𑁧. 𑀧𑀞𑀫𑀧𑀡𑁆𑀡𑀸𑀲𑀓𑀁

𑁧. 𑀓𑀫𑁆𑀫𑀓𑀸𑀭𑀡𑀯𑀕𑁆𑀕𑁄

𑁧. 𑀯𑀚𑁆𑀚𑀲𑀼𑀢𑁆𑀢𑀯𑀡𑁆𑀡𑀦𑀸

𑁧. 𑀤𑀼𑀓𑀦𑀺𑀧𑀸𑀢𑀲𑁆𑀲 𑀧𑀞𑀫𑁂 𑀯𑀚𑁆𑀚𑀸𑀦𑀻𑀢𑀺 𑀤𑁄𑀲𑀸 𑀅𑀧𑀭𑀸𑀥𑀸. 𑀤𑀺𑀝𑁆𑀞𑀥𑀫𑁆𑀫𑀺𑀓𑀦𑁆𑀢𑀺 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀇𑀫𑀲𑁆𑀫𑀺𑀁𑀬𑁂𑀯 𑀅𑀢𑁆𑀢𑀪𑀸𑀯𑁂 𑀉𑀧𑁆𑀧𑀦𑁆𑀦𑀨𑀮𑀁. 𑀲𑀫𑁆𑀧𑀭𑀸𑀬𑀺𑀓𑀦𑁆𑀢𑀺 𑀲𑀫𑁆𑀧𑀭𑀸𑀬𑁂 𑀅𑀦𑀸𑀕𑀢𑁂 𑀅𑀢𑁆𑀢𑀪𑀸𑀯𑁂 𑀉𑀧𑁆𑀧𑀦𑁆𑀦𑀨𑀮𑀁. 𑀆𑀕𑀼𑀘𑀸𑀭𑀺𑀦𑁆𑀢𑀺 𑀧𑀸𑀧𑀓𑀸𑀭𑀺𑀁 𑀅𑀧𑀭𑀸𑀥𑀓𑀸𑀭𑀓𑀁. 𑀭𑀸𑀚𑀸𑀦𑁄 𑀕𑀳𑁂𑀢𑁆𑀯𑀸 𑀯𑀺𑀯𑀺𑀥𑀸 𑀓𑀫𑁆𑀫𑀓𑀸𑀭𑀡𑀸 𑀓𑀸𑀭𑁂𑀦𑁆𑀢𑁂𑀢𑀺 𑀘𑁄𑀭𑀁 𑀕𑀳𑁂𑀢𑁆𑀯𑀸 𑀯𑀺𑀯𑀺𑀥𑀸 𑀓𑀫𑁆𑀫𑀓𑀸𑀭𑀡𑀸 𑀭𑀸𑀚𑀧𑀼𑀭𑀺𑀲𑀸 𑀓𑀭𑁄𑀦𑁆𑀢𑀺, 𑀭𑀸𑀚𑀸𑀦𑁄 𑀧𑀦 𑀢𑀸 𑀓𑀸𑀭𑁂𑀦𑁆𑀢𑀺 𑀦𑀸𑀫. 𑀢𑀁 𑀘𑁄𑀭𑀁 𑀏𑀯𑀁 𑀓𑀫𑁆𑀫𑀓𑀸𑀭𑀡𑀸 𑀓𑀸𑀭𑀺𑀬𑀫𑀸𑀦𑀁 𑀏𑀲 𑀧𑀲𑁆𑀲𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀧𑀲𑁆𑀲𑀢𑀺 𑀘𑁄𑀭𑀁 𑀆𑀕𑀼𑀘𑀸𑀭𑀺𑀁 𑀭𑀸𑀚𑀸𑀦𑁄 𑀕𑀳𑁂𑀢𑁆𑀯𑀸 𑀯𑀺𑀯𑀺𑀥𑀸 𑀓𑀫𑁆𑀫𑀓𑀸𑀭𑀡𑀸 𑀓𑀸𑀭𑁂𑀦𑁆𑀢𑁂’’𑀢𑀺. 𑀅𑀤𑁆𑀥𑀤𑀡𑁆𑀟𑀓𑁂𑀳𑀻𑀢𑀺 𑀫𑀼𑀕𑁆𑀕𑀭𑁂𑀳𑀺, 𑀧𑀳𑀸𑀭𑀲𑀸𑀥𑀦𑀢𑁆𑀣𑀁 𑀯𑀸 𑀘𑀢𑀼𑀳𑀢𑁆𑀣𑀤𑀡𑁆𑀟𑀁 𑀤𑁆𑀯𑁂𑀥𑀸 𑀙𑁂𑀢𑁆𑀯𑀸 𑀕𑀳𑀺𑀢𑀤𑀡𑁆𑀟𑀓𑁂𑀳𑀺. 𑀩𑀺𑀮𑀗𑁆𑀕𑀣𑀸𑀮𑀺𑀓𑀦𑁆𑀢𑀺 𑀓𑀜𑁆𑀚𑀺𑀬𑀉𑀓𑁆𑀔𑀮𑀺𑀓𑀓𑀫𑁆𑀫𑀓𑀸𑀭𑀡𑀁. 𑀢𑀁 𑀓𑀭𑁄𑀦𑁆𑀢𑀸 𑀲𑀻𑀲𑀓𑀝𑀸𑀳𑀁 𑀉𑀧𑁆𑀧𑀸𑀝𑁂𑀢𑁆𑀯𑀸 𑀢𑀢𑁆𑀢𑀁 𑀅𑀬𑁄𑀕𑀼𑀴𑀁 𑀲𑀡𑁆𑀟𑀸𑀲𑁂𑀦 𑀕𑀳𑁂𑀢𑁆𑀯𑀸 𑀢𑀢𑁆𑀣 𑀧𑀓𑁆𑀔𑀺𑀧𑀦𑁆𑀢𑀺, 𑀢𑁂𑀦 𑀫𑀢𑁆𑀣𑀮𑀼𑀗𑁆𑀕𑀁 𑀧𑀓𑁆𑀓𑀼𑀣𑀺𑀢𑁆𑀯𑀸 𑀉𑀢𑁆𑀢𑀭𑀢𑀺. 𑀲𑀗𑁆𑀔𑀫𑀼𑀡𑁆𑀟𑀺𑀓𑀦𑁆𑀢𑀺 𑀲𑀗𑁆𑀔𑀫𑀼𑀡𑁆𑀟𑀓𑀫𑁆𑀫𑀓𑀸𑀭𑀡𑀁. 𑀢𑀁 𑀓𑀭𑁄𑀦𑁆𑀢𑀸 𑀉𑀢𑁆𑀢𑀭𑁄𑀝𑁆𑀞𑀉𑀪𑀢𑁄𑀓𑀡𑁆𑀡𑀘𑀽𑀴𑀺𑀓𑀕𑀮𑀯𑀸𑀝𑀓𑀧𑀭𑀺𑀘𑁆𑀙𑁂𑀤𑁂𑀦 𑀘𑀫𑁆𑀫𑀁 𑀙𑀺𑀦𑁆𑀤𑀺𑀢𑁆𑀯𑀸 𑀲𑀩𑁆𑀩𑀓𑁂𑀲𑁂 𑀏𑀓𑀢𑁄 𑀕𑀡𑁆𑀞𑀺𑀁 𑀓𑀢𑁆𑀯𑀸 𑀤𑀡𑁆𑀟𑀓𑁂𑀦 𑀯𑁂𑀞𑁂𑀢𑁆𑀯𑀸 𑀉𑀧𑁆𑀧𑀸𑀝𑁂𑀦𑁆𑀢𑀺, 𑀲𑀳 𑀓𑁂𑀲𑁂𑀳𑀺 𑀘𑀫𑁆𑀫𑀁 𑀉𑀝𑁆𑀞𑀳𑀢𑀺. 𑀢𑀢𑁄 𑀲𑀻𑀲𑀓𑀝𑀸𑀳𑀁 𑀣𑀽𑀮𑀲𑀓𑁆𑀔𑀭𑀸𑀳𑀺 𑀖𑀁𑀲𑀺𑀢𑁆𑀯𑀸 𑀥𑁄𑀯𑀦𑁆𑀢𑀸 𑀲𑀗𑁆𑀔𑀯𑀡𑁆𑀡𑀁 𑀓𑀭𑁄𑀦𑁆𑀢𑀺. 𑀭𑀸𑀳𑀼𑀫𑀼𑀔𑀦𑁆𑀢𑀺 𑀭𑀸𑀳𑀼𑀫𑀼𑀔𑀓𑀫𑁆𑀫𑀓𑀸𑀭𑀡𑀁. 𑀢𑀁 𑀓𑀭𑁄𑀦𑁆𑀢𑀸 𑀲𑀗𑁆𑀓𑀼𑀦𑀸 𑀫𑀼𑀔𑀁 𑀯𑀺𑀯𑀭𑀺𑀢𑁆𑀯𑀸 𑀅𑀦𑁆𑀢𑁄𑀫𑀼𑀔𑁂 𑀤𑀻𑀧𑀁 𑀚𑀸𑀮𑁂𑀦𑁆𑀢𑀺, 𑀓𑀡𑁆𑀡𑀘𑀽𑀴𑀺𑀓𑀸𑀳𑀺 𑀯𑀸 𑀧𑀝𑁆𑀞𑀸𑀬 𑀫𑀼𑀔𑀁 𑀦𑀺𑀔𑀸𑀤𑀦𑁂𑀦 𑀔𑀦𑀦𑁆𑀢𑀺, 𑀮𑁄𑀳𑀺𑀢𑀁 𑀧𑀕𑁆𑀖𑀭𑀺𑀢𑁆𑀯𑀸 𑀫𑀼𑀔𑀁 𑀧𑀽𑀭𑁂𑀢𑀺.

𑀚𑁄𑀢𑀺𑀫𑀸𑀮𑀺𑀓𑀦𑁆𑀢𑀺 𑀲𑀓𑀮𑀲𑀭𑀻𑀭𑀁 𑀢𑁂𑀮𑀧𑀺𑀮𑁄𑀢𑀺𑀓𑀸𑀬 𑀯𑁂𑀞𑁂𑀢𑁆𑀯𑀸 𑀆𑀮𑀺𑀫𑁆𑀧𑁂𑀦𑁆𑀢𑀺. 𑀳𑀢𑁆𑀣𑀧𑀚𑁆𑀚𑁄𑀢𑀺𑀓𑀦𑁆𑀢𑀺 𑀳𑀢𑁆𑀣𑁂 𑀢𑁂𑀮𑀧𑀺𑀮𑁄𑀢𑀺𑀓𑀸𑀬 𑀯𑁂𑀞𑁂𑀢𑁆𑀯𑀸 𑀤𑀻𑀧𑀁 𑀯𑀺𑀬 𑀧𑀚𑁆𑀚𑀸𑀮𑁂𑀦𑁆𑀢𑀺. 𑀏𑀭𑀓𑀯𑀢𑁆𑀢𑀺𑀓𑀦𑁆𑀢𑀺 𑀏𑀭𑀓𑀯𑀢𑁆𑀢𑀓𑀫𑁆𑀫𑀓𑀸𑀭𑀡𑀁. 𑀢𑀁 𑀓𑀭𑁄𑀦𑁆𑀢𑀸 𑀳𑁂𑀝𑁆𑀞𑀸𑀕𑀻𑀯𑀢𑁄 𑀧𑀝𑁆𑀞𑀸𑀬 𑀘𑀫𑁆𑀫𑀯𑀝𑁆𑀝𑁂 𑀓𑀦𑁆𑀢𑀺𑀢𑁆𑀯𑀸 𑀕𑁄𑀧𑁆𑀨𑀓𑁂 𑀞𑀧𑁂𑀦𑁆𑀢𑀺, 𑀅𑀣 𑀦𑀁 𑀬𑁄𑀢𑁆𑀢𑁂𑀳𑀺 𑀩𑀦𑁆𑀥𑀺𑀢𑁆𑀯𑀸 𑀓𑀟𑁆𑀠𑀦𑁆𑀢𑀺. 𑀲𑁄 𑀅𑀢𑁆𑀢𑀦𑁄 𑀘𑀫𑁆𑀫𑀯𑀝𑁆𑀝𑁂 𑀅𑀓𑁆𑀓𑀫𑀺𑀢𑁆𑀯𑀸 𑀅𑀓𑁆𑀓𑀫𑀺𑀢𑁆𑀯𑀸 𑀧𑀢𑀢𑀺. 𑀘𑀻𑀭𑀓𑀯𑀸𑀲𑀺𑀓𑀦𑁆𑀢𑀺 𑀘𑀻𑀭𑀓𑀯𑀸𑀲𑀺𑀓𑀓𑀫𑁆𑀫𑀓𑀸𑀭𑀡𑀁. 𑀢𑀁 𑀓𑀭𑁄𑀦𑁆𑀢𑀸 𑀢𑀣𑁂𑀯 𑀘𑀫𑁆𑀫𑀯𑀝𑁆𑀝𑁂 𑀓𑀦𑁆𑀢𑀺𑀢𑁆𑀯𑀸 𑀓𑀝𑀺𑀬𑀁 𑀞𑀧𑁂𑀦𑁆𑀢𑀺, 𑀓𑀝𑀺𑀢𑁄 𑀧𑀝𑁆𑀞𑀸𑀬 𑀓𑀦𑁆𑀢𑀺𑀢𑁆𑀯𑀸 𑀕𑁄𑀧𑁆𑀨𑀓𑁂𑀲𑀼 𑀞𑀧𑁂𑀦𑁆𑀢𑀺, 𑀉𑀧𑀭𑀺𑀫𑁂𑀳𑀺 𑀳𑁂𑀝𑁆𑀞𑀺𑀫𑀲𑀭𑀻𑀭𑀁 𑀘𑀻𑀭𑀓𑀦𑀺𑀯𑀸𑀲𑀦𑀦𑀺𑀯𑀢𑁆𑀣𑀁 𑀯𑀺𑀬 𑀳𑁄𑀢𑀺. 𑀏𑀡𑁂𑀬𑁆𑀬𑀓𑀦𑁆𑀢𑀺 𑀏𑀡𑁂𑀬𑁆𑀬𑀓𑀓𑀫𑁆𑀫𑀓𑀸𑀭𑀡𑀁. 𑀢𑀁 𑀓𑀭𑁄𑀦𑁆𑀢𑀸 𑀉𑀪𑁄𑀲𑀼 𑀓𑀧𑁆𑀧𑀭𑁂𑀲𑀼 𑀘 𑀉𑀪𑁄𑀲𑀼 𑀚𑀸𑀡𑀼𑀓𑁂𑀲𑀼 𑀘 𑀅𑀬𑀯𑀮𑀬𑀸𑀦𑀺 𑀤𑀢𑁆𑀯𑀸 𑀅𑀬𑀲𑀽𑀮𑀸𑀦𑀺 𑀓𑁄𑀝𑁆𑀝𑁂𑀦𑁆𑀢𑀺. 𑀲𑁄 𑀘𑀢𑀽𑀳𑀺 𑀅𑀬𑀲𑀽𑀮𑁂𑀳𑀺 𑀪𑀽𑀫𑀺𑀬𑀁 𑀧𑀢𑀺𑀝𑁆𑀞𑀳𑀢𑀺. 𑀅𑀣 𑀦𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀅𑀕𑁆𑀕𑀺𑀁 𑀓𑀭𑁄𑀦𑁆𑀢𑀺. ‘‘𑀏𑀡𑁂𑀬𑁆𑀬𑀓𑁄 𑀚𑁄𑀢𑀺𑀧𑀭𑀺𑀕𑁆𑀕𑀳𑁄 𑀬𑀣𑀸’’𑀢𑀺 𑀆𑀕𑀢𑀝𑁆𑀞𑀸𑀦𑁂𑀧𑀺 𑀇𑀤𑀫𑁂𑀯 𑀯𑀼𑀢𑁆𑀢𑀁. 𑀢𑀁 𑀓𑀸𑀮𑁂𑀦 𑀓𑀸𑀮𑀁 𑀲𑀽𑀮𑀸𑀦𑀺 𑀅𑀧𑀦𑁂𑀢𑁆𑀯𑀸 𑀘𑀢𑀽𑀳𑀺 𑀅𑀝𑁆𑀞𑀺𑀓𑁄𑀝𑀻𑀳𑀺𑀬𑁂𑀯 𑀞𑀧𑁂𑀦𑁆𑀢𑀺. 𑀏𑀯𑀭𑀽𑀧𑀸 𑀓𑀫𑁆𑀫𑀓𑀸𑀭𑀡𑀸 𑀦𑀸𑀫 𑀦𑀢𑁆𑀣𑀺.

𑀩𑀴𑀺𑀲𑀫𑀁𑀲𑀺𑀓𑀦𑁆𑀢𑀺 𑀉𑀪𑀢𑁄𑀫𑀼𑀔𑁂𑀳𑀺 𑀩𑀴𑀺𑀲𑁂𑀳𑀺 𑀧𑀳𑀭𑀺𑀢𑁆𑀯𑀸 𑀘𑀫𑁆𑀫𑀫𑀁𑀲𑀦𑁆𑀳𑀸𑀭𑀽𑀦𑀺 𑀉𑀧𑁆𑀧𑀸𑀝𑁂𑀦𑁆𑀢𑀺. 𑀓𑀳𑀸𑀧𑀡𑀺𑀓𑀦𑁆𑀢𑀺 𑀲𑀓𑀮𑀲𑀭𑀻𑀭𑀁 𑀢𑀺𑀡𑁆𑀳𑀸𑀳𑀺 𑀯𑀸𑀲𑀻𑀳𑀺 𑀓𑁄𑀝𑀺𑀢𑁄 𑀧𑀝𑁆𑀞𑀸𑀬 𑀓𑀳𑀸𑀧𑀡𑀫𑀢𑁆𑀢𑀁, 𑀓𑀳𑀸𑀧𑀡𑀫𑀢𑁆𑀢𑀁 𑀧𑀸𑀢𑁂𑀦𑁆𑀢𑀸 𑀓𑁄𑀝𑁆𑀝𑁂𑀦𑁆𑀢𑀺. 𑀔𑀸𑀭𑀸𑀧𑀢𑀘𑁆𑀙𑀺𑀓𑀦𑁆𑀢𑀺 𑀲𑀭𑀻𑀭𑀁 𑀢𑀢𑁆𑀣 𑀢𑀢𑁆𑀣 𑀆𑀯𑀼𑀥𑁂𑀳𑀺 𑀧𑀳𑀭𑀺𑀢𑁆𑀯𑀸 𑀓𑁄𑀘𑁆𑀙𑁂𑀳𑀺 𑀔𑀸𑀭𑀁 𑀖𑀁𑀲𑀦𑁆𑀢𑀺, 𑀘𑀫𑁆𑀫𑀫𑀁𑀲𑀦𑁆𑀳𑀸𑀭𑀽𑀦𑀺 𑀧𑀕𑁆𑀖𑀭𑀺𑀢𑁆𑀯𑀸 𑀅𑀝𑁆𑀞𑀺𑀓𑀲𑀗𑁆𑀔𑀮𑀺𑀓𑀸𑀯 𑀢𑀺𑀝𑁆𑀞𑀢𑀺. 𑀧𑀮𑀺𑀖𑀧𑀭𑀺𑀯𑀢𑁆𑀢𑀺𑀓𑀦𑁆𑀢𑀺 𑀏𑀓𑁂𑀦 𑀧𑀲𑁆𑀲𑁂𑀦 𑀦𑀺𑀧𑀚𑁆𑀚𑀸𑀧𑁂𑀢𑁆𑀯𑀸 𑀓𑀡𑁆𑀡𑀘𑁆𑀙𑀺𑀤𑁆𑀤𑁂𑀦 𑀅𑀬𑀲𑀽𑀮𑀁 𑀓𑁄𑀝𑁆𑀝𑁂𑀢𑁆𑀯𑀸 𑀧𑀣𑀯𑀺𑀬𑀸 𑀏𑀓𑀸𑀩𑀤𑁆𑀥𑀁 𑀓𑀭𑁄𑀦𑁆𑀢𑀺. 𑀅𑀣 𑀦𑀁 𑀧𑀸𑀤𑁂 𑀕𑀳𑁂𑀢𑁆𑀯𑀸 𑀆𑀯𑀺𑀜𑁆𑀙𑀦𑁆𑀢𑀺. 𑀧𑀮𑀸𑀮𑀧𑀻𑀞𑀓𑀦𑁆𑀢𑀺 𑀙𑁂𑀓𑁄 𑀓𑀸𑀭𑀡𑀺𑀓𑁄 𑀙𑀯𑀺𑀘𑀫𑁆𑀫𑀁 𑀅𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀦𑀺𑀲𑀤𑀧𑁄𑀢𑁂𑀳𑀺 𑀅𑀝𑁆𑀞𑀻𑀦𑀺 𑀪𑀺𑀦𑁆𑀤𑀺𑀢𑁆𑀯𑀸 𑀓𑁂𑀲𑁂𑀲𑀼 𑀕𑀳𑁂𑀢𑁆𑀯𑀸 𑀉𑀓𑁆𑀔𑀺𑀧𑀢𑀺, 𑀫𑀁𑀲𑀭𑀸𑀲𑀺𑀬𑁂𑀯 𑀳𑁄𑀢𑀺. 𑀅𑀣 𑀦𑀁 𑀓𑁂𑀲𑁂𑀳𑁂𑀯 𑀧𑀭𑀺𑀬𑁄𑀦𑀦𑁆𑀥𑀺𑀢𑁆𑀯𑀸 𑀕𑀡𑁆𑀳𑀦𑁆𑀢𑀺, 𑀧𑀮𑀸𑀮𑀯𑀝𑁆𑀝𑀺𑀁 𑀯𑀺𑀬 𑀓𑀢𑁆𑀯𑀸 𑀧𑀼𑀦 𑀯𑁂𑀞𑁂𑀦𑁆𑀢𑀺. 𑀲𑀼𑀦𑀔𑁂𑀳𑀺𑀧𑀻𑀢𑀺 𑀓𑀢𑀺𑀧𑀬𑀸𑀦𑀺 𑀤𑀺𑀯𑀲𑀸𑀦𑀺 𑀆𑀳𑀸𑀭𑀁 𑀅𑀤𑀢𑁆𑀯𑀸 𑀙𑀸𑀢𑀓𑀲𑀼𑀦𑀔𑁂𑀳𑀺 𑀔𑀸𑀤𑀸𑀧𑁂𑀦𑁆𑀢𑀺. 𑀢𑁂 𑀫𑀼𑀳𑀼𑀢𑁆𑀢𑁂𑀦 𑀅𑀝𑁆𑀞𑀺𑀓𑀲𑀗𑁆𑀔𑀮𑀺𑀓𑀫𑁂𑀯 𑀓𑀭𑁄𑀦𑁆𑀢𑀺. 𑀲𑀽𑀮𑁂 𑀉𑀢𑁆𑀢𑀸𑀲𑁂𑀦𑁆𑀢𑁂𑀢𑀺 𑀲𑀽𑀮𑁂 𑀆𑀭𑁄𑀧𑁂𑀦𑁆𑀢𑁂.

𑀦 𑀧𑀭𑁂𑀲𑀁 𑀧𑀸𑀪𑀢𑀁 𑀯𑀺𑀮𑀼𑀫𑁆𑀧𑀦𑁆𑀢𑁄 𑀘𑀭𑀢𑀻𑀢𑀺 𑀧𑀭𑁂𑀲𑀁 𑀲𑀦𑁆𑀢𑀓𑀁 𑀪𑀡𑁆𑀟𑀁 𑀧𑀭𑀫𑁆𑀫𑀼𑀔𑀁 𑀆𑀪𑀢𑀁 𑀅𑀦𑁆𑀢𑀫𑀲𑁄 𑀅𑀦𑁆𑀢𑀭𑀯𑀻𑀣𑀺𑀬𑀁 𑀧𑀢𑀺𑀢𑀁 𑀲𑀳𑀲𑁆𑀲𑀪𑀡𑁆𑀟𑀺𑀓𑀫𑁆𑀧𑀺 𑀤𑀺𑀲𑁆𑀯𑀸 ‘‘𑀇𑀫𑀺𑀦𑀸 𑀚𑀻𑀯𑀺𑀲𑁆𑀲𑀸𑀫𑀻’’𑀢𑀺 𑀯𑀺𑀮𑀼𑀫𑁆𑀧𑀦𑁆𑀢𑁄 𑀦 𑀯𑀺𑀘𑀭𑀢𑀺, 𑀓𑁄 𑀇𑀫𑀺𑀦𑀸 𑀅𑀢𑁆𑀣𑁄𑀢𑀺 𑀧𑀺𑀝𑁆𑀞𑀺𑀧𑀸𑀤𑁂𑀦 𑀯𑀸 𑀧𑀯𑀝𑁆𑀝𑁂𑀢𑁆𑀯𑀸 𑀕𑀘𑁆𑀙𑀢𑀺.

𑀧𑀸𑀧𑀓𑁄𑀢𑀺 𑀮𑀸𑀫𑀓𑁄. 𑀤𑀼𑀓𑁆𑀔𑁄𑀢𑀺 𑀅𑀦𑀺𑀝𑁆𑀞𑁄. 𑀓𑀺𑀜𑁆𑀘 𑀢𑀦𑁆𑀢𑀺 𑀓𑀺𑀁 𑀦𑀸𑀫 𑀢𑀁 𑀓𑀸𑀭𑀡𑀁 𑀪𑀯𑁂𑀬𑁆𑀬. 𑀬𑀸𑀳𑀦𑁆𑀢𑀺 𑀬𑁂𑀦 𑀅𑀳𑀁. 𑀓𑀸𑀬𑀤𑀼𑀘𑁆𑀘𑀭𑀺𑀢𑀦𑁆𑀢𑀺 𑀧𑀸𑀡𑀸𑀢𑀺𑀧𑀸𑀢𑀸𑀤𑀺 𑀢𑀺𑀯𑀺𑀥𑀁 𑀅𑀓𑀼𑀲𑀮𑀁 𑀓𑀸𑀬𑀓𑀫𑁆𑀫𑀁. 𑀓𑀸𑀬𑀲𑀼𑀘𑀭𑀺𑀢𑀦𑁆𑀢𑀺 𑀢𑀲𑁆𑀲 𑀧𑀝𑀺𑀧𑀓𑁆𑀔𑀪𑀽𑀢𑀁 𑀢𑀺𑀯𑀺𑀥𑀁 𑀓𑀼𑀲𑀮𑀓𑀫𑁆𑀫𑀁. 𑀯𑀘𑀻𑀤𑀼𑀘𑁆𑀘𑀭𑀺𑀢𑀦𑁆𑀢𑀺 𑀫𑀼𑀲𑀸𑀯𑀸𑀤𑀸𑀤𑀺 𑀘𑀢𑀼𑀩𑁆𑀩𑀺𑀥𑀁 𑀅𑀓𑀼𑀲𑀮𑀁 𑀯𑀘𑀻𑀓𑀫𑁆𑀫𑀁. 𑀯𑀘𑀻𑀲𑀼𑀘𑀭𑀺𑀢𑀦𑁆𑀢𑀺 𑀢𑀲𑁆𑀲 𑀧𑀝𑀺𑀧𑀓𑁆𑀔𑀪𑀽𑀢𑀁 𑀘𑀢𑀼𑀩𑁆𑀩𑀺𑀥𑀁 𑀓𑀼𑀲𑀮𑀓𑀫𑁆𑀫𑀁. 𑀫𑀦𑁄𑀤𑀼𑀘𑁆𑀘𑀭𑀺𑀢𑀦𑁆𑀢𑀺 𑀅𑀪𑀺𑀚𑁆𑀛𑀸𑀤𑀺 𑀢𑀺𑀯𑀺𑀥𑀁 𑀅𑀓𑀼𑀲𑀮𑀓𑀫𑁆𑀫𑀁. 𑀫𑀦𑁄𑀲𑀼𑀘𑀭𑀺𑀢𑀦𑁆𑀢𑀺 𑀢𑀲𑁆𑀲 𑀧𑀝𑀺𑀧𑀓𑁆𑀔𑀪𑀽𑀢𑀁 𑀢𑀺𑀯𑀺𑀥𑀁 𑀓𑀼𑀲𑀮𑀓𑀫𑁆𑀫𑀁. 𑀲𑀼𑀤𑁆𑀥𑀁 𑀅𑀢𑁆𑀢𑀸𑀦𑀁 𑀧𑀭𑀺𑀳𑀭𑀢𑀻𑀢𑀺 𑀏𑀢𑁆𑀣 𑀤𑀼𑀯𑀺𑀥𑀸 𑀲𑀼𑀤𑁆𑀥𑀺 𑁋 𑀧𑀭𑀺𑀬𑀸𑀬𑀢𑁄 𑀘 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀘. 𑀲𑀭𑀡𑀕𑀫𑀦𑁂𑀦 𑀳𑀺 𑀧𑀭𑀺𑀬𑀸𑀬𑁂𑀦 𑀲𑀼𑀤𑁆𑀥𑀁 𑀅𑀢𑁆𑀢𑀸𑀦𑀁 𑀧𑀭𑀺𑀳𑀭𑀢𑀺 𑀦𑀸𑀫. 𑀢𑀣𑀸 𑀧𑀜𑁆𑀘𑀳𑀺 𑀲𑀻𑀮𑁂𑀳𑀺, 𑀤𑀲𑀳𑀺 𑀲𑀻𑀮𑁂𑀳𑀺 𑁋 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑁂𑀦, 𑀧𑀞𑀫𑀚𑁆𑀛𑀸𑀦𑁂𑀦…𑀧𑁂… 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑁂𑀦, 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂𑀦, 𑀲𑁄𑀢𑀸𑀧𑀢𑁆𑀢𑀺𑀨𑀮𑁂𑀦…𑀧𑁂… 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀧𑀭𑀺𑀬𑀸𑀬𑁂𑀦 𑀲𑀼𑀤𑁆𑀥𑀁 𑀅𑀢𑁆𑀢𑀸𑀦𑀁 𑀧𑀭𑀺𑀳𑀭𑀢𑀺 𑀦𑀸𑀫. 𑀅𑀭𑀳𑀢𑁆𑀢𑀨𑀮𑁂 𑀧𑀢𑀺𑀝𑁆𑀞𑀺𑀢𑁄 𑀧𑀦 𑀔𑀻𑀡𑀸𑀲𑀯𑁄 𑀙𑀺𑀦𑁆𑀦𑀫𑀽𑀮𑀓𑁂 𑀧𑀜𑁆𑀘𑀓𑁆𑀔𑀦𑁆𑀥𑁂 𑀦𑁆𑀳𑀸𑀧𑁂𑀦𑁆𑀢𑁄𑀧𑀺 𑀔𑀸𑀤𑀸𑀧𑁂𑀦𑁆𑀢𑁄𑀧𑀺 𑀪𑀼𑀜𑁆𑀚𑀸𑀧𑁂𑀦𑁆𑀢𑁄𑀧𑀺 𑀦𑀺𑀲𑀻𑀤𑀸𑀧𑁂𑀦𑁆𑀢𑁄𑀧𑀺 𑀦𑀺𑀧𑀚𑁆𑀚𑀸𑀧𑁂𑀦𑁆𑀢𑁄𑀧𑀺 𑀦𑀺𑀧𑁆𑀧𑀭𑀺𑀬𑀸𑀬𑁂𑀦𑁂𑀯 𑀲𑀼𑀤𑁆𑀥𑀁 𑀦𑀺𑀫𑁆𑀫𑀮𑀁 𑀅𑀢𑁆𑀢𑀸𑀦𑀁 𑀧𑀭𑀺𑀳𑀭𑀢𑀺 𑀧𑀝𑀺𑀚𑀕𑁆𑀕𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀇𑀫𑀸𑀦𑀺 𑀤𑁆𑀯𑁂 𑀯𑀚𑁆𑀚𑀸𑀦𑁂𑀯, 𑀦𑁄 𑀦 𑀯𑀚𑁆𑀚𑀸𑀦𑀺, 𑀢𑀲𑁆𑀫𑀸. 𑀯𑀚𑁆𑀚𑀪𑀻𑀭𑀼𑀦𑁄𑀢𑀺 𑀯𑀚𑁆𑀚𑀪𑀻𑀭𑀼𑀓𑀸. 𑀯𑀚𑁆𑀚𑀪𑀬𑀤𑀲𑁆𑀲𑀸𑀯𑀺𑀦𑁄𑀢𑀺 𑀯𑀚𑁆𑀚𑀸𑀦𑀺 𑀪𑀬𑀢𑁄 𑀤𑀲𑁆𑀲𑀦𑀲𑀻𑀮𑀸. 𑀏𑀢𑀁 𑀧𑀸𑀝𑀺𑀓𑀗𑁆𑀔𑀦𑁆𑀢𑀺 𑀏𑀢𑀁 𑀇𑀘𑁆𑀙𑀺𑀢𑀩𑁆𑀩𑀁, 𑀏𑀢𑀁 𑀅𑀯𑀲𑁆𑀲𑀁𑀪𑀸𑀯𑀻𑀢𑀺 𑀅𑀢𑁆𑀣𑁄. 𑀬𑀦𑁆𑀢𑀺 𑀦𑀺𑀧𑀸𑀢𑀫𑀢𑁆𑀢𑀁, 𑀓𑀸𑀭𑀡𑀯𑀘𑀦𑀁 𑀯𑀸 𑀬𑁂𑀦 𑀓𑀸𑀭𑀡𑁂𑀦 𑀧𑀭𑀺𑀫𑀼𑀘𑁆𑀘𑀺𑀲𑁆𑀲𑀢𑀺 𑀲𑀩𑁆𑀩𑀯𑀚𑁆𑀚𑁂𑀳𑀺. 𑀓𑁂𑀦 𑀧𑀦 𑀓𑀸𑀭𑀡𑁂𑀦 𑀧𑀭𑀺𑀫𑀼𑀘𑁆𑀘𑀺𑀲𑁆𑀲𑀢𑀻𑀢𑀺? 𑀘𑀢𑀼𑀢𑁆𑀣𑀫𑀕𑁆𑀕𑁂𑀦 𑀘𑁂𑀯 𑀘𑀢𑀼𑀢𑁆𑀣𑀨𑀮𑁂𑀦 𑀘. 𑀫𑀕𑁆𑀕𑁂𑀦 𑀳𑀺 𑀧𑀭𑀺𑀫𑀼𑀘𑁆𑀘𑀢𑀺 𑀦𑀸𑀫, 𑀨𑀮𑀁 𑀧𑀢𑁆𑀢𑁄 𑀧𑀭𑀺𑀫𑀼𑀢𑁆𑀢𑁄 𑀦𑀸𑀫 𑀳𑁄𑀢𑀻𑀢𑀺. 𑀓𑀺𑀁 𑀧𑀦 𑀔𑀻𑀡𑀸𑀲𑀯𑀲𑁆𑀲 𑀅𑀓𑀼𑀲𑀮𑀁 𑀦 𑀯𑀺𑀧𑀘𑁆𑀘𑀢𑀻𑀢𑀺? 𑀯𑀺𑀧𑀘𑁆𑀘𑀢𑀺, 𑀢𑀁 𑀧𑀦 𑀔𑀻𑀡𑀸𑀲𑀯𑀪𑀸𑀯𑀢𑁄 𑀧𑀼𑀩𑁆𑀩𑁂 𑀓𑀢𑀁. 𑀢𑀜𑁆𑀘 𑀔𑁄 𑀇𑀫𑀲𑁆𑀫𑀺𑀁𑀬𑁂𑀯 𑀅𑀢𑁆𑀢𑀪𑀸𑀯𑁂, 𑀲𑀫𑁆𑀧𑀭𑀸𑀬𑁂 𑀧𑀦𑀲𑁆𑀲 𑀓𑀫𑁆𑀫𑀨𑀮𑀁 𑀦𑀸𑀫 𑀦𑀢𑁆𑀣𑀻𑀢𑀺. 𑀧𑀞𑀫𑀁.

𑁨. 𑀧𑀥𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁨. 𑀤𑀼𑀢𑀺𑀬𑁂 𑀧𑀥𑀸𑀦𑀸𑀦𑀻𑀢𑀺 𑀯𑀻𑀭𑀺𑀬𑀸𑀦𑀺. 𑀯𑀻𑀭𑀺𑀬𑀜𑁆𑀳𑀺 𑀧𑀤𑀳𑀺𑀢𑀩𑁆𑀩𑀢𑁄 𑀧𑀥𑀸𑀦𑀪𑀸𑀯𑀓𑀭𑀡𑀢𑁄 𑀯𑀸 𑀧𑀥𑀸𑀦𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀤𑀼𑀭𑀪𑀺𑀲𑀫𑁆𑀪𑀯𑀸𑀦𑀻𑀢𑀺 𑀤𑀼𑀲𑁆𑀲𑀳𑀸𑀦𑀺 𑀤𑀼𑀧𑁆𑀧𑀽𑀭𑀺𑀬𑀸𑀦𑀺, 𑀤𑀼𑀓𑁆𑀓𑀭𑀸𑀦𑀻𑀢𑀺 𑀅𑀢𑁆𑀣𑁄. 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀢𑀦𑁆𑀢𑀺 𑀅𑀕𑀸𑀭𑁂 𑀯𑀲𑀦𑁆𑀢𑀸𑀦𑀁. 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀸𑀦𑀼𑀧𑁆𑀧𑀤𑀸𑀦𑀢𑁆𑀣𑀁 𑀧𑀥𑀸𑀦𑀦𑁆𑀢𑀺 𑀏𑀢𑁂𑀲𑀁 𑀘𑀻𑀯𑀭𑀸𑀤𑀻𑀦𑀁 𑀘𑀢𑀼𑀦𑁆𑀦𑀁 𑀧𑀘𑁆𑀘𑀬𑀸𑀦𑀁 𑀅𑀦𑀼𑀧𑁆𑀧𑀤𑀸𑀦𑀢𑁆𑀣𑀸𑀬 𑀧𑀥𑀸𑀦𑀁 𑀦𑀸𑀫 𑀤𑀼𑀭𑀪𑀺𑀲𑀫𑁆𑀪𑀯𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀘𑀢𑀼𑀭𑀢𑀦𑀺𑀓𑀫𑁆𑀧𑀺 𑀳𑀺 𑀧𑀺𑀮𑁄𑀢𑀺𑀓𑀁, 𑀧𑀲𑀢𑀢𑀡𑁆𑀟𑀼𑀮𑀫𑀢𑁆𑀢𑀁 𑀯𑀸 𑀪𑀢𑁆𑀢𑀁, 𑀘𑀢𑀼𑀭𑀢𑀦𑀺𑀓𑀁 𑀯𑀸 𑀧𑀡𑁆𑀡𑀲𑀸𑀮𑀁, 𑀢𑁂𑀮𑀲𑀧𑁆𑀧𑀺𑀦𑀯𑀦𑀻𑀢𑀸𑀤𑀻𑀲𑀼 𑀯𑀸 𑀅𑀧𑁆𑀧𑀫𑀢𑁆𑀢𑀓𑀫𑁆𑀧𑀺 𑀪𑁂𑀲𑀚𑁆𑀚𑀁 𑀧𑀭𑁂𑀲𑀁 𑀤𑁂𑀣𑀸𑀢𑀺 𑀯𑀢𑁆𑀢𑀼𑀫𑁆𑀧𑀺 𑀦𑀻𑀳𑀭𑀺𑀢𑁆𑀯𑀸 𑀤𑀸𑀢𑀼𑀫𑁆𑀧𑀺 𑀤𑀼𑀓𑁆𑀓𑀭𑀁 𑀉𑀪𑀢𑁄𑀩𑁆𑀬𑀽𑀴𑁆𑀳𑀲𑀗𑁆𑀕𑀸𑀫𑀧𑁆𑀧𑀯𑁂𑀲𑀦𑀲𑀤𑀺𑀲𑀁. 𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀤𑀸𑀦𑀜𑁆𑀘 𑀬𑀼𑀤𑁆𑀥𑀜𑁆𑀘 𑀲𑀫𑀸𑀦𑀫𑀸𑀳𑀼,

𑀅𑀧𑁆𑀧𑀸𑀧𑀺 𑀲𑀦𑁆𑀢𑀸 𑀩𑀳𑀼𑀓𑁂 𑀚𑀺𑀦𑀦𑁆𑀢𑀺;

𑀅𑀧𑁆𑀧𑀫𑁆𑀧𑀺 𑀘𑁂 𑀲𑀤𑁆𑀤𑀳𑀸𑀦𑁄 𑀤𑀤𑀸𑀢𑀺,

𑀢𑁂𑀦𑁂𑀯 𑀲𑁄 𑀳𑁄𑀢𑀺 𑀲𑀼𑀔𑀻 𑀧𑀭𑀢𑁆𑀣𑀸’’𑀢𑀺. (𑀚𑀸. 𑁧.𑁮.𑁭𑁨; 𑀲𑀁. 𑀦𑀺. 𑁧.𑁩𑁩);

𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑀸𑀦𑀦𑁆𑀢𑀺 𑀕𑁂𑀳𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀕𑀸𑀭𑀲𑁆𑀲 𑀖𑀭𑀸𑀯𑀸𑀲𑀲𑁆𑀲 𑀳𑀺𑀢𑀸𑀯𑀳𑁂𑀳𑀺 𑀓𑀲𑀺𑀕𑁄𑀭𑀓𑁆𑀔𑀸𑀤𑀻𑀳𑀺 𑀯𑀺𑀭𑀳𑀺𑀢𑀁 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑁆𑀚𑀁 𑀉𑀧𑀕𑀢𑀸𑀦𑀁. 𑀲𑀩𑁆𑀩𑀽𑀧𑀥𑀺𑀧𑀝𑀺𑀦𑀺𑀲𑁆𑀲𑀕𑁆𑀕𑀢𑁆𑀣𑀸𑀬 𑀧𑀥𑀸𑀦𑀦𑁆𑀢𑀺 𑀲𑀩𑁆𑀩𑁂𑀲𑀁 𑀔𑀦𑁆𑀥𑀽𑀧𑀥𑀺𑀓𑀺𑀮𑁂𑀲𑀽𑀧𑀥𑀺𑀅𑀪𑀺𑀲𑀗𑁆𑀔𑀸𑀭𑀽𑀧𑀥𑀺𑀲𑀗𑁆𑀔𑀸𑀢𑀸𑀦𑀁 𑀉𑀧𑀥𑀻𑀦𑀁 𑀧𑀝𑀺𑀦𑀺𑀲𑁆𑀲𑀕𑁆𑀕𑀲𑀗𑁆𑀔𑀸𑀢𑀲𑁆𑀲 𑀦𑀺𑀩𑁆𑀩𑀸𑀦𑀲𑁆𑀲 𑀅𑀢𑁆𑀣𑀸𑀬 𑀯𑀺𑀧𑀲𑁆𑀲𑀦𑀸𑀬 𑀘𑁂𑀯 𑀫𑀕𑁆𑀕𑁂𑀦 𑀘 𑀲𑀳𑀚𑀸𑀢𑀯𑀻𑀭𑀺𑀬𑀁. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀇𑀫𑀸𑀦𑀺 𑀤𑁆𑀯𑁂 𑀧𑀥𑀸𑀦𑀸𑀦𑀺 𑀤𑀼𑀭𑀪𑀺𑀲𑀫𑁆𑀪𑀯𑀸𑀦𑀺, 𑀢𑀲𑁆𑀫𑀸. 𑀤𑀼𑀢𑀺𑀬𑀁.

