𑁪. 𑀘𑀓𑁆𑀓𑀯𑀕𑁆𑀕𑁄

𑁧. 𑀘𑀓𑁆𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁧. 𑀘𑀢𑀼𑀢𑁆𑀣𑀲𑁆𑀲 𑀧𑀞𑀫𑁂 𑀘𑀓𑁆𑀓𑀸𑀦𑀻𑀢𑀺 𑀲𑀫𑁆𑀧𑀢𑁆𑀢𑀺𑀬𑁄. 𑀘𑀢𑀼𑀘𑀓𑁆𑀓𑀁 𑀯𑀢𑁆𑀢𑀢𑀻𑀢𑀺 𑀘𑀢𑁆𑀢𑀸𑀭𑀺 𑀲𑀫𑁆𑀧𑀢𑁆𑀢𑀺𑀘𑀓𑁆𑀓𑀸𑀦𑀺 𑀯𑀢𑁆𑀢𑀦𑁆𑀢𑀺 𑀖𑀝𑀺𑀬𑀦𑁆𑀢𑀺𑀬𑁂𑀯𑀸𑀢𑀺 𑀅𑀢𑁆𑀣𑁄. 𑀧𑀢𑀺𑀭𑀽𑀧𑀤𑁂𑀲𑀯𑀸𑀲𑁄𑀢𑀺 𑀬𑀢𑁆𑀣 𑀘𑀢𑀲𑁆𑀲𑁄 𑀧𑀭𑀺𑀲𑀸 𑀲𑀦𑁆𑀤𑀺𑀲𑁆𑀲𑀦𑁆𑀢𑀺, 𑀏𑀯𑀭𑀽𑀧𑁂 𑀅𑀦𑀼𑀘𑁆𑀙𑀯𑀺𑀓𑁂 𑀤𑁂𑀲𑁂 𑀯𑀸𑀲𑁄. 𑀲𑀧𑁆𑀧𑀼𑀭𑀺𑀲𑀸𑀯𑀲𑁆𑀲𑀬𑁄𑀢𑀺 𑀩𑀼𑀤𑁆𑀥𑀸𑀤𑀻𑀦𑀁 𑀲𑀧𑁆𑀧𑀼𑀭𑀺𑀲𑀸𑀦𑀁 𑀅𑀯𑀲𑁆𑀲𑀬𑀦𑀁 𑀲𑁂𑀯𑀦𑀁 𑀪𑀚𑀦𑀁, 𑀦 𑀭𑀸𑀚𑀸𑀦𑀁. 𑀅𑀢𑁆𑀢𑀲𑀫𑁆𑀫𑀸𑀧𑀡𑀺𑀥𑀻𑀢𑀺 𑀅𑀢𑁆𑀢𑀦𑁄 𑀲𑀫𑁆𑀫𑀸 𑀞𑀧𑀦𑀁, 𑀲𑀘𑁂 𑀧𑀼𑀩𑁆𑀩𑁂 𑀅𑀲𑁆𑀲𑀤𑁆𑀥𑀸𑀤𑀻𑀳𑀺 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀢𑀸𑀦𑀺 𑀧𑀳𑀸𑀬 𑀲𑀤𑁆𑀥𑀸𑀤𑀻𑀲𑀼 𑀧𑀢𑀺𑀝𑁆𑀞𑀸𑀧𑀦𑀁. 𑀧𑀼𑀩𑁆𑀩𑁂 𑀘 𑀓𑀢𑀧𑀼𑀜𑁆𑀜𑀢𑀸𑀢𑀺 𑀧𑀼𑀩𑁆𑀩𑁂 𑀉𑀧𑀘𑀺𑀢𑀓𑀼𑀲𑀮𑀢𑀸. 𑀇𑀤𑀫𑁂𑀯 𑀘𑁂𑀢𑁆𑀣 𑀧𑀫𑀸𑀡𑀁. 𑀬𑁂𑀦 𑀳𑀺 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑁂𑀦 𑀓𑀼𑀲𑀮𑀓𑀫𑁆𑀫𑀁 𑀓𑀢𑀁 𑀳𑁄𑀢𑀺, 𑀢𑀤𑁂𑀯 𑀓𑀼𑀲𑀮𑀁 𑀢𑀁 𑀧𑀼𑀭𑀺𑀲𑀁 𑀧𑀢𑀺𑀭𑀽𑀧𑀤𑁂𑀲𑁂 𑀉𑀧𑀦𑁂𑀢𑀺, 𑀲𑀧𑁆𑀧𑀼𑀭𑀺𑀲𑁂 𑀪𑀚𑀸𑀧𑁂𑀢𑀺, 𑀲𑁄 𑀏𑀯 𑀘 𑀧𑀼𑀕𑁆𑀕𑀮𑁄 𑀅𑀢𑁆𑀢𑀸𑀦𑀁 𑀲𑀫𑁆𑀫𑀸 𑀞𑀧𑁂𑀢𑀺. 𑀧𑀼𑀜𑁆𑀜𑀓𑀢𑁄𑀢𑀺 𑀓𑀢𑀧𑀼𑀜𑁆𑀜𑁄. 𑀲𑀼𑀔𑀜𑁆𑀘𑁂𑀢𑀁𑀥𑀺𑀯𑀢𑁆𑀢𑀢𑀻𑀢𑀺 𑀲𑀼𑀔𑀜𑁆𑀘 𑀏𑀢𑀁 𑀧𑀼𑀕𑁆𑀕𑀮𑀁 𑀅𑀥𑀺𑀯𑀢𑁆𑀢𑀢𑀺, 𑀅𑀯𑀢𑁆𑀣𑀭𑀢𑀻𑀢𑀺 𑀅𑀢𑁆𑀣𑁄.

𑁨. 𑀲𑀗𑁆𑀕𑀳𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁨. 𑀤𑀼𑀢𑀺𑀬𑁂 𑀲𑀗𑁆𑀕𑀳𑀯𑀢𑁆𑀣𑀽𑀦𑀻𑀢𑀺 𑀲𑀗𑁆𑀕𑀡𑁆𑀳𑀦𑀓𑀸𑀭𑀡𑀸𑀦𑀺. 𑀤𑀸𑀦𑀜𑁆𑀘𑀸𑀢𑀺𑀆𑀤𑀻𑀲𑀼 𑀏𑀓𑀘𑁆𑀘𑁄 𑀳𑀺 𑀤𑀸𑀦𑁂𑀦𑁂𑀯 𑀲𑀗𑁆𑀕𑀡𑁆𑀳𑀺𑀢𑀩𑁆𑀩𑁄 𑀳𑁄𑀢𑀺, 𑀢𑀲𑁆𑀲 𑀤𑀸𑀦𑀫𑁂𑀯 𑀤𑀸𑀢𑀩𑁆𑀩𑀁. 𑀧𑁂𑀬𑁆𑀬𑀯𑀚𑁆𑀚𑀦𑁆𑀢𑀺 𑀧𑀺𑀬𑀯𑀘𑀦𑀁. 𑀏𑀓𑀘𑁆𑀘𑁄 𑀳𑀺 ‘‘𑀅𑀬𑀁 𑀤𑀸𑀢𑀩𑁆𑀩𑀁 𑀦𑀸𑀫 𑀤𑁂𑀢𑀺, 𑀏𑀓𑁂𑀓𑁂𑀦 𑀧𑀦 𑀯𑀘𑀦𑁂𑀦 𑀲𑀩𑁆𑀩𑀁 𑀫𑀓𑁆𑀔𑁂𑀢𑁆𑀯𑀸 𑀦𑀸𑀲𑁂𑀢𑀺, 𑀓𑀺𑀁 𑀢𑀲𑁆𑀲 𑀤𑀸𑀦’’𑀦𑁆𑀢𑀺 𑀯𑀢𑁆𑀢𑀸 𑀳𑁄𑀢𑀺. 𑀏𑀓𑀘𑁆𑀘𑁄 ‘‘𑀅𑀬𑀁 𑀓𑀺𑀜𑁆𑀘𑀸𑀧𑀺 𑀤𑀸𑀦𑀁 𑀦 𑀤𑁂𑀢𑀺, 𑀓𑀣𑁂𑀦𑁆𑀢𑁄 𑀧𑀦 𑀢𑁂𑀮𑁂𑀦 𑀯𑀺𑀬 𑀫𑀓𑁆𑀔𑁂𑀢𑀺. 𑀏𑀲 𑀤𑁂𑀢𑀼 𑀯𑀸 𑀫𑀸 𑀯𑀸, 𑀯𑀘𑀦𑀫𑁂𑀯𑀲𑁆𑀲 𑀲𑀳𑀲𑁆𑀲𑀁 𑀅𑀕𑁆𑀖𑀢𑀻’’𑀢𑀺 𑀯𑀢𑁆𑀢𑀸 𑀳𑁄𑀢𑀺. 𑀏𑀯𑀭𑀽𑀧𑁄 𑀧𑀼𑀕𑁆𑀕𑀮𑁄 𑀤𑀸𑀦𑀁 𑀦 𑀧𑀘𑁆𑀘𑀸𑀲𑀻𑀲𑀢𑀺, 𑀧𑀺𑀬𑀯𑀘𑀦𑀫𑁂𑀯 𑀧𑀘𑁆𑀘𑀸𑀲𑀻𑀲𑀢𑀺. 𑀢𑀲𑁆𑀲 𑀧𑀺𑀬𑀯𑀘𑀦𑀫𑁂𑀯 𑀯𑀢𑁆𑀢𑀩𑁆𑀩𑀁. 𑀅𑀢𑁆𑀣𑀘𑀭𑀺𑀬𑀸𑀢𑀺 𑀅𑀢𑁆𑀣𑀯𑀟𑁆𑀠𑀦𑀓𑀣𑀸. 𑀏𑀓𑀘𑁆𑀘𑁄 𑀳𑀺 𑀦𑁂𑀯 𑀤𑀸𑀦𑀁, 𑀦 𑀧𑀺𑀬𑀯𑀘𑀦𑀁 𑀧𑀘𑁆𑀘𑀸𑀲𑀻𑀲𑀢𑀺, 𑀅𑀢𑁆𑀢𑀦𑁄 𑀳𑀺𑀢𑀓𑀣𑀁 𑀯𑀟𑁆𑀠𑀺𑀓𑀣𑀫𑁂𑀯 𑀧𑀘𑁆𑀘𑀸𑀲𑀻𑀲𑀢𑀺. 𑀏𑀯𑀭𑀽𑀧𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 ‘‘𑀇𑀤𑀁 𑀢𑁂 𑀓𑀸𑀢𑀩𑁆𑀩𑀁, 𑀇𑀤𑀁 𑀦 𑀓𑀸𑀢𑀩𑁆𑀩𑀁, 𑀏𑀯𑀭𑀽𑀧𑁄 𑀧𑀼𑀕𑁆𑀕𑀮𑁄 𑀲𑁂𑀯𑀺𑀢𑀩𑁆𑀩𑁄, 𑀏𑀯𑀭𑀽𑀧𑁄 𑀦 𑀲𑁂𑀯𑀺𑀢𑀩𑁆𑀩𑁄’’𑀢𑀺 𑀏𑀯𑀁 𑀅𑀢𑁆𑀣𑀘𑀭𑀺𑀬𑀓𑀣𑀸𑀯 𑀓𑀣𑁂𑀢𑀩𑁆𑀩𑀸. 𑀲𑀫𑀸𑀦𑀢𑁆𑀢𑀢𑀸𑀢𑀺 𑀲𑀫𑀸𑀦𑀲𑀼𑀔𑀤𑀼𑀓𑁆𑀔𑀪𑀸𑀯𑁄. 𑀏𑀓𑀘𑁆𑀘𑁄 𑀳𑀺 𑀤𑀸𑀦𑀸𑀤𑀻𑀲𑀼 𑀏𑀓𑀫𑁆𑀧𑀺 𑀦 𑀧𑀘𑁆𑀘𑀸𑀲𑀻𑀲𑀢𑀺, 𑀏𑀓𑀸𑀲𑀦𑁂 𑀦𑀺𑀲𑀚𑁆𑀚𑀁, 𑀏𑀓𑀧𑀮𑁆𑀮𑀗𑁆𑀓𑁂 𑀲𑀬𑀦𑀁, 𑀏𑀓𑀢𑁄 𑀪𑁄𑀚𑀦𑀦𑁆𑀢𑀺 𑀏𑀯𑀁 𑀲𑀫𑀸𑀦𑀲𑀼𑀔𑀤𑀼𑀓𑁆𑀔𑀢𑀁 𑀧𑀘𑁆𑀘𑀸𑀲𑀻𑀲𑀢𑀺. 𑀲𑁄 𑀲𑀘𑁂 𑀕𑀳𑀝𑁆𑀞𑀲𑁆𑀲 𑀚𑀸𑀢𑀺𑀬𑀸 𑀧𑀩𑁆𑀩𑀚𑀺𑀢𑀲𑁆𑀲 𑀲𑀻𑀮𑁂𑀦 𑀲𑀤𑀺𑀲𑁄 𑀳𑁄𑀢𑀺, 𑀢𑀲𑁆𑀲𑀸𑀬𑀁 𑀲𑀫𑀸𑀦𑀢𑁆𑀢𑀢𑀸 𑀓𑀸𑀢𑀩𑁆𑀩𑀸. 𑀢𑀢𑁆𑀣 𑀢𑀢𑁆𑀣 𑀬𑀣𑀸𑀭𑀳𑀦𑁆𑀢𑀺 𑀢𑁂𑀲𑀼 𑀢𑁂𑀲𑀼 𑀥𑀫𑁆𑀫𑁂𑀲𑀼 𑀬𑀣𑀸𑀦𑀼𑀘𑁆𑀙𑀯𑀺𑀓𑀁 𑀲𑀫𑀸𑀦𑀢𑁆𑀢𑀢𑀸𑀢𑀺 𑀅𑀢𑁆𑀣𑁄. 𑀭𑀣𑀲𑁆𑀲𑀸𑀡𑀻𑀯 𑀬𑀸𑀬𑀢𑁄𑀢𑀺 𑀬𑀣𑀸 𑀭𑀣𑀲𑁆𑀲 𑀕𑀘𑁆𑀙𑀢𑁄 𑀆𑀡𑀺 𑀲𑀗𑁆𑀕𑀳𑁄 𑀦𑀸𑀫 𑀳𑁄𑀢𑀺, 𑀲𑀸 𑀭𑀣𑀁 𑀲𑀗𑁆𑀕𑀡𑁆𑀳𑀸𑀢𑀺, 𑀏𑀯𑀫𑀺𑀫𑁂 𑀲𑀗𑁆𑀕𑀳𑀸 𑀮𑁄𑀓𑀁 𑀲𑀗𑁆𑀕𑀡𑁆𑀳𑀦𑁆𑀢𑀺. 𑀦 𑀫𑀸𑀢𑀸 𑀧𑀼𑀢𑁆𑀢𑀓𑀸𑀭𑀡𑀸𑀢𑀺 𑀬𑀤𑀺 𑀫𑀸𑀢𑀸 𑀏𑀢𑁂 𑀲𑀗𑁆𑀕𑀳𑁂 𑀧𑀼𑀢𑁆𑀢𑀲𑁆𑀲 𑀦 𑀓𑀭𑁂𑀬𑁆𑀬, 𑀧𑀼𑀢𑁆𑀢𑀓𑀸𑀭𑀡𑀸 𑀫𑀸𑀦𑀁 𑀯𑀸 𑀧𑀽𑀚𑀁 𑀯𑀸 𑀦 𑀮𑀪𑁂𑀬𑁆𑀬. 𑀲𑀗𑁆𑀕𑀳𑀸 𑀏𑀢𑁂𑀢𑀺 𑀉𑀧𑀬𑁄𑀕𑀯𑀘𑀦𑁂 𑀧𑀘𑁆𑀘𑀢𑁆𑀢𑀁. 𑀲𑀗𑁆𑀕𑀳𑁂 𑀏𑀢𑁂𑀢𑀺 𑀯𑀸 𑀧𑀸𑀞𑁄. 𑀲𑀫𑀯𑁂𑀓𑁆𑀔𑀦𑁆𑀢𑀻𑀢𑀺 𑀲𑀫𑁆𑀫𑀸 𑀧𑁂𑀓𑁆𑀔𑀦𑁆𑀢𑀺. 𑀧𑀸𑀲𑀁𑀲𑀸 𑀘 𑀪𑀯𑀦𑁆𑀢𑀻𑀢𑀺 𑀧𑀲𑀁𑀲𑀦𑀻𑀬𑀸 𑀘 𑀪𑀯𑀦𑁆𑀢𑀺.

𑁩. 𑀲𑀻𑀳𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁩. 𑀢𑀢𑀺𑀬𑁂 𑀲𑀻𑀳𑁄𑀢𑀺 𑀘𑀢𑁆𑀢𑀸𑀭𑁄 𑀲𑀻𑀳𑀸 𑁋 𑀢𑀺𑀡𑀲𑀻𑀳𑁄, 𑀓𑀸𑀴𑀲𑀻𑀳𑁄, 𑀧𑀡𑁆𑀟𑀼𑀲𑀻𑀳𑁄, 𑀓𑁂𑀲𑀭𑀲𑀻𑀳𑁄𑀢𑀺. 𑀢𑁂𑀲𑀼 𑀢𑀺𑀡𑀲𑀻𑀳𑁄 𑀓𑀧𑁄𑀢𑀯𑀡𑁆𑀡𑀕𑀸𑀯𑀺𑀲𑀤𑀺𑀲𑁄 𑀢𑀺𑀡𑀪𑀓𑁆𑀔𑁄 𑀘 𑀳𑁄𑀢𑀺. 𑀓𑀸𑀴𑀲𑀻𑀳𑁄 𑀓𑀸𑀴𑀕𑀸𑀯𑀺𑀲𑀤𑀺𑀲𑁄 𑀢𑀺𑀡𑀪𑀓𑁆𑀔𑁄𑀬𑁂𑀯. 𑀧𑀡𑁆𑀟𑀼𑀲𑀻𑀳𑁄 𑀧𑀡𑁆𑀟𑀼𑀧𑀮𑀸𑀲𑀯𑀡𑁆𑀡𑀕𑀸𑀯𑀺𑀲𑀤𑀺𑀲𑁄 𑀫𑀁𑀲𑀪𑀓𑁆𑀔𑁄. 𑀓𑁂𑀲𑀭𑀲𑀻𑀳𑁄 𑀮𑀸𑀔𑀸𑀧𑀭𑀺𑀓𑀫𑁆𑀫𑀓𑀢𑁂𑀦𑁂𑀯 𑀫𑀼𑀔𑁂𑀦 𑀅𑀕𑁆𑀕𑀦𑀗𑁆𑀕𑀼𑀝𑁆𑀞𑁂𑀦 𑀘𑀢𑀽𑀳𑀺 𑀘 𑀧𑀸𑀤𑀧𑀭𑀺𑀬𑀦𑁆𑀢𑁂𑀳𑀺 𑀲𑀫𑀦𑁆𑀦𑀸𑀕𑀢𑁄, 𑀫𑀢𑁆𑀣𑀓𑀢𑁄𑀧𑀺𑀲𑁆𑀲 𑀧𑀝𑁆𑀞𑀸𑀬 𑀮𑀸𑀔𑀸𑀢𑀽𑀮𑀺𑀓𑀸𑀬 𑀓𑀢𑀸 𑀯𑀺𑀬 𑀢𑀺𑀲𑁆𑀲𑁄 𑀭𑀸𑀚𑀺𑀬𑁄 𑀧𑀺𑀝𑁆𑀞𑀺𑀫𑀚𑁆𑀛𑁂𑀦 𑀕𑀦𑁆𑀢𑁆𑀯𑀸 𑀅𑀦𑁆𑀢𑀭𑀲𑀢𑁆𑀣𑀺𑀫𑁆𑀳𑀺 𑀤𑀓𑁆𑀔𑀺𑀡𑀸𑀯𑀢𑁆𑀢𑀸 𑀳𑀼𑀢𑁆𑀯𑀸 𑀞𑀺𑀢𑀸. 𑀔𑀦𑁆𑀥𑁂 𑀧𑀦𑀲𑁆𑀲 𑀲𑀢𑀲𑀳𑀲𑁆𑀲𑀕𑁆𑀖𑀦𑀺𑀓𑀓𑀫𑁆𑀩𑀮𑀧𑀭𑀺𑀓𑁆𑀔𑁂𑀧𑁄 𑀯𑀺𑀬 𑀓𑁂𑀲𑀭𑀪𑀸𑀭𑁄 𑀳𑁄𑀢𑀺, 𑀅𑀯𑀲𑁂𑀲𑀝𑁆𑀞𑀸𑀦𑀁 𑀧𑀭𑀺𑀲𑀼𑀤𑁆𑀥𑀲𑀸𑀮𑀺𑀧𑀺𑀡𑁆𑀟𑀲𑀗𑁆𑀔𑀘𑀼𑀡𑁆𑀡𑀧𑀺𑀡𑁆𑀟𑀯𑀡𑁆𑀡𑀁 𑀳𑁄𑀢𑀺. 𑀇𑀫𑁂𑀲𑀼 𑀘𑀢𑀽𑀲𑀼 𑀲𑀻𑀳𑁂𑀲𑀼 𑀅𑀬𑀁 𑀓𑁂𑀲𑀭𑀲𑀻𑀳𑁄 𑀇𑀥 𑀅𑀥𑀺𑀧𑁆𑀧𑁂𑀢𑁄.

