑀺𑀬𑀫𑀸𑀦𑀦𑁆𑀢𑀺 𑀯𑀺𑀳𑀭𑀫𑀸𑀦𑀁. 𑀩𑁆𑀭𑀳𑁆𑀫𑀧𑀣𑁂𑀢𑀺 𑀲𑁂𑀝𑁆𑀞𑀧𑀣𑁂, 𑀅𑀫𑀢𑀧𑀣𑁂, 𑀦𑀺𑀩𑁆𑀩𑀸𑀦𑀧𑀣𑁂. 𑀘𑀺𑀢𑁆𑀢𑀲𑁆𑀲𑀽𑀧𑀲𑀫𑁂 𑀭𑀢𑀦𑁆𑀢𑀺 𑀧𑀞𑀫𑀚𑁆𑀛𑀸𑀦𑁂𑀦 𑀧𑀜𑁆𑀘 𑀦𑀻𑀯𑀭𑀡𑀸𑀦𑀺 𑀯𑀽𑀧𑀲𑀫𑁂𑀢𑁆𑀯𑀸, 𑀤𑀼𑀢𑀺𑀬𑀚𑁆𑀛𑀸𑀦𑁂𑀦 𑀯𑀺𑀢𑀓𑁆𑀓𑀯𑀺𑀘𑀸𑀭𑁂, 𑀢𑀢𑀺𑀬𑀚𑁆𑀛𑀸𑀦𑁂𑀦 𑀧𑀻𑀢𑀺𑀁, 𑀘𑀢𑀼𑀢𑁆𑀣𑀚𑁆𑀛𑀸𑀦𑁂𑀦 𑀲𑀼𑀔𑀤𑀼𑀓𑁆𑀔𑀁 𑀯𑀽𑀧𑀲𑀫𑁂𑀢𑁆𑀯𑀸 𑀢𑀲𑁆𑀫𑀺𑀁 𑀘𑀺𑀢𑁆𑀢𑀲𑁆𑀲𑀽𑀧𑀲𑀫𑁂 𑀭𑀢𑀁 𑀅𑀪𑀺𑀭𑀢𑀁.

𑀦𑀫𑀲𑁆𑀲𑀦𑁆𑀢𑀻𑀢𑀺 𑀓𑀸𑀬𑁂𑀦 𑀦𑀫𑀲𑁆𑀲𑀦𑁆𑀢𑀺, 𑀯𑀸𑀘𑀸𑀬 𑀦𑀫𑀲𑁆𑀲𑀦𑁆𑀢𑀺, 𑀫𑀦𑀲𑀸 𑀦𑀫𑀲𑁆𑀲𑀦𑁆𑀢𑀺, 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑀝𑀺𑀧𑀢𑁆𑀢𑀺𑀬𑀸 𑀦𑀫𑀲𑁆𑀲𑀦𑁆𑀢𑀺, 𑀲𑀓𑁆𑀓𑀭𑁄𑀦𑁆𑀢𑀺 𑀕𑀭𑀼𑀁 𑀓𑀭𑁄𑀦𑁆𑀢𑀺. 𑀲𑀩𑁆𑀩𑀥𑀫𑁆𑀫𑀸𑀦𑀧𑀸𑀭𑀕𑀼𑀦𑁆𑀢𑀺 𑀲𑀩𑁆𑀩𑁂𑀲𑀁 𑀔𑀦𑁆𑀥𑀸𑀬𑀢𑀦𑀥𑀸𑀢𑀼𑀥𑀫𑁆𑀫𑀸𑀦𑀁 𑀅𑀪𑀺𑀜𑁆𑀜𑀸𑀧𑀸𑀭𑀕𑀽, 𑀧𑀭𑀺𑀜𑁆𑀜𑀸𑀧𑀸𑀭𑀕𑀽, 𑀧𑀳𑀸𑀦𑀧𑀸𑀭𑀕𑀽, 𑀪𑀸𑀯𑀦𑀸𑀧𑀸𑀭𑀕𑀽, 𑀲𑀘𑁆𑀙𑀺𑀓𑀺𑀭𑀺𑀬𑀸𑀧𑀸𑀭𑀕𑀽, 𑀲𑀫𑀸𑀧𑀢𑁆𑀢𑀺𑀧𑀸𑀭𑀕𑀽𑀢𑀺 𑀙𑀩𑁆𑀩𑀺𑀥𑁂𑀦 𑀧𑀸𑀭𑀕𑀫𑀦𑁂𑀦 𑀧𑀸𑀭𑀕𑀢𑀁 𑀧𑀸𑀭𑀧𑁆𑀧𑀢𑁆𑀢𑀁 𑀫𑀢𑁆𑀣𑀓𑀧𑁆𑀧𑀢𑁆𑀢𑀁. 𑀤𑁂𑀯𑀸𑀧𑀺 𑀢𑀁 𑀦𑀫𑀲𑁆𑀲𑀦𑁆𑀢𑀻𑀢𑀺 𑀤𑀼𑀓𑁆𑀔𑀧𑁆𑀧𑀢𑁆𑀢𑀸 𑀲𑀼𑀩𑁆𑀭𑀳𑁆𑀫𑀤𑁂𑀯𑀧𑀼𑀢𑁆𑀢𑀸𑀤𑀬𑁄 𑀲𑀼𑀔𑀧𑁆𑀧𑀢𑁆𑀢𑀸 𑀘 𑀲𑀩𑁆𑀩𑁂𑀯 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀯𑀸𑀲𑀺𑀦𑁄 𑀤𑁂𑀯𑀸𑀧𑀺 𑀢𑀼𑀫𑁆𑀳𑁂 𑀦𑀫𑀲𑁆𑀲𑀦𑁆𑀢𑀺. 𑀇𑀢𑀺 𑀫𑁂 𑀅𑀭𑀳𑀢𑁄 𑀲𑀼𑀢𑀦𑁆𑀢𑀺 𑀇𑀢𑀺 𑀫𑀬𑀸 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺 𑀅𑀭𑀳𑀸𑀢𑀺 𑀮𑀤𑁆𑀥𑀯𑁄𑀳𑀸𑀭𑀸𑀦𑀁 𑀢𑀼𑀫𑁆𑀳𑀸𑀓𑀁𑀬𑁂𑀯 𑀲𑀦𑁆𑀢𑀺𑀓𑁂 𑀲𑀼𑀢𑀦𑁆𑀢𑀺 𑀤𑀻𑀧𑁂𑀢𑀺.

𑀲𑀩𑁆𑀩𑀲𑀁𑀬𑁄𑀚𑀦𑀸𑀢𑀻𑀢𑀦𑁆𑀢𑀺 𑀲𑀩𑁆𑀩𑀸𑀦𑀺 𑀤𑀲𑀯𑀺𑀥𑀲𑀁𑀬𑁄𑀚𑀦𑀸𑀦𑀺 𑀅𑀢𑀺𑀓𑁆𑀓𑀦𑁆𑀢𑀁. 𑀯𑀦𑀸 𑀦𑀺𑀩𑁆𑀩𑀦𑀫𑀸𑀕𑀢𑀦𑁆𑀢𑀺 𑀓𑀺𑀮𑁂𑀲𑀯𑀦𑀢𑁄 𑀦𑀺𑀩𑁆𑀩𑀦𑀁 𑀓𑀺𑀮𑁂𑀲𑀯𑀦𑀭𑀳𑀺𑀢𑀁 𑀦𑀺𑀩𑁆𑀩𑀸𑀦𑀁 𑀆𑀕𑀢𑀁 𑀲𑀫𑁆𑀧𑀢𑁆𑀢𑀁. 𑀓𑀸𑀫𑁂𑀳𑀺 𑀦𑁂𑀓𑁆𑀔𑀫𑁆𑀫𑀭𑀢𑀦𑁆𑀢𑀺 𑀤𑀼𑀯𑀺𑀥𑁂𑀳𑀺 𑀓𑀸𑀫𑁂𑀳𑀺 𑀦𑀺𑀓𑁆𑀔𑀦𑁆𑀢𑀢𑁆𑀢𑀸 𑀧𑀩𑁆𑀩𑀚𑁆𑀚𑀸 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄 𑀘𑀢𑁆𑀢𑀸𑀭𑁄 𑀘 𑀅𑀭𑀺𑀬𑀫𑀕𑁆𑀕𑀸 𑀓𑀸𑀫𑁂𑀳𑀺 𑀦𑁂𑀓𑁆𑀔𑀫𑁆𑀫𑀁 𑀦𑀸𑀫, 𑀢𑀢𑁆𑀣 𑀭𑀢𑀁 𑀅𑀪𑀺𑀭𑀢𑀁. 𑀫𑀼𑀢𑁆𑀢𑀁 𑀲𑁂𑀮𑀸𑀯 𑀓𑀜𑁆𑀘𑀦𑀦𑁆𑀢𑀺 𑀲𑁂𑀮𑀥𑀸𑀢𑀼𑀢𑁄 𑀫𑀼𑀢𑁆𑀢𑀁 𑀓𑀜𑁆𑀘𑀦𑀲𑀤𑀺𑀲𑀁.

𑀲𑀩𑁆𑀩𑁂 𑀅𑀘𑁆𑀘𑀭𑀼𑀘𑀻𑀢𑀺 𑀲𑀩𑁆𑀩𑀲𑀢𑁆𑀢𑁂 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀧𑀯𑀢𑁆𑀢𑀭𑀼𑀘𑀺. 𑀅𑀝𑁆𑀞𑀫𑀓𑀜𑁆𑀳𑀺 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀧𑀯𑀢𑁆𑀢𑀭𑀼𑀘𑀺𑀢𑀸𑀬 𑀲𑁄𑀢𑀸𑀧𑀦𑁆𑀦𑁄 𑀅𑀘𑁆𑀘𑀭𑀼𑀘𑀺 𑀦𑀸𑀫, 𑀲𑁄𑀢𑀸𑀧𑀦𑁆𑀦𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀧𑀯𑀢𑁆𑀢𑀭𑀼𑀘𑀺𑀢𑀸𑀬 𑀲𑀓𑀤𑀸𑀕𑀸𑀫𑀻…𑀧𑁂… 𑀔𑀻𑀡𑀸𑀲𑀯𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀧𑀯𑀢𑁆𑀢𑀭𑀼𑀘𑀺𑀢𑀸𑀬 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄, 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀧𑀯𑀢𑁆𑀢𑀭𑀼𑀘𑀺𑀢𑀸𑀬 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀅𑀘𑁆𑀘𑀭𑀼𑀘𑀺 𑀦𑀸𑀫. 𑀳𑀺𑀫𑀯𑀸𑀯𑀜𑁆𑀜𑁂 𑀲𑀺𑀮𑀼𑀘𑁆𑀘𑀬𑁂𑀢𑀺 𑀬𑀣𑀸 𑀳𑀺𑀫𑀯𑀸 𑀧𑀩𑁆𑀩𑀢𑀭𑀸𑀚𑀸 𑀅𑀜𑁆𑀜𑁂 𑀧𑀩𑁆𑀩𑀢𑁂 𑀅𑀢𑀺𑀭𑁄𑀘𑀢𑀺, 𑀏𑀯𑀁 𑀅𑀢𑀺𑀭𑁄𑀘𑀢𑀻𑀢𑀺 𑀅𑀢𑁆𑀣𑁄. 𑀲𑀘𑁆𑀘𑀦𑀸𑀫𑁄𑀢𑀺 𑀢𑀘𑁆𑀙𑀦𑀸𑀫𑁄 𑀪𑀽𑀢𑀦𑀸𑀫𑁄 𑀆𑀕𑀼𑀁 𑀅𑀓𑀭𑀡𑁂𑀦𑁂𑀯 𑀦𑀸𑀕𑁄𑀢𑀺 𑀏𑀯𑀁 𑀅𑀯𑀺𑀢𑀣𑀦𑀸𑀫𑁄.

𑀲𑁄𑀭𑀘𑁆𑀘𑀦𑁆𑀢𑀺 𑀲𑀼𑀘𑀺𑀲𑀻𑀮𑀁. 𑀅𑀯𑀺𑀳𑀺𑀁𑀲𑀸𑀢𑀺 𑀓𑀭𑀼𑀡𑀸 𑀘 𑀓𑀭𑀼𑀡𑀸𑀧𑀼𑀩𑁆𑀩𑀪𑀸𑀕𑁄 𑀘. 𑀧𑀸𑀤𑀸 𑀦𑀸𑀕𑀲𑁆𑀲 𑀢𑁂 𑀤𑀼𑀯𑁂𑀢𑀺 𑀢𑁂 𑀩𑀼𑀤𑁆𑀥𑀦𑀸𑀕𑀲𑁆𑀲 𑀤𑀼𑀯𑁂 𑀧𑀼𑀭𑀺𑀫𑀧𑀸𑀤𑀸.

𑀢𑀧𑁄𑀢𑀺 𑀥𑀼𑀢𑀲𑀫𑀸𑀤𑀸𑀦𑀁. 𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀺 𑀅𑀭𑀺𑀬𑀫𑀕𑁆𑀕𑀲𑀻𑀮𑀁. 𑀘𑀭𑀡𑀸 𑀦𑀸𑀕𑀲𑁆𑀲 𑀢𑁆𑀬𑀸𑀧𑀭𑁂𑀢𑀺 𑀢𑁂 𑀩𑀼𑀤𑁆𑀥𑀦𑀸𑀕𑀲𑁆𑀲 𑀅𑀧𑀭𑁂 𑀤𑁆𑀯𑁂 𑀧𑀘𑁆𑀙𑀺𑀫𑀧𑀸𑀤𑀸. 𑀲𑀤𑁆𑀥𑀸𑀳𑀢𑁆𑀣𑁄𑀢𑀺 𑀲𑀤𑁆𑀥𑀸𑀫𑀬𑀸𑀬 𑀲𑁄𑀡𑁆𑀟𑀸𑀬 𑀲𑀫𑀦𑁆𑀦𑀸𑀕𑀢𑁄. 𑀉𑀧𑁂𑀓𑁆𑀔𑀸𑀲𑁂𑀢𑀤𑀦𑁆𑀢𑀯𑀸𑀢𑀺 𑀙𑀴𑀗𑁆𑀕𑀼𑀧𑁂𑀓𑁆𑀔𑀸𑀫𑀬𑁂𑀳𑀺 𑀲𑁂𑀢𑀤𑀦𑁆𑀢𑁂𑀳𑀺 𑀲𑀫𑀦𑁆𑀦𑀸𑀕𑀢𑁄.

