𑁧. 𑀧𑀞𑀫𑀧𑀡𑁆𑀡𑀸𑀲𑀓𑀁

𑁧. 𑀩𑀸𑀮𑀯𑀕𑁆𑀕𑁄

𑁧. 𑀪𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁧. 𑀢𑀺𑀓𑀦𑀺𑀧𑀸𑀢𑀲𑁆𑀲 𑀧𑀞𑀫𑁂 𑀪𑀬𑀸𑀦𑀻𑀢𑀺𑀆𑀤𑀻𑀲𑀼 𑀪𑀬𑀦𑁆𑀢𑀺 𑀘𑀺𑀢𑁆𑀢𑀼𑀢𑁆𑀭𑀸𑀲𑁄. 𑀉𑀧𑀤𑁆𑀤𑀯𑁄𑀢𑀺 𑀅𑀦𑁂𑀓𑀕𑁆𑀕𑀢𑀸𑀓𑀸𑀭𑁄. 𑀉𑀧𑀲𑀕𑁆𑀕𑁄𑀢𑀺 𑀉𑀧𑀲𑀝𑁆𑀞𑀸𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀮𑀕𑁆𑀕𑀦𑀸𑀓𑀸𑀭𑁄.

𑀢𑁂𑀲𑀁 𑀏𑀯𑀁 𑀦𑀸𑀦𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑀁 𑁋 𑀧𑀩𑁆𑀩𑀢𑀯𑀺𑀲𑀫𑀦𑀺𑀲𑁆𑀲𑀺𑀢𑀸 𑀘𑁄𑀭𑀸 𑀚𑀦𑀧𑀤𑀯𑀸𑀲𑀻𑀦𑀁 𑀧𑁂𑀲𑁂𑀦𑁆𑀢𑀺 𑁋 ‘‘𑀫𑀬𑀁 𑀅𑀲𑀼𑀓𑀤𑀺𑀯𑀲𑁂 𑀦𑀸𑀫 𑀢𑀼𑀫𑁆𑀳𑀸𑀓𑀁 𑀕𑀸𑀫𑀁 𑀧𑀳𑀭𑀺𑀲𑁆𑀲𑀸𑀫𑀸’’𑀢𑀺. 𑀢𑁂 𑀢𑀁 𑀧𑀯𑀢𑁆𑀢𑀺𑀁 𑀲𑀼𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀪𑀬𑀁 𑀲𑀦𑁆𑀢𑀸𑀲𑀁 𑀆𑀧𑀚𑁆𑀚𑀦𑁆𑀢𑀺. 𑀅𑀬𑀁 𑀘𑀺𑀢𑁆𑀢𑀼𑀢𑁆𑀭𑀸𑀲𑁄 𑀦𑀸𑀫. ‘‘𑀬𑀣𑀸 𑀦𑁄 𑀢𑁂 𑀘𑁄𑀭𑀸 𑀓𑀼𑀧𑀺𑀢𑀸 𑀅𑀦𑀢𑁆𑀣𑀫𑁆𑀧𑀺 𑀆𑀯𑀳𑁂𑀬𑁆𑀬𑀼’’𑀦𑁆𑀢𑀺 𑀳𑀢𑁆𑀣𑀲𑀸𑀭𑀁 𑀕𑀳𑁂𑀢𑁆𑀯𑀸 𑀤𑁆𑀯𑀺𑀧𑀤𑀘𑀢𑀼𑀧𑁆𑀧𑀤𑁂𑀳𑀺 𑀲𑀤𑁆𑀥𑀺𑀁 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀢𑀢𑁆𑀣 𑀢𑀢𑁆𑀣 𑀪𑀽𑀫𑀺𑀬𑀁 𑀦𑀺𑀧𑀚𑁆𑀚𑀦𑁆𑀢𑀺 𑀟𑀁𑀲𑀫𑀓𑀲𑀸𑀤𑀻𑀳𑀺 𑀔𑀚𑁆𑀚𑀫𑀸𑀦𑀸, 𑀕𑀼𑀫𑁆𑀩𑀦𑁆𑀢𑀭𑀸𑀦𑀺 𑀧𑀯𑀺𑀲𑀦𑁆𑀢𑀸 𑀔𑀸𑀡𑀼𑀓𑀡𑁆𑀝𑀓𑁂 𑀫𑀤𑁆𑀤𑀦𑁆𑀢𑀺. 𑀢𑁂𑀲𑀁 𑀏𑀯𑀁 𑀯𑀺𑀘𑀭𑀦𑁆𑀢𑀸𑀦𑀁 𑀯𑀺𑀓𑁆𑀔𑀺𑀢𑁆𑀢𑀪𑀸𑀯𑁄 𑀅𑀦𑁂𑀓𑀕𑁆𑀕𑀢𑀸𑀓𑀸𑀭𑁄 𑀦𑀸𑀫. 𑀢𑀢𑁄 𑀘𑁄𑀭𑁂𑀲𑀼 𑀬𑀣𑀸𑀯𑀼𑀢𑁆𑀢𑁂 𑀤𑀺𑀯𑀲𑁂 𑀅𑀦𑀸𑀕𑀘𑁆𑀙𑀦𑁆𑀢𑁂𑀲𑀼 ‘‘𑀢𑀼𑀘𑁆𑀙𑀓𑀲𑀸𑀲𑀦𑀁 𑀪𑀯𑀺𑀲𑁆𑀲𑀢𑀺, 𑀕𑀸𑀫𑀁 𑀧𑀯𑀺𑀲𑀺𑀲𑁆𑀲𑀸𑀫𑀸’’𑀢𑀺 𑀲𑀧𑀭𑀺𑀓𑁆𑀔𑀸𑀭𑀸 𑀕𑀸𑀫𑀁 𑀧𑀯𑀺𑀲𑀦𑁆𑀢𑀺. 𑀅𑀣 𑀢𑁂𑀲𑀁 𑀧𑀯𑀺𑀝𑁆𑀞𑀪𑀸𑀯𑀁 𑀜𑀢𑁆𑀯𑀸 𑀕𑀸𑀫𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀤𑁆𑀯𑀸𑀭𑁂 𑀅𑀕𑁆𑀕𑀺𑀁 𑀤𑀢𑁆𑀯𑀸 𑀫𑀦𑀼𑀲𑁆𑀲𑁂 𑀖𑀸𑀢𑁂𑀢𑁆𑀯𑀸 𑀘𑁄𑀭𑀸 𑀲𑀩𑁆𑀩𑀁 𑀯𑀺𑀪𑀯𑀁 𑀯𑀺𑀮𑀼𑀫𑁆𑀧𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑀺. 𑀢𑁂𑀲𑀼 𑀖𑀸𑀢𑀺𑀢𑀸𑀯𑀲𑁂𑀲𑀸 𑀅𑀕𑁆𑀕𑀺𑀁 𑀦𑀺𑀩𑁆𑀩𑀸𑀧𑁂𑀢𑁆𑀯𑀸 𑀓𑁄𑀝𑁆𑀞𑀓𑀘𑁆𑀙𑀸𑀬𑀸𑀪𑀺𑀢𑁆𑀢𑀺𑀘𑁆𑀙𑀸𑀬𑀸𑀤𑀻𑀲𑀼 𑀢𑀢𑁆𑀣 𑀢𑀢𑁆𑀣 𑀮𑀕𑁆𑀕𑀺𑀢𑁆𑀯𑀸 𑀦𑀺𑀲𑀻𑀤𑀦𑁆𑀢𑀺 𑀦𑀝𑁆𑀞𑀁 𑀅𑀦𑀼𑀲𑁄𑀘𑀫𑀸𑀦𑀸. 𑀅𑀬𑀁 𑀉𑀧𑀲𑀝𑁆𑀞𑀸𑀓𑀸𑀭𑁄 𑀮𑀕𑁆𑀕𑀦𑀸𑀓𑀸𑀭𑁄 𑀦𑀸𑀫.

𑀦𑀴𑀸𑀕𑀸𑀭𑀸𑀢𑀺 𑀦𑀴𑁂𑀳𑀺 𑀙𑀦𑁆𑀦𑀧𑀝𑀺𑀘𑁆𑀙𑀦𑁆𑀦𑀅𑀕𑀸𑀭𑀸. 𑀲𑁂𑀲𑀲𑀫𑁆𑀪𑀸𑀭𑀸 𑀧𑀦𑁂𑀢𑁆𑀣 𑀭𑀼𑀓𑁆𑀔𑀫𑀬𑀸 𑀳𑁄𑀦𑁆𑀢𑀺. 𑀢𑀺𑀡𑀸𑀕𑀸𑀭𑁂𑀧𑀺 𑀏𑀲𑁂𑀯 𑀦𑀬𑁄. 𑀓𑀽𑀝𑀸𑀕𑀸𑀭𑀸𑀦𑀻𑀢𑀺 𑀓𑀽𑀝𑀲𑀗𑁆𑀕𑀳𑀺𑀢𑀸𑀦𑀺 𑀅𑀕𑀸𑀭𑀸𑀦𑀺. 𑀉𑀮𑁆𑀮𑀺𑀢𑁆𑀢𑀸𑀯𑀮𑀺𑀢𑁆𑀢𑀸𑀦𑀻𑀢𑀺 𑀅𑀦𑁆𑀢𑁄 𑀘 𑀩𑀳𑀺 𑀘 𑀮𑀺𑀢𑁆𑀢𑀸𑀦𑀺. 𑀦𑀺𑀯𑀸𑀢𑀸𑀦𑀻𑀢𑀺 𑀦𑀺𑀯𑀸𑀭𑀺𑀢𑀯𑀸𑀢𑀧𑁆𑀧𑀯𑁂𑀲𑀸𑀦𑀺. 𑀨𑀼𑀲𑀺𑀢𑀕𑁆𑀕𑀴𑀸𑀦𑀻𑀢𑀺 𑀙𑁂𑀓𑁂𑀳𑀺 𑀯𑀟𑁆𑀠𑀓𑀻𑀳𑀺 𑀓𑀢𑀢𑁆𑀢𑀸 𑀧𑀺𑀝𑁆𑀞𑀲𑀗𑁆𑀖𑀸𑀝𑀫𑁆𑀳𑀺 𑀲𑀼𑀝𑁆𑀞𑀼 𑀨𑀼𑀲𑀺𑀢𑀓𑀯𑀸𑀝𑀸𑀦𑀺. 𑀧𑀺𑀳𑀺𑀢𑀯𑀸𑀢𑀧𑀸𑀦𑀸𑀦𑀻𑀢𑀺 𑀬𑀼𑀢𑁆𑀢𑀯𑀸𑀢𑀧𑀸𑀦𑀸𑀦𑀺. 𑀇𑀫𑀺𑀦𑀸 𑀧𑀤𑀤𑁆𑀯𑀬𑁂𑀦 𑀓𑀯𑀸𑀝𑀯𑀸𑀢𑀧𑀸𑀦𑀸𑀦𑀁 𑀦𑀺𑀘𑁆𑀘𑀧𑀺𑀳𑀺𑀢𑀢𑀁 𑀅𑀓𑀣𑁂𑀢𑁆𑀯𑀸 𑀲𑀫𑁆𑀧𑀢𑁆𑀢𑀺𑀬𑁂𑀯 𑀓𑀣𑀺𑀢𑀸. 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀓𑁆𑀔𑀡𑁂 𑀧𑀦 𑀢𑀸𑀦𑀺 𑀧𑀺𑀥𑀻𑀬𑀦𑁆𑀢𑀺 𑀘 𑀯𑀺𑀯𑀭𑀻𑀬𑀦𑁆𑀢𑀺 𑀘.

𑀩𑀸𑀮𑀢𑁄 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀩𑀸𑀮𑀫𑁂𑀯 𑀦𑀺𑀲𑁆𑀲𑀸𑀬 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀩𑀸𑀮𑁄 𑀳𑀺 𑀅𑀧𑀡𑁆𑀟𑀺𑀢𑀧𑀼𑀭𑀺𑀲𑁄 𑀭𑀚𑁆𑀚𑀁 𑀯𑀸 𑀑𑀧𑀭𑀚𑁆𑀚𑀁 𑀯𑀸 𑀅𑀜𑁆𑀜𑀁 𑀯𑀸 𑀧𑀦 𑀫𑀳𑀦𑁆𑀢𑀁 𑀞𑀸𑀦𑀁 𑀧𑀢𑁆𑀣𑁂𑀦𑁆𑀢𑁄 𑀓𑀢𑀺𑀧𑀬𑁂 𑀅𑀢𑁆𑀢𑀦𑀸 𑀲𑀤𑀺𑀲𑁂 𑀯𑀺𑀥𑀯𑀧𑀼𑀢𑁆𑀢𑁂 𑀫𑀳𑀸𑀥𑀼𑀢𑁆𑀢𑁂 𑀕𑀳𑁂𑀢𑁆𑀯𑀸 ‘‘𑀏𑀣 𑀅𑀳𑀁 𑀢𑀼𑀫𑁆𑀳𑁂 𑀇𑀲𑁆𑀲𑀭𑁂 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀧𑀩𑁆𑀩𑀢𑀕𑀳𑀦𑀸𑀤𑀻𑀦𑀺 𑀦𑀺𑀲𑁆𑀲𑀸𑀬 𑀅𑀦𑁆𑀢𑀫𑀦𑁆𑀢𑁂 𑀕𑀸𑀫𑁂 𑀧𑀳𑀭𑀦𑁆𑀢𑁄 𑀤𑀸𑀫𑀭𑀺𑀓𑀪𑀸𑀯𑀁 𑀚𑀸𑀦𑀸𑀧𑁂𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀦𑀺𑀕𑀫𑁂𑀧𑀺 𑀚𑀦𑀧𑀤𑁂𑀧𑀺 𑀧𑀳𑀭𑀢𑀺. 𑀫𑀦𑀼𑀲𑁆𑀲𑀸 𑀕𑁂𑀳𑀸𑀦𑀺 𑀙𑀟𑁆𑀟𑁂𑀢𑁆𑀯𑀸 𑀔𑁂𑀫𑀝𑁆𑀞𑀸𑀦𑀁 𑀧𑀢𑁆𑀣𑀬𑀫𑀸𑀦𑀸 𑀧𑀓𑁆𑀓𑀫𑀦𑁆𑀢𑀺. 𑀢𑁂 𑀦𑀺𑀲𑁆𑀲𑀸𑀬 𑀯𑀲𑀦𑁆𑀢𑀸 𑀪𑀺𑀓𑁆𑀔𑀽𑀧𑀺 𑀪𑀺𑀓𑁆𑀔𑀼𑀦𑀺𑀬𑁄𑀧𑀺 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀸𑀦𑀺 𑀧𑀳𑀸𑀬 𑀧𑀓𑁆𑀓𑀫𑀦𑁆𑀢𑀺. 𑀕𑀢𑀕𑀢𑀝𑁆𑀞𑀸𑀦𑁂 𑀪𑀺𑀓𑁆𑀔𑀸𑀧𑀺 𑀲𑁂𑀦𑀸𑀲𑀦𑀫𑁆𑀧𑀺 𑀤𑀼𑀮𑁆𑀮𑀪𑀁 𑀳𑁄𑀢𑀺. 𑀏𑀯𑀁 𑀘𑀢𑀼𑀦𑁆𑀦𑀫𑁆𑀧𑀺 𑀧𑀭𑀺𑀲𑀸𑀦𑀁 𑀪𑀬𑀁 𑀆𑀕𑀢𑀫𑁂𑀯 𑀳𑁄𑀢𑀺. 𑀧𑀩𑁆𑀩𑀚𑁆𑀚𑀺𑀢𑁂𑀲𑀼𑀧𑀺 𑀤𑁆𑀯𑁂 𑀩𑀸𑀮𑀸 𑀪𑀺𑀓𑁆𑀔𑀽 𑀅𑀜𑁆𑀜𑀫𑀜𑁆𑀜𑀁 𑀯𑀺𑀯𑀸𑀤𑀁 𑀧𑀝𑁆𑀞𑀧𑁂𑀢𑁆𑀯𑀸 𑀘𑁄𑀤𑀦𑀁 𑀆𑀭𑀪𑀦𑁆𑀢𑀺. 𑀇𑀢𑀺 𑀓𑁄𑀲𑀫𑁆𑀩𑀺𑀯𑀸𑀲𑀺𑀓𑀸𑀦𑀁 𑀯𑀺𑀬 𑀫𑀳𑀸𑀓𑀮𑀳𑁄 𑀉𑀧𑁆𑀧𑀚𑁆𑀚𑀢𑀺. 𑀘𑀢𑀼𑀦𑁆𑀦𑀁 𑀧𑀭𑀺𑀲𑀸𑀦𑀁 𑀪𑀬𑀁 𑀆𑀕𑀢𑀫𑁂𑀯 𑀳𑁄𑀢𑀻𑀢𑀺 𑀏𑀯𑀁 𑀬𑀸𑀦𑀺 𑀓𑀸𑀦𑀺𑀘𑀺 𑀪𑀬𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀲𑀩𑁆𑀩𑀸𑀦𑀺 𑀢𑀸𑀦𑀺 𑀩𑀸𑀮𑀢𑁄 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀬𑀣𑀸𑀦𑀼𑀲𑀦𑁆𑀥𑀺𑀦𑀸 𑀤𑁂𑀲𑀦𑀁 𑀦𑀺𑀝𑁆𑀞𑀧𑁂𑀲𑀺.

𑁨. 𑀮𑀓𑁆𑀔𑀡𑀲𑀼𑀢𑁆𑀢𑀯𑀡𑁆𑀡𑀦𑀸

𑁨. 𑀤𑀼𑀢𑀺𑀬𑁂 𑀓𑀸𑀬𑀤𑁆𑀯𑀸𑀭𑀸𑀤𑀺𑀧𑀯𑀢𑁆𑀢𑀁 𑀓𑀫𑁆𑀫𑀁 𑀮𑀓𑁆𑀔𑀡𑀁 𑀲𑀜𑁆𑀚𑀸𑀦𑀦𑀓𑀸𑀭𑀡𑀁 𑀅𑀲𑁆𑀲𑀸𑀢𑀺 𑀓𑀫𑁆𑀫𑀮𑀓𑁆𑀔𑀡𑁄. 𑀅𑀧𑀤𑀸𑀦𑀲𑁄𑀪𑀦𑀻 𑀧𑀜𑁆𑀜𑀸𑀢𑀺 𑀬𑀸 𑀧𑀜𑁆𑀜𑀸 𑀦𑀸𑀫 𑀅𑀧𑀤𑀸𑀦𑁂𑀦 𑀲𑁄𑀪𑀢𑀺, 𑀩𑀸𑀮𑀸 𑀘 𑀧𑀡𑁆𑀟𑀺𑀢𑀸 𑀘 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀘𑀭𑀺𑀢𑁂𑀦𑁂𑀯 𑀧𑀸𑀓𑀝𑀸 𑀳𑁄𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀩𑀸𑀮𑁂𑀦 𑀳𑀺 𑀕𑀢𑀫𑀕𑁆𑀕𑁄 𑀭𑀼𑀓𑁆𑀔𑀕𑀘𑁆𑀙𑀕𑀸𑀫𑀦𑀺𑀕𑀫𑀸𑀤𑀻𑀦𑀺 𑀛𑀸𑀧𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑀲𑁆𑀲 𑀇𑀦𑁆𑀤𑀕𑁆𑀕𑀺𑀦𑁄 𑀕𑀢𑀫𑀕𑁆𑀕𑁄 𑀯𑀺𑀬 𑀳𑁄𑀢𑀺, 𑀛𑀸𑀫𑀝𑁆𑀞𑀸𑀦𑀫𑀢𑁆𑀢𑀫𑁂𑀯 𑀅𑀗𑁆𑀕𑀸𑀭𑀫𑀲𑀺𑀙𑀸𑀭𑀺𑀓𑀸𑀲𑀫𑀸𑀓𑀼𑀮𑀁 𑀧𑀜𑁆𑀜𑀸𑀬𑀢𑀺. 𑀧𑀡𑁆𑀟𑀺𑀢𑁂𑀦 𑀕𑀢𑀫𑀕𑁆𑀕𑁄 𑀓𑀼𑀲𑁄𑀩𑁆𑀪𑀸𑀤𑀬𑁄 𑀧𑀽𑀭𑁂𑀢𑁆𑀯𑀸 𑀯𑀺𑀯𑀺𑀥𑀲𑀲𑁆𑀲𑀲𑀫𑁆𑀧𑀤𑀁 𑀆𑀯𑀳𑀫𑀸𑀦𑁂𑀦 𑀘𑀢𑀼𑀤𑀻𑀧𑀺𑀓𑀫𑁂𑀖𑁂𑀦 𑀕𑀢𑀫𑀕𑁆𑀕𑁄 𑀯𑀺𑀬 𑀳𑁄𑀢𑀺. 𑀬𑀣𑀸 𑀢𑁂𑀦 𑀕𑀢𑀫𑀕𑁆𑀕𑁂 𑀉𑀤𑀓𑀧𑀽𑀭𑀸𑀦𑀺 𑀘𑁂𑀯 𑀯𑀺𑀯𑀺𑀥𑀲𑀲𑁆𑀲𑀨𑀮𑀸𑀨𑀮𑀸𑀦𑀺 𑀘 𑀢𑀸𑀦𑀺 𑀢𑀸𑀦𑀺 𑀞𑀸𑀦𑀸𑀦𑀺 𑀧𑀜𑁆𑀜𑀸𑀬𑀦𑁆𑀢𑀺, 𑀏𑀯𑀁 𑀧𑀡𑁆𑀟𑀺𑀢𑁂𑀦 𑀕𑀢𑀫𑀕𑁆𑀕𑁂 𑀲𑀫𑁆𑀧𑀢𑁆𑀢𑀺𑀬𑁄𑀯 𑀧𑀜𑁆𑀜𑀸𑀬𑀦𑁆𑀢𑀺 𑀦𑁄 𑀯𑀺𑀧𑀢𑁆𑀢𑀺𑀬𑁄𑀢𑀺. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑁩. 𑀘𑀺𑀦𑁆𑀢𑀻𑀲𑀼𑀢𑁆𑀢𑀯𑀡𑁆𑀡𑀦𑀸

𑁩. 𑀢𑀢𑀺𑀬𑁂 𑀩𑀸𑀮𑀮𑀓𑁆𑀔𑀡𑀸𑀦𑀻𑀢𑀺 ‘‘𑀩𑀸𑀮𑁄 𑀅𑀬’’𑀦𑁆𑀢𑀺 𑀏𑀢𑁂𑀳𑀺 𑀮𑀓𑁆𑀔𑀻𑀬𑀢𑀺 𑀜𑀸𑀬𑀢𑀻𑀢𑀺 𑀩𑀸𑀮𑀮𑀓𑁆𑀔𑀡𑀸𑀦𑀺. 𑀢𑀸𑀦𑁂𑀯𑀲𑁆𑀲 𑀲𑀜𑁆𑀚𑀸𑀦𑀦𑀓𑀸𑀭𑀡𑀸𑀦𑀻𑀢𑀺 𑀩𑀸𑀮𑀦𑀺𑀫𑀺𑀢𑁆𑀢𑀸𑀦𑀺. 𑀩𑀸𑀮𑀸𑀧𑀤𑀸𑀦𑀸𑀦𑀻𑀢𑀺 𑀩𑀸𑀮𑀲𑁆𑀲 𑀅𑀧𑀤𑀸𑀦𑀸𑀦𑀺. 𑀤𑀼𑀘𑁆𑀘𑀺𑀦𑁆𑀢𑀺𑀢𑀘𑀺𑀦𑁆𑀢𑀻𑀢𑀺 𑀘𑀺𑀦𑁆𑀢𑀬𑀦𑁆𑀢𑁄 𑀅𑀪𑀺𑀚𑁆𑀛𑀸𑀩𑁆𑀬𑀸𑀧𑀸𑀤𑀫𑀺𑀘𑁆𑀙𑀸𑀤𑀲𑁆𑀲𑀦𑀯𑀲𑁂𑀦 𑀤𑀼𑀘𑁆𑀘𑀺𑀦𑁆𑀢𑀺𑀢𑀫𑁂𑀯 𑀘𑀺𑀦𑁆𑀢𑁂𑀢𑀺. 𑀤𑀼𑀩𑁆𑀪𑀸𑀲𑀺𑀢𑀪𑀸𑀲𑀻𑀢𑀺 𑀪𑀸𑀲𑀫𑀸𑀦𑁄𑀧𑀺 𑀫𑀼𑀲𑀸𑀯𑀸𑀤𑀸𑀤𑀺𑀪𑁂𑀤𑀁 𑀤𑀼𑀩𑁆𑀪𑀸𑀲𑀺𑀢𑀫𑁂𑀯 𑀪𑀸𑀲𑀢𑀺. 𑀤𑀼𑀓𑁆𑀓𑀝𑀓𑀫𑁆𑀫𑀓𑀸𑀭𑀻𑀢𑀺 𑀓𑀭𑁄𑀦𑁆𑀢𑁄𑀧𑀺 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀯𑀲𑁂𑀦 𑀤𑀼𑀓𑁆𑀓𑀝𑀓𑀫𑁆𑀫𑀫𑁂𑀯 𑀓𑀭𑁄𑀢𑀺. 𑀧𑀡𑁆𑀟𑀺𑀢𑀮𑀓𑁆𑀔𑀡𑀸𑀦𑀻𑀢𑀺𑀆𑀤𑀺 𑀯𑀼𑀢𑁆𑀢𑀸𑀦𑀼𑀲𑀸𑀭𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀲𑀼𑀘𑀺𑀦𑁆𑀢𑀺𑀢𑀘𑀺𑀦𑁆𑀢𑀻𑀢𑀺𑀆𑀤𑀻𑀦𑀺 𑀘𑁂𑀢𑁆𑀣 𑀫𑀦𑁄𑀲𑀼𑀘𑀭𑀺𑀢𑀸𑀤𑀻𑀦𑀁 𑀯𑀲𑁂𑀦 𑀬𑁄𑀚𑁂𑀢𑀩𑁆𑀩𑀸𑀦𑀺.

𑁪. 𑀅𑀘𑁆𑀘𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁪. 𑀘𑀢𑀼𑀢𑁆𑀣𑁂 𑀅𑀘𑁆𑀘𑀬𑀁 𑀅𑀘𑁆𑀘𑀬𑀢𑁄 𑀦 𑀧𑀲𑁆𑀲𑀢𑀻𑀢𑀺 𑀅𑀢𑁆𑀢𑀦𑁄 𑀅𑀧𑀭𑀸𑀥𑀁 𑀅𑀧𑀭𑀸𑀥𑀢𑁄 𑀦 𑀧𑀲𑁆𑀲𑀢𑀺. 𑀅𑀘𑁆𑀘𑀬𑀢𑁄 𑀤𑀺𑀲𑁆𑀯𑀸 𑀬𑀣𑀸𑀥𑀫𑁆𑀫𑀁 𑀦𑀧𑁆𑀧𑀝𑀺𑀓𑀭𑁄𑀢𑀻𑀢𑀺 ‘‘𑀅𑀧𑀭𑀤𑁆𑀥𑀁 𑀫𑀬𑀸’’𑀢𑀺 𑀜𑀢𑁆𑀯𑀸𑀧𑀺 𑀬𑁄 𑀥𑀫𑁆𑀫𑁄, 𑀢𑀁 𑀦 𑀓𑀭𑁄𑀢𑀺, 𑀤𑀡𑁆𑀟𑀓𑀫𑁆𑀫𑀁 𑀆𑀳𑀭𑀺𑀢𑁆𑀯𑀸 𑀅𑀘𑁆𑀘𑀬𑀁 𑀦 𑀤𑁂𑀲𑁂𑀢𑀺 𑀦𑀓𑁆𑀔𑀫𑀸𑀧𑁂𑀢𑀺. 𑀅𑀘𑁆𑀘𑀬𑀁 𑀤𑁂𑀲𑁂𑀦𑁆𑀢𑀲𑁆𑀲 𑀬𑀣𑀸𑀥𑀫𑁆𑀫𑀁 𑀦𑀧𑁆𑀧𑀝𑀺𑀕𑁆𑀕𑀡𑁆𑀳𑀸𑀢𑀻𑀢𑀺 𑀧𑀭𑀲𑁆𑀲 ‘‘𑀯𑀺𑀭𑀤𑁆𑀥𑀁 𑀫𑀬𑀸’’𑀢𑀺 𑀜𑀢𑁆𑀯𑀸 𑀤𑀡𑁆𑀟𑀓𑀫𑁆𑀫𑀁 𑀆𑀳𑀭𑀺𑀢𑁆𑀯𑀸 𑀔𑀫𑀸𑀧𑁂𑀦𑁆𑀢𑀲𑁆𑀲 𑀦𑀓𑁆𑀔𑀫𑀢𑀺. 𑀲𑀼𑀓𑁆𑀓𑀧𑀓𑁆𑀔𑁄 𑀯𑀼𑀢𑁆𑀢𑀧𑀝𑀺𑀧𑀓𑁆𑀔𑀢𑁄 𑀯𑁂𑀤𑀺𑀢𑀩𑁆𑀩𑁄.

𑁫. 𑀅𑀬𑁄𑀦𑀺𑀲𑁄𑀲𑀼𑀢𑁆𑀢𑀯𑀡𑁆𑀡𑀦𑀸

𑁫. 𑀧𑀜𑁆𑀘𑀫𑁂 𑀅𑀬𑁄𑀦𑀺𑀲𑁄 𑀧𑀜𑁆𑀳𑀁 𑀓𑀢𑁆𑀢𑀸 𑀳𑁄𑀢𑀻𑀢𑀺 ‘‘𑀓𑀢𑀺 𑀦𑀼 𑀔𑁄, 𑀉𑀤𑀸𑀬𑀺, 𑀅𑀦𑀼𑀲𑁆𑀲𑀢𑀺𑀝𑁆𑀞𑀸𑀦𑀸𑀦𑀻’’𑀢𑀺 𑀯𑀼𑀢𑁆𑀢𑁂 ‘‘𑀧𑀼𑀩𑁆𑀩𑁂𑀦𑀺𑀯𑀸𑀲𑁄 𑀅𑀦𑀼𑀲𑁆𑀲𑀢𑀺𑀝𑁆𑀞𑀸𑀦𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀮𑀸𑀴𑀼𑀤𑀸𑀬𑀺𑀢𑁆𑀣𑁂𑀭𑁄 𑀯𑀺𑀬 𑀅𑀦𑀼𑀧𑀸𑀬𑀘𑀺𑀦𑁆𑀢𑀸𑀬 𑀅𑀧𑀜𑁆𑀳𑀫𑁂𑀯 𑀧𑀜𑁆𑀳𑀦𑁆𑀢𑀺 𑀓𑀢𑁆𑀢𑀸 𑀳𑁄𑀢𑀺. 𑀅𑀬𑁄𑀦𑀺𑀲𑁄 𑀧𑀜𑁆𑀳𑀁 𑀯𑀺𑀲𑁆𑀲𑀚𑁆𑀚𑁂𑀢𑀸 𑀳𑁄𑀢𑀻𑀢𑀺 𑀏𑀯𑀁 𑀘𑀺𑀦𑁆𑀢𑀺𑀢𑀁 𑀧𑀦 𑀧𑀜𑁆𑀳𑀁 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑁄𑀧𑀺 ‘‘𑀇𑀥, 𑀪𑀦𑁆𑀢𑁂, 𑀪𑀺𑀓𑁆𑀔𑀼 𑀅𑀦𑁂𑀓𑀯𑀺𑀳𑀺𑀢𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀢𑀺. 𑀲𑁂𑀬𑁆𑀬𑀣𑀺𑀤𑀁, 𑀏𑀓𑀫𑁆𑀧𑀺 𑀚𑀸𑀢𑀺’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀲𑁄𑀬𑁂𑀯 𑀣𑁂𑀭𑁄 𑀯𑀺𑀬 𑀅𑀬𑁄𑀦𑀺𑀲𑁄 𑀯𑀺𑀲𑁆𑀲𑀚𑁆𑀚𑁂𑀢𑀸 𑀳𑁄𑀢𑀺, 𑀅𑀧𑀜𑁆𑀳𑀫𑁂𑀯 𑀧𑀜𑁆𑀳𑀦𑁆𑀢𑀺 𑀓𑀣𑁂𑀢𑀺. 𑀧𑀭𑀺𑀫𑀡𑁆𑀟𑀮𑁂𑀳𑀺 𑀧𑀤𑀩𑁆𑀬𑀜𑁆𑀚𑀦𑁂𑀳𑀻𑀢𑀺 𑀏𑀢𑁆𑀣 𑀧𑀤𑀫𑁂𑀯 𑀅𑀢𑁆𑀣𑀲𑁆𑀲 𑀩𑁆𑀬𑀜𑁆𑀚𑀦𑀢𑁄 𑀧𑀤𑀩𑁆𑀬𑀜𑁆𑀚𑀦𑀁. 𑀢𑀁 𑀅𑀓𑁆𑀔𑀭𑀧𑀸𑀭𑀺𑀧𑀽𑀭𑀺𑀁 𑀓𑀢𑁆𑀯𑀸 𑀤𑀲𑀯𑀺𑀥𑀁 𑀩𑁆𑀬𑀜𑁆𑀚𑀦𑀩𑀼𑀤𑁆𑀥𑀺𑀁 𑀅𑀧𑀭𑀺𑀳𑀸𑀧𑁂𑀢𑁆𑀯𑀸 𑀯𑀼𑀢𑁆𑀢𑀁 𑀧𑀭𑀺𑀫𑀡𑁆𑀟𑀮𑀁 𑀦𑀸𑀫 𑀳𑁄𑀢𑀺, 𑀏𑀯𑀭𑀽𑀧𑁂𑀳𑀺 𑀧𑀤𑀩𑁆𑀬𑀜𑁆𑀚𑀦𑁂𑀳𑀻𑀢𑀺 𑀅𑀢𑁆𑀣𑁄. 𑀲𑀺𑀮𑀺𑀝𑁆𑀞𑁂𑀳𑀻𑀢𑀺 𑀧𑀤𑀲𑀺𑀮𑀺𑀝𑁆𑀞𑀢𑀸𑀬 𑀲𑀺𑀮𑀺𑀝𑁆𑀞𑁂𑀳𑀺. 𑀉𑀧𑀕𑀢𑁂𑀳𑀻𑀢𑀺 𑀅𑀢𑁆𑀣𑀜𑁆𑀘 𑀓𑀸𑀭𑀡𑀜𑁆𑀘 𑀉𑀧𑀕𑀢𑁂𑀳𑀺. 𑀦𑀸𑀩𑁆𑀪𑀦𑀼𑀫𑁄𑀤𑀺𑀢𑀸𑀢𑀺 𑀏𑀯𑀁 𑀬𑁄𑀦𑀺𑀲𑁄 𑀲𑀩𑁆𑀩𑀁 𑀓𑀸𑀭𑀡𑀲𑀫𑁆𑀧𑀦𑁆𑀦𑀁 𑀓𑀢𑁆𑀯𑀸𑀧𑀺 𑀯𑀺𑀲𑁆𑀲𑀚𑁆𑀚𑀺𑀢𑀁 𑀧𑀭𑀲𑁆𑀲 𑀧𑀜𑁆𑀳𑀁 𑀦𑀸𑀪𑀺𑀦𑀼𑀫𑁄𑀤𑀢𑀺 𑀦𑀸𑀪𑀺𑀦𑀦𑁆𑀤𑀢𑀺 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀲𑁆𑀲 𑀧𑀜𑁆𑀳𑀁 𑀮𑀸𑀴𑀼𑀤𑀸𑀬𑀺𑀢𑁆𑀣𑁂𑀭𑁄 𑀯𑀺𑀬. 𑀬𑀣𑀸𑀳 𑁋

‘‘𑀅𑀝𑁆𑀞𑀸𑀦𑀁 𑀔𑁄 𑀏𑀢𑀁, 𑀆𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢, 𑀅𑀦𑀯𑀓𑀸𑀲𑁄, 𑀬𑀁 𑀲𑁄 𑀅𑀢𑀺𑀓𑁆𑀓𑀫𑁆𑀫𑁂𑀯 𑀓𑀩𑀴𑀻𑀓𑀸𑀭𑀸𑀳𑀸𑀭𑀪𑀓𑁆𑀔𑀸𑀦𑀁 𑀤𑁂𑀯𑀸𑀦𑀁 𑀲𑀳𑀩𑁆𑀬𑀢𑀁 𑀅𑀜𑁆𑀜𑀢𑀭𑀁 𑀫𑀦𑁄𑀫𑀬𑀁 𑀓𑀸𑀬𑀁 𑀉𑀧𑀧𑀦𑁆𑀦𑁄 𑀲𑀜𑁆𑀜𑀸𑀯𑁂𑀤𑀬𑀺𑀢𑀦𑀺𑀭𑁄𑀥𑀁 𑀲𑀫𑀸𑀧𑀚𑁆𑀚𑁂𑀬𑁆𑀬𑀸𑀧𑀺 𑀯𑀼𑀝𑁆𑀞𑀳𑁂𑀬𑁆𑀬𑀸𑀧𑀺, 𑀦𑀢𑁆𑀣𑁂𑀢𑀁 𑀞𑀸𑀦’’𑀦𑁆𑀢𑀺 (𑀅. 𑀦𑀺. 𑁫.𑁧𑁬𑁬).

𑀬𑁄𑀦𑀺𑀲𑁄 𑀧𑀜𑁆𑀳𑀁 𑀓𑀢𑁆𑀢𑀸𑀢𑀺𑀆𑀤𑀻𑀲𑀼 𑀆𑀦𑀦𑁆𑀤𑀢𑁆𑀣𑁂𑀭𑁄 𑀯𑀺𑀬 𑀬𑁄𑀦𑀺𑀲𑁄𑀯 𑀧𑀜𑁆𑀳𑀁 𑀘𑀺𑀦𑁆𑀢𑁂𑀢𑁆𑀯𑀸 𑀬𑁄𑀦𑀺𑀲𑁄 𑀯𑀺𑀲𑁆𑀲𑀚𑁆𑀚𑀺𑀢𑀸 𑀳𑁄𑀢𑀺. 𑀣𑁂𑀭𑁄 𑀳𑀺 ‘‘𑀓𑀢𑀺 𑀦𑀼 𑀔𑁄, 𑀆𑀦𑀦𑁆𑀤, 𑀅𑀦𑀼𑀲𑁆𑀲𑀢𑀺𑀝𑁆𑀞𑀸𑀦𑀸𑀦𑀻’’𑀢𑀺 𑀧𑀼𑀘𑁆𑀙𑀺𑀢𑁄 ‘‘𑀅𑀬𑀁 𑀧𑀜𑁆𑀳𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀬𑁄𑀦𑀺𑀲𑁄 𑀘𑀺𑀦𑁆𑀢𑁂𑀢𑁆𑀯𑀸 𑀬𑁄𑀦𑀺𑀲𑁄 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑁄 𑀆𑀳 𑁋 ‘‘𑀇𑀥, 𑀪𑀦𑁆𑀢𑁂, 𑀪𑀺𑀓𑁆𑀔𑀼 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺…𑀧𑁂… 𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀇𑀤𑀁, 𑀪𑀦𑁆𑀢𑁂, 𑀅𑀦𑀼𑀲𑁆𑀲𑀢𑀺𑀝𑁆𑀞𑀸𑀦𑀁 𑀏𑀯𑀁𑀪𑀸𑀯𑀺𑀢𑀁 𑀏𑀯𑀁𑀩𑀳𑀼𑀮𑀻𑀓𑀢𑀁 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀸𑀬 𑀲𑀁𑀯𑀢𑁆𑀢𑀢𑀻’’𑀢𑀺. 𑀅𑀩𑁆𑀪𑀦𑀼𑀫𑁄𑀤𑀺𑀢𑀸 𑀳𑁄𑀢𑀻𑀢𑀺 𑀢𑀣𑀸𑀕𑀢𑁄 𑀯𑀺𑀬 𑀬𑁄𑀦𑀺𑀲𑁄 𑀅𑀩𑁆𑀪𑀦𑀼𑀫𑁄𑀤𑀺𑀢𑀸 𑀳𑁄𑀢𑀺. 𑀢𑀣𑀸𑀕𑀢𑁄 𑀳𑀺 𑀆𑀦𑀦𑁆𑀤𑀢𑁆𑀣𑁂𑀭𑁂𑀦 𑀧𑀜𑁆𑀳𑁂 𑀯𑀺𑀲𑁆𑀲𑀚𑁆𑀚𑀺𑀢𑁂 ‘‘𑀲𑀸𑀥𑀼 𑀲𑀸𑀥𑀼, 𑀆𑀦𑀦𑁆𑀤, 𑀢𑁂𑀦 𑀳𑀺 𑀢𑁆𑀯𑀁, 𑀆𑀦𑀦𑁆𑀤, 𑀇𑀫𑀫𑁆𑀧𑀺 𑀙𑀝𑁆𑀞𑀁 𑀅𑀦𑀼𑀲𑁆𑀲𑀢𑀺𑀝𑁆𑀞𑀸𑀦𑀁 𑀥𑀸𑀭𑁂𑀳𑀺. 𑀇𑀥𑀸𑀦𑀦𑁆𑀤, 𑀪𑀺𑀓𑁆𑀔𑀼 𑀲𑀢𑁄𑀯 𑀅𑀪𑀺𑀓𑁆𑀓𑀫𑀢𑀺 𑀲𑀢𑁄𑀯 𑀧𑀝𑀺𑀓𑁆𑀓𑀫𑀢𑀻’’𑀢𑀺𑀆𑀤𑀺𑀫𑀸𑀳. 𑀙𑀝𑁆𑀞𑀸𑀤𑀻𑀦𑀺 𑀉𑀢𑁆𑀢𑀸𑀦𑀢𑁆𑀣𑀸𑀦𑁂𑀯.

𑁯. 𑀔𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁯. 𑀦𑀯𑀫𑁂 𑀲𑀼𑀓𑁆𑀓𑀧𑀓𑁆𑀔𑁄 𑀧𑀼𑀩𑁆𑀩𑀪𑀸𑀕𑁂 𑀤𑀲𑀳𑀺𑀧𑀺 𑀓𑀼𑀲𑀮𑀓𑀫𑁆𑀫𑀧𑀣𑁂𑀳𑀺 𑀧𑀭𑀺𑀘𑁆𑀙𑀺𑀦𑁆𑀦𑁄, 𑀉𑀧𑀭𑀺 𑀬𑀸𑀯 𑀅𑀭𑀳𑀢𑁆𑀢𑀫𑀕𑁆𑀕𑀸 𑀮𑀩𑁆𑀪𑀢𑀺. 𑀩𑀳𑀼𑀜𑁆𑀘 𑀧𑀼𑀜𑁆𑀜𑀁 𑀧𑀲𑀯𑀢𑀻𑀢𑀺 𑀏𑀢𑁆𑀣 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀫𑀺𑀲𑁆𑀲𑀓𑀧𑀼𑀜𑁆𑀜𑀁 𑀓𑀣𑀺𑀢𑀁.

𑁧𑁦. 𑀫𑀮𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦. 𑀤𑀲𑀫𑁂 𑀤𑀼𑀲𑁆𑀲𑀻𑀮𑀪𑀸𑀯𑁄 𑀤𑀼𑀲𑁆𑀲𑀻𑀮𑁆𑀬𑀁, 𑀤𑀼𑀲𑁆𑀲𑀻𑀮𑁆𑀬𑀫𑁂𑀯 𑀫𑀮𑀁 𑀤𑀼𑀲𑁆𑀲𑀻𑀮𑁆𑀬𑀫𑀮𑀁. 𑀓𑁂𑀦𑀝𑁆𑀞𑁂𑀦 𑀫𑀮𑀦𑁆𑀢𑀺? 𑀅𑀦𑀼𑀤𑀳𑀦𑀝𑁆𑀞𑁂𑀦 𑀤𑀼𑀕𑁆𑀕𑀦𑁆𑀥𑀝𑁆𑀞𑁂𑀦 𑀓𑀺𑀮𑀺𑀝𑁆𑀞𑀓𑀭𑀡𑀝𑁆𑀞𑁂𑀦 𑀘. 𑀢𑀜𑁆𑀳𑀺 𑀦𑀺𑀭𑀬𑀸𑀤𑀻𑀲𑀼 𑀅𑀧𑀸𑀬𑁂𑀲𑀼 𑀅𑀦𑀼𑀤𑀳𑀢𑀻𑀢𑀺 𑀅𑀦𑀼𑀤𑀳𑀦𑀝𑁆𑀞𑁂𑀦𑀧𑀺 𑀫𑀮𑀁. 𑀢𑁂𑀦 𑀲𑀫𑀦𑁆𑀦𑀸𑀕𑀢𑁄 𑀧𑀼𑀕𑁆𑀕𑀮𑁄 𑀫𑀸𑀢𑀸𑀧𑀺𑀢𑀽𑀦𑀫𑁆𑀧𑀺 𑀲𑀦𑁆𑀢𑀺𑀓𑁂 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲𑀸𑀧𑀺 𑀅𑀦𑁆𑀢𑀭𑁂 𑀩𑁄𑀥𑀺𑀘𑁂𑀢𑀺𑀬𑀝𑁆𑀞𑀸𑀦𑁂𑀲𑀼𑀧𑀺 𑀚𑀺𑀕𑀼𑀘𑁆𑀙𑀦𑀻𑀬𑁄 𑀳𑁄𑀢𑀺, 𑀲𑀩𑁆𑀩𑀤𑀺𑀲𑀸𑀲𑀼 𑀘𑀲𑁆𑀲 ‘‘𑀏𑀯𑀭𑀽𑀧𑀁 𑀓𑀺𑀭 𑀢𑁂𑀦 𑀧𑀸𑀧𑀓𑀫𑁆𑀫𑀁 𑀓𑀢’’𑀦𑁆𑀢𑀺 𑀅𑀯𑀡𑁆𑀡𑀕𑀦𑁆𑀥𑁄 𑀯𑀸𑀬𑀢𑀻𑀢𑀺 𑀤𑀼𑀕𑁆𑀕𑀦𑁆𑀥𑀝𑁆𑀞𑁂𑀦𑀧𑀺 𑀫𑀮𑀁. 𑀢𑁂𑀦 𑀘 𑀲𑀫𑀦𑁆𑀦𑀸𑀕𑀢𑁄 𑀧𑀼𑀕𑁆𑀕𑀮𑁄 𑀕𑀢𑀕𑀢𑀝𑁆𑀞𑀸𑀦𑁂 𑀉𑀧𑀢𑀸𑀧𑀜𑁆𑀘𑁂𑀯 𑀮𑀪𑀢𑀺, 𑀓𑀸𑀬𑀓𑀫𑁆𑀫𑀸𑀤𑀻𑀦𑀺 𑀘𑀲𑁆𑀲 𑀅𑀲𑀼𑀘𑀻𑀦𑀺 𑀳𑁄𑀦𑁆𑀢𑀺 𑀅𑀧𑀪𑀲𑁆𑀲𑀭𑀸𑀦𑀻𑀢𑀺 𑀓𑀺𑀮𑀺𑀝𑁆𑀞𑀓𑀭𑀡𑀝𑁆𑀞𑁂𑀦𑀧𑀺 𑀫𑀮𑀁. 𑀅𑀧𑀺𑀘 𑀢𑀁 𑀤𑁂𑀯𑀫𑀦𑀼𑀲𑁆𑀲𑀲𑀫𑁆𑀧𑀢𑁆𑀢𑀺𑀬𑁄 𑀘𑁂𑀯 𑀦𑀺𑀩𑁆𑀩𑀸𑀦𑀲𑀫𑁆𑀧𑀢𑁆𑀢𑀺𑀜𑁆𑀘 𑀫𑀺𑀮𑀸𑀧𑁂𑀢𑀻𑀢𑀺 𑀫𑀺𑀮𑀸𑀧𑀦𑀝𑁆𑀞𑁂𑀦𑀧𑀺 𑀫𑀮𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀇𑀲𑁆𑀲𑀸𑀫𑀮𑀫𑀘𑁆𑀙𑁂𑀭𑀫𑀮𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀩𑀸𑀮𑀯𑀕𑁆𑀕𑁄 𑀧𑀞𑀫𑁄.

𑁨. 𑀭𑀣𑀓𑀸𑀭𑀯𑀕𑁆𑀕𑁄

𑁧. 𑀜𑀸𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁧. 𑀤𑀼𑀢𑀺𑀬𑀲𑁆𑀲 𑀧𑀞𑀫𑁂 𑀜𑀸𑀢𑁄𑀢𑀺 𑀧𑀜𑁆𑀜𑀸𑀢𑁄 𑀧𑀸𑀓𑀝𑁄. 𑀅𑀦𑀦𑀼𑀮𑁄𑀫𑀺𑀓𑁂𑀢𑀺 𑀲𑀸𑀲𑀦𑀲𑁆𑀲 𑀦 𑀅𑀦𑀼𑀮𑁄𑀫𑁂𑀢𑀻𑀢𑀺 𑀅𑀦𑀦𑀼𑀮𑁄𑀫𑀺𑀓𑀁, 𑀢𑀲𑁆𑀫𑀺𑀁 𑀅𑀦𑀦𑀼𑀮𑁄𑀫𑀺𑀓𑁂. 𑀓𑀸𑀬𑀓𑀫𑁆𑀫𑁂𑀢𑀺 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀫𑁆𑀳𑀺 𑀓𑀸𑀬𑀤𑀼𑀘𑁆𑀘𑀭𑀺𑀢𑁂. 𑀑𑀴𑀸𑀭𑀺𑀓𑀁 𑀯𑀸 𑀏𑀢𑀁, 𑀦 𑀏𑀯𑀭𑀽𑀧𑁂 𑀲𑀫𑀸𑀤𑀧𑁂𑀢𑀼𑀁 𑀲𑀓𑁆𑀓𑁄𑀢𑀺. 𑀤𑀺𑀲𑀸 𑀦𑀫𑀲𑁆𑀲𑀺𑀢𑀼𑀁 𑀯𑀝𑁆𑀝𑀢𑀺, 𑀪𑀽𑀢𑀩𑀮𑀺𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻𑀢𑀺 𑀏𑀯𑀭𑀽𑀧𑁂 𑀲𑀫𑀸𑀤𑀧𑁂𑀢𑀺 𑀕𑀡𑁆𑀳𑀸𑀧𑁂𑀢𑀺. 𑀯𑀘𑀻𑀓𑀫𑁆𑀫𑁂𑀧𑀺 𑀫𑀼𑀲𑀸𑀯𑀸𑀤𑀸𑀤𑀻𑀦𑀺 𑀑𑀴𑀸𑀭𑀺𑀓𑀸𑀦𑀺, 𑀅𑀢𑁆𑀢𑀦𑁄 𑀲𑀦𑁆𑀢𑀓𑀁 𑀧𑀭𑀲𑁆𑀲 𑀅𑀤𑀸𑀢𑀼𑀓𑀸𑀫𑁂𑀦 ‘‘𑀦𑀢𑁆𑀣𑀻’’𑀢𑀺 𑀅𑀬𑀁 𑀯𑀜𑁆𑀘𑀦𑀫𑀼𑀲𑀸𑀯𑀸𑀤𑁄 𑀦𑀸𑀫 𑀯𑀢𑁆𑀢𑀼𑀁 𑀯𑀝𑁆𑀝𑀢𑀻𑀢𑀺 𑀏𑀯𑀭𑀽𑀧𑁂 𑀲𑀫𑀸𑀤𑀧𑁂𑀢𑀺. 𑀫𑀦𑁄𑀓𑀫𑁆𑀫𑁂𑀧𑀺 𑀅𑀪𑀺𑀚𑁆𑀛𑀸𑀤𑀬𑁄 𑀑𑀴𑀸𑀭𑀺𑀓𑀸, 𑀓𑀫𑁆𑀫𑀝𑁆𑀞𑀸𑀦𑀁 𑀯𑀺𑀲𑀁𑀯𑀸𑀤𑁂𑀢𑁆𑀯𑀸 𑀓𑀣𑁂𑀦𑁆𑀢𑁄 𑀧𑀦 𑀅𑀦𑀦𑀼𑀮𑁄𑀫𑀺𑀓𑁂𑀲𑀼 𑀥𑀫𑁆𑀫𑁂𑀲𑀼 𑀲𑀫𑀸𑀤𑀧𑁂𑀢𑀺 𑀦𑀸𑀫 𑀤𑀓𑁆𑀔𑀺𑀡𑀯𑀺𑀳𑀸𑀭𑀯𑀸𑀲𑀺𑀢𑁆𑀣𑁂𑀭𑁄 𑀯𑀺𑀬. 𑀢𑀁 𑀓𑀺𑀭 𑀣𑁂𑀭𑀁 𑀏𑀓𑁄 𑀉𑀧𑀝𑁆𑀞𑀸𑀓𑁄 𑀅𑀫𑀘𑁆𑀘𑀧𑀼𑀢𑁆𑀢𑁄 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀫𑁂𑀢𑁆𑀢𑀸𑀬𑀦𑁆𑀢𑁂𑀦 𑀧𑀞𑀫𑀁 𑀓𑀻𑀤𑀺𑀲𑁂 𑀧𑀼𑀕𑁆𑀕𑀮𑁂 𑀫𑁂𑀢𑁆𑀢𑀸𑀬𑀺𑀢𑀩𑁆𑀩’’𑀦𑁆𑀢𑀺 𑀧𑀼𑀘𑁆𑀙𑀺. 𑀣𑁂𑀭𑁄 𑀲𑀪𑀸𑀕𑀯𑀺𑀲𑀪𑀸𑀕𑀁 𑀅𑀦𑀸𑀘𑀺𑀓𑁆𑀔𑀺𑀢𑁆𑀯𑀸 ‘‘𑀧𑀺𑀬𑀧𑀼𑀕𑁆𑀕𑀮𑁂’’𑀢𑀺 𑀆𑀳. 𑀢𑀲𑁆𑀲 𑀘 𑀪𑀭𑀺𑀬𑀸 𑀧𑀺𑀬𑀸 𑀳𑁄𑀢𑀺 𑀫𑀦𑀸𑀧𑀸, 𑀲𑁄 𑀢𑀁 𑀆𑀭𑀩𑁆𑀪 𑀫𑁂𑀢𑁆𑀢𑀸𑀬𑀦𑁆𑀢𑁄 𑀉𑀫𑁆𑀫𑀸𑀤𑀁 𑀧𑀸𑀧𑀼𑀡𑀺. 𑀓𑀣𑀁 𑀧𑀦𑁂𑀲 𑀩𑀳𑀼𑀚𑀦𑀅𑀳𑀺𑀢𑀸𑀬 𑀧𑀝𑀺𑀧𑀦𑁆𑀦𑁄 𑀳𑁄𑀢𑀻𑀢𑀺? 𑀏𑀯𑀭𑀽𑀧𑀲𑁆𑀲 𑀳𑀺 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸𑀤𑀬𑁄 𑀘𑁂𑀯 𑀉𑀧𑀝𑁆𑀞𑀸𑀓𑀸𑀤𑀬𑁄 𑀘 𑀢𑁂𑀲𑀁 𑀆𑀭𑀓𑁆𑀔𑀤𑁂𑀯𑀢𑀸 𑀆𑀤𑀺𑀁 𑀓𑀢𑁆𑀯𑀸 𑀢𑀸𑀲𑀁 𑀢𑀸𑀲𑀁 𑀫𑀺𑀢𑁆𑀢𑀪𑀽𑀢𑀸 𑀬𑀸𑀯 𑀩𑁆𑀭𑀳𑁆𑀫𑀮𑁄𑀓𑀸 𑀲𑁂𑀲𑀤𑁂𑀯𑀢𑀸 𑀘 ‘‘𑀅𑀬𑀁 𑀪𑀺𑀓𑁆𑀔𑀼 𑀦 𑀅𑀚𑀸𑀦𑀺𑀢𑁆𑀯𑀸 𑀓𑀭𑀺𑀲𑁆𑀲𑀢𑀻’’𑀢𑀺 𑀢𑁂𑀦 𑀓𑀢𑀫𑁂𑀯 𑀓𑀭𑁄𑀦𑁆𑀢𑀺, 𑀏𑀯𑀫𑁂𑀲 𑀩𑀳𑀼𑀚𑀦𑀅𑀳𑀺𑀢𑀸𑀬 𑀧𑀝𑀺𑀧𑀦𑁆𑀦𑁄 𑀳𑁄𑀢𑀺.

