𑁨. 𑀤𑀼𑀢𑀺𑀬𑀧𑀡𑁆𑀡𑀸𑀲𑀓𑀁

(𑁬) 𑁧. 𑀧𑀼𑀕𑁆𑀕𑀮𑀯𑀕𑁆𑀕𑀯𑀡𑁆𑀡𑀦𑀸

𑁫𑁩. 𑀤𑀼𑀢𑀺𑀬𑀧𑀡𑁆𑀡𑀸𑀲𑀓𑀲𑁆𑀲 𑀧𑀞𑀫𑁂 𑀘𑀓𑁆𑀓𑀯𑀢𑁆𑀢𑀺𑀦𑀸 𑀲𑀤𑁆𑀥𑀺𑀁 𑀕𑀳𑀺𑀢𑀢𑁆𑀢𑀸 ‘‘𑀮𑁄𑀓𑀸𑀦𑀼𑀓𑀫𑁆𑀧𑀸𑀬𑀸’’𑀢𑀺 𑀦 𑀯𑀼𑀢𑁆𑀢𑀁. 𑀏𑀢𑁆𑀣 𑀘 𑀘𑀓𑁆𑀓𑀯𑀢𑁆𑀢𑀺𑀦𑁄 𑀉𑀧𑁆𑀧𑀢𑁆𑀢𑀺𑀬𑀸 𑀤𑁆𑀯𑁂 𑀲𑀫𑁆𑀧𑀢𑁆𑀢𑀺𑀬𑁄 𑀮𑀪𑀦𑁆𑀢𑀺, 𑀩𑀼𑀤𑁆𑀥𑀸𑀦𑀁 𑀉𑀧𑁆𑀧𑀢𑁆𑀢𑀺𑀬𑀸 𑀢𑀺𑀲𑁆𑀲𑁄𑀧𑀺.

𑁫𑁪. 𑀤𑀼𑀢𑀺𑀬𑁂 𑀅𑀘𑁆𑀙𑀭𑀺𑀬𑀫𑀦𑀼𑀲𑁆𑀲𑀸𑀢𑀺 𑀆𑀘𑀺𑀡𑁆𑀡𑀫𑀦𑀼𑀲𑁆𑀲𑀸 𑀅𑀩𑁆𑀪𑀼𑀢𑀫𑀦𑀼𑀲𑁆𑀲𑀸.

𑁫𑁫. 𑀢𑀢𑀺𑀬𑁂 𑀩𑀳𑀼𑀦𑁄 𑀚𑀦𑀲𑁆𑀲 𑀅𑀦𑀼𑀢𑀧𑁆𑀧𑀸 𑀳𑁄𑀢𑀻𑀢𑀺 𑀫𑀳𑀸𑀚𑀦𑀲𑁆𑀲 𑀅𑀦𑀼𑀢𑀸𑀧𑀓𑀸𑀭𑀻 𑀳𑁄𑀢𑀺. 𑀢𑀢𑁆𑀣 𑀘𑀓𑁆𑀓𑀯𑀢𑁆𑀢𑀺𑀦𑁄 𑀓𑀸𑀮𑀓𑀺𑀭𑀺𑀬𑀸 𑀏𑀓𑀘𑀓𑁆𑀓𑀯𑀸𑀴𑁂 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀅𑀦𑀼𑀢𑀸𑀧𑀁 𑀓𑀭𑁄𑀢𑀺, 𑀢𑀣𑀸𑀕𑀢𑀲𑁆𑀲 𑀓𑀸𑀮𑀓𑀺𑀭𑀺𑀬𑀸 𑀤𑀲𑀲𑀼 𑀘𑀓𑁆𑀓𑀯𑀸𑀴𑀲𑀳𑀲𑁆𑀲𑁂𑀲𑀼.

𑁫𑁬. 𑀘𑀢𑀼𑀢𑁆𑀣𑁂 𑀣𑀽𑀧𑀸𑀭𑀳𑀸𑀢𑀺 𑀣𑀽𑀧𑀲𑁆𑀲 𑀬𑀼𑀢𑁆𑀢𑀸 𑀅𑀦𑀼𑀘𑁆𑀙𑀯𑀺𑀓𑀸. 𑀘𑀓𑁆𑀓𑀯𑀢𑁆𑀢𑀺𑀦𑁄 𑀳𑀺 𑀘𑁂𑀢𑀺𑀬𑀁 𑀧𑀝𑀺𑀚𑀕𑁆𑀕𑀺𑀢𑁆𑀯𑀸 𑀤𑁆𑀯𑁂 𑀲𑀫𑁆𑀧𑀢𑁆𑀢𑀺𑀬𑁄 𑀮𑀪𑀦𑁆𑀢𑀺, 𑀩𑀼𑀤𑁆𑀥𑀸𑀦𑀁 𑀘𑁂𑀢𑀺𑀬𑀁 𑀧𑀝𑀺𑀚𑀕𑁆𑀕𑀺𑀢𑁆𑀯𑀸 𑀢𑀺𑀲𑁆𑀲𑁄𑀧𑀺.

𑁫𑁭. 𑀧𑀜𑁆𑀘𑀫𑁂 𑀩𑀼𑀤𑁆𑀥𑀸𑀢𑀺 𑀅𑀢𑁆𑀢𑀦𑁄 𑀆𑀦𑀼𑀪𑀸𑀯𑁂𑀦 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀩𑀼𑀤𑁆𑀥𑀸.

