𑁫. 𑀧𑀜𑁆𑀘𑀫𑀧𑀡𑁆𑀡𑀸𑀲𑀓𑀁

(𑁨𑁧) 𑁧. 𑀓𑀺𑀫𑀺𑀮𑀯𑀕𑁆𑀕𑁄

𑁧. 𑀓𑀺𑀫𑀺𑀮𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁦𑁧. 𑀧𑀜𑁆𑀘𑀫𑀲𑁆𑀲 𑀧𑀞𑀫𑁂 𑀓𑀺𑀫𑀺𑀮𑀸𑀬𑀦𑁆𑀢𑀺 𑀏𑀯𑀁𑀦𑀸𑀫𑀓𑁂 𑀦𑀕𑀭𑁂. 𑀦𑀺𑀘𑀼𑀮𑀯𑀦𑁂𑀢𑀺 𑀫𑀼𑀘𑀮𑀺𑀦𑁆𑀤𑀯𑀦𑁂. 𑀏𑀢𑀤𑀯𑁄𑀘𑀸𑀢𑀺 𑀅𑀬𑀁 𑀓𑀺𑀭 𑀣𑁂𑀭𑁄 𑀢𑀲𑁆𑀫𑀺𑀁𑀬𑁂𑀯 𑀦𑀕𑀭𑁂 𑀲𑁂𑀝𑁆𑀞𑀺𑀧𑀼𑀢𑁆𑀢𑁄 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑁆𑀯𑀸 𑀧𑀼𑀩𑁆𑀩𑁂𑀦𑀺𑀯𑀸𑀲𑀜𑀸𑀡𑀁 𑀧𑀝𑀺𑀮𑀪𑀺. 𑀲𑁄 𑀅𑀢𑁆𑀢𑀦𑀸 𑀦𑀺𑀯𑀼𑀢𑁆𑀣𑀁 𑀔𑀦𑁆𑀥𑀲𑀦𑁆𑀢𑀸𑀦𑀁 𑀅𑀦𑀼𑀲𑁆𑀲𑀭𑀦𑁆𑀢𑁄 𑀓𑀲𑁆𑀲𑀧𑀤𑀲𑀩𑀮𑀲𑁆𑀲 𑀲𑀸𑀲𑀦𑁄𑀲𑀓𑁆𑀓𑀦𑀓𑀸𑀮𑁂 𑀧𑀩𑁆𑀩𑀚𑀺𑀢𑁆𑀯𑀸 𑀘𑀢𑀽𑀲𑀼 𑀧𑀭𑀺𑀲𑀸𑀲𑀼 𑀲𑀸𑀲𑀦𑁂 𑀅𑀕𑀸𑀭𑀯𑀁 𑀓𑀭𑁄𑀦𑁆𑀢𑀻𑀲𑀼 𑀦𑀺𑀲𑁆𑀲𑁂𑀡𑀺𑀁 𑀩𑀦𑁆𑀥𑀺𑀢𑁆𑀯𑀸 𑀧𑀩𑁆𑀩𑀢𑀁 𑀆𑀭𑀼𑀬𑁆𑀳 𑀢𑀢𑁆𑀣 𑀲𑀫𑀡𑀥𑀫𑁆𑀫𑀁 𑀓𑀢𑁆𑀯𑀸 𑀅𑀢𑁆𑀢𑀦𑁄 𑀦𑀺𑀯𑀼𑀢𑁆𑀣𑀪𑀸𑀯𑀁 𑀅𑀤𑁆𑀤𑀲. 𑀲𑁄 ‘‘𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀁 𑀓𑀸𑀭𑀡𑀁 𑀧𑀼𑀘𑁆𑀙𑀺𑀲𑁆𑀲𑀸𑀫𑀻’’𑀢𑀺 𑀏𑀢𑀁 ‘‘𑀓𑁄 𑀦𑀼 𑀔𑁄, 𑀪𑀦𑁆𑀢𑁂’’𑀢𑀺𑀆𑀤𑀺𑀯𑀘𑀦𑀁 𑀅𑀯𑁄𑀘.

𑀲𑀢𑁆𑀣𑀭𑀺 𑀅𑀕𑀸𑀭𑀯𑀸 𑀯𑀺𑀳𑀭𑀦𑁆𑀢𑀺 𑀅𑀧𑁆𑀧𑀢𑀺𑀲𑁆𑀲𑀸𑀢𑀺 𑀲𑀢𑁆𑀣𑀭𑀺 𑀕𑀸𑀭𑀯𑀜𑁆𑀘𑁂𑀯 𑀚𑁂𑀝𑁆𑀞𑀓𑀪𑀸𑀯𑀜𑁆𑀘 𑀅𑀦𑀼𑀧𑀝𑁆𑀞𑀧𑁂𑀢𑁆𑀯𑀸 𑀯𑀺𑀳𑀭𑀦𑁆𑀢𑀺. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀢𑀢𑁆𑀣 𑀘𑁂𑀢𑀺𑀬𑀗𑁆𑀕𑀡𑀸𑀤𑀻𑀲𑀼 𑀙𑀢𑁆𑀢𑀁 𑀥𑀸𑀭𑁂𑀢𑁆𑀯𑀸 𑀉𑀧𑀸𑀳𑀦𑀸 𑀆𑀭𑀼𑀬𑁆𑀳 𑀯𑀺𑀘𑀭𑀦𑁆𑀢𑁄 𑀦𑀸𑀦𑀧𑁆𑀧𑀓𑀸𑀭𑀜𑁆𑀘 𑀦𑀺𑀭𑀢𑁆𑀣𑀓𑀓𑀣𑀁 𑀓𑀣𑁂𑀦𑁆𑀢𑁄 𑀲𑀢𑁆𑀣𑀭𑀺 𑀅𑀕𑀸𑀭𑀯𑁄 𑀯𑀺𑀳𑀭𑀢𑀺 𑀦𑀸𑀫. 𑀥𑀫𑁆𑀫𑀲𑁆𑀲𑀯𑀦𑀕𑁆𑀕𑁂 𑀧𑀦 𑀦𑀺𑀲𑀻𑀤𑀺𑀢𑁆𑀯𑀸 𑀦𑀺𑀤𑁆𑀤𑀸𑀬𑀦𑁆𑀢𑁄 𑀘𑁂𑀯 𑀦𑀸𑀦𑀧𑁆𑀧𑀓𑀸𑀭𑀜𑁆𑀘 𑀦𑀺𑀭𑀢𑁆𑀣𑀓𑀓𑀣𑀁 𑀓𑀣𑁂𑀦𑁆𑀢𑁄 𑀥𑀫𑁆𑀫𑁂 𑀅𑀕𑀸𑀭𑀯𑁄 𑀯𑀺𑀳𑀭𑀢𑀺 𑀦𑀸𑀫. 𑀲𑀗𑁆𑀖𑀫𑀚𑁆𑀛𑁂 𑀩𑀸𑀳𑀸𑀯𑀺𑀓𑁆𑀔𑁂𑀧𑀓𑀁 𑀦𑀸𑀦𑀢𑁆𑀢𑀓𑀣𑀁 𑀓𑀣𑁂𑀦𑁆𑀢𑁄 𑀣𑁂𑀭𑀦𑀯𑀫𑀚𑁆𑀛𑀺𑀫𑁂𑀲𑀼 𑀘 𑀘𑀺𑀢𑁆𑀢𑀻𑀓𑀸𑀭𑀁 𑀅𑀓𑀭𑁄𑀦𑁆𑀢𑁄 𑀲𑀗𑁆𑀖𑁂 𑀅𑀕𑀸𑀭𑀯𑁄 𑀯𑀺𑀳𑀭𑀢𑀺 𑀦𑀸𑀫. 𑀲𑀺𑀓𑁆𑀔𑀁 𑀅𑀧𑀭𑀺𑀧𑀽𑀭𑁂𑀦𑁆𑀢𑁄 𑀲𑀺𑀓𑁆𑀔𑀸𑀬 𑀅𑀕𑀸𑀭𑀯𑁄 𑀯𑀺𑀳𑀭𑀢𑀺 𑀦𑀸𑀫. 𑀅𑀜𑁆𑀜𑀫𑀜𑁆𑀜𑀁 𑀓𑀮𑀳𑀪𑀡𑁆𑀟𑀦𑀸𑀤𑀻𑀦𑀺 𑀓𑀭𑁄𑀦𑁆𑀢𑁄 𑀅𑀜𑁆𑀜𑀫𑀜𑁆𑀜𑀁 𑀅𑀕𑀸𑀭𑀯𑁄 𑀯𑀺𑀳𑀭𑀢𑀺 𑀦𑀸𑀫. 𑀤𑀼𑀢𑀺𑀬𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑁩. 𑀅𑀲𑁆𑀲𑀸𑀚𑀸𑀦𑀻𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁦𑁩-𑁨𑁦𑁪. 𑀢𑀢𑀺𑀬𑁂 𑀅𑀚𑁆𑀚𑀯𑁂𑀦𑀸𑀢𑀺 𑀉𑀚𑀼𑀪𑀸𑀯𑁂𑀦 𑀅𑀯𑀗𑁆𑀓𑀕𑀫𑀦𑁂𑀦. 𑀚𑀯𑁂𑀦𑀸𑀢𑀺 𑀧𑀤𑀚𑀯𑁂𑀦. 𑀫𑀤𑁆𑀤𑀯𑁂𑀦𑀸𑀢𑀺 𑀲𑀭𑀻𑀭𑀫𑀼𑀤𑀼𑀢𑀸𑀬. 𑀔𑀦𑁆𑀢𑀺𑀬𑀸𑀢𑀺 𑀅𑀥𑀺𑀯𑀸𑀲𑀦𑀓𑁆𑀔𑀦𑁆𑀢𑀺𑀬𑀸. 𑀲𑁄𑀭𑀘𑁆𑀘𑁂𑀦𑀸𑀢𑀺 𑀲𑀼𑀘𑀺𑀲𑀻𑀮𑀢𑀸𑀬. 𑀪𑀺𑀓𑁆𑀔𑀼𑀯𑀸𑀭𑁂 𑀅𑀚𑁆𑀚𑀯𑀦𑁆𑀢𑀺 𑀜𑀸𑀡𑀲𑁆𑀲 𑀉𑀚𑀼𑀓𑀕𑀫𑀦𑀁. 𑀚𑀯𑁄𑀢𑀺 𑀲𑀽𑀭𑀁 𑀳𑀼𑀢𑁆𑀯𑀸 𑀜𑀸𑀡𑀲𑁆𑀲 𑀕𑀫𑀦𑀪𑀸𑀯𑁄. 𑀫𑀤𑁆𑀤𑀯𑀦𑁆𑀢𑀺 𑀲𑀻𑀮𑀫𑀤𑁆𑀤𑀯𑀁. 𑀔𑀦𑁆𑀢𑀻𑀢𑀺 𑀅𑀥𑀺𑀯𑀸𑀲𑀦𑀓𑁆𑀔𑀦𑁆𑀢𑀺𑀬𑁂𑀯. 𑀲𑁄𑀭𑀘𑁆𑀘𑀁 𑀲𑀼𑀘𑀺𑀲𑀻𑀮𑀢𑀸𑀬𑁂𑀯. 𑀘𑀢𑀼𑀢𑁆𑀣𑁂 𑀧𑀜𑁆𑀘 𑀩𑀮𑀸𑀦𑀺 𑀫𑀺𑀲𑁆𑀲𑀓𑀸𑀦𑀺 𑀓𑀣𑀺𑀢𑀸𑀦𑀺.

