𑁪. 𑀘𑀢𑀼𑀢𑁆𑀣𑀧𑀡𑁆𑀡𑀸𑀲𑀓𑀁

(𑁧𑁬) 𑁧. 𑀲𑀤𑁆𑀥𑀫𑁆𑀫𑀯𑀕𑁆𑀕𑁄

𑁧. 𑀧𑀞𑀫𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁫𑁧. 𑀘𑀢𑀼𑀢𑁆𑀣𑀲𑁆𑀲 𑀧𑀞𑀫𑁂 𑀅𑀪𑀩𑁆𑀩𑁄 𑀦𑀺𑀬𑀸𑀫𑀁 𑀑𑀓𑁆𑀓𑀫𑀺𑀢𑀼𑀁 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼 𑀲𑀫𑁆𑀫𑀢𑁆𑀢𑀦𑁆𑀢𑀺 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼 𑀲𑀫𑁆𑀫𑀢𑁆𑀢𑀪𑀽𑀢𑀁 𑀫𑀕𑁆𑀕𑀦𑀺𑀬𑀸𑀫𑀁 𑀑𑀓𑁆𑀓𑀫𑀺𑀢𑀼𑀁 𑀅𑀪𑀩𑁆𑀩𑁄 𑀅𑀪𑀸𑀚𑀦𑀁. 𑀓𑀣𑀁 𑀧𑀭𑀺𑀪𑁄𑀢𑀻𑀢𑀺𑀆𑀤𑀻𑀲𑀼 ‘‘𑀓𑀺𑀁 𑀓𑀣𑀸 𑀦𑀸𑀫 𑀏𑀲𑀸’’𑀢𑀺 𑀯𑀤𑀦𑁆𑀢𑁄 𑀓𑀣𑀁 𑀧𑀭𑀺𑀪𑁄𑀢𑀺 𑀦𑀸𑀫. ‘‘𑀓𑀺𑀁 𑀦𑀸𑀫𑁂𑀲 𑀓𑀣𑁂𑀢𑀺, 𑀓𑀺𑀁 𑀅𑀬𑀁 𑀚𑀸𑀦𑀸𑀢𑀻’’𑀢𑀺 𑀯𑀤𑀦𑁆𑀢𑁄 𑀓𑀣𑀺𑀓𑀁 𑀧𑀭𑀺𑀪𑁄𑀢𑀺 𑀦𑀸𑀫. ‘‘𑀫𑀬𑀁 𑀓𑀺𑀁 𑀚𑀸𑀦𑀸𑀫, 𑀓𑀼𑀢𑁄 𑀅𑀫𑁆𑀳𑀸𑀓𑀁 𑀏𑀢𑀁 𑀲𑁄𑀢𑀼𑀁 𑀩𑀮’’𑀦𑁆𑀢𑀺 𑀯𑀤𑀦𑁆𑀢𑁄 𑀅𑀢𑁆𑀢𑀸𑀦𑀁 𑀧𑀭𑀺𑀪𑁄𑀢𑀺 𑀦𑀸𑀫. 𑀯𑀺𑀧𑀭𑀺𑀬𑀸𑀬𑁂𑀦 𑀲𑀼𑀓𑁆𑀓𑀧𑀓𑁆𑀔𑁄 𑀯𑁂𑀤𑀺𑀢𑀩𑁆𑀩𑁄.

𑁨. 𑀤𑀼𑀢𑀺𑀬𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁫𑁨. 𑀤𑀼𑀢𑀺𑀬𑁂 𑀅𑀦𑀜𑁆𑀜𑀸𑀢𑁂 𑀅𑀜𑁆𑀜𑀸𑀢𑀫𑀸𑀦𑀻𑀢𑀺 𑀅𑀯𑀺𑀜𑁆𑀜𑀸𑀢𑀲𑁆𑀫𑀺𑀁𑀬𑁂𑀯 ‘‘𑀯𑀺𑀜𑁆𑀜𑀸𑀢𑀫𑀺𑀤𑀁 𑀫𑀬𑀸’’𑀢𑀺 𑀏𑀯𑀁𑀫𑀸𑀦𑀻.

𑁩. 𑀢𑀢𑀺𑀬𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁫𑁩. 𑀢𑀢𑀺𑀬𑁂 𑀫𑀓𑁆𑀔𑀻 𑀥𑀫𑁆𑀫𑀁 𑀲𑀼𑀡𑀸𑀢𑀻𑀢𑀺 𑀫𑀓𑁆𑀔𑀻 𑀳𑀼𑀢𑁆𑀯𑀸 𑀕𑀼𑀡𑀫𑀓𑁆𑀔𑀦𑀘𑀺𑀢𑁆𑀢𑁂𑀦 𑀥𑀫𑁆𑀫𑀁 𑀲𑀼𑀡𑀸𑀢𑀺. 𑀉𑀧𑀸𑀭𑀫𑁆𑀪𑀘𑀺𑀢𑁆𑀢𑁄𑀢𑀺 𑀦𑀺𑀕𑁆𑀕𑀳𑀸𑀭𑁄𑀧𑀦𑀘𑀺𑀢𑁆𑀢𑁄. 𑀭𑀦𑁆𑀥𑀕𑀯𑁂𑀲𑀻𑀢𑀺 𑀕𑀼𑀡𑀭𑀦𑁆𑀥𑀁 𑀕𑀼𑀡𑀘𑁆𑀙𑀺𑀤𑁆𑀤𑀁 𑀕𑀯𑁂𑀲𑀦𑁆𑀢𑁄.

𑁪. 𑀧𑀞𑀫𑀲𑀤𑁆𑀥𑀫𑁆𑀫𑀲𑀫𑁆𑀫𑁄𑀲𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁫𑁪. 𑀘𑀢𑀼𑀢𑁆𑀣𑁂 𑀦 𑀲𑀓𑁆𑀓𑀘𑁆𑀘𑀁 𑀥𑀫𑁆𑀫𑀁 𑀲𑀼𑀡𑀦𑁆𑀢𑀻𑀢𑀺 𑀑𑀳𑀺𑀢𑀲𑁄𑀢𑀸 𑀲𑀼𑀓𑀢𑀓𑀸𑀭𑀺𑀦𑁄 𑀳𑀼𑀢𑁆𑀯𑀸 𑀦 𑀲𑀼𑀡𑀦𑁆𑀢𑀺. 𑀦 𑀧𑀭𑀺𑀬𑀸𑀧𑀼𑀡𑀦𑁆𑀢𑀻𑀢𑀺 𑀬𑀣𑀸𑀲𑀼𑀢𑀁 𑀥𑀫𑁆𑀫𑀁 𑀯𑀴𑀜𑁆𑀚𑀦𑁆𑀢𑀸𑀧𑀺 𑀲𑀓𑁆𑀓𑀘𑁆𑀘𑀁 𑀦 𑀯𑀴𑀜𑁆𑀚𑁂𑀦𑁆𑀢𑀺. 𑀧𑀜𑁆𑀘𑀫𑀁 𑀉𑀢𑁆𑀢𑀸𑀦𑀫𑁂𑀯.

𑁬. 𑀢𑀢𑀺𑀬𑀲𑀤𑁆𑀥𑀫𑁆𑀫𑀲𑀫𑁆𑀫𑁄𑀲𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁫𑁬. 𑀙𑀝𑁆𑀞𑁂 𑀅𑀧𑁆𑀧𑀝𑀺𑀲𑀭𑀡𑁄𑀢𑀺 𑀅𑀧𑁆𑀧𑀢𑀺𑀝𑁆𑀞𑁄. 𑀆𑀘𑀭𑀺𑀬𑀸 𑀳𑀺 𑀲𑀼𑀢𑁆𑀢𑀦𑁆𑀢𑀲𑁆𑀲 𑀧𑀝𑀺𑀲𑀭𑀡𑀁 𑀦𑀸𑀫, 𑀢𑁂𑀲𑀁 𑀅𑀪𑀸𑀯𑀸 𑀅𑀧𑁆𑀧𑀝𑀺𑀲𑀭𑀡𑁄 𑀳𑁄𑀢𑀺. 𑀲𑁂𑀲𑀫𑁂𑀢𑁆𑀣 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀫𑁂𑀯.

𑁭. 𑀤𑀼𑀓𑁆𑀓𑀣𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁫𑁭. 𑀲𑀢𑁆𑀢𑀫𑁂 𑀧𑀼𑀕𑁆𑀕𑀮𑀁 𑀉𑀧𑀦𑀺𑀥𑀸𑀬𑀸𑀢𑀺 𑀢𑀁 𑀢𑀁 𑀧𑀼𑀕𑁆𑀕𑀮𑀁 𑀉𑀧𑀦𑀺𑀓𑁆𑀔𑀺𑀧𑀺𑀢𑁆𑀯𑀸, 𑀲𑀓𑁆𑀔𑀺𑀁 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀓𑀘𑁆𑀙𑀫𑀸𑀦𑀸𑀬𑀸𑀢𑀺 𑀓𑀣𑀺𑀬𑀫𑀸𑀦𑀸𑀬. 𑀲𑁂𑀲𑀫𑁂𑀢𑁆𑀣 𑀅𑀝𑁆𑀞𑀫𑀜𑁆𑀘 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑁯. 𑀉𑀤𑀸𑀬𑀻𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁫𑁯. 𑀦𑀯𑀫𑁂 𑀅𑀦𑀼𑀧𑀼𑀩𑁆𑀩𑀺𑀁 𑀓𑀣𑀁 𑀓𑀣𑁂𑀲𑁆𑀲𑀸𑀫𑀻𑀢𑀺 𑀤𑀸𑀦𑀸𑀦𑀦𑁆𑀢𑀭𑀁 𑀲𑀻𑀮𑀁, 𑀲𑀻𑀮𑀸𑀦𑀦𑁆𑀢𑀭𑀁 𑀲𑀕𑁆𑀕𑀦𑁆𑀢𑀺 𑀏𑀯𑀁 𑀤𑁂𑀲𑀦𑀸𑀦𑀼𑀧𑀼𑀩𑁆𑀩𑀺𑀁 𑀓𑀣𑀁 𑀯𑀸, 𑀬𑀁 𑀬𑀁 𑀲𑀼𑀢𑁆𑀢𑀧𑀤𑀁 𑀯𑀸 𑀕𑀸𑀣𑀸𑀧𑀤𑀁 𑀯𑀸 𑀦𑀺𑀓𑁆𑀔𑀺𑀢𑁆𑀢𑀁 𑀳𑁄𑀢𑀺, 𑀢𑀲𑁆𑀲 𑀢𑀲𑁆𑀲 𑀅𑀦𑀼𑀭𑀽𑀧𑀓𑀣𑀁 𑀓𑀣𑁂𑀲𑁆𑀲𑀸𑀫𑀻𑀢𑀺 𑀘𑀺𑀢𑁆𑀢𑀁 𑀉𑀧𑀝𑁆𑀞𑀧𑁂𑀢𑁆𑀯𑀸 𑀧𑀭𑁂𑀲𑀁 𑀥𑀫𑁆𑀫𑁄 𑀤𑁂𑀲𑁂𑀢𑀩𑁆𑀩𑁄. 𑀧𑀭𑀺𑀬𑀸𑀬𑀤𑀲𑁆𑀲𑀸𑀯𑀻𑀢𑀺 𑀢𑀲𑁆𑀲 𑀢𑀲𑁆𑀲 𑀅𑀢𑁆𑀣𑀲𑁆𑀲 𑀢𑀁 𑀢𑀁 𑀓𑀸𑀭𑀡𑀁 𑀤𑀲𑁆𑀲𑁂𑀦𑁆𑀢𑁄. 𑀓𑀸𑀭𑀡𑀜𑁆𑀳𑀺 𑀇𑀥 𑀧𑀭𑀺𑀬𑀸𑀬𑁄𑀢𑀺 𑀯𑀼𑀢𑁆𑀢𑀁. 𑀅𑀦𑀼𑀤𑁆𑀤𑀬𑀢𑀁 𑀧𑀝𑀺𑀘𑁆𑀘𑀸𑀢𑀺 ‘‘𑀫𑀳𑀸𑀲𑀫𑁆𑀩𑀸𑀥𑀧𑁆𑀧𑀢𑁆𑀢𑁂 𑀲𑀢𑁆𑀢𑁂 𑀲𑀫𑁆𑀩𑀸𑀥𑀢𑁄 𑀫𑁄𑀘𑁂𑀲𑁆𑀲𑀸𑀫𑀻’’𑀢𑀺 𑀅𑀦𑀼𑀓𑀫𑁆𑀧𑀁 𑀆𑀕𑀫𑁆𑀫. 𑀦 𑀆𑀫𑀺𑀲𑀦𑁆𑀢𑀭𑁄𑀢𑀺 𑀦 𑀆𑀫𑀺𑀲𑀳𑁂𑀢𑀼𑀓𑁄, 𑀅𑀢𑁆𑀢𑀦𑁄 𑀘𑀢𑀼𑀧𑀘𑁆𑀘𑀬𑀮𑀸𑀪𑀁 𑀅𑀦𑀸𑀲𑀻𑀲𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀅𑀢𑁆𑀢𑀸𑀦𑀜𑁆𑀘 𑀧𑀭𑀜𑁆𑀘 𑀅𑀦𑀼𑀧𑀳𑀘𑁆𑀘𑀸𑀢𑀺 𑀅𑀢𑁆𑀢𑀼𑀓𑁆𑀓𑀁𑀲𑀦𑀧𑀭𑀯𑀫𑁆𑀪𑀦𑀸𑀤𑀺𑀯𑀲𑁂𑀦 𑀅𑀢𑁆𑀢𑀸𑀦𑀜𑁆𑀘 𑀧𑀭𑀜𑁆𑀘 𑀕𑀼𑀡𑀼𑀧𑀖𑀸𑀢𑁂𑀦 𑀅𑀦𑀼𑀧𑀳𑀦𑁆𑀢𑁆𑀯𑀸.

𑁧𑁦. 𑀤𑀼𑀧𑁆𑀧𑀝𑀺𑀯𑀺𑀦𑁄𑀤𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁬𑁦. 𑀤𑀲𑀫𑁂 𑀤𑀼𑀧𑁆𑀧𑀝𑀺𑀯𑀺𑀦𑁄𑀤𑀬𑀸𑀢𑀺 𑀬𑀸𑀦𑀺 𑀳𑀲𑁆𑀲𑀸𑀤𑀻𑀦𑀺 𑀓𑀺𑀘𑁆𑀘𑀸𑀦𑀺 𑀦𑀺𑀧𑁆𑀨𑀸𑀤𑁂𑀢𑀼𑀁 𑀞𑀸𑀦𑀸𑀦𑀺 𑀉𑀧𑁆𑀧𑀦𑁆𑀦𑀸𑀦𑀺 𑀳𑁄𑀦𑁆𑀢𑀺, 𑀢𑁂𑀲𑀼 𑀫𑀢𑁆𑀣𑀓𑀁 𑀅𑀲𑀫𑁆𑀧𑀢𑁆𑀢𑁂𑀲𑀼 𑀅𑀦𑁆𑀢𑀭𑀸𑀬𑁂𑀯 𑀤𑀼𑀦𑁆𑀦𑀻𑀳𑀸𑀭𑀸 𑀤𑀼𑀯𑀺𑀓𑁆𑀔𑀫𑁆𑀪𑀬𑀸 𑀳𑁄𑀦𑁆𑀢𑀺. 𑀧𑀝𑀺𑀪𑀸𑀦𑀦𑁆𑀢𑀺 𑀓𑀣𑁂𑀢𑀼𑀓𑀸𑀫𑀢𑀸 𑀯𑀼𑀘𑁆𑀘𑀢𑀺. 𑀇𑀫𑀸𑀦𑀺 𑀧𑀜𑁆𑀘 𑀤𑀼𑀧𑁆𑀧𑀝𑀺𑀯𑀺𑀦𑁄𑀤𑀬𑀸𑀦𑀺, 𑀦 𑀲𑀼𑀧𑁆𑀧𑀝𑀺𑀯𑀺𑀦𑁄𑀤𑀬𑀸𑀦𑀺. 𑀉𑀧𑀸𑀬𑁂𑀦 𑀧𑀦 𑀓𑀸𑀭𑀡𑁂𑀦 𑀅𑀦𑀼𑀭𑀽𑀧𑀸𑀳𑀺 𑀧𑀘𑁆𑀘𑀯𑁂𑀓𑁆𑀔𑀡𑀅𑀦𑀼𑀲𑀸𑀲𑀦𑀸𑀤𑀻𑀳𑀺 𑀲𑀓𑁆𑀓𑀸 𑀧𑀝𑀺𑀯𑀺𑀦𑁄𑀤𑁂𑀢𑀼𑀦𑁆𑀢𑀺.

𑀲𑀤𑁆𑀥𑀫𑁆𑀫𑀯𑀕𑁆𑀕𑁄 𑀧𑀞𑀫𑁄.

(𑁧𑁭) 𑁨. 𑀆𑀖𑀸𑀢𑀯𑀕𑁆𑀕𑁄

𑁧. 𑀧𑀞𑀫𑀆𑀖𑀸𑀢𑀧𑀝𑀺𑀯𑀺𑀦𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁬𑁧. 𑀤𑀼𑀢𑀺𑀬𑀲𑁆𑀲 𑀧𑀞𑀫𑁂 𑀆𑀖𑀸𑀢𑀁 𑀧𑀝𑀺𑀯𑀺𑀦𑁂𑀦𑁆𑀢𑀺 𑀯𑀽𑀧𑀲𑀫𑁂𑀦𑁆𑀢𑀻𑀢𑀺 𑀆𑀖𑀸𑀢𑀧𑀝𑀺𑀯𑀺𑀦𑀬𑀸. 𑀬𑀢𑁆𑀣 𑀪𑀺𑀓𑁆𑀔𑀼𑀦𑁄 𑀉𑀧𑁆𑀧𑀦𑁆𑀦𑁄 𑀆𑀖𑀸𑀢𑁄 𑀲𑀩𑁆𑀩𑀲𑁄 𑀧𑀝𑀺𑀯𑀺𑀦𑁂𑀢𑀩𑁆𑀩𑁄𑀢𑀺 𑀬𑀢𑁆𑀣 𑀆𑀭𑀫𑁆𑀫𑀡𑁂 𑀪𑀺𑀓𑁆𑀔𑀼𑀦𑁄 𑀆𑀖𑀸𑀢𑁄 𑀉𑀧𑁆𑀧𑀦𑁆𑀦𑁄 𑀳𑁄𑀢𑀺, 𑀢𑀢𑁆𑀣 𑀲𑁄 𑀲𑀩𑁆𑀩𑁄 𑀇𑀫𑁂𑀳𑀺 𑀧𑀜𑁆𑀘𑀳𑀺 𑀧𑀝𑀺𑀯𑀺𑀦𑁄𑀤𑁂𑀢𑀩𑁆𑀩𑁄𑀢𑀺 𑀅𑀢𑁆𑀣𑁄. 𑀫𑁂𑀢𑁆𑀢𑀸 𑀢𑀲𑁆𑀫𑀺𑀁 𑀧𑀼𑀕𑁆𑀕𑀮𑁂 𑀪𑀸𑀯𑁂𑀢𑀩𑁆𑀩𑀸𑀢𑀺 𑀢𑀺𑀓𑀘𑀢𑀼𑀓𑁆𑀓𑀚𑁆𑀛𑀸𑀦𑀯𑀲𑁂𑀦 𑀫𑁂𑀢𑁆𑀢𑀸 𑀪𑀸𑀯𑁂𑀢𑀩𑁆𑀩𑀸. 𑀓𑀭𑀼𑀡𑀸𑀬𑀧𑀺 𑀏𑀲𑁂𑀯 𑀦𑀬𑁄. 𑀉𑀧𑁂𑀓𑁆𑀔𑀸 𑀧𑀦 𑀘𑀢𑀼𑀓𑁆𑀓𑀧𑀜𑁆𑀘𑀓𑀚𑁆𑀛𑀸𑀦𑀯𑀲𑁂𑀦 𑀪𑀸𑀯𑁂𑀢𑀩𑁆𑀩𑀸. 𑀬𑀲𑁆𑀫𑀸 𑀧𑀦 𑀬𑀁 𑀧𑀼𑀕𑁆𑀕𑀮𑀁 𑀧𑀲𑁆𑀲𑀢𑁄 𑀘𑀺𑀢𑁆𑀢𑀁 𑀦 𑀦𑀺𑀩𑁆𑀩𑀸𑀢𑀺, 𑀢𑀲𑁆𑀫𑀺𑀁 𑀫𑀼𑀤𑀺𑀢𑀸 𑀦 𑀲𑀡𑁆𑀞𑀳𑀢𑀺, 𑀢𑀲𑁆𑀫𑀸 𑀲𑀸 𑀦 𑀯𑀼𑀢𑁆𑀢𑀸. 𑀅𑀲𑀢𑀺𑀅𑀫𑀦𑀲𑀺𑀓𑀸𑀭𑁄𑀢𑀺 𑀬𑀣𑀸 𑀲𑁄 𑀧𑀼𑀕𑁆𑀕𑀮𑁄 𑀦 𑀉𑀧𑀝𑁆𑀞𑀸𑀢𑀺, 𑀓𑀼𑀝𑁆𑀝𑀸𑀤𑀻𑀳𑀺 𑀅𑀦𑁆𑀢𑀭𑀺𑀢𑁄 𑀯𑀺𑀬 𑀳𑁄𑀢𑀺, 𑀏𑀯𑀁 𑀢𑀲𑁆𑀫𑀺𑀁 𑀅𑀲𑀢𑀺𑀅𑀫𑀦𑀲𑀺𑀓𑀸𑀭𑁄 𑀆𑀧𑀚𑁆𑀚𑀺𑀢𑀩𑁆𑀩𑁄. 𑀲𑁂𑀲𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀢𑁆𑀢𑀸 𑀉𑀢𑁆𑀢𑀸𑀦𑀫𑁂𑀯.

𑁨. 𑀤𑀼𑀢𑀺𑀬𑀆𑀖𑀸𑀢𑀧𑀝𑀺𑀯𑀺𑀦𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁬𑁨. 𑀤𑀼𑀢𑀺𑀬𑁂 𑀆𑀖𑀸𑀢𑁄 𑀏𑀢𑁂𑀲𑀼 𑀧𑀝𑀺𑀯𑀺𑀦𑁂𑀢𑀩𑁆𑀩𑁄𑀢𑀺 𑀆𑀖𑀸𑀢𑀧𑀝𑀺𑀯𑀺𑀦𑀬𑀸. 𑀆𑀖𑀸𑀢𑁄 𑀏𑀢𑁂𑀳𑀺 𑀧𑀝𑀺𑀯𑀺𑀦𑁂𑀢𑀩𑁆𑀩𑁄𑀢𑀺𑀧𑀺 𑀆𑀖𑀸𑀢𑀧𑀝𑀺𑀯𑀺𑀦𑀬𑀸. 𑀧𑀝𑀺𑀯𑀺𑀦𑀬𑁄𑀢𑀺 𑀳𑀺 𑀧𑀝𑀺𑀯𑀺𑀦𑀬𑀯𑀢𑁆𑀣𑀽𑀦𑀫𑁆𑀧𑀺 𑀧𑀝𑀺𑀯𑀺𑀦𑀬𑀓𑀸𑀭𑀡𑀸𑀦𑀫𑁆𑀧𑀺 𑀏𑀢𑀁 𑀅𑀥𑀺𑀯𑀘𑀦𑀁, 𑀢𑀤𑀼𑀪𑀬𑀫𑁆𑀧𑀺 𑀇𑀥 𑀯𑀝𑁆𑀝𑀢𑀺. 𑀧𑀜𑁆𑀘 𑀳𑀺 𑀧𑀼𑀕𑁆𑀕𑀮𑀸 𑀧𑀝𑀺𑀯𑀺𑀦𑀬𑀯𑀢𑁆𑀣𑀽 𑀳𑁄𑀦𑁆𑀢𑀺 𑀧𑀜𑁆𑀘𑀳𑀺 𑀉𑀧𑀫𑀸𑀳𑀺 𑀧𑀜𑁆𑀘 𑀧𑀝𑀺𑀧𑀢𑁆𑀢𑀺𑀬𑁄 𑀧𑀝𑀺𑀯𑀺𑀦𑀬𑀓𑀸𑀭𑀡𑀸𑀦𑀺. 𑀮𑀪𑀢𑀺 𑀘 𑀓𑀸𑀮𑁂𑀦 𑀓𑀸𑀮𑀁 𑀘𑁂𑀢𑀲𑁄 𑀯𑀺𑀯𑀭𑀁 𑀘𑁂𑀢𑀲𑁄 𑀧𑀲𑀸𑀤𑀦𑁆𑀢𑀺 𑀓𑀸𑀮𑁂 𑀓𑀸𑀮𑁂 𑀲𑀫𑀣𑀯𑀺𑀧𑀲𑁆𑀲𑀦𑀸𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀦𑁆𑀦𑁄𑀓𑀸𑀲𑀲𑀗𑁆𑀔𑀸𑀢𑀁 𑀯𑀺𑀯𑀭𑀜𑁆𑀘𑁂𑀯 𑀲𑀤𑁆𑀥𑀸𑀲𑀫𑁆𑀧𑀦𑁆𑀦𑀪𑀸𑀯𑀲𑀗𑁆𑀔𑀸𑀢𑀁 𑀧𑀲𑀸𑀤𑀜𑁆𑀘 𑀮𑀪𑀢𑀺.

𑀭𑀣𑀺𑀬𑀸𑀬𑀸𑀢𑀺 𑀅𑀦𑁆𑀢𑀭𑀯𑀻𑀣𑀺𑀬𑀁. 𑀦𑀦𑁆𑀢𑀓𑀦𑁆𑀢𑀺 𑀧𑀺𑀮𑁄𑀢𑀺𑀓𑀔𑀡𑁆𑀟𑀁. 𑀦𑀺𑀕𑁆𑀕𑀳𑁂𑀢𑁆𑀯𑀸𑀢𑀺 𑀅𑀓𑁆𑀓𑀫𑀺𑀢𑁆𑀯𑀸. 𑀬𑁄 𑀢𑀢𑁆𑀣 𑀲𑀸𑀭𑁄𑀢𑀺 𑀬𑀁 𑀢𑀢𑁆𑀣 𑀣𑀺𑀭𑀝𑁆𑀞𑀸𑀦𑀁. 𑀢𑀁 𑀧𑀭𑀺𑀧𑀸𑀢𑁂𑀢𑁆𑀯𑀸𑀢𑀺 𑀢𑀁 𑀮𑀼𑀜𑁆𑀘𑀺𑀢𑁆𑀯𑀸. 𑀏𑀯𑀫𑁂𑀯 𑀔𑁄𑀢𑀺 𑀏𑀢𑁆𑀣 𑀧𑀁𑀲𑀼𑀓𑀽𑀮𑀺𑀓𑁄 𑀯𑀺𑀬 𑀫𑁂𑀢𑁆𑀢𑀸𑀯𑀺𑀳𑀸𑀭𑀻 𑀤𑀝𑁆𑀞𑀩𑁆𑀩𑁄, 𑀭𑀣𑀺𑀬𑀸𑀬 𑀦𑀦𑁆𑀢𑀓𑀁 𑀯𑀺𑀬 𑀯𑁂𑀭𑀺𑀧𑀼𑀕𑁆𑀕𑀮𑁄, 𑀤𑀼𑀩𑁆𑀩𑀮𑀝𑁆𑀞𑀸𑀦𑀁 𑀯𑀺𑀬 𑀅𑀧𑀭𑀺𑀲𑀼𑀤𑁆𑀥𑀓𑀸𑀬𑀲𑀫𑀸𑀘𑀸𑀭𑀢𑀸, 𑀣𑀺𑀭𑀝𑁆𑀞𑀸𑀦𑀁 𑀯𑀺𑀬 𑀧𑀭𑀺𑀲𑀼𑀤𑁆𑀥𑀯𑀘𑀻𑀲𑀫𑀸𑀘𑀸𑀭𑀢𑀸, 𑀤𑀼𑀩𑁆𑀩𑀮𑀝𑁆𑀞𑀸𑀦𑀁 𑀙𑀟𑁆𑀟𑁂𑀢𑁆𑀯𑀸 𑀣𑀺𑀭𑀝𑁆𑀞𑀸𑀦𑀁 𑀆𑀤𑀸𑀬 𑀕𑀦𑁆𑀢𑁆𑀯𑀸 𑀲𑀺𑀩𑁆𑀩𑀺𑀢𑁆𑀯𑀸 𑀭𑀚𑀺𑀢𑁆𑀯𑀸 𑀧𑀸𑀭𑀼𑀧𑀺𑀢𑁆𑀯𑀸 𑀯𑀺𑀘𑀭𑀡𑀓𑀸𑀮𑁄 𑀯𑀺𑀬 𑀅𑀧𑀭𑀺𑀲𑀼𑀤𑁆𑀥𑀓𑀸𑀬𑀲𑀫𑀸𑀘𑀸𑀭𑀢𑀁 𑀅𑀫𑀦𑀲𑀺𑀓𑀢𑁆𑀯𑀸 𑀧𑀭𑀺𑀲𑀼𑀤𑁆𑀥𑀯𑀘𑀻𑀲𑀫𑀸𑀘𑀸𑀭𑀢𑀁 𑀫𑀦𑀲𑀺𑀓𑀢𑁆𑀯𑀸 𑀯𑁂𑀭𑀺𑀫𑁆𑀳𑀺 𑀘𑀺𑀢𑁆𑀢𑀼𑀧𑁆𑀧𑀸𑀤𑀁 𑀦𑀺𑀩𑁆𑀩𑀸𑀧𑁂𑀢𑁆𑀯𑀸 𑀨𑀸𑀲𑀼𑀯𑀺𑀳𑀸𑀭𑀓𑀸𑀮𑁄 𑀤𑀝𑁆𑀞𑀩𑁆𑀩𑁄.

