𑁧. 𑀧𑀞𑀫𑀧𑀡𑁆𑀡𑀸𑀲𑀓𑀁

𑁧. 𑀆𑀳𑀼𑀦𑁂𑀬𑁆𑀬𑀯𑀕𑁆𑀕𑁄

𑁧. 𑀧𑀞𑀫𑀆𑀳𑀼𑀦𑁂𑀬𑁆𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁧. 𑀙𑀓𑁆𑀓𑀦𑀺𑀧𑀸𑀢𑀲𑁆𑀲 𑀧𑀞𑀫𑁂 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀢𑀺, 𑀪𑀺𑀓𑁆𑀔𑀯𑁂, 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀪𑀺𑀓𑁆𑀔𑀼. 𑀦𑁂𑀯 𑀲𑀼𑀫𑀦𑁄 𑀳𑁄𑀢𑀺 𑀦 𑀤𑀼𑀫𑁆𑀫𑀦𑁄𑀢𑀺 𑀇𑀝𑁆𑀞𑀸𑀭𑀫𑁆𑀫𑀡𑁂 𑀭𑀸𑀕𑀲𑀳𑀕𑀢𑁂𑀦 𑀲𑁄𑀫𑀦𑀲𑁆𑀲𑁂𑀦 𑀲𑀼𑀫𑀦𑁄 𑀯𑀸 𑀅𑀦𑀺𑀝𑁆𑀞𑀸𑀭𑀫𑁆𑀫𑀡𑁂 𑀤𑁄𑀲𑀲𑀳𑀕𑀢𑁂𑀦 𑀤𑁄𑀫𑀦𑀲𑁆𑀲𑁂𑀦 𑀤𑀼𑀫𑁆𑀫𑀦𑁄 𑀯𑀸 𑀦 𑀳𑁄𑀢𑀺. 𑀉𑀧𑁂𑀓𑁆𑀔𑀓𑁄 𑀯𑀺𑀳𑀭𑀢𑀺 𑀲𑀢𑁄 𑀲𑀫𑁆𑀧𑀚𑀸𑀦𑁄𑀢𑀺 𑀫𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑁂 𑀅𑀲𑀫𑀧𑁂𑀓𑁆𑀔𑀦𑁂𑀦 𑀅𑀜𑁆𑀜𑀸𑀡𑀼𑀧𑁂𑀓𑁆𑀔𑀸𑀬 𑀉𑀧𑁂𑀓𑁆𑀔𑀓𑀪𑀸𑀯𑀁 𑀅𑀦𑀸𑀧𑀚𑁆𑀚𑀺𑀢𑁆𑀯𑀸 𑀲𑀢𑁄 𑀲𑀫𑁆𑀧𑀚𑀸𑀦𑁄 𑀳𑀼𑀢𑁆𑀯𑀸 𑀆𑀭𑀫𑁆𑀫𑀡𑁂 𑀫𑀚𑁆𑀛𑀢𑁆𑀢𑁄 𑀯𑀺𑀳𑀭𑀢𑀺. 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀔𑀻𑀡𑀸𑀲𑀯𑀲𑁆𑀲 𑀲𑀢𑀢𑀯𑀺𑀳𑀸𑀭𑁄 𑀓𑀣𑀺𑀢𑁄.

𑁨. 𑀤𑀼𑀢𑀺𑀬𑀆𑀳𑀼𑀦𑁂𑀬𑁆𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁨-𑁪. 𑀤𑀼𑀢𑀺𑀬𑁂 𑀅𑀦𑁂𑀓𑀯𑀺𑀳𑀺𑀢𑀁 𑀇𑀤𑁆𑀥𑀺𑀯𑀺𑀥𑀦𑁆𑀢𑀺𑀆𑀤𑀻𑀦𑀺 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀯𑀼𑀢𑁆𑀢𑀸𑀦𑁂𑀯. 𑀆𑀲𑀯𑀸𑀦𑀁 𑀔𑀬𑀸 𑀅𑀦𑀸𑀲𑀯𑀦𑁆𑀢𑀺 𑀆𑀲𑀯𑀸𑀦𑀁 𑀔𑀬𑁂𑀦 𑀅𑀦𑀸𑀲𑀯𑀁, 𑀦 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀁 𑀯𑀺𑀬 𑀅𑀪𑀸𑀯𑁂𑀦𑀸𑀢𑀺. 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀔𑀻𑀡𑀸𑀲𑀯𑀲𑁆𑀲 𑀅𑀪𑀺𑀜𑁆𑀜𑀸 𑀧𑀝𑀺𑀧𑀸𑀝𑀺𑀬𑀸 𑀓𑀣𑀺𑀢𑀸. 𑀢𑀢𑀺𑀬𑀘𑀢𑀼𑀢𑁆𑀣𑁂𑀲𑀼 𑀔𑀻𑀡𑀸𑀲𑀯𑁄 𑀓𑀣𑀺𑀢𑁄.

𑁫-𑁭. 𑀆𑀚𑀸𑀦𑀻𑀬𑀲𑀼𑀢𑁆𑀢𑀢𑁆𑀢𑀬𑀯𑀡𑁆𑀡𑀦𑀸

𑁫-𑁭. 𑀧𑀜𑁆𑀘𑀫𑁂 𑀅𑀗𑁆𑀕𑁂𑀳𑀻𑀢𑀺 𑀕𑀼𑀡𑀗𑁆𑀕𑁂𑀳𑀺. 𑀔𑀫𑁄𑀢𑀺 𑀅𑀥𑀺𑀯𑀸𑀲𑀓𑁄. 𑀭𑀽𑀧𑀸𑀦𑀦𑁆𑀢𑀺 𑀭𑀽𑀧𑀸𑀭𑀫𑁆𑀫𑀡𑀸𑀦𑀁. 𑀯𑀡𑁆𑀡𑀲𑀫𑁆𑀧𑀦𑁆𑀦𑁄𑀢𑀺 𑀲𑀭𑀻𑀭𑀯𑀡𑁆𑀡𑁂𑀦 𑀲𑀫𑁆𑀧𑀦𑁆𑀦𑁄. 𑀙𑀝𑁆𑀞𑁂 𑀩𑀮𑀲𑀫𑁆𑀧𑀦𑁆𑀦𑁄𑀢𑀺 𑀓𑀸𑀬𑀩𑀮𑁂𑀦 𑀲𑀫𑁆𑀧𑀦𑁆𑀦𑁄. 𑀲𑀢𑁆𑀢𑀫𑁂 𑀚𑀯𑀲𑀫𑁆𑀧𑀦𑁆𑀦𑁄𑀢𑀺 𑀧𑀤𑀚𑀯𑁂𑀦 𑀲𑀫𑁆𑀧𑀦𑁆𑀦𑁄.

𑁮-𑁯. 𑀅𑀦𑀼𑀢𑁆𑀢𑀭𑀺𑀬𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁮-𑁯. 𑀅𑀝𑁆𑀞𑀫𑁂 𑀅𑀦𑀼𑀢𑁆𑀢𑀭𑀺𑀬𑀸𑀦𑀻𑀢𑀺 𑀅𑀜𑁆𑀜𑁂𑀦 𑀉𑀢𑁆𑀢𑀭𑀺𑀢𑀭𑁂𑀦 𑀭𑀳𑀺𑀢𑀸𑀦𑀺 𑀦𑀺𑀭𑀼𑀢𑁆𑀢𑀭𑀸𑀦𑀺. 𑀤𑀲𑁆𑀲𑀦𑀸𑀦𑀼𑀢𑁆𑀢𑀭𑀺𑀬𑀦𑁆𑀢𑀺 𑀭𑀽𑀧𑀤𑀲𑁆𑀲𑀦𑁂𑀲𑀼 𑀅𑀦𑀼𑀢𑁆𑀢𑀭𑀁. 𑀏𑀲 𑀦𑀬𑁄 𑀲𑀩𑁆𑀩𑀧𑀤𑁂𑀲𑀼. 𑀳𑀢𑁆𑀣𑀺𑀭𑀢𑀦𑀸𑀤𑀻𑀦𑀜𑁆𑀳𑀺 𑀤𑀲𑁆𑀲𑀦𑀁 𑀦 𑀤𑀲𑁆𑀲𑀦𑀸𑀦𑀼𑀢𑁆𑀢𑀭𑀺𑀬𑀁, 𑀦𑀺𑀯𑀺𑀝𑁆𑀞𑀲𑀤𑁆𑀥𑀲𑁆𑀲 𑀧𑀦 𑀦𑀺𑀯𑀺𑀝𑁆𑀞𑀧𑁂𑀫𑀯𑀲𑁂𑀦 𑀤𑀲𑀩𑀮𑀲𑁆𑀲 𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀯𑀸 𑀓𑀲𑀺𑀡𑀅𑀲𑀼𑀪𑀦𑀺𑀫𑀺𑀢𑁆𑀢𑀸𑀤𑀻𑀦𑀁 𑀯𑀸 𑀅𑀜𑁆𑀜𑀢𑀭𑀲𑁆𑀲 𑀤𑀲𑁆𑀲𑀦𑀁 𑀤𑀲𑁆𑀲𑀦𑀸𑀦𑀼𑀢𑁆𑀢𑀭𑀺𑀬𑀁 𑀦𑀸𑀫. 𑀔𑀢𑁆𑀢𑀺𑀬𑀸𑀤𑀻𑀦𑀁 𑀕𑀼𑀡𑀓𑀣𑀸𑀲𑀯𑀦𑀁 𑀦 𑀲𑀯𑀦𑀸𑀦𑀼𑀢𑁆𑀢𑀭𑀺𑀬𑀁, 𑀦𑀺𑀯𑀺𑀝𑁆𑀞𑀲𑀤𑁆𑀥𑀲𑁆𑀲 𑀧𑀦 𑀦𑀺𑀯𑀺𑀝𑁆𑀞𑀧𑁂𑀫𑀯𑀲𑁂𑀦 𑀢𑀺𑀡𑁆𑀡𑀁 𑀯𑀸 𑀭𑀢𑀦𑀸𑀦𑀁 𑀕𑀼𑀡𑀓𑀣𑀸𑀲𑀯𑀦𑀁 𑀢𑁂𑀧𑀺𑀝𑀓𑀩𑀼𑀤𑁆𑀥𑀯𑀘𑀦𑀲𑀯𑀦𑀁 𑀯𑀸 𑀲𑀯𑀦𑀸𑀦𑀼𑀢𑁆𑀢𑀭𑀺𑀬𑀁 𑀦𑀸𑀫. 𑀫𑀡𑀺𑀭𑀢𑀦𑀸𑀤𑀻𑀦𑀁 𑀮𑀸𑀪𑁄 𑀦 𑀮𑀸𑀪𑀸𑀦𑀼𑀢𑁆𑀢𑀭𑀺𑀬𑀁, 𑀲𑀢𑁆𑀢𑀯𑀺𑀥𑀅𑀭𑀺𑀬𑀥𑀦𑀮𑀸𑀪𑁄 𑀧𑀦 𑀮𑀸𑀪𑀸𑀦𑀼𑀢𑁆𑀢𑀭𑀺𑀬𑀁 𑀦𑀸𑀫. 𑀳𑀢𑁆𑀣𑀺𑀲𑀺𑀧𑁆𑀧𑀸𑀤𑀺𑀲𑀺𑀓𑁆𑀔𑀦𑀁 𑀦 𑀲𑀺𑀓𑁆𑀔𑀸𑀦𑀼𑀢𑁆𑀢𑀭𑀺𑀬𑀁, 𑀲𑀺𑀓𑁆𑀔𑀸𑀢𑁆𑀢𑀬𑀲𑁆𑀲 𑀧𑀽𑀭𑀡𑀁 𑀧𑀦 𑀲𑀺𑀓𑁆𑀔𑀸𑀦𑀼𑀢𑁆𑀢𑀭𑀺𑀬𑀁 𑀦𑀸𑀫. 𑀔𑀢𑁆𑀢𑀺𑀬𑀸𑀤𑀻𑀦𑀁 𑀧𑀸𑀭𑀺𑀘𑀭𑀺𑀬𑀸 𑀦 𑀧𑀸𑀭𑀺𑀘𑀭𑀺𑀬𑀸𑀦𑀼𑀢𑁆𑀢𑀭𑀺𑀬𑀁, 𑀢𑀺𑀡𑁆𑀡𑀁 𑀧𑀦 𑀭𑀢𑀦𑀸𑀦𑀁 𑀧𑀸𑀭𑀺𑀘𑀭𑀺𑀬𑀸 𑀧𑀸𑀭𑀺𑀘𑀭𑀺𑀬𑀸𑀦𑀼𑀢𑁆𑀢𑀭𑀺𑀬𑀁 𑀦𑀸𑀫. 𑀔𑀢𑁆𑀢𑀺𑀬𑀸𑀤𑀻𑀦𑀁 𑀕𑀼𑀡𑀸𑀦𑀼𑀲𑁆𑀲𑀭𑀡𑀁 𑀦 𑀅𑀦𑀼𑀲𑁆𑀲𑀢𑀸𑀦𑀼𑀢𑁆𑀢𑀭𑀺𑀬𑀁, 𑀢𑀺𑀡𑁆𑀡𑀁 𑀧𑀦 𑀭𑀢𑀦𑀸𑀦𑀁 𑀕𑀼𑀡𑀸𑀦𑀼𑀲𑁆𑀲𑀭𑀡𑀁 𑀅𑀦𑀼𑀲𑁆𑀲𑀢𑀸𑀦𑀼𑀢𑁆𑀢𑀭𑀺𑀬𑀁 𑀦𑀸𑀫. 𑀇𑀢𑀺 𑀇𑀫𑀸𑀦𑀺 𑀙 𑀅𑀦𑀼𑀢𑁆𑀢𑀭𑀺𑀬𑀸𑀦𑀺 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀸𑀦𑀺 𑀓𑀣𑀺𑀢𑀸𑀦𑀺. 𑀦𑀯𑀫𑁂 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀻𑀢𑀺 𑀩𑀼𑀤𑁆𑀥𑀕𑀼𑀡𑀸𑀭𑀫𑁆𑀫𑀡𑀸 𑀲𑀢𑀺. 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑁧𑁦. 𑀫𑀳𑀸𑀦𑀸𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦. 𑀤𑀲𑀫𑁂 𑀫𑀳𑀸𑀦𑀸𑀫𑁄𑀢𑀺 𑀤𑀲𑀩𑀮𑀲𑁆𑀲 𑀘𑀽𑀴𑀧𑀺𑀢𑀼 𑀧𑀼𑀢𑁆𑀢𑁄 𑀏𑀓𑁄 𑀲𑀓𑁆𑀬𑀭𑀸𑀚𑀸. 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀻𑀢𑀺 𑀪𑀼𑀢𑁆𑀢𑀧𑀸𑀢𑀭𑀸𑀲𑁄 𑀳𑀼𑀢𑁆𑀯𑀸 𑀤𑀸𑀲𑀧𑀭𑀺𑀚𑀦𑀧𑀭𑀺𑀯𑀼𑀢𑁄 𑀕𑀦𑁆𑀥𑀫𑀸𑀮𑀸𑀤𑀻𑀦𑀺 𑀕𑀸𑀳𑀸𑀧𑁂𑀢𑁆𑀯𑀸 𑀬𑀢𑁆𑀣 𑀲𑀢𑁆𑀣𑀸, 𑀢𑀢𑁆𑀣 𑀅𑀕𑀫𑀸𑀲𑀺. 𑀅𑀭𑀺𑀬𑀨𑀮𑀁 𑀅𑀲𑁆𑀲 𑀆𑀕𑀢𑀦𑁆𑀢𑀺 𑀆𑀕𑀢𑀨𑀮𑁄. 𑀲𑀺𑀓𑁆𑀔𑀸𑀢𑁆𑀢𑀬𑀲𑀸𑀲𑀦𑀁 𑀏𑀢𑁂𑀦 𑀯𑀺𑀜𑁆𑀜𑀸𑀢𑀦𑁆𑀢𑀺 𑀯𑀺𑀜𑁆𑀜𑀸𑀢𑀲𑀸𑀲𑀦𑁄. 𑀇𑀢𑀺 𑀅𑀬𑀁 𑀭𑀸𑀚𑀸 ‘‘𑀲𑁄𑀢𑀸𑀧𑀦𑁆𑀦𑀲𑁆𑀲 𑀦𑀺𑀲𑁆𑀲𑀬𑀯𑀺𑀳𑀸𑀭𑀁 𑀧𑀼𑀘𑁆𑀙𑀸𑀫𑀻’’𑀢𑀺 𑀧𑀼𑀘𑁆𑀙𑀦𑁆𑀢𑁄 𑀏𑀯𑀫𑀸𑀳.

𑀦𑁂𑀯𑀲𑁆𑀲 𑀭𑀸𑀕𑀧𑀭𑀺𑀬𑀼𑀝𑁆𑀞𑀺𑀢𑀦𑁆𑀢𑀺 𑀦 𑀉𑀧𑁆𑀧𑀚𑁆𑀚𑀫𑀸𑀦𑁂𑀦 𑀭𑀸𑀕𑁂𑀦 𑀉𑀝𑁆𑀞𑀳𑀺𑀢𑁆𑀯𑀸 𑀕𑀳𑀺𑀢𑀁. 𑀉𑀚𑀼𑀕𑀢𑀦𑁆𑀢𑀺 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺𑀓𑀫𑁆𑀫𑀝𑁆𑀞𑀸𑀦𑁂 𑀉𑀚𑀼𑀓𑀫𑁂𑀯 𑀕𑀢𑀁. 𑀢𑀣𑀸𑀕𑀢𑀁 𑀆𑀭𑀩𑁆𑀪𑀸𑀢𑀺 𑀢𑀣𑀸𑀕𑀢𑀕𑀼𑀡𑁂 𑀆𑀭𑀩𑁆𑀪. 𑀅𑀢𑁆𑀣𑀯𑁂𑀤𑀦𑁆𑀢𑀺 𑀅𑀝𑁆𑀞𑀓𑀣𑀁 𑀦𑀺𑀲𑁆𑀲𑀸𑀬 𑀉𑀧𑁆𑀧𑀦𑁆𑀦𑀁 𑀧𑀻𑀢𑀺𑀧𑀸𑀫𑁄𑀚𑁆𑀚𑀁. 𑀥𑀫𑁆𑀫𑀯𑁂𑀤𑀦𑁆𑀢𑀺 𑀧𑀸𑀴𑀺𑀁 𑀦𑀺𑀲𑁆𑀲𑀸𑀬 𑀉𑀧𑁆𑀧𑀦𑁆𑀦𑀁 𑀧𑀻𑀢𑀺𑀧𑀸𑀫𑁄𑀚𑁆𑀚𑀁. 𑀥𑀫𑁆𑀫𑀽𑀧𑀲𑀜𑁆𑀳𑀺𑀢𑀦𑁆𑀢𑀺 𑀧𑀸𑀴𑀺𑀜𑁆𑀘 𑀅𑀝𑁆𑀞𑀓𑀣𑀜𑁆𑀘 𑀦𑀺𑀲𑁆𑀲𑀸𑀬 𑀉𑀧𑁆𑀧𑀦𑁆𑀦𑀁. 𑀧𑀫𑀼𑀤𑀺𑀢𑀲𑁆𑀲𑀸𑀢𑀺 𑀤𑀼𑀯𑀺𑀥𑁂𑀦 𑀧𑀸𑀫𑁄𑀚𑁆𑀚𑁂𑀦 𑀧𑀫𑀼𑀤𑀺𑀢𑀲𑁆𑀲. 𑀧𑀻𑀢𑀺 𑀚𑀸𑀬𑀢𑀻𑀢𑀺 𑀧𑀜𑁆𑀘𑀯𑀺𑀥𑀸 𑀧𑀻𑀢𑀺 𑀦𑀺𑀩𑁆𑀩𑀢𑁆𑀢𑀢𑀺. 𑀓𑀸𑀬𑁄 𑀧𑀲𑁆𑀲𑀫𑁆𑀪𑀢𑀻𑀢𑀺 𑀦𑀸𑀫𑀓𑀸𑀬𑁄 𑀘 𑀓𑀭𑀚𑀓𑀸𑀬𑁄 𑀘 𑀤𑀭𑀣𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀬𑀸 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀺. 𑀲𑀼𑀔𑀦𑁆𑀢𑀺 𑀓𑀸𑀬𑀺𑀓𑀘𑁂𑀢𑀲𑀺𑀓𑀲𑀼𑀔𑀁. 𑀲𑀫𑀸𑀥𑀺𑀬𑀢𑀻𑀢𑀺 𑀆𑀭𑀫𑁆𑀫𑀡𑁂 𑀲𑀫𑁆𑀫𑀸 𑀞𑀧𑀺𑀢𑀁 𑀳𑁄𑀢𑀺. 𑀯𑀺𑀲𑀫𑀕𑀢𑀸𑀬 𑀧𑀚𑀸𑀬𑀸𑀢𑀺 𑀭𑀸𑀕𑀤𑁄𑀲𑀫𑁄𑀳𑀯𑀺𑀲𑀫𑀕𑀢𑁂𑀲𑀼 𑀲𑀢𑁆𑀢𑁂𑀲𑀼. 𑀲𑀫𑀧𑁆𑀧𑀢𑁆𑀢𑁄𑀢𑀺 𑀲𑀫𑀁 𑀉𑀧𑀲𑀫𑀁 𑀧𑀢𑁆𑀢𑁄 𑀳𑀼𑀢𑁆𑀯𑀸. 𑀲𑀩𑁆𑀬𑀸𑀧𑀚𑁆𑀛𑀸𑀬𑀸𑀢𑀺 𑀲𑀤𑀼𑀓𑁆𑀔𑀸𑀬. 𑀥𑀫𑁆𑀫𑀲𑁄𑀢𑀁 𑀲𑀫𑀸𑀧𑀦𑁆𑀦𑁄𑀢𑀺 𑀯𑀺𑀧𑀲𑁆𑀲𑀦𑀸𑀲𑀗𑁆𑀔𑀸𑀢𑀁 𑀥𑀫𑁆𑀫𑀲𑁄𑀢𑀁 𑀲𑀫𑀸𑀧𑀦𑁆𑀦𑁄. 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺𑀁 𑀪𑀸𑀯𑁂𑀢𑀻𑀢𑀺 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺𑀓𑀫𑁆𑀫𑀝𑁆𑀞𑀸𑀦𑀁 𑀩𑁆𑀭𑀽𑀳𑁂𑀢𑀺 𑀯𑀟𑁆𑀠𑁂𑀢𑀺. 𑀇𑀫𑀺𑀦𑀸 𑀦𑀬𑁂𑀦 𑀲𑀩𑁆𑀩𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀇𑀢𑀺 𑀫𑀳𑀸𑀦𑀸𑀫𑁄 𑀲𑁄𑀢𑀸𑀧𑀦𑁆𑀦𑀲𑁆𑀲 𑀦𑀺𑀲𑁆𑀲𑀬𑀯𑀺𑀳𑀸𑀭𑀁 𑀧𑀼𑀘𑁆𑀙𑀺. 𑀲𑀢𑁆𑀣𑀸𑀧𑀺𑀲𑁆𑀲 𑀢𑀫𑁂𑀯 𑀓𑀣𑁂𑀲𑀺. 𑀏𑀯𑀁 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀲𑁄𑀢𑀸𑀧𑀦𑁆𑀦𑁄𑀯 𑀓𑀣𑀺𑀢𑁄𑀢𑀺.

𑀆𑀳𑀼𑀦𑁂𑀬𑁆𑀬𑀯𑀕𑁆𑀕𑁄 𑀧𑀞𑀫𑁄.

𑁨. 𑀲𑀸𑀭𑀡𑀻𑀬𑀯𑀕𑁆𑀕𑁄

𑁧. 𑀧𑀞𑀫𑀲𑀸𑀭𑀡𑀻𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁧. 𑀤𑀼𑀢𑀺𑀬𑀲𑁆𑀲 𑀧𑀞𑀫𑁂 𑀲𑀸𑀭𑀡𑀻𑀬𑀸𑀢𑀺 𑀲𑀭𑀺𑀢𑀩𑁆𑀩𑀬𑀼𑀢𑁆𑀢𑀓𑀸. 𑀫𑁂𑀢𑁆𑀢𑀁 𑀓𑀸𑀬𑀓𑀫𑁆𑀫𑀦𑁆𑀢𑀺 𑀫𑁂𑀢𑁆𑀢𑁂𑀦 𑀘𑀺𑀢𑁆𑀢𑁂𑀦 𑀓𑀸𑀢𑀩𑁆𑀩𑀁 𑀓𑀸𑀬𑀓𑀫𑁆𑀫𑀁. 𑀯𑀘𑀻𑀓𑀫𑁆𑀫𑀫𑀦𑁄𑀓𑀫𑁆𑀫𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀇𑀫𑀸𑀦𑀺 𑀘 𑀧𑀦 𑀪𑀺𑀓𑁆𑀔𑀽𑀦𑀁 𑀯𑀲𑁂𑀦 𑀆𑀕𑀢𑀸𑀦𑀺, 𑀕𑀺𑀳𑀻𑀲𑀼𑀧𑀺 𑀮𑀩𑁆𑀪𑀦𑁆𑀢𑀺. 𑀪𑀺𑀓𑁆𑀔𑀽𑀦𑀜𑁆𑀳𑀺 𑀫𑁂𑀢𑁆𑀢𑁂𑀦 𑀘𑀺𑀢𑁆𑀢𑁂𑀦 𑀆𑀪𑀺𑀲𑀫𑀸𑀘𑀸𑀭𑀺𑀓𑀥𑀫𑁆𑀫𑀧𑀽𑀭𑀡𑀁 𑀫𑁂𑀢𑁆𑀢𑀁 𑀓𑀸𑀬𑀓𑀫𑁆𑀫𑀁 𑀦𑀸𑀫. 𑀕𑀺𑀳𑀻𑀦𑀁 𑀘𑁂𑀢𑀺𑀬𑀯𑀦𑁆𑀤𑀦𑀢𑁆𑀣𑀸𑀬 𑀩𑁄𑀥𑀺𑀯𑀦𑁆𑀤𑀦𑀢𑁆𑀣𑀸𑀬 𑀲𑀗𑁆𑀖𑀦𑀺𑀫𑀦𑁆𑀢𑀦𑀢𑁆𑀣𑀸𑀬 𑀕𑀫𑀦𑀁, 𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀯𑀺𑀝𑁆𑀞𑁂 𑀪𑀺𑀓𑁆𑀔𑀽 𑀤𑀺𑀲𑁆𑀯𑀸 𑀧𑀘𑁆𑀘𑀼𑀕𑁆𑀕𑀫𑀦𑀁, 𑀧𑀢𑁆𑀢𑀧𑀝𑀺𑀕𑁆𑀕𑀳𑀡𑀁, 𑀆𑀲𑀦𑀧𑀜𑁆𑀜𑀸𑀧𑀦𑀁, 𑀅𑀦𑀼𑀕𑀫𑀦𑀦𑁆𑀢𑀺 𑀏𑀯𑀫𑀸𑀤𑀺𑀓𑀁 𑀫𑁂𑀢𑁆𑀢𑀁 𑀓𑀸𑀬𑀓𑀫𑁆𑀫𑀁 𑀦𑀸𑀫.

𑀪𑀺𑀓𑁆𑀔𑀽𑀦𑀁 𑀫𑁂𑀢𑁆𑀢𑁂𑀦 𑀘𑀺𑀢𑁆𑀢𑁂𑀦 𑀆𑀘𑀸𑀭𑀧𑀡𑁆𑀡𑀢𑁆𑀢𑀺𑀲𑀺𑀓𑁆𑀔𑀸𑀧𑀦𑀁, 𑀓𑀫𑁆𑀫𑀝𑁆𑀞𑀸𑀦𑀓𑀣𑀦𑀁, 𑀥𑀫𑁆𑀫𑀤𑁂𑀲𑀦𑀸, 𑀢𑁂𑀧𑀺𑀝𑀓𑀫𑁆𑀧𑀺 𑀩𑀼𑀤𑁆𑀥𑀯𑀘𑀦𑀁 𑀫𑁂𑀢𑁆𑀢𑀁 𑀯𑀘𑀻𑀓𑀫𑁆𑀫𑀁 𑀦𑀸𑀫. 𑀕𑀺𑀳𑀻𑀦𑀁 ‘‘𑀘𑁂𑀢𑀺𑀬𑀯𑀦𑁆𑀤𑀦𑀸𑀬 𑀕𑀘𑁆𑀙𑀸𑀫, 𑀩𑁄𑀥𑀺𑀯𑀦𑁆𑀤𑀦𑀸𑀬 𑀕𑀘𑁆𑀙𑀸𑀫, 𑀥𑀫𑁆𑀫𑀲𑁆𑀲𑀯𑀦𑀁 𑀓𑀭𑀺𑀲𑁆𑀲𑀸𑀫, 𑀤𑀻𑀧𑀫𑀸𑀮𑀸𑀧𑀼𑀧𑁆𑀨𑀧𑀽𑀚𑀁 𑀓𑀭𑀺𑀲𑁆𑀲𑀸𑀫, 𑀢𑀻𑀡𑀺 𑀲𑀼𑀘𑀭𑀺𑀢𑀸𑀦𑀺 𑀲𑀫𑀸𑀤𑀸𑀬 𑀯𑀢𑁆𑀢𑀺𑀲𑁆𑀲𑀸𑀫, 𑀲𑀮𑀸𑀓𑀪𑀢𑁆𑀢𑀸𑀤𑀻𑀦𑀺 𑀤𑀲𑁆𑀲𑀸𑀫, 𑀯𑀲𑁆𑀲𑀸𑀯𑀸𑀲𑀺𑀓𑀁 𑀤𑀲𑁆𑀲𑀸𑀫, 𑀅𑀚𑁆𑀚 𑀲𑀗𑁆𑀖𑀲𑁆𑀲 𑀘𑀢𑁆𑀢𑀸𑀭𑁄 𑀧𑀘𑁆𑀘𑀬𑁂 𑀤𑀲𑁆𑀲𑀸𑀫, 𑀲𑀗𑁆𑀖𑀁 𑀦𑀺𑀫𑀦𑁆𑀢𑁂𑀢𑁆𑀯𑀸 𑀔𑀸𑀤𑀦𑀻𑀬𑀸𑀤𑀻𑀦𑀺 𑀲𑀁𑀯𑀺𑀤𑀳𑀣, 𑀆𑀲𑀦𑀸𑀦𑀺 𑀧𑀜𑁆𑀜𑀸𑀧𑁂𑀣, 𑀧𑀸𑀦𑀻𑀬𑀁 𑀉𑀧𑀝𑁆𑀞𑀸𑀧𑁂𑀣, 𑀲𑀗𑁆𑀖𑀁 𑀧𑀘𑁆𑀘𑀼𑀕𑁆𑀕𑀦𑁆𑀢𑁆𑀯𑀸 𑀆𑀦𑁂𑀣, 𑀧𑀜𑁆𑀜𑀢𑁆𑀢𑀸𑀲𑀦𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀉𑀲𑁆𑀲𑀸𑀳𑀚𑀸𑀢𑀸 𑀯𑁂𑀬𑁆𑀬𑀸𑀯𑀘𑁆𑀘𑀁 𑀓𑀭𑁄𑀣𑀸’’𑀢𑀺𑀆𑀤𑀺𑀯𑀘𑀦𑀓𑀸𑀮𑁂 𑀫𑁂𑀢𑁆𑀢𑀁 𑀯𑀘𑀻𑀓𑀫𑁆𑀫𑀁 𑀦𑀸𑀫.

𑀪𑀺𑀓𑁆𑀔𑀽𑀦𑀁 𑀧𑀸𑀢𑁄𑀯 𑀉𑀝𑁆𑀞𑀸𑀬 𑀲𑀭𑀻𑀭𑀧𑀝𑀺𑀚𑀕𑁆𑀕𑀦𑀁 𑀘𑁂𑀢𑀺𑀬𑀗𑁆𑀕𑀡𑀯𑀢𑁆𑀢𑀸𑀤𑀻𑀦𑀺 𑀘 𑀓𑀢𑁆𑀯𑀸 𑀯𑀺𑀯𑀺𑀢𑁆𑀢𑀸𑀲𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 ‘‘𑀇𑀫𑀲𑁆𑀫𑀺𑀁 𑀯𑀺𑀳𑀸𑀭𑁂 𑀪𑀺𑀓𑁆𑀔𑀽 𑀲𑀼𑀔𑀻 𑀳𑁄𑀦𑁆𑀢𑀼 𑀅𑀯𑁂𑀭𑀸 𑀅𑀩𑁆𑀬𑀸𑀧𑀚𑁆𑀛𑀸’’𑀢𑀺 𑀘𑀺𑀦𑁆𑀢𑀦𑀁 𑀫𑁂𑀢𑁆𑀢𑀁 𑀫𑀦𑁄𑀓𑀫𑁆𑀫𑀁 𑀦𑀸𑀫. 𑀕𑀺𑀳𑀻𑀦𑀁 ‘‘𑀅𑀬𑁆𑀬𑀸 𑀲𑀼𑀔𑀻 𑀳𑁄𑀦𑁆𑀢𑀼 𑀅𑀯𑁂𑀭𑀸 𑀅𑀩𑁆𑀬𑀸𑀧𑀚𑁆𑀛𑀸’’𑀢𑀺 𑀘𑀺𑀦𑁆𑀢𑀦𑀁 𑀫𑁂𑀢𑁆𑀢𑀁 𑀫𑀦𑁄𑀓𑀫𑁆𑀫𑀁 𑀦𑀸𑀫.

𑀆𑀯𑀺 𑀘𑁂𑀯 𑀭𑀳𑁄 𑀘𑀸𑀢𑀺 𑀲𑀫𑁆𑀫𑀼𑀔𑀸 𑀘 𑀧𑀭𑀫𑁆𑀫𑀼𑀔𑀸 𑀘. 𑀢𑀢𑁆𑀣 𑀦𑀯𑀓𑀸𑀦𑀁 𑀘𑀻𑀯𑀭𑀓𑀫𑁆𑀫𑀸𑀤𑀻𑀲𑀼 𑀲𑀳𑀸𑀬𑀪𑀸𑀯𑀕𑀫𑀦𑀁 𑀲𑀫𑁆𑀫𑀼𑀔𑀸 𑀫𑁂𑀢𑁆𑀢𑀁 𑀓𑀸𑀬𑀓𑀫𑁆𑀫𑀁 𑀦𑀸𑀫, 𑀣𑁂𑀭𑀸𑀦𑀁 𑀧𑀦 𑀧𑀸𑀤𑀥𑁄𑀯𑀦𑀤𑀸𑀦𑀸𑀤𑀺𑀪𑁂𑀤𑀁 𑀲𑀩𑁆𑀩𑀫𑁆𑀧𑀺 𑀲𑀸𑀫𑀻𑀘𑀺𑀓𑀫𑁆𑀫𑀁 𑀲𑀫𑁆𑀫𑀼𑀔𑀸 𑀫𑁂𑀢𑁆𑀢𑀁 𑀓𑀸𑀬𑀓𑀫𑁆𑀫𑀁 𑀦𑀸𑀫. 𑀉𑀪𑀬𑁂𑀳𑀺𑀧𑀺 𑀤𑀼𑀦𑁆𑀦𑀺𑀓𑁆𑀔𑀺𑀢𑁆𑀢𑀸𑀦𑀁 𑀤𑀸𑀭𑀼𑀪𑀡𑁆𑀟𑀸𑀤𑀻𑀦𑀁 𑀢𑁂𑀲𑀼 𑀅𑀯𑀜𑁆𑀜𑀁 𑀅𑀓𑀢𑁆𑀯𑀸 𑀅𑀢𑁆𑀢𑀦𑀸 𑀤𑀼𑀦𑁆𑀦𑀺𑀓𑁆𑀔𑀺𑀢𑁆𑀢𑀸𑀦𑀁 𑀯𑀺𑀬 𑀧𑀝𑀺𑀲𑀸𑀫𑀦𑀁 𑀧𑀭𑀫𑁆𑀫𑀼𑀔𑀸 𑀫𑁂𑀢𑁆𑀢𑀁 𑀓𑀸𑀬𑀓𑀫𑁆𑀫𑀁 𑀦𑀸𑀫. ‘‘𑀤𑁂𑀯𑀢𑁆𑀣𑁂𑀭𑁄 𑀢𑀺𑀲𑁆𑀲𑀢𑁆𑀣𑁂𑀭𑁄’’𑀢𑀺 𑀏𑀯𑀁 𑀧𑀕𑁆𑀕𑀬𑁆𑀳 𑀯𑀘𑀦𑀁 𑀲𑀫𑁆𑀫𑀼𑀔𑀸 𑀫𑁂𑀢𑁆𑀢𑀁 𑀯𑀘𑀻𑀓𑀫𑁆𑀫𑀁 𑀦𑀸𑀫. 𑀯𑀺𑀳𑀸𑀭𑁂 𑀅𑀲𑀦𑁆𑀢𑀁 𑀧𑀦 𑀧𑀝𑀺𑀧𑀼𑀘𑁆𑀙𑀦𑁆𑀢𑀲𑁆𑀲 ‘‘𑀓𑀳𑀁 𑀅𑀫𑁆𑀳𑀸𑀓𑀁 𑀤𑁂𑀯𑀢𑁆𑀣𑁂𑀭𑁄, 𑀓𑀳𑀁 𑀅𑀫𑁆𑀳𑀸𑀓𑀁 𑀢𑀺𑀲𑁆𑀲𑀢𑁆𑀣𑁂𑀭𑁄, 𑀓𑀤𑀸 𑀦𑀼 𑀔𑁄 𑀆𑀕𑀫𑀺𑀲𑁆𑀲𑀢𑀻’’𑀢𑀺 𑀏𑀯𑀁 𑀫𑀫𑀸𑀬𑀦𑀯𑀘𑀦𑀁 𑀧𑀭𑀫𑁆𑀫𑀼𑀔𑀸 𑀫𑁂𑀢𑁆𑀢𑀁 𑀯𑀘𑀻𑀓𑀫𑁆𑀫𑀁 𑀦𑀸𑀫. 𑀫𑁂𑀢𑁆𑀢𑀸𑀲𑀺𑀦𑁂𑀳𑀲𑀺𑀦𑀺𑀤𑁆𑀥𑀸𑀦𑀺 𑀧𑀦 𑀦𑀬𑀦𑀸𑀦𑀺 𑀉𑀫𑁆𑀫𑀻𑀮𑁂𑀢𑁆𑀯𑀸 𑀧𑀲𑀦𑁆𑀦𑁂𑀦 𑀫𑀼𑀔𑁂𑀦 𑀑𑀮𑁄𑀓𑀦𑀁 𑀲𑀫𑁆𑀫𑀼𑀔𑀸 𑀫𑁂𑀢𑁆𑀢𑀁 𑀫𑀦𑁄𑀓𑀫𑁆𑀫𑀁 𑀦𑀸𑀫. ‘‘𑀤𑁂𑀯𑀢𑁆𑀣𑁂𑀭𑁄 𑀢𑀺𑀲𑁆𑀲𑀢𑁆𑀣𑁂𑀭𑁄 𑀅𑀭𑁄𑀕𑁄 𑀳𑁄𑀢𑀼 𑀅𑀧𑁆𑀧𑀸𑀩𑀸𑀥𑁄’’𑀢𑀺 𑀲𑀫𑀦𑁆𑀦𑀸𑀳𑀭𑀡𑀁 𑀧𑀭𑀫𑁆𑀫𑀼𑀔𑀸 𑀫𑁂𑀢𑁆𑀢𑀁 𑀫𑀦𑁄𑀓𑀫𑁆𑀫𑀁 𑀦𑀸𑀫.

𑀮𑀸𑀪𑀸𑀢𑀺 𑀘𑀻𑀯𑀭𑀸𑀤𑀬𑁄 𑀮𑀤𑁆𑀥𑀧𑀘𑁆𑀘𑀬𑀸. 𑀥𑀫𑁆𑀫𑀺𑀓𑀸𑀢𑀺 𑀓𑀼𑀳𑀦𑀸𑀤𑀺𑀪𑁂𑀤𑀁 𑀫𑀺𑀘𑁆𑀙𑀸𑀚𑀻𑀯𑀁 𑀯𑀚𑁆𑀚𑁂𑀢𑁆𑀯𑀸 𑀥𑀫𑁆𑀫𑁂𑀦 𑀲𑀫𑁂𑀦 𑀪𑀺𑀓𑁆𑀔𑀸𑀘𑀭𑀺𑀬𑀯𑀢𑁆𑀢𑁂𑀦 𑀉𑀧𑁆𑀧𑀦𑁆𑀦𑀸. 𑀅𑀦𑁆𑀢𑀫𑀲𑁄 𑀧𑀢𑁆𑀢𑀧𑀭𑀺𑀬𑀸𑀧𑀦𑁆𑀦𑀫𑀢𑁆𑀢𑀫𑁆𑀧𑀻𑀢𑀺 𑀧𑀘𑁆𑀙𑀺𑀫𑀓𑁄𑀝𑀺𑀬𑀸 𑀧𑀢𑁆𑀢𑀧𑀭𑀺𑀬𑀸𑀧𑀦𑁆𑀦𑀁 𑀧𑀢𑁆𑀢𑀲𑁆𑀲 𑀅𑀦𑁆𑀢𑁄𑀕𑀢𑀁 𑀤𑁆𑀯𑀢𑁆𑀢𑀺𑀓𑀝𑀘𑁆𑀙𑀼𑀪𑀺𑀓𑁆𑀔𑀸𑀫𑀢𑁆𑀢𑀫𑁆𑀧𑀺. 𑀅𑀧𑁆𑀧𑀝𑀺𑀯𑀺𑀪𑀢𑁆𑀢𑀪𑁄𑀕𑀻𑀢𑀺 𑀏𑀢𑁆𑀣 𑀤𑁆𑀯𑁂 𑀧𑀝𑀺𑀯𑀺𑀪𑀢𑁆𑀢𑀸𑀦𑀺 𑀦𑀸𑀫 𑀆𑀫𑀺𑀲𑀧𑀝𑀺𑀯𑀺𑀪𑀢𑁆𑀢𑀁 𑀧𑀦 𑀧𑀼𑀕𑁆𑀕𑀮𑀧𑀝𑀺𑀯𑀺𑀪𑀢𑁆𑀢𑀜𑁆𑀘. 𑀢𑀢𑁆𑀣 ‘‘𑀏𑀢𑁆𑀢𑀓𑀁 𑀤𑀲𑁆𑀲𑀸𑀫𑀺, 𑀏𑀢𑁆𑀢𑀓𑀁 𑀦 𑀤𑀲𑁆𑀲𑀸𑀫𑀻’’𑀢𑀺 𑀏𑀯𑀁 𑀘𑀺𑀢𑁆𑀢𑁂𑀦 𑀧𑀝𑀺𑀯𑀺𑀪𑀚𑀦𑀁 𑀆𑀫𑀺𑀲𑀧𑀝𑀺𑀯𑀺𑀪𑀢𑁆𑀢𑀁 𑀦𑀸𑀫. ‘‘𑀅𑀲𑀼𑀓𑀲𑁆𑀲 𑀤𑀲𑁆𑀲𑀸𑀫𑀺, 𑀅𑀲𑀼𑀓𑀲𑁆𑀲 𑀦 𑀤𑀲𑁆𑀲𑀸𑀫𑀻’’𑀢𑀺 𑀏𑀯𑀁 𑀘𑀺𑀢𑁆𑀢𑁂𑀦 𑀯𑀺𑀪𑀚𑀦𑀁 𑀧𑀦 𑀧𑀼𑀕𑁆𑀕𑀮𑀧𑀝𑀺𑀯𑀺𑀪𑀢𑁆𑀢𑀁 𑀦𑀸𑀫. 𑀢𑀤𑀼𑀪𑀬𑀫𑁆𑀧𑀺 𑀅𑀓𑀢𑁆𑀯𑀸 𑀬𑁄 𑀅𑀧𑁆𑀧𑀝𑀺𑀯𑀺𑀪𑀢𑁆𑀢𑀁 𑀪𑀼𑀜𑁆𑀚𑀢𑀺, 𑀅𑀬𑀁 𑀅𑀧𑁆𑀧𑀝𑀺𑀯𑀺𑀪𑀢𑁆𑀢𑀪𑁄𑀕𑀻 𑀦𑀸𑀫. 𑀲𑀻𑀮𑀯𑀦𑁆𑀢𑁂𑀳𑀺 𑀲𑀩𑁆𑀭𑀳𑁆𑀫𑀘𑀸𑀭𑀻𑀳𑀺 𑀲𑀸𑀥𑀸𑀭𑀡𑀪𑁄𑀕𑀻𑀢𑀺 𑀏𑀢𑁆𑀣 𑀲𑀸𑀥𑀸𑀭𑀡𑀪𑁄𑀕𑀺𑀦𑁄 𑀇𑀤𑀁 𑀮𑀓𑁆𑀔𑀡𑀁 𑁋 𑀬𑀁 𑀬𑀁 𑀧𑀡𑀻𑀢𑀁 𑀮𑀪𑀢𑀺, 𑀢𑀁 𑀢𑀁 𑀦𑁂𑀯 𑀮𑀸𑀪𑁂𑀦𑀮𑀸𑀪𑀁-𑀦𑀺𑀚𑀺𑀕𑀻𑀲𑀦𑀢𑀸𑀫𑀼𑀔𑁂𑀦 𑀕𑀺𑀳𑀻𑀦𑀁 𑀤𑁂𑀢𑀺, 𑀦 𑀅𑀢𑁆𑀢𑀦𑀸 𑀧𑀭𑀺𑀪𑀼𑀜𑁆𑀚𑀢𑀺, 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑁄 𑀘 ‘‘𑀲𑀗𑁆𑀖𑁂𑀦 𑀲𑀸𑀥𑀸𑀭𑀡𑀁 𑀳𑁄𑀢𑀽’’𑀢𑀺 𑀕𑀳𑁂𑀢𑁆𑀯𑀸 𑀖𑀡𑁆𑀝𑀺𑀁 𑀧𑀳𑀭𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀁 𑀲𑀗𑁆𑀖𑀲𑀦𑁆𑀢𑀓𑀁 𑀯𑀺𑀬 𑀧𑀲𑁆𑀲𑀢𑀺.