𑁩. 𑀢𑀧𑀦𑀻𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁩. 𑀢𑀢𑀺𑀬𑁂 𑀢𑀧𑀦𑀻𑀬𑀸𑀢𑀺 𑀇𑀥 𑀘𑁂𑀯 𑀲𑀫𑁆𑀧𑀭𑀸𑀬𑁂 𑀘 𑀢𑀧𑀦𑁆𑀢𑀻𑀢𑀺 𑀢𑀧𑀦𑀻𑀬𑀸. 𑀢𑀧𑁆𑀧𑀢𑀻𑀢𑀺 𑀘𑀺𑀢𑁆𑀢𑀲𑀦𑁆𑀢𑀸𑀧𑁂𑀦 𑀢𑀧𑁆𑀧𑀢𑀺 𑀅𑀦𑀼𑀲𑁄𑀘𑀢𑀺 𑀓𑀸𑀬𑀤𑀼𑀘𑁆𑀘𑀭𑀺𑀢𑀁 𑀓𑀢𑁆𑀯𑀸 𑀦𑀦𑁆𑀤𑀬𑀓𑁆𑀔𑁄 𑀯𑀺𑀬 𑀦𑀦𑁆𑀤𑀫𑀸𑀡𑀯𑁄 𑀯𑀺𑀬 𑀦𑀦𑁆𑀤𑀕𑁄𑀖𑀸𑀢𑀓𑁄 𑀯𑀺𑀬 𑀤𑁂𑀯𑀤𑀢𑁆𑀢𑁄 𑀯𑀺𑀬 𑀤𑁆𑀯𑁂𑀪𑀸𑀢𑀺𑀓𑀸 𑀯𑀺𑀬 𑀘. 𑀢𑁂 𑀓𑀺𑀭 𑀕𑀸𑀯𑀁 𑀯𑀥𑀺𑀢𑁆𑀯𑀸 𑀫𑀁𑀲𑀁 𑀤𑁆𑀯𑁂 𑀓𑁄𑀝𑁆𑀞𑀸𑀲𑁂 𑀅𑀓𑀁𑀲𑀼. 𑀢𑀢𑁄 𑀓𑀦𑀺𑀝𑁆𑀞𑁄 𑀚𑁂𑀝𑁆𑀞𑀓𑀁 𑀆𑀳 𑁋 ‘‘𑀫𑀬𑁆𑀳𑀁 𑀤𑀸𑀭𑀓𑀸 𑀩𑀳𑀽, 𑀇𑀫𑀸𑀦𑀺 𑀫𑁂 𑀅𑀦𑁆𑀢𑀸𑀦𑀺 𑀤𑁂𑀳𑀻’’𑀢𑀺. 𑀅𑀣 𑀦𑀁 𑀲𑁄 ‘‘𑀲𑀩𑁆𑀩𑀁 𑀫𑀁𑀲𑀁 𑀤𑁆𑀯𑁂𑀥𑀸 𑀯𑀺𑀪𑀢𑁆𑀢𑀁, 𑀧𑀼𑀦 𑀓𑀺𑀁 𑀫𑀕𑁆𑀕𑀲𑀻’’𑀢𑀺 𑀧𑀳𑀭𑀺𑀢𑁆𑀯𑀸 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑁂𑀲𑀺. 𑀦𑀺𑀯𑀢𑁆𑀢𑀺𑀢𑁆𑀯𑀸 𑀘 𑀦𑀁 𑀑𑀮𑁄𑀓𑁂𑀦𑁆𑀢𑁄 𑀫𑀢𑀁 𑀤𑀺𑀲𑁆𑀯𑀸 ‘‘𑀪𑀸𑀭𑀺𑀬𑀁 𑀫𑁂 𑀓𑀫𑁆𑀫𑀁 𑀓𑀢’’𑀦𑁆𑀢𑀺 𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑁂𑀲𑀺. 𑀅𑀣𑀲𑁆𑀲 𑀩𑀮𑀯𑀲𑁄𑀓𑁄 𑀉𑀧𑁆𑀧𑀚𑁆𑀚𑀺. 𑀲𑁄 𑀞𑀺𑀢𑀝𑁆𑀞𑀸𑀦𑁂𑀧𑀺 𑀦𑀺𑀲𑀺𑀦𑁆𑀦𑀝𑁆𑀞𑀸𑀦𑁂𑀧𑀺 𑀢𑀤𑁂𑀯 𑀓𑀫𑁆𑀫𑀁 𑀆𑀯𑀚𑁆𑀚𑁂𑀢𑀺, 𑀘𑀺𑀢𑁆𑀢𑀲𑁆𑀲𑀸𑀤𑀁 𑀦 𑀮𑀪𑀢𑀺. 𑀅𑀲𑀺𑀢𑀧𑀻𑀢𑀔𑀸𑀬𑀺𑀢𑀲𑀸𑀬𑀺𑀢𑀫𑁆𑀧𑀺𑀲𑁆𑀲 𑀲𑀭𑀻𑀭𑁂 𑀑𑀚𑀁 𑀦 𑀨𑀭𑀢𑀺, 𑀅𑀝𑁆𑀞𑀺𑀘𑀫𑁆𑀫𑀫𑀢𑁆𑀢𑀫𑁂𑀯 𑀅𑀳𑁄𑀲𑀺. 𑀅𑀣 𑀦𑀁 𑀏𑀓𑁄 𑀣𑁂𑀭𑁄 𑀤𑀺𑀲𑁆𑀯𑀸 𑁋 ‘‘𑀉𑀧𑀸𑀲𑀓, 𑀢𑁆𑀯𑀁 𑀧𑀳𑀽𑀢𑀅𑀦𑁆𑀦𑀧𑀸𑀦𑁄, 𑀅𑀝𑁆𑀞𑀺𑀘𑀫𑁆𑀫𑀫𑀢𑁆𑀢𑀫𑁂𑀯 𑀢𑁂 𑀅𑀯𑀲𑀺𑀝𑁆𑀞𑀁, 𑀅𑀢𑁆𑀣𑀺 𑀦𑀼 𑀔𑁄 𑀢𑁂 𑀓𑀺𑀜𑁆𑀘𑀺 𑀢𑀧𑀦𑀻𑀬𑀓𑀫𑁆𑀫’’𑀦𑁆𑀢𑀺? 𑀲𑁄 ‘‘𑀆𑀫, 𑀪𑀦𑁆𑀢𑁂’’𑀢𑀺 𑀲𑀩𑁆𑀩𑀁 𑀆𑀭𑁄𑀘𑁂𑀲𑀺. 𑀅𑀣 𑀦𑀁 𑀣𑁂𑀭𑁄 ‘‘𑀪𑀸𑀭𑀺𑀬𑀁 𑀢𑁂 𑀉𑀧𑀸𑀲𑀓 𑀓𑀫𑁆𑀫𑀁 𑀓𑀢𑀁, 𑀅𑀦𑀧𑀭𑀸𑀥𑀝𑁆𑀞𑀸𑀦𑁂 𑀅𑀧𑀭𑀤𑁆𑀥’’𑀦𑁆𑀢𑀺 𑀆𑀳. 𑀲𑁄 𑀢𑁂𑀦𑁂𑀯 𑀓𑀫𑁆𑀫𑁂𑀦 𑀓𑀸𑀮𑀁 𑀓𑀢𑁆𑀯𑀸 𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑁄. 𑀯𑀘𑀻𑀤𑀼𑀘𑁆𑀘𑀭𑀺𑀢𑁂𑀦 𑀲𑀼𑀧𑁆𑀧𑀩𑀼𑀤𑁆𑀥𑀲𑀓𑁆𑀓𑀓𑁄𑀓𑀸𑀮𑀺𑀓𑀘𑀺𑀜𑁆𑀘𑀫𑀸𑀡𑀯𑀺𑀓𑀸𑀤𑀬𑁄 𑀯𑀺𑀬 𑀢𑀧𑁆𑀧𑀢𑀺. 𑀲𑁂𑀲𑀫𑁂𑀢𑁆𑀣 𑀘𑀢𑀼𑀢𑁆𑀣𑁂 𑀘 𑀉𑀢𑁆𑀢𑀸𑀦𑀢𑁆𑀣𑀫𑁂𑀯. 𑀢𑀢𑀺𑀬𑀁.

𑁫. 𑀉𑀧𑀜𑁆𑀜𑀸𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁫. 𑀧𑀜𑁆𑀘𑀫𑁂 𑀤𑁆𑀯𑀺𑀦𑁆𑀦𑀸𑀳𑀦𑁆𑀢𑀺 𑀤𑁆𑀯𑀺𑀦𑁆𑀦𑀁 𑀅𑀳𑀁. 𑀉𑀧𑀜𑁆𑀜𑀸𑀲𑀺𑀦𑁆𑀢𑀺 𑀉𑀧𑀕𑀦𑁆𑀢𑁆𑀯𑀸 𑀕𑀼𑀡𑀁 𑀅𑀜𑁆𑀜𑀸𑀲𑀺𑀁, 𑀚𑀸𑀦𑀺𑀁 𑀧𑀝𑀺𑀯𑀺𑀚𑁆𑀛𑀺𑀦𑁆𑀢𑀺 𑀅𑀢𑁆𑀣𑁄. 𑀇𑀤𑀸𑀦𑀺 𑀢𑁂 𑀥𑀫𑁆𑀫𑁂 𑀤𑀲𑁆𑀲𑁂𑀦𑁆𑀢𑁄 𑀬𑀸 𑀘 𑀅𑀲𑀦𑁆𑀢𑀼𑀝𑁆𑀞𑀺𑀢𑀸𑀢𑀺𑀆𑀤𑀺𑀫𑀸𑀳. 𑀇𑀫𑀜𑁆𑀳𑀺 𑀥𑀫𑁆𑀫𑀤𑁆𑀯𑀬𑀁 𑀦𑀺𑀲𑁆𑀲𑀸𑀬 𑀲𑀢𑁆𑀣𑀸 𑀲𑀩𑁆𑀩𑀜𑁆𑀜𑀼𑀢𑀁 𑀧𑀢𑁆𑀢𑁄, 𑀢𑀲𑁆𑀫𑀸 𑀢𑀲𑁆𑀲𑀸𑀦𑀼𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 𑀏𑀯𑀫𑀸𑀳. 𑀢𑀢𑁆𑀣 𑀅𑀲𑀦𑁆𑀢𑀼𑀝𑁆𑀞𑀺𑀢𑀸 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀽𑀢𑀺 𑀇𑀫𑀺𑀦𑀸 𑀇𑀫𑀁 𑀤𑀻𑀧𑁂𑀢𑀺 𑁋 ‘‘𑀅𑀳𑀁 𑀛𑀸𑀦𑀫𑀢𑁆𑀢𑀓𑁂𑀦 𑀯𑀸 𑀑𑀪𑀸𑀲𑀦𑀺𑀫𑀺𑀢𑁆𑀢𑀫𑀢𑁆𑀢𑀓𑁂𑀦 𑀯𑀸 𑀅𑀲𑀦𑁆𑀢𑀼𑀝𑁆𑀞𑁄 𑀳𑀼𑀢𑁆𑀯𑀸 𑀅𑀭𑀳𑀢𑁆𑀢𑀫𑀕𑁆𑀕𑀫𑁂𑀯 𑀉𑀧𑁆𑀧𑀸𑀤𑁂𑀲𑀺𑀁. 𑀬𑀸𑀯 𑀲𑁄 𑀦 𑀉𑀧𑁆𑀧𑀚𑁆𑀚𑀺, 𑀦 𑀢𑀸𑀯𑀸𑀳𑀁 𑀲𑀦𑁆𑀢𑀼𑀝𑁆𑀞𑁄 𑀅𑀳𑁄𑀲𑀺𑀁. 𑀧𑀥𑀸𑀦𑀲𑁆𑀫𑀺𑀁 𑀘 𑀅𑀦𑀼𑀓𑁆𑀓𑀡𑁆𑀞𑀺𑀢𑁄 𑀳𑀼𑀢𑁆𑀯𑀸 𑀅𑀦𑁄𑀲𑀓𑁆𑀓𑀦𑀸𑀬 𑀞𑀢𑁆𑀯𑀸𑀬𑁂𑀯 𑀧𑀥𑀸𑀦𑀓𑀺𑀭𑀺𑀬𑀁 𑀅𑀓𑀸𑀲𑀺’’𑀦𑁆𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀬𑀸 𑀘 𑀅𑀧𑁆𑀧𑀝𑀺𑀯𑀸𑀦𑀺𑀢𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀧𑁆𑀧𑀝𑀺𑀯𑀸𑀦𑀺𑀢𑀸𑀢𑀺 𑀅𑀧𑁆𑀧𑀝𑀺𑀓𑁆𑀓𑀫𑀦𑀸 𑀅𑀦𑁄𑀲𑀓𑁆𑀓𑀦𑀸. 𑀅𑀧𑁆𑀧𑀝𑀺𑀯𑀸𑀦𑀻 𑀲𑀼𑀤𑀸𑀳𑀁, 𑀪𑀺𑀓𑁆𑀔𑀯𑁂, 𑀧𑀤𑀳𑀸𑀫𑀻𑀢𑀺 𑀏𑀢𑁆𑀣 𑀲𑀼𑀤𑀦𑁆𑀢𑀺 𑀦𑀺𑀧𑀸𑀢𑀫𑀢𑁆𑀢𑀁. 𑀅𑀳𑀁, 𑀪𑀺𑀓𑁆𑀔𑀯𑁂, 𑀅𑀦𑁄𑀲𑀓𑁆𑀓𑀦𑀸𑀬𑀁 𑀞𑀺𑀢𑁄 𑀩𑁄𑀥𑀺𑀲𑀢𑁆𑀢𑀓𑀸𑀮𑁂 𑀲𑀩𑁆𑀩𑀜𑁆𑀜𑀼𑀢𑀁 𑀧𑀢𑁆𑀣𑁂𑀦𑁆𑀢𑁄 𑀧𑀥𑀸𑀦𑀫𑀓𑀸𑀲𑀺𑀦𑁆𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄.

𑀇𑀤𑀸𑀦𑀺 𑀬𑀣𑀸 𑀢𑁂𑀦 𑀢𑀁 𑀧𑀥𑀸𑀦𑀁 𑀓𑀢𑀁, 𑀢𑀁 𑀤𑀲𑁆𑀲𑁂𑀦𑁆𑀢𑁄 𑀓𑀸𑀫𑀁 𑀢𑀘𑁄 𑀘𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀧𑀢𑁆𑀢𑀩𑁆𑀩𑀦𑁆𑀢𑀺 𑀇𑀫𑀺𑀦𑀸 𑀧𑀢𑁆𑀢𑀩𑁆𑀩𑀁 𑀕𑀼𑀡𑀚𑀸𑀢𑀁 𑀤𑀲𑁆𑀲𑁂𑀢𑀺. 𑀧𑀼𑀭𑀺𑀲𑀣𑀸𑀫𑁂𑀦𑀸𑀢𑀺𑀆𑀤𑀺𑀦𑀸 𑀧𑀼𑀭𑀺𑀲𑀲𑁆𑀲 𑀜𑀸𑀡𑀣𑀸𑀫𑁄 𑀜𑀸𑀡𑀯𑀻𑀭𑀺𑀬𑀁 𑀜𑀸𑀡𑀧𑀭𑀓𑁆𑀓𑀫𑁄 𑀘 𑀓𑀣𑀺𑀢𑁄. 𑀲𑀡𑁆𑀞𑀸𑀦𑀦𑁆𑀢𑀺 𑀞𑀧𑀦𑀸 𑀅𑀧𑁆𑀧𑀯𑀢𑁆𑀢𑀦𑀸 𑀑𑀲𑀓𑁆𑀓𑀦𑀸, 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀻𑀢𑀺 𑀅𑀢𑁆𑀣𑁄. 𑀏𑀢𑁆𑀢𑀸𑀯𑀢𑀸 𑀢𑁂𑀦 𑀘𑀢𑀼𑀭𑀗𑁆𑀕𑀲𑀫𑀦𑁆𑀦𑀸𑀕𑀢𑀁 𑀯𑀻𑀭𑀺𑀬𑀸𑀥𑀺𑀝𑁆𑀞𑀸𑀦𑀁 𑀦𑀸𑀫 𑀓𑀣𑀺𑀢𑀁. 𑀏𑀢𑁆𑀣 𑀳𑀺 𑀓𑀸𑀫𑀁 𑀢𑀘𑁄 𑀘𑀸𑀢𑀺 𑀏𑀓𑀁 𑀅𑀗𑁆𑀕𑀁, 𑀦𑁆𑀳𑀸𑀭𑀼 𑀘𑀸𑀢𑀺 𑀏𑀓𑀁, 𑀅𑀝𑁆𑀞𑀺 𑀘𑀸𑀢𑀺 𑀏𑀓𑀁, 𑀫𑀁𑀲𑀮𑁄𑀳𑀺𑀢𑀦𑁆𑀢𑀺 𑀏𑀓𑀁, 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀅𑀗𑁆𑀕𑀸𑀦𑀺. 𑀧𑀼𑀭𑀺𑀲𑀣𑀸𑀫𑁂𑀦𑀸𑀢𑀺𑀆𑀤𑀻𑀦𑀺 𑀅𑀥𑀺𑀫𑀢𑁆𑀢𑀯𑀻𑀭𑀺𑀬𑀸𑀥𑀺𑀯𑀘𑀦𑀸𑀦𑀺. 𑀇𑀢𑀺 𑀧𑀼𑀭𑀺𑀫𑁂𑀳𑀺 𑀘𑀢𑀽𑀳𑀺 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀳𑀼𑀢𑁆𑀯𑀸 𑀏𑀯𑀁 𑀅𑀥𑀺𑀝𑁆𑀞𑀺𑀢𑀁 𑀯𑀻𑀭𑀺𑀬𑀁 𑀘𑀢𑀼𑀭𑀗𑁆𑀕𑀲𑀫𑀦𑁆𑀦𑀸𑀕𑀢𑀁 𑀯𑀻𑀭𑀺𑀬𑀸𑀥𑀺𑀝𑁆𑀞𑀸𑀦𑀁 𑀦𑀸𑀫𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀏𑀢𑁆𑀢𑀸𑀯𑀢𑀸 𑀢𑁂𑀦 𑀩𑁄𑀥𑀺𑀧𑀮𑁆𑀮𑀗𑁆𑀓𑁂 𑀅𑀢𑁆𑀢𑀦𑁄 𑀆𑀕𑀫𑀦𑀻𑀬𑀧𑀝𑀺𑀧𑀤𑀸 𑀓𑀣𑀺𑀢𑀸.

𑀇𑀤𑀸𑀦𑀺 𑀢𑀸𑀬 𑀧𑀝𑀺𑀧𑀤𑀸𑀬 𑀧𑀝𑀺𑀮𑀤𑁆𑀥𑀕𑀼𑀡𑀁 𑀓𑀣𑁂𑀢𑀼𑀁 𑀢𑀲𑁆𑀲 𑀫𑀬𑁆𑀳𑀁, 𑀪𑀺𑀓𑁆𑀔𑀯𑁂𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀧𑁆𑀧𑀫𑀸𑀤𑀸𑀥𑀺𑀕𑀢𑀸𑀢𑀺 𑀲𑀢𑀺𑀅𑀯𑀺𑀧𑁆𑀧𑀯𑀸𑀲𑀲𑀗𑁆𑀔𑀸𑀢𑁂𑀦 𑀅𑀧𑁆𑀧𑀫𑀸𑀤𑁂𑀦 𑀅𑀥𑀺𑀕𑀢𑀸, 𑀦 𑀲𑀼𑀢𑁆𑀢𑀧𑁆𑀧𑀫𑀢𑁆𑀢𑁂𑀦 𑀮𑀤𑁆𑀥𑀸. 𑀲𑀫𑁆𑀩𑁄𑀥𑀻𑀢𑀺 𑀘𑀢𑀼𑀫𑀕𑁆𑀕𑀜𑀸𑀡𑀜𑁆𑀘𑁂𑀯 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀜𑁆𑀘. 𑀦 𑀳𑀺 𑀲𑀓𑁆𑀓𑀸 𑀏𑀢𑀁 𑀲𑀼𑀢𑁆𑀢𑀧𑁆𑀧𑀫𑀢𑁆𑀢𑁂𑀦 𑀅𑀥𑀺𑀕𑀦𑁆𑀢𑀼𑀦𑁆𑀢𑀺. 𑀢𑁂𑀦𑀸𑀳 𑁋 ‘‘𑀅𑀧𑁆𑀧𑀫𑀸𑀤𑀸𑀥𑀺𑀕𑀢𑀸 𑀲𑀫𑁆𑀩𑁄𑀥𑀻’’𑀢𑀺. 𑀅𑀦𑀼𑀢𑁆𑀢𑀭𑁄 𑀬𑁄𑀕𑀓𑁆𑀔𑁂𑀫𑁄𑀢𑀺 𑀦 𑀓𑁂𑀯𑀮𑀁 𑀩𑁄𑀥𑀺𑀬𑁂𑀯, 𑀅𑀭𑀳𑀢𑁆𑀢𑀨𑀮𑀦𑀺𑀩𑁆𑀩𑀸𑀦𑀲𑀗𑁆𑀔𑀸𑀢𑁄 𑀅𑀦𑀼𑀢𑁆𑀢𑀭𑁄 𑀬𑁄𑀕𑀓𑁆𑀔𑁂𑀫𑁄𑀧𑀺 𑀅𑀧𑁆𑀧𑀫𑀸𑀤𑀸𑀥𑀺𑀕𑀢𑁄𑀯.

𑀇𑀤𑀸𑀦𑀺 𑀅𑀢𑁆𑀢𑀦𑀸 𑀧𑀝𑀺𑀮𑀤𑁆𑀥𑀕𑀼𑀡𑁂𑀲𑀼 𑀪𑀺𑀓𑁆𑀔𑀼𑀲𑀗𑁆𑀖𑀁 𑀲𑀫𑀸𑀤𑀧𑁂𑀦𑁆𑀢𑁄 𑀢𑀼𑀫𑁆𑀳𑁂 𑀘𑁂𑀧𑀺 𑀪𑀺𑀓𑁆𑀔𑀯𑁂𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀬𑀲𑁆𑀲𑀢𑁆𑀣𑀸𑀬𑀸𑀢𑀺 𑀬𑀲𑁆𑀲 𑀅𑀢𑁆𑀣𑀸𑀬, 𑀬𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀺𑀢𑀼𑀓𑀸𑀫𑀸 𑀳𑀼𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀢𑀤𑀦𑀼𑀢𑁆𑀢𑀭𑀦𑁆𑀢𑀺 𑀢𑀁 𑀅𑀦𑀼𑀢𑁆𑀢𑀭𑀁. 𑀩𑁆𑀭𑀳𑁆𑀫𑀘𑀭𑀺𑀬𑀧𑀭𑀺𑀬𑁄𑀲𑀸𑀦𑀦𑁆𑀢𑀺 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀧𑀭𑀺𑀬𑁄𑀲𑀸𑀦𑀪𑀽𑀢𑀁 𑀅𑀭𑀺𑀬𑀨𑀮𑀁. 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸𑀢𑀺 𑀅𑀪𑀺𑀜𑁆𑀜𑀸𑀬 𑀉𑀢𑁆𑀢𑀫𑀧𑀜𑁆𑀜𑀸𑀬 𑀧𑀘𑁆𑀘𑀓𑁆𑀔𑀁 𑀓𑀢𑁆𑀯𑀸. 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀺𑀲𑁆𑀲𑀣𑀸𑀢𑀺 𑀧𑀝𑀺𑀮𑀪𑀺𑀢𑁆𑀯𑀸 𑀧𑀸𑀧𑀼𑀡𑀺𑀢𑁆𑀯𑀸 𑀯𑀺𑀳𑀭𑀺𑀲𑁆𑀲𑀣. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀅𑀧𑁆𑀧𑀝𑀺𑀯𑀸𑀦𑀧𑀥𑀸𑀦𑀁 𑀦𑀸𑀫𑁂𑀢𑀁 𑀩𑀳𑀽𑀧𑀓𑀸𑀭𑀁 𑀉𑀢𑁆𑀢𑀫𑀢𑁆𑀣𑀲𑀸𑀥𑀓𑀁, 𑀢𑀲𑁆𑀫𑀸. 𑀧𑀜𑁆𑀘𑀫𑀁.

𑁬. 𑀲𑀁𑀬𑁄𑀚𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁬. 𑀙𑀝𑁆𑀞𑁂 𑀲𑀁𑀬𑁄𑀚𑀦𑀺𑀬𑁂𑀲𑀼 𑀥𑀫𑁆𑀫𑁂𑀲𑀽𑀢𑀺 𑀤𑀲𑀦𑁆𑀦𑀁 𑀲𑀁𑀬𑁄𑀚𑀦𑀸𑀦𑀁 𑀧𑀘𑁆𑀘𑀬𑀪𑀽𑀢𑁂𑀲𑀼 𑀢𑁂𑀪𑀽𑀫𑀓𑀥𑀫𑁆𑀫𑁂𑀲𑀼. 𑀅𑀲𑁆𑀲𑀸𑀤𑀸𑀦𑀼𑀧𑀲𑁆𑀲𑀺𑀢𑀸𑀢𑀺 𑀅𑀲𑁆𑀲𑀸𑀤𑀢𑁄 𑀧𑀲𑁆𑀲𑀺𑀢𑀸 𑀧𑀲𑁆𑀲𑀦𑀪𑀸𑀯𑁄𑀢𑀺 𑀅𑀢𑁆𑀣𑁄. 𑀦𑀺𑀩𑁆𑀩𑀺𑀤𑀸𑀦𑀼𑀧𑀲𑁆𑀲𑀺𑀢𑀸𑀢𑀺 𑀦𑀺𑀩𑁆𑀩𑀺𑀤𑀸𑀯𑀲𑁂𑀦 𑀉𑀓𑁆𑀓𑀡𑁆𑀞𑀦𑀯𑀲𑁂𑀦 𑀧𑀲𑁆𑀲𑀦𑀪𑀸𑀯𑁄. 𑀚𑀸𑀢𑀺𑀬𑀸𑀢𑀺 𑀔𑀦𑁆𑀥𑀦𑀺𑀩𑁆𑀩𑀢𑁆𑀢𑀺𑀢𑁄. 𑀚𑀭𑀸𑀬𑀸𑀢𑀺 𑀔𑀦𑁆𑀥𑀧𑀭𑀺𑀧𑀸𑀓𑀢𑁄. 𑀫𑀭𑀡𑁂𑀦𑀸𑀢𑀺 𑀔𑀦𑁆𑀥𑀪𑁂𑀤𑀢𑁄. 𑀲𑁄𑀓𑁂𑀳𑀻𑀢𑀺 𑀅𑀦𑁆𑀢𑁄𑀦𑀺𑀚𑁆𑀛𑀸𑀬𑀦𑀮𑀓𑁆𑀔𑀡𑁂𑀳𑀺 𑀲𑁄𑀓𑁂𑀳𑀺. 𑀧𑀭𑀺𑀤𑁂𑀯𑁂𑀳𑀻𑀢𑀺 𑀢𑀦𑁆𑀦𑀺𑀲𑁆𑀲𑀺𑀢𑀮𑀸𑀮𑀧𑁆𑀧𑀺𑀢𑀮𑀓𑁆𑀔𑀡𑁂𑀳𑀺 𑀧𑀭𑀺𑀤𑁂𑀯𑁂𑀳𑀺. 𑀤𑀼𑀓𑁆𑀔𑁂𑀳𑀻𑀢𑀺 𑀓𑀸𑀬𑀧𑀝𑀺𑀧𑀻𑀴𑀦𑀤𑀼𑀓𑁆𑀔𑁂𑀳𑀺. 𑀤𑁄𑀫𑀦𑀲𑁆𑀲𑁂𑀳𑀻𑀢𑀺 𑀫𑀦𑁄𑀯𑀺𑀖𑀸𑀢𑀤𑁄𑀫𑀦𑀲𑁆𑀲𑁂𑀳𑀺. 𑀉𑀧𑀸𑀬𑀸𑀲𑁂𑀳𑀻𑀢𑀺 𑀅𑀥𑀺𑀫𑀢𑁆𑀢𑀸𑀬𑀸𑀲𑀮𑀓𑁆𑀔𑀡𑀉𑀧𑀸𑀬𑀸𑀲𑁂𑀳𑀺. 𑀤𑀼𑀓𑁆𑀔𑀲𑁆𑀫𑀸𑀢𑀺 𑀲𑀓𑀮𑀯𑀝𑁆𑀝𑀤𑀼𑀓𑁆𑀔𑀢𑁄. 𑀧𑀚𑀳𑀢𑀻𑀢𑀺 𑀫𑀕𑁆𑀕𑁂𑀦 𑀧𑀚𑀳𑀢𑀺. 𑀧𑀳𑀸𑀬𑀸𑀢𑀺 𑀏𑀢𑁆𑀣 𑀧𑀦 𑀨𑀮𑀓𑁆𑀔𑀡𑁄 𑀓𑀣𑀺𑀢𑁄. 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀯𑀝𑁆𑀝𑀯𑀺𑀯𑀝𑁆𑀝𑀁 𑀓𑀣𑀺𑀢𑀁. 𑀙𑀝𑁆𑀞𑀁.

𑁭. 𑀓𑀡𑁆𑀳𑀲𑀼𑀢𑁆𑀢𑀯𑀡𑁆𑀡𑀦𑀸

𑁭. 𑀲𑀢𑁆𑀢𑀫𑁂 𑀓𑀡𑁆𑀳𑀸𑀢𑀺 𑀦 𑀓𑀸𑀴𑀯𑀡𑁆𑀡𑀢𑀸𑀬 𑀓𑀡𑁆𑀳𑀸, 𑀓𑀡𑁆𑀳𑀢𑀸𑀬 𑀧𑀦 𑀉𑀧𑀦𑁂𑀦𑁆𑀢𑀻𑀢𑀺 𑀦𑀺𑀧𑁆𑀨𑀢𑁆𑀢𑀺𑀓𑀸𑀴𑀢𑀸𑀬 𑀓𑀡𑁆𑀳𑀸. 𑀲𑀭𑀲𑁂𑀦𑀸𑀧𑀺 𑀯𑀸 𑀲𑀩𑁆𑀩𑀸𑀓𑀼𑀲𑀮𑀥𑀫𑁆𑀫𑀸 𑀓𑀡𑁆𑀳𑀸 𑀏𑀯. 𑀦 𑀳𑀺 𑀢𑁂𑀲𑀁 𑀉𑀧𑁆𑀧𑀢𑁆𑀢𑀺𑀬𑀸 𑀘𑀺𑀢𑁆𑀢𑀁 𑀧𑀪𑀲𑁆𑀲𑀭𑀁 𑀳𑁄𑀢𑀺. 𑀅𑀳𑀺𑀭𑀺𑀓𑀦𑁆𑀢𑀺 𑀅𑀳𑀺𑀭𑀺𑀓𑀪𑀸𑀯𑁄. 𑀅𑀦𑁄𑀢𑁆𑀢𑀧𑁆𑀧𑀦𑁆𑀢𑀺 𑀅𑀦𑁄𑀢𑁆𑀢𑀸𑀧𑀺𑀪𑀸𑀯𑁄. 𑀲𑀢𑁆𑀢𑀫𑀁.

𑁮. 𑀲𑀼𑀓𑁆𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁮. 𑀅𑀝𑁆𑀞𑀫𑁂 𑀲𑀼𑀓𑁆𑀓𑀸𑀢𑀺 𑀦 𑀯𑀡𑁆𑀡𑀲𑀼𑀓𑁆𑀓𑀢𑀸𑀬 𑀲𑀼𑀓𑁆𑀓𑀸, 𑀲𑀼𑀓𑁆𑀓𑀢𑀸𑀬 𑀧𑀦 𑀉𑀧𑀦𑁂𑀦𑁆𑀢𑀻𑀢𑀺 𑀦𑀺𑀧𑁆𑀨𑀢𑁆𑀢𑀺𑀲𑀼𑀓𑁆𑀓𑀢𑀸𑀬 𑀲𑀼𑀓𑁆𑀓𑀸. 𑀲𑀭𑀲𑁂𑀦𑀸𑀧𑀺 𑀯𑀸 𑀲𑀩𑁆𑀩𑀓𑀼𑀲𑀮𑀥𑀫𑁆𑀫𑀸 𑀲𑀼𑀓𑁆𑀓𑀸 𑀏𑀯. 𑀢𑁂𑀲𑀁 𑀳𑀺 𑀉𑀧𑁆𑀧𑀢𑁆𑀢𑀺𑀬𑀸 𑀘𑀺𑀢𑁆𑀢𑀁 𑀧𑀪𑀲𑁆𑀲𑀭𑀁 𑀳𑁄𑀢𑀺. 𑀳𑀺𑀭𑀻 𑀘 𑀑𑀢𑁆𑀢𑀧𑁆𑀧𑀜𑁆𑀘𑀸𑀢𑀺 𑀏𑀢𑁆𑀣 𑀧𑀸𑀧𑀢𑁄 𑀚𑀺𑀕𑀼𑀘𑁆𑀙𑀦𑀮𑀓𑁆𑀔𑀡𑀸 𑀳𑀺𑀭𑀻, 𑀪𑀸𑀬𑀦𑀮𑀓𑁆𑀔𑀡𑀁 𑀑𑀢𑁆𑀢𑀧𑁆𑀧𑀁. 𑀬𑀁 𑀧𑀦𑁂𑀢𑁆𑀣 𑀯𑀺𑀢𑁆𑀣𑀸𑀭𑀢𑁄 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸, 𑀢𑀁 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀯𑀼𑀢𑁆𑀢𑀫𑁂𑀯. 𑀅𑀝𑁆𑀞𑀫𑀁.

𑁯. 𑀘𑀭𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁯. 𑀦𑀯𑀫𑁂 𑀮𑁄𑀓𑀁 𑀧𑀸𑀮𑁂𑀦𑁆𑀢𑀻𑀢𑀺 𑀮𑁄𑀓𑀁 𑀲𑀦𑁆𑀥𑀸𑀭𑁂𑀦𑁆𑀢𑀺 𑀞𑀧𑁂𑀦𑁆𑀢𑀺 𑀭𑀓𑁆𑀔𑀦𑁆𑀢𑀺. 𑀦𑀬𑀺𑀥 𑀧𑀜𑁆𑀜𑀸𑀬𑁂𑀣 𑀫𑀸𑀢𑀸𑀢𑀺 𑀇𑀫𑀲𑁆𑀫𑀺𑀁 𑀮𑁄𑀓𑁂 𑀚𑀦𑀺𑀓𑀸 𑀫𑀸𑀢𑀸 ‘‘𑀅𑀬𑀁 𑀫𑁂 𑀫𑀸𑀢𑀸’’𑀢𑀺 𑀕𑀭𑀼𑀘𑀺𑀢𑁆𑀢𑀻𑀓𑀸𑀭𑀯𑀲𑁂𑀦 𑀦 𑀧𑀜𑁆𑀜𑀸𑀬𑁂𑀣. 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀲𑀫𑁆𑀪𑁂𑀤𑀦𑁆𑀢𑀺 𑀲𑀗𑁆𑀓𑀭𑀁 𑀫𑀭𑀺𑀬𑀸𑀤𑀪𑁂𑀤𑀁 𑀯𑀸. 𑀬𑀣𑀸 𑀅𑀚𑁂𑀴𑀓𑀸𑀢𑀺𑀆𑀤𑀻𑀲𑀼 𑀏𑀢𑁂 𑀳𑀺 𑀲𑀢𑁆𑀢𑀸 ‘‘𑀅𑀬𑀁 𑀫𑁂 𑀫𑀸𑀢𑀸’’𑀢𑀺 𑀯𑀸 ‘‘𑀫𑀸𑀢𑀼𑀘𑁆𑀙𑀸’’𑀢𑀺 𑀯𑀸 𑀕𑀭𑀼𑀘𑀺𑀢𑁆𑀢𑀻𑀓𑀸𑀭𑀯𑀲𑁂𑀦 𑀦 𑀚𑀸𑀦𑀦𑁆𑀢𑀺. 𑀬𑀁 𑀯𑀢𑁆𑀣𑀼𑀁 𑀦𑀺𑀲𑁆𑀲𑀸𑀬 𑀉𑀧𑁆𑀧𑀦𑁆𑀦𑀸, 𑀢𑀢𑁆𑀣𑁂𑀯 𑀯𑀺𑀧𑁆𑀧𑀝𑀺𑀧𑀚𑁆𑀚𑀦𑁆𑀢𑀺. 𑀢𑀲𑁆𑀫𑀸 𑀉𑀧𑀫𑀁 𑀆𑀳𑀭𑀦𑁆𑀢𑁄 ‘‘𑀬𑀣𑀸 𑀅𑀚𑁂𑀴𑀓𑀸’’𑀢𑀺𑀆𑀤𑀺𑀫𑀸𑀳. 𑀦𑀯𑀫𑀁.

𑁧𑁦. 𑀯𑀲𑁆𑀲𑀽𑀧𑀦𑀸𑀬𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦. 𑀤𑀲𑀫𑀁 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀬𑀁 𑀯𑀼𑀢𑁆𑀢𑀁. 𑀓𑀢𑀭𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀬𑀁? 𑀫𑀦𑀼𑀲𑁆𑀲𑀸𑀦𑀁 𑀉𑀚𑁆𑀛𑀸𑀬𑀦𑁂. 𑀪𑀕𑀯𑀢𑀸 𑀳𑀺 𑀧𑀞𑀫𑀩𑁄𑀥𑀺𑀬𑀁 𑀯𑀻𑀲𑀢𑀺 𑀯𑀲𑁆𑀲𑀸𑀦𑀺 𑀯𑀲𑁆𑀲𑀽𑀧𑀦𑀸𑀬𑀺𑀓𑀸 𑀅𑀧𑁆𑀧𑀜𑁆𑀜𑀢𑁆𑀢𑀸 𑀅𑀳𑁄𑀲𑀺. 𑀪𑀺𑀓𑁆𑀔𑀽 𑀅𑀦𑀺𑀩𑀤𑁆𑀥𑀯𑀸𑀲𑀸 𑀯𑀲𑁆𑀲𑁂𑀧𑀺 𑀉𑀢𑀼𑀯𑀲𑁆𑀲𑁂𑀧𑀺 𑀬𑀣𑀸𑀲𑀼𑀔𑀁 𑀯𑀺𑀘𑀭𑀺𑀁𑀲𑀼. 𑀢𑁂 𑀤𑀺𑀲𑁆𑀯𑀸 𑀫𑀦𑀼𑀲𑁆𑀲𑀸 ‘‘𑀓𑀣𑀜𑁆𑀳𑀺 𑀦𑀸𑀫 𑀲𑀫𑀡𑀸 𑀲𑀓𑁆𑀬𑀧𑀼𑀢𑁆𑀢𑀺𑀬𑀸 𑀳𑁂𑀫𑀦𑁆𑀢𑀫𑁆𑀧𑀺 𑀕𑀺𑀫𑁆𑀳𑀫𑁆𑀧𑀺 𑀯𑀲𑁆𑀲𑀫𑁆𑀧𑀺 𑀘𑀸𑀭𑀺𑀓𑀁 𑀘𑀭𑀺𑀲𑁆𑀲𑀦𑁆𑀢𑀺 𑀳𑀭𑀺𑀢𑀸𑀦𑀺 𑀢𑀺𑀡𑀸𑀦𑀺 𑀲𑀫𑁆𑀫𑀤𑁆𑀤𑀦𑁆𑀢𑀸 𑀏𑀓𑀺𑀦𑁆𑀤𑁆𑀭𑀺𑀬𑀁 𑀚𑀻𑀯𑀁 𑀯𑀺𑀳𑁂𑀞𑁂𑀦𑁆𑀢𑀸 𑀩𑀳𑀽 𑀔𑀼𑀤𑁆𑀤𑀓𑁂 𑀧𑀸𑀡𑁂 𑀲𑀗𑁆𑀖𑀸𑀢𑀁 𑀆𑀧𑀸𑀤𑁂𑀦𑁆𑀢𑀸. 𑀇𑀫𑁂 𑀳𑀺 𑀦𑀸𑀫 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀤𑀼𑀭𑀓𑁆𑀔𑀸𑀢𑀥𑀫𑁆𑀫𑀸 𑀯𑀲𑁆𑀲𑀸𑀯𑀸𑀲𑀁 𑀅𑀮𑁆𑀮𑀻𑀬𑀺𑀲𑁆𑀲𑀦𑁆𑀢𑀺 𑀲𑀁𑀓𑀲𑀸𑀬𑀺𑀲𑁆𑀲𑀦𑁆𑀢𑀺, 𑀇𑀫𑁂 𑀦𑀸𑀫 𑀲𑀓𑀼𑀡𑀸 𑀭𑀼𑀓𑁆𑀔𑀕𑁆𑀕𑁂𑀲𑀼 𑀓𑀼𑀮𑀸𑀯𑀓𑀸𑀦𑀺 𑀓𑀢𑁆𑀯𑀸 𑀯𑀲𑁆𑀲𑀸𑀯𑀸𑀲𑀁 𑀅𑀮𑁆𑀮𑀻𑀬𑀺𑀲𑁆𑀲𑀦𑁆𑀢𑀺 𑀲𑀁𑀓𑀲𑀸𑀬𑀺𑀲𑁆𑀲𑀦𑁆𑀢𑀻’’𑀢𑀺𑀆𑀤𑀻𑀦𑀺 𑀯𑀢𑁆𑀯𑀸 𑀉𑀚𑁆𑀛𑀸𑀬𑀺𑀁𑀲𑀼. 𑀢𑀫𑀢𑁆𑀣𑀁 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀆𑀭𑁄𑀘𑁂𑀲𑀼𑀁. 𑀪𑀕𑀯𑀸 𑀢𑀁 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀁 𑀓𑀢𑁆𑀯𑀸 𑀇𑀫𑀁 𑀲𑀼𑀢𑁆𑀢𑀁 𑀤𑁂𑀲𑁂𑀦𑁆𑀢𑁄 𑀧𑀞𑀫𑀁 𑀢𑀸𑀯 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀯𑀲𑁆𑀲𑀁 𑀉𑀧𑀕𑀦𑁆𑀢𑀼’’𑀦𑁆𑀢𑀺 (𑀫𑀳𑀸𑀯. 𑁧𑁮𑁪) 𑀏𑀢𑁆𑀢𑀓𑀫𑁂𑀯𑀸𑀳. 𑀅𑀣 𑀪𑀺𑀓𑁆𑀔𑀽𑀦𑀁 ‘‘𑀓𑀤𑀸 𑀦𑀼 𑀔𑁄 𑀯𑀲𑁆𑀲𑀁 𑀉𑀧𑀕𑀦𑁆𑀢𑀩𑁆𑀩’’𑀦𑁆𑀢𑀺 𑀉𑀧𑁆𑀧𑀦𑁆𑀦𑀁 𑀯𑀺𑀢𑀓𑁆𑀓𑀁 𑀲𑀼𑀢𑁆𑀯𑀸 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀯𑀲𑁆𑀲𑀸𑀦𑁂 𑀯𑀲𑁆𑀲𑀁 𑀉𑀧𑀕𑀦𑁆𑀢𑀼’’𑀦𑁆𑀢𑀺 𑀆𑀳. 𑀅𑀣 𑀔𑁄 𑀪𑀺𑀓𑁆𑀔𑀽𑀦𑀁 𑀏𑀢𑀤𑀳𑁄𑀲𑀺 𑁋 ‘‘𑀓𑀢𑀺 𑀦𑀼 𑀔𑁄 𑀯𑀲𑁆𑀲𑀽𑀧𑀦𑀸𑀬𑀺𑀓𑀸’’𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀢𑀁 𑀲𑀼𑀢𑁆𑀯𑀸 𑀲𑀓𑀮𑀫𑁆𑀧𑀺 𑀇𑀤𑀁 𑀲𑀼𑀢𑁆𑀢𑀁 𑀤𑁂𑀲𑁂𑀦𑁆𑀢𑁄 𑀤𑁆𑀯𑁂𑀫𑀸, 𑀪𑀺𑀓𑁆𑀔𑀯𑁂𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀯𑀲𑁆𑀲𑀽𑀧𑀦𑀸𑀬𑀺𑀓𑀸𑀢𑀺 𑀯𑀲𑁆𑀲𑀽𑀧𑀕𑀫𑀦𑀸𑀦𑀺. 𑀧𑀼𑀭𑀺𑀫𑀺𑀓𑀸𑀢𑀺 𑀅𑀧𑀭𑀚𑁆𑀚𑀼𑀕𑀢𑀸𑀬 𑀆𑀲𑀸𑀴𑁆𑀳𑀺𑀬𑀸 𑀉𑀧𑀕𑀦𑁆𑀢𑀩𑁆𑀩𑀸 𑀧𑀼𑀭𑀺𑀫𑀓𑀢𑁆𑀢𑀺𑀓𑀧𑀼𑀡𑁆𑀡𑀫𑀺𑀧𑀭𑀺𑀬𑁄𑀲𑀸𑀦𑀸 𑀧𑀞𑀫𑀸 𑀢𑁂𑀫𑀸𑀲𑀻. 𑀧𑀘𑁆𑀙𑀺𑀫𑀺𑀓𑀸𑀢𑀺 𑀫𑀸𑀲𑀕𑀢𑀸𑀬 𑀆𑀲𑀸𑀴𑁆𑀳𑀺𑀬𑀸 𑀉𑀧𑀕𑀦𑁆𑀢𑀩𑁆𑀩𑀸 𑀧𑀘𑁆𑀙𑀺𑀫𑀓𑀢𑁆𑀢𑀺𑀓𑀧𑀭𑀺𑀬𑁄𑀲𑀸𑀦𑀸 𑀧𑀘𑁆𑀙𑀺𑀫𑀸 𑀢𑁂𑀫𑀸𑀲𑀻𑀢𑀺. 𑀤𑀲𑀫𑀁.

𑀓𑀫𑁆𑀫𑀓𑀸𑀭𑀡𑀯𑀕𑁆𑀕𑁄 𑀧𑀞𑀫𑁄.

