𑁫. 𑀧𑀭𑀺𑀲𑀯𑀕𑁆𑀕𑀯𑀡𑁆𑀡𑀦𑀸

𑁪𑁩. 𑀧𑀜𑁆𑀘𑀫𑀲𑁆𑀲 𑀧𑀞𑀫𑁂 𑀉𑀢𑁆𑀢𑀸𑀦𑀸𑀢𑀺 𑀧𑀸𑀓𑀝𑀸 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀸. 𑀕𑀫𑁆𑀪𑀻𑀭𑀸𑀢𑀺 𑀕𑀼𑀴𑁆𑀳𑀸 𑀧𑀝𑀺𑀘𑁆𑀙𑀦𑁆𑀦𑀸. 𑀉𑀤𑁆𑀥𑀢𑀸𑀢𑀺 𑀉𑀤𑁆𑀥𑀘𑁆𑀘𑁂𑀦 𑀲𑀫𑀦𑁆𑀦𑀸𑀕𑀢𑀸. 𑀉𑀦𑁆𑀦𑀴𑀸𑀢𑀺 𑀉𑀕𑁆𑀕𑀢𑀦𑀴𑀸, 𑀉𑀝𑁆𑀞𑀺𑀢𑀢𑀼𑀘𑁆𑀙𑀫𑀸𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀘𑀧𑀮𑀸𑀢𑀺 𑀧𑀢𑁆𑀢𑀘𑀻𑀯𑀭𑀫𑀡𑁆𑀟𑀦𑀸𑀤𑀺𑀦𑀸 𑀘𑀸𑀧𑀮𑁆𑀮𑁂𑀦 𑀬𑀼𑀢𑁆𑀢𑀸. 𑀫𑀼𑀔𑀭𑀸𑀢𑀺 𑀫𑀼𑀔𑀔𑀭𑀸 𑀔𑀭𑀯𑀘𑀦𑀸. 𑀯𑀺𑀓𑀺𑀡𑁆𑀡𑀯𑀸𑀘𑀸𑀢𑀺 𑀅𑀲𑀁𑀬𑀢𑀯𑀘𑀦𑀸 𑀤𑀺𑀯𑀲𑀫𑁆𑀧𑀺 𑀦𑀺𑀭𑀢𑁆𑀣𑀓𑀯𑀘𑀦𑀧𑀮𑀸𑀧𑀺𑀦𑁄. 𑀫𑀼𑀝𑁆𑀞𑀲𑁆𑀲𑀢𑀻𑀢𑀺 𑀯𑀺𑀲𑁆𑀲𑀝𑁆𑀞𑀲𑀢𑀺𑀦𑁄. 𑀅𑀲𑀫𑁆𑀧𑀚𑀸𑀦𑀸𑀢𑀺 𑀦𑀺𑀧𑁆𑀧𑀜𑁆𑀜𑀸. 𑀅𑀲𑀫𑀸𑀳𑀺𑀢𑀸𑀢𑀺 𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀫𑀢𑁆𑀢𑀲𑁆𑀲𑀸𑀧𑀺 𑀅𑀮𑀸𑀪𑀺𑀦𑁄. 𑀧𑀸𑀓𑀢𑀺𑀦𑁆𑀤𑁆𑀭𑀺𑀬𑀸𑀢𑀺 𑀧𑀓𑀢𑀺𑀬𑀸 𑀞𑀺𑀢𑁂𑀳𑀺 𑀯𑀺𑀯𑀝𑁂𑀳𑀺 𑀅𑀭𑀓𑁆𑀔𑀺𑀢𑁂𑀳𑀺 𑀇𑀦𑁆𑀤𑁆𑀭𑀺𑀬𑁂𑀳𑀺 𑀲𑀫𑀦𑁆𑀦𑀸𑀕𑀢𑀸. 𑀲𑀼𑀓𑁆𑀓𑀧𑀓𑁆𑀔𑁄 𑀯𑀼𑀢𑁆𑀢𑀯𑀺𑀧𑀮𑁆𑀮𑀸𑀲𑁂𑀦 𑀯𑁂𑀤𑀺𑀢𑀩𑁆𑀩𑁄.

𑁪𑁪. 𑀤𑀼𑀢𑀺𑀬𑁂 𑀪𑀡𑁆𑀟𑀦𑀚𑀸𑀢𑀸𑀢𑀺 𑀪𑀡𑁆𑀟𑀦𑀁 𑀯𑀼𑀘𑁆𑀘𑀢𑀺 𑀓𑀮𑀳𑀲𑁆𑀲 𑀧𑀼𑀩𑁆𑀩𑀪𑀸𑀕𑁄, 𑀢𑀁 𑀢𑁂𑀲𑀁 𑀚𑀸𑀢𑀦𑁆𑀢𑀺 𑀪𑀡𑁆𑀟𑀦𑀚𑀸𑀢𑀸. 𑀢𑀣𑀸 ‘‘𑀫𑀬𑀁 𑀢𑀼𑀫𑁆𑀳𑁂 𑀤𑀡𑁆𑀟𑀸𑀧𑁂𑀲𑁆𑀲𑀸𑀫 𑀩𑀦𑁆𑀥𑀸𑀧𑁂𑀲𑁆𑀲𑀸𑀫𑀸’’𑀢𑀺𑀆𑀤𑀺𑀯𑀘𑀦𑀧𑁆𑀧𑀯𑀢𑁆𑀢𑀺𑀬𑀸 𑀲𑀜𑁆𑀚𑀸𑀢𑀓𑀮𑀳𑀸. 𑀅𑀬𑀁 𑀢𑀸𑀯 𑀕𑀺𑀳𑀻𑀲𑀼 𑀦𑀬𑁄. 𑀧𑀩𑁆𑀩𑀚𑀺𑀢𑀸 𑀧𑀦 𑀆𑀧𑀢𑁆𑀢𑀺𑀯𑀻𑀢𑀺𑀓𑁆𑀓𑀫𑀯𑀸𑀘𑀁 𑀯𑀤𑀦𑁆𑀢𑀸 𑀓𑀮𑀳𑀚𑀸𑀢𑀸 𑀦𑀸𑀫. 𑀯𑀺𑀯𑀸𑀤𑀸𑀧𑀦𑁆𑀦𑀸𑀢𑀺 𑀯𑀺𑀭𑀼𑀤𑁆𑀥𑀯𑀸𑀤𑀁 𑀆𑀧𑀦𑁆𑀦𑀸. 𑀫𑀼𑀔𑀲𑀢𑁆𑀢𑀻𑀳𑀺 𑀯𑀺𑀢𑀼𑀤𑀦𑁆𑀢𑀸𑀢𑀺 𑀕𑀼𑀡𑀸𑀦𑀁 𑀙𑀺𑀦𑁆𑀤𑀦𑀝𑁆𑀞𑁂𑀦 𑀤𑀼𑀩𑁆𑀪𑀸𑀲𑀺𑀢𑀸 𑀯𑀸𑀘𑀸 𑀫𑀼𑀔𑀲𑀢𑁆𑀢𑀺𑀬𑁄𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀢𑀸𑀳𑀺 𑀯𑀺𑀢𑀼𑀤𑀦𑁆𑀢𑀸 𑀯𑀺𑀚𑁆𑀛𑀦𑁆𑀢𑀸. 𑀲𑀫𑀕𑁆𑀕𑀸𑀢𑀺 𑀏𑀓𑀓𑀫𑁆𑀫𑀁 𑀏𑀓𑀼𑀤𑁆𑀤𑁂𑀲𑁄 𑀲𑀫𑀲𑀺𑀓𑁆𑀔𑀢𑀸𑀢𑀺 𑀏𑀢𑁂𑀲𑀁 𑀓𑀭𑀡𑁂𑀦 𑀲𑀫𑀕𑁆𑀕𑀢𑀸𑀬 𑀲𑀳𑀺𑀢𑀸. 𑀧𑀺𑀬𑀘𑀓𑁆𑀔𑀽𑀳𑀻𑀢𑀺 𑀫𑁂𑀢𑁆𑀢𑀸𑀘𑀓𑁆𑀔𑀽𑀳𑀺.