𑀇𑀫𑀁 𑀧𑀦 𑀲𑀸𑀭𑀡𑀻𑀬𑀥𑀫𑁆𑀫𑀁 𑀓𑁄 𑀧𑀽𑀭𑁂𑀢𑀺, 𑀓𑁄 𑀦 𑀧𑀽𑀭𑁂𑀢𑀺? 𑀤𑀼𑀲𑁆𑀲𑀻𑀮𑁄 𑀢𑀸𑀯 𑀦 𑀧𑀽𑀭𑁂𑀢𑀺. 𑀦 𑀳𑀺 𑀢𑀲𑁆𑀲 𑀲𑀦𑁆𑀢𑀓𑀁 𑀲𑀻𑀮𑀯𑀦𑁆𑀢𑀸 𑀕𑀡𑁆𑀳𑀦𑁆𑀢𑀺. 𑀧𑀭𑀺𑀲𑀼𑀤𑁆𑀥𑀲𑀻𑀮𑁄 𑀧𑀦 𑀯𑀢𑁆𑀢𑀁 𑀅𑀔𑀡𑁆𑀟𑁂𑀦𑁆𑀢𑁄 𑀧𑀽𑀭𑁂𑀢𑀺. 𑀢𑀢𑁆𑀭𑀺𑀤𑀁 𑀯𑀢𑁆𑀢𑀁 𑁋 𑀬𑁄 𑀳𑀺 𑀑𑀤𑀺𑀲𑁆𑀲𑀓𑀁 𑀓𑀢𑁆𑀯𑀸 𑀫𑀸𑀢𑀼 𑀯𑀸 𑀧𑀺𑀢𑀼 𑀯𑀸 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸𑀤𑀻𑀦𑀁 𑀯𑀸 𑀤𑁂𑀢𑀺, 𑀲𑁄 𑀤𑀸𑀢𑀩𑁆𑀩𑀁 𑀤𑁂𑀢𑀺. 𑀲𑀸𑀭𑀡𑀻𑀬𑀥𑀫𑁆𑀫𑁄 𑀧𑀦𑀲𑁆𑀲 𑀦 𑀳𑁄𑀢𑀺, 𑀧𑀮𑀺𑀩𑁄𑀥𑀚𑀕𑁆𑀕𑀦𑀁 𑀦𑀸𑀫 𑀳𑁄𑀢𑀺. 𑀲𑀸𑀭𑀡𑀻𑀬𑀥𑀫𑁆𑀫𑁄 𑀳𑀺 𑀫𑀼𑀢𑁆𑀢𑀧𑀮𑀺𑀩𑁄𑀥𑀲𑁆𑀲 𑀯𑀝𑁆𑀝𑀢𑀺. 𑀢𑁂𑀦 𑀧𑀦 𑀑𑀤𑀺𑀲𑁆𑀲𑀓𑀁 𑀤𑁂𑀦𑁆𑀢𑁂𑀦 𑀕𑀺𑀮𑀸𑀦𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑀆𑀕𑀦𑁆𑀢𑀼𑀓𑀕𑀫𑀺𑀓𑀸𑀦𑀜𑁆𑀘𑁂𑀯 𑀦𑀯𑀧𑀩𑁆𑀩𑀚𑀺𑀢𑀲𑁆𑀲 𑀘 𑀲𑀗𑁆𑀖𑀸𑀝𑀺𑀧𑀢𑁆𑀢𑀕𑁆𑀕𑀳𑀡𑀁 𑀅𑀚𑀸𑀦𑀦𑁆𑀢𑀲𑁆𑀲 𑀤𑀸𑀢𑀩𑁆𑀩𑀁. 𑀏𑀢𑁂𑀲𑀁 𑀤𑀢𑁆𑀯𑀸 𑀅𑀯𑀲𑁂𑀲𑀁 𑀣𑁂𑀭𑀸𑀲𑀦𑀢𑁄 𑀧𑀝𑁆𑀞𑀸𑀬 𑀣𑁄𑀓𑀁 𑀣𑁄𑀓𑀁 𑀅𑀤𑀢𑁆𑀯𑀸 𑀬𑁄 𑀬𑀢𑁆𑀢𑀓𑀁 𑀕𑀡𑁆𑀳𑀸𑀢𑀺, 𑀢𑀲𑁆𑀲 𑀢𑀢𑁆𑀢𑀓𑀁 𑀤𑀸𑀢𑀩𑁆𑀩𑀁. 𑀅𑀯𑀲𑀺𑀝𑁆𑀞𑁂 𑀅𑀲𑀢𑀺 𑀧𑀼𑀦 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀣𑁂𑀭𑀸𑀲𑀦𑀢𑁄 𑀧𑀝𑁆𑀞𑀸𑀬 𑀬𑀁 𑀬𑀁 𑀧𑀡𑀻𑀢𑀁, 𑀢𑀁 𑀢𑀁 𑀤𑀢𑁆𑀯𑀸 𑀲𑁂𑀲𑀁 𑀪𑀼𑀜𑁆𑀚𑀺𑀢𑀩𑁆𑀩𑀁. ‘‘𑀲𑀻𑀮𑀯𑀦𑁆𑀢𑁂𑀳𑀻’’𑀢𑀺 𑀯𑀘𑀦𑀢𑁄 𑀤𑀼𑀲𑁆𑀲𑀻𑀮𑀲𑁆𑀲 𑀅𑀤𑀸𑀢𑀼𑀫𑁆𑀧𑀺 𑀯𑀝𑁆𑀝𑀢𑀺.

𑀅𑀬𑀁 𑀧𑀦 𑀲𑀸𑀭𑀡𑀻𑀬𑀥𑀫𑁆𑀫𑁄 𑀲𑀼𑀲𑀺𑀓𑁆𑀔𑀺𑀢𑀸𑀬 𑀧𑀭𑀺𑀲𑀸𑀬 𑀲𑀼𑀧𑀽𑀭𑁄 𑀳𑁄𑀢𑀺, 𑀲𑀼𑀲𑀺𑀓𑁆𑀔𑀺𑀢𑀸𑀬 𑀳𑀺 𑀧𑀭𑀺𑀲𑀸𑀬 𑀬𑁄 𑀅𑀜𑁆𑀜𑀢𑁄 𑀮𑀪𑀢𑀺, 𑀲𑁄 𑀦 𑀕𑀡𑁆𑀳𑀸𑀢𑀺. 𑀅𑀜𑁆𑀜𑀢𑁄 𑀅𑀮𑀪𑀦𑁆𑀢𑁄𑀧𑀺 𑀧𑀫𑀸𑀡𑀬𑀼𑀢𑁆𑀢𑀫𑁂𑀯 𑀕𑀡𑁆𑀳𑀢𑀺, 𑀦 𑀅𑀢𑀺𑀭𑁂𑀓𑀁. 𑀅𑀬𑀁 𑀧𑀦 𑀲𑀸𑀭𑀡𑀻𑀬𑀥𑀫𑁆𑀫𑁄 𑀏𑀯𑀁 𑀧𑀼𑀦𑀧𑁆𑀧𑀼𑀦𑀁 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀮𑀤𑁆𑀥𑀁 𑀮𑀤𑁆𑀥𑀁 𑀤𑁂𑀦𑁆𑀢𑀲𑁆𑀲𑀸𑀧𑀺 𑀤𑁆𑀯𑀸𑀤𑀲𑀳𑀺 𑀯𑀲𑁆𑀲𑁂𑀳𑀺 𑀧𑀽𑀭𑁂𑀢𑀺, 𑀦 𑀢𑀢𑁄 𑀑𑀭𑀁. 𑀲𑀘𑁂 𑀳𑀺 𑀤𑁆𑀯𑀸𑀤𑀲𑀫𑁂 𑀯𑀲𑁆𑀲𑁂 𑀲𑀸𑀭𑀡𑀻𑀬𑀥𑀫𑁆𑀫𑀧𑀽𑀭𑀓𑁄 𑀧𑀺𑀡𑁆𑀟𑀧𑀸𑀢𑀧𑀽𑀭𑀁 𑀧𑀢𑁆𑀢𑀁 𑀆𑀲𑀦𑀲𑀸𑀮𑀸𑀬𑀁 𑀞𑀧𑁂𑀢𑁆𑀯𑀸 𑀦𑁆𑀳𑀸𑀬𑀺𑀢𑀼𑀁 𑀕𑀘𑁆𑀙𑀢𑀺, 𑀲𑀗𑁆𑀖𑀢𑁆𑀣𑁂𑀭𑁄 𑀘 ‘‘𑀓𑀲𑁆𑀲𑁂𑀲𑁄 𑀧𑀢𑁆𑀢𑁄’’𑀢𑀺 𑀯𑀢𑁆𑀯𑀸 ‘‘𑀲𑀸𑀭𑀡𑀻𑀬𑀥𑀫𑁆𑀫𑀧𑀽𑀭𑀓𑀲𑁆𑀲𑀸’’𑀢𑀺 𑀯𑀼𑀢𑁆𑀢𑁂 ‘‘𑀆𑀳𑀭𑀣 𑀦’’𑀦𑁆𑀢𑀺 𑀲𑀩𑁆𑀩𑀁 𑀧𑀺𑀡𑁆𑀟𑀧𑀸𑀢𑀁 𑀯𑀺𑀘𑀸𑀭𑁂𑀢𑁆𑀯𑀸𑀯 𑀪𑀼𑀜𑁆𑀚𑀺𑀢𑁆𑀯𑀸 𑀭𑀺𑀢𑁆𑀢𑀧𑀢𑁆𑀢𑀁 𑀞𑀧𑁂𑀢𑀺. 𑀅𑀣 𑀔𑁄 𑀲𑁄 𑀪𑀺𑀓𑁆𑀔𑀼 𑀭𑀺𑀢𑁆𑀢𑀧𑀢𑁆𑀢𑀁 𑀤𑀺𑀲𑁆𑀯𑀸 ‘‘𑀫𑀬𑁆𑀳𑀁 𑀅𑀲𑁂𑀲𑁂𑀢𑁆𑀯𑀸𑀯 𑀧𑀭𑀺𑀪𑀼𑀜𑁆𑀚𑀺𑀁𑀲𑀽’’𑀢𑀺 𑀤𑁄𑀫𑀦𑀲𑁆𑀲𑀁 𑀉𑀧𑁆𑀧𑀸𑀤𑁂𑀢𑀺, 𑀲𑀸𑀭𑀡𑀻𑀬𑀥𑀫𑁆𑀫𑁄 𑀪𑀺𑀚𑁆𑀚𑀢𑀺, 𑀧𑀼𑀦 𑀤𑁆𑀯𑀸𑀤𑀲 𑀯𑀲𑁆𑀲𑀸𑀦𑀺 𑀧𑀽𑀭𑁂𑀢𑀩𑁆𑀩𑁄 𑀳𑁄𑀢𑀺. 𑀢𑀺𑀢𑁆𑀣𑀺𑀬𑀧𑀭𑀺𑀯𑀸𑀲𑀲𑀤𑀺𑀲𑁄 𑀳𑁂𑀲, 𑀲𑀓𑀺𑀁 𑀔𑀡𑁆𑀟𑁂 𑀚𑀸𑀢𑁂 𑀧𑀼𑀦 𑀧𑀽𑀭𑁂𑀢𑀩𑁆𑀩𑁄𑀯. 𑀬𑁄 𑀧𑀦 ‘‘𑀮𑀸𑀪𑀸 𑀯𑀢 𑀫𑁂, 𑀲𑀼𑀮𑀤𑁆𑀥𑀁 𑀯𑀢 𑀫𑁂, 𑀬𑀲𑁆𑀲 𑀫𑁂 𑀧𑀢𑁆𑀢𑀕𑀢𑀁 𑀅𑀦𑀸𑀧𑀼𑀘𑁆𑀙𑀸𑀯 𑀲𑀩𑁆𑀭𑀳𑁆𑀫𑀘𑀸𑀭𑀻 𑀧𑀭𑀺𑀪𑀼𑀜𑁆𑀚𑀦𑁆𑀢𑀻’’𑀢𑀺 𑀲𑁄𑀫𑀦𑀲𑁆𑀲𑀁 𑀚𑀦𑁂𑀢𑀺, 𑀢𑀲𑁆𑀲 𑀧𑀼𑀡𑁆𑀡𑁄 𑀦𑀸𑀫 𑀳𑁄𑀢𑀺.

𑀏𑀯𑀁 𑀧𑀽𑀭𑀺𑀢𑀲𑀸𑀭𑀡𑀻𑀬𑀥𑀫𑁆𑀫𑀲𑁆𑀲 𑀧𑀦 𑀦𑁂𑀯 𑀇𑀲𑁆𑀲𑀸 𑀦 𑀫𑀘𑁆𑀙𑀭𑀺𑀬𑀁 𑀳𑁄𑀢𑀺, 𑀫𑀦𑀼𑀲𑁆𑀲𑀸𑀦𑀁 𑀧𑀺𑀬𑁄 𑀳𑁄𑀢𑀺, 𑀅𑀫𑀦𑀼𑀲𑁆𑀲𑀸𑀦𑀁 𑀧𑀺𑀬𑁄 𑀳𑁄𑀢𑀺, 𑀲𑀼𑀮𑀪𑀧𑀘𑁆𑀘𑀬𑁄. 𑀧𑀢𑁆𑀢𑀕𑀢𑀫𑀲𑁆𑀲 𑀤𑀺𑀬𑁆𑀬𑀫𑀸𑀦𑀫𑁆𑀧𑀺 𑀦 𑀔𑀻𑀬𑀢𑀺, 𑀪𑀸𑀚𑀦𑀻𑀬𑀪𑀡𑁆𑀟𑀝𑁆𑀞𑀸𑀦𑁂 𑀅𑀕𑁆𑀕𑀪𑀡𑁆𑀟𑀁 𑀮𑀪𑀢𑀺, 𑀪𑀬𑁂 𑀯𑀸 𑀙𑀸𑀢𑀓𑁂 𑀯𑀸 𑀧𑀢𑁆𑀢𑁂 𑀤𑁂𑀯𑀢𑀸 𑀉𑀲𑁆𑀲𑀼𑀓𑁆𑀓𑀁 𑀆𑀧𑀚𑁆𑀚𑀦𑁆𑀢𑀺.

𑀢𑀢𑁆𑀭𑀺𑀫𑀸𑀦𑀺 𑀯𑀢𑁆𑀣𑀽𑀦𑀺 𑁋 𑀲𑁂𑀦𑀕𑀺𑀭𑀺𑀯𑀸𑀲𑀻 𑀢𑀺𑀲𑁆𑀲𑀢𑁆𑀣𑁂𑀭𑁄 𑀓𑀺𑀭 𑀫𑀳𑀸𑀕𑀺𑀭𑀺𑀕𑀸𑀫𑀁 𑀉𑀧𑀦𑀺𑀲𑁆𑀲𑀸𑀬 𑀯𑀲𑀢𑀺, 𑀧𑀜𑁆𑀜𑀸𑀲 𑀫𑀳𑀸𑀣𑁂𑀭𑀸 𑀦𑀸𑀕𑀤𑀻𑀧𑀁 𑀘𑁂𑀢𑀺𑀬𑀯𑀦𑁆𑀤𑀦𑀢𑁆𑀣𑀸𑀬 𑀕𑀘𑁆𑀙𑀦𑁆𑀢𑀸 𑀕𑀺𑀭𑀺𑀕𑀸𑀫𑁂 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀓𑀺𑀜𑁆𑀘𑀺 𑀅𑀮𑀤𑁆𑀥𑀸 𑀦𑀺𑀓𑁆𑀔𑀫𑀺𑀁𑀲𑀼. 𑀣𑁂𑀭𑁄 𑀧𑀯𑀺𑀲𑀦𑁆𑀢𑁄 𑀢𑁂 𑀤𑀺𑀲𑁆𑀯𑀸 𑀧𑀼𑀘𑁆𑀙𑀺 𑁋 ‘‘𑀮𑀤𑁆𑀥𑀁, 𑀪𑀦𑁆𑀢𑁂’’𑀢𑀺? 𑀯𑀺𑀘𑀭𑀺𑀫𑁆𑀳𑀸, 𑀆𑀯𑀼𑀲𑁄𑀢𑀺. 𑀲𑁄 𑀅𑀮𑀤𑁆𑀥𑀪𑀸𑀯𑀁 𑀜𑀢𑁆𑀯𑀸 𑀆𑀳 𑁋 ‘‘𑀪𑀦𑁆𑀢𑁂, 𑀬𑀸𑀯𑀸𑀳𑀁 𑀆𑀕𑀘𑁆𑀙𑀸𑀫𑀺, 𑀢𑀸𑀯 𑀇𑀥𑁂𑀯 𑀳𑁄𑀣𑀸’’𑀢𑀺. 𑀫𑀬𑀁, 𑀆𑀯𑀼𑀲𑁄, 𑀧𑀜𑁆𑀜𑀸𑀲 𑀚𑀦𑀸 𑀧𑀢𑁆𑀢𑀢𑁂𑀫𑀦𑀫𑀢𑁆𑀢𑀫𑁆𑀧𑀺 𑀦 𑀮𑀪𑀺𑀫𑁆𑀳𑀸𑀢𑀺. 𑀪𑀦𑁆𑀢𑁂, 𑀦𑁂𑀯𑀸𑀲𑀺𑀓𑀸 𑀦𑀸𑀫 𑀧𑀝𑀺𑀩𑀮𑀸 𑀳𑁄𑀦𑁆𑀢𑀺, 𑀅𑀮𑀪𑀦𑁆𑀢𑀸𑀧𑀺 𑀪𑀺𑀓𑁆𑀔𑀸𑀘𑀸𑀭𑀫𑀕𑁆𑀕𑀲𑀪𑀸𑀕𑀁 𑀚𑀸𑀦𑀦𑁆𑀢𑀻𑀢𑀺. 𑀣𑁂𑀭𑀸 𑀆𑀕𑀫𑁂𑀲𑀼𑀁. 𑀣𑁂𑀭𑁄 𑀕𑀸𑀫𑀁 𑀧𑀸𑀯𑀺𑀲𑀺. 𑀥𑀼𑀭𑀕𑁂𑀳𑁂𑀬𑁂𑀯 𑀫𑀳𑀸𑀉𑀧𑀸𑀲𑀺𑀓𑀸 𑀔𑀻𑀭𑀪𑀢𑁆𑀢𑀁 𑀲𑀚𑁆𑀚𑁂𑀢𑁆𑀯𑀸 𑀣𑁂𑀭𑀁 𑀑𑀮𑁄𑀓𑀬𑀫𑀸𑀦𑀸 𑀞𑀺𑀢𑀸 𑀣𑁂𑀭𑀲𑁆𑀲 𑀤𑁆𑀯𑀸𑀭𑀁 𑀲𑀫𑁆𑀧𑀢𑁆𑀢𑀲𑁆𑀲𑁂𑀯 𑀧𑀢𑁆𑀢𑀁 𑀧𑀽𑀭𑁂𑀢𑁆𑀯𑀸 𑀅𑀤𑀸𑀲𑀺. 𑀲𑁄 𑀢𑀁 𑀆𑀤𑀸𑀬 𑀣𑁂𑀭𑀸𑀦𑀁 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀕𑀡𑁆𑀳𑀣, 𑀪𑀦𑁆𑀢𑁂’’𑀢𑀺 𑀲𑀗𑁆𑀖𑀢𑁆𑀣𑁂𑀭𑀁 𑀆𑀳. 𑀣𑁂𑀭𑁄 ‘‘𑀅𑀫𑁆𑀳𑁂𑀳𑀺 𑀏𑀢𑁆𑀢𑀓𑁂𑀳𑀺 𑀓𑀺𑀜𑁆𑀘𑀺 𑀦 𑀮𑀤𑁆𑀥𑀁, 𑀅𑀬𑀁 𑀲𑀻𑀖𑀫𑁂𑀯 𑀕𑀳𑁂𑀢𑁆𑀯𑀸 𑀆𑀕𑀢𑁄, 𑀓𑀺𑀁 𑀦𑀼 𑀔𑁄’’𑀢𑀺 𑀲𑁂𑀲𑀸𑀦𑀁 𑀫𑀼𑀔𑀁 𑀑𑀮𑁄𑀓𑁂𑀲𑀺. 𑀣𑁂𑀭𑁄 𑀑𑀮𑁄𑀓𑀦𑀸𑀓𑀸𑀭𑁂𑀦𑁂𑀯 𑀜𑀢𑁆𑀯𑀸, ‘‘𑀪𑀦𑁆𑀢𑁂, 𑀥𑀫𑁆𑀫𑁂𑀦 𑀲𑀫𑁂𑀦 𑀮𑀤𑁆𑀥𑁄, 𑀦𑀺𑀓𑁆𑀓𑀼𑀓𑁆𑀓𑀼𑀘𑁆𑀘𑀸 𑀕𑀡𑁆𑀳𑀣𑀸’’𑀢𑀺 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀲𑀩𑁆𑀩𑁂𑀲𑀁 𑀬𑀸𑀯𑀤𑀢𑁆𑀣𑀁 𑀤𑀢𑁆𑀯𑀸 𑀅𑀢𑁆𑀢𑀦𑀸𑀧𑀺 𑀬𑀸𑀯𑀤𑀢𑁆𑀣𑀁 𑀪𑀼𑀜𑁆𑀚𑀺.

𑀅𑀣 𑀦𑀁 𑀪𑀢𑁆𑀢𑀓𑀺𑀘𑁆𑀘𑀸𑀯𑀲𑀸𑀦𑁂 𑀣𑁂𑀭𑀸 𑀧𑀼𑀘𑁆𑀙𑀺𑀁𑀲𑀼 𑁋 ‘‘𑀓𑀤𑀸, 𑀆𑀯𑀼𑀲𑁄, 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀁 𑀧𑀝𑀺𑀯𑀺𑀚𑁆𑀛𑀻’’𑀢𑀺? 𑀦𑀢𑁆𑀣𑀺 𑀫𑁂, 𑀪𑀦𑁆𑀢𑁂, 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁄𑀢𑀺. 𑀛𑀸𑀦𑀮𑀸𑀪𑀻𑀲𑀺, 𑀆𑀯𑀼𑀲𑁄𑀢𑀺. 𑀏𑀢𑀫𑁆𑀧𑀺, 𑀪𑀦𑁆𑀢𑁂, 𑀦𑀢𑁆𑀣𑀻𑀢𑀺? 𑀦𑀦𑀼, 𑀆𑀯𑀼𑀲𑁄, 𑀧𑀸𑀝𑀺𑀳𑀸𑀭𑀺𑀬𑀦𑁆𑀢𑀺. 𑀲𑀸𑀭𑀡𑀻𑀬𑀥𑀫𑁆𑀫𑁄 𑀫𑁂, 𑀪𑀦𑁆𑀢𑁂, 𑀧𑀽𑀭𑀺𑀢𑁄, 𑀢𑀲𑁆𑀲 𑀫𑁂 𑀧𑀽𑀭𑀺𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀲𑀘𑁂𑀧𑀺 𑀪𑀺𑀓𑁆𑀔𑀼𑀲𑀢𑀲𑀳𑀲𑁆𑀲𑀁 𑀳𑁄𑀢𑀺, 𑀧𑀢𑁆𑀢𑀕𑀢𑀁 𑀦 𑀔𑀻𑀬𑀢𑀻𑀢𑀺. 𑀲𑀸𑀥𑀼 𑀲𑀸𑀥𑀼, 𑀲𑀧𑁆𑀧𑀼𑀭𑀺𑀲, 𑀅𑀦𑀼𑀘𑁆𑀙𑀯𑀺𑀓𑀫𑀺𑀤𑀁 𑀢𑀼𑀬𑁆𑀳𑀦𑁆𑀢𑀺. 𑀇𑀤𑀁 𑀢𑀸𑀯 𑀧𑀢𑁆𑀢𑀕𑀢𑀁 𑀦 𑀔𑀻𑀬𑀢𑀻𑀢𑀺 𑀏𑀢𑁆𑀣 𑀯𑀢𑁆𑀣𑀼.

𑀅𑀬𑀫𑁂𑀯 𑀧𑀦 𑀣𑁂𑀭𑁄 𑀘𑁂𑀢𑀺𑀬𑀧𑀩𑁆𑀩𑀢𑁂 𑀕𑀺𑀭𑀺𑀪𑀡𑁆𑀟𑀫𑀳𑀸𑀧𑀽𑀚𑀸𑀬 𑀤𑀸𑀦𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 ‘‘𑀇𑀫𑀲𑁆𑀫𑀺𑀁 𑀤𑀸𑀦𑁂 𑀓𑀺𑀁 𑀯𑀭𑀪𑀡𑁆𑀟’’𑀦𑁆𑀢𑀺 𑀧𑀼𑀘𑁆𑀙𑀺. 𑀤𑁆𑀯𑁂 𑀲𑀸𑀝𑀓𑀸, 𑀪𑀦𑁆𑀢𑁂𑀢𑀺. 𑀏𑀢𑁂 𑀫𑀬𑁆𑀳𑀁 𑀧𑀸𑀧𑀼𑀡𑀺𑀲𑁆𑀲𑀦𑁆𑀢𑀻𑀢𑀺? 𑀢𑀁 𑀲𑀼𑀢𑁆𑀯𑀸 𑀅𑀫𑀘𑁆𑀘𑁄 𑀭𑀜𑁆𑀜𑁄 𑀆𑀭𑁄𑀘𑁂𑀲𑀺 𑁋 ‘‘𑀏𑀓𑁄 𑀤𑀳𑀭𑁄 𑀏𑀯𑀁 𑀯𑀤𑀢𑀻’’𑀢𑀺. ‘‘𑀤𑀳𑀭𑀲𑁆𑀲 𑀏𑀯𑀁 𑀘𑀺𑀢𑁆𑀢𑀁, 𑀫𑀳𑀸𑀣𑁂𑀭𑀸𑀦𑀁 𑀧𑀦 𑀲𑀼𑀔𑀼𑀫𑀲𑀸𑀝𑀓𑀸 𑀯𑀝𑁆𑀝𑀦𑁆𑀢𑀻’’𑀢𑀺 𑀯𑀢𑁆𑀯𑀸 ‘‘𑀫𑀳𑀸𑀣𑁂𑀭𑀸𑀦𑀁 𑀤𑀲𑁆𑀲𑀸𑀫𑀻’’𑀢𑀺 𑀞𑀧𑁂𑀲𑀺. 𑀢𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑁂 𑀧𑀝𑀺𑀧𑀸𑀝𑀺𑀬𑀸 𑀞𑀺𑀢𑁂 𑀤𑁂𑀦𑁆𑀢𑀲𑁆𑀲 𑀫𑀢𑁆𑀣𑀓𑁂 𑀞𑀧𑀺𑀢𑀸𑀧𑀺 𑀢𑁂 𑀲𑀸𑀝𑀓𑀸 𑀳𑀢𑁆𑀣𑀁 𑀦𑀸𑀭𑁄𑀳𑀦𑁆𑀢𑀺, 𑀅𑀜𑁆𑀜𑁂𑀯 𑀆𑀭𑁄𑀳𑀦𑁆𑀢𑀺. 𑀤𑀳𑀭𑀲𑁆𑀲 𑀤𑀸𑀦𑀓𑀸𑀮𑁂 𑀧𑀦 𑀳𑀢𑁆𑀣𑀁 𑀆𑀭𑀼𑀴𑁆𑀳𑀸. 𑀲𑁄 𑀢𑀲𑁆𑀲 𑀳𑀢𑁆𑀣𑁂 𑀞𑀧𑁂𑀢𑁆𑀯𑀸 𑀅𑀫𑀘𑁆𑀘𑀲𑁆𑀲 𑀫𑀼𑀔𑀁 𑀑𑀮𑁄𑀓𑁂𑀢𑁆𑀯𑀸 𑀤𑀳𑀭𑀁 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀤𑀸𑀦𑀁 𑀤𑀢𑁆𑀯𑀸 𑀲𑀗𑁆𑀖𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀤𑀳𑀭𑀲𑁆𑀲 𑀲𑀦𑁆𑀢𑀺𑀓𑁂 𑀦𑀺𑀲𑀻𑀤𑀺𑀢𑁆𑀯𑀸 ‘‘𑀓𑀤𑀸, 𑀪𑀦𑁆𑀢𑁂, 𑀇𑀫𑀁 𑀥𑀫𑁆𑀫𑀁 𑀧𑀝𑀺𑀯𑀺𑀚𑁆𑀛𑀺𑀢𑁆𑀣𑀸’’𑀢𑀺 𑀆𑀳. 𑀲𑁄 𑀧𑀭𑀺𑀬𑀸𑀬𑁂𑀦𑀧𑀺 𑀅𑀲𑀦𑁆𑀢𑀁 𑀅𑀯𑀤𑀦𑁆𑀢𑁄 ‘‘𑀦𑀢𑁆𑀣𑀺 𑀫𑀬𑁆𑀳𑀁, 𑀫𑀳𑀸𑀭𑀸𑀚, 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁄’’𑀢𑀺 𑀆𑀳. 𑀦𑀦𑀼, 𑀪𑀦𑁆𑀢𑁂, 𑀧𑀼𑀩𑁆𑀩𑁂𑀯 𑀅𑀯𑀘𑀼𑀢𑁆𑀣𑀸𑀢𑀺. 𑀆𑀫, 𑀫𑀳𑀸𑀭𑀸𑀚, 𑀲𑀸𑀭𑀡𑀻𑀬𑀥𑀫𑁆𑀫𑀧𑀽𑀭𑀓𑁄 𑀅𑀳𑀁, 𑀢𑀲𑁆𑀲 𑀫𑁂 𑀥𑀫𑁆𑀫𑀲𑁆𑀲 𑀧𑀽𑀭𑀺𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀪𑀸𑀚𑀦𑀻𑀬𑀪𑀡𑁆𑀟𑀝𑁆𑀞𑀸𑀦𑁂 𑀅𑀕𑁆𑀕𑀪𑀡𑁆𑀟𑀁 𑀧𑀸𑀧𑀼𑀡𑀸𑀢𑀻𑀢𑀺. ‘‘𑀲𑀸𑀥𑀼 𑀲𑀸𑀥𑀼, 𑀪𑀦𑁆𑀢𑁂, 𑀅𑀦𑀼𑀘𑁆𑀙𑀯𑀺𑀓𑀫𑀺𑀤𑀁 𑀢𑀼𑀫𑁆𑀳𑀸𑀓’’𑀦𑁆𑀢𑀺 𑀯𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀇𑀤𑀁 𑀪𑀸𑀚𑀦𑀻𑀬𑀪𑀡𑁆𑀟𑀝𑁆𑀞𑀸𑀦𑁂 𑀅𑀕𑁆𑀕𑀪𑀡𑁆𑀟𑀁 𑀧𑀸𑀧𑀼𑀡𑀸𑀢𑀻𑀢𑀺 𑀏𑀢𑁆𑀣 𑀯𑀢𑁆𑀣𑀼.

𑀩𑁆𑀭𑀸𑀳𑁆𑀫𑀡𑀢𑀺𑀲𑁆𑀲𑀪𑀬𑁂 𑀧𑀦 𑀪𑀸𑀢𑀭𑀕𑀸𑀫𑀯𑀸𑀲𑀺𑀦𑁄 𑀦𑀸𑀕𑀢𑁆𑀣𑁂𑀭𑀺𑀬𑀸 𑀅𑀦𑀸𑀭𑁄𑀘𑁂𑀢𑁆𑀯𑀸𑀯 𑀧𑀮𑀸𑀬𑀺𑀁𑀲𑀼. 𑀣𑁂𑀭𑀻 𑀧𑀘𑁆𑀘𑀽𑀲𑀲𑀫𑀬𑁂 ‘‘𑀅𑀢𑀺𑀯𑀺𑀬 𑀅𑀧𑁆𑀧𑀦𑀺𑀕𑁆𑀖𑁄𑀲𑁄 𑀕𑀸𑀫𑁄, 𑀉𑀧𑀥𑀸𑀭𑁂𑀣 𑀢𑀸𑀯𑀸’’𑀢𑀺 𑀤𑀳𑀭𑀪𑀺𑀓𑁆𑀔𑀼𑀦𑀺𑀬𑁄 𑀆𑀳. 𑀢𑀸 𑀕𑀦𑁆𑀢𑁆𑀯𑀸 𑀲𑀩𑁆𑀩𑁂𑀲𑀁 𑀕𑀢𑀪𑀸𑀯𑀁 𑀜𑀢𑁆𑀯𑀸 𑀆𑀕𑀫𑁆𑀫 𑀣𑁂𑀭𑀺𑀬𑀸 𑀆𑀭𑁄𑀘𑁂𑀲𑀼𑀁. 𑀲𑀸 𑀲𑀼𑀢𑁆𑀯𑀸 ‘‘𑀫𑀸 𑀢𑀼𑀫𑁆𑀳𑁂 𑀢𑁂𑀲𑀁 𑀕𑀢𑀪𑀸𑀯𑀁 𑀘𑀺𑀦𑁆𑀢𑀬𑀺𑀢𑁆𑀣, 𑀅𑀢𑁆𑀢𑀦𑁄 𑀉𑀤𑁆𑀤𑁂𑀲𑀧𑀭𑀺𑀧𑀼𑀘𑁆𑀙𑀸𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁂𑀲𑀼𑀬𑁂𑀯 𑀬𑁄𑀕𑀁 𑀓𑀭𑁄𑀣𑀸’’𑀢𑀺 𑀯𑀢𑁆𑀯𑀸 𑀪𑀺𑀓𑁆𑀔𑀸𑀘𑀸𑀭𑀯𑁂𑀮𑀸𑀬𑀁 𑀧𑀸𑀭𑀼𑀧𑀺𑀢𑁆𑀯𑀸 𑀅𑀢𑁆𑀢𑀤𑁆𑀯𑀸𑀤𑀲𑀫𑀸 𑀕𑀸𑀫𑀤𑁆𑀯𑀸𑀭𑁂 𑀦𑀺𑀕𑁆𑀭𑁄𑀥𑀭𑀼𑀓𑁆𑀔𑀫𑀽𑀮𑁂 𑀅𑀝𑁆𑀞𑀸𑀲𑀺. 𑀭𑀼𑀓𑁆𑀔𑁂 𑀅𑀥𑀺𑀯𑀢𑁆𑀣𑀸 𑀤𑁂𑀯𑀢𑀸 𑀤𑁆𑀯𑀸𑀤𑀲𑀦𑁆𑀦𑀫𑁆𑀧𑀺 𑀪𑀺𑀓𑁆𑀔𑀼𑀦𑀻𑀦𑀁 𑀧𑀺𑀡𑁆𑀟𑀧𑀸𑀢𑀁 𑀤𑀢𑁆𑀯𑀸, ‘‘𑀅𑀬𑁆𑀬𑁂, 𑀅𑀜𑁆𑀜𑀢𑁆𑀣 𑀫𑀸 𑀕𑀘𑁆𑀙𑀣, 𑀦𑀺𑀘𑁆𑀘𑀁 𑀇𑀥𑁂𑀯 𑀆𑀕𑀘𑁆𑀙𑁂𑀬𑁆𑀬𑀸𑀣𑀸’’𑀢𑀺 𑀆𑀳. 𑀣𑁂𑀭𑀺𑀬𑀸 𑀧𑀦 𑀓𑀦𑀺𑀝𑁆𑀞𑀪𑀸𑀢𑀸 𑀦𑀸𑀕𑀢𑁆𑀣𑁂𑀭𑁄 𑀦𑀸𑀫 𑀅𑀢𑁆𑀣𑀺. 𑀲𑁄 ‘‘𑀫𑀳𑀦𑁆𑀢𑀁 𑀪𑀬𑀁, 𑀦 𑀲𑀓𑁆𑀓𑀸 𑀬𑀸𑀧𑁂𑀢𑀼𑀁, 𑀧𑀭𑀢𑀻𑀭𑀁 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀅𑀢𑁆𑀢𑀤𑁆𑀯𑀸𑀤𑀲𑀫𑁄𑀯 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀸 𑀦𑀺𑀓𑁆𑀔𑀦𑁆𑀢𑁄 ‘‘𑀣𑁂𑀭𑀺𑀁 𑀤𑀺𑀲𑁆𑀯𑀸 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀪𑀸𑀢𑀭𑀕𑀸𑀫𑀁 𑀆𑀕𑀢𑁄. 𑀣𑁂𑀭𑀻 ‘‘𑀣𑁂𑀭𑀸 𑀆𑀕𑀢𑀸’’𑀢𑀺 𑀲𑀼𑀢𑁆𑀯𑀸 𑀢𑁂𑀲𑀁 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀓𑀺𑀁 𑀅𑀬𑁆𑀬𑀸’’𑀢𑀺 𑀧𑀼𑀘𑁆𑀙𑀺. 𑀲𑁄 𑀢𑀁 𑀧𑀯𑀢𑁆𑀢𑀺𑀁 𑀆𑀭𑁄𑀘𑁂𑀲𑀺. 𑀲𑀸 ‘‘𑀅𑀚𑁆𑀚 𑀏𑀓𑀤𑀺𑀯𑀲𑀁 𑀯𑀺𑀳𑀸𑀭𑁂𑀯 𑀯𑀲𑀺𑀢𑁆𑀯𑀸 𑀲𑁆𑀯𑁂 𑀕𑀫𑀺𑀲𑁆𑀲𑀣𑀸’’𑀢𑀺 𑀆𑀳. 𑀣𑁂𑀭𑀸 𑀯𑀺𑀳𑀸𑀭𑀁 𑀅𑀕𑀫𑀺𑀁𑀲𑀼.

𑀣𑁂𑀭𑀻 𑀧𑀼𑀦𑀤𑀺𑀯𑀲𑁂 𑀭𑀼𑀓𑁆𑀔𑀫𑀽𑀮𑁂 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀣𑁂𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀇𑀫𑀁 𑀧𑀺𑀡𑁆𑀟𑀧𑀸𑀢𑀁 𑀧𑀭𑀺𑀪𑀼𑀜𑁆𑀚𑀣𑀸’’𑀢𑀺 𑀆𑀳. 𑀣𑁂𑀭𑁄 ‘‘𑀯𑀝𑁆𑀝𑀺𑀲𑁆𑀲𑀢𑀺 𑀣𑁂𑀭𑀻’’𑀢𑀺 𑀯𑀢𑁆𑀯𑀸 𑀢𑀼𑀡𑁆𑀳𑀻 𑀅𑀝𑁆𑀞𑀸𑀲𑀺. 𑀥𑀫𑁆𑀫𑀺𑀓𑁄, 𑀢𑀸𑀢, 𑀧𑀺𑀡𑁆𑀟𑀧𑀸𑀢𑁄, 𑀓𑀼𑀓𑁆𑀓𑀼𑀘𑁆𑀘𑀁 𑀅𑀓𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀣𑀸𑀢𑀺. 𑀯𑀝𑁆𑀝𑀺𑀲𑁆𑀲𑀢𑀺 𑀣𑁂𑀭𑀻𑀢𑀺? 𑀲𑀸 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀆𑀓𑀸𑀲𑁂 𑀔𑀺𑀧𑀺, 𑀧𑀢𑁆𑀢𑁄 𑀆𑀓𑀸𑀲𑁂 𑀅𑀝𑁆𑀞𑀸𑀲𑀺. 𑀣𑁂𑀭𑁄 ‘‘𑀲𑀢𑁆𑀢𑀢𑀸𑀮𑀫𑀢𑁆𑀢𑁂 𑀞𑀺𑀢𑀫𑁆𑀧𑀺 𑀪𑀺𑀓𑁆𑀔𑀼𑀦𑀻𑀪𑀢𑁆𑀢𑀫𑁂𑀯 𑀣𑁂𑀭𑀻’’𑀢𑀺 𑀯𑀢𑁆𑀯𑀸 ‘‘𑀪𑀬𑀁 𑀦𑀸𑀫 𑀲𑀩𑁆𑀩𑀓𑀸𑀮𑀁 𑀦 𑀳𑁄𑀢𑀺, 𑀪𑀬𑁂 𑀯𑀽𑀧𑀲𑀦𑁆𑀢𑁂 𑀅𑀭𑀺𑀬𑀯𑀁𑀲𑀁 𑀓𑀣𑀬𑀫𑀸𑀦𑁄, ‘𑀪𑁄 𑀧𑀺𑀡𑁆𑀟𑀧𑀸𑀢𑀺𑀓, 𑀪𑀺𑀓𑁆𑀔𑀼𑀦𑀻𑀪𑀢𑁆𑀢𑀁 𑀪𑀼𑀜𑁆𑀚𑀺𑀢𑁆𑀯𑀸 𑀯𑀻𑀢𑀺𑀦𑀸𑀫𑀬𑀺𑀢𑁆𑀣𑀸’𑀢𑀺 𑀘𑀺𑀢𑁆𑀢𑁂𑀦 𑀅𑀦𑀼𑀯𑀤𑀺𑀬𑀫𑀸𑀦𑁄 𑀲𑀦𑁆𑀣𑀫𑁆𑀪𑀺𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀸𑀫𑀺, 𑀅𑀧𑁆𑀧𑀫𑀢𑁆𑀢𑀸 𑀳𑁄𑀣 𑀣𑁂𑀭𑀺𑀬𑁄’’𑀢𑀺 𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀺.

𑀭𑀼𑀓𑁆𑀔𑀤𑁂𑀯𑀢𑀸𑀧𑀺 ‘‘𑀲𑀘𑁂 𑀣𑁂𑀭𑁄 𑀣𑁂𑀭𑀺𑀬𑀸 𑀳𑀢𑁆𑀣𑀢𑁄 𑀧𑀺𑀡𑁆𑀟𑀧𑀸𑀢𑀁 𑀧𑀭𑀺𑀪𑀼𑀜𑁆𑀚𑀺𑀲𑁆𑀲𑀢𑀺, 𑀦 𑀢𑀁 𑀦𑀺𑀯𑀢𑁆𑀢𑁂𑀲𑁆𑀲𑀸𑀫𑀺. 𑀲𑀘𑁂 𑀦 𑀧𑀭𑀺𑀪𑀼𑀜𑁆𑀚𑀺𑀲𑁆𑀲𑀢𑀺, 𑀦𑀺𑀯𑀢𑁆𑀢𑁂𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑀬𑀫𑀸𑀦𑀸 𑀞𑀢𑁆𑀯𑀸 𑀣𑁂𑀭𑀲𑁆𑀲 𑀕𑀫𑀦𑀁 𑀤𑀺𑀲𑁆𑀯𑀸 𑀭𑀼𑀓𑁆𑀔𑀸 𑀑𑀭𑀼𑀬𑁆𑀳 ‘‘𑀧𑀢𑁆𑀢𑀁, 𑀪𑀦𑁆𑀢𑁂, 𑀤𑁂𑀣𑀸’’𑀢𑀺 𑀯𑀢𑁆𑀯𑀸 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀣𑁂𑀭𑀁 𑀭𑀼𑀓𑁆𑀔𑀫𑀽𑀮𑀁𑀬𑁂𑀯 𑀆𑀦𑁂𑀢𑁆𑀯𑀸 𑀆𑀲𑀦𑀁 𑀧𑀜𑁆𑀜𑀸𑀧𑁂𑀢𑁆𑀯𑀸 𑀧𑀺𑀡𑁆𑀟𑀧𑀸𑀢𑀁 𑀤𑀢𑁆𑀯𑀸 𑀓𑀢𑀪𑀢𑁆𑀢𑀓𑀺𑀘𑁆𑀘𑀁 𑀧𑀝𑀺𑀜𑁆𑀜𑀁 𑀓𑀸𑀭𑁂𑀢𑁆𑀯𑀸 𑀤𑁆𑀯𑀸𑀤𑀲 𑀪𑀺𑀓𑁆𑀔𑀼𑀦𑀺𑀬𑁄 𑀤𑁆𑀯𑀸𑀤𑀲 𑀘 𑀪𑀺𑀓𑁆𑀔𑀽 𑀲𑀢𑁆𑀢 𑀯𑀲𑁆𑀲𑀸𑀦𑀺 𑀉𑀧𑀝𑁆𑀞𑀳𑀺. 𑀇𑀤𑀁 𑀤𑁂𑀯𑀢𑀸 𑀉𑀲𑁆𑀲𑀼𑀓𑁆𑀓𑀁 𑀆𑀧𑀚𑁆𑀚𑀦𑁆𑀢𑀻𑀢𑀺 𑀏𑀢𑁆𑀣 𑀯𑀢𑁆𑀣𑀼. 𑀢𑀢𑁆𑀭 𑀳𑀺 𑀣𑁂𑀭𑀻 𑀲𑀸𑀭𑀡𑀻𑀬𑀥𑀫𑁆𑀫𑀧𑀽𑀭𑀺𑀓𑀸 𑀅𑀳𑁄𑀲𑀺.

𑀅𑀔𑀡𑁆𑀟𑀸𑀦𑀻𑀢𑀺𑀆𑀤𑀻𑀲𑀼 𑀬𑀲𑁆𑀲 𑀲𑀢𑁆𑀢𑀲𑀼 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑁂𑀲𑀼 𑀆𑀤𑀺𑀫𑁆𑀳𑀺 𑀯𑀸 𑀅𑀦𑁆𑀢𑁂 𑀯𑀸 𑀲𑀺𑀓𑁆𑀔𑀸𑀧𑀤𑀁 𑀪𑀺𑀦𑁆𑀦𑀁 𑀳𑁄𑀢𑀺, 𑀢𑀲𑁆𑀲 𑀲𑀻𑀮𑀁 𑀧𑀭𑀺𑀬𑀦𑁆𑀢𑁂 𑀙𑀺𑀦𑁆𑀦𑀲𑀸𑀝𑀓𑁄 𑀯𑀺𑀬 𑀔𑀡𑁆𑀟𑀁 𑀦𑀸𑀫. 𑀬𑀲𑁆𑀲 𑀧𑀦 𑀯𑁂𑀫𑀚𑁆𑀛𑁂 𑀪𑀺𑀦𑁆𑀦𑀁, 𑀢𑀲𑁆𑀲 𑀙𑀺𑀤𑁆𑀤𑀲𑀸𑀝𑀓𑁄 𑀯𑀺𑀬 𑀙𑀺𑀤𑁆𑀤𑀁 𑀦𑀸𑀫 𑀳𑁄𑀢𑀺. 𑀬𑀲𑁆𑀲 𑀧𑀝𑀺𑀧𑀸𑀝𑀺𑀬𑀸 𑀤𑁆𑀯𑁂 𑀢𑀻𑀡𑀺 𑀪𑀺𑀦𑁆𑀦𑀸𑀦𑀺, 𑀢𑀲𑁆𑀲 𑀧𑀺𑀝𑁆𑀞𑀺𑀬𑀁 𑀯𑀸 𑀓𑀼𑀘𑁆𑀙𑀺𑀬𑀁 𑀯𑀸 𑀉𑀝𑁆𑀞𑀺𑀢𑁂𑀦 𑀯𑀺𑀲𑀪𑀸𑀕𑀯𑀡𑁆𑀡𑁂𑀦 𑀓𑀸𑀴𑀭𑀢𑁆𑀢𑀸𑀤𑀻𑀦𑀁 𑀅𑀜𑁆𑀜𑀢𑀭𑀯𑀡𑁆𑀡𑀸 𑀕𑀸𑀯𑀻 𑀯𑀺𑀬 𑀲𑀩𑀮𑀁 𑀦𑀸𑀫 𑀳𑁄𑀢𑀺. 𑀬𑀲𑁆𑀲 𑀅𑀦𑁆𑀢𑀭𑀦𑁆𑀢𑀭𑀸 𑀪𑀺𑀦𑁆𑀦𑀸𑀦𑀺, 𑀢𑀲𑁆𑀲 𑀅𑀦𑁆𑀢𑀭𑀦𑁆𑀢𑀭𑀸 𑀯𑀺𑀲𑀪𑀸𑀕𑀩𑀺𑀦𑁆𑀤𑀼𑀯𑀺𑀘𑀺𑀢𑁆𑀭𑀸 𑀕𑀸𑀯𑀻 𑀯𑀺𑀬 𑀓𑀫𑁆𑀫𑀸𑀲𑀁 𑀦𑀸𑀫 𑀳𑁄𑀢𑀺. 𑀬𑀲𑁆𑀲 𑀧𑀦 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀅𑀪𑀺𑀦𑁆𑀦𑀸𑀦𑀺, 𑀢𑀲𑁆𑀲 𑀢𑀸𑀦𑀺 𑀲𑀻𑀮𑀸𑀦𑀺 𑀅𑀔𑀡𑁆𑀟𑀸𑀦𑀺 𑀅𑀘𑁆𑀙𑀺𑀤𑁆𑀤𑀸𑀦𑀺 𑀅𑀲𑀩𑀮𑀸𑀦𑀺 𑀅𑀓𑀫𑁆𑀫𑀸𑀲𑀸𑀦𑀺 𑀦𑀸𑀫 𑀳𑁄𑀦𑁆𑀢𑀺. 𑀢𑀸𑀦𑀺 𑀧𑀦𑁂𑀢𑀸𑀦𑀺 𑀢𑀡𑁆𑀳𑀸𑀤𑀸𑀲𑀩𑁆𑀬𑀢𑁄 𑀫𑁄𑀘𑁂𑀢𑁆𑀯𑀸 𑀪𑀼𑀚𑀺𑀲𑁆𑀲𑀪𑀸𑀯𑀓𑀭𑀡𑀢𑁄 𑀪𑀼𑀚𑀺𑀲𑁆𑀲𑀸𑀦𑀺, 𑀩𑀼𑀤𑁆𑀥𑀸𑀤𑀻𑀳𑀺 𑀯𑀺𑀜𑁆𑀜𑀽𑀳𑀺 𑀧𑀲𑀢𑁆𑀣𑀢𑁆𑀢𑀸 𑀯𑀺𑀜𑁆𑀜𑀼𑀧𑁆𑀧𑀲𑀢𑁆𑀣𑀸𑀦𑀺, 𑀢𑀡𑁆𑀳𑀸𑀤𑀺𑀝𑁆𑀞𑀻𑀳𑀺 𑀅𑀧𑀭𑀸𑀫𑀝𑁆𑀞𑀢𑁆𑀢𑀸 ‘‘𑀇𑀤𑀁 𑀦𑀸𑀫 𑀢𑁆𑀯𑀁 𑀆𑀧𑀦𑁆𑀦𑀧𑀼𑀩𑁆𑀩𑁄’’𑀢𑀺 𑀓𑁂𑀦𑀘𑀺 𑀧𑀭𑀸𑀫𑀝𑁆𑀞𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑀸 𑀘 𑀅𑀧𑀭𑀸𑀫𑀝𑁆𑀞𑀸𑀦𑀺, 𑀉𑀧𑀘𑀸𑀭𑀲𑀫𑀸𑀥𑀺𑀁 𑀅𑀧𑁆𑀧𑀦𑀸𑀲𑀫𑀸𑀥𑀺𑀁 𑀯𑀸 𑀲𑀁𑀯𑀢𑁆𑀢𑀬𑀦𑁆𑀢𑀻𑀢𑀺 𑀲𑀫𑀸𑀥𑀺𑀲𑀁𑀯𑀢𑁆𑀢𑀦𑀺𑀓𑀸𑀦𑀻𑀢𑀺 𑀯𑀼𑀘𑁆𑀘𑀦𑁆𑀢𑀺.