𑀲𑁂𑀯𑀸𑀮𑀧𑀡𑀓𑀧𑀭𑀺𑀬𑁄𑀦𑀤𑁆𑀥𑀸𑀢𑀺 𑀲𑁂𑀯𑀸𑀮𑁂𑀦 𑀘 𑀉𑀤𑀓𑀧𑀧𑁆𑀧𑀝𑀓𑁂𑀦 𑀘 𑀧𑀝𑀺𑀘𑁆𑀙𑀦𑁆𑀦𑀸. 𑀖𑀫𑁆𑀫𑀧𑀭𑁂𑀢𑁄𑀢𑀺 𑀖𑀫𑁆𑀫𑁂𑀦 𑀅𑀦𑀼𑀕𑀢𑁄. 𑀓𑀺𑀮𑀦𑁆𑀢𑁄𑀢𑀺 𑀫𑀕𑁆𑀕𑀓𑀺𑀮𑀦𑁆𑀢𑁄. 𑀢𑀲𑀺𑀢𑁄𑀢𑀺 𑀢𑀡𑁆𑀳𑀸𑀪𑀺𑀪𑀽𑀢𑁄. 𑀧𑀺𑀧𑀸𑀲𑀺𑀢𑁄𑀢𑀺 𑀧𑀸𑀦𑀻𑀬𑀁 𑀧𑀸𑀢𑀼𑀓𑀸𑀫𑁄. 𑀅𑀧𑀯𑀺𑀬𑀽𑀳𑀺𑀢𑁆𑀯𑀸𑀢𑀺 𑀅𑀧𑀦𑁂𑀢𑁆𑀯𑀸. 𑀧𑀺𑀯𑀺𑀢𑁆𑀯𑀸𑀢𑀺 𑀧𑀲𑀦𑁆𑀦𑀉𑀤𑀓𑀁 𑀧𑀺𑀯𑀺𑀢𑁆𑀯𑀸. 𑀏𑀯𑀫𑁂𑀯 𑀔𑁄𑀢𑀺 𑀏𑀢𑁆𑀣 𑀖𑀫𑁆𑀫𑀸𑀪𑀺𑀢𑀢𑁆𑀢𑁄 𑀧𑀼𑀭𑀺𑀲𑁄 𑀯𑀺𑀬 𑀫𑁂𑀢𑁆𑀢𑀸𑀯𑀺𑀳𑀸𑀭𑀻 𑀤𑀝𑁆𑀞𑀩𑁆𑀩𑁄, 𑀲𑁂𑀯𑀸𑀮𑀧𑀡𑀓𑀁 𑀯𑀺𑀬 𑀅𑀧𑀭𑀺𑀲𑀼𑀤𑁆𑀥𑀯𑀘𑀻𑀲𑀫𑀸𑀘𑀸𑀭𑀢𑀸, 𑀧𑀲𑀦𑁆𑀦𑀉𑀤𑀓𑀁 𑀯𑀺𑀬 𑀧𑀭𑀺𑀲𑀼𑀤𑁆𑀥𑀓𑀸𑀬𑀲𑀫𑀸𑀘𑀸𑀭𑀢𑀸, 𑀲𑁂𑀯𑀸𑀮𑀧𑀡𑀓𑀁 𑀅𑀧𑀩𑁆𑀬𑀽𑀳𑀺𑀢𑁆𑀯𑀸 𑀧𑀲𑀦𑁆𑀦𑁄𑀤𑀓𑀁 𑀧𑀺𑀯𑀺𑀢𑁆𑀯𑀸 𑀕𑀫𑀦𑀁 𑀯𑀺𑀬 𑀅𑀧𑀭𑀺𑀲𑀼𑀤𑁆𑀥𑀯𑀘𑀻𑀲𑀫𑀸𑀘𑀸𑀭𑀢𑀁 𑀅𑀫𑀦𑀲𑀺𑀓𑀢𑁆𑀯𑀸 𑀧𑀭𑀺𑀲𑀼𑀤𑁆𑀥𑀓𑀸𑀬𑀲𑀫𑀸𑀘𑀸𑀭𑀢𑀁 𑀫𑀦𑀲𑀺𑀓𑀢𑁆𑀯𑀸 𑀯𑁂𑀭𑀺𑀫𑁆𑀳𑀺 𑀘𑀺𑀢𑁆𑀢𑀼𑀧𑁆𑀧𑀸𑀤𑀁 𑀦𑀺𑀩𑁆𑀩𑀸𑀧𑁂𑀢𑁆𑀯𑀸 𑀨𑀸𑀲𑀼𑀯𑀺𑀳𑀸𑀭𑀓𑀸𑀮𑁄 𑀤𑀝𑁆𑀞𑀩𑁆𑀩𑁄.

𑀔𑁄𑀪𑁂𑀲𑁆𑀲𑀸𑀫𑀻𑀢𑀺 𑀘𑀸𑀮𑁂𑀲𑁆𑀲𑀸𑀫𑀺. 𑀮𑁄𑀴𑁂𑀲𑁆𑀲𑀸𑀫𑀻𑀢𑀺 𑀆𑀓𑀼𑀮𑀁 𑀓𑀭𑀺𑀲𑁆𑀲𑀸𑀫𑀺. 𑀅𑀧𑁂𑀬𑁆𑀬𑀫𑁆𑀧𑀺 𑀢𑀁 𑀓𑀭𑀺𑀲𑁆𑀲𑀸𑀫𑀻𑀢𑀺 𑀧𑀺𑀯𑀺𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀁 𑀓𑀭𑀺𑀲𑁆𑀲𑀸𑀫𑀺. 𑀘𑀢𑀼𑀓𑁆𑀓𑀼𑀡𑁆𑀟𑀺𑀓𑁄𑀢𑀺 𑀚𑀸𑀡𑀽𑀳𑀺 𑀘 𑀳𑀢𑁆𑀣𑁂𑀳𑀺 𑀘 𑀪𑀽𑀫𑀺𑀬𑀁 𑀧𑀢𑀺𑀝𑁆𑀞𑀸𑀦𑁂𑀦 𑀘𑀢𑀼𑀓𑁆𑀓𑀼𑀡𑁆𑀟𑀺𑀓𑁄 𑀳𑀼𑀢𑁆𑀯𑀸. 𑀕𑁄𑀧𑀻𑀢𑀓𑀁 𑀧𑀺𑀯𑀺𑀢𑁆𑀯𑀸𑀢𑀺 𑀕𑀸𑀯𑀺𑀬𑁄 𑀯𑀺𑀬 𑀫𑀼𑀔𑁂𑀦 𑀆𑀓𑀟𑁆𑀠𑁂𑀦𑁆𑀢𑁄 𑀧𑀺𑀯𑀺𑀢𑁆𑀯𑀸. 𑀏𑀯𑀫𑁂𑀯 𑀔𑁄𑀢𑀺 𑀏𑀢𑁆𑀣 𑀖𑀫𑁆𑀫𑀸𑀪𑀺𑀢𑀢𑁆𑀢𑁄 𑀧𑀼𑀭𑀺𑀲𑁄 𑀯𑀺𑀬 𑀫𑁂𑀢𑁆𑀢𑀸𑀯𑀺𑀳𑀸𑀭𑀻 𑀤𑀝𑁆𑀞𑀩𑁆𑀩𑁄, 𑀕𑁄𑀧𑀤𑀁 𑀯𑀺𑀬 𑀯𑁂𑀭𑀺𑀧𑀼𑀕𑁆𑀕𑀮𑁄, 𑀕𑁄𑀧𑀤𑁂 𑀧𑀭𑀺𑀢𑁆𑀢𑀉𑀤𑀓𑀁 𑀯𑀺𑀬 𑀢𑀲𑁆𑀲𑀩𑁆𑀪𑀦𑁆𑀢𑀭𑁂 𑀧𑀭𑀺𑀢𑁆𑀢𑀕𑀼𑀡𑁄, 𑀘𑀢𑀼𑀓𑁆𑀓𑀼𑀡𑁆𑀟𑀺𑀓𑀲𑁆𑀲 𑀕𑁄𑀧𑀻𑀢𑀓𑀁 𑀧𑀺𑀯𑀺𑀢𑁆𑀯𑀸 𑀧𑀓𑁆𑀓𑀫𑀦𑀁 𑀯𑀺𑀬 𑀢𑀲𑁆𑀲 𑀅𑀧𑀭𑀺𑀲𑀼𑀤𑁆𑀥𑀓𑀸𑀬𑀯𑀘𑀻𑀲𑀫𑀸𑀘𑀸𑀭𑀢𑀁 𑀅𑀫𑀦𑀲𑀺𑀓𑀢𑁆𑀯𑀸 𑀬𑀁 𑀲𑁄 𑀓𑀸𑀮𑁂𑀦 𑀓𑀸𑀮𑀁 𑀥𑀫𑁆𑀫𑀲𑁆𑀲𑀯𑀦𑀁 𑀦𑀺𑀲𑁆𑀲𑀸𑀬 𑀘𑁂𑀢𑀲𑁄 𑀯𑀺𑀯𑀭𑀧𑁆𑀧𑀲𑀸𑀤𑀲𑀗𑁆𑀔𑀸𑀢𑀁 𑀧𑀻𑀢𑀺𑀧𑀸𑀫𑁄𑀚𑁆𑀚𑀁 𑀮𑀪𑀢𑀺, 𑀢𑀁 𑀫𑀦𑀲𑀺𑀓𑀢𑁆𑀯𑀸 𑀘𑀺𑀢𑁆𑀢𑀼𑀧𑁆𑀧𑀸𑀤𑀦𑀺𑀩𑁆𑀩𑀸𑀧𑀦𑀁 𑀯𑁂𑀤𑀺𑀢𑀩𑁆𑀩𑀁.

𑀆𑀩𑀸𑀥𑀺𑀓𑁄𑀢𑀺 𑀇𑀭𑀺𑀬𑀸𑀧𑀣𑀪𑀜𑁆𑀚𑀦𑀓𑁂𑀦 𑀯𑀺𑀲𑀪𑀸𑀕𑀸𑀩𑀸𑀥𑁂𑀦 𑀆𑀩𑀸𑀥𑀺𑀓𑁄. 𑀧𑀼𑀭𑀢𑁄𑀧𑀺𑀲𑁆𑀲𑀸𑀢𑀺 𑀧𑀼𑀭𑀢𑁄𑀧𑀺 𑀪𑀯𑁂𑀬𑁆𑀬. 𑀅𑀦𑀬𑀩𑁆𑀬𑀲𑀦𑀦𑁆𑀢𑀺 𑀅𑀯𑀟𑁆𑀠𑀺𑀯𑀺𑀦𑀸𑀲𑀁. 𑀏𑀯𑀫𑁂𑀯 𑀔𑁄𑀢𑀺 𑀏𑀢𑁆𑀣 𑀲𑁄 𑀅𑀦𑀸𑀣𑀕𑀺𑀮𑀸𑀦𑁄 𑀯𑀺𑀬 𑀲𑀩𑁆𑀩𑀓𑀡𑁆𑀳𑀥𑀫𑁆𑀫𑀲𑀫𑀦𑁆𑀦𑀸𑀕𑀢𑁄 𑀧𑀼𑀕𑁆𑀕𑀮𑁄, 𑀅𑀤𑁆𑀥𑀸𑀦𑀫𑀕𑁆𑀕𑁄 𑀯𑀺𑀬 𑀅𑀦𑀫𑀢𑀕𑁆𑀕𑀲𑀁𑀲𑀸𑀭𑁄, 𑀧𑀼𑀭𑀢𑁄 𑀘 𑀧𑀘𑁆𑀙𑀢𑁄 𑀘 𑀕𑀸𑀫𑀸𑀦𑀁 𑀤𑀽𑀭𑀪𑀸𑀯𑁄 𑀯𑀺𑀬 𑀦𑀺𑀩𑁆𑀩𑀸𑀦𑀲𑁆𑀲 𑀤𑀽𑀭𑀪𑀸𑀯𑁄, 𑀲𑀧𑁆𑀧𑀸𑀬𑀪𑁄𑀚𑀦𑀸𑀦𑀁 𑀅𑀮𑀸𑀪𑁄 𑀯𑀺𑀬 𑀲𑀸𑀫𑀜𑁆𑀜𑀨𑀮𑀪𑁄𑀚𑀦𑀸𑀦𑀁 𑀅𑀮𑀸𑀪𑁄, 𑀲𑀧𑁆𑀧𑀸𑀬𑀪𑁂𑀲𑀚𑁆𑀚𑀸𑀦𑀁 𑀅𑀮𑀸𑀪𑁄 𑀯𑀺𑀬 𑀲𑀫𑀣𑀯𑀺𑀧𑀲𑁆𑀲𑀦𑀸𑀦𑀁 𑀅𑀪𑀸𑀯𑁄, 𑀧𑀢𑀺𑀭𑀽𑀧𑀉𑀧𑀝𑁆𑀞𑀸𑀓𑀸𑀦𑀁 𑀅𑀮𑀸𑀪𑁄 𑀯𑀺𑀬 𑀑𑀯𑀸𑀤𑀸𑀦𑀼𑀲𑀸𑀲𑀦𑀻𑀳𑀺 𑀓𑀺𑀮𑁂𑀲𑀢𑀺𑀓𑀺𑀘𑁆𑀙𑀓𑀸𑀦𑀁 𑀅𑀪𑀸𑀯𑁄, 𑀕𑀸𑀫𑀦𑁆𑀢𑀦𑀸𑀬𑀓𑀲𑁆𑀲 𑀅𑀮𑀸𑀪𑁄 𑀯𑀺𑀬 𑀦𑀺𑀩𑁆𑀩𑀸𑀦𑀲𑀫𑁆𑀧𑀸𑀧𑀓𑀲𑁆𑀲 𑀢𑀣𑀸𑀕𑀢𑀲𑁆𑀲 𑀯𑀸 𑀢𑀣𑀸𑀕𑀢𑀲𑀸𑀯𑀓𑀲𑁆𑀲 𑀯𑀸 𑀅𑀮𑀤𑁆𑀥𑀪𑀸𑀯𑁄, 𑀅𑀜𑁆𑀜𑀢𑀭𑀲𑁆𑀲 𑀧𑀼𑀭𑀺𑀲𑀲𑁆𑀲 𑀤𑀺𑀲𑁆𑀯𑀸 𑀓𑀸𑀭𑀼𑀜𑁆𑀜𑀼𑀧𑀝𑁆𑀞𑀸𑀦𑀁 𑀯𑀺𑀬 𑀢𑀲𑁆𑀫𑀺𑀁 𑀧𑀼𑀕𑁆𑀕𑀮𑁂 𑀫𑁂𑀢𑁆𑀢𑀸𑀯𑀺𑀳𑀸𑀭𑀺𑀓𑀲𑁆𑀲 𑀓𑀸𑀭𑀼𑀜𑁆𑀜𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀘𑀺𑀢𑁆𑀢𑀦𑀺𑀩𑁆𑀩𑀸𑀧𑀦𑀁 𑀯𑁂𑀤𑀺𑀢𑀩𑁆𑀩𑀁.

𑀅𑀘𑁆𑀙𑁄𑀤𑀓𑀸𑀢𑀺 𑀧𑀲𑀦𑁆𑀦𑁄𑀤𑀓𑀸. 𑀲𑀸𑀢𑁄𑀤𑀓𑀸𑀢𑀺 𑀫𑀥𑀼𑀭𑁄𑀤𑀓𑀸. 𑀲𑀻𑀢𑁄𑀤𑀓𑀸𑀢𑀺 𑀢𑀦𑀼𑀲𑀻𑀢𑀲𑀮𑀺𑀮𑀸. 𑀲𑁂𑀢𑀓𑀸𑀢𑀺 𑀊𑀫𑀺𑀪𑀺𑀚𑁆𑀚𑀦𑀝𑁆𑀞𑀸𑀦𑁂𑀲𑀼 𑀲𑁂𑀢𑀯𑀡𑁆𑀡𑀸. 𑀲𑀼𑀧𑀢𑀺𑀢𑁆𑀣𑀸𑀢𑀺 𑀲𑀫𑀢𑀺𑀢𑁆𑀣𑀸. 𑀏𑀯𑀫𑁂𑀯 𑀔𑁄𑀢𑀺 𑀏𑀢𑁆𑀣 𑀖𑀫𑁆𑀫𑀸𑀪𑀺𑀢𑀢𑁆𑀢𑁄 𑀧𑀼𑀭𑀺𑀲𑁄 𑀯𑀺𑀬 𑀫𑁂𑀢𑁆𑀢𑀸𑀯𑀺𑀳𑀸𑀭𑀻 𑀤𑀝𑁆𑀞𑀩𑁆𑀩𑁄, 𑀲𑀸 𑀧𑁄𑀓𑁆𑀔𑀭𑀡𑀻 𑀯𑀺𑀬 𑀧𑀭𑀺𑀲𑀼𑀤𑁆𑀥𑀲𑀩𑁆𑀩𑀤𑁆𑀯𑀸𑀭𑁄 𑀧𑀼𑀭𑀺𑀲𑁄, 𑀦𑁆𑀳𑀢𑁆𑀯𑀸 𑀧𑀺𑀯𑀺𑀢𑁆𑀯𑀸 𑀧𑀘𑁆𑀘𑀼𑀢𑁆𑀢𑀭𑀺𑀢𑁆𑀯𑀸 𑀭𑀼𑀓𑁆𑀔𑀘𑁆𑀙𑀸𑀬𑀸𑀬 𑀦𑀺𑀧𑀚𑁆𑀚𑀺𑀢𑁆𑀯𑀸 𑀬𑀣𑀸𑀓𑀸𑀫𑀁 𑀕𑀫𑀦𑀁 𑀯𑀺𑀬 𑀢𑁂𑀲𑀼 𑀤𑁆𑀯𑀸𑀭𑁂𑀲𑀼 𑀬𑀁 𑀇𑀘𑁆𑀙𑀢𑀺, 𑀢𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀘𑀺𑀢𑁆𑀢𑀦𑀺𑀩𑁆𑀩𑀸𑀧𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀢𑀢𑀺𑀬𑀘𑀢𑀼𑀢𑁆𑀣𑀸𑀦𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀸𑀦𑁂𑀯.

𑁫. 𑀧𑀜𑁆𑀳𑀧𑀼𑀘𑁆𑀙𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁬𑁫. 𑀧𑀜𑁆𑀘𑀫𑁂 𑀧𑀭𑀺𑀪𑀯𑀦𑁆𑀢𑀺 𑀧𑀭𑀺𑀪𑀯𑀦𑁆𑀢𑁄, 𑀏𑀯𑀁 𑀧𑀭𑀺𑀪𑀯𑀺𑀲𑁆𑀲𑀸𑀫𑀻𑀢𑀺 𑀧𑀭𑀺𑀪𑀯𑀦𑀢𑁆𑀣𑀸𑀬 𑀧𑀼𑀘𑁆𑀙𑀢𑀻𑀢𑀺 𑀅𑀢𑁆𑀣𑁄. 𑀅𑀜𑁆𑀜𑀸𑀢𑀼𑀓𑀸𑀫𑁄𑀢𑀺 𑀚𑀸𑀦𑀺𑀢𑀼𑀓𑀸𑀫𑁄 𑀳𑀼𑀢𑁆𑀯𑀸.

𑁬. 𑀦𑀺𑀭𑁄𑀥𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁬𑁬. 𑀙𑀝𑁆𑀞𑁂 𑀅𑀢𑁆𑀣𑁂𑀢𑀁 𑀞𑀸𑀦𑀦𑁆𑀢𑀺 𑀅𑀢𑁆𑀣𑀺 𑀏𑀢𑀁 𑀓𑀸𑀭𑀡𑀁. 𑀦𑁄 𑀘𑁂 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀅𑀜𑁆𑀜𑀁 𑀆𑀭𑀸𑀥𑁂𑀬𑁆𑀬𑀸𑀢𑀺 𑀦𑁄 𑀘𑁂 𑀇𑀫𑀲𑁆𑀫𑀺𑀁𑀬𑁂𑀯 𑀅𑀢𑁆𑀢𑀪𑀸𑀯𑁂 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑁂𑀬𑁆𑀬. 𑀓𑀩𑀴𑀻𑀓𑀸𑀭𑀸𑀳𑀸𑀭𑀪𑀓𑁆𑀔𑀸𑀦𑀁 𑀤𑁂𑀯𑀸𑀦𑀦𑁆𑀢𑀺 𑀓𑀸𑀫𑀸𑀯𑀘𑀭𑀤𑁂𑀯𑀸𑀦𑀁. 𑀅𑀜𑁆𑀜𑀢𑀭𑀁 𑀫𑀦𑁄𑀫𑀬𑀁 𑀓𑀸𑀬𑀦𑁆𑀢𑀺 𑀛𑀸𑀦𑀫𑀦𑁂𑀦 𑀦𑀺𑀩𑁆𑀩𑀢𑁆𑀢𑀁 𑀅𑀜𑁆𑀜𑀢𑀭𑀁 𑀲𑀼𑀤𑁆𑀥𑀸𑀯𑀸𑀲𑀩𑁆𑀭𑀳𑁆𑀫𑀓𑀸𑀬𑀁. 𑀉𑀤𑀸𑀬𑀻𑀢𑀺 𑀮𑀸𑀴𑀼𑀤𑀸𑀬𑀻. 𑀲𑁄 𑀳𑀺 ‘‘𑀫𑀦𑁄𑀫𑀬’’𑀦𑁆𑀢𑀺 𑀲𑀼𑀢𑁆𑀯𑀸 ‘‘𑀆𑀭𑀼𑀧𑁆𑀧𑁂 𑀦 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀧𑀝𑀺𑀩𑀸𑀳𑀺. 𑀣𑁂𑀭𑁄 ‘‘𑀲𑀸𑀭𑀺𑀧𑀼𑀢𑁆𑀢𑁄 𑀓𑀺𑀁 𑀚𑀸𑀦𑀸𑀢𑀺, 𑀬𑀲𑁆𑀲 𑀲𑀫𑁆𑀫𑀼𑀔𑀸 𑀏𑀯𑀁 𑀪𑀺𑀓𑁆𑀔𑀽 𑀯𑀘𑀦𑀁 𑀧𑀝𑀺𑀓𑁆𑀓𑁄𑀲𑀦𑁆𑀢𑀻’’𑀢𑀺 𑀏𑀯𑀁 𑀩𑀸𑀮𑀸𑀦𑀁 𑀮𑀤𑁆𑀥𑀺𑀉𑀧𑁆𑀧𑀢𑁆𑀢𑀺𑀧𑀝𑀺𑀩𑀸𑀳𑀦𑀢𑁆𑀣𑀁 𑀢𑀁 𑀯𑀘𑀦𑀁 𑀅𑀦𑀥𑀺𑀯𑀸𑀲𑁂𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺.

𑀅𑀢𑁆𑀣𑀺 𑀦𑀸𑀫𑀸𑀢𑀺 𑀅𑀫𑀭𑀺𑀲𑀦𑀢𑁆𑀣𑁂 𑀦𑀺𑀧𑀸𑀢𑁄. 𑀢𑁂𑀦𑁂𑀯 𑀘𑁂𑀢𑁆𑀣 ‘‘𑀅𑀚𑁆𑀛𑀼𑀧𑁂𑀓𑁆𑀔𑀺𑀲𑁆𑀲𑀣𑀸’’𑀢𑀺 𑀅𑀦𑀸𑀕𑀢𑀯𑀘𑀦𑀁 𑀓𑀢𑀁. 𑀅𑀬𑀜𑁆𑀳𑁂𑀢𑁆𑀣𑀢𑁆𑀣𑁄 𑁋 𑀆𑀦𑀦𑁆𑀤, 𑀢𑀼𑀫𑁆𑀳𑁂 𑀣𑁂𑀭𑀁 𑀪𑀺𑀓𑁆𑀔𑀼𑀁 𑀯𑀺𑀳𑁂𑀞𑀺𑀬𑀫𑀸𑀦𑀁 𑀅𑀚𑁆𑀛𑀼𑀧𑁂𑀓𑁆𑀔𑀣, 𑀦 𑀯𑁄 𑀏𑀢𑀁 𑀫𑀭𑀺𑀲𑀬𑀸𑀫𑀺 𑀦 𑀲𑀳𑀸𑀫𑀺 𑀦𑀸𑀥𑀺𑀯𑀸𑀲𑁂𑀫𑀻𑀢𑀺. 𑀓𑀲𑁆𑀫𑀸 𑀧𑀦 𑀪𑀕𑀯𑀸 𑀆𑀦𑀦𑁆𑀤𑀣𑁂𑀭𑀁𑀬𑁂𑀯 𑀏𑀯𑀫𑀸𑀳𑀸𑀢𑀺? 𑀥𑀫𑁆𑀫𑀪𑀡𑁆𑀟𑀸𑀕𑀸𑀭𑀺𑀓𑀢𑁆𑀢𑀸. 𑀥𑀫𑁆𑀫𑀪𑀡𑁆𑀟𑀸𑀕𑀸𑀭𑀺𑀓𑀲𑁆𑀲 𑀳𑀺 𑀏𑀯𑀁 𑀯𑀤𑀦𑁆𑀢𑁄 𑀧𑀝𑀺𑀩𑀸𑀳𑀺𑀢𑀼𑀁 𑀪𑀸𑀭𑁄. 𑀅𑀧𑀺𑀘𑁂𑀲 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀲𑁆𑀲 𑀧𑀺𑀬𑀲𑀳𑀸𑀬𑁄, 𑀢𑁂𑀦𑀸𑀧𑀺𑀲𑁆𑀲 𑀏𑀲 𑀪𑀸𑀭𑁄. 𑀢𑀢𑁆𑀣 𑀓𑀺𑀜𑁆𑀘𑀸𑀧𑀺 𑀪𑀕𑀯𑀸 𑀆𑀦𑀦𑁆𑀤𑀢𑁆𑀣𑁂𑀭𑀁 𑀕𑀭𑀳𑀦𑁆𑀢𑁄 𑀏𑀯𑀫𑀸𑀳, 𑀦 𑀧𑀦𑁂𑀲𑀸 𑀢𑀲𑁆𑀲𑁂𑀯 𑀕𑀭𑀳𑀸, 𑀲𑀫𑁆𑀫𑀼𑀔𑀻𑀪𑀽𑀢𑀸𑀦𑀁 𑀲𑀩𑁆𑀩𑁂𑀲𑀁𑀬𑁂𑀯 𑀕𑀭𑀳𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀯𑀺𑀳𑀸𑀭𑀦𑁆𑀢𑀺 𑀕𑀦𑁆𑀥𑀓𑀼𑀝𑀺𑀁.

𑀅𑀦𑀘𑁆𑀙𑀭𑀺𑀬𑀦𑁆𑀢𑀺 𑀦 𑀅𑀘𑁆𑀙𑀭𑀺𑀬𑀁. 𑀬𑀣𑀸𑀢𑀺 𑀓𑀸𑀭𑀡𑀯𑀘𑀦𑀁. 𑀆𑀬𑀲𑁆𑀫𑀦𑁆𑀢𑀁𑀬𑁂𑀯𑁂𑀢𑁆𑀣 𑀉𑀧𑀯𑀸𑀦𑀁 𑀧𑀝𑀺𑀪𑀸𑀲𑁂𑀬𑁆𑀬𑀸𑀢𑀺 𑀏𑀢𑁆𑀣 𑀪𑀕𑀯𑀢𑀸 𑀘 𑀏𑀯𑀁 𑀏𑀢𑀤𑁂𑀯 𑀓𑀸𑀭𑀡𑀁 𑀆𑀭𑀩𑁆𑀪 𑀉𑀤𑀸𑀳𑀝𑁂 𑀆𑀬𑀲𑁆𑀫𑀢𑁄𑀬𑁂𑀯 𑀉𑀧𑀯𑀸𑀦𑀲𑁆𑀲 𑀧𑀝𑀺𑀯𑀘𑀦𑀁 𑀧𑀝𑀺𑀪𑀸𑀢𑀼 𑀉𑀧𑀝𑁆𑀞𑀸𑀢𑀽𑀢𑀺 𑀤𑀻𑀧𑁂𑀢𑀺. 𑀲𑀸𑀭𑀚𑁆𑀚𑀁 𑀑𑀓𑁆𑀓𑀦𑁆𑀢𑀦𑁆𑀢𑀺 𑀤𑁄𑀫𑀦𑀲𑁆𑀲𑀁 𑀅𑀦𑀼𑀧𑀯𑀺𑀝𑁆𑀞𑀁. 𑀲𑀻𑀮𑀯𑀸𑀢𑀺𑀆𑀤𑀻𑀳𑀺 𑀔𑀻𑀡𑀸𑀲𑀯𑀲𑀻𑀮𑀸𑀤𑀻𑀦𑀺𑀬𑁂𑀯 𑀓𑀣𑀺𑀢𑀸𑀦𑀺. 𑀔𑀡𑁆𑀟𑀺𑀘𑁆𑀘𑁂𑀦𑀸𑀢𑀺𑀆𑀤𑀻𑀦𑀺 𑀲𑀓𑁆𑀓𑀸𑀭𑀸𑀤𑀻𑀦𑀁 𑀓𑀸𑀭𑀡𑀧𑀼𑀘𑁆𑀙𑀸𑀯𑀲𑁂𑀦 𑀯𑀼𑀢𑁆𑀢𑀸𑀦𑀺. 𑀓𑀺𑀁 𑀔𑀡𑁆𑀟𑀺𑀘𑁆𑀘𑀸𑀤𑀻𑀳𑀺 𑀓𑀸𑀭𑀡𑁂𑀳𑀺 𑀢𑀁 𑀢𑀁 𑀲𑀩𑁆𑀭𑀳𑁆𑀫𑀘𑀸𑀭𑀺𑀁 𑀲𑀓𑁆𑀓𑀭𑁂𑀬𑁆𑀬𑀼𑀦𑁆𑀢𑀺 𑀅𑀬𑀜𑁆𑀳𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄.

𑁭. 𑀘𑁄𑀤𑀦𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁬𑁭. 𑀲𑀢𑁆𑀢𑀫𑁂 𑀘𑁄𑀤𑀓𑁂𑀦𑀸𑀢𑀺 𑀯𑀢𑁆𑀣𑀼𑀲𑀦𑁆𑀤𑀲𑁆𑀲𑀦𑀸 𑀆𑀧𑀢𑁆𑀢𑀺𑀲𑀦𑁆𑀤𑀲𑁆𑀲𑀦𑀸 𑀲𑀁𑀯𑀸𑀲𑀧𑁆𑀧𑀝𑀺𑀓𑁆𑀔𑁂𑀧𑁄 𑀲𑀸𑀫𑀻𑀘𑀺𑀧𑁆𑀧𑀝𑀺𑀓𑁆𑀔𑁂𑀧𑁄𑀢𑀺 𑀘𑀢𑀽𑀳𑀺 𑀘𑁄𑀤𑀦𑀸𑀯𑀢𑁆𑀣𑀽𑀳𑀺 𑀘𑁄𑀤𑀬𑀫𑀸𑀦𑁂𑀦. 𑀓𑀸𑀮𑁂𑀦 𑀯𑀓𑁆𑀔𑀸𑀫𑀺 𑀦𑁄 𑀅𑀓𑀸𑀮𑁂𑀦𑀸𑀢𑀺 𑀏𑀢𑁆𑀣 𑀘𑀼𑀤𑀺𑀢𑀓𑀲𑁆𑀲 𑀓𑀸𑀮𑁄 𑀓𑀣𑀺𑀢𑁄, 𑀦 𑀘𑁄𑀤𑀓𑀲𑁆𑀲. 𑀧𑀭𑀁 𑀘𑁄𑀤𑁂𑀦𑁆𑀢𑁂𑀦 𑀳𑀺 𑀧𑀭𑀺𑀲𑀫𑀚𑁆𑀛𑁂 𑀯𑀸 𑀉𑀧𑁄𑀲𑀣𑀧𑀯𑀸𑀭𑀡𑀕𑁆𑀕𑁂 𑀯𑀸 𑀆𑀲𑀦𑀲𑀸𑀮𑀸𑀪𑁄𑀚𑀦𑀲𑀸𑀮𑀸𑀤𑀻𑀲𑀼 𑀯𑀸 𑀦 𑀘𑁄𑀤𑁂𑀢𑀩𑁆𑀩𑁄, 𑀤𑀺𑀯𑀸𑀝𑁆𑀞𑀸𑀦𑁂 𑀦𑀺𑀲𑀺𑀦𑁆𑀦𑀓𑀸𑀮𑁂 ‘‘𑀓𑀭𑁄𑀢𑀸𑀬𑀲𑁆𑀫𑀸 𑀑𑀓𑀸𑀲𑀁, 𑀅𑀳𑀁 𑀆𑀬𑀲𑁆𑀫𑀦𑁆𑀢𑀁 𑀯𑀢𑁆𑀢𑀼𑀓𑀸𑀫𑁄’’𑀢𑀺 𑀏𑀯𑀁 𑀑𑀓𑀸𑀲𑀁 𑀓𑀸𑀭𑁂𑀢𑁆𑀯𑀸 𑀘𑁄𑀤𑁂𑀢𑀩𑁆𑀩𑁄. 𑀧𑀼𑀕𑁆𑀕𑀮𑀁 𑀧𑀦 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸 𑀬𑁄 𑀮𑁄𑀮𑀧𑀼𑀕𑁆𑀕𑀮𑁄 𑀅𑀪𑀽𑀢𑀁 𑀯𑀢𑁆𑀯𑀸 𑀪𑀺𑀓𑁆𑀔𑀽𑀦𑀁 𑀅𑀬𑀲𑀁 𑀆𑀭𑁄𑀧𑁂𑀢𑀺, 𑀲𑁄 𑀑𑀓𑀸𑀲𑀓𑀫𑁆𑀫𑀁 𑀯𑀺𑀦𑀸𑀧𑀺 𑀘𑁄𑀤𑁂𑀢𑀩𑁆𑀩𑁄. 𑀪𑀽𑀢𑁂𑀦𑀸𑀢𑀺 𑀢𑀘𑁆𑀙𑁂𑀦 𑀲𑀪𑀸𑀯𑁂𑀦. 𑀲𑀡𑁆𑀳𑁂𑀦𑀸𑀢𑀺 𑀫𑀝𑁆𑀞𑁂𑀦 𑀫𑀼𑀤𑀼𑀓𑁂𑀦. 𑀅𑀢𑁆𑀣𑀲𑀁𑀳𑀺𑀢𑁂𑀦𑀸𑀢𑀺 𑀅𑀢𑁆𑀣𑀓𑀸𑀫𑀢𑀸𑀬 𑀳𑀺𑀢𑀓𑀸𑀫𑀢𑀸𑀬 𑀉𑀧𑁂𑀢𑁂𑀦. 𑀅𑀯𑀺𑀧𑁆𑀧𑀝𑀺𑀲𑀸𑀭𑁄 𑀉𑀧𑀤𑀳𑀸𑀢𑀩𑁆𑀩𑁄𑀢𑀺 𑀅𑀫𑀗𑁆𑀓𑀼𑀪𑀸𑀯𑁄 𑀉𑀧𑀦𑁂𑀢𑀩𑁆𑀩𑁄. 𑀅𑀮𑀁 𑀢𑁂 𑀅𑀯𑀺𑀧𑁆𑀧𑀝𑀺𑀲𑀸𑀭𑀸𑀬𑀸𑀢𑀺 𑀬𑀼𑀢𑁆𑀢𑀁 𑀢𑁂 𑀅𑀫𑀗𑁆𑀓𑀼𑀪𑀸𑀯𑀸𑀬. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺. 𑀅𑀝𑁆𑀞𑀫𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀢𑁆𑀢𑀸 𑀧𑀸𑀓𑀝𑀫𑁂𑀯.