𑁫. 𑀘𑁂𑀢𑁄𑀔𑀺𑀮𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁦𑁫. 𑀧𑀜𑁆𑀘𑀫𑁂 𑀘𑁂𑀢𑁄𑀔𑀺𑀮𑀸𑀢𑀺 𑀘𑀺𑀢𑁆𑀢𑀲𑁆𑀲 𑀣𑀤𑁆𑀥𑀪𑀸𑀯𑀸, 𑀓𑀘𑀯𑀭𑀪𑀸𑀯𑀸, 𑀔𑀸𑀡𑀼𑀓𑀪𑀸𑀯𑀸. 𑀲𑀢𑁆𑀣𑀭𑀺 𑀓𑀗𑁆𑀔𑀢𑀻𑀢𑀺 𑀲𑀢𑁆𑀣𑀼 𑀲𑀭𑀻𑀭𑁂 𑀯𑀸 𑀕𑀼𑀡𑁂 𑀯𑀸 𑀓𑀗𑁆𑀔𑀢𑀺. 𑀲𑀭𑀻𑀭𑁂 𑀓𑀗𑁆𑀔𑀫𑀸𑀦𑁄 ‘‘𑀤𑁆𑀯𑀢𑁆𑀢𑀺𑀁𑀲𑀯𑀭𑀧𑀼𑀭𑀺𑀲𑀮𑀓𑁆𑀔𑀡𑀧𑀝𑀺𑀫𑀡𑁆𑀟𑀺𑀢𑀁 𑀦𑀸𑀫 𑀲𑀭𑀻𑀭𑀁 𑀅𑀢𑁆𑀣𑀺 𑀦𑀼 𑀔𑁄 𑀦𑀢𑁆𑀣𑀻’’𑀢𑀺 𑀓𑀗𑁆𑀔𑀢𑀺, 𑀕𑀼𑀡𑁂 𑀓𑀗𑁆𑀔𑀫𑀸𑀦𑁄 ‘‘𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀚𑀸𑀦𑀦𑀲𑀫𑀢𑁆𑀣𑀁 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀅𑀢𑁆𑀣𑀺 𑀦𑀼 𑀔𑁄 𑀦𑀢𑁆𑀣𑀻’’𑀢𑀺 𑀓𑀗𑁆𑀔𑀢𑀺. 𑀯𑀺𑀘𑀺𑀓𑀺𑀘𑁆𑀙𑀢𑀻𑀢𑀺 𑀯𑀺𑀘𑀺𑀦𑀦𑁆𑀢𑁄 𑀓𑀺𑀘𑁆𑀙𑀢𑀺, 𑀤𑀼𑀓𑁆𑀔𑀁 𑀆𑀧𑀚𑁆𑀚𑀢𑀺, 𑀯𑀺𑀦𑀺𑀘𑁆𑀙𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀦𑀸𑀥𑀺𑀫𑀼𑀘𑁆𑀘𑀢𑀻𑀢𑀺 𑀏𑀯𑀫𑁂𑀢𑀦𑁆𑀢𑀺 𑀅𑀥𑀺𑀫𑁄𑀓𑁆𑀔𑀁 𑀦 𑀧𑀝𑀺𑀮𑀪𑀢𑀺. 𑀦 𑀲𑀫𑁆𑀧𑀲𑀻𑀤𑀢𑀻𑀢𑀺 𑀕𑀼𑀡𑁂𑀲𑀼 𑀑𑀢𑀭𑀺𑀢𑁆𑀯𑀸 𑀦𑀺𑀩𑁆𑀩𑀺𑀘𑀺𑀓𑀺𑀘𑁆𑀙𑀪𑀸𑀯𑁂𑀦 𑀧𑀲𑀻𑀤𑀺𑀢𑀼𑀁 𑀅𑀦𑀸𑀯𑀺𑀮𑁄 𑀪𑀯𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀆𑀢𑀧𑁆𑀧𑀸𑀬𑀸𑀢𑀺 𑀓𑀺𑀮𑁂𑀲𑀲𑀦𑁆𑀢𑀸𑀧𑀓𑀯𑀻𑀭𑀺𑀬𑀓𑀭𑀡𑀢𑁆𑀣𑀸𑀬. 𑀅𑀦𑀼𑀬𑁄𑀕𑀸𑀬𑀸𑀢𑀺 𑀧𑀼𑀦𑀧𑁆𑀧𑀼𑀦𑀁 𑀬𑁄𑀕𑀸𑀬. 𑀲𑀸𑀢𑀘𑁆𑀘𑀸𑀬𑀸𑀢𑀺 𑀲𑀢𑀢𑀓𑀺𑀭𑀺𑀬𑀸𑀬. 𑀧𑀥𑀸𑀦𑀸𑀬𑀸𑀢𑀺 𑀧𑀤𑀳𑀦𑀢𑁆𑀣𑀸𑀬. 𑀅𑀬𑀁 𑀧𑀞𑀫𑁄 𑀘𑁂𑀢𑁄𑀔𑀺𑀮𑁄𑀢𑀺 𑀅𑀬𑀁 𑀲𑀢𑁆𑀣𑀭𑀺 𑀯𑀺𑀘𑀺𑀓𑀺𑀘𑁆𑀙𑀸𑀲𑀗𑁆𑀔𑀸𑀢𑁄 𑀧𑀞𑀫𑁄 𑀘𑀺𑀢𑁆𑀢𑀲𑁆𑀲 𑀣𑀤𑁆𑀥𑀪𑀸𑀯𑁄 𑀏𑀯𑀫𑁂𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀧𑁆𑀧𑀳𑀻𑀦𑁄 𑀳𑁄𑀢𑀺.

𑀥𑀫𑁆𑀫𑁂𑀢𑀺 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑁂 𑀘 𑀧𑀝𑀺𑀯𑁂𑀥𑀥𑀫𑁆𑀫𑁂 𑀘. 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑁂 𑀓𑀗𑁆𑀔𑀫𑀸𑀦𑁄 ‘‘𑀢𑁂𑀧𑀺𑀝𑀓𑀁 𑀩𑀼𑀤𑁆𑀥𑀯𑀘𑀦𑀁 𑀘𑀢𑀼𑀭𑀸𑀲𑀻𑀢𑀺𑀥𑀫𑁆𑀫𑀓𑁆𑀔𑀦𑁆𑀥𑀲𑀳𑀲𑁆𑀲𑀸𑀦𑀻𑀢𑀺 𑀯𑀤𑀦𑁆𑀢𑀺, 𑀅𑀢𑁆𑀣𑀺 𑀦𑀼 𑀔𑁄 𑀏𑀢𑀁 𑀦𑀢𑁆𑀣𑀻’’𑀢𑀺 𑀓𑀗𑁆𑀔𑀢𑀺. 𑀧𑀝𑀺𑀯𑁂𑀥𑀥𑀫𑁆𑀫𑁂 𑀓𑀗𑁆𑀔𑀫𑀸𑀦𑁄 ‘‘𑀯𑀺𑀧𑀲𑁆𑀲𑀦𑀸𑀦𑀺𑀲𑁆𑀲𑀦𑁆𑀤𑁄 𑀫𑀕𑁆𑀕𑁄 𑀦𑀸𑀫, 𑀫𑀕𑁆𑀕𑀦𑀺𑀲𑁆𑀲𑀦𑁆𑀤𑀁 𑀨𑀮𑀁 𑀦𑀸𑀫, 𑀲𑀩𑁆𑀩𑀲𑀗𑁆𑀔𑀸𑀭𑀧𑀝𑀺𑀦𑀺𑀲𑁆𑀲𑀕𑁆𑀕𑁄 𑀦𑀺𑀩𑁆𑀩𑀸𑀦𑀁 𑀦𑀸𑀫𑀸𑀢𑀺 𑀯𑀤𑀦𑁆𑀢𑀺, 𑀢𑀁 𑀅𑀢𑁆𑀣𑀺 𑀦𑀼 𑀔𑁄 𑀦𑀢𑁆𑀣𑀻’’𑀢𑀺 𑀓𑀗𑁆𑀔𑀢𑀺. 𑀲𑀗𑁆𑀖𑁂 𑀓𑀗𑁆𑀔𑀢𑀻𑀢𑀺 ‘‘𑀉𑀚𑀼𑀧𑁆𑀧𑀝𑀺𑀧𑀦𑁆𑀦𑁄’’𑀢𑀺𑀆𑀤𑀻𑀦𑀁 𑀧𑀤𑀸𑀦𑀁 𑀯𑀲𑁂𑀦 ‘‘𑀏𑀯𑀭𑀽𑀧𑀁 𑀧𑀝𑀺𑀧𑀤𑀁 𑀧𑀝𑀺𑀧𑀦𑁆𑀦𑁄 𑀘𑀢𑁆𑀢𑀸𑀭𑁄 𑀫𑀕𑁆𑀕𑀝𑁆𑀞𑀸 𑀘𑀢𑁆𑀢𑀸𑀭𑁄 𑀨𑀮𑀝𑁆𑀞𑀸𑀢𑀺 𑀅𑀝𑁆𑀞𑀦𑁆𑀦𑀁 𑀧𑀼𑀕𑁆𑀕𑀮𑀸𑀦𑀁 𑀲𑀫𑀽𑀳𑀪𑀽𑀢𑁄 𑀲𑀗𑁆𑀖𑁄 𑀦𑀸𑀫 𑀅𑀢𑁆𑀣𑀺 𑀦𑀼 𑀔𑁄 𑀦𑀢𑁆𑀣𑀻’’𑀢𑀺 𑀓𑀗𑁆𑀔𑀢𑀺. 𑀲𑀺𑀓𑁆𑀔𑀸𑀬 𑀓𑀗𑁆𑀔𑀫𑀸𑀦𑁄 ‘‘𑀅𑀥𑀺𑀲𑀻𑀮𑀲𑀺𑀓𑁆𑀔𑀸 𑀦𑀸𑀫 𑀅𑀥𑀺𑀘𑀺𑀢𑁆𑀢𑀅𑀥𑀺𑀧𑀜𑁆𑀜𑀸𑀲𑀺𑀓𑁆𑀔𑀸 𑀦𑀸𑀫𑀸𑀢𑀺 𑀯𑀤𑀦𑁆𑀢𑀺, 𑀲𑀸 𑀅𑀢𑁆𑀣𑀺 𑀦𑀼 𑀔𑁄 𑀦𑀢𑁆𑀣𑀻’’𑀢𑀺 𑀓𑀗𑁆𑀔𑀢𑀺. 𑀅𑀬𑀁 𑀧𑀜𑁆𑀘𑀫𑁄𑀢𑀺 𑀅𑀬𑀁 𑀲𑀩𑁆𑀭𑀳𑁆𑀫𑀘𑀸𑀭𑀻𑀲𑀼 𑀓𑁄𑀧𑀲𑀗𑁆𑀔𑀸𑀢𑁄 𑀧𑀜𑁆𑀘𑀫𑁄 𑀘𑀺𑀢𑁆𑀢𑀲𑁆𑀲 𑀣𑀤𑁆𑀥𑀪𑀸𑀯𑁄 𑀓𑀘𑀯𑀭𑀪𑀸𑀯𑁄 𑀔𑀸𑀡𑀼𑀓𑀪𑀸𑀯𑁄.

