𑁨. 𑀤𑀼𑀢𑀺𑀬𑀧𑀡𑁆𑀡𑀸𑀲𑀓𑀁

𑁬. 𑀫𑀳𑀸𑀯𑀕𑁆𑀕𑁄

𑁧. 𑀲𑁄𑀡𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁫. 𑀙𑀝𑁆𑀞𑀲𑁆𑀲 𑀧𑀞𑀫𑁂 𑀲𑁄𑀡𑁄𑀢𑀺 𑀲𑀼𑀔𑀼𑀫𑀸𑀮𑀲𑁄𑀡𑀢𑁆𑀣𑁂𑀭𑁄. 𑀲𑀻𑀢𑀯𑀦𑁂𑀢𑀺 𑀏𑀯𑀁𑀦𑀸𑀫𑀓𑁂 𑀲𑀼𑀲𑀸𑀦𑁂. 𑀢𑀲𑁆𑀫𑀺𑀁 𑀓𑀺𑀭 𑀧𑀝𑀺𑀧𑀸𑀝𑀺𑀬𑀸 𑀧𑀜𑁆𑀘 𑀘𑀗𑁆𑀓𑀫𑀦𑀧𑀡𑁆𑀡𑀲𑀸𑀮𑀸𑀲𑀢𑀸𑀦𑀺 𑀫𑀸𑀧𑀺𑀢𑀸𑀦𑀺, 𑀢𑁂𑀲𑀼 𑀣𑁂𑀭𑁄 𑀅𑀢𑁆𑀢𑀦𑁄 𑀲𑀧𑁆𑀧𑀸𑀬𑀘𑀗𑁆𑀓𑀫𑀦𑀁 𑀕𑀳𑁂𑀢𑁆𑀯𑀸 𑀲𑀫𑀡𑀥𑀫𑁆𑀫𑀁 𑀓𑀭𑁄𑀢𑀺. 𑀢𑀲𑁆𑀲 𑀆𑀭𑀤𑁆𑀥𑀯𑀻𑀭𑀺𑀬𑀲𑁆𑀲 𑀳𑀼𑀢𑁆𑀯𑀸 𑀘𑀗𑁆𑀓𑀫𑀢𑁄 𑀧𑀸𑀤𑀢𑀮𑀸𑀦𑀺 𑀪𑀺𑀚𑁆𑀚𑀺𑀁𑀲𑀼, 𑀚𑀸𑀡𑀽𑀳𑀺 𑀘𑀗𑁆𑀓𑀫𑀢𑁄 𑀚𑀸𑀡𑀼𑀓𑀸𑀦𑀺𑀧𑀺 𑀳𑀢𑁆𑀣𑀢𑀮𑀸𑀦𑀺𑀧𑀺 𑀪𑀺𑀚𑁆𑀚𑀺𑀁𑀲𑀼, 𑀙𑀺𑀤𑁆𑀤𑀸𑀦𑀺 𑀅𑀳𑁂𑀲𑀼𑀁. 𑀏𑀯𑀁 𑀆𑀭𑀤𑁆𑀥𑀯𑀻𑀭𑀺𑀬𑁄 𑀯𑀺𑀳𑀭𑀦𑁆𑀢𑁄 𑀑𑀪𑀸𑀲𑀦𑀺𑀫𑀺𑀢𑁆𑀢𑀫𑀢𑁆𑀢𑀓𑀫𑁆𑀧𑀺 𑀤𑀲𑁆𑀲𑁂𑀢𑀼𑀁 𑀦𑀸𑀲𑀓𑁆𑀔𑀺. 𑀢𑀲𑁆𑀲 𑀯𑀻𑀭𑀺𑀬𑁂𑀦 𑀓𑀺𑀮𑀫𑀺𑀢𑀓𑀸𑀬𑀲𑁆𑀲 𑀓𑁄𑀝𑀺𑀬𑀁 𑀧𑀸𑀲𑀸𑀡𑀨𑀮𑀓𑁂 𑀦𑀺𑀲𑀺𑀦𑁆𑀦𑀲𑁆𑀲 𑀬𑁄 𑀯𑀺𑀢𑀓𑁆𑀓𑁄 𑀉𑀤𑀧𑀸𑀤𑀺, 𑀢𑀁 𑀤𑀲𑁆𑀲𑁂𑀢𑀼𑀁 𑀅𑀣 𑀔𑁄 𑀆𑀬𑀲𑁆𑀫𑀢𑁄𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀆𑀭𑀤𑁆𑀥𑀯𑀻𑀭𑀺𑀬𑀸𑀢𑀺 𑀧𑀭𑀺𑀧𑀼𑀡𑁆𑀡𑀧𑀕𑁆𑀕𑀳𑀺𑀢𑀯𑀻𑀭𑀺𑀬𑀸. 𑀦 𑀅𑀦𑀼𑀧𑀸𑀤𑀸𑀬 𑀆𑀲𑀯𑁂𑀳𑀺 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀢𑀻𑀢𑀺 𑀲𑀘𑁂 𑀳𑀺 𑀅𑀳𑀁 𑀉𑀕𑁆𑀖𑀝𑀺𑀢𑀜𑁆𑀜𑀽 𑀯𑀸 𑀅𑀲𑁆𑀲𑀁 𑀯𑀺𑀧𑀜𑁆𑀘𑀺𑀢𑀜𑁆𑀜𑀽 𑀯𑀸 𑀦𑁂𑀬𑁆𑀬𑁄 𑀯𑀸, 𑀦𑀽𑀦 𑀫𑁂 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑁂𑀬𑁆𑀬. 𑀅𑀤𑁆𑀥𑀸 𑀧𑀦𑀲𑁆𑀫𑀺 𑀧𑀤𑀧𑀭𑀫𑁄, 𑀬𑁂𑀦 𑀫𑁂 𑀘𑀺𑀢𑁆𑀢𑀁 𑀦 𑀯𑀺𑀫𑀼𑀘𑁆𑀘𑀢𑀻𑀢𑀺 𑀲𑀦𑁆𑀦𑀺𑀝𑁆𑀞𑀸𑀦𑀁 𑀓𑀢𑁆𑀯𑀸 𑀲𑀁𑀯𑀺𑀚𑁆𑀚𑀦𑁆𑀢𑀺 𑀔𑁄 𑀧𑀦𑀸𑀢𑀺𑀆𑀤𑀻𑀦𑀺 𑀘𑀺𑀦𑁆𑀢𑁂𑀲𑀺. 𑀢𑀢𑁆𑀣 𑀪𑁄𑀕𑀸𑀢𑀺 𑀉𑀧𑀬𑁄𑀕𑀢𑁆𑀣𑁂 𑀧𑀘𑁆𑀘𑀢𑁆𑀢𑀁.

𑀧𑀸𑀢𑀼𑀭𑀳𑁄𑀲𑀻𑀢𑀺 𑀣𑁂𑀭𑀲𑁆𑀲 𑀘𑀺𑀢𑁆𑀢𑀸𑀘𑀸𑀭𑀁 𑀜𑀢𑁆𑀯𑀸 ‘‘𑀅𑀬𑀁 𑀲𑁄𑀡𑁄 𑀅𑀚𑁆𑀚 𑀲𑀻𑀢𑀯𑀦𑁂 𑀧𑀥𑀸𑀦𑀪𑀽𑀫𑀺𑀬𑀁 𑀦𑀺𑀲𑀺𑀦𑁆𑀦𑁄 𑀇𑀫𑀁 𑀯𑀺𑀢𑀓𑁆𑀓𑀁 𑀯𑀺𑀢𑀓𑁆𑀓𑁂𑀢𑀺, 𑀕𑀦𑁆𑀢𑁆𑀯𑀸𑀲𑁆𑀲 𑀯𑀺𑀢𑀓𑁆𑀓𑀁 𑀲𑀳𑁄𑀢𑁆𑀣𑀁 𑀕𑀡𑁆𑀳𑀺𑀢𑁆𑀯𑀸 𑀯𑀻𑀡𑁄𑀧𑀫𑀁 𑀓𑀫𑁆𑀫𑀝𑁆𑀞𑀸𑀦𑀁 𑀓𑀣𑁂𑀲𑁆𑀲𑀸𑀫𑀻’’𑀢𑀺 𑀧𑀫𑀼𑀔𑁂 𑀧𑀸𑀓𑀝𑁄 𑀅𑀳𑁄𑀲𑀺. 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂𑀢𑀺 𑀧𑀥𑀸𑀦𑀺𑀓𑀪𑀺𑀓𑁆𑀔𑀽 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑁂 𑀑𑀯𑀤𑀺𑀢𑀼𑀁 𑀆𑀕𑀢𑀲𑁆𑀲 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀦𑀺𑀲𑀻𑀤𑀦𑀢𑁆𑀣𑀁 𑀬𑀣𑀸𑀮𑀸𑀪𑁂𑀦 𑀆𑀲𑀦𑀁 𑀧𑀜𑁆𑀜𑀸𑀧𑁂𑀢𑁆𑀯𑀸𑀯 𑀧𑀥𑀸𑀦𑀁 𑀓𑀭𑁄𑀦𑁆𑀢𑀺, 𑀅𑀜𑁆𑀜𑀁 𑀅𑀮𑀪𑀫𑀸𑀦𑀸 𑀧𑀼𑀭𑀸𑀡𑀧𑀡𑁆𑀡𑀸𑀦𑀺𑀧𑀺 𑀲𑀦𑁆𑀣𑀭𑀺𑀢𑁆𑀯𑀸 𑀉𑀧𑀭𑀺 𑀲𑀗𑁆𑀖𑀸𑀝𑀺𑀁 𑀧𑀜𑁆𑀜𑀧𑁂𑀦𑁆𑀢𑀺. 𑀣𑁂𑀭𑁄𑀧𑀺 𑀆𑀲𑀦𑀁 𑀧𑀜𑁆𑀜𑀸𑀧𑁂𑀢𑁆𑀯𑀸 𑀧𑀥𑀸𑀦𑀁 𑀅𑀓𑀸𑀲𑀺. 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋 ‘‘𑀧𑀜𑁆𑀜𑀢𑁆𑀢𑁂 𑀆𑀲𑀦𑁂’’𑀢𑀺.

𑀢𑀁 𑀓𑀺𑀁 𑀫𑀜𑁆𑀜𑀲𑀻𑀢𑀺 𑀲𑀢𑁆𑀣𑀸 ‘‘𑀇𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀯𑀲𑁂𑀲𑀓𑀫𑁆𑀫𑀝𑁆𑀞𑀸𑀦𑁂𑀳𑀺 𑀅𑀢𑁆𑀣𑁄 𑀦𑀢𑁆𑀣𑀺, 𑀅𑀬𑀁 𑀕𑀦𑁆𑀥𑀩𑁆𑀩𑀲𑀺𑀧𑁆𑀧𑁂 𑀙𑁂𑀓𑁄 𑀘𑀺𑀡𑁆𑀡𑀯𑀲𑀻, 𑀅𑀢𑁆𑀢𑀦𑁄 𑀯𑀺𑀲𑀬𑁂 𑀓𑀣𑀺𑀬𑀫𑀸𑀦𑀁 𑀔𑀺𑀧𑁆𑀧𑀫𑁂𑀯 𑀲𑀮𑁆𑀮𑀓𑁆𑀔𑁂𑀲𑁆𑀲𑀢𑀻’’𑀢𑀺 𑀯𑀻𑀡𑁄𑀧𑀫𑀁 𑀓𑀣𑁂𑀢𑀼𑀁 ‘‘𑀢𑀁 𑀓𑀺𑀁 𑀫𑀜𑁆𑀜𑀲𑀻’’𑀢𑀺𑀆𑀤𑀺𑀫𑀸𑀳. 𑀯𑀻𑀡𑀸𑀬 𑀢𑀦𑁆𑀢𑀺𑀲𑁆𑀲𑀭𑁂 𑀓𑀼𑀲𑀮𑀢𑀸 𑀦𑀸𑀫 𑀯𑀻𑀡𑀸𑀬 𑀯𑀸𑀤𑀦𑀓𑀼𑀲𑀮𑀢𑀸, 𑀲𑁄 𑀘 𑀢𑀢𑁆𑀣 𑀓𑀼𑀲𑀮𑁄. 𑀫𑀸𑀢𑀸𑀧𑀺𑀢𑀭𑁄 𑀳𑀺𑀲𑁆𑀲 ‘‘𑀅𑀫𑁆𑀳𑀸𑀓𑀁 𑀧𑀼𑀢𑁆𑀢𑁄 𑀅𑀜𑁆𑀜𑀁 𑀲𑀺𑀧𑁆𑀧𑀁 𑀲𑀺𑀓𑁆𑀔𑀦𑁆𑀢𑁄 𑀓𑀸𑀬𑁂𑀦 𑀓𑀺𑀮𑀫𑀺𑀲𑁆𑀲𑀢𑀺, 𑀇𑀤𑀁 𑀧𑀦 𑀲𑀬𑀦𑁂 𑀦𑀺𑀲𑀺𑀦𑁆𑀦𑁂𑀦𑁂𑀯 𑀲𑀓𑁆𑀓𑀸 𑀉𑀕𑁆𑀕𑀡𑁆𑀳𑀺𑀢𑀼’’𑀦𑁆𑀢𑀺 𑀕𑀦𑁆𑀥𑀩𑁆𑀩𑀲𑀺𑀧𑁆𑀧𑀫𑁂𑀯 𑀉𑀕𑁆𑀕𑀡𑁆𑀳𑀸𑀧𑁂𑀲𑀼𑀁. 𑀢𑀲𑁆𑀲 𑁋

‘‘𑀲𑀢𑁆𑀢 𑀲𑀭𑀸 𑀢𑀬𑁄 𑀕𑀸𑀫𑀸, 𑀫𑀼𑀘𑁆𑀙𑀦𑀸 𑀏𑀓𑀯𑀻𑀲𑀢𑀺;

𑀞𑀸𑀦𑀸 𑀏𑀓𑀽𑀦𑀧𑀜𑁆𑀜𑀸𑀲, 𑀇𑀘𑁆𑀘𑁂𑀢𑁂 𑀲𑀭𑀫𑀡𑁆𑀟𑀮𑀸’’𑀢𑀺. 𑁋

𑀆𑀤𑀺𑀓𑀁 𑀕𑀦𑁆𑀥𑀩𑁆𑀩𑀲𑀺𑀧𑁆𑀧𑀁 𑀲𑀩𑁆𑀩𑀫𑁂𑀯 𑀧𑀕𑀼𑀡𑀁 𑀅𑀳𑁄𑀲𑀺. 𑀅𑀘𑁆𑀘𑀸𑀬𑀢𑀸𑀢𑀺 𑀅𑀢𑀺𑀆𑀬𑀢𑀸 𑀔𑀭𑀫𑀼𑀘𑁆𑀙𑀦𑀸. 𑀲𑀭𑀯𑀢𑀻𑀢𑀺 𑀲𑀭𑀲𑀫𑁆𑀧𑀦𑁆𑀦𑀸. 𑀓𑀫𑁆𑀫𑀜𑁆𑀜𑀸𑀢𑀺 𑀓𑀫𑁆𑀫𑀓𑁆𑀔𑀫𑀸 𑀓𑀫𑁆𑀫𑀬𑁄𑀕𑁆𑀕𑀸. 𑀅𑀢𑀺𑀲𑀺𑀣𑀺𑀮𑀸𑀢𑀺 𑀫𑀦𑁆𑀤𑀫𑀼𑀘𑁆𑀙𑀦𑀸. 𑀲𑀫𑁂 𑀕𑀼𑀡𑁂 𑀧𑀢𑀺𑀝𑁆𑀞𑀺𑀢𑀸𑀢𑀺 𑀫𑀚𑁆𑀛𑀺𑀫𑁂 𑀲𑀭𑁂 𑀞𑀧𑁂𑀢𑁆𑀯𑀸 𑀫𑀼𑀘𑁆𑀙𑀺𑀢𑀸.

𑀅𑀘𑁆𑀘𑀸𑀭𑀤𑁆𑀥𑀦𑁆𑀢𑀺 𑀅𑀢𑀺𑀕𑀸𑀴𑁆𑀳𑀁. 𑀉𑀤𑁆𑀥𑀘𑁆𑀘𑀸𑀬 𑀲𑀁𑀯𑀢𑁆𑀢𑀢𑀻𑀢𑀺 𑀉𑀤𑁆𑀥𑀢𑀪𑀸𑀯𑀸𑀬 𑀲𑀁𑀯𑀢𑁆𑀢𑀢𑀺. 𑀅𑀢𑀺𑀮𑀻𑀦𑀦𑁆𑀢𑀺 𑀅𑀢𑀺𑀲𑀺𑀣𑀺𑀮𑀁. 𑀓𑁄𑀲𑀚𑁆𑀚𑀸𑀬𑀸𑀢𑀺 𑀓𑀼𑀲𑀻𑀢𑀪𑀸𑀯𑀢𑁆𑀣𑀸𑀬. 𑀯𑀻𑀭𑀺𑀬𑀲𑀫𑀣𑀁 𑀅𑀥𑀺𑀝𑁆𑀞𑀳𑀸𑀢𑀺 𑀯𑀻𑀭𑀺𑀬𑀲𑀫𑁆𑀧𑀬𑀼𑀢𑁆𑀢𑀁 𑀲𑀫𑀣𑀁 𑀅𑀥𑀺𑀝𑁆𑀞𑀳, 𑀯𑀻𑀭𑀺𑀬𑀁 𑀲𑀫𑀣𑁂𑀦 𑀬𑁄𑀚𑁂𑀳𑀻𑀢𑀺 𑀅𑀢𑁆𑀣𑁄. 𑀇𑀦𑁆𑀤𑁆𑀭𑀺𑀬𑀸𑀦𑀜𑁆𑀘 𑀲𑀫𑀢𑀁 𑀧𑀝𑀺𑀯𑀺𑀚𑁆𑀛𑀸𑀢𑀺 𑀲𑀤𑁆𑀥𑀸𑀤𑀻𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀲𑀫𑀢𑀁 𑀲𑀫𑀪𑀸𑀯𑀁 𑀅𑀥𑀺𑀝𑁆𑀞𑀸𑀳𑀺. 𑀢𑀢𑁆𑀣 𑀲𑀤𑁆𑀥𑀁 𑀧𑀜𑁆𑀜𑀸𑀬, 𑀧𑀜𑁆𑀜𑀜𑁆𑀘 𑀲𑀤𑁆𑀥𑀸𑀬, 𑀯𑀻𑀭𑀺𑀬𑀁 𑀲𑀫𑀸𑀥𑀺𑀦𑀸, 𑀲𑀫𑀸𑀥𑀺𑀜𑁆𑀘 𑀯𑀻𑀭𑀺𑀬𑁂𑀦 𑀬𑁄𑀚𑀬𑀢𑀸 𑀇𑀦𑁆𑀤𑁆𑀭𑀺𑀬𑀸𑀦𑀁 𑀲𑀫𑀢𑀸 𑀅𑀥𑀺𑀝𑁆𑀞𑀺𑀢𑀸 𑀦𑀸𑀫 𑀳𑁄𑀢𑀺. 𑀲𑀢𑀺 𑀧𑀦 𑀲𑀩𑁆𑀩𑀢𑁆𑀣𑀺𑀓𑀸, 𑀲𑀸 𑀲𑀤𑀸 𑀩𑀮𑀯𑀢𑀻𑀬𑁂𑀯 𑀯𑀝𑁆𑀝𑀢𑀺. 𑀢𑀜𑁆𑀘 𑀧𑀦 𑀢𑁂𑀲𑀁 𑀬𑁄𑀚𑀦𑀸𑀯𑀺𑀥𑀸𑀦𑀁 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁧.𑁬𑁦-𑁬𑁨) 𑀧𑀓𑀸𑀲𑀺𑀢𑀫𑁂𑀯. 𑀢𑀢𑁆𑀣 𑀘 𑀦𑀺𑀫𑀺𑀢𑁆𑀢𑀁 𑀕𑀡𑁆𑀳𑀸𑀳𑀻𑀢𑀺 𑀢𑀲𑁆𑀫𑀺𑀜𑁆𑀘 𑀲𑀫𑀪𑀸𑀯𑁂 𑀲𑀢𑀺 𑀬𑁂𑀦 𑀆𑀤𑀸𑀲𑁂 𑀫𑀼𑀔𑀩𑀺𑀫𑁆𑀩𑁂𑀦𑁂𑀯 𑀦𑀺𑀫𑀺𑀢𑁆𑀢𑁂𑀦 𑀉𑀧𑁆𑀧𑀚𑁆𑀚𑀺𑀢𑀩𑁆𑀩𑀁, 𑀢𑀁 𑀲𑀫𑀣𑀦𑀺𑀫𑀺𑀢𑁆𑀢𑀁 𑀯𑀺𑀧𑀲𑁆𑀲𑀦𑀸𑀦𑀺𑀫𑀺𑀢𑁆𑀢𑀁 𑀫𑀕𑁆𑀕𑀦𑀺𑀫𑀺𑀢𑁆𑀢𑀁 𑀨𑀮𑀦𑀺𑀫𑀺𑀢𑁆𑀢𑀜𑁆𑀘 𑀕𑀡𑁆𑀳𑀸𑀳𑀺 𑀦𑀺𑀩𑁆𑀩𑀢𑁆𑀢𑁂𑀳𑀻𑀢𑀺 𑀏𑀯𑀫𑀲𑁆𑀲 𑀲𑀢𑁆𑀣𑀸 𑀅𑀭𑀳𑀢𑁆𑀢𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑀁 𑀓𑀣𑁂𑀲𑀺.

𑀢𑀢𑁆𑀣 𑀘 𑀦𑀺𑀫𑀺𑀢𑁆𑀢𑀁 𑀅𑀕𑁆𑀕𑀳𑁂𑀲𑀻𑀢𑀺 𑀲𑀫𑀣𑀦𑀺𑀫𑀺𑀢𑁆𑀢𑀜𑁆𑀘 𑀯𑀺𑀧𑀲𑁆𑀲𑀦𑀸𑀦𑀺𑀫𑀺𑀢𑁆𑀢𑀜𑁆𑀘 𑀅𑀕𑁆𑀕𑀳𑁂𑀲𑀺. 𑀙 𑀞𑀸𑀦𑀸𑀦𑀻𑀢𑀺 𑀙 𑀓𑀸𑀭𑀡𑀸𑀦𑀺. 𑀅𑀥𑀺𑀫𑀼𑀢𑁆𑀢𑁄 𑀳𑁄𑀢𑀻𑀢𑀺 𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸 𑀧𑀘𑁆𑀘𑀓𑁆𑀔𑀁 𑀓𑀢𑁆𑀯𑀸 𑀞𑀺𑀢𑁄 𑀳𑁄𑀢𑀺. 𑀦𑁂𑀓𑁆𑀔𑀫𑁆𑀫𑀸𑀥𑀺𑀫𑀼𑀢𑁆𑀢𑁄𑀢𑀺𑀆𑀤𑀺 𑀲𑀩𑁆𑀩𑀁 𑀅𑀭𑀳𑀢𑁆𑀢𑀯𑀲𑁂𑀦𑁂𑀯 𑀯𑀼𑀢𑁆𑀢𑀁. 𑀅𑀭𑀳𑀢𑁆𑀢𑀜𑁆𑀳𑀺 𑀲𑀩𑁆𑀩𑀓𑀺𑀮𑁂𑀲𑁂𑀳𑀺 𑀦𑀺𑀓𑁆𑀔𑀦𑁆𑀢𑀢𑁆𑀢𑀸 𑀦𑁂𑀓𑁆𑀔𑀫𑁆𑀫𑀁, 𑀢𑁂𑀳𑁂𑀯 𑀧𑀯𑀺𑀯𑀺𑀢𑁆𑀢𑀢𑁆𑀢𑀸 𑀧𑀯𑀺𑀯𑁂𑀓𑁄, 𑀩𑁆𑀬𑀸𑀧𑀚𑁆𑀛𑀸𑀪𑀸𑀯𑀢𑁄 𑀅𑀩𑁆𑀬𑀸𑀧𑀚𑁆𑀛𑀁, 𑀢𑀡𑁆𑀳𑀸𑀓𑁆𑀔𑀬𑀦𑁆𑀢𑁂 𑀉𑀧𑁆𑀧𑀦𑁆𑀦𑀢𑁆𑀢𑀸 𑀢𑀡𑁆𑀳𑀸𑀓𑁆𑀔𑀬𑁄, 𑀉𑀧𑀸𑀤𑀸𑀦𑀓𑁆𑀔𑀬𑀦𑁆𑀢𑁂 𑀉𑀧𑁆𑀧𑀦𑁆𑀦𑀢𑁆𑀢𑀸 𑀉𑀧𑀸𑀤𑀸𑀦𑀓𑁆𑀔𑀬𑁄, 𑀲𑀫𑁆𑀫𑁄𑀳𑀸𑀪𑀸𑀯𑀢𑁄 𑀅𑀲𑀫𑁆𑀫𑁄𑀳𑁄𑀢𑀺 𑀯𑀼𑀘𑁆𑀘𑀢𑀺.

𑀓𑁂𑀯𑀮𑀁 𑀲𑀤𑁆𑀥𑀸𑀫𑀢𑁆𑀢𑀓𑀦𑁆𑀢𑀺 𑀧𑀝𑀺𑀯𑁂𑀥𑀭𑀳𑀺𑀢𑀁 𑀓𑁂𑀯𑀮𑀁 𑀧𑀝𑀺𑀯𑁂𑀥𑀧𑀜𑁆𑀜𑀸𑀬 𑀅𑀲𑀫𑁆𑀫𑀺𑀲𑁆𑀲𑀓𑀁 𑀲𑀤𑁆𑀥𑀸𑀫𑀢𑁆𑀢𑀓𑀁. 𑀧𑀝𑀺𑀘𑀬𑀦𑁆𑀢𑀺 𑀧𑀼𑀦𑀧𑁆𑀧𑀼𑀦𑀁 𑀓𑀭𑀡𑁂𑀦 𑀯𑀟𑁆𑀠𑀺𑀁. 𑀯𑀻𑀢𑀭𑀸𑀕𑀢𑁆𑀢𑀸𑀢𑀺 𑀫𑀕𑁆𑀕𑀧𑀝𑀺𑀯𑁂𑀥𑁂𑀦 𑀭𑀸𑀕𑀲𑁆𑀲 𑀯𑀺𑀕𑀢𑀢𑁆𑀢𑀸𑀬𑁂𑀯 𑀦𑁂𑀓𑁆𑀔𑀫𑁆𑀫𑀲𑀗𑁆𑀔𑀸𑀢𑀁 𑀅𑀭𑀳𑀢𑁆𑀢𑀁 𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸 𑀲𑀘𑁆𑀙𑀺𑀓𑀢𑁆𑀯𑀸 𑀞𑀺𑀢𑁄 𑀳𑁄𑀢𑀺, 𑀨𑀮𑀲𑀫𑀸𑀧𑀢𑁆𑀢𑀺𑀯𑀺𑀳𑀸𑀭𑁂𑀦 𑀯𑀺𑀳𑀭𑀢𑀺, 𑀢𑀦𑁆𑀦𑀺𑀦𑁆𑀦𑀫𑀸𑀦𑀲𑁄𑀬𑁂𑀯 𑀘 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑀦𑁆𑀢𑀺 𑀘𑀢𑀼𑀧𑀘𑁆𑀘𑀬𑀮𑀸𑀪𑀜𑁆𑀘 𑀢𑁂𑀲𑀜𑁆𑀜𑁂𑀯 𑀲𑀼𑀓𑀢𑀪𑀸𑀯𑀜𑁆𑀘 𑀯𑀡𑁆𑀡𑀪𑀡𑀦𑀜𑁆𑀘. 𑀦𑀺𑀓𑀸𑀫𑀬𑀫𑀸𑀦𑁄𑀢𑀺 𑀇𑀘𑁆𑀙𑀫𑀸𑀦𑁄 𑀧𑀢𑁆𑀣𑀬𑀫𑀸𑀦𑁄. 𑀧𑀯𑀺𑀯𑁂𑀓𑀸𑀥𑀺𑀫𑀼𑀢𑁆𑀢𑁄𑀢𑀺 𑀧𑀯𑀺𑀯𑁂𑀓𑁂 𑀅𑀥𑀺𑀫𑀼𑀢𑁆𑀢𑁄 𑀅𑀭𑀳𑀦𑁆𑀢𑀺 𑀏𑀯𑀁 𑀅𑀭𑀳𑀢𑁆𑀢𑀁 𑀩𑁆𑀬𑀸𑀓𑀭𑁄𑀢𑀻𑀢𑀺 𑀅𑀢𑁆𑀣𑁄.

𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑀦𑁆𑀢𑀺 𑀲𑀻𑀮𑀜𑁆𑀘 𑀯𑀢𑀜𑁆𑀘 𑀧𑀭𑀸𑀫𑀲𑀺𑀢𑁆𑀯𑀸 𑀕𑀳𑀺𑀢𑀁 𑀕𑀳𑀡𑀫𑀢𑁆𑀢𑀁. 𑀲𑀸𑀭𑀢𑁄 𑀧𑀘𑁆𑀘𑀸𑀕𑀘𑁆𑀙𑀦𑁆𑀢𑁄𑀢𑀺 𑀲𑀸𑀭𑀪𑀸𑀯𑁂𑀦 𑀚𑀸𑀦𑀦𑁆𑀢𑁄. 𑀅𑀩𑁆𑀬𑀸𑀧𑀚𑁆𑀛𑀸𑀥𑀺𑀫𑀼𑀢𑁆𑀢𑁄𑀢𑀺 𑀅𑀩𑁆𑀬𑀸𑀧𑀚𑁆𑀛𑀁 𑀅𑀭𑀳𑀢𑁆𑀢𑀁 𑀩𑁆𑀬𑀸𑀓𑀭𑁄𑀢𑀺. 𑀇𑀫𑀺𑀦𑀸𑀯 𑀦𑀬𑁂𑀦 𑀲𑀩𑁆𑀩𑀝𑁆𑀞𑀸𑀦𑁂𑀲𑀼 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀅𑀧𑀺𑀘𑁂𑀢𑁆𑀣 ‘‘𑀦𑁂𑀓𑁆𑀔𑀫𑁆𑀫𑀸𑀥𑀺𑀫𑀼𑀢𑁆𑀢𑁄𑀢𑀺 𑀇𑀫𑀲𑁆𑀫𑀺𑀁𑀬𑁂𑀯 𑀅𑀭𑀳𑀢𑁆𑀢𑀁 𑀓𑀣𑀺𑀢𑀁, 𑀲𑁂𑀲𑁂𑀲𑀼 𑀧𑀜𑁆𑀘𑀲𑀼 𑀦𑀺𑀩𑁆𑀩𑀸𑀦’’𑀦𑁆𑀢𑀺 𑀏𑀓𑁂 𑀯𑀤𑀦𑁆𑀢𑀺. 𑀅𑀧𑀭𑁂 ‘‘𑀅𑀲𑀫𑁆𑀫𑁄𑀳𑀸𑀥𑀺𑀫𑀼𑀢𑁆𑀢𑁄𑀢𑀺 𑀏𑀢𑁆𑀣𑁂𑀯 𑀦𑀺𑀩𑁆𑀩𑀸𑀦𑀁 𑀓𑀣𑀺𑀢𑀁, 𑀲𑁂𑀲𑁂𑀲𑀼 𑀅𑀭𑀳𑀢𑁆𑀢’’𑀦𑁆𑀢𑀺 𑀯𑀤𑀦𑁆𑀢𑀺. 𑀅𑀬𑀁 𑀧𑀦𑁂𑀢𑁆𑀣 𑀲𑀸𑀭𑁄 𑁋 𑀲𑀩𑁆𑀩𑁂𑀲𑁆𑀯𑁂𑀯 𑀢𑁂𑀲𑀼 𑀅𑀭𑀳𑀢𑁆𑀢𑀫𑁆𑀧𑀺 𑀦𑀺𑀩𑁆𑀩𑀸𑀦𑀫𑁆𑀧𑀺 𑀓𑀣𑀺𑀢𑀫𑁂𑀯𑀸𑀢𑀺.

𑀪𑀼𑀲𑀸𑀢𑀺 𑀩𑀮𑀯𑀦𑁆𑀢𑁄 𑀤𑀺𑀩𑁆𑀩𑀭𑀽𑀧𑀲𑀤𑀺𑀲𑀸. 𑀦𑁂𑀯𑀲𑁆𑀲 𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀺𑀬𑀦𑁆𑀢𑀻𑀢𑀺 𑀏𑀢𑀲𑁆𑀲 𑀔𑀻𑀡𑀸𑀲𑀯𑀲𑁆𑀲 𑀘𑀺𑀢𑁆𑀢𑀁 𑀕𑀳𑁂𑀢𑁆𑀯𑀸 𑀞𑀸𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺. 𑀓𑀺𑀮𑁂𑀲𑀸 𑀳𑀺 𑀉𑀧𑁆𑀧𑀚𑁆𑀚𑀫𑀸𑀦𑀸 𑀘𑀺𑀢𑁆𑀢𑀁 𑀕𑀡𑁆𑀳𑀦𑁆𑀢𑀺 𑀦𑀸𑀫. 𑀅𑀫𑀺𑀲𑁆𑀲𑀻𑀓𑀢𑀦𑁆𑀢𑀺 𑀓𑀺𑀮𑁂𑀲𑀸 𑀳𑀺 𑀆𑀭𑀫𑁆𑀫𑀡𑁂𑀦 𑀲𑀤𑁆𑀥𑀺𑀁 𑀘𑀺𑀢𑁆𑀢𑀁 𑀫𑀺𑀲𑁆𑀲𑀁 𑀓𑀭𑁄𑀦𑁆𑀢𑀺, 𑀢𑁂𑀲𑀁 𑀅𑀪𑀸𑀯𑀸 𑀅𑀫𑀺𑀲𑁆𑀲𑀻𑀓𑀢𑀁. 𑀞𑀺𑀢𑀦𑁆𑀢𑀺 𑀧𑀢𑀺𑀝𑁆𑀞𑀺𑀢𑀁. 𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑀦𑁆𑀢𑀺 𑀅𑀘𑀮𑀧𑁆𑀧𑀢𑁆𑀢𑀁. 𑀯𑀬𑀜𑁆𑀘𑀲𑁆𑀲𑀸𑀦𑀼𑀧𑀲𑁆𑀲𑀢𑀻𑀢𑀺 𑀢𑀲𑁆𑀲 𑀘𑁂𑀲 𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑀫𑁆𑀧𑀺 𑀯𑀬𑀫𑁆𑀧𑀺 𑀧𑀲𑁆𑀲𑀢𑀺. 𑀪𑀼𑀲𑀸 𑀯𑀸𑀢𑀯𑀼𑀝𑁆𑀞𑀻𑀢𑀺 𑀩𑀮𑀯𑀸 𑀯𑀸𑀢𑀓𑁆𑀔𑀦𑁆𑀥𑁄. 𑀦𑁂𑀯 𑀲𑀫𑁆𑀧𑀓𑀫𑁆𑀧𑁂𑀬𑁆𑀬𑀸𑀢𑀺 𑀏𑀓𑀪𑀸𑀕𑁂𑀦 𑀘𑀸𑀮𑁂𑀢𑀼𑀁 𑀦 𑀲𑀓𑁆𑀓𑀼𑀡𑁂𑀬𑁆𑀬. 𑀦 𑀲𑀫𑁆𑀧𑀓𑀫𑁆𑀧𑁂𑀬𑁆𑀬𑀸𑀢𑀺 𑀣𑀽𑀡𑀁 𑀯𑀺𑀬 𑀲𑀩𑁆𑀩𑀪𑀸𑀕𑀢𑁄 𑀓𑀫𑁆𑀧𑁂𑀢𑀼𑀁 𑀦 𑀲𑀓𑁆𑀓𑀼𑀡𑁂𑀬𑁆𑀬. 𑀦 𑀲𑀫𑁆𑀧𑀯𑁂𑀥𑁂𑀬𑁆𑀬𑀸𑀢𑀺 𑀯𑁂𑀥𑁂𑀢𑁆𑀯𑀸 𑀧𑀯𑁂𑀥𑁂𑀢𑁆𑀯𑀸 𑀧𑀸𑀢𑁂𑀢𑀼𑀁 𑀦 𑀲𑀓𑁆𑀓𑀼𑀡𑁂𑀬𑁆𑀬.

𑀦𑁂𑀓𑁆𑀔𑀫𑁆𑀫𑀁 𑀅𑀥𑀺𑀫𑀼𑀢𑁆𑀢𑀲𑁆𑀲𑀸𑀢𑀺 𑀅𑀭𑀳𑀢𑁆𑀢𑀁 𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸 𑀞𑀺𑀢𑀲𑁆𑀲 𑀔𑀻𑀡𑀸𑀲𑀯𑀲𑁆𑀲. 𑀲𑁂𑀲𑀧𑀤𑁂𑀲𑀼𑀧𑀺 𑀅𑀭𑀳𑀢𑁆𑀢𑀫𑁂𑀯 𑀓𑀣𑀺𑀢𑀁. 𑀉𑀧𑀸𑀤𑀸𑀦𑀓𑁆𑀔𑀬𑀲𑁆𑀲 𑀘𑀸𑀢𑀺 𑀉𑀧𑀬𑁄𑀕𑀢𑁆𑀣𑁂 𑀲𑀸𑀫𑀺𑀯𑀘𑀦𑀁. 𑀅𑀲𑀫𑁆𑀫𑁄𑀳𑀜𑁆𑀘 𑀘𑁂𑀢𑀲𑁄𑀢𑀺 𑀘𑀺𑀢𑁆𑀢𑀲𑁆𑀲 𑀘 𑀅𑀲𑀫𑁆𑀫𑁄𑀳𑀁 𑀅𑀥𑀺𑀫𑀼𑀢𑁆𑀢𑀲𑁆𑀲. 𑀤𑀺𑀲𑁆𑀯𑀸 𑀆𑀬𑀢𑀦𑀼𑀧𑁆𑀧𑀸𑀤𑀦𑁆𑀢𑀺 𑀆𑀬𑀢𑀦𑀸𑀦𑀁 𑀉𑀧𑁆𑀧𑀸𑀤𑀜𑁆𑀘 𑀯𑀬𑀜𑁆𑀘 𑀤𑀺𑀲𑁆𑀯𑀸. 𑀲𑀫𑁆𑀫𑀸 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀢𑀻𑀢𑀺 𑀲𑀫𑁆𑀫𑀸 𑀳𑁂𑀢𑀼𑀦𑀸 𑀦𑀬𑁂𑀦 𑀇𑀫𑀸𑀬 𑀯𑀺𑀧𑀲𑁆𑀲𑀦𑀸𑀧𑀝𑀺𑀧𑀢𑁆𑀢𑀺𑀬𑀸 𑀨𑀮𑀲𑀫𑀸𑀧𑀢𑁆𑀢𑀺𑀯𑀲𑁂𑀦 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀢𑀺, 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑁂 𑀅𑀥𑀺𑀫𑀼𑀘𑁆𑀘𑀢𑀺. 𑀅𑀣 𑀯𑀸 𑀇𑀫𑀺𑀦𑀸 𑀔𑀻𑀡𑀸𑀲𑀯𑀲𑁆𑀲 𑀧𑀝𑀺𑀧𑀤𑀸 𑀓𑀣𑀺𑀢𑀸. 𑀢𑀲𑁆𑀲 𑀳𑀺 𑀆𑀬𑀢𑀦𑀼𑀧𑁆𑀧𑀸𑀤𑀁 𑀤𑀺𑀲𑁆𑀯𑀸 𑀇𑀫𑀸𑀬 𑀯𑀺𑀧𑀲𑁆𑀲𑀦𑀸𑀬 𑀅𑀥𑀺𑀕𑀢𑀲𑁆𑀲 𑀅𑀭𑀺𑀬𑀫𑀕𑁆𑀕𑀲𑁆𑀲𑀸𑀦𑀼𑀪𑀸𑀯𑁂𑀦 𑀲𑀩𑁆𑀩𑀓𑀺𑀮𑁂𑀲𑁂𑀳𑀺 𑀲𑀫𑁆𑀫𑀸 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀢𑀺. 𑀏𑀯𑀁 𑀢𑀲𑁆𑀲 𑀲𑀫𑁆𑀫𑀸 𑀯𑀺𑀫𑀼𑀢𑁆𑀢𑀲𑁆𑀲…𑀧𑁂… 𑀦 𑀯𑀺𑀚𑁆𑀚𑀢𑀺. 𑀢𑀢𑁆𑀣 𑀲𑀦𑁆𑀢𑀘𑀺𑀢𑁆𑀢𑀲𑁆𑀲𑀸𑀢𑀺 𑀦𑀺𑀩𑁆𑀩𑀼𑀢𑀘𑀺𑀢𑁆𑀢𑀲𑁆𑀲. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑁨. 𑀨𑀕𑁆𑀕𑀼𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁬. 𑀤𑀼𑀢𑀺𑀬𑁂 𑀲𑀫𑀥𑁄𑀲𑀻𑀢𑀺 𑀉𑀝𑁆𑀞𑀸𑀦𑀸𑀓𑀸𑀭𑀁 𑀤𑀲𑁆𑀲𑁂𑀲𑀺. 𑀧𑀝𑀺𑀓𑁆𑀓𑀫𑀦𑁆𑀢𑀻𑀢𑀺 𑀧𑀭𑀺𑀳𑀸𑀬𑀦𑁆𑀢𑀺. 𑀦𑁄 𑀅𑀪𑀺𑀓𑁆𑀓𑀫𑀦𑁆𑀢𑀻𑀢𑀺 𑀦 𑀯𑀟𑁆𑀠𑀦𑁆𑀢𑀺. 𑀲𑀻𑀲𑀯𑁂𑀞𑀦𑀁 𑀤𑀤𑁂𑀬𑁆𑀬𑀸𑀢𑀺 𑀲𑀻𑀲𑀁 𑀯𑁂𑀞𑁂𑀢𑁆𑀯𑀸 𑀤𑀡𑁆𑀟𑀓𑁂𑀦 𑀲𑀫𑁆𑀧𑀭𑀺𑀯𑀢𑁆𑀢𑀓𑀁 𑀩𑀦𑁆𑀥𑁂𑀬𑁆𑀬. 𑀇𑀦𑁆𑀤𑁆𑀭𑀺𑀬𑀸𑀦𑀺 𑀯𑀺𑀧𑁆𑀧𑀲𑀻𑀤𑀺𑀁𑀲𑀽𑀢𑀺 𑀢𑀲𑁆𑀫𑀺𑀁 𑀫𑀭𑀡𑀲𑀫𑀬𑁂 𑀙 𑀇𑀦𑁆𑀤𑁆𑀭𑀺𑀬𑀸𑀦𑀺 𑀯𑀺𑀧𑁆𑀧𑀲𑀦𑁆𑀦𑀸𑀦𑀺 𑀅𑀳𑁂𑀲𑀼𑀁. 𑀅𑀢𑁆𑀣𑀼𑀧𑀧𑀭𑀺𑀓𑁆𑀔𑀸𑀬𑀸𑀢𑀺 𑀅𑀢𑁆𑀣𑀸𑀦𑀢𑁆𑀣𑀁 𑀓𑀸𑀭𑀡𑀸𑀓𑀸𑀭𑀡𑀁 𑀉𑀧𑀧𑀭𑀺𑀓𑁆𑀔𑀦𑁂. 𑀅𑀦𑀼𑀢𑁆𑀢𑀭𑁂 𑀉𑀧𑀥𑀺𑀲𑀗𑁆𑀔𑀬𑁂𑀢𑀺 𑀦𑀺𑀩𑁆𑀩𑀸𑀦𑁂. 𑀅𑀯𑀺𑀫𑀼𑀢𑁆𑀢𑀁 𑀳𑁄𑀢𑀻𑀢𑀺 𑀅𑀭𑀳𑀢𑁆𑀢𑀨𑀮𑁂𑀦 𑀅𑀥𑀺𑀫𑀼𑀢𑁆𑀢𑀁 𑀳𑁄𑀢𑀺.

𑁩. 𑀙𑀴𑀪𑀺𑀚𑀸𑀢𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁭. 𑀢𑀢𑀺𑀬𑁂 𑀙𑀴𑀪𑀺𑀚𑀸𑀢𑀺𑀬𑁄𑀢𑀺 𑀙 𑀚𑀸𑀢𑀺𑀬𑁄. 𑀢𑀢𑁆𑀭𑀺𑀤𑀦𑁆𑀢𑀺 𑀢𑀢𑁆𑀭𑀸𑀬𑀁. 𑀮𑀼𑀤𑁆𑀤𑀸𑀢𑀺 𑀤𑀸𑀭𑀼𑀡𑀸. 𑀪𑀺𑀓𑁆𑀔𑀽 𑀓𑀡𑁆𑀝𑀓𑀯𑀼𑀢𑁆𑀢𑀺𑀓𑀸𑀢𑀺 𑀲𑀫𑀡𑀸 𑀦𑀸𑀫𑁂𑀢𑁂. 𑀏𑀓𑀲𑀸𑀝𑀓𑀸𑀢𑀺 𑀏𑀓𑁂𑀦𑁂𑀯 𑀧𑀺𑀮𑁄𑀢𑀺𑀓𑀔𑀡𑁆𑀟𑁂𑀦 𑀧𑀼𑀭𑀢𑁄 𑀧𑀝𑀺𑀘𑁆𑀙𑀸𑀤𑀦𑀓𑀸. 𑀅𑀓𑀸𑀫𑀓𑀲𑁆𑀲 𑀩𑀺𑀮𑀁 𑀑𑀮𑀕𑁆𑀕𑁂𑀬𑁆𑀬𑀼𑀦𑁆𑀢𑀺 𑀲𑀢𑁆𑀣𑁂 𑀕𑀘𑁆𑀙𑀫𑀸𑀦𑁂 𑀕𑁄𑀡𑀫𑁆𑀳𑀺 𑀫𑀢𑁂 𑀕𑁄𑀫𑀁𑀲𑀫𑀽𑀮𑀁 𑀉𑀧𑁆𑀧𑀸𑀤𑀦𑀢𑁆𑀣𑀸𑀬 𑀯𑀺𑀪𑀚𑀺𑀢𑁆𑀯𑀸 𑀔𑀸𑀤𑀫𑀸𑀦𑀸 𑀏𑀓𑀲𑁆𑀲 𑀕𑁄𑀫𑀁𑀲𑀁 𑀅𑀦𑀺𑀘𑁆𑀙𑀦𑁆𑀢𑀲𑁆𑀲𑁂𑀯 𑀓𑁄𑀝𑁆𑀞𑀸𑀲𑀁 𑀓𑀢𑁆𑀯𑀸 ‘‘𑀅𑀬𑀜𑁆𑀘 𑀢𑁂 𑀔𑀸𑀤𑀺𑀢𑀩𑁆𑀩𑁄, 𑀫𑀽𑀮𑀜𑁆𑀘 𑀤𑀸𑀢𑀩𑁆𑀩’’𑀦𑁆𑀢𑀺 𑀢𑀁 𑀓𑁄𑀝𑁆𑀞𑀸𑀲𑀲𑀗𑁆𑀔𑀸𑀢𑀁 𑀩𑀺𑀮𑀁 𑀑𑀮𑀕𑁆𑀕𑁂𑀬𑁆𑀬𑀼𑀁, 𑀩𑀮𑀓𑁆𑀓𑀸𑀭𑁂𑀦 𑀳𑀢𑁆𑀣𑁂 𑀞𑀧𑁂𑀬𑁆𑀬𑀼𑀦𑁆𑀢𑀺 𑀅𑀢𑁆𑀣𑁄. 𑀅𑀔𑁂𑀢𑁆𑀢𑀜𑁆𑀜𑀼𑀦𑀸𑀢𑀺 𑀅𑀪𑀺𑀚𑀸𑀢𑀺𑀧𑀜𑁆𑀜𑀢𑁆𑀢𑀺𑀬𑀸 𑀔𑁂𑀢𑁆𑀢𑀁 𑀅𑀚𑀸𑀦𑀦𑁆𑀢𑁂𑀦. 𑀢𑀁 𑀲𑀼𑀡𑀸𑀳𑀻𑀢𑀺 𑀢𑀁 𑀫𑀫 𑀧𑀜𑁆𑀜𑀢𑁆𑀢𑀺𑀁 𑀲𑀼𑀡𑀸𑀳𑀺. 𑀓𑀡𑁆𑀳𑀸𑀪𑀺𑀚𑀸𑀢𑀺𑀓𑁄𑀢𑀺 𑀓𑀸𑀴𑀓𑀚𑀸𑀢𑀺𑀓𑁄. 𑀓𑀡𑁆𑀳𑀁 𑀥𑀫𑁆𑀫𑀁 𑀅𑀪𑀺𑀚𑀸𑀬𑀢𑀻𑀢𑀺 𑀓𑀡𑁆𑀳𑀲𑀪𑀸𑀯𑁄 𑀳𑀼𑀢𑁆𑀯𑀸 𑀚𑀸𑀬𑀢𑀺 𑀦𑀺𑀩𑁆𑀩𑀢𑁆𑀢𑀢𑀺, 𑀓𑀡𑁆𑀳𑀸𑀪𑀺𑀚𑀸𑀢𑀺𑀬𑀁 𑀯𑀸 𑀚𑀸𑀬𑀢𑀺. 𑀦𑀺𑀩𑁆𑀩𑀸𑀦𑀁 𑀅𑀪𑀺𑀚𑀸𑀬𑀢𑀻𑀢𑀺 𑀦𑀺𑀩𑁆𑀩𑀸𑀦𑀁 𑀧𑀸𑀧𑀼𑀡𑀸𑀢𑀺, 𑀅𑀭𑀺𑀬𑀪𑀽𑀫𑀺𑀲𑀗𑁆𑀔𑀸𑀢𑀸𑀬 𑀯𑀸 𑀦𑀺𑀩𑁆𑀩𑀸𑀦𑀚𑀸𑀢𑀺𑀬𑀸 𑀚𑀸𑀬𑀢𑀺.

𑁪. 𑀆𑀲𑀯𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁮. 𑀘𑀢𑀼𑀢𑁆𑀣𑁂 𑀲𑀁𑀯𑀭𑀸 𑀧𑀳𑀸𑀢𑀩𑁆𑀩𑀸𑀢𑀺 𑀲𑀁𑀯𑀭𑁂𑀦 𑀧𑀳𑀸𑀢𑀩𑁆𑀩𑀸. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂. 𑀧𑀝𑀺𑀲𑀗𑁆𑀔𑀸𑀢𑀺 𑀧𑀝𑀺𑀲𑀜𑁆𑀚𑀸𑀦𑀺𑀢𑁆𑀯𑀸, 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀬𑁄𑀦𑀺𑀲𑁄𑀢𑀺 𑀉𑀧𑀸𑀬𑁂𑀦 𑀧𑀣𑁂𑀦. 𑀏𑀢𑁆𑀣 𑀘 𑀅𑀲𑀁𑀯𑀭𑁂 𑀆𑀤𑀻𑀦𑀯𑀧𑀝𑀺𑀲𑀗𑁆𑀔𑀸 𑀬𑁄𑀦𑀺𑀲𑁄 𑀧𑀝𑀺𑀲𑀗𑁆𑀔𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀲𑀸 𑀘𑀸𑀬𑀁 ‘‘𑀯𑀭𑀁, 𑀪𑀺𑀓𑁆𑀔𑀯𑁂, 𑀢𑀢𑁆𑀢𑀸𑀬 𑀅𑀬𑁄𑀲𑀮𑀸𑀓𑀸𑀬 𑀆𑀤𑀺𑀢𑁆𑀢𑀸𑀬 𑀲𑀫𑁆𑀧𑀚𑁆𑀚𑀮𑀺𑀢𑀸𑀬 𑀲𑀚𑁄𑀢𑀺𑀪𑀽𑀢𑀸𑀬 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁 𑀲𑀫𑁆𑀧𑀮𑀺𑀫𑀝𑁆𑀞𑀁, 𑀦 𑀢𑁆𑀯𑁂𑀯 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑁂𑀲𑀼 𑀭𑀽𑀧𑁂𑀲𑀼 𑀅𑀦𑀼𑀩𑁆𑀬𑀜𑁆𑀚𑀦𑀲𑁄 𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑁄’’𑀢𑀺𑀆𑀤𑀺𑀦𑀸 𑀆𑀤𑀺𑀢𑁆𑀢𑀧𑀭𑀺𑀬𑀸𑀬𑁂𑀦 (𑀲𑀁. 𑀦𑀺. 𑁪.𑁨𑁩𑁫) 𑀯𑁂𑀤𑀺𑀢𑀩𑁆𑀩𑀸. 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀲𑀁𑀯𑀭𑀲𑀁𑀯𑀼𑀢𑁄 𑀯𑀺𑀳𑀭𑀢𑀻𑀢𑀺 𑀏𑀢𑁆𑀣 𑀘𑀓𑁆𑀔𑀼𑀫𑁂𑀯 𑀇𑀦𑁆𑀤𑁆𑀭𑀺𑀬𑀁 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁, 𑀲𑀁𑀯𑀭𑀡𑀢𑁄 𑀲𑀁𑀯𑀭𑁄, 𑀧𑀺𑀤𑀳𑀦𑀢𑁄 𑀣𑀓𑀦𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀢𑀺𑀬𑀸 𑀏𑀢𑀁 𑀅𑀥𑀺𑀯𑀘𑀦𑀁. 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑁂 𑀲𑀁𑀯𑀭𑁄 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀲𑀁𑀯𑀭𑁄. 𑀚𑀯𑀦𑁂 𑀉𑀧𑁆𑀧𑀚𑁆𑀚𑀫𑀸𑀦𑁄𑀧𑀺 𑀳𑁂𑀲 𑀢𑀲𑁆𑀫𑀺𑀁 𑀤𑁆𑀯𑀸𑀭𑁂 𑀓𑀺𑀮𑁂𑀲𑀸𑀦𑀁 𑀉𑀧𑁆𑀧𑀢𑁆𑀢𑀺𑀯𑀸𑀭𑀡𑀢𑁄 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀲𑀁𑀯𑀭𑁄𑀢𑀺 𑀯𑀼𑀘𑁆𑀘𑀢𑀺. 𑀲𑀁𑀯𑀼𑀢𑁄𑀢𑀺 𑀢𑁂𑀦 𑀲𑀁𑀯𑀭𑁂𑀦 𑀉𑀧𑁂𑀢𑁄. 𑀢𑀣𑀸 𑀳𑀺 ‘‘𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀁𑀯𑀼𑀢𑁄’’𑀢𑀺 𑀇𑀫𑀲𑁆𑀲 𑀯𑀺𑀪𑀗𑁆𑀕𑁂 ‘‘𑀇𑀫𑀺𑀦𑀸 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑁂𑀦 𑀉𑀧𑁂𑀢𑁄 𑀳𑁄𑀢𑀺…𑀧𑁂… 𑀲𑀫𑀦𑁆𑀦𑀸𑀕𑀢𑁄’’𑀢𑀺 𑀯𑀼𑀢𑁆𑀢𑀁. 𑀅𑀣 𑀯𑀸 𑀲𑀁𑀯𑀭𑀻𑀢𑀺 𑀲𑀁𑀯𑀼𑀢𑁄, 𑀣𑀓𑁂𑀲𑀺 𑀧𑀺𑀤𑀳𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀲𑀁𑀯𑀭𑀲𑀁𑀯𑀼𑀢𑁄𑀢𑀺 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀲𑀁𑀯𑀭𑀲𑀗𑁆𑀔𑀸𑀢𑀁 𑀲𑀢𑀺𑀓𑀯𑀸𑀝𑀁 𑀘𑀓𑁆𑀔𑀼𑀤𑁆𑀯𑀸𑀭𑁂 𑀖𑀭𑀤𑁆𑀯𑀸𑀭𑁂 𑀓𑀯𑀸𑀝𑀁 𑀯𑀺𑀬 𑀲𑀁𑀯𑀭𑀺 𑀣𑀓𑁂𑀲𑀺 𑀧𑀺𑀤𑀳𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀬𑀫𑁂𑀯𑁂𑀢𑁆𑀣 𑀅𑀢𑁆𑀣𑁄 𑀲𑀼𑀦𑁆𑀤𑀭𑀢𑀭𑁄. 𑀢𑀣𑀸 𑀳𑀺 ‘‘𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀲𑀁𑀯𑀭𑀁 𑀅𑀲𑀁𑀯𑀼𑀢𑀲𑁆𑀲 𑀯𑀺𑀳𑀭𑀢𑁄, 𑀲𑀁𑀯𑀼𑀢𑀲𑁆𑀲 𑀯𑀺𑀳𑀭𑀢𑁄’’𑀢𑀺 𑀏𑀢𑁂𑀲𑀼 𑀧𑀤𑁂𑀲𑀼 𑀅𑀬𑀫𑁂𑀯𑀢𑁆𑀣𑁄 𑀤𑀺𑀲𑁆𑀲𑀢𑀻𑀢𑀺.

