𑁧. 𑀓𑁄𑀥𑀧𑁂𑀬𑁆𑀬𑀸𑀮𑀁

𑁧𑁮𑁧. 𑀇𑀢𑁄 𑀧𑀭𑁂𑀲𑀼 𑀓𑀼𑀚𑁆𑀛𑀦𑀮𑀓𑁆𑀔𑀡𑁄 𑀓𑁄𑀥𑁄. 𑀉𑀧𑀦𑀦𑁆𑀥𑀦𑀮𑀓𑁆𑀔𑀡𑁄 𑀉𑀧𑀦𑀸𑀳𑁄. 𑀲𑀼𑀓𑀢𑀓𑀭𑀡𑀫𑀓𑁆𑀔𑀦𑀮𑀓𑁆𑀔𑀡𑁄 𑀫𑀓𑁆𑀔𑁄. 𑀬𑀼𑀕𑀕𑁆𑀕𑀸𑀳𑀮𑀓𑁆𑀔𑀡𑁄 𑀧𑀮𑀸𑀲𑁄. 𑀉𑀲𑀽𑀬𑀦𑀮𑀓𑁆𑀔𑀡𑀸 𑀇𑀲𑁆𑀲𑀸. 𑀧𑀜𑁆𑀘𑀫𑀘𑁆𑀙𑁂𑀭𑀪𑀸𑀯𑁄 𑀫𑀘𑁆𑀙𑀭𑀺𑀬𑀁. 𑀢𑀁 𑀲𑀩𑁆𑀩𑀫𑁆𑀧𑀺 𑀫𑀘𑁆𑀙𑀭𑀸𑀬𑀦𑀮𑀓𑁆𑀔𑀡𑀁. 𑀓𑀢𑀧𑀝𑀺𑀘𑁆𑀙𑀸𑀤𑀦𑀮𑀓𑁆𑀔𑀡𑀸 𑀫𑀸𑀬𑀸. 𑀓𑁂𑀭𑀸𑀝𑀺𑀓𑀮𑀓𑁆𑀔𑀡𑀁 𑀲𑀸𑀞𑁂𑀬𑁆𑀬𑀁. 𑀅𑀮𑀚𑁆𑀚𑀦𑀸𑀓𑀸𑀭𑁄 𑀅𑀳𑀺𑀭𑀺𑀓𑀁. 𑀉𑀧𑀯𑀸𑀤𑀢𑁄 𑀅𑀪𑀸𑀬𑀦𑀸𑀓𑀸𑀭𑁄 𑀅𑀦𑁄𑀢𑁆𑀢𑀧𑁆𑀧𑀁. 𑀅𑀓𑁆𑀓𑁄𑀥𑀸𑀤𑀬𑁄 𑀢𑁂𑀲𑀁 𑀧𑀝𑀺𑀧𑀓𑁆𑀔𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀸.

𑁧𑁮𑁫. 𑀲𑁂𑀓𑁆𑀔𑀲𑁆𑀲 𑀪𑀺𑀓𑁆𑀔𑀼𑀦𑁄𑀢𑀺 𑀲𑀢𑁆𑀢𑀯𑀺𑀥𑀲𑁆𑀲𑀸𑀧𑀺 𑀲𑁂𑀓𑁆𑀔𑀲𑁆𑀲 𑀉𑀧𑀭𑀺𑀉𑀧𑀭𑀺𑀕𑀼𑀡𑁂𑀳𑀺 𑀧𑀭𑀺𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀺, 𑀧𑀼𑀣𑀼𑀚𑁆𑀚𑀦𑀲𑁆𑀲 𑀧𑀦 𑀧𑀞𑀫𑀢𑀭𑀁𑀬𑁂𑀯 𑀧𑀭𑀺𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀅𑀧𑀭𑀺𑀳𑀸𑀦𑀸𑀬𑀸𑀢𑀺 𑀉𑀧𑀭𑀺𑀉𑀧𑀭𑀺𑀕𑀼𑀡𑁂𑀳𑀺 𑀅𑀧𑀭𑀺𑀳𑀸𑀦𑀢𑁆𑀣𑀸𑀬.

𑁧𑁮𑁭. 𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀢𑁆𑀢𑁄𑀢𑀺 𑀬𑀣𑀸 𑀆𑀦𑁂𑀢𑁆𑀯𑀸 𑀦𑀺𑀓𑁆𑀔𑀺𑀢𑁆𑀢𑁄, 𑀏𑀯𑀁 𑀦𑀺𑀭𑀬𑁂 𑀧𑀢𑀺𑀝𑁆𑀞𑀺𑀢𑁄 𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑁄.

𑁧𑁯𑁦. 𑀏𑀓𑀘𑁆𑀘𑁄𑀢𑀺 𑀬𑀲𑁆𑀲𑁂𑀢𑁂 𑀓𑁄𑀥𑀸𑀤𑀬𑁄 𑀅𑀢𑁆𑀣𑀺, 𑀲𑁄 𑀏𑀓𑀘𑁆𑀘𑁄 𑀦𑀸𑀫.

𑀓𑁄𑀥𑀧𑁂𑀬𑁆𑀬𑀸𑀮𑀁 𑀦𑀺𑀝𑁆𑀞𑀺𑀢𑀁.