𑁫𑁮. 𑀙𑀝𑁆𑀞𑁂 𑀨𑀮𑀦𑁆𑀢𑀺𑀬𑀸𑀢𑀺 𑀲𑀤𑁆𑀤𑀁 𑀓𑀭𑁄𑀦𑁆𑀢𑀺𑀬𑀸. 𑀦 𑀲𑀦𑁆𑀢𑀲𑀦𑁆𑀢𑀻𑀢𑀺 𑀦 𑀪𑀸𑀬𑀦𑁆𑀢𑀺. 𑀢𑀢𑁆𑀣 𑀔𑀻𑀡𑀸𑀲𑀯𑁄 𑀅𑀢𑁆𑀢𑀦𑁄 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀬𑀸 𑀧𑀳𑀻𑀦𑀢𑁆𑀢𑀸 𑀦 𑀪𑀸𑀬𑀢𑀺, 𑀳𑀢𑁆𑀣𑀸𑀚𑀸𑀦𑀻𑀬𑁄 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀬𑀸 𑀩𑀮𑀯𑀢𑁆𑀢𑀸𑀢𑀺. 𑀲𑀢𑁆𑀢𑀫𑀝𑁆𑀞𑀫𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑁬𑁧. 𑀦𑀯𑀫𑁂 𑀓𑀺𑀁𑀧𑀼𑀭𑀺𑀲𑀸𑀢𑀺 𑀓𑀺𑀦𑁆𑀦𑀭𑀸. 𑀫𑀸𑀦𑀼𑀲𑀺𑀁 𑀯𑀸𑀘𑀁 𑀦 𑀪𑀸𑀲𑀦𑁆𑀢𑀻𑀢𑀺 𑀫𑀦𑀼𑀲𑁆𑀲𑀓𑀣𑀁 𑀦 𑀓𑀣𑁂𑀦𑁆𑀢𑀺. 𑀥𑀫𑁆𑀫𑀸𑀲𑁄𑀓𑀲𑁆𑀲 𑀓𑀺𑀭 𑀏𑀓𑀁 𑀓𑀺𑀦𑁆𑀦𑀭𑀁 𑀆𑀦𑁂𑀢𑁆𑀯𑀸 𑀤𑀲𑁆𑀲𑁂𑀲𑀼𑀁. 𑀲𑁄 ‘‘𑀓𑀣𑀸𑀧𑁂𑀣 𑀦’’𑀦𑁆𑀢𑀺 𑀆𑀳. 𑀓𑀺𑀦𑁆𑀦𑀭𑁄 𑀓𑀣𑁂𑀢𑀼𑀁 𑀦 𑀇𑀘𑁆𑀙𑀢𑀺. 𑀏𑀓𑁄 𑀧𑀼𑀭𑀺𑀲𑁄 ‘‘𑀅𑀳𑀫𑁂𑀢𑀁 𑀓𑀣𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀳𑁂𑀝𑁆𑀞𑀸𑀧𑀸𑀲𑀸𑀤𑀁 𑀑𑀢𑀸𑀭𑁂𑀢𑁆𑀯𑀸 𑀤𑁆𑀯𑁂 𑀔𑀸𑀡𑀼𑀓𑁂 𑀓𑁄𑀝𑁆𑀝𑁂𑀢𑁆𑀯𑀸 𑀉𑀓𑁆𑀔𑀮𑀺𑀁 𑀆𑀭𑁄𑀧𑁂𑀲𑀺. 𑀲𑀸 𑀉𑀪𑀢𑁄𑀧𑀲𑁆𑀲𑁂𑀳𑀺 𑀧𑀢𑀢𑀺. 𑀢𑀁 𑀤𑀺𑀲𑁆𑀯𑀸 𑀓𑀺𑀦𑁆𑀦𑀭𑁄 ‘‘𑀓𑀺𑀁 𑀅𑀜𑁆𑀜𑀁 𑀏𑀓𑀁 𑀔𑀸𑀡𑀼𑀓𑀁 𑀓𑁄𑀝𑁆𑀝𑁂𑀢𑀼𑀁 𑀦 𑀯𑀝𑁆𑀝𑀢𑀻’’𑀢𑀺 𑀏𑀢𑁆𑀢𑀓𑀫𑁂𑀯 𑀆𑀳. 𑀧𑀼𑀦 𑀅𑀧𑀭𑀪𑀸𑀕𑁂 𑀤𑁆𑀯𑁂 𑀓𑀺𑀦𑁆𑀦𑀭𑁂 𑀆𑀦𑁂𑀢𑁆𑀯𑀸 𑀤𑀲𑁆𑀲𑁂𑀲𑀼𑀁. 𑀭𑀸𑀚𑀸 ‘‘𑀓𑀣𑀸𑀧𑁂𑀣 𑀦𑁂’’𑀢𑀺 𑀆𑀳. 𑀢𑁂 𑀓𑀣𑁂𑀢𑀼𑀁 𑀦 𑀇𑀘𑁆𑀙𑀺𑀁𑀲𑀼. 𑀏𑀓𑁄 𑀧𑀼𑀭𑀺𑀲𑁄 ‘‘𑀅𑀳𑀫𑁂𑀢𑁂 𑀓𑀣𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀢𑁂 𑀕𑀳𑁂𑀢𑁆𑀯𑀸 𑀅𑀦𑁆𑀢𑀭𑀸𑀧𑀡𑀁 𑀅𑀕𑀫𑀸𑀲𑀺. 𑀢𑀢𑁆𑀣𑁂𑀓𑁄 𑀅𑀫𑁆𑀩𑀧𑀓𑁆𑀓𑀜𑁆𑀘 𑀫𑀘𑁆𑀙𑁂 𑀘 𑀅𑀤𑁆𑀤𑀲, 𑀏𑀓𑁄 𑀓𑀩𑀺𑀝𑁆𑀞𑀨𑀮𑀜𑁆𑀘 𑀅𑀫𑁆𑀩𑀺𑀮𑀺𑀓𑀸𑀨𑀮𑀜𑁆𑀘. 𑀢𑀢𑁆𑀣 𑀧𑀼𑀭𑀺𑀫𑁄 ‘‘𑀫𑀳𑀸𑀯𑀺𑀲𑀁 𑀫𑀦𑀼𑀲𑁆𑀲𑀸 𑀔𑀸𑀤𑀦𑁆𑀢𑀺, 𑀓𑀣𑀁 𑀢𑁂 𑀓𑀺𑀮𑀸𑀲𑀺𑀦𑁄 𑀦 𑀳𑁄𑀦𑁆𑀢𑀻’’𑀢𑀺 𑀆𑀳. 𑀇𑀢𑀭𑁄 ‘‘𑀓𑀣𑀁 𑀇𑀫𑁂 𑀏𑀢𑀁 𑀦𑀺𑀲𑁆𑀲𑀸𑀬 𑀓𑀼𑀝𑁆𑀞𑀺𑀦𑁄 𑀦 𑀳𑁄𑀦𑁆𑀢𑀻’’𑀢𑀺 𑀆𑀳. 𑀏𑀯𑀁 𑀫𑀸𑀦𑀼𑀲𑀺𑀁 𑀯𑀸𑀘𑀁 𑀓𑀣𑁂𑀢𑀼𑀁 𑀲𑀓𑁆𑀓𑁄𑀦𑁆𑀢𑀸𑀧𑀺 𑀤𑁆𑀯𑁂 𑀅𑀢𑁆𑀣𑁂 𑀲𑀫𑁆𑀧𑀲𑁆𑀲𑀫𑀸𑀦𑀸 𑀦 𑀓𑀣𑁂𑀦𑁆𑀢𑀻𑀢𑀺.

𑁬𑁨. 𑀤𑀲𑀫𑁂 𑀅𑀧𑁆𑀧𑀝𑀺𑀯𑀸𑀦𑁄𑀢𑀺 𑀅𑀦𑀼𑀓𑀡𑁆𑀞𑀺𑀢𑁄 𑀅𑀧𑀘𑁆𑀘𑁄𑀲𑀓𑁆𑀓𑀺𑀢𑁄.

