𑁪. 𑀤𑁂𑀯𑀤𑀽𑀢𑀯𑀕𑁆𑀕𑁄

𑁧. 𑀲𑀩𑁆𑀭𑀳𑁆𑀫𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁧. 𑀘𑀢𑀼𑀢𑁆𑀣𑀲𑁆𑀲 𑀧𑀞𑀫𑁂 𑀅𑀚𑁆𑀛𑀸𑀕𑀸𑀭𑁂𑀢𑀺 𑀲𑀓𑁂 𑀖𑀭𑁂. 𑀧𑀽𑀚𑀺𑀢𑀸 𑀳𑁄𑀦𑁆𑀢𑀻𑀢𑀺 𑀬𑀁 𑀖𑀭𑁂 𑀅𑀢𑁆𑀣𑀺, 𑀢𑁂𑀦 𑀧𑀝𑀺𑀚𑀕𑁆𑀕𑀺𑀢𑀸 𑀕𑁄𑀧𑀺𑀢𑀸 𑀳𑁄𑀦𑁆𑀢𑀺. 𑀇𑀢𑀺 𑀫𑀸𑀢𑀸𑀧𑀺𑀢𑀼𑀧𑀽𑀚𑀓𑀸𑀦𑀺 𑀓𑀼𑀮𑀸𑀦𑀺 𑀫𑀸𑀢𑀸𑀧𑀺𑀢𑀽𑀳𑀺 𑀲𑀩𑁆𑀭𑀳𑁆𑀫𑀓𑀸𑀦𑀻𑀢𑀺 𑀧𑀓𑀸𑀲𑁂𑀢𑁆𑀯𑀸 𑀇𑀤𑀸𑀦𑀺 𑀦𑁂𑀲𑀁 𑀲𑀧𑀼𑀩𑁆𑀩𑀸𑀘𑀭𑀺𑀬𑀓𑀸𑀤𑀺𑀪𑀸𑀯𑀁 𑀧𑀓𑀸𑀲𑁂𑀦𑁆𑀢𑁄 𑀲𑀧𑀼𑀩𑁆𑀩𑀸𑀘𑀭𑀺𑀬𑀓𑀸𑀦𑀻𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀩𑁆𑀭𑀳𑁆𑀫𑀸𑀢𑀺𑀆𑀤𑀻𑀦𑀺 𑀢𑁂𑀲𑀁 𑀩𑁆𑀭𑀳𑁆𑀫𑀸𑀤𑀺𑀪𑀸𑀯𑀲𑀸𑀥𑀦𑀢𑁆𑀣𑀁 𑀯𑀼𑀢𑁆𑀢𑀸𑀦𑀺. 𑀩𑀳𑀼𑀓𑀸𑀭𑀸𑀢𑀺 𑀧𑀼𑀢𑁆𑀢𑀸𑀦𑀁 𑀩𑀳𑀽𑀧𑀓𑀸𑀭𑀸. 𑀆𑀧𑀸𑀤𑀓𑀸𑀢𑀺 𑀚𑀻𑀯𑀺𑀢𑀲𑁆𑀲 𑀆𑀧𑀸𑀤𑀓𑀸. 𑀧𑀼𑀢𑁆𑀢𑀓𑀸𑀦𑀁 𑀳𑀺 𑀫𑀸𑀢𑀸𑀧𑀺𑀢𑀽𑀳𑀺 𑀚𑀻𑀯𑀺𑀢𑀁 𑀆𑀧𑀸𑀤𑀺𑀢𑀁 𑀧𑀸𑀮𑀺𑀢𑀁 𑀖𑀝𑀺𑀢𑀁 𑀅𑀦𑀼𑀧𑁆𑀧𑀩𑀦𑁆𑀥𑁂𑀦 𑀧𑀯𑀢𑁆𑀢𑀺𑀢𑀁. 𑀧𑁄𑀲𑀓𑀸𑀢𑀺 𑀳𑀢𑁆𑀣𑀧𑀸𑀤𑁂 𑀯𑀟𑁆𑀠𑁂𑀢𑁆𑀯𑀸 𑀳𑀤𑀬𑀮𑁄𑀳𑀺𑀢𑀁 𑀧𑀸𑀬𑁂𑀢𑁆𑀯𑀸 𑀧𑁄𑀲𑁂𑀢𑀸𑀭𑁄. 𑀇𑀫𑀲𑁆𑀲 𑀮𑁄𑀓𑀲𑁆𑀲 𑀤𑀲𑁆𑀲𑁂𑀢𑀸𑀭𑁄𑀢𑀺 𑀧𑀼𑀢𑁆𑀢𑀸𑀦𑀁 𑀳𑀺 𑀇𑀫𑀲𑁆𑀫𑀺𑀁 𑀮𑁄𑀓𑁂 𑀇𑀝𑁆𑀞𑀸𑀦𑀺𑀝𑁆𑀞𑀸𑀭𑀫𑁆𑀫𑀡𑀲𑁆𑀲 𑀤𑀲𑁆𑀲𑀦𑀁 𑀦𑀸𑀫 𑀫𑀸𑀢𑀸𑀧𑀺𑀢𑀭𑁄 𑀦𑀺𑀲𑁆𑀲𑀸𑀬 𑀚𑀸𑀢𑀦𑁆𑀢𑀺 𑀇𑀫𑀲𑁆𑀲 𑀮𑁄𑀓𑀲𑁆𑀲 𑀤𑀲𑁆𑀲𑁂𑀢𑀸𑀭𑁄 𑀦𑀸𑀫.

𑀩𑁆𑀭𑀳𑁆𑀫𑀸𑀢𑀺 𑀫𑀸𑀢𑀸𑀧𑀺𑀢𑀭𑁄𑀢𑀺 𑀲𑁂𑀝𑁆𑀞𑀸𑀥𑀺𑀯𑀘𑀦𑀁. 𑀬𑀣𑀸 𑀩𑁆𑀭𑀳𑁆𑀫𑀼𑀦𑁄 𑀘𑀢𑀲𑁆𑀲𑁄 𑀪𑀸𑀯𑀦𑀸 𑀅𑀯𑀺𑀚𑀳𑀺𑀢𑀸 𑀳𑁄𑀦𑁆𑀢𑀺 𑀫𑁂𑀢𑁆𑀢𑀸 𑀓𑀭𑀼𑀡𑀸 𑀫𑀼𑀤𑀺𑀢𑀸 𑀉𑀧𑁂𑀓𑁆𑀔𑀸𑀢𑀺, 𑀏𑀯𑀫𑁂𑀯 𑀫𑀸𑀢𑀸𑀧𑀺𑀢𑀽𑀦𑀁 𑀧𑀼𑀢𑁆𑀢𑀓𑁂𑀲𑀼 𑀘𑀢𑀲𑁆𑀲𑁄 𑀪𑀸𑀯𑀦𑀸 𑀅𑀯𑀺𑀚𑀳𑀺𑀢𑀸 𑀳𑁄𑀦𑁆𑀢𑀺. 𑀢𑀸 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀓𑀸𑀮𑁂 𑀯𑁂𑀤𑀺𑀢𑀩𑁆𑀩𑀸 𑁋 𑀓𑀼𑀘𑁆𑀙𑀺𑀕𑀢𑀲𑁆𑀫𑀺𑀁 𑀳𑀺 𑀤𑀸𑀭𑀓𑁂 ‘‘𑀓𑀤𑀸 𑀦𑀼 𑀔𑁄 𑀧𑀼𑀢𑁆𑀢𑀓𑀁 𑀅𑀭𑁄𑀕𑀁 𑀧𑀭𑀺𑀧𑀼𑀡𑁆𑀡𑀗𑁆𑀕𑀧𑀘𑁆𑀘𑀗𑁆𑀕𑀁 𑀧𑀲𑁆𑀲𑀺𑀲𑁆𑀲𑀸𑀫𑀸’’𑀢𑀺 𑀫𑀸𑀢𑀸𑀧𑀺𑀢𑀽𑀦𑀁 𑀫𑁂𑀢𑁆𑀢𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺. 𑀬𑀤𑀸 𑀧𑀦𑁂𑀲 𑀫𑀦𑁆𑀤𑁄 𑀉𑀢𑁆𑀢𑀸𑀦𑀲𑁂𑀬𑁆𑀬𑀓𑁄 𑀊𑀓𑀸𑀳𑀺 𑀯𑀸 𑀫𑀗𑁆𑀓𑀼𑀮𑀸𑀤𑀻𑀳𑀺 𑀧𑀸𑀡𑀓𑁂𑀳𑀺 𑀤𑀝𑁆𑀞𑁄 𑀤𑀼𑀓𑁆𑀔𑀲𑁂𑀬𑁆𑀬𑀸𑀬 𑀯𑀸 𑀧𑀦 𑀧𑀻𑀴𑀺𑀢𑁄 𑀧𑀭𑁄𑀤𑀢𑀺 𑀯𑀺𑀭𑀯𑀢𑀺, 𑀢𑀤𑀸𑀲𑁆𑀲 𑀲𑀤𑁆𑀤𑀁 𑀲𑀼𑀢𑁆𑀯𑀸 𑀫𑀸𑀢𑀸𑀧𑀺𑀢𑀽𑀦𑀁 𑀓𑀸𑀭𑀼𑀜𑁆𑀜𑀁 𑀉𑀧𑁆𑀧𑀚𑁆𑀚𑀢𑀺, 𑀆𑀥𑀸𑀯𑀺𑀢𑁆𑀯𑀸 𑀯𑀺𑀥𑀸𑀯𑀺𑀢𑁆𑀯𑀸 𑀓𑀻𑀴𑀦𑀓𑀸𑀮𑁂 𑀧𑀦 𑀮𑁄𑀪𑀦𑀻𑀬𑀯𑀬𑀲𑁆𑀫𑀺𑀁 𑀯𑀸 𑀞𑀺𑀢𑀓𑀸𑀮𑁂 𑀤𑀸𑀭𑀓𑀁 𑀑𑀮𑁄𑀓𑁂𑀢𑁆𑀯𑀸 𑀫𑀸𑀢𑀸𑀧𑀺𑀢𑀽𑀦𑀁 𑀘𑀺𑀢𑁆𑀢𑀁 𑀲𑀧𑁆𑀧𑀺𑀫𑀡𑁆𑀟𑁂 𑀧𑀓𑁆𑀔𑀺𑀢𑁆𑀢𑀲𑀢𑀯𑀺𑀳𑀢𑀓𑀧𑁆𑀧𑀸𑀲𑀧𑀺𑀘𑀼𑀧𑀝𑀮𑀁 𑀯𑀺𑀬 𑀫𑀼𑀤𑀼𑀓𑀁 𑀳𑁄𑀢𑀺 𑀆𑀫𑁄𑀤𑀺𑀢𑀁 𑀧𑀫𑁄𑀤𑀺𑀢𑀁, 𑀢𑀤𑀸 𑀢𑁂𑀲𑀁 𑀫𑀼𑀤𑀺𑀢𑀸 𑀮𑀩𑁆𑀪𑀢𑀺. 𑀬𑀤𑀸 𑀧𑀦𑁂𑀲 𑀧𑀼𑀢𑁆𑀢𑁄 𑀤𑀸𑀭𑀸𑀪𑀭𑀡𑀁 𑀧𑀘𑁆𑀘𑀼𑀧𑀝𑁆𑀞𑀸𑀧𑁂𑀢𑁆𑀯𑀸 𑀧𑀸𑀝𑀺𑀬𑁂𑀓𑁆𑀓𑀁 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀢𑀺, 𑀢𑀤𑀸 𑀫𑀸𑀢𑀸𑀧𑀺𑀢𑀽𑀦𑀁 ‘‘𑀲𑀓𑁆𑀓𑁄𑀢𑀺 𑀤𑀸𑀦𑀺 𑀦𑁄 𑀧𑀼𑀢𑁆𑀢𑀓𑁄 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀬𑀸𑀧𑁂𑀢𑀼’’𑀦𑁆𑀢𑀺 𑀫𑀚𑁆𑀛𑀢𑁆𑀢𑀪𑀸𑀯𑁄 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀫𑀺𑀁 𑀓𑀸𑀮𑁂 𑀉𑀧𑁂𑀓𑁆𑀔𑀸 𑀮𑀩𑁆𑀪𑀢𑀻𑀢𑀺 𑀇𑀫𑀺𑀦𑀸 𑀓𑀸𑀭𑀡𑁂𑀦 ‘‘𑀩𑁆𑀭𑀳𑁆𑀫𑀸𑀢𑀺 𑀫𑀸𑀢𑀸𑀧𑀺𑀢𑀭𑁄’’𑀢𑀺 𑀯𑀼𑀢𑁆𑀢𑀁.

𑀧𑀼𑀩𑁆𑀩𑀸𑀘𑀭𑀺𑀬𑀸𑀢𑀺 𑀯𑀼𑀘𑁆𑀘𑀭𑁂𑀢𑀺 𑀫𑀸𑀢𑀸𑀧𑀺𑀢𑀭𑁄 𑀳𑀺 𑀚𑀸𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 ‘‘𑀏𑀯𑀁 𑀦𑀺𑀲𑀻𑀤, 𑀏𑀯𑀁 𑀢𑀺𑀝𑁆𑀞, 𑀏𑀯𑀁 𑀕𑀘𑁆𑀙, 𑀏𑀯𑀁 𑀲𑀬, 𑀏𑀯𑀁 𑀔𑀸𑀤, 𑀏𑀯𑀁 𑀪𑀼𑀜𑁆𑀚, 𑀅𑀬𑀁 𑀢𑁂, 𑀢𑀸𑀢𑀸𑀢𑀺 𑀯𑀢𑁆𑀢𑀩𑁆𑀩𑁄, 𑀅𑀬𑀁 𑀪𑀸𑀢𑀺𑀓𑀸𑀢𑀺, 𑀅𑀬𑀁 𑀪𑀕𑀺𑀦𑀻𑀢𑀺, 𑀇𑀤𑀁 𑀦𑀸𑀫 𑀓𑀸𑀢𑀼𑀁 𑀯𑀝𑁆𑀝𑀢𑀺, 𑀇𑀤𑀁 𑀦 𑀯𑀝𑁆𑀝𑀢𑀺, 𑀅𑀲𑀼𑀓𑀁 𑀦𑀸𑀫 𑀉𑀧𑀲𑀗𑁆𑀓𑀫𑀺𑀢𑀼𑀁 𑀯𑀝𑁆𑀝𑀢𑀺, 𑀅𑀲𑀼𑀓𑀁 𑀦 𑀯𑀝𑁆𑀝𑀢𑀻’’𑀢𑀺 𑀕𑀸𑀳𑀸𑀧𑁂𑀦𑁆𑀢𑀺 𑀲𑀺𑀓𑁆𑀔𑀸𑀧𑁂𑀦𑁆𑀢𑀺. 𑀅𑀣𑀸𑀧𑀭𑀪𑀸𑀕𑁂 𑀅𑀜𑁆𑀜𑁂 𑀆𑀘𑀭𑀺𑀬𑀸 𑀳𑀢𑁆𑀣𑀺𑀲𑀺𑀧𑁆𑀧𑀅𑀲𑁆𑀲𑀲𑀺𑀧𑁆𑀧𑀭𑀣𑀲𑀺𑀧𑁆𑀧𑀥𑀦𑀼𑀲𑀺𑀧𑁆𑀧𑀣𑀭𑀼𑀲𑀺𑀧𑁆𑀧𑀫𑀼𑀤𑁆𑀤𑀸𑀕𑀡𑀦𑀸𑀤𑀻𑀦𑀺 𑀲𑀺𑀓𑁆𑀔𑀸𑀧𑁂𑀦𑁆𑀢𑀺. 𑀅𑀜𑁆𑀜𑁄 𑀲𑀭𑀡𑀸𑀦𑀺 𑀤𑁂𑀢𑀺, 𑀅𑀜𑁆𑀜𑁄 𑀲𑀻𑀮𑁂𑀲𑀼 𑀧𑀢𑀺𑀝𑁆𑀞𑀸𑀧𑁂𑀢𑀺, 𑀅𑀜𑁆𑀜𑁄 𑀧𑀩𑁆𑀩𑀸𑀚𑁂𑀢𑀺, 𑀅𑀜𑁆𑀜𑁄 𑀩𑀼𑀤𑁆𑀥𑀯𑀘𑀦𑀁 𑀉𑀕𑁆𑀕𑀡𑁆𑀳𑀸𑀧𑁂𑀢𑀺, 𑀅𑀜𑁆𑀜𑁄 𑀉𑀧𑀲𑀫𑁆𑀧𑀸𑀤𑁂𑀢𑀺, 𑀅𑀜𑁆𑀜𑁄 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀸𑀤𑀻𑀦𑀺 𑀧𑀸𑀧𑁂𑀢𑀺. 𑀇𑀢𑀺 𑀲𑀩𑁆𑀩𑁂𑀧𑀺 𑀢𑁂 𑀧𑀘𑁆𑀙𑀸𑀘𑀭𑀺𑀬𑀸 𑀦𑀸𑀫 𑀳𑁄𑀦𑁆𑀢𑀺, 𑀫𑀸𑀢𑀸𑀧𑀺𑀢𑀭𑁄 𑀧𑀦 𑀲𑀩𑁆𑀩𑀧𑀞𑀫𑀸, 𑀢𑁂𑀦𑀸𑀳 𑁋 ‘‘𑀧𑀼𑀩𑁆𑀩𑀸𑀘𑀭𑀺𑀬𑀸𑀢𑀺 𑀯𑀼𑀘𑁆𑀘𑀭𑁂’’𑀢𑀺. 𑀢𑀢𑁆𑀣 𑀯𑀼𑀘𑁆𑀘𑀭𑁂𑀢𑀺 𑀯𑀼𑀘𑁆𑀘𑀦𑁆𑀢𑀺 𑀓𑀣𑀺𑀬𑀦𑁆𑀢𑀺. 𑀆𑀳𑀼𑀦𑁂𑀬𑁆𑀬𑀸 𑀘 𑀧𑀼𑀢𑁆𑀢𑀸𑀦𑀦𑁆𑀢𑀺 𑀧𑀼𑀢𑁆𑀢𑀸𑀦𑀁 𑀆𑀳𑀼𑀢𑀁 𑀧𑀸𑀳𑀼𑀢𑀁 𑀅𑀪𑀺𑀲𑀗𑁆𑀔𑀢𑀁 𑀅𑀦𑁆𑀦𑀧𑀸𑀦𑀸𑀤𑀺𑀁 𑀅𑀭𑀳𑀦𑁆𑀢𑀺, 𑀅𑀦𑀼𑀘𑁆𑀙𑀯𑀺𑀓𑀸 𑀢𑀁 𑀧𑀝𑀺𑀕𑁆𑀕𑀳𑁂𑀢𑀼𑀁. 𑀢𑀲𑁆𑀫𑀸 ‘‘𑀆𑀳𑀼𑀦𑁂𑀬𑁆𑀬𑀸 𑀘 𑀧𑀼𑀢𑁆𑀢𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀧𑀚𑀸𑀬 𑀅𑀦𑀼𑀓𑀫𑁆𑀧𑀓𑀸𑀢𑀺 𑀧𑀭𑁂𑀲𑀁 𑀧𑀸𑀡𑁂 𑀅𑀘𑁆𑀙𑀺𑀦𑁆𑀤𑀺𑀢𑁆𑀯𑀸𑀧𑀺 𑀅𑀢𑁆𑀢𑀦𑁄 𑀧𑀚𑀁 𑀧𑀝𑀺𑀚𑀕𑁆𑀕𑀦𑁆𑀢𑀺 𑀕𑁄𑀧𑀸𑀬𑀦𑁆𑀢𑀺. 𑀢𑀲𑁆𑀫𑀸 ‘‘𑀧𑀚𑀸𑀬 𑀅𑀦𑀼𑀓𑀫𑁆𑀧𑀓𑀸’’𑀢𑀺 𑀯𑀼𑀢𑁆𑀢𑀁.

𑀦𑀫𑀲𑁆𑀲𑁂𑀬𑁆𑀬𑀸𑀢𑀺 𑀦𑀫𑁄 𑀓𑀭𑁂𑀬𑁆𑀬. 𑀲𑀓𑁆𑀓𑀭𑁂𑀬𑁆𑀬𑀸𑀢𑀺 𑀲𑀓𑁆𑀓𑀸𑀭𑁂𑀦 𑀧𑀝𑀺𑀫𑀸𑀦𑁂𑀬𑁆𑀬. 𑀇𑀤𑀸𑀦𑀺 𑀢𑀁 𑀲𑀓𑁆𑀓𑀸𑀭𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀦𑁆𑀦𑁂𑀦𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀦𑁆𑀦𑁂𑀦𑀸𑀢𑀺 𑀬𑀸𑀕𑀼𑀪𑀢𑁆𑀢𑀔𑀸𑀤𑀦𑀻𑀬𑁂𑀦. 𑀧𑀸𑀦𑁂𑀦𑀸𑀢𑀺 𑀅𑀝𑁆𑀞𑀯𑀺𑀥𑀧𑀸𑀦𑁂𑀦. 𑀯𑀢𑁆𑀣𑁂𑀦𑀸𑀢𑀺 𑀦𑀺𑀯𑀸𑀲𑀦𑀧𑀸𑀭𑀼𑀧𑀦𑀓𑁂𑀦 𑀯𑀢𑁆𑀣𑁂𑀦. 𑀲𑀬𑀦𑁂𑀦𑀸𑀢𑀺 𑀫𑀜𑁆𑀘𑀧𑀻𑀞𑀸𑀦𑀼𑀧𑁆𑀧𑀤𑀸𑀦𑁂𑀦. 𑀉𑀘𑁆𑀙𑀸𑀤𑀦𑁂𑀦𑀸𑀢𑀺 𑀤𑀼𑀕𑁆𑀕𑀦𑁆𑀥𑀁 𑀧𑀝𑀺𑀯𑀺𑀦𑁄𑀤𑁂𑀢𑁆𑀯𑀸 𑀲𑀼𑀕𑀦𑁆𑀥𑀓𑀭𑀡𑀼𑀘𑁆𑀙𑀸𑀤𑀦𑁂𑀦. 𑀦𑁆𑀳𑀸𑀧𑀦𑁂𑀦𑀸𑀢𑀺 𑀲𑀻𑀢𑁂 𑀉𑀡𑁆𑀳𑁄𑀤𑀓𑁂𑀦, 𑀉𑀡𑁆𑀳𑁂 𑀲𑀻𑀢𑁄𑀤𑀓𑁂𑀦 𑀕𑀢𑁆𑀢𑀸𑀦𑀺 𑀧𑀭𑀺𑀲𑀺𑀜𑁆𑀘𑀺𑀢𑁆𑀯𑀸 𑀦𑁆𑀳𑀸𑀧𑀦𑁂𑀦. 𑀧𑀸𑀤𑀸𑀦𑀁 𑀥𑁄𑀯𑀦𑁂𑀦𑀸𑀢𑀺 𑀉𑀡𑁆𑀳𑁄𑀤𑀓𑀲𑀻𑀢𑁄𑀤𑀓𑁂𑀳𑀺 𑀧𑀸𑀤𑀥𑁄𑀯𑀦𑁂𑀦 𑀘𑁂𑀯 𑀢𑁂𑀮𑀫𑀓𑁆𑀔𑀦𑁂𑀦 𑀘. 𑀧𑁂𑀘𑁆𑀘𑀸𑀢𑀺 𑀧𑀭𑀮𑁄𑀓𑀁 𑀕𑀦𑁆𑀢𑁆𑀯𑀸. 𑀲𑀕𑁆𑀕𑁂 𑀧𑀫𑁄𑀤𑀢𑀻𑀢𑀺 𑀇𑀥 𑀢𑀸𑀯 𑀫𑀸𑀢𑀸𑀧𑀺𑀢𑀽𑀲𑀼 𑀧𑀸𑀭𑀺𑀘𑀭𑀺𑀬𑀁 𑀤𑀺𑀲𑁆𑀯𑀸 𑀧𑀸𑀭𑀺𑀘𑀭𑀺𑀬𑀓𑀸𑀭𑀡𑀸 𑀢𑀁 𑀧𑀡𑁆𑀟𑀺𑀢𑀫𑀦𑀼𑀲𑁆𑀲𑀸 𑀇𑀥𑁂𑀯 𑀧𑀲𑀁𑀲𑀦𑁆𑀢𑀺, 𑀧𑀭𑀮𑁄𑀓𑀁 𑀧𑀦 𑀕𑀦𑁆𑀢𑁆𑀯𑀸 𑀲𑀕𑁆𑀕𑁂 𑀞𑀺𑀢𑁄 𑀲𑁄 𑀫𑀸𑀢𑀸𑀧𑀺𑀢𑀼𑀉𑀧𑀝𑁆𑀞𑀸𑀓𑁄 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀻𑀳𑀺 𑀆𑀫𑁄𑀤𑀢𑀺 𑀧𑀫𑁄𑀤𑀢𑀻𑀢𑀺.

𑁨. 𑀆𑀦𑀦𑁆𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁨. 𑀤𑀼𑀢𑀺𑀬𑁂 𑀢𑀣𑀸𑀭𑀽𑀧𑁄𑀢𑀺 𑀢𑀣𑀸𑀚𑀸𑀢𑀺𑀓𑁄. 𑀲𑀫𑀸𑀥𑀺𑀧𑀝𑀺𑀮𑀸𑀪𑁄𑀢𑀺 𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀮𑀸𑀪𑁄. 𑀇𑀫𑀲𑁆𑀫𑀺𑀁 𑀘 𑀲𑀯𑀺𑀜𑁆𑀜𑀸𑀡𑀓𑁂𑀢𑀺 𑀏𑀢𑁆𑀣 𑀅𑀢𑁆𑀢𑀦𑁄 𑀘 𑀧𑀭𑀲𑁆𑀲 𑀘𑀸𑀢𑀺 𑀉𑀪𑀬𑁂𑀲𑀫𑁆𑀧𑀺 𑀓𑀸𑀬𑁄 𑀲𑀯𑀺𑀜𑁆𑀜𑀸𑀡𑀓𑀝𑁆𑀞𑁂𑀦 𑀏𑀓𑀢𑁄 𑀓𑀢𑁆𑀯𑀸 𑀇𑀫𑀲𑁆𑀫𑀺𑀦𑁆𑀢𑀺 𑀯𑀼𑀢𑁆𑀢𑁄. 𑀅𑀳𑀗𑁆𑀓𑀸𑀭𑀫𑀫𑀗𑁆𑀓𑀸𑀭𑀫𑀸𑀦𑀸𑀦𑀼𑀲𑀬𑀸𑀢𑀺 𑀅𑀳𑀗𑁆𑀓𑀸𑀭𑀤𑀺𑀝𑁆𑀞𑀺 𑀘 𑀫𑀫𑀗𑁆𑀓𑀸𑀭𑀢𑀡𑁆𑀳𑀸 𑀘 𑀫𑀸𑀦𑀸𑀦𑀼𑀲𑀬𑁄 𑀘𑀸𑀢𑀺 𑀅𑀢𑁆𑀢𑀦𑁄 𑀘 𑀧𑀭𑀲𑁆𑀲 𑀘 𑀓𑀺𑀮𑁂𑀲𑀸. 𑀦𑀸𑀲𑁆𑀲𑀽𑀢𑀺 𑀦 𑀪𑀯𑁂𑀬𑁆𑀬𑀼𑀁. 𑀩𑀳𑀺𑀤𑁆𑀥𑀸 𑀘 𑀲𑀩𑁆𑀩𑀦𑀺𑀫𑀺𑀢𑁆𑀢𑁂𑀲𑀽𑀢𑀺 𑀭𑀽𑀧𑀦𑀺𑀫𑀺𑀢𑁆𑀢𑀁, 𑀲𑀤𑁆𑀤𑀦𑀺𑀫𑀺𑀢𑁆𑀢𑀁, 𑀕𑀦𑁆𑀥𑀦𑀺𑀫𑀺𑀢𑁆𑀢𑀁, 𑀭𑀲𑀦𑀺𑀫𑀺𑀢𑁆𑀢𑀁, 𑀨𑁄𑀝𑁆𑀞𑀩𑁆𑀩𑀦𑀺𑀫𑀺𑀢𑁆𑀢𑀁, 𑀲𑀲𑁆𑀲𑀢𑀸𑀤𑀺𑀦𑀺𑀫𑀺𑀢𑁆𑀢𑀁, 𑀧𑀼𑀕𑁆𑀕𑀮𑀦𑀺𑀫𑀺𑀢𑁆𑀢𑀁 𑀥𑀫𑁆𑀫𑀦𑀺𑀫𑀺𑀢𑁆𑀢𑀦𑁆𑀢𑀺 𑀏𑀯𑀭𑀽𑀧𑁂𑀲𑀼 𑀘 𑀩𑀳𑀺𑀤𑁆𑀥𑀸 𑀲𑀩𑁆𑀩𑀦𑀺𑀫𑀺𑀢𑁆𑀢𑁂𑀲𑀼. 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀦𑁆𑀢𑀺 𑀨𑀮𑀲𑀫𑀸𑀥𑀺𑀜𑁆𑀘𑁂𑀯 𑀨𑀮𑀜𑀸𑀡𑀜𑁆𑀘. 𑀲𑀺𑀬𑀸𑀢𑀺 𑀪𑀯𑁂𑀬𑁆𑀬.

𑀇𑀥𑀸𑀦𑀦𑁆𑀤, 𑀪𑀺𑀓𑁆𑀔𑀼𑀦𑁄𑀢𑀺, 𑀆𑀦𑀦𑁆𑀤, 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀪𑀺𑀓𑁆𑀔𑀼𑀦𑁄. 𑀏𑀢𑀁 𑀲𑀦𑁆𑀢𑀁 𑀏𑀢𑀁 𑀧𑀡𑀻𑀢𑀦𑁆𑀢𑀺 𑀦𑀺𑀩𑁆𑀩𑀸𑀦𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳. 𑀦𑀺𑀩𑁆𑀩𑀸𑀦𑀁 𑀳𑀺 𑀓𑀺𑀮𑁂𑀲𑀸𑀦𑀁 𑀲𑀦𑁆𑀢𑀢𑀸𑀬 𑀲𑀦𑁆𑀢𑀁 𑀦𑀸𑀫, 𑀦𑀺𑀩𑁆𑀩𑀸𑀦𑀁 𑀲𑀦𑁆𑀢𑀦𑁆𑀢𑀺 𑀲𑀫𑀸𑀧𑀢𑁆𑀢𑀺𑀁 𑀅𑀧𑁆𑀧𑁂𑀢𑁆𑀯𑀸𑀯 𑀤𑀺𑀯𑀲𑀫𑁆𑀧𑀺 𑀦𑀺𑀲𑀺𑀦𑁆𑀦𑀲𑁆𑀲 𑀘𑀺𑀢𑁆𑀢𑀼𑀧𑁆𑀧𑀸𑀤𑁄 𑀲𑀦𑁆𑀢𑀦𑁆𑀢𑁂𑀯 𑀧𑀯𑀢𑁆𑀢𑀢𑀻𑀢𑀺𑀧𑀺 𑀲𑀦𑁆𑀢𑀁. 𑀧𑀡𑀻𑀢𑀦𑁆𑀢𑀺 𑀲𑀫𑀸𑀧𑀢𑁆𑀢𑀺𑀁 𑀅𑀧𑁆𑀧𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑀲𑁆𑀲𑀸𑀧𑀺 𑀘𑀺𑀢𑁆𑀢𑀼𑀧𑁆𑀧𑀸𑀤𑁄 𑀧𑀡𑀻𑀢𑀦𑁆𑀢𑁂𑀯 𑀧𑀯𑀢𑁆𑀢𑀢𑀻𑀢𑀺 𑀦𑀺𑀩𑁆𑀩𑀸𑀦𑀁 𑀧𑀡𑀻𑀢𑀁 𑀦𑀸𑀫. 𑀲𑀩𑁆𑀩𑀲𑀗𑁆𑀔𑀸𑀭𑀲𑀫𑀣𑁄𑀢𑀺𑀆𑀤𑀻𑀦𑀺𑀧𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀸𑀦𑀺. ‘‘𑀲𑀩𑁆𑀩𑀲𑀗𑁆𑀔𑀸𑀭𑀲𑀫𑀣𑁄’’𑀢𑀺 𑀲𑀫𑀸𑀧𑀢𑁆𑀢𑀺𑀁 𑀅𑀧𑁆𑀧𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑀲𑁆𑀲 𑀳𑀺 𑀤𑀺𑀯𑀲𑀪𑀸𑀕𑀫𑁆𑀧𑀺 𑀘𑀺𑀢𑁆𑀢𑀼𑀧𑁆𑀧𑀸𑀤𑁄 𑀲𑀩𑁆𑀩𑀲𑀗𑁆𑀔𑀸𑀭𑀲𑀫𑀣𑁄𑀢𑁂𑀯 𑀧𑀯𑀢𑁆𑀢𑀢𑀺…𑀧𑁂… 𑀢𑀣𑀸 𑀢𑀻𑀲𑀼 𑀪𑀯𑁂𑀲𑀼 𑀯𑀸𑀦𑀲𑀗𑁆𑀔𑀸𑀢𑀸𑀬 𑀢𑀡𑁆𑀳𑀸𑀬 𑀅𑀪𑀸𑀯𑁂𑀦 𑀦𑀺𑀩𑁆𑀩𑀸𑀦𑀦𑁆𑀢𑀺 𑀮𑀤𑁆𑀥𑀦𑀸𑀫𑁂 𑀢𑀲𑁆𑀫𑀺𑀁 𑀲𑀫𑀸𑀧𑀢𑁆𑀢𑀺𑀁 𑀅𑀧𑁆𑀧𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑀲𑁆𑀲 𑀘𑀺𑀢𑁆𑀢𑀼𑀧𑁆𑀧𑀸𑀤𑁄 𑀦𑀺𑀩𑁆𑀩𑀸𑀦𑀁 𑀦𑀺𑀩𑁆𑀩𑀸𑀦𑀦𑁆𑀢𑁂𑀯 𑀧𑀯𑀢𑁆𑀢𑀢𑀻𑀢𑀺 𑀲𑀩𑁆𑀩𑀲𑀗𑁆𑀔𑀸𑀭𑀲𑀫𑀣𑁄𑀢𑀺𑀆𑀤𑀻𑀦𑀺 𑀦𑀸𑀫𑀸𑀦𑀺 𑀮𑀪𑀢𑀺. 𑀇𑀫𑀲𑁆𑀫𑀺𑀁 𑀧𑀦 𑀅𑀝𑁆𑀞𑀯𑀺𑀥𑁂 𑀆𑀪𑁄𑀕𑀲𑀫𑀦𑁆𑀦𑀸𑀳𑀸𑀭𑁂 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀏𑀓𑁄𑀧𑀺 𑀮𑀩𑁆𑀪𑀢𑀺, 𑀤𑁆𑀯𑁂𑀧𑀺 𑀲𑀩𑁆𑀩𑁂𑀧𑀺 𑀮𑀩𑁆𑀪𑀦𑁆𑀢𑁂𑀯.

𑀲𑀗𑁆𑀔𑀸𑀬𑀸𑀢𑀺 𑀜𑀸𑀡𑁂𑀦 𑀚𑀸𑀦𑀺𑀢𑁆𑀯𑀸. 𑀧𑀭𑁄𑀧𑀭𑀸𑀦𑀻𑀢𑀺 𑀧𑀭𑀸𑀦𑀺 𑀘 𑀑𑀧𑀭𑀸𑀦𑀺 𑀘. 𑀧𑀭𑀅𑀢𑁆𑀢𑀪𑀸𑀯𑀲𑀓𑀅𑀢𑁆𑀢𑀪𑀸𑀯𑀸𑀦𑀺 𑀳𑀺 𑀧𑀭𑀸𑀦𑀺 𑀘 𑀑𑀧𑀭𑀸𑀦𑀺 𑀘𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀬𑀲𑁆𑀲𑀸𑀢𑀺 𑀬𑀲𑁆𑀲 𑀅𑀭𑀳𑀢𑁄. 𑀇𑀜𑁆𑀚𑀺𑀢𑀦𑁆𑀢𑀺 𑀭𑀸𑀕𑀺𑀜𑁆𑀚𑀺𑀢𑀁 𑀤𑁄𑀲𑀫𑁄𑀳𑀫𑀸𑀦𑀤𑀺𑀝𑁆𑀞𑀺𑀓𑀺𑀮𑁂𑀲𑀤𑀼𑀘𑁆𑀘𑀭𑀺𑀢𑀺𑀜𑁆𑀚𑀺𑀢𑀦𑁆𑀢𑀺 𑀇𑀫𑀸𑀦𑀺 𑀲𑀢𑁆𑀢 𑀇𑀜𑁆𑀚𑀺𑀢𑀸𑀦𑀺 𑀘𑀮𑀺𑀢𑀸𑀦𑀺 𑀨𑀦𑁆𑀤𑀺𑀢𑀸𑀦𑀺. 𑀦𑀢𑁆𑀣𑀺 𑀓𑀼𑀳𑀺𑀜𑁆𑀘𑀻𑀢𑀺 𑀓𑀢𑁆𑀣𑀘𑀺 𑀏𑀓𑀸𑀭𑀫𑁆𑀫𑀡𑁂𑀧𑀺 𑀦𑀢𑁆𑀣𑀺. 𑀲𑀦𑁆𑀢𑁄𑀢𑀺 𑀧𑀘𑁆𑀘𑀦𑀻𑀓𑀓𑀺𑀮𑁂𑀲𑀸𑀦𑀁 𑀲𑀦𑁆𑀢𑀢𑀸𑀬 𑀲𑀦𑁆𑀢𑁄. 𑀯𑀺𑀥𑀽𑀫𑁄𑀢𑀺 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀺𑀥𑀽𑀫𑀯𑀺𑀭𑀳𑀺𑀢𑁄. 𑀅𑀦𑀻𑀖𑁄𑀢𑀺 𑀭𑀸𑀕𑀸𑀤𑀺𑀈𑀖𑀯𑀺𑀭𑀳𑀺𑀢𑁄. 𑀦𑀺𑀭𑀸𑀲𑁄𑀢𑀺 𑀦𑀺𑀢𑁆𑀢𑀡𑁆𑀳𑁄. 𑀅𑀢𑀸𑀭𑀻𑀢𑀺 𑀢𑀺𑀡𑁆𑀡𑁄 𑀉𑀢𑁆𑀢𑀺𑀡𑁆𑀡𑁄 𑀲𑀫𑀢𑀺𑀓𑁆𑀓𑀦𑁆𑀢𑁄. 𑀲𑁄𑀢𑀺 𑀲𑁄 𑀅𑀭𑀳𑀁 𑀔𑀻𑀡𑀸𑀲𑀯𑁄. 𑀚𑀸𑀢𑀺𑀚𑀭𑀦𑁆𑀢𑀺 𑀏𑀢𑁆𑀣 𑀚𑀸𑀢𑀺𑀚𑀭𑀸𑀕𑀳𑀡𑁂𑀦𑁂𑀯 𑀩𑁆𑀬𑀸𑀥𑀺𑀫𑀭𑀡𑀫𑁆𑀧𑀺 𑀕𑀳𑀺𑀢𑀫𑁂𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀇𑀢𑀺 𑀲𑀼𑀢𑁆𑀢𑀦𑁆𑀢𑁂𑀧𑀺 𑀕𑀸𑀣𑀸𑀬𑀧𑀺 𑀅𑀭𑀳𑀢𑁆𑀢𑀨𑀮𑀲𑀫𑀸𑀧𑀢𑁆𑀢𑀺𑀬𑁂𑀯 𑀓𑀣𑀺𑀢𑀸𑀢𑀺.

𑁩. 𑀲𑀸𑀭𑀺𑀧𑀼𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁩. 𑀢𑀢𑀺𑀬𑁂 𑀲𑀁𑀔𑀺𑀢𑁆𑀢𑁂𑀦𑀸𑀢𑀺 𑀫𑀸𑀢𑀺𑀓𑀸𑀞𑀧𑀦𑁂𑀦. 𑀯𑀺𑀢𑁆𑀣𑀸𑀭𑁂𑀦𑀸𑀢𑀺 𑀞𑀧𑀺𑀢𑀫𑀸𑀢𑀺𑀓𑀸𑀯𑀺𑀪𑀚𑀦𑁂𑀦. 𑀲𑀁𑀔𑀺𑀢𑁆𑀢𑀯𑀺𑀢𑁆𑀣𑀸𑀭𑁂𑀦𑀸𑀢𑀺 𑀓𑀸𑀮𑁂 𑀲𑀁𑀔𑀺𑀢𑁆𑀢𑁂𑀦 𑀓𑀸𑀮𑁂 𑀯𑀺𑀢𑁆𑀣𑀸𑀭𑁂𑀦. 𑀅𑀜𑁆𑀜𑀸𑀢𑀸𑀭𑁄 𑀘 𑀤𑀼𑀮𑁆𑀮𑀪𑀸𑀢𑀺 𑀧𑀝𑀺𑀯𑀺𑀚𑁆𑀛𑀦𑀓𑀧𑀼𑀕𑁆𑀕𑀮𑀸 𑀧𑀦 𑀤𑀼𑀮𑁆𑀮𑀪𑀸. 𑀇𑀤𑀁 𑀪𑀕𑀯𑀸 ‘‘𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀲𑁆𑀲 𑀜𑀸𑀡𑀁 𑀖𑀝𑁆𑀝𑁂𑀫𑀻’’𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀓𑀣𑁂𑀲𑀺. 𑀢𑀁 𑀲𑀼𑀢𑁆𑀯𑀸 𑀣𑁂𑀭𑁄 𑀓𑀺𑀜𑁆𑀘𑀸𑀧𑀺 ‘‘𑀅𑀳𑀁, 𑀪𑀦𑁆𑀢𑁂, 𑀆𑀚𑀸𑀦𑀺𑀲𑁆𑀲𑀸𑀫𑀻’’𑀢𑀺 𑀦 𑀯𑀤𑀢𑀺, 𑀅𑀥𑀺𑀧𑁆𑀧𑀸𑀬𑁂𑀦 𑀧𑀦 ‘‘𑀯𑀺𑀲𑁆𑀲𑀢𑁆𑀣𑀸 𑀢𑀼𑀫𑁆𑀳𑁂, 𑀪𑀦𑁆𑀢𑁂, 𑀤𑁂𑀲𑁂𑀣, 𑀅𑀳𑀁 𑀢𑀼𑀫𑁆𑀳𑁂𑀳𑀺 𑀤𑁂𑀲𑀺𑀢𑀁 𑀥𑀫𑁆𑀫𑀁 𑀦𑀬𑀲𑀢𑁂𑀦 𑀦𑀬𑀲𑀳𑀲𑁆𑀲𑁂𑀦 𑀧𑀝𑀺𑀯𑀺𑀚𑁆𑀛𑀺𑀲𑁆𑀲𑀸𑀫𑀺, 𑀫𑀫𑁂𑀲 𑀪𑀸𑀭𑁄 𑀳𑁄𑀢𑀽’’𑀢𑀺 𑀲𑀢𑁆𑀣𑀸𑀭𑀁 𑀤𑁂𑀲𑀦𑀸𑀬 𑀉𑀲𑁆𑀲𑀸𑀳𑁂𑀦𑁆𑀢𑁄 𑀏𑀢𑀲𑁆𑀲 𑀪𑀕𑀯𑀸 𑀓𑀸𑀮𑁄𑀢𑀺𑀆𑀤𑀺𑀫𑀸𑀳.

𑀅𑀣𑀲𑁆𑀲 𑀲𑀢𑁆𑀣𑀸 𑀢𑀲𑁆𑀫𑀸𑀢𑀺𑀳𑀸𑀢𑀺 𑀤𑁂𑀲𑀦𑀁 𑀆𑀭𑀪𑀺. 𑀢𑀢𑁆𑀣 𑀇𑀫𑀲𑁆𑀫𑀺𑀜𑁆𑀘 𑀲𑀯𑀺𑀜𑁆𑀜𑀸𑀡𑀓𑁂𑀢𑀺𑀆𑀤𑀺 𑀯𑀼𑀢𑁆𑀢𑀦𑀬𑀫𑁂𑀯. 𑀅𑀘𑁆𑀙𑁂𑀘𑁆𑀙𑀺 𑀢𑀡𑁆𑀳𑀦𑁆𑀢𑀺 𑀫𑀕𑁆𑀕𑀜𑀸𑀡𑀲𑀢𑁆𑀣𑁂𑀦 𑀢𑀡𑁆𑀳𑀁 𑀙𑀺𑀦𑁆𑀤𑀺. 𑀯𑀺𑀯𑀢𑁆𑀢𑀬𑀺 𑀲𑀁𑀬𑁄𑀚𑀦𑀦𑁆𑀢𑀺 𑀤𑀲𑀯𑀺𑀥𑀫𑁆𑀧𑀺 𑀲𑀁𑀬𑁄𑀚𑀦𑀁 𑀲𑀫𑀽𑀮𑀓𑀁 𑀉𑀩𑁆𑀩𑀢𑁆𑀢𑁂𑀢𑁆𑀯𑀸 𑀙𑀟𑁆𑀟𑁂𑀲𑀺. 𑀲𑀫𑁆𑀫𑀸 𑀫𑀸𑀦𑀸𑀪𑀺𑀲𑀫𑀬𑀸 𑀅𑀦𑁆𑀢𑀫𑀓𑀸𑀲𑀺 𑀤𑀼𑀓𑁆𑀔𑀲𑁆𑀲𑀸𑀢𑀺 𑀲𑀫𑁆𑀫𑀸 𑀉𑀧𑀸𑀬𑁂𑀦 𑀲𑀫𑁆𑀫𑀸 𑀧𑀝𑀺𑀧𑀢𑁆𑀢𑀺𑀬𑀸 𑀦𑀯𑀯𑀺𑀥𑀲𑁆𑀲 𑀫𑀸𑀦𑀲𑁆𑀲 𑀧𑀳𑀸𑀦𑀸𑀪𑀺𑀲𑀫𑀬𑁂𑀦 𑀯𑀝𑁆𑀝𑀤𑀼𑀓𑁆𑀔𑀲𑁆𑀲 𑀅𑀦𑁆𑀢𑀫𑀓𑀸𑀲𑀺. 𑀇𑀤𑀜𑁆𑀘 𑀧𑀦 𑀫𑁂𑀢𑀁, 𑀲𑀸𑀭𑀺𑀧𑀼𑀢𑁆𑀢, 𑀲𑀦𑁆𑀥𑀸𑀬 𑀪𑀸𑀲𑀺𑀢𑀦𑁆𑀢𑀺, 𑀲𑀸𑀭𑀺𑀧𑀼𑀢𑁆𑀢, 𑀫𑀬𑀸 𑀧𑀸𑀭𑀸𑀬𑀦𑁂 𑀉𑀤𑀬𑀧𑀜𑁆𑀳𑁂 𑀇𑀤𑀁 𑀨𑀮𑀲𑀫𑀸𑀧𑀢𑁆𑀢𑀺𑀫𑁂𑀯 𑀲𑀦𑁆𑀥𑀸𑀬 𑀏𑀢𑀁 𑀪𑀸𑀲𑀺𑀢𑀁.

𑀇𑀤𑀸𑀦𑀺 𑀬𑀁 𑀢𑀁 𑀪𑀕𑀯𑀢𑀸 𑀪𑀸𑀲𑀺𑀢𑀁, 𑀢𑀁 𑀤𑀲𑁆𑀲𑁂𑀦𑁆𑀢𑁄 𑀧𑀳𑀸𑀦𑀁 𑀓𑀸𑀫𑀲𑀜𑁆𑀜𑀸𑀦𑀦𑁆𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀉𑀤𑀬𑀧𑀜𑁆𑀳𑁂 𑀘 𑀏𑀢𑀁 𑀧𑀤𑀁 ‘‘𑀧𑀳𑀸𑀦𑀁 𑀓𑀸𑀫𑀘𑁆𑀙𑀦𑁆𑀤𑀸𑀦’’𑀦𑁆𑀢𑀺 (𑀲𑀼. 𑀦𑀺. 𑁧𑁧𑁧𑁨; 𑀘𑀽𑀴𑀦𑀺. 𑀉𑀤𑀬𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲𑁄 𑁭𑁫) 𑀆𑀕𑀢𑀁, 𑀇𑀥 𑀧𑀦 𑀅𑀗𑁆𑀕𑀼𑀢𑁆𑀢𑀭𑀪𑀸𑀡𑀓𑁂𑀳𑀺 ‘‘𑀓𑀸𑀫𑀲𑀜𑁆𑀜𑀸𑀦’’𑀦𑁆𑀢𑀺 𑀆𑀭𑁄𑀧𑀺𑀢𑀁. 𑀢𑀢𑁆𑀣 𑀩𑁆𑀬𑀜𑁆𑀚𑀦𑀫𑁂𑀯 𑀦𑀸𑀦𑀁, 𑀅𑀢𑁆𑀣𑁄 𑀧𑀦 𑀏𑀓𑁄𑀬𑁂𑀯. 𑀓𑀸𑀫𑀲𑀜𑁆𑀜𑀸𑀦𑀦𑁆𑀢𑀺 𑀓𑀸𑀫𑁂 𑀆𑀭𑀩𑁆𑀪 𑀉𑀧𑁆𑀧𑀦𑁆𑀦𑀲𑀜𑁆𑀜𑀸𑀦𑀁, 𑀅𑀝𑁆𑀞𑀳𑀺 𑀯𑀸 𑀮𑁄𑀪𑀲𑀳𑀕𑀢𑀘𑀺𑀢𑁆𑀢𑁂𑀳𑀺 𑀲𑀳𑀚𑀸𑀢𑀲𑀜𑁆𑀜𑀸𑀦𑀁. 𑀤𑁄𑀫𑀦𑀲𑁆𑀲𑀸𑀦 𑀘𑀽𑀪𑀬𑀦𑁆𑀢𑀺 𑀏𑀢𑀸𑀲𑀜𑁆𑀘 𑀓𑀸𑀫𑀲𑀜𑁆𑀜𑀸𑀦𑀁 𑀘𑁂𑀢𑀲𑀺𑀓𑀤𑁄𑀫𑀦𑀲𑁆𑀲𑀸𑀦𑀜𑁆𑀘𑀸𑀢𑀺 𑀉𑀪𑀺𑀦𑁆𑀦𑀫𑁆𑀧𑀺 𑀧𑀳𑀸𑀦𑀁 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀧𑀳𑀸𑀦𑀲𑀗𑁆𑀔𑀸𑀢𑀁 𑀅𑀭𑀳𑀢𑁆𑀢𑀨𑀮𑀁 𑀅𑀜𑁆𑀜𑀸𑀯𑀺𑀫𑁄𑀓𑁆𑀔𑀁 𑀧𑀩𑁆𑀭𑀽𑀫𑀻𑀢𑀺 𑀅𑀢𑁆𑀣𑁄. 𑀦𑀺𑀤𑁆𑀤𑁂𑀲𑁂 𑀧𑀦 ‘‘𑀓𑀸𑀫𑀘𑁆𑀙𑀦𑁆𑀤𑀲𑁆𑀲 𑀘 𑀤𑁄𑀫𑀦𑀲𑁆𑀲𑀲𑁆𑀲 𑀘 𑀉𑀪𑀺𑀦𑁆𑀦𑀁 𑀧𑀳𑀸𑀦𑀁 𑀯𑀽𑀧𑀲𑀫𑀁 𑀧𑀝𑀺𑀦𑀺𑀲𑁆𑀲𑀕𑁆𑀕𑀁 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀁 𑀅𑀫𑀢𑀁 𑀦𑀺𑀩𑁆𑀩𑀸𑀦’’𑀦𑁆𑀢𑀺 (𑀘𑀽𑀴𑀦𑀺. 𑀉𑀤𑀬𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲𑁄 𑁭𑁫) 𑀯𑀼𑀢𑁆𑀢𑀁, 𑀢𑀁 𑀅𑀢𑁆𑀣𑀼𑀤𑁆𑀥𑀸𑀭𑀯𑀲𑁂𑀦 𑀯𑀼𑀢𑁆𑀢𑀁. 𑀧𑀳𑀸𑀦𑀦𑁆𑀢𑀺 𑀳𑀺 𑀔𑀻𑀡𑀸𑀓𑀸𑀭𑀲𑀗𑁆𑀔𑀸𑀢𑁄 𑀯𑀽𑀧𑀲𑀫𑁄𑀧𑀺 𑀯𑀼𑀘𑁆𑀘𑀢𑀺, 𑀓𑀺𑀮𑁂𑀲𑁂 𑀧𑀝𑀺𑀦𑀺𑀲𑁆𑀲𑀚𑁆𑀚𑀦𑁆𑀢𑁄 𑀫𑀕𑁆𑀕𑁄𑀧𑀺, 𑀓𑀺𑀮𑁂𑀲𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀲𑀗𑁆𑀔𑀸𑀢𑀁 𑀨𑀮𑀫𑁆𑀧𑀺, 𑀬𑀁 𑀆𑀕𑀫𑁆𑀫 𑀓𑀺𑀮𑁂𑀲𑀸 𑀧𑀳𑀻𑀬𑀦𑁆𑀢𑀺, 𑀢𑀁 𑀅𑀫𑀢𑀁 𑀦𑀺𑀩𑁆𑀩𑀸𑀦𑀫𑁆𑀧𑀺. 𑀢𑀲𑁆𑀫𑀸 𑀢𑀢𑁆𑀣 𑀢𑀸𑀦𑀺 𑀧𑀤𑀸𑀦𑀺 𑀆𑀕𑀢𑀸𑀦𑀺. ‘‘𑀅𑀜𑁆𑀜𑀸𑀯𑀺𑀫𑁄𑀓𑁆𑀔𑀁 𑀧𑀩𑁆𑀭𑀽𑀫𑀻’’𑀢𑀺 𑀯𑀘𑀦𑀢𑁄 𑀧𑀦 𑀅𑀭𑀳𑀢𑁆𑀢𑀨𑀮𑀫𑁂𑀯 𑀅𑀥𑀺𑀧𑁆𑀧𑁂𑀢𑀁. 𑀣𑀺𑀦𑀲𑁆𑀲 𑀘 𑀧𑀦𑀽𑀤𑀦𑀦𑁆𑀢𑀺𑀧𑀺 𑀣𑀺𑀦𑀲𑁆𑀲 𑀘 𑀧𑀦𑀽𑀤𑀦𑀦𑁆𑀢𑁂 𑀉𑀧𑁆𑀧𑀦𑁆𑀦𑀢𑁆𑀢𑀸 𑀅𑀭𑀳𑀢𑁆𑀢𑀨𑀮𑀫𑁂𑀯 𑀅𑀥𑀺𑀧𑁆𑀧𑁂𑀢𑀁. 𑀓𑀼𑀓𑁆𑀓𑀼𑀘𑁆𑀘𑀸𑀦𑀁 𑀦𑀺𑀯𑀸𑀭𑀡𑀦𑁆𑀢𑀺 𑀓𑀼𑀓𑁆𑀓𑀼𑀘𑁆𑀘𑀦𑀺𑀯𑀸𑀭𑀡𑀲𑁆𑀲 𑀫𑀕𑁆𑀕𑀲𑁆𑀲 𑀅𑀦𑀦𑁆𑀢𑀭𑀁 𑀉𑀧𑁆𑀧𑀦𑁆𑀦𑀢𑁆𑀢𑀸 𑀨𑀮𑀫𑁂𑀯 𑀅𑀥𑀺𑀧𑁆𑀧𑁂𑀢𑀁.