𑀲𑀼𑀓𑁆𑀓𑀧𑀓𑁆𑀔𑁂 𑀧𑀸𑀡𑀸𑀢𑀺𑀧𑀸𑀢𑀸 𑀯𑁂𑀭𑀫𑀡𑀺𑀆𑀤𑀻𑀦𑀁𑀬𑁂𑀯 𑀯𑀲𑁂𑀦 𑀓𑀸𑀬𑀓𑀫𑁆𑀫𑀯𑀘𑀻𑀓𑀫𑁆𑀫𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀓𑀫𑁆𑀫𑀝𑁆𑀞𑀸𑀦𑀁 𑀧𑀦 𑀅𑀯𑀺𑀲𑀁𑀯𑀸𑀤𑁂𑀢𑁆𑀯𑀸 𑀓𑀣𑁂𑀦𑁆𑀢𑁄 𑀅𑀦𑀼𑀮𑁄𑀫𑀺𑀓𑁂𑀲𑀼 𑀥𑀫𑁆𑀫𑁂𑀲𑀼 𑀲𑀫𑀸𑀤𑀧𑁂𑀢𑀺 𑀦𑀸𑀫 𑀓𑁄𑀴𑀺𑀢𑀯𑀺𑀳𑀸𑀭𑀯𑀸𑀲𑀻 𑀘𑀢𑀼𑀦𑀺𑀓𑀸𑀬𑀺𑀓𑀢𑀺𑀲𑁆𑀲𑀢𑁆𑀣𑁂𑀭𑁄 𑀯𑀺𑀬. 𑀢𑀲𑁆𑀲 𑀓𑀺𑀭 𑀚𑁂𑀝𑁆𑀞𑀪𑀸𑀢𑀸 𑀦𑀦𑁆𑀤𑀸𑀪𑀬𑀢𑁆𑀣𑁂𑀭𑁄 𑀦𑀸𑀫 𑀧𑁄𑀢𑀮𑀺𑀬𑀯𑀺𑀳𑀸𑀭𑁂 𑀯𑀲𑀦𑁆𑀢𑁄 𑀏𑀓𑀲𑁆𑀫𑀺𑀁 𑀭𑁄𑀕𑁂 𑀲𑀫𑀼𑀝𑁆𑀞𑀺𑀢𑁂 𑀓𑀦𑀺𑀝𑁆𑀞𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀆𑀳 𑁋 ‘‘𑀆𑀯𑀼𑀲𑁄, 𑀫𑀬𑁆𑀳𑀁 𑀲𑀮𑁆𑀮𑀳𑀼𑀓𑀁 𑀓𑀢𑁆𑀯𑀸 𑀏𑀓𑀁 𑀓𑀫𑁆𑀫𑀝𑁆𑀞𑀸𑀦𑀁 𑀓𑀣𑁂𑀳𑀻’’𑀢𑀺. 𑀓𑀺𑀁, 𑀪𑀦𑁆𑀢𑁂, 𑀅𑀜𑁆𑀜𑁂𑀦 𑀓𑀫𑁆𑀫𑀝𑁆𑀞𑀸𑀦𑁂𑀦, 𑀓𑀩𑀴𑀻𑀓𑀸𑀭𑀸𑀳𑀸𑀭𑀁 𑀧𑀭𑀺𑀕𑁆𑀕𑀡𑁆𑀳𑀺𑀢𑀼𑀁 𑀯𑀝𑁆𑀝𑀢𑀻𑀢𑀺? 𑀓𑀺𑀫𑀢𑁆𑀣𑀺𑀓𑁄 𑀏𑀲, 𑀆𑀯𑀼𑀲𑁄𑀢𑀺? 𑀪𑀦𑁆𑀢𑁂, 𑀓𑀩𑀴𑀻𑀓𑀸𑀭𑀸𑀳𑀸𑀭𑁄 𑀉𑀧𑀸𑀤𑀸𑀭𑀽𑀧𑀁, 𑀏𑀓𑀲𑁆𑀫𑀺𑀜𑁆𑀘 𑀉𑀧𑀸𑀤𑀸𑀭𑀽𑀧𑁂 𑀤𑀺𑀝𑁆𑀞𑁂 𑀢𑁂𑀯𑀻𑀲𑀢𑀺 𑀉𑀧𑀸𑀤𑀸𑀭𑀽𑀧𑀸𑀦𑀺 𑀧𑀸𑀓𑀝𑀸𑀦𑀺 𑀳𑁄𑀦𑁆𑀢𑀻𑀢𑀺. 𑀲𑁄 ‘‘𑀯𑀝𑁆𑀝𑀺𑀲𑁆𑀲𑀢𑀺, 𑀆𑀯𑀼𑀲𑁄, 𑀏𑀢𑁆𑀢𑀓’’𑀦𑁆𑀢𑀺 𑀢𑀁 𑀉𑀬𑁆𑀬𑁄𑀚𑁂𑀢𑁆𑀯𑀸 𑀓𑀩𑀴𑀻𑀓𑀸𑀭𑀸𑀳𑀸𑀭𑀁 𑀧𑀭𑀺𑀕𑁆𑀕𑀡𑁆𑀳𑀺𑀢𑁆𑀯𑀸 𑀉𑀧𑀸𑀤𑀸𑀭𑀽𑀧𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀯𑀺𑀯𑀝𑁆𑀝𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀅𑀣 𑀦𑀁 𑀣𑁂𑀭𑀁 𑀩𑀳𑀺𑀯𑀺𑀳𑀸𑀭𑀸 𑀅𑀦𑀺𑀓𑁆𑀔𑀦𑁆𑀢𑀫𑁂𑀯 𑀧𑀓𑁆𑀓𑁄𑀲𑀺𑀢𑁆𑀯𑀸, ‘‘𑀆𑀯𑀼𑀲𑁄, 𑀫𑀳𑀸𑀅𑀯𑀲𑁆𑀲𑀬𑁄𑀲𑀺 𑀫𑀬𑁆𑀳𑀁 𑀚𑀸𑀢𑁄’’𑀢𑀺 𑀓𑀦𑀺𑀝𑁆𑀞𑀢𑁆𑀣𑁂𑀭𑀲𑁆𑀲 𑀅𑀢𑁆𑀢𑀦𑀸 𑀧𑀝𑀺𑀮𑀤𑁆𑀥𑀕𑀼𑀡𑀁 𑀆𑀭𑁄𑀘𑁂𑀲𑀺. 𑀩𑀳𑀼𑀚𑀦𑀳𑀺𑀢𑀸𑀬𑀸𑀢𑀺 𑀏𑀢𑀲𑁆𑀲𑀧𑀺 𑀳𑀺 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸𑀤𑀬𑁄 ‘‘𑀅𑀬𑀁 𑀦 𑀅𑀚𑀸𑀦𑀺𑀢𑁆𑀯𑀸 𑀓𑀭𑀺𑀲𑁆𑀲𑀢𑀻’’𑀢𑀺 𑀢𑁂𑀦 𑀓𑀢𑀫𑁂𑀯 𑀓𑀭𑁄𑀦𑁆𑀢𑀻𑀢𑀺 𑀩𑀳𑀼𑀚𑀦𑀳𑀺𑀢𑀸𑀬 𑀧𑀝𑀺𑀧𑀦𑁆𑀦𑁄 𑀦𑀸𑀫 𑀳𑁄𑀢𑀻𑀢𑀺.

𑁨. 𑀲𑀸𑀭𑀡𑀻𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁨. 𑀤𑀼𑀢𑀺𑀬𑁂 𑀔𑀢𑁆𑀢𑀺𑀬𑀲𑁆𑀲𑀸𑀢𑀺 𑀚𑀸𑀢𑀺𑀬𑀸 𑀔𑀢𑁆𑀢𑀺𑀬𑀲𑁆𑀲. 𑀫𑀼𑀤𑁆𑀥𑀸𑀯𑀲𑀺𑀢𑁆𑀢𑀲𑁆𑀲𑀸𑀢𑀺 𑀭𑀸𑀚𑀸𑀪𑀺𑀲𑁂𑀓𑁂𑀦 𑀫𑀼𑀤𑁆𑀥𑀦𑀺 𑀅𑀪𑀺𑀲𑀺𑀢𑁆𑀢𑀲𑁆𑀲. 𑀲𑀸𑀭𑀡𑀻𑀬𑀸𑀦𑀺 𑀪𑀯𑀦𑁆𑀢𑀻𑀢𑀺 𑀲𑀭𑀺𑀢𑀩𑁆𑀩𑀸𑀦𑀺 𑀅𑀲𑀫𑁆𑀫𑀼𑀲𑁆𑀲𑀦𑀻𑀬𑀸𑀦𑀺 𑀳𑁄𑀦𑁆𑀢𑀺. 𑀚𑀸𑀢𑁄𑀢𑀺 𑀦𑀺𑀩𑁆𑀩𑀢𑁆𑀢𑁄. 𑀬𑀸𑀯𑀚𑀻𑀯𑀁 𑀲𑀸𑀭𑀡𑀻𑀬𑀦𑁆𑀢𑀺 𑀤𑀳𑀭𑀓𑀸𑀮𑁂 𑀚𑀸𑀦𑀺𑀢𑀼𑀫𑁆𑀧𑀺 𑀦 𑀲𑀓𑁆𑀓𑀸, 𑀅𑀧𑀭𑀪𑀸𑀕𑁂 𑀧𑀦 𑀫𑀸𑀢𑀸𑀧𑀺𑀢𑀼𑀆𑀤𑀻𑀳𑀺 𑀜𑀸𑀢𑀓𑁂𑀳𑀺 𑀯𑀸 𑀤𑀸𑀲𑀸𑀤𑀻𑀳𑀺 𑀯𑀸 ‘‘𑀢𑁆𑀯𑀁 𑀅𑀲𑀼𑀓𑀚𑀦𑀧𑀤𑁂 𑀅𑀲𑀼𑀓𑀦𑀕𑀭𑁂 𑀅𑀲𑀼𑀓𑀤𑀺𑀯𑀲𑁂 𑀅𑀲𑀼𑀓𑀦𑀓𑁆𑀔𑀢𑁆𑀢𑁂 𑀚𑀸𑀢𑁄’’𑀢𑀺 𑀆𑀘𑀺𑀓𑁆𑀔𑀺𑀢𑁂 𑀲𑀼𑀢𑁆𑀯𑀸 𑀢𑀢𑁄 𑀧𑀝𑁆𑀞𑀸𑀬 𑀬𑀸𑀯𑀚𑀻𑀯𑀁 𑀲𑀭𑀢𑀺 𑀦 𑀲𑀫𑁆𑀫𑀼𑀲𑁆𑀲𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀬𑀸𑀯𑀚𑀻𑀯𑀁 𑀲𑀸𑀭𑀡𑀻𑀬𑀁 𑀳𑁄𑀢𑀻’’𑀢𑀺.

𑀇𑀤𑀁, 𑀪𑀺𑀓𑁆𑀔𑀯𑁂, 𑀤𑀼𑀢𑀺𑀬𑀦𑁆𑀢𑀺 𑀅𑀪𑀺𑀲𑁂𑀓𑀝𑁆𑀞𑀸𑀦𑀁 𑀦𑀸𑀫 𑀭𑀜𑁆𑀜𑁄 𑀩𑀮𑀯𑀢𑀼𑀝𑁆𑀞𑀺𑀓𑀭𑀁 𑀳𑁄𑀢𑀺, 𑀢𑁂𑀦𑀲𑁆𑀲 𑀢𑀁 𑀬𑀸𑀯𑀚𑀻𑀯𑀁 𑀲𑀸𑀭𑀡𑀻𑀬𑀁. 𑀲𑀗𑁆𑀕𑀸𑀫𑀯𑀺𑀚𑀬𑀝𑁆𑀞𑀸𑀦𑁂𑀧𑀺 𑀏𑀲𑁂𑀯 𑀦𑀬𑁄. 𑀏𑀢𑁆𑀣 𑀧𑀦 𑀲𑀗𑁆𑀕𑀸𑀫𑀦𑁆𑀢𑀺 𑀬𑀼𑀤𑁆𑀥𑀁. 𑀅𑀪𑀺𑀯𑀺𑀚𑀺𑀦𑀺𑀢𑁆𑀯𑀸𑀢𑀺 𑀚𑀺𑀦𑀺𑀢𑁆𑀯𑀸 𑀲𑀢𑁆𑀢𑀼𑀫𑀤𑁆𑀤𑀦𑀁 𑀓𑀢𑁆𑀯𑀸. 𑀢𑀫𑁂𑀯 𑀲𑀗𑁆𑀕𑀸𑀫𑀲𑀻𑀲𑀦𑁆𑀢𑀺 𑀢𑀫𑁂𑀯 𑀲𑀗𑁆𑀕𑀸𑀫𑀝𑁆𑀞𑀸𑀦𑀁. 𑀅𑀚𑁆𑀛𑀸𑀯𑀲𑀢𑀻𑀢𑀺 𑀅𑀪𑀺𑀪𑀯𑀺𑀢𑁆𑀯𑀸 𑀆𑀯𑀲𑀢𑀺.

𑀇𑀤𑀸𑀦𑀺 𑀬𑀲𑁆𑀫𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀭𑀜𑁆𑀜𑁄 𑀚𑀸𑀢𑀺𑀝𑁆𑀞𑀸𑀦𑀸𑀤𑀻𑀳𑀺 𑀓𑀢𑁆𑀢𑀩𑁆𑀩𑀓𑀺𑀘𑁆𑀘𑀁 𑀦𑀢𑁆𑀣𑀺, 𑀇𑀫𑀲𑁆𑀫𑀺𑀁 𑀧𑀦 𑀲𑀸𑀲𑀦𑁂 𑀢𑀧𑁆𑀧𑀝𑀺𑀪𑀸𑀕𑁂 𑀢𑀬𑁄 𑀧𑀼𑀕𑁆𑀕𑀮𑁂 𑀤𑀲𑁆𑀲𑁂𑀢𑀼𑀁 𑀇𑀤𑀁 𑀓𑀸𑀭𑀡𑀁 𑀆𑀪𑀢𑀁, 𑀢𑀲𑁆𑀫𑀸 𑀢𑁂 𑀤𑀲𑁆𑀲𑁂𑀦𑁆𑀢𑁄 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑁄 𑀳𑁄𑀢𑀻𑀢𑀺 𑀏𑀢𑁆𑀣 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀫𑁆𑀧𑀺 𑀧𑀩𑁆𑀩𑀚𑁆𑀚𑀸𑀦𑀺𑀲𑁆𑀲𑀺𑀢𑀫𑁂𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀲𑀸𑀭𑀡𑀻𑀬𑀁 𑀳𑁄𑀢𑀻𑀢𑀺 ‘‘𑀅𑀳𑀁 𑀅𑀲𑀼𑀓𑀭𑀝𑁆𑀞𑁂 𑀅𑀲𑀼𑀓𑀚𑀦𑀧𑀤𑁂 𑀅𑀲𑀼𑀓𑀯𑀺𑀳𑀸𑀭𑁂 𑀅𑀲𑀼𑀓𑀫𑀸𑀴𑀓𑁂 𑀅𑀲𑀼𑀓𑀤𑀺𑀯𑀸𑀝𑁆𑀞𑀸𑀦𑁂 𑀅𑀲𑀼𑀓𑀘𑀗𑁆𑀓𑀫𑁂 𑀅𑀲𑀼𑀓𑀭𑀼𑀓𑁆𑀔𑀫𑀽𑀮𑁂 𑀧𑀩𑁆𑀩𑀚𑀺𑀢𑁄’’𑀢𑀺 𑀏𑀯𑀁 𑀬𑀸𑀯𑀚𑀻𑀯𑀁 𑀲𑀭𑀺𑀢𑀩𑁆𑀩𑀫𑁂𑀯 𑀳𑁄𑀢𑀺 𑀦 𑀲𑀫𑁆𑀫𑀼𑀲𑁆𑀲𑀺𑀢𑀩𑁆𑀩𑀁.

𑀇𑀤𑀁 𑀤𑀼𑀓𑁆𑀔𑀦𑁆𑀢𑀺 𑀏𑀢𑁆𑀢𑀓𑀁 𑀤𑀼𑀓𑁆𑀔𑀁, 𑀦 𑀇𑀢𑁄 𑀉𑀤𑁆𑀥𑀁 𑀤𑀼𑀓𑁆𑀔𑀁 𑀅𑀢𑁆𑀣𑀺. 𑀅𑀬𑀁 𑀤𑀼𑀓𑁆𑀔𑀲𑀫𑀼𑀤𑀬𑁄𑀢𑀺 𑀏𑀢𑁆𑀢𑀓𑁄 𑀤𑀼𑀓𑁆𑀔𑀲𑀫𑀼𑀤𑀬𑁄, 𑀦 𑀇𑀢𑁄 𑀉𑀤𑁆𑀥𑀁 𑀤𑀼𑀓𑁆𑀔𑀲𑀫𑀼𑀤𑀬𑁄 𑀅𑀢𑁆𑀣𑀻𑀢𑀺. 𑀲𑁂𑀲𑀧𑀤𑀤𑁆𑀯𑀬𑁂𑀧𑀺 𑀏𑀲𑁂𑀯 𑀦𑀬𑁄. 𑀏𑀯𑀫𑁂𑀢𑁆𑀣 𑀘𑀢𑀽𑀳𑀺 𑀲𑀘𑁆𑀘𑁂𑀳𑀺 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁄 𑀓𑀣𑀺𑀢𑁄. 𑀓𑀲𑀺𑀡𑀧𑀭𑀺𑀓𑀫𑁆𑀫𑀯𑀺𑀧𑀲𑁆𑀲𑀦𑀸𑀜𑀸𑀡𑀸𑀦𑀺 𑀧𑀦 𑀫𑀕𑁆𑀕𑀲𑀦𑁆𑀦𑀺𑀲𑁆𑀲𑀺𑀢𑀸𑀦𑁂𑀯 𑀳𑁄𑀦𑁆𑀢𑀺. 𑀲𑀸𑀭𑀡𑀻𑀬𑀁 𑀳𑁄𑀢𑀻𑀢𑀺 ‘‘𑀅𑀳𑀁 𑀅𑀲𑀼𑀓𑀭𑀝𑁆𑀞𑁂…𑀧𑁂… 𑀅𑀲𑀼𑀓𑀭𑀼𑀓𑁆𑀔𑀫𑀽𑀮𑁂 𑀲𑁄𑀢𑀸𑀧𑀦𑁆𑀦𑁄 𑀚𑀸𑀢𑁄’’𑀢𑀺 𑀬𑀸𑀯𑀚𑀻𑀯𑀁 𑀲𑀸𑀭𑀡𑀻𑀬𑀁 𑀳𑁄𑀢𑀺 𑀅𑀲𑀫𑁆𑀫𑀼𑀲𑁆𑀲𑀦𑀻𑀬𑀁.

𑀆𑀲𑀯𑀸𑀦𑀁 𑀔𑀬𑀸𑀢𑀺 𑀆𑀲𑀯𑀸𑀦𑀁 𑀔𑀬𑁂𑀦. 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀦𑁆𑀢𑀺 𑀨𑀮𑀲𑀫𑀸𑀥𑀺𑀁. 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀦𑁆𑀢𑀺 𑀨𑀮𑀧𑀜𑁆𑀜𑀁. 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸𑀢𑀺 𑀅𑀢𑁆𑀢𑀦𑀸𑀯 𑀅𑀪𑀺𑀯𑀺𑀲𑀺𑀝𑁆𑀞𑀸𑀬 𑀧𑀜𑁆𑀜𑀸𑀬 𑀧𑀘𑁆𑀘𑀓𑁆𑀔𑀁 𑀓𑀢𑁆𑀯𑀸. 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀻𑀢𑀺 𑀧𑀝𑀺𑀮𑀪𑀺𑀢𑁆𑀯𑀸 𑀯𑀺𑀳𑀭𑀢𑀺. 𑀲𑀸𑀭𑀡𑀻𑀬𑀦𑁆𑀢𑀺 ‘‘𑀫𑀬𑀸 𑀅𑀲𑀼𑀓𑀭𑀝𑁆𑀞𑁂…𑀧𑁂… 𑀅𑀲𑀼𑀓𑀭𑀼𑀓𑁆𑀔𑀫𑀽𑀮𑁂 𑀅𑀭𑀳𑀢𑁆𑀢𑀁 𑀧𑀢𑁆𑀢’’𑀦𑁆𑀢𑀺 𑀅𑀢𑁆𑀢𑀦𑁄 𑀅𑀭𑀳𑀢𑁆𑀢𑀧𑀢𑁆𑀢𑀺𑀝𑁆𑀞𑀸𑀦𑀁 𑀦𑀸𑀫 𑀬𑀸𑀯𑀚𑀻𑀯𑀁 𑀲𑀸𑀭𑀡𑀻𑀬𑀁 𑀳𑁄𑀢𑀺 𑀅𑀲𑀫𑁆𑀫𑀼𑀲𑁆𑀲𑀦𑀻𑀬𑀦𑁆𑀢𑀺 𑀬𑀣𑀸𑀦𑀼𑀲𑀦𑁆𑀥𑀺𑀦𑀸𑀯 𑀤𑁂𑀲𑀦𑀁 𑀦𑀺𑀝𑁆𑀞𑀧𑁂𑀲𑀺.

𑁩. 𑀆𑀲𑀁𑀲𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁩. 𑀢𑀢𑀺𑀬𑁂 𑀲𑀦𑁆𑀢𑁄𑀢𑀺 𑀅𑀢𑁆𑀣𑀺 𑀉𑀧𑀮𑀩𑁆𑀪𑀦𑁆𑀢𑀺. 𑀲𑀁𑀯𑀺𑀚𑁆𑀚𑀫𑀸𑀦𑀸𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀮𑁄𑀓𑀲𑁆𑀫𑀺𑀦𑁆𑀢𑀺 𑀲𑀢𑁆𑀢𑀮𑁄𑀓𑁂. 𑀦𑀺𑀭𑀸𑀲𑁄𑀢𑀺 𑀅𑀦𑀸𑀲𑁄 𑀅𑀧𑀢𑁆𑀣𑀦𑁄. 𑀆𑀲𑀁𑀲𑁄𑀢𑀺 𑀆𑀲𑀁𑀲𑀫𑀸𑀦𑁄 𑀧𑀢𑁆𑀣𑀬𑀫𑀸𑀦𑁄. 𑀯𑀺𑀕𑀢𑀸𑀲𑁄𑀢𑀺 𑀅𑀧𑀕𑀢𑀸𑀲𑁄. 𑀘𑀡𑁆𑀟𑀸𑀮𑀓𑀼𑀮𑁂𑀢𑀺 𑀘𑀡𑁆𑀟𑀸𑀮𑀸𑀦𑀁 𑀓𑀼𑀮𑁂. 𑀯𑁂𑀦𑀓𑀼𑀮𑁂𑀢𑀺 𑀯𑀺𑀮𑀻𑀯𑀓𑀸𑀭𑀓𑀼𑀮𑁂. 𑀦𑁂𑀲𑀸𑀤𑀓𑀼𑀮𑁂𑀢𑀺 𑀫𑀺𑀕𑀮𑀼𑀤𑁆𑀤𑀓𑀸𑀦𑀁 𑀓𑀼𑀮𑁂. 𑀭𑀣𑀓𑀸𑀭𑀓𑀼𑀮𑁂𑀢𑀺 𑀘𑀫𑁆𑀫𑀓𑀸𑀭𑀓𑀼𑀮𑁂. 𑀧𑀼𑀓𑁆𑀓𑀼𑀲𑀓𑀼𑀮𑁂𑀢𑀺 𑀧𑀼𑀧𑁆𑀨𑀘𑁆𑀙𑀟𑁆𑀟𑀓𑀓𑀼𑀮𑁂.

𑀏𑀢𑁆𑀢𑀸𑀯𑀢𑀸 𑀓𑀼𑀮𑀯𑀺𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀬𑀲𑁆𑀫𑀸 𑀦𑀻𑀘𑀓𑀼𑀮𑁂 𑀚𑀸𑀢𑁄𑀧𑀺 𑀏𑀓𑀘𑁆𑀘𑁄 𑀅𑀟𑁆𑀠𑁄 𑀳𑁄𑀢𑀺 𑀫𑀳𑀤𑁆𑀥𑀦𑁄, 𑀅𑀬𑀁 𑀧𑀦 𑀦 𑀢𑀸𑀤𑀺𑀲𑁄, 𑀢𑀲𑁆𑀫𑀸𑀲𑁆𑀲 𑀪𑁄𑀕𑀯𑀺𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑀼𑀁 𑀤𑀮𑀺𑀤𑁆𑀤𑁂𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀤𑀮𑀺𑀤𑁆𑀤𑁂𑀢𑀺 𑀤𑀸𑀮𑀺𑀤𑁆𑀤𑀺𑀬𑁂𑀦 𑀲𑀫𑀦𑁆𑀦𑀸𑀕𑀢𑁂. 𑀅𑀧𑁆𑀧𑀦𑁆𑀦𑀧𑀸𑀦𑀪𑁄𑀚𑀦𑁂𑀢𑀺 𑀧𑀭𑀺𑀢𑁆𑀢𑀓𑀅𑀦𑁆𑀦𑀧𑀸𑀦𑀪𑁄𑀚𑀦𑁂. 𑀓𑀲𑀺𑀭𑀯𑀼𑀢𑁆𑀢𑀺𑀓𑁂𑀢𑀺 𑀤𑀼𑀓𑁆𑀔𑀚𑀻𑀯𑀺𑀓𑁂, 𑀬𑀢𑁆𑀣 𑀯𑀸𑀬𑀸𑀫𑁂𑀦 𑀧𑀬𑁄𑀕𑁂𑀦 𑀚𑀻𑀯𑀺𑀢𑀯𑀼𑀢𑁆𑀢𑀺𑀁 𑀲𑀸𑀥𑁂𑀦𑁆𑀢𑀺, 𑀢𑀣𑀸𑀭𑀽𑀧𑁂𑀢𑀺 𑀅𑀢𑁆𑀣𑁄. 𑀬𑀢𑁆𑀣 𑀓𑀲𑀺𑀭𑁂𑀦 𑀖𑀸𑀲𑀘𑁆𑀙𑀸𑀤𑁄 𑀮𑀩𑁆𑀪𑀢𑀻𑀢𑀺 𑀬𑀲𑁆𑀫𑀺𑀁 𑀓𑀼𑀮𑁂 𑀤𑀼𑀓𑁆𑀔𑁂𑀦 𑀬𑀸𑀕𑀼𑀪𑀢𑁆𑀢𑀖𑀸𑀲𑁄 𑀘 𑀓𑁄𑀧𑀻𑀦𑀫𑀢𑁆𑀢𑀁 𑀅𑀘𑁆𑀙𑀸𑀤𑀦𑀜𑁆𑀘 𑀮𑀩𑁆𑀪𑀢𑀺.

𑀇𑀤𑀸𑀦𑀺 𑀬𑀲𑁆𑀫𑀸 𑀏𑀓𑀘𑁆𑀘𑁄 𑀦𑀻𑀘𑀓𑀼𑀮𑁂 𑀚𑀸𑀢𑁄𑀧𑀺 𑀉𑀧𑀥𑀺𑀲𑀫𑁆𑀧𑀦𑁆𑀦𑁄 𑀳𑁄𑀢𑀺 𑀅𑀢𑁆𑀢𑀪𑀸𑀯𑀲𑀫𑀺𑀤𑁆𑀥𑀺𑀬𑀁 𑀞𑀺𑀢𑁄, 𑀅𑀬𑀜𑁆𑀘 𑀦 𑀢𑀸𑀤𑀺𑀲𑁄, 𑀢𑀲𑁆𑀫𑀸𑀲𑁆𑀲 𑀲𑀭𑀻𑀭𑀯𑀺𑀧𑀢𑁆𑀢𑀺𑀫𑁆𑀧𑀺 𑀤𑀲𑁆𑀲𑁂𑀢𑀼𑀁 𑀲𑁄 𑀘 𑀳𑁄𑀢𑀺 𑀤𑀼𑀩𑁆𑀩𑀡𑁆𑀡𑁄𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀤𑀼𑀩𑁆𑀩𑀡𑁆𑀡𑁄𑀢𑀺 𑀧𑀁𑀲𑀼𑀧𑀺𑀲𑀸𑀘𑀓𑁄 𑀯𑀺𑀬 𑀛𑀸𑀫𑀔𑀸𑀡𑀼𑀯𑀡𑁆𑀡𑁄. 𑀤𑀼𑀤𑁆𑀤𑀲𑀺𑀓𑁄𑀢𑀺 𑀯𑀺𑀚𑀸𑀢𑀫𑀸𑀢𑀼𑀬𑀸𑀧𑀺 𑀅𑀫𑀦𑀸𑀧𑀤𑀲𑁆𑀲𑀦𑁄. 𑀑𑀓𑁄𑀝𑀺𑀫𑀓𑁄𑀢𑀺 𑀮𑀓𑀼𑀡𑁆𑀟𑀓𑁄. 𑀓𑀸𑀡𑁄𑀢𑀺 𑀏𑀓𑀓𑁆𑀔𑀺𑀓𑀸𑀡𑁄 𑀯𑀸 𑀉𑀪𑀬𑀓𑁆𑀔𑀺𑀓𑀸𑀡𑁄 𑀯𑀸. 𑀓𑀼𑀡𑀻𑀢𑀺 𑀏𑀓𑀳𑀢𑁆𑀣𑀓𑀼𑀡𑀻 𑀯𑀸 𑀉𑀪𑀬𑀳𑀢𑁆𑀣𑀓𑀼𑀡𑀻 𑀯𑀸. 𑀔𑀜𑁆𑀚𑁄𑀢𑀺 𑀏𑀓𑀧𑀸𑀤𑀔𑀜𑁆𑀚𑁄 𑀯𑀸 𑀉𑀪𑀬𑀧𑀸𑀤𑀔𑀜𑁆𑀚𑁄 𑀯𑀸. 𑀧𑀓𑁆𑀔𑀳𑀢𑁄𑀢𑀺 𑀳𑀢𑀧𑀓𑁆𑀔𑁄 𑀧𑀻𑀞𑀲𑀧𑁆𑀧𑀻. 𑀧𑀤𑀻𑀧𑁂𑀬𑁆𑀬𑀲𑁆𑀲𑀸𑀢𑀺 𑀯𑀝𑁆𑀝𑀺𑀢𑁂𑀮𑀓𑀧𑀮𑁆𑀮𑀓𑀸𑀤𑀺𑀦𑁄 𑀧𑀤𑀻𑀧𑀉𑀧𑀓𑀭𑀡𑀲𑁆𑀲. 𑀢𑀲𑁆𑀲 𑀦 𑀏𑀯𑀁 𑀳𑁄𑀢𑀻𑀢𑀺. 𑀓𑀲𑁆𑀫𑀸 𑀦 𑀳𑁄𑀢𑀺? 𑀦𑀻𑀘𑀓𑀼𑀮𑁂 𑀚𑀸𑀢𑀢𑁆𑀢𑀸.

𑀚𑁂𑀝𑁆𑀞𑁄𑀢𑀺 𑀅𑀜𑁆𑀜𑀲𑁆𑀫𑀺𑀁 𑀚𑁂𑀝𑁆𑀞𑁂 𑀲𑀢𑀺 𑀓𑀦𑀺𑀝𑁆𑀞𑁄 𑀆𑀲𑀁 𑀦 𑀓𑀭𑁄𑀢𑀺, 𑀢𑀲𑁆𑀫𑀸 𑀚𑁂𑀝𑁆𑀞𑁄𑀢𑀺 𑀆𑀳. 𑀆𑀪𑀺𑀲𑁂𑀓𑁄𑀢𑀺 𑀚𑁂𑀝𑁆𑀞𑁄𑀧𑀺 𑀦 𑀅𑀪𑀺𑀲𑁂𑀓𑀸𑀭𑀳𑁄 𑀆𑀲𑀁 𑀦 𑀓𑀭𑁄𑀢𑀺, 𑀢𑀲𑁆𑀫𑀸 𑀆𑀪𑀺𑀲𑁂𑀓𑁄𑀢𑀺 𑀆𑀳. 𑀅𑀦𑀪𑀺𑀲𑀺𑀢𑁆𑀢𑁄𑀢𑀺 𑀅𑀪𑀺𑀲𑁂𑀓𑀸𑀭𑀳𑁄𑀧𑀺 𑀓𑀸𑀡𑀓𑀼𑀡𑀺𑀆𑀤𑀺𑀤𑁄𑀲𑀭𑀳𑀺𑀢𑁄 𑀲𑀓𑀺𑀁 𑀅𑀪𑀺𑀲𑀺𑀢𑁆𑀢𑁄 𑀧𑀼𑀦 𑀅𑀪𑀺𑀲𑁂𑀓𑁂 𑀆𑀲𑀁 𑀦 𑀓𑀭𑁄𑀢𑀺, 𑀢𑀲𑁆𑀫𑀸 𑀅𑀦𑀪𑀺𑀲𑀺𑀢𑁆𑀢𑁄𑀢𑀺 𑀆𑀳. 𑀅𑀘𑀮𑀧𑁆𑀧𑀢𑁆𑀢𑁄𑀢𑀺 𑀚𑁂𑀝𑁆𑀞𑁄𑀧𑀺 𑀆𑀪𑀺𑀲𑁂𑀓𑁄 𑀅𑀦𑀪𑀺𑀲𑀺𑀢𑁆𑀢𑁄 𑀫𑀦𑁆𑀤𑁄 𑀉𑀢𑁆𑀢𑀸𑀦𑀲𑁂𑀬𑁆𑀬𑀓𑁄, 𑀲𑁄𑀧𑀺 𑀅𑀪𑀺𑀲𑁂𑀓𑁂 𑀆𑀲𑀁 𑀦 𑀓𑀭𑁄𑀢𑀺. 𑀲𑁄𑀴𑀲𑀯𑀲𑁆𑀲𑀼𑀤𑁆𑀤𑁂𑀲𑀺𑀓𑁄 𑀧𑀦 𑀧𑀜𑁆𑀜𑀸𑀬𑀫𑀸𑀦𑀫𑀲𑁆𑀲𑀼𑀪𑁂𑀤𑁄 𑀅𑀘𑀮𑀧𑁆𑀧𑀢𑁆𑀢𑁄 𑀦𑀸𑀫 𑀳𑁄𑀢𑀺, 𑀫𑀳𑀦𑁆𑀢𑀫𑁆𑀧𑀺 𑀭𑀚𑁆𑀚𑀁 𑀯𑀺𑀘𑀸𑀭𑁂𑀢𑀼𑀁 𑀲𑀫𑀢𑁆𑀣𑁄, 𑀢𑀲𑁆𑀫𑀸 ‘‘𑀅𑀘𑀮𑀧𑁆𑀧𑀢𑁆𑀢𑁄’’𑀢𑀺 𑀆𑀳. 𑀢𑀲𑁆𑀲 𑀏𑀯𑀁 𑀳𑁄𑀢𑀻𑀢𑀺 𑀓𑀲𑁆𑀫𑀸 𑀳𑁄𑀢𑀺? 𑀫𑀳𑀸𑀚𑀸𑀢𑀺𑀢𑀸𑀬.

𑀤𑀼𑀲𑁆𑀲𑀻𑀮𑁄𑀢𑀺 𑀦𑀺𑀲𑁆𑀲𑀻𑀮𑁄. 𑀧𑀸𑀧𑀥𑀫𑁆𑀫𑁄𑀢𑀺 𑀮𑀸𑀫𑀓𑀥𑀫𑁆𑀫𑁄. 𑀅𑀲𑀼𑀘𑀻𑀢𑀺 𑀅𑀲𑀼𑀘𑀻𑀳𑀺 𑀓𑀸𑀬𑀓𑀫𑁆𑀫𑀸𑀤𑀻𑀳𑀺 𑀲𑀫𑀦𑁆𑀦𑀸𑀕𑀢𑁄. 𑀲𑀗𑁆𑀓𑀲𑁆𑀲𑀭𑀲𑀫𑀸𑀘𑀸𑀭𑁄𑀢𑀺 𑀲𑀗𑁆𑀓𑀸𑀳𑀺 𑀲𑀭𑀺𑀢𑀩𑁆𑀩𑀲𑀫𑀸𑀘𑀸𑀭𑁄, 𑀓𑀺𑀜𑁆𑀘𑀺𑀤𑁂𑀯 𑀅𑀲𑀸𑀭𑀼𑀧𑁆𑀧𑀁 𑀤𑀺𑀲𑁆𑀯𑀸 ‘‘𑀇𑀤𑀁 𑀇𑀫𑀺𑀦𑀸 𑀓𑀢𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀏𑀯𑀁 𑀧𑀭𑁂𑀲𑀁 𑀆𑀲𑀗𑁆𑀓𑀦𑀻𑀬𑀲𑀫𑀸𑀘𑀸𑀭𑁄, 𑀅𑀢𑁆𑀢𑀦𑀸𑀬𑁂𑀯 𑀯𑀸 𑀲𑀗𑁆𑀓𑀸𑀳𑀺 𑀲𑀭𑀺𑀢𑀩𑁆𑀩𑀲𑀫𑀸𑀘𑀸𑀭𑁄, 𑀲𑀸𑀲𑀗𑁆𑀓𑀲𑀫𑀸𑀘𑀸𑀭𑁄𑀢𑀺 𑀅𑀢𑁆𑀣𑁄. 𑀢𑀲𑁆𑀲 𑀳𑀺 𑀤𑀺𑀯𑀸𑀝𑁆𑀞𑀸𑀦𑀸𑀤𑀻𑀲𑀼 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀓𑀺𑀜𑁆𑀘𑀺𑀤𑁂𑀯 𑀫𑀦𑁆𑀢𑀬𑀦𑁆𑀢𑁂 𑀪𑀺𑀓𑁆𑀔𑀽 𑀤𑀺𑀲𑁆𑀯𑀸 ‘‘𑀇𑀫𑁂 𑀏𑀓𑀢𑁄 𑀳𑀼𑀢𑁆𑀯𑀸 𑀫𑀦𑁆𑀢𑁂𑀦𑁆𑀢𑀺, 𑀓𑀘𑁆𑀘𑀺 𑀦𑀼 𑀔𑁄 𑀫𑀬𑀸 𑀓𑀢𑀓𑀫𑁆𑀫𑀁 𑀚𑀸𑀦𑀺𑀢𑁆𑀯𑀸 𑀫𑀦𑁆𑀢𑁂𑀦𑁆𑀢𑀻’’𑀢𑀺 𑀏𑀯𑀁 𑀲𑀸𑀲𑀗𑁆𑀓𑀲𑀫𑀸𑀘𑀸𑀭𑁄 𑀳𑁄𑀢𑀺. 𑀧𑀝𑀺𑀘𑁆𑀙𑀦𑁆𑀦𑀓𑀫𑁆𑀫𑀦𑁆𑀢𑁄𑀢𑀺 𑀧𑀝𑀺𑀘𑁆𑀙𑀸𑀤𑁂𑀢𑀩𑁆𑀩𑀬𑀼𑀢𑁆𑀢𑀓𑁂𑀦 𑀧𑀸𑀧𑀓𑀫𑁆𑀫𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀅𑀲𑁆𑀲𑀫𑀡𑁄 𑀲𑀫𑀡𑀧𑀝𑀺𑀜𑁆𑀜𑁄𑀢𑀺 𑀅𑀲𑁆𑀲𑀫𑀡𑁄 𑀳𑀼𑀢𑁆𑀯𑀸𑀯 𑀲𑀫𑀡𑀧𑀢𑀺𑀭𑀽𑀧𑀓𑀢𑀸𑀬 ‘‘𑀲𑀫𑀡𑁄 𑀅𑀳’’𑀦𑁆𑀢𑀺 𑀏𑀯𑀁 𑀧𑀝𑀺𑀜𑁆𑀜𑁄. 𑀅𑀩𑁆𑀭𑀳𑁆𑀫𑀘𑀸𑀭𑀻 𑀩𑁆𑀭𑀳𑁆𑀫𑀘𑀸𑀭𑀺𑀧𑀝𑀺𑀜𑁆𑀜𑁄𑀢𑀺 𑀅𑀜𑁆𑀜𑁂 𑀩𑁆𑀭𑀳𑁆𑀫𑀘𑀸𑀭𑀺𑀦𑁄 𑀲𑀼𑀦𑀺𑀯𑀢𑁆𑀣𑁂 𑀲𑀼𑀧𑀸𑀭𑀼𑀢𑁂 𑀲𑀼𑀫𑁆𑀪𑀓𑀧𑀢𑁆𑀢𑀥𑀭𑁂 𑀕𑀸𑀫𑀦𑀺𑀕𑀫𑀭𑀸𑀚𑀥𑀸𑀦𑀻𑀲𑀼 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀚𑀻𑀯𑀺𑀓𑀁 𑀓𑀧𑁆𑀧𑁂𑀦𑁆𑀢𑁂 𑀤𑀺𑀲𑁆𑀯𑀸 𑀲𑀬𑀫𑁆𑀧𑀺 𑀢𑀸𑀤𑀺𑀲𑁂𑀦 𑀆𑀓𑀸𑀭𑁂𑀦 𑀢𑀣𑀸 𑀧𑀝𑀺𑀧𑀚𑁆𑀚𑀦𑀢𑁄 ‘‘𑀅𑀳𑀁 𑀩𑁆𑀭𑀳𑁆𑀫𑀘𑀸𑀭𑀻’’𑀢𑀺 𑀧𑀝𑀺𑀜𑁆𑀜𑀁 𑀤𑁂𑀦𑁆𑀢𑁄 𑀯𑀺𑀬 𑀳𑁄𑀢𑀺. ‘‘𑀅𑀳𑀁 𑀪𑀺𑀓𑁆𑀔𑀽’’𑀢𑀺 𑀯𑀢𑁆𑀯𑀸 𑀉𑀧𑁄𑀲𑀣𑀕𑁆𑀕𑀸𑀤𑀻𑀦𑀺 𑀧𑀯𑀺𑀲𑀦𑁆𑀢𑁄 𑀧𑀦 𑀩𑁆𑀭𑀳𑁆𑀫𑀘𑀸𑀭𑀺𑀧𑀝𑀺𑀜𑁆𑀜𑁄 𑀳𑁄𑀢𑀺𑀬𑁂𑀯, 𑀢𑀣𑀸 𑀲𑀗𑁆𑀖𑀺𑀓𑀁 𑀮𑀸𑀪𑀁 𑀕𑀡𑁆𑀳𑀦𑁆𑀢𑁄. 𑀅𑀦𑁆𑀢𑁄𑀧𑀽𑀢𑀻𑀢𑀺 𑀧𑀽𑀢𑀺𑀦𑀸 𑀓𑀫𑁆𑀫𑁂𑀦 𑀅𑀦𑁆𑀢𑁄 𑀅𑀦𑀼𑀧𑀯𑀺𑀝𑁆𑀞𑁄. 𑀅𑀯𑀲𑁆𑀲𑀼𑀢𑁄𑀢𑀺 𑀭𑀸𑀕𑀸𑀤𑀻𑀳𑀺 𑀢𑀺𑀦𑁆𑀢𑁄. 𑀓𑀲𑀫𑁆𑀩𑀼𑀚𑀸𑀢𑁄𑀢𑀺 𑀲𑀜𑁆𑀚𑀸𑀢𑀭𑀸𑀕𑀸𑀤𑀺𑀓𑀘𑀯𑀭𑁄. 𑀢𑀲𑁆𑀲 𑀦 𑀏𑀯𑀁 𑀳𑁄𑀢𑀻𑀢𑀺. 𑀓𑀲𑁆𑀫𑀸 𑀦 𑀳𑁄𑀢𑀺? 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀉𑀧𑀦𑀺𑀲𑁆𑀲𑀬𑀲𑁆𑀲 𑀦𑀢𑁆𑀣𑀺𑀢𑀸𑀬. 𑀢𑀲𑁆𑀲 𑀏𑀯𑀁 𑀳𑁄𑀢𑀻𑀢𑀺. 𑀓𑀲𑁆𑀫𑀸 𑀳𑁄𑀢𑀺? 𑀫𑀳𑀸𑀲𑀻𑀮𑀲𑁆𑀫𑀺𑀁 𑀧𑀭𑀺𑀧𑀽𑀭𑀓𑀸𑀭𑀺𑀢𑀸𑀬.

𑁪. 𑀘𑀓𑁆𑀓𑀯𑀢𑁆𑀢𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁪. 𑀘𑀢𑀼𑀢𑁆𑀣𑁂 𑀘𑀢𑀽𑀳𑀺 𑀲𑀗𑁆𑀕𑀳𑀯𑀢𑁆𑀣𑀽𑀳𑀺 𑀚𑀦𑀁 𑀭𑀜𑁆𑀚𑁂𑀢𑀻𑀢𑀺 𑀭𑀸𑀚𑀸. 𑀘𑀓𑁆𑀓𑀁 𑀯𑀢𑁆𑀢𑁂𑀢𑀻𑀢𑀺 𑀘𑀓𑁆𑀓𑀯𑀢𑁆𑀢𑀻. 𑀯𑀢𑁆𑀢𑀺𑀢𑀁 𑀯𑀸 𑀅𑀦𑁂𑀦 𑀘𑀓𑁆𑀓𑀦𑁆𑀢𑀺 𑀘𑀓𑁆𑀓𑀯𑀢𑁆𑀢𑀻. 𑀥𑀫𑁆𑀫𑁄 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀥𑀫𑁆𑀫𑀺𑀓𑁄. 𑀥𑀫𑁆𑀫𑁂𑀦𑁂𑀯 𑀤𑀲𑀯𑀺𑀥𑁂𑀦 𑀘𑀓𑁆𑀓𑀯𑀢𑁆𑀢𑀺𑀯𑀢𑁆𑀢𑁂𑀦 𑀭𑀸𑀚𑀸 𑀚𑀸𑀢𑁄𑀢𑀺 𑀥𑀫𑁆𑀫𑀭𑀸𑀚𑀸. 𑀲𑁄𑀧𑀺 𑀦 𑀅𑀭𑀸𑀚𑀓𑀦𑁆𑀢𑀺 𑀲𑁄𑀧𑀺 𑀅𑀜𑁆𑀜𑀁 𑀦𑀺𑀲𑁆𑀲𑀬𑀭𑀸𑀚𑀸𑀦𑀁 𑀅𑀮𑀪𑀺𑀢𑁆𑀯𑀸 𑀘𑀓𑁆𑀓𑀁 𑀦𑀸𑀫 𑀯𑀢𑁆𑀢𑁂𑀢𑀼𑀁 𑀦 𑀲𑀓𑁆𑀓𑁄𑀢𑀻𑀢𑀺 𑀅𑀢𑁆𑀣𑁄. 𑀇𑀢𑀺 𑀲𑀢𑁆𑀣𑀸 𑀤𑁂𑀲𑀦𑀁 𑀧𑀝𑁆𑀞𑀧𑁂𑀢𑁆𑀯𑀸 𑀬𑀣𑀸𑀦𑀼𑀲𑀦𑁆𑀥𑀺𑀁 𑀅𑀧𑀸𑀧𑁂𑀢𑁆𑀯𑀸𑀯 𑀢𑀼𑀡𑁆𑀳𑀻 𑀅𑀳𑁄𑀲𑀺. 𑀓𑀲𑁆𑀫𑀸? 𑀅𑀦𑀼𑀲𑀦𑁆𑀥𑀺𑀓𑀼𑀲𑀮𑀸 𑀉𑀝𑁆𑀞𑀳𑀺𑀢𑁆𑀯𑀸 𑀅𑀦𑀼𑀲𑀦𑁆𑀥𑀺𑀁 𑀧𑀼𑀘𑁆𑀙𑀺𑀲𑁆𑀲𑀦𑁆𑀢𑀺, 𑀩𑀳𑀽 𑀳𑀺 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀢𑀣𑀸𑀭𑀽𑀧𑀸 𑀪𑀺𑀓𑁆𑀔𑀽, 𑀅𑀣𑀸𑀳𑀁 𑀢𑁂𑀳𑀺 𑀧𑀼𑀝𑁆𑀞𑁄 𑀤𑁂𑀲𑀦𑀁 𑀯𑀟𑁆𑀠𑁂𑀲𑁆𑀲𑀸𑀫𑀻𑀢𑀺. 𑀅𑀣𑁂𑀓𑁄 𑀅𑀦𑀼𑀲𑀦𑁆𑀥𑀺𑀓𑀼𑀲𑀮𑁄 𑀪𑀺𑀓𑁆𑀔𑀼 𑀪𑀕𑀯𑀦𑁆𑀢𑀁 𑀧𑀼𑀘𑁆𑀙𑀦𑁆𑀢𑁄 𑀓𑁄 𑀧𑀦, 𑀪𑀦𑁆𑀢𑁂𑀢𑀺𑀆𑀤𑀺𑀫𑀸𑀳. 𑀪𑀕𑀯𑀸𑀧𑀺𑀲𑁆𑀲 𑀩𑁆𑀬𑀸𑀓𑀭𑁄𑀦𑁆𑀢𑁄 𑀥𑀫𑁆𑀫𑁄 𑀪𑀺𑀓𑁆𑀔𑀽𑀢𑀺𑀆𑀤𑀺𑀫𑀸𑀳.