𑀲𑀻𑀮𑀲𑀸𑀫𑀜𑁆𑀜𑀕𑀢𑁄 𑀯𑀺𑀳𑀭𑀢𑀻𑀢𑀺 𑀢𑁂𑀲𑀼 𑀢𑁂𑀲𑀼 𑀤𑀺𑀲𑀸𑀪𑀸𑀕𑁂𑀲𑀼 𑀯𑀺𑀳𑀭𑀦𑁆𑀢𑁂𑀳𑀺 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀲𑀫𑀸𑀦𑀪𑀸𑀯𑀽𑀧𑀕𑀢𑀲𑀻𑀮𑁄 𑀯𑀺𑀳𑀭𑀢𑀺. 𑀲𑁄𑀢𑀸𑀧𑀦𑁆𑀦𑀸𑀤𑀻𑀦𑀜𑁆𑀳𑀺 𑀲𑀻𑀮𑀁 𑀲𑀫𑀼𑀤𑁆𑀤𑀦𑁆𑀢𑀭𑁂𑀧𑀺 𑀤𑁂𑀯𑀮𑁄𑀓𑁂𑀧𑀺 𑀯𑀲𑀦𑁆𑀢𑀸𑀦𑀁 𑀅𑀜𑁆𑀜𑁂𑀲𑀁 𑀲𑁄𑀢𑀸𑀧𑀦𑁆𑀦𑀸𑀤𑀻𑀦𑀁 𑀲𑀻𑀮𑁂𑀦 𑀲𑀫𑀸𑀦𑀫𑁂𑀯 𑀳𑁄𑀢𑀺, 𑀦𑀢𑁆𑀣𑀺 𑀫𑀕𑁆𑀕𑀲𑀻𑀮𑁂 𑀦𑀸𑀦𑀢𑁆𑀢𑀁. 𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁.

𑀬𑀸𑀬𑀁 𑀤𑀺𑀝𑁆𑀞𑀻𑀢𑀺 𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀸 𑀲𑀫𑁆𑀫𑀸𑀤𑀺𑀝𑁆𑀞𑀺. 𑀅𑀭𑀺𑀬𑀸𑀢𑀺 𑀦𑀺𑀤𑁆𑀤𑁄𑀲𑀸. 𑀦𑀺𑀬𑁆𑀬𑀸𑀢𑀻𑀢𑀺 𑀦𑀺𑀬𑁆𑀬𑀸𑀦𑀺𑀓𑀸. 𑀢𑀓𑁆𑀓𑀭𑀲𑁆𑀲𑀸𑀢𑀺 𑀬𑁄 𑀢𑀣𑀸𑀓𑀸𑀭𑀻 𑀳𑁄𑀢𑀺. 𑀤𑀼𑀓𑁆𑀔𑀓𑁆𑀔𑀬𑀸𑀬𑀸𑀢𑀺 𑀲𑀩𑁆𑀩𑀤𑀼𑀓𑁆𑀔𑀓𑁆𑀔𑀬𑀢𑁆𑀣𑀁. 𑀤𑀺𑀝𑁆𑀞𑀺𑀲𑀸𑀫𑀜𑁆𑀜𑀕𑀢𑁄𑀢𑀺 𑀲𑀫𑀸𑀦𑀤𑀺𑀝𑁆𑀞𑀺𑀪𑀸𑀯𑀁 𑀉𑀧𑀕𑀢𑁄 𑀳𑀼𑀢𑁆𑀯𑀸 𑀯𑀺𑀳𑀭𑀢𑀻𑀢𑀺.

𑁨. 𑀤𑀼𑀢𑀺𑀬𑀲𑀸𑀭𑀡𑀻𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁨. 𑀤𑀼𑀢𑀺𑀬𑁂 𑀬𑁄 𑀢𑁂 𑀥𑀫𑁆𑀫𑁂 𑀧𑀽𑀭𑁂𑀢𑀺, 𑀢𑀁 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁 𑀧𑀺𑀬𑀁 𑀓𑀭𑁄𑀦𑁆𑀢𑀻𑀢𑀺 𑀧𑀺𑀬𑀓𑀭𑀡𑀸. 𑀕𑀭𑀼𑀁 𑀓𑀭𑁄𑀦𑁆𑀢𑀻𑀢𑀺 𑀕𑀭𑀼𑀓𑀭𑀡𑀸. 𑀲𑀗𑁆𑀕𑀳𑀸𑀬𑀸𑀢𑀺 𑀲𑀗𑁆𑀕𑀡𑁆𑀳𑀦𑀢𑁆𑀣𑀸𑀬. 𑀅𑀯𑀺𑀯𑀸𑀤𑀸𑀬𑀸𑀢𑀺 𑀅𑀯𑀺𑀯𑀤𑀦𑀢𑁆𑀣𑀸𑀬. 𑀲𑀸𑀫𑀕𑁆𑀕𑀺𑀬𑀸𑀢𑀺 𑀲𑀫𑀕𑁆𑀕𑀪𑀸𑀯𑀢𑁆𑀣𑀸𑀬. 𑀏𑀓𑀻𑀪𑀸𑀯𑀸𑀬𑀸𑀢𑀺 𑀏𑀓𑀪𑀸𑀯𑀢𑁆𑀣𑀸𑀬 𑀦𑀺𑀦𑁆𑀦𑀸𑀦𑀸𑀓𑀭𑀡𑀸𑀬. 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀯𑀢𑁆𑀢𑀦𑁆𑀢𑀺 𑀧𑀯𑀢𑁆𑀢𑀦𑁆𑀢𑀺.

𑁩. 𑀦𑀺𑀲𑁆𑀲𑀸𑀭𑀡𑀻𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁩. 𑀢𑀢𑀺𑀬𑁂 𑀦𑀺𑀲𑁆𑀲𑀸𑀭𑀡𑀻𑀬𑀸 𑀥𑀸𑀢𑀼𑀬𑁄𑀢𑀺 𑀦𑀺𑀲𑁆𑀲𑀭𑀡𑀥𑀸𑀢𑀼𑀬𑁄𑀯. 𑀫𑁂𑀢𑁆𑀢𑀸 𑀳𑀺 𑀔𑁄 𑀫𑁂 𑀘𑁂𑀢𑁄𑀯𑀺𑀫𑀼𑀢𑁆𑀢𑀻𑀢𑀺 𑀏𑀢𑁆𑀣 𑀧𑀘𑁆𑀘𑀦𑀻𑀓𑀥𑀫𑁆𑀫𑁂𑀳𑀺 𑀯𑀺𑀫𑀼𑀢𑁆𑀢𑀢𑁆𑀢𑀸 𑀢𑀺𑀓𑀘𑀢𑀼𑀓𑁆𑀓𑀚𑁆𑀛𑀸𑀦𑀺𑀓𑀸 𑀫𑁂𑀢𑁆𑀢𑀸𑀯 𑀫𑁂𑀢𑁆𑀢𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑀦𑀸𑀫. 𑀪𑀸𑀯𑀺𑀢𑀸𑀢𑀺 𑀯𑀟𑁆𑀠𑀺𑀢𑀸. 𑀩𑀳𑀼𑀮𑀻𑀓𑀢𑀸𑀢𑀺 𑀧𑀼𑀦𑀧𑁆𑀧𑀼𑀦𑀁 𑀓𑀢𑀸. 𑀬𑀸𑀦𑀻𑀓𑀢𑀸𑀢𑀺 𑀬𑀼𑀢𑁆𑀢𑀬𑀸𑀦𑀲𑀤𑀺𑀲𑀸 𑀓𑀢𑀸. 𑀯𑀢𑁆𑀣𑀼𑀓𑀢𑀸𑀢𑀺 𑀧𑀢𑀺𑀝𑁆𑀞𑀸 𑀓𑀢𑀸. 𑀅𑀦𑀼𑀝𑁆𑀞𑀺𑀢𑀸𑀢𑀺 𑀅𑀥𑀺𑀝𑁆𑀞𑀺𑀢𑀸. 𑀧𑀭𑀺𑀘𑀺𑀢𑀸𑀢𑀺 𑀲𑀫𑀦𑁆𑀢𑀢𑁄 𑀘𑀺𑀢𑀸 𑀆𑀘𑀺𑀢𑀸 𑀉𑀧𑀘𑀺𑀢𑀸. 𑀲𑀼𑀲𑀫𑀸𑀭𑀤𑁆𑀥𑀸𑀢𑀺 𑀲𑀼𑀧𑁆𑀧𑀕𑀼𑀡𑀓𑀭𑀡𑁂𑀦 𑀲𑀼𑀝𑁆𑀞𑀼 𑀲𑀫𑀸𑀭𑀤𑁆𑀥𑀸. 𑀧𑀭𑀺𑀬𑀸𑀤𑀸𑀬 𑀢𑀺𑀝𑁆𑀞𑀢𑀻𑀢𑀺 𑀧𑀭𑀺𑀬𑀸𑀤𑀺𑀬𑀺𑀢𑁆𑀯𑀸 𑀕𑀳𑁂𑀢𑁆𑀯𑀸 𑀢𑀺𑀝𑁆𑀞𑀢𑀺. 𑀫𑀸 𑀳𑁂𑀯𑀦𑁆𑀢𑀺𑀲𑁆𑀲 𑀯𑀘𑀦𑀻𑀬𑁄𑀢𑀺 𑀬𑀲𑁆𑀫𑀸 𑀅𑀪𑀽𑀢𑀩𑁆𑀬𑀸𑀓𑀭𑀡𑀁 𑀩𑁆𑀬𑀸𑀓𑀭𑁄𑀢𑀺, 𑀢𑀲𑁆𑀫𑀸 ‘‘𑀫𑀸 𑀏𑀯𑀁 𑀪𑀡𑀻’’𑀢𑀺 𑀯𑀢𑁆𑀢𑀩𑁆𑀩𑁄. 𑀬𑀤𑀺𑀤𑀁 𑀫𑁂𑀢𑁆𑀢𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀻𑀢𑀺 𑀬𑀸 𑀅𑀬𑀁 𑀫𑁂𑀢𑁆𑀢𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀺, 𑀇𑀤𑀁 𑀦𑀺𑀲𑁆𑀲𑀭𑀡𑀁 𑀩𑁆𑀬𑀸𑀧𑀸𑀤𑀲𑁆𑀲, 𑀩𑁆𑀬𑀸𑀧𑀸𑀤𑀢𑁄 𑀦𑀺𑀲𑁆𑀲𑀝𑀸𑀢𑀺 𑀅𑀢𑁆𑀣𑁄. 𑀬𑁄 𑀧𑀦 𑀫𑁂𑀢𑁆𑀢𑀸𑀬 𑀢𑀺𑀓𑀘𑀢𑀼𑀓𑁆𑀓𑀚𑁆𑀛𑀸𑀦𑀢𑁄 𑀯𑀼𑀝𑁆𑀞𑀺𑀢𑁄 𑀲𑀗𑁆𑀔𑀸𑀭𑁂 𑀲𑀫𑁆𑀫𑀲𑀺𑀢𑁆𑀯𑀸 𑀢𑀢𑀺𑀬𑀫𑀕𑁆𑀕𑀁 𑀧𑀢𑁆𑀯𑀸 ‘‘𑀧𑀼𑀦 𑀩𑁆𑀬𑀸𑀧𑀸𑀤𑁄 𑀦𑀢𑁆𑀣𑀻’’𑀢𑀺 𑀢𑀢𑀺𑀬𑀨𑀮𑁂𑀦 𑀦𑀺𑀩𑁆𑀩𑀸𑀦𑀁 𑀧𑀲𑁆𑀲𑀢𑀺, 𑀢𑀲𑁆𑀲 𑀘𑀺𑀢𑁆𑀢𑀁 𑀅𑀘𑁆𑀘𑀦𑁆𑀢𑀦𑀺𑀲𑁆𑀲𑀭𑀡𑀁 𑀩𑁆𑀬𑀸𑀧𑀸𑀤𑀲𑁆𑀲. 𑀏𑀢𑁂𑀦𑀼𑀧𑀸𑀬𑁂𑀦 𑀲𑀩𑁆𑀩𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀅𑀦𑀺𑀫𑀺𑀢𑁆𑀢𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀻𑀢𑀺 𑀩𑀮𑀯𑀯𑀺𑀧𑀲𑁆𑀲𑀦𑀸. 𑀤𑀻𑀖𑀪𑀸𑀡𑀓𑀸 𑀧𑀦 𑀅𑀭𑀳𑀢𑁆𑀢𑀨𑀮𑀲𑀫𑀸𑀧𑀢𑁆𑀢𑀻𑀢𑀺 𑀯𑀤𑀦𑁆𑀢𑀺. 𑀲𑀸 𑀳𑀺 𑀭𑀸𑀕𑀦𑀺𑀫𑀺𑀢𑁆𑀢𑀸𑀤𑀻𑀦𑀜𑁆𑀘𑁂𑀯 𑀭𑀽𑀧𑀦𑀺𑀫𑀺𑀢𑁆𑀢𑀸𑀤𑀻𑀦𑀜𑁆𑀘 𑀦𑀺𑀘𑁆𑀘𑀦𑀺𑀫𑀺𑀢𑁆𑀢𑀸𑀤𑀻𑀦𑀜𑁆𑀘 𑀅𑀪𑀸𑀯𑀸 𑀅𑀦𑀺𑀫𑀺𑀢𑁆𑀢𑀸𑀢𑀺 𑀯𑀼𑀢𑁆𑀢𑀸. 𑀦𑀺𑀫𑀺𑀢𑁆𑀢𑀸𑀦𑀼𑀲𑀸𑀭𑀻𑀢𑀺 𑀯𑀼𑀢𑁆𑀢𑀧𑁆𑀧𑀪𑁂𑀤𑀁 𑀦𑀺𑀫𑀺𑀢𑁆𑀢𑀁 𑀅𑀦𑀼𑀲𑀭𑀡𑀲𑀪𑀸𑀯𑀁.

𑀅𑀲𑁆𑀫𑀻𑀢𑀺 𑀅𑀲𑁆𑀫𑀺𑀫𑀸𑀦𑁄. 𑀅𑀬𑀫𑀳𑀫𑀲𑁆𑀫𑀻𑀢𑀺 𑀧𑀜𑁆𑀘𑀲𑀼 𑀔𑀦𑁆𑀥𑁂𑀲𑀼 𑀅𑀬𑀁 𑀦𑀸𑀫 𑀅𑀳𑀁 𑀅𑀲𑁆𑀫𑀻𑀢𑀺. 𑀏𑀢𑁆𑀢𑀸𑀯𑀢𑀸 𑀅𑀭𑀳𑀢𑁆𑀢𑀁 𑀩𑁆𑀬𑀸𑀓𑀢𑀁 𑀳𑁄𑀢𑀺. 𑀯𑀺𑀘𑀺𑀓𑀺𑀘𑁆𑀙𑀸𑀓𑀣𑀁𑀓𑀣𑀸𑀲𑀮𑁆𑀮𑀦𑁆𑀢𑀺 𑀯𑀺𑀘𑀺𑀓𑀺𑀘𑁆𑀙𑀸𑀪𑀽𑀢𑀁 𑀓𑀣𑀁𑀓𑀣𑀸𑀲𑀮𑁆𑀮𑀁. 𑀫𑀸 𑀳𑁂𑀯𑀦𑁆𑀢𑀺𑀲𑁆𑀲 𑀯𑀘𑀦𑀻𑀬𑁄𑀢𑀺 𑀲𑀘𑁂 𑀢𑁂 𑀧𑀞𑀫𑀫𑀕𑁆𑀕𑀯𑀚𑁆𑀛𑀸 𑀯𑀺𑀘𑀺𑀓𑀺𑀘𑁆𑀙𑀸 𑀉𑀧𑁆𑀧𑀚𑁆𑀚𑀢𑀺, 𑀅𑀭𑀳𑀢𑁆𑀢𑀩𑁆𑀬𑀸𑀓𑀭𑀡𑀁 𑀫𑀺𑀘𑁆𑀙𑀸 𑀳𑁄𑀢𑀺, 𑀢𑀲𑁆𑀫𑀸 ‘‘𑀫𑀸 𑀅𑀪𑀽𑀢𑀁 𑀕𑀡𑁆𑀳𑀻’’𑀢𑀺 𑀯𑀸𑀭𑁂𑀢𑀩𑁆𑀩𑁄. 𑀅𑀲𑁆𑀫𑀻𑀢𑀺 𑀫𑀸𑀦𑀲𑀫𑀼𑀕𑁆𑀖𑀸𑀢𑁄𑀢𑀺 𑀅𑀭𑀳𑀢𑁆𑀢𑀫𑀕𑁆𑀕𑁄. 𑀅𑀭𑀳𑀢𑁆𑀢𑀫𑀕𑁆𑀕𑀨𑀮𑀯𑀲𑁂𑀦 𑀳𑀺 𑀦𑀺𑀩𑁆𑀩𑀸𑀦𑁂 𑀤𑀺𑀝𑁆𑀞𑁂 𑀧𑀼𑀦 𑀅𑀲𑁆𑀫𑀺𑀫𑀸𑀦𑁄 𑀦𑀢𑁆𑀣𑀻𑀢𑀺 𑀅𑀭𑀳𑀢𑁆𑀢𑀫𑀕𑁆𑀕𑁄 ‘‘𑀅𑀲𑁆𑀫𑀻𑀢𑀺 𑀫𑀸𑀦𑀲𑀫𑀼𑀕𑁆𑀖𑀸𑀢𑁄’’𑀢𑀺 𑀯𑀼𑀢𑁆𑀢𑁄. 𑀇𑀢𑀺 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀅𑀪𑀽𑀢𑀩𑁆𑀬𑀸𑀓𑀭𑀡𑀁 𑀦𑀸𑀫 𑀓𑀣𑀺𑀢𑀁.

𑁪. 𑀪𑀤𑁆𑀤𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁪. 𑀘𑀢𑀼𑀢𑁆𑀣𑁂 𑀦 𑀪𑀤𑁆𑀤𑀓𑀦𑁆𑀢𑀺 𑀦 𑀮𑀤𑁆𑀥𑀓𑀁. 𑀢𑀢𑁆𑀣 𑀬𑁄 𑀳𑀺 𑀪𑀻𑀢𑀪𑀻𑀢𑁄 𑀫𑀭𑀢𑀺, 𑀢𑀲𑁆𑀲 𑀦 𑀪𑀤𑁆𑀤𑀓𑀁 𑀫𑀭𑀡𑀁 𑀳𑁄𑀢𑀺. 𑀬𑁄 𑀅𑀧𑀸𑀬𑁂 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀸𑀢𑀺, 𑀢𑀲𑁆𑀲 𑀦 𑀪𑀤𑁆𑀤𑀺𑀓𑀸 𑀓𑀸𑀮𑀓𑀺𑀭𑀺𑀬𑀸 𑀳𑁄𑀢𑀺. 𑀓𑀫𑁆𑀫𑀸𑀭𑀸𑀫𑁄𑀢𑀺𑀆𑀤𑀻𑀲𑀼 𑀆𑀭𑀫𑀡𑀁 𑀆𑀭𑀸𑀫𑁄, 𑀅𑀪𑀺𑀭𑀢𑀻𑀢𑀺 𑀅𑀢𑁆𑀣𑁄. 𑀯𑀺𑀳𑀸𑀭𑀓𑀭𑀡𑀸𑀤𑀺𑀫𑁆𑀳𑀺 𑀦𑀯𑀓𑀫𑁆𑀫𑁂 𑀆𑀭𑀸𑀫𑁄 𑀅𑀲𑁆𑀲𑀸𑀢𑀺 𑀓𑀫𑁆𑀫𑀸𑀭𑀸𑀫𑁄. 𑀢𑀲𑁆𑀫𑀺𑀁𑀬𑁂𑀯 𑀓𑀫𑁆𑀫𑁂 𑀭𑀢𑁄𑀢𑀺 𑀓𑀫𑁆𑀫𑀭𑀢𑁄. 𑀢𑀤𑁂𑀯 𑀓𑀫𑁆𑀫𑀸𑀭𑀸𑀫𑀢𑀁 𑀧𑀼𑀦𑀧𑁆𑀧𑀼𑀦𑀁 𑀬𑀼𑀢𑁆𑀢𑁄𑀢𑀺 𑀅𑀦𑀼𑀬𑀼𑀢𑁆𑀢𑁄. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣. 𑀏𑀢𑁆𑀣 𑀘 𑀪𑀲𑁆𑀲𑀦𑁆𑀢𑀺 𑀆𑀮𑀸𑀧𑀲𑀮𑁆𑀮𑀸𑀧𑁄. 𑀦𑀺𑀤𑁆𑀤𑀸𑀢𑀺 𑀲𑁄𑀧𑁆𑀧𑀁. 𑀲𑀗𑁆𑀕𑀡𑀺𑀓𑀸𑀢𑀺 𑀕𑀡𑀲𑀗𑁆𑀕𑀡𑀺𑀓𑀸. 𑀲𑀸 ‘‘𑀏𑀓𑀲𑁆𑀲 𑀤𑀼𑀢𑀺𑀬𑁄 𑀳𑁄𑀢𑀺, 𑀤𑁆𑀯𑀺𑀦𑁆𑀦𑀁 𑀳𑁄𑀢𑀺 𑀢𑀢𑀺𑀬𑀓𑁄’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀸. 𑀲𑀁𑀲𑀕𑁆𑀕𑁄𑀢𑀺 𑀤𑀲𑁆𑀲𑀦𑀲𑀯𑀦𑀲𑀫𑀼𑀮𑁆𑀮𑀸𑀧𑀲𑀫𑁆𑀪𑁄𑀕𑀓𑀸𑀬𑀲𑀁𑀲𑀕𑁆𑀕𑀯𑀲𑁂𑀦 𑀧𑀯𑀢𑁆𑀢𑁄 𑀲𑀁𑀲𑀝𑁆𑀞𑀪𑀸𑀯𑁄. 𑀧𑀧𑀜𑁆𑀘𑁄𑀢𑀺 𑀢𑀡𑁆𑀳𑀸𑀤𑀺𑀝𑁆𑀞𑀺𑀫𑀸𑀦𑀯𑀲𑁂𑀦 𑀧𑀯𑀢𑁆𑀢𑁄 𑀫𑀤𑀦𑀸𑀓𑀸𑀭𑀲𑀡𑁆𑀞𑀺𑀢𑁄 𑀓𑀺𑀮𑁂𑀲𑀧𑀧𑀜𑁆𑀘𑁄. 𑀲𑀓𑁆𑀓𑀸𑀬𑀦𑁆𑀢𑀺 𑀢𑁂𑀪𑀽𑀫𑀓𑀯𑀝𑁆𑀝𑀁. 𑀲𑀫𑁆𑀫𑀸 𑀤𑀼𑀓𑁆𑀔𑀲𑁆𑀲 𑀅𑀦𑁆𑀢𑀓𑀺𑀭𑀺𑀬𑀸𑀬𑀸𑀢𑀺 𑀳𑁂𑀢𑀼𑀦𑀸 𑀦𑀬𑁂𑀦 𑀲𑀓𑀮𑀯𑀝𑁆𑀝𑀤𑀼𑀓𑁆𑀔𑀲𑁆𑀲 𑀧𑀭𑀺𑀯𑀝𑀼𑀫𑀧𑀭𑀺𑀘𑁆𑀙𑁂𑀤𑀓𑀭𑀡𑀢𑁆𑀣𑀁. 𑀫𑀕𑁄𑀢𑀺 𑀫𑀕𑀲𑀤𑀺𑀲𑁄. 𑀦𑀺𑀧𑁆𑀧𑀧𑀜𑁆𑀘𑀧𑀤𑁂𑀢𑀺 𑀦𑀺𑀩𑁆𑀩𑀸𑀦𑀧𑀤𑁂. 𑀆𑀭𑀸𑀥𑀬𑀻𑀢𑀺 𑀧𑀭𑀺𑀧𑀽𑀭𑀬𑀺 𑀢𑀁 𑀲𑀫𑁆𑀧𑀸𑀤𑁂𑀲𑀻𑀢𑀺.

𑁫. 𑀅𑀦𑀼𑀢𑀧𑁆𑀧𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁫. 𑀧𑀜𑁆𑀘𑀫𑁂 𑀅𑀦𑀼𑀢𑀧𑁆𑀧𑀸𑀢𑀺 𑀅𑀦𑀼𑀲𑁄𑀘𑀺𑀢𑀩𑁆𑀩𑀸 𑀅𑀦𑀼𑀢𑀸𑀧𑀓𑀸𑀭𑀻. 𑀇𑀫𑁂𑀲𑀼 𑀤𑁆𑀯𑀻𑀲𑀼𑀧𑀺 𑀲𑀼𑀢𑁆𑀢𑁂𑀲𑀼 𑀕𑀸𑀣𑀸𑀲𑀼 𑀘 𑀯𑀝𑁆𑀝𑀯𑀺𑀯𑀝𑁆𑀝𑀁 𑀓𑀣𑀺𑀢𑀁.

𑁬. 𑀦𑀓𑀼𑀮𑀧𑀺𑀢𑀼𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁬. 𑀙𑀝𑁆𑀞𑁂 𑀩𑀸𑀴𑁆𑀳𑀕𑀺𑀮𑀸𑀦𑁄𑀢𑀺 𑀅𑀥𑀺𑀫𑀢𑁆𑀢𑀕𑀺𑀮𑀸𑀦𑁄. 𑀏𑀢𑀤𑀯𑁄𑀘𑀸𑀢𑀺 𑀲𑀸𑀫𑀺𑀓𑀲𑁆𑀲 𑀪𑁂𑀲𑀚𑁆𑀚𑀁 𑀓𑀢𑁆𑀯𑀸 𑀩𑁆𑀬𑀸𑀥𑀺𑀁 𑀯𑀽𑀧𑀲𑀫𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀻 𑀇𑀤𑀸𑀦𑀺 𑀲𑀻𑀳𑀦𑀸𑀤𑀁 𑀦𑀤𑀺𑀢𑁆𑀯𑀸 𑀲𑀘𑁆𑀘𑀓𑀺𑀭𑀺𑀬𑀸𑀬 𑀩𑁆𑀬𑀸𑀥𑀺𑀁 𑀯𑀽𑀧𑀲𑀫𑁂𑀢𑀼𑀁 𑀲𑀦𑁆𑀢𑀺𑀓𑁂 𑀦𑀺𑀲𑀻𑀤𑀺𑀢𑁆𑀯𑀸 𑀏𑀢𑀁 ‘‘𑀫𑀸 𑀔𑁄 𑀢𑁆𑀯’’𑀦𑁆𑀢𑀺𑀆𑀤𑀺𑀯𑀘𑀦𑀁 𑀅𑀯𑁄𑀘. 𑀲𑀸𑀧𑁂𑀓𑁆𑀔𑁄𑀢𑀺 𑀲𑀢𑀡𑁆𑀳𑁄. 𑀦 𑀦𑀓𑀼𑀮𑀫𑀸𑀢𑀸𑀢𑀺 𑀏𑀢𑁆𑀣 𑀦-𑀓𑀸𑀭𑁄 𑀦 𑀲𑀓𑁆𑀔𑀢𑀻𑀢𑀺 𑀏𑀯𑀁 𑀧𑀭𑀧𑀤𑁂𑀦 𑀬𑁄𑀚𑁂𑀢𑀩𑁆𑀩𑁄. 𑀲𑀦𑁆𑀣𑀭𑀺𑀢𑀼𑀦𑁆𑀢𑀺 𑀦𑀺𑀘𑁆𑀙𑀺𑀤𑁆𑀤𑀁 𑀓𑀸𑀢𑀼𑀁, 𑀲𑀡𑁆𑀞𑀧𑁂𑀢𑀼𑀦𑁆𑀢𑀺 𑀅𑀢𑁆𑀣𑁄. 𑀯𑁂𑀡𑀺𑀁 𑀑𑀮𑀺𑀔𑀺𑀢𑀼𑀦𑁆𑀢𑀺 𑀏𑀴𑀓𑀮𑁄𑀫𑀸𑀦𑀺 𑀓𑀧𑁆𑀧𑁂𑀢𑁆𑀯𑀸 𑀯𑀺𑀚𑀝𑁂𑀢𑁆𑀯𑀸 𑀯𑁂𑀡𑀺𑀁 𑀓𑀸𑀢𑀼𑀁.

𑀅𑀜𑁆𑀜𑀁 𑀖𑀭𑀁 𑀕𑀫𑀺𑀲𑁆𑀲𑀢𑀻𑀢𑀺 𑀅𑀜𑁆𑀜𑀁 𑀲𑀸𑀫𑀺𑀓𑀁 𑀕𑀡𑁆𑀳𑀺𑀲𑁆𑀲𑀢𑀺. 𑀲𑁄𑀴𑀲 𑀯𑀲𑁆𑀲𑀸𑀦𑀺 𑀕𑀳𑀝𑁆𑀞𑀓𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀲𑀫𑀸𑀘𑀺𑀡𑁆𑀡𑀦𑁆𑀢𑀺 𑀇𑀢𑁄 𑀲𑁄𑀴𑀲𑀯𑀲𑁆𑀲𑀫𑀢𑁆𑀣𑀓𑁂 𑀕𑀳𑀝𑁆𑀞𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄 𑀲𑀫𑀸𑀘𑀺𑀡𑁆𑀡𑁄. 𑀤𑀲𑁆𑀲𑀦𑀓𑀸𑀫𑀢𑀭𑀸𑀢𑀺 𑀅𑀢𑀺𑀭𑁂𑀓𑁂𑀦 𑀤𑀲𑁆𑀲𑀦𑀓𑀸𑀫𑀸. 𑀇𑀫𑁂𑀳𑀺 𑀢𑀻𑀳𑀺 𑀅𑀗𑁆𑀕𑁂𑀳𑀺 𑀲𑀻𑀳𑀦𑀸𑀤𑀁 𑀦𑀤𑀺𑀢𑁆𑀯𑀸 ‘‘𑀇𑀫𑀺𑀦𑀸 𑀲𑀘𑁆𑀘𑁂𑀦 𑀢𑀯 𑀲𑀭𑀻𑀭𑁂 𑀩𑁆𑀬𑀸𑀥𑀺 𑀨𑀸𑀲𑀼 𑀳𑁄𑀢𑀽’’𑀢𑀺 𑀲𑀘𑁆𑀘𑀓𑀺𑀭𑀺𑀬𑀁 𑀅𑀓𑀸𑀲𑀺.

𑀇𑀤𑀸𑀦𑀺 𑀪𑀕𑀯𑀦𑁆𑀢𑀁 𑀲𑀓𑁆𑀔𑀺𑀁 𑀓𑀢𑁆𑀯𑀸 𑀅𑀢𑁆𑀢𑀦𑁄 𑀲𑀻𑀮𑀸𑀤𑀺𑀕𑀼𑀡𑁂𑀳𑀺𑀧𑀺 𑀲𑀘𑁆𑀘𑀓𑀺𑀭𑀺𑀬𑀁 𑀓𑀸𑀢𑀼𑀁 𑀲𑀺𑀬𑀸 𑀔𑁄 𑀧𑀦 𑀢𑁂𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀧𑀭𑀺𑀧𑀽𑀭𑀓𑀸𑀭𑀺𑀦𑀻𑀢𑀺 𑀲𑀫𑀢𑁆𑀢𑀓𑀸𑀭𑀺𑀦𑀻. 𑀘𑁂𑀢𑁄𑀲𑀫𑀣𑀲𑁆𑀲𑀸𑀢𑀺 𑀲𑀫𑀸𑀥𑀺𑀓𑀫𑁆𑀫𑀝𑁆𑀞𑀸𑀦𑀲𑁆𑀲. 𑀑𑀕𑀸𑀥𑀧𑁆𑀧𑀢𑁆𑀢𑀸𑀢𑀺 𑀑𑀕𑀸𑀥𑀁 𑀅𑀦𑀼𑀧𑁆𑀧𑀯𑁂𑀲𑀁 𑀧𑀢𑁆𑀢𑀸. 𑀧𑀢𑀺𑀕𑀸𑀥𑀧𑁆𑀧𑀢𑁆𑀢𑀸𑀢𑀺 𑀧𑀢𑀺𑀕𑀸𑀥𑀁 𑀧𑀢𑀺𑀝𑁆𑀞𑀁 𑀧𑀢𑁆𑀢𑀸. 𑀅𑀲𑁆𑀲𑀸𑀲𑀧𑁆𑀧𑀢𑁆𑀢𑀸𑀢𑀺 𑀅𑀲𑁆𑀲𑀸𑀲𑀁 𑀅𑀯𑀲𑁆𑀲𑀬𑀁 𑀧𑀢𑁆𑀢𑀸. 𑀯𑁂𑀲𑀸𑀭𑀚𑁆𑀚𑀧𑁆𑀧𑀢𑁆𑀢𑀸𑀢𑀺 𑀲𑁄𑀫𑀦𑀲𑁆𑀲𑀜𑀸𑀡𑀁 𑀧𑀢𑁆𑀢𑀸. 𑀅𑀧𑀭𑀧𑁆𑀧𑀘𑁆𑀘𑀬𑀸𑀢𑀺 𑀧𑀭𑀧𑁆𑀧𑀘𑁆𑀘𑀬𑁄 𑀯𑀼𑀘𑁆𑀘𑀢𑀺 𑀧𑀭𑀲𑀤𑁆𑀥𑀸 𑀧𑀭𑀧𑀢𑁆𑀢𑀺𑀬𑀸𑀬𑀦𑀸, 𑀢𑀸𑀬 𑀯𑀺𑀭𑀳𑀺𑀢𑀸𑀢𑀺 𑀅𑀢𑁆𑀣𑁄. 𑀇𑀫𑁂𑀳𑀺 𑀢𑀻𑀳𑀺 𑀅𑀗𑁆𑀕𑁂𑀳𑀺 𑀅𑀢𑁆𑀢𑀦𑁄 𑀕𑀼𑀡𑁂 𑀆𑀭𑀩𑁆𑀪 𑀲𑀘𑁆𑀘𑀓𑀺𑀭𑀺𑀬𑀁 𑀅𑀓𑀸𑀲𑀺. 𑀕𑀺𑀮𑀸𑀦𑀸 𑀯𑀼𑀝𑁆𑀞𑀺𑀢𑁄𑀢𑀺 𑀕𑀺𑀮𑀸𑀦𑁄 𑀳𑀼𑀢𑁆𑀯𑀸 𑀯𑀼𑀝𑁆𑀞𑀺𑀢𑁄. 𑀬𑀸𑀯𑀢𑀸𑀢𑀺 𑀬𑀢𑁆𑀢𑀺𑀓𑀸𑀬𑁄. 𑀢𑀸𑀲𑀁 𑀅𑀜𑁆𑀜𑀢𑀭𑀸𑀢𑀺 𑀢𑀸𑀲𑀁 𑀅𑀦𑁆𑀢𑀭𑁂 𑀏𑀓𑀸. 𑀅𑀦𑀼𑀓𑀫𑁆𑀧𑀺𑀓𑀸𑀢𑀺 𑀳𑀺𑀢𑀸𑀦𑀼𑀓𑀫𑁆𑀧𑀺𑀓𑀸. 𑀑𑀯𑀸𑀤𑀺𑀓𑀸𑀢𑀺 𑀑𑀯𑀸𑀤𑀤𑀸𑀬𑀺𑀓𑀸. 𑀅𑀦𑀼𑀲𑀸𑀲𑀺𑀓𑀸𑀢𑀺 𑀅𑀦𑀼𑀲𑀺𑀝𑁆𑀞𑀺𑀤𑀸𑀬𑀺𑀓𑀸.

𑁭. 𑀲𑁄𑀧𑁆𑀧𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁭. 𑀲𑀢𑁆𑀢𑀫𑁂 𑀧𑀝𑀺𑀲𑀮𑁆𑀮𑀸𑀦𑀸 𑀯𑀼𑀝𑁆𑀞𑀺𑀢𑁄𑀢𑀺 𑀏𑀓𑀻𑀪𑀸𑀯𑀸𑀬 𑀥𑀫𑁆𑀫𑀦𑀺𑀚𑁆𑀛𑀸𑀦𑀓𑁆𑀔𑀦𑁆𑀢𑀺𑀢𑁄 𑀨𑀮𑀲𑀫𑀸𑀧𑀢𑁆𑀢𑀺𑀯𑀺𑀳𑀸𑀭𑀢𑁄 𑀯𑀼𑀝𑁆𑀞𑀺𑀢𑁄. 𑀬𑀣𑀸𑀯𑀺𑀳𑀸𑀭𑀦𑁆𑀢𑀺 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀯𑀲𑀦𑀯𑀺𑀳𑀸𑀭𑀁. 𑀦𑀯𑀸𑀢𑀺 𑀧𑀩𑁆𑀩𑀚𑁆𑀚𑀸𑀬 𑀦𑀯𑀓𑀸. 𑀢𑁂 𑀧𑀜𑁆𑀘𑀲𑀢𑀫𑀢𑁆𑀢𑀸 𑀅𑀳𑁂𑀲𑀼𑀁. 𑀓𑀸𑀓𑀘𑁆𑀙𑀫𑀸𑀦𑀸𑀢𑀺 𑀓𑀸𑀓𑀲𑀤𑁆𑀤𑀁 𑀓𑀭𑁄𑀦𑁆𑀢𑀸 𑀤𑀦𑁆𑀢𑁂 𑀔𑀸𑀤𑀦𑁆𑀢𑀸. 𑀣𑁂𑀭𑀸𑀢𑀺 𑀣𑀺𑀭𑀪𑀸𑀯𑀁 𑀧𑀢𑁆𑀢𑀸. 𑀢𑁂𑀦 𑀦𑁄𑀢𑀺 𑀢𑁂𑀦 𑀦𑀼. 𑀲𑁂𑀬𑁆𑀬𑀲𑀼𑀔𑀸𑀤𑀻𑀦𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀢𑁆𑀣𑀸𑀦𑁂𑀯. 𑀭𑀝𑁆𑀞𑀺𑀓𑁄𑀢𑀺 𑀬𑁄 𑀭𑀝𑁆𑀞𑀁 𑀪𑀼𑀜𑁆𑀚𑀢𑀺. 𑀧𑁂𑀢𑁆𑀢𑀡𑀺𑀓𑁄𑀢𑀺 𑀬𑁄 𑀧𑀺𑀢𑀭𑀸 𑀪𑀼𑀢𑁆𑀢𑀸𑀦𑀼𑀪𑀼𑀢𑁆𑀢𑀁 𑀪𑀼𑀜𑁆𑀚𑀢𑀺. 𑀲𑁂𑀦𑀸𑀧𑀢𑀺𑀓𑁄𑀢𑀺 𑀲𑁂𑀦𑀸𑀬 𑀚𑁂𑀝𑁆𑀞𑀓𑁄. 𑀕𑀸𑀫𑀕𑀸𑀫𑀡𑀺𑀓𑁄𑀢𑀺 𑀕𑀸𑀫𑀪𑁄𑀚𑀓𑁄. 𑀧𑀽𑀕𑀕𑀸𑀫𑀡𑀺𑀓𑁄𑀢𑀺 𑀕𑀡𑀚𑁂𑀝𑁆𑀞𑀓𑁄. 𑀅𑀯𑀺𑀧𑀲𑁆𑀲𑀓𑁄 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀦𑁆𑀢𑀺 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀅𑀦𑁂𑀲𑀓𑁄 𑀅𑀕𑀯𑁂𑀲𑀓𑁄 𑀳𑀼𑀢𑁆𑀯𑀸. 𑀩𑁄𑀥𑀺𑀧𑀓𑁆𑀔𑀺𑀬𑀸𑀦𑀁 𑀥𑀫𑁆𑀫𑀸𑀦𑀦𑁆𑀢𑀺 𑀲𑀢𑁆𑀢𑀢𑀺𑀁𑀲𑀸𑀬 𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑀸𑀦𑀁.

𑁮. 𑀫𑀘𑁆𑀙𑀩𑀦𑁆𑀥𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁮. 𑀅𑀝𑁆𑀞𑀫𑁂 𑀫𑀘𑁆𑀙𑀺𑀓𑀦𑁆𑀢𑀺 𑀫𑀘𑁆𑀙𑀖𑀸𑀢𑀓𑀁. 𑀳𑀢𑁆𑀣𑀺𑀦𑀸 𑀬𑀸𑀢𑀻𑀢𑀺 𑀳𑀢𑁆𑀣𑀺𑀬𑀸𑀬𑀻. 𑀧𑀭𑀢𑁄𑀧𑀺 𑀏𑀲𑁂𑀯 𑀦𑀬𑁄. 𑀯𑀚𑁆𑀛𑁂𑀢𑀺 𑀯𑀥𑀺𑀢𑀩𑁆𑀩𑁂. 𑀯𑀥𑀸𑀬𑀦𑀻𑀢𑁂𑀢𑀺 𑀯𑀥𑀸𑀬 𑀉𑀧𑀦𑀻𑀢𑁂. 𑀧𑀸𑀧𑀓𑁂𑀦 𑀫𑀦𑀲𑀸𑀢𑀺 𑀮𑀸𑀫𑀓𑁂𑀦 𑀯𑀥𑀓𑀘𑀺𑀢𑁆𑀢𑁂𑀦. 𑀧𑀸𑀴𑀺𑀬𑀁 𑀧𑀦 𑀯𑀥𑀸𑀬𑀼𑀧𑀦𑀻𑀢𑁂𑀢𑀺 𑀮𑀺𑀔𑀦𑁆𑀢𑀺. 𑀫𑀸𑀕𑀯𑀺𑀓𑁄𑀢𑀺 𑀫𑀺𑀕𑀖𑀸𑀢𑀓𑁄. 𑀓𑁄 𑀧𑀦 𑀯𑀸𑀤𑁄 𑀫𑀦𑀼𑀲𑁆𑀲𑀪𑀽𑀢𑀦𑁆𑀢𑀺 𑀬𑁄 𑀫𑀦𑀼𑀲𑁆𑀲𑀪𑀽𑀢𑀁 𑀧𑀸𑀧𑀓𑁂𑀦 𑀫𑀦𑀲𑀸 𑀅𑀦𑀼𑀧𑁂𑀓𑁆𑀔𑀢𑀺, 𑀢𑀲𑁆𑀲 𑀲𑀫𑁆𑀧𑀢𑁆𑀢𑀺𑀬𑀸 𑀅𑀪𑀸𑀯𑁂 𑀓𑀺𑀫𑁂𑀯 𑀯𑀢𑁆𑀢𑀩𑁆𑀩𑀁. 𑀇𑀤𑀁 𑀧𑀸𑀧𑀓𑀲𑁆𑀲 𑀓𑀫𑁆𑀫𑀼𑀦𑁄 𑀅𑀦𑀺𑀝𑁆𑀞𑀨𑀮𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁. 𑀬𑁂𑀲𑀁 𑀧𑀦 𑀢𑀸𑀤𑀺𑀲𑀁 𑀓𑀫𑁆𑀫𑀁 𑀓𑀭𑁄𑀦𑁆𑀢𑀸𑀦𑀫𑁆𑀧𑀺 𑀬𑀲𑀧𑀝𑀺𑀮𑀸𑀪𑁄 𑀳𑁄𑀢𑀺, 𑀢𑁂𑀲𑀁 𑀢𑀁 𑀅𑀓𑀼𑀲𑀮𑀁 𑀦𑀺𑀲𑁆𑀲𑀸𑀬 𑀓𑀼𑀲𑀮𑀁 𑀯𑀺𑀧𑀘𑁆𑀘𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑁂𑀦 𑀧𑀦𑀲𑁆𑀲 𑀅𑀓𑀼𑀲𑀮𑀓𑀫𑁆𑀫𑁂𑀦 𑀉𑀧𑀳𑀢𑀢𑁆𑀢𑀸 𑀯𑀺𑀧𑀸𑀓𑁄 𑀦 𑀘𑀺𑀭𑀝𑁆𑀞𑀺𑀢𑀺𑀓𑁄 𑀳𑁄𑀢𑀺. 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀅𑀓𑀼𑀲𑀮𑀧𑀓𑁆𑀔𑁄𑀯 𑀓𑀣𑀺𑀢𑁄.

𑁯. 𑀧𑀞𑀫𑀫𑀭𑀡𑀲𑁆𑀲𑀢𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁯. 𑀦𑀯𑀫𑁂 𑀦𑀸𑀢𑀺𑀓𑁂𑀢𑀺 𑀏𑀯𑀁𑀦𑀸𑀫𑀓𑁂 𑀕𑀸𑀫𑁂. 𑀕𑀺𑀜𑁆𑀚𑀓𑀸𑀯𑀲𑀣𑁂𑀢𑀺 𑀇𑀝𑁆𑀞𑀓𑀸𑀫𑀬𑁂 𑀧𑀸𑀲𑀸𑀤𑁂. 𑀅𑀫𑀢𑁄𑀕𑀥𑀸𑀢𑀺 𑀦𑀺𑀩𑁆𑀩𑀸𑀦𑁄𑀕𑀥𑀸, 𑀦𑀺𑀩𑁆𑀩𑀸𑀦𑀧𑀢𑀺𑀝𑁆𑀞𑀸𑀢𑀺 𑀅𑀢𑁆𑀣𑁄. 𑀪𑀸𑀯𑁂𑀣 𑀦𑁄𑀢𑀺 𑀪𑀸𑀯𑁂𑀣 𑀦𑀼. 𑀫𑀭𑀡𑀲𑁆𑀲𑀢𑀺𑀦𑁆𑀢𑀺 𑀫𑀭𑀡𑀲𑁆𑀲𑀢𑀺𑀓𑀫𑁆𑀫𑀝𑁆𑀞𑀸𑀦𑀁. 𑀅𑀳𑁄 𑀯𑀢𑀸𑀢𑀺 𑀧𑀢𑁆𑀣𑀦𑀢𑁆𑀣𑁂 𑀦𑀺𑀧𑀸𑀢𑁄. 𑀩𑀳𑀼𑀁 𑀯𑀢 𑀫𑁂 𑀓𑀢𑀁 𑀅𑀲𑁆𑀲𑀸𑀢𑀺 𑀢𑀼𑀫𑁆𑀳𑀸𑀓𑀁 𑀲𑀸𑀲𑀦𑁂 𑀫𑀫 𑀓𑀺𑀘𑁆𑀘𑀁 𑀩𑀳𑀼 𑀓𑀢𑀁 𑀅𑀲𑁆𑀲. 𑀢𑀤𑀦𑁆𑀢𑀭𑀦𑁆𑀢𑀺 𑀢𑀁 𑀅𑀦𑁆𑀢𑀭𑀁 𑀔𑀡𑀁 𑀑𑀓𑀸𑀲𑀁. 𑀅𑀲𑁆𑀲𑀲𑀺𑀢𑁆𑀯𑀸 𑀯𑀸 𑀧𑀲𑁆𑀲𑀲𑀸𑀫𑀻𑀢𑀺 𑀏𑀢𑁆𑀣 𑀅𑀲𑁆𑀲𑀸𑀲𑁄 𑀯𑀼𑀘𑁆𑀘𑀢𑀺 𑀅𑀦𑁆𑀢𑁄 𑀧𑀯𑀺𑀲𑀦𑀯𑀸𑀢𑁄, 𑀧𑀲𑁆𑀲𑀸𑀲𑁄 𑀩𑀳𑀺 𑀦𑀺𑀓𑁆𑀔𑀫𑀦𑀯𑀸𑀢𑁄. 𑀇𑀢𑀺 𑀅𑀬𑀁 𑀪𑀺𑀓𑁆𑀔𑀼 𑀬𑀸𑀯 𑀅𑀦𑁆𑀢𑁄 𑀧𑀯𑀺𑀝𑁆𑀞𑀯𑀸𑀢𑁄 𑀩𑀳𑀺 𑀦𑀺𑀓𑁆𑀔𑀫𑀢𑀺, 𑀩𑀳𑀺 𑀦𑀺𑀓𑁆𑀔𑀦𑁆𑀢𑁄 𑀯𑀸𑀢𑁄 𑀅𑀦𑁆𑀢𑁄 𑀧𑀯𑀺𑀲𑀢𑀺, 𑀢𑀸𑀯 𑀚𑀻𑀯𑀺𑀢𑀁 𑀧𑀢𑁆𑀣𑁂𑀦𑁆𑀢𑁄 𑀏𑀯𑀫𑀸𑀳. 𑀤𑀦𑁆𑀥𑀦𑁆𑀢𑀺 𑀫𑀦𑁆𑀤𑀁 𑀕𑀭𑀼𑀓𑀁 𑀅𑀲𑀻𑀖𑀧𑁆𑀧𑀯𑀢𑁆𑀢𑀁. 𑀆𑀲𑀯𑀸𑀦𑀁 𑀔𑀬𑀸𑀬𑀸𑀢𑀺 𑀅𑀭𑀳𑀢𑁆𑀢𑀨𑀮𑀢𑁆𑀣𑀸𑀬. 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀫𑀭𑀡𑀲𑁆𑀲𑀢𑀺 𑀅𑀭𑀳𑀢𑁆𑀢𑀁 𑀧𑀸𑀧𑁂𑀢𑁆𑀯𑀸 𑀓𑀣𑀺𑀢𑀸𑀢𑀺.