𑀉𑀧𑁂𑀓𑁆𑀔𑀸𑀲𑀢𑀺𑀲𑀁𑀲𑀼𑀤𑁆𑀥𑀦𑁆𑀢𑀺 𑀘𑀢𑀼𑀢𑁆𑀣𑀚𑁆𑀛𑀸𑀦𑀺𑀓𑁂 𑀨𑀮𑁂 𑀉𑀧𑁆𑀧𑀦𑁆𑀦𑀸𑀬 𑀉𑀧𑁂𑀓𑁆𑀔𑀸𑀬 𑀘 𑀲𑀢𑀺𑀬𑀸 𑀘 𑀲𑀁𑀲𑀼𑀤𑁆𑀥𑀁. 𑀥𑀫𑁆𑀫𑀢𑀓𑁆𑀓𑀧𑀼𑀭𑁂𑀚𑀯𑀦𑁆𑀢𑀺 𑀥𑀫𑁆𑀫𑀢𑀓𑁆𑀓𑁄 𑀯𑀼𑀘𑁆𑀘𑀢𑀺 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄, 𑀲𑁄 𑀆𑀤𑀺𑀢𑁄 𑀳𑁄𑀢𑀺, 𑀧𑀼𑀭𑀢𑁄 𑀳𑁄𑀢𑀺, 𑀧𑀼𑀩𑁆𑀩𑀗𑁆𑀕𑀫𑁄 𑀳𑁄𑀢𑀺 𑀅𑀜𑁆𑀜𑀸𑀯𑀺𑀫𑁄𑀓𑁆𑀔𑀲𑁆𑀲𑀸𑀢𑀺 𑀥𑀫𑁆𑀫𑀢𑀓𑁆𑀓𑀧𑀼𑀭𑁂𑀚𑀯𑁄. 𑀢𑀁 𑀥𑀫𑁆𑀫𑀢𑀓𑁆𑀓𑀧𑀼𑀭𑁂𑀚𑀯𑀁. 𑀅𑀜𑁆𑀜𑀸𑀯𑀺𑀫𑁄𑀓𑁆𑀔𑀦𑁆𑀢𑀺 𑀅𑀜𑁆𑀜𑀺𑀦𑁆𑀤𑁆𑀭𑀺𑀬𑀧𑀭𑀺𑀬𑁄𑀲𑀸𑀦𑁂 𑀉𑀧𑁆𑀧𑀦𑁆𑀦𑀁 𑀯𑀺𑀫𑁄𑀓𑁆𑀔𑀁, 𑀅𑀜𑁆𑀜𑀸𑀬 𑀯𑀸 𑀯𑀺𑀫𑁄𑀓𑁆𑀔𑀁 𑀅𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀅𑀯𑀺𑀚𑁆𑀚𑀸𑀬 𑀧𑀪𑁂𑀤𑀦𑀦𑁆𑀢𑀺 𑀅𑀯𑀺𑀚𑁆𑀚𑀸𑀬 𑀧𑀪𑁂𑀤𑀦𑀦𑁆𑀢𑁂 𑀉𑀧𑁆𑀧𑀦𑁆𑀦𑀢𑁆𑀢𑀸, 𑀅𑀯𑀺𑀚𑁆𑀚𑀸𑀬 𑀧𑀪𑁂𑀤𑀦𑀲𑀗𑁆𑀔𑀸𑀢𑀁 𑀯𑀸 𑀦𑀺𑀩𑁆𑀩𑀸𑀦𑀁 𑀆𑀭𑀩𑁆𑀪 𑀉𑀧𑁆𑀧𑀦𑁆𑀦𑀢𑁆𑀢𑀸 𑀏𑀯𑀁𑀮𑀤𑁆𑀥𑀦𑀸𑀫𑀁 𑀅𑀭𑀳𑀢𑁆𑀢𑀨𑀮𑀫𑁂𑀯. 𑀇𑀢𑀺 𑀲𑀩𑁆𑀩𑁂𑀳𑀺𑀧𑀺 𑀇𑀫𑁂𑀳𑀺 𑀧𑀳𑀸𑀦𑀦𑁆𑀢𑀺𑀆𑀤𑀻𑀳𑀺 𑀧𑀤𑁂𑀳𑀺 𑀅𑀭𑀳𑀢𑁆𑀢𑀨𑀮𑀫𑁂𑀯 𑀧𑀓𑀸𑀲𑀺𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑁪. 𑀦𑀺𑀤𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁪. 𑀘𑀢𑀼𑀢𑁆𑀣𑁂 𑀦𑀺𑀤𑀸𑀦𑀸𑀦𑀻𑀢𑀺 𑀓𑀸𑀭𑀡𑀸𑀦𑀺. 𑀓𑀫𑁆𑀫𑀸𑀦𑀦𑁆𑀢𑀺 𑀯𑀝𑁆𑀝𑀕𑀸𑀫𑀺𑀓𑀫𑁆𑀫𑀸𑀦𑀁. 𑀮𑁄𑀪𑁄 𑀦𑀺𑀤𑀸𑀦𑀁 𑀓𑀫𑁆𑀫𑀸𑀦𑀁 𑀲𑀫𑀼𑀤𑀬𑀸𑀬𑀸𑀢𑀺 𑀮𑀼𑀩𑁆𑀪𑀦𑀧𑀮𑀼𑀩𑁆𑀪𑀦𑀲𑀪𑀸𑀯𑁄 𑀮𑁄𑀪𑁄 𑀯𑀝𑁆𑀝𑀕𑀸𑀫𑀺𑀓𑀫𑁆𑀫𑀸𑀦𑀁 𑀲𑀫𑀼𑀤𑀬𑀸𑀬 𑀧𑀺𑀡𑁆𑀟𑀓𑀭𑀡𑀢𑁆𑀣𑀸𑀬 𑀦𑀺𑀤𑀸𑀦𑀁 𑀓𑀸𑀭𑀡𑀁 𑀧𑀘𑁆𑀘𑀬𑁄𑀢𑀺 𑀅𑀢𑁆𑀣𑁄. 𑀤𑁄𑀲𑁄𑀢𑀺 𑀤𑀼𑀲𑁆𑀲𑀦𑀧𑀤𑀼𑀲𑁆𑀲𑀦𑀲𑀪𑀸𑀯𑁄 𑀤𑁄𑀲𑁄. 𑀫𑁄𑀳𑁄𑀢𑀺 𑀫𑀼𑀬𑁆𑀳𑀦𑀧𑀫𑀼𑀬𑁆𑀳𑀦𑀲𑀪𑀸𑀯𑁄 𑀫𑁄𑀳𑁄.

𑀮𑁄𑀪𑀧𑀓𑀢𑀦𑁆𑀢𑀺 𑀮𑁄𑀪𑁂𑀦 𑀧𑀓𑀢𑀁, 𑀮𑁄𑀪𑀸𑀪𑀺𑀪𑀽𑀢𑁂𑀦 𑀮𑀼𑀤𑁆𑀥𑁂𑀦 𑀳𑀼𑀢𑁆𑀯𑀸 𑀓𑀢𑀓𑀫𑁆𑀫𑀦𑁆𑀢𑀺 𑀅𑀢𑁆𑀣𑁄. 𑀮𑁄𑀪𑀢𑁄 𑀚𑀸𑀢𑀦𑁆𑀢𑀺 𑀮𑁄𑀪𑀚𑀁. 𑀮𑁄𑀪𑁄 𑀦𑀺𑀤𑀸𑀦𑀫𑀲𑁆𑀲𑀸𑀢𑀺 𑀮𑁄𑀪𑀦𑀺𑀤𑀸𑀦𑀁. 𑀮𑁄𑀪𑁄 𑀲𑀫𑀼𑀤𑀬𑁄 𑀅𑀲𑁆𑀲𑀸𑀢𑀺 𑀮𑁄𑀪𑀲𑀫𑀼𑀤𑀬𑀁. 𑀲𑀫𑀼𑀤𑀬𑁄𑀢𑀺 𑀧𑀘𑁆𑀘𑀬𑁄, 𑀮𑁄𑀪𑀧𑀘𑁆𑀘𑀬𑀦𑁆𑀢𑀺 𑀅𑀢𑁆𑀣𑁄. 𑀬𑀢𑁆𑀣𑀲𑁆𑀲 𑀅𑀢𑁆𑀢𑀪𑀸𑀯𑁄 𑀦𑀺𑀩𑁆𑀩𑀢𑁆𑀢𑀢𑀻𑀢𑀺 𑀬𑀲𑁆𑀫𑀺𑀁 𑀞𑀸𑀦𑁂 𑀅𑀲𑁆𑀲 𑀮𑁄𑀪𑀚𑀓𑀫𑁆𑀫𑀯𑀢𑁄 𑀧𑀼𑀕𑁆𑀕𑀮𑀲𑁆𑀲 𑀅𑀢𑁆𑀢𑀪𑀸𑀯𑁄 𑀦𑀺𑀩𑁆𑀩𑀢𑁆𑀢𑀢𑀺, 𑀔𑀦𑁆𑀥𑀸 𑀧𑀸𑀢𑀼𑀪𑀯𑀦𑁆𑀢𑀺. 𑀢𑀢𑁆𑀣 𑀢𑀁 𑀓𑀫𑁆𑀫𑀁 𑀯𑀺𑀧𑀘𑁆𑀘𑀢𑀻𑀢𑀺 𑀢𑁂𑀲𑀼 𑀔𑀦𑁆𑀥𑁂𑀲𑀼 𑀢𑀁 𑀓𑀫𑁆𑀫𑀁 𑀯𑀺𑀧𑀘𑁆𑀘𑀢𑀺. 𑀤𑀺𑀝𑁆𑀞𑁂 𑀯𑀸 𑀥𑀫𑁆𑀫𑁂𑀢𑀺𑀆𑀤𑀺 𑀬𑀲𑁆𑀫𑀸 𑀢𑀁 𑀓𑀫𑁆𑀫𑀁 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀁 𑀯𑀸 𑀳𑁄𑀢𑀺 𑀉𑀧𑀧𑀚𑁆𑀚𑀯𑁂𑀤𑀦𑀻𑀬𑀁 𑀯𑀸 𑀅𑀧𑀭𑀧𑀭𑀺𑀬𑀸𑀬𑀯𑁂𑀤𑀦𑀻𑀬𑀁 𑀯𑀸, 𑀢𑀲𑁆𑀫𑀸 𑀢𑀁 𑀧𑀪𑁂𑀤𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁. 𑀲𑁂𑀲𑀤𑁆𑀯𑀬𑁂𑀧𑀺 𑀏𑀲𑁂𑀯 𑀦𑀬𑁄.

𑀅𑀔𑀡𑁆𑀟𑀸𑀦𑀻𑀢𑀺 𑀅𑀪𑀺𑀦𑁆𑀦𑀸𑀦𑀺. 𑀅𑀧𑀽𑀢𑀻𑀦𑀻𑀢𑀺 𑀧𑀽𑀢𑀺𑀪𑀸𑀯𑁂𑀦 𑀅𑀩𑀻𑀚𑀢𑁆𑀢𑀁 𑀅𑀧𑁆𑀧𑀢𑁆𑀢𑀸𑀦𑀺. 𑀅𑀯𑀸𑀢𑀸𑀢𑀧𑀳𑀢𑀸𑀦𑀻𑀢𑀺 𑀦 𑀯𑀸𑀢𑁂𑀦 𑀦 𑀘 𑀆𑀢𑀧𑁂𑀦 𑀳𑀢𑀸𑀦𑀺. 𑀲𑀸𑀭𑀸𑀤𑀸𑀦𑀻𑀢𑀺 𑀕𑀳𑀺𑀢𑀲𑀸𑀭𑀸𑀦𑀺 𑀲𑀸𑀭𑀯𑀦𑁆𑀢𑀸𑀦𑀺 𑀦 𑀦𑀺𑀲𑁆𑀲𑀸𑀭𑀸𑀦𑀺. 𑀲𑀼𑀔𑀲𑀬𑀺𑀢𑀸𑀦𑀻𑀢𑀺 𑀲𑀦𑁆𑀦𑀺𑀘𑀬𑀪𑀸𑀯𑁂𑀦 𑀲𑀼𑀔𑀁 𑀲𑀬𑀺𑀢𑀸𑀦𑀺. 𑀲𑀼𑀔𑁂𑀢𑁆𑀢𑁂𑀢𑀺 𑀫𑀡𑁆𑀟𑀔𑁂𑀢𑁆𑀢𑁂. 𑀲𑀼𑀧𑀭𑀺𑀓𑀫𑁆𑀫𑀓𑀢𑀸𑀬 𑀪𑀽𑀫𑀺𑀬𑀸𑀢𑀺 𑀦𑀗𑁆𑀕𑀮𑀓𑀲𑀦𑁂𑀦 𑀘𑁂𑀯 𑀅𑀝𑁆𑀞𑀤𑀦𑁆𑀢𑀓𑁂𑀦 𑀘 𑀲𑀼𑀝𑁆𑀞𑀼 𑀧𑀭𑀺𑀓𑀫𑁆𑀫𑀓𑀢𑀸𑀬 𑀔𑁂𑀢𑁆𑀢𑀪𑀽𑀫𑀺𑀬𑀸. 𑀦𑀺𑀓𑁆𑀔𑀺𑀢𑁆𑀢𑀸𑀦𑀻𑀢𑀺 𑀞𑀧𑀺𑀢𑀸𑀦𑀺 𑀭𑁄𑀧𑀺𑀢𑀸𑀦𑀺. 𑀅𑀦𑀼𑀧𑁆𑀧𑀯𑁂𑀘𑁆𑀙𑁂𑀬𑁆𑀬𑀸𑀢𑀺 𑀅𑀦𑀼𑀧𑁆𑀧𑀯𑁂𑀲𑁂𑀬𑁆𑀬. 𑀯𑀼𑀤𑁆𑀥𑀺𑀦𑁆𑀢𑀺𑀆𑀤𑀻𑀲𑀼 𑀉𑀤𑁆𑀥𑀕𑁆𑀕𑀫𑀦𑁂𑀦 𑀯𑀼𑀤𑁆𑀥𑀺𑀁, 𑀳𑁂𑀝𑁆𑀞𑀸 𑀫𑀽𑀮𑀧𑁆𑀧𑀢𑀺𑀝𑁆𑀞𑀸𑀦𑁂𑀦 𑀯𑀺𑀭𑀽𑀴𑁆𑀳𑀺𑀁, 𑀲𑀫𑀦𑁆𑀢𑀸 𑀯𑀺𑀢𑁆𑀣𑀸𑀭𑀺𑀓𑀪𑀸𑀯𑁂𑀦 𑀯𑁂𑀧𑀼𑀮𑁆𑀮𑀁.

𑀬𑀁 𑀧𑀦𑁂𑀢𑁆𑀣 𑀤𑀺𑀝𑁆𑀞𑁂 𑀯𑀸 𑀥𑀫𑁆𑀫𑁂𑀢𑀺𑀆𑀤𑀺 𑀯𑀼𑀢𑁆𑀢𑀁, 𑀢𑀢𑁆𑀣 𑀅𑀲𑀫𑁆𑀫𑁄𑀳𑀢𑁆𑀣𑀁 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀓𑀫𑁆𑀫𑀯𑀺𑀪𑀢𑁆𑀢𑀺 𑀦𑀸𑀫 𑀓𑀣𑁂𑀢𑀩𑁆𑀩𑀸. 𑀲𑀼𑀢𑁆𑀢𑀦𑁆𑀢𑀺𑀓𑀧𑀭𑀺𑀬𑀸𑀬𑁂𑀦 𑀳𑀺 𑀏𑀓𑀸𑀤𑀲 𑀓𑀫𑁆𑀫𑀸𑀦𑀺 𑀯𑀺𑀪𑀢𑁆𑀢𑀸𑀦𑀺. 𑀲𑁂𑀬𑁆𑀬𑀣𑀺𑀤𑀁 𑁋 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀁 𑀉𑀧𑀧𑀚𑁆𑀚𑀯𑁂𑀤𑀦𑀻𑀬𑀁 𑀅𑀧𑀭𑀧𑀭𑀺𑀬𑀸𑀬𑀯𑁂𑀤𑀦𑀻𑀬𑀁, 𑀬𑀕𑁆𑀕𑀭𑀼𑀓𑀁 𑀬𑀩𑁆𑀩𑀳𑀼𑀮𑀁 𑀬𑀤𑀸𑀲𑀦𑁆𑀦𑀁 𑀓𑀝𑀢𑁆𑀢𑀸 𑀯𑀸 𑀧𑀦 𑀓𑀫𑁆𑀫𑀁, 𑀚𑀦𑀓𑀁 𑀉𑀧𑀢𑁆𑀣𑀫𑁆𑀪𑀓𑀁 𑀉𑀧𑀧𑀻𑀴𑀓𑀁 𑀉𑀧𑀖𑀸𑀢𑀓𑀦𑁆𑀢𑀺. 𑀢𑀢𑁆𑀣 𑀏𑀓𑀚𑀯𑀦𑀯𑀻𑀣𑀺𑀬𑀁 𑀲𑀢𑁆𑀢𑀲𑀼 𑀘𑀺𑀢𑁆𑀢𑁂𑀲𑀼 𑀓𑀼𑀲𑀮𑀸 𑀯𑀸 𑀅𑀓𑀼𑀲𑀮𑀸 𑀯𑀸 𑀧𑀞𑀫𑀚𑀯𑀦𑀘𑁂𑀢𑀦𑀸 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀓𑀫𑁆𑀫𑀁 𑀦𑀸𑀫. 𑀢𑀁 𑀇𑀫𑀲𑁆𑀫𑀺𑀁𑀬𑁂𑀯 𑀅𑀢𑁆𑀢𑀪𑀸𑀯𑁂 𑀯𑀺𑀧𑀸𑀓𑀁 𑀤𑁂𑀢𑀺 𑀓𑀸𑀓𑀯𑀴𑀺𑀬𑀧𑀼𑀡𑁆𑀡𑀲𑁂𑀝𑁆𑀞𑀻𑀦𑀁 𑀯𑀺𑀬 𑀓𑀼𑀲𑀮𑀁, 𑀦𑀦𑁆𑀤𑀬𑀓𑁆𑀔𑀦𑀦𑁆𑀤𑀫𑀸𑀡𑀯𑀓𑀦𑀦𑁆𑀤𑀕𑁄𑀖𑀸𑀢𑀓𑀓𑁄𑀓𑀸𑀮𑀺𑀬𑀲𑀼𑀧𑁆𑀧𑀩𑀼𑀤𑁆𑀥𑀤𑁂𑀯𑀤𑀢𑁆𑀢𑀘𑀺𑀜𑁆𑀘𑀫𑀸𑀡𑀯𑀺𑀓𑀸𑀦𑀁 𑀯𑀺𑀬 𑀘 𑀅𑀓𑀼𑀲𑀮𑀁. 𑀢𑀣𑀸 𑀅𑀲𑀓𑁆𑀓𑁄𑀦𑁆𑀢𑀁 𑀧𑀦 𑀅𑀳𑁄𑀲𑀺𑀓𑀫𑁆𑀫𑀁 𑀦𑀸𑀫 𑀳𑁄𑀢𑀺, 𑀅𑀯𑀺𑀧𑀸𑀓𑀁 𑀲𑀫𑁆𑀧𑀚𑁆𑀚𑀢𑀺. 𑀢𑀁 𑀫𑀺𑀕𑀮𑀼𑀤𑁆𑀤𑀓𑁄𑀧𑀫𑀸𑀬 𑀲𑀸𑀥𑁂𑀢𑀩𑁆𑀩𑀁. 𑀬𑀣𑀸 𑀳𑀺 𑀫𑀺𑀕𑀮𑀼𑀤𑁆𑀤𑀓𑁂𑀦 𑀫𑀺𑀕𑀁 𑀤𑀺𑀲𑁆𑀯𑀸 𑀥𑀦𑀼𑀁 𑀆𑀓𑀟𑁆𑀠𑀺𑀢𑁆𑀯𑀸 𑀔𑀺𑀢𑁆𑀢𑁄 𑀲𑀭𑁄 𑀲𑀘𑁂 𑀦 𑀯𑀺𑀭𑀚𑁆𑀛𑀢𑀺, 𑀢𑀁 𑀫𑀺𑀕𑀁 𑀢𑀢𑁆𑀣𑁂𑀯 𑀧𑀸𑀢𑁂𑀢𑀺, 𑀅𑀣 𑀦𑀁 𑀫𑀺𑀕𑀮𑀼𑀤𑁆𑀤𑀓𑁄 𑀦𑀺𑀘𑁆𑀘𑀫𑁆𑀫𑀁 𑀓𑀢𑁆𑀯𑀸 𑀔𑀡𑁆𑀟𑀸𑀔𑀡𑁆𑀟𑀺𑀓𑀁 𑀙𑁂𑀢𑁆𑀯𑀸 𑀫𑀁𑀲𑀁 𑀆𑀤𑀸𑀬 𑀧𑀼𑀢𑁆𑀢𑀤𑀸𑀭𑀁 𑀢𑁄𑀲𑁂𑀦𑁆𑀢𑁄 𑀕𑀘𑁆𑀙𑀢𑀺. 𑀲𑀘𑁂 𑀧𑀦 𑀯𑀺𑀭𑀚𑁆𑀛𑀢𑀺, 𑀫𑀺𑀕𑁄 𑀧𑀮𑀸𑀬𑀺𑀢𑁆𑀯𑀸 𑀧𑀼𑀦 𑀢𑀁 𑀤𑀺𑀲𑀁 𑀦 𑀑𑀮𑁄𑀓𑁂𑀢𑀺. 𑀏𑀯𑀁 𑀲𑀫𑁆𑀧𑀤𑀫𑀺𑀤𑀁 𑀤𑀝𑁆𑀞𑀩𑁆𑀩𑀁. 𑀲𑀭𑀲𑁆𑀲 𑀅𑀯𑀺𑀭𑀚𑁆𑀛𑀺𑀢𑁆𑀯𑀸 𑀫𑀺𑀕𑀯𑀺𑀚𑁆𑀛𑀦𑀁 𑀯𑀺𑀬 𑀳𑀺 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀲𑁆𑀲 𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑀯𑀸𑀭𑀧𑀝𑀺𑀮𑀸𑀪𑁄, 𑀅𑀯𑀺𑀚𑁆𑀛𑀦𑀁 𑀯𑀺𑀬 𑀅𑀯𑀺𑀧𑀸𑀓𑀪𑀸𑀯𑀸𑀬 𑀲𑀫𑁆𑀧𑀚𑁆𑀚𑀦𑀦𑁆𑀢𑀺.

𑀅𑀢𑁆𑀣𑀲𑀸𑀥𑀺𑀓𑀸 𑀧𑀦 𑀲𑀢𑁆𑀢𑀫𑀚𑀯𑀦𑀘𑁂𑀢𑀦𑀸 𑀉𑀧𑀧𑀚𑁆𑀚𑀯𑁂𑀤𑀦𑀻𑀬𑀓𑀫𑁆𑀫𑀁 𑀦𑀸𑀫. 𑀢𑀁 𑀅𑀦𑀦𑁆𑀢𑀭𑁂 𑀅𑀢𑁆𑀢𑀪𑀸𑀯𑁂 𑀯𑀺𑀧𑀸𑀓𑀁 𑀤𑁂𑀢𑀺. 𑀢𑀁 𑀧𑀦𑁂𑀢𑀁 𑀓𑀼𑀲𑀮𑀧𑀓𑁆𑀔𑁂 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀯𑀲𑁂𑀦, 𑀅𑀓𑀼𑀲𑀮𑀧𑀓𑁆𑀔𑁂 𑀧𑀜𑁆𑀘𑀸𑀦𑀦𑁆𑀢𑀭𑀺𑀬𑀓𑀫𑁆𑀫𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀢𑀢𑁆𑀣 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀮𑀸𑀪𑀻 𑀏𑀓𑀸𑀬 𑀲𑀫𑀸𑀧𑀢𑁆𑀢𑀺𑀬𑀸 𑀩𑁆𑀭𑀳𑁆𑀫𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀢𑀺. 𑀧𑀜𑁆𑀘𑀦𑁆𑀦𑀫𑁆𑀧𑀺 𑀆𑀦𑀦𑁆𑀢𑀭𑀺𑀬𑀸𑀦𑀁 𑀓𑀢𑁆𑀢𑀸 𑀏𑀓𑁂𑀦 𑀓𑀫𑁆𑀫𑁂𑀦 𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀢𑀺, 𑀲𑁂𑀲𑀲𑀫𑀸𑀧𑀢𑁆𑀢𑀺𑀬𑁄 𑀘 𑀓𑀫𑁆𑀫𑀸𑀦𑀺 𑀘 𑀅𑀳𑁄𑀲𑀺𑀓𑀫𑁆𑀫𑀪𑀸𑀯𑀁𑀬𑁂𑀯 𑀆𑀧𑀚𑁆𑀚𑀦𑁆𑀢𑀺, 𑀅𑀯𑀺𑀧𑀸𑀓𑀸𑀦𑀺 𑀳𑁄𑀦𑁆𑀢𑀺. 𑀅𑀬𑀫𑁆𑀧𑀺 𑀅𑀢𑁆𑀣𑁄 𑀧𑀼𑀭𑀺𑀫𑀉𑀧𑀫𑀸𑀬𑀬𑁂𑀯 𑀤𑀻𑀧𑁂𑀢𑀩𑁆𑀩𑁄.

𑀉𑀪𑀺𑀦𑁆𑀦𑀁 𑀅𑀦𑁆𑀢𑀭𑁂 𑀧𑀦 𑀧𑀜𑁆𑀘𑀚𑀯𑀦𑀘𑁂𑀢𑀦𑀸 𑀅𑀧𑀭𑀧𑀭𑀺𑀬𑀸𑀬𑀯𑁂𑀤𑀦𑀻𑀬𑀓𑀫𑁆𑀫𑀁 𑀦𑀸𑀫. 𑀢𑀁 𑀅𑀦𑀸𑀕𑀢𑁂 𑀬𑀤𑀸 𑀑𑀓𑀸𑀲𑀁 𑀮𑀪𑀢𑀺, 𑀢𑀤𑀸 𑀯𑀺𑀧𑀸𑀓𑀁 𑀤𑁂𑀢𑀺. 𑀲𑀢𑀺 𑀲𑀁𑀲𑀸𑀭𑀧𑁆𑀧𑀯𑀢𑁆𑀢𑀺𑀬𑀸 𑀅𑀳𑁄𑀲𑀺𑀓𑀫𑁆𑀫𑀁 𑀦𑀸𑀫 𑀦 𑀳𑁄𑀢𑀺. 𑀢𑀁 𑀲𑀩𑁆𑀩𑀁 𑀲𑀼𑀦𑀔𑀮𑀼𑀤𑁆𑀤𑀓𑁂𑀦 𑀤𑀻𑀧𑁂𑀢𑀩𑁆𑀩𑀁. 𑀬𑀣𑀸 𑀳𑀺 𑀲𑀼𑀦𑀔𑀮𑀼𑀤𑁆𑀤𑀓𑁂𑀦 𑀫𑀺𑀕𑀁 𑀤𑀺𑀲𑁆𑀯𑀸 𑀲𑀼𑀦𑀔𑁄 𑀯𑀺𑀲𑁆𑀲𑀚𑁆𑀚𑀺𑀢𑁄 𑀫𑀺𑀕𑀁 𑀅𑀦𑀼𑀩𑀦𑁆𑀥𑀺𑀢𑁆𑀯𑀸 𑀬𑀲𑁆𑀫𑀺𑀁 𑀞𑀸𑀦𑁂 𑀧𑀸𑀧𑀼𑀡𑀸𑀢𑀺, 𑀢𑀲𑁆𑀫𑀺𑀁 𑀬𑁂𑀯 𑀟𑀁𑀲𑀢𑀺; 𑀏𑀯𑀫𑁂𑀯𑀁 𑀇𑀤𑀁 𑀓𑀫𑁆𑀫𑀁 𑀬𑀲𑁆𑀫𑀺𑀁 𑀞𑀸𑀦𑁂 𑀑𑀓𑀸𑀲𑀁 𑀮𑀪𑀢𑀺, 𑀢𑀲𑁆𑀫𑀺𑀁𑀬𑁂𑀯 𑀯𑀺𑀧𑀸𑀓𑀁 𑀤𑁂𑀢𑀺, 𑀢𑁂𑀦 𑀫𑀼𑀢𑁆𑀢𑁄 𑀲𑀢𑁆𑀢𑁄 𑀦𑀸𑀫 𑀦𑀢𑁆𑀣𑀺.

𑀓𑀼𑀲𑀮𑀸𑀓𑀼𑀲𑀮𑁂𑀲𑀼 𑀧𑀦 𑀕𑀭𑀼𑀓𑀸𑀕𑀭𑀼𑀓𑁂𑀲𑀼 𑀬𑀁 𑀕𑀭𑀼𑀓𑀁 𑀳𑁄𑀢𑀺, 𑀢𑀁 𑀬𑀕𑁆𑀕𑀭𑀼𑀓𑀁 𑀦𑀸𑀫. 𑀢𑀤𑁂𑀢𑀁 𑀓𑀼𑀲𑀮𑀧𑀓𑁆𑀔𑁂 𑀫𑀳𑀕𑁆𑀕𑀢𑀓𑀫𑁆𑀫𑀁, 𑀅𑀓𑀼𑀲𑀮𑀧𑀓𑁆𑀔𑁂 𑀧𑀜𑁆𑀘𑀸𑀦𑀦𑁆𑀢𑀭𑀺𑀬𑀓𑀫𑁆𑀫𑀁 𑀯𑁂𑀤𑀺𑀢𑀩𑁆𑀩𑀁. 𑀢𑀲𑁆𑀫𑀺𑀁 𑀲𑀢𑀺 𑀲𑁂𑀲𑀸𑀦𑀺 𑀓𑀼𑀲𑀮𑀸𑀦𑀺 𑀯𑀸 𑀅𑀓𑀼𑀲𑀮𑀸𑀦𑀺 𑀯𑀸 𑀯𑀺𑀧𑀘𑁆𑀘𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺, 𑀢𑀤𑁂𑀯 𑀤𑀼𑀯𑀺𑀥𑀫𑁆𑀧𑀺 𑀧𑀝𑀺𑀲𑀦𑁆𑀥𑀺𑀁 𑀤𑁂𑀢𑀺. 𑀬𑀣𑀸 𑀳𑀺 𑀲𑀸𑀲𑀧𑀧𑁆𑀧𑀫𑀸𑀡𑀸𑀧𑀺 𑀲𑀓𑁆𑀔𑀭𑀸 𑀯𑀸 𑀅𑀬𑀕𑀼𑀴𑀺𑀓𑀸 𑀯𑀸 𑀉𑀤𑀓𑀭𑀳𑀤𑁂 𑀧𑀓𑁆𑀔𑀺𑀢𑁆𑀢𑀸 𑀉𑀤𑀓𑀧𑀺𑀝𑁆𑀞𑁂 𑀉𑀧𑁆𑀮𑀯𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀳𑁂𑀝𑁆𑀞𑀸𑀯 𑀧𑀯𑀺𑀲𑀢𑀺; 𑀏𑀯𑀫𑁂𑀯 𑀓𑀼𑀲𑀮𑁂𑀧𑀺 𑀅𑀓𑀼𑀲𑀮𑁂𑀧𑀺 𑀬𑀁 𑀕𑀭𑀼𑀓𑀁, 𑀢𑀤𑁂𑀯 𑀕𑀡𑁆𑀳𑀺𑀢𑁆𑀯𑀸 𑀕𑀘𑁆𑀙𑀢𑀺.

𑀓𑀼𑀲𑀮𑀸𑀓𑀼𑀲𑀮𑁂𑀲𑀼 𑀧𑀦 𑀬𑀁 𑀩𑀳𑀼𑀮𑀁 𑀳𑁄𑀢𑀺, 𑀢𑀁 𑀬𑀩𑁆𑀩𑀳𑀼𑀮𑀁 𑀦𑀸𑀫. 𑀢𑀁 𑀤𑀻𑀖𑀭𑀢𑁆𑀢𑀁 𑀮𑀤𑁆𑀥𑀸𑀲𑁂𑀯𑀦𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀬𑀁 𑀯𑀸 𑀩𑀮𑀯𑀓𑀼𑀲𑀮𑀓𑀫𑁆𑀫𑁂𑀲𑀼 𑀲𑁄𑀫𑀦𑀲𑁆𑀲𑀓𑀭𑀁, 𑀅𑀓𑀼𑀲𑀮𑀓𑀫𑁆𑀫𑁂𑀲𑀼 𑀲𑀦𑁆𑀢𑀸𑀧𑀓𑀭𑀁, 𑀏𑀢𑀁 𑀬𑀩𑁆𑀩𑀳𑀼𑀮𑀁 𑀦𑀸𑀫. 𑀢𑀤𑁂𑀢𑀁 𑀬𑀣𑀸 𑀦𑀸𑀫 𑀤𑁆𑀯𑀻𑀲𑀼 𑀫𑀮𑁆𑀮𑁂𑀲𑀼 𑀬𑀼𑀤𑁆𑀥𑀪𑀽𑀫𑀺𑀁 𑀑𑀢𑀺𑀡𑁆𑀡𑁂𑀲𑀼 𑀬𑁄 𑀩𑀮𑀯𑀸, 𑀲𑁄 𑀇𑀢𑀭𑀁 𑀧𑀸𑀢𑁂𑀢𑁆𑀯𑀸 𑀕𑀘𑁆𑀙𑀢𑀺; 𑀏𑀯𑀫𑁂𑀯 𑀇𑀢𑀭𑀁 𑀤𑀼𑀩𑁆𑀩𑀮𑀓𑀫𑁆𑀫𑀁 𑀅𑀯𑀢𑁆𑀣𑀭𑀺𑀢𑁆𑀯𑀸 𑀬𑀁 𑀆𑀲𑁂𑀯𑀦𑀯𑀲𑁂𑀦 𑀯𑀸 𑀩𑀳𑀼𑀮𑀁, 𑀆𑀲𑀦𑁆𑀦𑀯𑀲𑁂𑀦 𑀯𑀸 𑀩𑀮𑀯𑀁, 𑀢𑀁 𑀯𑀺𑀧𑀸𑀓𑀁 𑀤𑁂𑀢𑀺, 𑀤𑀼𑀝𑁆𑀞𑀕𑀸𑀫𑀡𑀺𑀅𑀪𑀬𑀭𑀜𑁆𑀜𑁄 𑀓𑀫𑁆𑀫𑀁 𑀯𑀺𑀬.

𑀲𑁄 𑀓𑀺𑀭 𑀘𑀽𑀴𑀗𑁆𑀕𑀡𑀺𑀬𑀬𑀼𑀤𑁆𑀥𑁂 𑀧𑀭𑀸𑀚𑀺𑀢𑁄 𑀯𑀴𑀯𑀁 𑀆𑀭𑀼𑀬𑁆𑀳 𑀧𑀮𑀸𑀬𑀺. 𑀢𑀲𑁆𑀲 𑀘𑀽𑀴𑀼𑀧𑀝𑁆𑀞𑀸𑀓𑁄 𑀢𑀺𑀲𑁆𑀲𑀸𑀫𑀘𑁆𑀘𑁄 𑀦𑀸𑀫 𑀏𑀓𑀓𑁄𑀯 𑀧𑀘𑁆𑀙𑀢𑁄 𑀅𑀳𑁄𑀲𑀺. 𑀲𑁄 𑀏𑀓𑀁 𑀅𑀝𑀯𑀺𑀁 𑀧𑀯𑀺𑀲𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑁄 𑀚𑀺𑀖𑀘𑁆𑀙𑀸𑀬 𑀩𑀸𑀥𑀬𑀫𑀸𑀦𑀸𑀬 𑁋 ‘‘𑀪𑀸𑀢𑀺𑀓 𑀢𑀺𑀲𑁆𑀲, 𑀅𑀢𑀺𑀯𑀺𑀬 𑀦𑁄 𑀚𑀺𑀖𑀘𑁆𑀙𑀸 𑀩𑀸𑀥𑀢𑀺, 𑀓𑀺𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀆𑀳. 𑀅𑀢𑁆𑀣𑀺, 𑀤𑁂𑀯, 𑀫𑀬𑀸 𑀲𑀸𑀝𑀓𑀦𑁆𑀢𑀭𑁂 𑀞𑀧𑁂𑀢𑁆𑀯𑀸 𑀏𑀓𑀁 𑀲𑀼𑀯𑀡𑁆𑀡𑀲𑀭𑀓𑀪𑀢𑁆𑀢𑀁 𑀆𑀪𑀢𑀦𑁆𑀢𑀺. 𑀢𑁂𑀦 𑀳𑀺 𑀆𑀳𑀭𑀸𑀢𑀺. 𑀲𑁄 𑀦𑀻𑀳𑀭𑀺𑀢𑁆𑀯𑀸 𑀭𑀜𑁆𑀜𑁄 𑀧𑀼𑀭𑀢𑁄 𑀞𑀧𑁂𑀲𑀺. 𑀭𑀸𑀚𑀸 𑀤𑀺𑀲𑁆𑀯𑀸, ‘‘𑀢𑀸𑀢, 𑀘𑀢𑁆𑀢𑀸𑀭𑁄 𑀓𑁄𑀝𑁆𑀞𑀸𑀲𑁂 𑀓𑀭𑁄𑀳𑀻’’𑀢𑀺 𑀆𑀳. 𑀫𑀬𑀁 𑀢𑀬𑁄 𑀚𑀦𑀸, 𑀓𑀲𑁆𑀫𑀸 𑀤𑁂𑀯𑁄 𑀘𑀢𑁆𑀢𑀸𑀭𑁄 𑀓𑁄𑀝𑁆𑀞𑀸𑀲𑁂 𑀓𑀸𑀭𑀬𑀢𑀻𑀢𑀺? 𑀪𑀸𑀢𑀺𑀓 𑀢𑀺𑀲𑁆𑀲, 𑀬𑀢𑁄 𑀧𑀝𑁆𑀞𑀸𑀬 𑀅𑀳𑀁 𑀅𑀢𑁆𑀢𑀸𑀦𑀁 𑀲𑀭𑀸𑀫𑀺, 𑀦 𑀫𑁂 𑀅𑀬𑁆𑀬𑀸𑀦𑀁 𑀅𑀤𑀢𑁆𑀯𑀸 𑀆𑀳𑀸𑀭𑁄 𑀧𑀭𑀺𑀪𑀼𑀢𑁆𑀢𑀧𑀼𑀩𑁆𑀩𑁄 𑀅𑀢𑁆𑀣𑀺, 𑀲𑁆𑀯𑀸𑀳𑀁 𑀅𑀚𑁆𑀚𑀧𑀺 𑀅𑀤𑀢𑁆𑀯𑀸 𑀦 𑀧𑀭𑀺𑀪𑀼𑀜𑁆𑀚𑀺𑀲𑁆𑀲𑀸𑀫𑀻𑀢𑀺. 𑀲𑁄 𑀘𑀢𑁆𑀢𑀸𑀭𑁄 𑀓𑁄𑀝𑁆𑀞𑀸𑀲𑁂 𑀅𑀓𑀸𑀲𑀺. 𑀭𑀸𑀚𑀸 ‘‘𑀓𑀸𑀮𑀁 𑀖𑁄𑀲𑁂𑀳𑀻’’𑀢𑀺 𑀆𑀳. 𑀙𑀟𑁆𑀟𑀺𑀢𑀸𑀭𑀜𑁆𑀜𑁂 𑀓𑀼𑀢𑁄, 𑀅𑀬𑁆𑀬𑁂, 𑀮𑀪𑀺𑀲𑁆𑀲𑀸𑀫 𑀤𑁂𑀯𑀸𑀢𑀺. ‘‘𑀦𑀸𑀬𑀁 𑀢𑀯 𑀪𑀸𑀭𑁄. 𑀲𑀘𑁂 𑀫𑀫 𑀲𑀤𑁆𑀥𑀸 𑀅𑀢𑁆𑀣𑀺, 𑀅𑀬𑁆𑀬𑁂, 𑀮𑀪𑀺𑀲𑁆𑀲𑀸𑀫, 𑀯𑀺𑀲𑁆𑀲𑀢𑁆𑀣𑁄 𑀓𑀸𑀮𑀁 𑀖𑁄𑀲𑁂𑀳𑀻’’𑀢𑀺 𑀆𑀳. 𑀲𑁄 ‘‘𑀓𑀸𑀮𑁄, 𑀪𑀦𑁆𑀢𑁂, 𑀓𑀸𑀮𑁄, 𑀪𑀦𑁆𑀢𑁂’’𑀢𑀺 𑀢𑀺𑀓𑁆𑀔𑀢𑁆𑀢𑀼𑀁 𑀖𑁄𑀲𑁂𑀲𑀺.

𑀅𑀣𑀲𑁆𑀲 𑀩𑁄𑀥𑀺𑀫𑀸𑀢𑀼𑀫𑀳𑀸𑀢𑀺𑀲𑁆𑀲𑀢𑁆𑀣𑁂𑀭𑁄 𑀢𑀁 𑀲𑀤𑁆𑀤𑀁 𑀤𑀺𑀩𑁆𑀩𑀸𑀬 𑀲𑁄𑀢𑀥𑀸𑀢𑀼𑀬𑀸 𑀲𑀼𑀢𑁆𑀯𑀸 ‘𑀓𑀢𑁆𑀣𑀸𑀬𑀁 𑀲𑀤𑁆𑀤𑁄’𑀢𑀺 𑀢𑀁 𑀆𑀯𑀚𑁆𑀚𑁂𑀦𑁆𑀢𑁄 ‘‘𑀅𑀚𑁆𑀚 𑀤𑀼𑀝𑁆𑀞𑀕𑀸𑀫𑀡𑀺𑀅𑀪𑀬𑀫𑀳𑀸𑀭𑀸𑀚𑀸 𑀬𑀼𑀤𑁆𑀥𑀧𑀭𑀸𑀚𑀺𑀢𑁄 𑀅𑀝𑀯𑀺𑀁 𑀧𑀯𑀺𑀲𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑁄 𑀏𑀓𑀁 𑀲𑀭𑀓𑀪𑀢𑁆𑀢𑀁 𑀘𑀢𑁆𑀢𑀸𑀭𑁄 𑀓𑁄𑀝𑁆𑀞𑀸𑀲𑁂 𑀓𑀸𑀭𑁂𑀢𑁆𑀯𑀸 ‘𑀏𑀓𑀓𑁄𑀯 𑀦 𑀧𑀭𑀺𑀪𑀼𑀜𑁆𑀚𑀺𑀲𑁆𑀲𑀸𑀫𑀻’𑀢𑀺 𑀓𑀸𑀮𑀁 𑀖𑁄𑀲𑀸𑀧𑁂𑀲𑀻’’𑀢𑀺 𑀜𑀢𑁆𑀯𑀸 ‘‘𑀅𑀚𑁆𑀚 𑀫𑀬𑀸 𑀭𑀜𑁆𑀜𑁄 𑀲𑀗𑁆𑀕𑀳𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀫𑀦𑁄𑀕𑀢𑀺𑀬𑀸 𑀆𑀕𑀦𑁆𑀢𑁆𑀯𑀸 𑀭𑀜𑁆𑀜𑁄 𑀧𑀼𑀭𑀢𑁄 𑀅𑀝𑁆𑀞𑀸𑀲𑀺. 𑀭𑀸𑀚𑀸 𑀤𑀺𑀲𑁆𑀯𑀸 𑀧𑀲𑀦𑁆𑀦𑀘𑀺𑀢𑁆𑀢𑁄 ‘‘𑀧𑀲𑁆𑀲, 𑀪𑀸𑀢𑀺𑀓, 𑀢𑀺𑀲𑁆𑀲𑀸’’𑀢𑀺 𑀯𑀢𑁆𑀯𑀸 𑀣𑁂𑀭𑀁 𑀯𑀦𑁆𑀤𑀺𑀢𑁆𑀯𑀸 ‘‘𑀧𑀢𑁆𑀢𑀁, 𑀪𑀦𑁆𑀢𑁂, 𑀤𑁂𑀣𑀸’’𑀢𑀺 𑀆𑀳. 𑀣𑁂𑀭𑁄 𑀧𑀢𑁆𑀢𑀁 𑀦𑀻𑀳𑀭𑀺. 𑀭𑀸𑀚𑀸 𑀅𑀢𑁆𑀢𑀦𑁄 𑀓𑁄𑀝𑁆𑀞𑀸𑀲𑁂𑀦 𑀲𑀤𑁆𑀥𑀺𑀁 𑀣𑁂𑀭𑀲𑁆𑀲 𑀓𑁄𑀝𑁆𑀞𑀸𑀲𑀁 𑀧𑀢𑁆𑀢𑁂 𑀧𑀓𑁆𑀔𑀺𑀧𑀺𑀢𑁆𑀯𑀸, ‘‘𑀪𑀦𑁆𑀢𑁂, 𑀆𑀳𑀸𑀭𑀧𑀭𑀺𑀲𑁆𑀲𑀬𑁄 𑀦𑀸𑀫 𑀫𑀸 𑀓𑀤𑀸𑀘𑀺 𑀳𑁄𑀢𑀽’’𑀢𑀺 𑀯𑀦𑁆𑀤𑀺𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀢𑀺𑀲𑁆𑀲𑀸𑀫𑀘𑁆𑀘𑁄𑀧𑀺 ‘‘𑀫𑀫 𑀅𑀬𑁆𑀬𑀧𑀼𑀢𑁆𑀢𑁂 𑀧𑀲𑁆𑀲𑀦𑁆𑀢𑁂 𑀪𑀼𑀜𑁆𑀚𑀺𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀸𑀫𑀻’’𑀢𑀺 𑀅𑀢𑁆𑀢𑀦𑁄 𑀓𑁄𑀝𑁆𑀞𑀸𑀲𑀁 𑀣𑁂𑀭𑀲𑁆𑀲𑁂𑀯 𑀧𑀢𑁆𑀢𑁂 𑀆𑀓𑀺𑀭𑀺. 𑀯𑀴𑀯𑀸𑀧𑀺 𑀘𑀺𑀦𑁆𑀢𑁂𑀲𑀺 𑁋 ‘‘𑀫𑀬𑁆𑀳𑀫𑁆𑀧𑀺 𑀓𑁄𑀝𑁆𑀞𑀸𑀲𑀁 𑀣𑁂𑀭𑀲𑁆𑀲𑁂𑀯 𑀤𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺. 𑀭𑀸𑀚𑀸 𑀯𑀴𑀯𑀁 𑀑𑀮𑁄𑀓𑁂𑀢𑁆𑀯𑀸 ‘‘𑀅𑀬𑀫𑁆𑀧𑀺 𑀅𑀢𑁆𑀢𑀦𑁄 𑀓𑁄𑀝𑁆𑀞𑀸𑀲𑀁 𑀣𑁂𑀭𑀲𑁆𑀲𑁂𑀯 𑀧𑀢𑁆𑀢𑁂 𑀧𑀓𑁆𑀔𑀺𑀧𑀦𑀁 𑀧𑀘𑁆𑀘𑀸𑀲𑀻𑀲𑀢𑀻’’𑀢𑀺 𑀜𑀢𑁆𑀯𑀸 𑀢𑀫𑁆𑀧𑀺 𑀢𑀢𑁆𑀣𑁂𑀯 𑀧𑀓𑁆𑀔𑀺𑀧𑀺𑀢𑁆𑀯𑀸 𑀣𑁂𑀭𑀁 𑀯𑀦𑁆𑀤𑀺𑀢𑁆𑀯𑀸 𑀉𑀬𑁆𑀬𑁄𑀚𑁂𑀲𑀺. 𑀣𑁂𑀭𑁄 𑀢𑀁 𑀪𑀢𑁆𑀢𑀁 𑀆𑀤𑀸𑀬 𑀕𑀦𑁆𑀢𑁆𑀯𑀸 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀆𑀮𑁄𑀧𑀲𑀗𑁆𑀔𑁂𑀧𑁂𑀦 𑀅𑀤𑀸𑀲𑀺.

𑀭𑀸𑀚𑀸𑀧𑀺 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀢𑀺𑀯𑀺𑀬𑀫𑁆𑀳𑀸 𑀚𑀺𑀖𑀘𑁆𑀙𑀺𑀢𑀸, 𑀲𑀸𑀥𑀼 𑀯𑀢𑀲𑁆𑀲 𑀲𑀘𑁂 𑀅𑀢𑀺𑀭𑁂𑀓𑀪𑀢𑁆𑀢𑀲𑀺𑀢𑁆𑀣𑀸𑀦𑀺 𑀧𑀳𑀺𑀡𑁂𑀬𑁆𑀬𑀸’’𑀢𑀺. 𑀣𑁂𑀭𑁄 𑀭𑀜𑁆𑀜𑁄 𑀘𑀺𑀢𑁆𑀢𑀁 𑀜𑀢𑁆𑀯𑀸 𑀅𑀢𑀺𑀭𑁂𑀓𑀪𑀢𑁆𑀢𑀁 𑀏𑀢𑁂𑀲𑀁 𑀬𑀸𑀧𑀦𑀫𑀢𑁆𑀢𑀁 𑀓𑀢𑁆𑀯𑀸 𑀧𑀢𑁆𑀢𑀁 𑀆𑀓𑀸𑀲𑁂 𑀔𑀺𑀧𑀺, 𑀧𑀢𑁆𑀢𑁄 𑀆𑀕𑀦𑁆𑀢𑁆𑀯𑀸 𑀭𑀜𑁆𑀜𑁄 𑀳𑀢𑁆𑀣𑁂 𑀧𑀢𑀺𑀝𑁆𑀞𑀸𑀲𑀺. 𑀪𑀢𑁆𑀢𑀁 𑀢𑀺𑀡𑁆𑀡𑀫𑁆𑀧𑀺 𑀚𑀦𑀸𑀦𑀁 𑀬𑀸𑀯𑀤𑀢𑁆𑀣𑀁 𑀅𑀳𑁄𑀲𑀺. 𑀅𑀣 𑀭𑀸𑀚𑀸 𑀧𑀢𑁆𑀢𑀁 𑀥𑁄𑀯𑀺𑀢𑁆𑀯𑀸 ‘‘𑀢𑀼𑀘𑁆𑀙𑀧𑀢𑁆𑀢𑀁 𑀦 𑀧𑁂𑀲𑀺𑀲𑁆𑀲𑀸𑀫𑀻’’𑀢𑀺 𑀉𑀢𑁆𑀢𑀭𑀺𑀲𑀸𑀝𑀓𑀁 𑀫𑁄𑀘𑁂𑀢𑁆𑀯𑀸 𑀉𑀤𑀓𑀁 𑀧𑀼𑀜𑁆𑀙𑀺𑀢𑁆𑀯𑀸 𑀲𑀸𑀝𑀓𑀁 𑀧𑀢𑁆𑀢𑁂 𑀞𑀧𑁂𑀢𑁆𑀯𑀸 ‘‘𑀧𑀢𑁆𑀢𑁄 𑀕𑀦𑁆𑀢𑁆𑀯𑀸 𑀫𑀫 𑀅𑀬𑁆𑀬𑀲𑁆𑀲 𑀳𑀢𑁆𑀣𑁂 𑀧𑀢𑀺𑀝𑁆𑀞𑀸𑀢𑀽’’𑀢𑀺 𑀆𑀓𑀸𑀲𑁂 𑀔𑀺𑀧𑀺. 𑀧𑀢𑁆𑀢𑁄 𑀕𑀦𑁆𑀢𑁆𑀯𑀸 𑀣𑁂𑀭𑀲𑁆𑀲 𑀳𑀢𑁆𑀣𑁂 𑀧𑀢𑀺𑀝𑁆𑀞𑀸𑀲𑀺.