𑁯. 𑀔𑀺𑀧𑁆𑀧𑀦𑀺𑀲𑀦𑁆𑀢𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁬𑁯. 𑀦𑀯𑀫𑁂 𑀔𑀺𑀧𑁆𑀧𑀁 𑀦𑀺𑀲𑀸𑀫𑀬𑀢𑀺 𑀉𑀧𑀥𑀸𑀭𑁂𑀢𑀻𑀢𑀺 𑀔𑀺𑀧𑁆𑀧𑀦𑀺𑀲𑀦𑁆𑀢𑀺. 𑀲𑀼𑀕𑁆𑀕𑀳𑀺𑀢𑀁 𑀓𑀢𑁆𑀯𑀸 𑀕𑀡𑁆𑀳𑀸𑀢𑀻𑀢𑀺 𑀲𑀼𑀕𑁆𑀕𑀳𑀺𑀢𑀕𑁆𑀕𑀸𑀳𑀻. 𑀅𑀢𑁆𑀣𑀓𑀼𑀲𑀮𑁄𑀢𑀺 𑀅𑀝𑁆𑀞𑀓𑀣𑀸𑀬 𑀙𑁂𑀓𑁄. 𑀥𑀫𑁆𑀫𑀓𑀼𑀲𑀮𑁄𑀢𑀺 𑀧𑀸𑀴𑀺𑀬𑀁 𑀙𑁂𑀓𑁄. 𑀦𑀺𑀭𑀼𑀢𑁆𑀢𑀺𑀓𑀼𑀲𑀮𑁄𑀢𑀺 𑀦𑀺𑀭𑀼𑀢𑁆𑀢𑀺𑀯𑀘𑀦𑁂𑀲𑀼 𑀙𑁂𑀓𑁄. 𑀩𑁆𑀬𑀜𑁆𑀚𑀦𑀓𑀼𑀲𑀮𑁄𑀢𑀺 𑀅𑀓𑁆𑀔𑀭𑀧𑁆𑀧𑀪𑁂𑀤𑁂 𑀙𑁂𑀓𑁄. 𑀧𑀼𑀩𑁆𑀩𑀸𑀧𑀭𑀓𑀼𑀲𑀮𑁄𑀢𑀺 𑀅𑀢𑁆𑀣𑀧𑀼𑀩𑁆𑀩𑀸𑀧𑀭𑀁, 𑀥𑀫𑁆𑀫𑀧𑀼𑀩𑁆𑀩𑀸𑀧𑀭𑀁, 𑀅𑀓𑁆𑀔𑀭𑀧𑀼𑀩𑁆𑀩𑀸𑀧𑀭𑀁, 𑀩𑁆𑀬𑀜𑁆𑀚𑀦𑀧𑀼𑀩𑁆𑀩𑀸𑀧𑀭𑀁, 𑀅𑀦𑀼𑀲𑀦𑁆𑀥𑀺𑀧𑀼𑀩𑁆𑀩𑀸𑀧𑀭𑀦𑁆𑀢𑀺 𑀇𑀫𑀲𑁆𑀫𑀺𑀁 𑀧𑀜𑁆𑀘𑀯𑀺𑀥𑁂 𑀧𑀼𑀩𑁆𑀩𑀸𑀧𑀭𑁂 𑀙𑁂𑀓𑁄. 𑀢𑀢𑁆𑀣 𑀅𑀢𑁆𑀣𑀧𑀼𑀩𑁆𑀩𑀸𑀧𑀭𑀓𑀼𑀲𑀮𑁄𑀢𑀺 𑀳𑁂𑀝𑁆𑀞𑀸 𑀅𑀢𑁆𑀣𑁂𑀦 𑀉𑀧𑀭𑀺 𑀅𑀢𑁆𑀣𑀁 𑀚𑀸𑀦𑀸𑀢𑀺, 𑀉𑀧𑀭𑀺 𑀅𑀢𑁆𑀣𑁂𑀦 𑀳𑁂𑀝𑁆𑀞𑀸 𑀅𑀢𑁆𑀣𑀁 𑀚𑀸𑀦𑀸𑀢𑀺. 𑀓𑀣𑀁? 𑀲𑁄 𑀳𑀺 𑀳𑁂𑀝𑁆𑀞𑀸 𑀅𑀢𑁆𑀣𑀁 𑀞𑀧𑁂𑀢𑁆𑀯𑀸 𑀉𑀧𑀭𑀺 𑀅𑀢𑁆𑀣𑁂 𑀯𑀼𑀢𑁆𑀢𑁂 ‘‘𑀳𑁂𑀝𑁆𑀞𑀸 𑀅𑀢𑁆𑀣𑁄 𑀅𑀢𑁆𑀣𑀻’’𑀢𑀺 𑀚𑀸𑀦𑀸𑀢𑀺. 𑀉𑀧𑀭𑀺 𑀅𑀢𑁆𑀣𑀁 𑀞𑀧𑁂𑀢𑁆𑀯𑀸 𑀳𑁂𑀝𑁆𑀞𑀸 𑀅𑀢𑁆𑀣𑁂 𑀯𑀼𑀢𑁆𑀢𑁂𑀧𑀺 ‘‘𑀉𑀧𑀭𑀺 𑀅𑀢𑁆𑀣𑁄 𑀅𑀢𑁆𑀣𑀻’’𑀢𑀺 𑀚𑀸𑀦𑀸𑀢𑀺. 𑀉𑀪𑀢𑁄 𑀞𑀧𑁂𑀢𑁆𑀯𑀸 𑀫𑀚𑁆𑀛𑁂 𑀅𑀢𑁆𑀣𑁂 𑀯𑀼𑀢𑁆𑀢𑁂 ‘‘𑀉𑀪𑀢𑁄 𑀅𑀢𑁆𑀣𑁄 𑀅𑀢𑁆𑀣𑀻’’𑀢𑀺 𑀚𑀸𑀦𑀸𑀢𑀺. 𑀫𑀚𑁆𑀛𑁂 𑀅𑀢𑁆𑀣𑀁 𑀞𑀧𑁂𑀢𑁆𑀯𑀸 𑀉𑀪𑀢𑁄𑀪𑀸𑀕𑁂𑀲𑀼 𑀅𑀢𑁆𑀣𑁂 𑀯𑀼𑀢𑁆𑀢𑁂 ‘‘𑀫𑀚𑁆𑀛𑁂 𑀅𑀢𑁆𑀣𑁄 𑀅𑀢𑁆𑀣𑀻’’𑀢𑀺 𑀚𑀸𑀦𑀸𑀢𑀺. 𑀥𑀫𑁆𑀫𑀧𑀼𑀩𑁆𑀩𑀸𑀧𑀭𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀅𑀦𑀼𑀲𑀦𑁆𑀥𑀺𑀧𑀼𑀩𑁆𑀩𑀸𑀧𑀭𑁂 𑀧𑀦 𑀲𑀻𑀮𑀁 𑀆𑀤𑀺𑀁 𑀓𑀢𑁆𑀯𑀸 𑀆𑀭𑀤𑁆𑀥𑁂 𑀲𑀼𑀢𑁆𑀢𑀦𑁆𑀢𑁂 𑀫𑀢𑁆𑀣𑀓𑁂 𑀙𑀲𑀼 𑀅𑀪𑀺𑀜𑁆𑀜𑀸𑀲𑀼 𑀆𑀕𑀢𑀸𑀲𑀼 ‘‘𑀬𑀣𑀸𑀦𑀼𑀲𑀦𑁆𑀥𑀺𑀁 𑀬𑀣𑀸𑀦𑀼𑀧𑀭𑀺𑀘𑁆𑀙𑁂𑀤𑀁 𑀲𑀼𑀢𑁆𑀢𑀦𑁆𑀢𑁄 𑀕𑀢𑁄’’𑀢𑀺 𑀚𑀸𑀦𑀸𑀢𑀺. 𑀤𑀺𑀝𑁆𑀞𑀺𑀯𑀲𑁂𑀦 𑀆𑀭𑀤𑁆𑀥𑁂 𑀉𑀧𑀭𑀺 𑀲𑀘𑁆𑀘𑁂𑀲𑀼 𑀆𑀕𑀢𑁂𑀲𑀼𑀧𑀺 ‘‘𑀬𑀣𑀸𑀦𑀼𑀲𑀦𑁆𑀥𑀺𑀦𑀸 𑀕𑀢𑁄’’𑀢𑀺 𑀚𑀸𑀦𑀸𑀢𑀺. 𑀓𑀮𑀳𑀪𑀡𑁆𑀟𑀦𑀯𑀲𑁂𑀦 𑀆𑀭𑀤𑁆𑀥𑁂 𑀉𑀧𑀭𑀺 𑀲𑀸𑀭𑀡𑀻𑀬𑀥𑀫𑁆𑀫𑁂𑀲𑀼 𑀆𑀕𑀢𑁂𑀲𑀼𑀧𑀺, 𑀤𑁆𑀯𑀢𑁆𑀢𑀺𑀁𑀲𑀢𑀺𑀭𑀘𑁆𑀙𑀸𑀦𑀓𑀣𑀸𑀯𑀲𑁂𑀦 𑀆𑀭𑀤𑁆𑀥𑁂 𑀉𑀧𑀭𑀺 𑀤𑀲𑀓𑀣𑀸𑀯𑀢𑁆𑀣𑀽𑀲𑀼 (𑀅. 𑀦𑀺. 𑁧𑁦.𑁬𑁯; 𑀉𑀤𑀸.𑁩𑁧) 𑀆𑀕𑀢𑁂𑀲𑀼𑀧𑀺 ‘‘𑀬𑀣𑀸𑀦𑀼𑀲𑀦𑁆𑀥𑀺𑀦𑀸 𑀕𑀢𑁄’’𑀢𑀺 𑀚𑀸𑀦𑀸𑀢𑀻𑀢𑀺.

𑁧𑁦. 𑀪𑀤𑁆𑀤𑀚𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁭𑁦. 𑀤𑀲𑀫𑁂 𑀅𑀪𑀺𑀪𑀽𑀢𑀺 𑀅𑀪𑀺𑀪𑀯𑀺𑀢𑁆𑀯𑀸 𑀞𑀺𑀢𑁄 𑀚𑁂𑀝𑁆𑀞𑀓𑁄. 𑀅𑀦𑀪𑀺𑀪𑀽𑀢𑁄𑀢𑀺 𑀅𑀜𑁆𑀜𑁂𑀳𑀺 𑀅𑀦𑀪𑀺𑀪𑀽𑀢𑁄. 𑀅𑀜𑁆𑀜𑀤𑀢𑁆𑀣𑀽𑀢𑀺 𑀏𑀓𑀁𑀲𑀯𑀘𑀦𑁂 𑀦𑀺𑀧𑀸𑀢𑁄. 𑀤𑀲𑁆𑀲𑀦𑀯𑀲𑁂𑀦 𑀤𑀲𑁄, 𑀲𑀩𑁆𑀩𑀁 𑀧𑀲𑁆𑀲𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀯𑀲𑀯𑀢𑁆𑀢𑀻𑀢𑀺 𑀲𑀩𑁆𑀩𑀁 𑀚𑀦𑀁 𑀯𑀲𑁂 𑀯𑀢𑁆𑀢𑁂𑀢𑀺. 𑀬𑀣𑀸 𑀧𑀲𑁆𑀲𑀢𑁄𑀢𑀺 𑀇𑀝𑁆𑀞𑀸𑀭𑀫𑁆𑀫𑀡𑀁 𑀯𑀸 𑀳𑁄𑀢𑀼 𑀅𑀦𑀺𑀝𑁆𑀞𑀸𑀭𑀫𑁆𑀫𑀡𑀁 𑀯𑀸, 𑀬𑁂𑀦𑀸𑀓𑀸𑀭𑁂𑀦 𑀢𑀁 𑀧𑀲𑁆𑀲𑀦𑁆𑀢𑀲𑁆𑀲. 𑀅𑀦𑀦𑁆𑀢𑀭𑀸 𑀆𑀲𑀯𑀸𑀦𑀁 𑀔𑀬𑁄 𑀳𑁄𑀢𑀻𑀢𑀺 𑀅𑀦𑀦𑁆𑀢𑀭𑀸𑀬𑁂𑀯 𑀅𑀭𑀳𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺. 𑀬𑀣𑀸 𑀲𑀼𑀡𑀢𑁄𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀅𑀣 𑀯𑀸 𑀬𑀁 𑀘𑀓𑁆𑀔𑀼𑀦𑀸 𑀭𑀽𑀧𑀁 𑀤𑀺𑀲𑁆𑀯𑀸 𑀦𑀺𑀭𑀦𑁆𑀢𑀭𑀫𑁂𑀯 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀸𑀢𑀺, 𑀢𑀁 𑀢𑀲𑁆𑀲 𑀅𑀭𑀳𑀢𑁆𑀢𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀦𑀦𑁆𑀢𑀭𑀁 𑀦𑀸𑀫 𑀳𑁄𑀢𑀺. 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋 𑀇𑀤𑀁 𑀤𑀲𑁆𑀲𑀦𑀸𑀦𑀁 𑀅𑀕𑁆𑀕𑀦𑁆𑀢𑀺. 𑀤𑀼𑀢𑀺𑀬𑀧𑀤𑁂𑀧𑀺 𑀏𑀲𑁂𑀯 𑀦𑀬𑁄.

𑀬𑀣𑀸 𑀲𑀼𑀔𑀺𑀢𑀲𑁆𑀲𑀸𑀢𑀺 𑀬𑁂𑀦 𑀫𑀕𑁆𑀕𑀲𑀼𑀔𑁂𑀦 𑀲𑀼𑀔𑀺𑀢𑀲𑁆𑀲. 𑀅𑀦𑀦𑁆𑀢𑀭𑀸 𑀆𑀲𑀯𑀸𑀦𑀁 𑀔𑀬𑁄 𑀳𑁄𑀢𑀻𑀢𑀺 𑀲𑀫𑀦𑀦𑁆𑀢𑀭𑀫𑁂𑀯 𑀅𑀭𑀳𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺. 𑀇𑀤𑀁 𑀲𑀼𑀔𑀸𑀦𑀁 𑀅𑀕𑁆𑀕𑀦𑁆𑀢𑀺 𑀇𑀤𑀁 𑀫𑀕𑁆𑀕𑀲𑀼𑀔𑀁 𑀲𑀼𑀔𑀸𑀦𑀁 𑀉𑀢𑁆𑀢𑀫𑀁. 𑀬𑀣𑀸 𑀲𑀜𑁆𑀜𑀺𑀲𑁆𑀲𑀸𑀢𑀺 𑀇𑀥𑀸𑀧𑀺 𑀫𑀕𑁆𑀕𑀲𑀜𑁆𑀜𑀸𑀯 𑀅𑀥𑀺𑀧𑁆𑀧𑁂𑀢𑀸. 𑀬𑀣𑀸 𑀪𑀽𑀢𑀲𑁆𑀲𑀸𑀢𑀺 𑀬𑀲𑁆𑀫𑀺𑀁 𑀪𑀯𑁂 𑀬𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂 𑀞𑀺𑀢𑀲𑁆𑀲. 𑀅𑀦𑀦𑁆𑀢𑀭𑀸𑀢𑀺 𑀅𑀦𑀦𑁆𑀢𑀭𑀸𑀬𑁂𑀦 𑀅𑀭𑀳𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺. 𑀇𑀤𑀁 𑀪𑀯𑀸𑀦𑀁 𑀅𑀕𑁆𑀕𑀦𑁆𑀢𑀺 𑀅𑀬𑀁 𑀧𑀘𑁆𑀙𑀺𑀫𑁄 𑀅𑀢𑁆𑀢𑀪𑀸𑀯𑁄 𑀪𑀯𑀸𑀦𑀁 𑀅𑀕𑁆𑀕𑀁 𑀦𑀸𑀫. 𑀅𑀣 𑀯𑀸 𑀬𑀣𑀸 𑀪𑀽𑀢𑀲𑁆𑀲𑀸𑀢𑀺 𑀬𑁂𑀳𑀺 𑀔𑀦𑁆𑀥𑁂𑀳𑀺 𑀫𑀕𑁆𑀕𑀓𑁆𑀔𑀡𑁂 𑀪𑀽𑀢𑀲𑁆𑀲 𑀯𑀺𑀚𑁆𑀚𑀫𑀸𑀦𑀲𑁆𑀲. 𑀅𑀦𑀦𑁆𑀢𑀭𑀸 𑀆𑀲𑀯𑀸𑀦𑀁 𑀔𑀬𑁄 𑀳𑁄𑀢𑀻𑀢𑀺 𑀫𑀕𑁆𑀕𑀸𑀦𑀦𑁆𑀢𑀭𑀫𑁂𑀯 𑀨𑀮𑀁 𑀉𑀧𑁆𑀧𑀚𑁆𑀚𑀢𑀺. 𑀇𑀤𑀁 𑀪𑀯𑀸𑀦𑀁 𑀅𑀕𑁆𑀕𑀦𑁆𑀢𑀺 𑀇𑀤𑀁 𑀫𑀕𑁆𑀕𑀓𑁆𑀔𑀡𑁂 𑀔𑀦𑁆𑀥𑀧𑀜𑁆𑀘𑀓𑀁 𑀪𑀯𑀸𑀦𑀁 𑀅𑀕𑁆𑀕𑀁 𑀦𑀸𑀫𑀸𑀢𑀺.

𑀆𑀖𑀸𑀢𑀯𑀕𑁆𑀕𑁄 𑀤𑀼𑀢𑀺𑀬𑁄.

(𑁧𑁮) 𑁩. 𑀉𑀧𑀸𑀲𑀓𑀯𑀕𑁆𑀕𑁄

𑁧-𑁩. 𑀲𑀸𑀭𑀚𑁆𑀚𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁭𑁧-𑁧𑁭𑁩. 𑀢𑀢𑀺𑀬𑀲𑁆𑀲 𑀧𑀞𑀫𑀤𑀼𑀢𑀺𑀬𑀢𑀢𑀺𑀬𑁂𑀲𑀼 𑀅𑀕𑀸𑀭𑀺𑀬𑀧𑁆𑀧𑀝𑀺𑀧𑀢𑁆𑀢𑀺 𑀓𑀣𑀺𑀢𑀸. 𑀲𑁄𑀢𑀸𑀧𑀦𑁆𑀦𑀲𑀓𑀤𑀸𑀕𑀸𑀫𑀺𑀦𑁄𑀧𑀺 𑀳𑁄𑀦𑁆𑀢𑀼, 𑀯𑀝𑁆𑀝𑀦𑁆𑀢𑀺𑀬𑁂𑀯.

𑁪. 𑀯𑁂𑀭𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁭𑁪. 𑀘𑀢𑀼𑀢𑁆𑀣𑁂 𑀪𑀬𑀸𑀦𑀻𑀢𑀺 𑀘𑀺𑀢𑁆𑀢𑀼𑀢𑁆𑀭𑀸𑀲𑀪𑀬𑀸𑀦𑀺. 𑀯𑁂𑀭𑀸𑀦𑀻𑀢𑀺 𑀅𑀓𑀼𑀲𑀮𑀯𑁂𑀭𑀸𑀦𑀺𑀧𑀺 𑀧𑀼𑀕𑁆𑀕𑀮𑀯𑁂𑀭𑀸𑀦𑀺𑀧𑀺. 𑀘𑁂𑀢𑀲𑀺𑀓𑀦𑁆𑀢𑀺 𑀘𑀺𑀢𑁆𑀢𑀦𑀺𑀲𑁆𑀲𑀺𑀢𑀁. 𑀤𑀼𑀓𑁆𑀔𑀦𑁆𑀢𑀺 𑀓𑀸𑀬𑀧𑀲𑀸𑀤𑀯𑀢𑁆𑀣𑀼𑀓𑀁 𑀤𑀼𑀓𑁆𑀔𑀁. 𑀤𑁄𑀫𑀦𑀲𑁆𑀲𑀦𑁆𑀢𑀺 𑀤𑁄𑀫𑀦𑀲𑁆𑀲𑀯𑁂𑀤𑀦𑀁. 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀯𑀺𑀭𑀢𑀺𑀧𑀳𑀸𑀦𑀁 𑀓𑀣𑀺𑀢𑀁.

𑁫. 𑀘𑀡𑁆𑀟𑀸𑀮𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁭𑁫. 𑀧𑀜𑁆𑀘𑀫𑁂 𑀉𑀧𑀸𑀲𑀓𑀧𑀢𑀺𑀓𑀼𑀝𑁆𑀞𑁄𑀢𑀺 𑀉𑀧𑀸𑀲𑀓𑀧𑀘𑁆𑀙𑀺𑀫𑀓𑁄. 𑀓𑁄𑀢𑀽𑀳𑀮𑀫𑀗𑁆𑀕𑀮𑀺𑀓𑁄𑀢𑀺 ‘‘𑀇𑀫𑀺𑀦𑀸 𑀇𑀤𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀏𑀯𑀁 𑀧𑀯𑀢𑁆𑀢𑀢𑁆𑀢𑀸 𑀓𑁄𑀢𑀽𑀳𑀮𑀲𑀗𑁆𑀔𑀸𑀢𑁂𑀦 𑀤𑀺𑀝𑁆𑀞𑀲𑀼𑀢𑀫𑀼𑀢𑀫𑀗𑁆𑀕𑀮𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀫𑀗𑁆𑀕𑀮𑀁 𑀧𑀘𑁆𑀘𑁂𑀢𑀺 𑀦𑁄 𑀓𑀫𑁆𑀫𑀦𑁆𑀢𑀺 𑀫𑀗𑁆𑀕𑀮𑀁 𑀑𑀮𑁄𑀓𑁂𑀢𑀺, 𑀓𑀫𑁆𑀫𑀁 𑀦 𑀑𑀮𑁄𑀓𑁂𑀢𑀺. 𑀇𑀢𑁄 𑀘 𑀩𑀳𑀺𑀤𑁆𑀥𑀸𑀢𑀺 𑀇𑀫𑀫𑁆𑀳𑀸 𑀲𑀸𑀲𑀦𑀸 𑀩𑀳𑀺𑀤𑁆𑀥𑀸. 𑀧𑀼𑀩𑁆𑀩𑀓𑀸𑀭𑀁 𑀓𑀭𑁄𑀢𑀻𑀢𑀺 𑀤𑀸𑀦𑀸𑀤𑀺𑀓𑀁 𑀓𑀼𑀲𑀮𑀓𑀺𑀘𑁆𑀘𑀁 𑀧𑀞𑀫𑀢𑀭𑀁 𑀓𑀭𑁄𑀢𑀺.

𑁬. 𑀧𑀻𑀢𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁭𑁬. 𑀙𑀝𑁆𑀞𑁂 𑀓𑀺𑀦𑁆𑀢𑀺 𑀫𑀬𑀦𑁆𑀢𑀺 𑀓𑁂𑀦 𑀦𑀸𑀫 𑀉𑀧𑀸𑀬𑁂𑀦 𑀫𑀬𑀁. 𑀧𑀯𑀺𑀯𑁂𑀓𑀁 𑀧𑀻𑀢𑀺𑀦𑁆𑀢𑀺 𑀧𑀞𑀫𑀤𑀼𑀢𑀺𑀬𑀚𑁆𑀛𑀸𑀦𑀸𑀦𑀺 𑀦𑀺𑀲𑁆𑀲𑀸𑀬 𑀉𑀧𑁆𑀧𑀚𑁆𑀚𑀦𑀓𑀧𑀻𑀢𑀺𑀁. 𑀓𑀸𑀫𑀽𑀧𑀲𑀁𑀳𑀺𑀢𑀦𑁆𑀢𑀺 𑀓𑀸𑀫𑀦𑀺𑀲𑁆𑀲𑀺𑀢𑀁 𑀤𑀼𑀯𑀺𑀥𑁂 𑀓𑀸𑀫𑁂 𑀆𑀭𑀩𑁆𑀪 𑀉𑀧𑁆𑀧𑀚𑁆𑀚𑀦𑀓𑀁. 𑀅𑀓𑀼𑀲𑀮𑀽𑀧𑀲𑀁𑀳𑀺𑀢𑀦𑁆𑀢𑀺 ‘‘𑀫𑀺𑀕𑀲𑀽𑀓𑀭𑀸𑀤𑀬𑁄 𑀯𑀺𑀚𑁆𑀛𑀺𑀲𑁆𑀲𑀸𑀫𑀻’’𑀢𑀺 𑀲𑀭𑀁 𑀔𑀺𑀧𑀺𑀢𑁆𑀯𑀸 𑀢𑀲𑁆𑀫𑀺𑀁 𑀯𑀺𑀭𑀤𑁆𑀥𑁂 ‘‘𑀯𑀺𑀭𑀤𑁆𑀥𑀁 𑀫𑀬𑀸’’𑀢𑀺 𑀏𑀯𑀁 𑀅𑀓𑀼𑀲𑀮𑁂 𑀦𑀺𑀲𑁆𑀲𑀸𑀬 𑀉𑀧𑁆𑀧𑀚𑁆𑀚𑀦𑀓𑀁. 𑀢𑀸𑀤𑀺𑀲𑁂𑀲𑀼 𑀧𑀦 𑀞𑀸𑀦𑁂𑀲𑀼 𑀅𑀯𑀺𑀭𑀚𑁆𑀛𑀦𑁆𑀢𑀲𑁆𑀲 ‘‘𑀲𑀼𑀝𑁆𑀞𑀼 𑀫𑁂 𑀯𑀺𑀤𑁆𑀥𑀁, 𑀲𑀼𑀝𑁆𑀞𑀼 𑀫𑁂 𑀧𑀳𑀝’’𑀦𑁆𑀢𑀺 𑀉𑀧𑁆𑀧𑀚𑁆𑀚𑀦𑀓𑀁 𑀅𑀓𑀼𑀲𑀮𑀽𑀧𑀲𑀁𑀳𑀺𑀢𑀁 𑀲𑀼𑀔𑀁 𑀲𑁄𑀫𑀦𑀲𑁆𑀲𑀁 𑀦𑀸𑀫. 𑀤𑀸𑀦𑀸𑀤𑀺𑀉𑀧𑀓𑀭𑀡𑀸𑀦𑀁 𑀅𑀲𑀫𑁆𑀧𑀢𑁆𑀢𑀺𑀬𑀸 𑀉𑀧𑁆𑀧𑀚𑁆𑀚𑀫𑀸𑀦𑀁 𑀧𑀦 𑀓𑀼𑀲𑀮𑀽𑀧𑀲𑀁𑀳𑀺𑀢𑀁 𑀤𑀼𑀓𑁆𑀔𑀁 𑀤𑁄𑀫𑀦𑀲𑁆𑀲𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑁭. 𑀯𑀡𑀺𑀚𑁆𑀚𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁭𑁭. 𑀲𑀢𑁆𑀢𑀫𑁂 𑀯𑀡𑀺𑀚𑁆𑀚𑀸𑀢𑀺 𑀯𑀸𑀡𑀺𑀚𑀓𑀫𑁆𑀫𑀸𑀦𑀺. 𑀉𑀧𑀸𑀲𑀓𑁂𑀦𑀸𑀢𑀺 𑀢𑀺𑀲𑀭𑀡𑀕𑀢𑁂𑀦. 𑀲𑀢𑁆𑀣𑀯𑀡𑀺𑀚𑁆𑀚𑀸𑀢𑀺 𑀆𑀯𑀼𑀥𑀪𑀡𑁆𑀟𑀁 𑀓𑀸𑀭𑁂𑀢𑁆𑀯𑀸 𑀢𑀲𑁆𑀲 𑀯𑀺𑀓𑁆𑀓𑀬𑁄. 𑀲𑀢𑁆𑀢𑀯𑀡𑀺𑀚𑁆𑀚𑀸𑀢𑀺 𑀫𑀦𑀼𑀲𑁆𑀲𑀯𑀺𑀓𑁆𑀓𑀬𑁄. 𑀫𑀁𑀲𑀯𑀡𑀺𑀚𑁆𑀚𑀸𑀢𑀺 𑀲𑀽𑀓𑀭𑀫𑀺𑀕𑀸𑀤𑀬𑁄 𑀧𑁄𑀲𑁂𑀢𑁆𑀯𑀸 𑀢𑁂𑀲𑀁 𑀯𑀺𑀓𑁆𑀓𑀬𑁄. 𑀫𑀚𑁆𑀚𑀯𑀡𑀺𑀚𑁆𑀚𑀸𑀢𑀺 𑀬𑀁𑀓𑀺𑀜𑁆𑀘𑀺 𑀫𑀚𑁆𑀚𑀁 𑀓𑀸𑀭𑁂𑀢𑁆𑀯𑀸 𑀢𑀲𑁆𑀲 𑀯𑀺𑀓𑁆𑀓𑀬𑁄. 𑀯𑀺𑀲𑀯𑀡𑀺𑀚𑁆𑀚𑀸𑀢𑀺 𑀯𑀺𑀲𑀁 𑀓𑀸𑀭𑁂𑀢𑁆𑀯𑀸 𑀢𑀲𑁆𑀲 𑀯𑀺𑀓𑁆𑀓𑀬𑁄. 𑀇𑀢𑀺 𑀲𑀩𑁆𑀩𑀫𑁆𑀧𑀺 𑀇𑀫𑀁 𑀯𑀡𑀺𑀚𑁆𑀚𑀁 𑀦𑁂𑀯 𑀅𑀢𑁆𑀢𑀦𑀸 𑀓𑀸𑀢𑀼𑀁, 𑀦 𑀧𑀭𑁂 𑀲𑀫𑀸𑀤𑀧𑁂𑀢𑁆𑀯𑀸 𑀓𑀸𑀭𑁂𑀢𑀼𑀁 𑀯𑀝𑁆𑀝𑀢𑀺.

𑁮. 𑀭𑀸𑀚𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁭𑁮. 𑀅𑀝𑁆𑀞𑀫𑁂 𑀧𑀩𑁆𑀩𑀸𑀚𑁂𑀦𑁆𑀢𑀻𑀢𑀺 𑀭𑀝𑁆𑀞𑀫𑁆𑀳𑀸 𑀧𑀩𑁆𑀩𑀸𑀚𑁂𑀦𑁆𑀢𑀺. 𑀬𑀣𑀸𑀧𑀘𑁆𑀘𑀬𑀁 𑀯𑀸 𑀓𑀭𑁄𑀦𑁆𑀢𑀻𑀢𑀺 𑀬𑀣𑀸𑀥𑀺𑀧𑁆𑀧𑀸𑀬𑀁 𑀬𑀣𑀸𑀚𑁆𑀛𑀸𑀲𑀬𑀁 𑀓𑀭𑁄𑀦𑁆𑀢𑀺. 𑀢𑀣𑁂𑀯 𑀧𑀸𑀧𑀓𑀫𑁆𑀫𑀁 𑀧𑀯𑁂𑀤𑁂𑀦𑁆𑀢𑀻𑀢𑀺 𑀬𑀣𑀸 𑀢𑁂𑀦 𑀓𑀢𑀁, 𑀢𑀁 𑀢𑀣𑁂𑀯 𑀅𑀜𑁆𑀜𑁂𑀲𑀁 𑀆𑀭𑁄𑀘𑁂𑀦𑁆𑀢𑀺 𑀓𑀣𑁂𑀦𑁆𑀢𑀺.