𑁧𑁦. 𑀤𑀼𑀢𑀺𑀬𑀫𑀭𑀡𑀲𑁆𑀲𑀢𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁦. 𑀤𑀲𑀫𑁂 𑀧𑀢𑀺𑀕𑀢𑀸𑀬𑀸𑀢𑀺 𑀧𑀝𑀺𑀧𑀦𑁆𑀦𑀸𑀬. 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀢𑀻𑀢𑀺 𑀏𑀯𑀁 𑀧𑀘𑁆𑀘𑀯𑁂𑀓𑁆𑀔𑀢𑀺. 𑀲𑁄 𑀫𑀫𑀲𑁆𑀲 𑀅𑀦𑁆𑀢𑀭𑀸𑀬𑁄𑀢𑀺 𑀏𑀢𑁆𑀣 𑀢𑀺𑀯𑀺𑀥𑁄 𑀅𑀦𑁆𑀢𑀭𑀸𑀬𑁄 𑀚𑀻𑀯𑀺𑀢𑀦𑁆𑀢𑀭𑀸𑀬𑁄, 𑀲𑀫𑀡𑀥𑀫𑁆𑀫𑀦𑁆𑀢𑀭𑀸𑀬𑁄, 𑀧𑀼𑀣𑀼𑀚𑁆𑀚𑀦𑀓𑀸𑀮𑀓𑀺𑀭𑀺𑀬𑀁 𑀓𑀭𑁄𑀦𑁆𑀢𑀲𑁆𑀲 𑀲𑀕𑁆𑀕𑀦𑁆𑀢𑀭𑀸𑀬𑁄 𑀘𑁂𑀯 𑀫𑀕𑁆𑀕𑀦𑁆𑀢𑀭𑀸𑀬𑁄 𑀘𑀸𑀢𑀺. 𑀢𑀁 𑀲𑀩𑁆𑀩𑀫𑁆𑀧𑀺 𑀲𑀦𑁆𑀥𑀸𑀬𑁂𑀯𑀫𑀸𑀳. 𑀩𑁆𑀬𑀸𑀧𑀚𑁆𑀚𑁂𑀬𑁆𑀬𑀸𑀢𑀺 𑀅𑀚𑀺𑀡𑁆𑀡𑀓𑀸𑀤𑀺𑀯𑀲𑁂𑀦 𑀯𑀺𑀧𑀚𑁆𑀚𑁂𑀬𑁆𑀬. 𑀅𑀥𑀺𑀫𑀢𑁆𑀢𑁄𑀢𑀺 𑀩𑀮𑀯𑀸. 𑀙𑀦𑁆𑀤𑁄𑀢𑀺 𑀓𑀢𑁆𑀢𑀼𑀓𑀫𑁆𑀬𑀢𑀸𑀙𑀦𑁆𑀤𑁄. 𑀯𑀸𑀬𑀸𑀫𑁄𑀢𑀺 𑀧𑀬𑁄𑀕𑀯𑀻𑀭𑀺𑀬𑀁. 𑀉𑀲𑁆𑀲𑀸𑀳𑁄𑀢𑀺 𑀉𑀲𑁆𑀲𑀸𑀧𑀦𑀯𑀻𑀭𑀺𑀬𑀁. 𑀉𑀲𑁆𑀲𑁄𑀴𑁆𑀳𑀻𑀢𑀺 𑀲𑀫𑁆𑀧𑀸𑀤𑀦𑀯𑀻𑀭𑀺𑀬𑀁. 𑀅𑀧𑁆𑀧𑀝𑀺𑀯𑀸𑀦𑀻𑀢𑀺 𑀅𑀦𑀼𑀓𑁆𑀓𑀡𑁆𑀞𑀦𑀸 𑀅𑀧𑁆𑀧𑀝𑀺𑀲𑀗𑁆𑀖𑀭𑀡𑀸. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀲𑀸𑀭𑀡𑀻𑀬𑀯𑀕𑁆𑀕𑁄 𑀤𑀼𑀢𑀺𑀬𑁄.

𑁩. 𑀅𑀦𑀼𑀢𑁆𑀢𑀭𑀺𑀬𑀯𑀕𑁆𑀕𑁄

𑁧-𑁨. 𑀲𑀸𑀫𑀓𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁨𑁧-𑁨𑁨. 𑀢𑀢𑀺𑀬𑀲𑁆𑀲 𑀧𑀞𑀫𑁂 𑀲𑀸𑀫𑀕𑀸𑀫𑀓𑁂𑀢𑀺 𑀲𑀸𑀫𑀓𑀸𑀦𑀁 𑀉𑀲𑁆𑀲𑀦𑁆𑀦𑀢𑁆𑀢𑀸 𑀏𑀯𑀁𑀮𑀤𑁆𑀥𑀦𑀸𑀫𑁂 𑀕𑀸𑀫𑀓𑁂. 𑀧𑁄𑀓𑁆𑀔𑀭𑀡𑀺𑀬𑀸𑀬𑀦𑁆𑀢𑀺 𑀧𑁄𑀓𑁆𑀔𑀭𑀡𑀺𑀬𑀸𑀦𑀸𑀫𑀓𑁂 𑀯𑀺𑀳𑀸𑀭𑁂. 𑀅𑀪𑀺𑀓𑁆𑀓𑀦𑁆𑀢𑀸𑀬 𑀭𑀢𑁆𑀢𑀺𑀬𑀸𑀢𑀺 𑀭𑀢𑁆𑀢𑀺𑀬𑀸 𑀧𑀞𑀫𑀬𑀸𑀫𑀁 𑀅𑀢𑀺𑀓𑁆𑀓𑀫𑁆𑀫 𑀫𑀚𑁆𑀛𑀺𑀫𑀬𑀸𑀫𑁂 𑀲𑀫𑁆𑀧𑀢𑁆𑀢𑁂. 𑀅𑀪𑀺𑀓𑁆𑀓𑀦𑁆𑀢𑀯𑀡𑁆𑀡𑀸𑀢𑀺 𑀅𑀪𑀺𑀓𑁆𑀓𑀦𑁆𑀢𑀅𑀢𑀺𑀫𑀦𑀸𑀧𑀯𑀡𑁆𑀡𑀸. 𑀓𑁂𑀯𑀮𑀓𑀧𑁆𑀧𑀦𑁆𑀢𑀺 𑀲𑀓𑀮𑀓𑀧𑁆𑀧𑀁. 𑀧𑁄𑀓𑁆𑀔𑀭𑀡𑀺𑀬𑀁 𑀑𑀪𑀸𑀲𑁂𑀢𑁆𑀯𑀸𑀢𑀺 𑀧𑁄𑀓𑁆𑀔𑀭𑀡𑀺𑀬𑀸𑀦𑀸𑀫𑀓𑀁 𑀫𑀳𑀸𑀯𑀺𑀳𑀸𑀭𑀁 𑀅𑀢𑁆𑀢𑀦𑁄 𑀑𑀪𑀸𑀲𑁂𑀦 𑀨𑀭𑀺𑀢𑁆𑀯𑀸. 𑀲𑀫𑀦𑀼𑀜𑁆𑀜𑁄𑀢𑀺 𑀲𑀫𑀸𑀦𑀅𑀦𑀼𑀜𑁆𑀜𑁄 𑀲𑀫𑀸𑀦𑀘𑀺𑀢𑁆𑀢𑁄. 𑀤𑁄𑀯𑀘𑀲𑁆𑀲𑀢𑀸𑀢𑀺 𑀤𑀼𑀩𑁆𑀩𑀘𑀪𑀸𑀯𑁄. 𑀧𑀸𑀧𑀫𑀺𑀢𑁆𑀢𑀢𑀸𑀢𑀺 𑀮𑀸𑀫𑀓𑀫𑀺𑀢𑁆𑀢𑀢𑀸. 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀧𑀭𑀺𑀳𑀸𑀦𑀺𑀬𑀥𑀫𑁆𑀫𑀸𑀯 𑀓𑀣𑀺𑀢𑀸. 𑀤𑀼𑀢𑀺𑀬𑁂 𑀅𑀧𑀭𑀺𑀳𑀸𑀦𑀺𑀬𑀥𑀫𑁆𑀫𑀸 𑀮𑁄𑀓𑀼𑀢𑁆𑀢𑀭𑀫𑀺𑀲𑁆𑀲𑀓𑀸 𑀓𑀣𑀺𑀢𑀸.

𑁩. 𑀪𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁩. 𑀢𑀢𑀺𑀬𑁂 𑀓𑀸𑀫𑀭𑀸𑀕𑀭𑀢𑁆𑀢𑀸𑀬𑀦𑁆𑀢𑀺 𑀓𑀸𑀫𑀭𑀸𑀕𑀭𑀢𑁆𑀢𑁄 𑀅𑀬𑀁. 𑀙𑀦𑁆𑀤𑀭𑀸𑀕𑀯𑀺𑀦𑀺𑀩𑀤𑁆𑀥𑁄𑀢𑀺 𑀙𑀦𑁆𑀤𑀭𑀸𑀕𑁂𑀦 𑀯𑀺𑀦𑀺𑀩𑀤𑁆𑀥𑁄. 𑀪𑀬𑀸𑀢𑀺 𑀘𑀺𑀢𑁆𑀢𑀼𑀢𑁆𑀭𑀸𑀲𑀪𑀬𑀸. 𑀧𑀗𑁆𑀓𑀸𑀢𑀺 𑀓𑀺𑀮𑁂𑀲𑀧𑀗𑁆𑀓𑀢𑁄. 𑀲𑀗𑁆𑀕𑁄 𑀧𑀗𑁆𑀓𑁄 𑀘 𑀉𑀪𑀬𑀦𑁆𑀢𑀺 𑀲𑀗𑁆𑀕𑁄 𑀘 𑀧𑀗𑁆𑀓𑁄 𑀘 𑀇𑀤𑀫𑁆𑀧𑀺 𑀉𑀪𑀬𑀁. 𑀏𑀢𑁂 𑀓𑀸𑀫𑀸 𑀧𑀯𑀼𑀘𑁆𑀘𑀦𑁆𑀢𑀺, 𑀬𑀢𑁆𑀣 𑀲𑀢𑁆𑀢𑁄 𑀧𑀼𑀣𑀼𑀚𑁆𑀚𑀦𑁄𑀢𑀺 𑀬𑀲𑁆𑀫𑀺𑀁 𑀲𑀗𑁆𑀕𑁂 𑀘 𑀧𑀗𑁆𑀓𑁂 𑀘 𑀧𑀼𑀣𑀼𑀚𑁆𑀚𑀦𑁄 𑀲𑀢𑁆𑀢𑁄 𑀮𑀕𑁆𑀕𑁄 𑀮𑀕𑁆𑀕𑀺𑀢𑁄 𑀧𑀮𑀺𑀩𑀼𑀤𑁆𑀥𑁄. 𑀉𑀧𑀸𑀤𑀸𑀦𑁂𑀢𑀺 𑀘𑀢𑀼𑀩𑁆𑀩𑀺𑀥𑁂 𑀉𑀧𑀸𑀤𑀸𑀦𑁂. 𑀚𑀸𑀢𑀺𑀫𑀭𑀡𑀲𑀫𑁆𑀪𑀯𑁂𑀢𑀺 𑀚𑀸𑀢𑀺𑀬𑀸 𑀘 𑀫𑀭𑀡𑀲𑁆𑀲 𑀘 𑀲𑀫𑁆𑀪𑀯𑁂 𑀧𑀘𑁆𑀘𑀬𑀪𑀽𑀢𑁂. 𑀅𑀦𑀼𑀧𑀸𑀤𑀸 𑀯𑀺𑀫𑀼𑀘𑁆𑀘𑀦𑁆𑀢𑀻𑀢𑀺 𑀅𑀦𑀼𑀧𑀸𑀤𑀺𑀬𑀺𑀢𑁆𑀯𑀸 𑀯𑀺𑀫𑀼𑀘𑁆𑀘𑀦𑁆𑀢𑀺. 𑀚𑀸𑀢𑀺𑀫𑀭𑀡𑀲𑀗𑁆𑀔𑀬𑁂𑀢𑀺 𑀚𑀸𑀢𑀺𑀫𑀭𑀡𑀸𑀦𑀁 𑀲𑀗𑁆𑀔𑀬𑀲𑀗𑁆𑀔𑀸𑀢𑁂 𑀦𑀺𑀩𑁆𑀩𑀸𑀦𑁂, 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀸𑀬 𑀯𑀺𑀫𑀼𑀢𑁆𑀢𑀺𑀬𑀸 𑀯𑀺𑀫𑀼𑀘𑁆𑀘𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀯𑀺𑀯𑀝𑁆𑀝𑁂𑀢𑁆𑀯𑀸 𑀅𑀭𑀳𑀢𑁆𑀢𑀫𑁂𑀯 𑀧𑀢𑁆𑀢𑁄 𑀏𑀲 𑀪𑀺𑀓𑁆𑀔𑀼. 𑀇𑀤𑀸𑀦𑀺 𑀢𑀁 𑀔𑀻𑀡𑀸𑀲𑀯𑀁 𑀣𑁄𑀫𑁂𑀦𑁆𑀢𑁄 𑀢𑁂 𑀔𑁂𑀫𑀧𑁆𑀧𑀢𑁆𑀢𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀔𑁂𑀫𑀧𑁆𑀧𑀢𑁆𑀢𑀸𑀢𑀺 𑀔𑁂𑀫𑀪𑀸𑀯𑀁 𑀧𑀢𑁆𑀢𑀸. 𑀲𑀼𑀔𑀺𑀦𑁄𑀢𑀺 𑀮𑁄𑀓𑀼𑀢𑁆𑀢𑀭𑀲𑀼𑀔𑁂𑀦 𑀲𑀼𑀔𑀺𑀢𑀸. 𑀤𑀺𑀝𑁆𑀞𑀥𑀫𑁆𑀫𑀸𑀪𑀺𑀦𑀺𑀩𑁆𑀩𑀼𑀢𑀸𑀢𑀺 𑀅𑀩𑁆𑀪𑀦𑁆𑀢𑀭𑁂 𑀓𑀺𑀮𑁂𑀲𑀸𑀪𑀸𑀯𑁂𑀦 𑀤𑀺𑀝𑁆𑀞𑀥𑀫𑁆𑀫𑁂𑀬𑁂𑀯 𑀅𑀪𑀺𑀦𑀺𑀩𑁆𑀩𑀼𑀢𑀸. 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀯𑀝𑁆𑀝𑀫𑁂𑀯 𑀓𑀣𑁂𑀢𑁆𑀯𑀸 𑀕𑀸𑀣𑀸𑀲𑀼 𑀯𑀝𑁆𑀝𑀯𑀺𑀯𑀝𑀁 𑀓𑀣𑀺𑀢𑀁.

𑁪. 𑀳𑀺𑀫𑀯𑀦𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁪. 𑀘𑀢𑀼𑀢𑁆𑀣𑁂 𑀧𑀤𑀸𑀮𑁂𑀬𑁆𑀬𑀸𑀢𑀺 𑀪𑀺𑀦𑁆𑀤𑁂𑀬𑁆𑀬. 𑀙𑀯𑀸𑀬𑀸𑀢𑀺 𑀮𑀸𑀫𑀺𑀓𑀸𑀬. 𑀲𑀫𑀸𑀥𑀺𑀲𑁆𑀲 𑀲𑀫𑀸𑀧𑀢𑁆𑀢𑀺𑀓𑀼𑀲𑀮𑁄 𑀳𑁄𑀢𑀻𑀢𑀺 𑀆𑀳𑀸𑀭𑀲𑀧𑁆𑀧𑀸𑀬𑀉𑀢𑀼𑀲𑀧𑁆𑀧𑀸𑀬𑀸𑀦𑀺 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀲𑀫𑀸𑀥𑀺𑀁 𑀲𑀫𑀸𑀧𑀚𑁆𑀚𑀺𑀢𑀼𑀁 𑀓𑀼𑀲𑀮𑁄 𑀳𑁄𑀢𑀺 𑀙𑁂𑀓𑁄 𑀲𑀫𑀢𑁆𑀣𑁄 𑀧𑀝𑀺𑀩𑀮𑁄. 𑀲𑀫𑀸𑀥𑀺𑀲𑁆𑀲 𑀞𑀺𑀢𑀺𑀓𑀼𑀲𑀮𑁄𑀢𑀺 𑀲𑀫𑀸𑀥𑀺𑀲𑁆𑀲 𑀞𑀺𑀢𑀺𑀬𑀁 𑀓𑀼𑀲𑀮𑁄, 𑀲𑀫𑀸𑀥𑀺𑀁 𑀞𑀧𑁂𑀢𑀼𑀁 𑀲𑀓𑁆𑀓𑁄𑀢𑀻𑀢𑀺 𑀅𑀢𑁆𑀣𑁄. 𑀲𑀫𑀸𑀥𑀺𑀲𑁆𑀲 𑀯𑀼𑀝𑁆𑀞𑀸𑀦𑀓𑀼𑀲𑀮𑁄𑀢𑀺 𑀲𑀫𑀸𑀥𑀺𑀲𑁆𑀲 𑀯𑀼𑀝𑁆𑀞𑀸𑀦𑁂 𑀓𑀼𑀲𑀮𑁄, 𑀬𑀣𑀸𑀧𑀭𑀺𑀘𑁆𑀙𑁂𑀤𑁂𑀦 𑀯𑀼𑀝𑁆𑀞𑀸𑀢𑀼𑀁 𑀲𑀓𑁆𑀓𑁄𑀢𑀻𑀢𑀺 𑀅𑀢𑁆𑀣𑁄. 𑀲𑀫𑀸𑀥𑀺𑀲𑁆𑀲 𑀓𑀮𑁆𑀮𑀺𑀢𑀓𑀼𑀲𑀮𑁄𑀢𑀺 𑀲𑀫𑀸𑀥𑀺𑀲𑁆𑀲 𑀓𑀮𑁆𑀮𑀢𑀸𑀬 𑀓𑀼𑀲𑀮𑁄, 𑀲𑀫𑀸𑀥𑀺𑀘𑀺𑀢𑁆𑀢𑀁 𑀳𑀸𑀲𑁂𑀢𑀼𑀁 𑀓𑀮𑁆𑀮𑀁 𑀓𑀸𑀢𑀼𑀁 𑀲𑀓𑁆𑀓𑁄𑀢𑀻𑀢𑀺 𑀅𑀢𑁆𑀣𑁄. 𑀲𑀫𑀸𑀥𑀺𑀲𑁆𑀲 𑀕𑁄𑀘𑀭𑀓𑀼𑀲𑀮𑁄𑀢𑀺 𑀲𑀫𑀸𑀥𑀺𑀲𑁆𑀲 𑀅𑀲𑀧𑁆𑀧𑀸𑀬𑁂 𑀅𑀦𑀼𑀧𑀓𑀸𑀭𑀓𑁂 𑀥𑀫𑁆𑀫𑁂 𑀯𑀚𑁆𑀚𑁂𑀢𑁆𑀯𑀸 𑀲𑀧𑁆𑀧𑀸𑀬𑁂 𑀉𑀧𑀓𑀸𑀭𑀓𑁂 𑀲𑁂𑀯𑀦𑁆𑀢𑁄𑀧𑀺, ‘‘𑀅𑀬𑀁 𑀲𑀫𑀸𑀥𑀺𑀦𑀺𑀫𑀺𑀢𑁆𑀢𑀸𑀭𑀫𑁆𑀫𑀡𑁄 𑀅𑀬𑀁 𑀮𑀓𑁆𑀔𑀡𑀸𑀭𑀫𑁆𑀫𑀡𑁄’’𑀢𑀺 𑀚𑀸𑀦𑀦𑁆𑀢𑁄𑀧𑀺 𑀲𑀫𑀸𑀥𑀺𑀲𑁆𑀲 𑀕𑁄𑀘𑀭𑀓𑀼𑀲𑀮𑁄 𑀦𑀸𑀫 𑀳𑁄𑀢𑀺. 𑀲𑀫𑀸𑀥𑀺𑀲𑁆𑀲 𑀅𑀪𑀺𑀦𑀻𑀳𑀸𑀭𑀓𑀼𑀲𑀮𑁄𑀢𑀺 𑀉𑀧𑀭𑀺𑀉𑀧𑀭𑀺𑀲𑀫𑀸𑀧𑀢𑁆𑀢𑀺𑀲𑀫𑀸𑀧𑀚𑁆𑀚𑀦𑀢𑁆𑀣𑀸𑀬 𑀧𑀞𑀫𑀚𑁆𑀛𑀸𑀦𑀸𑀤𑀺𑀲𑀫𑀸𑀥𑀺𑀁 𑀅𑀪𑀺𑀦𑀻𑀳𑀭𑀺𑀢𑀼𑀁 𑀲𑀓𑁆𑀓𑁄𑀦𑁆𑀢𑁄 𑀲𑀫𑀸𑀥𑀺𑀲𑁆𑀲 𑀅𑀪𑀺𑀦𑀻𑀳𑀸𑀭𑀓𑀼𑀲𑀮𑁄 𑀦𑀸𑀫 𑀳𑁄𑀢𑀺. 𑀲𑁄 𑀧𑀞𑀫𑀚𑁆𑀛𑀸𑀦𑀸 𑀯𑀼𑀝𑁆𑀞𑀸𑀬 𑀤𑀼𑀢𑀺𑀬𑀁 𑀲𑀫𑀸𑀧𑀚𑁆𑀚𑀢𑀺, 𑀤𑀼𑀢𑀺𑀬𑀚𑁆𑀛𑀸𑀦𑀸…𑀧𑁂… 𑀢𑀢𑀺𑀬𑀚𑁆𑀛𑀸𑀦𑀸 𑀯𑀼𑀝𑁆𑀞𑀸𑀬 𑀘𑀢𑀼𑀢𑁆𑀣𑀁 𑀲𑀫𑀸𑀧𑀚𑁆𑀚𑀢𑀻𑀢𑀺.

𑁫. 𑀅𑀦𑀼𑀲𑁆𑀲𑀢𑀺𑀝𑁆𑀞𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁫. 𑀧𑀜𑁆𑀘𑀫𑁂 𑀅𑀦𑀼𑀲𑁆𑀲𑀢𑀺𑀝𑁆𑀞𑀸𑀦𑀸𑀦𑀻𑀢𑀺 𑀅𑀦𑀼𑀲𑁆𑀲𑀢𑀺𑀓𑀸𑀭𑀡𑀸𑀦𑀺. 𑀇𑀢𑀺𑀧𑀺 𑀲𑁄 𑀪𑀕𑀯𑀸𑀢𑀺𑀆𑀤𑀻𑀦𑀺 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁧.𑁧𑁨𑁩 𑀆𑀤𑀬𑁄) 𑀯𑀺𑀢𑁆𑀣𑀸𑀭𑀺𑀢𑀸𑀦𑁂𑀯. 𑀇𑀤𑀫𑁆𑀧𑀺 𑀔𑁄, 𑀪𑀺𑀓𑁆𑀔𑀯𑁂, 𑀆𑀭𑀫𑁆𑀫𑀡𑀁 𑀓𑀭𑀺𑀢𑁆𑀯𑀸𑀢𑀺 𑀇𑀤𑀁 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺𑀓𑀫𑁆𑀫𑀝𑁆𑀞𑀸𑀦𑀁 𑀆𑀭𑀫𑁆𑀫𑀡𑀁 𑀓𑀭𑀺𑀢𑁆𑀯𑀸. 𑀯𑀺𑀲𑀼𑀚𑁆𑀛𑀦𑁆𑀢𑀻𑀢𑀺 𑀧𑀭𑀫𑀯𑀺𑀲𑀼𑀤𑁆𑀥𑀺𑀁 𑀦𑀺𑀩𑁆𑀩𑀸𑀦𑀁 𑀧𑀸𑀧𑀼𑀡𑀦𑁆𑀢𑀺. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯. 𑀇𑀫𑀲𑁆𑀫𑀺𑀁 𑀧𑀦 𑀲𑀼𑀢𑁆𑀢𑁂 𑀙 𑀅𑀦𑀼𑀲𑁆𑀲𑀢𑀺𑀝𑁆𑀞𑀸𑀦𑀸𑀦𑀺 𑀫𑀺𑀲𑁆𑀲𑀓𑀸𑀦𑀺 𑀓𑀣𑀺𑀢𑀸𑀦𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺.

𑁬. 𑀫𑀳𑀸𑀓𑀘𑁆𑀘𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁬. 𑀙𑀝𑁆𑀞𑁂 𑀲𑀫𑁆𑀩𑀸𑀥𑁂𑀢𑀺 𑀧𑀜𑁆𑀘𑀓𑀸𑀫𑀕𑀼𑀡𑀲𑀫𑁆𑀩𑀸𑀥𑁂. 𑀑𑀓𑀸𑀲𑀸𑀥𑀺𑀕𑀫𑁄𑀢𑀺 𑀏𑀢𑁆𑀣 𑀑𑀓𑀸𑀲𑀸 𑀯𑀼𑀘𑁆𑀘𑀦𑁆𑀢𑀺 𑀙 𑀅𑀦𑀼𑀲𑁆𑀲𑀢𑀺𑀝𑁆𑀞𑀸𑀦𑀸𑀦𑀺, 𑀢𑁂𑀲𑀁 𑀅𑀥𑀺𑀕𑀫𑁄. 𑀯𑀺𑀲𑀼𑀤𑁆𑀥𑀺𑀬𑀸𑀢𑀺 𑀯𑀺𑀲𑀼𑀚𑁆𑀛𑀦𑀢𑁆𑀣𑀸𑀬. 𑀲𑁄𑀓𑀧𑀭𑀺𑀤𑁂𑀯𑀸𑀦𑀁 𑀲𑀫𑀢𑀺𑀓𑁆𑀓𑀫𑀸𑀬𑀸𑀢𑀺 𑀲𑁄𑀓𑀸𑀦𑀜𑁆𑀘 𑀧𑀭𑀺𑀤𑁂𑀯𑀸𑀦𑀜𑁆𑀘 𑀲𑀫𑀢𑀺𑀓𑁆𑀓𑀫𑀢𑁆𑀣𑀸𑀬. 𑀅𑀢𑁆𑀣𑀗𑁆𑀕𑀫𑀸𑀬𑀸𑀢𑀺 𑀅𑀢𑁆𑀣𑀁 𑀕𑀫𑀦𑀢𑁆𑀣𑀸𑀬. 𑀜𑀸𑀬𑀲𑁆𑀲 𑀅𑀥𑀺𑀕𑀫𑀸𑀬𑀸𑀢𑀺 𑀲𑀳𑀯𑀺𑀧𑀲𑁆𑀲𑀦𑀓𑀲𑁆𑀲 𑀫𑀕𑁆𑀕𑀲𑁆𑀲 𑀅𑀥𑀺𑀕𑀫𑀦𑀢𑁆𑀣𑀸𑀬. 𑀦𑀺𑀩𑁆𑀩𑀸𑀦𑀲𑁆𑀲 𑀲𑀘𑁆𑀙𑀺𑀓𑀺𑀭𑀺𑀬𑀸𑀬𑀸𑀢𑀺 𑀅𑀧𑀘𑁆𑀘𑀬𑀧𑀭𑀺𑀦𑀺𑀩𑁆𑀩𑀸𑀦𑀲𑁆𑀲 𑀧𑀘𑁆𑀘𑀓𑁆𑀔𑀓𑀺𑀭𑀺𑀬𑀢𑁆𑀣𑀸𑀬.

𑀲𑀩𑁆𑀩𑀲𑁄𑀢𑀺 𑀲𑀩𑁆𑀩𑀸𑀓𑀸𑀭𑁂𑀦. 𑀆𑀓𑀸𑀲𑀲𑀫𑁂𑀦𑀸𑀢𑀺 𑀅𑀮𑀕𑁆𑀕𑀦𑀝𑁆𑀞𑁂𑀦 𑀘𑁂𑀯 𑀅𑀧𑀮𑀺𑀩𑀼𑀤𑁆𑀥𑀝𑁆𑀞𑁂𑀦 𑀘 𑀆𑀓𑀸𑀲𑀲𑀤𑀺𑀲𑁂𑀦. 𑀯𑀺𑀧𑀼𑀮𑁂𑀦𑀸𑀢𑀺 𑀦 𑀧𑀭𑀺𑀢𑁆𑀢𑀓𑁂𑀦. 𑀫𑀳𑀕𑁆𑀕𑀢𑁂𑀦𑀸𑀢𑀺 𑀫𑀳𑀦𑁆𑀢𑀪𑀸𑀯𑀁 𑀕𑀢𑁂𑀦, 𑀫𑀳𑀦𑁆𑀢𑁂𑀳𑀺 𑀯𑀸 𑀅𑀭𑀺𑀬𑀲𑀸𑀯𑀓𑁂𑀳𑀺 𑀕𑀢𑁂𑀦, 𑀧𑀝𑀺𑀧𑀦𑁆𑀦𑁂𑀦𑀸𑀢𑀺 𑀅𑀢𑁆𑀣𑁄. 𑀅𑀧𑁆𑀧𑀫𑀸𑀡𑁂𑀦𑀸𑀢𑀺 𑀨𑀭𑀡𑀅𑀧𑁆𑀧𑀫𑀸𑀡𑀢𑀸𑀬 𑀅𑀧𑁆𑀧𑀫𑀸𑀡𑁂𑀦. 𑀅𑀯𑁂𑀭𑁂𑀦𑀸𑀢𑀺 𑀅𑀓𑀼𑀲𑀮𑀯𑁂𑀭𑀧𑀼𑀕𑁆𑀕𑀮𑀯𑁂𑀭𑀭𑀳𑀺𑀢𑁂𑀦. 𑀅𑀩𑁆𑀬𑀸𑀧𑀚𑁆𑀛𑁂𑀦𑀸𑀢𑀺 𑀓𑁄𑀥𑀤𑀼𑀓𑁆𑀔𑀯𑀚𑁆𑀚𑀺𑀢𑁂𑀦. 𑀲𑀩𑁆𑀩𑀫𑁂𑀢𑀁 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺𑀘𑀺𑀢𑁆𑀢𑀫𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀧𑀭𑀢𑁄𑀧𑀺 𑀏𑀲𑁂𑀯 𑀦𑀬𑁄. 𑀯𑀺𑀲𑀼𑀤𑁆𑀥𑀺𑀥𑀫𑁆𑀫𑀸𑀢𑀺 𑀯𑀺𑀲𑀼𑀚𑁆𑀛𑀦𑀲𑀪𑀸𑀯𑀸. 𑀇𑀫𑀲𑁆𑀫𑀺𑀫𑁆𑀧𑀺 𑀲𑀼𑀢𑁆𑀢𑁂 𑀙 𑀅𑀦𑀼𑀲𑁆𑀲𑀢𑀺𑀝𑁆𑀞𑀸𑀦𑀸𑀦𑀺 𑀫𑀺𑀲𑁆𑀲𑀓𑀸𑀦𑁂𑀯 𑀓𑀣𑀺𑀢𑀸𑀦𑀻𑀢𑀺.

𑁭. 𑀧𑀞𑀫𑀲𑀫𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁭. 𑀲𑀢𑁆𑀢𑀫𑁂 𑀫𑀦𑁄𑀪𑀸𑀯𑀦𑀻𑀬𑀲𑁆𑀲𑀸𑀢𑀺 𑀏𑀢𑁆𑀣 𑀫𑀦𑀁 𑀪𑀸𑀯𑁂𑀢𑀺 𑀯𑀟𑁆𑀠𑁂𑀢𑀻𑀢𑀺 𑀫𑀦𑁄𑀪𑀸𑀯𑀦𑀻𑀬𑁄. 𑀤𑀲𑁆𑀲𑀦𑀸𑀬𑀸𑀢𑀺 𑀤𑀲𑁆𑀲𑀦𑀢𑁆𑀣𑀁. 𑀦𑀺𑀲𑁆𑀲𑀭𑀡𑀦𑁆𑀢𑀺 𑀦𑀺𑀕𑁆𑀕𑀫𑀦𑀁 𑀯𑀽𑀧𑀲𑀫𑀦𑀁. 𑀥𑀫𑁆𑀫𑀁 𑀤𑁂𑀲𑁂𑀢𑀻𑀢𑀺 𑀓𑀸𑀫𑀭𑀸𑀕𑀧𑁆𑀧𑀚𑀳𑀦𑀢𑁆𑀣𑀸𑀬 𑀅𑀲𑀼𑀪𑀓𑀫𑁆𑀫𑀝𑁆𑀞𑀸𑀦𑀁 𑀓𑀣𑁂𑀢𑀺. 𑀤𑀼𑀢𑀺𑀬𑀯𑀸𑀭𑀸𑀤𑀻𑀲𑀼 𑀩𑁆𑀬𑀸𑀧𑀸𑀤𑀧𑁆𑀧𑀳𑀸𑀦𑀸𑀬 𑀫𑁂𑀢𑁆𑀢𑀸𑀓𑀫𑁆𑀫𑀝𑁆𑀞𑀸𑀦𑀁, 𑀣𑀺𑀦𑀫𑀺𑀤𑁆𑀥𑀧𑁆𑀧𑀳𑀸𑀦𑀸𑀬 𑀣𑀺𑀦𑀫𑀺𑀤𑁆𑀥𑀯𑀺𑀦𑁄𑀤𑀦𑀓𑀫𑁆𑀫𑀝𑁆𑀞𑀸𑀦𑀁, 𑀆𑀮𑁄𑀓𑀲𑀜𑁆𑀜𑀁 𑀯𑀸 𑀯𑀻𑀭𑀺𑀬𑀸𑀭𑀫𑁆𑀪𑀯𑀢𑁆𑀣𑀼𑀆𑀤𑀻𑀦𑀁 𑀯𑀸 𑀅𑀜𑁆𑀜𑀢𑀭𑀁, 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀧𑁆𑀧𑀳𑀸𑀦𑀸𑀬 𑀲𑀫𑀣𑀓𑀫𑁆𑀫𑀝𑁆𑀞𑀸𑀦𑀁, 𑀯𑀺𑀘𑀺𑀓𑀺𑀘𑁆𑀙𑀸𑀧𑀳𑀸𑀦𑀸𑀬 𑀢𑀺𑀡𑁆𑀡𑀁 𑀭𑀢𑀦𑀸𑀦𑀁 𑀕𑀼𑀡𑀓𑀣𑀁 𑀓𑀣𑁂𑀦𑁆𑀢𑁄 𑀥𑀫𑁆𑀫𑀁 𑀤𑁂𑀲𑁂𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀆𑀕𑀫𑁆𑀫𑀸𑀢𑀺 𑀆𑀭𑀩𑁆𑀪. 𑀫𑀦𑀲𑀺𑀓𑀭𑁄𑀢𑁄𑀢𑀺 𑀆𑀭𑀫𑁆𑀫𑀡𑀯𑀲𑁂𑀦 𑀘𑀺𑀢𑁆𑀢𑁂 𑀓𑀭𑁄𑀦𑁆𑀢𑀲𑁆𑀲. 𑀅𑀦𑀦𑁆𑀢𑀭𑀸 𑀆𑀲𑀯𑀸𑀦𑀁 𑀔𑀬𑁄 𑀳𑁄𑀢𑀻𑀢𑀺 𑀅𑀦𑀦𑁆𑀢𑀭𑀸𑀬𑁂𑀦 𑀆𑀲𑀯𑀸𑀦𑀁 𑀔𑀬𑁄 𑀳𑁄𑀢𑀺.

𑁮. 𑀤𑀼𑀢𑀺𑀬𑀲𑀫𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁮. 𑀅𑀝𑁆𑀞𑀫𑁂 𑀫𑀡𑁆𑀟𑀮𑀫𑀸𑀴𑁂𑀢𑀺 𑀪𑁄𑀚𑀦𑀲𑀸𑀮𑀸𑀬. 𑀘𑀸𑀭𑀺𑀢𑁆𑀢𑀓𑀺𑀮𑀫𑀣𑁄𑀢𑀺 𑀧𑀺𑀡𑁆𑀟𑀧𑀸𑀢𑀘𑀭𑀺𑀬𑀸𑀬 𑀉𑀧𑁆𑀧𑀦𑁆𑀦𑀓𑀺𑀮𑀫𑀣𑁄. 𑀪𑀢𑁆𑀢𑀓𑀺𑀮𑀫𑀣𑁄𑀢𑀺 𑀪𑀢𑁆𑀢𑀤𑀭𑀣𑁄. 𑀯𑀺𑀳𑀸𑀭𑀧𑀘𑁆𑀙𑀸𑀬𑀸𑀬𑀦𑁆𑀢𑀺 𑀯𑀺𑀳𑀸𑀭𑀧𑀘𑁆𑀘𑀦𑁆𑀢𑁂 𑀙𑀸𑀬𑀸𑀬. 𑀬𑀤𑁂𑀯𑀲𑁆𑀲 𑀤𑀺𑀯𑀸 𑀲𑀫𑀸𑀥𑀺𑀦𑀺𑀫𑀺𑀢𑁆𑀢𑀁 𑀫𑀦𑀲𑀺𑀓𑀢𑀁 𑀳𑁄𑀢𑀻𑀢𑀺 𑀬𑀁 𑀏𑀯 𑀢𑀲𑁆𑀲 𑀢𑀢𑁄 𑀧𑀼𑀭𑀺𑀫𑀤𑀺𑀯𑀲𑀪𑀸𑀕𑁂 𑀲𑀫𑀣𑀦𑀺𑀫𑀺𑀢𑁆𑀢𑀁 𑀘𑀺𑀢𑁆𑀢𑁂 𑀓𑀢𑀁 𑀳𑁄𑀢𑀺. 𑀢𑀤𑁂𑀯𑀲𑁆𑀲 𑀢𑀲𑁆𑀫𑀺𑀁 𑀲𑀫𑀬𑁂 𑀲𑀫𑀼𑀤𑀸𑀘𑀭𑀢𑀻𑀢𑀺 𑀢𑀁𑀬𑁂𑀯 𑀏𑀢𑀲𑁆𑀲 𑀢𑀲𑁆𑀫𑀺𑀁 𑀲𑀫𑀬𑁂 𑀤𑀺𑀯𑀸𑀯𑀺𑀳𑀸𑀭𑁂 𑀦𑀺𑀲𑀺𑀦𑁆𑀦𑀲𑁆𑀲 𑀫𑀦𑁄𑀤𑁆𑀯𑀸𑀭𑁂 𑀲𑀜𑁆𑀘𑀭𑀢𑀺. 𑀑𑀚𑀝𑁆𑀞𑀸𑀬𑀻𑀢𑀺 𑀑𑀚𑀸𑀬 𑀞𑀺𑀢𑁄 𑀧𑀢𑀺𑀝𑁆𑀞𑀺𑀢𑁄. 𑀨𑀸𑀲𑀼𑀓𑀲𑁆𑀲 𑀳𑁄𑀢𑀻𑀢𑀺 𑀨𑀸𑀲𑀼𑀓𑀁 𑀅𑀲𑁆𑀲 𑀳𑁄𑀢𑀺. 𑀲𑀫𑁆𑀫𑀼𑀔𑀸𑀢𑀺 𑀓𑀣𑁂𑀦𑁆𑀢𑀲𑁆𑀲 𑀲𑀫𑁆𑀫𑀼𑀔𑀝𑁆𑀞𑀸𑀦𑁂. 𑀲𑀼𑀢𑀦𑁆𑀢𑀺 𑀲𑁄𑀢𑁂𑀦 𑀲𑀼𑀢𑀁. 𑀧𑀝𑀺𑀕𑁆𑀕𑀳𑀺𑀢𑀦𑁆𑀢𑀺 𑀘𑀺𑀢𑁆𑀢𑁂𑀦 𑀧𑀝𑀺𑀕𑁆𑀕𑀳𑀺𑀢𑀁.

𑁯. 𑀉𑀤𑀸𑀬𑀻𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁯. 𑀦𑀯𑀫𑁂 𑀉𑀤𑀸𑀬𑀺𑀦𑁆𑀢𑀺 𑀮𑀸𑀴𑀼𑀤𑀸𑀬𑀺𑀢𑁆𑀣𑁂𑀭𑀁. 𑀲𑀼𑀡𑁄𑀫𑀳𑀁, 𑀆𑀯𑀼𑀲𑁄𑀢𑀺, 𑀆𑀯𑀼𑀲𑁄, 𑀦𑀸𑀳𑀁 𑀩𑀥𑀺𑀭𑁄, 𑀲𑀼𑀡𑀸𑀫𑀺 𑀪𑀕𑀯𑀢𑁄 𑀯𑀘𑀦𑀁, 𑀧𑀜𑁆𑀳𑀁 𑀧𑀦 𑀉𑀧𑀧𑀭𑀺𑀓𑁆𑀔𑀸𑀫𑀻𑀢𑀺. 𑀅𑀥𑀺𑀘𑀺𑀢𑁆𑀢𑀦𑁆𑀢𑀺 𑀲𑀫𑀸𑀥𑀺𑀯𑀺𑀧𑀲𑁆𑀲𑀦𑀸𑀘𑀺𑀢𑁆𑀢𑀁. 𑀇𑀤𑀁, 𑀪𑀦𑁆𑀢𑁂, 𑀅𑀦𑀼𑀲𑁆𑀲𑀢𑀺𑀝𑁆𑀞𑀸𑀦𑀦𑁆𑀢𑀺 𑀇𑀤𑀁 𑀛𑀸𑀦𑀢𑁆𑀢𑀬𑀲𑀗𑁆𑀔𑀸𑀢𑀁 𑀅𑀦𑀼𑀲𑁆𑀲𑀢𑀺𑀓𑀸𑀭𑀡𑀁. 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀸𑀬 𑀲𑀁𑀯𑀢𑁆𑀢𑀢𑀻𑀢𑀺 𑀇𑀫𑀲𑁆𑀫𑀺𑀁𑀬𑁂𑀯 𑀅𑀢𑁆𑀢𑀪𑀸𑀯𑁂 𑀲𑀼𑀔𑀯𑀺𑀳𑀸𑀭𑀢𑁆𑀣𑀸𑀬 𑀧𑀯𑀢𑁆𑀢𑀢𑀺. 𑀆𑀮𑁄𑀓𑀲𑀜𑁆𑀜𑀦𑁆𑀢𑀺 𑀆𑀮𑁄𑀓𑀦𑀺𑀫𑀺𑀢𑁆𑀢𑁂 𑀉𑀧𑁆𑀧𑀦𑁆𑀦𑀲𑀜𑁆𑀜𑀁. 𑀤𑀺𑀯𑀸 𑀲𑀜𑁆𑀜𑀁 𑀅𑀥𑀺𑀝𑁆𑀞𑀸𑀢𑀻𑀢𑀺 𑀤𑀺𑀯𑀸𑀢𑀺 𑀲𑀜𑁆𑀜𑀁 𑀞𑀧𑁂𑀢𑀺. 𑀬𑀣𑀸 𑀤𑀺𑀯𑀸 𑀢𑀣𑀸 𑀭𑀢𑁆𑀢𑀺𑀦𑁆𑀢𑀺 𑀬𑀣𑀸𑀦𑁂𑀦 𑀤𑀺𑀯𑀸 𑀆𑀮𑁄𑀓𑀲𑀜𑁆𑀜𑀸 𑀫𑀦𑀲𑀺𑀓𑀢𑀸, 𑀭𑀢𑁆𑀢𑀺𑀫𑁆𑀧𑀺 𑀢𑀣𑁂𑀯 𑀢𑀁 𑀫𑀦𑀲𑀺 𑀓𑀭𑁄𑀢𑀺. 𑀬𑀣𑀸 𑀭𑀢𑁆𑀢𑀺𑀁 𑀢𑀣𑀸 𑀤𑀺𑀯𑀸𑀢𑀺 𑀬𑀣𑀸 𑀯𑀸𑀦𑁂𑀦 𑀭𑀢𑁆𑀢𑀺𑀁 𑀆𑀮𑁄𑀓𑀲𑀜𑁆𑀜𑀸 𑀫𑀦𑀲𑀺𑀓𑀢𑀸, 𑀤𑀺𑀯𑀸𑀧𑀺 𑀢𑀁 𑀢𑀣𑁂𑀯 𑀫𑀦𑀲𑀺 𑀓𑀭𑁄𑀢𑀺. 𑀯𑀺𑀯𑀝𑁂𑀦𑀸𑀢𑀺 𑀧𑀸𑀓𑀝𑁂𑀦. 𑀅𑀧𑀭𑀺𑀬𑁄𑀦𑀤𑁆𑀥𑁂𑀦𑀸𑀢𑀺 𑀦𑀻𑀯𑀭𑀡𑁂𑀳𑀺 𑀅𑀦𑁄𑀦𑀤𑁆𑀥𑁂𑀦. 𑀲𑀧𑁆𑀧𑀪𑀸𑀲𑀁 𑀘𑀺𑀢𑁆𑀢𑀁 𑀪𑀸𑀯𑁂𑀢𑀻𑀢𑀺 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀢𑁆𑀣𑀸𑀬 𑀲𑀳𑁄𑀪𑀸𑀲𑀓𑀁 𑀘𑀺𑀢𑁆𑀢𑀁 𑀩𑁆𑀭𑀽𑀳𑁂𑀢𑀺 𑀯𑀟𑁆𑀠𑁂𑀢𑀺. 𑀬𑀁 𑀧𑀦 ‘‘𑀆𑀮𑁄𑀓𑀲𑀜𑁆𑀜𑀁 𑀫𑀦𑀲𑀺 𑀓𑀭𑁄𑀢𑀻’’𑀢𑀺 𑀯𑀼𑀢𑁆𑀢𑀁, 𑀢𑀁 𑀣𑀺𑀦𑀫𑀺𑀤𑁆𑀥𑀯𑀺𑀦𑁄𑀤𑀦𑀸𑀮𑁄𑀓𑀲𑀜𑁆𑀜𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀦 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀸𑀮𑁄𑀓𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀜𑀸𑀡𑀤𑀲𑁆𑀲𑀦𑀧𑁆𑀧𑀝𑀺𑀮𑀸𑀪𑀸𑀬𑀸𑀢𑀺 𑀤𑀺𑀩𑁆𑀩𑀘𑀓𑁆𑀔𑀼𑀲𑀗𑁆𑀔𑀸𑀢𑀲𑁆𑀲 𑀜𑀸𑀡𑀤𑀲𑁆𑀲𑀦𑀲𑁆𑀲 𑀧𑀝𑀺𑀮𑀸𑀪𑀸𑀬.