𑁨. 𑀅𑀥𑀺𑀓𑀭𑀡𑀯𑀕𑁆𑀕𑀯𑀡𑁆𑀡𑀦𑀸

𑁧𑁧. 𑀤𑀼𑀢𑀺𑀬𑀲𑁆𑀲 𑀧𑀞𑀫𑁂 𑀩𑀮𑀸𑀦𑀻𑀢𑀺 𑀓𑁂𑀦𑀝𑁆𑀞𑁂𑀦 𑀩𑀮𑀸𑀦𑀺. 𑀅𑀓𑀫𑁆𑀧𑀺𑀬𑀝𑁆𑀞𑁂𑀦 𑀩𑀮𑀸𑀦𑀺 𑀦𑀸𑀫, 𑀢𑀣𑀸 𑀤𑀼𑀭𑀪𑀺𑀪𑀯𑀦𑀝𑁆𑀞𑁂𑀦 𑀅𑀦𑀚𑁆𑀛𑁄𑀫𑀤𑁆𑀤𑀦𑀝𑁆𑀞𑁂𑀦 𑀘. 𑀧𑀝𑀺𑀲𑀗𑁆𑀔𑀸𑀦𑀩𑀮𑀦𑁆𑀢𑀺 𑀧𑀘𑁆𑀘𑀯𑁂𑀓𑁆𑀔𑀡𑀩𑀮𑀁. 𑀪𑀸𑀯𑀦𑀸𑀩𑀮𑀦𑁆𑀢𑀺 𑀩𑁆𑀭𑀽𑀳𑀦𑀩𑀮𑀁 𑀯𑀟𑁆𑀠𑀦𑀩𑀮𑀁. 𑀲𑀼𑀤𑁆𑀥𑀁 𑀅𑀢𑁆𑀢𑀸𑀦𑀦𑁆𑀢𑀺 𑀇𑀤𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀢𑀢𑁆𑀭𑀸𑀢𑀺 𑀢𑁂𑀲𑀼 𑀤𑁆𑀯𑀻𑀲𑀼 𑀩𑀮𑁂𑀲𑀼. 𑀬𑀫𑀺𑀤𑀦𑁆𑀢𑀺 𑀬𑀁 𑀇𑀤𑀁. 𑀲𑁂𑀔𑀸𑀦𑀫𑁂𑀢𑀁 𑀩𑀮𑀦𑁆𑀢𑀺 𑀲𑀢𑁆𑀢𑀦𑁆𑀦𑀁 𑀲𑁂𑀔𑀸𑀦𑀁 𑀜𑀸𑀡𑀩𑀮𑀫𑁂𑀢𑀁. 𑀲𑁂𑀔𑀜𑁆𑀳𑀺 𑀲𑁄, 𑀪𑀺𑀓𑁆𑀔𑀯𑁂, 𑀩𑀮𑀁 𑀆𑀕𑀫𑁆𑀫𑀸𑀢𑀺 𑀲𑀢𑁆𑀢𑀦𑁆𑀦𑀁 𑀲𑁂𑀔𑀸𑀦𑀁 𑀜𑀸𑀡𑀩𑀮𑀁 𑀆𑀭𑀩𑁆𑀪 𑀲𑀦𑁆𑀥𑀸𑀬 𑀧𑀝𑀺𑀘𑁆𑀘. 𑀧𑀚𑀳𑀢𑀻𑀢𑀺 𑀫𑀕𑁆𑀕𑁂𑀦 𑀧𑀚𑀳𑀢𑀺. 𑀧𑀳𑀸𑀬𑀸𑀢𑀺 𑀇𑀫𑀺𑀦𑀸 𑀧𑀦 𑀨𑀮𑀁 𑀓𑀣𑀺𑀢𑀁. 𑀬𑀁 𑀧𑀸𑀧𑀦𑁆𑀢𑀺 𑀬𑀁 𑀧𑀸𑀧𑀓𑀁 𑀮𑀸𑀫𑀓𑀁. 𑀬𑀲𑁆𑀫𑀸 𑀧𑀦𑁂𑀢𑀸𑀦𑀺 𑀤𑁆𑀯𑁂𑀧𑀺 𑀯𑀟𑁆𑀠𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀸𑀢𑀺, 𑀢𑀲𑁆𑀫𑀸 𑀏𑀢𑁆𑀣 𑀏𑀢𑀤𑀕𑁆𑀕𑀁 𑀦𑀸𑀕𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑁧𑁨. 𑀤𑀼𑀢𑀺𑀬𑁂 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀁 𑀪𑀸𑀯𑁂𑀢𑀻𑀢𑀺𑀆𑀤𑀻𑀲𑀼 𑀅𑀬𑀁 𑀳𑁂𑀝𑁆𑀞𑀸 𑀅𑀦𑀸𑀕𑀢𑀸𑀦𑀁 𑀧𑀤𑀸𑀦𑀁 𑀯𑀲𑁂𑀦 𑀅𑀢𑁆𑀣𑀯𑀡𑁆𑀡𑀦𑀸 𑁋 𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀦𑁆𑀢𑀺 𑀯𑀺𑀯𑁂𑀓𑀁 𑀦𑀺𑀲𑁆𑀲𑀺𑀢𑀁. 𑀯𑀺𑀯𑁂𑀓𑁄𑀢𑀺 𑀯𑀺𑀯𑀺𑀢𑁆𑀢𑀢𑀸. 𑀲𑁆𑀯𑀸𑀬𑀁 𑀢𑀤𑀗𑁆𑀕𑀯𑀺𑀯𑁂𑀓𑁄 𑀯𑀺𑀓𑁆𑀔𑀫𑁆𑀪𑀦-𑀲𑀫𑀼𑀘𑁆𑀙𑁂𑀤-𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺-𑀦𑀺𑀲𑁆𑀲𑀭𑀡𑀯𑀺𑀯𑁂𑀓𑁄𑀢𑀺 𑀧𑀜𑁆𑀘𑀯𑀺𑀥𑁄. 𑀢𑀲𑁆𑀫𑀺𑀁 𑀧𑀜𑁆𑀘𑀯𑀺𑀥𑁂 𑀯𑀺𑀯𑁂𑀓𑁂. 𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀦𑁆𑀢𑀺 𑀢𑀤𑀗𑁆𑀕𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀁, 𑀲𑀫𑀼𑀘𑁆𑀙𑁂𑀤𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀁, 𑀦𑀺𑀲𑁆𑀲𑀭𑀡𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀜𑁆𑀘 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀁 𑀪𑀸𑀯𑁂𑀢𑀻𑀢𑀺 𑀅𑀬𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀣𑀸 𑀳𑀺 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀪𑀸𑀯𑀦𑀸𑀦𑀼𑀬𑀼𑀢𑁆𑀢𑁄 𑀬𑁄𑀕𑀻 𑀯𑀺𑀧𑀲𑁆𑀲𑀦𑀸𑀓𑁆𑀔𑀡𑁂 𑀓𑀺𑀘𑁆𑀘𑀢𑁄 𑀢𑀤𑀗𑁆𑀕𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀁, 𑀅𑀚𑁆𑀛𑀸𑀲𑀬𑀢𑁄 𑀦𑀺𑀲𑁆𑀲𑀭𑀡𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀁, 𑀫𑀕𑁆𑀕𑀓𑀸𑀮𑁂 𑀧𑀦 𑀓𑀺𑀘𑁆𑀘𑀢𑁄 𑀲𑀫𑀼𑀘𑁆𑀙𑁂𑀤𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀁, 𑀆𑀭𑀫𑁆𑀫𑀡𑀢𑁄 𑀦𑀺𑀲𑁆𑀲𑀭𑀡𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀁 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀁 𑀪𑀸𑀯𑁂𑀢𑀺. 𑀧𑀜𑁆𑀘𑀯𑀺𑀥𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀫𑁆𑀧𑀻𑀢𑀺 𑀏𑀓𑁂. 𑀢𑁂 𑀳𑀺 𑀦 𑀓𑁂𑀯𑀮𑀁 𑀩𑀮𑀯𑀯𑀺𑀧𑀲𑁆𑀲𑀦𑀸𑀫𑀕𑁆𑀕𑀨𑀮𑀓𑁆𑀔𑀡𑁂𑀲𑀼𑀬𑁂𑀯 𑀩𑁄𑀚𑁆𑀛𑀗𑁆𑀕𑁂 𑀉𑀤𑁆𑀥𑀭𑀦𑁆𑀢𑀺, 𑀯𑀺𑀧𑀲𑁆𑀲𑀦𑀸𑀧𑀸𑀤𑀓𑀓𑀲𑀺𑀡𑀚𑁆𑀛𑀸𑀦𑀆𑀦𑀸𑀧𑀸𑀦𑀸𑀲𑀼𑀪𑀩𑁆𑀭𑀳𑁆𑀫𑀯𑀺𑀳𑀸𑀭𑀚𑁆𑀛𑀸𑀦𑁂𑀲𑀼𑀧𑀺 𑀉𑀤𑁆𑀥𑀭𑀦𑁆𑀢𑀺, 𑀦 𑀘 𑀧𑀝𑀺𑀲𑀺𑀤𑁆𑀥𑀸 𑀅𑀝𑁆𑀞𑀓𑀣𑀸𑀘𑀭𑀺𑀬𑁂𑀳𑀺. 𑀢𑀲𑁆𑀫𑀸 𑀢𑁂𑀲𑀁 𑀫𑀢𑁂𑀦 𑀏𑀢𑁂𑀲𑀁 𑀛𑀸𑀦𑀸𑀦𑀁 𑀧𑀯𑀢𑁆𑀢𑀺𑀓𑁆𑀔𑀡𑁂 𑀓𑀺𑀘𑁆𑀘𑀢𑁄 𑀏𑀯 𑀯𑀺𑀓𑁆𑀔𑀫𑁆𑀪𑀦𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀁. 𑀬𑀣𑀸 𑀘 ‘‘𑀯𑀺𑀧𑀲𑁆𑀲𑀦𑀸𑀓𑁆𑀔𑀡𑁂 𑀅𑀚𑁆𑀛𑀸𑀲𑀬𑀢𑁄 𑀦𑀺𑀲𑁆𑀲𑀭𑀡𑀯𑀺𑀯𑁂𑀓𑀦𑀺𑀲𑁆𑀲𑀺𑀢’’𑀦𑁆𑀢𑀺 𑀯𑀼𑀢𑁆𑀢𑀁, 𑀏𑀯𑀁 ‘‘𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀫𑁆𑀧𑀺 𑀪𑀸𑀯𑁂𑀢𑀻’’𑀢𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺. 𑀏𑀲 𑀦𑀬𑁄 𑀯𑀺𑀭𑀸𑀕𑀦𑀺𑀲𑁆𑀲𑀺𑀢𑀦𑁆𑀢𑀺𑀆𑀤𑀻𑀲𑀼. 𑀯𑀺𑀯𑁂𑀓𑀢𑁆𑀣𑀸 𑀏𑀯 𑀳𑀺 𑀯𑀺𑀭𑀸𑀕𑀸𑀤𑀬𑁄.

𑀓𑁂𑀯𑀮𑀁 𑀳𑁂𑀢𑁆𑀣 𑀯𑁄𑀲𑁆𑀲𑀕𑁆𑀕𑁄 𑀤𑀼𑀯𑀺𑀥𑁄 𑀧𑀭𑀺𑀘𑁆𑀘𑀸𑀕𑀯𑁄𑀲𑁆𑀲𑀕𑁆𑀕𑁄 𑀘 𑀧𑀓𑁆𑀔𑀦𑁆𑀤𑀦𑀯𑁄𑀲𑁆𑀲𑀕𑁆𑀕𑁄 𑀘𑀸𑀢𑀺. 𑀢𑀢𑁆𑀣 𑀧𑀭𑀺𑀘𑁆𑀘𑀸𑀕𑀯𑁄𑀲𑁆𑀲𑀕𑁆𑀕𑁄𑀢𑀺 𑀯𑀺𑀧𑀲𑁆𑀲𑀦𑀸𑀓𑁆𑀔𑀡𑁂 𑀘 𑀢𑀤𑀗𑁆𑀕𑀯𑀲𑁂𑀦, 𑀫𑀕𑁆𑀕𑀓𑁆𑀔𑀡𑁂 𑀘 𑀲𑀫𑀼𑀘𑁆𑀙𑁂𑀤𑀯𑀲𑁂𑀦 𑀓𑀺𑀮𑁂𑀲𑀧𑁆𑀧𑀳𑀸𑀦𑀁. 𑀧𑀓𑁆𑀔𑀦𑁆𑀤𑀦𑀯𑁄𑀲𑁆𑀲𑀕𑁆𑀕𑁄𑀢𑀺 𑀯𑀺𑀧𑀲𑁆𑀲𑀦𑀸𑀓𑁆𑀔𑀡𑁂 𑀢𑀦𑁆𑀦𑀺𑀦𑁆𑀦𑀪𑀸𑀯𑁂𑀦, 𑀫𑀕𑁆𑀕𑀓𑁆𑀔𑀡𑁂 𑀧𑀦 𑀆𑀭𑀫𑁆𑀫𑀡𑀓𑀭𑀡𑁂𑀦 𑀦𑀺𑀩𑁆𑀩𑀸𑀦𑀧𑀓𑁆𑀔𑀦𑁆𑀤𑀦𑀁. 𑀢𑀤𑀼𑀪𑀬𑀫𑁆𑀧𑀺 𑀇𑀫𑀲𑁆𑀫𑀺𑀁 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀫𑀺𑀲𑁆𑀲𑀓𑁂 𑀅𑀢𑁆𑀣𑀯𑀡𑁆𑀡𑀦𑀸𑀦𑀬𑁂 𑀯𑀝𑁆𑀝𑀢𑀺. 𑀢𑀣𑀸 𑀳𑀺 𑀅𑀬𑀁 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀬𑀣𑀸𑀯𑀼𑀢𑁆𑀢𑁂𑀦 𑀧𑀓𑀸𑀭𑁂𑀦 𑀓𑀺𑀮𑁂𑀲𑁂 𑀧𑀭𑀺𑀘𑁆𑀘𑀚𑀢𑀺, 𑀦𑀺𑀩𑁆𑀩𑀸𑀦𑀜𑁆𑀘 𑀧𑀓𑁆𑀔𑀦𑁆𑀤𑀢𑀺. 𑀯𑁄𑀲𑁆𑀲𑀕𑁆𑀕𑀧𑀭𑀺𑀡𑀸𑀫𑀺𑀦𑁆𑀢𑀺 𑀇𑀫𑀺𑀦𑀸 𑀧𑀦 𑀲𑀓𑀮𑁂𑀦 𑀯𑀘𑀦𑁂𑀦 𑀯𑁄𑀲𑁆𑀲𑀕𑁆𑀕𑀢𑁆𑀣𑀁 𑀧𑀭𑀺𑀡𑀫𑀦𑁆𑀢𑀁 𑀧𑀭𑀺𑀡𑀢𑀜𑁆𑀘, 𑀧𑀭𑀺𑀧𑀘𑁆𑀘𑀦𑁆𑀢𑀁 𑀧𑀭𑀺𑀧𑀓𑁆𑀓𑀜𑁆𑀘𑀸𑀢𑀺 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀬𑀜𑁆𑀳𑀺 𑀩𑁄𑀚𑁆𑀛𑀗𑁆𑀕𑀪𑀸𑀯𑀦𑀸𑀦𑀼𑀬𑀼𑀢𑁆𑀢𑁄 𑀪𑀺𑀓𑁆𑀔𑀼 𑀬𑀣𑀸 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀓𑀺𑀮𑁂𑀲𑀧𑀭𑀺𑀘𑁆𑀘𑀸𑀕𑀯𑁄𑀲𑁆𑀲𑀕𑁆𑀕𑀢𑁆𑀣𑀁 𑀦𑀺𑀩𑁆𑀩𑀸𑀦𑀧𑀓𑁆𑀔𑀦𑁆𑀤𑀦𑀯𑁄𑀲𑁆𑀲𑀕𑁆𑀕𑀢𑁆𑀣𑀜𑁆𑀘 𑀧𑀭𑀺𑀧𑀘𑁆𑀘𑀢𑀺, 𑀬𑀣𑀸 𑀘 𑀧𑀭𑀺𑀧𑀓𑁆𑀓𑁄 𑀳𑁄𑀢𑀺, 𑀢𑀣𑀸 𑀦𑀁 𑀪𑀸𑀯𑁂𑀢𑀻𑀢𑀺. 𑀏𑀲 𑀦𑀬𑁄 𑀲𑁂𑀲𑀩𑁄𑀚𑁆𑀛𑀗𑁆𑀕𑁂𑀲𑀼.

𑀇𑀥 𑀧𑀦 𑀦𑀺𑀩𑁆𑀩𑀸𑀦𑀁𑀬𑁂𑀯 𑀲𑀩𑁆𑀩𑀲𑀗𑁆𑀔𑀢𑁂𑀳𑀺 𑀯𑀺𑀯𑀺𑀢𑁆𑀢𑀢𑁆𑀢𑀸 𑀯𑀺𑀯𑁂𑀓𑁄, 𑀲𑀩𑁆𑀩𑁂𑀲𑀁 𑀯𑀺𑀭𑀸𑀕𑀪𑀸𑀯𑀢𑁄 𑀯𑀺𑀭𑀸𑀕𑁄, 𑀦𑀺𑀭𑁄𑀥𑀪𑀸𑀯𑀢𑁄 𑀦𑀺𑀭𑁄𑀥𑁄𑀢𑀺 𑀯𑀼𑀢𑁆𑀢𑀁. 𑀫𑀕𑁆𑀕𑁄 𑀏𑀯 𑀘 𑀯𑁄𑀲𑁆𑀲𑀕𑁆𑀕𑀧𑀭𑀺𑀡𑀸𑀫𑀻, 𑀢𑀲𑁆𑀫𑀸 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀁 𑀪𑀸𑀯𑁂𑀢𑀺 𑀯𑀺𑀯𑁂𑀓𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀧𑀯𑀢𑁆𑀢𑀺𑀬𑀸 𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀁, 𑀢𑀣𑀸 𑀯𑀺𑀭𑀸𑀕𑀦𑀺𑀲𑁆𑀲𑀺𑀢𑀁 𑀦𑀺𑀭𑁄𑀥𑀦𑀺𑀲𑁆𑀲𑀺𑀢𑀁. 𑀢𑀜𑁆𑀘 𑀔𑁄 𑀅𑀭𑀺𑀬𑀫𑀕𑁆𑀕𑀓𑁆𑀔𑀡𑀼𑀧𑁆𑀧𑀢𑁆𑀢𑀺𑀬𑀸 𑀓𑀺𑀮𑁂𑀲𑀸𑀦𑀁 𑀲𑀫𑀼𑀘𑁆𑀙𑁂𑀤𑀢𑁄 𑀧𑀭𑀺𑀘𑁆𑀘𑀸𑀕𑀪𑀸𑀯𑁂𑀦 𑀘 𑀦𑀺𑀩𑁆𑀩𑀸𑀦𑀧𑀓𑁆𑀔𑀦𑁆𑀤𑀦𑀪𑀸𑀯𑁂𑀦 𑀘 𑀧𑀭𑀺𑀡𑀢𑀁 𑀧𑀭𑀺𑀧𑀓𑁆𑀓𑀦𑁆𑀢𑀺 𑀅𑀬𑀫𑁂𑀯 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀏𑀲 𑀦𑀬𑁄 𑀲𑁂𑀲𑀩𑁄𑀚𑁆𑀛𑀗𑁆𑀕𑁂𑀲𑀼. 𑀇𑀢𑀺 𑀇𑀫𑁂 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑀸 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀫𑀺𑀲𑁆𑀲𑀓𑀸 𑀓𑀣𑀺𑀢𑀸. 𑀇𑀫𑁂𑀲𑀼𑀧𑀺 𑀤𑁆𑀯𑀻𑀲𑀼 𑀩𑀮𑁂𑀲𑀼 𑀏𑀢𑀤𑀕𑁆𑀕𑀪𑀸𑀯𑁄 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄.

𑁧𑁩. 𑀢𑀢𑀺𑀬𑁂 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀻𑀢𑀺𑀆𑀤𑀻𑀦𑀁 𑀘𑀢𑀼𑀦𑁆𑀦𑀁 𑀛𑀸𑀦𑀸𑀦𑀁 𑀧𑀸𑀴𑀺𑀅𑀢𑁆𑀣𑁄 𑀘 𑀪𑀸𑀯𑀦𑀸𑀦𑀬𑁄 𑀘 𑀲𑀩𑁆𑀩𑁄 𑀲𑀩𑁆𑀩𑀸𑀓𑀸𑀭𑁂𑀦 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁧.𑁬𑁯-𑁭𑁦) 𑀯𑀺𑀢𑁆𑀣𑀸𑀭𑀺𑀢𑁄𑀬𑁂𑀯. 𑀇𑀫𑀸𑀦𑀺 𑀧𑀦 𑀘𑀢𑁆𑀢𑀸𑀭𑀺 𑀛𑀸𑀦𑀸𑀦𑀺 𑀏𑀓𑁄 𑀪𑀺𑀓𑁆𑀔𑀼 𑀘𑀺𑀢𑁆𑀢𑁂𑀓𑀕𑁆𑀕𑀢𑁆𑀣𑀸𑀬 𑀪𑀸𑀯𑁂𑀢𑀺, 𑀏𑀓𑁄 𑀯𑀺𑀧𑀲𑁆𑀲𑀦𑀸𑀧𑀸𑀤𑀓𑀢𑁆𑀣𑀸𑀬, 𑀏𑀓𑁄 𑀅𑀪𑀺𑀜𑁆𑀜𑀸𑀧𑀸𑀤𑀓𑀢𑁆𑀣𑀸𑀬, 𑀏𑀓𑁄 𑀦𑀺𑀭𑁄𑀥𑀧𑀸𑀤𑀓𑀢𑁆𑀣𑀸𑀬, 𑀏𑀓𑁄 𑀪𑀯𑀯𑀺𑀲𑁂𑀲𑀢𑁆𑀣𑀸𑀬. 𑀇𑀥 𑀧𑀦 𑀢𑀸𑀦𑀺𑀧𑀺 𑀯𑀺𑀧𑀲𑁆𑀲𑀦𑀸𑀧𑀸𑀤𑀓𑀸𑀦𑀺 𑀅𑀥𑀺𑀧𑁆𑀧𑁂𑀢𑀸𑀦𑀺. 𑀅𑀬𑀁 𑀳𑀺 𑀪𑀺𑀓𑁆𑀔𑀼 𑀇𑀫𑀸𑀦𑀺 𑀛𑀸𑀦𑀸𑀦𑀺 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀬 𑀲𑀗𑁆𑀔𑀸𑀭𑁂 𑀲𑀫𑁆𑀫𑀲𑀺𑀢𑁆𑀯𑀸 𑀳𑁂𑀢𑀼𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑀁 𑀓𑀢𑁆𑀯𑀸 𑀲𑀧𑁆𑀧𑀘𑁆𑀘𑀬𑀁 𑀦𑀸𑀫𑀭𑀽𑀧𑀜𑁆𑀘 𑀯𑀯𑀢𑁆𑀣𑀧𑁂𑀢𑁆𑀯𑀸 𑀇𑀦𑁆𑀤𑁆𑀭𑀺𑀬𑀩𑀮𑀩𑁄𑀚𑁆𑀛𑀗𑁆𑀕𑀸𑀦𑀺 𑀲𑀫𑁄𑀥𑀸𑀦𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀸𑀢𑀺. 𑀏𑀯𑀫𑁂𑀢𑀸𑀦𑀺 𑀛𑀸𑀦𑀸𑀦𑀺 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀫𑀺𑀲𑁆𑀲𑀓𑀸𑀦𑁂𑀯 𑀓𑀣𑀺𑀢𑀸𑀦𑀺. 𑀇𑀫𑀲𑁆𑀫𑀺𑀫𑁆𑀧𑀺 𑀩𑀮𑀤𑁆𑀯𑀬𑁂 𑀏𑀢𑀤𑀕𑁆𑀕𑀪𑀸𑀯𑁄 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄.

𑁧𑁪. 𑀘𑀢𑀼𑀢𑁆𑀣𑁂 𑀲𑀁𑀔𑀺𑀢𑁆𑀢𑁂𑀦 𑀘 𑀯𑀺𑀢𑁆𑀣𑀸𑀭𑁂𑀦 𑀘𑀸𑀢𑀺 𑀲𑀁𑀔𑀺𑀢𑁆𑀢𑀥𑀫𑁆𑀫𑀤𑁂𑀲𑀦𑀸 𑀯𑀺𑀢𑁆𑀣𑀸𑀭𑀥𑀫𑁆𑀫𑀤𑁂𑀲𑀦𑀸 𑀘𑀸𑀢𑀺 𑀤𑁆𑀯𑁂𑀬𑁂𑀯 𑀥𑀫𑁆𑀫𑀤𑁂𑀲𑀦𑀸𑀢𑀺 𑀤𑀲𑁆𑀲𑁂𑀢𑀺. 𑀢𑀢𑁆𑀣 𑀫𑀸𑀢𑀺𑀓𑀁 𑀉𑀤𑁆𑀤𑀺𑀲𑀺𑀢𑁆𑀯𑀸 𑀓𑀣𑀺𑀢𑀸 𑀤𑁂𑀲𑀦𑀸 𑀲𑀁𑀔𑀺𑀢𑁆𑀢𑀤𑁂𑀲𑀦𑀸 𑀦𑀸𑀫. 𑀢𑀫𑁂𑀯 𑀫𑀸𑀢𑀺𑀓𑀁 𑀯𑀺𑀢𑁆𑀣𑀸𑀭𑀢𑁄 𑀯𑀺𑀪𑀚𑀺𑀢𑁆𑀯𑀸 𑀓𑀣𑀺𑀢𑀸 𑀯𑀺𑀢𑁆𑀣𑀸𑀭𑀤𑁂𑀲𑀦𑀸 𑀦𑀸𑀫. 𑀫𑀸𑀢𑀺𑀓𑀁 𑀯𑀸 𑀞𑀧𑁂𑀢𑁆𑀯𑀸𑀧𑀺 𑀅𑀝𑁆𑀞𑀧𑁂𑀢𑁆𑀯𑀸𑀧𑀺 𑀯𑀺𑀢𑁆𑀣𑀸𑀭𑀢𑁄 𑀯𑀺𑀪𑀚𑀺𑀢𑁆𑀯𑀸 𑀓𑀣𑀺𑀢𑀸 𑀯𑀺𑀢𑁆𑀣𑀸𑀭𑀤𑁂𑀲𑀦𑀸 𑀦𑀸𑀫. 𑀢𑀸𑀲𑀼 𑀲𑀁𑀔𑀺𑀢𑁆𑀢𑀤𑁂𑀲𑀦𑀸 𑀦𑀸𑀫 𑀫𑀳𑀸𑀧𑀜𑁆𑀜𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀯𑀲𑁂𑀦 𑀓𑀣𑀺𑀢𑀸, 𑀯𑀺𑀢𑁆𑀣𑀸𑀭𑀤𑁂𑀲𑀦𑀸 𑀦𑀸𑀫 𑀫𑀦𑁆𑀤𑀧𑀜𑁆𑀜𑀲𑁆𑀲. 𑀫𑀳𑀸𑀧𑀜𑁆𑀜𑀲𑁆𑀲 𑀳𑀺 𑀯𑀺𑀢𑁆𑀣𑀸𑀭𑀤𑁂𑀲𑀦𑀸 𑀅𑀢𑀺𑀧𑀧𑀜𑁆𑀘𑁄 𑀯𑀺𑀬 𑀳𑁄𑀢𑀺. 𑀫𑀦𑁆𑀤𑀧𑀜𑁆𑀜𑀲𑁆𑀲 𑀲𑀗𑁆𑀔𑁂𑀧𑀤𑁂𑀲𑀦𑀸 𑀲𑀲𑀓𑀲𑁆𑀲 𑀉𑀧𑁆𑀧𑀢𑀦𑀁 𑀯𑀺𑀬 𑀳𑁄𑀢𑀺, 𑀦𑁂𑀯 𑀅𑀦𑁆𑀢𑀁 𑀦 𑀓𑁄𑀝𑀺𑀁 𑀧𑀸𑀧𑀼𑀡𑀺𑀢𑀼𑀁 𑀲𑀓𑁆𑀓𑁄𑀢𑀺. 𑀲𑀗𑁆𑀔𑁂𑀧𑀤𑁂𑀲𑀦𑀸 𑀘 𑀉𑀕𑁆𑀖𑀝𑀺𑀢𑀜𑁆𑀜𑀼𑀲𑁆𑀲 𑀯𑀲𑁂𑀦 𑀓𑀣𑀺𑀢𑀸, 𑀯𑀺𑀢𑁆𑀣𑀸𑀭𑀤𑁂𑀲𑀦𑀸 𑀇𑀢𑀭𑁂𑀲𑀁 𑀢𑀺𑀡𑁆𑀡𑀁 𑀯𑀲𑁂𑀦. 𑀲𑀓𑀮𑀫𑁆𑀧𑀺 𑀳𑀺 𑀢𑁂𑀧𑀺𑀝𑀓𑀁 𑀲𑀗𑁆𑀔𑁂𑀧𑀤𑁂𑀲𑀦𑀸 𑀯𑀺𑀢𑁆𑀣𑀸𑀭𑀤𑁂𑀲𑀦𑀸𑀢𑀺 𑀏𑀢𑁆𑀣𑁂𑀯 𑀲𑀗𑁆𑀔𑀁 𑀕𑀘𑁆𑀙𑀢𑀺.

𑁧𑁫. 𑀧𑀜𑁆𑀘𑀫𑁂 𑀬𑀲𑁆𑀫𑀺𑀁, 𑀪𑀺𑀓𑁆𑀔𑀯𑁂, 𑀅𑀥𑀺𑀓𑀭𑀡𑁂𑀢𑀺 𑀯𑀺𑀯𑀸𑀤𑀸𑀥𑀺𑀓𑀭𑀡𑀁, 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀁, 𑀆𑀧𑀢𑁆𑀢𑀸𑀥𑀺𑀓𑀭𑀡𑀁, 𑀓𑀺𑀘𑁆𑀘𑀸𑀥𑀺𑀓𑀭𑀡𑀦𑁆𑀢𑀺 𑀇𑀫𑁂𑀲𑀁 𑀘𑀢𑀼𑀦𑁆𑀦𑀁 𑀅𑀥𑀺𑀓𑀭𑀡𑀸𑀦𑀁 𑀬𑀲𑁆𑀫𑀺𑀁 𑀅𑀥𑀺𑀓𑀭𑀡𑁂. 𑀆𑀧𑀦𑁆𑀦𑁄 𑀘 𑀪𑀺𑀓𑁆𑀔𑀽𑀢𑀺 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑁄 𑀪𑀺𑀓𑁆𑀔𑀼 𑀘. 𑀢𑀲𑁆𑀫𑁂𑀢𑀦𑁆𑀢𑀺 𑀢𑀲𑁆𑀫𑀺𑀁 𑀏𑀢𑀁. 𑀤𑀻𑀖𑀢𑁆𑀢𑀸𑀬𑀸𑀢𑀺 𑀤𑀻𑀖𑀁 𑀅𑀤𑁆𑀥𑀸𑀦𑀁 𑀢𑀺𑀝𑁆𑀞𑀦𑀢𑁆𑀣𑀸𑀬. 𑀔𑀭𑀢𑁆𑀢𑀸𑀬𑀸𑀢𑀺 𑀤𑀸𑀲-𑀓𑁄𑀡𑁆𑀟-𑀘𑀡𑁆𑀟𑀸𑀮-𑀯𑁂𑀦𑀸𑀢𑀺 𑀏𑀯𑀁 𑀔𑀭𑀯𑀸𑀘𑀸𑀧𑀯𑀢𑁆𑀢𑀦𑀢𑁆𑀣𑀸𑀬. 𑀯𑀸𑀴𑀢𑁆𑀢𑀸𑀬𑀸𑀢𑀺 𑀧𑀸𑀡𑀺 𑀮𑁂𑀟𑁆𑀟𑀼𑀤𑀡𑁆𑀟𑀸𑀤𑀻𑀳𑀺 𑀧𑀳𑀭𑀡𑀯𑀲𑁂𑀦 𑀓𑀓𑁆𑀔𑀴𑀪𑀸𑀯𑀢𑁆𑀣𑀸𑀬. 𑀪𑀺𑀓𑁆𑀔𑀽 𑀘 𑀦 𑀨𑀸𑀲𑀼𑀁 𑀯𑀺𑀳𑀭𑀺𑀲𑁆𑀲𑀦𑁆𑀢𑀻𑀢𑀺 𑀅𑀜𑁆𑀜𑀫𑀜𑁆𑀜𑀁 𑀯𑀺𑀯𑀸𑀤𑀸𑀧𑀦𑁆𑀦𑁂 𑀪𑀺𑀓𑁆𑀔𑀼𑀲𑀗𑁆𑀖𑁂 𑀬𑁂𑀧𑀺 𑀉𑀤𑁆𑀤𑁂𑀲𑀁 𑀯𑀸 𑀧𑀭𑀺𑀧𑀼𑀘𑁆𑀙𑀁 𑀯𑀸 𑀕𑀳𑁂𑀢𑀼𑀓𑀸𑀫𑀸 𑀧𑀥𑀸𑀦𑀁 𑀯𑀸 𑀅𑀦𑀼𑀬𑀼𑀜𑁆𑀚𑀺𑀢𑀼𑀓𑀸𑀫𑀸, 𑀢𑁂 𑀨𑀸𑀲𑀼𑀁 𑀦 𑀯𑀺𑀳𑀭𑀺𑀲𑁆𑀲𑀦𑁆𑀢𑀺. 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀫𑀺𑀁 𑀳𑀺 𑀉𑀧𑁄𑀲𑀣𑀧𑀯𑀸𑀭𑀡𑀸𑀬 𑀞𑀺𑀢𑀸𑀬 𑀉𑀤𑁆𑀤𑁂𑀲𑀸𑀤𑀻𑀳𑀺 𑀅𑀢𑁆𑀣𑀺𑀓𑀸 𑀉𑀤𑁆𑀤𑁂𑀲𑀸𑀤𑀻𑀦𑀺 𑀕𑀳𑁂𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺, 𑀯𑀺𑀧𑀲𑁆𑀲𑀓𑀸𑀦𑀁 𑀘𑀺𑀢𑁆𑀢𑀼𑀧𑁆𑀧𑀸𑀤𑁄 𑀦 𑀏𑀓𑀕𑁆𑀕𑁄 𑀳𑁄𑀢𑀺, 𑀢𑀢𑁄 𑀯𑀺𑀲𑁂𑀲𑀁 𑀦𑀺𑀩𑁆𑀩𑀢𑁆𑀢𑁂𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺. 𑀏𑀯𑀁 𑀪𑀺𑀓𑁆𑀔𑀽 𑀘 𑀦 𑀨𑀸𑀲𑀼𑀁 𑀯𑀺𑀳𑀭𑀺𑀲𑁆𑀲𑀦𑁆𑀢𑀺. 𑀦 𑀤𑀻𑀖𑀢𑁆𑀢𑀸𑀬𑀸𑀢𑀺𑀆𑀤𑀻𑀲𑀼 𑀯𑀼𑀢𑁆𑀢𑀧𑀝𑀺𑀧𑀓𑁆𑀔𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂. 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀢𑀻𑀢𑀺 𑀏𑀯𑀁 𑀧𑀘𑁆𑀘𑀯𑁂𑀓𑁆𑀔𑀢𑀺. 𑀅𑀓𑀼𑀲𑀮𑀁 𑀆𑀧𑀦𑁆𑀦𑁄𑀢𑀺 𑀏𑀢𑁆𑀣 𑀅𑀓𑀼𑀲𑀮𑀦𑁆𑀢𑀺 𑀆𑀧𑀢𑁆𑀢𑀺 𑀅𑀥𑀺𑀧𑁆𑀧𑁂𑀢𑀸, 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑁄𑀢𑀺 𑀅𑀢𑁆𑀣𑁄. 𑀓𑀜𑁆𑀘𑀺𑀤𑁂𑀯 𑀤𑁂𑀲𑀦𑁆𑀢𑀺 𑀦 𑀲𑀩𑁆𑀩𑀫𑁂𑀯 𑀆𑀧𑀢𑁆𑀢𑀺𑀁, 𑀆𑀧𑀢𑁆𑀢𑀺𑀬𑀸 𑀧𑀦 𑀓𑀜𑁆𑀘𑀺𑀤𑁂𑀯 𑀤𑁂𑀲𑀁 𑀅𑀜𑁆𑀜𑀢𑀭𑀁 𑀆𑀧𑀢𑁆𑀢𑀺𑀦𑁆𑀢𑀺 𑀅𑀢𑁆𑀣𑁄. 𑀓𑀸𑀬𑁂𑀦𑀸𑀢𑀺 𑀓𑀭𑀚𑀓𑀸𑀬𑁂𑀦. 𑀅𑀦𑀢𑁆𑀢𑀫𑀦𑁄𑀢𑀺 𑀅𑀢𑀼𑀝𑁆𑀞𑀘𑀺𑀢𑁆𑀢𑁄. 𑀅𑀦𑀢𑁆𑀢𑀫𑀦𑀯𑀸𑀘𑀦𑁆𑀢𑀺 𑀅𑀢𑀼𑀝𑁆𑀞𑀯𑀸𑀘𑀁. 𑀫𑀫𑁂𑀯𑀸𑀢𑀺 𑀫𑀁𑀬𑁂𑀯. 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀅𑀥𑀺𑀓𑀭𑀡𑁂. 𑀅𑀘𑁆𑀘𑀬𑁄 𑀅𑀘𑁆𑀘𑀕𑀫𑀸𑀢𑀺 𑀅𑀧𑀭𑀸𑀥𑁄 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀫𑀤𑁆𑀤𑀺𑀢𑁆𑀯𑀸 𑀕𑀢𑁄, 𑀅𑀳𑀫𑁂𑀯𑁂𑀢𑁆𑀣 𑀅𑀧𑀭𑀸𑀥𑀺𑀓𑁄. 𑀲𑀼𑀗𑁆𑀓𑀤𑀸𑀬𑀓𑀁𑀯 𑀪𑀡𑁆𑀟𑀲𑁆𑀫𑀺𑀦𑁆𑀢𑀺 𑀬𑀣𑀸 𑀲𑀼𑀗𑁆𑀓𑀝𑁆𑀞𑀸𑀦𑀁 𑀧𑀭𑀺𑀳𑀭𑀺𑀢𑁆𑀯𑀸 𑀦𑀻𑀢𑁂 𑀪𑀡𑁆𑀟𑀲𑁆𑀫𑀺𑀁 𑀲𑀼𑀗𑁆𑀓𑀤𑀸𑀬𑀓𑀁 𑀅𑀧𑀭𑀸𑀥𑁄 𑀅𑀪𑀺𑀪𑀯𑀢𑀺, 𑀲𑁄 𑀘 𑀢𑀢𑁆𑀣 𑀅𑀧𑀭𑀸𑀥𑀺𑀓𑁄 𑀳𑁄𑀢𑀺, 𑀦 𑀭𑀸𑀚𑀸𑀦𑁄 𑀦 𑀭𑀸𑀚𑀧𑀼𑀭𑀺𑀲𑀸𑀢𑀺 𑀅𑀢𑁆𑀣𑁄.

𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑁄 𑀳𑀺 𑀭𑀜𑁆𑀜𑀸 𑀞𑀧𑀺𑀢𑀁 𑀲𑀼𑀗𑁆𑀓𑀝𑁆𑀞𑀸𑀦𑀁 𑀧𑀭𑀺𑀳𑀭𑀺𑀢𑁆𑀯𑀸 𑀪𑀡𑁆𑀟𑀁 𑀳𑀭𑀢𑀺, 𑀢𑀁 𑀲𑀳 𑀪𑀡𑁆𑀟𑀲𑀓𑀝𑁂𑀦 𑀆𑀦𑁂𑀢𑁆𑀯𑀸 𑀭𑀜𑁆𑀜𑁄 𑀤𑀲𑁆𑀲𑁂𑀦𑁆𑀢𑀺. 𑀢𑀢𑁆𑀣 𑀦𑁂𑀯 𑀲𑀼𑀗𑁆𑀓𑀝𑁆𑀞𑀸𑀦𑀲𑁆𑀲 𑀤𑁄𑀲𑁄 𑀅𑀢𑁆𑀣𑀺, 𑀦 𑀭𑀜𑁆𑀜𑁄 𑀦 𑀭𑀸𑀚𑀧𑀼𑀭𑀺𑀲𑀸𑀦𑀁, 𑀧𑀭𑀺𑀳𑀭𑀺𑀢𑁆𑀯𑀸 𑀕𑀢𑀲𑁆𑀲𑁂𑀯 𑀧𑀦 𑀤𑁄𑀲𑁄, 𑀏𑀯𑀫𑁂𑀯𑀁 𑀬𑀁 𑀲𑁄 𑀪𑀺𑀓𑁆𑀔𑀼 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑁄, 𑀢𑀢𑁆𑀣 𑀦𑁂𑀯 𑀆𑀧𑀢𑁆𑀢𑀺𑀬𑀸 𑀤𑁄𑀲𑁄, 𑀦 𑀘𑁄𑀤𑀓𑀲𑁆𑀲. 𑀢𑀻𑀳𑀺 𑀧𑀦 𑀓𑀸𑀭𑀡𑁂𑀳𑀺 𑀢𑀲𑁆𑀲𑁂𑀯 𑀪𑀺𑀓𑁆𑀔𑀼𑀦𑁄 𑀤𑁄𑀲𑁄. 𑀢𑀲𑁆𑀲 𑀳𑀺 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑀪𑀸𑀯𑁂𑀦𑀧𑀺 𑀤𑁄𑀲𑁄, 𑀘𑁄𑀤𑀓𑁂 𑀅𑀦𑀢𑁆𑀢𑀫𑀦𑀢𑀸𑀬𑀧𑀺 𑀤𑁄𑀲𑁄, 𑀅𑀦𑀢𑁆𑀢𑀫𑀦𑀲𑁆𑀲 𑀲𑀢𑁄 𑀧𑀭𑁂𑀲𑀁 𑀆𑀭𑁄𑀘𑀦𑁂𑀦𑀧𑀺 𑀤𑁄𑀲𑁄. 𑀘𑁄𑀤𑀓𑀲𑁆𑀲 𑀧𑀦 𑀬𑀁 𑀲𑁄 𑀢𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀦𑁆𑀢𑀁 𑀅𑀤𑁆𑀤𑀲, 𑀢𑀢𑁆𑀣 𑀤𑁄𑀲𑁄 𑀦𑀢𑁆𑀣𑀺. 𑀅𑀦𑀢𑁆𑀢𑀫𑀦𑀢𑀸𑀬 𑀘𑁄𑀤𑀦𑀸𑀬 𑀧𑀦 𑀤𑁄𑀲𑁄. 𑀢𑀫𑁆𑀧𑀺 𑀅𑀫𑀦𑀲𑀺𑀓𑀭𑀺𑀢𑁆𑀯𑀸 𑀅𑀬𑀁 𑀪𑀺𑀓𑁆𑀔𑀼 𑀅𑀢𑁆𑀢𑀦𑁄𑀯 𑀤𑁄𑀲𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑁄 ‘‘𑀇𑀢𑀺 𑀫𑀫𑁂𑀯 𑀢𑀢𑁆𑀣 𑀅𑀘𑁆𑀘𑀬𑁄 𑀅𑀘𑁆𑀘𑀕𑀫𑀸 𑀲𑀼𑀗𑁆𑀓𑀤𑀸𑀬𑀓𑀁𑀯 𑀪𑀡𑁆𑀟𑀲𑁆𑀫𑀺’’𑀦𑁆𑀢𑀺 𑀏𑀯𑀁 𑀧𑀝𑀺𑀲𑀜𑁆𑀘𑀺𑀓𑁆𑀔𑀢𑀻𑀢𑀺 𑀅𑀢𑁆𑀣𑁄. 𑀤𑀼𑀢𑀺𑀬𑀯𑀸𑀭𑁂 𑀘𑁄𑀤𑀓𑀲𑁆𑀲 𑀅𑀦𑀢𑁆𑀢𑀫𑀦𑀢𑀸 𑀘 𑀅𑀦𑀢𑁆𑀢𑀫𑀦𑀢𑀸𑀬 𑀘𑁄𑀤𑀺𑀢𑀪𑀸𑀯𑁄 𑀘𑀸𑀢𑀺 𑀤𑁆𑀯𑁂 𑀤𑁄𑀲𑀸, 𑀢𑁂𑀲𑀁 𑀯𑀲𑁂𑀦 ‘‘𑀅𑀘𑁆𑀘𑀬𑁄 𑀅𑀘𑁆𑀘𑀕𑀫𑀸’’𑀢𑀺 𑀏𑀢𑁆𑀣 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑁧𑁬. 𑀙𑀝𑁆𑀞𑁂 𑀅𑀜𑁆𑀜𑀢𑀭𑁄𑀢𑀺 𑀏𑀓𑁄 𑀅𑀧𑀸𑀓𑀝𑀦𑀸𑀫𑁄 𑀩𑁆𑀭𑀸𑀳𑁆𑀫𑀡𑁄. 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀻𑀢𑀺 𑀬𑁂𑀦𑀸𑀢𑀺 𑀪𑀼𑀫𑁆𑀫𑀢𑁆𑀣𑁂 𑀓𑀭𑀡𑀯𑀘𑀦𑀁. 𑀢𑀲𑁆𑀫𑀸 𑀬𑀢𑁆𑀣 𑀪𑀕𑀯𑀸, 𑀢𑀢𑁆𑀣 𑀉𑀧𑀲𑀗𑁆𑀓𑀫𑀻𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀬𑁂𑀦 𑀯𑀸 𑀓𑀸𑀭𑀡𑁂𑀦 𑀪𑀕𑀯𑀸 𑀤𑁂𑀯𑀫𑀦𑀼𑀲𑁆𑀲𑁂𑀳𑀺 𑀉𑀧𑀲𑀗𑁆𑀓𑀫𑀺𑀢𑀩𑁆𑀩𑁄, 𑀢𑁂𑀦 𑀓𑀸𑀭𑀡𑁂𑀦 𑀉𑀧𑀲𑀗𑁆𑀓𑀫𑀻𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀓𑁂𑀦 𑀘 𑀓𑀸𑀭𑀡𑁂𑀦 𑀪𑀕𑀯𑀸 𑀉𑀧𑀲𑀗𑁆𑀓𑀫𑀺𑀢𑀩𑁆𑀩𑁄? 𑀦𑀸𑀦𑀧𑁆𑀧𑀓𑀸𑀭𑀕𑀼𑀡𑀯𑀺𑀲𑁂𑀲𑀸𑀥𑀺𑀕𑀫𑀸𑀥𑀺𑀧𑁆𑀧𑀸𑀬𑁂𑀦, 𑀲𑀸𑀤𑀼𑀨𑀮𑀽𑀧𑀪𑁄𑀕𑀸𑀥𑀺𑀧𑁆𑀧𑀸𑀬𑁂𑀦 𑀤𑀺𑀚𑀕𑀡𑁂𑀳𑀺 𑀦𑀺𑀘𑁆𑀘𑀨𑀮𑀺𑀢𑀫𑀳𑀸𑀭𑀼𑀓𑁆𑀔𑁄 𑀯𑀺𑀬. 𑀉𑀧𑀲𑀗𑁆𑀓𑀫𑀻𑀢𑀺 𑀕𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀉𑀧𑀲𑀗𑁆𑀓𑀫𑀺𑀢𑁆𑀯𑀸𑀢𑀺 𑀉𑀧𑀲𑀗𑁆𑀓𑀫𑀦𑀧𑀭𑀺𑀬𑁄𑀲𑀸𑀦𑀤𑀻𑀧𑀦𑀁. 𑀅𑀣 𑀯𑀸 𑀏𑀯𑀁 𑀕𑀢𑁄 𑀢𑀢𑁄 𑀆𑀲𑀦𑁆𑀦𑀢𑀭𑀁 𑀞𑀸𑀦𑀁 𑀪𑀕𑀯𑀢𑁄 𑀲𑀫𑀻𑀧𑀲𑀗𑁆𑀔𑀸𑀢𑀁 𑀕𑀦𑁆𑀢𑁆𑀯𑀸𑀢𑀺𑀧𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀪𑀕𑀯𑀢𑀸 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀻𑀢𑀺 𑀬𑀣𑀸 𑀘 𑀔𑀫𑀦𑀻𑀬𑀸𑀤𑀻𑀦𑀺 𑀧𑀼𑀘𑁆𑀙𑀦𑁆𑀢𑁄 𑀪𑀕𑀯𑀸 𑀢𑁂𑀦, 𑀏𑀯𑀁 𑀲𑁄𑀧𑀺 𑀪𑀕𑀯𑀢𑀸 𑀲𑀤𑁆𑀥𑀺𑀁 𑀲𑀫𑀧𑁆𑀧𑀯𑀢𑁆𑀢𑀫𑁄𑀤𑁄 𑀅𑀳𑁄𑀲𑀺, 𑀲𑀻𑀢𑁄𑀤𑀓𑀁 𑀯𑀺𑀬 𑀉𑀡𑁆𑀳𑁄𑀤𑀓𑁂𑀦 𑀲𑀫𑁆𑀫𑁄𑀤𑀺𑀢𑀁 𑀏𑀓𑀻𑀪𑀸𑀯𑀁 𑀅𑀕𑀫𑀸𑀲𑀺. 𑀬𑀸𑀬 𑀘 ‘‘𑀓𑀘𑁆𑀘𑀺, 𑀪𑁄 𑀕𑁄𑀢𑀫, 𑀔𑀫𑀦𑀻𑀬𑀁, 𑀓𑀘𑁆𑀘𑀺 𑀬𑀸𑀧𑀦𑀻𑀬𑀁, 𑀓𑀘𑁆𑀘𑀺 𑀪𑁄𑀢𑁄 𑀕𑁄𑀢𑀫𑀲𑁆𑀲 𑀘 𑀲𑀸𑀯𑀓𑀸𑀦𑀜𑁆𑀘 𑀅𑀧𑁆𑀧𑀸𑀩𑀸𑀥𑀁 𑀅𑀧𑁆𑀧𑀸𑀢𑀗𑁆𑀓𑀁 𑀮𑀳𑀼𑀝𑁆𑀞𑀸𑀦𑀁 𑀩𑀮𑀁 𑀨𑀸𑀲𑀼𑀯𑀺𑀳𑀸𑀭𑁄’’𑀢𑀺𑀆𑀤𑀺𑀓𑀸𑀬 𑀓𑀣𑀸𑀬 𑀲𑀫𑁆𑀫𑁄𑀤𑀺, 𑀢𑀁 𑀧𑀻𑀢𑀺𑀧𑀸𑀫𑁄𑀚𑁆𑀚𑀲𑀗𑁆𑀔𑀸𑀢𑀲𑁆𑀲 𑀲𑀫𑁆𑀫𑁄𑀤𑀲𑁆𑀲 𑀚𑀦𑀦𑀢𑁄 𑀲𑀫𑁆𑀫𑁄𑀤𑀺𑀢𑀼𑀁 𑀬𑀼𑀢𑁆𑀢𑀪𑀸𑀯𑀢𑁄 𑀘 𑀲𑀫𑁆𑀫𑁄𑀤𑀦𑀻𑀬𑀁, 𑀅𑀢𑁆𑀣𑀩𑁆𑀬𑀜𑁆𑀚𑀦𑀫𑀥𑀼𑀭𑀢𑀸𑀬 𑀲𑀼𑀘𑀺𑀭𑀫𑁆𑀧𑀺 𑀓𑀸𑀮𑀁 𑀲𑀸𑀭𑁂𑀢𑀼𑀁 𑀦𑀺𑀭𑀦𑁆𑀢𑀭𑀁 𑀧𑀯𑀢𑁆𑀢𑁂𑀢𑀼𑀁 𑀅𑀭𑀳𑀭𑀽𑀧𑀢𑁄 𑀲𑀭𑀺𑀢𑀩𑁆𑀩𑀪𑀸𑀯𑀢𑁄 𑀘 𑀲𑀸𑀭𑀡𑀻𑀬𑀁. 𑀲𑀼𑀬𑁆𑀬𑀫𑀸𑀦𑀲𑀼𑀔𑀢𑁄 𑀯𑀸 𑀲𑀫𑁆𑀫𑁄𑀤𑀦𑀻𑀬𑀁, 𑀅𑀦𑀼𑀲𑁆𑀲𑀭𑀺𑀬𑀫𑀸𑀦𑀲𑀼𑀔𑀢𑁄 𑀲𑀸𑀭𑀡𑀻𑀬𑀁, 𑀢𑀣𑀸 𑀩𑁆𑀬𑀜𑁆𑀚𑀦𑀧𑀭𑀺𑀲𑀼𑀤𑁆𑀥𑀢𑀸𑀬 𑀲𑀫𑁆𑀫𑁄𑀤𑀦𑀻𑀬𑀁, 𑀅𑀢𑁆𑀣𑀧𑀭𑀺𑀲𑀼𑀤𑁆𑀥𑀢𑀸𑀬 𑀲𑀸𑀭𑀡𑀻𑀬𑀦𑁆𑀢𑀺 𑀏𑀯𑀁 𑀅𑀦𑁂𑀓𑁂𑀳𑀺 𑀧𑀭𑀺𑀬𑀸𑀬𑁂𑀳𑀺 𑀲𑀫𑁆𑀫𑁄𑀤𑀦𑀻𑀬𑀁 𑀲𑀸𑀭𑀡𑀻𑀬𑀁 𑀓𑀣𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀧𑀭𑀺𑀬𑁄𑀲𑀸𑀧𑁂𑀢𑁆𑀯𑀸 𑀦𑀺𑀝𑁆𑀞𑀧𑁂𑀢𑁆𑀯𑀸 𑀬𑁂𑀦𑀢𑁆𑀣𑁂𑀦 𑀆𑀕𑀢𑁄, 𑀢𑀁 𑀧𑀼𑀘𑁆𑀙𑀺𑀢𑀼𑀓𑀸𑀫𑁄 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺.