𑁯. 𑀕𑀺𑀳𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁭𑁯. 𑀦𑀯𑀫𑁂 𑀲𑀁𑀯𑀼𑀢𑀓𑀫𑁆𑀫𑀦𑁆𑀢𑀦𑁆𑀢𑀺 𑀧𑀺𑀳𑀺𑀢𑀓𑀫𑁆𑀫𑀦𑁆𑀢𑀁. 𑀆𑀪𑀺𑀘𑁂𑀢𑀲𑀺𑀓𑀸𑀦𑀦𑁆𑀢𑀺 𑀉𑀢𑁆𑀢𑀫𑀘𑀺𑀢𑁆𑀢𑀦𑀺𑀲𑁆𑀲𑀺𑀢𑀸𑀦𑀁. 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀸𑀦𑀦𑁆𑀢𑀺 𑀧𑀘𑁆𑀘𑀓𑁆𑀔𑁂𑀬𑁂𑀯 𑀥𑀫𑁆𑀫𑁂 𑀧𑀯𑀢𑁆𑀢𑀺𑀓𑁆𑀔𑀡𑁂 𑀲𑀼𑀔𑀯𑀺𑀳𑀸𑀭𑀸𑀦𑀁. 𑀅𑀭𑀺𑀬𑀓𑀦𑁆𑀢𑁂𑀳𑀻𑀢𑀺 𑀅𑀭𑀺𑀬𑀸𑀦𑀁 𑀓𑀦𑁆𑀢𑁂𑀳𑀺 𑀫𑀕𑁆𑀕𑀨𑀮𑀲𑀻𑀮𑁂𑀳𑀺.

𑀅𑀭𑀺𑀬𑀥𑀫𑁆𑀫𑀁 𑀲𑀫𑀸𑀤𑀸𑀬𑀸𑀢𑀺 𑀏𑀢𑁆𑀣 𑀅𑀭𑀺𑀬𑀥𑀫𑁆𑀫𑁄𑀢𑀺 𑀧𑀜𑁆𑀘 𑀲𑀻𑀮𑀸𑀦𑀺 𑀓𑀣𑀺𑀢𑀸𑀦𑀺. 𑀫𑁂𑀭𑀬𑀁 𑀯𑀸𑀭𑀼𑀡𑀺𑀦𑁆𑀢𑀺 𑀘𑀢𑀼𑀩𑁆𑀩𑀺𑀥𑀁 𑀫𑁂𑀭𑀬𑀁 𑀧𑀜𑁆𑀘𑀯𑀺𑀥𑀜𑁆𑀘 𑀲𑀼𑀭𑀁. 𑀥𑀫𑁆𑀫𑀜𑁆𑀘𑀸𑀦𑀼𑀯𑀺𑀢𑀓𑁆𑀓𑀬𑁂𑀢𑀺 𑀦𑀯𑀯𑀺𑀥𑀁 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀁 𑀅𑀦𑀼𑀲𑁆𑀲𑀢𑀺𑀯𑀲𑁂𑀦𑁂𑀯 𑀯𑀺𑀢𑀓𑁆𑀓𑁂𑀬𑁆𑀬. 𑀅𑀩𑁆𑀬𑀸𑀧𑀚𑁆𑀛𑀁 𑀳𑀺𑀢𑀁 𑀘𑀺𑀢𑁆𑀢𑀦𑁆𑀢𑀺 𑀦𑀺𑀤𑁆𑀤𑀼𑀓𑁆𑀔𑀁 𑀫𑁂𑀢𑁆𑀢𑀸𑀤𑀺𑀩𑁆𑀭𑀳𑁆𑀫𑀯𑀺𑀳𑀸𑀭𑀘𑀺𑀢𑁆𑀢𑀁. 𑀤𑁂𑀯𑀮𑁄𑀓𑀸𑀬 𑀪𑀸𑀯𑀬𑁂𑀢𑀺 𑀩𑁆𑀭𑀳𑁆𑀫𑀮𑁄𑀓𑀢𑁆𑀣𑀸𑀬 𑀪𑀸𑀯𑁂𑀬𑁆𑀬. 𑀧𑀼𑀜𑁆𑀜𑀢𑁆𑀣𑀲𑁆𑀲 𑀚𑀺𑀕𑀻𑀲𑀢𑁄𑀢𑀺 𑀧𑀼𑀜𑁆𑀜𑁂𑀦 𑀅𑀢𑁆𑀣𑀺𑀓𑀲𑁆𑀲 𑀧𑀼𑀜𑁆𑀜𑀁 𑀕𑀯𑁂𑀲𑀦𑁆𑀢𑀲𑁆𑀲. 𑀲𑀦𑁆𑀢𑁂𑀲𑀽𑀢𑀺 𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑀢𑀣𑀸𑀕𑀢𑀲𑀸𑀯𑀓𑁂𑀲𑀼. 𑀯𑀺𑀧𑀼𑀮𑀸 𑀳𑁄𑀢𑀺 𑀤𑀓𑁆𑀔𑀺𑀡𑀸𑀢𑀺 𑀏𑀯𑀁 𑀤𑀺𑀦𑁆𑀦𑀤𑀸𑀦𑀁 𑀫𑀳𑀧𑁆𑀨𑀮𑀁 𑀳𑁄𑀢𑀺. 𑀅𑀦𑀼𑀧𑀼𑀩𑁆𑀩𑁂𑀦𑀸𑀢𑀺 𑀲𑀻𑀮𑀧𑀽𑀭𑀡𑀸𑀤𑀺𑀦𑀸 𑀅𑀦𑀼𑀓𑁆𑀓𑀫𑁂𑀦. 𑀲𑁂𑀲𑀁 𑀢𑀺𑀓𑀦𑀺𑀧𑀸𑀢𑁂 𑀯𑀼𑀢𑁆𑀢𑀢𑁆𑀣𑀫𑁂𑀯.

𑁧𑁦. 𑀕𑀯𑁂𑀲𑀻𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁮𑁦. 𑀤𑀲𑀫𑁂 𑀲𑀺𑀢𑀁 𑀧𑀸𑀢𑁆𑀯𑀸𑀓𑀸𑀲𑀻𑀢𑀺 𑀫𑀳𑀸𑀫𑀕𑁆𑀕𑁂𑀦𑁂𑀯 𑀕𑀘𑁆𑀙𑀦𑁆𑀢𑁄 𑀢𑀁 𑀲𑀸𑀮𑀯𑀦𑀁 𑀑𑀮𑁄𑀓𑁂𑀢𑁆𑀯𑀸 ‘‘𑀅𑀢𑁆𑀣𑀺 𑀦𑀼 𑀔𑁄 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀓𑀺𑀜𑁆𑀘𑀺 𑀲𑀼𑀓𑀸𑀭𑀡𑀁 𑀉𑀧𑁆𑀧𑀦𑁆𑀦𑀧𑀼𑀩𑁆𑀩’’𑀦𑁆𑀢𑀺 𑀅𑀤𑁆𑀤𑀲 𑀓𑀲𑁆𑀲𑀧𑀩𑀼𑀤𑁆𑀥𑀓𑀸𑀮𑁂 𑀕𑀯𑁂𑀲𑀺𑀦𑀸 𑀉𑀧𑀸𑀲𑀓𑁂𑀦 𑀓𑀢𑀁 𑀲𑀼𑀓𑀸𑀭𑀡𑀁. 𑀅𑀣𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀇𑀤𑀁 𑀲𑀼𑀓𑀸𑀭𑀡𑀁 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀅𑀧𑀸𑀓𑀝𑀁 𑀧𑀝𑀺𑀘𑁆𑀙𑀦𑁆𑀦𑀁, 𑀳𑀦𑁆𑀤 𑀦𑀁 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀧𑀸𑀓𑀝𑀁 𑀓𑀭𑁄𑀫𑀻’’𑀢𑀺 𑀫𑀕𑁆𑀕𑀸 𑀑𑀓𑁆𑀓𑀫𑁆𑀫 𑀅𑀜𑁆𑀜𑀢𑀭𑀲𑁆𑀫𑀺𑀁 𑀧𑀤𑁂𑀲𑁂 𑀞𑀺𑀢𑁄𑀯 𑀲𑀺𑀢𑀧𑀸𑀢𑀼𑀓𑀫𑁆𑀫𑀁 𑀅𑀓𑀸𑀲𑀺, 𑀅𑀕𑁆𑀕𑀕𑁆𑀕𑀤𑀦𑁆𑀢𑁂 𑀤𑀲𑁆𑀲𑁂𑀢𑁆𑀯𑀸 𑀫𑀦𑁆𑀤𑀳𑀲𑀺𑀢𑀁 𑀳𑀲𑀺. 𑀬𑀣𑀸 𑀳𑀺 𑀮𑁄𑀓𑀺𑀬𑀫𑀦𑀼𑀲𑁆𑀲𑀸 𑀉𑀤𑀭𑀁 𑀧𑀳𑀭𑀦𑁆𑀢𑀸 ‘‘𑀓𑀳𑀁 𑀓𑀳’’𑀦𑁆𑀢𑀺 𑀳𑀲𑀦𑁆𑀢𑀺, 𑀦 𑀏𑀯𑀁 𑀩𑀼𑀤𑁆𑀥𑀸. 𑀩𑀼𑀤𑁆𑀥𑀸𑀦𑀁 𑀧𑀦 𑀳𑀲𑀺𑀢𑀁 𑀳𑀝𑁆𑀞𑀧𑀳𑀝𑁆𑀞𑀸𑀓𑀸𑀭𑀫𑀢𑁆𑀢𑀫𑁂𑀯 𑀳𑁄𑀢𑀺.

𑀳𑀲𑀺𑀢𑀜𑁆𑀘 𑀦𑀸𑀫𑁂𑀢𑀁 𑀢𑁂𑀭𑀲𑀳𑀺 𑀲𑁄𑀫𑀦𑀲𑁆𑀲𑀲𑀳𑀕𑀢𑀘𑀺𑀢𑁆𑀢𑁂𑀳𑀺 𑀳𑁄𑀢𑀺. 𑀢𑀢𑁆𑀣 𑀮𑁄𑀓𑀺𑀬𑀫𑀳𑀸𑀚𑀦𑁄 𑀅𑀓𑀼𑀲𑀮𑀢𑁄 𑀘𑀢𑀽𑀳𑀺, 𑀓𑀸𑀫𑀸𑀯𑀘𑀭𑀓𑀼𑀲𑀮𑀢𑁄 𑀘𑀢𑀽𑀳𑀻𑀢𑀺 𑀅𑀝𑁆𑀞𑀳𑀺 𑀘𑀺𑀢𑁆𑀢𑁂𑀳𑀺 𑀳𑀲𑀢𑀺, 𑀲𑁂𑀔𑀸 𑀅𑀓𑀼𑀲𑀮𑀢𑁄 𑀤𑀺𑀝𑁆𑀞𑀺𑀕𑀢𑀲𑀫𑁆𑀧𑀬𑀼𑀢𑁆𑀢𑀸𑀦𑀺 𑀤𑁆𑀯𑁂 𑀅𑀧𑀦𑁂𑀢𑁆𑀯𑀸 𑀙𑀳𑀺 𑀘𑀺𑀢𑁆𑀢𑁂𑀳𑀺 𑀳𑀲𑀦𑁆𑀢𑀺, 𑀔𑀻𑀡𑀸𑀲𑀯𑀸 𑀘𑀢𑀽𑀳𑀺 𑀲𑀳𑁂𑀢𑀼𑀓𑀓𑀺𑀭𑀺𑀬𑀘𑀺𑀢𑁆𑀢𑁂𑀳𑀺, 𑀏𑀓𑁂𑀦 𑀅𑀳𑁂𑀢𑀼𑀓𑀓𑀺𑀭𑀺𑀬𑀘𑀺𑀢𑁆𑀢𑁂𑀦𑀸𑀢𑀺 𑀧𑀜𑁆𑀘𑀳𑀺 𑀘𑀺𑀢𑁆𑀢𑁂𑀳𑀺 𑀳𑀲𑀦𑁆𑀢𑀺. 𑀢𑁂𑀲𑀼𑀧𑀺 𑀩𑀮𑀯𑀸𑀭𑀫𑁆𑀫𑀡𑁂 𑀆𑀧𑀸𑀣𑀫𑀸𑀕𑀢𑁂 𑀤𑁆𑀯𑀻𑀳𑀺 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑁂𑀳𑀺 𑀳𑀲𑀦𑁆𑀢𑀺, 𑀤𑀼𑀩𑁆𑀩𑀮𑀸𑀭𑀫𑁆𑀫𑀡𑁂 𑀤𑀼𑀳𑁂𑀢𑀼𑀓𑀘𑀺𑀢𑁆𑀢𑀤𑁆𑀯𑀬𑁂𑀦 𑀘 𑀅𑀳𑁂𑀢𑀼𑀓𑀘𑀺𑀢𑁆𑀢𑁂𑀦 𑀘𑀸𑀢𑀺 𑀢𑀻𑀳𑀺 𑀘𑀺𑀢𑁆𑀢𑁂𑀳𑀺 𑀳𑀲𑀦𑁆𑀢𑀺. 𑀇𑀫𑀲𑁆𑀫𑀺𑀁 𑀧𑀦 𑀞𑀸𑀦𑁂 𑀓𑀺𑀭𑀺𑀬𑀸𑀳𑁂𑀢𑀼𑀓𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀲𑁄𑀫𑀦𑀲𑁆𑀲𑀲𑀳𑀕𑀢𑀘𑀺𑀢𑁆𑀢𑀁 𑀪𑀕𑀯𑀢𑁄 𑀧𑀳𑀝𑁆𑀞𑀸𑀓𑀸𑀭𑀫𑀢𑁆𑀢𑀳𑀲𑀺𑀢𑀁 𑀉𑀧𑁆𑀧𑀸𑀤𑁂𑀢𑀺.

𑀢𑀁 𑀧𑀦𑁂𑀢𑀁 𑀳𑀲𑀺𑀢𑀁 𑀏𑀯𑀁 𑀅𑀧𑁆𑀧𑀫𑀢𑁆𑀢𑀓𑀫𑁆𑀧𑀺 𑀣𑁂𑀭𑀲𑁆𑀲 𑀧𑀸𑀓𑀝𑀁 𑀅𑀳𑁄𑀲𑀺. 𑀓𑀣𑀁? 𑀢𑀣𑀸𑀭𑀽𑀧𑁂 𑀳𑀺 𑀓𑀸𑀮𑁂 𑀢𑀣𑀸𑀕𑀢𑀲𑁆𑀲 𑀘𑀢𑀽𑀳𑀺 𑀤𑀸𑀞𑀸𑀳𑀺 𑀘𑀸𑀢𑀼𑀤𑁆𑀤𑀻𑀧𑀺𑀓𑀫𑀳𑀸𑀫𑁂𑀖𑀫𑀼𑀔𑀢𑁄 𑀲𑀫𑁄𑀲𑀭𑀺𑀢𑀸 𑀯𑀺𑀚𑁆𑀚𑀼𑀮𑀢𑀸 𑀯𑀺𑀬 𑀯𑀺𑀭𑁄𑀘𑀫𑀸𑀦𑀸 𑀫𑀳𑀸𑀢𑀸𑀮𑀓𑁆𑀔𑀦𑁆𑀥𑀧𑁆𑀧𑀫𑀸𑀡𑀸 𑀭𑀲𑁆𑀫𑀺𑀯𑀝𑁆𑀝𑀺𑀬𑁄 𑀉𑀝𑁆𑀞𑀳𑀺𑀢𑁆𑀯𑀸 𑀢𑀺𑀓𑁆𑀔𑀢𑁆𑀢𑀼𑀁 𑀲𑀺𑀭𑀯𑀭𑀁 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀤𑀸𑀞𑀕𑁆𑀕𑁂𑀲𑀼𑀬𑁂𑀯 𑀅𑀦𑁆𑀢𑀭𑀥𑀸𑀬𑀦𑁆𑀢𑀺. 𑀢𑁂𑀦 𑀲𑀜𑁆𑀜𑀸𑀡𑁂𑀦 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀢𑁄 𑀧𑀘𑁆𑀙𑀢𑁄 𑀕𑀘𑁆𑀙𑀫𑀸𑀦𑁄𑀧𑀺 𑀲𑀺𑀢𑀧𑀸𑀢𑀼𑀪𑀸𑀯𑀁 𑀚𑀸𑀦𑀸𑀢𑀺.

𑀇𑀤𑁆𑀥𑀦𑁆𑀢𑀺 𑀲𑀫𑀺𑀤𑁆𑀥𑀁. 𑀨𑀻𑀢𑀦𑁆𑀢𑀺 𑀅𑀢𑀺𑀲𑀫𑀺𑀤𑁆𑀥𑀁 𑀲𑀩𑁆𑀩𑀧𑀸𑀮𑀺𑀨𑀼𑀮𑁆𑀮𑀁 𑀯𑀺𑀬. 𑀆𑀓𑀺𑀡𑁆𑀡𑀫𑀦𑀼𑀲𑁆𑀲𑀦𑁆𑀢𑀺 𑀚𑀦𑀲𑀫𑀸𑀓𑀼𑀮𑀁. 𑀲𑀻𑀮𑁂𑀲𑀼 𑀅𑀧𑀭𑀺𑀧𑀽𑀭𑀓𑀸𑀭𑀻𑀢𑀺 𑀧𑀜𑁆𑀘𑀲𑀼 𑀲𑀻𑀮𑁂𑀲𑀼 𑀅𑀲𑀫𑀢𑁆𑀢𑀓𑀸𑀭𑀻. 𑀧𑀝𑀺𑀤𑁂𑀲𑀺𑀢𑀸𑀦𑀻𑀢𑀺 𑀉𑀧𑀸𑀲𑀓𑀪𑀸𑀯𑀁 𑀧𑀝𑀺𑀤𑁂𑀲𑀺𑀢𑀸𑀦𑀺. 𑀲𑀫𑀸𑀤𑀧𑀺𑀢𑀸𑀦𑀻𑀢𑀺 𑀲𑀭𑀡𑁂𑀲𑀼 𑀧𑀢𑀺𑀝𑁆𑀞𑀸𑀧𑀺𑀢𑀸𑀦𑀻𑀢𑀺 𑀅𑀢𑁆𑀣𑁄. 𑀇𑀘𑁆𑀘𑁂𑀢𑀁 𑀲𑀫𑀲𑀫𑀦𑁆𑀢𑀺 𑀇𑀢𑀺 𑀏𑀢𑀁 𑀓𑀸𑀭𑀡𑀁 𑀲𑀩𑁆𑀩𑀸𑀓𑀸𑀭𑀢𑁄 𑀲𑀫𑀪𑀸𑀯𑁂𑀦𑁂𑀯 𑀲𑀫𑀁, 𑀦 𑀏𑀓𑀤𑁂𑀲𑁂𑀦. 𑀦𑀢𑁆𑀣𑀺 𑀓𑀺𑀜𑁆𑀘𑀺 𑀅𑀢𑀺𑀭𑁂𑀓𑀦𑁆𑀢𑀺 𑀫𑀬𑁆𑀳𑀁 𑀇𑀫𑁂𑀳𑀺 𑀓𑀺𑀜𑁆𑀘𑀺 𑀅𑀢𑀺𑀭𑁂𑀓𑀁 𑀦𑀢𑁆𑀣𑀺. 𑀳𑀦𑁆𑀤𑀸𑀢𑀺 𑀯𑀯𑀲𑁆𑀲𑀕𑁆𑀕𑀢𑁆𑀣𑁂 𑀦𑀺𑀧𑀸𑀢𑁄. 𑀅𑀢𑀺𑀭𑁂𑀓𑀸𑀬𑀸𑀢𑀺 𑀯𑀺𑀲𑁂𑀲𑀓𑀸𑀭𑀡𑀢𑁆𑀣𑀸𑀬 𑀧𑀝𑀺𑀧𑀚𑁆𑀚𑀸𑀫𑀻𑀢𑀺 𑀅𑀢𑁆𑀣𑁄. 𑀲𑀻𑀮𑁂𑀲𑀼 𑀧𑀭𑀺𑀧𑀽𑀭𑀓𑀸𑀭𑀺𑀁 𑀥𑀸𑀭𑁂𑀣𑀸𑀢𑀺 𑀧𑀜𑁆𑀘𑀲𑀼 𑀲𑀻𑀮𑁂𑀲𑀼 𑀲𑀫𑀢𑁆𑀢𑀓𑀸𑀭𑀻𑀢𑀺 𑀚𑀸𑀦𑀸𑀣. 𑀏𑀢𑁆𑀢𑀸𑀯𑀢𑀸 𑀢𑁂𑀦 𑀧𑀜𑁆𑀘 𑀲𑀻𑀮𑀸𑀦𑀺 𑀲𑀫𑀸𑀤𑀺𑀦𑁆𑀦𑀸𑀦𑀺 𑀦𑀸𑀫 𑀳𑁄𑀦𑁆𑀢𑀺. 𑀓𑀺𑀫𑀗𑁆𑀕 𑀧𑀦 𑀦 𑀫𑀬𑀦𑁆𑀢𑀺 𑀫𑀬𑀁 𑀧𑀦 𑀓𑁂𑀦𑁂𑀯 𑀓𑀸𑀭𑀡𑁂𑀦 𑀧𑀭𑀺𑀧𑀽𑀭𑀓𑀸𑀭𑀺𑀦𑁄 𑀦 𑀪𑀯𑀺𑀲𑁆𑀲𑀸𑀫. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀉𑀧𑀸𑀲𑀓𑀯𑀕𑁆𑀕𑁄 𑀢𑀢𑀺𑀬𑁄.

(𑁧𑁯) 𑁪. 𑀅𑀭𑀜𑁆𑀜𑀯𑀕𑁆𑀕𑁄

𑁧. 𑀆𑀭𑀜𑁆𑀜𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁮𑁧. 𑀘𑀢𑀼𑀢𑁆𑀣𑀲𑁆𑀲 𑀧𑀞𑀫𑁂 𑀫𑀦𑁆𑀤𑀢𑁆𑀢𑀸 𑀫𑁄𑀫𑀽𑀳𑀢𑁆𑀢𑀸𑀢𑀺 𑀦𑁂𑀯 𑀲𑀫𑀸𑀤𑀸𑀦𑀁 𑀚𑀸𑀦𑀸𑀢𑀺, 𑀦 𑀆𑀦𑀺𑀲𑀁𑀲𑀁. 𑀅𑀢𑁆𑀢𑀦𑁄 𑀧𑀦 𑀫𑀦𑁆𑀤𑀢𑁆𑀢𑀸 𑀫𑁄𑀫𑀽𑀳𑀢𑁆𑀢𑀸 𑀅𑀜𑁆𑀜𑀸𑀡𑁂𑀦𑁂𑀯 𑀆𑀭𑀜𑁆𑀜𑀓𑁄 𑀳𑁄𑀢𑀺. 𑀧𑀸𑀧𑀺𑀘𑁆𑀙𑁄 𑀇𑀘𑁆𑀙𑀸𑀧𑀓𑀢𑁄𑀢𑀺 ‘‘𑀅𑀭𑀜𑁆𑀜𑁂 𑀫𑁂 𑀯𑀺𑀳𑀭𑀦𑁆𑀢𑀲𑁆𑀲 ‘𑀅𑀬𑀁 𑀆𑀭𑀜𑁆𑀜𑀓𑁄’𑀢𑀺 𑀘𑀢𑀼𑀧𑀘𑁆𑀘𑀬𑀲𑀓𑁆𑀓𑀸𑀭𑀁 𑀓𑀭𑀺𑀲𑁆𑀲𑀦𑁆𑀢𑀺, ‘𑀅𑀬𑀁 𑀪𑀺𑀓𑁆𑀔𑀼 𑀮𑀚𑁆𑀚𑀻 𑀧𑀯𑀺𑀯𑀺𑀢𑁆𑀢𑁄’𑀢𑀺𑀆𑀤𑀻𑀳𑀺 𑀘 𑀕𑀼𑀡𑁂𑀳𑀺 𑀲𑀫𑁆𑀪𑀸𑀯𑁂𑀲𑁆𑀲𑀦𑁆𑀢𑀻’’𑀢𑀺 𑀏𑀯𑀁 𑀧𑀸𑀧𑀺𑀓𑀸𑀬 𑀇𑀘𑁆𑀙𑀸𑀬 𑀞𑀢𑁆𑀯𑀸 𑀢𑀸𑀬 𑀏𑀯 𑀇𑀘𑁆𑀙𑀸𑀬 𑀅𑀪𑀺𑀪𑀽𑀢𑁄 𑀳𑀼𑀢𑁆𑀯𑀸 𑀆𑀭𑀜𑁆𑀜𑀓𑁄 𑀳𑁄𑀢𑀺. 𑀉𑀫𑁆𑀫𑀸𑀤𑀯𑀲𑁂𑀦 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀯𑀺𑀳𑀭𑀦𑁆𑀢𑁄 𑀧𑀦 𑀉𑀫𑁆𑀫𑀸𑀤𑀸 𑀘𑀺𑀢𑁆𑀢𑀓𑁆𑀔𑁂𑀧𑀸 𑀆𑀭𑀜𑁆𑀜𑀓𑁄 𑀦𑀸𑀫 𑀳𑁄𑀢𑀺. 𑀯𑀡𑁆𑀡𑀺𑀢𑀦𑁆𑀢𑀺 𑀇𑀤𑀁 𑀆𑀭𑀜𑁆𑀜𑀓𑀗𑁆𑀕𑀁 𑀦𑀸𑀫 𑀩𑀼𑀤𑁆𑀥𑁂𑀳𑀺 𑀘 𑀩𑀼𑀤𑁆𑀥𑀲𑀸𑀯𑀓𑁂𑀳𑀺 𑀘 𑀯𑀡𑁆𑀡𑀺𑀢𑀁 𑀧𑀲𑀢𑁆𑀣𑀦𑁆𑀢𑀺 𑀆𑀭𑀜𑁆𑀜𑀓𑁄 𑀳𑁄𑀢𑀺. 𑀇𑀤𑀫𑀢𑁆𑀣𑀺𑀢𑀦𑁆𑀢𑀺 𑀇𑀫𑀸𑀬 𑀓𑀮𑁆𑀬𑀸𑀡𑀸𑀬 𑀧𑀝𑀺𑀧𑀢𑁆𑀢𑀺𑀬𑀸 𑀅𑀢𑁆𑀣𑁄 𑀏𑀢𑀲𑁆𑀲𑀸𑀢𑀺 𑀇𑀤𑀫𑀢𑁆𑀣𑀻, 𑀇𑀤𑀫𑀢𑁆𑀣𑀺𑀦𑁄 𑀪𑀸𑀯𑁄 𑀇𑀤𑀫𑀢𑁆𑀣𑀺𑀢𑀸. 𑀢𑀁 𑀇𑀤𑀫𑀢𑁆𑀣𑀺𑀢𑀁𑀬𑁂𑀯 𑀦𑀺𑀲𑁆𑀲𑀸𑀬, 𑀦 𑀅𑀜𑁆𑀜𑀁 𑀓𑀺𑀜𑁆𑀘𑀺 𑀮𑁄𑀓𑀸𑀫𑀺𑀲𑀦𑁆𑀢𑀺 𑀅𑀢𑁆𑀣𑁄. 𑀲𑁂𑀲𑀫𑁂𑀢𑁆𑀣 𑀇𑀢𑁄 𑀧𑀭𑁂𑀲𑀼 𑀘 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑀅𑀭𑀜𑁆𑀜𑀯𑀕𑁆𑀕𑁄 𑀘𑀢𑀼𑀢𑁆𑀣𑁄.

(𑁨𑁦) 𑁫. 𑀩𑁆𑀭𑀸𑀳𑁆𑀫𑀡𑀯𑀕𑁆𑀕𑁄

𑁧. 𑀲𑁄𑀡𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁯𑁧. 𑀧𑀜𑁆𑀘𑀫𑀲𑁆𑀲 𑀧𑀞𑀫𑁂 𑀩𑁆𑀭𑀸𑀳𑁆𑀫𑀡𑀥𑀫𑁆𑀫𑀸𑀢𑀺 𑀩𑁆𑀭𑀸𑀳𑁆𑀫𑀡𑀲𑀪𑀸𑀯𑀸. 𑀲𑀼𑀦𑀔𑁂𑀲𑀽𑀢𑀺 𑀓𑀼𑀓𑁆𑀓𑀼𑀭𑁂𑀲𑀼. 𑀦𑁂𑀯 𑀓𑀺𑀡𑀦𑁆𑀢𑀺 𑀦 𑀯𑀺𑀓𑁆𑀓𑀺𑀡𑀦𑁆𑀢𑀻𑀢𑀺 𑀦 𑀕𑀡𑁆𑀳𑀦𑁆𑀢𑀸 𑀓𑀺𑀡𑀦𑁆𑀢𑀺, 𑀦 𑀤𑀤𑀦𑁆𑀢𑀸 𑀯𑀺𑀓𑁆𑀓𑀺𑀡𑀦𑁆𑀢𑀺. 𑀲𑀫𑁆𑀧𑀺𑀬𑁂𑀦𑁂𑀯 𑀲𑀁𑀯𑀸𑀲𑀁 𑀲𑀁𑀩𑀦𑁆𑀥𑀸𑀬 𑀲𑀫𑁆𑀧𑀯𑀢𑁆𑀢𑁂𑀦𑁆𑀢𑀻𑀢𑀺 𑀧𑀺𑀬𑁄 𑀧𑀺𑀬𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀯𑁂𑀡𑀺𑀬𑀸 𑀩𑀦𑁆𑀥𑀦𑀢𑁆𑀣𑀁 𑀲𑀁𑀯𑀸𑀲𑀁 𑀧𑀯𑀢𑁆𑀢𑀬𑀦𑁆𑀢𑀺. 𑀉𑀤𑀭𑀸𑀯𑀤𑁂𑀳𑀓𑀦𑁆𑀢𑀺 𑀉𑀤𑀭𑀁 𑀅𑀯𑀤𑀺𑀳𑀺𑀢𑁆𑀯𑀸 𑀉𑀧𑀘𑀺𑀦𑀺𑀢𑁆𑀯𑀸 𑀧𑀽𑀭𑁂𑀢𑁆𑀯𑀸. 𑀅𑀯𑀲𑁂𑀲𑀁 𑀆𑀤𑀸𑀬 𑀧𑀓𑁆𑀓𑀫𑀦𑁆𑀢𑀻𑀢𑀺 𑀬𑀁 𑀪𑀼𑀜𑁆𑀚𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺, 𑀢𑀁 𑀪𑀡𑁆𑀟𑀺𑀓𑀁 𑀓𑀢𑁆𑀯𑀸 𑀕𑀳𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑀺. 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀯𑀝𑁆𑀝𑀫𑁂𑀯 𑀓𑀣𑀺𑀢𑀁.