𑀫𑀺𑀕𑀭𑀸𑀚𑀸𑀢𑀺 𑀲𑀩𑁆𑀩𑀫𑀺𑀕𑀕𑀡𑀲𑁆𑀲 𑀭𑀸𑀚𑀸. 𑀆𑀲𑀬𑀸𑀢𑀺 𑀯𑀲𑀦𑀝𑁆𑀞𑀸𑀦𑀢𑁄, 𑀲𑀼𑀯𑀡𑁆𑀡𑀕𑀼𑀳𑀢𑁄 𑀯𑀸 𑀭𑀚𑀢𑀫𑀡𑀺𑀨𑀮𑀺𑀓𑀫𑀦𑁄𑀲𑀺𑀮𑀸𑀕𑀼𑀳𑀢𑁄 𑀯𑀸 𑀦𑀺𑀓𑁆𑀔𑀫𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀦𑀺𑀓𑁆𑀔𑀫𑀫𑀸𑀦𑁄 𑀧𑀦𑁂𑀲 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺 𑀦𑀺𑀓𑁆𑀔𑀫𑀢𑀺 𑀅𑀦𑁆𑀥𑀓𑀸𑀭𑀧𑀻𑀴𑀺𑀢𑁄 𑀯𑀸 𑀆𑀮𑁄𑀓𑀢𑁆𑀣𑀸𑀬, 𑀉𑀘𑁆𑀘𑀸𑀭𑀧𑀲𑁆𑀲𑀸𑀯𑀧𑀻𑀴𑀺𑀢𑁄 𑀯𑀸 𑀢𑁂𑀲𑀁 𑀯𑀺𑀲𑁆𑀲𑀚𑁆𑀚𑀦𑀢𑁆𑀣𑀸𑀬, 𑀚𑀺𑀖𑀘𑁆𑀙𑀸𑀧𑀻𑀴𑀺𑀢𑁄 𑀯𑀸 𑀕𑁄𑀘𑀭𑀢𑁆𑀣𑀸𑀬, 𑀲𑀫𑁆𑀪𑀯𑀧𑀻𑀴𑀺𑀢𑁄 𑀯𑀸 𑀅𑀲𑁆𑀲𑀤𑁆𑀥𑀫𑁆𑀫𑀧𑀝𑀺𑀲𑁂𑀯𑀦𑀢𑁆𑀣𑀸𑀬. 𑀇𑀥 𑀧𑀦 𑀕𑁄𑀘𑀭𑀢𑁆𑀣𑀸𑀬 𑀦𑀺𑀓𑁆𑀔𑀫𑀦𑁆𑀢𑁄 𑀅𑀥𑀺𑀧𑁆𑀧𑁂𑀢𑁄.

𑀯𑀺𑀚𑀫𑁆𑀪𑀢𑀻𑀢𑀺 𑀲𑀼𑀯𑀡𑁆𑀡𑀢𑀮𑁂 𑀯𑀸 𑀭𑀚𑀢𑀫𑀡𑀺𑀨𑀮𑀺𑀓𑀫𑀦𑁄𑀲𑀺𑀮𑀸𑀢𑀮𑀸𑀦𑀁 𑀯𑀸 𑀅𑀜𑁆𑀜𑀢𑀭𑀲𑁆𑀫𑀺𑀁 𑀤𑁆𑀯𑁂 𑀧𑀘𑁆𑀙𑀺𑀫𑀧𑀸𑀤𑁂 𑀲𑀫𑀁 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀧𑀼𑀭𑀺𑀫𑀧𑀸𑀤𑁂 𑀧𑀼𑀭𑀢𑁄 𑀧𑀲𑀸𑀭𑁂𑀢𑁆𑀯𑀸 𑀲𑀭𑀻𑀭𑀲𑁆𑀲 𑀧𑀘𑁆𑀙𑀸𑀪𑀸𑀕𑀁 𑀆𑀓𑀟𑁆𑀠𑀺𑀢𑁆𑀯𑀸 𑀧𑀼𑀭𑀺𑀫𑀪𑀸𑀕𑀁 𑀅𑀪𑀺𑀳𑀭𑀺𑀢𑁆𑀯𑀸 𑀧𑀺𑀝𑁆𑀞𑀺𑀁 𑀦𑀸𑀫𑁂𑀢𑁆𑀯𑀸 𑀕𑀻𑀯𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀅𑀲𑀦𑀺𑀲𑀤𑁆𑀤𑀁 𑀓𑀭𑁄𑀦𑁆𑀢𑁄 𑀯𑀺𑀬 𑀦𑀸𑀲𑀧𑀼𑀝𑀸𑀦𑀺 𑀧𑁄𑀣𑁂𑀢𑁆𑀯𑀸 𑀲𑀭𑀻𑀭𑀮𑀕𑁆𑀕𑀁 𑀭𑀚𑀁 𑀯𑀺𑀥𑀼𑀦𑀦𑁆𑀢𑁄 𑀯𑀺𑀚𑀫𑁆𑀪𑀢𑀺. 𑀯𑀺𑀚𑀫𑁆𑀪𑀦𑀪𑀽𑀫𑀺𑀬𑀜𑁆𑀘 𑀧𑀦 𑀢𑀭𑀼𑀡𑀯𑀘𑁆𑀙𑀓𑁄 𑀯𑀺𑀬 𑀅𑀧𑀭𑀸𑀧𑀭𑀁 𑀚𑀯𑀢𑀺, 𑀚𑀯𑀢𑁄 𑀧𑀦𑀲𑁆𑀲 𑀲𑀭𑀻𑀭𑀁 𑀅𑀦𑁆𑀥𑀓𑀸𑀭𑁂 𑀧𑀭𑀺𑀩𑁆𑀪𑀫𑀦𑁆𑀢𑀁 𑀅𑀮𑀸𑀢𑀁 𑀯𑀺𑀬 𑀔𑀸𑀬𑀢𑀺.

𑀅𑀦𑀼𑀯𑀺𑀮𑁄𑀓𑁂𑀢𑀻𑀢𑀺 𑀓𑀲𑁆𑀫𑀸 𑀅𑀦𑀼𑀯𑀺𑀮𑁄𑀓𑁂𑀢𑀺? 𑀧𑀭𑀸𑀦𑀼𑀤𑁆𑀤𑀬𑀢𑀸𑀬. 𑀢𑀲𑁆𑀫𑀺𑀁 𑀓𑀺𑀭 𑀲𑀻𑀳𑀦𑀸𑀤𑀁 𑀦𑀤𑀦𑁆𑀢𑁂 𑀧𑀧𑀸𑀢𑀸𑀯𑀸𑀝𑀸𑀤𑀻𑀲𑀼 𑀯𑀺𑀲𑀫𑀝𑁆𑀞𑀸𑀦𑁂𑀲𑀼 𑀘𑀭𑀦𑁆𑀢𑀸 𑀳𑀢𑁆𑀣𑀺𑀕𑁄𑀓𑀡𑁆𑀡𑀫𑀳𑀺𑀁𑀲𑀸𑀤𑀬𑁄 𑀧𑀸𑀡𑀸 𑀧𑀧𑀸𑀢𑁂𑀧𑀺 𑀆𑀯𑀸𑀝𑁂𑀧𑀺 𑀧𑀢𑀦𑁆𑀢𑀺, 𑀢𑁂𑀲𑀁 𑀅𑀦𑀼𑀤𑁆𑀤𑀬𑀸𑀬 𑀅𑀦𑀼𑀯𑀺𑀮𑁄𑀓𑁂𑀢𑀺. 𑀓𑀺𑀁 𑀧𑀦𑀲𑁆𑀲 𑀮𑀼𑀤𑁆𑀤𑀲𑁆𑀲 𑀧𑀭𑀫𑀁𑀲𑀔𑀸𑀤𑀺𑀦𑁄 𑀅𑀦𑀼𑀤𑁆𑀤𑀬𑀸 𑀦𑀸𑀫 𑀅𑀢𑁆𑀣𑀻𑀢𑀺? 𑀆𑀫 𑀅𑀢𑁆𑀣𑀺. 𑀢𑀣𑀸 𑀳𑀺 ‘‘𑀓𑀺𑀁 𑀫𑁂 𑀩𑀳𑀽𑀳𑀺 𑀖𑀸𑀢𑀺𑀢𑁂𑀳𑀻’’𑀢𑀺 𑀅𑀢𑁆𑀢𑀦𑁄 𑀕𑁄𑀘𑀭𑀢𑁆𑀣𑀸𑀬𑀸𑀧𑀺 𑀔𑀼𑀤𑁆𑀤𑀓𑁂 𑀧𑀸𑀡𑁂 𑀦 𑀕𑀡𑁆𑀳𑀸𑀢𑀺. 𑀏𑀯𑀁 𑀅𑀦𑀼𑀤𑁆𑀤𑀬𑀁 𑀓𑀭𑁄𑀢𑀺, 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋 ‘‘𑀫𑀸𑀳𑀁 𑀔𑀼𑀤𑁆𑀤𑀓𑁂 𑀧𑀸𑀡𑁂 𑀯𑀺𑀲𑀫𑀕𑀢𑁂 𑀲𑀗𑁆𑀖𑀸𑀢𑀁 𑀆𑀧𑀸𑀤𑁂𑀲𑀺’’𑀦𑁆𑀢𑀺 (𑀅. 𑀦𑀺. 𑁧𑁦.𑁨𑁧).

𑀲𑀻𑀳𑀦𑀸𑀤𑀁 𑀦𑀤𑀢𑀻𑀢𑀺 𑀢𑀺𑀓𑁆𑀔𑀢𑁆𑀢𑀼𑀁 𑀢𑀸𑀯 𑀅𑀪𑀻𑀢𑀦𑀸𑀤𑀁 𑀦𑀤𑀢𑀺. 𑀏𑀯𑀜𑁆𑀘 𑀧𑀦𑀲𑁆𑀲 𑀯𑀺𑀚𑀫𑁆𑀪𑀦𑀪𑀽𑀫𑀺𑀬𑀁 𑀞𑀢𑁆𑀯𑀸 𑀦𑀤𑀦𑁆𑀢𑀲𑁆𑀲 𑀲𑀤𑁆𑀤𑁄 𑀲𑀫𑀦𑁆𑀢𑀸 𑀢𑀺𑀬𑁄𑀚𑀦𑀧𑀤𑁂𑀲𑀁 𑀏𑀓𑀦𑀺𑀦𑁆𑀦𑀸𑀤𑀁 𑀓𑀭𑁄𑀢𑀺, 𑀢𑀫𑀲𑁆𑀲 𑀦𑀺𑀦𑁆𑀦𑀸𑀤𑀁 𑀲𑀼𑀢𑁆𑀯𑀸 𑀢𑀺𑀬𑁄𑀚𑀦𑀩𑁆𑀪𑀦𑁆𑀢𑀭𑀕𑀢𑀸 𑀤𑁆𑀯𑀺𑀧𑀤𑀘𑀢𑀼𑀧𑁆𑀧𑀤𑀕𑀡𑀸 𑀬𑀣𑀸𑀞𑀸𑀦𑁂 𑀞𑀸𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺. 𑀕𑁄𑀘𑀭𑀸𑀬 𑀧𑀓𑁆𑀓𑀫𑀢𑀻𑀢𑀺 𑀆𑀳𑀸𑀭𑀢𑁆𑀣𑀸𑀬 𑀕𑀘𑁆𑀙𑀢𑀺. 𑀓𑀣𑀁? 𑀲𑁄 𑀳𑀺 𑀯𑀺𑀚𑀫𑁆𑀪𑀦𑀪𑀽𑀫𑀺𑀬𑀁 𑀞𑀢𑁆𑀯𑀸 𑀤𑀓𑁆𑀔𑀺𑀡𑀢𑁄 𑀯𑀸 𑀯𑀸𑀫𑀢𑁄 𑀯𑀸 𑀉𑀧𑁆𑀧𑀢𑀦𑁆𑀢𑁄 𑀉𑀲𑀪𑀫𑀢𑁆𑀢𑀁 𑀞𑀸𑀦𑀁 𑀕𑀡𑁆𑀳𑀸𑀢𑀺, 𑀉𑀤𑁆𑀥𑀁 𑀉𑀧𑁆𑀧𑀢𑀦𑁆𑀢𑁄 𑀘𑀢𑁆𑀢𑀸𑀭𑀺𑀧𑀺 𑀅𑀝𑁆𑀞𑀧𑀺 𑀉𑀲𑀪𑀝𑁆𑀞𑀸𑀦𑀸𑀦𑀺 𑀉𑀧𑁆𑀧𑀢𑀢𑀺, 𑀲𑀫𑁂 𑀞𑀸𑀦𑁂 𑀉𑀚𑀼𑀓𑀁 𑀧𑀓𑁆𑀔𑀦𑁆𑀤𑀦𑁆𑀢𑁄 𑀲𑁄𑀴𑀲𑀉𑀲𑀪𑀫𑀢𑁆𑀢𑀫𑁆𑀧𑀺 𑀯𑀻𑀲𑀢𑀺𑀉𑀲𑀪𑀫𑀢𑁆𑀢𑀫𑁆𑀧𑀺 𑀞𑀸𑀦𑀁 𑀧𑀓𑁆𑀔𑀦𑁆𑀤𑀢𑀺, 𑀣𑀮𑀸 𑀯𑀸 𑀧𑀩𑁆𑀩𑀢𑀸 𑀯𑀸 𑀧𑀓𑁆𑀔𑀦𑁆𑀤𑀦𑁆𑀢𑁄 𑀲𑀝𑁆𑀞𑀺𑀉𑀲𑀪𑀫𑀢𑁆𑀢𑀫𑁆𑀧𑀺 𑀅𑀲𑀻𑀢𑀺𑀉𑀲𑀪𑀫𑀢𑁆𑀢𑀫𑁆𑀧𑀺 𑀞𑀸𑀦𑀁 𑀧𑀓𑁆𑀔𑀦𑁆𑀤𑀢𑀺, 𑀅𑀦𑁆𑀢𑀭𑀸𑀫𑀕𑁆𑀕𑁂 𑀭𑀼𑀓𑁆𑀔𑀁 𑀯𑀸 𑀧𑀩𑁆𑀩𑀢𑀁 𑀯𑀸 𑀤𑀺𑀲𑁆𑀯𑀸 𑀢𑀁 𑀧𑀭𑀺𑀳𑀭𑀦𑁆𑀢𑁄 𑀯𑀸𑀫𑀢𑁄 𑀯𑀸 𑀤𑀓𑁆𑀔𑀺𑀡𑀢𑁄 𑀯𑀸 𑀉𑀤𑁆𑀥𑀁 𑀯𑀸 𑀉𑀲𑀪𑀫𑀢𑁆𑀢𑀁 𑀅𑀧𑀓𑁆𑀓𑀫𑀢𑀺. 𑀢𑀢𑀺𑀬𑀁 𑀧𑀦 𑀲𑀻𑀳𑀦𑀸𑀤𑀁 𑀦𑀤𑀺𑀢𑁆𑀯𑀸 𑀢𑁂𑀦𑁂𑀯 𑀲𑀤𑁆𑀥𑀺𑀁 𑀢𑀺𑀬𑁄𑀚𑀦𑁂 𑀞𑀸𑀦𑁂 𑀧𑀜𑁆𑀜𑀸𑀬𑀢𑀺, 𑀢𑀺𑀬𑁄𑀚𑀦𑀁 𑀕𑀦𑁆𑀢𑁆𑀯𑀸 𑀦𑀺𑀯𑀢𑁆𑀢𑀺𑀢𑁆𑀯𑀸 𑀞𑀺𑀢𑁄 𑀅𑀢𑁆𑀢𑀦𑁄𑀯 𑀦𑀸𑀤𑀲𑁆𑀲 𑀅𑀦𑀼𑀦𑀸𑀤𑀁 𑀲𑀼𑀡𑀸𑀢𑀺. 𑀏𑀯𑀁 𑀲𑀻𑀖𑁂𑀦 𑀚𑀯𑁂𑀦 𑀧𑀓𑁆𑀓𑀫𑀢𑀺.

𑀬𑁂𑀪𑀼𑀬𑁆𑀬𑁂𑀦𑀸𑀢𑀺 𑀧𑀸𑀬𑁂𑀦. 𑀪𑀬𑀁 𑀲𑀦𑁆𑀢𑀸𑀲𑀁 𑀲𑀁𑀯𑁂𑀕𑀦𑁆𑀢𑀺 𑀲𑀩𑁆𑀩𑀁 𑀘𑀺𑀢𑁆𑀢𑀼𑀢𑁆𑀭𑀸𑀲𑀲𑁆𑀲𑁂𑀯 𑀦𑀸𑀫𑀁. 𑀲𑀻𑀳𑀲𑁆𑀲 𑀳𑀺 𑀲𑀤𑁆𑀤𑀁 𑀲𑀼𑀢𑁆𑀯𑀸 𑀩𑀳𑀽 𑀪𑀸𑀬𑀦𑁆𑀢𑀺, 𑀅𑀧𑁆𑀧𑀓𑀸 𑀦 𑀪𑀸𑀬𑀦𑁆𑀢𑀺. 𑀓𑁂 𑀧𑀦 𑀢𑁂𑀢𑀺? 𑀲𑀫𑀲𑀻𑀳𑁄 𑀳𑀢𑁆𑀣𑀸𑀚𑀸𑀦𑀻𑀬𑁄 𑀅𑀲𑁆𑀲𑀸𑀚𑀸𑀦𑀻𑀬𑁄 𑀉𑀲𑀪𑀸𑀚𑀸𑀦𑀻𑀬𑁄 𑀧𑀼𑀭𑀺𑀲𑀸𑀚𑀸𑀦𑀻𑀬𑁄 𑀔𑀻𑀡𑀸𑀲𑀯𑁄𑀢𑀺. 𑀓𑀲𑁆𑀫𑀸 𑀧𑀦𑁂𑀢𑁂 𑀦 𑀪𑀸𑀬𑀦𑁆𑀢𑀻𑀢𑀺? 𑀲𑀫𑀲𑀻𑀳𑁄 𑀢𑀸𑀯 ‘‘𑀚𑀸𑀢𑀺𑀕𑁄𑀢𑁆𑀢𑀓𑀼𑀮𑀲𑀽𑀭𑀪𑀸𑀯𑁂𑀳𑀺 𑀲𑀫𑀸𑀦𑁄𑀲𑁆𑀫𑀻’’𑀢𑀺 𑀦 𑀪𑀸𑀬𑀢𑀺, 𑀳𑀢𑁆𑀣𑀸𑀚𑀸𑀦𑀻𑀬𑀸𑀤𑀬𑁄 𑀅𑀢𑁆𑀢𑀦𑁄 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀩𑀮𑀯𑀢𑀸𑀬 𑀦 𑀪𑀸𑀬𑀦𑁆𑀢𑀺, 𑀔𑀻𑀡𑀸𑀲𑀯𑁄 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀬𑀸 𑀧𑀳𑀻𑀦𑀢𑁆𑀢𑀸 𑀦 𑀪𑀸𑀬𑀢𑀺.