𑀬𑀁 𑀳𑀺𑀲𑁆𑀲𑀸𑀢𑀺𑀆𑀤𑀺𑀫𑁆𑀳𑀺 𑀬𑀁 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀲𑀁𑀯𑀭𑀁 𑀅𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀲𑀁𑀯𑀼𑀢𑀲𑁆𑀲 𑀅𑀣𑀓𑁂𑀢𑁆𑀯𑀸 𑀅𑀧𑀺𑀤𑀳𑀺𑀢𑁆𑀯𑀸 𑀯𑀺𑀳𑀭𑀦𑁆𑀢𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀬𑁂𑀓𑀸𑀭𑀲𑁆𑀲 𑀯𑀸 𑀏𑀲 𑀬𑀦𑁆𑀢𑀺 𑀆𑀤𑁂𑀲𑁄, 𑀬𑁂 𑀅𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀆𑀲𑀯𑀸 𑀯𑀺𑀖𑀸𑀢𑀧𑀭𑀺𑀴𑀸𑀳𑀸𑀢𑀺 𑀘𑀢𑁆𑀢𑀸𑀭𑁄 𑀆𑀲𑀯𑀸 𑀘 𑀅𑀜𑁆𑀜𑁂 𑀘 𑀯𑀺𑀖𑀸𑀢𑀓𑀭𑀸 𑀓𑀺𑀮𑁂𑀲𑀧𑀭𑀺𑀴𑀸𑀳𑀸 𑀯𑀺𑀧𑀸𑀓𑀧𑀭𑀺𑀴𑀸𑀳𑀸 𑀯𑀸. 𑀘𑀓𑁆𑀔𑀼𑀤𑁆𑀯𑀸𑀭𑀲𑁆𑀫𑀺𑀜𑁆𑀳𑀺 𑀇𑀝𑁆𑀞𑀸𑀭𑀫𑁆𑀫𑀡𑀁 𑀆𑀧𑀸𑀣𑀕𑀢𑀁 𑀓𑀸𑀫𑀲𑁆𑀲𑀸𑀤𑀯𑀲𑁂𑀦 𑀅𑀲𑁆𑀲𑀸𑀤𑀬𑀢𑁄 𑀅𑀪𑀺𑀦𑀦𑁆𑀤𑀢𑁄 𑀓𑀸𑀫𑀸𑀲𑀯𑁄 𑀉𑀧𑁆𑀧𑀚𑁆𑀚𑀢𑀺, ‘‘𑀈𑀤𑀺𑀲𑀁 𑀅𑀜𑁆𑀜𑀲𑁆𑀫𑀺𑀫𑁆𑀧𑀺 𑀲𑀼𑀕𑀢𑀺𑀪𑀯𑁂 𑀮𑀪𑀺𑀲𑁆𑀲𑀸𑀫𑀻’’𑀢𑀺 𑀪𑀯𑀧𑀢𑁆𑀣𑀦𑀸𑀬 𑀅𑀲𑁆𑀲𑀸𑀤𑀬𑀢𑁄 𑀪𑀯𑀸𑀲𑀯𑁄 𑀉𑀧𑁆𑀧𑀚𑁆𑀚𑀢𑀺, 𑀲𑀢𑁆𑀢𑁄𑀢𑀺 𑀯𑀸 𑀲𑀢𑁆𑀢𑀲𑁆𑀲𑀸𑀢𑀺 𑀯𑀸 𑀕𑀡𑁆𑀳𑀢𑁄 𑀤𑀺𑀝𑁆𑀞𑀸𑀲𑀯𑁄 𑀉𑀧𑁆𑀧𑀚𑁆𑀚𑀢𑀺, 𑀲𑀩𑁆𑀩𑁂𑀳𑁂𑀯 𑀲𑀳𑀚𑀸𑀢𑀁 𑀅𑀜𑁆𑀜𑀸𑀡𑀁 𑀅𑀯𑀺𑀚𑁆𑀚𑀸𑀲𑀯𑁄𑀢𑀺 𑀘𑀢𑁆𑀢𑀸𑀭𑁄 𑀆𑀲𑀯𑀸 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀏𑀢𑁂𑀳𑀺 𑀲𑀫𑁆𑀧𑀬𑀼𑀢𑁆𑀢𑀸 𑀅𑀧𑀭𑁂 𑀓𑀺𑀮𑁂𑀲𑀸 𑀯𑀺𑀖𑀸𑀢𑀧𑀭𑀺𑀴𑀸𑀳𑀸 𑀆𑀬𑀢𑀺𑀁 𑀯𑀸 𑀢𑁂𑀲𑀁 𑀯𑀺𑀧𑀸𑀓𑀸 𑀢𑁂𑀳𑀺𑀧𑀺 𑀅𑀲𑀁𑀯𑀼𑀢𑀲𑁆𑀲𑁂𑀯 𑀯𑀺𑀳𑀭𑀢𑁄 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀦𑁆𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀏𑀯𑀁𑀲 𑀢𑁂𑀢𑀺 𑀏𑀯𑀁 𑀅𑀲𑁆𑀲 𑀢𑁂, 𑀏𑀢𑁂𑀦𑀼𑀧𑀸𑀬𑁂𑀦 𑀦 𑀳𑁄𑀦𑁆𑀢𑀺, 𑀦𑁄 𑀅𑀜𑁆𑀜𑀣𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀝𑀺𑀲𑀗𑁆𑀔𑀸 𑀬𑁄𑀦𑀺𑀲𑁄 𑀲𑁄𑀢𑀺𑀦𑁆𑀤𑁆𑀭𑀺𑀬𑀲𑀁𑀯𑀭𑀲𑀁𑀯𑀼𑀢𑁄𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺 𑀆𑀲𑀯𑀸 𑀲𑀁𑀯𑀭𑀸 𑀧𑀳𑀸𑀢𑀩𑁆𑀩𑀸𑀢𑀺 𑀇𑀫𑁂𑀲𑀼 𑀙𑀲𑀼 𑀤𑁆𑀯𑀸𑀭𑁂𑀲𑀼 𑀘𑀢𑁆𑀢𑀸𑀭𑁄 𑀘𑀢𑁆𑀢𑀸𑀭𑁄 𑀓𑀢𑁆𑀯𑀸 𑀘𑀢𑀼𑀯𑀻𑀲𑀢𑀺 𑀆𑀲𑀯𑀸 𑀲𑀁𑀯𑀭𑁂𑀦 𑀧𑀳𑀸𑀢𑀩𑁆𑀩𑀸𑀢𑀺 𑀯𑀼𑀘𑁆𑀘𑀦𑁆𑀢𑀺.

𑀧𑀝𑀺𑀲𑀗𑁆𑀔𑀸 𑀬𑁄𑀦𑀺𑀲𑁄 𑀘𑀻𑀯𑀭𑀦𑁆𑀢𑀺𑀆𑀤𑀻𑀲𑀼 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀲𑀩𑁆𑀩𑀁 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁧.𑁧𑁮) 𑀲𑀻𑀮𑀓𑀣𑀸𑀬 𑀯𑀼𑀢𑁆𑀢𑀫𑁂𑀯. 𑀬𑀁 𑀳𑀺𑀲𑁆𑀲𑀸𑀢𑀺 𑀬𑀜𑁆𑀳𑀺 𑀘𑀻𑀯𑀭𑀁 𑀧𑀺𑀡𑁆𑀟𑀧𑀸𑀢𑀸𑀤𑀻𑀲𑀼 𑀯𑀸 𑀅𑀜𑁆𑀜𑀢𑀭𑀁 𑀅𑀲𑁆𑀲. 𑀅𑀧𑁆𑀧𑀝𑀺𑀲𑁂𑀯𑀢𑁄𑀢𑀺 𑀏𑀯𑀁 𑀬𑁄𑀦𑀺𑀲𑁄 𑀅𑀧𑁆𑀧𑀝𑀺𑀲𑁂𑀯𑀦𑁆𑀢𑀲𑁆𑀲. 𑀇𑀫𑀲𑁆𑀫𑀺𑀁 𑀯𑀸𑀭𑁂 𑀅𑀮𑀤𑁆𑀥𑀁 𑀘𑀻𑀯𑀭𑀸𑀤𑀺𑀁 𑀧𑀢𑁆𑀣𑀬𑀢𑁄 𑀮𑀤𑁆𑀥𑀁 𑀯𑀸 𑀅𑀲𑁆𑀲𑀸𑀤𑀬𑀢𑁄 𑀓𑀸𑀫𑀸𑀲𑀯𑀲𑁆𑀲 𑀉𑀧𑁆𑀧𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸, 𑀈𑀤𑀺𑀲𑀁 𑀅𑀜𑁆𑀜𑀲𑁆𑀫𑀺𑀫𑁆𑀧𑀺 𑀲𑀼𑀕𑀢𑀺𑀪𑀯𑁂 𑀮𑀪𑀺𑀲𑁆𑀲𑀸𑀫𑀻𑀢𑀺 𑀪𑀯𑀧𑀢𑁆𑀣𑀦𑀸𑀬 𑀅𑀲𑁆𑀲𑀸𑀤𑀬𑀢𑁄 𑀪𑀯𑀸𑀲𑀯𑀲𑁆𑀲, 𑀅𑀳𑀁 𑀮𑀪𑀸𑀫𑀺 𑀦 𑀮𑀪𑀸𑀫𑀻𑀢𑀺 𑀯𑀸 𑀫𑀬𑁆𑀳𑀁 𑀯𑀸 𑀇𑀤𑀦𑁆𑀢𑀺 𑀅𑀢𑁆𑀢𑀲𑀜𑁆𑀜𑀁 𑀅𑀥𑀺𑀝𑁆𑀞𑀳𑀢𑁄 𑀤𑀺𑀝𑁆𑀞𑀸𑀲𑀯𑀲𑁆𑀲, 𑀲𑀩𑁆𑀩𑁂𑀳𑁂𑀯 𑀧𑀦 𑀲𑀳𑀚𑀸𑀢𑁄 𑀅𑀯𑀺𑀚𑁆𑀚𑀸𑀲𑀯𑁄𑀢𑀺 𑀏𑀯𑀁 𑀘𑀢𑀼𑀦𑁆𑀦𑀁 𑀆𑀲𑀯𑀸𑀦𑀁 𑀉𑀧𑁆𑀧𑀢𑁆𑀢𑀺 𑀯𑀺𑀖𑀸𑀢𑀧𑀭𑀺𑀴𑀸𑀳𑀸𑀯 𑀦𑀯𑀯𑁂𑀤𑀦𑀼𑀧𑁆𑀧𑀸𑀤𑀦𑀢𑁄𑀧𑀺 𑀯𑁂𑀤𑀺𑀢𑀩𑁆𑀩𑀸. 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀆𑀲𑀯𑀸 𑀧𑀝𑀺𑀲𑁂𑀯𑀦𑀸 𑀧𑀳𑀸𑀢𑀩𑁆𑀩𑀸𑀢𑀺 𑀇𑀫𑁂 𑀏𑀓𑀫𑁂𑀓𑀲𑁆𑀫𑀺𑀁 𑀧𑀘𑁆𑀘𑀬𑁂 𑀘𑀢𑁆𑀢𑀸𑀭𑁄 𑀘𑀢𑁆𑀢𑀸𑀭𑁄 𑀓𑀢𑁆𑀯𑀸 𑀲𑁄𑀴𑀲 𑀆𑀲𑀯𑀸 𑀇𑀫𑀺𑀦𑀸 𑀜𑀸𑀡𑀲𑀁𑀯𑀭𑀲𑀗𑁆𑀔𑀸𑀢𑁂𑀦 𑀧𑀘𑁆𑀘𑀯𑁂𑀓𑁆𑀔𑀡𑀧𑀝𑀺𑀲𑁂𑀯𑀦𑁂𑀦 𑀧𑀳𑀸𑀢𑀩𑁆𑀩𑀸𑀢𑀺 𑀯𑀼𑀘𑁆𑀘𑀦𑁆𑀢𑀺.

𑀧𑀝𑀺𑀲𑀗𑁆𑀔𑀸 𑀬𑁄𑀦𑀺𑀲𑁄 𑀔𑀫𑁄 𑀳𑁄𑀢𑀺 𑀲𑀻𑀢𑀲𑁆𑀲𑀸𑀢𑀺 𑀉𑀧𑀸𑀬𑁂𑀦 𑀧𑀣𑁂𑀦 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀔𑀦𑁆𑀢𑀸 𑀳𑁄𑀢𑀺 𑀲𑀻𑀢𑀲𑁆𑀲, 𑀲𑀻𑀢𑀁 𑀔𑀫𑀢𑀺 𑀲𑀳𑀢𑀺, 𑀦 𑀅𑀯𑀻𑀭𑀧𑀼𑀭𑀺𑀲𑁄 𑀯𑀺𑀬 𑀅𑀧𑁆𑀧𑀫𑀢𑁆𑀢𑀓𑁂𑀦𑀧𑀺 𑀲𑀻𑀢𑁂𑀦 𑀘𑀮𑀢𑀺 𑀓𑀫𑁆𑀧𑀢𑀺 𑀓𑀫𑁆𑀫𑀝𑁆𑀞𑀸𑀦𑀁 𑀯𑀺𑀚𑀳𑀢𑀺. 𑀉𑀡𑁆𑀳𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀏𑀢𑁆𑀣 𑀘 𑀯𑀘𑀦𑀫𑁂𑀯 𑀯𑀘𑀦𑀧𑀣𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀤𑀼𑀓𑁆𑀔𑀸𑀦𑀦𑁆𑀢𑀺𑀆𑀤𑀻𑀲𑀼 𑀤𑀼𑀓𑁆𑀔𑀫𑀦𑀝𑁆𑀞𑁂𑀦 𑀤𑀼𑀓𑁆𑀔𑀸, 𑀩𑀳𑀮𑀝𑁆𑀞𑁂𑀦 𑀢𑀺𑀩𑁆𑀩𑀸, 𑀨𑀭𑀼𑀲𑀝𑁆𑀞𑁂𑀦 𑀔𑀭𑀸, 𑀢𑀺𑀔𑀺𑀡𑀝𑁆𑀞𑁂𑀦 𑀓𑀝𑀼𑀓𑀸, 𑀅𑀲𑁆𑀲𑀸𑀤𑀯𑀺𑀭𑀳𑀢𑁄 𑀅𑀲𑀸𑀢𑀸, 𑀫𑀦𑀁 𑀅𑀯𑀟𑁆𑀠𑀦𑀢𑁄 𑀅𑀫𑀦𑀸𑀧𑀸, 𑀧𑀸𑀡𑀳𑀭𑀡𑀲𑀫𑀢𑁆𑀣𑀢𑀸𑀬 𑀧𑀸𑀡𑀳𑀭𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀬𑀁 𑀳𑀺𑀲𑁆𑀲𑀸𑀢𑀺 𑀲𑀻𑀢𑀸𑀤𑀻𑀲𑀼 𑀬𑀁𑀓𑀺𑀜𑁆𑀘𑀺 𑀏𑀓𑀥𑀫𑁆𑀫𑀫𑁆𑀧𑀺 𑀅𑀲𑁆𑀲. 𑀅𑀦𑀥𑀺𑀯𑀸𑀲𑀢𑁄𑀢𑀺 𑀅𑀦𑀥𑀺𑀯𑀸𑀲𑁂𑀦𑁆𑀢𑀲𑁆𑀲 𑀅𑀓𑁆𑀔𑀫𑀦𑁆𑀢𑀲𑁆𑀲. 𑀆𑀲𑀯𑀼𑀧𑁆𑀧𑀢𑁆𑀢𑀺 𑀧𑀦𑁂𑀢𑁆𑀣 𑀏𑀯𑀁 𑀯𑁂𑀤𑀺𑀢𑀩𑁆𑀩𑀸 𑁋 𑀲𑀻𑀢𑁂𑀦 𑀨𑀼𑀝𑁆𑀞𑀲𑁆𑀲 𑀉𑀡𑁆𑀳𑀁 𑀧𑀢𑁆𑀣𑀬𑀢𑁄 𑀓𑀸𑀫𑀸𑀲𑀯𑁄 𑀉𑀧𑁆𑀧𑀚𑁆𑀚𑀢𑀺, 𑀏𑀯𑀁 𑀲𑀩𑁆𑀩𑀢𑁆𑀣. ‘‘𑀦𑀢𑁆𑀣𑀺 𑀲𑀼𑀕𑀢𑀺𑀪𑀯𑁂 𑀲𑀻𑀢𑀁 𑀯𑀸 𑀉𑀡𑁆𑀳𑀁 𑀯𑀸’’𑀢𑀺 𑀪𑀯𑀁 𑀧𑀢𑁆𑀣𑁂𑀦𑁆𑀢𑀲𑁆𑀲 𑀪𑀯𑀸𑀲𑀯𑁄, 𑀫𑀬𑁆𑀳𑀁 𑀲𑀻𑀢𑀁 𑀉𑀡𑁆𑀳𑀦𑁆𑀢𑀺 𑀕𑀸𑀳𑁄 𑀤𑀺𑀝𑁆𑀞𑀸𑀲𑀯𑁄, 𑀲𑀩𑁆𑀩𑁂𑀳𑁂𑀯 𑀲𑀫𑁆𑀧𑀬𑀼𑀢𑁆𑀢𑁄 𑀅𑀯𑀺𑀚𑁆𑀚𑀸𑀲𑀯𑁄𑀢𑀺. 𑀇𑀫𑁂 𑀯𑀼𑀘𑁆𑀘𑀦𑁆𑀢𑀻𑀢𑀺 𑀇𑀫𑁂 𑀲𑀻𑀢𑀸𑀤𑀻𑀲𑀼 𑀏𑀓𑀫𑁂𑀓𑀲𑁆𑀲 𑀯𑀲𑁂𑀦 𑀘𑀢𑁆𑀢𑀸𑀭𑁄 𑀘𑀢𑁆𑀢𑀸𑀭𑁄 𑀓𑀢𑁆𑀯𑀸 𑀅𑀦𑁂𑀓𑁂 𑀆𑀲𑀯𑀸 𑀇𑀫𑀸𑀬 𑀔𑀦𑁆𑀢𑀺𑀲𑀁𑀯𑀭𑀲𑀗𑁆𑀔𑀸𑀢𑀸𑀬 𑀅𑀥𑀺𑀯𑀸𑀲𑀦𑀸𑀬 𑀧𑀳𑀸𑀢𑀩𑁆𑀩𑀸𑀢𑀺 𑀯𑀼𑀘𑁆𑀘𑀦𑁆𑀢𑀻𑀢𑀺 𑀅𑀢𑁆𑀣𑁄.