𑁪𑁫. 𑀢𑀢𑀺𑀬𑁂 𑀅𑀕𑁆𑀕𑀯𑀢𑀻𑀢𑀺 𑀉𑀢𑁆𑀢𑀫𑀧𑀼𑀕𑁆𑀕𑀮𑀯𑀢𑀻, 𑀅𑀕𑁆𑀕𑀸𑀬 𑀯𑀸 𑀉𑀢𑁆𑀢𑀫𑀸𑀬 𑀧𑀝𑀺𑀧𑀢𑁆𑀢𑀺𑀬𑀸 𑀲𑀫𑀦𑁆𑀦𑀸𑀕𑀢𑀸. 𑀢𑀢𑁄 𑀯𑀺𑀧𑀭𑀻𑀢𑀸 𑀅𑀦𑀕𑁆𑀕𑀯𑀢𑀻. 𑀩𑀸𑀳𑀼𑀮𑀺𑀓𑀸𑀢𑀺 𑀘𑀻𑀯𑀭𑀸𑀤𑀺𑀩𑀸𑀳𑀼𑀮𑁆𑀮𑀸𑀬 𑀧𑀝𑀺𑀧𑀦𑁆𑀦𑀸. 𑀲𑀸𑀲𑀦𑀁 𑀲𑀺𑀣𑀺𑀮𑀁 𑀕𑀡𑁆𑀳𑀦𑁆𑀢𑀻𑀢𑀺 𑀲𑀸𑀣𑀮𑀺𑀓𑀸. 𑀑𑀓𑁆𑀓𑀫𑀦𑁂 𑀧𑀼𑀩𑁆𑀩𑀗𑁆𑀕𑀫𑀸𑀢𑀺 𑀏𑀢𑁆𑀣 𑀑𑀓𑁆𑀓𑀫𑀦𑀁 𑀯𑀼𑀘𑁆𑀘𑀢𑀺 𑀅𑀯𑀕𑀫𑀦𑀝𑁆𑀞𑁂𑀦 𑀧𑀜𑁆𑀘 𑀦𑀻𑀯𑀭𑀡𑀸𑀦𑀺, 𑀢𑁂𑀦 𑀧𑀜𑁆𑀘𑀦𑀻𑀯𑀭𑀡𑀧𑀽𑀭𑀡𑁂 𑀧𑀼𑀩𑁆𑀩𑀗𑁆𑀕𑀫𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀯𑀺𑀯𑁂𑀓𑁂𑀢𑀺 𑀉𑀧𑀥𑀺𑀯𑀺𑀯𑁂𑀓𑁂 𑀦𑀺𑀩𑁆𑀩𑀸𑀦𑁂. 𑀦𑀺𑀓𑁆𑀔𑀺𑀢𑁆𑀢𑀥𑀼𑀭𑀸𑀢𑀺 𑀢𑀺𑀯𑀺𑀥𑁂𑀧𑀺 𑀯𑀺𑀯𑁂𑀓𑁂 𑀑𑀭𑁄𑀧𑀺𑀢𑀥𑀼𑀭𑀸. 𑀦 𑀯𑀻𑀭𑀺𑀬𑀁 𑀆𑀭𑀪𑀦𑁆𑀢𑀻𑀢𑀺 𑀤𑀼𑀯𑀺𑀥𑀫𑁆𑀧𑀺 𑀯𑀻𑀭𑀺𑀬𑀁 𑀦 𑀓𑀭𑁄𑀦𑁆𑀢𑀺. 𑀅𑀧𑁆𑀧𑀢𑁆𑀢𑀲𑁆𑀲 𑀧𑀢𑁆𑀢𑀺𑀬𑀸𑀢𑀺 𑀧𑀼𑀩𑁆𑀩𑁂 𑀅𑀧𑁆𑀧𑀢𑁆𑀢𑀲𑁆𑀲 𑀛𑀸𑀦𑀯𑀺𑀧𑀲𑁆𑀲𑀦𑀸𑀫𑀕𑁆𑀕𑀨𑀮𑀯𑀺𑀲𑁂𑀲𑀲𑁆𑀲 𑀧𑀢𑁆𑀢𑀺𑀅𑀢𑁆𑀣𑀸𑀬. 𑀇𑀢𑀭𑀁 𑀧𑀤𑀤𑁆𑀯𑀬𑀁 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀧𑀘𑁆𑀙𑀺𑀫𑀸 𑀚𑀦𑀢𑀸𑀢𑀺 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀅𑀦𑁆𑀢𑁂𑀯𑀸𑀲𑀺𑀓𑀚𑀦𑁄. 𑀤𑀺𑀝𑁆𑀞𑀸𑀦𑀼𑀕𑀢𑀺𑀁 𑀆𑀧𑀚𑁆𑀚𑀢𑀻𑀢𑀺 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑁂𑀳𑀺 𑀓𑀢𑀁 𑀅𑀦𑀼𑀓𑀭𑁄𑀦𑁆𑀢𑁄 𑀤𑀺𑀝𑁆𑀞𑀲𑁆𑀲 𑀢𑁂𑀲𑀁 𑀆𑀘𑀸𑀭𑀲𑁆𑀲 𑀅𑀦𑀼𑀕𑀢𑀺𑀁 𑀆𑀧𑀚𑁆𑀚𑀢𑀺 𑀦𑀸𑀫. 𑀲𑁂𑀲𑀁 𑀯𑀼𑀢𑁆𑀢𑀧𑀝𑀺𑀧𑀓𑁆𑀔𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀁.

