𑁩. 𑀢𑀢𑀺𑀬𑀧𑀡𑁆𑀡𑀸𑀲𑀓𑀁

(𑁧𑁧) 𑁧. 𑀆𑀲𑀸𑀤𑀼𑀧𑁆𑀧𑀚𑀳𑀯𑀕𑁆𑀕𑀯𑀡𑁆𑀡𑀦𑀸

𑁧𑁧𑁯. 𑀢𑀢𑀺𑀬𑀲𑁆𑀲 𑀧𑀡𑁆𑀡𑀸𑀲𑀓𑀲𑁆𑀲 𑀧𑀞𑀫𑁂 𑀆𑀲𑀸𑀢𑀺 𑀢𑀡𑁆𑀳𑀸. 𑀤𑀼𑀧𑁆𑀧𑀚𑀳𑀸𑀢𑀺 𑀤𑀼𑀘𑁆𑀘𑀚𑀸 𑀤𑀼𑀦𑁆𑀦𑀻𑀳𑀭𑀸. 𑀮𑀸𑀪𑀸𑀲𑀸𑀬 𑀤𑀼𑀧𑁆𑀧𑀚𑀳𑀪𑀸𑀯𑁂𑀦 𑀲𑀢𑁆𑀢𑀸 𑀤𑀲𑀧𑀺 𑀯𑀲𑁆𑀲𑀸𑀦𑀺 𑀯𑀻𑀲𑀢𑀺𑀧𑀺 𑀲𑀝𑁆𑀞𑀺𑀧𑀺 𑀯𑀲𑁆𑀲𑀸𑀦𑀺 ‘‘𑀅𑀚𑁆𑀚 𑀮𑀪𑀺𑀲𑁆𑀲𑀸𑀫, 𑀲𑁆𑀯𑁂 𑀮𑀪𑀺𑀲𑁆𑀲𑀸𑀫𑀸’’𑀢𑀺 𑀭𑀸𑀚𑀸𑀦𑀁 𑀉𑀧𑀝𑁆𑀞𑀳𑀦𑁆𑀢𑀺, 𑀓𑀲𑀺𑀓𑀫𑁆𑀫𑀸𑀤𑀻𑀦𑀺 𑀓𑀭𑁄𑀦𑁆𑀢𑀺, 𑀉𑀪𑀢𑁄𑀩𑁆𑀬𑀽𑀴𑁆𑀳𑀁 𑀲𑀗𑁆𑀕𑀸𑀫𑀁 𑀧𑀓𑁆𑀔𑀦𑁆𑀤𑀦𑁆𑀢𑀺, 𑀅𑀚𑀧𑀣𑀲𑀗𑁆𑀓𑀼𑀧𑀣𑀸𑀤𑀬𑁄 𑀧𑀝𑀺𑀧𑀚𑁆𑀚𑀦𑁆𑀢𑀺, 𑀦𑀸𑀯𑀸𑀬 𑀫𑀳𑀸𑀲𑀫𑀼𑀤𑁆𑀤𑀁 𑀧𑀯𑀺𑀲𑀦𑁆𑀢𑀺. 𑀚𑀻𑀯𑀺𑀢𑀸𑀲𑀸𑀬 𑀤𑀼𑀧𑁆𑀧𑀚𑀳𑀢𑁆𑀢𑀸 𑀲𑀫𑁆𑀧𑀢𑁆𑀢𑁂 𑀫𑀭𑀡𑀓𑀸𑀮𑁂𑀧𑀺 𑀯𑀲𑁆𑀲𑀲𑀢𑀚𑀻𑀯𑀺𑀁 𑀅𑀢𑁆𑀢𑀸𑀦𑀁 𑀫𑀜𑁆𑀜𑀦𑁆𑀢𑀺. 𑀲𑁄 𑀓𑀫𑁆𑀫𑀓𑀫𑁆𑀫𑀦𑀺𑀫𑀺𑀢𑁆𑀢𑀸𑀤𑀻𑀦𑀺 𑀧𑀲𑁆𑀲𑀦𑁆𑀢𑁄𑀧𑀺 ‘‘𑀤𑀸𑀦𑀁 𑀤𑁂𑀳𑀺 𑀧𑀽𑀚𑀁, 𑀓𑀭𑁄𑀳𑀻’’𑀢𑀺 𑀅𑀦𑀼𑀓𑀫𑁆𑀧𑀓𑁂𑀳𑀺 𑀯𑀼𑀘𑁆𑀘𑀫𑀸𑀦𑁄 ‘‘𑀦𑀸𑀳𑀁 𑀫𑀭𑀺𑀲𑁆𑀲𑀸𑀫𑀺, 𑀚𑀻𑀯𑀺𑀲𑁆𑀲𑀸𑀫𑀺’’𑀘𑁆𑀘𑁂𑀯 𑀆𑀲𑀸𑀬 𑀓𑀲𑁆𑀲𑀘𑀺 𑀯𑀘𑀦𑀁 𑀦 𑀕𑀡𑁆𑀳𑀸𑀢𑀺.

𑁧𑁨𑁦. 𑀤𑀼𑀢𑀺𑀬𑁂 𑀧𑀼𑀩𑁆𑀩𑀓𑀸𑀭𑀻𑀢𑀺 𑀧𑀞𑀫𑀁 𑀉𑀧𑀓𑀸𑀭𑀲𑁆𑀲 𑀓𑀸𑀭𑀓𑁄. 𑀓𑀢𑀜𑁆𑀜𑀽𑀓𑀢𑀯𑁂𑀤𑀻𑀢𑀺 𑀢𑁂𑀦 𑀓𑀢𑀁 𑀜𑀢𑁆𑀯𑀸 𑀧𑀘𑁆𑀙𑀸 𑀓𑀸𑀭𑀓𑁄. 𑀢𑁂𑀲𑀼 𑀧𑀼𑀩𑁆𑀩𑀓𑀸𑀭𑀻 ‘‘𑀇𑀡𑀁 𑀤𑁂𑀫𑀻’’𑀢𑀺 𑀲𑀜𑁆𑀜𑀁 𑀓𑀭𑁄𑀢𑀺, 𑀧𑀘𑁆𑀙𑀸 𑀓𑀸𑀭𑀓𑁄 ‘‘𑀇𑀡𑀁 𑀚𑀻𑀭𑀸𑀧𑁂𑀫𑀻’’𑀢𑀺 𑀲𑀜𑁆𑀜𑀁 𑀓𑀭𑁄𑀢𑀺.

𑁧𑁨𑁧. 𑀢𑀢𑀺𑀬𑁂 𑀢𑀺𑀢𑁆𑀢𑁄 𑀘 𑀢𑀧𑁆𑀧𑁂𑀢𑀸 𑀘𑀸𑀢𑀺 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀘 𑀢𑀣𑀸𑀕𑀢𑀲𑀸𑀯𑀓𑁄 𑀘 𑀔𑀻𑀡𑀸𑀲𑀯𑁄 𑀢𑀺𑀢𑁆𑀢𑁄 𑀦𑀸𑀫, 𑀢𑀣𑀸𑀕𑀢𑁄 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀢𑀺𑀢𑁆𑀢𑁄 𑀘 𑀢𑀧𑁆𑀧𑁂𑀢𑀸 𑀘.

𑁧𑁨𑁨. 𑀘𑀢𑀼𑀢𑁆𑀣𑁂 𑀤𑀼𑀢𑁆𑀢𑀧𑁆𑀧𑀬𑀸𑀢𑀺 𑀤𑀸𑀬𑀓𑁂𑀦 𑀤𑀼𑀢𑁆𑀢𑀧𑁆𑀧𑀬𑀸 𑀢𑀧𑁆𑀧𑁂𑀢𑀼𑀁 𑀦 𑀲𑀼𑀓𑀭𑀸. 𑀦𑀺𑀓𑁆𑀔𑀺𑀧𑀢𑀻𑀢𑀺 𑀦𑀺𑀤𑀳𑀢𑀺 𑀦 𑀧𑀭𑀺𑀪𑀼𑀜𑁆𑀚𑀢𑀺. 𑀯𑀺𑀲𑁆𑀲𑀚𑁆𑀚𑁂𑀢𑀻𑀢𑀺 𑀧𑀭𑁂𑀲𑀁 𑀤𑁂𑀢𑀺.