𑀲𑀢𑀺 𑀕𑀻𑀯𑀸𑀢𑀺 𑀬𑀣𑀸 𑀦𑀸𑀕𑀲𑁆𑀲 𑀅𑀗𑁆𑀕𑀧𑀘𑁆𑀘𑀗𑁆𑀕𑀲𑁆𑀫𑀺𑀁 𑀲𑀺𑀭𑀸𑀚𑀸𑀮𑀸𑀦𑀁 𑀕𑀻𑀯𑀸 𑀧𑀢𑀺𑀝𑁆𑀞𑀸, 𑀏𑀯𑀁 𑀩𑀼𑀤𑁆𑀥𑀦𑀸𑀕𑀲𑁆𑀲 𑀲𑁄𑀭𑀘𑁆𑀘𑀸𑀤𑀻𑀦𑀁 𑀥𑀫𑁆𑀫𑀸𑀦𑀁 𑀲𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀲𑀢𑀺 𑀕𑀻𑀯𑀸’’𑀢𑀺. 𑀲𑀺𑀭𑁄 𑀧𑀜𑁆𑀜𑀸𑀢𑀺 𑀬𑀣𑀸 𑀳𑀢𑁆𑀣𑀺𑀦𑀸𑀕𑀲𑁆𑀲 𑀲𑀺𑀭𑁄 𑀉𑀢𑁆𑀢𑀫𑀗𑁆𑀕𑁄, 𑀏𑀯𑀁 𑀩𑀼𑀤𑁆𑀥𑀦𑀸𑀕𑀲𑁆𑀲 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀁. 𑀢𑁂𑀦 𑀳𑀺 𑀲𑁄 𑀲𑀩𑁆𑀩𑀥𑀫𑁆𑀫𑁂 𑀚𑀸𑀦𑀸𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀲𑀺𑀭𑁄 𑀧𑀜𑁆𑀜𑀸’’𑀢𑀺. 𑀯𑀻𑀫𑀁𑀲𑀸 𑀥𑀫𑁆𑀫𑀘𑀺𑀦𑁆𑀢𑀦𑀸𑀢𑀺 𑀬𑀣𑀸 𑀳𑀢𑁆𑀣𑀺𑀦𑀸𑀕𑀲𑁆𑀲 𑀅𑀕𑁆𑀕𑀲𑁄𑀡𑁆𑀟𑁄 𑀯𑀻𑀫𑀁𑀲𑀸 𑀦𑀸𑀫 𑀳𑁄𑀢𑀺. 𑀲𑁄 𑀢𑀸𑀬 𑀣𑀤𑁆𑀥𑀫𑀼𑀤𑀼𑀓𑀁 𑀔𑀸𑀤𑀺𑀢𑀩𑁆𑀩𑀸𑀔𑀸𑀤𑀺𑀢𑀩𑁆𑀩𑀜𑁆𑀘 𑀯𑀻𑀫𑀁𑀲𑀢𑀺, 𑀢𑀢𑁄 𑀧𑀳𑀸𑀢𑀩𑁆𑀩𑀁 𑀧𑀚𑀳𑀢𑀺, 𑀆𑀤𑀸𑀢𑀩𑁆𑀩𑀁 𑀆𑀤𑀺𑀬𑀢𑀺, 𑀏𑀯𑀫𑁂𑀯 𑀩𑀼𑀤𑁆𑀥𑀦𑀸𑀕𑀲𑁆𑀲 𑀥𑀫𑁆𑀫𑀓𑁄𑀝𑁆𑀞𑀸𑀲𑀧𑀭𑀺𑀘𑁆𑀙𑁂𑀤𑀓𑀜𑀸𑀡𑀲𑀗𑁆𑀔𑀸𑀢𑀸 𑀥𑀫𑁆𑀫𑀘𑀺𑀦𑁆𑀢𑀦𑀸 𑀯𑀻𑀫𑀁𑀲𑀸. 𑀢𑁂𑀦 𑀳𑀺 𑀜𑀸𑀡𑁂𑀦 𑀲𑁄 𑀪𑀩𑁆𑀩𑀸𑀪𑀩𑁆𑀩𑁂 𑀚𑀸𑀦𑀸𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀯𑀻𑀫𑀁𑀲𑀸 𑀥𑀫𑁆𑀫𑀘𑀺𑀦𑁆𑀢𑀦𑀸’’𑀢𑀺. 𑀥𑀫𑁆𑀫𑀓𑀼𑀘𑁆𑀙𑀺𑀲𑀫𑀸𑀢𑀧𑁄𑀢𑀺 𑀥𑀫𑁆𑀫𑁄 𑀯𑀼𑀘𑁆𑀘𑀢𑀺 𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑀫𑀸𑀥𑀺, 𑀓𑀼𑀘𑁆𑀙𑀺𑀬𑁂𑀯 𑀲𑀫𑀸𑀢𑀧𑁄 𑀓𑀼𑀘𑁆𑀙𑀺𑀲𑀫𑀸𑀢𑀧𑁄. 𑀲𑀫𑀸𑀢𑀧𑁄 𑀦𑀸𑀫 𑀲𑀫𑀸𑀢𑀧𑀦𑀝𑁆𑀞𑀸𑀦𑀁. 𑀥𑀫𑁆𑀫𑁄 𑀓𑀼𑀘𑁆𑀙𑀺𑀲𑀫𑀸𑀢𑀧𑁄 𑀅𑀲𑁆𑀲𑀸𑀢𑀺 𑀥𑀫𑁆𑀫𑀓𑀼𑀘𑁆𑀙𑀺𑀲𑀫𑀸𑀢𑀧𑁄. 𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑀫𑀸𑀥𑀺𑀲𑁆𑀫𑀺𑀁 𑀞𑀺𑀢𑀲𑁆𑀲 𑀳𑀺 𑀢𑁂 𑀢𑁂 𑀇𑀤𑁆𑀥𑀺𑀯𑀺𑀥𑀸𑀤𑀺𑀥𑀫𑁆𑀫𑀸 𑀇𑀚𑁆𑀛𑀦𑁆𑀢𑀺, 𑀢𑀲𑁆𑀫𑀸 𑀲𑁄 𑀓𑀼𑀘𑁆𑀙𑀺𑀲𑀫𑀸𑀢𑀧𑁄𑀢𑀺 𑀯𑀼𑀢𑁆𑀢𑁄. 𑀯𑀺𑀯𑁂𑀓𑁄𑀢𑀺 𑀓𑀸𑀬𑀘𑀺𑀢𑁆𑀢𑀉𑀧𑀥𑀺𑀯𑀺𑀯𑁂𑀓𑁄. 𑀬𑀣𑀸 𑀦𑀸𑀕𑀲𑁆𑀲 𑀯𑀸𑀮𑀥𑀺 𑀫𑀓𑁆𑀔𑀺𑀓𑀸 𑀯𑀸𑀭𑁂𑀢𑀺, 𑀏𑀯𑀁 𑀢𑀣𑀸𑀕𑀢𑀲𑁆𑀲 𑀯𑀺𑀯𑁂𑀓𑁄 𑀕𑀳𑀝𑁆𑀞𑀧𑀩𑁆𑀩𑀚𑀺𑀢𑁂 𑀯𑀸𑀭𑁂𑀢𑀺. 𑀢𑀲𑁆𑀫𑀸 𑀲𑁄 𑀯𑀸𑀮𑀥𑀻𑀢𑀺 𑀯𑀼𑀢𑁆𑀢𑁄.

𑀛𑀸𑀬𑀻𑀢𑀺 𑀤𑀼𑀯𑀺𑀥𑁂𑀦 𑀛𑀸𑀦𑁂𑀦 𑀛𑀸𑀬𑀻. 𑀅𑀲𑁆𑀲𑀸𑀲𑀭𑀢𑁄𑀢𑀺 𑀦𑀸𑀕𑀲𑁆𑀲 𑀳𑀺 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸 𑀯𑀺𑀬 𑀩𑀼𑀤𑁆𑀥𑀦𑀸𑀕𑀲𑁆𑀲 𑀨𑀮𑀲𑀫𑀸𑀧𑀢𑁆𑀢𑀺, 𑀢𑀢𑁆𑀣 𑀭𑀢𑁄, 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑁂𑀳𑀺 𑀯𑀺𑀬 𑀢𑀸𑀬 𑀯𑀺𑀦𑀸 𑀦 𑀯𑀢𑁆𑀢𑀢𑀻𑀢𑀺 𑀅𑀢𑁆𑀣𑁄. 𑀲𑀩𑁆𑀩𑀢𑁆𑀣 𑀲𑀁𑀯𑀼𑀢𑁄𑀢𑀺 𑀲𑀩𑁆𑀩𑀤𑁆𑀯𑀸𑀭𑁂𑀲𑀼 𑀲𑀁𑀯𑀼𑀢𑁄. 𑀅𑀦𑀯𑀚𑁆𑀚𑀸𑀦𑀻𑀢𑀺 𑀲𑀫𑁆𑀫𑀸𑀆𑀚𑀻𑀯𑁂𑀦 𑀉𑀧𑁆𑀧𑀦𑁆𑀦𑀪𑁄𑀚𑀦𑀸𑀦𑀺. 𑀲𑀸𑀯𑀚𑁆𑀚𑀸𑀦𑀻𑀢𑀺 𑀧𑀜𑁆𑀘𑀯𑀺𑀥𑀫𑀺𑀘𑁆𑀙𑀸𑀚𑀻𑀯𑀯𑀲𑁂𑀦 𑀉𑀧𑁆𑀧𑀦𑁆𑀦𑀪𑁄𑀚𑀦𑀸𑀦𑀺.

𑀅𑀡𑀼𑀁𑀣𑀽𑀮𑀦𑁆𑀢𑀺 𑀔𑀼𑀤𑁆𑀤𑀓𑀜𑁆𑀘 𑀫𑀳𑀦𑁆𑀢𑀜𑁆𑀘. 𑀲𑀩𑁆𑀩𑀁 𑀙𑁂𑀢𑁆𑀯𑀸𑀦 𑀩𑀦𑁆𑀥𑀦𑀦𑁆𑀢𑀺 𑀲𑀩𑁆𑀩𑀁 𑀤𑀲𑀯𑀺𑀥𑀫𑁆𑀧𑀺 𑀲𑀁𑀬𑁄𑀚𑀦𑀁 𑀙𑀺𑀦𑁆𑀤𑀺𑀢𑁆𑀯𑀸𑀦. 𑀦𑀼𑀧𑀮𑀺𑀧𑁆𑀧𑀢𑀺 𑀮𑁄𑀓𑁂𑀦𑀸𑀢𑀺 𑀮𑁄𑀓𑁂𑀦 𑀲𑀤𑁆𑀥𑀺𑀁 𑀢𑀡𑁆𑀳𑀸𑀫𑀸𑀦𑀤𑀺𑀝𑁆𑀞𑀺𑀮𑁂𑀧𑁂𑀳𑀺 𑀦 𑀮𑀺𑀧𑁆𑀧𑀢𑀺. 𑀫𑀳𑀸𑀕𑀺𑀦𑀻𑀢𑀺 𑀫𑀳𑀸𑀅𑀕𑁆𑀕𑀺. 𑀯𑀺𑀜𑁆𑀜𑀽𑀳𑀺 𑀤𑁂𑀲𑀺𑀢𑀸𑀢𑀺 𑀇𑀥 𑀧𑀝𑀺𑀲𑀫𑁆𑀪𑀺𑀤𑀸𑀧𑁆𑀧𑀢𑁆𑀢𑁄 𑀓𑀸𑀴𑀼𑀤𑀸𑀬𑀺𑀢𑁆𑀣𑁂𑀭𑁄𑀯 𑀯𑀺𑀜𑁆𑀜𑀽 𑀧𑀡𑁆𑀟𑀺𑀢𑁄, 𑀢𑁂𑀦 𑀤𑁂𑀲𑀺𑀢𑀸𑀢𑀺 𑀅𑀢𑁆𑀣𑁄. 𑀯𑀺𑀜𑁆𑀜𑀲𑁆𑀲𑀦𑁆𑀢𑀺 𑀫𑀳𑀸𑀦𑀸𑀕𑀸, 𑀦𑀸𑀕𑀁 𑀦𑀸𑀕𑁂𑀦 𑀤𑁂𑀲𑀺𑀢𑀦𑁆𑀢𑀺 𑀉𑀤𑀸𑀬𑀺𑀢𑁆𑀣𑁂𑀭𑀦𑀸𑀕𑁂𑀦 𑀤𑁂𑀲𑀺𑀢𑀁 𑀩𑀼𑀤𑁆𑀥𑀦𑀸𑀕𑀁 𑀇𑀢𑀭𑁂 𑀔𑀻𑀡𑀸𑀲𑀯𑀸 𑀦𑀸𑀕𑀸 𑀯𑀺𑀚𑀸𑀦𑀺𑀲𑁆𑀲𑀦𑁆𑀢𑀺.

𑀲𑀭𑀻𑀭𑀁 𑀯𑀺𑀚𑀳𑀁 𑀦𑀸𑀕𑁄, 𑀧𑀭𑀺𑀦𑀺𑀩𑁆𑀩𑀺𑀲𑁆𑀲𑀢𑀻𑀢𑀺 𑀩𑁄𑀥𑀺𑀧𑀮𑁆𑀮𑀗𑁆𑀓𑁂 𑀓𑀺𑀮𑁂𑀲𑀧𑀭𑀺𑀦𑀺𑀩𑁆𑀩𑀸𑀦𑁂𑀦 𑀧𑀭𑀺𑀦𑀺𑀩𑁆𑀩𑀼𑀢𑁄, 𑀬𑀫𑀓𑀲𑀸𑀮𑀦𑁆𑀢𑀭𑁂 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀢𑀺. 𑀏𑀯𑀁 𑀧𑀝𑀺𑀲𑀫𑁆𑀪𑀺𑀤𑀸𑀧𑁆𑀧𑀢𑁆𑀢𑁄 𑀉𑀤𑀸𑀬𑀺𑀢𑁆𑀣𑁂𑀭𑁄 𑀲𑁄𑀴𑀲𑀳𑀺 𑀕𑀸𑀣𑀸𑀳𑀺 𑀘𑀢𑀼𑀲𑀝𑁆𑀞𑀺𑀬𑀸 𑀧𑀤𑁂𑀳𑀺 𑀤𑀲𑀩𑀮𑀲𑁆𑀲 𑀯𑀡𑁆𑀡𑀁 𑀓𑀣𑁂𑀦𑁆𑀢𑁄 𑀤𑁂𑀲𑀦𑀁 𑀦𑀺𑀝𑁆𑀞𑀸𑀧𑁂𑀲𑀺. 𑀪𑀕𑀯𑀸 𑀅𑀦𑀼𑀫𑁄𑀤𑀺. 𑀤𑁂𑀲𑀦𑀸𑀯𑀲𑀸𑀦𑁂 𑀘𑀢𑀼𑀭𑀸𑀲𑀻𑀢𑀺𑀧𑀸𑀡𑀲𑀳𑀲𑁆𑀲𑀸𑀦𑀺 𑀅𑀫𑀢𑀧𑀸𑀦𑀁 𑀧𑀺𑀯𑀺𑀁𑀲𑀽𑀢𑀺.

𑁨. 𑀫𑀺𑀕𑀲𑀸𑀮𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁪. 𑀤𑀼𑀢𑀺𑀬𑁂 𑀓𑀣𑀁 𑀓𑀣𑀁 𑀦𑀸𑀫𑀸𑀢𑀺 𑀓𑁂𑀦 𑀓𑁂𑀦 𑀓𑀸𑀭𑀡𑁂𑀦. 𑀅𑀜𑁆𑀜𑁂𑀬𑁆𑀬𑁄𑀢𑀺 𑀆𑀚𑀸𑀦𑀺𑀢𑀩𑁆𑀩𑁄. 𑀬𑀢𑁆𑀭 𑀳𑀺 𑀦𑀸𑀫𑀸𑀢𑀺 𑀬𑀲𑁆𑀫𑀺𑀁 𑀦𑀸𑀫 𑀥𑀫𑁆𑀫𑁂. 𑀲𑀫𑀲𑀫𑀕𑀢𑀺𑀓𑀸𑀢𑀺 𑀲𑀫𑀪𑀸𑀯𑁂𑀦𑁂𑀯 𑀲𑀫𑀕𑀢𑀺𑀓𑀸. 𑀪𑀯𑀺𑀲𑁆𑀲𑀦𑁆𑀢𑀻𑀢𑀺 𑀚𑀸𑀢𑀸. 𑀲𑀓𑀤𑀸𑀕𑀸𑀫𑀺𑀧𑀢𑁆𑀢𑁄 𑀢𑀼𑀲𑀺𑀢𑀁 𑀓𑀸𑀬𑀁 𑀉𑀧𑀧𑀦𑁆𑀦𑁄𑀢𑀺 𑀲𑀓𑀤𑀸𑀕𑀸𑀫𑀺𑀧𑀼𑀕𑁆𑀕𑀮𑁄 𑀳𑀼𑀢𑁆𑀯𑀸 𑀢𑀼𑀲𑀺𑀢𑀪𑀯𑀦𑁂𑀬𑁂𑀯 𑀦𑀺𑀩𑁆𑀩𑀢𑁆𑀢𑁄. 𑀓𑀣𑀁 𑀓𑀣𑀁 𑀦𑀸𑀫𑀸𑀢𑀺 𑀓𑁂𑀦 𑀓𑁂𑀦 𑀦𑀼 𑀔𑁄 𑀓𑀸𑀭𑀡𑁂𑀦, 𑀓𑀺𑀁 𑀦𑀼 𑀔𑁄 𑀚𑀸𑀦𑀺𑀢𑁆𑀯𑀸 𑀤𑁂𑀲𑀺𑀢𑁄, 𑀉𑀤𑀸𑀳𑀼 𑀅𑀚𑀸𑀦𑀺𑀢𑁆𑀯𑀸𑀢𑀺. 𑀣𑁂𑀭𑁄 𑀓𑀸𑀭𑀡𑀁 𑀅𑀚𑀸𑀦𑀦𑁆𑀢𑁄 𑀏𑀯𑀁 𑀔𑁄 𑀧𑀦𑁂𑀢𑀁 𑀪𑀕𑀺𑀦𑀺 𑀪𑀕𑀯𑀢𑀸 𑀩𑁆𑀬𑀸𑀓𑀢𑀦𑁆𑀢𑀺 𑀆𑀳.

𑀅𑀫𑁆𑀫𑀓𑀸 𑀅𑀫𑁆𑀫𑀓𑀧𑀜𑁆𑀜𑀸𑀢𑀺 𑀇𑀢𑁆𑀣𑀻 𑀳𑀼𑀢𑁆𑀯𑀸 𑀇𑀢𑁆𑀣𑀺𑀲𑀜𑁆𑀜𑀸𑀬 𑀏𑀯 𑀲𑀫𑀦𑁆𑀦𑀸𑀕𑀢𑀸. 𑀓𑁂 𑀘 𑀧𑀼𑀭𑀺𑀲𑀧𑀼𑀕𑁆𑀕𑀮𑀧𑀭𑁄𑀧𑀭𑀺𑀬𑀜𑀸𑀡𑁂𑀢𑀺 𑀏𑀢𑁆𑀣 𑀧𑀼𑀭𑀺𑀲𑀧𑀼𑀕𑁆𑀕𑀮𑀧𑀭𑁄𑀧𑀭𑀺𑀬𑀜𑀸𑀡𑀁 𑀯𑀼𑀘𑁆𑀘𑀢𑀺 𑀧𑀼𑀭𑀺𑀲𑀧𑀼𑀕𑁆𑀕𑀮𑀸𑀦𑀁 𑀢𑀺𑀓𑁆𑀔𑀫𑀼𑀤𑀼𑀯𑀲𑁂𑀦 𑀇𑀦𑁆𑀤𑁆𑀭𑀺𑀬𑀧𑀭𑁄𑀧𑀭𑀺𑀬𑀜𑀸𑀡𑀁. 𑀢𑀲𑁆𑀫𑀸 𑀓𑀸 𑀘 𑀩𑀸𑀮𑀸 𑀫𑀺𑀕𑀲𑀸𑀮𑀸, 𑀓𑁂 𑀘 𑀧𑀼𑀭𑀺𑀲𑀧𑀼𑀕𑁆𑀕𑀮𑀸𑀦𑀁 𑀇𑀦𑁆𑀤𑁆𑀭𑀺𑀬𑀧𑀭𑁄𑀧𑀭𑀺𑀬𑀜𑀸𑀡𑁂 𑀅𑀧𑁆𑀧𑀝𑀺𑀳𑀢𑀯𑀺𑀲𑀬𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸, 𑀉𑀪𑀬𑀫𑁂𑀢𑀁 𑀤𑀽𑀭𑁂 𑀲𑀼𑀯𑀺𑀤𑀽𑀭𑁂𑀢𑀺 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄.

