𑁩. 𑀢𑀢𑀺𑀬𑀧𑀡𑁆𑀡𑀸𑀲𑀓𑀁

(𑁧𑁧) 𑁧. 𑀨𑀸𑀲𑀼𑀯𑀺𑀳𑀸𑀭𑀯𑀕𑁆𑀕𑁄

𑁧. 𑀲𑀸𑀭𑀚𑁆𑀚𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁧. 𑀢𑀢𑀺𑀬𑀲𑁆𑀲 𑀧𑀞𑀫𑁂 𑀯𑁂𑀲𑀸𑀭𑀚𑁆𑀚𑀓𑀭𑀡𑀸𑀢𑀺 𑀯𑀺𑀲𑀸𑀭𑀤𑀪𑀸𑀯𑀸𑀯𑀳𑀸. 𑀲𑀸𑀭𑀚𑁆𑀚𑀁 𑀳𑁄𑀢𑀻𑀢𑀺 𑀤𑁄𑀫𑀦𑀲𑁆𑀲𑀁 𑀳𑁄𑀢𑀺.

𑁨. 𑀉𑀲𑁆𑀲𑀗𑁆𑀓𑀺𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁨. 𑀤𑀼𑀢𑀺𑀬𑁂 𑀉𑀲𑁆𑀲𑀗𑁆𑀓𑀺𑀢𑀧𑀭𑀺𑀲𑀗𑁆𑀓𑀺𑀢𑁄𑀢𑀺 𑀉𑀲𑁆𑀲𑀗𑁆𑀓𑀺𑀢𑁄 𑀘 𑀧𑀭𑀺𑀲𑀗𑁆𑀓𑀺𑀢𑁄 𑀘. 𑀅𑀧𑀺 𑀅𑀓𑀼𑀧𑁆𑀧𑀥𑀫𑁆𑀫𑁄𑀧𑀻𑀢𑀺 𑀅𑀧𑀺 𑀅𑀓𑀼𑀧𑁆𑀧𑀥𑀫𑁆𑀫𑁄 𑀔𑀻𑀡𑀸𑀲𑀯𑁄 𑀲𑀫𑀸𑀦𑁄𑀧𑀺 𑀧𑀭𑁂𑀳𑀺 𑀧𑀸𑀧𑀪𑀺𑀓𑁆𑀔𑀽𑀳𑀺 𑀉𑀲𑁆𑀲𑀗𑁆𑀓𑀺𑀢𑀧𑀭𑀺𑀲𑀗𑁆𑀓𑀺𑀢𑁄 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀯𑁂𑀲𑀺𑀬𑀸𑀕𑁄𑀘𑀭𑁄𑀢𑀺𑀆𑀤𑀻𑀲𑀼 𑀯𑁂𑀲𑀺𑀬𑀸 𑀯𑀼𑀘𑁆𑀘𑀦𑁆𑀢𑀺 𑀭𑀽𑀧𑀽𑀧𑀚𑀻𑀯𑀺𑀦𑀺𑀬𑁄, 𑀢𑀸 𑀕𑁄𑀘𑀭𑁄 𑀅𑀲𑁆𑀲𑀸𑀢𑀺 𑀯𑁂𑀲𑀺𑀬𑀸𑀕𑁄𑀘𑀭𑁄, 𑀢𑀸𑀲𑀁 𑀕𑁂𑀳𑀁 𑀅𑀪𑀺𑀡𑁆𑀳𑀕𑀫𑀦𑁄𑀢𑀺 𑀅𑀢𑁆𑀣𑁄. 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀢𑀢𑁆𑀣 𑀧𑀦 𑀯𑀺𑀥𑀯𑀸𑀢𑀺 𑀫𑀢𑀧𑀢𑀺𑀓𑀸. 𑀣𑀼𑀮𑁆𑀮𑀓𑀼𑀫𑀸𑀭𑀺𑀓𑀸𑀢𑀺 𑀫𑀳𑀮𑁆𑀮𑀺𑀓𑀓𑀼𑀫𑀸𑀭𑀺𑀓𑀸𑀬𑁄.

𑁩. 𑀫𑀳𑀸𑀘𑁄𑀭𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁩. 𑀢𑀢𑀺𑀬𑁂 𑀇𑀢𑁄 𑀪𑁄𑀕𑁂𑀦 𑀧𑀝𑀺𑀲𑀦𑁆𑀣𑀭𑀺𑀲𑁆𑀲𑀸𑀫𑀻𑀢𑀺 𑀇𑀢𑁄 𑀫𑀫 𑀲𑀸𑀧𑀢𑁂𑀬𑁆𑀬𑀢𑁄 𑀪𑁄𑀕𑀁 𑀕𑀳𑁂𑀢𑁆𑀯𑀸 𑀢𑁂𑀦 𑀧𑀝𑀺𑀲𑀦𑁆𑀣𑀸𑀭𑀁 𑀓𑀭𑀺𑀲𑁆𑀲𑀸𑀫𑀺, 𑀢𑀲𑁆𑀲 𑀘 𑀫𑀫 𑀘 𑀅𑀦𑁆𑀢𑀭𑀁 𑀧𑀺𑀤𑀳𑀺𑀲𑁆𑀲𑀸𑀫𑀻𑀢𑀺 𑀅𑀢𑁆𑀣𑁄. 𑀕𑀳𑀡𑀸𑀦𑀻𑀢𑀺 𑀧𑀭𑀲𑀦𑁆𑀢𑀓𑀸𑀦𑀁 𑀪𑀡𑁆𑀟𑀸𑀦𑀁 𑀕𑀳𑀡𑀸𑀦𑀺. 𑀕𑀼𑀬𑁆𑀳𑀫𑀦𑁆𑀢𑀸𑀢𑀺 𑀕𑀼𑀳𑀺𑀢𑀩𑁆𑀩𑀫𑀦𑁆𑀢𑀸. 𑀅𑀦𑁆𑀢𑀕𑁆𑀕𑀸𑀳𑀺𑀓𑀸𑀬𑀸𑀢𑀺 𑀲𑀲𑁆𑀲𑀢𑀁 𑀯𑀸 𑀉𑀘𑁆𑀙𑁂𑀤𑀁 𑀯𑀸 𑀕𑀳𑁂𑀢𑁆𑀯𑀸 𑀞𑀺𑀢𑀸𑀬. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯. 𑀘𑀢𑀼𑀢𑁆𑀣𑁂 𑀲𑀩𑁆𑀩𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀫𑁂𑀯.

𑁫. 𑀨𑀸𑀲𑀼𑀯𑀺𑀳𑀸𑀭𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁫. 𑀧𑀜𑁆𑀘𑀫𑁂 𑀫𑁂𑀢𑁆𑀢𑀁 𑀓𑀸𑀬𑀓𑀫𑁆𑀫𑀦𑁆𑀢𑀺 𑀫𑁂𑀢𑁆𑀢𑀘𑀺𑀢𑁆𑀢𑁂𑀦 𑀧𑀯𑀢𑁆𑀢𑀺𑀢𑀁 𑀓𑀸𑀬𑀓𑀫𑁆𑀫𑀁. 𑀆𑀯𑀺 𑀘𑁂𑀯 𑀭𑀳𑁄 𑀘𑀸𑀢𑀺 𑀲𑀫𑁆𑀫𑀼𑀔𑁂 𑀘𑁂𑀯 𑀧𑀭𑀫𑁆𑀫𑀼𑀔𑁂 𑀘. 𑀇𑀢𑀭𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀬𑀸𑀦𑀺 𑀢𑀸𑀦𑀺 𑀲𑀻𑀮𑀸𑀦𑀻𑀢𑀺𑀆𑀤𑀺 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀯𑀲𑁂𑀦 𑀯𑀼𑀢𑁆𑀢𑀁. 𑀲𑀫𑀸𑀥𑀺𑀲𑀁𑀯𑀢𑁆𑀢𑀦𑀺𑀓𑀸𑀦𑀻𑀢𑀺 𑀫𑀕𑁆𑀕𑀲𑀫𑀸𑀥𑀺𑀨𑀮𑀲𑀫𑀸𑀥𑀺𑀦𑀺𑀩𑁆𑀩𑀢𑁆𑀢𑀓𑀸𑀦𑀺. 𑀲𑀻𑀮𑀲𑀸𑀫𑀜𑁆𑀜𑀕𑀢𑁄𑀢𑀺 𑀲𑀫𑀸𑀦𑀲𑀻𑀮𑀢𑀁 𑀕𑀢𑁄, 𑀏𑀓𑀲𑀤𑀺𑀲𑀲𑀻𑀮𑁄 𑀳𑀼𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀢𑀓𑁆𑀓𑀭𑀲𑁆𑀲𑀸𑀢𑀺 𑀬𑁄 𑀦𑀁 𑀓𑀭𑁄𑀢𑀺, 𑀢𑀲𑁆𑀲. 𑀇𑀢𑀺 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀲𑀻𑀮𑀁 𑀫𑀺𑀲𑁆𑀲𑀓𑀁 𑀓𑀣𑀺𑀢𑀁, 𑀤𑀺𑀝𑁆𑀞𑀺 𑀯𑀺𑀧𑀲𑁆𑀲𑀦𑀸𑀲𑀫𑁆𑀫𑀸𑀤𑀺𑀝𑁆𑀞𑀻𑀢𑀺.

𑁬. 𑀆𑀦𑀦𑁆𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁬. 𑀙𑀝𑁆𑀞𑁂 𑀦𑁄 𑀘 𑀧𑀭𑀁 𑀅𑀥𑀺𑀲𑀻𑀮𑁂 𑀲𑀫𑁆𑀧𑀯𑀢𑁆𑀢𑀸 𑀳𑁄𑀢𑀻𑀢𑀺 𑀧𑀭𑀁 𑀲𑀻𑀮𑀪𑀸𑀯𑁂𑀦 𑀦 𑀕𑀭𑀳𑀢𑀺 𑀦 𑀉𑀧𑀯𑀤𑀢𑀺. 𑀅𑀢𑁆𑀢𑀸𑀦𑀼𑀧𑁂𑀓𑁆𑀔𑀻𑀢𑀺 𑀅𑀢𑁆𑀢𑀦𑁄𑀯 𑀓𑀢𑀸𑀓𑀢𑀁 𑀚𑀸𑀦𑀦𑀯𑀲𑁂𑀦 𑀅𑀢𑁆𑀢𑀸𑀦𑀁 𑀅𑀦𑀼𑀧𑁂𑀓𑁆𑀔𑀺𑀢𑀸. 𑀦𑁄 𑀧𑀭𑀸𑀦𑀼𑀧𑁂𑀓𑁆𑀔𑀻𑀢𑀺 𑀧𑀭𑀲𑁆𑀲 𑀓𑀢𑀸𑀓𑀢𑁂𑀲𑀼 𑀅𑀩𑁆𑀬𑀸𑀯𑀝𑁄. 𑀅𑀧𑀜𑁆𑀜𑀸𑀢𑁄𑀢𑀺 𑀅𑀧𑀸𑀓𑀝𑁄 𑀅𑀧𑁆𑀧𑀧𑀼𑀜𑁆𑀜𑁄. 𑀅𑀧𑀜𑁆𑀜𑀸𑀢𑀓𑁂𑀦𑀸𑀢𑀺 𑀅𑀧𑀜𑁆𑀜𑀸𑀢𑀪𑀸𑀯𑁂𑀦 𑀅𑀧𑀸𑀓𑀝𑀢𑀸𑀬 𑀫𑀦𑁆𑀤𑀧𑀼𑀜𑁆𑀜𑀢𑀸𑀬. 𑀦𑁄 𑀧𑀭𑀺𑀢𑀲𑁆𑀲𑀢𑀻𑀢𑀺 𑀧𑀭𑀺𑀢𑀸𑀲𑀁 𑀦𑀸𑀧𑀚𑁆𑀚𑀢𑀺. 𑀇𑀢𑀺 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀔𑀻𑀡𑀸𑀲𑀯𑁄𑀯 𑀓𑀣𑀺𑀢𑁄.

𑁭-𑁮. 𑀲𑀻𑀮𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁦𑁭-𑁧𑁦𑁮. 𑀲𑀢𑁆𑀢𑀫𑁂 𑀲𑀻𑀮𑀲𑀫𑀸𑀥𑀺𑀧𑀜𑁆𑀜𑀸 𑀫𑀺𑀲𑁆𑀲𑀺𑀓𑀸 𑀓𑀣𑀺𑀢𑀸, 𑀯𑀺𑀫𑀼𑀢𑁆𑀢𑀺 𑀅𑀭𑀳𑀢𑁆𑀢𑀨𑀮𑀁, 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀁 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀁 𑀮𑁄𑀓𑀺𑀬𑀫𑁂𑀯. 𑀅𑀝𑁆𑀞𑀫𑁂𑀧𑀺 𑀏𑀲𑁂𑀯 𑀦𑀬𑁄. 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀁 𑀧𑀦𑁂𑀢𑁆𑀣 𑀅𑀲𑁂𑀔𑀲𑁆𑀲 𑀧𑀯𑀢𑁆𑀢𑀢𑁆𑀢𑀸 𑀅𑀲𑁂𑀔𑀦𑁆𑀢𑀺 𑀯𑀼𑀢𑁆𑀢𑀁.

𑁯-𑁧𑁦. 𑀘𑀸𑀢𑀼𑀤𑁆𑀤𑀺𑀲𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁦𑁯-𑁧𑁧𑁦. 𑀦𑀯𑀫𑁂 𑀘𑀸𑀢𑀼𑀤𑁆𑀤𑀺𑀲𑁄𑀢𑀺 𑀘𑀢𑀽𑀲𑀼 𑀤𑀺𑀲𑀸𑀲𑀼 𑀅𑀧𑁆𑀧𑀝𑀺𑀳𑀢𑀘𑀸𑀭𑁄. 𑀇𑀫𑀲𑁆𑀫𑀺𑀫𑁆𑀧𑀺 𑀲𑀼𑀢𑁆𑀢𑁂 𑀔𑀻𑀡𑀸𑀲𑀯𑁄𑀯 𑀓𑀣𑀺𑀢𑁄. 𑀤𑀲𑀫𑁂 𑀅𑀮𑀦𑁆𑀢𑀺 𑀬𑀼𑀢𑁆𑀢𑁄. 𑀇𑀥𑀸𑀧𑀺 𑀔𑀻𑀡𑀸𑀲𑀯𑁄𑀯 𑀓𑀣𑀺𑀢𑁄.