𑀩𑀺𑀮𑀸𑀲𑀬𑀸𑀢𑀺 𑀩𑀺𑀮𑁂 𑀲𑀬𑀦𑁆𑀢𑀸 𑀩𑀺𑀮𑀯𑀸𑀲𑀺𑀦𑁄 𑀅𑀳𑀺𑀦𑀓𑀼𑀮𑀕𑁄𑀥𑀸𑀤𑀬𑁄. 𑀉𑀤𑀓𑀸𑀲𑀬𑀸𑀢𑀺 𑀉𑀤𑀓𑀯𑀸𑀲𑀺𑀦𑁄 𑀫𑀘𑁆𑀙𑀓𑀘𑁆𑀙𑀧𑀸𑀤𑀬𑁄. 𑀯𑀦𑀸𑀲𑀬𑀸𑀢𑀺 𑀯𑀦𑀯𑀸𑀲𑀺𑀦𑁄 𑀳𑀢𑁆𑀣𑀺𑀅𑀲𑁆𑀲𑀕𑁄𑀓𑀡𑁆𑀡𑀫𑀺𑀕𑀸𑀤𑀬𑁄. 𑀧𑀯𑀺𑀲𑀦𑁆𑀢𑀻𑀢𑀺 ‘‘𑀇𑀤𑀸𑀦𑀺 𑀆𑀕𑀦𑁆𑀢𑁆𑀯𑀸 𑀕𑀡𑁆𑀳𑀺𑀲𑁆𑀲𑀢𑀻’’𑀢𑀺 𑀫𑀕𑁆𑀕𑀁 𑀑𑀮𑁄𑀓𑁂𑀢𑁆𑀯𑀸 𑀧𑀯𑀺𑀲𑀦𑁆𑀢𑀺. 𑀤𑀴𑁆𑀳𑁂𑀳𑀻𑀢𑀺 𑀣𑀺𑀭𑁂𑀳𑀺. 𑀯𑀭𑀢𑁆𑀢𑁂𑀳𑀻𑀢𑀺 𑀘𑀫𑁆𑀫𑀭𑀚𑁆𑀚𑀽𑀳𑀺. 𑀫𑀳𑀺𑀤𑁆𑀥𑀺𑀓𑁄𑀢𑀺𑀆𑀤𑀻𑀲𑀼 𑀯𑀺𑀚𑀫𑁆𑀪𑀦𑀪𑀽𑀫𑀺𑀬𑀁 𑀞𑀢𑁆𑀯𑀸 𑀤𑀓𑁆𑀔𑀺𑀡𑀧𑀲𑁆𑀲𑀸𑀤𑀻𑀳𑀺 𑀉𑀲𑀪𑀫𑀢𑁆𑀢𑀁, 𑀉𑀚𑀼𑀁 𑀯𑀻𑀲𑀢𑀺𑀉𑀲𑀪𑀫𑀢𑁆𑀢𑀸𑀤𑀺𑀮𑀗𑁆𑀖𑀦𑀯𑀲𑁂𑀦 𑀫𑀳𑀺𑀤𑁆𑀥𑀺𑀓𑀢𑀸, 𑀲𑁂𑀲𑀫𑀺𑀕𑀸𑀦𑀁 𑀅𑀥𑀺𑀧𑀢𑀺𑀪𑀸𑀯𑁂𑀦 𑀫𑀳𑁂𑀲𑀓𑁆𑀔𑀢𑀸, 𑀲𑀫𑀦𑁆𑀢𑀸 𑀢𑀺𑀬𑁄𑀚𑀦𑀝𑁆𑀞𑀸𑀦𑁂 𑀲𑀤𑁆𑀤𑀁 𑀲𑀼𑀢𑁆𑀯𑀸 𑀧𑀮𑀸𑀬𑀦𑁆𑀢𑀸𑀦𑀁 𑀯𑀲𑁂𑀦 𑀫𑀳𑀸𑀦𑀼𑀪𑀸𑀯𑀢𑀸 𑀯𑁂𑀤𑀺𑀢𑀩𑁆𑀩𑀸.

𑀏𑀯𑀫𑁂𑀯 𑀔𑁄𑀢𑀺 𑀪𑀕𑀯𑀸 𑀢𑁂𑀲𑀼 𑀢𑁂𑀲𑀼 𑀲𑀼𑀢𑁆𑀢𑀦𑁆𑀢𑁂𑀲𑀼 𑀢𑀣𑀸 𑀢𑀣𑀸 𑀅𑀢𑁆𑀢𑀸𑀦𑀁 𑀓𑀣𑁂𑀲𑀺. ‘‘𑀲𑀻𑀳𑁄𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲𑀸’’𑀢𑀺 (𑀅. 𑀦𑀺. 𑁫.𑁯𑁯; 𑁧𑁦.𑁨𑁧) 𑀇𑀫𑀲𑁆𑀫𑀺𑀁 𑀢𑀸𑀯 𑀲𑀼𑀢𑁆𑀢𑁂 𑀲𑀻𑀳𑀲𑀤𑀺𑀲𑀁 𑀅𑀢𑁆𑀢𑀸𑀦𑀁 𑀓𑀣𑁂𑀲𑀺. ‘‘𑀪𑀺𑀲𑀓𑁆𑀓𑁄 𑀲𑀮𑁆𑀮𑀓𑀢𑁆𑀢𑁄𑀢𑀺 𑀔𑁄, 𑀲𑀼𑀦𑀓𑁆𑀔𑀢𑁆𑀢, 𑀢𑀣𑀸𑀕𑀢𑀲𑁆𑀲𑁂𑀢𑀁 𑀅𑀥𑀺𑀯𑀘𑀦’’𑀦𑁆𑀢𑀺 (𑀫. 𑀦𑀺. 𑁩.𑁬𑁫) 𑀇𑀫𑀲𑁆𑀫𑀺𑀁 𑀯𑁂𑀚𑁆𑀚𑀲𑀤𑀺𑀲𑀁, ‘‘𑀩𑁆𑀭𑀸𑀳𑁆𑀫𑀡𑁄𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑀲𑁆𑀲𑁂𑀢𑀁 𑀅𑀥𑀺𑀯𑀘𑀦’’𑀦𑁆𑀢𑀺 (𑀅. 𑀦𑀺. 𑁮.𑁮𑁫) 𑀇𑀫𑀲𑁆𑀫𑀺𑀁 𑀩𑁆𑀭𑀸𑀳𑁆𑀫𑀡𑀲𑀤𑀺𑀲𑀁, ‘‘𑀧𑀼𑀭𑀺𑀲𑁄 𑀫𑀕𑁆𑀕𑀓𑀼𑀲𑀮𑁄𑀢𑀺 𑀔𑁄, 𑀢𑀺𑀲𑁆𑀲, 𑀢𑀣𑀸𑀕𑀢𑀲𑁆𑀲𑁂𑀢𑀁 𑀅𑀥𑀺𑀯𑀘𑀦’’𑀦𑁆𑀢𑀺 (𑀲𑀁. 𑀦𑀺. 𑁩.𑁮𑁪) 𑀇𑀫𑀲𑁆𑀫𑀺𑀁 𑀫𑀕𑁆𑀕𑀤𑁂𑀲𑀓𑀧𑀼𑀭𑀺𑀲𑀲𑀤𑀺𑀲𑀁, ‘‘𑀭𑀸𑀚𑀸𑀳𑀫𑀲𑁆𑀫𑀺, 𑀲𑁂𑀮𑀸’’𑀢𑀺 (𑀲𑀼. 𑀦𑀺. 𑁫𑁫𑁯; 𑀫. 𑀦𑀺. 𑁨.𑁩𑁯𑁯) 𑀇𑀫𑀲𑁆𑀫𑀺𑀁 𑀭𑀸𑀚𑀲𑀤𑀺𑀲𑀁. 𑀇𑀫𑀲𑁆𑀫𑀺𑀁 𑀧𑀦 𑀲𑀼𑀢𑁆𑀢𑁂 𑀲𑀻𑀳𑀲𑀤𑀺𑀲𑀫𑁂𑀯 𑀓𑀢𑁆𑀯𑀸 𑀅𑀢𑁆𑀢𑀸𑀦𑀁 𑀓𑀣𑁂𑀦𑁆𑀢𑁄 𑀏𑀯𑀫𑀸𑀳.

𑀢𑀢𑁆𑀭𑀸𑀬𑀁 𑀲𑀤𑀺𑀲𑀢𑀸 𑁋 𑀲𑀻𑀳𑀲𑁆𑀲 𑀓𑀜𑁆𑀘𑀦𑀕𑀼𑀳𑀸𑀤𑀻𑀲𑀼 𑀯𑀲𑀦𑀓𑀸𑀮𑁄 𑀯𑀺𑀬 𑀳𑀺 𑀢𑀣𑀸𑀕𑀢𑀲𑁆𑀲 𑀤𑀻𑀧𑀗𑁆𑀓𑀭𑀧𑀸𑀤𑀫𑀽𑀮𑁂 𑀓𑀢𑀸𑀪𑀺𑀦𑀻𑀳𑀸𑀭𑀲𑁆𑀲 𑀅𑀧𑀭𑀺𑀫𑀺𑀢𑀓𑀸𑀮𑀁 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸 𑀧𑀘𑁆𑀙𑀺𑀫𑀪𑀯𑁂 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑁂𑀦 𑀘𑁂𑀯 𑀫𑀸𑀢𑀼𑀓𑀼𑀘𑁆𑀙𑀺𑀢𑁄 𑀦𑀺𑀓𑁆𑀔𑀫𑀦𑁂𑀦 𑀘 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀁 𑀓𑀫𑁆𑀧𑁂𑀢𑁆𑀯𑀸 𑀯𑀼𑀤𑁆𑀥𑀺𑀫𑀦𑁆𑀯𑀸𑀬 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀲𑀤𑀺𑀲𑀁 𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀫𑀸𑀦𑀲𑁆𑀲 𑀢𑀻𑀲𑀼 𑀧𑀸𑀲𑀸𑀤𑁂𑀲𑀼 𑀦𑀺𑀯𑀸𑀲𑀓𑀸𑀮𑁄 𑀤𑀝𑁆𑀞𑀩𑁆𑀩𑁄. 𑀲𑀻𑀳𑀲𑁆𑀲 𑀓𑀜𑁆𑀘𑀦𑀕𑀼𑀳𑀸𑀤𑀺𑀢𑁄 𑀦𑀺𑀓𑁆𑀔𑀦𑁆𑀢𑀓𑀸𑀮𑁄 𑀯𑀺𑀬 𑀢𑀣𑀸𑀕𑀢𑀲𑁆𑀲 𑀏𑀓𑀽𑀦𑀢𑀺𑀁𑀲𑀲𑀁𑀯𑀘𑁆𑀙𑀭𑁂 𑀯𑀺𑀯𑀝𑁂𑀦 𑀤𑁆𑀯𑀸𑀭𑁂𑀦 𑀓𑀡𑁆𑀟𑀓𑀁 𑀆𑀭𑀼𑀬𑁆𑀳 𑀙𑀦𑁆𑀦𑀲𑀳𑀸𑀬𑀲𑁆𑀲 𑀦𑀺𑀓𑁆𑀔𑀫𑀺𑀢𑁆𑀯𑀸 𑀢𑀻𑀡𑀺 𑀭𑀚𑁆𑀚𑀸𑀦𑀺 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀅𑀦𑁄𑀫𑀸𑀦𑀤𑀻𑀢𑀻𑀭𑁂 𑀩𑁆𑀭𑀳𑁆𑀫𑀼𑀦𑀸 𑀤𑀺𑀦𑁆𑀦𑀸𑀦𑀺 𑀓𑀸𑀲𑀸𑀬𑀸𑀦𑀺 𑀧𑀭𑀺𑀤𑀳𑀺𑀢𑁆𑀯𑀸 𑀧𑀩𑁆𑀩𑀚𑀺𑀢𑀲𑁆𑀲 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀭𑀸𑀚𑀕𑀳𑀁 𑀕𑀦𑁆𑀢𑁆𑀯𑀸 𑀢𑀢𑁆𑀣 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀧𑀡𑁆𑀟𑀯𑀕𑀺𑀭𑀺𑀧𑀩𑁆𑀪𑀸𑀭𑁂 𑀓𑀢𑀪𑀢𑁆𑀢𑀓𑀺𑀘𑁆𑀘𑀲𑁆𑀲 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀧𑀢𑁆𑀯𑀸 𑀧𑀞𑀫𑀫𑁂𑀯 𑀫𑀕𑀥𑀭𑀝𑁆𑀞𑀁 𑀆𑀕𑀫𑀦𑀢𑁆𑀣𑀸𑀬 𑀬𑀸𑀯 𑀭𑀜𑁆𑀜𑁄 𑀧𑀝𑀺𑀜𑁆𑀜𑀸𑀤𑀸𑀦𑀓𑀸𑀮𑁄.

𑀲𑀻𑀳𑀲𑁆𑀲 𑀯𑀺𑀚𑀫𑁆𑀪𑀦𑀓𑀸𑀮𑁄 𑀯𑀺𑀬 𑀢𑀣𑀸𑀕𑀢𑀲𑁆𑀲 𑀤𑀺𑀦𑁆𑀦𑀧𑀝𑀺𑀜𑁆𑀜𑀲𑁆𑀲 𑀆𑀴𑀸𑀭𑀓𑀸𑀮𑀸𑀫𑀉𑀧𑀲𑀗𑁆𑀓𑀫𑀦𑀁 𑀆𑀤𑀺𑀁 𑀓𑀢𑁆𑀯𑀸 𑀬𑀸𑀯 𑀲𑀼𑀚𑀸𑀢𑀸𑀬 𑀤𑀺𑀦𑁆𑀦𑀧𑀸𑀬𑀸𑀲𑀲𑁆𑀲 𑀏𑀓𑀽𑀦𑀧𑀡𑁆𑀡𑀸𑀲𑀸𑀬 𑀧𑀺𑀡𑁆𑀟𑁂𑀳𑀺 𑀧𑀭𑀺𑀪𑀼𑀢𑁆𑀢𑀓𑀸𑀮𑁄 𑀯𑁂𑀤𑀺𑀢𑀩𑁆𑀩𑁄. 𑀲𑀻𑀳𑀲𑁆𑀲 𑀲𑀭𑀻𑀭𑀯𑀺𑀥𑀼𑀦𑀦𑀁 𑀯𑀺𑀬 𑀲𑀸𑀬𑀦𑁆𑀳𑀲𑀫𑀬𑁂 𑀲𑁄𑀢𑁆𑀢𑀺𑀬𑁂𑀦 𑀤𑀺𑀦𑁆𑀦𑀸 𑀅𑀝𑁆𑀞 𑀢𑀺𑀡𑀫𑀼𑀝𑁆𑀞𑀺𑀬𑁄 𑀕𑀳𑁂𑀢𑁆𑀯𑀸 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀤𑁂𑀯𑀢𑀸𑀳𑀺 𑀣𑁄𑀫𑀺𑀬𑀫𑀸𑀦𑀲𑁆𑀲 𑀕𑀦𑁆𑀥𑀸𑀤𑀻𑀳𑀺 𑀧𑀽𑀚𑀺𑀬𑀫𑀸𑀦𑀲𑁆𑀲 𑀢𑀺𑀓𑁆𑀔𑀢𑁆𑀢𑀼𑀁 𑀩𑁄𑀥𑀺𑀁 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀩𑁄𑀥𑀺𑀫𑀡𑁆𑀟𑀁 𑀆𑀭𑀼𑀬𑁆𑀳 𑀘𑀼𑀤𑁆𑀤𑀲𑀳𑀢𑁆𑀣𑀼𑀩𑁆𑀩𑁂𑀥𑁂 𑀞𑀸𑀦𑁂 𑀢𑀺𑀡𑀲𑀦𑁆𑀣𑀭𑀁 𑀅𑀢𑁆𑀣𑀭𑀺𑀢𑁆𑀯𑀸 𑀘𑀢𑀼𑀭𑀗𑁆𑀕𑀯𑀻𑀭𑀺𑀬𑀁 𑀅𑀥𑀺𑀝𑁆𑀞𑀸𑀬 𑀦𑀺𑀲𑀺𑀦𑁆𑀦𑀲𑁆𑀲 𑀢𑀁𑀔𑀡𑀜𑁆𑀜𑁂𑀯 𑀫𑀸𑀭𑀩𑀮𑀁 𑀯𑀺𑀥𑀫𑁂𑀢𑁆𑀯𑀸 𑀢𑀻𑀲𑀼 𑀬𑀸𑀫𑁂𑀲𑀼 𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀯𑀺𑀲𑁄𑀥𑁂𑀢𑁆𑀯𑀸 𑀅𑀦𑀼𑀮𑁄𑀫𑀧𑁆𑀧𑀝𑀺𑀮𑁄𑀫𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀫𑀳𑀸𑀲𑀫𑀼𑀤𑁆𑀤𑀁 𑀬𑀫𑀓𑀜𑀸𑀡𑀫𑀦𑁆𑀣𑀦𑁂𑀦 𑀫𑀦𑁆𑀣𑁂𑀦𑁆𑀢𑀲𑁆𑀲 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑁂 𑀧𑀝𑀺𑀯𑀺𑀤𑁆𑀥𑁂 𑀢𑀤𑀦𑀼𑀪𑀸𑀯𑁂𑀦 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀓𑀫𑁆𑀧𑀦𑀁 𑀯𑁂𑀤𑀺𑀢𑀩𑁆𑀩𑀁.

𑀲𑀻𑀳𑀲𑁆𑀲 𑀘𑀢𑀼𑀤𑀺𑀲𑀸𑀯𑀺𑀮𑁄𑀓𑀦𑀁 𑀯𑀺𑀬 𑀧𑀝𑀺𑀯𑀺𑀤𑁆𑀥𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑁆𑀲 𑀲𑀢𑁆𑀢𑀲𑀢𑁆𑀢𑀸𑀳𑀁 𑀩𑁄𑀥𑀺𑀫𑀡𑁆𑀟𑁂 𑀯𑀺𑀳𑀭𑀺𑀢𑁆𑀯𑀸 𑀧𑀭𑀺𑀪𑀼𑀢𑁆𑀢𑀫𑀥𑀼𑀧𑀺𑀡𑁆𑀟𑀺𑀓𑀸𑀳𑀸𑀭𑀲𑁆𑀲 𑀅𑀚𑀧𑀸𑀮𑀦𑀺𑀕𑁆𑀭𑁄𑀥𑀫𑀽𑀮𑁂 𑀫𑀳𑀸𑀩𑁆𑀭𑀳𑁆𑀫𑀼𑀦𑁄 𑀥𑀫𑁆𑀫𑀤𑁂𑀲𑀦𑀸𑀬𑀸𑀘𑀦𑀁 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀢𑀢𑁆𑀣 𑀯𑀺𑀳𑀭𑀦𑁆𑀢𑀲𑁆𑀲 𑀏𑀓𑀸𑀤𑀲𑀫𑁂 𑀤𑀺𑀯𑀲𑁂 ‘‘𑀲𑁆𑀯𑁂 𑀆𑀲𑀸𑀴𑁆𑀳𑀺𑀧𑀼𑀡𑁆𑀡𑀫𑀸 𑀪𑀯𑀺𑀲𑁆𑀲𑀢𑀻’’𑀢𑀺 𑀧𑀘𑁆𑀘𑀽𑀲𑀲𑀫𑀬𑁂 ‘‘𑀓𑀲𑁆𑀲 𑀦𑀼 𑀔𑁄 𑀅𑀳𑀁 𑀧𑀞𑀫𑀁 𑀥𑀫𑁆𑀫𑀁 𑀤𑁂𑀲𑁂𑀬𑁆𑀬’’𑀦𑁆𑀢𑀺 𑀆𑀴𑀸𑀭𑀼𑀤𑀓𑀸𑀦𑀁 𑀓𑀸𑀮𑀓𑀢𑀪𑀸𑀯𑀁 𑀜𑀢𑁆𑀯𑀸 𑀥𑀫𑁆𑀫𑀤𑁂𑀲𑀦𑀢𑁆𑀣𑀸𑀬 𑀧𑀜𑁆𑀘𑀯𑀕𑁆𑀕𑀺𑀬𑀸𑀦𑀁 𑀑𑀮𑁄𑀓𑀦𑀁 𑀤𑀝𑁆𑀞𑀩𑁆𑀩𑀁. 𑀲𑀻𑀳𑀲𑁆𑀲 𑀕𑁄𑀘𑀭𑀢𑁆𑀣𑀸𑀬 𑀢𑀺𑀬𑁄𑀚𑀦𑀁 𑀕𑀫𑀦𑀓𑀸𑀮𑁄 𑀯𑀺𑀬 𑀅𑀢𑁆𑀢𑀦𑁄 𑀧𑀢𑁆𑀢𑀘𑀻𑀯𑀭𑀁 𑀆𑀤𑀸𑀬 ‘‘𑀧𑀜𑁆𑀘𑀯𑀕𑁆𑀕𑀺𑀬𑀸𑀦𑀁 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁂𑀲𑁆𑀲𑀸𑀫𑀻’’𑀢𑀺 𑀧𑀘𑁆𑀙𑀸𑀪𑀢𑁆𑀢𑁂 𑀅𑀚𑀧𑀸𑀮𑀦𑀺𑀕𑁆𑀭𑁄𑀥𑀢𑁄 𑀯𑀼𑀝𑁆𑀞𑀺𑀢𑀲𑁆𑀲 𑀅𑀝𑁆𑀞𑀸𑀭𑀲𑀬𑁄𑀚𑀦𑀫𑀕𑁆𑀕𑀁 𑀕𑀫𑀦𑀓𑀸𑀮𑁄.