𑀇𑀫𑀫𑁂𑀯 𑀓𑀸𑀬𑀦𑁆𑀢𑀺𑀆𑀤𑀻𑀲𑀼 𑀬𑀁 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸, 𑀢𑀁 𑀲𑀩𑁆𑀩𑀁 𑀲𑀩𑁆𑀩𑀸𑀓𑀸𑀭𑁂𑀦 𑀯𑀺𑀢𑁆𑀣𑀸𑀭𑀢𑁄 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀓𑀸𑀬𑀕𑀢𑀸𑀲𑀢𑀺𑀓𑀫𑁆𑀫𑀝𑁆𑀞𑀸𑀦𑁂 𑀯𑀼𑀢𑁆𑀢𑀁. 𑀓𑀸𑀫𑀭𑀸𑀕𑀧𑁆𑀧𑀳𑀸𑀦𑀸𑀬𑀸𑀢𑀺 𑀧𑀜𑁆𑀘𑀓𑀸𑀫𑀕𑀼𑀡𑀺𑀓𑀲𑁆𑀲 𑀭𑀸𑀕𑀲𑁆𑀲 𑀧𑀳𑀸𑀦𑀢𑁆𑀣𑀸𑀬. 𑀲𑁂𑀬𑁆𑀬𑀣𑀸𑀧𑀺 𑀧𑀲𑁆𑀲𑁂𑀬𑁆𑀬𑀸𑀢𑀺 𑀬𑀣𑀸 𑀧𑀲𑁆𑀲𑁂𑀬𑁆𑀬. 𑀲𑀭𑀻𑀭𑀦𑁆𑀢𑀺 𑀫𑀢𑀲𑀭𑀻𑀭𑀁. 𑀲𑀺𑀯𑀣𑀺𑀓𑀸𑀬 𑀙𑀟𑁆𑀟𑀺𑀢𑀦𑁆𑀢𑀺 𑀲𑀼𑀲𑀸𑀦𑁂 𑀅𑀧𑀯𑀺𑀤𑁆𑀥𑀁. 𑀏𑀓𑀸𑀳𑀁 𑀫𑀢𑀲𑁆𑀲 𑀅𑀲𑁆𑀲𑀸𑀢𑀺 𑀏𑀓𑀸𑀳𑀫𑀢𑀁. 𑀤𑁆𑀯𑀻𑀳𑀁 𑀫𑀢𑀲𑁆𑀲 𑀅𑀲𑁆𑀲𑀸𑀢𑀺 𑀤𑁆𑀯𑀻𑀳𑀫𑀢𑀁. 𑀢𑀻𑀳𑀁 𑀫𑀢𑀲𑁆𑀲 𑀅𑀲𑁆𑀲𑀸𑀢𑀺 𑀢𑀻𑀳𑀫𑀢𑀁. 𑀪𑀲𑁆𑀢𑀸 𑀯𑀺𑀬 𑀯𑀸𑀬𑀼𑀦𑀸 𑀉𑀤𑁆𑀥𑀁 𑀚𑀻𑀯𑀺𑀢𑀧𑀭𑀺𑀬𑀸𑀤𑀸𑀦𑀸 𑀬𑀣𑀸𑀦𑀼𑀓𑁆𑀓𑀫𑀁 𑀲𑀫𑀼𑀕𑁆𑀕𑀢𑁂𑀦 𑀲𑀽𑀦𑀪𑀸𑀯𑁂𑀦 𑀥𑀼𑀫𑀸𑀢𑀢𑁆𑀢𑀸 𑀉𑀤𑁆𑀥𑀼𑀫𑀸𑀢𑀁, 𑀉𑀤𑁆𑀥𑀼𑀫𑀸𑀢𑀫𑁂𑀯 𑀉𑀤𑁆𑀥𑀼𑀫𑀸𑀢𑀓𑀁. 𑀧𑀝𑀺𑀓𑀽𑀮𑀢𑁆𑀢𑀸 𑀯𑀸 𑀓𑀼𑀘𑁆𑀙𑀺𑀢𑀁 𑀉𑀤𑁆𑀥𑀼𑀫𑀸𑀢𑀦𑁆𑀢𑀺 𑀉𑀤𑁆𑀥𑀼𑀫𑀸𑀢𑀓𑀁. 𑀯𑀺𑀦𑀻𑀮𑀁 𑀯𑀼𑀘𑁆𑀘𑀢𑀺 𑀯𑀺𑀧𑀭𑀺𑀪𑀺𑀦𑁆𑀦𑀯𑀡𑁆𑀡𑀁, 𑀯𑀺𑀦𑀻𑀮𑀫𑁂𑀯 𑀯𑀺𑀦𑀻𑀮𑀓𑀁. 𑀧𑀝𑀺𑀓𑀽𑀮𑀢𑁆𑀢𑀸 𑀯𑀸 𑀓𑀼𑀘𑁆𑀙𑀺𑀢𑀁 𑀯𑀺𑀦𑀻𑀮𑀦𑁆𑀢𑀺 𑀯𑀺𑀦𑀻𑀮𑀓𑀁. 𑀫𑀁𑀲𑀼𑀲𑁆𑀲𑀤𑀝𑁆𑀞𑀸𑀦𑁂𑀲𑀼 𑀭𑀢𑁆𑀢𑀯𑀡𑁆𑀡𑀲𑁆𑀲 𑀧𑀼𑀩𑁆𑀩𑀲𑀦𑁆𑀦𑀺𑀘𑀬𑀝𑁆𑀞𑀸𑀦𑁂𑀲𑀼 𑀲𑁂𑀢𑀯𑀡𑁆𑀡𑀲𑁆𑀲 𑀬𑁂𑀪𑀼𑀬𑁆𑀬𑁂𑀦 𑀘 𑀦𑀻𑀮𑀯𑀡𑁆𑀡𑀲𑁆𑀲 𑀦𑀻𑀮𑀝𑁆𑀞𑀸𑀦𑁂 𑀦𑀻𑀮𑀲𑀸𑀝𑀓𑀧𑀸𑀭𑀼𑀢𑀲𑁆𑀲𑁂𑀯 𑀙𑀯𑀲𑀭𑀻𑀭𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀧𑀭𑀺𑀪𑀺𑀦𑁆𑀦𑀝𑁆𑀞𑀸𑀦𑁂𑀳𑀺 𑀦𑀯𑀳𑀺 𑀯𑀸 𑀯𑀡𑀫𑀼𑀔𑁂𑀳𑀺 𑀯𑀺𑀲𑁆𑀲𑀦𑁆𑀤𑀫𑀸𑀦𑀁 𑀧𑀼𑀩𑁆𑀩𑀁 𑀯𑀺𑀧𑀼𑀩𑁆𑀩𑀁, 𑀯𑀺𑀧𑀼𑀩𑁆𑀩𑀫𑁂𑀯 𑀯𑀺𑀧𑀼𑀩𑁆𑀩𑀓𑀁. 𑀧𑀝𑀺𑀓𑀽𑀮𑀢𑁆𑀢𑀸 𑀯𑀸 𑀓𑀼𑀘𑁆𑀙𑀺𑀢𑀁 𑀯𑀺𑀧𑀼𑀩𑁆𑀩𑀦𑁆𑀢𑀺 𑀯𑀺𑀧𑀼𑀩𑁆𑀩𑀓𑀁. 𑀯𑀺𑀧𑀼𑀩𑁆𑀩𑀓𑀁 𑀚𑀸𑀢𑀁 𑀢𑀣𑀸𑀪𑀸𑀯𑀁 𑀕𑀢𑀦𑁆𑀢𑀺 𑀯𑀺𑀧𑀼𑀩𑁆𑀩𑀓𑀚𑀸𑀢𑀁.

𑀲𑁄 𑀇𑀫𑀫𑁂𑀯 𑀓𑀸𑀬𑀦𑁆𑀢𑀺 𑀲𑁄 𑀪𑀺𑀓𑁆𑀔𑀼 𑀇𑀫𑀁 𑀅𑀢𑁆𑀢𑀦𑁄 𑀓𑀸𑀬𑀁 𑀢𑁂𑀦 𑀓𑀸𑀬𑁂𑀦 𑀲𑀤𑁆𑀥𑀺𑀁 𑀜𑀸𑀡𑁂𑀦 𑀉𑀧𑀲𑀁𑀳𑀭𑀢𑀺 𑀉𑀧𑀦𑁂𑀢𑀺. 𑀓𑀣𑀁? 𑀅𑀬𑀫𑁆𑀧𑀺 𑀔𑁄 𑀓𑀸𑀬𑁄 𑀏𑀯𑀁𑀥𑀫𑁆𑀫𑁄 𑀏𑀯𑀁𑀪𑀸𑀯𑀻 𑀏𑀯𑀁𑀅𑀦𑀢𑀻𑀢𑁄𑀢𑀺. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀆𑀬𑀼 𑀉𑀲𑁆𑀫𑀸 𑀯𑀺𑀜𑁆𑀜𑀸𑀡𑀦𑁆𑀢𑀺 𑀇𑀫𑁂𑀲𑀁 𑀢𑀺𑀡𑁆𑀡𑀁 𑀥𑀫𑁆𑀫𑀸𑀦𑀁 𑀅𑀢𑁆𑀣𑀺𑀢𑀸𑀬 𑀅𑀬𑀁 𑀓𑀸𑀬𑁄 𑀞𑀸𑀦𑀕𑀫𑀦𑀸𑀤𑀺𑀔𑀫𑁄 𑀳𑁄𑀢𑀺, 𑀇𑀫𑁂𑀲𑀁 𑀧𑀦 𑀯𑀺𑀕𑀫𑀸 𑀅𑀬𑀫𑁆𑀧𑀺 𑀏𑀯𑀁𑀥𑀫𑁆𑀫𑁄 𑀏𑀯𑀁𑀧𑀽𑀢𑀺𑀓𑀲𑀪𑀸𑀯𑁄𑀬𑁂𑀯𑀸𑀢𑀺. 𑀏𑀯𑀁𑀪𑀸𑀯𑀻𑀢𑀺 𑀏𑀯𑀫𑁂𑀯𑀁 𑀉𑀤𑁆𑀥𑀼𑀫𑀸𑀢𑀸𑀤𑀺𑀪𑁂𑀤𑁄 𑀪𑀯𑀺𑀲𑁆𑀲𑀢𑀺. 𑀏𑀯𑀁 𑀅𑀦𑀢𑀻𑀢𑁄𑀢𑀺 𑀏𑀯𑀁 𑀉𑀤𑁆𑀥𑀼𑀫𑀸𑀢𑀸𑀤𑀺𑀪𑀸𑀯𑀁 𑀅𑀦𑀢𑀺𑀓𑁆𑀓𑀦𑁆𑀢𑁄.

𑀔𑀚𑁆𑀚𑀫𑀸𑀦𑀦𑁆𑀢𑀺 𑀉𑀤𑀭𑀸𑀤𑀻𑀲𑀼 𑀦𑀺𑀲𑀻𑀤𑀺𑀢𑁆𑀯𑀸 𑀉𑀤𑀭𑀫𑀁𑀲𑀑𑀝𑁆𑀞𑀫𑀁𑀲𑀅𑀓𑁆𑀔𑀺𑀓𑀫𑀁𑀲𑀸𑀤𑀻𑀦𑀺 𑀮𑀼𑀜𑁆𑀘𑀺𑀢𑁆𑀯𑀸 𑀮𑀼𑀜𑁆𑀘𑀺𑀢𑁆𑀯𑀸 𑀔𑀸𑀤𑀺𑀬𑀫𑀸𑀦𑀁. 𑀲𑀫𑀁𑀲𑀮𑁄𑀳𑀺𑀢𑀦𑁆𑀢𑀺 𑀲𑁂𑀲𑀸𑀯𑀲𑁂𑀲𑀫𑀁𑀲𑀮𑁄𑀳𑀺𑀢𑀬𑀼𑀢𑁆𑀢𑀁. 𑀦𑀺𑀫𑁆𑀫𑀁𑀲𑀮𑁄𑀳𑀺𑀢𑀫𑀓𑁆𑀔𑀺𑀢𑀦𑁆𑀢𑀺 𑀫𑀁𑀲𑁂 𑀔𑀻𑀡𑁂𑀧𑀺 𑀮𑁄𑀳𑀺𑀢𑀁 𑀦 𑀲𑀼𑀲𑁆𑀲𑀢𑀺, 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋 ‘‘𑀦𑀺𑀫𑁆𑀫𑀁𑀲𑀮𑁄𑀳𑀺𑀢𑀫𑀓𑁆𑀔𑀺𑀢’’𑀦𑁆𑀢𑀺. 𑀅𑀜𑁆𑀜𑁂𑀦𑀸𑀢𑀺 𑀅𑀜𑁆𑀜𑁂𑀦 𑀤𑀺𑀲𑀸𑀪𑀸𑀕𑁂𑀦. 𑀳𑀢𑁆𑀣𑀝𑁆𑀞𑀺𑀓𑀦𑁆𑀢𑀺 𑀘𑀢𑀼𑀲𑀝𑁆𑀞𑀺𑀪𑁂𑀤𑀫𑁆𑀧𑀺 𑀳𑀢𑁆𑀣𑀝𑁆𑀞𑀺𑀓𑀁 𑀧𑀸𑀝𑀺𑀬𑁂𑀓𑁆𑀓𑀁 𑀧𑀸𑀝𑀺𑀬𑁂𑀓𑁆𑀓𑀁 𑀯𑀺𑀧𑁆𑀧𑀓𑀺𑀡𑁆𑀡𑀁. 𑀧𑀸𑀤𑀝𑁆𑀞𑀺𑀓𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀢𑁂𑀭𑁄𑀯𑀲𑁆𑀲𑀺𑀓𑀸𑀦𑀻𑀢𑀺 𑀅𑀢𑀺𑀓𑁆𑀓𑀦𑁆𑀢𑀲𑀁𑀯𑀘𑁆𑀙𑀭𑀸𑀦𑀺. 𑀧𑀽𑀢𑀻𑀦𑀻𑀢𑀺 𑀅𑀩𑁆𑀪𑁄𑀓𑀸𑀲𑁂 𑀞𑀺𑀢𑀸𑀦𑀺 𑀯𑀸𑀢𑀸𑀢𑀧𑀯𑀼𑀝𑁆𑀞𑀺𑀲𑀫𑁆𑀨𑀲𑁆𑀲𑁂𑀦 𑀢𑁂𑀭𑁄𑀯𑀲𑁆𑀲𑀺𑀓𑀸𑀦𑁂𑀯 𑀧𑀽𑀢𑀻𑀦𑀺 𑀳𑁄𑀦𑁆𑀢𑀺, 𑀅𑀦𑁆𑀢𑁄𑀪𑀽𑀫𑀺𑀕𑀢𑀸𑀦𑀺 𑀧𑀦 𑀘𑀺𑀭𑀢𑀭𑀁 𑀢𑀺𑀝𑁆𑀞𑀦𑁆𑀢𑀺. 𑀘𑀼𑀡𑁆𑀡𑀓𑀚𑀸𑀢𑀸𑀦𑀻𑀢𑀺 𑀘𑀼𑀡𑁆𑀡𑀯𑀺𑀘𑀼𑀡𑁆𑀡𑀁 𑀳𑀼𑀢𑁆𑀯𑀸 𑀯𑀺𑀧𑁆𑀧𑀓𑀺𑀡𑁆𑀡𑀸𑀦𑀺. 𑀲𑀩𑁆𑀩𑀢𑁆𑀣 𑀲𑁄 𑀇𑀫𑀫𑁂𑀯𑀸𑀢𑀺 𑀯𑀼𑀢𑁆𑀢𑀦𑀬𑁂𑀦 𑀔𑀚𑁆𑀚𑀫𑀸𑀦𑀸𑀤𑀻𑀦𑀁 𑀯𑀲𑁂𑀦 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸. 𑀅𑀲𑁆𑀫𑀺𑀫𑀸𑀦𑀲𑀫𑀼𑀕𑁆𑀖𑀸𑀢𑀸𑀬𑀸𑀢𑀺 𑀅𑀲𑁆𑀫𑀻𑀢𑀺 𑀧𑀯𑀢𑁆𑀢𑀲𑁆𑀲 𑀦𑀯𑀯𑀺𑀥𑀲𑁆𑀲 𑀫𑀸𑀦𑀲𑁆𑀲 𑀲𑀫𑀼𑀕𑁆𑀖𑀸𑀢𑀢𑁆𑀣𑀸𑀬. 𑀅𑀦𑁂𑀓𑀥𑀸𑀢𑀼𑀧𑀝𑀺𑀯𑁂𑀥𑀸𑀬𑀸𑀢𑀺 𑀅𑀦𑁂𑀓𑀥𑀸𑀢𑀽𑀦𑀁 𑀧𑀝𑀺𑀯𑀺𑀚𑁆𑀛𑀦𑀢𑁆𑀣𑀸𑀬. 𑀲𑀢𑁄𑀯 𑀅𑀪𑀺𑀓𑁆𑀓𑀫𑀢𑀻𑀢𑀺 𑀕𑀘𑁆𑀙𑀦𑁆𑀢𑁄 𑀲𑀢𑀺𑀧𑀜𑁆𑀜𑀸𑀳𑀺 𑀲𑀫𑀦𑁆𑀦𑀸𑀕𑀢𑁄𑀯 𑀕𑀘𑁆𑀙𑀢𑀺. 𑀲𑀢𑁄𑀯 𑀧𑀝𑀺𑀓𑁆𑀓𑀫𑀢𑀻𑀢𑀺 𑀧𑀝𑀺𑀦𑀺𑀯𑀢𑁆𑀢𑀦𑁆𑀢𑁄𑀧𑀺 𑀲𑀢𑀺𑀧𑀜𑁆𑀜𑀸𑀳𑀺 𑀲𑀫𑀦𑁆𑀦𑀸𑀕𑀢𑁄𑀯 𑀦𑀺𑀯𑀢𑁆𑀢𑀢𑀺. 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀲𑀢𑀺𑀲𑀫𑁆𑀧𑀚𑀜𑁆𑀜𑀸𑀬𑀸𑀢𑀺 𑀲𑀢𑀺𑀬𑀸 𑀘 𑀜𑀸𑀡𑀲𑁆𑀲 𑀘 𑀅𑀢𑁆𑀣𑀸𑀬. 𑀇𑀢𑀺 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀲𑀢𑀺𑀜𑀸𑀡𑀸𑀦𑀺 𑀫𑀺𑀲𑁆𑀲𑀓𑀸𑀦𑀺 𑀓𑀣𑀺𑀢𑀸𑀦𑀻𑀢𑀺.

𑁧𑁦. 𑀅𑀦𑀼𑀢𑁆𑀢𑀭𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁦. 𑀤𑀲𑀫𑁂 𑀉𑀘𑁆𑀘𑀸𑀯𑀘𑀦𑁆𑀢𑀺 𑀬𑀁 𑀓𑀺𑀜𑁆𑀘𑀺 𑀫𑀳𑀦𑁆𑀢𑀔𑀼𑀤𑁆𑀤𑀓𑀁, 𑀉𑀘𑁆𑀘𑀦𑀻𑀘𑀁 𑀯𑀸. 𑀳𑀻𑀦𑀦𑁆𑀢𑀺 𑀦𑀺𑀳𑀻𑀦𑀁. 𑀕𑀫𑁆𑀫𑀦𑁆𑀢𑀺 𑀕𑀸𑀫𑀯𑀸𑀲𑀺𑀓𑀸𑀦𑀁 𑀤𑀲𑁆𑀲𑀦𑀁. 𑀧𑁄𑀣𑀼𑀚𑁆𑀚𑀦𑀺𑀓𑀦𑁆𑀢𑀺 𑀧𑀼𑀣𑀼𑀚𑁆𑀚𑀦𑀸𑀦𑀁 𑀲𑀦𑁆𑀢𑀓𑀁. 𑀅𑀦𑀭𑀺𑀬𑀦𑁆𑀢𑀺 𑀦 𑀅𑀭𑀺𑀬𑀁 𑀦 𑀉𑀢𑁆𑀢𑀫𑀁 𑀦 𑀧𑀭𑀺𑀲𑀼𑀤𑁆𑀥𑀁. 𑀅𑀦𑀢𑁆𑀣𑀲𑀁𑀳𑀺𑀢𑀦𑁆𑀢𑀺 𑀦 𑀅𑀢𑁆𑀣𑀲𑀦𑁆𑀦𑀺𑀲𑁆𑀲𑀺𑀢𑀁. 𑀦 𑀦𑀺𑀩𑁆𑀩𑀺𑀤𑀸𑀬𑀸𑀢𑀺 𑀦 𑀯𑀝𑁆𑀝𑁂 𑀦𑀺𑀩𑁆𑀩𑀺𑀦𑁆𑀤𑀦𑀢𑁆𑀣𑀸𑀬. 𑀦 𑀯𑀺𑀭𑀸𑀕𑀸𑀬𑀸𑀢𑀺 𑀦 𑀭𑀸𑀕𑀸𑀤𑀻𑀦𑀁 𑀯𑀺𑀭𑀚𑁆𑀚𑀦𑀢𑁆𑀣𑀸𑀬. 𑀦 𑀦𑀺𑀭𑁄𑀥𑀸𑀬𑀸𑀢𑀺 𑀦 𑀭𑀸𑀕𑀸𑀤𑀻𑀦𑀁 𑀅𑀧𑁆𑀧𑀯𑀢𑁆𑀢𑀺𑀦𑀺𑀭𑁄𑀥𑀸𑀬. 𑀦 𑀉𑀧𑀲𑀫𑀸𑀬𑀸𑀢𑀺 𑀦 𑀭𑀸𑀕𑀸𑀤𑀻𑀦𑀁 𑀯𑀽𑀧𑀲𑀫𑀦𑀢𑁆𑀣𑀸𑀬. 𑀦 𑀅𑀪𑀺𑀜𑁆𑀜𑀸𑀬𑀸𑀢𑀺 𑀦 𑀅𑀪𑀺𑀚𑀸𑀦𑀦𑀢𑁆𑀣𑀸𑀬. 𑀦 𑀲𑀫𑁆𑀩𑁄𑀥𑀸𑀬𑀸𑀢𑀺 𑀦 𑀲𑀫𑁆𑀩𑁄𑀥𑀺𑀲𑀗𑁆𑀔𑀸𑀢𑀲𑁆𑀲 𑀘𑀢𑀼𑀫𑀕𑁆𑀕𑀜𑀸𑀡𑀲𑁆𑀲 𑀧𑀝𑀺𑀯𑀺𑀚𑁆𑀛𑀦𑀢𑁆𑀣𑀸𑀬. 𑀦 𑀦𑀺𑀩𑁆𑀩𑀸𑀦𑀸𑀬𑀸𑀢𑀺 𑀦 𑀦𑀺𑀩𑁆𑀩𑀸𑀦𑀲𑁆𑀲 𑀲𑀘𑁆𑀙𑀺𑀓𑀺𑀭𑀺𑀬𑀸𑀬.

𑀦𑀺𑀯𑀺𑀝𑁆𑀞𑀲𑀤𑁆𑀥𑁄𑀢𑀺 𑀧𑀢𑀺𑀝𑁆𑀞𑀺𑀢𑀲𑀤𑁆𑀥𑁄. 𑀦𑀺𑀯𑀺𑀝𑁆𑀞𑀧𑁂𑀫𑁄𑀢𑀺 𑀧𑀢𑀺𑀝𑁆𑀞𑀺𑀢𑀧𑁂𑀫𑁄. 𑀏𑀓𑀦𑁆𑀢𑀕𑀢𑁄𑀢𑀺 𑀏𑀓𑀦𑁆𑀢𑀁 𑀕𑀢𑁄, 𑀅𑀘𑀮𑀧𑁆𑀧𑀢𑁆𑀢𑁄𑀢𑀺 𑀅𑀢𑁆𑀣𑁄. 𑀅𑀪𑀺𑀧𑁆𑀧𑀲𑀦𑁆𑀦𑁄𑀢𑀺 𑀅𑀢𑀺𑀯𑀺𑀬 𑀧𑀲𑀦𑁆𑀦𑁄. 𑀏𑀢𑀤𑀸𑀦𑀼𑀢𑁆𑀢𑀭𑀺𑀬𑀦𑁆𑀢𑀺 𑀏𑀢𑀁 𑀅𑀦𑀼𑀢𑁆𑀢𑀭𑀁. 𑀳𑀢𑁆𑀣𑀺𑀲𑁆𑀫𑀺𑀫𑁆𑀧𑀺 𑀲𑀺𑀓𑁆𑀔𑀢𑀻𑀢𑀺 𑀳𑀢𑁆𑀣𑀺𑀦𑀺𑀫𑀺𑀢𑁆𑀢𑀁 𑀲𑀺𑀓𑁆𑀔𑀺𑀢𑀩𑁆𑀩𑀁 𑀳𑀢𑁆𑀣𑀺𑀲𑀺𑀧𑁆𑀧𑀁 𑀲𑀺𑀓𑁆𑀔𑀢𑀺. 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀉𑀘𑁆𑀘𑀸𑀯𑀘𑀦𑁆𑀢𑀺 𑀫𑀳𑀦𑁆𑀢𑀔𑀼𑀤𑁆𑀤𑀓𑀁 𑀲𑀺𑀧𑁆𑀧𑀁 𑀲𑀺𑀓𑁆𑀔𑀢𑀺.

𑀉𑀧𑀝𑁆𑀞𑀺𑀢𑀸 𑀧𑀸𑀭𑀺𑀘𑀭𑀺𑀬𑁂𑀢𑀺 𑀧𑀸𑀭𑀺𑀘𑀭𑀺𑀬𑀸𑀬 𑀧𑀘𑁆𑀘𑀼𑀧𑀝𑁆𑀞𑀺𑀢𑀸. 𑀪𑀸𑀯𑀬𑀦𑁆𑀢𑀺 𑀅𑀦𑀼𑀲𑁆𑀲𑀢𑀺𑀦𑁆𑀢𑀺 𑀅𑀦𑀼𑀢𑁆𑀢𑀭𑀁 𑀅𑀦𑀼𑀲𑁆𑀲𑀢𑀺𑀁 𑀪𑀸𑀯𑁂𑀦𑁆𑀢𑀺. 𑀯𑀺𑀯𑁂𑀓𑀧𑁆𑀧𑀝𑀺𑀲𑀁𑀬𑀼𑀢𑁆𑀢𑀦𑁆𑀢𑀺 𑀦𑀺𑀩𑁆𑀩𑀸𑀦𑀦𑀺𑀲𑁆𑀲𑀺𑀢𑀁 𑀓𑀢𑁆𑀯𑀸. 𑀔𑁂𑀫𑀦𑁆𑀢𑀺 𑀦𑀺𑀭𑀼𑀧𑀤𑁆𑀤𑀯𑀁. 𑀅𑀫𑀢𑀕𑀸𑀫𑀺𑀦𑀦𑁆𑀢𑀺 𑀦𑀺𑀩𑁆𑀩𑀸𑀦𑀕𑀸𑀫𑀺𑀦𑀁, 𑀅𑀭𑀺𑀬𑀫𑀕𑁆𑀕𑀁 𑀪𑀸𑀯𑁂𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀅𑀧𑁆𑀧𑀫𑀸𑀤𑁂 𑀧𑀫𑁄𑀤𑀺𑀢𑀸𑀢𑀺 𑀲𑀢𑀺𑀬𑀸 𑀅𑀯𑀺𑀧𑁆𑀧𑀯𑀸𑀲𑀲𑀗𑁆𑀔𑀸𑀢𑁂 𑀅𑀧𑁆𑀧𑀫𑀸𑀤𑁂 𑀆𑀫𑁄𑀤𑀺𑀢𑀸 𑀧𑀫𑁄𑀤𑀺𑀢𑀸. 𑀦𑀺𑀧𑀓𑀸𑀢𑀺 𑀦𑁂𑀧𑀓𑁆𑀓𑁂𑀦 𑀲𑀫𑀦𑁆𑀦𑀸𑀕𑀢𑀸. 𑀲𑀻𑀮𑀲𑀁𑀯𑀼𑀢𑀸𑀢𑀺 𑀲𑀻𑀮𑁂𑀦 𑀲𑀁𑀯𑀼𑀢𑀸 𑀧𑀺𑀳𑀺𑀢𑀸. 𑀢𑁂 𑀯𑁂 𑀓𑀸𑀮𑁂𑀦 𑀧𑀘𑁆𑀘𑁂𑀦𑁆𑀢𑀻𑀢𑀺 𑀢𑁂 𑀯𑁂 𑀬𑀼𑀢𑁆𑀢𑀧𑁆𑀧𑀬𑀼𑀢𑁆𑀢𑀓𑀸𑀮𑁂 𑀚𑀸𑀦𑀦𑁆𑀢𑀺. 𑀬𑀢𑁆𑀣 𑀤𑀼𑀓𑁆𑀔𑀁 𑀦𑀺𑀭𑀼𑀚𑁆𑀛𑀢𑀻𑀢𑀺 𑀬𑀲𑁆𑀫𑀺𑀁 𑀞𑀸𑀦𑁂 𑀲𑀓𑀮𑀁 𑀯𑀝𑁆𑀝𑀤𑀼𑀓𑁆𑀔𑀁 𑀦𑀺𑀭𑀼𑀚𑁆𑀛𑀢𑀺, 𑀢𑀁 𑀅𑀫𑀢𑀁 𑀫𑀳𑀸𑀦𑀺𑀩𑁆𑀩𑀸𑀦𑀁 𑀢𑁂 𑀪𑀺𑀓𑁆𑀔𑀽 𑀚𑀸𑀦𑀦𑁆𑀢𑀻𑀢𑀺. 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀙 𑀅𑀦𑀼𑀢𑁆𑀢𑀭𑀺𑀬𑀸𑀦𑀺 𑀫𑀺𑀲𑁆𑀲𑀓𑀸𑀦𑀺 𑀓𑀣𑀺𑀢𑀸𑀦𑀻𑀢𑀺.

𑀅𑀦𑀼𑀢𑁆𑀢𑀭𑀺𑀬𑀯𑀕𑁆𑀕𑁄 𑀢𑀢𑀺𑀬𑁄.

𑁪. 𑀤𑁂𑀯𑀢𑀸𑀯𑀕𑁆𑀕𑁄

𑁧. 𑀲𑁂𑀔𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁧. 𑀘𑀢𑀼𑀢𑁆𑀣𑀲𑁆𑀲 𑀧𑀞𑀫𑁂 𑀲𑁂𑀔𑀲𑁆𑀲𑀸𑀢𑀺 𑀲𑀢𑁆𑀢𑀯𑀺𑀥𑀲𑁆𑀲 𑀲𑁂𑀔𑀲𑁆𑀲. 𑀧𑀼𑀣𑀼𑀚𑁆𑀚𑀦𑁂 𑀧𑀦 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺. 𑀧𑀭𑀺𑀳𑀸𑀦𑀸𑀬𑀸𑀢𑀺 𑀉𑀧𑀭𑀽𑀧𑀭𑀺𑀕𑀼𑀡𑀧𑀭𑀺𑀳𑀸𑀦𑀸𑀬.

𑁨-𑁩. 𑀅𑀧𑀭𑀺𑀳𑀸𑀦𑀲𑀼𑀢𑁆𑀢𑀤𑁆𑀯𑀬𑀯𑀡𑁆𑀡𑀦𑀸

𑁩𑁨-𑁩𑁩. 𑀤𑀼𑀢𑀺𑀬𑁂 𑀲𑀢𑁆𑀣𑀼𑀕𑀸𑀭𑀯𑀢𑀸𑀢𑀺 𑀲𑀢𑁆𑀣𑀭𑀺 𑀕𑀭𑀼𑀪𑀸𑀯𑁄. 𑀥𑀫𑁆𑀫𑀕𑀸𑀭𑀯𑀢𑀸𑀢𑀺 𑀦𑀯𑀯𑀺𑀥𑁂 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁂 𑀕𑀭𑀼𑀪𑀸𑀯𑁄. 𑀲𑀗𑁆𑀖𑀕𑀸𑀭𑀯𑀢𑀸𑀢𑀺 𑀲𑀗𑁆𑀖𑁂 𑀕𑀭𑀼𑀪𑀸𑀯𑁄. 𑀲𑀺𑀓𑁆𑀔𑀸𑀕𑀸𑀭𑀯𑀢𑀸𑀢𑀺 𑀢𑀻𑀲𑀼 𑀲𑀺𑀓𑁆𑀔𑀸𑀲𑀼 𑀕𑀭𑀼𑀪𑀸𑀯𑁄. 𑀅𑀧𑁆𑀧𑀫𑀸𑀤𑀕𑀸𑀭𑀯𑀢𑀸𑀢𑀺 𑀅𑀧𑁆𑀧𑀫𑀸𑀤𑁂 𑀕𑀭𑀼𑀪𑀸𑀯𑁄. 𑀧𑀝𑀺𑀲𑀦𑁆𑀣𑀸𑀭𑀕𑀸𑀭𑀯𑀢𑀸𑀢𑀺 𑀥𑀫𑁆𑀫𑀸𑀫𑀺𑀲𑀯𑀲𑁂𑀦 𑀤𑀼𑀯𑀺𑀥𑁂 𑀧𑀝𑀺𑀲𑀦𑁆𑀣𑀸𑀭𑁂 𑀕𑀭𑀼𑀪𑀸𑀯𑁄. 𑀲𑀢𑁆𑀣𑀸 𑀕𑀭𑀼 𑀅𑀲𑁆𑀲𑀸𑀢𑀺 𑀲𑀢𑁆𑀣𑀼𑀕𑀭𑀼. 𑀥𑀫𑁆𑀫𑁄 𑀕𑀭𑀼 𑀅𑀲𑁆𑀲𑀸𑀢𑀺 𑀥𑀫𑁆𑀫𑀕𑀭𑀼. 𑀢𑀺𑀩𑁆𑀩𑀕𑀸𑀭𑀯𑁄𑀢𑀺 𑀩𑀳𑀮𑀕𑀸𑀭𑀯𑁄. 𑀧𑀝𑀺𑀲𑀦𑁆𑀣𑀸𑀭𑁂 𑀕𑀸𑀭𑀯𑁄 𑀅𑀲𑁆𑀲𑀸𑀢𑀺 𑀧𑀝𑀺𑀲𑀦𑁆𑀣𑀸𑀭𑀕𑀸𑀭𑀯𑁄. 𑀢𑀢𑀺𑀬𑁂 𑀲𑀧𑁆𑀧𑀢𑀺𑀲𑁆𑀲𑁄𑀢𑀺 𑀲𑀚𑁂𑀝𑁆𑀞𑀓𑁄 𑀲𑀕𑀸𑀭𑀯𑁄. 𑀳𑀺𑀭𑁄𑀢𑁆𑀢𑀧𑁆𑀧𑀁 𑀧𑀦𑁂𑀢𑁆𑀣 𑀫𑀺𑀲𑁆𑀲𑀓𑀁 𑀓𑀣𑀺𑀢𑀁.

𑁪. 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁪. 𑀘𑀢𑀼𑀢𑁆𑀣𑁂 𑀢𑀺𑀲𑁆𑀲𑁄 𑀦𑀸𑀫 𑀪𑀺𑀓𑁆𑀔𑀽𑀢𑀺 𑀣𑁂𑀭𑀲𑁆𑀲𑁂𑀯 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁄. 𑀫𑀳𑀺𑀤𑁆𑀥𑀺𑀓𑁄 𑀫𑀳𑀸𑀦𑀼𑀪𑀸𑀯𑁄𑀢𑀺 𑀇𑀚𑁆𑀛𑀦𑀝𑁆𑀞𑁂𑀦 𑀫𑀳𑀢𑀻 𑀇𑀤𑁆𑀥𑀺 𑀅𑀲𑁆𑀲𑀸𑀢𑀺 𑀫𑀳𑀺𑀤𑁆𑀥𑀺𑀓𑁄. 𑀅𑀦𑀼𑀨𑀭𑀡𑀝𑁆𑀞𑁂𑀦 𑀫𑀳𑀸 𑀆𑀦𑀼𑀪𑀸𑀯𑁄 𑀅𑀲𑁆𑀲𑀸𑀢𑀺 𑀫𑀳𑀸𑀦𑀼𑀪𑀸𑀯𑁄. 𑀘𑀺𑀭𑀲𑁆𑀲𑀁 𑀔𑁄, 𑀫𑀸𑀭𑀺𑀲 𑀫𑁄𑀕𑁆𑀕𑀮𑁆𑀮𑀸𑀦, 𑀇𑀫𑀁 𑀧𑀭𑀺𑀬𑀸𑀬𑀫𑀓𑀸𑀲𑀻𑀢𑀺 𑀏𑀯𑀭𑀽𑀧𑀁 𑀮𑁄𑀓𑁂 𑀧𑀓𑀢𑀺𑀬𑀸 𑀧𑀺𑀬𑀲𑀫𑀼𑀤𑀸𑀳𑀸𑀭𑀯𑀘𑀦𑀁 𑀳𑁄𑀢𑀺. 𑀮𑁄𑀓𑀺𑀬𑀸 𑀳𑀺 𑀘𑀺𑀭𑀲𑁆𑀲𑀁 𑀆𑀕𑀢𑀫𑁆𑀧𑀺 𑀅𑀦𑀸𑀕𑀢𑀧𑀼𑀩𑁆𑀩𑀫𑁆𑀧𑀺 𑀫𑀦𑀸𑀧𑀚𑀸𑀢𑀺𑀬𑀁 𑀆𑀕𑀢𑀁 𑀤𑀺𑀲𑁆𑀯𑀸 ‘‘𑀓𑀼𑀢𑁄 𑀪𑀯𑀁 𑀆𑀕𑀢𑁄, 𑀘𑀺𑀭𑀲𑁆𑀲𑀁 𑀪𑀯𑀁 𑀆𑀕𑀢𑁄, 𑀓𑀣𑀁 𑀢𑁂 𑀇𑀥𑀸𑀕𑀫𑀦𑀫𑀕𑁆𑀕𑁄 𑀜𑀸𑀢𑁄, 𑀓𑀺𑀁 𑀫𑀕𑁆𑀕𑀫𑀽𑀴𑁆𑀳𑁄𑀲𑀻’’𑀢𑀺𑀆𑀤𑀻𑀦𑀺 𑀯𑀤𑀦𑁆𑀢𑀺. 𑀅𑀬𑀁 𑀧𑀦 𑀆𑀕𑀢𑀧𑀼𑀩𑁆𑀩𑀢𑁆𑀢𑀸𑀬𑁂𑀯 𑀏𑀯𑀫𑀸𑀳. 𑀣𑁂𑀭𑁄 𑀳𑀺 𑀓𑀸𑀮𑁂𑀦 𑀓𑀸𑀮𑀁 𑀩𑁆𑀭𑀳𑁆𑀫𑀮𑁄𑀓𑀁 𑀕𑀘𑁆𑀙𑀢𑀺𑀬𑁂𑀯. 𑀢𑀢𑁆𑀣 𑀧𑀭𑀺𑀬𑀸𑀬𑀫𑀓𑀸𑀲𑀻𑀢𑀺 𑀯𑀸𑀭𑀁 𑀅𑀓𑀸𑀲𑀺. 𑀬𑀤𑀺𑀤𑀁 𑀇𑀥𑀸𑀕𑀫𑀦𑀸𑀬𑀸𑀢𑀺 𑀬𑁄 𑀅𑀬𑀁 𑀇𑀥𑀸𑀕𑀫𑀦𑀸𑀬 𑀯𑀸𑀭𑁄, 𑀢𑀁 𑀘𑀺𑀭𑀲𑁆𑀲𑀁 𑀅𑀓𑀸𑀲𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀇𑀤𑀫𑀸𑀲𑀦𑀁 𑀧𑀜𑁆𑀜𑀢𑁆𑀢𑀦𑁆𑀢𑀺 𑀫𑀳𑀸𑀭𑀳𑀁 𑀩𑁆𑀭𑀳𑁆𑀫𑀧𑀮𑁆𑀮𑀗𑁆𑀓𑀁 𑀧𑀜𑁆𑀜𑀸𑀧𑁂𑀢𑁆𑀯𑀸 𑀏𑀯𑀫𑀸𑀳. 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑁂𑀦𑀸𑀢𑀺 𑀅𑀥𑀺𑀕𑀢𑁂𑀦 𑀅𑀘𑀮𑁂𑀦 𑀫𑀕𑁆𑀕𑀧𑁆𑀧𑀲𑀸𑀤𑁂𑀦. 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀜𑀸𑀡𑀁 𑀓𑀣𑀺𑀢𑀁.

𑁫. 𑀯𑀺𑀚𑁆𑀚𑀸𑀪𑀸𑀕𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁫. 𑀧𑀜𑁆𑀘𑀫𑁂 𑀯𑀺𑀚𑁆𑀚𑀸𑀪𑀸𑀕𑀺𑀬𑀸𑀢𑀺 𑀯𑀺𑀚𑁆𑀚𑀸𑀓𑁄𑀝𑁆𑀞𑀸𑀲𑀺𑀓𑀸. 𑀅𑀦𑀺𑀘𑁆𑀘𑀲𑀜𑁆𑀜𑀸𑀢𑀺 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑁂 𑀉𑀧𑁆𑀧𑀦𑁆𑀦𑀲𑀜𑁆𑀜𑀸. 𑀅𑀦𑀺𑀘𑁆𑀘𑁂 𑀤𑀼𑀓𑁆𑀔𑀲𑀜𑁆𑀜𑀸𑀢𑀺 𑀤𑀼𑀓𑁆𑀔𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑁂 𑀉𑀧𑁆𑀧𑀦𑁆𑀦𑀲𑀜𑁆𑀜𑀸. 𑀤𑀼𑀓𑁆𑀔𑁂 𑀅𑀦𑀢𑁆𑀢𑀲𑀜𑁆𑀜𑀸𑀢𑀺 𑀅𑀦𑀢𑁆𑀢𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑁂 𑀉𑀧𑁆𑀧𑀦𑁆𑀦𑀲𑀜𑁆𑀜𑀸. 𑀧𑀳𑀸𑀦𑀲𑀜𑁆𑀜𑀸𑀢𑀺 𑀧𑀳𑀸𑀦𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑁂 𑀉𑀧𑁆𑀧𑀦𑁆𑀦𑀲𑀜𑁆𑀜𑀸. 𑀯𑀺𑀭𑀸𑀕𑀲𑀜𑁆𑀜𑀸𑀢𑀺 𑀯𑀺𑀭𑀸𑀕𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑁂 𑀉𑀧𑁆𑀧𑀦𑁆𑀦𑀲𑀜𑁆𑀜𑀸. 𑀦𑀺𑀭𑁄𑀥𑀲𑀜𑁆𑀜𑀸𑀢𑀺 𑀦𑀺𑀭𑁄𑀥𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑁂 𑀉𑀧𑁆𑀧𑀦𑁆𑀦𑀲𑀜𑁆𑀜𑀸.

𑁬. 𑀯𑀺𑀯𑀸𑀤𑀫𑀽𑀮𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁬. 𑀙𑀝𑁆𑀞𑁂 𑀯𑀺𑀯𑀸𑀤𑀫𑀽𑀮𑀸𑀦𑀻𑀢𑀺 𑀯𑀺𑀯𑀸𑀤𑀲𑁆𑀲 𑀫𑀽𑀮𑀸𑀦𑀺. 𑀓𑁄𑀥𑀦𑁄𑀢𑀺 𑀓𑀼𑀚𑁆𑀛𑀦𑀮𑀓𑁆𑀔𑀡𑁂𑀦 𑀓𑁄𑀥𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀉𑀧𑀦𑀸𑀳𑀻𑀢𑀺 𑀯𑁂𑀭𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑀮𑀓𑁆𑀔𑀡𑁂𑀦 𑀉𑀧𑀦𑀸𑀳𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀤𑁂𑀯𑀫𑀦𑀼𑀲𑁆𑀲𑀸𑀦𑀦𑁆𑀢𑀺 𑀤𑁆𑀯𑀺𑀦𑁆𑀦𑀁 𑀪𑀺𑀓𑁆𑀔𑀽𑀦𑀁 𑀯𑀺𑀯𑀸𑀤𑁄 𑀓𑀣𑀁 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀲𑀁𑀯𑀢𑁆𑀢𑀢𑀺? 𑀓𑁄𑀲𑀫𑁆𑀩𑀓𑀓𑁆𑀔𑀦𑁆𑀥𑀓𑁂 𑀯𑀺𑀬 𑀤𑁆𑀯𑀻𑀲𑀼 𑀪𑀺𑀓𑁆𑀔𑀽𑀲𑀼 𑀯𑀺𑀯𑀸𑀤𑀁 𑀆𑀧𑀦𑁆𑀦𑁂𑀲𑀼 𑀢𑀲𑁆𑀫𑀺𑀁 𑀯𑀺𑀳𑀸𑀭𑁂 𑀢𑁂𑀲𑀁 𑀅𑀦𑁆𑀢𑁂𑀯𑀸𑀲𑀺𑀓𑀸 𑀯𑀺𑀯𑀤𑀦𑁆𑀢𑀺, 𑀢𑁂𑀲𑀁 𑀑𑀯𑀸𑀤𑀁 𑀕𑀡𑁆𑀳𑀦𑁆𑀢𑁄 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑁄 𑀯𑀺𑀯𑀤𑀢𑀺. 𑀢𑀢𑁄 𑀢𑁂𑀲𑀁 𑀉𑀧𑀝𑁆𑀞𑀸𑀓𑀸 𑀯𑀺𑀯𑀤𑀦𑁆𑀢𑀺, 𑀅𑀣 𑀫𑀦𑀼𑀲𑁆𑀲𑀸𑀦𑀁 𑀆𑀭𑀓𑁆𑀔𑀤𑁂𑀯𑀢𑀸 𑀤𑁆𑀯𑁂 𑀓𑁄𑀝𑁆𑀞𑀸𑀲𑀸 𑀳𑁄𑀦𑁆𑀢𑀺. 𑀢𑀣𑀸 𑀥𑀫𑁆𑀫𑀯𑀸𑀤𑀻𑀦𑀁 𑀆𑀭𑀓𑁆𑀔𑀤𑁂𑀯𑀢𑀸 𑀥𑀫𑁆𑀫𑀯𑀸𑀤𑀺𑀦𑀺𑀬𑁄 𑀳𑁄𑀦𑁆𑀢𑀺, 𑀅𑀥𑀫𑁆𑀫𑀯𑀸𑀤𑀻𑀦𑀁 𑀅𑀥𑀫𑁆𑀫𑀯𑀸𑀤𑀺𑀦𑀺𑀬𑁄. 𑀢𑀢𑁄 𑀆𑀭𑀓𑁆𑀔𑀤𑁂𑀯𑀢𑀸𑀦𑀁 𑀫𑀺𑀢𑁆𑀢𑀸 𑀪𑀼𑀫𑁆𑀫𑀤𑁂𑀯𑀢𑀸 𑀪𑀺𑀚𑁆𑀚𑀦𑁆𑀢𑀺. 𑀏𑀯𑀁 𑀧𑀭𑀫𑁆𑀧𑀭𑀸𑀬 𑀬𑀸𑀯 𑀩𑁆𑀭𑀳𑁆𑀫𑀮𑁄𑀓𑀸 𑀞𑀧𑁂𑀢𑁆𑀯𑀸 𑀅𑀭𑀺𑀬𑀲𑀸𑀯𑀓𑁂 𑀲𑀩𑁆𑀩𑁂 𑀤𑁂𑀯𑀫𑀦𑀼𑀲𑁆𑀲𑀸 𑀤𑁆𑀯𑁂 𑀓𑁄𑀝𑁆𑀞𑀸𑀲𑀸 𑀳𑁄𑀦𑁆𑀢𑀺. 𑀥𑀫𑁆𑀫𑀯𑀸𑀤𑀻𑀳𑀺 𑀧𑀦 𑀅𑀥𑀫𑁆𑀫𑀯𑀸𑀤𑀺𑀦𑁄𑀯 𑀩𑀳𑀼𑀢𑀭𑀸 𑀳𑁄𑀦𑁆𑀢𑀺. 𑀢𑀢𑁄 𑀬𑀁 𑀩𑀳𑀼𑀓𑁂𑀳𑀺 𑀕𑀳𑀺𑀢𑀁, 𑀢𑀁 𑀕𑀘𑁆𑀙𑀦𑁆𑀢𑀺. 𑀥𑀫𑁆𑀫𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀩𑀳𑀼𑀢𑀭𑀸𑀯 𑀅𑀥𑀫𑁆𑀫𑀁 𑀕𑀡𑁆𑀳𑀦𑁆𑀢𑀺. 𑀢𑁂 𑀅𑀥𑀫𑁆𑀫𑀁 𑀧𑀼𑀭𑀓𑁆𑀔𑀢𑁆𑀯𑀸 𑀯𑀺𑀳𑀭𑀦𑁆𑀢𑀸 𑀅𑀧𑀸𑀬𑁂 𑀦𑀺𑀩𑁆𑀩𑀢𑁆𑀢𑀦𑁆𑀢𑀺. 𑀏𑀯𑀁 𑀤𑁆𑀯𑀺𑀦𑁆𑀦𑀁 𑀪𑀺𑀓𑁆𑀔𑀽𑀦𑀁 𑀯𑀺𑀯𑀸𑀤𑁄 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀳𑁄𑀢𑀺. 𑀅𑀚𑁆𑀛𑀢𑁆𑀢𑀁 𑀯𑀸𑀢𑀺 𑀢𑀼𑀫𑁆𑀳𑀸𑀓𑀁 𑀅𑀩𑁆𑀪𑀦𑁆𑀢𑀭𑀧𑀭𑀺𑀲𑀸𑀬. 𑀩𑀳𑀺𑀤𑁆𑀥𑀸𑀢𑀺 𑀧𑀭𑁂𑀲𑀁 𑀧𑀭𑀺𑀲𑀸𑀬.