𑀏𑀓𑀫𑀦𑁆𑀢𑀦𑁆𑀢𑀺 𑀪𑀸𑀯𑀦𑀧𑀼𑀁𑀲𑀓𑀦𑀺𑀤𑁆𑀤𑁂𑀲𑁄 ‘‘𑀯𑀺𑀲𑀫𑀁 𑀘𑀦𑁆𑀤𑀺𑀫𑀲𑀽𑀭𑀺𑀬𑀸 𑀧𑀭𑀺𑀯𑀢𑁆𑀢𑀦𑁆𑀢𑀻’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁪.𑁭𑁦) 𑀯𑀺𑀬. 𑀢𑀲𑁆𑀫𑀸 𑀬𑀣𑀸 𑀦𑀺𑀲𑀺𑀦𑁆𑀦𑁄 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺, 𑀢𑀣𑀸 𑀦𑀺𑀲𑀻𑀤𑀻𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀪𑀼𑀫𑁆𑀫𑀢𑁆𑀣𑁂 𑀯𑀸 𑀏𑀢𑀁 𑀉𑀧𑀬𑁄𑀕𑀯𑀘𑀦𑀁. 𑀦𑀺𑀲𑀻𑀤𑀻𑀢𑀺 𑀉𑀧𑀸𑀯𑀺𑀲𑀺. 𑀧𑀡𑁆𑀟𑀺𑀢𑀸 𑀳𑀺 𑀧𑀼𑀭𑀺𑀲𑀸 𑀕𑀭𑀼𑀝𑁆𑀞𑀸𑀦𑀻𑀬𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀲𑀦𑀓𑀼𑀲𑀮𑀢𑀸𑀬 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀦𑁆𑀢𑀺. 𑀅𑀬𑀜𑁆𑀘 𑀦𑁂𑀲𑀁 𑀅𑀜𑁆𑀜𑀢𑀭𑁄, 𑀢𑀲𑁆𑀫𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺.

𑀓𑀣𑀁 𑀦𑀺𑀲𑀺𑀦𑁆𑀦𑁄 𑀧𑀦 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀳𑁄𑀢𑀻𑀢𑀺? 𑀙 𑀦𑀺𑀲𑀚𑁆𑀚𑀤𑁄𑀲𑁂 𑀯𑀚𑁆𑀚𑁂𑀢𑁆𑀯𑀸. 𑀲𑁂𑀬𑁆𑀬𑀣𑀺𑀤𑀁 𑁋 𑀅𑀢𑀺𑀤𑀽𑀭𑀁, 𑀅𑀘𑁆𑀘𑀸𑀲𑀦𑁆𑀦𑀁, 𑀉𑀧𑀭𑀺𑀯𑀸𑀢𑀁, 𑀉𑀦𑁆𑀦𑀢𑀧𑁆𑀧𑀤𑁂𑀲𑀁, 𑀅𑀢𑀺𑀲𑀫𑁆𑀫𑀼𑀔𑀁 𑀅𑀢𑀺𑀧𑀘𑁆𑀙𑀸𑀢𑀺. 𑀅𑀢𑀺𑀤𑀽𑀭𑁂 𑀦𑀺𑀲𑀺𑀦𑁆𑀦𑁄 𑀳𑀺 𑀲𑀘𑁂 𑀓𑀣𑁂𑀢𑀼𑀓𑀸𑀫𑁄 𑀳𑁄𑀢𑀺, 𑀉𑀘𑁆𑀘𑀸𑀲𑀤𑁆𑀤𑁂𑀦 𑀓𑀣𑁂𑀢𑀩𑁆𑀩𑀁 𑀳𑁄𑀢𑀺. 𑀅𑀘𑁆𑀘𑀸𑀲𑀦𑁆𑀦𑁂 𑀦𑀺𑀲𑀺𑀦𑁆𑀦𑁄 𑀲𑀗𑁆𑀖𑀝𑁆𑀝𑀦𑀁 𑀓𑀭𑁄𑀢𑀺. 𑀉𑀧𑀭𑀺𑀯𑀸𑀢𑁂 𑀦𑀺𑀲𑀺𑀦𑁆𑀦𑁄 𑀲𑀭𑀻𑀭𑀕𑀦𑁆𑀥𑁂𑀦 𑀩𑀸𑀥𑀢𑀺. 𑀉𑀦𑁆𑀦𑀢𑀧𑁆𑀧𑀤𑁂𑀲𑁂 𑀦𑀺𑀲𑀺𑀦𑁆𑀦𑁄 𑀅𑀕𑀸𑀭𑀯𑀁 𑀧𑀓𑀸𑀲𑁂𑀢𑀺. 𑀅𑀢𑀺𑀲𑀫𑁆𑀫𑀼𑀔𑀸 𑀦𑀺𑀲𑀺𑀦𑁆𑀦𑁄 𑀲𑀘𑁂 𑀤𑀝𑁆𑀞𑀼𑀓𑀸𑀫𑁄 𑀳𑁄𑀢𑀺, 𑀘𑀓𑁆𑀔𑀼𑀦𑀸 𑀘𑀓𑁆𑀔𑀼𑀁 𑀆𑀳𑀘𑁆𑀘 𑀤𑀝𑁆𑀞𑀩𑁆𑀩𑀁 𑀳𑁄𑀢𑀺. 𑀅𑀢𑀺𑀧𑀘𑁆𑀙𑀸 𑀦𑀺𑀲𑀺𑀦𑁆𑀦𑁄 𑀲𑀘𑁂 𑀤𑀝𑁆𑀞𑀼𑀓𑀸𑀫𑁄 𑀳𑁄𑀢𑀺, 𑀕𑀻𑀯𑀁 𑀧𑀲𑀸𑀭𑁂𑀢𑁆𑀯𑀸 𑀤𑀝𑁆𑀞𑀩𑁆𑀩𑀁 𑀳𑁄𑀢𑀺. 𑀢𑀲𑁆𑀫𑀸 𑀅𑀬𑀫𑁆𑀧𑀺 𑀏𑀢𑁂 𑀙 𑀦𑀺𑀲𑀚𑁆𑀚𑀤𑁄𑀲𑁂 𑀯𑀚𑁆𑀚𑁂𑀢𑁆𑀯𑀸 𑀦𑀺𑀲𑀻𑀤𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀻’’𑀢𑀺.

𑀏𑀢𑀤𑀯𑁄𑀘𑀸𑀢𑀺 𑀤𑀼𑀯𑀺𑀥𑀸 𑀳𑀺 𑀧𑀼𑀘𑁆𑀙𑀸 𑁋 𑀅𑀕𑀸𑀭𑀺𑀓𑀧𑀼𑀘𑁆𑀙𑀸, 𑀅𑀦𑀕𑀸𑀭𑀺𑀓𑀧𑀼𑀘𑁆𑀙𑀸 𑀘. 𑀢𑀢𑁆𑀣 ‘‘𑀓𑀺𑀁, 𑀪𑀦𑁆𑀢𑁂, 𑀓𑀼𑀲𑀮𑀁, 𑀓𑀺𑀁 𑀅𑀓𑀼𑀲𑀮’’𑀦𑁆𑀢𑀺 (𑀫. 𑀦𑀺. 𑁩.𑁨𑁯𑁬) 𑀇𑀫𑀺𑀦𑀸 𑀦𑀬𑁂𑀦 𑀅𑀕𑀸𑀭𑀺𑀓𑀧𑀼𑀘𑁆𑀙𑀸 𑀆𑀕𑀢𑀸. ‘‘𑀇𑀫𑁂 𑀦𑀼 𑀔𑁄, 𑀪𑀦𑁆𑀢𑁂, 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸’’𑀢𑀺 (𑀫. 𑀦𑀺. 𑁩.𑁮𑁬) 𑀇𑀫𑀺𑀦𑀸 𑀦𑀬𑁂𑀦 𑀅𑀦𑀕𑀸𑀭𑀺𑀓𑀧𑀼𑀘𑁆𑀙𑀸. 𑀅𑀬𑀁 𑀧𑀦 𑀅𑀢𑁆𑀢𑀦𑁄 𑀅𑀦𑀼𑀭𑀽𑀧𑀁 𑀅𑀕𑀸𑀭𑀺𑀓𑀧𑀼𑀘𑁆𑀙𑀁 𑀧𑀼𑀘𑁆𑀙𑀦𑁆𑀢𑁄 𑀏𑀢𑀁 ‘‘𑀓𑁄 𑀦𑀼 𑀔𑁄, 𑀪𑁄 𑀕𑁄𑀢𑀫, 𑀳𑁂𑀢𑀼 𑀓𑁄 𑀧𑀘𑁆𑀘𑀬𑁄’’𑀢𑀺𑀆𑀤𑀺𑀯𑀘𑀦𑀁 𑀅𑀯𑁄𑀘. 𑀢𑀢𑁆𑀣 𑀳𑁂𑀢𑀼 𑀧𑀘𑁆𑀘𑀬𑁄𑀢𑀺 𑀉𑀪𑀬𑀫𑁆𑀧𑁂𑀢𑀁 𑀓𑀸𑀭𑀡𑀯𑁂𑀯𑀘𑀦𑀫𑁂𑀯. 𑀅𑀥𑀫𑁆𑀫𑀘𑀭𑀺𑀬𑀸𑀯𑀺𑀲𑀫𑀘𑀭𑀺𑀬𑀸𑀳𑁂𑀢𑀽𑀢𑀺 𑀅𑀥𑀫𑁆𑀫𑀘𑀭𑀺𑀬𑀸𑀲𑀗𑁆𑀔𑀸𑀢𑀸𑀬 𑀯𑀺𑀲𑀫𑀘𑀭𑀺𑀬𑀸𑀬 𑀳𑁂𑀢𑀼, 𑀢𑀁𑀓𑀸𑀭𑀡𑀸 𑀢𑀧𑁆𑀧𑀘𑁆𑀘𑀬𑀸𑀢𑀺 𑀅𑀢𑁆𑀣𑁄. 𑀢𑀢𑁆𑀭𑀸𑀬𑀁 𑀧𑀤𑀢𑁆𑀣𑁄 𑁋 𑀅𑀥𑀫𑁆𑀫𑀲𑁆𑀲 𑀘𑀭𑀺𑀬𑀸 𑀅𑀥𑀫𑁆𑀫𑀘𑀭𑀺𑀬𑀸, 𑀅𑀥𑀫𑁆𑀫𑀓𑀸𑀭𑀡𑀦𑁆𑀢𑀺 𑀅𑀢𑁆𑀣𑁄. 𑀯𑀺𑀲𑀫𑀁 𑀘𑀭𑀺𑀬𑀸, 𑀯𑀺𑀲𑀫𑀲𑁆𑀲 𑀯𑀸 𑀓𑀫𑁆𑀫𑀲𑁆𑀲 𑀘𑀭𑀺𑀬𑀸𑀢𑀺 𑀯𑀺𑀲𑀫𑀘𑀭𑀺𑀬𑀸. 𑀅𑀥𑀫𑁆𑀫𑀘𑀭𑀺𑀬𑀸 𑀘 𑀲𑀸 𑀯𑀺𑀲𑀫𑀘𑀭𑀺𑀬𑀸 𑀘𑀸𑀢𑀺 𑀅𑀥𑀫𑁆𑀫𑀘𑀭𑀺𑀬𑀸𑀯𑀺𑀲𑀫𑀘𑀭𑀺𑀬𑀸. 𑀏𑀢𑁂𑀦𑀼𑀧𑀸𑀬𑁂𑀦 𑀲𑀼𑀓𑁆𑀓𑀧𑀓𑁆𑀔𑁂𑀧𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀢𑁆𑀣𑀢𑁄 𑀧𑀦𑁂𑀢𑁆𑀣 𑀅𑀥𑀫𑁆𑀫𑀘𑀭𑀺𑀬𑀸𑀯𑀺𑀲𑀫𑀘𑀭𑀺𑀬𑀸 𑀦𑀸𑀫 𑀤𑀲 𑀅𑀓𑀼𑀲𑀮𑀓𑀫𑁆𑀫𑀧𑀣𑀸, 𑀥𑀫𑁆𑀫𑀘𑀭𑀺𑀬𑀸𑀲𑀫𑀘𑀭𑀺𑀬𑀸 𑀦𑀸𑀫 𑀤𑀲 𑀓𑀼𑀲𑀮𑀓𑀫𑁆𑀫𑀧𑀣𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀅𑀪𑀺𑀓𑁆𑀓𑀦𑁆𑀢𑀁, 𑀪𑁄 𑀕𑁄𑀢𑀫𑀸𑀢𑀺 𑀏𑀢𑁆𑀣 𑀅𑀬𑀁 𑀅𑀪𑀺𑀓𑁆𑀓𑀦𑁆𑀢𑀲𑀤𑁆𑀤𑁄 𑀔𑀬𑀲𑀼𑀦𑁆𑀤𑀭𑀸𑀪𑀺𑀭𑀽𑀧𑀅𑀩𑁆𑀪𑀦𑀼𑀫𑁄𑀤𑀦𑁂𑀲𑀼 𑀤𑀺𑀲𑁆𑀲𑀢𑀺. ‘‘𑀅𑀪𑀺𑀓𑁆𑀓𑀦𑁆𑀢𑀸, 𑀪𑀦𑁆𑀢𑁂, 𑀭𑀢𑁆𑀢𑀺, 𑀦𑀺𑀓𑁆𑀔𑀦𑁆𑀢𑁄 𑀧𑀞𑀫𑁄 𑀬𑀸𑀫𑁄, 𑀘𑀺𑀭𑀦𑀺𑀲𑀺𑀦𑁆𑀦𑁄 𑀪𑀺𑀓𑁆𑀔𑀼𑀲𑀗𑁆𑀖𑁄’’𑀢𑀺𑀆𑀤𑀻𑀲𑀼 (𑀉𑀤𑀸. 𑁪𑁫; 𑀘𑀽𑀴𑀯. 𑁩𑁮𑁩; 𑀅. 𑀦𑀺. 𑁮.𑁨𑁦) 𑀳𑀺 𑀔𑀬𑁂 𑀤𑀺𑀲𑁆𑀲𑀢𑀺. ‘‘𑀅𑀬𑀁 𑀇𑀫𑁂𑀲𑀁 𑀘𑀢𑀼𑀦𑁆𑀦𑀁 𑀧𑀼𑀕𑁆𑀕𑀮𑀸𑀦𑀁 𑀅𑀪𑀺𑀓𑁆𑀓𑀦𑁆𑀢𑀢𑀭𑁄 𑀘 𑀧𑀡𑀻𑀢𑀢𑀭𑁄 𑀘𑀸’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁪.𑁧𑁦𑁦) 𑀲𑀼𑀦𑁆𑀤𑀭𑁂.

‘‘𑀓𑁄 𑀫𑁂 𑀯𑀦𑁆𑀤𑀢𑀺 𑀧𑀸𑀤𑀸𑀦𑀺, 𑀇𑀤𑁆𑀥𑀺𑀬𑀸 𑀬𑀲𑀲𑀸 𑀚𑀮𑀁;

𑀅𑀪𑀺𑀓𑁆𑀓𑀦𑁆𑀢𑁂𑀦 𑀯𑀡𑁆𑀡𑁂𑀦, 𑀲𑀩𑁆𑀩𑀸 𑀑𑀪𑀸𑀲𑀬𑀁 𑀤𑀺𑀲𑀸’’𑀢𑀺. 𑁋

𑀆𑀤𑀻𑀲𑀼 (𑀯𑀺. 𑀯. 𑁮𑁫𑁭) 𑀅𑀪𑀺𑀭𑀽𑀧𑁂. ‘‘𑀅𑀪𑀺𑀓𑁆𑀓𑀦𑁆𑀢𑀁, 𑀪𑀦𑁆𑀢𑁂’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁧.𑁨𑁫𑁦; 𑀧𑀸𑀭𑀸. 𑁧𑁫) 𑀅𑀩𑁆𑀪𑀦𑀼𑀫𑁄𑀤𑀦𑁂. 𑀇𑀥𑀸𑀧𑀺 𑀅𑀩𑁆𑀪𑀦𑀼𑀫𑁄𑀤𑀦𑁂𑀬𑁂𑀯. 𑀬𑀲𑁆𑀫𑀸 𑀘 𑀅𑀩𑁆𑀪𑀦𑀼𑀫𑁄𑀤𑀦𑁂, 𑀢𑀲𑁆𑀫𑀸 𑀲𑀸𑀥𑀼 𑀲𑀸𑀥𑀼, 𑀪𑁄 𑀕𑁄𑀢𑀫𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

‘‘𑀪𑀬𑁂 𑀓𑁄𑀥𑁂 𑀧𑀲𑀁𑀲𑀸𑀬𑀁, 𑀢𑀼𑀭𑀺𑀢𑁂 𑀓𑁄𑀢𑀽𑀳𑀮𑀘𑁆𑀙𑀭𑁂;

𑀳𑀸𑀲𑁂 𑀲𑁄𑀓𑁂 𑀧𑀲𑀸𑀤𑁂 𑀘, 𑀓𑀭𑁂 𑀆𑀫𑁂𑀟𑀺𑀢𑀁 𑀩𑀼𑀥𑁄’’𑀢𑀺. 𑁋

𑀇𑀫𑀺𑀦𑀸 𑀘 𑀮𑀓𑁆𑀔𑀡𑁂𑀦 𑀇𑀥 𑀧𑀲𑀸𑀤𑀯𑀲𑁂𑀦 𑀧𑀲𑀁𑀲𑀸𑀯𑀲𑁂𑀦 𑀘𑀸𑀬𑀁 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀯𑀼𑀢𑁆𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀅𑀣 𑀯𑀸 𑀅𑀪𑀺𑀓𑁆𑀓𑀦𑁆𑀢𑀦𑁆𑀢𑀺 𑀅𑀪𑀺𑀓𑁆𑀓𑀦𑁆𑀢𑀁 𑀅𑀢𑀺𑀇𑀝𑁆𑀞𑀁 𑀅𑀢𑀺𑀫𑀦𑀸𑀧𑀁, 𑀅𑀢𑀺𑀲𑀼𑀦𑁆𑀤𑀭𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀢𑀢𑁆𑀣 𑀏𑀓𑁂𑀦 𑀅𑀪𑀺𑀓𑁆𑀓𑀦𑁆𑀢𑀲𑀤𑁆𑀤𑁂𑀦 𑀤𑁂𑀲𑀦𑀁 𑀣𑁄𑀫𑁂𑀢𑀺, 𑀏𑀓𑁂𑀦 𑀅𑀢𑁆𑀢𑀦𑁄 𑀧𑀲𑀸𑀤𑀁. 𑀅𑀬𑀜𑁆𑀳𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑁋 𑀅𑀪𑀺𑀓𑁆𑀓𑀦𑁆𑀢𑀁, 𑀪𑁄 𑀕𑁄𑀢𑀫, 𑀬𑀤𑀺𑀤𑀁 𑀪𑁄𑀢𑁄 𑀕𑁄𑀢𑀫𑀲𑁆𑀲 𑀥𑀫𑁆𑀫𑀤𑁂𑀲𑀦𑀸, 𑀅𑀪𑀺𑀓𑁆𑀓𑀦𑁆𑀢𑀁 𑀬𑀤𑀺𑀤𑀁 𑀪𑁄𑀢𑁄 𑀕𑁄𑀢𑀫𑀲𑁆𑀲 𑀥𑀫𑁆𑀫𑀤𑁂𑀲𑀦𑀁 𑀆𑀕𑀫𑁆𑀫 𑀫𑀫 𑀧𑀲𑀸𑀤𑁄𑀢𑀺. 𑀪𑀕𑀯𑀢𑁄𑀬𑁂𑀯 𑀯𑀸 𑀯𑀘𑀦𑀁 𑀤𑁆𑀯𑁂 𑀤𑁆𑀯𑁂 𑀅𑀢𑁆𑀣𑁂 𑀲𑀦𑁆𑀥𑀸𑀬 𑀣𑁄𑀫𑁂𑀢𑀺 𑁋 𑀪𑁄𑀢𑁄 𑀕𑁄𑀢𑀫𑀲𑁆𑀲 𑀯𑀘𑀦𑀁 𑀅𑀪𑀺𑀓𑁆𑀓𑀦𑁆𑀢𑀁 𑀤𑁄𑀲𑀦𑀸𑀲𑀦𑀢𑁄, 𑀅𑀪𑀺𑀓𑁆𑀓𑀦𑁆𑀢𑀁 𑀕𑀼𑀡𑀸𑀥𑀺𑀕𑀫𑀦𑀢𑁄, 𑀢𑀣𑀸 𑀲𑀤𑁆𑀥𑀸𑀚𑀦𑀦𑀢𑁄, 𑀧𑀜𑁆𑀜𑀸𑀚𑀦𑀦𑀢𑁄, 𑀲𑀸𑀢𑁆𑀣𑀢𑁄, 𑀲𑀩𑁆𑀬𑀜𑁆𑀚𑀦𑀢𑁄, 𑀉𑀢𑁆𑀢𑀸𑀦𑀧𑀤𑀢𑁄, 𑀕𑀫𑁆𑀪𑀻𑀭𑀢𑁆𑀣𑀢𑁄, 𑀓𑀡𑁆𑀡𑀲𑀼𑀔𑀢𑁄, 𑀳𑀤𑀬𑀗𑁆𑀕𑀫𑀢𑁄, 𑀅𑀦𑀢𑁆𑀢𑀼𑀓𑁆𑀓𑀁𑀲𑀦𑀢𑁄, 𑀅𑀧𑀭𑀯𑀫𑁆𑀪𑀦𑀢𑁄, 𑀓𑀭𑀼𑀡𑀸𑀲𑀻𑀢𑀮𑀢𑁄, 𑀧𑀜𑁆𑀜𑀸𑀯𑀤𑀸𑀢𑀢𑁄, 𑀆𑀧𑀸𑀣𑀭𑀫𑀡𑀻𑀬𑀢𑁄, 𑀯𑀺𑀫𑀤𑁆𑀤𑀓𑁆𑀔𑀫𑀢𑁄, 𑀲𑀼𑀬𑁆𑀬𑀫𑀸𑀦𑀲𑀼𑀔𑀢𑁄, 𑀯𑀻𑀫𑀁𑀲𑀺𑀬𑀫𑀸𑀦𑀳𑀺𑀢𑀢𑁄𑀢𑀺 𑀏𑀯𑀫𑀸𑀤𑀻𑀳𑀺 𑀬𑁄𑀚𑁂𑀢𑀩𑁆𑀩𑀁.

𑀢𑀢𑁄 𑀧𑀭𑀫𑁆𑀧𑀺 𑀘𑀢𑀽𑀳𑀺 𑀉𑀧𑀫𑀸𑀳𑀺 𑀤𑁂𑀲𑀦𑀁𑀬𑁂𑀯 𑀣𑁄𑀫𑁂𑀢𑀺. 𑀢𑀢𑁆𑀣 𑀦𑀺𑀓𑁆𑀓𑀼𑀚𑁆𑀚𑀺𑀢𑀦𑁆𑀢𑀺 𑀅𑀥𑁄𑀫𑀼𑀔𑀞𑀧𑀺𑀢𑀁, 𑀳𑁂𑀝𑁆𑀞𑀸𑀫𑀼𑀔𑀚𑀸𑀢𑀁 𑀯𑀸. 𑀉𑀓𑁆𑀓𑀼𑀚𑁆𑀚𑁂𑀬𑁆𑀬𑀸𑀢𑀺 𑀉𑀧𑀭𑀺𑀫𑀼𑀔𑀁 𑀓𑀭𑁂𑀬𑁆𑀬. 𑀧𑀝𑀺𑀘𑁆𑀙𑀦𑁆𑀦𑀦𑁆𑀢𑀺 𑀢𑀺𑀡𑀧𑀡𑁆𑀡𑀸𑀤𑀺𑀙𑀸𑀤𑀺𑀢𑀁. 𑀯𑀺𑀯𑀭𑁂𑀬𑁆𑀬𑀸𑀢𑀺 𑀉𑀕𑁆𑀖𑀸𑀝𑁂𑀬𑁆𑀬. 𑀫𑀽𑀴𑁆𑀳𑀲𑁆𑀲𑀸𑀢𑀺 𑀤𑀺𑀲𑀸𑀫𑀽𑀴𑁆𑀳𑀲𑁆𑀲. 𑀫𑀕𑁆𑀕𑀁 𑀆𑀘𑀺𑀓𑁆𑀔𑁂𑀬𑁆𑀬𑀸𑀢𑀺 𑀳𑀢𑁆𑀣𑁂 𑀕𑀳𑁂𑀢𑁆𑀯𑀸 ‘‘𑀏𑀲 𑀫𑀕𑁆𑀕𑁄’’𑀢𑀺 𑀯𑀤𑁂𑀬𑁆𑀬. 𑀅𑀦𑁆𑀥𑀓𑀸𑀭𑁂𑀢𑀺 𑀓𑀸𑀴𑀧𑀓𑁆𑀔𑀘𑀸𑀢𑀼𑀤𑁆𑀤𑀲𑀻𑀅𑀟𑁆𑀠𑀭𑀢𑁆𑀢𑀖𑀦𑀯𑀦𑀲𑀡𑁆𑀟𑀫𑁂𑀖𑀧𑀝𑀮𑁂𑀳𑀺 𑀘𑀢𑀼𑀭𑀗𑁆𑀕𑁂 𑀢𑀫𑁂. 𑀅𑀬𑀁 𑀢𑀸𑀯 𑀅𑀦𑀼𑀢𑁆𑀢𑀸𑀦𑀧𑀤𑀢𑁆𑀣𑁄.

𑀅𑀬𑀁 𑀧𑀦 𑀅𑀥𑀺𑀧𑁆𑀧𑀸𑀬𑀬𑁄𑀚𑀦𑀸 𑁋 𑀬𑀣𑀸 𑀓𑁄𑀘𑀺 𑀦𑀺𑀓𑁆𑀓𑀼𑀚𑁆𑀚𑀺𑀢𑀁 𑀉𑀓𑁆𑀓𑀼𑀚𑁆𑀚𑁂𑀬𑁆𑀬, 𑀏𑀯𑀁 𑀲𑀤𑁆𑀥𑀫𑁆𑀫𑀯𑀺𑀫𑀼𑀔𑀁 𑀅𑀲𑀤𑁆𑀥𑀫𑁆𑀫𑁂 𑀧𑀢𑀺𑀢𑀁 𑀫𑀁 𑀅𑀲𑀤𑁆𑀥𑀫𑁆𑀫𑀸 𑀯𑀼𑀝𑁆𑀞𑀸𑀧𑁂𑀦𑁆𑀢𑁂𑀦, 𑀬𑀣𑀸 𑀧𑀝𑀺𑀘𑁆𑀙𑀦𑁆𑀦𑀁 𑀯𑀺𑀯𑀭𑁂𑀬𑁆𑀬, 𑀏𑀯𑀁 𑀓𑀲𑁆𑀲𑀧𑀲𑁆𑀲 𑀪𑀕𑀯𑀢𑁄 𑀲𑀸𑀲𑀦𑀦𑁆𑀢𑀭𑀥𑀸𑀦𑀢𑁄 𑀧𑀪𑀼𑀢𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀕𑀳𑀦𑀧𑀝𑀺𑀘𑁆𑀙𑀦𑁆𑀦𑀁 𑀲𑀸𑀲𑀦𑀁 𑀯𑀺𑀯𑀭𑀦𑁆𑀢𑁂𑀦, 𑀬𑀣𑀸 𑀫𑀽𑀴𑁆𑀳𑀲𑁆𑀲 𑀫𑀕𑁆𑀕𑀁 𑀆𑀘𑀺𑀓𑁆𑀔𑁂𑀬𑁆𑀬, 𑀏𑀯𑀁 𑀓𑀼𑀫𑁆𑀫𑀕𑁆𑀕𑀫𑀺𑀘𑁆𑀙𑀸𑀫𑀕𑁆𑀕𑀧𑁆𑀧𑀝𑀺𑀧𑀦𑁆𑀦𑀲𑁆𑀲 𑀫𑁂 𑀲𑀕𑁆𑀕𑀫𑁄𑀓𑁆𑀔𑀫𑀕𑁆𑀕𑀁 𑀆𑀯𑀺𑀓𑀭𑁄𑀦𑁆𑀢𑁂𑀦, 𑀬𑀣𑀸 𑀅𑀦𑁆𑀥𑀓𑀸𑀭𑁂 𑀢𑁂𑀮𑀧𑀚𑁆𑀚𑁄𑀢𑀁 𑀥𑀸𑀭𑁂𑀬𑁆𑀬, 𑀏𑀯𑀁 𑀫𑁄𑀳𑀦𑁆𑀥𑀓𑀸𑀭𑁂 𑀦𑀺𑀫𑀼𑀕𑁆𑀕𑀲𑁆𑀲 𑀫𑁂 𑀩𑀼𑀤𑁆𑀥𑀸𑀤𑀺𑀭𑀢𑀦𑀭𑀽𑀧𑀸𑀦𑀺 𑀅𑀧𑀲𑁆𑀲𑀢𑁄 𑀢𑀧𑁆𑀧𑀝𑀺𑀘𑁆𑀙𑀸𑀤𑀓𑀫𑁄𑀳𑀦𑁆𑀥𑀓𑀸𑀭𑀯𑀺𑀤𑁆𑀥𑀁𑀲𑀓𑀤𑁂𑀲𑀦𑀸𑀧𑀚𑁆𑀚𑁄𑀢𑀥𑀸𑀭𑀡𑁂𑀦 𑀫𑀬𑁆𑀳𑀁 𑀪𑁄𑀢𑀸 𑀕𑁄𑀢𑀫𑁂𑀦 𑀏𑀢𑁂𑀳𑀺 𑀧𑀭𑀺𑀬𑀸𑀬𑁂𑀳𑀺 𑀧𑀓𑀸𑀲𑀺𑀢𑀢𑁆𑀢𑀸 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀥𑀫𑁆𑀫𑁄 𑀧𑀓𑀸𑀲𑀺𑀢𑁄𑀢𑀺.

𑀏𑀯𑀁 𑀤𑁂𑀲𑀦𑀁 𑀣𑁄𑀫𑁂𑀢𑁆𑀯𑀸 𑀇𑀫𑀸𑀬 𑀤𑁂𑀲𑀦𑀸𑀬 𑀭𑀢𑀦𑀢𑁆𑀢𑀬𑁂 𑀧𑀲𑀦𑁆𑀦𑀘𑀺𑀢𑁆𑀢𑁄 𑀧𑀲𑀦𑁆𑀦𑀸𑀓𑀸𑀭𑀁 𑀓𑀭𑁄𑀦𑁆𑀢𑁄 𑀏𑀲𑀸𑀳𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀏𑀲𑀸𑀳𑀦𑁆𑀢𑀺 𑀏𑀲𑁄 𑀅𑀳𑀁. 𑀪𑀯𑀦𑁆𑀢𑀁 𑀕𑁄𑀢𑀫𑀁 𑀲𑀭𑀡𑀁 𑀕𑀘𑁆𑀙𑀸𑀫𑀻𑀢𑀺 𑀪𑀯𑀁 𑀫𑁂 𑀕𑁄𑀢𑀫𑁄 𑀲𑀭𑀡𑀁 𑀧𑀭𑀸𑀬𑀡𑀁 𑀅𑀖𑀲𑁆𑀲 𑀢𑀸𑀢𑀸 𑀳𑀺𑀢𑀲𑁆𑀲 𑀘 𑀯𑀺𑀥𑀸𑀢𑀸𑀢𑀺 𑀇𑀫𑀺𑀦𑀸 𑀅𑀥𑀺𑀧𑁆𑀧𑀸𑀬𑁂𑀦 𑀪𑀯𑀦𑁆𑀢𑀁 𑀕𑁄𑀢𑀫𑀁 𑀕𑀘𑁆𑀙𑀸𑀫𑀺 𑀪𑀚𑀸𑀫𑀺 𑀲𑁂𑀯𑀸𑀫𑀺 𑀧𑀬𑀺𑀭𑀼𑀧𑀸𑀲𑀸𑀫𑀺, 𑀏𑀯𑀁 𑀯𑀸 𑀚𑀸𑀦𑀸𑀫𑀺 𑀩𑀼𑀚𑁆𑀛𑀸𑀫𑀻𑀢𑀺. 𑀬𑁂𑀲𑀜𑁆𑀳𑀺 𑀥𑀸𑀢𑀽𑀦𑀁 𑀕𑀢𑀺 𑀅𑀢𑁆𑀣𑁄, 𑀩𑀼𑀤𑁆𑀥𑀺𑀧𑀺 𑀢𑁂𑀲𑀁 𑀅𑀢𑁆𑀣𑁄. 𑀢𑀲𑁆𑀫𑀸 𑀕𑀘𑁆𑀙𑀸𑀫𑀻𑀢𑀺 𑀇𑀫𑀲𑁆𑀲 𑀚𑀸𑀦𑀸𑀫𑀺 𑀩𑀼𑀚𑁆𑀛𑀸𑀫𑀻𑀢𑀺 𑀅𑀬𑀫𑀢𑁆𑀣𑁄 𑀯𑀼𑀢𑁆𑀢𑁄. 𑀥𑀫𑁆𑀫𑀜𑁆𑀘 𑀪𑀺𑀓𑁆𑀔𑀼𑀲𑀗𑁆𑀖𑀜𑁆𑀘𑀸𑀢𑀺 𑀏𑀢𑁆𑀣 𑀧𑀦 𑀅𑀥𑀺𑀕𑀢𑀫𑀕𑁆𑀕𑁂 𑀲𑀘𑁆𑀙𑀺𑀓𑀢𑀦𑀺𑀭𑁄𑀥𑁂 𑀬𑀣𑀸𑀦𑀼𑀲𑀺𑀝𑁆𑀞𑀁 𑀧𑀝𑀺𑀧𑀚𑁆𑀚𑀫𑀸𑀦𑁂 𑀘 𑀘𑀢𑀽𑀲𑀼 𑀅𑀧𑀸𑀬𑁂𑀲𑀼 𑀅𑀧𑀢𑀫𑀸𑀦𑁂 𑀥𑀸𑀭𑁂𑀢𑀻𑀢𑀺 𑀥𑀫𑁆𑀫𑁄. 𑀲𑁄 𑀅𑀢𑁆𑀣𑀢𑁄 𑀅𑀭𑀺𑀬𑀫𑀕𑁆𑀕𑁄 𑀘𑁂𑀯 𑀦𑀺𑀩𑁆𑀩𑀸𑀦𑀜𑁆𑀘. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋 ‘‘𑀬𑀸𑀯𑀢𑀸, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸 𑀲𑀗𑁆𑀔𑀢𑀸, 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀢𑁂𑀲𑀁 𑀅𑀕𑁆𑀕𑀫𑀓𑁆𑀔𑀸𑀬𑀢𑀻’’𑀢𑀺 (𑀅. 𑀦𑀺. 𑁪.𑁩𑁪) 𑀯𑀺𑀢𑁆𑀣𑀸𑀭𑁄. 𑀦 𑀓𑁂𑀯𑀮𑀜𑁆𑀘 𑀅𑀭𑀺𑀬𑀫𑀕𑁆𑀕𑁄 𑀘𑁂𑀯 𑀦𑀺𑀩𑁆𑀩𑀸𑀦𑀜𑁆𑀘, 𑀅𑀧𑀺𑀘 𑀔𑁄 𑀅𑀭𑀺𑀬𑀨𑀮𑁂𑀳𑀺 𑀲𑀤𑁆𑀥𑀺𑀁 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑁄𑀧𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀙𑀢𑁆𑀢𑀫𑀸𑀡𑀯𑀓𑀯𑀺𑀫𑀸𑀦𑁂 𑁋

‘‘𑀭𑀸𑀕𑀯𑀺𑀭𑀸𑀕𑀫𑀦𑁂𑀚𑀫𑀲𑁄𑀓𑀁, 𑀥𑀫𑁆𑀫𑀫𑀲𑀗𑁆𑀔𑀢𑀫𑀧𑁆𑀧𑀝𑀺𑀓𑀽𑀮𑀁;

𑀫𑀥𑀼𑀭𑀫𑀺𑀫𑀁 𑀧𑀕𑀼𑀡𑀁 𑀲𑀼𑀯𑀺𑀪𑀢𑁆𑀢𑀁, 𑀥𑀫𑁆𑀫𑀫𑀺𑀫𑀁 𑀲𑀭𑀡𑀢𑁆𑀣𑀫𑀼𑀧𑁂𑀳𑀻’’𑀢𑀺. (𑀯𑀺. 𑀯. 𑁮𑁮𑁭);

𑀏𑀢𑁆𑀣 𑀭𑀸𑀕𑀯𑀺𑀭𑁄𑀕𑁄𑀢𑀺 𑀫𑀕𑁆𑀕𑁄 𑀓𑀣𑀺𑀢𑁄. 𑀅𑀦𑁄𑀚𑀫𑀲𑁄𑀓𑀦𑁆𑀢𑀺 𑀨𑀮𑀁. 𑀥𑀫𑁆𑀫𑀫𑀲𑀗𑁆𑀔𑀢𑀦𑁆𑀢𑀺 𑀦𑀺𑀩𑁆𑀩𑀸𑀦𑀁. 𑀅𑀧𑁆𑀧𑀝𑀺𑀓𑀽𑀮𑀁 𑀫𑀥𑀼𑀭𑀫𑀺𑀫𑀁 𑀧𑀕𑀼𑀡𑀁 𑀲𑀼𑀯𑀺𑀪𑀢𑁆𑀢𑀦𑁆𑀢𑀺 𑀧𑀺𑀝𑀓𑀢𑁆𑀢𑀬𑁂𑀦 𑀯𑀺𑀪𑀢𑁆𑀢𑀸 𑀲𑀩𑁆𑀩𑀥𑀫𑁆𑀫𑀓𑁆𑀔𑀦𑁆𑀥𑀸𑀢𑀺. 𑀤𑀺𑀝𑁆𑀞𑀺𑀲𑀻𑀮𑀲𑀗𑁆𑀖𑀸𑀢𑁂𑀦 𑀲𑀁𑀳𑀢𑁄𑀢𑀺 𑀲𑀗𑁆𑀖𑁄. 𑀲𑁄 𑀅𑀢𑁆𑀣𑀢𑁄 𑀅𑀝𑁆𑀞𑀅𑀭𑀺𑀬𑀧𑀼𑀕𑁆𑀕𑀮𑀲𑀫𑀽𑀳𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀢𑀲𑁆𑀫𑀺𑀬𑁂𑀯 𑀯𑀺𑀫𑀸𑀦𑁂 𑁋

‘‘𑀬𑀢𑁆𑀣 𑀘 𑀤𑀺𑀦𑁆𑀦𑀫𑀳𑀧𑁆𑀨𑀮𑀫𑀸𑀳𑀼, 𑀘𑀢𑀽𑀲𑀼 𑀲𑀼𑀘𑀻𑀲𑀼 𑀧𑀼𑀭𑀺𑀲𑀬𑀼𑀕𑁂𑀲𑀼;

𑀅𑀝𑁆𑀞 𑀘 𑀧𑀼𑀕𑁆𑀕𑀮𑀥𑀫𑁆𑀫𑀤𑀲𑀸 𑀢𑁂, 𑀲𑀗𑁆𑀖𑀫𑀺𑀫𑀁 𑀲𑀭𑀡𑀢𑁆𑀣𑀫𑀼𑀧𑁂𑀳𑀻’’𑀢𑀺. (𑀯𑀺. 𑀯. 𑁮𑁮𑁮);

𑀪𑀺𑀓𑁆𑀔𑀽𑀦𑀁 𑀲𑀗𑁆𑀖𑁄 𑀪𑀺𑀓𑁆𑀔𑀼𑀲𑀗𑁆𑀖𑁄. 𑀏𑀢𑁆𑀢𑀸𑀯𑀢𑀸 𑀩𑁆𑀭𑀸𑀳𑁆𑀫𑀡𑁄 𑀢𑀻𑀡𑀺 𑀲𑀭𑀡𑀕𑀫𑀦𑀸𑀦𑀺 𑀧𑀝𑀺𑀯𑁂𑀤𑁂𑀲𑀺.

𑀇𑀤𑀸𑀦𑀺 𑀢𑁂𑀲𑀼 𑀲𑀭𑀡𑀕𑀫𑀦𑁂𑀲𑀼 𑀓𑁄𑀲𑀮𑁆𑀮𑀢𑁆𑀣𑀁 𑀲𑀭𑀡𑀁, 𑀲𑀭𑀡𑀕𑀫𑀦𑀁, 𑀬𑁄 𑀘 𑀲𑀭𑀡𑀁 𑀕𑀘𑁆𑀙𑀢𑀺, 𑀲𑀭𑀡𑀕𑀫𑀦𑀧𑁆𑀧𑀪𑁂𑀤𑁄, 𑀲𑀭𑀡𑀕𑀫𑀦𑀨𑀮𑀁, 𑀲𑀁𑀓𑀺𑀮𑁂𑀲𑁄, 𑀪𑁂𑀤𑁄𑀢𑀺 𑀅𑀬𑀁 𑀯𑀺𑀥𑀺 𑀯𑁂𑀤𑀺𑀢𑀩𑁆𑀩𑁄.