𑀢𑀢𑁆𑀣 𑀥𑀫𑁆𑀫𑁄𑀢𑀺 𑀤𑀲𑀓𑀼𑀲𑀮𑀓𑀫𑁆𑀫𑀧𑀣𑀥𑀫𑁆𑀫𑁄. 𑀥𑀫𑁆𑀫𑀦𑁆𑀢𑀺 𑀢𑀫𑁂𑀯 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀥𑀫𑁆𑀫𑀁. 𑀦𑀺𑀲𑁆𑀲𑀸𑀬𑀸𑀢𑀺 𑀢𑀤𑀥𑀺𑀝𑁆𑀞𑀸𑀦𑁂𑀦 𑀘𑁂𑀢𑀲𑀸 𑀢𑀫𑁂𑀯 𑀦𑀺𑀲𑁆𑀲𑀬𑀁 𑀓𑀢𑁆𑀯𑀸. 𑀥𑀫𑁆𑀫𑀁 𑀲𑀓𑁆𑀓𑀭𑁄𑀦𑁆𑀢𑁄𑀢𑀺 𑀬𑀣𑀸 𑀓𑀢𑁄 𑀲𑁄 𑀥𑀫𑁆𑀫𑁄 𑀲𑀼𑀝𑁆𑀞𑀼 𑀓𑀢𑁄 𑀳𑁄𑀢𑀺, 𑀏𑀯𑀫𑁂𑀢𑀁 𑀓𑀭𑁄𑀦𑁆𑀢𑁄. 𑀥𑀫𑁆𑀫𑀁 𑀕𑀭𑀼𑀁 𑀓𑀭𑁄𑀦𑁆𑀢𑁄𑀢𑀺 𑀢𑀲𑁆𑀫𑀺𑀁 𑀕𑀸𑀭𑀯𑀼𑀧𑁆𑀧𑀢𑁆𑀢𑀺𑀬𑀸 𑀢𑀁 𑀕𑀭𑀼𑀓𑀭𑁄𑀦𑁆𑀢𑁄. 𑀥𑀫𑁆𑀫𑀁 𑀅𑀧𑀘𑀸𑀬𑀫𑀸𑀦𑁄𑀢𑀺 𑀢𑀲𑁆𑀲𑁂𑀯 𑀥𑀫𑁆𑀫𑀲𑁆𑀲 𑀅𑀜𑁆𑀚𑀮𑀺𑀓𑀭𑀡𑀸𑀤𑀻𑀳𑀺 𑀦𑀻𑀘𑀯𑀼𑀢𑁆𑀢𑀺𑀢𑀁 𑀓𑀭𑁄𑀦𑁆𑀢𑁄. 𑀥𑀫𑁆𑀫𑀤𑁆𑀥𑀚𑁄 𑀥𑀫𑁆𑀫𑀓𑁂𑀢𑀽𑀢𑀺 𑀢𑀁 𑀥𑀫𑁆𑀫𑀁 𑀥𑀚𑀫𑀺𑀯 𑀧𑀼𑀭𑀓𑁆𑀔𑀢𑁆𑀯𑀸 𑀓𑁂𑀢𑀼𑀫𑀺𑀯 𑀉𑀓𑁆𑀔𑀺𑀧𑀺𑀢𑁆𑀯𑀸 𑀧𑀯𑀢𑁆𑀢𑀺𑀬𑀸 𑀥𑀫𑁆𑀫𑀤𑁆𑀥𑀚𑁄 𑀥𑀫𑁆𑀫𑀓𑁂𑀢𑀼 𑀘 𑀳𑀼𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀥𑀫𑁆𑀫𑀸𑀥𑀺𑀧𑀢𑁂𑀬𑁆𑀬𑁄𑀢𑀺 𑀥𑀫𑁆𑀫𑀸𑀥𑀺𑀧𑀢𑀺𑀪𑀽𑀢𑀸𑀕𑀢𑀪𑀸𑀯𑁂𑀦 𑀥𑀫𑁆𑀫𑀯𑀲𑁂𑀦𑁂𑀯 𑀘 𑀲𑀩𑁆𑀩𑀓𑀺𑀭𑀺𑀬𑀸𑀦𑀁 𑀓𑀭𑀡𑁂𑀦 𑀥𑀫𑁆𑀫𑀸𑀥𑀺𑀧𑀢𑁂𑀬𑁆𑀬𑁄 𑀳𑀼𑀢𑁆𑀯𑀸. 𑀥𑀫𑁆𑀫𑀺𑀓𑀁 𑀭𑀓𑁆𑀔𑀸𑀯𑀭𑀡𑀕𑀼𑀢𑁆𑀢𑀺𑀁 𑀲𑀁𑀯𑀺𑀤𑀳𑀢𑀻𑀢𑀺 𑀥𑀫𑁆𑀫𑁄 𑀅𑀲𑁆𑀲𑀸 𑀅𑀢𑁆𑀣𑀻𑀢𑀺 𑀥𑀫𑁆𑀫𑀺𑀓𑀸, 𑀭𑀓𑁆𑀔𑀸 𑀘 𑀆𑀯𑀭𑀡𑀜𑁆𑀘 𑀕𑀼𑀢𑁆𑀢𑀺 𑀘 𑀭𑀓𑁆𑀔𑀸𑀯𑀭𑀡𑀕𑀼𑀢𑁆𑀢𑀺. 𑀢𑀢𑁆𑀣 ‘‘𑀧𑀭𑀁 𑀭𑀓𑁆𑀔𑀦𑁆𑀢𑁄 𑀅𑀢𑁆𑀢𑀸𑀦𑀁 𑀭𑀓𑁆𑀔𑀢𑀻’’𑀢𑀺 𑀯𑀘𑀦𑀢𑁄 𑀔𑀦𑁆𑀢𑀺𑀆𑀤𑀬𑁄 𑀭𑀓𑁆𑀔𑀸. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋 ‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀧𑀭𑀁 𑀭𑀓𑁆𑀔𑀦𑁆𑀢𑁄 𑀅𑀢𑁆𑀢𑀸𑀦𑀁 𑀭𑀓𑁆𑀔𑀢𑀺. 𑀔𑀦𑁆𑀢𑀺𑀬𑀸 𑀅𑀯𑀺𑀳𑀺𑀁𑀲𑀸𑀬 𑀫𑁂𑀢𑁆𑀢𑀘𑀺𑀢𑁆𑀢𑀢𑀸𑀬 𑀅𑀦𑀼𑀤𑁆𑀤𑀬𑀸𑀬𑀸’’𑀢𑀺 (𑀲𑀁. 𑀦𑀺. 𑁫.𑁩𑁮𑁫). 𑀦𑀺𑀯𑀸𑀲𑀦𑀧𑀸𑀭𑀼𑀧𑀦𑀕𑁂𑀳𑀸𑀤𑀻𑀦𑀺 𑀆𑀯𑀭𑀡𑀁. 𑀘𑁄𑀭𑀸𑀤𑀺𑀉𑀧𑀤𑁆𑀤𑀯𑀦𑀺𑀯𑀸𑀭𑀡𑀢𑁆𑀣𑀁 𑀕𑁄𑀧𑀸𑀬𑀦𑀸 𑀕𑀼𑀢𑁆𑀢𑀺. 𑀢𑀁 𑀲𑀩𑁆𑀩𑀫𑁆𑀧𑀺 𑀲𑀼𑀝𑁆𑀞𑀼 𑀯𑀺𑀤𑀳𑀢𑀺 𑀧𑀯𑀢𑁆𑀢𑁂𑀢𑀺 𑀞𑀧𑁂𑀢𑀻𑀢𑀺 𑀅𑀢𑁆𑀣𑁄.

𑀇𑀤𑀸𑀦𑀺 𑀬𑀢𑁆𑀣 𑀲𑀸 𑀲𑀁𑀯𑀺𑀤𑀳𑀺𑀢𑀩𑁆𑀩𑀸, 𑀢𑀁 𑀤𑀲𑁆𑀲𑁂𑀦𑁆𑀢𑁄 𑀅𑀦𑁆𑀢𑁄𑀚𑀦𑀲𑁆𑀫𑀺𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀭𑀸𑀬𑀁 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀅𑀦𑁆𑀢𑁄𑀚𑀦𑀲𑀗𑁆𑀔𑀸𑀢𑀁 𑀧𑀼𑀢𑁆𑀢𑀤𑀸𑀭𑀁 𑀲𑀻𑀮𑀲𑀁𑀯𑀭𑁂 𑀧𑀢𑀺𑀝𑁆𑀞𑀸𑀧𑁂𑀦𑁆𑀢𑁄 𑀯𑀢𑁆𑀣𑀕𑀦𑁆𑀥𑀫𑀸𑀮𑀸𑀤𑀻𑀦𑀺 𑀘𑀲𑁆𑀲 𑀤𑀤𑀫𑀸𑀦𑁄 𑀲𑀩𑁆𑀩𑁄𑀧𑀤𑁆𑀤𑀯𑁂 𑀘𑀲𑁆𑀲 𑀦𑀺𑀯𑀸𑀭𑀬𑀫𑀸𑀦𑁄 𑀥𑀫𑁆𑀫𑀺𑀓𑀁 𑀭𑀓𑁆𑀔𑀸𑀯𑀭𑀡𑀕𑀼𑀢𑁆𑀢𑀺𑀁 𑀲𑀁𑀯𑀺𑀤𑀳𑀢𑀺 𑀦𑀸𑀫. 𑀔𑀢𑁆𑀢𑀺𑀬𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀅𑀬𑀁 𑀧𑀦 𑀯𑀺𑀲𑁂𑀲𑁄 𑁋 𑀅𑀪𑀺𑀲𑀺𑀢𑁆𑀢𑀔𑀢𑁆𑀢𑀺𑀬𑀸 𑀪𑀤𑁆𑀭𑀅𑀲𑁆𑀲𑀸𑀚𑀸𑀦𑀻𑀬𑀸𑀤𑀺𑀭𑀢𑀦𑀲𑀫𑁆𑀧𑀤𑀸𑀦𑁂𑀦𑀧𑀺 𑀉𑀧𑀕𑀡𑁆𑀳𑀺𑀢𑀩𑁆𑀩𑀸, 𑀅𑀦𑀼𑀬𑀦𑁆𑀢𑀸 𑀔𑀢𑁆𑀢𑀺𑀬𑀸 𑀢𑁂𑀲𑀁 𑀅𑀦𑀼𑀭𑀽𑀧𑀬𑀸𑀦𑀯𑀸𑀳𑀦𑀲𑀫𑁆𑀧𑀤𑀸𑀦𑁂𑀦𑀧𑀺 𑀧𑀭𑀺𑀢𑁄𑀲𑁂𑀢𑀩𑁆𑀩𑀸, 𑀩𑀮𑀓𑀸𑀬𑁄 𑀓𑀸𑀮𑀁 𑀅𑀦𑀢𑀺𑀓𑁆𑀓𑀫𑁂𑀢𑁆𑀯𑀸 𑀪𑀢𑁆𑀢𑀯𑁂𑀢𑀦𑀲𑀫𑁆𑀧𑀤𑀸𑀦𑁂𑀦𑀧𑀺 𑀅𑀦𑀼𑀕𑁆𑀕𑀳𑁂𑀢𑀩𑁆𑀩𑁄, 𑀩𑁆𑀭𑀸𑀳𑁆𑀫𑀡𑀸 𑀅𑀦𑁆𑀦𑀧𑀸𑀦𑀯𑀢𑁆𑀣𑀸𑀤𑀺𑀦𑀸 𑀤𑁂𑀬𑁆𑀬𑀥𑀫𑁆𑀫𑁂𑀦, 𑀕𑀳𑀧𑀢𑀺𑀓𑀸 𑀪𑀢𑁆𑀢𑀩𑀻𑀚𑀦𑀗𑁆𑀕𑀮𑀩𑀮𑀺𑀩𑀤𑁆𑀤𑀸𑀤𑀺𑀲𑀫𑁆𑀧𑀤𑀸𑀦𑁂𑀦, 𑀢𑀣𑀸 𑀦𑀺𑀕𑀫𑀯𑀸𑀲𑀺𑀦𑁄 𑀦𑁂𑀕𑀫𑀸 𑀚𑀦𑀧𑀤𑀯𑀸𑀲𑀺𑀦𑁄 𑀘 𑀚𑀸𑀦𑀧𑀤𑀸. 𑀲𑀫𑀺𑀢𑀧𑀸𑀧𑀩𑀸𑀳𑀺𑀢𑀧𑀸𑀧𑀸 𑀧𑀦 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀲𑀫𑀡𑀧𑀭𑀺𑀓𑁆𑀔𑀸𑀭𑀲𑀫𑁆𑀧𑀤𑀸𑀦𑁂𑀦 𑀲𑀓𑁆𑀓𑀸𑀢𑀩𑁆𑀩𑀸, 𑀫𑀺𑀕𑀧𑀓𑁆𑀔𑀺𑀦𑁄 𑀅𑀪𑀬𑀤𑀸𑀦𑁂𑀦 𑀲𑀫𑀲𑁆𑀲𑀸𑀲𑁂𑀢𑀩𑁆𑀩𑀸.

𑀥𑀫𑁆𑀫𑁂𑀦𑁂𑀯 𑀘𑀓𑁆𑀓𑀁 𑀯𑀢𑁆𑀢𑁂𑀢𑀻𑀢𑀺 𑀤𑀲𑀓𑀼𑀲𑀮𑀓𑀫𑁆𑀫𑀧𑀣𑀥𑀫𑁆𑀫𑁂𑀦𑁂𑀯 𑀘𑀓𑁆𑀓𑀁 𑀧𑀯𑀢𑁆𑀢𑁂𑀢𑀺. 𑀢𑀁 𑀳𑁄𑀢𑀺 𑀘𑀓𑁆𑀓𑀁 𑀅𑀧𑁆𑀧𑀝𑀺𑀯𑀢𑁆𑀢𑀺𑀬𑀦𑁆𑀢𑀺 𑀢𑀁 𑀢𑁂𑀦 𑀏𑀯𑀁 𑀧𑀯𑀢𑁆𑀢𑀺𑀢𑀁 𑀆𑀡𑀸𑀘𑀓𑁆𑀓𑀁 𑀅𑀧𑁆𑀧𑀝𑀺𑀯𑀢𑁆𑀢𑀺𑀬𑀁 𑀳𑁄𑀢𑀺. 𑀓𑁂𑀦𑀘𑀺 𑀫𑀦𑀼𑀲𑁆𑀲𑀪𑀽𑀢𑁂𑀦𑀸𑀢𑀺 𑀤𑁂𑀯𑀢𑀸 𑀦𑀸𑀫 𑀅𑀢𑁆𑀢𑀦𑀸 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀫𑁂𑀯 𑀓𑀭𑁄𑀦𑁆𑀢𑀺, 𑀢𑀲𑁆𑀫𑀸 𑀢𑀸 𑀅𑀕𑁆𑀕𑀡𑁆𑀳𑀺𑀢𑁆𑀯𑀸 ‘‘𑀫𑀦𑀼𑀲𑁆𑀲𑀪𑀽𑀢𑁂𑀦𑀸’’𑀢𑀺 𑀯𑀼𑀢𑁆𑀢𑀁. 𑀧𑀘𑁆𑀘𑀢𑁆𑀣𑀺𑀓𑁂𑀦𑀸𑀢𑀺 𑀧𑀝𑀺𑀅𑀢𑁆𑀣𑀺𑀓𑁂𑀦, 𑀧𑀝𑀺𑀲𑀢𑁆𑀢𑀼𑀦𑀸𑀢𑀺 𑀅𑀢𑁆𑀣𑁄. 𑀥𑀫𑁆𑀫𑀺𑀓𑁄𑀢𑀺 𑀘𑀓𑁆𑀓𑀯𑀢𑁆𑀢𑀻 𑀤𑀲𑀓𑀼𑀲𑀮𑀓𑀫𑁆𑀫𑀧𑀣𑀯𑀲𑁂𑀦 𑀥𑀫𑁆𑀫𑀺𑀓𑁄, 𑀢𑀣𑀸𑀕𑀢𑁄 𑀧𑀦 𑀦𑀯𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀯𑀲𑁂𑀦. 𑀥𑀫𑁆𑀫𑀭𑀸𑀚𑀸𑀢𑀺 𑀦𑀯𑀳𑀺 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁂𑀳𑀺 𑀫𑀳𑀸𑀚𑀦𑀁 𑀭𑀜𑁆𑀚𑁂𑀢𑀻𑀢𑀺 𑀥𑀫𑁆𑀫𑀭𑀸𑀚𑀸. 𑀥𑀫𑁆𑀫𑀁𑀬𑁂𑀯𑀸𑀢𑀺 𑀦𑀯𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀫𑁂𑀯 𑀦𑀺𑀲𑁆𑀲𑀸𑀬 𑀢𑀫𑁂𑀯 𑀲𑀓𑁆𑀓𑀭𑁄𑀦𑁆𑀢𑁄 𑀢𑀁 𑀕𑀭𑀼𑀓𑀭𑁄𑀦𑁆𑀢𑁄 𑀢𑀁 𑀅𑀧𑀘𑀸𑀬𑀫𑀸𑀦𑁄. 𑀲𑁄𑀯𑀲𑁆𑀲 𑀥𑀫𑁆𑀫𑁄 𑀅𑀩𑁆𑀪𑀼𑀕𑁆𑀕𑀢𑀝𑁆𑀞𑁂𑀦 𑀥𑀚𑁄𑀢𑀺 𑀥𑀫𑁆𑀫𑀤𑁆𑀥𑀚𑁄. 𑀲𑁄𑀯𑀲𑁆𑀲 𑀓𑁂𑀢𑀽𑀢𑀺 𑀥𑀫𑁆𑀫𑀓𑁂𑀢𑀼. 𑀢𑀫𑁂𑀯 𑀅𑀥𑀺𑀧𑀢𑀺𑀁 𑀚𑁂𑀝𑁆𑀞𑀓𑀁 𑀓𑀢𑁆𑀯𑀸 𑀯𑀺𑀳𑀭𑀢𑀻𑀢𑀺 𑀥𑀫𑁆𑀫𑀸𑀥𑀺𑀧𑀢𑁂𑀬𑁆𑀬𑁄. 𑀥𑀫𑁆𑀫𑀺𑀓𑀁 𑀭𑀓𑁆𑀔𑀸𑀯𑀭𑀡𑀕𑀼𑀢𑁆𑀢𑀺𑀦𑁆𑀢𑀺 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀤𑀸𑀬𑀺𑀓𑀭𑀓𑁆𑀔𑀜𑁆𑀘 𑀆𑀯𑀭𑀡𑀜𑁆𑀘 𑀕𑀼𑀢𑁆𑀢𑀺𑀜𑁆𑀘. 𑀲𑀁𑀯𑀺𑀤𑀳𑀢𑀻𑀢𑀺 𑀞𑀧𑁂𑀢𑀺 𑀧𑀜𑁆𑀜𑀧𑁂𑀢𑀺. 𑀏𑀯𑀭𑀽𑀧𑀦𑁆𑀢𑀺 𑀢𑀺𑀯𑀺𑀥𑀁 𑀓𑀸𑀬𑀤𑀼𑀘𑁆𑀘𑀭𑀺𑀢𑀁 𑀦 𑀲𑁂𑀯𑀺𑀢𑀩𑁆𑀩𑀁, 𑀲𑀼𑀘𑀭𑀺𑀢𑀁 𑀲𑁂𑀯𑀺𑀢𑀩𑁆𑀩𑀦𑁆𑀢𑀺 𑀏𑀯𑀁 𑀲𑀩𑁆𑀩𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀲𑀁𑀯𑀺𑀤𑀳𑀺𑀢𑁆𑀯𑀸𑀢𑀺 𑀞𑀧𑁂𑀢𑁆𑀯𑀸 𑀓𑀣𑁂𑀢𑁆𑀯𑀸. 𑀥𑀫𑁆𑀫𑁂𑀦𑁂𑀯 𑀅𑀦𑀼𑀢𑁆𑀢𑀭𑀁 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁂𑀢𑀻𑀢𑀺 𑀦𑀯𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁂𑀦𑁂𑀯 𑀅𑀲𑀤𑀺𑀲𑀁 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁂𑀢𑀺. 𑀢𑀁 𑀳𑁄𑀢𑀺 𑀘𑀓𑁆𑀓𑀁 𑀅𑀧𑁆𑀧𑀝𑀺𑀯𑀢𑁆𑀢𑀺𑀬𑀦𑁆𑀢𑀺 𑀢𑀁 𑀏𑀯𑀁 𑀧𑀯𑀢𑁆𑀢𑀺𑀢𑀁 𑀥𑀫𑁆𑀫𑀘𑀓𑁆𑀓𑀁 𑀏𑀢𑁂𑀲𑀼 𑀲𑀫𑀡𑀸𑀤𑀻𑀲𑀼 𑀏𑀓𑁂𑀦𑀧𑀺 𑀧𑀝𑀺𑀯𑀢𑁆𑀢𑁂𑀢𑀼𑀁 𑀧𑀝𑀺𑀩𑀸𑀳𑀺𑀢𑀼𑀁 𑀦 𑀲𑀓𑁆𑀓𑀸. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑁫. 𑀲𑀘𑁂𑀢𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁫. 𑀧𑀜𑁆𑀘𑀫𑁂 𑀇𑀲𑀺𑀧𑀢𑀦𑁂𑀢𑀺 𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑀗𑁆𑀔𑀸𑀢𑀸𑀦𑀁 𑀇𑀲𑀻𑀦𑀁 𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑀢𑁆𑀣𑀸𑀬 𑀘𑁂𑀯 𑀉𑀧𑁄𑀲𑀣𑀓𑀭𑀡𑀢𑁆𑀣𑀸𑀬 𑀘 𑀆𑀕𑀦𑁆𑀢𑁆𑀯𑀸 𑀧𑀢𑀦𑁂, 𑀲𑀦𑁆𑀦𑀺𑀧𑀸𑀢𑀝𑁆𑀞𑀸𑀦𑁂𑀢𑀺 𑀅𑀢𑁆𑀣𑁄. 𑀧𑀤𑀦𑁂𑀢𑀺𑀧𑀺 𑀧𑀸𑀞𑁄, 𑀅𑀬𑀫𑁂𑀯 𑀅𑀢𑁆𑀣𑁄. 𑀫𑀺𑀕𑀤𑀸𑀬𑁂𑀢𑀺 𑀫𑀺𑀕𑀸𑀦𑀁 𑀅𑀪𑀬𑀢𑁆𑀣𑀸𑀬 𑀤𑀺𑀦𑁆𑀦𑁂. 𑀙𑀳𑀺 𑀫𑀸𑀲𑁂𑀳𑀺 𑀙𑀸𑀭𑀢𑁆𑀢𑀽𑀦𑁂𑀳𑀻𑀢𑀺 𑀲𑁄 𑀓𑀺𑀭 𑀭𑀜𑁆𑀜𑀸 𑀆𑀡𑀢𑁆𑀢𑀤𑀺𑀯𑀲𑁂𑀬𑁂𑀯 𑀲𑀩𑁆𑀩𑀽𑀧𑀓𑀭𑀡𑀸𑀦𑀺 𑀲𑀚𑁆𑀚𑁂𑀢𑁆𑀯𑀸 𑀅𑀦𑁆𑀢𑁂𑀯𑀸𑀲𑀺𑀓𑁂𑀳𑀺 𑀲𑀤𑁆𑀥𑀺𑀁 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀕𑀸𑀫𑀤𑁆𑀯𑀸𑀭𑀕𑀸𑀫𑀫𑀚𑁆𑀛𑀤𑁂𑀯𑀓𑀼𑀮𑀲𑀼𑀲𑀸𑀦𑀸𑀤𑀻𑀲𑀼 𑀞𑀺𑀢𑀭𑀼𑀓𑁆𑀔𑁂 𑀘𑁂𑀯 𑀛𑀸𑀫𑀧𑀢𑀺𑀢𑀲𑀼𑀓𑁆𑀔𑀭𑀼𑀓𑁆𑀔𑁂 𑀘 𑀯𑀺𑀯𑀚𑁆𑀚𑁂𑀢𑁆𑀯𑀸 𑀲𑀫𑁆𑀧𑀦𑁆𑀦𑀧𑀤𑁂𑀲𑁂 𑀞𑀺𑀢𑁂 𑀲𑀩𑁆𑀩𑀤𑁄𑀲𑀯𑀺𑀯𑀚𑁆𑀚𑀺𑀢𑁂 𑀦𑀸𑀪𑀺𑀅𑀭𑀦𑁂𑀫𑀻𑀦𑀁 𑀅𑀦𑀼𑀭𑀽𑀧𑁂 𑀭𑀼𑀓𑁆𑀔𑁂 𑀕𑀳𑁂𑀢𑁆𑀯𑀸 𑀢𑀁 𑀘𑀓𑁆𑀓𑀁 𑀅𑀓𑀸𑀲𑀺. 𑀢𑀲𑁆𑀲 𑀭𑀼𑀓𑁆𑀔𑁂 𑀯𑀺𑀘𑀺𑀦𑀺𑀢𑁆𑀯𑀸 𑀕𑀡𑁆𑀳𑀦𑁆𑀢𑀲𑁆𑀲 𑀘𑁂𑀯 𑀓𑀭𑁄𑀦𑁆𑀢𑀲𑁆𑀲 𑀘 𑀏𑀢𑁆𑀢𑀓𑁄 𑀓𑀸𑀮𑁄 𑀯𑀻𑀢𑀺𑀯𑀢𑁆𑀢𑁄. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀙𑀳𑀺 𑀫𑀸𑀲𑁂𑀳𑀺 𑀙𑀸𑀭𑀢𑁆𑀢𑀽𑀦𑁂𑀳𑀻’’𑀢𑀺. 𑀦𑀸𑀦𑀸𑀓𑀭𑀡𑀦𑁆𑀢𑀺 𑀦𑀸𑀦𑀢𑁆𑀢𑀁. 𑀦𑁂𑀲𑀦𑁆𑀢𑀺 𑀦 𑀏𑀲𑀁. 𑀅𑀢𑁆𑀣𑁂𑀲𑀦𑁆𑀢𑀺 𑀅𑀢𑁆𑀣𑀺 𑀏𑀲𑀁. 𑀅𑀪𑀺𑀲𑀗𑁆𑀔𑀸𑀭𑀲𑁆𑀲 𑀕𑀢𑀻𑀢𑀺 𑀧𑀬𑁄𑀕𑀲𑁆𑀲 𑀕𑀫𑀦𑀁. 𑀘𑀺𑀗𑁆𑀕𑀼𑀮𑀸𑀬𑀺𑀢𑁆𑀯𑀸𑀢𑀺 𑀧𑀭𑀺𑀩𑁆𑀪𑀫𑀺𑀢𑁆𑀯𑀸. 𑀅𑀓𑁆𑀔𑀸𑀳𑀢𑀁 𑀫𑀜𑁆𑀜𑁂𑀢𑀺 𑀅𑀓𑁆𑀔𑁂 𑀧𑀯𑁂𑀲𑁂𑀢𑁆𑀯𑀸 𑀞𑀧𑀺𑀢𑀫𑀺𑀯.

𑀲𑀤𑁄𑀲𑀸𑀢𑀺 𑀲𑀕𑀡𑁆𑀟𑀸 𑀉𑀡𑁆𑀡𑀢𑁄𑀡𑀢𑀝𑁆𑀞𑀸𑀦𑀬𑀼𑀢𑁆𑀢𑀸. 𑀲𑀓𑀲𑀸𑀯𑀸𑀢𑀺 𑀧𑀽𑀢𑀺𑀲𑀸𑀭𑁂𑀦 𑀘𑁂𑀯 𑀨𑁂𑀕𑁆𑀕𑀼𑀦𑀸 𑀘 𑀬𑀼𑀢𑁆𑀢𑀸. 𑀓𑀸𑀬𑀯𑀗𑁆𑀓𑀸𑀢𑀺𑀆𑀤𑀻𑀦𑀺 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀻𑀦𑀁 𑀦𑀸𑀫𑀸𑀦𑀺. 𑀏𑀯𑀁 𑀧𑀧𑀢𑀺𑀢𑀸𑀢𑀺 𑀏𑀯𑀁 𑀕𑀼𑀡𑀧𑀢𑀦𑁂𑀦 𑀧𑀢𑀺𑀢𑀸. 𑀏𑀯𑀁 𑀧𑀢𑀺𑀝𑁆𑀞𑀺𑀢𑀸𑀢𑀺 𑀏𑀯𑀁 𑀕𑀼𑀡𑁂𑀳𑀺 𑀧𑀢𑀺𑀝𑁆𑀞𑀺𑀢𑀸. 𑀢𑀢𑁆𑀣 𑀮𑁄𑀓𑀺𑀬𑀫𑀳𑀸𑀚𑀦𑀸 𑀧𑀧𑀢𑀺𑀢𑀸 𑀦𑀸𑀫, 𑀲𑁄𑀢𑀸𑀧𑀦𑁆𑀦𑀸𑀤𑀬𑁄 𑀧𑀢𑀺𑀝𑁆𑀞𑀺𑀢𑀸 𑀦𑀸𑀫. 𑀢𑁂𑀲𑀼𑀧𑀺 𑀧𑀼𑀭𑀺𑀫𑀸 𑀢𑀬𑁄 𑀓𑀺𑀮𑁂𑀲𑀸𑀦𑀁 𑀲𑀫𑀼𑀤𑀸𑀘𑀸𑀭𑀓𑁆𑀔𑀡𑁂 𑀧𑀧𑀢𑀺𑀢𑀸 𑀦𑀸𑀫, 𑀔𑀻𑀡𑀸𑀲𑀯𑀸 𑀧𑀦 𑀏𑀓𑀦𑁆𑀢𑁂𑀦𑁂𑀯 𑀧𑀢𑀺𑀝𑁆𑀞𑀺𑀢𑀸 𑀦𑀸𑀫. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀅𑀧𑁆𑀧𑀳𑀻𑀦𑀓𑀸𑀬𑀯𑀗𑁆𑀓𑀸𑀤𑀬𑁄 𑀧𑀧𑀢𑀦𑁆𑀢𑀺, 𑀧𑀳𑀻𑀦𑀓𑀸𑀬𑀯𑀗𑁆𑀓𑀸𑀤𑀬𑁄 𑀧𑀢𑀺𑀝𑁆𑀞𑀳𑀦𑁆𑀢𑀺, 𑀢𑀲𑁆𑀫𑀸. 𑀓𑀸𑀬𑀯𑀗𑁆𑀓𑀸𑀤𑀻𑀦𑀁 𑀧𑀦 𑀏𑀯𑀁 𑀧𑀳𑀸𑀦𑀁 𑀯𑁂𑀤𑀺𑀢𑀩𑁆𑀩𑀁 𑁋 𑀧𑀸𑀡𑀸𑀢𑀺𑀧𑀸𑀢𑁄 𑀅𑀤𑀺𑀦𑁆𑀦𑀸𑀤𑀸𑀦𑀁 𑀫𑀺𑀘𑁆𑀙𑀸𑀘𑀸𑀭𑁄 𑀫𑀼𑀲𑀸𑀯𑀸𑀤𑁄 𑀧𑀺𑀲𑀼𑀡𑀸𑀯𑀸𑀘𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀻𑀢𑀺 𑀇𑀫𑁂 𑀢𑀸𑀯 𑀙 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂𑀦 𑀧𑀳𑀻𑀬𑀦𑁆𑀢𑀺, 𑀨𑀭𑀼𑀲𑀸𑀯𑀸𑀘𑀸 𑀩𑁆𑀬𑀸𑀧𑀸𑀤𑁄𑀢𑀺 𑀤𑁆𑀯𑁂 𑀅𑀦𑀸𑀕𑀸𑀫𑀺𑀫𑀕𑁆𑀕𑁂𑀦, 𑀅𑀪𑀺𑀚𑁆𑀛𑀸 𑀲𑀫𑁆𑀨𑀧𑁆𑀧𑀮𑀸𑀧𑁄𑀢𑀺 𑀤𑁆𑀯𑁂 𑀅𑀭𑀳𑀢𑁆𑀢𑀫𑀕𑁆𑀕𑁂𑀦𑀸𑀢𑀺.

𑁬. 𑀅𑀧𑀡𑁆𑀡𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁬. 𑀙𑀝𑁆𑀞𑁂 𑀅𑀧𑀡𑁆𑀡𑀓𑀧𑀝𑀺𑀧𑀤𑀦𑁆𑀢𑀺 𑀅𑀯𑀺𑀭𑀤𑁆𑀥𑀧𑀝𑀺𑀧𑀤𑀁 𑀏𑀓𑀁𑀲𑀧𑀝𑀺𑀧𑀤𑀁 𑀦𑀺𑀬𑁆𑀬𑀸𑀦𑀺𑀓𑀧𑀝𑀺𑀧𑀤𑀁 𑀓𑀸𑀭𑀡𑀧𑀝𑀺𑀧𑀤𑀁 𑀲𑀸𑀭𑀧𑀝𑀺𑀧𑀤𑀁 𑀫𑀡𑁆𑀟𑀧𑀝𑀺𑀧𑀤𑀁 𑀅𑀧𑀘𑁆𑀘𑀦𑀻𑀓𑀧𑀝𑀺𑀧𑀤𑀁 𑀅𑀦𑀼𑀮𑁄𑀫𑀧𑀝𑀺𑀧𑀤𑀁 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑀝𑀺𑀧𑀤𑀁 𑀧𑀝𑀺𑀧𑀦𑁆𑀦𑁄 𑀳𑁄𑀢𑀺, 𑀦 𑀢𑀓𑁆𑀓𑀕𑁆𑀕𑀸𑀳𑁂𑀦 𑀯𑀸 𑀦𑀬𑀕𑁆𑀕𑀸𑀳𑁂𑀦 𑀯𑀸. 𑀏𑀯𑀁 𑀕𑀳𑁂𑀢𑁆𑀯𑀸 𑀧𑀝𑀺𑀧𑀦𑁆𑀦𑁄 𑀳𑀺 𑀪𑀺𑀓𑁆𑀔𑀼 𑀯𑀸 𑀪𑀺𑀓𑁆𑀔𑀼𑀦𑀻 𑀯𑀸 𑀉𑀧𑀸𑀲𑀓𑁄 𑀯𑀸 𑀉𑀧𑀸𑀲𑀺𑀓𑀸 𑀯𑀸 𑀫𑀦𑀼𑀲𑁆𑀲𑀤𑁂𑀯𑀦𑀺𑀩𑁆𑀩𑀸𑀦𑀲𑀫𑁆𑀧𑀢𑁆𑀢𑀻𑀳𑀺 𑀳𑀸𑀬𑀢𑀺 𑀧𑀭𑀺𑀳𑀸𑀬𑀢𑀺, 𑀅𑀧𑀡𑁆𑀡𑀓𑀧𑀝𑀺𑀧𑀤𑀁 𑀧𑀝𑀺𑀧𑀦𑁆𑀦𑁄 𑀧𑀦 𑀢𑀸𑀳𑀺 𑀲𑀫𑁆𑀧𑀢𑁆𑀢𑀻𑀳𑀺 𑀦 𑀧𑀭𑀺𑀳𑀸𑀬𑀢𑀺. 𑀅𑀢𑀻𑀢𑁂 𑀓𑀦𑁆𑀢𑀸𑀭𑀤𑁆𑀥𑀸𑀦𑀫𑀕𑁆𑀕𑀁 𑀧𑀝𑀺𑀧𑀦𑁆𑀦𑁂𑀲𑀼 𑀤𑁆𑀯𑀻𑀲𑀼 𑀲𑀢𑁆𑀣𑀯𑀸𑀳𑁂𑀲𑀼 𑀬𑀓𑁆𑀔𑀲𑁆𑀲 𑀯𑀘𑀦𑀁 𑀕𑀳𑁂𑀢𑁆𑀯𑀸 𑀩𑀸𑀮𑀲𑀢𑁆𑀣𑀯𑀸𑀳𑁄 𑀲𑀤𑁆𑀥𑀺𑀁 𑀲𑀢𑁆𑀣𑁂𑀦 𑀅𑀦𑀬𑀩𑁆𑀬𑀲𑀦𑀁 𑀧𑀢𑁆𑀢𑁄, 𑀬𑀓𑁆𑀔𑀲𑁆𑀲 𑀯𑀘𑀦𑀁 𑀅𑀕𑁆𑀕𑀳𑁂𑀢𑁆𑀯𑀸 ‘‘𑀉𑀤𑀓𑀤𑀺𑀝𑁆𑀞𑀝𑁆𑀞𑀸𑀦𑁂 𑀉𑀤𑀓𑀁 𑀙𑀟𑁆𑀟𑁂𑀲𑁆𑀲𑀸𑀫𑀸’’𑀢𑀺 𑀲𑀢𑁆𑀣𑀓𑁂 𑀲𑀜𑁆𑀜𑀸𑀧𑁂𑀢𑁆𑀯𑀸 𑀫𑀕𑁆𑀕𑀁 𑀧𑀝𑀺𑀧𑀦𑁆𑀦𑁄 𑀧𑀡𑁆𑀟𑀺𑀢𑀲𑀢𑁆𑀣𑀯𑀸𑀳𑁄 𑀯𑀺𑀬. 𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋

‘‘𑀅𑀧𑀡𑁆𑀡𑀓𑀁 𑀞𑀸𑀦𑀫𑁂𑀓𑁂, 𑀤𑀼𑀢𑀺𑀬𑀁 𑀆𑀳𑀼 𑀢𑀓𑁆𑀓𑀺𑀓𑀸;

𑀏𑀢𑀤𑀜𑁆𑀜𑀸𑀬 𑀫𑁂𑀥𑀸𑀯𑀻, 𑀢𑀁 𑀕𑀡𑁆𑀳𑁂 𑀬𑀤𑀧𑀡𑁆𑀡𑀓’’𑀦𑁆𑀢𑀺. (𑀚𑀸. 𑁧.𑁧.𑁧);

𑀬𑁄𑀦𑀺 𑀘𑀲𑁆𑀲 𑀆𑀭𑀤𑁆𑀥𑀸 𑀳𑁄𑀢𑀻𑀢𑀺 𑀏𑀢𑁆𑀣 𑀬𑁄𑀦𑀻𑀢𑀺 𑀔𑀦𑁆𑀥𑀓𑁄𑀝𑁆𑀞𑀸𑀲𑀲𑁆𑀲𑀧𑀺 𑀓𑀸𑀭𑀡𑀲𑁆𑀲𑀧𑀺 𑀧𑀲𑁆𑀲𑀸𑀯𑀫𑀕𑁆𑀕𑀲𑁆𑀲𑀧𑀺 𑀦𑀸𑀫𑀁. ‘‘𑀘𑀢𑀲𑁆𑀲𑁄 𑀔𑁄 𑀇𑀫𑀸, 𑀲𑀸𑀭𑀺𑀧𑀼𑀢𑁆𑀢, 𑀬𑁄𑀦𑀺𑀬𑁄’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁧𑁫𑁨) 𑀳𑀺 𑀔𑀦𑁆𑀥𑀓𑁄𑀝𑁆𑀞𑀸𑀲𑁄 𑀬𑁄𑀦𑀺 𑀦𑀸𑀫. ‘‘𑀬𑁄𑀦𑀺 𑀳𑁂𑀲𑀸 𑀪𑀽𑀫𑀺𑀚 𑀨𑀮𑀲𑁆𑀲 𑀅𑀥𑀺𑀕𑀫𑀸𑀬𑀸’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁩.𑁨𑁨𑁬) 𑀓𑀸𑀭𑀡𑀁. ‘‘𑀦 𑀘𑀸𑀳𑀁 𑀩𑁆𑀭𑀸𑀳𑁆𑀫𑀡𑀁 𑀩𑁆𑀭𑀽𑀫𑀺, 𑀬𑁄𑀦𑀺𑀚𑀁 𑀫𑀢𑁆𑀢𑀺𑀲𑀫𑁆𑀪𑀯’’𑀦𑁆𑀢𑀺 (𑀫. 𑀦𑀺. 𑁨.𑁪𑁫𑁭; 𑀥. 𑀧. 𑁩𑁯𑁬) 𑀘 ‘‘𑀢𑀫𑁂𑀦𑀁 𑀓𑀫𑁆𑀫𑀚𑀯𑀸𑀢𑀸 𑀦𑀺𑀯𑀢𑁆𑀢𑀺𑀢𑁆𑀯𑀸 𑀉𑀤𑁆𑀥𑀁𑀧𑀸𑀤𑀁 𑀅𑀥𑁄𑀲𑀺𑀭𑀁 𑀲𑀫𑁆𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀫𑀸𑀢𑀼 𑀬𑁄𑀦𑀺𑀫𑀼𑀔𑁂 𑀲𑀫𑁆𑀧𑀝𑀺𑀧𑀸𑀤𑁂𑀦𑁆𑀢𑀻’’𑀢𑀺 𑀘 𑀆𑀤𑀻𑀲𑀼 𑀧𑀲𑁆𑀲𑀸𑀯𑀫𑀕𑁆𑀕𑁄. 𑀇𑀥 𑀧𑀦 𑀓𑀸𑀭𑀡𑀁 𑀅𑀥𑀺𑀧𑁆𑀧𑁂𑀢𑀁. 𑀆𑀭𑀤𑁆𑀥𑀸𑀢𑀺 𑀧𑀕𑁆𑀕𑀳𑀺𑀢𑀸 𑀧𑀭𑀺𑀧𑀼𑀡𑁆𑀡𑀸.

𑀆𑀲𑀯𑀸𑀦𑀁 𑀔𑀬𑀸𑀬𑀸𑀢𑀺 𑀏𑀢𑁆𑀣 𑀆𑀲𑀯𑀦𑁆𑀢𑀻𑀢𑀺 𑀆𑀲𑀯𑀸, 𑀘𑀓𑁆𑀔𑀼𑀢𑁄𑀧𑀺…𑀧𑁂… 𑀫𑀦𑀢𑁄𑀧𑀺 𑀲𑀦𑁆𑀤𑀦𑁆𑀢𑀺 𑀧𑀯𑀢𑁆𑀢𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀥𑀫𑁆𑀫𑀢𑁄 𑀬𑀸𑀯 𑀕𑁄𑀢𑁆𑀭𑀪𑀼, 𑀑𑀓𑀸𑀲𑀢𑁄 𑀬𑀸𑀯 𑀪𑀯𑀕𑁆𑀕𑀸 𑀲𑀯𑀦𑁆𑀢𑀻𑀢𑀺 𑀯𑀸 𑀆𑀲𑀯𑀸, 𑀏𑀢𑁂 𑀥𑀫𑁆𑀫𑁂 𑀏𑀢𑀜𑁆𑀘 𑀑𑀓𑀸𑀲𑀁 𑀅𑀦𑁆𑀢𑁄𑀓𑀭𑀺𑀢𑁆𑀯𑀸 𑀧𑀯𑀢𑁆𑀢𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀅𑀦𑁆𑀢𑁄𑀓𑀭𑀡𑀢𑁆𑀣𑁄 𑀳𑀺 𑀅𑀬𑀁 𑀆𑀓𑀸𑀭𑁄. 𑀘𑀺𑀭𑀧𑀸𑀭𑀺𑀯𑀸𑀲𑀺𑀬𑀝𑁆𑀞𑁂𑀦 𑀫𑀤𑀺𑀭𑀸𑀤𑀬𑁄 𑀆𑀲𑀯𑀸, 𑀆𑀲𑀯𑀸 𑀯𑀺𑀬𑀸𑀢𑀺𑀧𑀺 𑀆𑀲𑀯𑀸. 𑀮𑁄𑀓𑀲𑁆𑀫𑀺𑀫𑁆𑀧𑀺 𑀳𑀺 𑀘𑀺𑀭𑀧𑀸𑀭𑀺𑀯𑀸𑀲𑀺𑀓𑀸 𑀫𑀤𑀺𑀭𑀸𑀤𑀬𑁄 𑀆𑀲𑀯𑀸𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀬𑀤𑀺 𑀘 𑀘𑀺𑀭𑀧𑀸𑀭𑀺𑀯𑀸𑀲𑀺𑀬𑀝𑁆𑀞𑁂𑀦 𑀆𑀲𑀯𑀸, 𑀏𑀢𑁂𑀬𑁂𑀯 𑀪𑀯𑀺𑀢𑀼𑀫𑀭𑀳𑀦𑁆𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋 ‘‘𑀧𑀼𑀭𑀺𑀫𑀸, 𑀪𑀺𑀓𑁆𑀔𑀯𑁂, 𑀓𑁄𑀝𑀺 𑀦 𑀧𑀜𑁆𑀜𑀸𑀬𑀢𑀺 𑀅𑀯𑀺𑀚𑁆𑀚𑀸𑀬, 𑀇𑀢𑁄 𑀧𑀼𑀩𑁆𑀩𑁂 𑀅𑀯𑀺𑀚𑁆𑀚𑀸 𑀦𑀸𑀳𑁄𑀲𑀻’’𑀢𑀺𑀆𑀤𑀺 (𑀅. 𑀦𑀺. 𑁧𑁦.𑁬𑁧). 𑀆𑀬𑀢𑀁 𑀯𑀸 𑀲𑀁𑀲𑀸𑀭𑀤𑀼𑀓𑁆𑀔𑀁 𑀲𑀯𑀦𑁆𑀢𑀺 𑀧𑀲𑀯𑀦𑁆𑀢𑀻𑀢𑀺𑀧𑀺 𑀆𑀲𑀯𑀸. 𑀧𑀼𑀭𑀺𑀫𑀸𑀦𑀺 𑀘𑁂𑀢𑁆𑀣 𑀦𑀺𑀩𑁆𑀩𑀘𑀦𑀸𑀦𑀺 𑀬𑀢𑁆𑀣 𑀓𑀺𑀮𑁂𑀲𑀸 𑀆𑀲𑀯𑀸𑀢𑀺 𑀆𑀕𑀘𑁆𑀙𑀦𑁆𑀢𑀺, 𑀢𑀢𑁆𑀣 𑀬𑀼𑀚𑁆𑀚𑀦𑁆𑀢𑀺, 𑀧𑀘𑁆𑀙𑀺𑀫𑀁 𑀓𑀫𑁆𑀫𑁂𑀧𑀺. 𑀦 𑀓𑁂𑀯𑀮𑀜𑁆𑀘 𑀓𑀫𑁆𑀫𑀓𑀺𑀮𑁂𑀲𑀸𑀬𑁂𑀯 𑀆𑀲𑀯𑀸, 𑀅𑀧𑀺𑀘 𑀔𑁄 𑀦𑀸𑀦𑀧𑁆𑀧𑀓𑀸𑀭𑀸 𑀉𑀧𑀤𑁆𑀤𑀯𑀸𑀧𑀺. 𑀲𑀼𑀢𑁆𑀢𑁂𑀲𑀼 𑀳𑀺 ‘‘𑀦𑀸𑀳𑀁, 𑀘𑀼𑀦𑁆𑀤, 𑀤𑀺𑀝𑁆𑀞𑀥𑀫𑁆𑀫𑀺𑀓𑀸𑀦𑀁𑀬𑁂𑀯 𑀆𑀲𑀯𑀸𑀦𑀁 𑀲𑀁𑀯𑀭𑀸𑀬 𑀥𑀫𑁆𑀫𑀁 𑀤𑁂𑀲𑁂𑀫𑀻’’𑀢𑀺 (𑀤𑀻. 𑀦𑀺. 𑁩.𑁧𑁮𑁨) 𑀏𑀢𑁆𑀣 𑀯𑀺𑀯𑀸𑀤𑀫𑀽𑀮𑀪𑀽𑀢𑀸 𑀓𑀺𑀮𑁂𑀲𑀸 𑀆𑀲𑀯𑀸𑀢𑀺 𑀆𑀕𑀢𑀸.

‘‘𑀬𑁂𑀦 𑀤𑁂𑀯𑀽𑀧𑀧𑀢𑁆𑀬𑀲𑁆𑀲, 𑀕𑀦𑁆𑀥𑀩𑁆𑀩𑁄 𑀯𑀸 𑀯𑀺𑀳𑀗𑁆𑀕𑀫𑁄;

𑀬𑀓𑁆𑀔𑀢𑁆𑀢𑀁 𑀬𑁂𑀦 𑀕𑀘𑁆𑀙𑁂𑀬𑁆𑀬𑀁, 𑀫𑀦𑀼𑀲𑁆𑀲𑀢𑁆𑀢𑀜𑁆𑀘 𑀅𑀩𑁆𑀩𑀚𑁂;

𑀢𑁂 𑀫𑀬𑁆𑀳𑀁 𑀆𑀲𑀯𑀸 𑀔𑀻𑀡𑀸, 𑀯𑀺𑀤𑁆𑀥𑀲𑁆𑀢𑀸 𑀯𑀺𑀦𑀴𑀻𑀓𑀢𑀸’’𑀢𑀺. (𑀅. 𑀦𑀺. 𑁪.𑁩𑁬) 𑁋

𑀏𑀢𑁆𑀣 𑀢𑁂𑀪𑀽𑀫𑀓𑀁 𑀘 𑀓𑀫𑁆𑀫𑀁 𑀅𑀯𑀲𑁂𑀲𑀸 𑀘 𑀅𑀓𑀼𑀲𑀮𑀸 𑀥𑀫𑁆𑀫𑀸. ‘‘𑀤𑀺𑀝𑁆𑀞𑀥𑀫𑁆𑀫𑀺𑀓𑀸𑀦𑀁 𑀆𑀲𑀯𑀸𑀦𑀁 𑀲𑀁𑀯𑀭𑀸𑀬 𑀲𑀫𑁆𑀧𑀭𑀸𑀬𑀺𑀓𑀸𑀦𑀁 𑀆𑀲𑀯𑀸𑀦𑀁 𑀧𑀝𑀺𑀖𑀸𑀢𑀸𑀬𑀸’’𑀢𑀺 (𑀧𑀸𑀭𑀸. 𑁩𑁯; 𑀅. 𑀦𑀺. 𑁨.𑁨𑁦𑁨-𑁨𑁩𑁦) 𑀏𑀢𑁆𑀣 𑀧𑀭𑀽𑀧𑀯𑀸𑀤𑀯𑀺𑀧𑁆𑀧𑀝𑀺𑀲𑀸𑀭𑀯𑀥𑀩𑀦𑁆𑀥𑀸𑀤𑀬𑁄 𑀘𑁂𑀯 𑀅𑀧𑀸𑀬𑀤𑀼𑀓𑁆𑀔𑀪𑀽𑀢𑀸 𑀘 𑀦𑀸𑀦𑀧𑁆𑀧𑀓𑀸𑀭𑀸 𑀉𑀧𑀤𑁆𑀤𑀯𑀸.

𑀢𑁂 𑀧𑀦𑁂𑀢𑁂 𑀆𑀲𑀯𑀸 𑀬𑀢𑁆𑀣 𑀬𑀣𑀸 𑀆𑀕𑀢𑀸, 𑀢𑀢𑁆𑀣 𑀢𑀣𑀸 𑀯𑁂𑀤𑀺𑀢𑀩𑁆𑀩𑀸. 𑀏𑀢𑁂 𑀳𑀺 𑀯𑀺𑀦𑀬𑁂 𑀢𑀸𑀯 ‘‘𑀤𑀺𑀝𑁆𑀞𑀥𑀫𑁆𑀫𑀺𑀓𑀸𑀦𑀁 𑀆𑀲𑀯𑀸𑀦𑀁 𑀲𑀁𑀯𑀭𑀸𑀬, 𑀲𑀫𑁆𑀧𑀭𑀸𑀬𑀺𑀓𑀸𑀦𑀁 𑀆𑀲𑀯𑀸𑀦𑀁 𑀧𑀝𑀺𑀖𑀸𑀢𑀸𑀬𑀸’’𑀢𑀺 (𑀧𑀸𑀭𑀸. 𑁩𑁯; 𑀅. 𑀦𑀺. 𑁨.𑁨𑁦𑁨-𑁨𑁩𑁦) 𑀤𑁆𑀯𑁂𑀥𑀸 𑀆𑀕𑀢𑀸. 𑀲𑀴𑀸𑀬𑀢𑀦𑁂 ‘‘𑀢𑀬𑁄 𑀫𑁂, 𑀆𑀯𑀼𑀲𑁄, 𑀆𑀲𑀯𑀸 𑀓𑀸𑀫𑀸𑀲𑀯𑁄 𑀪𑀯𑀸𑀲𑀯𑁄 𑀅𑀯𑀺𑀚𑁆𑀚𑀸𑀲𑀯𑁄’’𑀢𑀺 (𑀲𑀁. 𑀦𑀺. 𑁪.𑁩𑁨𑁧) 𑀢𑀺𑀥𑀸 𑀆𑀕𑀢𑀸. 𑀅𑀜𑁆𑀜𑁂𑀲𑀼 𑀘 𑀲𑀼𑀢𑁆𑀢𑀦𑁆𑀢𑁂𑀲𑀼 (𑀘𑀽𑀴𑀦𑀺. 𑀚𑀢𑀼𑀓𑀡𑁆𑀡𑀺𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲𑁄 𑁬𑁯; 𑀧𑀝𑀺. 𑀫. 𑁧.𑁧𑁦𑁭) 𑀅𑀪𑀺𑀥𑀫𑁆𑀫𑁂 (𑀥. 𑀲. 𑁧𑁧𑁦𑁨-𑁧𑁧𑁦𑁬; 𑀯𑀺𑀪. 𑁯𑁩𑁭) 𑀘 𑀢𑁂𑀬𑁂𑀯 𑀤𑀺𑀝𑁆𑀞𑀸𑀲𑀯𑁂𑀦 𑀲𑀳 𑀘𑀢𑀼𑀥𑀸 𑀆𑀕𑀢𑀸. 𑀦𑀺𑀩𑁆𑀩𑁂𑀥𑀺𑀓𑀧𑀭𑀺𑀬𑀸𑀬𑁂𑀦 ‘‘𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀆𑀲𑀯𑀸 𑀦𑀺𑀭𑀬𑀕𑀸𑀫𑀺𑀦𑀺𑀬𑀸, 𑀅𑀢𑁆𑀣𑀺 𑀆𑀲𑀯𑀸 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀕𑀸𑀫𑀺𑀦𑀺𑀬𑀸, 𑀅𑀢𑁆𑀣𑀺 𑀆𑀲𑀯𑀸 𑀧𑁂𑀢𑁆𑀢𑀺𑀯𑀺𑀲𑀬𑀕𑀸𑀫𑀺𑀦𑀺𑀬𑀸, 𑀅𑀢𑁆𑀣𑀺 𑀆𑀲𑀯𑀸 𑀫𑀦𑀼𑀲𑁆𑀲𑀮𑁄𑀓𑀕𑀸𑀫𑀺𑀦𑀺𑀬𑀸, 𑀅𑀢𑁆𑀣𑀺 𑀆𑀲𑀯𑀸 𑀤𑁂𑀯𑀮𑁄𑀓𑀕𑀸𑀫𑀺𑀦𑀺𑀬𑀸’’𑀢𑀺 (𑀅. 𑀦𑀺. 𑁬.𑁬𑁩) 𑀧𑀜𑁆𑀘𑀥𑀸 𑀆𑀕𑀢𑀸. 𑀓𑀫𑁆𑀫𑀫𑁂𑀯 𑀘𑁂𑀢𑁆𑀣 𑀆𑀲𑀯𑀸𑀢𑀺 𑀯𑀼𑀢𑁆𑀢𑀁. 𑀙𑀓𑁆𑀓𑀦𑀺𑀧𑀸𑀢𑁂 ‘‘𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀆𑀲𑀯𑀸 𑀲𑀁𑀯𑀭𑀸𑀧𑀳𑀸𑀢𑀩𑁆𑀩𑀸’’𑀢𑀺𑀆𑀤𑀺𑀦𑀸 (𑀅. 𑀦𑀺. 𑁬.𑁫𑁮) 𑀦𑀬𑁂𑀦 𑀙𑀥𑀸 𑀆𑀕𑀢𑀸. 𑀲𑀩𑁆𑀩𑀸𑀲𑀯𑀧𑀭𑀺𑀬𑀸𑀬𑁂 (𑀫. 𑀦𑀺. 𑁧.𑁧𑁪 𑀆𑀤𑀬𑁄) 𑀢𑁂𑀬𑁂𑀯 𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑁂𑀳𑀺 𑀲𑀤𑁆𑀥𑀺𑀁 𑀲𑀢𑁆𑀢𑀥𑀸 𑀆𑀕𑀢𑀸. 𑀇𑀥 𑀧𑀦 𑀅𑀪𑀺𑀥𑀫𑁆𑀫𑀦𑀬𑁂𑀦 𑀘𑀢𑁆𑀢𑀸𑀭𑁄 𑀆𑀲𑀯𑀸 𑀅𑀥𑀺𑀧𑁆𑀧𑁂𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀔𑀬𑀸𑀬𑀸𑀢𑀺 𑀏𑀢𑁆𑀣 𑀧𑀦 𑀆𑀲𑀯𑀸𑀦𑀁 𑀲𑀭𑀲𑀪𑁂𑀤𑁄𑀧𑀺 𑀔𑀻𑀡𑀸𑀓𑀸𑀭𑁄𑀧𑀺 𑀫𑀕𑁆𑀕𑀨𑀮𑀦𑀺𑀩𑁆𑀩𑀸𑀦𑀸𑀦𑀺𑀧𑀺 ‘‘𑀆𑀲𑀯𑀓𑁆𑀔𑀬𑁄’’𑀢𑀺 𑀯𑀼𑀘𑁆𑀘𑀢𑀺. ‘‘𑀬𑁄 𑀆𑀲𑀯𑀸𑀦𑀁 𑀔𑀬𑁄 𑀯𑀬𑁄 𑀪𑁂𑀤𑁄 𑀧𑀭𑀺𑀪𑁂𑀤𑁄 𑀅𑀦𑀺𑀘𑁆𑀘𑀢𑀸 𑀅𑀦𑁆𑀢𑀭𑀥𑀸𑀦’’𑀦𑁆𑀢𑀺 𑀏𑀢𑁆𑀣 𑀳𑀺 𑀆𑀲𑀯𑀸𑀦𑀁 𑀲𑀭𑀲𑀪𑁂𑀤𑁄 ‘‘𑀆𑀲𑀯𑀓𑁆𑀔𑀬𑁄’’𑀢𑀺 𑀯𑀼𑀢𑁆𑀢𑁄. ‘‘𑀚𑀸𑀦𑀢𑁄 𑀅𑀳𑀁, 𑀪𑀺𑀓𑁆𑀔𑀯𑁂, 𑀧𑀲𑁆𑀲𑀢𑁄 𑀆𑀲𑀯𑀸𑀦𑀁 𑀔𑀬𑀁 𑀯𑀤𑀸𑀫𑀻’’𑀢𑀺 (𑀫. 𑀦𑀺. 𑁧.𑁧𑁫; 𑀲𑀁. 𑀦𑀺. 𑁨.𑁨𑁩; 𑀇𑀢𑀺𑀯𑀼. 𑁧𑁦𑁨) 𑀏𑀢𑁆𑀣 𑀆𑀲𑀯𑀧𑁆𑀧𑀳𑀸𑀦𑀁 𑀆𑀲𑀯𑀸𑀦𑀁 𑀅𑀘𑁆𑀘𑀦𑁆𑀢𑀓𑁆𑀔𑀬𑁄 𑀅𑀲𑀫𑀼𑀧𑁆𑀧𑀸𑀤𑁄 𑀔𑀻𑀡𑀸𑀓𑀸𑀭𑁄 𑀦𑀢𑁆𑀣𑀺𑀪𑀸𑀯𑁄 ‘‘𑀆𑀲𑀯𑀓𑁆𑀔𑀬𑁄’’𑀢𑀺 𑀯𑀼𑀢𑁆𑀢𑁄.