𑀧𑀝𑀺𑀲𑀗𑁆𑀔𑀸 𑀬𑁄𑀦𑀺𑀲𑁄 𑀘𑀡𑁆𑀟𑀁 𑀳𑀢𑁆𑀣𑀺𑀁 𑀧𑀭𑀺𑀯𑀚𑁆𑀚𑁂𑀢𑀻𑀢𑀺 𑀅𑀳𑀁 𑀲𑀫𑀡𑁄𑀢𑀺 𑀦 𑀘𑀡𑁆𑀟𑀲𑁆𑀲 𑀳𑀢𑁆𑀣𑀺𑀲𑁆𑀲 𑀆𑀲𑀦𑁆𑀦𑁂 𑀞𑀸𑀢𑀩𑁆𑀩𑀁. 𑀢𑀢𑁄𑀦𑀺𑀤𑀸𑀦𑀜𑁆𑀳𑀺 𑀫𑀭𑀡𑀫𑁆𑀧𑀺 𑀫𑀭𑀡𑀫𑀢𑁆𑀢𑀫𑁆𑀧𑀺 𑀤𑀼𑀓𑁆𑀔𑀁 𑀪𑀯𑁂𑀬𑁆𑀬𑀸𑀢𑀺 𑀏𑀯𑀁 𑀉𑀧𑀸𑀬𑁂𑀦 𑀧𑀣𑁂𑀦 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀘𑀡𑁆𑀟𑀁 𑀳𑀢𑁆𑀣𑀺𑀁 𑀧𑀭𑀺𑀯𑀚𑁆𑀚𑁂𑀢𑀺 𑀧𑀝𑀺𑀓𑁆𑀓𑀫𑀢𑀺. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣. 𑀘𑀡𑁆𑀟𑀦𑁆𑀢𑀺 𑀤𑀼𑀝𑁆𑀞𑀁 𑀯𑀸𑀴𑀁. 𑀔𑀸𑀡𑀼𑀦𑁆𑀢𑀺 𑀔𑀤𑀺𑀭𑀔𑀸𑀡𑀼𑀓𑀸𑀤𑀺𑀁. 𑀓𑀡𑁆𑀝𑀓𑀝𑁆𑀞𑀸𑀦𑀦𑁆𑀢𑀺 𑀬𑀢𑁆𑀣 𑀓𑀡𑁆𑀝𑀓𑀸 𑀯𑀺𑀚𑁆𑀛𑀦𑁆𑀢𑀺, 𑀢𑀁 𑀑𑀓𑀸𑀲𑀁. 𑀲𑁄𑀩𑁆𑀪𑀦𑁆𑀢𑀺 𑀲𑀩𑁆𑀩𑀢𑁄 𑀙𑀺𑀦𑁆𑀦𑀢𑀝𑀁. 𑀧𑀧𑀸𑀢𑀦𑁆𑀢𑀺 𑀏𑀓𑀢𑁄 𑀙𑀺𑀦𑁆𑀦𑀢𑀝𑀁. 𑀘𑀦𑁆𑀤𑀦𑀺𑀓𑀦𑁆𑀢𑀺 𑀉𑀘𑁆𑀙𑀺𑀝𑁆𑀞𑁄𑀤𑀓𑀕𑀩𑁆𑀪𑀫𑀮𑀸𑀤𑀻𑀦𑀁 𑀙𑀟𑁆𑀟𑀦𑀝𑁆𑀞𑀸𑀦𑀁. 𑀑𑀴𑀺𑀕𑀮𑁆𑀮𑀦𑁆𑀢𑀺 𑀢𑁂𑀲𑀁𑀬𑁂𑀯 𑀓𑀤𑁆𑀤𑀫𑀸𑀤𑀻𑀦𑀁 𑀲𑀦𑁆𑀤𑀦𑁄𑀓𑀸𑀲𑀁. 𑀢𑀁 𑀚𑀡𑁆𑀡𑀼𑀫𑀢𑁆𑀢𑀫𑁆𑀧𑀺 𑀅𑀲𑀼𑀘𑀺𑀪𑀭𑀺𑀢𑀁 𑀳𑁄𑀢𑀺. 𑀤𑁆𑀯𑁂𑀧𑀺 𑀘𑁂𑀢𑀸𑀦𑀺 𑀞𑀸𑀦𑀸𑀦𑀺 𑀅𑀫𑀦𑀼𑀲𑁆𑀲𑀼𑀲𑁆𑀲𑀤𑀝𑁆𑀞𑀸𑀦𑀸𑀦𑀺 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀯𑀚𑁆𑀚𑁂𑀢𑀩𑁆𑀩𑀸𑀦𑀺. 𑀅𑀦𑀸𑀲𑀦𑁂𑀢𑀺 𑀏𑀢𑁆𑀣 𑀅𑀬𑀼𑀢𑁆𑀢𑀁 𑀆𑀲𑀦𑀁 𑀅𑀦𑀸𑀲𑀦𑀁, 𑀢𑀁 𑀅𑀢𑁆𑀣𑀢𑁄 𑀅𑀦𑀺𑀬𑀢𑀯𑀢𑁆𑀣𑀼𑀪𑀽𑀢𑀁 𑀭𑀳𑁄𑀧𑀝𑀺𑀘𑁆𑀙𑀦𑁆𑀦𑀸𑀲𑀦𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀕𑁄𑀘𑀭𑁂𑀢𑀺 𑀏𑀢𑁆𑀣𑀧𑀺 𑀅𑀬𑀼𑀢𑁆𑀢𑁄 𑀕𑁄𑀘𑀭𑁄 𑀅𑀕𑁄𑀘𑀭𑁄. 𑀲𑁄 𑀯𑁂𑀲𑀺𑀬𑀸𑀤𑀺𑀪𑁂𑀤𑀢𑁄 𑀧𑀜𑁆𑀘𑀯𑀺𑀥𑁄. 𑀧𑀸𑀧𑀓𑁂 𑀫𑀺𑀢𑁆𑀢𑁂𑀢𑀺 𑀮𑀸𑀫𑀓𑁂 𑀤𑀼𑀲𑁆𑀲𑀻𑀮𑁂 𑀫𑀺𑀢𑁆𑀢𑀧𑀢𑀺𑀭𑀽𑀧𑀓𑁂 𑀅𑀫𑀺𑀢𑁆𑀢𑁂. 𑀧𑀸𑀧𑀓𑁂𑀲𑀽𑀢𑀺 𑀮𑀸𑀫𑀓𑁂𑀲𑀼. 𑀑𑀓𑀧𑁆𑀧𑁂𑀬𑁆𑀬𑀼𑀦𑁆𑀢𑀺 𑀲𑀤𑁆𑀤𑀳𑁂𑀬𑁆𑀬𑀼𑀁 𑀅𑀥𑀺𑀫𑀼𑀘𑁆𑀘𑁂𑀬𑁆𑀬𑀼𑀁 ‘‘𑀅𑀤𑁆𑀥𑀸 𑀅𑀬𑀫𑀸𑀬𑀲𑁆𑀫𑀸 𑀅𑀓𑀸𑀲𑀺 𑀯𑀸 𑀓𑀭𑀺𑀲𑁆𑀲𑀢𑀺 𑀯𑀸’’𑀢𑀺. 𑀬𑀁 𑀳𑀺𑀲𑁆𑀲𑀸𑀢𑀺 𑀳𑀢𑁆𑀣𑀺𑀆𑀤𑀻𑀲𑀼 𑀬𑀁𑀓𑀺𑀜𑁆𑀘𑀺 𑀏𑀓𑀫𑁆𑀧𑀺 𑀅𑀲𑁆𑀲. 𑀆𑀲𑀯𑀼𑀧𑁆𑀧𑀢𑁆𑀢𑀺 𑀧𑀦𑁂𑀢𑁆𑀣 𑀏𑀯𑀁 𑀯𑁂𑀤𑀺𑀢𑀩𑁆𑀩𑀸 𑁋 𑀳𑀢𑁆𑀣𑀺𑀆𑀤𑀺𑀦𑀺𑀤𑀸𑀦𑁂𑀦 𑀤𑀼𑀓𑁆𑀔𑁂𑀦 𑀨𑀼𑀝𑁆𑀞𑀲𑁆𑀲 𑀲𑀼𑀔𑀁 𑀧𑀢𑁆𑀣𑀬𑀢𑁄 𑀓𑀸𑀫𑀸𑀲𑀯𑁄 𑀉𑀧𑁆𑀧𑀚𑁆𑀚𑀢𑀺, ‘‘𑀦𑀢𑁆𑀣𑀺 𑀲𑀼𑀕𑀢𑀺𑀪𑀯𑁂 𑀈𑀤𑀺𑀲𑀁 𑀤𑀼𑀓𑁆𑀔’’𑀦𑁆𑀢𑀺 𑀪𑀯𑀁 𑀧𑀢𑁆𑀣𑁂𑀦𑁆𑀢𑀲𑁆𑀲 𑀪𑀯𑀸𑀲𑀯𑁄, 𑀫𑀁 𑀳𑀢𑁆𑀣𑀻 𑀫𑀤𑁆𑀤𑀢𑀺 𑀫𑀁 𑀅𑀲𑁆𑀲𑁄𑀢𑀺 𑀕𑀸𑀳𑁄 𑀤𑀺𑀝𑁆𑀞𑀸𑀲𑀯𑁄, 𑀲𑀩𑁆𑀩𑁂𑀳𑁂𑀯 𑀲𑀫𑁆𑀧𑀬𑀼𑀢𑁆𑀢𑁄 𑀅𑀯𑀺𑀚𑁆𑀚𑀸𑀲𑀯𑁄𑀢𑀺. 𑀇𑀫𑁂 𑀯𑀼𑀘𑁆𑀘𑀦𑁆𑀢𑀻𑀢𑀺 𑀇𑀫𑁂 𑀳𑀢𑁆𑀣𑀺𑀆𑀤𑀻𑀲𑀼 𑀏𑀓𑁂𑀓𑀲𑁆𑀲 𑀯𑀲𑁂𑀦 𑀘𑀢𑁆𑀢𑀸𑀭𑁄 𑀘𑀢𑁆𑀢𑀸𑀭𑁄 𑀓𑀢𑁆𑀯𑀸 𑀅𑀦𑁂𑀓𑁂 𑀆𑀲𑀯𑀸 𑀇𑀫𑀺𑀦𑀸 𑀲𑀻𑀮𑀲𑀁𑀯𑀭𑀲𑀗𑁆𑀔𑀸𑀢𑁂𑀦 𑀧𑀭𑀺𑀯𑀚𑁆𑀚𑀦𑁂𑀦 𑀧𑀳𑀸𑀢𑀩𑁆𑀩𑀸𑀢𑀺 𑀯𑀼𑀘𑁆𑀘𑀦𑁆𑀢𑀺.

𑀧𑀝𑀺𑀲𑀗𑁆𑀔𑀸 𑀬𑁄𑀦𑀺𑀲𑁄 𑀉𑀧𑁆𑀧𑀦𑁆𑀦𑀁 𑀓𑀸𑀫𑀯𑀺𑀢𑀓𑁆𑀓𑀁 𑀦𑀸𑀥𑀺𑀯𑀸𑀲𑁂𑀢𑀻𑀢𑀺 ‘‘𑀇𑀢𑀺𑀧𑀸𑀬𑀁 𑀯𑀺𑀢𑀓𑁆𑀓𑁄 𑀅𑀓𑀼𑀲𑀮𑁄, 𑀇𑀢𑀺𑀧𑀺 𑀲𑀸𑀯𑀚𑁆𑀚𑁄, 𑀇𑀢𑀺𑀧𑀺 𑀤𑀼𑀓𑁆𑀔𑀯𑀺𑀧𑀸𑀓𑁄, 𑀲𑁄 𑀘 𑀔𑁄 𑀅𑀢𑁆𑀢𑀩𑁆𑀬𑀸𑀩𑀸𑀥𑀸𑀬 𑀲𑀁𑀯𑀢𑁆𑀢𑀢𑀻’’𑀢𑀺𑀆𑀤𑀺𑀦𑀸 (𑀫. 𑀦𑀺. 𑁧.𑁨𑁦𑁭-𑁨𑁦𑁮) 𑀦𑀬𑁂𑀦 𑀬𑁄𑀦𑀺𑀲𑁄 𑀓𑀸𑀫𑀯𑀺𑀢𑀓𑁆𑀓𑁂 𑀆𑀤𑀻𑀦𑀯𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀆𑀭𑀫𑁆𑀫𑀡𑁂 𑀉𑀧𑁆𑀧𑀦𑁆𑀦𑀁 𑀓𑀸𑀫𑀯𑀺𑀢𑀓𑁆𑀓𑀁 𑀦𑀸𑀥𑀺𑀯𑀸𑀲𑁂𑀢𑀺, 𑀘𑀺𑀢𑁆𑀢𑀁 𑀆𑀭𑁄𑀧𑁂𑀢𑁆𑀯𑀸 𑀦 𑀯𑀸𑀲𑁂𑀢𑀺, 𑀅𑀩𑁆𑀪𑀦𑁆𑀢𑀭𑁂 𑀯𑀸 𑀦 𑀯𑀸𑀲𑁂𑀢𑀻𑀢𑀺 𑀅𑀢𑁆𑀣𑁄. 𑀅𑀦𑀥𑀺𑀯𑀸𑀲𑁂𑀦𑁆𑀢𑁄 𑀓𑀺𑀁 𑀓𑀭𑁄𑀢𑀻𑀢𑀺? 𑀧𑀚𑀳𑀢𑀺. 𑀓𑀺𑀁 𑀓𑀘𑀯𑀭𑀁 𑀯𑀺𑀬 𑀧𑀺𑀝𑀓𑁂𑀦𑀸𑀢𑀺? 𑀦 𑀳𑀺, 𑀅𑀧𑀺 𑀘 𑀔𑁄 𑀦𑀁 𑀯𑀺𑀦𑁄𑀤𑁂𑀢𑀺 𑀢𑀼𑀤𑀢𑀺 𑀯𑀺𑀚𑁆𑀛𑀢𑀺 𑀦𑀻𑀳𑀭𑀢𑀺. 𑀓𑀺𑀁 𑀩𑀮𑀺𑀩𑀤𑁆𑀤𑀁 𑀯𑀺𑀬 𑀧𑀢𑁄𑀤𑁂𑀦𑀸𑀢𑀺? 𑀦 𑀳𑀺, 𑀅𑀣 𑀔𑁄 𑀦𑀁 𑀩𑁆𑀬𑀦𑁆𑀢𑀻𑀓𑀭𑁄𑀢𑀺 𑀯𑀺𑀕𑀢𑀦𑁆𑀢𑀁 𑀓𑀭𑁄𑀢𑀺, 𑀬𑀣𑀸𑀲𑁆𑀲 𑀅𑀦𑁆𑀢𑁄𑀧𑀺 𑀦𑀸𑀯𑀲𑀺𑀲𑁆𑀲𑀢𑀺 𑀅𑀦𑁆𑀢𑀫𑀲𑁄 𑀪𑀗𑁆𑀕𑀫𑀢𑁆𑀢𑀫𑁆𑀧𑀺, 𑀢𑀣𑀸 𑀦𑀁 𑀓𑀭𑁄𑀢𑀺. 𑀓𑀣𑀁 𑀧𑀦 𑀦𑀁 𑀢𑀣𑀸 𑀓𑀭𑁄𑀢𑀻𑀢𑀺? 𑀅𑀦𑀪𑀸𑀯𑀁 𑀕𑀫𑁂𑀢𑀺 𑀅𑀦𑀼 𑀅𑀦𑀼 𑀅𑀪𑀸𑀯𑀁 𑀕𑀫𑁂𑀢𑀺, 𑀯𑀺𑀓𑁆𑀔𑀫𑁆𑀪𑀦𑀧𑁆𑀧𑀳𑀸𑀦𑁂𑀦 𑀬𑀣𑀸 𑀲𑀼𑀯𑀺𑀓𑁆𑀔𑀫𑁆𑀪𑀺𑀢𑁄 𑀳𑁄𑀢𑀺, 𑀢𑀣𑀸 𑀓𑀭𑁄𑀢𑀺. 𑀲𑁂𑀲𑀯𑀺𑀢𑀓𑁆𑀓𑀤𑁆𑀯𑀬𑁂𑀧𑀺 𑀏𑀲𑁂𑀯 𑀦𑀬𑁄. 𑀉𑀧𑁆𑀧𑀦𑁆𑀦𑀼𑀧𑁆𑀧𑀦𑁆𑀦𑁂𑀢𑀺 𑀉𑀧𑁆𑀧𑀦𑁆𑀦𑁂 𑀉𑀧𑁆𑀧𑀦𑁆𑀦𑁂, 𑀉𑀧𑁆𑀧𑀦𑁆𑀦𑀫𑀢𑁆𑀢𑁂𑀬𑁂𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀓𑀺𑀁 𑀯𑀸 𑀉𑀧𑁆𑀧𑀦𑁆𑀦𑁂 𑀯𑀺𑀦𑁄𑀤𑁂𑀢𑁆𑀯𑀸 𑀤𑀼𑀢𑀺𑀬𑁂 𑀯𑀸𑀭𑁂 𑀅𑀚𑁆𑀛𑀼𑀧𑁂𑀓𑁆𑀔𑀺𑀢𑀸 𑀦 𑀳𑁄𑀢𑀺, 𑀲𑀢𑀓𑁆𑀔𑀢𑁆𑀢𑀼𑀫𑁆𑀧𑀺 𑀉𑀧𑁆𑀧𑀦𑁆𑀦𑁂 𑀉𑀧𑁆𑀧𑀦𑁆𑀦𑁂 𑀯𑀺𑀦𑁄𑀤𑁂𑀢𑀺𑀬𑁂𑀯. 𑀧𑀸𑀧𑀓𑁂 𑀅𑀓𑀼𑀲𑀮𑁂 𑀥𑀫𑁆𑀫𑁂𑀢𑀺 𑀢𑁂𑀬𑁂𑀯 𑀓𑀸𑀫𑀯𑀺𑀢𑀓𑁆𑀓𑀸𑀤𑀬𑁄, 𑀲𑀩𑁆𑀩𑁂𑀧𑀺 𑀯𑀸 𑀦𑀯 𑀫𑀳𑀸𑀯𑀺𑀢𑀓𑁆𑀓𑁂. 𑀢𑀢𑁆𑀣 𑀢𑀬𑁄 𑀯𑀼𑀢𑁆𑀢𑀸, 𑀅𑀯𑀲𑁂𑀲𑀸 ‘‘𑀜𑀸𑀢𑀺𑀯𑀺𑀢𑀓𑁆𑀓𑁄, 𑀚𑀦𑀧𑀤𑀯𑀺𑀢𑀓𑁆𑀓𑁄, 𑀅𑀫𑀭𑀸𑀯𑀺𑀢𑀓𑁆𑀓𑁄, 𑀧𑀭𑀸𑀦𑀼𑀤𑁆𑀤𑀬𑀢𑀸𑀧𑀝𑀺𑀲𑀁𑀬𑀼𑀢𑁆𑀢𑁄 𑀯𑀺𑀢𑀓𑁆𑀓𑁄, 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑀧𑁆𑀧𑀝𑀺𑀲𑀁𑀬𑀼𑀢𑁆𑀢𑁄 𑀯𑀺𑀢𑀓𑁆𑀓𑁄, 𑀅𑀦𑀯𑀜𑁆𑀜𑀢𑁆𑀢𑀺𑀧𑁆𑀧𑀝𑀺𑀲𑀁𑀬𑀼𑀢𑁆𑀢𑁄 𑀯𑀺𑀢𑀓𑁆𑀓𑁄’’𑀢𑀺 (𑀫𑀳𑀸𑀦𑀺. 𑁨𑁦𑁭) 𑀇𑀫𑁂 𑀙. 𑀬𑀁 𑀳𑀺𑀲𑁆𑀲𑀸𑀢𑀺 𑀏𑀢𑁂𑀲𑀼 𑀯𑀺𑀢𑀓𑁆𑀓𑁂𑀲𑀼 𑀬𑀁𑀓𑀺𑀜𑁆𑀘𑀺 𑀅𑀲𑁆𑀲. 𑀓𑀸𑀫𑀯𑀺𑀢𑀓𑁆𑀓𑁄 𑀧𑀦𑁂𑀢𑁆𑀣 𑀓𑀸𑀫𑀸𑀲𑀯𑁄 𑀏𑀯, 𑀢𑀩𑁆𑀩𑀺𑀲𑁂𑀲𑁄 𑀪𑀯𑀸𑀲𑀯𑁄, 𑀢𑀁𑀲𑀫𑁆𑀧𑀬𑀼𑀢𑁆𑀢𑁄 𑀤𑀺𑀝𑁆𑀞𑀸𑀲𑀯𑁄, 𑀲𑀩𑁆𑀩𑀯𑀺𑀢𑀓𑁆𑀓𑁂𑀲𑀼 𑀅𑀯𑀺𑀚𑁆𑀚𑀸 𑀅𑀯𑀺𑀚𑁆𑀚𑀸𑀲𑀯𑁄𑀢𑀺 𑀏𑀯𑀁 𑀆𑀲𑀯𑀼𑀧𑁆𑀧𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀇𑀫𑁂 𑀯𑀼𑀘𑁆𑀘𑀦𑁆𑀢𑀻𑀢𑀺 𑀇𑀫𑁂 𑀓𑀸𑀫𑀯𑀺𑀢𑀓𑁆𑀓𑀸𑀤𑀺𑀯𑀲𑁂𑀦 𑀯𑀼𑀢𑁆𑀢𑀧𑁆𑀧𑀓𑀸𑀭𑀸 𑀆𑀲𑀯𑀸 𑀇𑀫𑀺𑀦𑀸 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀯𑀺𑀢𑀓𑁆𑀓𑁂 𑀆𑀤𑀻𑀦𑀯𑀧𑀘𑁆𑀘𑀯𑁂𑀓𑁆𑀔𑀡𑀲𑀳𑀺𑀢𑁂𑀦 𑀯𑀻𑀭𑀺𑀬𑀲𑀁𑀯𑀭𑀲𑀗𑁆𑀔𑀸𑀢𑁂𑀦 𑀯𑀺𑀦𑁄𑀤𑀦𑁂𑀦 𑀧𑀳𑀸𑀢𑀩𑁆𑀩𑀸𑀢𑀺 𑀯𑀼𑀘𑁆𑀘𑀦𑁆𑀢𑀺.

𑀧𑀝𑀺𑀲𑀗𑁆𑀔𑀸 𑀬𑁄𑀦𑀺𑀲𑁄 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀁 𑀪𑀸𑀯𑁂𑀢𑀻𑀢𑀺 𑀅𑀪𑀸𑀯𑀦𑀸𑀬 𑀆𑀤𑀻𑀦𑀯𑀁 𑀪𑀸𑀯𑀦𑀸𑀬 𑀘 𑀆𑀦𑀺𑀲𑀁𑀲𑀁 𑀉𑀧𑀸𑀬𑁂𑀦 𑀧𑀣𑁂𑀦 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀁 𑀪𑀸𑀯𑁂𑀢𑀺. 𑀏𑀲𑁂𑀯 𑀦𑀬𑁄 𑀲𑀩𑁆𑀩𑀢𑁆𑀣. 𑀩𑁄𑀚𑁆𑀛𑀗𑁆𑀕𑀸𑀦𑀁 𑀪𑀸𑀯𑀦𑀸 𑀳𑁂𑀝𑁆𑀞𑀸 𑀯𑀺𑀢𑁆𑀣𑀸𑀭𑀺𑀢𑀸𑀯. 𑀬𑀁 𑀳𑀺𑀲𑁆𑀲𑀸𑀢𑀺 𑀏𑀢𑁂𑀲𑀼 𑀩𑁄𑀚𑁆𑀛𑀗𑁆𑀕𑁂𑀲𑀼 𑀬𑀁𑀓𑀺𑀜𑁆𑀘𑀺 𑀅𑀲𑁆𑀲. 𑀆𑀲𑀯𑀼𑀧𑁆𑀧𑀢𑁆𑀢𑀺𑀬𑀁 𑀧𑀦𑁂𑀢𑁆𑀣 𑀇𑀫𑁂𑀲𑀁 𑀅𑀭𑀺𑀬𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀩𑁄𑀚𑁆𑀛𑀗𑁆𑀕𑀸𑀦𑀁 𑀅𑀪𑀸𑀯𑀺𑀢𑀢𑁆𑀢𑀸 𑀬𑁂 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁 𑀓𑀸𑀫𑀸𑀲𑀯𑀸𑀤𑀬𑁄 𑀆𑀲𑀯𑀸, 𑀪𑀸𑀯𑀬𑀢𑁄 𑀏𑀯𑀁𑀲 𑀢𑁂 𑀦 𑀳𑁄𑀦𑁆𑀢𑀻𑀢𑀺 𑀅𑀬𑀁 𑀦𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀇𑀫𑁂 𑀯𑀼𑀘𑁆𑀘𑀦𑁆𑀢𑀻𑀢𑀺 𑀇𑀫𑁂 𑀓𑀸𑀫𑀸𑀲𑀯𑀸𑀤𑀬𑁄 𑀆𑀲𑀯𑀸 𑀇𑀫𑀸𑀬 𑀮𑁄𑀓𑀼𑀢𑁆𑀢𑀭𑀸𑀬 𑀩𑁄𑀚𑁆𑀛𑀗𑁆𑀕𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀸𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀇𑀫𑁂𑀳𑀺 𑀙𑀳𑀸𑀓𑀸𑀭𑁂𑀳𑀺 𑀧𑀳𑀻𑀦𑀸𑀲𑀯𑀁 𑀪𑀺𑀓𑁆𑀔𑀼𑀁 𑀣𑁄𑀫𑁂𑀦𑁆𑀢𑁄 𑀬𑀢𑁄 𑀔𑁄, 𑀪𑀺𑀓𑁆𑀔𑀯𑁂𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀬𑀢𑁄𑀢𑀺 𑀲𑀸𑀫𑀺𑀯𑀘𑀦𑁂 𑀢𑁄-𑀓𑀸𑀭𑁄, 𑀬𑀲𑁆𑀲𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑁄𑀭𑀸𑀡𑀸 𑀧𑀦 𑀬𑀫𑁆𑀳𑀺 𑀓𑀸𑀮𑁂𑀢𑀺 𑀯𑀡𑁆𑀡𑀬𑀦𑁆𑀢𑀺. 𑀬𑁂 𑀆𑀲𑀯𑀸 𑀲𑀁𑀯𑀭𑀸 𑀧𑀳𑀸𑀢𑀩𑁆𑀩𑀸, 𑀢𑁂 𑀲𑀁𑀯𑀭𑀸 𑀧𑀳𑀻𑀦𑀸 𑀳𑁄𑀦𑁆𑀢𑀻𑀢𑀺 𑀬𑁂 𑀆𑀲𑀯𑀸 𑀲𑀁𑀯𑀭𑁂𑀦 𑀧𑀳𑀸𑀢𑀩𑁆𑀩𑀸, 𑀢𑁂 𑀲𑀁𑀯𑀭𑁂𑀦𑁂𑀯 𑀧𑀳𑀻𑀦𑀸 𑀳𑁄𑀦𑁆𑀢𑀺, 𑀦 𑀅𑀧𑁆𑀧𑀳𑀻𑀦𑁂𑀲𑀼𑀬𑁂𑀯 𑀧𑀳𑀻𑀦𑀲𑀜𑁆𑀜𑀻 𑀳𑁄𑀢𑀻𑀢𑀺.

𑁫. 𑀤𑀸𑀭𑀼𑀓𑀫𑁆𑀫𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁯. 𑀧𑀜𑁆𑀘𑀫𑁂 𑀤𑀸𑀭𑀼𑀓𑀫𑁆𑀫𑀺𑀓𑁄𑀢𑀺 𑀤𑀸𑀭𑀼𑀯𑀺𑀓𑁆𑀓𑀬𑁂𑀦 𑀧𑀯𑀢𑁆𑀢𑀺𑀢𑀸𑀚𑀻𑀯𑁄 𑀏𑀓𑁄 𑀉𑀧𑀸𑀲𑀓𑁄. 𑀓𑀸𑀲𑀺𑀓𑀘𑀦𑁆𑀤𑀦𑀦𑁆𑀢𑀺 𑀲𑀡𑁆𑀳𑀘𑀦𑁆𑀤𑀦𑀁. 𑀅𑀗𑁆𑀕𑁂𑀦𑀸𑀢𑀺 𑀅𑀕𑀼𑀡𑀗𑁆𑀕𑁂𑀦, 𑀲𑀼𑀓𑁆𑀓𑀧𑀓𑁆𑀔𑁂 𑀕𑀼𑀡𑀗𑁆𑀕𑁂𑀦. 𑀦𑁂𑀫𑀦𑁆𑀢𑀦𑀺𑀓𑁄𑀢𑀺 𑀦𑀺𑀫𑀦𑁆𑀢𑀦𑀁 𑀕𑀡𑁆𑀳𑀦𑀓𑁄. 𑀲𑀗𑁆𑀖𑁂 𑀤𑀸𑀦𑀁 𑀤𑀲𑁆𑀲𑀸𑀫𑀻𑀢𑀺 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀤𑀲𑁆𑀲𑀸𑀫𑀺. 𑀲𑁄 𑀏𑀯𑀁 𑀯𑀢𑁆𑀯𑀸 𑀲𑀢𑁆𑀣𑀸𑀭𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀅𑀣𑀲𑁆𑀲 𑀅𑀧𑀭𑀪𑀸𑀕𑁂 𑀧𑀜𑁆𑀘𑀲𑀢𑀸 𑀓𑀼𑀮𑀽𑀧𑀓𑀸 𑀪𑀺𑀓𑁆𑀔𑀽 𑀕𑀺𑀳𑀺𑀪𑀸𑀯𑀁 𑀧𑀸𑀧𑀼𑀡𑀺𑀁𑀲𑀼. 𑀲𑁄 ‘‘𑀓𑀼𑀮𑀽𑀧𑀓𑀪𑀺𑀓𑁆𑀔𑀽 𑀢𑁂 𑀯𑀺𑀩𑁆𑀪𑀦𑁆𑀢𑀸’’𑀢𑀺 𑀯𑀼𑀢𑁆𑀢𑁂 ‘‘𑀓𑀺𑀁 𑀏𑀢𑁆𑀣 𑀫𑀬𑁆𑀳’’𑀦𑁆𑀢𑀺 𑀯𑀢𑁆𑀯𑀸 𑀘𑀺𑀢𑁆𑀢𑀼𑀧𑁆𑀧𑀸𑀤𑀯𑁂𑀫𑀢𑁆𑀢𑀫𑀢𑁆𑀢𑀫𑁆𑀧𑀺 𑀦 𑀅𑀓𑀸𑀲𑀺. 𑀇𑀤𑀁 𑀲𑀦𑁆𑀥𑀸𑀬 𑀲𑀢𑁆𑀣𑀸 𑀲𑀗𑁆𑀖𑁂 𑀢𑁂 𑀤𑀸𑀦𑀁 𑀤𑀤𑀢𑁄 𑀘𑀺𑀢𑁆𑀢𑀁 𑀧𑀲𑀻𑀤𑀺𑀲𑁆𑀲𑀢𑀻𑀢𑀺 𑀆𑀳.