𑁧𑁨𑁩. 𑀧𑀜𑁆𑀘𑀫𑁂 𑀦 𑀯𑀺𑀲𑁆𑀲𑀚𑁆𑀚𑁂𑀢𑀻𑀢𑀺 𑀲𑀩𑁆𑀩𑀁𑀬𑁂𑀯 𑀧𑀭𑁂𑀲𑀁 𑀦 𑀤𑁂𑀢𑀺, 𑀅𑀢𑁆𑀢𑀦𑁄 𑀧𑀦 𑀬𑀸𑀧𑀦𑀫𑀢𑁆𑀢𑀁 𑀕𑀳𑁂𑀢𑁆𑀯𑀸 𑀅𑀯𑀲𑁂𑀲𑀁 𑀤𑁂𑀢𑀺.

𑁧𑁨𑁪. 𑀙𑀝𑁆𑀞𑁂 𑀲𑀼𑀪𑀦𑀺𑀫𑀺𑀢𑁆𑀢𑀦𑁆𑀢𑀺 𑀇𑀝𑁆𑀞𑀸𑀭𑀫𑁆𑀫𑀡𑀁.

𑁧𑁨𑁫. 𑀲𑀢𑁆𑀢𑀫𑁂 𑀧𑀝𑀺𑀖𑀦𑀺𑀫𑀺𑀢𑁆𑀢𑀦𑁆𑀢𑀺 𑀅𑀦𑀺𑀝𑁆𑀞𑀦𑀺𑀫𑀺𑀢𑁆𑀢𑀁.

𑁧𑁨𑁬. 𑀅𑀝𑁆𑀞𑀫𑁂 𑀧𑀭𑀢𑁄 𑀘 𑀖𑁄𑀲𑁄𑀢𑀺 𑀧𑀭𑀲𑁆𑀲 𑀲𑀦𑁆𑀢𑀺𑀓𑀸 𑀅𑀲𑁆𑀲𑀤𑁆𑀥𑀫𑁆𑀫𑀲𑀯𑀦𑀁.

𑁧𑁨𑁭. 𑀦𑀯𑀫𑁂 𑀧𑀭𑀢𑁄 𑀘 𑀖𑁄𑀲𑁄𑀢𑀺 𑀧𑀭𑀲𑁆𑀲 𑀲𑀦𑁆𑀢𑀺𑀓𑀸 𑀲𑀤𑁆𑀥𑀫𑁆𑀫𑀲𑀯𑀦𑀁. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀆𑀲𑀸𑀤𑀼𑀧𑁆𑀧𑀚𑀳𑀯𑀕𑁆𑀕𑁄 𑀧𑀞𑀫𑁄.

(𑁧𑁨) 𑁨. 𑀆𑀬𑀸𑀘𑀦𑀯𑀕𑁆𑀕𑀯𑀡𑁆𑀡𑀦𑀸

𑁧𑁩𑁧. 𑀤𑀼𑀢𑀺𑀬𑀲𑁆𑀲 𑀧𑀞𑀫𑁂 𑀏𑀯𑀁 𑀲𑀫𑁆𑀫𑀸 𑀆𑀬𑀸𑀘𑀫𑀸𑀦𑁄 𑀆𑀬𑀸𑀘𑁂𑀬𑁆𑀬𑀸𑀢𑀺 𑀲𑀤𑁆𑀥𑁄 𑀪𑀺𑀓𑁆𑀔𑀼 𑀉𑀝𑁆𑀞𑀳𑀺𑀢𑁆𑀯𑀸 ‘‘𑀬𑀸𑀤𑀺𑀲𑁄 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄 𑀧𑀜𑁆𑀜𑀸𑀬, 𑀅𑀳𑀫𑁆𑀧𑀺 𑀢𑀸𑀤𑀺𑀲𑁄 𑀳𑁄𑀫𑀺. 𑀬𑀸𑀤𑀺𑀲𑁄 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑁄 𑀇𑀤𑁆𑀥𑀺𑀬𑀸, 𑀅𑀳𑀫𑁆𑀧𑀺 𑀢𑀸𑀤𑀺𑀲𑁄 𑀳𑁄𑀫𑀻’’𑀢𑀺 𑀏𑀯𑀁 𑀆𑀬𑀸𑀘𑀦𑁆𑀢𑁄 𑀧𑀺𑀳𑁂𑀦𑁆𑀢𑁄 𑀧𑀢𑁆𑀣𑁂𑀦𑁆𑀢𑁄 𑀬𑀁 𑀅𑀢𑁆𑀣𑀺, 𑀢𑀲𑁆𑀲𑁂𑀯 𑀧𑀢𑁆𑀣𑀺𑀢𑀢𑁆𑀢𑀸 𑀲𑀫𑁆𑀫𑀸 𑀧𑀢𑁆𑀣𑁂𑀬𑁆𑀬 𑀦𑀸𑀫. 𑀇𑀢𑁄 𑀉𑀢𑁆𑀢𑀭𑀺 𑀧𑀢𑁆𑀣𑁂𑀦𑁆𑀢𑁄 𑀫𑀺𑀘𑁆𑀙𑀸 𑀧𑀢𑁆𑀣𑁂𑀬𑁆𑀬. 𑀏𑀯𑀭𑀽𑀧𑀸 𑀳𑀺 𑀧𑀢𑁆𑀣𑀦𑀸 𑀬𑀁 𑀦𑀢𑁆𑀣𑀺, 𑀢𑀲𑁆𑀲 𑀧𑀢𑁆𑀣𑀺𑀢𑀢𑁆𑀢𑀸 𑀫𑀺𑀘𑁆𑀙𑀸𑀧𑀢𑁆𑀣𑀦𑀸 𑀦𑀸𑀫 𑀳𑁄𑀢𑀺. 𑀓𑀺𑀁 𑀓𑀸𑀭𑀡𑀸? 𑀏𑀲𑀸, 𑀪𑀺𑀓𑁆𑀔𑀯𑁂, 𑀢𑀼𑀮𑀸 𑀏𑀢𑀁 𑀧𑀫𑀸𑀡𑀦𑁆𑀢𑀺 𑀬𑀣𑀸 𑀳𑀺 𑀲𑀼𑀯𑀡𑁆𑀡𑀁 𑀯𑀸 𑀳𑀺𑀭𑀜𑁆𑀜𑀁 𑀯𑀸 𑀢𑀼𑀮𑁂𑀦𑁆𑀢𑀲𑁆𑀲 𑀢𑀼𑀮𑀸 𑀇𑀘𑁆𑀙𑀺𑀢𑀩𑁆𑀩𑀸, 𑀥𑀜𑁆𑀜𑀁 𑀫𑀺𑀦𑀦𑁆𑀢𑀲𑁆𑀲 𑀫𑀸𑀦𑀦𑁆𑀢𑀺 𑀢𑀼𑀮𑀦𑁂 𑀢𑀼𑀮𑀸, 𑀫𑀺𑀦𑀦𑁂 𑀘 𑀫𑀸𑀦𑀁 𑀧𑀫𑀸𑀡𑀁 𑀳𑁄𑀢𑀺, 𑀏𑀯𑀫𑁂𑀯 𑀫𑀫 𑀲𑀸𑀯𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀏𑀲𑀸 𑀢𑀼𑀮𑀸 𑀏𑀢𑀁 𑀧𑀫𑀸𑀡𑀁 𑀬𑀤𑀺𑀤𑀁 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑀸. 𑀢𑁂 𑀕𑀳𑁂𑀢𑁆𑀯𑀸 ‘‘𑀅𑀳𑀫𑁆𑀧𑀺 𑀜𑀸𑀡𑁂𑀦 𑀯𑀸 𑀇𑀤𑁆𑀥𑀺𑀬𑀸 𑀯𑀸 𑀏𑀢𑀫𑁆𑀧𑀫𑀸𑀡𑁄 𑀳𑁄𑀫𑀻’’𑀢𑀺 𑀅𑀢𑁆𑀢𑀸𑀦𑀁 𑀢𑀼𑀮𑁂𑀢𑀼𑀁 𑀯𑀸 𑀧𑀫𑀸𑀡𑁂𑀢𑀼𑀁 𑀯𑀸 𑀲𑀓𑁆𑀓𑀸, 𑀦 𑀇𑀢𑁄 𑀅𑀜𑁆𑀜𑀣𑀸.

