𑁨. 𑀤𑀼𑀢𑀺𑀬𑀧𑀡𑁆𑀡𑀸𑀲𑀓𑀁

(𑁬) 𑁧. 𑀦𑀻𑀯𑀭𑀡𑀯𑀕𑁆𑀕𑁄

𑁧. 𑀆𑀯𑀭𑀡𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁧. 𑀤𑀼𑀢𑀺𑀬𑀲𑁆𑀲 𑀧𑀞𑀫𑁂 𑀆𑀯𑀭𑀡𑀯𑀲𑁂𑀦 𑀆𑀯𑀭𑀡𑀸. 𑀦𑀻𑀯𑀭𑀡𑀯𑀲𑁂𑀦 𑀦𑀻𑀯𑀭𑀡𑀸. 𑀘𑁂𑀢𑁄 𑀅𑀚𑁆𑀛𑀸𑀭𑀼𑀳𑀦𑁆𑀢𑀻𑀢𑀺 𑀘𑁂𑀢𑀲𑁄 𑀅𑀚𑁆𑀛𑀸𑀭𑀼𑀳𑀸. 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀜𑁆𑀘 𑀫𑀕𑁆𑀕𑀧𑀜𑁆𑀜𑀜𑁆𑀘 𑀉𑀧𑁆𑀧𑀢𑁆𑀢𑀺𑀦𑀺𑀯𑀸𑀭𑀡𑀝𑁆𑀞𑁂𑀦 𑀤𑀼𑀩𑁆𑀩𑀮𑀁 𑀓𑀭𑁄𑀦𑁆𑀢𑀻𑀢𑀺 𑀧𑀜𑁆𑀜𑀸𑀬 𑀤𑀼𑀩𑁆𑀩𑀮𑀻𑀓𑀭𑀡𑀸. 𑀬𑀸 𑀯𑀸 𑀏𑀢𑁂𑀳𑀺 𑀲𑀤𑁆𑀥𑀺𑀁 𑀯𑁄𑀓𑀺𑀡𑁆𑀡𑀸 𑀧𑀜𑁆𑀜𑀸 𑀉𑀧𑁆𑀧𑀚𑁆𑀚𑀢𑀺, 𑀢𑀁 𑀤𑀼𑀩𑁆𑀩𑀮𑀁 𑀓𑀭𑁄𑀦𑁆𑀢𑀻𑀢𑀺𑀧𑀺 𑀧𑀜𑁆𑀜𑀸𑀬 𑀤𑀼𑀩𑁆𑀩𑀮𑀻𑀓𑀭𑀡𑀸. 𑀅𑀩𑀮𑀸𑀬𑀸𑀢𑀺 𑀧𑀜𑁆𑀘𑀦𑀻𑀯𑀭𑀡𑀧𑀭𑀺𑀬𑁄𑀦𑀤𑁆𑀥𑀢𑁆𑀢𑀸 𑀅𑀧𑀕𑀢𑀩𑀮𑀸𑀬. 𑀉𑀢𑁆𑀢𑀭𑀺 𑀯𑀸 𑀫𑀦𑀼𑀲𑁆𑀲𑀥𑀫𑁆𑀫𑀸 𑀅𑀮𑀫𑀭𑀺𑀬𑀜𑀸𑀡𑀤𑀲𑁆𑀲𑀦𑀯𑀺𑀲𑁂𑀲𑀦𑁆𑀢𑀺 𑀤𑀲𑀓𑀼𑀲𑀮𑀓𑀫𑁆𑀫𑀧𑀣𑀲𑀗𑁆𑀔𑀸𑀢𑀸 𑀫𑀦𑀼𑀲𑁆𑀲𑀥𑀫𑁆𑀫𑀸 𑀉𑀢𑁆𑀢𑀭𑀺 𑀅𑀭𑀺𑀬𑀪𑀸𑀯𑀁 𑀓𑀸𑀢𑀼𑀁 𑀲𑀫𑀢𑁆𑀣𑀁 𑀜𑀸𑀡𑀤𑀲𑁆𑀲𑀦𑀯𑀺𑀲𑁂𑀲𑀁. 𑀳𑀸𑀭𑀳𑀸𑀭𑀺𑀦𑀻𑀢𑀺 𑀳𑀭𑀺𑀢𑀩𑁆𑀩𑀁 𑀳𑀭𑀺𑀢𑀼𑀁 𑀲𑀫𑀢𑁆𑀣𑀸. 𑀦𑀗𑁆𑀕𑀮𑀫𑀼𑀔𑀸𑀦𑀻𑀢𑀺 𑀫𑀸𑀢𑀺𑀓𑀸𑀫𑀼𑀔𑀸𑀦𑀺. 𑀢𑀸𑀦𑀺 𑀳𑀺 𑀦𑀗𑁆𑀕𑀮𑀲𑀭𑀺𑀓𑁆𑀔𑀓𑀢𑁆𑀢𑀸 𑀦𑀗𑁆𑀕𑀮𑁂𑀳𑀺 𑀘 𑀔𑀢𑀢𑁆𑀢𑀸 𑀦𑀗𑁆𑀕𑀮𑀫𑀼𑀔𑀸𑀦𑀻𑀢𑀺 𑀯𑀼𑀘𑁆𑀘𑀦𑁆𑀢𑀺.

𑀏𑀯𑀫𑁂𑀯 𑀔𑁄𑀢𑀺 𑀏𑀢𑁆𑀣 𑀲𑁄𑀢𑀁 𑀯𑀺𑀬 𑀯𑀺𑀧𑀲𑁆𑀲𑀦𑀸𑀜𑀸𑀡𑀁 𑀤𑀝𑁆𑀞𑀩𑁆𑀩𑀁, 𑀉𑀪𑀢𑁄 𑀦𑀗𑁆𑀕𑀮𑀫𑀼𑀔𑀸𑀦𑀁 𑀯𑀺𑀯𑀭𑀡𑀓𑀸𑀮𑁄 𑀯𑀺𑀬 𑀙𑀲𑀼 𑀤𑁆𑀯𑀸𑀭𑁂𑀲𑀼 𑀲𑀁𑀯𑀭𑀲𑁆𑀲 𑀯𑀺𑀲𑁆𑀲𑀝𑁆𑀞𑀓𑀸𑀮𑁄, 𑀫𑀚𑁆𑀛𑁂𑀦𑀤𑀺𑀬𑀸 𑀭𑀼𑀓𑁆𑀔𑀧𑀸𑀤𑁂 𑀓𑁄𑀝𑁆𑀝𑁂𑀢𑁆𑀯𑀸 𑀧𑀮𑀸𑀮𑀢𑀺𑀡𑀫𑀢𑁆𑀢𑀺𑀓𑀸𑀳𑀺 𑀆𑀯𑀭𑀡𑁂 𑀓𑀢𑁂 𑀉𑀤𑀓𑀲𑁆𑀲 𑀯𑀺𑀓𑁆𑀔𑀺𑀢𑁆𑀢𑀯𑀺𑀲𑀝𑀩𑁆𑀬𑀸𑀤𑀺𑀡𑁆𑀡𑀓𑀸𑀮𑁄 𑀯𑀺𑀬 𑀧𑀜𑁆𑀘𑀳𑀺 𑀦𑀻𑀯𑀭𑀡𑁂𑀳𑀺 𑀧𑀭𑀺𑀬𑁄𑀦𑀤𑁆𑀥𑀓𑀸𑀮𑁄, 𑀏𑀯𑀁 𑀆𑀯𑀭𑀡𑁂 𑀓𑀢𑁂 𑀯𑀺𑀳𑀢𑀯𑁂𑀕𑀲𑁆𑀲 𑀉𑀤𑀓𑀲𑁆𑀲 𑀢𑀺𑀡𑀧𑀮𑀸𑀮𑀸𑀤𑀻𑀦𑀺 𑀧𑀭𑀺𑀓𑀟𑁆𑀠𑀺𑀢𑁆𑀯𑀸 𑀲𑀫𑀼𑀤𑁆𑀤𑀁 𑀧𑀸𑀧𑀼𑀡𑀺𑀢𑀼𑀁 𑀅𑀲𑀫𑀢𑁆𑀣𑀓𑀸𑀮𑁄 𑀯𑀺𑀬 𑀯𑀺𑀧𑀲𑁆𑀲𑀦𑀸𑀜𑀸𑀡𑁂𑀦 𑀲𑀩𑁆𑀩𑀸𑀓𑀼𑀲𑀮𑁂 𑀯𑀺𑀤𑁆𑀥𑀁𑀲𑁂𑀢𑁆𑀯𑀸 𑀦𑀺𑀩𑁆𑀩𑀸𑀦𑀲𑀸𑀕𑀭𑀁 𑀧𑀸𑀧𑀼𑀡𑀺𑀢𑀼𑀁 𑀅𑀲𑀫𑀢𑁆𑀣𑀓𑀸𑀮𑁄 𑀯𑁂𑀤𑀺𑀢𑀩𑁆𑀩𑁄. 𑀲𑀼𑀓𑁆𑀓𑀧𑀓𑁆𑀔𑁂 𑀯𑀼𑀢𑁆𑀢𑀯𑀺𑀧𑀮𑁆𑀮𑀸𑀲𑁂𑀦 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸. 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀯𑀝𑁆𑀝𑀯𑀺𑀯𑀝𑁆𑀝𑀁 𑀓𑀣𑀺𑀢𑀁. 𑀤𑀼𑀢𑀺𑀬𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑁩. 𑀧𑀥𑀸𑀦𑀺𑀬𑀗𑁆𑀕𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁩. 𑀢𑀢𑀺𑀬𑁂 𑀧𑀥𑀸𑀦𑀺𑀬𑀗𑁆𑀕𑀸𑀦𑀻𑀢𑀺 𑀧𑀥𑀸𑀦𑀁 𑀯𑀼𑀘𑁆𑀘𑀢𑀺 𑀧𑀤𑀳𑀦𑀪𑀸𑀯𑁄, 𑀧𑀥𑀸𑀦𑀫𑀲𑁆𑀲 𑀅𑀢𑁆𑀣𑀻𑀢𑀺 𑀧𑀥𑀸𑀦𑀺𑀬𑁄, 𑀧𑀥𑀸𑀦𑀺𑀬𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀗𑁆𑀕𑀸𑀦𑀻𑀢𑀺 𑀧𑀥𑀸𑀦𑀺𑀬𑀗𑁆𑀕𑀸𑀦𑀺. 𑀲𑀤𑁆𑀥𑁄𑀢𑀺 𑀲𑀤𑁆𑀥𑀸𑀬 𑀲𑀫𑀦𑁆𑀦𑀸𑀕𑀢𑁄. 𑀲𑀤𑁆𑀥𑀸 𑀧𑀦𑁂𑀲𑀸 𑀆𑀕𑀫𑀲𑀤𑁆𑀥𑀸 𑀅𑀥𑀺𑀕𑀫𑀲𑀤𑁆𑀥𑀸 𑀑𑀓𑀧𑁆𑀧𑀦𑀲𑀤𑁆𑀥𑀸 𑀧𑀲𑀸𑀤𑀲𑀤𑁆𑀥𑀸𑀢𑀺 𑀘𑀢𑀼𑀩𑁆𑀩𑀺𑀥𑀸. 𑀢𑀢𑁆𑀣 𑀲𑀩𑁆𑀩𑀜𑁆𑀜𑀼𑀩𑁄𑀥𑀺𑀲𑀢𑁆𑀢𑀸𑀦𑀁 𑀲𑀤𑁆𑀥𑀸, 𑀅𑀪𑀺𑀦𑀻𑀳𑀸𑀭𑀢𑁄 𑀧𑀝𑁆𑀞𑀸𑀬 𑀆𑀕𑀢𑀢𑁆𑀢𑀸 𑀆𑀕𑀫𑀲𑀤𑁆𑀥𑀸 𑀦𑀸𑀫. 𑀅𑀭𑀺𑀬𑀲𑀸𑀯𑀓𑀸𑀦𑀁 𑀧𑀝𑀺𑀯𑁂𑀥𑁂𑀦 𑀅𑀥𑀺𑀕𑀢𑀢𑁆𑀢𑀸 𑀅𑀥𑀺𑀕𑀫𑀲𑀤𑁆𑀥𑀸 𑀦𑀸𑀫. 𑀩𑀼𑀤𑁆𑀥𑁄 𑀥𑀫𑁆𑀫𑁄 𑀲𑀗𑁆𑀖𑁄𑀢𑀺 𑀯𑀼𑀢𑁆𑀢𑁂 𑀅𑀘𑀮𑀪𑀸𑀯𑁂𑀦 𑀑𑀓𑀧𑁆𑀧𑀦𑀁 𑀑𑀓𑀧𑁆𑀧𑀦𑀲𑀤𑁆𑀥𑀸 𑀦𑀸𑀫. 𑀧𑀲𑀸𑀤𑀼𑀧𑁆𑀧𑀢𑁆𑀢𑀺 𑀧𑀲𑀸𑀤𑀲𑀤𑁆𑀥𑀸 𑀦𑀸𑀫. 𑀇𑀥 𑀑𑀓𑀧𑁆𑀧𑀦𑀲𑀤𑁆𑀥𑀸 𑀅𑀥𑀺𑀧𑁆𑀧𑁂𑀢𑀸. 𑀩𑁄𑀥𑀺𑀦𑁆𑀢𑀺 𑀘𑀢𑀼𑀫𑀕𑁆𑀕𑀜𑀸𑀡𑀁. 𑀢𑀁 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑀁 𑀢𑀣𑀸𑀕𑀢𑁂𑀦𑀸𑀢𑀺 𑀲𑀤𑁆𑀤𑀳𑀢𑀺. 𑀤𑁂𑀲𑀦𑀸𑀲𑀻𑀲𑀫𑁂𑀯 𑀘𑁂𑀢𑀁, 𑀇𑀫𑀺𑀦𑀸 𑀧𑀦 𑀅𑀗𑁆𑀕𑁂𑀦 𑀢𑀻𑀲𑀼𑀧𑀺 𑀭𑀢𑀦𑁂𑀲𑀼 𑀲𑀤𑁆𑀥𑀸 𑀅𑀥𑀺𑀧𑁆𑀧𑁂𑀢𑀸. 𑀬𑀲𑁆𑀲 𑀳𑀺 𑀩𑀼𑀤𑁆𑀥𑀸𑀤𑀻𑀲𑀼 𑀧𑀲𑀸𑀤𑁄 𑀩𑀮𑀯𑀸, 𑀢𑀲𑁆𑀲 𑀧𑀥𑀸𑀦𑀯𑀻𑀭𑀺𑀬𑀁 𑀇𑀚𑁆𑀛𑀢𑀺.

𑀅𑀧𑁆𑀧𑀸𑀩𑀸𑀥𑁄𑀢𑀺 𑀅𑀭𑁄𑀕𑁄. 𑀅𑀧𑁆𑀧𑀸𑀢𑀗𑁆𑀓𑁄𑀢𑀺 𑀦𑀺𑀤𑁆𑀤𑀼𑀓𑁆𑀔𑁄. 𑀲𑀫𑀯𑁂𑀧𑀸𑀓𑀺𑀦𑀺𑀬𑀸𑀢𑀺 𑀲𑀫𑀯𑀺𑀧𑀸𑀓𑀺𑀦𑀺𑀬𑀸. 𑀕𑀳𑀡𑀺𑀬𑀸𑀢𑀺 𑀓𑀫𑁆𑀫𑀚𑀢𑁂𑀚𑁄𑀥𑀸𑀢𑀼𑀬𑀸. 𑀦𑀸𑀢𑀺𑀲𑀻𑀢𑀸𑀬 𑀦𑀸𑀘𑁆𑀘𑀼𑀡𑁆𑀳𑀸𑀬𑀸𑀢𑀺 𑀅𑀢𑀺𑀲𑀻𑀢𑀮𑀕𑁆𑀕𑀳𑀡𑀺𑀓𑁄 𑀳𑀺 𑀲𑀻𑀢𑀪𑀻𑀭𑀼𑀓𑁄 𑀳𑁄𑀢𑀺, 𑀅𑀘𑁆𑀘𑀼𑀡𑁆𑀳𑀕𑁆𑀕𑀳𑀡𑀺𑀓𑁄 𑀉𑀡𑁆𑀳𑀪𑀻𑀭𑀼𑀓𑁄, 𑀢𑁂𑀲𑀁 𑀧𑀥𑀸𑀦𑀁 𑀦 𑀇𑀚𑁆𑀛𑀢𑀺, 𑀫𑀚𑁆𑀛𑀺𑀫𑀕𑁆𑀕𑀳𑀡𑀺𑀓𑀲𑁆𑀲 𑀇𑀚𑁆𑀛𑀢𑀺. 𑀢𑁂𑀦𑀸𑀳 𑁋 𑀫𑀚𑁆𑀛𑀺𑀫𑀸𑀬 𑀧𑀥𑀸𑀦𑀓𑁆𑀔𑀫𑀸𑀬𑀸𑀢𑀺. 𑀬𑀣𑀸𑀪𑀽𑀢𑀁 𑀅𑀢𑁆𑀢𑀸𑀦𑀁 𑀆𑀯𑀺𑀓𑀢𑁆𑀢𑀸𑀢𑀺 𑀬𑀣𑀸𑀪𑀽𑀢𑀁 𑀅𑀢𑁆𑀢𑀦𑁄 𑀅𑀕𑀼𑀡𑀁 𑀧𑀓𑀸𑀲𑁂𑀢𑀸. 𑀉𑀤𑀬𑀢𑁆𑀣𑀕𑀸𑀫𑀺𑀦𑀺𑀬𑀸𑀢𑀺 𑀉𑀤𑀬𑀜𑁆𑀘 𑀅𑀢𑁆𑀣𑀜𑁆𑀘 𑀕𑀦𑁆𑀢𑀼𑀁 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑀼𑀁 𑀲𑀫𑀢𑁆𑀣𑀸𑀬. 𑀏𑀢𑁂𑀦 𑀧𑀜𑁆𑀜𑀸𑀲𑀮𑀓𑁆𑀔𑀡𑀧𑀭𑀺𑀕𑁆𑀕𑀸𑀳𑀓𑀁 𑀉𑀤𑀬𑀩𑁆𑀩𑀬𑀜𑀸𑀡𑀁 𑀯𑀼𑀢𑁆𑀢𑀁. 𑀅𑀭𑀺𑀬𑀸𑀬𑀸𑀢𑀺 𑀧𑀭𑀺𑀲𑀼𑀤𑁆𑀥𑀸𑀬. 𑀦𑀺𑀩𑁆𑀩𑁂𑀥𑀺𑀓𑀸𑀬𑀸𑀢𑀺 𑀅𑀦𑀺𑀩𑁆𑀩𑀺𑀤𑁆𑀥𑀧𑀼𑀩𑁆𑀩𑁂 𑀮𑁄𑀪𑀓𑁆𑀔𑀦𑁆𑀥𑀸𑀤𑀬𑁄 𑀦𑀺𑀩𑁆𑀩𑀺𑀚𑁆𑀛𑀺𑀢𑀼𑀁 𑀲𑀫𑀢𑁆𑀣𑀸𑀬. 𑀲𑀫𑁆𑀫𑀸 𑀤𑀼𑀓𑁆𑀔𑀓𑁆𑀔𑀬𑀕𑀸𑀫𑀺𑀦𑀺𑀬𑀸𑀢𑀺 𑀢𑀤𑀗𑁆𑀕𑀯𑀲𑁂𑀦 𑀓𑀺𑀮𑁂𑀲𑀸𑀦𑀁 𑀧𑀳𑀻𑀦𑀢𑁆𑀢𑀸 𑀬𑀁 𑀤𑀼𑀓𑁆𑀔𑀁 𑀔𑀻𑀬𑀢𑀺, 𑀢𑀲𑁆𑀲 𑀤𑀼𑀓𑁆𑀔𑀲𑁆𑀲 𑀔𑀬𑀕𑀸𑀫𑀺𑀦𑀺𑀬𑀸. 𑀇𑀢𑀺 𑀲𑀩𑁆𑀩𑁂𑀳𑀺𑀧𑀺 𑀇𑀫𑁂𑀳𑀺 𑀧𑀤𑁂𑀳𑀺 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸𑀯 𑀓𑀣𑀺𑀢𑀸. 𑀤𑀼𑀧𑁆𑀧𑀜𑁆𑀜𑀲𑁆𑀲 𑀳𑀺 𑀧𑀥𑀸𑀦𑀁 𑀦 𑀇𑀚𑁆𑀛𑀢𑀺.

𑁪. 𑀲𑀫𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁪. 𑀘𑀢𑀼𑀢𑁆𑀣𑁂 𑀧𑀥𑀸𑀦𑀸𑀬𑀸𑀢𑀺 𑀯𑀻𑀭𑀺𑀬𑀓𑀭𑀡𑀢𑁆𑀣𑀸𑀬. 𑀦 𑀲𑀼𑀓𑀭𑀁 𑀉𑀜𑁆𑀙𑁂𑀦 𑀧𑀕𑁆𑀕𑀳𑁂𑀦 𑀬𑀸𑀧𑁂𑀢𑀼𑀦𑁆𑀢𑀺 𑀦 𑀲𑀓𑁆𑀓𑀸 𑀳𑁄𑀢𑀺 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀉𑀜𑁆𑀙𑀸𑀘𑀭𑀺𑀬𑀸𑀬 𑀬𑀸𑀧𑁂𑀢𑀼𑀁. 𑀇𑀫𑀲𑁆𑀫𑀺𑀫𑁆𑀧𑀺 𑀲𑀼𑀢𑁆𑀢𑁂 𑀯𑀝𑁆𑀝𑀯𑀺𑀯𑀝𑁆𑀝𑀫𑁂𑀯 𑀓𑀣𑀺𑀢𑀁.

𑁫. 𑀫𑀸𑀢𑀸𑀧𑀼𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁫. 𑀧𑀜𑁆𑀘𑀫𑁂 𑀧𑀭𑀺𑀬𑀸𑀤𑀸𑀬 𑀢𑀺𑀝𑁆𑀞𑀢𑀻𑀢𑀺 𑀧𑀭𑀺𑀬𑀸𑀤𑀺𑀬𑀺𑀢𑁆𑀯𑀸 𑀕𑀳𑁂𑀢𑁆𑀯𑀸 𑀔𑁂𑀧𑁂𑀢𑁆𑀯𑀸 𑀢𑀺𑀝𑁆𑀞𑀢𑀺. 𑀉𑀕𑁆𑀖𑀸𑀢𑀺𑀢𑀸𑀢𑀺 𑀉𑀤𑁆𑀥𑀼𑀫𑀸𑀢𑀸.