𑁪𑁬. 𑀘𑀢𑀼𑀢𑁆𑀣𑁂 𑀅𑀭𑀺𑀬𑀸𑀢𑀺 𑀅𑀭𑀺𑀬𑀲𑀸𑀯𑀓𑀧𑀭𑀺𑀲𑀸. 𑀅𑀦𑀭𑀺𑀬𑀸𑀢𑀺 𑀧𑀼𑀣𑀼𑀚𑁆𑀚𑀦𑀧𑀭𑀺𑀲𑀸. ‘‘𑀇𑀤𑀁 𑀤𑀼𑀓𑁆𑀔’’𑀦𑁆𑀢𑀺 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀦𑁆𑀢𑀻𑀢𑀺 𑀞𑀧𑁂𑀢𑁆𑀯𑀸 𑀢𑀡𑁆𑀳𑀁 𑀢𑁂𑀪𑀽𑀫𑀓𑀸 𑀧𑀜𑁆𑀘𑀓𑁆𑀔𑀦𑁆𑀥𑀸 𑀤𑀼𑀓𑁆𑀔𑀲𑀘𑁆𑀘𑀁 𑀦𑀸𑀫, 𑀏𑀢𑁆𑀢𑀓𑀫𑁂𑀯 𑀤𑀼𑀓𑁆𑀔𑀁, 𑀇𑀢𑁄 𑀉𑀤𑁆𑀥𑀁 𑀤𑀼𑀓𑁆𑀔𑀁 𑀦𑀢𑁆𑀣𑀻𑀢𑀺 𑀬𑀣𑀸𑀲𑀪𑀸𑀯𑀢𑁄 𑀦𑀧𑁆𑀧𑀚𑀸𑀦𑀦𑁆𑀢𑀺. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣. 𑀲𑁂𑀲𑀧𑀤𑁂𑀲𑀼 𑀧𑀦 𑀢𑀲𑁆𑀲 𑀤𑀼𑀓𑁆𑀔𑀲𑁆𑀲 𑀲𑀫𑀼𑀝𑁆𑀞𑀸𑀧𑀺𑀓𑀸 𑀧𑀼𑀭𑀺𑀫𑀢𑀡𑁆𑀳𑀸 𑀲𑀫𑀼𑀤𑀬𑁄 𑀦𑀸𑀫, 𑀢𑀲𑁆𑀲𑀸𑀬𑁂𑀯 𑀢𑀡𑁆𑀳𑀸𑀬, 𑀤𑁆𑀯𑀺𑀦𑁆𑀦𑀫𑁆𑀧𑀺 𑀯𑀸 𑀢𑁂𑀲𑀁 𑀲𑀘𑁆𑀘𑀸𑀦𑀁 𑀅𑀘𑁆𑀘𑀦𑁆𑀢𑀓𑁆𑀔𑀬𑁄 𑀅𑀲𑀫𑀼𑀧𑁆𑀧𑀢𑁆𑀢𑀺 𑀤𑀼𑀓𑁆𑀔𑀦𑀺𑀭𑁄𑀥𑁄 𑀦𑀸𑀫, 𑀅𑀝𑁆𑀞𑀗𑁆𑀕𑀺𑀓𑁄 𑀅𑀭𑀺𑀬𑀫𑀕𑁆𑀕𑁄 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸 𑀦𑀸𑀫𑀸𑀢𑀺 𑀏𑀯𑀁 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀘𑀢𑀽𑀳𑀺 𑀲𑀘𑁆𑀘𑁂𑀳𑀺 𑀘𑀢𑁆𑀢𑀸𑀭𑁄 𑀫𑀕𑁆𑀕𑀸 𑀘 𑀘𑀢𑁆𑀢𑀸𑀭𑀺 𑀘 𑀨𑀮𑀸𑀦𑀺 𑀓𑀣𑀺𑀢𑀸𑀦𑀺.

𑁪𑁭. 𑀧𑀜𑁆𑀘𑀫𑁂 𑀧𑀭𑀺𑀲𑀸𑀓𑀲𑀝𑁄𑀢𑀺 𑀓𑀲𑀝𑀧𑀭𑀺𑀲𑀸 𑀓𑀘𑀯𑀭𑀧𑀭𑀺𑀲𑀸 𑀧𑀮𑀸𑀧𑀧𑀭𑀺𑀲𑀸𑀢𑀺 𑀅𑀢𑁆𑀣𑁄. 𑀧𑀭𑀺𑀲𑀸𑀫𑀡𑁆𑀟𑁄𑀢𑀺 𑀧𑀲𑀦𑁆𑀦𑀧𑀭𑀺𑀲𑀸 𑀲𑀸𑀭𑀧𑀭𑀺𑀲𑀸𑀢𑀺 𑀅𑀢𑁆𑀣𑁄. 𑀙𑀦𑁆𑀤𑀸𑀕𑀢𑀺𑀁 𑀕𑀘𑁆𑀙𑀦𑁆𑀢𑀻𑀢𑀺 𑀙𑀦𑁆𑀤𑁂𑀦 𑀅𑀕𑀢𑀺𑀁 𑀕𑀘𑁆𑀙𑀦𑁆𑀢𑀺, 𑀅𑀓𑀢𑁆𑀢𑀩𑁆𑀩𑀁 𑀓𑀭𑁄𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀇𑀫𑀸𑀦𑀺 𑀧𑀦 𑀘𑀢𑁆𑀢𑀸𑀭𑀺 𑀅𑀕𑀢𑀺𑀕𑀫𑀦𑀸𑀦𑀺 𑀪𑀡𑁆𑀟𑀪𑀸𑀚𑀦𑀻𑀬𑁂 𑀘 𑀯𑀺𑀦𑀺𑀘𑁆𑀙𑀬𑀝𑁆𑀞𑀸𑀦𑁂 𑀘 𑀮𑀩𑁆𑀪𑀦𑁆𑀢𑀺. 𑀢𑀢𑁆𑀣 𑀪𑀡𑁆𑀟𑀪𑀸𑀚𑀦𑀻𑀬𑁂 𑀢𑀸𑀯 𑀅𑀢𑁆𑀢𑀦𑁄 𑀪𑀸𑀭𑀪𑀽𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀅𑀫𑀦𑀸𑀧𑁂 𑀪𑀡𑁆𑀟𑀓𑁂 𑀧𑀢𑁆𑀢𑁂 𑀢𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀫𑀦𑀸𑀧𑀁 𑀤𑁂𑀦𑁆𑀢𑁄 𑀙𑀦𑁆𑀤𑀸𑀕𑀢𑀺𑀁 𑀕𑀘𑁆𑀙𑀢𑀺 𑀦𑀸𑀫. 