𑁬𑁩. 𑀏𑀓𑀸𑀤𑀲𑀫𑁂 𑀅𑀲𑀦𑁆𑀢𑀲𑀦𑁆𑀦𑀺𑀯𑀸𑀲𑀦𑁆𑀢𑀺 𑀅𑀲𑀧𑁆𑀧𑀼𑀭𑀺𑀲𑀸𑀦𑀁 𑀲𑀦𑁆𑀦𑀺𑀯𑀸𑀲𑀁. 𑀦 𑀯𑀤𑁂𑀬𑁆𑀬𑀸𑀢𑀺 𑀑𑀯𑀸𑀤𑁂𑀦 𑀯𑀸 𑀅𑀦𑀼𑀲𑀸𑀲𑀦𑀺𑀬𑀸 𑀯𑀸 𑀦 𑀯𑀤𑁂𑀬𑁆𑀬, 𑀫𑀸 𑀯𑀤𑀢𑀽𑀢𑀺 𑀅𑀢𑁆𑀣𑁄. 𑀣𑁂𑀭𑀫𑁆𑀧𑀸𑀳𑀁 𑀦 𑀯𑀤𑁂𑀬𑁆𑀬𑀦𑁆𑀢𑀺 𑀅𑀳𑀫𑁆𑀧𑀺 𑀣𑁂𑀭𑀁 𑀪𑀺𑀓𑁆𑀔𑀼𑀁 𑀑𑀯𑀸𑀤𑀸𑀦𑀼𑀲𑀸𑀲𑀦𑀺𑀯𑀲𑁂𑀦 𑀦 𑀯𑀤𑁂𑀬𑁆𑀬𑀁. 𑀅𑀳𑀺𑀢𑀸𑀦𑀼𑀓𑀫𑁆𑀧𑀻𑀢𑀺 𑀅𑀳𑀺𑀢𑀁 𑀇𑀘𑁆𑀙𑀫𑀸𑀦𑁄. 𑀦𑁄 𑀳𑀺𑀢𑀸𑀦𑀼𑀓𑀫𑁆𑀧𑀻𑀢𑀺 𑀳𑀺𑀢𑀁 𑀅𑀦𑀺𑀘𑁆𑀙𑀫𑀸𑀦𑁄. 𑀦𑁄𑀢𑀺 𑀦𑀁 𑀯𑀤𑁂𑀬𑁆𑀬𑀦𑁆𑀢𑀺 ‘‘𑀅𑀳𑀁 𑀢𑀯 𑀯𑀘𑀦𑀁 𑀦 𑀓𑀭𑀺𑀲𑁆𑀲’’𑀦𑁆𑀢𑀺 𑀦𑀁 𑀯𑀤𑁂𑀬𑁆𑀬𑀁. 𑀯𑀺𑀳𑁂𑀞𑁂𑀬𑁆𑀬𑀦𑁆𑀢𑀺 𑀯𑀘𑀦𑀲𑁆𑀲 𑀅𑀓𑀭𑀡𑁂𑀦 𑀯𑀺𑀳𑁂𑀞𑁂𑀬𑁆𑀬𑀁. 𑀧𑀲𑁆𑀲𑀫𑁆𑀧𑀺𑀲𑁆𑀲 𑀦𑀧𑁆𑀧𑀝𑀺𑀓𑀭𑁂𑀬𑁆𑀬𑀦𑁆𑀢𑀺 𑀧𑀲𑁆𑀲𑀦𑁆𑀢𑁄𑀧𑀺 𑀚𑀸𑀦𑀦𑁆𑀢𑁄𑀧𑀺 𑀅𑀳𑀁 𑀢𑀲𑁆𑀲 𑀯𑀘𑀦𑀁 𑀦 𑀓𑀭𑁂𑀬𑁆𑀬𑀁. 𑀇𑀫𑀺𑀦𑀸 𑀉𑀧𑀸𑀬𑁂𑀦 𑀲𑀩𑁆𑀩𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀲𑀼𑀓𑁆𑀓𑀧𑀓𑁆𑀔𑁂 𑀧𑀦 𑀲𑀸𑀥𑀽𑀢𑀺 𑀦𑀁 𑀯𑀤𑁂𑀬𑁆𑀬𑀦𑁆𑀢𑀺 ‘‘𑀲𑀸𑀥𑀼 𑀪𑀤𑁆𑀤𑀓𑀁 𑀲𑀼𑀓𑀣𑀺𑀢𑀁 𑀢𑀬𑀸’’𑀢𑀺 𑀢𑀲𑁆𑀲 𑀓𑀣𑀁 𑀅𑀪𑀺𑀦𑀦𑁆𑀤𑀦𑁆𑀢𑁄 𑀦𑀁 𑀯𑀤𑁂𑀬𑁆𑀬𑀦𑁆𑀢𑀺 𑀅𑀢𑁆𑀣𑁄.

