𑁫. 𑀘𑀽𑀴𑀯𑀕𑁆𑀕𑁄

𑁧. 𑀲𑀫𑁆𑀫𑀼𑀔𑀻𑀪𑀸𑀯𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁧. 𑀧𑀜𑁆𑀘𑀫𑀲𑁆𑀲 𑀧𑀞𑀫𑁂 𑀲𑀫𑁆𑀫𑀼𑀔𑀻𑀪𑀸𑀯𑀸𑀢𑀺 𑀲𑀫𑁆𑀫𑀼𑀔𑀻𑀪𑀸𑀯𑁂𑀦, 𑀯𑀺𑀚𑁆𑀚𑀫𑀸𑀦𑀢𑀸𑀬𑀸𑀢𑀺 𑀅𑀢𑁆𑀣𑁄. 𑀧𑀲𑀯𑀢𑀻𑀢𑀺 𑀧𑀝𑀺𑀮𑀪𑀢𑀺. 𑀲𑀤𑁆𑀥𑀸𑀬 𑀲𑀫𑁆𑀫𑀼𑀔𑀻𑀪𑀸𑀯𑀸𑀢𑀺 𑀬𑀤𑀺 𑀳𑀺 𑀲𑀤𑁆𑀥𑀸 𑀦 𑀪𑀯𑁂𑀬𑁆𑀬, 𑀤𑁂𑀬𑁆𑀬𑀥𑀫𑁆𑀫𑁄 𑀦 𑀪𑀯𑁂𑀬𑁆𑀬, 𑀤𑀓𑁆𑀔𑀺𑀡𑁂𑀬𑁆𑀬𑀲𑀗𑁆𑀔𑀸𑀢𑀸 𑀧𑀝𑀺𑀕𑁆𑀕𑀸𑀳𑀓𑀧𑀼𑀕𑁆𑀕𑀮𑀸 𑀦 𑀪𑀯𑁂𑀬𑁆𑀬𑀼𑀁, 𑀓𑀣𑀁 𑀧𑀼𑀜𑁆𑀜𑀓𑀫𑁆𑀫𑀁 𑀓𑀭𑁂𑀬𑁆𑀬. 𑀢𑁂𑀲𑀁 𑀧𑀦 𑀲𑀫𑁆𑀫𑀼𑀔𑀻𑀪𑀸𑀯𑁂𑀦 𑀲𑀓𑁆𑀓𑀸 𑀓𑀸𑀢𑀼𑀦𑁆𑀢𑀺 𑀢𑀲𑁆𑀫𑀸 ‘‘𑀲𑀤𑁆𑀥𑀸𑀬 𑀲𑀫𑁆𑀫𑀼𑀔𑀻𑀪𑀸𑀯𑀸’’𑀢𑀺𑀆𑀤𑀺𑀫𑀸𑀳. 𑀏𑀢𑁆𑀣 𑀘 𑀤𑁆𑀯𑁂 𑀥𑀫𑁆𑀫𑀸 𑀲𑀼𑀮𑀪𑀸 𑀤𑁂𑀬𑁆𑀬𑀥𑀫𑁆𑀫𑀸 𑀘𑁂𑀯 𑀤𑀓𑁆𑀔𑀺𑀡𑁂𑀬𑁆𑀬𑀸 𑀘, 𑀲𑀤𑁆𑀥𑀸 𑀧𑀦 𑀤𑀼𑀮𑁆𑀮𑀪𑀸. 𑀧𑀼𑀣𑀼𑀚𑁆𑀚𑀦𑀲𑁆𑀲 𑀳𑀺 𑀲𑀤𑁆𑀥𑀸 𑀅𑀣𑀸𑀯𑀭𑀸 𑀧𑀤𑀯𑀸𑀭𑁂𑀦 𑀦𑀸𑀦𑀸 𑀳𑁄𑀢𑀺, 𑀢𑁂𑀦𑁂𑀯 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀲𑀤𑀺𑀲𑁄𑀧𑀺 𑀅𑀕𑁆𑀕𑀲𑀸𑀯𑀓𑁄 𑀧𑀸𑀝𑀺𑀪𑁄𑀕𑁄 𑀪𑀯𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀆𑀳 𑁋 ‘‘𑀤𑁆𑀯𑀺𑀦𑁆𑀦𑀁 𑀔𑁄 𑀢𑁂 𑀅𑀳𑀁, 𑀆𑀯𑀼𑀲𑁄, 𑀥𑀫𑁆𑀫𑀸𑀦𑀁 𑀧𑀸𑀝𑀺𑀪𑁄𑀕𑁄 𑀪𑁄𑀕𑀸𑀦𑀜𑁆𑀘 𑀚𑀻𑀯𑀺𑀢𑀲𑁆𑀲 𑀘, 𑀲𑀤𑁆𑀥𑀸𑀬 𑀧𑀦 𑀢𑁆𑀯𑀁𑀬𑁂𑀯 𑀧𑀸𑀝𑀺𑀪𑁄𑀕𑁄’’𑀢𑀺 (𑀉𑀤𑀸. 𑁧𑁮).

𑁨. 𑀢𑀺𑀞𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁨. 𑀤𑀼𑀢𑀺𑀬𑁂 𑀯𑀺𑀕𑀢𑀫𑀮𑀫𑀘𑁆𑀙𑁂𑀭𑁂𑀦𑀸𑀢𑀺 𑀯𑀺𑀕𑀢𑀫𑀘𑁆𑀙𑀭𑀺𑀬𑀫𑀮𑁂𑀦. 𑀫𑀼𑀢𑁆𑀢𑀘𑀸𑀕𑁄𑀢𑀺 𑀯𑀺𑀲𑁆𑀲𑀝𑁆𑀞𑀘𑀸𑀕𑁄. 𑀧𑀬𑀢𑀧𑀸𑀡𑀻𑀢𑀺 𑀥𑁄𑀢𑀳𑀢𑁆𑀣𑁄. 𑀅𑀲𑁆𑀲𑀤𑁆𑀥𑁄 𑀳𑀺 𑀲𑀢𑀓𑁆𑀔𑀢𑁆𑀢𑀼𑀁 𑀳𑀢𑁆𑀣𑁂 𑀥𑁄𑀯𑀺𑀢𑁆𑀯𑀸𑀧𑀺 𑀫𑀮𑀺𑀦𑀳𑀢𑁆𑀣𑁄𑀯 𑀳𑁄𑀢𑀺, 𑀲𑀤𑁆𑀥𑁄 𑀧𑀦 𑀤𑀸𑀦𑀸𑀪𑀺𑀭𑀢𑀢𑁆𑀢𑀸 𑀫𑀮𑀺𑀦𑀳𑀢𑁆𑀣𑁄𑀧𑀺 𑀥𑁄𑀢𑀳𑀢𑁆𑀣𑁄𑀯. 𑀯𑁄𑀲𑁆𑀲𑀕𑁆𑀕𑀭𑀢𑁄𑀢𑀺 𑀯𑁄𑀲𑁆𑀲𑀕𑁆𑀕𑀲𑀗𑁆𑀔𑀸𑀢𑁂 𑀤𑀸𑀦𑁂 𑀭𑀢𑁄. 𑀬𑀸𑀘𑀬𑁄𑀕𑁄𑀢𑀺 𑀬𑀸𑀘𑀺𑀢𑀼𑀁 𑀬𑀼𑀢𑁆𑀢𑁄, 𑀬𑀸𑀘𑀓𑁂𑀳𑀺 𑀯𑀸 𑀬𑁄𑀕𑁄 𑀅𑀲𑁆𑀲𑀸𑀢𑀺𑀧𑀺 𑀬𑀸𑀘𑀬𑁄𑀕𑁄. 𑀤𑀸𑀦𑀲𑀁𑀯𑀺𑀪𑀸𑀕𑀭𑀢𑁄𑀢𑀺 𑀤𑀸𑀦𑀁 𑀤𑀤𑀦𑁆𑀢𑁄 𑀲𑀁𑀯𑀺𑀪𑀸𑀕𑀜𑁆𑀘 𑀓𑀭𑁄𑀦𑁆𑀢𑁄 𑀤𑀸𑀦𑀲𑀁𑀯𑀺𑀪𑀸𑀕𑀭𑀢𑁄 𑀦𑀸𑀫 𑀳𑁄𑀢𑀺.