𑀅𑀢𑁆𑀢𑀦𑁄 𑀧𑀦 𑀅𑀪𑀸𑀭𑀪𑀽𑀢𑀸𑀦𑀁 𑀫𑀦𑀸𑀧𑁂 𑀪𑀡𑁆𑀟𑀓𑁂 𑀧𑀢𑁆𑀢𑁂 𑀢𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀅𑀫𑀦𑀸𑀧𑀁 𑀤𑁂𑀦𑁆𑀢𑁄 𑀤𑁄𑀲𑀸𑀕𑀢𑀺𑀁 𑀕𑀘𑁆𑀙𑀢𑀺 𑀦𑀸𑀫. 𑀪𑀡𑁆𑀟𑀓𑀪𑀸𑀚𑀦𑀻𑀬𑀯𑀢𑁆𑀣𑀼𑀜𑁆𑀘 𑀞𑀺𑀢𑀺𑀓𑀜𑁆𑀘 𑀅𑀚𑀸𑀦𑀦𑁆𑀢𑁄 𑀫𑁄𑀳𑀸𑀕𑀢𑀺𑀁 𑀕𑀘𑁆𑀙𑀢𑀺 𑀦𑀸𑀫. 𑀫𑀼𑀔𑀭𑀸𑀦𑀁 𑀯𑀸 𑀭𑀸𑀚𑀸𑀤𑀺𑀦𑀺𑀲𑁆𑀲𑀺𑀢𑀸𑀦𑀁 𑀯𑀸 ‘‘𑀇𑀫𑁂 𑀫𑁂 𑀅𑀫𑀦𑀸𑀧𑁂 𑀪𑀡𑁆𑀟𑀓𑁂 𑀤𑀺𑀦𑁆𑀦𑁂 𑀅𑀦𑀢𑁆𑀣𑀫𑁆𑀧𑀺 𑀓𑀭𑁂𑀬𑁆𑀬𑀼’’𑀦𑁆𑀢𑀺 𑀪𑀬𑁂𑀦 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀫𑀦𑀸𑀧𑀁 𑀤𑁂𑀦𑁆𑀢𑁄 𑀪𑀬𑀸𑀕𑀢𑀺𑀁 𑀕𑀘𑁆𑀙𑀢𑀺 𑀦𑀸𑀫. 𑀬𑁄 𑀧𑀦 𑀏𑀯𑀁 𑀦 𑀕𑀘𑁆𑀙𑀢𑀺, 𑀲𑀩𑁆𑀩𑁂𑀲𑀁 𑀢𑀼𑀮𑀸𑀪𑀽𑀢𑁄 𑀧𑀫𑀸𑀡𑀪𑀽𑀢𑁄 𑀫𑀚𑁆𑀛𑀢𑁆𑀢𑁄 𑀳𑀼𑀢𑁆𑀯𑀸 𑀬𑀁 𑀬𑀲𑁆𑀲 𑀧𑀸𑀧𑀼𑀡𑀸𑀢𑀺, 𑀢𑀜𑁆𑀜𑁂𑀯 𑀢𑀲𑁆𑀲 𑀤𑁂𑀢𑀺, 𑀅𑀬𑀁 𑀘𑀢𑀼𑀩𑁆𑀩𑀺𑀥𑀫𑁆𑀧𑀺 𑀅𑀕𑀢𑀺𑀕𑀫𑀦𑀁 𑀦 𑀕𑀘𑁆𑀙𑀢𑀺 𑀦𑀸𑀫. 𑀯𑀺𑀦𑀺𑀘𑁆𑀙𑀬𑀝𑁆𑀞𑀸𑀦𑁂 𑀧𑀦 𑀅𑀢𑁆𑀢𑀦𑁄 𑀪𑀸𑀭𑀪𑀽𑀢𑀲𑁆𑀲 𑀕𑀭𑀼𑀓𑀸𑀧𑀢𑁆𑀢𑀺𑀁 𑀮𑀳𑀼𑀓𑀸𑀧𑀢𑁆𑀢𑀻𑀢𑀺 𑀓𑀢𑁆𑀯𑀸 𑀓𑀣𑁂𑀦𑁆𑀢𑁄 𑀙𑀦𑁆𑀤𑀸𑀕𑀢𑀺𑀁 𑀕𑀘𑁆𑀙𑀢𑀺 𑀦𑀸𑀫. 𑀇𑀢𑀭𑀲𑁆𑀲 𑀮𑀳𑀼𑀓𑀸𑀧𑀢𑁆𑀢𑀺𑀁 𑀕𑀭𑀼𑀓𑀸𑀧𑀢𑁆𑀢𑀻𑀢𑀺 𑀓𑀢𑁆𑀯𑀸 𑀓𑀣𑁂𑀦𑁆𑀢𑁄 𑀤𑁄𑀲𑀸𑀕𑀢𑀺𑀁 𑀕𑀘𑁆𑀙𑀢𑀺 𑀦𑀸𑀫. 𑀆𑀧𑀢𑁆𑀢𑀺𑀯𑀼𑀝𑁆𑀞𑀸𑀦𑀁 𑀧𑀦 𑀲𑀫𑀼𑀘𑁆𑀘𑀬𑀓𑁆𑀔𑀦𑁆𑀥𑀓𑀜𑁆𑀘 𑀅𑀚𑀸𑀦𑀦𑁆𑀢𑁄 𑀫𑁄𑀳𑀸𑀕𑀢𑀺𑀁 𑀕𑀘𑁆𑀙𑀢𑀺 𑀦𑀸𑀫. 𑀫𑀼𑀔𑀭𑀲𑁆𑀲 𑀯𑀸 𑀭𑀸𑀚𑀧𑀽𑀚𑀺𑀢𑀲𑁆𑀲 𑀯𑀸 ‘‘𑀅𑀬𑀁 𑀫𑁂 𑀕𑀭𑀼𑀓𑀁 𑀓𑀢𑁆𑀯𑀸 𑀆𑀧𑀢𑁆𑀢𑀺𑀁 𑀓𑀣𑁂𑀦𑁆𑀢𑀲𑁆𑀲 𑀅𑀦𑀢𑁆𑀣𑀫𑁆𑀧𑀺 𑀓𑀭𑁂𑀬𑁆𑀬𑀸’’𑀢𑀺 𑀕𑀭𑀼𑀓𑀫𑁂𑀯 𑀮𑀳𑀼𑀓𑀸𑀢𑀺 𑀓𑀢𑁆𑀯𑀸 𑀓𑀣𑁂𑀦𑁆𑀢𑁄 𑀪𑀬𑀸𑀕𑀢𑀺𑀁 𑀕𑀘𑁆𑀙𑀢𑀺 𑀦𑀸𑀫. 𑀬𑁄 𑀧𑀦 𑀲𑀩𑁆𑀩𑁂𑀲𑀁 𑀬𑀣𑀸𑀪𑀽𑀢𑀫𑁂𑀯 𑀓𑀣𑁂𑀢𑀺, 𑀅𑀬𑀁 𑀘𑀢𑀼𑀩𑁆𑀩𑀺𑀥𑀫𑁆𑀧𑀺 𑀅𑀕𑀢𑀺𑀕𑀫𑀦𑀁 𑀦 𑀕𑀘𑁆𑀙𑀢𑀺 𑀦𑀸𑀫.