𑁧𑁩𑁨. 𑀤𑀼𑀢𑀺𑀬𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀇𑀤𑀁 𑀧𑀦𑁂𑀢𑁆𑀣 𑀯𑀺𑀲𑁂𑀲𑀫𑀢𑁆𑀢𑀁 𑁋 𑀔𑁂𑀫𑀸 𑀘 𑀪𑀺𑀓𑁆𑀔𑀼𑀦𑀻 𑀉𑀧𑁆𑀧𑀮𑀯𑀡𑁆𑀡𑀸 𑀘𑀸𑀢𑀺 𑀏𑀢𑀸𑀲𑀼 𑀳𑀺 𑀔𑁂𑀫𑀸 𑀧𑀜𑁆𑀜𑀸𑀬 𑀅𑀕𑁆𑀕𑀸, 𑀉𑀧𑁆𑀧𑀮𑀯𑀡𑁆𑀡𑀸 𑀇𑀤𑁆𑀥𑀺𑀬𑀸. 𑀢𑀲𑁆𑀫𑀸 ‘‘𑀧𑀜𑁆𑀜𑀸𑀬 𑀯𑀸 𑀇𑀤𑁆𑀥𑀺𑀬𑀸 𑀯𑀸 𑀏𑀢𑀸𑀤𑀺𑀲𑀻 𑀳𑁄𑀫𑀻’’𑀢𑀺 𑀲𑀫𑁆𑀫𑀸 𑀆𑀬𑀸𑀘𑀫𑀸𑀦𑀸 𑀆𑀬𑀸𑀘𑁂𑀬𑁆𑀬. 𑀢𑀣𑀸 𑀘𑀺𑀢𑁆𑀢𑁄 𑀕𑀳𑀧𑀢𑀺 𑀧𑀜𑁆𑀜𑀸𑀬 𑀅𑀕𑁆𑀕𑁄, 𑀳𑀢𑁆𑀣𑀓𑁄 𑀭𑀸𑀚𑀓𑀼𑀫𑀸𑀭𑁄 𑀫𑀳𑀺𑀤𑁆𑀥𑀺𑀓𑀢𑀸𑀬. 𑀢𑀲𑁆𑀫𑀸 ‘‘𑀧𑀜𑁆𑀜𑀸𑀬 𑀯𑀸 𑀇𑀤𑁆𑀥𑀺𑀬𑀸 𑀯𑀸 𑀏𑀤𑀺𑀲𑁄 𑀳𑁄𑀫𑀻’’𑀢𑀺 𑀲𑀫𑁆𑀫𑀸 𑀆𑀬𑀸𑀘𑀫𑀸𑀦𑁄 𑀆𑀬𑀸𑀘𑁂𑀬𑁆𑀬. 𑀔𑀼𑀚𑁆𑀚𑀼𑀢𑁆𑀢𑀭𑀸𑀧𑀺 𑀫𑀳𑀸𑀧𑀜𑁆𑀜𑀢𑀸𑀬 𑀅𑀕𑁆𑀕𑀸, 𑀦𑀦𑁆𑀤𑀫𑀸𑀢𑀸 𑀫𑀳𑀺𑀤𑁆𑀥𑀺𑀓𑀢𑀸𑀬. 𑀢𑀲𑁆𑀫𑀸 ‘‘𑀧𑀜𑁆𑀜𑀸𑀬 𑀯𑀸 𑀇𑀤𑁆𑀥𑀺𑀬𑀸 𑀯𑀸 𑀏𑀢𑀸𑀤𑀺𑀲𑀻 𑀳𑁄𑀫𑀻’’𑀢𑀺 𑀲𑀫𑁆𑀫𑀸 𑀆𑀬𑀸𑀘𑀫𑀸𑀦𑀸 𑀆𑀬𑀸𑀘𑁂𑀬𑁆𑀬.