𑀤𑀲𑁆𑀲𑀦𑀓𑀸𑀫𑁄 𑀲𑀻𑀮𑀯𑀢𑀦𑁆𑀢𑀺 𑀤𑀲𑀧𑀺 𑀬𑁄𑀚𑀦𑀸𑀦𑀺 𑀯𑀻𑀲𑀫𑁆𑀧𑀺 𑀢𑀺𑀁𑀲𑀫𑁆𑀧𑀺 𑀬𑁄𑀚𑀦𑀲𑀢𑀫𑁆𑀧𑀺 𑀕𑀦𑁆𑀢𑁆𑀯𑀸 𑀲𑀻𑀮𑀲𑀫𑁆𑀧𑀦𑁆𑀦𑁂 𑀤𑀝𑁆𑀞𑀼𑀓𑀸𑀫𑁄 𑀳𑁄𑀢𑀺 𑀧𑀸𑀝𑀮𑀺𑀧𑀼𑀢𑁆𑀢𑀓𑀩𑁆𑀭𑀸𑀳𑁆𑀫𑀡𑁄 𑀯𑀺𑀬 𑀲𑀤𑁆𑀥𑀸𑀢𑀺𑀲𑁆𑀲𑀫𑀳𑀸𑀭𑀸𑀚𑀸 𑀯𑀺𑀬 𑀘. 𑀧𑀸𑀝𑀮𑀺𑀧𑀼𑀢𑁆𑀢𑀲𑁆𑀲 𑀓𑀺𑀭 𑀦𑀕𑀭𑀤𑁆𑀯𑀸𑀭𑁂 𑀲𑀸𑀮𑀸𑀬 𑀦𑀺𑀲𑀺𑀦𑁆𑀦𑀸 𑀤𑁆𑀯𑁂 𑀩𑁆𑀭𑀸𑀳𑁆𑀫𑀡𑀸 𑀓𑀸𑀴𑀯𑀮𑁆𑀮𑀺𑀫𑀡𑁆𑀟𑀧𑀯𑀸𑀲𑀺𑀫𑀳𑀸𑀦𑀸𑀕𑀢𑁆𑀣𑁂𑀭𑀲𑁆𑀲 𑀕𑀼𑀡𑀓𑀣𑀁 𑀲𑀼𑀢𑁆𑀯𑀸 ‘‘𑀅𑀫𑁆𑀳𑁂𑀳𑀺 𑀢𑀁 𑀪𑀺𑀓𑁆𑀔𑀼𑀁 𑀤𑀝𑁆𑀞𑀼𑀁 𑀯𑀝𑁆𑀝𑀢𑀻’’𑀢𑀺 𑀤𑁆𑀯𑁂𑀧𑀺 𑀚𑀦𑀸 𑀦𑀺𑀓𑁆𑀔𑀫𑀺𑀁𑀲𑀼. 𑀏𑀓𑁄 𑀅𑀦𑁆𑀢𑀭𑀸𑀫𑀕𑁆𑀕𑁂 𑀓𑀸𑀮𑀫𑀓𑀸𑀲𑀺. 𑀏𑀓𑁄 𑀲𑀫𑀼𑀤𑁆𑀤𑀢𑀻𑀭𑀁 𑀧𑀢𑁆𑀯𑀸 𑀦𑀸𑀯𑀸𑀬 𑀫𑀳𑀸𑀢𑀺𑀢𑁆𑀣𑀧𑀝𑁆𑀝𑀦𑁂 𑀑𑀭𑀼𑀬𑁆𑀳 𑀅𑀦𑀼𑀭𑀸𑀥𑀧𑀼𑀭𑀁 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀴𑀯𑀮𑁆𑀮𑀺𑀫𑀡𑁆𑀟𑀧𑁄 𑀓𑀼𑀳𑀺’’𑀦𑁆𑀢𑀺 𑀧𑀼𑀘𑁆𑀙𑀺. 𑀭𑁄𑀳𑀡𑀚𑀦𑀧𑀤𑁂𑀢𑀺. 𑀲𑁄 𑀅𑀦𑀼𑀧𑀼𑀩𑁆𑀩𑁂𑀦 𑀣𑁂𑀭𑀲𑁆𑀲 𑀯𑀲𑀦𑀝𑁆𑀞𑀸𑀦𑀁 𑀧𑀢𑁆𑀯𑀸 𑀘𑀽𑀴𑀦𑀕𑀭𑀕𑀸𑀫𑁂 𑀥𑀼𑀭𑀖𑀭𑁂 𑀦𑀺𑀯𑀸𑀲𑀁 𑀕𑀳𑁂𑀢𑁆𑀯𑀸 𑀣𑁂𑀭𑀲𑁆𑀲 𑀆𑀳𑀸𑀭𑀁 𑀲𑀫𑁆𑀧𑀸𑀤𑁂𑀢𑁆𑀯𑀸 𑀧𑀸𑀢𑁄𑀯 𑀯𑀼𑀝𑁆𑀞𑀸𑀬 𑀣𑁂𑀭𑀲𑁆𑀲 𑀯𑀲𑀦𑀝𑁆𑀞𑀸𑀦𑀁 𑀧𑀼𑀘𑁆𑀙𑀺𑀢𑁆𑀯𑀸 𑀕𑀦𑁆𑀢𑁆𑀯𑀸 𑀚𑀦𑀧𑀭𑀺𑀬𑀦𑁆𑀢𑁂 𑀞𑀺𑀢𑁄 𑀣𑁂𑀭𑀁 𑀤𑀽𑀭𑀢𑁄𑀯 𑀆𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 𑀲𑀓𑀺𑀁 𑀢𑀢𑁆𑀣𑁂𑀯 𑀞𑀺𑀢𑁄 𑀯𑀦𑁆𑀤𑀺𑀢𑁆𑀯𑀸 𑀧𑀼𑀦 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀕𑁄𑀧𑁆𑀨𑀓𑁂𑀲𑀼 𑀤𑀴𑁆𑀳𑀁 𑀕𑀳𑁂𑀢𑁆𑀯𑀸 𑀯𑀦𑁆𑀤𑀦𑁆𑀢𑁄 ‘‘𑀉𑀘𑁆𑀘𑀸, 𑀪𑀦𑁆𑀢𑁂, 𑀢𑀼𑀫𑁆𑀳𑁂’’𑀢𑀺 𑀆𑀳. 𑀣𑁂𑀭𑁄 𑀘 𑀦𑀸𑀢𑀺𑀉𑀘𑁆𑀘𑁄 𑀦𑀸𑀢𑀺𑀭𑀲𑁆𑀲𑁄 𑀧𑀫𑀸𑀡𑀬𑀼𑀢𑁆𑀢𑁄𑀯, 𑀢𑁂𑀦 𑀦𑀁 𑀧𑀼𑀦 𑀆𑀳 𑁋 ‘‘𑀦𑀸𑀢𑀺𑀉𑀘𑁆𑀘𑀸 𑀢𑀼𑀫𑁆𑀳𑁂, 𑀢𑀼𑀫𑁆𑀳𑀸𑀓𑀁 𑀧𑀦 𑀕𑀼𑀡𑀸 𑀫𑁂𑀘𑀓𑀯𑀡𑁆𑀡𑀲𑁆𑀲 𑀲𑀫𑀼𑀤𑁆𑀤𑀲𑁆𑀲 𑀫𑀢𑁆𑀣𑀓𑁂𑀦 𑀕𑀦𑁆𑀢𑁆𑀯𑀸 𑀲𑀓𑀮𑀚𑀫𑁆𑀩𑀼𑀤𑀻𑀧𑀢𑀮𑀁 𑀅𑀚𑁆𑀛𑁄𑀢𑁆𑀣𑀭𑀺𑀢𑁆𑀯𑀸 𑀕𑀢𑀸, 𑀅𑀳𑀫𑁆𑀧𑀺 𑀧𑀸𑀝𑀮𑀺𑀧𑀼𑀢𑁆𑀢𑀦𑀕𑀭𑀤𑁆𑀯𑀸𑀭𑁂 𑀦𑀺𑀲𑀺𑀦𑁆𑀦𑁄 𑀢𑀼𑀫𑁆𑀳𑀸𑀓𑀁 𑀕𑀼𑀡𑀓𑀣𑀁 𑀅𑀲𑁆𑀲𑁄𑀲𑀺’’𑀦𑁆𑀢𑀺. 𑀲𑁄 𑀣𑁂𑀭𑀲𑁆𑀲 𑀪𑀺𑀓𑁆𑀔𑀸𑀳𑀸𑀭𑀁 𑀤𑀢𑁆𑀯𑀸 𑀅𑀢𑁆𑀢𑀦𑁄 𑀢𑀺𑀘𑀻𑀯𑀭𑀁 𑀧𑀝𑀺𑀬𑀸𑀤𑁂𑀢𑁆𑀯𑀸 𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑁆𑀯𑀸 𑀢𑀲𑁆𑀲𑁄𑀯𑀸𑀤𑁂 𑀧𑀢𑀺𑀝𑁆𑀞𑀸𑀬 𑀓𑀢𑀺𑀧𑀸𑀳𑁂𑀦𑁂𑀯 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺.

𑀲𑀤𑁆𑀥𑀸𑀢𑀺𑀲𑁆𑀲𑀫𑀳𑀸𑀭𑀸𑀚𑀸𑀧𑀺, ‘‘𑀪𑀦𑁆𑀢𑁂, 𑀫𑀬𑁆𑀳𑀁 𑀯𑀦𑁆𑀤𑀺𑀢𑀩𑁆𑀩𑀬𑀼𑀢𑁆𑀢𑀓𑀁 𑀏𑀓𑀁 𑀅𑀬𑁆𑀬𑀁 𑀆𑀘𑀺𑀓𑁆𑀔𑀣𑀸’’𑀢𑀺 𑀧𑀼𑀘𑁆𑀙𑀺. 𑀪𑀺𑀓𑁆𑀔𑀽 ‘‘𑀫𑀗𑁆𑀕𑀮𑀯𑀸𑀲𑀻 𑀓𑀼𑀝𑁆𑀝𑀢𑀺𑀲𑁆𑀲𑀢𑁆𑀣𑁂𑀭𑁄’’𑀢𑀺 𑀆𑀳𑀁𑀲𑀼. 𑀭𑀸𑀚𑀸 𑀫𑀳𑀸𑀧𑀭𑀺𑀯𑀸𑀭𑁂𑀦 𑀧𑀜𑁆𑀘𑀬𑁄𑀚𑀦𑀫𑀕𑁆𑀕𑀁 𑀅𑀕𑀫𑀸𑀲𑀺. 𑀣𑁂𑀭𑁄 ‘‘𑀓𑀺𑀁 𑀲𑀤𑁆𑀤𑁄 𑀏𑀲𑁄, 𑀆𑀯𑀼𑀲𑁄’’𑀢𑀺 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀼𑀘𑁆𑀙𑀺. ‘‘𑀭𑀸𑀚𑀸, 𑀪𑀦𑁆𑀢𑁂, 𑀢𑀼𑀫𑁆𑀳𑀸𑀓𑀁 𑀤𑀲𑁆𑀲𑀦𑀢𑁆𑀣𑀸𑀬 𑀆𑀕𑀢𑁄’’𑀢𑀺. 𑀣𑁂𑀭𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀓𑀺𑀁 𑀫𑀬𑁆𑀳𑀁 𑀫𑀳𑀮𑁆𑀮𑀓𑀓𑀸𑀮𑁂 𑀭𑀸𑀚𑀕𑁂𑀳𑁂 𑀓𑀫𑁆𑀫’’𑀦𑁆𑀢𑀺 𑀤𑀺𑀯𑀸𑀝𑁆𑀞𑀸𑀦𑁂 𑀫𑀜𑁆𑀘𑁂 𑀦𑀺𑀧𑀚𑁆𑀚𑀺𑀢𑁆𑀯𑀸 𑀪𑀽𑀫𑀺𑀬𑀁 𑀮𑁂𑀔𑀁 𑀮𑀺𑀔𑀦𑁆𑀢𑁄 𑀅𑀘𑁆𑀙𑀺. 𑀭𑀸𑀚𑀸 ‘‘𑀓𑀳𑀁 𑀣𑁂𑀭𑁄’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀤𑀺𑀯𑀸𑀝𑁆𑀞𑀸𑀦𑁂’’𑀢𑀺 𑀲𑀼𑀢𑁆𑀯𑀸 𑀢𑀢𑁆𑀣 𑀕𑀘𑁆𑀙𑀦𑁆𑀢𑁄 𑀣𑁂𑀭𑀁 𑀪𑀽𑀫𑀺𑀬𑀁 𑀮𑁂𑀔𑀁 𑀮𑀺𑀔𑀦𑁆𑀢𑀁 𑀤𑀺𑀲𑁆𑀯𑀸 ‘‘𑀔𑀻𑀡𑀸𑀲𑀯𑀲𑁆𑀲 𑀦𑀸𑀫 𑀳𑀢𑁆𑀣𑀓𑀼𑀓𑁆𑀓𑀼𑀘𑁆𑀘𑀁 𑀦𑀢𑁆𑀣𑀺, 𑀦𑀸𑀬𑀁 𑀔𑀻𑀡𑀸𑀲𑀯𑁄’’𑀢𑀺 𑀅𑀯𑀦𑁆𑀤𑀺𑀢𑁆𑀯𑀸𑀯 𑀦𑀺𑀯𑀢𑁆𑀢𑀺. 𑀪𑀺𑀓𑁆𑀔𑀼𑀲𑀗𑁆𑀖𑁄 𑀣𑁂𑀭𑀁 𑀆𑀳 𑁋 ‘‘𑀪𑀦𑁆𑀢𑁂, 𑀏𑀯𑀁𑀯𑀺𑀥𑀲𑁆𑀲 𑀲𑀤𑁆𑀥𑀲𑁆𑀲 𑀧𑀲𑀦𑁆𑀦𑀲𑁆𑀲 𑀭𑀜𑁆𑀜𑁄 𑀓𑀲𑁆𑀫𑀸 𑀯𑀺𑀧𑁆𑀧𑀝𑀺𑀲𑀸𑀭𑀁 𑀓𑀭𑀺𑀢𑁆𑀣𑀸’’𑀢𑀺. ‘‘𑀆𑀯𑀼𑀲𑁄, 𑀭𑀜𑁆𑀜𑁄 𑀧𑀲𑀸𑀤𑀭𑀓𑁆𑀔𑀦𑀁 𑀦 𑀢𑀼𑀫𑁆𑀳𑀸𑀓𑀁 𑀪𑀸𑀭𑁄, 𑀫𑀳𑀮𑁆𑀮𑀓𑀢𑁆𑀣𑁂𑀭𑀲𑁆𑀲 𑀪𑀸𑀭𑁄’’𑀢𑀺 𑀯𑀢𑁆𑀯𑀸 𑀅𑀧𑀭𑀪𑀸𑀕𑁂 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀧𑀭𑀺𑀦𑀺𑀩𑁆𑀩𑀸𑀬𑀦𑁆𑀢𑁄 𑀪𑀺𑀓𑁆𑀔𑀼𑀲𑀗𑁆𑀖𑀁 𑀆𑀳 𑁋 ‘‘𑀫𑀬𑁆𑀳𑀁 𑀓𑀽𑀝𑀸𑀕𑀸𑀭𑀫𑁆𑀳𑀺 𑀅𑀜𑁆𑀜𑀫𑁆𑀧𑀺 𑀧𑀮𑁆𑀮𑀗𑁆𑀓𑀁 𑀅𑀢𑁆𑀣𑀭𑀣𑀸’’𑀢𑀺. 𑀢𑀲𑁆𑀫𑀺𑀁 𑀅𑀢𑁆𑀣𑀢𑁂 𑀣𑁂𑀭𑁄 𑁋 ‘‘𑀇𑀤𑀁 𑀓𑀽𑀝𑀸𑀕𑀸𑀭𑀁 𑀅𑀦𑁆𑀢𑀭𑁂 𑀅𑀧𑁆𑀧𑀢𑀺𑀝𑁆𑀞𑀳𑀺𑀢𑁆𑀯𑀸 𑀭𑀜𑁆𑀜𑀸 𑀤𑀺𑀝𑁆𑀞𑀓𑀸𑀮𑁂𑀬𑁂𑀯 𑀪𑀽𑀫𑀺𑀬𑀁 𑀧𑀢𑀺𑀝𑁆𑀞𑀸𑀢𑀽’’𑀢𑀺 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀺. 𑀓𑀽𑀝𑀸𑀕𑀸𑀭𑀁 𑀧𑀜𑁆𑀘𑀬𑁄𑀚𑀦𑀫𑀕𑁆𑀕𑀁 𑀆𑀓𑀸𑀲𑁂𑀦 𑀅𑀕𑀫𑀸𑀲𑀺. 𑀧𑀜𑁆𑀘𑀬𑁄𑀚𑀦𑀫𑀕𑁆𑀕𑁂 𑀥𑀚𑀁 𑀥𑀸𑀭𑁂𑀢𑀼𑀁 𑀲𑀫𑀢𑁆𑀣𑀸 𑀭𑀼𑀓𑁆𑀔𑀸 𑀥𑀚𑀧𑀕𑁆𑀕𑀳𑀺𑀢𑀸𑀯 𑀅𑀳𑁂𑀲𑀼𑀁. 𑀕𑀘𑁆𑀙𑀸𑀧𑀺 𑀕𑀼𑀫𑁆𑀩𑀸𑀧𑀺 𑀲𑀩𑁆𑀩𑁂 𑀓𑀽𑀝𑀸𑀕𑀸𑀭𑀸𑀪𑀺𑀫𑀼𑀔𑀸 𑀳𑀼𑀢𑁆𑀯𑀸 𑀅𑀝𑁆𑀞𑀁𑀲𑀼.