𑁨. 𑀤𑁄𑀡𑀩𑁆𑀭𑀸𑀳𑁆𑀫𑀡𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁯𑁨. 𑀤𑀼𑀢𑀺𑀬𑁂 𑀢𑁆𑀯𑀫𑁆𑀧𑀺 𑀦𑁄𑀢𑀺 𑀢𑁆𑀯𑀫𑁆𑀧𑀺 𑀦𑀼. 𑀧𑀯𑀢𑁆𑀢𑀸𑀭𑁄𑀢𑀺 𑀧𑀯𑀢𑁆𑀢𑀬𑀺𑀢𑀸𑀭𑁄. 𑀬𑁂𑀲𑀦𑁆𑀢𑀺 𑀬𑁂𑀲𑀁 𑀲𑀦𑁆𑀢𑀓𑀁. 𑀫𑀦𑁆𑀢𑀧𑀤𑀦𑁆𑀢𑀺 𑀯𑁂𑀤𑀲𑀗𑁆𑀔𑀸𑀢𑀁 𑀫𑀦𑁆𑀢𑀫𑁂𑀯. 𑀕𑀻𑀢𑀦𑁆𑀢𑀺 𑀅𑀝𑁆𑀞𑀓𑀸𑀤𑀻𑀳𑀺 𑀤𑀲𑀳𑀺 𑀧𑁄𑀭𑀸𑀡𑀓𑀩𑁆𑀭𑀸𑀳𑁆𑀫𑀡𑁂𑀳𑀺 𑀲𑀭𑀲𑀫𑁆𑀧𑀢𑁆𑀢𑀺𑀯𑀲𑁂𑀦 𑀲𑀚𑁆𑀛𑀸𑀬𑀺𑀢𑀁. 𑀧𑀯𑀼𑀢𑁆𑀢𑀦𑁆𑀢𑀺 𑀅𑀜𑁆𑀜𑁂𑀲𑀁 𑀯𑀼𑀢𑁆𑀢𑀁, 𑀯𑀸𑀘𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀲𑀫𑀻𑀳𑀺𑀢𑀦𑁆𑀢𑀺 𑀲𑀫𑀼𑀧𑀩𑁆𑀬𑀽𑀴𑁆𑀳𑀁 𑀭𑀸𑀲𑀺𑀓𑀢𑀁, 𑀧𑀺𑀡𑁆𑀟𑀁 𑀓𑀢𑁆𑀯𑀸 𑀞𑀧𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀢𑀤𑀦𑀼𑀕𑀸𑀬𑀦𑁆𑀢𑀻𑀢𑀺 𑀏𑀢𑀭𑀳𑀺 𑀩𑁆𑀭𑀸𑀳𑁆𑀫𑀡𑀸 𑀢𑀁 𑀢𑁂𑀳𑀺 𑀧𑀼𑀩𑁆𑀩𑁂𑀳𑀺 𑀕𑀻𑀢𑀁 𑀅𑀦𑀼𑀕𑀸𑀬𑀦𑁆𑀢𑀺 𑀅𑀦𑀼𑀲𑀚𑁆𑀛𑀸𑀬𑀦𑁆𑀢𑀺. 𑀢𑀤𑀦𑀼𑀪𑀸𑀲𑀦𑁆𑀢𑀻𑀢𑀺 𑀢𑀁 𑀅𑀦𑀼𑀪𑀸𑀲𑀦𑁆𑀢𑀺. 𑀇𑀤𑀁 𑀧𑀼𑀭𑀺𑀫𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀪𑀸𑀲𑀺𑀢𑀫𑀦𑀼𑀪𑀸𑀲𑀦𑁆𑀢𑀻𑀢𑀺 𑀢𑁂𑀳𑀺 𑀪𑀸𑀲𑀺𑀢𑀁 𑀅𑀦𑀼𑀪𑀸𑀲𑀦𑁆𑀢𑀺. 𑀲𑀚𑁆𑀛𑀸𑀬𑀺𑀢𑀫𑀦𑀼𑀲𑀚𑁆𑀛𑀸𑀬𑀦𑁆𑀢𑀻𑀢𑀺 𑀢𑁂𑀳𑀺 𑀲𑀚𑁆𑀛𑀸𑀬𑀺𑀢𑀁 𑀅𑀦𑀼𑀲𑀚𑁆𑀛𑀸𑀬𑀦𑁆𑀢𑀺. 𑀯𑀸𑀘𑀺𑀢𑀫𑀦𑀼𑀯𑀸𑀘𑁂𑀦𑁆𑀢𑀻𑀢𑀺 𑀢𑁂𑀳𑀺 𑀅𑀜𑁆𑀜𑁂𑀲𑀁 𑀯𑀸𑀘𑀺𑀢𑀁 𑀅𑀦𑀼𑀯𑀸𑀘𑁂𑀦𑁆𑀢𑀺. 𑀲𑁂𑀬𑁆𑀬𑀣𑀺𑀤𑀦𑁆𑀢𑀺 𑀢𑁂 𑀓𑀢𑀫𑁂𑀢𑀺 𑀅𑀢𑁆𑀣𑁄. 𑀅𑀝𑁆𑀞𑀓𑁄𑀢𑀺𑀆𑀤𑀻𑀦𑀺 𑀢𑁂𑀲𑀁 𑀦𑀸𑀫𑀸𑀦𑀺. 𑀢𑁂 𑀓𑀺𑀭 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀑𑀮𑁄𑀓𑁂𑀢𑁆𑀯𑀸 𑀧𑀭𑀽𑀧𑀖𑀸𑀢𑀁 𑀅𑀓𑀢𑁆𑀯𑀸 𑀓𑀲𑁆𑀲𑀧𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀧𑀸𑀯𑀘𑀦𑁂𑀦 𑀲𑀳 𑀲𑀁𑀲𑀦𑁆𑀤𑁂𑀢𑁆𑀯𑀸 𑀫𑀦𑁆𑀢𑁂 𑀕𑀦𑁆𑀣𑁂𑀲𑀼𑀁. 𑀅𑀧𑀭𑀸𑀧𑀭𑁂 𑀧𑀦 𑀩𑁆𑀭𑀸𑀳𑁆𑀫𑀡𑀸 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀦𑀺 𑀧𑀓𑁆𑀔𑀺𑀧𑀺𑀢𑁆𑀯𑀸 𑀢𑀬𑁄 𑀯𑁂𑀤𑁂 𑀪𑀺𑀦𑁆𑀤𑀺𑀢𑁆𑀯𑀸 𑀩𑀼𑀤𑁆𑀥𑀯𑀘𑀦𑁂𑀦 𑀲𑀤𑁆𑀥𑀺𑀁 𑀯𑀺𑀭𑀼𑀤𑁆𑀥𑁂 𑀅𑀓𑀁𑀲𑀼. 𑀢𑁆𑀬𑀸𑀲𑁆𑀲𑀼’𑀫𑁂𑀢𑀺 𑀏𑀢𑁆𑀣 𑀅𑀲𑁆𑀲𑀽𑀢𑀺 𑀦𑀺𑀧𑀸𑀢𑀫𑀢𑁆𑀢𑀁, 𑀢𑁂 𑀩𑁆𑀭𑀸𑀳𑁆𑀫𑀡𑀸 𑀇𑀫𑁂 𑀧𑀜𑁆𑀘 𑀩𑁆𑀭𑀸𑀳𑁆𑀫𑀡𑁂 𑀧𑀜𑁆𑀜𑀸𑀧𑁂𑀦𑁆𑀢𑀻𑀢𑀺 𑀅𑀢𑁆𑀣𑁄.

𑀫𑀦𑁆𑀢𑁂 𑀅𑀥𑀻𑀬𑀫𑀸𑀦𑁄𑀢𑀺 𑀯𑁂𑀤𑁂 𑀲𑀚𑁆𑀛𑀸𑀬𑀦𑁆𑀢𑁄 𑀕𑀡𑁆𑀳𑀦𑁆𑀢𑁄. 𑀆𑀘𑀭𑀺𑀬𑀥𑀦𑀦𑁆𑀢𑀺 𑀆𑀘𑀭𑀺𑀬𑀤𑀓𑁆𑀔𑀺𑀡𑀁 𑀆𑀘𑀭𑀺𑀬𑀪𑀸𑀕𑀁. 𑀦 𑀇𑀲𑁆𑀲𑀢𑁆𑀣𑁂𑀦𑀸𑀢𑀺 𑀦 𑀬𑁄𑀥𑀸𑀚𑀻𑀯𑀓𑀫𑁆𑀫𑁂𑀦 𑀉𑀧𑁆𑀧𑀸𑀤𑁂𑀢𑀺. 𑀦 𑀭𑀸𑀚𑀧𑁄𑀭𑀺𑀲𑁂𑀦𑀸𑀢𑀺 𑀦 𑀭𑀸𑀚𑀼𑀧𑀝𑁆𑀞𑀸𑀓𑀪𑀸𑀯𑁂𑀦. 𑀓𑁂𑀯𑀮𑀁 𑀪𑀺𑀓𑁆𑀔𑀸𑀘𑀭𑀺𑀬𑀸𑀬𑀸𑀢𑀺 𑀲𑀼𑀤𑁆𑀥𑀸𑀬 𑀪𑀺𑀓𑁆𑀔𑀸𑀘𑀭𑀺𑀬𑀸𑀬 𑀏𑀯. 𑀓𑀧𑀸𑀮𑀁 𑀅𑀦𑀢𑀺𑀫𑀜𑁆𑀜𑀫𑀸𑀦𑁄𑀢𑀺 𑀢𑀁 𑀪𑀺𑀓𑁆𑀔𑀸𑀪𑀸𑀚𑀦𑀁 𑀅𑀦𑀢𑀺𑀫𑀜𑁆𑀜𑀫𑀸𑀦𑁄. 𑀲𑁄 𑀳𑀺 𑀧𑀼𑀡𑁆𑀡𑀧𑀢𑁆𑀢𑀁 𑀆𑀤𑀸𑀬 𑀲𑀻𑀲𑀁 𑀦𑁆𑀳𑀸𑀢𑁄 𑀓𑀼𑀮𑀤𑁆𑀯𑀸𑀭𑁂𑀲𑀼 𑀞𑀢𑁆𑀯𑀸 ‘‘𑀅𑀳𑀁 𑀅𑀝𑁆𑀞𑀘𑀢𑁆𑀢𑀸𑀮𑀻𑀲 𑀯𑀲𑁆𑀲𑀸𑀦𑀺 𑀓𑁄𑀫𑀸𑀭𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀺𑀁, 𑀫𑀦𑁆𑀢𑀸𑀧𑀺 𑀫𑁂 𑀕𑀳𑀺𑀢𑀸, 𑀆𑀘𑀭𑀺𑀬𑀲𑁆𑀲 𑀆𑀘𑀭𑀺𑀬𑀥𑀦𑀁 𑀤𑀲𑁆𑀲𑀸𑀫𑀺, 𑀥𑀦𑀁 𑀫𑁂 𑀤𑁂𑀣𑀸’’𑀢𑀺 𑀬𑀸𑀘𑀢𑀺. 𑀢𑀁 𑀲𑀼𑀢𑁆𑀯𑀸 𑀫𑀦𑀼𑀲𑁆𑀲𑀸 𑀬𑀣𑀸𑀲𑀢𑁆𑀢𑀺 𑀬𑀣𑀸𑀩𑀮𑀁 𑀅𑀝𑁆𑀞𑀧𑀺 𑀲𑁄𑀴𑀲𑀧𑀺 𑀲𑀢𑀫𑁆𑀧𑀺 𑀲𑀳𑀲𑁆𑀲𑀫𑁆𑀧𑀺 𑀤𑁂𑀦𑁆𑀢𑀺. 𑀏𑀯𑀁 𑀲𑀓𑀮𑀕𑀸𑀫𑀁 𑀘𑀭𑀺𑀢𑁆𑀯𑀸 𑀮𑀤𑁆𑀥𑀥𑀦𑀁 𑀆𑀘𑀭𑀺𑀬𑀲𑁆𑀲 𑀦𑀺𑀬𑁆𑀬𑀸𑀤𑁂𑀢𑀺. 𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀏𑀯𑀁 𑀔𑁄 𑀤𑁄𑀡 𑀩𑁆𑀭𑀸𑀳𑁆𑀫𑀡𑁄 𑀩𑁆𑀭𑀳𑁆𑀫𑀲𑀫𑁄 𑀳𑁄𑀢𑀻𑀢𑀺 𑀏𑀯𑀁 𑀩𑁆𑀭𑀳𑁆𑀫𑀯𑀺𑀳𑀸𑀭𑁂𑀳𑀺 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀩𑁆𑀭𑀸𑀳𑁆𑀫𑀡𑁄 𑀩𑁆𑀭𑀳𑁆𑀫𑀲𑀫𑁄 𑀦𑀸𑀫 𑀳𑁄𑀢𑀺.

𑀦𑁂𑀯 𑀓𑀬𑁂𑀦 𑀦 𑀯𑀺𑀓𑁆𑀓𑀬𑁂𑀦𑀸𑀢𑀺 𑀦𑁂𑀯 𑀅𑀢𑁆𑀢𑀦𑀸 𑀓𑀬𑀁 𑀓𑀢𑁆𑀯𑀸 𑀕𑀡𑁆𑀳𑀸𑀢𑀺, 𑀦 𑀧𑀭𑁂𑀦 𑀯𑀺𑀓𑁆𑀓𑀬𑀁 𑀓𑀢𑁆𑀯𑀸 𑀤𑀺𑀦𑁆𑀦𑀁. 𑀉𑀤𑀓𑀽𑀧𑀲𑁆𑀲𑀝𑁆𑀞𑀦𑁆𑀢𑀺 𑀉𑀤𑀓𑁂𑀦 𑀉𑀧𑀲𑁆𑀲𑀝𑁆𑀞𑀁 𑀧𑀭𑀺𑀘𑁆𑀘𑀢𑁆𑀢𑀁. 𑀲𑁄 𑀳𑀺 𑀬𑀲𑁆𑀫𑀺𑀁 𑀓𑀼𑀮𑁂 𑀯𑀬𑀧𑁆𑀧𑀢𑁆𑀢𑀸 𑀤𑀸𑀭𑀺𑀓𑀸 𑀅𑀢𑁆𑀣𑀺, 𑀕𑀦𑁆𑀢𑁆𑀯𑀸 𑀢𑀲𑁆𑀲 𑀤𑁆𑀯𑀸𑀭𑁂 𑀢𑀺𑀝𑁆𑀞𑀢𑀺. ‘‘𑀓𑀲𑁆𑀫𑀸 𑀞𑀺𑀢𑁄𑀲𑀻’’𑀢𑀺 𑀯𑀼𑀢𑁆𑀢𑁂 ‘‘𑀅𑀳𑀁 𑀅𑀝𑁆𑀞𑀘𑀢𑁆𑀢𑀸𑀮𑀻𑀲 𑀯𑀲𑁆𑀲𑀸𑀦𑀺 𑀓𑁄𑀫𑀸𑀭𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀺𑀁, 𑀢𑀁 𑀲𑀩𑁆𑀩𑀁 𑀢𑀼𑀫𑁆𑀳𑀸𑀓𑀁 𑀤𑁂𑀫𑀺, 𑀢𑀼𑀫𑁆𑀳𑁂 𑀫𑀬𑁆𑀳𑀁 𑀤𑀸𑀭𑀺𑀓𑀁 𑀤𑁂𑀣𑀸’’𑀢𑀺 𑀯𑀤𑀢𑀺. 𑀢𑁂 𑀤𑀸𑀭𑀺𑀓𑀁 𑀆𑀦𑁂𑀢𑁆𑀯𑀸 𑀢𑀲𑁆𑀲 𑀳𑀢𑁆𑀣𑁂 𑀉𑀤𑀓𑀁 𑀧𑀸𑀢𑁂𑀢𑁆𑀯𑀸 𑀤𑁂𑀦𑁆𑀢𑀺. 𑀲𑁄 𑀢𑀁 𑀉𑀤𑀓𑀽𑀧𑀲𑁆𑀲𑀝𑁆𑀞𑀁 𑀪𑀭𑀺𑀬𑀁 𑀕𑀡𑁆𑀳𑀺𑀢𑁆𑀯𑀸 𑀕𑀘𑁆𑀙𑀢𑀺. 𑀅𑀢𑀺𑀫𑀻𑀴𑁆𑀳𑀚𑁄𑀢𑀺 𑀅𑀢𑀺𑀫𑀻𑀴𑁆𑀳𑁂 𑀫𑀳𑀸𑀕𑀽𑀣𑀭𑀸𑀲𑀺𑀫𑁆𑀳𑀺 𑀚𑀸𑀢𑁄. 𑀢𑀲𑁆𑀲 𑀲𑀸𑀢𑀺 𑀢𑀲𑁆𑀲 𑀏𑀲𑀸. 𑀦 𑀤𑀯𑀢𑁆𑀣𑀸𑀢𑀺 𑀦 𑀓𑀻𑀴𑀦𑀢𑁆𑀣𑀸. 𑀦 𑀭𑀢𑀢𑁆𑀣𑀸𑀢𑀺 𑀦 𑀓𑀸𑀫𑀭𑀢𑀺𑀅𑀢𑁆𑀣𑀸. 𑀫𑁂𑀣𑀼𑀦𑀁 𑀉𑀧𑁆𑀧𑀸𑀤𑁂𑀢𑁆𑀯𑀸𑀢𑀺 𑀥𑀻𑀢𑀭𑀁 𑀯𑀸 𑀧𑀼𑀢𑁆𑀢𑀁 𑀯𑀸 𑀉𑀧𑁆𑀧𑀸𑀤𑁂𑀢𑁆𑀯𑀸 ‘‘𑀇𑀤𑀸𑀦𑀺 𑀧𑀯𑁂𑀡𑀺 𑀖𑀝𑀻𑀬𑀺𑀲𑁆𑀲𑀢𑀻’’𑀢𑀺 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀩𑁆𑀩𑀚𑀢𑀺. 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀦𑁆𑀢𑀺 𑀩𑁆𑀭𑀳𑁆𑀫𑀮𑁄𑀓𑀫𑁂𑀯 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀤𑁂𑀯𑀲𑀫𑁄 𑀳𑁄𑀢𑀻𑀢𑀺 𑀤𑀺𑀩𑁆𑀩𑀯𑀺𑀳𑀸𑀭𑁂𑀳𑀺 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀤𑁂𑀯𑀲𑀫𑁄 𑀦𑀸𑀫 𑀳𑁄𑀢𑀺.

𑀢𑀫𑁂𑀯 𑀧𑀼𑀢𑁆𑀢𑀲𑁆𑀲𑀸𑀤𑀁 𑀦𑀺𑀓𑀸𑀫𑀬𑀫𑀸𑀦𑁄𑀢𑀺 𑀬𑁆𑀯𑀸𑀲𑁆𑀲 𑀥𑀻𑀢𑀭𑀁 𑀯𑀸 𑀧𑀼𑀢𑁆𑀢𑀁 𑀯𑀸 𑀚𑀸𑀢𑀁 𑀤𑀺𑀲𑁆𑀯𑀸 𑀧𑀼𑀢𑁆𑀢𑀧𑁂𑀫𑀁 𑀧𑀼𑀢𑁆𑀢𑀲𑁆𑀲𑀸𑀤𑁄 𑀉𑀧𑁆𑀧𑀚𑁆𑀚𑀢𑀺, 𑀢𑀁 𑀧𑀢𑁆𑀣𑀬𑀫𑀸𑀦𑁄 𑀇𑀘𑁆𑀙𑀫𑀸𑀦𑁄. 𑀓𑀼𑀝𑀼𑀫𑁆𑀩𑀁 𑀅𑀚𑁆𑀛𑀸𑀯𑀲𑀢𑀻𑀢𑀺 𑀓𑀼𑀝𑀼𑀫𑁆𑀩𑀁 𑀲𑀡𑁆𑀞𑀧𑁂𑀢𑁆𑀯𑀸 𑀓𑀼𑀝𑀼𑀫𑁆𑀩𑀫𑀚𑁆𑀛𑁂 𑀯𑀲𑀢𑀺. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑁩. 𑀲𑀗𑁆𑀕𑀸𑀭𑀯𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁯𑁩. 𑀢𑀢𑀺𑀬𑁂 𑀧𑀕𑁂𑀯𑀸𑀢𑀺 𑀧𑀞𑀫𑀜𑁆𑀜𑁂𑀯. 𑀓𑀸𑀫𑀭𑀸𑀕𑀧𑀭𑀺𑀬𑀼𑀝𑁆𑀞𑀺𑀢𑁂𑀦𑀸𑀢𑀺 𑀓𑀸𑀫𑀭𑀸𑀕𑀕𑁆𑀕𑀳𑀺𑀢𑁂𑀦. 𑀓𑀸𑀫𑀭𑀸𑀕𑀧𑀭𑁂𑀢𑁂𑀦𑀸𑀢𑀺 𑀓𑀸𑀫𑀭𑀸𑀕𑀸𑀦𑀼𑀕𑀢𑁂𑀦. 𑀦𑀺𑀲𑁆𑀲𑀭𑀡𑀦𑁆𑀢𑀺 𑀢𑀺𑀯𑀺𑀥𑀁 𑀓𑀸𑀫𑀭𑀸𑀕𑀲𑁆𑀲 𑀦𑀺𑀲𑁆𑀲𑀭𑀡𑀁 𑀯𑀺𑀓𑁆𑀔𑀫𑁆𑀪𑀦𑀦𑀺𑀲𑁆𑀲𑀭𑀡𑀁, 𑀢𑀤𑀗𑁆𑀕𑀦𑀺𑀲𑁆𑀲𑀭𑀡𑀁, 𑀲𑀫𑀼𑀘𑁆𑀙𑁂𑀤𑀦𑀺𑀲𑁆𑀲𑀭𑀡𑀦𑁆𑀢𑀺. 𑀢𑀢𑁆𑀣 𑀅𑀲𑀼𑀪𑁂 𑀧𑀞𑀫𑀚𑁆𑀛𑀸𑀦𑀁 𑀯𑀺𑀓𑁆𑀔𑀫𑁆𑀪𑀦𑀦𑀺𑀲𑁆𑀲𑀭𑀡𑀁 𑀦𑀸𑀫, 𑀯𑀺𑀧𑀲𑁆𑀲𑀦𑀸 𑀢𑀤𑀗𑁆𑀕𑀦𑀺𑀲𑁆𑀲𑀭𑀡𑀁 𑀦𑀸𑀫, 𑀅𑀭𑀳𑀢𑁆𑀢𑀫𑀕𑁆𑀕𑁄 𑀲𑀫𑀼𑀘𑁆𑀙𑁂𑀤𑀦𑀺𑀲𑁆𑀲𑀭𑀡𑀁 𑀦𑀸𑀫. 𑀢𑀁 𑀢𑀺𑀯𑀺𑀥𑀫𑁆𑀧𑀺 𑀦𑀧𑁆𑀧𑀚𑀸𑀦𑀸𑀢𑀻𑀢𑀺 𑀅𑀢𑁆𑀣𑁄. 𑀅𑀢𑁆𑀢𑀢𑁆𑀣𑀫𑁆𑀧𑀻𑀢𑀺𑀆𑀤𑀻𑀲𑀼 𑀅𑀭𑀳𑀢𑁆𑀢𑀲𑀗𑁆𑀔𑀸𑀢𑁄 𑀅𑀢𑁆𑀢𑀦𑁄 𑀅𑀢𑁆𑀣𑁄 𑀅𑀢𑁆𑀢𑀢𑁆𑀣𑁄 𑀦𑀸𑀫, 𑀧𑀘𑁆𑀘𑀬𑀤𑀸𑀬𑀓𑀸𑀦𑀁 𑀅𑀢𑁆𑀣𑁄 𑀧𑀭𑀢𑁆𑀣𑁄 𑀦𑀸𑀫, 𑀲𑁆𑀯𑁂𑀯 𑀤𑀼𑀯𑀺𑀥𑁄 𑀉𑀪𑀬𑀢𑁆𑀣𑁄 𑀦𑀸𑀫. 𑀇𑀫𑀺𑀦𑀸 𑀦𑀬𑁂𑀦 𑀲𑀩𑁆𑀩𑀯𑀸𑀭𑁂𑀲𑀼 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀅𑀬𑀁 𑀧𑀦 𑀯𑀺𑀲𑁂𑀲𑁄 𑁋 𑀩𑁆𑀬𑀸𑀧𑀸𑀤𑀲𑁆𑀲 𑀦𑀺𑀲𑁆𑀲𑀭𑀡𑀦𑁆𑀢𑀺𑀆𑀤𑀻𑀲𑀼 𑀳𑀺 𑀤𑁆𑀯𑁂𑀯 𑀦𑀺𑀲𑁆𑀲𑀭𑀡𑀸𑀦𑀺 𑀯𑀺𑀓𑁆𑀔𑀫𑁆𑀪𑀦𑀦𑀺𑀲𑁆𑀲𑀭𑀡𑀜𑁆𑀘 𑀲𑀫𑀼𑀘𑁆𑀙𑁂𑀤𑀦𑀺𑀲𑁆𑀲𑀭𑀡𑀜𑁆𑀘. 𑀢𑀢𑁆𑀣 𑀩𑁆𑀬𑀸𑀧𑀸𑀤𑀲𑁆𑀲 𑀢𑀸𑀯 𑀫𑁂𑀢𑁆𑀢𑀸𑀬 𑀧𑀞𑀫𑀚𑁆𑀛𑀸𑀦𑀁 𑀯𑀺𑀓𑁆𑀔𑀫𑁆𑀪𑀦𑀦𑀺𑀲𑁆𑀲𑀭𑀡𑀁 𑀦𑀸𑀫, 𑀅𑀦𑀸𑀕𑀸𑀫𑀺𑀫𑀕𑁆𑀕𑁄 𑀲𑀫𑀼𑀘𑁆𑀙𑁂𑀤𑀦𑀺𑀲𑁆𑀲𑀭𑀡𑀁, 𑀣𑀺𑀦𑀫𑀺𑀤𑁆𑀥𑀲𑁆𑀲 𑀆𑀮𑁄𑀓𑀲𑀜𑁆𑀜𑀸 𑀯𑀺𑀓𑁆𑀔𑀫𑁆𑀪𑀦𑀦𑀺𑀲𑁆𑀲𑀭𑀡𑀁, 𑀅𑀭𑀳𑀢𑁆𑀢𑀫𑀕𑁆𑀕𑁄 𑀲𑀫𑀼𑀘𑁆𑀙𑁂𑀤𑀦𑀺𑀲𑁆𑀲𑀭𑀡𑀁. 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀲𑁆𑀲 𑀬𑁄 𑀓𑁄𑀘𑀺 𑀲𑀫𑀣𑁄 𑀯𑀺𑀓𑁆𑀔𑀫𑁆𑀪𑀦𑀦𑀺𑀲𑁆𑀲𑀭𑀡𑀁, 𑀉𑀤𑁆𑀥𑀘𑁆𑀘𑀲𑁆𑀲 𑀧𑀦𑁂𑀢𑁆𑀣 𑀅𑀭𑀳𑀢𑁆𑀢𑀫𑀕𑁆𑀕𑁄, 𑀓𑀼𑀓𑁆𑀓𑀼𑀘𑁆𑀘𑀲𑁆𑀲 𑀅𑀦𑀸𑀕𑀸𑀫𑀺𑀫𑀕𑁆𑀕𑁄 𑀲𑀫𑀼𑀘𑁆𑀙𑁂𑀤𑀦𑀺𑀲𑁆𑀲𑀭𑀡𑀁. 𑀯𑀺𑀘𑀺𑀓𑀺𑀘𑁆𑀙𑀸𑀬 𑀥𑀫𑁆𑀫𑀯𑀯𑀢𑁆𑀣𑀸𑀦𑀁 𑀯𑀺𑀓𑁆𑀔𑀫𑁆𑀪𑀦𑀦𑀺𑀲𑁆𑀲𑀭𑀡𑀁, 𑀧𑀞𑀫𑀫𑀕𑁆𑀕𑁄 𑀲𑀫𑀼𑀘𑁆𑀙𑁂𑀤𑀦𑀺𑀲𑁆𑀲𑀭𑀡𑀁.

𑀬𑀸 𑀧𑀦𑁂𑀢𑁆𑀣 𑀲𑁂𑀬𑁆𑀬𑀣𑀸𑀧𑀺, 𑀩𑁆𑀭𑀸𑀳𑁆𑀫𑀡, 𑀉𑀤𑀧𑀢𑁆𑀢𑁄 𑀲𑀁𑀲𑀝𑁆𑀞𑁄 𑀮𑀸𑀔𑀸𑀬 𑀯𑀸𑀢𑀺𑀆𑀤𑀺𑀓𑀸 𑀉𑀧𑀫𑀸 𑀯𑀼𑀢𑁆𑀢𑀸, 𑀢𑀸𑀲𑀼 𑀉𑀤𑀧𑀢𑁆𑀢𑁄𑀢𑀺 𑀉𑀤𑀓𑀪𑀭𑀺𑀢𑀸 𑀧𑀸𑀢𑀺. 𑀲𑀁𑀲𑀝𑁆𑀞𑁄𑀢𑀺 𑀯𑀡𑁆𑀡𑀪𑁂𑀤𑀓𑀭𑀡𑀯𑀲𑁂𑀦 𑀲𑀁𑀲𑀝𑁆𑀞𑁄. 𑀉𑀓𑁆𑀓𑀼𑀥𑀺𑀢𑁄𑀢𑀺 𑀓𑀼𑀥𑀺𑀢𑁄. 𑀉𑀲𑁆𑀲𑀤𑀓𑀚𑀸𑀢𑁄𑀢𑀺 𑀉𑀲𑀼𑀫𑀓𑀚𑀸𑀢𑁄. 𑀲𑁂𑀯𑀸𑀮𑀧𑀡𑀓𑀧𑀭𑀺𑀬𑁄𑀦𑀤𑁆𑀥𑁄𑀢𑀺 𑀢𑀺𑀮𑀩𑀻𑀚𑀓𑀸𑀤𑀺𑀪𑁂𑀤𑁂𑀦 𑀲𑁂𑀯𑀸𑀮𑁂𑀦 𑀯𑀸 𑀦𑀻𑀮𑀫𑀡𑁆𑀟𑀽𑀓𑀧𑀺𑀝𑁆𑀞𑀺𑀯𑀡𑁆𑀡𑁂𑀦 𑀯𑀸 𑀉𑀤𑀓𑀧𑀺𑀝𑁆𑀞𑀺𑀁 𑀙𑀸𑀤𑁂𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑁂𑀦 𑀧𑀡𑀓𑁂𑀦 𑀧𑀭𑀺𑀬𑁄𑀦𑀤𑁆𑀥𑁄. 𑀯𑀸𑀢𑁂𑀭𑀺𑀢𑁄𑀢𑀺 𑀯𑀸𑀢𑁂𑀦 𑀏𑀭𑀺𑀢𑁄 𑀓𑀫𑁆𑀧𑀺𑀢𑁄. 𑀆𑀯𑀺𑀮𑁄𑀢𑀺 𑀅𑀧𑁆𑀧𑀲𑀦𑁆𑀦𑁄. 𑀮𑀼𑀴𑀺𑀢𑁄𑀢𑀺 𑀅𑀲𑀦𑁆𑀦𑀺𑀲𑀺𑀦𑁆𑀦𑁄. 𑀓𑀮𑀮𑀻𑀪𑀽𑀢𑁄𑀢𑀺 𑀓𑀤𑁆𑀤𑀫𑀻𑀪𑀽𑀢𑁄. 𑀅𑀦𑁆𑀥𑀓𑀸𑀭𑁂 𑀦𑀺𑀓𑁆𑀔𑀺𑀢𑁆𑀢𑁄𑀢𑀺 𑀓𑁄𑀝𑁆𑀞𑀓𑀦𑁆𑀢𑀭𑀸𑀤𑀺𑀪𑁂𑀤𑁂 𑀅𑀦𑀸𑀮𑁄𑀓𑀝𑁆𑀞𑀸𑀦𑁂 𑀞𑀧𑀺𑀢𑁄. 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀪𑀕𑀯𑀸 𑀢𑀻𑀳𑀺 𑀪𑀯𑁂𑀳𑀺 𑀤𑁂𑀲𑀦𑀁 𑀦𑀺𑀯𑀝𑁆𑀝𑁂𑀢𑁆𑀯𑀸 𑀅𑀭𑀳𑀢𑁆𑀢𑀦𑀺𑀓𑀽𑀝𑁂𑀦 𑀦𑀺𑀝𑁆𑀞𑀧𑁂𑀲𑀺, 𑀩𑁆𑀭𑀸𑀳𑁆𑀫𑀡𑁄 𑀧𑀦 𑀲𑀭𑀡𑀫𑀢𑁆𑀢𑁂 𑀧𑀢𑀺𑀝𑁆𑀞𑀺𑀢𑁄𑀢𑀺.