𑀅𑀲𑀺𑀳𑀢𑁆𑀣𑁂𑀦𑀸𑀢𑀺 𑀲𑀻𑀲𑀘𑁆𑀙𑁂𑀤𑀦𑀢𑁆𑀣𑀸𑀬 𑀅𑀲𑀺𑀁 𑀆𑀤𑀸𑀬 𑀆𑀕𑀢𑁂𑀦𑀸𑀧𑀺. 𑀧𑀺𑀲𑀸𑀘𑁂𑀦𑀸𑀢𑀺 𑀔𑀸𑀤𑀺𑀢𑀼𑀁 𑀆𑀕𑀢𑀬𑀓𑁆𑀔𑁂𑀦𑀸𑀧𑀺. 𑀆𑀲𑀻𑀤𑁂𑀢𑀺 𑀖𑀝𑁆𑀝𑁂𑀬𑁆𑀬. 𑀫𑀜𑁆𑀚𑀼𑀦𑀸𑀢𑀺 𑀫𑀼𑀤𑀼𑀓𑁂𑀦. 𑀓𑀸𑀫𑁄𑀖𑀯𑀼𑀴𑁆𑀳𑀸𑀦𑀦𑁆𑀢𑀺 𑀓𑀸𑀫𑁄𑀖𑁂𑀦 𑀯𑀼𑀴𑁆𑀳𑀸𑀦𑀁 𑀓𑀟𑁆𑀠𑀺𑀢𑀸𑀦𑀁. 𑀓𑀸𑀮𑀁 𑀕𑀢𑀺 𑀪𑀯𑀸𑀪𑀯𑀦𑁆𑀢𑀺 𑀯𑀝𑁆𑀝𑀓𑀸𑀮𑀁 𑀕𑀢𑀺𑀜𑁆𑀘 𑀧𑀼𑀦𑀧𑁆𑀧𑀼𑀦𑀩𑁆𑀪𑀯𑁂 𑀘. 𑀧𑀼𑀭𑀓𑁆𑀔𑀢𑀸𑀢𑀺 𑀧𑀼𑀭𑁂𑀘𑀸𑀭𑀺𑀓𑀸 𑀧𑀼𑀭𑀢𑁄 𑀕𑀢𑀸𑀬𑁂𑀯. 𑀬𑁂 𑀘 𑀓𑀸𑀫𑁂 𑀧𑀭𑀺𑀜𑁆𑀜𑀸𑀬𑀸𑀢𑀺 𑀬𑁂 𑀧𑀡𑁆𑀟𑀺𑀢𑀸 𑀤𑀼𑀯𑀺𑀥𑁂𑀧𑀺 𑀓𑀸𑀫𑁂 𑀢𑀻𑀳𑀺 𑀧𑀭𑀺𑀜𑁆𑀜𑀸𑀳𑀺 𑀧𑀭𑀺𑀚𑀸𑀦𑀺𑀢𑁆𑀯𑀸. 𑀘𑀭𑀦𑁆𑀢𑀺 𑀅𑀓𑀼𑀢𑁄𑀪𑀬𑀸𑀢𑀺 𑀔𑀻𑀡𑀸𑀲𑀯𑀸𑀦𑀁 𑀓𑀼𑀢𑁄𑀘𑀺 𑀪𑀬𑀁 𑀦𑀸𑀫 𑀦𑀢𑁆𑀣𑀺, 𑀢𑀲𑁆𑀫𑀸 𑀢𑁂 𑀅𑀓𑀼𑀢𑁄𑀪𑀬𑀸 𑀳𑀼𑀢𑁆𑀯𑀸 𑀘𑀭𑀦𑁆𑀢𑀺. 𑀧𑀸𑀭𑀗𑁆𑀕𑀢𑀸𑀢𑀺 𑀧𑀸𑀭𑀁 𑀯𑀼𑀘𑁆𑀘𑀢𑀺 𑀦𑀺𑀩𑁆𑀩𑀸𑀦𑀁, 𑀢𑀁 𑀉𑀧𑀕𑀢𑀸, 𑀲𑀘𑁆𑀙𑀺𑀓𑀢𑁆𑀯𑀸 𑀞𑀺𑀢𑀸𑀢𑀺 𑀅𑀢𑁆𑀣𑁄. 𑀆𑀲𑀯𑀓𑁆𑀔𑀬𑀦𑁆𑀢𑀺 𑀅𑀭𑀳𑀢𑁆𑀢𑀁. 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀯𑀝𑁆𑀝𑀫𑁂𑀯 𑀓𑀣𑁂𑀢𑁆𑀯𑀸 𑀕𑀸𑀣𑀸𑀲𑀼 𑀯𑀝𑁆𑀝𑀯𑀺𑀯𑀝𑁆𑀝𑀁 𑀓𑀣𑀺𑀢𑀁.

𑁬. 𑀉𑀧𑀚𑁆𑀛𑀸𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁬. 𑀙𑀝𑁆𑀞𑁂 𑀫𑀥𑀼𑀭𑀓𑀚𑀸𑀢𑁄𑀢𑀺 𑀲𑀜𑁆𑀚𑀸𑀢𑀕𑀭𑀼𑀪𑀸𑀯𑁄. 𑀤𑀺𑀲𑀸 𑀘 𑀫𑁂 𑀦 𑀧𑀓𑁆𑀔𑀸𑀬𑀦𑁆𑀢𑀻𑀢𑀺 𑀘𑀢𑀲𑁆𑀲𑁄 𑀤𑀺𑀲𑀸 𑀘 𑀅𑀦𑀼𑀤𑀺𑀲𑀸 𑀘 𑀫𑀬𑁆𑀳𑀁 𑀦 𑀉𑀧𑀝𑁆𑀞𑀳𑀦𑁆𑀢𑀻𑀢𑀺 𑀯𑀤𑀢𑀺. 𑀥𑀫𑁆𑀫𑀸 𑀘 𑀫𑀁 𑀦𑀧𑁆𑀧𑀝𑀺𑀪𑀦𑁆𑀢𑀻𑀢𑀺 𑀲𑀫𑀣𑀯𑀺𑀧𑀲𑁆𑀲𑀦𑀸𑀥𑀫𑁆𑀫𑀸𑀧𑀺 𑀫𑁂 𑀦 𑀉𑀧𑀝𑁆𑀞𑀳𑀦𑁆𑀢𑀺. 𑀅𑀦𑀪𑀺𑀭𑀢𑁄 𑀘 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀸𑀫𑀻𑀢𑀺 𑀉𑀓𑁆𑀓𑀡𑁆𑀞𑀺𑀢𑁄 𑀳𑀼𑀢𑁆𑀯𑀸 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑀁 𑀯𑀲𑀸𑀫𑀺. 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀻𑀢𑀺 𑀢𑀲𑁆𑀲 𑀓𑀣𑀁 𑀲𑀼𑀢𑁆𑀯𑀸 ‘‘𑀩𑀼𑀤𑁆𑀥𑀯𑁂𑀦𑁂𑀬𑁆𑀬𑀧𑀼𑀕𑁆𑀕𑀮𑁄 𑀅𑀬’’𑀦𑁆𑀢𑀺 𑀢𑀁 𑀓𑀸𑀭𑀡𑀁 𑀪𑀕𑀯𑀢𑁄 𑀆𑀭𑁄𑀘𑁂𑀢𑀼𑀁 𑀉𑀧𑀲𑀗𑁆𑀓𑀫𑀺. 𑀅𑀯𑀺𑀧𑀲𑁆𑀲𑀓𑀲𑁆𑀲 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀦𑁆𑀢𑀺 𑀓𑀼𑀲𑀮𑀥𑀫𑁆𑀫𑁂 𑀅𑀯𑀺𑀧𑀲𑁆𑀲𑀦𑁆𑀢𑀲𑁆𑀲, 𑀅𑀦𑁂𑀲𑀦𑁆𑀢𑀲𑁆𑀲 𑀅𑀕𑀯𑁂𑀲𑀦𑁆𑀢𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀩𑁄𑀥𑀺𑀧𑀓𑁆𑀔𑀺𑀬𑀸𑀦𑀁 𑀥𑀫𑁆𑀫𑀸𑀦𑀦𑁆𑀢𑀺 𑀲𑀢𑀺𑀧𑀝𑁆𑀞𑀸𑀦𑀸𑀤𑀻𑀦𑀁 𑀲𑀢𑁆𑀢𑀢𑀺𑀁𑀲𑀥𑀫𑁆𑀫𑀸𑀦𑀁.

𑁭. 𑀅𑀪𑀺𑀡𑁆𑀳𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑀞𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁭. 𑀲𑀢𑁆𑀢𑀫𑁂 𑀚𑀭𑀸𑀥𑀫𑁆𑀫𑁄𑀫𑁆𑀳𑀻𑀢𑀺 𑀚𑀭𑀸𑀲𑀪𑀸𑀯𑁄 𑀅𑀫𑁆𑀳𑀺. 𑀚𑀭𑀁 𑀅𑀦𑀢𑀻𑀢𑁄𑀢𑀺 𑀚𑀭𑀁 𑀅𑀦𑀢𑀺𑀓𑁆𑀓𑀦𑁆𑀢𑁄, 𑀅𑀦𑁆𑀢𑁄𑀚𑀭𑀸𑀬 𑀏𑀯 𑀘𑀭𑀸𑀫𑀺. 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀓𑀫𑁆𑀫𑀲𑁆𑀲𑀓𑁄𑀢𑀺𑀆𑀤𑀻𑀲𑀼 𑀓𑀫𑁆𑀫𑀁 𑀫𑀬𑁆𑀳𑀁 𑀲𑀓𑀁 𑀅𑀢𑁆𑀢𑀦𑁄 𑀲𑀦𑁆𑀢𑀓𑀦𑁆𑀢𑀺 𑀓𑀫𑁆𑀫𑀲𑁆𑀲𑀓𑁄 𑀅𑀫𑁆𑀳𑀺. 𑀓𑀫𑁆𑀫𑀲𑁆𑀲 𑀤𑀸𑀬𑀸𑀤𑁄𑀢𑀺 𑀓𑀫𑁆𑀫𑀤𑀸𑀬𑀸𑀤𑁄, 𑀓𑀫𑁆𑀫𑀁 𑀫𑀬𑁆𑀳𑀁 𑀤𑀸𑀬𑀚𑁆𑀚𑀁 𑀲𑀦𑁆𑀢𑀓𑀦𑁆𑀢𑀺 𑀅𑀢𑁆𑀣𑁄. 𑀓𑀫𑁆𑀫𑀁 𑀫𑀬𑁆𑀳𑀁 𑀬𑁄𑀦𑀺 𑀓𑀸𑀭𑀡𑀦𑁆𑀢𑀺 𑀓𑀫𑁆𑀫𑀬𑁄𑀦𑀺. 𑀓𑀫𑁆𑀫𑀁 𑀫𑀬𑁆𑀳𑀁 𑀩𑀦𑁆𑀥𑀽𑀢𑀺 𑀓𑀫𑁆𑀫𑀩𑀦𑁆𑀥𑀼, 𑀓𑀫𑁆𑀫𑀜𑀸𑀢𑀓𑁄𑀢𑀺 𑀅𑀢𑁆𑀣𑁄. 𑀓𑀫𑁆𑀫𑀁 𑀫𑀬𑁆𑀳𑀁 𑀧𑀝𑀺𑀲𑀭𑀡𑀁 𑀧𑀢𑀺𑀝𑁆𑀞𑀸𑀢𑀺 𑀓𑀫𑁆𑀫𑀧𑀝𑀺𑀲𑀭𑀡𑁄. 𑀢𑀲𑁆𑀲 𑀤𑀸𑀬𑀸𑀤𑁄 𑀪𑀯𑀺𑀲𑁆𑀲𑀸𑀫𑀻𑀢𑀺 𑀢𑀲𑁆𑀲 𑀓𑀫𑁆𑀫𑀲𑁆𑀲 𑀤𑀸𑀬𑀸𑀤𑁄 𑀢𑁂𑀦 𑀤𑀺𑀦𑁆𑀦𑀨𑀮𑀧𑀝𑀺𑀕𑁆𑀕𑀸𑀳𑀓𑁄 𑀪𑀯𑀺𑀲𑁆𑀲𑀸𑀫𑀻𑀢𑀺 𑀅𑀢𑁆𑀣𑁄. 𑀬𑁄𑀩𑁆𑀩𑀦𑀫𑀤𑁄𑀢𑀺 𑀬𑁄𑀩𑁆𑀩𑀦𑀁 𑀆𑀭𑀩𑁆𑀪 𑀉𑀧𑁆𑀧𑀦𑁆𑀦𑀫𑀤𑁄. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀫𑀕𑁆𑀕𑁄 𑀲𑀜𑁆𑀚𑀸𑀬𑀢𑀻𑀢𑀺 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑁄 𑀲𑀜𑁆𑀚𑀸𑀬𑀢𑀺. 𑀲𑀁𑀬𑁄𑀚𑀦𑀸𑀦𑀺 𑀲𑀩𑁆𑀩𑀲𑁄 𑀧𑀳𑀻𑀬𑀦𑁆𑀢𑀻𑀢𑀺 𑀤𑀲 𑀲𑀁𑀬𑁄𑀚𑀦𑀸𑀦𑀺 𑀲𑀩𑁆𑀩𑀲𑁄 𑀧𑀳𑀻𑀬𑀦𑁆𑀢𑀺. 𑀅𑀦𑀼𑀲𑀬𑀸 𑀩𑁆𑀬𑀦𑁆𑀢𑀻𑀳𑁄𑀦𑁆𑀢𑀻𑀢𑀺 𑀲𑀢𑁆𑀢 𑀅𑀦𑀼𑀲𑀬𑀸 𑀯𑀺𑀕𑀢𑀦𑁆𑀢𑀸 𑀧𑀭𑀺𑀘𑁆𑀙𑀺𑀦𑁆𑀦𑀸 𑀧𑀭𑀺𑀯𑀝𑀼𑀫𑀸 𑀳𑁄𑀦𑁆𑀢𑀺. 𑀏𑀯𑀫𑁂𑀢𑁆𑀣 𑀳𑁂𑀝𑁆𑀞𑀸 𑀧𑀜𑁆𑀘𑀲𑀼 𑀞𑀸𑀦𑁂𑀲𑀼 𑀯𑀺𑀧𑀲𑁆𑀲𑀦𑀸 𑀓𑀣𑀺𑀢𑀸, 𑀇𑀫𑁂𑀲𑀼 𑀧𑀜𑁆𑀘𑀲𑀼 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑁄.

𑀇𑀤𑀸𑀦𑀺 𑀕𑀸𑀣𑀸𑀳𑀺 𑀓𑀽𑀝𑀁 𑀕𑀡𑁆𑀳𑀦𑁆𑀢𑁄 𑀩𑁆𑀬𑀸𑀥𑀺𑀥𑀫𑁆𑀫𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀜𑀢𑁆𑀯𑀸 𑀥𑀫𑁆𑀫𑀁 𑀦𑀺𑀭𑀽𑀧𑀥𑀺𑀦𑁆𑀢𑀺 𑀉𑀧𑀥𑀺𑀭𑀳𑀺𑀢𑀁 𑀅𑀭𑀳𑀢𑁆𑀢𑀫𑀕𑁆𑀕𑀁 𑀜𑀢𑁆𑀯𑀸. 𑀲𑀩𑁆𑀩𑁂 𑀫𑀤𑁂 𑀅𑀪𑀺𑀪𑁄𑀲𑁆𑀫𑀻𑀢𑀺 𑀲𑀩𑁆𑀩𑁂 𑀇𑀫𑁂 𑀢𑀬𑁄𑀧𑀺 𑀫𑀤𑁂 𑀅𑀥𑀺𑀪𑀯𑀺𑀁, 𑀅𑀢𑀺𑀓𑁆𑀓𑀫𑁆𑀫 𑀞𑀺𑀢𑁄𑀲𑁆𑀫𑀻𑀢𑀺 𑀅𑀢𑁆𑀣𑁄. 𑀦𑁂𑀓𑁆𑀔𑀫𑁆𑀫𑀁 𑀤𑀝𑁆𑀞𑀼 𑀔𑁂𑀫𑀢𑁄𑀢𑀺 𑀧𑀩𑁆𑀩𑀚𑁆𑀚𑀁 𑀔𑁂𑀫𑀢𑁄 𑀤𑀺𑀲𑁆𑀯𑀸. 𑀢𑀲𑁆𑀲 𑀫𑁂 𑀅𑀳𑀼 𑀉𑀲𑁆𑀲𑀸𑀳𑁄, 𑀦𑀺𑀩𑁆𑀩𑀸𑀦𑀁 𑀅𑀪𑀺𑀧𑀲𑁆𑀲𑀢𑁄𑀢𑀺 𑀢𑀲𑁆𑀲 𑀫𑀬𑁆𑀳𑀁 𑀦𑀺𑀩𑁆𑀩𑀸𑀦𑀁 𑀅𑀪𑀺𑀧𑀲𑁆𑀲𑀦𑁆𑀢𑀲𑁆𑀲 𑀯𑀸𑀬𑀸𑀫𑁄 𑀅𑀳𑁄𑀲𑀺. 𑀅𑀦𑀺𑀯𑀢𑁆𑀢𑀺 𑀪𑀯𑀺𑀲𑁆𑀲𑀸𑀫𑀻𑀢𑀺 𑀧𑀩𑁆𑀩𑀚𑁆𑀚𑀢𑁄 𑀅𑀦𑀺𑀯𑀢𑁆𑀢𑀺𑀓𑁄 𑀪𑀯𑀺𑀲𑁆𑀲𑀸𑀫𑀺, 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑀢𑁄 𑀅𑀦𑀺𑀯𑀢𑁆𑀢𑀺𑀓𑁄, 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀢𑁄 𑀅𑀦𑀺𑀯𑀢𑁆𑀢𑀺𑀓𑁄 𑀪𑀯𑀺𑀲𑁆𑀲𑀸𑀫𑀺. 𑀩𑁆𑀭𑀳𑁆𑀫𑀘𑀭𑀺𑀬𑀧𑀭𑀸𑀬𑀡𑁄𑀢𑀺 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀧𑀭𑀸𑀬𑀡𑁄. 𑀇𑀫𑀺𑀦𑀸 𑀮𑁄𑀓𑀼𑀢𑁆𑀢𑀭𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀓𑀣𑀺𑀢𑁄𑀢𑀺.

𑁮. 𑀮𑀺𑀘𑁆𑀙𑀯𑀺𑀓𑀼𑀫𑀸𑀭𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁮. 𑀅𑀝𑁆𑀞𑀫𑁂 𑀲𑀚𑁆𑀚𑀸𑀦𑀺 𑀥𑀦𑀽𑀦𑀻𑀢𑀺 𑀲𑀚𑀺𑀬𑀸𑀦𑀺 𑀆𑀭𑁄𑀧𑀺𑀢𑀥𑀦𑀽𑀦𑀺. 𑀅𑀤𑁆𑀤𑀲𑀽𑀢𑀺 𑀅𑀤𑁆𑀤𑀲𑀁𑀲𑀼. 𑀪𑀯𑀺𑀲𑁆𑀲𑀦𑁆𑀢𑀺 𑀯𑀚𑁆𑀚𑀻𑀢𑀺 𑀯𑀟𑁆𑀠𑀺𑀲𑁆𑀲𑀦𑁆𑀢𑀺 𑀯𑀚𑁆𑀚𑀺𑀭𑀸𑀚𑀸𑀦𑁄. 𑀅𑀧𑀸𑀦𑀼𑀪𑀸𑀢𑀺 𑀅𑀯𑀟𑁆𑀠𑀺𑀦𑀺𑀲𑁆𑀲𑀺𑀢𑀸 𑀫𑀸𑀦𑀣𑀤𑁆𑀥𑀸. 𑀧𑀘𑁆𑀙𑀸𑀮𑀺𑀬𑀁 𑀔𑀺𑀧𑀦𑁆𑀢𑀻𑀢𑀺 𑀧𑀘𑁆𑀙𑀢𑁄 𑀕𑀦𑁆𑀢𑁆𑀯𑀸 𑀧𑀺𑀝𑁆𑀞𑀺𑀁 𑀧𑀸𑀤𑁂𑀦 𑀧𑀳𑀭𑀦𑁆𑀢𑀺. 𑀭𑀝𑁆𑀞𑀺𑀓𑀲𑁆𑀲𑀸𑀢𑀺𑀆𑀤𑀻𑀲𑀼 𑀭𑀝𑁆𑀞𑀁 𑀪𑀼𑀜𑁆𑀚𑀢𑀻𑀢𑀺 𑀭𑀝𑁆𑀞𑀺𑀓𑁄. 𑀧𑀺𑀢𑀭𑀸 𑀤𑀢𑁆𑀢𑀁 𑀲𑀸𑀧𑀢𑁂𑀬𑁆𑀬𑀁 𑀪𑀼𑀜𑁆𑀚𑀢𑀻𑀢𑀺 𑀧𑁂𑀢𑁆𑀢𑀦𑀺𑀓𑁄. 𑀲𑁂𑀦𑀸𑀬 𑀧𑀢𑀺 𑀚𑁂𑀝𑁆𑀞𑀓𑁄𑀢𑀺 𑀲𑁂𑀦𑀸𑀧𑀢𑀺𑀓𑁄. 𑀕𑀸𑀫𑀕𑀸𑀫𑀡𑀺𑀓𑀲𑁆𑀲𑀸𑀢𑀺 𑀕𑀸𑀫𑀸𑀦𑀁 𑀕𑀸𑀫𑀡𑀺𑀓𑀲𑁆𑀲, 𑀕𑀸𑀫𑀲𑀸𑀫𑀺𑀓𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀧𑀽𑀕𑀕𑀸𑀫𑀡𑀺𑀓𑀲𑁆𑀲𑀸𑀢𑀺 𑀕𑀡𑀚𑁂𑀝𑁆𑀞𑀓𑀲𑁆𑀲. 𑀓𑀼𑀮𑁂𑀲𑀽𑀢𑀺 𑀢𑁂𑀲𑀼 𑀢𑁂𑀲𑀼 𑀓𑀼𑀮𑁂𑀲𑀼. 𑀧𑀘𑁆𑀘𑁂𑀓𑀸𑀥𑀺𑀧𑀘𑁆𑀘𑀁 𑀓𑀸𑀭𑁂𑀦𑁆𑀢𑀻𑀢𑀺 𑀧𑀘𑁆𑀘𑁂𑀓𑀁 𑀚𑁂𑀝𑁆𑀞𑀓𑀝𑁆𑀞𑀸𑀦𑀁 𑀓𑀸𑀭𑁂𑀦𑁆𑀢𑀺. 𑀓𑀮𑁆𑀬𑀸𑀡𑁂𑀦 𑀫𑀦𑀲𑀸 𑀅𑀦𑀼𑀓𑀫𑁆𑀧𑀦𑁆𑀢𑀻𑀢𑀺 𑀲𑀼𑀦𑁆𑀤𑀭𑁂𑀦 𑀘𑀺𑀢𑁆𑀢𑁂𑀦 𑀅𑀦𑀼𑀕𑁆𑀕𑀡𑁆𑀳𑀦𑁆𑀢𑀺. 𑀔𑁂𑀢𑁆𑀢𑀓𑀫𑁆𑀫𑀦𑁆𑀢𑀲𑀸𑀫𑀦𑁆𑀢𑀲𑀩𑁆𑀬𑁄𑀳𑀸𑀭𑁂𑀢𑀺 𑀬𑁂 𑀘 𑀅𑀢𑁆𑀢𑀦𑁄 𑀔𑁂𑀢𑁆𑀢𑀓𑀫𑁆𑀫𑀦𑁆𑀢𑀸𑀦𑀁 𑀲𑀸𑀫𑀦𑁆𑀢𑀸 𑀅𑀦𑀦𑁆𑀢𑀭𑀓𑁆𑀔𑁂𑀢𑁆𑀢𑀲𑀸𑀫𑀺𑀦𑁄, 𑀢𑁂 𑀘 𑀭𑀚𑁆𑀚𑀼𑀤𑀡𑁆𑀟𑁂𑀳𑀺 𑀪𑀽𑀫𑀺𑀧𑁆𑀧𑀫𑀸𑀡𑀕𑁆𑀕𑀸𑀳𑀓𑁂 𑀲𑀩𑁆𑀩𑁄𑀳𑀸𑀭𑁂 𑀘. 𑀩𑀮𑀺𑀧𑀝𑀺𑀕𑁆𑀕𑀸𑀳𑀺𑀓𑀸 𑀤𑁂𑀯𑀢𑀸𑀢𑀺 𑀓𑀼𑀮𑀧𑁆𑀧𑀯𑁂𑀡𑀺𑀬𑀸 𑀆𑀕𑀢𑀸 𑀆𑀭𑀓𑁆𑀔𑀤𑁂𑀯𑀢𑀸. 𑀲𑀓𑁆𑀓𑀭𑁄𑀢𑀻𑀢𑀺 𑀢𑀸 𑀤𑁂𑀯𑀢𑀸 𑀅𑀕𑁆𑀕𑀬𑀸𑀕𑀼𑀪𑀢𑁆𑀢𑀸𑀤𑀻𑀳𑀺 𑀲𑀓𑁆𑀓𑀭𑁄𑀢𑀺.