𑀨𑀸𑀲𑀼𑀯𑀺𑀳𑀸𑀭𑀯𑀕𑁆𑀕𑁄 𑀧𑀞𑀫𑁄.

(𑁧𑁨) 𑁨. 𑀅𑀦𑁆𑀥𑀓𑀯𑀺𑀦𑁆𑀤𑀯𑀕𑁆𑀕𑁄

𑁧. 𑀓𑀼𑀮𑀽𑀧𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁧𑁧. 𑀤𑀼𑀢𑀺𑀬𑀲𑁆𑀲 𑀧𑀞𑀫𑁂 𑀅𑀲𑀦𑁆𑀣𑀯𑀯𑀺𑀲𑁆𑀲𑀸𑀲𑀻𑀢𑀺 𑀅𑀢𑁆𑀢𑀦𑀸 𑀲𑀤𑁆𑀥𑀺𑀁 𑀲𑀦𑁆𑀣𑀯𑀁 𑀅𑀓𑀭𑁄𑀦𑁆𑀢𑁂𑀲𑀼 𑀯𑀺𑀲𑁆𑀲𑀸𑀲𑀁 𑀅𑀦𑀸𑀧𑀚𑁆𑀚𑀦𑁆𑀢𑁂𑀲𑀼𑀬𑁂𑀯 𑀯𑀺𑀲𑁆𑀲𑀸𑀲𑀁 𑀓𑀭𑁄𑀢𑀺. 𑀅𑀦𑀺𑀲𑁆𑀲𑀭𑀯𑀺𑀓𑀧𑁆𑀧𑀻𑀢𑀺 𑀅𑀦𑀺𑀲𑁆𑀲𑀭𑁄𑀯 𑀲𑀫𑀸𑀦𑁄 ‘‘𑀇𑀫𑀁 𑀤𑁂𑀣, 𑀇𑀫𑀁 𑀕𑀡𑁆𑀳𑀣𑀸’’𑀢𑀺 𑀇𑀲𑁆𑀲𑀭𑁄 𑀯𑀺𑀬 𑀯𑀺𑀓𑀧𑁆𑀧𑁂𑀢𑀺. 𑀯𑀺𑀲𑁆𑀲𑀝𑁆𑀞𑀼𑀧𑀲𑁂𑀯𑀻𑀢𑀺 𑀯𑀺𑀲𑁆𑀲𑀝𑁆𑀞𑀸𑀦𑀺 𑀪𑀺𑀦𑁆𑀦𑀓𑀼𑀮𑀸𑀦𑀺 𑀖𑀝𑀦𑀢𑁆𑀣𑀸𑀬 𑀉𑀧𑀲𑁂𑀯𑀢𑀺. 𑀉𑀧𑀓𑀡𑁆𑀡𑀓𑀚𑀧𑁆𑀧𑀻𑀢𑀺 𑀓𑀡𑁆𑀡𑀫𑀽𑀮𑁂 𑀫𑀦𑁆𑀢𑀁 𑀕𑀡𑁆𑀳𑀸𑀢𑀺. 𑀲𑀼𑀓𑁆𑀓𑀧𑀓𑁆𑀔𑁄 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑁂𑀦 𑀯𑁂𑀤𑀺𑀢𑀩𑁆𑀩𑁄.

𑁨. 𑀧𑀘𑁆𑀙𑀸𑀲𑀫𑀡𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁧𑁨. 𑀤𑀼𑀢𑀺𑀬𑁂 𑀧𑀢𑁆𑀢𑀧𑀭𑀺𑀬𑀸𑀧𑀦𑁆𑀦𑀁 𑀦 𑀕𑀡𑁆𑀳𑀸𑀢𑀻𑀢𑀺 𑀉𑀧𑀚𑁆𑀛𑀸𑀬𑁂 𑀦𑀺𑀯𑀢𑁆𑀢𑀺𑀢𑁆𑀯𑀸 𑀞𑀺𑀢𑁂 𑀅𑀢𑁆𑀢𑀦𑁄 𑀢𑀼𑀘𑁆𑀙𑀧𑀢𑁆𑀢𑀁 𑀤𑀢𑁆𑀯𑀸 𑀢𑀲𑁆𑀲 𑀧𑀢𑁆𑀢𑀁 𑀦 𑀕𑀡𑁆𑀳𑀸𑀢𑀺, 𑀢𑀢𑁄 𑀯𑀸 𑀤𑀻𑀬𑀫𑀸𑀦𑀁 𑀦 𑀕𑀡𑁆𑀳𑀸𑀢𑀺. 𑀦 𑀦𑀺𑀯𑀸𑀭𑁂𑀢𑀻𑀢𑀺 𑀇𑀤𑀁 𑀯𑀘𑀦𑀁 𑀆𑀧𑀢𑁆𑀢𑀺𑀯𑀻𑀢𑀺𑀓𑁆𑀓𑀫𑀯𑀘𑀦𑀁 𑀦𑀸𑀫𑀸𑀢𑀺 𑀦 𑀚𑀸𑀦𑀸𑀢𑀺. 𑀜𑀢𑁆𑀯𑀸 𑀯𑀸𑀧𑀺, ‘‘𑀪𑀦𑁆𑀢𑁂, 𑀏𑀯𑀭𑀽𑀧𑀁 𑀦𑀸𑀫 𑀯𑀢𑁆𑀢𑀼𑀁 𑀦 𑀯𑀝𑁆𑀝𑀢𑀻’’𑀢𑀺 𑀦 𑀦𑀺𑀯𑀸𑀭𑁂𑀢𑀺. 𑀓𑀣𑀁 𑀑𑀧𑀸𑀢𑁂𑀢𑀻𑀢𑀺 𑀢𑀲𑁆𑀲 𑀓𑀣𑀁 𑀪𑀺𑀦𑁆𑀤𑀺𑀢𑁆𑀯𑀸 𑀅𑀢𑁆𑀢𑀦𑁄 𑀓𑀣𑀁 𑀧𑀯𑁂𑀲𑁂𑀢𑀺. 𑀚𑀴𑁄𑀢𑀺 𑀚𑀟𑁄. 𑀏𑀴𑀫𑀽𑀕𑁄𑀢𑀺 𑀧𑀕𑁆𑀖𑀭𑀺𑀢𑀔𑁂𑀴𑀫𑀼𑀔𑁄. 𑀢𑀢𑀺𑀬𑀁 𑀉𑀢𑁆𑀢𑀸𑀦𑀫𑁂𑀯.

𑁪. 𑀅𑀦𑁆𑀥𑀓𑀯𑀺𑀦𑁆𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁧𑁪. 𑀘𑀢𑀼𑀢𑁆𑀣𑁂 𑀲𑀻𑀮𑀯𑀸 𑀳𑁄𑀣𑀸𑀢𑀺 𑀲𑀻𑀮𑀯𑀦𑁆𑀢𑀸 𑀳𑁄𑀣. 𑀆𑀭𑀓𑁆𑀔𑀲𑀢𑀺𑀦𑁄𑀢𑀺 𑀤𑁆𑀯𑀸𑀭𑀭𑀓𑁆𑀔𑀺𑀓𑀸𑀬 𑀲𑀢𑀺𑀬𑀸 𑀲𑀫𑀦𑁆𑀦𑀸𑀕𑀢𑀸. 𑀦𑀺𑀧𑀓𑁆𑀓𑀲𑀢𑀺𑀦𑁄𑀢𑀺 𑀤𑁆𑀯𑀸𑀭𑀭𑀓𑁆𑀔𑀦𑀓𑁂𑀦𑁂𑀯 𑀜𑀸𑀡𑁂𑀦 𑀲𑀫𑀦𑁆𑀦𑀸𑀕𑀢𑀲𑁆𑀲𑀢𑀺𑀦𑁄. 𑀲𑀢𑀸𑀭𑀓𑁆𑀔𑁂𑀦 𑀘𑁂𑀢𑀲𑀸 𑀲𑀫𑀦𑁆𑀦𑀸𑀕𑀢𑀸𑀢𑀺 𑀲𑀢𑀸𑀭𑀓𑁆𑀔𑁂𑀦 𑀘𑀺𑀢𑁆𑀢𑁂𑀦 𑀲𑀫𑀦𑁆𑀦𑀸𑀕𑀢𑀸. 𑀅𑀧𑁆𑀧𑀪𑀲𑁆𑀲𑀸𑀢𑀺 𑀅𑀧𑁆𑀧𑀓𑀣𑀸. 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑀸𑀢𑀺 𑀓𑀫𑁆𑀫𑀲𑁆𑀲𑀓𑀢𑀚𑁆𑀛𑀸𑀦-𑀯𑀺𑀧𑀲𑁆𑀲𑀦𑀸𑀫𑀕𑁆𑀕-𑀨𑀮𑀯𑀲𑁂𑀦 𑀧𑀜𑁆𑀘𑀯𑀺𑀥𑀸𑀬 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀲𑀫𑀦𑁆𑀦𑀸𑀕𑀢𑀸. 𑀅𑀧𑀺𑀘 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀫𑁆𑀧𑀺 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑁂𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑁫. 𑀫𑀘𑁆𑀙𑀭𑀺𑀦𑀻𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁧𑁫. 𑀧𑀜𑁆𑀘𑀫𑁂 𑀆𑀯𑀸𑀲𑀫𑀘𑁆𑀙𑀭𑀺𑀦𑀻𑀢𑀺 𑀆𑀯𑀸𑀲𑀁 𑀫𑀘𑁆𑀙𑀭𑀸𑀬𑀢𑀺, 𑀢𑀢𑁆𑀣 𑀅𑀜𑁆𑀜𑁂𑀲𑀁 𑀯𑀸𑀲𑀁 𑀦 𑀲𑀳𑀢𑀺. 𑀓𑀼𑀮𑀫𑀘𑁆𑀙𑀭𑀺𑀦𑀻𑀢𑀺 𑀉𑀧𑀝𑁆𑀞𑀸𑀓𑀓𑀼𑀮𑀁 𑀫𑀘𑁆𑀙𑀭𑀸𑀬𑀢𑀺, 𑀅𑀜𑁆𑀜𑁂𑀲𑀁 𑀢𑀢𑁆𑀣 𑀉𑀧𑀲𑀗𑁆𑀓𑀫𑀦𑀁 𑀦 𑀲𑀳𑀢𑀺. 𑀮𑀸𑀪𑀫𑀘𑁆𑀙𑀭𑀺𑀦𑀻𑀢𑀺 𑀮𑀸𑀪𑀁 𑀫𑀘𑁆𑀙𑀭𑀸𑀬𑀢𑀺, 𑀅𑀜𑁆𑀜𑁂𑀲𑀁 𑀢𑀁 𑀉𑀧𑁆𑀧𑀚𑁆𑀚𑀦𑁆𑀢𑀁 𑀦 𑀲𑀳𑀢𑀺. 𑀯𑀡𑁆𑀡𑀫𑀘𑁆𑀙𑀭𑀺𑀦𑀻𑀢𑀺 𑀕𑀼𑀡𑀁 𑀫𑀘𑁆𑀙𑀭𑀸𑀬𑀢𑀺, 𑀅𑀜𑁆𑀜𑁂𑀲𑀁 𑀕𑀼𑀡𑀓𑀣𑀁 𑀦 𑀲𑀳𑀢𑀺. 𑀥𑀫𑁆𑀫𑀫𑀘𑁆𑀙𑀭𑀺𑀦𑀻𑀢𑀺 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀁 𑀫𑀘𑁆𑀙𑀭𑀸𑀬𑀢𑀺, 𑀅𑀜𑁆𑀜𑁂𑀲𑀁 𑀤𑀸𑀢𑀼𑀁 𑀦 𑀇𑀘𑁆𑀙𑀢𑀺.

𑁬-𑁭. 𑀯𑀡𑁆𑀡𑀦𑀸𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁧𑁬-𑁧𑁧𑁭. 𑀙𑀝𑁆𑀞𑁂 𑀲𑀤𑁆𑀥𑀸𑀤𑁂𑀬𑁆𑀬𑀁 𑀯𑀺𑀦𑀺𑀧𑀸𑀢𑁂𑀢𑀻𑀢𑀺 𑀧𑀭𑁂𑀳𑀺 𑀲𑀤𑁆𑀥𑀸𑀬 𑀤𑀺𑀦𑁆𑀦𑀧𑀺𑀡𑁆𑀟𑀧𑀸𑀢𑀢𑁄 𑀅𑀕𑁆𑀕𑀁 𑀅𑀕𑁆𑀕𑀳𑁂𑀢𑁆𑀯𑀸 𑀧𑀭𑀲𑁆𑀲 𑀤𑁂𑀢𑀺. 𑀲𑀢𑁆𑀢𑀫𑁂 𑀇𑀲𑁆𑀲𑀼𑀓𑀺𑀦𑀻𑀢𑀺 𑀇𑀲𑁆𑀲𑀸𑀬 𑀲𑀫𑀦𑁆𑀦𑀸𑀕𑀢𑀸. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀅𑀦𑁆𑀥𑀓𑀯𑀺𑀦𑁆𑀤𑀯𑀕𑁆𑀕𑁄 𑀤𑀼𑀢𑀺𑀬𑁄.