𑁧𑁩𑁫. 𑀧𑀜𑁆𑀘𑀫𑁂 𑀔𑀢𑀦𑁆𑀢𑀺 𑀕𑀼𑀡𑀸𑀦𑀁 𑀔𑀢𑀢𑁆𑀢𑀸 𑀔𑀢𑀁. 𑀉𑀧𑀳𑀢𑀦𑁆𑀢𑀺 𑀕𑀼𑀡𑀸𑀦𑀁 𑀉𑀧𑀳𑀢𑀢𑁆𑀢𑀸 𑀉𑀧𑀳𑀢𑀁, 𑀙𑀺𑀦𑁆𑀦𑀕𑀼𑀡𑀁 𑀦𑀝𑁆𑀞𑀕𑀼𑀡𑀦𑁆𑀢𑀺 𑀅𑀢𑁆𑀣𑁄. 𑀅𑀢𑁆𑀢𑀸𑀦𑀁 𑀧𑀭𑀺𑀳𑀭𑀢𑀻𑀢𑀺 𑀦𑀺𑀕𑁆𑀕𑀼𑀡𑀁 𑀅𑀢𑁆𑀢𑀸𑀦𑀁 𑀚𑀕𑁆𑀕𑀢𑀺 𑀕𑁄𑀧𑀸𑀬𑀢𑀺. 𑀲𑀸𑀯𑀚𑁆𑀚𑁄𑀢𑀺 𑀲𑀤𑁄𑀲𑁄. 𑀲𑀸𑀦𑀼𑀯𑀚𑁆𑀚𑁄𑀢𑀺 𑀲𑀉𑀧𑀯𑀸𑀤𑁄. 𑀧𑀲𑀯𑀢𑀻𑀢𑀺 𑀧𑀝𑀺𑀮𑀪𑀢𑀺. 𑀅𑀦𑀦𑀼𑀯𑀺𑀘𑁆𑀘𑀸𑀢𑀺 𑀅𑀚𑀸𑀦𑀺𑀢𑁆𑀯𑀸 𑀅𑀯𑀺𑀦𑀺𑀘𑁆𑀙𑀺𑀦𑀺𑀢𑁆𑀯𑀸. 𑀅𑀧𑀭𑀺𑀬𑁄𑀕𑀸𑀳𑁂𑀢𑁆𑀯𑀸𑀢𑀺 𑀅𑀦𑀦𑀼𑀧𑀯𑀺𑀲𑀺𑀢𑁆𑀯𑀸. 𑀅𑀯𑀡𑁆𑀡𑀸𑀭𑀳𑀲𑁆𑀲𑀸𑀢𑀺 𑀅𑀯𑀡𑁆𑀡𑀬𑀼𑀢𑁆𑀢𑀲𑁆𑀲 𑀫𑀺𑀘𑁆𑀙𑀸𑀧𑀝𑀺𑀧𑀦𑁆𑀦𑀲𑁆𑀲 𑀢𑀺𑀢𑁆𑀣𑀺𑀬𑀲𑁆𑀲 𑀯𑀸 𑀢𑀺𑀢𑁆𑀣𑀺𑀬𑀲𑀸𑀯𑀓𑀲𑁆𑀲 𑀯𑀸. 𑀯𑀡𑁆𑀡𑀁 𑀪𑀸𑀲𑀢𑀻𑀢𑀺 ‘‘𑀲𑀼𑀧𑁆𑀧𑀝𑀺𑀧𑀦𑁆𑀦𑁄 𑀏𑀲 𑀲𑀫𑁆𑀫𑀸𑀧𑀝𑀺𑀧𑀦𑁆𑀦𑁄’’𑀢𑀺 𑀕𑀼𑀡𑀁 𑀓𑀣𑁂𑀢𑀺. 𑀯𑀡𑁆𑀡𑀸𑀭𑀳𑀲𑁆𑀲𑀸𑀢𑀺 𑀩𑀼𑀤𑁆𑀥𑀸𑀤𑀻𑀲𑀼 𑀅𑀜𑁆𑀜𑀢𑀭𑀲𑁆𑀲 𑀲𑀫𑁆𑀫𑀸𑀧𑀝𑀺𑀧𑀦𑁆𑀦𑀲𑁆𑀲. 𑀅𑀯𑀡𑁆𑀡𑀁 𑀪𑀸𑀲𑀢𑀻𑀢𑀺 ‘‘𑀤𑀼𑀧𑁆𑀧𑀝𑀺𑀧𑀦𑁆𑀦𑁄 𑀏𑀲 𑀫𑀺𑀘𑁆𑀙𑀸𑀧𑀝𑀺𑀧𑀦𑁆𑀦𑁄’’𑀢𑀺 𑀅𑀕𑀼𑀡𑀁 𑀓𑀣𑁂𑀢𑀺. 𑀅𑀯𑀡𑁆𑀡𑀸𑀭𑀳𑀲𑁆𑀲 𑀅𑀯𑀡𑁆𑀡𑀁 𑀪𑀸𑀲𑀢𑀻𑀢𑀺 𑀇𑀥𑁂𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀤𑀼𑀧𑁆𑀧𑀝𑀺𑀧𑀦𑁆𑀦𑀸𑀦𑀁 𑀫𑀺𑀘𑁆𑀙𑀸𑀧𑀝𑀺𑀧𑀦𑁆𑀦𑀸𑀦𑀁 𑀢𑀺𑀢𑁆𑀣𑀺𑀬𑀸𑀦𑀁 𑀢𑀺𑀢𑁆𑀣𑀺𑀬𑀲𑀸𑀯𑀓𑀸𑀦𑀁 ‘‘𑀇𑀢𑀺𑀧𑀺 𑀤𑀼𑀧𑁆𑀧𑀝𑀺𑀧𑀦𑁆𑀦𑀸 𑀇𑀢𑀺𑀧𑀺 𑀫𑀺𑀘𑁆𑀙𑀸𑀧𑀝𑀺𑀧𑀦𑁆𑀦𑀸’’𑀢𑀺 𑀅𑀯𑀡𑁆𑀡𑀁 𑀪𑀸𑀲𑀢𑀺. 𑀯𑀡𑁆𑀡𑀸𑀭𑀳𑀲𑁆𑀲 𑀯𑀡𑁆𑀡𑀁 𑀪𑀸𑀲𑀢𑀻𑀢𑀺 𑀲𑀼𑀧𑁆𑀧𑀝𑀺𑀧𑀦𑁆𑀦𑀸𑀦𑀁 𑀲𑀫𑁆𑀫𑀸𑀧𑀝𑀺𑀧𑀦𑁆𑀦𑀸𑀦𑀁 𑀩𑀼𑀤𑁆𑀥𑀸𑀦𑀁 𑀩𑀼𑀤𑁆𑀥𑀲𑀸𑀯𑀓𑀸𑀦𑀁 ‘‘𑀇𑀢𑀺𑀧𑀺 𑀲𑀼𑀧𑁆𑀧𑀝𑀺𑀧𑀦𑁆𑀦𑀸 𑀇𑀢𑀺𑀧𑀺 𑀲𑀫𑁆𑀫𑀸𑀧𑀝𑀺𑀧𑀦𑁆𑀦𑀸’’𑀢𑀺 𑀯𑀡𑁆𑀡𑀁 𑀪𑀸𑀲𑀢𑀺.

𑁧𑁩𑁬. 𑀙𑀝𑁆𑀞𑁂 𑀅𑀧𑁆𑀧𑀲𑀸𑀤𑀦𑀻𑀬𑁂 𑀞𑀸𑀦𑁂𑀢𑀺 𑀅𑀧𑁆𑀧𑀲𑀸𑀤𑀓𑀸𑀭𑀡𑁂. 𑀧𑀲𑀸𑀤𑀁 𑀉𑀧𑀤𑀁𑀲𑁂𑀢𑀻𑀢𑀺 𑀤𑀼𑀧𑁆𑀧𑀝𑀺𑀧𑀤𑀸𑀬 𑀫𑀺𑀘𑁆𑀙𑀸𑀧𑀝𑀺𑀧𑀤𑀸𑀬 ‘‘𑀅𑀬𑀁 𑀲𑀼𑀧𑁆𑀧𑀝𑀺𑀧𑀤𑀸 𑀲𑀫𑁆𑀫𑀸𑀧𑀝𑀺𑀧𑀤𑀸’’𑀢𑀺 𑀧𑀲𑀸𑀤𑀁 𑀚𑀦𑁂𑀢𑀺. 𑀧𑀲𑀸𑀤𑀦𑀻𑀬𑁂 𑀞𑀸𑀦𑁂 𑀅𑀧𑁆𑀧𑀲𑀸𑀤𑀦𑁆𑀢𑀺 𑀲𑀼𑀧𑁆𑀧𑀝𑀺𑀧𑀤𑀸𑀬 𑀲𑀫𑁆𑀫𑀸𑀧𑀝𑀺𑀧𑀤𑀸𑀬 ‘‘𑀅𑀬𑀁 𑀤𑀼𑀧𑁆𑀧𑀝𑀺𑀧𑀤𑀸 𑀫𑀺𑀘𑁆𑀙𑀸𑀧𑀝𑀺𑀧𑀤𑀸’’𑀢𑀺 𑀅𑀧𑁆𑀧𑀲𑀸𑀤𑀁 𑀚𑀦𑁂𑀢𑀻𑀢𑀺. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀫𑁂𑀯.

𑁧𑁩𑁭. 𑀲𑀢𑁆𑀢𑀫𑁂 𑀤𑁆𑀯𑀻𑀲𑀽𑀢𑀺 𑀤𑁆𑀯𑀻𑀲𑀼 𑀑𑀓𑀸𑀲𑁂𑀲𑀼 𑀤𑁆𑀯𑀻𑀲𑀼 𑀓𑀸𑀭𑀡𑁂𑀲𑀼. 𑀫𑀺𑀘𑁆𑀙𑀸𑀧𑀝𑀺𑀧𑀚𑁆𑀚𑀫𑀸𑀦𑁄𑀢𑀺 𑀫𑀺𑀘𑁆𑀙𑀸𑀧𑀝𑀺𑀧𑀢𑁆𑀢𑀺𑀁 𑀧𑀝𑀺𑀧𑀚𑁆𑀚𑀫𑀸𑀦𑁄. 𑀫𑀸𑀢𑀭𑀺 𑀘 𑀧𑀺𑀢𑀭𑀺 𑀘𑀸𑀢𑀺 𑀫𑀺𑀢𑁆𑀢𑀯𑀺𑀦𑁆𑀤𑀓𑁄 𑀯𑀺𑀬 𑀫𑀸𑀢𑀭𑀺, 𑀅𑀚𑀸𑀢𑀲𑀢𑁆𑀢𑀼 𑀯𑀺𑀬 𑀧𑀺𑀢𑀭𑀺. 𑀲𑀼𑀓𑁆𑀓𑀧𑀓𑁆𑀔𑁄 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄.