𑁬. 𑀯𑀺𑀦𑀺𑀩𑀦𑁆𑀥𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁦𑁬. 𑀙𑀝𑁆𑀞𑁂 𑀘𑁂𑀢𑀲𑁄𑀯𑀺𑀦𑀺𑀩𑀦𑁆𑀥𑀸𑀢𑀺 𑀘𑀺𑀢𑁆𑀢𑀁 𑀯𑀺𑀦𑀺𑀩𑀦𑁆𑀥𑀺𑀢𑁆𑀯𑀸 𑀫𑀼𑀝𑁆𑀞𑀺𑀬𑀁 𑀓𑀢𑁆𑀯𑀸 𑀯𑀺𑀬 𑀕𑀡𑁆𑀳𑀦𑁆𑀢𑀻𑀢𑀺 𑀘𑁂𑀢𑀲𑁄𑀯𑀺𑀦𑀺𑀩𑀦𑁆𑀥𑀸. 𑀓𑀸𑀫𑁂𑀢𑀺 𑀯𑀢𑁆𑀣𑀼𑀓𑀸𑀫𑁂𑀧𑀺 𑀓𑀺𑀮𑁂𑀲𑀓𑀸𑀫𑁂𑀧𑀺. 𑀓𑀸𑀬𑁂𑀢𑀺 𑀅𑀢𑁆𑀢𑀦𑁄 𑀓𑀸𑀬𑁂. 𑀭𑀽𑀧𑁂𑀢𑀺 𑀩𑀳𑀺𑀤𑁆𑀥𑀸𑀭𑀽𑀧𑁂. 𑀬𑀸𑀯𑀤𑀢𑁆𑀣𑀦𑁆𑀢𑀺 𑀬𑀢𑁆𑀢𑀓𑀁 𑀇𑀘𑁆𑀙𑀢𑀺, 𑀢𑀢𑁆𑀢𑀓𑀁. 𑀉𑀤𑀭𑀸𑀯𑀤𑁂𑀳𑀓𑀦𑁆𑀢𑀺 𑀉𑀤𑀭𑀧𑀽𑀭𑀁. 𑀢𑀜𑁆𑀳𑀺 𑀉𑀤𑀭𑀁 𑀅𑀯𑀤𑁂𑀳𑀦𑀢𑁄 𑀉𑀤𑀭𑀸𑀯𑀤𑁂𑀳𑀓𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀲𑁂𑀬𑁆𑀬𑀲𑀼𑀔𑀦𑁆𑀢𑀺 𑀫𑀜𑁆𑀘𑀧𑀻𑀞𑀲𑀼𑀔𑀁, 𑀉𑀢𑀼𑀲𑀼𑀔𑀁 𑀯𑀸. 𑀧𑀲𑁆𑀲𑀲𑀼𑀔𑀦𑁆𑀢𑀺 𑀬𑀣𑀸 𑀲𑀫𑁆𑀧𑀭𑀺𑀯𑀢𑁆𑀢𑀓𑀁 𑀲𑀬𑀦𑁆𑀢𑀲𑁆𑀲 𑀤𑀓𑁆𑀔𑀺𑀡𑀧𑀲𑁆𑀲 𑀯𑀸𑀫𑀧𑀲𑁆𑀲𑀸𑀦𑀁 𑀲𑀼𑀔𑀁 𑀳𑁄𑀢𑀺, 𑀏𑀯𑀁 𑀉𑀧𑁆𑀧𑀦𑁆𑀦𑀲𑀼𑀔𑀁. 𑀫𑀺𑀤𑁆𑀥𑀲𑀼𑀔𑀦𑁆𑀢𑀺 𑀦𑀺𑀤𑁆𑀤𑀸𑀲𑀼𑀔𑀁. 𑀅𑀦𑀼𑀬𑀼𑀢𑁆𑀢𑁄𑀢𑀺 𑀬𑀼𑀢𑁆𑀢𑀧𑁆𑀧𑀬𑀼𑀢𑁆𑀢𑁄 𑀯𑀺𑀳𑀭𑀢𑀺. 𑀧𑀡𑀺𑀥𑀸𑀬𑀸𑀢𑀺 𑀧𑀢𑁆𑀣𑀬𑀺𑀢𑁆𑀯𑀸. 𑀲𑀻𑀮𑁂𑀦𑀸𑀢𑀺𑀆𑀤𑀻𑀲𑀼 𑀲𑀻𑀮𑀦𑁆𑀢𑀺 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀁. 𑀯𑀢𑀦𑁆𑀢𑀺 𑀯𑀢𑀲𑀫𑀸𑀤𑀸𑀦𑀁. 𑀢𑀧𑁄𑀢𑀺 𑀢𑀧𑀘𑀭𑀡𑀁. 𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀺 𑀫𑁂𑀣𑀼𑀦𑀯𑀺𑀭𑀢𑀺. 𑀤𑁂𑀯𑁄 𑀯𑀸 𑀪𑀯𑀺𑀲𑁆𑀲𑀸𑀫𑀻𑀢𑀺 𑀫𑀳𑁂𑀲𑀓𑁆𑀔𑀤𑁂𑀯𑁄 𑀯𑀸 𑀪𑀯𑀺𑀲𑁆𑀲𑀸𑀫𑀺. 𑀤𑁂𑀯𑀜𑁆𑀜𑀢𑀭𑁄 𑀯𑀸𑀢𑀺 𑀅𑀧𑁆𑀧𑁂𑀲𑀓𑁆𑀔𑀤𑁂𑀯𑁂𑀲𑀼 𑀯𑀸 𑀅𑀜𑁆𑀜𑀢𑀭𑁄𑀢𑀺.

𑁭-𑁮. 𑀬𑀸𑀕𑀼𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁨𑁦𑁭-𑁨𑁦𑁮. 𑀲𑀢𑁆𑀢𑀫𑁂 𑀯𑀸𑀢𑀁 𑀅𑀦𑀼𑀮𑁄𑀫𑁂𑀢𑀻𑀢𑀺 𑀯𑀸𑀢𑀁 𑀅𑀦𑀼𑀮𑁄𑀫𑁂𑀢𑁆𑀯𑀸 𑀳𑀭𑀢𑀺. 𑀯𑀢𑁆𑀣𑀺𑀁 𑀲𑁄𑀥𑁂𑀢𑀻𑀢𑀺 𑀥𑀫𑀦𑀺𑀬𑁄 𑀲𑀼𑀤𑁆𑀥𑀸 𑀓𑀭𑁄𑀢𑀺. 𑀆𑀫𑀸𑀯𑀲𑁂𑀲𑀁 𑀧𑀸𑀘𑁂𑀢𑀻𑀢𑀺 𑀲𑀘𑁂 𑀆𑀫𑀸𑀯𑀲𑁂𑀲𑀓𑀁 𑀳𑁄𑀢𑀺, 𑀢𑀁 𑀧𑀸𑀘𑁂𑀢𑀺. 𑀅𑀝𑁆𑀞𑀫𑁂 𑀅𑀘𑀓𑁆𑀔𑀼𑀲𑁆𑀲𑀦𑁆𑀢𑀺 𑀦 𑀘𑀓𑁆𑀔𑀽𑀦𑀁 𑀳𑀺𑀢𑀁, 𑀘𑀓𑁆𑀔𑀼𑀁 𑀯𑀺𑀲𑀼𑀤𑁆𑀥𑀁 𑀦 𑀓𑀭𑁄𑀢𑀺.