(𑁧𑁩) 𑁩. 𑀕𑀺𑀮𑀸𑀦𑀯𑀕𑁆𑀕𑁄

𑁪. 𑀤𑀼𑀢𑀺𑀬𑀉𑀧𑀝𑁆𑀞𑀸𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁨𑁪. 𑀢𑀢𑀺𑀬𑀲𑁆𑀲 𑀘𑀢𑀼𑀢𑁆𑀣𑁂 𑀦𑀧𑁆𑀧𑀝𑀺𑀩𑀮𑁄𑀢𑀺 𑀓𑀸𑀬𑀩𑀮𑁂𑀦 𑀘 𑀜𑀸𑀡𑀩𑀮𑁂𑀦 𑀘 𑀅𑀲𑀫𑀦𑁆𑀦𑀸𑀕𑀢𑁄. 𑀆𑀫𑀺𑀲𑀦𑁆𑀢𑀭𑁄𑀢𑀺 𑀆𑀫𑀺𑀲𑀳𑁂𑀢𑀼𑀓𑁄 𑀘𑀻𑀯𑀭𑀸𑀤𑀻𑀦𑀺 𑀧𑀘𑁆𑀘𑀸𑀲𑀻𑀲𑀫𑀸𑀦𑁄.

𑁫-𑁬. 𑀅𑀦𑀸𑀬𑀼𑀲𑁆𑀲𑀸𑀲𑀼𑀢𑁆𑀢𑀤𑁆𑀯𑀬𑀯𑀡𑁆𑀡𑀦𑀸

𑁧𑁨𑁫-𑁧𑁨𑁬. 𑀧𑀜𑁆𑀘𑀫𑁂 𑀅𑀦𑀸𑀬𑀼𑀲𑁆𑀲𑀸𑀢𑀺 𑀆𑀬𑀼𑀧𑀘𑁆𑀙𑁂𑀤𑀦𑀸, 𑀦 𑀆𑀬𑀼𑀯𑀟𑁆𑀠𑀦𑀸. 𑀙𑀝𑁆𑀞𑁂𑀧𑀺 𑀏𑀲𑁂𑀯 𑀦𑀬𑁄.

𑁭. 𑀯𑀧𑀓𑀸𑀲𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁨𑁭. 𑀲𑀢𑁆𑀢𑀫𑁂 𑀦𑀸𑀮𑀁 𑀲𑀗𑁆𑀖𑀫𑁆𑀳𑀸 𑀯𑀧𑀓𑀸𑀲𑀺𑀢𑀼𑀦𑁆𑀢𑀺 𑀲𑀗𑁆𑀖𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀏𑀓𑀓𑁄 𑀯𑀲𑀺𑀢𑀼𑀁 𑀦 𑀬𑀼𑀢𑁆𑀢𑁄. 𑀓𑀸𑀫𑀜𑁆𑀘𑁂𑀲 𑀲𑀗𑁆𑀖𑀫𑀚𑁆𑀛𑁂𑀧𑀺 𑀯𑀲𑀺𑀢𑀼𑀁 𑀅𑀬𑀼𑀢𑁆𑀢𑁄𑀯 𑀅𑀲𑀗𑁆𑀖𑀲𑁄𑀪𑀦𑀢𑀸𑀬, 𑀑𑀯𑀸𑀤𑀸𑀦𑀼𑀲𑀸𑀲𑀦𑀺𑀧𑁆𑀧𑀝𑀺𑀩𑀤𑁆𑀥𑀢𑁆𑀢𑀸 𑀧𑀦 𑀦𑀺𑀧𑁆𑀧𑀭𑀺𑀬𑀸𑀬𑁂𑀦𑁂𑀯 𑀲𑀗𑁆𑀖𑀫𑁆𑀳𑀸 𑀯𑀧𑀓𑀸𑀲𑀺𑀢𑀼𑀁 𑀦 𑀬𑀼𑀢𑁆𑀢𑁄. 𑀅𑀮𑀁 𑀲𑀗𑁆𑀖𑀫𑁆𑀳𑀸 𑀯𑀧𑀓𑀸𑀲𑀺𑀢𑀼𑀦𑁆𑀢𑀺 𑀘𑀸𑀢𑀼𑀤𑁆𑀤𑀺𑀲𑀢𑁆𑀢𑀸 𑀲𑀗𑁆𑀖𑀫𑁆𑀳𑀸 𑀦𑀺𑀓𑁆𑀔𑀫𑁆𑀫 𑀏𑀓𑀓𑁄 𑀯𑀲𑀺𑀢𑀼𑀁 𑀬𑀼𑀢𑁆𑀢𑁄, 𑀲𑀗𑁆𑀖𑀲𑁄𑀪𑀦𑀢𑀸𑀬 𑀧𑀦 𑀲𑀗𑁆𑀖𑁂𑀧𑀺 𑀯𑀲𑀺𑀢𑀼𑀁 𑀬𑀼𑀢𑁆𑀢𑁄𑀬𑁂𑀯. 𑀅𑀝𑁆𑀞𑀫𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑁯. 𑀧𑀭𑀺𑀓𑀼𑀧𑁆𑀧𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁨𑁯. 𑀦𑀯𑀫𑁂 𑀆𑀧𑀸𑀬𑀺𑀓𑀸𑀢𑀺 𑀅𑀧𑀸𑀬𑀕𑀸𑀫𑀺𑀦𑁄. 𑀦𑁂𑀭𑀬𑀺𑀓𑀸𑀢𑀺 𑀦𑀺𑀭𑀬𑀕𑀸𑀫𑀺𑀦𑁄. 𑀧𑀭𑀺𑀓𑀼𑀧𑁆𑀧𑀸𑀢𑀺 𑀧𑀭𑀺𑀓𑀼𑀧𑁆𑀧𑀦𑀲𑀪𑀸𑀯𑀸 𑀧𑀼𑀭𑀸𑀡𑀯𑀡𑀲𑀤𑀺𑀲𑀸. 𑀅𑀢𑁂𑀓𑀺𑀘𑁆𑀙𑀸𑀢𑀺 𑀅𑀓𑀢𑁆𑀢𑀩𑁆𑀩𑀧𑀭𑀺𑀓𑀫𑁆𑀫𑀸. 𑀤𑀲𑀫𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀕𑀺𑀮𑀸𑀦𑀯𑀕𑁆𑀕𑁄 𑀢𑀢𑀺𑀬𑁄.

(𑁧𑁪) 𑁪. 𑀭𑀸𑀚𑀯𑀕𑁆𑀕𑁄

𑁧. 𑀧𑀞𑀫𑀘𑀓𑁆𑀓𑀸𑀦𑀼𑀯𑀢𑁆𑀢𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁩𑁧. 𑀘𑀢𑀼𑀢𑁆𑀣𑀲𑁆𑀲 𑀧𑀞𑀫𑁂 𑀥𑀫𑁆𑀫𑁂𑀦𑀸𑀢𑀺 𑀤𑀲𑀓𑀼𑀲𑀮𑀥𑀫𑁆𑀫𑁂𑀦. 𑀘𑀓𑁆𑀓𑀦𑁆𑀢𑀺 𑀆𑀡𑀸𑀘𑀓𑁆𑀓𑀁. 𑀅𑀢𑁆𑀣𑀜𑁆𑀜𑀽𑀢𑀺 𑀭𑀚𑁆𑀚𑀢𑁆𑀣𑀁 𑀚𑀸𑀦𑀸𑀢𑀺. 𑀥𑀫𑁆𑀫𑀜𑁆𑀜𑀽𑀢𑀺 𑀧𑀯𑁂𑀡𑀺𑀥𑀫𑁆𑀫𑀁 𑀚𑀸𑀦𑀸𑀢𑀺. 𑀫𑀢𑁆𑀢𑀜𑁆𑀜𑀽𑀢𑀺 𑀤𑀡𑁆𑀟𑁂 𑀯𑀸 𑀩𑀮𑀫𑁆𑀳𑀺 𑀯𑀸 𑀧𑀫𑀸𑀡𑀁 𑀚𑀸𑀦𑀸𑀢𑀺. 𑀓𑀸𑀮𑀜𑁆𑀜𑀽𑀢𑀺 𑀭𑀚𑁆𑀚𑀲𑀼𑀔𑀸𑀦𑀼𑀪𑀯𑀦𑀓𑀸𑀮𑀁, 𑀯𑀺𑀦𑀺𑀘𑁆𑀙𑀬𑀓𑀭𑀡𑀓𑀸𑀮𑀁, 𑀚𑀦𑀧𑀤𑀘𑀸𑀭𑀺𑀓𑀸𑀓𑀸𑀮𑀜𑁆𑀘 𑀚𑀸𑀦𑀸𑀢𑀺. 𑀧𑀭𑀺𑀲𑀜𑁆𑀜𑀽𑀢𑀺 𑀅𑀬𑀁 𑀧𑀭𑀺𑀲𑀸 𑀔𑀢𑁆𑀢𑀺𑀬𑀧𑀭𑀺𑀲𑀸, 𑀅𑀬𑀁 𑀩𑁆𑀭𑀸𑀳𑁆𑀫𑀡𑀯𑁂𑀲𑁆𑀲𑀲𑀼𑀤𑁆𑀤𑀲𑀫𑀡𑀧𑀭𑀺𑀲𑀸𑀢𑀺 𑀚𑀸𑀦𑀸𑀢𑀺.

𑀢𑀣𑀸𑀕𑀢𑀯𑀸𑀭𑁂 𑀅𑀢𑁆𑀣𑀜𑁆𑀜𑀽𑀢𑀺 𑀧𑀜𑁆𑀘 𑀅𑀢𑁆𑀣𑁂 𑀚𑀸𑀦𑀸𑀢𑀺. 𑀥𑀫𑁆𑀫𑀜𑁆𑀜𑀽𑀢𑀺 𑀘𑀢𑁆𑀢𑀸𑀭𑁄 𑀥𑀫𑁆𑀫𑁂 𑀚𑀸𑀦𑀸𑀢𑀺. 𑀫𑀢𑁆𑀢𑀜𑁆𑀜𑀽𑀢𑀺 𑀘𑀢𑀽𑀲𑀼 𑀧𑀘𑁆𑀘𑀬𑁂𑀲𑀼 𑀧𑀝𑀺𑀕𑁆𑀕𑀳𑀡𑀧𑀭𑀺𑀪𑁄𑀕𑀫𑀢𑁆𑀢𑀁 𑀚𑀸𑀦𑀸𑀢𑀺. 𑀓𑀸𑀮𑀜𑁆𑀜𑀽𑀢𑀺 𑀅𑀬𑀁 𑀓𑀸𑀮𑁄 𑀧𑀝𑀺𑀲𑀮𑁆𑀮𑀻𑀦𑀲𑁆𑀲, 𑀅𑀬𑀁 𑀲𑀫𑀸𑀧𑀢𑁆𑀢𑀺𑀬𑀸, 𑀅𑀬𑀁 𑀥𑀫𑁆𑀫𑀤𑁂𑀲𑀦𑀸𑀬, 𑀅𑀬𑀁 𑀚𑀦𑀧𑀤𑀘𑀸𑀭𑀺𑀓𑀸𑀬𑀸𑀢𑀺 𑀏𑀯𑀁 𑀓𑀸𑀮𑀁 𑀚𑀸𑀦𑀸𑀢𑀺. 𑀧𑀭𑀺𑀲𑀜𑁆𑀜𑀽𑀢𑀺 𑀅𑀬𑀁 𑀧𑀭𑀺𑀲𑀸 𑀔𑀢𑁆𑀢𑀺𑀬𑀧𑀭𑀺𑀲𑀸…𑀧𑁂… 𑀅𑀬𑀁 𑀲𑀫𑀡𑀧𑀭𑀺𑀲𑀸𑀢𑀺 𑀚𑀸𑀦𑀸𑀢𑀺. 𑀅𑀦𑀼𑀢𑁆𑀢𑀭𑀦𑁆𑀢𑀺 𑀦𑀯𑀳𑀺 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁂𑀳𑀺 𑀅𑀦𑀼𑀢𑁆𑀢𑀭𑀁. 𑀥𑀫𑁆𑀫𑀘𑀓𑁆𑀓𑀦𑁆𑀢𑀺 𑀲𑁂𑀝𑁆𑀞𑀘𑀓𑁆𑀓𑀁.

𑁨. 𑀤𑀼𑀢𑀺𑀬𑀘𑀓𑁆𑀓𑀸𑀦𑀼𑀯𑀢𑁆𑀢𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁩𑁨. 𑀤𑀼𑀢𑀺𑀬𑁂 𑀧𑀺𑀢𑀭𑀸 𑀧𑀯𑀢𑁆𑀢𑀺𑀢𑀁 𑀘𑀓𑁆𑀓𑀦𑁆𑀢𑀺 𑀘𑀓𑁆𑀓𑀯𑀢𑁆𑀢𑀺𑀫𑁆𑀳𑀺 𑀧𑀩𑁆𑀩𑀚𑀺𑀢𑁂 𑀯𑀸 𑀓𑀸𑀮𑀓𑀢𑁂 𑀯𑀸 𑀘𑀓𑁆𑀓𑀭𑀢𑀦𑀁 𑀲𑀢𑁆𑀢𑀸𑀳𑀫𑀢𑁆𑀢𑀁 𑀞𑀢𑁆𑀯𑀸 𑀅𑀦𑁆𑀢𑀭𑀥𑀸𑀬𑀢𑀺, 𑀓𑀣𑀫𑁂𑀲 𑀢𑀁 𑀅𑀦𑀼𑀧𑁆𑀧𑀯𑀢𑁆𑀢𑁂𑀢𑀺 𑀦𑀸𑀫? 𑀧𑀺𑀢𑀼 𑀧𑀯𑁂𑀡𑀺𑀬𑀁 𑀞𑀢𑁆𑀯𑀸 𑀘𑀓𑁆𑀓𑀯𑀢𑁆𑀢𑀺𑀯𑀢𑁆𑀢𑀁 𑀧𑀽𑀭𑁂𑀢𑁆𑀯𑀸 𑀘𑀓𑁆𑀓𑀯𑀢𑁆𑀢𑀺𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁄𑀧𑀺 𑀧𑀺𑀢𑀭𑀸 𑀧𑀯𑀢𑁆𑀢𑀺𑀢𑀫𑁂𑀯 𑀅𑀦𑀼𑀧𑁆𑀧𑀯𑀢𑁆𑀢𑁂𑀢𑀺 𑀦𑀸𑀫.