𑁧𑁩𑁮. 𑀅𑀝𑁆𑀞𑀫𑁂 𑀢𑀣𑀸𑀕𑀢𑁂 𑀘 𑀢𑀣𑀸𑀕𑀢𑀲𑀸𑀯𑀓𑁂 𑀘𑀸𑀢𑀺 𑀤𑁂𑀯𑀤𑀢𑁆𑀢𑁄 𑀯𑀺𑀬 𑀢𑀣𑀸𑀕𑀢𑁂, 𑀓𑁄𑀓𑀸𑀮𑀺𑀓𑁄 𑀯𑀺𑀬 𑀘 𑀢𑀣𑀸𑀕𑀢𑀲𑀸𑀯𑀓𑁂. 𑀲𑀼𑀓𑁆𑀓𑀧𑀓𑁆𑀔𑁂 𑀆𑀦𑀦𑁆𑀤𑀢𑁆𑀣𑁂𑀭𑁄 𑀯𑀺𑀬 𑀢𑀣𑀸𑀕𑀢𑁂, 𑀦𑀦𑁆𑀤𑀕𑁄𑀧𑀸𑀮𑀓𑀲𑁂𑀝𑁆𑀞𑀺𑀧𑀼𑀢𑁆𑀢𑁄 𑀯𑀺𑀬 𑀘 𑀢𑀣𑀸𑀕𑀢𑀲𑀸𑀯𑀓𑁂.

𑁧𑁩𑁯. 𑀦𑀯𑀫𑁂 𑀲𑀘𑀺𑀢𑁆𑀢𑀯𑁄𑀤𑀸𑀦𑀦𑁆𑀢𑀺 𑀲𑀓𑀘𑀺𑀢𑁆𑀢𑀲𑁆𑀲 𑀯𑁄𑀤𑀸𑀦𑀁, 𑀅𑀝𑁆𑀞𑀦𑁆𑀦𑀁 𑀲𑀫𑀸𑀧𑀢𑁆𑀢𑀻𑀦𑀁 𑀏𑀢𑀁 𑀦𑀸𑀫𑀁. 𑀦 𑀘 𑀓𑀺𑀜𑁆𑀘𑀺 𑀮𑁄𑀓𑁂 𑀉𑀧𑀸𑀤𑀺𑀬𑀢𑀻𑀢𑀺 𑀮𑁄𑀓𑁂 𑀘 𑀭𑀽𑀧𑀸𑀤𑀻𑀲𑀼 𑀥𑀫𑁆𑀫𑁂𑀲𑀼 𑀓𑀺𑀜𑁆𑀘𑀺 𑀏𑀓𑀁 𑀥𑀫𑁆𑀫𑀫𑁆𑀧𑀺 𑀦 𑀕𑀡𑁆𑀳𑀸𑀢𑀺 𑀦 𑀧𑀭𑀸𑀫𑀲𑀢𑀺. 𑀏𑀯𑀫𑁂𑀢𑁆𑀣 𑀅𑀦𑀼𑀧𑀸𑀤𑀸𑀦𑀁 𑀦𑀸𑀫 𑀤𑀼𑀢𑀺𑀬𑁄 𑀥𑀫𑁆𑀫𑁄 𑀳𑁄𑀢𑀺. 𑀤𑀲𑀫𑁂𑀓𑀸𑀤𑀲𑀫𑀸𑀦𑀺 𑀉𑀢𑁆𑀢𑀸𑀦𑀢𑁆𑀣𑀸𑀦𑁂𑀯𑀸𑀢𑀺.

𑀆𑀬𑀸𑀘𑀦𑀯𑀕𑁆𑀕𑁄 𑀤𑀼𑀢𑀺𑀬𑁄.

(𑁧𑁩) 𑁩. 𑀤𑀸𑀦𑀯𑀕𑁆𑀕𑀯𑀡𑁆𑀡𑀦𑀸

𑁧𑁪𑁨. 𑀢𑀢𑀺𑀬𑀲𑁆𑀲 𑀧𑀞𑀫𑁂 𑀤𑀸𑀦𑀸𑀦𑀻𑀢𑀺 𑀤𑀺𑀬𑁆𑀬𑀦𑀓𑀯𑀲𑁂𑀦 𑀤𑀸𑀦𑀸𑀦𑀺, 𑀤𑁂𑀬𑁆𑀬𑀥𑀫𑁆𑀫𑀲𑁆𑀲𑁂𑀢𑀁 𑀦𑀸𑀫𑀁. 𑀲𑀯𑀢𑁆𑀣𑀼𑀓𑀸 𑀯𑀸 𑀘𑁂𑀢𑀦𑀸 𑀤𑀸𑀦𑀁, 𑀲𑀫𑁆𑀧𑀢𑁆𑀢𑀺𑀧𑀭𑀺𑀘𑁆𑀘𑀸𑀕𑀲𑁆𑀲𑁂𑀢𑀁 𑀦𑀸𑀫𑀁. 𑀆𑀫𑀺𑀲𑀤𑀸𑀦𑀦𑁆𑀢𑀺 𑀘𑀢𑁆𑀢𑀸𑀭𑁄 𑀧𑀘𑁆𑀘𑀬𑀸 𑀤𑀺𑀬𑁆𑀬𑀦𑀓𑀯𑀲𑁂𑀦 𑀆𑀫𑀺𑀲𑀤𑀸𑀦𑀁 𑀦𑀸𑀫. 𑀥𑀫𑁆𑀫𑀤𑀸𑀦𑀦𑁆𑀢𑀺 𑀇𑀥𑁂𑀓𑀘𑁆𑀘𑁄 𑀅𑀫𑀢𑀧𑀢𑁆𑀢𑀺𑀧𑀝𑀺𑀧𑀤𑀁 𑀓𑀣𑁂𑀢𑁆𑀯𑀸 𑀤𑁂𑀢𑀺, 𑀇𑀤𑀁 𑀥𑀫𑁆𑀫𑀤𑀸𑀦𑀁 𑀦𑀸𑀫.

𑁧𑁪𑁩. 𑀤𑀼𑀢𑀺𑀬𑁂 𑀘𑀢𑁆𑀢𑀸𑀭𑁄 𑀧𑀘𑁆𑀘𑀬𑀸 𑀬𑀚𑀦𑀓𑀯𑀲𑁂𑀦 𑀬𑀸𑀕𑁄 𑀦𑀸𑀫 𑀥𑀫𑁆𑀫𑁄𑀧𑀺 𑀬𑀚𑀦𑀓𑀯𑀲𑁂𑀦 𑀬𑀸𑀕𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑁧𑁪𑁪. 𑀢𑀢𑀺𑀬𑁂 𑀆𑀫𑀺𑀲𑀲𑁆𑀲 𑀘𑀚𑀦𑀁 𑀆𑀫𑀺𑀲𑀘𑀸𑀕𑁄, 𑀥𑀫𑁆𑀫𑀲𑁆𑀲 𑀘𑀚𑀦𑀁 𑀥𑀫𑁆𑀫𑀘𑀸𑀕𑁄. 𑀘𑀢𑀼𑀢𑁆𑀣𑁂 𑀉𑀧𑀲𑀕𑁆𑀕𑀫𑀢𑁆𑀢𑀁 𑀯𑀺𑀲𑁂𑀲𑁄.

𑁧𑁪𑁬. 𑀧𑀜𑁆𑀘𑀫𑁂 𑀘𑀢𑀼𑀦𑁆𑀦𑀁 𑀧𑀘𑁆𑀘𑀬𑀸𑀦𑀁 𑀪𑀼𑀜𑁆𑀚𑀦𑀁 𑀆𑀫𑀺𑀲𑀪𑁄𑀕𑁄, 𑀥𑀫𑁆𑀫𑀲𑁆𑀲 𑀪𑀼𑀜𑁆𑀚𑀦𑀁 𑀥𑀫𑁆𑀫𑀪𑁄𑀕𑁄. 𑀙𑀝𑁆𑀞𑁂 𑀉𑀧𑀲𑀕𑁆𑀕𑀫𑀢𑁆𑀢𑀁 𑀯𑀺𑀲𑁂𑀲𑁄.