𑀲𑁂𑀬𑁆𑀬𑀣𑀺𑀤𑀁 𑁋 𑀧𑀤𑀢𑁆𑀣𑀢𑁄 𑀢𑀸𑀯 𑀳𑀺𑀁𑀲𑀢𑀻𑀢𑀺 𑀲𑀭𑀡𑀁, 𑀲𑀭𑀡𑀕𑀢𑀸𑀦𑀁 𑀢𑁂𑀦𑁂𑀯 𑀲𑀭𑀡𑀕𑀫𑀦𑁂𑀦 𑀪𑀬𑀁 𑀲𑀦𑁆𑀢𑀸𑀲𑀁 𑀤𑀼𑀓𑁆𑀔𑀁 𑀤𑀼𑀕𑁆𑀕𑀢𑀺𑀧𑀭𑀺𑀓𑀺𑀮𑁂𑀲𑀁 𑀳𑀦𑀢𑀺 𑀯𑀺𑀦𑀸𑀲𑁂𑀢𑀻𑀢𑀺 𑀅𑀢𑁆𑀣𑁄, 𑀭𑀢𑀦𑀢𑁆𑀢𑀬𑀲𑁆𑀲𑁂𑀯𑁂𑀢𑀁 𑀅𑀥𑀺𑀯𑀘𑀦𑀁. 𑀅𑀣 𑀯𑀸 𑀳𑀺𑀢𑁂 𑀧𑀯𑀢𑁆𑀢𑀦𑁂𑀦 𑀅𑀳𑀺𑀢𑀸 𑀘 𑀦𑀺𑀯𑀢𑁆𑀢𑀦𑁂𑀦 𑀲𑀢𑁆𑀢𑀸𑀦𑀁 𑀪𑀬𑀁 𑀳𑀺𑀁𑀲𑀢𑀻𑀢𑀺 𑀩𑀼𑀤𑁆𑀥𑁄, 𑀪𑀯𑀓𑀦𑁆𑀢𑀸𑀭𑀸 𑀉𑀢𑁆𑀢𑀸𑀭𑀡𑁂𑀦 𑀮𑁄𑀓𑀲𑁆𑀲 𑀅𑀲𑁆𑀲𑀸𑀲𑀤𑀸𑀦𑁂𑀦 𑀘 𑀥𑀫𑁆𑀫𑁄, 𑀅𑀧𑁆𑀧𑀓𑀸𑀦𑀫𑁆𑀧𑀺 𑀓𑀸𑀭𑀸𑀦𑀁 𑀯𑀺𑀧𑀼𑀮𑀨𑀮𑀧𑀝𑀺𑀮𑀸𑀪𑀓𑀭𑀡𑁂𑀦 𑀲𑀗𑁆𑀖𑁄. 𑀢𑀲𑁆𑀫𑀸 𑀇𑀫𑀺𑀦𑀸𑀧𑀺 𑀧𑀭𑀺𑀬𑀸𑀬𑁂𑀦 𑀭𑀢𑀦𑀢𑁆𑀢𑀬𑀁 𑀲𑀭𑀡𑀁. 𑀢𑀧𑁆𑀧𑀲𑀸𑀤𑀢𑀕𑁆𑀕𑀭𑀼𑀢𑀸𑀳𑀺 𑀯𑀺𑀳𑀢𑀓𑀺𑀮𑁂𑀲𑁄 𑀢𑀧𑁆𑀧𑀭𑀸𑀬𑀡𑀢𑀸𑀓𑀸𑀭𑀧𑁆𑀧𑀯𑀢𑁆𑀢𑁄 𑀘𑀺𑀢𑁆𑀢𑀼𑀧𑁆𑀧𑀸𑀤𑁄 𑀲𑀭𑀡𑀕𑀫𑀦𑀁. 𑀢𑀁𑀲𑀫𑀗𑁆𑀕𑀻𑀲𑀢𑁆𑀢𑁄 𑀲𑀭𑀡𑀁 𑀕𑀘𑁆𑀙𑀢𑀺, 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦 𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀦 ‘‘𑀏𑀢𑀸𑀦𑀺 𑀫𑁂 𑀢𑀻𑀡𑀺 𑀭𑀢𑀦𑀸𑀦𑀺 𑀲𑀭𑀡𑀁, 𑀏𑀢𑀸𑀦𑀺 𑀧𑀭𑀸𑀬𑀡’’𑀦𑁆𑀢𑀺 𑀏𑀯𑀁 𑀉𑀧𑁂𑀢𑀻𑀢𑀺 𑀅𑀢𑁆𑀣𑁄. 𑀏𑀯𑀁 𑀢𑀸𑀯 𑀲𑀭𑀡𑀁 𑀲𑀭𑀡𑀕𑀫𑀦𑀁 𑀬𑁄 𑀘 𑀲𑀭𑀡𑀁 𑀕𑀘𑁆𑀙𑀢𑀺 𑀇𑀤𑀁 𑀢𑀬𑀁 𑀯𑁂𑀤𑀺𑀢𑀩𑁆𑀩𑀁.

𑀲𑀭𑀡𑀕𑀫𑀦𑀧𑁆𑀧𑀪𑁂𑀤𑁂 𑀧𑀦 𑀤𑀼𑀯𑀺𑀥𑀁 𑀲𑀭𑀡𑀕𑀫𑀦𑀁 𑀮𑁄𑀓𑀼𑀢𑁆𑀢𑀭𑀁 𑀮𑁄𑀓𑀺𑀬𑀜𑁆𑀘𑀸𑀢𑀺. 𑀢𑀢𑁆𑀣 𑀮𑁄𑀓𑀼𑀢𑁆𑀢𑀭𑀁 𑀤𑀺𑀝𑁆𑀞𑀲𑀘𑁆𑀘𑀸𑀦𑀁 𑀫𑀕𑁆𑀕𑀓𑁆𑀔𑀡𑁂 𑀲𑀭𑀡𑀕𑀫𑀦𑀼𑀧𑀓𑁆𑀓𑀺𑀮𑁂𑀲𑀲𑀫𑀼𑀘𑁆𑀙𑁂𑀤𑁂𑀦 𑀆𑀭𑀫𑁆𑀫𑀡𑀢𑁄 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀁 𑀳𑀼𑀢𑁆𑀯𑀸 𑀓𑀺𑀘𑁆𑀘𑀢𑁄 𑀲𑀓𑀮𑁂𑀧𑀺 𑀭𑀢𑀦𑀢𑁆𑀢𑀬𑁂 𑀇𑀚𑁆𑀛𑀢𑀺. 𑀮𑁄𑀓𑀺𑀬𑀁 𑀧𑀼𑀣𑀼𑀚𑁆𑀚𑀦𑀸𑀦𑀁 𑀲𑀭𑀡𑀕𑀫𑀦𑀼𑀧𑀓𑁆𑀓𑀺𑀮𑁂𑀲𑀯𑀺𑀓𑁆𑀔𑀫𑁆𑀪𑀦𑁂𑀦 𑀆𑀭𑀫𑁆𑀫𑀡𑀢𑁄 𑀩𑀼𑀤𑁆𑀥𑀸𑀤𑀺𑀕𑀼𑀡𑀸𑀭𑀫𑁆𑀫𑀡𑀁 𑀳𑀼𑀢𑁆𑀯𑀸 𑀇𑀚𑁆𑀛𑀢𑀺. 𑀢𑀁 𑀅𑀢𑁆𑀣𑀢𑁄 𑀩𑀼𑀤𑁆𑀥𑀸𑀤𑀻𑀲𑀼 𑀯𑀢𑁆𑀣𑀽𑀲𑀼 𑀲𑀤𑁆𑀥𑀸𑀧𑀝𑀺𑀮𑀸𑀪𑁄, 𑀲𑀤𑁆𑀥𑀸𑀫𑀽𑀮𑀺𑀓𑀸 𑀘 𑀲𑀫𑁆𑀫𑀸𑀤𑀺𑀝𑁆𑀞𑀺 𑀤𑀲𑀲𑀼 𑀧𑀼𑀜𑁆𑀜𑀓𑀺𑀭𑀺𑀬𑀸𑀯𑀢𑁆𑀣𑀽𑀲𑀼 𑀤𑀺𑀝𑁆𑀞𑀺𑀚𑀼𑀓𑀫𑁆𑀫𑀦𑁆𑀢𑀺 𑀯𑀼𑀘𑁆𑀘𑀢𑀺.

𑀢𑀬𑀺𑀤𑀁 𑀘𑀢𑀼𑀥𑀸 𑀧𑀯𑀢𑁆𑀢𑀢𑀺 𑀅𑀢𑁆𑀢𑀲𑀦𑁆𑀦𑀺𑀬𑁆𑀬𑀸𑀢𑀦𑁂𑀦 𑀢𑀧𑁆𑀧𑀭𑀸𑀬𑀡𑀢𑀸𑀬 𑀲𑀺𑀲𑁆𑀲𑀪𑀸𑀯𑀽𑀧𑀕𑀫𑀦𑁂𑀦 𑀧𑀡𑀺𑀧𑀸𑀢𑁂𑀦𑀸𑀢𑀺. 𑀢𑀢𑁆𑀣 𑀅𑀢𑁆𑀢𑀲𑀦𑁆𑀦𑀺𑀬𑁆𑀬𑀸𑀢𑀦𑀁 𑀦𑀸𑀫 ‘‘𑀅𑀚𑁆𑀚 𑀆𑀤𑀺𑀁 𑀓𑀢𑁆𑀯𑀸 𑀅𑀳𑀁 𑀅𑀢𑁆𑀢𑀸𑀦𑀁 𑀩𑀼𑀤𑁆𑀥𑀲𑁆𑀲 𑀦𑀺𑀬𑁆𑀬𑀸𑀢𑁂𑀫𑀺, 𑀥𑀫𑁆𑀫𑀲𑁆𑀲, 𑀲𑀗𑁆𑀖𑀲𑁆𑀲𑀸’’𑀢𑀺 𑀏𑀯𑀁 𑀩𑀼𑀤𑁆𑀥𑀸𑀤𑀻𑀦𑀁 𑀅𑀢𑁆𑀢𑀧𑀭𑀺𑀘𑁆𑀘𑀚𑀦𑀁. 𑀢𑀧𑁆𑀧𑀭𑀸𑀬𑀡𑀢𑀸 𑀦𑀸𑀫 ‘‘𑀅𑀚𑁆𑀚 𑀆𑀤𑀺𑀁 𑀓𑀢𑁆𑀯𑀸 𑀅𑀳𑀁 𑀩𑀼𑀤𑁆𑀥𑀧𑀭𑀸𑀬𑀡𑁄, 𑀥𑀫𑁆𑀫𑀧𑀭𑀸𑀬𑀡𑁄, 𑀲𑀗𑁆𑀖𑀧𑀭𑀸𑀬𑀡𑁄 𑀇𑀢𑀺 𑀫𑀁 𑀥𑀸𑀭𑁂𑀣𑀸’’𑀢𑀺 𑀏𑀯𑀁 𑀢𑀧𑁆𑀧𑀭𑀸𑀬𑀡𑀪𑀸𑀯𑁄. 𑀲𑀺𑀲𑁆𑀲𑀪𑀸𑀯𑀽𑀧𑀕𑀫𑀦𑀁 𑀦𑀸𑀫 ‘‘𑀅𑀚𑁆𑀚 𑀆𑀤𑀺𑀁 𑀓𑀢𑁆𑀯𑀸 𑀅𑀳𑀁 𑀩𑀼𑀤𑁆𑀥𑀲𑁆𑀲 𑀅𑀦𑁆𑀢𑁂𑀯𑀸𑀲𑀺𑀓𑁄, 𑀥𑀫𑁆𑀫𑀲𑁆𑀲, 𑀲𑀗𑁆𑀖𑀲𑁆𑀲 𑀇𑀢𑀺 𑀫𑀁 𑀥𑀸𑀭𑁂𑀣𑀸’’𑀢𑀺 𑀏𑀯𑀁 𑀲𑀺𑀲𑁆𑀲𑀪𑀸𑀯𑀽𑀧𑀕𑀫𑁄. 𑀧𑀡𑀺𑀧𑀸𑀢𑁄 𑀦𑀸𑀫 ‘‘𑀅𑀚𑁆𑀚 𑀆𑀤𑀺𑀁 𑀓𑀢𑁆𑀯𑀸 𑀅𑀳𑀁 𑀅𑀪𑀺𑀯𑀸𑀤𑀦-𑀧𑀘𑁆𑀘𑀼𑀝𑁆𑀞𑀸𑀦-𑀅𑀜𑁆𑀚𑀮𑀺𑀓𑀫𑁆𑀫-𑀲𑀸𑀫𑀻𑀘𑀺𑀓𑀫𑁆𑀫𑀁 𑀩𑀼𑀤𑁆𑀥𑀸𑀤𑀻𑀦𑀁𑀬𑁂𑀯 𑀢𑀺𑀡𑁆𑀡𑀁 𑀯𑀢𑁆𑀣𑀽𑀦𑀁 𑀓𑀭𑁄𑀫𑀺 𑀇𑀢𑀺 𑀫𑀁 𑀥𑀸𑀭𑁂𑀣𑀸’’𑀢𑀺 𑀏𑀯𑀁 𑀩𑀼𑀤𑁆𑀥𑀸𑀤𑀻𑀲𑀼 𑀧𑀭𑀫𑀦𑀺𑀧𑀘𑁆𑀘𑀓𑀸𑀭𑁄. 𑀇𑀫𑁂𑀲𑀜𑁆𑀳𑀺 𑀘𑀢𑀼𑀦𑁆𑀦𑀫𑁆𑀧𑀺 𑀆𑀓𑀸𑀭𑀸𑀦𑀁 𑀅𑀜𑁆𑀜𑀢𑀭𑀫𑁆𑀧𑀺 𑀓𑀭𑁄𑀦𑁆𑀢𑁂𑀦 𑀕𑀳𑀺𑀢𑀁𑀬𑁂𑀯 𑀳𑁄𑀢𑀺 𑀲𑀭𑀡𑀕𑀫𑀦𑀁.

𑀅𑀧𑀺𑀘 ‘‘𑀪𑀕𑀯𑀢𑁄 𑀅𑀢𑁆𑀢𑀸𑀦𑀁 𑀧𑀭𑀺𑀘𑁆𑀘𑀚𑀸𑀫𑀺, 𑀥𑀫𑁆𑀫𑀲𑁆𑀲, 𑀲𑀗𑁆𑀖𑀲𑁆𑀲 𑀅𑀢𑁆𑀢𑀸𑀦𑀁 𑀧𑀭𑀺𑀘𑁆𑀘𑀚𑀸𑀫𑀺, 𑀚𑀻𑀯𑀺𑀢𑀁 𑀧𑀭𑀺𑀘𑁆𑀘𑀚𑀸𑀫𑀺, 𑀧𑀭𑀺𑀘𑁆𑀘𑀢𑁆𑀢𑁄𑀬𑁂𑀯 𑀫𑁂 𑀅𑀢𑁆𑀢𑀸, 𑀧𑀭𑀺𑀘𑁆𑀘𑀢𑁆𑀢𑀁𑀬𑁂𑀯 𑀫𑁂 𑀚𑀻𑀯𑀺𑀢𑀁, 𑀚𑀻𑀯𑀺𑀢𑀧𑀭𑀺𑀬𑀦𑁆𑀢𑀺𑀓𑀁 𑀩𑀼𑀤𑁆𑀥𑀁 𑀲𑀭𑀡𑀁 𑀕𑀘𑁆𑀙𑀸𑀫𑀺, 𑀩𑀼𑀤𑁆𑀥𑁄 𑀫𑁂 𑀲𑀭𑀡𑀁 𑀮𑁂𑀡𑀁 𑀢𑀸𑀡’’𑀦𑁆𑀢𑀺 𑀏𑀯𑀫𑁆𑀧𑀺 𑀅𑀢𑁆𑀢𑀲𑀦𑁆𑀦𑀺𑀬𑁆𑀬𑀸𑀢𑀦𑀁 𑀯𑁂𑀤𑀺𑀢𑀩𑁆𑀩𑀁. ‘‘𑀲𑀢𑁆𑀣𑀸𑀭𑀜𑁆𑀘 𑀯𑀢𑀸𑀳𑀁 𑀧𑀲𑁆𑀲𑁂𑀬𑁆𑀬𑀁, 𑀪𑀕𑀯𑀦𑁆𑀢𑀫𑁂𑀯 𑀧𑀲𑁆𑀲𑁂𑀬𑁆𑀬𑀁, 𑀲𑀼𑀕𑀢𑀜𑁆𑀘 𑀯𑀢𑀸𑀳𑀁 𑀧𑀲𑁆𑀲𑁂𑀬𑁆𑀬𑀁, 𑀪𑀕𑀯𑀦𑁆𑀢𑀫𑁂𑀯 𑀧𑀲𑁆𑀲𑁂𑀬𑁆𑀬𑀁, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀜𑁆𑀘 𑀯𑀢𑀸𑀳𑀁 𑀧𑀲𑁆𑀲𑁂𑀬𑁆𑀬𑀁, 𑀪𑀕𑀯𑀦𑁆𑀢𑀫𑁂𑀯 𑀧𑀲𑁆𑀲𑁂𑀬𑁆𑀬’’𑀦𑁆𑀢𑀺 (𑀲𑀁. 𑀦𑀺. 𑁨.𑁧𑁫𑁪) 𑀏𑀯𑀫𑁆𑀧𑀺 𑀫𑀳𑀸𑀓𑀲𑁆𑀲𑀧𑀲𑁆𑀲 𑀲𑀭𑀡𑀕𑀫𑀦𑁂 𑀯𑀺𑀬 𑀲𑀺𑀲𑁆𑀲𑀪𑀸𑀯𑀽𑀧𑀕𑀫𑀦𑀁 𑀤𑀝𑁆𑀞𑀩𑁆𑀩𑀁.

‘‘𑀲𑁄 𑀅𑀳𑀁 𑀯𑀺𑀘𑀭𑀺𑀲𑁆𑀲𑀸𑀫𑀺, 𑀕𑀸𑀫𑀸 𑀕𑀸𑀫𑀁 𑀧𑀼𑀭𑀸 𑀧𑀼𑀭𑀁;

𑀦𑀫𑀲𑁆𑀲𑀫𑀸𑀦𑁄 𑀲𑀫𑁆𑀩𑀼𑀤𑁆𑀥𑀁, 𑀥𑀫𑁆𑀫𑀲𑁆𑀲 𑀘 𑀲𑀼𑀥𑀫𑁆𑀫𑀢’’𑀦𑁆𑀢𑀺. (𑀲𑀼. 𑀦𑀺. 𑁧𑁯𑁪; 𑀲𑀁. 𑀦𑀺. 𑁧.𑁨𑁪𑁬);

𑀏𑀯𑀫𑁆𑀧𑀺 𑀆𑀴𑀯𑀓𑀸𑀤𑀻𑀦𑀁 𑀲𑀭𑀡𑀕𑀫𑀦𑀁 𑀯𑀺𑀬 𑀢𑀧𑁆𑀧𑀭𑀸𑀬𑀡𑀢𑀸 𑀯𑁂𑀤𑀺𑀢𑀩𑁆𑀩𑀸. ‘‘𑀅𑀣 𑀔𑁄 𑀩𑁆𑀭𑀳𑁆𑀫𑀸𑀬𑀼 𑀩𑁆𑀭𑀸𑀳𑁆𑀫𑀡𑁄 𑀉𑀝𑁆𑀞𑀸𑀬𑀸𑀲𑀦𑀸 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸 𑀪𑀕𑀯𑀢𑁄 𑀧𑀸𑀤𑁂𑀲𑀼 𑀲𑀺𑀭𑀲𑀸 𑀦𑀺𑀧𑀢𑀺𑀢𑁆𑀯𑀸 𑀪𑀕𑀯𑀢𑁄 𑀧𑀸𑀤𑀸𑀦𑀺 𑀫𑀼𑀔𑁂𑀦 𑀘 𑀧𑀭𑀺𑀘𑀼𑀫𑁆𑀩𑀢𑀺, 𑀧𑀸𑀡𑀻𑀳𑀺 𑀘 𑀧𑀭𑀺𑀲𑀫𑁆𑀩𑀸𑀳𑀢𑀺, 𑀦𑀸𑀫𑀜𑁆𑀘 𑀲𑀸𑀯𑁂𑀢𑀺 𑁋 ‘𑀩𑁆𑀭𑀳𑁆𑀫𑀸𑀬𑀼 𑀅𑀳𑀁, 𑀪𑁄 𑀕𑁄𑀢𑀫, 𑀩𑁆𑀭𑀸𑀳𑁆𑀫𑀡𑁄; 𑀩𑁆𑀭𑀳𑁆𑀫𑀸𑀬𑀼 𑀅𑀳𑀁, 𑀪𑁄 𑀕𑁄𑀢𑀫, 𑀩𑁆𑀭𑀸𑀳𑁆𑀫𑀡𑁄’’’𑀢𑀺 (𑀫. 𑀦𑀺. 𑁨.𑁩𑁯𑁪) 𑀏𑀯𑀫𑁆𑀧𑀺 𑀧𑀡𑀺𑀧𑀸𑀢𑁄 𑀯𑁂𑀤𑀺𑀢𑀩𑁆𑀩𑁄.

𑀲𑁄 𑀧𑀦𑁂𑀲 𑀜𑀸𑀢𑀺𑀪𑀬𑀸𑀘𑀭𑀺𑀬𑀤𑀓𑁆𑀔𑀺𑀡𑁂𑀬𑁆𑀬𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑁄 𑀳𑁄𑀢𑀺. 𑀢𑀢𑁆𑀣 𑀤𑀓𑁆𑀔𑀺𑀡𑁂𑀬𑁆𑀬𑀧𑀡𑀺𑀧𑀸𑀢𑁂𑀦 𑀲𑀭𑀡𑀕𑀫𑀦𑀁 𑀳𑁄𑀢𑀺, 𑀦 𑀇𑀢𑀭𑁂𑀳𑀺. 𑀲𑁂𑀝𑁆𑀞𑀯𑀲𑁂𑀦𑁂𑀯 𑀳𑀺 𑀲𑀭𑀡𑀁 𑀕𑀡𑁆𑀳𑀸𑀢𑀺, 𑀲𑁂𑀝𑁆𑀞𑀯𑀲𑁂𑀦 𑀘 𑀪𑀺𑀚𑁆𑀚𑀢𑀺. 𑀢𑀲𑁆𑀫𑀸 𑀬𑁄 𑀲𑀸𑀓𑀺𑀬𑁄 𑀯𑀸 𑀓𑁄𑀮𑀺𑀬𑁄 𑀯𑀸 ‘‘𑀩𑀼𑀤𑁆𑀥𑁄 𑀅𑀫𑁆𑀳𑀸𑀓𑀁 𑀜𑀸𑀢𑀓𑁄’’𑀢𑀺 𑀯𑀦𑁆𑀤𑀢𑀺, 𑀅𑀕𑁆𑀕𑀳𑀺𑀢𑀫𑁂𑀯 𑀳𑁄𑀢𑀺 𑀲𑀭𑀡𑀁. 𑀬𑁄 𑀯𑀸 ‘‘𑀲𑀫𑀡𑁄 𑀕𑁄𑀢𑀫𑁄 𑀭𑀸𑀚𑀧𑀽𑀚𑀺𑀢𑁄 𑀫𑀳𑀸𑀦𑀼𑀪𑀸𑀯𑁄 𑀅𑀯𑀦𑁆𑀤𑀺𑀬𑀫𑀸𑀦𑁄 𑀅𑀦𑀢𑁆𑀣𑀫𑁆𑀧𑀺 𑀓𑀭𑁂𑀬𑁆𑀬𑀸’’𑀢𑀺 𑀪𑀬𑁂𑀦 𑀯𑀦𑁆𑀤𑀢𑀺, 𑀅𑀕𑁆𑀕𑀳𑀺𑀢𑀫𑁂𑀯 𑀳𑁄𑀢𑀺 𑀲𑀭𑀡𑀁. 𑀬𑁄 𑀯𑀸 𑀩𑁄𑀥𑀺𑀲𑀢𑁆𑀢𑀓𑀸𑀮𑁂 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀓𑀺𑀜𑁆𑀘𑀺 𑀉𑀕𑁆𑀕𑀳𑀺𑀢𑀁 𑀲𑀭𑀫𑀸𑀦𑁄 𑀩𑀼𑀤𑁆𑀥𑀓𑀸𑀮𑁂 𑀯𑀸 𑁋

‘‘𑀏𑀓𑁂𑀦 𑀪𑁄𑀕𑁂 𑀪𑀼𑀜𑁆𑀚𑁂𑀬𑁆𑀬, 𑀤𑁆𑀯𑀻𑀳𑀺 𑀓𑀫𑁆𑀫𑀁 𑀧𑀬𑁄𑀚𑀬𑁂;

𑀘𑀢𑀼𑀢𑁆𑀣𑀜𑁆𑀘 𑀦𑀺𑀥𑀸𑀧𑁂𑀬𑁆𑀬, 𑀆𑀧𑀤𑀸𑀲𑀼 𑀪𑀯𑀺𑀲𑁆𑀲𑀢𑀻’’𑀢𑀺. (𑀤𑀻. 𑀦𑀺. 𑁩.𑁨𑁬𑁫) 𑁋

𑀏𑀯𑀭𑀽𑀧𑀁 𑀅𑀦𑀼𑀲𑀸𑀲𑀦𑀺𑀁 𑀉𑀕𑁆𑀕𑀳𑁂𑀢𑁆𑀯𑀸 ‘‘𑀆𑀘𑀭𑀺𑀬𑁄 𑀫𑁂’’𑀢𑀺 𑀯𑀦𑁆𑀤𑀢𑀺, 𑀅𑀕𑁆𑀕𑀳𑀺𑀢𑀫𑁂𑀯 𑀳𑁄𑀢𑀺 𑀲𑀭𑀡𑀁. 𑀬𑁄 𑀧𑀦 ‘‘𑀅𑀬𑀁 𑀮𑁄𑀓𑁂 𑀅𑀕𑁆𑀕𑀤𑀓𑁆𑀔𑀺𑀡𑁂𑀬𑁆𑀬𑁄’’𑀢𑀺 𑀯𑀦𑁆𑀤𑀢𑀺, 𑀢𑁂𑀦𑁂𑀯 𑀕𑀳𑀺𑀢𑀁 𑀳𑁄𑀢𑀺 𑀲𑀭𑀡𑀁.

𑀏𑀯𑀁 𑀕𑀳𑀺𑀢𑀲𑀭𑀡𑀲𑁆𑀲 𑀘 𑀉𑀧𑀸𑀲𑀓𑀲𑁆𑀲 𑀯𑀸 𑀉𑀧𑀸𑀲𑀺𑀓𑀸𑀬 𑀯𑀸 𑀅𑀜𑁆𑀜𑀢𑀺𑀢𑁆𑀣𑀺𑀬𑁂𑀲𑀼 𑀧𑀩𑁆𑀩𑀚𑀺𑀢𑀫𑁆𑀧𑀺 𑀜𑀸𑀢𑀺𑀁 ‘‘𑀜𑀸𑀢𑀓𑁄 𑀫𑁂 𑀅𑀬’’𑀦𑁆𑀢𑀺 𑀯𑀦𑁆𑀤𑀢𑁄 𑀲𑀭𑀡𑀕𑀫𑀦𑀁 𑀦 𑀪𑀺𑀚𑁆𑀚𑀢𑀺, 𑀧𑀕𑁂𑀯 𑀅𑀧𑀩𑁆𑀩𑀚𑀺𑀢𑀁. 𑀢𑀣𑀸 𑀭𑀸𑀚𑀸𑀦𑀁 𑀪𑀬𑀯𑀲𑁂𑀦 𑀯𑀦𑁆𑀤𑀢𑁄. 𑀲𑁄 𑀳𑀺 𑀭𑀝𑁆𑀞𑀧𑀽𑀚𑀺𑀢𑀢𑁆𑀢𑀸 𑀅𑀯𑀦𑁆𑀤𑀺𑀬𑀫𑀸𑀦𑁄 𑀅𑀦𑀢𑁆𑀣𑀫𑁆𑀧𑀺 𑀓𑀭𑁂𑀬𑁆𑀬𑀸𑀢𑀺. 𑀢𑀣𑀸 𑀬𑀁 𑀓𑀺𑀜𑁆𑀘𑀺 𑀲𑀺𑀧𑁆𑀧𑀁 𑀲𑀺𑀓𑁆𑀔𑀸𑀧𑀓𑀁 𑀢𑀺𑀢𑁆𑀣𑀺𑀬𑀁 ‘‘𑀆𑀘𑀭𑀺𑀬𑁄 𑀫𑁂 𑀅𑀬’’𑀦𑁆𑀢𑀺 𑀯𑀦𑁆𑀤𑀢𑁄𑀧𑀺 𑀦 𑀪𑀺𑀚𑁆𑀚𑀢𑀻𑀢𑀺 𑀏𑀯𑀁 𑀲𑀭𑀡𑀕𑀫𑀦𑀧𑁆𑀧𑀪𑁂𑀤𑁄 𑀯𑁂𑀤𑀺𑀢𑀩𑁆𑀩𑁄.

𑀏𑀢𑁆𑀣 𑀘 𑀮𑁄𑀓𑀼𑀢𑁆𑀢𑀭𑀲𑁆𑀲 𑀲𑀭𑀡𑀕𑀫𑀦𑀲𑁆𑀲 𑀘𑀢𑁆𑀢𑀸𑀭𑀺 𑀲𑀸𑀫𑀜𑁆𑀜𑀨𑀮𑀸𑀦𑀺 𑀯𑀺𑀧𑀸𑀓𑀨𑀮𑀁, 𑀲𑀩𑁆𑀩𑀤𑀼𑀓𑁆𑀔𑀓𑁆𑀔𑀬𑁄 𑀆𑀦𑀺𑀲𑀁𑀲𑀨𑀮𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀬𑁄 𑀘 𑀩𑀼𑀤𑁆𑀥𑀜𑁆𑀘 𑀥𑀫𑁆𑀫𑀜𑁆𑀘, 𑀲𑀗𑁆𑀖𑀜𑁆𑀘 𑀲𑀭𑀡𑀁 𑀕𑀢𑁄;

𑀘𑀢𑁆𑀢𑀸𑀭𑀺 𑀅𑀭𑀺𑀬𑀲𑀘𑁆𑀘𑀸𑀦𑀺, 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀧𑀲𑁆𑀲𑀢𑀺. (𑀥. 𑀧. 𑁧𑁯𑁦);

‘‘𑀤𑀼𑀓𑁆𑀔𑀁 𑀤𑀼𑀓𑁆𑀔𑀲𑀫𑀼𑀧𑁆𑀧𑀸𑀤𑀁, 𑀤𑀼𑀓𑁆𑀔𑀲𑁆𑀲 𑀘 𑀅𑀢𑀺𑀓𑁆𑀓𑀫𑀁;

𑀅𑀭𑀺𑀬𑀜𑁆𑀘𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁, 𑀤𑀼𑀓𑁆𑀔𑀽𑀧𑀲𑀫𑀕𑀸𑀫𑀺𑀦𑀁. (𑀥. 𑀧. 𑁧𑁯𑁧);

‘‘𑀏𑀢𑀁 𑀔𑁄 𑀲𑀭𑀡𑀁 𑀔𑁂𑀫𑀁, 𑀏𑀢𑀁 𑀲𑀭𑀡𑀫𑀼𑀢𑁆𑀢𑀫𑀁;

𑀏𑀢𑀁 𑀲𑀭𑀡𑀫𑀸𑀕𑀫𑁆𑀫, 𑀲𑀩𑁆𑀩𑀤𑀼𑀓𑁆𑀔𑀸 𑀧𑀫𑀼𑀘𑁆𑀘𑀢𑀻’’𑀢𑀺. (𑀥. 𑀧. 𑁧𑁯𑁨);

𑀅𑀧𑀺𑀘 𑀦𑀺𑀘𑁆𑀘𑀢𑁄 𑀅𑀦𑀼𑀧𑀕𑀫𑀦𑀸𑀤𑀺𑀯𑀲𑁂𑀦𑀧𑁂𑀢𑀲𑁆𑀲 𑀆𑀦𑀺𑀲𑀁𑀲𑀨𑀮𑀁 𑀯𑁂𑀤𑀺𑀢𑀩𑁆𑀩𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀅𑀝𑁆𑀞𑀸𑀦𑀫𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀦𑀯𑀓𑀸𑀲𑁄, 𑀬𑀁 𑀤𑀺𑀝𑁆𑀞𑀺𑀲𑀫𑁆𑀧𑀦𑁆𑀦𑁄 𑀧𑀼𑀕𑁆𑀕𑀮𑁄 𑀓𑀜𑁆𑀘𑀺 𑀲𑀗𑁆𑀔𑀸𑀭𑀁 𑀦𑀺𑀘𑁆𑀘𑀢𑁄 𑀉𑀧𑀕𑀘𑁆𑀙𑁂𑀬𑁆𑀬, 𑀲𑀼𑀔𑀢𑁄 𑀉𑀧𑀕𑀘𑁆𑀙𑁂𑀬𑁆𑀬, 𑀓𑀜𑁆𑀘𑀺 𑀥𑀫𑁆𑀫𑀁 𑀅𑀢𑁆𑀢𑀢𑁄 𑀉𑀧𑀕𑀘𑁆𑀙𑁂𑀬𑁆𑀬, 𑀫𑀸𑀢𑀭𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀬𑁆𑀬, 𑀧𑀺𑀢𑀭𑀁, 𑀅𑀭𑀳𑀦𑁆𑀢𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀬𑁆𑀬, 𑀧𑀤𑀼𑀝𑁆𑀞𑀘𑀺𑀢𑁆𑀢𑁄 𑀢𑀣𑀸𑀕𑀢𑀲𑁆𑀲 𑀮𑁄𑀳𑀺𑀢𑀁 𑀉𑀧𑁆𑀧𑀸𑀤𑁂𑀬𑁆𑀬, 𑀲𑀗𑁆𑀖𑀁 𑀪𑀺𑀦𑁆𑀤𑁂𑀬𑁆𑀬, 𑀅𑀜𑁆𑀜𑀁 𑀲𑀢𑁆𑀣𑀸𑀭𑀁 𑀉𑀤𑁆𑀤𑀺𑀲𑁂𑀬𑁆𑀬, 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀻’’𑀢𑀺 (𑀫. 𑀦𑀺. 𑁩.𑁧𑁨𑁮-𑁧𑁩𑁦; 𑀅. 𑀦𑀺. 𑁧.𑁨𑁭𑁨-𑁨𑁭𑁭).

𑀮𑁄𑀓𑀺𑀬𑀲𑁆𑀲 𑀧𑀦 𑀲𑀭𑀡𑀕𑀫𑀦𑀲𑁆𑀲 𑀪𑀯𑀲𑀫𑁆𑀧𑀤𑀸𑀧𑀺 𑀪𑁄𑀕𑀲𑀫𑁆𑀧𑀤𑀸𑀧𑀺 𑀨𑀮𑀫𑁂𑀯. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀬𑁂 𑀓𑁂𑀘𑀺 𑀩𑀼𑀤𑁆𑀥𑀁 𑀲𑀭𑀡𑀁 𑀕𑀢𑀸𑀲𑁂,

𑀦 𑀢𑁂 𑀕𑀫𑀺𑀲𑁆𑀲𑀦𑁆𑀢𑀺 𑀅𑀧𑀸𑀬𑀪𑀽𑀫𑀺𑀁;

𑀧𑀳𑀸𑀬 𑀫𑀸𑀦𑀼𑀲𑀁 𑀤𑁂𑀳𑀁,

𑀤𑁂𑀯𑀓𑀸𑀬𑀁 𑀧𑀭𑀺𑀧𑀽𑀭𑁂𑀲𑁆𑀲𑀦𑁆𑀢𑀻’’𑀢𑀺. (𑀲𑀁. 𑀦𑀺. 𑁧.𑁩𑁭);

𑀅𑀧𑀭𑀫𑁆𑀧𑀺 𑀯𑀼𑀢𑁆𑀢𑀁 𑁋

‘‘𑀅𑀣 𑀔𑁄 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀅𑀲𑀻𑀢𑀺𑀬𑀸 𑀤𑁂𑀯𑀢𑀸𑀲𑀳𑀲𑁆𑀲𑁂𑀳𑀺 𑀲𑀤𑁆𑀥𑀺𑀁 𑀬𑁂𑀦𑀸𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀢𑁂𑀦𑀼𑀧𑀲𑀗𑁆𑀓𑀫𑀺…𑀧𑁂… 𑀏𑀓𑀫𑀦𑁆𑀢𑀁 𑀞𑀺𑀢𑀁 𑀔𑁄 𑀲𑀓𑁆𑀓𑀁 𑀤𑁂𑀯𑀸𑀦𑀫𑀺𑀦𑁆𑀤𑀁 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀏𑀢𑀤𑀯𑁄𑀘 𑁋 ‘𑀲𑀸𑀥𑀼 𑀔𑁄, 𑀤𑁂𑀯𑀸𑀦𑀫𑀺𑀦𑁆𑀤, 𑀩𑀼𑀤𑁆𑀥𑀲𑀭𑀡𑀕𑀫𑀦𑀁 𑀳𑁄𑀢𑀺. 𑀩𑀼𑀤𑁆𑀥𑀲𑀭𑀡𑀕𑀫𑀦𑀳𑁂𑀢𑀼 𑀔𑁄 𑀤𑁂𑀯𑀸𑀦𑀫𑀺𑀦𑁆𑀤 𑀏𑀯𑀫𑀺𑀥𑁂𑀓𑀘𑁆𑀘𑁂 𑀲𑀢𑁆𑀢𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑀦𑁆𑀢𑀺. 𑀢𑁂 𑀅𑀜𑁆𑀜𑁂 𑀤𑁂𑀯𑁂 𑀤𑀲𑀳𑀺 𑀞𑀸𑀦𑁂𑀳𑀺 𑀅𑀥𑀺𑀕𑀡𑁆𑀳𑀦𑁆𑀢𑀺 𑀤𑀺𑀩𑁆𑀩𑁂𑀦 𑀆𑀬𑀼𑀦𑀸 𑀤𑀺𑀩𑁆𑀩𑁂𑀦 𑀯𑀡𑁆𑀡𑁂𑀦 𑀲𑀼𑀔𑁂𑀦 𑀬𑀲𑁂𑀦 𑀆𑀥𑀺𑀧𑀢𑁂𑀬𑁆𑀬𑁂𑀦 𑀤𑀺𑀩𑁆𑀩𑁂𑀳𑀺 𑀭𑀽𑀧𑁂𑀳𑀺 𑀲𑀤𑁆𑀤𑁂𑀳𑀺 𑀕𑀦𑁆𑀥𑁂𑀳𑀺 𑀭𑀲𑁂𑀳𑀺 𑀨𑁄𑀝𑁆𑀞𑀩𑁆𑀩𑁂𑀳𑀻’’’𑀢𑀺 (𑀲𑀁. 𑀦𑀺. 𑁪.𑁩𑁪𑁧).

𑀏𑀲𑁂𑀯 𑀦𑀬𑁄 𑀥𑀫𑁆𑀫𑁂 𑀲𑀗𑁆𑀖𑁂 𑀘. 𑀅𑀧𑀺𑀘 𑀯𑁂𑀮𑀸𑀫𑀲𑀼𑀢𑁆𑀢𑀸𑀤𑀺𑀯𑀲𑁂𑀦𑀸𑀧𑀺 (𑀅. 𑀦𑀺. 𑁯.𑁨𑁦 𑀆𑀤𑀬𑁄) 𑀲𑀭𑀡𑀕𑀫𑀦𑀲𑁆𑀲 𑀨𑀮𑀯𑀺𑀲𑁂𑀲𑁄 𑀯𑁂𑀤𑀺𑀢𑀩𑁆𑀩𑁄. 𑀏𑀯𑀁 𑀲𑀭𑀡𑀕𑀫𑀦𑀨𑀮𑀁 𑀯𑁂𑀤𑀺𑀢𑀩𑁆𑀩𑀁.

𑀢𑀢𑁆𑀣 𑀮𑁄𑀓𑀺𑀬𑀲𑀭𑀡𑀕𑀫𑀦𑀁 𑀢𑀻𑀲𑀼 𑀯𑀢𑁆𑀣𑀽𑀲𑀼 𑀅𑀜𑁆𑀜𑀸𑀡𑀲𑀁𑀲𑀬𑀫𑀺𑀘𑁆𑀙𑀸𑀜𑀸𑀡𑀸𑀤𑀻𑀳𑀺 𑀲𑀁𑀓𑀺𑀮𑀺𑀲𑁆𑀲𑀢𑀺, 𑀦 𑀫𑀳𑀸𑀚𑀼𑀢𑀺𑀓𑀁 𑀳𑁄𑀢𑀺 𑀦 𑀫𑀳𑀸𑀯𑀺𑀧𑁆𑀨𑀸𑀭𑀁. 𑀮𑁄𑀓𑀼𑀢𑁆𑀢𑀭𑀲𑁆𑀲 𑀦𑀢𑁆𑀣𑀺 𑀲𑀁𑀓𑀺𑀮𑁂𑀲𑁄. 𑀮𑁄𑀓𑀺𑀬𑀲𑁆𑀲 𑀘 𑀲𑀭𑀡𑀕𑀫𑀦𑀲𑁆𑀲 𑀤𑀼𑀯𑀺𑀥𑁄 𑀪𑁂𑀤𑁄 𑀲𑀸𑀯𑀚𑁆𑀚𑁄 𑀅𑀦𑀯𑀚𑁆𑀚𑁄 𑀘. 𑀢𑀢𑁆𑀣 𑀲𑀸𑀯𑀚𑁆𑀚𑁄 𑀅𑀜𑁆𑀜𑀲𑀢𑁆𑀣𑀸𑀭𑀸𑀤𑀻𑀲𑀼 𑀅𑀢𑁆𑀢𑀲𑀦𑁆𑀦𑀺𑀬𑁆𑀬𑀸𑀢𑀦𑀸𑀤𑀻𑀳𑀺 𑀳𑁄𑀢𑀺, 𑀲𑁄 𑀅𑀦𑀺𑀝𑁆𑀞𑀨𑀮𑁄. 𑀅𑀦𑀯𑀚𑁆𑀚𑁄 𑀓𑀸𑀮𑀓𑀺𑀭𑀺𑀬𑀸𑀬, 𑀲𑁄 𑀅𑀯𑀺𑀧𑀸𑀓𑀢𑁆𑀢𑀸 𑀅𑀨𑀮𑁄. 𑀮𑁄𑀓𑀼𑀢𑁆𑀢𑀭𑀲𑁆𑀲 𑀧𑀦 𑀦𑁂𑀯𑀢𑁆𑀣𑀺 𑀪𑁂𑀤𑁄. 𑀪𑀯𑀦𑁆𑀢𑀭𑁂𑀧𑀺 𑀳𑀺 𑀅𑀭𑀺𑀬𑀲𑀸𑀯𑀓𑁄 𑀅𑀜𑁆𑀜𑀁 𑀲𑀢𑁆𑀣𑀸𑀭𑀁 𑀦 𑀉𑀤𑁆𑀤𑀺𑀲𑀢𑀻𑀢𑀺 𑀏𑀯𑀁 𑀲𑀭𑀡𑀕𑀫𑀦𑀲𑁆𑀲 𑀲𑀁𑀓𑀺𑀮𑁂𑀲𑁄 𑀘 𑀪𑁂𑀤𑁄 𑀘 𑀯𑁂𑀤𑀺𑀢𑀩𑁆𑀩𑁄.

𑀉𑀧𑀸𑀲𑀓𑀁 𑀫𑀁 𑀪𑀯𑀁 𑀕𑁄𑀢𑀫𑁄 𑀥𑀸𑀭𑁂𑀢𑀽𑀢𑀺 𑀫𑀁 𑀪𑀯𑀁 𑀕𑁄𑀢𑀫𑁄 ‘‘𑀉𑀧𑀸𑀲𑀓𑁄 𑀅𑀬’’𑀦𑁆𑀢𑀺 𑀏𑀯𑀁 𑀥𑀸𑀭𑁂𑀢𑀼, 𑀚𑀸𑀦𑀸𑀢𑀽𑀢𑀺 𑀅𑀢𑁆𑀣𑁄. 𑀉𑀧𑀸𑀲𑀓𑀯𑀺𑀥𑀺𑀓𑁄𑀲𑀮𑁆𑀮𑀢𑁆𑀣𑀁 𑀧𑀦𑁂𑀢𑁆𑀣 𑀓𑁄 𑀉𑀧𑀸𑀲𑀓𑁄, 𑀓𑀲𑁆𑀫𑀸 𑀉𑀧𑀸𑀲𑀓𑁄𑀢𑀺 𑀯𑀼𑀘𑁆𑀘𑀢𑀺, 𑀓𑀺𑀫𑀲𑁆𑀲 𑀲𑀻𑀮𑀁, 𑀓𑁄 𑀆𑀚𑀻𑀯𑁄, 𑀓𑀸 𑀯𑀺𑀧𑀢𑁆𑀢𑀺, 𑀓𑀸 𑀲𑀫𑁆𑀧𑀢𑁆𑀢𑀻𑀢𑀺 𑀇𑀤𑀁 𑀧𑀓𑀺𑀡𑁆𑀡𑀓𑀁 𑀯𑁂𑀤𑀺𑀢𑀩𑁆𑀩𑀁.

𑀢𑀢𑁆𑀣 𑀓𑁄 𑀉𑀧𑀸𑀲𑀓𑁄𑀢𑀺 𑀬𑁄 𑀓𑁄𑀘𑀺 𑀲𑀭𑀡𑀕𑀢𑁄 𑀕𑀳𑀝𑁆𑀞𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀬𑀢𑁄 𑀔𑁄, 𑀫𑀳𑀸𑀦𑀸𑀫, 𑀉𑀧𑀸𑀲𑀓𑁄 𑀩𑀼𑀤𑁆𑀥𑀁 𑀲𑀭𑀡𑀁 𑀕𑀢𑁄 𑀳𑁄𑀢𑀺, 𑀥𑀫𑁆𑀫𑀁 𑀲𑀭𑀡𑀁 𑀕𑀢𑁄, 𑀲𑀗𑁆𑀖𑀁 𑀲𑀭𑀡𑀁 𑀕𑀢𑁄 𑀳𑁄𑀢𑀺. 𑀏𑀢𑁆𑀢𑀸𑀯𑀢𑀸 𑀔𑁄, 𑀫𑀳𑀸𑀦𑀸𑀫, 𑀉𑀧𑀸𑀲𑀓𑁄 𑀳𑁄𑀢𑀻’’𑀢𑀺 (𑀲𑀁. 𑀦𑀺. 𑁫.𑁧𑁦𑁩𑁩).

𑀓𑀲𑁆𑀫𑀸 𑀉𑀧𑀸𑀲𑀓𑁄𑀢𑀺. 𑀭𑀢𑀦𑀢𑁆𑀢𑀬𑀲𑁆𑀲 𑀉𑀧𑀸𑀲𑀦𑀢𑁄. 𑀲𑁄 𑀳𑀺 𑀩𑀼𑀤𑁆𑀥𑀁 𑀉𑀧𑀸𑀲𑀢𑀻𑀢𑀺 𑀉𑀧𑀸𑀲𑀓𑁄. 𑀥𑀫𑁆𑀫𑀁, 𑀲𑀗𑁆𑀖𑀁 𑀉𑀧𑀸𑀲𑀢𑀻𑀢𑀺 𑀉𑀧𑀸𑀲𑀓𑁄𑀢𑀺.

𑀓𑀺𑀫𑀲𑁆𑀲 𑀲𑀻𑀮𑀦𑁆𑀢𑀺. 𑀧𑀜𑁆𑀘 𑀯𑁂𑀭𑀫𑀡𑀺𑀬𑁄. 𑀬𑀣𑀸𑀳 𑁋

‘‘𑀬𑀢𑁄 𑀔𑁄, 𑀫𑀳𑀸𑀦𑀸𑀫, 𑀉𑀧𑀸𑀲𑀓𑁄 𑀧𑀸𑀡𑀸𑀢𑀺𑀧𑀸𑀢𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀅𑀤𑀺𑀦𑁆𑀦𑀸𑀤𑀸𑀦𑀸, 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀸, 𑀫𑀼𑀲𑀸𑀯𑀸𑀤𑀸, 𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑁆𑀧𑀫𑀸𑀤𑀝𑁆𑀞𑀸𑀦𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺. 𑀏𑀢𑁆𑀢𑀸𑀯𑀢𑀸 𑀔𑁄, 𑀫𑀳𑀸𑀦𑀸𑀫, 𑀉𑀧𑀸𑀲𑀓𑁄 𑀲𑀻𑀮𑀯𑀸 𑀳𑁄𑀢𑀻’’𑀢𑀺 (𑀲𑀁. 𑀦𑀺. 𑁫.𑁧𑁦𑁩𑁩).