‘‘𑀲𑁂𑀔𑀲𑁆𑀲 𑀲𑀺𑀓𑁆𑀔𑀫𑀸𑀦𑀲𑁆𑀲, 𑀉𑀚𑀼𑀫𑀕𑁆𑀕𑀸𑀦𑀼𑀲𑀸𑀭𑀺𑀦𑁄;

𑀔𑀬𑀲𑁆𑀫𑀺𑀁 𑀧𑀞𑀫𑀁 𑀜𑀸𑀡𑀁, 𑀢𑀢𑁄 𑀅𑀜𑁆𑀜𑀸 𑀅𑀦𑀦𑁆𑀢𑀭𑀸’’𑀢𑀺. (𑀇𑀢𑀺𑀯𑀼. 𑁬𑁨) 𑁋

𑀏𑀢𑁆𑀣 𑀫𑀕𑁆𑀕𑁄 ‘‘𑀆𑀲𑀯𑀓𑁆𑀔𑀬𑁄’’𑀢𑀺 𑀯𑀼𑀢𑁆𑀢𑁄. ‘‘𑀆𑀲𑀯𑀸𑀦𑀁 𑀔𑀬𑀸 𑀲𑀫𑀡𑁄 𑀳𑁄𑀢𑀻’’𑀢𑀺 (𑀫. 𑀦𑀺. 𑁧.𑁪𑁩𑁮) 𑀏𑀢𑁆𑀣 𑀨𑀮𑀁.

‘‘𑀧𑀭𑀯𑀚𑁆𑀚𑀸𑀦𑀼𑀧𑀲𑁆𑀲𑀺𑀲𑁆𑀲, 𑀦𑀺𑀘𑁆𑀘𑀁 𑀉𑀚𑁆𑀛𑀸𑀦𑀲𑀜𑁆𑀜𑀺𑀦𑁄;

𑀆𑀲𑀯𑀸 𑀢𑀲𑁆𑀲 𑀯𑀟𑁆𑀠𑀦𑁆𑀢𑀺, 𑀆𑀭𑀸 𑀲𑁄 𑀆𑀲𑀯𑀓𑁆𑀔𑀬𑀸’’𑀢𑀺. (𑀥. 𑀧. 𑁨𑁫𑁩) 𑁋

𑀏𑀢𑁆𑀣 𑀦𑀺𑀩𑁆𑀩𑀸𑀦𑀁. 𑀇𑀫𑀲𑁆𑀫𑀺𑀁 𑀧𑀦 𑀲𑀼𑀢𑁆𑀢𑁂 𑀨𑀮𑀁 𑀲𑀦𑁆𑀥𑀸𑀬 ‘‘𑀆𑀲𑀯𑀸𑀦𑀁 𑀔𑀬𑀸𑀬𑀸’’𑀢𑀺 𑀆𑀳, 𑀅𑀭𑀳𑀢𑁆𑀢𑀨𑀮𑀢𑁆𑀣𑀸𑀬𑀸𑀢𑀺 𑀅𑀢𑁆𑀣𑁄.

𑀇𑀦𑁆𑀤𑁆𑀭𑀺𑀬𑁂𑀲𑀼 𑀕𑀼𑀢𑁆𑀢𑀤𑁆𑀯𑀸𑀭𑁄𑀢𑀺 𑀫𑀦𑀘𑁆𑀙𑀝𑁆𑀞𑁂𑀲𑀼 𑀇𑀦𑁆𑀤𑁆𑀭𑀺𑀬𑁂𑀲𑀼 𑀧𑀺𑀳𑀺𑀢𑀤𑁆𑀯𑀸𑀭𑁄. 𑀪𑁄𑀚𑀦𑁂 𑀫𑀢𑁆𑀢𑀜𑁆𑀜𑀽𑀢𑀺 𑀪𑁄𑀚𑀦𑀲𑁆𑀫𑀺𑀁 𑀧𑀫𑀸𑀡𑀜𑁆𑀜𑀽, 𑀧𑀝𑀺𑀕𑁆𑀕𑀳𑀡𑀧𑀭𑀺𑀪𑁄𑀕𑀧𑀘𑁆𑀘𑀯𑁂𑀓𑁆𑀔𑀡𑀫𑀢𑁆𑀢𑀁 𑀚𑀸𑀦𑀸𑀢𑀺 𑀧𑀚𑀸𑀦𑀸𑀢𑀻𑀢𑀺 𑀅𑀢𑁆𑀣𑁄. 𑀚𑀸𑀕𑀭𑀺𑀬𑀁 𑀅𑀦𑀼𑀬𑀼𑀢𑁆𑀢𑁄𑀢𑀺 𑀭𑀢𑁆𑀢𑀺𑀦𑁆𑀤𑀺𑀯𑀁 𑀙 𑀓𑁄𑀝𑁆𑀞𑀸𑀲𑁂 𑀓𑀢𑁆𑀯𑀸 𑀧𑀜𑁆𑀘𑀲𑀼 𑀓𑁄𑀝𑁆𑀞𑀸𑀲𑁂𑀲𑀼 𑀚𑀸𑀕𑀭𑀡𑀪𑀸𑀯𑀁 𑀅𑀦𑀼𑀬𑀼𑀢𑁆𑀢𑁄, 𑀚𑀸𑀕𑀭𑀡𑁂𑀬𑁂𑀯 𑀬𑀼𑀢𑁆𑀢𑀧𑁆𑀧𑀬𑀼𑀢𑁆𑀢𑁄𑀢𑀺 𑀅𑀢𑁆𑀣𑁄.

𑀏𑀯𑀁 𑀫𑀸𑀢𑀺𑀓𑀁 𑀞𑀧𑁂𑀢𑁆𑀯𑀸 𑀇𑀤𑀸𑀦𑀺 𑀢𑀫𑁂𑀯 𑀞𑀧𑀺𑀢𑀧𑀝𑀺𑀧𑀸𑀝𑀺𑀬𑀸 𑀯𑀺𑀪𑀚𑀦𑁆𑀢𑁄 𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀘𑀓𑁆𑀔𑀼𑀦𑀸 𑀭𑀽𑀧𑀁 𑀤𑀺𑀲𑁆𑀯𑀸𑀢𑀺𑀆𑀤𑀻𑀦𑀁 𑀅𑀢𑁆𑀣𑁄 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁧.𑁧𑁫) 𑀯𑀺𑀢𑁆𑀣𑀸𑀭𑀺𑀢𑁄, 𑀢𑀣𑀸 𑀧𑀝𑀺𑀲𑀗𑁆𑀔𑀸 𑀬𑁄𑀦𑀺𑀲𑁄 𑀆𑀳𑀸𑀭𑀁 𑀆𑀳𑀸𑀭𑁂𑀢𑀺 𑀦𑁂𑀯 𑀤𑀯𑀸𑀬𑀸𑀢𑀺𑀆𑀤𑀻𑀦𑀁 (𑀯𑀺𑀲𑀼𑀤𑁆𑀥𑀺. 𑁧.𑁧𑁮). 𑀆𑀯𑀭𑀡𑀻𑀬𑁂𑀳𑀺 𑀥𑀫𑁆𑀫𑁂𑀳𑀻𑀢𑀺 𑀧𑀜𑁆𑀘𑀳𑀺 𑀦𑀻𑀯𑀭𑀡𑁂𑀳𑀺 𑀥𑀫𑁆𑀫𑁂𑀳𑀺. 𑀦𑀻𑀯𑀭𑀡𑀸𑀦𑀺 𑀳𑀺 𑀘𑀺𑀢𑁆𑀢𑀁 𑀆𑀯𑀭𑀺𑀢𑁆𑀯𑀸 𑀢𑀺𑀝𑁆𑀞𑀦𑁆𑀢𑀺, 𑀢𑀲𑁆𑀫𑀸 𑀆𑀯𑀭𑀡𑀻𑀬𑀸 𑀥𑀫𑁆𑀫𑀸𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀲𑀻𑀳𑀲𑁂𑀬𑁆𑀬𑀁 𑀓𑀧𑁆𑀧𑁂𑀢𑀻𑀢𑀺 𑀲𑀻𑀳𑁄 𑀯𑀺𑀬 𑀲𑁂𑀬𑁆𑀬𑀁 𑀓𑀧𑁆𑀧𑁂𑀢𑀺. 𑀧𑀸𑀤𑁂 𑀧𑀸𑀤𑀁 𑀅𑀘𑁆𑀘𑀸𑀥𑀸𑀬𑀸𑀢𑀺 𑀯𑀸𑀫𑀧𑀸𑀤𑀁 𑀤𑀓𑁆𑀔𑀺𑀡𑀧𑀸𑀤𑁂 𑀅𑀢𑀺𑀆𑀥𑀸𑀬. 𑀲𑀫𑀁 𑀞𑀧𑀺𑀢𑁂 𑀳𑀺 𑀧𑀸𑀤𑁂 𑀚𑀸𑀡𑀼𑀓𑁂𑀦 𑀚𑀸𑀡𑀼𑀓𑀁 𑀕𑁄𑀧𑁆𑀨𑀓𑁂𑀦 𑀘 𑀕𑁄𑀧𑁆𑀨𑀓𑀁 𑀖𑀝𑀻𑀬𑀢𑀺, 𑀢𑀢𑁄 𑀯𑁂𑀤𑀦𑀸 𑀉𑀝𑁆𑀞𑀳𑀦𑁆𑀢𑀺. 𑀢𑀲𑁆𑀫𑀸 𑀢𑀲𑁆𑀲 𑀤𑁄𑀲𑀲𑁆𑀲 𑀧𑀭𑀺𑀯𑀚𑁆𑀚𑀦𑀢𑁆𑀣𑀁 𑀣𑁄𑀓𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀏𑀲 𑀧𑀸𑀤𑀁 𑀞𑀧𑁂𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀧𑀸𑀤𑁂 𑀧𑀸𑀤𑀁 𑀅𑀘𑁆𑀘𑀸𑀥𑀸𑀬𑀸’’𑀢𑀺.

𑀲𑀢𑁄 𑀲𑀫𑁆𑀧𑀚𑀸𑀦𑁄𑀢𑀺 𑀲𑀢𑀺𑀬𑀸 𑀘𑁂𑀯 𑀲𑀫𑁆𑀧𑀚𑀜𑁆𑀜𑁂𑀦 𑀘 𑀲𑀫𑀦𑁆𑀦𑀸𑀕𑀢𑁄. 𑀓𑀣𑀁 𑀧𑀦𑁂𑀲 𑀦𑀺𑀤𑁆𑀤𑀸𑀬𑀦𑁆𑀢𑁄 𑀲𑀢𑁄 𑀲𑀫𑁆𑀧𑀚𑀸𑀦𑁄 𑀦𑀸𑀫 𑀳𑁄𑀢𑀻𑀢𑀺? 𑀧𑀼𑀭𑀺𑀫𑀧𑁆𑀧𑀯𑀢𑁆𑀢𑀺𑀯𑀲𑁂𑀦. 𑀅𑀬𑀁 𑀳𑀺 𑀘𑀗𑁆𑀓𑀫𑁂 𑀘𑀗𑁆𑀓𑀫𑀦𑁆𑀢𑁄 𑀦𑀺𑀤𑁆𑀤𑀸𑀬 𑀑𑀓𑁆𑀓𑀫𑀦𑀪𑀸𑀯𑀁 𑀜𑀢𑁆𑀯𑀸 𑀧𑀯𑀢𑁆𑀢𑀫𑀸𑀦𑀁 𑀓𑀫𑁆𑀫𑀝𑁆𑀞𑀸𑀦𑀁 𑀞𑀧𑁂𑀢𑁆𑀯𑀸 𑀫𑀜𑁆𑀘𑁂 𑀯𑀸 𑀨𑀮𑀓𑁂 𑀯𑀸 𑀦𑀺𑀧𑀦𑁆𑀦𑁄 𑀦𑀺𑀤𑁆𑀤𑀁 𑀉𑀧𑀕𑀦𑁆𑀢𑁆𑀯𑀸 𑀧𑀼𑀦 𑀧𑀩𑀼𑀚𑁆𑀛𑀫𑀸𑀦𑁄 𑀓𑀫𑁆𑀫𑀝𑁆𑀞𑀸𑀦𑀁 𑀞𑀺𑀢𑀝𑁆𑀞𑀸𑀦𑁂 𑀕𑀡𑁆𑀳𑀦𑁆𑀢𑁄𑀬𑁂𑀯 𑀧𑀩𑀼𑀚𑁆𑀛𑀢𑀺. 𑀢𑀲𑁆𑀫𑀸 𑀦𑀺𑀤𑁆𑀤𑀸𑀬𑀦𑁆𑀢𑁄𑀧𑀺 𑀲𑀢𑁄 𑀲𑀫𑁆𑀧𑀚𑀸𑀦𑁄 𑀦𑀸𑀫 𑀳𑁄𑀢𑀺. 𑀅𑀬𑀁 𑀢𑀸𑀯 𑀫𑀽𑀮𑀓𑀫𑁆𑀫𑀝𑁆𑀞𑀸𑀦𑁂 𑀦𑀬𑁄𑀯. 𑀧𑀭𑀺𑀕𑁆𑀕𑀳𑀓𑀫𑁆𑀫𑀝𑁆𑀞𑀸𑀦𑀯𑀲𑁂𑀦𑀸𑀧𑀺 𑀧𑀦𑁂𑀲 𑀲𑀢𑁄 𑀲𑀫𑁆𑀧𑀚𑀸𑀦𑁄 𑀦𑀸𑀫 𑀳𑁄𑀢𑀺. 𑀓𑀣𑀁? 𑀅𑀬𑀁 𑀳𑀺 𑀘𑀗𑁆𑀓𑀫𑀦𑁆𑀢𑁄 𑀦𑀺𑀤𑁆𑀤𑀸𑀬 𑀑𑀓𑁆𑀓𑀫𑀦𑀪𑀸𑀯𑀁 𑀜𑀢𑁆𑀯𑀸 𑀧𑀸𑀲𑀸𑀡𑀨𑀮𑀓𑁂 𑀯𑀸 𑀫𑀜𑁆𑀘𑁂 𑀯𑀸 𑀤𑀓𑁆𑀔𑀺𑀡𑁂𑀦 𑀧𑀲𑁆𑀲𑁂𑀦 𑀦𑀺𑀧𑀚𑁆𑀚𑀺𑀢𑁆𑀯𑀸 𑀧𑀘𑁆𑀘𑀯𑁂𑀓𑁆𑀔𑀢𑀺 𑁋 ‘‘𑀅𑀘𑁂𑀢𑀦𑁄 𑀓𑀸𑀬𑁄 𑀅𑀘𑁂𑀢𑀦𑁂 𑀫𑀜𑁆𑀘𑁂 𑀧𑀢𑀺𑀝𑁆𑀞𑀺𑀢𑁄, 𑀅𑀘𑁂𑀢𑀦𑁄 𑀫𑀜𑁆𑀘𑁄 𑀅𑀘𑁂𑀢𑀦𑀸𑀬 𑀧𑀣𑀯𑀺𑀬𑀸, 𑀅𑀘𑁂𑀢𑀦𑀸 𑀧𑀣𑀯𑀻 𑀅𑀘𑁂𑀢𑀦𑁂 𑀉𑀤𑀓𑁂, 𑀅𑀘𑁂𑀢𑀦𑀁 𑀉𑀤𑀓𑀁 𑀅𑀘𑁂𑀢𑀦𑁂 𑀯𑀸𑀢𑁂, 𑀅𑀘𑁂𑀢𑀦𑁄 𑀯𑀸𑀢𑁄 𑀅𑀘𑁂𑀢𑀦𑁂 𑀆𑀓𑀸𑀲𑁂 𑀧𑀢𑀺𑀝𑁆𑀞𑀺𑀢𑁄. 𑀢𑀢𑁆𑀣 𑀆𑀓𑀸𑀲𑀫𑁆𑀧𑀺 ‘𑀅𑀳𑀁 𑀯𑀸𑀢𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀞𑀺𑀢’𑀦𑁆𑀢𑀺 𑀦 𑀚𑀸𑀦𑀸𑀢𑀺, 𑀯𑀸𑀢𑁄𑀧𑀺 ‘𑀅𑀳𑀁 𑀆𑀓𑀸𑀲𑁂 𑀧𑀢𑀺𑀝𑁆𑀞𑀺𑀢𑁄’𑀢𑀺 𑀦 𑀚𑀸𑀦𑀸𑀢𑀺. 𑀢𑀣𑀸 𑀯𑀸𑀢𑁄 𑀦 𑀚𑀸𑀦𑀸𑀢𑀺. ‘𑀅𑀳𑀁 𑀉𑀤𑀓𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀞𑀺𑀢𑁄’𑀢𑀺…𑀧𑁂… 𑀫𑀜𑁆𑀘𑁄 𑀦 𑀚𑀸𑀦𑀸𑀢𑀺, ‘𑀅𑀳𑀁 𑀓𑀸𑀬𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀞𑀺𑀢𑁄’𑀢𑀺, 𑀓𑀸𑀬𑁄 𑀦 𑀚𑀸𑀦𑀸𑀢𑀺 ‘𑀅𑀳𑀁 𑀫𑀜𑁆𑀘𑁂 𑀧𑀢𑀺𑀝𑁆𑀞𑀺𑀢𑁄’𑀢𑀺. 𑀦 𑀳𑀺 𑀢𑁂𑀲𑀁 𑀅𑀜𑁆𑀜𑀫𑀜𑁆𑀜𑀁 𑀆𑀪𑁄𑀕𑁄 𑀯𑀸 𑀲𑀫𑀦𑁆𑀦𑀸𑀳𑀸𑀭𑁄 𑀯𑀸 𑀫𑀦𑀲𑀺𑀓𑀸𑀭𑁄 𑀯𑀸 𑀘𑁂𑀢𑀦𑀸 𑀯𑀸 𑀧𑀢𑁆𑀣𑀦𑀸 𑀯𑀸 𑀅𑀢𑁆𑀣𑀻’’𑀢𑀺. 𑀢𑀲𑁆𑀲 𑀏𑀯𑀁 𑀧𑀘𑁆𑀘𑀯𑁂𑀓𑁆𑀔𑀢𑁄 𑀢𑀁 𑀧𑀘𑁆𑀘𑀯𑁂𑀓𑁆𑀔𑀡𑀘𑀺𑀢𑁆𑀢𑀁 𑀪𑀯𑀗𑁆𑀕𑁂 𑀑𑀢𑀭𑀢𑀺. 𑀏𑀯𑀁 𑀦𑀺𑀤𑁆𑀤𑀸𑀬𑀦𑁆𑀢𑁄𑀧𑀺 𑀲𑀢𑁄 𑀲𑀫𑁆𑀧𑀚𑀸𑀦𑁄 𑀦𑀸𑀫 𑀳𑁄𑀢𑀻𑀢𑀺.

𑀉𑀝𑁆𑀞𑀸𑀦𑀲𑀜𑁆𑀜𑀁 𑀫𑀦𑀲𑀺𑀓𑀭𑀺𑀢𑁆𑀯𑀸𑀢𑀺 ‘‘𑀏𑀢𑁆𑀢𑀓𑀁 𑀞𑀸𑀦𑀁 𑀕𑀢𑁂 𑀘𑀦𑁆𑀤𑁂 𑀯𑀸 𑀢𑀸𑀭𑀓𑀸𑀬 𑀯𑀸 𑀉𑀝𑁆𑀞𑀳𑀺𑀲𑁆𑀲𑀸𑀫𑀻’’𑀢𑀺 𑀉𑀝𑁆𑀞𑀸𑀦𑀓𑀸𑀮𑀧𑀭𑀺𑀘𑁆𑀙𑁂𑀤𑀺𑀓𑀁 𑀲𑀜𑁆𑀜𑀁 𑀫𑀦𑀲𑀺𑀓𑀭𑀺𑀢𑁆𑀯𑀸, 𑀘𑀺𑀢𑁆𑀢𑁂 𑀞𑀧𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀏𑀯𑀁 𑀓𑀭𑀺𑀢𑁆𑀯𑀸 𑀲𑀬𑀺𑀢𑁄 𑀳𑀺 𑀬𑀣𑀸𑀧𑀭𑀺𑀘𑁆𑀙𑀺𑀦𑁆𑀦𑁂𑀬𑁂𑀯 𑀓𑀸𑀮𑁂 𑀉𑀝𑁆𑀞𑀳𑀢𑀺.

𑁭. 𑀅𑀢𑁆𑀢𑀩𑁆𑀬𑀸𑀩𑀸𑀥𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁭. 𑀲𑀢𑁆𑀢𑀫𑁂 𑀅𑀢𑁆𑀢𑀩𑁆𑀬𑀸𑀩𑀸𑀥𑀸𑀬𑀸𑀢𑀺 𑀅𑀢𑁆𑀢𑀤𑀼𑀓𑁆𑀔𑀸𑀬. 𑀧𑀭𑀩𑁆𑀬𑀸𑀩𑀸𑀥𑀸𑀬𑀸𑀢𑀺 𑀧𑀭𑀤𑀼𑀓𑁆𑀔𑀸𑀬. 𑀓𑀸𑀬𑀲𑀼𑀘𑀭𑀺𑀢𑀦𑁆𑀢𑀺𑀆𑀤𑀻𑀦𑀺 𑀧𑀼𑀩𑁆𑀩𑀪𑀸𑀕𑁂 𑀤𑀲𑀓𑀼𑀲𑀮𑀓𑀫𑁆𑀫𑀧𑀣𑀯𑀲𑁂𑀦 𑀆𑀕𑀢𑀸𑀦𑀺, 𑀉𑀧𑀭𑀺 𑀧𑀦 𑀬𑀸𑀯 𑀅𑀭𑀳𑀢𑁆𑀢𑀸 𑀅𑀯𑀸𑀭𑀺𑀢𑀸𑀦𑁂𑀯.

𑁮. 𑀤𑁂𑀯𑀮𑁄𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁮. 𑀅𑀝𑁆𑀞𑀫𑁂 𑀅𑀝𑁆𑀝𑀻𑀬𑁂𑀬𑁆𑀬𑀸𑀣𑀸𑀢𑀺 𑀅𑀝𑁆𑀝𑀸 𑀧𑀻𑀴𑀺𑀢𑀸 𑀪𑀯𑁂𑀬𑁆𑀬𑀸𑀣. 𑀳𑀭𑀸𑀬𑁂𑀬𑁆𑀬𑀸𑀣𑀸𑀢𑀺 𑀮𑀚𑁆𑀚𑁂𑀬𑁆𑀬𑀸𑀣. 𑀚𑀺𑀕𑀼𑀘𑁆𑀙𑁂𑀬𑁆𑀬𑀸𑀣𑀸𑀢𑀺 𑀕𑀽𑀣𑁂 𑀯𑀺𑀬 𑀢𑀲𑁆𑀫𑀺𑀁 𑀯𑀘𑀦𑁂 𑀲𑀜𑁆𑀚𑀸𑀢𑀚𑀺𑀕𑀼𑀘𑁆𑀙𑀸 𑀪𑀯𑁂𑀬𑁆𑀬𑀸𑀣. 𑀇𑀢𑀺 𑀓𑀺𑀭𑀸𑀢𑀺 𑀏𑀢𑁆𑀣 𑀇𑀢𑀻𑀢𑀺 𑀧𑀤𑀲𑀦𑁆𑀥𑀺𑀩𑁆𑀬𑀜𑁆𑀚𑀦𑀲𑀺𑀮𑀺𑀝𑁆𑀞𑀢𑀸, 𑀓𑀺𑀭𑀸𑀢𑀺 𑀅𑀦𑀼𑀲𑁆𑀲𑀯𑀢𑁆𑀣𑁂 𑀦𑀺𑀧𑀸𑀢𑁄. 𑀤𑀺𑀩𑁆𑀩𑁂𑀦 𑀓𑀺𑀭 𑀆𑀬𑀼𑀦𑀸 𑀅𑀝𑁆𑀝𑀻𑀬𑀣𑀸𑀢𑀺 𑀏𑀯𑀫𑀲𑁆𑀲 𑀲𑀫𑁆𑀩𑀦𑁆𑀥𑁄 𑀯𑁂𑀤𑀺𑀢𑀩𑁆𑀩𑁄. 𑀧𑀕𑁂𑀯 𑀔𑁄 𑀧𑀦𑀸𑀢𑀺 𑀧𑀞𑀫𑀢𑀭𑀁𑀬𑁂𑀯.

𑁯. 𑀧𑀞𑀫𑀧𑀸𑀧𑀡𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁯. 𑀦𑀯𑀫𑁂 𑀧𑀸𑀧𑀡𑀺𑀓𑁄𑀢𑀺 𑀆𑀧𑀡𑀺𑀓𑁄, 𑀆𑀧𑀡𑀁 𑀉𑀕𑁆𑀖𑀸𑀝𑁂𑀢𑁆𑀯𑀸 𑀪𑀡𑁆𑀟𑀯𑀺𑀓𑁆𑀓𑀸𑀬𑀓𑀲𑁆𑀲 𑀯𑀸𑀡𑀺𑀚𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀅𑀪𑀩𑁆𑀩𑁄𑀢𑀺 𑀅𑀪𑀸𑀚𑀦𑀪𑀽𑀢𑁄. 𑀦 𑀲𑀓𑁆𑀓𑀘𑁆𑀘𑀁 𑀓𑀫𑁆𑀫𑀦𑁆𑀢𑀁 𑀅𑀥𑀺𑀝𑁆𑀞𑀸𑀢𑀻𑀢𑀺 𑀬𑀣𑀸 𑀅𑀥𑀺𑀝𑁆𑀞𑀺𑀢𑀁 𑀲𑀼𑀅𑀥𑀺𑀝𑁆𑀞𑀺𑀢𑀁 𑀳𑁄𑀢𑀺, 𑀏𑀯𑀁 𑀲𑀬𑀁 𑀅𑀢𑁆𑀢𑀧𑀘𑁆𑀘𑀓𑁆𑀔𑀁 𑀓𑀭𑁄𑀦𑁆𑀢𑁄 𑀦𑀸𑀥𑀺𑀝𑁆𑀞𑀸𑀢𑀺. 𑀢𑀢𑁆𑀣 𑀧𑀘𑁆𑀘𑀽𑀲𑀓𑀸𑀮𑁂 𑀧𑀤𑀲𑀤𑁆𑀤𑁂𑀦 𑀉𑀝𑁆𑀞𑀸𑀬 𑀤𑀻𑀧𑀁 𑀚𑀸𑀮𑁂𑀢𑁆𑀯𑀸 𑀪𑀡𑁆𑀟𑀁 𑀧𑀲𑀸𑀭𑁂𑀢𑁆𑀯𑀸 𑀅𑀦𑀺𑀲𑀻𑀤𑀦𑁆𑀢𑁄 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦 𑀲𑀓𑁆𑀓𑀘𑁆𑀘𑀁 𑀓𑀫𑁆𑀫𑀦𑁆𑀢𑀁 𑀅𑀥𑀺𑀝𑁆𑀞𑀸𑀢𑀺 𑀦𑀸𑀫. 𑀅𑀬𑀁 𑀳𑀺 𑀬𑀁 𑀘𑁄𑀭𑀸 𑀭𑀢𑁆𑀢𑀺𑀁 𑀪𑀡𑁆𑀟𑀁 𑀳𑀭𑀺𑀢𑁆𑀯𑀸 ‘‘𑀇𑀤𑀁 𑀅𑀫𑁆𑀳𑀸𑀓𑀁 𑀳𑀢𑁆𑀣𑀢𑁄 𑀯𑀺𑀲𑁆𑀲𑀚𑁆𑀚𑁂𑀲𑁆𑀲𑀸𑀫𑀸’’𑀢𑀺 𑀆𑀧𑀡𑀁 𑀕𑀦𑁆𑀢𑁆𑀯𑀸 𑀅𑀧𑁆𑀧𑁂𑀦 𑀅𑀕𑁆𑀖𑁂𑀦 𑀤𑁂𑀦𑁆𑀢𑀺, 𑀬𑀫𑁆𑀧𑀺 𑀩𑀳𑀼𑀯𑁂𑀭𑀺𑀦𑁄 𑀫𑀦𑀼𑀲𑁆𑀲𑀸 𑀭𑀢𑁆𑀢𑀺𑀁 𑀦𑀕𑀭𑁂 𑀯𑀲𑀺𑀢𑁆𑀯𑀸 𑀧𑀸𑀢𑁄𑀯 𑀆𑀧𑀡𑀁 𑀕𑀦𑁆𑀢𑁆𑀯𑀸 𑀪𑀡𑁆𑀟𑀁 𑀕𑀡𑁆𑀳𑀦𑁆𑀢𑀺, 𑀬𑀁 𑀯𑀸 𑀧𑀦 𑀚𑀦𑀧𑀤𑀁 𑀕𑀦𑁆𑀢𑀼𑀓𑀸𑀫𑀸 𑀫𑀦𑀼𑀲𑁆𑀲𑀸 𑀧𑀸𑀢𑁄𑀯 𑀆𑀧𑀡𑀁 𑀕𑀦𑁆𑀢𑁆𑀯𑀸 𑀪𑀡𑁆𑀟𑀁 𑀓𑀺𑀡𑀦𑁆𑀢𑀺, 𑀢𑀧𑁆𑀧𑀘𑁆𑀘𑀬𑀲𑁆𑀲 𑀮𑀸𑀪𑀲𑁆𑀲 𑀅𑀲𑁆𑀲𑀸𑀫𑀺𑀓𑁄 𑀳𑁄𑀢𑀺.

𑀅𑀜𑁆𑀜𑁂𑀲𑀁 𑀪𑁄𑀚𑀦𑀯𑁂𑀮𑀸𑀬 𑀧𑀦 𑀪𑀼𑀜𑁆𑀚𑀺𑀢𑀼𑀁 𑀆𑀕𑀦𑁆𑀢𑁆𑀯𑀸 𑀧𑀸𑀢𑁄𑀯 𑀪𑀡𑁆𑀟𑀁 𑀧𑀝𑀺𑀲𑀸𑀫𑁂𑀢𑁆𑀯𑀸 𑀖𑀭𑀁 𑀕𑀦𑁆𑀢𑁆𑀯𑀸 𑀪𑀼𑀜𑁆𑀚𑀺𑀢𑁆𑀯𑀸 𑀦𑀺𑀤𑁆𑀤𑀸𑀬𑀺𑀢𑁆𑀯𑀸 𑀲𑀸𑀬𑀁 𑀧𑀼𑀦 𑀆𑀧𑀡𑀁 𑀆𑀕𑀘𑁆𑀙𑀦𑁆𑀢𑁄 𑀫𑀚𑁆𑀛𑀦𑁆𑀳𑀺𑀓𑀲𑀫𑀬𑀁 𑀦 𑀲𑀓𑁆𑀓𑀘𑁆𑀘𑀁 𑀓𑀫𑁆𑀫𑀦𑁆𑀢𑀁 𑀅𑀥𑀺𑀝𑁆𑀞𑀸𑀢𑀺 𑀦𑀸𑀫. 𑀲𑁄 𑀳𑀺 𑀬𑀁 𑀘𑁄𑀭𑀸 𑀧𑀸𑀢𑁄𑀯 𑀯𑀺𑀲𑁆𑀲𑀚𑁆𑀚𑁂𑀢𑀼𑀁 𑀦 𑀲𑀫𑁆𑀧𑀸𑀧𑀼𑀡𑀺𑀁𑀲𑀼, 𑀤𑀺𑀯𑀸𑀓𑀸𑀮𑁂 𑀧𑀦 𑀧𑀭𑁂𑀲𑀁 𑀅𑀲𑀜𑁆𑀘𑀸𑀭𑀓𑁆𑀔𑀡𑁂 𑀆𑀧𑀡𑀁 𑀕𑀦𑁆𑀢𑁆𑀯𑀸 𑀅𑀧𑁆𑀧𑀕𑁆𑀖𑁂𑀦 𑀤𑁂𑀦𑁆𑀢𑀺, 𑀬𑀜𑁆𑀘 𑀪𑁄𑀚𑀦𑀯𑁂𑀮𑀸𑀬 𑀧𑀼𑀜𑁆𑀜𑀯𑀦𑁆𑀢𑁄 𑀇𑀲𑁆𑀲𑀭𑀸 ‘‘𑀆𑀧𑀡𑀢𑁄 𑀇𑀤𑀜𑁆𑀘𑀺𑀤𑀜𑁆𑀘 𑀮𑀤𑁆𑀥𑀼𑀁 𑀯𑀝𑁆𑀝𑀢𑀻’’𑀢𑀺 𑀧𑀳𑀺𑀡𑀺𑀢𑁆𑀯𑀸 𑀆𑀳𑀭𑀸𑀧𑁂𑀦𑁆𑀢𑀺, 𑀢𑀧𑁆𑀧𑀘𑁆𑀘𑀬𑀲𑁆𑀲 𑀮𑀸𑀪𑀲𑁆𑀲 𑀅𑀲𑁆𑀲𑀸𑀫𑀺𑀓𑁄 𑀳𑁄𑀢𑀺.

𑀬𑀸𑀯 𑀬𑀸𑀫𑀪𑁂𑀭𑀺𑀦𑀺𑀓𑁆𑀔𑀫𑀦𑀸 𑀧𑀦 𑀅𑀦𑁆𑀢𑁄𑀆𑀧𑀡𑁂 𑀤𑀻𑀧𑀁 𑀚𑀸𑀮𑀸𑀧𑁂𑀢𑁆𑀯𑀸 𑀅𑀦𑀺𑀲𑀻𑀤𑀦𑁆𑀢𑁄 𑀲𑀸𑀬𑀦𑁆𑀳𑀲𑀫𑀬𑀁 𑀦 𑀲𑀓𑁆𑀓𑀘𑁆𑀘𑀁 𑀓𑀫𑁆𑀫𑀦𑁆𑀢𑀁 𑀅𑀥𑀺𑀝𑁆𑀞𑀸𑀢𑀺 𑀦𑀸𑀫. 𑀲𑁄 𑀳𑀺 𑀬𑀁 𑀘𑁄𑀭𑀸 𑀧𑀸𑀢𑁄𑀧𑀺 𑀤𑀺𑀯𑀸𑀧𑀺 𑀯𑀺𑀲𑁆𑀲𑀚𑁆𑀚𑁂𑀢𑀼𑀁 𑀦 𑀲𑀫𑁆𑀧𑀸𑀧𑀼𑀡𑀺𑀁𑀲𑀼, 𑀲𑀸𑀬𑀁 𑀧𑀦 𑀆𑀧𑀡𑀁 𑀕𑀦𑁆𑀢𑁆𑀯𑀸 𑀅𑀧𑁆𑀧𑀕𑁆𑀖𑁂𑀦 𑀤𑁂𑀦𑁆𑀢𑀺, 𑀢𑀧𑁆𑀧𑀘𑁆𑀘𑀬𑀲𑁆𑀲 𑀮𑀸𑀪𑀲𑁆𑀲 𑀅𑀲𑁆𑀲𑀸𑀫𑀺𑀓𑁄 𑀳𑁄𑀢𑀺.

𑀦 𑀲𑀓𑁆𑀓𑀘𑁆𑀘𑀁 𑀲𑀫𑀸𑀥𑀺𑀦𑀺𑀫𑀺𑀢𑁆𑀢𑀁 𑀅𑀥𑀺𑀝𑁆𑀞𑀸𑀢𑀻𑀢𑀺 𑀲𑀓𑁆𑀓𑀘𑁆𑀘𑀓𑀺𑀭𑀺𑀬𑀸𑀬 𑀲𑀫𑀸𑀥𑀺𑀁 𑀦 𑀲𑀫𑀸𑀧𑀚𑁆𑀚𑀢𑀺. 𑀏𑀢𑁆𑀣 𑀘 𑀧𑀸𑀢𑁄𑀯 𑀘𑁂𑀢𑀺𑀬𑀗𑁆𑀕𑀡𑀩𑁄𑀥𑀺𑀬𑀗𑁆𑀕𑀡𑁂𑀲𑀼 𑀯𑀢𑁆𑀢𑀁 𑀓𑀢𑁆𑀯𑀸 𑀲𑁂𑀦𑀸𑀲𑀦𑀁 𑀧𑀯𑀺𑀲𑀺𑀢𑁆𑀯𑀸 𑀬𑀸𑀯 𑀪𑀺𑀓𑁆𑀔𑀸𑀘𑀸𑀭𑀯𑁂𑀮𑀸, 𑀢𑀸𑀯 𑀲𑀫𑀸𑀧𑀢𑁆𑀢𑀺𑀁 𑀅𑀧𑁆𑀧𑁂𑀢𑁆𑀯𑀸 𑀅𑀦𑀺𑀲𑀻𑀤𑀦𑁆𑀢𑁄 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦 𑀲𑀓𑁆𑀓𑀘𑁆𑀘𑀁 𑀲𑀫𑀸𑀥𑀺𑀦𑀺𑀫𑀺𑀢𑁆𑀢𑀁 𑀅𑀥𑀺𑀝𑁆𑀞𑀸𑀢𑀺 𑀦𑀸𑀫. 𑀧𑀘𑁆𑀙𑀸𑀪𑀢𑁆𑀢𑀁 𑀧𑀦 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀦𑁆𑀢𑁄 𑀭𑀢𑁆𑀢𑀺𑀝𑁆𑀞𑀸𑀦𑀤𑀺𑀯𑀸𑀝𑁆𑀞𑀸𑀦𑀁 𑀧𑀯𑀺𑀲𑀺𑀢𑁆𑀯𑀸 𑀬𑀸𑀯 𑀲𑀸𑀬𑀦𑁆𑀳𑀲𑀫𑀬𑀸 𑀲𑀫𑀸𑀧𑀢𑁆𑀢𑀺𑀁 𑀅𑀧𑁆𑀧𑁂𑀢𑁆𑀯𑀸 𑀅𑀦𑀺𑀲𑀻𑀤𑀦𑁆𑀢𑁄 𑀫𑀚𑁆𑀛𑀦𑁆𑀳𑀺𑀓𑀲𑀫𑀬𑀁 𑀦 𑀲𑀓𑁆𑀓𑀘𑁆𑀘𑀁 𑀲𑀫𑀸𑀥𑀺𑀦𑀺𑀫𑀺𑀢𑁆𑀢𑀁 𑀅𑀥𑀺𑀝𑁆𑀞𑀸𑀢𑀺 𑀦𑀸𑀫. 𑀲𑀸𑀬𑀁 𑀧𑀦 𑀘𑁂𑀢𑀺𑀬𑀁 𑀯𑀦𑁆𑀤𑀺𑀢𑁆𑀯𑀸 𑀣𑁂𑀭𑀽𑀧𑀝𑁆𑀞𑀸𑀦𑀁 𑀓𑀢𑁆𑀯𑀸 𑀲𑁂𑀦𑀸𑀲𑀦𑀁 𑀧𑀯𑀺𑀲𑀺𑀢𑁆𑀯𑀸 𑀧𑀞𑀫𑀬𑀸𑀫𑀁 𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀅𑀦𑀺𑀲𑀻𑀤𑀦𑁆𑀢𑁄 𑀲𑀸𑀬𑀦𑁆𑀳𑀲𑀫𑀬𑀁 𑀦 𑀲𑀓𑁆𑀓𑀘𑁆𑀘𑀁 𑀲𑀫𑀸𑀥𑀺𑀦𑀺𑀫𑀺𑀢𑁆𑀢𑀁 𑀅𑀥𑀺𑀝𑁆𑀞𑀸𑀢𑀺 𑀦𑀸𑀫. 𑀲𑀼𑀓𑁆𑀓𑀧𑀓𑁆𑀔𑁄 𑀯𑀼𑀢𑁆𑀢𑀧𑀝𑀺𑀧𑀓𑁆𑀔𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀅𑀧𑀺𑀘𑁂𑀢𑁆𑀣 ‘‘𑀲𑀫𑀸𑀧𑀢𑁆𑀢𑀺𑀁 𑀅𑀧𑁆𑀧𑁂𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀝𑁆𑀞𑀸𑀦𑁂 𑀲𑀫𑀸𑀧𑀢𑁆𑀢𑀺𑀬𑀸 𑀅𑀲𑀢𑀺 𑀯𑀺𑀧𑀲𑁆𑀲𑀦𑀸𑀧𑀺 𑀯𑀝𑁆𑀝𑀢𑀺, 𑀲𑀫𑀸𑀥𑀺𑀦𑀺𑀫𑀺𑀢𑁆𑀢𑀦𑁆𑀢𑀺 𑀘 𑀲𑀫𑀸𑀥𑀺𑀆𑀭𑀫𑁆𑀫𑀡𑀫𑁆𑀧𑀺 𑀯𑀝𑁆𑀝𑀢𑀺𑀬𑁂𑀯. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋 ‘‘𑀲𑀫𑀸𑀥𑀺𑀧𑀺 𑀲𑀫𑀸𑀥𑀺𑀦𑀺𑀫𑀺𑀢𑁆𑀢𑀁, 𑀲𑀫𑀸𑀥𑀸𑀭𑀫𑁆𑀫𑀡𑀫𑁆𑀧𑀺 𑀲𑀫𑀸𑀥𑀺𑀦𑀺𑀫𑀺𑀢𑁆𑀢’’𑀦𑁆𑀢𑀺.

𑁧𑁦. 𑀤𑀼𑀢𑀺𑀬𑀧𑀸𑀧𑀡𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁦. 𑀤𑀲𑀫𑁂 𑀘𑀓𑁆𑀔𑀼𑀫𑀸𑀢𑀺 𑀧𑀜𑁆𑀜𑀸𑀘𑀓𑁆𑀔𑀼𑀦𑀸 𑀘𑀓𑁆𑀔𑀼𑀫𑀸 𑀳𑁄𑀢𑀺. 𑀯𑀺𑀥𑀼𑀭𑁄𑀢𑀺 𑀯𑀺𑀲𑀺𑀝𑁆𑀞𑀥𑀼𑀭𑁄 𑀉𑀢𑁆𑀢𑀫𑀥𑀼𑀭𑁄 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑁂𑀦 𑀯𑀻𑀭𑀺𑀬𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀦𑀺𑀲𑁆𑀲𑀬𑀲𑀫𑁆𑀧𑀦𑁆𑀦𑁄𑀢𑀺 𑀅𑀯𑀲𑁆𑀲𑀬𑀲𑀫𑁆𑀧𑀦𑁆𑀦𑁄 𑀧𑀢𑀺𑀝𑁆𑀞𑀸𑀦𑀲𑀫𑁆𑀧𑀦𑁆𑀦𑁄. 𑀧𑀡𑀺𑀬𑀦𑁆𑀢𑀺 𑀯𑀺𑀓𑁆𑀓𑀸𑀬𑀺𑀓𑀪𑀡𑁆𑀟𑀁. 𑀏𑀢𑁆𑀢𑀓𑀁 𑀫𑀽𑀮𑀁 𑀪𑀯𑀺𑀲𑁆𑀲𑀢𑀺 𑀏𑀢𑁆𑀢𑀓𑁄 𑀉𑀤𑀬𑁄𑀢𑀺 𑀢𑀲𑁆𑀫𑀺𑀁 ‘‘𑀏𑀯𑀁 𑀓𑀻𑀢𑀁 𑀏𑀯𑀁 𑀯𑀺𑀓𑁆𑀓𑀸𑀬𑀫𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀧𑀡𑀺𑀬𑁂 𑀬𑁂𑀦 𑀓𑀬𑁂𑀦 𑀢𑀁 𑀓𑀻𑀢𑀁, 𑀢𑀁 𑀓𑀬𑀲𑀗𑁆𑀔𑀸𑀢𑀁 𑀫𑀽𑀮𑀁 𑀏𑀢𑁆𑀢𑀓𑀁 𑀪𑀯𑀺𑀲𑁆𑀲𑀢𑀺. 𑀬𑁄 𑀘 𑀢𑀲𑁆𑀫𑀺𑀁 𑀯𑀺𑀓𑁆𑀓𑀬𑀫𑀸𑀦𑁂 𑀯𑀺𑀓𑁆𑀓𑀬𑁄, 𑀢𑀲𑁆𑀫𑀺𑀁 𑀯𑀺𑀓𑁆𑀓𑀬𑁂 𑀏𑀢𑁆𑀢𑀓𑁄 𑀉𑀤𑀬𑁄 𑀪𑀯𑀺𑀲𑁆𑀲𑀢𑀺, 𑀏𑀢𑁆𑀢𑀺𑀓𑀸 𑀯𑀟𑁆𑀠𑀻𑀢𑀺 𑀅𑀢𑁆𑀣𑁄.

𑀓𑀼𑀲𑀮𑁄 𑀳𑁄𑀢𑀺 𑀧𑀡𑀺𑀬𑀁 𑀓𑁂𑀢𑀼𑀜𑁆𑀘 𑀯𑀺𑀓𑁆𑀓𑁂𑀢𑀼𑀜𑁆𑀘𑀸𑀢𑀺 𑀲𑀼𑀮𑀪𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀓𑀺𑀡𑀦𑁆𑀢𑁄 𑀤𑀼𑀮𑁆𑀮𑀪𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀯𑀺𑀓𑁆𑀓𑀺𑀡𑀦𑁆𑀢𑁄 𑀘 𑀏𑀢𑁆𑀣 𑀓𑀼𑀲𑀮𑁄 𑀦𑀸𑀫 𑀳𑁄𑀢𑀺, 𑀤𑀲𑀕𑀼𑀡𑀫𑁆𑀧𑀺 𑀯𑀻𑀲𑀢𑀺𑀕𑀼𑀡𑀫𑁆𑀧𑀺 𑀮𑀸𑀪𑀁 𑀮𑀪𑀢𑀺.

𑀅𑀟𑁆𑀠𑀸𑀢𑀺 𑀇𑀲𑁆𑀲𑀭𑀸 𑀩𑀳𑀼𑀦𑀸 𑀦𑀺𑀓𑁆𑀔𑀺𑀢𑁆𑀢𑀥𑀦𑁂𑀦 𑀲𑀫𑀦𑁆𑀦𑀸𑀕𑀢𑀸. 𑀫𑀳𑀤𑁆𑀥𑀦𑀸𑀢𑀺 𑀯𑀴𑀜𑁆𑀚𑀦𑀓𑀯𑀲𑁂𑀦 𑀫𑀳𑀤𑁆𑀥𑀦𑀸. 𑀫𑀳𑀸𑀪𑁄𑀕𑀸𑀢𑀺 𑀉𑀧𑀪𑁄𑀕𑀧𑀭𑀺𑀪𑁄𑀕𑀪𑀡𑁆𑀟𑁂𑀦 𑀫𑀳𑀸𑀪𑁄𑀕𑀸. 𑀧𑀝𑀺𑀩𑀮𑁄𑀢𑀺 𑀓𑀸𑀬𑀩𑀮𑁂𑀦 𑀘𑁂𑀯 𑀜𑀸𑀡𑀩𑀮𑁂𑀦 𑀘 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀲𑀫𑀢𑁆𑀣𑁄. 𑀅𑀫𑁆𑀳𑀸𑀓𑀜𑁆𑀘 𑀓𑀸𑀮𑁂𑀦 𑀓𑀸𑀮𑀁 𑀅𑀦𑀼𑀧𑁆𑀧𑀤𑀸𑀢𑀼𑀦𑁆𑀢𑀺 𑀅𑀫𑁆𑀳𑀸𑀓𑀜𑁆𑀘 𑀕𑀳𑀺𑀢𑀥𑀦𑀫𑀽𑀮𑀺𑀓𑀁 𑀯𑀟𑁆𑀠𑀺𑀁 𑀓𑀸𑀮𑁂𑀦 𑀓𑀸𑀮𑀁 𑀅𑀦𑀼𑀧𑁆𑀧𑀤𑀸𑀢𑀼𑀁. 𑀦𑀺𑀧𑀢𑀦𑁆𑀢𑀻𑀢𑀺 𑀦𑀺𑀫𑀦𑁆𑀢𑁂𑀦𑁆𑀢𑀺. 𑀦𑀺𑀧𑀸𑀢𑁂𑀦𑁆𑀢𑀻𑀢𑀺𑀧𑀺 𑀧𑀸𑀞𑁄, 𑀅𑀬𑀫𑁂𑀯 𑀅𑀢𑁆𑀣𑁄.

𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀉𑀧𑀲𑀫𑁆𑀧𑀤𑀸𑀬𑀸𑀢𑀺 𑀓𑀼𑀲𑀮𑀥𑀫𑁆𑀫𑀸𑀦𑀁 𑀲𑀫𑁆𑀧𑀸𑀤𑀦𑀢𑁆𑀣𑀸𑀬 𑀧𑀝𑀺𑀮𑀸𑀪𑀢𑁆𑀣𑀸𑀬. 𑀣𑀸𑀫𑀯𑀸𑀢𑀺 𑀜𑀸𑀡𑀣𑀸𑀫𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀤𑀴𑁆𑀳𑀧𑀭𑀓𑁆𑀓𑀫𑁄𑀢𑀺 𑀣𑀺𑀭𑁂𑀦 𑀜𑀸𑀡𑀧𑀭𑀓𑁆𑀓𑀫𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀅𑀦𑀺𑀓𑁆𑀔𑀺𑀢𑁆𑀢𑀥𑀼𑀭𑁄𑀢𑀺 ‘‘𑀅𑀕𑁆𑀕𑀫𑀕𑁆𑀕𑀁 𑀅𑀧𑀸𑀧𑀼𑀡𑀺𑀢𑁆𑀯𑀸 𑀇𑀫𑀁 𑀯𑀻𑀭𑀺𑀬𑀥𑀼𑀭𑀁 𑀦 𑀞𑀧𑁂𑀲𑁆𑀲𑀸𑀫𑀻’’𑀢𑀺 𑀏𑀯𑀁 𑀅𑀝𑁆𑀞𑀧𑀺𑀢𑀥𑀼𑀭𑁄.