𑁧𑁪𑁮. 𑀲𑀢𑁆𑀢𑀫𑁂 𑀘𑀢𑀼𑀦𑁆𑀦𑀁 𑀧𑀘𑁆𑀘𑀬𑀸𑀦𑀁 𑀲𑀁𑀯𑀺𑀪𑀚𑀦𑀁 𑀆𑀫𑀺𑀲𑀲𑀁𑀯𑀺𑀪𑀸𑀕𑁄, 𑀥𑀫𑁆𑀫𑀲𑁆𑀲 𑀲𑀁𑀯𑀺𑀪𑀚𑀦𑀁 𑀥𑀫𑁆𑀫𑀲𑀁𑀯𑀺𑀪𑀸𑀕𑁄.

𑁧𑁪𑁯. 𑀅𑀝𑁆𑀞𑀫𑁂 𑀘𑀢𑀽𑀳𑀺 𑀧𑀘𑁆𑀘𑀬𑁂𑀳𑀺 𑀲𑀗𑁆𑀕𑀳𑁄 𑀆𑀫𑀺𑀲𑀲𑀗𑁆𑀕𑀳𑁄, 𑀥𑀫𑁆𑀫𑁂𑀦 𑀲𑀗𑁆𑀕𑀳𑁄 𑀥𑀫𑁆𑀫𑀲𑀗𑁆𑀕𑀳𑁄.

𑁧𑁫𑁦. 𑀦𑀯𑀫𑁂 𑀘𑀢𑀽𑀳𑀺 𑀧𑀘𑁆𑀘𑀬𑁂𑀳𑀺 𑀅𑀦𑀼𑀕𑁆𑀕𑀡𑁆𑀳𑀦𑀁 𑀆𑀫𑀺𑀲𑀸𑀦𑀼𑀕𑁆𑀕𑀳𑁄, 𑀥𑀫𑁆𑀫𑁂𑀦 𑀅𑀦𑀼𑀕𑁆𑀕𑀡𑁆𑀳𑀦𑀁 𑀥𑀫𑁆𑀫𑀸𑀦𑀼𑀕𑁆𑀕𑀳𑁄.

𑁧𑁫𑁧. 𑀤𑀲𑀫𑁂 𑀘𑀢𑀽𑀳𑀺 𑀧𑀘𑁆𑀘𑀬𑁂𑀳𑀺 𑀅𑀦𑀼𑀓𑀫𑁆𑀧𑀦𑀁 𑀆𑀫𑀺𑀲𑀸𑀦𑀼𑀓𑀫𑁆𑀧𑀸, 𑀥𑀫𑁆𑀫𑁂𑀦 𑀅𑀦𑀼𑀓𑀫𑁆𑀧𑀦𑀁 𑀥𑀫𑁆𑀫𑀸𑀦𑀼𑀓𑀫𑁆𑀧𑀸𑀢𑀺.

𑀤𑀸𑀦𑀯𑀕𑁆𑀕𑁄 𑀢𑀢𑀺𑀬𑁄.

(𑁧𑁪) 𑁪. 𑀲𑀦𑁆𑀣𑀸𑀭𑀯𑀕𑁆𑀕𑀯𑀡𑁆𑀡𑀦𑀸

𑁧𑁫𑁨. 𑀘𑀢𑀼𑀢𑁆𑀣𑀲𑁆𑀲 𑀧𑀞𑀫𑁂 𑀘𑀢𑀽𑀳𑀺 𑀧𑀘𑁆𑀘𑀬𑁂𑀳𑀺 𑀅𑀢𑁆𑀢𑀦𑁄 𑀘 𑀧𑀭𑀲𑁆𑀲 𑀘 𑀅𑀦𑁆𑀢𑀭𑀧𑀝𑀺𑀘𑁆𑀙𑀸𑀤𑀦𑀯𑀲𑁂𑀦 𑀲𑀦𑁆𑀣𑀭𑀡𑀁 𑀆𑀫𑀺𑀲𑀲𑀦𑁆𑀣𑀸𑀭𑁄, 𑀥𑀫𑁆𑀫𑁂𑀦 𑀲𑀦𑁆𑀣𑀭𑀡𑀁 𑀥𑀫𑁆𑀫𑀲𑀦𑁆𑀣𑀸𑀭𑁄. 𑀤𑀼𑀢𑀺𑀬𑁂 𑀉𑀧𑀲𑀕𑁆𑀕𑀫𑀢𑁆𑀢𑀁 𑀯𑀺𑀲𑁂𑀲𑁄.

𑁧𑁫𑁪. 𑀢𑀢𑀺𑀬𑁂 𑀯𑀼𑀢𑁆𑀢𑀧𑁆𑀧𑀓𑀸𑀭𑀲𑁆𑀲 𑀆𑀫𑀺𑀲𑀲𑁆𑀲 𑀏𑀲𑀦𑀸 𑀆𑀫𑀺𑀲𑁂𑀲𑀦𑀸, 𑀥𑀫𑁆𑀫𑀲𑁆𑀲 𑀏𑀲𑀦𑀸 𑀥𑀫𑁆𑀫𑁂𑀲𑀦𑀸. 𑀘𑀢𑀼𑀢𑁆𑀣𑁂 𑀉𑀧𑀲𑀕𑁆𑀕𑀫𑀢𑁆𑀢𑀫𑁂𑀯 𑀯𑀺𑀲𑁂𑀲𑁄.

𑁧𑁫𑁬. 𑀧𑀜𑁆𑀘𑀫𑁂 𑀫𑀢𑁆𑀣𑀓𑀧𑁆𑀧𑀢𑁆𑀢𑀸 𑀆𑀫𑀺𑀲𑀧𑀭𑀺𑀬𑁂𑀲𑀦𑀸 𑀆𑀫𑀺𑀲𑀧𑀭𑀺𑀬𑁂𑀝𑁆𑀞𑀺, 𑀫𑀢𑁆𑀣𑀓𑀧𑁆𑀧𑀢𑁆𑀢𑀸𑀯 𑀥𑀫𑁆𑀫𑀧𑀭𑀺𑀬𑁂𑀲𑀦𑀸 𑀥𑀫𑁆𑀫𑀧𑀭𑀺𑀬𑁂𑀝𑁆𑀞𑀻𑀢𑀺 𑀯𑀼𑀢𑁆𑀢𑀸.

𑁧𑁫𑁭. 𑀙𑀝𑁆𑀞𑁂 𑀆𑀫𑀺𑀲𑁂𑀦 𑀧𑀽𑀚𑀦𑀁 𑀆𑀫𑀺𑀲𑀧𑀽𑀚𑀸, 𑀥𑀫𑁆𑀫𑁂𑀦 𑀧𑀽𑀚𑀦𑀁 𑀥𑀫𑁆𑀫𑀧𑀽𑀚𑀸.

𑁧𑁫𑁮. 𑀲𑀢𑁆𑀢𑀫𑁂 𑀆𑀢𑀺𑀣𑁂𑀬𑁆𑀬𑀸𑀦𑀻𑀢𑀺 𑀆𑀕𑀦𑁆𑀢𑀼𑀓𑀤𑀸𑀦𑀸𑀦𑀺. 𑀅𑀢𑀺𑀣𑁂𑀬𑁆𑀬𑀸𑀦𑀻𑀢𑀺𑀧𑀺 𑀧𑀸𑀞𑁄.

𑁧𑁫𑁯. 𑀅𑀝𑁆𑀞𑀫𑁂 𑀆𑀫𑀺𑀲𑀁 𑀇𑀚𑁆𑀛𑀦𑀓𑀲𑀫𑀺𑀚𑁆𑀛𑀦𑀓𑀯𑀲𑁂𑀦 𑀆𑀫𑀺𑀲𑀺𑀤𑁆𑀥𑀺, 𑀥𑀫𑁆𑀫𑁄𑀧𑀺 𑀇𑀚𑁆𑀛𑀦𑀓𑀲𑀫𑀺𑀚𑁆𑀛𑀦𑀓𑀯𑀲𑁂𑀦 𑀥𑀫𑁆𑀫𑀺𑀤𑁆𑀥𑀺.