𑀅𑀧𑀭𑀪𑀸𑀕𑁂 𑀭𑀜𑁆𑀜𑁄 𑀢𑀣𑀸𑀕𑀢𑀲𑁆𑀲 𑀲𑀭𑀻𑀭𑀥𑀸𑀢𑀽𑀦𑀁 𑀅𑀝𑁆𑀞𑀫𑀪𑀸𑀕𑀁 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀯𑀻𑀲𑀭𑀢𑀦𑀲𑀢𑀺𑀓𑀁 𑀫𑀳𑀸𑀘𑁂𑀢𑀺𑀬𑀁 𑀓𑀸𑀭𑁂𑀦𑁆𑀢𑀲𑁆𑀲 𑀅𑀧𑀭𑀺𑀦𑀺𑀝𑁆𑀞𑀺𑀢𑁂𑀬𑁂𑀯 𑀘𑁂𑀢𑀺𑀬𑁂 𑀓𑀸𑀮𑀓𑀺𑀭𑀺𑀬𑀸𑀲𑀫𑀬𑁄 𑀅𑀦𑀼𑀧𑁆𑀧𑀢𑁆𑀢𑁄. 𑀅𑀣𑀲𑁆𑀲 𑀫𑀳𑀸𑀘𑁂𑀢𑀺𑀬𑀲𑁆𑀲 𑀤𑀓𑁆𑀔𑀺𑀡𑀧𑀲𑁆𑀲𑁂 𑀦𑀺𑀧𑀦𑁆𑀦𑀲𑁆𑀲 𑀧𑀜𑁆𑀘𑀦𑀺𑀓𑀸𑀬𑀯𑀲𑁂𑀦 𑀪𑀺𑀓𑁆𑀔𑀼𑀲𑀗𑁆𑀖𑁂 𑀲𑀚𑁆𑀛𑀸𑀬𑀁 𑀓𑀭𑁄𑀦𑁆𑀢𑁂 𑀙𑀳𑀺 𑀤𑁂𑀯𑀮𑁄𑀓𑁂𑀳𑀺 𑀙 𑀭𑀣𑀸 𑀆𑀕𑀦𑁆𑀢𑁆𑀯𑀸 𑀧𑀼𑀭𑀢𑁄 𑀆𑀓𑀸𑀲𑁂 𑀅𑀝𑁆𑀞𑀁𑀲𑀼. 𑀭𑀸𑀚𑀸 ‘‘𑀧𑀼𑀜𑁆𑀜𑀧𑁄𑀢𑁆𑀣𑀓𑀁 𑀆𑀳𑀭𑀣𑀸’’𑀢𑀺 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀧𑀼𑀜𑁆𑀜𑀧𑁄𑀢𑁆𑀣𑀓𑀁 𑀯𑀸𑀘𑀸𑀧𑁂𑀲𑀺. 𑀅𑀣 𑀦𑀁 𑀓𑀺𑀜𑁆𑀘𑀺 𑀓𑀫𑁆𑀫𑀁 𑀦 𑀧𑀭𑀺𑀢𑁄𑀲𑁂𑀲𑀺. 𑀲𑁄 ‘‘𑀧𑀭𑀢𑁄 𑀯𑀸𑀘𑁂𑀣𑀸’’𑀢𑀺 𑀆𑀳. 𑀧𑁄𑀢𑁆𑀣𑀓𑀯𑀸𑀘𑀓𑁄 ‘‘𑀘𑀽𑀴𑀗𑁆𑀕𑀡𑀺𑀬𑀬𑀼𑀤𑁆𑀥𑁂 𑀧𑀭𑀸𑀚𑀺𑀢𑁂𑀦 𑀢𑁂 𑀤𑁂𑀯 𑀅𑀝𑀯𑀺𑀁 𑀧𑀯𑀺𑀲𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑁂𑀦 𑀏𑀓𑀁 𑀲𑀭𑀓𑀪𑀢𑁆𑀢𑀁 𑀘𑀢𑁆𑀢𑀸𑀭𑁄 𑀓𑁄𑀝𑁆𑀞𑀸𑀲𑁂 𑀓𑀸𑀭𑁂𑀢𑁆𑀯𑀸 𑀩𑁄𑀥𑀺𑀫𑀸𑀢𑀼𑀫𑀳𑀸𑀢𑀺𑀲𑁆𑀲𑀢𑁆𑀣𑁂𑀭𑀲𑁆𑀲 𑀪𑀺𑀓𑁆𑀔𑀸 𑀤𑀺𑀦𑁆𑀦𑀸’’𑀢𑀺 𑀆𑀳. 𑀭𑀸𑀚𑀸 ‘‘𑀞𑀧𑁂𑀳𑀻’’𑀢𑀺 𑀯𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀼𑀘𑁆𑀙𑀺, ‘‘𑀪𑀦𑁆𑀢𑁂, 𑀓𑀢𑀭𑁄 𑀤𑁂𑀯𑀮𑁄𑀓𑁄 𑀭𑀫𑀡𑀻𑀬𑁄’’𑀢𑀺? 𑀲𑀩𑁆𑀩𑀩𑁄𑀥𑀺𑀲𑀢𑁆𑀢𑀸𑀦𑀁 𑀯𑀲𑀦𑀝𑁆𑀞𑀸𑀦𑀁 𑀢𑀼𑀲𑀺𑀢𑀪𑀯𑀦𑀁 𑀫𑀳𑀸𑀭𑀸𑀚𑀸𑀢𑀺. 𑀭𑀸𑀚𑀸 𑀓𑀸𑀮𑀁 𑀓𑀢𑁆𑀯𑀸 𑀢𑀼𑀲𑀺𑀢𑀪𑀯𑀦𑀢𑁄 𑀆𑀕𑀢𑀭𑀣𑁂𑀯 𑀧𑀢𑀺𑀝𑁆𑀞𑀸𑀬 𑀢𑀼𑀲𑀺𑀢𑀪𑀯𑀦𑀁 𑀅𑀕𑀫𑀸𑀲𑀺. 𑀇𑀤𑀁 𑀩𑀮𑀯𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑀤𑀸𑀦𑁂 𑀯𑀢𑁆𑀣𑀼.

𑀬𑀁 𑀧𑀦 𑀓𑀼𑀲𑀮𑀸𑀓𑀼𑀲𑀮𑁂𑀲𑀼 𑀆𑀲𑀦𑁆𑀦𑀫𑀭𑀡𑁂 𑀅𑀦𑀼𑀲𑁆𑀲𑀭𑀺𑀢𑀼𑀁 𑀲𑀓𑁆𑀓𑁄𑀢𑀺, 𑀢𑀁 𑀬𑀤𑀸𑀲𑀦𑁆𑀦𑀁 𑀦𑀸𑀫. 𑀢𑀤𑁂𑀢𑀁 𑀬𑀣𑀸 𑀦𑀸𑀫 𑀕𑁄𑀕𑀡𑀧𑀭𑀺𑀧𑀼𑀡𑁆𑀡𑀲𑁆𑀲 𑀯𑀚𑀲𑁆𑀲 𑀤𑁆𑀯𑀸𑀭𑁂 𑀯𑀺𑀯𑀝𑁂 𑀧𑀭𑀪𑀸𑀕𑁂 𑀤𑀫𑁆𑀫𑀕𑀯𑀩𑀮𑀯𑀕𑀯𑁂𑀲𑀼 𑀲𑀦𑁆𑀢𑁂𑀲𑀼𑀧𑀺 𑀬𑁄 𑀯𑀚𑀤𑁆𑀯𑀸𑀭𑀲𑁆𑀲 𑀆𑀲𑀦𑁆𑀦𑁄 𑀳𑁄𑀢𑀺 𑀅𑀦𑁆𑀢𑀫𑀲𑁄 𑀤𑀼𑀩𑁆𑀩𑀮𑀚𑀭𑀕𑁆𑀕𑀯𑁄𑀧𑀺, 𑀲𑁄 𑀏𑀯 𑀧𑀞𑀫𑀢𑀭𑀁 𑀦𑀺𑀓𑁆𑀔𑀫𑀢𑀺, 𑀏𑀯𑀫𑁂𑀯 𑀅𑀜𑁆𑀜𑁂𑀲𑀼 𑀓𑀼𑀲𑀮𑀸𑀓𑀼𑀲𑀮𑁂𑀲𑀼 𑀲𑀦𑁆𑀢𑁂𑀲𑀼𑀧𑀺 𑀫𑀭𑀡𑀓𑀸𑀮𑀲𑁆𑀲 𑀆𑀲𑀦𑁆𑀦𑀢𑁆𑀢𑀸 𑀯𑀺𑀧𑀸𑀓𑀁 𑀤𑁂𑀢𑀺.

𑀢𑀢𑁆𑀭𑀺𑀫𑀸𑀦𑀺 𑀯𑀢𑁆𑀣𑀽𑀦𑀺 𑁋 𑀫𑀥𑀼𑀅𑀗𑁆𑀕𑀡𑀕𑀸𑀫𑁂 𑀓𑀺𑀭 𑀏𑀓𑁄 𑀤𑀫𑀺𑀴𑀤𑁄𑀯𑀸𑀭𑀺𑀓𑁄 𑀧𑀸𑀢𑁄𑀯 𑀩𑀴𑀺𑀲𑀁 𑀆𑀤𑀸𑀬 𑀕𑀦𑁆𑀢𑁆𑀯𑀸 𑀫𑀘𑁆𑀙𑁂 𑀯𑀥𑀺𑀢𑁆𑀯𑀸 𑀢𑀬𑁄 𑀓𑁄𑀝𑁆𑀞𑀸𑀲𑁂 𑀓𑀢𑁆𑀯𑀸 𑀏𑀓𑁂𑀦 𑀢𑀡𑁆𑀟𑀼𑀮𑀁 𑀕𑀡𑁆𑀳𑀸𑀢𑀺, 𑀏𑀓𑁂𑀦 𑀤𑀥𑀺𑀁, 𑀏𑀓𑀁 𑀧𑀘𑀢𑀺. 𑀇𑀫𑀺𑀦𑀸 𑀦𑀻𑀳𑀸𑀭𑁂𑀦 𑀧𑀜𑁆𑀜𑀸𑀲 𑀯𑀲𑁆𑀲𑀸𑀦𑀺 𑀧𑀸𑀡𑀸𑀢𑀺𑀧𑀸𑀢𑀓𑀫𑁆𑀫𑀁 𑀓𑀢𑁆𑀯𑀸 𑀅𑀧𑀭𑀪𑀸𑀕𑁂 𑀫𑀳𑀮𑁆𑀮𑀓𑁄 𑀅𑀦𑀼𑀝𑁆𑀞𑀸𑀦𑀲𑁂𑀬𑁆𑀬𑀁 𑀉𑀧𑀕𑀘𑁆𑀙𑀢𑀺. 𑀢𑀲𑁆𑀫𑀺𑀁 𑀔𑀡𑁂 𑀕𑀺𑀭𑀺𑀯𑀺𑀳𑀸𑀭𑀯𑀸𑀲𑀻 𑀘𑀽𑀴𑀧𑀺𑀡𑁆𑀟𑀧𑀸𑀢𑀺𑀓𑀢𑀺𑀲𑁆𑀲𑀢𑁆𑀣𑁂𑀭𑁄 ‘‘𑀫𑀸 𑀅𑀬𑀁 𑀲𑀢𑁆𑀢𑁄 𑀫𑀬𑀺 𑀧𑀲𑁆𑀲𑀦𑁆𑀢𑁂 𑀦𑀲𑁆𑀲𑀢𑀽’’𑀢𑀺 𑀕𑀦𑁆𑀢𑁆𑀯𑀸 𑀢𑀲𑁆𑀲 𑀕𑁂𑀳𑀤𑁆𑀯𑀸𑀭𑁂 𑀅𑀝𑁆𑀞𑀸𑀲𑀺. 𑀅𑀣𑀲𑁆𑀲 𑀪𑀭𑀺𑀬𑀸, ‘‘𑀲𑀸𑀫𑀺, 𑀣𑁂𑀭𑁄 𑀆𑀕𑀢𑁄’’𑀢𑀺 𑀆𑀭𑁄𑀘𑁂𑀲𑀺. 𑀅𑀳𑀁 𑀧𑀜𑁆𑀜𑀸𑀲 𑀯𑀲𑁆𑀲𑀸𑀦𑀺 𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑀁 𑀦 𑀕𑀢𑀧𑀼𑀩𑁆𑀩𑁄, 𑀓𑀢𑀭𑁂𑀦 𑀫𑁂 𑀕𑀼𑀡𑁂𑀦 𑀣𑁂𑀭𑁄 𑀆𑀕𑀫𑀺𑀲𑁆𑀲𑀢𑀺, 𑀕𑀘𑁆𑀙𑀸𑀢𑀺 𑀦𑀁 𑀯𑀤𑀣𑀸𑀢𑀺. 𑀲𑀸 ‘‘𑀅𑀢𑀺𑀘𑁆𑀙𑀣, 𑀪𑀦𑁆𑀢𑁂’’𑀢𑀺 𑀆𑀳. 𑀣𑁂𑀭𑁄 ‘‘𑀉𑀧𑀸𑀲𑀓𑀲𑁆𑀲 𑀓𑀸 𑀲𑀭𑀻𑀭𑀧𑁆𑀧𑀯𑀢𑁆𑀢𑀻’’𑀢𑀺 𑀧𑀼𑀘𑁆𑀙𑀺. 𑀤𑀼𑀩𑁆𑀩𑀮𑁄, 𑀪𑀦𑁆𑀢𑁂𑀢𑀺. 𑀣𑁂𑀭𑁄 𑀖𑀭𑀁 𑀧𑀯𑀺𑀲𑀺𑀢𑁆𑀯𑀸 𑀲𑀢𑀺𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 ‘‘𑀲𑀻𑀮𑀁 𑀕𑀡𑁆𑀳𑀺𑀲𑁆𑀲𑀲𑀻’’𑀢𑀺 𑀆𑀳. 𑀆𑀫, 𑀪𑀦𑁆𑀢𑁂, 𑀤𑁂𑀣𑀸𑀢𑀺. 𑀣𑁂𑀭𑁄 𑀢𑀻𑀡𑀺 𑀲𑀭𑀡𑀸𑀦𑀺 𑀤𑀢𑁆𑀯𑀸 𑀧𑀜𑁆𑀘 𑀲𑀻𑀮𑀸𑀦𑀺 𑀤𑀸𑀢𑀼𑀁 𑀆𑀭𑀪𑀺. 𑀢𑀲𑁆𑀲 𑀧𑀜𑁆𑀘 𑀲𑀻𑀮𑀸𑀦𑀻𑀢𑀺 𑀯𑀘𑀦𑀓𑀸𑀮𑁂𑀬𑁂𑀯 𑀚𑀺𑀯𑁆𑀳𑀸 𑀧𑀧𑀢𑀺. 𑀣𑁂𑀭𑁄 ‘‘𑀯𑀝𑁆𑀝𑀺𑀲𑁆𑀲𑀢𑀺 𑀏𑀢𑁆𑀢𑀓’’𑀦𑁆𑀢𑀺 𑀦𑀺𑀓𑁆𑀔𑀫𑀺𑀢𑁆𑀯𑀸 𑀕𑀢𑁄. 𑀲𑁄𑀧𑀺 𑀓𑀸𑀮𑀁 𑀓𑀢𑁆𑀯𑀸 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀪𑀯𑀦𑁂 𑀦𑀺𑀩𑁆𑀩𑀢𑁆𑀢𑀺. 𑀦𑀺𑀩𑁆𑀩𑀢𑁆𑀢𑀓𑁆𑀔𑀡𑁂𑀬𑁂𑀯 𑀘 ‘‘𑀓𑀺𑀁 𑀦𑀼 𑀔𑁄 𑀓𑀫𑁆𑀫𑀁 𑀓𑀢𑁆𑀯𑀸 𑀫𑀬𑀸 𑀇𑀤𑀁 𑀮𑀤𑁆𑀥’’𑀦𑁆𑀢𑀺 𑀆𑀯𑀚𑁆𑀚𑁂𑀦𑁆𑀢𑁄 𑀣𑁂𑀭𑀁 𑀦𑀺𑀲𑁆𑀲𑀸𑀬 𑀮𑀤𑁆𑀥𑀪𑀸𑀯𑀁 𑀜𑀢𑁆𑀯𑀸 𑀤𑁂𑀯𑀮𑁄𑀓𑀢𑁄 𑀆𑀕𑀦𑁆𑀢𑁆𑀯𑀸 𑀣𑁂𑀭𑀁 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. ‘‘𑀓𑁄 𑀏𑀲𑁄’’𑀢𑀺 𑀘 𑀯𑀼𑀢𑁆𑀢𑁂 ‘‘𑀅𑀳𑀁, 𑀪𑀦𑁆𑀢𑁂, 𑀤𑀫𑀺𑀴𑀤𑁄𑀯𑀸𑀭𑀺𑀓𑁄’’𑀢𑀺 𑀆𑀳. 𑀓𑀼𑀳𑀺𑀁 𑀦𑀺𑀩𑁆𑀩𑀢𑁆𑀢𑁄𑀲𑀻𑀢𑀺? 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑁂𑀲𑀼, 𑀪𑀦𑁆𑀢𑁂, 𑀲𑀘𑁂 𑀫𑁂 𑀅𑀬𑁆𑀬𑁄 𑀧𑀜𑁆𑀘 𑀲𑀻𑀮𑀸𑀦𑀺 𑀅𑀤𑀲𑁆𑀲, 𑀉𑀧𑀭𑀺 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑁄 𑀅𑀲𑁆𑀲𑀁. 𑀅𑀳𑀁 𑀓𑀺𑀁 𑀓𑀭𑀺𑀲𑁆𑀲𑀸𑀫𑀺, 𑀢𑁆𑀯𑀁 𑀕𑀡𑁆𑀳𑀺𑀢𑀼𑀁 𑀦𑀸𑀲𑀓𑁆𑀔𑀺, 𑀧𑀼𑀢𑁆𑀢𑀓𑀸𑀢𑀺. 𑀲𑁄 𑀣𑁂𑀭𑀁 𑀯𑀦𑁆𑀤𑀺𑀢𑁆𑀯𑀸 𑀤𑁂𑀯𑀮𑁄𑀓𑀫𑁂𑀯 𑀕𑀢𑁄. 𑀇𑀤𑀁 𑀢𑀸𑀯 𑀓𑀼𑀲𑀮𑀓𑀫𑁆𑀫𑁂 𑀯𑀢𑁆𑀣𑀼.

𑀅𑀦𑁆𑀢𑀭𑀕𑀗𑁆𑀕𑀸𑀬 𑀧𑀦 𑀫𑀳𑀸𑀯𑀸𑀘𑀓𑀸𑀮𑀉𑀧𑀸𑀲𑀓𑁄 𑀦𑀸𑀫 𑀅𑀳𑁄𑀲𑀺. 𑀲𑁄 𑀢𑀺𑀁𑀲 𑀯𑀲𑁆𑀲𑀸𑀦𑀺 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀢𑁆𑀣𑀸𑀬 𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭𑀁 𑀲𑀚𑁆𑀛𑀸𑀬𑀺𑀢𑁆𑀯𑀸 ‘‘𑀅𑀳𑀁 𑀏𑀯𑀁 𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭𑀁 𑀲𑀚𑁆𑀛𑀸𑀬𑀦𑁆𑀢𑁄 𑀑𑀪𑀸𑀲𑀫𑀢𑁆𑀢𑀫𑁆𑀧𑀺 𑀦𑀺𑀩𑁆𑀩𑀢𑁆𑀢𑁂𑀢𑀼𑀁 𑀦𑀸𑀲𑀓𑁆𑀔𑀺𑀁, 𑀩𑀼𑀤𑁆𑀥𑀲𑀸𑀲𑀦𑀁 𑀅𑀦𑀺𑀬𑁆𑀬𑀸𑀦𑀺𑀓𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀤𑀺𑀝𑁆𑀞𑀺𑀯𑀺𑀧𑀮𑁆𑀮𑀸𑀲𑀁 𑀧𑀢𑁆𑀯𑀸 𑀓𑀸𑀮𑀓𑀺𑀭𑀺𑀬𑀁 𑀓𑀢𑁆𑀯𑀸 𑀫𑀳𑀸𑀕𑀗𑁆𑀕𑀸𑀬 𑀦𑀯𑀉𑀲𑀪𑀺𑀓𑁄 𑀲𑀼𑀲𑀼𑀫𑀸𑀭𑀧𑁂𑀢𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀏𑀓𑀁 𑀲𑀫𑀬𑀁 𑀓𑀘𑁆𑀙𑀓𑀢𑀺𑀢𑁆𑀣𑁂𑀦 𑀲𑀝𑁆𑀞𑀺 𑀧𑀸𑀲𑀸𑀡𑀢𑁆𑀣𑀫𑁆𑀪𑀲𑀓𑀝𑀸𑀦𑀺 𑀅𑀕𑀫𑀁𑀲𑀼. 𑀲𑁄 𑀲𑀩𑁆𑀩𑁂𑀧𑀺 𑀢𑁂 𑀕𑁄𑀡𑁂 𑀘 𑀧𑀸𑀲𑀸𑀡𑁂 𑀘 𑀔𑀸𑀤𑀺. 𑀇𑀤𑀁 𑀅𑀓𑀼𑀲𑀮𑀓𑀫𑁆𑀫𑁂 𑀯𑀢𑁆𑀣𑀼.

𑀏𑀢𑁂𑀳𑀺 𑀧𑀦 𑀢𑀻𑀳𑀺 𑀫𑀼𑀢𑁆𑀢𑀁 𑀅𑀜𑁆𑀜𑀸𑀡𑀯𑀲𑁂𑀦 𑀓𑀢𑀁 𑀓𑀝𑀢𑁆𑀢𑀸 𑀯𑀸 𑀧𑀦 𑀓𑀫𑁆𑀫𑀁 𑀦𑀸𑀫. 𑀢𑀁 𑀬𑀣𑀸 𑀦𑀸𑀫 𑀉𑀫𑁆𑀫𑀢𑁆𑀢𑀓𑁂𑀦 𑀔𑀺𑀢𑁆𑀢𑀤𑀡𑁆𑀟𑀁 𑀬𑀢𑁆𑀣 𑀯𑀸 𑀢𑀢𑁆𑀣 𑀯𑀸 𑀕𑀘𑁆𑀙𑀢𑀺, 𑀏𑀯𑀫𑁂𑀯 𑀢𑁂𑀲𑀁 𑀅𑀪𑀸𑀯𑁂 𑀬𑀢𑁆𑀣 𑀓𑀢𑁆𑀣𑀘𑀺 𑀯𑀺𑀧𑀸𑀓𑀁 𑀤𑁂𑀢𑀺.

𑀚𑀦𑀓𑀁 𑀦𑀸𑀫 𑀏𑀓𑀁 𑀧𑀝𑀺𑀲𑀦𑁆𑀥𑀺𑀁 𑀚𑀦𑁂𑀢𑁆𑀯𑀸 𑀧𑀯𑀢𑁆𑀢𑀺𑀁 𑀦 𑀚𑀦𑁂𑀢𑀺, 𑀧𑀯𑀢𑁆𑀢𑁂 𑀅𑀜𑁆𑀜𑀁 𑀓𑀫𑁆𑀫𑀁 𑀯𑀺𑀧𑀸𑀓𑀁 𑀦𑀺𑀩𑁆𑀩𑀢𑁆𑀢𑁂𑀢𑀺. 𑀬𑀣𑀸 𑀳𑀺 𑀫𑀸𑀢𑀸 𑀚𑀦𑁂𑀢𑀺𑀬𑁂𑀯, 𑀥𑀸𑀢𑀺𑀬𑁂𑀯 𑀧𑀦 𑀚𑀕𑁆𑀕𑀢𑀺; 𑀏𑀯𑀫𑁂𑀯𑀁 𑀫𑀸𑀢𑀸 𑀯𑀺𑀬 𑀧𑀝𑀺𑀲𑀦𑁆𑀥𑀺𑀦𑀺𑀩𑁆𑀩𑀢𑁆𑀢𑀓𑀁 𑀚𑀦𑀓𑀓𑀫𑁆𑀫𑀁, 𑀥𑀸𑀢𑀺 𑀯𑀺𑀬 𑀧𑀯𑀢𑁆𑀢𑁂 𑀲𑀫𑁆𑀧𑀢𑁆𑀢𑀓𑀫𑁆𑀫𑀁. 𑀉𑀧𑀢𑁆𑀣𑀫𑁆𑀪𑀓𑀁 𑀦𑀸𑀫 𑀓𑀼𑀲𑀮𑁂𑀧𑀺 𑀮𑀩𑁆𑀪𑀢𑀺 𑀅𑀓𑀼𑀲𑀮𑁂𑀧𑀺. 𑀏𑀓𑀘𑁆𑀘𑁄 𑀳𑀺 𑀓𑀼𑀲𑀮𑀁 𑀓𑀢𑁆𑀯𑀸 𑀲𑀼𑀕𑀢𑀺𑀪𑀯𑁂 𑀦𑀺𑀩𑁆𑀩𑀢𑁆𑀢𑀢𑀺. 𑀲𑁄 𑀢𑀢𑁆𑀣 𑀞𑀺𑀢𑁄 𑀧𑀼𑀦𑀧𑁆𑀧𑀼𑀦𑀁 𑀓𑀼𑀲𑀮𑀁 𑀓𑀢𑁆𑀯𑀸 𑀢𑀁 𑀓𑀫𑁆𑀫𑀁 𑀉𑀧𑀢𑁆𑀣𑀫𑁆𑀪𑁂𑀢𑁆𑀯𑀸 𑀅𑀦𑁂𑀓𑀸𑀦𑀺 𑀯𑀲𑁆𑀲𑀲𑀢𑀲𑀳𑀲𑁆𑀲𑀸𑀦𑀺 𑀲𑀼𑀕𑀢𑀺𑀪𑀯𑀲𑁆𑀫𑀺𑀁𑀬𑁂𑀯 𑀯𑀺𑀘𑀭𑀢𑀺. 𑀏𑀓𑀘𑁆𑀘𑁄 𑀅𑀓𑀼𑀲𑀮𑀁 𑀓𑀢𑁆𑀯𑀸 𑀤𑀼𑀕𑁆𑀕𑀢𑀺𑀪𑀯𑁂 𑀦𑀺𑀩𑁆𑀩𑀢𑁆𑀢𑀢𑀺. 𑀲𑁄 𑀢𑀢𑁆𑀣 𑀞𑀺𑀢𑁄 𑀧𑀼𑀦𑀧𑁆𑀧𑀼𑀦𑀁 𑀅𑀓𑀼𑀲𑀮𑀁 𑀓𑀢𑁆𑀯𑀸 𑀢𑀁 𑀓𑀫𑁆𑀫𑀁 𑀉𑀧𑀢𑁆𑀣𑀫𑁆𑀪𑁂𑀢𑁆𑀯𑀸 𑀩𑀳𑀽𑀦𑀺 𑀯𑀲𑁆𑀲𑀲𑀢𑀲𑀳𑀲𑁆𑀲𑀸𑀦𑀺 𑀤𑀼𑀕𑁆𑀕𑀢𑀺𑀪𑀯𑀲𑁆𑀫𑀺𑀁𑀬𑁂𑀯 𑀯𑀺𑀘𑀭𑀢𑀺.

𑀅𑀧𑀭𑁄 𑀦𑀬𑁄 𑁋 𑀚𑀦𑀓𑀁 𑀦𑀸𑀫 𑀓𑀼𑀲𑀮𑀫𑁆𑀧𑀺 𑀳𑁄𑀢𑀺 𑀅𑀓𑀼𑀲𑀮𑀫𑁆𑀧𑀺. 𑀢𑀁 𑀧𑀝𑀺𑀲𑀦𑁆𑀥𑀺𑀬𑀫𑁆𑀧𑀺 𑀧𑀯𑀢𑁆𑀢𑁂𑀧𑀺 𑀭𑀽𑀧𑀸𑀭𑀽𑀧𑀯𑀺𑀧𑀸𑀓𑀓𑁆𑀔𑀦𑁆𑀥𑁂 𑀚𑀦𑁂𑀢𑀺. 𑀉𑀧𑀢𑁆𑀣𑀫𑁆𑀪𑀓𑀁 𑀧𑀦 𑀯𑀺𑀧𑀸𑀓𑀁 𑀚𑀦𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀅𑀜𑁆𑀜𑁂𑀦 𑀓𑀫𑁆𑀫𑁂𑀦 𑀤𑀺𑀦𑁆𑀦𑀸𑀬 𑀧𑀝𑀺𑀲𑀦𑁆𑀥𑀺𑀬𑀸 𑀚𑀦𑀺𑀢𑁂 𑀯𑀺𑀧𑀸𑀓𑁂 𑀉𑀧𑁆𑀧𑀚𑁆𑀚𑀦𑀓𑀲𑀼𑀔𑀤𑀼𑀓𑁆𑀔𑀁 𑀉𑀧𑀢𑁆𑀣𑀫𑁆𑀪𑁂𑀢𑀺, 𑀅𑀤𑁆𑀥𑀸𑀦𑀁 𑀧𑀯𑀢𑁆𑀢𑁂𑀢𑀺. 𑀉𑀧𑀧𑀻𑀴𑀓𑀁 𑀦𑀸𑀫 𑀅𑀜𑁆𑀜𑁂𑀦 𑀓𑀫𑁆𑀫𑁂𑀦 𑀤𑀺𑀦𑁆𑀦𑀸𑀬 𑀧𑀝𑀺𑀲𑀦𑁆𑀥𑀺𑀬𑀸 𑀚𑀦𑀺𑀢𑁂 𑀯𑀺𑀧𑀸𑀓𑁂 𑀉𑀧𑁆𑀧𑀚𑁆𑀚𑀦𑀓𑀲𑀼𑀔𑀤𑀼𑀓𑁆𑀔𑀁 𑀧𑀻𑀴𑁂𑀢𑀺 𑀩𑀸𑀥𑁂𑀢𑀺, 𑀅𑀤𑁆𑀥𑀸𑀦𑀁 𑀧𑀯𑀢𑁆𑀢𑀺𑀢𑀼𑀁 𑀦 𑀤𑁂𑀢𑀺. 𑀢𑀢𑁆𑀭𑀸𑀬𑀁 𑀦𑀬𑁄 𑁋 𑀓𑀼𑀲𑀮𑀓𑀫𑁆𑀫𑁂 𑀯𑀺𑀧𑀘𑁆𑀘𑀫𑀸𑀦𑁂 𑀅𑀓𑀼𑀲𑀮𑀓𑀫𑁆𑀫𑀁 𑀉𑀧𑀧𑀻𑀴𑀓𑀁 𑀳𑀼𑀢𑁆𑀯𑀸 𑀢𑀲𑁆𑀲 𑀯𑀺𑀧𑀘𑁆𑀘𑀺𑀢𑀼𑀁 𑀦 𑀤𑁂𑀢𑀺. 𑀅𑀓𑀼𑀲𑀮𑀓𑀫𑁆𑀫𑁂 𑀯𑀺𑀧𑀘𑁆𑀘𑀫𑀸𑀦𑁂 𑀓𑀼𑀲𑀮𑀓𑀫𑁆𑀫𑀁 𑀉𑀧𑀧𑀻𑀴𑀓𑀁 𑀳𑀼𑀢𑁆𑀯𑀸 𑀢𑀲𑁆𑀲 𑀯𑀺𑀧𑀘𑁆𑀘𑀺𑀢𑀼𑀁 𑀦 𑀤𑁂𑀢𑀺. 𑀬𑀣𑀸 𑀯𑀟𑁆𑀠𑀫𑀸𑀦𑀓𑀁 𑀭𑀼𑀓𑁆𑀔𑀁 𑀯𑀸 𑀕𑀘𑁆𑀙𑀁 𑀯𑀸 𑀮𑀢𑀁 𑀯𑀸 𑀓𑁄𑀘𑀺𑀤𑁂𑀯 𑀤𑀡𑁆𑀟𑁂𑀦 𑀯𑀸 𑀲𑀢𑁆𑀣𑁂𑀦 𑀯𑀸 𑀪𑀺𑀦𑁆𑀤𑁂𑀬𑁆𑀬 𑀯𑀸 𑀙𑀺𑀦𑁆𑀤𑁂𑀬𑁆𑀬 𑀯𑀸, 𑀅𑀣 𑀲𑁄 𑀭𑀼𑀓𑁆𑀔𑁄 𑀯𑀸 𑀕𑀘𑁆𑀙𑁄 𑀯𑀸 𑀮𑀢𑀸 𑀯𑀸 𑀯𑀟𑁆𑀠𑀺𑀢𑀼𑀁 𑀦 𑀲𑀓𑁆𑀓𑀼𑀡𑁂𑀬𑁆𑀬; 𑀏𑀯𑀫𑁂𑀯𑀁 𑀓𑀼𑀲𑀮𑀁 𑀯𑀺𑀧𑀘𑁆𑀘𑀫𑀸𑀦𑀁 𑀅𑀓𑀼𑀲𑀮𑁂𑀦 𑀉𑀧𑀧𑀻𑀴𑀺𑀢𑀁, 𑀅𑀓𑀼𑀲𑀮𑀁 𑀯𑀸 𑀧𑀦 𑀯𑀺𑀧𑀘𑁆𑀘𑀫𑀸𑀦𑀁 𑀓𑀼𑀲𑀮𑁂𑀦 𑀉𑀧𑀧𑀻𑀴𑀺𑀢𑀁 𑀯𑀺𑀧𑀘𑁆𑀘𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀢𑀢𑁆𑀣 𑀲𑀼𑀦𑀓𑁆𑀔𑀢𑁆𑀢𑀲𑁆𑀲 𑀅𑀓𑀼𑀲𑀮𑀓𑀫𑁆𑀫𑀁 𑀓𑀼𑀲𑀮𑀁 𑀉𑀧𑀧𑀻𑀴𑁂𑀲𑀺, 𑀘𑁄𑀭𑀖𑀸𑀢𑀓𑀲𑁆𑀲 𑀓𑀼𑀲𑀮𑀓𑀫𑁆𑀫𑀁 𑀅𑀓𑀼𑀲𑀮𑀁 𑀉𑀧𑀧𑀻𑀴𑁂𑀲𑀺.

𑀭𑀸𑀚𑀕𑀳𑁂 𑀓𑀺𑀭 𑀯𑀸𑀢𑀓𑀸𑀴𑀓𑁄 𑀧𑀜𑁆𑀜𑀸𑀲 𑀯𑀲𑁆𑀲𑀸𑀦𑀺 𑀘𑁄𑀭𑀖𑀸𑀢𑀓𑀫𑁆𑀫𑀁 𑀅𑀓𑀸𑀲𑀺. 𑀅𑀣 𑀦𑀁 𑀭𑀜𑁆𑀜𑁄 𑀆𑀭𑁄𑀘𑁂𑀲𑀼𑀁 𑁋 ‘‘𑀤𑁂𑀯, 𑀯𑀸𑀢𑀓𑀸𑀴𑀓𑁄 𑀫𑀳𑀮𑁆𑀮𑀓𑁄 𑀘𑁄𑀭𑁂 𑀖𑀸𑀢𑁂𑀢𑀼𑀁 𑀦 𑀲𑀓𑁆𑀓𑁄𑀢𑀻’’𑀢𑀺. ‘‘𑀅𑀧𑀦𑁂𑀣 𑀦𑀁 𑀢𑀲𑁆𑀫𑀸 𑀞𑀸𑀦𑀦𑁆𑀢𑀭𑀸𑀢𑀺. 𑀅𑀫𑀘𑁆𑀘𑀸 𑀦𑀁 𑀅𑀧𑀦𑁂𑀢𑁆𑀯𑀸 𑀅𑀜𑁆𑀜𑀁 𑀢𑀲𑁆𑀫𑀺𑀁 𑀞𑀸𑀦𑁂 𑀞𑀧𑀬𑀺𑀁𑀲𑀼. 𑀯𑀸𑀢𑀓𑀸𑀴𑀓𑁄𑀧𑀺 𑀬𑀸𑀯 𑀢𑀁 𑀓𑀫𑁆𑀫𑀁 𑀅𑀓𑀸𑀲𑀺, 𑀢𑀸𑀯 𑀅𑀳𑀢𑀯𑀢𑁆𑀣𑀸𑀦𑀺 𑀯𑀸 𑀅𑀘𑁆𑀙𑀸𑀤𑀺𑀢𑀼𑀁 𑀲𑀼𑀭𑀪𑀺𑀧𑀼𑀧𑁆𑀨𑀸𑀦𑀺 𑀯𑀸 𑀧𑀺𑀴𑀦𑁆𑀥𑀺𑀢𑀼𑀁 𑀧𑀸𑀬𑀸𑀲𑀁 𑀯𑀸 𑀪𑀼𑀜𑁆𑀚𑀺𑀢𑀼𑀁 𑀉𑀘𑁆𑀙𑀸𑀤𑀦𑀦𑁆𑀳𑀸𑀧𑀦𑀁 𑀯𑀸 𑀧𑀘𑁆𑀘𑀦𑀼𑀪𑁄𑀢𑀼𑀁 𑀦𑀸𑀮𑀢𑁆𑀣. 𑀲𑁄 ‘‘𑀤𑀻𑀖𑀭𑀢𑁆𑀢𑀁 𑀫𑁂 𑀓𑀺𑀮𑀺𑀝𑁆𑀞𑀯𑁂𑀲𑁂𑀦 𑀘𑀭𑀺𑀢’’𑀦𑁆𑀢𑀺 ‘‘𑀧𑀸𑀬𑀸𑀲𑀁 𑀫𑁂 𑀧𑀘𑀸𑀳𑀻’’𑀢𑀺 𑀪𑀭𑀺𑀬𑀁 𑀆𑀡𑀸𑀧𑁂𑀢𑁆𑀯𑀸 𑀦𑁆𑀳𑀸𑀦𑀻𑀬𑀲𑀫𑁆𑀪𑀸𑀭𑀸𑀦𑀺 𑀕𑀸𑀳𑀸𑀧𑁂𑀢𑁆𑀯𑀸 𑀦𑁆𑀳𑀸𑀦𑀢𑀺𑀢𑁆𑀣𑀁 𑀕𑀦𑁆𑀢𑁆𑀯𑀸 𑀲𑀻𑀲𑀁 𑀦𑁆𑀳𑀢𑁆𑀯𑀸 𑀅𑀳𑀢𑀯𑀢𑁆𑀣𑀸𑀦𑀺 𑀅𑀘𑁆𑀙𑀸𑀤𑁂𑀢𑁆𑀯𑀸 𑀕𑀦𑁆𑀥𑁂 𑀯𑀺𑀮𑀺𑀫𑁆𑀧𑀺𑀢𑁆𑀯𑀸 𑀧𑀼𑀧𑁆𑀨𑀸𑀦𑀺 𑀧𑀺𑀴𑀦𑁆𑀥𑀺𑀢𑁆𑀯𑀸 𑀖𑀭𑀁 𑀆𑀕𑀘𑁆𑀙𑀦𑁆𑀢𑁄 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀁 𑀤𑀺𑀲𑁆𑀯𑀸 ‘‘𑀲𑀁𑀓𑀺𑀮𑀺𑀝𑁆𑀞𑀓𑀫𑁆𑀫𑀢𑁄 𑀘𑀫𑁆𑀳𑀺 𑀅𑀧𑀕𑀢𑁄, 𑀅𑀬𑁆𑀬𑁄 𑀘 𑀫𑁂 𑀤𑀺𑀝𑁆𑀞𑁄’’𑀢𑀺 𑀢𑀼𑀝𑁆𑀞𑀫𑀸𑀦𑀲𑁄 𑀣𑁂𑀭𑀁 𑀖𑀭𑀁 𑀦𑁂𑀢𑁆𑀯𑀸 𑀦𑀯𑀲𑀧𑁆𑀧𑀺𑀲𑀓𑁆𑀓𑀭𑀘𑀼𑀡𑁆𑀡𑀸𑀪𑀺𑀲𑀗𑁆𑀔𑀢𑁂𑀦 𑀧𑀸𑀬𑀸𑀲𑁂𑀦 𑀧𑀭𑀺𑀯𑀺𑀲𑀺. 𑀣𑁂𑀭𑁄 𑀢𑀲𑁆𑀲 𑀅𑀦𑀼𑀫𑁄𑀤𑀦𑀫𑀓𑀸𑀲𑀺. 𑀲𑁄 𑀅𑀦𑀼𑀫𑁄𑀤𑀦𑀁 𑀲𑀼𑀢𑁆𑀯𑀸 𑀅𑀦𑀼𑀮𑁄𑀫𑀺𑀓𑀔𑀦𑁆𑀢𑀺𑀁 𑀧𑀝𑀺𑀮𑀪𑀺𑀢𑁆𑀯𑀸 𑀣𑁂𑀭𑀁 𑀅𑀦𑀼𑀕𑀦𑁆𑀢𑁆𑀯𑀸 𑀦𑀺𑀯𑀢𑁆𑀢𑀫𑀸𑀦𑁄 𑀅𑀦𑁆𑀢𑀭𑀸𑀫𑀕𑁆𑀕𑁂 𑀢𑀭𑀼𑀡𑀯𑀘𑁆𑀙𑀸𑀬 𑀕𑀸𑀯𑀺𑀬𑀸 𑀫𑀤𑁆𑀤𑀺𑀢𑁆𑀯𑀸 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑀺𑀢𑁄 𑀕𑀦𑁆𑀢𑁆𑀯𑀸 𑀢𑀸𑀯𑀢𑀺𑀁𑀲𑀪𑀯𑀦𑁂 𑀦𑀺𑀩𑁆𑀩𑀢𑁆𑀢𑀺. 𑀪𑀺𑀓𑁆𑀔𑀽 𑀢𑀣𑀸𑀕𑀢𑀁 𑀧𑀼𑀘𑁆𑀙𑀺𑀁𑀲𑀼 𑁋 ‘‘𑀪𑀦𑁆𑀢𑁂, 𑀘𑁄𑀭𑀖𑀸𑀢𑀓𑁄 𑀅𑀚𑁆𑀚𑁂𑀯 𑀓𑀺𑀮𑀺𑀝𑁆𑀞𑀓𑀫𑁆𑀫𑀢𑁄 𑀅𑀧𑀦𑀻𑀢𑁄, 𑀅𑀚𑁆𑀚𑁂𑀯 𑀓𑀸𑀮𑀗𑁆𑀓𑀢𑁄, 𑀓𑀳𑀁 𑀦𑀼 𑀔𑁄 𑀦𑀺𑀩𑁆𑀩𑀢𑁆𑀢𑁄’’𑀢𑀺? 𑀢𑀸𑀯𑀢𑀺𑀁𑀲𑀪𑀯𑀦𑁂, 𑀪𑀺𑀓𑁆𑀔𑀯𑁂𑀢𑀺. 𑀪𑀦𑁆𑀢𑁂, 𑀘𑁄𑀭𑀖𑀸𑀢𑀓𑁄 𑀤𑀻𑀖𑀭𑀢𑁆𑀢𑀁 𑀧𑀼𑀭𑀺𑀲𑁂 𑀖𑀸𑀢𑁂𑀲𑀺, 𑀢𑀼𑀫𑁆𑀳𑁂 𑀘 𑀏𑀯𑀁 𑀯𑀤𑁂𑀣, 𑀦𑀢𑁆𑀣𑀺 𑀦𑀼 𑀔𑁄 𑀧𑀸𑀧𑀓𑀫𑁆𑀫𑀲𑁆𑀲 𑀨𑀮𑀦𑁆𑀢𑀺. 𑀫𑀸, 𑀪𑀺𑀓𑁆𑀔𑀯𑁂, 𑀏𑀯𑀁 𑀅𑀯𑀘𑀼𑀢𑁆𑀣, 𑀩𑀮𑀯𑀓𑀮𑁆𑀬𑀸𑀡𑀫𑀺𑀢𑁆𑀢𑀽𑀧𑀦𑀺𑀲𑁆𑀲𑀬𑀁 𑀮𑀪𑀺𑀢𑁆𑀯𑀸 𑀥𑀫𑁆𑀫𑀲𑁂𑀦𑀸𑀧𑀢𑀺𑀲𑁆𑀲 𑀧𑀺𑀡𑁆𑀟𑀧𑀸𑀢𑀁 𑀤𑀢𑁆𑀯𑀸 𑀅𑀦𑀼𑀫𑁄𑀤𑀦𑀁 𑀲𑀼𑀢𑁆𑀯𑀸 𑀅𑀦𑀼𑀮𑁄𑀫𑀺𑀓𑀔𑀦𑁆𑀢𑀺𑀁 𑀧𑀝𑀺𑀮𑀪𑀺𑀢𑁆𑀯𑀸 𑀲𑁄 𑀢𑀢𑁆𑀣 𑀦𑀺𑀩𑁆𑀩𑀢𑁆𑀢𑁄𑀢𑀺.

‘‘𑀲𑀼𑀪𑀸𑀲𑀺𑀢𑀁 𑀲𑀼𑀡𑀺𑀢𑁆𑀯𑀸𑀦, 𑀦𑀸𑀕𑀭𑀺𑀬𑁄 𑀘𑁄𑀭𑀖𑀸𑀢𑀓𑁄;

𑀅𑀦𑀼𑀮𑁄𑀫𑀔𑀦𑁆𑀢𑀺𑀁 𑀮𑀤𑁆𑀥𑀸𑀦, 𑀫𑁄𑀤𑀢𑀻 𑀢𑀺𑀤𑀺𑀯𑀁 𑀕𑀢𑁄’’𑀢𑀺.

𑀉𑀧𑀖𑀸𑀢𑀓𑀁 𑀧𑀦 𑀲𑀬𑀁 𑀓𑀼𑀲𑀮𑀫𑁆𑀧𑀺 𑀅𑀓𑀼𑀲𑀮𑀫𑁆𑀧𑀺 𑀲𑀫𑀸𑀦𑀁 𑀅𑀜𑁆𑀜𑀁 𑀤𑀼𑀩𑁆𑀩𑀮𑀓𑀫𑁆𑀫𑀁 𑀖𑀸𑀢𑁂𑀢𑁆𑀯𑀸 𑀢𑀲𑁆𑀲 𑀯𑀺𑀧𑀸𑀓𑀁 𑀧𑀝𑀺𑀩𑀸𑀳𑀺𑀢𑁆𑀯𑀸 𑀅𑀢𑁆𑀢𑀦𑁄 𑀯𑀺𑀧𑀸𑀓𑀲𑁆𑀲 𑀑𑀓𑀸𑀲𑀁 𑀓𑀭𑁄𑀢𑀺. 𑀏𑀯𑀁 𑀧𑀦 𑀓𑀫𑁆𑀫𑁂𑀦 𑀓𑀢𑁂 𑀑𑀓𑀸𑀲𑁂 𑀢𑀁 𑀯𑀺𑀧𑀸𑀓𑀁 𑀉𑀧𑁆𑀧𑀦𑁆𑀦𑀁 𑀦𑀸𑀫 𑀯𑀼𑀘𑁆𑀘𑀢𑀺. 𑀉𑀧𑀘𑁆𑀙𑁂𑀤𑀓𑀦𑁆𑀢𑀺𑀧𑀺 𑀏𑀢𑀲𑁆𑀲𑁂𑀯 𑀦𑀸𑀫𑀁. 𑀢𑀢𑁆𑀭𑀸𑀬𑀁 𑀦𑀬𑁄 𑁋 𑀓𑀼𑀲𑀮𑀓𑀫𑁆𑀫𑀲𑁆𑀲 𑀯𑀺𑀧𑀘𑁆𑀘𑀦𑀓𑀸𑀮𑁂 𑀏𑀓𑀁 𑀅𑀓𑀼𑀲𑀮𑀓𑀫𑁆𑀫𑀁 𑀉𑀝𑁆𑀞𑀸𑀬 𑀢𑀁 𑀓𑀫𑁆𑀫𑀁 𑀙𑀺𑀦𑁆𑀤𑀺𑀢𑁆𑀯𑀸 𑀧𑀸𑀢𑁂𑀢𑀺. 𑀅𑀓𑀼𑀲𑀮𑀓𑀫𑁆𑀫𑀲𑁆𑀲𑀧𑀺 𑀯𑀺𑀧𑀘𑁆𑀘𑀦𑀓𑀸𑀮𑁂 𑀏𑀓𑀁 𑀓𑀼𑀲𑀮𑀓𑀫𑁆𑀫𑀁 𑀉𑀝𑁆𑀞𑀸𑀬 𑀢𑀁 𑀓𑀫𑁆𑀫𑀁 𑀙𑀺𑀦𑁆𑀤𑀺𑀢𑁆𑀯𑀸 𑀧𑀸𑀢𑁂𑀢𑀺. 𑀇𑀤𑀁 𑀉𑀧𑀘𑁆𑀙𑁂𑀤𑀓𑀁 𑀦𑀸𑀫. 𑀢𑀢𑁆𑀣 𑀅𑀚𑀸𑀢𑀲𑀢𑁆𑀢𑀼𑀦𑁄 𑀓𑀫𑁆𑀫𑀁 𑀓𑀼𑀲𑀮𑀘𑁆𑀙𑁂𑀤𑀓𑀁 𑀅𑀳𑁄𑀲𑀺, 𑀅𑀗𑁆𑀕𑀼𑀮𑀺𑀫𑀸𑀮𑀢𑁆𑀣𑁂𑀭𑀲𑁆𑀲 𑀅𑀓𑀼𑀲𑀮𑀘𑁆𑀙𑁂𑀤𑀓𑀦𑁆𑀢𑀺. 𑀏𑀯𑀁 𑀲𑀼𑀢𑁆𑀢𑀦𑁆𑀢𑀺𑀓𑀧𑀭𑀺𑀬𑀸𑀬𑁂𑀦 𑀏𑀓𑀸𑀤𑀲 𑀓𑀫𑁆𑀫𑀸𑀦𑀺 𑀯𑀺𑀪𑀢𑁆𑀢𑀸𑀦𑀺.

𑀅𑀪𑀺𑀥𑀫𑁆𑀫𑀧𑀭𑀺𑀬𑀸𑀬𑁂𑀦 𑀧𑀦 𑀲𑁄𑀴𑀲 𑀓𑀫𑁆𑀫𑀸𑀦𑀺 𑀯𑀺𑀪𑀢𑁆𑀢𑀸𑀦𑀺, 𑀲𑁂𑀬𑁆𑀬𑀣𑀺𑀤𑀁 𑁋 ‘‘𑀅𑀢𑁆𑀣𑁂𑀓𑀘𑁆𑀘𑀸𑀦𑀺 𑀧𑀸𑀧𑀓𑀸𑀦𑀺 𑀓𑀫𑁆𑀫𑀲𑀫𑀸𑀤𑀸𑀦𑀸𑀦𑀺 𑀕𑀢𑀺𑀲𑀫𑁆𑀧𑀢𑁆𑀢𑀺𑀧𑀝𑀺𑀩𑀸𑀴𑁆𑀳𑀸𑀦𑀺 𑀦 𑀯𑀺𑀧𑀘𑁆𑀘𑀦𑁆𑀢𑀺, 𑀅𑀢𑁆𑀣𑁂𑀓𑀘𑁆𑀘𑀸𑀦𑀺 𑀧𑀸𑀧𑀓𑀸𑀦𑀺 𑀓𑀫𑁆𑀫𑀲𑀫𑀸𑀤𑀸𑀦𑀸𑀦𑀺 𑀉𑀧𑀥𑀺𑀲𑀫𑁆𑀧𑀢𑁆𑀢𑀺𑀧𑀝𑀺𑀩𑀸𑀴𑁆𑀳𑀸𑀦𑀺 𑀦 𑀯𑀺𑀧𑀘𑁆𑀘𑀦𑁆𑀢𑀺, 𑀅𑀢𑁆𑀣𑁂𑀓𑀘𑁆𑀘𑀸𑀦𑀺 𑀧𑀸𑀧𑀓𑀸𑀦𑀺 𑀓𑀫𑁆𑀫𑀲𑀫𑀸𑀤𑀸𑀦𑀸𑀦𑀺 𑀓𑀸𑀮𑀲𑀫𑁆𑀧𑀢𑁆𑀢𑀺𑀧𑀝𑀺𑀩𑀸𑀴𑁆𑀳𑀸𑀦𑀺 𑀦 𑀯𑀺𑀧𑀘𑁆𑀘𑀦𑁆𑀢𑀺, 𑀅𑀢𑁆𑀣𑁂𑀓𑀘𑁆𑀘𑀸𑀦𑀺 𑀧𑀸𑀧𑀓𑀸𑀦𑀺 𑀓𑀫𑁆𑀫𑀲𑀫𑀸𑀤𑀸𑀦𑀸𑀦𑀺 𑀧𑀬𑁄𑀕𑀲𑀫𑁆𑀧𑀢𑁆𑀢𑀺𑀧𑀝𑀺𑀩𑀸𑀴𑁆𑀳𑀸𑀦𑀺 𑀦 𑀯𑀺𑀧𑀘𑁆𑀘𑀦𑁆𑀢𑀺. 𑀅𑀢𑁆𑀣𑁂𑀓𑀘𑁆𑀘𑀸𑀦𑀺 𑀧𑀸𑀧𑀓𑀸𑀦𑀺 𑀓𑀫𑁆𑀫𑀲𑀫𑀸𑀤𑀸𑀦𑀸𑀦𑀺 𑀕𑀢𑀺𑀯𑀺𑀧𑀢𑁆𑀢𑀺𑀁 𑀆𑀕𑀫𑁆𑀫 𑀯𑀺𑀧𑀘𑁆𑀘𑀦𑁆𑀢𑀺, 𑀉𑀧𑀥𑀺𑀯𑀺𑀧𑀢𑁆𑀢𑀺𑀁, 𑀓𑀸𑀮𑀯𑀺𑀧𑀢𑁆𑀢𑀺𑀁, 𑀧𑀬𑁄𑀕𑀯𑀺𑀧𑀢𑁆𑀢𑀺𑀁 𑀆𑀕𑀫𑁆𑀫 𑀯𑀺𑀧𑀘𑁆𑀘𑀦𑁆𑀢𑀺. 𑀅𑀢𑁆𑀣𑁂𑀓𑀘𑁆𑀘𑀸𑀦𑀺 𑀓𑀮𑁆𑀬𑀸𑀡𑀸𑀦𑀺 𑀓𑀫𑁆𑀫𑀲𑀫𑀸𑀤𑀸𑀦𑀸𑀦𑀺 𑀕𑀢𑀺𑀯𑀺𑀧𑀢𑁆𑀢𑀺𑀧𑀝𑀺𑀩𑀸𑀴𑁆𑀳𑀸𑀦𑀺 𑀦 𑀯𑀺𑀧𑀘𑁆𑀘𑀦𑁆𑀢𑀺, 𑀉𑀧𑀥𑀺𑀯𑀺𑀧𑀢𑁆𑀢𑀺, 𑀓𑀸𑀮𑀯𑀺𑀧𑀢𑁆𑀢𑀺, 𑀧𑀬𑁄𑀕𑀯𑀺𑀧𑀢𑁆𑀢𑀺𑀧𑀝𑀺𑀩𑀸𑀴𑁆𑀳𑀸𑀦𑀺 𑀦 𑀯𑀺𑀧𑀘𑁆𑀘𑀦𑁆𑀢𑀺. 𑀅𑀢𑁆𑀣𑁂𑀓𑀘𑁆𑀘𑀸𑀦𑀺 𑀓𑀮𑁆𑀬𑀸𑀡𑀸𑀦𑀺 𑀓𑀫𑁆𑀫𑀲𑀫𑀸𑀤𑀸𑀦𑀸𑀦𑀺 𑀕𑀢𑀺𑀲𑀫𑁆𑀧𑀢𑁆𑀢𑀺𑀁 𑀆𑀕𑀫𑁆𑀫 𑀯𑀺𑀧𑀘𑁆𑀘𑀦𑁆𑀢𑀺, 𑀉𑀧𑀥𑀺𑀲𑀫𑁆𑀧𑀢𑁆𑀢𑀺𑀁, 𑀓𑀸𑀮𑀲𑀫𑁆𑀧𑀢𑁆𑀢𑀺𑀁, 𑀧𑀬𑁄𑀕𑀲𑀫𑁆𑀧𑀢𑁆𑀢𑀺𑀁 𑀆𑀕𑀫𑁆𑀫 𑀯𑀺𑀧𑀘𑁆𑀘𑀦𑁆𑀢𑀻’’𑀢𑀺 (𑀯𑀺𑀪. 𑁮𑁧𑁦).

