𑁧𑁦. 𑀓𑀓𑀼𑀥𑀣𑁂𑀭𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁦. 𑀤𑀲𑀫𑁂 𑀅𑀢𑁆𑀢𑀪𑀸𑀯𑀧𑀝𑀺𑀮𑀸𑀪𑁄𑀢𑀺 𑀲𑀭𑀻𑀭𑀧𑀝𑀺𑀮𑀸𑀪𑁄. 𑀤𑁆𑀯𑁂 𑀯𑀸 𑀢𑀻𑀡𑀺 𑀯𑀸 𑀫𑀸𑀕𑀥𑀓𑀸𑀦𑀺 𑀕𑀸𑀫𑀓𑁆𑀔𑁂𑀢𑁆𑀢𑀸𑀦𑀻𑀢𑀺 𑀏𑀢𑁆𑀣 𑀫𑀸𑀕𑀥𑀺𑀓𑀁 𑀕𑀸𑀫𑀓𑁆𑀔𑁂𑀢𑁆𑀢𑀁 𑀅𑀢𑁆𑀣𑀺 𑀔𑀼𑀤𑁆𑀤𑀓𑀁, 𑀅𑀢𑁆𑀣𑀺 𑀫𑀚𑁆𑀛𑀺𑀫𑀁, 𑀅𑀢𑁆𑀣𑀺 𑀫𑀳𑀦𑁆𑀢𑀁. 𑀔𑀼𑀤𑁆𑀤𑀓𑀁 𑀕𑀸𑀫𑀓𑁆𑀔𑁂𑀢𑁆𑀢𑀁 𑀇𑀢𑁄 𑀘𑀢𑁆𑀢𑀸𑀮𑀻𑀲𑀁 𑀉𑀲𑀪𑀸𑀦𑀺, 𑀇𑀢𑁄 𑀘𑀢𑁆𑀢𑀸𑀮𑀻𑀲𑀦𑁆𑀢𑀺 𑀕𑀸𑀯𑀼𑀢𑀁 𑀳𑁄𑀢𑀺, 𑀫𑀚𑁆𑀛𑀺𑀫𑀁 𑀇𑀢𑁄 𑀕𑀸𑀯𑀼𑀢𑀁, 𑀇𑀢𑁄 𑀕𑀸𑀯𑀼𑀢𑀦𑁆𑀢𑀺 𑀅𑀟𑁆𑀠𑀬𑁄𑀚𑀦𑀁 𑀳𑁄𑀢𑀺, 𑀫𑀳𑀦𑁆𑀢𑀁 𑀇𑀢𑁄 𑀤𑀺𑀬𑀟𑁆𑀠𑀕𑀸𑀯𑀼𑀢𑀁, 𑀇𑀢𑁄 𑀤𑀺𑀬𑀟𑁆𑀠𑀕𑀸𑀯𑀼𑀢𑀦𑁆𑀢𑀺 𑀢𑀺𑀕𑀸𑀯𑀼𑀢𑀁 𑀳𑁄𑀢𑀺. 𑀢𑁂𑀲𑀼 𑀔𑀼𑀤𑁆𑀤𑀓𑁂𑀦 𑀕𑀸𑀫𑀓𑁆𑀔𑁂𑀢𑁆𑀢𑁂𑀦 𑀢𑀻𑀡𑀺, 𑀔𑀼𑀤𑁆𑀤𑀓𑁂𑀦 𑀘 𑀫𑀚𑁆𑀛𑀺𑀫𑁂𑀦 𑀘 𑀤𑁆𑀯𑁂 𑀕𑀸𑀫𑀓𑁆𑀔𑁂𑀢𑁆𑀢𑀸𑀦𑀺 𑀢𑀲𑁆𑀲 𑀅𑀢𑁆𑀢𑀪𑀸𑀯𑁄. 𑀢𑀺𑀕𑀸𑀯𑀼𑀢𑀜𑁆𑀳𑀺𑀲𑁆𑀲 𑀲𑀭𑀻𑀭𑀁. 𑀧𑀭𑀺𑀳𑀭𑀺𑀲𑁆𑀲𑀸𑀫𑀻𑀢𑀺 𑀧𑀝𑀺𑀚𑀕𑁆𑀕𑀺𑀲𑁆𑀲𑀸𑀫𑀺 𑀕𑁄𑀧𑀬𑀺𑀲𑁆𑀲𑀸𑀫𑀺. 𑀭𑀓𑁆𑀔𑀲𑁆𑀲𑁂𑀢𑀦𑁆𑀢𑀺 𑀭𑀓𑁆𑀔𑀲𑁆𑀲𑀼 𑀏𑀢𑀁. 𑀫𑁄𑀖𑀧𑀼𑀭𑀺𑀲𑁄𑀢𑀺 𑀢𑀼𑀘𑁆𑀙𑀧𑀼𑀭𑀺𑀲𑁄. 𑀦𑀸𑀲𑁆𑀲𑀲𑁆𑀲𑀸𑀢𑀺 𑀦 𑀏𑀢𑀲𑁆𑀲 𑀪𑀯𑁂𑀬𑁆𑀬. 𑀲𑀫𑀼𑀤𑀸𑀘𑀭𑁂𑀬𑁆𑀬𑀸𑀫𑀸𑀢𑀺 𑀓𑀣𑁂𑀬𑁆𑀬𑀸𑀫. 𑀲𑀫𑁆𑀫𑀦𑁆𑀦𑀢𑀻𑀢𑀺 𑀲𑀫𑁆𑀫𑀸𑀦𑀁 𑀓𑀭𑁄𑀢𑀺. 𑀬𑀁 𑀢𑀼𑀫𑁄 𑀓𑀭𑀺𑀲𑁆𑀲𑀢𑀺 𑀢𑀼𑀫𑁄𑀯 𑀢𑁂𑀦 𑀧𑀜𑁆𑀜𑀸𑀬𑀺𑀲𑁆𑀲𑀢𑀻𑀢𑀺 𑀬𑀁 𑀏𑀲 𑀓𑀭𑀺𑀲𑁆𑀲𑀢𑀺, 𑀏𑀲𑁄𑀯 𑀢𑁂𑀦 𑀓𑀫𑁆𑀫𑁂𑀦 𑀧𑀸𑀓𑀝𑁄 𑀪𑀯𑀺𑀲𑁆𑀲𑀢𑀺. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀓𑀓𑀼𑀥𑀯𑀕𑁆𑀕𑁄 𑀧𑀜𑁆𑀘𑀫𑁄.