𑀭𑀜𑁆𑀜𑁄𑀧𑀺 𑀧𑀡𑁆𑀡𑀁 𑀧𑀳𑀺𑀡𑀺𑀁𑀲𑀼 ‘‘𑀣𑁂𑀭𑁄 𑀧𑀭𑀺𑀦𑀺𑀩𑁆𑀩𑀼𑀢𑁄, 𑀓𑀽𑀝𑀸𑀕𑀸𑀭𑀁 𑀆𑀓𑀸𑀲𑁂𑀦 𑀆𑀕𑀘𑁆𑀙𑀢𑀻’’𑀢𑀺. 𑀭𑀸𑀚𑀸 𑀦 𑀲𑀤𑁆𑀤𑀳𑀺. 𑀓𑀽𑀝𑀸𑀕𑀸𑀭𑀁 𑀆𑀓𑀸𑀲𑁂𑀦 𑀕𑀦𑁆𑀢𑁆𑀯𑀸 𑀣𑀽𑀧𑀸𑀭𑀸𑀫𑀁 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀲𑀺𑀮𑀸𑀘𑁂𑀢𑀺𑀬𑀝𑁆𑀞𑀸𑀦𑀁 𑀅𑀕𑀫𑀸𑀲𑀺. 𑀘𑁂𑀢𑀺𑀬𑀁 𑀲𑀳 𑀯𑀢𑁆𑀣𑀼𑀦𑀸 𑀉𑀧𑁆𑀧𑀢𑀺𑀢𑁆𑀯𑀸 𑀓𑀽𑀝𑀸𑀕𑀸𑀭𑀫𑀢𑁆𑀣𑀓𑁂 𑀅𑀝𑁆𑀞𑀸𑀲𑀺, 𑀲𑀸𑀥𑀼𑀓𑀸𑀭𑀲𑀳𑀲𑁆𑀲𑀸𑀦𑀺 𑀧𑀯𑀢𑁆𑀢𑀺𑀁𑀲𑀼. 𑀢𑀲𑁆𑀫𑀺𑀁 𑀔𑀡𑁂 𑀫𑀳𑀸𑀩𑁆𑀬𑀕𑁆𑀖𑀢𑁆𑀣𑁂𑀭𑁄 𑀦𑀸𑀫 𑀮𑁄𑀳𑀧𑀸𑀲𑀸𑀤𑁂 𑀲𑀢𑁆𑀢𑀫𑀓𑀽𑀝𑀸𑀕𑀸𑀭𑁂 𑀦𑀺𑀲𑀺𑀦𑁆𑀦𑁄 𑀪𑀺𑀓𑁆𑀔𑀽𑀦𑀁 𑀯𑀺𑀦𑀬𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 𑀢𑀁 𑀲𑀤𑁆𑀤𑀁 𑀲𑀼𑀢𑁆𑀯𑀸 ‘‘𑀓𑀺𑀁 𑀲𑀤𑁆𑀤𑁄 𑀏𑀲𑁄’’𑀢𑀺 𑀧𑀝𑀺𑀧𑀼𑀘𑁆𑀙𑀺. 𑀪𑀦𑁆𑀢𑁂, 𑀫𑀗𑁆𑀕𑀮𑀯𑀸𑀲𑀻 𑀓𑀼𑀝𑁆𑀝𑀢𑀺𑀲𑁆𑀲𑀢𑁆𑀣𑁂𑀭𑁄 𑀧𑀭𑀺𑀦𑀺𑀩𑁆𑀩𑀼𑀢𑁄, 𑀓𑀽𑀝𑀸𑀕𑀸𑀭𑀁 𑀧𑀜𑁆𑀘𑀬𑁄𑀚𑀦𑀫𑀕𑁆𑀕𑀁 𑀆𑀓𑀸𑀲𑁂𑀦 𑀆𑀕𑀢𑀁, 𑀢𑀢𑁆𑀣 𑀲𑁄 𑀲𑀸𑀥𑀼𑀓𑀸𑀭𑀲𑀤𑁆𑀤𑁄𑀢𑀺. 𑀆𑀯𑀼𑀲𑁄, 𑀧𑀼𑀜𑁆𑀜𑀯𑀦𑁆𑀢𑁂 𑀦𑀺𑀲𑁆𑀲𑀸𑀬 𑀲𑀓𑁆𑀓𑀸𑀭𑀁 𑀮𑀪𑀺𑀲𑁆𑀲𑀸𑀫𑀸𑀢𑀺 𑀅𑀦𑁆𑀢𑁂𑀯𑀸𑀲𑀺𑀓𑁂 𑀔𑀫𑀸𑀧𑁂𑀢𑁆𑀯𑀸 𑀆𑀓𑀸𑀲𑁂𑀦𑁂𑀯 𑀆𑀕𑀦𑁆𑀢𑁆𑀯𑀸 𑀢𑀁 𑀓𑀽𑀝𑀸𑀕𑀸𑀭𑀁 𑀧𑀯𑀺𑀲𑀺𑀢𑁆𑀯𑀸 𑀤𑀼𑀢𑀺𑀬𑀫𑀜𑁆𑀘𑁂 𑀦𑀺𑀲𑀻𑀤𑀺𑀢𑁆𑀯𑀸 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀧𑀭𑀺𑀦𑀺𑀩𑁆𑀩𑀸𑀬𑀺. 𑀭𑀸𑀚𑀸 𑀕𑀦𑁆𑀥𑀧𑀼𑀧𑁆𑀨𑀘𑀼𑀡𑁆𑀡𑀸𑀦𑀺 𑀆𑀤𑀸𑀬 𑀕𑀦𑁆𑀢𑁆𑀯𑀸 𑀆𑀓𑀸𑀲𑁂 𑀞𑀺𑀢𑀁 𑀓𑀽𑀝𑀸𑀕𑀸𑀭𑀁 𑀤𑀺𑀲𑁆𑀯𑀸 𑀓𑀽𑀝𑀸𑀕𑀸𑀭𑀁 𑀧𑀽𑀚𑁂𑀲𑀺. 𑀢𑀲𑁆𑀫𑀺𑀁 𑀔𑀡𑁂 𑀓𑀽𑀝𑀸𑀕𑀸𑀭𑀁 𑀑𑀢𑀭𑀺𑀢𑁆𑀯𑀸 𑀧𑀣𑀯𑀺𑀬𑀁 𑀧𑀢𑀺𑀝𑁆𑀞𑀺𑀢𑀁. 𑀭𑀸𑀚𑀸 𑀫𑀳𑀸𑀲𑀓𑁆𑀓𑀸𑀭𑁂𑀦 𑀲𑀭𑀻𑀭𑀓𑀺𑀘𑁆𑀘𑀁 𑀓𑀸𑀭𑁂𑀢𑁆𑀯𑀸 𑀥𑀸𑀢𑀼𑀬𑁄 𑀕𑀳𑁂𑀢𑁆𑀯𑀸 𑀘𑁂𑀢𑀺𑀬𑀁 𑀅𑀓𑀸𑀲𑀺. 𑀏𑀯𑀭𑀽𑀧𑀸 𑀲𑀻𑀮𑀯𑀦𑁆𑀢𑀸𑀦𑀁 𑀤𑀲𑁆𑀲𑀦𑀓𑀸𑀫𑀸 𑀦𑀸𑀫 𑀳𑁄𑀦𑁆𑀢𑀺.