𑀢𑀢𑁆𑀣 𑀧𑀸𑀧𑀓𑀸𑀦𑀻𑀢𑀺 𑀮𑀸𑀫𑀓𑀸𑀦𑀺. 𑀓𑀫𑁆𑀫𑀲𑀫𑀸𑀤𑀸𑀦𑀸𑀦𑀻𑀢𑀺 𑀓𑀫𑁆𑀫𑀕𑁆𑀕𑀳𑀡𑀸𑀦𑀺. 𑀕𑀳𑀺𑀢𑀲𑀫𑀸𑀤𑀺𑀦𑁆𑀦𑀸𑀦𑀁 𑀓𑀫𑁆𑀫𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀁. 𑀕𑀢𑀺𑀲𑀫𑁆𑀧𑀢𑁆𑀢𑀺𑀧𑀝𑀺𑀩𑀸𑀴𑁆𑀳𑀸𑀦𑀺 𑀦 𑀯𑀺𑀧𑀘𑁆𑀘𑀦𑁆𑀢𑀻𑀢𑀺𑀆𑀤𑀻𑀲𑀼 𑀅𑀦𑀺𑀝𑁆𑀞𑀸𑀭𑀫𑁆𑀫𑀡𑀸𑀦𑀼𑀪𑀯𑀦𑀸𑀭𑀳𑁂 𑀓𑀫𑁆𑀫𑁂 𑀯𑀺𑀚𑁆𑀚𑀫𑀸𑀦𑁂𑀬𑁂𑀯 𑀲𑀼𑀕𑀢𑀺𑀪𑀯𑁂 𑀦𑀺𑀩𑁆𑀩𑀢𑁆𑀢𑀲𑁆𑀲 𑀢𑀁 𑀓𑀫𑁆𑀫𑀁 𑀕𑀢𑀺𑀲𑀫𑁆𑀧𑀢𑁆𑀢𑀺𑀧𑀝𑀺𑀩𑀸𑀴𑁆𑀳𑀁 𑀦 𑀯𑀺𑀧𑀘𑁆𑀘𑀢𑀺 𑀦𑀸𑀫. 𑀕𑀢𑀺𑀲𑀫𑁆𑀧𑀢𑁆𑀢𑀺𑀬𑀸 𑀧𑀢𑀺𑀩𑀸𑀳𑀺𑀢𑀁 𑀳𑀼𑀢𑁆𑀯𑀸 𑀦 𑀯𑀺𑀧𑀘𑁆𑀘𑀢𑀻𑀢𑀺 𑀅𑀢𑁆𑀣𑁄. 𑀬𑁄 𑀧𑀦 𑀧𑀸𑀧𑀓𑀫𑁆𑀫𑁂𑀦 𑀤𑀸𑀲𑀺𑀬𑀸 𑀯𑀸 𑀓𑀫𑁆𑀫𑀓𑀸𑀭𑀺𑀬𑀸 𑀯𑀸 𑀓𑀼𑀘𑁆𑀙𑀺𑀬𑀁 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀉𑀧𑀥𑀺𑀲𑀫𑁆𑀧𑀦𑁆𑀦𑁄 𑀳𑁄𑀢𑀺, 𑀅𑀢𑁆𑀢𑀪𑀸𑀯𑀲𑀫𑀺𑀤𑁆𑀥𑀺𑀬𑀁 𑀢𑀺𑀝𑁆𑀞𑀢𑀺. 𑀅𑀣𑀲𑁆𑀲 𑀲𑀸𑀫𑀺𑀓𑀸 𑀢𑀲𑁆𑀲 𑀭𑀽𑀧𑀲𑀫𑁆𑀧𑀢𑁆𑀢𑀺𑀁 𑀤𑀺𑀲𑁆𑀯𑀸 ‘‘𑀦𑀸𑀬𑀁 𑀓𑀺𑀮𑀺𑀝𑁆𑀞𑀓𑀫𑁆𑀫𑀲𑁆𑀲𑀸𑀦𑀼𑀘𑁆𑀙𑀯𑀺𑀓𑁄’’𑀢𑀺 𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀅𑀢𑁆𑀢𑀦𑁄 𑀚𑀸𑀢𑀧𑀼𑀢𑁆𑀢𑀁 𑀯𑀺𑀬 𑀪𑀡𑁆𑀟𑀸𑀕𑀸𑀭𑀺𑀓𑀸𑀤𑀺𑀝𑁆𑀞𑀸𑀦𑁂𑀲𑀼 𑀞𑀧𑁂𑀢𑁆𑀯𑀸 𑀲𑀫𑁆𑀧𑀢𑁆𑀢𑀺𑀁 𑀬𑁄𑀚𑁂𑀢𑁆𑀯𑀸 𑀧𑀭𑀺𑀳𑀭𑀦𑁆𑀢𑀺. 𑀏𑀯𑀭𑀽𑀧𑀲𑁆𑀲 𑀓𑀫𑁆𑀫𑀁 𑀉𑀧𑀥𑀺𑀲𑀫𑁆𑀧𑀢𑁆𑀢𑀺𑀧𑀝𑀺𑀩𑀸𑀴𑁆𑀳𑀁 𑀦 𑀯𑀺𑀧𑀘𑁆𑀘𑀢𑀺 𑀦𑀸𑀫. 𑀬𑁄 𑀧𑀦 𑀧𑀞𑀫𑀓𑀧𑁆𑀧𑀺𑀓𑀓𑀸𑀮𑀲𑀤𑀺𑀲𑁂 𑀲𑀼𑀮𑀪𑀲𑀫𑁆𑀧𑀦𑁆𑀦𑀭𑀲𑀪𑁄𑀚𑀦𑁂 𑀲𑀼𑀪𑀺𑀓𑁆𑀔𑀓𑀸𑀮𑁂 𑀦𑀺𑀩𑁆𑀩𑀢𑁆𑀢𑀢𑀺, 𑀢𑀲𑁆𑀲 𑀯𑀺𑀚𑁆𑀚𑀫𑀸𑀦𑀫𑁆𑀧𑀺 𑀧𑀸𑀧𑀓𑀫𑁆𑀫𑀁 𑀓𑀸𑀮𑀲𑀫𑁆𑀧𑀢𑁆𑀢𑀺𑀧𑀝𑀺𑀩𑀸𑀴𑁆𑀳𑀁 𑀦 𑀯𑀺𑀧𑀘𑁆𑀘𑀢𑀺 𑀦𑀸𑀫. 𑀬𑁄 𑀧𑀦 𑀲𑀫𑁆𑀫𑀸𑀧𑀬𑁄𑀕𑀁 𑀦𑀺𑀲𑁆𑀲𑀸𑀬 𑀚𑀻𑀯𑀢𑀺, 𑀉𑀧𑀲𑀗𑁆𑀓𑀫𑀺𑀢𑀩𑁆𑀩𑀬𑀼𑀢𑁆𑀢𑀓𑀸𑀮𑁂 𑀉𑀧𑀲𑀗𑁆𑀓𑀫𑀢𑀺, 𑀧𑀝𑀺𑀓𑁆𑀓𑀫𑀺𑀢𑀩𑁆𑀩𑀬𑀼𑀢𑁆𑀢𑀓𑀸𑀮𑁂 𑀧𑀝𑀺𑀓𑁆𑀓𑀫𑀢𑀺, 𑀧𑀮𑀸𑀬𑀺𑀢𑀩𑁆𑀩𑀬𑀼𑀢𑁆𑀢𑀓𑀸𑀮𑁂 𑀧𑀮𑀸𑀬𑀢𑀺. 𑀮𑀜𑁆𑀚𑀤𑀸𑀦𑀬𑀼𑀢𑁆𑀢𑀓𑀸𑀮𑁂 𑀮𑀜𑁆𑀚𑀁 𑀤𑁂𑀢𑀺, 𑀘𑁄𑀭𑀺𑀓𑀬𑀼𑀢𑁆𑀢𑀓𑀸𑀮𑁂 𑀘𑁄𑀭𑀺𑀓𑀁 𑀓𑀭𑁄𑀢𑀺, 𑀏𑀯𑀭𑀽𑀧𑀲𑁆𑀲 𑀧𑀸𑀧𑀓𑀫𑁆𑀫𑀁 𑀧𑀬𑁄𑀕𑀲𑀫𑁆𑀧𑀢𑁆𑀢𑀺𑀧𑀝𑀺𑀩𑀸𑀴𑁆𑀳𑀁 𑀦 𑀯𑀺𑀧𑀘𑁆𑀘𑀢𑀺 𑀦𑀸𑀫.

𑀤𑀼𑀕𑁆𑀕𑀢𑀺𑀪𑀯𑁂 𑀦𑀺𑀩𑁆𑀩𑀢𑁆𑀢𑀲𑁆𑀲 𑀧𑀦 𑀧𑀸𑀧𑀓𑀫𑁆𑀫𑀁 𑀕𑀢𑀺𑀯𑀺𑀧𑀢𑁆𑀢𑀺𑀁 𑀆𑀕𑀫𑁆𑀫 𑀯𑀺𑀧𑀘𑁆𑀘𑀢𑀺 𑀦𑀸𑀫. 𑀬𑁄 𑀧𑀦 𑀤𑀸𑀲𑀺𑀬𑀸 𑀯𑀸 𑀓𑀫𑁆𑀫𑀓𑀸𑀭𑀺𑀬𑀸 𑀯𑀸 𑀓𑀼𑀘𑁆𑀙𑀺𑀲𑁆𑀫𑀺𑀁 𑀦𑀺𑀩𑁆𑀩𑀢𑁆𑀢𑁄 𑀤𑀼𑀩𑁆𑀩𑀡𑁆𑀡𑁄 𑀳𑁄𑀢𑀺 𑀤𑀼𑀲𑁆𑀲𑀡𑁆𑀞𑀸𑀦𑁄, ‘‘𑀬𑀓𑁆𑀔𑁄 𑀦𑀼 𑀔𑁄 𑀫𑀦𑀼𑀲𑁆𑀲𑁄 𑀦𑀼 𑀔𑁄’’𑀢𑀺 𑀯𑀺𑀫𑀢𑀺𑀁 𑀉𑀧𑁆𑀧𑀸𑀤𑁂𑀢𑀺. 𑀲𑁄 𑀲𑀘𑁂 𑀧𑀼𑀭𑀺𑀲𑁄 𑀳𑁄𑀢𑀺, 𑀅𑀣 𑀦𑀁 ‘‘𑀦𑀸𑀬𑀁 𑀅𑀜𑁆𑀜𑀲𑁆𑀲 𑀓𑀫𑁆𑀫𑀲𑁆𑀲 𑀅𑀦𑀼𑀘𑁆𑀙𑀯𑀺𑀓𑁄’’𑀢𑀺 𑀳𑀢𑁆𑀣𑀺𑀁 𑀯𑀸 𑀭𑀓𑁆𑀔𑀸𑀧𑁂𑀦𑁆𑀢𑀺 𑀅𑀲𑁆𑀲𑀁 𑀯𑀸 𑀕𑁄𑀡𑁂 𑀯𑀸, 𑀢𑀺𑀡𑀓𑀝𑁆𑀞𑀸𑀤𑀻𑀦𑀺 𑀯𑀸 𑀆𑀳𑀭𑀸𑀧𑁂𑀦𑁆𑀢𑀺, 𑀔𑁂𑀴𑀲𑀭𑀓𑀁 𑀯𑀸 𑀕𑀡𑁆𑀳𑀸𑀧𑁂𑀦𑁆𑀢𑀺. 𑀲𑀘𑁂 𑀇𑀢𑁆𑀣𑀻 𑀳𑁄𑀢𑀺, 𑀅𑀣 𑀦𑀁 𑀳𑀢𑁆𑀣𑀺𑀅𑀲𑁆𑀲𑀸𑀤𑀻𑀦𑀁 𑀪𑀢𑁆𑀢𑀫𑀸𑀲𑀸𑀤𑀻𑀦𑀺 𑀯𑀸 𑀧𑀘𑀸𑀧𑁂𑀦𑁆𑀢𑀺, 𑀓𑀘𑀯𑀭𑀁 𑀯𑀸 𑀙𑀟𑁆𑀟𑀸𑀧𑁂𑀦𑁆𑀢𑀺, 𑀅𑀜𑁆𑀜𑀁 𑀯𑀸 𑀧𑀦 𑀚𑀺𑀕𑀼𑀘𑁆𑀙𑀦𑀻𑀬𑀓𑀫𑁆𑀫𑀁 𑀓𑀸𑀭𑁂𑀦𑁆𑀢𑀺. 𑀏𑀯𑀭𑀽𑀧𑀲𑁆𑀲 𑀧𑀸𑀧𑀓𑀫𑁆𑀫𑀁 𑀉𑀧𑀥𑀺𑀯𑀺𑀧𑀢𑁆𑀢𑀺𑀁 𑀆𑀕𑀫𑁆𑀫 𑀯𑀺𑀧𑀘𑁆𑀘𑀢𑀺 𑀦𑀸𑀫. 𑀬𑁄 𑀧𑀦 𑀤𑀼𑀩𑁆𑀪𑀺𑀓𑁆𑀔𑀓𑀸𑀮𑁂 𑀯𑀸 𑀧𑀭𑀺𑀳𑀻𑀦𑀲𑀫𑁆𑀧𑀢𑁆𑀢𑀺𑀓𑀸𑀮𑁂 𑀯𑀸 𑀅𑀦𑁆𑀢𑀭𑀓𑀧𑁆𑀧𑁂 𑀯𑀸 𑀦𑀺𑀩𑁆𑀩𑀢𑁆𑀢𑀢𑀺, 𑀢𑀲𑁆𑀲 𑀧𑀸𑀧𑀓𑀫𑁆𑀫𑀁 𑀓𑀸𑀮𑀯𑀺𑀧𑀢𑁆𑀢𑀺𑀁 𑀆𑀕𑀫𑁆𑀫 𑀯𑀺𑀧𑀘𑁆𑀘𑀢𑀺 𑀦𑀸𑀫. 𑀬𑁄 𑀧𑀦 𑀧𑀬𑁄𑀕𑀁 𑀲𑀫𑁆𑀧𑀸𑀤𑁂𑀢𑀼𑀁 𑀦 𑀚𑀸𑀦𑀸𑀢𑀺, 𑀉𑀧𑀲𑀗𑁆𑀓𑀫𑀺𑀢𑀩𑁆𑀩𑀬𑀼𑀢𑁆𑀢𑀓𑀸𑀮𑁂 𑀉𑀧𑀲𑀗𑁆𑀓𑀫𑀺𑀢𑀼𑀁 𑀦 𑀚𑀸𑀦𑀸𑀢𑀺…𑀧𑁂… 𑀘𑁄𑀭𑀺𑀓𑀬𑀼𑀢𑁆𑀢𑀓𑀸𑀮𑁂 𑀘𑁄𑀭𑀺𑀓𑀁 𑀓𑀸𑀢𑀼𑀁 𑀦 𑀚𑀸𑀦𑀸𑀢𑀺, 𑀢𑀲𑁆𑀲 𑀧𑀸𑀧𑀓𑀫𑁆𑀫𑀁 𑀧𑀬𑁄𑀕𑀯𑀺𑀧𑀢𑁆𑀢𑀺𑀁 𑀆𑀕𑀫𑁆𑀫 𑀯𑀺𑀧𑀘𑁆𑀘𑀢𑀺 𑀦𑀸𑀫.

𑀬𑁄 𑀧𑀦 𑀇𑀝𑁆𑀞𑀸𑀭𑀫𑁆𑀫𑀡𑀸𑀦𑀼𑀪𑀯𑀦𑀸𑀭𑀳𑁂 𑀓𑀫𑁆𑀫𑁂 𑀯𑀺𑀚𑁆𑀚𑀫𑀸𑀦𑁂𑀬𑁂𑀯 𑀕𑀦𑁆𑀢𑁆𑀯𑀸 𑀤𑀼𑀕𑁆𑀕𑀢𑀺𑀪𑀯𑁂 𑀦𑀺𑀩𑁆𑀩𑀢𑁆𑀢𑀢𑀺, 𑀢𑀲𑁆𑀲 𑀢𑀁 𑀓𑀫𑁆𑀫𑀁 𑀕𑀢𑀺𑀯𑀺𑀧𑀢𑁆𑀢𑀺𑀧𑀝𑀺𑀩𑀸𑀴𑁆𑀳𑀁 𑀦 𑀯𑀺𑀧𑀘𑁆𑀘𑀢𑀺 𑀦𑀸𑀫. 𑀬𑁄 𑀧𑀦 𑀧𑀼𑀜𑁆𑀜𑀸𑀦𑀼𑀪𑀸𑀯𑁂𑀦 𑀭𑀸𑀚𑀭𑀸𑀚𑀫𑀳𑀸𑀫𑀢𑁆𑀢𑀸𑀤𑀻𑀦𑀁 𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀓𑀸𑀡𑁄 𑀯𑀸 𑀳𑁄𑀢𑀺 𑀓𑀼𑀡𑀻 𑀯𑀸 𑀔𑀜𑁆𑀚𑁄 𑀯𑀸 𑀧𑀓𑁆𑀔𑀳𑀢𑁄 𑀯𑀸, 𑀢𑀲𑁆𑀲 𑀑𑀧𑀭𑀚𑁆𑀚𑀲𑁂𑀦𑀸𑀧𑀢𑀺𑀪𑀡𑁆𑀟𑀸𑀕𑀸𑀭𑀺𑀓𑀝𑁆𑀞𑀸𑀦𑀸𑀤𑀻𑀦𑀺 𑀦 𑀅𑀦𑀼𑀘𑁆𑀙𑀯𑀺𑀓𑀸𑀦𑀻𑀢𑀺 𑀦 𑀤𑁂𑀦𑁆𑀢𑀺. 𑀇𑀘𑁆𑀘𑀲𑁆𑀲 𑀢𑀁 𑀧𑀼𑀜𑁆𑀜𑀁 𑀉𑀧𑀥𑀺𑀯𑀺𑀧𑀢𑁆𑀢𑀺𑀧𑀝𑀺𑀩𑀸𑀴𑁆𑀳𑀁 𑀦 𑀯𑀺𑀧𑀘𑁆𑀘𑀢𑀺 𑀦𑀸𑀫. 𑀬𑁄 𑀧𑀦 𑀤𑀼𑀩𑁆𑀪𑀺𑀓𑁆𑀔𑀓𑀸𑀮𑁂 𑀯𑀸 𑀧𑀭𑀺𑀳𑀻𑀦𑀲𑀫𑁆𑀧𑀢𑁆𑀢𑀺𑀓𑀸𑀮𑁂 𑀯𑀸 𑀅𑀦𑁆𑀢𑀭𑀓𑀧𑁆𑀧𑁂 𑀯𑀸 𑀫𑀦𑀼𑀲𑁆𑀲𑁂𑀲𑀼 𑀦𑀺𑀩𑁆𑀩𑀢𑁆𑀢𑀢𑀺, 𑀢𑀲𑁆𑀲 𑀢𑀁 𑀓𑀮𑁆𑀬𑀸𑀡𑀓𑀫𑁆𑀫𑀁 𑀓𑀸𑀮𑀯𑀺𑀧𑀢𑁆𑀢𑀺𑀧𑀝𑀺𑀩𑀸𑀴𑁆𑀳𑀁 𑀦 𑀯𑀺𑀧𑀘𑁆𑀘𑀢𑀺 𑀦𑀸𑀫. 𑀬𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀧𑀬𑁄𑀕𑀁 𑀲𑀫𑁆𑀧𑀸𑀤𑁂𑀢𑀼𑀁 𑀦 𑀚𑀸𑀦𑀸𑀢𑀺, 𑀢𑀲𑁆𑀲 𑀓𑀮𑁆𑀬𑀸𑀡𑀓𑀫𑁆𑀫𑀁 𑀧𑀬𑁄𑀕𑀯𑀺𑀧𑀢𑁆𑀢𑀺𑀧𑀝𑀺𑀩𑀸𑀴𑁆𑀳𑀁 𑀦 𑀯𑀺𑀧𑀘𑁆𑀘𑀢𑀺 𑀦𑀸𑀫.

𑀓𑀮𑁆𑀬𑀸𑀡𑀓𑀫𑁆𑀫𑁂𑀦 𑀧𑀦 𑀲𑀼𑀕𑀢𑀺𑀪𑀯𑁂 𑀦𑀺𑀩𑁆𑀩𑀢𑁆𑀢𑀲𑁆𑀲 𑀢𑀁 𑀓𑀫𑁆𑀫𑀁 𑀕𑀢𑀺𑀲𑀫𑁆𑀧𑀢𑁆𑀢𑀺𑀁 𑀆𑀕𑀫𑁆𑀫 𑀯𑀺𑀧𑀘𑁆𑀘𑀢𑀺 𑀦𑀸𑀫. 𑀭𑀸𑀚𑀭𑀸𑀚𑀫𑀳𑀸𑀫𑀢𑁆𑀢𑀸𑀤𑀻𑀦𑀁 𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀉𑀧𑀥𑀺𑀲𑀫𑁆𑀧𑀢𑁆𑀢𑀺𑀁 𑀧𑀢𑁆𑀢𑀲𑁆𑀲 𑀅𑀢𑁆𑀢𑀪𑀸𑀯𑀲𑀫𑀺𑀤𑁆𑀥𑀺𑀬𑀁 𑀞𑀺𑀢𑀲𑁆𑀲 𑀤𑁂𑀯𑀦𑀕𑀭𑁂 𑀲𑀫𑀼𑀲𑁆𑀲𑀺𑀢𑀭𑀢𑀦𑀢𑁄𑀭𑀡𑀲𑀤𑀺𑀲𑀁 𑀅𑀢𑁆𑀢𑀪𑀸𑀯𑀁 𑀤𑀺𑀲𑁆𑀯𑀸 ‘‘𑀇𑀫𑀲𑁆𑀲 𑀑𑀧𑀭𑀚𑁆𑀚𑀲𑁂𑀦𑀸𑀧𑀢𑀺𑀪𑀡𑁆𑀟𑀸𑀕𑀸𑀭𑀺𑀓𑀝𑁆𑀞𑀸𑀦𑀸𑀤𑀻𑀦𑀺 𑀅𑀦𑀼𑀘𑁆𑀙𑀯𑀺𑀓𑀸𑀦𑀻’’𑀢𑀺 𑀤𑀳𑀭𑀲𑁆𑀲𑁂𑀯 𑀲𑀢𑁄 𑀢𑀸𑀦𑀺 𑀞𑀸𑀦𑀦𑁆𑀢𑀭𑀸𑀦𑀺 𑀤𑁂𑀦𑁆𑀢𑀺, 𑀏𑀯𑀭𑀽𑀧𑀲𑁆𑀲 𑀓𑀮𑁆𑀬𑀸𑀡𑀓𑀫𑁆𑀫𑀁 𑀉𑀧𑀥𑀺𑀲𑀫𑁆𑀧𑀢𑁆𑀢𑀺𑀁 𑀆𑀕𑀫𑁆𑀫 𑀯𑀺𑀧𑀘𑁆𑀘𑀢𑀺 𑀦𑀸𑀫. 𑀬𑁄 𑀧𑀞𑀫𑀓𑀧𑁆𑀧𑀺𑀓𑁂𑀲𑀼 𑀯𑀸 𑀲𑀼𑀮𑀪𑀦𑁆𑀦𑀧𑀸𑀦𑀓𑀸𑀮𑁂 𑀯𑀸 𑀦𑀺𑀩𑁆𑀩𑀢𑁆𑀢𑀢𑀺, 𑀢𑀲𑁆𑀲 𑀓𑀮𑁆𑀬𑀸𑀡𑀓𑀫𑁆𑀫𑀁 𑀓𑀸𑀮𑀲𑀫𑁆𑀧𑀢𑁆𑀢𑀺𑀁 𑀆𑀕𑀫𑁆𑀫 𑀯𑀺𑀧𑀘𑁆𑀘𑀢𑀺 𑀦𑀸𑀫. 𑀬𑁄 𑀯𑀼𑀢𑁆𑀢𑀦𑀬𑁂𑀦𑁂𑀯 𑀧𑀬𑁄𑀕𑀁 𑀲𑀫𑁆𑀧𑀸𑀤𑁂𑀢𑀼𑀁 𑀚𑀸𑀦𑀸𑀢𑀺, 𑀢𑀲𑁆𑀲 𑀓𑀫𑁆𑀫𑀁 𑀧𑀬𑁄𑀕𑀲𑀫𑁆𑀧𑀢𑁆𑀢𑀺𑀁 𑀆𑀕𑀫𑁆𑀫 𑀯𑀺𑀧𑀘𑁆𑀘𑀢𑀺 𑀦𑀸𑀫. 𑀏𑀯𑀁 𑀅𑀪𑀺𑀥𑀫𑁆𑀫𑀧𑀭𑀺𑀬𑀸𑀬𑁂𑀦 𑀲𑁄𑀴𑀲 𑀓𑀫𑁆𑀫𑀸𑀦𑀺 𑀯𑀺𑀪𑀢𑁆𑀢𑀸𑀦𑀺.

𑀅𑀧𑀭𑀸𑀦𑀺𑀧𑀺 𑀧𑀝𑀺𑀲𑀫𑁆𑀪𑀺𑀤𑀸𑀫𑀕𑁆𑀕𑀧𑀭𑀺𑀬𑀸𑀬𑁂𑀦 𑀤𑁆𑀯𑀸𑀤𑀲 𑀓𑀫𑁆𑀫𑀸𑀦𑀺 𑀯𑀺𑀪𑀢𑁆𑀢𑀸𑀦𑀺. 𑀲𑁂𑀬𑁆𑀬𑀣𑀺𑀤𑀁 𑁋 ‘‘𑀅𑀳𑁄𑀲𑀺 𑀓𑀫𑁆𑀫𑀁 𑀅𑀳𑁄𑀲𑀺 𑀓𑀫𑁆𑀫𑀯𑀺𑀧𑀸𑀓𑁄, 𑀅𑀳𑁄𑀲𑀺 𑀓𑀫𑁆𑀫𑀁 𑀦𑀸𑀳𑁄𑀲𑀺 𑀓𑀫𑁆𑀫𑀯𑀺𑀧𑀸𑀓𑁄, 𑀅𑀳𑁄𑀲𑀺 𑀓𑀫𑁆𑀫𑀁 𑀅𑀢𑁆𑀣𑀺 𑀓𑀫𑁆𑀫𑀯𑀺𑀧𑀸𑀓𑁄, 𑀅𑀳𑁄𑀲𑀺 𑀓𑀫𑁆𑀫𑀁 𑀦𑀢𑁆𑀣𑀺 𑀓𑀫𑁆𑀫𑀯𑀺𑀧𑀸𑀓𑁄, 𑀅𑀳𑁄𑀲𑀺 𑀓𑀫𑁆𑀫𑀁 𑀪𑀯𑀺𑀲𑁆𑀲𑀢𑀺 𑀓𑀫𑁆𑀫𑀯𑀺𑀧𑀸𑀓𑁄, 𑀅𑀳𑁄𑀲𑀺 𑀓𑀫𑁆𑀫𑀁 𑀦 𑀪𑀯𑀺𑀲𑁆𑀲𑀢𑀺 𑀓𑀫𑁆𑀫𑀯𑀺𑀧𑀸𑀓𑁄, 𑀅𑀢𑁆𑀣𑀺 𑀓𑀫𑁆𑀫𑀁 𑀅𑀢𑁆𑀣𑀺 𑀓𑀫𑁆𑀫𑀯𑀺𑀧𑀸𑀓𑁄, 𑀅𑀢𑁆𑀣𑀺 𑀓𑀫𑁆𑀫𑀁 𑀦𑀢𑁆𑀣𑀺 𑀓𑀫𑁆𑀫𑀯𑀺𑀧𑀸𑀓𑁄, 𑀅𑀢𑁆𑀣𑀺 𑀓𑀫𑁆𑀫𑀁 𑀪𑀯𑀺𑀲𑁆𑀲𑀢𑀺 𑀓𑀫𑁆𑀫𑀯𑀺𑀧𑀸𑀓𑁄, 𑀅𑀢𑁆𑀣𑀺 𑀓𑀫𑁆𑀫𑀁 𑀦 𑀪𑀯𑀺𑀲𑁆𑀲𑀢𑀺 𑀓𑀫𑁆𑀫𑀯𑀺𑀧𑀸𑀓𑁄, 𑀪𑀯𑀺𑀲𑁆𑀲𑀢𑀺 𑀓𑀫𑁆𑀫𑀁 𑀪𑀯𑀺𑀲𑁆𑀲𑀢𑀺 𑀓𑀫𑁆𑀫𑀯𑀺𑀧𑀸𑀓𑁄, 𑀪𑀯𑀺𑀲𑁆𑀲𑀢𑀺 𑀓𑀫𑁆𑀫𑀁 𑀦 𑀪𑀯𑀺𑀲𑁆𑀲𑀢𑀺 𑀓𑀫𑁆𑀫𑀯𑀺𑀧𑀸𑀓𑁄’’𑀢𑀺 (𑀧𑀝𑀺. 𑀫. 𑁧.𑁨𑁩𑁪).

𑀢𑀢𑁆𑀣 𑀬𑀁 𑀓𑀫𑁆𑀫𑀁 𑀅𑀢𑀻𑀢𑁂 𑀆𑀬𑀽𑀳𑀺𑀢𑀁 𑀅𑀢𑀻𑀢𑁂𑀬𑁂𑀯 𑀯𑀺𑀧𑀸𑀓𑀯𑀸𑀭𑀁 𑀮𑀪𑀺, 𑀧𑀝𑀺𑀲𑀦𑁆𑀥𑀺𑀚𑀦𑀓𑀁 𑀧𑀝𑀺𑀲𑀦𑁆𑀥𑀺𑀁 𑀚𑀦𑁂𑀲𑀺, 𑀭𑀽𑀧𑀚𑀦𑀓𑀁 𑀭𑀽𑀧𑀁, 𑀢𑀁 𑀅𑀳𑁄𑀲𑀺 𑀓𑀫𑁆𑀫𑀁 𑀅𑀳𑁄𑀲𑀺 𑀓𑀫𑁆𑀫𑀯𑀺𑀧𑀸𑀓𑁄𑀢𑀺 𑀯𑀼𑀢𑁆𑀢𑀁. 𑀬𑀁 𑀧𑀦 𑀯𑀺𑀧𑀸𑀓𑀯𑀸𑀭𑀁 𑀦 𑀮𑀪𑀺, 𑀧𑀝𑀺𑀲𑀦𑁆𑀥𑀺𑀚𑀦𑀓𑀁 𑀧𑀝𑀺𑀲𑀦𑁆𑀥𑀺𑀁 𑀭𑀽𑀧𑀚𑀦𑀓𑀁 𑀯𑀸 𑀭𑀽𑀧𑀁 𑀚𑀦𑁂𑀢𑀼𑀁 𑀦𑀸𑀲𑀓𑁆𑀔𑀺, 𑀢𑀁 𑀅𑀳𑁄𑀲𑀺 𑀓𑀫𑁆𑀫𑀁 𑀦𑀸𑀳𑁄𑀲𑀺 𑀓𑀫𑁆𑀫𑀯𑀺𑀧𑀸𑀓𑁄𑀢𑀺 𑀯𑀼𑀢𑁆𑀢𑀁. 𑀬𑀁 𑀧𑀦 𑀅𑀢𑀻𑀢𑁂 𑀆𑀬𑀽𑀳𑀺𑀢𑀁 𑀏𑀢𑀭𑀳𑀺 𑀮𑀤𑁆𑀥𑀯𑀺𑀧𑀸𑀓𑀯𑀸𑀭𑀁 𑀧𑀝𑀺𑀲𑀦𑁆𑀥𑀺𑀚𑀦𑀓𑀁 𑀧𑀝𑀺𑀲𑀦𑁆𑀥𑀺𑀁 𑀚𑀦𑁂𑀢𑁆𑀯𑀸 𑀭𑀽𑀧𑀚𑀦𑀓𑀁 𑀭𑀽𑀧𑀁 𑀚𑀦𑁂𑀢𑁆𑀯𑀸 𑀞𑀺𑀢𑀁, 𑀢𑀁 𑀅𑀳𑁄𑀲𑀺 𑀓𑀫𑁆𑀫𑀁 𑀅𑀢𑁆𑀣𑀺 𑀓𑀫𑁆𑀫𑀯𑀺𑀧𑀸𑀓𑁄𑀢𑀺 𑀯𑀼𑀢𑁆𑀢𑀁. 𑀬𑀁 𑀅𑀮𑀤𑁆𑀥𑀯𑀺𑀧𑀸𑀓𑀯𑀸𑀭𑀁 𑀧𑀝𑀺𑀲𑀦𑁆𑀥𑀺𑀚𑀦𑀓𑀁 𑀯𑀸 𑀧𑀝𑀺𑀲𑀦𑁆𑀥𑀺𑀁 𑀭𑀽𑀧𑀚𑀦𑀓𑀁 𑀯𑀸 𑀭𑀽𑀧𑀁 𑀚𑀦𑁂𑀢𑀼𑀁 𑀦𑀸𑀲𑀓𑁆𑀔𑀺, 𑀢𑀁 𑀅𑀳𑁄𑀲𑀺 𑀓𑀫𑁆𑀫𑀁 𑀦𑀢𑁆𑀣𑀺 𑀓𑀫𑁆𑀫𑀯𑀺𑀧𑀸𑀓𑁄𑀢𑀺 𑀯𑀼𑀢𑁆𑀢𑀁. 𑀬𑀁 𑀧𑀦 𑀅𑀢𑀻𑀢𑁂 𑀆𑀬𑀽𑀳𑀺𑀢𑀁 𑀅𑀦𑀸𑀕𑀢𑁂 𑀯𑀺𑀧𑀸𑀓𑀯𑀸𑀭𑀁 𑀮𑀪𑀺𑀲𑁆𑀲𑀢𑀺, 𑀧𑀝𑀺𑀲𑀦𑁆𑀥𑀺𑀚𑀦𑀓𑀁 𑀧𑀝𑀺𑀲𑀦𑁆𑀥𑀺𑀁 𑀭𑀽𑀧𑀚𑀦𑀓𑀁 𑀭𑀽𑀧𑀁 𑀚𑀦𑁂𑀢𑀼𑀁 𑀲𑀓𑁆𑀔𑀺𑀲𑁆𑀲𑀢𑀺, 𑀢𑀁 𑀅𑀳𑁄𑀲𑀺 𑀓𑀫𑁆𑀫𑀁 𑀪𑀯𑀺𑀲𑁆𑀲𑀢𑀺 𑀓𑀫𑁆𑀫𑀯𑀺𑀧𑀸𑀓𑁄𑀢𑀺 𑀯𑀼𑀢𑁆𑀢𑀁. 𑀬𑀁 𑀅𑀦𑀸𑀕𑀢𑁂 𑀯𑀺𑀧𑀸𑀓𑀯𑀸𑀭𑀁 𑀦 𑀮𑀪𑀺𑀲𑁆𑀲𑀢𑀺, 𑀧𑀝𑀺𑀲𑀦𑁆𑀥𑀺𑀚𑀦𑀓𑀁 𑀧𑀝𑀺𑀲𑀦𑁆𑀥𑀺𑀁 𑀭𑀽𑀧𑀚𑀦𑀓𑀁 𑀯𑀸 𑀭𑀽𑀧𑀁 𑀚𑀦𑁂𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀢𑀺, 𑀢𑀁 𑀅𑀳𑁄𑀲𑀺 𑀓𑀫𑁆𑀫𑀁 𑀦 𑀪𑀯𑀺𑀲𑁆𑀲𑀢𑀺 𑀓𑀫𑁆𑀫𑀯𑀺𑀧𑀸𑀓𑁄𑀢𑀺 𑀯𑀼𑀢𑁆𑀢𑀁.

𑀬𑀁 𑀧𑀦 𑀏𑀢𑀭𑀳𑀺 𑀆𑀬𑀽𑀳𑀺𑀢𑀁 𑀏𑀢𑀭𑀳𑀺𑀬𑁂𑀯 𑀯𑀺𑀧𑀸𑀓𑀯𑀸𑀭𑀁 𑀮𑀪𑀢𑀺, 𑀢𑀁 𑀅𑀢𑁆𑀣𑀺 𑀓𑀫𑁆𑀫𑀁 𑀅𑀢𑁆𑀣𑀺 𑀓𑀫𑁆𑀫𑀯𑀺𑀧𑀸𑀓𑁄𑀢𑀺 𑀯𑀼𑀢𑁆𑀢𑀁. 𑀬𑀁 𑀧𑀦 𑀏𑀢𑀭𑀳𑀺 𑀯𑀺𑀧𑀸𑀓𑀯𑀸𑀭𑀁 𑀦 𑀮𑀪𑀢𑀺, 𑀢𑀁 𑀅𑀢𑁆𑀣𑀺 𑀓𑀫𑁆𑀫𑀁 𑀦𑀢𑁆𑀣𑀺 𑀓𑀫𑁆𑀫𑀯𑀺𑀧𑀸𑀓𑁄𑀢𑀺 𑀯𑀼𑀢𑁆𑀢𑀁. 𑀬𑀁 𑀧𑀦 𑀏𑀢𑀭𑀳𑀺 𑀆𑀬𑀽𑀳𑀺𑀢𑀁 𑀅𑀦𑀸𑀕𑀢𑁂 𑀯𑀺𑀧𑀸𑀓𑀯𑀸𑀭𑀁 𑀮𑀪𑀺𑀲𑁆𑀲𑀢𑀺, 𑀧𑀝𑀺𑀲𑀦𑁆𑀥𑀺𑀚𑀦𑀓𑀁 𑀧𑀝𑀺𑀲𑀦𑁆𑀥𑀺𑀁 𑀭𑀽𑀧𑀚𑀦𑀓𑀁 𑀭𑀽𑀧𑀁 𑀚𑀦𑁂𑀢𑀼𑀁 𑀲𑀓𑁆𑀔𑀺𑀲𑁆𑀲𑀢𑀺, 𑀢𑀁 𑀅𑀢𑁆𑀣𑀺 𑀓𑀫𑁆𑀫𑀁 𑀪𑀯𑀺𑀲𑁆𑀲𑀢𑀺 𑀓𑀫𑁆𑀫𑀯𑀺𑀧𑀸𑀓𑁄𑀢𑀺 𑀯𑀼𑀢𑁆𑀢𑀁. 𑀬𑀁 𑀧𑀦 𑀯𑀺𑀧𑀸𑀓𑀯𑀸𑀭𑀁 𑀦 𑀮𑀪𑀺𑀲𑁆𑀲𑀢𑀺, 𑀧𑀝𑀺𑀲𑀦𑁆𑀥𑀺𑀚𑀦𑀓𑀁 𑀧𑀝𑀺𑀲𑀦𑁆𑀥𑀺𑀁 𑀭𑀽𑀧𑀚𑀦𑀓𑀁 𑀯𑀸 𑀭𑀽𑀧𑀁 𑀚𑀦𑁂𑀢𑀼𑀁 𑀲𑀓𑁆𑀔𑀺𑀲𑁆𑀲𑀢𑀺, 𑀢𑀁 𑀅𑀢𑁆𑀣𑀺 𑀓𑀫𑁆𑀫𑀁 𑀦 𑀪𑀯𑀺𑀲𑁆𑀲𑀢𑀺 𑀓𑀫𑁆𑀫𑀯𑀺𑀧𑀸𑀓𑁄𑀢𑀺 𑀯𑀼𑀢𑁆𑀢𑀁.

𑀬𑀁 𑀧𑀦𑀸𑀦𑀸𑀕𑀢𑁂 𑀆𑀬𑀽𑀳𑀺𑀲𑁆𑀲𑀢𑀺, 𑀅𑀦𑀸𑀕𑀢𑁂𑀬𑁂𑀯 𑀯𑀺𑀧𑀸𑀓𑀯𑀸𑀭𑀁 𑀮𑀪𑀺𑀲𑁆𑀲𑀢𑀺, 𑀧𑀝𑀺𑀲𑀦𑁆𑀥𑀺𑀚𑀦𑀓𑀁 𑀧𑀝𑀺𑀲𑀦𑁆𑀥𑀺𑀁 𑀭𑀽𑀧𑀚𑀦𑀓𑀁 𑀯𑀸 𑀭𑀽𑀧𑀁 𑀚𑀦𑁂𑀲𑁆𑀲𑀢𑀺, 𑀢𑀁 𑀪𑀯𑀺𑀲𑁆𑀲𑀢𑀺 𑀓𑀫𑁆𑀫𑀁 𑀪𑀯𑀺𑀲𑁆𑀲𑀢𑀺 𑀓𑀫𑁆𑀫𑀯𑀺𑀧𑀸𑀓𑁄𑀢𑀺 𑀯𑀼𑀢𑁆𑀢𑀁. 𑀬𑀁 𑀧𑀦 𑀯𑀺𑀧𑀸𑀓𑀯𑀸𑀭𑀁 𑀦 𑀮𑀪𑀺𑀲𑁆𑀲𑀢𑀺, 𑀧𑀝𑀺𑀲𑀦𑁆𑀥𑀺𑀚𑀦𑀓𑀁 𑀧𑀝𑀺𑀲𑀦𑁆𑀥𑀺𑀁 𑀭𑀽𑀧𑀚𑀦𑀓𑀁 𑀯𑀸 𑀭𑀽𑀧𑀁 𑀚𑀦𑁂𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀢𑀺, 𑀢𑀁 𑀪𑀯𑀺𑀲𑁆𑀲𑀢𑀺 𑀓𑀫𑁆𑀫𑀁 𑀦 𑀪𑀯𑀺𑀲𑁆𑀲𑀢𑀺 𑀓𑀫𑁆𑀫𑀯𑀺𑀧𑀸𑀓𑁄𑀢𑀺 𑀯𑀼𑀢𑁆𑀢𑀁. 𑀏𑀯𑀁 𑀧𑀝𑀺𑀲𑀫𑁆𑀪𑀺𑀤𑀸𑀫𑀕𑁆𑀕𑀧𑀭𑀺𑀬𑀸𑀬𑁂𑀦 𑀤𑁆𑀯𑀸𑀤𑀲 𑀓𑀫𑁆𑀫𑀸𑀦𑀺 𑀯𑀺𑀪𑀢𑁆𑀢𑀸𑀦𑀺.

𑀇𑀢𑀺 𑀇𑀫𑀸𑀦𑀺 𑀘𑁂𑀯 𑀤𑁆𑀯𑀸𑀤𑀲 𑀅𑀪𑀺𑀥𑀫𑁆𑀫𑀧𑀭𑀺𑀬𑀸𑀬𑁂𑀦 𑀯𑀺𑀪𑀢𑁆𑀢𑀸𑀦𑀺 𑀘 𑀲𑁄𑀴𑀲 𑀓𑀫𑁆𑀫𑀸𑀦𑀺 𑀅𑀢𑁆𑀢𑀦𑁄 𑀞𑀸𑀦𑀸 𑀑𑀲𑀓𑁆𑀓𑀺𑀢𑁆𑀯𑀸 𑀲𑀼𑀢𑁆𑀢𑀦𑁆𑀢𑀺𑀓𑀧𑀭𑀺𑀬𑀸𑀬𑁂𑀦 𑀯𑀼𑀢𑁆𑀢𑀸𑀦𑀺 𑀏𑀓𑀸𑀤𑀲 𑀓𑀫𑁆𑀫𑀸𑀦𑀺𑀬𑁂𑀯 𑀪𑀯𑀦𑁆𑀢𑀺. 𑀢𑀸𑀦𑀺𑀧𑀺 𑀢𑀢𑁄 𑀑𑀲𑀓𑁆𑀓𑀺𑀢𑁆𑀯𑀸 𑀢𑀻𑀡𑀺𑀬𑁂𑀯 𑀓𑀫𑁆𑀫𑀸𑀦𑀺 𑀳𑁄𑀦𑁆𑀢𑀺 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀁, 𑀉𑀧𑀧𑀚𑁆𑀚𑀯𑁂𑀤𑀦𑀻𑀬𑀁, 𑀅𑀧𑀭𑀧𑀭𑀺𑀬𑀸𑀬𑀯𑁂𑀤𑀦𑀻𑀬𑀦𑁆𑀢𑀺. 𑀢𑁂𑀲𑀁 𑀲𑀗𑁆𑀓𑀫𑀦𑀁 𑀦𑀢𑁆𑀣𑀺, 𑀬𑀣𑀸𑀞𑀸𑀦𑁂𑀬𑁂𑀯 𑀢𑀺𑀝𑁆𑀞𑀦𑁆𑀢𑀺. 𑀬𑀤𑀺 𑀳𑀺 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀁 𑀓𑀫𑁆𑀫𑀁 𑀉𑀧𑀧𑀚𑁆𑀚𑀯𑁂𑀤𑀦𑀻𑀬𑀁 𑀯𑀸 𑀅𑀧𑀭𑀧𑀭𑀺𑀬𑀸𑀬𑀯𑁂𑀤𑀦𑀻𑀬𑀁 𑀯𑀸 𑀪𑀯𑁂𑀬𑁆𑀬, ‘‘𑀤𑀺𑀝𑁆𑀞𑁂 𑀯𑀸 𑀥𑀫𑁆𑀫𑁂’’𑀢𑀺 𑀲𑀢𑁆𑀣𑀸 𑀦 𑀯𑀤𑁂𑀬𑁆𑀬. 𑀲𑀘𑁂𑀧𑀺 𑀉𑀧𑀧𑀚𑁆𑀚𑀯𑁂𑀤𑀦𑀻𑀬𑀁 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀁 𑀯𑀸 𑀅𑀧𑀭𑀧𑀭𑀺𑀬𑀸𑀬𑀯𑁂𑀤𑀦𑀻𑀬𑀁 𑀯𑀸 𑀪𑀯𑁂𑀬𑁆𑀬, ‘‘𑀉𑀧𑀧𑀚𑁆𑀚 𑀯𑀸’’𑀢𑀺 𑀲𑀢𑁆𑀣𑀸 𑀦 𑀯𑀤𑁂𑀬𑁆𑀬. 𑀅𑀣𑀸𑀧𑀺 𑀅𑀧𑀭𑀧𑀭𑀺𑀬𑀸𑀬𑀯𑁂𑀤𑀦𑀻𑀬𑀁 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀁 𑀯𑀸 𑀉𑀧𑀧𑀚𑁆𑀚𑀯𑁂𑀤𑀦𑀻𑀬𑀁 𑀯𑀸 𑀪𑀯𑁂𑀬𑁆𑀬, ‘‘𑀅𑀧𑀭𑁂 𑀯𑀸 𑀧𑀭𑀺𑀬𑀸𑀬𑁂’’𑀢𑀺 𑀲𑀢𑁆𑀣𑀸 𑀦 𑀯𑀤𑁂𑀬𑁆𑀬.

𑀲𑀼𑀓𑁆𑀓𑀧𑀓𑁆𑀔𑁂𑀧𑀺 𑀇𑀫𑀺𑀦𑀸𑀯 𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀏𑀢𑁆𑀣 𑀧𑀦 𑀮𑁄𑀪𑁂 𑀯𑀺𑀕𑀢𑁂𑀢𑀺 𑀮𑁄𑀪𑁂 𑀅𑀧𑀕𑀢𑁂 𑀦𑀺𑀭𑀼𑀤𑁆𑀥𑁂. 𑀢𑀸𑀮𑀯𑀢𑁆𑀣𑀼𑀓𑀢𑀦𑁆𑀢𑀺 𑀢𑀸𑀮𑀯𑀢𑁆𑀣𑀼 𑀯𑀺𑀬 𑀓𑀢𑀁, 𑀫𑀢𑁆𑀣𑀓𑀘𑁆𑀙𑀺𑀦𑁆𑀦𑀢𑀸𑀮𑁄 𑀯𑀺𑀬 𑀧𑀼𑀦 𑀅𑀯𑀺𑀭𑀼𑀴𑁆𑀳𑀺𑀲𑀪𑀸𑀯𑀁 𑀓𑀢𑀦𑁆𑀢𑀺 𑀅𑀢𑁆𑀣𑁄. 𑀅𑀦𑀪𑀸𑀯𑀁 𑀓𑀢𑀦𑁆𑀢𑀺 𑀅𑀦𑀼𑀅𑀪𑀸𑀯𑀁 𑀓𑀢𑀁, 𑀬𑀣𑀸 𑀧𑀼𑀦 𑀦𑀼𑀧𑁆𑀧𑀚𑁆𑀚𑀢𑀺, 𑀏𑀯𑀁 𑀓𑀢𑀦𑁆𑀢𑀺 𑀅𑀢𑁆𑀣𑁄. 𑀏𑀯𑀲𑁆𑀲𑀽𑀢𑀺 𑀏𑀯𑀁 𑀪𑀯𑁂𑀬𑁆𑀬𑀼𑀁. 𑀏𑀯𑀫𑁂𑀯 𑀔𑁄𑀢𑀺 𑀏𑀢𑁆𑀣 𑀩𑀻𑀚𑀸𑀦𑀺 𑀯𑀺𑀬 𑀓𑀼𑀲𑀮𑀸𑀓𑀼𑀲𑀮𑀁 𑀓𑀫𑁆𑀫𑀁 𑀤𑀝𑁆𑀞𑀩𑁆𑀩𑀁, 𑀢𑀸𑀦𑀺 𑀅𑀕𑁆𑀕𑀺𑀦𑀸 𑀟𑀳𑀦𑀧𑀼𑀭𑀺𑀲𑁄 𑀯𑀺𑀬 𑀬𑁄𑀕𑀸𑀯𑀘𑀭𑁄, 𑀅𑀕𑁆𑀕𑀺 𑀯𑀺𑀬 𑀫𑀕𑁆𑀕𑀜𑀸𑀡𑀁, 𑀅𑀕𑁆𑀕𑀺𑀁 𑀤𑀢𑁆𑀯𑀸 𑀩𑀻𑀚𑀸𑀦𑀁 𑀟𑀳𑀦𑀓𑀸𑀮𑁄 𑀯𑀺𑀬 𑀫𑀕𑁆𑀕𑀜𑀸𑀡𑁂𑀦 𑀓𑀺𑀮𑁂𑀲𑀸𑀦𑀁 𑀤𑀟𑁆𑀠𑀓𑀸𑀮𑁄, 𑀫𑀲𑀺𑀓𑀢𑀓𑀸𑀮𑁄 𑀯𑀺𑀬 𑀧𑀜𑁆𑀘𑀦𑁆𑀦𑀁 𑀔𑀦𑁆𑀥𑀸𑀦𑀁 𑀙𑀺𑀦𑁆𑀦𑀫𑀽𑀮𑀓𑁂 𑀓𑀢𑁆𑀯𑀸 𑀞𑀧𑀺𑀢𑀓𑀸𑀮𑁄, 𑀫𑀳𑀸𑀯𑀸𑀢𑁂 𑀑𑀧𑀼𑀦𑀺𑀢𑁆𑀯𑀸 𑀦𑀤𑀺𑀬𑀸 𑀯𑀸 𑀧𑀯𑀸𑀳𑁂𑀢𑁆𑀯𑀸 𑀅𑀧𑁆𑀧𑀯𑀢𑁆𑀢𑀺𑀓𑀢𑀓𑀸𑀮𑁄 𑀯𑀺𑀬 𑀉𑀧𑀸𑀤𑀺𑀦𑁆𑀦𑀓𑀲𑀦𑁆𑀢𑀸𑀦𑀲𑁆𑀲 𑀦𑀺𑀭𑁄𑀥𑁂𑀦 𑀙𑀺𑀦𑁆𑀦𑀫𑀽𑀮𑀓𑀸𑀦𑀁 𑀧𑀜𑁆𑀘𑀦𑁆𑀦𑀁 𑀔𑀦𑁆𑀥𑀸𑀦𑀁 𑀅𑀧𑁆𑀧𑀝𑀺𑀲𑀦𑁆𑀥𑀺𑀓𑀪𑀸𑀯𑁂𑀦 𑀦𑀺𑀭𑀼𑀚𑁆𑀛𑀺𑀢𑁆𑀯𑀸 𑀧𑀼𑀦 𑀪𑀯𑀲𑁆𑀫𑀺𑀁 𑀧𑀝𑀺𑀲𑀦𑁆𑀥𑀺𑀁 𑀅𑀕𑁆𑀕𑀳𑀺𑀢𑀓𑀸𑀮𑁄 𑀯𑁂𑀤𑀺𑀢𑀩𑁆𑀩𑁄.