𑀩𑀳𑀼𑀲𑁆𑀲𑀼𑀢𑀸𑀢𑀺 𑀏𑀓𑀦𑀺𑀓𑀸𑀬𑀸𑀤𑀺𑀯𑀲𑁂𑀦 𑀩𑀳𑀼 𑀩𑀼𑀤𑁆𑀥𑀯𑀘𑀦𑀁 𑀲𑀼𑀢𑀁 𑀏𑀢𑁂𑀲𑀦𑁆𑀢𑀺 𑀩𑀳𑀼𑀲𑁆𑀲𑀼𑀢𑀸. 𑀆𑀕𑀢𑀸𑀕𑀫𑀸𑀢𑀺 𑀏𑀓𑁄 𑀦𑀺𑀓𑀸𑀬𑁄 𑀏𑀓𑁄 𑀆𑀕𑀫𑁄 𑀦𑀸𑀫, 𑀤𑁆𑀯𑁂 𑀦𑀺𑀓𑀸𑀬𑀸 𑀤𑁆𑀯𑁂 𑀆𑀕𑀫𑀸 𑀦𑀸𑀫, 𑀧𑀜𑁆𑀘 𑀦𑀺𑀓𑀸𑀬𑀸 𑀧𑀜𑁆𑀘 𑀆𑀕𑀫𑀸 𑀦𑀸𑀫, 𑀏𑀢𑁂𑀲𑀼 𑀆𑀕𑀫𑁂𑀲𑀼 𑀬𑁂𑀲𑀁 𑀏𑀓𑁄𑀧𑀺 𑀆𑀕𑀫𑁄 𑀆𑀕𑀢𑁄 𑀧𑀕𑀼𑀡𑁄 𑀧𑀯𑀢𑁆𑀢𑀺𑀢𑁄, 𑀢𑁂 𑀆𑀕𑀢𑀸𑀕𑀫𑀸 𑀦𑀸𑀫. 𑀥𑀫𑁆𑀫𑀥𑀭𑀸𑀢𑀺 𑀲𑀼𑀢𑁆𑀢𑀦𑁆𑀢𑀧𑀺𑀝𑀓𑀥𑀭𑀸. 𑀯𑀺𑀦𑀬𑀥𑀭𑀸𑀢𑀺 𑀯𑀺𑀦𑀬𑀧𑀺𑀝𑀓𑀥𑀭𑀸. 𑀫𑀸𑀢𑀺𑀓𑀸𑀥𑀭𑀸𑀢𑀺 𑀤𑁆𑀯𑁂𑀫𑀸𑀢𑀺𑀓𑀸𑀥𑀭𑀸. 𑀧𑀭𑀺𑀧𑀼𑀘𑁆𑀙𑀢𑀻𑀢𑀺 𑀅𑀢𑁆𑀣𑀸𑀦𑀢𑁆𑀣𑀁 𑀓𑀸𑀭𑀡𑀸𑀓𑀸𑀭𑀡𑀁 𑀧𑀼𑀘𑁆𑀙𑀢𑀺. 𑀧𑀭𑀺𑀧𑀜𑁆𑀳𑀢𑀻𑀢𑀺 ‘‘𑀇𑀫𑀁 𑀦𑀸𑀫 𑀧𑀼𑀘𑁆𑀙𑀺𑀲𑁆𑀲𑀸𑀫𑀻’’𑀢𑀺 𑀅𑀜𑁆𑀜𑀸𑀢𑀺 𑀢𑀼𑀮𑁂𑀢𑀺 𑀧𑀭𑀺𑀕𑁆𑀕𑀡𑁆𑀳𑀸𑀢𑀺. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑀇𑀫𑀲𑁆𑀫𑀺𑀁 𑀧𑀦 𑀲𑀼𑀢𑁆𑀢𑁂 𑀧𑀞𑀫𑀁 𑀧𑀜𑁆𑀜𑀸 𑀆𑀕𑀢𑀸, 𑀧𑀘𑁆𑀙𑀸 𑀯𑀻𑀭𑀺𑀬𑀜𑁆𑀘 𑀓𑀮𑁆𑀬𑀸𑀡𑀫𑀺𑀢𑁆𑀢𑀲𑁂𑀯𑀦𑀸 𑀘. 𑀢𑀢𑁆𑀣 𑀧𑀞𑀫𑀁 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀧𑀘𑁆𑀙𑀸 𑀯𑀻𑀭𑀺𑀬𑀁 𑀓𑀢𑁆𑀯𑀸 𑀓𑀮𑁆𑀬𑀸𑀡𑀫𑀺𑀢𑁆𑀢𑀸 𑀲𑁂𑀯𑀺𑀢𑀩𑁆𑀩𑀸𑀢𑀺 𑀦 𑀏𑀯𑀁 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄, 𑀤𑁂𑀲𑀦𑀸𑀬 𑀦𑀸𑀫 𑀳𑁂𑀝𑁆𑀞𑀺𑀫𑁂𑀦 𑀯𑀸 𑀧𑀭𑀺𑀘𑁆𑀙𑁂𑀤𑁄 𑀳𑁄𑀢𑀺 𑀉𑀧𑀭𑀺𑀫𑁂𑀦 𑀯𑀸 𑀤𑁆𑀯𑀻𑀳𑀺𑀧𑀺 𑀯𑀸 𑀓𑁄𑀝𑀻𑀳𑀺. 𑀇𑀥 𑀧𑀦 𑀉𑀧𑀭𑀺𑀫𑁂𑀦 𑀧𑀭𑀺𑀘𑁆𑀙𑁂𑀤𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀲𑁆𑀫𑀸 𑀓𑀣𑁂𑀦𑁆𑀢𑁂𑀦 𑀧𑀞𑀫𑀁 𑀓𑀮𑁆𑀬𑀸𑀡𑀫𑀺𑀢𑁆𑀢𑀉𑀧𑀦𑀺𑀲𑁆𑀲𑀬𑀁 𑀤𑀲𑁆𑀲𑁂𑀢𑁆𑀯𑀸 𑀫𑀚𑁆𑀛𑁂 𑀯𑀻𑀭𑀺𑀬𑀁 𑀤𑀲𑁆𑀲𑁂𑀢𑁆𑀯𑀸 𑀧𑀘𑁆𑀙𑀸 𑀅𑀭𑀳𑀢𑁆𑀢𑀁 𑀓𑀣𑁂𑀢𑀩𑁆𑀩𑀦𑁆𑀢𑀺.

𑀭𑀣𑀓𑀸𑀭𑀯𑀕𑁆𑀕𑁄 𑀤𑀼𑀢𑀺𑀬𑁄.

𑁩. 𑀧𑀼𑀕𑁆𑀕𑀮𑀯𑀕𑁆𑀕𑁄

𑁧. 𑀲𑀫𑀺𑀤𑁆𑀥𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁧. 𑀢𑀢𑀺𑀬𑀲𑁆𑀲 𑀧𑀞𑀫𑁂 𑀛𑀸𑀦𑀨𑀲𑁆𑀲𑀁 𑀧𑀞𑀫𑀁 𑀨𑀼𑀲𑀢𑀺, 𑀧𑀘𑁆𑀙𑀸 𑀦𑀺𑀭𑁄𑀥𑀁 𑀦𑀺𑀩𑁆𑀩𑀸𑀦𑀁 𑀲𑀘𑁆𑀙𑀺𑀓𑀭𑁄𑀢𑀻𑀢𑀺 𑀓𑀸𑀬𑀲𑀓𑁆𑀔𑀺. 𑀤𑀺𑀝𑁆𑀞𑀦𑁆𑀢𑀁 𑀧𑀢𑁆𑀢𑁄𑀢𑀺 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑁄. 𑀲𑀤𑁆𑀤𑀳𑀦𑁆𑀢𑁄 𑀯𑀺𑀫𑀼𑀢𑁆𑀢𑁄𑀢𑀺 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑁄. 𑀔𑀫𑀢𑀻𑀢𑀺 𑀭𑀼𑀘𑁆𑀘𑀢𑀺. 𑀅𑀪𑀺𑀓𑁆𑀓𑀦𑁆𑀢𑀢𑀭𑁄𑀢𑀺 𑀅𑀢𑀺𑀲𑀼𑀦𑁆𑀤𑀭𑀢𑀭𑁄. 𑀧𑀡𑀻𑀢𑀢𑀭𑁄𑀢𑀺 𑀅𑀢𑀺𑀧𑀡𑀻𑀢𑀢𑀭𑁄. 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀅𑀥𑀺𑀫𑀢𑁆𑀢𑀁 𑀳𑁄𑀢𑀻𑀢𑀺 𑀲𑀫𑀺𑀤𑁆𑀥𑀢𑁆𑀣𑁂𑀭𑀲𑁆𑀲 𑀓𑀺𑀭 𑀅𑀭𑀳𑀢𑁆𑀢𑀫𑀕𑁆𑀕𑀓𑁆𑀔𑀡𑁂 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀥𑀼𑀭𑀁 𑀅𑀳𑁄𑀲𑀺, 𑀲𑁂𑀲𑀸𑀦𑀺 𑀘𑀢𑁆𑀢𑀸𑀭𑀺 𑀲𑀳𑀚𑀸𑀢𑀺𑀦𑁆𑀤𑁆𑀭𑀺𑀬𑀸𑀦𑀺 𑀢𑀲𑁆𑀲𑁂𑀯 𑀧𑀭𑀺𑀯𑀸𑀭𑀸𑀦𑀺 𑀅𑀳𑁂𑀲𑀼𑀁. 𑀇𑀢𑀺 𑀣𑁂𑀭𑁄 𑀅𑀢𑁆𑀢𑀦𑀸 𑀧𑀝𑀺𑀯𑀺𑀤𑁆𑀥𑀫𑀕𑁆𑀕𑀁 𑀓𑀣𑁂𑀦𑁆𑀢𑁄 𑀏𑀯𑀫𑀸𑀳. 𑀫𑀳𑀸𑀓𑁄𑀝𑁆𑀞𑀺𑀓𑀢𑁆𑀣𑁂𑀭𑀲𑁆𑀲 𑀧𑀦 𑀅𑀭𑀳𑀢𑁆𑀢𑀫𑀕𑁆𑀕𑀓𑁆𑀔𑀡𑁂 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁 𑀥𑀼𑀭𑀁 𑀅𑀳𑁄𑀲𑀺, 𑀲𑁂𑀲𑀸𑀦𑀺 𑀘𑀢𑁆𑀢𑀸𑀭𑀺 𑀇𑀦𑁆𑀤𑁆𑀭𑀺𑀬𑀸𑀦𑀺 𑀢𑀲𑁆𑀲𑁂𑀯 𑀧𑀭𑀺𑀯𑀸𑀭𑀸𑀦𑀺 𑀅𑀳𑁂𑀲𑀼𑀁. 𑀢𑀲𑁆𑀫𑀸 𑀲𑁄𑀧𑀺 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁 𑀅𑀥𑀺𑀫𑀢𑁆𑀢𑀦𑁆𑀢𑀺 𑀓𑀣𑁂𑀦𑁆𑀢𑁄 𑀅𑀢𑁆𑀢𑀦𑀸 𑀧𑀝𑀺𑀯𑀺𑀤𑁆𑀥𑀫𑀕𑁆𑀕𑀫𑁂𑀯 𑀓𑀣𑁂𑀲𑀺. 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀲𑁆𑀲 𑀧𑀦 𑀅𑀭𑀳𑀢𑁆𑀢𑀫𑀕𑁆𑀕𑀓𑁆𑀔𑀡𑁂 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀥𑀼𑀭𑀁 𑀅𑀳𑁄𑀲𑀺. 𑀲𑁂𑀲𑀸𑀦𑀺 𑀘𑀢𑁆𑀢𑀸𑀭𑀺 𑀇𑀦𑁆𑀤𑁆𑀭𑀺𑀬𑀸𑀦𑀺 𑀢𑀲𑁆𑀲𑁂𑀯 𑀧𑀭𑀺𑀯𑀸𑀭𑀸𑀦𑀺 𑀅𑀳𑁂𑀲𑀼𑀁. 𑀢𑀲𑁆𑀫𑀸 𑀲𑁄𑀧𑀺 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀅𑀥𑀺𑀫𑀢𑁆𑀢𑀦𑁆𑀢𑀺 𑀓𑀣𑁂𑀦𑁆𑀢𑁄 𑀅𑀢𑁆𑀢𑀦𑀸 𑀧𑀝𑀺𑀯𑀺𑀤𑁆𑀥𑀫𑀕𑁆𑀕𑀫𑁂𑀯 𑀓𑀣𑁂𑀲𑀺.

𑀦 𑀔𑁆𑀯𑁂𑀢𑁆𑀣𑀸𑀢𑀺 𑀦 𑀔𑁄 𑀏𑀢𑁆𑀣. 𑀏𑀓𑀁𑀲𑁂𑀦 𑀩𑁆𑀬𑀸𑀓𑀸𑀢𑀼𑀦𑁆𑀢𑀺 𑀏𑀓𑀦𑁆𑀢𑁂𑀦 𑀩𑁆𑀬𑀸𑀓𑀭𑀺𑀢𑀼𑀁. 𑀅𑀭𑀳𑀢𑁆𑀢𑀸𑀬 𑀧𑀝𑀺𑀧𑀦𑁆𑀦𑁄𑀢𑀺 𑀅𑀭𑀳𑀢𑁆𑀢𑀫𑀕𑁆𑀕𑀲𑀫𑀗𑁆𑀕𑀺𑀁 𑀤𑀲𑁆𑀲𑁂𑀢𑀺. 𑀏𑀯𑀫𑁂𑀢𑀲𑁆𑀫𑀺𑀁 𑀲𑀼𑀢𑁆𑀢𑁂 𑀢𑀻𑀳𑀺𑀧𑀺 𑀣𑁂𑀭𑁂𑀳𑀺 𑀅𑀢𑁆𑀢𑀦𑀸 𑀧𑀝𑀺𑀯𑀺𑀤𑁆𑀥𑀫𑀕𑁆𑀕𑁄𑀯 𑀓𑀣𑀺𑀢𑁄, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀧𑀦 𑀪𑀼𑀫𑁆𑀫𑀦𑁆𑀢𑀭𑁂𑀦𑁂𑀯 𑀓𑀣𑁂𑀲𑀺.

𑁨. 𑀕𑀺𑀮𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁨. 𑀤𑀼𑀢𑀺𑀬𑁂 𑀲𑀧𑁆𑀧𑀸𑀬𑀸𑀦𑀻𑀢𑀺 𑀳𑀺𑀢𑀸𑀦𑀺 𑀯𑀼𑀤𑁆𑀥𑀺𑀓𑀭𑀸𑀦𑀺. 𑀧𑀢𑀺𑀭𑀽𑀧𑀦𑁆𑀢𑀺 𑀅𑀦𑀼𑀘𑁆𑀙𑀯𑀺𑀓𑀁. 𑀦𑁂𑀯 𑀯𑀼𑀝𑁆𑀞𑀸𑀢𑀺 𑀢𑀫𑁆𑀳𑀸 𑀆𑀩𑀸𑀥𑀸𑀢𑀺 𑀇𑀫𑀺𑀦𑀸 𑀅𑀢𑁂𑀓𑀺𑀘𑁆𑀙𑁂𑀦 𑀯𑀸𑀢𑀸𑀧𑀫𑀸𑀭𑀸𑀤𑀺𑀦𑀸 𑀭𑁄𑀕𑁂𑀦 𑀲𑀫𑀦𑁆𑀦𑀸𑀕𑀢𑁄 𑀦𑀺𑀝𑁆𑀞𑀸𑀧𑀢𑁆𑀢𑀕𑀺𑀮𑀸𑀦𑁄 𑀓𑀣𑀺𑀢𑁄. 𑀯𑀼𑀝𑁆𑀞𑀸𑀢𑀺 𑀢𑀫𑁆𑀳𑀸 𑀆𑀩𑀸𑀥𑀸𑀢𑀺 𑀇𑀫𑀺𑀦𑀸 𑀔𑀺𑀧𑀺𑀢𑀓𑀓𑀘𑁆𑀙𑀼𑀢𑀺𑀡𑀧𑀼𑀧𑁆𑀨𑀓𑀚𑀭𑀸𑀤𑀺𑀪𑁂𑀤𑁄 𑀅𑀧𑁆𑀧𑀫𑀢𑁆𑀢𑀆𑀩𑀸𑀥𑁄 𑀓𑀣𑀺𑀢𑁄. 𑀮𑀪𑀦𑁆𑀢𑁄 𑀲𑀧𑁆𑀧𑀸𑀬𑀸𑀦𑀺 𑀪𑁄𑀚𑀦𑀸𑀦𑀺 𑀦𑁄 𑀅𑀮𑀪𑀦𑁆𑀢𑁄𑀢𑀺 𑀇𑀫𑀺𑀦𑀸 𑀧𑀦 𑀬𑁂𑀲𑀁 𑀧𑀝𑀺𑀚𑀕𑁆𑀕𑀦𑁂𑀦 𑀨𑀸𑀲𑀼𑀓𑀁 𑀳𑁄𑀢𑀺, 𑀲𑀩𑁆𑀩𑁂𑀧𑀺 𑀢𑁂 𑀆𑀩𑀸𑀥𑀸 𑀓𑀣𑀺𑀢𑀸. 𑀏𑀢𑁆𑀣 𑀘 𑀧𑀢𑀺𑀭𑀽𑀧𑁄 𑀉𑀧𑀝𑁆𑀞𑀸𑀓𑁄 𑀦𑀸𑀫 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀧𑀡𑁆𑀟𑀺𑀢𑁄 𑀤𑀓𑁆𑀔𑁄 𑀅𑀦𑀮𑀲𑁄 𑀯𑁂𑀤𑀺𑀢𑀩𑁆𑀩𑁄. 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑁄 𑀅𑀦𑀼𑀜𑁆𑀜𑀸𑀢𑁄𑀢𑀺 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀤𑀸𑀢𑀩𑁆𑀩𑁄𑀢𑀺 𑀅𑀦𑀼𑀜𑁆𑀜𑀸𑀢𑁄. 𑀢𑀲𑁆𑀫𑀺𑀜𑁆𑀳𑀺 𑀕𑀺𑀮𑀸𑀦𑁂 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀬𑀸𑀧𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁂 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀏𑀓𑁄 𑀪𑀺𑀓𑁆𑀔𑀼 𑀘 𑀲𑀸𑀫𑀡𑁂𑀭𑁄 𑀘 ‘‘𑀇𑀫𑀁 𑀧𑀝𑀺𑀚𑀕𑁆𑀕𑀣𑀸’’𑀢𑀺 𑀅𑀧𑀮𑁄𑀓𑁂𑀢𑁆𑀯𑀸 𑀤𑀸𑀢𑀩𑁆𑀩𑀸. 𑀬𑀸𑀯 𑀧𑀦 𑀢𑁂 𑀢𑀁 𑀧𑀝𑀺𑀚𑀕𑁆𑀕𑀦𑁆𑀢𑀺, 𑀢𑀸𑀯 𑀕𑀺𑀮𑀸𑀦𑀲𑁆𑀲 𑀘 𑀢𑁂𑀲𑀜𑁆𑀘 𑀤𑁆𑀯𑀺𑀦𑁆𑀦𑀁 𑀬𑁂𑀦𑀢𑁆𑀣𑁄, 𑀲𑀩𑁆𑀩𑀁 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲𑁂𑀯 𑀪𑀸𑀭𑁄.

𑀅𑀜𑁆𑀜𑁂𑀧𑀺 𑀕𑀺𑀮𑀸𑀦𑀸 𑀉𑀧𑀝𑁆𑀞𑀸𑀢𑀩𑁆𑀩𑀸𑀢𑀺 𑀇𑀢𑀭𑁂𑀧𑀺 𑀤𑁆𑀯𑁂 𑀕𑀺𑀮𑀸𑀦𑀸 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑀸. 𑀓𑀺𑀁 𑀓𑀸𑀭𑀡𑀸? 𑀬𑁄𑀧𑀺 𑀳𑀺 𑀦𑀺𑀝𑁆𑀞𑀧𑀢𑁆𑀢𑀕𑀺𑀮𑀸𑀦𑁄, 𑀲𑁄 𑀅𑀦𑀼𑀧𑀝𑁆𑀞𑀺𑀬𑀫𑀸𑀦𑁄 ‘‘𑀲𑀘𑁂 𑀫𑀁 𑀧𑀝𑀺𑀚𑀕𑁆𑀕𑁂𑀬𑁆𑀬𑀼𑀁, 𑀨𑀸𑀲𑀼𑀓𑀁 𑀫𑁂 𑀪𑀯𑁂𑀬𑁆𑀬. 𑀦 𑀔𑁄 𑀧𑀦 𑀫𑀁 𑀧𑀝𑀺𑀚𑀕𑁆𑀕𑀦𑁆𑀢𑀻’’𑀢𑀺 𑀫𑀦𑁄𑀧𑀤𑁄𑀲𑀁 𑀓𑀢𑁆𑀯𑀸 𑀅𑀧𑀸𑀬𑁂 𑀦𑀺𑀩𑁆𑀩𑀢𑁆𑀢𑁂𑀬𑁆𑀬. 𑀧𑀝𑀺𑀚𑀕𑁆𑀕𑀺𑀬𑀫𑀸𑀦𑀲𑁆𑀲 𑀧𑀦𑀲𑁆𑀲 𑀏𑀯𑀁 𑀳𑁄𑀢𑀺 ‘‘𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀬𑀁 𑀓𑀸𑀢𑀩𑁆𑀩𑀁, 𑀢𑀁 𑀓𑀢𑀁. 𑀫𑀬𑁆𑀳𑀁 𑀧𑀦 𑀓𑀫𑁆𑀫𑀯𑀺𑀧𑀸𑀓𑁄 𑀈𑀤𑀺𑀲𑁄’’𑀢𑀺. 𑀲𑁄 𑀪𑀺𑀓𑁆𑀔𑀼𑀲𑀗𑁆𑀖𑁂 𑀫𑁂𑀢𑁆𑀢𑀁 𑀧𑀘𑁆𑀘𑀼𑀧𑀝𑁆𑀞𑀸𑀧𑁂𑀢𑁆𑀯𑀸 𑀲𑀕𑁆𑀕𑁂 𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀢𑀺. 𑀬𑁄 𑀧𑀦 𑀅𑀧𑁆𑀧𑀫𑀢𑁆𑀢𑀓𑁂𑀦 𑀩𑁆𑀬𑀸𑀥𑀺𑀦𑀸 𑀲𑀫𑀦𑁆𑀦𑀸𑀕𑀢𑁄 𑀮𑀪𑀦𑁆𑀢𑁄𑀧𑀺 𑀅𑀮𑀪𑀦𑁆𑀢𑁄𑀧𑀺 𑀯𑀼𑀝𑁆𑀞𑀸𑀢𑀺𑀬𑁂𑀯, 𑀢𑀲𑁆𑀲 𑀯𑀺𑀦𑀸𑀧𑀺 𑀪𑁂𑀲𑀚𑁆𑀚𑁂𑀦 𑀯𑀽𑀧𑀲𑀫𑀦𑀩𑁆𑀬𑀸𑀥𑀺 𑀪𑁂𑀲𑀚𑁆𑀚𑁂 𑀓𑀢𑁂 𑀔𑀺𑀧𑁆𑀧𑀢𑀭𑀁 𑀯𑀽𑀧𑀲𑀫𑁆𑀫𑀢𑀺. 𑀲𑁄 𑀢𑀢𑁄 𑀩𑀼𑀤𑁆𑀥𑀯𑀘𑀦𑀁 𑀯𑀸 𑀉𑀕𑁆𑀕𑀡𑁆𑀳𑀺𑀢𑀼𑀁 𑀲𑀓𑁆𑀔𑀺𑀲𑁆𑀲𑀢𑀺, 𑀲𑀫𑀡𑀥𑀫𑁆𑀫𑀁 𑀯𑀸 𑀓𑀸𑀢𑀼𑀁 𑀲𑀓𑁆𑀔𑀺𑀲𑁆𑀲𑀢𑀺. 𑀇𑀫𑀺𑀦𑀸 𑀓𑀸𑀭𑀡𑁂𑀦 ‘‘𑀅𑀜𑁆𑀜𑁂𑀧𑀺 𑀕𑀺𑀮𑀸𑀦𑀸 𑀉𑀧𑀝𑁆𑀞𑀸𑀢𑀩𑁆𑀩𑀸’’𑀢𑀺 𑀯𑀼𑀢𑁆𑀢𑀁.

𑀦𑁂𑀯 𑀑𑀓𑁆𑀓𑀫𑀢𑀻𑀢𑀺 𑀦𑁂𑀯 𑀧𑀯𑀺𑀲𑀢𑀺. 𑀦𑀺𑀬𑀸𑀫𑀁 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼 𑀲𑀫𑁆𑀫𑀢𑁆𑀢𑀦𑁆𑀢𑀺 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼 𑀫𑀕𑁆𑀕𑀦𑀺𑀬𑀸𑀫𑀲𑀗𑁆𑀔𑀸𑀢𑀁 𑀲𑀫𑁆𑀫𑀢𑁆𑀢𑀁. 𑀇𑀫𑀺𑀦𑀸 𑀧𑀤𑀧𑀭𑀫𑁄 𑀧𑀼𑀕𑁆𑀕𑀮𑁄 𑀓𑀣𑀺𑀢𑁄. 𑀤𑀼𑀢𑀺𑀬𑀯𑀸𑀭𑁂𑀦 𑀉𑀕𑁆𑀖𑀝𑀺𑀢𑀜𑁆𑀜𑀽 𑀕𑀳𑀺𑀢𑁄 𑀲𑀸𑀲𑀦𑁂 𑀦𑀸𑀮𑀓𑀢𑁆𑀣𑁂𑀭𑀲𑀤𑀺𑀲𑁄 𑀩𑀼𑀤𑁆𑀥𑀦𑁆𑀢𑀭𑁂 𑀏𑀓𑀯𑀸𑀭𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀲𑀦𑁆𑀢𑀺𑀓𑁂 𑀑𑀯𑀸𑀤𑀁 𑀮𑀪𑀺𑀢𑁆𑀯𑀸 𑀧𑀝𑀺𑀯𑀺𑀤𑁆𑀥𑀧𑀘𑁆𑀘𑁂𑀓𑀩𑁄𑀥𑀺𑀜𑀸𑀡𑁄 𑀘. 𑀢𑀢𑀺𑀬𑀯𑀸𑀭𑁂𑀦 𑀯𑀺𑀧𑀜𑁆𑀘𑀺𑀢𑀜𑁆𑀜𑀽 𑀧𑀼𑀕𑁆𑀕𑀮𑁄 𑀓𑀣𑀺𑀢𑁄, 𑀦𑁂𑀬𑁆𑀬𑁄 𑀧𑀦 𑀢𑀦𑁆𑀦𑀺𑀲𑁆𑀲𑀺𑀢𑁄𑀯 𑀳𑁄𑀢𑀺.

𑀥𑀫𑁆𑀫𑀤𑁂𑀲𑀦𑀸 𑀅𑀦𑀼𑀜𑁆𑀜𑀸𑀢𑀸𑀢𑀺 𑀫𑀸𑀲𑀲𑁆𑀲 𑀅𑀝𑁆𑀞 𑀯𑀸𑀭𑁂 𑀥𑀫𑁆𑀫𑀓𑀣𑀸 𑀅𑀦𑀼𑀜𑁆𑀜𑀸𑀢𑀸. 𑀅𑀜𑁆𑀜𑁂𑀲𑀫𑁆𑀧𑀺 𑀥𑀫𑁆𑀫𑁄 𑀤𑁂𑀲𑁂𑀢𑀩𑁆𑀩𑁄𑀢𑀺 𑀇𑀢𑀭𑁂𑀲𑀫𑁆𑀧𑀺 𑀥𑀫𑁆𑀫𑁄 𑀓𑀣𑁂𑀢𑀩𑁆𑀩𑁄. 𑀓𑀺𑀁 𑀓𑀸𑀭𑀡𑀸? 𑀧𑀤𑀧𑀭𑀫𑀲𑁆𑀲 𑀳𑀺 𑀇𑀫𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂 𑀥𑀫𑁆𑀫𑀁 𑀧𑀝𑀺𑀯𑀺𑀚𑁆𑀛𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀲𑁆𑀲𑀸𑀧𑀺 𑀅𑀦𑀸𑀕𑀢𑁂 𑀧𑀘𑁆𑀘𑀬𑁄 𑀪𑀯𑀺𑀲𑁆𑀲𑀢𑀺. 𑀬𑁄 𑀧𑀦 𑀢𑀣𑀸𑀕𑀢𑀲𑁆𑀲 𑀭𑀽𑀧𑀤𑀲𑁆𑀲𑀦𑀁 𑀮𑀪𑀦𑁆𑀢𑁄𑀧𑀺 𑀅𑀮𑀪𑀦𑁆𑀢𑁄𑀧𑀺 𑀥𑀫𑁆𑀫𑀯𑀺𑀦𑀬𑀜𑁆𑀘 𑀲𑀯𑀦𑀸𑀬 𑀮𑀪𑀦𑁆𑀢𑁄𑀧𑀺 𑀅𑀮𑀪𑀦𑁆𑀢𑁄𑀧𑀺 𑀥𑀫𑁆𑀫𑀁 𑀅𑀪𑀺𑀲𑀫𑁂𑀢𑀺, 𑀲𑁄 𑀅𑀮𑀪𑀦𑁆𑀢𑁄 𑀢𑀸𑀯 𑀅𑀪𑀺𑀲𑀫𑁂𑀢𑀺. 𑀮𑀪𑀦𑁆𑀢𑁄 𑀧𑀦 𑀔𑀺𑀧𑁆𑀧𑀫𑁂𑀯 𑀅𑀪𑀺𑀲𑀫𑁂𑀲𑁆𑀲𑀢𑀻𑀢𑀺 𑀇𑀫𑀺𑀦𑀸 𑀓𑀸𑀭𑀡𑁂𑀦 𑀢𑁂𑀲𑀁 𑀥𑀫𑁆𑀫𑁄 𑀤𑁂𑀲𑁂𑀢𑀩𑁆𑀩𑁄. 𑀢𑀢𑀺𑀬𑀲𑁆𑀲 𑀧𑀦 𑀧𑀼𑀦𑀧𑁆𑀧𑀼𑀦𑀁 𑀤𑁂𑀲𑁂𑀢𑀩𑁆𑀩𑁄𑀯.

𑁩. 𑀲𑀗𑁆𑀔𑀸𑀭𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁩. 𑀢𑀢𑀺𑀬𑁂 𑀲𑀩𑁆𑀬𑀸𑀩𑀚𑁆𑀛𑀦𑁆𑀢𑀺 𑀲𑀤𑀼𑀓𑁆𑀔𑀁. 𑀓𑀸𑀬𑀲𑀗𑁆𑀔𑀸𑀭𑀦𑁆𑀢𑀺 𑀓𑀸𑀬𑀤𑁆𑀯𑀸𑀭𑁂 𑀘𑁂𑀢𑀦𑀸𑀭𑀸𑀲𑀺𑀁. 𑀅𑀪𑀺𑀲𑀗𑁆𑀔𑀭𑁄𑀢𑀻𑀢𑀺 𑀆𑀬𑀽𑀳𑀢𑀺 𑀭𑀸𑀲𑀺𑀁 𑀓𑀭𑁄𑀢𑀺 𑀧𑀺𑀡𑁆𑀟𑀁 𑀓𑀭𑁄𑀢𑀺. 𑀯𑀘𑀻𑀫𑀦𑁄𑀤𑁆𑀯𑀸𑀭𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀲𑀩𑁆𑀬𑀸𑀩𑀚𑁆𑀛𑀁 𑀮𑁄𑀓𑀦𑁆𑀢𑀺 𑀲𑀤𑀼𑀓𑁆𑀔𑀁 𑀮𑁄𑀓𑀁. 𑀲𑀩𑁆𑀬𑀸𑀩𑀚𑁆𑀛𑀸 𑀨𑀲𑁆𑀲𑀸 𑀨𑀼𑀲𑀦𑁆𑀢𑀻𑀢𑀺 𑀲𑀤𑀼𑀓𑁆𑀔𑀸 𑀯𑀺𑀧𑀸𑀓𑀨𑀲𑁆𑀲𑀸 𑀨𑀼𑀲𑀦𑁆𑀢𑀺. 𑀲𑀩𑁆𑀬𑀸𑀩𑀚𑁆𑀛𑀁 𑀯𑁂𑀤𑀦𑀁 𑀯𑁂𑀤𑀺𑀬𑀢𑀻𑀢𑀺 𑀲𑀤𑀼𑀓𑁆𑀔𑀁 𑀯𑀺𑀧𑀸𑀓𑀯𑁂𑀤𑀦𑀁 𑀯𑁂𑀤𑀺𑀬𑀢𑀺, 𑀲𑀸𑀩𑀸𑀥𑀁 𑀦𑀺𑀭𑀲𑁆𑀲𑀸𑀤𑀦𑁆𑀢𑀺 𑀅𑀢𑁆𑀣𑁄. 𑀲𑁂𑀬𑁆𑀬𑀣𑀸𑀧𑀺 𑀲𑀢𑁆𑀢𑀸 𑀦𑁂𑀭𑀬𑀺𑀓𑀸𑀢𑀺 𑀬𑀣𑀸 𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀲𑀢𑁆𑀢𑀸 𑀏𑀓𑀦𑁆𑀢𑀤𑀼𑀓𑁆𑀔𑀁 𑀯𑁂𑀤𑀦𑀁 𑀯𑁂𑀤𑀺𑀬𑀦𑁆𑀢𑀺, 𑀏𑀯𑀁 𑀯𑁂𑀤𑀺𑀬𑀢𑀻𑀢𑀺 𑀅𑀢𑁆𑀣𑁄. 𑀓𑀺𑀁 𑀧𑀦 𑀢𑀢𑁆𑀣 𑀉𑀧𑁂𑀓𑁆𑀔𑀸𑀯𑁂𑀤𑀦𑀸 𑀦𑀢𑁆𑀣𑀻𑀢𑀺? 𑀅𑀢𑁆𑀣𑀺, 𑀤𑀼𑀓𑁆𑀔𑀯𑁂𑀤𑀦𑀸𑀬 𑀧𑀦 𑀩𑀮𑀯𑀪𑀸𑀯𑁂𑀦 𑀲𑀸 𑀅𑀩𑁆𑀩𑁄𑀳𑀸𑀭𑀺𑀓𑀝𑁆𑀞𑀸𑀦𑁂 𑀞𑀺𑀢𑀸. 𑀇𑀢𑀺 𑀦𑀺𑀭𑀬𑁄𑀯 𑀦𑀺𑀭𑀬𑀲𑁆𑀲 𑀉𑀧𑀫𑀁 𑀓𑀢𑁆𑀯𑀸 𑀆𑀳𑀝𑁄. 𑀢𑀢𑁆𑀭 𑀧𑀝𑀺𑀪𑀸𑀕𑀉𑀧𑀫𑀸 𑀦𑀸𑀫 𑀓𑀺𑀭 𑀏𑀲𑀸.

𑀲𑁂𑀬𑁆𑀬𑀣𑀸𑀧𑀺 𑀤𑁂𑀯𑀸 𑀲𑀼𑀪𑀓𑀺𑀡𑁆𑀳𑀸𑀢𑀺 𑀇𑀥𑀸𑀧𑀺 𑀤𑁂𑀯𑀮𑁄𑀓𑁄𑀯 𑀤𑁂𑀯𑀮𑁄𑀓𑀲𑁆𑀲 𑀉𑀧𑀫𑀁 𑀓𑀢𑁆𑀯𑀸 𑀆𑀳𑀝𑁄. 𑀬𑀲𑁆𑀫𑀸 𑀧𑀦 𑀳𑁂𑀝𑁆𑀞𑀺𑀫𑁂𑀲𑀼 𑀩𑁆𑀭𑀳𑁆𑀫𑀮𑁄𑀓𑁂𑀲𑀼 𑀲𑀧𑁆𑀧𑀻𑀢𑀺𑀓𑀚𑁆𑀛𑀸𑀦𑀯𑀺𑀧𑀸𑀓𑁄 𑀯𑀢𑁆𑀢𑀢𑀺, 𑀲𑀼𑀪𑀓𑀺𑀡𑁆𑀳𑁂𑀲𑀼 𑀦𑀺𑀧𑁆𑀧𑀻𑀢𑀺𑀓𑁄 𑀏𑀓𑀦𑁆𑀢𑀲𑀼𑀔𑁄𑀯, 𑀢𑀲𑁆𑀫𑀸 𑀢𑁂 𑀅𑀕𑁆𑀕𑀳𑁂𑀢𑁆𑀯𑀸 𑀲𑀼𑀪𑀓𑀺𑀡𑁆𑀳𑀸𑀯 𑀓𑀣𑀺𑀢𑀸. 𑀇𑀢𑀺 𑀅𑀬𑀫𑁆𑀧𑀺 𑀢𑀢𑁆𑀭 𑀧𑀝𑀺𑀪𑀸𑀕𑀉𑀧𑀫𑀸 𑀦𑀸𑀫𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀯𑁄𑀓𑀺𑀡𑁆𑀡𑀲𑀼𑀔𑀤𑀼𑀓𑁆𑀔𑀦𑁆𑀢𑀺 𑀯𑁄𑀫𑀺𑀲𑁆𑀲𑀓𑀲𑀼𑀔𑀤𑀼𑀓𑁆𑀔𑀁. 𑀲𑁂𑀬𑁆𑀬𑀣𑀸𑀧𑀺 𑀫𑀦𑀼𑀲𑁆𑀲𑀸𑀢𑀺 𑀫𑀦𑀼𑀲𑁆𑀲𑀸𑀦𑀁 𑀳𑀺 𑀓𑀸𑀮𑁂𑀦 𑀲𑀼𑀔𑀁 𑀳𑁄𑀢𑀺, 𑀓𑀸𑀮𑁂𑀦 𑀤𑀼𑀓𑁆𑀔𑀁. 𑀏𑀓𑀘𑁆𑀘𑁂 𑀘 𑀤𑁂𑀯𑀸𑀢𑀺 𑀓𑀸𑀫𑀸𑀯𑀘𑀭𑀤𑁂𑀯𑀸. 𑀢𑁂𑀲𑀫𑁆𑀧𑀺 𑀓𑀸𑀮𑁂𑀦 𑀲𑀼𑀔𑀁 𑀳𑁄𑀢𑀺, 𑀓𑀸𑀮𑁂𑀦 𑀤𑀼𑀓𑁆𑀔𑀁. 𑀢𑁂𑀲𑀁 𑀳𑀺 𑀳𑀻𑀦𑀢𑀭𑀸𑀦𑀁 𑀫𑀳𑁂𑀲𑀓𑁆𑀔𑀢𑀭𑀸 𑀤𑁂𑀯𑀢𑀸 𑀤𑀺𑀲𑁆𑀯𑀸 𑀆𑀲𑀦𑀸 𑀯𑀼𑀝𑁆𑀞𑀸𑀢𑀩𑁆𑀩𑀁 𑀳𑁄𑀢𑀺, 𑀫𑀕𑁆𑀕𑀸 𑀉𑀓𑁆𑀓𑀫𑀺𑀢𑀩𑁆𑀩𑀁, 𑀧𑀸𑀭𑀼𑀢𑀯𑀢𑁆𑀣𑀁 𑀅𑀧𑀦𑁂𑀢𑀩𑁆𑀩𑀁, 𑀅𑀜𑁆𑀚𑀮𑀺𑀓𑀫𑁆𑀫𑀁 𑀓𑀸𑀢𑀩𑁆𑀩𑀦𑁆𑀢𑀺 𑀢𑀁 𑀲𑀩𑁆𑀩𑀫𑁆𑀧𑀺 𑀤𑀼𑀓𑁆𑀔𑀁 𑀦𑀸𑀫 𑀳𑁄𑀢𑀺. 𑀏𑀓𑀘𑁆𑀘𑁂 𑀘 𑀯𑀺𑀦𑀺𑀧𑀸𑀢𑀺𑀓𑀸𑀢𑀺 𑀯𑁂𑀫𑀸𑀦𑀺𑀓𑀧𑁂𑀢𑀸. 𑀢𑁂 𑀳𑀺 𑀓𑀸𑀮𑁂𑀦 𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀦𑁆𑀢𑀺 𑀓𑀸𑀮𑁂𑀦 𑀓𑀫𑁆𑀫𑀦𑁆𑀢𑀺 𑀯𑁄𑀓𑀺𑀡𑁆𑀡𑀲𑀼𑀔𑀤𑀼𑀓𑁆𑀔𑀸𑀯 𑀳𑁄𑀦𑁆𑀢𑀺. 𑀇𑀢𑀺 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀢𑀻𑀡𑀺 𑀲𑀼𑀘𑀭𑀺𑀢𑀸𑀦𑀺 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀫𑀺𑀲𑁆𑀲𑀓𑀸𑀦𑀺 𑀓𑀣𑀺𑀢𑀸𑀦𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺.

𑁪. 𑀩𑀳𑀼𑀓𑀸𑀭𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁪. 𑀘𑀢𑀼𑀢𑁆𑀣𑁂 𑀢𑀬𑁄𑀫𑁂, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑀸𑀢𑀺 𑀢𑀬𑁄 𑀆𑀘𑀭𑀺𑀬𑀧𑀼𑀕𑁆𑀕𑀮𑀸. 𑀧𑀼𑀕𑁆𑀕𑀮𑀲𑁆𑀲 𑀩𑀳𑀼𑀓𑀸𑀭𑀸𑀢𑀺 𑀅𑀦𑁆𑀢𑁂𑀯𑀸𑀲𑀺𑀓𑀧𑀼𑀕𑁆𑀕𑀮𑀲𑁆𑀲 𑀩𑀳𑀽𑀧𑀓𑀸𑀭𑀸. 𑀩𑀼𑀤𑁆𑀥𑀦𑁆𑀢𑀺 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑀁. 𑀲𑀭𑀡𑀁 𑀕𑀢𑁄 𑀳𑁄𑀢𑀻𑀢𑀺 𑀅𑀯𑀲𑁆𑀲𑀬𑀁 𑀕𑀢𑁄 𑀳𑁄𑀢𑀺. 𑀥𑀫𑁆𑀫𑀦𑁆𑀢𑀺 𑀲𑀢𑀦𑁆𑀢𑀺𑀓𑀁 𑀦𑀯𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀁. 𑀲𑀗𑁆𑀖𑀦𑁆𑀢𑀺 𑀅𑀝𑁆𑀞𑀅𑀭𑀺𑀬𑀧𑀼𑀕𑁆𑀕𑀮𑀲𑀫𑀽𑀳𑀁. 𑀇𑀤𑀜𑁆𑀘 𑀧𑀦 𑀲𑀭𑀡𑀕𑀫𑀦𑀁 𑀅𑀕𑁆𑀕𑀳𑀺𑀢𑀲𑀭𑀡𑀧𑀼𑀩𑁆𑀩𑀲𑁆𑀲 𑀅𑀓𑀢𑀸𑀪𑀺𑀦𑀺𑀯𑁂𑀲𑀲𑁆𑀲 𑀯𑀲𑁂𑀦 𑀯𑀼𑀢𑁆𑀢𑀁. 𑀇𑀢𑀺 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀲𑀭𑀡𑀤𑀸𑀬𑀓𑁄 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀲𑀫𑁆𑀧𑀸𑀧𑀓𑁄 𑀅𑀭𑀳𑀢𑁆𑀢𑀫𑀕𑁆𑀕𑀲𑀫𑁆𑀧𑀸𑀧𑀓𑁄𑀢𑀺 𑀢𑀬𑁄 𑀆𑀘𑀭𑀺𑀬𑀸 𑀩𑀳𑀼𑀓𑀸𑀭𑀸𑀢𑀺 𑀆𑀕𑀢𑀸, 𑀧𑀩𑁆𑀩𑀚𑁆𑀚𑀸𑀤𑀸𑀬𑀓𑁄 𑀩𑀼𑀤𑁆𑀥𑀯𑀘𑀦𑀤𑀸𑀬𑀓𑁄 𑀓𑀫𑁆𑀫𑀯𑀸𑀘𑀸𑀘𑀭𑀺𑀬𑁄 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑀲𑀫𑁆𑀧𑀸𑀧𑀓𑁄 𑀅𑀦𑀸𑀕𑀸𑀫𑀺𑀫𑀕𑁆𑀕𑀲𑀫𑁆𑀧𑀸𑀧𑀓𑁄𑀢𑀺 𑀇𑀫𑁂 𑀆𑀘𑀭𑀺𑀬𑀸 𑀦 𑀆𑀕𑀢𑀸, 𑀓𑀺𑀁 𑀏𑀢𑁂 𑀦 𑀩𑀳𑀼𑀓𑀸𑀭𑀸𑀢𑀺? 𑀦𑁄, 𑀦 𑀩𑀳𑀼𑀓𑀸𑀭𑀸. 𑀅𑀬𑀁 𑀧𑀦 𑀤𑁂𑀲𑀦𑀸 𑀤𑀼𑀯𑀺𑀥𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑀸. 𑀢𑀲𑁆𑀫𑀸 𑀲𑀩𑁆𑀩𑁂𑀧𑁂𑀢𑁂 𑀩𑀳𑀼𑀓𑀸𑀭𑀸. 𑀢𑁂𑀲𑀼 𑀲𑀭𑀡𑀕𑀫𑀦𑀲𑁆𑀫𑀺𑀁𑀬𑁂𑀯 𑀅𑀓𑀢𑀸𑀪𑀺𑀦𑀺𑀯𑁂𑀲𑁄 𑀯𑀝𑁆𑀝𑀢𑀺, 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀓𑀲𑀺𑀡𑀧𑀭𑀺𑀓𑀫𑁆𑀫𑀯𑀺𑀧𑀲𑁆𑀲𑀦𑀸𑀜𑀸𑀡𑀸𑀦𑀺 𑀧𑀦 𑀧𑀞𑀫𑀫𑀕𑁆𑀕𑀲𑀦𑁆𑀦𑀺𑀲𑁆𑀲𑀺𑀢𑀸𑀦𑀺 𑀳𑁄𑀦𑁆𑀢𑀺, 𑀉𑀧𑀭𑀺 𑀤𑁆𑀯𑁂 𑀫𑀕𑁆𑀕𑀸 𑀘 𑀨𑀮𑀸𑀦𑀺 𑀘 𑀅𑀭𑀳𑀢𑁆𑀢𑀫𑀕𑁆𑀕𑀲𑀦𑁆𑀦𑀺𑀲𑁆𑀲𑀺𑀢𑀸𑀦𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺.

𑀇𑀫𑀺𑀦𑀸 𑀧𑀼𑀕𑁆𑀕𑀮𑁂𑀦𑀸𑀢𑀺 𑀇𑀫𑀺𑀦𑀸 𑀅𑀦𑁆𑀢𑁂𑀯𑀸𑀲𑀺𑀓𑀧𑀼𑀕𑁆𑀕𑀮𑁂𑀦. 𑀦 𑀲𑀼𑀧𑁆𑀧𑀢𑀺𑀓𑀸𑀭𑀁 𑀯𑀤𑀸𑀫𑀻𑀢𑀺 𑀧𑀢𑀺𑀓𑀸𑀭𑀁 𑀓𑀸𑀢𑀼𑀁 𑀦 𑀲𑀼𑀓𑀭𑀦𑁆𑀢𑀺 𑀯𑀤𑀸𑀫𑀺. 𑀅𑀪𑀺𑀯𑀸𑀤𑀦𑀸𑀤𑀻𑀲𑀼 𑀅𑀦𑁂𑀓𑀲𑀢𑀯𑀸𑀭𑀁 𑀅𑀦𑁂𑀓𑀲𑀳𑀲𑁆𑀲𑀯𑀸𑀭𑀫𑁆𑀧𑀺 𑀳𑀺 𑀧𑀜𑁆𑀘𑀧𑀢𑀺𑀝𑁆𑀞𑀺𑀢𑁂𑀦 𑀦𑀺𑀧𑀢𑀺𑀢𑁆𑀯𑀸 𑀯𑀦𑁆𑀤𑀦𑁆𑀢𑁄 𑀆𑀲𑀦𑀸 𑀯𑀼𑀝𑁆𑀞𑀸𑀬 𑀧𑀘𑁆𑀘𑀼𑀕𑁆𑀕𑀘𑁆𑀙𑀦𑁆𑀢𑁄 𑀤𑀺𑀝𑁆𑀞𑀤𑀺𑀝𑁆𑀞𑀓𑁆𑀔𑀡𑁂 𑀅𑀜𑁆𑀚𑀮𑀺𑀁 𑀧𑀕𑁆𑀕𑀡𑁆𑀳𑀦𑁆𑀢𑁄 𑀅𑀦𑀼𑀘𑁆𑀙𑀯𑀺𑀓𑀁 𑀲𑀸𑀫𑀻𑀘𑀺𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 𑀤𑀺𑀯𑀲𑁂 𑀤𑀺𑀯𑀲𑁂 𑀘𑀻𑀯𑀭𑀲𑀢𑀁 𑀘𑀻𑀯𑀭𑀲𑀳𑀲𑁆𑀲𑀁 𑀧𑀺𑀡𑁆𑀟𑀧𑀸𑀢𑀲𑀢𑀁 𑀧𑀺𑀡𑁆𑀟𑀧𑀸𑀢𑀲𑀳𑀲𑁆𑀲𑀁 𑀤𑀤𑀫𑀸𑀦𑁄 𑀘𑀓𑁆𑀓𑀯𑀸𑀴𑀧𑀭𑀺𑀬𑀦𑁆𑀢𑁂𑀦 𑀲𑀩𑁆𑀩𑀭𑀢𑀦𑀫𑀬𑀁 𑀆𑀯𑀸𑀲𑀁 𑀓𑀭𑁄𑀦𑁆𑀢𑁄 𑀲𑀧𑁆𑀧𑀺𑀦𑀯𑀦𑀻𑀢𑀸𑀤𑀺𑀦𑀸𑀦𑀧𑁆𑀧𑀓𑀸𑀭𑀁 𑀪𑁂𑀲𑀚𑁆𑀚𑀁 𑀅𑀦𑀼𑀧𑁆𑀧𑀤𑀚𑁆𑀚𑀫𑀸𑀦𑁄 𑀦𑁂𑀯 𑀲𑀓𑁆𑀓𑁄𑀢𑀺 𑀆𑀘𑀭𑀺𑀬𑁂𑀦 𑀓𑀢𑀲𑁆𑀲 𑀧𑀢𑀺𑀓𑀸𑀭𑀁 𑀦𑀸𑀫 𑀓𑀸𑀢𑀼𑀦𑁆𑀢𑀺 𑀏𑀯𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑁫. 𑀯𑀚𑀺𑀭𑀽𑀧𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁫. 𑀧𑀜𑁆𑀘𑀫𑁂 𑀅𑀭𑀼𑀓𑀽𑀧𑀫𑀘𑀺𑀢𑁆𑀢𑁄𑀢𑀺 𑀧𑀼𑀭𑀸𑀡𑀯𑀡𑀲𑀤𑀺𑀲𑀘𑀺𑀢𑁆𑀢𑁄. 𑀯𑀺𑀚𑁆𑀚𑀽𑀧𑀫𑀘𑀺𑀢𑁆𑀢𑁄𑀢𑀺 𑀇𑀢𑁆𑀢𑀭𑀓𑀸𑀮𑁄𑀪𑀸𑀲𑀦𑁂𑀦 𑀯𑀺𑀚𑁆𑀚𑀼𑀲𑀤𑀺𑀲𑀘𑀺𑀢𑁆𑀢𑁄. 𑀯𑀚𑀺𑀭𑀽𑀧𑀫𑀘𑀺𑀢𑁆𑀢𑁄𑀢𑀺 𑀓𑀺𑀮𑁂𑀲𑀸𑀦𑀁 𑀫𑀽𑀮𑀖𑀸𑀢𑀓𑀭𑀡𑀲𑀫𑀢𑁆𑀣𑀢𑀸𑀬 𑀯𑀚𑀺𑀭𑁂𑀦 𑀲𑀤𑀺𑀲𑀘𑀺𑀢𑁆𑀢𑁄. 𑀅𑀪𑀺𑀲𑀚𑁆𑀚𑀢𑀻𑀢𑀺 𑀮𑀕𑁆𑀕𑀢𑀺. 𑀓𑀼𑀧𑁆𑀧𑀢𑀻𑀢𑀺 𑀓𑁄𑀧𑀯𑀲𑁂𑀦 𑀓𑀼𑀧𑁆𑀧𑀢𑀺. 𑀩𑁆𑀬𑀸𑀧𑀚𑁆𑀚𑀢𑀻𑀢𑀺 𑀧𑀓𑀢𑀺𑀪𑀸𑀯𑀁 𑀧𑀚𑀳𑀢𑀺, 𑀧𑀽𑀢𑀺𑀓𑁄 𑀳𑁄𑀢𑀺. 𑀧𑀢𑀺𑀢𑁆𑀣𑀻𑀬𑀢𑀻𑀢𑀺 𑀣𑀺𑀦𑀪𑀸𑀯𑀁 𑀣𑀤𑁆𑀥𑀪𑀸𑀯𑀁 𑀆𑀧𑀚𑁆𑀚𑀢𑀺. 𑀓𑁄𑀧𑀦𑁆𑀢𑀺 𑀤𑀼𑀩𑁆𑀩𑀮𑀓𑁄𑀥𑀁. 𑀤𑁄𑀲𑀦𑁆𑀢𑀺 𑀤𑀼𑀲𑁆𑀲𑀦𑀯𑀲𑁂𑀦 𑀢𑀢𑁄 𑀩𑀮𑀯𑀢𑀭𑀁. 𑀅𑀧𑁆𑀧𑀘𑁆𑀘𑀬𑀦𑁆𑀢𑀺 𑀅𑀢𑀼𑀝𑁆𑀞𑀸𑀓𑀸𑀭𑀁 𑀤𑁄𑀫𑀦𑀲𑁆𑀲𑀁. 𑀤𑀼𑀝𑁆𑀞𑀸𑀭𑀼𑀓𑁄𑀢𑀺 𑀧𑀼𑀭𑀸𑀡𑀯𑀡𑁄. 𑀓𑀝𑁆𑀞𑁂𑀦𑀸𑀢𑀺 𑀤𑀡𑁆𑀟𑀓𑀓𑁄𑀝𑀺𑀬𑀸. 𑀓𑀞𑀮𑁂𑀦𑀸𑀢𑀺 𑀓𑀧𑀸𑀮𑁂𑀦. 𑀆𑀲𑀯𑀁 𑀤𑁂𑀢𑀻𑀢𑀺 𑀅𑀧𑀭𑀸𑀧𑀭𑀁 𑀲𑀯𑀢𑀺. 𑀧𑀼𑀭𑀸𑀡𑀯𑀡𑁄 𑀳𑀺 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬𑁂𑀯 𑀧𑀼𑀩𑁆𑀩𑀁 𑀮𑁄𑀳𑀺𑀢𑀁 𑀬𑀽𑀲𑀦𑁆𑀢𑀺 𑀇𑀫𑀸𑀦𑀺 𑀢𑀻𑀡𑀺 𑀲𑀯𑀢𑀺, 𑀖𑀝𑁆𑀝𑀺𑀢𑁄 𑀧𑀦 𑀢𑀸𑀦𑀺 𑀅𑀥𑀺𑀓𑀢𑀭𑀁 𑀲𑀯𑀢𑀺.