𑀲𑀤𑁆𑀥𑀫𑁆𑀫𑀁 𑀲𑁄𑀢𑀼𑀫𑀺𑀘𑁆𑀙𑀢𑀻𑀢𑀺 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑀁 𑀲𑀤𑁆𑀥𑀫𑁆𑀫𑀁 𑀲𑁄𑀢𑀼𑀓𑀸𑀫𑁄 𑀳𑁄𑀢𑀺 𑀧𑀺𑀡𑁆𑀟𑀧𑀸𑀢𑀺𑀓𑀢𑁆𑀣𑁂𑀭𑀸𑀤𑀬𑁄 𑀯𑀺𑀬. 𑀕𑀗𑁆𑀕𑀸𑀯𑀦𑀯𑀸𑀮𑀺𑀅𑀗𑁆𑀕𑀡𑀫𑁆𑀳𑀺 𑀓𑀺𑀭 𑀢𑀺𑀁𑀲 𑀪𑀺𑀓𑁆𑀔𑀽 𑀯𑀲𑁆𑀲𑀁 𑀉𑀧𑀕𑀢𑀸 𑀅𑀦𑁆𑀯𑀤𑁆𑀥𑀫𑀸𑀲𑀁 𑀉𑀧𑁄𑀲𑀣𑀤𑀺𑀯𑀲𑁂 𑀘𑀢𑀼𑀧𑀘𑁆𑀘𑀬𑀲𑀦𑁆𑀢𑁄𑀲𑀪𑀸𑀯𑀦𑀸𑀭𑀸𑀫𑀫𑀳𑀸𑀅𑀭𑀺𑀬𑀯𑀁𑀲𑀜𑁆𑀘 (𑀅. 𑀦𑀺. 𑁪.𑁨𑁮) 𑀓𑀣𑁂𑀦𑁆𑀢𑀺. 𑀏𑀓𑁄 𑀧𑀺𑀡𑁆𑀟𑀧𑀸𑀢𑀺𑀓𑀢𑁆𑀣𑁂𑀭𑁄 𑀧𑀘𑁆𑀙𑀸𑀪𑀸𑀕𑁂𑀦 𑀆𑀕𑀦𑁆𑀢𑁆𑀯𑀸 𑀧𑀝𑀺𑀘𑁆𑀙𑀦𑁆𑀦𑀝𑁆𑀞𑀸𑀦𑁂 𑀦𑀺𑀲𑀻𑀤𑀺. 𑀅𑀣 𑀦𑀁 𑀏𑀓𑁄 𑀕𑁄𑀦𑀲𑁄 𑀚𑀗𑁆𑀖𑀧𑀺𑀡𑁆𑀟𑀺𑀫𑀁𑀲𑀁 𑀲𑀡𑁆𑀟𑀸𑀲𑁂𑀦 𑀕𑀡𑁆𑀳𑀦𑁆𑀢𑁄 𑀯𑀺𑀬 𑀟𑀁𑀲𑀺. 𑀣𑁂𑀭𑁄 𑀑𑀮𑁄𑀓𑁂𑀦𑁆𑀢𑁄 𑀕𑁄𑀦𑀲𑀁 𑀤𑀺𑀲𑁆𑀯𑀸 ‘‘𑀅𑀚𑁆𑀚 𑀥𑀫𑁆𑀫𑀲𑁆𑀲𑀯𑀦𑀦𑁆𑀢𑀭𑀸𑀬𑀁 𑀦 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀕𑁄𑀦𑀲𑀁 𑀕𑀳𑁂𑀢𑁆𑀯𑀸 𑀣𑀯𑀺𑀓𑀸𑀬 𑀧𑀓𑁆𑀔𑀺𑀧𑀺𑀢𑁆𑀯𑀸 𑀣𑀯𑀺𑀓𑀸𑀫𑀼𑀔𑀁 𑀩𑀦𑁆𑀥𑀺𑀢𑁆𑀯𑀸 𑀅𑀯𑀺𑀤𑀽𑀭𑁂 𑀞𑀸𑀦𑁂 𑀞𑀧𑁂𑀢𑁆𑀯𑀸 𑀥𑀫𑁆𑀫𑀁 𑀲𑀼𑀡𑀦𑁆𑀢𑁄𑀯 𑀦𑀺𑀲𑀻𑀤𑀺. 𑀅𑀭𑀼𑀡𑀼𑀕𑁆𑀕𑀫𑀦𑀜𑁆𑀘 𑀯𑀺𑀲𑀁 𑀯𑀺𑀓𑁆𑀔𑀫𑁆𑀪𑁂𑀢𑁆𑀯𑀸 𑀣𑁂𑀭𑀲𑁆𑀲 𑀢𑀺𑀡𑁆𑀡𑀁 𑀨𑀮𑀸𑀦𑀁 𑀧𑀸𑀧𑀼𑀡𑀦𑀜𑁆𑀘 𑀯𑀺𑀲𑀲𑁆𑀲 𑀤𑀝𑁆𑀞𑀝𑁆𑀞𑀸𑀦𑁂𑀦𑁂𑀯 𑀑𑀢𑀭𑀺𑀢𑁆𑀯𑀸 𑀧𑀣𑀯𑀺𑀧𑀯𑀺𑀲𑀦𑀜𑁆𑀘 𑀥𑀫𑁆𑀫𑀓𑀣𑀺𑀓𑀢𑁆𑀣𑁂𑀭𑀲𑁆𑀲 𑀥𑀫𑁆𑀫𑀓𑀣𑀸𑀦𑀺𑀝𑁆𑀞𑀸𑀧𑀦𑀜𑁆𑀘 𑀏𑀓𑀓𑁆𑀔𑀡𑁂𑀬𑁂𑀯 𑀅𑀳𑁄𑀲𑀺. 𑀢𑀢𑁄 𑀣𑁂𑀭𑁄 𑀆𑀳 𑁋 ‘‘𑀆𑀯𑀼𑀲𑁄 𑀏𑀓𑁄 𑀫𑁂 𑀘𑁄𑀭𑁄 𑀕𑀳𑀺𑀢𑁄’’𑀢𑀺 𑀣𑀯𑀺𑀓𑀁 𑀫𑀼𑀜𑁆𑀘𑀺𑀢𑁆𑀯𑀸 𑀕𑁄𑀦𑀲𑀁 𑀯𑀺𑀲𑁆𑀲𑀚𑁆𑀚𑁂𑀲𑀺. 𑀪𑀺𑀓𑁆𑀔𑀽 𑀤𑀺𑀲𑁆𑀯𑀸 ‘‘𑀓𑀸𑀬 𑀯𑁂𑀮𑀸𑀬 𑀤𑀝𑁆𑀞𑀢𑁆𑀣, 𑀪𑀦𑁆𑀢𑁂’’𑀢𑀺 𑀧𑀼𑀘𑁆𑀙𑀺𑀁𑀲𑀼. 𑀳𑀺𑀬𑁆𑀬𑁄 𑀲𑀸𑀬𑀦𑁆𑀳𑀲𑀫𑀬𑁂, 𑀆𑀯𑀼𑀲𑁄𑀢𑀺. 𑀓𑀲𑁆𑀫𑀸, 𑀪𑀦𑁆𑀢𑁂, 𑀏𑀯𑀁 𑀪𑀸𑀭𑀺𑀬𑀁 𑀓𑀫𑁆𑀫𑀁 𑀓𑀭𑀺𑀢𑁆𑀣𑀸𑀢𑀺. 𑀆𑀯𑀼𑀲𑁄, 𑀲𑀘𑀸𑀳𑀁 𑀤𑀻𑀖𑀚𑀸𑀢𑀺𑀓𑁂𑀦 𑀤𑀝𑁆𑀞𑁄𑀢𑀺 𑀯𑀤𑁂𑀬𑁆𑀬𑀁, 𑀦𑀬𑀺𑀫𑀁 𑀏𑀢𑁆𑀢𑀓𑀁 𑀆𑀦𑀺𑀲𑀁𑀲𑀁 𑀮𑀪𑁂𑀬𑁆𑀬𑀦𑁆𑀢𑀺. 𑀇𑀤𑀁 𑀢𑀸𑀯 𑀧𑀺𑀡𑁆𑀟𑀧𑀸𑀢𑀺𑀓𑀢𑁆𑀣𑁂𑀭𑀲𑁆𑀲 𑀯𑀢𑁆𑀣𑀼.

𑀤𑀻𑀖𑀯𑀸𑀧𑀺𑀬𑀫𑁆𑀧𑀺 ‘‘𑀫𑀳𑀸𑀚𑀸𑀢𑀓𑀪𑀸𑀡𑀓𑀢𑁆𑀣𑁂𑀭𑁄 𑀕𑀸𑀣𑀸𑀲𑀳𑀲𑁆𑀲𑀁 𑀫𑀳𑀸𑀯𑁂𑀲𑁆𑀲𑀦𑁆𑀢𑀭𑀁 𑀓𑀣𑁂𑀲𑁆𑀲𑀢𑀻’’𑀢𑀺 𑀢𑀺𑀲𑁆𑀲𑀫𑀳𑀸𑀕𑀸𑀫𑁂 𑀢𑀺𑀲𑁆𑀲𑀫𑀳𑀸𑀯𑀺𑀳𑀸𑀭𑀯𑀸𑀲𑀻 𑀏𑀓𑁄 𑀤𑀳𑀭𑁄 𑀲𑀼𑀢𑁆𑀯𑀸 𑀢𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀏𑀓𑀸𑀳𑁂𑀦𑁂𑀯 𑀦𑀯𑀬𑁄𑀚𑀦𑀫𑀕𑁆𑀕𑀁 𑀆𑀕𑀢𑁄. 𑀢𑀲𑁆𑀫𑀺𑀁𑀬𑁂𑀯 𑀔𑀡𑁂 𑀣𑁂𑀭𑁄 𑀥𑀫𑁆𑀫𑀓𑀣𑀁 𑀆𑀭𑀪𑀺. 𑀤𑀳𑀭𑁄 𑀤𑀽𑀭𑀫𑀕𑁆𑀕𑀸𑀕𑀫𑀦𑁂𑀦 𑀲𑀜𑁆𑀚𑀸𑀢𑀓𑀸𑀬𑀤𑀭𑀣𑀢𑁆𑀢𑀸 𑀧𑀝𑁆𑀞𑀸𑀦𑀕𑀸𑀣𑀸𑀬 𑀲𑀤𑁆𑀥𑀺𑀁 𑀅𑀯𑀲𑀸𑀦𑀕𑀸𑀣𑀁𑀬𑁂𑀯 𑀯𑀯𑀢𑁆𑀣𑀧𑁂𑀲𑀺. 𑀢𑀢𑁄 𑀣𑁂𑀭𑀲𑁆𑀲 ‘‘𑀇𑀤𑀫𑀯𑁄𑀘𑀸’’𑀢𑀺 𑀯𑀢𑁆𑀯𑀸 𑀉𑀝𑁆𑀞𑀸𑀬 𑀕𑀫𑀦𑀓𑀸𑀮𑁂 ‘‘𑀫𑀬𑁆𑀳𑀁 𑀆𑀕𑀫𑀦𑀓𑀫𑁆𑀫𑀁 𑀫𑁄𑀖𑀁 𑀚𑀸𑀢’’𑀦𑁆𑀢𑀺 𑀭𑁄𑀤𑀫𑀸𑀦𑁄 𑀅𑀝𑁆𑀞𑀸𑀲𑀺. 𑀏𑀓𑁄 𑀫𑀦𑀼𑀲𑁆𑀲𑁄 𑀢𑀁 𑀓𑀣𑀁 𑀲𑀼𑀢𑁆𑀯𑀸 𑀕𑀦𑁆𑀢𑁆𑀯𑀸 𑀣𑁂𑀭𑀲𑁆𑀲 𑀆𑀭𑁄𑀘𑁂𑀲𑀺, ‘‘𑀪𑀦𑁆𑀢𑁂, ‘𑀢𑀼𑀫𑁆𑀳𑀸𑀓𑀁 𑀥𑀫𑁆𑀫𑀓𑀣𑀁 𑀲𑁄𑀲𑁆𑀲𑀸𑀫𑀻’𑀢𑀺 𑀏𑀓𑁄 𑀤𑀳𑀭𑀪𑀺𑀓𑁆𑀔𑀼 𑀢𑀺𑀲𑁆𑀲𑀫𑀳𑀸𑀯𑀺𑀳𑀸𑀭𑀸 𑀆𑀕𑀢𑁄, 𑀲𑁄 ‘𑀓𑀸𑀬𑀤𑀭𑀣𑀪𑀸𑀯𑁂𑀦 𑀫𑁂 𑀆𑀕𑀫𑀦𑀁 𑀫𑁄𑀖𑀁 𑀚𑀸𑀢’𑀦𑁆𑀢𑀺 𑀭𑁄𑀤𑀫𑀸𑀦𑁄 𑀞𑀺𑀢𑁄’’𑀢𑀺. 𑀕𑀘𑁆𑀙𑀣 𑀲𑀜𑁆𑀜𑀸𑀧𑁂𑀣 𑀦𑀁 ‘‘𑀧𑀼𑀦 𑀲𑁆𑀯𑁂 𑀓𑀣𑁂𑀲𑁆𑀲𑀸𑀫𑀸’’𑀢𑀺. 𑀲𑁄 𑀧𑀼𑀦𑀤𑀺𑀯𑀲𑁂 𑀣𑁂𑀭𑀲𑁆𑀲 𑀥𑀫𑁆𑀫𑀓𑀣𑀁 𑀲𑀼𑀢𑁆𑀯𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀧𑀸𑀧𑀼𑀡𑀺.