𑀫𑁄𑀳𑀚𑀜𑁆𑀘𑀸𑀧𑀯𑀺𑀤𑁆𑀤𑀲𑀽𑀢𑀺 𑀫𑁄𑀳𑀚𑀜𑁆𑀘𑀸𑀧𑀺 𑀅𑀯𑀺𑀤𑁆𑀤𑀲𑀼. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀁 𑀲𑁄 𑀅𑀯𑀺𑀤𑀽 𑀅𑀦𑁆𑀥𑀩𑀸𑀮𑁄 𑀮𑁄𑀪𑀚𑀜𑁆𑀘 𑀤𑁄𑀲𑀚𑀜𑁆𑀘 𑀫𑁄𑀳𑀚𑀜𑁆𑀘𑀸𑀢𑀺 𑀓𑀫𑁆𑀫𑀁 𑀓𑀭𑁄𑀢𑀺, 𑀏𑀯𑀁 𑀓𑀭𑁄𑀦𑁆𑀢𑁂𑀦 𑀬𑀁 𑀢𑁂𑀦 𑀧𑀓𑀢𑀁 𑀓𑀫𑁆𑀫𑀁 𑀅𑀧𑁆𑀧𑀁 𑀯𑀸 𑀬𑀤𑀺 𑀯𑀸 𑀩𑀳𑀼𑀁. 𑀇𑀥𑁂𑀯 𑀢𑀁 𑀯𑁂𑀤𑀦𑀺𑀬𑀦𑁆𑀢𑀺 𑀢𑀁 𑀓𑀫𑁆𑀫𑀁 𑀢𑁂𑀦 𑀩𑀸𑀮𑁂𑀦 𑀇𑀥 𑀲𑀓𑁂 𑀅𑀢𑁆𑀢𑀪𑀸𑀯𑁂𑀬𑁂𑀯 𑀯𑁂𑀤𑀦𑀻𑀬𑀁, 𑀢𑀲𑁆𑀲𑁂𑀯 𑀢𑀁 𑀅𑀢𑁆𑀢𑀪𑀸𑀯𑁂 𑀯𑀺𑀧𑀘𑁆𑀘𑀢𑀻𑀢𑀺 𑀅𑀢𑁆𑀣𑁄. 𑀯𑀢𑁆𑀣𑀼𑀁 𑀅𑀜𑁆𑀜𑀁 𑀦 𑀯𑀺𑀚𑁆𑀚𑀢𑀻𑀢𑀺 𑀢𑀲𑁆𑀲 𑀓𑀫𑁆𑀫𑀲𑁆𑀲 𑀯𑀺𑀧𑀘𑁆𑀘𑀦𑀢𑁆𑀣𑀸𑀬 𑀅𑀜𑁆𑀜𑀁 𑀯𑀢𑁆𑀣𑀼 𑀦𑀢𑁆𑀣𑀺. 𑀦 𑀳𑀺 𑀅𑀜𑁆𑀜𑁂𑀦 𑀓𑀢𑀁 𑀓𑀫𑁆𑀫𑀁 𑀅𑀜𑁆𑀜𑀲𑁆𑀲 𑀅𑀢𑁆𑀢𑀪𑀸𑀯𑁂 𑀯𑀺𑀧𑀘𑁆𑀘𑀢𑀺. 𑀢𑀲𑁆𑀫𑀸 𑀮𑁄𑀪𑀜𑁆𑀘 𑀤𑁄𑀲𑀜𑁆𑀘, 𑀫𑁄𑀳𑀚𑀜𑁆𑀘𑀸𑀧𑀺 𑀯𑀺𑀤𑁆𑀤𑀲𑀽𑀢𑀺 𑀢𑀲𑁆𑀫𑀸 𑀬𑁄 𑀯𑀺𑀤𑀽 𑀫𑁂𑀥𑀸𑀯𑀻 𑀧𑀡𑁆𑀟𑀺𑀢𑁄 𑀢𑀁 𑀮𑁄𑀪𑀚𑀸𑀤𑀺𑀪𑁂𑀤𑀁 𑀓𑀫𑁆𑀫𑀁 𑀦 𑀓𑀭𑁄𑀢𑀺, 𑀲𑁄 𑀯𑀺𑀚𑁆𑀚𑀁 𑀉𑀧𑁆𑀧𑀸𑀤𑀬𑀁 𑀪𑀺𑀓𑁆𑀔𑀼, 𑀲𑀩𑁆𑀩𑀸 𑀤𑀼𑀕𑁆𑀕𑀢𑀺𑀬𑁄 𑀚𑀳𑁂, 𑀅𑀭𑀳𑀢𑁆𑀢𑀫𑀕𑁆𑀕𑀯𑀺𑀚𑁆𑀚𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀢𑀁 𑀯𑀸 𑀧𑀦 𑀯𑀺𑀚𑁆𑀚𑀁 𑀉𑀧𑁆𑀧𑀸𑀤𑁂𑀦𑁆𑀢𑁄 𑀲𑀩𑁆𑀩𑀸 𑀤𑀼𑀕𑁆𑀕𑀢𑀺𑀬𑁄 𑀚𑀳𑀢𑀺. 𑀤𑁂𑀲𑀦𑀸𑀲𑀻𑀲𑀫𑁂𑀯𑁂𑀢𑀁, 𑀲𑀼𑀕𑀢𑀺𑀬𑁄𑀧𑀺 𑀧𑀦 𑀲𑁄 𑀔𑀻𑀡𑀸𑀲𑀯𑁄 𑀚𑀳𑀢𑀺𑀬𑁂𑀯. 𑀬𑀫𑁆𑀧𑀺 𑀘𑁂𑀢𑀁 ‘‘𑀢𑀲𑁆𑀫𑀸 𑀮𑁄𑀪𑀜𑁆𑀘 𑀤𑁄𑀲𑀜𑁆𑀘𑀸’’𑀢𑀺 𑀯𑀼𑀢𑁆𑀢𑀁, 𑀏𑀢𑁆𑀣𑀸𑀧𑀺 𑀮𑁄𑀪𑀤𑁄𑀲𑀲𑀻𑀲𑁂𑀦 𑀮𑁄𑀪𑀚𑀜𑁆𑀘 𑀤𑁄𑀲𑀚𑀜𑁆𑀘 𑀓𑀫𑁆𑀫𑀫𑁂𑀯 𑀦𑀺𑀤𑁆𑀤𑀺𑀝𑁆𑀞𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀏𑀯𑀁 𑀲𑀼𑀢𑁆𑀢𑀦𑁆𑀢𑁂𑀲𑀼𑀧𑀺 𑀕𑀸𑀣𑀸𑀬𑀧𑀺 𑀯𑀝𑁆𑀝𑀯𑀺𑀯𑀝𑁆𑀝𑀫𑁂𑀯 𑀓𑀣𑀺𑀢𑀦𑁆𑀢𑀺.

𑁫. 𑀳𑀢𑁆𑀣𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁫. 𑀧𑀜𑁆𑀘𑀫𑁂 𑀆𑀴𑀯𑀺𑀬𑀦𑁆𑀢𑀺 𑀆𑀴𑀯𑀺𑀭𑀝𑁆𑀞𑁂. 𑀕𑁄𑀫𑀕𑁆𑀕𑁂𑀢𑀺 𑀕𑀼𑀦𑁆𑀦𑀁 𑀕𑀫𑀦𑀫𑀕𑁆𑀕𑁂. 𑀧𑀡𑁆𑀡𑀲𑀦𑁆𑀣𑀭𑁂𑀢𑀺 𑀲𑀬𑀁 𑀧𑀢𑀺𑀢𑀧𑀡𑁆𑀡𑀲𑀦𑁆𑀣𑀭𑁂. 𑀅𑀣𑀸𑀢𑀺 𑀏𑀯𑀁 𑀕𑀼𑀦𑁆𑀦𑀁 𑀕𑀫𑀦𑀫𑀕𑁆𑀕𑀁 𑀉𑀚𑀼𑀁 𑀫𑀳𑀸𑀧𑀣𑀁 𑀦𑀺𑀲𑁆𑀲𑀸𑀬 𑀲𑀺𑀁𑀲𑀧𑀸𑀯𑀦𑁂 𑀲𑀬𑀁 𑀧𑀢𑀺𑀢𑀧𑀡𑁆𑀡𑀸𑀦𑀺 𑀲𑀗𑁆𑀓𑀟𑁆𑀠𑀺𑀢𑁆𑀯𑀸 𑀓𑀢𑀲𑀦𑁆𑀣𑀭𑁂 𑀲𑀼𑀕𑀢𑀫𑀳𑀸𑀘𑀻𑀯𑀭𑀁 𑀧𑀢𑁆𑀣𑀭𑀺𑀢𑁆𑀯𑀸 𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑁂 𑀢𑀣𑀸𑀕𑀢𑁂. 𑀳𑀢𑁆𑀣𑀓𑁄 𑀆𑀴𑀯𑀓𑁄𑀢𑀺 𑀳𑀢𑁆𑀣𑀢𑁄 𑀳𑀢𑁆𑀣𑀁 𑀕𑀢𑀢𑁆𑀢𑀸 𑀏𑀯𑀁𑀮𑀤𑁆𑀥𑀦𑀸𑀫𑁄 𑀆𑀴𑀯𑀓𑁄 𑀭𑀸𑀚𑀧𑀼𑀢𑁆𑀢𑁄. 𑀏𑀢𑀤𑀯𑁄𑀘𑀸𑀢𑀺 𑀏𑀢𑀁 ‘‘𑀓𑀘𑁆𑀘𑀺, 𑀪𑀦𑁆𑀢𑁂, 𑀪𑀕𑀯𑀸’’𑀢𑀺𑀆𑀤𑀺𑀯𑀘𑀦𑀁 𑀅𑀯𑁄𑀘. 𑀓𑀲𑁆𑀫𑀸 𑀧𑀦 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀢𑀁 𑀞𑀸𑀦𑀁 𑀕𑀦𑁆𑀢𑁆𑀯𑀸 𑀦𑀺𑀲𑀺𑀦𑁆𑀦𑁄, 𑀓𑀲𑁆𑀫𑀸 𑀭𑀸𑀚𑀓𑀼𑀫𑀸𑀭𑁄 𑀢𑀢𑁆𑀣 𑀕𑀢𑁄𑀢𑀺? 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀢𑀸𑀯 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀓𑀸𑀬 𑀥𑀫𑁆𑀫𑀤𑁂𑀲𑀦𑀸𑀬 𑀲𑀫𑀼𑀝𑁆𑀞𑀸𑀦𑀁 𑀤𑀺𑀲𑁆𑀯𑀸 𑀢𑀢𑁆𑀣 𑀦𑀺𑀲𑀺𑀦𑁆𑀦𑁄, 𑀭𑀸𑀚𑀓𑀼𑀫𑀸𑀭𑁄𑀧𑀺 𑀧𑀸𑀢𑁄𑀯 𑀉𑀝𑁆𑀞𑀸𑀬 𑀧𑀜𑁆𑀘𑀳𑀺 𑀉𑀧𑀸𑀲𑀓𑀲𑀢𑁂𑀳𑀺 𑀧𑀭𑀺𑀯𑀼𑀢𑁄 𑀩𑀼𑀤𑁆𑀥𑀼𑀧𑀝𑁆𑀞𑀸𑀦𑀁 𑀕𑀘𑁆𑀙𑀦𑁆𑀢𑁄 𑀫𑀳𑀸𑀫𑀕𑁆𑀕𑀸 𑀑𑀓𑁆𑀓𑀫𑁆𑀫 𑀕𑁄𑀧𑀣𑀁 𑀕𑀳𑁂𑀢𑁆𑀯𑀸 ‘‘𑀩𑀼𑀤𑁆𑀥𑀸𑀦𑀁 𑀧𑀽𑀚𑀦𑀢𑁆𑀣𑀸𑀬 𑀫𑀺𑀲𑁆𑀲𑀓𑀫𑀸𑀮𑀁 𑀑𑀘𑀺𑀦𑀺𑀲𑁆𑀲𑀸𑀫𑀻’’𑀢𑀺 𑀕𑀘𑁆𑀙𑀦𑁆𑀢𑁄 𑀲𑀢𑁆𑀣𑀸𑀭𑀁 𑀤𑀺𑀲𑁆𑀯𑀸 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺, 𑀏𑀯𑀁 𑀲𑁄 𑀢𑀢𑁆𑀣 𑀕𑀢𑁄𑀢𑀺. 𑀲𑀼𑀔𑀫𑀲𑀬𑀺𑀢𑁆𑀣𑀸𑀢𑀺 𑀲𑀼𑀔𑀁 𑀲𑀬𑀺𑀢𑁆𑀣.

𑀅𑀦𑁆𑀢𑀭𑀝𑁆𑀞𑀓𑁄𑀢𑀺 𑀫𑀸𑀖𑀨𑀕𑁆𑀕𑀼𑀡𑀸𑀦𑀁 𑀅𑀦𑁆𑀢𑀭𑁂 𑀅𑀝𑁆𑀞𑀤𑀺𑀯𑀲𑀧𑀭𑀺𑀫𑀸𑀡𑁄 𑀓𑀸𑀮𑁄. 𑀫𑀸𑀖𑀲𑁆𑀲 𑀳𑀺 𑀅𑀯𑀲𑀸𑀦𑁂 𑀘𑀢𑁆𑀢𑀸𑀭𑁄 𑀤𑀺𑀯𑀲𑀸, 𑀨𑀕𑁆𑀕𑀼𑀡𑀲𑁆𑀲 𑀆𑀤𑀺𑀫𑁆𑀳𑀺 𑀘𑀢𑁆𑀢𑀸𑀭𑁄𑀢𑀺 𑀅𑀬𑀁 ‘‘𑀅𑀦𑁆𑀢𑀭𑀝𑁆𑀞𑀓𑁄’’𑀢𑀺 𑀯𑀼𑀘𑁆𑀘𑀢𑀺. 𑀳𑀺𑀫𑀧𑀸𑀢𑀲𑀫𑀬𑁄𑀢𑀺 𑀳𑀺𑀫𑀲𑁆𑀲 𑀧𑀢𑀦𑀲𑀫𑀬𑁄. 𑀔𑀭𑀸𑀢𑀺 𑀨𑀭𑀼𑀲𑀸 𑀓𑀓𑁆𑀔𑀴𑀸 𑀯𑀸. 𑀕𑁄𑀓𑀡𑁆𑀝𑀓𑀳𑀢𑀸𑀢𑀺 𑀦𑀯𑀯𑀼𑀝𑁆𑀞𑁂 𑀤𑁂𑀯𑁂 𑀕𑀸𑀯𑀻𑀦𑀁 𑀅𑀓𑁆𑀓𑀦𑁆𑀢𑀓𑁆𑀓𑀦𑁆𑀢𑀝𑁆𑀞𑀸𑀦𑁂 𑀔𑀼𑀭𑀦𑁆𑀢𑀭𑁂𑀳𑀺 𑀓𑀤𑁆𑀤𑀫𑁄 𑀉𑀕𑁆𑀕𑀦𑁆𑀢𑁆𑀯𑀸 𑀢𑀺𑀝𑁆𑀞𑀢𑀺, 𑀲𑁄 𑀯𑀸𑀢𑀸𑀢𑀧𑁂𑀦 𑀲𑀼𑀓𑁆𑀔𑁄 𑀓𑀓𑀘𑀤𑀦𑁆𑀢𑀲𑀤𑀺𑀲𑁄 𑀳𑁄𑀢𑀺 𑀤𑀼𑀓𑁆𑀔𑀲𑀫𑁆𑀨𑀲𑁆𑀲𑁄. 𑀢𑀁 𑀲𑀦𑁆𑀥𑀸𑀬𑀸𑀳 𑁋 ‘‘𑀕𑁄𑀓𑀡𑁆𑀝𑀓𑀳𑀢𑀸 𑀪𑀽𑀫𑀻’’𑀢𑀺. 𑀕𑀼𑀦𑁆𑀦𑀁 𑀔𑀼𑀭𑀦𑁆𑀢𑀭𑁂𑀳𑀺 𑀙𑀺𑀦𑁆𑀦𑀸𑀢𑀺𑀧𑀺 𑀅𑀢𑁆𑀣𑁄. 𑀯𑁂𑀭𑀫𑁆𑀪𑁄 𑀯𑀸𑀢𑁄 𑀯𑀸𑀬𑀢𑀻𑀢𑀺 𑀘𑀢𑀽𑀳𑀺 𑀤𑀺𑀲𑀸𑀳𑀺 𑀯𑀸𑀬𑀦𑁆𑀢𑁄 𑀯𑀸𑀢𑁄 𑀯𑀸𑀬𑀢𑀺. 𑀏𑀓𑀸𑀬 𑀤𑀺𑀲𑀸𑀬 𑀯𑀸 𑀤𑁆𑀯𑀻𑀳𑀺 𑀯𑀸 𑀤𑀺𑀲𑀸𑀳𑀺 𑀢𑀻𑀳𑀺 𑀯𑀸 𑀤𑀺𑀲𑀸𑀳𑀺 𑀯𑀸𑀬𑀦𑁆𑀢𑁄 𑀯𑀸𑀢𑁄 𑀯𑁂𑀭𑀫𑁆𑀪𑁄𑀢𑀺 𑀦 𑀯𑀼𑀘𑁆𑀘𑀢𑀺.

𑀢𑁂𑀦 𑀳𑀺 𑀭𑀸𑀚𑀓𑀼𑀫𑀸𑀭𑀸𑀢𑀺 𑀇𑀤𑀁 𑀲𑀢𑁆𑀣𑀸 ‘‘𑀅𑀬𑀁 𑀭𑀸𑀚𑀓𑀼𑀫𑀸𑀭𑁄 𑀮𑁄𑀓𑀲𑁆𑀫𑀺𑀁 𑀦𑁂𑀯 𑀲𑀼𑀔𑀯𑀸𑀲𑀺𑀦𑁄, 𑀦 𑀤𑀼𑀓𑁆𑀔𑀯𑀸𑀲𑀺𑀦𑁄 𑀚𑀸𑀦𑀸𑀢𑀺, 𑀚𑀸𑀦𑀸𑀧𑁂𑀲𑁆𑀲𑀸𑀫𑀺 𑀦’’𑀦𑁆𑀢𑀺 𑀉𑀧𑀭𑀺 𑀤𑁂𑀲𑀦𑀁 𑀯𑀟𑁆𑀠𑁂𑀦𑁆𑀢𑁄 𑀆𑀳. 𑀢𑀢𑁆𑀣 𑀬𑀣𑀸 𑀢𑁂 𑀔𑀫𑁂𑀬𑁆𑀬𑀸𑀢𑀺 𑀬𑀣𑀸 𑀢𑀼𑀬𑁆𑀳𑀁 𑀭𑀼𑀘𑁆𑀘𑁂𑀬𑁆𑀬. 𑀇𑀥𑀲𑁆𑀲𑀸𑀢𑀺 𑀇𑀫𑀲𑁆𑀫𑀺𑀁 𑀮𑁄𑀓𑁂 𑀅𑀲𑁆𑀲. 𑀕𑁄𑀦𑀓𑀢𑁆𑀣𑀢𑁄𑀢𑀺 𑀘𑀢𑀼𑀭𑀗𑁆𑀕𑀼𑀮𑀸𑀥𑀺𑀓𑀮𑁄𑀫𑁂𑀦 𑀓𑀸𑀴𑀓𑁄𑀚𑀯𑁂𑀦 𑀅𑀢𑁆𑀣𑀢𑁄. 𑀧𑀝𑀺𑀓𑀢𑁆𑀣𑀢𑁄𑀢𑀺 𑀉𑀡𑁆𑀡𑀸𑀫𑀬𑁂𑀦 𑀲𑁂𑀢𑀢𑁆𑀣𑀭𑀡𑁂𑀦 𑀅𑀢𑁆𑀣𑀢𑁄. 𑀧𑀝𑀮𑀺𑀓𑀢𑁆𑀣𑀢𑁄𑀢𑀺 𑀖𑀦𑀧𑀼𑀧𑁆𑀨𑁂𑀦 𑀉𑀡𑁆𑀡𑀸𑀫𑀬𑀅𑀢𑁆𑀣𑀭𑀡𑁂𑀦 𑀅𑀢𑁆𑀣𑀢𑁄. 𑀓𑀤𑀮𑀺𑀫𑀺𑀕𑀧𑀯𑀭𑀧𑀘𑁆𑀘𑀢𑁆𑀣𑀭𑀡𑁄𑀢𑀺 𑀓𑀤𑀮𑀺𑀫𑀺𑀕𑀘𑀫𑁆𑀫𑀫𑀬𑁂𑀦 𑀉𑀢𑁆𑀢𑀫𑀧𑀘𑁆𑀘𑀢𑁆𑀣𑀭𑀡𑁂𑀦 𑀅𑀢𑁆𑀣𑀢𑁄. 𑀢𑀁 𑀓𑀺𑀭 𑀧𑀘𑁆𑀘𑀢𑁆𑀣𑀭𑀡𑀁 𑀲𑁂𑀢𑀯𑀢𑁆𑀣𑀲𑁆𑀲 𑀉𑀧𑀭𑀺 𑀓𑀤𑀮𑀺𑀫𑀺𑀕𑀘𑀫𑁆𑀫𑀁 𑀅𑀢𑁆𑀣𑀭𑀺𑀢𑁆𑀯𑀸 𑀲𑀺𑀩𑁆𑀩𑀺𑀢𑁆𑀯𑀸 𑀓𑀭𑁄𑀦𑁆𑀢𑀺. 𑀲𑀉𑀢𑁆𑀢𑀭𑀘𑁆𑀙𑀤𑁄𑀢𑀺 𑀲𑀳 𑀉𑀢𑁆𑀢𑀭𑀘𑁆𑀙𑀤𑁂𑀦, 𑀉𑀧𑀭𑀺 𑀩𑀤𑁆𑀥𑁂𑀦 𑀭𑀢𑁆𑀢𑀯𑀺𑀢𑀸𑀦𑁂𑀦 𑀲𑀤𑁆𑀥𑀺𑀦𑁆𑀢𑀺 𑀅𑀢𑁆𑀣𑁄. 𑀉𑀪𑀢𑁄𑀮𑁄𑀳𑀺𑀢𑀓𑀽𑀧𑀥𑀸𑀦𑁄𑀢𑀺 𑀲𑀻𑀲𑀽𑀧𑀥𑀸𑀦𑀜𑁆𑀘 𑀧𑀸𑀤𑀽𑀧𑀥𑀸𑀦𑀜𑁆𑀘𑀸𑀢𑀺 𑀧𑀮𑁆𑀮𑀗𑁆𑀓𑀲𑁆𑀲 𑀉𑀪𑀢𑁄 𑀞𑀧𑀺𑀢𑀮𑁄𑀳𑀺𑀢𑀓𑀽𑀧𑀥𑀸𑀦𑁄. 𑀧𑀚𑀸𑀧𑀢𑀺𑀬𑁄𑀢𑀺 𑀪𑀭𑀺𑀬𑀸𑀬𑁄. 𑀫𑀦𑀸𑀧𑁂𑀦 𑀧𑀘𑁆𑀘𑀼𑀧𑀝𑁆𑀞𑀺𑀢𑀸 𑀅𑀲𑁆𑀲𑀽𑀢𑀺 𑀫𑀦𑀸𑀧𑁂𑀦 𑀉𑀧𑀝𑁆𑀞𑀸𑀦𑀯𑀺𑀥𑀸𑀦𑁂𑀦 𑀧𑀘𑁆𑀘𑀼𑀧𑀝𑁆𑀞𑀺𑀢𑀸 𑀪𑀯𑁂𑀬𑁆𑀬𑀼𑀁.

𑀓𑀸𑀬𑀺𑀓𑀸𑀢𑀺 𑀧𑀜𑁆𑀘𑀤𑁆𑀯𑀸𑀭𑀓𑀸𑀬𑀁 𑀔𑁄𑀪𑀬𑀫𑀸𑀦𑀸. 𑀘𑁂𑀢𑀲𑀺𑀓𑀸𑀢𑀺 𑀫𑀦𑁄𑀤𑁆𑀯𑀸𑀭𑀁 𑀔𑁄𑀪𑀬𑀫𑀸𑀦𑀸. 𑀲𑁄 𑀭𑀸𑀕𑁄 𑀢𑀣𑀸𑀕𑀢𑀲𑁆𑀲 𑀧𑀳𑀻𑀦𑁄𑀢𑀺 𑀢𑀣𑀸𑀭𑀽𑀧𑁄 𑀭𑀸𑀕𑁄 𑀢𑀣𑀸𑀕𑀢𑀲𑁆𑀲 𑀧𑀳𑀻𑀦𑁄𑀢𑀺 𑀅𑀢𑁆𑀣𑁄. 𑀬𑁄 𑀧𑀦 𑀢𑀲𑁆𑀲 𑀭𑀸𑀕𑁄, 𑀦 𑀲𑁄 𑀢𑀣𑀸𑀕𑀢𑀲𑁆𑀲 𑀧𑀳𑀻𑀦𑁄 𑀦𑀸𑀫. 𑀤𑁄𑀲𑀫𑁄𑀳𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀩𑁆𑀭𑀸𑀳𑁆𑀫𑀡𑁄𑀢𑀺 𑀩𑀸𑀳𑀺𑀢𑀧𑀸𑀧𑁄 𑀔𑀻𑀡𑀸𑀲𑀯𑀩𑁆𑀭𑀸𑀳𑁆𑀫𑀡𑁄. 𑀧𑀭𑀺𑀦𑀺𑀩𑁆𑀩𑀼𑀢𑁄𑀢𑀺 𑀓𑀺𑀮𑁂𑀲𑀧𑀭𑀺𑀦𑀺𑀩𑁆𑀩𑀸𑀦𑁂𑀦 𑀧𑀭𑀺𑀦𑀺𑀩𑁆𑀩𑀼𑀢𑁄. 𑀦 𑀮𑀺𑀫𑁆𑀧𑀢𑀺 𑀓𑀸𑀫𑁂𑀲𑀽𑀢𑀺 𑀯𑀢𑁆𑀣𑀼𑀓𑀸𑀫𑁂𑀲𑀼 𑀘 𑀓𑀺𑀮𑁂𑀲𑀓𑀸𑀫𑁂𑀲𑀼 𑀘 𑀢𑀡𑁆𑀳𑀸𑀤𑀺𑀝𑁆𑀞𑀺𑀮𑁂𑀧𑁂𑀳𑀺 𑀦 𑀮𑀺𑀫𑁆𑀧𑀢𑀺. 𑀲𑀻𑀢𑀺𑀪𑀽𑀢𑁄𑀢𑀺 𑀅𑀩𑁆𑀪𑀦𑁆𑀢𑀭𑁂 𑀢𑀸𑀧𑀦𑀓𑀺𑀮𑁂𑀲𑀸𑀦𑀁 𑀅𑀪𑀸𑀯𑁂𑀦 𑀲𑀻𑀢𑀺𑀪𑀽𑀢𑁄. 𑀦𑀺𑀭𑀽𑀧𑀥𑀻𑀢𑀺 𑀓𑀺𑀮𑁂𑀲𑀽𑀧𑀥𑀻𑀦𑀁 𑀅𑀪𑀸𑀯𑁂𑀦 𑀦𑀺𑀭𑀽𑀧𑀥𑀺. 𑀲𑀩𑁆𑀩𑀸 𑀆𑀲𑀢𑁆𑀢𑀺𑀬𑁄 𑀙𑁂𑀢𑁆𑀯𑀸𑀢𑀺 𑀆𑀲𑀢𑁆𑀢𑀺𑀬𑁄 𑀯𑀼𑀘𑁆𑀘𑀦𑁆𑀢𑀺 𑀢𑀡𑁆𑀳𑀸𑀬𑁄, 𑀢𑀸 𑀲𑀩𑁆𑀩𑀸𑀧𑀺 𑀭𑀽𑀧𑀸𑀤𑀻𑀲𑀼 𑀆𑀭𑀫𑁆𑀫𑀡𑁂𑀲𑀼 𑀆𑀲𑀢𑁆𑀢𑀯𑀺𑀲𑀢𑁆𑀢𑀸 𑀆𑀲𑀢𑁆𑀢𑀺𑀬𑁄 𑀙𑀺𑀦𑁆𑀤𑀺𑀢𑁆𑀯𑀸. 𑀯𑀺𑀦𑁂𑀬𑁆𑀬 𑀳𑀤𑀬𑁂 𑀤𑀭𑀦𑁆𑀢𑀺 𑀳𑀤𑀬𑀦𑀺𑀲𑁆𑀲𑀺𑀢𑀁 𑀤𑀭𑀣𑀁 𑀯𑀺𑀦𑀬𑀺𑀢𑁆𑀯𑀸 𑀯𑀽𑀧𑀲𑀫𑁂𑀢𑁆𑀯𑀸. 𑀲𑀦𑁆𑀢𑀺𑀁 𑀧𑀧𑁆𑀧𑀼𑀬𑁆𑀬 𑀘𑁂𑀢𑀲𑁄𑀢𑀺 𑀘𑀺𑀢𑁆𑀢𑀲𑁆𑀲 𑀓𑀺𑀮𑁂𑀲𑀦𑀺𑀩𑁆𑀩𑀸𑀦𑀁 𑀧𑀸𑀧𑀼𑀡𑀺𑀢𑁆𑀯𑀸. 𑀓𑀭𑀡𑀯𑀘𑀦𑀁 𑀯𑀸 𑀏𑀢𑀁 ‘‘𑀲𑀩𑁆𑀩𑀘𑁂𑀢𑀲𑁄 𑀲𑀫𑀦𑁆𑀦𑀸𑀳𑀭𑀺𑀢𑁆𑀯𑀸’’𑀢𑀺𑀆𑀤𑀻𑀲𑀼 𑀯𑀺𑀬, 𑀘𑁂𑀢𑀲𑀸 𑀦𑀺𑀩𑁆𑀩𑀸𑀦𑀁 𑀧𑀸𑀧𑀼𑀡𑀺𑀢𑁆𑀯𑀸𑀢𑀺 𑀅𑀢𑁆𑀣𑁄.

𑁬. 𑀤𑁂𑀯𑀤𑀽𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁬. 𑀙𑀝𑁆𑀞𑁂 𑀤𑁂𑀯𑀤𑀽𑀢𑀸𑀦𑀻𑀢𑀺 𑀤𑁂𑀯𑀤𑀽𑀢𑀸. 𑀅𑀬𑀁 𑀧𑀦𑁂𑀢𑁆𑀣 𑀯𑀘𑀦𑀢𑁆𑀣𑁄 𑁋 𑀤𑁂𑀯𑁄𑀢𑀺 𑀫𑀘𑁆𑀘𑀼, 𑀢𑀲𑁆𑀲 𑀤𑀽𑀢𑀸𑀢𑀺 𑀤𑁂𑀯𑀤𑀽𑀢𑀸. 𑀚𑀺𑀡𑁆𑀡𑀩𑁆𑀬𑀸𑀥𑀺𑀫𑀢𑀸 𑀳𑀺 𑀲𑀁𑀯𑁂𑀕𑀚𑀦𑀦𑀝𑁆𑀞𑁂𑀦 ‘‘𑀇𑀤𑀸𑀦𑀺 𑀢𑁂 𑀫𑀘𑁆𑀘𑀼𑀲𑀫𑀻𑀧𑀁 𑀕𑀦𑁆𑀢𑀩𑁆𑀩’’𑀦𑁆𑀢𑀺 𑀘𑁄𑀤𑁂𑀦𑁆𑀢𑀺 𑀯𑀺𑀬, 𑀢𑀲𑁆𑀫𑀸 𑀤𑁂𑀯𑀤𑀽𑀢𑀸𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀤𑁂𑀯𑀸 𑀯𑀺𑀬 𑀤𑀽𑀢𑀸𑀢𑀺𑀧𑀺 𑀤𑁂𑀯𑀤𑀽𑀢𑀸. 𑀬𑀣𑀸 𑀳𑀺 𑀅𑀮𑀗𑁆𑀓𑀢𑀧𑀝𑀺𑀬𑀢𑁆𑀢𑀸𑀬 𑀤𑁂𑀯𑀢𑀸𑀬 𑀆𑀓𑀸𑀲𑁂 𑀞𑀢𑁆𑀯𑀸 ‘‘𑀢𑁆𑀯𑀁 𑀅𑀲𑀼𑀓𑀤𑀺𑀯𑀲𑁂 𑀫𑀭𑀺𑀲𑁆𑀲𑀲𑀻’’𑀢𑀺 𑀯𑀼𑀢𑁆𑀢𑁂 𑀢𑀲𑁆𑀲𑀸 𑀯𑀘𑀦𑀁 𑀲𑀤𑁆𑀥𑀸𑀢𑀩𑁆𑀩𑀁 𑀳𑁄𑀢𑀺; 𑀏𑀯𑀫𑁂𑀯𑀁 𑀚𑀺𑀡𑁆𑀡𑀩𑁆𑀬𑀸𑀥𑀺𑀫𑀢𑀸𑀧𑀺 𑀤𑀺𑀲𑁆𑀲𑀫𑀸𑀦𑀸 ‘‘𑀢𑁆𑀯𑀫𑁆𑀧𑀺 𑀏𑀯𑀁𑀥𑀫𑁆𑀫𑁄’’𑀢𑀺 𑀘𑁄𑀤𑁂𑀦𑁆𑀢𑀺 𑀯𑀺𑀬, 𑀢𑁂𑀲𑀜𑁆𑀘 𑀢𑀁 𑀯𑀘𑀦𑀁 𑀅𑀦𑀜𑁆𑀜𑀣𑀸𑀪𑀸𑀯𑀺𑀢𑀸𑀬 𑀤𑁂𑀯𑀢𑀸𑀬 𑀩𑁆𑀬𑀸𑀓𑀭𑀡𑀲𑀤𑀺𑀲𑀫𑁂𑀯 𑀳𑁄𑀢𑀻𑀢𑀺 𑀤𑁂𑀯𑀸 𑀯𑀺𑀬 𑀤𑀽𑀢𑀸𑀢𑀺 𑀤𑁂𑀯𑀤𑀽𑀢𑀸. 𑀯𑀺𑀲𑀼𑀤𑁆𑀥𑀺𑀤𑁂𑀯𑀸𑀦𑀁 𑀤𑀽𑀢𑀸𑀢𑀺𑀧𑀺 𑀤𑁂𑀯𑀤𑀽𑀢𑀸. 𑀲𑀩𑁆𑀩𑀩𑁄𑀥𑀺𑀲𑀢𑁆𑀢𑀸 𑀳𑀺 𑀚𑀺𑀡𑁆𑀡𑀩𑁆𑀬𑀸𑀥𑀺𑀫𑀢𑀧𑀩𑁆𑀩𑀚𑀺𑀢𑁂 𑀤𑀺𑀲𑁆𑀯𑀸𑀯 𑀲𑀁𑀯𑁂𑀕𑀁 𑀆𑀧𑀚𑁆𑀚𑀺𑀢𑁆𑀯𑀸 𑀦𑀺𑀓𑁆𑀔𑀫𑁆𑀫 𑀧𑀩𑁆𑀩𑀚𑀺𑀁𑀲𑀼. 𑀏𑀯𑀁 𑀯𑀺𑀲𑀼𑀤𑁆𑀥𑀺𑀤𑁂𑀯𑀸𑀦𑀁 𑀤𑀽𑀢𑀸𑀢𑀺𑀧𑀺 𑀤𑁂𑀯𑀤𑀽𑀢𑀸. 𑀇𑀥 𑀧𑀦 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑁂𑀦 ‘‘𑀤𑁂𑀯𑀤𑀽𑀢𑀸𑀦𑀻’’𑀢𑀺 𑀯𑀼𑀢𑁆𑀢𑀁.

𑀓𑀸𑀬𑁂𑀦 𑀤𑀼𑀘𑁆𑀘𑀭𑀺𑀢𑀦𑁆𑀢𑀺𑀆𑀤𑀺 𑀓𑀲𑁆𑀫𑀸 𑀆𑀭𑀤𑁆𑀥𑀁? 𑀤𑁂𑀯𑀤𑀽𑀢𑀸𑀦𑀼𑀬𑀼𑀜𑁆𑀚𑀦𑀝𑁆𑀞𑀸𑀦𑀼𑀧𑀓𑁆𑀓𑀫𑀓𑀫𑁆𑀫𑀤𑀲𑁆𑀲𑀦𑀢𑁆𑀣𑀁. 𑀇𑀫𑀺𑀦𑀸 𑀳𑀺 𑀓𑀫𑁆𑀫𑁂𑀦 𑀅𑀬𑀁 𑀲𑀢𑁆𑀢𑁄 𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀢𑀺, 𑀅𑀣 𑀦𑀁 𑀢𑀢𑁆𑀣 𑀬𑀫𑁄 𑀭𑀸𑀚𑀸 𑀤𑁂𑀯𑀤𑀽𑀢𑁂 𑀲𑀫𑀦𑀼𑀬𑀼𑀜𑁆𑀚𑀢𑀺. 𑀢𑀢𑁆𑀣 𑀓𑀸𑀬𑁂𑀦 𑀤𑀼𑀘𑁆𑀘𑀭𑀺𑀢𑀁 𑀘𑀭𑀢𑀻𑀢𑀺 𑀓𑀸𑀬𑀤𑁆𑀯𑀸𑀭𑁂𑀦 𑀢𑀺𑀯𑀺𑀥𑀁 𑀤𑀼𑀘𑁆𑀘𑀭𑀺𑀢𑀁 𑀘𑀭𑀢𑀺. 𑀯𑀸𑀘𑀸𑀬𑀸𑀢𑀺 𑀯𑀘𑀻𑀤𑁆𑀯𑀸𑀭𑁂𑀦 𑀘𑀢𑀼𑀩𑁆𑀩𑀺𑀥𑀁 𑀤𑀼𑀘𑁆𑀘𑀭𑀺𑀢𑀁 𑀘𑀭𑀢𑀺. 𑀫𑀦𑀲𑀸𑀢𑀺 𑀫𑀦𑁄𑀤𑁆𑀯𑀸𑀭𑁂𑀦 𑀢𑀺𑀯𑀺𑀥𑀁 𑀤𑀼𑀘𑁆𑀘𑀭𑀺𑀢𑀁 𑀘𑀭𑀢𑀺.

𑀢𑀫𑁂𑀦𑀁, 𑀪𑀺𑀓𑁆𑀔𑀯𑁂, 𑀦𑀺𑀭𑀬𑀧𑀸𑀮𑀸𑀢𑀺 𑀏𑀢𑁆𑀣 𑀏𑀓𑀘𑁆𑀘𑁂 𑀣𑁂𑀭𑀸 ‘‘𑀦𑀺𑀭𑀬𑀧𑀸𑀮𑀸 𑀦𑀸𑀫 𑀦𑀢𑁆𑀣𑀺, 𑀬𑀦𑁆𑀢𑀭𑀽𑀧𑀁 𑀯𑀺𑀬 𑀓𑀫𑁆𑀫𑀫𑁂𑀯 𑀓𑀸𑀭𑀡𑀁 𑀓𑀸𑀭𑁂𑀢𑀻’’𑀢𑀺 𑀯𑀤𑀦𑁆𑀢𑀺. 𑀢𑀁 ‘‘𑀅𑀢𑁆𑀣𑀺 𑀦𑀺𑀭𑀬𑁂 𑀦𑀺𑀭𑀬𑀧𑀸𑀮𑀸𑀢𑀺, 𑀆𑀫𑀦𑁆𑀢𑀸. 𑀅𑀢𑁆𑀣𑀺 𑀘 𑀓𑀸𑀭𑀡𑀺𑀓𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀅𑀪𑀺𑀥𑀫𑁆𑀫𑁂 (𑀓𑀣𑀸. 𑁮𑁬𑁬) 𑀧𑀝𑀺𑀲𑁂𑀥𑀺𑀢𑀫𑁂𑀯. 𑀬𑀣𑀸 𑀳𑀺 𑀫𑀦𑀼𑀲𑁆𑀲𑀮𑁄𑀓𑁂 𑀓𑀫𑁆𑀫𑀓𑀸𑀭𑀡𑀓𑀸𑀭𑀓𑀸 𑀅𑀢𑁆𑀣𑀺, 𑀏𑀯𑀫𑁂𑀯 𑀦𑀺𑀭𑀬𑁂 𑀦𑀺𑀭𑀬𑀧𑀸𑀮𑀸 𑀅𑀢𑁆𑀣𑀻𑀢𑀺. 𑀬𑀫𑀲𑁆𑀲 𑀭𑀜𑁆𑀜𑁄𑀢𑀺 𑀬𑀫𑀭𑀸𑀚𑀸 𑀦𑀸𑀫 𑀯𑁂𑀫𑀸𑀦𑀺𑀓𑀧𑁂𑀢𑀭𑀸𑀚𑀸. 𑀏𑀓𑀲𑁆𑀫𑀺𑀁 𑀓𑀸𑀮𑁂 𑀤𑀺𑀩𑁆𑀩𑀯𑀺𑀫𑀸𑀦𑁂 𑀤𑀺𑀩𑁆𑀩𑀓𑀧𑁆𑀧𑀭𑀼𑀓𑁆𑀔𑀤𑀺𑀩𑁆𑀩𑀉𑀬𑁆𑀬𑀸𑀦𑀤𑀺𑀩𑁆𑀩𑀦𑀸𑀝𑀓𑀸𑀤𑀺𑀲𑀩𑁆𑀩𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀢𑀺, 𑀏𑀓𑀲𑁆𑀫𑀺𑀁 𑀓𑀸𑀮𑁂 𑀓𑀫𑁆𑀫𑀯𑀺𑀧𑀸𑀓𑀁, 𑀥𑀫𑁆𑀫𑀺𑀓𑁄 𑀭𑀸𑀚𑀸, 𑀦 𑀘𑁂𑀲 𑀏𑀓𑁄𑀯 𑀳𑁄𑀢𑀺, 𑀘𑀢𑀽𑀲𑀼 𑀧𑀦 𑀤𑁆𑀯𑀸𑀭𑁂𑀲𑀼 𑀘𑀢𑁆𑀢𑀸𑀭𑁄 𑀚𑀦𑀸 𑀳𑁄𑀦𑁆𑀢𑀺. 𑀅𑀫𑀢𑁆𑀢𑁂𑀬𑁆𑀬𑁄𑀢𑀺 𑀫𑀸𑀢𑀼 𑀳𑀺𑀢𑁄 𑀫𑀢𑁆𑀢𑁂𑀬𑁆𑀬𑁄, 𑀫𑀸𑀢𑀭𑀺 𑀲𑀫𑁆𑀫𑀸 𑀧𑀝𑀺𑀧𑀦𑁆𑀦𑁄𑀢𑀺 𑀅𑀢𑁆𑀣𑁄. 𑀦 𑀫𑀢𑁆𑀢𑁂𑀬𑁆𑀬𑁄𑀢𑀺 𑀅𑀫𑀢𑁆𑀢𑁂𑀬𑁆𑀬𑁄, 𑀫𑀸𑀢𑀭𑀺 𑀫𑀺𑀘𑁆𑀙𑀸 𑀧𑀝𑀺𑀧𑀦𑁆𑀦𑁄𑀢𑀺 𑀅𑀢𑁆𑀣𑁄. 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀅𑀩𑁆𑀭𑀳𑁆𑀫𑀜𑁆𑀜𑁄𑀢𑀺 𑀏𑀢𑁆𑀣 𑀘 𑀔𑀻𑀡𑀸𑀲𑀯𑀸 𑀩𑁆𑀭𑀸𑀳𑁆𑀫𑀡𑀸 𑀦𑀸𑀫, 𑀢𑁂𑀲𑀼 𑀫𑀺𑀘𑁆𑀙𑀸 𑀧𑀝𑀺𑀧𑀦𑁆𑀦𑁄 𑀅𑀩𑁆𑀭𑀳𑁆𑀫𑀜𑁆𑀜𑁄 𑀦𑀸𑀫.

𑀲𑀫𑀦𑀼𑀬𑀼𑀜𑁆𑀚𑀢𑀻𑀢𑀺 𑀅𑀦𑀼𑀬𑁄𑀕𑀯𑀢𑁆𑀢𑀁 𑀆𑀭𑁄𑀧𑁂𑀦𑁆𑀢𑁄 𑀧𑀼𑀘𑁆𑀙𑀢𑀺, 𑀮𑀤𑁆𑀥𑀺𑀁 𑀧𑀢𑀺𑀝𑁆𑀞𑀸𑀧𑁂𑀦𑁆𑀢𑁄 𑀧𑀦 𑀲𑀫𑀦𑀼𑀕𑁆𑀕𑀸𑀳𑀢𑀺 𑀦𑀸𑀫, 𑀓𑀸𑀭𑀡𑀁 𑀧𑀼𑀘𑁆𑀙𑀦𑁆𑀢𑁄 𑀲𑀫𑀦𑀼𑀪𑀸𑀲𑀢𑀺 𑀦𑀸𑀫. 𑀦𑀸𑀤𑁆𑀤𑀲𑀦𑁆𑀢𑀺 𑀅𑀢𑁆𑀢𑀦𑁄 𑀲𑀦𑁆𑀢𑀺𑀓𑁂 𑀧𑀳𑀺𑀢𑀲𑁆𑀲 𑀓𑀲𑁆𑀲𑀘𑀺 𑀤𑁂𑀯𑀤𑀽𑀢𑀲𑁆𑀲 𑀅𑀪𑀸𑀯𑀁 𑀲𑀦𑁆𑀥𑀸𑀬 𑀏𑀯𑀁 𑀯𑀤𑀢𑀺.

𑀅𑀣 𑀦𑀁 𑀬𑀫𑁄 ‘‘𑀦𑀸𑀬𑀁 𑀪𑀸𑀲𑀺𑀢𑀲𑁆𑀲 𑀅𑀢𑁆𑀣𑀁 𑀲𑀮𑁆𑀮𑀓𑁆𑀔𑁂𑀢𑀻’’𑀢𑀺 𑀜𑀢𑁆𑀯𑀸 𑀅𑀢𑁆𑀣𑀁 𑀲𑀮𑁆𑀮𑀓𑁆𑀔𑀸𑀧𑁂𑀢𑀼𑀓𑀸𑀫𑁄 𑀅𑀫𑁆𑀪𑁄𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀚𑀺𑀡𑁆𑀡𑀦𑁆𑀢𑀺 𑀚𑀭𑀸𑀚𑀺𑀡𑁆𑀡𑀁. 𑀕𑁄𑀧𑀸𑀦𑀲𑀺𑀯𑀗𑁆𑀓𑀦𑁆𑀢𑀺 𑀕𑁄𑀧𑀸𑀦𑀲𑀻 𑀯𑀺𑀬 𑀯𑀗𑁆𑀓𑀁. 𑀪𑁄𑀕𑁆𑀕𑀦𑁆𑀢𑀺 𑀪𑀕𑁆𑀕𑀁. 𑀇𑀫𑀺𑀦𑀸𑀧𑀺𑀲𑁆𑀲 𑀯𑀗𑁆𑀓𑀪𑀸𑀯𑀫𑁂𑀯 𑀤𑀻𑀧𑁂𑀢𑀺. 𑀤𑀡𑁆𑀟𑀧𑀭𑀸𑀬𑀡𑀦𑁆𑀢𑀺 𑀤𑀡𑁆𑀟𑀧𑀝𑀺𑀲𑀭𑀡𑀁 𑀤𑀡𑁆𑀟𑀤𑀼𑀢𑀺𑀬𑀁. 𑀧𑀯𑁂𑀥𑀫𑀸𑀦𑀦𑁆𑀢𑀺 𑀓𑀫𑁆𑀧𑀫𑀸𑀦𑀁. 𑀆𑀢𑀼𑀭𑀦𑁆𑀢𑀺 𑀚𑀭𑀸𑀢𑀼𑀭𑀁. 𑀔𑀡𑁆𑀟𑀤𑀦𑁆𑀢𑀦𑁆𑀢𑀺 𑀚𑀭𑀸𑀦𑀼𑀪𑀸𑀯𑁂𑀦 𑀔𑀡𑁆𑀟𑀺𑀢𑀤𑀦𑁆𑀢𑀁. 𑀧𑀮𑀺𑀢𑀓𑁂𑀲𑀦𑁆𑀢𑀺 𑀧𑀡𑁆𑀟𑀭𑀓𑁂𑀲𑀁. 𑀯𑀺𑀮𑀽𑀦𑀦𑁆𑀢𑀺 𑀮𑀼𑀜𑁆𑀘𑀺𑀢𑁆𑀯𑀸 𑀕𑀳𑀺𑀢𑀓𑁂𑀲𑀁 𑀯𑀺𑀬 𑀔𑀮𑁆𑀮𑀸𑀝𑀁. 𑀔𑀮𑀺𑀢𑀲𑀺𑀭𑀦𑁆𑀢𑀺 𑀫𑀳𑀸𑀔𑀮𑁆𑀮𑀸𑀝𑀲𑀻𑀲𑀁. 𑀯𑀮𑀺𑀢𑀦𑁆𑀢𑀺 𑀲𑀜𑁆𑀚𑀸𑀢𑀯𑀮𑀺𑀁. 𑀢𑀺𑀮𑀓𑀸𑀳𑀢𑀕𑀢𑁆𑀢𑀦𑁆𑀢𑀺 𑀲𑁂𑀢𑀢𑀺𑀮𑀓𑀓𑀸𑀴𑀢𑀺𑀮𑀓𑁂𑀳𑀺 𑀯𑀺𑀓𑀺𑀡𑁆𑀡𑀲𑀭𑀻𑀭𑀁. 𑀚𑀭𑀸𑀥𑀫𑁆𑀫𑁄𑀢𑀺 𑀚𑀭𑀸𑀲𑀪𑀸𑀯𑁄, 𑀅𑀧𑀭𑀺𑀫𑀼𑀢𑁆𑀢𑁄 𑀚𑀭𑀸𑀬, 𑀚𑀭𑀸 𑀦𑀸𑀫 𑀫𑀬𑁆𑀳𑀁 𑀅𑀩𑁆𑀪𑀦𑁆𑀢𑀭𑁂𑀬𑁂𑀯 𑀧𑀯𑀢𑁆𑀢𑀢𑀻𑀢𑀺. 𑀧𑀭𑀢𑁄 𑀩𑁆𑀬𑀸𑀥𑀺𑀥𑀫𑁆𑀫𑁄 𑀫𑀭𑀡𑀥𑀫𑁆𑀫𑁄𑀢𑀺 𑀧𑀤𑀤𑁆𑀯𑀬𑁂𑀧𑀺 𑀏𑀲𑁂𑀯 𑀦𑀬𑁄.