𑁪𑁮. 𑀙𑀝𑁆𑀞𑁂 𑀑𑀓𑁆𑀓𑀸𑀘𑀺𑀢𑀯𑀺𑀦𑀻𑀢𑀸𑀢𑀺 𑀤𑀼𑀩𑁆𑀩𑀺𑀦𑀻𑀢𑀸. 𑀦𑁄 𑀧𑀝𑀺𑀧𑀼𑀘𑁆𑀙𑀸𑀯𑀺𑀦𑀻𑀢𑀸𑀢𑀺 𑀦 𑀧𑀼𑀘𑁆𑀙𑀺𑀢𑁆𑀯𑀸 𑀯𑀺𑀦𑀻𑀢𑀸. 𑀕𑀫𑁆𑀪𑀻𑀭𑀸𑀢𑀺 𑀧𑀸𑀴𑀺𑀯𑀲𑁂𑀦 𑀕𑀫𑁆𑀪𑀻𑀭𑀸 𑀲𑀮𑁆𑀮𑀲𑀼𑀢𑁆𑀢𑀲𑀤𑀺𑀲𑀸. 𑀕𑀫𑁆𑀪𑀻𑀭𑀢𑁆𑀣𑀸𑀢𑀺 𑀅𑀢𑁆𑀣𑀯𑀲𑁂𑀦 𑀕𑀫𑁆𑀪𑀻𑀭𑀸 𑀫𑀳𑀸𑀯𑁂𑀤𑀮𑁆𑀮𑀲𑀼𑀢𑁆𑀢𑀲𑀤𑀺𑀲𑀸. 𑀮𑁄𑀓𑀼𑀢𑁆𑀢𑀭𑀸𑀢𑀺 𑀮𑁄𑀓𑀼𑀢𑁆𑀢𑀭𑀅𑀢𑁆𑀣𑀤𑀻𑀧𑀓𑀸. 𑀲𑀼𑀜𑁆𑀜𑀢𑀸𑀧𑀝𑀺𑀲𑀁𑀬𑀼𑀢𑁆𑀢𑀸𑀢𑀺 𑀲𑀢𑁆𑀢𑀲𑀼𑀜𑁆𑀜𑀁 𑀥𑀫𑁆𑀫𑀫𑀢𑁆𑀢𑀫𑁂𑀯 𑀧𑀓𑀸𑀲𑀓𑀸 𑀅𑀲𑀗𑁆𑀔𑀢𑀲𑀁𑀬𑀼𑀢𑁆𑀢𑀲𑀤𑀺𑀲𑀸. 𑀦 𑀅𑀜𑁆𑀜𑀸 𑀘𑀺𑀢𑁆𑀢𑀁 𑀉𑀧𑀝𑁆𑀞𑀧𑁂𑀦𑁆𑀢𑀻𑀢𑀺 𑀯𑀺𑀚𑀸𑀦𑀦𑀢𑁆𑀣𑀸𑀬 𑀘𑀺𑀢𑁆𑀢𑀁 𑀦 𑀉𑀧𑀝𑁆𑀞𑀧𑁂𑀦𑁆𑀢𑀺, 𑀦𑀺𑀤𑁆𑀤𑀸𑀬𑀦𑁆𑀢𑀺 𑀯𑀸 𑀅𑀜𑁆𑀜𑀯𑀺𑀳𑀺𑀢𑀸 𑀯𑀸 𑀳𑁄𑀦𑁆𑀢𑀺. 𑀉𑀕𑁆𑀕𑀳𑁂𑀢𑀩𑁆𑀩𑀁 𑀧𑀭𑀺𑀬𑀸𑀧𑀼𑀡𑀺𑀢𑀩𑁆𑀩𑀦𑁆𑀢𑀺 𑀉𑀕𑁆𑀕𑀳𑁂𑀢𑀩𑁆𑀩𑁂 𑀘 𑀧𑀭𑀺𑀬𑀸𑀧𑀼𑀡𑀺𑀢𑀩𑁆𑀩𑁂 𑀘. 𑀓𑀯𑀺𑀢𑀸𑀢𑀺 𑀓𑀯𑀻𑀳𑀺 𑀓𑀢𑀸. 𑀇𑀢𑀭𑀁 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀘𑀺𑀢𑁆𑀢𑀓𑁆𑀔𑀭𑀸𑀢𑀺 𑀯𑀺𑀘𑀺𑀢𑁆𑀭𑀅𑀓𑁆𑀔𑀭𑀸. 𑀇𑀢𑀭𑀁 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀩𑀸𑀳𑀺𑀭𑀓𑀸𑀢𑀺 𑀲𑀸𑀲𑀦𑀢𑁄 𑀩𑀳𑀺𑀪𑀽𑀢𑀸. 𑀲𑀸𑀯𑀓𑀪𑀸𑀲𑀺𑀢𑀸𑀢𑀺 𑀢𑁂𑀲𑀁 𑀢𑁂𑀲𑀁 𑀲𑀸𑀯𑀓𑁂𑀳𑀺 𑀪𑀸𑀲𑀺𑀢𑀸. 𑀲𑀼𑀲𑁆𑀲𑀽𑀲𑀦𑁆𑀢𑀻𑀢𑀺 𑀅𑀓𑁆𑀔𑀭𑀘𑀺𑀢𑁆𑀢𑀢𑀸𑀬 𑀘𑁂𑀯 𑀲𑀭𑀲𑀫𑁆𑀧𑀢𑁆𑀢𑀺𑀬𑀸 𑀘 𑀅𑀢𑁆𑀢𑀫𑀦𑀸 𑀳𑀼𑀢𑁆𑀯𑀸 𑀲𑀼𑀡𑀦𑁆𑀢𑀺. 𑀦 𑀘𑁂𑀯 𑀅𑀜𑁆𑀜𑀫𑀜𑁆𑀜𑀁 𑀧𑀝𑀺𑀧𑀼𑀘𑁆𑀙𑀦𑁆𑀢𑀻𑀢𑀺 𑀅𑀜𑁆𑀜𑀫𑀜𑁆𑀜𑀁 𑀅𑀢𑁆𑀣𑀁 𑀯𑀸 𑀅𑀦𑀼𑀲𑀦𑁆𑀥𑀺𑀁 𑀯𑀸 𑀧𑀼𑀩𑁆𑀩𑀸𑀧𑀭𑀁 𑀯𑀸 𑀦 𑀧𑀼𑀘𑁆𑀙𑀦𑁆𑀢𑀺. 𑀦 𑀘 𑀧𑀝𑀺𑀯𑀺𑀘𑀭𑀦𑁆𑀢𑀻𑀢𑀺 𑀧𑀼𑀘𑁆𑀙𑀦𑀢𑁆𑀣𑀸𑀬 𑀘𑀸𑀭𑀺𑀓𑀁 𑀦 𑀯𑀺𑀘𑀭𑀦𑁆𑀢𑀺. 𑀇𑀤𑀁 𑀓𑀣𑀦𑁆𑀢𑀺 𑀇𑀤𑀁 𑀩𑁆𑀬𑀜𑁆𑀚𑀦𑀁 𑀓𑀣𑀁 𑀭𑁄𑀧𑁂𑀢𑀩𑁆𑀩𑀁 𑀓𑀺𑀦𑁆𑀢𑀺 𑀭𑁄𑀧𑁂𑀢𑀩𑁆𑀩𑀁? 𑀇𑀫𑀲𑁆𑀲 𑀓𑁄 𑀅𑀢𑁆𑀣𑁄𑀢𑀺 𑀇𑀫𑀲𑁆𑀲 𑀪𑀸𑀲𑀺𑀢𑀲𑁆𑀲 𑀓𑁄 𑀅𑀢𑁆𑀣𑁄, 𑀓𑀸 𑀅𑀦𑀼𑀲𑀦𑁆𑀥𑀺, 𑀓𑀺𑀁 𑀧𑀼𑀩𑁆𑀩𑀸𑀧𑀭𑀁? 𑀅𑀯𑀺𑀯𑀝𑀦𑁆𑀢𑀺 𑀧𑀝𑀺𑀘𑁆𑀙𑀦𑁆𑀦𑀁. 𑀦 𑀯𑀺𑀯𑀭𑀦𑁆𑀢𑀻𑀢𑀺 𑀦 𑀉𑀕𑁆𑀖𑀸𑀝𑁂𑀦𑁆𑀢𑀺. 𑀅𑀦𑀼𑀢𑁆𑀢𑀸𑀦𑀻𑀓𑀢𑀦𑁆𑀢𑀺 𑀅𑀧𑀸𑀓𑀝𑀁 𑀓𑀢𑀁. 𑀦 𑀉𑀢𑁆𑀢𑀸𑀦𑀺𑀁 𑀓𑀭𑁄𑀦𑁆𑀢𑀻𑀢𑀺 𑀧𑀸𑀓𑀝𑀁 𑀦 𑀓𑀭𑁄𑀦𑁆𑀢𑀺. 𑀓𑀗𑁆𑀔𑀸𑀞𑀸𑀦𑀺𑀬𑁂𑀲𑀽𑀢𑀺 𑀓𑀗𑁆𑀔𑀸𑀬 𑀓𑀸𑀭𑀡𑀪𑀽𑀢𑁂𑀲𑀼. 𑀲𑀼𑀓𑁆𑀓𑀧𑀓𑁆𑀔𑁄 𑀯𑀼𑀢𑁆𑀢𑀯𑀺𑀧𑀮𑁆𑀮𑀸𑀲𑁂𑀦 𑀯𑁂𑀤𑀺𑀢𑀩𑁆𑀩𑁄.