𑁬. 𑀳𑀢𑁆𑀣𑀺𑀲𑀸𑀭𑀺𑀧𑀼𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁬𑁦. 𑀙𑀝𑁆𑀞𑁂 𑀅𑀪𑀺𑀥𑀫𑁆𑀫𑀓𑀣𑀦𑁆𑀢𑀺 𑀅𑀪𑀺𑀥𑀫𑁆𑀫𑀫𑀺𑀲𑁆𑀲𑀓𑀁 𑀓𑀣𑀁. 𑀓𑀣𑀁 𑀑𑀧𑀸𑀢𑁂𑀢𑀻𑀢𑀺 𑀢𑁂𑀲𑀁 𑀓𑀣𑀁 𑀯𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀅𑀢𑁆𑀢𑀦𑁄 𑀓𑀣𑀁 𑀓𑀣𑁂𑀢𑀺. 𑀣𑁂𑀭𑀸𑀦𑀁 𑀪𑀺𑀓𑁆𑀔𑀽𑀦𑀦𑁆𑀢𑀺 𑀓𑀭𑀡𑀢𑁆𑀣𑁂 𑀲𑀸𑀫𑀺𑀯𑀘𑀦𑀁, 𑀣𑁂𑀭𑁂𑀳𑀺 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀦𑁆𑀢𑀺 𑀅𑀢𑁆𑀣𑁄. 𑀬𑀸 𑀘 𑀣𑁂𑀭𑀸𑀦𑀁 𑀅𑀪𑀺𑀥𑀫𑁆𑀫𑀓𑀣𑀸, 𑀢𑀁 𑀅𑀬𑀫𑁆𑀧𑀺 𑀓𑀣𑁂𑀢𑀼𑀁 𑀲𑀓𑁆𑀓𑁄𑀢𑀻𑀢𑀺 𑀅𑀢𑁆𑀣𑁄. 𑀘𑁂𑀢𑁄𑀧𑀭𑀺𑀬𑀸𑀬𑀦𑁆𑀢𑀺 𑀘𑀺𑀢𑁆𑀢𑀯𑀸𑀭𑀁. 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀮𑁄𑀓𑁂. 𑀲𑁄𑀭𑀢𑀲𑁄𑀭𑀢𑁄𑀢𑀺 𑀲𑀽𑀭𑀢𑁄 𑀯𑀺𑀬 𑀲𑀽𑀭𑀢𑁄, 𑀲𑁄𑀭𑀘𑁆𑀘𑀲𑀫𑀦𑁆𑀦𑀸𑀕𑀢𑁄 𑀯𑀺𑀬𑀸𑀢𑀺 𑀅𑀢𑁆𑀣𑁄. 𑀦𑀺𑀯𑀸𑀢𑀦𑀺𑀯𑀸𑀢𑁄𑀢𑀺 𑀦𑀺𑀯𑀸𑀢𑁄 𑀯𑀺𑀬 𑀦𑀺𑀯𑀸𑀢𑁄, 𑀦𑀺𑀯𑀸𑀢𑀯𑀼𑀢𑁆𑀢𑀺 𑀯𑀺𑀬𑀸𑀢𑀺 𑀅𑀢𑁆𑀣𑁄. 𑀉𑀧𑀲𑀦𑁆𑀢𑀼𑀧𑀲𑀦𑁆𑀢𑁄𑀢𑀺 𑀉𑀧𑀲𑀦𑁆𑀢𑁄 𑀯𑀺𑀬 𑀉𑀧𑀲𑀦𑁆𑀢𑁄. 𑀯𑀧𑀓𑀲𑁆𑀲𑀢𑁂𑀯 𑀲𑀢𑁆𑀣𑀸𑀭𑀸𑀢𑀺 𑀲𑀢𑁆𑀣𑀼 𑀲𑀦𑁆𑀢𑀺𑀓𑀸 𑀅𑀧𑀕𑀘𑁆𑀙𑀢𑀺. 𑀲𑀁𑀲𑀝𑁆𑀞𑀲𑁆𑀲𑀸𑀢𑀺 𑀧𑀜𑁆𑀘𑀳𑀺 𑀲𑀁𑀲𑀕𑁆𑀕𑁂𑀳𑀺 𑀲𑀁𑀲𑀝𑁆𑀞𑀲𑁆𑀲. 𑀯𑀺𑀲𑁆𑀲𑀝𑁆𑀞𑀲𑁆𑀲𑀸𑀢𑀺 𑀯𑀺𑀲𑁆𑀲𑀚𑁆𑀚𑀺𑀢𑀲𑁆𑀲. 𑀧𑀸𑀓𑀢𑀲𑁆𑀲𑀸𑀢𑀺 𑀧𑀸𑀓𑀢𑀺𑀦𑁆𑀤𑁆𑀭𑀺𑀬𑀲𑁆𑀲.

𑀓𑀺𑀝𑁆𑀞𑀸𑀤𑁄𑀢𑀺 𑀓𑀺𑀝𑁆𑀞𑀔𑀸𑀤𑀓𑁄. 𑀅𑀦𑁆𑀢𑀭𑀥𑀸𑀧𑁂𑀬𑁆𑀬𑀸𑀢𑀺 𑀦𑀸𑀲𑁂𑀬𑁆𑀬. 𑀕𑁄𑀧𑀲𑀽𑀢𑀺 𑀕𑀸𑀯𑁄 𑀘 𑀅𑀚𑀺𑀓𑀸 𑀘. 𑀲𑀺𑀧𑁆𑀧𑀺𑀲𑀫𑁆𑀩𑀼𑀓𑀦𑁆𑀢𑀺 𑀲𑀺𑀧𑁆𑀧𑀺𑀬𑁄 𑀘 𑀲𑀫𑁆𑀩𑀼𑀓𑀸 𑀘. 𑀲𑀓𑁆𑀔𑀭𑀓𑀞𑀮𑀦𑁆𑀢𑀺 𑀲𑀓𑁆𑀔𑀭𑀸 𑀘 𑀓𑀞𑀮𑀸𑀦𑀺 𑀘. 𑀆𑀪𑀺𑀤𑁄𑀲𑀺𑀓𑀦𑁆𑀢𑀺 𑀅𑀪𑀺𑀜𑁆𑀜𑀸𑀢𑀤𑁄𑀲𑀁 𑀓𑀼𑀤𑁆𑀭𑀽𑀲𑀓𑀪𑁄𑀚𑀦𑀁. 𑀦𑀘𑁆𑀙𑀸𑀤𑁂𑀬𑁆𑀬𑀸𑀢𑀺 𑀦 𑀭𑀼𑀘𑁆𑀘𑁂𑀬𑁆𑀬. 𑀢𑀢𑁆𑀣 𑀬𑀤𑁂𑀢𑀁 𑀧𑀼𑀭𑀺𑀲𑀁 𑀪𑀼𑀢𑁆𑀢𑀸𑀯𑀺𑀦𑁆𑀢𑀺 𑀉𑀧𑀬𑁄𑀕𑀯𑀘𑀦𑀁, 𑀢𑀁 𑀲𑀸𑀫𑀺𑀅𑀢𑁆𑀣𑁂 𑀤𑀝𑁆𑀞𑀩𑁆𑀩𑀁. 𑀅𑀫𑀼𑀁 𑀳𑀸𑀯𑀼𑀲𑁄, 𑀧𑀼𑀭𑀺𑀲𑀦𑁆𑀢𑀺, 𑀆𑀯𑀼𑀲𑁄, 𑀅𑀫𑀼𑀁 𑀧𑀼𑀭𑀺𑀲𑀁.

𑀲𑀩𑁆𑀩𑀦𑀺𑀫𑀺𑀢𑁆𑀢𑀸𑀦𑀦𑁆𑀢𑀺 𑀲𑀩𑁆𑀩𑁂𑀲𑀁 𑀦𑀺𑀘𑁆𑀘𑀦𑀺𑀫𑀺𑀢𑁆𑀢𑀸𑀤𑀻𑀦𑀁 𑀦𑀺𑀫𑀺𑀢𑁆𑀢𑀸𑀦𑀁. 𑀅𑀦𑀺𑀫𑀺𑀢𑁆𑀢𑀁 𑀘𑁂𑀢𑁄𑀲𑀫𑀸𑀥𑀺𑀦𑁆𑀢𑀺 𑀩𑀮𑀯𑀯𑀺𑀧𑀲𑁆𑀲𑀦𑀸𑀲𑀫𑀸𑀥𑀺𑀁. 𑀘𑀻𑀭𑀺𑀓𑀲𑀤𑁆𑀤𑁄𑀢𑀺 𑀛𑀮𑁆𑀮𑀺𑀓𑀲𑀤𑁆𑀤𑁄. 𑀲𑀭𑀺𑀲𑁆𑀲𑀢𑀺 𑀦𑁂𑀓𑁆𑀔𑀫𑁆𑀫𑀲𑁆𑀲𑀸𑀢𑀺 𑀧𑀩𑁆𑀩𑀚𑁆𑀚𑀸𑀬 𑀕𑀼𑀡𑀁 𑀲𑀭𑀺𑀲𑁆𑀲𑀢𑀺. 𑀅𑀭𑀳𑀢𑀁 𑀅𑀳𑁄𑀲𑀻𑀢𑀺 𑀪𑀕𑀯𑀢𑁄 𑀲𑀸𑀯𑀓𑀸𑀦𑀁 𑀅𑀭𑀳𑀦𑁆𑀢𑀸𑀦𑀁 𑀅𑀦𑁆𑀢𑀭𑁂 𑀏𑀓𑁄 𑀅𑀭𑀳𑀸 𑀅𑀳𑁄𑀲𑀺. 𑀅𑀬𑀜𑁆𑀳𑀺 𑀣𑁂𑀭𑁄 𑀲𑀢𑁆𑀢 𑀯𑀸𑀭𑁂 𑀕𑀺𑀳𑀻 𑀳𑀼𑀢𑁆𑀯𑀸 𑀲𑀢𑁆𑀢 𑀯𑀸𑀭𑁂 𑀧𑀩𑁆𑀩𑀚𑀺. 𑀓𑀺𑀁 𑀓𑀸𑀭𑀡𑀸? 𑀓𑀲𑁆𑀲𑀧𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀓𑀸𑀮𑁂 𑀓𑀺𑀭𑁂𑀲 𑀏𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀕𑀺𑀳𑀺𑀪𑀸𑀯𑁂 𑀯𑀡𑁆𑀡𑀁 𑀓𑀣𑁂𑀲𑀺. 𑀲𑁄 𑀢𑁂𑀦𑁂𑀯 𑀓𑀫𑁆𑀫𑁂𑀦 𑀅𑀭𑀳𑀢𑁆𑀢𑀲𑁆𑀲 𑀉𑀧𑀦𑀺𑀲𑁆𑀲𑀬𑁂 𑀯𑀺𑀚𑁆𑀚𑀫𑀸𑀦𑁂𑀬𑁂𑀯 𑀲𑀢𑁆𑀢 𑀯𑀸𑀭𑁂 𑀕𑀺𑀳𑀺𑀪𑀸𑀯𑁂 𑀘 𑀧𑀩𑁆𑀩𑀚𑁆𑀚𑀸𑀬 𑀘 𑀲𑀜𑁆𑀘𑀭𑀦𑁆𑀢𑁄 𑀲𑀢𑁆𑀢𑀫𑁂 𑀯𑀸𑀭𑁂 𑀧𑀩𑁆𑀩𑀚𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀻𑀢𑀺.

𑁭. 𑀫𑀚𑁆𑀛𑁂𑀲𑀼𑀢𑁆𑀢𑀯𑀡𑁆𑀡𑀦𑀸

𑁬𑁧. 𑀲𑀢𑁆𑀢𑀫𑁂 𑀧𑀸𑀭𑀸𑀬𑀦𑁂 𑀫𑁂𑀢𑁆𑀢𑁂𑀬𑁆𑀬𑀧𑀜𑁆𑀳𑁂𑀢𑀺 𑀧𑀸𑀭𑀸𑀬𑀦𑀲𑀫𑀸𑀕𑀫𑀫𑁆𑀳𑀺 𑀫𑁂𑀢𑁆𑀢𑁂𑀬𑁆𑀬𑀫𑀸𑀡𑀯𑀲𑁆𑀲 𑀧𑀜𑁆𑀳𑁂. 𑀉𑀪𑁄𑀦𑁆𑀢𑁂 𑀯𑀺𑀤𑀺𑀢𑁆𑀯𑀸𑀦𑀸𑀢𑀺 𑀤𑁆𑀯𑁂 𑀅𑀦𑁆𑀢𑁂 𑀤𑁆𑀯𑁂 𑀓𑁄𑀝𑁆𑀞𑀸𑀲𑁂 𑀚𑀸𑀦𑀺𑀢𑁆𑀯𑀸. 𑀫𑀚𑁆𑀛𑁂 𑀫𑀦𑁆𑀢𑀸 𑀦 𑀮𑀺𑀧𑁆𑀧𑀢𑀻𑀢𑀺 𑀫𑀦𑁆𑀢𑀸 𑀯𑀼𑀘𑁆𑀘𑀢𑀺 𑀧𑀜𑁆𑀜𑀸, 𑀢𑀸𑀬 𑀉𑀪𑁄 𑀅𑀦𑁆𑀢𑁂 𑀯𑀺𑀤𑀺𑀢𑁆𑀯𑀸 𑀫𑀚𑁆𑀛𑁂 𑀦 𑀮𑀺𑀧𑁆𑀧𑀢𑀺, 𑀯𑁂𑀫𑀚𑁆𑀛𑁂𑀝𑁆𑀞𑀸𑀦𑁂 𑀦 𑀮𑀺𑀧𑁆𑀧𑀢𑀺. 𑀲𑀺𑀩𑁆𑀩𑀦𑀺𑀫𑀘𑁆𑀘𑀕𑀸𑀢𑀺 𑀲𑀺𑀩𑁆𑀩𑀦𑀺𑀲𑀗𑁆𑀔𑀸𑀢𑀁 𑀢𑀡𑁆𑀳𑀁 𑀅𑀢𑀻𑀢𑁄. 𑀨𑀲𑁆𑀲𑁄𑀢𑀺 𑀨𑀲𑁆𑀲𑀯𑀲𑁂𑀦 𑀦𑀺𑀩𑁆𑀩𑀢𑁆𑀢𑀢𑁆𑀢𑀸 𑀅𑀬𑀁 𑀅𑀢𑁆𑀢𑀪𑀸𑀯𑁄. 𑀏𑀓𑁄 𑀅𑀦𑁆𑀢𑁄𑀢𑀺 𑀅𑀬𑀫𑁂𑀓𑁄 𑀓𑁄𑀝𑁆𑀞𑀸𑀲𑁄. 𑀨𑀲𑁆𑀲𑀲𑀫𑀼𑀤𑀬𑁄𑀢𑀺 𑀨𑀲𑁆𑀲𑁄 𑀲𑀫𑀼𑀤𑀬𑁄 𑀅𑀲𑁆𑀲𑀸𑀢𑀺 𑀨𑀲𑁆𑀲𑀲𑀫𑀼𑀤𑀬𑁄, 𑀇𑀫𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂 𑀓𑀢𑀓𑀫𑁆𑀫𑀨𑀲𑁆𑀲𑀧𑀘𑁆𑀘𑀬𑀸 𑀦𑀺𑀩𑁆𑀩𑀢𑁆𑀢𑁄 𑀅𑀦𑀸𑀕𑀢𑀢𑁆𑀢𑀪𑀸𑀯𑁄. 𑀤𑀼𑀢𑀺𑀬𑁄 𑀅𑀦𑁆𑀢𑁄𑀢𑀺 𑀤𑀼𑀢𑀺𑀬𑁄 𑀓𑁄𑀝𑁆𑀞𑀸𑀲𑁄. 𑀨𑀲𑁆𑀲𑀦𑀺𑀭𑁄𑀥𑁄𑀢𑀺 𑀦𑀺𑀩𑁆𑀩𑀸𑀦𑀁. 𑀫𑀚𑁆𑀛𑁂𑀢𑀺 𑀲𑀺𑀩𑁆𑀩𑀺𑀦𑀺𑀢𑀡𑁆𑀳𑀁 𑀙𑁂𑀢𑁆𑀯𑀸 𑀤𑁆𑀯𑀺𑀥𑀸𑀓𑀭𑀡𑀝𑁆𑀞𑁂𑀦 𑀦𑀺𑀩𑁆𑀩𑀸𑀦𑀁 𑀫𑀚𑁆𑀛𑁂 𑀦𑀸𑀫 𑀳𑁄𑀢𑀺. 𑀢𑀡𑁆𑀳𑀸 𑀳𑀺 𑀦𑀁 𑀲𑀺𑀩𑁆𑀩𑀢𑀻𑀢𑀺 𑀢𑀡𑁆𑀳𑀸 𑀦𑀁 𑀅𑀢𑁆𑀢𑀪𑀸𑀯𑀤𑁆𑀯𑀬𑀲𑀗𑁆𑀔𑀸𑀢𑀁 𑀨𑀲𑁆𑀲𑀜𑁆𑀘 𑀨𑀲𑁆𑀲𑀲𑀫𑀼𑀤𑀬𑀜𑁆𑀘 𑀲𑀺𑀩𑁆𑀩𑀢𑀺 𑀖𑀝𑁆𑀝𑁂𑀢𑀺. 𑀓𑀺𑀁 𑀓𑀸𑀭𑀡𑀸? 𑀢𑀲𑁆𑀲 𑀢𑀲𑁆𑀲𑁂𑀯 𑀪𑀯𑀲𑁆𑀲 𑀅𑀪𑀺𑀦𑀺𑀩𑁆𑀩𑀢𑁆𑀢𑀺𑀬𑀸. 𑀬𑀤𑀺 𑀳𑀺 𑀢𑀡𑁆𑀳𑀸 𑀦 𑀲𑀺𑀩𑁆𑀩𑁂𑀬𑁆𑀬, 𑀢𑀲𑁆𑀲 𑀢𑀲𑁆𑀲 𑀪𑀯𑀲𑁆𑀲 𑀦𑀺𑀩𑁆𑀩𑀢𑁆𑀢𑀺 𑀦 𑀪𑀯𑁂𑀬𑁆𑀬. 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀓𑁄𑀝𑀺𑀫𑀚𑁆𑀛𑀺𑀓𑀽𑀧𑀫𑀁 𑀕𑀡𑁆𑀳𑀦𑁆𑀢𑀺. 𑀤𑁆𑀯𑀺𑀦𑁆𑀦𑀜𑁆𑀳𑀺 𑀓𑀡𑁆𑀟𑀸𑀦𑀁 𑀏𑀓𑀢𑁄 𑀓𑀢𑁆𑀯𑀸 𑀫𑀚𑁆𑀛𑁂 𑀲𑀼𑀢𑁆𑀢𑁂𑀦 𑀲𑀁𑀲𑀺𑀩𑁆𑀩𑀺𑀢𑀸𑀦𑀁 𑀓𑁄𑀝𑀺 𑀫𑀚𑁆𑀛𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀲𑀼𑀢𑁆𑀢𑁂 𑀙𑀺𑀦𑁆𑀦𑁂 𑀉𑀪𑁄 𑀓𑀡𑁆𑀟𑀸𑀦𑀺 𑀉𑀪𑀢𑁄 𑀧𑀢𑀦𑁆𑀢𑀺. 𑀏𑀯𑀫𑁂𑀢𑁆𑀣 𑀓𑀡𑁆𑀟𑀤𑁆𑀯𑀬𑀁 𑀯𑀺𑀬 𑀯𑀼𑀢𑁆𑀢𑀧𑁆𑀧𑀓𑀸𑀭𑀸 𑀤𑁆𑀯𑁂 𑀅𑀦𑁆𑀢𑀸, 𑀲𑀺𑀩𑁆𑀩𑀺𑀢𑁆𑀯𑀸 𑀞𑀺𑀢𑀲𑀼𑀢𑁆𑀢𑀁 𑀯𑀺𑀬 𑀢𑀡𑁆𑀳𑀸, 𑀲𑀼𑀢𑁆𑀢𑁂 𑀙𑀺𑀦𑁆𑀦𑁂 𑀓𑀡𑁆𑀟𑀤𑁆𑀯𑀬𑀲𑁆𑀲 𑀉𑀪𑀢𑁄𑀧𑀢𑀦𑀁 𑀯𑀺𑀬 𑀢𑀡𑁆𑀳𑀸𑀬 𑀦𑀺𑀭𑀼𑀤𑁆𑀥𑀸𑀬 𑀅𑀦𑁆𑀢𑀤𑁆𑀯𑀬𑀁 𑀦𑀺𑀭𑀼𑀤𑁆𑀥𑀫𑁂𑀯 𑀳𑁄𑀢𑀺. 𑀏𑀢𑁆𑀢𑀸𑀯𑀢𑀸𑀢𑀺 𑀏𑀢𑁆𑀢𑀓𑁂𑀦 𑀇𑀫𑀺𑀦𑀸 𑀉𑀪𑁄 𑀅𑀦𑁆𑀢𑁂 𑀯𑀺𑀤𑀺𑀢𑁆𑀯𑀸 𑀢𑀡𑁆𑀳𑀸𑀬 𑀫𑀚𑁆𑀛𑁂 𑀅𑀦𑀼𑀧𑀮𑀺𑀢𑁆𑀢𑀪𑀸𑀯𑁂𑀦 𑀅𑀪𑀺𑀜𑁆𑀜𑁂𑀬𑁆𑀬𑀁 𑀘𑀢𑀼𑀲𑀘𑁆𑀘𑀥𑀫𑁆𑀫𑀁 𑀅𑀪𑀺𑀚𑀸𑀦𑀸𑀢𑀺 𑀦𑀸𑀫, 𑀢𑀻𑀭𑀡𑀧𑀭𑀺𑀜𑁆𑀜𑀸𑀬 𑀘 𑀧𑀳𑀸𑀦𑀧𑀭𑀺𑀜𑁆𑀜𑀸𑀬 𑀘 𑀧𑀭𑀺𑀚𑀸𑀦𑀺𑀢𑀩𑁆𑀩𑀁 𑀮𑁄𑀓𑀺𑀬𑀲𑀘𑁆𑀘𑀤𑁆𑀯𑀬𑀁 𑀧𑀭𑀺𑀚𑀸𑀦𑀸𑀢𑀺 𑀦𑀸𑀫. 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂𑀢𑀺 𑀇𑀫𑀲𑁆𑀫𑀺𑀁𑀬𑁂𑀯 𑀅𑀢𑁆𑀢𑀪𑀸𑀯𑁂. 𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀭𑁄 𑀳𑁄𑀢𑀻𑀢𑀺 𑀯𑀝𑁆𑀝𑀤𑀼𑀓𑁆𑀔𑀲𑁆𑀲 𑀓𑁄𑀝𑀺𑀓𑀭𑁄 𑀧𑀭𑀺𑀘𑁆𑀙𑁂𑀤𑀧𑀭𑀺𑀯𑀝𑀼𑀫𑀓𑀭𑁄 𑀳𑁄𑀢𑀺 𑀦𑀸𑀫.

𑀤𑀼𑀢𑀺𑀬𑀯𑀸𑀭𑁂 𑀢𑀺𑀡𑁆𑀡𑀁 𑀓𑀡𑁆𑀟𑀸𑀦𑀁 𑀯𑀲𑁂𑀦 𑀉𑀧𑀫𑀸 𑀯𑁂𑀤𑀺𑀢𑀩𑁆𑀩𑀸. 𑀢𑀺𑀡𑁆𑀡𑀜𑁆𑀳𑀺 𑀓𑀡𑁆𑀟𑀸𑀦𑀁 𑀲𑀼𑀢𑁆𑀢𑁂𑀦 𑀲𑀁𑀲𑀺𑀩𑁆𑀩𑀺𑀢𑀸𑀦𑀁 𑀲𑀼𑀢𑁆𑀢𑁂 𑀙𑀺𑀦𑁆𑀦𑁂 𑀢𑀻𑀡𑀺 𑀓𑀡𑁆𑀟𑀸𑀦𑀺 𑀢𑀻𑀲𑀼 𑀞𑀸𑀦𑁂𑀲𑀼 𑀧𑀢𑀦𑁆𑀢𑀺, 𑀏𑀯𑀫𑁂𑀢𑁆𑀣 𑀓𑀡𑁆𑀟𑀢𑁆𑀢𑀬𑀁 𑀯𑀺𑀬 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀸 𑀔𑀦𑁆𑀥𑀸, 𑀲𑀼𑀢𑁆𑀢𑀁 𑀯𑀺𑀬 𑀢𑀡𑁆𑀳𑀸. 𑀲𑀸 𑀳𑀺 𑀅𑀢𑀻𑀢𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀦, 𑀧𑀘𑁆𑀘𑀼𑀧𑁆𑀧𑀦𑁆𑀦𑀜𑁆𑀘 𑀅𑀦𑀸𑀕𑀢𑁂𑀦 𑀲𑀤𑁆𑀥𑀺𑀁 𑀲𑀁𑀲𑀺𑀩𑁆𑀩𑀢𑀺. 𑀲𑀼𑀢𑁆𑀢𑁂 𑀙𑀺𑀦𑁆𑀦𑁂 𑀓𑀡𑁆𑀟𑀢𑁆𑀢𑀬𑀲𑁆𑀲 𑀢𑀻𑀲𑀼 𑀞𑀸𑀦𑁂𑀲𑀼 𑀧𑀢𑀦𑀁 𑀯𑀺𑀬 𑀢𑀡𑁆𑀳𑀸𑀬 𑀦𑀺𑀭𑀼𑀤𑁆𑀥𑀸𑀬 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀸 𑀔𑀦𑁆𑀥𑀸 𑀦𑀺𑀭𑀼𑀤𑁆𑀥𑀸𑀯 𑀳𑁄𑀦𑁆𑀢𑀺.

𑀢𑀢𑀺𑀬𑀯𑀸𑀭𑁂 𑀅𑀤𑀼𑀓𑁆𑀔𑀫𑀲𑀼𑀔𑀸 𑀫𑀚𑁆𑀛𑁂𑀢𑀺 𑀤𑁆𑀯𑀺𑀦𑁆𑀦𑀁 𑀯𑁂𑀤𑀦𑀸𑀦𑀁 𑀅𑀦𑁆𑀢𑀭𑀝𑁆𑀞𑀓𑀪𑀸𑀯𑁂𑀦 𑀫𑀚𑁆𑀛𑁂. 𑀲𑀼𑀔𑀜𑁆𑀳𑀺 𑀤𑀼𑀓𑁆𑀔𑀲𑁆𑀲, 𑀤𑀼𑀓𑁆𑀔𑀁 𑀯𑀸 𑀲𑀼𑀔𑀲𑁆𑀲 𑀅𑀦𑁆𑀢𑀭𑀁 𑀦𑀸𑀫 𑀦𑀢𑁆𑀣𑀺. 𑀢𑀡𑁆𑀳𑀸 𑀲𑀺𑀩𑁆𑀩𑀺𑀦𑀻𑀢𑀺 𑀯𑁂𑀤𑀦𑀸𑀲𑀼 𑀦𑀦𑁆𑀤𑀺𑀭𑀸𑀕𑁄 𑀯𑁂𑀤𑀦𑀸𑀦𑀁 𑀉𑀧𑀘𑁆𑀙𑁂𑀤𑀁 𑀦𑀺𑀯𑀸𑀭𑁂𑀢𑀻𑀢𑀺 𑀢𑀸 𑀲𑀺𑀩𑁆𑀩𑀢𑀺 𑀦𑀸𑀫.