𑀓𑁄 𑀆𑀚𑀻𑀯𑁄𑀢𑀺. 𑀧𑀜𑁆𑀘 𑀫𑀺𑀘𑁆𑀙𑀸𑀯𑀡𑀺𑀚𑁆𑀚𑀸 𑀧𑀳𑀸𑀬 𑀥𑀫𑁆𑀫𑁂𑀦 𑀲𑀫𑁂𑀦 𑀚𑀻𑀯𑀺𑀓𑀓𑀧𑁆𑀧𑀦𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀧𑀜𑁆𑀘𑀺𑀫𑀸, 𑀪𑀺𑀓𑁆𑀔𑀯𑁂, 𑀯𑀡𑀺𑀚𑁆𑀚𑀸 𑀉𑀧𑀸𑀲𑀓𑁂𑀦 𑀅𑀓𑀭𑀡𑀻𑀬𑀸. 𑀓𑀢𑀫𑀸 𑀧𑀜𑁆𑀘. 𑀲𑀢𑁆𑀣𑀯𑀡𑀺𑀚𑁆𑀚𑀸, 𑀲𑀢𑁆𑀢𑀯𑀡𑀺𑀚𑁆𑀚𑀸, 𑀫𑀁𑀲𑀯𑀡𑀺𑀚𑁆𑀚𑀸, 𑀫𑀚𑁆𑀚𑀯𑀡𑀺𑀚𑁆𑀚𑀸, 𑀯𑀺𑀲𑀯𑀡𑀺𑀚𑁆𑀚𑀸. 𑀇𑀫𑀸 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘 𑀯𑀡𑀺𑀚𑁆𑀚𑀸 𑀉𑀧𑀸𑀲𑀓𑁂𑀦 𑀅𑀓𑀭𑀡𑀻𑀬𑀸’’𑀢𑀺 (𑀅. 𑀦𑀺. 𑁫.𑁧𑁭𑁭).

𑀓𑀸 𑀯𑀺𑀧𑀢𑁆𑀢𑀻𑀢𑀺. 𑀬𑀸 𑀢𑀲𑁆𑀲𑁂𑀯 𑀲𑀻𑀮𑀲𑁆𑀲 𑀘 𑀆𑀚𑀻𑀯𑀲𑁆𑀲 𑀘 𑀯𑀺𑀧𑀢𑁆𑀢𑀺, 𑀅𑀬𑀫𑀲𑁆𑀲 𑀯𑀺𑀧𑀢𑁆𑀢𑀺. 𑀅𑀧𑀺𑀘 𑀬𑀸𑀬 𑀏𑀲 𑀘𑀡𑁆𑀟𑀸𑀮𑁄 𑀘𑁂𑀯 𑀳𑁄𑀢𑀺 𑀫𑀮𑀜𑁆𑀘 𑀧𑀢𑀺𑀓𑀼𑀝𑁆𑀞𑁄 𑀘, 𑀲𑀸𑀧𑀺 𑀢𑀲𑁆𑀲 𑀯𑀺𑀧𑀢𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀢𑁂 𑀘 𑀅𑀢𑁆𑀣𑀢𑁄 𑀅𑀲𑁆𑀲𑀤𑁆𑀥𑀺𑀬𑀸𑀤𑀬𑁄 𑀧𑀜𑁆𑀘 𑀥𑀫𑁆𑀫𑀸 𑀳𑁄𑀦𑁆𑀢𑀺. 𑀬𑀣𑀸𑀳 𑁋

‘‘𑀧𑀜𑁆𑀘𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀉𑀧𑀸𑀲𑀓𑁄 𑀉𑀧𑀸𑀲𑀓𑀘𑀡𑁆𑀟𑀸𑀮𑁄 𑀘 𑀳𑁄𑀢𑀺 𑀉𑀧𑀸𑀲𑀓𑀫𑀮𑀜𑁆𑀘 𑀉𑀧𑀸𑀲𑀓𑀧𑀢𑀺𑀓𑀼𑀝𑁆𑀞𑁄 𑀘. 𑀓𑀢𑀫𑁂𑀳𑀺 𑀧𑀜𑁆𑀘𑀳𑀺? 𑀅𑀲𑁆𑀲𑀤𑁆𑀥𑁄 𑀳𑁄𑀢𑀺, 𑀤𑀼𑀲𑁆𑀲𑀻𑀮𑁄 𑀳𑁄𑀢𑀺, 𑀓𑁄𑀢𑀽𑀳𑀮𑀫𑀗𑁆𑀕𑀮𑀺𑀓𑁄 𑀳𑁄𑀢𑀺, 𑀫𑀗𑁆𑀕𑀮𑀁 𑀧𑀘𑁆𑀘𑁂𑀢𑀺 𑀦𑁄 𑀓𑀫𑁆𑀫𑀁, 𑀇𑀢𑁄 𑀘 𑀩𑀳𑀺𑀤𑁆𑀥𑀸 𑀤𑀓𑁆𑀔𑀺𑀡𑁂𑀬𑁆𑀬𑀁 𑀧𑀭𑀺𑀬𑁂𑀲𑀢𑀺, 𑀢𑀢𑁆𑀣 𑀘 𑀧𑀼𑀩𑁆𑀩𑀓𑀸𑀭𑀁 𑀓𑀭𑁄𑀢𑀻’’𑀢𑀺 (𑀅. 𑀦𑀺. 𑁫.𑁧𑁭𑁫).

𑀓𑀸 𑀲𑀫𑁆𑀧𑀢𑁆𑀢𑀻𑀢𑀺. 𑀬𑀸 𑀘𑀲𑁆𑀲 𑀲𑀻𑀮𑀲𑀫𑁆𑀧𑀤𑀸 𑀘 𑀆𑀚𑀻𑀯𑀲𑀫𑁆𑀧𑀤𑀸 𑀘, 𑀲𑀸 𑀲𑀫𑁆𑀧𑀢𑁆𑀢𑀺. 𑀬𑁂 𑀘𑀲𑁆𑀲 𑀭𑀢𑀦𑀪𑀸𑀯𑀸𑀤𑀺𑀓𑀭𑀸 𑀲𑀤𑁆𑀥𑀸𑀤𑀬𑁄 𑀧𑀜𑁆𑀘 𑀥𑀫𑁆𑀫𑀸. 𑀬𑀣𑀸𑀳 𑁋

‘‘𑀧𑀜𑁆𑀘𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀉𑀧𑀸𑀲𑀓𑁄 𑀉𑀧𑀸𑀲𑀓𑀭𑀢𑀦𑀜𑁆𑀘 𑀳𑁄𑀢𑀺 𑀉𑀧𑀸𑀲𑀓𑀧𑀤𑀼𑀫𑀜𑁆𑀘 𑀉𑀧𑀸𑀲𑀓𑀧𑀼𑀡𑁆𑀟𑀭𑀻𑀓𑀜𑁆𑀘. 𑀓𑀢𑀫𑁂𑀳𑀺 𑀧𑀜𑁆𑀘𑀳𑀺? 𑀲𑀤𑁆𑀥𑁄 𑀳𑁄𑀢𑀺, 𑀲𑀻𑀮𑀯𑀸 𑀳𑁄𑀢𑀺, 𑀦 𑀓𑁄𑀢𑀽𑀳𑀮𑀫𑀗𑁆𑀕𑀮𑀺𑀓𑁄 𑀳𑁄𑀢𑀺, 𑀓𑀫𑁆𑀫𑀁 𑀧𑀘𑁆𑀘𑁂𑀢𑀺 𑀦𑁄 𑀫𑀗𑁆𑀕𑀮𑀁, 𑀦 𑀇𑀢𑁄 𑀩𑀳𑀺𑀤𑁆𑀥𑀸 𑀤𑀓𑁆𑀔𑀺𑀡𑁂𑀬𑁆𑀬𑀁 𑀕𑀯𑁂𑀲𑀢𑀺, 𑀇𑀥 𑀘 𑀧𑀼𑀩𑁆𑀩𑀓𑀸𑀭𑀁 𑀓𑀭𑁄𑀢𑀻’’𑀢𑀺 (𑀅. 𑀦𑀺. 𑁫.𑁧𑁭𑁫).

𑀅𑀚𑁆𑀚𑀢𑀕𑁆𑀕𑁂𑀢𑀺 𑀏𑀢𑁆𑀣 𑀅𑀬𑀁 𑀅𑀕𑁆𑀕𑀲𑀤𑁆𑀤𑁄 𑀆𑀤𑀺𑀓𑁄𑀝𑀺𑀓𑁄𑀝𑁆𑀞𑀸𑀲𑀲𑁂𑀝𑁆𑀞𑁂𑀲𑀼 𑀤𑀺𑀲𑁆𑀲𑀢𑀺. ‘‘𑀅𑀚𑁆𑀚𑀢𑀕𑁆𑀕𑁂 𑀲𑀫𑁆𑀫, 𑀤𑁄𑀯𑀸𑀭𑀺𑀓, 𑀆𑀯𑀭𑀸𑀫𑀺 𑀤𑁆𑀯𑀸𑀭𑀁 𑀦𑀺𑀕𑀡𑁆𑀞𑀸𑀦𑀁 𑀦𑀺𑀕𑀡𑁆𑀞𑀻𑀦’’𑀦𑁆𑀢𑀺𑀆𑀤𑀻𑀲𑀼 (𑀫. 𑀦𑀺. 𑁨.𑁭𑁦) 𑀳𑀺 𑀆𑀤𑀺𑀫𑁆𑀳𑀺 𑀤𑀺𑀲𑁆𑀲𑀢𑀺. ‘‘𑀢𑁂𑀦𑁂𑀯 𑀅𑀗𑁆𑀕𑀼𑀮𑀕𑁆𑀕𑁂𑀦 𑀢𑀁 𑀅𑀗𑁆𑀕𑀼𑀮𑀕𑁆𑀕𑀁 𑀧𑀭𑀸𑀫𑀲𑁂𑀬𑁆𑀬 (𑀓𑀣𑀸. 𑁪𑁪𑁧). 𑀉𑀘𑁆𑀙𑀕𑁆𑀕𑀁 𑀯𑁂𑀴𑀕𑁆𑀕’’𑀦𑁆𑀢𑀺𑀆𑀤𑀻𑀲𑀼 𑀓𑁄𑀝𑀺𑀬𑀁. ‘‘𑀅𑀫𑁆𑀩𑀺𑀮𑀕𑁆𑀕𑀁 𑀯𑀸 𑀫𑀥𑀼𑀭𑀕𑁆𑀕𑀁 𑀯𑀸 𑀢𑀺𑀢𑁆𑀢𑀓𑀕𑁆𑀕𑀁 𑀯𑀸 (𑀲𑀁. 𑀦𑀺. 𑁫.𑁩𑁭𑁪), 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀯𑀺𑀳𑀸𑀭𑀕𑁆𑀕𑁂𑀦 𑀯𑀸 𑀧𑀭𑀺𑀯𑁂𑀡𑀕𑁆𑀕𑁂𑀦 𑀯𑀸 𑀪𑀸𑀚𑁂𑀢𑀼’’𑀦𑁆𑀢𑀺𑀆𑀤𑀻𑀲𑀼 (𑀘𑀽𑀴𑀯. 𑁩𑁧𑁮) 𑀓𑁄𑀝𑁆𑀞𑀸𑀲𑁂. ‘‘𑀬𑀸𑀯𑀢𑀸, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸 𑀅𑀧𑀤𑀸 𑀯𑀸…𑀧𑁂… 𑀢𑀣𑀸𑀕𑀢𑁄 𑀢𑁂𑀲𑀁 𑀅𑀕𑁆𑀕𑀫𑀓𑁆𑀔𑀸𑀬𑀢𑀻’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁪.𑁩𑁪) 𑀲𑁂𑀝𑁆𑀞𑁂. 𑀇𑀥 𑀧𑀦𑀸𑀬𑀁 𑀆𑀤𑀺𑀫𑁆𑀳𑀺 𑀤𑀝𑁆𑀞𑀩𑁆𑀩𑁄. 𑀢𑀲𑁆𑀫𑀸 𑀅𑀚𑁆𑀚𑀢𑀕𑁆𑀕𑁂𑀢𑀺 𑀅𑀚𑁆𑀚𑀢𑀁 𑀆𑀤𑀺𑀁 𑀓𑀢𑁆𑀯𑀸𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀚𑁆𑀚𑀢𑀦𑁆𑀢𑀺 𑀅𑀚𑁆𑀚𑀪𑀸𑀯𑀁. 𑀅𑀚𑁆𑀚𑀤𑀕𑁆𑀕𑁂𑀢𑀺 𑀯𑀸 𑀧𑀸𑀞𑁄, 𑀤𑀓𑀸𑀭𑁄 𑀧𑀤𑀲𑀦𑁆𑀥𑀺𑀓𑀭𑁄, 𑀅𑀚𑁆𑀚 𑀅𑀕𑁆𑀕𑀁 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄.

𑀧𑀸𑀡𑀼𑀧𑁂𑀢𑀦𑁆𑀢𑀺 𑀧𑀸𑀡𑁂𑀳𑀺 𑀉𑀧𑁂𑀢𑀁, 𑀬𑀸𑀯 𑀫𑁂 𑀚𑀻𑀯𑀺𑀢𑀁 𑀧𑀯𑀢𑁆𑀢𑀢𑀺, 𑀢𑀸𑀯 𑀉𑀧𑁂𑀢𑀁, 𑀅𑀦𑀜𑁆𑀜𑀲𑀢𑁆𑀣𑀼𑀓𑀁 𑀢𑀻𑀳𑀺 𑀲𑀭𑀡𑀕𑀫𑀦𑁂𑀳𑀺 𑀲𑀭𑀡𑀁 𑀕𑀢𑀁 𑀉𑀧𑀸𑀲𑀓𑀁 𑀓𑀧𑁆𑀧𑀺𑀬𑀓𑀸𑀭𑀓𑀁 𑀫𑀁 𑀪𑀯𑀁 𑀕𑁄𑀢𑀫𑁄 𑀥𑀸𑀭𑁂𑀢𑀼 𑀚𑀸𑀦𑀸𑀢𑀼. 𑀅𑀳𑀜𑁆𑀳𑀺 𑀲𑀘𑁂𑀧𑀺 𑀫𑁂 𑀢𑀺𑀔𑀺𑀡𑁂𑀦 𑀅𑀲𑀺𑀦𑀸 𑀲𑀻𑀲𑀁 𑀙𑀺𑀦𑁆𑀤𑁂𑀬𑁆𑀬, 𑀦𑁂𑀯 𑀩𑀼𑀤𑁆𑀥𑀁 ‘‘𑀦 𑀩𑀼𑀤𑁆𑀥𑁄’’𑀢𑀺 𑀯𑀸 𑀥𑀫𑁆𑀫𑀁 ‘‘𑀦 𑀥𑀫𑁆𑀫𑁄’’𑀢𑀺 𑀯𑀸 𑀲𑀗𑁆𑀖𑀁 ‘‘𑀦 𑀲𑀗𑁆𑀖𑁄’’𑀢𑀺 𑀯𑀸 𑀯𑀤𑁂𑀬𑁆𑀬𑀦𑁆𑀢𑀺 𑀏𑀯𑀁 𑀅𑀢𑁆𑀢𑀲𑀦𑁆𑀦𑀺𑀬𑁆𑀬𑀸𑀢𑀦𑁂𑀦 𑀲𑀭𑀡𑀁 𑀕𑀦𑁆𑀢𑁆𑀯𑀸 𑀘𑀢𑀽𑀳𑀺 𑀘 𑀧𑀘𑁆𑀘𑀬𑁂𑀳𑀺 𑀧𑀯𑀸𑀭𑁂𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀢𑀺𑀓𑁆𑀔𑀢𑁆𑀢𑀼𑀁 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀧𑀓𑁆𑀓𑀸𑀫𑀻𑀢𑀺.

𑁧𑁭. 𑀲𑀢𑁆𑀢𑀫𑁂 𑀚𑀸𑀡𑀼𑀲𑁆𑀲𑁄𑀡𑀻𑀢𑀺 𑀚𑀸𑀡𑀼𑀲𑁆𑀲𑁄𑀡𑀺𑀞𑀸𑀦𑀦𑁆𑀢𑀭𑀁 𑀓𑀺𑀭 𑀦𑀸𑀫𑁂𑀓𑀁 𑀞𑀸𑀦𑀦𑁆𑀢𑀭𑀁, 𑀢𑀁 𑀬𑁂𑀦 𑀓𑀼𑀮𑁂𑀦 𑀮𑀤𑁆𑀥𑀁, 𑀢𑀁 𑀚𑀸𑀡𑀼𑀲𑁆𑀲𑁄𑀡𑀺𑀓𑀼𑀮𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀅𑀬𑀁 𑀢𑀲𑁆𑀫𑀺𑀁 𑀓𑀼𑀮𑁂 𑀚𑀸𑀢𑀢𑁆𑀢𑀸 𑀭𑀜𑁆𑀜𑁄 𑀲𑀦𑁆𑀢𑀺𑀓𑁂 𑀘 𑀮𑀤𑁆𑀥𑀚𑀸𑀡𑀼𑀲𑁆𑀲𑁄𑀡𑀺𑀲𑀓𑁆𑀓𑀸𑀭𑀢𑁆𑀢𑀸 𑀚𑀸𑀡𑀼𑀲𑁆𑀲𑁄𑀡𑀻𑀢𑀺 𑀯𑀼𑀘𑁆𑀘𑀢𑀺. 𑀢𑁂𑀦𑀼𑀧𑀲𑀗𑁆𑀓𑀫𑀻𑀢𑀺 ‘‘𑀲𑀫𑀡𑁄 𑀓𑀺𑀭 𑀕𑁄𑀢𑀫𑁄 𑀧𑀡𑁆𑀟𑀺𑀢𑁄 𑀩𑁆𑀬𑀢𑁆𑀢𑁄 𑀩𑀳𑀼𑀲𑁆𑀲𑀼𑀢𑁄’’𑀢𑀺 𑀲𑀼𑀢𑁆𑀯𑀸 ‘‘𑀲𑀘𑁂 𑀲𑁄 𑀮𑀺𑀗𑁆𑀕𑀯𑀺𑀪𑀢𑁆𑀢𑀺𑀓𑀸𑀭𑀓𑀸𑀤𑀺𑀪𑁂𑀤𑀁 𑀚𑀸𑀦𑀺𑀲𑁆𑀲𑀢𑀺, 𑀅𑀫𑁆𑀳𑁂𑀳𑀺 𑀜𑀸𑀢𑀫𑁂𑀯 𑀚𑀸𑀦𑀺𑀲𑁆𑀲𑀢𑀺, 𑀅𑀜𑁆𑀜𑀸𑀢𑀁 𑀓𑀺𑀁 𑀚𑀸𑀦𑀺𑀲𑁆𑀲𑀢𑀺. 𑀜𑀸𑀢𑀫𑁂𑀯 𑀓𑀣𑁂𑀲𑁆𑀲𑀢𑀺, 𑀅𑀜𑁆𑀜𑀸𑀢𑀁 𑀓𑀺𑀁 𑀓𑀣𑁂𑀲𑁆𑀲𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀫𑀸𑀦𑀤𑁆𑀥𑀚𑀁 𑀧𑀕𑁆𑀕𑀬𑁆𑀳 𑀲𑀺𑀗𑁆𑀕𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀫𑀳𑀸𑀧𑀭𑀺𑀯𑀸𑀭𑁂𑀳𑀺 𑀧𑀭𑀺𑀯𑀼𑀢𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺. 𑀓𑀢𑀢𑁆𑀢𑀸 𑀘, 𑀩𑁆𑀭𑀸𑀳𑁆𑀫𑀡, 𑀅𑀓𑀢𑀢𑁆𑀢𑀸 𑀘𑀸𑀢𑀺 𑀲𑀢𑁆𑀣𑀸 𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 ‘‘𑀅𑀬𑀁 𑀩𑁆𑀭𑀸𑀳𑁆𑀫𑀡𑁄 𑀇𑀥 𑀆𑀕𑀘𑁆𑀙𑀦𑁆𑀢𑁄 𑀦 𑀚𑀸𑀦𑀺𑀢𑀼𑀓𑀸𑀫𑁄 𑀅𑀢𑁆𑀣𑀕𑀯𑁂𑀲𑀻 𑀳𑀼𑀢𑁆𑀯𑀸 𑀆𑀕𑀢𑁄, 𑀫𑀸𑀦𑀁 𑀧𑀦 𑀧𑀕𑁆𑀕𑀬𑁆𑀳 𑀲𑀺𑀗𑁆𑀕𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀆𑀕𑀢𑁄. 𑀓𑀺𑀁 𑀦𑀼 𑀔𑁆𑀯𑀲𑁆𑀲 𑀬𑀣𑀸 𑀧𑀜𑁆𑀳𑀲𑁆𑀲 𑀅𑀢𑁆𑀣𑀁 𑀚𑀸𑀦𑀸𑀢𑀺, 𑀏𑀯𑀁 𑀓𑀣𑀺𑀢𑁂 𑀯𑀟𑁆𑀠𑀺 𑀪𑀯𑀺𑀲𑁆𑀲𑀢𑀺, 𑀉𑀤𑀸𑀳𑀼 𑀬𑀣𑀸 𑀦 𑀚𑀸𑀦𑀸𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀬𑀣𑀸 𑀦 𑀚𑀸𑀦𑀸𑀢𑀺, 𑀏𑀯𑀁 𑀓𑀣𑀺𑀢𑁂 𑀯𑀟𑁆𑀠𑀺 𑀪𑀯𑀺𑀲𑁆𑀲𑀢𑀻’’𑀢𑀺 𑀜𑀢𑁆𑀯𑀸 ‘‘𑀓𑀢𑀢𑁆𑀢𑀸 𑀘, 𑀩𑁆𑀭𑀸𑀳𑁆𑀫𑀡, 𑀅𑀓𑀢𑀢𑁆𑀢𑀸 𑀘𑀸’’𑀢𑀺 𑀆𑀳.

𑀩𑁆𑀭𑀸𑀳𑁆𑀫𑀡𑁄 𑀢𑀁 𑀲𑀼𑀢𑁆𑀯𑀸 ‘‘𑀲𑀫𑀡𑁄 𑀕𑁄𑀢𑀫𑁄 𑀓𑀢𑀢𑁆𑀢𑀸𑀧𑀺 𑀅𑀓𑀢𑀢𑁆𑀢𑀸𑀧𑀺 𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀺𑀁 𑀯𑀤𑀢𑀺, 𑀇𑀤𑀁 𑀉𑀪𑀬𑀓𑀸𑀭𑀡𑁂𑀦𑀸𑀧𑀺 𑀏𑀓𑀝𑁆𑀞𑀸𑀦𑁂 𑀦𑀺𑀩𑁆𑀩𑀢𑁆𑀢𑀺𑀬𑀸 𑀓𑀣𑀺𑀢𑀢𑁆𑀢𑀸 𑀤𑀼𑀚𑁆𑀚𑀸𑀦𑀁 𑀫𑀳𑀦𑁆𑀥𑀓𑀸𑀭𑀁, 𑀦𑀢𑁆𑀣𑀺 𑀫𑀬𑁆𑀳𑀁 𑀏𑀢𑁆𑀣 𑀧𑀢𑀺𑀝𑁆𑀞𑀸. 𑀲𑀘𑁂 𑀧𑀦𑀸𑀳𑀁 𑀏𑀢𑁆𑀢𑀓𑁂𑀦𑁂𑀯 𑀢𑀼𑀡𑁆𑀳𑀻 𑀪𑀯𑁂𑀬𑁆𑀬𑀁, 𑀩𑁆𑀭𑀸𑀳𑁆𑀫𑀡𑀸𑀦𑀁 𑀫𑀚𑁆𑀛𑁂 𑀓𑀣𑀦𑀓𑀸𑀮𑁂𑀧𑀺 𑀫𑀁 𑀏𑀯𑀁 𑀯𑀤𑁂𑀬𑁆𑀬𑀼𑀁 𑁋 ‘𑀢𑁆𑀯𑀁 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀲𑀦𑁆𑀢𑀺𑀓𑀁 𑀫𑀸𑀦𑀁 𑀧𑀕𑁆𑀕𑀬𑁆𑀳 𑀲𑀺𑀗𑁆𑀕𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀕𑀢𑁄𑀲𑀺, 𑀏𑀓𑀯𑀘𑀦𑁂𑀦𑁂𑀯 𑀢𑀼𑀡𑁆𑀳𑀻 𑀳𑀼𑀢𑁆𑀯𑀸 𑀓𑀺𑀜𑁆𑀘𑀺 𑀯𑀢𑁆𑀢𑀼𑀁 𑀦𑀸𑀲𑀓𑁆𑀔𑀺, 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀓𑀲𑁆𑀫𑀸 𑀓𑀣𑁂𑀲𑀻’𑀢𑀺. 𑀢𑀲𑁆𑀫𑀸 𑀧𑀭𑀸𑀚𑀺𑀢𑁄𑀧𑀺 𑀅𑀧𑀭𑀸𑀚𑀺𑀢𑀲𑀤𑀺𑀲𑁄 𑀳𑀼𑀢𑁆𑀯𑀸 𑀧𑀼𑀦 𑀲𑀕𑁆𑀕𑀕𑀫𑀦𑀧𑀜𑁆𑀳𑀁 𑀧𑀼𑀘𑁆𑀙𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀓𑁄 𑀦𑀼 𑀔𑁄, 𑀪𑁄 𑀕𑁄𑀢𑀫𑀸𑀢𑀺 𑀇𑀫𑀁 𑀤𑀼𑀢𑀺𑀬𑀧𑀜𑁆𑀳𑀁 𑀆𑀭𑀪𑀺.

𑀏𑀯𑀫𑁆𑀧𑀺 𑀢𑀲𑁆𑀲 𑀅𑀳𑁄𑀲𑀺 𑁋 ‘‘𑀉𑀧𑀭𑀺𑀧𑀜𑁆𑀳𑁂𑀦 𑀳𑁂𑀝𑁆𑀞𑀸𑀧𑀜𑁆𑀳𑀁 𑀚𑀸𑀦𑀺𑀲𑁆𑀲𑀸𑀫𑀺, 𑀳𑁂𑀝𑁆𑀞𑀸𑀧𑀜𑁆𑀳𑁂𑀦 𑀉𑀧𑀭𑀺𑀧𑀜𑁆𑀳’’𑀦𑁆𑀢𑀺. 𑀢𑀲𑁆𑀫𑀸𑀧𑀺 𑀇𑀫𑀁 𑀧𑀜𑁆𑀳𑀁 𑀧𑀼𑀘𑁆𑀙𑀺. 𑀲𑀢𑁆𑀣𑀸 𑀧𑀼𑀭𑀺𑀫𑀦𑀬𑁂𑀦𑁂𑀯 𑀘𑀺𑀦𑁆𑀢𑁂𑀢𑁆𑀯𑀸 𑀬𑀣𑀸 𑀦 𑀚𑀸𑀦𑀸𑀢𑀺, 𑀏𑀯𑀫𑁂𑀯 𑀓𑀣𑁂𑀦𑁆𑀢𑁄 𑀧𑀼𑀦𑀧𑀺 ‘‘𑀓𑀢𑀢𑁆𑀢𑀸 𑀘, 𑀩𑁆𑀭𑀸𑀳𑁆𑀫𑀡, 𑀅𑀓𑀢𑀢𑁆𑀢𑀸 𑀘𑀸’’𑀢𑀺 𑀆𑀳. 𑀩𑁆𑀭𑀸𑀳𑁆𑀫𑀡𑁄 𑀢𑀲𑁆𑀫𑀺𑀫𑁆𑀧𑀺 𑀧𑀢𑀺𑀝𑁆𑀞𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 ‘‘𑀅𑀮𑀁, 𑀪𑁄, 𑀦 𑀈𑀤𑀺𑀲𑀲𑁆𑀲 𑀧𑀼𑀭𑀺𑀲𑀲𑁆𑀲 𑀲𑀦𑁆𑀢𑀺𑀓𑀁 𑀆𑀕𑀢𑁂𑀦 𑀅𑀚𑀸𑀦𑀺𑀢𑁆𑀯𑀸 𑀕𑀦𑁆𑀢𑀼𑀁 𑀯𑀝𑁆𑀝𑀢𑀺, 𑀲𑀓𑀯𑀸𑀤𑀁 𑀧𑀳𑀸𑀬 𑀲𑀫𑀡𑀁 𑀕𑁄𑀢𑀫𑀁 𑀅𑀦𑀼𑀯𑀢𑁆𑀢𑀺𑀢𑁆𑀯𑀸 𑀫𑀬𑁆𑀳𑀁 𑀅𑀢𑁆𑀣𑀁 𑀕𑀯𑁂𑀲𑀺𑀲𑁆𑀲𑀸𑀫𑀺, 𑀧𑀭𑀮𑁄𑀓𑀫𑀕𑁆𑀕𑀁 𑀲𑁄𑀥𑁂𑀲𑁆𑀲𑀸𑀫𑀻’’𑀢𑀺 𑀲𑀦𑁆𑀦𑀺𑀝𑁆𑀞𑀸𑀦𑀁 𑀓𑀢𑁆𑀯𑀸 𑀲𑀢𑁆𑀣𑀸𑀭𑀁 𑀆𑀬𑀸𑀘𑀦𑁆𑀢𑁄 𑀦 𑀔𑁄 𑀅𑀳𑀦𑁆𑀢𑀺𑀆𑀤𑀺𑀫𑀸𑀳. 𑀅𑀣𑀲𑁆𑀲 𑀦𑀺𑀳𑀢𑀫𑀸𑀦𑀢𑀁 𑀜𑀢𑁆𑀯𑀸 𑀲𑀢𑁆𑀣𑀸 𑀉𑀧𑀭𑀺 𑀤𑁂𑀲𑀦𑀁 𑀯𑀟𑁆𑀠𑁂𑀦𑁆𑀢𑁄 𑀢𑁂𑀦 𑀳𑀺, 𑀩𑁆𑀭𑀸𑀳𑁆𑀫𑀡𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀢𑁂𑀦 𑀳𑀻𑀢𑀺 𑀓𑀸𑀭𑀡𑀦𑀺𑀤𑁆𑀤𑁂𑀲𑁄. 𑀬𑀲𑁆𑀫𑀸 𑀲𑀁𑀔𑀺𑀢𑁆𑀢𑁂𑀦 𑀪𑀸𑀲𑀺𑀢𑀲𑁆𑀲 𑀅𑀢𑁆𑀣𑀁 𑀅𑀚𑀸𑀦𑀦𑁆𑀢𑁄 𑀯𑀺𑀢𑁆𑀣𑀸𑀭𑀤𑁂𑀲𑀦𑀁 𑀬𑀸𑀘𑀲𑀺, 𑀢𑀲𑁆𑀫𑀸𑀢𑀺 𑀅𑀢𑁆𑀣𑁄. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑁧𑁮. 𑀅𑀝𑁆𑀞𑀫𑁂 𑀆𑀬𑀲𑁆𑀫𑀸𑀢𑀺 𑀧𑀺𑀬𑀯𑀘𑀦𑀫𑁂𑀢𑀁. 𑀆𑀦𑀦𑁆𑀤𑁄𑀢𑀺 𑀢𑀲𑁆𑀲 𑀣𑁂𑀭𑀲𑁆𑀲 𑀦𑀸𑀫𑀁. 𑀏𑀓𑀁𑀲𑁂𑀦𑀸𑀢𑀺 𑀏𑀓𑀦𑁆𑀢𑁂𑀦. 𑀅𑀦𑀼𑀯𑀺𑀘𑁆𑀘𑀸𑀢𑀺 𑀅𑀦𑀼𑀧𑀯𑀺𑀲𑀺𑀢𑁆𑀯𑀸. 𑀯𑀺𑀜𑁆𑀜𑀽𑀢𑀺 𑀧𑀡𑁆𑀟𑀺𑀢𑀸. 𑀕𑀭𑀳𑀦𑁆𑀢𑀻𑀢𑀺 𑀦𑀺𑀦𑁆𑀤𑀦𑁆𑀢𑀺, 𑀅𑀯𑀡𑁆𑀡𑀁 𑀪𑀸𑀲𑀦𑁆𑀢𑀺. 𑀲𑁂𑀲𑀫𑁂𑀢𑁆𑀣 𑀦𑀯𑀫𑁂 𑀘 𑀲𑀩𑁆𑀩𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑁨𑁦. 𑀤𑀲𑀫𑁂 𑀤𑀼𑀦𑁆𑀦𑀺𑀓𑁆𑀔𑀺𑀢𑁆𑀢𑀜𑁆𑀘 𑀧𑀤𑀩𑁆𑀬𑀜𑁆𑀚𑀦𑀦𑁆𑀢𑀺 𑀉𑀧𑁆𑀧𑀝𑀺𑀧𑀸𑀝𑀺𑀬𑀸 𑀕𑀳𑀺𑀢𑀧𑀸𑀴𑀺𑀧𑀤𑀫𑁂𑀯 𑀳𑀺 𑀅𑀢𑁆𑀣𑀲𑁆𑀲 𑀩𑁆𑀬𑀜𑁆𑀚𑀦𑀢𑁆𑀢𑀸 𑀩𑁆𑀬𑀜𑁆𑀚𑀦𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀉𑀪𑀬𑀫𑁂𑀢𑀁 𑀧𑀸𑀴𑀺𑀬𑀸𑀯 𑀦𑀸𑀫𑀁. 𑀅𑀢𑁆𑀣𑁄 𑀘 𑀤𑀼𑀦𑁆𑀦𑀻𑀢𑁄𑀢𑀺 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀉𑀧𑁆𑀧𑀝𑀺𑀧𑀸𑀝𑀺𑀬𑀸 𑀕𑀳𑀺𑀢𑀸 𑀅𑀝𑁆𑀞𑀓𑀣𑀸. 𑀤𑀼𑀦𑁆𑀦𑀺𑀓𑁆𑀔𑀺𑀢𑁆𑀢𑀲𑁆𑀲, 𑀪𑀺𑀓𑁆𑀔𑀯𑁂, 𑀧𑀤𑀩𑁆𑀬𑀜𑁆𑀚𑀦𑀲𑁆𑀲 𑀅𑀢𑁆𑀣𑁄𑀧𑀺 𑀤𑀼𑀦𑁆𑀦𑀬𑁄 𑀳𑁄𑀢𑀻𑀢𑀺 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀉𑀧𑁆𑀧𑀝𑀺𑀧𑀸𑀝𑀺𑀬𑀸 𑀕𑀳𑀺𑀢𑀸𑀬 𑀧𑀸𑀴𑀺𑀬𑀸 𑀅𑀝𑁆𑀞𑀓𑀣𑀸 𑀦𑀸𑀫 𑀤𑀼𑀦𑁆𑀦𑀬𑀸 𑀤𑀼𑀦𑁆𑀦𑀻𑀳𑀸𑀭𑀸 𑀤𑀼𑀓𑁆𑀓𑀣𑀸 𑀦𑀸𑀫 𑀳𑁄𑀢𑀺. 𑀏𑀓𑀸𑀤𑀲𑀫𑁂 𑀯𑀼𑀢𑁆𑀢𑀧𑀝𑀺𑀧𑀓𑁆𑀔𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄𑀢𑀺.

𑀅𑀥𑀺𑀓𑀭𑀡𑀯𑀕𑁆𑀕𑁄 𑀤𑀼𑀢𑀺𑀬𑁄.

𑁩. 𑀩𑀸𑀮𑀯𑀕𑁆𑀕𑀯𑀡𑁆𑀡𑀦𑀸

𑁨𑁨. 𑀢𑀢𑀺𑀬𑀲𑁆𑀲 𑀧𑀞𑀫𑁂 𑀅𑀘𑁆𑀘𑀬𑀁 𑀅𑀘𑁆𑀘𑀬𑀢𑁄 𑀦 𑀧𑀲𑁆𑀲𑀢𑀻𑀢𑀺 ‘‘𑀅𑀧𑀭𑀚𑁆𑀛𑀺𑀢𑁆𑀯𑀸 𑀅𑀧𑀭𑀤𑁆𑀥𑀁 𑀫𑀬𑀸’’𑀢𑀺 𑀅𑀢𑁆𑀢𑀦𑁄 𑀅𑀧𑀭𑀸𑀥𑀁 𑀦 𑀧𑀲𑁆𑀲𑀢𑀺, 𑀅𑀧𑀭𑀤𑁆𑀥𑀁 𑀫𑀬𑀸𑀢𑀺 𑀯𑀢𑁆𑀯𑀸 𑀤𑀡𑁆𑀟𑀓𑀫𑁆𑀫𑀁 𑀆𑀳𑀭𑀺𑀢𑁆𑀯𑀸 𑀦 𑀔𑀫𑀸𑀧𑁂𑀢𑀻𑀢𑀺 𑀅𑀢𑁆𑀣𑁄. 𑀅𑀘𑁆𑀘𑀬𑀁 𑀤𑁂𑀲𑁂𑀦𑁆𑀢𑀲𑁆𑀲𑀸𑀢𑀺 𑀏𑀯𑀁 𑀯𑀢𑁆𑀯𑀸 𑀤𑀡𑁆𑀟𑀓𑀫𑁆𑀫𑀁 𑀆𑀳𑀭𑀺𑀢𑁆𑀯𑀸 𑀔𑀫𑀸𑀧𑁂𑀦𑁆𑀢𑀲𑁆𑀲. 𑀬𑀣𑀸𑀥𑀫𑁆𑀫𑀁 𑀦𑀧𑁆𑀧𑀝𑀺𑀕𑁆𑀕𑀡𑁆𑀳𑀸𑀢𑀻𑀢𑀺 ‘‘𑀧𑀼𑀦 𑀏𑀯𑀁 𑀦 𑀓𑀭𑀺𑀲𑁆𑀲𑀸𑀫𑀺, 𑀔𑀫𑀣 𑀫𑁂’’𑀢𑀺 𑀯𑀼𑀘𑁆𑀘𑀫𑀸𑀦𑁄 𑀅𑀘𑁆𑀘𑀬𑀁 𑀇𑀫𑀁 𑀬𑀣𑀸𑀥𑀫𑁆𑀫𑀁 𑀬𑀣𑀸𑀲𑀪𑀸𑀯𑀁 𑀦 𑀧𑀝𑀺𑀕𑁆𑀕𑀡𑁆𑀳𑀸𑀢𑀺. ‘‘𑀇𑀢𑁄 𑀧𑀝𑁆𑀞𑀸𑀬 𑀧𑀼𑀦 𑀏𑀯𑀭𑀽𑀧𑀁 𑀫𑀸 𑀅𑀓𑀸𑀲𑀺, 𑀔𑀫𑀸𑀫𑀺 𑀢𑀼𑀬𑁆𑀳’’𑀦𑁆𑀢𑀺 𑀦 𑀯𑀤𑀢𑀺. 𑀲𑀼𑀓𑁆𑀓𑀧𑀓𑁆𑀔𑁄 𑀯𑀼𑀢𑁆𑀢𑀧𑀝𑀺𑀧𑀓𑁆𑀔𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄.

𑁨𑁩. 𑀤𑀼𑀢𑀺𑀬𑁂 𑀅𑀩𑁆𑀪𑀸𑀘𑀺𑀓𑁆𑀔𑀦𑁆𑀢𑀻𑀢𑀺 𑀅𑀪𑀺𑀪𑀯𑀺𑀢𑁆𑀯𑀸 𑀆𑀘𑀺𑀓𑁆𑀔𑀦𑁆𑀢𑀺, 𑀅𑀪𑀽𑀢𑁂𑀦 𑀯𑀤𑀦𑁆𑀢𑀺. 𑀤𑁄𑀲𑀦𑁆𑀢𑀭𑁄𑀢𑀺 𑀅𑀦𑁆𑀢𑀭𑁂 𑀧𑀢𑀺𑀢𑀤𑁄𑀲𑁄. 𑀏𑀯𑀭𑀽𑀧𑁄 𑀳𑀺 ‘‘𑀦𑀢𑁆𑀣𑀺 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑁄’’𑀢𑀺𑀆𑀤𑀻𑀦𑀺 𑀯𑀤𑀦𑁆𑀢𑁄 𑀲𑀼𑀦𑀓𑁆𑀔𑀢𑁆𑀢𑁄 𑀯𑀺𑀬 𑀢𑀣𑀸𑀕𑀢𑀁 𑀅𑀩𑁆𑀪𑀸𑀘𑀺𑀓𑁆𑀔𑀢𑀺. 𑀲𑀤𑁆𑀥𑁄 𑀯𑀸 𑀤𑀼𑀕𑁆𑀕𑀳𑀺𑀢𑁂𑀦𑀸𑀢𑀺 𑀬𑁄 𑀳𑀺 𑀜𑀸𑀡𑀯𑀺𑀭𑀳𑀺𑀢𑀸𑀬 𑀲𑀤𑁆𑀥𑀸𑀬 𑀅𑀢𑀺𑀲𑀤𑁆𑀥𑁄 𑀳𑁄𑀢𑀺 𑀫𑀼𑀤𑁆𑀥𑀧𑁆𑀧𑀲𑀦𑁆𑀦𑁄, 𑀲𑁄𑀧𑀺 ‘‘𑀩𑀼𑀤𑁆𑀥𑁄 𑀦𑀸𑀫 𑀲𑀩𑁆𑀩𑀮𑁄𑀓𑀼𑀢𑁆𑀢𑀭𑁄, 𑀲𑀩𑁆𑀩𑁂 𑀢𑀲𑁆𑀲 𑀓𑁂𑀲𑀸𑀤𑀬𑁄 𑀩𑀸𑀢𑁆𑀢𑀺𑀁𑀲 𑀓𑁄𑀝𑁆𑀞𑀸𑀲𑀸 𑀮𑁄𑀓𑀼𑀢𑁆𑀢𑀭𑀸𑀬𑁂𑀯𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀤𑀼𑀕𑁆𑀕𑀳𑀺𑀢𑀁 𑀕𑀡𑁆𑀳𑀺𑀢𑁆𑀯𑀸 𑀢𑀣𑀸𑀕𑀢𑀁 𑀅𑀩𑁆𑀪𑀸𑀘𑀺𑀓𑁆𑀔𑀢𑀺. 𑀢𑀢𑀺𑀬𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑁨𑁫. 𑀘𑀢𑀼𑀢𑁆𑀣𑁂 𑀦𑁂𑀬𑁆𑀬𑀢𑁆𑀣𑀁 𑀲𑀼𑀢𑁆𑀢𑀦𑁆𑀢𑀦𑁆𑀢𑀺 𑀬𑀲𑁆𑀲 𑀅𑀢𑁆𑀣𑁄 𑀦𑁂𑀢𑀩𑁆𑀩𑁄, 𑀢𑀁 𑀦𑁂𑀢𑀩𑁆𑀩𑀢𑁆𑀣𑀁 𑀲𑀼𑀢𑁆𑀢𑀦𑁆𑀢𑀁. 𑀦𑀻𑀢𑀢𑁆𑀣𑁄 𑀲𑀼𑀢𑁆𑀢𑀦𑁆𑀢𑁄𑀢𑀺 𑀤𑀻𑀧𑁂𑀢𑀻𑀢𑀺 𑀓𑀣𑀺𑀢𑀢𑁆𑀣𑁄 𑀅𑀬𑀁 𑀲𑀼𑀢𑁆𑀢𑀦𑁆𑀢𑁄𑀢𑀺 𑀯𑀤𑀢𑀺. 𑀢𑀢𑁆𑀣 ‘‘𑀏𑀓𑀧𑀼𑀕𑁆𑀕𑀮𑁄, 𑀪𑀺𑀓𑁆𑀔𑀯𑁂, 𑀤𑁆𑀯𑁂𑀫𑁂, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑀸, 𑀢𑀬𑁄𑀫𑁂, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑀸, 𑀘𑀢𑁆𑀢𑀸𑀭𑁄𑀫𑁂, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑀸’’𑀢𑀺 𑀏𑀯𑀭𑀽𑀧𑁄 𑀲𑀼𑀢𑁆𑀢𑀦𑁆𑀢𑁄 𑀦𑁂𑀬𑁆𑀬𑀢𑁆𑀣𑁄 𑀦𑀸𑀫. 𑀏𑀢𑁆𑀣 𑀳𑀺 𑀓𑀺𑀜𑁆𑀘𑀸𑀧𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 ‘‘𑀏𑀓𑀧𑀼𑀕𑁆𑀕𑀮𑁄, 𑀪𑀺𑀓𑁆𑀔𑀯𑁂’’𑀢𑀺𑀆𑀤𑀺 𑀯𑀼𑀢𑁆𑀢𑀁, 𑀧𑀭𑀫𑀢𑁆𑀣𑀢𑁄 𑀧𑀦 𑀧𑀼𑀕𑁆𑀕𑀮𑁄 𑀦𑀸𑀫 𑀦𑀢𑁆𑀣𑀻𑀢𑀺 𑀏𑀯𑀫𑀲𑁆𑀲 𑀅𑀢𑁆𑀣𑁄 𑀦𑁂𑀢𑀩𑁆𑀩𑁄𑀯 𑀳𑁄𑀢𑀺. 𑀅𑀬𑀁 𑀧𑀦 𑀅𑀢𑁆𑀢𑀦𑁄 𑀩𑀸𑀮𑀢𑀸𑀬 𑀦𑀻𑀢𑀢𑁆𑀣𑁄 𑀅𑀬𑀁 𑀲𑀼𑀢𑁆𑀢𑀦𑁆𑀢𑁄𑀢𑀺 𑀤𑀻𑀧𑁂𑀢𑀺. 𑀧𑀭𑀫𑀢𑁆𑀣𑀢𑁄 𑀳𑀺 𑀧𑀼𑀕𑁆𑀕𑀮𑁂 𑀅𑀲𑀢𑀺 𑀦 𑀢𑀣𑀸𑀕𑀢𑁄 ‘‘𑀏𑀓𑀧𑀼𑀕𑁆𑀕𑀮𑁄, 𑀪𑀺𑀓𑁆𑀔𑀯𑁂’’𑀢𑀺𑀆𑀤𑀻𑀦𑀺 𑀯𑀤𑁂𑀬𑁆𑀬. 𑀬𑀲𑁆𑀫𑀸 𑀧𑀦 𑀢𑁂𑀦 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀧𑀭𑀫𑀢𑁆𑀣𑀢𑁄 𑀅𑀢𑁆𑀣𑀺 𑀧𑀼𑀕𑁆𑀕𑀮𑁄𑀢𑀺 𑀕𑀡𑁆𑀳𑀦𑁆𑀢𑁄 𑀢𑀁 𑀦𑁂𑀬𑁆𑀬𑀢𑁆𑀣𑀁 𑀲𑀼𑀢𑁆𑀢𑀦𑁆𑀢𑀁 𑀦𑀻𑀢𑀢𑁆𑀣𑁄 𑀲𑀼𑀢𑁆𑀢𑀦𑁆𑀢𑁄𑀢𑀺 𑀤𑀻𑀧𑁂𑀢𑀺. 𑀦𑀻𑀢𑀢𑁆𑀣𑀦𑁆𑀢𑀺 𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀅𑀦𑀢𑁆𑀢𑀸𑀢𑀺 𑀏𑀯𑀁 𑀓𑀣𑀺𑀢𑀢𑁆𑀣𑀁. 𑀏𑀢𑁆𑀣 𑀳𑀺 𑀅𑀦𑀺𑀘𑁆𑀘𑀫𑁂𑀯 𑀤𑀼𑀓𑁆𑀔𑀫𑁂𑀯 𑀅𑀦𑀢𑁆𑀢𑀸𑀬𑁂𑀯𑀸𑀢𑀺 𑀅𑀢𑁆𑀣𑁄. 𑀅𑀬𑀁 𑀧𑀦 𑀅𑀢𑁆𑀢𑀦𑁄 𑀩𑀸𑀮𑀢𑀸𑀬 ‘‘𑀦𑁂𑀬𑁆𑀬𑀢𑁆𑀣𑁄 𑀅𑀬𑀁 𑀲𑀼𑀢𑁆𑀢𑀦𑁆𑀢𑁄, 𑀅𑀢𑁆𑀣𑀫𑀲𑁆𑀲 𑀆𑀳𑀭𑀺𑀲𑁆𑀲𑀸𑀫𑀻’’𑀢𑀺 ‘‘𑀦𑀺𑀘𑁆𑀘𑀁 𑀦𑀸𑀫 𑀅𑀢𑁆𑀣𑀺, 𑀲𑀼𑀔𑀁 𑀦𑀸𑀫 𑀅𑀢𑁆𑀣𑀺, 𑀅𑀢𑁆𑀢𑀸 𑀦𑀸𑀫 𑀅𑀢𑁆𑀣𑀻’’𑀢𑀺 𑀕𑀡𑁆𑀳𑀦𑁆𑀢𑁄 𑀦𑀻𑀢𑀢𑁆𑀣𑀁 𑀲𑀼𑀢𑁆𑀢𑀦𑁆𑀢𑀁 𑀦𑁂𑀬𑁆𑀬𑀢𑁆𑀣𑁄 𑀲𑀼𑀢𑁆𑀢𑀦𑁆𑀢𑁄𑀢𑀺 𑀤𑀻𑀧𑁂𑀢𑀺 𑀦𑀸𑀫. 𑀧𑀜𑁆𑀘𑀫𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑁨𑁭. 𑀙𑀝𑁆𑀞𑁂 𑀧𑀝𑀺𑀘𑁆𑀙𑀦𑁆𑀦𑀓𑀫𑁆𑀫𑀦𑁆𑀢𑀲𑁆𑀲𑀸𑀢𑀺 𑀧𑀸𑀧𑀓𑀫𑁆𑀫𑀲𑁆𑀲. 𑀧𑀸𑀧𑀁 𑀳𑀺 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀓𑀭𑁄𑀦𑁆𑀢𑀺. 𑀦𑁄 𑀘𑁂𑀧𑀺 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀓𑀭𑁄𑀦𑁆𑀢𑀺, 𑀧𑀸𑀧𑀓𑀫𑁆𑀫𑀁 𑀧𑀝𑀺𑀘𑁆𑀙𑀦𑁆𑀦𑀫𑁂𑀯𑀸𑀢𑀺 𑀯𑀼𑀘𑁆𑀘𑀢𑀺. 𑀦𑀺𑀭𑀬𑁄𑀢𑀺 𑀲𑀳𑁄𑀓𑀸𑀲𑀓𑀸 𑀔𑀦𑁆𑀥𑀸. 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀬𑀁 𑀔𑀦𑁆𑀥𑀸𑀯 𑀮𑀩𑁆𑀪𑀦𑁆𑀢𑀺. 𑀲𑀢𑁆𑀢𑀫𑀝𑁆𑀞𑀫𑀸𑀦𑀺 𑀉𑀢𑁆𑀢𑀸𑀦𑀢𑁆𑀣𑀸𑀦𑁂𑀯.