𑀫𑀓𑁆𑀔𑀻𑀢𑀺 𑀧𑀭𑁂𑀲𑀁 𑀕𑀼𑀡𑀫𑀓𑁆𑀔𑀦𑀮𑀓𑁆𑀔𑀡𑁂𑀦 𑀫𑀓𑁆𑀔𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀧𑀴𑀸𑀲𑀻𑀢𑀺 𑀬𑀼𑀕𑀕𑁆𑀕𑀸𑀳𑀮𑀓𑁆𑀔𑀡𑁂𑀦 𑀧𑀴𑀸𑀲𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀇𑀲𑁆𑀲𑀼𑀓𑀻𑀢𑀺 𑀧𑀭𑀲𑁆𑀲 𑀲𑀓𑁆𑀓𑀸𑀭𑀸𑀤𑀻𑀦𑀺 𑀇𑀲𑁆𑀲𑀸𑀬𑀦𑀮𑀓𑁆𑀔𑀡𑀸𑀬 𑀇𑀲𑁆𑀲𑀸𑀬 𑀲𑀫𑀦𑁆𑀦𑀸𑀕𑀢𑁄. 𑀫𑀘𑁆𑀙𑀭𑀻𑀢𑀺 𑀆𑀯𑀸𑀲𑀫𑀘𑁆𑀙𑀭𑀺𑀬𑀸𑀤𑀻𑀳𑀺 𑀲𑀫𑀦𑁆𑀦𑀸𑀕𑀢𑁄. 𑀲𑀞𑁄𑀢𑀺 𑀓𑁂𑀭𑀸𑀝𑀺𑀓𑁄. 𑀫𑀸𑀬𑀸𑀯𑀻𑀢𑀺 𑀓𑀢𑀧𑀝𑀺𑀘𑁆𑀙𑀸𑀤𑀓𑁄. 𑀧𑀸𑀧𑀺𑀘𑁆𑀙𑁄𑀢𑀺 𑀅𑀲𑀦𑁆𑀢𑀲𑀫𑁆𑀪𑀸𑀯𑀦𑀺𑀘𑁆𑀙𑀓𑁄 𑀤𑀼𑀲𑁆𑀲𑀻𑀮𑁄. 𑀫𑀺𑀘𑁆𑀙𑀸𑀤𑀺𑀝𑁆𑀞𑀻𑀢𑀺 𑀦𑀢𑁆𑀣𑀺𑀓𑀯𑀸𑀤𑀻, 𑀅𑀳𑁂𑀢𑀼𑀯𑀸𑀤𑀻, 𑀅𑀓𑀺𑀭𑀺𑀬𑀯𑀸𑀤𑀻. 𑀲𑀦𑁆𑀤𑀺𑀝𑁆𑀞𑀺𑀧𑀭𑀸𑀫𑀸𑀲𑀻𑀢𑀺 𑀲𑀬𑀁 𑀤𑀺𑀝𑁆𑀞𑀫𑁂𑀯 𑀧𑀭𑀸𑀫𑀲𑀢𑀺. 𑀆𑀥𑀸𑀦𑀕𑁆𑀕𑀸𑀳𑀻𑀢𑀺 𑀤𑀴𑁆𑀳𑀕𑁆𑀕𑀸𑀳𑀻. 𑀤𑀼𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑀻𑀢𑀺 𑀦 𑀲𑀓𑁆𑀓𑀸 𑀳𑁄𑀢𑀺 𑀕𑀳𑀺𑀢𑀁 𑀯𑀺𑀲𑁆𑀲𑀚𑁆𑀚𑀸𑀧𑁂𑀢𑀼𑀁. 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀯𑀝𑁆𑀝𑀫𑁂𑀯 𑀓𑀣𑀺𑀢𑀁.

𑁭. 𑀤𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁭. 𑀲𑀢𑁆𑀢𑀫𑁂 𑀯𑁂𑀴𑀼𑀓𑀡𑁆𑀟𑀓𑀻𑀢𑀺 𑀯𑁂𑀴𑀼𑀓𑀡𑁆𑀟𑀓𑀦𑀕𑀭𑀯𑀸𑀲𑀺𑀦𑀻. 𑀙𑀴𑀗𑁆𑀕𑀲𑀫𑀦𑁆𑀦𑀸𑀕𑀢𑀦𑁆𑀢𑀺 𑀙𑀳𑀺 𑀕𑀼𑀡𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁. 𑀤𑀓𑁆𑀔𑀺𑀡𑀁 𑀧𑀢𑀺𑀝𑁆𑀞𑀸𑀧𑁂𑀢𑀻𑀢𑀺 𑀤𑀸𑀦𑀁 𑀤𑁂𑀢𑀺. 𑀧𑀼𑀩𑁆𑀩𑁂𑀯 𑀤𑀸𑀦𑀸 𑀲𑀼𑀫𑀦𑁄𑀢𑀺 𑀤𑀸𑀦𑀁 𑀤𑀲𑁆𑀲𑀸𑀫𑀻𑀢𑀺 𑀫𑀸𑀲𑀟𑁆𑀠𑀫𑀸𑀲𑀢𑁄 𑀧𑀝𑁆𑀞𑀸𑀬 𑀲𑁄𑀫𑀦𑀲𑁆𑀲𑀧𑁆𑀧𑀢𑁆𑀢𑁄 𑀳𑁄𑀢𑀺. 𑀏𑀢𑁆𑀣 𑀳𑀺 𑀧𑀼𑀩𑁆𑀩𑁂𑀘𑁂𑀢𑀦𑀸 𑀤𑀲𑁆𑀲𑀸𑀫𑀻𑀢𑀺 𑀘𑀺𑀢𑁆𑀢𑀼𑀧𑁆𑀧𑀸𑀤𑀓𑀸𑀮𑀢𑁄 𑀧𑀝𑁆𑀞𑀸𑀬 ‘‘𑀇𑀢𑁄 𑀉𑀝𑁆𑀞𑀺𑀢𑁂𑀦 𑀤𑀸𑀦𑀁 𑀤𑀲𑁆𑀲𑀸𑀫𑀻’’𑀢𑀺 𑀔𑁂𑀢𑁆𑀢𑀕𑁆𑀕𑀳𑀡𑀁 𑀆𑀤𑀺𑀁 𑀓𑀢𑁆𑀯𑀸 𑀘𑀺𑀦𑁆𑀢𑁂𑀦𑁆𑀢𑀲𑁆𑀲 𑀮𑀩𑁆𑀪𑀢𑀺. 𑀤𑀤𑀁 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑀻𑀢𑀺 𑀏𑀯𑀁 𑀯𑀼𑀢𑁆𑀢𑀸 𑀫𑀼𑀜𑁆𑀘𑀘𑁂𑀢𑀦𑀸 𑀧𑀦 𑀤𑀸𑀦𑀓𑀸𑀮𑁂𑀬𑁂𑀯 𑀮𑀩𑁆𑀪𑀢𑀺. 𑀤𑀢𑁆𑀯𑀸 𑀅𑀢𑁆𑀢𑀫𑀦𑁄 𑀳𑁄𑀢𑀻𑀢𑀺 𑀅𑀬𑀁 𑀧𑀦 𑀅𑀧𑀭𑀘𑁂𑀢𑀦𑀸 𑀅𑀧𑀭𑀸𑀧𑀭𑀁 𑀅𑀦𑀼𑀲𑁆𑀲𑀭𑀦𑁆𑀢𑀲𑁆𑀲 𑀮𑀩𑁆𑀪𑀢𑀺. 𑀯𑀻𑀢𑀭𑀸𑀕𑀸𑀢𑀺 𑀯𑀺𑀕𑀢𑀭𑀸𑀕𑀸 𑀔𑀻𑀡𑀸𑀲𑀯𑀸. 𑀭𑀸𑀕𑀯𑀺𑀦𑀬𑀸𑀬 𑀯𑀸 𑀧𑀝𑀺𑀧𑀦𑁆𑀦𑀸𑀢𑀺 𑀭𑀸𑀕𑀯𑀺𑀦𑀬𑀧𑀝𑀺𑀧𑀤𑀁 𑀧𑀝𑀺𑀧𑀦𑁆𑀦𑀸. 𑀉𑀓𑁆𑀓𑀝𑁆𑀞𑀤𑁂𑀲𑀦𑀸 𑀘𑁂𑀲𑀸, 𑀦 𑀓𑁂𑀯𑀮𑀁 𑀧𑀦 𑀔𑀻𑀡𑀸𑀲𑀯𑀸𑀦𑀁, 𑀅𑀦𑀸𑀕𑀸𑀫𑀺-𑀲𑀓𑀤𑀸𑀕𑀸𑀫𑀺-𑀲𑁄𑀢𑀸𑀧𑀦𑁆𑀦𑀸𑀦𑀫𑁆𑀧𑀺 𑀅𑀦𑁆𑀢𑀫𑀲𑁄 𑀢𑀤𑀳𑀼𑀧𑀩𑁆𑀩𑀚𑀺𑀢𑀲𑁆𑀲 𑀪𑀡𑁆𑀟𑀕𑀸𑀳𑀓𑀲𑀸𑀫𑀡𑁂𑀭𑀲𑁆𑀲𑀸𑀧𑀺 𑀤𑀺𑀦𑁆𑀦𑀸 𑀤𑀓𑁆𑀔𑀺𑀡𑀸 𑀙𑀴𑀗𑁆𑀕𑀲𑀫𑀦𑁆𑀦𑀸𑀕𑀢𑀸𑀯 𑀳𑁄𑀢𑀺. 𑀲𑁄𑀧𑀺 𑀳𑀺 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀢𑁆𑀣𑀫𑁂𑀯 𑀧𑀩𑁆𑀩𑀚𑀺𑀢𑁄.

𑀬𑀜𑁆𑀜𑀲𑁆𑀲 𑀲𑀫𑁆𑀧𑀤𑀸𑀢𑀺 𑀤𑀸𑀦𑀲𑁆𑀲 𑀧𑀭𑀺𑀧𑀼𑀡𑁆𑀡𑀢𑀸. 𑀲𑀜𑁆𑀜𑀢𑀸𑀢𑀺 𑀲𑀻𑀮𑀲𑀜𑁆𑀜𑀫𑁂𑀦 𑀲𑀜𑁆𑀜𑀢𑀸. 𑀲𑀬𑀁 𑀆𑀘𑀫𑀬𑀺𑀢𑁆𑀯𑀸𑀦𑀸𑀢𑀺 𑀅𑀢𑁆𑀢𑀦𑀸𑀯 𑀳𑀢𑁆𑀣𑀧𑀸𑀤𑁂 𑀥𑁄𑀯𑀺𑀢𑁆𑀯𑀸 𑀫𑀼𑀔𑀁 𑀯𑀺𑀓𑁆𑀔𑀸𑀮𑁂𑀢𑁆𑀯𑀸. 𑀲𑀓𑁂𑀳𑀺 𑀧𑀸𑀡𑀺𑀪𑀻𑀢𑀺 𑀅𑀢𑁆𑀢𑀦𑁄 𑀳𑀢𑁆𑀣𑁂𑀳𑀺. 𑀲𑀬𑁂𑀳𑀻𑀢𑀺𑀧𑀺 𑀧𑀸𑀞𑁄. 𑀲𑀤𑁆𑀥𑁄𑀢𑀺 𑀭𑀢𑀦𑀢𑁆𑀢𑀬𑀕𑀼𑀡𑁂 𑀲𑀤𑁆𑀤𑀳𑀦𑁆𑀢𑁄. 𑀫𑀼𑀢𑁆𑀢𑁂𑀦 𑀘𑁂𑀢𑀲𑀸𑀢𑀺 𑀮𑀸𑀪𑀫𑀘𑁆𑀙𑀭𑀺𑀬𑀸𑀤𑀻𑀳𑀺 𑀯𑀺𑀫𑀼𑀢𑁆𑀢𑁂𑀦 𑀘𑀺𑀢𑁆𑀢𑁂𑀦. 𑀅𑀩𑁆𑀬𑀸𑀧𑀚𑁆𑀛𑀁 𑀲𑀼𑀔𑀁 𑀮𑁄𑀓𑀦𑁆𑀢𑀺 𑀦𑀺𑀤𑁆𑀤𑀼𑀓𑁆𑀔𑀁 𑀉𑀴𑀸𑀭𑀲𑀼𑀔𑀲𑁄𑀫𑀦𑀲𑁆𑀲𑀁 𑀤𑁂𑀯𑀮𑁄𑀓𑀁.

𑁮. 𑀅𑀢𑁆𑀢𑀓𑀸𑀭𑀻𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁮. 𑀅𑀝𑁆𑀞𑀫𑁂 𑀅𑀤𑁆𑀤𑀲𑀁 𑀯𑀸 𑀅𑀲𑁆𑀲𑁄𑀲𑀺𑀁 𑀯𑀸𑀢𑀺 𑀅𑀓𑁆𑀔𑀻𑀦𑀺 𑀉𑀫𑁆𑀫𑀻𑀮𑁂𑀢𑁆𑀯𑀸 𑀫𑀸 𑀅𑀤𑁆𑀤𑀲𑀁, 𑀅𑀲𑀼𑀓𑀲𑁆𑀫𑀺𑀁 𑀦𑀸𑀫 𑀞𑀸𑀦𑁂 𑀯𑀲𑀢𑀻𑀢𑀺 𑀫𑀸 𑀅𑀲𑁆𑀲𑁄𑀲𑀺𑀁, 𑀓𑀣𑁂𑀦𑁆𑀢𑀲𑁆𑀲 𑀯𑀸 𑀯𑀘𑀦𑀁 𑀫𑀸 𑀅𑀲𑁆𑀲𑁄𑀲𑀺𑀁. 𑀓𑀣𑀜𑁆𑀳𑀺 𑀦𑀸𑀫𑀸𑀢𑀺 𑀓𑁂𑀦 𑀦𑀸𑀫 𑀓𑀸𑀭𑀡𑁂𑀦. 𑀆𑀭𑀫𑁆𑀪𑀥𑀸𑀢𑀽𑀢𑀺 𑀆𑀭𑀪𑀦𑀯𑀲𑁂𑀦 𑀧𑀯𑀢𑁆𑀢𑀯𑀻𑀭𑀺𑀬𑀁. 𑀦𑀺𑀓𑁆𑀓𑀫𑀥𑀸𑀢𑀽𑀢𑀺 𑀓𑁄𑀲𑀚𑁆𑀚𑀢𑁄 𑀦𑀺𑀓𑁆𑀔𑀫𑀦𑀲𑀪𑀸𑀯𑀁 𑀯𑀻𑀭𑀺𑀬𑀁. 𑀧𑀭𑀓𑁆𑀓𑀫𑀥𑀸𑀢𑀽𑀢𑀺 𑀧𑀭𑀓𑁆𑀓𑀫𑀲𑀪𑀸𑀯𑁄. 𑀣𑀸𑀫𑀥𑀸𑀢𑀽𑀢𑀺 𑀣𑀸𑀫𑀲𑀪𑀸𑀯𑁄. 𑀞𑀺𑀢𑀺𑀥𑀸𑀢𑀽𑀢𑀺 𑀞𑀺𑀢𑀺𑀲𑀪𑀸𑀯𑁄. 𑀉𑀧𑀓𑁆𑀓𑀫𑀥𑀸𑀢𑀽𑀢𑀺 𑀉𑀧𑀓𑁆𑀓𑀫𑀲𑀪𑀸𑀯𑁄. 𑀲𑀩𑁆𑀩𑀁 𑀘𑁂𑀢𑀁 𑀢𑁂𑀦 𑀢𑁂𑀦𑀸𑀓𑀸𑀭𑁂𑀦 𑀧𑀯𑀢𑁆𑀢𑀲𑁆𑀲 𑀯𑀻𑀭𑀺𑀬𑀲𑁆𑀲𑁂𑀯 𑀦𑀸𑀫𑀁.

𑁯-𑁧𑁦. 𑀦𑀺𑀤𑀸𑀦𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁩𑁯-𑁪𑁦. 𑀦𑀯𑀫𑁂 𑀓𑀫𑁆𑀫𑀸𑀦𑀦𑁆𑀢𑀺 𑀯𑀝𑁆𑀝𑀕𑀸𑀫𑀺𑀓𑀫𑁆𑀫𑀸𑀦𑀁. 𑀲𑀫𑀼𑀤𑀬𑀸𑀬𑀸𑀢𑀺 𑀧𑀺𑀡𑁆𑀟𑀓𑀭𑀡𑀢𑁆𑀣𑀸𑀬. 𑀦𑀺𑀤𑀸𑀦𑀦𑁆𑀢𑀺 𑀧𑀘𑁆𑀘𑀬𑁄. 𑀮𑁄𑀪𑀚𑁂𑀦𑀸𑀢𑀺 𑀮𑁄𑀪𑀢𑁄 𑀚𑀸𑀢𑁂𑀦. 𑀦 𑀧𑀜𑁆𑀜𑀸𑀬𑀦𑁆𑀢𑀻𑀢𑀺 ‘‘𑀏𑀯𑀭𑀽𑀧𑁂𑀦 𑀓𑀫𑁆𑀫𑁂𑀦 𑀦𑀺𑀩𑁆𑀩𑀢𑁆𑀢𑀸’’𑀢𑀺 𑀦 𑀤𑀺𑀲𑁆𑀲𑀦𑁆𑀢𑀺. 𑀲𑀼𑀓𑁆𑀓𑀧𑀓𑁆𑀔𑁂 𑀓𑀫𑁆𑀫𑀸𑀦𑀦𑁆𑀢𑀺 𑀯𑀺𑀯𑀝𑁆𑀝𑀕𑀸𑀫𑀺𑀓𑀫𑁆𑀫𑀸𑀦𑀁. 𑀇𑀢𑀺 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀯𑀝𑁆𑀝𑀯𑀺𑀯𑀝𑁆𑀝𑀁 𑀓𑀣𑀺𑀢𑀁. 𑀤𑀲𑀫𑁂 𑀦𑀺𑀘𑀼𑀮𑀯𑀦𑁂𑀢𑀺 𑀫𑀳𑀸𑀫𑀼𑀘𑀮𑀺𑀦𑁆𑀤𑀯𑀦𑁂. 𑀲𑀤𑁆𑀥𑀫𑁆𑀫𑁄𑀢𑀺 𑀲𑀸𑀲𑀦𑀲𑀤𑁆𑀥𑀫𑁆𑀫𑁄.

𑁧𑁧. 𑀤𑀸𑀭𑀼𑀓𑁆𑀔𑀦𑁆𑀥𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁧. 𑀏𑀓𑀸𑀤𑀲𑀫𑁂 𑀘𑁂𑀢𑁄𑀯𑀲𑀺𑀧𑁆𑀧𑀢𑁆𑀢𑁄𑀢𑀺 𑀘𑀺𑀢𑁆𑀢𑀯𑀲𑀺𑀪𑀸𑀯𑀁 𑀧𑀢𑁆𑀢𑁄. 𑀧𑀣𑀯𑀻𑀢𑁆𑀯𑁂𑀯 𑀅𑀥𑀺𑀫𑀼𑀘𑁆𑀘𑁂𑀬𑁆𑀬𑀸𑀢𑀺 𑀣𑀤𑁆𑀥𑀸𑀓𑀸𑀭𑀁 𑀧𑀣𑀯𑀻𑀥𑀸𑀢𑀽𑀢𑀺 𑀲𑀮𑁆𑀮𑀓𑁆𑀔𑁂𑀬𑁆𑀬. 𑀬𑀁 𑀦𑀺𑀲𑁆𑀲𑀸𑀬𑀸𑀢𑀺 𑀬𑀁 𑀯𑀺𑀚𑁆𑀚𑀫𑀸𑀦𑀁 𑀣𑀤𑁆𑀥𑀸𑀓𑀸𑀭𑀁 𑀧𑀣𑀯𑀻𑀥𑀸𑀢𑀼𑀁 𑀦𑀺𑀲𑁆𑀲𑀸𑀬 𑀅𑀫𑀼𑀁 𑀤𑀸𑀭𑀼𑀓𑁆𑀔𑀦𑁆𑀥𑀁 𑀧𑀣𑀯𑀻𑀢𑁆𑀯𑁂𑀯 𑀅𑀥𑀺𑀫𑀼𑀘𑁆𑀘𑁂𑀬𑁆𑀬, 𑀲𑀸 𑀏𑀢𑁆𑀣 𑀧𑀣𑀯𑀻𑀥𑀸𑀢𑀼 𑀅𑀢𑁆𑀣𑀻𑀢𑀺. 𑀇𑀫𑀺𑀦𑀸 𑀦𑀬𑁂𑀦 𑀲𑁂𑀲𑀧𑀤𑀸𑀦𑀺𑀧𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀬𑀣𑁂𑀯 𑀳𑀺 𑀢𑀲𑁆𑀫𑀺𑀁 𑀣𑀤𑁆𑀥𑀸𑀓𑀸𑀭𑀸 𑀧𑀣𑀯𑀻𑀥𑀸𑀢𑀼 𑀅𑀢𑁆𑀣𑀺, 𑀏𑀯𑀁 𑀬𑀽𑀲𑀸𑀓𑀸𑀭𑀸 𑀆𑀧𑁄𑀥𑀸𑀢𑀼, 𑀉𑀡𑁆𑀳𑀸𑀓𑀸𑀭𑀸 𑀢𑁂𑀚𑁄𑀥𑀸𑀢𑀼, 𑀯𑀺𑀢𑁆𑀣𑀫𑁆𑀪𑀦𑀸𑀓𑀸𑀭𑀸 𑀯𑀸𑀬𑁄𑀥𑀸𑀢𑀼, 𑀭𑀢𑁆𑀢𑀯𑀡𑁆𑀡𑀫𑁆𑀳𑀺 𑀲𑀸𑀭𑁂 𑀧𑀤𑀼𑀫𑀧𑀼𑀧𑁆𑀨𑀯𑀡𑁆𑀡𑀸 𑀲𑀼𑀪𑀥𑀸𑀢𑀼, 𑀧𑀽𑀢𑀺𑀪𑀽𑀢𑁂 𑀘𑀼𑀡𑁆𑀡𑁂 𑀘𑁂𑀯 𑀨𑁂𑀕𑁆𑀕𑀼𑀧𑀧𑀝𑀺𑀓𑀸𑀲𑀼 𑀘 𑀅𑀫𑀦𑀼𑀜𑁆𑀜𑀯𑀡𑁆𑀡𑀸 𑀅𑀲𑀼𑀪𑀥𑀸𑀢𑀼, 𑀢𑀁 𑀦𑀺𑀲𑁆𑀲𑀸𑀬 𑀅𑀫𑀼𑀁 𑀤𑀸𑀭𑀼𑀓𑁆𑀔𑀦𑁆𑀥𑀁 𑀅𑀲𑀼𑀪𑀦𑁆𑀢𑁆𑀯𑁂𑀯 𑀅𑀥𑀺𑀫𑀼𑀘𑁆𑀘𑁂𑀬𑁆𑀬 𑀲𑀮𑁆𑀮𑀓𑁆𑀔𑁂𑀬𑁆𑀬𑀸𑀢𑀺. 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀫𑀺𑀲𑁆𑀲𑀓𑀯𑀺𑀳𑀸𑀭𑁄 𑀦𑀸𑀫 𑀓𑀣𑀺𑀢𑁄.

𑁧𑁨. 𑀦𑀸𑀕𑀺𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁨. 𑀤𑁆𑀯𑀸𑀤𑀲𑀫𑁂 𑀕𑀸𑀫𑀦𑁆𑀢𑀯𑀺𑀳𑀸𑀭𑀺𑀦𑁆𑀢𑀺 𑀕𑀸𑀫𑀦𑁆𑀢𑀲𑁂𑀦𑀸𑀲𑀦𑀯𑀸𑀲𑀺𑀁. 𑀲𑀫𑀸𑀳𑀺𑀢𑀁 𑀦𑀺𑀲𑀺𑀦𑁆𑀦𑀦𑁆𑀢𑀺 𑀢𑀲𑁆𑀫𑀺𑀁 𑀕𑀸𑀫𑀦𑁆𑀢𑀲𑁂𑀦𑀸𑀲𑀦𑁂 𑀲𑀫𑀸𑀥𑀺𑀁 𑀅𑀧𑁆𑀧𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑀁. 𑀇𑀤𑀸𑀦𑀺𑀫𑀦𑁆𑀢𑀺 𑀇𑀤𑀸𑀦𑀺 𑀇𑀫𑀁. 𑀲𑀫𑀸𑀥𑀺𑀫𑁆𑀳𑀸 𑀘𑀸𑀯𑁂𑀲𑁆𑀲𑀢𑀻𑀢𑀺 𑀲𑀫𑀸𑀥𑀺𑀢𑁄 𑀉𑀝𑁆𑀞𑀸𑀧𑁂𑀲𑁆𑀲𑀢𑀺. 𑀦 𑀅𑀢𑁆𑀢𑀫𑀦𑁄 𑀳𑁄𑀫𑀻𑀢𑀺 𑀦 𑀲𑀓𑀫𑀦𑁄 𑀳𑁄𑀫𑀺. 𑀧𑀘𑀮𑀸𑀬𑀫𑀸𑀦𑀦𑁆𑀢𑀺 𑀦𑀺𑀤𑁆𑀤𑀸𑀬𑀫𑀸𑀦𑀁. 𑀏𑀓𑀢𑁆𑀢𑀦𑁆𑀢𑀺 𑀏𑀓𑀲𑀪𑀸𑀯𑀁, 𑀏𑀓𑀕𑁆𑀕𑀢𑀸𑀪𑀽𑀢𑀁 𑀅𑀭𑀜𑁆𑀜𑀲𑀜𑁆𑀜𑀁𑀬𑁂𑀯 𑀘𑀺𑀢𑁆𑀢𑁂 𑀓𑀭𑀺𑀲𑁆𑀲𑀢𑀻𑀢𑀺 𑀅𑀢𑁆𑀣𑁄. 𑀅𑀦𑀼𑀭𑀓𑁆𑀔𑀺𑀲𑁆𑀲𑀢𑀻𑀢𑀺 𑀅𑀦𑀼𑀕𑁆𑀕𑀡𑁆𑀳𑀺𑀲𑁆𑀲𑀢𑀺. 𑀅𑀯𑀺𑀫𑀼𑀢𑁆𑀢𑀁 𑀯𑀸 𑀘𑀺𑀢𑁆𑀢𑀁 𑀯𑀺𑀫𑁄𑀘𑁂𑀲𑁆𑀲𑀢𑀻𑀢𑀺 𑀅𑀜𑁆𑀜𑀲𑁆𑀫𑀺𑀁 𑀓𑀸𑀮𑁂 𑀅𑀯𑀺𑀫𑀼𑀢𑁆𑀢𑀁 𑀘𑀺𑀢𑁆𑀢𑀁 𑀇𑀤𑀸𑀦𑀺 𑀧𑀜𑁆𑀘𑀳𑀺 𑀯𑀺𑀫𑀼𑀢𑁆𑀢𑀻𑀳𑀺 𑀯𑀺𑀫𑁄𑀘𑀬𑀺𑀲𑁆𑀲𑀢𑀺. 𑀭𑀺𑀜𑁆𑀘𑀢𑀻𑀢𑀺 𑀯𑀚𑁆𑀚𑁂𑀢𑀺 𑀯𑀺𑀲𑁆𑀲𑀚𑁆𑀚𑁂𑀢𑀺. 𑀧𑀝𑀺𑀧𑀡𑀸𑀫𑁂𑀢𑁆𑀯𑀸𑀢𑀺 𑀧𑀦𑀼𑀤𑀺𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸. 𑀉𑀘𑁆𑀘𑀸𑀭𑀧𑀲𑁆𑀲𑀸𑀯𑀓𑀫𑁆𑀫𑀸𑀬𑀸𑀢𑀺 𑀉𑀘𑁆𑀘𑀸𑀭𑀧𑀲𑁆𑀲𑀸𑀯𑀓𑀭𑀡𑀢𑁆𑀣𑀸𑀬. 𑀇𑀫𑀺𑀦𑀸 𑀏𑀢𑁆𑀢𑀓𑁂𑀦 𑀞𑀸𑀦𑁂𑀦 𑀲𑀢𑁆𑀣𑀸𑀭𑀸 𑀅𑀭𑀜𑁆𑀜𑀲𑁂𑀦𑀸𑀲𑀦𑀲𑁆𑀲 𑀯𑀡𑁆𑀡𑁄 𑀓𑀣𑀺𑀢𑁄. 𑀲𑀼𑀢𑁆𑀢𑀲𑁆𑀲 𑀧𑀦 𑀧𑀞𑀫𑀓𑁄𑀝𑁆𑀞𑀸𑀲𑁂 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀫𑁂𑀯𑀸𑀢𑀺.

𑀤𑁂𑀯𑀢𑀸𑀯𑀕𑁆𑀕𑁄 𑀘𑀢𑀼𑀢𑁆𑀣𑁄.

𑁫. 𑀥𑀫𑁆𑀫𑀺𑀓𑀯𑀕𑁆𑀕𑁄

𑁧. 𑀦𑀸𑀕𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁩. 𑀧𑀜𑁆𑀘𑀫𑀲𑁆𑀲 𑀧𑀞𑀫𑁂 𑀆𑀬𑀲𑁆𑀫𑀢𑀸 𑀆𑀦𑀦𑁆𑀤𑁂𑀦 𑀲𑀤𑁆𑀥𑀺𑀦𑁆𑀢𑀺 𑀇𑀤𑀁 ‘‘𑀆𑀬𑀸𑀫𑀸𑀦𑀦𑁆𑀤𑀸’’𑀢𑀺 𑀣𑁂𑀭𑀁 𑀆𑀫𑀦𑁆𑀢𑁂𑀢𑁆𑀯𑀸 𑀕𑀢𑀢𑁆𑀢𑀸 𑀯𑀼𑀢𑁆𑀢𑀁, 𑀲𑀢𑁆𑀣𑀸 𑀧𑀦 𑀅𑀦𑀽𑀦𑁂𑀳𑀺 𑀧𑀜𑁆𑀘𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺 𑀧𑀭𑀺𑀯𑀼𑀢𑁄 𑀢𑀢𑁆𑀣 𑀅𑀕𑀫𑀸𑀲𑀻𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀢𑁂𑀦𑀼𑀧𑀲𑀗𑁆𑀓𑀫𑀻𑀢𑀺 𑀢𑁂𑀳𑁂𑀯 𑀧𑀜𑁆𑀘𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺 𑀧𑀭𑀺𑀯𑀼𑀢𑁄 𑀉𑀧𑀲𑀗𑁆𑀓𑀫𑀺. 𑀧𑀭𑀺𑀲𑀺𑀜𑁆𑀘𑀺𑀢𑁆𑀯𑀸𑀢𑀺 𑀯𑁄𑀳𑀸𑀭𑀯𑀘𑀦𑀫𑁂𑀢𑀁, 𑀦𑁆𑀳𑀸𑀬𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀧𑀼𑀩𑁆𑀩𑀸𑀧𑀬𑀫𑀸𑀦𑁄𑀢𑀺 𑀭𑀢𑁆𑀢𑀤𑀼𑀧𑀝𑁆𑀝𑀁 𑀦𑀺𑀯𑀸𑀲𑁂𑀢𑁆𑀯𑀸 𑀉𑀢𑁆𑀢𑀭𑀸𑀲𑀗𑁆𑀕𑀘𑀻𑀯𑀭𑀁 𑀤𑁆𑀯𑀻𑀳𑀺 𑀳𑀢𑁆𑀣𑁂𑀳𑀺 𑀕𑀳𑁂𑀢𑁆𑀯𑀸 𑀧𑀘𑁆𑀙𑀺𑀫𑀮𑁄𑀓𑀥𑀸𑀢𑀼𑀁 𑀧𑀺𑀝𑁆𑀞𑀺𑀢𑁄 𑀓𑀢𑁆𑀯𑀸 𑀧𑀼𑀭𑀢𑁆𑀣𑀺𑀫𑀮𑁄𑀓𑀥𑀸𑀢𑀼𑀁 𑀅𑀪𑀺𑀫𑀼𑀔𑁄 𑀯𑁄𑀤𑀓𑀪𑀸𑀯𑁂𑀦 𑀕𑀢𑁆𑀢𑀸𑀦𑀺 𑀧𑀼𑀩𑁆𑀩𑀲𑀤𑀺𑀲𑀸𑀦𑀺 𑀓𑀼𑀭𑀼𑀫𑀸𑀦𑁄 𑀅𑀝𑁆𑀞𑀸𑀲𑀻𑀢𑀺 𑀅𑀢𑁆𑀣𑁄. 𑀪𑀺𑀓𑁆𑀔𑀼𑀲𑀗𑁆𑀖𑁄𑀧𑀺 𑀢𑁂𑀦 𑀢𑁂𑀦 𑀞𑀸𑀦𑁂𑀦 𑀑𑀢𑀭𑀺𑀢𑁆𑀯𑀸 𑀦𑁆𑀳𑀢𑁆𑀯𑀸 𑀧𑀘𑁆𑀘𑀼𑀢𑁆𑀢𑀭𑀺𑀢𑁆𑀯𑀸 𑀲𑀢𑁆𑀣𑀸𑀭𑀁𑀬𑁂𑀯 𑀧𑀭𑀺𑀯𑀸𑀭𑁂𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀇𑀢𑀺 𑀢𑀲𑁆𑀫𑀺𑀁 𑀲𑀫𑀬𑁂 𑀆𑀓𑀸𑀲𑀢𑁄 𑀧𑀢𑀫𑀸𑀦𑀁 𑀭𑀢𑁆𑀢𑀲𑀼𑀯𑀡𑁆𑀡𑀓𑀼𑀡𑁆𑀟𑀮𑀁 𑀯𑀺𑀬 𑀲𑀽𑀭𑀺𑀬𑁄 𑀧𑀘𑁆𑀙𑀺𑀫𑀮𑁄𑀓𑀥𑀸𑀢𑀼𑀁 𑀧𑀝𑀺𑀧𑀚𑁆𑀚𑀺, 𑀧𑀭𑀺𑀲𑀼𑀤𑁆𑀥𑀭𑀚𑀢𑀫𑀡𑁆𑀟𑀮𑁄 𑀯𑀺𑀬 𑀧𑀸𑀘𑀻𑀦𑀮𑁄𑀓𑀥𑀸𑀢𑀼𑀢𑁄 𑀘𑀦𑁆𑀤𑁄 𑀅𑀩𑁆𑀪𑀼𑀕𑁆𑀕𑀜𑁆𑀙𑀺, 𑀫𑀚𑁆𑀛𑀝𑁆𑀞𑀸𑀦𑁂𑀧𑀺 𑀧𑀜𑁆𑀘𑀪𑀺𑀓𑁆𑀔𑀼𑀲𑀢𑀧𑀭𑀺𑀯𑀸𑀭𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀙𑀩𑁆𑀩𑀡𑁆𑀡𑀩𑀼𑀤𑁆𑀥𑀭𑀲𑁆𑀫𑀺𑀬𑁄 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀧𑀼𑀩𑁆𑀩𑀓𑁄𑀝𑁆𑀞𑀓𑀦𑀤𑀻𑀢𑀻𑀭𑁂 𑀮𑁄𑀓𑀁 𑀅𑀮𑀗𑁆𑀓𑀼𑀭𑀼𑀫𑀸𑀦𑁄 𑀅𑀝𑁆𑀞𑀸𑀲𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦…𑀧𑁂… 𑀲𑁂𑀢𑁄 𑀦𑀸𑀫 𑀦𑀸𑀕𑁄𑀢𑀺 𑀲𑁂𑀢𑀯𑀡𑁆𑀡𑀢𑀸𑀬 𑀏𑀯𑀁 𑀮𑀤𑁆𑀥𑀦𑀸𑀫𑁄 𑀳𑀢𑁆𑀣𑀺𑀦𑀸𑀕𑁄. 𑀫𑀳𑀸𑀢𑀽𑀭𑀺𑀬𑀢𑀸𑀴𑀺𑀢𑀯𑀸𑀤𑀺𑀢𑁂𑀦𑀸𑀢𑀺 𑀫𑀳𑀦𑁆𑀢𑁂𑀦 𑀢𑀽𑀭𑀺𑀬𑀢𑀸𑀴𑀺𑀢𑀯𑀸𑀤𑀺𑀢𑁂𑀦. 𑀢𑀢𑁆𑀣 𑀧𑀞𑀫𑀁 𑀲𑀗𑁆𑀖𑀝𑁆𑀝𑀦𑀁 𑀢𑀸𑀴𑀺𑀢𑀁 𑀦𑀸𑀫 𑀳𑁄𑀢𑀺, 𑀢𑀢𑁄 𑀧𑀭𑀁 𑀯𑀸𑀤𑀺𑀢𑀁. 𑀚𑀦𑁄𑀢𑀺 𑀳𑀢𑁆𑀣𑀺𑀤𑀲𑁆𑀲𑀦𑀢𑁆𑀣𑀁 𑀲𑀦𑁆𑀦𑀺𑀧𑀢𑀺𑀢𑀫𑀳𑀸𑀚𑀦𑁄. 𑀤𑀺𑀲𑁆𑀯𑀸 𑀏𑀯𑀫𑀸𑀳𑀸𑀢𑀺 𑀅𑀗𑁆𑀕𑀧𑀘𑁆𑀘𑀗𑁆𑀕𑀸𑀦𑀺 𑀖𑀁𑀲𑀺𑀢𑁆𑀯𑀸 𑀦𑁆𑀳𑀸𑀧𑁂𑀢𑁆𑀯𑀸 𑀉𑀢𑁆𑀢𑀸𑀭𑁂𑀢𑁆𑀯𑀸 𑀩𑀳𑀺𑀢𑀻𑀭𑁂 𑀞𑀧𑁂𑀢𑁆𑀯𑀸 𑀕𑀢𑁆𑀢𑀸𑀦𑀺 𑀯𑁄𑀤𑀓𑀸𑀦𑀺 𑀓𑀢𑁆𑀯𑀸 𑀳𑀢𑁆𑀣𑀸𑀮𑀗𑁆𑀓𑀸𑀭𑁂𑀦 𑀅𑀮𑀗𑁆𑀓𑀢𑀁 𑀢𑀁 𑀫𑀳𑀸𑀦𑀸𑀕𑀁 𑀤𑀺𑀲𑁆𑀯𑀸 𑀇𑀤𑀁 ‘‘𑀅𑀪𑀺𑀭𑀽𑀧𑁄 𑀯𑀢, 𑀪𑁄’’𑀢𑀺 𑀧𑀲𑀁𑀲𑀸𑀯𑀘𑀦𑀫𑀸𑀳. 𑀓𑀸𑀬𑀼𑀧𑀧𑀦𑁆𑀦𑁄𑀢𑀺 𑀲𑀭𑀻𑀭𑀲𑀫𑁆𑀧𑀢𑁆𑀢𑀺𑀬𑀸 𑀉𑀧𑀧𑀦𑁆𑀦𑁄, 𑀧𑀭𑀺𑀧𑀼𑀡𑁆𑀡𑀗𑁆𑀕𑀧𑀘𑁆𑀘𑀗𑁆𑀕𑁄𑀢𑀺 𑀅𑀢𑁆𑀣𑁄. 𑀆𑀬𑀲𑁆𑀫𑀸 𑀉𑀤𑀸𑀬𑀻𑀢𑀺 𑀧𑀝𑀺𑀲𑀫𑁆𑀪𑀺𑀤𑀸𑀧𑁆𑀧𑀢𑁆𑀢𑁄 𑀓𑀸𑀴𑀼𑀤𑀸𑀬𑀺𑀢𑁆𑀣𑁂𑀭𑁄. 𑀏𑀢𑀤𑀯𑁄𑀘𑀸𑀢𑀺 𑀢𑀁 𑀫𑀳𑀸𑀚𑀦𑀁 𑀳𑀢𑁆𑀣𑀺𑀲𑁆𑀲 𑀯𑀡𑁆𑀡𑀁 𑀪𑀡𑀦𑁆𑀢𑀁 𑀤𑀺𑀲𑁆𑀯𑀸 ‘‘𑀅𑀬𑀁 𑀚𑀦𑁄 𑀅𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀬𑀁 𑀦𑀺𑀩𑁆𑀩𑀢𑁆𑀢𑀳𑀢𑁆𑀣𑀺𑀦𑁄 𑀯𑀡𑁆𑀡𑀁 𑀓𑀣𑁂𑀢𑀺, 𑀦 𑀩𑀼𑀤𑁆𑀥𑀳𑀢𑁆𑀣𑀺𑀲𑁆𑀲. 𑀅𑀳𑀁 𑀤𑀸𑀦𑀺 𑀇𑀫𑀺𑀦𑀸 𑀳𑀢𑁆𑀣𑀺𑀦𑀸𑀕𑁂𑀦 𑀉𑀧𑀫𑀁 𑀓𑀢𑁆𑀯𑀸 𑀩𑀼𑀤𑁆𑀥𑀦𑀸𑀕𑀲𑁆𑀲 𑀯𑀡𑁆𑀡𑀁 𑀓𑀣𑁂𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀏𑀢𑀁 ‘‘𑀳𑀢𑁆𑀣𑀺𑀫𑁂𑀯 𑀦𑀼 𑀔𑁄, 𑀪𑀦𑁆𑀢𑁂’’𑀢𑀺𑀆𑀤𑀺𑀯𑀘𑀦𑀁 𑀅𑀯𑁄𑀘. 𑀢𑀢𑁆𑀣 𑀫𑀳𑀦𑁆𑀢𑀦𑁆𑀢𑀺 𑀆𑀭𑁄𑀳𑀲𑀫𑁆𑀧𑀦𑁆𑀦𑀁. 𑀩𑁆𑀭𑀳𑀦𑁆𑀢𑀦𑁆𑀢𑀺 𑀧𑀭𑀺𑀡𑀸𑀳𑀲𑀫𑁆𑀧𑀦𑁆𑀦𑀁. 𑀏𑀯𑀫𑀸𑀳𑀸𑀢𑀺 𑀏𑀯𑀁 𑀯𑀤𑀢𑀺. 𑀅𑀣 𑀪𑀕𑀯𑀸 𑀬𑀲𑁆𑀫𑀸 𑀅𑀬𑀁 𑀦𑀸𑀕𑀲𑀤𑁆𑀤𑁄 𑀳𑀢𑁆𑀣𑀺𑀫𑁆𑀳𑀺𑀘𑁂𑀯 𑀅𑀲𑁆𑀲𑀕𑁄𑀡𑀉𑀭𑀕𑀭𑀼𑀓𑁆𑀔𑀫𑀦𑀼𑀲𑁆𑀲𑁂𑀲𑀼 𑀘𑀸𑀧𑀺 𑀧𑀯𑀢𑁆𑀢𑀢𑀺, 𑀢𑀲𑁆𑀫𑀸 𑀳𑀢𑁆𑀣𑀺𑀫𑁆𑀧𑀺 𑀔𑁄𑀢𑀺𑀆𑀤𑀺𑀫𑀸𑀳.

𑀆𑀕𑀼𑀦𑁆𑀢𑀺 𑀧𑀸𑀧𑀓𑀁 𑀮𑀸𑀫𑀓𑀁 𑀅𑀓𑀼𑀲𑀮𑀥𑀫𑁆𑀫𑀁. 𑀢𑀫𑀳𑀁 𑀦𑀸𑀕𑁄𑀢𑀺 𑀩𑁆𑀭𑀽𑀫𑀻𑀢𑀺 𑀢𑀁 𑀅𑀳𑀁 𑀇𑀫𑁂𑀳𑀺 𑀢𑀻𑀳𑀺 𑀤𑁆𑀯𑀸𑀭𑁂𑀳𑀺 𑀤𑀲𑀦𑁆𑀦𑀁 𑀅𑀓𑀼𑀲𑀮𑀓𑀫𑁆𑀫𑀧𑀣𑀸𑀦𑀁 𑀤𑁆𑀯𑀸𑀤𑀲𑀦𑁆𑀦𑀜𑁆𑀘 𑀅𑀓𑀼𑀲𑀮𑀘𑀺𑀢𑁆𑀢𑀸𑀦𑀁 𑀅𑀓𑀭𑀡𑀢𑁄 𑀦𑀸𑀕𑁄𑀢𑀺 𑀯𑀤𑀸𑀫𑀺. 𑀅𑀬𑀜𑁆𑀳𑀺 𑀦 𑀆𑀕𑀼𑀁 𑀓𑀭𑁄𑀢𑀻𑀢𑀺 𑀇𑀫𑀺𑀦𑀸 𑀅𑀢𑁆𑀣𑁂𑀦 𑀦𑀸𑀕𑁄. 𑀇𑀫𑀸𑀳𑀺 𑀕𑀸𑀣𑀸𑀳𑀺 𑀅𑀦𑀼𑀫𑁄𑀤𑀸𑀫𑀻𑀢𑀺 𑀇𑀫𑀸𑀳𑀺 𑀘𑀢𑀼𑀲𑀝𑁆𑀞𑀺𑀧𑀤𑀸𑀳𑀺 𑀲𑁄𑀴𑀲𑀳𑀺 𑀕𑀸𑀣𑀸𑀳𑀺 𑀅𑀦𑀼𑀫𑁄𑀤𑀸𑀫𑀺 𑀅𑀪𑀺𑀦𑀦𑁆𑀤𑀸𑀫𑀺.

𑀫𑀦𑀼𑀲𑁆𑀲𑀪𑀽𑀢𑀦𑁆𑀢𑀺 𑀤𑁂𑀯𑀸𑀤𑀺𑀪𑀸𑀯𑀁 𑀅𑀦𑀼𑀧𑀕𑀦𑁆𑀢𑁆𑀯𑀸 𑀫𑀦𑀼𑀲𑁆𑀲𑀫𑁂𑀯 𑀪𑀽𑀢𑀁. 𑀅𑀢𑁆𑀢𑀤𑀦𑁆𑀢𑀦𑁆𑀢𑀺 𑀅𑀢𑁆𑀢𑀦𑀸𑀬𑁂𑀯 𑀤𑀦𑁆𑀢𑀁, 𑀦 𑀅𑀜𑁆𑀜𑁂𑀳𑀺 𑀤𑀫𑀣𑀁 𑀉𑀧𑀦𑀻𑀢𑀁. 𑀪𑀕𑀯𑀸 𑀳𑀺 𑀅𑀢𑁆𑀢𑀦𑀸 𑀉𑀧𑁆𑀧𑀸𑀤𑀺𑀢𑁂𑀦𑁂𑀯 𑀫𑀕𑁆𑀕𑀤𑀫𑀣𑁂𑀦 𑀘𑀓𑁆𑀔𑀼𑀢𑁄𑀧𑀺 𑀤𑀦𑁆𑀢𑁄, 𑀲𑁄𑀢𑀢𑁄𑀧𑀺, 𑀖𑀸𑀦𑀢𑁄𑀧𑀺, 𑀚𑀺𑀯𑁆𑀳𑀸𑀢𑁄𑀧𑀺, 𑀓𑀸𑀬𑀢𑁄𑀧𑀺, 𑀫𑀦𑀢𑁄𑀧𑀻𑀢𑀺 𑀇𑀫𑁂𑀲𑀼 𑀙𑀲𑀼 𑀞𑀸𑀦𑁂𑀲𑀼 𑀤𑀦𑁆𑀢𑁄 𑀲𑀦𑁆𑀢𑁄 𑀦𑀺𑀩𑁆𑀩𑀼𑀢𑁄 𑀧𑀭𑀺𑀦𑀺𑀩𑁆𑀩𑀼𑀢𑁄. 𑀢𑁂𑀦𑀸𑀳 𑁋 ‘‘𑀅𑀢𑁆𑀢𑀤𑀦𑁆𑀢’’𑀦𑁆𑀢𑀺. 𑀲𑀫𑀸𑀳𑀺𑀢𑀦𑁆𑀢𑀺 𑀤𑀼𑀯𑀺𑀥𑁂𑀦𑀸𑀧𑀺 𑀲𑀫𑀸𑀥𑀺𑀦𑀸 𑀲𑀫𑀸𑀳𑀺𑀢𑀁. 𑀇𑀭𑀺𑀬𑀫𑀸𑀦𑀦𑁆𑀢𑀺 𑀯𑀺𑀳𑀭𑀫𑀸𑀦𑀁. 𑀩𑁆𑀭𑀳𑁆𑀫𑀧𑀣𑁂𑀢𑀺 𑀲𑁂𑀝𑁆𑀞𑀧𑀣𑁂, 𑀅𑀫𑀢𑀧𑀣𑁂, 𑀦𑀺𑀩𑁆𑀩𑀸𑀦𑀧𑀣𑁂. 𑀘𑀺𑀢𑁆𑀢𑀲𑁆𑀲𑀽𑀧𑀲𑀫𑁂 𑀭𑀢𑀦𑁆𑀢𑀺 𑀧𑀞𑀫𑀚𑁆𑀛𑀸𑀦𑁂𑀦 𑀧𑀜𑁆𑀘 𑀦𑀻𑀯𑀭𑀡𑀸𑀦𑀺 𑀯𑀽𑀧𑀲𑀫𑁂𑀢𑁆𑀯𑀸, 𑀤𑀼𑀢𑀺𑀬𑀚𑁆𑀛𑀸𑀦𑁂𑀦 𑀯𑀺𑀢𑀓𑁆𑀓𑀯𑀺𑀘𑀸𑀭𑁂, 𑀢𑀢𑀺𑀬𑀚𑁆𑀛𑀸𑀦𑁂𑀦 𑀧𑀻𑀢𑀺𑀁, 𑀘𑀢𑀼𑀢𑁆𑀣𑀚𑁆𑀛𑀸𑀦𑁂𑀦 𑀲𑀼𑀔𑀤𑀼𑀓𑁆𑀔𑀁 𑀯𑀽𑀧𑀲𑀫𑁂𑀢𑁆𑀯𑀸 𑀢𑀲𑁆𑀫𑀺𑀁 𑀘𑀺𑀢𑁆𑀢𑀲𑁆𑀲𑀽𑀧𑀲𑀫𑁂 𑀭𑀢𑀁 𑀅𑀪𑀺𑀭𑀢𑀁.