𑀘𑀢𑀼𑀢𑁆𑀣𑀯𑀸𑀭𑁂 𑀯𑀺𑀜𑁆𑀜𑀸𑀡𑀁 𑀫𑀚𑁆𑀛𑁂𑀢𑀺 𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑀫𑁆𑀧𑀺 𑀲𑁂𑀲𑀯𑀺𑀜𑁆𑀜𑀸𑀡𑀫𑁆𑀧𑀺 𑀦𑀸𑀫𑀭𑀽𑀧𑀧𑀘𑁆𑀘𑀬𑀲𑀫𑀼𑀤𑀸𑀕𑀢𑀢𑁆𑀢𑀸 𑀦𑀸𑀫𑀭𑀽𑀧𑀸𑀦𑀁 𑀫𑀚𑁆𑀛𑁂 𑀦𑀸𑀫.

𑀧𑀜𑁆𑀘𑀫𑀯𑀸𑀭𑁂 𑀯𑀺𑀜𑁆𑀜𑀸𑀡𑀁 𑀫𑀚𑁆𑀛𑁂𑀢𑀺 𑀓𑀫𑁆𑀫𑀯𑀺𑀜𑁆𑀜𑀸𑀡𑀁 𑀫𑀚𑁆𑀛𑁂, 𑀅𑀚𑁆𑀛𑀢𑁆𑀢𑀺𑀓𑀸𑀬𑀢𑀦𑁂𑀲𑀼 𑀯𑀸 𑀫𑀦𑀸𑀬𑀢𑀦𑁂𑀦 𑀓𑀫𑁆𑀫𑀲𑁆𑀲 𑀕𑀳𑀺𑀢𑀢𑁆𑀢𑀸 𑀇𑀥 𑀬𑀁𑀓𑀺𑀜𑁆𑀘𑀺 𑀯𑀺𑀜𑁆𑀜𑀸𑀡𑀁 𑀫𑀚𑁆𑀛𑁂 𑀦𑀸𑀫, 𑀫𑀦𑁄𑀤𑁆𑀯𑀸𑀭𑁂 𑀯𑀸 𑀆𑀯𑀚𑁆𑀚𑀦𑀲𑁆𑀲 𑀅𑀚𑁆𑀛𑀢𑁆𑀢𑀺𑀓𑀸𑀬𑀢𑀦𑀦𑀺𑀲𑁆𑀲𑀺𑀢𑀢𑁆𑀢𑀸 𑀚𑀯𑀦𑀯𑀺𑀜𑁆𑀜𑀸𑀡𑀁 𑀫𑀚𑁆𑀛𑁂 𑀦𑀸𑀫.

𑀙𑀝𑁆𑀞𑀯𑀸𑀭𑁂 𑀲𑀓𑁆𑀓𑀸𑀬𑁄𑀢𑀺 𑀢𑁂𑀪𑀽𑀫𑀓𑀯𑀝𑁆𑀝𑀁. 𑀲𑀓𑁆𑀓𑀸𑀬𑀲𑀫𑀼𑀤𑀬𑁄𑀢𑀺 𑀲𑀫𑀼𑀤𑀬𑀲𑀘𑁆𑀘𑀁. 𑀲𑀓𑁆𑀓𑀸𑀬𑀦𑀺𑀭𑁄𑀥𑁄𑀢𑀺 𑀦𑀺𑀭𑁄𑀥𑀲𑀘𑁆𑀘𑀁. 𑀧𑀭𑀺𑀬𑀸𑀬𑁂𑀦𑀸𑀢𑀺 𑀢𑁂𑀦 𑀢𑁂𑀦 𑀓𑀸𑀭𑀡𑁂𑀦𑁂𑀯. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑁮. 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀜𑀸𑀡𑀲𑀼𑀢𑁆𑀢𑀯𑀡𑁆𑀡𑀦𑀸

𑁬𑁨. 𑀅𑀝𑁆𑀞𑀫𑁂 𑀅𑀜𑁆𑀜𑀢𑀭𑁄𑀢𑀺 𑀤𑁂𑀯𑀤𑀢𑁆𑀢𑀧𑀓𑁆𑀔𑀺𑀓𑁄 𑀏𑀓𑁄. 𑀲𑀫𑀦𑁆𑀦𑀸𑀳𑀭𑀺𑀢𑁆𑀯𑀸𑀢𑀺 𑀆𑀯𑀚𑁆𑀚𑀺𑀢𑁆𑀯𑀸. 𑀇𑀤𑀁 𑀲𑁄 ‘‘𑀓𑀺𑀁 𑀦𑀼 𑀔𑁄 𑀪𑀕𑀯𑀢𑀸 𑀚𑀸𑀦𑀺𑀢𑁆𑀯𑀸 𑀓𑀣𑀺𑀢𑀁, 𑀉𑀤𑀸𑀳𑀼 𑀅𑀚𑀸𑀦𑀺𑀢𑁆𑀯𑀸, 𑀏𑀓𑀁𑀲𑀺𑀓𑀁 𑀯𑀸 𑀓𑀣𑀺𑀢𑀁 𑀉𑀤𑀸𑀳𑀼 𑀯𑀺𑀪𑀚𑁆𑀚𑀓𑀣𑀺𑀢’’𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀧𑀼𑀘𑁆𑀙𑀢𑀺. 𑀆𑀧𑀸𑀬𑀺𑀓𑁄𑀢𑀺 𑀅𑀧𑀸𑀬𑁂 𑀦𑀺𑀩𑁆𑀩𑀢𑁆𑀢𑀦𑀓𑁄. 𑀦𑁂𑀭𑀬𑀺𑀓𑁄𑀢𑀺 𑀦𑀺𑀭𑀬𑀕𑀸𑀫𑀻. 𑀓𑀧𑁆𑀧𑀝𑁆𑀞𑁄𑀢𑀺 𑀓𑀧𑁆𑀧𑀝𑁆𑀞𑀺𑀬𑀓𑀫𑁆𑀫𑀲𑁆𑀲 𑀓𑀢𑀢𑁆𑀢𑀸 𑀓𑀧𑁆𑀧𑀁 𑀞𑀲𑁆𑀲𑀢𑀺. 𑀅𑀢𑁂𑀓𑀺𑀘𑁆𑀙𑁄𑀢𑀺 𑀦 𑀲𑀓𑁆𑀓𑀸 𑀢𑀺𑀓𑀺𑀘𑁆𑀙𑀺𑀢𑀼𑀁. 𑀤𑁆𑀯𑁂𑀚𑁆𑀛𑀦𑁆𑀢𑀺 𑀤𑁆𑀯𑀺𑀥𑀸𑀪𑀸𑀯𑀁. 𑀯𑀸𑀮𑀕𑁆𑀕𑀓𑁄𑀝𑀺𑀦𑀺𑀢𑁆𑀢𑀼𑀤𑀦𑀫𑀢𑁆𑀢𑀦𑁆𑀢𑀺 𑀯𑀸𑀮𑀲𑁆𑀲 𑀅𑀕𑁆𑀕𑀓𑁄𑀝𑀺𑀬𑀸 𑀤𑀲𑁆𑀲𑁂𑀢𑀩𑁆𑀩𑀫𑀢𑁆𑀢𑀓𑀁, 𑀯𑀸𑀮𑀕𑁆𑀕𑀓𑁄𑀝𑀺𑀦𑀺𑀧𑀸𑀢𑀫𑀢𑁆𑀢𑀓𑀁 𑀯𑀸. 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀜𑀸𑀡𑀸𑀦𑀻𑀢𑀺 𑀧𑀼𑀭𑀺𑀲𑀧𑀼𑀕𑁆𑀕𑀮𑀸𑀦𑀁 𑀇𑀦𑁆𑀤𑁆𑀭𑀺𑀬𑀧𑀭𑁄𑀧𑀭𑀺𑀬𑀢𑁆𑀢𑀜𑀸𑀡𑀸𑀦𑀺, 𑀇𑀦𑁆𑀤𑁆𑀭𑀺𑀬𑀸𑀦𑀁 𑀢𑀺𑀓𑁆𑀔𑀫𑀼𑀤𑀼𑀪𑀸𑀯𑀚𑀸𑀦𑀦𑀜𑀸𑀡𑀸𑀦𑀻𑀢𑀺 𑀅𑀢𑁆𑀣𑁄.

𑀯𑀺𑀚𑁆𑀚𑀫𑀸𑀦𑀸 𑀓𑀼𑀲𑀮𑀸𑀧𑀺 𑀥𑀫𑁆𑀫𑀸 𑀅𑀓𑀼𑀲𑀮𑀸𑀧𑀺 𑀥𑀫𑁆𑀫𑀸𑀢𑀺 𑀏𑀢𑁆𑀢𑀓𑀸 𑀓𑀼𑀲𑀮𑀸 𑀥𑀫𑁆𑀫𑀸 𑀯𑀺𑀚𑁆𑀚𑀦𑁆𑀢𑀺, 𑀏𑀢𑁆𑀢𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸𑀢𑀺 𑀚𑀸𑀦𑀸𑀫𑀺. 𑀅𑀦𑁆𑀢𑀭𑀳𑀺𑀢𑀸𑀢𑀺 𑀅𑀤𑀲𑁆𑀲𑀦𑀁 𑀕𑀢𑀸. 𑀲𑀫𑁆𑀫𑀼𑀔𑀻𑀪𑀽𑀢𑀸𑀢𑀺 𑀲𑀫𑀼𑀤𑀸𑀘𑀸𑀭𑀯𑀲𑁂𑀦 𑀧𑀸𑀓𑀝𑀸 𑀚𑀸𑀢𑀸. 𑀓𑀼𑀲𑀮𑀫𑀽𑀮𑀦𑁆𑀢𑀺 𑀓𑀼𑀲𑀮𑀚𑁆𑀛𑀸𑀲𑀬𑁄. 𑀓𑀼𑀲𑀮𑀸 𑀓𑀼𑀲𑀮𑀦𑁆𑀢𑀺 𑀢𑀫𑁆𑀳𑀸 𑀓𑀼𑀲𑀮𑀚𑁆𑀛𑀸𑀲𑀬𑀸 𑀅𑀜𑁆𑀜𑀫𑁆𑀧𑀺 𑀓𑀼𑀲𑀮𑀁 𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀢𑀺. 𑀲𑀸𑀭𑀤𑀸𑀦𑀻𑀢𑀺 𑀲𑀸𑀭𑀸𑀤𑀸𑀦𑀺 𑀕𑀳𑀺𑀢𑀲𑀸𑀭𑀸𑀦𑀺, 𑀲𑀭𑀤𑀫𑀸𑀲𑁂 𑀯𑀸 𑀦𑀺𑀩𑁆𑀩𑀢𑁆𑀢𑀸𑀦𑀺. 𑀲𑀼𑀔𑀲𑀬𑀺𑀢𑀸𑀦𑀻𑀢𑀺 𑀲𑀼𑀔𑀲𑀦𑁆𑀦𑀺𑀘𑀺𑀢𑀸𑀦𑀺. 𑀲𑀼𑀔𑁂𑀢𑁆𑀢𑁂𑀢𑀺 𑀫𑀡𑁆𑀟𑀔𑁂𑀢𑁆𑀢𑁂. 𑀦𑀺𑀓𑁆𑀔𑀺𑀢𑁆𑀢𑀸𑀦𑀻𑀢𑀺 𑀯𑀼𑀢𑁆𑀢𑀸𑀦𑀺. 𑀲𑀧𑁆𑀧𑀝𑀺𑀪𑀸𑀕𑀸𑀢𑀺 𑀲𑀭𑀺𑀓𑁆𑀔𑀓𑀸. 𑀅𑀪𑀺𑀤𑁄 𑀅𑀤𑁆𑀥𑀭𑀢𑁆𑀢𑀦𑁆𑀢𑀺 𑀅𑀪𑀺𑀅𑀤𑁆𑀥𑀭𑀢𑁆𑀢𑀁 𑀅𑀤𑁆𑀥𑀭𑀢𑁆𑀢𑁂 𑀅𑀪𑀺𑀫𑀼𑀔𑀻𑀪𑀽𑀢𑁂. 𑀪𑀢𑁆𑀢𑀓𑀸𑀮𑀲𑀫𑀬𑁂𑀢𑀺 𑀭𑀸𑀚𑀓𑀼𑀮𑀸𑀦𑀁 𑀪𑀢𑁆𑀢𑀓𑀸𑀮𑀲𑀗𑁆𑀔𑀸𑀢𑁂 𑀲𑀫𑀬𑁂. 𑀧𑀭𑀺𑀳𑀸𑀦𑀥𑀫𑁆𑀫𑁄𑀢𑀺 𑀓𑁄 𑀏𑀯𑀁 𑀪𑀕𑀯𑀢𑀸 𑀜𑀸𑀢𑁄𑀢𑀺? 𑀅𑀚𑀸𑀢𑀲𑀢𑁆𑀢𑀼𑀭𑀸𑀚𑀸. 𑀲𑁄 𑀳𑀺 𑀧𑀸𑀧𑀫𑀺𑀢𑁆𑀢𑀁 𑀦𑀺𑀲𑁆𑀲𑀸𑀬 𑀫𑀕𑁆𑀕𑀨𑀮𑁂𑀳𑀺 𑀧𑀭𑀺𑀳𑀻𑀦𑁄. 𑀅𑀧𑀭𑁂𑀧𑀺 𑀲𑀼𑀧𑁆𑀧𑀩𑀼𑀤𑁆𑀥𑀲𑀼𑀦𑀓𑁆𑀔𑀢𑁆𑀢𑀸𑀤𑀬𑁄 𑀪𑀕𑀯𑀢𑀸 𑀜𑀸𑀢𑀸𑀯. 𑀅𑀧𑀭𑀺𑀳𑀸𑀦𑀥𑀫𑁆𑀫𑁄𑀢𑀺 𑀏𑀯𑀁 𑀪𑀕𑀯𑀢𑀸 𑀓𑁄 𑀜𑀸𑀢𑁄? 𑀲𑀼𑀲𑀻𑀫𑁄 𑀧𑀭𑀺𑀩𑁆𑀩𑀸𑀚𑀓𑁄 𑀅𑀜𑁆𑀜𑁂 𑀘 𑀏𑀯𑀭𑀽𑀧𑀸. 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀢𑀻𑀢𑀺 𑀏𑀯𑀁 𑀓𑁄 𑀜𑀸𑀢𑁄 𑀪𑀕𑀯𑀢𑀸𑀢𑀺? 𑀲𑀦𑁆𑀢𑀢𑀺𑀫𑀳𑀸𑀫𑀢𑁆𑀢𑁄 𑀅𑀜𑁆𑀜𑁂 𑀘 𑀏𑀯𑀭𑀽𑀧𑀸.

𑁯. 𑀦𑀺𑀩𑁆𑀩𑁂𑀥𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁬𑁩. 𑀦𑀯𑀫𑁂 𑀅𑀦𑀺𑀩𑁆𑀩𑀺𑀤𑁆𑀥𑀧𑀼𑀩𑁆𑀩𑁂 𑀅𑀧𑁆𑀧𑀤𑀸𑀮𑀺𑀢𑀧𑀼𑀩𑁆𑀩𑁂 𑀮𑁄𑀪𑀓𑁆𑀔𑀦𑁆𑀥𑀸𑀤𑀬𑁄 𑀦𑀺𑀩𑁆𑀩𑀺𑀚𑁆𑀛𑀢𑀺 𑀧𑀤𑀸𑀮𑁂𑀢𑀻𑀢𑀺 𑀦𑀺𑀩𑁆𑀩𑁂𑀥𑀺𑀓𑀧𑀭𑀺𑀬𑀸𑀬𑁄, 𑀦𑀺𑀩𑁆𑀩𑀺𑀚𑁆𑀛𑀦𑀓𑀸𑀭𑀡𑀦𑁆𑀢𑀺 𑀅𑀢𑁆𑀣𑁄. 𑀦𑀺𑀤𑀸𑀦𑀲𑀫𑁆𑀪𑀯𑁄𑀢𑀺 𑀓𑀸𑀫𑁂 𑀦𑀺𑀤𑁂𑀢𑀺 𑀉𑀧𑁆𑀧𑀸𑀤𑀦𑀲𑀫𑀢𑁆𑀣𑀢𑀸𑀬 𑀦𑀺𑀬𑁆𑀬𑀸𑀤𑁂𑀢𑀻𑀢𑀺 𑀦𑀺𑀤𑀸𑀦𑀁. 𑀲𑀫𑁆𑀪𑀯𑀢𑀺 𑀢𑀢𑁄𑀢𑀺 𑀲𑀫𑁆𑀪𑀯𑁄, 𑀦𑀺𑀤𑀸𑀦𑀫𑁂𑀯 𑀲𑀫𑁆𑀪𑀯𑁄 𑀦𑀺𑀤𑀸𑀦𑀲𑀫𑁆𑀪𑀯𑁄. 𑀯𑁂𑀫𑀢𑁆𑀢𑀢𑀸𑀢𑀺 𑀦𑀸𑀦𑀸𑀓𑀭𑀡𑀁.

𑀓𑀸𑀫𑀕𑀼𑀡𑀸𑀢𑀺 𑀓𑀸𑀫𑀬𑀺𑀢𑀩𑁆𑀩𑀝𑁆𑀞𑁂𑀦 𑀓𑀸𑀫𑀸, 𑀩𑀦𑁆𑀥𑀦𑀝𑁆𑀞𑁂𑀦 𑀕𑀼𑀡𑀸 ‘‘𑀅𑀦𑁆𑀢𑀕𑀼𑀡’’𑀦𑁆𑀢𑀺𑀆𑀤𑀻𑀲𑀼 𑀯𑀺𑀬. 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀸𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑁂𑀦 𑀧𑀲𑁆𑀲𑀺𑀢𑀩𑁆𑀩𑀸. 𑀇𑀝𑁆𑀞𑀸𑀢𑀺 𑀧𑀭𑀺𑀬𑀺𑀝𑁆𑀞𑀸 𑀯𑀸 𑀳𑁄𑀦𑁆𑀢𑀼 𑀫𑀸 𑀯𑀸, 𑀇𑀝𑁆𑀞𑀸𑀭𑀫𑁆𑀫𑀡𑀪𑀽𑀢𑀸𑀢𑀺 𑀅𑀢𑁆𑀣𑁄. 𑀓𑀦𑁆𑀢𑀸𑀢𑀺 𑀓𑀫𑀦𑀻𑀬𑀸. 𑀫𑀦𑀸𑀧𑀸𑀢𑀺 𑀫𑀦𑀯𑀟𑁆𑀠𑀦𑀓𑀸. 𑀧𑀺𑀬𑀭𑀽𑀧𑀸𑀢𑀺 𑀧𑀺𑀬𑀚𑀸𑀢𑀺𑀓𑀸. 𑀓𑀸𑀫𑀽𑀧𑀲𑀜𑁆𑀳𑀺𑀢𑀸𑀢𑀺 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀉𑀧𑁆𑀧𑀚𑁆𑀚𑀫𑀸𑀦𑁂𑀦 𑀓𑀸𑀫𑁂𑀦 𑀉𑀧𑀲𑀜𑁆𑀳𑀺𑀢𑀸. 𑀭𑀚𑀦𑀻𑀬𑀸𑀢𑀺 𑀭𑀸𑀕𑀼𑀧𑁆𑀧𑀢𑁆𑀢𑀺𑀓𑀸𑀭𑀡𑀪𑀽𑀢𑀸. 𑀦𑁂𑀢𑁂 𑀓𑀸𑀫𑀸𑀢𑀺 𑀦 𑀏𑀢𑁂 𑀓𑀫𑀦𑀝𑁆𑀞𑁂𑀦 𑀓𑀸𑀫𑀸 𑀦𑀸𑀫 𑀳𑁄𑀦𑁆𑀢𑀺. 𑀲𑀗𑁆𑀓𑀧𑁆𑀧𑀭𑀸𑀕𑁄𑀢𑀺 𑀲𑀗𑁆𑀓𑀧𑁆𑀧𑀯𑀲𑁂𑀦 𑀉𑀧𑁆𑀧𑀦𑁆𑀦𑀭𑀸𑀕𑁄. 𑀓𑀸𑀫𑁄𑀢𑀺 𑀅𑀬𑀁 𑀓𑀸𑀫𑀧𑁆𑀧𑀳𑀸𑀦𑀸𑀬 𑀧𑀝𑀺𑀧𑀦𑁆𑀦𑁂𑀳𑀺 𑀧𑀳𑀸𑀢𑀩𑁆𑀩𑁄. 𑀓𑀫𑀦𑀝𑁆𑀞𑁂𑀦 𑀓𑀸𑀫𑀸 𑀦𑀸𑀫. 𑀘𑀺𑀢𑁆𑀭𑀸𑀦𑀻𑀢𑀺 𑀘𑀺𑀢𑁆𑀭𑀯𑀺𑀘𑀺𑀢𑁆𑀭𑀸𑀭𑀫𑁆𑀫𑀡𑀸𑀦𑀺.

𑀨𑀲𑁆𑀲𑁄𑀢𑀺 𑀲𑀳𑀚𑀸𑀢𑀨𑀲𑁆𑀲𑁄. 𑀓𑀸𑀫𑀬𑀫𑀸𑀦𑁄𑀢𑀺 𑀓𑀸𑀫𑀁 𑀓𑀸𑀫𑀬𑀫𑀸𑀦𑁄. 𑀢𑀚𑁆𑀚𑀁 𑀢𑀚𑁆𑀚𑀦𑁆𑀢𑀺 𑀢𑀚𑁆𑀚𑀸𑀢𑀺𑀓𑀁 𑀢𑀚𑁆𑀚𑀸𑀢𑀺𑀓𑀁. 𑀧𑀼𑀜𑁆𑀜𑀪𑀸𑀕𑀺𑀬𑀦𑁆𑀢𑀺 𑀤𑀺𑀩𑁆𑀩𑁂 𑀓𑀸𑀫𑁂 𑀧𑀢𑁆𑀣𑁂𑀢𑁆𑀯𑀸 𑀲𑀼𑀘𑀭𑀺𑀢𑀧𑀸𑀭𑀺𑀧𑀽𑀭𑀺𑀬𑀸 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀲𑁆𑀲 𑀅𑀢𑁆𑀢𑀪𑀸𑀯𑁄 𑀧𑀼𑀜𑁆𑀜𑀪𑀸𑀕𑀺𑀬𑁄 𑀦𑀸𑀫, 𑀤𑀼𑀘𑁆𑀘𑀭𑀺𑀢𑀧𑀸𑀭𑀺𑀧𑀽𑀭𑀺𑀬𑀸 𑀅𑀧𑀸𑀬𑁂 𑀦𑀺𑀩𑁆𑀩𑀢𑁆𑀢𑀲𑁆𑀲 𑀅𑀢𑁆𑀢𑀪𑀸𑀯𑁄 𑀅𑀧𑀼𑀜𑁆𑀜𑀪𑀸𑀕𑀺𑀬𑁄 𑀦𑀸𑀫. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀓𑀸𑀫𑀸𑀦𑀁 𑀯𑀺𑀧𑀸𑀓𑁄𑀢𑀺 𑀅𑀬𑀁 𑀤𑀼𑀯𑀺𑀥𑁄𑀧𑀺 𑀓𑀸𑀫𑀧𑀢𑁆𑀣𑀦𑀁 𑀦𑀺𑀲𑁆𑀲𑀸𑀬 𑀉𑀧𑁆𑀧𑀦𑁆𑀦𑀢𑁆𑀢𑀸 𑀓𑀸𑀫𑀸𑀦𑀁 𑀯𑀺𑀧𑀸𑀓𑁄𑀢𑀺 𑀯𑀼𑀘𑁆𑀘𑀢𑀺. 𑀲𑁄 𑀇𑀫𑀁 𑀦𑀺𑀩𑁆𑀩𑁂𑀥𑀺𑀓𑀦𑁆𑀢𑀺 𑀲𑁄 𑀪𑀺𑀓𑁆𑀔𑀼 𑀇𑀫𑀁 𑀙𑀢𑁆𑀢𑀺𑀁𑀲𑀝𑁆𑀞𑀸𑀦𑁂𑀲𑀼 𑀦𑀺𑀩𑁆𑀩𑀺𑀚𑁆𑀛𑀦𑀓𑀁 𑀲𑁂𑀝𑁆𑀞𑀘𑀭𑀺𑀬𑀁 𑀚𑀸𑀦𑀸𑀢𑀺. 𑀓𑀸𑀫𑀦𑀺𑀭𑁄𑀥𑀦𑁆𑀢𑀺 𑀓𑀸𑀫𑀸𑀦𑀁 𑀦𑀺𑀭𑁄𑀥𑀦𑁂 𑀏𑀯𑀁 𑀮𑀤𑁆𑀥𑀦𑀸𑀫𑀁. 𑀇𑀫𑀲𑁆𑀫𑀺𑀜𑁆𑀳𑀺 𑀞𑀸𑀦𑁂 𑀩𑁆𑀭𑀳𑁆𑀫𑀘𑀭𑀺𑀬𑀲𑀗𑁆𑀔𑀸𑀢𑁄 𑀫𑀕𑁆𑀕𑁄𑀯 𑀓𑀸𑀫𑀦𑀺𑀭𑁄𑀥𑁄𑀢𑀺 𑀯𑀼𑀢𑁆𑀢𑁄.

𑀲𑀸𑀫𑀺𑀲𑀸𑀢𑀺 𑀓𑀺𑀮𑁂𑀲𑀸𑀫𑀺𑀲𑀲𑀫𑁆𑀧𑀬𑀼𑀢𑁆𑀢𑀸. 𑀇𑀫𑀺𑀦𑀸 𑀦𑀬𑁂𑀦 𑀲𑀩𑁆𑀩𑀞𑀸𑀦𑁂𑀲𑀼 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀧𑀺𑀘𑁂𑀢𑁆𑀣 𑀯𑁄𑀳𑀸𑀭𑀯𑁂𑀧𑀓𑁆𑀓𑀦𑁆𑀢𑀺 𑀯𑁄𑀳𑀸𑀭𑀯𑀺𑀧𑀸𑀓𑀁. 𑀓𑀣𑀸𑀲𑀗𑁆𑀔𑀸𑀢𑁄 𑀳𑀺 𑀯𑁄𑀳𑀸𑀭𑁄 𑀲𑀜𑁆𑀜𑀸𑀬 𑀯𑀺𑀧𑀸𑀓𑁄 𑀦𑀸𑀫. 𑀬𑀣𑀸 𑀬𑀣𑀸 𑀦𑀦𑁆𑀢𑀺 𑀏𑀢𑁆𑀣 𑀦𑀁-𑀇𑀢𑀺 𑀦𑀺𑀧𑀸𑀢𑀫𑀢𑁆𑀢𑀫𑁂𑀯. 𑀇𑀢𑀺 𑀬𑀲𑁆𑀫𑀸 𑀬𑀣𑀸 𑀬𑀣𑀸 𑀲𑀜𑁆𑀚𑀸𑀦𑀸𑀢𑀺, 𑀢𑀣𑀸 𑀢𑀣𑀸 𑀏𑀯𑀁𑀲𑀜𑁆𑀜𑀻 𑀅𑀳𑁄𑀲𑀺𑀦𑁆𑀢𑀺 𑀓𑀣𑁂𑀢𑀺, 𑀢𑀲𑁆𑀫𑀸 𑀯𑁄𑀳𑀸𑀭𑀯𑁂𑀧𑀓𑁆𑀓𑀸𑀢𑀺 𑀅𑀢𑁆𑀣𑁄.