𑀅𑀧𑀭𑀸𑀧𑀺 𑀉𑀮𑁆𑀮𑀓𑁄𑀮𑀺𑀓𑀡𑁆𑀡𑀺𑀯𑀸𑀲𑀺𑀓𑀸 𑀏𑀓𑀸 𑀇𑀢𑁆𑀣𑀻 𑀧𑀼𑀢𑁆𑀢𑀓𑀁 𑀧𑀸𑀬𑀫𑀸𑀦𑀸 ‘‘𑀤𑀻𑀖𑀪𑀸𑀡𑀓𑀫𑀳𑀸𑀅𑀪𑀬𑀢𑁆𑀣𑁂𑀭𑁄 𑀦𑀸𑀫 𑀅𑀭𑀺𑀬𑀯𑀁𑀲𑀧𑀝𑀺𑀧𑀤𑀁 𑀓𑀣𑁂𑀢𑀻’’𑀢𑀺 𑀲𑀼𑀢𑁆𑀯𑀸 𑀧𑀜𑁆𑀘𑀬𑁄𑀚𑀦𑀫𑀕𑁆𑀕𑀁 𑀕𑀦𑁆𑀢𑁆𑀯𑀸 𑀤𑀺𑀯𑀸𑀓𑀣𑀺𑀓𑀢𑁆𑀣𑁂𑀭𑀲𑁆𑀲 𑀦𑀺𑀲𑀺𑀦𑁆𑀦𑀓𑀸𑀮𑁂𑀬𑁂𑀯 𑀯𑀺𑀳𑀸𑀭𑀁 𑀧𑀯𑀺𑀲𑀺𑀢𑁆𑀯𑀸 𑀪𑀽𑀫𑀺𑀬𑀁 𑀧𑀼𑀢𑁆𑀢𑀁 𑀦𑀺𑀧𑀚𑁆𑀚𑀸𑀧𑁂𑀢𑁆𑀯𑀸 𑀤𑀺𑀯𑀸𑀓𑀣𑀺𑀓𑀢𑁆𑀣𑁂𑀭𑀲𑁆𑀲 𑀞𑀺𑀢𑀓𑀸𑀯 𑀥𑀫𑁆𑀫𑀁 𑀅𑀲𑁆𑀲𑁄𑀲𑀺. 𑀲𑀭𑀪𑀸𑀡𑀓𑁂 𑀣𑁂𑀭𑁂 𑀉𑀝𑁆𑀞𑀺𑀢𑁂 𑀤𑀻𑀖𑀪𑀸𑀡𑀓𑀫𑀳𑀸𑀅𑀪𑀬𑀢𑁆𑀣𑁂𑀭𑁄 𑀘𑀢𑀼𑀧𑀘𑁆𑀘𑀬𑀲𑀦𑁆𑀢𑁄𑀲𑀪𑀸𑀯𑀦𑀸𑀭𑀸𑀫𑀫𑀳𑀸𑀅𑀭𑀺𑀬𑀯𑀁𑀲𑀁 𑀆𑀭𑀪𑀺. 𑀲𑀸 𑀞𑀺𑀢𑀓𑀸𑀯 𑀧𑀕𑁆𑀕𑀡𑁆𑀳𑀸𑀢𑀺. 𑀣𑁂𑀭𑁄 𑀢𑀬𑁄 𑀏𑀯 𑀧𑀘𑁆𑀘𑀬𑁂 𑀓𑀣𑁂𑀢𑁆𑀯𑀸 𑀉𑀝𑁆𑀞𑀸𑀦𑀸𑀓𑀸𑀭𑀁 𑀅𑀓𑀸𑀲𑀺. 𑀲𑀸 𑀉𑀧𑀸𑀲𑀺𑀓𑀸 𑀆𑀳 𑁋 ‘‘𑀅𑀬𑁆𑀬𑁄, ‘𑀅𑀭𑀺𑀬𑀯𑀁𑀲𑀁 𑀓𑀣𑁂𑀲𑁆𑀲𑀸𑀫𑀻’𑀢𑀺 𑀲𑀺𑀦𑀺𑀤𑁆𑀥𑀪𑁄𑀚𑀦𑀁 𑀪𑀼𑀜𑁆𑀚𑀺𑀢𑁆𑀯𑀸 𑀫𑀥𑀼𑀭𑀧𑀸𑀦𑀓𑀁 𑀧𑀺𑀯𑀺𑀢𑁆𑀯𑀸 𑀬𑀝𑁆𑀞𑀺𑀫𑀥𑀼𑀓𑀢𑁂𑀮𑀸𑀤𑀻𑀳𑀺 𑀪𑁂𑀲𑀚𑁆𑀚𑀁 𑀓𑀢𑁆𑀯𑀸 𑀓𑀣𑁂𑀢𑀼𑀁 𑀬𑀼𑀢𑁆𑀢𑀝𑁆𑀞𑀸𑀦𑁂𑀬𑁂𑀯 𑀉𑀝𑁆𑀞𑀳𑀢𑀻’’𑀢𑀺. 𑀣𑁂𑀭𑁄 ‘‘𑀲𑀸𑀥𑀼, 𑀪𑀕𑀺𑀦𑀻’’𑀢𑀺 𑀯𑀢𑁆𑀯𑀸 𑀉𑀧𑀭𑀺 𑀪𑀸𑀯𑀦𑀸𑀭𑀸𑀫𑀁 𑀧𑀝𑁆𑀞𑀧𑁂𑀲𑀺. 𑀅𑀭𑀼𑀡𑀼𑀕𑁆𑀕𑀫𑀦𑀜𑁆𑀘 𑀣𑁂𑀭𑀲𑁆𑀲 ‘‘𑀇𑀤𑀫𑀯𑁄𑀘𑀸’’𑀢𑀺 𑀯𑀘𑀦𑀜𑁆𑀘 𑀉𑀧𑀸𑀲𑀺𑀓𑀸𑀬 𑀲𑁄𑀢𑀸𑀧𑀢𑁆𑀢𑀺𑀨𑀮𑀼𑀧𑁆𑀧𑀢𑁆𑀢𑀺 𑀘 𑀏𑀓𑀓𑁆𑀔𑀡𑁂𑀬𑁂𑀯 𑀅𑀳𑁄𑀲𑀺.

𑀅𑀧𑀭𑀸𑀧𑀺 𑀓𑀴𑀫𑁆𑀧𑀭𑀯𑀸𑀲𑀺𑀓𑀸 𑀇𑀢𑁆𑀣𑀻 𑀅𑀗𑁆𑀓𑁂𑀦 𑀧𑀼𑀢𑁆𑀢𑀁 𑀆𑀤𑀸𑀬 ‘‘𑀥𑀫𑁆𑀫𑀁 𑀲𑁄𑀲𑁆𑀲𑀸𑀫𑀻’’𑀢𑀺 𑀘𑀺𑀢𑁆𑀢𑀮𑀧𑀩𑁆𑀩𑀢𑀁 𑀕𑀦𑁆𑀢𑁆𑀯𑀸 𑀏𑀓𑀁 𑀭𑀼𑀓𑁆𑀔𑀁 𑀦𑀺𑀲𑁆𑀲𑀸𑀬 𑀤𑀸𑀭𑀓𑀁 𑀦𑀺𑀧𑀚𑁆𑀚𑀸𑀧𑁂𑀢𑁆𑀯𑀸 𑀲𑀬𑀁 𑀞𑀺𑀢𑀓𑀸𑀯 𑀥𑀫𑁆𑀫𑀁 𑀲𑀼𑀡𑀸𑀢𑀺. 𑀭𑀢𑁆𑀢𑀺𑀪𑀸𑀕𑀲𑀫𑀦𑀦𑁆𑀢𑀭𑁂 𑀏𑀓𑁄 𑀤𑀻𑀖𑀚𑀸𑀢𑀺𑀓𑁄 𑀢𑀲𑁆𑀲𑀸 𑀧𑀲𑁆𑀲𑀦𑁆𑀢𑀺𑀬𑀸𑀬𑁂𑀯 𑀲𑀫𑀻𑀧𑁂 𑀦𑀺𑀧𑀦𑁆𑀦𑀤𑀸𑀭𑀓𑀁 𑀘𑀢𑀽𑀳𑀺 𑀤𑀸𑀞𑀸𑀳𑀺 𑀟𑀁𑀲𑀺𑀢𑁆𑀯𑀸 𑀅𑀕𑀫𑀸𑀲𑀺. 𑀲𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀲𑀘𑀸𑀳𑀁 ‘𑀧𑀼𑀢𑁆𑀢𑁄 𑀫𑁂 𑀲𑀧𑁆𑀧𑁂𑀦 𑀤𑀝𑁆𑀞𑁄’𑀢𑀺 𑀯𑀓𑁆𑀔𑀸𑀫𑀺, 𑀥𑀫𑁆𑀫𑀲𑁆𑀲 𑀅𑀦𑁆𑀢𑀭𑀸𑀬𑁄 𑀪𑀯𑀺𑀲𑁆𑀲𑀢𑀺. 𑀅𑀦𑁂𑀓𑀓𑁆𑀔𑀢𑁆𑀢𑀼𑀁 𑀔𑁄 𑀧𑀦 𑀫𑁂 𑀅𑀬𑀁 𑀲𑀁𑀲𑀸𑀭𑀯𑀝𑁆𑀝𑁂 𑀯𑀝𑁆𑀝𑀦𑁆𑀢𑀺𑀬𑀸 𑀧𑀼𑀢𑁆𑀢𑁄 𑀅𑀳𑁄𑀲𑀺, 𑀥𑀫𑁆𑀫𑀫𑁂𑀯 𑀘𑀭𑀺𑀲𑁆𑀲𑀸𑀫𑀻’’𑀢𑀺 𑀢𑀺𑀬𑀸𑀫𑀭𑀢𑁆𑀢𑀺𑀁 𑀞𑀺𑀢𑀓𑀸𑀯 𑀥𑀫𑁆𑀫𑀁 𑀧𑀕𑁆𑀕𑀡𑁆𑀳𑀺𑀢𑁆𑀯𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀸𑀬 𑀅𑀭𑀼𑀡𑁂 𑀉𑀕𑁆𑀕𑀢𑁂 𑀲𑀘𑁆𑀘𑀓𑀺𑀭𑀺𑀬𑀸𑀬 𑀧𑀼𑀢𑁆𑀢𑀲𑁆𑀲 𑀯𑀺𑀲𑀁 𑀦𑀺𑀫𑁆𑀫𑀣𑁂𑀢𑁆𑀯𑀸 𑀧𑀼𑀢𑁆𑀢𑀁 𑀕𑀳𑁂𑀢𑁆𑀯𑀸 𑀕𑀢𑀸. 𑀏𑀯𑀭𑀽𑀧𑀸 𑀧𑀼𑀕𑁆𑀕𑀮𑀸 𑀥𑀫𑁆𑀫𑀁 𑀲𑁄𑀢𑀼𑀓𑀸𑀫𑀸 𑀦𑀸𑀫 𑀳𑁄𑀦𑁆𑀢𑀺.

𑁩. 𑀅𑀢𑁆𑀣𑀯𑀲𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁩. 𑀢𑀢𑀺𑀬𑁂 𑀢𑀬𑁄, 𑀪𑀺𑀓𑁆𑀔𑀯𑁂, 𑀅𑀢𑁆𑀣𑀯𑀲𑁂 𑀲𑀫𑁆𑀧𑀲𑁆𑀲𑀫𑀸𑀦𑁂𑀦𑀸𑀢𑀺 𑀢𑀬𑁄 𑀅𑀢𑁆𑀣𑁂 𑀢𑀻𑀡𑀺 𑀓𑀸𑀭𑀡𑀸𑀦𑀺 𑀧𑀲𑁆𑀲𑀦𑁆𑀢𑁂𑀦. 𑀅𑀮𑀫𑁂𑀯𑀸𑀢𑀺 𑀬𑀼𑀢𑁆𑀢𑀫𑁂𑀯. 𑀬𑁄 𑀥𑀫𑁆𑀫𑀁 𑀤𑁂𑀲𑁂𑀢𑀻𑀢𑀺 𑀬𑁄 𑀧𑀼𑀕𑁆𑀕𑀮𑁄 𑀘𑀢𑀼𑀲𑀘𑁆𑀘𑀥𑀫𑁆𑀫𑀁 𑀧𑀓𑀸𑀲𑁂𑀢𑀺. 𑀅𑀢𑁆𑀣𑀧𑁆𑀧𑀝𑀺𑀲𑀁𑀯𑁂𑀤𑀻𑀢𑀺 𑀅𑀝𑁆𑀞𑀓𑀣𑀁 𑀜𑀸𑀡𑁂𑀦 𑀧𑀝𑀺𑀲𑀁𑀯𑁂𑀤𑀻. 𑀥𑀫𑁆𑀫𑀧𑁆𑀧𑀝𑀺𑀲𑀁𑀯𑁂𑀤𑀻𑀢𑀺 𑀧𑀸𑀴𑀺𑀥𑀫𑁆𑀫𑀁 𑀧𑀝𑀺𑀲𑀁𑀯𑁂𑀤𑀻.

𑁪. 𑀓𑀣𑀸𑀧𑀯𑀢𑁆𑀢𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁪. 𑀘𑀢𑀼𑀢𑁆𑀣𑁂 𑀞𑀸𑀦𑁂𑀳𑀻𑀢𑀺 𑀓𑀸𑀭𑀡𑁂𑀳𑀺. 𑀧𑀯𑀢𑁆𑀢𑀺𑀦𑀻𑀢𑀺 𑀅𑀧𑁆𑀧𑀝𑀺𑀳𑀢𑀸 𑀦𑀺𑀬𑁆𑀬𑀸𑀦𑀺𑀓𑀸.