𑁧𑁬𑁦. 𑀦𑀯𑀫𑁂 𑀆𑀫𑀺𑀲𑁂𑀦 𑀯𑀟𑁆𑀠𑀦𑀁 𑀆𑀫𑀺𑀲𑀯𑀼𑀤𑁆𑀥𑀺, 𑀥𑀫𑁆𑀫𑁂𑀦 𑀯𑀟𑁆𑀠𑀦𑀁 𑀥𑀫𑁆𑀫𑀯𑀼𑀤𑁆𑀥𑀺.

𑁧𑁬𑁧. 𑀤𑀲𑀫𑁂 𑀭𑀢𑀺𑀓𑀭𑀡𑀝𑁆𑀞𑁂𑀦 𑀆𑀫𑀺𑀲𑀁 𑀆𑀫𑀺𑀲𑀭𑀢𑀦𑀁, 𑀥𑀫𑁆𑀫𑁄 𑀥𑀫𑁆𑀫𑀭𑀢𑀦𑀁.

𑁧𑁬𑁨. 𑀏𑀓𑀸𑀤𑀲𑀫𑁂 𑀆𑀫𑀺𑀲𑀲𑁆𑀲 𑀘𑀺𑀦𑀦𑀁 𑀯𑀟𑁆𑀠𑀦𑀁 𑀆𑀫𑀺𑀲𑀲𑀦𑁆𑀦𑀺𑀘𑀬𑁄, 𑀥𑀫𑁆𑀫𑀲𑁆𑀲 𑀘𑀺𑀦𑀦𑀁 𑀯𑀟𑁆𑀠𑀦𑀁 𑀥𑀫𑁆𑀫𑀲𑀦𑁆𑀦𑀺𑀘𑀬𑁄.

𑁧𑁬𑁩. 𑀤𑁆𑀯𑀸𑀤𑀲𑀫𑁂 𑀆𑀫𑀺𑀲𑀲𑁆𑀲 𑀯𑀺𑀧𑀼𑀮𑀪𑀸𑀯𑁄 𑀆𑀫𑀺𑀲𑀯𑁂𑀧𑀼𑀮𑁆𑀮𑀁, 𑀥𑀫𑁆𑀫𑀲𑁆𑀲 𑀯𑀺𑀧𑀼𑀮𑀪𑀸𑀯𑁄 𑀥𑀫𑁆𑀫𑀯𑁂𑀧𑀼𑀮𑁆𑀮𑀦𑁆𑀢𑀺.

𑀲𑀦𑁆𑀣𑀸𑀭𑀯𑀕𑁆𑀕𑁄 𑀘𑀢𑀼𑀢𑁆𑀣𑁄.

(𑁧𑁫) 𑁫. 𑀲𑀫𑀸𑀧𑀢𑁆𑀢𑀺𑀯𑀕𑁆𑀕𑀯𑀡𑁆𑀡𑀦𑀸

𑁧𑁬𑁪. 𑀧𑀜𑁆𑀘𑀫𑀲𑁆𑀲 𑀧𑀞𑀫𑁂 𑀲𑀫𑀸𑀧𑀢𑁆𑀢𑀺𑀓𑀼𑀲𑀮𑀢𑀸𑀢𑀺 𑀆𑀳𑀸𑀭𑀲𑀧𑁆𑀧𑀸𑀬𑀁 𑀉𑀢𑀼𑀲𑀧𑁆𑀧𑀸𑀬𑀁 𑀧𑀭𑀺𑀕𑁆𑀕𑀡𑁆𑀳𑀺𑀢𑁆𑀯𑀸 𑀲𑀫𑀸𑀧𑀢𑁆𑀢𑀺𑀲𑀫𑀸𑀧𑀚𑁆𑀚𑀦𑁂 𑀙𑁂𑀓𑀢𑀸. 𑀲𑀫𑀸𑀧𑀢𑁆𑀢𑀺𑀯𑀼𑀝𑁆𑀞𑀸𑀦𑀓𑀼𑀲𑀮𑀢𑀸𑀢𑀺 𑀬𑀣𑀸𑀧𑀭𑀺𑀘𑁆𑀙𑁂𑀤𑁂𑀦 𑀕𑀢𑁂 𑀓𑀸𑀮𑁂 𑀯𑀺𑀬𑀢𑁆𑀢𑁄 𑀳𑀼𑀢𑁆𑀯𑀸 𑀉𑀝𑁆𑀞𑀳𑀦𑁆𑀢𑁄 𑀯𑀼𑀝𑁆𑀞𑀸𑀦𑀓𑀼𑀲𑀮𑁄 𑀦𑀸𑀫 𑀳𑁄𑀢𑀺, 𑀏𑀯𑀁 𑀓𑀼𑀲𑀮𑀢𑀸.

𑁧𑁬𑁫. 𑀤𑀼𑀢𑀺𑀬𑁂 𑀅𑀚𑁆𑀚𑀯𑀦𑁆𑀢𑀺 𑀉𑀚𑀼𑀪𑀸𑀯𑁄. 𑀫𑀤𑁆𑀤𑀯𑀦𑁆𑀢𑀺 𑀫𑀼𑀤𑀼𑀪𑀸𑀯𑁄.

𑁧𑁬𑁬. 𑀢𑀢𑀺𑀬𑁂 𑀔𑀦𑁆𑀢𑀻𑀢𑀺 𑀅𑀥𑀺𑀯𑀸𑀲𑀦𑀔𑀦𑁆𑀢𑀺. 𑀲𑁄𑀭𑀘𑁆𑀘𑀦𑁆𑀢𑀺 𑀲𑀼𑀲𑀻𑀮𑁆𑀬𑀪𑀸𑀯𑁂𑀦 𑀲𑀼𑀭𑀢𑀪𑀸𑀯𑁄.

𑁧𑁬𑁭. 𑀘𑀢𑀼𑀢𑁆𑀣𑁂 𑀲𑀸𑀔𑀮𑁆𑀬𑀦𑁆𑀢𑀺 𑀲𑀡𑁆𑀳𑀯𑀸𑀘𑀸𑀯𑀲𑁂𑀦 𑀲𑀫𑁆𑀫𑁄𑀤𑀫𑀸𑀦𑀪𑀸𑀯𑁄. 𑀧𑀝𑀺𑀲𑀦𑁆𑀣𑀸𑀭𑁄𑀢𑀺 𑀆𑀫𑀺𑀲𑁂𑀦 𑀯𑀸 𑀥𑀫𑁆𑀫𑁂𑀦 𑀯𑀸 𑀧𑀝𑀺𑀲𑀦𑁆𑀣𑀭𑀡𑀁.

𑁧𑁬𑁮. 𑀧𑀜𑁆𑀘𑀫𑁂 𑀅𑀯𑀺𑀳𑀺𑀁𑀲𑀸𑀢𑀺 𑀓𑀭𑀼𑀡𑀸𑀧𑀼𑀩𑁆𑀩𑀪𑀸𑀕𑁄. 𑀲𑁄𑀘𑁂𑀬𑁆𑀬𑀦𑁆𑀢𑀺 𑀲𑀻𑀮𑀯𑀲𑁂𑀦 𑀲𑀼𑀘𑀺𑀪𑀸𑀯𑁄. 𑀙𑀝𑁆𑀞𑀲𑀢𑁆𑀢𑀫𑀸𑀦𑀺 𑀉𑀢𑁆𑀢𑀸𑀦𑀢𑁆𑀣𑀸𑀦𑁂𑀯.

𑁧𑁭𑁧. 𑀅𑀝𑁆𑀞𑀫𑁂 𑀧𑀝𑀺𑀲𑀗𑁆𑀔𑀸𑀦𑀩𑀮𑀦𑁆𑀢𑀺 𑀧𑀘𑁆𑀘𑀯𑁂𑀓𑁆𑀔𑀡𑀩𑀮𑀁.