𑀲𑀻𑀳𑀲𑁆𑀲 𑀲𑀻𑀳𑀦𑀸𑀤𑀓𑀸𑀮𑁄 𑀯𑀺𑀬 𑀢𑀣𑀸𑀕𑀢𑀲𑁆𑀲 𑀅𑀝𑁆𑀞𑀸𑀭𑀲𑀬𑁄𑀚𑀦𑀫𑀕𑁆𑀕𑀁 𑀕𑀦𑁆𑀢𑁆𑀯𑀸 𑀧𑀜𑁆𑀘𑀯𑀕𑁆𑀕𑀺𑀬𑁂 𑀲𑀜𑁆𑀜𑀸𑀧𑁂𑀢𑁆𑀯𑀸 𑀅𑀘𑀮𑀧𑀮𑁆𑀮𑀗𑁆𑀓𑁂 𑀦𑀺𑀲𑀺𑀦𑁆𑀦𑀲𑁆𑀲 𑀤𑀲𑀳𑀺 𑀘𑀓𑁆𑀓𑀯𑀸𑀴𑀲𑀳𑀲𑁆𑀲𑁂𑀳𑀺 𑀲𑀦𑁆𑀦𑀺𑀧𑀢𑀺𑀢𑁂𑀦 𑀤𑁂𑀯𑀕𑀡𑁂𑀦 𑀧𑀭𑀺𑀯𑀼𑀢𑀲𑁆𑀲 ‘‘𑀤𑁆𑀯𑁂𑀫𑁂, 𑀪𑀺𑀓𑁆𑀔𑀯𑁂, 𑀅𑀦𑁆𑀢𑀸 𑀧𑀩𑁆𑀩𑀚𑀺𑀢𑁂𑀦 𑀦 𑀲𑁂𑀯𑀺𑀢𑀩𑁆𑀩𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑀓𑀸𑀮𑁄 𑀯𑁂𑀤𑀺𑀢𑀩𑁆𑀩𑁄. 𑀇𑀫𑀲𑁆𑀫𑀺𑀁 𑀘 𑀧𑀦 𑀧𑀤𑁂 𑀤𑁂𑀲𑀺𑀬𑀫𑀸𑀦𑁂 𑀢𑀣𑀸𑀕𑀢𑀲𑀻𑀳𑀲𑁆𑀲 𑀥𑀫𑁆𑀫𑀖𑁄𑀲𑁄 𑀳𑁂𑀝𑁆𑀞𑀸 𑀅𑀯𑀻𑀘𑀺𑀁 𑀉𑀧𑀭𑀺 𑀪𑀯𑀕𑁆𑀕𑀁 𑀕𑀳𑁂𑀢𑁆𑀯𑀸 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀁 𑀧𑀝𑀺𑀘𑁆𑀙𑀸𑀤𑁂𑀲𑀺. 𑀲𑀻𑀳𑀲𑁆𑀲 𑀲𑀤𑁆𑀤𑁂𑀦 𑀔𑀼𑀤𑁆𑀤𑀓𑀧𑀸𑀡𑀸𑀦𑀁 𑀲𑀦𑁆𑀢𑀸𑀲𑀸𑀧𑀚𑁆𑀚𑀦𑀓𑀸𑀮𑁄 𑀯𑀺𑀬 𑀢𑀣𑀸𑀕𑀢𑀲𑁆𑀲 𑀢𑀻𑀡𑀺 𑀮𑀓𑁆𑀔𑀡𑀸𑀦𑀺 𑀤𑀻𑀧𑁂𑀢𑁆𑀯𑀸 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀲𑁄𑀴𑀲𑀳𑀸𑀓𑀸𑀭𑁂𑀳𑀺 𑀲𑀝𑁆𑀞𑀺𑀬𑀸 𑀘 𑀦𑀬𑀲𑀳𑀲𑁆𑀲𑁂𑀳𑀺 𑀯𑀺𑀪𑀚𑀺𑀢𑁆𑀯𑀸 𑀥𑀫𑁆𑀫𑀁 𑀓𑀣𑁂𑀦𑁆𑀢𑀲𑁆𑀲 𑀤𑀻𑀖𑀸𑀬𑀼𑀓𑀸𑀦𑀁 𑀤𑁂𑀯𑀸𑀦𑀁 𑀜𑀸𑀡𑀲𑀦𑁆𑀢𑀸𑀲𑀲𑁆𑀲 𑀉𑀧𑁆𑀧𑀢𑁆𑀢𑀺𑀓𑀸𑀮𑁄 𑀯𑁂𑀤𑀺𑀢𑀩𑁆𑀩𑁄.

𑀅𑀧𑀭𑁄 𑀦𑀬𑁄 𑁋 𑀲𑀻𑀳𑁄 𑀯𑀺𑀬 𑀲𑀩𑁆𑀩𑀜𑁆𑀜𑀼𑀢𑀁 𑀧𑀢𑁆𑀢𑁄 𑀢𑀣𑀸𑀕𑀢𑁄, 𑀆𑀲𑀬𑀪𑀽𑀢𑀸𑀬 𑀓𑀦𑀓𑀕𑀼𑀳𑀸𑀬 𑀦𑀺𑀓𑁆𑀔𑀫𑀦𑀁 𑀯𑀺𑀬 𑀕𑀦𑁆𑀥𑀓𑀼𑀝𑀺𑀢𑁄 𑀦𑀺𑀓𑁆𑀔𑀫𑀦𑀓𑀸𑀮𑁄, 𑀯𑀺𑀚𑀫𑁆𑀪𑀦𑀁 𑀯𑀺𑀬 𑀥𑀫𑁆𑀫𑀲𑀪𑀁 𑀉𑀧𑀲𑀗𑁆𑀓𑀫𑀦𑀓𑀸𑀮𑁄, 𑀤𑀺𑀲𑀸𑀯𑀺𑀮𑁄𑀓𑀦𑀁 𑀯𑀺𑀬 𑀧𑀭𑀺𑀲𑀸𑀯𑀺𑀮𑁄𑀓𑀦𑀁, 𑀲𑀻𑀳𑀦𑀸𑀤𑀦𑀤𑀦𑀁 𑀯𑀺𑀬 𑀥𑀫𑁆𑀫𑀤𑁂𑀲𑀦𑀸𑀓𑀸𑀮𑁄, 𑀕𑁄𑀘𑀭𑀸𑀬 𑀧𑀓𑁆𑀓𑀫𑀦𑀁 𑀯𑀺𑀬 𑀧𑀭𑀯𑀸𑀤𑀦𑀺𑀫𑁆𑀫𑀤𑁆𑀤𑀦𑀢𑁆𑀣𑀸𑀬 𑀕𑀫𑀦𑀁.

𑀅𑀧𑀭𑁄 𑀦𑀬𑁄 𑁋 𑀲𑀻𑀳𑁄 𑀯𑀺𑀬 𑀢𑀣𑀸𑀕𑀢𑁄, 𑀳𑀺𑀫𑀯𑀦𑁆𑀢𑀦𑀺𑀲𑁆𑀲𑀺𑀢𑀸𑀬 𑀓𑀜𑁆𑀘𑀦𑀕𑀼𑀳𑀸𑀬 𑀦𑀺𑀓𑁆𑀔𑀫𑀦𑀁 𑀯𑀺𑀬 𑀆𑀭𑀫𑁆𑀫𑀡𑀯𑀲𑁂𑀦 𑀦𑀺𑀩𑁆𑀩𑀸𑀦𑀦𑀺𑀲𑁆𑀲𑀺𑀢𑀸𑀬 𑀨𑀮𑀲𑀫𑀸𑀧𑀢𑁆𑀢𑀺𑀬𑀸 𑀯𑀼𑀝𑁆𑀞𑀸𑀦𑀁, 𑀯𑀺𑀚𑀫𑁆𑀪𑀦𑀁 𑀯𑀺𑀬 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀁, 𑀤𑀺𑀲𑀸𑀯𑀺𑀮𑁄𑀓𑀦𑀁 𑀯𑀺𑀬 𑀯𑁂𑀦𑁂𑀬𑁆𑀬𑀲𑀢𑁆𑀢𑀯𑀺𑀮𑁄𑀓𑀦𑀁, 𑀲𑀻𑀳𑀦𑀸𑀤𑁄 𑀯𑀺𑀬 𑀲𑀫𑁆𑀧𑀢𑁆𑀢𑀧𑀭𑀺𑀲𑀸𑀬 𑀥𑀫𑁆𑀫𑀤𑁂𑀲𑀦𑀸, 𑀕𑁄𑀘𑀭𑀸𑀬 𑀧𑀓𑁆𑀓𑀫𑀦𑀁 𑀯𑀺𑀬 𑀅𑀲𑀫𑁆𑀧𑀢𑁆𑀢𑀸𑀦𑀁 𑀯𑁂𑀦𑁂𑀬𑁆𑀬𑀲𑀢𑁆𑀢𑀸𑀦𑀁 𑀲𑀦𑁆𑀢𑀺𑀓𑀽𑀧𑀲𑀗𑁆𑀓𑀫𑀦𑀁 𑀯𑁂𑀤𑀺𑀢𑀩𑁆𑀩𑀁.

𑀬𑀤𑀸𑀢𑀺 𑀬𑀲𑁆𑀫𑀺𑀁 𑀓𑀸𑀮𑁂. 𑀢𑀣𑀸𑀕𑀢𑁄𑀢𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑁂𑀳𑀺 𑀅𑀝𑁆𑀞𑀳𑀺 𑀓𑀸𑀭𑀡𑁂𑀳𑀺 𑀢𑀣𑀸𑀕𑀢𑁄. 𑀮𑁄𑀓𑁂𑀢𑀺 𑀲𑀢𑁆𑀢𑀮𑁄𑀓𑁂. 𑀉𑀧𑁆𑀧𑀚𑁆𑀚𑀢𑀻𑀢𑀺 𑀅𑀪𑀺𑀦𑀻𑀳𑀸𑀭𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀩𑁄𑀥𑀺𑀧𑀮𑁆𑀮𑀗𑁆𑀓𑀸 𑀯𑀸 𑀅𑀭𑀳𑀢𑁆𑀢𑀫𑀕𑁆𑀕𑀜𑀸𑀡𑀸 𑀯𑀸 𑀉𑀧𑁆𑀧𑀚𑁆𑀚𑀢𑀺 𑀦𑀸𑀫, 𑀅𑀭𑀳𑀢𑁆𑀢𑀨𑀮𑁂 𑀧𑀦 𑀧𑀢𑁆𑀢𑁂 𑀉𑀧𑁆𑀧𑀦𑁆𑀦𑁄 𑀦𑀸𑀫. 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄𑀢𑀺𑀆𑀤𑀻𑀦𑀺 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁧.𑁧𑁨𑁪 𑀆𑀤𑀬𑁄) 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺𑀦𑀺𑀤𑁆𑀤𑁂𑀲𑁂 𑀯𑀺𑀢𑁆𑀣𑀸𑀭𑀺𑀢𑀸𑀦𑀺.

𑀇𑀢𑀺 𑀲𑀓𑁆𑀓𑀸𑀬𑁄𑀢𑀺 𑀅𑀬𑀁 𑀲𑀓𑁆𑀓𑀸𑀬𑁄, 𑀏𑀢𑁆𑀢𑀓𑁄 𑀲𑀓𑁆𑀓𑀸𑀬𑁄, 𑀦 𑀇𑀢𑁄 𑀪𑀺𑀬𑁆𑀬𑁄 𑀲𑀓𑁆𑀓𑀸𑀬𑁄 𑀅𑀢𑁆𑀣𑀻𑀢𑀺. 𑀏𑀢𑁆𑀢𑀸𑀯𑀢𑀸 𑀲𑀪𑀸𑀯𑀢𑁄 𑀲𑀭𑀲𑀢𑁄 𑀧𑀭𑀺𑀬𑀦𑁆𑀢𑀢𑁄 𑀧𑀭𑀺𑀘𑁆𑀙𑁂𑀤𑀢𑁄 𑀧𑀭𑀺𑀯𑀝𑀼𑀫𑀢𑁄 𑀲𑀩𑁆𑀩𑁂𑀧𑀺 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸 𑀤𑀲𑁆𑀲𑀺𑀢𑀸 𑀳𑁄𑀦𑁆𑀢𑀺. 𑀇𑀢𑀺 𑀲𑀓𑁆𑀓𑀸𑀬𑀲𑀫𑀼𑀤𑀬𑁄𑀢𑀺 𑀅𑀬𑀁 𑀲𑀓𑁆𑀓𑀸𑀬𑀲𑁆𑀲 𑀲𑀫𑀼𑀤𑀬𑁄 𑀦𑀸𑀫. 𑀏𑀢𑁆𑀢𑀸𑀯𑀢𑀸 ‘‘𑀆𑀳𑀸𑀭𑀲𑀫𑀼𑀤𑀬𑀸 𑀭𑀽𑀧𑀲𑀫𑀼𑀤𑀬𑁄’’𑀢𑀺𑀆𑀤𑀺 𑀲𑀩𑁆𑀩𑀁 𑀤𑀲𑁆𑀲𑀺𑀢𑀁 𑀳𑁄𑀢𑀺. 𑀇𑀢𑀺 𑀲𑀓𑁆𑀓𑀸𑀬𑀲𑁆𑀲 𑀅𑀢𑁆𑀣𑀗𑁆𑀕𑀫𑁄𑀢𑀺 𑀅𑀬𑀁 𑀲𑀓𑁆𑀓𑀸𑀬𑀲𑁆𑀲 𑀅𑀢𑁆𑀣𑀗𑁆𑀕𑀫𑁄. 𑀇𑀫𑀺𑀦𑀸𑀧𑀺 ‘‘𑀆𑀳𑀸𑀭𑀦𑀺𑀭𑁄𑀥𑀸 𑀭𑀽𑀧𑀦𑀺𑀭𑁄𑀥𑁄’’𑀢𑀺𑀆𑀤𑀺 𑀲𑀩𑁆𑀩𑀁 𑀤𑀲𑁆𑀲𑀺𑀢𑀁 𑀳𑁄𑀢𑀺.

𑀯𑀡𑁆𑀡𑀯𑀦𑁆𑀢𑁄𑀢𑀺 𑀲𑀭𑀻𑀭𑀯𑀡𑁆𑀡𑁂𑀦 𑀯𑀡𑁆𑀡𑀯𑀦𑁆𑀢𑁄. 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸𑀢𑀺 𑀧𑀜𑁆𑀘𑀲𑀼 𑀔𑀦𑁆𑀥𑁂𑀲𑀼 𑀧𑀡𑁆𑀡𑀸𑀲𑀮𑀓𑁆𑀔𑀡𑀧𑁆𑀧𑀝𑀺𑀫𑀡𑁆𑀟𑀺𑀢𑀁 𑀢𑀣𑀸𑀕𑀢𑀲𑁆𑀲 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸. 𑀬𑁂𑀪𑀼𑀬𑁆𑀬𑁂𑀦𑀸𑀢𑀺 𑀇𑀥 𑀓𑁂 𑀞𑀧𑁂𑀢𑀺? 𑀅𑀭𑀺𑀬𑀲𑀸𑀯𑀓𑁂 𑀤𑁂𑀯𑁂. 𑀢𑁂𑀲𑀁 𑀳𑀺 𑀔𑀻𑀡𑀸𑀲𑀯𑀢𑁆𑀢𑀸 𑀘𑀺𑀢𑁆𑀢𑀼𑀢𑁆𑀭𑀸𑀲𑀪𑀬𑀫𑁆𑀧𑀺 𑀦 𑀉𑀧𑁆𑀧𑀚𑁆𑀚𑀢𑀺, 𑀲𑀁𑀯𑀺𑀕𑁆𑀕𑀲𑁆𑀲 𑀬𑁄𑀦𑀺𑀲𑁄 𑀧𑀥𑀸𑀦𑁂𑀦 𑀧𑀢𑁆𑀢𑀩𑁆𑀩𑀁 𑀧𑀢𑁆𑀢𑀢𑀸𑀬 𑀜𑀸𑀡𑀲𑀁𑀯𑁂𑀕𑁄𑀧𑀺. 𑀇𑀢𑀭𑀸𑀲𑀁 𑀧𑀦 𑀤𑁂𑀯𑀢𑀸𑀦𑀁 ‘‘𑀢𑀸𑀲𑁄 𑀳𑁂𑀲𑁄, 𑀪𑀺𑀓𑁆𑀔𑀯𑁂, 𑀅𑀦𑀺𑀘𑁆𑀘’’𑀦𑁆𑀢𑀺 𑀫𑀦𑀲𑀺𑀓𑀭𑁄𑀦𑁆𑀢𑀸𑀦𑀁 𑀘𑀺𑀢𑁆𑀢𑀼𑀢𑁆𑀭𑀸𑀲𑀪𑀬𑀫𑁆𑀧𑀺, 𑀩𑀮𑀯𑀯𑀺𑀧𑀲𑁆𑀲𑀦𑀸𑀓𑀸𑀮𑁂 𑀜𑀸𑀡𑀪𑀬𑀫𑁆𑀧𑀺 𑀉𑀧𑁆𑀧𑀚𑁆𑀚𑀢𑀺. 𑀪𑁄𑀢𑀺 𑀥𑀫𑁆𑀫𑀸𑀮𑀧𑀦𑀫𑀢𑁆𑀢𑀫𑁂𑀢𑀁. 𑀲𑀓𑁆𑀓𑀸𑀬𑀧𑀭𑀺𑀬𑀸𑀧𑀦𑁆𑀦𑀸𑀢𑀺 𑀧𑀜𑁆𑀘𑀓𑁆𑀔𑀦𑁆𑀥𑀧𑀭𑀺𑀬𑀸𑀧𑀦𑁆𑀦𑀸. 𑀇𑀢𑀺 𑀢𑁂𑀲𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂 𑀯𑀝𑁆𑀝𑀤𑁄𑀲𑀁 𑀤𑀲𑁆𑀲𑁂𑀢𑁆𑀯𑀸 𑀢𑀺𑀮𑀓𑁆𑀔𑀡𑀸𑀳𑀢𑀁 𑀓𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁂 𑀜𑀸𑀡𑀪𑀬𑀁 𑀦𑀸𑀫 𑀑𑀓𑁆𑀓𑀫𑀢𑀺.