𑀓𑀺𑀘𑁆𑀘𑀓𑀭𑁄𑀢𑀺 𑀉𑀧𑁆𑀧𑀦𑁆𑀦𑀸𑀦𑀁 𑀓𑀺𑀘𑁆𑀘𑀸𑀦𑀁 𑀓𑀸𑀭𑀓𑁄. 𑀬𑁂 𑀘𑀲𑁆𑀲 𑀅𑀦𑀼𑀚𑀻𑀯𑀺𑀦𑁄𑀢𑀺 𑀬𑁂 𑀘 𑀏𑀢𑀁 𑀉𑀧𑀦𑀺𑀲𑁆𑀲𑀸𑀬 𑀚𑀻𑀯𑀦𑁆𑀢𑀺. 𑀉𑀪𑀺𑀦𑁆𑀦𑀜𑁆𑀘𑁂𑀯 𑀅𑀢𑁆𑀣𑀸𑀬𑀸𑀢𑀺 𑀉𑀪𑀺𑀦𑁆𑀦𑀫𑁆𑀧𑀺 𑀳𑀺𑀢𑀢𑁆𑀣𑀸𑀬 𑀧𑀝𑀺𑀧𑀦𑁆𑀦𑁄 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀧𑀼𑀩𑁆𑀩𑀧𑁂𑀢𑀸𑀦𑀦𑁆𑀢𑀺 𑀧𑀭𑀮𑁄𑀓𑀕𑀢𑀸𑀦𑀁. 𑀤𑀺𑀝𑁆𑀞𑁂 𑀥𑀫𑁆𑀫𑁂 𑀘 𑀚𑀻𑀯𑀢𑀦𑁆𑀢𑀺 𑀬𑁂 𑀘 𑀤𑀺𑀝𑁆𑀞𑁂 𑀥𑀫𑁆𑀫𑁂 𑀚𑀻𑀯𑀦𑁆𑀢𑀺. 𑀇𑀢𑀺 𑀧𑀤𑀤𑁆𑀯𑀬𑁂𑀦𑀸𑀧𑀺 𑀅𑀢𑀻𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀜𑀸𑀢𑀬𑁄 𑀤𑀲𑁆𑀲𑁂𑀢𑀺. 𑀯𑀺𑀢𑁆𑀢𑀺𑀲𑀜𑁆𑀚𑀦𑀦𑁄𑀢𑀺 𑀢𑀼𑀝𑁆𑀞𑀺𑀚𑀦𑀦𑁄. 𑀖𑀭𑀫𑀸𑀯𑀲𑀦𑁆𑀢𑀺 𑀖𑀭𑀸𑀯𑀸𑀲𑀁 𑀯𑀲𑀦𑁆𑀢𑁄. 𑀧𑀼𑀚𑁆𑀚𑁄 𑀳𑁄𑀢𑀺 𑀧𑀲𑀁𑀲𑀺𑀬𑁄𑀢𑀺 𑀧𑀽𑀚𑁂𑀢𑀩𑁆𑀩𑁄 𑀘 𑀧𑀲𑀁𑀲𑀺𑀢𑀩𑁆𑀩𑁄 𑀘 𑀳𑁄𑀢𑀻𑀢𑀺.

𑁯-𑁧𑁦. 𑀯𑀼𑀟𑁆𑀠𑀧𑀩𑁆𑀩𑀚𑀺𑀢𑀲𑀼𑀢𑁆𑀢𑀤𑁆𑀯𑀬𑀯𑀡𑁆𑀡𑀦𑀸

𑁫𑁯-𑁬𑁦. 𑀦𑀯𑀫𑁂 𑀦𑀺𑀧𑀼𑀡𑁄𑀢𑀺 𑀲𑀡𑁆𑀳𑁄 𑀲𑀼𑀔𑀼𑀫𑀓𑀸𑀭𑀡𑀜𑁆𑀜𑀽. 𑀆𑀓𑀧𑁆𑀧𑀲𑀫𑁆𑀧𑀦𑁆𑀦𑁄𑀢𑀺 𑀲𑀫𑀡𑀸𑀓𑀧𑁆𑀧𑁂𑀦 𑀲𑀫𑁆𑀧𑀦𑁆𑀦𑁄. 𑀤𑀲𑀫𑁂 𑀧𑀤𑀓𑁆𑀔𑀺𑀡𑀕𑁆𑀕𑀸𑀳𑀻𑀢𑀺 𑀤𑀺𑀦𑁆𑀦𑁄𑀯𑀸𑀤𑀁 𑀧𑀤𑀓𑁆𑀔𑀺𑀡𑀢𑁄 𑀕𑀡𑁆𑀳𑀦𑁆𑀢𑁄. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀦𑀻𑀯𑀭𑀡𑀯𑀕𑁆𑀕𑁄 𑀧𑀞𑀫𑁄.

(𑁭) 𑁨. 𑀲𑀜𑁆𑀜𑀸𑀯𑀕𑁆𑀕𑁄

𑁧-𑁨. 𑀲𑀜𑁆𑀜𑀸𑀲𑀼𑀢𑁆𑀢𑀤𑁆𑀯𑀬𑀯𑀡𑁆𑀡𑀦𑀸

𑁬𑁧-𑁬𑁨. 𑀤𑀼𑀢𑀺𑀬𑀲𑁆𑀲 𑀧𑀞𑀫𑁂 𑀫𑀳𑀧𑁆𑀨𑀮𑀸𑀢𑀺 𑀯𑀺𑀧𑀸𑀓𑀨𑀮𑁂𑀦 𑀫𑀳𑀧𑁆𑀨𑀮𑀸. 𑀯𑀺𑀧𑀸𑀓𑀸𑀦𑀺𑀲𑀁𑀲𑁂𑀦𑁂𑀯 𑀫𑀳𑀸𑀦𑀺𑀲𑀁𑀲𑀸. 𑀅𑀫𑀢𑁄𑀕𑀥𑀸𑀢𑀺 𑀦𑀺𑀩𑁆𑀩𑀸𑀦𑀧𑀢𑀺𑀝𑁆𑀞𑀸. 𑀲𑀩𑁆𑀩𑀮𑁄𑀓𑁂 𑀅𑀦𑀪𑀺𑀭𑀢𑀺𑀲𑀜𑁆𑀜𑀸𑀢𑀺 𑀲𑀩𑁆𑀩𑀲𑁆𑀫𑀺𑀁 𑀢𑁂𑀥𑀸𑀢𑀼𑀲𑀦𑁆𑀦𑀺𑀯𑁂𑀲𑁂 𑀮𑁄𑀓𑁂 𑀉𑀓𑁆𑀓𑀡𑁆𑀞𑀺𑀢𑀲𑁆𑀲 𑀉𑀧𑁆𑀧𑀚𑁆𑀚𑀦𑀓𑀲𑀜𑁆𑀜𑀸. 𑀤𑀼𑀢𑀺𑀬𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑁩-𑁪. 𑀯𑀟𑁆𑀠𑀲𑀼𑀢𑁆𑀢𑀤𑁆𑀯𑀬𑀯𑀡𑁆𑀡𑀦𑀸

𑁬𑁩-𑁬𑁪. 𑀢𑀢𑀺𑀬𑁂 𑀯𑀭𑀸𑀤𑀸𑀬𑀻𑀢𑀺 𑀉𑀢𑁆𑀢𑀫𑀲𑁆𑀲 𑀯𑀭𑀲𑁆𑀲 𑀆𑀤𑀸𑀬𑀓𑁄. 𑀲𑁂𑀲𑀫𑁂𑀢𑁆𑀣 𑀘𑀢𑀼𑀢𑁆𑀣𑁂 𑀘 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑁫. 𑀲𑀸𑀓𑀘𑁆𑀙𑀲𑀼𑀢𑁆𑀢𑀯𑀡𑁆𑀡𑀦𑀸

𑁬𑁫. 𑀧𑀜𑁆𑀘𑀫𑁂 𑀅𑀮𑀁𑀲𑀸𑀓𑀘𑁆𑀙𑁄𑀢𑀺 𑀲𑀸𑀓𑀘𑁆𑀙𑀸𑀬 𑀬𑀼𑀢𑁆𑀢𑁄. 𑀆𑀕𑀢𑀁 𑀧𑀜𑁆𑀳𑀦𑁆𑀢𑀺 𑀧𑀼𑀘𑁆𑀙𑀺𑀢𑀁 𑀧𑀜𑁆𑀳𑀁. 𑀩𑁆𑀬𑀸𑀓𑀢𑁆𑀢𑀸 𑀳𑁄𑀢𑀻𑀢𑀺 𑀯𑀺𑀲𑁆𑀲𑀚𑁆𑀚𑀺𑀢𑀸 𑀳𑁄𑀢𑀺.

𑁬. 𑀲𑀸𑀚𑀻𑀯𑀲𑀼𑀢𑁆𑀢𑀯𑀡𑁆𑀡𑀦𑀸

𑁬𑁬. 𑀙𑀝𑁆𑀞𑁂 𑀅𑀮𑀁𑀲𑀸𑀚𑀻𑀯𑁄𑀢𑀺 𑀲𑀸𑀚𑀻𑀯𑀸𑀬 𑀬𑀼𑀢𑁆𑀢𑁄. 𑀲𑀸𑀚𑀻𑀯𑁄𑀢𑀺 𑀧𑀜𑁆𑀳𑀧𑀼𑀘𑁆𑀙𑀦𑀜𑁆𑀘𑁂𑀯 𑀧𑀜𑁆𑀳𑀯𑀺𑀲𑁆𑀲𑀚𑁆𑀚𑀦𑀜𑁆𑀘. 𑀲𑀩𑁆𑀩𑁂𑀧𑀺 𑀳𑀺 𑀲𑀩𑁆𑀭𑀳𑁆𑀫𑀘𑀸𑀭𑀺𑀦𑁄 𑀧𑀜𑁆𑀳𑀁 𑀉𑀧𑀚𑀻𑀯𑀦𑁆𑀢𑀺, 𑀢𑁂𑀦𑁂𑀢𑀁 𑀧𑀜𑁆𑀳𑀧𑀼𑀘𑁆𑀙𑀦𑀯𑀺𑀲𑁆𑀲𑀚𑁆𑀚𑀦𑀁 𑀲𑀫𑀸𑀦𑀸𑀚𑀻𑀯𑀢𑀸𑀬 𑀲𑀸𑀚𑀻𑀯𑁄𑀢𑀺 𑀯𑀼𑀢𑁆𑀢𑀁. 𑀓𑀢𑀁 𑀧𑀜𑁆𑀳𑀦𑁆𑀢𑀺 𑀅𑀪𑀺𑀲𑀗𑁆𑀔𑀢𑀁 𑀧𑀜𑁆𑀳𑀁.

𑁭-𑁧𑁦. 𑀧𑀞𑀫𑀇𑀤𑁆𑀥𑀺𑀧𑀸𑀤𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁬𑁭-𑁭𑁦. 𑀲𑀢𑁆𑀢𑀫𑁂 𑀉𑀲𑁆𑀲𑁄𑀴𑁆𑀳𑀻𑀢𑀺 𑀅𑀥𑀺𑀫𑀢𑁆𑀢𑀯𑀻𑀭𑀺𑀬𑀁. 𑀅𑀝𑁆𑀞𑀫𑁂 𑀅𑀢𑁆𑀢𑀦𑁄 𑀩𑁄𑀥𑀺𑀫𑀡𑁆𑀟𑁂 𑀧𑀝𑀺𑀯𑀺𑀤𑁆𑀥𑁂 𑀆𑀕𑀫𑀦𑀇𑀤𑁆𑀥𑀺𑀧𑀸𑀤𑁂 𑀓𑀣𑁂𑀢𑁆𑀯𑀸 𑀉𑀧𑀭𑀺 𑀅𑀢𑁆𑀢𑀦𑁄𑀯 𑀙 𑀅𑀪𑀺𑀜𑁆𑀜𑀸 𑀓𑀣𑁂𑀲𑀻𑀢𑀺. 𑀦𑀯𑀫𑀤𑀲𑀫𑁂𑀲𑀼 𑀯𑀺𑀧𑀲𑁆𑀲𑀦𑀸 𑀓𑀣𑀺𑀢𑀸. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀲𑀜𑁆𑀜𑀸𑀯𑀕𑁆𑀕𑁄 𑀤𑀼𑀢𑀺𑀬𑁄.

(𑁮) 𑁩. 𑀬𑁄𑀥𑀸𑀚𑀻𑀯𑀯𑀕𑁆𑀕𑁄

𑁧. 𑀧𑀞𑀫𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀨𑀮𑀲𑀼𑀢𑁆𑀢𑀯𑀡𑁆𑀡𑀦𑀸

𑁭𑁧. 𑀢𑀢𑀺𑀬𑀲𑁆𑀲 𑀧𑀞𑀫𑁂 𑀬𑀢𑁄 𑀔𑁄, 𑀪𑀺𑀓𑁆𑀔𑀯𑁂𑀢𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀇𑀤𑀸𑀦𑀺 𑀯𑀡𑁆𑀡𑀪𑀡𑀦𑀢𑁆𑀣𑀁 𑀇𑀤𑀁 𑀆𑀭𑀤𑁆𑀥𑀁. 𑀢𑀢𑁆𑀣 𑀬𑀢𑁄 𑀔𑁄𑀢𑀺 𑀬𑀤𑀸 𑀔𑁄. 𑀉𑀓𑁆𑀔𑀺𑀢𑁆𑀢𑀧𑀮𑀺𑀖𑁄𑀢𑀺 𑀅𑀯𑀺𑀚𑁆𑀚𑀸𑀧𑀮𑀺𑀖𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀅𑀧𑀦𑁂𑀢𑁆𑀯𑀸 𑀞𑀺𑀢𑁄. 𑀲𑀁𑀓𑀺𑀡𑁆𑀡𑀧𑀭𑀺𑀔𑁄𑀢𑀺 𑀲𑀁𑀲𑀸𑀭𑀧𑀭𑀺𑀔𑀁 𑀲𑀁𑀓𑀺𑀭𑀺𑀢𑁆𑀯𑀸 𑀯𑀺𑀦𑀸𑀲𑁂𑀢𑁆𑀯𑀸 𑀞𑀺𑀢𑁄. 𑀅𑀩𑁆𑀩𑀽𑀴𑁆𑀳𑁂𑀲𑀺𑀓𑁄𑀢𑀺 𑀢𑀡𑁆𑀳𑀸𑀲𑀗𑁆𑀔𑀸𑀢𑀁 𑀏𑀲𑀺𑀓𑀸𑀣𑀫𑁆𑀪𑀁 𑀅𑀩𑁆𑀩𑀼𑀬𑁆𑀳 𑀮𑀼𑀜𑁆𑀘𑀺𑀢𑁆𑀯𑀸 𑀞𑀺𑀢𑁄. 𑀦𑀺𑀭𑀕𑁆𑀕𑀴𑁄𑀢𑀺 𑀦𑀻𑀯𑀭𑀡𑀓𑀯𑀸𑀝𑀁 𑀉𑀕𑁆𑀖𑀸𑀝𑁂𑀢𑁆𑀯𑀸 𑀞𑀺𑀢𑁄. 𑀧𑀦𑁆𑀦𑀤𑁆𑀥𑀚𑁄 𑀧𑀦𑁆𑀦𑀪𑀸𑀭𑁄𑀢𑀺 𑀫𑀸𑀦𑀤𑁆𑀥𑀚𑀜𑁆𑀘 𑀔𑀦𑁆𑀥𑀸𑀪𑀺𑀲𑀗𑁆𑀔𑀸𑀭𑀓𑀺𑀮𑁂𑀲𑀪𑀸𑀭𑀜𑁆𑀘 𑀧𑀸𑀢𑁂𑀢𑁆𑀯𑀸 𑀑𑀢𑀸𑀭𑁂𑀢𑁆𑀯𑀸 𑀞𑀺𑀢𑁄. 𑀯𑀺𑀲𑀁𑀬𑀼𑀢𑁆𑀢𑁄𑀢𑀺 𑀯𑀝𑁆𑀝𑁂𑀦 𑀯𑀺𑀲𑀁𑀬𑀼𑀢𑁆𑀢𑁄. 𑀲𑁂𑀲𑀁 𑀧𑀸𑀴𑀺𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀏𑀢𑁆𑀢𑀸𑀯𑀢𑀸 𑀪𑀕𑀯𑀢𑀸 𑀫𑀕𑁆𑀕𑁂𑀦 𑀓𑀺𑀮𑁂𑀲𑁂 𑀔𑁂𑀧𑁂𑀢𑁆𑀯𑀸 𑀦𑀺𑀭𑁄𑀥𑀲𑀬𑀦𑀯𑀭𑀕𑀢𑀲𑁆𑀲 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀁 𑀨𑀮𑀲𑀫𑀸𑀧𑀢𑁆𑀢𑀺𑀁 𑀅𑀧𑁆𑀧𑁂𑀢𑁆𑀯𑀸 𑀯𑀺𑀳𑀭𑀢𑁄 𑀔𑀻𑀡𑀸𑀲𑀯𑀲𑁆𑀲 𑀓𑀸𑀮𑁄 𑀤𑀲𑁆𑀲𑀺𑀢𑁄.