𑁩. 𑀥𑀫𑁆𑀫𑀭𑀸𑀚𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁩𑁩. 𑀢𑀢𑀺𑀬𑀁 𑀢𑀺𑀓𑀦𑀺𑀧𑀸𑀢𑁂 𑀯𑀼𑀢𑁆𑀢𑀦𑀬𑀫𑁂𑀯. 𑀲𑁂𑀯𑀺𑀢𑀩𑁆𑀩𑀸𑀲𑁂𑀯𑀺𑀢𑀩𑁆𑀩𑁂 𑀧𑀦𑁂𑀢𑁆𑀣 𑀧𑀘𑁆𑀙𑀺𑀫𑀧𑀤𑀤𑁆𑀯𑀬𑀫𑁂𑀯 𑀯𑀺𑀲𑁂𑀲𑁄. 𑀢𑀢𑁆𑀣 𑀲𑀫𑁆𑀫𑀸𑀆𑀚𑀻𑀯𑁄 𑀲𑁂𑀯𑀺𑀢𑀩𑁆𑀩𑁄, 𑀫𑀺𑀘𑁆𑀙𑀸𑀆𑀚𑀻𑀯𑁄 𑀦 𑀲𑁂𑀯𑀺𑀢𑀩𑁆𑀩𑁄. 𑀲𑀧𑁆𑀧𑀸𑀬𑁄 𑀕𑀸𑀫𑀦𑀺𑀕𑀫𑁄 𑀲𑁂𑀯𑀺𑀢𑀩𑁆𑀩𑁄, 𑀅𑀲𑀧𑁆𑀧𑀸𑀬𑁄 𑀦 𑀲𑁂𑀯𑀺𑀢𑀩𑁆𑀩𑁄.

𑁪. 𑀬𑀲𑁆𑀲𑀁𑀤𑀺𑀲𑀁𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁩𑁪. 𑀘𑀢𑀼𑀢𑁆𑀣𑁂 𑀉𑀪𑀢𑁄𑀢𑀺 𑀤𑁆𑀯𑀻𑀳𑀺𑀧𑀺 𑀧𑀓𑁆𑀔𑁂𑀳𑀺. 𑀫𑀸𑀢𑀺𑀢𑁄 𑀘 𑀧𑀺𑀢𑀺𑀢𑁄 𑀘𑀸𑀢𑀺 𑀬𑀲𑁆𑀲 𑀳𑀺 𑀫𑀸𑀢𑀸 𑀔𑀢𑁆𑀢𑀺𑀬𑀸, 𑀫𑀸𑀢𑀼𑀫𑀸𑀢𑀸 𑀔𑀢𑁆𑀢𑀺𑀬𑀸, 𑀢𑀲𑁆𑀲𑀸𑀧𑀺 𑀫𑀸𑀢𑀸 𑀔𑀢𑁆𑀢𑀺𑀬𑀸. 𑀧𑀺𑀢𑀸 𑀔𑀢𑁆𑀢𑀺𑀬𑁄, 𑀧𑀺𑀢𑀼𑀧𑀺𑀢𑀸 𑀔𑀢𑁆𑀢𑀺𑀬𑁄, 𑀢𑀲𑁆𑀲𑀧𑀺 𑀧𑀺𑀢𑀸 𑀔𑀢𑁆𑀢𑀺𑀬𑁄. 𑀲𑁄 𑀉𑀪𑀢𑁄 𑀲𑀼𑀚𑀸𑀢𑁄 𑀫𑀸𑀢𑀺𑀢𑁄 𑀘 𑀧𑀺𑀢𑀺𑀢𑁄 𑀘. 𑀲𑀁𑀲𑀼𑀤𑁆𑀥𑀕𑀳𑀡𑀺𑀓𑁄𑀢𑀺 𑀲𑀁𑀲𑀼𑀤𑁆𑀥𑀸𑀬 𑀫𑀸𑀢𑀼𑀓𑀼𑀘𑁆𑀙𑀺𑀬𑀸 𑀲𑀫𑀦𑁆𑀦𑀸𑀕𑀢𑁄. ‘‘𑀲𑀫𑀯𑁂𑀧𑀸𑀓𑀺𑀦𑀺𑀬𑀸 𑀕𑀳𑀡𑀺𑀬𑀸’’𑀢𑀺 𑀏𑀢𑁆𑀣 𑀧𑀦 𑀓𑀫𑁆𑀫𑀚𑀢𑁂𑀚𑁄𑀥𑀸𑀢𑀼 𑀕𑀳𑀡𑀻𑀢𑀺 𑀯𑀼𑀘𑁆𑀘𑀢𑀺. 𑀬𑀸𑀯 𑀲𑀢𑁆𑀢𑀫𑀸 𑀧𑀺𑀢𑀸𑀫𑀳𑀬𑀼𑀕𑀸𑀢𑀺 𑀏𑀢𑁆𑀣 𑀧𑀺𑀢𑀼𑀧𑀺𑀢𑀸 𑀧𑀺𑀢𑀸𑀫𑀳𑁄, 𑀧𑀺𑀢𑀸𑀫𑀳𑀲𑁆𑀲 𑀬𑀼𑀕𑀁 𑀧𑀺𑀢𑀸𑀫𑀳𑀬𑀼𑀕𑀁. 𑀬𑀼𑀕𑀦𑁆𑀢𑀺 𑀆𑀬𑀼𑀧𑁆𑀧𑀫𑀸𑀡𑀁 𑀯𑀼𑀘𑁆𑀘𑀢𑀺. 𑀅𑀪𑀺𑀮𑀸𑀧𑀫𑀢𑁆𑀢𑀫𑁂𑀯 𑀘𑁂𑀢𑀁, 𑀅𑀢𑁆𑀣𑀢𑁄 𑀧𑀦 𑀧𑀺𑀢𑀸𑀫𑀳𑁄𑀬𑁂𑀯 𑀧𑀺𑀢𑀸𑀫𑀳𑀬𑀼𑀕𑀁. 𑀢𑀢𑁄 𑀉𑀤𑁆𑀥𑀁 𑀲𑀩𑁆𑀩𑁂𑀧𑀺 𑀧𑀼𑀩𑁆𑀩𑀧𑀼𑀭𑀺𑀲𑀸 𑀧𑀺𑀢𑀸𑀫𑀳𑀕𑁆𑀕𑀳𑀡𑁂𑀦𑁂𑀯 𑀕𑀳𑀺𑀢𑀸. 𑀏𑀯𑀁 𑀬𑀸𑀯 𑀲𑀢𑁆𑀢𑀫𑁄 𑀧𑀼𑀭𑀺𑀲𑁄, 𑀢𑀸𑀯 𑀲𑀁𑀲𑀼𑀤𑁆𑀥𑀕𑀳𑀡𑀺𑀓𑁄, 𑀅𑀣 𑀯𑀸 𑀅𑀓𑁆𑀔𑀺𑀢𑁆𑀢𑁄 𑀅𑀦𑀼𑀧𑀓𑁆𑀓𑀼𑀝𑁆𑀞𑁄 𑀚𑀸𑀢𑀺𑀯𑀸𑀤𑁂𑀦𑀸𑀢𑀺 𑀤𑀲𑁆𑀲𑁂𑀢𑀺. 𑀅𑀓𑁆𑀔𑀺𑀢𑁆𑀢𑁄𑀢𑀺 ‘‘𑀅𑀧𑀦𑁂𑀣 𑀏𑀢𑀁, 𑀓𑀺𑀁 𑀇𑀫𑀺𑀦𑀸’’𑀢𑀺 𑀏𑀯𑀁 𑀅𑀓𑁆𑀔𑀺𑀢𑁆𑀢𑁄 𑀅𑀦𑀯𑀓𑁆𑀔𑀺𑀢𑁆𑀢𑁄. 𑀅𑀦𑀼𑀧𑀓𑁆𑀓𑀼𑀝𑁆𑀞𑁄𑀢𑀺 𑀦 𑀉𑀧𑀓𑁆𑀓𑀼𑀝𑁆𑀞𑁄 𑀦 𑀅𑀓𑁆𑀓𑁄𑀲𑀁 𑀯𑀸 𑀦𑀺𑀦𑁆𑀤𑀁 𑀯𑀸 𑀧𑀢𑁆𑀢𑀧𑀼𑀩𑁆𑀩𑁄. 𑀓𑁂𑀦 𑀓𑀸𑀭𑀡𑁂𑀦𑀸𑀢𑀺? 𑀚𑀸𑀢𑀺𑀯𑀸𑀤𑁂𑀦, ‘‘𑀇𑀢𑀺𑀧𑀺 𑀳𑀻𑀦𑀚𑀸𑀢𑀺𑀓𑁄 𑀏𑀲𑁄’’𑀢𑀺 𑀏𑀯𑀭𑀽𑀧𑁂𑀦 𑀯𑀘𑀦𑁂𑀦𑀸𑀢𑀺 𑀅𑀢𑁆𑀣𑁄.

𑀅𑀟𑁆𑀠𑁄𑀢𑀺𑀆𑀤𑀻𑀲𑀼 𑀬𑁄 𑀓𑁄𑀘𑀺 𑀅𑀢𑁆𑀢𑀦𑁄 𑀲𑀦𑁆𑀢𑀓𑁂𑀦 𑀯𑀺𑀪𑀯𑁂𑀦 𑀅𑀟𑁆𑀠𑁄 𑀳𑁄𑀢𑀺. 𑀇𑀥 𑀧𑀦 𑀦 𑀓𑁂𑀯𑀮𑀁 𑀅𑀟𑁆𑀠𑁄𑀬𑁂𑀯, 𑀫𑀳𑀤𑁆𑀥𑀦𑁄 𑀫𑀳𑀢𑀸 𑀅𑀧𑀭𑀺𑀫𑀸𑀡𑀲𑀗𑁆𑀔𑁂𑀦 𑀥𑀦𑁂𑀦 𑀲𑀫𑀦𑁆𑀦𑀸𑀕𑀢𑁄𑀢𑀺 𑀅𑀢𑁆𑀣𑁄. 𑀧𑀜𑁆𑀘𑀓𑀸𑀫𑀕𑀼𑀡𑀯𑀲𑁂𑀦 𑀫𑀳𑀦𑁆𑀢𑀸 𑀉𑀴𑀸𑀭𑀸 𑀪𑁄𑀕𑀸 𑀅𑀲𑁆𑀲𑀸𑀢𑀺 𑀫𑀳𑀸𑀪𑁄𑀕𑁄. 𑀧𑀭𑀺𑀧𑀼𑀡𑁆𑀡𑀓𑁄𑀲𑀓𑁄𑀝𑁆𑀞𑀸𑀕𑀸𑀭𑁄𑀢𑀺 𑀓𑁄𑀲𑁄 𑀯𑀼𑀘𑁆𑀘𑀢𑀺 𑀪𑀡𑁆𑀟𑀸𑀕𑀸𑀭𑀁, 𑀦𑀺𑀤𑀳𑀺𑀢𑁆𑀯𑀸 𑀞𑀧𑀺𑀢𑁂𑀦 𑀥𑀦𑁂𑀦 𑀧𑀭𑀺𑀧𑀼𑀡𑁆𑀡𑀓𑁄𑀲𑁄, 𑀥𑀜𑁆𑀜𑁂𑀦 𑀘 𑀧𑀭𑀺𑀧𑀼𑀡𑁆𑀡𑀓𑁄𑀝𑁆𑀞𑀸𑀕𑀸𑀭𑁄𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀘𑀢𑀼𑀩𑁆𑀩𑀺𑀥𑁄 𑀓𑁄𑀲𑁄 𑀳𑀢𑁆𑀣𑀻 𑀅𑀲𑁆𑀲𑀸 𑀭𑀣𑀸 𑀭𑀝𑁆𑀞𑀦𑁆𑀢𑀺, 𑀢𑀺𑀯𑀺𑀥𑀁 𑀓𑁄𑀝𑁆𑀞𑀸𑀕𑀸𑀭𑀁 𑀥𑀦𑀓𑁄𑀝𑁆𑀞𑀸𑀕𑀸𑀭𑀁 𑀥𑀜𑁆𑀜𑀓𑁄𑀝𑁆𑀞𑀸𑀕𑀸𑀭𑀁 𑀯𑀢𑁆𑀣𑀓𑁄𑀝𑁆𑀞𑀸𑀕𑀸𑀭𑀦𑁆𑀢𑀺. 𑀢𑀁 𑀲𑀩𑁆𑀩𑀫𑁆𑀧𑀺 𑀧𑀭𑀺𑀧𑀼𑀡𑁆𑀡𑀫𑀲𑁆𑀲𑀸𑀢𑀺 𑀧𑀭𑀺𑀧𑀼𑀡𑁆𑀡𑀓𑁄𑀲𑀓𑁄𑀝𑁆𑀞𑀸𑀕𑀸𑀭𑁄. 𑀅𑀲𑁆𑀲𑀯𑀸𑀬𑀸𑀢𑀺 𑀓𑀲𑁆𑀲𑀘𑀺 𑀩𑀳𑀼𑀫𑁆𑀧𑀺 𑀥𑀦𑀁 𑀤𑁂𑀦𑁆𑀢𑀲𑁆𑀲 𑀲𑁂𑀦𑀸 𑀦 𑀲𑀼𑀡𑀸𑀢𑀺, 𑀲𑀸 𑀅𑀦𑀲𑁆𑀲𑀯𑀸 𑀦𑀸𑀫 𑀳𑁄𑀢𑀺. 𑀓𑀲𑁆𑀲𑀘𑀺 𑀅𑀤𑁂𑀦𑁆𑀢𑀲𑁆𑀲𑀸𑀧𑀺 𑀲𑀼𑀡𑀸𑀢𑀺𑀬𑁂𑀯, 𑀅𑀬𑀁 𑀅𑀲𑁆𑀲𑀯𑀸 𑀦𑀸𑀫. 𑀑𑀯𑀸𑀤𑀧𑀝𑀺𑀓𑀭𑀸𑀬𑀸𑀢𑀺 ‘‘𑀇𑀤𑀁 𑀯𑁄 𑀓𑀢𑁆𑀢𑀩𑁆𑀩, 𑀇𑀤𑀁 𑀦 𑀓𑀢𑁆𑀢𑀩𑁆𑀩’’𑀦𑁆𑀢𑀺 𑀤𑀺𑀦𑁆𑀦𑀑𑀯𑀸𑀤𑀓𑀭𑀸𑀬. 𑀧𑀡𑁆𑀟𑀺𑀢𑁄𑀢𑀺 𑀧𑀡𑁆𑀟𑀺𑀘𑁆𑀘𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀩𑁆𑀬𑀢𑁆𑀢𑁄𑀢𑀺 𑀧𑀜𑁆𑀜𑀸𑀯𑁂𑀬𑁆𑀬𑀢𑁆𑀢𑀺𑀬𑁂𑀦 𑀬𑀼𑀢𑁆𑀢𑁄. 𑀫𑁂𑀥𑀸𑀯𑀻𑀢𑀺 𑀞𑀸𑀦𑀼𑀧𑁆𑀧𑀢𑁆𑀢𑀺𑀓𑀧𑀜𑁆𑀜𑀸𑀬 𑀲𑀫𑀦𑁆𑀦𑀸𑀕𑀢𑁄. 𑀧𑀝𑀺𑀩𑀮𑁄𑀢𑀺 𑀲𑀫𑀢𑁆𑀣𑁄. 𑀅𑀢𑁆𑀣𑁂 𑀘𑀺𑀦𑁆𑀢𑁂𑀢𑀼𑀦𑁆𑀢𑀺 𑀯𑀟𑁆𑀠𑀺𑀅𑀢𑁆𑀣𑁂 𑀘𑀺𑀦𑁆𑀢𑁂𑀢𑀼𑀁. 𑀲𑁄 𑀳𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀅𑀢𑁆𑀣𑀯𑀲𑁂𑀦𑁂𑀯 ‘‘𑀅𑀢𑀻𑀢𑁂𑀧𑀺 𑀏𑀯𑀁 𑀅𑀳𑁂𑀲𑀼𑀁, 𑀅𑀦𑀸𑀕𑀢𑁂𑀧𑀺 𑀏𑀯𑀁 𑀪𑀯𑀺𑀲𑁆𑀲𑀦𑁆𑀢𑀻’’𑀢𑀺 𑀘𑀺𑀦𑁆𑀢𑁂𑀢𑀺. 𑀯𑀺𑀚𑀺𑀢𑀸𑀯𑀻𑀦𑀦𑁆𑀢𑀺 𑀯𑀺𑀚𑀺𑀢𑀯𑀺𑀚𑀬𑀸𑀦𑀁, 𑀫𑀳𑀦𑁆𑀢𑁂𑀦 𑀯𑀸 𑀯𑀺𑀚𑀬𑁂𑀦 𑀲𑀫𑀦𑁆𑀦𑀸𑀕𑀢𑀸𑀦𑀁. 𑀯𑀺𑀫𑀼𑀢𑁆𑀢𑀘𑀺𑀢𑁆𑀢𑀸𑀦𑀦𑁆𑀢𑀺 𑀧𑀜𑁆𑀘𑀳𑀺 𑀯𑀺𑀫𑀼𑀢𑁆𑀢𑀻𑀳𑀺 𑀯𑀺𑀫𑀼𑀢𑁆𑀢𑀫𑀸𑀦𑀲𑀸𑀦𑀁.