𑁯. 𑀕𑀻𑀢𑀲𑁆𑀲𑀭𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁦𑁯. 𑀦𑀯𑀫𑁂 𑀆𑀬𑀢𑀓𑁂𑀦𑀸𑀢𑀺 𑀤𑀻𑀖𑁂𑀦, 𑀧𑀭𑀺𑀧𑀼𑀡𑁆𑀡𑀧𑀤𑀩𑁆𑀬𑀜𑁆𑀚𑀦𑀓𑀁 𑀕𑀸𑀣𑀸𑀯𑀢𑁆𑀢𑀜𑁆𑀘 𑀯𑀺𑀦𑀸𑀲𑁂𑀢𑁆𑀯𑀸 𑀧𑀯𑀢𑁆𑀢𑁂𑀦. 𑀲𑀭𑀓𑀼𑀢𑁆𑀢𑀺𑀫𑁆𑀧𑀺 𑀦𑀺𑀓𑀸𑀫𑀬𑀫𑀸𑀦𑀲𑁆𑀲𑀸𑀢𑀺 𑀏𑀯𑀁 𑀕𑀻𑀢𑀲𑁆𑀲𑀭𑁄 𑀓𑀸𑀢𑀩𑁆𑀩𑁄𑀢𑀺 𑀲𑀭𑀓𑀺𑀭𑀺𑀬𑀁 𑀧𑀢𑁆𑀣𑀬𑀫𑀸𑀦𑀲𑁆𑀲. 𑀲𑀫𑀸𑀥𑀺𑀲𑁆𑀲 𑀪𑀗𑁆𑀕𑁄 𑀳𑁄𑀢𑀻𑀢𑀺 𑀲𑀫𑀣𑀯𑀺𑀧𑀲𑁆𑀲𑀦𑀸𑀘𑀺𑀢𑁆𑀢𑀲𑁆𑀲 𑀯𑀺𑀦𑀸𑀲𑁄 𑀳𑁄𑀢𑀺.

𑁧𑁦. 𑀫𑀼𑀝𑁆𑀞𑀲𑁆𑀲𑀢𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁧𑁦. 𑀤𑀲𑀫𑁂 𑀤𑀼𑀓𑁆𑀔𑀁 𑀲𑀼𑀧𑀢𑀻𑀢𑀺 𑀦𑀸𑀦𑀸𑀯𑀺𑀥𑀁 𑀲𑀼𑀧𑀺𑀦𑀁 𑀧𑀲𑁆𑀲𑀦𑁆𑀢𑁄 𑀤𑀼𑀓𑁆𑀔𑀁 𑀲𑀼𑀧𑀢𑀺. 𑀤𑀼𑀓𑁆𑀔𑀁 𑀧𑀝𑀺𑀩𑀼𑀚𑁆𑀛𑀢𑀻𑀢𑀺 𑀧𑀝𑀺𑀩𑀼𑀚𑁆𑀛𑀦𑁆𑀢𑁄𑀧𑀺 𑀉𑀢𑁆𑀢𑀲𑀺𑀢𑁆𑀯𑀸 𑀲𑀮𑁄𑀫𑀳𑀁𑀲𑁄 𑀧𑀝𑀺𑀩𑀼𑀚𑁆𑀛𑀢𑀺. 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀲𑀢𑀺𑀲𑀫𑁆𑀧𑀚𑀜𑁆𑀜𑀁 𑀫𑀺𑀲𑁆𑀲𑀓𑀁 𑀓𑀣𑀺𑀢𑀁.

𑀓𑀺𑀫𑀺𑀮𑀯𑀕𑁆𑀕𑁄 𑀧𑀞𑀫𑁄.

(𑁨𑁨) 𑁨. 𑀅𑀓𑁆𑀓𑁄𑀲𑀓𑀯𑀕𑁆𑀕𑁄

𑁧. 𑀅𑀓𑁆𑀓𑁄𑀲𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁧𑁧. 𑀤𑀼𑀢𑀺𑀬𑀲𑁆𑀲 𑀧𑀞𑀫𑁂 𑀅𑀓𑁆𑀓𑁄𑀲𑀓𑀧𑀭𑀺𑀪𑀸𑀲𑀓𑁄𑀢𑀺 𑀤𑀲𑀳𑀺 𑀅𑀓𑁆𑀓𑁄𑀲𑀯𑀢𑁆𑀣𑀽𑀳𑀺 𑀅𑀓𑁆𑀓𑁄𑀲𑀓𑁄, 𑀪𑀬𑀤𑀲𑁆𑀲𑀦𑁂𑀦 𑀧𑀭𑀺𑀪𑀸𑀲𑀓𑁄. 𑀙𑀺𑀦𑁆𑀦𑀧𑀭𑀺𑀧𑀦𑁆𑀣𑁄𑀢𑀺 𑀮𑁄𑀓𑀼𑀢𑁆𑀢𑀭𑀧𑀭𑀺𑀧𑀦𑁆𑀣𑀲𑁆𑀲 𑀙𑀺𑀦𑁆𑀦𑀢𑁆𑀢𑀸 𑀙𑀺𑀦𑁆𑀦𑀧𑀭𑀺𑀧𑀦𑁆𑀣𑁄. 𑀭𑁄𑀕𑀸𑀢𑀗𑁆𑀓𑀦𑁆𑀢𑀺 𑀭𑁄𑀕𑁄𑀬𑁂𑀯 𑀓𑀺𑀘𑁆𑀙𑀚𑀻𑀯𑀺𑀓𑀸𑀬𑀸𑀯𑀳𑀦𑀢𑁄 𑀭𑁄𑀕𑀸𑀢𑀗𑁆𑀓𑁄 𑀦𑀸𑀫.

𑁨. 𑀪𑀡𑁆𑀟𑀦𑀓𑀸𑀭𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁧𑁨. 𑀤𑀼𑀢𑀺𑀬𑁂 𑀅𑀥𑀺𑀓𑀭𑀡𑀓𑀸𑀭𑀓𑁄𑀢𑀺 𑀘𑀢𑀼𑀦𑁆𑀦𑀁 𑀅𑀥𑀺𑀓𑀭𑀡𑀸𑀦𑀁 𑀅𑀜𑁆𑀜𑀢𑀭𑀲𑁆𑀲 𑀓𑀸𑀭𑀓𑁄. 𑀅𑀦𑀥𑀺𑀕𑀢𑀦𑁆𑀢𑀺 𑀧𑀼𑀩𑁆𑀩𑁂 𑀅𑀧𑁆𑀧𑀢𑁆𑀢𑀯𑀺𑀲𑁂𑀲𑀁.

𑁩. 𑀲𑀻𑀮𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁧𑁩. 𑀢𑀢𑀺𑀬𑁂 𑀤𑀼𑀲𑁆𑀲𑀻𑀮𑁄𑀢𑀺 𑀅𑀲𑀻𑀮𑁄 𑀦𑀺𑀲𑁆𑀲𑀻𑀮𑁄. 𑀲𑀻𑀮𑀯𑀺𑀧𑀦𑁆𑀦𑁄𑀢𑀺 𑀯𑀺𑀧𑀦𑁆𑀦𑀲𑀻𑀮𑁄 𑀪𑀺𑀦𑁆𑀦𑀲𑀁𑀯𑀭𑁄. 𑀧𑀫𑀸𑀤𑀸𑀥𑀺𑀓𑀭𑀡𑀦𑁆𑀢𑀺 𑀧𑀫𑀸𑀤𑀓𑀸𑀭𑀡𑀸. 𑀇𑀤𑀜𑁆𑀘 𑀲𑀼𑀢𑁆𑀢𑀁 𑀕𑀳𑀝𑁆𑀞𑀸𑀦𑀁 𑀯𑀲𑁂𑀦 𑀆𑀕𑀢𑀁, 𑀧𑀩𑁆𑀩𑀚𑀺𑀢𑀸𑀦𑀫𑁆𑀧𑀺 𑀧𑀦 𑀮𑀩𑁆𑀪𑀢𑁂𑀯. 𑀕𑀳𑀝𑁆𑀞𑁄 𑀳𑀺 𑀬𑁂𑀦 𑀬𑁂𑀦 𑀲𑀺𑀧𑁆𑀧𑀝𑁆𑀞𑀸𑀦𑁂𑀦 𑀚𑀻𑀯𑀺𑀓𑀁 𑀓𑀧𑁆𑀧𑁂𑀢𑀺, 𑀬𑀤𑀺 𑀓𑀲𑀺𑀬𑀸, 𑀬𑀤𑀺 𑀯𑀡𑀺𑀚𑁆𑀚𑀸𑀬, 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀯𑀲𑁂𑀦 𑀧𑀫𑀢𑁆𑀢𑁄 𑀢𑀁 𑀢𑀁 𑀬𑀣𑀸𑀓𑀸𑀮𑀁 𑀲𑀫𑁆𑀧𑀸𑀤𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀅𑀣𑀲𑁆𑀲 𑀫𑀽𑀮𑀁 𑀯𑀺𑀦𑀲𑁆𑀲𑀢𑀺. 𑀫𑀸𑀖𑀸𑀢𑀓𑀸𑀮𑁂𑀧𑀺 𑀧𑀸𑀡𑀸𑀢𑀺𑀧𑀸𑀢𑀁 𑀅𑀤𑀺𑀦𑁆𑀦𑀸𑀤𑀸𑀦𑀸𑀤𑀻𑀦𑀺 𑀘 𑀓𑀭𑁄𑀦𑁆𑀢𑁄 𑀤𑀡𑁆𑀟𑀯𑀲𑁂𑀦 𑀫𑀳𑀢𑀺𑀁 𑀪𑁄𑀕𑀚𑀸𑀦𑀺𑀁 𑀦𑀺𑀕𑀘𑁆𑀙𑀢𑀺. 𑀧𑀩𑁆𑀩𑀚𑀺𑀢𑁄 𑀤𑀼𑀲𑁆𑀲𑀻𑀮𑁄 𑀧𑀫𑀸𑀤𑀓𑀸𑀭𑀡𑀸 𑀲𑀻𑀮𑀢𑁄 𑀩𑀼𑀤𑁆𑀥𑀯𑀘𑀦𑀢𑁄 𑀛𑀸𑀦𑀢𑁄 𑀲𑀢𑁆𑀢𑀅𑀭𑀺𑀬𑀥𑀦𑀢𑁄 𑀘 𑀚𑀸𑀦𑀺𑀁 𑀦𑀺𑀕𑀘𑁆𑀙𑀢𑀺. 𑀕𑀳𑀝𑁆𑀞𑀲𑁆𑀲 ‘‘𑀅𑀲𑀼𑀓𑁄 𑀅𑀲𑀼𑀓𑀓𑀼𑀮𑁂 𑀚𑀸𑀢𑁄 𑀤𑀼𑀲𑁆𑀲𑀻𑀮𑁄 𑀧𑀸𑀧𑀥𑀫𑁆𑀫𑁄 𑀧𑀭𑀺𑀘𑁆𑀘𑀢𑁆𑀢𑀇𑀥𑀮𑁄𑀓𑀧𑀭𑀮𑁄𑀓𑁄 𑀲𑀮𑀸𑀓𑀪𑀢𑁆𑀢𑀫𑀢𑁆𑀢𑀫𑁆𑀧𑀺 𑀦 𑀤𑁂𑀢𑀻’’𑀢𑀺 𑀘𑀢𑀼𑀧𑀭𑀺𑀲𑀫𑀚𑁆𑀛𑁂 𑀧𑀸𑀧𑀓𑁄 𑀓𑀺𑀢𑁆𑀢𑀺𑀲𑀤𑁆𑀤𑁄 𑀅𑀩𑁆𑀪𑀼𑀕𑁆𑀕𑀘𑁆𑀙𑀢𑀺. 𑀧𑀩𑁆𑀩𑀚𑀺𑀢𑀲𑁆𑀲 ‘‘𑀅𑀲𑀼𑀓𑁄 𑀦𑀸𑀲𑀓𑁆𑀔𑀺 𑀲𑀻𑀮𑀁 𑀭𑀓𑁆𑀔𑀺𑀢𑀼𑀁 𑀩𑀼𑀤𑁆𑀥𑀯𑀘𑀦𑀁 𑀕𑀳𑁂𑀢𑀼𑀁, 𑀯𑁂𑀚𑁆𑀚𑀓𑀫𑁆𑀫𑀸𑀤𑀻𑀳𑀺 𑀚𑀻𑀯𑀢𑀺, 𑀙𑀳𑀺 𑀅𑀕𑀸𑀭𑀯𑁂𑀳𑀺 𑀲𑀫𑀦𑁆𑀦𑀸𑀕𑀢𑁄’’𑀢𑀺 𑀏𑀯𑀁 𑀅𑀩𑁆𑀪𑀼𑀕𑁆𑀕𑀘𑁆𑀙𑀢𑀺.