𑀧𑀞𑀫𑀁 𑀤𑁂𑀯𑀤𑀽𑀢𑀁 𑀲𑀫𑀦𑀼𑀬𑀼𑀜𑁆𑀚𑀺𑀢𑁆𑀯𑀸𑀢𑀺 𑀏𑀢𑁆𑀣 𑀚𑀭𑀸𑀚𑀺𑀡𑁆𑀡𑀲𑀢𑁆𑀢𑁄 𑀅𑀢𑁆𑀣𑀢𑁄 𑀏𑀯𑀁 𑀯𑀤𑀢𑀺 𑀦𑀸𑀫 𑁋 ‘‘𑀧𑀲𑁆𑀲𑀣, 𑀪𑁄, 𑀅𑀳𑀫𑁆𑀧𑀺 𑀢𑀼𑀫𑁆𑀳𑁂 𑀯𑀺𑀬 𑀢𑀭𑀼𑀡𑁄 𑀅𑀳𑁄𑀲𑀺𑀁 𑀊𑀭𑀼𑀩𑀮𑀻 𑀩𑀸𑀳𑀼𑀩𑀮𑀻 𑀚𑀯𑀲𑀫𑁆𑀧𑀦𑁆𑀦𑁄, 𑀢𑀲𑁆𑀲 𑀫𑁂 𑀢𑀸 𑀩𑀮𑀚𑀯𑀲𑀫𑁆𑀧𑀢𑁆𑀢𑀺𑀬𑁄 𑀅𑀦𑁆𑀢𑀭𑀳𑀺𑀢𑀸, 𑀯𑀺𑀚𑁆𑀚𑀫𑀸𑀦𑀸𑀧𑀺 𑀫𑁂 𑀳𑀢𑁆𑀣𑀧𑀸𑀤𑀸 𑀳𑀢𑁆𑀣𑀧𑀸𑀤𑀓𑀺𑀘𑁆𑀘𑀁 𑀦 𑀓𑀭𑁄𑀦𑁆𑀢𑀺, 𑀚𑀭𑀸𑀬𑀫𑁆𑀳𑀺 𑀅𑀧𑀭𑀺𑀫𑀼𑀢𑁆𑀢𑀢𑀸𑀬 𑀏𑀤𑀺𑀲𑁄 𑀚𑀸𑀢𑁄. 𑀦 𑀔𑁄 𑀧𑀦𑀸𑀳𑀫𑁂𑀯, 𑀢𑀼𑀫𑁆𑀳𑁂𑀧𑀺 𑀚𑀭𑀸𑀬 𑀅𑀧𑀭𑀺𑀫𑀼𑀢𑁆𑀢𑀸𑀯. 𑀬𑀣𑁂𑀯 𑀳𑀺 𑀫𑀬𑁆𑀳𑀁, 𑀏𑀯𑀁 𑀢𑀼𑀫𑁆𑀳𑀸𑀓𑀫𑁆𑀧𑀺 𑀚𑀭𑀸 𑀆𑀕𑀫𑀺𑀲𑁆𑀲𑀢𑀺. 𑀇𑀢𑀺 𑀢𑀲𑁆𑀲𑀸 𑀧𑀼𑀭𑁂 𑀆𑀕𑀫𑀦𑀸𑀯 𑀓𑀮𑁆𑀬𑀸𑀡𑀁 𑀓𑀭𑁄𑀣𑀸’’𑀢𑀺. 𑀢𑁂𑀦𑁂𑀯𑁂𑀲 𑀤𑁂𑀯𑀤𑀽𑀢𑁄 𑀦𑀸𑀫 𑀚𑀸𑀢𑁄. 𑀆𑀩𑀸𑀥𑀺𑀓𑀦𑁆𑀢𑀺 𑀩𑀸𑀥𑀺𑀓𑀁. 𑀤𑀼𑀓𑁆𑀔𑀺𑀢𑀦𑁆𑀢𑀺 𑀤𑀼𑀓𑁆𑀔𑀧𑁆𑀧𑀢𑁆𑀢𑀁. 𑀩𑀸𑀴𑁆𑀳𑀕𑀺𑀮𑀸𑀦𑀦𑁆𑀢𑀺 𑀅𑀥𑀺𑀫𑀢𑁆𑀢𑀕𑀺𑀮𑀸𑀦𑀁.

𑀤𑀼𑀢𑀺𑀬𑀁 𑀤𑁂𑀯𑀤𑀽𑀢𑀦𑁆𑀢𑀺 𑀏𑀢𑁆𑀣𑀧𑀺 𑀕𑀺𑀮𑀸𑀦𑀲𑀢𑁆𑀢𑁄 𑀅𑀢𑁆𑀣𑀢𑁄 𑀏𑀯𑀁 𑀯𑀤𑀢𑀺 𑀦𑀸𑀫 𑁋 ‘‘𑀧𑀲𑁆𑀲𑀣, 𑀪𑁄, 𑀅𑀳𑀫𑁆𑀧𑀺 𑀢𑀼𑀫𑁆𑀳𑁂 𑀯𑀺𑀬 𑀦𑀺𑀭𑁄𑀕𑁄 𑀅𑀳𑁄𑀲𑀺𑀁, 𑀲𑁄𑀫𑁆𑀳𑀺 𑀏𑀢𑀭𑀳𑀺 𑀩𑁆𑀬𑀸𑀥𑀺𑀦𑀸 𑀅𑀪𑀺𑀳𑀢𑁄, 𑀲𑀓𑁂 𑀫𑀼𑀢𑁆𑀢𑀓𑀭𑀻𑀲𑁂 𑀧𑀮𑀺𑀧𑀦𑁆𑀦𑁄, 𑀉𑀝𑁆𑀞𑀸𑀢𑀼𑀫𑁆𑀧𑀺 𑀦 𑀲𑀓𑁆𑀓𑁄𑀫𑀺. 𑀯𑀺𑀚𑁆𑀚𑀫𑀸𑀦𑀸𑀧𑀺 𑀫𑁂 𑀳𑀢𑁆𑀣𑀧𑀸𑀤𑀸 𑀳𑀢𑁆𑀣𑀧𑀸𑀤𑀓𑀺𑀘𑁆𑀘𑀁 𑀦 𑀓𑀭𑁄𑀦𑁆𑀢𑀺, 𑀩𑁆𑀬𑀸𑀥𑀺𑀢𑁄𑀫𑁆𑀳𑀺 𑀅𑀧𑀭𑀺𑀫𑀼𑀢𑁆𑀢𑀢𑀸𑀬 𑀏𑀤𑀺𑀲𑁄 𑀚𑀸𑀢𑁄. 𑀦 𑀔𑁄 𑀧𑀦𑀸𑀳𑀫𑁂𑀯, 𑀢𑀼𑀫𑁆𑀳𑁂𑀧𑀺 𑀩𑁆𑀬𑀸𑀥𑀺𑀢𑁄 𑀅𑀧𑀭𑀺𑀫𑀼𑀢𑁆𑀢𑀸𑀯. 𑀬𑀣𑁂𑀯 𑀳𑀺 𑀫𑀬𑁆𑀳𑀁, 𑀏𑀯𑀁 𑀢𑀼𑀫𑁆𑀳𑀸𑀓𑀫𑁆𑀧𑀺 𑀩𑁆𑀬𑀸𑀥𑀺 𑀆𑀕𑀫𑀺𑀲𑁆𑀲𑀢𑀺. 𑀇𑀢𑀺 𑀢𑀲𑁆𑀲 𑀧𑀼𑀭𑁂 𑀆𑀕𑀫𑀦𑀸𑀯 𑀓𑀮𑁆𑀬𑀸𑀡𑀁 𑀓𑀭𑁄𑀣𑀸’’𑀢𑀺. 𑀢𑁂𑀦𑁂𑀯𑁂𑀲 𑀤𑁂𑀯𑀤𑀽𑀢𑁄 𑀦𑀸𑀫 𑀚𑀸𑀢𑁄.

𑀏𑀓𑀸𑀳𑀫𑀢𑀦𑁆𑀢𑀺𑀆𑀤𑀻𑀲𑀼 𑀏𑀓𑀸𑀳𑀁 𑀫𑀢𑀲𑁆𑀲 𑀅𑀲𑁆𑀲𑀸𑀢𑀺 𑀏𑀓𑀸𑀳𑀫𑀢𑁄, 𑀢𑀁 𑀏𑀓𑀸𑀳𑀫𑀢𑀁. 𑀧𑀭𑀢𑁄 𑀧𑀤𑀤𑁆𑀯𑀬𑁂𑀧𑀺 𑀏𑀲𑁂𑀯 𑀦𑀬𑁄. 𑀪𑀲𑁆𑀢𑀸 𑀯𑀺𑀬 𑀯𑀸𑀬𑀼𑀦𑀸 𑀉𑀤𑁆𑀥𑀁 𑀚𑀻𑀯𑀺𑀢𑀧𑀭𑀺𑀬𑀸𑀤𑀸𑀦𑀸 𑀬𑀣𑀸𑀓𑁆𑀓𑀫𑀁 𑀲𑀫𑀼𑀕𑁆𑀕𑀢𑁂𑀦 𑀲𑀽𑀦𑀪𑀸𑀯𑁂𑀦 𑀉𑀤𑁆𑀥𑀼𑀫𑀸𑀢𑀢𑁆𑀢𑀸 𑀉𑀤𑁆𑀥𑀼𑀫𑀸𑀢𑀓𑀁. 𑀯𑀺𑀦𑀻𑀮𑁄 𑀯𑀼𑀘𑁆𑀘𑀢𑀺 𑀯𑀺𑀧𑀭𑀺𑀪𑀺𑀦𑁆𑀦𑀯𑀡𑁆𑀡𑁄, 𑀯𑀺𑀦𑀻𑀮𑁄𑀯 𑀯𑀺𑀦𑀻𑀮𑀓𑁄, 𑀢𑀁 𑀯𑀺𑀦𑀻𑀮𑀓𑀁. 𑀧𑀝𑀺𑀓𑀽𑀮𑀢𑁆𑀢𑀸 𑀯𑀸 𑀓𑀼𑀘𑁆𑀙𑀺𑀢𑀁 𑀯𑀺𑀦𑀻𑀮𑀦𑁆𑀢𑀺 𑀯𑀺𑀦𑀻𑀮𑀓𑀁. 𑀯𑀺𑀧𑀼𑀩𑁆𑀩𑀓𑀦𑁆𑀢𑀺 𑀯𑀺𑀲𑁆𑀲𑀦𑁆𑀤𑀫𑀸𑀦𑀧𑀼𑀩𑁆𑀩𑀓𑀁, 𑀧𑀭𑀺𑀪𑀺𑀦𑁆𑀦𑀝𑁆𑀞𑀸𑀦𑁂 𑀳𑀺 𑀧𑀕𑁆𑀖𑀭𑀺𑀢𑁂𑀦 𑀧𑀼𑀩𑁆𑀩𑁂𑀦 𑀧𑀮𑀺𑀫𑀓𑁆𑀔𑀺𑀢𑀦𑁆𑀢𑀺 𑀅𑀢𑁆𑀣𑁄.

𑀢𑀢𑀺𑀬𑀁 𑀤𑁂𑀯𑀤𑀽𑀢𑀦𑁆𑀢𑀺 𑀏𑀢𑁆𑀣 𑀫𑀢𑀓𑀲𑀢𑁆𑀢𑁄 𑀅𑀢𑁆𑀣𑀢𑁄 𑀏𑀯𑀁 𑀯𑀤𑀢𑀺 𑀦𑀸𑀫 𑁋 ‘‘𑀧𑀲𑁆𑀲𑀣, 𑀪𑁄, 𑀫𑀁 𑀆𑀫𑀓𑀲𑀼𑀲𑀸𑀦𑁂 𑀙𑀟𑁆𑀟𑀺𑀢𑀁 𑀉𑀤𑁆𑀥𑀼𑀫𑀸𑀢𑀓𑀸𑀤𑀺𑀪𑀸𑀯𑀧𑁆𑀧𑀢𑁆𑀢𑀁, 𑀫𑀭𑀡𑀢𑁄𑀫𑁆𑀳𑀺 𑀅𑀧𑀭𑀺𑀫𑀼𑀢𑁆𑀢𑀢𑀸𑀬 𑀏𑀤𑀺𑀲𑁄 𑀚𑀸𑀢𑁄. 𑀦 𑀔𑁄 𑀧𑀦𑀸𑀳𑀫𑁂𑀯, 𑀢𑀼𑀫𑁆𑀳𑁂𑀧𑀺 𑀫𑀭𑀡𑀢𑁄 𑀅𑀧𑀭𑀺𑀫𑀼𑀢𑁆𑀢𑀸. 𑀬𑀣𑁂𑀯 𑀳𑀺 𑀫𑀬𑁆𑀳𑀁, 𑀏𑀯𑀁 𑀢𑀼𑀫𑁆𑀳𑀸𑀓𑀫𑁆𑀧𑀺 𑀫𑀭𑀡𑀁 𑀆𑀕𑀫𑀺𑀲𑁆𑀲𑀢𑀺. 𑀇𑀢𑀺 𑀢𑀲𑁆𑀲 𑀧𑀼𑀭𑁂 𑀆𑀕𑀫𑀦𑀸𑀯 𑀓𑀮𑁆𑀬𑀸𑀡𑀁 𑀓𑀭𑁄𑀣𑀸’’𑀢𑀺. 𑀢𑁂𑀦𑁂𑀯𑀲𑁆𑀲 𑀤𑁂𑀯𑀤𑀽𑀢𑁄 𑀦𑀸𑀫 𑀚𑀸𑀢𑁄.

𑀇𑀫𑀁 𑀧𑀦 𑀤𑁂𑀯𑀤𑀽𑀢𑀸𑀦𑀼𑀬𑁄𑀕𑀁 𑀓𑁄 𑀮𑀪𑀢𑀺, 𑀓𑁄 𑀦 𑀮𑀪𑀢𑀺? 𑀬𑁂𑀦 𑀢𑀸𑀯 𑀩𑀳𑀼𑀁 𑀧𑀸𑀧𑀁 𑀓𑀢𑀁, 𑀲𑁄 𑀕𑀦𑁆𑀢𑁆𑀯𑀸 𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀢𑀺𑀬𑁂𑀯. 𑀬𑁂𑀦 𑀧𑀦 𑀧𑀭𑀺𑀢𑁆𑀢𑀁 𑀧𑀸𑀧𑀁 𑀓𑀢𑀁, 𑀲𑁄 𑀮𑀪𑀢𑀺. 𑀬𑀣𑀸 𑀳𑀺 𑀲𑀪𑀡𑁆𑀟𑀁 𑀘𑁄𑀭𑀁 𑀕𑀳𑁂𑀢𑁆𑀯𑀸 𑀓𑀢𑁆𑀢𑀩𑁆𑀩𑀫𑁂𑀯 𑀓𑀭𑁄𑀦𑁆𑀢𑀺 𑀦 𑀯𑀺𑀦𑀺𑀘𑁆𑀙𑀺𑀦𑀦𑁆𑀢𑀺. 𑀅𑀦𑀼𑀯𑀺𑀚𑁆𑀚𑀺𑀢𑁆𑀯𑀸 𑀕𑀳𑀺𑀢𑀁 𑀧𑀦 𑀯𑀺𑀦𑀺𑀘𑁆𑀙𑀬𑀝𑁆𑀞𑀸𑀦𑀁 𑀦𑀬𑀦𑁆𑀢𑀺, 𑀲𑁄 𑀯𑀺𑀦𑀺𑀘𑁆𑀙𑀬𑀁 𑀮𑀪𑀢𑀺. 𑀏𑀯𑀁𑀲𑀫𑁆𑀧𑀤𑀫𑁂𑀢𑀁. 𑀧𑀭𑀺𑀢𑁆𑀢𑀧𑀸𑀧𑀓𑀫𑁆𑀫𑀸 𑀳𑀺 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬𑀧𑀺 𑀲𑀭𑀦𑁆𑀢𑀺, 𑀲𑀸𑀭𑀻𑀬𑀫𑀸𑀦𑀸𑀧𑀺 𑀲𑀭𑀦𑁆𑀢𑀺.

𑀢𑀢𑁆𑀣 𑀤𑀻𑀖𑀚𑀬𑀦𑁆𑀢𑀤𑀫𑀺𑀴𑁄 𑀦𑀸𑀫 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀲𑀭𑀺. 𑀲𑁄 𑀓𑀺𑀭 𑀤𑀫𑀺𑀴𑁄 𑀲𑀼𑀫𑀦𑀕𑀺𑀭𑀺𑀫𑀳𑀸𑀯𑀺𑀳𑀸𑀭𑁂 𑀆𑀓𑀸𑀲𑀘𑁂𑀢𑀺𑀬𑀁 𑀭𑀢𑁆𑀢𑀧𑀝𑁂𑀦 𑀧𑀽𑀚𑁂𑀲𑀺, 𑀅𑀣 𑀦𑀺𑀭𑀬𑁂 𑀉𑀲𑁆𑀲𑀤𑀲𑀸𑀫𑀦𑁆𑀢𑁂 𑀦𑀺𑀩𑁆𑀩𑀢𑁆𑀢𑁄 𑀅𑀕𑁆𑀕𑀺𑀚𑀸𑀮𑀲𑀤𑁆𑀤𑀁 𑀲𑀼𑀢𑁆𑀯𑀸𑀯 𑀅𑀢𑁆𑀢𑀦𑀸 𑀧𑀽𑀚𑀺𑀢𑀧𑀝𑀁 𑀅𑀦𑀼𑀲𑁆𑀲𑀭𑀺, 𑀲𑁄 𑀕𑀦𑁆𑀢𑁆𑀯𑀸 𑀲𑀕𑁆𑀕𑁂 𑀦𑀺𑀩𑁆𑀩𑀢𑁆𑀢𑁄. 𑀅𑀧𑀭𑁄𑀧𑀺 𑀧𑀼𑀢𑁆𑀢𑀲𑁆𑀲 𑀤𑀳𑀭𑀪𑀺𑀓𑁆𑀔𑀼𑀦𑁄 𑀔𑀮𑀺𑀲𑀸𑀝𑀓𑀁 𑀤𑁂𑀦𑁆𑀢𑁄 𑀧𑀸𑀤𑀫𑀽𑀮𑁂 𑀞𑀧𑁂𑀲𑀺, 𑀫𑀭𑀡𑀓𑀸𑀮𑀫𑁆𑀳𑀺 𑀧𑀝𑀧𑀝𑀸𑀢𑀺 𑀲𑀤𑁆𑀤𑁂 𑀦𑀺𑀫𑀺𑀢𑁆𑀢𑀁 𑀕𑀡𑁆𑀳𑀺, 𑀲𑁄𑀧𑀺 𑀉𑀲𑁆𑀲𑀤𑀲𑀸𑀫𑀦𑁆𑀢𑁂 𑀦𑀺𑀩𑁆𑀩𑀢𑁆𑀢𑁄 𑀚𑀸𑀮𑀲𑀤𑁆𑀤𑁂𑀦 𑀢𑀁 𑀲𑀸𑀝𑀓𑀁 𑀅𑀦𑀼𑀲𑁆𑀲𑀭𑀺𑀢𑁆𑀯𑀸 𑀲𑀕𑁆𑀕𑁂 𑀦𑀺𑀩𑁆𑀩𑀢𑁆𑀢𑁄. 𑀏𑀯𑀁 𑀢𑀸𑀯 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀓𑀼𑀲𑀮𑀁 𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑀕𑁆𑀕𑁂 𑀦𑀺𑀩𑁆𑀩𑀢𑁆𑀢𑀢𑀻𑀢𑀺.

𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀅𑀲𑀭𑀦𑁆𑀢𑁂 𑀧𑀦 𑀢𑀬𑁄 𑀤𑁂𑀯𑀤𑀽𑀢𑁂 𑀧𑀼𑀘𑁆𑀙𑀢𑀺. 𑀢𑀢𑁆𑀣 𑀓𑁄𑀘𑀺 𑀧𑀞𑀫𑁂𑀦 𑀤𑁂𑀯𑀤𑀽𑀢𑁂𑀦 𑀲𑀭𑀢𑀺, 𑀓𑁄𑀘𑀺 𑀤𑀼𑀢𑀺𑀬𑀢𑀢𑀺𑀬𑁂𑀳𑀺, 𑀓𑁄𑀘𑀺 𑀢𑀻𑀳𑀺𑀧𑀺 𑀦𑀲𑁆𑀲𑀭𑀢𑀺. 𑀢𑀁 𑀬𑀫𑁄 𑀭𑀸𑀚𑀸 𑀤𑀺𑀲𑁆𑀯𑀸 𑀲𑀬𑀁 𑀲𑀸𑀭𑁂𑀢𑀺. 𑀏𑀓𑁄 𑀓𑀺𑀭 𑀅𑀫𑀘𑁆𑀘𑁄 𑀲𑀼𑀫𑀦𑀧𑀼𑀧𑁆𑀨𑀓𑀼𑀫𑁆𑀪𑁂𑀦 𑀫𑀳𑀸𑀘𑁂𑀢𑀺𑀬𑀁 𑀧𑀽𑀚𑁂𑀢𑁆𑀯𑀸 𑀬𑀫𑀲𑁆𑀲 𑀧𑀢𑁆𑀢𑀺𑀁 𑀅𑀤𑀸𑀲𑀺, 𑀢𑀁 𑀅𑀓𑀼𑀲𑀮𑀓𑀫𑁆𑀫𑁂𑀦 𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀁 𑀬𑀫𑀲𑁆𑀲 𑀲𑀦𑁆𑀢𑀺𑀓𑀁 𑀦𑀬𑀺𑀁𑀲𑀼. 𑀢𑀲𑁆𑀫𑀺𑀁 𑀢𑀻𑀳𑀺𑀧𑀺 𑀤𑁂𑀯𑀤𑀽𑀢𑁂𑀳𑀺 𑀓𑀼𑀲𑀮𑀁 𑀅𑀲𑀭𑀦𑁆𑀢𑁂 𑀬𑀫𑁄 𑀲𑀬𑀁 𑀑𑀮𑁄𑀓𑁂𑀦𑁆𑀢𑁄 𑀤𑀺𑀲𑁆𑀯𑀸 𑁋 ‘‘𑀦𑀦𑀼 𑀢𑁆𑀯𑀁 𑀫𑀳𑀸𑀘𑁂𑀢𑀺𑀬𑀁 𑀲𑀼𑀫𑀦𑀧𑀼𑀧𑁆𑀨𑀓𑀼𑀫𑁆𑀪𑁂𑀦 𑀧𑀽𑀚𑁂𑀢𑁆𑀯𑀸 𑀫𑀬𑁆𑀳𑀁 𑀧𑀢𑁆𑀢𑀺𑀁 𑀅𑀤𑀸𑀲𑀻’’𑀢𑀺 𑀲𑀸𑀭𑁂𑀲𑀺, 𑀲𑁄 𑀢𑀲𑁆𑀫𑀺𑀁 𑀓𑀸𑀮𑁂 𑀲𑀭𑀺𑀢𑁆𑀯𑀸 𑀤𑁂𑀯𑀮𑁄𑀓𑀁 𑀕𑀢𑁄. 𑀬𑀫𑁄 𑀧𑀦 𑀲𑀬𑀁 𑀑𑀮𑁄𑀓𑁂𑀢𑁆𑀯𑀸𑀧𑀺 𑀅𑀧𑀲𑁆𑀲𑀦𑁆𑀢𑁄 𑁋 ‘‘𑀫𑀳𑀸𑀤𑀼𑀓𑁆𑀔𑀁 𑀦𑀸𑀫 𑀅𑀦𑀼𑀪𑀯𑀺𑀲𑁆𑀲𑀢𑀺 𑀅𑀬𑀁 𑀲𑀢𑁆𑀢𑁄’’𑀢𑀺 𑀢𑀼𑀡𑁆𑀳𑀻 𑀅𑀳𑁄𑀲𑀺.

𑀢𑀢𑁆𑀢𑀁 𑀅𑀬𑁄𑀔𑀺𑀮𑀦𑁆𑀢𑀺 𑀢𑀺𑀕𑀸𑀯𑀼𑀢𑀁 𑀅𑀢𑁆𑀢𑀪𑀸𑀯𑀁 𑀲𑀫𑁆𑀧𑀚𑁆𑀚𑀮𑀺𑀢𑀸𑀬 𑀮𑁄𑀳𑀧𑀣𑀯𑀺𑀬𑀸 𑀉𑀢𑁆𑀢𑀸𑀦𑀓𑀁 𑀦𑀺𑀧𑀚𑁆𑀚𑀸𑀧𑁂𑀢𑁆𑀯𑀸 𑀤𑀓𑁆𑀔𑀺𑀡𑀳𑀢𑁆𑀣𑁂 𑀢𑀸𑀮𑀧𑁆𑀧𑀫𑀸𑀡𑀁 𑀅𑀬𑀲𑀽𑀮𑀁 𑀧𑀯𑁂𑀲𑁂𑀦𑁆𑀢𑀺, 𑀢𑀣𑀸 𑀯𑀸𑀫𑀳𑀢𑁆𑀣𑀸𑀤𑀻𑀲𑀼. 𑀬𑀣𑀸 𑀘 𑀢𑀁 𑀉𑀢𑁆𑀢𑀸𑀦𑀓𑀁 𑀦𑀺𑀧𑀚𑁆𑀚𑀸𑀧𑁂𑀢𑁆𑀯𑀸, 𑀏𑀯𑀁 𑀉𑀭𑁂𑀦𑀧𑀺 𑀯𑀸𑀫𑀧𑀲𑁆𑀲𑁂𑀦𑀧𑀺 𑀤𑀓𑁆𑀔𑀺𑀡𑀧𑀲𑁆𑀲𑁂𑀦𑀧𑀺 𑀦𑀺𑀧𑀚𑁆𑀚𑀸𑀧𑁂𑀢𑁆𑀯𑀸 𑀢𑁂 𑀢𑀁 𑀓𑀫𑁆𑀫𑀓𑀸𑀭𑀡𑀁 𑀓𑀭𑁄𑀦𑁆𑀢𑀺𑀬𑁂𑀯. 𑀲𑀁𑀯𑁂𑀲𑁂𑀢𑁆𑀯𑀸𑀢𑀺 𑀚𑀮𑀺𑀢𑀸𑀬 𑀮𑁄𑀳𑀧𑀣𑀯𑀺𑀬𑀸 𑀢𑀺𑀕𑀸𑀯𑀼𑀢𑀁 𑀅𑀢𑁆𑀢𑀪𑀸𑀯𑀁 𑀦𑀺𑀧𑀚𑁆𑀚𑀸𑀧𑁂𑀢𑁆𑀯𑀸. 𑀓𑀼𑀞𑀸𑀭𑀻𑀳𑀻𑀢𑀺 𑀫𑀳𑀢𑀻𑀳𑀺 𑀕𑁂𑀳𑀲𑁆𑀲 𑀏𑀓𑀧𑀓𑁆𑀔𑀘𑁆𑀙𑀤𑀦𑀫𑀢𑁆𑀢𑀸𑀳𑀺 𑀓𑀼𑀞𑀸𑀭𑀻𑀳𑀺 𑀢𑀘𑁆𑀙𑀦𑁆𑀢𑀺, 𑀮𑁄𑀳𑀺𑀢𑀁 𑀦𑀤𑀻 𑀳𑀼𑀢𑁆𑀯𑀸 𑀲𑀦𑁆𑀤𑀢𑀺, 𑀮𑁄𑀳𑀧𑀣𑀯𑀺𑀢𑁄 𑀚𑀸𑀮𑀸 𑀉𑀝𑁆𑀞𑀳𑀺𑀢𑁆𑀯𑀸 𑀢𑀘𑁆𑀙𑀺𑀢𑀝𑁆𑀞𑀸𑀦𑀁 𑀕𑀡𑁆𑀳𑀸𑀢𑀺, 𑀫𑀳𑀸𑀤𑀼𑀓𑁆𑀔𑀁 𑀉𑀧𑁆𑀧𑀚𑁆𑀚𑀢𑀺. 𑀢𑀘𑁆𑀙𑀦𑁆𑀢𑀸 𑀧𑀦 𑀲𑀼𑀢𑁆𑀢𑀸𑀳𑀢𑀁 𑀓𑀭𑀺𑀢𑁆𑀯𑀸 𑀤𑀸𑀭𑀼𑀁 𑀯𑀺𑀬 𑀅𑀝𑁆𑀞𑀁𑀲𑀫𑁆𑀧𑀺 𑀙𑀴𑀁𑀲𑀫𑁆𑀧𑀺 𑀓𑀭𑁄𑀦𑁆𑀢𑀺. 𑀯𑀸𑀲𑀻𑀳𑀻𑀢𑀺 𑀫𑀳𑀸𑀲𑀼𑀧𑁆𑀧𑀧𑁆𑀧𑀫𑀸𑀡𑀸𑀳𑀺 𑀯𑀸𑀲𑀻𑀳𑀺. 𑀭𑀣𑁂 𑀬𑁄𑀚𑁂𑀢𑁆𑀯𑀸𑀢𑀺 𑀲𑀤𑁆𑀥𑀺𑀁 𑀬𑀼𑀕𑀬𑁄𑀢𑁆𑀢𑀧𑀓𑁆𑀔𑀭𑀣𑀘𑀓𑁆𑀓𑀓𑀼𑀩𑁆𑀩𑀭𑀧𑀸𑀚𑀦𑁂𑀳𑀺 𑀲𑀩𑁆𑀩𑀢𑁄 𑀧𑀚𑁆𑀚𑀮𑀺𑀢𑁂 𑀭𑀣𑁂 𑀬𑁄𑀚𑁂𑀢𑁆𑀯𑀸. 𑀫𑀳𑀦𑁆𑀢𑀦𑁆𑀢𑀺 𑀫𑀳𑀸𑀓𑀽𑀝𑀸𑀕𑀸𑀭𑀧𑁆𑀧𑀫𑀸𑀡𑀁. 𑀆𑀭𑁄𑀧𑁂𑀦𑁆𑀢𑀻𑀢𑀺 𑀲𑀫𑁆𑀧𑀚𑁆𑀚𑀮𑀺𑀢𑁂𑀳𑀺 𑀅𑀬𑀫𑀼𑀕𑁆𑀕𑀭𑁂𑀳𑀺 𑀧𑁄𑀣𑁂𑀦𑁆𑀢𑀸 𑀆𑀭𑁄𑀧𑁂𑀦𑁆𑀢𑀺. 𑀲𑀓𑀺𑀫𑁆𑀧𑀺 𑀉𑀤𑁆𑀥𑀦𑁆𑀢𑀺 𑀲𑀼𑀧𑀓𑁆𑀓𑀼𑀣𑀺𑀢𑀸𑀬 𑀉𑀓𑁆𑀔𑀮𑀺𑀬𑀸 𑀧𑀓𑁆𑀔𑀺𑀢𑁆𑀢𑀢𑀡𑁆𑀟𑀼𑀮𑀸 𑀯𑀺𑀬 𑀉𑀤𑁆𑀥𑀫𑀥𑁄𑀢𑀺𑀭𑀺𑀬𑀜𑁆𑀘 𑀕𑀘𑁆𑀙𑀢𑀺. 𑀫𑀳𑀸𑀦𑀺𑀭𑀬𑁂𑀢𑀺 𑀅𑀯𑀻𑀘𑀺𑀫𑀳𑀸𑀦𑀺𑀭𑀬𑀫𑁆𑀳𑀺.

𑀪𑀸𑀕𑀲𑁄 𑀫𑀺𑀢𑁄𑀢𑀺 𑀪𑀸𑀕𑁂 𑀞𑀧𑁂𑀢𑁆𑀯𑀸 𑀯𑀺𑀪𑀢𑁆𑀢𑁄. 𑀧𑀭𑀺𑀬𑀦𑁆𑀢𑁄𑀢𑀺 𑀧𑀭𑀺𑀓𑁆𑀔𑀺𑀢𑁆𑀢𑁄. 𑀅𑀬𑀲𑀸𑀢𑀺 𑀉𑀧𑀭𑀺 𑀅𑀬𑀧𑀝𑁆𑀝𑁂𑀦 𑀙𑀸𑀤𑀺𑀢𑁄. 𑀲𑀫𑀦𑁆𑀢𑀸 𑀬𑁄𑀚𑀦𑀲𑀢𑀁, 𑀨𑀭𑀺𑀢𑁆𑀯𑀸 𑀢𑀺𑀝𑁆𑀞𑀢𑀻𑀢𑀺 𑀏𑀯𑀁 𑀨𑀭𑀺𑀢𑁆𑀯𑀸 𑀢𑀺𑀝𑁆𑀞𑀢𑀺, 𑀬𑀣𑀸 𑀢𑀁 𑀲𑀫𑀦𑁆𑀢𑀸 𑀬𑁄𑀚𑀦𑀲𑀢𑁂 𑀞𑀢𑁆𑀯𑀸 𑀑𑀮𑁄𑀓𑁂𑀦𑁆𑀢𑀲𑁆𑀲 𑀅𑀓𑁆𑀔𑀻𑀦𑀺 𑀬𑀫𑀓𑀕𑁄𑀴𑀓𑀸 𑀯𑀺𑀬 𑀦𑀺𑀓𑁆𑀔𑀫𑀦𑁆𑀢𑀺.

𑀳𑀻𑀦𑀓𑀸𑀬𑀽𑀧𑀕𑀸𑀢𑀺 𑀳𑀻𑀦𑀁 𑀓𑀸𑀬𑀁 𑀉𑀧𑀕𑀢𑀸 𑀳𑀼𑀢𑁆𑀯𑀸. 𑀉𑀧𑀸𑀤𑀸𑀦𑁂𑀢𑀺 𑀢𑀡𑁆𑀳𑀸𑀤𑀺𑀝𑁆𑀞𑀺𑀕𑁆𑀕𑀳𑀡𑁂. 𑀚𑀸𑀢𑀺𑀫𑀭𑀡𑀲𑀫𑁆𑀪𑀯𑁂𑀢𑀺 𑀚𑀸𑀢𑀺𑀬𑀸 𑀘 𑀫𑀭𑀡𑀲𑁆𑀲 𑀘 𑀓𑀸𑀭𑀡𑀪𑀽𑀢𑁂. 𑀅𑀦𑀼𑀧𑀸𑀤𑀸𑀢𑀺 𑀘𑀢𑀽𑀳𑀺 𑀉𑀧𑀸𑀤𑀸𑀦𑁂𑀳𑀺 𑀅𑀦𑀼𑀧𑀸𑀤𑀺𑀬𑀺𑀢𑁆𑀯𑀸. 𑀚𑀸𑀢𑀺𑀫𑀭𑀡𑀲𑀗𑁆𑀔𑀬𑁂𑀢𑀺 𑀚𑀸𑀢𑀺𑀫𑀭𑀡𑀲𑀗𑁆𑀔𑀬𑀲𑀗𑁆𑀔𑀸𑀢𑁂 𑀦𑀺𑀩𑁆𑀩𑀸𑀦𑁂 𑀯𑀺𑀫𑀼𑀘𑁆𑀘𑀦𑁆𑀢𑀺. 𑀤𑀺𑀝𑁆𑀞𑀥𑀫𑁆𑀫𑀸𑀪𑀺𑀦𑀺𑀩𑁆𑀩𑀼𑀢𑀸𑀢𑀺 𑀤𑀺𑀝𑁆𑀞𑀥𑀫𑁆𑀫𑁂 𑀇𑀫𑀲𑁆𑀫𑀺𑀁𑀬𑁂𑀯 𑀅𑀢𑁆𑀢𑀪𑀸𑀯𑁂 𑀲𑀩𑁆𑀩𑀓𑀺𑀮𑁂𑀲𑀦𑀺𑀩𑁆𑀩𑀸𑀦𑁂𑀦 𑀦𑀺𑀩𑁆𑀩𑀼𑀢𑀸. 𑀲𑀩𑁆𑀩𑀤𑀼𑀓𑁆𑀔𑀁 𑀉𑀧𑀘𑁆𑀘𑀕𑀼𑀦𑁆𑀢𑀺 𑀲𑀓𑀮𑀯𑀝𑁆𑀝𑀤𑀼𑀓𑁆𑀔𑀁 𑀅𑀢𑀺𑀓𑁆𑀓𑀦𑁆𑀢𑀸.

𑁭. 𑀘𑀢𑀼𑀫𑀳𑀸𑀭𑀸𑀚𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁭. 𑀲𑀢𑁆𑀢𑀫𑁂 𑀅𑀫𑀘𑁆𑀘𑀸 𑀧𑀸𑀭𑀺𑀲𑀚𑁆𑀚𑀸𑀢𑀺 𑀧𑀭𑀺𑀘𑀸𑀭𑀺𑀓𑀤𑁂𑀯𑀢𑀸. 𑀇𑀫𑀁 𑀮𑁄𑀓𑀁 𑀅𑀦𑀼𑀯𑀺𑀘𑀭𑀦𑁆𑀢𑀻𑀢𑀺 𑀅𑀝𑁆𑀞𑀫𑀻𑀤𑀺𑀯𑀲𑁂 𑀓𑀺𑀭 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 𑀘𑀢𑁆𑀢𑀸𑀭𑁄 𑀫𑀳𑀸𑀭𑀸𑀚𑀸𑀦𑁄 𑀆𑀡𑀸𑀧𑁂𑀢𑀺 𑁋 ‘‘𑀢𑀸𑀢𑀸, 𑀅𑀚𑁆𑀚 𑀅𑀝𑁆𑀞𑀫𑀻𑀤𑀺𑀯𑀲𑁂 𑀫𑀦𑀼𑀲𑁆𑀲𑀮𑁄𑀓𑀁 𑀅𑀦𑀼𑀯𑀺𑀘𑀭𑀺𑀢𑁆𑀯𑀸 𑀧𑀼𑀜𑁆𑀜𑀸𑀦𑀺 𑀓𑀭𑁄𑀦𑁆𑀢𑀸𑀦𑀁 𑀦𑀸𑀫𑀕𑁄𑀢𑁆𑀢𑀁 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀆𑀕𑀘𑁆𑀙𑀣𑀸’’𑀢𑀺. 𑀢𑁂 𑀕𑀦𑁆𑀢𑁆𑀯𑀸 𑀅𑀢𑁆𑀢𑀦𑁄 𑀧𑀭𑀺𑀘𑀸𑀭𑀓𑁂 𑀧𑁂𑀲𑁂𑀦𑁆𑀢𑀺 𑁋 ‘‘𑀕𑀘𑁆𑀙𑀣, 𑀢𑀸𑀢𑀸, 𑀫𑀦𑀼𑀲𑁆𑀲𑀮𑁄𑀓𑀁 𑀯𑀺𑀘𑀭𑀺𑀢𑁆𑀯𑀸 𑀧𑀼𑀜𑁆𑀜𑀓𑀸𑀭𑀓𑀸𑀦𑀁 𑀦𑀸𑀫𑀕𑁄𑀢𑁆𑀢𑀸𑀦𑀺 𑀲𑀼𑀯𑀡𑁆𑀡𑀧𑀝𑁆𑀝𑁂 𑀮𑀺𑀔𑀺𑀢𑁆𑀯𑀸 𑀆𑀦𑁂𑀣𑀸’’𑀢𑀺. 𑀢𑁂 𑀢𑀣𑀸 𑀓𑀭𑁄𑀦𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀇𑀫𑀁 𑀮𑁄𑀓𑀁 𑀅𑀦𑀼𑀯𑀺𑀘𑀭𑀦𑁆𑀢𑀻’’𑀢𑀺. 𑀓𑀘𑁆𑀘𑀺 𑀩𑀳𑀽𑀢𑀺𑀆𑀤𑀺 𑀢𑁂𑀲𑀁 𑀉𑀧𑀧𑀭𑀺𑀓𑁆𑀔𑀸𑀓𑀸𑀭𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀏𑀯𑀁 𑀉𑀧𑀧𑀭𑀺𑀓𑁆𑀔𑀦𑁆𑀢𑀸 𑀳𑀺 𑀢𑁂 𑀅𑀦𑀼𑀯𑀺𑀘𑀭𑀦𑁆𑀢𑀺. 𑀢𑀢𑁆𑀣 𑀉𑀧𑁄𑀲𑀣𑀁 𑀉𑀧𑀯𑀲𑀦𑁆𑀢𑀻𑀢𑀺 𑀫𑀸𑀲𑀲𑁆𑀲 𑀅𑀝𑁆𑀞𑀯𑀸𑀭𑁂 𑀉𑀧𑁄𑀲𑀣𑀗𑁆𑀕𑀸𑀦𑀺 𑀅𑀥𑀺𑀝𑁆𑀞𑀳𑀦𑁆𑀢𑀺. 𑀧𑀝𑀺𑀚𑀸𑀕𑀭𑁄𑀦𑁆𑀢𑀻𑀢𑀺 𑀧𑀝𑀺𑀚𑀸𑀕𑀭𑀉𑀧𑁄𑀲𑀣𑀓𑀫𑁆𑀫𑀁 𑀦𑀸𑀫 𑀓𑀭𑁄𑀦𑁆𑀢𑀺. 𑀢𑀁 𑀓𑀭𑁄𑀦𑁆𑀢𑀸 𑀏𑀓𑀲𑁆𑀫𑀺𑀁 𑀅𑀤𑁆𑀥𑀫𑀸𑀲𑁂 𑀘𑀢𑀼𑀦𑁆𑀦𑀁 𑀉𑀧𑁄𑀲𑀣𑀤𑀺𑀯𑀲𑀸𑀦𑀁 𑀧𑀘𑁆𑀘𑀼𑀕𑁆𑀕𑀫𑀦𑀸𑀦𑀼𑀕𑁆𑀕𑀫𑀦𑀯𑀲𑁂𑀦 𑀓𑀭𑁄𑀦𑁆𑀢𑀺. 𑀧𑀜𑁆𑀘𑀫𑀻𑀉𑀧𑁄𑀲𑀣𑀁 𑀧𑀘𑁆𑀘𑀼𑀕𑁆𑀕𑀘𑁆𑀙𑀦𑁆𑀢𑀸 𑀘𑀢𑀼𑀢𑁆𑀣𑀺𑀬𑀁 𑀉𑀧𑁄𑀲𑀣𑀺𑀓𑀸 𑀳𑁄𑀦𑁆𑀢𑀺, 𑀅𑀦𑀼𑀕𑀘𑁆𑀙𑀦𑁆𑀢𑀸 𑀙𑀝𑁆𑀞𑀺𑀬𑀁. 𑀅𑀝𑁆𑀞𑀫𑀻𑀉𑀧𑁄𑀲𑀣𑀁 𑀧𑀘𑁆𑀘𑀼𑀕𑁆𑀕𑀘𑁆𑀙𑀦𑁆𑀢𑀸 𑀲𑀢𑁆𑀢𑀫𑀺𑀬𑀁, 𑀅𑀦𑀼𑀕𑀘𑁆𑀙𑀦𑁆𑀢𑀸 𑀦𑀯𑀫𑀺𑀬𑀁. 𑀘𑀸𑀢𑀼𑀤𑁆𑀤𑀲𑀺𑀁 𑀧𑀘𑁆𑀘𑀼𑀕𑁆𑀕𑀘𑁆𑀙𑀦𑁆𑀢𑀸 𑀢𑁂𑀭𑀲𑀺𑀬𑀁, 𑀧𑀦𑁆𑀦𑀭𑀲𑀻𑀉𑀧𑁄𑀲𑀣𑀁 𑀅𑀦𑀼𑀕𑀘𑁆𑀙𑀦𑁆𑀢𑀸 𑀧𑀸𑀝𑀺𑀧𑀤𑁂 𑀉𑀧𑁄𑀲𑀣𑀺𑀓𑀸 𑀳𑁄𑀦𑁆𑀢𑀺. 𑀧𑀼𑀜𑁆𑀜𑀸𑀦𑀺 𑀓𑀭𑁄𑀦𑁆𑀢𑀻𑀢𑀺 𑀲𑀭𑀡𑀕𑀫𑀦𑀦𑀺𑀘𑁆𑀘𑀲𑀻𑀮𑀧𑀼𑀧𑁆𑀨𑀧𑀽𑀚𑀸𑀥𑀫𑁆𑀫𑀲𑁆𑀲𑀯𑀦𑀧𑀤𑀻𑀧𑀲𑀳𑀲𑁆𑀲𑀆𑀭𑁄𑀧𑀦𑀯𑀺𑀳𑀸𑀭𑀓𑀭𑀡𑀸𑀤𑀻𑀦𑀺 𑀦𑀸𑀦𑀧𑁆𑀧𑀓𑀸𑀭𑀸𑀦𑀺 𑀧𑀼𑀜𑁆𑀜𑀸𑀦𑀺 𑀓𑀭𑁄𑀦𑁆𑀢𑀺. 𑀢𑁂 𑀏𑀯𑀁 𑀅𑀦𑀼𑀯𑀺𑀘𑀭𑀺𑀢𑁆𑀯𑀸 𑀧𑀼𑀜𑁆𑀜𑀓𑀫𑁆𑀫𑀓𑀸𑀭𑀓𑀸𑀦𑀁 𑀦𑀸𑀫𑀕𑁄𑀢𑁆𑀢𑀸𑀦𑀺 𑀲𑁄𑀯𑀡𑁆𑀡𑀫𑀬𑁂 𑀧𑀝𑁆𑀝𑁂 𑀮𑀺𑀔𑀺𑀢𑁆𑀯𑀸 𑀆𑀳𑀭𑀺𑀢𑁆𑀯𑀸 𑀘𑀢𑀼𑀦𑁆𑀦𑀁 𑀫𑀳𑀸𑀭𑀸𑀚𑀸𑀦𑀁 𑀤𑁂𑀦𑁆𑀢𑀺. 𑀧𑀼𑀢𑁆𑀢𑀸 𑀇𑀫𑀁 𑀮𑁄𑀓𑀁 𑀅𑀦𑀼𑀯𑀺𑀘𑀭𑀦𑁆𑀢𑀻𑀢𑀺 𑀘𑀢𑀽𑀳𑀺 𑀫𑀳𑀸𑀭𑀸𑀚𑁂𑀳𑀺 𑀧𑀼𑀭𑀺𑀫𑀦𑀬𑁂𑀦𑁂𑀯 𑀧𑀳𑀺𑀢𑀢𑁆𑀢𑀸 𑀅𑀦𑀼𑀯𑀺𑀘𑀭𑀦𑁆𑀢𑀺. 𑀢𑀤𑀳𑀽𑀢𑀺 𑀢𑀁𑀤𑀺𑀯𑀲𑀁. 𑀉𑀧𑁄𑀲𑀣𑁂𑀢𑀺 𑀉𑀧𑁄𑀲𑀣𑀤𑀺𑀯𑀲𑁂.

𑀲𑀘𑁂, 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀓𑀸 𑀳𑁄𑀦𑁆𑀢𑀻𑀢𑀺 𑀘𑀢𑀼𑀦𑁆𑀦𑀁 𑀫𑀳𑀸𑀭𑀸𑀚𑀸𑀦𑀁 𑀅𑀫𑀘𑁆𑀘𑀸 𑀧𑀸𑀭𑀺𑀲𑀚𑁆𑀚𑀸 𑀢𑀸 𑀢𑀸 𑀕𑀸𑀫𑀦𑀺𑀕𑀫𑀭𑀸𑀚𑀥𑀸𑀦𑀺𑀬𑁄 𑀉𑀧𑀲𑀗𑁆𑀓𑀫𑀦𑁆𑀢𑀺, 𑀢𑀢𑁄 𑀢𑀁 𑀉𑀧𑀦𑀺𑀲𑁆𑀲𑀸𑀬 𑀅𑀥𑀺𑀯𑀢𑁆𑀣𑀸 𑀤𑁂𑀯𑀢𑀸 ‘‘𑀫𑀳𑀸𑀭𑀸𑀚𑀸𑀦𑀁 𑀅𑀫𑀘𑁆𑀘𑀸 𑀆𑀕𑀢𑀸’’𑀢𑀺 𑀧𑀡𑁆𑀡𑀸𑀓𑀸𑀭𑀁 𑀕𑀳𑁂𑀢𑁆𑀯𑀸 𑀢𑁂𑀲𑀁 𑀲𑀦𑁆𑀢𑀺𑀓𑀁 𑀕𑀘𑁆𑀙𑀦𑁆𑀢𑀺. 𑀢𑁂 𑀧𑀡𑁆𑀡𑀸𑀓𑀸𑀭𑀁 𑀕𑀳𑁂𑀢𑁆𑀯𑀸 ‘‘𑀓𑀘𑁆𑀘𑀺 𑀦𑀼 𑀔𑁄 𑀫𑀸𑀭𑀺𑀲𑀸 𑀩𑀳𑀽 𑀫𑀦𑀼𑀲𑁆𑀲𑀸 𑀫𑀢𑁆𑀢𑁂𑀬𑁆𑀬𑀸’’𑀢𑀺 𑀯𑀼𑀢𑁆𑀢𑀦𑀬𑁂𑀦 𑀫𑀦𑀼𑀲𑁆𑀲𑀸𑀦𑀁 𑀧𑀼𑀜𑁆𑀜𑀧𑀝𑀺𑀧𑀢𑁆𑀢𑀺𑀁 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀆𑀫, 𑀫𑀸𑀭𑀺𑀲, 𑀇𑀫𑀲𑁆𑀫𑀺𑀁 𑀕𑀸𑀫𑁂 𑀅𑀲𑀼𑀓𑁄 𑀘 𑀅𑀲𑀼𑀓𑁄 𑀘 𑀧𑀼𑀜𑁆𑀜𑀸𑀦𑀺 𑀓𑀭𑁄𑀦𑁆𑀢𑀻’’𑀢𑀺 𑀯𑀼𑀢𑁆𑀢𑁂 𑀢𑁂𑀲𑀁 𑀦𑀸𑀫𑀕𑁄𑀢𑁆𑀢𑀁 𑀮𑀺𑀔𑀺𑀢𑁆𑀯𑀸 𑀅𑀜𑁆𑀜𑀢𑁆𑀣 𑀕𑀘𑁆𑀙𑀦𑁆𑀢𑀺. 𑀅𑀣 𑀘𑀸𑀢𑀼𑀤𑁆𑀤𑀲𑀺𑀬𑀁 𑀘𑀢𑀼𑀦𑁆𑀦𑀁 𑀫𑀳𑀸𑀭𑀸𑀚𑀸𑀦𑀁 𑀧𑀼𑀢𑁆𑀢𑀸𑀧𑀺 𑀢𑀫𑁂𑀯 𑀲𑀼𑀯𑀡𑁆𑀡𑀧𑀝𑁆𑀝𑀁 𑀕𑀳𑁂𑀢𑁆𑀯𑀸 𑀢𑁂𑀦𑁂𑀯 𑀦𑀬𑁂𑀦 𑀅𑀦𑀼𑀯𑀺𑀘𑀭𑀦𑁆𑀢𑀸 𑀦𑀸𑀫𑀕𑁄𑀢𑁆𑀢𑀸𑀦𑀺 𑀮𑀺𑀔𑀦𑁆𑀢𑀺. 𑀢𑀤𑀳𑀼𑀧𑁄𑀲𑀣𑁂 𑀧𑀦𑁆𑀦𑀭𑀲𑁂 𑀘𑀢𑁆𑀢𑀸𑀭𑁄𑀧𑀺 𑀫𑀳𑀸𑀭𑀸𑀚𑀸𑀦𑁄 𑀢𑁂𑀦𑁂𑀯 𑀦𑀬𑁂𑀦 𑀢𑀲𑁆𑀫𑀺𑀁𑀬𑁂𑀯 𑀲𑀼𑀯𑀡𑁆𑀡𑀧𑀝𑁆𑀝𑁂 𑀦𑀸𑀫𑀕𑁄𑀢𑁆𑀢𑀸𑀦𑀺 𑀮𑀺𑀔𑀦𑁆𑀢𑀺. 𑀢𑁂 𑀲𑀼𑀯𑀡𑁆𑀡𑀧𑀝𑁆𑀝𑀧𑀭𑀺𑀫𑀸𑀡𑁂𑀦𑁂𑀯 𑁋 ‘‘𑀇𑀫𑀲𑁆𑀫𑀺𑀁 𑀓𑀸𑀮𑁂 𑀫𑀦𑀼𑀲𑁆𑀲𑀸 𑀅𑀧𑁆𑀧𑀓𑀸, 𑀇𑀫𑀲𑁆𑀫𑀺𑀁 𑀓𑀸𑀮𑁂 𑀩𑀳𑀼𑀓𑀸’’𑀢𑀺 𑀚𑀸𑀦𑀦𑁆𑀢𑀺. 𑀢𑀁 𑀲𑀦𑁆𑀥𑀸𑀬 ‘‘𑀲𑀘𑁂, 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀓𑀸 𑀳𑁄𑀦𑁆𑀢𑀺 𑀫𑀦𑀼𑀲𑁆𑀲𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀤𑁂𑀯𑀸𑀦𑀁 𑀢𑀸𑀯𑀢𑀺𑀁𑀲𑀸𑀦𑀦𑁆𑀢𑀺 𑀧𑀞𑀫𑀁 𑀅𑀪𑀺𑀦𑀺𑀩𑁆𑀩𑀢𑁆𑀢𑁂 𑀢𑁂𑀢𑁆𑀢𑀺𑀁𑀲 𑀤𑁂𑀯𑀧𑀼𑀢𑁆𑀢𑁂 𑀉𑀧𑀸𑀤𑀸𑀬 𑀏𑀯𑀁𑀮𑀤𑁆𑀥𑀦𑀸𑀫𑀸𑀦𑀁. 𑀢𑁂𑀲𑀁 𑀧𑀦 𑀉𑀧𑁆𑀧𑀢𑁆𑀢𑀺𑀓𑀣𑀸 𑀤𑀻𑀖𑀦𑀺𑀓𑀸𑀬𑁂 𑀲𑀓𑁆𑀓𑀧𑀜𑁆𑀳𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀯𑀺𑀢𑁆𑀣𑀸𑀭𑀺𑀢𑀸. 𑀢𑁂𑀦𑀸𑀢𑀺 𑀢𑁂𑀦 𑀆𑀭𑁄𑀘𑀦𑁂𑀦, 𑀢𑁂𑀦 𑀯𑀸 𑀧𑀼𑀜𑁆𑀜𑀓𑀸𑀭𑀓𑀸𑀦𑀁 𑀅𑀧𑁆𑀧𑀓𑀪𑀸𑀯𑁂𑀦. 𑀤𑀺𑀩𑁆𑀩𑀸 𑀯𑀢, 𑀪𑁄, 𑀓𑀸𑀬𑀸 𑀧𑀭𑀺𑀳𑀸𑀬𑀺𑀲𑁆𑀲𑀦𑁆𑀢𑀻𑀢𑀺 𑀦𑀯𑀦𑀯𑀸𑀦𑀁 𑀤𑁂𑀯𑀧𑀼𑀢𑁆𑀢𑀸𑀦𑀁 𑀅𑀧𑀸𑀢𑀼𑀪𑀸𑀯𑁂𑀦 𑀤𑁂𑀯𑀓𑀸𑀬𑀸 𑀧𑀭𑀺𑀳𑀸𑀬𑀺𑀲𑁆𑀲𑀦𑁆𑀢𑀺, 𑀭𑀫𑀡𑀻𑀬𑀁 𑀤𑀲𑀬𑁄𑀚𑀦𑀲𑀳𑀲𑁆𑀲𑀁 𑀤𑁂𑀯𑀦𑀕𑀭𑀁 𑀲𑀼𑀜𑁆𑀜𑀁 𑀪𑀯𑀺𑀲𑁆𑀲𑀢𑀺. 𑀧𑀭𑀺𑀧𑀽𑀭𑀺𑀲𑁆𑀲𑀦𑁆𑀢𑀺 𑀅𑀲𑀼𑀭𑀓𑀸𑀬𑀸𑀢𑀺 𑀘𑀢𑁆𑀢𑀸𑀭𑁄 𑀅𑀧𑀸𑀬𑀸 𑀧𑀭𑀺𑀧𑀽𑀭𑀺𑀲𑁆𑀲𑀦𑁆𑀢𑀺. 𑀇𑀫𑀺𑀦𑀸 ‘‘𑀫𑀬𑀁 𑀧𑀭𑀺𑀧𑀼𑀡𑁆𑀡𑁂 𑀤𑁂𑀯𑀦𑀕𑀭𑁂 𑀤𑁂𑀯𑀲𑀗𑁆𑀖𑀫𑀚𑁆𑀛𑁂 𑀦𑀓𑁆𑀔𑀢𑁆𑀢𑀁 𑀓𑀻𑀴𑀺𑀢𑀼𑀁 𑀦 𑀮𑀪𑀺𑀲𑁆𑀲𑀸𑀫𑀸’’𑀢𑀺 𑀅𑀦𑀢𑁆𑀢𑀫𑀦𑀸 𑀳𑁄𑀦𑁆𑀢𑀺. 𑀲𑀼𑀓𑁆𑀓𑀧𑀓𑁆𑀔𑁂𑀧𑀺 𑀇𑀫𑀺𑀦𑀸𑀯 𑀉𑀧𑀸𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀪𑀽𑀢𑀧𑀼𑀩𑁆𑀩𑀁, 𑀪𑀺𑀓𑁆𑀔𑀯𑁂, 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄𑀢𑀺 𑀅𑀢𑁆𑀢𑀦𑁄 𑀲𑀓𑁆𑀓𑀤𑁂𑀯𑀭𑀸𑀚𑀓𑀸𑀮𑀁 𑀲𑀦𑁆𑀥𑀸𑀬 𑀓𑀣𑁂𑀢𑀺. 𑀏𑀓𑀲𑁆𑀲 𑀯𑀸 𑀲𑀓𑁆𑀓𑀲𑁆𑀲 𑀅𑀚𑁆𑀛𑀸𑀲𑀬𑀁 𑀕𑀳𑁂𑀢𑁆𑀯𑀸 𑀓𑀣𑁂𑀢𑀻𑀢𑀺 𑀯𑀼𑀢𑁆𑀢𑀁. 𑀅𑀦𑀼𑀦𑀬𑀫𑀸𑀦𑁄𑀢𑀺 𑀅𑀦𑀼𑀩𑁄𑀥𑀬𑀫𑀸𑀦𑁄. 𑀢𑀸𑀬𑀁 𑀯𑁂𑀮𑀸𑀬𑀦𑁆𑀢𑀺 𑀢𑀲𑁆𑀫𑀺𑀁 𑀓𑀸𑀮𑁂.