𑀇𑀤𑀸𑀦𑀺 𑀫𑀺𑀕𑀲𑀸𑀮𑀸𑀬 𑀅𑀢𑁆𑀢𑀦𑁄 𑀤𑀽𑀭𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 𑀙𑀬𑀺𑀫𑁂, 𑀆𑀦𑀦𑁆𑀤𑀸𑀢𑀺𑀆𑀤𑀺𑀫𑀸𑀳. 𑀲𑁄𑀭𑀢𑁄 𑀳𑁄𑀢𑀻𑀢𑀺 𑀧𑀸𑀧𑀢𑁄 𑀲𑀼𑀝𑁆𑀞𑀼 𑀑𑀭𑀢𑁄 𑀯𑀺𑀭𑀢𑁄 𑀳𑁄𑀢𑀺. 𑀲𑀼𑀭𑀢𑁄𑀢𑀺𑀧𑀺 𑀧𑀸𑀞𑁄. 𑀅𑀪𑀺𑀦𑀦𑁆𑀤𑀦𑁆𑀢𑀺 𑀲𑀩𑁆𑀭𑀳𑁆𑀫𑀘𑀸𑀭𑀻 𑀏𑀓𑀢𑁆𑀢𑀯𑀸𑀲𑁂𑀦𑀸𑀢𑀺 𑀢𑁂𑀦 𑀲𑀤𑁆𑀥𑀺𑀁 𑀏𑀓𑀢𑁄𑀯𑀸𑀲𑁂𑀦 𑀲𑀩𑁆𑀭𑀳𑁆𑀫𑀘𑀸𑀭𑀻 𑀅𑀪𑀺𑀦𑀦𑁆𑀤𑀦𑁆𑀢𑀺 𑀢𑀼𑀲𑁆𑀲𑀦𑁆𑀢𑀺. 𑀏𑀓𑀦𑁆𑀢𑀯𑀸𑀲𑁂𑀦𑀸𑀢𑀺𑀧𑀺 𑀧𑀸𑀞𑁄, 𑀲𑀢𑀢𑀯𑀸𑀲𑁂𑀦𑀸𑀢𑀺 𑀅𑀢𑁆𑀣𑁄. 𑀲𑀯𑀦𑁂𑀦𑀧𑀺 𑀅𑀓𑀢𑀁 𑀳𑁄𑀢𑀻𑀢𑀺 𑀲𑁄𑀢𑀩𑁆𑀩𑀬𑀼𑀢𑁆𑀢𑀓𑀁 𑀅𑀲𑀼𑀢𑀁 𑀳𑁄𑀢𑀺. 𑀩𑀸𑀳𑀼𑀲𑀘𑁆𑀘𑁂𑀦𑀧𑀺 𑀅𑀓𑀢𑀁 𑀳𑁄𑀢𑀻𑀢𑀺 𑀏𑀢𑁆𑀣 𑀩𑀸𑀳𑀼𑀲𑀘𑁆𑀘𑀁 𑀯𑀼𑀘𑁆𑀘𑀢𑀺 𑀯𑀻𑀭𑀺𑀬𑀁, 𑀯𑀻𑀭𑀺𑀬𑁂𑀦 𑀓𑀢𑁆𑀢𑀩𑁆𑀩𑀬𑀼𑀢𑁆𑀢𑀓𑀁 𑀅𑀓𑀢𑀁 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀤𑀺𑀝𑁆𑀞𑀺𑀬𑀸𑀧𑀺 𑀅𑀧𑁆𑀧𑀝𑀺𑀯𑀺𑀤𑁆𑀥𑀁 𑀳𑁄𑀢𑀻𑀢𑀺 𑀤𑀺𑀝𑁆𑀞𑀺𑀬𑀸 𑀧𑀝𑀺𑀯𑀺𑀚𑁆𑀛𑀺𑀢𑀩𑁆𑀩𑀁 𑀅𑀧𑁆𑀧𑀝𑀺𑀯𑀺𑀤𑁆𑀥𑀁 𑀳𑁄𑀢𑀺. 𑀲𑀸𑀫𑀸𑀬𑀺𑀓𑀫𑁆𑀧𑀺 𑀯𑀺𑀫𑀼𑀢𑁆𑀢𑀺𑀁 𑀦 𑀮𑀪𑀢𑀻𑀢𑀺 𑀓𑀸𑀮𑀸𑀦𑀼𑀓𑀸𑀮𑀁 𑀥𑀫𑁆𑀫𑀲𑁆𑀲𑀯𑀦𑀁 𑀦𑀺𑀲𑁆𑀲𑀸𑀬 𑀧𑀻𑀢𑀺𑀧𑀸𑀫𑁄𑀚𑁆𑀚𑀁 𑀦 𑀮𑀪𑀢𑀺. 𑀳𑀸𑀦𑀕𑀸𑀫𑀻𑀬𑁂𑀯 𑀳𑁄𑀢𑀻𑀢𑀺 𑀧𑀭𑀺𑀳𑀸𑀦𑀺𑀫𑁂𑀯 𑀕𑀘𑁆𑀙𑀢𑀺.

𑀧𑀫𑀸𑀡𑀺𑀓𑀸𑀢𑀺 𑀧𑀼𑀕𑁆𑀕𑀮𑁂𑀲𑀼 𑀧𑀫𑀸𑀡𑀕𑁆𑀕𑀸𑀳𑀓𑀸. 𑀧𑀫𑀺𑀦𑀦𑁆𑀢𑀻𑀢𑀺 𑀧𑀫𑁂𑀢𑀼𑀁 𑀢𑀼𑀮𑁂𑀢𑀼𑀁 𑀆𑀭𑀪𑀦𑁆𑀢𑀺. 𑀏𑀓𑁄 𑀳𑀻𑀦𑁄𑀢𑀺 𑀏𑀓𑁄 𑀕𑀼𑀡𑁂𑀳𑀺 𑀳𑀻𑀦𑁄. 𑀏𑀓𑁄 𑀧𑀡𑀻𑀢𑁄𑀢𑀺 𑀏𑀓𑁄 𑀕𑀼𑀡𑁂𑀳𑀺 𑀧𑀡𑀻𑀢𑁄. 𑀢𑀁 𑀳𑀻𑀢𑀺 𑀢𑀁 𑀧𑀫𑀸𑀡𑀓𑀭𑀡𑀁.

𑀅𑀪𑀺𑀓𑁆𑀓𑀦𑁆𑀢𑀢𑀭𑁄𑀢𑀺 𑀲𑀼𑀦𑁆𑀤𑀭𑀢𑀭𑁄. 𑀧𑀡𑀻𑀢𑀢𑀭𑁄𑀢𑀺 𑀉𑀢𑁆𑀢𑀫𑀢𑀭𑁄. 𑀥𑀫𑁆𑀫𑀲𑁄𑀢𑁄 𑀦𑀺𑀩𑁆𑀩𑀳𑀢𑀻𑀢𑀺 𑀲𑀽𑀭𑀁 𑀳𑀼𑀢𑁆𑀯𑀸 𑀧𑀯𑀢𑁆𑀢𑀫𑀸𑀦𑀯𑀺𑀧𑀲𑁆𑀲𑀦𑀸𑀜𑀸𑀡𑀁 𑀦𑀺𑀩𑁆𑀩𑀳𑀢𑀺, 𑀅𑀭𑀺𑀬𑀪𑀽𑀫𑀺𑀁 𑀲𑀫𑁆𑀧𑀸𑀧𑁂𑀢𑀺. 𑀢𑀤𑀦𑁆𑀢𑀭𑀁 𑀓𑁄 𑀚𑀸𑀦𑁂𑀬𑁆𑀬𑀸𑀢𑀺 𑀢𑀁 𑀅𑀦𑁆𑀢𑀭𑀁 𑀢𑀁 𑀓𑀸𑀭𑀡𑀁 𑀅𑀜𑁆𑀜𑀢𑁆𑀭 𑀢𑀣𑀸𑀕𑀢𑁂𑀦 𑀓𑁄 𑀚𑀸𑀦𑁂𑀬𑁆𑀬𑀸𑀢𑀺 𑀅𑀢𑁆𑀣𑁄.

𑀓𑁄𑀥𑀫𑀸𑀦𑁄𑀢𑀺 𑀓𑁄𑀥𑁄 𑀘 𑀫𑀸𑀦𑁄 𑀘. 𑀮𑁄𑀪𑀥𑀫𑁆𑀫𑀸𑀢𑀺 𑀮𑁄𑀪𑁄𑀬𑁂𑀯. 𑀯𑀘𑀻𑀲𑀗𑁆𑀔𑀸𑀭𑀸𑀢𑀺 𑀆𑀮𑀸𑀧𑀲𑀮𑁆𑀮𑀸𑀧𑀯𑀲𑁂𑀦 𑀯𑀘𑀦𑀸𑀦𑁂𑀯. 𑀬𑁄 𑀯𑀸 𑀧𑀦𑀲𑁆𑀲 𑀫𑀸𑀤𑀺𑀲𑁄𑀢𑀺 𑀬𑁄 𑀯𑀸 𑀧𑀦 𑀅𑀜𑁆𑀜𑁄𑀧𑀺 𑀫𑀬𑀸 𑀲𑀤𑀺𑀲𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄𑀬𑁂𑀯 𑀅𑀲𑁆𑀲, 𑀲𑁄 𑀧𑀼𑀕𑁆𑀕𑀮𑁂𑀲𑀼 𑀧𑀫𑀸𑀡𑀁 𑀕𑀡𑁆𑀳𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀔𑀜𑁆𑀜𑀢𑀻𑀢𑀺 𑀕𑀼𑀡𑀔𑀡𑀦𑀁 𑀧𑀸𑀧𑀼𑀡𑀸𑀢𑀺. 𑀇𑀫𑁂 𑀔𑁄, 𑀆𑀦𑀦𑁆𑀤, 𑀙 𑀧𑀼𑀕𑁆𑀕𑀮𑀸𑀢𑀺 𑀤𑁆𑀯𑁂 𑀲𑁄𑀭𑀢𑀸, 𑀤𑁆𑀯𑁂 𑀅𑀥𑀺𑀕𑀢𑀓𑁄𑀥𑀫𑀸𑀦𑀮𑁄𑀪𑀥𑀫𑁆𑀫𑀸, 𑀤𑁆𑀯𑁂 𑀅𑀥𑀺𑀕𑀢𑀓𑁄𑀥𑀫𑀸𑀦𑀯𑀘𑀻𑀲𑀗𑁆𑀔𑀸𑀭𑀸𑀢𑀺 𑀇𑀫𑁂 𑀙 𑀧𑀼𑀕𑁆𑀕𑀮𑀸. 𑀕𑀢𑀺𑀦𑁆𑀢𑀺 𑀜𑀸𑀡𑀕𑀢𑀺𑀁. 𑀏𑀓𑀗𑁆𑀕𑀳𑀻𑀦𑀸𑀢𑀺 𑀏𑀓𑁂𑀓𑁂𑀦 𑀕𑀼𑀡𑀗𑁆𑀕𑁂𑀦 𑀳𑀻𑀦𑀸. 𑀧𑀽𑀭𑀡𑁄 𑀲𑀻𑀮𑁂𑀦 𑀯𑀺𑀲𑁂𑀲𑀻 𑀅𑀳𑁄𑀲𑀺, 𑀇𑀲𑀺𑀤𑀢𑁆𑀢𑁄 𑀧𑀜𑁆𑀜𑀸𑀬. 𑀧𑀽𑀭𑀡𑀲𑁆𑀲 𑀲𑀻𑀮𑀁 𑀇𑀲𑀺𑀤𑀢𑁆𑀢𑀲𑁆𑀲 𑀧𑀜𑁆𑀜𑀸𑀞𑀸𑀦𑁂 𑀞𑀺𑀢𑀁, 𑀇𑀲𑀺𑀤𑀢𑁆𑀢𑀲𑁆𑀲 𑀧𑀜𑁆𑀜𑀸 𑀧𑀽𑀭𑀡𑀲𑁆𑀲 𑀲𑀻𑀮𑀝𑁆𑀞𑀸𑀦𑁂 𑀞𑀺𑀢𑀸𑀢𑀺.

𑁩. 𑀇𑀡𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁫. 𑀢𑀢𑀺𑀬𑁂 𑀤𑀸𑀮𑀺𑀤𑁆𑀤𑀺𑀬𑀦𑁆𑀢𑀺 𑀤𑀮𑀺𑀤𑁆𑀤𑀪𑀸𑀯𑁄. 𑀓𑀸𑀫𑀪𑁄𑀕𑀺𑀦𑁄𑀢𑀺 𑀓𑀸𑀫𑁂 𑀪𑀼𑀜𑁆𑀚𑀦𑀓𑀲𑀢𑁆𑀢𑀲𑁆𑀲. 𑀅𑀲𑁆𑀲𑀓𑁄𑀢𑀺 𑀅𑀢𑁆𑀢𑀦𑁄 𑀲𑀦𑁆𑀢𑀓𑁂𑀦 𑀭𑀳𑀺𑀢𑁄. 𑀅𑀦𑀸𑀴𑁆𑀳𑀺𑀓𑁄𑀢𑀺 𑀦 𑀅𑀟𑁆𑀠𑁄. 𑀇𑀡𑀁 𑀆𑀤𑀺𑀬𑀢𑀻𑀢𑀺 𑀚𑀻𑀯𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀇𑀡𑀁 𑀆𑀤𑀺𑀬𑀢𑀺. 𑀯𑀟𑁆𑀠𑀺𑀁 𑀧𑀝𑀺𑀲𑁆𑀲𑀼𑀡𑀸𑀢𑀻𑀢𑀺 𑀤𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀯𑀟𑁆𑀠𑀺𑀁 𑀤𑀲𑁆𑀲𑀸𑀫𑀻𑀢𑀺 𑀧𑀝𑀺𑀚𑀸𑀦𑀸𑀢𑀺. 𑀅𑀦𑀼𑀘𑀭𑀦𑁆𑀢𑀺𑀧𑀺 𑀦𑀦𑁆𑀢𑀺 𑀧𑀭𑀺𑀲𑀫𑀚𑁆𑀛𑀕𑀡𑀫𑀚𑁆𑀛𑀸𑀤𑀻𑀲𑀼 𑀆𑀢𑀧𑀞𑀧𑀦𑀧𑀁𑀲𑀼𑀑𑀓𑀺𑀭𑀡𑀸𑀤𑀻𑀳𑀺 𑀯𑀺𑀧𑁆𑀧𑀓𑀸𑀭𑀁 𑀧𑀸𑀧𑁂𑀦𑁆𑀢𑁄 𑀧𑀘𑁆𑀙𑀢𑁄 𑀧𑀘𑁆𑀙𑀢𑁄 𑀅𑀦𑀼𑀩𑀦𑁆𑀥𑀦𑁆𑀢𑀺. 𑀲𑀤𑁆𑀥𑀸 𑀦𑀢𑁆𑀣𑀻𑀢𑀺 𑀑𑀓𑀧𑁆𑀧𑀦𑀓𑀲𑀤𑁆𑀥𑀸𑀫𑀢𑁆𑀢𑀓𑀫𑁆𑀧𑀺 𑀦𑀢𑁆𑀣𑀺. 𑀳𑀺𑀭𑀻 𑀦𑀢𑁆𑀣𑀻𑀢𑀺 𑀳𑀺𑀭𑀻𑀬𑀦𑀸𑀓𑀸𑀭𑀫𑀢𑁆𑀢𑀓𑀫𑁆𑀧𑀺 𑀦𑀢𑁆𑀣𑀺. 𑀑𑀢𑁆𑀢𑀧𑁆𑀧𑀁 𑀦𑀢𑁆𑀣𑀻𑀢𑀺 𑀪𑀸𑀬𑀦𑀸𑀓𑀸𑀭𑀫𑀢𑁆𑀢𑀓𑀫𑁆𑀧𑀺 𑀦𑀢𑁆𑀣𑀺. 𑀯𑀻𑀭𑀺𑀬𑀁 𑀦𑀢𑁆𑀣𑀻𑀢𑀺 𑀓𑀸𑀬𑀺𑀓𑀯𑀻𑀭𑀺𑀬𑀫𑀢𑁆𑀢𑀓𑀫𑁆𑀧𑀺 𑀦𑀢𑁆𑀣𑀺. 𑀧𑀜𑁆𑀜𑀸 𑀦𑀢𑁆𑀣𑀻𑀢𑀺 𑀓𑀫𑁆𑀫𑀲𑁆𑀲𑀓𑀢𑀧𑀜𑁆𑀜𑀸𑀫𑀢𑁆𑀢𑀓𑀫𑁆𑀧𑀺 𑀦𑀢𑁆𑀣𑀺. 𑀇𑀡𑀸𑀤𑀸𑀦𑀲𑁆𑀫𑀺𑀁 𑀯𑀤𑀸𑀫𑀻𑀢𑀺 𑀇𑀡𑀕𑁆𑀕𑀳𑀡𑀁 𑀯𑀤𑀸𑀫𑀺. 𑀫𑀸 𑀫𑀁 𑀚𑀜𑁆𑀜𑀽𑀢𑀺 𑀫𑀸 𑀫𑀁 𑀚𑀸𑀦𑀸𑀢𑀼.