𑀬𑀣𑀸 𑀳𑀺 𑀤𑁆𑀯𑁂 𑀦𑀕𑀭𑀸𑀦𑀺 𑀏𑀓𑀁 𑀘𑁄𑀭𑀦𑀕𑀭𑀁 𑀏𑀓𑀁 𑀔𑁂𑀫𑀦𑀕𑀭𑀁. 𑀅𑀣 𑀏𑀓𑀲𑁆𑀲 𑀫𑀳𑀸𑀬𑁄𑀥𑀲𑁆𑀲 𑀏𑀯𑀁 𑀪𑀯𑁂𑀬𑁆𑀬 𑁋 ‘‘𑀬𑀸𑀯𑀺𑀫𑀁 𑀘𑁄𑀭𑀦𑀕𑀭𑀁 𑀢𑀺𑀝𑁆𑀞𑀢𑀺, 𑀢𑀸𑀯 𑀔𑁂𑀫𑀦𑀕𑀭𑀁 𑀪𑀬𑀢𑁄 𑀦 𑀫𑀼𑀘𑁆𑀘𑀢𑀺, 𑀘𑁄𑀭𑀦𑀕𑀭𑀁 𑀅𑀦𑀕𑀭𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀲𑀦𑁆𑀦𑀸𑀳𑀁 𑀓𑀢𑁆𑀯𑀸 𑀔𑀕𑁆𑀕𑀁 𑀕𑀳𑁂𑀢𑁆𑀯𑀸 𑀘𑁄𑀭𑀦𑀕𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀦𑀕𑀭𑀤𑁆𑀯𑀸𑀭𑁂 𑀉𑀲𑁆𑀲𑀸𑀧𑀺𑀢𑁂 𑀏𑀲𑀺𑀓𑀸𑀣𑀫𑁆𑀪𑁂 𑀔𑀕𑁆𑀕𑁂𑀦 𑀙𑀺𑀦𑁆𑀤𑀺𑀢𑁆𑀯𑀸 𑀲𑀤𑁆𑀥𑀺𑀁 𑀤𑁆𑀯𑀸𑀭𑀩𑀸𑀳𑀸𑀳𑀺 𑀓𑀯𑀸𑀝𑀁 𑀪𑀺𑀦𑁆𑀤𑀺𑀢𑁆𑀯𑀸 𑀧𑀮𑀺𑀖𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀧𑀸𑀓𑀸𑀭𑀁 𑀪𑀺𑀦𑁆𑀤𑀺𑀢𑁆𑀯𑀸 𑀧𑀭𑀺𑀔𑀁 𑀯𑀺𑀓𑀺𑀭𑀺𑀢𑁆𑀯𑀸 𑀦𑀕𑀭𑀲𑁄𑀪𑀢𑁆𑀣𑀸𑀬 𑀉𑀲𑁆𑀲𑀺𑀢𑁂 𑀥𑀚𑁂 𑀧𑀸𑀢𑁂𑀢𑁆𑀯𑀸 𑀦𑀕𑀭𑀁 𑀅𑀕𑁆𑀕𑀺𑀦𑀸 𑀛𑀸𑀧𑁂𑀢𑁆𑀯𑀸 𑀔𑁂𑀫𑀦𑀕𑀭𑀁 𑀧𑀯𑀺𑀲𑀺𑀢𑁆𑀯𑀸 𑀧𑀸𑀲𑀸𑀤𑀁 𑀆𑀭𑀼𑀬𑁆𑀳 𑀜𑀸𑀢𑀺𑀕𑀡𑀧𑀭𑀺𑀯𑀼𑀢𑁄 𑀲𑀼𑀭𑀲𑀪𑁄𑀚𑀦𑀁 𑀪𑀼𑀜𑁆𑀚𑁂𑀬𑁆𑀬. 𑀏𑀯𑀁 𑀘𑁄𑀭𑀦𑀕𑀭𑀁 𑀯𑀺𑀬 𑀲𑀓𑁆𑀓𑀸𑀬𑁄, 𑀔𑁂𑀫𑀦𑀕𑀭𑀁 𑀯𑀺𑀬 𑀦𑀺𑀩𑁆𑀩𑀸𑀦𑀁, 𑀫𑀳𑀸𑀬𑁄𑀥𑁄 𑀯𑀺𑀬 𑀬𑁄𑀕𑀸𑀯𑀘𑀭𑁄. 𑀢𑀲𑁆𑀲𑁂𑀯𑀁 𑀳𑁄𑀢𑀺 𑁋 ‘‘𑀬𑀸𑀯 𑀲𑀓𑁆𑀓𑀸𑀬𑀯𑀝𑁆𑀝𑀁 𑀯𑀝𑁆𑀝𑀢𑀺, 𑀢𑀸𑀯 𑀤𑁆𑀯𑀢𑁆𑀢𑀺𑀁𑀲𑀓𑀫𑁆𑀫𑀓𑀸𑀭𑀡𑀸𑀅𑀝𑁆𑀞𑀦𑀯𑀼𑀢𑀺𑀭𑁄𑀕𑀧𑀜𑁆𑀘𑀯𑀻𑀲𑀢𑀺𑀫𑀳𑀸𑀪𑀬𑁂𑀳𑀺 𑀧𑀭𑀺𑀫𑀼𑀘𑁆𑀘𑀦𑀁 𑀦𑀢𑁆𑀣𑀻’’𑀢𑀺. 𑀲𑁄 𑀫𑀳𑀸𑀬𑁄𑀥𑁄 𑀲𑀦𑁆𑀦𑀸𑀳𑀁 𑀯𑀺𑀬 𑀲𑀻𑀮𑀲𑀦𑁆𑀦𑀸𑀳𑀁 𑀓𑀢𑁆𑀯𑀸 𑀧𑀜𑁆𑀜𑀸𑀔𑀕𑁆𑀕𑀁 𑀕𑀳𑁂𑀢𑁆𑀯𑀸 𑀔𑀕𑁆𑀕𑁂𑀦 𑀏𑀲𑀺𑀓𑀸𑀣𑀫𑁆𑀪𑁂 𑀯𑀺𑀬 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀢𑀡𑁆𑀳𑁂𑀲𑀺𑀓𑀁 𑀮𑀼𑀜𑁆𑀘𑀺𑀢𑁆𑀯𑀸, 𑀲𑁄 𑀬𑁄𑀥𑁄 𑀲𑀤𑁆𑀯𑀸𑀭𑀩𑀸𑀳𑀓𑀁 𑀦𑀕𑀭𑀓𑀯𑀸𑀝𑀁 𑀯𑀺𑀬 𑀧𑀜𑁆𑀘𑁄𑀭𑀫𑁆𑀪𑀸𑀕𑀺𑀬𑀲𑀁𑀬𑁄𑀚𑀦𑀅𑀕𑁆𑀕𑀴𑀁 𑀉𑀕𑁆𑀖𑀸𑀝𑁂𑀢𑁆𑀯𑀸, 𑀲𑁄 𑀬𑁄𑀥𑁄 𑀧𑀮𑀺𑀖𑀁 𑀯𑀺𑀬 𑀅𑀯𑀺𑀚𑁆𑀚𑀸𑀧𑀮𑀺𑀖𑀁 𑀉𑀓𑁆𑀔𑀺𑀧𑀺𑀢𑁆𑀯𑀸, 𑀲𑁄 𑀬𑁄𑀥𑁄 𑀧𑀸𑀓𑀸𑀭𑀁 𑀪𑀺𑀦𑁆𑀤𑀦𑁆𑀢𑁄 𑀧𑀭𑀺𑀔𑀁 𑀯𑀺𑀬 𑀓𑀫𑁆𑀫𑀸𑀪𑀺𑀲𑀗𑁆𑀔𑀸𑀭𑀁 𑀪𑀺𑀦𑁆𑀤𑀦𑁆𑀢𑁄 𑀚𑀸𑀢𑀺𑀲𑀁𑀲𑀸𑀭𑀧𑀭𑀺𑀔𑀁 𑀯𑀺𑀓𑀺𑀭𑀺𑀢𑁆𑀯𑀸, 𑀲𑁄 𑀬𑁄𑀥𑁄 𑀦𑀕𑀭𑀁 𑀲𑁄𑀪𑀢𑁆𑀣𑀸𑀬 𑀉𑀲𑁆𑀲𑀸𑀧𑀺𑀢𑀤𑁆𑀥𑀚𑁂 𑀯𑀺𑀬 𑀫𑀸𑀦𑀤𑁆𑀥𑀚𑁂 𑀧𑀸𑀢𑁂𑀢𑁆𑀯𑀸 𑀲𑀓𑁆𑀓𑀸𑀬𑀦𑀕𑀭𑀁 𑀛𑀸𑀧𑁂𑀢𑁆𑀯𑀸, 𑀲𑁄 𑀬𑁄𑀥𑁄 𑀔𑁂𑀫𑀦𑀕𑀭𑁂 𑀉𑀧𑀭𑀺𑀧𑀸𑀲𑀸𑀤𑁂 𑀲𑀼𑀪𑁄𑀚𑀦𑀁 𑀯𑀺𑀬 𑀓𑀺𑀮𑁂𑀲𑀧𑀭𑀺𑀦𑀺𑀩𑁆𑀩𑀸𑀦𑀦𑀕𑀭𑀁 𑀧𑀯𑀺𑀲𑀺𑀢𑁆𑀯𑀸 𑀅𑀫𑀢𑀁 𑀦𑀺𑀭𑁄𑀥𑀸𑀭𑀫𑁆𑀫𑀡𑀁 𑀨𑀮𑀲𑀫𑀸𑀧𑀢𑁆𑀢𑀺𑀲𑀼𑀔𑀁 𑀅𑀦𑀼𑀪𑀯𑀫𑀸𑀦𑁄 𑀓𑀸𑀮𑀁 𑀯𑀻𑀢𑀺𑀦𑀸𑀫𑁂𑀢𑀺.

𑁨. 𑀤𑀼𑀢𑀺𑀬𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀨𑀮𑀲𑀼𑀢𑁆𑀢𑀯𑀡𑁆𑀡𑀦𑀸

𑁭𑁨. 𑀤𑀼𑀢𑀺𑀬𑁂 𑀅𑀦𑀺𑀘𑁆𑀘𑀲𑀜𑁆𑀜𑀸𑀢𑀺 𑀔𑀦𑁆𑀥𑀧𑀜𑁆𑀘𑀓𑀁 𑀳𑀼𑀢𑁆𑀯𑀸 𑀅𑀪𑀸𑀯𑀸𑀓𑀸𑀭𑁂𑀦 𑀅𑀦𑀺𑀘𑁆𑀘𑀦𑁆𑀢𑀺 𑀉𑀧𑁆𑀧𑀚𑁆𑀚𑀦𑀓𑀲𑀜𑁆𑀜𑀸. 𑀅𑀦𑀺𑀘𑁆𑀘𑁂 𑀤𑀼𑀓𑁆𑀔𑀲𑀜𑁆𑀜𑀸𑀢𑀺 𑀬𑀤𑀦𑀺𑀘𑁆𑀘𑀁, 𑀢𑀁 𑀧𑀝𑀺𑀧𑀻𑀴𑀦𑀸𑀓𑀸𑀭𑁂𑀦 𑀤𑀼𑀓𑁆𑀔𑀦𑁆𑀢𑀺 𑀉𑀧𑁆𑀧𑀚𑁆𑀚𑀦𑀓𑀲𑀜𑁆𑀜𑀸. 𑀤𑀼𑀓𑁆𑀔𑁂 𑀅𑀦𑀢𑁆𑀢𑀲𑀜𑁆𑀜𑀸𑀢𑀺 𑀬𑀁 𑀤𑀼𑀓𑁆𑀔𑀁, 𑀢𑀁 𑀅𑀯𑀲𑀯𑀢𑁆𑀢𑀦𑀸𑀓𑀸𑀭𑁂𑀦 𑀅𑀦𑀢𑁆𑀢𑀸𑀢𑀺 𑀉𑀧𑁆𑀧𑀚𑁆𑀚𑀦𑀓𑀲𑀜𑁆𑀜𑀸. 𑀲𑁂𑀲𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀫𑁂𑀯. 𑀇𑀫𑁂𑀲𑀼 𑀧𑀦 𑀤𑁆𑀯𑀻𑀲𑀼𑀧𑀺 𑀲𑀼𑀢𑁆𑀢𑁂𑀲𑀼 𑀯𑀺𑀧𑀲𑁆𑀲𑀦𑀸𑀨𑀮𑀁 𑀦𑀸𑀫 𑀓𑀣𑀺𑀢𑀦𑁆𑀢𑀺.

𑁩. 𑀧𑀞𑀫𑀥𑀫𑁆𑀫𑀯𑀺𑀳𑀸𑀭𑀻𑀲𑀼𑀢𑁆𑀢𑀯𑀡𑁆𑀡𑀦𑀸

𑁭𑁩. 𑀢𑀢𑀺𑀬𑁂 𑀤𑀺𑀯𑀲𑀁 𑀅𑀢𑀺𑀦𑀸𑀫𑁂𑀢𑀻𑀢𑀺 𑀤𑀺𑀯𑀲𑀁 𑀅𑀢𑀺𑀓𑁆𑀓𑀸𑀫𑁂𑀢𑀺. 𑀭𑀺𑀜𑁆𑀘𑀢𑀺 𑀧𑀝𑀺𑀲𑀮𑁆𑀮𑀸𑀦𑀦𑁆𑀢𑀺 𑀏𑀓𑀻𑀪𑀸𑀯𑀁 𑀯𑀺𑀲𑁆𑀲𑀚𑁆𑀚𑁂𑀢𑀺. 𑀤𑁂𑀲𑁂𑀢𑀻𑀢𑀺 𑀓𑀣𑁂𑀢𑀺 𑀧𑀓𑀸𑀲𑁂𑀢𑀺. 𑀥𑀫𑁆𑀫𑀧𑀜𑁆𑀜𑀢𑁆𑀢𑀺𑀬𑀸𑀢𑀺 𑀥𑀫𑁆𑀫𑀲𑁆𑀲 𑀧𑀜𑁆𑀜𑀸𑀧𑀦𑀸𑀬. 𑀥𑀫𑁆𑀫𑀁 𑀧𑀭𑀺𑀬𑀸𑀧𑀼𑀡𑀸𑀢𑀻𑀢𑀺 𑀦𑀯𑀗𑁆𑀕𑀯𑀲𑁂𑀦 𑀘𑀢𑀼𑀲𑀘𑁆𑀘𑀥𑀫𑁆𑀫𑀁 𑀧𑀭𑀺𑀬𑀸𑀧𑀼𑀡𑀸𑀢𑀺 𑀯𑀴𑀜𑁆𑀚𑁂𑀢𑀺 𑀓𑀣𑁂𑀢𑀺. 𑀦 𑀭𑀺𑀜𑁆𑀘𑀢𑀺 𑀧𑀝𑀺𑀲𑀮𑁆𑀮𑀸𑀦𑀦𑁆𑀢𑀺 𑀏𑀓𑀻𑀪𑀸𑀯𑀁 𑀦 𑀯𑀺𑀲𑁆𑀲𑀚𑁆𑀚𑁂𑀢𑀺. 𑀅𑀦𑀼𑀬𑀼𑀜𑁆𑀚𑀢𑀺 𑀅𑀚𑁆𑀛𑀢𑁆𑀢𑀁 𑀘𑁂𑀢𑁄𑀲𑀫𑀣𑀦𑁆𑀢𑀺 𑀦𑀺𑀬𑀓𑀚𑁆𑀛𑀢𑁆𑀢𑁂 𑀘𑀺𑀢𑁆𑀢𑀲𑀫𑀸𑀥𑀺𑀁 𑀆𑀲𑁂𑀯𑀢𑀺 𑀪𑀸𑀯𑁂𑀢𑀺, 𑀲𑀫𑀣𑀓𑀫𑁆𑀫𑀝𑁆𑀞𑀸𑀦𑁂 𑀬𑀼𑀢𑁆𑀢𑀧𑁆𑀧𑀬𑀼𑀢𑁆𑀢𑁄 𑀳𑁄𑀢𑀺.

𑀳𑀺𑀢𑁂𑀲𑀺𑀦𑀸𑀢𑀺 𑀳𑀺𑀢𑀁 𑀏𑀲𑀦𑁆𑀢𑁂𑀦. 𑀅𑀦𑀼𑀓𑀫𑁆𑀧𑀓𑁂𑀦𑀸𑀢𑀺 𑀅𑀦𑀼𑀓𑀫𑁆𑀧𑀫𑀸𑀦𑁂𑀦. 𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬𑀸𑀢𑀺 𑀅𑀦𑀼𑀓𑀫𑁆𑀧𑀁 𑀘𑀺𑀢𑁆𑀢𑁂𑀦 𑀧𑀭𑀺𑀕𑁆𑀕𑀳𑁂𑀢𑁆𑀯𑀸, 𑀧𑀝𑀺𑀘𑁆𑀘𑀸𑀢𑀺𑀧𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑀢𑀁 𑀯𑁄 𑀢𑀁 𑀫𑀬𑀸𑀢𑀺 𑀢𑀁 𑀫𑀬𑀸 𑀇𑀫𑁂 𑀧𑀜𑁆𑀘 𑀧𑀼𑀕𑁆𑀕𑀮𑁂 𑀤𑁂𑀲𑁂𑀦𑁆𑀢𑁂𑀦 𑀢𑀼𑀫𑁆𑀳𑀸𑀓𑀁 𑀓𑀢𑀁. 𑀏𑀢𑁆𑀢𑀓𑀫𑁂𑀯 𑀳𑀺 𑀅𑀦𑀼𑀓𑀫𑁆𑀧𑀓𑀲𑁆𑀲 𑀲𑀢𑁆𑀣𑀼 𑀓𑀺𑀘𑁆𑀘𑀁 𑀬𑀤𑀺𑀤𑀁 𑀅𑀯𑀺𑀧𑀭𑀻𑀢𑀥𑀫𑁆𑀫𑀤𑁂𑀲𑀦𑀸, 𑀇𑀢𑁄 𑀧𑀭𑀁 𑀧𑀦 𑀧𑀝𑀺𑀧𑀢𑁆𑀢𑀺 𑀦𑀸𑀫 𑀲𑀸𑀯𑀓𑀸𑀦𑀁 𑀓𑀺𑀘𑁆𑀘𑀁. 𑀢𑁂𑀦𑀸𑀳 𑁋 𑀏𑀢𑀸𑀦𑀺 𑀪𑀺𑀓𑁆𑀔𑀼 𑀭𑀼𑀓𑁆𑀔𑀫𑀽𑀮𑀸𑀦𑀺…𑀧𑁂… 𑀅𑀫𑁆𑀳𑀸𑀓𑀁 𑀅𑀦𑀼𑀲𑀸𑀲𑀦𑀻𑀢𑀺. 𑀢𑀢𑁆𑀣 𑀘 𑀭𑀼𑀓𑁆𑀔𑀫𑀽𑀮𑀸𑀦𑀻𑀢𑀺 𑀇𑀫𑀺𑀦𑀸 𑀭𑀼𑀓𑁆𑀔𑀫𑀽𑀮𑀲𑁂𑀦𑀸𑀲𑀦𑀁 𑀤𑀲𑁆𑀲𑁂𑀢𑀺. 𑀲𑀼𑀜𑁆𑀜𑀸𑀕𑀸𑀭𑀸𑀦𑀻𑀢𑀺 𑀇𑀫𑀺𑀦𑀸 𑀚𑀦𑀯𑀺𑀯𑀺𑀢𑁆𑀢𑀝𑁆𑀞𑀸𑀦𑀁. 𑀉𑀪𑀬𑁂𑀦𑀸𑀧𑀺 𑀘 𑀬𑁄𑀕𑀸𑀦𑀼𑀭𑀽𑀧𑀁 𑀲𑁂𑀦𑀸𑀲𑀦𑀫𑀸𑀘𑀺𑀓𑁆𑀔𑀢𑀺, 𑀤𑀸𑀬𑀚𑁆𑀚𑀁 𑀦𑀺𑀬𑁆𑀬𑀸𑀢𑁂𑀢𑀺. 𑀛𑀸𑀬𑀣𑀸𑀢𑀺 𑀆𑀭𑀫𑁆𑀫𑀡𑀽𑀧𑀦𑀺𑀚𑁆𑀛𑀸𑀦𑁂𑀦 𑀅𑀝𑁆𑀞𑀢𑀺𑀁𑀲𑀸𑀭𑀫𑁆𑀫𑀡𑀸𑀦𑀺, 𑀮𑀓𑁆𑀔𑀡𑀽𑀧𑀦𑀺𑀚𑁆𑀛𑀸𑀦𑁂𑀦 𑀘 𑀅𑀦𑀺𑀘𑁆𑀘𑀸𑀤𑀺𑀢𑁄 𑀔𑀦𑁆𑀥𑀸𑀬𑀢𑀦𑀸𑀤𑀻𑀦𑀺 𑀉𑀧𑀦𑀺𑀚𑁆𑀛𑀸𑀬𑀣, 𑀲𑀫𑀣𑀜𑁆𑀘 𑀯𑀺𑀧𑀲𑁆𑀲𑀦𑀜𑁆𑀘 𑀯𑀟𑁆𑀠𑁂𑀣𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀫𑀸 𑀧𑀫𑀸𑀤𑀢𑁆𑀣𑀸𑀢𑀺 𑀫𑀸 𑀧𑀫𑀚𑁆𑀚𑀺𑀢𑁆𑀣. 𑀫𑀸 𑀧𑀘𑁆𑀙𑀸 𑀯𑀺𑀧𑁆𑀧𑀝𑀺𑀲𑀸𑀭𑀺𑀦𑁄 𑀅𑀳𑀼𑀯𑀢𑁆𑀣𑀸𑀢𑀺 𑀬𑁂 𑀳𑀺 𑀧𑀼𑀩𑁆𑀩𑁂 𑀤𑀳𑀭𑀓𑀸𑀮𑁂 𑀆𑀭𑁄𑀕𑁆𑀬𑀓𑀸𑀮𑁂 𑀲𑀢𑁆𑀢𑀲𑀧𑁆𑀧𑀸𑀬𑀸𑀤𑀺𑀲𑀫𑁆𑀧𑀢𑁆𑀢𑀺𑀓𑀸𑀮𑁂 𑀲𑀢𑁆𑀣𑀼 𑀲𑀫𑁆𑀫𑀼𑀔𑀻𑀪𑀸𑀯𑀓𑀸𑀮𑁂 𑀘 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀯𑀺𑀭𑀳𑀺𑀢𑀸 𑀭𑀢𑁆𑀢𑀺𑀦𑁆𑀤𑀺𑀯𑀁 𑀫𑀗𑁆𑀓𑀼𑀮𑀪𑀢𑁆𑀢𑀸 𑀳𑀼𑀢𑁆𑀯𑀸 𑀲𑁂𑀬𑁆𑀬𑀲𑀼𑀔𑀫𑀺𑀤𑁆𑀥𑀲𑀼𑀔𑀫𑀦𑀼𑀬𑀼𑀢𑁆𑀢𑀸 𑀧𑀫𑀚𑁆𑀚𑀦𑁆𑀢𑀺, 𑀢𑁂 𑀧𑀘𑁆𑀙𑀸 𑀚𑀭𑀸𑀓𑀸𑀮𑁂 𑀭𑁄𑀕𑀓𑀸𑀮𑁂 𑀫𑀭𑀡𑀓𑀸𑀮𑁂 𑀯𑀺𑀧𑀢𑁆𑀢𑀺𑀓𑀸𑀮𑁂 𑀲𑀢𑁆𑀣𑀼 𑀧𑀭𑀺𑀦𑀺𑀩𑁆𑀩𑀸𑀦𑀓𑀸𑀮𑁂 𑀘 𑀢𑀁 𑀧𑀼𑀩𑁆𑀩𑁂 𑀧𑀫𑀸𑀤𑀯𑀺𑀳𑀸𑀭𑀁 𑀅𑀦𑀼𑀲𑁆𑀲𑀭𑀦𑁆𑀢𑀸 𑀲𑀧𑁆𑀧𑀝𑀺𑀲𑀦𑁆𑀥𑀺𑀓𑀸𑀮𑀓𑀺𑀭𑀺𑀬𑀜𑁆𑀘 𑀪𑀸𑀭𑀺𑀬𑀁 𑀲𑀫𑁆𑀧𑀲𑁆𑀲𑀫𑀸𑀦𑀸 𑀯𑀺𑀧𑁆𑀧𑀝𑀺𑀲𑀸𑀭𑀺𑀦𑁄 𑀳𑁄𑀦𑁆𑀢𑀺. 𑀢𑀼𑀫𑁆𑀳𑁂 𑀧𑀦 𑀢𑀸𑀤𑀺𑀲𑀸 𑀫𑀸 𑀅𑀳𑀼𑀯𑀢𑁆𑀣𑀸𑀢𑀺 𑀏𑀢𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 𑁋 ‘‘𑀫𑀸 𑀧𑀘𑁆𑀙𑀸 𑀯𑀺𑀧𑁆𑀧𑀝𑀺𑀲𑀸𑀭𑀺𑀦𑁄 𑀅𑀳𑀼𑀯𑀢𑁆𑀣𑀸’’𑀢𑀺. 𑀅𑀬𑀁 𑀯𑁄 𑀅𑀫𑁆𑀳𑀸𑀓𑀁 𑀅𑀦𑀼𑀲𑀸𑀲𑀦𑀻𑀢𑀺 𑀅𑀬𑀁 𑀅𑀫𑁆𑀳𑀸𑀓𑀁 𑀲𑀦𑁆𑀢𑀺𑀓𑀸 ‘‘𑀛𑀸𑀬𑀣 𑀫𑀸 𑀧𑀫𑀸𑀤𑀢𑁆𑀣𑀸’’𑀢𑀺 𑀢𑀼𑀫𑁆𑀳𑀸𑀓𑀁 𑀅𑀦𑀼𑀲𑀸𑀲𑀦𑀻, 𑀑𑀯𑀸𑀤𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁪. 𑀤𑀼𑀢𑀺𑀬𑀥𑀫𑁆𑀫𑀯𑀺𑀳𑀸𑀭𑀻𑀲𑀼𑀢𑁆𑀢𑀯𑀡𑁆𑀡𑀦𑀸