𑀅𑀪𑀺𑀜𑁆𑀜𑀸𑀬𑀸𑀢𑀺 𑀚𑀸𑀦𑀺𑀢𑁆𑀯𑀸. 𑀥𑀫𑁆𑀫𑀘𑀓𑁆𑀓𑀦𑁆𑀢𑀺 𑀧𑀝𑀺𑀯𑁂𑀥𑀜𑀸𑀡𑀫𑁆𑀧𑀺 𑀤𑁂𑀲𑀦𑀸𑀜𑀸𑀡𑀫𑁆𑀧𑀺. 𑀧𑀝𑀺𑀯𑁂𑀥𑀜𑀸𑀡𑀁 𑀦𑀸𑀫 𑀬𑁂𑀦 𑀜𑀸𑀡𑁂𑀦 𑀩𑁄𑀥𑀺𑀧𑀮𑁆𑀮𑀗𑁆𑀓𑁂 𑀦𑀺𑀲𑀺𑀦𑁆𑀦𑁄 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀲𑁄𑀴𑀲𑀳𑀸𑀓𑀸𑀭𑁂𑀳𑀺 𑀲𑀝𑁆𑀞𑀺𑀬𑀸 𑀘 𑀦𑀬𑀲𑀳𑀲𑁆𑀲𑁂𑀳𑀺 𑀧𑀝𑀺𑀯𑀺𑀚𑁆𑀛𑀺. 𑀤𑁂𑀲𑀦𑀸𑀜𑀸𑀡𑀁 𑀦𑀸𑀫 𑀬𑁂𑀦 𑀜𑀸𑀡𑁂𑀦 𑀢𑀺𑀧𑀭𑀺𑀯𑀝𑁆𑀝𑀁 𑀤𑁆𑀯𑀸𑀤𑀲𑀸𑀓𑀸𑀭𑀁 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁂𑀲𑀺. 𑀉𑀪𑀬𑀫𑁆𑀧𑁂𑀢𑀁 𑀤𑀲𑀩𑀮𑀲𑁆𑀲 𑀉𑀭𑁂 𑀚𑀸𑀢𑀜𑀸𑀡𑀫𑁂𑀯. 𑀢𑁂𑀲𑀼 𑀥𑀫𑁆𑀫𑀤𑁂𑀲𑀦𑀸𑀜𑀸𑀡𑀁 𑀕𑀳𑁂𑀢𑀩𑁆𑀩𑀁. 𑀢𑀁 𑀧𑀦𑁂𑀲 𑀬𑀸𑀯 𑀅𑀝𑁆𑀞𑀸𑀭𑀲𑀩𑁆𑀭𑀳𑁆𑀫𑀓𑁄𑀝𑀻𑀳𑀺 𑀲𑀤𑁆𑀥𑀺𑀁 𑀅𑀜𑁆𑀜𑀸𑀓𑁄𑀡𑁆𑀟𑀜𑁆𑀜𑀢𑁆𑀣𑁂𑀭𑀲𑁆𑀲 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀦 𑀉𑀧𑁆𑀧𑀚𑁆𑀚𑀢𑀺, 𑀢𑀸𑀯 𑀧𑀯𑀢𑁆𑀢𑁂𑀢𑀺 𑀦𑀸𑀫. 𑀢𑀲𑁆𑀫𑀺𑀁 𑀉𑀧𑁆𑀧𑀦𑁆𑀦𑁂 𑀧𑀯𑀢𑁆𑀢𑀺𑀢𑀁 𑀦𑀸𑀫 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀧𑁆𑀧𑀝𑀺𑀧𑀼𑀕𑁆𑀕𑀮𑁄𑀢𑀺 𑀲𑀤𑀺𑀲𑀧𑀼𑀕𑁆𑀕𑀮𑀭𑀳𑀺𑀢𑁄. 𑀬𑀲𑀲𑁆𑀲𑀺𑀦𑁄𑀢𑀺 𑀧𑀭𑀺𑀯𑀸𑀭𑀲𑀫𑁆𑀧𑀦𑁆𑀦𑀸. 𑀢𑀸𑀤𑀺𑀦𑁄𑀢𑀺 𑀮𑀸𑀪𑀸𑀮𑀸𑀪𑀸𑀤𑀻𑀳𑀺 𑀏𑀓𑀲𑀤𑀺𑀲𑀲𑁆𑀲.

𑁪. 𑀧𑀲𑀸𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁪. 𑀘𑀢𑀼𑀢𑁆𑀣𑁂 𑀅𑀕𑁆𑀕𑁂𑀲𑀼 𑀧𑀲𑀸𑀤𑀸, 𑀅𑀕𑁆𑀕𑀸 𑀯𑀸 𑀧𑀲𑀸𑀤𑀸𑀢𑀺 𑀅𑀕𑁆𑀕𑀧𑁆𑀧𑀲𑀸𑀤𑀸. 𑀬𑀸𑀯𑀢𑀸𑀢𑀺 𑀬𑀢𑁆𑀢𑀓𑀸. 𑀅𑀧𑀤𑀸𑀢𑀺 𑀦𑀺𑀧𑁆𑀧𑀤𑀸 𑀅𑀳𑀺𑀫𑀘𑁆𑀙𑀸𑀤𑀬𑁄. 𑀤𑁆𑀯𑀺𑀧𑀤𑀸𑀢𑀺 𑀫𑀦𑀼𑀲𑁆𑀲𑀧𑀓𑁆𑀔𑀺𑀆𑀤𑀬𑁄. 𑀘𑀢𑀼𑀧𑁆𑀧𑀤𑀸𑀢𑀺 𑀳𑀢𑁆𑀣𑀺𑀅𑀲𑁆𑀲𑀸𑀤𑀬𑁄. 𑀩𑀳𑀼𑀧𑁆𑀧𑀤𑀸𑀢𑀺 𑀲𑀢𑀧𑀤𑀺𑀆𑀤𑀬𑁄. 𑀦𑁂𑀯𑀲𑀜𑁆𑀜𑀺𑀦𑀸𑀲𑀜𑁆𑀜𑀺𑀦𑁄𑀢𑀺 𑀪𑀯𑀕𑁆𑀕𑁂 𑀦𑀺𑀩𑁆𑀩𑀢𑁆𑀢𑀲𑀢𑁆𑀢𑀸. 𑀅𑀕𑁆𑀕𑀫𑀓𑁆𑀔𑀸𑀬𑀢𑀻𑀢𑀺 𑀕𑀼𑀡𑁂𑀳𑀺 𑀅𑀕𑁆𑀕𑁄 𑀉𑀢𑁆𑀢𑀫𑁄 𑀲𑁂𑀝𑁆𑀞𑁄𑀢𑀺 𑀅𑀓𑁆𑀔𑀸𑀬𑀢𑀺. 𑀅𑀲𑀗𑁆𑀔𑀢𑀸𑀢𑀺 𑀦𑀺𑀩𑁆𑀩𑀸𑀦𑀫𑁂𑀯 𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑀁. 𑀯𑀺𑀭𑀸𑀕𑁄𑀢𑀺𑀆𑀤𑀻𑀦𑀺 𑀦𑀺𑀩𑁆𑀩𑀸𑀦𑀲𑁆𑀲𑁂𑀯 𑀦𑀸𑀫𑀸𑀦𑀺. 𑀢𑀜𑁆𑀳𑀺 𑀆𑀕𑀫𑁆𑀫 𑀲𑀩𑁆𑀩𑀓𑀺𑀮𑁂𑀲𑀸 𑀯𑀺𑀭𑀚𑁆𑀚𑀦𑁆𑀢𑀺, 𑀲𑀩𑁆𑀩𑁂 𑀭𑀸𑀕𑀫𑀤𑀸𑀤𑀬𑁄 𑀫𑀤𑀸 𑀦𑀺𑀫𑁆𑀫𑀤𑀸 𑀳𑁄𑀦𑁆𑀢𑀺, 𑀅𑀪𑀸𑀯𑀁 𑀕𑀘𑁆𑀙𑀦𑁆𑀢𑀺, 𑀲𑀩𑁆𑀩𑀸 𑀧𑀺𑀧𑀸𑀲𑀸 𑀯𑀺𑀦𑀬𑀁 𑀉𑀧𑁂𑀦𑁆𑀢𑀺, 𑀲𑀩𑁆𑀩𑁂 𑀆𑀮𑀬𑀸 𑀲𑀫𑀼𑀕𑁆𑀖𑀸𑀢𑀁 𑀕𑀘𑁆𑀙𑀦𑁆𑀢𑀺, 𑀯𑀝𑁆𑀝𑀸𑀦𑀺 𑀉𑀧𑀘𑁆𑀙𑀺𑀚𑁆𑀚𑀦𑁆𑀢𑀺, 𑀢𑀡𑁆𑀳𑀸 𑀔𑀻𑀬𑀦𑁆𑀢𑀺, 𑀯𑀝𑁆𑀝𑀤𑀼𑀓𑁆𑀔𑀸 𑀦𑀺𑀭𑀼𑀚𑁆𑀛𑀦𑁆𑀢𑀺, 𑀲𑀩𑁆𑀩𑁂 𑀧𑀭𑀺𑀴𑀸𑀳𑀸 𑀦𑀺𑀩𑁆𑀩𑀸𑀬𑀦𑁆𑀢𑀺. 𑀢𑀲𑁆𑀫𑀸 𑀏𑀢𑀸𑀦𑀺 𑀦𑀸𑀫𑀸𑀦𑀺 𑀮𑀪𑀢𑀺. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑁫. 𑀯𑀲𑁆𑀲𑀓𑀸𑀭𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁫. 𑀧𑀜𑁆𑀘𑀫𑁂 𑀅𑀦𑀼𑀲𑁆𑀲𑀭𑀺𑀢𑀸𑀢𑀺 𑀅𑀦𑀼𑀕𑀦𑁆𑀢𑁆𑀯𑀸 𑀲𑀭𑀺𑀢𑀸, 𑀅𑀧𑀭𑀸𑀧𑀭𑀁 𑀲𑀭𑀺𑀢𑀼𑀁 𑀲𑀫𑀢𑁆𑀣𑁄𑀢𑀺 𑀅𑀢𑁆𑀣𑁄. 𑀤𑀓𑁆𑀔𑁄𑀢𑀺 𑀙𑁂𑀓𑁄. 𑀢𑀢𑁆𑀭𑀼𑀧𑀸𑀬𑀸𑀬𑀸𑀢𑀺 ‘‘𑀇𑀫𑀲𑁆𑀫𑀺𑀁 𑀓𑀸𑀮𑁂 𑀇𑀫𑀁 𑀦𑀸𑀫 𑀓𑀢𑁆𑀢𑀩𑁆𑀩’’𑀦𑁆𑀢𑀺 𑀏𑀯𑀁 𑀢𑀢𑁆𑀣 𑀢𑀢𑁆𑀣 𑀉𑀧𑀸𑀬𑀪𑀽𑀢𑀸𑀬 𑀧𑀜𑁆𑀜𑀸𑀬 𑀲𑀫𑀦𑁆𑀦𑀸𑀕𑀢𑁄. 𑀅𑀦𑀼𑀫𑁄𑀤𑀺𑀢𑀩𑁆𑀩𑀦𑁆𑀢𑀺 𑀅𑀪𑀺𑀦𑀦𑁆𑀤𑀺𑀢𑀩𑁆𑀩𑀁. 𑀧𑀝𑀺𑀓𑁆𑀓𑁄𑀲𑀺𑀢𑀩𑁆𑀩𑀦𑁆𑀢𑀺 𑀧𑀝𑀺𑀓𑁆𑀔𑀺𑀧𑀺𑀢𑀩𑁆𑀩𑀁. 𑀦𑁂𑀯 𑀔𑁄 𑀢𑁆𑀬𑀸𑀳𑀦𑁆𑀢𑀺 𑀦𑁂𑀯 𑀔𑁄 𑀢𑁂 𑀅𑀳𑀁. 𑀓𑀲𑁆𑀫𑀸 𑀧𑀦𑁂𑀢𑀁 𑀪𑀕𑀯𑀸 𑀦𑀸𑀪𑀺𑀦𑀦𑁆𑀤𑀢𑀺, 𑀦𑀧𑁆𑀧𑀝𑀺𑀓𑁆𑀔𑀺𑀧𑀢𑀻𑀢𑀺? 𑀮𑁄𑀓𑀺𑀬𑀢𑁆𑀢𑀸 𑀦𑀸𑀪𑀺𑀦𑀦𑁆𑀤𑀢𑀺, 𑀮𑁄𑀓𑀺𑀬𑀁 𑀅𑀢𑁆𑀣𑀁 𑀕𑀳𑁂𑀢𑁆𑀯𑀸 𑀞𑀺𑀢𑀢𑁆𑀢𑀸 𑀦𑀧𑁆𑀧𑀝𑀺𑀓𑁆𑀓𑁄𑀲𑀢𑀺. 𑀩𑀳𑀼𑀲𑁆𑀲 𑀚𑀦𑀢𑀸𑀢𑀺 𑀩𑀳𑀼 𑀅𑀲𑁆𑀲 𑀚𑀦𑀢𑀸. 𑀇𑀤𑀜𑁆𑀘 𑀓𑀭𑀡𑀢𑁆𑀣𑁂 𑀲𑀸𑀫𑀺𑀯𑀘𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀅𑀭𑀺𑀬𑁂 𑀜𑀸𑀬𑁂𑀢𑀺 𑀲𑀳𑀯𑀺𑀧𑀲𑁆𑀲𑀦𑀓𑁂 𑀫𑀕𑁆𑀕𑁂. 𑀓𑀮𑁆𑀬𑀸𑀡𑀥𑀫𑁆𑀫𑀢𑀸 𑀓𑀼𑀲𑀮𑀥𑀫𑁆𑀫𑀢𑀸𑀢𑀺𑀧𑀺 𑀢𑀲𑁆𑀲𑁂𑀯 𑀦𑀸𑀫𑀸𑀦𑀺. 𑀬𑀁 𑀯𑀺𑀢𑀓𑁆𑀓𑀦𑁆𑀢𑀺 𑀦𑁂𑀓𑁆𑀔𑀫𑁆𑀫𑀯𑀺𑀢𑀓𑁆𑀓𑀸𑀤𑀻𑀲𑀼 𑀅𑀜𑁆𑀜𑀢𑀭𑀁. 𑀦 𑀢𑀁 𑀯𑀺𑀢𑀓𑁆𑀓𑀁 𑀯𑀺𑀢𑀓𑁆𑀓𑁂𑀢𑀻𑀢𑀺 𑀓𑀸𑀫𑀯𑀺𑀢𑀓𑁆𑀓𑀸𑀤𑀻𑀲𑀼 𑀏𑀓𑀫𑁆𑀧𑀺 𑀦 𑀯𑀺𑀢𑀓𑁆𑀓𑁂𑀢𑀺. 𑀇𑀢𑀭𑀁 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀯𑀺𑀢𑀓𑁆𑀓𑀧𑀣𑁂𑀢𑀺 𑀏𑀢𑁆𑀣 𑀯𑀺𑀢𑀓𑁆𑀓𑁄𑀬𑁂𑀯 𑀯𑀺𑀢𑀓𑁆𑀓𑀧𑀣𑁄. 𑀅𑀳𑀜𑁆𑀳𑀺 𑀩𑁆𑀭𑀸𑀳𑁆𑀫𑀡𑀸𑀢𑀺𑀆𑀤𑀻𑀲𑀼 𑀧𑀞𑀫𑀦𑀬𑁂𑀦 𑀔𑀻𑀡𑀸𑀲𑀯𑀲𑁆𑀲 𑀲𑀻𑀮𑀜𑁆𑀘𑁂𑀯 𑀩𑀸𑀳𑀼𑀲𑀘𑁆𑀘𑀜𑁆𑀘 𑀓𑀣𑀺𑀢𑀁, 𑀤𑀼𑀢𑀺𑀬𑀢𑀢𑀺𑀬𑁂𑀳𑀺 𑀔𑀻𑀡𑀸𑀲𑀯𑀲𑁆𑀲 𑀓𑀺𑀭𑀺𑀬𑀯𑀺𑀢𑀓𑁆𑀓𑀸𑀦𑀺 𑀘𑁂𑀯 𑀓𑀺𑀭𑀺𑀬𑀚𑁆𑀛𑀸𑀦𑀸𑀦𑀺 𑀘, 𑀘𑀢𑀼𑀢𑁆𑀣𑁂𑀦 𑀔𑀻𑀡𑀸𑀲𑀯𑀪𑀸𑀯𑁄 𑀓𑀣𑀺𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀫𑀘𑁆𑀘𑀼𑀧𑀸𑀲𑀧𑁆𑀧𑀫𑁄𑀘𑀦𑀦𑁆𑀢𑀺 𑀫𑀘𑁆𑀘𑀼𑀧𑀸𑀲𑀸 𑀧𑀫𑁄𑀘𑀦𑀓𑀁 𑀫𑀕𑁆𑀕𑀁. 𑀜𑀸𑀬𑀁 𑀥𑀫𑁆𑀫𑀦𑁆𑀢𑀺 𑀲𑀳𑀯𑀺𑀧𑀲𑁆𑀲𑀦𑀓𑀁 𑀫𑀕𑁆𑀕𑀁. 𑀤𑀺𑀲𑁆𑀯𑀸 𑀘 𑀲𑀼𑀢𑁆𑀯𑀸 𑀘𑀸𑀢𑀺 𑀜𑀸𑀡𑁂𑀦𑁂𑀯 𑀧𑀲𑁆𑀲𑀺𑀢𑁆𑀯𑀸 𑀘 𑀲𑀼𑀡𑀺𑀢𑁆𑀯𑀸 𑀘. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀫𑁂𑀯.

𑁬. 𑀤𑁄𑀡𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁬. 𑀙𑀝𑁆𑀞𑁂 𑀅𑀦𑁆𑀢𑀭𑀸 𑀘 𑀉𑀓𑁆𑀓𑀝𑁆𑀞𑀁 𑀅𑀦𑁆𑀢𑀭𑀸 𑀘 𑀲𑁂𑀢𑀩𑁆𑀬𑀦𑁆𑀢𑀺 𑀏𑀢𑁆𑀣 𑀉𑀓𑁆𑀓𑀝𑁆𑀞𑀸𑀢𑀺 𑀉𑀓𑁆𑀓𑀸𑀳𑀺 𑀥𑀸𑀭𑀻𑀬𑀫𑀸𑀦𑀸𑀳𑀺 𑀫𑀸𑀧𑀺𑀢𑀢𑁆𑀢𑀸 𑀏𑀯𑀁𑀮𑀤𑁆𑀥𑀯𑁄𑀳𑀸𑀭𑀁 𑀦𑀕𑀭𑀁. 𑀲𑁂𑀢𑀩𑁆𑀬𑀦𑁆𑀢𑀺 𑀅𑀢𑀻𑀢𑁂 𑀓𑀲𑁆𑀲𑀧𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀚𑀸𑀢𑀦𑀕𑀭𑀁. 𑀅𑀦𑁆𑀢𑀭𑀸𑀲𑀤𑁆𑀤𑁄 𑀧𑀦 𑀓𑀸𑀭𑀡𑀔𑀡𑀘𑀺𑀢𑁆𑀢𑀯𑁂𑀫𑀚𑁆𑀛𑀯𑀺𑀯𑀭𑀸𑀤𑀻𑀲𑀼 𑀯𑀢𑁆𑀢𑀢𑀺. ‘‘𑀢𑀤𑀦𑁆𑀢𑀭𑀁 𑀓𑁄 𑀚𑀸𑀦𑁂𑀬𑁆𑀬 𑀅𑀜𑁆𑀜𑀢𑁆𑀭 𑀢𑀣𑀸𑀕𑀢𑀸’’𑀢𑀺 (𑀅. 𑀦𑀺. 𑁬.𑁪𑁪; 𑁧𑁦.𑁭𑁫) 𑀘, ‘‘𑀚𑀦𑀸 𑀲𑀗𑁆𑀕𑀫𑁆𑀫 𑀫𑀦𑁆𑀢𑁂𑀦𑁆𑀢𑀺, 𑀫𑀜𑁆𑀘 𑀢𑀜𑁆𑀘 𑀓𑀺𑀫𑀦𑁆𑀢𑀭’’𑀦𑁆𑀢𑀺 𑀘 𑀆𑀤𑀻𑀲𑀼 (𑀲𑀁. 𑀦𑀺. 𑁧.𑁨𑁨𑁮) 𑀓𑀸𑀭𑀡𑁂. ‘‘𑀅𑀤𑁆𑀤𑀲𑀸 𑀫𑀁, 𑀪𑀦𑁆𑀢𑁂, 𑀅𑀜𑁆𑀜𑀢𑀭𑀸 𑀇𑀢𑁆𑀣𑀻 𑀯𑀺𑀚𑁆𑀚𑀦𑁆𑀢𑀭𑀺𑀓𑀸𑀬 𑀪𑀸𑀚𑀦𑀁 𑀥𑁄𑀯𑀦𑁆𑀢𑀻’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁨.𑁧𑁪𑁯) 𑀔𑀡𑁂. ‘‘𑀬𑀲𑁆𑀲𑀦𑁆𑀢𑀭𑀢𑁄 𑀦 𑀲𑀦𑁆𑀢𑀺 𑀓𑁄𑀧𑀸’’𑀢𑀺𑀆𑀤𑀻𑀲𑀼 (𑀉𑀤𑀸. 𑁨𑁦) 𑀘𑀺𑀢𑁆𑀢𑁂. ‘‘𑀅𑀦𑁆𑀢𑀭𑀸𑀯𑁄𑀲𑀸𑀦𑀫𑀸𑀧𑀸𑀤𑀻’’𑀢𑀺𑀆𑀤𑀻𑀲𑀼 𑀯𑁂𑀫𑀚𑁆𑀛𑁂. ‘‘𑀅𑀧𑀺𑀘𑀸𑀬𑀁 𑀢𑀧𑁄𑀤𑀸 𑀤𑁆𑀯𑀺𑀦𑁆𑀦𑀁 𑀫𑀳𑀸𑀦𑀺𑀭𑀬𑀸𑀦𑀁 𑀅𑀦𑁆𑀢𑀭𑀺𑀓𑀸𑀬 𑀆𑀕𑀘𑁆𑀙𑀢𑀻’’𑀢𑀺𑀆𑀤𑀻𑀲𑀼 (𑀧𑀸𑀭𑀸. 𑁨𑁩𑁧) 𑀯𑀺𑀯𑀭𑁂. 𑀲𑁆𑀯𑀸𑀬𑀫𑀺𑀥 𑀯𑀺𑀯𑀭𑁂 𑀯𑀢𑁆𑀢𑀢𑀺. 𑀢𑀲𑁆𑀫𑀸 𑀉𑀓𑁆𑀓𑀝𑁆𑀞𑀸𑀬 𑀘 𑀲𑁂𑀢𑀩𑁆𑀬𑀲𑁆𑀲 𑀘 𑀯𑀺𑀯𑀭𑁂𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀅𑀦𑁆𑀢𑀭𑀸𑀲𑀤𑁆𑀤𑁂𑀦 𑀧𑀦 𑀬𑀼𑀢𑁆𑀢𑀢𑁆𑀢𑀸 𑀉𑀧𑀬𑁄𑀕𑀯𑀘𑀦𑀁 𑀓𑀢𑀁. 𑀈𑀤𑀺𑀲𑁂𑀲𑀼 𑀘 𑀞𑀸𑀦𑁂𑀲𑀼 𑀅𑀓𑁆𑀔𑀭𑀘𑀺𑀦𑁆𑀢𑀓𑀸 ‘‘𑀅𑀦𑁆𑀢𑀭𑀸 𑀕𑀸𑀫𑀜𑁆𑀘 𑀦𑀤𑀺𑀜𑁆𑀘 𑀬𑀸𑀢𑀻’’𑀢𑀺 𑀏𑀯𑀁 𑀏𑀓𑀫𑁂𑀯 𑀅𑀦𑁆𑀢𑀭𑀸𑀲𑀤𑁆𑀤𑀁 𑀧𑀬𑀼𑀜𑁆𑀚𑀦𑁆𑀢𑀺, 𑀲𑁄 𑀤𑀼𑀢𑀺𑀬𑀧𑀤𑁂𑀦𑀧𑀺 𑀬𑁄𑀚𑁂𑀢𑀩𑁆𑀩𑁄 𑀳𑁄𑀢𑀺, 𑀅𑀬𑁄𑀚𑀺𑀬𑀫𑀸𑀦𑁂 𑀉𑀧𑀬𑁄𑀕𑀯𑀘𑀦𑀁 𑀦 𑀧𑀸𑀧𑀼𑀡𑀸𑀢𑀺. 𑀇𑀥 𑀧𑀦 𑀬𑁄𑀚𑁂𑀢𑁆𑀯𑀸 𑀏𑀯 𑀯𑀼𑀢𑁆𑀢𑁄.