𑀤𑀸𑀮𑀺𑀤𑁆𑀤𑀺𑀬𑀁 𑀤𑀼𑀓𑁆𑀔𑀦𑁆𑀢𑀺 𑀥𑀦𑀤𑀮𑀺𑀤𑁆𑀤𑀪𑀸𑀯𑁄 𑀤𑀼𑀓𑁆𑀔𑀁. 𑀓𑀸𑀫𑀮𑀸𑀪𑀸𑀪𑀺𑀚𑀧𑁆𑀧𑀺𑀦𑀦𑁆𑀢𑀺 𑀓𑀸𑀫𑀮𑀸𑀪𑀁 𑀧𑀢𑁆𑀣𑁂𑀦𑁆𑀢𑀸𑀦𑀁. 𑀧𑀸𑀧𑀓𑀫𑁆𑀫𑀯𑀺𑀦𑀺𑀩𑁆𑀩𑀬𑁄𑀢𑀺 𑀧𑀸𑀧𑀓𑀫𑁆𑀫𑀯𑀟𑁆𑀠𑀓𑁄. 𑀲𑀁𑀲𑀧𑁆𑀧𑀢𑀻𑀢𑀺 𑀧𑀭𑀺𑀧𑁆𑀨𑀦𑁆𑀤𑀢𑀺. 𑀚𑀸𑀦𑀦𑁆𑀢𑀺 𑀚𑀸𑀦𑀦𑁆𑀢𑁄. 𑀬𑀲𑁆𑀲 𑀯𑀺𑀧𑁆𑀧𑀝𑀺𑀲𑀸𑀭𑀚𑀸𑀢𑀺 𑀬𑁂 𑀅𑀲𑁆𑀲 𑀯𑀺𑀧𑁆𑀧𑀝𑀺𑀲𑀸𑀭𑀢𑁄 𑀚𑀸𑀢𑀸. 𑀬𑁄𑀦𑀺𑀫𑀜𑁆𑀜𑀢𑀭𑀦𑁆𑀢𑀺 𑀏𑀓𑀁 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀁. 𑀤𑀤𑀁 𑀘𑀺𑀢𑁆𑀢𑀁 𑀧𑀲𑀸𑀤𑀬𑀦𑁆𑀢𑀺 𑀘𑀺𑀢𑁆𑀢𑀁 𑀧𑀲𑀸𑀤𑁂𑀦𑁆𑀢𑁄 𑀤𑀤𑀫𑀸𑀦𑁄.

𑀓𑀝𑀕𑁆𑀕𑀸𑀳𑁄𑀢𑀺 𑀚𑀬𑀕𑁆𑀕𑀸𑀳𑁄, 𑀅𑀦𑀧𑀭𑀸𑀥𑀕𑁆𑀕𑀸𑀳𑁄 𑀳𑁄𑀢𑀺. 𑀖𑀭𑀫𑁂𑀲𑀺𑀦𑁄𑀢𑀺 𑀖𑀭𑀸𑀯𑀸𑀲𑀁 𑀧𑀭𑀺𑀬𑁂𑀲𑀦𑁆𑀢𑀲𑁆𑀲 𑀯𑀲𑀫𑀸𑀦𑀲𑁆𑀲 𑀯𑀸. 𑀘𑀸𑀕𑁄 𑀧𑀼𑀜𑁆𑀜𑀁 𑀧𑀯𑀟𑁆𑀠𑀢𑀻𑀢𑀺 𑀘𑀸𑀕𑁄𑀢𑀺 𑀲𑀗𑁆𑀔𑀁 𑀕𑀢𑀁 𑀧𑀼𑀜𑁆𑀜𑀁 𑀯𑀟𑁆𑀠𑀢𑀺. 𑀘𑀸𑀕𑀸 𑀧𑀼𑀜𑁆𑀜𑀦𑁆𑀢𑀺 𑀯𑀸 𑀧𑀸𑀞𑁄. 𑀧𑀢𑀺𑀝𑁆𑀞𑀺𑀢𑀸𑀢𑀺 𑀧𑀢𑀺𑀝𑁆𑀞𑀺𑀢𑀲𑀤𑁆𑀥𑀸 𑀦𑀸𑀫 𑀲𑁄𑀢𑀸𑀧𑀦𑁆𑀦𑀲𑁆𑀲 𑀲𑀤𑁆𑀥𑀸. 𑀳𑀺𑀭𑀺𑀫𑀦𑁄𑀢𑀺 𑀳𑀺𑀭𑀺𑀲𑀫𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑁄. 𑀦𑀺𑀭𑀸𑀫𑀺𑀲𑀁 𑀲𑀼𑀔𑀦𑁆𑀢𑀺 𑀢𑀻𑀡𑀺 𑀛𑀸𑀦𑀸𑀦𑀺 𑀦𑀺𑀲𑁆𑀲𑀸𑀬 𑀉𑀧𑁆𑀧𑀚𑁆𑀚𑀦𑀓𑀲𑀼𑀔𑀁. 𑀉𑀧𑁂𑀓𑁆𑀔𑀦𑁆𑀢𑀺 𑀘𑀢𑀼𑀢𑁆𑀣𑀚𑁆𑀛𑀸𑀦𑀼𑀧𑁂𑀓𑁆𑀔𑀁. 𑀆𑀭𑀤𑁆𑀥𑀯𑀻𑀭𑀺𑀬𑁄𑀢𑀺 𑀧𑀭𑀺𑀧𑀼𑀡𑁆𑀡𑀧𑀕𑁆𑀕𑀳𑀺𑀢𑀯𑀻𑀭𑀺𑀬𑁄. 𑀛𑀸𑀦𑀸𑀦𑀺 𑀉𑀧𑀲𑀫𑁆𑀧𑀚𑁆𑀚𑀸𑀢𑀺 𑀘𑀢𑁆𑀢𑀸𑀭𑀺 𑀛𑀸𑀦𑀸𑀦𑀺 𑀧𑀢𑁆𑀯𑀸. 𑀏𑀓𑁄𑀤𑀺 𑀦𑀺𑀧𑀓𑁄 𑀲𑀢𑁄𑀢𑀺 𑀏𑀓𑀕𑁆𑀕𑀘𑀺𑀢𑁆𑀢𑁄 𑀓𑀫𑁆𑀫𑀲𑁆𑀲𑀓𑀢𑀜𑀸𑀡𑀲𑀢𑀻𑀳𑀺 𑀘 𑀲𑀫𑀦𑁆𑀦𑀸𑀕𑀢𑁄.

𑀏𑀯𑀁 𑀜𑀢𑁆𑀯𑀸 𑀬𑀣𑀸𑀪𑀽𑀢𑀦𑁆𑀢𑀺 𑀏𑀯𑀁 𑀏𑀢𑁆𑀢𑀓𑀁 𑀓𑀸𑀭𑀡𑀁 𑀬𑀣𑀸𑀲𑀪𑀸𑀯𑀁 𑀚𑀸𑀦𑀺𑀢𑁆𑀯𑀸. 𑀲𑀩𑁆𑀩𑀲𑀁𑀬𑁄𑀚𑀦𑀓𑁆𑀔𑀬𑁂𑀢𑀺 𑀦𑀺𑀩𑁆𑀩𑀸𑀦𑁂. 𑀲𑀩𑁆𑀩𑀲𑁄𑀢𑀺 𑀲𑀩𑁆𑀩𑀸𑀓𑀸𑀭𑁂𑀦. 𑀅𑀦𑀼𑀧𑀸𑀤𑀸𑀬𑀸𑀢𑀺 𑀅𑀕𑁆𑀕𑀳𑁂𑀢𑁆𑀯𑀸. 𑀲𑀫𑁆𑀫𑀸 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀢𑀻𑀢𑀺 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀲𑀩𑁆𑀩𑀲𑀁𑀬𑁄𑀚𑀦𑀓𑁆𑀔𑀬𑀲𑀗𑁆𑀔𑀸𑀢𑁂 𑀦𑀺𑀩𑁆𑀩𑀸𑀦𑁂 𑀲𑀩𑁆𑀩𑀲𑁄 𑀅𑀦𑀼𑀧𑀸𑀤𑀺𑀬𑀺𑀢𑁆𑀯𑀸 𑀲𑀫𑁆𑀫𑀸 𑀳𑁂𑀢𑀼𑀦𑀸 𑀦𑀬𑁂𑀦 𑀫𑀕𑁆𑀕𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀢𑀺. ‘‘𑀏𑀢𑀁 𑀜𑀢𑁆𑀯𑀸 𑀬𑀣𑀸𑀪𑀽𑀢𑀁, 𑀲𑀩𑁆𑀩𑀲𑀁𑀬𑁄𑀚𑀦𑀓𑁆𑀔𑀬’’𑀦𑁆𑀢𑀺𑀧𑀺 𑀧𑀸𑀴𑀺𑀬𑀁 𑀮𑀺𑀔𑀺𑀢𑀁, 𑀢𑀲𑁆𑀲 𑀏𑀢𑀁 𑀲𑀩𑁆𑀩𑀲𑀁𑀬𑁄𑀚𑀦𑀓𑁆𑀔𑀬𑀲𑀗𑁆𑀔𑀸𑀢𑀁 𑀦𑀺𑀩𑁆𑀩𑀸𑀦𑀁 𑀬𑀣𑀸𑀪𑀽𑀢𑀁 𑀜𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀧𑀼𑀭𑀺𑀫𑀧𑀘𑁆𑀙𑀺𑀫𑁂𑀳𑀺 𑀧𑀦 𑀲𑀤𑁆𑀥𑀺𑀁 𑀦 𑀖𑀝𑀻𑀬𑀢𑀺.

𑀢𑀲𑁆𑀲 𑀲𑀫𑁆𑀫𑀸 𑀯𑀺𑀫𑀼𑀢𑁆𑀢𑀲𑁆𑀲𑀸𑀢𑀺 𑀢𑀲𑁆𑀲 𑀲𑀫𑁆𑀫𑀸 𑀯𑀺𑀫𑀼𑀢𑁆𑀢𑀲𑁆𑀲 𑀔𑀻𑀡𑀸𑀲𑀯𑀲𑁆𑀲. 𑀜𑀸𑀡𑀁 𑀳𑁄𑀢𑀻𑀢𑀺 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀁 𑀳𑁄𑀢𑀺. 𑀢𑀸𑀤𑀺𑀦𑁄𑀢𑀺 𑀢𑀁𑀲𑀡𑁆𑀞𑀺𑀢𑀲𑁆𑀲. 𑀅𑀓𑀼𑀧𑁆𑀧𑀸𑀢𑀺 𑀅𑀓𑀼𑀧𑁆𑀧𑀸𑀭𑀫𑁆𑀫𑀡𑀢𑁆𑀢𑀸 𑀓𑀼𑀧𑁆𑀧𑀓𑀸𑀭𑀡𑀸𑀦𑀁 𑀓𑀺𑀮𑁂𑀲𑀸𑀦𑀜𑁆𑀘 𑀅𑀪𑀸𑀯𑁂𑀦 𑀅𑀓𑀼𑀧𑁆𑀧𑀸. 𑀯𑀺𑀫𑀼𑀢𑁆𑀢𑀻𑀢𑀺 𑀫𑀕𑁆𑀕𑀯𑀺𑀫𑀼𑀢𑁆𑀢𑀺𑀧𑀺 𑀨𑀮𑀯𑀺𑀫𑀼𑀢𑁆𑀢𑀺𑀧𑀺. 𑀪𑀯𑀲𑀁𑀬𑁄𑀚𑀦𑀓𑁆𑀔𑀬𑁂𑀢𑀺 𑀪𑀯𑀲𑀁𑀬𑁄𑀚𑀦𑀓𑁆𑀔𑀬𑀲𑀗𑁆𑀔𑀸𑀢𑁂 𑀦𑀺𑀩𑁆𑀩𑀸𑀦𑁂 𑀪𑀯𑀲𑀁𑀬𑁄𑀚𑀦𑀸𑀦𑀜𑁆𑀘 𑀔𑀬𑀦𑁆𑀢𑁂 𑀉𑀧𑁆𑀧𑀦𑁆𑀦𑀸. 𑀏𑀢𑀁 𑀔𑁄 𑀧𑀭𑀫𑀁 𑀜𑀸𑀡𑀦𑁆𑀢𑀺 𑀏𑀢𑀁 𑀫𑀕𑁆𑀕𑀨𑀮𑀜𑀸𑀡𑀁 𑀧𑀭𑀫𑀜𑀸𑀡𑀁 𑀦𑀸𑀫. 𑀲𑀼𑀔𑀫𑀦𑀼𑀢𑁆𑀢𑀭𑀦𑁆𑀢𑀺 𑀏𑀢𑀤𑁂𑀯 𑀫𑀕𑁆𑀕𑀨𑀮𑀲𑀼𑀔𑀁 𑀅𑀦𑀼𑀢𑁆𑀢𑀭𑀁 𑀲𑀼𑀔𑀁 𑀦𑀸𑀫. 𑀆𑀡𑀡𑁆𑀬𑀫𑀼𑀢𑁆𑀢𑀫𑀦𑁆𑀢𑀺 𑀲𑀩𑁆𑀩𑁂𑀲𑀁 𑀅𑀡𑀡𑀸𑀦𑀁 𑀔𑀻𑀡𑀸𑀲𑀯𑁄 𑀉𑀢𑁆𑀢𑀫𑀅𑀡𑀡𑁄, 𑀢𑀲𑁆𑀫𑀸 𑀅𑀭𑀳𑀢𑁆𑀢𑀨𑀮𑀁 𑀆𑀡𑀡𑁆𑀬𑀫𑀼𑀢𑁆𑀢𑀫𑀦𑁆𑀢𑀺 𑀅𑀭𑀳𑀢𑁆𑀢𑀨𑀮𑁂𑀦 𑀤𑁂𑀲𑀦𑀸𑀬 𑀓𑀽𑀝𑀁 𑀕𑀡𑁆𑀳𑀺. 𑀇𑀫𑀲𑁆𑀫𑀺𑀜𑁆𑀘 𑀲𑀼𑀢𑁆𑀢𑁂 𑀯𑀝𑁆𑀝𑀫𑁂𑀯 𑀓𑀣𑁂𑀢𑁆𑀯𑀸 𑀕𑀸𑀣𑀸𑀲𑀼 𑀯𑀝𑁆𑀝𑀯𑀺𑀯𑀝𑁆𑀝𑀁 𑀓𑀣𑀺𑀢𑀦𑁆𑀢𑀺.