𑁪𑁯. 𑀲𑀢𑁆𑀢𑀫𑁂 𑀆𑀫𑀺𑀲𑀕𑀭𑀽𑀢𑀺 𑀘𑀢𑀼𑀧𑀘𑁆𑀘𑀬𑀕𑀭𑀼𑀓𑀸 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀁 𑀮𑀸𑀫𑀓𑀢𑁄 𑀕𑀳𑁂𑀢𑁆𑀯𑀸 𑀞𑀺𑀢𑀧𑀭𑀺𑀲𑀸. 𑀲𑀤𑁆𑀥𑀫𑁆𑀫𑀕𑀭𑀽𑀢𑀺 𑀦𑀯 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁂 𑀕𑀭𑀼𑀓𑁂 𑀓𑀢𑁆𑀯𑀸 𑀘𑀢𑁆𑀢𑀸𑀭𑁄 𑀧𑀘𑁆𑀘𑀬𑁂 𑀮𑀸𑀫𑀓𑀢𑁄 𑀕𑀳𑁂𑀢𑁆𑀯𑀸 𑀞𑀺𑀢𑀧𑀭𑀺𑀲𑀸. 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄𑀢𑀺 𑀤𑁆𑀯𑀻𑀳𑀺 𑀪𑀸𑀕𑁂𑀳𑀺 𑀯𑀺𑀫𑀼𑀢𑁆𑀢𑁄. 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑁄𑀢𑀺 𑀧𑀜𑁆𑀜𑀸𑀬 𑀯𑀺𑀫𑀼𑀢𑁆𑀢𑁄 𑀲𑀼𑀓𑁆𑀔𑀯𑀺𑀧𑀲𑁆𑀲𑀓𑀔𑀻𑀡𑀸𑀲𑀯𑁄. 𑀓𑀸𑀬𑀲𑀓𑁆𑀔𑀻𑀢𑀺 𑀓𑀸𑀬𑁂𑀦 𑀛𑀸𑀦𑀨𑀲𑁆𑀲𑀁 𑀨𑀼𑀲𑀺𑀢𑁆𑀯𑀸 𑀧𑀘𑁆𑀙𑀸 𑀦𑀺𑀭𑁄𑀥𑀁 𑀦𑀺𑀩𑁆𑀩𑀸𑀦𑀁 𑀲𑀘𑁆𑀙𑀺𑀓𑀢𑁆𑀯𑀸 𑀞𑀺𑀢𑁄. 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑁄𑀢𑀺 𑀤𑀺𑀝𑁆𑀞𑀦𑁆𑀢𑀁 𑀧𑀢𑁆𑀢𑁄. 𑀇𑀫𑁂 𑀤𑁆𑀯𑁂𑀧𑀺 𑀙𑀲𑀼 𑀞𑀸𑀦𑁂𑀲𑀼 𑀮𑀩𑁆𑀪𑀦𑁆𑀢𑀺. 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑁄𑀢𑀺 𑀲𑀤𑁆𑀤𑀳𑀦𑁆𑀢𑁄 𑀯𑀺𑀫𑀼𑀢𑁆𑀢𑁄. 𑀅𑀬𑀫𑁆𑀧𑀺 𑀙𑀲𑀼 𑀞𑀸𑀦𑁂𑀲𑀼 𑀮𑀩𑁆𑀪𑀢𑀺. 𑀥𑀫𑁆𑀫𑀁 𑀅𑀦𑀼𑀲𑁆𑀲𑀭𑀢𑀻𑀢𑀺 𑀥𑀫𑁆𑀫𑀸𑀦𑀼𑀲𑀸𑀭𑀻. 𑀲𑀤𑁆𑀥𑀁 𑀅𑀦𑀼𑀲𑁆𑀲𑀭𑀢𑀻𑀢𑀺 𑀲𑀤𑁆𑀥𑀸𑀦𑀼𑀲𑀸𑀭𑀻. 𑀇𑀫𑁂 𑀤𑁆𑀯𑁂𑀧𑀺 𑀧𑀞𑀫𑀫𑀕𑁆𑀕𑀲𑀫𑀗𑁆𑀕𑀺𑀦𑁄. 𑀓𑀮𑁆𑀬𑀸𑀡𑀥𑀫𑁆𑀫𑁄𑀢𑀺 𑀲𑀼𑀦𑁆𑀤𑀭𑀥𑀫𑁆𑀫𑁄. 𑀤𑀼𑀲𑁆𑀲𑀻𑀮𑁄 𑀧𑀸𑀧𑀥𑀫𑁆𑀫𑁄𑀢𑀺 𑀦𑀺𑀲𑁆𑀲𑀻𑀮𑁄 𑀮𑀸𑀫𑀓𑀥𑀫𑁆𑀫𑁄. 𑀇𑀫𑀁 𑀓𑀲𑁆𑀫𑀸 𑀕𑀡𑁆𑀳𑀦𑁆𑀢𑀺? 𑀲𑀩𑁆𑀩𑁂𑀲𑀼 𑀳𑀺 𑀏𑀓𑀲𑀤𑀺𑀲𑁂𑀲𑀼 𑀚𑀸𑀢𑁂𑀲𑀼 𑀲𑀻𑀮𑀯𑀦𑁆𑀢𑁂𑀲𑀼 𑀩𑀮𑀯𑀕𑀸𑀭𑀯𑀁 𑀦 𑀳𑁄𑀢𑀺, 𑀏𑀓𑀘𑁆𑀘𑁂𑀲𑀼 𑀧𑀦 𑀤𑀼𑀲𑁆𑀲𑀻𑀮𑁂𑀲𑀼 𑀲𑀢𑀺 𑀲𑀻𑀮𑀯𑀦𑁆𑀢𑀸𑀦𑀁 𑀉𑀧𑀭𑀺 𑀩𑀮𑀯𑀕𑀸𑀭𑀯𑀁 𑀳𑁄𑀢𑀻𑀢𑀺 𑀫𑀜𑁆𑀜𑀦𑁆𑀢𑀸 𑀕𑀡𑁆𑀳𑀦𑁆𑀢𑀺. 𑀢𑁂 𑀢𑁂𑀦 𑀮𑀸𑀪𑀁 𑀮𑀪𑀦𑁆𑀢𑀻𑀢𑀺 𑀢𑁂 𑀪𑀺𑀓𑁆𑀔𑀽 𑀏𑀓𑀘𑁆𑀘𑀸𑀦𑀁 𑀯𑀡𑁆𑀡𑀁 𑀏𑀓𑀘𑁆𑀘𑀸𑀦𑀁 𑀅𑀯𑀡𑁆𑀡𑀁 𑀓𑀣𑁂𑀢𑁆𑀯𑀸 𑀘𑀢𑁆𑀢𑀸𑀭𑁄 𑀧𑀘𑁆𑀘𑀬𑁂 𑀮𑀪𑀦𑁆𑀢𑀺. 𑀕𑀣𑀺𑀢𑀸𑀢𑀺 𑀢𑀡𑁆𑀳𑀸𑀬 𑀕𑀦𑁆𑀣𑀺𑀢𑀸. 𑀫𑀼𑀘𑁆𑀙𑀺𑀢𑀸𑀢𑀺 𑀢𑀡𑁆𑀳𑀸𑀯𑀲𑁂𑀦𑁂𑀯 𑀫𑀼𑀘𑁆𑀙𑀺𑀢𑀸. 𑀅𑀚𑁆𑀛𑁄𑀧𑀦𑁆𑀦𑀸𑀢𑀺 𑀅𑀚𑁆𑀛𑁄𑀲𑀸𑀬 𑀕𑀺𑀮𑀺𑀢𑁆𑀯𑀸 𑀧𑀭𑀺𑀦𑀺𑀝𑁆𑀞𑀧𑁂𑀢𑁆𑀯𑀸 𑀞𑀺𑀢𑀸. 𑀅𑀦𑀸𑀤𑀻𑀦𑀯𑀤𑀲𑁆𑀲𑀸𑀯𑀺𑀦𑁄𑀢𑀺 𑀅𑀧𑀘𑁆𑀘𑀯𑁂𑀓𑁆𑀔𑀺𑀢𑀧𑀭𑀺𑀪𑁄𑀕𑁂 𑀆𑀤𑀻𑀦𑀯𑀁 𑀅𑀧𑀲𑁆𑀲𑀦𑁆𑀢𑀸. 𑀅𑀦𑀺𑀲𑁆𑀲𑀭𑀡𑀧𑀜𑁆𑀜𑀸𑀢𑀺 𑀘𑀢𑀽𑀲𑀼 𑀧𑀘𑁆𑀘𑀬𑁂𑀲𑀼 𑀙𑀦𑁆𑀤𑀭𑀸𑀕𑀅𑀧𑀓𑀟𑁆𑀠𑀦𑀸𑀬 𑀦𑀺𑀲𑁆𑀲𑀭𑀡𑀧𑀜𑁆𑀜𑀸𑀬 𑀯𑀺𑀭𑀳𑀺𑀢𑀸 𑀇𑀤𑀫𑀢𑁆𑀣𑀁 𑀏𑀢𑀦𑁆𑀢𑀺 𑀅𑀚𑀸𑀦𑀦𑁆𑀢𑀸. 𑀧𑀭𑀺𑀪𑀼𑀜𑁆𑀚𑀦𑁆𑀢𑀻𑀢𑀺 𑀲𑀘𑁆𑀙𑀦𑁆𑀤𑀭𑀸𑀕𑀸 𑀳𑀼𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀦𑁆𑀢𑀺.