𑀅𑀯𑀺𑀚𑁆𑀚𑀸𑀢𑀺 𑀅𑀝𑁆𑀞𑀲𑀼 𑀞𑀸𑀦𑁂𑀲𑀼 𑀅𑀜𑁆𑀜𑀸𑀡𑀪𑀽𑀢𑀸 𑀩𑀳𑀮𑀅𑀯𑀺𑀚𑁆𑀚𑀸. 𑀦𑀺𑀭𑀬𑀁 𑀕𑀫𑁂𑀦𑁆𑀢𑀻𑀢𑀺 𑀦𑀺𑀭𑀬𑀕𑀫𑀦𑀻𑀬𑀸, 𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀺𑀧𑀘𑁆𑀘𑀬𑀸𑀢𑀺 𑀅𑀢𑁆𑀣𑁄. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀘𑁂𑀢𑀦𑀸𑀳𑀦𑁆𑀢𑀺 𑀘𑁂𑀢𑀦𑀁 𑀅𑀳𑀁. 𑀇𑀥 𑀲𑀩𑁆𑀩𑀲𑀗𑁆𑀕𑀸𑀳𑀺𑀓𑀸 𑀲𑀁𑀯𑀺𑀤𑀳𑀦𑀘𑁂𑀢𑀦𑀸 𑀕𑀳𑀺𑀢𑀸. 𑀘𑁂𑀢𑀬𑀺𑀢𑁆𑀯𑀸𑀢𑀺 𑀤𑁆𑀯𑀸𑀭𑀧𑁆𑀧𑀯𑀢𑁆𑀢𑀘𑁂𑀢𑀦𑀸. 𑀫𑀦𑀲𑀸𑀢𑀺 𑀘𑁂𑀢𑀦𑀸𑀲𑀫𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑁂𑀦. 𑀦𑀺𑀭𑀬𑀯𑁂𑀤𑀦𑀻𑀬𑀦𑁆𑀢𑀺 𑀦𑀺𑀭𑀬𑁂 𑀯𑀺𑀧𑀸𑀓𑀤𑀸𑀬𑀓𑀁. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀅𑀥𑀺𑀫𑀢𑁆𑀢𑀦𑁆𑀢𑀺 𑀩𑀮𑀯𑀤𑀼𑀓𑁆𑀔𑀁. 𑀤𑀦𑁆𑀥𑀯𑀺𑀭𑀸𑀕𑀻𑀢𑀺 𑀕𑀭𑀼𑀓𑀁 𑀦 𑀔𑀺𑀧𑁆𑀧𑀁 𑀲𑀡𑀺𑀓𑀁 𑀯𑀺𑀕𑀘𑁆𑀙𑀦𑀓𑀤𑀼𑀓𑁆𑀔𑀁. 𑀉𑀭𑀢𑁆𑀢𑀸𑀴𑀺𑀁 𑀓𑀦𑁆𑀤𑀢𑀻𑀢𑀺 𑀉𑀭𑀁 𑀢𑀸𑀴𑁂𑀢𑁆𑀯𑀸 𑀭𑁄𑀤𑀢𑀺. 𑀧𑀭𑀺𑀬𑁂𑀝𑁆𑀞𑀺𑀦𑁆𑀢𑀺 𑀧𑀭𑀺𑀬𑁂𑀲𑀦𑀁. 𑀏𑀓𑀧𑀤𑀁 𑀤𑁆𑀯𑀺𑀧𑀤𑀦𑁆𑀢𑀺 𑀏𑀓𑀧𑀤𑀫𑀦𑁆𑀢𑀁 𑀯𑀸 𑀤𑁆𑀯𑀺𑀧𑀤𑀫𑀦𑁆𑀢𑀁 𑀯𑀸, 𑀓𑁄 𑀫𑀦𑁆𑀢𑀁 𑀚𑀸𑀦𑀸𑀢𑀻𑀢𑀺 𑀅𑀢𑁆𑀣𑁄. 𑀲𑀫𑁆𑀫𑁄𑀳𑀯𑁂𑀧𑀓𑁆𑀓𑀦𑁆𑀢𑀺 𑀲𑀫𑁆𑀫𑁄𑀳𑀯𑀺𑀧𑀸𑀓𑀁. 𑀤𑀼𑀓𑁆𑀔𑀲𑁆𑀲 𑀳𑀺 𑀲𑀫𑁆𑀫𑁄𑀳𑁄 𑀦𑀺𑀲𑁆𑀲𑀦𑁆𑀤𑀯𑀺𑀧𑀸𑀓𑁄 𑀦𑀸𑀫. 𑀤𑀼𑀢𑀺𑀬𑀧𑀤𑁂𑀧𑀺 𑀏𑀲𑁂𑀯 𑀦𑀬𑁄. 𑀧𑀭𑀺𑀬𑁂𑀲𑀦𑀸𑀧𑀺 𑀳𑀺 𑀢𑀲𑁆𑀲 𑀦𑀺𑀲𑁆𑀲𑀦𑁆𑀤𑀯𑀺𑀧𑀸𑀓𑁄𑀢𑀺. 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀯𑀝𑁆𑀝𑀯𑀺𑀯𑀝𑁆𑀝𑀁 𑀓𑀣𑀺𑀢𑀁.

𑁧𑁦. 𑀲𑀻𑀳𑀦𑀸𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁬𑁪. 𑀤𑀲𑀫𑁂 𑀆𑀲𑀪𑀁 𑀞𑀸𑀦𑀦𑁆𑀢𑀺 𑀲𑁂𑀝𑁆𑀞𑀁 𑀦𑀺𑀘𑁆𑀘𑀮𑀝𑁆𑀞𑀸𑀦𑀁. 𑀲𑀻𑀳𑀦𑀸𑀤𑀦𑁆𑀢𑀺 𑀅𑀪𑀻𑀢𑀦𑀸𑀤𑀁 𑀧𑀫𑀼𑀔𑀦𑀸𑀤𑀁. 𑀩𑁆𑀭𑀳𑁆𑀫𑀘𑀓𑁆𑀓𑀦𑁆𑀢𑀺 𑀲𑁂𑀝𑁆𑀞𑀜𑀸𑀡𑀘𑀓𑁆𑀓𑀁 𑀧𑀝𑀺𑀯𑁂𑀥𑀜𑀸𑀡𑀜𑁆𑀘𑁂𑀯 𑀤𑁂𑀲𑀦𑀸𑀜𑀸𑀡𑀜𑁆𑀘. 𑀞𑀸𑀦𑀜𑁆𑀘 𑀞𑀸𑀦𑀢𑁄𑀢𑀺 𑀓𑀸𑀭𑀡𑀜𑁆𑀘 𑀓𑀸𑀭𑀡𑀢𑁄. 𑀬𑀫𑁆𑀧𑀻𑀢𑀺 𑀬𑁂𑀦 𑀜𑀸𑀡𑁂𑀦. 𑀇𑀤𑀫𑁆𑀧𑀺 𑀢𑀣𑀸𑀕𑀢𑀲𑁆𑀲𑀸𑀢𑀺 𑀇𑀤𑀫𑁆𑀧𑀺 𑀞𑀸𑀦𑀸𑀝𑁆𑀞𑀸𑀦𑀜𑀸𑀡𑀁 𑀢𑀣𑀸𑀕𑀢𑀲𑁆𑀲 𑀢𑀣𑀸𑀕𑀢𑀩𑀮𑀁 𑀦𑀸𑀫 𑀳𑁄𑀢𑀺. 𑀏𑀯𑀁 𑀲𑀩𑁆𑀩𑀧𑀤𑁂𑀲𑀼 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀓𑀫𑁆𑀫𑀲𑀫𑀸𑀤𑀸𑀦𑀸𑀦𑀦𑁆𑀢𑀺 𑀲𑀫𑀸𑀤𑀺𑀬𑀺𑀢𑁆𑀯𑀸 𑀓𑀢𑀸𑀦𑀁 𑀓𑀼𑀲𑀮𑀸𑀓𑀼𑀲𑀮𑀓𑀫𑁆𑀫𑀸𑀦𑀁, 𑀓𑀫𑁆𑀫𑀫𑁂𑀯 𑀯𑀸 𑀓𑀫𑁆𑀫𑀲𑀫𑀸𑀤𑀸𑀦𑀁. 𑀞𑀸𑀦𑀲𑁄 𑀳𑁂𑀢𑀼𑀲𑁄𑀢𑀺 𑀧𑀘𑁆𑀘𑀬𑀢𑁄 𑀘𑁂𑀯 𑀳𑁂𑀢𑀼𑀢𑁄 𑀘. 𑀢𑀢𑁆𑀣 𑀕𑀢𑀺𑀉𑀧𑀥𑀺𑀓𑀸𑀮𑀧𑀬𑁄𑀕𑀸 𑀯𑀺𑀧𑀸𑀓𑀲𑁆𑀲 𑀞𑀸𑀦𑀁, 𑀓𑀫𑁆𑀫𑀁 𑀳𑁂𑀢𑀼. 𑀛𑀸𑀦𑀯𑀺𑀫𑁄𑀓𑁆𑀔𑀲𑀫𑀸𑀥𑀺𑀲𑀫𑀸𑀧𑀢𑁆𑀢𑀻𑀦𑀦𑁆𑀢𑀺 𑀘𑀢𑀼𑀦𑁆𑀦𑀁 𑀛𑀸𑀦𑀸𑀦𑀁 𑀅𑀝𑁆𑀞𑀦𑁆𑀦𑀁 𑀯𑀺𑀫𑁄𑀓𑁆𑀔𑀸𑀦𑀁 𑀢𑀺𑀡𑁆𑀡𑀁 𑀲𑀫𑀸𑀥𑀻𑀦𑀁 𑀦𑀯𑀦𑁆𑀦𑀁 𑀅𑀦𑀼𑀧𑀼𑀩𑁆𑀩𑀲𑀫𑀸𑀧𑀢𑁆𑀢𑀻𑀦𑀜𑁆𑀘. 𑀲𑀁𑀓𑀺𑀮𑁂𑀲𑀦𑁆𑀢𑀺 𑀳𑀸𑀦𑀪𑀸𑀕𑀺𑀬𑀁 𑀥𑀫𑁆𑀫𑀁. 𑀯𑁄𑀤𑀸𑀦𑀦𑁆𑀢𑀺 𑀯𑀺𑀲𑁂𑀲𑀪𑀸𑀕𑀺𑀬𑀁 𑀥𑀫𑁆𑀫𑀁. 𑀯𑀼𑀝𑁆𑀞𑀸𑀦𑀦𑁆𑀢𑀺 ‘‘𑀯𑁄𑀤𑀸𑀦𑀫𑁆𑀧𑀺 𑀯𑀼𑀝𑁆𑀞𑀸𑀦𑀁, 𑀢𑀫𑁆𑀳𑀸 𑀢𑀫𑁆𑀳𑀸 𑀲𑀫𑀸𑀥𑀺𑀫𑁆𑀳𑀸 𑀯𑀼𑀝𑁆𑀞𑀸𑀦𑀫𑁆𑀧𑀺 𑀯𑀼𑀝𑁆𑀞𑀸𑀦’’𑀦𑁆𑀢𑀺 (𑀯𑀺𑀪. 𑁮𑁨𑁮) 𑀏𑀯𑀁 𑀯𑀼𑀢𑁆𑀢𑀁 𑀧𑀕𑀼𑀡𑀚𑁆𑀛𑀸𑀦𑀜𑁆𑀘𑁂𑀯 𑀪𑀯𑀗𑁆𑀕𑀦𑀨𑀮𑀲𑀫𑀸𑀧𑀢𑁆𑀢𑀺𑀬𑁄 𑀘. 𑀳𑁂𑀝𑁆𑀞𑀺𑀫𑀁 𑀳𑁂𑀝𑁆𑀞𑀺𑀫𑀜𑁆𑀳𑀺 𑀧𑀕𑀼𑀡𑀚𑁆𑀛𑀸𑀦𑀁 𑀉𑀧𑀭𑀺𑀫𑀲𑁆𑀲 𑀉𑀧𑀭𑀺𑀫𑀲𑁆𑀲 𑀧𑀤𑀝𑁆𑀞𑀸𑀦𑀁 𑀳𑁄𑀢𑀺, 𑀢𑀲𑁆𑀫𑀸 ‘‘𑀯𑁄𑀤𑀸𑀦𑀫𑁆𑀧𑀺 𑀯𑀼𑀝𑁆𑀞𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀪𑀯𑀗𑁆𑀕𑁂𑀦 𑀧𑀦 𑀲𑀩𑁆𑀩𑀚𑁆𑀛𑀸𑀦𑁂𑀳𑀺 𑀯𑀼𑀝𑁆𑀞𑀸𑀦𑀁 𑀳𑁄𑀢𑀺, 𑀨𑀮𑀲𑀫𑀸𑀧𑀢𑁆𑀢𑀺𑀬𑀸 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀦𑀁 𑀳𑁄𑀢𑀺. 𑀢𑀁 𑀲𑀦𑁆𑀥𑀸𑀬 ‘‘𑀢𑀫𑁆𑀳𑀸 𑀢𑀫𑁆𑀳𑀸 𑀲𑀫𑀸𑀥𑀺𑀫𑁆𑀳𑀸 𑀯𑀼𑀝𑁆𑀞𑀸𑀦𑀫𑁆𑀧𑀺 𑀯𑀼𑀝𑁆𑀞𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀅𑀦𑁂𑀓𑀯𑀺𑀳𑀺𑀢𑀦𑁆𑀢𑀺𑀆𑀤𑀻𑀦𑀺 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁨.𑁪𑁦𑁨) 𑀯𑀡𑁆𑀡𑀺𑀢𑀸𑀦𑀺. 𑀆𑀲𑀯𑀓𑁆𑀔𑀬𑀜𑀸𑀡𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀢𑁆𑀣𑀫𑁂𑀯. 𑀧𑀼𑀭𑀺𑀫𑀲𑁆𑀲𑀸𑀧𑀺 𑀜𑀸𑀡𑀢𑁆𑀢𑀬𑀲𑁆𑀲 𑀯𑀺𑀢𑁆𑀣𑀸𑀭𑀓𑀣𑀁 𑀇𑀘𑁆𑀙𑀦𑁆𑀢𑁂𑀦 𑀫𑀚𑁆𑀛𑀺𑀫𑀝𑁆𑀞𑀓𑀣𑀸𑀬 𑀫𑀳𑀸𑀲𑀻𑀳𑀦𑀸𑀤𑀯𑀡𑁆𑀡𑀦𑀸 (𑀫. 𑀦𑀺. 𑀅𑀝𑁆𑀞. 𑁧.𑁧𑁪𑁬 𑀆𑀤𑀬𑁄) 𑀑𑀮𑁄𑀓𑁂𑀢𑀩𑁆𑀩𑀸. 𑀲𑀫𑀸𑀳𑀺𑀢𑀲𑁆𑀲𑀸𑀢𑀺 𑀏𑀓𑀕𑁆𑀕𑀘𑀺𑀢𑁆𑀢𑀲𑁆𑀲. 𑀲𑀫𑀸𑀥𑀺 𑀫𑀕𑁆𑀕𑁄𑀢𑀺 𑀲𑀫𑀸𑀥𑀺 𑀏𑀢𑁂𑀲𑀁 𑀜𑀸𑀡𑀸𑀦𑀁 𑀅𑀥𑀺𑀕𑀫𑀸𑀬 𑀉𑀧𑀸𑀬𑁄. 𑀅𑀲𑀫𑀸𑀥𑀻𑀢𑀺 𑀅𑀦𑁂𑀓𑀕𑁆𑀕𑀪𑀸𑀯𑁄. 𑀓𑀼𑀫𑁆𑀫𑀕𑁆𑀕𑁄𑀢𑀺 𑀫𑀺𑀘𑁆𑀙𑀸𑀫𑀕𑁆𑀕𑁄. 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀢𑀣𑀸𑀕𑀢𑀲𑁆𑀲 𑀜𑀸𑀡𑀩𑀮𑀁 𑀓𑀣𑀺𑀢𑀦𑁆𑀢𑀺.

𑀫𑀳𑀸𑀯𑀕𑁆𑀕𑁄 𑀙𑀝𑁆𑀞𑁄.

𑁭. 𑀤𑁂𑀯𑀢𑀸𑀯𑀕𑁆𑀕𑁄

𑁧-𑁩. 𑀅𑀦𑀸𑀕𑀸𑀫𑀺𑀨𑀮𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁬𑁫-𑁬𑁭. 𑀲𑀢𑁆𑀢𑀫𑀲𑁆𑀲 𑀧𑀞𑀫𑁂 𑀅𑀲𑁆𑀲𑀤𑁆𑀥𑀺𑀬𑀦𑁆𑀢𑀺 𑀅𑀲𑁆𑀲𑀤𑁆𑀥𑀪𑀸𑀯𑀁. 𑀤𑀼𑀧𑁆𑀧𑀜𑁆𑀜𑀢𑀦𑁆𑀢𑀺 𑀦𑀺𑀧𑁆𑀧𑀜𑁆𑀜𑀪𑀸𑀯𑀁. 𑀤𑀼𑀢𑀺𑀬𑁂 𑀧𑀫𑀸𑀤𑀦𑁆𑀢𑀺 𑀲𑀢𑀺𑀯𑀺𑀧𑁆𑀧𑀯𑀸𑀲𑀁. 𑀢𑀢𑀺𑀬𑁂 𑀆𑀪𑀺𑀲𑀫𑀸𑀘𑀸𑀭𑀺𑀓𑀦𑁆𑀢𑀺 𑀉𑀢𑁆𑀢𑀫𑀲𑀫𑀸𑀘𑀸𑀭𑀪𑀽𑀢𑀁 𑀯𑀢𑁆𑀢𑀯𑀲𑁂𑀦 𑀧𑀡𑁆𑀡𑀢𑁆𑀢𑀺𑀲𑀻𑀮𑀁. 𑀲𑁂𑀔𑀥𑀫𑁆𑀫𑀦𑁆𑀢𑀺 𑀲𑁂𑀔𑀧𑀡𑁆𑀡𑀢𑁆𑀢𑀺𑀲𑀻𑀮𑀁. 𑀲𑀻𑀮𑀸𑀦𑀻𑀢𑀺 𑀘𑀢𑁆𑀢𑀸𑀭𑀺 𑀫𑀳𑀸𑀲𑀻𑀮𑀸𑀦𑀺.

𑁪. 𑀲𑀗𑁆𑀕𑀡𑀺𑀓𑀸𑀭𑀸𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁬𑁮. 𑀘𑀢𑀼𑀢𑁆𑀣𑁂 𑀲𑀗𑁆𑀕𑀡𑀺𑀓𑀸𑀭𑀸𑀫𑁄𑀢𑀺 𑀕𑀡𑀲𑀗𑁆𑀕𑀡𑀺𑀓𑀸𑀭𑀸𑀫𑁄. 𑀲𑀼𑀢𑁆𑀢𑀦𑁆𑀢𑀺𑀓𑀕𑀡𑀸𑀤𑀻𑀲𑀼 𑀧𑀦 𑀕𑀡𑁂𑀲𑀼 𑀅𑀢𑁆𑀢𑀦𑁄 𑀯𑀸 𑀧𑀭𑀺𑀲𑀸𑀲𑀗𑁆𑀔𑀸𑀢𑁂 𑀕𑀡𑁂 𑀭𑀫𑀢𑀻𑀢𑀺 𑀕𑀡𑀸𑀭𑀸𑀫𑁄. 𑀧𑀯𑀺𑀯𑁂𑀓𑁂𑀢𑀺 𑀓𑀸𑀬𑀯𑀺𑀯𑁂𑀓𑁂. 𑀘𑀺𑀢𑁆𑀢𑀲𑁆𑀲 𑀦𑀺𑀫𑀺𑀢𑁆𑀢𑀦𑁆𑀢𑀺 𑀲𑀫𑀸𑀥𑀺𑀯𑀺𑀧𑀲𑁆𑀲𑀦𑀸𑀘𑀺𑀢𑁆𑀢𑀲𑁆𑀲 𑀦𑀺𑀫𑀺𑀢𑁆𑀢𑀁 𑀲𑀫𑀸𑀥𑀺𑀯𑀺𑀧𑀲𑁆𑀲𑀦𑀸𑀓𑀸𑀭𑀁. 𑀲𑀫𑁆𑀫𑀸𑀤𑀺𑀝𑁆𑀞𑀺𑀦𑁆𑀢𑀺 𑀯𑀺𑀧𑀲𑁆𑀲𑀦𑀸𑀲𑀫𑁆𑀫𑀸𑀤𑀺𑀝𑁆𑀞𑀺𑀁. 𑀲𑀫𑀸𑀥𑀺𑀦𑁆𑀢𑀺 𑀫𑀕𑁆𑀕𑀲𑀫𑀸𑀥𑀺𑀜𑁆𑀘𑁂𑀯 𑀨𑀮𑀲𑀫𑀸𑀥𑀺𑀜𑁆𑀘. 𑀲𑀁𑀬𑁄𑀚𑀦𑀸𑀦𑀻𑀢𑀺 𑀤𑀲 𑀲𑀁𑀬𑁄𑀚𑀦𑀸𑀦𑀺. 𑀦𑀺𑀩𑁆𑀩𑀸𑀦𑀦𑁆𑀢𑀺 𑀅𑀧𑀘𑁆𑀘𑀬𑀧𑀭𑀺𑀦𑀺𑀩𑁆𑀩𑀸𑀦𑀁.

𑁫. 𑀤𑁂𑀯𑀢𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁬𑁯. 𑀧𑀜𑁆𑀘𑀫𑁂 𑀲𑁄𑀯𑀘𑀲𑁆𑀲𑀢𑀸𑀢𑀺 𑀲𑀼𑀩𑁆𑀩𑀘𑀪𑀸𑀯𑁄. 𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑀸𑀢𑀺 𑀲𑀼𑀘𑀺𑀫𑀺𑀢𑁆𑀢𑀢𑀸. 𑀲𑀢𑁆𑀣𑀼𑀕𑀸𑀭𑀯𑁄𑀢𑀺 𑀲𑀢𑁆𑀣𑀭𑀺 𑀕𑀸𑀭𑀯𑀬𑀼𑀢𑁆𑀢𑁄. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣.

𑁬. 𑀲𑀫𑀸𑀥𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁭𑁦. 𑀙𑀝𑁆𑀞𑁂 𑀦 𑀲𑀦𑁆𑀢𑁂𑀦𑀸𑀢𑀺 𑀧𑀘𑁆𑀘𑀦𑀻𑀓𑀓𑀺𑀮𑁂𑀲𑁂𑀳𑀺 𑀅𑀯𑀽𑀧𑀲𑀦𑁆𑀢𑁂𑀦. 𑀦 𑀧𑀡𑀻𑀢𑁂𑀦𑀸𑀢𑀺 𑀦 𑀅𑀢𑀧𑁆𑀧𑀓𑁂𑀦. 𑀦 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀮𑀤𑁆𑀥𑁂𑀦𑀸𑀢𑀺 𑀓𑀺𑀮𑁂𑀲𑀧𑁆𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀬𑀸 𑀅𑀮𑀤𑁆𑀥𑁂𑀦 𑀅𑀧𑁆𑀧𑀢𑁆𑀢𑁂𑀦. 𑀦 𑀏𑀓𑁄𑀤𑀺𑀪𑀸𑀯𑀸𑀥𑀺𑀕𑀢𑁂𑀦𑀸𑀢𑀺 𑀦 𑀏𑀓𑀕𑁆𑀕𑀪𑀸𑀯𑀁 𑀉𑀧𑀕𑀢𑁂𑀦.

𑁭. 𑀲𑀓𑁆𑀔𑀺𑀪𑀩𑁆𑀩𑀲𑀼𑀢𑁆𑀢𑀯𑀡𑁆𑀡𑀦𑀸

𑁭𑁧. 𑀲𑀢𑁆𑀢𑀫𑁂 𑀢𑀢𑁆𑀭 𑀢𑀢𑁆𑀭𑀸𑀢𑀺 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀯𑀺𑀲𑁂𑀲𑁂. 𑀲𑀓𑁆𑀔𑀺𑀪𑀩𑁆𑀩𑀢𑀦𑁆𑀢𑀺 𑀧𑀘𑁆𑀘𑀓𑁆𑀔𑀪𑀸𑀯𑀁. 𑀆𑀬𑀢𑀦𑁂𑀢𑀺 𑀓𑀸𑀭𑀡𑁂. 𑀳𑀸𑀦𑀪𑀸𑀕𑀺𑀬𑀸𑀤𑀬𑁄 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁧.𑁩𑁯) 𑀲𑀁𑀯𑀡𑁆𑀡𑀺𑀢𑀸. 𑀅𑀲𑀓𑁆𑀓𑀘𑁆𑀘𑀓𑀸𑀭𑀻𑀢𑀺 𑀦 𑀲𑀼𑀓𑀢𑀓𑀸𑀭𑀻, 𑀦 𑀆𑀤𑀭𑀓𑀸𑀭𑀻. 𑀅𑀲𑀧𑁆𑀧𑀸𑀬𑀓𑀸𑀭𑀻𑀢𑀺 𑀦 𑀲𑀧𑁆𑀧𑀸𑀬𑀓𑀸𑀭𑀻, 𑀦 𑀉𑀧𑀓𑀸𑀭𑀪𑀽𑀢𑀥𑀫𑁆𑀫𑀓𑀸𑀭𑀻.

𑁮. 𑀩𑀮𑀲𑀼𑀢𑁆𑀢𑀯𑀡𑁆𑀡𑀦𑀸

𑁭𑁨. 𑀅𑀝𑁆𑀞𑀫𑁂 𑀩𑀮𑀢𑀦𑁆𑀢𑀺 𑀩𑀮𑀪𑀸𑀯𑀁 𑀣𑀸𑀫𑀪𑀸𑀯𑀁. 𑀅𑀲𑀸𑀢𑀘𑁆𑀘𑀓𑀸𑀭𑀻𑀢𑀺 𑀦 𑀲𑀢𑀢𑀓𑀸𑀭𑀻. 𑀲𑁂𑀲𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀫𑁂𑀯.