𑁪. 𑀫𑀳𑀸𑀘𑀼𑀦𑁆𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁬. 𑀘𑀢𑀼𑀢𑁆𑀣𑁂 𑀘𑁂𑀢𑀻𑀲𑀽𑀢𑀺 𑀘𑁂𑀢𑀺𑀭𑀝𑁆𑀞𑁂. 𑀲𑀬𑀁𑀚𑀸𑀢𑀺𑀬𑀦𑁆𑀢𑀺 𑀏𑀯𑀁𑀦𑀸𑀫𑀓𑁂 𑀦𑀺𑀕𑀫𑁂. 𑀫𑀳𑀸𑀘𑀼𑀦𑁆𑀤𑁄𑀢𑀺 𑀥𑀫𑁆𑀫𑀲𑁂𑀦𑀸𑀧𑀢𑀺𑀲𑁆𑀲 𑀓𑀦𑀺𑀝𑁆𑀞𑀪𑀸𑀢𑀺𑀓𑁄. 𑀥𑀫𑁆𑀫𑁂 𑀬𑁄𑀕𑁄 𑀅𑀦𑀼𑀬𑁄𑀕𑁄 𑀏𑀢𑁂𑀲𑀦𑁆𑀢𑀺 𑀥𑀫𑁆𑀫𑀬𑁄𑀕𑀸. 𑀥𑀫𑁆𑀫𑀓𑀣𑀺𑀓𑀸𑀦𑀁 𑀏𑀢𑀁 𑀦𑀸𑀫𑀁. 𑀛𑀸𑀬𑀦𑁆𑀢𑀻𑀢𑀺 𑀛𑀸𑀬𑀻. 𑀅𑀧𑀲𑀸𑀤𑁂𑀦𑁆𑀢𑀻𑀢𑀺 𑀖𑀝𑁆𑀝𑁂𑀦𑁆𑀢𑀺 𑀳𑀺𑀁𑀲𑀦𑁆𑀢𑀺. 𑀛𑀸𑀬𑀦𑁆𑀢𑀻𑀢𑀺 𑀘𑀺𑀦𑁆𑀢𑁂𑀦𑁆𑀢𑀺. 𑀧𑀚𑁆𑀛𑀸𑀬𑀦𑁆𑀢𑀻𑀢𑀺𑀆𑀤𑀻𑀦𑀺 𑀉𑀧𑀲𑀕𑁆𑀕𑀯𑀲𑁂𑀦 𑀯𑀟𑁆𑀠𑀺𑀢𑀸𑀦𑀺. 𑀓𑀺𑀫𑀺𑀫𑁂 𑀛𑀸𑀬𑀦𑁆𑀢𑀻𑀢𑀺 𑀓𑀺𑀁 𑀦𑀸𑀫 𑀇𑀫𑁂 𑀛𑀸𑀬𑀦𑁆𑀢𑀺. 𑀓𑀺𑀦𑁆𑀢𑀺𑀫𑁂 𑀛𑀸𑀬𑀦𑁆𑀢𑀻𑀢𑀺 𑀓𑀺𑀫𑀢𑁆𑀣𑀁 𑀇𑀫𑁂 𑀛𑀸𑀬𑀦𑁆𑀢𑀺. 𑀓𑀣𑀁 𑀇𑀫𑁂 𑀛𑀸𑀬𑀦𑁆𑀢𑀻𑀢𑀺 𑀓𑁂𑀦 𑀓𑀸𑀭𑀡𑁂𑀦 𑀇𑀫𑁂 𑀛𑀸𑀬𑀦𑁆𑀢𑀺. 𑀅𑀫𑀢𑀁 𑀥𑀸𑀢𑀼𑀁 𑀓𑀸𑀬𑁂𑀦 𑀨𑀼𑀲𑀺𑀢𑁆𑀯𑀸 𑀯𑀺𑀳𑀭𑀦𑁆𑀢𑀻𑀢𑀺 𑀫𑀭𑀡𑀯𑀺𑀭𑀳𑀺𑀢𑀁 𑀦𑀺𑀩𑁆𑀩𑀸𑀦𑀥𑀸𑀢𑀼𑀁 𑀲𑀦𑁆𑀥𑀸𑀬 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀯𑀺𑀳𑀭𑀦𑁆𑀢𑀸 𑀅𑀦𑀼𑀓𑁆𑀓𑀫𑁂𑀦 𑀢𑀁 𑀦𑀸𑀫𑀓𑀸𑀬𑁂𑀦 𑀨𑀼𑀲𑀺𑀢𑁆𑀯𑀸 𑀯𑀺𑀳𑀭𑀦𑁆𑀢𑀺. 𑀕𑀫𑁆𑀪𑀻𑀭𑀁 𑀅𑀢𑁆𑀣𑀧𑀤𑀦𑁆𑀢𑀺 𑀕𑀼𑀴𑁆𑀳𑀁 𑀧𑀝𑀺𑀘𑁆𑀙𑀦𑁆𑀦𑀁 𑀔𑀦𑁆𑀥𑀥𑀸𑀢𑀼𑀆𑀬𑀢𑀦𑀸𑀤𑀺𑀅𑀢𑁆𑀣𑀁. 𑀧𑀜𑁆𑀜𑀸𑀬 𑀅𑀢𑀺𑀯𑀺𑀚𑁆𑀛 𑀧𑀲𑁆𑀲𑀦𑁆𑀢𑀻𑀢𑀺 𑀲𑀳𑀯𑀺𑀧𑀲𑁆𑀲𑀦𑀸𑀬 𑀫𑀕𑁆𑀕𑀧𑀜𑁆𑀜𑀸𑀬 𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸 𑀧𑀲𑁆𑀲𑀦𑁆𑀢𑀺. 𑀇𑀫𑀲𑁆𑀫𑀺𑀁 𑀧𑀦𑀢𑁆𑀣𑁂 𑀲𑀫𑁆𑀫𑀲𑀦𑀧𑀝𑀺𑀯𑁂𑀥𑀧𑀜𑁆𑀜𑀸𑀧𑀺 𑀉𑀕𑁆𑀕𑀳𑀧𑀭𑀺𑀧𑀼𑀘𑁆𑀙𑀸𑀧𑀜𑁆𑀜𑀸𑀧𑀺 𑀯𑀝𑁆𑀝𑀢𑀺𑀬𑁂𑀯𑀸𑀢𑀺.

𑁫-𑁬. 𑀲𑀦𑁆𑀤𑀺𑀝𑁆𑀞𑀺𑀓𑀲𑀼𑀢𑁆𑀢𑀤𑁆𑀯𑀬𑀯𑀡𑁆𑀡𑀦𑀸

𑁪𑁭-𑁪𑁮. 𑀧𑀜𑁆𑀘𑀫𑁂 𑀲𑀦𑁆𑀢𑀁 𑀯𑀸 𑀅𑀚𑁆𑀛𑀢𑁆𑀢𑀦𑁆𑀢𑀺 𑀦𑀺𑀬𑀓𑀚𑁆𑀛𑀢𑁆𑀢𑁂 𑀯𑀺𑀚𑁆𑀚𑀫𑀸𑀦𑀁. 𑀮𑁄𑀪𑁄𑀢𑀺𑀆𑀤𑀻𑀳𑀺 𑀢𑀻𑀡𑀺 𑀅𑀓𑀼𑀲𑀮𑀫𑀽𑀮𑀸𑀦𑀺 𑀤𑀲𑁆𑀲𑀺𑀢𑀸𑀦𑀺. 𑀮𑁄𑀪𑀥𑀫𑁆𑀫𑀸𑀢𑀺𑀆𑀤𑀻𑀳𑀺 𑀢𑀁𑀲𑀫𑁆𑀧𑀬𑀼𑀢𑁆𑀢𑀓𑀸 𑀥𑀫𑁆𑀫𑀸. 𑀙𑀝𑁆𑀞𑁂 𑀓𑀸𑀬𑀲𑀦𑁆𑀤𑁄𑀲𑀦𑁆𑀢𑀺 𑀓𑀸𑀬𑀤𑁆𑀯𑀸𑀭𑀲𑁆𑀲 𑀤𑀼𑀲𑁆𑀲𑀦𑀸𑀓𑀸𑀭𑀁. 𑀲𑁂𑀲𑀤𑁆𑀯𑀬𑁂𑀧𑀺 𑀏𑀲𑁂𑀯 𑀦𑀬𑁄. 𑀇𑀫𑁂𑀲𑀼 𑀤𑁆𑀯𑀻𑀲𑀼 𑀲𑀼𑀢𑁆𑀢𑁂𑀲𑀼 𑀧𑀘𑁆𑀘𑀯𑁂𑀓𑁆𑀔𑀡𑀸𑀯 𑀓𑀣𑀺𑀢𑀸.

𑁭. 𑀔𑁂𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁯. 𑀲𑀢𑁆𑀢𑀫𑁂 𑀯𑀼𑀲𑀺𑀢𑀯𑀸𑀢𑀺 𑀯𑀼𑀢𑁆𑀣𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄. 𑀓𑀢𑀓𑀭𑀡𑀻𑀬𑁄𑀢𑀺 𑀘𑀢𑀽𑀳𑀺 𑀫𑀕𑁆𑀕𑁂𑀳𑀺 𑀓𑀢𑁆𑀢𑀩𑁆𑀩𑀁 𑀓𑀢𑁆𑀯𑀸 𑀞𑀺𑀢𑁄. 𑀑𑀳𑀺𑀢𑀪𑀸𑀭𑁄𑀢𑀺 𑀔𑀦𑁆𑀥𑀪𑀸𑀭𑀁 𑀓𑀺𑀮𑁂𑀲𑀪𑀸𑀭𑀁 𑀅𑀪𑀺𑀲𑀗𑁆𑀔𑀸𑀭𑀪𑀸𑀭𑀜𑁆𑀘 𑀑𑀢𑀸𑀭𑁂𑀢𑁆𑀯𑀸 𑀞𑀺𑀢𑁄. 𑀅𑀦𑀼𑀧𑁆𑀧𑀢𑁆𑀢𑀲𑀤𑀢𑁆𑀣𑁄𑀢𑀺 𑀲𑀤𑀢𑁆𑀣𑁄 𑀯𑀼𑀘𑁆𑀘𑀢𑀺 𑀅𑀭𑀳𑀢𑁆𑀢𑀁, 𑀢𑀁 𑀧𑀢𑁆𑀢𑁄𑀢𑀺 𑀅𑀢𑁆𑀣𑁄. 𑀧𑀭𑀺𑀓𑁆𑀔𑀻𑀡𑀪𑀯𑀲𑀁𑀬𑁄𑀚𑀦𑁄𑀢𑀺 𑀔𑀻𑀡𑀪𑀯𑀩𑀦𑁆𑀥𑀦𑁄. 𑀲𑀫𑁆𑀫𑀤𑀜𑁆𑀜𑀸 𑀯𑀺𑀫𑀼𑀢𑁆𑀢𑁄𑀢𑀺 𑀲𑀫𑁆𑀫𑀸 𑀳𑁂𑀢𑀼𑀦𑀸 𑀓𑀸𑀭𑀡𑁂𑀦 𑀚𑀸𑀦𑀺𑀢𑁆𑀯𑀸 𑀯𑀺𑀫𑀼𑀢𑁆𑀢𑁄. 𑀢𑀲𑁆𑀲 𑀦 𑀏𑀯𑀁 𑀳𑁄𑀢𑀺 𑀅𑀢𑁆𑀣𑀺 𑀫𑁂 𑀲𑁂𑀬𑁆𑀬𑁄𑀢𑀺 𑀯𑀸𑀢𑀺𑀆𑀤𑀻𑀳𑀺 𑀲𑁂𑀬𑁆𑀬𑀲𑁆𑀲 𑀲𑁂𑀬𑁆𑀬𑁄𑀳𑀫𑀲𑁆𑀫𑀻𑀢𑀺 𑀫𑀸𑀦𑀸𑀤𑀬𑁄 𑀢𑀬𑁄 𑀫𑀸𑀦𑀸 𑀧𑀝𑀺𑀓𑁆𑀔𑀺𑀢𑁆𑀢𑀸. 𑀦 𑀳𑀺 𑀔𑀻𑀡𑀸𑀲𑀯𑀲𑁆𑀲 ‘‘𑀅𑀢𑁆𑀣𑀺 𑀫𑀬𑁆𑀳𑀁 𑀲𑁂𑀬𑁆𑀬𑁄, 𑀅𑀢𑁆𑀣𑀺 𑀲𑀤𑀺𑀲𑁄, 𑀅𑀢𑁆𑀣𑀺 𑀳𑀻𑀦𑁄’’𑀢𑀺 𑀫𑀸𑀦𑁄 𑀳𑁄𑀢𑀺. 𑀦𑀢𑁆𑀣𑀺 𑀫𑁂 𑀲𑁂𑀬𑁆𑀬𑁄𑀢𑀺𑀆𑀤𑀻𑀳𑀺𑀧𑀺 𑀢𑁂𑀬𑁂𑀯 𑀧𑀝𑀺𑀓𑁆𑀔𑀺𑀢𑁆𑀢𑀸. 𑀦 𑀳𑀺 𑀔𑀻𑀡𑀸𑀲𑀯𑀲𑁆𑀲 ‘‘𑀅𑀳𑀫𑁂𑀯 𑀲𑁂𑀬𑁆𑀬𑁄, 𑀅𑀳𑀁 𑀲𑀤𑀺𑀲𑁄, 𑀅𑀳𑀁 𑀳𑀻𑀦𑁄, 𑀅𑀜𑁆𑀜𑁂 𑀲𑁂𑀬𑁆𑀬𑀸𑀤𑀬𑁄 𑀦𑀢𑁆𑀣𑀻’’𑀢𑀺 𑀏𑀯𑀁 𑀫𑀸𑀦𑁄 𑀳𑁄𑀢𑀺.

𑀅𑀘𑀺𑀭𑀧𑀓𑁆𑀓𑀦𑁆𑀢𑁂𑀲𑀽𑀢𑀺 𑀅𑀭𑀳𑀢𑁆𑀢𑀁 𑀩𑁆𑀬𑀸𑀓𑀭𑀺𑀢𑁆𑀯𑀸 𑀅𑀘𑀺𑀭𑀁𑀬𑁂𑀯 𑀧𑀓𑁆𑀓𑀦𑁆𑀢𑁂𑀲𑀼. 𑀅𑀜𑁆𑀜𑀁 𑀩𑁆𑀬𑀸𑀓𑀭𑁄𑀦𑁆𑀢𑀻𑀢𑀺 𑀅𑀭𑀳𑀢𑁆𑀢𑀁 𑀓𑀣𑁂𑀦𑁆𑀢𑀺. 𑀳𑀲𑀫𑀸𑀦𑀓𑀸 𑀫𑀜𑁆𑀜𑁂 𑀅𑀜𑁆𑀜𑀁 𑀩𑁆𑀬𑀸𑀓𑀭𑁄𑀦𑁆𑀢𑀻𑀢𑀺 𑀳𑀲𑀫𑀸𑀦𑀸 𑀯𑀺𑀬 𑀓𑀣𑁂𑀦𑁆𑀢𑀺. 𑀯𑀺𑀖𑀸𑀢𑀁 𑀆𑀧𑀚𑁆𑀚𑀦𑁆𑀢𑀻𑀢𑀺 𑀤𑀼𑀓𑁆𑀔𑀁 𑀆𑀧𑀚𑁆𑀚𑀦𑁆𑀢𑀺.

𑀦 𑀉𑀲𑁆𑀲𑁂𑀲𑀼 𑀦 𑀑𑀫𑁂𑀲𑀼, 𑀲𑀫𑀢𑁆𑀢𑁂 𑀦𑁄𑀧𑀦𑀻𑀬𑀭𑁂𑀢𑀺 𑀏𑀢𑁆𑀣 𑀉𑀲𑁆𑀲𑀸𑀢𑀺 𑀉𑀲𑁆𑀲𑀺𑀢𑀢𑀸 𑀲𑁂𑀬𑁆𑀬𑀧𑀼𑀕𑁆𑀕𑀮𑀸. 𑀑𑀫𑀸𑀢𑀺 𑀳𑀻𑀦𑀸. 𑀲𑀫𑀢𑁆𑀢𑁄𑀢𑀺 𑀲𑀤𑀺𑀲𑁄. 𑀇𑀢𑀺 𑀇𑀫𑁂𑀲𑀼 𑀢𑀻𑀲𑀼𑀧𑀺 𑀲𑁂𑀬𑁆𑀬𑀳𑀻𑀦𑀲𑀤𑀺𑀲𑁂𑀲𑀼 𑀔𑀻𑀡𑀸𑀲𑀯𑀸 𑀫𑀸𑀦𑁂𑀦 𑀦 𑀉𑀧𑀦𑀻𑀬𑀭𑁂, 𑀦 𑀉𑀧𑀦𑁂𑀦𑁆𑀢𑀺, 𑀦 𑀉𑀧𑀕𑀘𑁆𑀙𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀔𑀻𑀡𑀸 𑀚𑀸𑀢𑀻𑀢𑀺 𑀔𑀻𑀡𑀸 𑀢𑁂𑀲𑀁 𑀚𑀸𑀢𑀺. 𑀯𑀼𑀲𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀺 𑀯𑀼𑀢𑁆𑀣𑀁 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀁. 𑀘𑀭𑀦𑁆𑀢𑀺 𑀲𑀁𑀬𑁄𑀚𑀦𑀯𑀺𑀧𑁆𑀧𑀫𑀼𑀢𑁆𑀢𑀸𑀢𑀺 𑀲𑀩𑁆𑀩𑀲𑀁𑀬𑁄𑀚𑀦𑁂𑀳𑀺 𑀯𑀺𑀫𑀼𑀢𑁆𑀢𑀸 𑀳𑀼𑀢𑁆𑀯𑀸 𑀘𑀭𑀦𑁆𑀢𑀺. 𑀲𑀼𑀢𑁆𑀢𑁂𑀧𑀺 𑀕𑀸𑀣𑀸𑀬𑀫𑁆𑀧𑀺 𑀔𑀻𑀡𑀸𑀲𑀯𑁄 𑀓𑀣𑀺𑀢𑁄.

