𑁭. 𑀲𑀗𑁆𑀔𑀢𑀮𑀓𑁆𑀔𑀡𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁭. 𑀲𑀢𑁆𑀢𑀫𑁂 𑀲𑀗𑁆𑀔𑀢𑀲𑁆𑀲𑀸𑀢𑀺 𑀧𑀘𑁆𑀘𑀬𑁂𑀳𑀺 𑀲𑀫𑀸𑀕𑀦𑁆𑀢𑁆𑀯𑀸 𑀓𑀢𑀲𑁆𑀲. 𑀲𑀗𑁆𑀔𑀢𑀮𑀓𑁆𑀔𑀡𑀸𑀦𑀻𑀢𑀺 𑀲𑀗𑁆𑀔𑀢𑀁 𑀏𑀢𑀦𑁆𑀢𑀺 𑀲𑀜𑁆𑀚𑀸𑀦𑀦𑀓𑀸𑀭𑀡𑀸𑀦𑀺 𑀦𑀺𑀫𑀺𑀢𑁆𑀢𑀸𑀦𑀺. 𑀉𑀧𑁆𑀧𑀸𑀤𑁄𑀢𑀺 𑀚𑀸𑀢𑀺. 𑀯𑀬𑁄𑀢𑀺 𑀪𑁂𑀤𑁄. 𑀞𑀺𑀢𑀲𑁆𑀲 𑀅𑀜𑁆𑀜𑀣𑀢𑁆𑀢𑀁 𑀦𑀸𑀫 𑀚𑀭𑀸. 𑀢𑀢𑁆𑀣 𑀲𑀗𑁆𑀔𑀢𑀦𑁆𑀢𑀺 𑀢𑁂𑀪𑀽𑀫𑀓𑀸 𑀥𑀫𑁆𑀫𑀸. 𑀫𑀕𑁆𑀕𑀨𑀮𑀸𑀦𑀺 𑀧𑀦 𑀅𑀲𑀫𑁆𑀫𑀲𑀦𑀽𑀧𑀕𑀢𑁆𑀢𑀸 𑀇𑀥 𑀦 𑀓𑀣𑀻𑀬𑀦𑁆𑀢𑀺. 𑀉𑀧𑁆𑀧𑀸𑀤𑀸𑀤𑀬𑁄 𑀲𑀗𑁆𑀔𑀢𑀮𑀓𑁆𑀔𑀡𑀸 𑀦𑀸𑀫. 𑀢𑁂𑀲𑀼 𑀉𑀧𑁆𑀧𑀸𑀤𑀓𑁆𑀔𑀡𑁂 𑀉𑀧𑁆𑀧𑀸𑀤𑁄, 𑀞𑀸𑀦𑀓𑁆𑀔𑀡𑁂 𑀚𑀭𑀸, 𑀪𑁂𑀤𑀓𑁆𑀔𑀡𑁂 𑀯𑀬𑁄. 𑀮𑀓𑁆𑀔𑀡𑀁 𑀦 𑀲𑀗𑁆𑀔𑀢𑀁, 𑀲𑀗𑁆𑀔𑀢𑀁 𑀦 𑀮𑀓𑁆𑀔𑀡𑀁, 𑀮𑀓𑁆𑀔𑀡𑁂𑀦 𑀧𑀦 𑀲𑀗𑁆𑀔𑀢𑀁 𑀧𑀭𑀺𑀘𑁆𑀙𑀺𑀦𑁆𑀦𑀁. 𑀬𑀣𑀸 𑀳𑀢𑁆𑀣𑀺𑀅𑀲𑁆𑀲𑀕𑁄𑀫𑀳𑀺𑀁𑀲𑀸𑀤𑀻𑀦𑀁 𑀲𑀢𑁆𑀢𑀺𑀲𑀽𑀮𑀸𑀤𑀻𑀦𑀺 𑀲𑀜𑁆𑀚𑀸𑀦𑀦𑀮𑀓𑁆𑀔𑀡𑀸𑀦𑀺 𑀦 𑀳𑀢𑁆𑀣𑀺𑀆𑀤𑀬𑁄, 𑀦𑀧𑀺 𑀳𑀢𑁆𑀣𑀺𑀆𑀤𑀬𑁄 𑀮𑀓𑁆𑀔𑀡𑀸𑀦𑁂𑀯, 𑀮𑀓𑁆𑀔𑀡𑁂𑀳𑀺 𑀧𑀦 𑀢𑁂 ‘‘𑀅𑀲𑀼𑀓𑀲𑁆𑀲 𑀳𑀢𑁆𑀣𑀻, 𑀅𑀲𑀼𑀓𑀲𑁆𑀲 𑀅𑀲𑁆𑀲𑁄, 𑀅𑀲𑀼𑀓𑀳𑀢𑁆𑀣𑀻, 𑀅𑀲𑀼𑀓𑀅𑀲𑁆𑀲𑁄’’𑀢𑀺 𑀯𑀸 𑀧𑀜𑁆𑀜𑀸𑀬𑀦𑁆𑀢𑀺, 𑀏𑀯𑀁𑀲𑀫𑁆𑀧𑀤𑀫𑀺𑀤𑀁 𑀯𑁂𑀤𑀺𑀢𑀩𑁆𑀩𑀁.