𑁫. 𑀧𑀡𑁆𑀟𑀺𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁫. 𑀧𑀜𑁆𑀘𑀫𑁂 𑀧𑀡𑁆𑀟𑀺𑀢𑀧𑀜𑁆𑀜𑀢𑁆𑀢𑀸𑀦𑀻𑀢𑀺 𑀧𑀡𑁆𑀟𑀺𑀢𑁂𑀳𑀺 𑀧𑀜𑁆𑀜𑀢𑁆𑀢𑀸𑀦𑀺 𑀓𑀣𑀺𑀢𑀸𑀦𑀺 𑀧𑀲𑀢𑁆𑀣𑀸𑀦𑀺. 𑀲𑀧𑁆𑀧𑀼𑀭𑀺𑀲𑀧𑀜𑁆𑀜𑀢𑁆𑀢𑀸𑀦𑀻𑀢𑀺 𑀲𑀧𑁆𑀧𑀼𑀭𑀺𑀲𑁂𑀳𑀺 𑀫𑀳𑀸𑀧𑀼𑀭𑀺𑀲𑁂𑀳𑀺 𑀧𑀜𑁆𑀜𑀢𑁆𑀢𑀸𑀦𑀺 𑀓𑀣𑀺𑀢𑀸𑀦𑀺 𑀧𑀲𑀢𑁆𑀣𑀸𑀦𑀺. 𑀅𑀳𑀺𑀁𑀲𑀸𑀢𑀺 𑀓𑀭𑀼𑀡𑀸 𑀘𑁂𑀯 𑀓𑀭𑀼𑀡𑀸𑀧𑀼𑀩𑁆𑀩𑀪𑀸𑀕𑁄 𑀘. 𑀲𑀁𑀬𑀫𑁄𑀢𑀺 𑀲𑀻𑀮𑀲𑀁𑀬𑀫𑁄. 𑀤𑀫𑁄𑀢𑀺 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑁄, 𑀉𑀧𑁄𑀲𑀣𑀯𑀲𑁂𑀦 𑀯𑀸 𑀅𑀢𑁆𑀢𑀤𑀫𑀦𑀁, 𑀧𑀼𑀡𑁆𑀡𑁄𑀯𑀸𑀤𑁂 (𑀫. 𑀦𑀺. 𑁩.𑁩𑁯𑁫 𑀆𑀤𑀬𑁄; 𑀲𑀁. 𑀦𑀺. 𑁪.𑁮𑁮 𑀆𑀤𑀬𑁄) 𑀤𑀫𑁄𑀢𑀺 𑀯𑀼𑀢𑁆𑀢𑀸 𑀔𑀦𑁆𑀢𑀺𑀧𑀺 𑀆𑀴𑀯𑀓𑁂 (𑀲𑀁. 𑀦𑀺. 𑁧.𑁨𑁪𑁬; 𑀲𑀼. 𑀦𑀺. 𑁧𑁮𑁩 𑀆𑀤𑀬𑁄) 𑀯𑀼𑀢𑁆𑀢𑀸 𑀧𑀜𑁆𑀜𑀸𑀧𑀺 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀯𑀝𑁆𑀝𑀢𑀺𑀬𑁂𑀯. 𑀫𑀸𑀢𑀸𑀧𑀺𑀢𑀼 𑀉𑀧𑀝𑁆𑀞𑀸𑀦𑀦𑁆𑀢𑀺 𑀫𑀸𑀢𑀸𑀧𑀺𑀢𑀽𑀦𑀁 𑀭𑀓𑁆𑀔𑀦𑀁 𑀕𑁄𑀧𑀦𑀁 𑀧𑀝𑀺𑀚𑀕𑁆𑀕𑀦𑀁. 𑀲𑀦𑁆𑀢𑀸𑀦𑀦𑁆𑀢𑀺 𑀅𑀜𑁆𑀜𑀢𑁆𑀣 𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑀅𑀭𑀺𑀬𑀲𑀸𑀯𑀓𑀸 𑀲𑀦𑁆𑀢𑁄 𑀦𑀸𑀫, 𑀇𑀥 𑀧𑀦 𑀫𑀸𑀢𑀸𑀧𑀺𑀢𑀼𑀉𑀧𑀝𑁆𑀞𑀸𑀓𑀸 𑀅𑀥𑀺𑀧𑁆𑀧𑁂𑀢𑀸. 𑀢𑀲𑁆𑀫𑀸 𑀉𑀢𑁆𑀢𑀫𑀝𑁆𑀞𑁂𑀦 𑀲𑀦𑁆𑀢𑀸𑀦𑀁, 𑀲𑁂𑀝𑁆𑀞𑀘𑀭𑀺𑀬𑀝𑁆𑀞𑁂𑀦 𑀩𑁆𑀭𑀳𑁆𑀫𑀘𑀸𑀭𑀻𑀦𑀁. 𑀇𑀤𑀁 𑀫𑀸𑀢𑀸𑀧𑀺𑀢𑀼𑀉𑀧𑀝𑁆𑀞𑀸𑀦𑀁 𑀲𑀩𑁆𑀪𑀺 𑀉𑀧𑀜𑁆𑀜𑀸𑀢𑀦𑁆𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀲𑀢𑀁 𑀏𑀢𑀸𑀦𑀺 𑀞𑀸𑀦𑀸𑀦𑀻𑀢𑀺 𑀲𑀦𑁆𑀢𑀸𑀦𑀁 𑀉𑀢𑁆𑀢𑀫𑀧𑀼𑀭𑀺𑀲𑀸𑀦𑀁 𑀏𑀢𑀸𑀦𑀺 𑀞𑀸𑀦𑀸𑀦𑀺 𑀓𑀸𑀭𑀡𑀸𑀦𑀺. 𑀅𑀭𑀺𑀬𑁄 𑀤𑀲𑁆𑀲𑀦𑀲𑀫𑁆𑀧𑀦𑁆𑀦𑁄𑀢𑀺 𑀇𑀥 𑀇𑀫𑁂𑀲𑀁𑀬𑁂𑀯 𑀢𑀺𑀡𑁆𑀡𑀁 𑀞𑀸𑀦𑀸𑀦𑀁 𑀓𑀸𑀭𑀡𑁂𑀦 𑀅𑀭𑀺𑀬𑁄 𑀘𑁂𑀯 𑀤𑀲𑁆𑀲𑀦𑀲𑀫𑁆𑀧𑀦𑁆𑀦𑁄 𑀘 𑀯𑁂𑀤𑀺𑀢𑀩𑁆𑀩𑁄, 𑀦 𑀩𑀼𑀤𑁆𑀥𑀸𑀤𑀬𑁄 𑀦 𑀲𑁄𑀢𑀸𑀧𑀦𑁆𑀦𑀸. 𑀅𑀣 𑀯𑀸 𑀲𑀢𑀁 𑀏𑀢𑀸𑀦𑀺 𑀞𑀸𑀦𑀸𑀦𑀻𑀢𑀺 𑀫𑀸𑀢𑀼𑀧𑀝𑁆𑀞𑀸𑀦𑀁 𑀧𑀺𑀢𑀼𑀧𑀝𑁆𑀞𑀸𑀦𑀦𑁆𑀢𑀺 𑀏𑀢𑀸𑀦𑀺 𑀞𑀸𑀦𑀸𑀦𑀺 𑀲𑀦𑁆𑀢𑀸𑀦𑀁 𑀉𑀢𑁆𑀢𑀫𑀧𑀼𑀭𑀺𑀲𑀸𑀦𑀁 𑀓𑀸𑀭𑀡𑀸𑀦𑀻𑀢𑀺 𑀏𑀯𑀁 𑀫𑀸𑀢𑀸𑀧𑀺𑀢𑀼𑀉𑀧𑀝𑁆𑀞𑀸𑀓𑀯𑀲𑁂𑀦 𑀇𑀫𑀺𑀲𑁆𑀲𑀸 𑀕𑀸𑀣𑀸𑀬 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀫𑀸𑀢𑀸𑀧𑀺𑀢𑀼𑀉𑀧𑀝𑁆𑀞𑀸𑀓𑁄𑀬𑁂𑀯 𑀳𑀺 𑀇𑀥 ‘‘𑀅𑀭𑀺𑀬𑁄 𑀤𑀲𑁆𑀲𑀦𑀲𑀫𑁆𑀧𑀦𑁆𑀦𑁄’’𑀢𑀺 𑀯𑀼𑀢𑁆𑀢𑁄. 𑀲 𑀮𑁄𑀓𑀁 𑀪𑀚𑀢𑁂 𑀲𑀺𑀯𑀦𑁆𑀢𑀺 𑀲𑁄 𑀔𑁂𑀫𑀁 𑀤𑁂𑀯𑀮𑁄𑀓𑀁 𑀕𑀘𑁆𑀙𑀢𑀻𑀢𑀺.

𑁬. 𑀲𑀻𑀮𑀯𑀦𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁬. 𑀙𑀝𑁆𑀞𑁂 𑀢𑀻𑀳𑀺 𑀞𑀸𑀦𑁂𑀳𑀻𑀢𑀺 𑀢𑀻𑀳𑀺 𑀓𑀸𑀭𑀡𑁂𑀳𑀺. 𑀓𑀸𑀬𑁂𑀦𑀸𑀢𑀺𑀆𑀤𑀻𑀲𑀼 𑀪𑀺𑀓𑁆𑀔𑀽 𑀆𑀕𑀘𑁆𑀙𑀦𑁆𑀢𑁂 𑀤𑀺𑀲𑁆𑀯𑀸 𑀧𑀘𑁆𑀘𑀼𑀕𑁆𑀕𑀫𑀦𑀁 𑀓𑀭𑁄𑀦𑁆𑀢𑀸 𑀕𑀘𑁆𑀙𑀦𑁆𑀢𑁂 𑀅𑀦𑀼𑀕𑀘𑁆𑀙𑀦𑁆𑀢𑀸 𑀆𑀲𑀦𑀲𑀸𑀮𑀸𑀬 𑀲𑀫𑁆𑀫𑀚𑁆𑀚𑀦𑀉𑀧𑀮𑁂𑀧𑀦𑀸𑀤𑀻𑀦𑀺 𑀓𑀭𑁄𑀦𑁆𑀢𑀸 𑀆𑀲𑀦𑀸𑀦𑀺 𑀧𑀜𑁆𑀜𑀸𑀧𑁂𑀦𑁆𑀢𑀸 𑀧𑀸𑀦𑀻𑀬𑀁 𑀧𑀘𑁆𑀘𑀼𑀧𑀝𑁆𑀞𑀸𑀧𑁂𑀦𑁆𑀢𑀸 𑀓𑀸𑀬𑁂𑀦 𑀧𑀼𑀜𑁆𑀜𑀁 𑀧𑀲𑀯𑀦𑁆𑀢𑀺 𑀦𑀸𑀫. 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑀁 𑀤𑀺𑀲𑁆𑀯𑀸 ‘‘𑀬𑀸𑀕𑀼𑀁 𑀤𑁂𑀣, 𑀪𑀢𑁆𑀢𑀁 𑀤𑁂𑀣, 𑀲𑀧𑁆𑀧𑀺𑀦𑀯𑀦𑀻𑀢𑀸𑀤𑀻𑀦𑀺 𑀤𑁂𑀣, 𑀕𑀦𑁆𑀥𑀧𑀼𑀧𑁆𑀨𑀸𑀤𑀻𑀳𑀺 𑀧𑀽𑀚𑁂𑀣, 𑀉𑀧𑁄𑀲𑀣𑀁 𑀉𑀧𑀯𑀲𑀣, 𑀥𑀫𑁆𑀫𑀁 𑀲𑀼𑀡𑀸𑀣, 𑀘𑁂𑀢𑀺𑀬𑀁 𑀯𑀦𑁆𑀤𑀣𑀸’’𑀢𑀺𑀆𑀤𑀻𑀦𑀺 𑀯𑀤𑀦𑁆𑀢𑀸 𑀯𑀸𑀘𑀸𑀬 𑀧𑀼𑀜𑁆𑀜𑀁 𑀧𑀲𑀯𑀦𑁆𑀢𑀺 𑀦𑀸𑀫. 𑀪𑀺𑀓𑁆𑀔𑀽 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑁂 𑀤𑀺𑀲𑁆𑀯𑀸 ‘‘𑀮𑀪𑀦𑁆𑀢𑀽’’𑀢𑀺 𑀘𑀺𑀦𑁆𑀢𑁂𑀦𑁆𑀢𑀸 𑀫𑀦𑀲𑀸 𑀧𑀼𑀜𑁆𑀜𑀁 𑀧𑀲𑀯𑀦𑁆𑀢𑀺 𑀦𑀸𑀫. 𑀧𑀲𑀯𑀦𑁆𑀢𑀻𑀢𑀺 𑀧𑀝𑀺𑀮𑀪𑀦𑁆𑀢𑀺. 𑀧𑀼𑀜𑁆𑀜𑀁 𑀧𑀦𑁂𑀢𑁆𑀣 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀫𑀺𑀲𑁆𑀲𑀓𑀁 𑀓𑀣𑀺𑀢𑀁.