𑁮. 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁦. 𑀅𑀝𑁆𑀞𑀫𑁂 𑀳𑀢𑀽𑀧𑀦𑀺𑀲𑀁 𑀳𑁄𑀢𑀻𑀢𑀺 𑀳𑀢𑀽𑀧𑀦𑀺𑀲𑁆𑀲𑀬𑀁 𑀳𑁄𑀢𑀺. 𑀲𑀻𑀮𑀯𑀺𑀧𑀦𑁆𑀦𑀲𑁆𑀲𑀸𑀢𑀺 𑀯𑀺𑀧𑀦𑁆𑀦𑀲𑀻𑀮𑀲𑁆𑀲. 𑀬𑀣𑀸𑀪𑀽𑀢𑀜𑀸𑀡𑀤𑀲𑁆𑀲𑀦𑀦𑁆𑀢𑀺 𑀢𑀭𑀼𑀡𑀯𑀺𑀧𑀲𑁆𑀲𑀦𑀸𑀜𑀸𑀡𑀁. 𑀦𑀺𑀩𑁆𑀩𑀺𑀤𑀸𑀯𑀺𑀭𑀸𑀕𑁄𑀢𑀺 𑀏𑀢𑁆𑀣 𑀦𑀺𑀩𑁆𑀩𑀺𑀤𑀸 𑀩𑀮𑀯𑀯𑀺𑀧𑀲𑁆𑀲𑀦𑀸, 𑀯𑀺𑀭𑀸𑀕𑁄 𑀅𑀭𑀺𑀬𑀫𑀕𑁆𑀕𑁄. 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀦𑁆𑀢𑀺 𑀏𑀢𑁆𑀣 𑀯𑀺𑀫𑀼𑀢𑁆𑀢𑀻𑀢𑀺 𑀅𑀭𑀳𑀢𑁆𑀢𑀨𑀮𑀁, 𑀜𑀸𑀡𑀤𑀲𑁆𑀲𑀦𑀦𑁆𑀢𑀺 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀁. 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀦𑁆𑀦𑀁 𑀳𑁄𑀢𑀻𑀢𑀺 𑀲𑀫𑁆𑀧𑀦𑁆𑀦𑀉𑀧𑀦𑀺𑀲𑁆𑀲𑀬𑀁 𑀳𑁄𑀢𑀺. 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀲𑀻𑀮𑀸𑀦𑀼𑀭𑀓𑁆𑀔𑀡𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑁄 𑀓𑀣𑀺𑀢𑁄.

𑁯. 𑀆𑀦𑀦𑁆𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁧. 𑀦𑀯𑀫𑁂 𑀓𑀺𑀢𑁆𑀢𑀸𑀯𑀢𑀸𑀢𑀺 𑀓𑀺𑀢𑁆𑀢𑀓𑁂𑀦. 𑀅𑀲𑁆𑀲𑀼𑀢𑀜𑁆𑀘𑁂𑀯𑀸𑀢𑀺 𑀅𑀜𑁆𑀜𑀲𑁆𑀫𑀺𑀁 𑀓𑀸𑀮𑁂 𑀅𑀲𑁆𑀲𑀼𑀢𑀧𑀼𑀩𑁆𑀩𑀁. 𑀦 𑀲𑀫𑁆𑀫𑁄𑀲𑀁 𑀕𑀘𑁆𑀙𑀦𑁆𑀢𑀻𑀢𑀺 𑀯𑀺𑀦𑀸𑀲𑀁 𑀦 𑀕𑀘𑁆𑀙𑀦𑁆𑀢𑀺. 𑀘𑁂𑀢𑀲𑁄 𑀲𑀫𑁆𑀨𑀼𑀝𑁆𑀞𑀧𑀼𑀩𑁆𑀩𑀸𑀢𑀺 𑀘𑀺𑀢𑁆𑀢𑁂𑀦 𑀨𑀼𑀲𑀺𑀢𑀧𑀼𑀩𑁆𑀩𑀸. 𑀲𑀫𑀼𑀤𑀸𑀘𑀭𑀦𑁆𑀢𑀻𑀢𑀺 𑀫𑀦𑁄𑀤𑁆𑀯𑀸𑀭𑁂 𑀘𑀭𑀦𑁆𑀢𑀺. 𑀅𑀯𑀺𑀜𑁆𑀜𑀸𑀢𑀜𑁆𑀘 𑀯𑀺𑀚𑀸𑀦𑀸𑀢𑀻𑀢𑀺 𑀅𑀜𑁆𑀜𑀲𑁆𑀫𑀺𑀁 𑀓𑀸𑀮𑁂 𑀅𑀯𑀺𑀜𑁆𑀜𑀸𑀢𑀓𑀸𑀭𑀡𑀁 𑀚𑀸𑀦𑀸𑀢𑀺. 𑀧𑀭𑀺𑀬𑀸𑀧𑀼𑀡𑀸𑀢𑀻𑀢𑀺 𑀯𑀴𑀜𑁆𑀚𑁂𑀢𑀺 𑀓𑀣𑁂𑀢𑀺. 𑀤𑁂𑀲𑁂𑀢𑀻𑀢𑀺 𑀧𑀓𑀸𑀲𑁂𑀢𑀺. 𑀧𑀭𑀁 𑀯𑀸𑀘𑁂𑀢𑀻𑀢𑀺 𑀧𑀭𑀁 𑀉𑀕𑁆𑀕𑀡𑁆𑀳𑀸𑀧𑁂𑀢𑀺.

𑀆𑀕𑀢𑀸𑀕𑀫𑀸𑀢𑀺 𑀤𑀻𑀖𑀸𑀤𑀻𑀲𑀼 𑀬𑁄 𑀓𑁄𑀘𑀺 𑀆𑀕𑀫𑁄 𑀆𑀕𑀢𑁄 𑀏𑀢𑁂𑀲𑀦𑁆𑀢𑀺 𑀆𑀕𑀢𑀸𑀕𑀫𑀸. 𑀥𑀫𑁆𑀫𑀥𑀭𑀸𑀢𑀺 𑀲𑀼𑀢𑁆𑀢𑀦𑁆𑀢𑀧𑀺𑀝𑀓𑀥𑀭𑀸. 𑀯𑀺𑀦𑀬𑀥𑀭𑀸𑀢𑀺 𑀯𑀺𑀦𑀬𑀧𑀺𑀝𑀓𑀥𑀭𑀸. 𑀫𑀸𑀢𑀺𑀓𑀸𑀥𑀭𑀸𑀢𑀺 𑀤𑁆𑀯𑁂𑀧𑀸𑀢𑀺𑀫𑁄𑀓𑁆𑀔𑀥𑀭𑀸. 𑀧𑀭𑀺𑀧𑀼𑀘𑁆𑀙𑀢𑀻𑀢𑀺 𑀅𑀦𑀼𑀲𑀦𑁆𑀥𑀺𑀧𑀼𑀩𑁆𑀩𑀸𑀧𑀭𑀁 𑀧𑀼𑀘𑁆𑀙𑀢𑀺. 𑀧𑀭𑀺𑀧𑀜𑁆𑀳𑀢𑀻𑀢𑀺 𑀇𑀤𑀜𑁆𑀘𑀺𑀤𑀜𑁆𑀘 𑀧𑀼𑀘𑁆𑀙𑀺𑀲𑁆𑀲𑀸𑀫𑀻𑀢𑀺 𑀧𑀭𑀺𑀢𑀼𑀮𑀢𑀺 𑀧𑀭𑀺𑀘𑁆𑀙𑀺𑀦𑁆𑀤𑀢𑀺. 𑀇𑀤𑀁, 𑀪𑀦𑁆𑀢𑁂, 𑀓𑀣𑀦𑁆𑀢𑀺, 𑀪𑀦𑁆𑀢𑁂, 𑀇𑀤𑀁 𑀅𑀦𑀼𑀲𑀦𑁆𑀥𑀺𑀧𑀼𑀩𑁆𑀩𑀸𑀧𑀭𑀁 𑀓𑀣𑀁 𑀳𑁄𑀢𑀻𑀢𑀺 𑀧𑀼𑀘𑁆𑀙𑀢𑀺. 𑀇𑀫𑀲𑁆𑀲 𑀓𑁆𑀯𑀢𑁆𑀣𑁄𑀢𑀺 𑀇𑀫𑀲𑁆𑀲 𑀪𑀸𑀲𑀺𑀢𑀲𑁆𑀲 𑀓𑁄 𑀅𑀢𑁆𑀣𑁄𑀢𑀺 𑀧𑀼𑀘𑁆𑀙𑀢𑀺. 𑀅𑀯𑀺𑀯𑀝𑀦𑁆𑀢𑀺 𑀅𑀯𑀺𑀯𑀭𑀺𑀢𑀁. 𑀯𑀺𑀯𑀭𑀦𑁆𑀢𑀻𑀢𑀺 𑀧𑀸𑀓𑀝𑀁 𑀓𑀭𑁄𑀦𑁆𑀢𑀺. 𑀓𑀗𑁆𑀔𑀸𑀞𑀸𑀦𑀺𑀬𑁂𑀲𑀽𑀢𑀺 𑀓𑀗𑁆𑀔𑀸𑀬 𑀓𑀸𑀭𑀡𑀪𑀽𑀢𑁂𑀲𑀼. 𑀢𑀢𑁆𑀣 𑀬𑀲𑁆𑀫𑀺𑀁 𑀥𑀫𑁆𑀫𑁂 𑀓𑀗𑁆𑀔𑀸 𑀉𑀧𑁆𑀧𑀚𑁆𑀚𑀢𑀺, 𑀲𑁆𑀯𑁂𑀯 𑀓𑀗𑁆𑀔𑀸𑀞𑀸𑀦𑀺𑀬𑁄 𑀦𑀸𑀫𑀸𑀢𑀺 𑀯𑁂𑀤𑀺𑀢𑀩𑁆𑀩𑁄.

𑁧𑁦. 𑀔𑀢𑁆𑀢𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁨. 𑀤𑀲𑀫𑁂 𑀪𑁄𑀕𑀸𑀥𑀺𑀧𑁆𑀧𑀸𑀬𑀸𑀢𑀺 𑀪𑁄𑀕𑀲𑀁𑀳𑀭𑀡𑀢𑁆𑀣𑀁 𑀞𑀧𑀺𑀢𑀸𑀥𑀺𑀧𑁆𑀧𑀸𑀬𑀸 𑀧𑀯𑀢𑁆𑀢𑀅𑀚𑁆𑀛𑀸𑀲𑀬𑀸. 𑀧𑀜𑁆𑀜𑀽𑀧𑀯𑀺𑀘𑀸𑀭𑀸𑀢𑀺 𑀧𑀜𑁆𑀜𑀯𑀦𑁆𑀢𑁄 𑀪𑀯𑁂𑀬𑁆𑀬𑀸𑀫𑀸𑀢𑀺 𑀏𑀯𑀁 𑀧𑀜𑁆𑀜𑀢𑁆𑀣𑀸𑀬 𑀧𑀯𑀢𑁆𑀢𑀽𑀧𑀯𑀺𑀘𑀸𑀭𑀸. 𑀅𑀬𑀫𑁂𑀯 𑀦𑁂𑀲𑀁 𑀯𑀺𑀘𑀸𑀭𑁄 𑀘𑀺𑀢𑁆𑀢𑁂 𑀉𑀧𑀯𑀺𑀘𑀭𑀢𑀺. 𑀩𑀮𑀸𑀥𑀺𑀝𑁆𑀞𑀸𑀦𑀸𑀢𑀺 𑀩𑀮𑀓𑀸𑀬𑀸𑀥𑀺𑀝𑁆𑀞𑀸𑀦𑀸. 𑀩𑀮𑀓𑀸𑀬𑀜𑁆𑀳𑀺 𑀮𑀤𑁆𑀥𑀸 𑀢𑁂 𑀮𑀤𑁆𑀥𑀧𑀢𑀺𑀝𑁆𑀞𑀸 𑀦𑀸𑀫 𑀳𑁄𑀦𑁆𑀢𑀺. 𑀧𑀣𑀯𑀺𑀪𑀺𑀦𑀺𑀯𑁂𑀲𑀸𑀢𑀺 𑀧𑀣𑀯𑀺𑀲𑀸𑀫𑀺𑀦𑁄 𑀪𑀯𑀺𑀲𑁆𑀲𑀸𑀫𑀸𑀢𑀺 𑀏𑀯𑀁 𑀧𑀣𑀯𑀺𑀅𑀢𑁆𑀣𑀸𑀬 𑀓𑀢𑀘𑀺𑀢𑁆𑀢𑀸𑀪𑀺𑀦𑀺𑀯𑁂𑀲𑀸. 𑀇𑀲𑁆𑀲𑀭𑀺𑀬𑀧𑀭𑀺𑀬𑁄𑀲𑀸𑀦𑀸𑀢𑀺 𑀭𑀚𑁆𑀚𑀸𑀪𑀺𑀲𑁂𑀓𑀧𑀭𑀺𑀬𑁄𑀲𑀸𑀦𑀸. 𑀅𑀪𑀺𑀲𑁂𑀓𑀜𑁆𑀳𑀺 𑀧𑀢𑁆𑀯𑀸 𑀢𑁂 𑀧𑀭𑀺𑀬𑁄𑀲𑀸𑀦𑀧𑁆𑀧𑀢𑁆𑀢𑀸 𑀦𑀸𑀫 𑀳𑁄𑀦𑁆𑀢𑀺. 𑀇𑀫𑀺𑀦𑀸 𑀦𑀬𑁂𑀦 𑀲𑀩𑁆𑀩𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀲𑁂𑀲𑀧𑀤𑁂𑀲𑀼 𑀧𑀦𑁂𑀢𑁆𑀣 𑀅𑀬𑀫𑀥𑀺𑀧𑁆𑀧𑀸𑀬𑁄 𑁋 𑀩𑁆𑀭𑀸𑀳𑁆𑀫𑀡𑀸 𑀢𑀸𑀯 𑀫𑀦𑁆𑀢𑁂 𑀮𑀪𑀺𑀢𑁆𑀯𑀸 𑀮𑀤𑁆𑀥𑀧𑀢𑀺𑀝𑁆𑀞𑀸 𑀦𑀸𑀫 𑀳𑁄𑀦𑁆𑀢𑀺, 𑀕𑀳𑀧𑀢𑀺𑀓𑀸 𑀬𑀁𑀓𑀺𑀜𑁆𑀘𑀺 𑀲𑀺𑀧𑁆𑀧𑀁, 𑀇𑀢𑁆𑀣𑀻 𑀓𑀼𑀮𑀤𑀸𑀬𑀚𑁆𑀚𑀲𑀸𑀫𑀺𑀓𑀁 𑀧𑀼𑀢𑁆𑀢𑀁, 𑀘𑁄𑀭𑀸 𑀬𑀁𑀓𑀺𑀜𑁆𑀘𑀺 𑀆𑀯𑀼𑀥𑀲𑀢𑁆𑀣𑀁, 𑀲𑀫𑀡𑀸 𑀲𑀻𑀮𑀧𑀭𑀺𑀧𑀼𑀡𑁆𑀡𑀸 𑀮𑀤𑁆𑀥𑀧𑀢𑀺𑀝𑁆𑀞𑀸 𑀦𑀸𑀫 𑀳𑁄𑀦𑁆𑀢𑀺. 𑀢𑀲𑁆𑀫𑀸 𑀫𑀦𑁆𑀢𑀸𑀥𑀺𑀝𑁆𑀞𑀸𑀦𑀸𑀢𑀺𑀆𑀤𑀻𑀦𑀺 𑀯𑀼𑀢𑁆𑀢𑀸𑀦𑀺.

𑀩𑁆𑀭𑀸𑀳𑁆𑀫𑀡𑀸𑀦𑀜𑁆𑀘 ‘‘𑀬𑀜𑁆𑀜𑀁 𑀬𑀚𑀺𑀲𑁆𑀲𑀸𑀫𑀸’’𑀢𑀺 𑀘𑀺𑀢𑁆𑀢𑀁 𑀅𑀪𑀺𑀦𑀺𑀯𑀺𑀲𑀢𑀺, 𑀩𑁆𑀭𑀳𑁆𑀫𑀮𑁄𑀓𑁂 𑀧𑀢𑁆𑀢𑁂 𑀧𑀭𑀺𑀬𑁄𑀲𑀸𑀦𑀧𑁆𑀧𑀢𑁆𑀢𑀸 𑀦𑀸𑀫 𑀳𑁄𑀦𑁆𑀢𑀺. 𑀢𑀲𑁆𑀫𑀸 𑀢𑁂 𑀬𑀜𑁆𑀜𑀸𑀪𑀺𑀦𑀺𑀯𑁂𑀲𑀸 𑀩𑁆𑀭𑀳𑁆𑀫𑀮𑁄𑀓𑀧𑀭𑀺𑀬𑁄𑀲𑀸𑀦𑀸𑀢𑀺 𑀯𑀼𑀢𑁆𑀢𑀸. 𑀓𑀫𑁆𑀫𑀦𑁆𑀢𑀓𑀭𑀡𑀢𑁆𑀣𑀸𑀬 𑀫𑀦𑁄 𑀏𑀢𑁂𑀲𑀁 𑀅𑀪𑀺𑀦𑀺𑀯𑀺𑀲𑀢𑀻𑀢𑀺 𑀓𑀫𑁆𑀫𑀦𑁆𑀢𑀸𑀪𑀺𑀦𑀺𑀯𑁂𑀲𑀸. 𑀓𑀫𑁆𑀫𑁂 𑀦𑀺𑀝𑁆𑀞𑀺𑀢𑁂 𑀧𑀭𑀺𑀬𑁄𑀲𑀸𑀦𑀧𑁆𑀧𑀢𑁆𑀢𑀸 𑀦𑀸𑀫 𑀳𑁄𑀦𑁆𑀢𑀻𑀢𑀺 𑀦𑀺𑀝𑁆𑀞𑀺𑀢𑀓𑀫𑁆𑀫𑀦𑁆𑀢𑀧𑀭𑀺𑀬𑁄𑀲𑀸𑀦𑀸.