𑀧𑀸𑀝𑀺𑀳𑀸𑀭𑀺𑀬𑀧𑀓𑁆𑀔𑀜𑁆𑀘𑀸𑀢𑀺 𑀏𑀢𑁆𑀣 𑀧𑀸𑀝𑀺𑀳𑀸𑀭𑀺𑀬𑀧𑀓𑁆𑀔𑁄 𑀦𑀸𑀫 𑀅𑀦𑁆𑀢𑁄𑀯𑀲𑁆𑀲𑁂 𑀢𑁂𑀫𑀸𑀲𑀁 𑀦𑀺𑀩𑀤𑁆𑀥𑀼𑀧𑁄𑀲𑀣𑁄, 𑀢𑀁 𑀅𑀲𑀓𑁆𑀓𑁄𑀦𑁆𑀢𑀲𑁆𑀲 𑀤𑁆𑀯𑀺𑀦𑁆𑀦𑀁 𑀧𑀯𑀸𑀭𑀡𑀸𑀦𑀁 𑀅𑀦𑁆𑀢𑀭𑁂 𑀏𑀓𑀫𑀸𑀲𑀁 𑀦𑀺𑀩𑀤𑁆𑀥𑀼𑀧𑁄𑀲𑀣𑁄, 𑀢𑀫𑁆𑀧𑀺 𑀅𑀲𑀓𑁆𑀓𑁄𑀦𑁆𑀢𑀲𑁆𑀲 𑀧𑀞𑀫𑀧𑀯𑀸𑀭𑀡𑀢𑁄 𑀧𑀝𑁆𑀞𑀸𑀬 𑀏𑀓𑁄 𑀅𑀤𑁆𑀥𑀫𑀸𑀲𑁄 𑀧𑀸𑀝𑀺𑀳𑀸𑀭𑀺𑀬𑀧𑀓𑁆𑀔𑁄𑀬𑁂𑀯 𑀦𑀸𑀫. 𑀅𑀝𑁆𑀞𑀗𑁆𑀕𑀲𑀼𑀲𑀫𑀸𑀕𑀢𑀦𑁆𑀢𑀺 𑀅𑀝𑁆𑀞𑀳𑀺 𑀕𑀼𑀡𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁. 𑀬𑁄𑀧𑀺𑀲𑁆𑀲 𑀫𑀸𑀤𑀺𑀲𑁄 𑀦𑀭𑁄𑀢𑀺 𑀬𑁄𑀧𑀺 𑀲𑀢𑁆𑀢𑁄 𑀫𑀸𑀤𑀺𑀲𑁄 𑀪𑀯𑁂𑀬𑁆𑀬. 𑀲𑀓𑁆𑀓𑁄𑀧𑀺 𑀓𑀺𑀭 𑀯𑀼𑀢𑁆𑀢𑀧𑁆𑀧𑀓𑀸𑀭𑀲𑁆𑀲 𑀉𑀧𑁄𑀲𑀣𑀓𑀫𑁆𑀫𑀲𑁆𑀲 𑀕𑀼𑀡𑀁 𑀚𑀸𑀦𑀺𑀢𑁆𑀯𑀸 𑀤𑁆𑀯𑁂 𑀤𑁂𑀯𑀮𑁄𑀓𑀲𑀫𑁆𑀧𑀢𑁆𑀢𑀺𑀬𑁄 𑀧𑀳𑀸𑀬 𑀫𑀸𑀲𑀲𑁆𑀲 𑀅𑀝𑁆𑀞 𑀯𑀸𑀭𑁂 𑀉𑀧𑁄𑀲𑀣𑀁 𑀉𑀧𑀯𑀲𑀢𑀺. 𑀢𑀲𑁆𑀫𑀸 𑀏𑀯𑀫𑀸𑀳. 𑀅𑀧𑀭𑁄 𑀦𑀬𑁄 𑁋 𑀬𑁄𑀧𑀺𑀲𑁆𑀲 𑀫𑀸𑀤𑀺𑀲𑁄 𑀦𑀭𑁄𑀢𑀺 𑀬𑁄𑀧𑀺 𑀲𑀢𑁆𑀢𑁄 𑀫𑀸𑀤𑀺𑀲𑁄 𑀅𑀲𑁆𑀲, 𑀫𑀬𑀸 𑀧𑀢𑁆𑀢𑀁 𑀲𑀫𑁆𑀧𑀢𑁆𑀢𑀺𑀁 𑀧𑀸𑀧𑀼𑀡𑀺𑀢𑀼𑀁 𑀇𑀘𑁆𑀙𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀲𑀓𑁆𑀓𑀸 𑀳𑀺 𑀏𑀯𑀭𑀽𑀧𑁂𑀦 𑀉𑀧𑁄𑀲𑀣𑀓𑀫𑁆𑀫𑁂𑀦 𑀲𑀓𑁆𑀓𑀲𑀫𑁆𑀧𑀢𑁆𑀢𑀺𑀁 𑀧𑀸𑀧𑀼𑀡𑀺𑀢𑀼𑀦𑁆𑀢𑀺 𑀅𑀬𑀫𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄.

𑀯𑀼𑀲𑀺𑀢𑀯𑀸𑀢𑀺 𑀯𑀼𑀢𑁆𑀣𑀯𑀸𑀲𑁄. 𑀓𑀢𑀓𑀭𑀡𑀻𑀬𑁄𑀢𑀺 𑀘𑀢𑀽𑀳𑀺 𑀫𑀕𑁆𑀕𑁂𑀳𑀺 𑀓𑀢𑁆𑀢𑀩𑁆𑀩𑀓𑀺𑀘𑁆𑀘𑀁 𑀓𑀢𑁆𑀯𑀸 𑀞𑀺𑀢𑁄. 𑀑𑀳𑀺𑀢𑀪𑀸𑀭𑁄𑀢𑀺 𑀔𑀦𑁆𑀥𑀪𑀸𑀭𑀓𑀺𑀮𑁂𑀲𑀪𑀸𑀭𑀅𑀪𑀺𑀲𑀗𑁆𑀔𑀸𑀭𑀪𑀸𑀭𑁂 𑀑𑀢𑀸𑀭𑁂𑀢𑁆𑀯𑀸 𑀞𑀺𑀢𑁄. 𑀅𑀦𑀼𑀧𑁆𑀧𑀢𑁆𑀢𑀲𑀤𑀢𑁆𑀣𑁄𑀢𑀺 𑀲𑀤𑀢𑁆𑀣𑁄 𑀯𑀼𑀘𑁆𑀘𑀢𑀺 𑀅𑀭𑀳𑀢𑁆𑀢𑀁, 𑀢𑀁 𑀅𑀦𑀼𑀧𑁆𑀧𑀢𑁆𑀢𑁄. 𑀧𑀭𑀺𑀓𑁆𑀔𑀻𑀡𑀪𑀯𑀲𑀁𑀬𑁄𑀚𑀦𑁄𑀢𑀺 𑀬𑁂𑀦 𑀲𑀁𑀬𑁄𑀚𑀦𑁂𑀦 𑀩𑀤𑁆𑀥𑁄 𑀪𑀯𑁂𑀲𑀼 𑀆𑀓𑀟𑁆𑀠𑀻𑀬𑀢𑀺, 𑀢𑀲𑁆𑀲 𑀔𑀻𑀡𑀢𑁆𑀢𑀸 𑀧𑀭𑀺𑀓𑁆𑀔𑀻𑀡𑀪𑀯𑀲𑀁𑀬𑁄𑀚𑀦𑁄. 𑀲𑀫𑁆𑀫𑀤𑀜𑁆𑀜𑀸 𑀯𑀺𑀫𑀼𑀢𑁆𑀢𑁄𑀢𑀺 𑀳𑁂𑀢𑀼𑀦𑀸 𑀦𑀬𑁂𑀦 𑀓𑀸𑀭𑀡𑁂𑀦 𑀚𑀸𑀦𑀺𑀢𑁆𑀯𑀸 𑀯𑀺𑀫𑀼𑀢𑁆𑀢𑁄. 𑀓𑀮𑁆𑀮𑀁 𑀯𑀘𑀦𑀸𑀬𑀸𑀢𑀺 𑀬𑀼𑀢𑁆𑀢𑀁 𑀯𑀢𑁆𑀢𑀼𑀁.

𑀬𑁄𑀧𑀺𑀲𑁆𑀲 𑀫𑀸𑀤𑀺𑀲𑁄 𑀦𑀭𑁄𑀢𑀺 𑀬𑁄𑀧𑀺 𑀫𑀸𑀤𑀺𑀲𑁄 𑀔𑀻𑀡𑀸𑀲𑀯𑁄 𑀅𑀲𑁆𑀲, 𑀲𑁄𑀧𑀺 𑀏𑀯𑀭𑀽𑀧𑀁 𑀉𑀧𑁄𑀲𑀣𑀁 𑀉𑀧𑀯𑀲𑁂𑀬𑁆𑀬𑀸𑀢𑀺 𑀉𑀧𑁄𑀲𑀣𑀓𑀫𑁆𑀫𑀲𑁆𑀲 𑀕𑀼𑀡𑀁 𑀚𑀸𑀦𑀦𑁆𑀢𑁄 𑀏𑀯𑀁 𑀯𑀤𑁂𑀬𑁆𑀬. 𑀅𑀧𑀭𑁄 𑀦𑀬𑁄 𑀬𑁄𑀧𑀺𑀲𑁆𑀲 𑀫𑀸𑀤𑀺𑀲𑁄 𑀦𑀭𑁄𑀢𑀺 𑀬𑁄𑀧𑀺 𑀲𑀢𑁆𑀢𑁄 𑀫𑀸𑀤𑀺𑀲𑁄 𑀅𑀲𑁆𑀲, 𑀫𑀬𑀸 𑀧𑀢𑁆𑀢𑀁 𑀲𑀫𑁆𑀧𑀢𑁆𑀢𑀺𑀁 𑀧𑀸𑀧𑀼𑀡𑀺𑀢𑀼𑀁 𑀇𑀘𑁆𑀙𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀲𑀓𑁆𑀓𑀸 𑀳𑀺 𑀏𑀯𑀭𑀽𑀧𑁂𑀦 𑀉𑀧𑁄𑀲𑀣𑀓𑀫𑁆𑀫𑁂𑀦 𑀔𑀻𑀡𑀸𑀲𑀯𑀲𑀫𑁆𑀧𑀢𑁆𑀢𑀺𑀁 𑀧𑀸𑀧𑀼𑀡𑀺𑀢𑀼𑀦𑁆𑀢𑀺 𑀅𑀬𑀫𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄. 𑀅𑀝𑁆𑀞𑀫𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑁯. 𑀲𑀼𑀔𑀼𑀫𑀸𑀮𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁯. 𑀦𑀯𑀫𑁂 𑀲𑀼𑀔𑀼𑀫𑀸𑀮𑁄𑀢𑀺 𑀦𑀺𑀤𑁆𑀤𑀼𑀓𑁆𑀔𑁄. 𑀧𑀭𑀫𑀲𑀼𑀔𑀼𑀫𑀸𑀮𑁄𑀢𑀺 𑀧𑀭𑀫𑀦𑀺𑀤𑁆𑀤𑀼𑀓𑁆𑀔𑁄. 𑀅𑀘𑁆𑀘𑀦𑁆𑀢𑀲𑀼𑀔𑀼𑀫𑀸𑀮𑁄𑀢𑀺 𑀲𑀢𑀢𑀦𑀺𑀤𑁆𑀤𑀼𑀓𑁆𑀔𑁄. 𑀇𑀫𑀁 𑀪𑀕𑀯𑀸 𑀓𑀧𑀺𑀮𑀧𑀼𑀭𑁂 𑀦𑀺𑀩𑁆𑀩𑀢𑁆𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀦𑀺𑀤𑁆𑀤𑀼𑀓𑁆𑀔𑀪𑀸𑀯𑀁 𑀕𑀳𑁂𑀢𑁆𑀯𑀸 𑀆𑀳, 𑀘𑀭𑀺𑀬𑀓𑀸𑀮𑁂 𑀧𑀦 𑀢𑁂𑀦 𑀅𑀦𑀼𑀪𑀽𑀢𑀤𑀼𑀓𑁆𑀔𑀲𑁆𑀲 𑀅𑀦𑁆𑀢𑁄 𑀦𑀢𑁆𑀣𑀻𑀢𑀺. 𑀏𑀓𑀢𑁆𑀣𑀸𑀢𑀺 𑀏𑀓𑀺𑀲𑁆𑀲𑀸 𑀧𑁄𑀓𑁆𑀔𑀭𑀡𑀺𑀬𑀸. 𑀉𑀧𑁆𑀧𑀮𑀁 𑀯𑀧𑁆𑀧𑀢𑀻𑀢𑀺 𑀉𑀧𑁆𑀧𑀮𑀁 𑀭𑁄𑀧𑁂𑀢𑀺. 𑀲𑀸 𑀦𑀻𑀮𑀼𑀧𑁆𑀧𑀮𑀯𑀦𑀲𑀜𑁆𑀙𑀦𑁆𑀦𑀸 𑀳𑁄𑀢𑀺. 𑀧𑀤𑀼𑀫𑀦𑁆𑀢𑀺 𑀧𑀡𑁆𑀟𑀭𑀧𑀤𑀼𑀫𑀁. 𑀧𑀼𑀡𑁆𑀟𑀭𑀻𑀓𑀦𑁆𑀢𑀺 𑀭𑀢𑁆𑀢𑀧𑀤𑀼𑀫𑀁. 𑀏𑀯𑀁 𑀇𑀢𑀭𑀸𑀧𑀺 𑀤𑁆𑀯𑁂 𑀧𑀤𑀼𑀫𑀧𑀼𑀡𑁆𑀟𑀭𑀻𑀓𑀯𑀦𑁂𑀳𑀺 𑀲𑀜𑁆𑀙𑀦𑁆𑀦𑀸 𑀳𑁄𑀦𑁆𑀢𑀺. 𑀩𑁄𑀥𑀺𑀲𑀢𑁆𑀢𑀲𑁆𑀲 𑀓𑀺𑀭 𑀲𑀢𑁆𑀢𑀝𑁆𑀞𑀯𑀲𑁆𑀲𑀺𑀓𑀓𑀸𑀮𑁂 𑀭𑀸𑀚𑀸 𑀅𑀫𑀘𑁆𑀘𑁂 𑀧𑀼𑀘𑁆𑀙𑀺 𑁋 ‘‘𑀢𑀭𑀼𑀡𑀤𑀸𑀭𑀓𑀸 𑀓𑀢𑀭𑀓𑀻𑀴𑀺𑀓𑀁 𑀧𑀺𑀬𑀸𑀬𑀦𑁆𑀢𑀻’’𑀢𑀺? 𑀉𑀤𑀓𑀓𑀻𑀴𑀺𑀓𑀁 𑀤𑁂𑀯𑀸𑀢𑀺. 𑀢𑀢𑁄 𑀭𑀸𑀚𑀸 𑀓𑀼𑀤𑁆𑀤𑀸𑀮𑀓𑀫𑁆𑀫𑀓𑀸𑀭𑀓𑁂 𑀲𑀦𑁆𑀦𑀺𑀧𑀸𑀢𑁂𑀢𑁆𑀯𑀸 𑀧𑁄𑀓𑁆𑀔𑀭𑀡𑀺𑀝𑁆𑀞𑀸𑀦𑀸𑀦𑀺 𑀕𑀡𑁆𑀳𑀸𑀧𑁂𑀲𑀺. 𑀅𑀣 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 𑀆𑀯𑀚𑁆𑀚𑁂𑀦𑁆𑀢𑁄 𑀢𑀁 𑀧𑀯𑀢𑁆𑀢𑀺𑀁 𑀜𑀢𑁆𑀯𑀸 𑁋 ‘‘𑀦 𑀬𑀼𑀢𑁆𑀢𑁄 𑀫𑀳𑀸𑀲𑀢𑁆𑀢𑀲𑁆𑀲 𑀫𑀸𑀦𑀼𑀲𑀓𑀧𑀭𑀺𑀪𑁄𑀕𑁄, 𑀤𑀺𑀩𑁆𑀩𑀧𑀭𑀺𑀪𑁄𑀕𑁄 𑀬𑀼𑀢𑁆𑀢𑁄’’𑀢𑀺 𑀯𑀺𑀲𑁆𑀲𑀓𑀫𑁆𑀫𑀁 𑀆𑀫𑀦𑁆𑀢𑁂𑀢𑁆𑀯𑀸 𑁋 ‘‘𑀕𑀘𑁆𑀙, 𑀢𑀸𑀢, 𑀫𑀳𑀸𑀲𑀢𑁆𑀢𑀲𑁆𑀲 𑀓𑀻𑀴𑀸𑀪𑀽𑀫𑀺𑀬𑀁 𑀧𑁄𑀓𑁆𑀔𑀭𑀡𑀺𑀬𑁄 𑀫𑀸𑀧𑁂𑀳𑀻’’𑀢𑀺 𑀆𑀳. 𑀓𑀻𑀤𑀺𑀲𑀸 𑀳𑁄𑀦𑁆𑀢𑀼, 𑀤𑁂𑀯𑀸𑀢𑀺? 𑀅𑀧𑀕𑀢𑀓𑀮𑀮𑀓𑀤𑁆𑀤𑀫𑀸 𑀳𑁄𑀦𑁆𑀢𑀼 𑀯𑀺𑀧𑁆𑀧𑀓𑀺𑀡𑁆𑀡𑀫𑀡𑀺𑀫𑀼𑀢𑁆𑀢𑀧𑀯𑀸𑀴𑀺𑀓𑀸 𑀲𑀢𑁆𑀢𑀭𑀢𑀦𑀫𑀬𑀧𑀸𑀓𑀸𑀭𑀧𑀭𑀺𑀓𑁆𑀔𑀺𑀢𑁆𑀢𑀸 𑀧𑀯𑀸𑀴𑀫𑀬𑀉𑀡𑁆𑀳𑀻𑀲𑁂𑀳𑀺 𑀫𑀡𑀺𑀫𑀬𑀲𑁄𑀧𑀸𑀦𑀩𑀸𑀳𑀼𑀓𑁂𑀳𑀺 𑀲𑀼𑀯𑀡𑁆𑀡𑀭𑀚𑀢𑀫𑀡𑀺𑀫𑀬𑀨𑀮𑀓𑁂𑀳𑀺 𑀲𑁄𑀧𑀸𑀦𑁂𑀳𑀺 𑀲𑀫𑀦𑁆𑀦𑀸𑀕𑀢𑀸. 𑀲𑀼𑀯𑀡𑁆𑀡𑀭𑀚𑀢𑀫𑀡𑀺𑀧𑀯𑀸𑀴𑀫𑀬𑀸 𑀘𑁂𑀢𑁆𑀣 𑀦𑀸𑀯𑀸 𑀳𑁄𑀦𑁆𑀢𑀼, 𑀲𑀼𑀯𑀡𑁆𑀡𑀦𑀸𑀯𑀸𑀬 𑀭𑀚𑀢𑀧𑀮𑁆𑀮𑀗𑁆𑀓𑁄 𑀳𑁄𑀢𑀼, 𑀭𑀚𑀢𑀦𑀸𑀯𑀸𑀬 𑀲𑀼𑀯𑀡𑁆𑀡𑀧𑀮𑁆𑀮𑀗𑁆𑀓𑁄, 𑀫𑀡𑀺𑀦𑀸𑀯𑀸𑀬 𑀧𑀯𑀸𑀴𑀧𑀮𑁆𑀮𑀗𑁆𑀓𑁄, 𑀧𑀯𑀸𑀴𑀦𑀸𑀯𑀸𑀬 𑀫𑀡𑀺𑀧𑀮𑁆𑀮𑀗𑁆𑀓𑁄, 𑀲𑀼𑀯𑀡𑁆𑀡𑀭𑀚𑀢𑀫𑀡𑀺𑀧𑀯𑀸𑀴𑀫𑀬𑀸𑀯 𑀉𑀤𑀓𑀲𑁂𑀘𑀦𑀦𑀸𑀴𑀺𑀓𑀸 𑀳𑁄𑀦𑁆𑀢𑀼, 𑀧𑀜𑁆𑀘𑀯𑀡𑁆𑀡𑁂𑀳𑀺 𑀘 𑀧𑀤𑀼𑀫𑁂𑀳𑀺 𑀲𑀜𑁆𑀙𑀦𑁆𑀦𑀸 𑀳𑁄𑀦𑁆𑀢𑀽𑀢𑀺. ‘‘𑀲𑀸𑀥𑀼, 𑀤𑁂𑀯𑀸’’𑀢𑀺 𑀯𑀺𑀲𑁆𑀲𑀓𑀫𑁆𑀫𑀤𑁂𑀯𑀧𑀼𑀢𑁆𑀢𑁄 𑀲𑀓𑁆𑀓𑀲𑁆𑀲 𑀧𑀝𑀺𑀲𑁆𑀲𑀼𑀢𑁆𑀯𑀸 𑀭𑀢𑁆𑀢𑀺𑀪𑀸𑀕𑁂 𑀑𑀢𑀭𑀺𑀢𑁆𑀯𑀸 𑀭𑀜𑁆𑀜𑁄 𑀕𑀸𑀳𑀸𑀧𑀺𑀢𑀧𑁄𑀓𑁆𑀔𑀭𑀡𑀺𑀝𑁆𑀞𑀸𑀦𑁂𑀲𑀼𑀬𑁂𑀯 𑀢𑁂𑀦𑁂𑀯 𑀦𑀺𑀬𑀸𑀫𑁂𑀦 𑀧𑁄𑀓𑁆𑀔𑀭𑀡𑀺𑀬𑁄 𑀫𑀸𑀧𑁂𑀲𑀺.

𑀦𑀦𑀼 𑀘𑁂𑀢𑀸 𑀅𑀧𑀕𑀢𑀓𑀮𑀮𑀓𑀤𑁆𑀤𑀫𑀸, 𑀓𑀣𑀫𑁂𑀢𑁆𑀣 𑀧𑀤𑀼𑀫𑀸𑀦𑀺 𑀧𑀼𑀧𑁆𑀨𑀺𑀁𑀲𑀽𑀢𑀺? 𑀲𑁄 𑀓𑀺𑀭 𑀢𑀸𑀲𑀼 𑀧𑁄𑀓𑁆𑀔𑀭𑀡𑀻𑀲𑀼 𑀢𑀢𑁆𑀣 𑀢𑀢𑁆𑀣 𑀲𑀼𑀯𑀡𑁆𑀡𑀭𑀚𑀢𑀫𑀡𑀺𑀧𑀯𑀸𑀴𑀫𑀬𑀸 𑀔𑀼𑀤𑁆𑀤𑀓𑀦𑀸𑀯𑀸𑀬𑁄 𑀫𑀸𑀧𑁂𑀢𑁆𑀯𑀸 ‘‘𑀏𑀢𑀸 𑀓𑀮𑀮𑀓𑀤𑁆𑀤𑀫𑀧𑀽𑀭𑀺𑀢𑀸 𑀘 𑀳𑁄𑀦𑁆𑀢𑀼, 𑀧𑀜𑁆𑀘𑀯𑀡𑁆𑀡𑀸𑀦𑀺 𑀘𑁂𑀢𑁆𑀣 𑀧𑀤𑀼𑀫𑀸𑀦𑀺 𑀧𑀼𑀧𑁆𑀨𑀦𑁆𑀢𑀽’’𑀢𑀺 𑀅𑀥𑀺𑀝𑁆𑀞𑀸𑀲𑀺. 𑀏𑀯𑀁 𑀧𑀜𑁆𑀘𑀯𑀡𑁆𑀡𑀸𑀦𑀺 𑀧𑀤𑀼𑀫𑀸𑀦𑀺 𑀧𑀼𑀧𑁆𑀨𑀺𑀁𑀲𑀼, 𑀭𑁂𑀡𑀼𑀯𑀝𑁆𑀝𑀺𑀬𑁄 𑀉𑀕𑁆𑀕𑀦𑁆𑀢𑁆𑀯𑀸 𑀉𑀤𑀓𑀧𑀺𑀝𑁆𑀞𑀁 𑀅𑀚𑁆𑀛𑁄𑀢𑁆𑀣𑀭𑀺𑀢𑁆𑀯𑀸 𑀯𑀺𑀘𑀭𑀦𑁆𑀢𑀺. 𑀧𑀜𑁆𑀘𑀯𑀺𑀥𑀸 𑀪𑀫𑀭𑀕𑀡𑀸 𑀉𑀧𑀓𑀽𑀚𑀦𑁆𑀢𑀸 𑀯𑀺𑀘𑀭𑀦𑁆𑀢𑀺. 𑀏𑀯𑀁 𑀢𑀸 𑀫𑀸𑀧𑁂𑀢𑁆𑀯𑀸 𑀯𑀺𑀲𑁆𑀲𑀓𑀫𑁆𑀫𑁄 𑀤𑁂𑀯𑀧𑀼𑀭𑀫𑁂𑀯 𑀕𑀢𑁄. 𑀢𑀢𑁄 𑀯𑀺𑀪𑀸𑀢𑀸𑀬 𑀭𑀢𑁆𑀢𑀺𑀬𑀸 𑀫𑀳𑀸𑀚𑀦𑁄 𑀤𑀺𑀲𑁆𑀯𑀸 ‘‘𑀫𑀳𑀸𑀧𑀼𑀭𑀺𑀲𑁆𑀲𑀲𑁆𑀲 𑀫𑀸𑀧𑀺𑀢𑀸 𑀪𑀯𑀺𑀲𑁆𑀲𑀦𑁆𑀢𑀻’’𑀢𑀺 𑀕𑀦𑁆𑀢𑁆𑀯𑀸 𑀭𑀜𑁆𑀜𑁄 𑀆𑀭𑁄𑀘𑁂𑀲𑀺. 𑀭𑀸𑀚𑀸 𑀫𑀳𑀸𑀚𑀦𑀧𑀭𑀺𑀯𑀸𑀭𑁄 𑀕𑀦𑁆𑀢𑁆𑀯𑀸 𑀧𑁄𑀓𑁆𑀔𑀭𑀡𑀺𑀬𑁄 𑀤𑀺𑀲𑁆𑀯𑀸 ‘‘𑀫𑀫 𑀧𑀼𑀢𑁆𑀢𑀲𑁆𑀲 𑀧𑀼𑀜𑁆𑀜𑀺𑀤𑁆𑀥𑀺𑀬𑀸 𑀤𑁂𑀯𑀢𑀸𑀳𑀺 𑀫𑀸𑀧𑀺𑀢𑀸 𑀪𑀯𑀺𑀲𑁆𑀲𑀦𑁆𑀢𑀻’’𑀢𑀺 𑀅𑀢𑁆𑀢𑀫𑀦𑁄 𑀅𑀳𑁄𑀲𑀺. 𑀢𑀢𑁄 𑀧𑀝𑁆𑀞𑀸𑀬 𑀫𑀳𑀸𑀧𑀼𑀭𑀺𑀲𑁄 𑀉𑀤𑀓𑀓𑀻𑀴𑀺𑀓𑀁 𑀅𑀕𑀫𑀸𑀲𑀺.

𑀬𑀸𑀯𑀤𑁂𑀯 𑀫𑀫𑀢𑁆𑀣𑀸𑀬𑀸𑀢𑀺 𑀏𑀢𑁆𑀣 𑀬𑀸𑀯𑀤𑁂𑀯𑀸𑀢𑀺 𑀧𑀬𑁄𑀚𑀦𑀸𑀯𑀥𑀺𑀦𑀺𑀬𑀸𑀫𑀯𑀘𑀦𑀁, 𑀬𑀸𑀯 𑀫𑀫𑁂𑀯 𑀅𑀢𑁆𑀣𑀸𑀬, 𑀦𑀢𑁆𑀣𑁂𑀢𑁆𑀣 𑀅𑀜𑁆𑀜𑀁 𑀓𑀸𑀭𑀡𑀦𑁆𑀢𑀺 𑀅𑀢𑁆𑀣𑁄. 𑀦 𑀔𑁄 𑀧𑀦𑀲𑁆𑀲𑀸𑀳𑀦𑁆𑀢𑀺 𑀦 𑀔𑁄 𑀧𑀦𑀲𑁆𑀲 𑀅𑀳𑀁. 𑀅𑀓𑀸𑀲𑀺𑀓𑀁 𑀘𑀦𑁆𑀤𑀦𑀦𑁆𑀢𑀺 𑀅𑀲𑀡𑁆𑀳𑀁 𑀘𑀦𑁆𑀤𑀦𑀁. 𑀓𑀸𑀲𑀺𑀓𑀁, 𑀪𑀺𑀓𑁆𑀔𑀯𑁂, 𑀲𑀼 𑀫𑁂 𑀢𑀁 𑀯𑁂𑀞𑀦𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀯𑁂𑀞𑀦𑀫𑁆𑀧𑀺 𑀫𑁂 𑀓𑀸𑀲𑀺𑀓𑀁 𑀳𑁄𑀢𑀺. 𑀏𑀢𑁆𑀣 𑀳𑀺 𑀲𑀼𑀇𑀢𑀺 𑀘 𑀢𑀦𑁆𑀢𑀺 𑀘 𑀦𑀺𑀧𑀸𑀢𑀫𑀢𑁆𑀢𑀁, 𑀫𑁂𑀢𑀺 𑀲𑀸𑀫𑀺𑀯𑀘𑀦𑀁. 𑀯𑁂𑀞𑀦𑀫𑁆𑀧𑀺 𑀫𑁂 𑀲𑀡𑁆𑀳𑀫𑁂𑀯 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀓𑀸𑀲𑀺𑀓𑀸 𑀓𑀜𑁆𑀘𑀼𑀓𑀸𑀢𑀺 𑀧𑀸𑀭𑀼𑀧𑀦𑀓𑀜𑁆𑀘𑀼𑀓𑁄𑀧𑀺 𑀲𑀡𑁆𑀳𑀓𑀜𑁆𑀘𑀼𑀓𑁄𑀯. 𑀲𑁂𑀢𑀘𑁆𑀙𑀢𑁆𑀢𑀁 𑀥𑀸𑀭𑀻𑀬𑀢𑀻𑀢𑀺 𑀫𑀸𑀦𑀼𑀲𑀓𑀲𑁂𑀢𑀘𑁆𑀙𑀢𑁆𑀢𑀫𑁆𑀧𑀺 𑀤𑀺𑀩𑁆𑀩𑀲𑁂𑀢𑀘𑁆𑀙𑀢𑁆𑀢𑀫𑁆𑀧𑀺 𑀉𑀧𑀭𑀺𑀥𑀸𑀭𑀺𑀢𑀫𑁂𑀯 𑀳𑁄𑀢𑀺. 𑀫𑀸 𑀦𑀁 𑀨𑀼𑀲𑀺 𑀲𑀻𑀢𑀁 𑀯𑀸𑀢𑀺 𑀫𑀸 𑀏𑀢𑀁 𑀩𑁄𑀥𑀺𑀲𑀢𑁆𑀢𑀁 𑀲𑀻𑀢𑀁 𑀯𑀸 𑀉𑀡𑁆𑀳𑀸𑀤𑀻𑀲𑀼 𑀯𑀸 𑀅𑀜𑁆𑀜𑀢𑀭𑀁 𑀨𑀼𑀲𑀢𑀽𑀢𑀺 𑀅𑀢𑁆𑀣𑁄.

𑀢𑀬𑁄 𑀧𑀸𑀲𑀸𑀤𑀸 𑀅𑀳𑁂𑀲𑀼𑀦𑁆𑀢𑀺 𑀩𑁄𑀥𑀺𑀲𑀢𑁆𑀢𑁂 𑀓𑀺𑀭 𑀲𑁄𑀴𑀲𑀯𑀲𑁆𑀲𑀼𑀤𑁆𑀤𑁂𑀲𑀺𑀓𑁂 𑀚𑀸𑀢𑁂 𑀲𑀼𑀤𑁆𑀥𑁄𑀤𑀦𑀫𑀳𑀸𑀭𑀸𑀚𑀸 ‘‘𑀧𑀼𑀢𑁆𑀢𑀲𑁆𑀲 𑀯𑀲𑀦𑀓𑀧𑀸𑀲𑀸𑀤𑁂 𑀓𑀸𑀭𑁂𑀲𑁆𑀲𑀸𑀫𑀻’’𑀢𑀺 𑀯𑀟𑁆𑀠𑀓𑀺𑀦𑁄 𑀲𑀦𑁆𑀦𑀺𑀧𑀸𑀢𑀸𑀧𑁂𑀢𑁆𑀯𑀸 𑀪𑀤𑁆𑀤𑀓𑁂𑀦 𑀦𑀓𑁆𑀔𑀢𑁆𑀢𑀫𑀼𑀳𑀼𑀢𑁆𑀢𑁂𑀦 𑀦𑀯𑀪𑀽𑀫𑀺𑀓𑀢𑀧𑀭𑀺𑀓𑀫𑁆𑀫𑀁 𑀓𑀸𑀭𑁂𑀢𑁆𑀯𑀸 𑀢𑀬𑁄 𑀧𑀸𑀲𑀸𑀤𑁂 𑀓𑀸𑀭𑀸𑀧𑁂𑀲𑀺. 𑀢𑁂 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀳𑁂𑀫𑀦𑁆𑀢𑀺𑀓𑁄𑀢𑀺𑀆𑀤𑀻𑀲𑀼 𑀬𑀢𑁆𑀣 𑀲𑀼𑀔𑀁 𑀳𑁂𑀫𑀦𑁆𑀢𑁂 𑀯𑀲𑀺𑀢𑀼𑀁, 𑀅𑀬𑀁 𑀳𑁂𑀫𑀦𑁆𑀢𑀺𑀓𑁄. 𑀇𑀢𑀭𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀅𑀬𑀁 𑀧𑀦𑁂𑀢𑁆𑀣 𑀯𑀘𑀦𑀢𑁆𑀣𑁄 𑁋 𑀳𑁂𑀫𑀦𑁆𑀢𑁂 𑀯𑀸𑀲𑁄 𑀳𑁂𑀫𑀦𑁆𑀢𑀁, 𑀳𑁂𑀫𑀦𑁆𑀢𑀁 𑀅𑀭𑀳𑀢𑀻𑀢𑀺 𑀳𑁂𑀫𑀦𑁆𑀢𑀺𑀓𑁄. 𑀇𑀢𑀭𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀢𑀢𑁆𑀣 𑀳𑁂𑀫𑀦𑁆𑀢𑀺𑀓𑁄 𑀧𑀸𑀲𑀸𑀤𑁄 𑀦𑀯𑀪𑀽𑀫𑀓𑁄 𑀅𑀳𑁄𑀲𑀺, 𑀪𑀽𑀫𑀺𑀬𑁄 𑀧𑀦𑀲𑁆𑀲 𑀉𑀡𑁆𑀳𑀉𑀢𑀼𑀕𑁆𑀕𑀸𑀳𑀸𑀧𑀦𑀢𑁆𑀣𑀸𑀬 𑀦𑀻𑀘𑀸 𑀅𑀳𑁂𑀲𑀼𑀁. 𑀢𑀢𑁆𑀣 𑀤𑁆𑀯𑀸𑀭𑀯𑀸𑀢𑀧𑀸𑀦𑀸𑀦𑀺 𑀲𑀼𑀨𑀼𑀲𑀺𑀢𑀓𑀯𑀸𑀝𑀸𑀦𑀺 𑀅𑀳𑁂𑀲𑀼𑀁 𑀦𑀺𑀩𑁆𑀩𑀺𑀯𑀭𑀸𑀦𑀺. 𑀘𑀺𑀢𑁆𑀢𑀓𑀫𑁆𑀫𑀫𑁆𑀧𑀺 𑀓𑀭𑁄𑀦𑁆𑀢𑀸 𑀢𑀢𑁆𑀣 𑀢𑀢𑁆𑀣 𑀧𑀚𑁆𑀚𑀮𑀺𑀢𑁂 𑀅𑀕𑁆𑀕𑀺𑀓𑁆𑀔𑀦𑁆𑀥𑁂𑀬𑁂𑀯 𑀅𑀓𑀁𑀲𑀼. 𑀪𑀽𑀫𑀢𑁆𑀣𑀭𑀡𑀁 𑀧𑀦𑁂𑀢𑁆𑀣 𑀓𑀫𑁆𑀩𑀮𑀫𑀬𑀁, 𑀢𑀣𑀸 𑀲𑀸𑀡𑀺𑀯𑀺𑀢𑀸𑀦𑀦𑀺𑀯𑀸𑀲𑀦𑀧𑀸𑀭𑀼𑀧𑀦𑀯𑁂𑀞𑀦𑀸𑀦𑀺. 𑀯𑀸𑀢𑀧𑀸𑀦𑀸𑀦𑀺 𑀉𑀡𑁆𑀳𑀕𑁆𑀕𑀸𑀳𑀸𑀧𑀦𑀢𑁆𑀣𑀁 𑀤𑀺𑀯𑀸 𑀯𑀺𑀯𑀝𑀸𑀦𑀺 𑀭𑀢𑁆𑀢𑀺𑀁 𑀧𑀺𑀳𑀺𑀢𑀸𑀦𑀺 𑀳𑁄𑀦𑁆𑀢𑀺.

𑀕𑀺𑀫𑁆𑀳𑀺𑀓𑁄 𑀧𑀦 𑀧𑀜𑁆𑀘𑀪𑀽𑀫𑀓𑁄 𑀅𑀳𑁄𑀲𑀺. 𑀲𑀻𑀢𑀉𑀢𑀼𑀕𑁆𑀕𑀸𑀳𑀸𑀧𑀦𑀢𑁆𑀣𑀁 𑀧𑀦𑁂𑀢𑁆𑀣 𑀪𑀽𑀫𑀺𑀬𑁄 𑀉𑀘𑁆𑀘𑀸 𑀅𑀲𑀫𑁆𑀩𑀸𑀥𑀸 𑀅𑀳𑁂𑀲𑀼𑀁. 𑀤𑁆𑀯𑀸𑀭𑀯𑀸𑀢𑀧𑀸𑀦𑀸𑀦𑀺 𑀦𑀸𑀢𑀺𑀨𑀼𑀲𑀺𑀢𑀸𑀦𑀺 𑀲𑀯𑀺𑀯𑀭𑀸𑀦𑀺 𑀲𑀚𑀸𑀮𑀸𑀦𑀺 𑀅𑀳𑁂𑀲𑀼𑀁. 𑀘𑀺𑀢𑁆𑀢𑀓𑀫𑁆𑀫𑁂 𑀉𑀧𑁆𑀧𑀮𑀸𑀦𑀺 𑀧𑀤𑀼𑀫𑀸𑀦𑀺 𑀧𑀼𑀡𑁆𑀟𑀭𑀻𑀓𑀸𑀦𑀺𑀬𑁂𑀯 𑀅𑀓𑀁𑀲𑀼. 𑀪𑀽𑀫𑀢𑁆𑀣𑀭𑀡𑀁 𑀧𑀦𑁂𑀢𑁆𑀣 𑀤𑀼𑀓𑀽𑀮𑀫𑀬𑀁, 𑀢𑀣𑀸 𑀲𑀸𑀡𑀺𑀯𑀺𑀢𑀸𑀦𑀦𑀺𑀯𑀸𑀲𑀦𑀧𑀸𑀭𑀼𑀧𑀦𑀯𑁂𑀞𑀦𑀸𑀦𑀺. 𑀯𑀸𑀢𑀧𑀸𑀦𑀲𑀫𑀻𑀧𑁂𑀲𑀼 𑀘𑁂𑀢𑁆𑀣 𑀦𑀯 𑀘𑀸𑀝𑀺𑀬𑁄 𑀞𑀧𑁂𑀢𑁆𑀯𑀸 𑀉𑀤𑀓𑀲𑁆𑀲 𑀧𑀽𑀭𑁂𑀢𑁆𑀯𑀸 𑀦𑀻𑀮𑀼𑀧𑁆𑀧𑀮𑀸𑀤𑀻𑀳𑀺 𑀲𑀜𑁆𑀙𑀸𑀤𑁂𑀦𑁆𑀢𑀺. 𑀢𑁂𑀲𑀼 𑀢𑁂𑀲𑀼 𑀧𑀤𑁂𑀲𑁂𑀲𑀼 𑀉𑀤𑀓𑀬𑀦𑁆𑀢𑀸𑀦𑀺 𑀓𑀭𑁄𑀦𑁆𑀢𑀺, 𑀬𑁂𑀳𑀺 𑀤𑁂𑀯𑁂 𑀯𑀲𑁆𑀲𑀦𑁆𑀢𑁂 𑀯𑀺𑀬 𑀉𑀤𑀓𑀥𑀸𑀭𑀸 𑀦𑀺𑀓𑁆𑀔𑀫𑀦𑁆𑀢𑀺. 𑀅𑀦𑁆𑀢𑁄𑀧𑀸𑀲𑀸𑀤𑁂 𑀢𑀢𑁆𑀣 𑀢𑀢𑁆𑀣 𑀓𑀮𑀮𑀧𑀽𑀭𑀸 𑀤𑁄𑀡𑀺𑀬𑁄 𑀞𑀧𑁂𑀢𑁆𑀯𑀸 𑀧𑀜𑁆𑀘𑀯𑀡𑁆𑀡𑀸𑀦𑀺 𑀧𑀤𑀼𑀫𑀸𑀦𑀺 𑀭𑁄𑀧𑀬𑀺𑀁𑀲𑀼. 𑀧𑀸𑀲𑀸𑀤𑀫𑀢𑁆𑀣𑀓𑁂 𑀲𑀼𑀓𑁆𑀔𑀫𑀳𑀺𑀁𑀲𑀘𑀫𑁆𑀫𑀁 𑀩𑀦𑁆𑀥𑀺𑀢𑁆𑀯𑀸 𑀬𑀦𑁆𑀢𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀬𑀸𑀯 𑀙𑀤𑀦𑀧𑀺𑀝𑁆𑀞𑀺𑀬𑀸 𑀧𑀸𑀲𑀸𑀡𑁂 𑀆𑀭𑁄𑀧𑁂𑀢𑁆𑀯𑀸 𑀢𑀲𑁆𑀫𑀺𑀁 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑀺. 𑀢𑁂𑀲𑀁 𑀘𑀫𑁆𑀫𑁂 𑀧𑀯𑀝𑁆𑀝𑀦𑁆𑀢𑀸𑀦𑀁 𑀲𑀤𑁆𑀤𑁄 𑀫𑁂𑀖𑀕𑀚𑁆𑀚𑀺𑀢𑀁 𑀯𑀺𑀬 𑀳𑁄𑀢𑀺. 𑀤𑁆𑀯𑀸𑀭𑀯𑀸𑀢𑀧𑀸𑀦𑀸𑀦𑀺 𑀧𑀦𑁂𑀢𑁆𑀣 𑀤𑀺𑀯𑀸 𑀧𑀺𑀳𑀺𑀢𑀸𑀦𑀺 𑀳𑁄𑀦𑁆𑀢𑀺 𑀭𑀢𑁆𑀢𑀺𑀁 𑀯𑀺𑀯𑀝𑀸𑀦𑀺.

𑀯𑀲𑁆𑀲𑀺𑀓𑁄 𑀲𑀢𑁆𑀢𑀪𑀽𑀫𑀓𑁄 𑀅𑀳𑁄𑀲𑀺. 𑀪𑀽𑀫𑀺𑀬𑁄 𑀧𑀦𑁂𑀢𑁆𑀣 𑀤𑁆𑀯𑀺𑀦𑁆𑀦𑀫𑁆𑀧𑀺 𑀉𑀢𑀽𑀦𑀁 𑀕𑀸𑀳𑀸𑀧𑀦𑀢𑁆𑀣𑀸𑀬 𑀦𑀸𑀢𑀺𑀉𑀘𑁆𑀘𑀸 𑀦𑀸𑀢𑀺𑀦𑀻𑀘𑀸 𑀅𑀓𑀁𑀲𑀼. 𑀏𑀓𑀘𑁆𑀘𑀸𑀦𑀺 𑀤𑁆𑀯𑀸𑀭𑀯𑀸𑀢𑀧𑀸𑀦𑀸𑀦𑀺 𑀲𑀼𑀨𑀼𑀲𑀺𑀢𑀸𑀦𑀺, 𑀏𑀓𑀘𑁆𑀘𑀸𑀦𑀺 𑀲𑀯𑀺𑀯𑀭𑀸𑀦𑀺. 𑀢𑀢𑁆𑀣 𑀘𑀺𑀢𑁆𑀢𑀓𑀫𑁆𑀫𑀫𑁆𑀧𑀺 𑀓𑁂𑀲𑀼𑀘𑀺 𑀞𑀸𑀦𑁂𑀲𑀼 𑀧𑀚𑁆𑀚𑀮𑀺𑀢𑀅𑀕𑁆𑀕𑀺𑀓𑁆𑀔𑀦𑁆𑀥𑀯𑀲𑁂𑀦, 𑀓𑁂𑀲𑀼𑀘𑀺 𑀚𑀸𑀢𑀲𑁆𑀲𑀭𑀯𑀲𑁂𑀦 𑀓𑀢𑀁. 𑀪𑀽𑀫𑀢𑁆𑀣𑀭𑀡𑀸𑀤𑀻𑀦𑀺 𑀧𑀦𑁂𑀢𑁆𑀣 𑀓𑀫𑁆𑀩𑀮𑀤𑀼𑀓𑀽𑀮𑀯𑀲𑁂𑀦 𑀉𑀪𑀬𑀫𑀺𑀲𑁆𑀲𑀓𑀸𑀦𑀺. 𑀏𑀓𑀘𑁆𑀘𑁂 𑀤𑁆𑀯𑀸𑀭𑀯𑀸𑀢𑀧𑀸𑀦𑀸 𑀭𑀢𑁆𑀢𑀺𑀁 𑀯𑀺𑀯𑀝𑀸 𑀤𑀺𑀯𑀸 𑀧𑀺𑀳𑀺𑀢𑀸, 𑀏𑀓𑀘𑁆𑀘𑁂 𑀤𑀺𑀯𑀸 𑀯𑀺𑀯𑀝𑀸 𑀭𑀢𑁆𑀢𑀺𑀁 𑀧𑀺𑀳𑀺𑀢𑀸. 𑀢𑀬𑁄𑀧𑀺 𑀧𑀸𑀲𑀸𑀤𑀸 𑀉𑀩𑁆𑀩𑁂𑀥𑁂𑀦 𑀲𑀫𑀧𑁆𑀧𑀫𑀸𑀡𑀸. 𑀪𑀽𑀫𑀺𑀓𑀸𑀲𑀼 𑀧𑀦 𑀦𑀸𑀦𑀢𑁆𑀢𑀁 𑀅𑀳𑁄𑀲𑀺.