𑁭. 𑀲𑀗𑁆𑀔𑀢𑀮𑀓𑁆𑀔𑀡𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁭. 𑀲𑀢𑁆𑀢𑀫𑁂 𑀲𑀗𑁆𑀔𑀢𑀲𑁆𑀲𑀸𑀢𑀺 𑀧𑀘𑁆𑀘𑀬𑁂𑀳𑀺 𑀲𑀫𑀸𑀕𑀦𑁆𑀢𑁆𑀯𑀸 𑀓𑀢𑀲𑁆𑀲. 𑀲𑀗𑁆𑀔𑀢𑀮𑀓𑁆𑀔𑀡𑀸𑀦𑀻𑀢𑀺 𑀲𑀗𑁆𑀔𑀢𑀁 𑀏𑀢𑀦𑁆𑀢𑀺 𑀲𑀜𑁆𑀚𑀸𑀦𑀦𑀓𑀸𑀭𑀡𑀸𑀦𑀺 𑀦𑀺𑀫𑀺𑀢𑁆𑀢𑀸𑀦𑀺. 𑀉𑀧𑁆𑀧𑀸𑀤𑁄𑀢𑀺 𑀚𑀸𑀢𑀺. 𑀯𑀬𑁄𑀢𑀺 𑀪𑁂𑀤𑁄. 𑀞𑀺𑀢𑀲𑁆𑀲 𑀅𑀜𑁆𑀜𑀣𑀢𑁆𑀢𑀁 𑀦𑀸𑀫 𑀚𑀭𑀸. 𑀢𑀢𑁆𑀣 𑀲𑀗𑁆𑀔𑀢𑀦𑁆𑀢𑀺 𑀢𑁂𑀪𑀽𑀫𑀓𑀸 𑀥𑀫𑁆𑀫𑀸. 𑀫𑀕𑁆𑀕𑀨𑀮𑀸𑀦𑀺 𑀧𑀦 𑀅𑀲𑀫𑁆𑀫𑀲𑀦𑀽𑀧𑀕𑀢𑁆𑀢𑀸 𑀇𑀥 𑀦 𑀓𑀣𑀻𑀬𑀦𑁆𑀢𑀺. 𑀉𑀧𑁆𑀧𑀸𑀤𑀸𑀤𑀬𑁄 𑀲𑀗𑁆𑀔𑀢𑀮𑀓𑁆𑀔𑀡𑀸 𑀦𑀸𑀫. 𑀢𑁂𑀲𑀼 𑀉𑀧𑁆𑀧𑀸𑀤𑀓𑁆𑀔𑀡𑁂 𑀉𑀧𑁆𑀧𑀸𑀤𑁄, 𑀞𑀸𑀦𑀓𑁆𑀔𑀡𑁂 𑀚𑀭𑀸, 𑀪𑁂𑀤𑀓𑁆𑀔𑀡𑁂 𑀯𑀬𑁄. 𑀮𑀓𑁆𑀔𑀡𑀁 𑀦 𑀲𑀗𑁆𑀔𑀢𑀁, 𑀲𑀗𑁆𑀔𑀢𑀁 𑀦 𑀮𑀓𑁆𑀔𑀡𑀁, 𑀮𑀓𑁆𑀔𑀡𑁂𑀦 𑀧𑀦 𑀲𑀗𑁆𑀔𑀢𑀁 𑀧𑀭𑀺𑀘𑁆𑀙𑀺𑀦𑁆𑀦𑀁. 𑀬𑀣𑀸 𑀳𑀢𑁆𑀣𑀺𑀅𑀲𑁆𑀲𑀕𑁄𑀫𑀳𑀺𑀁𑀲𑀸𑀤𑀻𑀦𑀁 𑀲𑀢𑁆𑀢𑀺𑀲𑀽𑀮𑀸𑀤𑀻𑀦𑀺 𑀲𑀜𑁆𑀚𑀸𑀦𑀦𑀮𑀓𑁆𑀔𑀡𑀸𑀦𑀺 𑀦 𑀳𑀢𑁆𑀣𑀺𑀆𑀤𑀬𑁄, 𑀦𑀧𑀺 𑀳𑀢𑁆𑀣𑀺𑀆𑀤𑀬𑁄 𑀮𑀓𑁆𑀔𑀡𑀸𑀦𑁂𑀯, 𑀮𑀓𑁆𑀔𑀡𑁂𑀳𑀺 𑀧𑀦 𑀢𑁂 ‘‘𑀅𑀲𑀼𑀓𑀲𑁆𑀲 𑀳𑀢𑁆𑀣𑀻, 𑀅𑀲𑀼𑀓𑀲𑁆𑀲 𑀅𑀲𑁆𑀲𑁄, 𑀅𑀲𑀼𑀓𑀳𑀢𑁆𑀣𑀻, 𑀅𑀲𑀼𑀓𑀅𑀲𑁆𑀲𑁄’’𑀢𑀺 𑀯𑀸 𑀧𑀜𑁆𑀜𑀸𑀬𑀦𑁆𑀢𑀺, 𑀏𑀯𑀁𑀲𑀫𑁆𑀧𑀤𑀫𑀺𑀤𑀁 𑀯𑁂𑀤𑀺𑀢𑀩𑁆𑀩𑀁.

𑁮. 𑀅𑀲𑀗𑁆𑀔𑀢𑀮𑀓𑁆𑀔𑀡𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁮. 𑀅𑀝𑁆𑀞𑀫𑁂 𑀅𑀲𑀗𑁆𑀔𑀢𑀲𑁆𑀲𑀸𑀢𑀺 𑀧𑀘𑁆𑀘𑀬𑁂𑀳𑀺 𑀲𑀫𑀸𑀕𑀦𑁆𑀢𑁆𑀯𑀸 𑀅𑀓𑀢𑀲𑁆𑀲. 𑀅𑀲𑀗𑁆𑀔𑀢𑀮𑀓𑁆𑀔𑀡𑀸𑀦𑀻𑀢𑀺 𑀅𑀲𑀗𑁆𑀔𑀢𑀁 𑀏𑀢𑀦𑁆𑀢𑀺 𑀲𑀜𑁆𑀚𑀸𑀦𑀦𑀓𑀸𑀭𑀡𑀸𑀦𑀺 𑀦𑀺𑀫𑀺𑀢𑁆𑀢𑀸𑀦𑀺. 𑀦 𑀉𑀧𑁆𑀧𑀸𑀤𑁄 𑀧𑀜𑁆𑀜𑀸𑀬𑀢𑀻𑀢𑀺𑀆𑀤𑀻𑀳𑀺 𑀉𑀧𑁆𑀧𑀸𑀤𑀚𑀭𑀸𑀪𑀗𑁆𑀕𑀸𑀦𑀁 𑀅𑀪𑀸𑀯𑁄 𑀯𑀼𑀢𑁆𑀢𑁄. 𑀉𑀧𑁆𑀧𑀸𑀤𑀸𑀤𑀻𑀦𑀜𑁆𑀳𑀺 𑀅𑀪𑀸𑀯𑁂𑀦 𑀅𑀲𑀗𑁆𑀔𑀢𑀦𑁆𑀢𑀺 𑀧𑀜𑁆𑀜𑀸𑀬𑀢𑀺.

𑁯. 𑀧𑀩𑁆𑀩𑀢𑀭𑀸𑀚𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁯. 𑀦𑀯𑀫𑁂 𑀫𑀳𑀸𑀲𑀸𑀮𑀸𑀢𑀺 𑀫𑀳𑀸𑀭𑀼𑀓𑁆𑀔𑀸. 𑀓𑀼𑀮𑀧𑀢𑀺𑀦𑁆𑀢𑀺 𑀓𑀼𑀮𑀚𑁂𑀝𑁆𑀞𑀓𑀁. 𑀲𑁂𑀮𑁄𑀢𑀺 𑀲𑀺𑀮𑀸𑀫𑀬𑁄. 𑀅𑀭𑀜𑁆𑀜𑀲𑁆𑀫𑀺𑀦𑁆𑀢𑀺 𑀅𑀕𑀸𑀫𑀓𑀝𑁆𑀞𑀸𑀦𑁂. 𑀩𑁆𑀭𑀳𑁆𑀫𑀸𑀢𑀺 𑀫𑀳𑀦𑁆𑀢𑁄. 𑀯𑀦𑁂𑀢𑀺 𑀅𑀝𑀯𑀺𑀬𑀁. 𑀯𑀦𑀧𑁆𑀧𑀢𑀻𑀢𑀺 𑀯𑀦𑀚𑁂𑀝𑁆𑀞𑀓𑀸. 𑀇𑀥 𑀥𑀫𑁆𑀫𑀁 𑀘𑀭𑀺𑀢𑁆𑀯𑀸𑀦, 𑀫𑀕𑁆𑀕𑀁 𑀲𑀼𑀕𑀢𑀺𑀕𑀸𑀫𑀺𑀦𑀦𑁆𑀢𑀺 𑀲𑀼𑀕𑀢𑀺𑀕𑀸𑀫𑀺𑀓𑀫𑀕𑁆𑀕𑀲𑀗𑁆𑀔𑀸𑀢𑀁 𑀥𑀫𑁆𑀫𑀁 𑀘𑀭𑀺𑀢𑁆𑀯𑀸.

𑁧𑁦. 𑀆𑀢𑀧𑁆𑀧𑀓𑀭𑀡𑀻𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁦. 𑀤𑀲𑀫𑁂 𑀆𑀢𑀧𑁆𑀧𑀁 𑀓𑀭𑀡𑀻𑀬𑀦𑁆𑀢𑀺 𑀯𑀻𑀭𑀺𑀬𑀁 𑀓𑀸𑀢𑀼𑀁 𑀬𑀼𑀢𑁆𑀢𑀁. 𑀅𑀦𑀼𑀧𑁆𑀧𑀸𑀤𑀸𑀬𑀸𑀢𑀺 𑀅𑀦𑀼𑀧𑁆𑀧𑀸𑀤𑀢𑁆𑀣𑀸𑀬, 𑀅𑀦𑀼𑀧𑁆𑀧𑀸𑀤𑀁 𑀲𑀸𑀥𑁂𑀲𑁆𑀲𑀸𑀫𑀻𑀢𑀺 𑀇𑀫𑀺𑀦𑀸 𑀓𑀸𑀭𑀡𑁂𑀦 𑀓𑀢𑁆𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀧𑀭𑀢𑁄𑀧𑀺 𑀏𑀲𑁂𑀯 𑀦𑀬𑁄. 𑀲𑀸𑀭𑀻𑀭𑀺𑀓𑀸𑀦𑀦𑁆𑀢𑀺 𑀲𑀭𑀻𑀭𑀲𑀫𑁆𑀪𑀯𑀸𑀦𑀁. 𑀤𑀼𑀓𑁆𑀔𑀸𑀦𑀦𑁆𑀢𑀺 𑀤𑀼𑀓𑁆𑀔𑀫𑀸𑀦𑀁. 𑀢𑀺𑀩𑁆𑀩𑀸𑀦𑀦𑁆𑀢𑀺 𑀩𑀳𑀮𑀸𑀦𑀁, 𑀢𑀸𑀧𑀦𑀯𑀲𑁂𑀦 𑀯𑀸 𑀢𑀺𑀩𑁆𑀩𑀸𑀦𑀁. 𑀔𑀭𑀸𑀦𑀦𑁆𑀢𑀺 𑀨𑀭𑀼𑀲𑀸𑀦𑀁. 𑀓𑀝𑀼𑀓𑀸𑀦𑀦𑁆𑀢𑀺 𑀢𑀺𑀔𑀺𑀡𑀸𑀦𑀁. 𑀅𑀲𑀸𑀢𑀸𑀦𑀦𑁆𑀢𑀺 𑀅𑀫𑀥𑀼𑀭𑀸𑀦𑀁. 𑀅𑀫𑀦𑀸𑀧𑀸𑀦𑀦𑁆𑀢𑀺 𑀫𑀦𑀁 𑀯𑀟𑁆𑀠𑁂𑀢𑀼𑀁 𑀅𑀲𑀫𑀢𑁆𑀣𑀸𑀦𑀁. 𑀧𑀸𑀡𑀳𑀭𑀸𑀦𑀦𑁆𑀢𑀺 𑀚𑀻𑀯𑀺𑀢𑀳𑀭𑀸𑀦𑀁. 𑀅𑀥𑀺𑀯𑀸𑀲𑀦𑀸𑀬𑀸𑀢𑀺 𑀅𑀥𑀺𑀯𑀸𑀲𑀦𑀢𑁆𑀣𑀸𑀬 𑀲𑀳𑀦𑀢𑁆𑀣𑀸𑀬 𑀔𑀫𑀦𑀢𑁆𑀣𑀸𑀬.