𑁬𑁪. 𑀤𑁆𑀯𑀸𑀤𑀲𑀫𑁂 𑀉𑀪𑀢𑁄 𑀯𑀘𑀻𑀲𑀁𑀲𑀸𑀭𑁄𑀢𑀺 𑀤𑁆𑀯𑀻𑀲𑀼𑀧𑀺 𑀧𑀓𑁆𑀔𑁂𑀲𑀼 𑀅𑀜𑁆𑀜𑀫𑀜𑁆𑀜𑀁 𑀅𑀓𑁆𑀓𑁄𑀲𑀦𑀧𑀘𑁆𑀘𑀓𑁆𑀓𑁄𑀲𑀦𑀯𑀲𑁂𑀦 𑀲𑀁𑀲𑀭𑀫𑀸𑀦𑀸 𑀯𑀸𑀘𑀸 𑀯𑀘𑀻𑀲𑀁𑀲𑀸𑀭𑁄. 𑀤𑀺𑀝𑁆𑀞𑀺𑀧𑀴𑀸𑀲𑁄𑀢𑀺 𑀤𑀺𑀝𑁆𑀞𑀺𑀁 𑀦𑀺𑀲𑁆𑀲𑀸𑀬 𑀉𑀧𑁆𑀧𑀚𑁆𑀚𑀦𑀓𑁄 𑀬𑀼𑀕𑀕𑁆𑀕𑀸𑀳𑀮𑀓𑁆𑀔𑀡𑁄 𑀧𑀴𑀸𑀲𑁄 𑀤𑀺𑀝𑁆𑀞𑀺𑀧𑀴𑀸𑀲𑁄 𑀦𑀸𑀫. 𑀘𑁂𑀢𑀲𑁄 𑀆𑀖𑀸𑀢𑁄𑀢𑀺 𑀓𑁄𑀧𑁄. 𑀲𑁄 𑀳𑀺 𑀘𑀺𑀢𑁆𑀢𑀁 𑀆𑀖𑀸𑀢𑁂𑀦𑁆𑀢𑁄 𑀉𑀧𑁆𑀧𑀚𑁆𑀚𑀢𑀺. 𑀅𑀧𑁆𑀧𑀘𑁆𑀘𑀬𑁄𑀢𑀺 𑀅𑀢𑀼𑀝𑁆𑀞𑀸𑀓𑀸𑀭𑁄, 𑀤𑁄𑀫𑀦𑀲𑁆𑀲𑀦𑁆𑀢𑀺 𑀅𑀢𑁆𑀣𑁄. 𑀅𑀦𑀪𑀺𑀭𑀤𑁆𑀥𑀻𑀢𑀺 𑀓𑁄𑀧𑁄𑀬𑁂𑀯. 𑀲𑁄 𑀳𑀺 𑀅𑀦𑀪𑀺𑀭𑀸𑀥𑀦𑀯𑀲𑁂𑀦 𑀅𑀦𑀪𑀺𑀭𑀤𑁆𑀥𑀻𑀢𑀺 𑀯𑀼𑀘𑁆𑀘𑀢𑀺. 𑀅𑀚𑁆𑀛𑀢𑁆𑀢𑀁 𑀅𑀯𑀽𑀧𑀲𑀦𑁆𑀢𑀁 𑀳𑁄𑀢𑀻𑀢𑀺 𑀲𑀩𑁆𑀩𑀫𑁆𑀧𑁂𑀢𑀁 𑀦𑀺𑀬𑀓𑀚𑁆𑀛𑀢𑁆𑀢𑀲𑀗𑁆𑀔𑀸𑀢𑁂 𑀅𑀢𑁆𑀢𑀦𑁄 𑀘𑀺𑀢𑁆𑀢𑁂 𑀘 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀅𑀦𑁆𑀢𑁂𑀯𑀸𑀲𑀺𑀓𑀲𑀗𑁆𑀔𑀸𑀢𑀸𑀬 𑀅𑀢𑁆𑀢𑀦𑁄 𑀧𑀭𑀺𑀲𑀸𑀬 𑀘 𑀅𑀯𑀽𑀧𑀲𑀦𑁆𑀢𑀁 𑀳𑁄𑀢𑀺. 𑀢𑀲𑁆𑀫𑁂𑀢𑀦𑁆𑀢𑀺 𑀢𑀲𑁆𑀫𑀺𑀁 𑀏𑀢𑀁. 𑀲𑁂𑀲𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀦𑁆𑀢𑀺.

𑀧𑀼𑀕𑁆𑀕𑀮𑀯𑀕𑁆𑀕𑁄 𑀧𑀞𑀫𑁄.

(𑁭) 𑁨. 𑀲𑀼𑀔𑀯𑀕𑁆𑀕𑀯𑀡𑁆𑀡𑀦𑀸

𑁬𑁫. 𑀤𑀼𑀢𑀺𑀬𑀲𑁆𑀲 𑀧𑀞𑀫𑁂 𑀕𑀺𑀳𑀺𑀲𑀼𑀔𑀦𑁆𑀢𑀺 𑀕𑀺𑀳𑀻𑀦𑀁 𑀲𑀩𑁆𑀩𑀓𑀸𑀫𑀦𑀺𑀧𑁆𑀨𑀢𑁆𑀢𑀺𑀫𑀽𑀮𑀓𑀁 𑀲𑀼𑀔𑀁. 𑀧𑀩𑁆𑀩𑀚𑀺𑀢𑀲𑀼𑀔𑀦𑁆𑀢𑀺 𑀧𑀩𑁆𑀩𑀚𑀺𑀢𑀸𑀦𑀁 𑀧𑀩𑁆𑀩𑀚𑁆𑀚𑀸𑀫𑀽𑀮𑀓𑀁 𑀲𑀼𑀔𑀁.

𑁬𑁬. 𑀤𑀼𑀢𑀺𑀬𑁂 𑀓𑀸𑀫𑀲𑀼𑀔𑀦𑁆𑀢𑀺 𑀓𑀸𑀫𑁂 𑀆𑀭𑀩𑁆𑀪 𑀉𑀧𑁆𑀧𑀚𑁆𑀚𑀦𑀓𑀲𑀼𑀔𑀁. 𑀦𑁂𑀓𑁆𑀔𑀫𑁆𑀫𑀲𑀼𑀔𑀦𑁆𑀢𑀺 𑀦𑁂𑀓𑁆𑀔𑀫𑁆𑀫𑀁 𑀯𑀼𑀘𑁆𑀘𑀢𑀺 𑀧𑀩𑁆𑀩𑀚𑁆𑀚𑀸, 𑀢𑀁 𑀆𑀭𑀩𑁆𑀪 𑀉𑀧𑁆𑀧𑀚𑁆𑀚𑀦𑀓𑀲𑀼𑀔𑀁.

𑁬𑁭. 𑀢𑀢𑀺𑀬𑁂 𑀉𑀧𑀥𑀺𑀲𑀼𑀔𑀦𑁆𑀢𑀺 𑀢𑁂𑀪𑀽𑀫𑀓𑀲𑀼𑀔𑀁. 𑀦𑀺𑀭𑀼𑀧𑀥𑀺𑀲𑀼𑀔𑀦𑁆𑀢𑀺 𑀮𑁄𑀓𑀼𑀢𑁆𑀢𑀭𑀲𑀼𑀔𑀁.

𑁬𑁮. 𑀘𑀢𑀼𑀢𑁆𑀣𑁂 𑀲𑀸𑀲𑀯𑀲𑀼𑀔𑀦𑁆𑀢𑀺 𑀆𑀲𑀯𑀸𑀦𑀁 𑀧𑀘𑁆𑀘𑀬𑀪𑀽𑀢𑀁 𑀯𑀝𑁆𑀝𑀲𑀼𑀔𑀁. 𑀅𑀦𑀸𑀲𑀯𑀲𑀼𑀔𑀦𑁆𑀢𑀺 𑀢𑁂𑀲𑀁 𑀅𑀧𑀘𑁆𑀘𑀬𑀪𑀽𑀢𑀁 𑀯𑀺𑀯𑀝𑁆𑀝𑀲𑀼𑀔𑀁.

𑁬𑁯. 𑀧𑀜𑁆𑀘𑀫𑁂 𑀲𑀸𑀫𑀺𑀲𑀦𑁆𑀢𑀺 𑀲𑀁𑀓𑀺𑀮𑁂𑀲𑀁 𑀯𑀝𑁆𑀝𑀕𑀸𑀫𑀺𑀲𑀼𑀔𑀁. 𑀦𑀺𑀭𑀸𑀫𑀺𑀲𑀦𑁆𑀢𑀺 𑀦𑀺𑀓𑁆𑀓𑀺𑀮𑁂𑀲𑀁 𑀯𑀺𑀯𑀝𑁆𑀝𑀕𑀸𑀫𑀺𑀲𑀼𑀔𑀁.