𑀅𑀯𑀺𑀲𑀸𑀭𑀤𑁄𑀢𑀺 𑀕𑀳𑀝𑁆𑀞𑁄 𑀢𑀸𑀯 ‘‘𑀅𑀯𑀲𑁆𑀲𑀁 𑀩𑀳𑀽𑀦𑀁 𑀲𑀦𑁆𑀦𑀺𑀧𑀸𑀢𑀝𑁆𑀞𑀸𑀦𑁂 𑀓𑁄𑀘𑀺 𑀫𑀫 𑀓𑀫𑁆𑀫𑀁 𑀚𑀸𑀦𑀺𑀲𑁆𑀲𑀢𑀺, 𑀅𑀣 𑀫𑀁 𑀦𑀺𑀕𑁆𑀕𑀡𑁆𑀳𑀺𑀲𑁆𑀲𑀦𑁆𑀢𑀺 𑀯𑀸, 𑀭𑀸𑀚𑀓𑀼𑀮𑀲𑁆𑀲 𑀯𑀸 𑀤𑀲𑁆𑀲𑀦𑁆𑀢𑀻’’𑀢𑀺 𑀲𑀪𑀬𑁄 𑀉𑀧𑀲𑀗𑁆𑀓𑀫𑀢𑀺. 𑀫𑀗𑁆𑀓𑀼𑀪𑀽𑀢𑁄 𑀘 𑀧𑀢𑀺𑀢𑀓𑁆𑀔𑀦𑁆𑀥𑁄 𑀅𑀥𑁄𑀫𑀼𑀔𑁄 𑀅𑀗𑁆𑀕𑀼𑀝𑁆𑀞𑀓𑁂𑀦 𑀪𑀽𑀫𑀺𑀁 𑀓𑀲𑀦𑁆𑀢𑁄 𑀦𑀺𑀲𑀻𑀤𑀢𑀺, 𑀯𑀺𑀲𑀸𑀭𑀤𑁄 𑀳𑀼𑀢𑁆𑀯𑀸 𑀓𑀣𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀧𑀩𑁆𑀩𑀚𑀺𑀢𑁄𑀧𑀺 ‘‘𑀩𑀳𑀽 𑀪𑀺𑀓𑁆𑀔𑀽 𑀲𑀦𑁆𑀦𑀺𑀧𑀢𑀺𑀢𑀸, 𑀅𑀯𑀲𑁆𑀲𑀁 𑀓𑁄𑀘𑀺 𑀫𑀫 𑀓𑀫𑁆𑀫𑀁 𑀚𑀸𑀦𑀺𑀲𑁆𑀲𑀢𑀺, 𑀅𑀣 𑀫𑁂 𑀉𑀧𑁄𑀲𑀣𑀫𑁆𑀧𑀺 𑀧𑀯𑀸𑀭𑀡𑀫𑁆𑀧𑀺 𑀞𑀧𑁂𑀢𑁆𑀯𑀸 𑀲𑀸𑀫𑀜𑁆𑀜𑀸 𑀘𑀸𑀯𑁂𑀢𑁆𑀯𑀸 𑀦𑀺𑀓𑁆𑀓𑀟𑁆𑀠𑀺𑀲𑁆𑀲𑀦𑁆𑀢𑀻’’𑀢𑀺 𑀲𑀪𑀬𑁄 𑀉𑀧𑀲𑀗𑁆𑀓𑀫𑀢𑀺, 𑀯𑀺𑀲𑀸𑀭𑀤𑁄 𑀳𑀼𑀢𑁆𑀯𑀸 𑀓𑀣𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀏𑀓𑀘𑁆𑀘𑁄 𑀧𑀦 𑀤𑀼𑀲𑁆𑀲𑀻𑀮𑁄𑀧𑀺 𑀤𑀧𑁆𑀧𑀺𑀢𑁄 𑀯𑀺𑀬 𑀘𑀭𑀢𑀺, 𑀲𑁄𑀧𑀺 𑀅𑀚𑁆𑀛𑀸𑀲𑀬𑁂𑀦 𑀫𑀗𑁆𑀓𑀼 𑀳𑁄𑀢𑀺𑀬𑁂𑀯.

𑀲𑀫𑁆𑀫𑀽𑀴𑁆𑀳𑁄 𑀓𑀸𑀮𑀁 𑀓𑀭𑁄𑀢𑀻𑀢𑀺 𑀢𑀲𑁆𑀲 𑀳𑀺 𑀫𑀭𑀡𑀫𑀜𑁆𑀘𑁂 𑀦𑀺𑀧𑀦𑁆𑀦𑀲𑁆𑀲 𑀤𑀼𑀲𑁆𑀲𑀻𑀮𑀓𑀫𑁆𑀫𑀁 𑀲𑀫𑀸𑀤𑀸𑀬 𑀯𑀢𑁆𑀢𑀺𑀢𑀝𑁆𑀞𑀸𑀦𑀁 𑀆𑀧𑀸𑀣𑀁 𑀆𑀕𑀘𑁆𑀙𑀢𑀺. 𑀲𑁄 𑀉𑀫𑁆𑀫𑀻𑀮𑁂𑀢𑁆𑀯𑀸 𑀇𑀥𑀮𑁄𑀓𑀁 𑀧𑀲𑁆𑀲𑀢𑀺, 𑀦𑀺𑀫𑁆𑀫𑀻𑀮𑁂𑀢𑁆𑀯𑀸 𑀧𑀭𑀮𑁄𑀓𑀁. 𑀢𑀲𑁆𑀲 𑀘𑀢𑁆𑀢𑀸𑀭𑁄 𑀅𑀧𑀸𑀬𑀸 𑀉𑀧𑀝𑁆𑀞𑀳𑀦𑁆𑀢𑀺, 𑀲𑀢𑁆𑀢𑀺𑀲𑀢𑁂𑀦 𑀲𑀻𑀲𑁂 𑀧𑀳𑀭𑀺𑀬𑀫𑀸𑀦𑁄 𑀯𑀺𑀬 𑀳𑁄𑀢𑀺. 𑀲𑁄 ‘‘𑀯𑀸𑀭𑁂𑀣 𑀯𑀸𑀭𑁂𑀣𑀸’’𑀢𑀺 𑀯𑀺𑀭𑀯𑀦𑁆𑀢𑁄 𑀫𑀭𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀲𑀫𑁆𑀫𑀽𑀴𑁆𑀳𑁄 𑀓𑀸𑀮𑀁 𑀓𑀭𑁄𑀢𑀻’’𑀢𑀺. 𑀧𑀜𑁆𑀘𑀫𑀧𑀤𑀁 𑀉𑀢𑁆𑀢𑀸𑀦𑀫𑁂𑀯. 𑀆𑀦𑀺𑀲𑀁𑀲𑀓𑀣𑀸 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑁂𑀦 𑀯𑁂𑀤𑀺𑀢𑀩𑁆𑀩𑀸.

𑁪. 𑀩𑀳𑀼𑀪𑀸𑀡𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁧𑁪. 𑀘𑀢𑀼𑀢𑁆𑀣𑁂 𑀩𑀳𑀼𑀪𑀸𑀡𑀺𑀲𑁆𑀫𑀺𑀦𑁆𑀢𑀺 𑀧𑀜𑁆𑀜𑀸𑀬 𑀅𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀩𑀳𑀼𑀁 𑀪𑀡𑀦𑁆𑀢𑁂. 𑀫𑀦𑁆𑀢𑀪𑀸𑀡𑀺𑀲𑁆𑀫𑀺𑀦𑁆𑀢𑀺 𑀫𑀦𑁆𑀢𑀸 𑀯𑀼𑀘𑁆𑀘𑀢𑀺 𑀧𑀜𑁆𑀜𑀸, 𑀢𑀸𑀬 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀪𑀡𑀦𑁆𑀢𑁂.

𑁫. 𑀧𑀞𑀫𑀅𑀓𑁆𑀔𑀦𑁆𑀢𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁧𑁫. 𑀧𑀜𑁆𑀘𑀫𑁂 𑀯𑁂𑀭𑀩𑀳𑀼𑀮𑁄𑀢𑀺 𑀧𑀼𑀕𑁆𑀕𑀮𑀯𑁂𑀭𑁂𑀦𑀧𑀺 𑀅𑀓𑀼𑀲𑀮𑀯𑁂𑀭𑁂𑀦𑀧𑀺 𑀩𑀳𑀼𑀯𑁂𑀭𑁄. 𑀯𑀚𑁆𑀚𑀩𑀳𑀼𑀮𑁄𑀢𑀺 𑀤𑁄𑀲𑀩𑀳𑀼𑀮𑁄.