𑁫-𑁬. 𑀧𑀢𑁆𑀣𑀦𑀸𑀲𑀼𑀢𑁆𑀢𑀤𑁆𑀯𑀬𑀯𑀡𑁆𑀡𑀦𑀸

𑁧𑁩𑁫-𑁧𑁩𑁬. 𑀧𑀜𑁆𑀘𑀫𑁂 𑀦𑁂𑀕𑀫𑀚𑀸𑀦𑀧𑀤𑀲𑁆𑀲𑀸𑀢𑀺 𑀦𑀺𑀕𑀫𑀯𑀸𑀲𑀺𑀦𑁄 𑀘 𑀭𑀝𑁆𑀞𑀯𑀸𑀲𑀺𑀦𑁄 𑀘 𑀚𑀦𑀲𑁆𑀲. 𑀳𑀢𑁆𑀣𑀺𑀲𑁆𑀫𑀺𑀦𑁆𑀢𑀺𑀆𑀤𑀻𑀳𑀺 𑀳𑀢𑁆𑀣𑀺𑀅𑀲𑁆𑀲𑀭𑀣𑀣𑀭𑀼𑀥𑀦𑀼𑀮𑁂𑀔𑀫𑀼𑀤𑁆𑀤𑀸𑀕𑀡𑀦𑀸𑀤𑀻𑀦𑀺 𑀲𑁄𑀴𑀲 𑀫𑀳𑀸𑀲𑀺𑀧𑁆𑀧𑀸𑀦𑀺 𑀤𑀲𑁆𑀲𑀺𑀢𑀸𑀦𑀺. 𑀅𑀦𑀯𑀬𑁄𑀢𑀺 𑀲𑀫𑀢𑁆𑀣𑁄 𑀧𑀭𑀺𑀧𑀼𑀡𑁆𑀡𑁄. 𑀲𑁂𑀲𑀫𑁂𑀢𑁆𑀣 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀙𑀝𑁆𑀞𑁂 𑀑𑀧𑀭𑀚𑁆𑀚𑀦𑁆𑀢𑀺 𑀉𑀧𑀭𑀸𑀚𑀪𑀸𑀯𑀁.

𑁭. 𑀅𑀧𑁆𑀧𑀁𑀲𑀼𑀧𑀢𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁩𑁭. 𑀲𑀢𑁆𑀢𑀫𑁂 𑀧𑀼𑀭𑀺𑀲𑀸𑀥𑀺𑀧𑁆𑀧𑀸𑀬𑀸𑀢𑀺 𑀅𑀲𑁆𑀲𑀤𑁆𑀥𑀫𑁆𑀫𑀯𑀲𑁂𑀦 𑀧𑀼𑀭𑀺𑀲𑁂 𑀉𑀧𑁆𑀧𑀦𑁆𑀦𑀸𑀥𑀺𑀧𑁆𑀧𑀸𑀬𑀸 𑀧𑀼𑀭𑀺𑀲𑀚𑁆𑀛𑀸𑀲𑀬𑀸. 𑀆𑀤𑀸𑀦𑀸𑀥𑀺𑀧𑁆𑀧𑀸𑀬𑁄𑀢𑀺 𑀇𑀤𑀸𑀦𑀺 𑀕𑀳𑁂𑀢𑀼𑀁 𑀲𑀓𑁆𑀔𑀺𑀲𑁆𑀲𑀸𑀫𑀺, 𑀇𑀤𑀸𑀦𑀺 𑀲𑀓𑁆𑀔𑀺𑀲𑁆𑀲𑀸𑀫𑀻𑀢𑀺 𑀏𑀯𑀁 𑀕𑀳𑀡𑀸𑀥𑀺𑀧𑁆𑀧𑀸𑀬𑁄. 𑀯𑀺𑀲𑀁𑀬𑁄𑀕𑀸𑀥𑀺𑀧𑁆𑀧𑀸𑀬𑁄𑀢𑀺 𑀇𑀤𑀸𑀦𑀺 𑀦𑀺𑀩𑁆𑀩𑀸𑀦𑀁 𑀧𑀸𑀧𑀼𑀡𑀺𑀲𑁆𑀲𑀸𑀫𑀺, 𑀇𑀤𑀸𑀦𑀺 𑀧𑀸𑀧𑀼𑀡𑀺𑀲𑁆𑀲𑀸𑀫𑀻𑀢𑀺 𑀏𑀯𑀁 𑀦𑀺𑀩𑁆𑀩𑀸𑀦𑀚𑁆𑀛𑀸𑀲𑀬𑁄.

𑁮. 𑀪𑀢𑁆𑀢𑀸𑀤𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁩𑁮. 𑀅𑀝𑁆𑀞𑀫𑁂 𑀪𑀢𑁆𑀢𑀸𑀤𑀓𑁄𑀢𑀺 𑀪𑀢𑁆𑀢𑀓𑁆𑀔𑀸𑀤𑀓𑁄, 𑀩𑀳𑀼𑀪𑀢𑁆𑀢𑀪𑀼𑀜𑁆𑀚𑁄𑀢𑀺 𑀅𑀢𑁆𑀣𑁄. 𑀑𑀓𑀸𑀲𑀨𑀭𑀡𑁄𑀢𑀺 𑀑𑀓𑀸𑀲𑀁 𑀨𑀭𑀺𑀢𑁆𑀯𑀸 𑀅𑀜𑁆𑀜𑁂𑀲𑀁 𑀲𑀫𑁆𑀩𑀸𑀥𑀁 𑀓𑀢𑁆𑀯𑀸 𑀞𑀸𑀦𑁂𑀦 𑀑𑀓𑀸𑀲𑀨𑀭𑀡𑁄. 𑀢𑀢𑁆𑀣 𑀢𑀢𑁆𑀣 𑀮𑀡𑁆𑀟𑀁 𑀲𑀸𑀭𑁂𑀢𑀺 𑀧𑀸𑀢𑁂𑀢𑀻𑀢𑀺 𑀮𑀡𑁆𑀟𑀲𑀸𑀭𑀡𑁄. 𑀏𑀢𑁆𑀢𑀓𑀸 𑀳𑀢𑁆𑀣𑀻𑀢𑀺 𑀕𑀡𑀦𑀓𑀸𑀮𑁂 𑀲𑀮𑀸𑀓𑀁 𑀕𑀡𑁆𑀳𑀸𑀢𑀻𑀢𑀺 𑀲𑀮𑀸𑀓𑀕𑁆𑀕𑀸𑀳𑀻. 𑀦𑀺𑀲𑀻𑀤𑀦𑀲𑀬𑀦𑀯𑀲𑁂𑀦 𑀫𑀜𑁆𑀘𑀧𑀻𑀞𑀁 𑀫𑀤𑁆𑀤𑀢𑀻𑀢𑀺 𑀫𑀜𑁆𑀘𑀧𑀻𑀞𑀫𑀤𑁆𑀤𑀦𑁄. 𑀪𑀺𑀓𑁆𑀔𑀼𑀕𑀡𑀦𑀓𑀸𑀮𑁂 𑀲𑀮𑀸𑀓𑀁 𑀕𑀡𑁆𑀳𑀸𑀢𑀻𑀢𑀺 𑀲𑀮𑀸𑀓𑀕𑁆𑀕𑀸𑀳𑀻.