𑁭𑁦. 𑀙𑀝𑁆𑀞𑁂 𑀅𑀭𑀺𑀬𑀲𑀼𑀔𑀦𑁆𑀢𑀺 𑀅𑀧𑀼𑀣𑀼𑀚𑁆𑀚𑀦𑀲𑀼𑀔𑀁. 𑀅𑀦𑀭𑀺𑀬𑀲𑀼𑀔𑀦𑁆𑀢𑀺 𑀧𑀼𑀣𑀼𑀚𑁆𑀚𑀦𑀲𑀼𑀔𑀁.

𑁭𑁧. 𑀲𑀢𑁆𑀢𑀫𑁂 𑀓𑀸𑀬𑀺𑀓𑀦𑁆𑀢𑀺 𑀓𑀸𑀬𑀯𑀺𑀜𑁆𑀜𑀸𑀡𑀲𑀳𑀚𑀸𑀢𑀁. 𑀘𑁂𑀢𑀲𑀺𑀓𑀦𑁆𑀢𑀺 𑀫𑀦𑁄𑀤𑁆𑀯𑀸𑀭𑀺𑀓𑀲𑀼𑀔𑀁. 𑀢𑀁 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀫𑀺𑀲𑁆𑀲𑀓𑀁 𑀓𑀣𑀺𑀢𑀁.

𑁭𑁨. 𑀅𑀝𑁆𑀞𑀫𑁂 𑀲𑀧𑁆𑀧𑀻𑀢𑀺𑀓𑀦𑁆𑀢𑀺 𑀧𑀞𑀫𑀤𑀼𑀢𑀺𑀬𑀚𑁆𑀛𑀸𑀦𑀲𑀼𑀔𑀁. 𑀦𑀺𑀧𑁆𑀧𑀻𑀢𑀺𑀓𑀦𑁆𑀢𑀺 𑀢𑀢𑀺𑀬𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑀼𑀔𑀁. 𑀢𑀢𑁆𑀣 𑀮𑁄𑀓𑀺𑀬𑀲𑀧𑁆𑀧𑀻𑀢𑀺𑀓𑀢𑁄 𑀮𑁄𑀓𑀺𑀬𑀦𑀺𑀧𑁆𑀧𑀻𑀢𑀺𑀓𑀁, 𑀮𑁄𑀓𑀼𑀢𑁆𑀢𑀭𑀲𑀧𑁆𑀧𑀻𑀢𑀺𑀓𑀢𑁄 𑀘 𑀮𑁄𑀓𑀼𑀢𑁆𑀢𑀭𑀦𑀺𑀧𑁆𑀧𑀻𑀢𑀺𑀓𑀁 𑀅𑀕𑁆𑀕𑀦𑁆𑀢𑀺 𑀏𑀯𑀁 𑀪𑀼𑀫𑁆𑀫𑀦𑁆𑀢𑀭𑀁 𑀅𑀪𑀺𑀦𑁆𑀤𑀺𑀢𑁆𑀯𑀸 𑀅𑀕𑁆𑀕𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄.

𑁭𑁩. 𑀦𑀯𑀫𑁂 𑀲𑀸𑀢𑀲𑀼𑀔𑀦𑁆𑀢𑀺 𑀢𑀻𑀲𑀼 𑀛𑀸𑀦𑁂𑀲𑀼 𑀲𑀼𑀔𑀁. 𑀉𑀧𑁂𑀓𑁆𑀔𑀸𑀲𑀼𑀔𑀦𑁆𑀢𑀺 𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑀼𑀔𑀁.

𑁭𑁪. 𑀤𑀲𑀫𑁂 𑀲𑀫𑀸𑀥𑀺𑀲𑀼𑀔𑀦𑁆𑀢𑀺 𑀅𑀧𑁆𑀧𑀦𑀁 𑀯𑀸 𑀉𑀧𑀘𑀸𑀭𑀁 𑀯𑀸 𑀧𑀢𑁆𑀢𑀲𑀼𑀔𑀁. 𑀅𑀲𑀫𑀸𑀥𑀺𑀲𑀼𑀔𑀦𑁆𑀢𑀺 𑀢𑀤𑀼𑀪𑀬𑀁 𑀅𑀧𑁆𑀧𑀢𑁆𑀢𑀲𑀼𑀔𑀁.

𑁭𑁫. 𑀏𑀓𑀸𑀤𑀲𑀫𑁂 𑀲𑀧𑁆𑀧𑀻𑀢𑀺𑀓𑀸𑀭𑀫𑁆𑀫𑀡𑀦𑁆𑀢𑀺 𑀲𑀧𑁆𑀧𑀻𑀢𑀺𑀓𑀁 𑀛𑀸𑀦𑀤𑁆𑀯𑀬𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲 𑀉𑀧𑁆𑀧𑀦𑁆𑀦𑀲𑀼𑀔𑀁. 𑀦𑀺𑀧𑁆𑀧𑀻𑀢𑀺𑀓𑀸𑀭𑀫𑁆𑀫𑀡𑁂𑀧𑀺 𑀏𑀲𑁂𑀯 𑀦𑀬𑁄. 𑀤𑁆𑀯𑀸𑀤𑀲𑀫𑁂𑀧𑀺 𑀇𑀫𑀺𑀦𑀸𑀯 𑀉𑀧𑀸𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑁭𑁭. 𑀢𑁂𑀭𑀲𑀫𑁂 𑀭𑀽𑀧𑀸𑀭𑀫𑁆𑀫𑀡𑀦𑁆𑀢𑀺 𑀭𑀽𑀧𑀸𑀯𑀘𑀭𑀘𑀢𑀼𑀢𑁆𑀣𑀚𑁆𑀛𑀸𑀦𑀸𑀭𑀫𑁆𑀫𑀡𑀁, 𑀬𑀁𑀓𑀺𑀜𑁆𑀘𑀺 𑀭𑀽𑀧𑀁 𑀆𑀭𑀩𑁆𑀪 𑀉𑀧𑁆𑀧𑀚𑁆𑀚𑀦𑀓𑀁 𑀯𑀸. 𑀅𑀭𑀽𑀧𑀸𑀭𑀫𑁆𑀫𑀡𑀦𑁆𑀢𑀺 𑀅𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀸𑀭𑀫𑁆𑀫𑀡𑀁, 𑀬𑀁𑀓𑀺𑀜𑁆𑀘𑀺 𑀅𑀭𑀽𑀧𑀁 𑀆𑀭𑀩𑁆𑀪 𑀉𑀧𑁆𑀧𑀚𑁆𑀚𑀦𑀓𑀁 𑀯𑀸𑀢𑀺.