𑀅𑀤𑁆𑀥𑀸𑀦𑀫𑀕𑁆𑀕𑀧𑁆𑀧𑀝𑀺𑀧𑀦𑁆𑀦𑁄 𑀳𑁄𑀢𑀻𑀢𑀺 𑀅𑀤𑁆𑀥𑀸𑀦𑀲𑀗𑁆𑀔𑀸𑀢𑀁 𑀫𑀕𑁆𑀕𑀁 𑀧𑀝𑀺𑀧𑀦𑁆𑀦𑁄 𑀳𑁄𑀢𑀺, 𑀤𑀻𑀖𑀫𑀕𑁆𑀕𑀦𑁆𑀢𑀺 𑀅𑀢𑁆𑀣𑁄. 𑀓𑀲𑁆𑀫𑀸 𑀧𑀝𑀺𑀧𑀦𑁆𑀦𑁄𑀢𑀺? 𑀢𑀁 𑀤𑀺𑀯𑀲𑀁 𑀓𑀺𑀭 𑀪𑀕𑀯𑀸 𑀇𑀤𑀁 𑀅𑀤𑁆𑀤𑀲 ‘‘𑀫𑀬𑀺 𑀢𑀁 𑀫𑀕𑁆𑀕𑀁 𑀧𑀝𑀺𑀧𑀦𑁆𑀦𑁂 𑀤𑁄𑀡𑁄 𑀩𑁆𑀭𑀸𑀳𑁆𑀫𑀡𑁄 𑀫𑀫 𑀧𑀤𑀘𑁂𑀢𑀺𑀬𑀸𑀦𑀺 𑀧𑀲𑁆𑀲𑀺𑀢𑁆𑀯𑀸 𑀧𑀤𑀸𑀦𑀼𑀧𑀤𑀺𑀓𑁄 𑀳𑀼𑀢𑁆𑀯𑀸 𑀫𑀫 𑀦𑀺𑀲𑀺𑀦𑁆𑀦𑀝𑁆𑀞𑀸𑀦𑀁 𑀆𑀕𑀦𑁆𑀢𑁆𑀯𑀸 𑀧𑀜𑁆𑀳𑀁 𑀧𑀼𑀘𑁆𑀙𑀺𑀲𑁆𑀲𑀢𑀺. 𑀅𑀣𑀲𑁆𑀲𑀸𑀳𑀁 𑀏𑀓𑀁 𑀲𑀘𑁆𑀘𑀥𑀫𑁆𑀫𑀁 𑀤𑁂𑀲𑁂𑀲𑁆𑀲𑀸𑀫𑀺. 𑀩𑁆𑀭𑀸𑀳𑁆𑀫𑀡𑁄 𑀢𑀻𑀡𑀺 𑀲𑀸𑀫𑀜𑁆𑀜𑀨𑀮𑀸𑀦𑀺 𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸 𑀤𑁆𑀯𑀸𑀤𑀲𑀧𑀤𑀲𑀳𑀲𑁆𑀲𑀧𑀭𑀺𑀫𑀸𑀡𑀁 𑀤𑁄𑀡𑀕𑀚𑁆𑀚𑀺𑀢𑀁 𑀦𑀸𑀫 𑀯𑀡𑁆𑀡𑀁 𑀯𑀢𑁆𑀯𑀸 𑀫𑀬𑀺 𑀧𑀭𑀺𑀦𑀺𑀩𑁆𑀩𑀼𑀢𑁂 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀉𑀧𑁆𑀧𑀦𑁆𑀦𑀁 𑀫𑀳𑀸𑀓𑀮𑀳𑀁 𑀯𑀽𑀧𑀲𑀫𑁂𑀢𑁆𑀯𑀸 𑀥𑀸𑀢𑀼𑀬𑁄 𑀪𑀸𑀚𑁂𑀲𑁆𑀲𑀢𑀻’’𑀢𑀺. 𑀇𑀫𑀺𑀦𑀸 𑀓𑀸𑀭𑀡𑁂𑀦 𑀧𑀝𑀺𑀧𑀦𑁆𑀦𑁄. 𑀤𑁄𑀡𑁄𑀧𑀺 𑀲𑀼𑀤𑀁 𑀩𑁆𑀭𑀸𑀳𑁆𑀫𑀡𑁄𑀢𑀺 𑀤𑁄𑀡𑁄 𑀩𑁆𑀭𑀸𑀳𑁆𑀫𑀡𑁄𑀧𑀺 𑀢𑀬𑁄 𑀯𑁂𑀤𑁂 𑀧𑀕𑀼𑀡𑁂 𑀓𑀢𑁆𑀯𑀸 𑀧𑀜𑁆𑀘𑀲𑀢𑁂 𑀫𑀸𑀡𑀯𑀓𑁂 𑀲𑀺𑀧𑁆𑀧𑀁 𑀯𑀸𑀘𑁂𑀦𑁆𑀢𑁄 𑀢𑀁𑀤𑀺𑀯𑀲𑀁 𑀧𑀸𑀢𑁄𑀯 𑀉𑀝𑁆𑀞𑀸𑀬 𑀲𑀭𑀻𑀭𑀧𑀝𑀺𑀚𑀕𑁆𑀕𑀦𑀁 𑀓𑀢𑁆𑀯𑀸 𑀲𑀢𑀕𑁆𑀖𑀦𑀓𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀜𑁆𑀘𑀲𑀢𑀕𑁆𑀖𑀦𑀓𑀁 𑀏𑀓𑀁𑀲𑀯𑀭𑀕𑀢𑀁 𑀓𑀢𑁆𑀯𑀸 𑀆𑀫𑀼𑀢𑁆𑀢𑀬𑀜𑁆𑀜𑀲𑀼𑀢𑁆𑀢𑁄 𑀭𑀢𑁆𑀢𑀯𑀝𑁆𑀝𑀺𑀓𑀸 𑀉𑀧𑀸𑀳𑀦𑀸 𑀆𑀭𑁄𑀳𑀺𑀢𑁆𑀯𑀸 𑀧𑀜𑁆𑀘𑀲𑀢𑀫𑀸𑀡𑀯𑀓𑀧𑀭𑀺𑀯𑀸𑀭𑁄 𑀢𑀫𑁂𑀯 𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀺. 𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁.

𑀧𑀸𑀤𑁂𑀲𑀽𑀢𑀺 𑀧𑀸𑀤𑁂𑀳𑀺 𑀅𑀓𑁆𑀓𑀦𑁆𑀢𑀝𑁆𑀞𑀸𑀦𑁂𑀲𑀼. 𑀘𑀓𑁆𑀓𑀸𑀦𑀻𑀢𑀺 𑀮𑀓𑁆𑀔𑀡𑀘𑀓𑁆𑀓𑀸𑀦𑀺. 𑀓𑀺𑀁 𑀧𑀦 𑀪𑀕𑀯𑀢𑁄 𑀕𑀘𑁆𑀙𑀦𑁆𑀢𑀲𑁆𑀲 𑀅𑀓𑁆𑀓𑀦𑁆𑀢𑀝𑁆𑀞𑀸𑀦𑁂 𑀧𑀤𑀁 𑀧𑀜𑁆𑀜𑀸𑀬𑀢𑀻𑀢𑀺? 𑀦 𑀧𑀜𑁆𑀜𑀸𑀬𑀢𑀺. 𑀓𑀲𑁆𑀫𑀸? 𑀲𑀼𑀔𑀼𑀫𑀢𑁆𑀢𑀸 𑀫𑀳𑀸𑀩𑀮𑀢𑁆𑀢𑀸 𑀫𑀳𑀸𑀚𑀦𑀸𑀦𑀼𑀕𑁆𑀕𑀳𑁂𑀦 𑀘. 𑀩𑀼𑀤𑁆𑀥𑀸𑀦𑀜𑁆𑀳𑀺 𑀲𑀼𑀔𑀼𑀫𑀘𑁆𑀙𑀯𑀺𑀢𑀸𑀬 𑀅𑀓𑁆𑀓𑀦𑁆𑀢𑀝𑁆𑀞𑀸𑀦𑀁 𑀢𑀽𑀮𑀧𑀺𑀘𑀼𑀦𑁄 𑀧𑀢𑀺𑀝𑁆𑀞𑀺𑀢𑀝𑁆𑀞𑀸𑀦𑀁 𑀯𑀺𑀬 𑀳𑁄𑀢𑀺, 𑀧𑀤𑀯𑀴𑀜𑁆𑀚𑁄 𑀦 𑀧𑀜𑁆𑀜𑀸𑀬𑀢𑀺. 𑀬𑀣𑀸 𑀘 𑀩𑀮𑀯𑀢𑁄 𑀯𑀸𑀢𑀚𑀯𑀲𑀺𑀦𑁆𑀥𑀯𑀲𑁆𑀲 𑀧𑀤𑀼𑀫𑀺𑀦𑀺𑀧𑀢𑁆𑀢𑁂𑀧𑀺 𑀅𑀓𑁆𑀓𑀦𑁆𑀢𑀫𑀢𑁆𑀢𑀫𑁂𑀯 𑀳𑁄𑀢𑀺, 𑀏𑀯𑀁 𑀫𑀳𑀸𑀩𑀮𑀢𑀸𑀬 𑀢𑀣𑀸𑀕𑀢𑁂𑀦 𑀅𑀓𑁆𑀓𑀦𑁆𑀢𑀝𑁆𑀞𑀸𑀦𑀁 𑀅𑀓𑁆𑀓𑀦𑁆𑀢𑀫𑀢𑁆𑀢𑀫𑁂𑀯 𑀳𑁄𑀢𑀺, 𑀦 𑀢𑀢𑁆𑀣 𑀧𑀤𑀯𑀴𑀜𑁆𑀚𑁄 𑀧𑀜𑁆𑀜𑀸𑀬𑀢𑀺. 𑀩𑀼𑀤𑁆𑀥𑀸𑀦𑀜𑁆𑀘 𑀅𑀦𑀼𑀧𑀤𑀁 𑀫𑀳𑀸𑀚𑀦𑀓𑀸𑀬𑁄 𑀕𑀘𑁆𑀙𑀢𑀺, 𑀢𑀲𑁆𑀲 𑀲𑀢𑁆𑀣𑀼 𑀧𑀤𑀯𑀴𑀜𑁆𑀚𑀁 𑀤𑀺𑀲𑁆𑀯𑀸 𑀫𑀤𑁆𑀤𑀺𑀢𑀼𑀁 𑀅𑀯𑀺𑀲𑀳𑀦𑁆𑀢𑀲𑁆𑀲 𑀕𑀫𑀦𑀯𑀺𑀘𑁆𑀙𑁂𑀤𑁄 𑀪𑀯𑁂𑀬𑁆𑀬. 𑀢𑀲𑁆𑀫𑀸 𑀅𑀓𑁆𑀓𑀦𑁆𑀢𑀅𑀓𑁆𑀓𑀦𑁆𑀢𑀝𑁆𑀞𑀸𑀦𑁂 𑀬𑁄𑀧𑀺 𑀧𑀤𑀯𑀴𑀜𑁆𑀚𑁄 𑀪𑀯𑁂𑀬𑁆𑀬, 𑀲𑁄 𑀅𑀦𑁆𑀢𑀭𑀥𑀸𑀬𑀢𑁂𑀯. 𑀤𑁄𑀡𑁄 𑀧𑀦 𑀩𑁆𑀭𑀸𑀳𑁆𑀫𑀡𑁄 𑀢𑀣𑀸𑀕𑀢𑀲𑁆𑀲 𑀅𑀥𑀺𑀝𑁆𑀞𑀸𑀦𑀯𑀲𑁂𑀦 𑀧𑀲𑁆𑀲𑀺. 𑀪𑀕𑀯𑀸 𑀳𑀺 𑀬𑀲𑁆𑀲 𑀧𑀤𑀘𑁂𑀢𑀺𑀬𑀁 𑀤𑀲𑁆𑀲𑁂𑀢𑀼𑀓𑀸𑀫𑁄 𑀳𑁄𑀢𑀺, 𑀢𑀁 𑀆𑀭𑀩𑁆𑀪 ‘‘𑀅𑀲𑀼𑀓𑁄 𑀦𑀸𑀫 𑀧𑀲𑁆𑀲𑀢𑀽’’𑀢𑀺 𑀅𑀥𑀺𑀝𑁆𑀞𑀸𑀢𑀺. 𑀢𑀲𑁆𑀫𑀸 𑀫𑀸𑀕𑀡𑁆𑀟𑀺𑀬𑀩𑁆𑀭𑀸𑀳𑁆𑀫𑀡𑁄 𑀯𑀺𑀬 𑀅𑀬𑀫𑁆𑀧𑀺 𑀩𑁆𑀭𑀸𑀳𑁆𑀫𑀡𑁄 𑀢𑀣𑀸𑀕𑀢𑀲𑁆𑀲 𑀅𑀥𑀺𑀝𑁆𑀞𑀸𑀦𑀯𑀲𑁂𑀦 𑀅𑀤𑁆𑀤𑀲.

𑀧𑀸𑀲𑀸𑀤𑀺𑀓𑀦𑁆𑀢𑀺 𑀧𑀲𑀸𑀤𑀚𑀦𑀓𑀁. 𑀇𑀢𑀭𑀁 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀉𑀢𑁆𑀢𑀫𑀤𑀫𑀣𑀲𑀫𑀣𑀫𑀦𑀼𑀧𑁆𑀧𑀢𑁆𑀢𑀦𑁆𑀢𑀺 𑀏𑀢𑁆𑀣 𑀉𑀢𑁆𑀢𑀫𑀤𑀫𑀣𑁄 𑀦𑀸𑀫 𑀅𑀭𑀳𑀢𑁆𑀢𑀫𑀕𑁆𑀕𑁄, 𑀉𑀢𑁆𑀢𑀫𑀲𑀫𑀣𑁄 𑀦𑀸𑀫 𑀅𑀭𑀳𑀢𑁆𑀢𑀫𑀕𑁆𑀕𑀲𑀫𑀸𑀥𑀺, 𑀢𑀤𑀼𑀪𑀬𑀁 𑀧𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀤𑀦𑁆𑀢𑀦𑁆𑀢𑀺 𑀦𑀺𑀩𑁆𑀩𑀺𑀲𑁂𑀯𑀦𑀁. 𑀕𑀼𑀢𑁆𑀢𑀦𑁆𑀢𑀺 𑀕𑁄𑀧𑀺𑀢𑀁. 𑀲𑀁𑀬𑀢𑀺𑀦𑁆𑀤𑁆𑀭𑀺𑀬𑀦𑁆𑀢𑀺 𑀭𑀓𑁆𑀔𑀺𑀢𑀺𑀦𑁆𑀤𑁆𑀭𑀺𑀬𑀁. 𑀦𑀸𑀕𑀦𑁆𑀢𑀺 𑀙𑀦𑁆𑀤𑀸𑀤𑀻𑀳𑀺 𑀅𑀕𑀘𑁆𑀙𑀦𑀢𑁄, 𑀧𑀳𑀻𑀦𑀓𑀺𑀮𑁂𑀲𑁂 𑀧𑀼𑀦 𑀅𑀦𑀸𑀕𑀘𑁆𑀙𑀦𑀢𑁄, 𑀆𑀕𑀼𑀁 𑀅𑀓𑀭𑀡𑀢𑁄, 𑀩𑀮𑀯𑀦𑁆𑀢𑀝𑁆𑀞𑁂𑀦𑀸𑀢𑀺 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺 𑀦𑀸𑀕𑀁.

𑀤𑁂𑀯𑁄 𑀦𑁄 𑀪𑀯𑀁 𑀪𑀯𑀺𑀲𑁆𑀲𑀢𑀻𑀢𑀺 𑀏𑀢𑁆𑀣 ‘‘𑀤𑁂𑀯𑁄 𑀦𑁄 𑀪𑀯’’𑀦𑁆𑀢𑀺 𑀏𑀢𑁆𑀢𑀸𑀯𑀢𑀸𑀧𑀺 𑀧𑀼𑀘𑁆𑀙𑀸 𑀦𑀺𑀝𑁆𑀞𑀺𑀢𑀸 𑀪𑀯𑁂𑀬𑁆𑀬, 𑀅𑀬𑀁 𑀧𑀦 𑀩𑁆𑀭𑀸𑀳𑁆𑀫𑀡𑁄 ‘‘𑀅𑀦𑀸𑀕𑀢𑁂 𑀫𑀳𑁂𑀲𑀓𑁆𑀔𑁄 𑀏𑀓𑁄 𑀤𑁂𑀯𑀭𑀸𑀚𑀸 𑀪𑀯𑀺𑀲𑁆𑀲𑀢𑀻’’𑀢𑀺 𑀅𑀦𑀸𑀕𑀢𑀯𑀲𑁂𑀦 𑀧𑀼𑀘𑁆𑀙𑀸𑀲𑀪𑀸𑀕𑁂𑀦𑁂𑀯 𑀓𑀣𑁂𑀦𑁆𑀢𑁄 𑀏𑀯𑀫𑀸𑀳. 𑀪𑀕𑀯𑀸𑀧𑀺𑀲𑁆𑀲 𑀧𑀼𑀘𑁆𑀙𑀸𑀲𑀪𑀸𑀕𑁂𑀦𑁂𑀯 𑀓𑀣𑁂𑀦𑁆𑀢𑁄 𑀦 𑀔𑁄 𑀅𑀳𑀁, 𑀩𑁆𑀭𑀸𑀳𑁆𑀫𑀡, 𑀤𑁂𑀯𑁄 𑀪𑀯𑀺𑀲𑁆𑀲𑀸𑀫𑀻𑀢𑀺 𑀆𑀳. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣. 𑀆𑀲𑀯𑀸𑀦𑀦𑁆𑀢𑀺 𑀓𑀸𑀫𑀸𑀲𑀯𑀸𑀤𑀻𑀦𑀁 𑀘𑀢𑀼𑀦𑁆𑀦𑀁. 𑀧𑀳𑀻𑀦𑀸𑀢𑀺 𑀩𑁄𑀥𑀺𑀧𑀮𑁆𑀮𑀗𑁆𑀓𑁂 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀸𑀥𑀺𑀕𑀫𑁂𑀦𑁂𑀯 𑀧𑀳𑀻𑀦𑀸. 𑀅𑀦𑀼𑀧𑀮𑀺𑀢𑁆𑀢𑁄 𑀮𑁄𑀓𑁂𑀦𑀸𑀢𑀺 𑀢𑀡𑁆𑀳𑀸𑀤𑀺𑀝𑁆𑀞𑀺𑀮𑁂𑀧𑀸𑀦𑀁 𑀧𑀳𑀻𑀦𑀢𑁆𑀢𑀸 𑀲𑀗𑁆𑀔𑀸𑀭𑀮𑁄𑀓𑁂𑀦 𑀅𑀦𑀼𑀧𑀮𑀺𑀢𑁆𑀢𑁄. 𑀩𑀼𑀤𑁆𑀥𑁄𑀢𑀺 𑀘𑀢𑀼𑀦𑁆𑀦𑀁 𑀲𑀘𑁆𑀘𑀸𑀦𑀁 𑀩𑀼𑀤𑁆𑀥𑀢𑁆𑀢𑀸 𑀩𑀼𑀤𑁆𑀥𑁄 𑀇𑀢𑀺 𑀫𑀁 𑀥𑀸𑀭𑁂𑀳𑀺.