𑁩𑁦. 𑀦𑀯𑀫𑁂 𑀧𑀝𑀺𑀕𑁆𑀕𑀸𑀳𑀸𑀢𑀺 𑀧𑀝𑀺𑀕𑁆𑀕𑀸𑀳𑀓𑀸, 𑀤𑀼𑀲𑁆𑀲𑀻𑀮𑀁 𑀧𑀼𑀕𑁆𑀕𑀮𑀁 𑀤𑁆𑀯𑁂 𑀞𑀸𑀦𑀸𑀦𑀺 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑀻𑀢𑀺 𑀅𑀢𑁆𑀣𑁄.

𑁩𑁧. 𑀤𑀲𑀫𑁂 𑀅𑀢𑁆𑀣𑀯𑀲𑁂𑀢𑀺 𑀓𑀸𑀭𑀡𑀸𑀦𑀺. 𑀅𑀭𑀜𑁆𑀜𑀯𑀦𑀧𑀢𑁆𑀣𑀸𑀦𑀻𑀢𑀺 𑀅𑀭𑀜𑁆𑀜𑀸𑀦𑀺 𑀘 𑀯𑀦𑀧𑀢𑁆𑀣𑀸𑀦𑀺 𑀘. 𑀢𑀢𑁆𑀣 𑀓𑀺𑀜𑁆𑀘𑀸𑀧𑀺 𑀅𑀪𑀺𑀥𑀫𑁆𑀫𑁂 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 ‘‘𑀦𑀺𑀓𑁆𑀔𑀫𑀺𑀢𑁆𑀯𑀸 𑀩𑀳𑀺 𑀇𑀦𑁆𑀤𑀔𑀻𑀮𑀸, 𑀲𑀩𑁆𑀩𑀫𑁂𑀢𑀁 𑀅𑀭𑀜𑁆𑀜’’𑀦𑁆𑀢𑀺 (𑀯𑀺𑀪. 𑁫𑁨𑁯) 𑀯𑀼𑀢𑁆𑀢𑀁, 𑀢𑀣𑀸𑀧𑀺 𑀬𑀁 𑀢𑀁 ‘‘𑀧𑀜𑁆𑀘𑀥𑀦𑀼𑀲𑀢𑀺𑀓𑀁 𑀧𑀘𑁆𑀙𑀺𑀫’’𑀦𑁆𑀢𑀺 (𑀧𑀸𑀭𑀸. 𑁬𑁫𑁪) 𑀆𑀭𑀜𑁆𑀜𑀓𑀗𑁆𑀕𑀦𑀺𑀧𑁆𑀨𑀸𑀤𑀓𑀁 𑀲𑁂𑀦𑀸𑀲𑀦𑀁 𑀯𑀼𑀢𑁆𑀢𑀁, 𑀢𑀤𑁂𑀯 𑀅𑀥𑀺𑀧𑁆𑀧𑁂𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀯𑀦𑀧𑀢𑁆𑀣𑀦𑁆𑀢𑀺 𑀕𑀸𑀫𑀦𑁆𑀢𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀫𑀦𑀼𑀲𑁆𑀲𑀸𑀦𑀁 𑀅𑀦𑀼𑀧𑀘𑀸𑀭𑀝𑁆𑀞𑀸𑀦𑀁, 𑀬𑀢𑁆𑀣 𑀦 𑀓𑀲𑀻𑀬𑀢𑀺 𑀦 𑀯𑀧𑀻𑀬𑀢𑀺. 𑀧𑀦𑁆𑀢𑀸𑀦𑀻𑀢𑀺 𑀧𑀭𑀺𑀬𑀦𑁆𑀢𑀸𑀦𑀺 𑀅𑀢𑀺𑀤𑀽𑀭𑀸𑀦𑀺, 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀦𑁆𑀢𑀺 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀁 𑀨𑀸𑀲𑀼𑀯𑀺𑀳𑀸𑀭𑀁. 𑀧𑀘𑁆𑀙𑀺𑀫𑀜𑁆𑀘 𑀚𑀦𑀢𑀁 𑀅𑀦𑀼𑀓𑀫𑁆𑀧𑀫𑀸𑀦𑁄𑀢𑀺 𑀧𑀘𑁆𑀙𑀺𑀫𑁂 𑀫𑀫 𑀲𑀸𑀯𑀓𑁂 𑀅𑀦𑀼𑀓𑀫𑁆𑀧𑀦𑁆𑀢𑁄.

𑁩𑁨. 𑀏𑀓𑀸𑀤𑀲𑀫𑁂 𑀯𑀺𑀚𑁆𑀚𑀸𑀪𑀸𑀕𑀺𑀬𑀸𑀢𑀺 𑀯𑀺𑀚𑁆𑀚𑀸𑀓𑁄𑀝𑁆𑀞𑀸𑀲𑀺𑀓𑀸. 𑀲𑀫𑀣𑁄𑀢𑀺 𑀘𑀺𑀢𑁆𑀢𑁂𑀓𑀕𑁆𑀕𑀢𑀸. 𑀯𑀺𑀧𑀲𑁆𑀲𑀦𑀸𑀢𑀺 𑀲𑀗𑁆𑀔𑀸𑀭𑀧𑀭𑀺𑀕𑁆𑀕𑀸𑀳𑀓𑀜𑀸𑀡𑀁. 𑀓𑀫𑀢𑁆𑀣𑀫𑀦𑀼𑀪𑁄𑀢𑀻𑀢𑀺 𑀓𑀢𑀫𑀁 𑀅𑀢𑁆𑀣𑀁 𑀆𑀭𑀸𑀥𑁂𑀢𑀺 𑀲𑀫𑁆𑀧𑀸𑀤𑁂𑀢𑀺 𑀧𑀭𑀺𑀧𑀽𑀭𑁂𑀢𑀺. 𑀘𑀺𑀢𑁆𑀢𑀁 𑀪𑀸𑀯𑀻𑀬𑀢𑀻𑀢𑀺 𑀫𑀕𑁆𑀕𑀘𑀺𑀢𑁆𑀢𑀁 𑀪𑀸𑀯𑀻𑀬𑀢𑀺 𑀩𑁆𑀭𑀽𑀳𑀻𑀬𑀢𑀺 𑀯𑀟𑁆𑀠𑀻𑀬𑀢𑀺. 𑀬𑁄 𑀭𑀸𑀕𑁄, 𑀲𑁄 𑀧𑀳𑀻𑀬𑀢𑀻𑀢𑀺 𑀬𑁄 𑀭𑀚𑁆𑀚𑀦𑀓𑀯𑀲𑁂𑀦 𑀭𑀸𑀕𑁄, 𑀲𑁄 𑀧𑀳𑀻𑀬𑀢𑀺. 𑀭𑀸𑀕𑁄 𑀳𑀺 𑀫𑀕𑁆𑀕𑀘𑀺𑀢𑁆𑀢𑀲𑁆𑀲 𑀧𑀘𑁆𑀘𑀦𑀻𑀓𑁄, 𑀫𑀕𑁆𑀕𑀘𑀺𑀢𑁆𑀢𑀁 𑀭𑀸𑀕𑀲𑁆𑀲 𑀘. 𑀭𑀸𑀕𑀓𑁆𑀔𑀡𑁂 𑀫𑀕𑁆𑀕𑀘𑀺𑀢𑁆𑀢𑀁 𑀦𑀢𑁆𑀣𑀺, 𑀫𑀕𑁆𑀕𑀘𑀺𑀢𑁆𑀢𑀓𑁆𑀔𑀡𑁂 𑀭𑀸𑀕𑁄 𑀦𑀢𑁆𑀣𑀺. 𑀬𑀤𑀸 𑀧𑀦 𑀭𑀸𑀕𑁄 𑀉𑀧𑁆𑀧𑀚𑁆𑀚𑀢𑀺, 𑀢𑀤𑀸 𑀫𑀕𑁆𑀕𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀢𑁆𑀢𑀺𑀁 𑀦𑀺𑀯𑀸𑀭𑁂𑀢𑀺, 𑀧𑀤𑀁 𑀧𑀘𑁆𑀙𑀺𑀦𑁆𑀤𑀢𑀺. 𑀬𑀤𑀸 𑀧𑀦 𑀫𑀕𑁆𑀕𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀤𑀸 𑀭𑀸𑀕𑀁 𑀲𑀫𑀽𑀮𑀓𑀁 𑀉𑀩𑁆𑀩𑀝𑁆𑀝𑁂𑀢𑁆𑀯𑀸 𑀲𑀫𑀼𑀕𑁆𑀖𑀸𑀢𑁂𑀦𑁆𑀢𑀫𑁂𑀯 𑀉𑀧𑁆𑀧𑀚𑁆𑀚𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀭𑀸𑀕𑁄 𑀧𑀳𑀻𑀬𑀢𑀻’’𑀢𑀺.

𑀯𑀺𑀧𑀲𑁆𑀲𑀦𑀸, 𑀪𑀺𑀓𑁆𑀔𑀯𑁂, 𑀪𑀸𑀯𑀺𑀢𑀸𑀢𑀺 𑀯𑀺𑀧𑀲𑁆𑀲𑀦𑀸𑀜𑀸𑀡𑀁 𑀩𑁆𑀭𑀽𑀳𑀺𑀢𑀁 𑀯𑀟𑁆𑀠𑀺𑀢𑀁. 𑀧𑀜𑁆𑀜𑀸 𑀪𑀸𑀯𑀻𑀬𑀢𑀻𑀢𑀺 𑀫𑀕𑁆𑀕𑀧𑀜𑁆𑀜𑀸 𑀪𑀸𑀯𑀻𑀬𑀢𑀺 𑀩𑁆𑀭𑀽𑀳𑀻𑀬𑀢𑀺 𑀯𑀟𑁆𑀠𑀻𑀬𑀢𑀺. 𑀬𑀸 𑀅𑀯𑀺𑀚𑁆𑀚𑀸, 𑀲𑀸 𑀧𑀳𑀻𑀬𑀢𑀻𑀢𑀺 𑀅𑀝𑁆𑀞𑀲𑀼 𑀞𑀸𑀦𑁂𑀲𑀼 𑀯𑀝𑁆𑀝𑀫𑀽𑀮𑀺𑀓𑀸 𑀫𑀳𑀸𑀅𑀯𑀺𑀚𑁆𑀚𑀸 𑀧𑀳𑀻𑀬𑀢𑀺. 𑀅𑀯𑀺𑀚𑁆𑀚𑀸 𑀳𑀺 𑀫𑀕𑁆𑀕𑀧𑀜𑁆𑀜𑀸𑀬 𑀧𑀘𑁆𑀘𑀦𑀻𑀓𑀸, 𑀫𑀕𑁆𑀕𑀧𑀜𑁆𑀜𑀸 𑀅𑀯𑀺𑀚𑁆𑀚𑀸𑀬. 𑀅𑀯𑀺𑀚𑁆𑀚𑀸𑀓𑁆𑀔𑀡𑁂 𑀫𑀕𑁆𑀕𑀧𑀜𑁆𑀜𑀸 𑀦𑀢𑁆𑀣𑀺, 𑀫𑀕𑁆𑀕𑀧𑀜𑁆𑀜𑀸𑀓𑁆𑀔𑀡𑁂 𑀅𑀯𑀺𑀚𑁆𑀚𑀸 𑀦𑀢𑁆𑀣𑀺. 𑀬𑀤𑀸 𑀧𑀦 𑀅𑀯𑀺𑀚𑁆𑀚𑀸 𑀉𑀧𑁆𑀧𑀚𑁆𑀚𑀢𑀺, 𑀢𑀤𑀸 𑀫𑀕𑁆𑀕𑀧𑀜𑁆𑀜𑀸𑀬 𑀉𑀧𑁆𑀧𑀢𑁆𑀢𑀺𑀁 𑀦𑀺𑀯𑀸𑀭𑁂𑀢𑀺, 𑀧𑀤𑀁 𑀧𑀘𑁆𑀙𑀺𑀦𑁆𑀤𑀢𑀺. 𑀬𑀤𑀸 𑀫𑀕𑁆𑀕𑀧𑀜𑁆𑀜𑀸 𑀉𑀧𑁆𑀧𑀚𑁆𑀚𑀢𑀺, 𑀢𑀤𑀸 𑀅𑀯𑀺𑀚𑁆𑀚𑀁 𑀲𑀫𑀽𑀮𑀺𑀓𑀁 𑀉𑀩𑁆𑀩𑀝𑁆𑀝𑁂𑀢𑁆𑀯𑀸 𑀲𑀫𑀼𑀕𑁆𑀖𑀸𑀢𑀬𑀫𑀸𑀦𑀸𑀯 𑀉𑀧𑁆𑀧𑀚𑁆𑀚𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀅𑀯𑀺𑀚𑁆𑀚𑀸 𑀧𑀳𑀻𑀬𑀢𑀻’’𑀢𑀺. 𑀇𑀢𑀺 𑀫𑀕𑁆𑀕𑀘𑀺𑀢𑁆𑀢𑀁 𑀫𑀕𑁆𑀕𑀧𑀜𑁆𑀜𑀸𑀢𑀺 𑀤𑁆𑀯𑁂𑀧𑀺 𑀲𑀳𑀚𑀸𑀢𑀥𑀫𑁆𑀫𑀸𑀯 𑀓𑀣𑀺𑀢𑀸.

𑀭𑀸𑀕𑀼𑀧𑀓𑁆𑀓𑀺𑀮𑀺𑀝𑁆𑀞𑀁 𑀯𑀸, 𑀪𑀺𑀓𑁆𑀔𑀯𑁂, 𑀘𑀺𑀢𑁆𑀢𑀁 𑀦 𑀯𑀺𑀫𑀼𑀘𑁆𑀘𑀢𑀻𑀢𑀺 𑀭𑀸𑀕𑁂𑀦 𑀉𑀧𑀓𑁆𑀓𑀺𑀮𑀺𑀝𑁆𑀞𑀢𑁆𑀢𑀸 𑀫𑀕𑁆𑀕𑀘𑀺𑀢𑁆𑀢𑀁 𑀦 𑀯𑀺𑀫𑀼𑀘𑁆𑀘𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀅𑀯𑀺𑀚𑁆𑀚𑀼𑀧𑀓𑁆𑀓𑀺𑀮𑀺𑀝𑁆𑀞𑀸 𑀯𑀸 𑀧𑀜𑁆𑀜𑀸 𑀦 𑀪𑀸𑀯𑀻𑀬𑀢𑀻𑀢𑀺 𑀅𑀯𑀺𑀚𑁆𑀚𑀸𑀬 𑀉𑀧𑀓𑁆𑀓𑀺𑀮𑀺𑀝𑁆𑀞𑀢𑁆𑀢𑀸 𑀫𑀕𑁆𑀕𑀧𑀜𑁆𑀜𑀸 𑀦 𑀪𑀸𑀯𑀻𑀬𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀇𑀢𑀺 𑀔𑁄, 𑀪𑀺𑀓𑁆𑀔𑀯𑁂𑀢𑀺 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂. 𑀭𑀸𑀕𑀯𑀺𑀭𑀸𑀕𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀻𑀢𑀺 𑀭𑀸𑀕𑀲𑁆𑀲 𑀔𑀬𑀯𑀺𑀭𑀸𑀕𑁂𑀦 𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑀦𑀸𑀫 𑀳𑁄𑀢𑀺. 𑀨𑀮𑀲𑀫𑀸𑀥𑀺𑀲𑁆𑀲𑁂𑀢𑀁 𑀦𑀸𑀫𑀁. 𑀅𑀯𑀺𑀚𑁆𑀚𑀸𑀯𑀺𑀭𑀸𑀕𑀸 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀻𑀢𑀺 𑀅𑀯𑀺𑀚𑁆𑀚𑀸𑀬 𑀔𑀬𑀯𑀺𑀭𑀸𑀕𑁂𑀦 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺 𑀦𑀸𑀫 𑀳𑁄𑀢𑀺. 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀦𑀸𑀦𑀸𑀓𑁆𑀔𑀡𑀺𑀓𑀸 𑀲𑀫𑀸𑀥𑀺𑀯𑀺𑀧𑀲𑁆𑀲𑀦𑀸 𑀓𑀣𑀺𑀢𑀸𑀢𑀺.

𑀩𑀸𑀮𑀯𑀕𑁆𑀕𑁄 𑀢𑀢𑀺𑀬𑁄.

𑁪. 𑀲𑀫𑀘𑀺𑀢𑁆𑀢𑀯𑀕𑁆𑀕𑀯𑀡𑁆𑀡𑀦𑀸

𑁩𑁩. 𑀘𑀢𑀼𑀢𑁆𑀣𑀲𑁆𑀲 𑀧𑀞𑀫𑁂 𑀅𑀲𑀧𑁆𑀧𑀼𑀭𑀺𑀲𑀪𑀽𑀫𑀻𑀢𑀺 𑀅𑀲𑀧𑁆𑀧𑀼𑀭𑀺𑀲𑀸𑀦𑀁 𑀧𑀢𑀺𑀝𑁆𑀞𑀸𑀦𑀝𑁆𑀞𑀸𑀦𑀁. 𑀲𑀧𑁆𑀧𑀼𑀭𑀺𑀲𑀪𑀽𑀫𑀺𑀬𑀫𑁆𑀧𑀺 𑀏𑀲𑁂𑀯 𑀦𑀬𑁄. 𑀅𑀓𑀢𑀜𑁆𑀜𑀽𑀢𑀺 𑀓𑀢𑀁 𑀦 𑀚𑀸𑀦𑀸𑀢𑀺. 𑀅𑀓𑀢𑀯𑁂𑀤𑀻𑀢𑀺 𑀓𑀢𑀁 𑀧𑀸𑀓𑀝𑀁 𑀓𑀢𑁆𑀯𑀸 𑀦 𑀚𑀸𑀦𑀸𑀢𑀺. 𑀉𑀧𑀜𑁆𑀜𑀸𑀢𑀦𑁆𑀢𑀺 𑀯𑀡𑁆𑀡𑀺𑀢𑀁 𑀣𑁄𑀫𑀺𑀢𑀁 𑀧𑀲𑀢𑁆𑀣𑀁. 𑀬𑀤𑀺𑀤𑀦𑁆𑀢𑀺 𑀬𑀸 𑀅𑀬𑀁. 𑀅𑀓𑀢𑀜𑁆𑀜𑀼𑀢𑀸 𑀅𑀓𑀢𑀯𑁂𑀤𑀺𑀢𑀸𑀢𑀺 𑀧𑀭𑁂𑀦 𑀓𑀢𑀲𑁆𑀲 𑀉𑀧𑀓𑀸𑀭𑀲𑁆𑀲 𑀅𑀚𑀸𑀦𑀦𑀜𑁆𑀘𑁂𑀯 𑀧𑀸𑀓𑀝𑀁 𑀓𑀢𑁆𑀯𑀸 𑀅𑀚𑀸𑀦𑀦𑀜𑁆𑀘. 𑀓𑁂𑀯𑀮𑀸𑀢𑀺 𑀲𑀓𑀮𑀸. 𑀲𑀼𑀓𑁆𑀓𑀧𑀓𑁆𑀔𑁂𑀧𑀺 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑁩𑁪. 𑀤𑀼𑀢𑀺𑀬𑁂 𑀫𑀸𑀢𑀼 𑀘 𑀧𑀺𑀢𑀼 𑀘𑀸𑀢𑀺 𑀚𑀦𑀓𑀫𑀸𑀢𑀼 𑀘 𑀚𑀦𑀓𑀧𑀺𑀢𑀼 𑀘. 𑀏𑀓𑁂𑀦, 𑀪𑀺𑀓𑁆𑀔𑀯𑁂, 𑀅𑀁𑀲𑁂𑀦 𑀫𑀸𑀢𑀭𑀁 𑀧𑀭𑀺𑀳𑀭𑁂𑀬𑁆𑀬𑀸𑀢𑀺 𑀏𑀓𑀲𑁆𑀫𑀺𑀁 𑀅𑀁𑀲𑀓𑀽𑀝𑁂 𑀞𑀧𑁂𑀢𑁆𑀯𑀸 𑀫𑀸𑀢𑀭𑀁 𑀧𑀝𑀺𑀚𑀕𑁆𑀕𑁂𑀬𑁆𑀬. 𑀏𑀓𑁂𑀦 𑀅𑀁𑀲𑁂𑀦 𑀧𑀺𑀢𑀭𑀁 𑀧𑀭𑀺𑀳𑀭𑁂𑀬𑁆𑀬𑀸𑀢𑀺 𑀏𑀓𑀲𑁆𑀫𑀺𑀁 𑀅𑀁𑀲𑀓𑀽𑀝𑁂 𑀞𑀧𑁂𑀢𑁆𑀯𑀸 𑀧𑀺𑀢𑀭𑀁 𑀧𑀝𑀺𑀚𑀕𑁆𑀕𑁂𑀬𑁆𑀬. 𑀯𑀲𑁆𑀲𑀲𑀢𑀸𑀬𑀼𑀓𑁄 𑀯𑀲𑁆𑀲𑀲𑀢𑀚𑀻𑀯𑀻𑀢𑀺 𑀯𑀲𑁆𑀲𑀲𑀢𑀸𑀬𑀼𑀓𑀓𑀸𑀮𑁂 𑀚𑀸𑀢𑁄 𑀲𑀓𑀮𑀁 𑀯𑀲𑁆𑀲𑀲𑀢𑀁 𑀚𑀻𑀯𑀦𑁆𑀢𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀲𑀘𑁂 𑀧𑀼𑀢𑁆𑀢𑁄 𑀦𑀸𑀫 ‘‘𑀫𑀸𑀢𑀸𑀧𑀺𑀢𑀽𑀦𑀁 𑀧𑀝𑀺𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀉𑀝𑁆𑀞𑀸𑀬 𑀲𑀫𑀼𑀝𑁆𑀞𑀸𑀬 𑀤𑀓𑁆𑀔𑀺𑀡𑁂 𑀅𑀁𑀲𑀓𑀽𑀝𑁂 𑀫𑀸𑀢𑀭𑀁, 𑀯𑀸𑀫𑁂 𑀧𑀺𑀢𑀭𑀁 𑀞𑀧𑁂𑀢𑁆𑀯𑀸 𑀯𑀲𑁆𑀲𑀲𑀢𑀸𑀬𑀼𑀓𑁄 𑀲𑀓𑀮𑀫𑁆𑀧𑀺 𑀯𑀲𑁆𑀲𑀲𑀢𑀁 𑀚𑀻𑀯𑀫𑀸𑀦𑁄 𑀧𑀭𑀺𑀳𑀭𑁂𑀬𑁆𑀬. 𑀲𑁄 𑀘 𑀦𑁂𑀲𑀁 𑀉𑀘𑁆𑀙𑀸𑀤𑀦𑀧𑀭𑀺𑀫𑀤𑁆𑀤𑀦𑀦𑁆𑀳𑀸𑀧𑀦𑀲𑀫𑁆𑀩𑀸𑀳𑀦𑁂𑀦𑀸𑀢𑀺 𑀲𑁄 𑀘 𑀧𑀼𑀢𑁆𑀢𑁄 𑀦𑁂𑀲𑀁 𑀫𑀸𑀢𑀸𑀧𑀺𑀢𑀽𑀦𑀁 𑀅𑀁𑀲𑀓𑀽𑀝𑁂𑀲𑀼 𑀞𑀺𑀢𑀸𑀦𑀁𑀬𑁂𑀯 𑀤𑀼𑀕𑁆𑀕𑀦𑁆𑀥𑀧𑀝𑀺𑀯𑀺𑀦𑁄𑀤𑀦𑀢𑁆𑀣𑀁 𑀲𑀼𑀕𑀦𑁆𑀥𑀓𑀭𑀡𑁂𑀦 𑀉𑀘𑁆𑀙𑀸𑀤𑀦𑁂𑀦, 𑀧𑀭𑀺𑀲𑁆𑀲𑀫𑀯𑀺𑀦𑁄𑀤𑀦𑀢𑁆𑀣𑀁 𑀳𑀢𑁆𑀣𑀧𑀭𑀺𑀫𑀤𑁆𑀤𑀦𑁂𑀦, 𑀲𑀻𑀢𑀼𑀡𑁆𑀳𑀓𑀸𑀮𑁂 𑀘 𑀉𑀡𑁆𑀳𑁄𑀤𑀓𑀲𑀻𑀢𑁄𑀤𑀓𑀦𑁆𑀳𑀸𑀧𑀦𑁂𑀦, 𑀳𑀢𑁆𑀣𑀧𑀸𑀤𑀸𑀤𑀻𑀦𑀁 𑀆𑀓𑀟𑁆𑀠𑀦𑀧𑀭𑀺𑀓𑀟𑁆𑀠𑀦𑀲𑀗𑁆𑀔𑀸𑀢𑁂𑀦 𑀲𑀫𑁆𑀩𑀸𑀳𑀦𑁂𑀦 𑀉𑀧𑀝𑁆𑀞𑀸𑀦𑀁 𑀓𑀭𑁂𑀬𑁆𑀬. 𑀢𑁂 𑀘 𑀢𑀢𑁆𑀣𑁂𑀯𑀸𑀢𑀺 𑀢𑁂 𑀘 𑀫𑀸𑀢𑀸𑀧𑀺𑀢𑀭𑁄 𑀢𑀢𑁆𑀣𑁂𑀯 𑀢𑀲𑁆𑀲 𑀅𑀁𑀲𑀓𑀽𑀝𑁂𑀲𑀼 𑀦𑀺𑀲𑀺𑀦𑁆𑀦𑀸𑀯 𑀫𑀼𑀢𑁆𑀢𑀓𑀭𑀻𑀲𑀁 𑀘𑀚𑁂𑀬𑁆𑀬𑀼𑀁. 𑀦𑀢𑁆𑀯𑁂𑀯 ,𑀪𑀺𑀓𑁆𑀔𑀯𑁂𑀢𑀺, 𑀪𑀺𑀓𑁆𑀔𑀯𑁂, 𑀏𑀯𑀫𑁆𑀧𑀺 𑀦𑀢𑁆𑀯𑁂𑀯 𑀫𑀸𑀢𑀸𑀧𑀺𑀢𑀽𑀦𑀁 𑀓𑀢𑀁 𑀯𑀸 𑀳𑁄𑀢𑀺 𑀧𑀝𑀺𑀓𑀢𑀁 𑀯𑀸.

𑀇𑀲𑁆𑀲𑀭𑀸𑀥𑀺𑀧𑀘𑁆𑀘𑁂 𑀭𑀚𑁆𑀚𑁂𑀢𑀺 𑀘𑀓𑁆𑀓𑀯𑀢𑁆𑀢𑀺𑀭𑀚𑁆𑀚𑀁 𑀲𑀦𑁆𑀥𑀸𑀬𑁂𑀯𑀫𑀸𑀳. 𑀆𑀧𑀸𑀤𑀓𑀸𑀢𑀺 𑀯𑀟𑁆𑀠𑀓𑀸 𑀅𑀦𑀼𑀧𑀸𑀮𑀓𑀸. 𑀧𑀼𑀢𑁆𑀢𑀸 𑀳𑀺 𑀫𑀸𑀢𑀸𑀧𑀺𑀢𑀽𑀳𑀺 𑀯𑀟𑁆𑀠𑀺𑀢𑀸 𑀘𑁂𑀯 𑀅𑀦𑀼𑀧𑀸𑀮𑀺𑀢𑀸 𑀘. 𑀧𑁄𑀲𑀓𑀸𑀢𑀺 𑀳𑀢𑁆𑀣𑀧𑀸𑀤𑁂 𑀯𑀟𑁆𑀠𑁂𑀢𑁆𑀯𑀸 𑀳𑀤𑀬𑀮𑁄𑀳𑀺𑀢𑀁 𑀧𑀸𑀬𑁂𑀢𑁆𑀯𑀸 𑀧𑁄𑀲𑀓𑀸. 𑀧𑀼𑀢𑁆𑀢𑀸 𑀳𑀺 𑀫𑀸𑀢𑀸𑀧𑀺𑀢𑀽𑀳𑀺 𑀧𑀼𑀝𑁆𑀞𑀸 𑀪𑀢𑀸 𑀅𑀦𑁆𑀦𑀧𑀸𑀦𑀸𑀤𑀻𑀳𑀺 𑀧𑀝𑀺𑀚𑀕𑁆𑀕𑀺𑀢𑀸. 𑀇𑀫𑀲𑁆𑀲 𑀮𑁄𑀓𑀲𑁆𑀲 𑀤𑀲𑁆𑀲𑁂𑀢𑀸𑀭𑁄𑀢𑀺 𑀲𑀘𑁂 𑀳𑀺 𑀫𑀸𑀢𑀸𑀧𑀺𑀢𑀭𑁄 𑀚𑀸𑀢𑀤𑀺𑀯𑀲𑁂𑀬𑁂𑀯 𑀧𑀼𑀢𑁆𑀢𑀁 𑀧𑀸𑀤𑁂 𑀕𑀳𑁂𑀢𑁆𑀯𑀸 𑀅𑀭𑀜𑁆𑀜𑁂 𑀯𑀸 𑀦𑀤𑀺𑀬𑀁 𑀯𑀸 𑀧𑀧𑀸𑀢𑁂 𑀯𑀸 𑀔𑀺𑀧𑁂𑀬𑁆𑀬𑀼𑀁, 𑀇𑀫𑀲𑁆𑀫𑀺𑀁 𑀮𑁄𑀓𑁂 𑀇𑀝𑁆𑀞𑀸𑀦𑀺𑀝𑁆𑀞𑀸𑀭𑀫𑁆𑀫𑀡𑀁 𑀦 𑀧𑀲𑁆𑀲𑁂𑀬𑁆𑀬. 𑀏𑀯𑀁 𑀅𑀓𑀢𑁆𑀯𑀸 𑀆𑀧𑀸𑀤𑀺𑀢𑀢𑁆𑀢𑀸 𑀧𑁄𑀲𑀺𑀢𑀢𑁆𑀢𑀸 𑀏𑀲 𑀇𑀫𑀲𑁆𑀫𑀺𑀁 𑀮𑁄𑀓𑁂 𑀇𑀝𑁆𑀞𑀸𑀦𑀺𑀝𑁆𑀞𑀸𑀭𑀫𑁆𑀫𑀡𑀁 𑀫𑀸𑀢𑀸𑀧𑀺𑀢𑀭𑁄 𑀦𑀺𑀲𑁆𑀲𑀸𑀬 𑀧𑀲𑁆𑀲𑀢𑀻𑀢𑀺 𑀢𑁆𑀬𑀸𑀲𑁆𑀲 𑀇𑀫𑀲𑁆𑀲 𑀮𑁄𑀓𑀲𑁆𑀲 𑀤𑀲𑁆𑀲𑁂𑀢𑀸𑀭𑁄 𑀦𑀸𑀫 𑀳𑁄𑀦𑁆𑀢𑀺. 𑀲𑀫𑀸𑀤𑀧𑁂𑀢𑀻𑀢𑀺 𑀕𑀡𑁆𑀳𑀸𑀧𑁂𑀢𑀺. 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀲𑀤𑁆𑀥𑀸𑀲𑀻𑀮𑀘𑀸𑀕𑀧𑀜𑁆𑀜𑀸 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀫𑀺𑀲𑁆𑀲𑀓𑀸 𑀓𑀣𑀺𑀢𑀸. 𑀥𑀫𑁆𑀫𑀲𑁂𑀦𑀸𑀧𑀢𑀺𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀲𑀤𑀺𑀲𑁄𑀯 𑀪𑀺𑀓𑁆𑀔𑀼 𑀢𑁂𑀲𑀼 𑀧𑀢𑀺𑀝𑁆𑀞𑀸𑀧𑁂𑀢𑀺 𑀦𑀸𑀫𑀸𑀢𑀺 𑀯𑁂𑀤𑀺𑀢𑀩𑁆𑀩𑁄.

𑁩𑁫. 𑀢𑀢𑀺𑀬𑁂 𑀢𑁂𑀦𑀼𑀧𑀲𑀗𑁆𑀓𑀫𑀻𑀢𑀺 𑀲𑁄 𑀳𑀺 𑀩𑁆𑀭𑀸𑀳𑁆𑀫𑀡𑁄 ‘‘𑀲𑀫𑀡𑁄 𑀓𑀺𑀭 𑀕𑁄𑀢𑀫𑁄 𑀓𑀣𑀺𑀢𑀁 𑀯𑀺𑀲𑁆𑀲𑀚𑁆𑀚𑁂𑀢𑀺, 𑀧𑀼𑀘𑁆𑀙𑀸𑀬𑀲𑁆𑀲 𑀯𑀺𑀭𑀚𑁆𑀛𑀦𑀁 𑀦𑀸𑀫 𑀦𑀢𑁆𑀣𑀺. 𑀅𑀳𑀫𑀲𑁆𑀲 𑀯𑀺𑀭𑀚𑁆𑀛𑀦𑀧𑀜𑁆𑀳𑀁 𑀅𑀪𑀺𑀲𑀗𑁆𑀔𑀭𑀺𑀲𑁆𑀲𑀸𑀫𑀻’’𑀢𑀺 𑀧𑀡𑀻𑀢𑀪𑁄𑀚𑀦𑀁 𑀪𑀼𑀜𑁆𑀚𑀺𑀢𑁆𑀯𑀸 𑀕𑀩𑁆𑀪𑀤𑁆𑀯𑀸𑀭𑀁 𑀧𑀺𑀤𑀳𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑁄 𑀘𑀺𑀦𑁆𑀢𑁂𑀢𑀼𑀁 𑀆𑀭𑀪𑀺. 𑀅𑀣𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀇𑀫𑀲𑁆𑀫𑀺𑀁 𑀞𑀸𑀦𑁂 𑀉𑀘𑁆𑀘𑀸𑀲𑀤𑁆𑀤𑀫𑀳𑀸𑀲𑀤𑁆𑀤𑁄 𑀯𑀢𑁆𑀢𑀢𑀺, 𑀘𑀺𑀢𑁆𑀢𑀁 𑀦 𑀏𑀓𑀕𑁆𑀕𑀁 𑀳𑁄𑀢𑀺, 𑀪𑀽𑀫𑀺𑀖𑀭𑀁 𑀓𑀸𑀭𑁂𑀲𑁆𑀲𑀸𑀫𑀻’’𑀢𑀺 𑀪𑀽𑀫𑀺𑀖𑀭𑀁 𑀓𑀸𑀭𑁂𑀢𑁆𑀯𑀸 𑀢𑀢𑁆𑀣 𑀧𑀯𑀺𑀲𑀺𑀢𑁆𑀯𑀸 𑁋 ‘‘𑀏𑀯𑀁 𑀧𑀼𑀝𑁆𑀞𑁄 𑀏𑀯𑀁 𑀓𑀣𑁂𑀲𑁆𑀲𑀢𑀺, 𑀏𑀯𑀁 𑀧𑀼𑀝𑁆𑀞𑁄 𑀏𑀯𑀁 𑀓𑀣𑁂𑀲𑁆𑀲𑀢𑀻’’𑀢𑀺 𑀏𑀓𑀁 𑀕𑀡𑁆𑀳𑀺𑀢𑁆𑀯𑀸 𑀏𑀓𑀁 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑁄 𑀲𑀓𑀮𑀤𑀺𑀯𑀲𑀁 𑀓𑀺𑀜𑁆𑀘𑀺 𑀧𑀲𑁆𑀲𑀺𑀢𑀼𑀁 𑀦𑀸𑀲𑀓𑁆𑀔𑀺. 𑀢𑀲𑁆𑀲 𑀇𑀫𑀺𑀦𑀸𑀯 𑀦𑀻𑀳𑀸𑀭𑁂𑀦 𑀘𑀢𑁆𑀢𑀸𑀭𑁄 𑀫𑀸𑀲𑀸 𑀯𑀻𑀢𑀺𑀯𑀢𑁆𑀢𑀸. 𑀲𑁄 𑀘𑀢𑀼𑀦𑁆𑀦𑀁 𑀫𑀸𑀲𑀸𑀦𑀁 𑀅𑀘𑁆𑀘𑀬𑁂𑀦 𑀉𑀪𑀢𑁄𑀓𑁄𑀝𑀺𑀓𑀁 𑀧𑀜𑁆𑀳𑀁 𑀦𑀸𑀫 𑀅𑀤𑁆𑀤𑀲. 𑀏𑀯𑀁 𑀓𑀺𑀭𑀲𑁆𑀲 𑀅𑀳𑁄𑀲𑀺 𑁋 ‘‘𑀅𑀳𑀁 𑀲𑀫𑀡𑀁 𑀕𑁄𑀢𑀫𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘𑀓𑀺𑀁𑀯𑀸𑀤𑀻 𑀪𑀯’𑀦𑁆𑀢𑀺 𑀧𑀼𑀘𑁆𑀙𑀺𑀲𑁆𑀲𑀸𑀫𑀺. 𑀲𑀘𑁂 ‘𑀓𑀺𑀭𑀺𑀬𑀯𑀸𑀤𑀺𑀫𑁆𑀳𑀻’𑀢𑀺 𑀯𑀓𑁆𑀔𑀢𑀺, ‘𑀲𑀩𑁆𑀩𑀸𑀓𑀼𑀲𑀮𑀸𑀦𑀁 𑀦𑀸𑀫 𑀢𑀼𑀫𑁆𑀳𑁂 𑀓𑀺𑀭𑀺𑀬𑀁 𑀯𑀤𑁂𑀣𑀸’𑀢𑀺 𑀦𑀁 𑀦𑀺𑀕𑁆𑀕𑀡𑁆𑀳𑀺𑀲𑁆𑀲𑀸𑀫𑀺. 𑀲𑀘𑁂 ‘𑀅𑀓𑀺𑀭𑀺𑀬𑀯𑀸𑀤𑀺𑀫𑁆𑀳𑀻’𑀢𑀺 𑀯𑀓𑁆𑀔𑀢𑀺, ‘𑀓𑀼𑀲𑀮𑀥𑀫𑁆𑀫𑀸𑀦𑀁 𑀦𑀸𑀫 𑀢𑀼𑀫𑁆𑀳𑁂 𑀅𑀓𑀺𑀭𑀺𑀬𑀁 𑀯𑀤𑁂𑀣𑀸’𑀢𑀺 𑀦𑀁 𑀦𑀺𑀕𑁆𑀕𑀡𑁆𑀳𑀺𑀲𑁆𑀲𑀸𑀫𑀺. 𑀇𑀤𑀜𑁆𑀳𑀺 𑀉𑀪𑀢𑁄𑀓𑁄𑀝𑀺𑀓𑀁 𑀧𑀜𑁆𑀳𑀁 𑀧𑀼𑀝𑁆𑀞𑁄 𑀦𑁂𑀯 𑀉𑀕𑁆𑀕𑀺𑀮𑀺𑀢𑀼𑀁 𑀲𑀓𑁆𑀔𑀺𑀲𑁆𑀲𑀢𑀺 𑀦 𑀦𑀺𑀕𑁆𑀕𑀺𑀮𑀺𑀢𑀼𑀁. 𑀏𑀯𑀁 𑀫𑀫 𑀚𑀬𑁄 𑀪𑀯𑀺𑀲𑁆𑀲𑀢𑀺, 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀧𑀭𑀸𑀚𑀬𑁄’’𑀢𑀺 𑀉𑀝𑁆𑀞𑀸𑀬 𑀅𑀧𑁆𑀨𑁄𑀝𑁂𑀢𑁆𑀯𑀸 𑀪𑀽𑀫𑀺𑀖𑀭𑀸 𑀦𑀺𑀓𑁆𑀔𑀫𑁆𑀫 ‘‘𑀏𑀯𑀭𑀽𑀧𑀁 𑀧𑀜𑁆𑀳𑀁 𑀧𑀼𑀘𑁆𑀙𑀦𑁆𑀢𑁂𑀦 𑀦 𑀏𑀓𑀓𑁂𑀦 𑀕𑀦𑁆𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀦𑀕𑀭𑁂 𑀖𑁄𑀲𑀦𑀁 𑀓𑀸𑀭𑁂𑀢𑁆𑀯𑀸 𑀲𑀓𑀮𑀦𑀸𑀕𑀭𑁂𑀳𑀺 𑀧𑀭𑀺𑀯𑀼𑀢𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺. 𑀓𑀺𑀁𑀯𑀸𑀤𑀻𑀢𑀺 𑀓𑀺𑀁𑀮𑀤𑁆𑀥𑀺𑀓𑁄. 𑀓𑀺𑀫𑀓𑁆𑀔𑀸𑀬𑀻𑀢𑀺 𑀓𑀺𑀁 𑀦𑀸𑀫 𑀲𑀸𑀯𑀓𑀸𑀦𑀁 𑀧𑀝𑀺𑀧𑀤𑀁 𑀅𑀓𑁆𑀔𑀸𑀬𑀻𑀢𑀺 𑀧𑀼𑀘𑁆𑀙𑀺. 𑀅𑀣𑀲𑁆𑀲 𑀪𑀕𑀯𑀸 𑀘𑀢𑀽𑀳𑀺 𑀫𑀸𑀲𑁂𑀳𑀺 𑀧𑀜𑁆𑀳𑀁 𑀅𑀪𑀺𑀲𑀗𑁆𑀔𑀭𑀺𑀢𑁆𑀯𑀸 ‘‘𑀤𑀺𑀝𑁆𑀞𑁄 𑀫𑁂 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀧𑀭𑀸𑀚𑀬𑀧𑀜𑁆𑀳𑁄’’𑀢𑀺 𑀫𑀸𑀦𑀁 𑀧𑀕𑁆𑀕𑀬𑁆𑀳 𑀆𑀕𑀢𑀪𑀸𑀯𑀁 𑀜𑀢𑁆𑀯𑀸 𑀏𑀓𑀧𑀤𑁂𑀦𑁂𑀯 𑀢𑀁 𑀧𑀜𑁆𑀳𑀁 𑀪𑀺𑀦𑁆𑀤𑀦𑁆𑀢𑁄 𑀓𑀺𑀭𑀺𑀬𑀯𑀸𑀤𑀻 𑀘𑀸𑀳𑀁, 𑀩𑁆𑀭𑀸𑀳𑁆𑀫𑀡𑀸𑀢𑀺𑀆𑀤𑀺𑀫𑀸𑀳. 𑀅𑀣 𑀩𑁆𑀭𑀸𑀳𑁆𑀫𑀡𑁄 𑀅𑀢𑁆𑀢𑀦𑁄 𑀫𑀸𑀦𑀁 𑀅𑀧𑀦𑁂𑀢𑁆𑀯𑀸 𑀪𑀕𑀯𑀦𑁆𑀢𑀁 𑀆𑀬𑀸𑀘𑀦𑁆𑀢𑁄 𑀬𑀣𑀸𑀓𑀣𑀁 𑀧𑀦𑀸𑀢𑀺𑀆𑀤𑀺𑀫𑀸𑀳. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑁩𑁬. 𑀘𑀢𑀼𑀢𑁆𑀣𑁂 𑀤𑀓𑁆𑀔𑀺𑀡𑁂𑀬𑁆𑀬𑀸𑀢𑀺 𑀤𑀓𑁆𑀔𑀺𑀡𑀸 𑀯𑀼𑀘𑁆𑀘𑀢𑀺 𑀤𑀸𑀦𑀁, 𑀢𑀲𑁆𑀲 𑀧𑀝𑀺𑀕𑁆𑀕𑀳𑀡𑀬𑀼𑀢𑁆𑀢𑀸 𑀓𑀢𑀺 𑀧𑀼𑀕𑁆𑀕𑀮𑀸𑀢𑀺 𑀧𑀼𑀘𑁆𑀙𑀢𑀺. 𑀲𑁂𑀔𑁄𑀢𑀺 𑀇𑀫𑀺𑀦𑀸 𑀲𑀢𑁆𑀢 𑀲𑁂𑀓𑁆𑀔𑁂 𑀤𑀲𑁆𑀲𑁂𑀢𑀺. 𑀏𑀢𑁆𑀣 𑀘 𑀲𑀻𑀮𑀯𑀦𑁆𑀢𑀧𑀼𑀣𑀼𑀚𑁆𑀚𑀦𑁄𑀧𑀺 𑀲𑁄𑀢𑀸𑀧𑀦𑁆𑀦𑁂𑀦𑁂𑀯 𑀲𑀗𑁆𑀕𑀳𑀺𑀢𑁄. 𑀆𑀳𑀼𑀦𑁂𑀬𑁆𑀬𑀸 𑀬𑀚𑀫𑀸𑀦𑀸𑀦𑀁 𑀳𑁄𑀦𑁆𑀢𑀻𑀢𑀺 𑀤𑀸𑀦𑀁 𑀤𑀤𑀦𑁆𑀢𑀸𑀦𑀁 𑀆𑀳𑀼𑀦𑀲𑁆𑀲 𑀅𑀭𑀳𑀸 𑀤𑀸𑀦𑀧𑀝𑀺𑀕𑁆𑀕𑀸𑀳𑀓𑀸 𑀦𑀸𑀫 𑀳𑁄𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀔𑁂𑀢𑁆𑀢𑀦𑁆𑀢𑀺 𑀯𑀢𑁆𑀣𑀼 𑀧𑀢𑀺𑀝𑁆𑀞𑀸, 𑀧𑀼𑀜𑁆𑀜𑀲𑁆𑀲 𑀯𑀺𑀭𑀼𑀳𑀦𑀝𑁆𑀞𑀸𑀦𑀦𑁆𑀢𑀺 𑀅𑀢𑁆𑀣𑁄.