𑁭𑁪. 𑀘𑀢𑀼𑀢𑁆𑀣𑁂 𑀉𑀢𑁆𑀢𑀭𑀺 𑀘𑀲𑁆𑀲 𑀧𑀜𑁆𑀜𑀸𑀬 𑀅𑀢𑁆𑀣𑀁 𑀦𑀧𑁆𑀧𑀚𑀸𑀦𑀸𑀢𑀻𑀢𑀺 𑀢𑀢𑁄 𑀧𑀭𑀺𑀬𑀢𑁆𑀢𑀺𑀢𑁄 𑀉𑀢𑁆𑀢𑀭𑀺 𑀢𑀲𑁆𑀲 𑀥𑀫𑁆𑀫𑀲𑁆𑀲 𑀲𑀳𑀯𑀺𑀧𑀲𑁆𑀲𑀦𑀸𑀬 𑀫𑀕𑁆𑀕𑀧𑀜𑁆𑀜𑀸𑀬 𑀅𑀢𑁆𑀣𑀁 𑀦𑀧𑁆𑀧𑀚𑀸𑀦𑀸𑀢𑀺, 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀦 𑀧𑀲𑁆𑀲𑀢𑀺 𑀦𑀧𑁆𑀧𑀝𑀺𑀯𑀺𑀚𑁆𑀛𑀢𑀻𑀢𑀺 𑀅𑀢𑁆𑀣𑁄. 𑀲𑁂𑀲𑀯𑀸𑀭𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀏𑀯𑀫𑁂𑀢𑁂𑀲𑀼 𑀤𑁆𑀯𑀻𑀲𑀼𑀧𑀺 𑀲𑀼𑀢𑁆𑀢𑁂𑀲𑀼 𑀩𑀳𑀼𑀲𑁆𑀲𑀼𑀢𑀪𑀺𑀓𑁆𑀔𑀼 𑀯𑀺𑀧𑀲𑁆𑀲𑀦𑀸𑀓𑀫𑁆𑀫𑀺𑀓𑁄 𑀲𑁄𑀢𑀸𑀧𑀦𑁆𑀦𑁄 𑀲𑀓𑀤𑀸𑀕𑀸𑀫𑀻 𑀅𑀦𑀸𑀕𑀸𑀫𑀻 𑀔𑀻𑀡𑀸𑀲𑀯𑁄𑀢𑀺 𑀙 𑀚𑀦𑀸 𑀥𑀫𑁆𑀫𑀯𑀺𑀳𑀸𑀭𑀺𑀦𑁄 𑀦𑀸𑀫𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑁫. 𑀧𑀞𑀫𑀬𑁄𑀥𑀸𑀚𑀻𑀯𑀲𑀼𑀢𑁆𑀢𑀯𑀡𑁆𑀡𑀦𑀸

𑁭𑁫. 𑀧𑀜𑁆𑀘𑀫𑁂 𑀬𑁄𑀥𑀸𑀚𑀻𑀯𑀸𑀢𑀺 𑀬𑀼𑀤𑁆𑀥𑀽𑀧𑀚𑀻𑀯𑀺𑀦𑁄. 𑀭𑀚𑀕𑁆𑀕𑀦𑁆𑀢𑀺 𑀳𑀢𑁆𑀣𑀺𑀅𑀲𑁆𑀲𑀸𑀤𑀻𑀦𑀁 𑀧𑀸𑀤𑀧𑁆𑀧𑀳𑀸𑀭𑀪𑀺𑀦𑁆𑀦𑀸𑀬 𑀪𑀽𑀫𑀺𑀬𑀸 𑀉𑀕𑁆𑀕𑀢𑀁 𑀭𑀚𑀓𑁆𑀔𑀦𑁆𑀥𑀁. 𑀦 𑀲𑀦𑁆𑀣𑀫𑁆𑀪𑀢𑀻𑀢𑀺 𑀲𑀦𑁆𑀣𑀫𑁆𑀪𑀺𑀢𑁆𑀯𑀸 𑀞𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀲𑀳𑀢𑀺 𑀭𑀚𑀕𑁆𑀕𑀦𑁆𑀢𑀺 𑀭𑀚𑀓𑁆𑀔𑀦𑁆𑀥𑀁 𑀤𑀺𑀲𑁆𑀯𑀸𑀧𑀺 𑀅𑀥𑀺𑀯𑀸𑀲𑁂𑀢𑀺. 𑀥𑀚𑀕𑁆𑀕𑀦𑁆𑀢𑀺 𑀳𑀢𑁆𑀣𑀺𑀅𑀲𑁆𑀲𑀤𑀻𑀦𑀁 𑀧𑀺𑀝𑁆𑀞𑁂𑀲𑀼 𑀯𑀸 𑀭𑀣𑁂𑀲𑀼 𑀯𑀸 𑀉𑀲𑁆𑀲𑀸𑀧𑀺𑀢𑀸𑀦𑀁 𑀥𑀚𑀸𑀦𑀁 𑀅𑀕𑁆𑀕𑀁. 𑀉𑀲𑁆𑀲𑀸𑀭𑀡𑀦𑁆𑀢𑀺 𑀳𑀢𑁆𑀣𑀺𑀅𑀲𑁆𑀲𑀭𑀣𑀸𑀦𑀜𑁆𑀘𑁂𑀯 𑀩𑀮𑀓𑀸𑀬𑀲𑁆𑀲 𑀘 𑀉𑀘𑁆𑀘𑀸𑀲𑀤𑁆𑀤𑀫𑀳𑀸𑀲𑀤𑁆𑀤𑀁. 𑀲𑀫𑁆𑀧𑀳𑀸𑀭𑁂𑀢𑀺 𑀲𑀫𑀸𑀕𑀢𑁂 𑀅𑀧𑁆𑀧𑀫𑀢𑁆𑀢𑀓𑁂𑀧𑀺 𑀧𑀳𑀸𑀭𑁂. 𑀳𑀜𑁆𑀜𑀢𑀻𑀢𑀺 𑀯𑀺𑀳𑀜𑁆𑀜𑀢𑀺 𑀯𑀺𑀖𑀸𑀢𑀁 𑀆𑀧𑀚𑁆𑀚𑀢𑀺. 𑀩𑁆𑀬𑀸𑀧𑀚𑁆𑀚𑀢𑀻𑀢𑀺 𑀯𑀺𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺, 𑀧𑀓𑀢𑀺𑀪𑀸𑀯𑀁 𑀚𑀳𑀢𑀺. 𑀲𑀳𑀢𑀺 𑀲𑀫𑁆𑀧𑀳𑀸𑀭𑀦𑁆𑀢𑀺 𑀤𑁆𑀯𑁂 𑀢𑀬𑁄 𑀧𑀳𑀸𑀭𑁂 𑀧𑀢𑁆𑀯𑀸𑀧𑀺 𑀲𑀳𑀢𑀺 𑀅𑀥𑀺𑀯𑀸𑀲𑁂𑀢𑀺. 𑀢𑀫𑁂𑀯 𑀲𑀗𑁆𑀕𑀸𑀫𑀲𑀻𑀲𑀦𑁆𑀢𑀺 𑀢𑀁𑀬𑁂𑀯 𑀚𑀬𑀓𑁆𑀔𑀦𑁆𑀥𑀸𑀯𑀸𑀭𑀝𑁆𑀞𑀸𑀦𑀁. 𑀅𑀚𑁆𑀛𑀸𑀯𑀲𑀢𑀻𑀢𑀺 𑀲𑀢𑁆𑀢𑀸𑀳𑀫𑀢𑁆𑀢𑀁 𑀅𑀪𑀺𑀪𑀯𑀺𑀢𑁆𑀯𑀸 𑀆𑀯𑀲𑀢𑀺. 𑀓𑀺𑀁 𑀓𑀸𑀭𑀡𑀸? 𑀮𑀤𑁆𑀥𑀧𑀳𑀸𑀭𑀸𑀦𑀁 𑀧𑀳𑀸𑀭𑀚𑀕𑁆𑀕𑀦𑀢𑁆𑀣𑀜𑁆𑀘𑁂𑀯 𑀓𑀢𑀓𑀫𑁆𑀫𑀸𑀦𑀁 𑀯𑀺𑀲𑁂𑀲𑀁 𑀜𑀢𑁆𑀯𑀸 𑀞𑀸𑀦𑀦𑁆𑀢𑀭𑀤𑀸𑀦𑀢𑁆𑀣𑀜𑁆𑀘 𑀇𑀲𑁆𑀲𑀭𑀺𑀬𑀲𑀼𑀔𑀸𑀦𑀼𑀪𑀯𑀦𑀢𑁆𑀣𑀜𑁆𑀘.

𑀇𑀤𑀸𑀦𑀺 𑀬𑀲𑁆𑀫𑀸 𑀲𑀢𑁆𑀣𑀼 𑀬𑁄𑀥𑀸𑀚𑀻𑀯𑁂𑀳𑀺 𑀓𑀺𑀘𑁆𑀘𑀁 𑀦𑀢𑁆𑀣𑀺, 𑀇𑀫𑀲𑁆𑀫𑀺𑀁 𑀧𑀦 𑀲𑀸𑀲𑀦𑁂 𑀢𑀣𑀸𑀭𑀽𑀧𑁂 𑀧𑀜𑁆𑀘 𑀧𑀼𑀕𑁆𑀕𑀮𑁂 𑀤𑀲𑁆𑀲𑁂𑀢𑀼𑀁 𑀇𑀤𑀁 𑀑𑀧𑀫𑁆𑀫𑀁 𑀆𑀪𑀢𑀁. 𑀢𑀲𑁆𑀫𑀸 𑀢𑁂 𑀧𑀼𑀕𑁆𑀕𑀮𑁂 𑀤𑀲𑁆𑀲𑁂𑀦𑁆𑀢𑁄 𑀏𑀯𑀫𑁂𑀯 𑀔𑁄𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀁𑀲𑀻𑀤𑀢𑀻𑀢𑀺 𑀫𑀺𑀘𑁆𑀙𑀸𑀯𑀺𑀢𑀓𑁆𑀓𑀲𑁆𑀫𑀺𑀁 𑀲𑀁𑀲𑀻𑀤𑀢𑀺 𑀅𑀦𑀼𑀧𑁆𑀧𑀯𑀺𑀲𑀢𑀺. 𑀦 𑀲𑀓𑁆𑀓𑁄𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀲𑀦𑁆𑀥𑀸𑀭𑁂𑀢𑀼𑀦𑁆𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑀁 𑀅𑀦𑀼𑀧𑀘𑁆𑀙𑀺𑀚𑁆𑀚𑀫𑀸𑀦𑀁 𑀕𑁄𑀧𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀲𑀺𑀓𑁆𑀔𑀸𑀤𑀼𑀩𑁆𑀩𑀮𑁆𑀬𑀁 𑀆𑀯𑀺𑀓𑀢𑁆𑀯𑀸𑀢𑀺 𑀲𑀺𑀓𑁆𑀔𑀸𑀬 𑀤𑀼𑀩𑁆𑀩𑀮𑀪𑀸𑀯𑀁 𑀧𑀓𑀸𑀲𑁂𑀢𑁆𑀯𑀸. 𑀓𑀺𑀫𑀲𑁆𑀲 𑀭𑀚𑀕𑁆𑀕𑀲𑁆𑀫𑀺𑀦𑁆𑀢𑀺 𑀓𑀺𑀁 𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀭𑀚𑀕𑁆𑀕𑀁 𑀦𑀸𑀫𑀸𑀢𑀺 𑀯𑀤𑀢𑀺. 𑀅𑀪𑀺𑀭𑀽𑀧𑀸𑀢𑀺 𑀅𑀪𑀺𑀭𑀽𑀧𑀯𑀢𑀻. 𑀤𑀲𑁆𑀲𑀦𑀻𑀬𑀸𑀢𑀺 𑀤𑀲𑁆𑀲𑀦𑀬𑁄𑀕𑁆𑀕𑀸. 𑀧𑀸𑀲𑀸𑀤𑀺𑀓𑀸𑀢𑀺 𑀤𑀲𑁆𑀲𑀦𑁂𑀦𑁂𑀯 𑀘𑀺𑀢𑁆𑀢𑀧𑁆𑀧𑀲𑀸𑀤𑀸𑀯𑀳𑀸. 𑀧𑀭𑀫𑀸𑀬𑀸𑀢𑀺 𑀉𑀢𑁆𑀢𑀫𑀸𑀬. 𑀯𑀡𑁆𑀡𑀧𑁄𑀓𑁆𑀔𑀭𑀢𑀸𑀬𑀸𑀢𑀺 𑀲𑀭𑀻𑀭𑀯𑀡𑁆𑀡𑁂𑀦 𑀘𑁂𑀯 𑀅𑀗𑁆𑀕𑀲𑀡𑁆𑀞𑀸𑀦𑁂𑀦 𑀘. 𑀊𑀳𑀲𑀢𑀻𑀢𑀺 𑀅𑀯𑀳𑀲𑀢𑀺. 𑀉𑀮𑁆𑀮𑀧𑀢𑀻𑀢𑀺 𑀓𑀣𑁂𑀢𑀺. 𑀉𑀚𑁆𑀛𑀕𑁆𑀖𑀢𑀻𑀢𑀺 𑀧𑀸𑀡𑀺𑀁 𑀧𑀳𑀭𑀺𑀢𑁆𑀯𑀸 𑀫𑀳𑀸𑀳𑀲𑀺𑀢𑀁 𑀳𑀲𑀢𑀺. 𑀉𑀧𑁆𑀧𑀡𑁆𑀟𑁂𑀢𑀻𑀢𑀺 𑀉𑀧𑁆𑀧𑀡𑁆𑀟𑀦𑀓𑀣𑀁 𑀓𑀣𑁂𑀢𑀺. 𑀅𑀪𑀺𑀦𑀺𑀲𑀻𑀤𑀢𑀻𑀢𑀺 𑀅𑀪𑀺𑀪𑀯𑀺𑀢𑁆𑀯𑀸 𑀲𑀦𑁆𑀢𑀺𑀓𑁂 𑀯𑀸 𑀏𑀓𑀸𑀲𑀦𑁂 𑀯𑀸 𑀦𑀺𑀲𑀻𑀤𑀢𑀺. 𑀤𑀼𑀢𑀺𑀬𑀧𑀤𑁂𑀧𑀺 𑀏𑀲𑁂𑀯 𑀦𑀬𑁄. 𑀅𑀚𑁆𑀛𑁄𑀢𑁆𑀣𑀭𑀢𑀻𑀢𑀺 𑀅𑀯𑀢𑁆𑀣𑀭𑀢𑀺. 𑀯𑀺𑀦𑀺𑀯𑁂𑀞𑁂𑀢𑁆𑀯𑀸 𑀯𑀺𑀦𑀺𑀫𑁄𑀘𑁂𑀢𑁆𑀯𑀸𑀢𑀺 𑀕𑀳𑀺𑀢𑀝𑁆𑀞𑀸𑀦𑀢𑁄 𑀢𑀲𑁆𑀲𑀸 𑀳𑀢𑁆𑀣𑀁 𑀯𑀺𑀦𑀺𑀩𑁆𑀩𑁂𑀞𑁂𑀢𑁆𑀯𑀸 𑀘𑁂𑀯 𑀫𑁄𑀘𑁂𑀢𑁆𑀯𑀸 𑀘. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺. 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀯𑀝𑁆𑀝𑀯𑀺𑀯𑀝𑁆𑀝𑀁 𑀓𑀣𑀺𑀢𑀁.

𑁬. 𑀤𑀼𑀢𑀺𑀬𑀬𑁄𑀥𑀸𑀚𑀻𑀯𑀲𑀼𑀢𑁆𑀢𑀯𑀡𑁆𑀡𑀦𑀸

𑁭𑁬. 𑀙𑀝𑁆𑀞𑁂 𑀅𑀲𑀺𑀘𑀫𑁆𑀫𑀁 𑀕𑀳𑁂𑀢𑁆𑀯𑀸𑀢𑀺 𑀅𑀲𑀺𑀜𑁆𑀘 𑀘𑀫𑁆𑀫𑀜𑁆𑀘 𑀕𑀳𑁂𑀢𑁆𑀯𑀸. 𑀥𑀦𑀼𑀓𑀮𑀸𑀧𑀁 𑀲𑀦𑁆𑀦𑀬𑁆𑀳𑀺𑀢𑁆𑀯𑀸𑀢𑀺 𑀥𑀦𑀼𑀜𑁆𑀘 𑀲𑀭𑀓𑀮𑀸𑀧𑀜𑁆𑀘 𑀲𑀦𑁆𑀦𑀬𑁆𑀳𑀺𑀢𑁆𑀯𑀸. 𑀯𑀺𑀬𑀽𑀴𑁆𑀳𑀦𑁆𑀢𑀺 𑀬𑀼𑀤𑁆𑀥𑀲𑀦𑁆𑀦𑀺𑀯𑁂𑀲𑀯𑁂𑀲𑁂𑀦 𑀞𑀺𑀢𑀁. 𑀲𑀗𑁆𑀕𑀸𑀫𑀁 𑀑𑀢𑀭𑀢𑀻𑀢𑀺 𑀫𑀳𑀸𑀬𑀼𑀤𑁆𑀥𑀁 𑀑𑀢𑀭𑀢𑀺. 𑀉𑀲𑁆𑀲𑀳𑀢𑀺 𑀯𑀸𑀬𑀫𑀢𑀻𑀢𑀺 𑀉𑀲𑁆𑀲𑀸𑀳𑀜𑁆𑀘 𑀯𑀸𑀬𑀸𑀫𑀜𑁆𑀘 𑀓𑀭𑁄𑀢𑀺. 𑀳𑀦𑀦𑁆𑀢𑀻𑀢𑀺 𑀖𑀸𑀢𑁂𑀦𑁆𑀢𑀺. 𑀧𑀭𑀺𑀬𑀸𑀧𑀸𑀤𑁂𑀦𑁆𑀢𑀻𑀢𑀺 𑀧𑀭𑀺𑀬𑀸𑀧𑀸𑀤𑀬𑀦𑁆𑀢𑀺. 𑀉𑀧𑀮𑀺𑀓𑁆𑀔𑀦𑁆𑀢𑀻𑀢𑀺 𑀯𑀺𑀚𑁆𑀛𑀦𑁆𑀢𑀺. 𑀅𑀧𑀦𑁂𑀦𑁆𑀢𑀻𑀢𑀺 𑀲𑀓𑀲𑁂𑀦𑀁 𑀕𑀳𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑀺. 𑀅𑀧𑀦𑁂𑀢𑁆𑀯𑀸 𑀜𑀸𑀢𑀓𑀸𑀦𑀁 𑀦𑁂𑀦𑁆𑀢𑀻𑀢𑀺 𑀲𑀓𑀲𑁂𑀦𑀁 𑀦𑁂𑀢𑁆𑀯𑀸 𑀢𑀢𑁄 𑀜𑀸𑀢𑀓𑀸𑀦𑀁 𑀲𑀦𑁆𑀢𑀺𑀓𑀁 𑀦𑁂𑀦𑁆𑀢𑀺. 𑀦𑀻𑀬𑀫𑀸𑀦𑁄𑀢𑀺 𑀅𑀢𑁆𑀢𑀦𑁄 𑀕𑁂𑀳𑀁 𑀯𑀸 𑀲𑁂𑀲𑀜𑀸𑀢𑀺𑀲𑀦𑁆𑀢𑀺𑀓𑀁 𑀯𑀸 𑀦𑀺𑀬𑁆𑀬𑀫𑀸𑀦𑁄. 𑀉𑀧𑀝𑁆𑀞𑀳𑀦𑁆𑀢𑀺 𑀧𑀭𑀺𑀘𑀭𑀦𑁆𑀢𑀻𑀢𑀺 𑀧𑀳𑀸𑀭𑀲𑁄𑀥𑀦𑀯𑀡𑀓𑀧𑁆𑀧𑀦𑀸𑀤𑀻𑀦𑀺 𑀓𑀭𑁄𑀦𑁆𑀢𑀸 𑀚𑀕𑁆𑀕𑀦𑁆𑀢𑀺 𑀕𑁄𑀧𑀬𑀦𑁆𑀢𑀺.