𑀦𑀫𑀲𑁆𑀲𑀦𑁆𑀢𑀻𑀢𑀺 𑀓𑀸𑀬𑁂𑀦 𑀦𑀫𑀲𑁆𑀲𑀦𑁆𑀢𑀺, 𑀯𑀸𑀘𑀸𑀬 𑀦𑀫𑀲𑁆𑀲𑀦𑁆𑀢𑀺, 𑀫𑀦𑀲𑀸 𑀦𑀫𑀲𑁆𑀲𑀦𑁆𑀢𑀺, 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑀝𑀺𑀧𑀢𑁆𑀢𑀺𑀬𑀸 𑀦𑀫𑀲𑁆𑀲𑀦𑁆𑀢𑀺, 𑀲𑀓𑁆𑀓𑀭𑁄𑀦𑁆𑀢𑀺 𑀕𑀭𑀼𑀁 𑀓𑀭𑁄𑀦𑁆𑀢𑀺. 𑀲𑀩𑁆𑀩𑀥𑀫𑁆𑀫𑀸𑀦𑀧𑀸𑀭𑀕𑀼𑀦𑁆𑀢𑀺 𑀲𑀩𑁆𑀩𑁂𑀲𑀁 𑀔𑀦𑁆𑀥𑀸𑀬𑀢𑀦𑀥𑀸𑀢𑀼𑀥𑀫𑁆𑀫𑀸𑀦𑀁 𑀅𑀪𑀺𑀜𑁆𑀜𑀸𑀧𑀸𑀭𑀕𑀽, 𑀧𑀭𑀺𑀜𑁆𑀜𑀸𑀧𑀸𑀭𑀕𑀽, 𑀧𑀳𑀸𑀦𑀧𑀸𑀭𑀕𑀽, 𑀪𑀸𑀯𑀦𑀸𑀧𑀸𑀭𑀕𑀽, 𑀲𑀘𑁆𑀙𑀺𑀓𑀺𑀭𑀺𑀬𑀸𑀧𑀸𑀭𑀕𑀽, 𑀲𑀫𑀸𑀧𑀢𑁆𑀢𑀺𑀧𑀸𑀭𑀕𑀽𑀢𑀺 𑀙𑀩𑁆𑀩𑀺𑀥𑁂𑀦 𑀧𑀸𑀭𑀕𑀫𑀦𑁂𑀦 𑀧𑀸𑀭𑀕𑀢𑀁 𑀧𑀸𑀭𑀧𑁆𑀧𑀢𑁆𑀢𑀁 𑀫𑀢𑁆𑀣𑀓𑀧𑁆𑀧𑀢𑁆𑀢𑀁. 𑀤𑁂𑀯𑀸𑀧𑀺 𑀢𑀁 𑀦𑀫𑀲𑁆𑀲𑀦𑁆𑀢𑀻𑀢𑀺 𑀤𑀼𑀓𑁆𑀔𑀧𑁆𑀧𑀢𑁆𑀢𑀸 𑀲𑀼𑀩𑁆𑀭𑀳𑁆𑀫𑀤𑁂𑀯𑀧𑀼𑀢𑁆𑀢𑀸𑀤𑀬𑁄 𑀲𑀼𑀔𑀧𑁆𑀧𑀢𑁆𑀢𑀸 𑀘 𑀲𑀩𑁆𑀩𑁂𑀯 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀯𑀸𑀲𑀺𑀦𑁄 𑀤𑁂𑀯𑀸𑀧𑀺 𑀢𑀼𑀫𑁆𑀳𑁂 𑀦𑀫𑀲𑁆𑀲𑀦𑁆𑀢𑀺. 𑀇𑀢𑀺 𑀫𑁂 𑀅𑀭𑀳𑀢𑁄 𑀲𑀼𑀢𑀦𑁆𑀢𑀺 𑀇𑀢𑀺 𑀫𑀬𑀸 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺 𑀅𑀭𑀳𑀸𑀢𑀺 𑀮𑀤𑁆𑀥𑀯𑁄𑀳𑀸𑀭𑀸𑀦𑀁 𑀢𑀼𑀫𑁆𑀳𑀸𑀓𑀁𑀬𑁂𑀯 𑀲𑀦𑁆𑀢𑀺𑀓𑁂 𑀲𑀼𑀢𑀦𑁆𑀢𑀺 𑀤𑀻𑀧𑁂𑀢𑀺.

𑀲𑀩𑁆𑀩𑀲𑀁𑀬𑁄𑀚𑀦𑀸𑀢𑀻𑀢𑀦𑁆𑀢𑀺 𑀲𑀩𑁆𑀩𑀸𑀦𑀺 𑀤𑀲𑀯𑀺𑀥𑀲𑀁𑀬𑁄𑀚𑀦𑀸𑀦𑀺 𑀅𑀢𑀺𑀓𑁆𑀓𑀦𑁆𑀢𑀁. 𑀯𑀦𑀸 𑀦𑀺𑀩𑁆𑀩𑀦𑀫𑀸𑀕𑀢𑀦𑁆𑀢𑀺 𑀓𑀺𑀮𑁂𑀲𑀯𑀦𑀢𑁄 𑀦𑀺𑀩𑁆𑀩𑀦𑀁 𑀓𑀺𑀮𑁂𑀲𑀯𑀦𑀭𑀳𑀺𑀢𑀁 𑀦𑀺𑀩𑁆𑀩𑀸𑀦𑀁 𑀆𑀕𑀢𑀁 𑀲𑀫𑁆𑀧𑀢𑁆𑀢𑀁. 𑀓𑀸𑀫𑁂𑀳𑀺 𑀦𑁂𑀓𑁆𑀔𑀫𑁆𑀫𑀭𑀢𑀦𑁆𑀢𑀺 𑀤𑀼𑀯𑀺𑀥𑁂𑀳𑀺 𑀓𑀸𑀫𑁂𑀳𑀺 𑀦𑀺𑀓𑁆𑀔𑀦𑁆𑀢𑀢𑁆𑀢𑀸 𑀧𑀩𑁆𑀩𑀚𑁆𑀚𑀸 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄 𑀘𑀢𑁆𑀢𑀸𑀭𑁄 𑀘 𑀅𑀭𑀺𑀬𑀫𑀕𑁆𑀕𑀸 𑀓𑀸𑀫𑁂𑀳𑀺 𑀦𑁂𑀓𑁆𑀔𑀫𑁆𑀫𑀁 𑀦𑀸𑀫, 𑀢𑀢𑁆𑀣 𑀭𑀢𑀁 𑀅𑀪𑀺𑀭𑀢𑀁. 𑀫𑀼𑀢𑁆𑀢𑀁 𑀲𑁂𑀮𑀸𑀯 𑀓𑀜𑁆𑀘𑀦𑀦𑁆𑀢𑀺 𑀲𑁂𑀮𑀥𑀸𑀢𑀼𑀢𑁄 𑀫𑀼𑀢𑁆𑀢𑀁 𑀓𑀜𑁆𑀘𑀦𑀲𑀤𑀺𑀲𑀁.

𑀲𑀩𑁆𑀩𑁂 𑀅𑀘𑁆𑀘𑀭𑀼𑀘𑀻𑀢𑀺 𑀲𑀩𑁆𑀩𑀲𑀢𑁆𑀢𑁂 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀧𑀯𑀢𑁆𑀢𑀭𑀼𑀘𑀺. 𑀅𑀝𑁆𑀞𑀫𑀓𑀜𑁆𑀳𑀺 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀧𑀯𑀢𑁆𑀢𑀭𑀼𑀘𑀺𑀢𑀸𑀬 𑀲𑁄𑀢𑀸𑀧𑀦𑁆𑀦𑁄 𑀅𑀘𑁆𑀘𑀭𑀼𑀘𑀺 𑀦𑀸𑀫, 𑀲𑁄𑀢𑀸𑀧𑀦𑁆𑀦𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀧𑀯𑀢𑁆𑀢𑀭𑀼𑀘𑀺𑀢𑀸𑀬 𑀲𑀓𑀤𑀸𑀕𑀸𑀫𑀻…𑀧𑁂… 𑀔𑀻𑀡𑀸𑀲𑀯𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀧𑀯𑀢𑁆𑀢𑀭𑀼𑀘𑀺𑀢𑀸𑀬 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄, 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀧𑀯𑀢𑁆𑀢𑀭𑀼𑀘𑀺𑀢𑀸𑀬 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀅𑀘𑁆𑀘𑀭𑀼𑀘𑀺 𑀦𑀸𑀫. 𑀳𑀺𑀫𑀯𑀸𑀯𑀜𑁆𑀜𑁂 𑀲𑀺𑀮𑀼𑀘𑁆𑀘𑀬𑁂𑀢𑀺 𑀬𑀣𑀸 𑀳𑀺𑀫𑀯𑀸 𑀧𑀩𑁆𑀩𑀢𑀭𑀸𑀚𑀸 𑀅𑀜𑁆𑀜𑁂 𑀧𑀩𑁆𑀩𑀢𑁂 𑀅𑀢𑀺𑀭𑁄𑀘𑀢𑀺, 𑀏𑀯𑀁 𑀅𑀢𑀺𑀭𑁄𑀘𑀢𑀻𑀢𑀺 𑀅𑀢𑁆𑀣𑁄. 𑀲𑀘𑁆𑀘𑀦𑀸𑀫𑁄𑀢𑀺 𑀢𑀘𑁆𑀙𑀦𑀸𑀫𑁄 𑀪𑀽𑀢𑀦𑀸𑀫𑁄 𑀆𑀕𑀼𑀁 𑀅𑀓𑀭𑀡𑁂𑀦𑁂𑀯 𑀦𑀸𑀕𑁄𑀢𑀺 𑀏𑀯𑀁 𑀅𑀯𑀺𑀢𑀣𑀦𑀸𑀫𑁄.

𑀲𑁄𑀭𑀘𑁆𑀘𑀦𑁆𑀢𑀺 𑀲𑀼𑀘𑀺𑀲𑀻𑀮𑀁. 𑀅𑀯𑀺𑀳𑀺𑀁𑀲𑀸𑀢𑀺 𑀓𑀭𑀼𑀡𑀸 𑀘 𑀓𑀭𑀼𑀡𑀸𑀧𑀼𑀩𑁆𑀩𑀪𑀸𑀕𑁄 𑀘. 𑀧𑀸𑀤𑀸 𑀦𑀸𑀕𑀲𑁆𑀲 𑀢𑁂 𑀤𑀼𑀯𑁂𑀢𑀺 𑀢𑁂 𑀩𑀼𑀤𑁆𑀥𑀦𑀸𑀕𑀲𑁆𑀲 𑀤𑀼𑀯𑁂 𑀧𑀼𑀭𑀺𑀫𑀧𑀸𑀤𑀸.

𑀢𑀧𑁄𑀢𑀺 𑀥𑀼𑀢𑀲𑀫𑀸𑀤𑀸𑀦𑀁. 𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀺 𑀅𑀭𑀺𑀬𑀫𑀕𑁆𑀕𑀲𑀻𑀮𑀁. 𑀘𑀭𑀡𑀸 𑀦𑀸𑀕𑀲𑁆𑀲 𑀢𑁆𑀬𑀸𑀧𑀭𑁂𑀢𑀺 𑀢𑁂 𑀩𑀼𑀤𑁆𑀥𑀦𑀸𑀕𑀲𑁆𑀲 𑀅𑀧𑀭𑁂 𑀤𑁆𑀯𑁂 𑀧𑀘𑁆𑀙𑀺𑀫𑀧𑀸𑀤𑀸. 𑀲𑀤𑁆𑀥𑀸𑀳𑀢𑁆𑀣𑁄𑀢𑀺 𑀲𑀤𑁆𑀥𑀸𑀫𑀬𑀸𑀬 𑀲𑁄𑀡𑁆𑀟𑀸𑀬 𑀲𑀫𑀦𑁆𑀦𑀸𑀕𑀢𑁄. 𑀉𑀧𑁂𑀓𑁆𑀔𑀸𑀲𑁂𑀢𑀤𑀦𑁆𑀢𑀯𑀸𑀢𑀺 𑀙𑀴𑀗𑁆𑀕𑀼𑀧𑁂𑀓𑁆𑀔𑀸𑀫𑀬𑁂𑀳𑀺 𑀲𑁂𑀢𑀤𑀦𑁆𑀢𑁂𑀳𑀺 𑀲𑀫𑀦𑁆𑀦𑀸𑀕𑀢𑁄.

𑀲𑀢𑀺 𑀕𑀻𑀯𑀸𑀢𑀺 𑀬𑀣𑀸 𑀦𑀸𑀕𑀲𑁆𑀲 𑀅𑀗𑁆𑀕𑀧𑀘𑁆𑀘𑀗𑁆𑀕𑀲𑁆𑀫𑀺𑀁 𑀲𑀺𑀭𑀸𑀚𑀸𑀮𑀸𑀦𑀁 𑀕𑀻𑀯𑀸 𑀧𑀢𑀺𑀝𑁆𑀞𑀸, 𑀏𑀯𑀁 𑀩𑀼𑀤𑁆𑀥𑀦𑀸𑀕𑀲𑁆𑀲 𑀲𑁄𑀭𑀘𑁆𑀘𑀸𑀤𑀻𑀦𑀁 𑀥𑀫𑁆𑀫𑀸𑀦𑀁 𑀲𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀲𑀢𑀺 𑀕𑀻𑀯𑀸’’𑀢𑀺. 𑀲𑀺𑀭𑁄 𑀧𑀜𑁆𑀜𑀸𑀢𑀺 𑀬𑀣𑀸 𑀳𑀢𑁆𑀣𑀺𑀦𑀸𑀕𑀲𑁆𑀲 𑀲𑀺𑀭𑁄 𑀉𑀢𑁆𑀢𑀫𑀗𑁆𑀕𑁄, 𑀏𑀯𑀁 𑀩𑀼𑀤𑁆𑀥𑀦𑀸𑀕𑀲𑁆𑀲 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀁. 𑀢𑁂𑀦 𑀳𑀺 𑀲𑁄 𑀲𑀩𑁆𑀩𑀥𑀫𑁆𑀫𑁂 𑀚𑀸𑀦𑀸𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀲𑀺𑀭𑁄 𑀧𑀜𑁆𑀜𑀸’’𑀢𑀺. 𑀯𑀻𑀫𑀁𑀲𑀸 𑀥𑀫𑁆𑀫𑀘𑀺𑀦𑁆𑀢𑀦𑀸𑀢𑀺 𑀬𑀣𑀸 𑀳𑀢𑁆𑀣𑀺𑀦𑀸𑀕𑀲𑁆𑀲 𑀅𑀕𑁆𑀕𑀲𑁄𑀡𑁆𑀟𑁄 𑀯𑀻𑀫𑀁𑀲𑀸 𑀦𑀸𑀫 𑀳𑁄𑀢𑀺. 𑀲𑁄 𑀢𑀸𑀬 𑀣𑀤𑁆𑀥𑀫𑀼𑀤𑀼𑀓𑀁 𑀔𑀸𑀤𑀺𑀢𑀩𑁆𑀩𑀸𑀔𑀸𑀤𑀺𑀢𑀩𑁆𑀩𑀜𑁆𑀘 𑀯𑀻𑀫𑀁𑀲𑀢𑀺, 𑀢𑀢𑁄 𑀧𑀳𑀸𑀢𑀩𑁆𑀩𑀁 𑀧𑀚𑀳𑀢𑀺, 𑀆𑀤𑀸𑀢𑀩𑁆𑀩𑀁 𑀆𑀤𑀺𑀬𑀢𑀺, 𑀏𑀯𑀫𑁂𑀯 𑀩𑀼𑀤𑁆𑀥𑀦𑀸𑀕𑀲𑁆𑀲 𑀥𑀫𑁆𑀫𑀓𑁄𑀝𑁆𑀞𑀸𑀲𑀧𑀭𑀺𑀘𑁆𑀙𑁂𑀤𑀓𑀜𑀸𑀡𑀲𑀗𑁆𑀔𑀸𑀢𑀸 𑀥𑀫𑁆𑀫𑀘𑀺𑀦𑁆𑀢𑀦𑀸 𑀯𑀻𑀫𑀁𑀲𑀸. 𑀢𑁂𑀦 𑀳𑀺 𑀜𑀸𑀡𑁂𑀦 𑀲𑁄 𑀪𑀩𑁆𑀩𑀸𑀪𑀩𑁆𑀩𑁂 𑀚𑀸𑀦𑀸𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀯𑀻𑀫𑀁𑀲𑀸 𑀥𑀫𑁆𑀫𑀘𑀺𑀦𑁆𑀢𑀦𑀸’’𑀢𑀺. 𑀥𑀫𑁆𑀫𑀓𑀼𑀘𑁆𑀙𑀺𑀲𑀫𑀸𑀢𑀧𑁄𑀢𑀺 𑀥𑀫𑁆𑀫𑁄 𑀯𑀼𑀘𑁆𑀘𑀢𑀺 𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑀫𑀸𑀥𑀺, 𑀓𑀼𑀘𑁆𑀙𑀺𑀬𑁂𑀯 𑀲𑀫𑀸𑀢𑀧𑁄 𑀓𑀼𑀘𑁆𑀙𑀺𑀲𑀫𑀸𑀢𑀧𑁄. 𑀲𑀫𑀸𑀢𑀧𑁄 𑀦𑀸𑀫 𑀲𑀫𑀸𑀢𑀧𑀦𑀝𑁆𑀞𑀸𑀦𑀁. 𑀥𑀫𑁆𑀫𑁄 𑀓𑀼𑀘𑁆𑀙𑀺𑀲𑀫𑀸𑀢𑀧𑁄 𑀅𑀲𑁆𑀲𑀸𑀢𑀺 𑀥𑀫𑁆𑀫𑀓𑀼𑀘𑁆𑀙𑀺𑀲𑀫𑀸𑀢𑀧𑁄. 𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑀫𑀸𑀥𑀺𑀲𑁆𑀫𑀺𑀁 𑀞𑀺𑀢𑀲𑁆𑀲 𑀳𑀺 𑀢𑁂 𑀢𑁂 𑀇𑀤𑁆𑀥𑀺𑀯𑀺𑀥𑀸𑀤𑀺𑀥𑀫𑁆𑀫𑀸 𑀇𑀚𑁆𑀛𑀦𑁆𑀢𑀺, 𑀢𑀲𑁆𑀫𑀸 𑀲𑁄 𑀓𑀼𑀘𑁆𑀙𑀺𑀲𑀫𑀸𑀢𑀧𑁄𑀢𑀺 𑀯𑀼𑀢𑁆𑀢𑁄. 𑀯𑀺𑀯𑁂𑀓𑁄𑀢𑀺 𑀓𑀸𑀬𑀘𑀺𑀢𑁆𑀢𑀉𑀧𑀥𑀺𑀯𑀺𑀯𑁂𑀓𑁄. 𑀬𑀣𑀸 𑀦𑀸𑀕𑀲𑁆𑀲 𑀯𑀸𑀮𑀥𑀺 𑀫𑀓𑁆𑀔𑀺𑀓𑀸 𑀯𑀸𑀭𑁂𑀢𑀺, 𑀏𑀯𑀁 𑀢𑀣𑀸𑀕𑀢𑀲𑁆𑀲 𑀯𑀺𑀯𑁂𑀓𑁄 𑀕𑀳𑀝𑁆𑀞𑀧𑀩𑁆𑀩𑀚𑀺𑀢𑁂 𑀯𑀸𑀭𑁂𑀢𑀺. 𑀢𑀲𑁆𑀫𑀸 𑀲𑁄 𑀯𑀸𑀮𑀥𑀻𑀢𑀺 𑀯𑀼𑀢𑁆𑀢𑁄.

𑀛𑀸𑀬𑀻𑀢𑀺 𑀤𑀼𑀯𑀺𑀥𑁂𑀦 𑀛𑀸𑀦𑁂𑀦 𑀛𑀸𑀬𑀻. 𑀅𑀲𑁆𑀲𑀸𑀲𑀭𑀢𑁄𑀢𑀺 𑀦𑀸𑀕𑀲𑁆𑀲 𑀳𑀺 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸 𑀯𑀺𑀬 𑀩𑀼𑀤𑁆𑀥𑀦𑀸𑀕𑀲𑁆𑀲 𑀨𑀮𑀲𑀫𑀸𑀧𑀢𑁆𑀢𑀺, 𑀢𑀢𑁆𑀣 𑀭𑀢𑁄, 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑁂𑀳𑀺 𑀯𑀺𑀬 𑀢𑀸𑀬 𑀯𑀺𑀦𑀸 𑀦 𑀯𑀢𑁆𑀢𑀢𑀻𑀢𑀺 𑀅𑀢𑁆𑀣𑁄. 𑀲𑀩𑁆𑀩𑀢𑁆𑀣 𑀲𑀁𑀯𑀼𑀢𑁄𑀢𑀺 𑀲𑀩𑁆𑀩𑀤𑁆𑀯𑀸𑀭𑁂𑀲𑀼 𑀲𑀁𑀯𑀼𑀢𑁄. 𑀅𑀦𑀯𑀚𑁆𑀚𑀸𑀦𑀻𑀢𑀺 𑀲𑀫𑁆𑀫𑀸𑀆𑀚𑀻𑀯𑁂𑀦 𑀉𑀧𑁆𑀧𑀦𑁆𑀦𑀪𑁄𑀚𑀦𑀸𑀦𑀺. 𑀲𑀸𑀯𑀚𑁆𑀚𑀸𑀦𑀻𑀢𑀺 𑀧𑀜𑁆𑀘𑀯𑀺𑀥𑀫𑀺𑀘𑁆𑀙𑀸𑀚𑀻𑀯𑀯𑀲𑁂𑀦 𑀉𑀧𑁆𑀧𑀦𑁆𑀦𑀪𑁄𑀚𑀦𑀸𑀦𑀺.

𑀅𑀡𑀼𑀁𑀣𑀽𑀮𑀦𑁆𑀢𑀺 𑀔𑀼𑀤𑁆𑀤𑀓𑀜𑁆𑀘 𑀫𑀳𑀦𑁆𑀢𑀜𑁆𑀘. 𑀲𑀩𑁆𑀩𑀁 𑀙𑁂𑀢𑁆𑀯𑀸𑀦 𑀩𑀦𑁆𑀥𑀦𑀦𑁆𑀢𑀺 𑀲𑀩𑁆𑀩𑀁 𑀤𑀲𑀯𑀺𑀥𑀫𑁆𑀧𑀺 𑀲𑀁𑀬𑁄𑀚𑀦𑀁 𑀙𑀺𑀦𑁆𑀤𑀺𑀢𑁆𑀯𑀸𑀦. 𑀦𑀼𑀧𑀮𑀺𑀧𑁆𑀧𑀢𑀺 𑀮𑁄𑀓𑁂𑀦𑀸𑀢𑀺 𑀮𑁄𑀓𑁂𑀦 𑀲𑀤𑁆𑀥𑀺𑀁 𑀢𑀡𑁆𑀳𑀸𑀫𑀸𑀦𑀤𑀺𑀝𑁆𑀞𑀺𑀮𑁂𑀧𑁂𑀳𑀺 𑀦 𑀮𑀺𑀧𑁆𑀧𑀢𑀺. 𑀫𑀳𑀸𑀕𑀺𑀦𑀻𑀢𑀺 𑀫𑀳𑀸𑀅𑀕𑁆𑀕𑀺. 𑀯𑀺𑀜𑁆𑀜𑀽𑀳𑀺 𑀤𑁂𑀲𑀺𑀢𑀸𑀢𑀺 𑀇𑀥 𑀧𑀝𑀺𑀲𑀫𑁆𑀪𑀺𑀤𑀸𑀧𑁆𑀧𑀢𑁆𑀢𑁄 𑀓𑀸𑀴𑀼𑀤𑀸𑀬𑀺𑀢𑁆𑀣𑁂𑀭𑁄𑀯 𑀯𑀺𑀜𑁆𑀜𑀽 𑀧𑀡𑁆𑀟𑀺𑀢𑁄, 𑀢𑁂𑀦 𑀤𑁂𑀲𑀺𑀢𑀸𑀢𑀺 𑀅𑀢𑁆𑀣𑁄. 𑀯𑀺𑀜𑁆𑀜𑀲𑁆𑀲𑀦𑁆𑀢𑀺 𑀫𑀳𑀸𑀦𑀸𑀕𑀸, 𑀦𑀸𑀕𑀁 𑀦𑀸𑀕𑁂𑀦 𑀤𑁂𑀲𑀺𑀢𑀦𑁆𑀢𑀺 𑀉𑀤𑀸𑀬𑀺𑀢𑁆𑀣𑁂𑀭𑀦𑀸𑀕𑁂𑀦 𑀤𑁂𑀲𑀺𑀢𑀁 𑀩𑀼𑀤𑁆𑀥𑀦𑀸𑀕𑀁 𑀇𑀢𑀭𑁂 𑀔𑀻𑀡𑀸𑀲𑀯𑀸 𑀦𑀸𑀕𑀸 𑀯𑀺𑀚𑀸𑀦𑀺𑀲𑁆𑀲𑀦𑁆𑀢𑀺.

𑀲𑀭𑀻𑀭𑀁 𑀯𑀺𑀚𑀳𑀁 𑀦𑀸𑀕𑁄, 𑀧𑀭𑀺𑀦𑀺𑀩𑁆𑀩𑀺𑀲𑁆𑀲𑀢𑀻𑀢𑀺 𑀩𑁄𑀥𑀺𑀧𑀮𑁆𑀮𑀗𑁆𑀓𑁂 𑀓𑀺𑀮𑁂𑀲𑀧𑀭𑀺𑀦𑀺𑀩𑁆𑀩𑀸𑀦𑁂𑀦 𑀧𑀭𑀺𑀦𑀺𑀩𑁆𑀩𑀼𑀢𑁄, 𑀬𑀫𑀓𑀲𑀸𑀮𑀦𑁆𑀢𑀭𑁂 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀢𑀺. 𑀏𑀯𑀁 𑀧𑀝𑀺𑀲𑀫𑁆𑀪𑀺𑀤𑀸𑀧𑁆𑀧𑀢𑁆𑀢𑁄 𑀉𑀤𑀸𑀬𑀺𑀢𑁆𑀣𑁂𑀭𑁄 𑀲𑁄𑀴𑀲𑀳𑀺 𑀕𑀸𑀣𑀸𑀳𑀺 𑀘𑀢𑀼𑀲𑀝𑁆𑀞𑀺𑀬𑀸 𑀧𑀤𑁂𑀳𑀺 𑀤𑀲𑀩𑀮𑀲𑁆𑀲 𑀯𑀡𑁆𑀡𑀁 𑀓𑀣𑁂𑀦𑁆𑀢𑁄 𑀤𑁂𑀲𑀦𑀁 𑀦𑀺𑀝𑁆𑀞𑀸𑀧𑁂𑀲𑀺. 𑀪𑀕𑀯𑀸 𑀅𑀦𑀼𑀫𑁄𑀤𑀺. 𑀤𑁂𑀲𑀦𑀸𑀯𑀲𑀸𑀦𑁂 𑀘𑀢𑀼𑀭𑀸𑀲𑀻𑀢𑀺𑀧𑀸𑀡𑀲𑀳𑀲𑁆𑀲𑀸𑀦𑀺 𑀅𑀫𑀢𑀧𑀸𑀦𑀁 𑀧𑀺𑀯𑀺𑀁𑀲𑀽𑀢𑀺.

𑁨. 𑀫𑀺𑀕𑀲𑀸𑀮𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁪. 𑀤𑀼𑀢𑀺𑀬𑁂 𑀓𑀣𑀁 𑀓𑀣𑀁 𑀦𑀸𑀫𑀸𑀢𑀺 𑀓𑁂𑀦 𑀓𑁂𑀦 𑀓𑀸𑀭𑀡𑁂𑀦. 𑀅𑀜𑁆𑀜𑁂𑀬𑁆𑀬𑁄𑀢𑀺 𑀆𑀚𑀸𑀦𑀺𑀢𑀩𑁆𑀩𑁄. 𑀬𑀢𑁆𑀭 𑀳𑀺 𑀦𑀸𑀫𑀸𑀢𑀺 𑀬𑀲𑁆𑀫𑀺𑀁 𑀦𑀸𑀫 𑀥𑀫𑁆𑀫𑁂. 𑀲𑀫𑀲𑀫𑀕𑀢𑀺𑀓𑀸𑀢𑀺 𑀲𑀫𑀪𑀸𑀯𑁂𑀦𑁂𑀯 𑀲𑀫𑀕𑀢𑀺𑀓𑀸. 𑀪𑀯𑀺𑀲𑁆𑀲𑀦𑁆𑀢𑀻𑀢𑀺 𑀚𑀸𑀢𑀸. 𑀲𑀓𑀤𑀸𑀕𑀸𑀫𑀺𑀧𑀢𑁆𑀢𑁄 𑀢𑀼𑀲𑀺𑀢𑀁 𑀓𑀸𑀬𑀁 𑀉𑀧𑀧𑀦𑁆𑀦𑁄𑀢𑀺 𑀲𑀓𑀤𑀸𑀕𑀸𑀫𑀺𑀧𑀼𑀕𑁆𑀕𑀮𑁄 𑀳𑀼𑀢𑁆𑀯𑀸 𑀢𑀼𑀲𑀺𑀢𑀪𑀯𑀦𑁂𑀬𑁂𑀯 𑀦𑀺𑀩𑁆𑀩𑀢𑁆𑀢𑁄. 𑀓𑀣𑀁 𑀓𑀣𑀁 𑀦𑀸𑀫𑀸𑀢𑀺 𑀓𑁂𑀦 𑀓𑁂𑀦 𑀦𑀼 𑀔𑁄 𑀓𑀸𑀭𑀡𑁂𑀦, 𑀓𑀺𑀁 𑀦𑀼 𑀔𑁄 𑀚𑀸𑀦𑀺𑀢𑁆𑀯𑀸 𑀤𑁂𑀲𑀺𑀢𑁄, 𑀉𑀤𑀸𑀳𑀼 𑀅𑀚𑀸𑀦𑀺𑀢𑁆𑀯𑀸𑀢𑀺. 𑀣𑁂𑀭𑁄 𑀓𑀸𑀭𑀡𑀁 𑀅𑀚𑀸𑀦𑀦𑁆𑀢𑁄 𑀏𑀯𑀁 𑀔𑁄 𑀧𑀦𑁂𑀢𑀁 𑀪𑀕𑀺𑀦𑀺 𑀪𑀕𑀯𑀢𑀸 𑀩𑁆𑀬𑀸𑀓𑀢𑀦𑁆𑀢𑀺 𑀆𑀳.

𑀅𑀫𑁆𑀫𑀓𑀸 𑀅𑀫𑁆𑀫𑀓𑀧𑀜𑁆𑀜𑀸𑀢𑀺 𑀇𑀢𑁆𑀣𑀻 𑀳𑀼𑀢𑁆𑀯𑀸 𑀇𑀢𑁆𑀣𑀺𑀲𑀜𑁆𑀜𑀸𑀬 𑀏𑀯 𑀲𑀫𑀦𑁆𑀦𑀸𑀕𑀢𑀸. 𑀓𑁂 𑀘 𑀧𑀼𑀭𑀺𑀲𑀧𑀼𑀕𑁆𑀕𑀮𑀧𑀭𑁄𑀧𑀭𑀺𑀬𑀜𑀸𑀡𑁂𑀢𑀺 𑀏𑀢𑁆𑀣 𑀧𑀼𑀭𑀺𑀲𑀧𑀼𑀕𑁆𑀕𑀮𑀧𑀭𑁄𑀧𑀭𑀺𑀬𑀜𑀸𑀡𑀁 𑀯𑀼𑀘𑁆𑀘𑀢𑀺 𑀧𑀼𑀭𑀺𑀲𑀧𑀼𑀕𑁆𑀕𑀮𑀸𑀦𑀁 𑀢𑀺𑀓𑁆𑀔𑀫𑀼𑀤𑀼𑀯𑀲𑁂𑀦 𑀇𑀦𑁆𑀤𑁆𑀭𑀺𑀬𑀧𑀭𑁄𑀧𑀭𑀺𑀬𑀜𑀸𑀡𑀁. 𑀢𑀲𑁆𑀫𑀸 𑀓𑀸 𑀘 𑀩𑀸𑀮𑀸 𑀫𑀺𑀕𑀲𑀸𑀮𑀸, 𑀓𑁂 𑀘 𑀧𑀼𑀭𑀺𑀲𑀧𑀼𑀕𑁆𑀕𑀮𑀸𑀦𑀁 𑀇𑀦𑁆𑀤𑁆𑀭𑀺𑀬𑀧𑀭𑁄𑀧𑀭𑀺𑀬𑀜𑀸𑀡𑁂 𑀅𑀧𑁆𑀧𑀝𑀺𑀳𑀢𑀯𑀺𑀲𑀬𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸, 𑀉𑀪𑀬𑀫𑁂𑀢𑀁 𑀤𑀽𑀭𑁂 𑀲𑀼𑀯𑀺𑀤𑀽𑀭𑁂𑀢𑀺 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄.

𑀇𑀤𑀸𑀦𑀺 𑀫𑀺𑀕𑀲𑀸𑀮𑀸𑀬 𑀅𑀢𑁆𑀢𑀦𑁄 𑀤𑀽𑀭𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 𑀙𑀬𑀺𑀫𑁂, 𑀆𑀦𑀦𑁆𑀤𑀸𑀢𑀺𑀆𑀤𑀺𑀫𑀸𑀳. 𑀲𑁄𑀭𑀢𑁄 𑀳𑁄𑀢𑀻𑀢𑀺 𑀧𑀸𑀧𑀢𑁄 𑀲𑀼𑀝𑁆𑀞𑀼 𑀑𑀭𑀢𑁄 𑀯𑀺𑀭𑀢𑁄 𑀳𑁄𑀢𑀺. 𑀲𑀼𑀭𑀢𑁄𑀢𑀺𑀧𑀺 𑀧𑀸𑀞𑁄. 𑀅𑀪𑀺𑀦𑀦𑁆𑀤𑀦𑁆𑀢𑀺 𑀲𑀩𑁆𑀭𑀳𑁆𑀫𑀘𑀸𑀭𑀻 𑀏𑀓𑀢𑁆𑀢𑀯𑀸𑀲𑁂𑀦𑀸𑀢𑀺 𑀢𑁂𑀦 𑀲𑀤𑁆𑀥𑀺𑀁 𑀏𑀓𑀢𑁄𑀯𑀸𑀲𑁂𑀦 𑀲𑀩𑁆𑀭𑀳𑁆𑀫𑀘𑀸𑀭𑀻 𑀅𑀪𑀺𑀦𑀦𑁆𑀤𑀦𑁆𑀢𑀺 𑀢𑀼𑀲𑁆𑀲𑀦𑁆𑀢𑀺. 𑀏𑀓𑀦𑁆𑀢𑀯𑀸𑀲𑁂𑀦𑀸𑀢𑀺𑀧𑀺 𑀧𑀸𑀞𑁄, 𑀲𑀢𑀢𑀯𑀸𑀲𑁂𑀦𑀸𑀢𑀺 𑀅𑀢𑁆𑀣𑁄. 𑀲𑀯𑀦𑁂𑀦𑀧𑀺 𑀅𑀓𑀢𑀁 𑀳𑁄𑀢𑀻𑀢𑀺 𑀲𑁄𑀢𑀩𑁆𑀩𑀬𑀼𑀢𑁆𑀢𑀓𑀁 𑀅𑀲𑀼𑀢𑀁 𑀳𑁄𑀢𑀺. 𑀩𑀸𑀳𑀼𑀲𑀘𑁆𑀘𑁂𑀦𑀧𑀺 𑀅𑀓𑀢𑀁 𑀳𑁄𑀢𑀻𑀢𑀺 𑀏𑀢𑁆𑀣 𑀩𑀸𑀳𑀼𑀲𑀘𑁆𑀘𑀁 𑀯𑀼𑀘𑁆𑀘𑀢𑀺 𑀯𑀻𑀭𑀺𑀬𑀁, 𑀯𑀻𑀭𑀺𑀬𑁂𑀦 𑀓𑀢𑁆𑀢𑀩𑁆𑀩𑀬𑀼𑀢𑁆𑀢𑀓𑀁 𑀅𑀓𑀢𑀁 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀤𑀺𑀝𑁆𑀞𑀺𑀬𑀸𑀧𑀺 𑀅𑀧𑁆𑀧𑀝𑀺𑀯𑀺𑀤𑁆𑀥𑀁 𑀳𑁄𑀢𑀻𑀢𑀺 𑀤𑀺𑀝𑁆𑀞𑀺𑀬𑀸 𑀧𑀝𑀺𑀯𑀺𑀚𑁆𑀛𑀺𑀢𑀩𑁆𑀩𑀁 𑀅𑀧𑁆𑀧𑀝𑀺𑀯𑀺𑀤𑁆𑀥𑀁 𑀳𑁄𑀢𑀺. 𑀲𑀸𑀫𑀸𑀬𑀺𑀓𑀫𑁆𑀧𑀺 𑀯𑀺𑀫𑀼𑀢𑁆𑀢𑀺𑀁 𑀦 𑀮𑀪𑀢𑀻𑀢𑀺 𑀓𑀸𑀮𑀸𑀦𑀼𑀓𑀸𑀮𑀁 𑀥𑀫𑁆𑀫𑀲𑁆𑀲𑀯𑀦𑀁 𑀦𑀺𑀲𑁆𑀲𑀸𑀬 𑀧𑀻𑀢𑀺𑀧𑀸𑀫𑁄𑀚𑁆𑀚𑀁 𑀦 𑀮𑀪𑀢𑀺. 𑀳𑀸𑀦𑀕𑀸𑀫𑀻𑀬𑁂𑀯 𑀳𑁄𑀢𑀻𑀢𑀺 𑀧𑀭𑀺𑀳𑀸𑀦𑀺𑀫𑁂𑀯 𑀕𑀘𑁆𑀙𑀢𑀺.

𑀧𑀫𑀸𑀡𑀺𑀓𑀸𑀢𑀺 𑀧𑀼𑀕𑁆𑀕𑀮𑁂𑀲𑀼 𑀧𑀫𑀸𑀡𑀕𑁆𑀕𑀸𑀳𑀓𑀸. 𑀧𑀫𑀺𑀦𑀦𑁆𑀢𑀻𑀢𑀺 𑀧𑀫𑁂𑀢𑀼𑀁 𑀢𑀼𑀮𑁂𑀢𑀼𑀁 𑀆𑀭𑀪𑀦𑁆𑀢𑀺. 𑀏𑀓𑁄 𑀳𑀻𑀦𑁄𑀢𑀺 𑀏𑀓𑁄 𑀕𑀼𑀡𑁂𑀳𑀺 𑀳𑀻𑀦𑁄. 𑀏𑀓𑁄 𑀧𑀡𑀻𑀢𑁄𑀢𑀺 𑀏𑀓𑁄 𑀕𑀼𑀡𑁂𑀳𑀺 𑀧𑀡𑀻𑀢𑁄. 𑀢𑀁 𑀳𑀻𑀢𑀺 𑀢𑀁 𑀧𑀫𑀸𑀡𑀓𑀭𑀡𑀁.

𑀅𑀪𑀺𑀓𑁆𑀓𑀦𑁆𑀢𑀢𑀭𑁄𑀢𑀺 𑀲𑀼𑀦𑁆𑀤𑀭𑀢𑀭𑁄. 𑀧𑀡𑀻𑀢𑀢𑀭𑁄𑀢𑀺 𑀉𑀢𑁆𑀢𑀫𑀢𑀭𑁄. 𑀥𑀫𑁆𑀫𑀲𑁄𑀢𑁄 𑀦𑀺𑀩𑁆𑀩𑀳𑀢𑀻𑀢𑀺 𑀲𑀽𑀭𑀁 𑀳𑀼𑀢𑁆𑀯𑀸 𑀧𑀯𑀢𑁆𑀢𑀫𑀸𑀦𑀯𑀺𑀧𑀲𑁆𑀲𑀦𑀸𑀜𑀸𑀡𑀁 𑀦𑀺𑀩𑁆𑀩𑀳𑀢𑀺, 𑀅𑀭𑀺𑀬𑀪𑀽𑀫𑀺𑀁 𑀲𑀫𑁆𑀧𑀸𑀧𑁂𑀢𑀺. 𑀢𑀤𑀦𑁆𑀢𑀭𑀁 𑀓𑁄 𑀚𑀸𑀦𑁂𑀬𑁆𑀬𑀸𑀢𑀺 𑀢𑀁 𑀅𑀦𑁆𑀢𑀭𑀁 𑀢𑀁 𑀓𑀸𑀭𑀡𑀁 𑀅𑀜𑁆𑀜𑀢𑁆𑀭 𑀢𑀣𑀸𑀕𑀢𑁂𑀦 𑀓𑁄 𑀚𑀸𑀦𑁂𑀬𑁆𑀬𑀸𑀢𑀺 𑀅𑀢𑁆𑀣𑁄.

𑀓𑁄𑀥𑀫𑀸𑀦𑁄𑀢𑀺 𑀓𑁄𑀥𑁄 𑀘 𑀫𑀸𑀦𑁄 𑀘. 𑀮𑁄𑀪𑀥𑀫𑁆𑀫𑀸𑀢𑀺 𑀮𑁄𑀪𑁄𑀬𑁂𑀯. 𑀯𑀘𑀻𑀲𑀗𑁆𑀔𑀸𑀭𑀸𑀢𑀺 𑀆𑀮𑀸𑀧𑀲𑀮𑁆𑀮𑀸𑀧𑀯𑀲𑁂𑀦 𑀯𑀘𑀦𑀸𑀦𑁂𑀯. 𑀬𑁄 𑀯𑀸 𑀧𑀦𑀲𑁆𑀲 𑀫𑀸𑀤𑀺𑀲𑁄𑀢𑀺 𑀬𑁄 𑀯𑀸 𑀧𑀦 𑀅𑀜𑁆𑀜𑁄𑀧𑀺 𑀫𑀬𑀸 𑀲𑀤𑀺𑀲𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄𑀬𑁂𑀯 𑀅𑀲𑁆𑀲, 𑀲𑁄 𑀧𑀼𑀕𑁆𑀕𑀮𑁂𑀲𑀼 𑀧𑀫𑀸𑀡𑀁 𑀕𑀡𑁆𑀳𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀔𑀜𑁆𑀜𑀢𑀻𑀢𑀺 𑀕𑀼𑀡𑀔𑀡𑀦𑀁 𑀧𑀸𑀧𑀼𑀡𑀸𑀢𑀺. 𑀇𑀫𑁂 𑀔𑁄, 𑀆𑀦𑀦𑁆𑀤, 𑀙 𑀧𑀼𑀕𑁆𑀕𑀮𑀸𑀢𑀺 𑀤𑁆𑀯𑁂 𑀲𑁄𑀭𑀢𑀸, 𑀤𑁆𑀯𑁂 𑀅𑀥𑀺𑀕𑀢𑀓𑁄𑀥𑀫𑀸𑀦𑀮𑁄𑀪𑀥𑀫𑁆𑀫𑀸, 𑀤𑁆𑀯𑁂 𑀅𑀥𑀺𑀕𑀢𑀓𑁄𑀥𑀫𑀸𑀦𑀯𑀘𑀻𑀲𑀗𑁆𑀔𑀸𑀭𑀸𑀢𑀺 𑀇𑀫𑁂 𑀙 𑀧𑀼𑀕𑁆𑀕𑀮𑀸. 𑀕𑀢𑀺𑀦𑁆𑀢𑀺 𑀜𑀸𑀡𑀕𑀢𑀺𑀁. 𑀏𑀓𑀗𑁆𑀕𑀳𑀻𑀦𑀸𑀢𑀺 𑀏𑀓𑁂𑀓𑁂𑀦 𑀕𑀼𑀡𑀗𑁆𑀕𑁂𑀦 𑀳𑀻𑀦𑀸. 𑀧𑀽𑀭𑀡𑁄 𑀲𑀻𑀮𑁂𑀦 𑀯𑀺𑀲𑁂𑀲𑀻 𑀅𑀳𑁄𑀲𑀺, 𑀇𑀲𑀺𑀤𑀢𑁆𑀢𑁄 𑀧𑀜𑁆𑀜𑀸𑀬. 𑀧𑀽𑀭𑀡𑀲𑁆𑀲 𑀲𑀻𑀮𑀁 𑀇𑀲𑀺𑀤𑀢𑁆𑀢𑀲𑁆𑀲 𑀧𑀜𑁆𑀜𑀸𑀞𑀸𑀦𑁂 𑀞𑀺𑀢𑀁, 𑀇𑀲𑀺𑀤𑀢𑁆𑀢𑀲𑁆𑀲 𑀧𑀜𑁆𑀜𑀸 𑀧𑀽𑀭𑀡𑀲𑁆𑀲 𑀲𑀻𑀮𑀝𑁆𑀞𑀸𑀦𑁂 𑀞𑀺𑀢𑀸𑀢𑀺.

𑁩. 𑀇𑀡𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁫. 𑀢𑀢𑀺𑀬𑁂 𑀤𑀸𑀮𑀺𑀤𑁆𑀤𑀺𑀬𑀦𑁆𑀢𑀺 𑀤𑀮𑀺𑀤𑁆𑀤𑀪𑀸𑀯𑁄. 𑀓𑀸𑀫𑀪𑁄𑀕𑀺𑀦𑁄𑀢𑀺 𑀓𑀸𑀫𑁂 𑀪𑀼𑀜𑁆𑀚𑀦𑀓𑀲𑀢𑁆𑀢𑀲𑁆𑀲. 𑀅𑀲𑁆𑀲𑀓𑁄𑀢𑀺 𑀅𑀢𑁆𑀢𑀦𑁄 𑀲𑀦𑁆𑀢𑀓𑁂𑀦 𑀭𑀳𑀺𑀢𑁄. 𑀅𑀦𑀸𑀴𑁆𑀳𑀺𑀓𑁄𑀢𑀺 𑀦 𑀅𑀟𑁆𑀠𑁄. 𑀇𑀡𑀁 𑀆𑀤𑀺𑀬𑀢𑀻𑀢𑀺 𑀚𑀻𑀯𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀇𑀡𑀁 𑀆𑀤𑀺𑀬𑀢𑀺. 𑀯𑀟𑁆𑀠𑀺𑀁 𑀧𑀝𑀺𑀲𑁆𑀲𑀼𑀡𑀸𑀢𑀻𑀢𑀺 𑀤𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀯𑀟𑁆𑀠𑀺𑀁 𑀤𑀲𑁆𑀲𑀸𑀫𑀻𑀢𑀺 𑀧𑀝𑀺𑀚𑀸𑀦𑀸𑀢𑀺. 𑀅𑀦𑀼𑀘𑀭𑀦𑁆𑀢𑀺𑀧𑀺 𑀦𑀦𑁆𑀢𑀺 𑀧𑀭𑀺𑀲𑀫𑀚𑁆𑀛𑀕𑀡𑀫𑀚𑁆𑀛𑀸𑀤𑀻𑀲𑀼 𑀆𑀢𑀧𑀞𑀧𑀦𑀧𑀁𑀲𑀼𑀑𑀓𑀺𑀭𑀡𑀸𑀤𑀻𑀳𑀺 𑀯𑀺𑀧𑁆𑀧𑀓𑀸𑀭𑀁 𑀧𑀸𑀧𑁂𑀦𑁆𑀢𑁄 𑀧𑀘𑁆𑀙𑀢𑁄 𑀧𑀘𑁆𑀙𑀢𑁄 𑀅𑀦𑀼𑀩𑀦𑁆𑀥𑀦𑁆𑀢𑀺. 𑀲𑀤𑁆𑀥𑀸 𑀦𑀢𑁆𑀣𑀻𑀢𑀺 𑀑𑀓𑀧𑁆𑀧𑀦𑀓𑀲𑀤𑁆𑀥𑀸𑀫𑀢𑁆𑀢𑀓𑀫𑁆𑀧𑀺 𑀦𑀢𑁆𑀣𑀺. 𑀳𑀺𑀭𑀻 𑀦𑀢𑁆𑀣𑀻𑀢𑀺 𑀳𑀺𑀭𑀻𑀬𑀦𑀸𑀓𑀸𑀭𑀫𑀢𑁆𑀢𑀓𑀫𑁆𑀧𑀺 𑀦𑀢𑁆𑀣𑀺. 𑀑𑀢𑁆𑀢𑀧𑁆𑀧𑀁 𑀦𑀢𑁆𑀣𑀻𑀢𑀺 𑀪𑀸𑀬𑀦𑀸𑀓𑀸𑀭𑀫𑀢𑁆𑀢𑀓𑀫𑁆𑀧𑀺 𑀦𑀢𑁆𑀣𑀺. 𑀯𑀻𑀭𑀺𑀬𑀁 𑀦𑀢𑁆𑀣𑀻𑀢𑀺 𑀓𑀸𑀬𑀺𑀓𑀯𑀻𑀭𑀺𑀬𑀫𑀢𑁆𑀢𑀓𑀫𑁆𑀧𑀺 𑀦𑀢𑁆𑀣𑀺. 𑀧𑀜𑁆𑀜𑀸 𑀦𑀢𑁆𑀣𑀻𑀢𑀺 𑀓𑀫𑁆𑀫𑀲𑁆𑀲𑀓𑀢𑀧𑀜𑁆𑀜𑀸𑀫𑀢𑁆𑀢𑀓𑀫𑁆𑀧𑀺 𑀦𑀢𑁆𑀣𑀺. 𑀇𑀡𑀸𑀤𑀸𑀦𑀲𑁆𑀫𑀺𑀁 𑀯𑀤𑀸𑀫𑀻𑀢𑀺 𑀇𑀡𑀕𑁆𑀕𑀳𑀡𑀁 𑀯𑀤𑀸𑀫𑀺. 𑀫𑀸 𑀫𑀁 𑀚𑀜𑁆𑀜𑀽𑀢𑀺 𑀫𑀸 𑀫𑀁 𑀚𑀸𑀦𑀸𑀢𑀼.