𑁬. 𑀤𑀼𑀢𑀺𑀬𑀅𑀓𑁆𑀔𑀦𑁆𑀢𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁧𑁬. 𑀙𑀝𑁆𑀞𑁂 𑀮𑀼𑀤𑁆𑀤𑁄𑀢𑀺 𑀤𑀸𑀭𑀼𑀡𑁄 𑀓𑀓𑁆𑀔𑀴𑁄. 𑀯𑀺𑀧𑁆𑀧𑀝𑀺𑀲𑀸𑀭𑀻𑀢𑀺 𑀫𑀗𑁆𑀓𑀼𑀪𑀸𑀯𑁂𑀦 𑀲𑀫𑀦𑁆𑀦𑀸𑀕𑀢𑁄.

𑁭.𑀧𑀞𑀫𑀅𑀧𑀸𑀲𑀸𑀤𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁧𑁭. 𑀲𑀢𑁆𑀢𑀫𑁂 𑀅𑀧𑀸𑀲𑀸𑀤𑀺𑀓𑁂𑀢𑀺 𑀅𑀧𑀸𑀲𑀸𑀤𑀺𑀓𑁂𑀳𑀺 𑀓𑀸𑀬𑀓𑀫𑁆𑀫𑀸𑀤𑀻𑀳𑀺 𑀲𑀫𑀦𑁆𑀦𑀸𑀕𑀢𑁂. 𑀧𑀸𑀲𑀸𑀤𑀺𑀓𑁂𑀢𑀺 𑀧𑀲𑀸𑀤𑀸𑀯𑀳𑁂 𑀧𑀭𑀺𑀲𑀼𑀤𑁆𑀥𑀲𑀫𑀸𑀘𑀸𑀭𑁂. 𑀅𑀝𑁆𑀞𑀫𑀦𑀯𑀫𑀸𑀦𑀺 𑀉𑀢𑁆𑀢𑀸𑀦𑀢𑁆𑀣𑀸𑀦𑁂𑀯.

𑁧𑁦. 𑀫𑀥𑀼𑀭𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁨𑁦. 𑀤𑀲𑀫𑁂 𑀧𑀜𑁆𑀘𑀺𑀫𑁂, 𑀪𑀺𑀓𑁆𑀔𑀯𑁂, 𑀆𑀤𑀻𑀦𑀯𑀸 𑀫𑀥𑀼𑀭𑀸𑀬𑀦𑁆𑀢𑀺 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑁄 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀫𑀥𑀼𑀭𑀸𑀦𑀕𑀭𑀁 𑀲𑀫𑁆𑀧𑀸𑀧𑀼𑀡𑀺𑀢𑁆𑀯𑀸 𑀅𑀦𑁆𑀢𑁄𑀦𑀕𑀭𑀁 𑀧𑀯𑀺𑀲𑀺𑀢𑀼𑀁 𑀆𑀭𑀪𑀺. 𑀅𑀣𑁂𑀓𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀸 𑀬𑀓𑁆𑀔𑀺𑀦𑀻 𑀅𑀘𑁂𑀮𑀸 𑀳𑀼𑀢𑁆𑀯𑀸 𑀤𑁆𑀯𑁂 𑀳𑀢𑁆𑀣𑁂 𑀧𑀲𑀸𑀭𑁂𑀢𑁆𑀯𑀸 𑀚𑀺𑀯𑁆𑀳𑀁 𑀦𑀺𑀮𑁆𑀮𑀸𑀮𑁂𑀢𑁆𑀯𑀸 𑀤𑀲𑀩𑀮𑀲𑁆𑀲 𑀧𑀼𑀭𑀢𑁄 𑀅𑀝𑁆𑀞𑀸𑀲𑀺. 𑀲𑀢𑁆𑀣𑀸 𑀅𑀦𑁆𑀢𑁄𑀦𑀕𑀭𑀁 𑀅𑀧𑁆𑀧𑀯𑀺𑀲𑀺𑀢𑁆𑀯𑀸 𑀢𑀢𑁄𑀯 𑀦𑀺𑀓𑁆𑀔𑀫𑀺𑀢𑁆𑀯𑀸 𑀯𑀺𑀳𑀸𑀭𑀁 𑀅𑀕𑀫𑀸𑀲𑀺. 𑀫𑀳𑀸𑀚𑀦𑁄 𑀔𑀸𑀤𑀦𑀻𑀬𑀪𑁄𑀚𑀦𑀻𑀬𑀜𑁆𑀘𑁂𑀯 𑀲𑀓𑁆𑀓𑀸𑀭𑀲𑀫𑁆𑀫𑀸𑀦𑀜𑁆𑀘 𑀆𑀤𑀸𑀬 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀤𑀸𑀦𑀁 𑀅𑀤𑀸𑀲𑀺. 𑀲𑀢𑁆𑀣𑀸 𑀢𑀲𑁆𑀲 𑀦𑀕𑀭𑀲𑁆𑀲 𑀦𑀺𑀕𑁆𑀕𑀡𑁆𑀳𑀦𑀢𑁆𑀣𑀸𑀬 𑀇𑀫𑀁 𑀲𑀼𑀢𑁆𑀢𑀁 𑀆𑀭𑀪𑀺. 𑀢𑀢𑁆𑀣 𑀯𑀺𑀲𑀫𑀸𑀢𑀺 𑀦 𑀲𑀫𑀢𑀮𑀸. 𑀩𑀳𑀼𑀭𑀚𑀸𑀢𑀺 𑀯𑀸𑀢𑀧𑀳𑀭𑀡𑀓𑀸𑀮𑁂 𑀉𑀤𑁆𑀥𑀢𑁂𑀦 𑀭𑀚𑀓𑁆𑀔𑀦𑁆𑀥𑁂𑀦 𑀧𑀭𑀺𑀬𑁄𑀦𑀤𑁆𑀥𑀸 𑀯𑀺𑀬 𑀳𑁄𑀢𑀺. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀅𑀓𑁆𑀓𑁄𑀲𑀓𑀯𑀕𑁆𑀕𑁄 𑀤𑀼𑀢𑀺𑀬𑁄.

(𑁨𑁩) 𑁩. 𑀤𑀻𑀖𑀘𑀸𑀭𑀺𑀓𑀯𑀕𑁆𑀕𑁄

𑁧. 𑀧𑀞𑀫𑀤𑀻𑀖𑀘𑀸𑀭𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁨𑁧. 𑀢𑀢𑀺𑀬𑀲𑁆𑀲 𑀧𑀞𑀫𑁂 𑀅𑀦𑀯𑀢𑁆𑀣𑀘𑀸𑀭𑀺𑀓𑀦𑁆𑀢𑀺 𑀅𑀯𑀯𑀢𑁆𑀣𑀺𑀢𑀘𑀸𑀭𑀺𑀓𑀁. 𑀲𑀼𑀢𑀁 𑀦 𑀧𑀭𑀺𑀬𑁄𑀤𑀧𑁂𑀢𑀻𑀢𑀺 𑀬𑀫𑁆𑀧𑀺𑀲𑁆𑀲 𑀲𑀼𑀢𑀁 𑀅𑀢𑁆𑀣𑀺, 𑀢𑀁 𑀧𑀭𑀺𑀬𑁄𑀤𑀧𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀲𑀼𑀢𑁂𑀦𑁂𑀓𑀘𑁆𑀘𑁂𑀦 𑀅𑀯𑀺𑀲𑀸𑀭𑀤𑁄 𑀳𑁄𑀢𑀻𑀢𑀺 𑀣𑁄𑀓𑀣𑁄𑀓𑁂𑀦 𑀲𑀼𑀢𑁂𑀦 𑀯𑀺𑀚𑁆𑀚𑀫𑀸𑀦𑁂𑀦𑀸𑀧𑀺 𑀜𑀸𑀡𑁂𑀦 𑀲𑁄𑀫𑀦𑀲𑁆𑀲𑀧𑁆𑀧𑀢𑁆𑀢𑁄 𑀦 𑀳𑁄𑀢𑀺. 𑀲𑀫𑀯𑀢𑁆𑀣𑀘𑀸𑀭𑁂𑀢𑀺 𑀲𑀫𑀯𑀢𑁆𑀣𑀺𑀢𑀘𑀸𑀭𑁂. 𑀤𑀼𑀢𑀺𑀬𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑁩-𑁪. 𑀅𑀢𑀺𑀦𑀺𑀯𑀸𑀲𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁨𑁨𑁩-𑁨𑁨𑁪. 𑀢𑀢𑀺𑀬𑁂 𑀩𑀳𑀼𑀪𑀡𑁆𑀟𑁄𑀢𑀺 𑀩𑀳𑀼𑀧𑀭𑀺𑀓𑁆𑀔𑀸𑀭𑁄. 𑀩𑀳𑀼𑀪𑁂𑀲𑀚𑁆𑀚𑁄𑀢𑀺 𑀲𑀧𑁆𑀧𑀺𑀦𑀯𑀦𑀻𑀢𑀸𑀤𑀻𑀦𑀁 𑀩𑀳𑀼𑀢𑀸𑀬 𑀩𑀳𑀼𑀪𑁂𑀲𑀚𑁆𑀚𑁄. 𑀩𑁆𑀬𑀢𑁆𑀢𑁄𑀢𑀺 𑀩𑁆𑀬𑀸𑀲𑀢𑁆𑀢𑁄. 𑀲𑀁𑀲𑀝𑁆𑀞𑁄𑀢𑀺 𑀧𑀜𑁆𑀘𑀯𑀺𑀥𑁂𑀦 𑀲𑀁𑀲𑀕𑁆𑀕𑁂𑀦 𑀲𑀁𑀲𑀝𑁆𑀞𑁄 𑀳𑀼𑀢𑁆𑀯𑀸. 𑀅𑀦𑀦𑀼𑀮𑁄𑀫𑀺𑀓𑁂𑀦𑀸𑀢𑀺 𑀲𑀸𑀲𑀦𑀲𑁆𑀲 𑀅𑀦𑀦𑀼𑀘𑁆𑀙𑀯𑀺𑀓𑁂𑀦. 𑀘𑀢𑀼𑀢𑁆𑀣𑁂 𑀯𑀡𑁆𑀡𑀫𑀘𑁆𑀙𑀭𑀻𑀢𑀺 𑀕𑀼𑀡𑀫𑀘𑁆𑀙𑀭𑀻. 𑀥𑀫𑁆𑀫𑀫𑀘𑁆𑀙𑀭𑀻𑀢𑀺 𑀧𑀭𑀺𑀬𑀢𑁆𑀢𑀺𑀫𑀘𑁆𑀙𑀭𑀻.