𑀏𑀯𑀫𑁂𑀯 𑀔𑁄𑀢𑀺 𑀏𑀢𑁆𑀣 𑀇𑀤𑀁 𑀑𑀧𑀫𑁆𑀫𑀲𑀁𑀲𑀦𑁆𑀤𑀦𑀁 𑁋 𑀤𑀼𑀝𑁆𑀞𑀸𑀭𑀼𑀓𑁄 𑀯𑀺𑀬 𑀳𑀺 𑀓𑁄𑀥𑀦𑀧𑀼𑀕𑁆𑀕𑀮𑁄, 𑀢𑀲𑁆𑀲 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀲𑀯𑀦𑀁 𑀯𑀺𑀬 𑀓𑁄𑀥𑀦𑀲𑁆𑀲𑀧𑀺 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀉𑀤𑁆𑀥𑀼𑀫𑀸𑀢𑀲𑁆𑀲 𑀯𑀺𑀬 𑀘𑀡𑁆𑀟𑀺𑀓𑀢𑀲𑁆𑀲 𑀘𑀭𑀡𑀁, 𑀓𑀝𑁆𑀞𑁂𑀦 𑀯𑀸 𑀓𑀞𑀮𑀸𑀬 𑀯𑀸 𑀖𑀝𑁆𑀝𑀦𑀁 𑀯𑀺𑀬 𑀅𑀧𑁆𑀧𑀫𑀢𑁆𑀢𑀁 𑀯𑀘𑀦𑀁, 𑀪𑀺𑀬𑁆𑀬𑁄𑀲𑁄𑀫𑀢𑁆𑀢𑀸𑀬 𑀲𑀯𑀦𑀁 𑀯𑀺𑀬 ‘‘𑀫𑀸𑀤𑀺𑀲𑀁 𑀦𑀸𑀫 𑀏𑀲 𑀏𑀯𑀁 𑀯𑀤𑀢𑀻’’𑀢𑀺 𑀪𑀺𑀬𑁆𑀬𑁄𑀲𑁄𑀫𑀢𑁆𑀢𑀸𑀬 𑀉𑀤𑁆𑀥𑀼𑀫𑀸𑀬𑀦𑀪𑀸𑀯𑁄 𑀤𑀝𑁆𑀞𑀩𑁆𑀩𑁄.

𑀭𑀢𑁆𑀢𑀦𑁆𑀥𑀓𑀸𑀭𑀢𑀺𑀫𑀺𑀲𑀸𑀬𑀦𑁆𑀢𑀺 𑀭𑀢𑁆𑀢𑀺𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀼𑀧𑁆𑀧𑀢𑁆𑀢𑀺𑀦𑀺𑀯𑀸𑀭𑀡𑁂𑀦 𑀅𑀦𑁆𑀥𑀪𑀸𑀯𑀓𑀭𑀡𑁂 𑀩𑀳𑀮𑀢𑀫𑁂. 𑀯𑀺𑀚𑁆𑀚𑀦𑁆𑀢𑀭𑀺𑀓𑀸𑀬𑀸𑀢𑀺 𑀯𑀺𑀚𑁆𑀚𑀼𑀧𑁆𑀧𑀢𑁆𑀢𑀺𑀓𑁆𑀔𑀡𑁂. 𑀇𑀥𑀸𑀧𑀺 𑀇𑀤𑀁 𑀑𑀧𑀫𑁆𑀫𑀲𑀁𑀲𑀦𑁆𑀤𑀦𑀁 𑁋 𑀘𑀓𑁆𑀔𑀼𑀫𑀸 𑀧𑀼𑀭𑀺𑀲𑁄 𑀯𑀺𑀬 𑀳𑀺 𑀬𑁄𑀕𑀸𑀯𑀘𑀭𑁄 𑀤𑀝𑁆𑀞𑀩𑁆𑀩𑁄, 𑀅𑀦𑁆𑀥𑀓𑀸𑀭𑀁 𑀯𑀺𑀬 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀯𑀚𑁆𑀛𑀸 𑀓𑀺𑀮𑁂𑀲𑀸, 𑀯𑀺𑀚𑁆𑀚𑀼𑀲𑀜𑁆𑀘𑀭𑀡𑀁 𑀯𑀺𑀬 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀜𑀸𑀡𑀲𑁆𑀲 𑀉𑀧𑁆𑀧𑀢𑁆𑀢𑀺𑀓𑀸𑀮𑁄, 𑀯𑀺𑀚𑁆𑀚𑀦𑁆𑀢𑀭𑀺𑀓𑀸𑀬 𑀘𑀓𑁆𑀔𑀼𑀫𑀢𑁄 𑀧𑀼𑀭𑀺𑀲𑀲𑁆𑀲 𑀲𑀫𑀦𑁆𑀢𑀸 𑀭𑀽𑀧𑀤𑀲𑁆𑀲𑀦𑀁 𑀯𑀺𑀬 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀓𑁆𑀔𑀡𑁂 𑀦𑀺𑀩𑁆𑀩𑀸𑀦𑀤𑀲𑁆𑀲𑀦𑀁, 𑀧𑀼𑀦 𑀅𑀦𑁆𑀥𑀓𑀸𑀭𑀸𑀯𑀢𑁆𑀣𑀭𑀡𑀁 𑀯𑀺𑀬 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑀯𑀚𑁆𑀛𑀸 𑀓𑀺𑀮𑁂𑀲𑀸, 𑀧𑀼𑀦 𑀯𑀺𑀚𑁆𑀚𑀼𑀲𑀜𑁆𑀘𑀭𑀡𑀁 𑀯𑀺𑀬 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑀜𑀸𑀡𑀲𑁆𑀲 𑀉𑀧𑁆𑀧𑀸𑀤𑁄, 𑀯𑀺𑀚𑁆𑀚𑀦𑁆𑀢𑀭𑀺𑀓𑀸𑀬 𑀘𑀓𑁆𑀔𑀼𑀫𑀢𑁄 𑀧𑀼𑀭𑀺𑀲𑀲𑁆𑀲 𑀲𑀫𑀦𑁆𑀢𑀸 𑀭𑀽𑀧𑀤𑀲𑁆𑀲𑀦𑀁 𑀯𑀺𑀬 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑀓𑁆𑀔𑀡𑁂 𑀦𑀺𑀩𑁆𑀩𑀸𑀦𑀤𑀲𑁆𑀲𑀦𑀁, 𑀧𑀼𑀦 𑀅𑀦𑁆𑀥𑀓𑀸𑀭𑀸𑀯𑀢𑁆𑀣𑀭𑀡𑀁 𑀯𑀺𑀬 𑀅𑀦𑀸𑀕𑀸𑀫𑀺𑀫𑀕𑁆𑀕𑀯𑀚𑁆𑀛𑀸 𑀓𑀺𑀮𑁂𑀲𑀸, 𑀧𑀼𑀦 𑀯𑀺𑀚𑁆𑀚𑀼𑀲𑀜𑁆𑀘𑀭𑀡𑀁 𑀯𑀺𑀬 𑀅𑀦𑀸𑀕𑀸𑀫𑀺𑀫𑀕𑁆𑀕𑀜𑀸𑀡𑀲𑁆𑀲 𑀉𑀧𑁆𑀧𑀸𑀤𑁄, 𑀯𑀺𑀚𑁆𑀚𑀦𑁆𑀢𑀭𑀺𑀓𑀸𑀬 𑀘𑀓𑁆𑀔𑀼𑀫𑀢𑁄 𑀧𑀼𑀭𑀺𑀲𑀲𑁆𑀲 𑀲𑀫𑀦𑁆𑀢𑀸 𑀭𑀽𑀧𑀤𑀲𑁆𑀲𑀦𑀁 𑀯𑀺𑀬 𑀅𑀦𑀸𑀕𑀸𑀫𑀺𑀫𑀕𑁆𑀕𑀓𑁆𑀔𑀡𑁂 𑀦𑀺𑀩𑁆𑀩𑀸𑀦𑀤𑀲𑁆𑀲𑀦𑀁 𑀯𑁂𑀤𑀺𑀢𑀩𑁆𑀩𑀁.

𑀯𑀚𑀺𑀭𑀽𑀧𑀫𑀘𑀺𑀢𑁆𑀢𑀢𑀸𑀬𑀧𑀺 𑀇𑀤𑀁 𑀑𑀧𑀫𑁆𑀫𑀲𑀁𑀲𑀦𑁆𑀤𑀦𑀁 𑁋 𑀯𑀚𑀺𑀭𑀁 𑀯𑀺𑀬 𑀳𑀺 𑀅𑀭𑀳𑀢𑁆𑀢𑀫𑀕𑁆𑀕𑀜𑀸𑀡𑀁 𑀤𑀝𑁆𑀞𑀩𑁆𑀩𑀁, 𑀫𑀡𑀺𑀕𑀡𑁆𑀞𑀺𑀧𑀸𑀲𑀸𑀡𑀕𑀡𑁆𑀞𑀺 𑀯𑀺𑀬 𑀅𑀭𑀳𑀢𑁆𑀢𑀫𑀕𑁆𑀕𑀯𑀚𑁆𑀛𑀸 𑀓𑀺𑀮𑁂𑀲𑀸, 𑀯𑀚𑀺𑀭𑀲𑁆𑀲 𑀫𑀡𑀺𑀕𑀡𑁆𑀞𑀺𑀫𑁆𑀧𑀺 𑀯𑀸 𑀧𑀸𑀲𑀸𑀡𑀕𑀡𑁆𑀞𑀺𑀫𑁆𑀧𑀺 𑀯𑀸 𑀯𑀺𑀦𑀺𑀯𑀺𑀚𑁆𑀛𑀺𑀢𑁆𑀯𑀸 𑀅𑀕𑀫𑀦𑀪𑀸𑀯𑀲𑁆𑀲 𑀦𑀢𑁆𑀣𑀺𑀢𑀸 𑀯𑀺𑀬 𑀅𑀭𑀳𑀢𑁆𑀢𑀫𑀕𑁆𑀕𑀜𑀸𑀡𑁂𑀦 𑀅𑀘𑁆𑀙𑁂𑀚𑁆𑀚𑀸𑀦𑀁 𑀓𑀺𑀮𑁂𑀲𑀸𑀦𑀁 𑀦𑀢𑁆𑀣𑀺𑀪𑀸𑀯𑁄, 𑀯𑀚𑀺𑀭𑁂𑀦 𑀦𑀺𑀩𑁆𑀩𑀺𑀤𑁆𑀥𑀯𑁂𑀥𑀲𑁆𑀲 𑀧𑀼𑀦 𑀅𑀧𑀢𑀺𑀧𑀽𑀭𑀡𑀁 𑀯𑀺𑀬 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀙𑀺𑀦𑁆𑀦𑀸𑀦𑀁 𑀓𑀺𑀮𑁂𑀲𑀸𑀦𑀁 𑀧𑀼𑀦 𑀅𑀦𑀼𑀧𑁆𑀧𑀸𑀤𑁄 𑀤𑀝𑁆𑀞𑀩𑁆𑀩𑁄𑀢𑀺.

𑁬. 𑀲𑁂𑀯𑀺𑀢𑀩𑁆𑀩𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁬. 𑀙𑀝𑁆𑀞𑁂 𑀲𑁂𑀯𑀺𑀢𑀩𑁆𑀩𑁄𑀢𑀺 𑀉𑀧𑀲𑀗𑁆𑀓𑀫𑀺𑀢𑀩𑁆𑀩𑁄. 𑀪𑀚𑀺𑀢𑀩𑁆𑀩𑁄𑀢𑀺 𑀅𑀮𑁆𑀮𑀻𑀬𑀺𑀢𑀩𑁆𑀩𑁄. 𑀧𑀬𑀺𑀭𑀼𑀧𑀸𑀲𑀺𑀢𑀩𑁆𑀩𑁄𑀢𑀺 𑀲𑀦𑁆𑀢𑀺𑀓𑁂 𑀦𑀺𑀲𑀻𑀤𑀦𑀯𑀲𑁂𑀦 𑀧𑀼𑀦𑀧𑁆𑀧𑀼𑀦𑀁 𑀉𑀧𑀸𑀲𑀺𑀢𑀩𑁆𑀩𑁄. 𑀲𑀓𑁆𑀓𑀢𑁆𑀯𑀸 𑀕𑀭𑀼𑀁 𑀓𑀢𑁆𑀯𑀸𑀢𑀺 𑀲𑀓𑁆𑀓𑀸𑀭𑀜𑁆𑀘𑁂𑀯 𑀕𑀭𑀼𑀓𑀸𑀭𑀜𑁆𑀘 𑀓𑀢𑁆𑀯𑀸. 𑀳𑀻𑀦𑁄 𑀳𑁄𑀢𑀺 𑀲𑀻𑀮𑁂𑀦𑀸𑀢𑀺𑀆𑀤𑀻𑀲𑀼 𑀉𑀧𑀸𑀤𑀸𑀬𑀼𑀧𑀸𑀤𑀸𑀬 𑀳𑀻𑀦𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀢𑀢𑁆𑀣 𑀬𑁄 𑀳𑀺 𑀧𑀜𑁆𑀘 𑀲𑀻𑀮𑀸𑀦𑀺 𑀭𑀓𑁆𑀔𑀢𑀺, 𑀲𑁄 𑀤𑀲 𑀲𑀻𑀮𑀸𑀦𑀺 𑀭𑀓𑁆𑀔𑀦𑁆𑀢𑁂𑀦 𑀦 𑀲𑁂𑀯𑀺𑀢𑀩𑁆𑀩𑁄. 𑀬𑁄 𑀤𑀲 𑀲𑀻𑀮𑀸𑀦𑀺 𑀭𑀓𑁆𑀔𑀢𑀺, 𑀲𑁄 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀁 𑀭𑀓𑁆𑀔𑀦𑁆𑀢𑁂𑀦 𑀦 𑀲𑁂𑀯𑀺𑀢𑀩𑁆𑀩𑁄. 𑀅𑀜𑁆𑀜𑀢𑁆𑀭 𑀅𑀦𑀼𑀤𑁆𑀤𑀬𑀸 𑀅𑀜𑁆𑀜𑀢𑁆𑀭 𑀅𑀦𑀼𑀓𑀫𑁆𑀧𑀸𑀢𑀺 𑀞𑀧𑁂𑀢𑁆𑀯𑀸 𑀅𑀦𑀼𑀤𑁆𑀤𑀬𑀜𑁆𑀘 𑀅𑀦𑀼𑀓𑀫𑁆𑀧𑀜𑁆𑀘. 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬𑁂𑀯 𑀳𑀺 𑀏𑀯𑀭𑀽𑀧𑁄 𑀧𑀼𑀕𑁆𑀕𑀮𑁄 𑀦 𑀲𑁂𑀯𑀺𑀢𑀩𑁆𑀩𑁄, 𑀅𑀦𑀼𑀤𑁆𑀤𑀬𑀸𑀦𑀼𑀓𑀫𑁆𑀧𑀸𑀯𑀲𑁂𑀦 𑀧𑀦 𑀢𑀁 𑀉𑀧𑀲𑀗𑁆𑀓𑀫𑀺𑀢𑀼𑀁 𑀯𑀝𑁆𑀝𑀢𑀺.

𑀲𑀻𑀮𑀲𑀸𑀫𑀜𑁆𑀜𑀕𑀢𑀸𑀦𑀁 𑀲𑀢𑀦𑁆𑀢𑀺 𑀲𑀻𑀮𑁂𑀦 𑀲𑀫𑀸𑀦𑀪𑀸𑀯𑀁 𑀕𑀢𑀸𑀦𑀁 𑀲𑀦𑁆𑀢𑀸𑀦𑀁. 𑀲𑀻𑀮𑀓𑀣𑀸 𑀘 𑀦𑁄 𑀪𑀯𑀺𑀲𑁆𑀲𑀢𑀻𑀢𑀺 𑀏𑀯𑀁 𑀲𑀫𑀸𑀦𑀲𑀻𑀮𑀸𑀦𑀁 𑀅𑀫𑁆𑀳𑀸𑀓𑀁 𑀲𑀻𑀮𑀫𑁂𑀯 𑀆𑀭𑀩𑁆𑀪 𑀓𑀣𑀸 𑀪𑀯𑀺𑀲𑁆𑀲𑀢𑀺. 𑀲𑀸 𑀘 𑀦𑁄 𑀧𑀯𑀢𑁆𑀢𑀺𑀦𑀻 𑀪𑀯𑀺𑀲𑁆𑀲𑀢𑀻𑀢𑀺 𑀲𑀸 𑀘 𑀅𑀫𑁆𑀳𑀸𑀓𑀁 𑀓𑀣𑀸 𑀤𑀺𑀯𑀲𑀫𑁆𑀧𑀺 𑀓𑀣𑁂𑀦𑁆𑀢𑀸𑀦𑀁 𑀧𑀯𑀢𑁆𑀢𑀺𑀲𑁆𑀲𑀢𑀺 𑀦 𑀧𑀝𑀺𑀳𑀜𑁆𑀜𑀺𑀲𑁆𑀲𑀢𑀺. 𑀲𑀸 𑀘 𑀦𑁄 𑀨𑀸𑀲𑀼 𑀪𑀯𑀺𑀲𑁆𑀲𑀢𑀻𑀢𑀺 𑀲𑀸 𑀘 𑀤𑀺𑀯𑀲𑀫𑁆𑀧𑀺 𑀧𑀯𑀢𑁆𑀢𑀫𑀸𑀦𑀸 𑀲𑀻𑀮𑀓𑀣𑀸 𑀅𑀫𑁆𑀳𑀸𑀓𑀁 𑀨𑀸𑀲𑀼𑀯𑀺𑀳𑀸𑀭𑁄 𑀲𑀼𑀔𑀯𑀺𑀳𑀸𑀭𑁄 𑀪𑀯𑀺𑀲𑁆𑀲𑀢𑀺. 𑀲𑀫𑀸𑀥𑀺𑀧𑀜𑁆𑀜𑀸𑀓𑀣𑀸𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀲𑀻𑀮𑀓𑁆𑀔𑀦𑁆𑀥𑀦𑁆𑀢𑀺 𑀲𑀻𑀮𑀭𑀸𑀲𑀺𑀁. 𑀢𑀢𑁆𑀣 𑀢𑀢𑁆𑀣 𑀧𑀜𑁆𑀜𑀸𑀬 𑀅𑀦𑀼𑀕𑁆𑀕𑀳𑁂𑀲𑁆𑀲𑀸𑀫𑀻𑀢𑀺 𑀏𑀢𑁆𑀣 𑀲𑀻𑀮𑀲𑁆𑀲 𑀅𑀲𑀧𑁆𑀧𑀸𑀬𑁂 𑀅𑀦𑀼𑀧𑀓𑀸𑀭𑀥𑀫𑁆𑀫𑁂 𑀯𑀚𑁆𑀚𑁂𑀢𑁆𑀯𑀸 𑀲𑀧𑁆𑀧𑀸𑀬𑁂 𑀉𑀧𑀓𑀸𑀭𑀥𑀫𑁆𑀫𑁂 𑀲𑁂𑀯𑀦𑁆𑀢𑁄 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀞𑀸𑀦𑁂 𑀲𑀻𑀮𑀓𑁆𑀔𑀦𑁆𑀥𑀁 𑀧𑀜𑁆𑀜𑀸𑀬 𑀅𑀦𑀼𑀕𑁆𑀕𑀡𑁆𑀳𑀸𑀢𑀺 𑀦𑀸𑀫. 𑀲𑀫𑀸𑀥𑀺𑀧𑀜𑁆𑀜𑀸𑀓𑁆𑀔𑀦𑁆𑀥𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀦𑀺𑀳𑀻𑀬𑀢𑀻𑀢𑀺 𑀅𑀢𑁆𑀢𑀦𑁄 𑀳𑀻𑀦𑀢𑀭𑀁 𑀧𑀼𑀕𑁆𑀕𑀮𑀁 𑀲𑁂𑀯𑀦𑁆𑀢𑁄 𑀔𑀸𑀭𑀧𑀭𑀺𑀲𑁆𑀲𑀸𑀯𑀦𑁂 𑀆𑀲𑀺𑀢𑁆𑀢𑀉𑀤𑀓𑀁 𑀯𑀺𑀬 𑀲𑀢𑀢𑀁 𑀲𑀫𑀺𑀢𑀁 𑀳𑀸𑀬𑀢𑀺 𑀧𑀭𑀺𑀳𑀸𑀬𑀢𑀺. 𑀢𑀼𑀮𑁆𑀬𑀲𑁂𑀯𑀻𑀢𑀺 𑀅𑀢𑁆𑀢𑀦𑀸 𑀲𑀫𑀸𑀦𑀲𑁂𑀯𑀻. 𑀲𑁂𑀝𑁆𑀞𑀫𑀼𑀧𑀦𑀫𑀦𑁆𑀢𑀺 𑀲𑁂𑀝𑁆𑀞𑀁 𑀧𑀼𑀕𑁆𑀕𑀮𑀁 𑀑𑀡𑀫𑀦𑁆𑀢𑁄. 𑀉𑀤𑁂𑀢𑀺 𑀔𑀺𑀧𑁆𑀧𑀦𑁆𑀢𑀺 𑀔𑀺𑀧𑁆𑀧𑀫𑁂𑀯 𑀯𑀟𑁆𑀠𑀢𑀺. 𑀢𑀲𑁆𑀫𑀸 𑀅𑀢𑁆𑀢𑀦𑁄 𑀉𑀢𑁆𑀢𑀭𑀺𑀁 𑀪𑀚𑁂𑀣𑀸𑀢𑀺 𑀬𑀲𑁆𑀫𑀸 𑀲𑁂𑀝𑁆𑀞𑀁 𑀧𑀼𑀕𑁆𑀕𑀮𑀁 𑀉𑀧𑀦𑀫𑀦𑁆𑀢𑁄 𑀉𑀤𑁂𑀢𑀺 𑀔𑀺𑀧𑁆𑀧𑀁, 𑀢𑀲𑁆𑀫𑀸 𑀅𑀢𑁆𑀢𑀦𑁄 𑀉𑀢𑁆𑀢𑀭𑀺𑀢𑀭𑀁 𑀯𑀺𑀲𑀺𑀝𑁆𑀞𑀢𑀭𑀁 𑀪𑀚𑁂𑀣.

𑁭. 𑀚𑀺𑀕𑀼𑀘𑁆𑀙𑀺𑀢𑀩𑁆𑀩𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁭. 𑀲𑀢𑁆𑀢𑀫𑁂 𑀚𑀺𑀕𑀼𑀘𑁆𑀙𑀺𑀢𑀩𑁆𑀩𑁄𑀢𑀺 𑀕𑀽𑀣𑀁 𑀯𑀺𑀬 𑀚𑀺𑀕𑀼𑀘𑁆𑀙𑀺𑀢𑀩𑁆𑀩𑁄. 𑀅𑀣 𑀔𑁄 𑀦𑀦𑁆𑀢𑀺 𑀅𑀣 𑀔𑁄 𑀅𑀲𑁆𑀲. 𑀓𑀺𑀢𑁆𑀢𑀺𑀲𑀤𑁆𑀤𑁄𑀢𑀺 𑀓𑀣𑀸𑀲𑀤𑁆𑀤𑁄. 𑀏𑀯𑀫𑁂𑀯 𑀔𑁄𑀢𑀺 𑀏𑀢𑁆𑀣 𑀕𑀽𑀣𑀓𑀽𑀧𑁄 𑀯𑀺𑀬 𑀤𑀼𑀲𑁆𑀲𑀻𑀮𑁆𑀬𑀁 𑀤𑀝𑁆𑀞𑀩𑁆𑀩𑀁. 𑀕𑀽𑀣𑀓𑀽𑀧𑁂 𑀧𑀢𑀺𑀢𑁆𑀯𑀸 𑀞𑀺𑀢𑁄 𑀥𑀫𑁆𑀫𑀦𑀺𑀅𑀳𑀺 𑀯𑀺𑀬 𑀤𑀼𑀲𑁆𑀲𑀻𑀮𑀧𑀼𑀕𑁆𑀕𑀮𑁄. 𑀕𑀽𑀣𑀓𑀽𑀧𑀢𑁄 𑀉𑀤𑁆𑀥𑀭𑀺𑀬𑀫𑀸𑀦𑁂𑀦 𑀢𑁂𑀦 𑀅𑀳𑀺𑀦𑀸 𑀧𑀼𑀭𑀺𑀲𑀲𑁆𑀲 𑀲𑀭𑀻𑀭𑀁 𑀆𑀭𑀼𑀴𑁆𑀳𑁂𑀦𑀸𑀧𑀺 𑀅𑀤𑀝𑁆𑀞𑀪𑀸𑀯𑁄 𑀯𑀺𑀬 𑀤𑀼𑀲𑁆𑀲𑀻𑀮𑀁 𑀲𑁂𑀯𑀫𑀸𑀦𑀲𑁆𑀲𑀸𑀧𑀺 𑀢𑀲𑁆𑀲 𑀓𑀺𑀭𑀺𑀬𑀸𑀬 𑀅𑀓𑀭𑀡𑀪𑀸𑀯𑁄. 𑀲𑀭𑀻𑀭𑀁 𑀕𑀽𑀣𑁂𑀦 𑀫𑀓𑁆𑀔𑁂𑀢𑁆𑀯𑀸 𑀅𑀳𑀺𑀦𑀸 𑀕𑀢𑀓𑀸𑀮𑁄 𑀯𑀺𑀬 𑀤𑀼𑀲𑁆𑀲𑀻𑀮𑀁 𑀲𑁂𑀯𑀫𑀸𑀦𑀲𑁆𑀲 𑀧𑀸𑀧𑀓𑀺𑀢𑁆𑀢𑀺𑀲𑀤𑁆𑀤𑀅𑀩𑁆𑀪𑀼𑀕𑁆𑀕𑀫𑀦𑀓𑀸𑀮𑁄 𑀯𑁂𑀤𑀺𑀢𑀩𑁆𑀩𑁄.

𑀢𑀺𑀦𑁆𑀤𑀼𑀓𑀸𑀮𑀸𑀢𑀦𑁆𑀢𑀺 𑀢𑀺𑀦𑁆𑀤𑀼𑀓𑀭𑀼𑀓𑁆𑀔𑀅𑀮𑀸𑀢𑀁. 𑀪𑀺𑀬𑁆𑀬𑁄𑀲𑁄𑀫𑀢𑁆𑀢𑀸𑀬 𑀘𑀺𑀘𑁆𑀘𑀺𑀝𑀸𑀬𑀢𑀻𑀢𑀺 𑀢𑀁 𑀳𑀺 𑀛𑀸𑀬𑀫𑀸𑀦𑀁 𑀧𑀓𑀢𑀺𑀬𑀸𑀧𑀺 𑀧𑀧𑀝𑀺𑀓𑀸𑀬𑁄 𑀫𑀼𑀜𑁆𑀘𑀦𑁆𑀢𑀁 𑀘𑀺𑀘𑁆𑀘𑀺𑀝𑀸𑀢𑀺 ‘‘𑀘𑀺𑀝𑀺𑀘𑀺𑀝𑀸’’𑀢𑀺 𑀲𑀤𑁆𑀤𑀁 𑀓𑀭𑁄𑀢𑀺, 𑀖𑀝𑁆𑀝𑀺𑀢𑀁 𑀧𑀦 𑀅𑀥𑀺𑀫𑀢𑁆𑀢𑀁 𑀓𑀭𑁄𑀢𑀻𑀢𑀺 𑀅𑀢𑁆𑀣𑁄. 𑀏𑀯𑀫𑁂𑀯 𑀔𑁄𑀢𑀺 𑀏𑀯𑀫𑁂𑀯𑀁 𑀓𑁄𑀥𑀦𑁄 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬𑀧𑀺 𑀉𑀤𑁆𑀥𑀢𑁄 𑀘𑀡𑁆𑀟𑀺𑀓𑀢𑁄 𑀳𑀼𑀢𑁆𑀯𑀸 𑀘𑀭𑀢𑀺, 𑀅𑀧𑁆𑀧𑀫𑀢𑁆𑀢𑀓𑀁 𑀧𑀦 𑀯𑀘𑀦𑀁 𑀲𑀼𑀢𑀓𑀸𑀮𑁂 ‘‘𑀫𑀸𑀤𑀺𑀲𑀁 𑀦𑀸𑀫 𑀏𑀯𑀁 𑀯𑀤𑀢𑀺 𑀏𑀯𑀁 𑀯𑀤𑀢𑀻’’𑀢𑀺 𑀅𑀢𑀺𑀭𑁂𑀓𑀢𑀭𑀁 𑀉𑀤𑁆𑀥𑀢𑁄 𑀘𑀡𑁆𑀟𑀺𑀓𑀢𑁄 𑀳𑀼𑀢𑁆𑀯𑀸 𑀘𑀭𑀢𑀺. 𑀕𑀽𑀣𑀓𑀽𑀧𑁄𑀢𑀺 𑀕𑀽𑀣𑀧𑀼𑀡𑁆𑀡𑀓𑀽𑀧𑁄, 𑀕𑀽𑀣𑀭𑀸𑀲𑀺𑀬𑁂𑀯 𑀯𑀸. 𑀑𑀧𑀫𑁆𑀫𑀲𑀁𑀲𑀦𑁆𑀤𑀦𑀁 𑀧𑀦𑁂𑀢𑁆𑀣 𑀧𑀼𑀭𑀺𑀫𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀢𑀲𑁆𑀫𑀸 𑀏𑀯𑀭𑀽𑀧𑁄 𑀧𑀼𑀕𑁆𑀕𑀮𑁄 𑀅𑀚𑁆𑀛𑀼𑀧𑁂𑀓𑁆𑀔𑀺𑀢𑀩𑁆𑀩𑁄 𑀦 𑀲𑁂𑀯𑀺𑀢𑀩𑁆𑀩𑁄𑀢𑀺 𑀬𑀲𑁆𑀫𑀸 𑀓𑁄𑀥𑀦𑁄 𑀅𑀢𑀺𑀲𑁂𑀯𑀺𑀬𑀫𑀸𑀦𑁄 𑀅𑀢𑀺𑀉𑀧𑀲𑀗𑁆𑀓𑀫𑀺𑀬𑀫𑀸𑀦𑁄𑀧𑀺 𑀓𑀼𑀚𑁆𑀛𑀢𑀺𑀬𑁂𑀯, ‘‘𑀓𑀺𑀁 𑀇𑀫𑀺𑀦𑀸’’𑀢𑀺 𑀧𑀝𑀺𑀓𑁆𑀓𑀫𑀦𑁆𑀢𑁂𑀧𑀺 𑀓𑀼𑀚𑁆𑀛𑀢𑀺𑀬𑁂𑀯. 𑀢𑀲𑁆𑀫𑀸 𑀧𑀮𑀸𑀮𑀕𑁆𑀕𑀺 𑀯𑀺𑀬 𑀅𑀚𑁆𑀛𑀼𑀧𑁂𑀓𑁆𑀔𑀺𑀢𑀩𑁆𑀩𑁄 𑀦 𑀲𑁂𑀯𑀺𑀢𑀩𑁆𑀩𑁄 𑀦 𑀪𑀚𑀺𑀢𑀩𑁆𑀩𑁄. 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺? 𑀬𑁄 𑀳𑀺 𑀧𑀮𑀸𑀮𑀕𑁆𑀕𑀺𑀁 𑀅𑀢𑀺𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀧𑁆𑀧𑀢𑀺, 𑀢𑀲𑁆𑀲 𑀲𑀭𑀻𑀭𑀁 𑀛𑀸𑀬𑀢𑀺. 𑀬𑁄 𑀅𑀢𑀺𑀧𑀝𑀺𑀓𑁆𑀓𑀫𑀺𑀢𑁆𑀯𑀸 𑀢𑀧𑁆𑀧𑀢𑀺, 𑀢𑀲𑁆𑀲 𑀲𑀻𑀢𑀁 𑀦 𑀯𑀽𑀧𑀲𑀫𑁆𑀫𑀢𑀺. 𑀅𑀦𑀼𑀧𑀲𑀗𑁆𑀓𑀫𑀺𑀢𑁆𑀯𑀸 𑀅𑀧𑀝𑀺𑀓𑁆𑀓𑀫𑀺𑀢𑁆𑀯𑀸 𑀧𑀦 𑀫𑀚𑁆𑀛𑀢𑁆𑀢𑀪𑀸𑀯𑁂𑀦 𑀢𑀧𑁆𑀧𑀦𑁆𑀢𑀲𑁆𑀲 𑀲𑀻𑀢𑀁 𑀯𑀽𑀧𑀲𑀫𑁆𑀫𑀢𑀺, 𑀢𑀲𑁆𑀫𑀸 𑀧𑀮𑀸𑀮𑀕𑁆𑀕𑀺 𑀯𑀺𑀬 𑀓𑁄𑀥𑀦𑁄 𑀧𑀼𑀕𑁆𑀕𑀮𑁄 𑀫𑀚𑁆𑀛𑀢𑁆𑀢𑀪𑀸𑀯𑁂𑀦 𑀅𑀚𑁆𑀛𑀼𑀧𑁂𑀓𑁆𑀔𑀺𑀢𑀩𑁆𑀩𑁄, 𑀦 𑀲𑁂𑀯𑀺𑀢𑀩𑁆𑀩𑁄 𑀦 𑀪𑀚𑀺𑀢𑀩𑁆𑀩𑁄 𑀦 𑀧𑀬𑀺𑀭𑀼𑀧𑀸𑀲𑀺𑀢𑀩𑁆𑀩𑁄.

𑀓𑀮𑁆𑀬𑀸𑀡𑀫𑀺𑀢𑁆𑀢𑁄𑀢𑀺 𑀲𑀼𑀘𑀺𑀫𑀺𑀢𑁆𑀢𑁄. 𑀓𑀮𑁆𑀬𑀸𑀡𑀲𑀳𑀸𑀬𑁄𑀢𑀺 𑀲𑀼𑀘𑀺𑀲𑀳𑀸𑀬𑁄. 𑀲𑀳𑀸𑀬𑀸 𑀦𑀸𑀫 𑀲𑀳𑀕𑀸𑀫𑀺𑀦𑁄 𑀲𑀤𑁆𑀥𑀺𑀁𑀘𑀭𑀸. 𑀓𑀮𑁆𑀬𑀸𑀡𑀲𑀫𑁆𑀧𑀯𑀗𑁆𑀓𑁄𑀢𑀺 𑀓𑀮𑁆𑀬𑀸𑀡𑁂𑀲𑀼 𑀲𑀼𑀘𑀺𑀧𑀼𑀕𑁆𑀕𑀮𑁂𑀲𑀼 𑀲𑀫𑁆𑀧𑀯𑀗𑁆𑀓𑁄, 𑀢𑀦𑁆𑀦𑀺𑀦𑁆𑀦𑀢𑀧𑁆𑀧𑁄𑀡𑀢𑀧𑁆𑀧𑀩𑁆𑀪𑀸𑀭𑀫𑀸𑀦𑀲𑁄𑀢𑀺 𑀅𑀢𑁆𑀣𑁄.

𑁮. 𑀕𑀽𑀣𑀪𑀸𑀡𑀻𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁮. 𑀅𑀝𑁆𑀞𑀫𑁂 𑀕𑀽𑀣𑀪𑀸𑀡𑀻𑀢𑀺 𑀬𑁄 𑀕𑀽𑀣𑀁 𑀯𑀺𑀬 𑀤𑀼𑀕𑁆𑀕𑀦𑁆𑀥𑀓𑀣𑀁 𑀓𑀣𑁂𑀢𑀺. 𑀧𑀼𑀧𑁆𑀨𑀪𑀸𑀡𑀻𑀢𑀺 𑀬𑁄 𑀧𑀼𑀧𑁆𑀨𑀸𑀦𑀺 𑀯𑀺𑀬 𑀲𑀼𑀕𑀦𑁆𑀥𑀓𑀣𑀁 𑀓𑀣𑁂𑀢𑀺. 𑀫𑀥𑀼𑀪𑀸𑀡𑀻𑀢𑀺 𑀬𑁄 𑀫𑀥𑀼 𑀯𑀺𑀬 𑀫𑀥𑀼𑀭𑀓𑀣𑀁 𑀓𑀣𑁂𑀢𑀺. 𑀲𑀪𑀕𑁆𑀕𑀢𑁄𑀢𑀺 𑀲𑀪𑀸𑀬 𑀞𑀺𑀢𑁄. 𑀧𑀭𑀺𑀲𑀕𑁆𑀕𑀢𑁄𑀢𑀺 𑀕𑀸𑀫𑀧𑀭𑀺𑀲𑀸𑀬 𑀞𑀺𑀢𑁄. 𑀜𑀸𑀢𑀺𑀫𑀚𑁆𑀛𑀕𑀢𑁄𑀢𑀺 𑀜𑀸𑀢𑀻𑀦𑀁 𑀫𑀚𑁆𑀛𑁂 𑀞𑀺𑀢𑁄. 𑀧𑀽𑀕𑀫𑀚𑁆𑀛𑀕𑀢𑁄𑀢𑀺 𑀲𑁂𑀡𑀻𑀦𑀁 𑀫𑀚𑁆𑀛𑁂 𑀞𑀺𑀢𑁄. 𑀭𑀸𑀚𑀓𑀼𑀮𑀫𑀚𑁆𑀛𑀕𑀢𑁄𑀢𑀺 𑀭𑀸𑀚𑀓𑀼𑀮𑀲𑁆𑀲 𑀫𑀚𑁆𑀛𑁂 𑀫𑀳𑀸𑀯𑀺𑀦𑀺𑀘𑁆𑀙𑀬𑁂 𑀞𑀺𑀢𑁄. 𑀅𑀪𑀺𑀦𑀻𑀢𑁄𑀢𑀺 𑀧𑀼𑀘𑁆𑀙𑀦𑀢𑁆𑀣𑀸𑀬𑀸𑀦𑀻𑀢𑁄. 𑀲𑀓𑁆𑀔𑀺𑀧𑀼𑀝𑁆𑀞𑁄𑀢𑀺 𑀲𑀓𑁆𑀔𑀺𑀁 𑀓𑀢𑁆𑀯𑀸 𑀧𑀼𑀘𑁆𑀙𑀺𑀢𑁄. 𑀏𑀳𑀫𑁆𑀪𑁄 𑀧𑀼𑀭𑀺𑀲𑀸𑀢𑀺 𑀆𑀮𑀧𑀦𑀫𑁂𑀢𑀁. 𑀅𑀢𑁆𑀢𑀳𑁂𑀢𑀼 𑀯𑀸 𑀧𑀭𑀳𑁂𑀢𑀼 𑀯𑀸𑀢𑀺 𑀅𑀢𑁆𑀢𑀦𑁄 𑀯𑀸 𑀧𑀭𑀲𑁆𑀲 𑀯𑀸 𑀳𑀢𑁆𑀣𑀧𑀸𑀤𑀸𑀤𑀺𑀳𑁂𑀢𑀼 𑀯𑀸 𑀥𑀦𑀳𑁂𑀢𑀼 𑀯𑀸. 𑀆𑀫𑀺𑀲𑀓𑀺𑀜𑁆𑀘𑀺𑀓𑁆𑀔𑀳𑁂𑀢𑀼 𑀯𑀸𑀢𑀺 𑀏𑀢𑁆𑀣 𑀆𑀫𑀺𑀲𑀦𑁆𑀢𑀺 𑀮𑀜𑁆𑀚𑁄 𑀅𑀥𑀺𑀧𑁆𑀧𑁂𑀢𑁄. 𑀓𑀺𑀜𑁆𑀘𑀺𑀓𑁆𑀔𑀦𑁆𑀢𑀺 𑀬𑀁 𑀯𑀸 𑀢𑀁 𑀯𑀸 𑀅𑀧𑁆𑀧𑀫𑀢𑁆𑀢𑀓𑀁 𑀅𑀦𑁆𑀢𑀫𑀲𑁄 𑀢𑀺𑀢𑁆𑀢𑀺𑀭𑀺𑀬𑀯𑀝𑁆𑀝𑀓𑀲𑀧𑁆𑀧𑀺𑀧𑀺𑀡𑁆𑀟𑀦𑀯𑀦𑀻𑀢𑀧𑀺𑀡𑁆𑀟𑀸𑀤𑀺𑀫𑀢𑁆𑀢𑀓𑀲𑁆𑀲 𑀮𑀜𑁆𑀚𑀲𑁆𑀲 𑀳𑁂𑀢𑀽𑀢𑀺 𑀅𑀢𑁆𑀣𑁄. 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀸𑀲𑀺𑀢𑀸 𑀳𑁄𑀢𑀻𑀢𑀺 𑀚𑀸𑀦𑀦𑁆𑀢𑁄𑀬𑁂𑀯 𑀫𑀼𑀲𑀸𑀯𑀸𑀤𑀁 𑀓𑀢𑁆𑀢𑀸 𑀳𑁄𑀢𑀺.

𑀦𑁂𑀮𑀸𑀢𑀺 𑀏𑀮𑀁 𑀯𑀼𑀘𑁆𑀘𑀢𑀺 𑀤𑁄𑀲𑁄, 𑀦𑀸𑀲𑁆𑀲 𑀏𑀮𑀦𑁆𑀢𑀺 𑀦𑁂𑀮𑀸, 𑀦𑀺𑀤𑁆𑀤𑁄𑀲𑀸𑀢𑀺 𑀅𑀢𑁆𑀣𑁄. ‘‘𑀦𑁂𑀮𑀗𑁆𑀕𑁄 𑀲𑁂𑀢𑀧𑀘𑁆𑀙𑀸𑀤𑁄’’𑀢𑀺 (𑀉𑀤𑀸. 𑁬𑁫) 𑀏𑀢𑁆𑀣 𑀯𑀼𑀢𑁆𑀢𑀲𑀻𑀮𑀁 𑀯𑀺𑀬. 𑀓𑀡𑁆𑀡𑀲𑀼𑀔𑀸𑀢𑀺 𑀩𑁆𑀬𑀜𑁆𑀚𑀦𑀫𑀥𑀼𑀭𑀢𑀸𑀬 𑀓𑀡𑁆𑀡𑀸𑀦𑀁 𑀲𑀼𑀔𑀸, 𑀲𑀽𑀘𑀺𑀯𑀺𑀚𑁆𑀛𑀦𑀁 𑀯𑀺𑀬 𑀓𑀡𑁆𑀡𑀲𑀽𑀮𑀁 𑀦 𑀚𑀦𑁂𑀢𑀺. 𑀅𑀢𑁆𑀣𑀫𑀥𑀼𑀭𑀢𑀸𑀬 𑀲𑀓𑀮𑀲𑀭𑀻𑀭𑁂 𑀓𑁄𑀧𑀁 𑀅𑀚𑀦𑁂𑀢𑁆𑀯𑀸 𑀧𑁂𑀫𑀁 𑀚𑀦𑁂𑀢𑀻𑀢𑀺 𑀧𑁂𑀫𑀦𑀻𑀬𑀸. 𑀳𑀤𑀬𑀁 𑀕𑀘𑁆𑀙𑀢𑀺 𑀅𑀧𑁆𑀧𑀝𑀺𑀳𑀜𑁆𑀜𑀫𑀸𑀦𑀸 𑀲𑀼𑀔𑁂𑀦 𑀘𑀺𑀢𑁆𑀢𑀁 𑀧𑀯𑀺𑀲𑀢𑀻𑀢𑀺 𑀳𑀤𑀬𑀗𑁆𑀕𑀫𑀸. 𑀕𑀼𑀡𑀧𑀭𑀺𑀧𑀼𑀡𑁆𑀡𑀢𑀸𑀬 𑀧𑀼𑀭𑁂 𑀪𑀯𑀸𑀢𑀺 𑀧𑁄𑀭𑀻. 𑀧𑀼𑀭𑁂 𑀲𑀁𑀯𑀟𑁆𑀠𑀦𑀸𑀭𑀻 𑀯𑀺𑀬 𑀲𑀼𑀓𑀼𑀫𑀸𑀭𑀸𑀢𑀺𑀧𑀺 𑀧𑁄𑀭𑀻. 𑀧𑀼𑀭𑀲𑁆𑀲 𑀏𑀲𑀸𑀢𑀺𑀧𑀺 𑀧𑁄𑀭𑀻. 𑀧𑀼𑀭𑀲𑁆𑀲 𑀏𑀲𑀸𑀢𑀺 𑀦𑀕𑀭𑀯𑀸𑀲𑀻𑀦𑀁 𑀓𑀣𑀸𑀢𑀺 𑀅𑀢𑁆𑀣𑁄. 𑀦𑀕𑀭𑀯𑀸𑀲𑀺𑀦𑁄 𑀳𑀺 𑀬𑀼𑀢𑁆𑀢𑀓𑀣𑀸 𑀳𑁄𑀦𑁆𑀢𑀺, 𑀧𑀺𑀢𑀺𑀫𑀢𑁆𑀢𑀁 𑀧𑀺𑀢𑀸𑀢𑀺, 𑀫𑀸𑀢𑀺𑀫𑀢𑁆𑀢𑀁 𑀫𑀸𑀢𑀸𑀢𑀺, 𑀪𑀸𑀢𑀺𑀫𑀢𑁆𑀢𑀁 𑀪𑀸𑀢𑀸𑀢𑀺 𑀯𑀤𑀦𑁆𑀢𑀺. 𑀏𑀯𑀭𑀽𑀧𑀻 𑀓𑀣𑀸 𑀩𑀳𑀼𑀦𑁄 𑀚𑀦𑀲𑁆𑀲 𑀓𑀦𑁆𑀢𑀸 𑀳𑁄𑀢𑀻𑀢𑀺 𑀩𑀳𑀼𑀚𑀦𑀓𑀦𑁆𑀢𑀸. 𑀓𑀦𑁆𑀢𑀪𑀸𑀯𑁂𑀦𑁂𑀯 𑀩𑀳𑀼𑀦𑁄 𑀚𑀦𑀲𑁆𑀲 𑀫𑀦𑀸𑀧𑀸 𑀘𑀺𑀢𑁆𑀢𑀯𑀼𑀤𑁆𑀥𑀺𑀓𑀭𑀸𑀢𑀺 𑀩𑀳𑀼𑀚𑀦𑀫𑀦𑀸𑀧𑀸.

𑁯. 𑀅𑀦𑁆𑀥𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁯. 𑀦𑀯𑀫𑁂 𑀘𑀓𑁆𑀔𑀼 𑀦 𑀳𑁄𑀢𑀻𑀢𑀺 𑀧𑀜𑁆𑀜𑀸𑀘𑀓𑁆𑀔𑀼 𑀦 𑀳𑁄𑀢𑀺. 𑀨𑀸𑀢𑀺𑀁 𑀓𑀭𑁂𑀬𑁆𑀬𑀸𑀢𑀺 𑀨𑀻𑀢𑀁 𑀯𑀟𑁆𑀠𑀺𑀢𑀁 𑀓𑀭𑁂𑀬𑁆𑀬. 𑀲𑀸𑀯𑀚𑁆𑀚𑀸𑀦𑀯𑀚𑁆𑀚𑁂𑀢𑀺 𑀲𑀤𑁄𑀲𑀦𑀺𑀤𑁆𑀤𑁄𑀲𑁂. 𑀳𑀻𑀦𑀧𑁆𑀧𑀡𑀻𑀢𑁂𑀢𑀺 𑀅𑀥𑀫𑀼𑀢𑁆𑀢𑀫𑁂. 𑀓𑀡𑁆𑀳𑀲𑀼𑀓𑁆𑀓𑀲𑀧𑁆𑀧𑀝𑀺𑀪𑀸𑀕𑁂𑀢𑀺 𑀓𑀡𑁆𑀳𑀲𑀼𑀓𑁆𑀓𑀸𑀬𑁂𑀯 𑀅𑀜𑁆𑀜𑀫𑀜𑁆𑀜𑀁 𑀧𑀝𑀺𑀩𑀸𑀳𑀦𑀢𑁄 𑀧𑀝𑀺𑀧𑀓𑁆𑀔𑀯𑀲𑁂𑀦 𑀲𑀧𑁆𑀧𑀝𑀺𑀪𑀸𑀕𑀸𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀅𑀬𑀁 𑀧𑀦𑁂𑀢𑁆𑀣 𑀲𑀗𑁆𑀔𑁂𑀧𑁄 𑁋 𑀓𑀼𑀲𑀮𑁂 𑀥𑀫𑁆𑀫𑁂 ‘‘𑀓𑀼𑀲𑀮𑀸 𑀥𑀫𑁆𑀫𑀸’’𑀢𑀺 𑀚𑀸𑀦𑁂𑀬𑁆𑀬, 𑀅𑀓𑀼𑀲𑀮𑁂 𑀥𑀫𑁆𑀫𑁂 ‘‘𑀅𑀓𑀼𑀲𑀮𑀸 𑀥𑀫𑁆𑀫𑀸’’𑀢𑀺 𑀚𑀸𑀦𑁂𑀬𑁆𑀬. 𑀲𑀸𑀯𑀚𑁆𑀚𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀓𑀡𑁆𑀳𑀲𑀼𑀓𑁆𑀓𑀲𑀧𑁆𑀧𑀝𑀺𑀪𑀸𑀕𑁂𑀲𑀼 𑀧𑀦 𑀓𑀡𑁆𑀳𑀥𑀫𑁆𑀫𑁂 ‘‘𑀲𑀼𑀓𑁆𑀓𑀲𑀧𑁆𑀧𑀝𑀺𑀪𑀸𑀕𑀸’’𑀢𑀺 𑀚𑀸𑀦𑁂𑀬𑁆𑀬, 𑀲𑀼𑀓𑁆𑀓𑀥𑀫𑁆𑀫𑁂 ‘‘𑀓𑀡𑁆𑀳𑀲𑀧𑁆𑀧𑀝𑀺𑀪𑀸𑀕𑀸’’𑀢𑀺 𑀬𑁂𑀦 𑀧𑀜𑁆𑀜𑀸𑀘𑀓𑁆𑀔𑀼𑀦𑀸 𑀚𑀸𑀦𑁂𑀬𑁆𑀬, 𑀢𑀣𑀸𑀭𑀽𑀧𑀫𑁆𑀧𑀺𑀲𑁆𑀲 𑀘𑀓𑁆𑀔𑀼 𑀦 𑀳𑁄𑀢𑀻𑀢𑀺. 𑀇𑀫𑀺𑀦𑀸 𑀦𑀬𑁂𑀦 𑀲𑁂𑀲𑀯𑀸𑀭𑁂𑀲𑀼𑀧𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀦 𑀘𑁂𑀯 𑀪𑁄𑀕𑀸 𑀢𑀣𑀸𑀭𑀽𑀧𑀸𑀢𑀺 𑀢𑀣𑀸𑀚𑀸𑀢𑀺𑀓𑀸 𑀪𑁄𑀕𑀸𑀧𑀺𑀲𑁆𑀲 𑀦 𑀳𑁄𑀦𑁆𑀢𑀺. 𑀦 𑀘 𑀧𑀼𑀜𑁆𑀜𑀸𑀦𑀺 𑀓𑀼𑀩𑁆𑀩𑀢𑀻𑀢𑀺 𑀧𑀼𑀜𑁆𑀜𑀸𑀦𑀺 𑀘 𑀦 𑀓𑀭𑁄𑀢𑀺. 𑀏𑀢𑁆𑀢𑀸𑀯𑀢𑀸 𑀪𑁄𑀕𑀼𑀧𑁆𑀧𑀸𑀤𑀦𑀘𑀓𑁆𑀔𑀼𑀦𑁄 𑀘 𑀧𑀼𑀜𑁆𑀜𑀓𑀭𑀡𑀘𑀓𑁆𑀔𑀼𑀦𑁄 𑀘 𑀅𑀪𑀸𑀯𑁄 𑀯𑀼𑀢𑁆𑀢𑁄. 𑀉𑀪𑀬𑀢𑁆𑀣 𑀓𑀮𑀺𑀕𑁆𑀕𑀸𑀳𑁄𑀢𑀺 𑀇𑀥𑀮𑁄𑀓𑁂 𑀘 𑀧𑀭𑀮𑁄𑀓𑁂 𑀘𑀸𑀢𑀺 𑀉𑀪𑀬𑀲𑁆𑀫𑀺𑀫𑁆𑀧𑀺 𑀅𑀧𑀭𑀤𑁆𑀥𑀕𑁆𑀕𑀸𑀳𑁄, 𑀧𑀭𑀸𑀚𑀬𑀕𑁆𑀕𑀸𑀳𑁄 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀉𑀪𑀬𑀢𑁆𑀣 𑀓𑀮𑀺𑀕𑁆𑀕𑀸𑀳𑁄𑀢𑀺 𑀉𑀪𑀬𑁂𑀲𑀫𑁆𑀧𑀺 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀸𑀦𑀁 𑀅𑀢𑁆𑀣𑀸𑀦𑀁 𑀓𑀮𑀺𑀕𑁆𑀕𑀸𑀳𑁄, 𑀧𑀭𑀸𑀚𑀬𑀕𑁆𑀕𑀸𑀳𑁄𑀢𑀺 𑀅𑀢𑁆𑀣𑁄. 𑀥𑀫𑁆𑀫𑀸𑀥𑀫𑁆𑀫𑁂𑀦𑀸𑀢𑀺 𑀤𑀲𑀓𑀼𑀲𑀮𑀓𑀫𑁆𑀫𑀧𑀣𑀥𑀫𑁆𑀫𑁂𑀦𑀧𑀺 𑀤𑀲𑀅𑀓𑀼𑀲𑀮𑀓𑀫𑁆𑀫𑀧𑀣𑀅𑀥𑀫𑁆𑀫𑁂𑀦𑀧𑀺. 𑀲𑀞𑁄𑀢𑀺 𑀓𑁂𑀭𑀸𑀝𑀺𑀓𑁄. 𑀪𑁄𑀕𑀸𑀦𑀺 𑀧𑀭𑀺𑀬𑁂𑀲𑀢𑀻𑀢𑀺 𑀪𑁄𑀕𑁂 𑀕𑀯𑁂𑀲𑀢𑀺. 𑀣𑁂𑀬𑁆𑀬𑁂𑀦 𑀓𑀽𑀝𑀓𑀫𑁆𑀫𑁂𑀦, 𑀫𑀼𑀲𑀸𑀯𑀸𑀤𑁂𑀦 𑀘𑀽𑀪𑀬𑀦𑁆𑀢𑀺 𑀣𑁂𑀬𑁆𑀬𑀸𑀤𑀻𑀲𑀼 𑀉𑀪𑀬𑁂𑀦 𑀧𑀭𑀺𑀬𑁂𑀲𑀢𑀻𑀢𑀺 𑀅𑀢𑁆𑀣𑁄. 𑀓𑀣𑀁? 𑀣𑁂𑀬𑁆𑀬𑁂𑀦 𑀓𑀽𑀝𑀓𑀫𑁆𑀫𑁂𑀦 𑀘 𑀧𑀭𑀺𑀬𑁂𑀲𑀢𑀺, 𑀣𑁂𑀬𑁆𑀬𑁂𑀦 𑀫𑀼𑀲𑀸𑀯𑀸𑀤𑁂𑀦 𑀘 𑀧𑀭𑀺𑀬𑁂𑀲𑀢𑀺, 𑀓𑀽𑀝𑀓𑀫𑁆𑀫𑁂𑀦 𑀫𑀼𑀲𑀸𑀯𑀸𑀤𑁂𑀦 𑀘 𑀧𑀭𑀺𑀬𑁂𑀲𑀢𑀺. 𑀲𑀗𑁆𑀖𑀸𑀢𑀼𑀦𑁆𑀢𑀺 𑀲𑀗𑁆𑀖𑀭𑀺𑀢𑀼𑀁. 𑀥𑀫𑁆𑀫𑀮𑀤𑁆𑀥𑁂𑀳𑀻𑀢𑀺 𑀤𑀲𑀓𑀼𑀲𑀮𑀓𑀫𑁆𑀫𑀧𑀣𑀥𑀫𑁆𑀫𑀁 𑀅𑀓𑁄𑀧𑁂𑀢𑁆𑀯𑀸 𑀮𑀤𑁆𑀥𑁂𑀳𑀺. 𑀉𑀝𑁆𑀞𑀸𑀦𑀸𑀥𑀺𑀕𑀢𑀦𑁆𑀢𑀺 𑀯𑀻𑀭𑀺𑀬𑁂𑀦 𑀅𑀥𑀺𑀕𑀢𑀁. 𑀅𑀩𑁆𑀬𑀕𑁆𑀖𑀫𑀸𑀦𑀲𑁄𑀢𑀺 𑀦𑀺𑀩𑁆𑀩𑀺𑀘𑀺𑀓𑀺𑀘𑁆𑀙𑀘𑀺𑀢𑁆𑀢𑁄. 𑀪𑀤𑁆𑀤𑀓𑀁 𑀞𑀸𑀦𑀦𑁆𑀢𑀺 𑀲𑁂𑀝𑁆𑀞𑀁 𑀤𑁂𑀯𑀝𑁆𑀞𑀸𑀦𑀁. 𑀦 𑀲𑁄𑀘𑀢𑀻𑀢𑀺 𑀬𑀲𑁆𑀫𑀺𑀁 𑀞𑀸𑀦𑁂 𑀅𑀦𑁆𑀢𑁄𑀲𑁄𑀓𑁂𑀦 𑀦 𑀲𑁄𑀘𑀢𑀺.