𑀧𑀼𑀭𑀺𑀲𑀸𑀥𑀺𑀧𑁆𑀧𑀸𑀬𑀸𑀢𑀺 𑀧𑀼𑀭𑀺𑀲𑁂𑀲𑀼 𑀧𑀯𑀢𑁆𑀢𑀅𑀚𑁆𑀛𑀸𑀲𑀬𑀸. 𑀅𑀮𑀗𑁆𑀓𑀸𑀭𑀢𑁆𑀣𑀸𑀬 𑀫𑀦𑁄 𑀉𑀧𑀯𑀺𑀘𑀭𑀢𑀺 𑀏𑀢𑀺𑀲𑁆𑀲𑀸𑀢𑀺 𑀅𑀮𑀗𑁆𑀓𑀸𑀭𑀽𑀧𑀯𑀺𑀘𑀸𑀭𑀸. 𑀅𑀲𑀧𑀢𑁆𑀢𑀻 𑀳𑀼𑀢𑁆𑀯𑀸 𑀏𑀓𑀺𑀓𑀸𑀯 𑀖𑀭𑁂 𑀯𑀲𑁂𑀬𑁆𑀬𑀦𑁆𑀢𑀺 𑀏𑀯𑀫𑀲𑁆𑀲𑀸 𑀘𑀺𑀢𑁆𑀢𑀁 𑀅𑀪𑀺𑀦𑀺𑀯𑀺𑀲𑀢𑀻𑀢𑀺 𑀅𑀲𑀧𑀢𑁆𑀢𑀻𑀪𑀺𑀦𑀺𑀯𑁂𑀲𑀸. 𑀖𑀭𑀸𑀯𑀸𑀲𑀺𑀲𑁆𑀲𑀭𑀺𑀬𑁂 𑀮𑀤𑁆𑀥𑁂 𑀧𑀭𑀺𑀬𑁄𑀲𑀸𑀦𑀧𑁆𑀧𑀢𑁆𑀢𑀸 𑀦𑀸𑀫 𑀳𑁄𑀦𑁆𑀢𑀻𑀢𑀺 𑀇𑀲𑁆𑀲𑀭𑀺𑀬𑀧𑀭𑀺𑀬𑁄𑀲𑀸𑀦𑀸.

𑀧𑀭𑀪𑀡𑁆𑀟𑀲𑁆𑀲 𑀆𑀤𑀸𑀦𑁂 𑀅𑀥𑀺𑀧𑁆𑀧𑀸𑀬𑁄 𑀏𑀢𑁂𑀲𑀦𑁆𑀢𑀺 𑀆𑀤𑀸𑀦𑀸𑀥𑀺𑀧𑁆𑀧𑀸𑀬𑀸. 𑀕𑀳𑀦𑁂 𑀦𑀺𑀮𑀻𑀬𑀦𑀝𑁆𑀞𑀸𑀦𑁂 𑀏𑀢𑁂𑀲𑀁 𑀫𑀦𑁄 𑀉𑀧𑀯𑀺𑀘𑀭𑀢𑀻𑀢𑀺 𑀕𑀳𑀦𑀽𑀧𑀯𑀺𑀘𑀸𑀭𑀸. 𑀅𑀦𑁆𑀥𑀓𑀸𑀭𑀢𑁆𑀣𑀸𑀬 𑀏𑀢𑁂𑀲𑀁 𑀘𑀺𑀢𑁆𑀢𑀁 𑀅𑀪𑀺𑀦𑀺𑀯𑀺𑀲𑀢𑀻𑀢𑀺 𑀅𑀦𑁆𑀥𑀓𑀸𑀭𑀸𑀪𑀺𑀦𑀺𑀯𑁂𑀲𑀸. 𑀅𑀤𑀲𑁆𑀲𑀦𑀧𑁆𑀧𑀢𑁆𑀢𑀸 𑀧𑀭𑀺𑀬𑁄𑀲𑀸𑀦𑀧𑁆𑀧𑀢𑁆𑀢𑀸 𑀳𑁄𑀦𑁆𑀢𑀻𑀢𑀺 𑀅𑀤𑀲𑁆𑀲𑀦𑀧𑀭𑀺𑀬𑁄𑀲𑀸𑀦𑀸.

𑀅𑀥𑀺𑀯𑀸𑀲𑀦𑀓𑁆𑀔𑀦𑁆𑀢𑀺𑀬𑀜𑁆𑀘 𑀲𑀼𑀘𑀺𑀪𑀸𑀯𑀲𑀻𑀮𑁂 𑀘 𑀅𑀥𑀺𑀧𑁆𑀧𑀸𑀬𑁄 𑀏𑀢𑁂𑀲𑀦𑁆𑀢𑀺 𑀔𑀦𑁆𑀢𑀺𑀲𑁄𑀭𑀘𑁆𑀘𑀸𑀥𑀺𑀧𑁆𑀧𑀸𑀬𑀸. 𑀅𑀓𑀺𑀜𑁆𑀘𑀦𑀪𑀸𑀯𑁂 𑀦𑀺𑀕𑁆𑀕𑀳𑀡𑀪𑀸𑀯𑁂 𑀘𑀺𑀢𑁆𑀢𑀁 𑀏𑀢𑁂𑀲𑀁 𑀅𑀪𑀺𑀦𑀺𑀯𑀺𑀲𑀢𑀻𑀢𑀺 𑀆𑀓𑀺𑀜𑁆𑀘𑀜𑁆𑀜𑀸𑀪𑀺𑀦𑀺𑀯𑁂𑀲𑀸. 𑀦𑀺𑀩𑁆𑀩𑀸𑀦𑀧𑁆𑀧𑀢𑁆𑀢𑀸 𑀧𑀭𑀺𑀬𑁄𑀲𑀸𑀦𑀧𑁆𑀧𑀢𑁆𑀢𑀸 𑀳𑁄𑀦𑁆𑀢𑀻𑀢𑀺 𑀦𑀺𑀩𑁆𑀩𑀸𑀦𑀧𑀭𑀺𑀬𑁄𑀲𑀸𑀦𑀸.

𑁧𑁧. 𑀅𑀧𑁆𑀧𑀫𑀸𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁩. 𑀏𑀓𑀸𑀤𑀲𑀫𑁂 𑀲𑀫𑀥𑀺𑀕𑁆𑀕𑀬𑁆𑀳𑀸𑀢𑀺 𑀲𑀼𑀝𑁆𑀞𑀼 𑀕𑀡𑁆𑀳𑀺𑀢𑁆𑀯𑀸. 𑀚𑀗𑁆𑀕𑀮𑀸𑀦𑀁 𑀧𑀸𑀡𑀸𑀦𑀦𑁆𑀢𑀺 𑀧𑀣𑀯𑀻𑀢𑀮𑀘𑀸𑀭𑀻𑀦𑀁 𑀲𑀧𑀸𑀤𑀓𑀧𑀸𑀡𑀸𑀦𑀁. 𑀧𑀤𑀚𑀸𑀢𑀸𑀦𑀻𑀢𑀺 𑀧𑀤𑀸𑀦𑀺. 𑀲𑀫𑁄𑀥𑀸𑀦𑀁 𑀕𑀘𑁆𑀙𑀦𑁆𑀢𑀻𑀢𑀺 𑀑𑀥𑀸𑀦𑀁 𑀉𑀧𑀦𑀺𑀓𑁆𑀔𑁂𑀧𑀁 𑀕𑀘𑁆𑀙𑀦𑁆𑀢𑀺. 𑀅𑀕𑁆𑀕𑀫𑀓𑁆𑀔𑀸𑀬𑀢𑀻𑀢𑀺 𑀲𑁂𑀝𑁆𑀞𑀁 𑀅𑀓𑁆𑀔𑀸𑀬𑀢𑀺. 𑀧𑀩𑁆𑀩𑀚𑀮𑀸𑀬𑀓𑁄𑀢𑀺 𑀧𑀩𑁆𑀩𑀚𑀢𑀺𑀡𑀘𑁆𑀙𑁂𑀤𑀓𑁄. 𑀑𑀥𑀼𑀦𑀸𑀢𑀻𑀢𑀺 𑀳𑁂𑀝𑁆𑀞𑀸 𑀫𑀼𑀔𑀁 𑀥𑀼𑀦𑀸𑀢𑀺. 𑀦𑀺𑀥𑀼𑀦𑀸𑀢𑀻𑀢𑀺 𑀉𑀪𑁄𑀳𑀺 𑀧𑀲𑁆𑀲𑁂𑀳𑀺 𑀥𑀼𑀦𑀸𑀢𑀺. 𑀦𑀺𑀘𑁆𑀙𑀸𑀤𑁂𑀢𑀻𑀢𑀺 𑀩𑀸𑀳𑀸𑀬 𑀯𑀸 𑀧𑀳𑀭𑀢𑀺, 𑀭𑀼𑀓𑁆𑀔𑁂 𑀯𑀸 𑀧𑀳𑀭𑀢𑀺. 𑀅𑀫𑁆𑀩𑀧𑀺𑀡𑁆𑀟𑀺𑀬𑀸𑀢𑀺 𑀅𑀫𑁆𑀩𑀨𑀮𑀧𑀺𑀡𑁆𑀟𑀺𑀬𑀸. 𑀯𑀡𑁆𑀝𑀽𑀧𑀦𑀺𑀩𑀦𑁆𑀥𑀦𑀸𑀦𑀻𑀢𑀺 𑀯𑀡𑁆𑀝𑁂 𑀉𑀧𑀦𑀺𑀩𑀦𑁆𑀥𑀦𑀸𑀦𑀺, 𑀯𑀡𑁆𑀝𑁂 𑀯𑀸 𑀧𑀢𑀺𑀝𑁆𑀞𑀺𑀢𑀸𑀦𑀺. 𑀢𑀤𑀦𑁆𑀯𑀬𑀸𑀦𑀺 𑀪𑀯𑀦𑁆𑀢𑀻𑀢𑀺 𑀯𑀡𑁆𑀝𑀸𑀦𑀼𑀯𑀢𑁆𑀢𑀓𑀸𑀦𑀺 𑀪𑀯𑀦𑁆𑀢𑀺, 𑀅𑀫𑁆𑀩𑀧𑀺𑀡𑁆𑀟𑀺𑀤𑀡𑁆𑀟𑀓𑀸𑀦𑀼𑀯𑀢𑁆𑀢𑀓𑀸𑀦𑀺 𑀪𑀯𑀦𑁆𑀢𑀻𑀢𑀺𑀧𑀺 𑀅𑀢𑁆𑀣𑁄. 𑀔𑀼𑀤𑁆𑀤𑀭𑀸𑀚𑀸𑀦𑁄𑀢𑀺 𑀔𑀼𑀤𑁆𑀤𑀓𑀭𑀸𑀚𑀸𑀦𑁄, 𑀧𑀓𑀢𑀺𑀭𑀸𑀚𑀸𑀦𑁄 𑀯𑀸.

𑁧𑁨. 𑀥𑀫𑁆𑀫𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁪. 𑀤𑁆𑀯𑀸𑀤𑀲𑀫𑁂 𑀲𑀩𑁆𑀩𑀲𑁄𑀢𑀺 𑀲𑀩𑁆𑀩𑁂𑀲𑀼. 𑀲𑀢𑁆𑀢𑀲𑀼 𑀯𑀺𑀳𑀸𑀭𑁂𑀲𑀽𑀢𑀺 𑀲𑀢𑁆𑀢𑀲𑀼 𑀧𑀭𑀺𑀯𑁂𑀡𑁂𑀲𑀼. 𑀧𑀭𑀺𑀪𑀸𑀲𑀢𑀻𑀢𑀺 𑀧𑀭𑀺𑀪𑀯𑀢𑀺 𑀪𑀬𑀁 𑀉𑀧𑀤𑀁𑀲𑁂𑀢𑀺. 𑀯𑀺𑀳𑀺𑀁𑀲𑀢𑀻𑀢𑀺 𑀯𑀺𑀳𑁂𑀞𑁂𑀢𑀺. 𑀯𑀺𑀢𑀼𑀤𑀢𑀻𑀢𑀺 𑀯𑀺𑀚𑁆𑀛𑀢𑀺. 𑀭𑁄𑀲𑁂𑀢𑀺 𑀯𑀸𑀘𑀸𑀬𑀸𑀢𑀺 𑀯𑀸𑀘𑀸𑀬 𑀖𑀝𑁆𑀝𑁂𑀢𑀺. 𑀧𑀓𑁆𑀓𑀫𑀦𑁆𑀢𑀻𑀢𑀺 𑀤𑀺𑀲𑀸 𑀧𑀓𑁆𑀓𑀫𑀦𑁆𑀢𑀺. 𑀦 𑀲𑀡𑁆𑀞𑀳𑀦𑁆𑀢𑀻𑀢𑀺 𑀦𑀧𑁆𑀧𑀢𑀺𑀝𑁆𑀞𑀳𑀦𑁆𑀢𑀺. 𑀭𑀺𑀜𑁆𑀘𑀦𑁆𑀢𑀻𑀢𑀺 𑀙𑀟𑁆𑀟𑁂𑀦𑁆𑀢𑀺 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑀺. 𑀧𑀩𑁆𑀩𑀸𑀚𑁂𑀬𑁆𑀬𑀸𑀫𑀸𑀢𑀺 𑀦𑀻𑀳𑀭𑁂𑀬𑁆𑀬𑀸𑀫. 𑀳𑀦𑁆𑀤𑀸𑀢𑀺 𑀯𑀯𑀲𑁆𑀲𑀕𑁆𑀕𑀢𑁆𑀣𑁂 𑀦𑀺𑀧𑀸𑀢𑁄. 𑀅𑀮𑀦𑁆𑀢𑀺 𑀬𑀼𑀢𑁆𑀢𑀫𑁂𑀢𑀁, 𑀬𑀁 𑀢𑀁 𑀧𑀩𑁆𑀩𑀸𑀚𑁂𑀬𑁆𑀬𑀼𑀦𑁆𑀢𑀺 𑀅𑀢𑁆𑀣𑁄. 𑀓𑀺𑀁 𑀢𑁂 𑀇𑀫𑀺𑀦𑀸𑀢𑀺 𑀓𑀺𑀁 𑀢𑀯 𑀇𑀫𑀺𑀦𑀸 𑀚𑀸𑀢𑀺𑀪𑀽𑀫𑀺𑀬𑀁 𑀯𑀸𑀲𑁂𑀦. 𑀢𑀻𑀭𑀤𑀲𑁆𑀲𑀺𑀁 𑀲𑀓𑀼𑀡𑀦𑁆𑀢𑀺 𑀤𑀺𑀲𑀸𑀓𑀸𑀓𑀁. 𑀫𑀼𑀜𑁆𑀘𑀦𑁆𑀢𑀻𑀢𑀺 𑀤𑀺𑀲𑀸𑀤𑀲𑁆𑀲𑀦𑀢𑁆𑀣𑀁 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑀺. 𑀲𑀸𑀫𑀦𑁆𑀢𑀸𑀢𑀺 𑀅𑀯𑀺𑀤𑀽𑀭𑁂. 𑀲𑀫𑀦𑁆𑀢𑀸𑀢𑀺𑀧𑀺 𑀧𑀸𑀞𑁄, 𑀲𑀫𑀦𑁆𑀢𑀢𑁄𑀢𑀺 𑀅𑀢𑁆𑀣𑁄. 𑀅𑀪𑀺𑀦𑀺𑀯𑁂𑀲𑁄𑀢𑀺 𑀧𑀢𑁆𑀣𑀭𑀺𑀢𑁆𑀯𑀸 𑀞𑀺𑀢𑀲𑀸𑀔𑀸𑀦𑀁 𑀦𑀺𑀯𑁂𑀲𑁄. 𑀫𑀽𑀮𑀲𑀦𑁆𑀢𑀸𑀦𑀓𑀸𑀦𑀦𑁆𑀢𑀺 𑀫𑀽𑀮𑀸𑀦𑀁 𑀦𑀺𑀯𑁂𑀲𑁄.