𑁯. 𑀅𑀓𑁆𑀔𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁩𑁯. 𑀦𑀯𑀫𑁂 𑀳𑀢𑁆𑀣𑀺𑀓𑀸𑀬𑀦𑁆𑀢𑀺 𑀳𑀢𑁆𑀣𑀺𑀖𑀝𑀁. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀲𑀗𑁆𑀕𑀸𑀫𑁂 𑀅𑀯𑀘𑀭𑀦𑁆𑀢𑀻𑀢𑀺 𑀲𑀗𑁆𑀕𑀸𑀫𑀸𑀯𑀘𑀭𑀸. 𑀏𑀓𑀺𑀲𑁆𑀲𑀸 𑀯𑀸 𑀢𑀺𑀡𑁄𑀤𑀓𑀤𑀢𑁆𑀢𑀺𑀬𑀸 𑀯𑀺𑀫𑀸𑀦𑀺𑀢𑁄𑀢𑀺 𑀏𑀓𑀤𑀺𑀯𑀲𑀁 𑀏𑀓𑁂𑀦 𑀢𑀺𑀡𑁄𑀤𑀓𑀤𑀸𑀦𑁂𑀦 𑀯𑀺𑀫𑀸𑀦𑀺𑀢𑁄, 𑀏𑀓𑀤𑀺𑀯𑀲𑀫𑀢𑁆𑀢𑀁 𑀅𑀮𑀤𑁆𑀥𑀢𑀺𑀡𑁄𑀤𑀓𑁄𑀢𑀺 𑀅𑀢𑁆𑀣𑁄. 𑀇𑀢𑁄 𑀧𑀭𑀫𑁆𑀧𑀺 𑀏𑀲𑁂𑀯 𑀦𑀬𑁄. 𑀦 𑀲𑀓𑁆𑀓𑁄𑀢𑀺 𑀘𑀺𑀢𑁆𑀢𑀁 𑀲𑀫𑀸𑀤𑀳𑀺𑀢𑀼𑀦𑁆𑀢𑀺 𑀆𑀭𑀫𑁆𑀫𑀡𑁂 𑀘𑀺𑀢𑁆𑀢𑀁 𑀲𑀫𑁆𑀫𑀸 𑀞𑀧𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀫𑁂𑀯. 𑀇𑀫𑀲𑁆𑀫𑀺𑀁 𑀧𑀦 𑀲𑀼𑀢𑁆𑀢𑁂 𑀯𑀝𑁆𑀝𑀯𑀺𑀯𑀝𑁆𑀝𑀁 𑀓𑀣𑀺𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑁧𑁦. 𑀲𑁄𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁪𑁦. 𑀤𑀲𑀫𑁂 𑀤𑀼𑀭𑀼𑀢𑁆𑀢𑀸𑀦𑀦𑁆𑀢𑀺 𑀦 𑀲𑀼𑀝𑁆𑀞𑀼 𑀯𑀼𑀢𑁆𑀢𑀸𑀦𑀁 𑀤𑁄𑀲𑀯𑀲𑁂𑀦 𑀧𑀯𑀢𑁆𑀢𑀺𑀢𑀸𑀦𑀁 𑀨𑀭𑀼𑀲𑀯𑀘𑀦𑀸𑀦𑀁. 𑀤𑀼𑀭𑀸𑀕𑀢𑀸𑀦𑀦𑁆𑀢𑀺 𑀤𑀼𑀓𑁆𑀔𑀼𑀧𑁆𑀧𑀸𑀤𑀦𑀸𑀓𑀸𑀭𑁂𑀦 𑀲𑁄𑀢𑀤𑁆𑀯𑀸𑀭𑀁 𑀆𑀕𑀢𑀸𑀦𑀁. 𑀯𑀘𑀦𑀧𑀣𑀸𑀦𑀦𑁆𑀢𑀺 𑀯𑀘𑀦𑀸𑀦𑀁. 𑀤𑀼𑀓𑁆𑀔𑀸𑀦𑀦𑁆𑀢𑀺 𑀤𑀼𑀓𑁆𑀔𑀫𑀸𑀦𑀁. 𑀢𑀺𑀩𑁆𑀩𑀸𑀦𑀦𑁆𑀢𑀺 𑀩𑀳𑀮𑀸𑀦𑀁 𑀢𑀸𑀧𑀦𑀲𑀪𑀸𑀯𑀸𑀦𑀁 𑀯𑀸. 𑀔𑀭𑀸𑀦𑀦𑁆𑀢𑀺 𑀨𑀭𑀼𑀲𑀸𑀦𑀁. 𑀓𑀝𑀼𑀓𑀸𑀦𑀦𑁆𑀢𑀺 𑀢𑀺𑀔𑀺𑀡𑀸𑀦𑀁. 𑀅𑀲𑀸𑀢𑀸𑀦𑀦𑁆𑀢𑀺 𑀅𑀫𑀥𑀼𑀭𑀸𑀦𑀁. 𑀅𑀫𑀦𑀸𑀧𑀸𑀦𑀦𑁆𑀢𑀺 𑀫𑀦𑀁 𑀅𑀧𑁆𑀧𑀸𑀬𑀺𑀢𑀼𑀁 𑀯𑀟𑁆𑀠𑁂𑀢𑀼𑀁 𑀅𑀲𑀫𑀢𑁆𑀣𑀸𑀦𑀁. 𑀧𑀸𑀡𑀳𑀭𑀸𑀦𑀦𑁆𑀢𑀺 𑀚𑀻𑀯𑀺𑀢𑀳𑀭𑀸𑀦𑀁. 𑀬𑀸 𑀲𑀸 𑀤𑀺𑀲𑀸𑀢𑀺 𑀲𑀩𑁆𑀩𑀲𑀗𑁆𑀔𑀸𑀭𑀲𑀫𑀣𑀸𑀤𑀺𑀯𑀲𑁂𑀦 𑀤𑀺𑀲𑁆𑀲𑀢𑀺 𑀅𑀧𑀤𑀺𑀲𑁆𑀲𑀢𑀻𑀢𑀺 𑀦𑀺𑀩𑁆𑀩𑀸𑀦𑀁 𑀤𑀺𑀲𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀬𑀲𑁆𑀫𑀸 𑀧𑀦 𑀢𑀁 𑀆𑀕𑀫𑁆𑀫 𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀲𑀫𑀣𑀁 𑀕𑀘𑁆𑀙𑀦𑁆𑀢𑀺, 𑀢𑀲𑁆𑀫𑀸 𑀲𑀩𑁆𑀩𑀲𑀗𑁆𑀔𑀸𑀭𑀲𑀫𑀣𑁄𑀢𑀺 𑀯𑀼𑀢𑁆𑀢𑀁. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯. 𑀇𑀫𑀲𑁆𑀫𑀺𑀁 𑀧𑀦 𑀲𑀼𑀢𑁆𑀢𑁂 𑀲𑀻𑀮𑀲𑀫𑀸𑀥𑀺𑀧𑀜𑁆𑀜𑀸 𑀫𑀺𑀲𑁆𑀲𑀺𑀓𑀸 𑀓𑀣𑀺𑀢𑀸𑀢𑀺.

𑀭𑀸𑀚𑀯𑀕𑁆𑀕𑁄 𑀘𑀢𑀼𑀢𑁆𑀣𑁄.

(𑁧𑁫) 𑁫. 𑀢𑀺𑀓𑀡𑁆𑀟𑀓𑀻𑀯𑀕𑁆𑀕𑁄

𑁧. 𑀅𑀯𑀚𑀸𑀦𑀸𑀢𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁪𑁧. 𑀧𑀜𑁆𑀘𑀫𑀲𑁆𑀲 𑀧𑀞𑀫𑁂 𑀲𑀁𑀯𑀸𑀲𑁂𑀦𑀸𑀢𑀺 𑀏𑀓𑀢𑁄𑀯𑀸𑀲𑁂𑀦. 𑀆𑀤𑁂𑀬𑁆𑀬𑀫𑀼𑀔𑁄𑀢𑀺 𑀆𑀤𑀺𑀬𑀦𑀫𑀼𑀔𑁄, 𑀕𑀳𑀡𑀫𑀼𑀔𑁄𑀢𑀺 𑀅𑀢𑁆𑀣𑁄. 𑀢𑀫𑁂𑀦𑀁 𑀤𑀢𑁆𑀯𑀸 𑀅𑀯𑀚𑀸𑀦𑀸𑀢𑀻𑀢𑀺 ‘‘𑀅𑀬𑀁 𑀤𑀺𑀦𑁆𑀦𑀁 𑀧𑀝𑀺𑀕𑁆𑀕𑀳𑁂𑀢𑀼𑀫𑁂𑀯 𑀚𑀸𑀦𑀸𑀢𑀻’’𑀢𑀺 𑀏𑀯𑀁 𑀅𑀯𑀫𑀜𑁆𑀜𑀢𑀺. 𑀢𑀫𑁂𑀦𑀁 𑀲𑀁𑀯𑀸𑀲𑁂𑀦 𑀅𑀯𑀚𑀸𑀦𑀸𑀢𑀻𑀢𑀺 𑀅𑀧𑁆𑀧𑀫𑀢𑁆𑀢𑀓𑁂 𑀓𑀺𑀲𑁆𑀫𑀺𑀜𑁆𑀘𑀺𑀤𑁂𑀯 𑀓𑀼𑀚𑁆𑀛𑀺𑀢𑁆𑀯𑀸 ‘‘𑀚𑀸𑀦𑀸𑀫𑀳𑀁 𑀢𑀬𑀸 𑀓𑀢𑀓𑀫𑁆𑀫𑀁, 𑀏𑀢𑁆𑀢𑀓𑀁 𑀅𑀤𑁆𑀥𑀸𑀦𑀁 𑀅𑀳𑀁 𑀓𑀺𑀁 𑀓𑀭𑁄𑀦𑁆𑀢𑁄 𑀯𑀲𑀺𑀁, 𑀦𑀦𑀼 𑀢𑀼𑀬𑁆𑀳𑀫𑁂𑀯 𑀓𑀢𑀸𑀓𑀢𑀁 𑀯𑀻𑀫𑀁𑀲𑀦𑁆𑀢𑁄’’𑀢𑀺𑀆𑀤𑀻𑀦𑀺 𑀯𑀢𑁆𑀢𑀸 𑀳𑁄𑀢𑀺. 𑀅𑀣 𑀇𑀢𑀭𑁄 ‘‘𑀅𑀤𑁆𑀥𑀸 𑀓𑁄𑀘𑀺 𑀫𑀬𑁆𑀳𑀁 𑀤𑁄𑀲𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀓𑀺𑀜𑁆𑀘𑀺 𑀧𑀝𑀺𑀧𑁆𑀨𑀭𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀢𑀁 𑀔𑀺𑀧𑁆𑀧𑀜𑁆𑀜𑁂𑀯 𑀅𑀥𑀺𑀫𑀼𑀘𑁆𑀘𑀺𑀢𑀸 𑀳𑁄𑀢𑀻𑀢𑀺 𑀢𑀁 𑀯𑀡𑁆𑀡𑀁 𑀯𑀸 𑀅𑀯𑀡𑁆𑀡𑀁 𑀯𑀸 𑀲𑀻𑀖𑀫𑁂𑀯 𑀲𑀤𑁆𑀤𑀳𑀢𑀺. 𑀲𑀤𑁆𑀤𑀳𑀦𑀝𑁆𑀞𑁂𑀦 𑀳𑀺 𑀆𑀤𑀸𑀦𑁂𑀦 𑀏𑀲 𑀆𑀤𑀺𑀬𑀦𑀫𑀼𑀔𑁄𑀢𑀺 𑀯𑀼𑀢𑁆𑀢𑁄. 𑀆𑀥𑁂𑀬𑁆𑀬𑀫𑀼𑀔𑁄𑀢𑀺 𑀧𑀸𑀴𑀺𑀬𑀸 𑀧𑀦 𑀞𑀧𑀺𑀢𑀫𑀼𑀔𑁄𑀢𑀺 𑀅𑀢𑁆𑀣𑁄. 𑀫𑀕𑁆𑀕𑁂 𑀔𑀝𑀆𑀯𑀸𑀝𑁄 𑀯𑀺𑀬 𑀆𑀕𑀢𑀸𑀕𑀢𑀁 𑀉𑀤𑀓𑀁 𑀯𑀡𑁆𑀡𑀁 𑀯𑀸 𑀅𑀯𑀡𑁆𑀡𑀁 𑀯𑀸 𑀲𑀤𑁆𑀤𑀳𑀦𑀯𑀲𑁂𑀦 𑀲𑀫𑁆𑀧𑀝𑀺𑀘𑁆𑀙𑀺𑀢𑀼𑀁 𑀞𑀧𑀺𑀢𑀫𑀼𑀔𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀇𑀢𑁆𑀢𑀭𑀲𑀤𑁆𑀥𑁄𑀢𑀺 𑀧𑀭𑀺𑀢𑁆𑀢𑀓𑀲𑀤𑁆𑀥𑁄. 𑀓𑀼𑀲𑀮𑀸𑀓𑀼𑀲𑀮𑁂 𑀥𑀫𑁆𑀫𑁂 𑀦 𑀚𑀸𑀦𑀸𑀢𑀻𑀢𑀺𑀆𑀤𑀻𑀲𑀼 𑀓𑀼𑀲𑀮𑁂 𑀥𑀫𑁆𑀫𑁂 ‘‘𑀇𑀫𑁂 𑀓𑀼𑀲𑀮𑀸’’𑀢𑀺 𑀦 𑀚𑀸𑀦𑀸𑀢𑀺, 𑀅𑀓𑀼𑀲𑀮𑁂 𑀥𑀫𑁆𑀫𑁂 ‘‘𑀇𑀫𑁂 𑀅𑀓𑀼𑀲𑀮𑀸’’𑀢𑀺 𑀦 𑀚𑀸𑀦𑀸𑀢𑀺. 𑀢𑀣𑀸 𑀲𑀸𑀯𑀚𑁆𑀚𑁂 𑀲𑀤𑁄𑀲𑀥𑀫𑁆𑀫𑁂 ‘‘𑀇𑀫𑁂 𑀲𑀸𑀯𑀚𑁆𑀚𑀸’’𑀢𑀺, 𑀅𑀦𑀯𑀚𑁆𑀚𑁂 𑀘 𑀦𑀺𑀤𑁆𑀤𑁄𑀲𑀥𑀫𑁆𑀫𑁂 ‘‘𑀇𑀫𑁂 𑀅𑀦𑀯𑀚𑁆𑀚𑀸’’𑀢𑀺, 𑀳𑀻𑀦𑁂 𑀳𑀻𑀦𑀸𑀢𑀺, 𑀧𑀡𑀻𑀢𑁂 𑀧𑀡𑀻𑀢𑀸𑀢𑀺. 𑀓𑀡𑁆𑀳𑀲𑀼𑀓𑁆𑀓𑀲𑀧𑁆𑀧𑀝𑀺𑀪𑀸𑀕𑁂𑀢𑀺 ‘‘𑀇𑀫𑁂 𑀓𑀡𑁆𑀳𑀸 𑀲𑀼𑀓𑁆𑀓𑁂 𑀧𑀝𑀺𑀩𑀸𑀳𑁂𑀢𑁆𑀯𑀸 𑀞𑀺𑀢𑀢𑁆𑀢𑀸 𑀲𑀧𑁆𑀧𑀝𑀺𑀪𑀸𑀕𑀸 𑀦𑀸𑀫, 𑀇𑀫𑁂 𑀘 𑀲𑀼𑀓𑁆𑀓𑀸 𑀓𑀡𑁆𑀳𑁂 𑀧𑀝𑀺𑀩𑀸𑀳𑀺𑀢𑁆𑀯𑀸 𑀞𑀺𑀢𑀢𑁆𑀢𑀸 𑀲𑀧𑁆𑀧𑀝𑀺𑀪𑀸𑀕𑀸’’𑀢𑀺 𑀦 𑀚𑀸𑀦𑀸𑀢𑀺.