𑁧𑁦. 𑀅𑀯𑀓𑀼𑀚𑁆𑀚𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁦. 𑀤𑀲𑀫𑁂 𑀅𑀯𑀓𑀼𑀚𑁆𑀚𑀧𑀜𑁆𑀜𑁄𑀢𑀺 𑀅𑀥𑁄𑀫𑀼𑀔𑀧𑀜𑁆𑀜𑁄. 𑀉𑀘𑁆𑀙𑀗𑁆𑀕𑀧𑀜𑁆𑀜𑁄𑀢𑀺 𑀉𑀘𑁆𑀙𑀗𑁆𑀕𑀲𑀤𑀺𑀲𑀧𑀜𑁆𑀜𑁄. 𑀧𑀼𑀣𑀼𑀧𑀜𑁆𑀜𑁄𑀢𑀺 𑀯𑀺𑀢𑁆𑀣𑀸𑀭𑀺𑀓𑀧𑀜𑁆𑀜𑁄. 𑀆𑀤𑀺𑀓𑀮𑁆𑀬𑀸𑀡𑀦𑁆𑀢𑀺𑀆𑀤𑀻𑀲𑀼 𑀆𑀤𑀻𑀢𑀺 𑀧𑀼𑀩𑁆𑀩𑀧𑀝𑁆𑀞𑀧𑀦𑀸. 𑀫𑀚𑁆𑀛𑀦𑁆𑀢𑀺 𑀓𑀣𑀸𑀯𑁂𑀫𑀚𑁆𑀛𑀁. 𑀧𑀭𑀺𑀬𑁄𑀲𑀸𑀦𑀦𑁆𑀢𑀺 𑀲𑀦𑁆𑀦𑀺𑀝𑁆𑀞𑀸𑀦𑀁. 𑀇𑀢𑀺𑀲𑁆𑀲 𑀢𑁂 𑀥𑀫𑁆𑀫𑀁 𑀓𑀣𑁂𑀦𑁆𑀢𑀸 𑀧𑀼𑀩𑁆𑀩𑀧𑀝𑁆𑀞𑀧𑀦𑁂𑀧𑀺 𑀓𑀮𑁆𑀬𑀸𑀡𑀁 𑀪𑀤𑁆𑀤𑀓𑀁 𑀅𑀦𑀯𑀚𑁆𑀚𑀫𑁂𑀯 𑀓𑀢𑁆𑀯𑀸 𑀓𑀣𑁂𑀦𑁆𑀢𑀺, 𑀯𑁂𑀫𑀚𑁆𑀛𑁂𑀧𑀺 𑀧𑀭𑀺𑀬𑁄𑀲𑀸𑀦𑁂𑀧𑀺. 𑀏𑀢𑁆𑀣 𑀘 𑀅𑀢𑁆𑀣𑀺 𑀤𑁂𑀲𑀦𑀸𑀬 𑀆𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑀸𑀦𑀺, 𑀅𑀢𑁆𑀣𑀺 𑀲𑀸𑀲𑀦𑀲𑁆𑀲. 𑀢𑀢𑁆𑀣 𑀤𑁂𑀲𑀦𑀸𑀬 𑀢𑀸𑀯 𑀘𑀢𑀼𑀧𑁆𑀧𑀤𑀺𑀓𑀕𑀸𑀣𑀸𑀬 𑀧𑀞𑀫𑀧𑀤𑀁 𑀆𑀤𑀺, 𑀤𑁆𑀯𑁂 𑀧𑀤𑀸𑀦𑀺 𑀫𑀚𑁆𑀛𑀁, 𑀅𑀯𑀲𑀸𑀦𑀧𑀤𑀁 𑀧𑀭𑀺𑀬𑁄𑀲𑀸𑀦𑀁. 𑀏𑀓𑀸𑀦𑀼𑀲𑀦𑁆𑀥𑀺𑀓𑀲𑁆𑀲 𑀲𑀼𑀢𑁆𑀢𑀲𑁆𑀲 𑀦𑀺𑀤𑀸𑀦𑀁 𑀆𑀤𑀺, 𑀅𑀦𑀼𑀲𑀦𑁆𑀥𑀺 𑀫𑀚𑁆𑀛𑀁, 𑀇𑀤𑀫𑀯𑁄𑀘𑀸𑀢𑀺 𑀅𑀧𑁆𑀧𑀦𑀸 𑀧𑀭𑀺𑀬𑁄𑀲𑀸𑀦𑀁. 𑀅𑀦𑁂𑀓𑀸𑀦𑀼𑀲𑀦𑁆𑀥𑀺𑀓𑀲𑁆𑀲 𑀧𑀞𑀫𑁄 𑀅𑀦𑀼𑀲𑀦𑁆𑀥𑀺 𑀆𑀤𑀺, 𑀢𑀢𑁄 𑀧𑀭𑀁 𑀏𑀓𑁄 𑀯𑀸 𑀅𑀦𑁂𑀓𑁂 𑀯𑀸 𑀫𑀚𑁆𑀛𑀁, 𑀧𑀘𑁆𑀙𑀺𑀫𑁄 𑀧𑀭𑀺𑀬𑁄𑀲𑀸𑀦𑀁. 𑀅𑀬𑀁 𑀢𑀸𑀯 𑀤𑁂𑀲𑀦𑀸𑀬 𑀦𑀬𑁄. 𑀲𑀸𑀲𑀦𑀲𑁆𑀲 𑀧𑀦 𑀲𑀻𑀮𑀁 𑀆𑀤𑀺, 𑀲𑀫𑀸𑀥𑀺 𑀫𑀚𑁆𑀛𑀁, 𑀯𑀺𑀧𑀲𑁆𑀲𑀦𑀸 𑀧𑀭𑀺𑀬𑁄𑀲𑀸𑀦𑀁. 𑀲𑀫𑀸𑀥𑀺 𑀯𑀸 𑀆𑀤𑀺, 𑀯𑀺𑀧𑀲𑁆𑀲𑀦𑀸 𑀫𑀚𑁆𑀛𑀁, 𑀫𑀕𑁆𑀕𑁄 𑀧𑀭𑀺𑀬𑁄𑀲𑀸𑀦𑀁. 𑀯𑀺𑀧𑀲𑁆𑀲𑀦𑀸 𑀯𑀸 𑀆𑀤𑀺, 𑀫𑀕𑁆𑀕𑁄 𑀫𑀚𑁆𑀛𑀁, 𑀨𑀮𑀁 𑀧𑀭𑀺𑀬𑁄𑀲𑀸𑀦𑀁. 𑀫𑀕𑁆𑀕𑁄 𑀯𑀸 𑀆𑀤𑀺, 𑀨𑀮𑀁 𑀫𑀚𑁆𑀛𑀁, 𑀦𑀺𑀩𑁆𑀩𑀸𑀦𑀁 𑀧𑀭𑀺𑀬𑁄𑀲𑀸𑀦𑀁. 𑀤𑁆𑀯𑁂 𑀤𑁆𑀯𑁂 𑀯𑀸 𑀓𑀬𑀺𑀭𑀫𑀸𑀦𑁂 𑀲𑀻𑀮𑀲𑀫𑀸𑀥𑀬𑁄 𑀆𑀤𑀺, 𑀯𑀺𑀧𑀲𑁆𑀲𑀦𑀸𑀫𑀕𑁆𑀕𑀸 𑀫𑀚𑁆𑀛𑀁, 𑀨𑀮𑀦𑀺𑀩𑁆𑀩𑀸𑀦𑀸𑀦𑀺 𑀧𑀭𑀺𑀬𑁄𑀲𑀸𑀦𑀁.

𑀲𑀸𑀢𑁆𑀣𑀦𑁆𑀢𑀺 𑀲𑀸𑀢𑁆𑀣𑀓𑀁 𑀓𑀢𑁆𑀯𑀸 𑀤𑁂𑀲𑁂𑀦𑁆𑀢𑀺. 𑀲𑀩𑁆𑀬𑀜𑁆𑀚𑀦𑀦𑁆𑀢𑀺 𑀅𑀓𑁆𑀔𑀭𑀧𑀸𑀭𑀺𑀧𑀽𑀭𑀺𑀁 𑀓𑀢𑁆𑀯𑀸 𑀤𑁂𑀲𑁂𑀦𑁆𑀢𑀺. 𑀓𑁂𑀯𑀮𑀧𑀭𑀺𑀧𑀼𑀡𑁆𑀡𑀦𑁆𑀢𑀺 𑀲𑀓𑀮𑀧𑀭𑀺𑀧𑀼𑀡𑁆𑀡𑀁 𑀅𑀦𑀽𑀦𑀁 𑀓𑀢𑁆𑀯𑀸 𑀤𑁂𑀲𑁂𑀦𑁆𑀢𑀺. 𑀧𑀭𑀺𑀲𑀼𑀤𑁆𑀥𑀦𑁆𑀢𑀺 𑀧𑀭𑀺𑀲𑀼𑀤𑁆𑀥𑀁 𑀦𑀺𑀚𑁆𑀚𑀝𑀁 𑀦𑀺𑀕𑁆𑀕𑀡𑁆𑀞𑀺𑀁 𑀓𑀢𑁆𑀯𑀸 𑀤𑁂𑀲𑁂𑀦𑁆𑀢𑀺. 𑀩𑁆𑀭𑀳𑁆𑀫𑀘𑀭𑀺𑀬𑀁 𑀧𑀓𑀸𑀲𑁂𑀦𑁆𑀢𑀻𑀢𑀺 𑀏𑀯𑀁 𑀤𑁂𑀲𑁂𑀦𑁆𑀢𑀸 𑀘 𑀲𑁂𑀝𑁆𑀞𑀘𑀭𑀺𑀬𑀪𑀽𑀢𑀁 𑀲𑀺𑀓𑁆𑀔𑀢𑁆𑀢𑀬𑀲𑀗𑁆𑀕𑀳𑀺𑀢𑀁 𑀅𑀭𑀺𑀬𑀁 𑀅𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁 𑀧𑀓𑀸𑀲𑁂𑀦𑁆𑀢𑀺. 𑀦𑁂𑀯 𑀆𑀤𑀺𑀁 𑀫𑀦𑀲𑀺 𑀓𑀭𑁄𑀢𑀻𑀢𑀺 𑀦𑁂𑀯 𑀧𑀼𑀩𑁆𑀩𑀧𑀝𑁆𑀞𑀧𑀦𑀁 𑀫𑀦𑀲𑀺 𑀓𑀭𑁄𑀢𑀺.

𑀓𑀼𑀫𑁆𑀪𑁄𑀢𑀺 𑀖𑀝𑁄. 𑀦𑀺𑀓𑀼𑀚𑁆𑀚𑁄𑀢𑀺 𑀅𑀥𑁄𑀫𑀼𑀔𑁄 𑀞𑀧𑀺𑀢𑁄. 𑀏𑀯𑀫𑁂𑀯 𑀔𑁄𑀢𑀺 𑀏𑀢𑁆𑀣 𑀓𑀼𑀫𑁆𑀪𑁄 𑀦𑀺𑀓𑀼𑀚𑁆𑀚𑁄 𑀯𑀺𑀬 𑀅𑀯𑀓𑀼𑀚𑁆𑀚𑀧𑀜𑁆𑀜𑁄 𑀧𑀼𑀕𑁆𑀕𑀮𑁄 𑀤𑀝𑁆𑀞𑀩𑁆𑀩𑁄, 𑀉𑀤𑀓𑀸𑀲𑀺𑀜𑁆𑀘𑀦𑀓𑀸𑀮𑁄 𑀯𑀺𑀬 𑀥𑀫𑁆𑀫𑀤𑁂𑀲𑀦𑀸𑀬 𑀮𑀤𑁆𑀥𑀓𑀸𑀮𑁄, 𑀉𑀤𑀓𑀲𑁆𑀲 𑀯𑀺𑀯𑀝𑁆𑀝𑀦𑀓𑀸𑀮𑁄 𑀯𑀺𑀬 𑀢𑀲𑁆𑀫𑀺𑀁 𑀆𑀲𑀦𑁂 𑀦𑀺𑀲𑀺𑀦𑁆𑀦𑀲𑁆𑀲 𑀉𑀕𑁆𑀕𑀳𑁂𑀢𑀼𑀁 𑀅𑀲𑀫𑀢𑁆𑀣𑀓𑀸𑀮𑁄, 𑀉𑀤𑀓𑀲𑁆𑀲 𑀅𑀲𑀡𑁆𑀞𑀸𑀦𑀓𑀸𑀮𑁄 𑀯𑀺𑀬 𑀯𑀼𑀝𑁆𑀞𑀳𑀺𑀢𑁆𑀯𑀸 𑀅𑀲𑀮𑁆𑀮𑀓𑁆𑀔𑀡𑀓𑀸𑀮𑁄 𑀯𑁂𑀤𑀺𑀢𑀩𑁆𑀩𑁄.

𑀆𑀓𑀺𑀡𑁆𑀡𑀸𑀦𑀻𑀢𑀺 𑀧𑀓𑁆𑀔𑀺𑀢𑁆𑀢𑀸𑀦𑀺. 𑀲𑀢𑀺𑀲𑀫𑁆𑀫𑁄𑀲𑀸𑀬 𑀧𑀓𑀺𑀭𑁂𑀬𑁆𑀬𑀸𑀢𑀺 𑀫𑀼𑀝𑁆𑀞𑀲𑁆𑀲𑀢𑀺𑀢𑀸𑀬 𑀯𑀺𑀓𑀺𑀭𑁂𑀬𑁆𑀬. 𑀏𑀯𑀫𑁂𑀯 𑀔𑁄𑀢𑀺 𑀏𑀢𑁆𑀣 𑀉𑀘𑁆𑀙𑀗𑁆𑀕𑁄 𑀯𑀺𑀬 𑀉𑀘𑁆𑀙𑀗𑁆𑀕𑀧𑀜𑁆𑀜𑁄 𑀧𑀼𑀕𑁆𑀕𑀮𑁄 𑀤𑀝𑁆𑀞𑀩𑁆𑀩𑁄, 𑀦𑀸𑀦𑀸𑀔𑀚𑁆𑀚𑀓𑀸𑀦𑀺 𑀯𑀺𑀬 𑀦𑀸𑀦𑀧𑁆𑀧𑀓𑀸𑀭𑀁 𑀩𑀼𑀤𑁆𑀥𑀯𑀘𑀦𑀁, 𑀉𑀘𑁆𑀙𑀗𑁆𑀕𑁂 𑀦𑀸𑀦𑀸𑀔𑀚𑁆𑀚𑀓𑀸𑀦𑀺 𑀔𑀸𑀤𑀦𑁆𑀢𑀲𑁆𑀲 𑀦𑀺𑀲𑀺𑀦𑁆𑀦𑀓𑀸𑀮𑁄 𑀯𑀺𑀬 𑀢𑀲𑁆𑀫𑀺𑀁 𑀆𑀲𑀦𑁂 𑀦𑀺𑀲𑀺𑀦𑁆𑀦𑀲𑁆𑀲 𑀉𑀕𑁆𑀕𑀡𑁆𑀳𑀦𑀓𑀸𑀮𑁄, 𑀯𑀼𑀝𑁆𑀞𑀳𑀦𑁆𑀢𑀲𑁆𑀲 𑀲𑀢𑀺𑀲𑀫𑁆𑀫𑁄𑀲𑀸 𑀧𑀓𑀺𑀭𑀡𑀓𑀸𑀮𑁄 𑀯𑀺𑀬 𑀢𑀲𑁆𑀫𑀸 𑀆𑀲𑀦𑀸 𑀯𑀼𑀝𑁆𑀞𑀸𑀬 𑀕𑀘𑁆𑀙𑀦𑁆𑀢𑀲𑁆𑀲 𑀅𑀲𑀮𑁆𑀮𑀓𑁆𑀔𑀡𑀓𑀸𑀮𑁄 𑀯𑁂𑀤𑀺𑀢𑀩𑁆𑀩𑁄.

𑀉𑀓𑁆𑀓𑀼𑀚𑁆𑀚𑁄𑀢𑀺 𑀉𑀧𑀭𑀺𑀫𑀼𑀔𑁄 𑀞𑀧𑀺𑀢𑁄. 𑀲𑀡𑁆𑀞𑀸𑀢𑀻𑀢𑀺 𑀧𑀢𑀺𑀝𑁆𑀞𑀳𑀢𑀺. 𑀏𑀯𑀫𑁂𑀯 𑀔𑁄𑀢𑀺 𑀏𑀢𑁆𑀣 𑀉𑀧𑀭𑀺𑀫𑀼𑀔𑁄 𑀞𑀧𑀺𑀢𑁄 𑀓𑀼𑀫𑁆𑀪𑁄 𑀯𑀺𑀬 𑀧𑀼𑀣𑀼𑀧𑀜𑁆𑀜𑁄 𑀧𑀼𑀕𑁆𑀕𑀮𑁄 𑀤𑀝𑁆𑀞𑀩𑁆𑀩𑁄, 𑀉𑀤𑀓𑀲𑁆𑀲 𑀆𑀲𑀺𑀢𑁆𑀢𑀓𑀸𑀮𑁄 𑀯𑀺𑀬 𑀤𑁂𑀲𑀦𑀸𑀬 𑀮𑀤𑁆𑀥𑀓𑀸𑀮𑁄, 𑀉𑀤𑀓𑀲𑁆𑀲 𑀲𑀡𑁆𑀞𑀸𑀦𑀓𑀸𑀮𑁄 𑀯𑀺𑀬 𑀢𑀢𑁆𑀣 𑀦𑀺𑀲𑀺𑀦𑁆𑀦𑀲𑁆𑀲 𑀉𑀕𑁆𑀕𑀡𑁆𑀳𑀦𑀓𑀸𑀮𑁄, 𑀦𑁄 𑀯𑀺𑀯𑀝𑁆𑀝𑀦𑀓𑀸𑀮𑁄 𑀯𑀺𑀬 𑀯𑀼𑀝𑁆𑀞𑀸𑀬 𑀕𑀘𑁆𑀙𑀦𑁆𑀢𑀲𑁆𑀲 𑀲𑀮𑁆𑀮𑀓𑁆𑀔𑀡𑀓𑀸𑀮𑁄 𑀯𑁂𑀤𑀺𑀢𑀩𑁆𑀩𑁄.

𑀤𑀼𑀫𑁆𑀫𑁂𑀥𑁄𑀢𑀺 𑀦𑀺𑀧𑁆𑀧𑀜𑁆𑀜𑁄. 𑀅𑀯𑀺𑀘𑀓𑁆𑀔𑀡𑁄𑀢𑀺 𑀲𑀁𑀯𑀺𑀤𑀳𑀦𑀧𑀜𑁆𑀜𑀸𑀬 𑀭𑀳𑀺𑀢𑁄. 𑀕𑀦𑁆𑀢𑀸𑀢𑀺 𑀕𑀫𑀦𑀲𑀻𑀮𑁄. 𑀲𑁂𑀬𑁆𑀬𑁄 𑀏𑀢𑁂𑀦 𑀯𑀼𑀘𑁆𑀘𑀢𑀻𑀢𑀺 𑀏𑀢𑀲𑁆𑀫𑀸 𑀧𑀼𑀕𑁆𑀕𑀮𑀸 𑀉𑀢𑁆𑀢𑀭𑀺𑀢𑀭𑁄𑀢𑀺 𑀯𑀼𑀘𑁆𑀘𑀢𑀺. 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑁆𑀧𑀝𑀺𑀧𑀦𑁆𑀦𑁄𑀢𑀺 𑀦𑀯𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀲𑁆𑀲 𑀅𑀦𑀼𑀥𑀫𑁆𑀫𑀁 𑀲𑀳 𑀲𑀻𑀮𑁂𑀦 𑀧𑀼𑀩𑁆𑀩𑀪𑀸𑀕𑀧𑀝𑀺𑀧𑀤𑀁 𑀧𑀝𑀺𑀧𑀦𑁆𑀦𑁄. 𑀤𑀼𑀓𑁆𑀔𑀲𑁆𑀲𑀸𑀢𑀺 𑀯𑀝𑁆𑀝𑀤𑀼𑀓𑁆𑀔𑀲𑁆𑀲. 𑀅𑀦𑁆𑀢𑀓𑀭𑁄 𑀲𑀺𑀬𑀸𑀢𑀺 𑀓𑁄𑀝𑀺𑀓𑀭𑁄 𑀧𑀭𑀺𑀘𑁆𑀙𑁂𑀤𑀓𑀭𑁄 𑀧𑀭𑀺𑀯𑀝𑀼𑀫𑀓𑀭𑁄 𑀪𑀯𑁂𑀬𑁆𑀬𑀸𑀢𑀺.

𑀧𑀼𑀕𑁆𑀕𑀮𑀯𑀕𑁆𑀕𑁄 𑀢𑀢𑀺𑀬𑁄.

𑁪. 𑀤𑁂𑀯𑀤𑀽𑀢𑀯𑀕𑁆𑀕𑁄

𑁧. 𑀲𑀩𑁆𑀭𑀳𑁆𑀫𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁧. 𑀘𑀢𑀼𑀢𑁆𑀣𑀲𑁆𑀲 𑀧𑀞𑀫𑁂 𑀅𑀚𑁆𑀛𑀸𑀕𑀸𑀭𑁂𑀢𑀺 𑀲𑀓𑁂 𑀖𑀭𑁂. 𑀧𑀽𑀚𑀺𑀢𑀸 𑀳𑁄𑀦𑁆𑀢𑀻𑀢𑀺 𑀬𑀁 𑀖𑀭𑁂 𑀅𑀢𑁆𑀣𑀺, 𑀢𑁂𑀦 𑀧𑀝𑀺𑀚𑀕𑁆𑀕𑀺𑀢𑀸 𑀕𑁄𑀧𑀺𑀢𑀸 𑀳𑁄𑀦𑁆𑀢𑀺. 𑀇𑀢𑀺 𑀫𑀸𑀢𑀸𑀧𑀺𑀢𑀼𑀧𑀽𑀚𑀓𑀸𑀦𑀺 𑀓𑀼𑀮𑀸𑀦𑀺 𑀫𑀸𑀢𑀸𑀧𑀺𑀢𑀽𑀳𑀺 𑀲𑀩𑁆𑀭𑀳𑁆𑀫𑀓𑀸𑀦𑀻𑀢𑀺 𑀧𑀓𑀸𑀲𑁂𑀢𑁆𑀯𑀸 𑀇𑀤𑀸𑀦𑀺 𑀦𑁂𑀲𑀁 𑀲𑀧𑀼𑀩𑁆𑀩𑀸𑀘𑀭𑀺𑀬𑀓𑀸𑀤𑀺𑀪𑀸𑀯𑀁 𑀧𑀓𑀸𑀲𑁂𑀦𑁆𑀢𑁄 𑀲𑀧𑀼𑀩𑁆𑀩𑀸𑀘𑀭𑀺𑀬𑀓𑀸𑀦𑀻𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀩𑁆𑀭𑀳𑁆𑀫𑀸𑀢𑀺𑀆𑀤𑀻𑀦𑀺 𑀢𑁂𑀲𑀁 𑀩𑁆𑀭𑀳𑁆𑀫𑀸𑀤𑀺𑀪𑀸𑀯𑀲𑀸𑀥𑀦𑀢𑁆𑀣𑀁 𑀯𑀼𑀢𑁆𑀢𑀸𑀦𑀺. 𑀩𑀳𑀼𑀓𑀸𑀭𑀸𑀢𑀺 𑀧𑀼𑀢𑁆𑀢𑀸𑀦𑀁 𑀩𑀳𑀽𑀧𑀓𑀸𑀭𑀸. 𑀆𑀧𑀸𑀤𑀓𑀸𑀢𑀺 𑀚𑀻𑀯𑀺𑀢𑀲𑁆𑀲 𑀆𑀧𑀸𑀤𑀓𑀸. 𑀧𑀼𑀢𑁆𑀢𑀓𑀸𑀦𑀁 𑀳𑀺 𑀫𑀸𑀢𑀸𑀧𑀺𑀢𑀽𑀳𑀺 𑀚𑀻𑀯𑀺𑀢𑀁 𑀆𑀧𑀸𑀤𑀺𑀢𑀁 𑀧𑀸𑀮𑀺𑀢𑀁 𑀖𑀝𑀺𑀢𑀁 𑀅𑀦𑀼𑀧𑁆𑀧𑀩𑀦𑁆𑀥𑁂𑀦 𑀧𑀯𑀢𑁆𑀢𑀺𑀢𑀁. 𑀧𑁄𑀲𑀓𑀸𑀢𑀺 𑀳𑀢𑁆𑀣𑀧𑀸𑀤𑁂 𑀯𑀟𑁆𑀠𑁂𑀢𑁆𑀯𑀸 𑀳𑀤𑀬𑀮𑁄𑀳𑀺𑀢𑀁 𑀧𑀸𑀬𑁂𑀢𑁆𑀯𑀸 𑀧𑁄𑀲𑁂𑀢𑀸𑀭𑁄. 𑀇𑀫𑀲𑁆𑀲 𑀮𑁄𑀓𑀲𑁆𑀲 𑀤𑀲𑁆𑀲𑁂𑀢𑀸𑀭𑁄𑀢𑀺 𑀧𑀼𑀢𑁆𑀢𑀸𑀦𑀁 𑀳𑀺 𑀇𑀫𑀲𑁆𑀫𑀺𑀁 𑀮𑁄𑀓𑁂 𑀇𑀝𑁆𑀞𑀸𑀦𑀺𑀝𑁆𑀞𑀸𑀭𑀫𑁆𑀫𑀡𑀲𑁆𑀲 𑀤𑀲𑁆𑀲𑀦𑀁 𑀦𑀸𑀫 𑀫𑀸𑀢𑀸𑀧𑀺𑀢𑀭𑁄 𑀦𑀺𑀲𑁆𑀲𑀸𑀬 𑀚𑀸𑀢𑀦𑁆𑀢𑀺 𑀇𑀫𑀲𑁆𑀲 𑀮𑁄𑀓𑀲𑁆𑀲 𑀤𑀲𑁆𑀲𑁂𑀢𑀸𑀭𑁄 𑀦𑀸𑀫.

𑀩𑁆𑀭𑀳𑁆𑀫𑀸𑀢𑀺 𑀫𑀸𑀢𑀸𑀧𑀺𑀢𑀭𑁄𑀢𑀺 𑀲𑁂𑀝𑁆𑀞𑀸𑀥𑀺𑀯𑀘𑀦𑀁. 𑀬𑀣𑀸 𑀩𑁆𑀭𑀳𑁆𑀫𑀼𑀦𑁄 𑀘𑀢𑀲𑁆𑀲𑁄 𑀪𑀸𑀯𑀦𑀸 𑀅𑀯𑀺𑀚𑀳𑀺𑀢𑀸 𑀳𑁄𑀦𑁆𑀢𑀺 𑀫𑁂𑀢𑁆𑀢𑀸 𑀓𑀭𑀼𑀡𑀸 𑀫𑀼𑀤𑀺𑀢𑀸 𑀉𑀧𑁂𑀓𑁆𑀔𑀸𑀢𑀺, 𑀏𑀯𑀫𑁂𑀯 𑀫𑀸𑀢𑀸𑀧𑀺𑀢𑀽𑀦𑀁 𑀧𑀼𑀢𑁆𑀢𑀓𑁂𑀲𑀼 𑀘𑀢𑀲𑁆𑀲𑁄 𑀪𑀸𑀯𑀦𑀸 𑀅𑀯𑀺𑀚𑀳𑀺𑀢𑀸 𑀳𑁄𑀦𑁆𑀢𑀺. 𑀢𑀸 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀓𑀸𑀮𑁂 𑀯𑁂𑀤𑀺𑀢𑀩𑁆𑀩𑀸 𑁋 𑀓𑀼𑀘𑁆𑀙𑀺𑀕𑀢𑀲𑁆𑀫𑀺𑀁 𑀳𑀺 𑀤𑀸𑀭𑀓𑁂 ‘‘𑀓𑀤𑀸 𑀦𑀼 𑀔𑁄 𑀧𑀼𑀢𑁆𑀢𑀓𑀁 𑀅𑀭𑁄𑀕𑀁 𑀧𑀭𑀺𑀧𑀼𑀡𑁆𑀡𑀗𑁆𑀕𑀧𑀘𑁆𑀘𑀗𑁆𑀕𑀁 𑀧𑀲𑁆𑀲𑀺𑀲𑁆𑀲𑀸𑀫𑀸’’𑀢𑀺 𑀫𑀸𑀢𑀸𑀧𑀺𑀢𑀽𑀦𑀁 𑀫𑁂𑀢𑁆𑀢𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺. 𑀬𑀤𑀸 𑀧𑀦𑁂𑀲 𑀫𑀦𑁆𑀤𑁄 𑀉𑀢𑁆𑀢𑀸𑀦𑀲𑁂𑀬𑁆𑀬𑀓𑁄 𑀊𑀓𑀸𑀳𑀺 𑀯𑀸 𑀫𑀗𑁆𑀓𑀼𑀮𑀸𑀤𑀻𑀳𑀺 𑀧𑀸𑀡𑀓𑁂𑀳𑀺 𑀤𑀝𑁆𑀞𑁄 𑀤𑀼𑀓𑁆𑀔𑀲𑁂𑀬𑁆𑀬𑀸𑀬 𑀯𑀸 𑀧𑀦 𑀧𑀻𑀴𑀺𑀢𑁄 𑀧𑀭𑁄𑀤𑀢𑀺 𑀯𑀺𑀭𑀯𑀢𑀺, 𑀢𑀤𑀸𑀲𑁆𑀲 𑀲𑀤𑁆𑀤𑀁 𑀲𑀼𑀢𑁆𑀯𑀸 𑀫𑀸𑀢𑀸𑀧𑀺𑀢𑀽𑀦𑀁 𑀓𑀸𑀭𑀼𑀜𑁆𑀜𑀁 𑀉𑀧𑁆𑀧𑀚𑁆𑀚𑀢𑀺, 𑀆𑀥𑀸𑀯𑀺𑀢𑁆𑀯𑀸 𑀯𑀺𑀥𑀸𑀯𑀺𑀢𑁆𑀯𑀸 𑀓𑀻𑀴𑀦𑀓𑀸𑀮𑁂 𑀧𑀦 𑀮𑁄𑀪𑀦𑀻𑀬𑀯𑀬𑀲𑁆𑀫𑀺𑀁 𑀯𑀸 𑀞𑀺𑀢𑀓𑀸𑀮𑁂 𑀤𑀸𑀭𑀓𑀁 𑀑𑀮𑁄𑀓𑁂𑀢𑁆𑀯𑀸 𑀫𑀸𑀢𑀸𑀧𑀺𑀢𑀽𑀦𑀁 𑀘𑀺𑀢𑁆𑀢𑀁 𑀲𑀧𑁆𑀧𑀺𑀫𑀡𑁆𑀟𑁂 𑀧𑀓𑁆𑀔𑀺𑀢𑁆𑀢𑀲𑀢𑀯𑀺𑀳𑀢𑀓𑀧𑁆𑀧𑀸𑀲𑀧𑀺𑀘𑀼𑀧𑀝𑀮𑀁 𑀯𑀺𑀬 𑀫𑀼𑀤𑀼𑀓𑀁 𑀳𑁄𑀢𑀺 𑀆𑀫𑁄𑀤𑀺𑀢𑀁 𑀧𑀫𑁄𑀤𑀺𑀢𑀁, 𑀢𑀤𑀸 𑀢𑁂𑀲𑀁 𑀫𑀼𑀤𑀺𑀢𑀸 𑀮𑀩𑁆𑀪𑀢𑀺. 𑀬𑀤𑀸 𑀧𑀦𑁂𑀲 𑀧𑀼𑀢𑁆𑀢𑁄 𑀤𑀸𑀭𑀸𑀪𑀭𑀡𑀁 𑀧𑀘𑁆𑀘𑀼𑀧𑀝𑁆𑀞𑀸𑀧𑁂𑀢𑁆𑀯𑀸 𑀧𑀸𑀝𑀺𑀬𑁂𑀓𑁆𑀓𑀁 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀢𑀺, 𑀢𑀤𑀸 𑀫𑀸𑀢𑀸𑀧𑀺𑀢𑀽𑀦𑀁 ‘‘𑀲𑀓𑁆𑀓𑁄𑀢𑀺 𑀤𑀸𑀦𑀺 𑀦𑁄 𑀧𑀼𑀢𑁆𑀢𑀓𑁄 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀬𑀸𑀧𑁂𑀢𑀼’’𑀦𑁆𑀢𑀺 𑀫𑀚𑁆𑀛𑀢𑁆𑀢𑀪𑀸𑀯𑁄 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀫𑀺𑀁 𑀓𑀸𑀮𑁂 𑀉𑀧𑁂𑀓𑁆𑀔𑀸 𑀮𑀩𑁆𑀪𑀢𑀻𑀢𑀺 𑀇𑀫𑀺𑀦𑀸 𑀓𑀸𑀭𑀡𑁂𑀦 ‘‘𑀩𑁆𑀭𑀳𑁆𑀫𑀸𑀢𑀺 𑀫𑀸𑀢𑀸𑀧𑀺𑀢𑀭𑁄’’𑀢𑀺 𑀯𑀼𑀢𑁆𑀢𑀁.

𑀧𑀼𑀩𑁆𑀩𑀸𑀘𑀭𑀺𑀬𑀸𑀢𑀺 𑀯𑀼𑀘𑁆𑀘𑀭𑁂𑀢𑀺 𑀫𑀸𑀢𑀸𑀧𑀺𑀢𑀭𑁄 𑀳𑀺 𑀚𑀸𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 ‘‘𑀏𑀯𑀁 𑀦𑀺𑀲𑀻𑀤, 𑀏𑀯𑀁 𑀢𑀺𑀝𑁆𑀞, 𑀏𑀯𑀁 𑀕𑀘𑁆𑀙, 𑀏𑀯𑀁 𑀲𑀬, 𑀏𑀯𑀁 𑀔𑀸𑀤, 𑀏𑀯𑀁 𑀪𑀼𑀜𑁆𑀚, 𑀅𑀬𑀁 𑀢𑁂, 𑀢𑀸𑀢𑀸𑀢𑀺 𑀯𑀢𑁆𑀢𑀩𑁆𑀩𑁄, 𑀅𑀬𑀁 𑀪𑀸𑀢𑀺𑀓𑀸𑀢𑀺, 𑀅𑀬𑀁 𑀪𑀕𑀺𑀦𑀻𑀢𑀺, 𑀇𑀤𑀁 𑀦𑀸𑀫 𑀓𑀸𑀢𑀼𑀁 𑀯𑀝𑁆𑀝𑀢𑀺, 𑀇𑀤𑀁 𑀦 𑀯𑀝𑁆𑀝𑀢𑀺, 𑀅𑀲𑀼𑀓𑀁 𑀦𑀸𑀫 𑀉𑀧𑀲𑀗𑁆𑀓𑀫𑀺𑀢𑀼𑀁 𑀯𑀝𑁆𑀝𑀢𑀺, 𑀅𑀲𑀼𑀓𑀁 𑀦 𑀯𑀝𑁆𑀝𑀢𑀻’’𑀢𑀺 𑀕𑀸𑀳𑀸𑀧𑁂𑀦𑁆𑀢𑀺 𑀲𑀺𑀓𑁆𑀔𑀸𑀧𑁂𑀦𑁆𑀢𑀺. 𑀅𑀣𑀸𑀧𑀭𑀪𑀸𑀕𑁂 𑀅𑀜𑁆𑀜𑁂 𑀆𑀘𑀭𑀺𑀬𑀸 𑀳𑀢𑁆𑀣𑀺𑀲𑀺𑀧𑁆𑀧𑀅𑀲𑁆𑀲𑀲𑀺𑀧𑁆𑀧𑀭𑀣𑀲𑀺𑀧𑁆𑀧𑀥𑀦𑀼𑀲𑀺𑀧𑁆𑀧𑀣𑀭𑀼𑀲𑀺𑀧𑁆𑀧𑀫𑀼𑀤𑁆𑀤𑀸𑀕𑀡𑀦𑀸𑀤𑀻𑀦𑀺 𑀲𑀺𑀓𑁆𑀔𑀸𑀧𑁂𑀦𑁆𑀢𑀺. 𑀅𑀜𑁆𑀜𑁄 𑀲𑀭𑀡𑀸𑀦𑀺 𑀤𑁂𑀢𑀺, 𑀅𑀜𑁆𑀜𑁄 𑀲𑀻𑀮𑁂𑀲𑀼 𑀧𑀢𑀺𑀝𑁆𑀞𑀸𑀧𑁂𑀢𑀺, 𑀅𑀜𑁆𑀜𑁄 𑀧𑀩𑁆𑀩𑀸𑀚𑁂𑀢𑀺, 𑀅𑀜𑁆𑀜𑁄 𑀩𑀼𑀤𑁆𑀥𑀯𑀘𑀦𑀁 𑀉𑀕𑁆𑀕𑀡𑁆𑀳𑀸𑀧𑁂𑀢𑀺, 𑀅𑀜𑁆𑀜𑁄 𑀉𑀧𑀲𑀫𑁆𑀧𑀸𑀤𑁂𑀢𑀺, 𑀅𑀜𑁆𑀜𑁄 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀸𑀤𑀻𑀦𑀺 𑀧𑀸𑀧𑁂𑀢𑀺. 𑀇𑀢𑀺 𑀲𑀩𑁆𑀩𑁂𑀧𑀺 𑀢𑁂 𑀧𑀘𑁆𑀙𑀸𑀘𑀭𑀺𑀬𑀸 𑀦𑀸𑀫 𑀳𑁄𑀦𑁆𑀢𑀺, 𑀫𑀸𑀢𑀸𑀧𑀺𑀢𑀭𑁄 𑀧𑀦 𑀲𑀩𑁆𑀩𑀧𑀞𑀫𑀸, 𑀢𑁂𑀦𑀸𑀳 𑁋 ‘‘𑀧𑀼𑀩𑁆𑀩𑀸𑀘𑀭𑀺𑀬𑀸𑀢𑀺 𑀯𑀼𑀘𑁆𑀘𑀭𑁂’’𑀢𑀺. 𑀢𑀢𑁆𑀣 𑀯𑀼𑀘𑁆𑀘𑀭𑁂𑀢𑀺 𑀯𑀼𑀘𑁆𑀘𑀦𑁆𑀢𑀺 𑀓𑀣𑀺𑀬𑀦𑁆𑀢𑀺. 𑀆𑀳𑀼𑀦𑁂𑀬𑁆𑀬𑀸 𑀘 𑀧𑀼𑀢𑁆𑀢𑀸𑀦𑀦𑁆𑀢𑀺 𑀧𑀼𑀢𑁆𑀢𑀸𑀦𑀁 𑀆𑀳𑀼𑀢𑀁 𑀧𑀸𑀳𑀼𑀢𑀁 𑀅𑀪𑀺𑀲𑀗𑁆𑀔𑀢𑀁 𑀅𑀦𑁆𑀦𑀧𑀸𑀦𑀸𑀤𑀺𑀁 𑀅𑀭𑀳𑀦𑁆𑀢𑀺, 𑀅𑀦𑀼𑀘𑁆𑀙𑀯𑀺𑀓𑀸 𑀢𑀁 𑀧𑀝𑀺𑀕𑁆𑀕𑀳𑁂𑀢𑀼𑀁. 𑀢𑀲𑁆𑀫𑀸 ‘‘𑀆𑀳𑀼𑀦𑁂𑀬𑁆𑀬𑀸 𑀘 𑀧𑀼𑀢𑁆𑀢𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀧𑀚𑀸𑀬 𑀅𑀦𑀼𑀓𑀫𑁆𑀧𑀓𑀸𑀢𑀺 𑀧𑀭𑁂𑀲𑀁 𑀧𑀸𑀡𑁂 𑀅𑀘𑁆𑀙𑀺𑀦𑁆𑀤𑀺𑀢𑁆𑀯𑀸𑀧𑀺 𑀅𑀢𑁆𑀢𑀦𑁄 𑀧𑀚𑀁 𑀧𑀝𑀺𑀚𑀕𑁆𑀕𑀦𑁆𑀢𑀺 𑀕𑁄𑀧𑀸𑀬𑀦𑁆𑀢𑀺. 𑀢𑀲𑁆𑀫𑀸 ‘‘𑀧𑀚𑀸𑀬 𑀅𑀦𑀼𑀓𑀫𑁆𑀧𑀓𑀸’’𑀢𑀺 𑀯𑀼𑀢𑁆𑀢𑀁.

𑀦𑀫𑀲𑁆𑀲𑁂𑀬𑁆𑀬𑀸𑀢𑀺 𑀦𑀫𑁄 𑀓𑀭𑁂𑀬𑁆𑀬. 𑀲𑀓𑁆𑀓𑀭𑁂𑀬𑁆𑀬𑀸𑀢𑀺 𑀲𑀓𑁆𑀓𑀸𑀭𑁂𑀦 𑀧𑀝𑀺𑀫𑀸𑀦𑁂𑀬𑁆𑀬. 𑀇𑀤𑀸𑀦𑀺 𑀢𑀁 𑀲𑀓𑁆𑀓𑀸𑀭𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀦𑁆𑀦𑁂𑀦𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀦𑁆𑀦𑁂𑀦𑀸𑀢𑀺 𑀬𑀸𑀕𑀼𑀪𑀢𑁆𑀢𑀔𑀸𑀤𑀦𑀻𑀬𑁂𑀦. 𑀧𑀸𑀦𑁂𑀦𑀸𑀢𑀺 𑀅𑀝𑁆𑀞𑀯𑀺𑀥𑀧𑀸𑀦𑁂𑀦. 𑀯𑀢𑁆𑀣𑁂𑀦𑀸𑀢𑀺 𑀦𑀺𑀯𑀸𑀲𑀦𑀧𑀸𑀭𑀼𑀧𑀦𑀓𑁂𑀦 𑀯𑀢𑁆𑀣𑁂𑀦. 𑀲𑀬𑀦𑁂𑀦𑀸𑀢𑀺 𑀫𑀜𑁆𑀘𑀧𑀻𑀞𑀸𑀦𑀼𑀧𑁆𑀧𑀤𑀸𑀦𑁂𑀦. 𑀉𑀘𑁆𑀙𑀸𑀤𑀦𑁂𑀦𑀸𑀢𑀺 𑀤𑀼𑀕𑁆𑀕𑀦𑁆𑀥𑀁 𑀧𑀝𑀺𑀯𑀺𑀦𑁄𑀤𑁂𑀢𑁆𑀯𑀸 𑀲𑀼𑀕𑀦𑁆𑀥𑀓𑀭𑀡𑀼𑀘𑁆𑀙𑀸𑀤𑀦𑁂𑀦. 𑀦𑁆𑀳𑀸𑀧𑀦𑁂𑀦𑀸𑀢𑀺 𑀲𑀻𑀢𑁂 𑀉𑀡𑁆𑀳𑁄𑀤𑀓𑁂𑀦, 𑀉𑀡𑁆𑀳𑁂 𑀲𑀻𑀢𑁄𑀤𑀓𑁂𑀦 𑀕𑀢𑁆𑀢𑀸𑀦𑀺 𑀧𑀭𑀺𑀲𑀺𑀜𑁆𑀘𑀺𑀢𑁆𑀯𑀸 𑀦𑁆𑀳𑀸𑀧𑀦𑁂𑀦. 𑀧𑀸𑀤𑀸𑀦𑀁 𑀥𑁄𑀯𑀦𑁂𑀦𑀸𑀢𑀺 𑀉𑀡𑁆𑀳𑁄𑀤𑀓𑀲𑀻𑀢𑁄𑀤𑀓𑁂𑀳𑀺 𑀧𑀸𑀤𑀥𑁄𑀯𑀦𑁂𑀦 𑀘𑁂𑀯 𑀢𑁂𑀮𑀫𑀓𑁆𑀔𑀦𑁂𑀦 𑀘. 𑀧𑁂𑀘𑁆𑀘𑀸𑀢𑀺 𑀧𑀭𑀮𑁄𑀓𑀁 𑀕𑀦𑁆𑀢𑁆𑀯𑀸. 𑀲𑀕𑁆𑀕𑁂 𑀧𑀫𑁄𑀤𑀢𑀻𑀢𑀺 𑀇𑀥 𑀢𑀸𑀯 𑀫𑀸𑀢𑀸𑀧𑀺𑀢𑀽𑀲𑀼 𑀧𑀸𑀭𑀺𑀘𑀭𑀺𑀬𑀁 𑀤𑀺𑀲𑁆𑀯𑀸 𑀧𑀸𑀭𑀺𑀘𑀭𑀺𑀬𑀓𑀸𑀭𑀡𑀸 𑀢𑀁 𑀧𑀡𑁆𑀟𑀺𑀢𑀫𑀦𑀼𑀲𑁆𑀲𑀸 𑀇𑀥𑁂𑀯 𑀧𑀲𑀁𑀲𑀦𑁆𑀢𑀺, 𑀧𑀭𑀮𑁄𑀓𑀁 𑀧𑀦 𑀕𑀦𑁆𑀢𑁆𑀯𑀸 𑀲𑀕𑁆𑀕𑁂 𑀞𑀺𑀢𑁄 𑀲𑁄 𑀫𑀸𑀢𑀸𑀧𑀺𑀢𑀼𑀉𑀧𑀝𑁆𑀞𑀸𑀓𑁄 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀻𑀳𑀺 𑀆𑀫𑁄𑀤𑀢𑀺 𑀧𑀫𑁄𑀤𑀢𑀻𑀢𑀺.

𑁨. 𑀆𑀦𑀦𑁆𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁨. 𑀤𑀼𑀢𑀺𑀬𑁂 𑀢𑀣𑀸𑀭𑀽𑀧𑁄𑀢𑀺 𑀢𑀣𑀸𑀚𑀸𑀢𑀺𑀓𑁄. 𑀲𑀫𑀸𑀥𑀺𑀧𑀝𑀺𑀮𑀸𑀪𑁄𑀢𑀺 𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀮𑀸𑀪𑁄. 𑀇𑀫𑀲𑁆𑀫𑀺𑀁 𑀘 𑀲𑀯𑀺𑀜𑁆𑀜𑀸𑀡𑀓𑁂𑀢𑀺 𑀏𑀢𑁆𑀣 𑀅𑀢𑁆𑀢𑀦𑁄 𑀘 𑀧𑀭𑀲𑁆𑀲 𑀘𑀸𑀢𑀺 𑀉𑀪𑀬𑁂𑀲𑀫𑁆𑀧𑀺 𑀓𑀸𑀬𑁄 𑀲𑀯𑀺𑀜𑁆𑀜𑀸𑀡𑀓𑀝𑁆𑀞𑁂𑀦 𑀏𑀓𑀢𑁄 𑀓𑀢𑁆𑀯𑀸 𑀇𑀫𑀲𑁆𑀫𑀺𑀦𑁆𑀢𑀺 𑀯𑀼𑀢𑁆𑀢𑁄. 𑀅𑀳𑀗𑁆𑀓𑀸𑀭𑀫𑀫𑀗𑁆𑀓𑀸𑀭𑀫𑀸𑀦𑀸𑀦𑀼𑀲𑀬𑀸𑀢𑀺 𑀅𑀳𑀗𑁆𑀓𑀸𑀭𑀤𑀺𑀝𑁆𑀞𑀺 𑀘 𑀫𑀫𑀗𑁆𑀓𑀸𑀭𑀢𑀡𑁆𑀳𑀸 𑀘 𑀫𑀸𑀦𑀸𑀦𑀼𑀲𑀬𑁄 𑀘𑀸𑀢𑀺 𑀅𑀢𑁆𑀢𑀦𑁄 𑀘 𑀧𑀭𑀲𑁆𑀲 𑀘 𑀓𑀺𑀮𑁂𑀲𑀸. 𑀦𑀸𑀲𑁆𑀲𑀽𑀢𑀺 𑀦 𑀪𑀯𑁂𑀬𑁆𑀬𑀼𑀁. 𑀩𑀳𑀺𑀤𑁆𑀥𑀸 𑀘 𑀲𑀩𑁆𑀩𑀦𑀺𑀫𑀺𑀢𑁆𑀢𑁂𑀲𑀽𑀢𑀺 𑀭𑀽𑀧𑀦𑀺𑀫𑀺𑀢𑁆𑀢𑀁, 𑀲𑀤𑁆𑀤𑀦𑀺𑀫𑀺𑀢𑁆𑀢𑀁, 𑀕𑀦𑁆𑀥𑀦𑀺𑀫𑀺𑀢𑁆𑀢𑀁, 𑀭𑀲𑀦𑀺𑀫𑀺𑀢𑁆𑀢𑀁, 𑀨𑁄𑀝𑁆𑀞𑀩𑁆𑀩𑀦𑀺𑀫𑀺𑀢𑁆𑀢𑀁, 𑀲𑀲𑁆𑀲𑀢𑀸𑀤𑀺𑀦𑀺𑀫𑀺𑀢𑁆𑀢𑀁, 𑀧𑀼𑀕𑁆𑀕𑀮𑀦𑀺𑀫𑀺𑀢𑁆𑀢𑀁 𑀥𑀫𑁆𑀫𑀦𑀺𑀫𑀺𑀢𑁆𑀢𑀦𑁆𑀢𑀺 𑀏𑀯𑀭𑀽𑀧𑁂𑀲𑀼 𑀘 𑀩𑀳𑀺𑀤𑁆𑀥𑀸 𑀲𑀩𑁆𑀩𑀦𑀺𑀫𑀺𑀢𑁆𑀢𑁂𑀲𑀼. 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀦𑁆𑀢𑀺 𑀨𑀮𑀲𑀫𑀸𑀥𑀺𑀜𑁆𑀘𑁂𑀯 𑀨𑀮𑀜𑀸𑀡𑀜𑁆𑀘. 𑀲𑀺𑀬𑀸𑀢𑀺 𑀪𑀯𑁂𑀬𑁆𑀬.