𑁪. 𑀓𑀸𑀭𑀡𑀧𑀸𑀮𑀻𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁯𑁪. 𑀘𑀢𑀼𑀢𑁆𑀣𑁂 𑀓𑀸𑀭𑀡𑀧𑀸𑀮𑀻𑀢𑀺 𑀧𑀸𑀮𑁄𑀢𑀺 𑀢𑀲𑁆𑀲 𑀦𑀸𑀫𑀁, 𑀭𑀸𑀚𑀓𑀼𑀮𑀸𑀦𑀁 𑀧𑀦 𑀓𑀫𑁆𑀫𑀦𑁆𑀢𑁂 𑀓𑀸𑀭𑁂𑀢𑀻𑀢𑀺 𑀓𑀸𑀭𑀡𑀧𑀸𑀮𑀻 𑀦𑀸𑀫 𑀚𑀸𑀢𑁄. 𑀓𑀫𑁆𑀫𑀦𑁆𑀢𑀁 𑀓𑀸𑀭𑁂𑀢𑀻𑀢𑀺 𑀧𑀸𑀢𑁄𑀯 𑀉𑀝𑁆𑀞𑀸𑀬 𑀤𑁆𑀯𑀸𑀭𑀝𑁆𑀝𑀸𑀮𑀓𑀧𑀸𑀓𑀸𑀭𑁂 𑀅𑀓𑀢𑁂 𑀓𑀸𑀭𑁂𑀢𑀺, 𑀚𑀺𑀡𑁆𑀡𑁂 𑀧𑀝𑀺𑀚𑀕𑁆𑀕𑀸𑀧𑁂𑀢𑀺. 𑀧𑀺𑀗𑁆𑀕𑀺𑀬𑀸𑀦𑀺𑀁 𑀩𑁆𑀭𑀸𑀳𑁆𑀫𑀡𑀦𑁆𑀢𑀺 𑀏𑀯𑀁𑀦𑀸𑀫𑀓𑀁 𑀅𑀦𑀸𑀕𑀸𑀫𑀺𑀨𑀮𑁂 𑀧𑀢𑀺𑀝𑁆𑀞𑀺𑀢𑀁 𑀅𑀭𑀺𑀬𑀲𑀸𑀯𑀓𑀁 𑀩𑁆𑀭𑀸𑀳𑁆𑀫𑀡𑀁. 𑀲𑁄 𑀓𑀺𑀭 𑀧𑀸𑀢𑁄𑀯 𑀉𑀝𑁆𑀞𑀸𑀬 𑀕𑀦𑁆𑀥𑀫𑀸𑀮𑀸𑀤𑀻𑀦𑀺 𑀕𑀸𑀳𑀸𑀧𑁂𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀕𑀦𑁆𑀥𑀫𑀸𑀮𑀸𑀤𑀻𑀳𑀺 𑀧𑀽𑀚𑁂𑀢𑁆𑀯𑀸 𑀦𑀕𑀭𑀁 𑀆𑀕𑀘𑁆𑀙𑀢𑀺, 𑀇𑀤𑀁 𑀩𑁆𑀭𑀸𑀳𑁆𑀫𑀡𑀲𑁆𑀲 𑀤𑁂𑀯𑀲𑀺𑀓𑀁 𑀯𑀢𑁆𑀢𑀦𑁆𑀢𑀺. 𑀢𑀁 𑀲𑁄 𑀏𑀯𑀁 𑀯𑀢𑁆𑀢𑀁 𑀓𑀢𑁆𑀯𑀸 𑀆𑀕𑀘𑁆𑀙𑀦𑁆𑀢𑀁 𑀅𑀤𑁆𑀤𑀲. 𑀏𑀢𑀤𑀯𑁄𑀘𑀸𑀢𑀺 ‘‘𑀅𑀬𑀁 𑀩𑁆𑀭𑀸𑀳𑁆𑀫𑀡𑁄 𑀧𑀜𑁆𑀜𑀯𑀸 𑀜𑀸𑀡𑀼𑀢𑁆𑀢𑀭𑁄, 𑀓𑀳𑀁 𑀦𑀼 𑀔𑁄 𑀧𑀸𑀢𑁄𑀯 𑀕𑀦𑁆𑀢𑁆𑀯𑀸 𑀆𑀕𑀘𑁆𑀙𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀅𑀦𑀼𑀓𑁆𑀓𑀫𑁂𑀦 𑀲𑀦𑁆𑀢𑀺𑀓𑀁 𑀆𑀕𑀢𑀁 𑀲𑀜𑁆𑀚𑀸𑀦𑀺𑀢𑁆𑀯𑀸 ‘‘𑀳𑀦𑁆𑀤 𑀓𑀼𑀢𑁄 𑀦𑀽’’𑀢𑀺𑀆𑀤𑀺𑀯𑀘𑀦𑀁 𑀅𑀯𑁄𑀘.

𑀢𑀢𑁆𑀣 𑀤𑀺𑀯𑀸 𑀤𑀺𑀯𑀲𑁆𑀲𑀸𑀢𑀺 𑀤𑀺𑀯𑀲𑀲𑁆𑀲𑀸𑀧𑀺 𑀤𑀺𑀯𑀸, 𑀫𑀚𑁆𑀛𑀦𑁆𑀳𑀺𑀓𑀓𑀸𑀮𑁂𑀢𑀺 𑀅𑀢𑁆𑀣𑁄. 𑀧𑀡𑁆𑀟𑀺𑀢𑁄 𑀫𑀜𑁆𑀜𑁂𑀢𑀺 𑀪𑀯𑀁 𑀧𑀺𑀗𑁆𑀕𑀺𑀬𑀸𑀦𑀻 𑀲𑀫𑀡𑀁 𑀕𑁄𑀢𑀫𑀁 𑀧𑀡𑁆𑀟𑀺𑀢𑁄𑀢𑀺 𑀫𑀜𑁆𑀜𑀢𑀺, 𑀉𑀤𑀸𑀳𑀼 𑀦𑁄𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄. 𑀓𑁄 𑀘𑀸𑀳𑀁, 𑀪𑁄𑀢𑀺, 𑀪𑁄, 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀧𑀜𑁆𑀜𑀸𑀯𑁂𑀬𑁆𑀬𑀢𑁆𑀢𑀺𑀬𑀚𑀸𑀦𑀦𑁂 𑀅𑀳𑀁 𑀓𑁄 𑀦𑀸𑀫? 𑀓𑁄 𑀘 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀧𑀜𑁆𑀜𑀸𑀯𑁂𑀬𑁆𑀬𑀢𑁆𑀢𑀺𑀬𑀁 𑀚𑀸𑀦𑀺𑀲𑁆𑀲𑀸𑀫𑀻𑀢𑀺 𑀓𑀼𑀢𑁄 𑀘𑀸𑀳𑀁 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀧𑀜𑁆𑀜𑀸𑀯𑁂𑀬𑁆𑀬𑀢𑁆𑀢𑀺𑀬𑀁 𑀚𑀸𑀦𑀺𑀲𑁆𑀲𑀸𑀫𑀺, 𑀓𑁂𑀦 𑀦𑀸𑀫 𑀓𑀸𑀭𑀡𑁂𑀦 𑀚𑀸𑀦𑀺𑀲𑁆𑀲𑀸𑀫𑀻𑀢𑀺 𑀏𑀯𑀁 𑀲𑀩𑁆𑀩𑀣𑀸𑀧𑀺 𑀅𑀢𑁆𑀢𑀦𑁄 𑀅𑀚𑀸𑀦𑀦𑀪𑀸𑀯𑀁 𑀤𑀻𑀧𑁂𑀢𑀺. 𑀲𑁄𑀧𑀺 𑀦𑀽𑀦𑀲𑁆𑀲 𑀢𑀸𑀤𑀺𑀲𑁄𑀯𑀸𑀢𑀺 𑀬𑁄 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀧𑀜𑁆𑀜𑀸𑀯𑁂𑀬𑁆𑀬𑀢𑁆𑀢𑀺𑀬𑀁 𑀚𑀸𑀦𑁂𑀬𑁆𑀬, 𑀲𑁄𑀧𑀺 𑀦𑀽𑀦 𑀤𑀲 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸 𑀲𑀩𑁆𑀩𑀜𑁆𑀜𑀼𑀢𑀁 𑀧𑀢𑁆𑀢𑁄 𑀢𑀸𑀤𑀺𑀲𑁄 𑀩𑀼𑀤𑁆𑀥𑁄𑀬𑁂𑀯 𑀪𑀯𑁂𑀬𑁆𑀬. 𑀲𑀺𑀦𑁂𑀭𑀼𑀁 𑀯𑀸 𑀳𑀺 𑀧𑀣𑀯𑀺𑀁 𑀯𑀸 𑀆𑀓𑀸𑀲𑀁 𑀯𑀸 𑀧𑀫𑁂𑀢𑀼𑀓𑀸𑀫𑁂𑀦 𑀢𑀧𑁆𑀧𑀫𑀸𑀡𑁄 𑀤𑀡𑁆𑀟𑁄 𑀯𑀸 𑀭𑀚𑁆𑀚𑀼 𑀯𑀸 𑀮𑀤𑁆𑀥𑀼𑀁 𑀯𑀝𑁆𑀝𑀢𑀺, 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀧𑀜𑁆𑀜𑀁 𑀚𑀸𑀦𑀦𑁆𑀢𑁂𑀦𑀧𑀺 𑀢𑀲𑁆𑀲 𑀜𑀸𑀡𑀲𑀤𑀺𑀲𑀫𑁂𑀯 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀮𑀤𑁆𑀥𑀼𑀁 𑀯𑀝𑁆𑀝𑀢𑀻𑀢𑀺 𑀤𑀻𑀧𑁂𑀢𑀺. 𑀆𑀤𑀭𑀯𑀲𑁂𑀦 𑀧𑀦𑁂𑀢𑁆𑀣 𑀆𑀫𑁂𑀟𑀺𑀢𑀁 𑀓𑀢𑀁. 𑀉𑀴𑀸𑀭𑀸𑀬𑀸𑀢𑀺 𑀉𑀢𑁆𑀢𑀫𑀸𑀬 𑀲𑁂𑀝𑁆𑀞𑀸𑀬. 𑀓𑁄 𑀘𑀸𑀳𑀁, 𑀪𑁄𑀢𑀺, 𑀪𑁄, 𑀅𑀳𑀁 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀧𑀲𑀁𑀲𑀦𑁂 𑀓𑁄 𑀦𑀸𑀫. 𑀓𑁄 𑀘 𑀲𑀫𑀡𑀁 𑀕𑁄𑀢𑀫𑀁 𑀧𑀲𑀁𑀲𑀺𑀲𑁆𑀲𑀸𑀫𑀻𑀢𑀺 𑀓𑁂𑀦 𑀓𑀸𑀭𑀡𑁂𑀦 𑀧𑀲𑀁𑀲𑀺𑀲𑁆𑀲𑀸𑀫𑀺.

𑀧𑀲𑀢𑁆𑀣𑀧𑁆𑀧𑀲𑀢𑁆𑀣𑁄𑀢𑀺 𑀲𑀩𑁆𑀩𑀕𑀼𑀡𑀸𑀦𑀁 𑀉𑀧𑀭𑀺 𑀘𑀭𑁂𑀳𑀺 𑀲𑀩𑁆𑀩𑀮𑁄𑀓𑀧𑀲𑀢𑁆𑀣𑁂𑀳𑀺 𑀅𑀢𑁆𑀢𑀦𑁄 𑀕𑀼𑀡𑁂𑀳𑁂𑀯 𑀧𑀲𑀢𑁆𑀣𑁄, 𑀦 𑀢𑀲𑁆𑀲 𑀅𑀜𑁆𑀜𑁂𑀳𑀺 𑀧𑀲𑀁𑀲𑀦𑀓𑀺𑀘𑁆𑀘𑀁 𑀅𑀢𑁆𑀣𑀺. 𑀬𑀣𑀸 𑀳𑀺 𑀘𑀫𑁆𑀧𑀓𑀧𑀼𑀧𑁆𑀨𑀁 𑀯𑀸 𑀦𑀻𑀮𑀼𑀧𑁆𑀧𑀮𑀁 𑀯𑀸 𑀧𑀤𑀼𑀫𑀁 𑀯𑀸 𑀮𑁄𑀳𑀺𑀢𑀘𑀦𑁆𑀤𑀦𑀁 𑀯𑀸 𑀅𑀢𑁆𑀢𑀦𑁄 𑀯𑀡𑁆𑀡𑀕𑀦𑁆𑀥𑀲𑀺𑀭𑀺𑀬𑀸𑀯 𑀧𑀸𑀲𑀸𑀤𑀺𑀓𑀜𑁆𑀘𑁂𑀯 𑀲𑀼𑀕𑀦𑁆𑀥𑀜𑁆𑀘, 𑀦 𑀢𑀲𑁆𑀲 𑀆𑀕𑀦𑁆𑀢𑀼𑀓𑁂𑀳𑀺 𑀯𑀡𑁆𑀡𑀕𑀦𑁆𑀥𑁂𑀳𑀺 𑀣𑁄𑀫𑀦𑀓𑀺𑀘𑁆𑀘𑀁 𑀅𑀢𑁆𑀣𑀺. 𑀬𑀣𑀸 𑀘 𑀫𑀡𑀺𑀭𑀢𑀦𑀁 𑀯𑀸 𑀘𑀦𑁆𑀤𑀫𑀡𑁆𑀟𑀮𑀁 𑀯𑀸 𑀅𑀢𑁆𑀢𑀦𑁄 𑀆𑀮𑁄𑀓𑁂𑀦𑁂𑀯 𑀑𑀪𑀸𑀲𑀢𑀺, 𑀦 𑀢𑀲𑁆𑀲 𑀅𑀜𑁆𑀜𑁂𑀦 𑀑𑀪𑀸𑀲𑀦𑀓𑀺𑀘𑁆𑀘𑀁 𑀅𑀢𑁆𑀣𑀺, 𑀏𑀯𑀁 𑀲𑀫𑀡𑁄 𑀕𑁄𑀢𑀫𑁄 𑀲𑀩𑁆𑀩𑀮𑁄𑀓𑀧𑀲𑀢𑁆𑀣𑁂𑀳𑀺 𑀅𑀢𑁆𑀢𑀦𑁄 𑀕𑀼𑀡𑁂𑀳𑁂𑀯 𑀧𑀲𑀢𑁆𑀣𑁄 𑀣𑁄𑀫𑀺𑀢𑁄, 𑀲𑀩𑁆𑀩𑀮𑁄𑀓𑀲𑁆𑀲 𑀲𑁂𑀝𑁆𑀞𑀢𑀁 𑀧𑀸𑀧𑀺𑀢𑁄. 𑀦 𑀢𑀲𑁆𑀲 𑀅𑀜𑁆𑀜𑁂𑀦 𑀧𑀲𑀁𑀲𑀦𑀓𑀺𑀘𑁆𑀘𑀁 𑀅𑀢𑁆𑀣𑀺.

𑀧𑀲𑀢𑁆𑀣𑁂𑀳𑀺 𑀯𑀸 𑀧𑀲𑀢𑁆𑀣𑁄𑀢𑀺𑀧𑀺 𑀧𑀲𑀢𑁆𑀣𑀧𑁆𑀧𑀲𑀢𑁆𑀣𑁄. 𑀓𑁂 𑀧𑀦 𑀧𑀲𑀢𑁆𑀣𑀸 𑀦𑀸𑀫? 𑀭𑀸𑀚𑀸 𑀧𑀲𑁂𑀦𑀤𑀺 𑀓𑁄𑀲𑀮𑁄 𑀓𑀸𑀲𑀺𑀓𑁄𑀲𑀮𑀯𑀸𑀲𑀺𑀓𑁂𑀳𑀺 𑀧𑀲𑀢𑁆𑀣𑁄, 𑀩𑀺𑀫𑁆𑀩𑀺𑀲𑀸𑀭𑁄 𑀅𑀗𑁆𑀕𑀫𑀕𑀥𑀯𑀸𑀲𑀻𑀳𑀺, 𑀯𑁂𑀲𑀸𑀮𑀺𑀓𑀸 𑀮𑀺𑀘𑁆𑀙𑀯𑀻 𑀯𑀚𑁆𑀚𑀺𑀢𑀝𑁆𑀞𑀯𑀸𑀲𑀻𑀳𑀺 𑀧𑀲𑀢𑁆𑀣𑀸, 𑀧𑀸𑀯𑁂𑀬𑁆𑀬𑀓𑀸 𑀫𑀮𑁆𑀮𑀸 𑀓𑁄𑀲𑀺𑀦𑀸𑀭𑀓𑀸 𑀫𑀮𑁆𑀮𑀸 𑀅𑀜𑁆𑀜𑁂𑀧𑀺 𑀢𑁂 𑀢𑁂 𑀔𑀢𑁆𑀢𑀺𑀬𑀸 𑀢𑁂𑀳𑀺 𑀢𑁂𑀳𑀺 𑀚𑀸𑀦𑀧𑀤𑁂𑀳𑀺 𑀧𑀲𑀢𑁆𑀣𑀸, 𑀘𑀗𑁆𑀓𑀺𑀆𑀤𑀬𑁄 𑀩𑁆𑀭𑀸𑀳𑁆𑀫𑀡𑀸 𑀩𑁆𑀭𑀸𑀳𑁆𑀫𑀡𑀕𑀡𑁂𑀳𑀺, 𑀅𑀦𑀸𑀣𑀧𑀺𑀡𑁆𑀟𑀺𑀓𑀸𑀤𑀬𑁄 𑀉𑀧𑀸𑀲𑀓𑀸 𑀉𑀧𑀸𑀲𑀓𑀕𑀡𑁂𑀳𑀺, 𑀯𑀺𑀲𑀸𑀔𑀸𑀆𑀤𑀺𑀓𑀸 𑀉𑀧𑀸𑀲𑀺𑀓𑀸 𑀅𑀦𑁂𑀓𑀲𑀢𑀸𑀳𑀺 𑀉𑀧𑀸𑀲𑀺𑀓𑀸𑀳𑀺, 𑀲𑀓𑀼𑀮𑀼𑀤𑀸𑀬𑀺𑀆𑀤𑀬𑁄 𑀧𑀭𑀺𑀩𑁆𑀩𑀸𑀚𑀓𑀸 𑀅𑀦𑁂𑀓𑁂𑀳𑀺 𑀧𑀭𑀺𑀩𑁆𑀩𑀸𑀚𑀓𑀲𑀢𑁂𑀳𑀺, 𑀉𑀧𑁆𑀧𑀮𑀯𑀡𑁆𑀡𑀢𑁆𑀣𑁂𑀭𑀺𑀆𑀤𑀺𑀓𑀸 𑀫𑀳𑀸𑀲𑀸𑀯𑀺𑀓𑀸 𑀅𑀦𑁂𑀓𑁂𑀳𑀺 𑀪𑀺𑀓𑁆𑀔𑀼𑀦𑀺𑀲𑀢𑁂𑀳𑀺, 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀸𑀤𑀬𑁄 𑀫𑀳𑀸𑀣𑁂𑀭𑀸 𑀅𑀦𑁂𑀓𑀲𑀢𑁂𑀳𑀺 𑀪𑀺𑀓𑁆𑀔𑀽𑀳𑀺, 𑀲𑀓𑁆𑀓𑀸𑀤𑀬𑁄 𑀤𑁂𑀯𑀸 𑀅𑀦𑁂𑀓𑀲𑀳𑀲𑁆𑀲𑁂𑀳𑀺 𑀤𑁂𑀯𑁂𑀳𑀺, 𑀫𑀳𑀸𑀩𑁆𑀭𑀳𑁆𑀫𑀸𑀤𑀬𑁄 𑀩𑁆𑀭𑀳𑁆𑀫𑀸𑀦𑁄 𑀅𑀦𑁂𑀓𑀲𑀳𑀲𑁆𑀲𑁂𑀳𑀺 𑀩𑁆𑀭𑀳𑁆𑀫𑁂𑀳𑀺 𑀧𑀲𑀢𑁆𑀣𑀸. 𑀢𑁂 𑀲𑀩𑁆𑀩𑁂𑀧𑀺 𑀤𑀲𑀩𑀮𑀁 𑀣𑁄𑀫𑁂𑀦𑁆𑀢𑀺 𑀯𑀡𑁆𑀡𑁂𑀦𑁆𑀢𑀺 𑀧𑀲𑀁𑀲𑀦𑁆𑀢𑀻𑀢𑀺 𑀪𑀕𑀯𑀸 ‘‘𑀧𑀲𑀢𑁆𑀣𑀧𑁆𑀧𑀲𑀢𑁆𑀣𑁄’’𑀢𑀺 𑀯𑀼𑀘𑁆𑀘𑀢𑀺. 𑀅𑀢𑁆𑀣𑀯𑀲𑀦𑁆𑀢𑀺 𑀅𑀢𑁆𑀣𑀸𑀦𑀺𑀲𑀁𑀲𑀁.

𑀅𑀣𑀲𑁆𑀲 𑀲𑁄 𑀅𑀢𑁆𑀢𑀦𑁄 𑀧𑀲𑀸𑀤𑀓𑀸𑀭𑀡𑀁 𑀆𑀘𑀺𑀓𑁆𑀔𑀦𑁆𑀢𑁄 𑀲𑁂𑀬𑁆𑀬𑀣𑀸𑀧𑀺, 𑀪𑁄, 𑀧𑀼𑀭𑀺𑀲𑁄𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀕𑁆𑀕𑀭𑀲𑀧𑀭𑀺𑀢𑀺𑀢𑁆𑀢𑁄𑀢𑀺 𑀪𑁄𑀚𑀦𑀭𑀲𑁂𑀲𑀼 𑀧𑀸𑀬𑀸𑀲𑁄 𑀲𑁆𑀦𑁂𑀳𑀭𑀲𑁂𑀲𑀼 𑀕𑁄𑀲𑀧𑁆𑀧𑀺, 𑀓𑀲𑀸𑀯𑀭𑀲𑁂𑀲𑀼 𑀔𑀼𑀤𑁆𑀤𑀓𑀫𑀥𑀼 𑀅𑀦𑁂𑀴𑀓𑀁, 𑀫𑀥𑀼𑀭𑀭𑀲𑁂𑀲𑀼 𑀲𑀓𑁆𑀓𑀭𑀸𑀢𑀺 𑀏𑀯𑀫𑀸𑀤𑀬𑁄 𑀅𑀕𑁆𑀕𑀭𑀲𑀸 𑀦𑀸𑀫. 𑀢𑁂𑀲𑀼 𑀬𑁂𑀦 𑀓𑁂𑀦𑀘𑀺 𑀧𑀭𑀺𑀢𑀺𑀢𑁆𑀢𑁄 𑀆𑀓𑀡𑁆𑀞𑀧𑁆𑀧𑀫𑀸𑀡𑀁 𑀪𑀼𑀜𑁆𑀚𑀺𑀢𑁆𑀯𑀸 𑀞𑀺𑀢𑁄. 𑀅𑀜𑁆𑀜𑁂𑀲𑀁 𑀳𑀻𑀦𑀸𑀦𑀦𑁆𑀢𑀺 𑀅𑀕𑁆𑀕𑀭𑀲𑁂𑀳𑀺 𑀅𑀜𑁆𑀜𑁂𑀲𑀁 𑀳𑀻𑀦𑀭𑀲𑀸𑀦𑀁. 𑀲𑀼𑀢𑁆𑀢𑀲𑁄𑀢𑀺 𑀲𑀼𑀢𑁆𑀢𑀢𑁄, 𑀲𑀼𑀢𑁆𑀢𑀪𑀸𑀯𑁂𑀦𑀸𑀢𑀺 𑀅𑀢𑁆𑀣𑁄. 𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀢𑀢𑁄 𑀢𑀢𑁄𑀢𑀺 𑀲𑀼𑀢𑁆𑀢𑀸𑀤𑀻𑀲𑀼 𑀢𑀢𑁄 𑀢𑀢𑁄. 𑀅𑀜𑁆𑀜𑁂𑀲𑀁 𑀧𑀼𑀣𑀼𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀧𑁆𑀧𑀯𑀸𑀤𑀸𑀦𑀦𑁆𑀢𑀺 𑀬𑁂 𑀅𑀜𑁆𑀜𑁂𑀲𑀁 𑀧𑀼𑀣𑀽𑀦𑀁 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀮𑀤𑁆𑀥𑀺𑀲𑀗𑁆𑀔𑀸𑀢𑀧𑁆𑀧𑀯𑀸𑀤𑀸, 𑀢𑁂𑀲𑀁. 𑀦 𑀧𑀺𑀳𑁂𑀢𑀻𑀢𑀺 𑀦 𑀧𑀢𑁆𑀣𑁂𑀢𑀺, 𑀢𑁂 𑀓𑀣𑀺𑀬𑀫𑀸𑀦𑁂 𑀲𑁄𑀢𑀼𑀫𑁆𑀧𑀺 𑀦 𑀇𑀘𑁆𑀙𑀢𑀺. 𑀚𑀺𑀖𑀘𑁆𑀙𑀸𑀤𑀼𑀩𑁆𑀩𑀮𑁆𑀬𑀧𑀭𑁂𑀢𑁄𑀢𑀺 𑀚𑀺𑀖𑀘𑁆𑀙𑀸𑀬 𑀘𑁂𑀯 𑀤𑀼𑀩𑁆𑀩𑀮𑀪𑀸𑀯𑁂𑀦 𑀘 𑀅𑀦𑀼𑀕𑀢𑁄. 𑀫𑀥𑀼𑀧𑀺𑀡𑁆𑀟𑀺𑀓𑀦𑁆𑀢𑀺 𑀲𑀸𑀮𑀺𑀧𑀺𑀝𑁆𑀞𑀁 𑀪𑀚𑁆𑀚𑀺𑀢𑁆𑀯𑀸 𑀘𑀢𑀼𑀫𑀥𑀼𑀭𑁂𑀦 𑀬𑁄𑀚𑁂𑀢𑁆𑀯𑀸 𑀓𑀢𑀁 𑀩𑀤𑁆𑀥𑀲𑀢𑁆𑀢𑀼𑀧𑀺𑀡𑁆𑀟𑀺𑀓𑀁, 𑀫𑀥𑀼𑀭𑀧𑀽𑀯𑀫𑁂𑀯 𑀯𑀸. 𑀅𑀥𑀺𑀕𑀘𑁆𑀙𑁂𑀬𑁆𑀬𑀸𑀢𑀺 𑀮𑀪𑁂𑀬𑁆𑀬. 𑀅𑀲𑁂𑀘𑀦𑀓𑀦𑁆𑀢𑀺 𑀫𑀥𑀼𑀭𑀪𑀸𑀯𑀓𑀭𑀡𑀢𑁆𑀣𑀸𑀬 𑀅𑀜𑁆𑀜𑁂𑀦 𑀭𑀲𑁂𑀦 𑀅𑀦𑀸𑀲𑀺𑀢𑁆𑀢𑀓𑀁 𑀑𑀚𑀯𑀦𑁆𑀢𑀁 𑀧𑀡𑀻𑀢𑀭𑀲𑀁.

𑀳𑀭𑀺𑀘𑀦𑁆𑀤𑀦𑀲𑁆𑀲𑀸𑀢𑀺 𑀲𑀼𑀯𑀡𑁆𑀡𑀯𑀡𑁆𑀡𑀘𑀦𑁆𑀤𑀦𑀲𑁆𑀲. 𑀮𑁄𑀳𑀺𑀢𑀘𑀦𑁆𑀤𑀦𑀲𑁆𑀲𑀸𑀢𑀺 𑀭𑀢𑁆𑀢𑀯𑀡𑁆𑀡𑀘𑀦𑁆𑀤𑀦𑀲𑁆𑀲. 𑀲𑀼𑀭𑀪𑀺𑀕𑀦𑁆𑀥𑀦𑁆𑀢𑀺 𑀲𑀼𑀕𑀦𑁆𑀥𑀁. 𑀤𑀭𑀣𑀸𑀤𑀬𑁄 𑀯𑀝𑁆𑀝𑀤𑀭𑀣𑀸, 𑀯𑀝𑁆𑀝𑀓𑀺𑀮𑀫𑀣𑀸, 𑀯𑀝𑁆𑀝𑀧𑀭𑀺𑀴𑀸𑀳𑀸 𑀏𑀯. 𑀉𑀤𑀸𑀦𑀁 𑀉𑀤𑀸𑀦𑁂𑀲𑀻𑀢𑀺 𑀉𑀤𑀸𑀳𑀸𑀭𑀁 𑀉𑀤𑀸𑀳𑀭𑀺. 𑀬𑀣𑀸 𑀳𑀺 𑀬𑀁 𑀢𑁂𑀮𑀁 𑀫𑀸𑀦𑀁 𑀕𑀳𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀯𑀺𑀲𑁆𑀲𑀦𑁆𑀤𑀺𑀢𑁆𑀯𑀸 𑀕𑀘𑁆𑀙𑀢𑀺, 𑀢𑀁 𑀅𑀯𑀲𑁂𑀓𑁄𑀢𑀺 𑀯𑀼𑀘𑁆𑀘𑀢𑀺. 𑀬𑀜𑁆𑀘 𑀚𑀮𑀁 𑀢𑀴𑀸𑀓𑀁 𑀕𑀳𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀅𑀚𑁆𑀛𑁄𑀢𑁆𑀣𑀭𑀺𑀢𑁆𑀯𑀸 𑀕𑀘𑁆𑀙𑀢𑀺, 𑀢𑀁 𑀑𑀖𑁄𑀢𑀺 𑀯𑀼𑀘𑁆𑀘𑀢𑀺. 𑀏𑀯𑀫𑁂𑀯𑀁 𑀬𑀁 𑀧𑀻𑀢𑀺𑀯𑀘𑀦𑀁 𑀳𑀤𑀬𑀁 𑀕𑀳𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀅𑀥𑀺𑀓𑀁 𑀳𑀼𑀢𑁆𑀯𑀸 𑀅𑀦𑁆𑀢𑁄 𑀅𑀲𑀡𑁆𑀞𑀳𑀺𑀢𑁆𑀯𑀸 𑀩𑀳𑀺 𑀦𑀺𑀓𑁆𑀔𑀫𑀢𑀺, 𑀢𑀁 𑀉𑀤𑀸𑀦𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀏𑀯𑀭𑀽𑀧𑀁 𑀧𑀻𑀢𑀺𑀫𑀬𑀯𑀘𑀦𑀁 𑀦𑀺𑀘𑁆𑀙𑀸𑀭𑁂𑀲𑀻𑀢𑀺 𑀅𑀢𑁆𑀣𑁄.