𑀏𑀯𑀁 𑀦𑀺𑀝𑁆𑀞𑀺𑀢𑁂𑀲𑀼 𑀧𑀸𑀲𑀸𑀤𑁂𑀲𑀼 𑀭𑀸𑀚𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀧𑀼𑀢𑁆𑀢𑁄 𑀫𑁂 𑀯𑀬𑀧𑁆𑀧𑀢𑁆𑀢𑁄, 𑀙𑀢𑁆𑀢𑀫𑀲𑁆𑀲 𑀉𑀲𑁆𑀲𑀸𑀧𑁂𑀢𑁆𑀯𑀸 𑀭𑀚𑁆𑀚𑀲𑀺𑀭𑀺𑀁 𑀧𑀲𑁆𑀲𑀺𑀲𑁆𑀲𑀸𑀫𑀻’’𑀢𑀺. 𑀲𑁄 𑀲𑀸𑀓𑀺𑀬𑀸𑀦𑀁 𑀧𑀡𑁆𑀡𑀸𑀦𑀺 𑀧𑀳𑀺𑀡𑀺 𑁋 ‘‘𑀧𑀼𑀢𑁆𑀢𑁄 𑀫𑁂 𑀯𑀬𑀧𑁆𑀧𑀢𑁆𑀢𑁄, 𑀭𑀚𑁆𑀚𑁂 𑀦𑀁 𑀧𑀢𑀺𑀝𑁆𑀞𑀸𑀧𑁂𑀲𑁆𑀲𑀸𑀫𑀺, 𑀲𑀩𑁆𑀩𑁂 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀕𑁂𑀳𑁂𑀲𑀼 𑀯𑀬𑀧𑁆𑀧𑀢𑁆𑀢𑀸, 𑀤𑀸𑀭𑀺𑀓𑀸 𑀇𑀫𑀁 𑀕𑁂𑀳𑀁 𑀧𑁂𑀲𑁂𑀦𑁆𑀢𑀽’’𑀢𑀺. 𑀢𑁂 𑀲𑀸𑀲𑀦𑀁 𑀲𑀼𑀢𑁆𑀯𑀸 𑁋 ‘‘𑀓𑀼𑀫𑀸𑀭𑁄 𑀓𑁂𑀯𑀮𑀁 𑀤𑀲𑁆𑀲𑀦𑀓𑁆𑀔𑀫𑁄 𑀭𑀽𑀧𑀲𑀫𑁆𑀧𑀦𑁆𑀦𑁄, 𑀦 𑀓𑀺𑀜𑁆𑀘𑀺 𑀲𑀺𑀧𑁆𑀧𑀁 𑀚𑀸𑀦𑀸𑀢𑀺, 𑀤𑀸𑀭𑀪𑀭𑀡𑀁 𑀓𑀸𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀢𑀺, 𑀦 𑀫𑀬𑀁 𑀥𑀻𑀢𑀭𑁄 𑀤𑀲𑁆𑀲𑀸𑀫𑀸’’𑀢𑀺 𑀆𑀳𑀁𑀲𑀼. 𑀭𑀸𑀚𑀸 𑀢𑀁 𑀧𑀯𑀢𑁆𑀢𑀺𑀁 𑀲𑀼𑀢𑁆𑀯𑀸 𑀧𑀼𑀢𑁆𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀆𑀭𑁄𑀘𑁂𑀲𑀺. 𑀩𑁄𑀥𑀺𑀲𑀢𑁆𑀢𑁄 ‘‘𑀓𑀺𑀁 𑀲𑀺𑀧𑁆𑀧𑀁 𑀤𑀲𑁆𑀲𑁂𑀢𑀼𑀁 𑀯𑀝𑁆𑀝𑀢𑀺, 𑀢𑀸𑀢𑀸’’𑀢𑀺 𑀆𑀳. 𑀲𑀳𑀲𑁆𑀲𑀣𑀸𑀫𑀥𑀦𑀼𑀁 𑀆𑀭𑁄𑀧𑁂𑀢𑀼𑀁 𑀯𑀝𑁆𑀝𑀢𑀺, 𑀢𑀸𑀢𑀸𑀢𑀺. 𑀢𑁂𑀦 𑀳𑀺 𑀆𑀳𑀭𑀸𑀧𑁂𑀣𑀸𑀢𑀺. 𑀭𑀸𑀚𑀸 𑀆𑀳𑀭𑀸𑀧𑁂𑀢𑁆𑀯𑀸 𑀅𑀤𑀸𑀲𑀺. 𑀥𑀦𑀼𑀁 𑀧𑀼𑀭𑀺𑀲𑀲𑀳𑀲𑁆𑀲𑀁 𑀆𑀭𑁄𑀧𑁂𑀢𑀺, 𑀧𑀼𑀭𑀺𑀲𑀲𑀳𑀲𑁆𑀲𑀁 𑀑𑀭𑁄𑀧𑁂𑀢𑀺. 𑀫𑀳𑀸𑀧𑀼𑀭𑀺𑀲𑁄 𑀥𑀦𑀼𑀁 𑀆𑀳𑀭𑀸𑀧𑁂𑀢𑁆𑀯𑀸 𑀧𑀮𑁆𑀮𑀗𑁆𑀓𑁂 𑀦𑀺𑀲𑀺𑀦𑁆𑀦𑁄𑀯 𑀚𑀺𑀬𑀁 𑀧𑀸𑀤𑀗𑁆𑀕𑀼𑀝𑁆𑀞𑀓𑁂 𑀯𑁂𑀞𑁂𑀢𑁆𑀯𑀸 𑀓𑀟𑁆𑀠𑀦𑁆𑀢𑁄 𑀧𑀸𑀤𑀗𑁆𑀕𑀼𑀝𑁆𑀞𑀓𑁂𑀦𑁂𑀯 𑀥𑀦𑀼𑀁 𑀆𑀭𑁄𑀧𑁂𑀢𑁆𑀯𑀸 𑀯𑀸𑀫𑁂𑀦 𑀳𑀢𑁆𑀣𑁂𑀦 𑀤𑀡𑁆𑀟𑁂 𑀕𑀳𑁂𑀢𑁆𑀯𑀸 𑀤𑀓𑁆𑀔𑀺𑀡𑁂𑀦 𑀳𑀢𑁆𑀣𑁂𑀦 𑀓𑀟𑁆𑀠𑀺𑀢𑁆𑀯𑀸 𑀚𑀺𑀬𑀁 𑀧𑁄𑀣𑁂𑀲𑀺. 𑀲𑀓𑀮𑀦𑀕𑀭𑀁 𑀉𑀧𑁆𑀧𑀢𑀦𑀸𑀓𑀸𑀭𑀧𑁆𑀧𑀢𑁆𑀢𑀁 𑀅𑀳𑁄𑀲𑀺. ‘‘𑀓𑀺𑀁 𑀲𑀤𑁆𑀤𑁄 𑀏𑀲𑁄’’𑀢𑀺 𑀘 𑀯𑀼𑀢𑁆𑀢𑁂 ‘‘𑀤𑁂𑀯𑁄 𑀕𑀚𑁆𑀚𑀢𑀻’’𑀢𑀺 𑀆𑀳𑀁𑀲𑀼. 𑀅𑀣𑀜𑁆𑀜𑁂 ‘‘𑀢𑀼𑀫𑁆𑀳𑁂 𑀦 𑀚𑀸𑀦𑀸𑀣, 𑀦 𑀤𑁂𑀯𑁄 𑀕𑀚𑁆𑀚𑀢𑀺, 𑀅𑀗𑁆𑀕𑀻𑀭𑀲𑀲𑁆𑀲 𑀓𑀼𑀫𑀸𑀭𑀲𑁆𑀲 𑀲𑀳𑀲𑁆𑀲𑀣𑀸𑀫𑀥𑀦𑀼𑀁 𑀆𑀭𑁄𑀧𑁂𑀢𑁆𑀯𑀸 𑀚𑀺𑀬𑀁 𑀧𑁄𑀣𑁂𑀦𑁆𑀢𑀲𑁆𑀲 𑀚𑀺𑀬𑀧𑁆𑀧𑀳𑀸𑀭𑀲𑀤𑁆𑀤𑁄 𑀏𑀲𑁄’’𑀢𑀺 𑀆𑀳𑀁𑀲𑀼. 𑀲𑀸𑀓𑀺𑀬𑀸 𑀢𑀸𑀯𑀢𑀓𑁂𑀦𑁂𑀯 𑀆𑀭𑀤𑁆𑀥𑀘𑀺𑀢𑁆𑀢𑀸 𑀅𑀳𑁂𑀲𑀼𑀁.

𑀫𑀳𑀸𑀧𑀼𑀭𑀺𑀲𑁄 ‘‘𑀅𑀜𑁆𑀜𑀁 𑀓𑀺𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀆𑀳. 𑀅𑀝𑁆𑀞𑀗𑁆𑀕𑀼𑀮𑀫𑀢𑁆𑀢𑀩𑀳𑀮𑀁 𑀅𑀬𑁄𑀧𑀝𑁆𑀝𑀁 𑀓𑀡𑁆𑀟𑁂𑀦 𑀯𑀺𑀦𑀺𑀯𑀺𑀚𑁆𑀛𑀺𑀢𑀼𑀁 𑀯𑀝𑁆𑀝𑀢𑀻𑀢𑀺. 𑀢𑀁 𑀯𑀺𑀦𑀺𑀯𑀺𑀚𑁆𑀛𑀺𑀢𑁆𑀯𑀸 ‘‘𑀅𑀜𑁆𑀜𑀁 𑀓𑀺𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀆𑀳. 𑀘𑀢𑀼𑀭𑀗𑁆𑀕𑀼𑀮𑀩𑀳𑀮𑀁 𑀅𑀲𑀦𑀨𑀮𑀓𑀁 𑀯𑀺𑀦𑀺𑀯𑀺𑀚𑁆𑀛𑀺𑀢𑀼𑀁 𑀯𑀝𑁆𑀝𑀢𑀻𑀢𑀺. 𑀢𑀁 𑀯𑀺𑀦𑀺𑀯𑀺𑀚𑁆𑀛𑀺𑀢𑁆𑀯𑀸 ‘‘𑀅𑀜𑁆𑀜𑀁 𑀓𑀺𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀆𑀳. 𑀯𑀺𑀤𑀢𑁆𑀣𑀺𑀩𑀳𑀮𑀁 𑀉𑀤𑀼𑀫𑁆𑀩𑀭𑀨𑀮𑀓𑀁 𑀯𑀺𑀦𑀺𑀯𑀺𑀚𑁆𑀛𑀺𑀢𑀼𑀁 𑀯𑀝𑁆𑀝𑀢𑀻𑀢𑀺. 𑀢𑀁 𑀯𑀺𑀦𑀺𑀯𑀺𑀚𑁆𑀛𑀺𑀢𑁆𑀯𑀸 ‘‘𑀅𑀜𑁆𑀜𑀁 𑀓𑀺𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺. 𑀬𑀦𑁆𑀢𑁂 𑀩𑀤𑁆𑀥𑀁 𑀨𑀮𑀓𑀲𑀢𑀁 𑀯𑀺𑀦𑀺𑀯𑀺𑀚𑁆𑀛𑀺𑀢𑀼𑀁 𑀯𑀝𑁆𑀝𑀢𑀻𑀢𑀺. 𑀢𑀁 𑀯𑀺𑀦𑀺𑀯𑀺𑀚𑁆𑀛𑀺𑀢𑁆𑀯𑀸 ‘‘𑀅𑀜𑁆𑀜𑀁 𑀓𑀺𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀆𑀳. 𑀲𑀝𑁆𑀞𑀺𑀧𑀝𑀮𑀁 𑀲𑀼𑀓𑁆𑀔𑀫𑀳𑀺𑀁𑀲𑀘𑀫𑁆𑀫𑀁 𑀯𑀺𑀦𑀺𑀯𑀺𑀚𑁆𑀛𑀺𑀢𑀼𑀁 𑀯𑀝𑁆𑀝𑀢𑀻𑀢𑀺. 𑀢𑀫𑁆𑀧𑀺 𑀯𑀺𑀦𑀺𑀯𑀺𑀚𑁆𑀛𑀺𑀢𑁆𑀯𑀸 ‘‘𑀅𑀜𑁆𑀜𑀁 𑀓𑀺𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀆𑀳. 𑀢𑀢𑁄 𑀯𑀸𑀮𑀺𑀓𑀲𑀓𑀝𑀸𑀤𑀻𑀦𑀺 𑀆𑀘𑀺𑀓𑁆𑀔𑀺𑀁𑀲𑀼. 𑀫𑀳𑀸𑀲𑀢𑁆𑀢𑁄 𑀯𑀸𑀮𑀺𑀓𑀲𑀓𑀝𑀫𑁆𑀧𑀺 𑀧𑀮𑀸𑀮𑀲𑀓𑀝𑀫𑁆𑀧𑀺 𑀯𑀺𑀦𑀺𑀯𑀺𑀚𑁆𑀛𑀺𑀢𑁆𑀯𑀸 𑀉𑀤𑀓𑁂 𑀏𑀓𑀼𑀲𑀪𑀧𑁆𑀧𑀫𑀸𑀡𑀁 𑀓𑀡𑁆𑀟𑀁 𑀧𑁂𑀲𑁂𑀲𑀺, 𑀣𑀮𑁂 𑀅𑀝𑁆𑀞𑀉𑀲𑀪𑀧𑁆𑀧𑀫𑀸𑀡𑀁. 𑀅𑀣 𑀦𑀁 ‘‘𑀇𑀤𑀸𑀦𑀺 𑀯𑀸𑀢𑀺𑀗𑁆𑀕𑀡𑀲𑀜𑁆𑀜𑀸𑀬 𑀯𑀸𑀮𑀁 𑀯𑀺𑀚𑁆𑀛𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀆𑀳𑀁𑀲𑀼. 𑀢𑁂𑀦 𑀳𑀺 𑀩𑀦𑁆𑀥𑀸𑀧𑁂𑀣𑀸𑀢𑀺. 𑀲𑀤𑁆𑀤𑀦𑁆𑀢𑀭𑁂 𑀩𑀚𑁆𑀛𑀢𑀼, 𑀢𑀸𑀢𑀸𑀢𑀺. 𑀧𑀼𑀭𑀢𑁄 𑀕𑀘𑁆𑀙𑀦𑁆𑀢𑀼, 𑀕𑀸𑀯𑀼𑀢𑀦𑁆𑀢𑀭𑁂 𑀩𑀦𑁆𑀥𑀦𑁆𑀢𑀽𑀢𑀺. 𑀧𑀼𑀭𑀢𑁄 𑀕𑀘𑁆𑀙𑀦𑁆𑀢𑀼, 𑀅𑀤𑁆𑀥𑀬𑁄𑀚𑀦𑁂 𑀩𑀦𑁆𑀥𑀦𑁆𑀢𑀽𑀢𑀺. 𑀧𑀼𑀭𑀢𑁄 𑀕𑀘𑁆𑀙𑀦𑁆𑀢𑀼 𑀬𑁄𑀚𑀦𑁂 𑀩𑀦𑁆𑀥𑀦𑁆𑀢𑀽𑀢𑀺. 𑀩𑀦𑁆𑀥𑀸𑀧𑁂𑀣, 𑀢𑀸𑀢𑀸𑀢𑀺 𑀬𑁄𑀚𑀦𑀫𑀢𑁆𑀣𑀓𑁂 𑀯𑀸𑀢𑀺𑀗𑁆𑀕𑀡𑀲𑀜𑁆𑀜𑀸𑀬 𑀯𑀸𑀮𑀁 𑀩𑀦𑁆𑀥𑀸𑀧𑁂𑀢𑁆𑀯𑀸 𑀭𑀢𑁆𑀢𑀦𑁆𑀥𑀓𑀸𑀭𑁂 𑀫𑁂𑀖𑀧𑀝𑀮𑀘𑁆𑀙𑀦𑁆𑀦𑀸𑀲𑀼 𑀤𑀺𑀲𑀸𑀲𑀼 𑀓𑀡𑁆𑀟𑀁 𑀔𑀺𑀧𑀺, 𑀢𑀁 𑀕𑀦𑁆𑀢𑁆𑀯𑀸 𑀬𑁄𑀚𑀦𑀫𑀢𑁆𑀣𑀓𑁂 𑀯𑀸𑀮𑀁 𑀨𑀸𑀮𑁂𑀢𑁆𑀯𑀸 𑀧𑀣𑀯𑀺𑀁 𑀧𑀸𑀯𑀺𑀲𑀺. 𑀦 𑀓𑁂𑀯𑀮𑀜𑁆𑀘 𑀏𑀢𑁆𑀢𑀓𑀫𑁂𑀯, 𑀢𑀁 𑀤𑀺𑀯𑀲𑀁 𑀧𑀦 𑀫𑀳𑀸𑀲𑀢𑁆𑀢𑁄 𑀮𑁄𑀓𑁂 𑀯𑀢𑁆𑀢𑀫𑀸𑀦𑀲𑀺𑀧𑁆𑀧𑀁 𑀲𑀩𑁆𑀩𑀫𑁂𑀯 𑀲𑀦𑁆𑀤𑀲𑁆𑀲𑁂𑀲𑀺. 𑀲𑀓𑁆𑀬𑀭𑀸𑀚𑀸𑀦𑁄 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀥𑀻𑀢𑀭𑁄 𑀅𑀮𑀗𑁆𑀓𑀭𑀺𑀢𑁆𑀯𑀸 𑀧𑁂𑀲𑀬𑀺𑀁𑀲𑀼, 𑀘𑀢𑁆𑀢𑀸𑀮𑀻𑀲𑀲𑀳𑀲𑁆𑀲𑀦𑀸𑀝𑀓𑀺𑀢𑁆𑀣𑀺𑀬𑁄 𑀅𑀳𑁂𑀲𑀼𑀁. 𑀫𑀳𑀸𑀧𑀼𑀭𑀺𑀲𑁄 𑀢𑀻𑀲𑀼 𑀧𑀸𑀲𑀸𑀤𑁂𑀲𑀼 𑀤𑁂𑀯𑁄 𑀫𑀜𑁆𑀜𑁂 𑀧𑀭𑀺𑀘𑀸𑀭𑁂𑀦𑁆𑀢𑁄 𑀫𑀳𑀸𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀢𑀺.

𑀦𑀺𑀧𑁆𑀧𑀼𑀭𑀺𑀲𑁂𑀳𑀻𑀢𑀺 𑀧𑀼𑀭𑀺𑀲𑀯𑀺𑀭𑀳𑀺𑀢𑁂𑀳𑀺. 𑀦 𑀓𑁂𑀯𑀮𑀁 𑀘𑁂𑀢𑁆𑀣 𑀢𑀽𑀭𑀺𑀬𑀸𑀦𑁂𑀯 𑀦𑀺𑀧𑁆𑀧𑀼𑀭𑀺𑀲𑀸𑀦𑀺, 𑀲𑀩𑁆𑀩𑀝𑁆𑀞𑀸𑀦𑀸𑀦𑀺𑀧𑀺 𑀦𑀺𑀧𑁆𑀧𑀼𑀭𑀺𑀲𑀸𑀦𑁂𑀯. 𑀤𑁄𑀯𑀸𑀭𑀺𑀓𑀸𑀧𑀺 𑀇𑀢𑁆𑀣𑀺𑀬𑁄𑀯, 𑀦𑁆𑀳𑀸𑀧𑀦𑀸𑀤𑀺𑀧𑀭𑀺𑀓𑀫𑁆𑀫𑀓𑀭𑀸𑀧𑀺 𑀇𑀢𑁆𑀣𑀺𑀬𑁄𑀯. 𑀭𑀸𑀚𑀸 𑀓𑀺𑀭 ‘‘𑀢𑀣𑀸𑀭𑀽𑀧𑀁 𑀇𑀲𑁆𑀲𑀭𑀺𑀬𑀲𑀼𑀔𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀫𑀸𑀦𑀲𑁆𑀲 𑀧𑀼𑀭𑀺𑀲𑀁 𑀤𑀺𑀲𑁆𑀯𑀸 𑀧𑀭𑀺𑀲𑀗𑁆𑀓𑀸 𑀉𑀧𑁆𑀧𑀚𑁆𑀚𑀢𑀺, 𑀲𑀸 𑀫𑁂 𑀧𑀼𑀢𑁆𑀢𑀲𑁆𑀲 𑀫𑀸 𑀅𑀳𑁄𑀲𑀻’’𑀢𑀺 𑀲𑀩𑁆𑀩𑀓𑀺𑀘𑁆𑀘𑁂𑀲𑀼 𑀇𑀢𑁆𑀣𑀺𑀬𑁄𑀯 𑀞𑀧𑁂𑀲𑀺. 𑀧𑀭𑀺𑀘𑀸𑀭𑀬𑀫𑀸𑀦𑁄𑀢𑀺 𑀫𑁄𑀤𑀫𑀸𑀦𑁄. 𑀦 𑀳𑁂𑀝𑁆𑀞𑀸𑀧𑀸𑀲𑀸𑀤𑀁 𑀑𑀭𑁄𑀳𑀸𑀫𑀻𑀢𑀺 𑀧𑀸𑀲𑀸𑀤𑀢𑁄 𑀳𑁂𑀝𑁆𑀞𑀸 𑀦 𑀑𑀢𑀭𑀸𑀫𑀺. 𑀇𑀢𑀺 𑀫𑀁 𑀘𑀢𑁆𑀢𑀸𑀭𑁄 𑀫𑀸𑀲𑁂 𑀅𑀜𑁆𑀜𑁄 𑀲𑀺𑀔𑀸𑀩𑀤𑁆𑀥𑁄 𑀧𑀼𑀭𑀺𑀲𑁄 𑀦𑀸𑀫 𑀧𑀲𑁆𑀲𑀺𑀢𑀼𑀁 𑀦𑀸𑀮𑀢𑁆𑀣. 𑀬𑀣𑀸𑀢𑀺 𑀬𑁂𑀦 𑀦𑀺𑀬𑀸𑀫𑁂𑀦. 𑀤𑀸𑀲𑀓𑀫𑁆𑀫𑀓𑀭𑀧𑁄𑀭𑀺𑀲𑀲𑁆𑀲𑀸𑀢𑀺 𑀤𑀸𑀲𑀸𑀦𑀜𑁆𑀘𑁂𑀯 𑀤𑁂𑀯𑀲𑀺𑀓𑀪𑀢𑁆𑀢𑀯𑁂𑀢𑀦𑀸𑀪𑀢𑀸𑀦𑀁 𑀓𑀫𑁆𑀫𑀓𑀭𑀸𑀦𑀜𑁆𑀘 𑀦𑀺𑀲𑁆𑀲𑀸𑀬 𑀚𑀻𑀯𑀫𑀸𑀦𑀧𑀼𑀭𑀺𑀲𑀸𑀦𑀜𑁆𑀘. 𑀓𑀡𑀸𑀚𑀓𑀦𑁆𑀢𑀺 𑀲𑀓𑀼𑀡𑁆𑀟𑀓𑀪𑀢𑁆𑀢𑀁. 𑀩𑀺𑀮𑀗𑁆𑀕𑀤𑀼𑀢𑀺𑀬𑀦𑁆𑀢𑀺 𑀓𑀜𑁆𑀚𑀺𑀓𑀤𑀼𑀢𑀺𑀬𑀁.

𑀏𑀯𑀭𑀽𑀧𑀸𑀬 𑀇𑀤𑁆𑀥𑀺𑀬𑀸𑀢𑀺 𑀏𑀯𑀁𑀚𑀸𑀢𑀺𑀓𑀸𑀬 𑀧𑀼𑀜𑁆𑀜𑀺𑀤𑁆𑀥𑀺𑀬𑀸 𑀲𑀫𑀦𑁆𑀦𑀸𑀕𑀢𑀲𑁆𑀲. 𑀏𑀯𑀭𑀽𑀧𑁂𑀦 𑀘 𑀲𑀼𑀔𑀼𑀫𑀸𑀮𑁂𑀦𑀸𑀢𑀺 𑀏𑀯𑀁𑀚𑀸𑀢𑀺𑀓𑁂𑀦 𑀘 𑀦𑀺𑀤𑁆𑀤𑀼𑀓𑁆𑀔𑀪𑀸𑀯𑁂𑀦. 𑀲𑁄𑀔𑀼𑀫𑀸𑀮𑁂𑀦𑀸𑀢𑀺𑀧𑀺 𑀧𑀸𑀞𑁄. 𑀏𑀯𑀁 𑀢𑀣𑀸𑀕𑀢𑁄 𑀏𑀢𑁆𑀢𑀓𑁂𑀦 𑀞𑀸𑀦𑁂𑀦 𑀅𑀢𑁆𑀢𑀦𑁄 𑀲𑀺𑀭𑀺𑀲𑀫𑁆𑀧𑀢𑁆𑀢𑀺𑀁 𑀓𑀣𑁂𑀲𑀺. 𑀓𑀣𑁂𑀦𑁆𑀢𑁄 𑀘 𑀦 𑀉𑀧𑁆𑀧𑀺𑀮𑀸𑀯𑀺𑀢𑀪𑀸𑀯𑀢𑁆𑀣𑀁 𑀓𑀣𑁂𑀲𑀺, ‘‘𑀏𑀯𑀭𑀽𑀧𑀸𑀬𑀧𑀺 𑀧𑀦 𑀲𑀫𑁆𑀧𑀢𑁆𑀢𑀺𑀬𑀸 𑀞𑀺𑀢𑁄 𑀧𑀫𑀸𑀤𑀁 𑀅𑀓𑀢𑁆𑀯𑀸 𑀅𑀧𑁆𑀧𑀫𑀢𑁆𑀢𑁄𑀯 𑀅𑀳𑁄𑀲𑀺’’𑀦𑁆𑀢𑀺 𑀅𑀧𑁆𑀧𑀫𑀸𑀤𑀮𑀓𑁆𑀔𑀡𑀲𑁆𑀲𑁂𑀯 𑀤𑀻𑀧𑀦𑀢𑁆𑀣𑀁 𑀓𑀣𑁂𑀲𑀺. 𑀢𑁂𑀦𑁂𑀯 𑀅𑀲𑁆𑀲𑀼𑀢𑀯𑀸 𑀔𑁄 𑀧𑀼𑀣𑀼𑀚𑁆𑀚𑀦𑁄𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀧𑀭𑀦𑁆𑀢𑀺 𑀧𑀭𑀧𑀼𑀕𑁆𑀕𑀮𑀁. 𑀚𑀺𑀡𑁆𑀡𑀦𑁆𑀢𑀺 𑀚𑀭𑀸𑀚𑀺𑀡𑁆𑀡𑀁. 𑀅𑀝𑁆𑀝𑀻𑀬𑀢𑀻𑀢𑀺 𑀅𑀝𑁆𑀝𑁄 𑀧𑀻𑀴𑀺𑀢𑁄 𑀳𑁄𑀢𑀺. 𑀳𑀭𑀸𑀬𑀢𑀻𑀢𑀺 𑀳𑀺𑀭𑀺𑀁 𑀓𑀭𑁄𑀢𑀺 𑀮𑀚𑁆𑀚𑀢𑀺. 𑀚𑀺𑀕𑀼𑀘𑁆𑀙𑀢𑀻𑀢𑀺 𑀅𑀲𑀼𑀘𑀺𑀁 𑀯𑀺𑀬 𑀤𑀺𑀲𑁆𑀯𑀸 𑀚𑀺𑀕𑀼𑀘𑁆𑀙𑀁 𑀉𑀧𑁆𑀧𑀸𑀤𑁂𑀢𑀺. 𑀅𑀢𑁆𑀢𑀸𑀦𑀁𑀬𑁂𑀯 𑀅𑀢𑀺𑀲𑀺𑀢𑁆𑀯𑀸𑀢𑀺 𑀚𑀭𑀸𑀥𑀫𑁆𑀫𑀫𑁆𑀧𑀺 𑀲𑀫𑀸𑀦𑀁 𑀅𑀢𑁆𑀢𑀸𑀦𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀅𑀝𑁆𑀝𑀻𑀬𑀢𑀺 𑀳𑀭𑀸𑀬𑀢𑀻𑀢𑀺 𑀅𑀢𑁆𑀣𑁄. 𑀚𑀭𑀸𑀥𑀫𑁆𑀫𑁄𑀢𑀺 𑀚𑀭𑀸𑀲𑀪𑀸𑀯𑁄. 𑀚𑀭𑀁 𑀅𑀦𑀢𑀻𑀢𑁄𑀢𑀺 𑀚𑀭𑀁 𑀅𑀦𑀢𑀺𑀓𑁆𑀓𑀦𑁆𑀢𑁄, 𑀅𑀦𑁆𑀢𑁄 𑀚𑀭𑀸𑀬 𑀯𑀢𑁆𑀢𑀸𑀫𑀺. 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀢𑁄𑀢𑀺 𑀏𑀯𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲. 𑀬𑁄𑀩𑁆𑀩𑀦𑀫𑀤𑁄𑀢𑀺 𑀬𑁄𑀩𑁆𑀩𑀦𑀁 𑀦𑀺𑀲𑁆𑀲𑀸𑀬 𑀉𑀧𑁆𑀧𑀚𑁆𑀚𑀦𑀓𑁄 𑀫𑀸𑀦𑀫𑀤𑁄. 𑀲𑀩𑁆𑀩𑀲𑁄 𑀧𑀳𑀻𑀬𑀻𑀢𑀺 𑀲𑀩𑁆𑀩𑀸𑀓𑀸𑀭𑁂𑀦 𑀧𑀳𑀻𑀦𑁄. 𑀫𑀕𑁆𑀕𑁂𑀦 𑀧𑀳𑀻𑀦𑀲𑀤𑀺𑀲𑁄 𑀓𑀢𑁆𑀯𑀸 𑀤𑀲𑁆𑀲𑀺𑀢𑁄. 𑀦 𑀧𑀦𑁂𑀲 𑀫𑀕𑁆𑀕𑁂𑀦 𑀧𑀳𑀻𑀦𑁄, 𑀧𑀝𑀺𑀲𑀗𑁆𑀔𑀸𑀦𑁂𑀦 𑀧𑀳𑀻𑀦𑁄𑀯 𑀓𑀣𑀺𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀩𑁄𑀥𑀺𑀲𑀢𑁆𑀢𑀲𑁆𑀲 𑀳𑀺 𑀤𑁂𑀯𑀢𑀸 𑀚𑀭𑀸𑀧𑀢𑁆𑀢𑀁 𑀤𑀲𑁆𑀲𑁂𑀲𑀼𑀁. 𑀢𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀅𑀭𑀳𑀢𑁆𑀢𑀸 𑀅𑀦𑁆𑀢𑀭𑀸 𑀫𑀳𑀸𑀲𑀢𑁆𑀢𑀲𑁆𑀲 𑀬𑁄𑀩𑁆𑀩𑀦𑀫𑀤𑁄 𑀦𑀸𑀫 𑀦 𑀉𑀧𑁆𑀧𑀚𑁆𑀚𑀢𑀺. 𑀲𑁂𑀲𑀧𑀤𑀤𑁆𑀯𑀬𑁂𑀧𑀺 𑀏𑀲𑁂𑀯 𑀦𑀬𑁄. 𑀏𑀢𑁆𑀣 𑀧𑀦 𑀆𑀭𑁄𑀕𑁆𑀬𑀫𑀤𑁄𑀢𑀺 𑀅𑀳𑀁 𑀦𑀺𑀭𑁄𑀕𑁄𑀢𑀺 𑀆𑀭𑁄𑀕𑁆𑀬𑀁 𑀦𑀺𑀲𑁆𑀲𑀸𑀬 𑀉𑀧𑁆𑀧𑀚𑁆𑀚𑀦𑀓𑁄 𑀫𑀸𑀦𑀫𑀤𑁄. 𑀚𑀻𑀯𑀺𑀢𑀫𑀤𑁄𑀢𑀺 𑀅𑀳𑀁 𑀘𑀺𑀭𑀁 𑀚𑀻𑀯𑀻𑀢𑀺 𑀢𑀁 𑀦𑀺𑀲𑁆𑀲𑀸𑀬 𑀉𑀧𑁆𑀧𑀚𑁆𑀚𑀦𑀓𑁄 𑀫𑀸𑀦𑀫𑀤𑁄. 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀬𑀸𑀢𑀺 𑀲𑀺𑀓𑁆𑀔𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸. 𑀳𑀻𑀦𑀸𑀬𑀸𑀯𑀢𑁆𑀢𑀢𑀻𑀢𑀺 𑀳𑀻𑀦𑀸𑀬 𑀮𑀸𑀫𑀓𑀸𑀬 𑀕𑀺𑀳𑀺𑀪𑀸𑀯𑀸𑀬 𑀆𑀯𑀢𑁆𑀢𑀢𑀺.

𑀬𑀣𑀸𑀥𑀫𑁆𑀫𑀸𑀢𑀺 𑀩𑁆𑀬𑀸𑀥𑀺𑀆𑀤𑀻𑀳𑀺 𑀬𑀣𑀸𑀲𑀪𑀸𑀯𑀸. 𑀢𑀣𑀸𑀲𑀦𑁆𑀢𑀸𑀢𑀺 𑀬𑀣𑀸 𑀲𑀦𑁆𑀢𑀸 𑀏𑀯 𑀅𑀯𑀺𑀧𑀭𑀻𑀢𑀩𑁆𑀬𑀸𑀥𑀺𑀆𑀤𑀺𑀲𑀪𑀸𑀯𑀸𑀯 𑀳𑀼𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀚𑀺𑀕𑀼𑀘𑁆𑀙𑀦𑁆𑀢𑀻𑀢𑀺 𑀧𑀭𑀧𑀼𑀕𑁆𑀕𑀮𑀁 𑀚𑀺𑀕𑀼𑀘𑁆𑀙𑀦𑁆𑀢𑀺. 𑀫𑀫 𑀏𑀯𑀁 𑀯𑀺𑀳𑀸𑀭𑀺𑀦𑁄𑀢𑀺 𑀫𑀬𑁆𑀳𑀁 𑀏𑀯𑀁 𑀚𑀺𑀕𑀼𑀘𑁆𑀙𑀸𑀯𑀺𑀳𑀸𑀭𑁂𑀦 𑀯𑀺𑀳𑀭𑀦𑁆𑀢𑀲𑁆𑀲 𑀏𑀯𑀁 𑀚𑀺𑀕𑀼𑀘𑁆𑀙𑀦𑀁 𑀦𑀧𑁆𑀧𑀢𑀺𑀭𑀽𑀧𑀁 𑀪𑀯𑁂𑀬𑁆𑀬 𑀦𑀸𑀦𑀼𑀘𑁆𑀙𑀯𑀺𑀓𑀁. 𑀲𑁄𑀳𑀁 𑀏𑀯𑀁 𑀯𑀺𑀳𑀭𑀦𑁆𑀢𑁄𑀢𑀺 𑀲𑁄 𑀅𑀳𑀁 𑀏𑀯𑀁 𑀧𑀭𑀁 𑀚𑀺𑀕𑀼𑀘𑁆𑀙𑀫𑀸𑀦𑁄 𑀯𑀺𑀳𑀭𑀦𑁆𑀢𑁄, 𑀏𑀯𑀁 𑀯𑀸 𑀇𑀫𑀺𑀦𑀸 𑀧𑀝𑀺𑀲𑀗𑁆𑀔𑀸𑀦𑀯𑀺𑀳𑀸𑀭𑁂𑀦 𑀯𑀺𑀳𑀭𑀦𑁆𑀢𑁄. 𑀜𑀢𑁆𑀯𑀸 𑀥𑀫𑁆𑀫𑀁 𑀦𑀺𑀭𑀽𑀧𑀥𑀺𑀦𑁆𑀢𑀺 𑀲𑀩𑁆𑀩𑀽𑀧𑀥𑀺𑀯𑀺𑀭𑀳𑀺𑀢𑀁 𑀦𑀺𑀩𑁆𑀩𑀸𑀦𑀥𑀫𑁆𑀫𑀁 𑀜𑀢𑁆𑀯𑀸. 𑀲𑀩𑁆𑀩𑁂 𑀫𑀤𑁂 𑀅𑀪𑀺𑀪𑁄𑀲𑁆𑀫𑀻𑀢𑀺 𑀲𑀩𑁆𑀩𑁂 𑀢𑀬𑁄𑀧𑀺 𑀫𑀤𑁂 𑀅𑀪𑀺𑀪𑀯𑀺𑀁 𑀲𑀫𑀢𑀺𑀓𑁆𑀓𑀫𑀺𑀁. 𑀦𑁂𑀓𑁆𑀔𑀫𑁆𑀫𑁂 𑀤𑀝𑁆𑀞𑀼 𑀔𑁂𑀫𑀢𑀦𑁆𑀢𑀺 𑀦𑀺𑀩𑁆𑀩𑀸𑀦𑁂 𑀔𑁂𑀫𑀪𑀸𑀯𑀁 𑀤𑀺𑀲𑁆𑀯𑀸. 𑀦𑁂𑀓𑁆𑀔𑀫𑁆𑀫𑀁 𑀤𑀝𑁆𑀞𑀼 𑀔𑁂𑀫𑀢𑁄𑀢𑀺𑀧𑀺 𑀧𑀸𑀞𑁄, 𑀦𑀺𑀩𑁆𑀩𑀸𑀦𑀁 𑀔𑁂𑀫𑀢𑁄 𑀤𑀺𑀲𑁆𑀯𑀸𑀢𑀺 𑀅𑀢𑁆𑀣𑁄. 𑀢𑀲𑁆𑀲 𑀫𑁂 𑀅𑀳𑀼 𑀉𑀲𑁆𑀲𑀸𑀳𑁄𑀢𑀺 𑀢𑀲𑁆𑀲 𑀫𑀬𑁆𑀳𑀁 𑀢𑀁 𑀦𑁂𑀓𑁆𑀔𑀫𑁆𑀫𑀲𑀗𑁆𑀔𑀸𑀢𑀁 𑀦𑀺𑀩𑁆𑀩𑀸𑀦𑀁 𑀅𑀪𑀺𑀧𑀲𑁆𑀲𑀦𑁆𑀢𑀲𑁆𑀲 𑀉𑀲𑁆𑀲𑀸𑀳𑁄 𑀅𑀳𑀼, 𑀯𑀸𑀬𑀸𑀫𑁄 𑀅𑀳𑁄𑀲𑀻𑀢𑀺 𑀅𑀢𑁆𑀣𑁄. 𑀦𑀸𑀳𑀁 𑀪𑀩𑁆𑀩𑁄 𑀏𑀢𑀭𑀳𑀺, 𑀓𑀸𑀫𑀸𑀦𑀺 𑀧𑀝𑀺𑀲𑁂𑀯𑀺𑀢𑀼𑀦𑁆𑀢𑀺 𑀅𑀳𑀁 𑀤𑀸𑀦𑀺 𑀤𑀼𑀯𑀺𑀥𑁂𑀧𑀺 𑀓𑀸𑀫𑁂 𑀧𑀝𑀺𑀲𑁂𑀯𑀺𑀢𑀼𑀁 𑀅𑀪𑀩𑁆𑀩𑁄. 𑀅𑀦𑀺𑀯𑀢𑁆𑀢𑀺 𑀪𑀯𑀺𑀲𑁆𑀲𑀸𑀫𑀻𑀢𑀺 𑀧𑀩𑁆𑀩𑀚𑁆𑀚𑀢𑁄 𑀘 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀢𑁄 𑀘 𑀦 𑀦𑀺𑀯𑀢𑁆𑀢𑀺𑀲𑁆𑀲𑀸𑀫𑀺, 𑀅𑀦𑀺𑀯𑀢𑁆𑀢𑀓𑁄 𑀪𑀯𑀺𑀲𑁆𑀲𑀸𑀫𑀺. 𑀩𑁆𑀭𑀳𑁆𑀫𑀘𑀭𑀺𑀬𑀧𑀭𑀸𑀬𑀡𑁄𑀢𑀺 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀧𑀭𑀸𑀬𑀡𑁄 𑀚𑀸𑀢𑁄𑀲𑁆𑀫𑀻𑀢𑀺 𑀅𑀢𑁆𑀣𑁄. 𑀇𑀢𑀺 𑀇𑀫𑀸𑀳𑀺 𑀕𑀸𑀣𑀸𑀳𑀺 𑀫𑀳𑀸𑀩𑁄𑀥𑀺𑀧𑀮𑁆𑀮𑀗𑁆𑀓𑁂 𑀅𑀢𑁆𑀢𑀦𑁄 𑀆𑀕𑀫𑀦𑀻𑀬𑀯𑀻𑀭𑀺𑀬𑀁 𑀓𑀣𑁂𑀲𑀺.

𑁧𑁦. 𑀆𑀥𑀺𑀧𑀢𑁂𑀬𑁆𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁦. 𑀤𑀲𑀫𑁂 𑀆𑀥𑀺𑀧𑀢𑁂𑀬𑁆𑀬𑀸𑀦𑀻𑀢𑀺 𑀚𑁂𑀝𑁆𑀞𑀓𑀓𑀸𑀭𑀡𑀢𑁄 𑀦𑀺𑀩𑁆𑀩𑀢𑁆𑀢𑀸𑀦𑀺. 𑀅𑀢𑁆𑀢𑀸𑀥𑀺𑀧𑀢𑁂𑀬𑁆𑀬𑀦𑁆𑀢𑀺𑀆𑀤𑀻𑀲𑀼 𑀅𑀢𑁆𑀢𑀸𑀦𑀁 𑀚𑁂𑀝𑁆𑀞𑀓𑀁 𑀓𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺𑀢𑀁 𑀕𑀼𑀡𑀚𑀸𑀢𑀁 𑀅𑀢𑁆𑀢𑀸𑀥𑀺𑀧𑀢𑁂𑀬𑁆𑀬𑀁. 𑀮𑁄𑀓𑀁 𑀚𑁂𑀝𑁆𑀞𑀓𑀁 𑀓𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺𑀢𑀁 𑀮𑁄𑀓𑀸𑀥𑀺𑀧𑀢𑁂𑀬𑁆𑀬𑀁. 𑀦𑀯𑀯𑀺𑀥𑀁 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀁 𑀚𑁂𑀝𑁆𑀞𑀓𑀁 𑀓𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺𑀢𑀁 𑀥𑀫𑁆𑀫𑀸𑀥𑀺𑀧𑀢𑁂𑀬𑁆𑀬𑀁. 𑀦 𑀇𑀢𑀺 𑀪𑀯𑀸𑀪𑀯𑀳𑁂𑀢𑀽𑀢𑀺 𑀇𑀢𑀺 𑀪𑀯𑁄, 𑀇𑀢𑀺 𑀪𑀯𑁄𑀢𑀺 𑀏𑀯𑀁 𑀆𑀬𑀢𑀺𑀁, 𑀦 𑀢𑀲𑁆𑀲 𑀢𑀲𑁆𑀲 𑀲𑀫𑁆𑀧𑀢𑁆𑀢𑀺𑀪𑀯𑀲𑁆𑀲 𑀳𑁂𑀢𑀼. 𑀑𑀢𑀺𑀡𑁆𑀡𑁄𑀢𑀺 𑀅𑀦𑀼𑀧𑀯𑀺𑀝𑁆𑀞𑁄. 𑀬𑀲𑁆𑀲 𑀳𑀺 𑀚𑀸𑀢𑀺 𑀅𑀦𑁆𑀢𑁄𑀧𑀯𑀺𑀝𑁆𑀞𑀸, 𑀲𑁄 𑀚𑀸𑀢𑀺𑀬𑀸 𑀑𑀢𑀺𑀡𑁆𑀡𑁄 𑀦𑀸𑀫. 𑀚𑀭𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀓𑁂𑀯𑀮𑀲𑁆𑀲 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲𑀸𑀢𑀺 𑀲𑀓𑀮𑀲𑁆𑀲 𑀯𑀝𑁆𑀝𑀤𑀼𑀓𑁆𑀔𑀭𑀸𑀲𑀺𑀲𑁆𑀲. 𑀅𑀦𑁆𑀢𑀓𑀺𑀭𑀺𑀬𑀸 𑀧𑀜𑁆𑀜𑀸𑀬𑁂𑀣𑀸𑀢𑀺 𑀅𑀦𑁆𑀢𑀓𑀭𑀡𑀁 𑀧𑀭𑀺𑀘𑁆𑀙𑁂𑀤𑀧𑀭𑀺𑀯𑀝𑀼𑀫𑀓𑀭𑀡𑀁 𑀧𑀜𑁆𑀜𑀸𑀬𑁂𑀬𑁆𑀬. 𑀑𑀳𑀸𑀬𑀸𑀢𑀺 𑀧𑀳𑀸𑀬. 𑀧𑀸𑀧𑀺𑀝𑁆𑀞𑀢𑀭𑁂𑀢𑀺 𑀮𑀸𑀫𑀓𑀢𑀭𑁂. 𑀆𑀭𑀤𑁆𑀥𑀦𑁆𑀢𑀺 𑀧𑀕𑁆𑀕𑀳𑀺𑀢𑀁 𑀧𑀭𑀺𑀧𑀼𑀡𑁆𑀡𑀁, 𑀆𑀭𑀤𑁆𑀥𑀢𑁆𑀢𑀸𑀯 𑀅𑀲𑀮𑁆𑀮𑀻𑀦𑀁. 𑀉𑀧𑀝𑁆𑀞𑀺𑀢𑀸𑀢𑀺 𑀘𑀢𑀼𑀲𑀢𑀺𑀧𑀝𑁆𑀞𑀸𑀦𑀯𑀲𑁂𑀦 𑀉𑀧𑀝𑁆𑀞𑀺𑀢𑀸. 𑀉𑀧𑀝𑁆𑀞𑀺𑀢𑀢𑁆𑀢𑀸𑀯 𑀅𑀲𑀫𑁆𑀫𑀼𑀝𑁆𑀞𑀸. 𑀧𑀲𑁆𑀲𑀤𑁆𑀥𑁄 𑀓𑀸𑀬𑁄𑀢𑀺 𑀦𑀸𑀫𑀓𑀸𑀬𑁄 𑀘 𑀓𑀭𑀚𑀓𑀸𑀬𑁄 𑀘 𑀧𑀲𑁆𑀲𑀤𑁆𑀥𑁄 𑀯𑀽𑀧𑀲𑀦𑁆𑀢𑀤𑀭𑀣𑁄. 𑀧𑀲𑁆𑀲𑀤𑁆𑀥𑀢𑁆𑀢𑀸𑀯 𑀅𑀲𑀸𑀭𑀤𑁆𑀥𑁄. 𑀲𑀫𑀸𑀳𑀺𑀢𑀁 𑀘𑀺𑀢𑁆𑀢𑀦𑁆𑀢𑀺 𑀆𑀭𑀫𑁆𑀫𑀡𑁂 𑀘𑀺𑀢𑁆𑀢𑀁 𑀲𑀫𑁆𑀫𑀸 𑀆𑀳𑀺𑀢𑀁 𑀲𑀼𑀝𑁆𑀞𑀼 𑀞𑀧𑀺𑀢𑀁. 𑀲𑀫𑁆𑀫𑀸 𑀆𑀳𑀺𑀢𑀢𑁆𑀢𑀸𑀯 𑀏𑀓𑀕𑁆𑀕𑀁. 𑀅𑀥𑀺𑀧𑀢𑀺𑀁 𑀓𑀭𑀺𑀢𑁆𑀯𑀸𑀢𑀺 𑀚𑁂𑀝𑁆𑀞𑀓𑀁 𑀓𑀢𑁆𑀯𑀸. 𑀲𑀼𑀤𑁆𑀥𑀁 𑀅𑀢𑁆𑀢𑀸𑀦𑀁 𑀧𑀭𑀺𑀳𑀭𑀢𑀻𑀢𑀺 𑀲𑀼𑀤𑁆𑀥𑀁 𑀦𑀺𑀫𑁆𑀫𑀮𑀁 𑀓𑀢𑁆𑀯𑀸 𑀅𑀢𑁆𑀢𑀸𑀦𑀁 𑀧𑀭𑀺𑀳𑀭𑀢𑀺 𑀧𑀝𑀺𑀚𑀕𑁆𑀕𑀢𑀺, 𑀕𑁄𑀧𑀸𑀬𑀢𑀻𑀢𑀺 𑀅𑀢𑁆𑀣𑁄. 𑀅𑀬𑀜𑁆𑀘 𑀬𑀸𑀯 𑀅𑀭𑀳𑀢𑁆𑀢𑀫𑀕𑁆𑀕𑀸 𑀧𑀭𑀺𑀬𑀸𑀬𑁂𑀦 𑀲𑀼𑀤𑁆𑀥𑀫𑀢𑁆𑀢𑀸𑀦𑀁 𑀧𑀭𑀺𑀳𑀭𑀢𑀺 𑀦𑀸𑀫, 𑀨𑀮𑀧𑁆𑀧𑀢𑁆𑀢𑁄𑀯 𑀧𑀦 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀲𑀼𑀤𑁆𑀥𑀫𑀢𑁆𑀢𑀸𑀦𑀁 𑀧𑀭𑀺𑀳𑀭𑀢𑀺.

𑀲𑁆𑀯𑀸𑀓𑁆𑀔𑀸𑀢𑁄𑀢𑀺𑀆𑀤𑀻𑀦𑀺 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁧.𑁧𑁪𑁭) 𑀯𑀺𑀢𑁆𑀣𑀸𑀭𑀺𑀢𑀸𑀦𑀺. 𑀚𑀸𑀦𑀁 𑀧𑀲𑁆𑀲𑀁 𑀯𑀺𑀳𑀭𑀦𑁆𑀢𑀻𑀢𑀺 𑀢𑀁 𑀥𑀫𑁆𑀫𑀁 𑀚𑀸𑀦𑀦𑁆𑀢𑀸 𑀧𑀲𑁆𑀲𑀦𑁆𑀢𑀸 𑀯𑀺𑀳𑀭𑀦𑁆𑀢𑀺. 𑀇𑀫𑀸𑀦𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀻𑀡𑀺 𑀆𑀥𑀺𑀧𑀢𑁂𑀬𑁆𑀬𑀸𑀦𑀻𑀢𑀺 𑀏𑀢𑁆𑀢𑀸𑀯𑀢𑀸 𑀢𑀻𑀡𑀺 𑀆𑀥𑀺𑀧𑀢𑁂𑀬𑁆𑀬𑀸𑀦𑀺 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀫𑀺𑀲𑁆𑀲𑀓𑀸𑀦𑀺 𑀓𑀣𑀺𑀢𑀸𑀦𑀺.

𑀧𑀓𑀼𑀩𑁆𑀩𑀢𑁄𑀢𑀺 𑀓𑀭𑁄𑀦𑁆𑀢𑀲𑁆𑀲. 𑀅𑀢𑁆𑀢𑀸 𑀢𑁂 𑀧𑀼𑀭𑀺𑀲 𑀚𑀸𑀦𑀸𑀢𑀺, 𑀲𑀘𑁆𑀘𑀁 𑀯𑀸 𑀬𑀤𑀺 𑀯𑀸 𑀫𑀼𑀲𑀸𑀢𑀺 𑀬𑀁 𑀢𑁆𑀯𑀁 𑀓𑀭𑁄𑀲𑀺, 𑀢𑀁 𑀬𑀤𑀺 𑀯𑀸 𑀬𑀣𑀸𑀲𑀪𑀸𑀯𑀁 𑀬𑀤𑀺 𑀯𑀸 𑀦𑁄 𑀬𑀣𑀸𑀲𑀪𑀸𑀯𑀦𑁆𑀢𑀺 𑀢𑀯 𑀅𑀢𑁆𑀢𑀸𑀯 𑀚𑀸𑀦𑀸𑀢𑀺. 𑀇𑀫𑀺𑀦𑀸 𑀘 𑀓𑀸𑀭𑀡𑁂𑀦 𑀯𑁂𑀤𑀺𑀢𑀩𑁆𑀩𑀁 ‘‘𑀧𑀸𑀧𑀓𑀫𑁆𑀫𑀁 𑀓𑀭𑁄𑀦𑁆𑀢𑀲𑁆𑀲 𑀮𑁄𑀓𑁂 𑀧𑀝𑀺𑀘𑁆𑀙𑀦𑁆𑀦𑀝𑁆𑀞𑀸𑀦𑀁 𑀦𑀸𑀫 𑀦𑀢𑁆𑀣𑀻’’𑀢𑀺. 𑀓𑀮𑁆𑀬𑀸𑀡𑀦𑁆𑀢𑀺 𑀲𑀼𑀦𑁆𑀤𑀭𑀁. 𑀅𑀢𑀺𑀫𑀜𑁆𑀜𑀲𑀻𑀢𑀺 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀫𑀜𑁆𑀜𑀲𑀺. 𑀅𑀢𑁆𑀢𑀸𑀦𑀁 𑀧𑀭𑀺𑀕𑀽𑀳𑀲𑀻𑀢𑀺 𑀬𑀣𑀸 𑀫𑁂 𑀅𑀢𑁆𑀢𑀸𑀧𑀺 𑀦 𑀚𑀸𑀦𑀸𑀢𑀺, 𑀏𑀯𑀁 𑀦𑀁 𑀧𑀭𑀺𑀕𑀽𑀳𑀸𑀫𑀻𑀢𑀺 𑀯𑀸𑀬𑀫𑀲𑀺. 𑀅𑀢𑁆𑀢𑀸𑀥𑀺𑀧𑀢𑁂𑀬𑁆𑀬𑀓𑁄𑀢𑀺 𑀅𑀢𑁆𑀢𑀚𑁂𑀝𑁆𑀞𑀓𑁄. 𑀮𑁄𑀓𑀸𑀥𑀺𑀧𑁄𑀢𑀺 𑀮𑁄𑀓𑀚𑁂𑀝𑁆𑀞𑀓𑁄. 𑀦𑀺𑀧𑀓𑁄𑀢𑀺 𑀧𑀜𑁆𑀜𑀯𑀸. 𑀛𑀸𑀬𑀻𑀢𑀺 𑀛𑀸𑀬𑀦𑁆𑀢𑁄. 𑀥𑀫𑁆𑀫𑀸𑀥𑀺𑀧𑁄𑀢𑀺 𑀥𑀫𑁆𑀫𑀚𑁂𑀝𑁆𑀞𑀓𑁄. 𑀲𑀘𑁆𑀘𑀧𑀭𑀓𑁆𑀓𑀫𑁄𑀢𑀺 𑀣𑀺𑀭𑀧𑀭𑀓𑁆𑀓𑀫𑁄 𑀪𑀽𑀢𑀧𑀭𑀓𑁆𑀓𑀫𑁄. 𑀧𑀲𑀬𑁆𑀳 𑀫𑀸𑀭𑀦𑁆𑀢𑀺 𑀫𑀸𑀭𑀁 𑀧𑀲𑀳𑀺𑀢𑁆𑀯𑀸. 𑀅𑀪𑀺𑀪𑀼𑀬𑁆𑀬 𑀅𑀦𑁆𑀢𑀓𑀦𑁆𑀢𑀺 𑀇𑀤𑀁 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀬𑁄 𑀘 𑀨𑀼𑀲𑀻 𑀚𑀸𑀢𑀺𑀓𑁆𑀔𑀬𑀁 𑀧𑀥𑀸𑀦𑀯𑀸𑀢𑀺 𑀬𑁄 𑀛𑀸𑀬𑀻 𑀧𑀥𑀸𑀦𑀯𑀸 𑀫𑀸𑀭𑀁 𑀅𑀪𑀺𑀪𑀯𑀺𑀢𑁆𑀯𑀸 𑀚𑀸𑀢𑀺𑀓𑁆𑀔𑀬𑀁 𑀅𑀭𑀳𑀢𑁆𑀢𑀁 𑀨𑀼𑀲𑀺. 𑀲𑁄 𑀢𑀸𑀤𑀺𑀲𑁄𑀢𑀺 𑀲𑁄 𑀢𑀣𑀸𑀯𑀺𑀥𑁄 𑀢𑀣𑀸𑀲𑀡𑁆𑀞𑀺𑀢𑁄. 𑀮𑁄𑀓𑀯𑀺𑀤𑀽𑀢𑀺 𑀢𑀬𑁄 𑀮𑁄𑀓𑁂 𑀯𑀺𑀤𑀺𑀢𑁂 𑀧𑀸𑀓𑀝𑁂 𑀓𑀢𑁆𑀯𑀸 𑀞𑀺𑀢𑁄. 𑀲𑀼𑀫𑁂𑀥𑁄𑀢𑀺 𑀲𑀼𑀧𑀜𑁆𑀜𑁄. 𑀲𑀩𑁆𑀩𑁂𑀲𑀼 𑀥𑀫𑁆𑀫𑁂𑀲𑀼 𑀅𑀢𑀫𑁆𑀫𑀬𑁄 𑀫𑀼𑀦𑀻𑀢𑀺 𑀲𑀩𑁆𑀩𑁂 𑀢𑁂𑀪𑀽𑀫𑀓𑀥𑀫𑁆𑀫𑁂 𑀢𑀡𑁆𑀳𑀸𑀲𑀗𑁆𑀔𑀸𑀢𑀸𑀬 𑀢𑀫𑁆𑀫𑀬𑀢𑀸𑀬 𑀅𑀪𑀸𑀯𑁂𑀦 𑀅𑀢𑀫𑁆𑀫𑀬𑁄 𑀔𑀻𑀡𑀸𑀲𑀯𑀫𑀼𑀦𑀺 𑀓𑀤𑀸𑀘𑀺 𑀓𑀢𑁆𑀣𑀘𑀺 𑀦 𑀳𑀻𑀬𑀢𑀺 𑀦 𑀧𑀭𑀺𑀳𑀻𑀬𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀻𑀢𑀺.

𑀤𑁂𑀯𑀤𑀽𑀢𑀯𑀕𑁆𑀕𑁄 𑀘𑀢𑀼𑀢𑁆𑀣𑁄.