𑀇𑀥𑀸𑀦𑀦𑁆𑀤, 𑀪𑀺𑀓𑁆𑀔𑀼𑀦𑁄𑀢𑀺, 𑀆𑀦𑀦𑁆𑀤, 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀪𑀺𑀓𑁆𑀔𑀼𑀦𑁄. 𑀏𑀢𑀁 𑀲𑀦𑁆𑀢𑀁 𑀏𑀢𑀁 𑀧𑀡𑀻𑀢𑀦𑁆𑀢𑀺 𑀦𑀺𑀩𑁆𑀩𑀸𑀦𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳. 𑀦𑀺𑀩𑁆𑀩𑀸𑀦𑀁 𑀳𑀺 𑀓𑀺𑀮𑁂𑀲𑀸𑀦𑀁 𑀲𑀦𑁆𑀢𑀢𑀸𑀬 𑀲𑀦𑁆𑀢𑀁 𑀦𑀸𑀫, 𑀦𑀺𑀩𑁆𑀩𑀸𑀦𑀁 𑀲𑀦𑁆𑀢𑀦𑁆𑀢𑀺 𑀲𑀫𑀸𑀧𑀢𑁆𑀢𑀺𑀁 𑀅𑀧𑁆𑀧𑁂𑀢𑁆𑀯𑀸𑀯 𑀤𑀺𑀯𑀲𑀫𑁆𑀧𑀺 𑀦𑀺𑀲𑀺𑀦𑁆𑀦𑀲𑁆𑀲 𑀘𑀺𑀢𑁆𑀢𑀼𑀧𑁆𑀧𑀸𑀤𑁄 𑀲𑀦𑁆𑀢𑀦𑁆𑀢𑁂𑀯 𑀧𑀯𑀢𑁆𑀢𑀢𑀻𑀢𑀺𑀧𑀺 𑀲𑀦𑁆𑀢𑀁. 𑀧𑀡𑀻𑀢𑀦𑁆𑀢𑀺 𑀲𑀫𑀸𑀧𑀢𑁆𑀢𑀺𑀁 𑀅𑀧𑁆𑀧𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑀲𑁆𑀲𑀸𑀧𑀺 𑀘𑀺𑀢𑁆𑀢𑀼𑀧𑁆𑀧𑀸𑀤𑁄 𑀧𑀡𑀻𑀢𑀦𑁆𑀢𑁂𑀯 𑀧𑀯𑀢𑁆𑀢𑀢𑀻𑀢𑀺 𑀦𑀺𑀩𑁆𑀩𑀸𑀦𑀁 𑀧𑀡𑀻𑀢𑀁 𑀦𑀸𑀫. 𑀲𑀩𑁆𑀩𑀲𑀗𑁆𑀔𑀸𑀭𑀲𑀫𑀣𑁄𑀢𑀺𑀆𑀤𑀻𑀦𑀺𑀧𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀸𑀦𑀺. ‘‘𑀲𑀩𑁆𑀩𑀲𑀗𑁆𑀔𑀸𑀭𑀲𑀫𑀣𑁄’’𑀢𑀺 𑀲𑀫𑀸𑀧𑀢𑁆𑀢𑀺𑀁 𑀅𑀧𑁆𑀧𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑀲𑁆𑀲 𑀳𑀺 𑀤𑀺𑀯𑀲𑀪𑀸𑀕𑀫𑁆𑀧𑀺 𑀘𑀺𑀢𑁆𑀢𑀼𑀧𑁆𑀧𑀸𑀤𑁄 𑀲𑀩𑁆𑀩𑀲𑀗𑁆𑀔𑀸𑀭𑀲𑀫𑀣𑁄𑀢𑁂𑀯 𑀧𑀯𑀢𑁆𑀢𑀢𑀺…𑀧𑁂… 𑀢𑀣𑀸 𑀢𑀻𑀲𑀼 𑀪𑀯𑁂𑀲𑀼 𑀯𑀸𑀦𑀲𑀗𑁆𑀔𑀸𑀢𑀸𑀬 𑀢𑀡𑁆𑀳𑀸𑀬 𑀅𑀪𑀸𑀯𑁂𑀦 𑀦𑀺𑀩𑁆𑀩𑀸𑀦𑀦𑁆𑀢𑀺 𑀮𑀤𑁆𑀥𑀦𑀸𑀫𑁂 𑀢𑀲𑁆𑀫𑀺𑀁 𑀲𑀫𑀸𑀧𑀢𑁆𑀢𑀺𑀁 𑀅𑀧𑁆𑀧𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑀲𑁆𑀲 𑀘𑀺𑀢𑁆𑀢𑀼𑀧𑁆𑀧𑀸𑀤𑁄 𑀦𑀺𑀩𑁆𑀩𑀸𑀦𑀁 𑀦𑀺𑀩𑁆𑀩𑀸𑀦𑀦𑁆𑀢𑁂𑀯 𑀧𑀯𑀢𑁆𑀢𑀢𑀻𑀢𑀺 𑀲𑀩𑁆𑀩𑀲𑀗𑁆𑀔𑀸𑀭𑀲𑀫𑀣𑁄𑀢𑀺𑀆𑀤𑀻𑀦𑀺 𑀦𑀸𑀫𑀸𑀦𑀺 𑀮𑀪𑀢𑀺. 𑀇𑀫𑀲𑁆𑀫𑀺𑀁 𑀧𑀦 𑀅𑀝𑁆𑀞𑀯𑀺𑀥𑁂 𑀆𑀪𑁄𑀕𑀲𑀫𑀦𑁆𑀦𑀸𑀳𑀸𑀭𑁂 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀏𑀓𑁄𑀧𑀺 𑀮𑀩𑁆𑀪𑀢𑀺, 𑀤𑁆𑀯𑁂𑀧𑀺 𑀲𑀩𑁆𑀩𑁂𑀧𑀺 𑀮𑀩𑁆𑀪𑀦𑁆𑀢𑁂𑀯.

𑀲𑀗𑁆𑀔𑀸𑀬𑀸𑀢𑀺 𑀜𑀸𑀡𑁂𑀦 𑀚𑀸𑀦𑀺𑀢𑁆𑀯𑀸. 𑀧𑀭𑁄𑀧𑀭𑀸𑀦𑀻𑀢𑀺 𑀧𑀭𑀸𑀦𑀺 𑀘 𑀑𑀧𑀭𑀸𑀦𑀺 𑀘. 𑀧𑀭𑀅𑀢𑁆𑀢𑀪𑀸𑀯𑀲𑀓𑀅𑀢𑁆𑀢𑀪𑀸𑀯𑀸𑀦𑀺 𑀳𑀺 𑀧𑀭𑀸𑀦𑀺 𑀘 𑀑𑀧𑀭𑀸𑀦𑀺 𑀘𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀬𑀲𑁆𑀲𑀸𑀢𑀺 𑀬𑀲𑁆𑀲 𑀅𑀭𑀳𑀢𑁄. 𑀇𑀜𑁆𑀚𑀺𑀢𑀦𑁆𑀢𑀺 𑀭𑀸𑀕𑀺𑀜𑁆𑀚𑀺𑀢𑀁 𑀤𑁄𑀲𑀫𑁄𑀳𑀫𑀸𑀦𑀤𑀺𑀝𑁆𑀞𑀺𑀓𑀺𑀮𑁂𑀲𑀤𑀼𑀘𑁆𑀘𑀭𑀺𑀢𑀺𑀜𑁆𑀚𑀺𑀢𑀦𑁆𑀢𑀺 𑀇𑀫𑀸𑀦𑀺 𑀲𑀢𑁆𑀢 𑀇𑀜𑁆𑀚𑀺𑀢𑀸𑀦𑀺 𑀘𑀮𑀺𑀢𑀸𑀦𑀺 𑀨𑀦𑁆𑀤𑀺𑀢𑀸𑀦𑀺. 𑀦𑀢𑁆𑀣𑀺 𑀓𑀼𑀳𑀺𑀜𑁆𑀘𑀻𑀢𑀺 𑀓𑀢𑁆𑀣𑀘𑀺 𑀏𑀓𑀸𑀭𑀫𑁆𑀫𑀡𑁂𑀧𑀺 𑀦𑀢𑁆𑀣𑀺. 𑀲𑀦𑁆𑀢𑁄𑀢𑀺 𑀧𑀘𑁆𑀘𑀦𑀻𑀓𑀓𑀺𑀮𑁂𑀲𑀸𑀦𑀁 𑀲𑀦𑁆𑀢𑀢𑀸𑀬 𑀲𑀦𑁆𑀢𑁄. 𑀯𑀺𑀥𑀽𑀫𑁄𑀢𑀺 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀺𑀥𑀽𑀫𑀯𑀺𑀭𑀳𑀺𑀢𑁄. 𑀅𑀦𑀻𑀖𑁄𑀢𑀺 𑀭𑀸𑀕𑀸𑀤𑀺𑀈𑀖𑀯𑀺𑀭𑀳𑀺𑀢𑁄. 𑀦𑀺𑀭𑀸𑀲𑁄𑀢𑀺 𑀦𑀺𑀢𑁆𑀢𑀡𑁆𑀳𑁄. 𑀅𑀢𑀸𑀭𑀻𑀢𑀺 𑀢𑀺𑀡𑁆𑀡𑁄 𑀉𑀢𑁆𑀢𑀺𑀡𑁆𑀡𑁄 𑀲𑀫𑀢𑀺𑀓𑁆𑀓𑀦𑁆𑀢𑁄. 𑀲𑁄𑀢𑀺 𑀲𑁄 𑀅𑀭𑀳𑀁 𑀔𑀻𑀡𑀸𑀲𑀯𑁄. 𑀚𑀸𑀢𑀺𑀚𑀭𑀦𑁆𑀢𑀺 𑀏𑀢𑁆𑀣 𑀚𑀸𑀢𑀺𑀚𑀭𑀸𑀕𑀳𑀡𑁂𑀦𑁂𑀯 𑀩𑁆𑀬𑀸𑀥𑀺𑀫𑀭𑀡𑀫𑁆𑀧𑀺 𑀕𑀳𑀺𑀢𑀫𑁂𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀇𑀢𑀺 𑀲𑀼𑀢𑁆𑀢𑀦𑁆𑀢𑁂𑀧𑀺 𑀕𑀸𑀣𑀸𑀬𑀧𑀺 𑀅𑀭𑀳𑀢𑁆𑀢𑀨𑀮𑀲𑀫𑀸𑀧𑀢𑁆𑀢𑀺𑀬𑁂𑀯 𑀓𑀣𑀺𑀢𑀸𑀢𑀺.

𑁩. 𑀲𑀸𑀭𑀺𑀧𑀼𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁩. 𑀢𑀢𑀺𑀬𑁂 𑀲𑀁𑀔𑀺𑀢𑁆𑀢𑁂𑀦𑀸𑀢𑀺 𑀫𑀸𑀢𑀺𑀓𑀸𑀞𑀧𑀦𑁂𑀦. 𑀯𑀺𑀢𑁆𑀣𑀸𑀭𑁂𑀦𑀸𑀢𑀺 𑀞𑀧𑀺𑀢𑀫𑀸𑀢𑀺𑀓𑀸𑀯𑀺𑀪𑀚𑀦𑁂𑀦. 𑀲𑀁𑀔𑀺𑀢𑁆𑀢𑀯𑀺𑀢𑁆𑀣𑀸𑀭𑁂𑀦𑀸𑀢𑀺 𑀓𑀸𑀮𑁂 𑀲𑀁𑀔𑀺𑀢𑁆𑀢𑁂𑀦 𑀓𑀸𑀮𑁂 𑀯𑀺𑀢𑁆𑀣𑀸𑀭𑁂𑀦. 𑀅𑀜𑁆𑀜𑀸𑀢𑀸𑀭𑁄 𑀘 𑀤𑀼𑀮𑁆𑀮𑀪𑀸𑀢𑀺 𑀧𑀝𑀺𑀯𑀺𑀚𑁆𑀛𑀦𑀓𑀧𑀼𑀕𑁆𑀕𑀮𑀸 𑀧𑀦 𑀤𑀼𑀮𑁆𑀮𑀪𑀸. 𑀇𑀤𑀁 𑀪𑀕𑀯𑀸 ‘‘𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀲𑁆𑀲 𑀜𑀸𑀡𑀁 𑀖𑀝𑁆𑀝𑁂𑀫𑀻’’𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀓𑀣𑁂𑀲𑀺. 𑀢𑀁 𑀲𑀼𑀢𑁆𑀯𑀸 𑀣𑁂𑀭𑁄 𑀓𑀺𑀜𑁆𑀘𑀸𑀧𑀺 ‘‘𑀅𑀳𑀁, 𑀪𑀦𑁆𑀢𑁂, 𑀆𑀚𑀸𑀦𑀺𑀲𑁆𑀲𑀸𑀫𑀻’’𑀢𑀺 𑀦 𑀯𑀤𑀢𑀺, 𑀅𑀥𑀺𑀧𑁆𑀧𑀸𑀬𑁂𑀦 𑀧𑀦 ‘‘𑀯𑀺𑀲𑁆𑀲𑀢𑁆𑀣𑀸 𑀢𑀼𑀫𑁆𑀳𑁂, 𑀪𑀦𑁆𑀢𑁂, 𑀤𑁂𑀲𑁂𑀣, 𑀅𑀳𑀁 𑀢𑀼𑀫𑁆𑀳𑁂𑀳𑀺 𑀤𑁂𑀲𑀺𑀢𑀁 𑀥𑀫𑁆𑀫𑀁 𑀦𑀬𑀲𑀢𑁂𑀦 𑀦𑀬𑀲𑀳𑀲𑁆𑀲𑁂𑀦 𑀧𑀝𑀺𑀯𑀺𑀚𑁆𑀛𑀺𑀲𑁆𑀲𑀸𑀫𑀺, 𑀫𑀫𑁂𑀲 𑀪𑀸𑀭𑁄 𑀳𑁄𑀢𑀽’’𑀢𑀺 𑀲𑀢𑁆𑀣𑀸𑀭𑀁 𑀤𑁂𑀲𑀦𑀸𑀬 𑀉𑀲𑁆𑀲𑀸𑀳𑁂𑀦𑁆𑀢𑁄 𑀏𑀢𑀲𑁆𑀲 𑀪𑀕𑀯𑀸 𑀓𑀸𑀮𑁄𑀢𑀺𑀆𑀤𑀺𑀫𑀸𑀳.

𑀅𑀣𑀲𑁆𑀲 𑀲𑀢𑁆𑀣𑀸 𑀢𑀲𑁆𑀫𑀸𑀢𑀺𑀳𑀸𑀢𑀺 𑀤𑁂𑀲𑀦𑀁 𑀆𑀭𑀪𑀺. 𑀢𑀢𑁆𑀣 𑀇𑀫𑀲𑁆𑀫𑀺𑀜𑁆𑀘 𑀲𑀯𑀺𑀜𑁆𑀜𑀸𑀡𑀓𑁂𑀢𑀺𑀆𑀤𑀺 𑀯𑀼𑀢𑁆𑀢𑀦𑀬𑀫𑁂𑀯. 𑀅𑀘𑁆𑀙𑁂𑀘𑁆𑀙𑀺 𑀢𑀡𑁆𑀳𑀦𑁆𑀢𑀺 𑀫𑀕𑁆𑀕𑀜𑀸𑀡𑀲𑀢𑁆𑀣𑁂𑀦 𑀢𑀡𑁆𑀳𑀁 𑀙𑀺𑀦𑁆𑀤𑀺. 𑀯𑀺𑀯𑀢𑁆𑀢𑀬𑀺 𑀲𑀁𑀬𑁄𑀚𑀦𑀦𑁆𑀢𑀺 𑀤𑀲𑀯𑀺𑀥𑀫𑁆𑀧𑀺 𑀲𑀁𑀬𑁄𑀚𑀦𑀁 𑀲𑀫𑀽𑀮𑀓𑀁 𑀉𑀩𑁆𑀩𑀢𑁆𑀢𑁂𑀢𑁆𑀯𑀸 𑀙𑀟𑁆𑀟𑁂𑀲𑀺. 𑀲𑀫𑁆𑀫𑀸 𑀫𑀸𑀦𑀸𑀪𑀺𑀲𑀫𑀬𑀸 𑀅𑀦𑁆𑀢𑀫𑀓𑀸𑀲𑀺 𑀤𑀼𑀓𑁆𑀔𑀲𑁆𑀲𑀸𑀢𑀺 𑀲𑀫𑁆𑀫𑀸 𑀉𑀧𑀸𑀬𑁂𑀦 𑀲𑀫𑁆𑀫𑀸 𑀧𑀝𑀺𑀧𑀢𑁆𑀢𑀺𑀬𑀸 𑀦𑀯𑀯𑀺𑀥𑀲𑁆𑀲 𑀫𑀸𑀦𑀲𑁆𑀲 𑀧𑀳𑀸𑀦𑀸𑀪𑀺𑀲𑀫𑀬𑁂𑀦 𑀯𑀝𑁆𑀝𑀤𑀼𑀓𑁆𑀔𑀲𑁆𑀲 𑀅𑀦𑁆𑀢𑀫𑀓𑀸𑀲𑀺. 𑀇𑀤𑀜𑁆𑀘 𑀧𑀦 𑀫𑁂𑀢𑀁, 𑀲𑀸𑀭𑀺𑀧𑀼𑀢𑁆𑀢, 𑀲𑀦𑁆𑀥𑀸𑀬 𑀪𑀸𑀲𑀺𑀢𑀦𑁆𑀢𑀺, 𑀲𑀸𑀭𑀺𑀧𑀼𑀢𑁆𑀢, 𑀫𑀬𑀸 𑀧𑀸𑀭𑀸𑀬𑀦𑁂 𑀉𑀤𑀬𑀧𑀜𑁆𑀳𑁂 𑀇𑀤𑀁 𑀨𑀮𑀲𑀫𑀸𑀧𑀢𑁆𑀢𑀺𑀫𑁂𑀯 𑀲𑀦𑁆𑀥𑀸𑀬 𑀏𑀢𑀁 𑀪𑀸𑀲𑀺𑀢𑀁.

𑀇𑀤𑀸𑀦𑀺 𑀬𑀁 𑀢𑀁 𑀪𑀕𑀯𑀢𑀸 𑀪𑀸𑀲𑀺𑀢𑀁, 𑀢𑀁 𑀤𑀲𑁆𑀲𑁂𑀦𑁆𑀢𑁄 𑀧𑀳𑀸𑀦𑀁 𑀓𑀸𑀫𑀲𑀜𑁆𑀜𑀸𑀦𑀦𑁆𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀉𑀤𑀬𑀧𑀜𑁆𑀳𑁂 𑀘 𑀏𑀢𑀁 𑀧𑀤𑀁 ‘‘𑀧𑀳𑀸𑀦𑀁 𑀓𑀸𑀫𑀘𑁆𑀙𑀦𑁆𑀤𑀸𑀦’’𑀦𑁆𑀢𑀺 (𑀲𑀼. 𑀦𑀺. 𑁧𑁧𑁧𑁨; 𑀘𑀽𑀴𑀦𑀺. 𑀉𑀤𑀬𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲𑁄 𑁭𑁫) 𑀆𑀕𑀢𑀁, 𑀇𑀥 𑀧𑀦 𑀅𑀗𑁆𑀕𑀼𑀢𑁆𑀢𑀭𑀪𑀸𑀡𑀓𑁂𑀳𑀺 ‘‘𑀓𑀸𑀫𑀲𑀜𑁆𑀜𑀸𑀦’’𑀦𑁆𑀢𑀺 𑀆𑀭𑁄𑀧𑀺𑀢𑀁. 𑀢𑀢𑁆𑀣 𑀩𑁆𑀬𑀜𑁆𑀚𑀦𑀫𑁂𑀯 𑀦𑀸𑀦𑀁, 𑀅𑀢𑁆𑀣𑁄 𑀧𑀦 𑀏𑀓𑁄𑀬𑁂𑀯. 𑀓𑀸𑀫𑀲𑀜𑁆𑀜𑀸𑀦𑀦𑁆𑀢𑀺 𑀓𑀸𑀫𑁂 𑀆𑀭𑀩𑁆𑀪 𑀉𑀧𑁆𑀧𑀦𑁆𑀦𑀲𑀜𑁆𑀜𑀸𑀦𑀁, 𑀅𑀝𑁆𑀞𑀳𑀺 𑀯𑀸 𑀮𑁄𑀪𑀲𑀳𑀕𑀢𑀘𑀺𑀢𑁆𑀢𑁂𑀳𑀺 𑀲𑀳𑀚𑀸𑀢𑀲𑀜𑁆𑀜𑀸𑀦𑀁. 𑀤𑁄𑀫𑀦𑀲𑁆𑀲𑀸𑀦 𑀘𑀽𑀪𑀬𑀦𑁆𑀢𑀺 𑀏𑀢𑀸𑀲𑀜𑁆𑀘 𑀓𑀸𑀫𑀲𑀜𑁆𑀜𑀸𑀦𑀁 𑀘𑁂𑀢𑀲𑀺𑀓𑀤𑁄𑀫𑀦𑀲𑁆𑀲𑀸𑀦𑀜𑁆𑀘𑀸𑀢𑀺 𑀉𑀪𑀺𑀦𑁆𑀦𑀫𑁆𑀧𑀺 𑀧𑀳𑀸𑀦𑀁 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀧𑀳𑀸𑀦𑀲𑀗𑁆𑀔𑀸𑀢𑀁 𑀅𑀭𑀳𑀢𑁆𑀢𑀨𑀮𑀁 𑀅𑀜𑁆𑀜𑀸𑀯𑀺𑀫𑁄𑀓𑁆𑀔𑀁 𑀧𑀩𑁆𑀭𑀽𑀫𑀻𑀢𑀺 𑀅𑀢𑁆𑀣𑁄. 𑀦𑀺𑀤𑁆𑀤𑁂𑀲𑁂 𑀧𑀦 ‘‘𑀓𑀸𑀫𑀘𑁆𑀙𑀦𑁆𑀤𑀲𑁆𑀲 𑀘 𑀤𑁄𑀫𑀦𑀲𑁆𑀲𑀲𑁆𑀲 𑀘 𑀉𑀪𑀺𑀦𑁆𑀦𑀁 𑀧𑀳𑀸𑀦𑀁 𑀯𑀽𑀧𑀲𑀫𑀁 𑀧𑀝𑀺𑀦𑀺𑀲𑁆𑀲𑀕𑁆𑀕𑀁 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀁 𑀅𑀫𑀢𑀁 𑀦𑀺𑀩𑁆𑀩𑀸𑀦’’𑀦𑁆𑀢𑀺 (𑀘𑀽𑀴𑀦𑀺. 𑀉𑀤𑀬𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲𑁄 𑁭𑁫) 𑀯𑀼𑀢𑁆𑀢𑀁, 𑀢𑀁 𑀅𑀢𑁆𑀣𑀼𑀤𑁆𑀥𑀸𑀭𑀯𑀲𑁂𑀦 𑀯𑀼𑀢𑁆𑀢𑀁. 𑀧𑀳𑀸𑀦𑀦𑁆𑀢𑀺 𑀳𑀺 𑀔𑀻𑀡𑀸𑀓𑀸𑀭𑀲𑀗𑁆𑀔𑀸𑀢𑁄 𑀯𑀽𑀧𑀲𑀫𑁄𑀧𑀺 𑀯𑀼𑀘𑁆𑀘𑀢𑀺, 𑀓𑀺𑀮𑁂𑀲𑁂 𑀧𑀝𑀺𑀦𑀺𑀲𑁆𑀲𑀚𑁆𑀚𑀦𑁆𑀢𑁄 𑀫𑀕𑁆𑀕𑁄𑀧𑀺, 𑀓𑀺𑀮𑁂𑀲𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀲𑀗𑁆𑀔𑀸𑀢𑀁 𑀨𑀮𑀫𑁆𑀧𑀺, 𑀬𑀁 𑀆𑀕𑀫𑁆𑀫 𑀓𑀺𑀮𑁂𑀲𑀸 𑀧𑀳𑀻𑀬𑀦𑁆𑀢𑀺, 𑀢𑀁 𑀅𑀫𑀢𑀁 𑀦𑀺𑀩𑁆𑀩𑀸𑀦𑀫𑁆𑀧𑀺. 𑀢𑀲𑁆𑀫𑀸 𑀢𑀢𑁆𑀣 𑀢𑀸𑀦𑀺 𑀧𑀤𑀸𑀦𑀺 𑀆𑀕𑀢𑀸𑀦𑀺. ‘‘𑀅𑀜𑁆𑀜𑀸𑀯𑀺𑀫𑁄𑀓𑁆𑀔𑀁 𑀧𑀩𑁆𑀭𑀽𑀫𑀻’’𑀢𑀺 𑀯𑀘𑀦𑀢𑁄 𑀧𑀦 𑀅𑀭𑀳𑀢𑁆𑀢𑀨𑀮𑀫𑁂𑀯 𑀅𑀥𑀺𑀧𑁆𑀧𑁂𑀢𑀁. 𑀣𑀺𑀦𑀲𑁆𑀲 𑀘 𑀧𑀦𑀽𑀤𑀦𑀦𑁆𑀢𑀺𑀧𑀺 𑀣𑀺𑀦𑀲𑁆𑀲 𑀘 𑀧𑀦𑀽𑀤𑀦𑀦𑁆𑀢𑁂 𑀉𑀧𑁆𑀧𑀦𑁆𑀦𑀢𑁆𑀢𑀸 𑀅𑀭𑀳𑀢𑁆𑀢𑀨𑀮𑀫𑁂𑀯 𑀅𑀥𑀺𑀧𑁆𑀧𑁂𑀢𑀁. 𑀓𑀼𑀓𑁆𑀓𑀼𑀘𑁆𑀘𑀸𑀦𑀁 𑀦𑀺𑀯𑀸𑀭𑀡𑀦𑁆𑀢𑀺 𑀓𑀼𑀓𑁆𑀓𑀼𑀘𑁆𑀘𑀦𑀺𑀯𑀸𑀭𑀡𑀲𑁆𑀲 𑀫𑀕𑁆𑀕𑀲𑁆𑀲 𑀅𑀦𑀦𑁆𑀢𑀭𑀁 𑀉𑀧𑁆𑀧𑀦𑁆𑀦𑀢𑁆𑀢𑀸 𑀨𑀮𑀫𑁂𑀯 𑀅𑀥𑀺𑀧𑁆𑀧𑁂𑀢𑀁.

𑀉𑀧𑁂𑀓𑁆𑀔𑀸𑀲𑀢𑀺𑀲𑀁𑀲𑀼𑀤𑁆𑀥𑀦𑁆𑀢𑀺 𑀘𑀢𑀼𑀢𑁆𑀣𑀚𑁆𑀛𑀸𑀦𑀺𑀓𑁂 𑀨𑀮𑁂 𑀉𑀧𑁆𑀧𑀦𑁆𑀦𑀸𑀬 𑀉𑀧𑁂𑀓𑁆𑀔𑀸𑀬 𑀘 𑀲𑀢𑀺𑀬𑀸 𑀘 𑀲𑀁𑀲𑀼𑀤𑁆𑀥𑀁. 𑀥𑀫𑁆𑀫𑀢𑀓𑁆𑀓𑀧𑀼𑀭𑁂𑀚𑀯𑀦𑁆𑀢𑀺 𑀥𑀫𑁆𑀫𑀢𑀓𑁆𑀓𑁄 𑀯𑀼𑀘𑁆𑀘𑀢𑀺 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄, 𑀲𑁄 𑀆𑀤𑀺𑀢𑁄 𑀳𑁄𑀢𑀺, 𑀧𑀼𑀭𑀢𑁄 𑀳𑁄𑀢𑀺, 𑀧𑀼𑀩𑁆𑀩𑀗𑁆𑀕𑀫𑁄 𑀳𑁄𑀢𑀺 𑀅𑀜𑁆𑀜𑀸𑀯𑀺𑀫𑁄𑀓𑁆𑀔𑀲𑁆𑀲𑀸𑀢𑀺 𑀥𑀫𑁆𑀫𑀢𑀓𑁆𑀓𑀧𑀼𑀭𑁂𑀚𑀯𑁄. 𑀢𑀁 𑀥𑀫𑁆𑀫𑀢𑀓𑁆𑀓𑀧𑀼𑀭𑁂𑀚𑀯𑀁. 𑀅𑀜𑁆𑀜𑀸𑀯𑀺𑀫𑁄𑀓𑁆𑀔𑀦𑁆𑀢𑀺 𑀅𑀜𑁆𑀜𑀺𑀦𑁆𑀤𑁆𑀭𑀺𑀬𑀧𑀭𑀺𑀬𑁄𑀲𑀸𑀦𑁂 𑀉𑀧𑁆𑀧𑀦𑁆𑀦𑀁 𑀯𑀺𑀫𑁄𑀓𑁆𑀔𑀁, 𑀅𑀜𑁆𑀜𑀸𑀬 𑀯𑀸 𑀯𑀺𑀫𑁄𑀓𑁆𑀔𑀁 𑀅𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀅𑀯𑀺𑀚𑁆𑀚𑀸𑀬 𑀧𑀪𑁂𑀤𑀦𑀦𑁆𑀢𑀺 𑀅𑀯𑀺𑀚𑁆𑀚𑀸𑀬 𑀧𑀪𑁂𑀤𑀦𑀦𑁆𑀢𑁂 𑀉𑀧𑁆𑀧𑀦𑁆𑀦𑀢𑁆𑀢𑀸, 𑀅𑀯𑀺𑀚𑁆𑀚𑀸𑀬 𑀧𑀪𑁂𑀤𑀦𑀲𑀗𑁆𑀔𑀸𑀢𑀁 𑀯𑀸 𑀦𑀺𑀩𑁆𑀩𑀸𑀦𑀁 𑀆𑀭𑀩𑁆𑀪 𑀉𑀧𑁆𑀧𑀦𑁆𑀦𑀢𑁆𑀢𑀸 𑀏𑀯𑀁𑀮𑀤𑁆𑀥𑀦𑀸𑀫𑀁 𑀅𑀭𑀳𑀢𑁆𑀢𑀨𑀮𑀫𑁂𑀯. 𑀇𑀢𑀺 𑀲𑀩𑁆𑀩𑁂𑀳𑀺𑀧𑀺 𑀇𑀫𑁂𑀳𑀺 𑀧𑀳𑀸𑀦𑀦𑁆𑀢𑀺𑀆𑀤𑀻𑀳𑀺 𑀧𑀤𑁂𑀳𑀺 𑀅𑀭𑀳𑀢𑁆𑀢𑀨𑀮𑀫𑁂𑀯 𑀧𑀓𑀸𑀲𑀺𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑁪. 𑀦𑀺𑀤𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁪. 𑀘𑀢𑀼𑀢𑁆𑀣𑁂 𑀦𑀺𑀤𑀸𑀦𑀸𑀦𑀻𑀢𑀺 𑀓𑀸𑀭𑀡𑀸𑀦𑀺. 𑀓𑀫𑁆𑀫𑀸𑀦𑀦𑁆𑀢𑀺 𑀯𑀝𑁆𑀝𑀕𑀸𑀫𑀺𑀓𑀫𑁆𑀫𑀸𑀦𑀁. 𑀮𑁄𑀪𑁄 𑀦𑀺𑀤𑀸𑀦𑀁 𑀓𑀫𑁆𑀫𑀸𑀦𑀁 𑀲𑀫𑀼𑀤𑀬𑀸𑀬𑀸𑀢𑀺 𑀮𑀼𑀩𑁆𑀪𑀦𑀧𑀮𑀼𑀩𑁆𑀪𑀦𑀲𑀪𑀸𑀯𑁄 𑀮𑁄𑀪𑁄 𑀯𑀝𑁆𑀝𑀕𑀸𑀫𑀺𑀓𑀫𑁆𑀫𑀸𑀦𑀁 𑀲𑀫𑀼𑀤𑀬𑀸𑀬 𑀧𑀺𑀡𑁆𑀟𑀓𑀭𑀡𑀢𑁆𑀣𑀸𑀬 𑀦𑀺𑀤𑀸𑀦𑀁 𑀓𑀸𑀭𑀡𑀁 𑀧𑀘𑁆𑀘𑀬𑁄𑀢𑀺 𑀅𑀢𑁆𑀣𑁄. 𑀤𑁄𑀲𑁄𑀢𑀺 𑀤𑀼𑀲𑁆𑀲𑀦𑀧𑀤𑀼𑀲𑁆𑀲𑀦𑀲𑀪𑀸𑀯𑁄 𑀤𑁄𑀲𑁄. 𑀫𑁄𑀳𑁄𑀢𑀺 𑀫𑀼𑀬𑁆𑀳𑀦𑀧𑀫𑀼𑀬𑁆𑀳𑀦𑀲𑀪𑀸𑀯𑁄 𑀫𑁄𑀳𑁄.

𑀮𑁄𑀪𑀧𑀓𑀢𑀦𑁆𑀢𑀺 𑀮𑁄𑀪𑁂𑀦 𑀧𑀓𑀢𑀁, 𑀮𑁄𑀪𑀸𑀪𑀺𑀪𑀽𑀢𑁂𑀦 𑀮𑀼𑀤𑁆𑀥𑁂𑀦 𑀳𑀼𑀢𑁆𑀯𑀸 𑀓𑀢𑀓𑀫𑁆𑀫𑀦𑁆𑀢𑀺 𑀅𑀢𑁆𑀣𑁄. 𑀮𑁄𑀪𑀢𑁄 𑀚𑀸𑀢𑀦𑁆𑀢𑀺 𑀮𑁄𑀪𑀚𑀁. 𑀮𑁄𑀪𑁄 𑀦𑀺𑀤𑀸𑀦𑀫𑀲𑁆𑀲𑀸𑀢𑀺 𑀮𑁄𑀪𑀦𑀺𑀤𑀸𑀦𑀁. 𑀮𑁄𑀪𑁄 𑀲𑀫𑀼𑀤𑀬𑁄 𑀅𑀲𑁆𑀲𑀸𑀢𑀺 𑀮𑁄𑀪𑀲𑀫𑀼𑀤𑀬𑀁. 𑀲𑀫𑀼𑀤𑀬𑁄𑀢𑀺 𑀧𑀘𑁆𑀘𑀬𑁄, 𑀮𑁄𑀪𑀧𑀘𑁆𑀘𑀬𑀦𑁆𑀢𑀺 𑀅𑀢𑁆𑀣𑁄. 𑀬𑀢𑁆𑀣𑀲𑁆𑀲 𑀅𑀢𑁆𑀢𑀪𑀸𑀯𑁄 𑀦𑀺𑀩𑁆𑀩𑀢𑁆𑀢𑀢𑀻𑀢𑀺 𑀬𑀲𑁆𑀫𑀺𑀁 𑀞𑀸𑀦𑁂 𑀅𑀲𑁆𑀲 𑀮𑁄𑀪𑀚𑀓𑀫𑁆𑀫𑀯𑀢𑁄 𑀧𑀼𑀕𑁆𑀕𑀮𑀲𑁆𑀲 𑀅𑀢𑁆𑀢𑀪𑀸𑀯𑁄 𑀦𑀺𑀩𑁆𑀩𑀢𑁆𑀢𑀢𑀺, 𑀔𑀦𑁆𑀥𑀸 𑀧𑀸𑀢𑀼𑀪𑀯𑀦𑁆𑀢𑀺. 𑀢𑀢𑁆𑀣 𑀢𑀁 𑀓𑀫𑁆𑀫𑀁 𑀯𑀺𑀧𑀘𑁆𑀘𑀢𑀻𑀢𑀺 𑀢𑁂𑀲𑀼 𑀔𑀦𑁆𑀥𑁂𑀲𑀼 𑀢𑀁 𑀓𑀫𑁆𑀫𑀁 𑀯𑀺𑀧𑀘𑁆𑀘𑀢𑀺. 𑀤𑀺𑀝𑁆𑀞𑁂 𑀯𑀸 𑀥𑀫𑁆𑀫𑁂𑀢𑀺𑀆𑀤𑀺 𑀬𑀲𑁆𑀫𑀸 𑀢𑀁 𑀓𑀫𑁆𑀫𑀁 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀁 𑀯𑀸 𑀳𑁄𑀢𑀺 𑀉𑀧𑀧𑀚𑁆𑀚𑀯𑁂𑀤𑀦𑀻𑀬𑀁 𑀯𑀸 𑀅𑀧𑀭𑀧𑀭𑀺𑀬𑀸𑀬𑀯𑁂𑀤𑀦𑀻𑀬𑀁 𑀯𑀸, 𑀢𑀲𑁆𑀫𑀸 𑀢𑀁 𑀧𑀪𑁂𑀤𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁. 𑀲𑁂𑀲𑀤𑁆𑀯𑀬𑁂𑀧𑀺 𑀏𑀲𑁂𑀯 𑀦𑀬𑁄.

𑀅𑀔𑀡𑁆𑀟𑀸𑀦𑀻𑀢𑀺 𑀅𑀪𑀺𑀦𑁆𑀦𑀸𑀦𑀺. 𑀅𑀧𑀽𑀢𑀻𑀦𑀻𑀢𑀺 𑀧𑀽𑀢𑀺𑀪𑀸𑀯𑁂𑀦 𑀅𑀩𑀻𑀚𑀢𑁆𑀢𑀁 𑀅𑀧𑁆𑀧𑀢𑁆𑀢𑀸𑀦𑀺. 𑀅𑀯𑀸𑀢𑀸𑀢𑀧𑀳𑀢𑀸𑀦𑀻𑀢𑀺 𑀦 𑀯𑀸𑀢𑁂𑀦 𑀦 𑀘 𑀆𑀢𑀧𑁂𑀦 𑀳𑀢𑀸𑀦𑀺. 𑀲𑀸𑀭𑀸𑀤𑀸𑀦𑀻𑀢𑀺 𑀕𑀳𑀺𑀢𑀲𑀸𑀭𑀸𑀦𑀺 𑀲𑀸𑀭𑀯𑀦𑁆𑀢𑀸𑀦𑀺 𑀦 𑀦𑀺𑀲𑁆𑀲𑀸𑀭𑀸𑀦𑀺. 𑀲𑀼𑀔𑀲𑀬𑀺𑀢𑀸𑀦𑀻𑀢𑀺 𑀲𑀦𑁆𑀦𑀺𑀘𑀬𑀪𑀸𑀯𑁂𑀦 𑀲𑀼𑀔𑀁 𑀲𑀬𑀺𑀢𑀸𑀦𑀺. 𑀲𑀼𑀔𑁂𑀢𑁆𑀢𑁂𑀢𑀺 𑀫𑀡𑁆𑀟𑀔𑁂𑀢𑁆𑀢𑁂. 𑀲𑀼𑀧𑀭𑀺𑀓𑀫𑁆𑀫𑀓𑀢𑀸𑀬 𑀪𑀽𑀫𑀺𑀬𑀸𑀢𑀺 𑀦𑀗𑁆𑀕𑀮𑀓𑀲𑀦𑁂𑀦 𑀘𑁂𑀯 𑀅𑀝𑁆𑀞𑀤𑀦𑁆𑀢𑀓𑁂𑀦 𑀘 𑀲𑀼𑀝𑁆𑀞𑀼 𑀧𑀭𑀺𑀓𑀫𑁆𑀫𑀓𑀢𑀸𑀬 𑀔𑁂𑀢𑁆𑀢𑀪𑀽𑀫𑀺𑀬𑀸. 𑀦𑀺𑀓𑁆𑀔𑀺𑀢𑁆𑀢𑀸𑀦𑀻𑀢𑀺 𑀞𑀧𑀺𑀢𑀸𑀦𑀺 𑀭𑁄𑀧𑀺𑀢𑀸𑀦𑀺. 𑀅𑀦𑀼𑀧𑁆𑀧𑀯𑁂𑀘𑁆𑀙𑁂𑀬𑁆𑀬𑀸𑀢𑀺 𑀅𑀦𑀼𑀧𑁆𑀧𑀯𑁂𑀲𑁂𑀬𑁆𑀬. 𑀯𑀼𑀤𑁆𑀥𑀺𑀦𑁆𑀢𑀺𑀆𑀤𑀻𑀲𑀼 𑀉𑀤𑁆𑀥𑀕𑁆𑀕𑀫𑀦𑁂𑀦 𑀯𑀼𑀤𑁆𑀥𑀺𑀁, 𑀳𑁂𑀝𑁆𑀞𑀸 𑀫𑀽𑀮𑀧𑁆𑀧𑀢𑀺𑀝𑁆𑀞𑀸𑀦𑁂𑀦 𑀯𑀺𑀭𑀽𑀴𑁆𑀳𑀺𑀁, 𑀲𑀫𑀦𑁆𑀢𑀸 𑀯𑀺𑀢𑁆𑀣𑀸𑀭𑀺𑀓𑀪𑀸𑀯𑁂𑀦 𑀯𑁂𑀧𑀼𑀮𑁆𑀮𑀁.

𑀬𑀁 𑀧𑀦𑁂𑀢𑁆𑀣 𑀤𑀺𑀝𑁆𑀞𑁂 𑀯𑀸 𑀥𑀫𑁆𑀫𑁂𑀢𑀺𑀆𑀤𑀺 𑀯𑀼𑀢𑁆𑀢𑀁, 𑀢𑀢𑁆𑀣 𑀅𑀲𑀫𑁆𑀫𑁄𑀳𑀢𑁆𑀣𑀁 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀓𑀫𑁆𑀫𑀯𑀺𑀪𑀢𑁆𑀢𑀺 𑀦𑀸𑀫 𑀓𑀣𑁂𑀢𑀩𑁆𑀩𑀸. 𑀲𑀼𑀢𑁆𑀢𑀦𑁆𑀢𑀺𑀓𑀧𑀭𑀺𑀬𑀸𑀬𑁂𑀦 𑀳𑀺 𑀏𑀓𑀸𑀤𑀲 𑀓𑀫𑁆𑀫𑀸𑀦𑀺 𑀯𑀺𑀪𑀢𑁆𑀢𑀸𑀦𑀺. 𑀲𑁂𑀬𑁆𑀬𑀣𑀺𑀤𑀁 𑁋 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀁 𑀉𑀧𑀧𑀚𑁆𑀚𑀯𑁂𑀤𑀦𑀻𑀬𑀁 𑀅𑀧𑀭𑀧𑀭𑀺𑀬𑀸𑀬𑀯𑁂𑀤𑀦𑀻𑀬𑀁, 𑀬𑀕𑁆𑀕𑀭𑀼𑀓𑀁 𑀬𑀩𑁆𑀩𑀳𑀼𑀮𑀁 𑀬𑀤𑀸𑀲𑀦𑁆𑀦𑀁 𑀓𑀝𑀢𑁆𑀢𑀸 𑀯𑀸 𑀧𑀦 𑀓𑀫𑁆𑀫𑀁, 𑀚𑀦𑀓𑀁 𑀉𑀧𑀢𑁆𑀣𑀫𑁆𑀪𑀓𑀁 𑀉𑀧𑀧𑀻𑀴𑀓𑀁 𑀉𑀧𑀖𑀸𑀢𑀓𑀦𑁆𑀢𑀺. 𑀢𑀢𑁆𑀣 𑀏𑀓𑀚𑀯𑀦𑀯𑀻𑀣𑀺𑀬𑀁 𑀲𑀢𑁆𑀢𑀲𑀼 𑀘𑀺𑀢𑁆𑀢𑁂𑀲𑀼 𑀓𑀼𑀲𑀮𑀸 𑀯𑀸 𑀅𑀓𑀼𑀲𑀮𑀸 𑀯𑀸 𑀧𑀞𑀫𑀚𑀯𑀦𑀘𑁂𑀢𑀦𑀸 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀓𑀫𑁆𑀫𑀁 𑀦𑀸𑀫. 𑀢𑀁 𑀇𑀫𑀲𑁆𑀫𑀺𑀁𑀬𑁂𑀯 𑀅𑀢𑁆𑀢𑀪𑀸𑀯𑁂 𑀯𑀺𑀧𑀸𑀓𑀁 𑀤𑁂𑀢𑀺 𑀓𑀸𑀓𑀯𑀴𑀺𑀬𑀧𑀼𑀡𑁆𑀡𑀲𑁂𑀝𑁆𑀞𑀻𑀦𑀁 𑀯𑀺𑀬 𑀓𑀼𑀲𑀮𑀁, 𑀦𑀦𑁆𑀤𑀬𑀓𑁆𑀔𑀦𑀦𑁆𑀤𑀫𑀸𑀡𑀯𑀓𑀦𑀦𑁆𑀤𑀕𑁄𑀖𑀸𑀢𑀓𑀓𑁄𑀓𑀸𑀮𑀺𑀬𑀲𑀼𑀧𑁆𑀧𑀩𑀼𑀤𑁆𑀥𑀤𑁂𑀯𑀤𑀢𑁆𑀢𑀘𑀺𑀜𑁆𑀘𑀫𑀸𑀡𑀯𑀺𑀓𑀸𑀦𑀁 𑀯𑀺𑀬 𑀘 𑀅𑀓𑀼𑀲𑀮𑀁. 𑀢𑀣𑀸 𑀅𑀲𑀓𑁆𑀓𑁄𑀦𑁆𑀢𑀁 𑀧𑀦 𑀅𑀳𑁄𑀲𑀺𑀓𑀫𑁆𑀫𑀁 𑀦𑀸𑀫 𑀳𑁄𑀢𑀺, 𑀅𑀯𑀺𑀧𑀸𑀓𑀁 𑀲𑀫𑁆𑀧𑀚𑁆𑀚𑀢𑀺. 𑀢𑀁 𑀫𑀺𑀕𑀮𑀼𑀤𑁆𑀤𑀓𑁄𑀧𑀫𑀸𑀬 𑀲𑀸𑀥𑁂𑀢𑀩𑁆𑀩𑀁. 𑀬𑀣𑀸 𑀳𑀺 𑀫𑀺𑀕𑀮𑀼𑀤𑁆𑀤𑀓𑁂𑀦 𑀫𑀺𑀕𑀁 𑀤𑀺𑀲𑁆𑀯𑀸 𑀥𑀦𑀼𑀁 𑀆𑀓𑀟𑁆𑀠𑀺𑀢𑁆𑀯𑀸 𑀔𑀺𑀢𑁆𑀢𑁄 𑀲𑀭𑁄 𑀲𑀘𑁂 𑀦 𑀯𑀺𑀭𑀚𑁆𑀛𑀢𑀺, 𑀢𑀁 𑀫𑀺𑀕𑀁 𑀢𑀢𑁆𑀣𑁂𑀯 𑀧𑀸𑀢𑁂𑀢𑀺, 𑀅𑀣 𑀦𑀁 𑀫𑀺𑀕𑀮𑀼𑀤𑁆𑀤𑀓𑁄 𑀦𑀺𑀘𑁆𑀘𑀫𑁆𑀫𑀁 𑀓𑀢𑁆𑀯𑀸 𑀔𑀡𑁆𑀟𑀸𑀔𑀡𑁆𑀟𑀺𑀓𑀁 𑀙𑁂𑀢𑁆𑀯𑀸 𑀫𑀁𑀲𑀁 𑀆𑀤𑀸𑀬 𑀧𑀼𑀢𑁆𑀢𑀤𑀸𑀭𑀁 𑀢𑁄𑀲𑁂𑀦𑁆𑀢𑁄 𑀕𑀘𑁆𑀙𑀢𑀺. 𑀲𑀘𑁂 𑀧𑀦 𑀯𑀺𑀭𑀚𑁆𑀛𑀢𑀺, 𑀫𑀺𑀕𑁄 𑀧𑀮𑀸𑀬𑀺𑀢𑁆𑀯𑀸 𑀧𑀼𑀦 𑀢𑀁 𑀤𑀺𑀲𑀁 𑀦 𑀑𑀮𑁄𑀓𑁂𑀢𑀺. 𑀏𑀯𑀁 𑀲𑀫𑁆𑀧𑀤𑀫𑀺𑀤𑀁 𑀤𑀝𑁆𑀞𑀩𑁆𑀩𑀁. 𑀲𑀭𑀲𑁆𑀲 𑀅𑀯𑀺𑀭𑀚𑁆𑀛𑀺𑀢𑁆𑀯𑀸 𑀫𑀺𑀕𑀯𑀺𑀚𑁆𑀛𑀦𑀁 𑀯𑀺𑀬 𑀳𑀺 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀲𑁆𑀲 𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑀯𑀸𑀭𑀧𑀝𑀺𑀮𑀸𑀪𑁄, 𑀅𑀯𑀺𑀚𑁆𑀛𑀦𑀁 𑀯𑀺𑀬 𑀅𑀯𑀺𑀧𑀸𑀓𑀪𑀸𑀯𑀸𑀬 𑀲𑀫𑁆𑀧𑀚𑁆𑀚𑀦𑀦𑁆𑀢𑀺.

𑀅𑀢𑁆𑀣𑀲𑀸𑀥𑀺𑀓𑀸 𑀧𑀦 𑀲𑀢𑁆𑀢𑀫𑀚𑀯𑀦𑀘𑁂𑀢𑀦𑀸 𑀉𑀧𑀧𑀚𑁆𑀚𑀯𑁂𑀤𑀦𑀻𑀬𑀓𑀫𑁆𑀫𑀁 𑀦𑀸𑀫. 𑀢𑀁 𑀅𑀦𑀦𑁆𑀢𑀭𑁂 𑀅𑀢𑁆𑀢𑀪𑀸𑀯𑁂 𑀯𑀺𑀧𑀸𑀓𑀁 𑀤𑁂𑀢𑀺. 𑀢𑀁 𑀧𑀦𑁂𑀢𑀁 𑀓𑀼𑀲𑀮𑀧𑀓𑁆𑀔𑁂 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀯𑀲𑁂𑀦, 𑀅𑀓𑀼𑀲𑀮𑀧𑀓𑁆𑀔𑁂 𑀧𑀜𑁆𑀘𑀸𑀦𑀦𑁆𑀢𑀭𑀺𑀬𑀓𑀫𑁆𑀫𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀢𑀢𑁆𑀣 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀮𑀸𑀪𑀻 𑀏𑀓𑀸𑀬 𑀲𑀫𑀸𑀧𑀢𑁆𑀢𑀺𑀬𑀸 𑀩𑁆𑀭𑀳𑁆𑀫𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀢𑀺. 𑀧𑀜𑁆𑀘𑀦𑁆𑀦𑀫𑁆𑀧𑀺 𑀆𑀦𑀦𑁆𑀢𑀭𑀺𑀬𑀸𑀦𑀁 𑀓𑀢𑁆𑀢𑀸 𑀏𑀓𑁂𑀦 𑀓𑀫𑁆𑀫𑁂𑀦 𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀢𑀺, 𑀲𑁂𑀲𑀲𑀫𑀸𑀧𑀢𑁆𑀢𑀺𑀬𑁄 𑀘 𑀓𑀫𑁆𑀫𑀸𑀦𑀺 𑀘 𑀅𑀳𑁄𑀲𑀺𑀓𑀫𑁆𑀫𑀪𑀸𑀯𑀁𑀬𑁂𑀯 𑀆𑀧𑀚𑁆𑀚𑀦𑁆𑀢𑀺, 𑀅𑀯𑀺𑀧𑀸𑀓𑀸𑀦𑀺 𑀳𑁄𑀦𑁆𑀢𑀺. 𑀅𑀬𑀫𑁆𑀧𑀺 𑀅𑀢𑁆𑀣𑁄 𑀧𑀼𑀭𑀺𑀫𑀉𑀧𑀫𑀸𑀬𑀬𑁂𑀯 𑀤𑀻𑀧𑁂𑀢𑀩𑁆𑀩𑁄.

𑀉𑀪𑀺𑀦𑁆𑀦𑀁 𑀅𑀦𑁆𑀢𑀭𑁂 𑀧𑀦 𑀧𑀜𑁆𑀘𑀚𑀯𑀦𑀘𑁂𑀢𑀦𑀸 𑀅𑀧𑀭𑀧𑀭𑀺𑀬𑀸𑀬𑀯𑁂𑀤𑀦𑀻𑀬𑀓𑀫𑁆𑀫𑀁 𑀦𑀸𑀫. 𑀢𑀁 𑀅𑀦𑀸𑀕𑀢𑁂 𑀬𑀤𑀸 𑀑𑀓𑀸𑀲𑀁 𑀮𑀪𑀢𑀺, 𑀢𑀤𑀸 𑀯𑀺𑀧𑀸𑀓𑀁 𑀤𑁂𑀢𑀺. 𑀲𑀢𑀺 𑀲𑀁𑀲𑀸𑀭𑀧𑁆𑀧𑀯𑀢𑁆𑀢𑀺𑀬𑀸 𑀅𑀳𑁄𑀲𑀺𑀓𑀫𑁆𑀫𑀁 𑀦𑀸𑀫 𑀦 𑀳𑁄𑀢𑀺. 𑀢𑀁 𑀲𑀩𑁆𑀩𑀁 𑀲𑀼𑀦𑀔𑀮𑀼𑀤𑁆𑀤𑀓𑁂𑀦 𑀤𑀻𑀧𑁂𑀢𑀩𑁆𑀩𑀁. 𑀬𑀣𑀸 𑀳𑀺 𑀲𑀼𑀦𑀔𑀮𑀼𑀤𑁆𑀤𑀓𑁂𑀦 𑀫𑀺𑀕𑀁 𑀤𑀺𑀲𑁆𑀯𑀸 𑀲𑀼𑀦𑀔𑁄 𑀯𑀺𑀲𑁆𑀲𑀚𑁆𑀚𑀺𑀢𑁄 𑀫𑀺𑀕𑀁 𑀅𑀦𑀼𑀩𑀦𑁆𑀥𑀺𑀢𑁆𑀯𑀸 𑀬𑀲𑁆𑀫𑀺𑀁 𑀞𑀸𑀦𑁂 𑀧𑀸𑀧𑀼𑀡𑀸𑀢𑀺, 𑀢𑀲𑁆𑀫𑀺𑀁 𑀬𑁂𑀯 𑀟𑀁𑀲𑀢𑀺; 𑀏𑀯𑀫𑁂𑀯𑀁 𑀇𑀤𑀁 𑀓𑀫𑁆𑀫𑀁 𑀬𑀲𑁆𑀫𑀺𑀁 𑀞𑀸𑀦𑁂 𑀑𑀓𑀸𑀲𑀁 𑀮𑀪𑀢𑀺, 𑀢𑀲𑁆𑀫𑀺𑀁𑀬𑁂𑀯 𑀯𑀺𑀧𑀸𑀓𑀁 𑀤𑁂𑀢𑀺, 𑀢𑁂𑀦 𑀫𑀼𑀢𑁆𑀢𑁄 𑀲𑀢𑁆𑀢𑁄 𑀦𑀸𑀫 𑀦𑀢𑁆𑀣𑀺.