𑁫. 𑀧𑀺𑀗𑁆𑀕𑀺𑀬𑀸𑀦𑀻𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁯𑁫. 𑀧𑀜𑁆𑀘𑀫𑁂 𑀦𑀻𑀮𑀸𑀢𑀺 𑀇𑀤𑀁 𑀲𑀩𑁆𑀩𑀲𑀗𑁆𑀕𑀸𑀳𑀺𑀓𑀁. 𑀦𑀻𑀮𑀯𑀡𑁆𑀡𑀸𑀢𑀺𑀆𑀤𑀺 𑀢𑀲𑁆𑀲𑁂𑀯 𑀯𑀺𑀪𑀸𑀕𑀤𑀲𑁆𑀲𑀦𑀁. 𑀢𑀢𑁆𑀣 𑀦 𑀢𑁂𑀲𑀁 𑀧𑀓𑀢𑀺𑀯𑀡𑁆𑀡𑁄 𑀦𑀻𑀮𑁄, 𑀦𑀻𑀮𑀯𑀺𑀮𑁂𑀧𑀦𑀯𑀺𑀮𑀺𑀢𑁆𑀢𑀢𑁆𑀢𑀸 𑀧𑀦𑁂𑀢𑀁 𑀯𑀼𑀢𑁆𑀢𑀁. 𑀦𑀻𑀮𑀯𑀢𑁆𑀣𑀸𑀢𑀺 𑀧𑀝𑀤𑀼𑀓𑀽𑀮𑀓𑁄𑀲𑁂𑀬𑁆𑀬𑀸𑀤𑀻𑀦𑀺𑀧𑀺 𑀢𑁂𑀲𑀁 𑀦𑀻𑀮𑀸𑀦𑁂𑀯 𑀳𑁄𑀦𑁆𑀢𑀺. 𑀦𑀻𑀮𑀸𑀮𑀗𑁆𑀓𑀸𑀭𑀸𑀢𑀺 𑀦𑀻𑀮𑀫𑀡𑀻𑀳𑀺 𑀦𑀻𑀮𑀧𑀼𑀧𑁆𑀨𑁂𑀳𑀺 𑀅𑀮𑀗𑁆𑀓𑀢𑀸, 𑀢𑁂𑀲𑀁 𑀳𑀢𑁆𑀣𑀸𑀮𑀗𑁆𑀓𑀸𑀭-𑀅𑀲𑁆𑀲𑀸𑀮𑀗𑁆𑀓𑀸𑀭-𑀭𑀣𑀸𑀮𑀗𑁆𑀓𑀸𑀭-𑀲𑀸𑀡𑀺𑀯𑀺𑀢𑀸𑀦𑀓𑀜𑁆𑀘𑀼𑀓𑀸𑀧𑀺 𑀲𑀩𑁆𑀩𑁂 𑀦𑀻𑀮𑀸𑀬𑁂𑀯 𑀳𑁄𑀦𑁆𑀢𑀺. 𑀇𑀫𑀺𑀦𑀸 𑀦𑀬𑁂𑀦 𑀲𑀩𑁆𑀩𑀧𑀤𑁂𑀲𑀼 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀧𑀤𑀼𑀫𑀁 𑀬𑀣𑀸𑀢𑀺 𑀬𑀣𑀸 𑀲𑀢𑀧𑀢𑁆𑀢𑀁 𑀭𑀢𑁆𑀢𑀧𑀤𑀼𑀫𑀁. 𑀓𑁄𑀓𑀦𑀤𑀦𑁆𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀧𑀸𑀢𑁄𑀢𑀺 𑀧𑀕𑁂𑀯 𑀲𑀼𑀭𑀺𑀬𑀼𑀕𑁆𑀕𑀫𑀦𑀓𑀸𑀮𑁂. 𑀲𑀺𑀬𑀸𑀢𑀺 𑀪𑀯𑁂𑀬𑁆𑀬. 𑀅𑀯𑀻𑀢𑀕𑀦𑁆𑀥𑀦𑁆𑀢𑀺 𑀅𑀯𑀺𑀕𑀢𑀕𑀦𑁆𑀥𑀁. 𑀅𑀗𑁆𑀕𑀻𑀭𑀲𑀦𑁆𑀢𑀺 𑀪𑀕𑀯𑀢𑁄 𑀅𑀗𑁆𑀕𑀫𑀗𑁆𑀕𑁂𑀳𑀺 𑀭𑀲𑁆𑀫𑀺𑀬𑁄 𑀦𑀺𑀘𑁆𑀙𑀭𑀦𑁆𑀢𑀺, 𑀢𑀲𑁆𑀫𑀸 𑀅𑀗𑁆𑀕𑀻𑀭𑀲𑁄𑀢𑀺 𑀯𑀼𑀘𑁆𑀘𑀢𑀺. 𑀢𑀧𑀦𑁆𑀢𑀫𑀸𑀤𑀺𑀘𑁆𑀘𑀫𑀺𑀯𑀦𑁆𑀢𑀮𑀺𑀓𑁆𑀔𑁂𑀢𑀺 𑀤𑁆𑀯𑀺𑀲𑀳𑀲𑁆𑀲𑀤𑀻𑀧𑀧𑀭𑀺𑀯𑀸𑀭𑁂𑀲𑀼 𑀘𑀢𑀽𑀲𑀼 𑀫𑀳𑀸𑀤𑀻𑀧𑁂𑀲𑀼 𑀆𑀮𑁄𑀓𑀓𑀭𑀡𑀯𑀲𑁂𑀦 𑀅𑀦𑁆𑀢𑀮𑀺𑀓𑁆𑀔𑁂 𑀢𑀧𑀦𑁆𑀢𑀁 𑀆𑀤𑀺𑀘𑁆𑀘𑀁 𑀯𑀺𑀬 𑀯𑀺𑀭𑁄𑀘𑀫𑀸𑀦𑀁. 𑀅𑀗𑁆𑀕𑀻𑀭𑀲𑀁 𑀧𑀲𑁆𑀲𑀸𑀢𑀺 𑀅𑀢𑁆𑀢𑀸𑀦𑀫𑁂𑀯 𑀯𑀸 𑀫𑀳𑀸𑀚𑀦𑀁 𑀯𑀸 𑀲𑀦𑁆𑀥𑀸𑀬 𑀏𑀯𑀁 𑀯𑀤𑀢𑀺.

𑁬. 𑀫𑀳𑀸𑀲𑀼𑀧𑀺𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁯𑁬. 𑀙𑀝𑁆𑀞𑁂 𑀫𑀳𑀸𑀲𑀼𑀧𑀺𑀦𑀸𑀢𑀺 𑀫𑀳𑀦𑁆𑀢𑁂𑀳𑀺 𑀧𑀼𑀭𑀺𑀲𑁂𑀳𑀺 𑀧𑀲𑁆𑀲𑀺𑀢𑀩𑁆𑀩𑀢𑁄 𑀫𑀳𑀦𑁆𑀢𑀸𑀦𑀜𑁆𑀘 𑀅𑀢𑁆𑀣𑀸𑀦𑀁 𑀦𑀺𑀫𑀺𑀢𑁆𑀢𑀪𑀸𑀯𑀢𑁄 𑀫𑀳𑀸𑀲𑀼𑀧𑀺𑀦𑀸. 𑀧𑀸𑀢𑀼𑀭𑀳𑁂𑀲𑀼𑀦𑁆𑀢𑀺 𑀧𑀸𑀓𑀝𑀸 𑀅𑀳𑁂𑀲𑀼𑀁. 𑀢𑀢𑁆𑀣 𑀲𑀼𑀧𑀺𑀦𑀁 𑀧𑀲𑁆𑀲𑀦𑁆𑀢𑁄 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺 𑀧𑀲𑁆𑀲𑀢𑀺 𑀥𑀸𑀢𑀼𑀓𑁆𑀔𑁄𑀪𑀢𑁄 𑀯𑀸 𑀅𑀦𑀼𑀪𑀽𑀢𑀧𑀼𑀩𑁆𑀩𑀢𑁄 𑀯𑀸 𑀤𑁂𑀯𑀢𑁄𑀧𑀲𑀁𑀳𑀸𑀭𑀢𑁄 𑀯𑀸 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀢𑁄 𑀯𑀸𑀢𑀺.

𑀢𑀢𑁆𑀣 𑀧𑀺𑀢𑁆𑀢𑀸𑀤𑀻𑀦𑀁 𑀔𑁄𑀪𑀓𑀭𑀡𑀧𑀘𑁆𑀘𑀬𑀧𑁆𑀧𑀬𑁄𑀕𑁂𑀦 𑀔𑀼𑀪𑀺𑀢𑀥𑀸𑀢𑀼𑀓𑁄 𑀥𑀸𑀢𑀼𑀓𑁆𑀔𑁄𑀪𑀢𑁄 𑀲𑀼𑀧𑀺𑀦𑀁 𑀧𑀲𑁆𑀲𑀢𑀺. 𑀧𑀲𑁆𑀲𑀦𑁆𑀢𑁄 𑀘 𑀦𑀸𑀦𑀸𑀯𑀺𑀥𑀁 𑀲𑀼𑀧𑀺𑀦𑀁 𑀧𑀲𑁆𑀲𑀢𑀺 𑀧𑀩𑁆𑀩𑀢𑀸 𑀧𑀢𑀦𑁆𑀢𑁄 𑀯𑀺𑀬, 𑀆𑀓𑀸𑀲𑁂𑀦 𑀕𑀘𑁆𑀙𑀦𑁆𑀢𑁄 𑀯𑀺𑀬, 𑀯𑀸𑀴𑀫𑀺𑀕𑀳𑀢𑁆𑀣𑀺𑀘𑁄𑀭𑀸𑀤𑀻𑀳𑀺 𑀅𑀦𑀼𑀩𑀤𑁆𑀥𑁄 𑀯𑀺𑀬 𑀘. 𑀅𑀦𑀼𑀪𑀽𑀢𑀧𑀼𑀩𑁆𑀩𑀢𑁄 𑀧𑀲𑁆𑀲𑀦𑁆𑀢𑁄 𑀧𑀼𑀩𑁆𑀩𑁂 𑀅𑀦𑀼𑀪𑀽𑀢𑀧𑀼𑀩𑁆𑀩𑀁 𑀆𑀭𑀫𑁆𑀫𑀡𑀁 𑀧𑀲𑁆𑀲𑀢𑀺. 𑀤𑁂𑀯𑀢𑁄𑀧𑀲𑀁𑀳𑀸𑀭𑀢𑁄 𑀧𑀲𑁆𑀲𑀦𑁆𑀢𑀲𑁆𑀲 𑀤𑁂𑀯𑀢𑀸 𑀅𑀢𑁆𑀣𑀓𑀸𑀫𑀢𑀸𑀬 𑀯𑀸 𑀅𑀦𑀢𑁆𑀣𑀓𑀸𑀫𑀢𑀸𑀬 𑀯𑀸 𑀅𑀢𑁆𑀣𑀸𑀬 𑀯𑀸 𑀅𑀦𑀢𑁆𑀣𑀸𑀬 𑀯𑀸 𑀦𑀸𑀦𑀸𑀯𑀺𑀥𑀸𑀦𑀺 𑀆𑀭𑀫𑁆𑀫𑀡𑀸𑀦𑀺 𑀉𑀧𑀲𑀁𑀳𑀭𑀦𑁆𑀢𑀺. 𑀲𑁄 𑀢𑀸𑀲𑀁 𑀤𑁂𑀯𑀢𑀸𑀦𑀁 𑀆𑀦𑀼𑀪𑀸𑀯𑁂𑀦 𑀢𑀸𑀦𑀺 𑀆𑀭𑀫𑁆𑀫𑀡𑀸𑀦𑀺 𑀧𑀲𑁆𑀲𑀢𑀺. 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀢𑁄 𑀧𑀲𑁆𑀲𑀦𑁆𑀢𑁄 𑀧𑀼𑀜𑁆𑀜𑀸𑀧𑀼𑀜𑁆𑀜𑀯𑀲𑁂𑀦 𑀉𑀧𑁆𑀧𑀚𑁆𑀚𑀺𑀢𑀼𑀓𑀸𑀫𑀲𑁆𑀲 𑀅𑀢𑁆𑀣𑀲𑁆𑀲 𑀯𑀸 𑀅𑀦𑀢𑁆𑀣𑀲𑁆𑀲 𑀯𑀸 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀪𑀽𑀢𑀁 𑀲𑀼𑀧𑀺𑀦𑀁 𑀧𑀲𑁆𑀲𑀢𑀺 𑀩𑁄𑀥𑀺𑀲𑀢𑁆𑀢𑀫𑀸𑀢𑀸 𑀯𑀺𑀬 𑀧𑀼𑀢𑁆𑀢𑀧𑀝𑀺𑀮𑀸𑀪𑀦𑀺𑀫𑀺𑀢𑁆𑀢𑀁, 𑀓𑁄𑀲𑀮𑀭𑀸𑀚𑀸 𑀯𑀺𑀬 𑀲𑁄𑀴𑀲 𑀲𑀼𑀧𑀺𑀦𑁂, 𑀅𑀬𑀫𑁂𑀯 𑀪𑀕𑀯𑀸 𑀩𑁄𑀥𑀺𑀲𑀢𑁆𑀢𑀪𑀽𑀢𑁄 𑀇𑀫𑁂 𑀧𑀜𑁆𑀘 𑀫𑀳𑀸𑀲𑀼𑀧𑀺𑀦𑁂 𑀯𑀺𑀬 𑀘𑀸𑀢𑀺.

𑀢𑀢𑁆𑀣 𑀬𑀁 𑀥𑀸𑀢𑀼𑀓𑁆𑀔𑁄𑀪𑀢𑁄 𑀅𑀦𑀼𑀪𑀽𑀢𑀧𑀼𑀩𑁆𑀩𑀢𑁄 𑀘 𑀲𑀼𑀧𑀺𑀦𑁂 𑀧𑀲𑁆𑀲𑀢𑀺, 𑀦 𑀢𑀁 𑀲𑀘𑁆𑀘𑀁 𑀳𑁄𑀢𑀺. 𑀬𑀁 𑀤𑁂𑀯𑀢𑁄𑀧𑀲𑀁𑀳𑀸𑀭𑀢𑁄 𑀧𑀲𑁆𑀲𑀢𑀺, 𑀢𑀁 𑀲𑀘𑁆𑀘𑀁 𑀯𑀸 𑀳𑁄𑀢𑀺 𑀅𑀮𑀺𑀓𑀁 𑀯𑀸. 𑀓𑀼𑀤𑁆𑀥𑀸 𑀳𑀺 𑀤𑁂𑀯𑀢𑀸 𑀉𑀧𑀸𑀬𑁂𑀦 𑀯𑀺𑀦𑀸𑀲𑁂𑀢𑀼𑀓𑀸𑀫𑀸 𑀯𑀺𑀧𑀭𑀻𑀢𑀫𑁆𑀧𑀺 𑀓𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑀺. 𑀬𑀁 𑀧𑀦 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀢𑁄 𑀧𑀲𑁆𑀲𑀢𑀺, 𑀢𑀁 𑀏𑀓𑀦𑁆𑀢𑀁 𑀲𑀘𑁆𑀘𑀫𑁂𑀯 𑀳𑁄𑀢𑀺. 𑀏𑀢𑁂𑀲𑀁 𑀘𑀢𑀼𑀦𑁆𑀦𑀁 𑀫𑀽𑀮𑀓𑀸𑀭𑀡𑀸𑀦𑀁 𑀲𑀁𑀲𑀕𑁆𑀕𑀪𑁂𑀤𑀢𑁄𑀧𑀺 𑀲𑀼𑀧𑀺𑀦𑀪𑁂𑀤𑁄 𑀳𑁄𑀢𑀺𑀬𑁂𑀯.

𑀢𑀁 𑀧𑀦𑁂𑀢𑀁 𑀘𑀢𑀼𑀩𑁆𑀩𑀺𑀥𑀫𑁆𑀧𑀺 𑀲𑀼𑀧𑀺𑀦𑀁 𑀲𑁂𑀔𑀧𑀼𑀣𑀼𑀚𑁆𑀚𑀦𑀸𑀯 𑀧𑀲𑁆𑀲𑀦𑁆𑀢𑀺 𑀅𑀧𑁆𑀧𑀳𑀻𑀦𑀯𑀺𑀧𑀮𑁆𑀮𑀸𑀲𑀢𑁆𑀢𑀸, 𑀅𑀲𑁂𑀔𑀸 𑀦 𑀧𑀲𑁆𑀲𑀦𑁆𑀢𑀺 𑀧𑀳𑀻𑀦𑀯𑀺𑀧𑀮𑁆𑀮𑀸𑀲𑀢𑁆𑀢𑀸. 𑀓𑀺𑀁 𑀧𑀦𑁂𑀢𑀁 𑀧𑀲𑁆𑀲𑀦𑁆𑀢𑁄 𑀲𑀼𑀢𑁆𑀢𑁄 𑀧𑀲𑁆𑀲𑀢𑀺 𑀧𑀝𑀺𑀩𑀼𑀤𑁆𑀥𑁄, 𑀉𑀤𑀸𑀳𑀼 𑀦𑁂𑀯 𑀲𑀼𑀢𑁆𑀢𑁄 𑀦 𑀧𑀝𑀺𑀩𑀼𑀤𑁆𑀥𑁄𑀢𑀺? 𑀓𑀺𑀜𑁆𑀘𑁂𑀢𑁆𑀣 𑀬𑀤𑀺 𑀢𑀸𑀯 𑀲𑀼𑀢𑁆𑀢𑁄 𑀧𑀲𑁆𑀲𑀢𑀺, 𑀅𑀪𑀺𑀥𑀫𑁆𑀫𑀯𑀺𑀭𑁄𑀥𑁄 𑀆𑀧𑀚𑁆𑀚𑀢𑀺. 𑀪𑀯𑀗𑁆𑀕𑀘𑀺𑀢𑁆𑀢𑁂𑀦 𑀳𑀺 𑀲𑀼𑀧𑀢𑀺, 𑀢𑀁 𑀭𑀽𑀧𑀦𑀺𑀫𑀺𑀢𑁆𑀢𑀸𑀤𑀺𑀆𑀭𑀫𑁆𑀫𑀡𑀁 𑀭𑀸𑀕𑀸𑀤𑀺𑀲𑀫𑁆𑀧𑀬𑀼𑀢𑁆𑀢𑀁 𑀯𑀸 𑀦 𑀳𑁄𑀢𑀺. 𑀲𑀼𑀧𑀺𑀦𑀁 𑀧𑀲𑁆𑀲𑀦𑁆𑀢𑀲𑁆𑀲 𑀘 𑀈𑀤𑀺𑀲𑀸𑀦𑀺 𑀘𑀺𑀢𑁆𑀢𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀅𑀣 𑀧𑀝𑀺𑀩𑀼𑀤𑁆𑀥𑁄 𑀧𑀲𑁆𑀲𑀢𑀺, 𑀯𑀺𑀦𑀬𑀯𑀺𑀭𑁄𑀥𑁄 𑀆𑀧𑀚𑁆𑀚𑀢𑀺. 𑀬𑀜𑁆𑀳𑀺 𑀧𑀝𑀺𑀩𑀼𑀤𑁆𑀥𑁄 𑀧𑀲𑁆𑀲𑀢𑀺, 𑀢𑀁 𑀲𑀩𑁆𑀩𑁄𑀳𑀸𑀭𑀺𑀓𑀘𑀺𑀢𑁆𑀢𑁂𑀦 𑀧𑀲𑁆𑀲𑀢𑀺. 𑀲𑀩𑁆𑀩𑁄𑀳𑀸𑀭𑀺𑀓𑀘𑀺𑀢𑁆𑀢𑁂𑀦 𑀘 𑀓𑀢𑁂 𑀯𑀻𑀢𑀺𑀓𑁆𑀓𑀫𑁂 𑀅𑀦𑀸𑀧𑀢𑁆𑀢𑀺 𑀦𑀸𑀫 𑀦𑀢𑁆𑀣𑀺. 𑀲𑀼𑀧𑀺𑀦𑀁 𑀧𑀲𑁆𑀲𑀦𑁆𑀢𑁂𑀦 𑀧𑀦 𑀓𑀢𑁂𑀧𑀺 𑀯𑀻𑀢𑀺𑀓𑁆𑀓𑀫𑁂 𑀏𑀓𑀦𑁆𑀢𑀁 𑀅𑀦𑀸𑀧𑀢𑁆𑀢𑀺 𑀏𑀯. 𑀅𑀣 𑀦𑁂𑀯 𑀲𑀼𑀢𑁆𑀢𑁄 𑀦 𑀧𑀝𑀺𑀩𑀼𑀤𑁆𑀥𑁄 𑀧𑀲𑁆𑀲𑀢𑀺, 𑀦 𑀦𑀸𑀫 𑀧𑀲𑁆𑀲𑀢𑀺. 𑀏𑀯𑀜𑁆𑀘 𑀲𑀢𑀺 𑀲𑀼𑀧𑀺𑀦𑀲𑁆𑀲 𑀅𑀪𑀸𑀯𑁄 𑀘 𑀆𑀧𑀚𑁆𑀚𑀢𑀺? 𑀦 𑀅𑀪𑀸𑀯𑁄. 𑀓𑀲𑁆𑀫𑀸? 𑀬𑀲𑁆𑀫𑀸 𑀓𑀧𑀺𑀫𑀺𑀤𑁆𑀥𑀧𑀭𑁂𑀢𑁄 𑀧𑀲𑁆𑀲𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋 ‘‘𑀓𑀧𑀺𑀫𑀺𑀤𑁆𑀥𑀧𑀭𑁂𑀢𑁄 𑀔𑁄, 𑀫𑀳𑀸𑀭𑀸𑀚, 𑀲𑀼𑀧𑀺𑀦𑀁 𑀧𑀲𑁆𑀲𑀢𑀻’’𑀢𑀺.

𑀓𑀧𑀺𑀫𑀺𑀤𑁆𑀥𑀧𑀭𑁂𑀢𑁄𑀢𑀺 𑀫𑀓𑁆𑀓𑀝𑀦𑀺𑀤𑁆𑀤𑀸𑀬 𑀬𑀼𑀢𑁆𑀢𑁄. 𑀬𑀣𑀸 𑀳𑀺 𑀫𑀓𑁆𑀓𑀝𑀲𑁆𑀲 𑀦𑀺𑀤𑁆𑀤𑀸 𑀮𑀳𑀼𑀧𑀭𑀺𑀯𑀢𑁆𑀢𑀸 𑀳𑁄𑀢𑀺, 𑀏𑀯𑀁 𑀬𑀸 𑀦𑀺𑀤𑁆𑀤𑀸 𑀧𑀼𑀦𑀧𑁆𑀧𑀼𑀦𑀁 𑀓𑀼𑀲𑀮𑀸𑀤𑀺𑀘𑀺𑀢𑁆𑀢𑀯𑁄𑀓𑀺𑀡𑁆𑀡𑀢𑁆𑀢𑀸 𑀮𑀳𑀼𑀧𑀭𑀺𑀯𑀢𑁆𑀢𑀸, 𑀬𑀲𑁆𑀲𑀸 𑀧𑀯𑀢𑁆𑀢𑀺𑀬𑀁 𑀧𑀼𑀦𑀧𑁆𑀧𑀼𑀦𑀁 𑀪𑀯𑀗𑁆𑀕𑀢𑁄 𑀉𑀢𑁆𑀢𑀭𑀡𑀁 𑀳𑁄𑀢𑀺, 𑀢𑀸𑀬 𑀬𑀼𑀢𑁆𑀢𑁄 𑀲𑀼𑀧𑀺𑀦𑀁 𑀧𑀲𑁆𑀲𑀢𑀺. 𑀢𑁂𑀦𑀸𑀬𑀁 𑀲𑀼𑀧𑀺𑀦𑁄 𑀓𑀼𑀲𑀮𑁄𑀧𑀺 𑀳𑁄𑀢𑀺 𑀅𑀓𑀼𑀲𑀮𑁄𑀧𑀺 𑀅𑀩𑁆𑀬𑀸𑀓𑀢𑁄𑀧𑀺. 𑀢𑀢𑁆𑀣 𑀲𑀼𑀧𑀺𑀦𑀦𑁆𑀢𑁂 𑀘𑁂𑀢𑀺𑀬𑀯𑀦𑁆𑀤𑀦𑀥𑀫𑁆𑀫𑀲𑁆𑀲𑀯𑀦𑀥𑀫𑁆𑀫𑀤𑁂𑀲𑀦𑀸𑀤𑀻𑀦𑀺 𑀓𑀭𑁄𑀦𑁆𑀢𑀲𑁆𑀲 𑀓𑀼𑀲𑀮𑁄, 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀦𑀺 𑀓𑀭𑁄𑀦𑁆𑀢𑀲𑁆𑀲 𑀅𑀓𑀼𑀲𑀮𑁄, 𑀤𑁆𑀯𑀻𑀳𑀺 𑀅𑀦𑁆𑀢𑁂𑀳𑀺 𑀫𑀼𑀢𑁆𑀢𑁄 𑀆𑀯𑀚𑁆𑀚𑀦𑀢𑀤𑀸𑀭𑀫𑁆𑀫𑀡𑀓𑁆𑀔𑀡𑁂 𑀅𑀩𑁆𑀬𑀸𑀓𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀲𑁆𑀯𑀸𑀬𑀁 𑀤𑀼𑀩𑁆𑀩𑀮𑀯𑀢𑁆𑀣𑀼𑀓𑀢𑁆𑀢𑀸 𑀘𑁂𑀢𑀦𑀸𑀬 𑀧𑀝𑀺𑀲𑀦𑁆𑀥𑀺𑀁 𑀆𑀓𑀟𑁆𑀠𑀺𑀢𑀼𑀁 𑀅𑀲𑀫𑀢𑁆𑀣𑁄. 𑀧𑀯𑀢𑁆𑀢𑁂 𑀧𑀦 𑀅𑀜𑁆𑀜𑁂𑀳𑀺 𑀓𑀼𑀲𑀮𑀸𑀓𑀼𑀲𑀮𑁂𑀳𑀺 𑀉𑀧𑀢𑁆𑀣𑀫𑁆𑀪𑀺𑀢𑁄 𑀯𑀺𑀧𑀸𑀓𑀁 𑀤𑁂𑀢𑀺. 𑀓𑀺𑀜𑁆𑀘𑀸𑀧𑀺 𑀯𑀺𑀧𑀸𑀓𑀁 𑀤𑁂𑀢𑀺, 𑀅𑀣 𑀔𑁄 𑀅𑀯𑀺𑀲𑀬𑁂 𑀉𑀧𑁆𑀧𑀦𑁆𑀦𑀢𑁆𑀢𑀸 𑀅𑀩𑁆𑀩𑁄𑀳𑀸𑀭𑀺𑀓𑀸𑀯 𑀲𑀼𑀧𑀺𑀦𑀦𑁆𑀢𑀘𑁂𑀢𑀦𑀸. 𑀲𑁄 𑀧𑀦𑁂𑀲 𑀲𑀼𑀧𑀺𑀦𑁄 𑀓𑀸𑀮𑀯𑀲𑁂𑀦𑀧𑀺 𑀤𑀺𑀯𑀸 𑀢𑀸𑀯 𑀤𑀺𑀝𑁆𑀞𑁄 𑀦 𑀲𑀫𑁂𑀢𑀺, 𑀢𑀣𑀸 𑀧𑀞𑀫𑀬𑀸𑀫𑁂 𑀫𑀚𑁆𑀛𑀺𑀫𑀬𑀸𑀫𑁂 𑀧𑀘𑁆𑀙𑀺𑀫𑀬𑀸𑀫𑁂 𑀘. 𑀩𑀮𑀯𑀧𑀘𑁆𑀘𑀽𑀲𑁂 𑀧𑀦 𑀅𑀲𑀺𑀢𑀧𑀻𑀢𑀔𑀸𑀬𑀺𑀢𑁂 𑀲𑀫𑁆𑀫𑀸 𑀧𑀭𑀺𑀡𑀸𑀫𑀁 𑀕𑀢𑁂 𑀓𑀸𑀬𑀲𑁆𑀫𑀺𑀁 𑀑𑀚𑀸𑀬 𑀧𑀢𑀺𑀝𑁆𑀞𑀺𑀢𑀸𑀬 𑀅𑀭𑀼𑀡𑁂 𑀉𑀕𑁆𑀕𑀘𑁆𑀙𑀫𑀸𑀦𑁂𑀯 𑀤𑀺𑀝𑁆𑀞𑁄 𑀲𑀼𑀧𑀺𑀦𑁄 𑀲𑀫𑁂𑀢𑀺. 𑀇𑀝𑁆𑀞𑀦𑀺𑀫𑀺𑀢𑁆𑀢𑀁 𑀲𑀼𑀧𑀺𑀦𑀁 𑀧𑀲𑁆𑀲𑀦𑁆𑀢𑁄 𑀇𑀝𑁆𑀞𑀁 𑀧𑀝𑀺𑀮𑀪𑀢𑀺, 𑀅𑀦𑀺𑀝𑁆𑀞𑀦𑀺𑀫𑀺𑀢𑁆𑀢𑀁 𑀧𑀲𑁆𑀲𑀦𑁆𑀢𑁄 𑀅𑀦𑀺𑀝𑁆𑀞𑀁.

𑀇𑀫𑁂 𑀧𑀦 𑀧𑀜𑁆𑀘 𑀫𑀳𑀸𑀲𑀼𑀧𑀺𑀦𑁂 𑀦𑁂𑀯 𑀮𑁄𑀓𑀺𑀬𑀫𑀳𑀸𑀚𑀦𑁄 𑀧𑀲𑁆𑀲𑀢𑀺, 𑀦 𑀫𑀳𑀸𑀭𑀸𑀚𑀸𑀦𑁄, 𑀦 𑀘𑀓𑁆𑀓𑀯𑀢𑁆𑀢𑀺𑀭𑀸𑀚𑀸𑀦𑁄, 𑀦 𑀅𑀕𑁆𑀕𑀲𑀸𑀯𑀓𑀸, 𑀦 𑀧𑀘𑁆𑀘𑁂𑀓𑀩𑀼𑀤𑁆𑀥𑀸, 𑀦 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸, 𑀏𑀓𑁄 𑀲𑀩𑁆𑀩𑀜𑁆𑀜𑀼𑀩𑁄𑀥𑀺𑀲𑀢𑁆𑀢𑁄𑀬𑁂𑀯 𑀧𑀲𑁆𑀲𑀢𑀺. 𑀅𑀫𑁆𑀳𑀸𑀓𑀁 𑀧𑀦 𑀩𑁄𑀥𑀺𑀲𑀢𑁆𑀢𑁄 𑀓𑀤𑀸 𑀇𑀫𑁂 𑀲𑀼𑀧𑀺𑀦𑁂 𑀧𑀲𑁆𑀲𑀻𑀢𑀺? ‘‘𑀲𑁆𑀯𑁂 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀸𑀫𑀻’’𑀢𑀺 𑀘𑀸𑀢𑀼𑀤𑁆𑀤𑀲𑀺𑀬𑀁 𑀧𑀓𑁆𑀔𑀲𑁆𑀲 𑀭𑀢𑁆𑀢𑀺𑀯𑀺𑀪𑀸𑀬𑀦𑀓𑀸𑀮𑁂 𑀧𑀲𑁆𑀲𑀺. 𑀢𑁂𑀭𑀲𑀺𑀬𑀦𑁆𑀢𑀺𑀧𑀺 𑀯𑀤𑀦𑁆𑀢𑀺𑀬𑁂𑀯. 𑀲𑁄 𑀇𑀫𑁂 𑀲𑀼𑀧𑀺𑀦𑁂 𑀤𑀺𑀲𑁆𑀯𑀸 𑀉𑀝𑁆𑀞𑀸𑀬 𑀧𑀮𑁆𑀮𑀗𑁆𑀓𑀁 𑀆𑀪𑀼𑀜𑁆𑀚𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀲𑀘𑁂 𑀫𑀬𑀸 𑀓𑀧𑀺𑀮𑀯𑀢𑁆𑀣𑀼𑀦𑀕𑀭𑁂 𑀇𑀫𑁂 𑀲𑀼𑀧𑀺𑀦𑀸 𑀤𑀺𑀝𑁆𑀞𑀸 𑀅𑀲𑁆𑀲𑀼, 𑀧𑀺𑀢𑀼 𑀫𑀳𑀸𑀭𑀸𑀚𑀲𑁆𑀲 𑀓𑀣𑁂𑀬𑁆𑀬𑀁. 𑀲𑀘𑁂 𑀧𑀦 𑀫𑁂 𑀫𑀸𑀢𑀸 𑀚𑀻𑀯𑁂𑀬𑁆𑀬, 𑀢𑀲𑁆𑀲𑀸 𑀓𑀣𑁂𑀬𑁆𑀬𑀁. 𑀇𑀫𑀲𑁆𑀫𑀺𑀁 𑀔𑁄 𑀧𑀦 𑀞𑀸𑀦𑁂 𑀇𑀫𑁂𑀲𑀁 𑀧𑀝𑀺𑀕𑁆𑀕𑀸𑀳𑀓𑁄 𑀦𑀸𑀫 𑀦𑀢𑁆𑀣𑀺, 𑀅𑀳𑀫𑁂𑀯 𑀧𑀝𑀺𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺. 𑀢𑀢𑁄 ‘‘𑀇𑀤𑀁 𑀇𑀫𑀲𑁆𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁 𑀇𑀤𑀁 𑀇𑀫𑀲𑁆𑀲𑀸’’𑀢𑀺 𑀲𑀬𑀫𑁂𑀯 𑀲𑀼𑀧𑀺𑀦𑁂 𑀧𑀝𑀺𑀕𑁆𑀕𑀡𑁆𑀳𑀺𑀢𑁆𑀯𑀸 𑀉𑀭𑀼𑀯𑁂𑀮𑀕𑀸𑀫𑁂 𑀲𑀼𑀚𑀸𑀢𑀸𑀬 𑀤𑀺𑀦𑁆𑀦𑀁 𑀧𑀸𑀬𑀸𑀲𑀁 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀩𑁄𑀥𑀺𑀫𑀡𑁆𑀟𑀁 𑀆𑀭𑀼𑀬𑁆𑀳 𑀩𑁄𑀥𑀺𑀁 𑀧𑀢𑁆𑀯𑀸 𑀅𑀦𑀼𑀓𑁆𑀓𑀫𑁂𑀦 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀅𑀢𑁆𑀢𑀦𑁄 𑀫𑀓𑀼𑀮𑀩𑀼𑀤𑁆𑀥𑀓𑀸𑀮𑁂 𑀤𑀺𑀝𑁆𑀞𑁂 𑀧𑀜𑁆𑀘 𑀫𑀳𑀸𑀲𑀼𑀧𑀺𑀦𑁂 𑀯𑀺𑀢𑁆𑀣𑀸𑀭𑁂𑀢𑀼𑀁 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀢𑁆𑀯𑀸 𑀇𑀫𑀁 𑀤𑁂𑀲𑀦𑀁 𑀆𑀭𑀪𑀺.