𑀅𑀭𑀓𑁆𑀔𑀺𑀢𑁂𑀦𑁂𑀯 𑀓𑀸𑀬𑁂𑀦𑀸𑀢𑀺 𑀅𑀭𑀓𑁆𑀔𑀺𑀢𑁂𑀦 𑀓𑀸𑀬𑀤𑁆𑀯𑀸𑀭𑁂𑀦. 𑀅𑀭𑀓𑁆𑀔𑀺𑀢𑀸𑀬 𑀯𑀸𑀘𑀸𑀬𑀸𑀢𑀺 𑀅𑀭𑀓𑁆𑀔𑀺𑀢𑁂𑀦 𑀯𑀘𑀻𑀤𑁆𑀯𑀸𑀭𑁂𑀦. 𑀅𑀭𑀓𑁆𑀔𑀺𑀢𑁂𑀦 𑀘𑀺𑀢𑁆𑀢𑁂𑀦𑀸𑀢𑀺 𑀅𑀭𑀓𑁆𑀔𑀺𑀢𑁂𑀦 𑀫𑀦𑁄𑀤𑁆𑀯𑀸𑀭𑁂𑀦. 𑀅𑀦𑀼𑀧𑀝𑁆𑀞𑀺𑀢𑀸𑀬 𑀲𑀢𑀺𑀬𑀸𑀢𑀺 𑀲𑀢𑀺𑀁 𑀲𑀼𑀧𑀝𑁆𑀞𑀺𑀢𑀁 𑀅𑀓𑀢𑁆𑀯𑀸. 𑀅𑀲𑀁𑀯𑀼𑀢𑁂𑀳𑀺 𑀇𑀦𑁆𑀤𑁆𑀭𑀺𑀬𑁂𑀳𑀻𑀢𑀺 𑀫𑀦𑀘𑁆𑀙𑀝𑁆𑀞𑁂𑀳𑀺 𑀇𑀦𑁆𑀤𑁆𑀭𑀺𑀬𑁂𑀳𑀺 𑀅𑀧𑀺𑀳𑀺𑀢𑁂𑀳𑀺 𑀅𑀕𑁄𑀧𑀺𑀢𑁂𑀳𑀺. 𑀭𑀸𑀕𑁄 𑀘𑀺𑀢𑁆𑀢𑀁 𑀅𑀦𑀼𑀤𑁆𑀥𑀁𑀲𑁂𑀢𑀻𑀢𑀺 𑀭𑀸𑀕𑁄 𑀉𑀧𑁆𑀧𑀚𑁆𑀚𑀫𑀸𑀦𑁄𑀯 𑀲𑀫𑀣𑀯𑀺𑀧𑀲𑁆𑀲𑀦𑀸𑀘𑀺𑀢𑁆𑀢𑀁 𑀥𑀁𑀲𑁂𑀢𑀺, 𑀤𑀽𑀭𑁂 𑀔𑀺𑀧𑀢𑀺. 𑀭𑀸𑀕𑀧𑀭𑀺𑀬𑀼𑀝𑁆𑀞𑀺𑀢𑁄𑀫𑁆𑀳𑀺, 𑀆𑀯𑀼𑀲𑁄, 𑀭𑀸𑀕𑀧𑀭𑁂𑀢𑁄𑀢𑀺 𑀅𑀳𑀁, 𑀆𑀯𑀼𑀲𑁄, 𑀭𑀸𑀕𑁂𑀦 𑀭𑀢𑁆𑀢𑁄, 𑀭𑀸𑀕𑁂𑀦 𑀅𑀦𑀼𑀕𑀢𑁄.

𑀅𑀝𑁆𑀞𑀺𑀓𑀗𑁆𑀓𑀮𑀽𑀧𑀫𑀸𑀢𑀺𑀆𑀤𑀻𑀲𑀼 𑀅𑀝𑁆𑀞𑀺𑀓𑀗𑁆𑀓𑀮𑀽𑀧𑀫𑀸 𑀅𑀧𑁆𑀧𑀲𑁆𑀲𑀸𑀤𑀝𑁆𑀞𑁂𑀦. 𑀫𑀁𑀲𑀧𑁂𑀲𑀽𑀧𑀫𑀸 𑀩𑀳𑀼𑀲𑀸𑀥𑀸𑀭𑀡𑀝𑁆𑀞𑁂𑀦. 𑀢𑀺𑀡𑀼𑀓𑁆𑀓𑀽𑀧𑀫𑀸 𑀅𑀦𑀼𑀤𑀳𑀦𑀝𑁆𑀞𑁂𑀦. 𑀅𑀗𑁆𑀕𑀸𑀭𑀓𑀸𑀲𑀽𑀧𑀫𑀸 𑀫𑀳𑀸𑀪𑀺𑀢𑀸𑀧𑀝𑁆𑀞𑁂𑀦. 𑀲𑀼𑀧𑀺𑀦𑀓𑀽𑀧𑀫𑀸 𑀇𑀢𑁆𑀢𑀭𑀧𑀘𑁆𑀘𑀼𑀧𑀝𑁆𑀞𑀸𑀦𑀝𑁆𑀞𑁂𑀦. 𑀬𑀸𑀘𑀺𑀢𑀓𑀽𑀧𑀫𑀸 𑀢𑀸𑀯𑀓𑀸𑀮𑀺𑀓𑀝𑁆𑀞𑁂𑀦. 𑀭𑀼𑀓𑁆𑀔𑀨𑀮𑀽𑀧𑀫𑀸 𑀲𑀩𑁆𑀩𑀗𑁆𑀕𑀧𑀘𑁆𑀘𑀗𑁆𑀕𑀧𑀮𑀺𑀪𑀜𑁆𑀚𑀦𑀝𑁆𑀞𑁂𑀦. 𑀅𑀲𑀺𑀲𑀽𑀦𑀽𑀧𑀫𑀸 𑀅𑀥𑀺𑀓𑀼𑀝𑁆𑀝𑀦𑀝𑁆𑀞𑁂𑀦. 𑀲𑀢𑁆𑀢𑀺𑀲𑀽𑀮𑀽𑀧𑀫𑀸 𑀯𑀺𑀦𑀺𑀯𑀺𑀚𑁆𑀛𑀦𑀝𑁆𑀞𑁂𑀦. 𑀲𑀧𑁆𑀧𑀲𑀺𑀭𑀽𑀧𑀫𑀸 𑀲𑀸𑀲𑀗𑁆𑀓𑀲𑀧𑁆𑀧𑀝𑀺𑀪𑀬𑀝𑁆𑀞𑁂𑀦. 𑀉𑀲𑁆𑀲𑀳𑀺𑀲𑁆𑀲𑀸𑀫𑀻𑀢𑀺 𑀉𑀲𑁆𑀲𑀸𑀳𑀁 𑀓𑀭𑀺𑀲𑁆𑀲𑀸𑀫𑀺. 𑀥𑀸𑀭𑀬𑀺𑀲𑁆𑀲𑀸𑀫𑀻𑀢𑀺 𑀲𑀫𑀡𑀪𑀸𑀯𑀁 𑀥𑀸𑀭𑀬𑀺𑀲𑁆𑀲𑀸𑀫𑀺. 𑀅𑀪𑀺𑀭𑀫𑀺𑀲𑁆𑀲𑀸𑀫𑀻𑀢𑀺 𑀅𑀪𑀺𑀭𑀢𑀺𑀁 𑀉𑀧𑁆𑀧𑀸𑀤𑁂𑀲𑁆𑀲𑀸𑀫𑀺 𑀦 𑀉𑀓𑁆𑀓𑀡𑁆𑀞𑀺𑀲𑁆𑀲𑀸𑀫𑀺. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯. 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀯𑀝𑁆𑀝𑀯𑀺𑀯𑀝𑁆𑀝𑀁 𑀓𑀣𑀺𑀢𑀦𑁆𑀢𑀺.

𑁭. 𑀧𑀞𑀫𑀅𑀦𑀸𑀕𑀢𑀪𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁭𑁭. 𑀲𑀢𑁆𑀢𑀫𑁂 𑀆𑀭𑀜𑁆𑀜𑀓𑁂𑀦𑀸𑀢𑀺 𑀅𑀭𑀜𑁆𑀜𑀯𑀸𑀲𑀺𑀦𑀸. 𑀅𑀧𑁆𑀧𑀢𑁆𑀢𑀲𑁆𑀲𑀸𑀢𑀺 𑀅𑀲𑀫𑁆𑀧𑀢𑁆𑀢𑀲𑁆𑀲 𑀛𑀸𑀦𑀯𑀺𑀧𑀲𑁆𑀲𑀦𑀸𑀫𑀕𑁆𑀕𑀨𑀮𑀧𑁆𑀧𑀪𑁂𑀤𑀲𑁆𑀲 𑀯𑀺𑀲𑁂𑀲𑀲𑁆𑀲 𑀧𑀢𑁆𑀢𑀺𑀬𑀸. 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀲𑁄 𑀫𑀫𑀲𑁆𑀲 𑀅𑀦𑁆𑀢𑀭𑀸𑀬𑁄𑀢𑀺 𑀲𑁄 𑀫𑀫 𑀚𑀻𑀯𑀺𑀢𑀦𑁆𑀢𑀭𑀸𑀬𑁄 𑀘 𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀭𑀸𑀬𑁄 𑀘, 𑀧𑀼𑀣𑀼𑀚𑁆𑀚𑀦𑀓𑀸𑀮𑀓𑀺𑀭𑀺𑀬𑀁 𑀓𑀭𑁄𑀦𑁆𑀢𑀲𑁆𑀲 𑀲𑀕𑁆𑀕𑀦𑁆𑀢𑀭𑀸𑀬𑁄 𑀘 𑀫𑀕𑁆𑀕𑀦𑁆𑀢𑀭𑀸𑀬𑁄 𑀘 𑀪𑀯𑁂𑀬𑁆𑀬. 𑀳𑀦𑁆𑀤𑀸𑀢𑀺 𑀯𑀯𑀲𑁆𑀲𑀕𑁆𑀕𑀢𑁆𑀣𑁂 𑀦𑀺𑀧𑀸𑀢𑁄. 𑀯𑀻𑀭𑀺𑀬𑀁 𑀆𑀭𑀪𑀸𑀫𑀻𑀢𑀺 𑀤𑀼𑀯𑀺𑀥𑀫𑁆𑀧𑀺 𑀯𑀻𑀭𑀺𑀬𑀁 𑀓𑀭𑁄𑀫𑀺. 𑀲𑀢𑁆𑀣𑀓𑀸𑀢𑀺 𑀲𑀢𑁆𑀣𑀁 𑀯𑀺𑀬 𑀲𑀦𑁆𑀥𑀺𑀩𑀦𑁆𑀥𑀦𑀘𑁆𑀙𑁂𑀤𑀓𑀯𑀸𑀢𑀸. 𑀯𑀸𑀴𑁂𑀳𑀻𑀢𑀺 𑀓𑀓𑁆𑀔𑀴𑁂𑀳𑀺. 𑀫𑀸𑀡𑀯𑁂𑀳𑀻𑀢𑀺 𑀘𑁄𑀭𑁂𑀳𑀺. 𑀓𑀢𑀓𑀫𑁆𑀫𑁂𑀳𑀺 𑀯𑀸 𑀅𑀓𑀢𑀓𑀫𑁆𑀫𑁂𑀳𑀺 𑀯𑀸𑀢𑀺 𑀏𑀢𑁆𑀣 𑀘𑁄𑀭𑀺𑀓𑀁 𑀓𑀢𑁆𑀯𑀸 𑀦𑀺𑀓𑁆𑀔𑀦𑁆𑀢𑀸 𑀓𑀢𑀓𑀫𑁆𑀫𑀸 𑀦𑀸𑀫, 𑀘𑁄𑀭𑀺𑀓𑀁 𑀓𑀸𑀢𑀼𑀁 𑀕𑀘𑁆𑀙𑀦𑁆𑀢𑀸 𑀅𑀓𑀢𑀓𑀫𑁆𑀫𑀸 𑀦𑀸𑀫. 𑀢𑀢𑁆𑀣 𑀓𑀢𑀓𑀫𑁆𑀫𑀸 𑀓𑀫𑁆𑀫𑀲𑁆𑀲 𑀦𑀺𑀧𑁆𑀨𑀦𑁆𑀦𑀢𑁆𑀢𑀸 𑀲𑀢𑁆𑀢𑀸𑀦𑀁 𑀕𑀮𑀮𑁄𑀳𑀺𑀢𑀁 𑀕𑀳𑁂𑀢𑁆𑀯𑀸 𑀤𑁂𑀯𑀢𑀸𑀦𑀁 𑀩𑀮𑀺𑀁 𑀓𑀭𑁄𑀦𑁆𑀢𑀺, 𑀅𑀓𑀢𑀓𑀫𑁆𑀫𑀸 ‘‘𑀏𑀯𑀁 𑀦𑁄 𑀓𑀫𑁆𑀫𑀁 𑀦𑀺𑀧𑁆𑀨𑀚𑁆𑀚𑀺𑀲𑁆𑀲𑀢𑀻’’𑀢𑀺 𑀧𑀞𑀫𑀢𑀭𑀁 𑀓𑀭𑁄𑀦𑁆𑀢𑀺. 𑀇𑀤𑀁 𑀲𑀦𑁆𑀥𑀸𑀬 𑀢𑁂 𑀫𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀬𑁆𑀬𑀼𑀦𑁆𑀢𑀺 𑀯𑀼𑀢𑁆𑀢𑀁. 𑀯𑀸𑀴𑀸 𑀅𑀫𑀦𑀼𑀲𑁆𑀲𑀸𑀢𑀺 𑀓𑀓𑁆𑀔𑀴𑀸 𑀤𑀼𑀝𑁆𑀞𑀸 𑀬𑀓𑁆𑀔𑀸𑀤𑀬𑁄 𑀅𑀫𑀦𑀼𑀲𑁆𑀲𑀸.

𑁮. 𑀤𑀼𑀢𑀺𑀬𑀅𑀦𑀸𑀕𑀢𑀪𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁭𑁮. 𑀅𑀝𑁆𑀞𑀫𑁂 𑀧𑀼𑀭𑀸 𑀫𑀁 𑀲𑁄 𑀥𑀫𑁆𑀫𑁄 𑀆𑀕𑀘𑁆𑀙𑀢𑀻𑀢𑀺 𑀬𑀸𑀯 𑀲𑁄 𑀥𑀫𑁆𑀫𑁄 𑀫𑀁 𑀦 𑀉𑀧𑀕𑀘𑁆𑀙𑀢𑀺, 𑀢𑀸𑀯 𑀅𑀳𑀁 𑀧𑀼𑀭𑁂𑀢𑀭𑀫𑁂𑀯 𑀯𑀻𑀭𑀺𑀬𑀁 𑀆𑀭𑀪𑀸𑀫𑀻𑀢𑀺 𑀅𑀢𑁆𑀣𑁄. 𑀔𑀻𑀭𑁄𑀤𑀓𑀻𑀪𑀽𑀢𑀸𑀢𑀺 𑀔𑀻𑀭𑁄𑀤𑀓𑀁 𑀯𑀺𑀬 𑀪𑀽𑀢𑀸 𑀏𑀓𑀻𑀪𑀸𑀯𑀁 𑀉𑀧𑀕𑀢𑀸. 𑀧𑀺𑀬𑀘𑀓𑁆𑀔𑀽𑀳𑀻𑀢𑀺 𑀫𑁂𑀢𑁆𑀢𑀘𑀓𑁆𑀔𑀽𑀳𑀺.

𑁯. 𑀢𑀢𑀺𑀬𑀅𑀦𑀸𑀕𑀢𑀪𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁭𑁯. 𑀦𑀯𑀫𑁂 𑀥𑀫𑁆𑀫𑀲𑀦𑁆𑀤𑁄𑀲𑀸 𑀯𑀺𑀦𑀬𑀲𑀦𑁆𑀤𑁄𑀲𑁄𑀢𑀺 𑀥𑀫𑁆𑀫𑀲𑀦𑁆𑀤𑁄𑀲𑁂𑀦 𑀯𑀺𑀦𑀬𑀲𑀦𑁆𑀤𑁄𑀲𑁄 𑀳𑁄𑀢𑀺. 𑀓𑀣𑀁 𑀧𑀦 𑀥𑀫𑁆𑀫𑀲𑁆𑀫𑀺𑀁 𑀤𑀼𑀲𑁆𑀲𑀦𑁆𑀢𑁂 𑀯𑀺𑀦𑀬𑁄 𑀤𑀼𑀲𑁆𑀲𑀢𑀺 𑀦𑀸𑀫? 𑀲𑀫𑀣𑀯𑀺𑀧𑀲𑁆𑀲𑀦𑀸𑀥𑀫𑁆𑀫𑁂𑀲𑀼 𑀕𑀩𑁆𑀪𑀁 𑀅𑀕𑁆𑀕𑀡𑁆𑀳𑀦𑁆𑀢𑁂𑀲𑀼 𑀧𑀜𑁆𑀘𑀯𑀺𑀥𑁄 𑀯𑀺𑀦𑀬𑁄 𑀦 𑀳𑁄𑀢𑀺, 𑀏𑀯𑀁 𑀥𑀫𑁆𑀫𑁂 𑀤𑀼𑀲𑁆𑀲𑀦𑁆𑀢𑁂 𑀯𑀺𑀦𑀬𑁄 𑀤𑀼𑀲𑁆𑀲𑀢𑀺. 𑀤𑀼𑀲𑁆𑀲𑀻𑀮𑀲𑁆𑀲 𑀧𑀦 𑀲𑀁𑀯𑀭𑀯𑀺𑀦𑀬𑁄 𑀦𑀸𑀫 𑀦 𑀳𑁄𑀢𑀺, 𑀢𑀲𑁆𑀫𑀺𑀁 𑀅𑀲𑀢𑀺 𑀲𑀫𑀣𑀯𑀺𑀧𑀲𑁆𑀲𑀦𑀸 𑀕𑀩𑁆𑀪𑀁 𑀦 𑀕𑀡𑁆𑀳𑀸𑀢𑀺. 𑀏𑀯𑀁 𑀯𑀺𑀦𑀬𑀲𑀦𑁆𑀤𑁄𑀲𑁂𑀦𑀧𑀺 𑀥𑀫𑁆𑀫𑀲𑀦𑁆𑀤𑁄𑀲𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀪𑀺𑀥𑀫𑁆𑀫𑀓𑀣𑀦𑁆𑀢𑀺 𑀲𑀻𑀮𑀸𑀤𑀺𑀉𑀢𑁆𑀢𑀫𑀥𑀫𑁆𑀫𑀓𑀣𑀁. 𑀯𑁂𑀤𑀮𑁆𑀮𑀓𑀣𑀦𑁆𑀢𑀺 𑀯𑁂𑀤𑀧𑀝𑀺𑀲𑀁𑀬𑀼𑀢𑁆𑀢𑀁 𑀜𑀸𑀡𑀫𑀺𑀲𑁆𑀲𑀓𑀓𑀣𑀁. 𑀓𑀡𑁆𑀳𑀥𑀫𑁆𑀫𑀁 𑀑𑀓𑁆𑀓𑀫𑀫𑀸𑀦𑀸𑀢𑀺 𑀭𑀦𑁆𑀥𑀕𑀯𑁂𑀲𑀺𑀢𑀸𑀬 𑀉𑀧𑀸𑀭𑀫𑁆𑀪𑀧𑀭𑀺𑀬𑁂𑀲𑀦𑀯𑀲𑁂𑀦 𑀓𑀸𑀴𑀓𑀥𑀫𑁆𑀫𑀁 𑀑𑀓𑁆𑀓𑀫𑀫𑀸𑀦𑀸. 𑀅𑀧𑀺𑀘 𑀤𑀼𑀝𑁆𑀞𑀘𑀺𑀢𑁆𑀢𑁂𑀦 𑀧𑀼𑀕𑁆𑀕𑀮𑀁 𑀖𑀝𑁆𑀝𑁂𑀦𑁆𑀢𑀸𑀧𑀺 𑀢𑀁 𑀓𑀡𑁆𑀳𑀥𑀫𑁆𑀫𑀁 𑀅𑀢𑁆𑀢𑀦𑁄 𑀤𑀳𑀦𑁆𑀢𑀸𑀧𑀺 𑀮𑀸𑀪𑀲𑀓𑁆𑀓𑀸𑀭𑀢𑁆𑀣𑀁 𑀓𑀣𑁂𑀦𑁆𑀢𑀸𑀧𑀺 𑀓𑀡𑁆𑀳𑀥𑀫𑁆𑀫𑀁 𑀑𑀓𑁆𑀓𑀫𑀦𑁆𑀢𑀺𑀬𑁂𑀯.