𑀲𑀼𑀓𑁆𑀓𑀧𑀓𑁆𑀔𑁂 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄𑀢𑀺𑀆𑀤𑀻𑀲𑀼 𑀅𑀬𑀁 𑀲𑀢𑁆𑀢𑀦𑁆𑀦𑀫𑁆𑀧𑀺 𑀅𑀭𑀺𑀬𑀧𑀼𑀕𑁆𑀕𑀮𑀸𑀦𑀁 𑀲𑀗𑁆𑀔𑁂𑀧𑀧𑀓𑀸𑀲𑀦𑀸 𑁋 𑀏𑀓𑁄 𑀪𑀺𑀓𑁆𑀔𑀼 𑀧𑀜𑁆𑀜𑀸𑀥𑀼𑀭𑁂𑀦 𑀅𑀪𑀺𑀦𑀺𑀯𑀺𑀝𑁆𑀞𑁄 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀁 𑀧𑀸𑀧𑀼𑀡𑀸𑀢𑀺. 𑀲𑁄 𑀢𑀲𑁆𑀫𑀺𑀁 𑀔𑀡𑁂 𑀥𑀫𑁆𑀫𑀸𑀦𑀼𑀲𑀸𑀭𑀻 𑀦𑀸𑀫 𑀳𑁄𑀢𑀺, 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀲𑀼 𑀙𑀲𑀼 𑀞𑀸𑀦𑁂𑀲𑀼 𑀓𑀸𑀬𑀲𑀓𑁆𑀔𑀺 𑀦𑀸𑀫, 𑀅𑀭𑀳𑀢𑁆𑀢𑀨𑀮𑀓𑁆𑀔𑀡𑁂 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄 𑀦𑀸𑀫. 𑀲𑀫𑀸𑀧𑀢𑁆𑀢𑀻𑀳𑀺 𑀯𑀺𑀓𑁆𑀔𑀫𑁆𑀪𑀦𑀯𑀺𑀫𑀼𑀢𑁆𑀢𑀺𑀬𑀸 𑀫𑀕𑁆𑀕𑁂𑀦 𑀲𑀫𑀼𑀘𑁆𑀙𑁂𑀤𑀯𑀺𑀫𑀼𑀢𑁆𑀢𑀺𑀬𑀸𑀢𑀺 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀯𑀸 𑀤𑁆𑀯𑀻𑀳𑀺 𑀯𑀸 𑀪𑀸𑀕𑁂𑀳𑀺 𑀯𑀺𑀫𑀼𑀢𑁆𑀢𑁄𑀢𑀺 𑀅𑀢𑁆𑀣𑁄. 𑀅𑀧𑀭𑁄 𑀧𑀜𑁆𑀜𑀸𑀥𑀼𑀭𑁂𑀦 𑀅𑀪𑀺𑀦𑀺𑀯𑀺𑀝𑁆𑀞𑁄 𑀲𑀫𑀸𑀧𑀢𑁆𑀢𑀺𑀬𑁄 𑀦𑀺𑀩𑁆𑀩𑀢𑁆𑀢𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀲𑀼𑀓𑁆𑀔𑀯𑀺𑀧𑀲𑁆𑀲𑀓𑁄𑀯 𑀳𑀼𑀢𑁆𑀯𑀸 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀁 𑀧𑀸𑀧𑀼𑀡𑀸𑀢𑀺. 𑀲𑁄 𑀢𑀲𑁆𑀫𑀺𑀁 𑀔𑀡𑁂 𑀥𑀫𑁆𑀫𑀸𑀦𑀼𑀲𑀸𑀭𑀻 𑀦𑀸𑀫 𑀳𑁄𑀢𑀺, 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀲𑀼 𑀙𑀲𑀼 𑀞𑀸𑀦𑁂𑀲𑀼 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑁄 𑀦𑀸𑀫, 𑀅𑀭𑀳𑀢𑁆𑀢𑀨𑀮𑀓𑁆𑀔𑀡𑁂 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑁄 𑀦𑀸𑀫. 𑀅𑀧𑀭𑁄 𑀲𑀤𑁆𑀥𑀸𑀥𑀼𑀭𑁂𑀦 𑀅𑀪𑀺𑀦𑀺𑀯𑀺𑀝𑁆𑀞𑁄 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀁 𑀧𑀸𑀧𑀼𑀡𑀸𑀢𑀺. 𑀲𑁄 𑀢𑀲𑁆𑀫𑀺𑀁 𑀔𑀡𑁂 𑀲𑀤𑁆𑀥𑀸𑀦𑀼𑀲𑀸𑀭𑀻 𑀦𑀸𑀫 𑀳𑁄𑀢𑀺, 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀲𑀼 𑀙𑀲𑀼 𑀞𑀸𑀦𑁂𑀲𑀼 𑀓𑀸𑀬𑀲𑀓𑁆𑀔𑀺 𑀦𑀸𑀫, 𑀅𑀭𑀳𑀢𑁆𑀢𑀨𑀮𑀓𑁆𑀔𑀡𑁂 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄 𑀦𑀸𑀫. 𑀅𑀧𑀭𑁄 𑀲𑀤𑁆𑀥𑀸𑀥𑀼𑀭𑁂𑀦 𑀅𑀪𑀺𑀦𑀺𑀯𑀺𑀝𑁆𑀞𑁄 𑀲𑀫𑀸𑀧𑀢𑁆𑀢𑀺𑀬𑁄 𑀦𑀺𑀩𑁆𑀩𑀢𑁆𑀢𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀲𑀼𑀓𑁆𑀔𑀯𑀺𑀧𑀲𑁆𑀲𑀓𑁄𑀯 𑀳𑀼𑀢𑁆𑀯𑀸 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀁 𑀧𑀸𑀧𑀼𑀡𑀸𑀢𑀺. 𑀲𑁄 𑀢𑀲𑁆𑀫𑀺𑀁 𑀔𑀡𑁂 𑀲𑀤𑁆𑀥𑀸𑀦𑀼𑀲𑀸𑀭𑀻 𑀦𑀸𑀫 𑀳𑁄𑀢𑀺, 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀲𑀼 𑀙𑀲𑀼 𑀞𑀸𑀦𑁂𑀲𑀼 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑁄 𑀦𑀸𑀫, 𑀅𑀭𑀳𑀢𑁆𑀢𑀨𑀮𑀓𑁆𑀔𑀡𑁂 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑁄 𑀦𑀸𑀫.

