(𑁧𑁫) 𑁫. 𑀆𑀪𑀸𑀯𑀕𑁆𑀕𑁄

𑁧. 𑀆𑀪𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁪𑁧. 𑀧𑀜𑁆𑀘𑀫𑀲𑁆𑀲 𑀧𑀞𑀫𑁂 𑀆𑀪𑀸𑀲𑀦𑀯𑀲𑁂𑀦 𑀘𑀦𑁆𑀤𑁄𑀯 𑀘𑀦𑁆𑀤𑀸𑀪𑀸. 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑁨-𑁫. 𑀧𑀪𑀸𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁪𑁨-𑁧𑁪𑁫. 𑀤𑀼𑀢𑀺𑀬𑀸𑀤𑀻𑀲𑀼𑀧𑀺 𑀧𑀪𑀸𑀲𑀦𑀯𑀲𑁂𑀦 𑀘𑀦𑁆𑀤𑁄𑀯 𑀘𑀦𑁆𑀤𑀧𑁆𑀧𑀪𑀸. 𑀆𑀮𑁄𑀓𑀦𑀯𑀲𑁂𑀦 𑀘𑀦𑁆𑀤𑁄𑀯 𑀘𑀦𑁆𑀤𑀸𑀮𑁄𑀓𑁄. 𑀑𑀪𑀸𑀲𑀦𑀯𑀲𑁂𑀦 𑀘𑀦𑁆𑀤𑁄𑀯 𑀘𑀦𑁆𑀤𑁄𑀪𑀸𑀲𑁄. 𑀧𑀚𑁆𑀚𑁄𑀢𑀦𑀯𑀲𑁂𑀦 𑀘𑀦𑁆𑀤𑁄𑀯 𑀘𑀦𑁆𑀤𑀧𑀚𑁆𑀚𑁄𑀢𑁄𑀢𑀺. 𑀏𑀯𑀁 𑀲𑀩𑁆𑀩𑀧𑀤𑁂𑀲𑀼𑀧𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑁬. 𑀧𑀞𑀫𑀓𑀸𑀮𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁪𑁬. 𑀙𑀝𑁆𑀞𑁂 𑀓𑀸𑀮𑀸𑀢𑀺 𑀬𑀼𑀢𑁆𑀢𑀧𑁆𑀧𑀬𑀼𑀢𑁆𑀢𑀓𑀸𑀮𑀸. 𑀓𑀸𑀮𑁂𑀦 𑀥𑀫𑁆𑀫𑀲𑁆𑀲𑀯𑀦𑀦𑁆𑀢𑀺 𑀬𑀼𑀢𑁆𑀢𑀧𑁆𑀧𑀬𑀼𑀢𑁆𑀢𑀓𑀸𑀮𑁂 𑀥𑀫𑁆𑀫𑀲𑁆𑀲𑀯𑀦𑀁. 𑀥𑀫𑁆𑀫𑀲𑀸𑀓𑀘𑁆𑀙𑀸𑀢𑀺 𑀧𑀜𑁆𑀳𑀧𑀼𑀘𑁆𑀙𑀦𑀯𑀺𑀲𑁆𑀲𑀚𑁆𑀚𑀦𑀯𑀲𑁂𑀦 𑀧𑀯𑀢𑁆𑀢𑀸 𑀲𑀁𑀲𑀦𑁆𑀤𑀦𑀓𑀣𑀸.

𑁭. 𑀤𑀼𑀢𑀺𑀬𑀓𑀸𑀮𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁪𑁭. 𑀲𑀢𑁆𑀢𑀫𑁂 𑀓𑀸𑀮𑀸𑀢𑀺 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀓𑀸𑀮𑁂 𑀥𑀫𑁆𑀫𑀲𑁆𑀲𑀯𑀦𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀸𑀦𑀁 𑀓𑀼𑀲𑀮𑀥𑀫𑁆𑀫𑀸𑀦𑀁 𑀏𑀢𑀁 𑀅𑀥𑀺𑀯𑀘𑀦𑀁. 𑀢𑁂 𑀪𑀸𑀯𑀺𑀬𑀦𑁆𑀢𑀺 𑀘𑁂𑀯 𑀅𑀦𑀼𑀧𑀭𑀺𑀯𑀢𑁆𑀢𑀺𑀬𑀦𑁆𑀢𑀺 𑀘. 𑀆𑀲𑀯𑀸𑀦𑀁 𑀔𑀬𑀦𑁆𑀢𑀺 𑀅𑀭𑀳𑀢𑁆𑀢𑀁. 𑀅𑀝𑁆𑀞𑀫𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑁯-𑁧𑁦. 𑀲𑀼𑀘𑀭𑀺𑀢𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁪𑁯-𑁧𑁫𑁦. 𑀦𑀯𑀫𑁂 𑀲𑀡𑁆𑀳𑀸 𑀯𑀸𑀘𑀸𑀢𑀺 𑀫𑀼𑀤𑀼𑀓𑀯𑀸𑀘𑀸. 𑀫𑀦𑁆𑀢𑀪𑀸𑀲𑀸𑀢𑀺 𑀫𑀦𑁆𑀢𑀲𑀗𑁆𑀔𑀸𑀢𑀸𑀬 𑀧𑀜𑁆𑀜𑀸𑀬 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀓𑀣𑀺𑀢𑀓𑀣𑀸. 𑀤𑀲𑀫𑁂 𑀲𑀻𑀮𑀲𑀸𑀭𑁄𑀢𑀺 𑀲𑀸𑀭𑀲𑀫𑁆𑀧𑀸𑀧𑀓𑀁 𑀲𑀻𑀮𑀁. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀆𑀪𑀸𑀯𑀕𑁆𑀕𑁄 𑀧𑀜𑁆𑀘𑀫𑁄.