𑁧𑁭𑁨. 𑀦𑀯𑀫𑁂 𑀫𑀼𑀝𑁆𑀞𑀲𑁆𑀲𑀘𑁆𑀘𑁂 𑀅𑀓𑀫𑁆𑀧𑀦𑁂𑀦 𑀲𑀢𑀺𑀬𑁂𑀯 𑀲𑀢𑀺𑀩𑀮𑀁. 𑀉𑀤𑁆𑀥𑀘𑁆𑀘𑁂 𑀅𑀓𑀫𑁆𑀧𑀦𑁂𑀦 𑀲𑀫𑀸𑀥𑀺𑀬𑁂𑀯 𑀲𑀫𑀸𑀥𑀺𑀩𑀮𑀁.

𑁧𑁭𑁩. 𑀤𑀲𑀫𑁂 𑀲𑀫𑀣𑁄𑀢𑀺 𑀘𑀺𑀢𑁆𑀢𑁂𑀓𑀕𑁆𑀕𑀢𑀸. 𑀯𑀺𑀧𑀲𑁆𑀲𑀦𑀸𑀢𑀺 𑀲𑀗𑁆𑀔𑀸𑀭𑀧𑀭𑀺𑀕𑁆𑀕𑀸𑀳𑀓𑀜𑁆𑀜𑀸𑀡𑀁.

𑁧𑁭𑁪. 𑀏𑀓𑀸𑀤𑀲𑀫𑁂 𑀲𑀻𑀮𑀯𑀺𑀧𑀢𑁆𑀢𑀻𑀢𑀺 𑀤𑀼𑀲𑁆𑀲𑀻𑀮𑁆𑀬𑀁. 𑀤𑀺𑀝𑁆𑀞𑀺𑀯𑀺𑀧𑀢𑁆𑀢𑀻𑀢𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺.

𑁧𑁭𑁫. 𑀤𑁆𑀯𑀸𑀤𑀲𑀫𑁂 𑀲𑀻𑀮𑀲𑀫𑁆𑀧𑀤𑀸𑀢𑀺 𑀧𑀭𑀺𑀧𑀼𑀡𑁆𑀡𑀲𑀻𑀮𑀢𑀸. 𑀤𑀺𑀝𑁆𑀞𑀺𑀲𑀫𑁆𑀧𑀤𑀸𑀢𑀺 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑀪𑀸𑀯𑁄. 𑀢𑁂𑀦 𑀓𑀫𑁆𑀫𑀲𑁆𑀲𑀓𑀢𑀲𑀫𑁆𑀫𑀸𑀤𑀺𑀝𑁆𑀞𑀺, 𑀛𑀸𑀦𑀲𑀫𑁆𑀫𑀸𑀤𑀺𑀝𑁆𑀞𑀺, 𑀯𑀺𑀧𑀲𑁆𑀲𑀦𑀸𑀲𑀫𑁆𑀫𑀸𑀤𑀺𑀝𑁆𑀞𑀺, 𑀫𑀕𑁆𑀕𑀲𑀫𑁆𑀫𑀸𑀤𑀺𑀝𑁆𑀞𑀺, 𑀨𑀮𑀲𑀫𑁆𑀫𑀸𑀤𑀺𑀝𑁆𑀞𑀻𑀢𑀺 𑀲𑀩𑁆𑀩𑀸𑀧𑀺 𑀧𑀜𑁆𑀘𑀯𑀺𑀥𑀸 𑀲𑀫𑁆𑀫𑀸𑀤𑀺𑀝𑁆𑀞𑀺 𑀲𑀗𑁆𑀕𑀳𑀺𑀢𑀸 𑀳𑁄𑀢𑀺.

𑁧𑁭𑁬. 𑀢𑁂𑀭𑀲𑀫𑁂 𑀲𑀻𑀮𑀯𑀺𑀲𑀼𑀤𑁆𑀥𑀻𑀢𑀺 𑀯𑀺𑀲𑀼𑀤𑁆𑀥𑀺𑀲𑀫𑁆𑀧𑀸𑀧𑀓𑀁 𑀲𑀻𑀮𑀁. 𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀻𑀢𑀺 𑀯𑀺𑀲𑀼𑀤𑁆𑀥𑀺𑀲𑀫𑁆𑀧𑀸𑀧𑀺𑀓𑀸 𑀘𑀢𑀼𑀫𑀕𑁆𑀕𑀲𑀫𑁆𑀫𑀸𑀤𑀺𑀝𑁆𑀞𑀺, 𑀧𑀜𑁆𑀘𑀯𑀺𑀥𑀸𑀧𑀺 𑀯𑀸 𑀲𑀫𑁆𑀫𑀸𑀤𑀺𑀝𑁆𑀞𑀺.

𑁧𑁭𑁭. 𑀘𑀼𑀤𑁆𑀤𑀲𑀫𑁂 𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀻𑀢𑀺 𑀯𑀺𑀲𑀼𑀤𑁆𑀥𑀺𑀲𑀫𑁆𑀧𑀸𑀧𑀺𑀓𑀸 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑁂𑀯. 𑀬𑀣𑀸𑀤𑀺𑀝𑁆𑀞𑀺𑀲𑁆𑀲 𑀘 𑀧𑀥𑀸𑀦𑀦𑁆𑀢𑀺 𑀳𑁂𑀝𑁆𑀞𑀺𑀫𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀁 𑀯𑀻𑀭𑀺𑀬𑀁. 𑀢𑀜𑁆𑀳𑀺 𑀢𑀲𑁆𑀲𑀸 𑀤𑀺𑀝𑁆𑀞𑀺𑀬𑀸 𑀅𑀦𑀼𑀭𑀽𑀧𑀢𑁆𑀢𑀸 ‘‘𑀬𑀣𑀸𑀤𑀺𑀝𑁆𑀞𑀺𑀲𑁆𑀲 𑀘 𑀧𑀥𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁.

𑁧𑁭𑁮. 𑀧𑀦𑁆𑀦𑀭𑀲𑀫𑁂 𑀅𑀲𑀦𑁆𑀢𑀼𑀝𑁆𑀞𑀺𑀢𑀸 𑀘 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀽𑀢𑀺 𑀅𑀜𑁆𑀜𑀢𑁆𑀭 𑀅𑀭𑀳𑀢𑁆𑀢𑀫𑀕𑁆𑀕𑀸 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼 𑀅𑀲𑀦𑁆𑀢𑀼𑀝𑁆𑀞𑀺𑀪𑀸𑀯𑁄.

𑁧𑁭𑁯. 𑀲𑁄𑀴𑀲𑀫𑁂 𑀫𑀼𑀝𑁆𑀞𑀲𑁆𑀲𑀘𑁆𑀘𑀦𑁆𑀢𑀺 𑀫𑀼𑀝𑁆𑀞𑀲𑁆𑀲𑀢𑀺𑀪𑀸𑀯𑁄. 𑀅𑀲𑀫𑁆𑀧𑀚𑀜𑁆𑀜𑀦𑁆𑀢𑀺 𑀅𑀜𑁆𑀜𑀸𑀡𑀪𑀸𑀯𑁄.

𑁧𑁮𑁦. 𑀲𑀢𑁆𑀢𑀭𑀲𑀫𑁂 𑀅𑀧𑀺𑀮𑀸𑀧𑀦𑀮𑀓𑁆𑀔𑀡𑀸 𑀲𑀢𑀺. 𑀲𑀫𑁆𑀫𑀸 𑀧𑀚𑀸𑀦𑀦𑀮𑀓𑁆𑀔𑀡𑀁 𑀲𑀫𑁆𑀧𑀚𑀜𑁆𑀜𑀦𑁆𑀢𑀺.

𑀲𑀫𑀸𑀧𑀢𑁆𑀢𑀺𑀯𑀕𑁆𑀕𑁄 𑀧𑀜𑁆𑀘𑀫𑁄. 𑀢𑀢𑀺𑀬𑀧𑀡𑁆𑀡𑀸𑀲𑀓𑀁 𑀦𑀺𑀝𑁆𑀞𑀺𑀢𑀁.