𑀆𑀴𑁆𑀳𑀓𑀣𑀸𑀮𑀺𑀓𑀸𑀢𑀺 𑀢𑀡𑁆𑀟𑀼𑀮𑀸𑀴𑁆𑀳𑀓𑀲𑁆𑀲 𑀪𑀢𑁆𑀢𑀧𑀘𑀦𑀣𑀸𑀮𑀺𑀓𑀸. 𑀔𑀼𑀤𑁆𑀤𑀁 𑀫𑀥𑀼𑀦𑁆𑀢𑀺 𑀔𑀼𑀤𑁆𑀤𑀫𑀓𑁆𑀔𑀺𑀓𑀸𑀳𑀺 𑀓𑀢𑀁 𑀤𑀡𑁆𑀟𑀓𑀫𑀥𑀼𑀁. 𑀅𑀦𑁂𑀮𑀓𑀦𑁆𑀢𑀺 𑀦𑀺𑀤𑁆𑀤𑁄𑀲𑀁. 𑀦 𑀘 𑀲𑀼𑀤𑀁 𑀅𑀜𑁆𑀜𑀫𑀜𑁆𑀜𑀲𑁆𑀲 𑀨𑀮𑀸𑀦𑀺 𑀳𑀺𑀁𑀲𑀦𑁆𑀢𑀻𑀢𑀺 𑀅𑀜𑁆𑀜𑀫𑀜𑁆𑀜𑀲𑁆𑀲 𑀓𑁄𑀝𑁆𑀞𑀸𑀲𑁂 𑀨𑀮𑀸𑀦𑀺 𑀦 𑀳𑀺𑀁𑀲𑀦𑁆𑀢𑀺. 𑀅𑀢𑁆𑀢𑀦𑁄 𑀓𑁄𑀝𑁆𑀞𑀸𑀲𑁂𑀳𑀺 𑀫𑀽𑀮𑀁 𑀯𑀸 𑀢𑀘𑀁 𑀯𑀸 𑀧𑀢𑁆𑀢𑀁 𑀯𑀸 𑀙𑀺𑀦𑁆𑀤𑀦𑁆𑀢𑁄 𑀦𑀸𑀫 𑀦𑀢𑁆𑀣𑀺, 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀲𑀸𑀔𑀸𑀬 𑀳𑁂𑀝𑁆𑀞𑀸 𑀧𑀢𑀺𑀢𑀸𑀦𑁂𑀯 𑀧𑀭𑀺𑀪𑀼𑀜𑁆𑀚𑀦𑁆𑀢𑀺. 𑀅𑀜𑁆𑀜𑀲𑁆𑀲 𑀓𑁄𑀝𑁆𑀞𑀸𑀲𑀢𑁄 𑀅𑀜𑁆𑀜𑀲 𑀓𑁄𑀝𑁆𑀞𑀸𑀲𑀁 𑀧𑀭𑀺𑀯𑀢𑁆𑀢𑀺𑀢𑁆𑀯𑀸 𑀕𑀢𑀫𑁆𑀧𑀺 ‘‘𑀦 𑀅𑀫𑁆𑀳𑀸𑀓𑀁 𑀲𑀸𑀔𑀸𑀬 𑀨𑀮’’𑀦𑁆𑀢𑀺 𑀜𑀢𑁆𑀯𑀸 𑀦𑁄 𑀔𑀸𑀤𑀦𑁆𑀢𑀺. 𑀬𑀸𑀯𑀤𑀢𑁆𑀣𑀁 𑀪𑀓𑁆𑀔𑀺𑀢𑁆𑀯𑀸𑀢𑀺 𑀓𑀡𑁆𑀞𑀧𑁆𑀧𑀫𑀸𑀡𑁂𑀦 𑀔𑀸𑀤𑀺𑀢𑁆𑀯𑀸. 𑀲𑀸𑀔𑀁 𑀪𑀜𑁆𑀚𑀺𑀢𑁆𑀯𑀸𑀢𑀺 𑀙𑀢𑁆𑀢𑀧𑁆𑀧𑀫𑀸𑀡𑀫𑀢𑁆𑀢𑀁 𑀙𑀺𑀦𑁆𑀤𑀺𑀢𑁆𑀯𑀸 𑀙𑀸𑀬𑀁 𑀓𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀬𑀢𑁆𑀭 𑀳𑀺 𑀦𑀸𑀫𑀸𑀢𑀺 𑀬𑁄 𑀳𑀺 𑀦𑀸𑀫. 𑀧𑀓𑁆𑀓𑀫𑀺𑀲𑁆𑀲𑀢𑀻𑀢𑀺 𑀧𑀓𑁆𑀓𑀦𑁆𑀢𑁄. 𑀦𑀸𑀤𑀸𑀲𑀻𑀢𑀺 𑀤𑁂𑀯𑀢𑀸𑀬 𑀆𑀦𑀼𑀪𑀸𑀯𑁂𑀦 𑀨𑀮𑀫𑁂𑀯 𑀦 𑀕𑀡𑁆𑀳𑀺. 𑀏𑀯𑀜𑁆𑀳𑀺 𑀲𑀸 𑀅𑀥𑀺𑀝𑁆𑀞𑀸𑀲𑀺.

𑀢𑁂𑀦𑀼𑀧𑀲𑀗𑁆𑀓𑀫𑀻𑀢𑀺 𑀚𑀦𑀧𑀤𑀯𑀸𑀲𑀻𑀳𑀺 𑀕𑀦𑁆𑀢𑁆𑀯𑀸, ‘‘𑀫𑀳𑀸𑀭𑀸𑀚, 𑀭𑀼𑀓𑁆𑀔𑁄 𑀨𑀮𑀁 𑀦 𑀕𑀡𑁆𑀳𑀺, 𑀅𑀫𑁆𑀳𑀸𑀓𑀁 𑀦𑀼 𑀔𑁄 𑀤𑁄𑀲𑁄 𑀢𑀼𑀫𑁆𑀳𑀸𑀓’’𑀦𑁆𑀢𑀺 𑀯𑀼𑀢𑁆𑀢𑁂 ‘‘𑀦𑁂𑀯 𑀫𑀬𑁆𑀳𑀁 𑀤𑁄𑀲𑁄 𑀅𑀢𑁆𑀣𑀺, 𑀦 𑀚𑀸𑀦𑀧𑀤𑀸𑀦𑀁, 𑀅𑀫𑁆𑀳𑀸𑀓𑀁 𑀯𑀺𑀚𑀺𑀢𑁂 𑀅𑀥𑀫𑁆𑀫𑁄 𑀦𑀸𑀫 𑀦 𑀯𑀢𑁆𑀢𑀢𑀺, 𑀓𑁂𑀦 𑀦𑀼 𑀔𑁄 𑀓𑀸𑀭𑀡𑁂𑀦 𑀭𑀼𑀓𑁆𑀔𑁄 𑀦 𑀨𑀮𑀺𑀢𑁄, 𑀲𑀓𑁆𑀓𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀼𑀘𑁆𑀙𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀬𑁂𑀦 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀢𑁂𑀦𑀼𑀧𑀲𑀗𑁆𑀓𑀫𑀺. 𑀧𑀯𑀢𑁆𑀢𑁂𑀲𑀻𑀢𑀺 𑀧𑀭𑀺𑀯𑀢𑁆𑀢𑁂𑀲𑀺. 𑀉𑀫𑁆𑀫𑀽𑀮𑀫𑀓𑀸𑀲𑀻𑀢𑀺 𑀉𑀤𑁆𑀥𑀁𑀫𑀽𑀮𑀁 𑀅𑀓𑀸𑀲𑀺. 𑀅𑀧𑀺 𑀦𑀼 𑀢𑁆𑀯𑀦𑁆𑀢𑀺 𑀅𑀧𑀺 𑀦𑀼 𑀢𑀯. 𑀅𑀝𑁆𑀞𑀺𑀢𑀸𑀬𑁂𑀯𑀸𑀢𑀺 𑀅𑀝𑁆𑀞𑀺𑀢𑀸𑀬 𑀏𑀯. 𑀲𑀘𑁆𑀙𑀯𑀻𑀦𑀻𑀢𑀺 𑀲𑀫𑀸𑀦𑀘𑁆𑀙𑀯𑀻𑀦𑀺 𑀧𑀓𑀢𑀺𑀝𑁆𑀞𑀸𑀦𑁂 𑀞𑀺𑀢𑀸𑀦𑀺. 𑀦 𑀧𑀘𑁆𑀘𑀓𑁆𑀓𑁄𑀲𑀢𑀻𑀢𑀺 𑀦𑀧𑁆𑀧𑀝𑀺𑀓𑁆𑀓𑁄𑀲𑀢𑀺. 𑀭𑁄𑀲𑀦𑁆𑀢𑀦𑁆𑀢𑀺 𑀖𑀝𑁆𑀝𑁂𑀦𑁆𑀢𑀁. 𑀪𑀡𑁆𑀟𑀦𑁆𑀢𑀦𑁆𑀢𑀺 𑀧𑀳𑀭𑀦𑁆𑀢𑀁.

𑀲𑀼𑀦𑁂𑀢𑁆𑀢𑁄𑀢𑀺 𑀦𑁂𑀢𑁆𑀢𑀸 𑀯𑀼𑀘𑁆𑀘𑀦𑁆𑀢𑀺 𑀅𑀓𑁆𑀔𑀻𑀦𑀺, 𑀢𑁂𑀲𑀁 𑀲𑀼𑀦𑁆𑀤𑀭𑀢𑀸𑀬 𑀲𑀼𑀦𑁂𑀢𑁆𑀢𑁄. 𑀢𑀺𑀢𑁆𑀣𑀓𑀭𑁄𑀢𑀺 𑀲𑀼𑀕𑀢𑀺𑀑𑀕𑀸𑀳𑀦𑀢𑀺𑀢𑁆𑀣𑀲𑁆𑀲 𑀓𑀸𑀭𑀓𑁄. 𑀯𑀻𑀢𑀭𑀸𑀕𑁄𑀢𑀺 𑀯𑀺𑀓𑁆𑀔𑀫𑁆𑀪𑀦𑀯𑀲𑁂𑀦 𑀯𑀺𑀕𑀢𑀭𑀸𑀕𑁄. 𑀧𑀲𑀯𑀢𑀻𑀢𑀺 𑀧𑀝𑀺𑀮𑀪𑀢𑀺. 𑀤𑀺𑀝𑁆𑀞𑀺𑀲𑀫𑁆𑀧𑀦𑁆𑀦𑀦𑁆𑀢𑀺 𑀤𑀲𑁆𑀲𑀦𑀲𑀫𑁆𑀧𑀦𑁆𑀦𑀁, 𑀲𑁄𑀢𑀸𑀧𑀦𑁆𑀦𑀦𑁆𑀢𑀺 𑀅𑀢𑁆𑀣𑁄. 𑀔𑀦𑁆𑀢𑀺𑀦𑁆𑀢𑀺 𑀅𑀢𑁆𑀢𑀦𑁄 𑀕𑀼𑀡𑀔𑀡𑀦𑀁. 𑀬𑀣𑀸𑀫𑀁 𑀲𑀩𑁆𑀭𑀳𑁆𑀫𑀘𑀸𑀭𑀻𑀲𑀽𑀢𑀺 𑀬𑀣𑀸 𑀇𑀫𑀁 𑀲𑀩𑁆𑀭𑀳𑁆𑀫𑀘𑀸𑀭𑀻𑀲𑀼 𑀅𑀓𑁆𑀓𑁄𑀲𑀦𑀧𑀭𑀺𑀪𑀸𑀲𑀦𑀁, 𑀅𑀜𑁆𑀜𑀁 𑀏𑀯𑀭𑀽𑀧𑀁 𑀕𑀼𑀡𑀔𑀦𑁆𑀢𑀺𑀁 𑀦 𑀯𑀤𑀸𑀫𑀻𑀢𑀺 𑀅𑀢𑁆𑀣𑁄. 𑀦 𑀦𑁄 𑀲𑀫𑀲𑀩𑁆𑀭𑀳𑁆𑀫𑀘𑀸𑀭𑀻𑀲𑀽𑀢𑀺 𑀏𑀢𑁆𑀣 𑀲𑀫𑀚𑀦𑁄 𑀦𑀸𑀫 𑀲𑀓𑀚𑀦𑁄 𑀯𑀼𑀘𑁆𑀘𑀢𑀺. 𑀢𑀲𑁆𑀫𑀸 𑀦 𑀦𑁄 𑀲𑀓𑁂𑀲𑀼 𑀲𑀫𑀸𑀦𑀩𑁆𑀭𑀳𑁆𑀫𑀘𑀸𑀭𑀻𑀲𑀼 𑀘𑀺𑀢𑁆𑀢𑀸𑀦𑀺 𑀧𑀤𑀼𑀝𑁆𑀞𑀸𑀦𑀺 𑀪𑀯𑀺𑀲𑁆𑀲𑀦𑁆𑀢𑀻𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄.

𑀚𑁄𑀢𑀺𑀧𑀸𑀮𑁄 𑀘 𑀕𑁄𑀯𑀺𑀦𑁆𑀤𑁄𑀢𑀺 𑀦𑀸𑀫𑁂𑀦 𑀚𑁄𑀢𑀺𑀧𑀸𑀮𑁄 𑀞𑀸𑀦𑁂𑀦 𑀫𑀳𑀸𑀕𑁄𑀯𑀺𑀦𑁆𑀤𑁄. 𑀲𑀢𑁆𑀢𑀧𑀼𑀭𑁄𑀳𑀺𑀢𑁄𑀢𑀺 𑀭𑁂𑀡𑀼𑀆𑀤𑀻𑀦𑀁 𑀲𑀢𑁆𑀢𑀦𑁆𑀦𑀁 𑀭𑀸𑀚𑀽𑀦𑀁 𑀧𑀼𑀭𑁄𑀳𑀺𑀢𑁄. 𑀅𑀳𑀺𑀁𑀲𑀓𑀸 𑀅𑀢𑀻𑀢𑀁𑀲𑁂𑀢𑀺 𑀏𑀢𑁂 𑀙 𑀲𑀢𑁆𑀣𑀸𑀭𑁄 𑀅𑀢𑀻𑀢𑀁𑀲𑁂 𑀅𑀳𑀺𑀁𑀲𑀓𑀸 𑀅𑀳𑁂𑀲𑀼𑀁. 𑀦𑀺𑀭𑀸𑀫𑀕𑀦𑁆𑀥𑀸𑀢𑀺 𑀓𑁄𑀥𑀸𑀫𑀕𑀦𑁆𑀥𑁂𑀦 𑀦𑀺𑀭𑀸𑀫𑀕𑀦𑁆𑀥𑀸. 𑀓𑀭𑀼𑀡𑁂𑀯𑀺𑀫𑀼𑀢𑁆𑀢𑀸𑀢𑀺 𑀓𑀭𑀼𑀡𑀚𑁆𑀛𑀸𑀦𑁂 𑀅𑀥𑀺𑀫𑀼𑀢𑁆𑀢𑀸, 𑀓𑀭𑀼𑀡𑀸𑀬 𑀘 𑀓𑀭𑀼𑀡𑀸𑀧𑀼𑀩𑁆𑀩𑀪𑀸𑀕𑁂 𑀘 𑀞𑀺𑀢𑀸. 𑀬𑁂𑀢𑁂𑀢𑀺 𑀏𑀢𑁂, 𑀅𑀬𑀫𑁂𑀯 𑀯𑀸 𑀧𑀸𑀞𑁄. 𑀦 𑀲𑀸𑀥𑀼𑀭𑀽𑀧𑀁 𑀆𑀲𑀻𑀤𑁂𑀢𑀺 𑀲𑀸𑀥𑀼𑀲𑀪𑀸𑀯𑀁 𑀦 𑀖𑀝𑁆𑀝𑁂𑀬𑁆𑀬. 𑀤𑀺𑀝𑁆𑀞𑀺𑀝𑁆𑀞𑀸𑀦𑀧𑁆𑀧𑀳𑀸𑀬𑀺𑀦𑀦𑁆𑀢𑀺 𑀤𑁆𑀯𑀸𑀲𑀝𑁆𑀞𑀺𑀤𑀺𑀝𑁆𑀞𑀺𑀕𑀢𑀧𑁆𑀧𑀳𑀸𑀬𑀺𑀦𑀁. 𑀲𑀢𑁆𑀢𑀫𑁄𑀢𑀺 𑀅𑀭𑀳𑀢𑁆𑀢𑀢𑁄 𑀧𑀝𑁆𑀞𑀸𑀬 𑀲𑀢𑁆𑀢𑀫𑁄. 𑀅𑀯𑀻𑀢𑀭𑀸𑀕𑁄𑀢𑀺 𑀅𑀯𑀺𑀕𑀢𑀭𑀸𑀕𑁄. 𑀏𑀢𑁂𑀦 𑀅𑀦𑀸𑀕𑀸𑀫𑀺𑀪𑀸𑀯𑀁 𑀧𑀝𑀺𑀓𑁆𑀔𑀺𑀧𑀢𑀺. 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸 𑀫𑀼𑀤𑀽𑀢𑀺 𑀧𑀜𑁆𑀘 𑀯𑀺𑀧𑀲𑁆𑀲𑀦𑀺𑀦𑁆𑀤𑁆𑀭𑀺𑀬𑀸𑀦𑀺 𑀫𑀼𑀤𑀽𑀦𑀺. 𑀢𑀲𑁆𑀲 𑀳𑀺 𑀢𑀸𑀦𑀺 𑀲𑀓𑀤𑀸𑀕𑀸𑀫𑀺𑀁 𑀉𑀧𑀸𑀤𑀸𑀬 𑀫𑀼𑀤𑀽𑀦𑀺 𑀦𑀸𑀫 𑀳𑁄𑀦𑁆𑀢𑀺. 𑀯𑀺𑀧𑀲𑁆𑀲𑀦𑀸𑀢𑀺 𑀲𑀗𑁆𑀔𑀸𑀭𑀧𑀭𑀺𑀕𑁆𑀕𑀳𑀜𑀸𑀡𑀁. 𑀧𑀼𑀩𑁆𑀩𑁂𑀯 𑀉𑀧𑀳𑀜𑁆𑀜𑀢𑀻𑀢𑀺 𑀧𑀞𑀫𑀢𑀭𑀜𑁆𑀜𑁂𑀯 𑀉𑀧𑀳𑀜𑁆𑀜𑀢𑀺. 𑀅𑀓𑁆𑀔𑀢𑁄𑀢𑀺 𑀕𑀼𑀡𑀔𑀡𑀦𑁂𑀦 𑀅𑀓𑁆𑀔𑀢𑁄 𑀅𑀦𑀼𑀧𑀳𑀢𑁄 𑀳𑀼𑀢𑁆𑀯𑀸. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀥𑀫𑁆𑀫𑀺𑀓𑀯𑀕𑁆𑀕𑁄 𑀧𑀜𑁆𑀘𑀫𑁄.