𑁫-𑁬. 𑀓𑀼𑀮𑀽𑀧𑀓𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁨𑁨𑁫-𑁨𑁨𑁬. 𑀧𑀜𑁆𑀘𑀫𑁂 𑀅𑀦𑀸𑀫𑀦𑁆𑀢𑀘𑀸𑀭𑁂 𑀆𑀧𑀚𑁆𑀚𑀢𑀻𑀢𑀺 ‘‘𑀦𑀺𑀫𑀦𑁆𑀢𑀺𑀢𑁄 𑀲𑀪𑀢𑁆𑀢𑁄 𑀲𑀫𑀸𑀦𑁄 𑀲𑀦𑁆𑀢𑀁 𑀪𑀺𑀓𑁆𑀔𑀼𑀁 𑀅𑀦𑀸𑀧𑀼𑀘𑁆𑀙𑀸 𑀧𑀼𑀭𑁂𑀪𑀢𑁆𑀢𑀁 𑀯𑀸 𑀧𑀘𑁆𑀙𑀸𑀪𑀢𑁆𑀢𑀁 𑀯𑀸 𑀓𑀼𑀮𑁂𑀲𑀼 𑀘𑀸𑀭𑀺𑀢𑁆𑀢𑀁 𑀆𑀧𑀚𑁆𑀚𑁂𑀬𑁆𑀬𑀸’’𑀢𑀺 𑀲𑀺𑀓𑁆𑀔𑀸𑀧𑀤𑁂 (𑀧𑀸𑀭𑀸. 𑁨𑁯𑁪) 𑀯𑀼𑀢𑁆𑀢𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺. 𑀭𑀳𑁄 𑀦𑀺𑀲𑀚𑁆𑀚𑀸𑀬𑀸𑀢𑀺𑀆𑀤𑀻𑀦𑀺𑀧𑀺 𑀢𑁂𑀲𑀁 𑀢𑁂𑀲𑀁 𑀲𑀺𑀓𑁆𑀔𑀸𑀧𑀤𑀸𑀦𑀁 𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀙𑀝𑁆𑀞𑁂 𑀅𑀢𑀺𑀯𑁂𑀮𑀦𑁆𑀢𑀺 𑀅𑀢𑀺𑀓𑁆𑀓𑀦𑁆𑀢𑀧𑀫𑀸𑀡𑀓𑀸𑀮𑀁. 𑀲𑀢𑁆𑀢𑀫𑀁 𑀉𑀢𑁆𑀢𑀸𑀦𑀫𑁂𑀯.

𑁮. 𑀉𑀲𑁆𑀲𑀽𑀭𑀪𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁨𑁮. 𑀅𑀝𑁆𑀞𑀫𑁂 𑀉𑀲𑁆𑀲𑀽𑀭𑀪𑀢𑁆𑀢𑁂𑀢𑀺 𑀅𑀢𑀺𑀤𑀺𑀯𑀸𑀧𑀘𑀦𑀪𑀢𑁆𑀢𑁂. 𑀦 𑀓𑀸𑀮𑁂𑀦 𑀧𑀝𑀺𑀧𑀽𑀚𑁂𑀦𑁆𑀢𑀻𑀢𑀺 𑀬𑀸𑀕𑀼𑀓𑀸𑀮𑁂 𑀬𑀸𑀕𑀼𑀁, 𑀔𑀚𑁆𑀚𑀓𑀓𑀸𑀮𑁂 𑀔𑀚𑁆𑀚𑀓𑀁, 𑀪𑁄𑀚𑀦𑀓𑀸𑀮𑁂 𑀪𑁄𑀚𑀦𑀁 𑀅𑀧𑀘𑀦𑁆𑀢𑀸 𑀬𑀼𑀢𑁆𑀢𑀧𑁆𑀧𑀬𑀼𑀢𑁆𑀢𑀓𑀸𑀮𑀲𑁆𑀲 𑀅𑀢𑀺𑀦𑀸𑀫𑀺𑀢𑀢𑁆𑀢𑀸 𑀦 𑀓𑀸𑀮𑁂𑀦 𑀧𑀝𑀺𑀧𑀽𑀚𑁂𑀦𑁆𑀢𑀺, 𑀅𑀢𑁆𑀢𑀦𑁄 𑀘𑀺𑀢𑁆𑀢𑁂𑀦𑁂𑀯 𑀤𑁂𑀦𑁆𑀢𑀺 𑀦𑀸𑀫. 𑀢𑀢𑁄 𑀢𑁂𑀧𑀺 𑀢𑁂𑀲𑀼 𑀅𑀢𑁆𑀢𑀦𑁄 𑀕𑁂𑀳𑀁 𑀆𑀕𑀢𑁂𑀲𑀼 𑀢𑀣𑁂𑀯 𑀓𑀭𑁄𑀦𑁆𑀢𑀺. 𑀓𑀼𑀮𑀧𑀯𑁂𑀡𑀺𑀬𑀸 𑀆𑀕𑀢𑀸 𑀩𑀮𑀺𑀧𑀝𑀺𑀕𑁆𑀕𑀸𑀳𑀺𑀓𑀸 𑀤𑁂𑀯𑀢𑀸𑀧𑀺 𑀬𑀼𑀢𑁆𑀢𑀧𑁆𑀧𑀬𑀼𑀢𑁆𑀢𑀓𑀸𑀮𑁂𑀦 𑀮𑀸𑀪𑀁 𑀮𑀪𑀫𑀸𑀦𑀸𑀬𑁂𑀯 𑀭𑀓𑁆𑀔𑀦𑁆𑀢𑀺 𑀕𑁄𑀧𑀬𑀦𑁆𑀢𑀺 𑀧𑀻𑀴𑀁 𑀅𑀓𑀢𑁆𑀯𑀸. 𑀅𑀓𑀸𑀮𑁂 𑀮𑀪𑀫𑀸𑀦𑀸 𑀧𑀦 ‘‘𑀇𑀫𑁂 𑀅𑀫𑁆𑀳𑁂𑀲𑀼 𑀅𑀦𑀸𑀤𑀭𑀸’’𑀢𑀺 𑀆𑀭𑀓𑁆𑀔𑀁 𑀦 𑀓𑀭𑁄𑀦𑁆𑀢𑀺.

𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀧𑀺 ‘‘𑀏𑀢𑁂𑀲𑀁 𑀕𑁂𑀳𑁂 𑀪𑁄𑀚𑀦𑀯𑁂𑀮𑀸𑀬 𑀪𑁄𑀚𑀦𑀁 𑀦 𑀳𑁄𑀢𑀺, 𑀞𑀺𑀢𑀫𑀚𑁆𑀛𑀦𑁆𑀳𑀺𑀓𑁂 𑀤𑁂𑀦𑁆𑀢𑀻’’𑀢𑀺 𑀫𑀗𑁆𑀕𑀮𑀸𑀫𑀗𑁆𑀕𑀮𑁂𑀲𑀼 𑀓𑀸𑀢𑀩𑁆𑀩𑀁 𑀦 𑀓𑀭𑁄𑀦𑁆𑀢𑀺. 𑀯𑀺𑀫𑀼𑀔𑀸 𑀓𑀫𑁆𑀫𑀁 𑀓𑀭𑁄𑀦𑁆𑀢𑀻𑀢𑀺 ‘‘𑀧𑀸𑀢𑁄 𑀓𑀺𑀜𑁆𑀘𑀺 𑀦 𑀮𑀪𑀸𑀫, 𑀔𑀼𑀤𑀸𑀬 𑀧𑀝𑀺𑀧𑀻𑀴𑀺𑀢𑀸 𑀓𑀫𑁆𑀫𑀁 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀫𑀸’’𑀢𑀺 𑀓𑀫𑁆𑀫𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀦𑀺𑀲𑀻𑀤𑀦𑁆𑀢𑀺. 𑀅𑀦𑁄𑀚𑀯𑀦𑁆𑀢𑀁 𑀳𑁄𑀢𑀻𑀢𑀺 𑀅𑀓𑀸𑀮𑁂 𑀪𑀼𑀢𑁆𑀢𑀁 𑀑𑀚𑀁 𑀳𑀭𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀲𑀼𑀓𑁆𑀓𑀧𑀓𑁆𑀔𑁄 𑀯𑀼𑀢𑁆𑀢𑀯𑀺𑀧𑀮𑁆𑀮𑀸𑀲𑁂𑀦 𑀯𑁂𑀤𑀺𑀢𑀩𑁆𑀩𑁄.

𑁯. 𑀧𑀞𑀫𑀓𑀡𑁆𑀳𑀲𑀧𑁆𑀧𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁨𑁯. 𑀦𑀯𑀫𑁂 𑀲𑀪𑀻𑀭𑀽𑀢𑀺 𑀲𑀦𑀺𑀤𑁆𑀤𑁄 𑀫𑀳𑀸𑀦𑀺𑀤𑁆𑀤𑀁 𑀦𑀺𑀤𑁆𑀤𑀸𑀬𑀢𑀺. 𑀲𑀧𑁆𑀧𑀝𑀺𑀪𑀬𑁄𑀢𑀺 𑀢𑀁 𑀦𑀺𑀲𑁆𑀲𑀸𑀬 𑀪𑀬𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀫𑀸 𑀲𑀧𑁆𑀧𑀝𑀺𑀪𑀬𑁄. 𑀫𑀺𑀢𑁆𑀢𑀤𑀼𑀩𑁆𑀪𑀻𑀢𑀺 𑀧𑀸𑀦𑀪𑁄𑀚𑀦𑀤𑀸𑀬𑀓𑀫𑁆𑀧𑀺 𑀫𑀺𑀢𑁆𑀢𑀁 𑀤𑀼𑀩𑁆𑀪𑀢𑀺 𑀳𑀺𑀁𑀲𑀢𑀺. 𑀫𑀸𑀢𑀼𑀕𑀸𑀫𑁂𑀧𑀺 𑀏𑀲𑁂𑀯 𑀦𑀬𑁄.