𑀢𑀢𑁆𑀣 𑀫𑀳𑀸𑀧𑀣𑀯𑀻𑀢𑀺 𑀘𑀓𑁆𑀓𑀯𑀸𑀴𑀕𑀩𑁆𑀪𑀁 𑀧𑀽𑀭𑁂𑀢𑁆𑀯𑀸 𑀞𑀺𑀢𑀸 𑀫𑀳𑀸𑀧𑀣𑀯𑀻. 𑀫𑀳𑀸𑀲𑀬𑀦𑀁 𑀅𑀳𑁄𑀲𑀻𑀢𑀺 𑀲𑀺𑀭𑀺𑀲𑀬𑀦𑀁 𑀅𑀳𑁄𑀲𑀺. 𑀑𑀳𑀺𑀢𑁄𑀢𑀺 𑀞𑀧𑀺𑀢𑁄. 𑀲𑁄 𑀧𑀦 𑀦 𑀉𑀤𑀓𑀲𑁆𑀫𑀺𑀁𑀬𑁂𑀯 𑀞𑀧𑀺𑀢𑁄 𑀅𑀳𑁄𑀲𑀺, 𑀅𑀣 𑀔𑁄 𑀧𑀸𑀘𑀻𑀦𑀲𑀫𑀼𑀤𑁆𑀤𑀲𑁆𑀲 𑀉𑀧𑀭𑀽𑀧𑀭𑀺𑀪𑀸𑀕𑁂𑀦 𑀕𑀦𑁆𑀢𑁆𑀯𑀸 𑀧𑀸𑀘𑀻𑀦𑀘𑀓𑁆𑀓𑀯𑀸𑀴𑀫𑀢𑁆𑀣𑀓𑁂 𑀞𑀧𑀺𑀢𑁄 𑀅𑀳𑁄𑀲𑀻𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀧𑀘𑁆𑀙𑀺𑀫𑁂 𑀲𑀫𑀼𑀤𑁆𑀤𑁂 𑀤𑀓𑁆𑀔𑀺𑀡𑁂 𑀲𑀫𑀼𑀤𑁆𑀤𑁂𑀢𑀺 𑀏𑀢𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀢𑀺𑀭𑀺𑀬𑀸 𑀦𑀸𑀫 𑀢𑀺𑀡𑀚𑀸𑀢𑀻𑀢𑀺 𑀤𑀩𑁆𑀩𑀢𑀺𑀡𑀁 𑀯𑀼𑀘𑁆𑀘𑀢𑀺. 𑀦𑀸𑀪𑀺𑀬𑀸 𑀉𑀕𑁆𑀕𑀦𑁆𑀢𑁆𑀯𑀸 𑀦𑀪𑀁 𑀆𑀳𑀘𑁆𑀘 𑀞𑀺𑀢𑀸 𑀅𑀳𑁄𑀲𑀻𑀢𑀺 𑀦𑀗𑁆𑀕𑀮𑀫𑀢𑁆𑀢𑁂𑀦 𑀭𑀢𑁆𑀢𑀤𑀡𑁆𑀟𑁂𑀦 𑀦𑀸𑀪𑀺𑀢𑁄 𑀉𑀕𑁆𑀕𑀦𑁆𑀢𑁆𑀯𑀸 𑀧𑀲𑁆𑀲𑀦𑁆𑀢𑀲𑁆𑀲 𑀧𑀲𑁆𑀲𑀦𑁆𑀢𑀲𑁆𑀲𑁂𑀯 𑀯𑀺𑀤𑀢𑁆𑀣𑀺𑀫𑀢𑁆𑀢𑀁 𑀭𑀢𑀦𑀫𑀢𑁆𑀢𑀁 𑀩𑁆𑀬𑀸𑀫𑀫𑀢𑁆𑀢𑀁 𑀬𑀝𑁆𑀞𑀺𑀫𑀢𑁆𑀢𑀁 𑀕𑀸𑀯𑀼𑀢𑀫𑀢𑁆𑀢𑀁 𑀅𑀟𑁆𑀠𑀬𑁄𑀚𑀦𑀫𑀢𑁆𑀢𑀁 𑀬𑁄𑀚𑀦𑀫𑀢𑁆𑀢𑀦𑁆𑀢𑀺 𑀏𑀯𑀁 𑀉𑀕𑁆𑀕𑀦𑁆𑀢𑁆𑀯𑀸 𑀉𑀕𑁆𑀕𑀦𑁆𑀢𑁆𑀯𑀸 𑀅𑀦𑁂𑀓𑀬𑁄𑀚𑀦𑀲𑀳𑀲𑁆𑀲𑀁 𑀦𑀪𑀁 𑀆𑀳𑀘𑁆𑀘 𑀞𑀺𑀢𑀸 𑀅𑀳𑁄𑀲𑀺. 𑀧𑀸𑀤𑁂𑀳𑀺 𑀉𑀲𑁆𑀲𑀓𑁆𑀓𑀺𑀢𑁆𑀯𑀸𑀢𑀺 𑀅𑀕𑁆𑀕𑀦𑀔𑀢𑁄 𑀧𑀝𑁆𑀞𑀸𑀬 𑀧𑀸𑀤𑁂𑀳𑀺 𑀅𑀪𑀺𑀭𑀼𑀳𑀺𑀢𑁆𑀯𑀸. 𑀦𑀸𑀦𑀸𑀯𑀡𑁆𑀡𑀸𑀢𑀺 𑀏𑀓𑁄 𑀦𑀻𑀮𑀯𑀡𑁆𑀡𑁄, 𑀏𑀓𑁄 𑀧𑀻𑀢𑀯𑀡𑁆𑀡𑁄, 𑀏𑀓𑁄 𑀮𑁄𑀳𑀺𑀢𑀯𑀡𑁆𑀡𑁄, 𑀏𑀓𑁄 𑀧𑀡𑁆𑀟𑀼𑀧𑀮𑀸𑀲𑀯𑀡𑁆𑀡𑁄𑀢𑀺 𑀏𑀯𑀁 𑀦𑀸𑀦𑀸𑀯𑀡𑁆𑀡𑀸. 𑀲𑁂𑀢𑀸𑀢𑀺 𑀧𑀡𑁆𑀟𑀭𑀸 𑀧𑀭𑀺𑀲𑀼𑀤𑁆𑀥𑀸. 𑀫𑀳𑀢𑁄 𑀫𑀻𑀴𑁆𑀳𑀧𑀩𑁆𑀩𑀢𑀲𑁆𑀲𑀸𑀢𑀺 𑀢𑀺𑀬𑁄𑀚𑀦𑀼𑀩𑁆𑀩𑁂𑀥𑀲𑁆𑀲 𑀕𑀽𑀣𑀧𑀩𑁆𑀩𑀢𑀲𑁆𑀲. 𑀉𑀧𑀭𑀽𑀧𑀭𑀺 𑀘𑀗𑁆𑀓𑀫𑀢𑀻𑀢𑀺 𑀫𑀢𑁆𑀣𑀓𑀫𑀢𑁆𑀣𑀓𑁂 𑀘𑀗𑁆𑀓𑀫𑀢𑀺. 𑀤𑀻𑀖𑀸𑀬𑀼𑀓𑀩𑀼𑀤𑁆𑀥𑀸 𑀧𑀦 𑀢𑀺𑀬𑁄𑀚𑀦𑀺𑀓𑁂 𑀫𑀻𑀴𑁆𑀳𑀧𑀩𑁆𑀩𑀢𑁂 𑀅𑀦𑀼𑀧𑀯𑀺𑀲𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑀸 𑀯𑀺𑀬 𑀳𑁄𑀦𑁆𑀢𑀺.

𑀏𑀯𑀁 𑀏𑀢𑁆𑀢𑀓𑁂𑀦 𑀞𑀸𑀦𑁂𑀦 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀸𑀦𑀺 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀲𑀳 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑁂𑀳𑀺 𑀧𑀝𑀺𑀮𑀸𑀪𑀁 𑀤𑀲𑁆𑀲𑁂𑀢𑀼𑀁 𑀬𑀫𑁆𑀧𑀺, 𑀪𑀺𑀓𑁆𑀔𑀯𑁂𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀩𑁆𑀩𑀕𑀼𑀡𑀤𑀸𑀬𑀓𑀢𑁆𑀢𑀸 𑀩𑀼𑀤𑁆𑀥𑀸𑀦𑀁 𑀅𑀭𑀳𑀢𑁆𑀢𑀫𑀕𑁆𑀕𑁄 𑀅𑀦𑀼𑀢𑁆𑀢𑀭𑀸 𑀲𑀫𑁆𑀫𑀸𑀲𑀫𑁆𑀩𑁄𑀥𑀺 𑀦𑀸𑀫. 𑀢𑀲𑁆𑀫𑀸 𑀬𑀁 𑀲𑁄 𑀘𑀓𑁆𑀓𑀯𑀸𑀴𑀫𑀳𑀸𑀧𑀣𑀯𑀺𑀁 𑀲𑀺𑀭𑀺𑀲𑀬𑀦𑀪𑀽𑀢𑀁 𑀅𑀤𑁆𑀤𑀲, 𑀢𑀁 𑀩𑀼𑀤𑁆𑀥𑀪𑀸𑀯𑀲𑁆𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁. 𑀬𑀁 𑀳𑀺𑀫𑀯𑀦𑁆𑀢𑀧𑀩𑁆𑀩𑀢𑀭𑀸𑀚𑀸𑀦𑀁 𑀩𑀺𑀫𑁆𑀩𑁄𑀳𑀦𑀁 𑀅𑀤𑁆𑀤𑀲, 𑀢𑀁 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀩𑀺𑀫𑁆𑀩𑁄𑀳𑀦𑀲𑁆𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁. 𑀬𑀁 𑀘𑀢𑁆𑀢𑀸𑀭𑁄 𑀳𑀢𑁆𑀣𑀧𑀸𑀤𑁂 𑀘𑀓𑁆𑀓𑀯𑀸𑀴𑀫𑀢𑁆𑀣𑀓𑁂 𑀞𑀺𑀢𑁂 𑀅𑀤𑁆𑀤𑀲, 𑀢𑀁 𑀥𑀫𑁆𑀫𑀘𑀓𑁆𑀓𑀲𑁆𑀲 𑀅𑀧𑁆𑀧𑀝𑀺𑀯𑀢𑁆𑀢𑀺𑀬𑀪𑀸𑀯𑁂 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁. 𑀬𑀁 𑀅𑀢𑁆𑀢𑀸𑀦𑀁 𑀉𑀢𑁆𑀢𑀸𑀦𑀓𑀁 𑀦𑀺𑀧𑀦𑁆𑀦𑀁 𑀅𑀤𑁆𑀤𑀲, 𑀢𑀁 𑀢𑀻𑀲𑀼 𑀪𑀯𑁂𑀲𑀼 𑀅𑀯𑀓𑀼𑀚𑁆𑀚𑀸𑀦𑀁 𑀲𑀢𑁆𑀢𑀸𑀦𑀁 𑀉𑀢𑁆𑀢𑀸𑀦𑀫𑀼𑀔𑀪𑀸𑀯𑀲𑁆𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁. 𑀬𑀁 𑀅𑀓𑁆𑀔𑀻𑀦𑀺 𑀉𑀫𑁆𑀫𑀻𑀮𑁂𑀢𑁆𑀯𑀸 𑀧𑀲𑁆𑀲𑀦𑁆𑀢𑁄 𑀯𑀺𑀬 𑀅𑀳𑁄𑀲𑀺, 𑀢𑀁 𑀤𑀺𑀩𑁆𑀩𑀘𑀓𑁆𑀔𑀼𑀧𑀝𑀺𑀮𑀸𑀪𑀲𑁆𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁. 𑀬𑀁 𑀬𑀸𑀯 𑀪𑀯𑀕𑁆𑀕𑀸 𑀏𑀓𑀸𑀮𑁄𑀓𑀁 𑀅𑀳𑁄𑀲𑀺, 𑀢𑀁 𑀅𑀦𑀸𑀯𑀭𑀡𑀜𑀸𑀡𑀲𑁆𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁. 𑀲𑁂𑀲𑀁 𑀧𑀸𑀴𑀺𑀯𑀲𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀦𑁆𑀢𑀺.

𑁭. 𑀯𑀲𑁆𑀲𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁯𑁭. 𑀲𑀢𑁆𑀢𑀫𑁂 𑀦𑁂𑀫𑀺𑀢𑁆𑀢𑀸𑀢𑀺 𑀦𑀺𑀫𑀺𑀢𑁆𑀢𑀧𑀸𑀞𑀓𑀸. 𑀢𑁂𑀚𑁄𑀥𑀸𑀢𑀼 𑀧𑀓𑀼𑀧𑁆𑀧𑀢𑀻𑀢𑀺 𑀫𑀳𑀸𑀅𑀕𑁆𑀕𑀺𑀓𑁆𑀔𑀦𑁆𑀥𑁄 𑀉𑀧𑁆𑀧𑀚𑁆𑀚𑀢𑀺. 𑀧𑀸𑀡𑀺𑀦𑀸 𑀉𑀤𑀓𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸𑀢𑀺 𑀉𑀧𑁆𑀧𑀦𑁆𑀦𑀁 𑀉𑀢𑀼𑀲𑀫𑀼𑀝𑁆𑀞𑀸𑀦𑀁 𑀉𑀤𑀓𑀁 𑀢𑀺𑀬𑁄𑀚𑀦𑀲𑀢𑁂𑀦 𑀳𑀢𑁆𑀣𑁂𑀦 𑀧𑀝𑀺𑀕𑁆𑀕𑀳𑁂𑀢𑁆𑀯𑀸. 𑀧𑀫𑀢𑁆𑀢𑀸 𑀳𑁄𑀦𑁆𑀢𑀻𑀢𑀺 𑀅𑀢𑁆𑀢𑀦𑁄 𑀓𑀻𑀴𑀸𑀬 𑀧𑀫𑀢𑁆𑀢𑀸 𑀳𑁄𑀦𑁆𑀢𑀺 𑀯𑀺𑀧𑁆𑀧𑀯𑀼𑀝𑁆𑀞𑀲𑀢𑀺𑀦𑁄. 𑀢𑁂𑀲𑀜𑁆𑀳𑀺 𑀲𑀓𑀸𑀬 𑀭𑀢𑀺𑀬𑀸 ‘‘𑀭𑀫𑀸𑀫𑀸’’𑀢𑀺 𑀘𑀺𑀢𑁆𑀢𑁂 𑀉𑀧𑁆𑀧𑀦𑁆𑀦𑁂 𑀅𑀓𑀸𑀮𑁂𑀧𑀺 𑀤𑁂𑀯𑁄 𑀯𑀲𑁆𑀲𑀢𑀺, 𑀢𑀤𑀪𑀸𑀯𑁂 𑀦 𑀯𑀲𑁆𑀲𑀢𑀺. 𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁 𑁋 ‘‘𑀦 𑀓𑀸𑀮𑀯𑀲𑁆𑀲’’𑀦𑁆𑀢𑀺. 𑀅𑀝𑁆𑀞𑀫𑀦𑀯𑀫𑀸𑀦𑀺 𑀉𑀢𑁆𑀢𑀸𑀦𑀢𑁆𑀣𑀸𑀦𑁂𑀯.

𑁧𑁦. 𑀦𑀺𑀲𑁆𑀲𑀸𑀭𑀡𑀻𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁦𑁦. 𑀤𑀲𑀫𑁂 𑀦𑀺𑀲𑁆𑀲𑀸𑀭𑀡𑀻𑀬𑀸𑀢𑀺 𑀦𑀺𑀲𑁆𑀲𑀝𑀸 𑀯𑀺𑀲𑀜𑁆𑀜𑀼𑀢𑁆𑀢𑀸. 𑀥𑀸𑀢𑀼𑀬𑁄𑀢𑀺 𑀅𑀢𑁆𑀢𑀲𑀼𑀜𑁆𑀜𑀲𑀪𑀸𑀯𑀸. 𑀓𑀸𑀫𑀁 𑀫𑀦𑀲𑀺𑀓𑀭𑁄𑀢𑁄𑀢𑀺 𑀓𑀸𑀫𑀁 𑀫𑀦𑀲𑀺𑀓𑀭𑁄𑀦𑁆𑀢𑀲𑁆𑀲, 𑀅𑀲𑀼𑀪𑀚𑁆𑀛𑀸𑀦𑀢𑁄 𑀯𑀼𑀝𑁆𑀞𑀸𑀬 𑀅𑀕𑀤𑀁 𑀕𑀳𑁂𑀢𑁆𑀯𑀸 𑀯𑀺𑀲𑀁 𑀯𑀻𑀫𑀁𑀲𑀦𑁆𑀢𑁄 𑀯𑀺𑀬 𑀯𑀻𑀫𑀁𑀲𑀦𑀢𑁆𑀣𑀁 𑀓𑀸𑀫𑀸𑀪𑀺𑀫𑀼𑀔𑀁 𑀘𑀺𑀢𑁆𑀢𑀁 𑀧𑁂𑀲𑁂𑀦𑁆𑀢𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀦 𑀧𑀓𑁆𑀔𑀦𑁆𑀤𑀢𑀻𑀢𑀺 𑀦𑀧𑁆𑀧𑀯𑀺𑀲𑀢𑀺. 𑀦𑀧𑁆𑀧𑀲𑀻𑀤𑀢𑀻𑀢𑀺 𑀧𑀲𑀸𑀤𑀁 𑀦𑀸𑀧𑀚𑁆𑀚𑀢𑀺. 𑀦 𑀲𑀦𑁆𑀢𑀺𑀝𑁆𑀞𑀢𑀻𑀢𑀺 𑀦𑀧𑁆𑀧𑀢𑀺𑀝𑁆𑀞𑀳𑀢𑀺. 𑀦 𑀯𑀺𑀫𑀼𑀘𑁆𑀘𑀢𑀻𑀢𑀺 𑀦 𑀅𑀥𑀺𑀫𑀼𑀘𑁆𑀘𑀢𑀺. 𑀬𑀣𑀸 𑀧𑀦 𑀓𑀼𑀓𑁆𑀓𑀼𑀝𑀧𑀢𑁆𑀢𑀁 𑀯𑀸 𑀦𑁆𑀳𑀸𑀭𑀼𑀤𑀤𑁆𑀤𑀼𑀮𑀁 𑀯𑀸 𑀅𑀕𑁆𑀕𑀺𑀫𑁆𑀳𑀺 𑀧𑀓𑁆𑀔𑀺𑀢𑁆𑀢𑀁 𑀧𑀝𑀺𑀮𑀻𑀬𑀢𑀺 𑀧𑀢𑀺𑀓𑀼𑀝𑀢𑀺 𑀧𑀢𑀺𑀯𑀝𑁆𑀝𑀢𑀺 𑀦 𑀲𑀁𑀧𑀲𑀸𑀭𑀻𑀬𑀢𑀺, 𑀏𑀯𑀁 𑀧𑀝𑀺𑀮𑀻𑀬𑀢𑀺 𑀦 𑀲𑀁𑀧𑀲𑀸𑀭𑀻𑀬𑀢𑀺. 𑀦𑁂𑀓𑁆𑀔𑀫𑁆𑀫𑀁 𑀔𑁄 𑀧𑀦𑀸𑀢𑀺 𑀇𑀥 𑀦𑁂𑀓𑁆𑀔𑀫𑁆𑀫𑀁 𑀦𑀸𑀫 𑀅𑀲𑀼𑀪𑁂𑀲𑀼 𑀧𑀞𑀫𑀚𑁆𑀛𑀸𑀦𑀁, 𑀢𑀤𑀲𑁆𑀲 𑀫𑀦𑀲𑀺𑀓𑀭𑁄𑀢𑁄 𑀘𑀺𑀢𑁆𑀢𑀁 𑀧𑀓𑁆𑀔𑀦𑁆𑀤𑀢𑀺. 𑀢𑀲𑁆𑀲 𑀢𑀁 𑀘𑀺𑀢𑁆𑀢𑀦𑁆𑀢𑀺 𑀢𑀲𑁆𑀲 𑀢𑀁 𑀅𑀲𑀼𑀪𑀚𑁆𑀛𑀸𑀦𑀘𑀺𑀢𑁆𑀢𑀁. 𑀲𑀼𑀕𑀢𑀦𑁆𑀢𑀺 𑀕𑁄𑀘𑀭𑁂 𑀕𑀢𑀢𑁆𑀢𑀸 𑀲𑀼𑀝𑁆𑀞𑀼 𑀕𑀢𑀁. 𑀲𑀼𑀪𑀸𑀯𑀺𑀢𑀦𑁆𑀢𑀺 𑀅𑀳𑀸𑀦𑀪𑀸𑀕𑀺𑀬𑀢𑁆𑀢𑀸 𑀲𑀼𑀝𑁆𑀞𑀼 𑀪𑀸𑀯𑀺𑀢𑀁. 𑀲𑀼𑀯𑀼𑀝𑁆𑀞𑀺𑀢𑀦𑁆𑀢𑀺 𑀓𑀸𑀫𑀢𑁄 𑀯𑀼𑀝𑁆𑀞𑀺𑀢𑀁. 𑀲𑀼𑀯𑀺𑀫𑀼𑀢𑁆𑀢𑀦𑁆𑀢𑀺 𑀓𑀸𑀫𑁂𑀳𑀺 𑀲𑀼𑀝𑁆𑀞𑀼 𑀯𑀺𑀫𑀼𑀢𑁆𑀢𑀁. 𑀓𑀸𑀫𑀧𑀘𑁆𑀘𑀬𑀸 𑀆𑀲𑀯𑀸 𑀦𑀸𑀫 𑀓𑀸𑀫𑀳𑁂𑀢𑀼𑀓𑀸 𑀘𑀢𑁆𑀢𑀸𑀭𑁄 𑀆𑀲𑀯𑀸. 𑀯𑀺𑀖𑀸𑀢𑀸𑀢𑀺 𑀤𑀼𑀓𑁆𑀔𑀸. 𑀧𑀭𑀺𑀴𑀸𑀳𑀸𑀢𑀺 𑀓𑀸𑀫𑀭𑀸𑀕𑀧𑀭𑀺𑀴𑀸𑀳𑀸. 𑀦 𑀲𑁄 𑀢𑀁 𑀯𑁂𑀤𑀦𑀁 𑀯𑁂𑀤𑀺𑀬𑀢𑀻𑀢𑀺 𑀲𑁄 𑀢𑀁 𑀓𑀸𑀫𑀯𑁂𑀤𑀦𑀁 𑀯𑀺𑀖𑀸𑀢𑀧𑀭𑀺𑀴𑀸𑀳𑀯𑁂𑀤𑀦𑀜𑁆𑀘 𑀦 𑀯𑁂𑀤𑀺𑀬𑀢𑀺. 𑀇𑀤𑀫𑀓𑁆𑀔𑀸𑀢𑀁 𑀓𑀸𑀫𑀸𑀦𑀁 𑀦𑀺𑀲𑁆𑀲𑀭𑀡𑀦𑁆𑀢𑀺 𑀇𑀤𑀁 𑀅𑀲𑀼𑀪𑀚𑁆𑀛𑀸𑀦𑀁 𑀓𑀸𑀫𑁂𑀳𑀺 𑀦𑀺𑀲𑁆𑀲𑀝𑀢𑁆𑀢𑀸 𑀓𑀸𑀫𑀸𑀦𑀁 𑀦𑀺𑀲𑁆𑀲𑀭𑀡𑀦𑁆𑀢𑀺 𑀅𑀓𑁆𑀔𑀸𑀢𑀁. 𑀬𑁄 𑀧𑀦 𑀢𑀁 𑀛𑀸𑀦𑀁 𑀧𑀸𑀤𑀓𑀁 𑀓𑀢𑁆𑀯𑀸 𑀲𑀗𑁆𑀔𑀸𑀭𑁂 𑀲𑀫𑁆𑀫𑀲𑀦𑁆𑀢𑁄 𑀢𑀢𑀺𑀬𑀫𑀕𑁆𑀕𑀁 𑀧𑀢𑁆𑀯𑀸 𑀅𑀦𑀸𑀕𑀸𑀫𑀺𑀨𑀮𑁂𑀦 𑀦𑀺𑀩𑁆𑀩𑀸𑀦𑀁 𑀤𑀺𑀲𑁆𑀯𑀸 ‘‘𑀧𑀼𑀦 𑀓𑀸𑀫𑀸 𑀦𑀸𑀫 𑀦𑀢𑁆𑀣𑀻’’𑀢𑀺 𑀚𑀸𑀦𑀸𑀢𑀺. 𑀢𑀲𑁆𑀲 𑀘𑀺𑀢𑁆𑀢𑀁 𑀅𑀘𑁆𑀘𑀦𑁆𑀢𑀦𑀺𑀲𑁆𑀲𑀭𑀡𑀫𑁂𑀯. 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀅𑀬𑀁 𑀧𑀦 𑀯𑀺𑀲𑁂𑀲𑁄 𑁋 𑀤𑀼𑀢𑀺𑀬𑀯𑀸𑀭𑁂 𑀫𑁂𑀢𑁆𑀢𑀸𑀛𑀸𑀦𑀸𑀦𑀺 𑀩𑁆𑀬𑀸𑀧𑀸𑀤𑀲𑁆𑀲 𑀦𑀺𑀲𑁆𑀲𑀭𑀡𑀁 𑀦𑀸𑀫. 𑀢𑀢𑀺𑀬𑀯𑀸𑀭𑁂 𑀓𑀭𑀼𑀡𑀸𑀛𑀸𑀦𑀸𑀦𑀺 𑀯𑀺𑀳𑀺𑀁𑀲𑀸𑀬 𑀦𑀺𑀲𑁆𑀲𑀭𑀡𑀁 𑀦𑀸𑀫. 𑀘𑀢𑀼𑀢𑁆𑀣𑀯𑀸𑀭𑁂 𑀅𑀭𑀽𑀧𑀚𑁆𑀛𑀸𑀦𑀸𑀦𑀺 𑀭𑀽𑀧𑀸𑀦𑀁 𑀦𑀺𑀲𑁆𑀲𑀭𑀡𑀁 𑀦𑀸𑀫. 𑀅𑀘𑁆𑀘𑀦𑁆𑀢𑀦𑀺𑀲𑁆𑀲𑀭𑀡𑀜𑁆𑀘𑁂𑀢𑁆𑀣 𑀅𑀭𑀳𑀢𑁆𑀢𑀨𑀮𑀁 𑀬𑁄𑀚𑁂𑀢𑀩𑁆𑀩𑀁. 𑀧𑀜𑁆𑀘𑀫𑀯𑀸𑀭𑁂 𑀲𑀓𑁆𑀓𑀸𑀬𑀁 𑀫𑀦𑀲𑀺𑀓𑀭𑁄𑀢𑁄𑀢𑀺 𑀲𑀼𑀤𑁆𑀥𑀲𑀗𑁆𑀔𑀸𑀭𑁂 𑀧𑀭𑀺𑀕𑁆𑀕𑀡𑁆𑀳𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀢𑁆𑀢𑀲𑁆𑀲 𑀲𑀼𑀓𑁆𑀔𑀯𑀺𑀧𑀲𑁆𑀲𑀓𑀲𑁆𑀲 𑀨𑀮𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀬 𑀯𑀻𑀫𑀁𑀲𑀦𑀢𑁆𑀣𑀁 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸𑀪𑀺𑀫𑀼𑀔𑀁 𑀘𑀺𑀢𑁆𑀢𑀁 𑀧𑁂𑀲𑁂𑀦𑁆𑀢𑀲𑁆𑀲. 𑀇𑀤𑀫𑀓𑁆𑀔𑀸𑀢𑀁 𑀲𑀓𑁆𑀓𑀸𑀬𑀲𑁆𑀲 𑀦𑀺𑀲𑁆𑀲𑀭𑀡𑀦𑁆𑀢𑀺 𑀇𑀤𑀁 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀘 𑀨𑀮𑁂𑀦 𑀘 𑀦𑀺𑀩𑁆𑀩𑀸𑀦𑀁 𑀤𑀺𑀲𑁆𑀯𑀸 𑀞𑀺𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 ‘‘𑀧𑀼𑀦 𑀲𑀓𑁆𑀓𑀸𑀬𑁄 𑀦𑀢𑁆𑀣𑀻’’𑀢𑀺 𑀉𑀧𑁆𑀧𑀦𑁆𑀦𑀁 𑀅𑀭𑀳𑀢𑁆𑀢𑀨𑀮𑀲𑀫𑀸𑀧𑀢𑁆𑀢𑀺𑀘𑀺𑀢𑁆𑀢𑀁 𑀲𑀓𑁆𑀓𑀸𑀬𑀲𑁆𑀲 𑀦𑀺𑀲𑁆𑀲𑀭𑀡𑀦𑁆𑀢𑀺 𑀅𑀓𑁆𑀔𑀸𑀢𑀁. 𑀇𑀤𑀸𑀦𑀺 𑀏𑀯𑀁 𑀲𑀓𑁆𑀓𑀸𑀬𑀦𑀺𑀲𑁆𑀲𑀭𑀡𑀁 𑀦𑀺𑀭𑁄𑀥𑀁 𑀧𑀢𑁆𑀯𑀸 𑀞𑀺𑀢𑀲𑁆𑀲 𑀔𑀻𑀡𑀸𑀲𑀯𑀲𑁆𑀲 𑀯𑀡𑁆𑀡𑀁 𑀓𑀣𑁂𑀦𑁆𑀢𑁄 𑀢𑀲𑁆𑀲 𑀓𑀸𑀫𑀦𑀦𑁆𑀤𑀻𑀧𑀺 𑀦𑀸𑀦𑀼𑀲𑁂𑀢𑀻𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀦𑀸𑀦𑀼𑀲𑁂𑀢𑀻𑀢𑀺 𑀦 𑀦𑀺𑀩𑁆𑀩𑀢𑁆𑀢𑀢𑀺. 𑀅𑀦𑀦𑀼𑀲𑀬𑀸𑀢𑀺 𑀅𑀦𑀺𑀩𑁆𑀩𑀢𑁆𑀢𑀺𑀬𑀸. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀩𑁆𑀭𑀸𑀳𑁆𑀫𑀡𑀯𑀕𑁆𑀕𑁄 𑀧𑀜𑁆𑀘𑀫𑁄.

𑀘𑀢𑀼𑀢𑁆𑀣𑀧𑀡𑁆𑀡𑀸𑀲𑀓𑀁 𑀦𑀺𑀝𑁆𑀞𑀺𑀢𑀁.