𑀲𑀼𑀔𑀯𑀕𑁆𑀕𑁄 𑀤𑀼𑀢𑀺𑀬𑁄.

(𑁮) 𑁩. 𑀲𑀦𑀺𑀫𑀺𑀢𑁆𑀢𑀯𑀕𑁆𑀕𑀯𑀡𑁆𑀡𑀦𑀸

𑁭𑁮-𑁭𑁯. 𑀢𑀢𑀺𑀬𑀲𑁆𑀲 𑀧𑀞𑀫𑁂 𑀲𑀦𑀺𑀫𑀺𑀢𑁆𑀢𑀸𑀢𑀺 𑀲𑀓𑀸𑀭𑀡𑀸. 𑀤𑀼𑀢𑀺𑀬𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀦𑀺𑀤𑀸𑀦𑀁 𑀳𑁂𑀢𑀼 𑀲𑀗𑁆𑀔𑀸𑀭𑁄 𑀧𑀘𑁆𑀘𑀬𑁄 𑀭𑀽𑀧𑀦𑁆𑀢𑀺 𑀲𑀩𑁆𑀩𑀸𑀦𑀺𑀧𑀺 𑀳𑀺 𑀏𑀢𑀸𑀦𑀺 𑀓𑀸𑀭𑀡𑀯𑁂𑀯𑀘𑀦𑀸𑀦𑁂𑀯.

𑁮𑁪. 𑀲𑀢𑁆𑀢𑀫𑁂 𑀲𑀯𑁂𑀤𑀦𑀸𑀢𑀺 𑀧𑀘𑁆𑀘𑀬𑀪𑀽𑀢𑀸𑀬 𑀲𑀫𑁆𑀧𑀬𑀼𑀢𑁆𑀢𑀯𑁂𑀤𑀦𑀸𑀬 𑀲𑀢𑀺𑀬𑁂𑀯 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀦𑀸𑀲𑀢𑀻𑀢𑀺 𑀅𑀢𑁆𑀣𑁄. 𑀅𑀝𑁆𑀞𑀫𑀦𑀯𑀫𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑁮𑁭. 𑀤𑀲𑀫𑁂 𑀲𑀗𑁆𑀔𑀢𑀸𑀭𑀫𑁆𑀫𑀡𑀸𑀢𑀺 𑀧𑀘𑁆𑀘𑀬𑀦𑀺𑀩𑁆𑀩𑀢𑁆𑀢𑀁 𑀲𑀗𑁆𑀔𑀢𑀥𑀫𑁆𑀫𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸𑀯 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀦𑁄 𑀅𑀲𑀗𑁆𑀔𑀢𑀸𑀭𑀫𑁆𑀫𑀡𑀸𑀢𑀺 𑀅𑀲𑀗𑁆𑀔𑀢𑀁 𑀧𑀦 𑀦𑀺𑀩𑁆𑀩𑀸𑀦𑀁 𑀆𑀭𑀩𑁆𑀪 𑀦 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀦 𑀳𑁄𑀦𑁆𑀢𑀻𑀢𑀺 𑀫𑀕𑁆𑀕𑀓𑁆𑀔𑀡𑁂 𑀦 𑀳𑁄𑀦𑁆𑀢𑀺 𑀦𑀸𑀫, 𑀨𑀮𑁂 𑀧𑀢𑁆𑀢𑁂 𑀦𑀸𑀳𑁂𑀲𑀼𑀦𑁆𑀢𑀺. 𑀏𑀯𑀫𑁂𑀢𑁂𑀲𑀼 𑀤𑀲𑀲𑀼𑀧𑀺 𑀞𑀸𑀦𑁂𑀲𑀼 𑀬𑀸𑀯 𑀅𑀭𑀳𑀢𑁆𑀢𑀸 𑀤𑁂𑀲𑀦𑀸 𑀤𑁂𑀲𑀺𑀢𑀸𑀢𑀺.

𑀲𑀦𑀺𑀫𑀺𑀢𑁆𑀢𑀯𑀕𑁆𑀕𑁄 𑀢𑀢𑀺𑀬𑁄.

(𑁯) 𑁪. 𑀥𑀫𑁆𑀫𑀯𑀕𑁆𑀕𑀯𑀡𑁆𑀡𑀦𑀸

𑁮𑁮. 𑀘𑀢𑀼𑀢𑁆𑀣𑀲𑁆𑀲 𑀧𑀞𑀫𑁂 𑀘𑁂𑀢𑁄𑀯𑀺𑀫𑀼𑀢𑁆𑀢𑀻𑀢𑀺 𑀨𑀮𑀲𑀫𑀸𑀥𑀺. 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀻𑀢𑀺 𑀨𑀮𑀧𑀜𑁆𑀜𑀸.

𑁮𑁯. 𑀤𑀼𑀢𑀺𑀬𑁂 𑀧𑀕𑁆𑀕𑀸𑀳𑁄𑀢𑀺 𑀯𑀻𑀭𑀺𑀬𑀁. 𑀅𑀯𑀺𑀓𑁆𑀔𑁂𑀧𑁄𑀢𑀺 𑀘𑀺𑀢𑁆𑀢𑁂𑀓𑀕𑁆𑀕𑀢𑀸.

𑁯𑁦. 𑀢𑀢𑀺𑀬𑁂 𑀦𑀸𑀫𑀦𑁆𑀢𑀺 𑀘𑀢𑁆𑀢𑀸𑀭𑁄 𑀅𑀭𑀽𑀧𑀓𑁆𑀔𑀦𑁆𑀥𑀸. 𑀭𑀽𑀧𑀦𑁆𑀢𑀺 𑀭𑀽𑀧𑀓𑁆𑀔𑀦𑁆𑀥𑁄. 𑀇𑀢𑀺 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀥𑀫𑁆𑀫𑀓𑁄𑀝𑁆𑀞𑀸𑀲𑀧𑀭𑀺𑀘𑁆𑀙𑁂𑀤𑀜𑀸𑀡𑀁 𑀦𑀸𑀫 𑀓𑀣𑀺𑀢𑀁.

𑁯𑁧. 𑀘𑀢𑀼𑀢𑁆𑀣𑁂 𑀯𑀺𑀚𑁆𑀚𑀸𑀢𑀺 𑀨𑀮𑀜𑀸𑀡𑀁. 𑀯𑀺𑀫𑀼𑀢𑁆𑀢𑀻𑀢𑀺 𑀢𑀁𑀲𑀫𑁆𑀧𑀬𑀼𑀢𑁆𑀢𑀸 𑀲𑁂𑀲𑀥𑀫𑁆𑀫𑀸.