𑀤𑀸𑀮𑀺𑀤𑁆𑀤𑀺𑀬𑀁 𑀤𑀼𑀓𑁆𑀔𑀦𑁆𑀢𑀺 𑀥𑀦𑀤𑀮𑀺𑀤𑁆𑀤𑀪𑀸𑀯𑁄 𑀤𑀼𑀓𑁆𑀔𑀁. 𑀓𑀸𑀫𑀮𑀸𑀪𑀸𑀪𑀺𑀚𑀧𑁆𑀧𑀺𑀦𑀦𑁆𑀢𑀺 𑀓𑀸𑀫𑀮𑀸𑀪𑀁 𑀧𑀢𑁆𑀣𑁂𑀦𑁆𑀢𑀸𑀦𑀁. 𑀧𑀸𑀧𑀓𑀫𑁆𑀫𑀯𑀺𑀦𑀺𑀩𑁆𑀩𑀬𑁄𑀢𑀺 𑀧𑀸𑀧𑀓𑀫𑁆𑀫𑀯𑀟𑁆𑀠𑀓𑁄. 𑀲𑀁𑀲𑀧𑁆𑀧𑀢𑀻𑀢𑀺 𑀧𑀭𑀺𑀧𑁆𑀨𑀦𑁆𑀤𑀢𑀺. 𑀚𑀸𑀦𑀦𑁆𑀢𑀺 𑀚𑀸𑀦𑀦𑁆𑀢𑁄. 𑀬𑀲𑁆𑀲 𑀯𑀺𑀧𑁆𑀧𑀝𑀺𑀲𑀸𑀭𑀚𑀸𑀢𑀺 𑀬𑁂 𑀅𑀲𑁆𑀲 𑀯𑀺𑀧𑁆𑀧𑀝𑀺𑀲𑀸𑀭𑀢𑁄 𑀚𑀸𑀢𑀸. 𑀬𑁄𑀦𑀺𑀫𑀜𑁆𑀜𑀢𑀭𑀦𑁆𑀢𑀺 𑀏𑀓𑀁 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀁. 𑀤𑀤𑀁 𑀘𑀺𑀢𑁆𑀢𑀁 𑀧𑀲𑀸𑀤𑀬𑀦𑁆𑀢𑀺 𑀘𑀺𑀢𑁆𑀢𑀁 𑀧𑀲𑀸𑀤𑁂𑀦𑁆𑀢𑁄 𑀤𑀤𑀫𑀸𑀦𑁄.

𑀓𑀝𑀕𑁆𑀕𑀸𑀳𑁄𑀢𑀺 𑀚𑀬𑀕𑁆𑀕𑀸𑀳𑁄, 𑀅𑀦𑀧𑀭𑀸𑀥𑀕𑁆𑀕𑀸𑀳𑁄 𑀳𑁄𑀢𑀺. 𑀖𑀭𑀫𑁂𑀲𑀺𑀦𑁄𑀢𑀺 𑀖𑀭𑀸𑀯𑀸𑀲𑀁 𑀧𑀭𑀺𑀬𑁂𑀲𑀦𑁆𑀢𑀲𑁆𑀲 𑀯𑀲𑀫𑀸𑀦𑀲𑁆𑀲 𑀯𑀸. 𑀘𑀸𑀕𑁄 𑀧𑀼𑀜𑁆𑀜𑀁 𑀧𑀯𑀟𑁆𑀠𑀢𑀻𑀢𑀺 𑀘𑀸𑀕𑁄𑀢𑀺 𑀲𑀗𑁆𑀔𑀁 𑀕𑀢𑀁 𑀧𑀼𑀜𑁆𑀜𑀁 𑀯𑀟𑁆𑀠𑀢𑀺. 𑀘𑀸𑀕𑀸 𑀧𑀼𑀜𑁆𑀜𑀦𑁆𑀢𑀺 𑀯𑀸 𑀧𑀸𑀞𑁄. 𑀧𑀢𑀺𑀝𑁆𑀞𑀺𑀢𑀸𑀢𑀺 𑀧𑀢𑀺𑀝𑁆𑀞𑀺𑀢𑀲𑀤𑁆𑀥𑀸 𑀦𑀸𑀫 𑀲𑁄𑀢𑀸𑀧𑀦𑁆𑀦𑀲𑁆𑀲 𑀲𑀤𑁆𑀥𑀸. 𑀳𑀺𑀭𑀺𑀫𑀦𑁄𑀢𑀺 𑀳𑀺𑀭𑀺𑀲𑀫𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑁄. 𑀦𑀺𑀭𑀸𑀫𑀺𑀲𑀁 𑀲𑀼𑀔𑀦𑁆𑀢𑀺 𑀢𑀻𑀡𑀺 𑀛𑀸𑀦𑀸𑀦𑀺 𑀦𑀺𑀲𑁆𑀲𑀸𑀬 𑀉𑀧𑁆𑀧𑀚𑁆𑀚𑀦𑀓𑀲𑀼𑀔𑀁. 𑀉𑀧𑁂𑀓𑁆𑀔𑀦𑁆𑀢𑀺 𑀘𑀢𑀼𑀢𑁆𑀣𑀚𑁆𑀛𑀸𑀦𑀼𑀧𑁂𑀓𑁆𑀔𑀁. 𑀆𑀭𑀤𑁆𑀥𑀯𑀻𑀭𑀺𑀬𑁄𑀢𑀺 𑀧𑀭𑀺𑀧𑀼𑀡𑁆𑀡𑀧𑀕𑁆𑀕𑀳𑀺𑀢𑀯𑀻𑀭𑀺𑀬𑁄. 𑀛𑀸𑀦𑀸𑀦𑀺 𑀉𑀧𑀲𑀫𑁆𑀧𑀚𑁆𑀚𑀸𑀢𑀺 𑀘𑀢𑁆𑀢𑀸𑀭𑀺 𑀛𑀸𑀦𑀸𑀦𑀺 𑀧𑀢𑁆𑀯𑀸. 𑀏𑀓𑁄𑀤𑀺 𑀦𑀺𑀧𑀓𑁄 𑀲𑀢𑁄𑀢𑀺 𑀏𑀓𑀕𑁆𑀕𑀘𑀺𑀢𑁆𑀢𑁄 𑀓𑀫𑁆𑀫𑀲𑁆𑀲𑀓𑀢𑀜𑀸𑀡𑀲𑀢𑀻𑀳𑀺 𑀘 𑀲𑀫𑀦𑁆𑀦𑀸𑀕𑀢𑁄.

𑀏𑀯𑀁 𑀜𑀢𑁆𑀯𑀸 𑀬𑀣𑀸𑀪𑀽𑀢𑀦𑁆𑀢𑀺 𑀏𑀯𑀁 𑀏𑀢𑁆𑀢𑀓𑀁 𑀓𑀸𑀭𑀡𑀁 𑀬𑀣𑀸𑀲𑀪𑀸𑀯𑀁 𑀚𑀸𑀦𑀺𑀢𑁆𑀯𑀸. 𑀲𑀩𑁆𑀩𑀲𑀁𑀬𑁄𑀚𑀦𑀓𑁆𑀔𑀬𑁂𑀢𑀺 𑀦𑀺𑀩𑁆𑀩𑀸𑀦𑁂. 𑀲𑀩𑁆𑀩𑀲𑁄𑀢𑀺 𑀲𑀩𑁆𑀩𑀸𑀓𑀸𑀭𑁂𑀦. 𑀅𑀦𑀼𑀧𑀸𑀤𑀸𑀬𑀸𑀢𑀺 𑀅𑀕𑁆𑀕𑀳𑁂𑀢𑁆𑀯𑀸. 𑀲𑀫𑁆𑀫𑀸 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀢𑀻𑀢𑀺 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀲𑀩𑁆𑀩𑀲𑀁𑀬𑁄𑀚𑀦𑀓𑁆𑀔𑀬𑀲𑀗𑁆𑀔𑀸𑀢𑁂 𑀦𑀺𑀩𑁆𑀩𑀸𑀦𑁂 𑀲𑀩𑁆𑀩𑀲𑁄 𑀅𑀦𑀼𑀧𑀸𑀤𑀺𑀬𑀺𑀢𑁆𑀯𑀸 𑀲𑀫𑁆𑀫𑀸 𑀳𑁂𑀢𑀼𑀦𑀸 𑀦𑀬𑁂𑀦 𑀫𑀕𑁆𑀕𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀢𑀺. ‘‘𑀏𑀢𑀁 𑀜𑀢𑁆𑀯𑀸 𑀬𑀣𑀸𑀪𑀽𑀢𑀁, 𑀲𑀩𑁆𑀩𑀲𑀁𑀬𑁄𑀚𑀦𑀓𑁆𑀔𑀬’’𑀦𑁆𑀢𑀺𑀧𑀺 𑀧𑀸𑀴𑀺𑀬𑀁 𑀮𑀺𑀔𑀺𑀢𑀁, 𑀢𑀲𑁆𑀲 𑀏𑀢𑀁 𑀲𑀩𑁆𑀩𑀲𑀁𑀬𑁄𑀚𑀦𑀓𑁆𑀔𑀬𑀲𑀗𑁆𑀔𑀸𑀢𑀁 𑀦𑀺𑀩𑁆𑀩𑀸𑀦𑀁 𑀬𑀣𑀸𑀪𑀽𑀢𑀁 𑀜𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀧𑀼𑀭𑀺𑀫𑀧𑀘𑁆𑀙𑀺𑀫𑁂𑀳𑀺 𑀧𑀦 𑀲𑀤𑁆𑀥𑀺𑀁 𑀦 𑀖𑀝𑀻𑀬𑀢𑀺.

𑀢𑀲𑁆𑀲 𑀲𑀫𑁆𑀫𑀸 𑀯𑀺𑀫𑀼𑀢𑁆𑀢𑀲𑁆𑀲𑀸𑀢𑀺 𑀢𑀲𑁆𑀲 𑀲𑀫𑁆𑀫𑀸 𑀯𑀺𑀫𑀼𑀢𑁆𑀢𑀲𑁆𑀲 𑀔𑀻𑀡𑀸𑀲𑀯𑀲𑁆𑀲. 𑀜𑀸𑀡𑀁 𑀳𑁄𑀢𑀻𑀢𑀺 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀁 𑀳𑁄𑀢𑀺. 𑀢𑀸𑀤𑀺𑀦𑁄𑀢𑀺 𑀢𑀁𑀲𑀡𑁆𑀞𑀺𑀢𑀲𑁆𑀲. 𑀅𑀓𑀼𑀧𑁆𑀧𑀸𑀢𑀺 𑀅𑀓𑀼𑀧𑁆𑀧𑀸𑀭𑀫𑁆𑀫𑀡𑀢𑁆𑀢𑀸 𑀓𑀼𑀧𑁆𑀧𑀓𑀸𑀭𑀡𑀸𑀦𑀁 𑀓𑀺𑀮𑁂𑀲𑀸𑀦𑀜𑁆𑀘 𑀅𑀪𑀸𑀯𑁂𑀦 𑀅𑀓𑀼𑀧𑁆𑀧𑀸. 𑀯𑀺𑀫𑀼𑀢𑁆𑀢𑀻𑀢𑀺 𑀫𑀕𑁆𑀕𑀯𑀺𑀫𑀼𑀢𑁆𑀢𑀺𑀧𑀺 𑀨𑀮𑀯𑀺𑀫𑀼𑀢𑁆𑀢𑀺𑀧𑀺. 𑀪𑀯𑀲𑀁𑀬𑁄𑀚𑀦𑀓𑁆𑀔𑀬𑁂𑀢𑀺 𑀪𑀯𑀲𑀁𑀬𑁄𑀚𑀦𑀓𑁆𑀔𑀬𑀲𑀗𑁆𑀔𑀸𑀢𑁂 𑀦𑀺𑀩𑁆𑀩𑀸𑀦𑁂 𑀪𑀯𑀲𑀁𑀬𑁄𑀚𑀦𑀸𑀦𑀜𑁆𑀘 𑀔𑀬𑀦𑁆𑀢𑁂 𑀉𑀧𑁆𑀧𑀦𑁆𑀦𑀸. 𑀏𑀢𑀁 𑀔𑁄 𑀧𑀭𑀫𑀁 𑀜𑀸𑀡𑀦𑁆𑀢𑀺 𑀏𑀢𑀁 𑀫𑀕𑁆𑀕𑀨𑀮𑀜𑀸𑀡𑀁 𑀧𑀭𑀫𑀜𑀸𑀡𑀁 𑀦𑀸𑀫. 𑀲𑀼𑀔𑀫𑀦𑀼𑀢𑁆𑀢𑀭𑀦𑁆𑀢𑀺 𑀏𑀢𑀤𑁂𑀯 𑀫𑀕𑁆𑀕𑀨𑀮𑀲𑀼𑀔𑀁 𑀅𑀦𑀼𑀢𑁆𑀢𑀭𑀁 𑀲𑀼𑀔𑀁 𑀦𑀸𑀫. 𑀆𑀡𑀡𑁆𑀬𑀫𑀼𑀢𑁆𑀢𑀫𑀦𑁆𑀢𑀺 𑀲𑀩𑁆𑀩𑁂𑀲𑀁 𑀅𑀡𑀡𑀸𑀦𑀁 𑀔𑀻𑀡𑀸𑀲𑀯𑁄 𑀉𑀢𑁆𑀢𑀫𑀅𑀡𑀡𑁄, 𑀢𑀲𑁆𑀫𑀸 𑀅𑀭𑀳𑀢𑁆𑀢𑀨𑀮𑀁 𑀆𑀡𑀡𑁆𑀬𑀫𑀼𑀢𑁆𑀢𑀫𑀦𑁆𑀢𑀺 𑀅𑀭𑀳𑀢𑁆𑀢𑀨𑀮𑁂𑀦 𑀤𑁂𑀲𑀦𑀸𑀬 𑀓𑀽𑀝𑀁 𑀕𑀡𑁆𑀳𑀺. 𑀇𑀫𑀲𑁆𑀫𑀺𑀜𑁆𑀘 𑀲𑀼𑀢𑁆𑀢𑁂 𑀯𑀝𑁆𑀝𑀫𑁂𑀯 𑀓𑀣𑁂𑀢𑁆𑀯𑀸 𑀕𑀸𑀣𑀸𑀲𑀼 𑀯𑀝𑁆𑀝𑀯𑀺𑀯𑀝𑁆𑀝𑀁 𑀓𑀣𑀺𑀢𑀦𑁆𑀢𑀺.

𑁪. 𑀫𑀳𑀸𑀘𑀼𑀦𑁆𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁬. 𑀘𑀢𑀼𑀢𑁆𑀣𑁂 𑀘𑁂𑀢𑀻𑀲𑀽𑀢𑀺 𑀘𑁂𑀢𑀺𑀭𑀝𑁆𑀞𑁂. 𑀲𑀬𑀁𑀚𑀸𑀢𑀺𑀬𑀦𑁆𑀢𑀺 𑀏𑀯𑀁𑀦𑀸𑀫𑀓𑁂 𑀦𑀺𑀕𑀫𑁂. 𑀫𑀳𑀸𑀘𑀼𑀦𑁆𑀤𑁄𑀢𑀺 𑀥𑀫𑁆𑀫𑀲𑁂𑀦𑀸𑀧𑀢𑀺𑀲𑁆𑀲 𑀓𑀦𑀺𑀝𑁆𑀞𑀪𑀸𑀢𑀺𑀓𑁄. 𑀥𑀫𑁆𑀫𑁂 𑀬𑁄𑀕𑁄 𑀅𑀦𑀼𑀬𑁄𑀕𑁄 𑀏𑀢𑁂𑀲𑀦𑁆𑀢𑀺 𑀥𑀫𑁆𑀫𑀬𑁄𑀕𑀸. 𑀥𑀫𑁆𑀫𑀓𑀣𑀺𑀓𑀸𑀦𑀁 𑀏𑀢𑀁 𑀦𑀸𑀫𑀁. 𑀛𑀸𑀬𑀦𑁆𑀢𑀻𑀢𑀺 𑀛𑀸𑀬𑀻. 𑀅𑀧𑀲𑀸𑀤𑁂𑀦𑁆𑀢𑀻𑀢𑀺 𑀖𑀝𑁆𑀝𑁂𑀦𑁆𑀢𑀺 𑀳𑀺𑀁𑀲𑀦𑁆𑀢𑀺. 𑀛𑀸𑀬𑀦𑁆𑀢𑀻𑀢𑀺 𑀘𑀺𑀦𑁆𑀢𑁂𑀦𑁆𑀢𑀺. 𑀧𑀚𑁆𑀛𑀸𑀬𑀦𑁆𑀢𑀻𑀢𑀺𑀆𑀤𑀻𑀦𑀺 𑀉𑀧𑀲𑀕𑁆𑀕𑀯𑀲𑁂𑀦 𑀯𑀟𑁆𑀠𑀺𑀢𑀸𑀦𑀺. 𑀓𑀺𑀫𑀺𑀫𑁂 𑀛𑀸𑀬𑀦𑁆𑀢𑀻𑀢𑀺 𑀓𑀺𑀁 𑀦𑀸𑀫 𑀇𑀫𑁂 𑀛𑀸𑀬𑀦𑁆𑀢𑀺. 𑀓𑀺𑀦𑁆𑀢𑀺𑀫𑁂 𑀛𑀸𑀬𑀦𑁆𑀢𑀻𑀢𑀺 𑀓𑀺𑀫𑀢𑁆𑀣𑀁 𑀇𑀫𑁂 𑀛𑀸𑀬𑀦𑁆𑀢𑀺. 𑀓𑀣𑀁 𑀇𑀫𑁂 𑀛𑀸𑀬𑀦𑁆𑀢𑀻𑀢𑀺 𑀓𑁂𑀦 𑀓𑀸𑀭𑀡𑁂𑀦 𑀇𑀫𑁂 𑀛𑀸𑀬𑀦𑁆𑀢𑀺. 𑀅𑀫𑀢𑀁 𑀥𑀸𑀢𑀼𑀁 𑀓𑀸𑀬𑁂𑀦 𑀨𑀼𑀲𑀺𑀢𑁆𑀯𑀸 𑀯𑀺𑀳𑀭𑀦𑁆𑀢𑀻𑀢𑀺 𑀫𑀭𑀡𑀯𑀺𑀭𑀳𑀺𑀢𑀁 𑀦𑀺𑀩𑁆𑀩𑀸𑀦𑀥𑀸𑀢𑀼𑀁 𑀲𑀦𑁆𑀥𑀸𑀬 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀯𑀺𑀳𑀭𑀦𑁆𑀢𑀸 𑀅𑀦𑀼𑀓𑁆𑀓𑀫𑁂𑀦 𑀢𑀁 𑀦𑀸𑀫𑀓𑀸𑀬𑁂𑀦 𑀨𑀼𑀲𑀺𑀢𑁆𑀯𑀸 𑀯𑀺𑀳𑀭𑀦𑁆𑀢𑀺. 𑀕𑀫𑁆𑀪𑀻𑀭𑀁 𑀅𑀢𑁆𑀣𑀧𑀤𑀦𑁆𑀢𑀺 𑀕𑀼𑀴𑁆𑀳𑀁 𑀧𑀝𑀺𑀘𑁆𑀙𑀦𑁆𑀦𑀁 𑀔𑀦𑁆𑀥𑀥𑀸𑀢𑀼𑀆𑀬𑀢𑀦𑀸𑀤𑀺𑀅𑀢𑁆𑀣𑀁. 𑀧𑀜𑁆𑀜𑀸𑀬 𑀅𑀢𑀺𑀯𑀺𑀚𑁆𑀛 𑀧𑀲𑁆𑀲𑀦𑁆𑀢𑀻𑀢𑀺 𑀲𑀳𑀯𑀺𑀧𑀲𑁆𑀲𑀦𑀸𑀬 𑀫𑀕𑁆𑀕𑀧𑀜𑁆𑀜𑀸𑀬 𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸 𑀧𑀲𑁆𑀲𑀦𑁆𑀢𑀺. 𑀇𑀫𑀲𑁆𑀫𑀺𑀁 𑀧𑀦𑀢𑁆𑀣𑁂 𑀲𑀫𑁆𑀫𑀲𑀦𑀧𑀝𑀺𑀯𑁂𑀥𑀧𑀜𑁆𑀜𑀸𑀧𑀺 𑀉𑀕𑁆𑀕𑀳𑀧𑀭𑀺𑀧𑀼𑀘𑁆𑀙𑀸𑀧𑀜𑁆𑀜𑀸𑀧𑀺 𑀯𑀝𑁆𑀝𑀢𑀺𑀬𑁂𑀯𑀸𑀢𑀺.

𑁫-𑁬. 𑀲𑀦𑁆𑀤𑀺𑀝𑁆𑀞𑀺𑀓𑀲𑀼𑀢𑁆𑀢𑀤𑁆𑀯𑀬𑀯𑀡𑁆𑀡𑀦𑀸

𑁪𑁭-𑁪𑁮. 𑀧𑀜𑁆𑀘𑀫𑁂 𑀲𑀦𑁆𑀢𑀁 𑀯𑀸 𑀅𑀚𑁆𑀛𑀢𑁆𑀢𑀦𑁆𑀢𑀺 𑀦𑀺𑀬𑀓𑀚𑁆𑀛𑀢𑁆𑀢𑁂 𑀯𑀺𑀚𑁆𑀚𑀫𑀸𑀦𑀁. 𑀮𑁄𑀪𑁄𑀢𑀺𑀆𑀤𑀻𑀳𑀺 𑀢𑀻𑀡𑀺 𑀅𑀓𑀼𑀲𑀮𑀫𑀽𑀮𑀸𑀦𑀺 𑀤𑀲𑁆𑀲𑀺𑀢𑀸𑀦𑀺. 𑀮𑁄𑀪𑀥𑀫𑁆𑀫𑀸𑀢𑀺𑀆𑀤𑀻𑀳𑀺 𑀢𑀁𑀲𑀫𑁆𑀧𑀬𑀼𑀢𑁆𑀢𑀓𑀸 𑀥𑀫𑁆𑀫𑀸. 𑀙𑀝𑁆𑀞𑁂 𑀓𑀸𑀬𑀲𑀦𑁆𑀤𑁄𑀲𑀦𑁆𑀢𑀺 𑀓𑀸𑀬𑀤𑁆𑀯𑀸𑀭𑀲𑁆𑀲 𑀤𑀼𑀲𑁆𑀲𑀦𑀸𑀓𑀸𑀭𑀁. 𑀲𑁂𑀲𑀤𑁆𑀯𑀬𑁂𑀧𑀺 𑀏𑀲𑁂𑀯 𑀦𑀬𑁄. 𑀇𑀫𑁂𑀲𑀼 𑀤𑁆𑀯𑀻𑀲𑀼 𑀲𑀼𑀢𑁆𑀢𑁂𑀲𑀼 𑀧𑀘𑁆𑀘𑀯𑁂𑀓𑁆𑀔𑀡𑀸𑀯 𑀓𑀣𑀺𑀢𑀸.

𑁭. 𑀔𑁂𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁯. 𑀲𑀢𑁆𑀢𑀫𑁂 𑀯𑀼𑀲𑀺𑀢𑀯𑀸𑀢𑀺 𑀯𑀼𑀢𑁆𑀣𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄. 𑀓𑀢𑀓𑀭𑀡𑀻𑀬𑁄𑀢𑀺 𑀘𑀢𑀽𑀳𑀺 𑀫𑀕𑁆𑀕𑁂𑀳𑀺 𑀓𑀢𑁆𑀢𑀩𑁆𑀩𑀁 𑀓𑀢𑁆𑀯𑀸 𑀞𑀺𑀢𑁄. 𑀑𑀳𑀺𑀢𑀪𑀸𑀭𑁄𑀢𑀺 𑀔𑀦𑁆𑀥𑀪𑀸𑀭𑀁 𑀓𑀺𑀮𑁂𑀲𑀪𑀸𑀭𑀁 𑀅𑀪𑀺𑀲𑀗𑁆𑀔𑀸𑀭𑀪𑀸𑀭𑀜𑁆𑀘 𑀑𑀢𑀸𑀭𑁂𑀢𑁆𑀯𑀸 𑀞𑀺𑀢𑁄. 𑀅𑀦𑀼𑀧𑁆𑀧𑀢𑁆𑀢𑀲𑀤𑀢𑁆𑀣𑁄𑀢𑀺 𑀲𑀤𑀢𑁆𑀣𑁄 𑀯𑀼𑀘𑁆𑀘𑀢𑀺 𑀅𑀭𑀳𑀢𑁆𑀢𑀁, 𑀢𑀁 𑀧𑀢𑁆𑀢𑁄𑀢𑀺 𑀅𑀢𑁆𑀣𑁄. 𑀧𑀭𑀺𑀓𑁆𑀔𑀻𑀡𑀪𑀯𑀲𑀁𑀬𑁄𑀚𑀦𑁄𑀢𑀺 𑀔𑀻𑀡𑀪𑀯𑀩𑀦𑁆𑀥𑀦𑁄. 𑀲𑀫𑁆𑀫𑀤𑀜𑁆𑀜𑀸 𑀯𑀺𑀫𑀼𑀢𑁆𑀢𑁄𑀢𑀺 𑀲𑀫𑁆𑀫𑀸 𑀳𑁂𑀢𑀼𑀦𑀸 𑀓𑀸𑀭𑀡𑁂𑀦 𑀚𑀸𑀦𑀺𑀢𑁆𑀯𑀸 𑀯𑀺𑀫𑀼𑀢𑁆𑀢𑁄. 𑀢𑀲𑁆𑀲 𑀦 𑀏𑀯𑀁 𑀳𑁄𑀢𑀺 𑀅𑀢𑁆𑀣𑀺 𑀫𑁂 𑀲𑁂𑀬𑁆𑀬𑁄𑀢𑀺 𑀯𑀸𑀢𑀺𑀆𑀤𑀻𑀳𑀺 𑀲𑁂𑀬𑁆𑀬𑀲𑁆𑀲 𑀲𑁂𑀬𑁆𑀬𑁄𑀳𑀫𑀲𑁆𑀫𑀻𑀢𑀺 𑀫𑀸𑀦𑀸𑀤𑀬𑁄 𑀢𑀬𑁄 𑀫𑀸𑀦𑀸 𑀧𑀝𑀺𑀓𑁆𑀔𑀺𑀢𑁆𑀢𑀸. 𑀦 𑀳𑀺 𑀔𑀻𑀡𑀸𑀲𑀯𑀲𑁆𑀲 ‘‘𑀅𑀢𑁆𑀣𑀺 𑀫𑀬𑁆𑀳𑀁 𑀲𑁂𑀬𑁆𑀬𑁄, 𑀅𑀢𑁆𑀣𑀺 𑀲𑀤𑀺𑀲𑁄, 𑀅𑀢𑁆𑀣𑀺 𑀳𑀻𑀦𑁄’’𑀢𑀺 𑀫𑀸𑀦𑁄 𑀳𑁄𑀢𑀺. 𑀦𑀢𑁆𑀣𑀺 𑀫𑁂 𑀲𑁂𑀬𑁆𑀬𑁄𑀢𑀺𑀆𑀤𑀻𑀳𑀺𑀧𑀺 𑀢𑁂𑀬𑁂𑀯 𑀧𑀝𑀺𑀓𑁆𑀔𑀺𑀢𑁆𑀢𑀸. 𑀦 𑀳𑀺 𑀔𑀻𑀡𑀸𑀲𑀯𑀲𑁆𑀲 ‘‘𑀅𑀳𑀫𑁂𑀯 𑀲𑁂𑀬𑁆𑀬𑁄, 𑀅𑀳𑀁 𑀲𑀤𑀺𑀲𑁄, 𑀅𑀳𑀁 𑀳𑀻𑀦𑁄, 𑀅𑀜𑁆𑀜𑁂 𑀲𑁂𑀬𑁆𑀬𑀸𑀤𑀬𑁄 𑀦𑀢𑁆𑀣𑀻’’𑀢𑀺 𑀏𑀯𑀁 𑀫𑀸𑀦𑁄 𑀳𑁄𑀢𑀺.

𑀅𑀘𑀺𑀭𑀧𑀓𑁆𑀓𑀦𑁆𑀢𑁂𑀲𑀽𑀢𑀺 𑀅𑀭𑀳𑀢𑁆𑀢𑀁 𑀩𑁆𑀬𑀸𑀓𑀭𑀺𑀢𑁆𑀯𑀸 𑀅𑀘𑀺𑀭𑀁𑀬𑁂𑀯 𑀧𑀓𑁆𑀓𑀦𑁆𑀢𑁂𑀲𑀼. 𑀅𑀜𑁆𑀜𑀁 𑀩𑁆𑀬𑀸𑀓𑀭𑁄𑀦𑁆𑀢𑀻𑀢𑀺 𑀅𑀭𑀳𑀢𑁆𑀢𑀁 𑀓𑀣𑁂𑀦𑁆𑀢𑀺. 𑀳𑀲𑀫𑀸𑀦𑀓𑀸 𑀫𑀜𑁆𑀜𑁂 𑀅𑀜𑁆𑀜𑀁 𑀩𑁆𑀬𑀸𑀓𑀭𑁄𑀦𑁆𑀢𑀻𑀢𑀺 𑀳𑀲𑀫𑀸𑀦𑀸 𑀯𑀺𑀬 𑀓𑀣𑁂𑀦𑁆𑀢𑀺. 𑀯𑀺𑀖𑀸𑀢𑀁 𑀆𑀧𑀚𑁆𑀚𑀦𑁆𑀢𑀻𑀢𑀺 𑀤𑀼𑀓𑁆𑀔𑀁 𑀆𑀧𑀚𑁆𑀚𑀦𑁆𑀢𑀺.

𑀦 𑀉𑀲𑁆𑀲𑁂𑀲𑀼 𑀦 𑀑𑀫𑁂𑀲𑀼, 𑀲𑀫𑀢𑁆𑀢𑁂 𑀦𑁄𑀧𑀦𑀻𑀬𑀭𑁂𑀢𑀺 𑀏𑀢𑁆𑀣 𑀉𑀲𑁆𑀲𑀸𑀢𑀺 𑀉𑀲𑁆𑀲𑀺𑀢𑀢𑀸 𑀲𑁂𑀬𑁆𑀬𑀧𑀼𑀕𑁆𑀕𑀮𑀸. 𑀑𑀫𑀸𑀢𑀺 𑀳𑀻𑀦𑀸. 𑀲𑀫𑀢𑁆𑀢𑁄𑀢𑀺 𑀲𑀤𑀺𑀲𑁄. 𑀇𑀢𑀺 𑀇𑀫𑁂𑀲𑀼 𑀢𑀻𑀲𑀼𑀧𑀺 𑀲𑁂𑀬𑁆𑀬𑀳𑀻𑀦𑀲𑀤𑀺𑀲𑁂𑀲𑀼 𑀔𑀻𑀡𑀸𑀲𑀯𑀸 𑀫𑀸𑀦𑁂𑀦 𑀦 𑀉𑀧𑀦𑀻𑀬𑀭𑁂, 𑀦 𑀉𑀧𑀦𑁂𑀦𑁆𑀢𑀺, 𑀦 𑀉𑀧𑀕𑀘𑁆𑀙𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀔𑀻𑀡𑀸 𑀚𑀸𑀢𑀻𑀢𑀺 𑀔𑀻𑀡𑀸 𑀢𑁂𑀲𑀁 𑀚𑀸𑀢𑀺. 𑀯𑀼𑀲𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀺 𑀯𑀼𑀢𑁆𑀣𑀁 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀁. 𑀘𑀭𑀦𑁆𑀢𑀺 𑀲𑀁𑀬𑁄𑀚𑀦𑀯𑀺𑀧𑁆𑀧𑀫𑀼𑀢𑁆𑀢𑀸𑀢𑀺 𑀲𑀩𑁆𑀩𑀲𑀁𑀬𑁄𑀚𑀦𑁂𑀳𑀺 𑀯𑀺𑀫𑀼𑀢𑁆𑀢𑀸 𑀳𑀼𑀢𑁆𑀯𑀸 𑀘𑀭𑀦𑁆𑀢𑀺. 𑀲𑀼𑀢𑁆𑀢𑁂𑀧𑀺 𑀕𑀸𑀣𑀸𑀬𑀫𑁆𑀧𑀺 𑀔𑀻𑀡𑀸𑀲𑀯𑁄 𑀓𑀣𑀺𑀢𑁄.

𑁮. 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁦. 𑀅𑀝𑁆𑀞𑀫𑁂 𑀳𑀢𑀽𑀧𑀦𑀺𑀲𑀁 𑀳𑁄𑀢𑀻𑀢𑀺 𑀳𑀢𑀽𑀧𑀦𑀺𑀲𑁆𑀲𑀬𑀁 𑀳𑁄𑀢𑀺. 𑀲𑀻𑀮𑀯𑀺𑀧𑀦𑁆𑀦𑀲𑁆𑀲𑀸𑀢𑀺 𑀯𑀺𑀧𑀦𑁆𑀦𑀲𑀻𑀮𑀲𑁆𑀲. 𑀬𑀣𑀸𑀪𑀽𑀢𑀜𑀸𑀡𑀤𑀲𑁆𑀲𑀦𑀦𑁆𑀢𑀺 𑀢𑀭𑀼𑀡𑀯𑀺𑀧𑀲𑁆𑀲𑀦𑀸𑀜𑀸𑀡𑀁. 𑀦𑀺𑀩𑁆𑀩𑀺𑀤𑀸𑀯𑀺𑀭𑀸𑀕𑁄𑀢𑀺 𑀏𑀢𑁆𑀣 𑀦𑀺𑀩𑁆𑀩𑀺𑀤𑀸 𑀩𑀮𑀯𑀯𑀺𑀧𑀲𑁆𑀲𑀦𑀸, 𑀯𑀺𑀭𑀸𑀕𑁄 𑀅𑀭𑀺𑀬𑀫𑀕𑁆𑀕𑁄. 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀦𑁆𑀢𑀺 𑀏𑀢𑁆𑀣 𑀯𑀺𑀫𑀼𑀢𑁆𑀢𑀻𑀢𑀺 𑀅𑀭𑀳𑀢𑁆𑀢𑀨𑀮𑀁, 𑀜𑀸𑀡𑀤𑀲𑁆𑀲𑀦𑀦𑁆𑀢𑀺 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀁. 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀦𑁆𑀦𑀁 𑀳𑁄𑀢𑀻𑀢𑀺 𑀲𑀫𑁆𑀧𑀦𑁆𑀦𑀉𑀧𑀦𑀺𑀲𑁆𑀲𑀬𑀁 𑀳𑁄𑀢𑀺. 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀲𑀻𑀮𑀸𑀦𑀼𑀭𑀓𑁆𑀔𑀡𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑁄 𑀓𑀣𑀺𑀢𑁄.

𑁯. 𑀆𑀦𑀦𑁆𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁧. 𑀦𑀯𑀫𑁂 𑀓𑀺𑀢𑁆𑀢𑀸𑀯𑀢𑀸𑀢𑀺 𑀓𑀺𑀢𑁆𑀢𑀓𑁂𑀦. 𑀅𑀲𑁆𑀲𑀼𑀢𑀜𑁆𑀘𑁂𑀯𑀸𑀢𑀺 𑀅𑀜𑁆𑀜𑀲𑁆𑀫𑀺𑀁 𑀓𑀸𑀮𑁂 𑀅𑀲𑁆𑀲𑀼𑀢𑀧𑀼𑀩𑁆𑀩𑀁. 𑀦 𑀲𑀫𑁆𑀫𑁄𑀲𑀁 𑀕𑀘𑁆𑀙𑀦𑁆𑀢𑀻𑀢𑀺 𑀯𑀺𑀦𑀸𑀲𑀁 𑀦 𑀕𑀘𑁆𑀙𑀦𑁆𑀢𑀺. 𑀘𑁂𑀢𑀲𑁄 𑀲𑀫𑁆𑀨𑀼𑀝𑁆𑀞𑀧𑀼𑀩𑁆𑀩𑀸𑀢𑀺 𑀘𑀺𑀢𑁆𑀢𑁂𑀦 𑀨𑀼𑀲𑀺𑀢𑀧𑀼𑀩𑁆𑀩𑀸. 𑀲𑀫𑀼𑀤𑀸𑀘𑀭𑀦𑁆𑀢𑀻𑀢𑀺 𑀫𑀦𑁄𑀤𑁆𑀯𑀸𑀭𑁂 𑀘𑀭𑀦𑁆𑀢𑀺. 𑀅𑀯𑀺𑀜𑁆𑀜𑀸𑀢𑀜𑁆𑀘 𑀯𑀺𑀚𑀸𑀦𑀸𑀢𑀻𑀢𑀺 𑀅𑀜𑁆𑀜𑀲𑁆𑀫𑀺𑀁 𑀓𑀸𑀮𑁂 𑀅𑀯𑀺𑀜𑁆𑀜𑀸𑀢𑀓𑀸𑀭𑀡𑀁 𑀚𑀸𑀦𑀸𑀢𑀺. 𑀧𑀭𑀺𑀬𑀸𑀧𑀼𑀡𑀸𑀢𑀻𑀢𑀺 𑀯𑀴𑀜𑁆𑀚𑁂𑀢𑀺 𑀓𑀣𑁂𑀢𑀺. 𑀤𑁂𑀲𑁂𑀢𑀻𑀢𑀺 𑀧𑀓𑀸𑀲𑁂𑀢𑀺. 𑀧𑀭𑀁 𑀯𑀸𑀘𑁂𑀢𑀻𑀢𑀺 𑀧𑀭𑀁 𑀉𑀕𑁆𑀕𑀡𑁆𑀳𑀸𑀧𑁂𑀢𑀺.

𑀆𑀕𑀢𑀸𑀕𑀫𑀸𑀢𑀺 𑀤𑀻𑀖𑀸𑀤𑀻𑀲𑀼 𑀬𑁄 𑀓𑁄𑀘𑀺 𑀆𑀕𑀫𑁄 𑀆𑀕𑀢𑁄 𑀏𑀢𑁂𑀲𑀦𑁆𑀢𑀺 𑀆𑀕𑀢𑀸𑀕𑀫𑀸. 𑀥𑀫𑁆𑀫𑀥𑀭𑀸𑀢𑀺 𑀲𑀼𑀢𑁆𑀢𑀦𑁆𑀢𑀧𑀺𑀝𑀓𑀥𑀭𑀸. 𑀯𑀺𑀦𑀬𑀥𑀭𑀸𑀢𑀺 𑀯𑀺𑀦𑀬𑀧𑀺𑀝𑀓𑀥𑀭𑀸. 𑀫𑀸𑀢𑀺𑀓𑀸𑀥𑀭𑀸𑀢𑀺 𑀤𑁆𑀯𑁂𑀧𑀸𑀢𑀺𑀫𑁄𑀓𑁆𑀔𑀥𑀭𑀸. 𑀧𑀭𑀺𑀧𑀼𑀘𑁆𑀙𑀢𑀻𑀢𑀺 𑀅𑀦𑀼𑀲𑀦𑁆𑀥𑀺𑀧𑀼𑀩𑁆𑀩𑀸𑀧𑀭𑀁 𑀧𑀼𑀘𑁆𑀙𑀢𑀺. 𑀧𑀭𑀺𑀧𑀜𑁆𑀳𑀢𑀻𑀢𑀺 𑀇𑀤𑀜𑁆𑀘𑀺𑀤𑀜𑁆𑀘 𑀧𑀼𑀘𑁆𑀙𑀺𑀲𑁆𑀲𑀸𑀫𑀻𑀢𑀺 𑀧𑀭𑀺𑀢𑀼𑀮𑀢𑀺 𑀧𑀭𑀺𑀘𑁆𑀙𑀺𑀦𑁆𑀤𑀢𑀺. 𑀇𑀤𑀁, 𑀪𑀦𑁆𑀢𑁂, 𑀓𑀣𑀦𑁆𑀢𑀺, 𑀪𑀦𑁆𑀢𑁂, 𑀇𑀤𑀁 𑀅𑀦𑀼𑀲𑀦𑁆𑀥𑀺𑀧𑀼𑀩𑁆𑀩𑀸𑀧𑀭𑀁 𑀓𑀣𑀁 𑀳𑁄𑀢𑀻𑀢𑀺 𑀧𑀼𑀘𑁆𑀙𑀢𑀺. 𑀇𑀫𑀲𑁆𑀲 𑀓𑁆𑀯𑀢𑁆𑀣𑁄𑀢𑀺 𑀇𑀫𑀲𑁆𑀲 𑀪𑀸𑀲𑀺𑀢𑀲𑁆𑀲 𑀓𑁄 𑀅𑀢𑁆𑀣𑁄𑀢𑀺 𑀧𑀼𑀘𑁆𑀙𑀢𑀺. 𑀅𑀯𑀺𑀯𑀝𑀦𑁆𑀢𑀺 𑀅𑀯𑀺𑀯𑀭𑀺𑀢𑀁. 𑀯𑀺𑀯𑀭𑀦𑁆𑀢𑀻𑀢𑀺 𑀧𑀸𑀓𑀝𑀁 𑀓𑀭𑁄𑀦𑁆𑀢𑀺. 𑀓𑀗𑁆𑀔𑀸𑀞𑀸𑀦𑀺𑀬𑁂𑀲𑀽𑀢𑀺 𑀓𑀗𑁆𑀔𑀸𑀬 𑀓𑀸𑀭𑀡𑀪𑀽𑀢𑁂𑀲𑀼. 𑀢𑀢𑁆𑀣 𑀬𑀲𑁆𑀫𑀺𑀁 𑀥𑀫𑁆𑀫𑁂 𑀓𑀗𑁆𑀔𑀸 𑀉𑀧𑁆𑀧𑀚𑁆𑀚𑀢𑀺, 𑀲𑁆𑀯𑁂𑀯 𑀓𑀗𑁆𑀔𑀸𑀞𑀸𑀦𑀺𑀬𑁄 𑀦𑀸𑀫𑀸𑀢𑀺 𑀯𑁂𑀤𑀺𑀢𑀩𑁆𑀩𑁄.

𑁧𑁦. 𑀔𑀢𑁆𑀢𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁨. 𑀤𑀲𑀫𑁂 𑀪𑁄𑀕𑀸𑀥𑀺𑀧𑁆𑀧𑀸𑀬𑀸𑀢𑀺 𑀪𑁄𑀕𑀲𑀁𑀳𑀭𑀡𑀢𑁆𑀣𑀁 𑀞𑀧𑀺𑀢𑀸𑀥𑀺𑀧𑁆𑀧𑀸𑀬𑀸 𑀧𑀯𑀢𑁆𑀢𑀅𑀚𑁆𑀛𑀸𑀲𑀬𑀸. 𑀧𑀜𑁆𑀜𑀽𑀧𑀯𑀺𑀘𑀸𑀭𑀸𑀢𑀺 𑀧𑀜𑁆𑀜𑀯𑀦𑁆𑀢𑁄 𑀪𑀯𑁂𑀬𑁆𑀬𑀸𑀫𑀸𑀢𑀺 𑀏𑀯𑀁 𑀧𑀜𑁆𑀜𑀢𑁆𑀣𑀸𑀬 𑀧𑀯𑀢𑁆𑀢𑀽𑀧𑀯𑀺𑀘𑀸𑀭𑀸. 𑀅𑀬𑀫𑁂𑀯 𑀦𑁂𑀲𑀁 𑀯𑀺𑀘𑀸𑀭𑁄 𑀘𑀺𑀢𑁆𑀢𑁂 𑀉𑀧𑀯𑀺𑀘𑀭𑀢𑀺. 𑀩𑀮𑀸𑀥𑀺𑀝𑁆𑀞𑀸𑀦𑀸𑀢𑀺 𑀩𑀮𑀓𑀸𑀬𑀸𑀥𑀺𑀝𑁆𑀞𑀸𑀦𑀸. 𑀩𑀮𑀓𑀸𑀬𑀜𑁆𑀳𑀺 𑀮𑀤𑁆𑀥𑀸 𑀢𑁂 𑀮𑀤𑁆𑀥𑀧𑀢𑀺𑀝𑁆𑀞𑀸 𑀦𑀸𑀫 𑀳𑁄𑀦𑁆𑀢𑀺. 𑀧𑀣𑀯𑀺𑀪𑀺𑀦𑀺𑀯𑁂𑀲𑀸𑀢𑀺 𑀧𑀣𑀯𑀺𑀲𑀸𑀫𑀺𑀦𑁄 𑀪𑀯𑀺𑀲𑁆𑀲𑀸𑀫𑀸𑀢𑀺 𑀏𑀯𑀁 𑀧𑀣𑀯𑀺𑀅𑀢𑁆𑀣𑀸𑀬 𑀓𑀢𑀘𑀺𑀢𑁆𑀢𑀸𑀪𑀺𑀦𑀺𑀯𑁂𑀲𑀸. 𑀇𑀲𑁆𑀲𑀭𑀺𑀬𑀧𑀭𑀺𑀬𑁄𑀲𑀸𑀦𑀸𑀢𑀺 𑀭𑀚𑁆𑀚𑀸𑀪𑀺𑀲𑁂𑀓𑀧𑀭𑀺𑀬𑁄𑀲𑀸𑀦𑀸. 𑀅𑀪𑀺𑀲𑁂𑀓𑀜𑁆𑀳𑀺 𑀧𑀢𑁆𑀯𑀸 𑀢𑁂 𑀧𑀭𑀺𑀬𑁄𑀲𑀸𑀦𑀧𑁆𑀧𑀢𑁆𑀢𑀸 𑀦𑀸𑀫 𑀳𑁄𑀦𑁆𑀢𑀺. 𑀇𑀫𑀺𑀦𑀸 𑀦𑀬𑁂𑀦 𑀲𑀩𑁆𑀩𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀲𑁂𑀲𑀧𑀤𑁂𑀲𑀼 𑀧𑀦𑁂𑀢𑁆𑀣 𑀅𑀬𑀫𑀥𑀺𑀧𑁆𑀧𑀸𑀬𑁄 𑁋 𑀩𑁆𑀭𑀸𑀳𑁆𑀫𑀡𑀸 𑀢𑀸𑀯 𑀫𑀦𑁆𑀢𑁂 𑀮𑀪𑀺𑀢𑁆𑀯𑀸 𑀮𑀤𑁆𑀥𑀧𑀢𑀺𑀝𑁆𑀞𑀸 𑀦𑀸𑀫 𑀳𑁄𑀦𑁆𑀢𑀺, 𑀕𑀳𑀧𑀢𑀺𑀓𑀸 𑀬𑀁𑀓𑀺𑀜𑁆𑀘𑀺 𑀲𑀺𑀧𑁆𑀧𑀁, 𑀇𑀢𑁆𑀣𑀻 𑀓𑀼𑀮𑀤𑀸𑀬𑀚𑁆𑀚𑀲𑀸𑀫𑀺𑀓𑀁 𑀧𑀼𑀢𑁆𑀢𑀁, 𑀘𑁄𑀭𑀸 𑀬𑀁𑀓𑀺𑀜𑁆𑀘𑀺 𑀆𑀯𑀼𑀥𑀲𑀢𑁆𑀣𑀁, 𑀲𑀫𑀡𑀸 𑀲𑀻𑀮𑀧𑀭𑀺𑀧𑀼𑀡𑁆𑀡𑀸 𑀮𑀤𑁆𑀥𑀧𑀢𑀺𑀝𑁆𑀞𑀸 𑀦𑀸𑀫 𑀳𑁄𑀦𑁆𑀢𑀺. 𑀢𑀲𑁆𑀫𑀸 𑀫𑀦𑁆𑀢𑀸𑀥𑀺𑀝𑁆𑀞𑀸𑀦𑀸𑀢𑀺𑀆𑀤𑀻𑀦𑀺 𑀯𑀼𑀢𑁆𑀢𑀸𑀦𑀺.