𑁧𑁦. 𑀤𑀼𑀢𑀺𑀬𑀓𑀡𑁆𑀳𑀲𑀧𑁆𑀧𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁩𑁦. 𑀤𑀲𑀫𑁂 𑀖𑁄𑀭𑀯𑀺𑀲𑁄𑀢𑀺 𑀓𑀓𑁆𑀔𑀴𑀯𑀺𑀲𑁄. 𑀤𑀼𑀚𑁆𑀚𑀺𑀯𑁆𑀳𑁄𑀢𑀺 𑀤𑁆𑀯𑀺𑀥𑀸 𑀪𑀺𑀦𑁆𑀦𑀚𑀺𑀯𑁆𑀳𑁄. 𑀖𑁄𑀭𑀯𑀺𑀲𑀢𑀸𑀢𑀺 𑀖𑁄𑀭𑀯𑀺𑀲𑀢𑀸𑀬. 𑀲𑁂𑀲𑀤𑁆𑀯𑀬𑁂𑀧𑀺 𑀏𑀲𑁂𑀯 𑀦𑀬𑁄.

𑀤𑀻𑀖𑀘𑀸𑀭𑀺𑀓𑀯𑀕𑁆𑀕𑁄 𑀢𑀢𑀺𑀬𑁄.

(𑁨𑁪) 𑁪. 𑀆𑀯𑀸𑀲𑀺𑀓𑀯𑀕𑁆𑀕𑁄

𑁧. 𑀆𑀯𑀸𑀲𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁩𑁧. 𑀘𑀢𑀼𑀢𑁆𑀣𑀲𑁆𑀲 𑀧𑀞𑀫𑁂 𑀦 𑀆𑀓𑀧𑁆𑀧𑀲𑀫𑁆𑀧𑀦𑁆𑀦𑁄𑀢𑀺 𑀲𑀫𑀡𑀸𑀓𑀧𑁆𑀧𑁂𑀦 𑀲𑀫𑁆𑀧𑀦𑁆𑀦𑁄. 𑀅𑀪𑀸𑀯𑀦𑀻𑀬𑁄 𑀳𑁄𑀢𑀻𑀢𑀺 𑀯𑀟𑁆𑀠𑀦𑀻𑀬𑁄 𑀦 𑀳𑁄𑀢𑀺. 𑀤𑀼𑀢𑀺𑀬𑀁 𑀉𑀢𑁆𑀢𑀸𑀦𑀫𑁂𑀯.

𑁩. 𑀲𑁄𑀪𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁩𑁩. 𑀢𑀢𑀺𑀬𑁂 𑀧𑀝𑀺𑀩𑀮𑁄𑀢𑀺 𑀓𑀸𑀬𑀩𑀮𑁂𑀦 𑀘 𑀜𑀸𑀡𑀩𑀮𑁂𑀦 𑀘 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀧𑀝𑀺𑀩𑀮𑁄.

𑁪. 𑀩𑀳𑀽𑀧𑀓𑀸𑀭𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁩𑁪. 𑀘𑀢𑀼𑀢𑁆𑀣𑁂 𑀔𑀡𑁆𑀟𑀨𑀼𑀮𑁆𑀮𑀦𑁆𑀢𑀺 𑀧𑀢𑀺𑀢𑀝𑁆𑀞𑀸𑀦𑀜𑁆𑀘 𑀪𑀺𑀦𑁆𑀦𑀝𑁆𑀞𑀸𑀦𑀜𑁆𑀘. 𑀧𑀝𑀺𑀲𑀗𑁆𑀔𑀭𑁄𑀢𑀻𑀢𑀺 𑀧𑀝𑀺𑀧𑀸𑀓𑀢𑀺𑀓𑀁 𑀓𑀭𑁄𑀢𑀺. 𑀆𑀭𑁄𑀘𑁂𑀢𑀻𑀢𑀺 𑀇𑀤𑀁 𑀧𑀯𑀸𑀭𑀺𑀢𑀓𑀼𑀮𑀸𑀦𑀁 𑀯𑀲𑁂𑀦 𑀯𑀼𑀢𑁆𑀢𑀁.

𑁫. 𑀅𑀦𑀼𑀓𑀫𑁆𑀧𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁩𑁫. 𑀧𑀜𑁆𑀘𑀫𑁂 𑀅𑀥𑀺𑀲𑀻𑀮𑁂𑀲𑀽𑀢𑀺 𑀧𑀜𑁆𑀘𑀲𑀼 𑀲𑀻𑀮𑁂𑀲𑀼. 𑀥𑀫𑁆𑀫𑀤𑀲𑁆𑀲𑀦𑁂 𑀦𑀺𑀯𑁂𑀲𑁂𑀢𑀻𑀢𑀺 𑀘𑀢𑀼𑀲𑀘𑁆𑀘𑀥𑀫𑁆𑀫𑀤𑀲𑁆𑀲𑀦𑁂 𑀧𑀢𑀺𑀝𑁆𑀞𑀸𑀧𑁂𑀢𑀺. 𑀅𑀭𑀳𑀕𑁆𑀕𑀢𑀦𑁆𑀢𑀺 𑀲𑀩𑁆𑀩𑀲𑀓𑁆𑀓𑀸𑀭𑀸𑀦𑀁 𑀅𑀭𑀳𑁂 𑀭𑀢𑀦𑀢𑁆𑀢𑀬𑁂𑀯 𑀕𑀢𑀁, 𑀢𑀻𑀲𑀼 𑀯𑀢𑁆𑀣𑀽𑀲𑀼 𑀕𑀭𑀼𑀘𑀺𑀢𑁆𑀢𑀻𑀓𑀸𑀭𑀁 𑀉𑀧𑀝𑁆𑀞𑀧𑁂𑀣𑀸𑀢𑀺 𑀅𑀢𑁆𑀣𑁄. 𑀙𑀝𑁆𑀞𑀁 𑀉𑀢𑁆𑀢𑀸𑀦𑀫𑁂𑀯.

𑁭. 𑀤𑀼𑀢𑀺𑀬𑀅𑀯𑀡𑁆𑀡𑀸𑀭𑀳𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁩𑁭. 𑀲𑀢𑁆𑀢𑀫𑁂 𑀆𑀯𑀸𑀲𑀧𑀮𑀺𑀕𑁂𑀥𑀻𑀢𑀺 𑀆𑀯𑀸𑀲𑀁 𑀩𑀮𑀯𑀕𑀺𑀤𑁆𑀥𑀺𑀯𑀲𑁂𑀦 𑀕𑀺𑀮𑀺𑀢𑁆𑀯𑀸 𑀯𑀺𑀬 𑀞𑀺𑀢𑁄. 𑀲𑁂𑀲𑀁 𑀲𑀩𑁆𑀩𑀁 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀆𑀯𑀸𑀲𑀺𑀓𑀯𑀕𑁆𑀕𑁄 𑀘𑀢𑀼𑀢𑁆𑀣𑁄.

(𑁨𑁫) 𑁫. 𑀤𑀼𑀘𑁆𑀘𑀭𑀺𑀢𑀯𑀕𑁆𑀕𑁄

𑁧. 𑀧𑀞𑀫𑀤𑀼𑀘𑁆𑀘𑀭𑀺𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁪𑁧. 𑀧𑀜𑁆𑀘𑀫𑀲𑁆𑀲 𑀧𑀞𑀫𑁂 𑀤𑀼𑀘𑁆𑀘𑀭𑀺𑀢𑁂 𑀲𑀼𑀘𑀭𑀺𑀢𑁂𑀢𑀺 𑀇𑀤𑀁 𑀅𑀪𑁂𑀤𑀢𑁄 𑀯𑀼𑀢𑁆𑀢𑀁, 𑀓𑀸𑀬𑀤𑀼𑀘𑁆𑀘𑀭𑀺𑀢𑁂𑀢𑀺𑀆𑀤𑀺 𑀓𑀸𑀬𑀤𑁆𑀯𑀸𑀭𑀸𑀤𑀻𑀦𑀁 𑀯𑀲𑁂𑀦 𑀪𑁂𑀤𑀢𑁄. 𑀲𑀤𑁆𑀥𑀫𑁆𑀫𑀸𑀢𑀺 𑀤𑀲𑀓𑀼𑀲𑀮𑀓𑀫𑁆𑀫𑀧𑀣𑀥𑀫𑁆𑀫𑀢𑁄. 𑀅𑀲𑀤𑁆𑀥𑀫𑁆𑀫𑁂𑀢𑀺 𑀅𑀓𑀼𑀲𑀮𑀓𑀫𑁆𑀫𑀧𑀣𑀲𑀗𑁆𑀔𑀸𑀢𑁂 𑀅𑀲𑁆𑀲𑀤𑁆𑀥𑀫𑁆𑀫𑁂.

𑁯. 𑀲𑀺𑀯𑀣𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁪𑁯. 𑀦𑀯𑀫𑁂 𑀲𑀺𑀯𑀣𑀺𑀓𑀸𑀬𑀸𑀢𑀺 𑀲𑀼𑀲𑀸𑀦𑁂. 𑀆𑀭𑁄𑀤𑀦𑀸𑀢𑀺 𑀆𑀭𑁄𑀤𑀦𑀝𑁆𑀞𑀸𑀦𑀁. 𑀅𑀲𑀼𑀘𑀺𑀦𑀸𑀢𑀺 𑀚𑀺𑀕𑀼𑀘𑁆𑀙𑀦𑀻𑀬𑁂𑀦.

𑁧𑁦. 𑀧𑀼𑀕𑁆𑀕𑀮𑀧𑁆𑀧𑀲𑀸𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁫𑁦. 𑀤𑀲𑀫𑁂 𑀧𑀼𑀕𑁆𑀕𑀮𑀧𑁆𑀧𑀲𑀸𑀤𑁂𑀢𑀺 𑀏𑀓𑀧𑀼𑀕𑁆𑀕𑀮𑀲𑁆𑀫𑀺𑀁 𑀉𑀧𑁆𑀧𑀦𑁆𑀦𑀧𑁆𑀧𑀲𑀸𑀤𑁂. 𑀅𑀦𑁆𑀢𑁂 𑀦𑀺𑀲𑀻𑀤𑀸𑀧𑁂𑀢𑀻𑀢𑀺 𑀪𑀺𑀓𑁆𑀔𑀽𑀦𑀁 𑀆𑀲𑀦𑀧𑀭𑀺𑀬𑀦𑁆𑀢𑁂 𑀦𑀺𑀲𑀻𑀤𑀸𑀧𑁂𑀢𑀺. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀤𑀼𑀘𑁆𑀘𑀭𑀺𑀢𑀯𑀕𑁆𑀕𑁄 𑀧𑀜𑁆𑀘𑀫𑁄.

𑀧𑀜𑁆𑀘𑀫𑀧𑀡𑁆𑀡𑀸𑀲𑀓𑀁 𑀦𑀺𑀝𑁆𑀞𑀺𑀢𑀁.