𑁯𑁨. 𑀧𑀜𑁆𑀘𑀫𑁂 𑀪𑀯𑀤𑀺𑀝𑁆𑀞𑀻𑀢𑀺 𑀲𑀲𑁆𑀲𑀢𑀤𑀺𑀝𑁆𑀞𑀺. 𑀯𑀺𑀪𑀯𑀤𑀺𑀝𑁆𑀞𑀻𑀢𑀺 𑀉𑀘𑁆𑀙𑁂𑀤𑀤𑀺𑀝𑁆𑀞𑀺. 𑀙𑀝𑁆𑀞𑀲𑀢𑁆𑀢𑀫𑀸𑀦𑀺 𑀉𑀢𑁆𑀢𑀸𑀦𑀢𑁆𑀣𑀸𑀦𑁂𑀯.

𑁯𑁫. 𑀅𑀝𑁆𑀞𑀫𑁂 𑀤𑁄𑀯𑀘𑀲𑁆𑀲𑀢𑀸𑀢𑀺 𑀤𑀼𑀩𑁆𑀩𑀘𑀪𑀸𑀯𑁄. 𑀧𑀸𑀧𑀫𑀺𑀢𑁆𑀢𑀢𑀸𑀢𑀺 𑀧𑀸𑀧𑀫𑀺𑀢𑁆𑀢𑀲𑁂𑀯𑀦𑀪𑀸𑀯𑁄. 𑀦𑀯𑀫𑀁 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑁂𑀦 𑀯𑁂𑀤𑀺𑀢𑀩𑁆𑀩𑀁.

𑁯𑁭. 𑀤𑀲𑀫𑁂 𑀥𑀸𑀢𑀼𑀓𑀼𑀲𑀮𑀢𑀸𑀢𑀺 𑀅𑀝𑁆𑀞𑀸𑀭𑀲 𑀥𑀸𑀢𑀼𑀬𑁄 𑀥𑀸𑀢𑀽𑀢𑀺 𑀚𑀸𑀦𑀦𑀁. 𑀫𑀦𑀲𑀺𑀓𑀸𑀭𑀓𑀼𑀲𑀮𑀢𑀸𑀢𑀺 𑀢𑀸𑀲𑀁𑀬𑁂𑀯 𑀥𑀸𑀢𑀽𑀦𑀁 𑀅𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀮𑀓𑁆𑀔𑀡𑀢𑁆𑀢𑀬𑀁 𑀆𑀭𑁄𑀧𑁂𑀢𑁆𑀯𑀸 𑀚𑀸𑀦𑀦𑀁.

𑁯𑁮. 𑀏𑀓𑀸𑀤𑀲𑀫𑁂 𑀆𑀧𑀢𑁆𑀢𑀺𑀓𑀼𑀲𑀮𑀢𑀸𑀢𑀺 𑀧𑀜𑁆𑀘𑀦𑁆𑀦𑀜𑁆𑀘 𑀲𑀢𑁆𑀢𑀦𑁆𑀦𑀜𑁆𑀘 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸𑀦𑀁 𑀚𑀸𑀦𑀦𑀁. 𑀆𑀧𑀢𑁆𑀢𑀺𑀯𑀼𑀝𑁆𑀞𑀸𑀦𑀓𑀼𑀲𑀮𑀢𑀸𑀢𑀺 𑀤𑁂𑀲𑀦𑀸𑀬 𑀯𑀸 𑀓𑀫𑁆𑀫𑀯𑀸𑀘𑀸𑀬 𑀯𑀸 𑀆𑀧𑀢𑁆𑀢𑀻𑀳𑀺 𑀯𑀼𑀝𑁆𑀞𑀸𑀦𑀚𑀸𑀦𑀦𑀦𑁆𑀢𑀺.

𑀥𑀫𑁆𑀫𑀯𑀕𑁆𑀕𑁄 𑀘𑀢𑀼𑀢𑁆𑀣𑁄.