𑁫𑁦. 𑀅𑀝𑁆𑀞𑀫𑁂 𑀯𑀺𑀲𑀫𑀸𑀢𑀺 𑀲𑀧𑀓𑁆𑀔𑀮𑀦𑀝𑁆𑀞𑁂𑀦 𑀯𑀺𑀲𑀫𑀸. 𑀲𑀫𑀸𑀢𑀺 𑀦𑀺𑀧𑀓𑁆𑀔𑀮𑀦𑀝𑁆𑀞𑁂𑀦 𑀲𑀫𑀸. 𑀅𑀥𑀫𑁆𑀫𑀓𑀫𑁆𑀫𑀸𑀦𑀻𑀢𑀺 𑀉𑀤𑁆𑀥𑀫𑁆𑀫𑀸𑀦𑀺 𑀓𑀫𑁆𑀫𑀸𑀦𑀺. 𑀅𑀯𑀺𑀦𑀬𑀓𑀫𑁆𑀫𑀸𑀦𑀻𑀢𑀺 𑀉𑀩𑁆𑀩𑀺𑀦𑀬𑀸𑀦𑀺 𑀓𑀫𑁆𑀫𑀸𑀦𑀺.

𑁫𑁧. 𑀦𑀯𑀫𑁂 𑀅𑀥𑀫𑁆𑀫𑀺𑀓𑀸𑀢𑀺 𑀦𑀺𑀤𑁆𑀥𑀫𑁆𑀫𑀸. 𑀥𑀫𑁆𑀫𑀺𑀓𑀸𑀢𑀺 𑀥𑀫𑁆𑀫𑀬𑀼𑀢𑁆𑀢𑀸.

𑁫𑁨. 𑀤𑀲𑀫𑁂 𑀅𑀥𑀺𑀓𑀭𑀡𑀦𑁆𑀢𑀺 𑀯𑀺𑀯𑀸𑀤𑀸𑀥𑀺𑀓𑀭𑀡𑀸𑀤𑀺𑀘𑀢𑀼𑀩𑁆𑀩𑀺𑀥𑀁 𑀅𑀥𑀺𑀓𑀭𑀡𑀁. 𑀆𑀤𑀺𑀬𑀦𑁆𑀢𑀻𑀢𑀺 𑀕𑀡𑁆𑀳𑀦𑁆𑀢𑀺. 𑀲𑀜𑁆𑀜𑀸𑀧𑁂𑀦𑁆𑀢𑀻𑀢𑀺 𑀚𑀸𑀦𑀸𑀧𑁂𑀦𑁆𑀢𑀺. 𑀦 𑀘 𑀲𑀜𑁆𑀜𑀢𑁆𑀢𑀺𑀁 𑀉𑀧𑀕𑀘𑁆𑀙𑀦𑁆𑀢𑀻𑀢𑀺 𑀲𑀜𑁆𑀜𑀸𑀧𑀦𑀢𑁆𑀣𑀁 𑀦 𑀲𑀦𑁆𑀦𑀺𑀧𑀢𑀦𑁆𑀢𑀺. 𑀦 𑀘 𑀦𑀺𑀚𑁆𑀛𑀸𑀧𑁂𑀦𑁆𑀢𑀻𑀢𑀺 𑀦 𑀧𑁂𑀓𑁆𑀔𑀸𑀧𑁂𑀦𑁆𑀢𑀺. 𑀦 𑀘 𑀦𑀺𑀚𑁆𑀛𑀢𑁆𑀢𑀺𑀁 𑀉𑀧𑀕𑀘𑁆𑀙𑀦𑁆𑀢𑀻𑀢𑀺 𑀅𑀜𑁆𑀜𑀫𑀜𑁆𑀜𑀁 𑀦𑀺𑀚𑁆𑀛𑀸𑀧𑀦𑀢𑁆𑀣𑀸𑀬 𑀦 𑀲𑀦𑁆𑀦𑀺𑀧𑀢𑀦𑁆𑀢𑀺. 𑀅𑀲𑀜𑁆𑀜𑀢𑁆𑀢𑀺𑀩𑀮𑀸𑀢𑀺 𑀅𑀲𑀜𑁆𑀜𑀢𑁆𑀢𑀺𑀬𑁂𑀯 𑀩𑀮𑀁 𑀏𑀢𑁂𑀲𑀦𑁆𑀢𑀺 𑀅𑀲𑀜𑁆𑀜𑀢𑁆𑀢𑀺𑀩𑀮𑀸. 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑀫𑀦𑁆𑀢𑀺𑀦𑁄𑀢𑀺 𑀬𑁂𑀲𑀁 𑀳𑀺 𑀏𑀯𑀁 𑀳𑁄𑀢𑀺 𑁋 ‘‘𑀲𑀘𑁂 𑀅𑀫𑁆𑀳𑁂𑀳𑀺 𑀕𑀳𑀺𑀢𑀁 𑀅𑀥𑀺𑀓𑀭𑀡𑀁 𑀥𑀫𑁆𑀫𑀺𑀓𑀁 𑀪𑀯𑀺𑀲𑁆𑀲𑀢𑀺, 𑀕𑀡𑁆𑀳𑀺𑀲𑁆𑀲𑀸𑀫. 𑀲𑀘𑁂 𑀅𑀥𑀫𑁆𑀫𑀺𑀓𑀁, 𑀯𑀺𑀲𑁆𑀲𑀚𑁆𑀚𑁂𑀲𑁆𑀲𑀸𑀫𑀸’’𑀢𑀺, 𑀢𑁂 𑀧𑀝𑀺𑀦𑀺𑀲𑁆𑀲𑀕𑁆𑀕𑀫𑀦𑁆𑀢𑀺𑀦𑁄 𑀦𑀸𑀫 𑀳𑁄𑀦𑁆𑀢𑀺. 𑀇𑀫𑁂 𑀧𑀦 𑀦 𑀢𑀣𑀸 𑀫𑀦𑁆𑀢𑁂𑀦𑁆𑀢𑀻𑀢𑀺 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑀫𑀦𑁆𑀢𑀺𑀦𑁄. 𑀣𑀸𑀫𑀲𑀸 𑀧𑀭𑀸𑀫𑀸𑀲𑀸 𑀅𑀪𑀺𑀦𑀺𑀯𑀺𑀲𑁆𑀲𑀸𑀢𑀺 𑀤𑀺𑀝𑁆𑀞𑀺𑀣𑀸𑀫𑁂𑀦 𑀘 𑀤𑀺𑀝𑁆𑀞𑀺𑀧𑀭𑀸𑀫𑀸𑀲𑁂𑀦 𑀘 𑀅𑀪𑀺𑀦𑀺𑀯𑀺𑀲𑀺𑀢𑁆𑀯𑀸. 𑀇𑀤𑀫𑁂𑀯 𑀲𑀘𑁆𑀘𑀦𑁆𑀢𑀺 𑀇𑀤𑀁 𑀅𑀫𑁆𑀳𑀸𑀓𑀁 𑀯𑀘𑀦𑀫𑁂𑀯 𑀲𑀘𑁆𑀘𑀁. 𑀫𑁄𑀖𑀫𑀜𑁆𑀜𑀦𑁆𑀢𑀺 𑀅𑀯𑀲𑁂𑀲𑀸𑀦𑀁 𑀯𑀘𑀦𑀁 𑀫𑁄𑀖𑀁 𑀢𑀼𑀘𑁆𑀙𑀁. 𑀲𑀼𑀓𑁆𑀓𑀧𑀓𑁆𑀔𑁄 𑀉𑀢𑁆𑀢𑀸𑀦𑀢𑁆𑀣𑁄𑀬𑁂𑀯𑀸𑀢𑀺.

𑀧𑀭𑀺𑀲𑀯𑀕𑁆𑀕𑁄 𑀧𑀜𑁆𑀘𑀫𑁄.