𑀕𑀫𑁆𑀪𑀻𑀭𑀸𑀢𑀺 𑀧𑀸𑀴𑀺𑀕𑀫𑁆𑀪𑀻𑀭𑀸. 𑀕𑀫𑁆𑀪𑀻𑀭𑀢𑁆𑀣𑀸𑀢𑀺 𑀅𑀢𑁆𑀣𑀕𑀫𑁆𑀪𑀻𑀭𑀸. 𑀮𑁄𑀓𑀼𑀢𑁆𑀢𑀭𑀸𑀢𑀺 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀤𑀻𑀧𑀓𑀸. 𑀲𑀼𑀜𑁆𑀜𑀢𑀸𑀧𑀝𑀺𑀲𑀁𑀬𑀼𑀢𑁆𑀢𑀸𑀢𑀺 𑀔𑀦𑁆𑀥𑀥𑀸𑀢𑀼𑀆𑀬𑀢𑀦𑀧𑀘𑁆𑀘𑀬𑀸𑀓𑀸𑀭𑀧𑀝𑀺𑀲𑀁𑀬𑀼𑀢𑁆𑀢𑀸. 𑀦 𑀅𑀜𑁆𑀜𑀸 𑀘𑀺𑀢𑁆𑀢𑀁 𑀉𑀧𑀝𑁆𑀞𑀧𑁂𑀲𑁆𑀲𑀦𑁆𑀢𑀻𑀢𑀺 𑀚𑀸𑀦𑀦𑀢𑁆𑀣𑀸𑀬 𑀘𑀺𑀢𑁆𑀢𑀁 𑀦 𑀞𑀧𑁂𑀲𑁆𑀲𑀦𑁆𑀢𑀺. 𑀉𑀕𑁆𑀕𑀳𑁂𑀢𑀩𑁆𑀩𑀁 𑀧𑀭𑀺𑀬𑀸𑀧𑀼𑀡𑀺𑀢𑀩𑁆𑀩𑀦𑁆𑀢𑀺 𑀉𑀕𑁆𑀕𑀳𑁂𑀢𑀩𑁆𑀩𑁂 𑀘 𑀯𑀴𑀜𑁆𑀚𑁂𑀢𑀩𑁆𑀩𑁂 𑀘. 𑀓𑀯𑀺𑀢𑀸𑀢𑀺 𑀲𑀺𑀮𑁄𑀓𑀸𑀤𑀺𑀩𑀦𑁆𑀥𑀦𑀯𑀲𑁂𑀦 𑀓𑀯𑀻𑀳𑀺 𑀓𑀢𑀸. 𑀓𑀸𑀯𑁂𑀬𑁆𑀬𑀸𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀩𑀸𑀳𑀺𑀭𑀓𑀸𑀢𑀺 𑀲𑀸𑀲𑀦𑀢𑁄 𑀩𑀳𑀺𑀤𑁆𑀥𑀸 𑀞𑀺𑀢𑀸. 𑀲𑀸𑀯𑀓𑀪𑀸𑀲𑀺𑀢𑀸𑀢𑀺 𑀩𑀸𑀳𑀺𑀭𑀲𑀸𑀯𑀓𑁂𑀳𑀺 𑀪𑀸𑀲𑀺𑀢𑀸. 𑀲𑁂𑀲𑀫𑁂𑀢𑁆𑀣 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀢𑁆𑀢𑀸 𑀲𑀼𑀯𑀺𑀜𑁆𑀜𑁂𑀬𑁆𑀬𑀢𑁆𑀢𑀸 𑀘 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑁧𑁦. 𑀘𑀢𑀼𑀢𑁆𑀣𑀅𑀦𑀸𑀕𑀢𑀪𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁦. 𑀤𑀲𑀫𑁂 𑀓𑀮𑁆𑀬𑀸𑀡𑀓𑀸𑀫𑀸𑀢𑀺 𑀲𑀼𑀦𑁆𑀤𑀭𑀓𑀸𑀫𑀸. 𑀭𑀲𑀕𑁆𑀕𑀸𑀦𑀻𑀢𑀺 𑀉𑀢𑁆𑀢𑀫𑀭𑀲𑀸𑀦𑀺. 𑀲𑀁𑀲𑀝𑁆𑀞𑀸 𑀯𑀺𑀳𑀭𑀺𑀲𑁆𑀲𑀦𑁆𑀢𑀻𑀢𑀺 𑀧𑀜𑁆𑀘𑀯𑀺𑀥𑁂𑀦 𑀲𑀁𑀲𑀕𑁆𑀕𑁂𑀦 𑀲𑀁𑀲𑀝𑁆𑀞𑀸 𑀯𑀺𑀳𑀭𑀺𑀲𑁆𑀲𑀦𑁆𑀢𑀺. 𑀲𑀦𑁆𑀦𑀺𑀥𑀺𑀓𑀸𑀭𑀧𑀭𑀺𑀪𑁄𑀕𑀦𑁆𑀢𑀺 𑀲𑀦𑁆𑀦𑀺𑀥𑀺𑀓𑀢𑀲𑁆𑀲 𑀧𑀭𑀺𑀪𑁄𑀕𑀁. 𑀑𑀴𑀸𑀭𑀺𑀓𑀫𑁆𑀧𑀺 𑀦𑀺𑀫𑀺𑀢𑁆𑀢𑀦𑁆𑀢𑀺 𑀏𑀢𑁆𑀣 𑀧𑀣𑀯𑀺𑀁 𑀔𑀡𑀦𑁆𑀢𑁄𑀧𑀺 𑀔𑀡𑀸𑀳𑀻𑀢𑀺 𑀆𑀡𑀸𑀧𑁂𑀦𑁆𑀢𑁄𑀧𑀺 𑀧𑀣𑀯𑀺𑀬𑀁 𑀑𑀴𑀸𑀭𑀺𑀓𑀁 𑀦𑀺𑀫𑀺𑀢𑁆𑀢𑀁 𑀓𑀭𑁄𑀢𑀺 𑀦𑀸𑀫. 𑀢𑀺𑀡𑀓𑀝𑁆𑀞𑀲𑀸𑀔𑀸𑀧𑀮𑀸𑀲𑀁 𑀙𑀺𑀦𑁆𑀤𑀦𑁆𑀢𑁄𑀧𑀺 𑀙𑀺𑀦𑁆𑀤𑀸𑀢𑀺 𑀆𑀡𑀸𑀧𑁂𑀦𑁆𑀢𑁄𑀧𑀺 𑀳𑀭𑀺𑀢𑀕𑁆𑀕𑁂 𑀑𑀴𑀸𑀭𑀺𑀓𑀁 𑀦𑀺𑀫𑀺𑀢𑁆𑀢𑀁 𑀓𑀭𑁄𑀢𑀺 𑀦𑀸𑀫. 𑀆𑀚𑀻𑀯𑀢𑁆𑀣𑀸𑀬 𑀧𑀡𑁆𑀡𑀦𑀺𑀯𑀸𑀧𑀆𑀤𑀻𑀦𑀺 𑀕𑀸𑀳𑀸𑀧𑁂𑀦𑁆𑀢𑁄 𑀨𑀮𑀸𑀦𑀺 𑀑𑀘𑀺𑀦𑀦𑁆𑀢𑁂 𑀯𑀸 𑀑𑀘𑀺𑀦𑀸𑀧𑁂𑀦𑁆𑀢𑁂𑀦 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺. 𑀇𑀫𑁂𑀲𑀼 𑀘𑀢𑀽𑀲𑀼 𑀲𑀼𑀢𑁆𑀢𑁂𑀲𑀼 𑀲𑀢𑁆𑀣𑀸𑀭𑀸 𑀲𑀸𑀲𑀦𑁂 𑀯𑀼𑀤𑁆𑀥𑀺𑀧𑀭𑀺𑀳𑀸𑀦𑀺 𑀓𑀣𑀺𑀢𑀸𑀢𑀺.

𑀬𑁄𑀥𑀸𑀚𑀻𑀯𑀯𑀕𑁆𑀕𑁄 𑀢𑀢𑀺𑀬𑁄.

(𑁯) 𑁪. 𑀣𑁂𑀭𑀯𑀕𑁆𑀕𑁄

𑁧. 𑀭𑀚𑀦𑀻𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁧. 𑀘𑀢𑀼𑀢𑁆𑀣𑀲𑁆𑀲 𑀧𑀞𑀫𑁂 𑀭𑀚𑀦𑀻𑀬𑁂𑀲𑀽𑀢𑀺 𑀭𑀸𑀕𑀲𑁆𑀲 𑀧𑀘𑁆𑀘𑀬𑁂𑀲𑀼 𑀆𑀭𑀫𑁆𑀫𑀡𑁂𑀲𑀼. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑁨. 𑀯𑀻𑀢𑀭𑀸𑀕𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁨. 𑀤𑀼𑀢𑀺𑀬𑁂 𑀫𑀓𑁆𑀔𑀻𑀢𑀺 𑀕𑀼𑀡𑀫𑀓𑁆𑀔𑀓𑁄. 𑀧𑀴𑀸𑀲𑀻𑀢𑀺 𑀬𑀼𑀕𑀕𑁆𑀕𑀸𑀳𑀮𑀓𑁆𑀔𑀡𑁂𑀦 𑀧𑀴𑀸𑀲𑁂𑀦 𑀲𑀫𑀦𑁆𑀦𑀸𑀕𑀢𑁄.

𑁩. 𑀓𑀼𑀳𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁩. 𑀢𑀢𑀺𑀬𑁂 𑀓𑀼𑀳𑀓𑁄𑀢𑀺 𑀢𑀻𑀳𑀺 𑀓𑀼𑀳𑀦𑀯𑀢𑁆𑀣𑀽𑀳𑀺 𑀲𑀫𑀦𑁆𑀦𑀸𑀕𑀢𑁄. 𑀮𑀧𑀓𑁄𑀢𑀺 𑀮𑀸𑀪𑀲𑀦𑁆𑀦𑀺𑀲𑁆𑀲𑀺𑀢𑀸𑀬 𑀮𑀧𑀦𑀸𑀬 𑀲𑀫𑀦𑁆𑀦𑀸𑀕𑀢𑁄. 𑀦𑁂𑀫𑀺𑀢𑁆𑀢𑀺𑀓𑁄𑀢𑀺 𑀦𑀺𑀫𑀺𑀢𑁆𑀢𑀓𑀺𑀭𑀺𑀬𑀓𑀸𑀭𑀓𑁄. 𑀦𑀺𑀧𑁆𑀧𑁂𑀲𑀺𑀓𑁄𑀢𑀺 𑀦𑀺𑀧𑁆𑀧𑁂𑀲𑀦𑀓𑀢𑀸𑀬 𑀲𑀫𑀦𑁆𑀦𑀸𑀕𑀢𑁄. 𑀮𑀸𑀪𑁂𑀦 𑀘 𑀮𑀸𑀪𑀁 𑀦𑀺𑀚𑀺𑀕𑀻𑀲𑀺𑀢𑀸𑀢𑀺 𑀮𑀸𑀪𑁂𑀦 𑀮𑀸𑀪𑀕𑀯𑁂𑀲𑀓𑁄. 𑀲𑀼𑀓𑁆𑀓𑀧𑀓𑁆𑀔𑁄 𑀯𑀼𑀢𑁆𑀢𑀯𑀺𑀧𑀮𑁆𑀮𑀸𑀲𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀘𑀢𑀼𑀢𑁆𑀣𑀁 𑀉𑀢𑁆𑀢𑀸𑀦𑀫𑁂𑀯.

𑁫. 𑀅𑀓𑁆𑀔𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁫. 𑀧𑀜𑁆𑀘𑀫𑁂 𑀅𑀓𑁆𑀔𑀫𑁄 𑀳𑁄𑀢𑀺 𑀭𑀽𑀧𑀸𑀦𑀦𑁆𑀢𑀺 𑀭𑀽𑀧𑀸𑀭𑀫𑁆𑀫𑀡𑀸𑀦𑀁 𑀅𑀦𑀥𑀺𑀯𑀸𑀲𑀓𑁄 𑀳𑁄𑀢𑀺, 𑀢𑀤𑀸𑀭𑀫𑁆𑀫𑀡𑁂𑀳𑀺 𑀭𑀸𑀕𑀸𑀤𑀻𑀳𑀺 𑀅𑀪𑀺𑀪𑀼𑀬𑁆𑀬𑀢𑀺. 𑀏𑀲𑁂𑀯 𑀦𑀬𑁄 𑀲𑀩𑁆𑀩𑀢𑁆𑀣.

𑁬. 𑀧𑀝𑀺𑀲𑀫𑁆𑀪𑀺𑀤𑀸𑀧𑁆𑀧𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁬. 𑀙𑀝𑁆𑀞𑁂 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸𑀧𑁆𑀧𑀢𑁆𑀢𑁄𑀢𑀺 𑀧𑀜𑁆𑀘𑀲𑀼 𑀅𑀢𑁆𑀣𑁂𑀲𑀼 𑀧𑀪𑁂𑀤𑀕𑀢𑀁 𑀜𑀸𑀡𑀁 𑀧𑀢𑁆𑀢𑁄. 𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑀸𑀧𑁆𑀧𑀢𑁆𑀢𑁄𑀢𑀺 𑀘𑀢𑀼𑀩𑁆𑀩𑀺𑀥𑁂 𑀥𑀫𑁆𑀫𑁂 𑀧𑀪𑁂𑀤𑀕𑀢𑀁 𑀜𑀸𑀡𑀁 𑀧𑀢𑁆𑀢𑁄. 𑀦𑀺𑀭𑀼𑀢𑁆𑀢𑀺𑀧𑀝𑀺𑀲𑀫𑁆𑀪𑀺𑀤𑀸𑀧𑁆𑀧𑀢𑁆𑀢𑁄𑀢𑀺 𑀥𑀫𑁆𑀫𑀦𑀺𑀭𑀼𑀢𑁆𑀢𑀻𑀲𑀼 𑀧𑀪𑁂𑀤𑀕𑀢𑀁 𑀜𑀸𑀡𑀁 𑀧𑀢𑁆𑀢𑁄. 𑀧𑀝𑀺𑀪𑀸𑀦𑀧𑀝𑀺𑀲𑀫𑁆𑀪𑀺𑀤𑀸𑀧𑁆𑀧𑀢𑁆𑀢𑁄𑀢𑀺 𑀢𑁂𑀲𑀼 𑀢𑀻𑀲𑀼 𑀜𑀸𑀡𑁂𑀲𑀼 𑀧𑀪𑁂𑀤𑀕𑀢𑀁 𑀜𑀸𑀡𑀁 𑀧𑀢𑁆𑀢𑁄. 𑀲𑁄 𑀧𑀦 𑀢𑀸𑀦𑀺 𑀢𑀻𑀡𑀺 𑀜𑀸𑀡𑀸𑀦𑁂𑀯 𑀚𑀸𑀦𑀸𑀢𑀺, 𑀦 𑀢𑁂𑀲𑀁 𑀓𑀺𑀘𑁆𑀘𑀁 𑀓𑀭𑁄𑀢𑀺. 𑀉𑀘𑁆𑀘𑀸𑀯𑀘𑀸𑀦𑀻𑀢𑀺 𑀫𑀳𑀦𑁆𑀢𑀔𑀼𑀤𑁆𑀤𑀓𑀸𑀦𑀺. 𑀓𑀺𑀁𑀓𑀭𑀡𑀻𑀬𑀸𑀦𑀻𑀢𑀺 𑀇𑀢𑀺 𑀓𑀢𑁆𑀢𑀩𑁆𑀩𑀸𑀦𑀺.

𑁭. 𑀲𑀻𑀮𑀯𑀦𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁭. 𑀲𑀢𑁆𑀢𑀫𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯. 𑀲𑀻𑀮𑀁 𑀧𑀦𑁂𑀢𑁆𑀣 𑀔𑀻𑀡𑀸𑀲𑀯𑀲𑀻𑀮𑀫𑁂𑀯, 𑀩𑀸𑀳𑀼𑀲𑀘𑁆𑀘𑀫𑁆𑀧𑀺 𑀔𑀻𑀡𑀸𑀲𑀯𑀩𑀸𑀳𑀼𑀲𑀘𑁆𑀘𑀫𑁂𑀯, 𑀯𑀸𑀘𑀸𑀧𑀺 𑀔𑀻𑀡𑀸𑀲𑀯𑀲𑁆𑀲 𑀓𑀮𑁆𑀬𑀸𑀡𑀯𑀸𑀘𑀸𑀯, 𑀛𑀸𑀦𑀸𑀦𑀺𑀧𑀺 𑀓𑀺𑀭𑀺𑀬𑀚𑁆𑀛𑀸𑀦𑀸𑀦𑁂𑀯 𑀓𑀣𑀺𑀢𑀸𑀦𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺.

𑁮. 𑀣𑁂𑀭𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁮. 𑀅𑀝𑁆𑀞𑀫𑁂 𑀣𑁂𑀭𑁄𑀢𑀺 𑀣𑀺𑀭𑀪𑀸𑀯𑀧𑁆𑀧𑀢𑁆𑀢𑁄. 𑀭𑀢𑁆𑀢𑀜𑁆𑀜𑀽𑀢𑀺 𑀧𑀩𑁆𑀩𑀚𑀺𑀢𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀅𑀢𑀺𑀓𑁆𑀓𑀦𑁆𑀢𑀸𑀦𑀁 𑀩𑀳𑀽𑀦𑀁 𑀭𑀢𑁆𑀢𑀻𑀦𑀁 𑀜𑀸𑀢𑀸. 𑀜𑀸𑀢𑁄𑀢𑀺 𑀧𑀜𑁆𑀜𑀸𑀢𑁄 𑀧𑀸𑀓𑀝𑁄. 𑀬𑀲𑀲𑁆𑀲𑀻𑀢𑀺 𑀬𑀲𑀦𑀺𑀲𑁆𑀲𑀺𑀢𑁄. 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑁄𑀢𑀺 𑀅𑀬𑀸𑀣𑀸𑀯𑀤𑀺𑀝𑁆𑀞𑀺𑀓𑁄. 𑀲𑀤𑁆𑀥𑀫𑁆𑀫𑀸 𑀯𑀼𑀝𑁆𑀞𑀸𑀧𑁂𑀢𑁆𑀯𑀸𑀢𑀺 𑀤𑀲𑀓𑀼𑀲𑀮𑀓𑀫𑁆𑀫𑀧𑀣𑀥𑀫𑁆𑀫𑀢𑁄 𑀯𑀼𑀝𑁆𑀞𑀸𑀧𑁂𑀢𑁆𑀯𑀸. 𑀅𑀲𑀤𑁆𑀥𑀫𑁆𑀫𑁂 𑀧𑀢𑀺𑀝𑁆𑀞𑀸𑀧𑁂𑀢𑀻𑀢𑀺 𑀅𑀓𑀼𑀲𑀮𑀓𑀫𑁆𑀫𑀧𑀣𑁂𑀲𑀼 𑀧𑀢𑀺𑀝𑁆𑀞𑀸𑀧𑁂𑀢𑀺.

𑁯. 𑀧𑀞𑀫𑀲𑁂𑀔𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁯. 𑀦𑀯𑀫𑁂 𑀲𑁂𑀔𑀲𑁆𑀲𑀸𑀢𑀺 𑀲𑀺𑀓𑁆𑀔𑀓𑀲𑁆𑀲 𑀲𑀓𑀭𑀡𑀻𑀬𑀲𑁆𑀲. 𑀧𑀭𑀺𑀳𑀸𑀦𑀸𑀬𑀸𑀢𑀺 𑀉𑀧𑀭𑀺𑀕𑀼𑀡𑁂𑀳𑀺 𑀧𑀭𑀺𑀳𑀸𑀦𑀢𑁆𑀣𑀸𑀬. 𑀓𑀫𑁆𑀫𑀸𑀭𑀸𑀫𑀢𑀸𑀢𑀺 𑀦𑀯𑀓𑀫𑁆𑀫𑁂 𑀭𑀫𑀦𑀓𑀪𑀸𑀯𑁄. 𑀪𑀲𑁆𑀲𑀸𑀭𑀸𑀫𑀢𑀸𑀢𑀺 𑀆𑀮𑀸𑀧𑀲𑀮𑁆𑀮𑀸𑀧𑁂 𑀭𑀫𑀦𑀓𑀪𑀸𑀯𑁄. 𑀦𑀺𑀤𑁆𑀤𑀸𑀭𑀸𑀫𑀢𑀸𑀢𑀺 𑀦𑀺𑀤𑁆𑀤𑀸𑀬𑀦𑁂 𑀭𑀫𑀦𑀓𑀪𑀸𑀯𑁄. 𑀲𑀗𑁆𑀕𑀡𑀺𑀓𑀸𑀭𑀸𑀫𑀢𑀸𑀢𑀺 𑀕𑀡𑀲𑀗𑁆𑀕𑀡𑀺𑀓𑀸𑀬 𑀭𑀫𑀦𑀓𑀪𑀸𑀯𑁄. 𑀬𑀣𑀸𑀯𑀺𑀫𑀼𑀢𑁆𑀢𑀁 𑀘𑀺𑀢𑁆𑀢𑀁 𑀦 𑀧𑀘𑁆𑀘𑀯𑁂𑀓𑁆𑀔𑀢𑀻𑀢𑀺 𑀬𑀣𑀸 𑀬𑀁 𑀘𑀺𑀢𑁆𑀢𑀁 𑀯𑀺𑀫𑀼𑀢𑁆𑀢𑀁, 𑀬𑁂 𑀘 𑀤𑁄𑀲𑀸 𑀧𑀳𑀻𑀦𑀸, 𑀕𑀼𑀡𑀸 𑀘 𑀧𑀝𑀺𑀮𑀤𑁆𑀥𑀸, 𑀢𑁂 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀉𑀧𑀭𑀺𑀕𑀼𑀡𑀧𑀝𑀺𑀮𑀸𑀪𑀸𑀬 𑀯𑀸𑀬𑀸𑀫𑀁 𑀦 𑀓𑀭𑁄𑀢𑀻𑀢𑀺 𑀅𑀢𑁆𑀣𑁄. 𑀇𑀢𑀺 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀲𑀢𑁆𑀢𑀦𑁆𑀦𑀁 𑀲𑁂𑀔𑀸𑀦𑀁 𑀉𑀧𑀭𑀺𑀕𑀼𑀡𑁂𑀳𑀺 𑀧𑀭𑀺𑀳𑀸𑀦𑀺𑀓𑀸𑀭𑀡𑀜𑁆𑀘 𑀯𑀼𑀤𑁆𑀥𑀺𑀓𑀸𑀭𑀡𑀜𑁆𑀘 𑀓𑀣𑀺𑀢𑀁. 𑀬𑀜𑁆𑀘 𑀦𑀸𑀫 𑀲𑁂𑀔𑀲𑁆𑀲 𑀧𑀭𑀺𑀳𑀸𑀦𑀓𑀸𑀭𑀡𑀁, 𑀢𑀁 𑀧𑀼𑀣𑀼𑀚𑁆𑀚𑀦𑀲𑁆𑀲 𑀧𑀞𑀫𑀫𑁂𑀯 𑀳𑁄𑀢𑀻𑀢𑀺.