(𑁧𑁦) 𑁫. 𑀩𑀸𑀮𑀯𑀕𑁆𑀕𑀯𑀡𑁆𑀡𑀦𑀸

𑁯𑁯. 𑀧𑀜𑁆𑀘𑀫𑀲𑁆𑀲 𑀧𑀞𑀫𑁂 𑀅𑀦𑀸𑀕𑀢𑀁 𑀪𑀸𑀭𑀁 𑀯𑀳𑀢𑀻𑀢𑀺 ‘‘𑀲𑀫𑁆𑀫𑀚𑁆𑀚𑀦𑀻 𑀧𑀤𑀻𑀧𑁄 𑀘, 𑀉𑀤𑀓𑀁 𑀆𑀲𑀦𑁂𑀦 𑀘, 𑀙𑀦𑁆𑀤𑀧𑀸𑀭𑀺𑀲𑀼𑀤𑁆𑀥𑀺𑀉𑀢𑀼𑀓𑁆𑀔𑀸𑀦𑀁, 𑀪𑀺𑀓𑁆𑀔𑀼𑀕𑀡𑀦𑀸 𑀘 𑀑𑀯𑀸𑀤𑁄, 𑀧𑀸𑀢𑀺𑀫𑁄𑀓𑁆𑀔𑀁 𑀣𑁂𑀭𑀪𑀸𑀭𑁄𑀢𑀺 𑀯𑀼𑀘𑁆𑀘𑀢𑀻’’𑀢𑀺 𑀇𑀫𑀁 𑀤𑀲𑀯𑀺𑀥𑀁 𑀣𑁂𑀭𑀪𑀸𑀭𑀁 𑀦𑀯𑀓𑁄 𑀳𑀼𑀢𑁆𑀯𑀸 𑀣𑁂𑀭𑁂𑀦 𑀅𑀦𑀚𑁆𑀛𑀺𑀝𑁆𑀞𑁄 𑀓𑀭𑁄𑀦𑁆𑀢𑁄 𑀅𑀦𑀸𑀕𑀢𑀁 𑀪𑀸𑀭𑀁 𑀯𑀳𑀢𑀺 𑀦𑀸𑀫. 𑀆𑀕𑀢𑀁 𑀪𑀸𑀭𑀁 𑀦 𑀯𑀳𑀢𑀻𑀢𑀺 𑀣𑁂𑀭𑁄 𑀲𑀫𑀸𑀦𑁄 𑀢𑀫𑁂𑀯 𑀤𑀲𑀯𑀺𑀥𑀁 𑀪𑀸𑀭𑀁 𑀅𑀢𑁆𑀢𑀦𑀸 𑀯𑀸 𑀅𑀓𑀭𑁄𑀦𑁆𑀢𑁄 𑀧𑀭𑀁 𑀯𑀸 𑀅𑀲𑀫𑀸𑀤𑀧𑁂𑀦𑁆𑀢𑁄 𑀆𑀕𑀢𑀁 𑀪𑀸𑀭𑀁 𑀦 𑀯𑀳𑀢𑀺 𑀦𑀸𑀫. 𑀤𑀼𑀢𑀺𑀬𑀲𑀼𑀢𑁆𑀢𑁂𑀧𑀺 𑀇𑀫𑀺𑀦𑀸𑀯 𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑁧𑁦𑁧. 𑀢𑀢𑀺𑀬𑁂 𑀅𑀓𑀧𑁆𑀧𑀺𑀬𑁂 𑀓𑀧𑁆𑀧𑀺𑀬𑀲𑀜𑁆𑀜𑀻𑀢𑀺 𑀅𑀓𑀧𑁆𑀧𑀺𑀬𑁂 𑀲𑀻𑀳𑀫𑀁𑀲𑀸𑀤𑀺𑀫𑁆𑀳𑀺 ‘‘𑀓𑀧𑁆𑀧𑀺𑀬𑀁 𑀇𑀤’’𑀦𑁆𑀢𑀺 𑀏𑀯𑀁𑀲𑀜𑁆𑀜𑀻. 𑀓𑀧𑁆𑀧𑀺𑀬𑁂 𑀅𑀓𑀧𑁆𑀧𑀺𑀬𑀲𑀜𑁆𑀜𑀻𑀢𑀺 𑀓𑀼𑀫𑁆𑀪𑀻𑀮𑀫𑀁𑀲𑀩𑀺𑀴𑀸𑀭𑀫𑀁𑀲𑀸𑀤𑀺𑀫𑁆𑀳𑀺 𑀓𑀧𑁆𑀧𑀺𑀬𑁂 ‘‘𑀅𑀓𑀧𑁆𑀧𑀺𑀬𑀁 𑀇𑀤’’𑀦𑁆𑀢𑀺 𑀏𑀯𑀁𑀲𑀜𑁆𑀜𑀻. 𑀘𑀢𑀼𑀢𑁆𑀣𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑁧𑁦𑁩. 𑀧𑀜𑁆𑀘𑀫𑁂 𑀅𑀦𑀸𑀧𑀢𑁆𑀢𑀺𑀬𑀸 𑀆𑀧𑀢𑁆𑀢𑀺𑀲𑀜𑁆𑀜𑀻𑀢𑀺 𑀆𑀧𑀼𑀘𑁆𑀙𑀺𑀢𑁆𑀯𑀸 𑀪𑀡𑁆𑀟𑀓𑀁 𑀥𑁄𑀯𑀦𑁆𑀢𑀲𑁆𑀲, 𑀧𑀢𑁆𑀢𑀁 𑀧𑀘𑀦𑁆𑀢𑀲𑁆𑀲, 𑀓𑁂𑀲𑁂 𑀙𑀺𑀦𑁆𑀤𑀦𑁆𑀢𑀲𑁆𑀲, 𑀕𑀸𑀫𑀁 𑀧𑀯𑀺𑀲𑀦𑁆𑀢𑀲𑁆𑀲𑀸𑀢𑀺𑀆𑀤𑀻𑀲𑀼 𑀅𑀦𑀸𑀧𑀢𑁆𑀢𑀺, 𑀢𑀢𑁆𑀣 ‘‘𑀆𑀧𑀢𑁆𑀢𑀺 𑀅𑀬’’𑀦𑁆𑀢𑀺 𑀏𑀯𑀁𑀲𑀜𑁆𑀜𑀻. 𑀆𑀧𑀢𑁆𑀢𑀺𑀬𑀸 𑀅𑀦𑀸𑀧𑀢𑁆𑀢𑀺𑀲𑀜𑁆𑀜𑀻𑀢𑀺 𑀢𑁂𑀲𑀜𑁆𑀜𑁂𑀯 𑀯𑀢𑁆𑀣𑀽𑀦𑀁 𑀅𑀦𑀸𑀧𑀼𑀘𑁆𑀙𑀸𑀓𑀭𑀡𑁂 𑀆𑀧𑀢𑁆𑀢𑀺, 𑀢𑀢𑁆𑀣 ‘‘𑀅𑀦𑀸𑀧𑀢𑁆𑀢𑀻’’𑀢𑀺 𑀏𑀯𑀁𑀲𑀜𑁆𑀜𑀻. 𑀙𑀝𑁆𑀞𑁂𑀧𑀺 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀲𑀢𑁆𑀢𑀫𑀸𑀤𑀻𑀦𑀺 𑀉𑀢𑁆𑀢𑀸𑀦𑀢𑁆𑀣𑀸𑀦𑁂𑀯.

𑁧𑁦𑁯. 𑀏𑀓𑀸𑀤𑀲𑀫𑁂 𑀆𑀲𑀯𑀸𑀢𑀺 𑀓𑀺𑀮𑁂𑀲𑀸. 𑀦 𑀓𑀼𑀓𑁆𑀓𑀼𑀘𑁆𑀘𑀸𑀬𑀺𑀢𑀩𑁆𑀩𑀦𑁆𑀢𑀺 𑀲𑀗𑁆𑀖𑀪𑁄𑀕𑀲𑁆𑀲 𑀅𑀧𑀝𑁆𑀞𑀧𑀦𑀁 𑀅𑀯𑀺𑀘𑀸𑀭𑀡𑀁 𑀦 𑀓𑀼𑀓𑁆𑀓𑀼𑀘𑁆𑀘𑀸𑀬𑀺𑀢𑀩𑁆𑀩𑀁 𑀦𑀸𑀫, 𑀢𑀁 𑀓𑀼𑀓𑁆𑀓𑀼𑀘𑁆𑀘𑀸𑀬𑀢𑀺. 𑀓𑀼𑀓𑁆𑀓𑀼𑀘𑁆𑀘𑀸𑀬𑀺𑀢𑀩𑁆𑀩𑀦𑁆𑀢𑀺 𑀢𑀲𑁆𑀲𑁂𑀯 𑀧𑀝𑁆𑀞𑀧𑀦𑀁 𑀯𑀺𑀘𑀸𑀭𑀡𑀁, 𑀢𑀁 𑀦 𑀓𑀼𑀓𑁆𑀓𑀼𑀘𑁆𑀘𑀸𑀬𑀢𑀺. 𑀤𑁆𑀯𑀸𑀤𑀲𑀫𑀸𑀤𑀻𑀦𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸𑀦𑀻𑀢𑀺.

𑀩𑀸𑀮𑀯𑀕𑁆𑀕𑁄 𑀧𑀜𑁆𑀘𑀫𑁄.

𑀤𑀼𑀢𑀺𑀬𑀧𑀡𑁆𑀡𑀸𑀲𑀓𑀁 𑀦𑀺𑀝𑁆𑀞𑀺𑀢𑀁.