𑀏𑀢𑁆𑀢𑀓𑁂 𑀞𑀸𑀦𑁂 𑀲𑀢𑁆𑀣𑀸 𑀆𑀡𑀸𑀧𑁂𑀢𑁆𑀯𑀸 𑀆𑀡𑀢𑁆𑀢𑀺𑀁 𑀧𑀯𑀢𑁆𑀢𑁂𑀢𑁆𑀯𑀸 𑀇𑀤𑀸𑀦𑀺 𑀲𑀫𑀸𑀤𑀧𑁂𑀦𑁆𑀢𑁄 𑀬𑀢𑁄 𑀔𑁄, 𑀪𑀺𑀓𑁆𑀔𑀯𑁂𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀬𑀢𑁄𑀢𑀺 𑀬𑀤𑀸. 𑀆𑀢𑀸𑀧𑀻𑀢𑀺 𑀯𑀻𑀭𑀺𑀬𑀯𑀸. 𑀦𑀺𑀧𑀓𑁄𑀢𑀺 𑀲𑀧𑁆𑀧𑀜𑁆𑀜𑁄. 𑀲𑀢𑁄𑀢𑀺 𑀲𑀢𑀺𑀬𑀸 𑀲𑀫𑀦𑁆𑀦𑀸𑀕𑀢𑁄. 𑀤𑀼𑀓𑁆𑀔𑀲𑁆𑀲 𑀅𑀦𑁆𑀢𑀓𑀺𑀭𑀺𑀬𑀸𑀬𑀸𑀢𑀺 𑀯𑀝𑁆𑀝𑀤𑀼𑀓𑁆𑀔𑀲𑁆𑀲 𑀧𑀭𑀺𑀘𑁆𑀙𑁂𑀤𑀧𑀭𑀺𑀯𑀝𑀼𑀫𑀓𑀺𑀭𑀺𑀬𑀸𑀬. 𑀇𑀫𑁂 𑀘 𑀧𑀦 𑀆𑀢𑀸𑀧𑀸𑀤𑀬𑁄 𑀢𑀬𑁄𑀧𑀺 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀫𑀺𑀲𑁆𑀲𑀓𑀸 𑀓𑀣𑀺𑀢𑀸.

𑁧𑁧. 𑀫𑀳𑀸𑀘𑁄𑀭𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁧. 𑀏𑀓𑀸𑀤𑀲𑀫𑁂 𑀫𑀳𑀸𑀘𑁄𑀭𑁄𑀢𑀺 𑀫𑀳𑀦𑁆𑀢𑁄 𑀩𑀮𑀯𑀘𑁄𑀭𑁄. 𑀲𑀦𑁆𑀥𑀺𑀦𑁆𑀢𑀺 𑀖𑀭𑀲𑀦𑁆𑀥𑀺𑀁. 𑀦𑀺𑀮𑁆𑀮𑁄𑀧𑀦𑁆𑀢𑀺 𑀫𑀳𑀸𑀯𑀺𑀮𑁄𑀧𑀁. 𑀏𑀓𑀸𑀕𑀸𑀭𑀺𑀓𑀦𑁆𑀢𑀺 𑀏𑀓𑀫𑁂𑀯 𑀕𑁂𑀳𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀯𑀺𑀮𑀼𑀫𑁆𑀧𑀦𑀁. 𑀧𑀭𑀺𑀧𑀦𑁆𑀣𑁂𑀧𑀺 𑀢𑀺𑀝𑁆𑀞𑀢𑀻𑀢𑀺 𑀧𑀦𑁆𑀣𑀤𑀽𑀳𑀦𑀓𑀫𑁆𑀫𑀁 𑀓𑀭𑁄𑀢𑀺. 𑀦𑀤𑀻𑀯𑀺𑀤𑀼𑀕𑁆𑀕𑀦𑁆𑀢𑀺 𑀦𑀤𑀻𑀦𑀁 𑀤𑀼𑀕𑁆𑀕𑀫𑀝𑁆𑀞𑀸𑀦𑀁 𑀅𑀦𑁆𑀢𑀭𑀤𑀻𑀧𑀓𑀁, 𑀬𑀢𑁆𑀣 𑀲𑀓𑁆𑀓𑀸 𑀳𑁄𑀢𑀺 𑀤𑁆𑀯𑀻𑀳𑀺𑀧𑀺 𑀢𑀻𑀳𑀺𑀧𑀺 𑀚𑀗𑁆𑀖𑀲𑀳𑀲𑁆𑀲𑁂𑀳𑀺 𑀲𑀤𑁆𑀥𑀺𑀁 𑀦𑀺𑀮𑀻𑀬𑀺𑀢𑀼𑀁. 𑀧𑀩𑁆𑀩𑀢𑀯𑀺𑀲𑀫𑀦𑁆𑀢𑀺 𑀧𑀩𑁆𑀩𑀢𑀸𑀦𑀁 𑀯𑀺𑀲𑀫𑀝𑁆𑀞𑀸𑀦𑀁 𑀧𑀩𑁆𑀩𑀢𑀦𑁆𑀢𑀭𑀁, 𑀬𑀢𑁆𑀣 𑀲𑀓𑁆𑀓𑀸 𑀳𑁄𑀢𑀺 𑀲𑀢𑁆𑀢𑀳𑀺 𑀯𑀸 𑀅𑀝𑁆𑀞𑀳𑀺 𑀯𑀸 𑀚𑀗𑁆𑀖𑀲𑀳𑀲𑁆𑀲𑁂𑀳𑀺 𑀲𑀤𑁆𑀥𑀺𑀁 𑀦𑀺𑀮𑀻𑀬𑀺𑀢𑀼𑀁. 𑀢𑀺𑀡𑀕𑀳𑀦𑀦𑁆𑀢𑀺 𑀢𑀺𑀡𑁂𑀦 𑀯𑀟𑁆𑀠𑀺𑀢𑁆𑀯𑀸 𑀲𑀜𑁆𑀙𑀦𑁆𑀦𑀁 𑀤𑁆𑀯𑀢𑁆𑀢𑀺𑀬𑁄𑀚𑀦𑀝𑁆𑀞𑀸𑀦𑀁. 𑀭𑁄𑀥𑀦𑁆𑀢𑀺 𑀖𑀦𑀁 𑀅𑀜𑁆𑀜𑀫𑀜𑁆𑀜𑀁 𑀲𑀁𑀲𑀝𑁆𑀞𑀲𑀸𑀔𑀁 𑀏𑀓𑀸𑀩𑀤𑁆𑀥𑀁 𑀫𑀳𑀸𑀯𑀦𑀲𑀡𑁆𑀟𑀁. 𑀧𑀭𑀺𑀬𑁄𑀥𑀸𑀬 𑀅𑀢𑁆𑀣𑀁 𑀪𑀡𑀺𑀲𑁆𑀲𑀦𑁆𑀢𑀻𑀢𑀺 𑀧𑀭𑀺𑀬𑁄𑀤𑀳𑀺𑀢𑁆𑀯𑀸 𑀢𑀁 𑀢𑀁 𑀓𑀸𑀭𑀡𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀅𑀢𑁆𑀣𑀁 𑀓𑀣𑀬𑀺𑀲𑁆𑀲𑀦𑁆𑀢𑀺. 𑀢𑁆𑀬𑀸𑀲𑁆𑀲𑀸𑀢𑀺 𑀢𑁂 𑀅𑀲𑁆𑀲. 𑀧𑀭𑀺𑀬𑁄𑀥𑀸𑀬 𑀅𑀢𑁆𑀣𑀁 𑀪𑀡𑀦𑁆𑀢𑀻𑀢𑀺 𑀓𑀺𑀲𑁆𑀫𑀺𑀜𑁆𑀘𑀺 𑀓𑀺𑀜𑁆𑀘𑀺 𑀯𑀢𑁆𑀢𑀼𑀁 𑀆𑀭𑀤𑁆𑀥𑁂𑀬𑁂𑀯 ‘‘𑀫𑀸 𑀏𑀯𑀁 𑀅𑀯𑀘𑀼𑀢𑁆𑀣, 𑀫𑀬𑀁 𑀏𑀢𑀁 𑀓𑀼𑀮𑀧𑀭𑀫𑁆𑀧𑀭𑀸𑀬 𑀚𑀸𑀦𑀸𑀫, 𑀦 𑀏𑀲 𑀏𑀯𑀭𑀽𑀧𑀁 𑀓𑀭𑀺𑀲𑁆𑀲𑀢𑀻’’𑀢𑀺 𑀢𑀁 𑀢𑀁 𑀓𑀸𑀭𑀡𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀫𑀳𑀦𑁆𑀢𑀫𑁆𑀧𑀺 𑀤𑁄𑀲𑀁 𑀳𑀭𑀦𑁆𑀢𑀸 𑀅𑀢𑁆𑀣𑀁 𑀪𑀡𑀦𑁆𑀢𑀺. 𑀅𑀣 𑀯𑀸 𑀧𑀭𑀺𑀬𑁄𑀥𑀸𑀬𑀸𑀢𑀺 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸𑀢𑀺𑀧𑀺 𑀅𑀢𑁆𑀣𑁄. 𑀢𑁂 𑀳𑀺 𑀢𑀲𑁆𑀲𑀧𑀺 𑀤𑁄𑀲𑀁 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀅𑀢𑁆𑀣𑀁 𑀪𑀡𑀦𑁆𑀢𑀺. 𑀔𑀢𑀁 𑀉𑀧𑀳𑀢𑀦𑁆𑀢𑀺 𑀕𑀼𑀡𑀔𑀦𑀦𑁂𑀦 𑀔𑀢𑀁, 𑀕𑀼𑀡𑀼𑀧𑀖𑀸𑀢𑁂𑀦 𑀉𑀧𑀳𑀢𑀁. 𑀯𑀺𑀲𑀫𑁂𑀦 𑀓𑀸𑀬𑀓𑀫𑁆𑀫𑁂𑀦𑀸𑀢𑀺 𑀲𑀫𑁆𑀧𑀓𑁆𑀔𑀮𑀦𑀝𑁆𑀞𑁂𑀦 𑀯𑀺𑀲𑀫𑁂𑀦 𑀓𑀸𑀬𑀤𑁆𑀯𑀸𑀭𑀺𑀓𑀓𑀫𑁆𑀫𑁂𑀦. 𑀯𑀘𑀻𑀫𑀦𑁄𑀓𑀫𑁆𑀫𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀅𑀦𑁆𑀢𑀕𑁆𑀕𑀸𑀳𑀺𑀓𑀸𑀬𑀸𑀢𑀺 𑀤𑀲𑀯𑀢𑁆𑀣𑀼𑀓𑀸𑀬 𑀅𑀦𑁆𑀢𑀁 𑀕𑀳𑁂𑀢𑁆𑀯𑀸 𑀞𑀺𑀢𑀤𑀺𑀝𑁆𑀞𑀺𑀬𑀸. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀘𑀽𑀴𑀯𑀕𑁆𑀕𑁄 𑀧𑀜𑁆𑀘𑀫𑁄.