𑁨. 𑀆𑀭𑀪𑀢𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁪𑁨. 𑀤𑀼𑀢𑀺𑀬𑁂 𑀆𑀭𑀪𑀢𑀺 𑀘 𑀯𑀺𑀧𑁆𑀧𑀝𑀺𑀲𑀸𑀭𑀻 𑀘 𑀳𑁄𑀢𑀻𑀢𑀺 𑀆𑀧𑀢𑁆𑀢𑀺𑀯𑀻𑀢𑀺𑀓𑁆𑀓𑀫𑀦𑀯𑀲𑁂𑀦 𑀆𑀭𑀪𑀢𑀺 𑀘𑁂𑀯, 𑀢𑀧𑁆𑀧𑀘𑁆𑀘𑀬𑀸 𑀘 𑀯𑀺𑀧𑁆𑀧𑀝𑀺𑀲𑀸𑀭𑀻 𑀳𑁄𑀢𑀺. 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀦𑁆𑀢𑀺 𑀅𑀭𑀳𑀢𑁆𑀢𑀲𑀫𑀸𑀥𑀺𑀜𑁆𑀘𑁂𑀯 𑀅𑀭𑀳𑀢𑁆𑀢𑀨𑀮𑀜𑀸𑀡𑀜𑁆𑀘. 𑀦𑀧𑁆𑀧𑀚𑀸𑀦𑀸𑀢𑀻𑀢𑀺 𑀅𑀦𑀥𑀺𑀕𑀢𑀢𑁆𑀢𑀸 𑀦 𑀚𑀸𑀦𑀸𑀢𑀺. 𑀆𑀭𑀪𑀢𑀺 𑀦 𑀯𑀺𑀧𑁆𑀧𑀝𑀺𑀲𑀸𑀭𑀻 𑀳𑁄𑀢𑀻𑀢𑀺 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺, 𑀯𑀼𑀝𑁆𑀞𑀺𑀢𑀢𑁆𑀢𑀸 𑀧𑀦 𑀦 𑀯𑀺𑀧𑁆𑀧𑀝𑀺𑀲𑀸𑀭𑀻 𑀳𑁄𑀢𑀺. 𑀦𑀸𑀭𑀪𑀢𑀺 𑀯𑀺𑀧𑁆𑀧𑀝𑀺𑀲𑀸𑀭𑀻 𑀳𑁄𑀢𑀻𑀢𑀺 𑀲𑀓𑀺𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀢𑁆𑀯𑀸 𑀢𑀢𑁄 𑀯𑀼𑀝𑁆𑀞𑀸𑀬 𑀧𑀘𑁆𑀙𑀸 𑀓𑀺𑀜𑁆𑀘𑀸𑀧𑀺 𑀦𑀸𑀧𑀚𑁆𑀚𑀢𑀺, 𑀯𑀺𑀧𑁆𑀧𑀝𑀺𑀲𑀸𑀭𑀁 𑀧𑀦 𑀯𑀺𑀦𑁄𑀤𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀦𑀸𑀭𑀪𑀢𑀺 𑀦 𑀯𑀺𑀧𑁆𑀧𑀝𑀺𑀲𑀸𑀭𑀻 𑀳𑁄𑀢𑀻𑀢𑀺 𑀦 𑀘𑁂𑀯 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺, 𑀦 𑀘 𑀯𑀺𑀧𑁆𑀧𑀝𑀺𑀲𑀸𑀭𑀻 𑀳𑁄𑀢𑀺. 𑀢𑀜𑁆𑀘 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁…𑀧𑁂… 𑀦𑀺𑀭𑀼𑀚𑁆𑀛𑀦𑁆𑀢𑀻𑀢𑀺 𑀅𑀭𑀳𑀢𑁆𑀢𑀁 𑀧𑀦 𑀅𑀧𑁆𑀧𑀢𑁆𑀢𑁄 𑀳𑁄𑀢𑀺. 𑀧𑀜𑁆𑀘𑀫𑀦𑀬𑁂𑀦 𑀔𑀻𑀡𑀸𑀲𑀯𑁄 𑀓𑀣𑀺𑀢𑁄.

𑀆𑀭𑀫𑁆𑀪𑀚𑀸𑀢𑀺 𑀆𑀧𑀢𑁆𑀢𑀺𑀯𑀻𑀢𑀺𑀓𑁆𑀓𑀫𑀲𑀫𑁆𑀪𑀯𑀸. 𑀯𑀺𑀧𑁆𑀧𑀝𑀺𑀲𑀸𑀭𑀚𑀸𑀢𑀺 𑀯𑀺𑀧𑁆𑀧𑀝𑀺𑀲𑀸𑀭𑀢𑁄 𑀚𑀸𑀢𑀸. 𑀧𑀯𑀟𑁆𑀠𑀦𑁆𑀢𑀻𑀢𑀺 𑀧𑀼𑀦𑀧𑁆𑀧𑀼𑀦𑀁 𑀉𑀧𑁆𑀧𑀚𑁆𑀚𑀦𑁂𑀦 𑀯𑀟𑁆𑀠𑀦𑁆𑀢𑀺. 𑀆𑀭𑀫𑁆𑀪𑀚𑁂 𑀆𑀲𑀯𑁂 𑀧𑀳𑀸𑀬𑀸𑀢𑀺 𑀯𑀻𑀢𑀺𑀓𑁆𑀓𑀫𑀲𑀫𑁆𑀪𑀯𑁂 𑀆𑀲𑀯𑁂 𑀆𑀧𑀢𑁆𑀢𑀺𑀤𑁂𑀲𑀦𑀸𑀬 𑀯𑀸 𑀆𑀧𑀢𑁆𑀢𑀺𑀯𑀼𑀝𑁆𑀞𑀸𑀦𑁂𑀦 𑀯𑀸 𑀧𑀚𑀳𑀺𑀢𑁆𑀯𑀸. 𑀧𑀝𑀺𑀯𑀺𑀦𑁄𑀤𑁂𑀢𑁆𑀯𑀸𑀢𑀺 𑀲𑀼𑀤𑁆𑀥𑀦𑁆𑀢𑁂 𑀞𑀺𑀢𑀪𑀸𑀯𑀧𑀘𑁆𑀘𑀯𑁂𑀓𑁆𑀔𑀡𑁂𑀦 𑀦𑀻𑀳𑀭𑀺𑀢𑁆𑀯𑀸. 𑀘𑀺𑀢𑁆𑀢𑀁 𑀧𑀜𑁆𑀜𑀜𑁆𑀘 𑀪𑀸𑀯𑁂𑀢𑀽𑀢𑀺 𑀯𑀺𑀧𑀲𑁆𑀲𑀦𑀸𑀘𑀺𑀢𑁆𑀢𑀜𑁆𑀘 𑀢𑀁𑀲𑀫𑁆𑀧𑀬𑀼𑀢𑁆𑀢𑀁 𑀧𑀜𑁆𑀜𑀜𑁆𑀘 𑀪𑀸𑀯𑁂𑀢𑀼. 𑀲𑁂𑀲𑀁 𑀇𑀫𑀺𑀦𑀸 𑀉𑀧𑀸𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀦𑁆𑀢𑀺.

𑁩. 𑀲𑀸𑀭𑀦𑁆𑀤𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁪𑁩. 𑀢𑀢𑀺𑀬𑁂 𑀓𑀸𑀫𑀸𑀥𑀺𑀫𑀼𑀢𑁆𑀢𑀸𑀦𑀦𑁆𑀢𑀺 𑀯𑀢𑁆𑀣𑀼𑀓𑀸𑀫𑀓𑀺𑀮𑁂𑀲𑀓𑀸𑀫𑁂𑀲𑀼 𑀅𑀥𑀺𑀫𑀼𑀢𑁆𑀢𑀸𑀦𑀁. 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑁆𑀧𑀝𑀺𑀧𑀦𑁆𑀦𑁄𑀢𑀺 𑀦𑀯𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀢𑁆𑀣𑀸𑀬 𑀲𑀳𑀲𑀻𑀮𑀓𑀁 𑀧𑀼𑀩𑁆𑀩𑀪𑀸𑀕𑀧𑁆𑀧𑀝𑀺𑀧𑀤𑀁 𑀧𑀝𑀺𑀧𑀦𑁆𑀦𑁄 𑀧𑀝𑀺𑀧𑀢𑁆𑀢𑀺𑀧𑀽𑀭𑀓𑁄 𑀧𑀼𑀕𑁆𑀕𑀮𑁄 𑀤𑀼𑀮𑁆𑀮𑀪𑁄 𑀮𑁄𑀓𑀲𑁆𑀫𑀺𑀁.

𑁪. 𑀢𑀺𑀓𑀡𑁆𑀟𑀓𑀻𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁪𑁪. 𑀘𑀢𑀼𑀢𑁆𑀣𑁂 𑀅𑀧𑁆𑀧𑀝𑀺𑀓𑀽𑀮𑁂𑀢𑀺 𑀅𑀧𑁆𑀧𑀝𑀺𑀓𑀽𑀮𑀸𑀭𑀫𑁆𑀫𑀡𑁂. 𑀧𑀝𑀺𑀓𑀽𑀮𑀲𑀜𑁆𑀜𑀻𑀢𑀺 𑀧𑀝𑀺𑀓𑀽𑀮𑀦𑁆𑀢𑀺 𑀏𑀯𑀁𑀲𑀜𑁆𑀜𑀻. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣. 𑀓𑀣𑀁 𑀧𑀦𑀸𑀬𑀁 𑀏𑀯𑀁 𑀯𑀺𑀳𑀭𑀢𑀻𑀢𑀺? 𑀇𑀝𑁆𑀞𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀧𑀦 𑀅𑀲𑀼𑀪𑀸𑀬 𑀯𑀸 𑀨𑀭𑀢𑀺, 𑀅𑀦𑀺𑀘𑁆𑀘𑀢𑁄 𑀯𑀸 𑀉𑀧𑀲𑀁𑀳𑀭𑀢𑀺. 𑀏𑀯𑀁 𑀢𑀸𑀯 𑀅𑀧𑁆𑀧𑀝𑀺𑀓𑀽𑀮𑁂 𑀧𑀝𑀺𑀓𑀽𑀮𑀲𑀜𑁆𑀜𑀻 𑀯𑀺𑀳𑀭𑀢𑀺. 𑀅𑀦𑀺𑀝𑁆𑀞𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀫𑁂𑀢𑁆𑀢𑀸𑀬 𑀯𑀸 𑀨𑀭𑀢𑀺, 𑀥𑀸𑀢𑀼𑀢𑁄 𑀯𑀸 𑀉𑀧𑀲𑀁𑀳𑀭𑀢𑀺. 𑀏𑀯𑀁 𑀧𑀝𑀺𑀓𑀽𑀮𑁂 𑀅𑀧𑁆𑀧𑀝𑀺𑀓𑀽𑀮𑀲𑀜𑁆𑀜𑀻 𑀯𑀺𑀳𑀭𑀢𑀺. 𑀉𑀪𑀬𑀲𑁆𑀫𑀺𑀁 𑀧𑀦 𑀧𑀼𑀭𑀺𑀫𑀦𑀬𑀲𑁆𑀲 𑀘 𑀧𑀘𑁆𑀙𑀺𑀫𑀦𑀬𑀲𑁆𑀲 𑀘 𑀯𑀲𑁂𑀦 𑀢𑀢𑀺𑀬𑀘𑀢𑀼𑀢𑁆𑀣𑀯𑀸𑀭𑀸 𑀯𑀼𑀢𑁆𑀢𑀸, 𑀙𑀴𑀗𑁆𑀕𑀼𑀧𑁂𑀓𑁆𑀔𑀸𑀯𑀲𑁂𑀦 𑀧𑀜𑁆𑀘𑀫𑁄. 𑀙𑀴𑀗𑁆𑀕𑀼𑀧𑁂𑀓𑁆𑀔𑀸 𑀘𑁂𑀲𑀸 𑀔𑀻𑀡𑀸𑀲𑀯𑀲𑁆𑀲 𑀉𑀧𑁂𑀓𑁆𑀔𑀸𑀲𑀤𑀺𑀲𑀸, 𑀦 𑀧𑀦 𑀔𑀻𑀡𑀸𑀲𑀯𑀼𑀧𑁂𑀓𑁆𑀔𑀸. 𑀢𑀢𑁆𑀣 𑀉𑀧𑁂𑀓𑁆𑀔𑀓𑁄 𑀯𑀺𑀳𑀭𑁂𑀬𑁆𑀬𑀸𑀢𑀺 𑀫𑀚𑁆𑀛𑀢𑁆𑀢𑀪𑀸𑀯𑁂 𑀞𑀺𑀢𑁄 𑀯𑀺𑀳𑀭𑁂𑀬𑁆𑀬. 𑀓𑁆𑀯𑀘𑀦𑀻𑀢𑀺 𑀓𑀺𑀲𑁆𑀫𑀺𑀜𑁆𑀘𑀺 𑀆𑀭𑀫𑁆𑀫𑀡𑁂. 𑀓𑀢𑁆𑀣𑀘𑀻𑀢𑀺 𑀓𑀺𑀲𑁆𑀫𑀺𑀜𑁆𑀘𑀺 𑀧𑀤𑁂𑀲𑁂. 𑀓𑀺𑀜𑁆𑀘𑀦𑀢𑀺 𑀓𑁄𑀘𑀺 𑀅𑀧𑁆𑀧𑀫𑀢𑁆𑀢𑀓𑁄𑀧𑀺. 𑀇𑀢𑀺 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀧𑀜𑁆𑀘𑀲𑀼 𑀞𑀸𑀦𑁂𑀲𑀼 𑀯𑀺𑀧𑀲𑁆𑀲𑀦𑀸𑀯 𑀓𑀣𑀺𑀢𑀸. 𑀢𑀁 𑀆𑀭𑀤𑁆𑀥𑀯𑀺𑀧𑀲𑁆𑀲𑀓𑁄 𑀪𑀺𑀓𑁆𑀔𑀼 𑀓𑀸𑀢𑀼𑀁 𑀲𑀓𑁆𑀓𑁄𑀢𑀺, 𑀜𑀸𑀡𑀯𑀸 𑀧𑀜𑁆𑀜𑀼𑀢𑁆𑀢𑀭𑁄 𑀩𑀳𑀼𑀲𑁆𑀲𑀼𑀢𑀲𑀫𑀡𑁄𑀧𑀺 𑀓𑀸𑀢𑀼𑀁 𑀲𑀓𑁆𑀓𑁄𑀢𑀺. 𑀲𑁄𑀢𑀸𑀧𑀦𑁆𑀦𑀲𑀓𑀤𑀸𑀕𑀸𑀫𑀺𑀅𑀦𑀸𑀕𑀸𑀫𑀺𑀦𑁄 𑀓𑀸𑀢𑀼𑀁 𑀲𑀓𑁆𑀓𑁄𑀦𑁆𑀢𑀺𑀬𑁂𑀯, 𑀔𑀻𑀡𑀸𑀲𑀯𑁂 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀻𑀢𑀺. 𑀧𑀜𑁆𑀘𑀫𑀁 𑀉𑀢𑁆𑀢𑀸𑀦𑀫𑁂𑀯.