𑁧𑁦. 𑀤𑀼𑀢𑀺𑀬𑀲𑁂𑀔𑀲𑀼𑀢𑁆𑀢𑀯𑀡𑁆𑀡𑀦𑀸

𑁯𑁦. 𑀤𑀲𑀫𑁂 𑀯𑀺𑀬𑀢𑁆𑀢𑁄𑀢𑀺 𑀩𑁆𑀬𑀢𑁆𑀢𑁄 𑀙𑁂𑀓𑁄. 𑀓𑀺𑀁𑀓𑀭𑀡𑀻𑀬𑁂𑀲𑀽𑀢𑀺 𑀇𑀢𑀺 𑀓𑀢𑁆𑀢𑀩𑁆𑀩𑁂𑀲𑀼. 𑀘𑁂𑀢𑁄𑀲𑀫𑀣𑀦𑁆𑀢𑀺 𑀲𑀫𑀸𑀥𑀺𑀓𑀫𑁆𑀫𑀝𑁆𑀞𑀸𑀦𑀁. 𑀅𑀦𑀦𑀼𑀮𑁄𑀫𑀺𑀓𑁂𑀦𑀸𑀢𑀺 𑀲𑀸𑀲𑀦𑀲𑁆𑀲 𑀅𑀦𑀦𑀼𑀘𑁆𑀙𑀯𑀺𑀓𑁂𑀦. 𑀅𑀢𑀺𑀓𑀸𑀮𑁂𑀦𑀸𑀢𑀺 𑀅𑀢𑀺𑀧𑀸𑀢𑁄𑀯. 𑀅𑀢𑀺𑀤𑀺𑀯𑀸𑀢𑀺 𑀤𑀺𑀯𑀸 𑀯𑀼𑀘𑁆𑀘𑀢𑀺 𑀫𑀚𑁆𑀛𑀦𑁆𑀳𑀺𑀓𑁄, 𑀢𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸. 𑀆𑀪𑀺𑀲𑀮𑁆𑀮𑁂𑀔𑀺𑀓𑀸𑀢𑀺 𑀅𑀢𑀺𑀯𑀺𑀬 𑀓𑀺𑀮𑁂𑀲𑀲𑀮𑁆𑀮𑁂𑀔𑀺𑀓𑀸. 𑀘𑁂𑀢𑁄𑀯𑀺𑀯𑀭𑀡𑀲𑀧𑁆𑀧𑀸𑀬𑀸𑀢𑀺 𑀘𑀺𑀢𑁆𑀢𑀯𑀺𑀯𑀭𑀡𑀲𑀗𑁆𑀔𑀸𑀢𑀸𑀦𑀁 𑀲𑀫𑀣𑀯𑀺𑀧𑀲𑁆𑀲𑀦𑀸𑀦𑀁 𑀲𑀧𑁆𑀧𑀸𑀬𑀸. 𑀅𑀧𑁆𑀧𑀺𑀘𑁆𑀙𑀓𑀣𑀸𑀢𑀺 𑀅𑀧𑁆𑀧𑀺𑀘𑁆𑀙𑀸 𑀳𑁄𑀣𑀸𑀢𑀺 𑀓𑀣𑀦𑀓𑀣𑀸. 𑀲𑀦𑁆𑀢𑀼𑀝𑁆𑀞𑀺𑀓𑀣𑀸𑀢𑀺 𑀘𑀢𑀽𑀳𑀺 𑀧𑀘𑁆𑀘𑀬𑁂𑀳𑀺 𑀲𑀦𑁆𑀢𑀼𑀝𑁆𑀞𑀸 𑀳𑁄𑀣𑀸𑀢𑀺 𑀓𑀣𑀦𑀓𑀣𑀸. 𑀧𑀯𑀺𑀯𑁂𑀓𑀓𑀣𑀸𑀢𑀺 𑀢𑀻𑀳𑀺 𑀯𑀺𑀯𑁂𑀓𑁂𑀳𑀺 𑀯𑀺𑀯𑀺𑀢𑁆𑀢𑀸 𑀳𑁄𑀣𑀸𑀢𑀺 𑀓𑀣𑀦𑀓𑀣𑀸. 𑀅𑀲𑀁𑀲𑀕𑁆𑀕𑀓𑀣𑀸𑀢𑀺 𑀧𑀜𑁆𑀘𑀯𑀺𑀥𑁂𑀦 𑀲𑀁𑀲𑀕𑁆𑀕𑁂𑀦 𑀅𑀲𑀁𑀲𑀝𑁆𑀞𑀸 𑀳𑁄𑀣𑀸𑀢𑀺 𑀓𑀣𑀦𑀓𑀣𑀸. 𑀯𑀻𑀭𑀺𑀬𑀸𑀭𑀫𑁆𑀪𑀓𑀣𑀸𑀢𑀺 𑀤𑀼𑀯𑀺𑀥𑀁 𑀯𑀻𑀭𑀺𑀬𑀁 𑀆𑀭𑀪𑀣𑀸𑀢𑀺 𑀓𑀣𑀦𑀓𑀣𑀸. 𑀲𑀻𑀮𑀓𑀣𑀸𑀤𑀻𑀲𑀼 𑀲𑀻𑀮𑀁 𑀆𑀭𑀩𑁆𑀪 𑀓𑀣𑀸 𑀲𑀻𑀮𑀓𑀣𑀸. 𑀲𑀫𑀸𑀥𑀺𑀁 𑀆𑀭𑀩𑁆𑀪, 𑀧𑀜𑁆𑀜𑀁 𑀆𑀭𑀩𑁆𑀪, 𑀧𑀜𑁆𑀘𑀯𑀺𑀥𑀁 𑀯𑀺𑀫𑀼𑀢𑁆𑀢𑀺𑀁 𑀆𑀭𑀩𑁆𑀪, 𑀏𑀓𑀽𑀦𑀯𑀻𑀲𑀢𑀺𑀧𑀘𑁆𑀘𑀯𑁂𑀓𑁆𑀔𑀡𑀲𑀗𑁆𑀔𑀸𑀢𑀁 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀁 𑀆𑀭𑀩𑁆𑀪 𑀓𑀣𑀸 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀓𑀣𑀸. 𑀦 𑀦𑀺𑀓𑀸𑀫𑀮𑀸𑀪𑀻𑀢𑀺𑀆𑀤𑀻𑀲𑀼 𑀦 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀮𑀸𑀪𑀻, 𑀤𑀼𑀓𑁆𑀔𑀮𑀸𑀪𑀻 𑀦 𑀯𑀺𑀧𑀼𑀮𑀮𑀸𑀪𑀻𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀣𑁂𑀭𑀯𑀕𑁆𑀕𑁄 𑀘𑀢𑀼𑀢𑁆𑀣𑁄.

(𑁧𑁦) 𑁫. 𑀓𑀓𑀼𑀥𑀯𑀕𑁆𑀕𑁄

𑁧-𑁨. 𑀲𑀫𑁆𑀧𑀤𑀸𑀲𑀼𑀢𑁆𑀢𑀤𑁆𑀯𑀬𑀯𑀡𑁆𑀡𑀦𑀸

𑁯𑁧-𑁯𑁨. 𑀧𑀜𑁆𑀘𑀫𑀲𑁆𑀲 𑀧𑀞𑀫𑁂 𑀧𑀜𑁆𑀘 𑀲𑀫𑁆𑀧𑀤𑀸 𑀫𑀺𑀲𑁆𑀲𑀺𑀓𑀸 𑀓𑀣𑀺𑀢𑀸. 𑀤𑀼𑀢𑀺𑀬𑁂 𑀧𑀼𑀭𑀺𑀫𑀸 𑀘𑀢𑀲𑁆𑀲𑁄 𑀫𑀺𑀲𑁆𑀲𑀺𑀓𑀸, 𑀧𑀜𑁆𑀘𑀫𑀻 𑀮𑁄𑀓𑀺𑀓𑀸𑀯.

𑁩. 𑀩𑁆𑀬𑀸𑀓𑀭𑀡𑀲𑀼𑀢𑁆𑀢𑀯𑀡𑁆𑀡𑀦𑀸

𑁯𑁩. 𑀢𑀢𑀺𑀬𑁂 𑀅𑀜𑁆𑀜𑀸𑀩𑁆𑀬𑀸𑀓𑀭𑀡𑀸𑀦𑀻𑀢𑀺 𑀅𑀭𑀳𑀢𑁆𑀢𑀩𑁆𑀬𑀸𑀓𑀭𑀡𑀸𑀦𑀺. 𑀫𑀦𑁆𑀤𑀢𑁆𑀢𑀸𑀢𑀺 𑀫𑀦𑁆𑀤𑀪𑀸𑀯𑁂𑀦 𑀅𑀜𑁆𑀜𑀸𑀡𑁂𑀦. 𑀫𑁄𑀫𑀽𑀳𑀢𑁆𑀢𑀸𑀢𑀺 𑀅𑀢𑀺𑀫𑀽𑀴𑁆𑀳𑀪𑀸𑀯𑁂𑀦. 𑀅𑀜𑁆𑀜𑀁 𑀩𑁆𑀬𑀸𑀓𑀭𑁄𑀢𑀻𑀢𑀺 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄𑀲𑁆𑀫𑀻𑀢𑀺 𑀓𑀣𑁂𑀢𑀺. 𑀇𑀘𑁆𑀙𑀸𑀧𑀓𑀢𑁄𑀢𑀺 𑀇𑀘𑁆𑀙𑀸𑀬 𑀅𑀪𑀺𑀪𑀽𑀢𑁄. 𑀅𑀥𑀺𑀫𑀸𑀦𑁂𑀦𑀸𑀢𑀺 𑀅𑀥𑀺𑀕𑀢𑀫𑀸𑀦𑁂𑀦. 𑀲𑀫𑁆𑀫𑀤𑁂𑀯𑀸𑀢𑀺 𑀳𑁂𑀢𑀼𑀦𑀸 𑀦𑀬𑁂𑀦 𑀓𑀸𑀭𑀡𑁂𑀦𑁂𑀯.

𑁪-𑁫. 𑀨𑀸𑀲𑀼𑀯𑀺𑀳𑀸𑀭𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁯𑁪-𑁯𑁫. 𑀘𑀢𑀼𑀢𑁆𑀣𑁂 𑀨𑀸𑀲𑀼𑀯𑀺𑀳𑀸𑀭𑀸𑀢𑀺 𑀲𑀼𑀔𑀯𑀺𑀳𑀸𑀭𑀸. 𑀧𑀜𑁆𑀘𑀫𑁂 𑀅𑀓𑀼𑀧𑁆𑀧𑀦𑁆𑀢𑀺 𑀅𑀭𑀳𑀢𑁆𑀢𑀁.

𑁬. 𑀲𑀼𑀢𑀥𑀭𑀲𑀼𑀢𑁆𑀢𑀯𑀡𑁆𑀡𑀦𑀸

𑁯𑁬. 𑀙𑀝𑁆𑀞𑁂 𑀅𑀧𑁆𑀧𑀝𑁆𑀞𑁄𑀢𑀺 𑀅𑀧𑁆𑀧𑀲𑀫𑀸𑀭𑀫𑁆𑀪𑁄. 𑀅𑀧𑁆𑀧𑀓𑀺𑀘𑁆𑀘𑁄𑀢𑀺 𑀅𑀧𑁆𑀧𑀓𑀭𑀡𑀻𑀬𑁄. 𑀲𑀼𑀪𑀭𑁄𑀢𑀺 𑀲𑀼𑀔𑁂𑀦 𑀪𑀭𑀺𑀢𑀩𑁆𑀩𑁄 𑀲𑀼𑀧𑁄𑀲𑁄. 𑀲𑀼𑀲𑀦𑁆𑀢𑁄𑀲𑁄𑀢𑀺 𑀢𑀻𑀳𑀺 𑀲𑀦𑁆𑀢𑁄𑀲𑁂𑀳𑀺 𑀲𑀼𑀝𑁆𑀞𑀼 𑀲𑀦𑁆𑀢𑁄𑀲𑁄. 𑀚𑀻𑀯𑀺𑀢𑀧𑀭𑀺𑀓𑁆𑀔𑀸𑀭𑁂𑀲𑀽𑀢𑀺 𑀚𑀻𑀯𑀺𑀢𑀲𑀫𑁆𑀪𑀸𑀭𑁂𑀲𑀼. 𑀅𑀧𑁆𑀧𑀸𑀳𑀸𑀭𑁄𑀢𑀺 𑀫𑀦𑁆𑀤𑀸𑀳𑀸𑀭𑁄. 𑀅𑀦𑁄𑀤𑀭𑀺𑀓𑀢𑁆𑀢𑀦𑁆𑀢𑀺 𑀦 𑀑𑀤𑀭𑀺𑀓𑀪𑀸𑀯𑀁 𑀅𑀫𑀳𑀕𑁆𑀖𑀲𑀪𑀸𑀯𑀁 𑀅𑀦𑀼𑀬𑀼𑀢𑁆𑀢𑁄. 𑀅𑀧𑁆𑀧𑀫𑀺𑀤𑁆𑀥𑁄𑀢𑀺 𑀦 𑀩𑀳𑀼𑀦𑀺𑀤𑁆𑀤𑁄. 𑀲𑀢𑁆𑀢𑀫𑀝𑁆𑀞𑀫𑀸𑀦𑀺 𑀉𑀢𑁆𑀢𑀸𑀦𑀢𑁆𑀣𑀸𑀦𑀺.

𑁯. 𑀲𑀻𑀳𑀲𑀼𑀢𑁆𑀢𑀯𑀡𑁆𑀡𑀦𑀸

𑁯𑁯. 𑀦𑀯𑀫𑁂 𑀲𑀓𑁆𑀓𑀘𑁆𑀘𑀜𑁆𑀜𑁂𑀯 𑀤𑁂𑀢𑀺 𑀦𑁄 𑀅𑀲𑀓𑁆𑀓𑀘𑁆𑀘𑀦𑁆𑀢𑀺 𑀅𑀦𑀯𑀜𑁆𑀜𑀸𑀬 𑀅𑀯𑀺𑀭𑀚𑁆𑀛𑀺𑀢𑁆𑀯𑀸𑀯 𑀤𑁂𑀢𑀺, 𑀦𑁄 𑀅𑀯𑀜𑁆𑀜𑀸𑀬 𑀯𑀺𑀭𑀚𑁆𑀛𑀺𑀢𑁆𑀯𑀸. 𑀫𑀸 𑀫𑁂 𑀬𑁄𑀕𑁆𑀕𑀧𑀣𑁄 𑀦𑀲𑁆𑀲𑀸𑀢𑀺 𑀫𑀬𑀸 𑀓𑀢𑀬𑁄𑀕𑁆𑀕𑀧𑀣𑁄 𑀫𑀬𑁆𑀳𑀁 𑀫𑀸 𑀦𑀲𑁆𑀲𑀢𑀼, ‘‘𑀏𑀓𑁄 𑀲𑀻𑀳𑁄 𑀉𑀝𑁆𑀞𑀸𑀬 𑀩𑀺𑀴𑀸𑀭𑀁 𑀧𑀳𑀭𑀦𑁆𑀢𑁄 𑀯𑀺𑀭𑀚𑁆𑀛𑀺𑀢𑁆𑀯𑀸 𑀧𑀳𑀭𑀻’’𑀢𑀺 𑀏𑀯𑀁 𑀯𑀢𑁆𑀢𑀸𑀭𑁄 𑀫𑀸 𑀳𑁄𑀦𑁆𑀢𑀽𑀢𑀺 𑀅𑀢𑁆𑀣𑁄. 𑀅𑀦𑁆𑀦𑀪𑀸𑀭𑀦𑁂𑀲𑀸𑀤𑀸𑀦𑀦𑁆𑀢𑀺 𑀏𑀢𑁆𑀣 𑀅𑀦𑁆𑀦𑀁 𑀯𑀼𑀘𑁆𑀘𑀢𑀺 𑀬𑀯𑀪𑀢𑁆𑀢𑀁, 𑀢𑀁 𑀪𑀸𑀭𑁄 𑀏𑀢𑁂𑀲𑀦𑁆𑀢𑀺 𑀅𑀦𑁆𑀦𑀪𑀸𑀭𑀸. 𑀬𑀸𑀘𑀓𑀸𑀦𑀁 𑀏𑀢𑀁 𑀦𑀸𑀫𑀁. 𑀦𑁂𑀲𑀸𑀤𑀸 𑀯𑀼𑀘𑁆𑀘𑀦𑁆𑀢𑀺 𑀲𑀸𑀓𑀼𑀡𑀺𑀓𑀸. 𑀇𑀢𑀺 𑀲𑀩𑁆𑀩𑀧𑀘𑁆𑀙𑀺𑀫𑀸𑀬 𑀓𑁄𑀝𑀺𑀬𑀸 𑀏𑀢𑁂𑀲𑀁 𑀬𑀸𑀘𑀓𑀦𑁂𑀲𑀸𑀤𑀸𑀦𑀫𑁆𑀧𑀺 𑀲𑀓𑁆𑀓𑀘𑁆𑀘𑀫𑁂𑀯 𑀤𑁂𑀲𑁂𑀢𑀺.

𑁧𑁦. 𑀓𑀓𑀼𑀥𑀣𑁂𑀭𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁦. 𑀤𑀲𑀫𑁂 𑀅𑀢𑁆𑀢𑀪𑀸𑀯𑀧𑀝𑀺𑀮𑀸𑀪𑁄𑀢𑀺 𑀲𑀭𑀻𑀭𑀧𑀝𑀺𑀮𑀸𑀪𑁄. 𑀤𑁆𑀯𑁂 𑀯𑀸 𑀢𑀻𑀡𑀺 𑀯𑀸 𑀫𑀸𑀕𑀥𑀓𑀸𑀦𑀺 𑀕𑀸𑀫𑀓𑁆𑀔𑁂𑀢𑁆𑀢𑀸𑀦𑀻𑀢𑀺 𑀏𑀢𑁆𑀣 𑀫𑀸𑀕𑀥𑀺𑀓𑀁 𑀕𑀸𑀫𑀓𑁆𑀔𑁂𑀢𑁆𑀢𑀁 𑀅𑀢𑁆𑀣𑀺 𑀔𑀼𑀤𑁆𑀤𑀓𑀁, 𑀅𑀢𑁆𑀣𑀺 𑀫𑀚𑁆𑀛𑀺𑀫𑀁, 𑀅𑀢𑁆𑀣𑀺 𑀫𑀳𑀦𑁆𑀢𑀁. 𑀔𑀼𑀤𑁆𑀤𑀓𑀁 𑀕𑀸𑀫𑀓𑁆𑀔𑁂𑀢𑁆𑀢𑀁 𑀇𑀢𑁄 𑀘𑀢𑁆𑀢𑀸𑀮𑀻𑀲𑀁 𑀉𑀲𑀪𑀸𑀦𑀺, 𑀇𑀢𑁄 𑀘𑀢𑁆𑀢𑀸𑀮𑀻𑀲𑀦𑁆𑀢𑀺 𑀕𑀸𑀯𑀼𑀢𑀁 𑀳𑁄𑀢𑀺, 𑀫𑀚𑁆𑀛𑀺𑀫𑀁 𑀇𑀢𑁄 𑀕𑀸𑀯𑀼𑀢𑀁, 𑀇𑀢𑁄 𑀕𑀸𑀯𑀼𑀢𑀦𑁆𑀢𑀺 𑀅𑀟𑁆𑀠𑀬𑁄𑀚𑀦𑀁 𑀳𑁄𑀢𑀺, 𑀫𑀳𑀦𑁆𑀢𑀁 𑀇𑀢𑁄 𑀤𑀺𑀬𑀟𑁆𑀠𑀕𑀸𑀯𑀼𑀢𑀁, 𑀇𑀢𑁄 𑀤𑀺𑀬𑀟𑁆𑀠𑀕𑀸𑀯𑀼𑀢𑀦𑁆𑀢𑀺 𑀢𑀺𑀕𑀸𑀯𑀼𑀢𑀁 𑀳𑁄𑀢𑀺. 𑀢𑁂𑀲𑀼 𑀔𑀼𑀤𑁆𑀤𑀓𑁂𑀦 𑀕𑀸𑀫𑀓𑁆𑀔𑁂𑀢𑁆𑀢𑁂𑀦 𑀢𑀻𑀡𑀺, 𑀔𑀼𑀤𑁆𑀤𑀓𑁂𑀦 𑀘 𑀫𑀚𑁆𑀛𑀺𑀫𑁂𑀦 𑀘 𑀤𑁆𑀯𑁂 𑀕𑀸𑀫𑀓𑁆𑀔𑁂𑀢𑁆𑀢𑀸𑀦𑀺 𑀢𑀲𑁆𑀲 𑀅𑀢𑁆𑀢𑀪𑀸𑀯𑁄. 𑀢𑀺𑀕𑀸𑀯𑀼𑀢𑀜𑁆𑀳𑀺𑀲𑁆𑀲 𑀲𑀭𑀻𑀭𑀁. 𑀧𑀭𑀺𑀳𑀭𑀺𑀲𑁆𑀲𑀸𑀫𑀻𑀢𑀺 𑀧𑀝𑀺𑀚𑀕𑁆𑀕𑀺𑀲𑁆𑀲𑀸𑀫𑀺 𑀕𑁄𑀧𑀬𑀺𑀲𑁆𑀲𑀸𑀫𑀺. 𑀭𑀓𑁆𑀔𑀲𑁆𑀲𑁂𑀢𑀦𑁆𑀢𑀺 𑀭𑀓𑁆𑀔𑀲𑁆𑀲𑀼 𑀏𑀢𑀁. 𑀫𑁄𑀖𑀧𑀼𑀭𑀺𑀲𑁄𑀢𑀺 𑀢𑀼𑀘𑁆𑀙𑀧𑀼𑀭𑀺𑀲𑁄. 𑀦𑀸𑀲𑁆𑀲𑀲𑁆𑀲𑀸𑀢𑀺 𑀦 𑀏𑀢𑀲𑁆𑀲 𑀪𑀯𑁂𑀬𑁆𑀬. 𑀲𑀫𑀼𑀤𑀸𑀘𑀭𑁂𑀬𑁆𑀬𑀸𑀫𑀸𑀢𑀺 𑀓𑀣𑁂𑀬𑁆𑀬𑀸𑀫. 𑀲𑀫𑁆𑀫𑀦𑁆𑀦𑀢𑀻𑀢𑀺 𑀲𑀫𑁆𑀫𑀸𑀦𑀁 𑀓𑀭𑁄𑀢𑀺. 𑀬𑀁 𑀢𑀼𑀫𑁄 𑀓𑀭𑀺𑀲𑁆𑀲𑀢𑀺 𑀢𑀼𑀫𑁄𑀯 𑀢𑁂𑀦 𑀧𑀜𑁆𑀜𑀸𑀬𑀺𑀲𑁆𑀲𑀢𑀻𑀢𑀺 𑀬𑀁 𑀏𑀲 𑀓𑀭𑀺𑀲𑁆𑀲𑀢𑀺, 𑀏𑀲𑁄𑀯 𑀢𑁂𑀦 𑀓𑀫𑁆𑀫𑁂𑀦 𑀧𑀸𑀓𑀝𑁄 𑀪𑀯𑀺𑀲𑁆𑀲𑀢𑀺. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀓𑀓𑀼𑀥𑀯𑀕𑁆𑀕𑁄 𑀧𑀜𑁆𑀘𑀫𑁄.

𑀤𑀼𑀢𑀺𑀬𑀧𑀡𑁆𑀡𑀸𑀲𑀓𑀁 𑀦𑀺𑀝𑁆𑀞𑀺𑀢𑀁.