𑀬𑁂𑀦𑀸𑀢𑀺 𑀬𑁂𑀦 𑀆𑀲𑀯𑁂𑀦. 𑀤𑁂𑀯𑀽𑀧𑀧𑀢𑁆𑀬𑀲𑁆𑀲𑀸𑀢𑀺 𑀤𑁂𑀯𑀽𑀧𑀧𑀢𑁆𑀢𑀺 𑀅𑀲𑁆𑀲 𑀫𑀬𑁆𑀳𑀁 𑀪𑀯𑁂𑀬𑁆𑀬. 𑀯𑀺𑀳𑀗𑁆𑀕𑀫𑁄𑀢𑀺 𑀆𑀓𑀸𑀲𑀘𑀭𑁄 𑀕𑀦𑁆𑀥𑀩𑁆𑀩𑀓𑀸𑀬𑀺𑀓𑀤𑁂𑀯𑁄. 𑀯𑀺𑀤𑁆𑀥𑀲𑁆𑀢𑀸𑀢𑀺 𑀯𑀺𑀥𑀫𑀺𑀢𑀸. 𑀯𑀺𑀦𑀴𑀻𑀓𑀢𑀸𑀢𑀺 𑀯𑀺𑀕𑀢𑀦𑀴𑀸 𑀯𑀺𑀕𑀢𑀩𑀦𑁆𑀥𑀦𑀸 𑀓𑀢𑀸. 𑀯𑀕𑁆𑀕𑀽𑀢𑀺 𑀲𑀼𑀦𑁆𑀤𑀭𑀁. 𑀢𑁄𑀬𑁂𑀦 𑀦𑀼𑀧𑀮𑀺𑀧𑁆𑀧𑀢𑀻𑀢𑀺 𑀉𑀤𑀓𑀢𑁄 𑀭𑀢𑀦𑀫𑀢𑁆𑀢𑀁 𑀅𑀘𑁆𑀘𑀼𑀕𑁆𑀕𑀫𑁆𑀫 𑀞𑀺𑀢𑀁 𑀲𑀭𑀁 𑀲𑁄𑀪𑀬𑀫𑀸𑀦𑀁 𑀪𑀫𑀭𑀕𑀡𑀁 𑀳𑀸𑀲𑀬𑀫𑀸𑀦𑀁 𑀢𑁄𑀬𑁂𑀦 𑀦 𑀮𑀺𑀧𑁆𑀧𑀢𑀺. 𑀢𑀲𑁆𑀫𑀸 𑀩𑀼𑀤𑁆𑀥𑁄𑀲𑁆𑀫𑀺 𑀩𑁆𑀭𑀸𑀳𑁆𑀫𑀡𑀸𑀢𑀺 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀢𑀻𑀡𑀺 𑀫𑀕𑁆𑀕𑀨𑀮𑀸𑀦𑀺 𑀧𑀸𑀧𑀼𑀡𑀺𑀢𑁆𑀯𑀸 𑀤𑁆𑀯𑀸𑀤𑀲𑀳𑀺 𑀧𑀤𑀲𑀳𑀲𑁆𑀲𑁂𑀳𑀺 𑀤𑁄𑀡𑀕𑀚𑁆𑀚𑀺𑀢𑀁 𑀦𑀸𑀫 𑀯𑀡𑁆𑀡𑀁 𑀓𑀣𑁂𑀲𑀺, 𑀢𑀣𑀸𑀕𑀢𑁂 𑀘 𑀧𑀭𑀺𑀦𑀺𑀩𑁆𑀩𑀼𑀢𑁂 𑀚𑀫𑁆𑀩𑀼𑀤𑀻𑀧𑀢𑀮𑁂 𑀉𑀧𑁆𑀧𑀦𑁆𑀦𑀁 𑀫𑀳𑀸𑀓𑀮𑀳𑀁 𑀯𑀽𑀧𑀲𑀫𑁂𑀢𑁆𑀯𑀸 𑀥𑀸𑀢𑀼𑀬𑁄 𑀪𑀸𑀚𑁂𑀲𑀻𑀢𑀺.

𑁭. 𑀅𑀧𑀭𑀺𑀳𑀸𑀦𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁭. 𑀲𑀢𑁆𑀢𑀫𑁂 𑀦𑀺𑀩𑁆𑀩𑀸𑀦𑀲𑁆𑀲𑁂𑀯 𑀲𑀦𑁆𑀢𑀺𑀓𑁂𑀢𑀺 𑀦𑀺𑀩𑁆𑀩𑀸𑀦𑀲𑀦𑁆𑀢𑀺𑀓𑁂𑀬𑁂𑀯 𑀘𑀭𑀢𑀺. 𑀲𑀻𑀮𑁂 𑀧𑀢𑀺𑀝𑁆𑀞𑀺𑀢𑁄𑀢𑀺 𑀧𑀸𑀢𑀺𑀫𑁄𑀓𑁆𑀔𑀲𑀻𑀮𑁂 𑀧𑀢𑀺𑀝𑁆𑀞𑀺𑀢𑁄. 𑀏𑀯𑀁 𑀯𑀺𑀳𑀸𑀭𑀻𑀢𑀺 𑀏𑀯𑀁 𑀯𑀺𑀳𑀭𑀦𑁆𑀢𑁄. 𑀆𑀢𑀸𑀧𑀻𑀢𑀺 𑀆𑀢𑀸𑀧𑁂𑀦 𑀯𑀻𑀭𑀺𑀬𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀬𑁄𑀕𑀓𑁆𑀔𑁂𑀫𑀲𑁆𑀲𑀸𑀢𑀺 𑀘𑀢𑀽𑀳𑀺 𑀬𑁄𑀕𑁂𑀳𑀺 𑀔𑁂𑀫𑀲𑁆𑀲 𑀦𑀺𑀩𑁆𑀩𑀸𑀦𑀲𑁆𑀲. 𑀧𑀫𑀸𑀤𑁂 𑀪𑀬𑀤𑀲𑁆𑀲𑀺𑀯𑀸𑀢𑀺 𑀧𑀫𑀸𑀤𑀁 𑀪𑀬𑀢𑁄 𑀧𑀲𑁆𑀲𑀦𑁆𑀢𑁄.

𑁮. 𑀧𑀢𑀺𑀮𑀻𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁮. 𑀅𑀝𑁆𑀞𑀫𑁂 𑀧𑀦𑀼𑀡𑁆𑀡𑀧𑀘𑁆𑀘𑁂𑀓𑀲𑀘𑁆𑀘𑁄𑀢𑀺 ‘‘𑀇𑀤𑀫𑁂𑀯 𑀤𑀲𑁆𑀲𑀦𑀁 𑀲𑀘𑁆𑀘𑀁, 𑀇𑀤𑀫𑁂𑀯 𑀲𑀘𑁆𑀘’’𑀦𑁆𑀢𑀺 𑀏𑀯𑀁 𑀧𑀸𑀝𑀺𑀏𑀓𑁆𑀓𑀁 𑀕𑀳𑀺𑀢𑀢𑁆𑀢𑀸 𑀧𑀘𑁆𑀘𑁂𑀓𑀲𑀗𑁆𑀔𑀸𑀢𑀸𑀦𑀺 𑀤𑀺𑀝𑁆𑀞𑀺𑀲𑀘𑁆𑀘𑀸𑀦𑀺 𑀧𑀦𑀼𑀡𑁆𑀡𑀸𑀦𑀺 𑀦𑀻𑀳𑀝𑀸𑀦𑀺 𑀧𑀳𑀻𑀦𑀸𑀦𑀺 𑀅𑀲𑁆𑀲𑀸𑀢𑀺 𑀧𑀦𑀼𑀡𑁆𑀡𑀧𑀘𑁆𑀘𑁂𑀓𑀲𑀘𑁆𑀘𑁄. 𑀲𑀫𑀯𑀬𑀲𑀝𑁆𑀞𑁂𑀲𑀦𑁄𑀢𑀺 𑀏𑀢𑁆𑀣 𑀅𑀯𑀬𑀸𑀢𑀺 𑀅𑀦𑀽𑀦𑀸, 𑀲𑀝𑁆𑀞𑀸𑀢𑀺 𑀯𑀺𑀲𑁆𑀲𑀝𑁆𑀞𑀸, 𑀲𑀫𑁆𑀫𑀸 𑀅𑀯𑀬𑀸 𑀲𑀝𑁆𑀞𑀸 𑀏𑀲𑀦𑀸 𑀅𑀲𑁆𑀲𑀸𑀢𑀺 𑀲𑀫𑀯𑀬𑀲𑀝𑁆𑀞𑁂𑀲𑀦𑁄, 𑀲𑀫𑁆𑀫𑀸 𑀯𑀺𑀲𑁆𑀲𑀝𑁆𑀞𑀲𑀩𑁆𑀩𑀏𑀲𑀦𑁄𑀢𑀺 𑀅𑀢𑁆𑀣𑁄. 𑀧𑀢𑀺𑀮𑀻𑀦𑁄𑀢𑀺 𑀦𑀺𑀮𑀻𑀦𑁄 𑀏𑀓𑀻𑀪𑀸𑀯𑀁 𑀉𑀧𑀕𑀢𑁄. 𑀧𑀼𑀣𑀼𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀦𑁆𑀢𑀺 𑀩𑀳𑀽𑀦𑀁 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁. 𑀏𑀢𑁆𑀣 𑀘 𑀲𑀫𑀡𑀸𑀢𑀺 𑀧𑀩𑁆𑀩𑀚𑁆𑀚𑀽𑀧𑀕𑀢𑀸, 𑀩𑁆𑀭𑀸𑀳𑁆𑀫𑀡𑀸𑀢𑀺 𑀪𑁄𑀯𑀸𑀤𑀺𑀦𑁄. 𑀧𑀼𑀣𑀼𑀧𑀘𑁆𑀘𑁂𑀓𑀲𑀘𑁆𑀘𑀸𑀦𑀻𑀢𑀺 𑀩𑀳𑀽𑀦𑀺 𑀧𑀸𑀝𑁂𑀓𑁆𑀓𑀲𑀘𑁆𑀘𑀸𑀦𑀺. 𑀦𑀼𑀡𑁆𑀡𑀸𑀦𑀻𑀢𑀺 𑀦𑀻𑀳𑀝𑀸𑀦𑀺. 𑀧𑀦𑀼𑀡𑁆𑀡𑀸𑀦𑀻𑀢𑀺 𑀲𑀼𑀝𑁆𑀞𑀼 𑀦𑀻𑀳𑀝𑀸𑀦𑀺. 𑀘𑀢𑁆𑀢𑀸𑀦𑀻𑀢𑀺 𑀯𑀺𑀲𑁆𑀲𑀝𑁆𑀞𑀸𑀦𑀺. 𑀯𑀦𑁆𑀢𑀸𑀦𑀻𑀢𑀺 𑀯𑀫𑀺𑀢𑀸𑀦𑀺. 𑀫𑀼𑀢𑁆𑀢𑀸𑀦𑀻𑀢𑀺 𑀙𑀺𑀦𑁆𑀦𑀩𑀦𑁆𑀥𑀦𑀸𑀦𑀺 𑀓𑀢𑀸𑀦𑀺. 𑀧𑀳𑀻𑀦𑀸𑀦𑀻𑀢𑀺 𑀧𑀚𑀳𑀺𑀢𑀸𑀦𑀺. 𑀧𑀝𑀺𑀦𑀺𑀲𑁆𑀲𑀝𑁆𑀞𑀸𑀦𑀻𑀢𑀺 𑀬𑀣𑀸 𑀦 𑀧𑀼𑀦 𑀘𑀺𑀢𑁆𑀢𑀁 𑀆𑀭𑁄𑀳𑀦𑁆𑀢𑀺, 𑀏𑀯𑀁 𑀧𑀝𑀺𑀦𑀺𑀲𑁆𑀲𑀚𑁆𑀚𑀺𑀢𑀸𑀦𑀺. 𑀲𑀩𑁆𑀩𑀸𑀦𑁂𑀯𑁂𑀢𑀸𑀦𑀺 𑀕𑀳𑀺𑀢𑀕𑀳𑀡𑀲𑁆𑀲 𑀯𑀺𑀲𑁆𑀲𑀝𑁆𑀞𑀪𑀸𑀯𑀯𑁂𑀯𑀘𑀦𑀸𑀦𑀺.

𑀓𑀸𑀫𑁂𑀲𑀦𑀸 𑀧𑀳𑀻𑀦𑀸 𑀳𑁄𑀢𑀻𑀢𑀺 𑀅𑀦𑀸𑀕𑀸𑀫𑀺𑀫𑀕𑁆𑀕𑁂𑀦 𑀧𑀳𑀻𑀦𑀸. 𑀪𑀯𑁂𑀲𑀦𑀸 𑀧𑀦 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀧𑀳𑀻𑀬𑀢𑀺. ‘‘𑀩𑁆𑀭𑀳𑁆𑀫𑀘𑀭𑀺𑀬𑀁 𑀏𑀲𑀺𑀲𑁆𑀲𑀸𑀫𑀺 𑀕𑀯𑁂𑀲𑀺𑀲𑁆𑀲𑀸𑀫𑀻’’𑀢𑀺 𑀏𑀯𑀁 𑀧𑀯𑀢𑁆𑀢𑀚𑁆𑀛𑀸𑀲𑀬𑀲𑀗𑁆𑀔𑀸𑀢𑀸 𑀩𑁆𑀭𑀳𑁆𑀫𑀘𑀭𑀺𑀬𑁂𑀲𑀦𑀸𑀧𑀺 𑀅𑀭𑀳𑀢𑁆𑀢𑀫𑀕𑁆𑀕𑁂𑀦𑁂𑀯 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀁 𑀯𑀽𑀧𑀲𑀫𑀁 𑀕𑀘𑁆𑀙𑀢𑀺. 𑀤𑀺𑀝𑁆𑀞𑀺𑀩𑁆𑀭𑀳𑁆𑀫𑀘𑀭𑀺𑀬𑁂𑀲𑀦𑀸 𑀧𑀦 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂𑀦𑁂𑀯 𑀧𑀝𑀺𑀧𑁆𑀧𑀲𑀫𑁆𑀪𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂𑀢𑀺 𑀏𑀯𑀁 𑀘𑀢𑀼𑀢𑁆𑀣𑀚𑁆𑀛𑀸𑀦𑁂𑀦 𑀧𑀲𑁆𑀲𑀤𑁆𑀥𑀓𑀸𑀬𑀲𑀗𑁆𑀔𑀸𑀭𑁄 𑀯𑀽𑀧𑀲𑀦𑁆𑀢𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑁄 𑀦𑀸𑀫 𑀳𑁄𑀢𑀺. 𑀅𑀲𑁆𑀫𑀺𑀫𑀸𑀦𑁄𑀢𑀺 𑀅𑀲𑁆𑀫𑀻𑀢𑀺 𑀉𑀧𑁆𑀧𑀚𑁆𑀚𑀦𑀓𑁄 𑀦𑀯𑀯𑀺𑀥𑀫𑀸𑀦𑁄.