𑁬. 𑀫𑀺𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁪𑁬. 𑀙𑀝𑁆𑀞𑁂 𑀓𑀫𑁆𑀫𑀦𑁆𑀢𑀁 𑀓𑀸𑀭𑁂𑀢𑀻𑀢𑀺 𑀔𑁂𑀢𑁆𑀢𑀸𑀤𑀺𑀓𑀫𑁆𑀫𑀦𑁆𑀢𑀁 𑀓𑀸𑀭𑁂𑀢𑀺. 𑀅𑀥𑀺𑀓𑀭𑀡𑀁 𑀆𑀤𑀺𑀬𑀢𑀻𑀢𑀺 𑀘𑀢𑁆𑀢𑀸𑀭𑀺 𑀅𑀥𑀺𑀓𑀭𑀡𑀸𑀦𑀺 𑀆𑀤𑀺𑀬𑀢𑀺. 𑀧𑀸𑀫𑁄𑀓𑁆𑀔𑁂𑀲𑀼 𑀪𑀺𑀓𑁆𑀔𑀽𑀲𑀽𑀢𑀺 𑀤𑀺𑀲𑀸𑀧𑀸𑀫𑁄𑀓𑁆𑀔𑁂𑀲𑀼 𑀪𑀺𑀓𑁆𑀔𑀽𑀲𑀼. 𑀧𑀝𑀺𑀯𑀺𑀭𑀼𑀤𑁆𑀥𑁄 𑀳𑁄𑀢𑀻𑀢𑀺 𑀧𑀘𑁆𑀘𑀦𑀻𑀓𑀕𑁆𑀕𑀸𑀳𑀺𑀢𑀸𑀬 𑀯𑀺𑀭𑀼𑀤𑁆𑀥𑁄 𑀳𑁄𑀢𑀺. 𑀅𑀦𑀯𑀢𑁆𑀣𑀘𑀸𑀭𑀺𑀓𑀦𑁆𑀢𑀺 𑀅𑀦𑀯𑀢𑁆𑀣𑀸𑀦𑀘𑀸𑀭𑀺𑀓𑀁.

𑁭. 𑀅𑀲𑀧𑁆𑀧𑀼𑀭𑀺𑀲𑀤𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁪𑁭. 𑀲𑀢𑁆𑀢𑀫𑁂 𑀅𑀲𑀓𑁆𑀓𑀘𑁆𑀘𑀁 𑀤𑁂𑀢𑀻𑀢𑀺 𑀦 𑀲𑀓𑁆𑀓𑀭𑀺𑀢𑁆𑀯𑀸 𑀲𑀼𑀘𑀺𑀁 𑀓𑀢𑁆𑀯𑀸 𑀤𑁂𑀢𑀺. 𑀅𑀘𑀺𑀢𑁆𑀢𑀻𑀓𑀢𑁆𑀯𑀸 𑀤𑁂𑀢𑀻𑀢𑀺 𑀅𑀘𑀺𑀢𑁆𑀢𑀻𑀓𑀸𑀭𑁂𑀦 𑀅𑀕𑀸𑀭𑀯𑀯𑀲𑁂𑀦 𑀤𑁂𑀢𑀺. 𑀅𑀧𑀯𑀺𑀤𑁆𑀥𑀁 𑀤𑁂𑀢𑀻𑀢𑀺 𑀦 𑀦𑀺𑀭𑀦𑁆𑀢𑀭𑀁 𑀤𑁂𑀢𑀺, 𑀅𑀣 𑀯𑀸 𑀙𑀟𑁆𑀟𑁂𑀢𑀼𑀓𑀸𑀫𑁄 𑀯𑀺𑀬 𑀤𑁂𑀢𑀺. 𑀅𑀦𑀸𑀕𑀫𑀦𑀤𑀺𑀝𑁆𑀞𑀺𑀓𑁄 𑀤𑁂𑀢𑀻𑀢𑀺 𑀓𑀢𑀲𑁆𑀲 𑀦𑀸𑀫 𑀨𑀮𑀁 𑀆𑀕𑀫𑀺𑀲𑁆𑀲𑀢𑀻𑀢𑀺 𑀦 𑀏𑀯𑀁 𑀆𑀕𑀫𑀦𑀤𑀺𑀝𑁆𑀞𑀺𑀁 𑀦 𑀉𑀧𑁆𑀧𑀸𑀤𑁂𑀢𑁆𑀯𑀸 𑀤𑁂𑀢𑀺.

𑀲𑀼𑀓𑁆𑀓𑀧𑀓𑁆𑀔𑁂 𑀘𑀺𑀢𑁆𑀢𑀻𑀓𑀢𑁆𑀯𑀸 𑀤𑁂𑀢𑀻𑀢𑀺 𑀤𑁂𑀬𑁆𑀬𑀥𑀫𑁆𑀫𑁂 𑀘 𑀤𑀓𑁆𑀔𑀺𑀡𑁂𑀬𑁆𑀬𑁂𑀲𑀼 𑀘 𑀘𑀺𑀢𑁆𑀢𑀻𑀓𑀸𑀭𑀁 𑀉𑀧𑀝𑁆𑀞𑀧𑁂𑀢𑁆𑀯𑀸 𑀤𑁂𑀢𑀺. 𑀢𑀢𑁆𑀣 𑀤𑁂𑀬𑁆𑀬𑀥𑀫𑁆𑀫𑀁 𑀧𑀡𑀻𑀢𑀁 𑀑𑀚𑀯𑀦𑁆𑀢𑀁 𑀓𑀢𑁆𑀯𑀸 𑀤𑁂𑀦𑁆𑀢𑁄 𑀤𑁂𑀬𑁆𑀬𑀥𑀫𑁆𑀫𑁂 𑀘𑀺𑀢𑁆𑀢𑀻𑀓𑀸𑀭𑀁 𑀉𑀧𑀝𑁆𑀞𑀧𑁂𑀢𑀺 𑀦𑀸𑀫. 𑀧𑀼𑀕𑁆𑀕𑀮𑀁 𑀯𑀺𑀘𑀺𑀦𑀺𑀢𑁆𑀯𑀸 𑀤𑁂𑀦𑁆𑀢𑁄 𑀤𑀓𑁆𑀔𑀺𑀡𑁂𑀬𑁆𑀬𑁂𑀲𑀼 𑀘𑀺𑀢𑁆𑀢𑀻𑀓𑀸𑀭𑀁 𑀉𑀧𑀝𑁆𑀞𑀧𑁂𑀢𑀺 𑀦𑀸𑀫. 𑀲𑀳𑀢𑁆𑀣𑀸 𑀤𑁂𑀢𑀻𑀢𑀺 𑀆𑀡𑀢𑁆𑀢𑀺𑀬𑀸 𑀧𑀭𑀳𑀢𑁆𑀣𑁂𑀦 𑀅𑀤𑀢𑁆𑀯𑀸 ‘‘𑀅𑀦𑀫𑀢𑀕𑁆𑀕𑁂 𑀲𑀁𑀲𑀸𑀭𑁂 𑀯𑀺𑀘𑀭𑀦𑁆𑀢𑁂𑀦 𑀫𑁂 𑀳𑀢𑁆𑀣𑀧𑀸𑀤𑀸𑀦𑀁 𑀅𑀮𑀤𑁆𑀥𑀓𑀸𑀮𑀲𑁆𑀲 𑀧𑀫𑀸𑀡𑀁 𑀦𑀸𑀫 𑀦𑀢𑁆𑀣𑀺, 𑀯𑀝𑁆𑀝𑀫𑁄𑀓𑁆𑀔𑀁 𑀪𑀯𑀦𑀺𑀲𑁆𑀲𑀭𑀡𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀲𑀳𑀢𑁆𑀣𑁂𑀦𑁂𑀯 𑀤𑁂𑀢𑀺. 𑀆𑀕𑀫𑀦𑀤𑀺𑀝𑁆𑀞𑀺𑀓𑁄𑀢𑀺 ‘‘𑀅𑀦𑀸𑀕𑀢𑀪𑀯𑀲𑁆𑀲 𑀧𑀘𑁆𑀘𑀬𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀓𑀫𑁆𑀫𑀜𑁆𑀘 𑀯𑀺𑀧𑀸𑀓𑀜𑁆𑀘 𑀲𑀤𑁆𑀤𑀳𑀺𑀢𑁆𑀯𑀸 𑀤𑁂𑀢𑀻𑀢𑀺.

𑁮. 𑀲𑀧𑁆𑀧𑀼𑀭𑀺𑀲𑀤𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁪𑁮. 𑀅𑀝𑁆𑀞𑀫𑁂 𑀲𑀤𑁆𑀥𑀸𑀬𑀸𑀢𑀺 𑀤𑀸𑀦𑀜𑁆𑀘 𑀤𑀸𑀦𑀨𑀮𑀜𑁆𑀘 𑀲𑀤𑁆𑀤𑀳𑀺𑀢𑁆𑀯𑀸. 𑀓𑀸𑀮𑁂𑀦𑀸𑀢𑀺 𑀬𑀼𑀢𑁆𑀢𑀧𑁆𑀧𑀢𑁆𑀢𑀓𑀸𑀮𑁂𑀦. 𑀅𑀦𑀕𑁆𑀕𑀳𑀺𑀢𑀘𑀺𑀢𑁆𑀢𑁄𑀢𑀺 𑀅𑀕𑁆𑀕𑀳𑀺𑀢𑀘𑀺𑀢𑁆𑀢𑁄 𑀫𑀼𑀢𑁆𑀢𑀘𑀸𑀕𑁄 𑀳𑀼𑀢𑁆𑀯𑀸. 𑀅𑀦𑀼𑀧𑀳𑀘𑁆𑀘𑀸𑀢𑀺 𑀅𑀦𑀼𑀧𑀖𑀸𑀢𑁂𑀢𑁆𑀯𑀸 𑀕𑀼𑀡𑁂 𑀅𑀫𑀓𑁆𑀔𑁂𑀢𑁆𑀯𑀸. 𑀓𑀸𑀮𑀸𑀕𑀢𑀸 𑀘𑀲𑁆𑀲 𑀅𑀢𑁆𑀣𑀸 𑀧𑀘𑀼𑀭𑀸 𑀳𑁄𑀦𑁆𑀢𑀻𑀢𑀺 𑀅𑀢𑁆𑀣𑀸 𑀆𑀕𑀘𑁆𑀙𑀫𑀸𑀦𑀸 𑀯𑀬𑁄𑀯𑀼𑀟𑁆𑀠𑀓𑀸𑀮𑁂 𑀅𑀦𑀸𑀕𑀦𑁆𑀢𑁆𑀯𑀸 𑀬𑀼𑀢𑁆𑀢𑀧𑁆𑀧𑀢𑁆𑀢𑀓𑀸𑀮𑁂 𑀧𑀞𑀫𑀯𑀬𑀲𑁆𑀫𑀺𑀁𑀬𑁂𑀯 𑀆𑀕𑀘𑁆𑀙𑀦𑁆𑀢𑀺 𑀘𑁂𑀯 𑀩𑀳𑀽 𑀘 𑀳𑁄𑀦𑁆𑀢𑀺.

𑁯. 𑀧𑀞𑀫𑀲𑀫𑀬𑀯𑀺𑀫𑀼𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁪𑁯. 𑀦𑀯𑀫𑁂 𑀲𑀫𑀬𑀯𑀺𑀫𑀼𑀢𑁆𑀢𑀲𑁆𑀲𑀸𑀢𑀺 𑀅𑀧𑁆𑀧𑀺𑀢𑀧𑁆𑀧𑀺𑀢𑀓𑁆𑀔𑀡𑁂𑀬𑁂𑀯 𑀯𑀺𑀓𑁆𑀔𑀫𑁆𑀪𑀺𑀢𑁂𑀳𑀺 𑀓𑀺𑀮𑁂𑀲𑁂𑀳𑀺 𑀯𑀺𑀫𑀼𑀢𑁆𑀢𑀢𑁆𑀢𑀸 𑀲𑀫𑀬𑀯𑀺𑀫𑀼𑀢𑁆𑀢𑀺𑀲𑀗𑁆𑀔𑀸𑀢𑀸𑀬 𑀮𑁄𑀓𑀺𑀬𑀯𑀺𑀫𑀼𑀢𑁆𑀢𑀺𑀬𑀸 𑀯𑀺𑀫𑀼𑀢𑁆𑀢𑀘𑀺𑀢𑁆𑀢𑀲𑁆𑀲. 𑀤𑀲𑀫𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑀢𑀺𑀓𑀡𑁆𑀟𑀓𑀻𑀯𑀕𑁆𑀕𑁄 𑀧𑀜𑁆𑀘𑀫𑁄.

𑀢𑀢𑀺𑀬𑀧𑀡𑁆𑀡𑀸𑀲𑀓𑀁 𑀦𑀺𑀝𑁆𑀞𑀺𑀢𑀁.