𑁯-𑁧𑁦. 𑀢𑀚𑁆𑀛𑀸𑀦𑀲𑀼𑀢𑁆𑀢𑀤𑁆𑀯𑀬𑀯𑀡𑁆𑀡𑀦𑀸

𑁭𑁩-𑁭𑁪. 𑀦𑀯𑀫𑁂 𑀦 𑀬𑀣𑀸𑀪𑀽𑀢𑀁 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀲𑀼𑀤𑀺𑀝𑁆𑀞𑁄 𑀳𑁄𑀢𑀻𑀢𑀺 𑀯𑀢𑁆𑀣𑀼𑀓𑀸𑀫𑀓𑀺𑀮𑁂𑀲𑀓𑀸𑀫𑁂𑀲𑀼 𑀆𑀤𑀻𑀦𑀯𑁄 𑀦 𑀬𑀣𑀸𑀲𑀪𑀸𑀯𑀢𑁄 𑀛𑀸𑀦𑀧𑀜𑁆𑀜𑀸𑀬 𑀲𑀼𑀤𑀺𑀝𑁆𑀞𑁄 𑀳𑁄𑀢𑀺. 𑀤𑀲𑀫𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀤𑁂𑀯𑀢𑀸𑀯𑀕𑁆𑀕𑁄 𑀲𑀢𑁆𑀢𑀫𑁄.

𑁮. 𑀅𑀭𑀳𑀢𑁆𑀢𑀯𑀕𑁆𑀕𑁄

𑁧. 𑀤𑀼𑀓𑁆𑀔𑀲𑀼𑀢𑁆𑀢𑀯𑀡𑁆𑀡𑀦𑀸

𑁭𑁫. 𑀅𑀝𑁆𑀞𑀫𑀲𑁆𑀲 𑀧𑀞𑀫𑁂 𑀲𑀯𑀺𑀖𑀸𑀢𑀦𑁆𑀢𑀺 𑀲𑀉𑀧𑀖𑀸𑀢𑀁 𑀲𑁄𑀧𑀤𑁆𑀤𑀯𑀁. 𑀲𑀧𑀭𑀺𑀴𑀸𑀳𑀦𑁆𑀢𑀺 𑀓𑀸𑀬𑀺𑀓𑀘𑁂𑀢𑀲𑀺𑀓𑁂𑀦 𑀧𑀭𑀺𑀴𑀸𑀳𑁂𑀦 𑀲𑀧𑀭𑀺𑀴𑀸𑀳𑀁. 𑀧𑀸𑀝𑀺𑀓𑀗𑁆𑀔𑀸𑀢𑀺 𑀇𑀘𑁆𑀙𑀺𑀢𑀩𑁆𑀩𑀸 𑀅𑀯𑀲𑁆𑀲𑀁𑀪𑀸𑀯𑀺𑀦𑀻.

𑁨. 𑀅𑀭𑀳𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁭𑁬. 𑀤𑀼𑀢𑀺𑀬𑁂 𑀫𑀸𑀦𑀦𑁆𑀢𑀺 𑀚𑀸𑀢𑀺𑀆𑀤𑀻𑀳𑀺 𑀫𑀜𑁆𑀜𑀦𑀁. 𑀑𑀫𑀸𑀦𑀦𑁆𑀢𑀺 𑀳𑀻𑀦𑁄𑀳𑀫𑀲𑁆𑀫𑀻𑀢𑀺 𑀫𑀸𑀦𑀁. 𑀅𑀢𑀺𑀫𑀸𑀦𑀦𑁆𑀢𑀺 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀧𑀯𑀢𑁆𑀢𑀁 𑀅𑀘𑁆𑀘𑀼𑀡𑁆𑀡𑀢𑀺𑀫𑀸𑀦𑀁. 𑀅𑀥𑀺𑀫𑀸𑀦𑀦𑁆𑀢𑀺 𑀅𑀥𑀺𑀕𑀢𑀫𑀸𑀦𑀁. 𑀣𑀫𑁆𑀪𑀦𑁆𑀢𑀺 𑀓𑁄𑀥𑀫𑀸𑀦𑁂𑀳𑀺 𑀣𑀤𑁆𑀥𑀪𑀸𑀯𑀁. 𑀅𑀢𑀺𑀦𑀺𑀧𑀸𑀢𑀦𑁆𑀢𑀺 𑀳𑀻𑀦𑀲𑁆𑀲 𑀳𑀻𑀦𑁄𑀳𑀫𑀲𑁆𑀫𑀻𑀢𑀺 𑀫𑀸𑀦𑀁.

𑁩. 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁭𑁭. 𑀢𑀢𑀺𑀬𑁂 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸𑀢𑀺 𑀫𑀦𑀼𑀲𑁆𑀲𑀥𑀫𑁆𑀫𑀢𑁄 𑀉𑀢𑁆𑀢𑀭𑀺. 𑀅𑀮𑀫𑀭𑀺𑀬𑀜𑀸𑀡𑀤𑀲𑁆𑀲𑀦𑀯𑀺𑀲𑁂𑀲𑀦𑁆𑀢𑀺 𑀅𑀭𑀺𑀬𑀪𑀸𑀯𑀁 𑀓𑀸𑀢𑀼𑀁 𑀲𑀫𑀢𑁆𑀣𑀁 𑀜𑀸𑀡𑀤𑀲𑁆𑀲𑀦𑀯𑀺𑀲𑁂𑀲𑀁, 𑀘𑀢𑁆𑀢𑀸𑀭𑁄 𑀫𑀕𑁆𑀕𑁂 𑀘𑀢𑁆𑀢𑀸𑀭𑀺 𑀘 𑀨𑀮𑀸𑀦𑀻𑀢𑀺 𑀅𑀢𑁆𑀣𑁄. 𑀓𑀼𑀳𑀦𑀦𑁆𑀢𑀺 𑀢𑀺𑀯𑀺𑀥𑀁 𑀓𑀼𑀳𑀦𑀯𑀢𑁆𑀣𑀼𑀁. 𑀮𑀧𑀦𑀦𑁆𑀢𑀺 𑀮𑀸𑀪𑀢𑁆𑀣𑀺𑀓𑀢𑀸𑀬 𑀉𑀓𑁆𑀔𑀺𑀧𑀺𑀢𑁆𑀯𑀸 𑀅𑀯𑀓𑁆𑀔𑀺𑀧𑀺𑀢𑁆𑀯𑀸 𑀯𑀸 𑀮𑀧𑀦𑀁.

𑁪. 𑀲𑀼𑀔𑀲𑁄𑀫𑀦𑀲𑁆𑀲𑀲𑀼𑀢𑁆𑀢𑀯𑀡𑁆𑀡𑀦𑀸

𑁭𑁮. 𑀘𑀢𑀼𑀢𑁆𑀣𑁂 𑀬𑁄𑀦𑀺 𑀘𑀲𑁆𑀲 𑀆𑀭𑀤𑁆𑀥𑀸 𑀳𑁄𑀢𑀻𑀢𑀺 𑀓𑀸𑀭𑀡𑀜𑁆𑀘𑀲𑁆𑀲 𑀧𑀭𑀺𑀧𑀼𑀡𑁆𑀡𑀁 𑀧𑀕𑁆𑀕𑀳𑀺𑀢𑀁 𑀳𑁄𑀢𑀺. 𑀥𑀫𑁆𑀫𑀸𑀭𑀸𑀫𑁄𑀢𑀺 𑀥𑀫𑁆𑀫𑁂 𑀭𑀢𑀺𑀁 𑀯𑀺𑀦𑁆𑀤𑀢𑀺. 𑀪𑀸𑀯𑀦𑀸𑀬 𑀭𑀫𑀢𑀺, 𑀪𑀸𑀯𑁂𑀦𑁆𑀢𑁄 𑀯𑀸 𑀭𑀫𑀢𑀻𑀢𑀺 𑀪𑀸𑀯𑀦𑀸𑀭𑀸𑀫𑁄. 𑀧𑀳𑀸𑀦𑁂 𑀭𑀫𑀢𑀺, 𑀧𑀚𑀳𑀦𑁆𑀢𑁄 𑀯𑀸 𑀭𑀫𑀢𑀻𑀢𑀺 𑀧𑀳𑀸𑀦𑀸𑀭𑀸𑀫𑁄. 𑀢𑀺𑀯𑀺𑀥𑁂 𑀧𑀯𑀺𑀯𑁂𑀓𑁂 𑀭𑀫𑀢𑀻𑀢𑀺 𑀧𑀯𑀺𑀯𑁂𑀓𑀸𑀭𑀸𑀫𑁄. 𑀅𑀩𑁆𑀬𑀸𑀧𑀚𑁆𑀛𑁂 𑀦𑀺𑀤𑁆𑀤𑀼𑀓𑁆𑀔𑀪𑀸𑀯𑁂 𑀭𑀫𑀢𑀻𑀢𑀺 𑀅𑀩𑁆𑀬𑀸𑀧𑀚𑁆𑀛𑀸𑀭𑀸𑀫𑁄. 𑀦𑀺𑀧𑁆𑀧𑀧𑀜𑁆𑀘𑀲𑀗𑁆𑀔𑀸𑀢𑁂 𑀦𑀺𑀩𑁆𑀩𑀸𑀦𑁂 𑀭𑀫𑀢𑀻𑀢𑀺 𑀦𑀺𑀧𑁆𑀧𑀧𑀜𑁆𑀘𑀸𑀭𑀸𑀫𑁄.

𑁫. 𑀅𑀥𑀺𑀕𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁭𑁯. 𑀧𑀜𑁆𑀘𑀫𑁂 𑀦 𑀆𑀬𑀓𑀼𑀲𑀮𑁄𑀢𑀺 𑀦 𑀆𑀕𑀫𑀦𑀓𑀼𑀲𑀮𑁄. 𑀦 𑀅𑀧𑀸𑀬𑀓𑀼𑀲𑀮𑁄𑀢𑀺 𑀦 𑀅𑀧𑀕𑀫𑀦𑀓𑀼𑀲𑀮𑁄. 𑀙𑀦𑁆𑀤𑀦𑁆𑀢𑀺 𑀓𑀢𑁆𑀢𑀼𑀓𑀫𑁆𑀬𑀢𑀸𑀙𑀦𑁆𑀤𑀁. 𑀦 𑀆𑀭𑀓𑁆𑀔𑀢𑀻𑀢𑀺 𑀦 𑀭𑀓𑁆𑀔𑀢𑀺.

𑁬. 𑀫𑀳𑀦𑁆𑀢𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁦. 𑀙𑀝𑁆𑀞𑁂 𑀆𑀮𑁄𑀓𑀩𑀳𑀼𑀮𑁄𑀢𑀺 𑀜𑀸𑀡𑀸𑀮𑁄𑀓𑀩𑀳𑀼𑀮𑁄. 𑀬𑁄𑀕𑀩𑀳𑀼𑀮𑁄𑀢𑀺 𑀬𑁄𑀕𑁂 𑀩𑀳𑀼𑀮𑀁 𑀓𑀭𑁄𑀢𑀺. 𑀯𑁂𑀤𑀩𑀳𑀼𑀮𑁄𑀢𑀺 𑀧𑀻𑀢𑀺𑀧𑀸𑀫𑁄𑀚𑁆𑀚𑀩𑀳𑀼𑀮𑁄. 𑀅𑀲𑀦𑁆𑀢𑀼𑀝𑁆𑀞𑀺𑀩𑀳𑀼𑀮𑁄𑀢𑀺 𑀓𑀼𑀲𑀮𑀥𑀫𑁆𑀫𑁂𑀲𑀼 𑀅𑀲𑀦𑁆𑀢𑀼𑀝𑁆𑀞𑁄. 𑀅𑀦𑀺𑀓𑁆𑀔𑀺𑀢𑁆𑀢𑀥𑀼𑀭𑁄𑀢𑀺 𑀅𑀝𑁆𑀞𑀧𑀺𑀢𑀥𑀼𑀭𑁄 𑀧𑀕𑁆𑀕𑀳𑀺𑀢𑀯𑀻𑀭𑀺𑀬𑁄. 𑀉𑀢𑁆𑀢𑀭𑀺 𑀘 𑀧𑀢𑀸𑀭𑁂𑀢𑀻𑀢𑀺 𑀲𑀫𑁆𑀧𑀢𑀺 𑀘 𑀉𑀢𑁆𑀢𑀭𑀺𑀜𑁆𑀘 𑀯𑀻𑀭𑀺𑀬𑀁 𑀓𑀭𑁄𑀢𑁂𑀯. 𑀲𑀢𑁆𑀢𑀫𑀁 𑀉𑀢𑁆𑀢𑀸𑀦𑀫𑁂𑀯.

𑁮-𑁧𑁦. 𑀤𑀼𑀢𑀺𑀬𑀦𑀺𑀭𑀬𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁮𑁨-𑁮𑁪. 𑀅𑀝𑁆𑀞𑀫𑁂 𑀧𑀕𑀩𑁆𑀪𑁄𑀢𑀺 𑀓𑀸𑀬𑀧𑀸𑀕𑀩𑁆𑀪𑀺𑀬𑀸𑀤𑀻𑀳𑀺 𑀲𑀫𑀦𑁆𑀦𑀸𑀕𑀢𑁄. 𑀦𑀯𑀫𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯. 𑀤𑀲𑀫𑁂 𑀯𑀺𑀖𑀸𑀢𑀯𑀸𑀢𑀺 𑀫𑀳𑀺𑀘𑁆𑀙𑀢𑀁 𑀦𑀺𑀲𑁆𑀲𑀸𑀬 𑀉𑀧𑁆𑀧𑀦𑁆𑀦𑁂𑀦 𑀮𑁄𑀪𑀤𑀼𑀓𑁆𑀔𑁂𑀦 𑀤𑀼𑀓𑁆𑀔𑀺𑀢𑁄. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀅𑀭𑀳𑀢𑁆𑀢𑀯𑀕𑁆𑀕𑁄 𑀅𑀝𑁆𑀞𑀫𑁄.

𑁯. 𑀲𑀻𑀢𑀺𑀯𑀕𑁆𑀕𑁄

𑁧. 𑀲𑀻𑀢𑀺𑀪𑀸𑀯𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁫. 𑀦𑀯𑀫𑀲𑁆𑀲 𑀧𑀞𑀫𑁂 𑀲𑀻𑀢𑀺𑀪𑀸𑀯𑀦𑁆𑀢𑀺 𑀲𑀻𑀢𑀮𑀪𑀸𑀯𑀁. 𑀬𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀁 𑀦𑀺𑀕𑁆𑀕𑀡𑁆𑀳𑀺𑀢𑀩𑁆𑀩𑀦𑁆𑀢𑀺𑀆𑀤𑀻𑀲𑀼 𑀉𑀤𑁆𑀥𑀘𑁆𑀘𑀲𑀫𑀬𑁂 𑀘𑀺𑀢𑁆𑀢𑀁 𑀲𑀫𑀸𑀥𑀺𑀦𑀸 𑀦𑀺𑀕𑁆𑀕𑀳𑁂𑀢𑀩𑁆𑀩𑀁 𑀦𑀸𑀫, 𑀓𑁄𑀲𑀚𑁆𑀚𑀸𑀦𑀼𑀧𑀢𑀺𑀢𑀓𑀸𑀮𑁂 𑀯𑀻𑀭𑀺𑀬𑁂𑀦 𑀧𑀕𑁆𑀕𑀳𑁂𑀢𑀩𑁆𑀩𑀁 𑀦𑀸𑀫, 𑀦𑀺𑀭𑀲𑁆𑀲𑀸𑀤𑀕𑀢𑀓𑀸𑀮𑁂 𑀲𑀫𑀸𑀥𑀺𑀦𑀸 𑀲𑀫𑁆𑀧𑀳𑀁𑀲𑀺𑀢𑀩𑁆𑀩𑀁 𑀦𑀸𑀫, 𑀲𑀫𑀧𑁆𑀧𑀯𑀢𑁆𑀢𑀓𑀸𑀮𑁂 𑀩𑁄𑀚𑁆𑀛𑀗𑁆𑀕𑀼𑀧𑁂𑀓𑁆𑀔𑀸𑀬 𑀅𑀚𑁆𑀛𑀼𑀧𑁂𑀓𑁆𑀔𑀺𑀢𑀩𑁆𑀩𑀁 𑀦𑀸𑀫.

𑁨. 𑀆𑀯𑀭𑀡𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁬. 𑀤𑀼𑀢𑀺𑀬𑁂 𑀓𑀫𑁆𑀫𑀸𑀯𑀭𑀡𑀢𑀸𑀬𑀸𑀢𑀺 𑀧𑀜𑁆𑀘𑀸𑀦𑀦𑁆𑀢𑀭𑀺𑀬𑀓𑀫𑁆𑀫𑁂𑀳𑀺. 𑀓𑀺𑀮𑁂𑀲𑀸𑀯𑀭𑀡𑀢𑀸𑀬𑀸𑀢𑀺 𑀦𑀺𑀬𑀢𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑀸. 𑀯𑀺𑀧𑀸𑀓𑀸𑀯𑀭𑀡𑀢𑀸𑀬𑀸𑀢𑀺 𑀅𑀓𑀼𑀲𑀮𑀯𑀺𑀧𑀸𑀓𑀧𑀝𑀺𑀲𑀦𑁆𑀥𑀺𑀬𑀸 𑀯𑀸 𑀓𑀼𑀲𑀮𑀯𑀺𑀧𑀸𑀓𑁂𑀳𑀺 𑀅𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀬𑀸 𑀯𑀸𑀢𑀺.

𑁪-𑁫. 𑀲𑀼𑀲𑁆𑀲𑀽𑀲𑀢𑀺𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁮𑁮-𑁮𑁯. 𑀘𑀢𑀼𑀢𑁆𑀣𑁂 𑀅𑀦𑀢𑁆𑀣𑀦𑁆𑀢𑀺 𑀅𑀯𑀟𑁆𑀠𑀺𑀁. 𑀅𑀢𑁆𑀣𑀁 𑀭𑀺𑀜𑁆𑀘𑀢𑀻𑀢𑀺 𑀯𑀟𑁆𑀠𑀺𑀅𑀢𑁆𑀣𑀁 𑀙𑀟𑁆𑀟𑁂𑀢𑀺. 𑀅𑀦𑀦𑀼𑀮𑁄𑀫𑀺𑀓𑀸𑀬𑀸𑀢𑀺 𑀲𑀸𑀲𑀦𑀲𑁆𑀲 𑀅𑀦𑀦𑀼𑀮𑁄𑀫𑀺𑀓𑀸𑀬. 𑀧𑀜𑁆𑀘𑀫𑁂 𑀤𑀺𑀝𑁆𑀞𑀺𑀲𑀫𑁆𑀧𑀤𑀦𑁆𑀢𑀺 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀁.

𑁮-𑁧𑁧. 𑀅𑀪𑀩𑁆𑀩𑀝𑁆𑀞𑀸𑀦𑀲𑀼𑀢𑁆𑀢𑀘𑀢𑀼𑀓𑁆𑀓𑀯𑀡𑁆𑀡𑀦𑀸

𑁯𑁨-𑁯𑁫. 𑀅𑀝𑁆𑀞𑀫𑁂 𑀅𑀦𑀸𑀕𑀫𑀦𑀻𑀬𑀁 𑀯𑀢𑁆𑀣𑀼𑀦𑁆𑀢𑀺 𑀅𑀦𑀼𑀧𑀕𑀦𑁆𑀢𑀩𑁆𑀩𑀁 𑀓𑀸𑀭𑀡𑀁, 𑀧𑀜𑁆𑀘𑀦𑁆𑀦𑀁 𑀯𑁂𑀭𑀸𑀦𑀁 𑀤𑁆𑀯𑀸𑀲𑀝𑁆𑀞𑀺𑀬𑀸 𑀘 𑀤𑀺𑀝𑁆𑀞𑀺𑀕𑀢𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀁. 𑀅𑀝𑁆𑀞𑀫𑀁 𑀪𑀯𑀦𑁆𑀢𑀺 𑀓𑀸𑀫𑀸𑀯𑀘𑀭𑁂 𑀅𑀝𑁆𑀞𑀫𑀁 𑀧𑀝𑀺𑀲𑀦𑁆𑀥𑀺𑀁. 𑀦𑀯𑀫𑁂 𑀓𑁄𑀢𑀽𑀳𑀮𑀫𑀗𑁆𑀕𑀮𑁂𑀦𑀸𑀢𑀺 𑀤𑀺𑀝𑁆𑀞𑀲𑀼𑀢𑀫𑀼𑀢𑀫𑀗𑁆𑀕𑀮𑁂𑀦. 𑀤𑀲𑀫𑁂 𑀲𑀬𑀁𑀓𑀢𑀦𑁆𑀢𑀺𑀆𑀤𑀻𑀦𑀺 𑀅𑀢𑁆𑀢𑀤𑀺𑀝𑁆𑀞𑀺𑀯𑀲𑁂𑀦 𑀯𑀼𑀢𑁆𑀢𑀸𑀦𑀺. 𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀦𑁆𑀢𑀺 𑀅𑀳𑁂𑀢𑀼𑀦𑀺𑀩𑁆𑀩𑀢𑁆𑀢𑀁. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀲𑀻𑀢𑀺𑀯𑀕𑁆𑀕𑁄 𑀦𑀯𑀫𑁄.

𑁧𑁦. 𑀆𑀦𑀺𑀲𑀁𑀲𑀯𑀕𑁆𑀕𑁄

𑁧-𑁨. 𑀧𑀸𑀢𑀼𑀪𑀸𑀯𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁯𑁬-𑁯𑁭. 𑀤𑀲𑀫𑀲𑁆𑀲 𑀧𑀞𑀫𑁂 𑀅𑀭𑀺𑀬𑀸𑀬𑀢𑀦𑁂𑀢𑀺 𑀫𑀚𑁆𑀛𑀺𑀫𑀤𑁂𑀲𑁂. 𑀇𑀦𑁆𑀤𑁆𑀭𑀺𑀬𑀸𑀦𑀦𑁆𑀢𑀺 𑀫𑀦𑀘𑁆𑀙𑀝𑁆𑀞𑀸𑀦𑀁. 𑀤𑀼𑀢𑀺𑀬𑁂 𑀲𑀤𑁆𑀥𑀫𑁆𑀫𑀦𑀺𑀬𑀢𑁄𑀢𑀺 𑀲𑀸𑀲𑀦𑀲𑀤𑁆𑀥𑀫𑁆𑀫𑁂 𑀦𑀺𑀬𑀢𑁄. 𑀅𑀲𑀸𑀥𑀸𑀭𑀡𑁂𑀦𑀸𑀢𑀺 𑀧𑀼𑀣𑀼𑀚𑁆𑀚𑀦𑁂𑀳𑀺 𑀅𑀲𑀸𑀥𑀸𑀭𑀡𑁂𑀦.

𑁭. 𑀅𑀦𑀯𑀢𑁆𑀣𑀺𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁨. 𑀲𑀢𑁆𑀢𑀫𑁂 𑀅𑀦𑁄𑀥𑀺𑀁 𑀓𑀭𑀺𑀢𑁆𑀯𑀸𑀢𑀺 ‘‘𑀏𑀢𑁆𑀢𑀓𑀸𑀯 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀸, 𑀦 𑀇𑀢𑁄 𑀧𑀭𑁂’’𑀢𑀺 𑀏𑀯𑀁 𑀲𑀻𑀫𑀁 𑀫𑀭𑀺𑀬𑀸𑀤𑀁 𑀅𑀓𑀢𑁆𑀯𑀸. 𑀅𑀦𑀯𑀢𑁆𑀣𑀺𑀢𑀸𑀢𑀺 𑀅𑀯𑀢𑁆𑀣𑀺𑀢𑀸𑀬 𑀭𑀳𑀺𑀢𑀸, 𑀪𑀺𑀚𑁆𑀚𑀫𑀸𑀦𑀸𑀯 𑀳𑀼𑀢𑁆𑀯𑀸 𑀉𑀧𑀝𑁆𑀞𑀳𑀺𑀲𑁆𑀲𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀲𑀩𑁆𑀩𑀮𑁄𑀓𑁂𑀢𑀺 𑀲𑀓𑀮𑁂 𑀢𑁂𑀥𑀸𑀢𑀼𑀓𑁂. 𑀲𑀸𑀫𑀜𑁆𑀜𑁂𑀦𑀸𑀢𑀺 𑀲𑀫𑀡𑀪𑀸𑀯𑁂𑀦, 𑀅𑀭𑀺𑀬𑀫𑀕𑁆𑀕𑁂𑀦𑀸𑀢𑀺 𑀅𑀢𑁆𑀣𑁄.

𑁮. 𑀉𑀓𑁆𑀔𑀺𑀢𑁆𑀢𑀸𑀲𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁩. 𑀅𑀝𑁆𑀞𑀫𑁂 𑀫𑁂𑀢𑁆𑀢𑀸𑀯𑀢𑀸𑀬𑀸𑀢𑀺 𑀫𑁂𑀢𑁆𑀢𑀸𑀬𑀼𑀢𑁆𑀢𑀸𑀬 𑀧𑀸𑀭𑀺𑀘𑀭𑀺𑀬𑀸𑀬. 𑀲𑀢𑁆𑀢 𑀳𑀺 𑀲𑁂𑀔𑀸 𑀢𑀣𑀸𑀕𑀢𑀁 𑀫𑁂𑀢𑁆𑀢𑀸𑀯𑀢𑀸𑀬 𑀧𑀭𑀺𑀘𑀭𑀦𑁆𑀢𑀺, 𑀔𑀻𑀡𑀸𑀲𑀯𑁄 𑀧𑀭𑀺𑀘𑀺𑀡𑁆𑀡𑀲𑀢𑁆𑀣𑀼𑀓𑁄.

𑁯. 𑀅𑀢𑀫𑁆𑀫𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁪. 𑀦𑀯𑀫𑁂 𑀅𑀢𑀫𑁆𑀫𑀬𑁄𑀢𑀺 𑀢𑀫𑁆𑀫𑀬𑀸 𑀯𑀼𑀘𑁆𑀘𑀦𑁆𑀢𑀺 𑀢𑀡𑁆𑀳𑀸𑀤𑀺𑀝𑁆𑀞𑀺𑀬𑁄, 𑀢𑀸𑀳𑀺 𑀭𑀳𑀺𑀢𑁄. 𑀅𑀳𑀁𑀓𑀸𑀭𑀸𑀢𑀺 𑀅𑀳𑀁𑀓𑀸𑀭𑀤𑀺𑀝𑁆𑀞𑀺. 𑀫𑀫𑀁𑀓𑀸𑀭𑀸𑀢𑀺 𑀫𑀫𑀁𑀓𑀸𑀭𑀢𑀡𑁆𑀳𑀸. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀆𑀦𑀺𑀲𑀁𑀲𑀯𑀕𑁆𑀕𑁄 𑀤𑀲𑀫𑁄.

𑀤𑀼𑀢𑀺𑀬𑀧𑀡𑁆𑀡𑀸𑀲𑀓𑀁 𑀦𑀺𑀝𑁆𑀞𑀺𑀢𑀁.