𑀕𑀸𑀣𑀸𑀲𑀼 𑀓𑀸𑀫𑁂𑀲𑀦𑀸 𑀪𑀯𑁂𑀲𑀦𑀸𑀢𑀺 𑀏𑀢𑀸 𑀤𑁆𑀯𑁂 𑀏𑀲𑀦𑀸, 𑀩𑁆𑀭𑀳𑁆𑀫𑀘𑀭𑀺𑀬𑁂𑀲𑀦𑀸 𑀲𑀳𑀸𑀢𑀺 𑀢𑀸𑀳𑀺𑀬𑁂𑀯 𑀲𑀳 𑀩𑁆𑀭𑀳𑁆𑀫𑀘𑀭𑀺𑀬𑁂𑀲𑀦𑀸𑀢𑀺 𑀢𑀺𑀲𑁆𑀲𑁄𑀧𑀺 𑀏𑀢𑀸. 𑀇𑀥 𑀞𑀢𑁆𑀯𑀸 𑀏𑀲𑀦𑀸 𑀧𑀝𑀺𑀦𑀺𑀲𑁆𑀲𑀝𑁆𑀞𑀸𑀢𑀺 𑀇𑀫𑀺𑀦𑀸 𑀧𑀤𑁂𑀦 𑀲𑀤𑁆𑀥𑀺𑀁 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸. 𑀇𑀢𑀺 𑀲𑀘𑁆𑀘𑀧𑀭𑀸𑀫𑀸𑀲𑁄, 𑀤𑀺𑀝𑁆𑀞𑀺𑀝𑁆𑀞𑀸𑀦𑀸 𑀲𑀫𑀼𑀲𑁆𑀲𑀬𑀸𑀢𑀺 ‘‘𑀇𑀢𑀺 𑀲𑀘𑁆𑀘𑀁 𑀇𑀢𑀺 𑀲𑀘𑁆𑀘’’𑀦𑁆𑀢𑀺 𑀕𑀳𑀡𑀧𑀭𑀸𑀫𑀸𑀲𑁄 𑀘 𑀤𑀺𑀝𑁆𑀞𑀺𑀲𑀗𑁆𑀔𑀸𑀢𑀸𑀬𑁂𑀯 𑀤𑀺𑀝𑁆𑀞𑀺𑀝𑁆𑀞𑀸𑀦𑀸 𑀘 𑀬𑁂 𑀲𑀫𑀼𑀲𑁆𑀲𑀺𑀢𑀢𑁆𑀢𑀸 𑀉𑀕𑁆𑀕𑀦𑁆𑀢𑁆𑀯𑀸 𑀞𑀺𑀢𑀢𑁆𑀢𑀸 𑀲𑀫𑀼𑀲𑁆𑀲𑀬𑀸𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀢𑁂 𑀲𑀩𑁆𑀩𑁂𑀧𑀺. 𑀇𑀥 𑀞𑀢𑁆𑀯𑀸 𑀤𑀺𑀝𑁆𑀞𑀺𑀝𑁆𑀞𑀸𑀦𑀸 𑀲𑀫𑀽𑀳𑀢𑀸𑀢𑀺 𑀇𑀫𑀺𑀦𑀸 𑀧𑀤𑁂𑀦 𑀲𑀤𑁆𑀥𑀺𑀁 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸. 𑀓𑀲𑁆𑀲 𑀧𑀦 𑀏𑀢𑀸 𑀏𑀲𑀦𑀸 𑀧𑀝𑀺𑀦𑀺𑀲𑁆𑀲𑀝𑁆𑀞𑀸, 𑀏𑀢𑁂 𑀘 𑀤𑀺𑀝𑁆𑀞𑀺𑀝𑁆𑀞𑀸𑀦𑀸 𑀲𑀫𑀽𑀳𑀢𑀸𑀢𑀺? 𑀲𑀩𑁆𑀩𑀭𑀸𑀕𑀯𑀺𑀭𑀢𑁆𑀢𑀲𑁆𑀲 𑀢𑀡𑁆𑀳𑀸𑀓𑁆𑀔𑀬𑀯𑀺𑀫𑀼𑀢𑁆𑀢𑀺𑀦𑁄. 𑀬𑁄 𑀳𑀺 𑀲𑀩𑁆𑀩𑀭𑀸𑀕𑁂𑀳𑀺𑀧𑀺 𑀯𑀺𑀭𑀢𑁆𑀢𑁄, 𑀢𑀡𑁆𑀳𑀸𑀓𑁆𑀔𑀬𑁂 𑀘 𑀦𑀺𑀩𑁆𑀩𑀸𑀦𑁂 𑀧𑀯𑀢𑁆𑀢𑀸𑀬 𑀅𑀭𑀳𑀢𑁆𑀢𑀨𑀮𑀯𑀺𑀫𑀼𑀢𑁆𑀢𑀺𑀬𑀸 𑀲𑀫𑀦𑁆𑀦𑀸𑀕𑀢𑁄, 𑀏𑀢𑀲𑁆𑀲 𑀏𑀲𑀦𑀸 𑀧𑀝𑀺𑀦𑀺𑀲𑁆𑀲𑀝𑁆𑀞𑀸, 𑀤𑀺𑀝𑁆𑀞𑀺𑀝𑁆𑀞𑀸𑀦𑀸 𑀘 𑀲𑀫𑀽𑀳𑀢𑀸. 𑀲 𑀯𑁂 𑀲𑀦𑁆𑀢𑁄𑀢𑀺 𑀲𑁄 𑀏𑀯𑀭𑀽𑀧𑁄 𑀓𑀺𑀮𑁂𑀲𑀲𑀦𑁆𑀢𑀢𑀸𑀬 𑀲𑀦𑁆𑀢𑁄. 𑀧𑀲𑁆𑀲𑀤𑁆𑀥𑁄𑀢𑀺 𑀤𑁆𑀯𑀻𑀳𑀺 𑀓𑀸𑀬𑀘𑀺𑀢𑁆𑀢𑀧𑀲𑁆𑀲𑀤𑁆𑀥𑀻𑀳𑀺 𑀧𑀲𑁆𑀲𑀤𑁆𑀥𑁄. 𑀅𑀧𑀭𑀸𑀚𑀺𑀢𑁄𑀢𑀺 𑀲𑀩𑁆𑀩𑀓𑀺𑀮𑁂𑀲𑁂 𑀚𑀺𑀦𑀺𑀢𑁆𑀯𑀸 𑀞𑀺𑀢𑀢𑁆𑀢𑀸 𑀓𑁂𑀦𑀘𑀺 𑀅𑀧𑀭𑀸𑀚𑀺𑀢𑁄. 𑀫𑀸𑀦𑀸𑀪𑀺𑀲𑀫𑀬𑀸𑀢𑀺 𑀫𑀸𑀦𑀲𑁆𑀲 𑀧𑀳𑀸𑀦𑀸𑀪𑀺𑀲𑀫𑀬𑁂𑀦. 𑀩𑀼𑀤𑁆𑀥𑁄𑀢𑀺 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀩𑀼𑀚𑁆𑀛𑀺𑀢𑁆𑀯𑀸 𑀞𑀺𑀢𑁄. 𑀇𑀢𑀺 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂𑀧𑀺 𑀕𑀸𑀣𑀸𑀲𑀼𑀧𑀺 𑀔𑀻𑀡𑀸𑀲𑀯𑁄𑀯 𑀓𑀣𑀺𑀢𑁄𑀢𑀺.

𑁯. 𑀉𑀚𑁆𑀚𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁯. 𑀦𑀯𑀫𑁂 𑀲𑀗𑁆𑀖𑀸𑀢𑀁 𑀆𑀧𑀚𑁆𑀚𑀦𑁆𑀢𑀻𑀢𑀺 𑀯𑀥𑀁 𑀫𑀭𑀡𑀁 𑀆𑀧𑀚𑁆𑀚𑀦𑁆𑀢𑀺. 𑀦𑀺𑀘𑁆𑀘𑀤𑀸𑀦𑀦𑁆𑀢𑀺 𑀲𑀮𑀸𑀓𑀪𑀢𑁆𑀢𑀁. 𑀅𑀦𑀼𑀓𑀼𑀮𑀬𑀜𑁆𑀜𑀦𑁆𑀢𑀺 𑀅𑀫𑁆𑀳𑀸𑀓𑀁 𑀧𑀺𑀢𑀽𑀳𑀺 𑀧𑀺𑀢𑀸𑀫𑀳𑁂𑀳𑀺 𑀤𑀺𑀦𑁆𑀦𑀢𑁆𑀢𑀸 𑀏𑀯𑀁 𑀓𑀼𑀮𑀸𑀦𑀼𑀓𑀼𑀮𑀯𑀲𑁂𑀦 𑀬𑀚𑀺𑀢𑀩𑁆𑀩𑀁, 𑀤𑀸𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀅𑀲𑁆𑀲𑀫𑁂𑀥𑀦𑁆𑀢𑀺𑀆𑀤𑀻𑀲𑀼 𑀅𑀲𑁆𑀲𑀫𑁂𑀢𑁆𑀣 𑀫𑁂𑀥𑀦𑁆𑀢𑀻𑀢𑀺 𑀅𑀲𑁆𑀲𑀫𑁂𑀥𑁄, 𑀤𑁆𑀯𑀻𑀳𑀺 𑀧𑀭𑀺𑀬𑀜𑁆𑀜𑁂𑀳𑀺 𑀬𑀚𑀺𑀢𑀩𑁆𑀩𑀲𑁆𑀲 𑀏𑀓𑀯𑀻𑀲𑀢𑀺𑀬𑀽𑀧𑀲𑁆𑀲 𑀞𑀧𑁂𑀢𑁆𑀯𑀸 𑀪𑀽𑀫𑀺𑀜𑁆𑀘 𑀧𑀼𑀭𑀺𑀲𑁂 𑀘 𑀅𑀯𑀲𑁂𑀲𑀲𑀩𑁆𑀩𑀯𑀺𑀪𑀯𑀤𑀓𑁆𑀔𑀺𑀡𑀲𑁆𑀲 𑀬𑀜𑁆𑀜𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀧𑀼𑀭𑀺𑀲𑀫𑁂𑀢𑁆𑀣 𑀫𑁂𑀥𑀦𑁆𑀢𑀻𑀢𑀺 𑀧𑀼𑀭𑀺𑀲𑀫𑁂𑀥𑁄, 𑀘𑀢𑀽𑀳𑀺 𑀧𑀭𑀺𑀬𑀜𑁆𑀜𑁂𑀳𑀺 𑀬𑀚𑀺𑀢𑀩𑁆𑀩𑀲𑁆𑀲 𑀲𑀤𑁆𑀥𑀺𑀁 𑀪𑀽𑀫𑀺𑀬𑀸 𑀅𑀲𑁆𑀲𑀫𑁂𑀥𑁂 𑀯𑀼𑀢𑁆𑀢𑀯𑀺𑀪𑀯𑀤𑀓𑁆𑀔𑀺𑀡𑀲𑁆𑀲 𑀬𑀜𑁆𑀜𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀲𑀫𑁆𑀫𑀫𑁂𑀢𑁆𑀣 𑀧𑀸𑀲𑀦𑁆𑀢𑀻𑀢𑀺 𑀲𑀫𑁆𑀫𑀸𑀧𑀸𑀲𑁄, 𑀤𑀺𑀯𑀲𑁂 𑀤𑀺𑀯𑀲𑁂 𑀲𑀫𑁆𑀫𑀁 𑀔𑀺𑀧𑀺𑀢𑁆𑀯𑀸 𑀢𑀲𑁆𑀲 𑀧𑀢𑀺𑀢𑁄𑀓𑀸𑀲𑁂 𑀯𑁂𑀤𑀺𑀁 𑀓𑀢𑁆𑀯𑀸 𑀲𑀁𑀳𑀸𑀭𑀺𑀫𑁂𑀳𑀺 𑀬𑀽𑀧𑀸𑀤𑀻𑀳𑀺 𑀲𑀭𑀲𑁆𑀲𑀢𑀺𑀦𑀤𑀺𑀬𑀸 𑀦𑀺𑀫𑀼𑀕𑁆𑀕𑁄𑀓𑀸𑀲𑀢𑁄 𑀧𑀪𑀼𑀢𑀺 𑀧𑀝𑀺𑀮𑁄𑀫𑀁 𑀕𑀘𑁆𑀙𑀦𑁆𑀢𑁂𑀦 𑀬𑀚𑀺𑀢𑀩𑁆𑀩𑀲𑁆𑀲 𑀲𑀩𑁆𑀩𑀬𑀸𑀕𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀯𑀸𑀚𑀫𑁂𑀢𑁆𑀣 𑀧𑀺𑀯𑀦𑁆𑀢𑀻𑀢𑀺 𑀯𑀸𑀚𑀧𑁂𑀬𑁆𑀬𑀁, 𑀏𑀓𑁂𑀦 𑀧𑀭𑀺𑀬𑀜𑁆𑀜𑁂𑀦 𑀲𑀢𑁆𑀢𑀭𑀲𑀳𑀺 𑀧𑀲𑀽𑀳𑀺 𑀬𑀚𑀺𑀢𑀩𑁆𑀩𑀲𑁆𑀲 𑀩𑁂𑀮𑀼𑀯𑀬𑀽𑀧𑀲𑁆𑀲 𑀲𑀢𑁆𑀢𑀭𑀲𑀓𑀤𑀓𑁆𑀔𑀺𑀡𑀲𑁆𑀲 𑀬𑀜𑁆𑀜𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀦𑀢𑁆𑀣𑀺 𑀏𑀢𑁆𑀣 𑀅𑀕𑁆𑀕𑀴𑀸𑀢𑀺 𑀦𑀺𑀭𑀕𑁆𑀕𑀴𑁄. 𑀦𑀯𑀳𑀺 𑀧𑀭𑀺𑀬𑀜𑁆𑀜𑁂𑀳𑀺 𑀬𑀚𑀺𑀢𑀩𑁆𑀩𑀲𑁆𑀲 𑀲𑀤𑁆𑀥𑀺𑀁 𑀪𑀽𑀫𑀺𑀬𑀸 𑀧𑀼𑀭𑀺𑀲𑁂𑀳𑀺 𑀘 𑀅𑀲𑁆𑀲𑀫𑁂𑀥𑁂 𑀯𑀼𑀢𑁆𑀢𑀯𑀺𑀪𑀯𑀤𑀓𑁆𑀔𑀺𑀡𑀲𑁆𑀲 𑀲𑀩𑁆𑀩𑀫𑁂𑀥𑀧𑀭𑀺𑀬𑀸𑀬𑀦𑀸𑀫𑀲𑁆𑀲 𑀅𑀲𑁆𑀲𑀫𑁂𑀥𑀯𑀺𑀓𑀧𑁆𑀧𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀫𑀳𑀸𑀭𑀫𑁆𑀪𑀸𑀢𑀺 𑀫𑀳𑀸𑀓𑀺𑀘𑁆𑀘𑀸 𑀫𑀳𑀸𑀓𑀭𑀡𑀻𑀬𑀸. 𑀅𑀧𑀺𑀘 𑀧𑀸𑀡𑀸𑀢𑀺𑀧𑀸𑀢𑀲𑀫𑀸𑀭𑀫𑁆𑀪𑀲𑁆𑀲 𑀫𑀳𑀦𑁆𑀢𑀢𑀸𑀬𑀧𑀺 𑀫𑀳𑀸𑀭𑀫𑁆𑀪𑀸𑀬𑁂𑀯. 𑀦 𑀢𑁂 𑀳𑁄𑀦𑁆𑀢𑀺 𑀫𑀳𑀧𑁆𑀨𑀮𑀸𑀢𑀺 𑀏𑀢𑁆𑀣 𑀦𑀺𑀭𑀯𑀲𑁂𑀲𑀢𑁆𑀣𑁂 𑀲𑀸𑀯𑀲𑁂𑀲𑀭𑀽𑀧𑀦𑀁 𑀓𑀢𑀁. 𑀢𑀲𑁆𑀫𑀸 𑀇𑀝𑁆𑀞𑀨𑀮𑁂𑀦 𑀦𑀺𑀧𑁆𑀨𑀮𑀸𑀯 𑀳𑁄𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀇𑀤𑀜𑁆𑀘 𑀧𑀸𑀡𑀸𑀢𑀺𑀧𑀸𑀢𑀲𑀫𑀸𑀭𑀫𑁆𑀪𑀫𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀬𑀁 𑀧𑀦 𑀢𑀢𑁆𑀣 𑀅𑀦𑁆𑀢𑀭𑀦𑁆𑀢𑀭𑀸 𑀤𑀸𑀦𑀁 𑀤𑀺𑀬𑁆𑀬𑀢𑀺, 𑀢𑀁 𑀇𑀫𑀺𑀦𑀸 𑀲𑀫𑀸𑀭𑀫𑁆𑀪𑁂𑀦 𑀉𑀧𑀳𑀢𑀢𑁆𑀢𑀸 𑀫𑀳𑀧𑁆𑀨𑀮𑀁 𑀦 𑀳𑁄𑀢𑀺, 𑀫𑀦𑁆𑀤𑀨𑀮𑀁 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀳𑀜𑁆𑀜𑀭𑁂𑀢𑀺 𑀳𑀜𑁆𑀜𑀦𑁆𑀢𑀺. 𑀬𑀚𑀦𑁆𑀢𑀺 𑀅𑀦𑀼𑀓𑀼𑀮𑀁 𑀲𑀤𑀸𑀢𑀺 𑀬𑁂 𑀅𑀜𑁆𑀜𑁂 𑀅𑀦𑀼𑀓𑀼𑀮𑀁 𑀬𑀚𑀦𑁆𑀢𑀺, 𑀧𑀼𑀩𑁆𑀩𑀧𑀼𑀭𑀺𑀲𑁂𑀳𑀺 𑀬𑀺𑀝𑁆𑀞𑀢𑁆𑀢𑀸 𑀧𑀘𑁆𑀙𑀺𑀫𑀧𑀼𑀭𑀺𑀲𑀸𑀧𑀺 𑀬𑀚𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀲𑁂𑀬𑁆𑀬𑁄 𑀳𑁄𑀢𑀻𑀢𑀺 𑀯𑀺𑀲𑁂𑀲𑁄𑀯 𑀳𑁄𑀢𑀺. 𑀦 𑀧𑀸𑀧𑀺𑀬𑁄𑀢𑀺 𑀧𑀸𑀧𑀁 𑀓𑀺𑀜𑁆𑀘𑀺 𑀦 𑀳𑁄𑀢𑀺.

𑁧𑁦. 𑀉𑀤𑀸𑀬𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁦. 𑀤𑀲𑀫𑁂 𑀅𑀪𑀺𑀲𑀗𑁆𑀔𑀢𑀦𑁆𑀢𑀺 𑀭𑀸𑀲𑀺𑀓𑀢𑀁. 𑀦𑀺𑀭𑀸𑀭𑀫𑁆𑀪𑀦𑁆𑀢𑀺 𑀧𑀸𑀡𑀲𑀫𑀸𑀭𑀫𑁆𑀪𑀭𑀳𑀺𑀢𑀁. 𑀬𑀜𑁆𑀜𑀦𑁆𑀢𑀺 𑀤𑁂𑀬𑁆𑀬𑀥𑀫𑁆𑀫𑀁. 𑀢𑀜𑁆𑀳𑀺 𑀬𑀚𑀺𑀢𑀩𑁆𑀩𑀢𑁆𑀢𑀸 𑀬𑀜𑁆𑀜𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀓𑀸𑀮𑁂𑀦𑀸𑀢𑀺 𑀬𑀼𑀢𑁆𑀢𑀧𑁆𑀧𑀢𑁆𑀢𑀓𑀸𑀮𑁂𑀦. 𑀉𑀧𑀲𑀁𑀬𑀦𑁆𑀢𑀻𑀢𑀺 𑀉𑀧𑀕𑀘𑁆𑀙𑀦𑁆𑀢𑀺. 𑀓𑀼𑀮𑀁 𑀕𑀢𑀺𑀦𑁆𑀢𑀺 𑀯𑀝𑁆𑀝𑀓𑀼𑀮𑀜𑁆𑀘𑁂𑀯 𑀯𑀝𑁆𑀝𑀕𑀢𑀺𑀜𑁆𑀘 𑀅𑀢𑀺𑀓𑁆𑀓𑀦𑁆𑀢𑀸. 𑀬𑀜𑁆𑀜𑀲𑁆𑀲 𑀓𑁄𑀯𑀺𑀤𑀸𑀢𑀺 𑀘𑀢𑀼𑀪𑀽𑀫𑀓𑀬𑀜𑁆𑀜𑁂 𑀓𑀼𑀲𑀮𑀸. 𑀬𑀜𑁆𑀜𑁂𑀢𑀺 𑀧𑀓𑀢𑀺𑀤𑀸𑀦𑁂. 𑀲𑀤𑁆𑀥𑁂𑀢𑀺 𑀫𑀢𑀓𑀤𑀸𑀦𑁂. 𑀳𑀩𑁆𑀬𑀁 𑀓𑀢𑁆𑀯𑀸𑀢𑀺 𑀳𑀼𑀦𑀺𑀢𑀩𑁆𑀩𑀁 𑀤𑁂𑀬𑁆𑀬𑀥𑀫𑁆𑀫𑀁 𑀉𑀧𑀓𑀧𑁆𑀧𑁂𑀢𑁆𑀯𑀸. 𑀲𑀼𑀔𑁂𑀢𑁆𑀢𑁂 𑀩𑁆𑀭𑀳𑁆𑀫𑀘𑀸𑀭𑀺𑀲𑀽𑀢𑀺 𑀩𑁆𑀭𑀳𑁆𑀫𑀘𑀸𑀭𑀺𑀲𑀗𑁆𑀔𑀸𑀢𑁂 𑀲𑀼𑀔𑁂𑀢𑁆𑀢𑀫𑁆𑀳𑀻𑀢𑀺 𑀅𑀢𑁆𑀣𑁄. 𑀲𑀼𑀧𑁆𑀧𑀢𑁆𑀢𑀦𑁆𑀢𑀺 𑀲𑀼𑀝𑁆𑀞𑀼 𑀧𑀢𑁆𑀢𑀁. 𑀤𑀓𑁆𑀔𑀺𑀡𑁂𑀬𑁆𑀬𑁂𑀲𑀼 𑀬𑀁 𑀓𑀢𑀦𑁆𑀢𑀺 𑀬𑀁 𑀤𑀓𑁆𑀔𑀺𑀡𑀸𑀬 𑀅𑀦𑀼𑀘𑁆𑀙𑀯𑀺𑀓𑁂𑀲𑀼 𑀉𑀧𑀓𑀧𑁆𑀧𑀺𑀢𑀁, 𑀢𑀁 𑀲𑀼𑀳𑀼𑀢𑀁 𑀲𑀼𑀬𑀺𑀝𑁆𑀞𑀁 𑀲𑀼𑀧𑁆𑀧𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀲𑀤𑁆𑀥𑁄𑀢𑀺 𑀩𑀼𑀤𑁆𑀥𑀥𑀫𑁆𑀫𑀲𑀗𑁆𑀖𑀕𑀼𑀡𑀸𑀦𑀁 𑀲𑀤𑁆𑀤𑀳𑀦𑀢𑀸𑀬 𑀲𑀤𑁆𑀥𑁄. 𑀫𑀼𑀢𑁆𑀢𑁂𑀦 𑀘𑁂𑀢𑀲𑀸𑀢𑀺 𑀯𑀺𑀲𑁆𑀲𑀝𑁆𑀞𑁂𑀦 𑀘𑀺𑀢𑁆𑀢𑁂𑀦. 𑀇𑀫𑀺𑀦𑀸𑀲𑁆𑀲 𑀫𑀼𑀢𑁆𑀢𑀘𑀸𑀕𑀁 𑀤𑀻𑀧𑁂𑀢𑀻𑀢𑀺.

𑀘𑀓𑁆𑀓𑀯𑀕𑁆𑀕𑁄 𑀘𑀢𑀼𑀢𑁆𑀣𑁄.