𑁩𑁭. 𑀧𑀜𑁆𑀘𑀫𑁂 𑀧𑀼𑀩𑁆𑀩𑀸𑀭𑀸𑀫𑁂𑀢𑀺 𑀲𑀸𑀯𑀢𑁆𑀣𑀺𑀢𑁄 𑀧𑀼𑀭𑀢𑁆𑀣𑀺𑀫𑀤𑀺𑀲𑀸𑀪𑀸𑀕𑁂 𑀆𑀭𑀸𑀫𑁂. 𑀫𑀺𑀕𑀸𑀭𑀫𑀸𑀢𑀼𑀧𑀸𑀲𑀸𑀤𑁂𑀢𑀺 𑀯𑀺𑀲𑀸𑀔𑀸𑀬 𑀉𑀧𑀸𑀲𑀺𑀓𑀸𑀬 𑀧𑀸𑀲𑀸𑀤𑁂. 𑀲𑀸 𑀳𑀺 𑀫𑀺𑀕𑀸𑀭𑀲𑁂𑀝𑁆𑀞𑀺𑀦𑀸 𑀫𑀸𑀢𑀼𑀝𑁆𑀞𑀸𑀦𑁂 𑀞𑀧𑀺𑀢𑀢𑁆𑀢𑀸𑀧𑀺, 𑀲𑀩𑁆𑀩𑀚𑁂𑀝𑁆𑀞𑀓𑀲𑁆𑀲 𑀧𑀼𑀢𑁆𑀢𑀲𑁆𑀲 𑀅𑀬𑁆𑀬𑀓𑀲𑁂𑀝𑁆𑀞𑀺𑀦𑁄𑀯 𑀲𑀫𑀸𑀦𑀦𑀸𑀫𑀓𑀢𑁆𑀢𑀸𑀧𑀺 𑀫𑀺𑀕𑀸𑀭𑀫𑀸𑀢𑀸𑀢𑀺 𑀯𑀼𑀘𑁆𑀘𑀢𑀺. 𑀢𑀸𑀬 𑀓𑀸𑀭𑀺𑀢𑁄 𑀲𑀳𑀲𑁆𑀲𑀕𑀩𑁆𑀪𑁄 𑀧𑀸𑀲𑀸𑀤𑁄 𑀫𑀺𑀕𑀸𑀭𑀫𑀸𑀢𑀼𑀧𑀸𑀲𑀸𑀤𑁄 𑀦𑀸𑀫. 𑀣𑁂𑀭𑁄 𑀢𑀲𑁆𑀫𑀺𑀁 𑀯𑀺𑀳𑀭𑀢𑀺. 𑀢𑀢𑁆𑀭 𑀔𑁄 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄𑀢𑀺 𑀢𑀲𑁆𑀫𑀺𑀁 𑀧𑀸𑀲𑀸𑀤𑁂 𑀯𑀺𑀳𑀭𑀦𑁆𑀢𑁄 𑀥𑀫𑁆𑀫𑀲𑁂𑀦𑀸𑀧𑀢𑀺𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄.

𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀻𑀢𑀺 𑀓𑀲𑁆𑀫𑀺𑀁 𑀓𑀸𑀮𑁂 𑀆𑀫𑀦𑁆𑀢𑁂𑀲𑀺? 𑀓𑀸𑀦𑀺𑀘𑀺 𑀳𑀺 𑀲𑀼𑀢𑁆𑀢𑀸𑀦𑀺 𑀧𑀼𑀭𑁂𑀪𑀢𑁆𑀢𑁂 𑀪𑀸𑀲𑀺𑀢𑀸𑀦𑀺 𑀅𑀢𑁆𑀣𑀺, 𑀓𑀸𑀦𑀺𑀘𑀺 𑀧𑀘𑁆𑀙𑀸𑀪𑀢𑁆𑀢𑁂, 𑀓𑀸𑀦𑀺𑀘𑀺 𑀧𑀼𑀭𑀺𑀫𑀬𑀸𑀫𑁂, 𑀓𑀸𑀦𑀺𑀘𑀺 𑀫𑀚𑁆𑀛𑀺𑀫𑀬𑀸𑀫𑁂, 𑀓𑀸𑀦𑀺𑀘𑀺 𑀧𑀘𑁆𑀙𑀺𑀫𑀬𑀸𑀫𑁂. 𑀇𑀤𑀁 𑀧𑀦 𑀲𑀫𑀘𑀺𑀢𑁆𑀢𑀧𑀝𑀺𑀧𑀤𑀸𑀲𑀼𑀢𑁆𑀢𑀁 𑀧𑀘𑁆𑀙𑀸𑀪𑀢𑁆𑀢𑁂 𑀪𑀸𑀲𑀺𑀢𑀁. 𑀢𑀲𑁆𑀫𑀸 𑀲𑀸𑀬𑀦𑁆𑀳𑀲𑀫𑀬𑁂 𑀆𑀫𑀦𑁆𑀢𑁂𑀲𑀺.

𑀦 𑀓𑁂𑀯𑀮𑀁 𑀘𑁂𑀢𑀁 𑀣𑁂𑀭𑁂𑀦𑁂𑀯 𑀪𑀸𑀲𑀺𑀢𑀁, 𑀢𑀣𑀸𑀕𑀢𑁂𑀦𑀸𑀧𑀺 𑀪𑀸𑀲𑀺𑀢𑀁. 𑀓𑀢𑁆𑀣 𑀦𑀺𑀲𑀻𑀤𑀺𑀢𑁆𑀯𑀸𑀢𑀺? 𑀯𑀺𑀲𑀸𑀔𑀸𑀬 𑀭𑀢𑀦𑀧𑀸𑀲𑀸𑀤𑁂 𑀦𑀺𑀲𑀻𑀤𑀺𑀢𑁆𑀯𑀸. 𑀢𑀣𑀸𑀕𑀢𑁄 𑀳𑀺 𑀧𑀞𑀫𑀩𑁄𑀥𑀺𑀬𑀁 𑀯𑀻𑀲𑀢𑀺 𑀯𑀲𑁆𑀲𑀸𑀦𑀺 𑀅𑀦𑀺𑀩𑀤𑁆𑀥𑀯𑀸𑀲𑁄 𑀳𑀼𑀢𑁆𑀯𑀸 𑀬𑀢𑁆𑀣 𑀬𑀢𑁆𑀣 𑀨𑀸𑀲𑀼𑀓𑀁 𑀳𑁄𑀢𑀺, 𑀢𑀢𑁆𑀣 𑀢𑀢𑁆𑀣𑁂𑀯 𑀕𑀦𑁆𑀢𑁆𑀯𑀸 𑀯𑀲𑀺. 𑀧𑀞𑀫𑀁 𑀅𑀦𑁆𑀢𑁄𑀯𑀲𑁆𑀲𑀜𑁆𑀳𑀺 𑀇𑀲𑀺𑀧𑀢𑀦𑁂 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁂𑀢𑁆𑀯𑀸 𑀅𑀝𑁆𑀞𑀸𑀭𑀲 𑀫𑀳𑀸𑀩𑁆𑀭𑀳𑁆𑀫𑀓𑁄𑀝𑀺𑀬𑁄 𑀅𑀫𑀢𑀧𑀸𑀦𑀁 𑀧𑀸𑀬𑁂𑀢𑁆𑀯𑀸 𑀩𑀸𑀭𑀸𑀡𑀲𑀺𑀁 𑀉𑀧𑀦𑀺𑀲𑁆𑀲𑀸𑀬 𑀇𑀲𑀺𑀧𑀢𑀦𑁂 𑀯𑀲𑀺. 𑀤𑀼𑀢𑀺𑀬𑀁 𑀅𑀦𑁆𑀢𑁄𑀯𑀲𑁆𑀲𑀁 𑀭𑀸𑀚𑀕𑀳𑀁 𑀉𑀧𑀦𑀺𑀲𑁆𑀲𑀸𑀬 𑀯𑁂𑀴𑀼𑀯𑀦𑁂, 𑀢𑀢𑀺𑀬𑀘𑀢𑀼𑀢𑁆𑀣𑀸𑀦𑀺𑀧𑀺 𑀢𑀢𑁆𑀣𑁂𑀯, 𑀧𑀜𑁆𑀘𑀫𑀁 𑀅𑀦𑁆𑀢𑁄𑀯𑀲𑁆𑀲𑀁 𑀯𑁂𑀲𑀸𑀮𑀺𑀁 𑀉𑀧𑀦𑀺𑀲𑁆𑀲𑀸𑀬 𑀫𑀳𑀸𑀯𑀦𑁂 𑀓𑀽𑀝𑀸𑀕𑀸𑀭𑀲𑀸𑀮𑀸𑀬𑀁, 𑀙𑀝𑁆𑀞𑀁 𑀅𑀦𑁆𑀢𑁄𑀯𑀲𑁆𑀲𑀁 𑀫𑀓𑀼𑀮𑀧𑀩𑁆𑀩𑀢𑁂, 𑀲𑀢𑁆𑀢𑀫𑀁 𑀢𑀸𑀯𑀢𑀺𑀁𑀲𑀪𑀯𑀦𑁂, 𑀅𑀝𑁆𑀞𑀫𑀁 𑀪𑀕𑁆𑀕𑁂 𑀲𑀼𑀲𑀼𑀫𑀸𑀭𑀕𑀺𑀭𑀁 𑀦𑀺𑀲𑁆𑀲𑀸𑀬 𑀪𑁂𑀲𑀓𑀴𑀸𑀯𑀦𑁂, 𑀦𑀯𑀫𑀁 𑀓𑁄𑀲𑀫𑁆𑀩𑀺𑀬𑀁, 𑀤𑀲𑀫𑀁 𑀧𑀸𑀮𑀺𑀮𑁂𑀬𑁆𑀬𑀓𑁂 𑀯𑀦𑀲𑀡𑁆𑀟𑁂, 𑀏𑀓𑀸𑀤𑀲𑀫𑀁 𑀦𑀸𑀮𑀸𑀬𑀁 𑀩𑁆𑀭𑀸𑀳𑁆𑀫𑀡𑀕𑀸𑀫𑁂, 𑀤𑁆𑀯𑀸𑀤𑀲𑀫𑀁 𑀯𑁂𑀭𑀜𑁆𑀚𑀸𑀬𑀁, 𑀢𑁂𑀭𑀲𑀫𑀁 𑀘𑀸𑀮𑀺𑀬𑀧𑀩𑁆𑀩𑀢𑁂, 𑀘𑀼𑀤𑁆𑀤𑀲𑀫𑀁 𑀚𑁂𑀢𑀯𑀦𑁂, 𑀧𑀜𑁆𑀘𑀤𑀲𑀫𑀁 𑀓𑀧𑀺𑀮𑀯𑀢𑁆𑀣𑀼𑀲𑁆𑀫𑀺𑀁, 𑀲𑁄𑀴𑀲𑀫𑀁 𑀆𑀴𑀯𑀓𑀁 𑀤𑀫𑁂𑀢𑁆𑀯𑀸 𑀘𑀢𑀼𑀭𑀸𑀲𑀻𑀢𑀺𑀧𑀸𑀡𑀲𑀳𑀲𑁆𑀲𑀸𑀦𑀺 𑀅𑀫𑀢𑀧𑀸𑀦𑀁 𑀧𑀸𑀬𑁂𑀢𑁆𑀯𑀸 𑀆𑀴𑀯𑀺𑀬𑀁, 𑀲𑀢𑁆𑀢𑀭𑀲𑀫𑀁 𑀭𑀸𑀚𑀕𑀳𑁂𑀬𑁂𑀯, 𑀅𑀝𑁆𑀞𑀸𑀭𑀲𑀫𑀁 𑀘𑀸𑀮𑀺𑀬𑀧𑀩𑁆𑀩𑀢𑁂𑀬𑁂𑀯, 𑀢𑀣𑀸 𑀏𑀓𑀽𑀦𑀯𑀻𑀲𑀢𑀺𑀫𑀁, 𑀯𑀻𑀲𑀢𑀺𑀫𑀁 𑀧𑀦 𑀅𑀦𑁆𑀢𑁄𑀯𑀲𑁆𑀲𑀁 𑀭𑀸𑀚𑀕𑀳𑀁𑀬𑁂𑀯 𑀉𑀧𑀦𑀺𑀲𑁆𑀲𑀸𑀬 𑀯𑀲𑀺. 𑀏𑀯𑀁 𑀯𑀻𑀲𑀢𑀺 𑀯𑀲𑁆𑀲𑀸𑀦𑀺 𑀅𑀦𑀺𑀩𑀤𑁆𑀥𑀯𑀸𑀲𑁄 𑀳𑀼𑀢𑁆𑀯𑀸 𑀬𑀢𑁆𑀣 𑀬𑀢𑁆𑀣 𑀨𑀸𑀲𑀼𑀓𑀁 𑀳𑁄𑀢𑀺, 𑀢𑀢𑁆𑀣 𑀢𑀢𑁆𑀣𑁂𑀯 𑀯𑀲𑀺.

𑀢𑀢𑁄 𑀧𑀝𑁆𑀞𑀸𑀬 𑀧𑀦 𑀤𑁆𑀯𑁂 𑀲𑁂𑀦𑀸𑀲𑀦𑀸𑀦𑀺 𑀥𑀼𑀯𑀧𑀭𑀺𑀪𑁄𑀕𑀸𑀦𑀺 𑀅𑀓𑀸𑀲𑀺. 𑀓𑀢𑀭𑀸𑀦𑀺 𑀤𑁆𑀯𑁂? 𑀚𑁂𑀢𑀯𑀦𑀜𑁆𑀘 𑀧𑀼𑀩𑁆𑀩𑀸𑀭𑀸𑀫𑀜𑁆𑀘. 𑀓𑀲𑁆𑀫𑀸? 𑀤𑁆𑀯𑀺𑀦𑁆𑀦𑀁 𑀓𑀼𑀮𑀸𑀦𑀁 𑀕𑀼𑀡𑀫𑀳𑀦𑁆𑀢𑀢𑀸𑀬. 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀳𑀺 𑀯𑀺𑀲𑀸𑀔𑀸𑀬 𑀘 𑀕𑀼𑀡𑀁 𑀲𑀦𑁆𑀥𑀸𑀬 𑀕𑀼𑀡𑀁 𑀧𑀝𑀺𑀘𑁆𑀘 𑀲𑀢𑁆𑀣𑀸 𑀢𑀸𑀦𑀺 𑀲𑁂𑀦𑀸𑀲𑀦𑀸𑀦𑀺 𑀥𑀼𑀯𑀧𑀭𑀺𑀪𑁄𑀕𑁂𑀦 𑀧𑀭𑀺𑀪𑀼𑀜𑁆𑀚𑀺. 𑀉𑀢𑀼𑀯𑀲𑁆𑀲𑀁 𑀘𑀸𑀭𑀺𑀓𑀁 𑀘𑀭𑀺𑀢𑁆𑀯𑀸𑀧𑀺 𑀳𑀺 𑀅𑀦𑁆𑀢𑁄𑀯𑀲𑁆𑀲𑁂 𑀤𑁆𑀯𑀻𑀲𑀼𑀬𑁂𑀯 𑀲𑁂𑀦𑀸𑀲𑀦𑁂𑀲𑀼 𑀯𑀲𑀢𑀺. 𑀏𑀯𑀁 𑀯𑀲𑀦𑁆𑀢𑁄 𑀧𑀦 𑀚𑁂𑀢𑀯𑀦𑁂 𑀭𑀢𑁆𑀢𑀺𑀁 𑀯𑀲𑀺𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑁄 𑀤𑀓𑁆𑀔𑀺𑀡𑀤𑁆𑀯𑀸𑀭𑁂𑀦 𑀲𑀸𑀯𑀢𑁆𑀣𑀺𑀁 𑀧𑀺𑀡𑁆𑀟𑀸𑀬 𑀧𑀯𑀺𑀲𑀺𑀢𑁆𑀯𑀸 𑀧𑀸𑀘𑀻𑀦𑀤𑁆𑀯𑀸𑀭𑁂𑀦 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀼𑀩𑁆𑀩𑀸𑀭𑀸𑀫𑁂 𑀤𑀺𑀯𑀸𑀯𑀺𑀳𑀸𑀭𑀁 𑀓𑀭𑁄𑀢𑀺. 𑀧𑀼𑀩𑁆𑀩𑀸𑀭𑀸𑀫𑁂 𑀭𑀢𑁆𑀢𑀺𑀁 𑀯𑀲𑀺𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀧𑀸𑀘𑀻𑀦𑀤𑁆𑀯𑀸𑀭𑁂𑀦 𑀲𑀸𑀯𑀢𑁆𑀣𑀺𑀁 𑀧𑀺𑀡𑁆𑀟𑀸𑀬 𑀧𑀯𑀺𑀲𑀺𑀢𑁆𑀯𑀸 𑀤𑀓𑁆𑀔𑀺𑀡𑀤𑁆𑀯𑀸𑀭𑁂𑀦 𑀦𑀺𑀓𑁆𑀔𑀫𑀺𑀢𑁆𑀯𑀸 𑀚𑁂𑀢𑀯𑀦𑁂 𑀤𑀺𑀯𑀸𑀯𑀺𑀳𑀸𑀭𑀁 𑀓𑀭𑁄𑀢𑀺. 𑀢𑀲𑁆𑀫𑀺𑀁 𑀧𑀦 𑀤𑀺𑀯𑀲𑁂 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀚𑁂𑀢𑀯𑀦𑁂𑀬𑁂𑀯 𑀯𑀲𑀺. 𑀬𑀢𑁆𑀣 𑀓𑀢𑁆𑀣𑀘𑀺 𑀯𑀲𑀦𑁆𑀢𑀲𑁆𑀲 𑀘𑀲𑁆𑀲 𑀧𑀜𑁆𑀘𑀯𑀺𑀥𑀓𑀺𑀘𑁆𑀘𑀁 𑀅𑀯𑀺𑀚𑀳𑀺𑀢𑀫𑁂𑀯 𑀳𑁄𑀢𑀺. 𑀢𑀁 𑀳𑁂𑀝𑁆𑀞𑀸 𑀯𑀺𑀢𑁆𑀣𑀸𑀭𑀺𑀢𑀫𑁂𑀯. 𑀢𑁂𑀲𑀼 𑀓𑀺𑀘𑁆𑀘𑁂𑀲𑀼 𑀧𑀘𑁆𑀙𑀺𑀫𑀬𑀸𑀫𑀓𑀺𑀘𑁆𑀘𑀓𑀸𑀮𑁂 𑀪𑀕𑀯𑀸 𑀮𑁄𑀓𑀁 𑀑𑀮𑁄𑀓𑁂𑀦𑁆𑀢𑁄 𑀲𑀸𑀯𑀢𑁆𑀣𑀺𑀯𑀸𑀲𑀻𑀦𑀜𑁆𑀘 𑀲𑀫𑀦𑁆𑀢𑀸 𑀘 𑀲𑀸𑀯𑀢𑁆𑀣𑀺𑀬𑀸 𑀕𑀸𑀯𑀼𑀢𑀅𑀟𑁆𑀠𑀬𑁄𑀚𑀦𑀬𑁄𑀚𑀦𑀧𑀭𑀫𑁂 𑀞𑀸𑀦𑁂 𑀅𑀧𑀭𑀺𑀫𑀸𑀡𑀸𑀦𑀁 𑀲𑀢𑁆𑀢𑀸𑀦𑀁 𑀅𑀪𑀺𑀲𑀫𑀬𑀪𑀸𑀯𑀁 𑀅𑀤𑁆𑀤𑀲.

𑀢𑀢𑁄 ‘‘𑀓𑀲𑁆𑀫𑀺𑀁 𑀦𑀼 𑀔𑁄 𑀓𑀸𑀮𑁂 𑀅𑀪𑀺𑀲𑀫𑀬𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀑𑀮𑁄𑀓𑁂𑀦𑁆𑀢𑁄 ‘‘𑀲𑀸𑀬𑀦𑁆𑀳𑀲𑀫𑀬𑁂’’𑀢𑀺 𑀤𑀺𑀲𑁆𑀯𑀸 ‘‘𑀫𑀬𑀺 𑀦𑀼 𑀔𑁄 𑀓𑀣𑁂𑀦𑁆𑀢𑁂 𑀅𑀪𑀺𑀲𑀫𑀬𑁄 𑀪𑀯𑀺𑀲𑁆𑀲𑀢𑀺, 𑀲𑀸𑀯𑀓𑁂 𑀓𑀣𑁂𑀦𑁆𑀢𑁂 𑀪𑀯𑀺𑀲𑁆𑀲𑀢𑀻’’𑀢𑀺 ‘‘𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁂 𑀓𑀣𑁂𑀦𑁆𑀢𑁂 𑀪𑀯𑀺𑀲𑁆𑀲𑀢𑀻’’𑀢𑀺 𑀅𑀤𑁆𑀤𑀲. 𑀢𑀢𑁄 ‘‘𑀓𑀢𑁆𑀣 𑀦𑀺𑀲𑀻𑀤𑀺𑀢𑁆𑀯𑀸 𑀓𑀣𑁂𑀦𑁆𑀢𑁂 𑀪𑀯𑀺𑀲𑁆𑀲𑀢𑀻’’𑀢𑀺 𑀑𑀮𑁄𑀓𑁂𑀦𑁆𑀢𑁄 ‘‘𑀯𑀺𑀲𑀸𑀔𑀸𑀬 𑀭𑀢𑀦𑀧𑀸𑀲𑀸𑀤𑁂 𑀦𑀺𑀲𑀻𑀤𑀺𑀢𑁆𑀯𑀸’’𑀢𑀺 𑀤𑀺𑀲𑁆𑀯𑀸 ‘‘𑀩𑀼𑀤𑁆𑀥𑀸𑀦𑀁 𑀦𑀸𑀫 𑀢𑀬𑁄 𑀲𑀸𑀯𑀓𑀲𑀦𑁆𑀦𑀺𑀧𑀸𑀢𑀸 𑀳𑁄𑀦𑁆𑀢𑀺, 𑀅𑀕𑁆𑀕𑀲𑀸𑀯𑀓𑀸𑀦𑀁 𑀏𑀓𑁄. 𑀢𑁂𑀲𑀼 𑀅𑀚𑁆𑀚 𑀥𑀫𑁆𑀫𑀲𑁂𑀦𑀸𑀧𑀢𑀺𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀲𑁆𑀲 𑀲𑀸𑀯𑀓𑀲𑀦𑁆𑀦𑀺𑀧𑀸𑀢𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀅𑀤𑁆𑀤𑀲. 𑀤𑀺𑀲𑁆𑀯𑀸 𑀧𑀸𑀢𑁄𑀯 𑀲𑀭𑀻𑀭𑀧𑀝𑀺𑀚𑀕𑁆𑀕𑀦𑀁 𑀓𑀢𑁆𑀯𑀸 𑀦𑀺𑀯𑀢𑁆𑀣𑀦𑀺𑀯𑀸𑀲𑀦𑁄 𑀲𑀼𑀕𑀢𑀘𑀻𑀯𑀭𑀁 𑀧𑀸𑀭𑀼𑀧𑀺𑀢𑁆𑀯𑀸 𑀲𑁂𑀮𑀫𑀬𑀧𑀢𑁆𑀢𑀁 𑀆𑀤𑀸𑀬 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑁄 𑀤𑀓𑁆𑀔𑀺𑀡𑀤𑁆𑀯𑀸𑀭𑁂𑀦 𑀦𑀕𑀭𑀁 𑀧𑀯𑀺𑀲𑀺𑀢𑁆𑀯𑀸 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑁄 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀲𑀼𑀮𑀪𑀧𑀺𑀡𑁆𑀟𑀧𑀸𑀢𑀁 𑀓𑀢𑁆𑀯𑀸 𑀯𑀸𑀢𑀧𑁆𑀧𑀳𑀢𑀸 𑀯𑀺𑀬 𑀦𑀸𑀯𑀸 𑀧𑀝𑀺𑀦𑀺𑀯𑀢𑁆𑀢𑀺𑀢𑁆𑀯𑀸 𑀤𑀓𑁆𑀔𑀺𑀡𑀤𑁆𑀯𑀸𑀭𑁂𑀦 𑀦𑀺𑀓𑁆𑀔𑀫𑀺𑀢𑁆𑀯𑀸 𑀩𑀳𑀺𑀤𑁆𑀯𑀸𑀭𑁂 𑀅𑀝𑁆𑀞𑀸𑀲𑀺. 𑀢𑀢𑁄 𑀅𑀲𑀻𑀢𑀺 𑀫𑀳𑀸𑀲𑀸𑀯𑀓𑀸 𑀪𑀺𑀓𑁆𑀔𑀼𑀦𑀺𑀧𑀭𑀺𑀲𑀸 𑀉𑀧𑀸𑀲𑀓𑀧𑀭𑀺𑀲𑀸 𑀉𑀧𑀸𑀲𑀺𑀓𑀸𑀧𑀭𑀺𑀲𑀸𑀢𑀺 𑀘𑀢𑀲𑁆𑀲𑁄 𑀧𑀭𑀺𑀲𑀸 𑀲𑀢𑁆𑀣𑀸𑀭𑀁 𑀧𑀭𑀺𑀯𑀸𑀭𑀬𑀺𑀁𑀲𑀼.

𑀲𑀢𑁆𑀣𑀸 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀲𑀸𑀭𑀺𑀧𑀼𑀢𑁆𑀢, 𑀢𑀬𑀸 𑀧𑀼𑀩𑁆𑀩𑀸𑀭𑀸𑀫𑀁 𑀕𑀦𑁆𑀢𑀼𑀁 𑀯𑀝𑁆𑀝𑀢𑀺, 𑀢𑀯 𑀘 𑀧𑀭𑀺𑀲𑀁 𑀕𑀳𑁂𑀢𑁆𑀯𑀸 𑀕𑀘𑁆𑀙𑀸𑀳𑀻’’𑀢𑀺. ‘‘𑀲𑀸𑀥𑀼, 𑀪𑀦𑁆𑀢𑁂’’𑀢𑀺 𑀣𑁂𑀭𑁄 𑀅𑀢𑁆𑀢𑀦𑁄 𑀧𑀭𑀺𑀯𑀸𑀭𑁂𑀳𑀺 𑀧𑀜𑁆𑀘𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺 𑀧𑀭𑀺𑀯𑀼𑀢𑁄 𑀧𑀼𑀩𑁆𑀩𑀸𑀭𑀸𑀫𑀁 𑀅𑀕𑀫𑀸𑀲𑀺. 𑀏𑀢𑁂𑀦𑁂𑀯 𑀦𑀺𑀬𑀸𑀫𑁂𑀦 𑀅𑀲𑀻𑀢𑀺 𑀫𑀳𑀸𑀲𑀸𑀯𑀓𑁂 𑀧𑀼𑀩𑁆𑀩𑀸𑀭𑀸𑀫𑀫𑁂𑀯 𑀧𑁂𑀲𑁂𑀢𑁆𑀯𑀸 𑀲𑀬𑀁 𑀏𑀓𑁂𑀦 𑀆𑀦𑀦𑁆𑀤𑀢𑁆𑀣𑁂𑀭𑁂𑀦𑁂𑀯 𑀲𑀤𑁆𑀥𑀺𑀁 𑀚𑁂𑀢𑀯𑀦𑀁 𑀅𑀕𑀫𑀸𑀲𑀺. 𑀆𑀦𑀦𑁆𑀤𑀢𑁆𑀣𑁂𑀭𑁄𑀧𑀺 𑀯𑀺𑀳𑀸𑀭𑁂 𑀲𑀢𑁆𑀣𑀼 𑀯𑀢𑁆𑀢𑀁 𑀓𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 ‘‘𑀧𑀼𑀩𑁆𑀩𑀸𑀭𑀸𑀫𑀁 𑀕𑀘𑁆𑀙𑀸𑀫𑀺, 𑀪𑀦𑁆𑀢𑁂’’𑀢𑀺 𑀆𑀳. 𑀏𑀯𑀁 𑀓𑀭𑁄𑀳𑀺 𑀆𑀦𑀦𑁆𑀤𑀸𑀢𑀺. 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀢𑀢𑁆𑀣𑁂𑀯 𑀅𑀕𑀫𑀸𑀲𑀺. 𑀲𑀢𑁆𑀣𑀸 𑀏𑀓𑀓𑁄𑀯 𑀚𑁂𑀢𑀯𑀦𑁂 𑀑𑀳𑀻𑀦𑁄.

𑀢𑀁 𑀤𑀺𑀯𑀲𑀜𑁆𑀳𑀺 𑀘𑀢𑀲𑁆𑀲𑁄 𑀧𑀭𑀺𑀲𑀸 𑀣𑁂𑀭𑀲𑁆𑀲𑁂𑀯 𑀥𑀫𑁆𑀫𑀓𑀣𑀁 𑀲𑁄𑀢𑀼𑀓𑀸𑀫𑀸 𑀅𑀳𑁂𑀲𑀼𑀁. 𑀓𑁄𑀲𑀮𑀫𑀳𑀸𑀭𑀸𑀚𑀸𑀧𑀺 𑀩𑀮𑀓𑀸𑀬𑁂𑀦 𑀧𑀭𑀺𑀯𑀼𑀢𑁄 𑀧𑀼𑀩𑁆𑀩𑀸𑀭𑀸𑀫𑀫𑁂𑀯 𑀕𑀢𑁄. 𑀢𑀣𑀸 𑀧𑀜𑁆𑀘𑀲𑀢𑀉𑀧𑀸𑀲𑀓𑀧𑀭𑀺𑀯𑀸𑀭𑁄 𑀅𑀦𑀸𑀣𑀧𑀺𑀡𑁆𑀟𑀺𑀓𑁄. 𑀯𑀺𑀲𑀸𑀔𑀸 𑀧𑀦 𑀫𑀳𑀸𑀉𑀧𑀸𑀲𑀺𑀓𑀸 𑀤𑁆𑀯𑀻𑀳𑀺 𑀚𑀗𑁆𑀖𑀲𑀳𑀲𑁆𑀲𑁂𑀳𑀺 𑀧𑀭𑀺𑀯𑀼𑀢𑁄 𑀅𑀕𑀫𑀸𑀲𑀺. 𑀲𑀢𑁆𑀢𑀧𑀡𑁆𑀡𑀸𑀲𑀸𑀬 𑀓𑀼𑀮𑀲𑀢𑀲𑀳𑀲𑁆𑀲𑀸𑀦𑀁 𑀯𑀲𑀦𑀝𑁆𑀞𑀸𑀦𑁂 𑀲𑀸𑀯𑀢𑁆𑀣𑀺𑀦𑀕𑀭𑁂 𑀕𑁂𑀳𑀧𑀸𑀮𑀓𑀤𑀸𑀭𑀓𑁂 𑀞𑀧𑁂𑀢𑁆𑀯𑀸 𑀲𑁂𑀲𑀚𑀦𑁄 𑀕𑀦𑁆𑀥𑀘𑀼𑀡𑁆𑀡𑀫𑀸𑀮𑀸𑀤𑀻𑀦𑀺 𑀕𑀳𑁂𑀢𑁆𑀯𑀸 𑀧𑀼𑀩𑁆𑀩𑀸𑀭𑀸𑀫𑀫𑁂𑀯 𑀅𑀕𑀫𑀸𑀲𑀺. 𑀘𑀢𑀽𑀲𑀼 𑀤𑁆𑀯𑀸𑀭𑀕𑀸𑀫𑁂𑀲𑀼 𑀕𑀸𑀯𑀼𑀢𑀅𑀟𑁆𑀠𑀬𑁄𑀚𑀦𑀬𑁄𑀚𑀦𑀧𑀭𑀫𑀝𑁆𑀞𑀸𑀦𑁂 𑀲𑀩𑁆𑀩𑁂𑀬𑁂𑀯 𑀫𑀦𑀼𑀲𑁆𑀲𑀸 𑀕𑀦𑁆𑀥𑀘𑀼𑀡𑁆𑀡𑀫𑀸𑀮𑀸𑀤𑀺𑀳𑀢𑁆𑀣𑀸 𑀧𑀼𑀩𑁆𑀩𑀸𑀭𑀸𑀫𑀫𑁂𑀯 𑀅𑀕𑀫𑀁𑀲𑀼. 𑀲𑀓𑀮𑀯𑀺𑀳𑀸𑀭𑁄 𑀫𑀺𑀲𑁆𑀲𑀓𑀧𑀼𑀧𑁆𑀨𑁂𑀳𑀺 𑀅𑀪𑀺𑀓𑀺𑀡𑁆𑀡𑁄 𑀯𑀺𑀬 𑀅𑀳𑁄𑀲𑀺.

𑀥𑀫𑁆𑀫𑀲𑁂𑀦𑀸𑀧𑀢𑀺𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄𑀧𑀺 𑀔𑁄 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀯𑀺𑀳𑀸𑀭𑀧𑀭𑀺𑀯𑁂𑀡𑁂 𑀅𑀗𑁆𑀕𑀡𑀝𑁆𑀞𑀸𑀦𑁂 𑀅𑀝𑁆𑀞𑀸𑀲𑀺. 𑀪𑀺𑀓𑁆𑀔𑀽 𑀣𑁂𑀭𑀲𑁆𑀲 𑀆𑀲𑀦𑀁 𑀧𑀜𑁆𑀜𑀸𑀧𑀬𑀺𑀁𑀲𑀼. 𑀣𑁂𑀭𑁄 𑀢𑀢𑁆𑀣 𑀦𑀺𑀲𑀻𑀤𑀺𑀢𑁆𑀯𑀸 𑀉𑀧𑀝𑁆𑀞𑀸𑀓𑀢𑁆𑀣𑁂𑀭𑁂𑀦 𑀯𑀢𑁆𑀢𑁂 𑀓𑀢𑁂 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀑𑀯𑀸𑀤𑀁 𑀓𑀢𑁆𑀯𑀸 𑀕𑀦𑁆𑀥𑀓𑀼𑀝𑀺𑀁 𑀧𑀯𑀺𑀲𑀺𑀢𑁆𑀯𑀸 𑀲𑀫𑀸𑀧𑀢𑁆𑀢𑀺𑀁 𑀅𑀧𑁆𑀧𑁂𑀢𑁆𑀯𑀸 𑀦𑀺𑀲𑀻𑀤𑀺. 𑀲𑁄 𑀧𑀭𑀺𑀘𑁆𑀙𑀺𑀦𑁆𑀦𑀓𑀸𑀮𑀯𑀲𑁂𑀦 𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀬 𑀅𑀘𑀺𑀭𑀯𑀢𑀺𑀁 𑀕𑀦𑁆𑀢𑁆𑀯𑀸 𑀭𑀚𑁄𑀚𑀮𑁆𑀮𑀁 𑀧𑀯𑀸𑀳𑁂𑀢𑁆𑀯𑀸 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀤𑀭𑀣𑁄 𑀑𑀢𑀺𑀡𑁆𑀡𑀢𑀺𑀢𑁆𑀣𑁂𑀦𑁂𑀯 𑀉𑀢𑁆𑀢𑀭𑀺𑀢𑁆𑀯𑀸 𑀦𑀺𑀯𑀢𑁆𑀣𑀦𑀺𑀯𑀸𑀲𑀦𑁄 𑀲𑀗𑁆𑀖𑀸𑀝𑀺𑀁 𑀧𑀸𑀭𑀼𑀧𑀺𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀪𑀺𑀓𑁆𑀔𑀼𑀲𑀗𑁆𑀖𑁄𑀧𑀺 𑀲𑀫𑁆𑀫𑀼𑀔𑀲𑀫𑁆𑀫𑀼𑀔𑀝𑁆𑀞𑀸𑀦𑁂𑀦 𑀑𑀢𑀭𑀺𑀢𑁆𑀯𑀸 𑀲𑀭𑀻𑀭𑁂 𑀭𑀚𑁄𑀚𑀮𑁆𑀮𑀁 𑀧𑀯𑀸𑀳𑁂𑀢𑁆𑀯𑀸 𑀧𑀘𑁆𑀘𑀼𑀢𑁆𑀢𑀭𑀺𑀢𑁆𑀯𑀸 𑀣𑁂𑀭𑀁 𑀧𑀭𑀺𑀯𑀸𑀭𑀬𑀺𑀁𑀲𑀼. 𑀅𑀦𑁆𑀢𑁄𑀯𑀺𑀳𑀸𑀭𑁂𑀧𑀺 𑀣𑁂𑀭𑀲𑁆𑀲 𑀥𑀫𑁆𑀫𑀸𑀲𑀦𑀁 𑀧𑀜𑁆𑀜𑀸𑀧𑀬𑀺𑀁𑀲𑀼. 𑀘𑀢𑀲𑁆𑀲𑁄𑀧𑀺 𑀧𑀭𑀺𑀲𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀑𑀓𑀸𑀲𑀁 𑀜𑀢𑁆𑀯𑀸 𑀫𑀕𑁆𑀕𑀁 𑀞𑀧𑁂𑀢𑁆𑀯𑀸 𑀦𑀺𑀲𑀻𑀤𑀺𑀁𑀲𑀼. 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄𑀧𑀺 𑀧𑀜𑁆𑀘𑀪𑀺𑀓𑁆𑀔𑀼𑀲𑀢𑀧𑀭𑀺𑀯𑀸𑀭𑁄 𑀥𑀫𑁆𑀫𑀲𑀪𑀁 𑀆𑀕𑀦𑁆𑀢𑁆𑀯𑀸 𑀲𑀻𑀳𑀫𑀢𑁆𑀣𑀓𑀧𑁆𑀧𑀢𑀺𑀝𑁆𑀞𑀺𑀢𑁂 𑀲𑀫𑀼𑀲𑁆𑀲𑀺𑀢𑀲𑁂𑀢𑀘𑁆𑀙𑀢𑁆𑀢𑁂 𑀭𑀢𑀦𑀧𑀮𑁆𑀮𑀗𑁆𑀓𑁂 𑀘𑀺𑀢𑁆𑀢𑀩𑀻𑀚𑀦𑀺𑀁 𑀕𑀳𑁂𑀢𑁆𑀯𑀸 𑀧𑀼𑀭𑀢𑁆𑀣𑀸𑀪𑀺𑀫𑀼𑀔𑁄 𑀦𑀺𑀲𑀻𑀤𑀺. 𑀦𑀺𑀲𑀻𑀤𑀺𑀢𑁆𑀯𑀸 𑀧𑀭𑀺𑀲𑀁 𑀑𑀮𑁄𑀓𑁂𑀢𑁆𑀯𑀸 𑁋 ‘‘𑀫𑀳𑀢𑀻 𑀯𑀢𑀸𑀬𑀁 𑀧𑀭𑀺𑀲𑀸, 𑀇𑀫𑀺𑀲𑁆𑀲𑀸 𑀦 𑀅𑀧𑁆𑀧𑀫𑀢𑁆𑀢𑀺𑀓𑀸 𑀧𑀭𑀺𑀢𑁆𑀢𑀓𑀥𑀫𑁆𑀫𑀤𑁂𑀲𑀦𑀸 𑀅𑀦𑀼𑀘𑁆𑀙𑀯𑀺𑀓𑀸, 𑀓𑀢𑀭𑀥𑀫𑁆𑀫𑀤𑁂𑀲𑀦𑀸 𑀦𑀼 𑀔𑁄 𑀅𑀦𑀼𑀘𑁆𑀙𑀯𑀺𑀓𑀸 𑀪𑀯𑀺𑀲𑁆𑀲𑀢𑀻’’𑀢𑀺 𑀢𑀻𑀡𑀺 𑀧𑀺𑀝𑀓𑀸𑀦𑀺 𑀆𑀯𑀚𑁆𑀚𑀫𑀸𑀦𑁄 𑀇𑀫𑀁 𑀲𑀁𑀬𑁄𑀚𑀦𑀧𑀭𑀺𑀬𑀸𑀬 𑀥𑀫𑁆𑀫𑀤𑁂𑀲𑀦𑀁 𑀅𑀤𑁆𑀤𑀲.

𑀏𑀯𑀁 𑀤𑁂𑀲𑀦𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀢𑀁 𑀤𑁂𑀲𑁂𑀢𑀼𑀓𑀸𑀫𑁄 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑀆𑀯𑀼𑀲𑁄, 𑀪𑀺𑀓𑁆𑀔𑀯𑁂𑀢𑀺. 𑀆𑀯𑀼𑀲𑁄𑀢𑀺 𑀳𑀺 𑀅𑀯𑀢𑁆𑀯𑀸, 𑀪𑀺𑀓𑁆𑀔𑀯𑁂𑀢𑀺 𑀯𑀘𑀦𑀁 𑀩𑀼𑀤𑁆𑀥𑀸𑀮𑀸𑀧𑁄 𑀦𑀸𑀫 𑀳𑁄𑀢𑀺, 𑀅𑀬𑀁 𑀧𑀦𑀸𑀬𑀲𑁆𑀫𑀸 ‘‘𑀤𑀲𑀩𑀮𑁂𑀦 𑀲𑀫𑀸𑀦𑀁 𑀆𑀮𑀧𑀦𑀁 𑀦 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀲𑀢𑁆𑀣𑀼 𑀕𑀸𑀭𑀯𑀯𑀲𑁂𑀦 𑀲𑀸𑀯𑀓𑀸𑀮𑀸𑀧𑀁 𑀓𑀭𑁄𑀦𑁆𑀢𑁄, ‘‘𑀆𑀯𑀼𑀲𑁄 𑀪𑀺𑀓𑁆𑀔𑀯𑁂’’𑀢𑀺 𑀆𑀳. 𑀏𑀢𑀤𑀯𑁄𑀘𑀸𑀢𑀺 𑀏𑀢𑀁 ‘‘𑀅𑀚𑁆𑀛𑀢𑁆𑀢𑀲𑀁𑀬𑁄𑀚𑀦𑀜𑁆𑀘, 𑀆𑀯𑀼𑀲𑁄, 𑀧𑀼𑀕𑁆𑀕𑀮𑀁 𑀤𑁂𑀲𑁂𑀲𑁆𑀲𑀸𑀫𑀺 𑀩𑀳𑀺𑀤𑁆𑀥𑀸𑀲𑀁𑀬𑁄𑀚𑀦𑀜𑁆𑀘𑀸’’𑀢𑀺 𑀥𑀫𑁆𑀫𑀤𑁂𑀲𑀦𑀸𑀧𑀤𑀁 𑀅𑀯𑁄𑀘.

𑀢𑀲𑁆𑀫𑀺𑀁 𑀧𑀦 𑀭𑀢𑀦𑀧𑀸𑀲𑀸𑀤𑁂 𑀅𑀥𑀺𑀯𑀢𑁆𑀣𑁄 𑀏𑀓𑁄 𑀲𑁄𑀢𑀸𑀧𑀦𑁆𑀦𑁄 𑀤𑁂𑀯𑀧𑀼𑀢𑁆𑀢𑁄 𑀅𑀢𑁆𑀣𑀺, 𑀲𑁄 𑀩𑀼𑀤𑁆𑀥𑁂𑀳𑀺 𑀯𑀸 𑀲𑀸𑀯𑀓𑁂𑀳𑀺 𑀯𑀸 𑀤𑁂𑀲𑀦𑀸𑀬 𑀆𑀭𑀤𑁆𑀥𑀫𑀢𑁆𑀢𑀸𑀬𑀬𑁂𑀯 𑀚𑀸𑀦𑀸𑀢𑀺 𑁋 ‘‘𑀅𑀬𑀁 𑀤𑁂𑀲𑀦𑀸 𑀉𑀢𑁆𑀢𑀸𑀦𑀺𑀓𑀸 𑀪𑀯𑀺𑀲𑁆𑀲𑀢𑀺, 𑀅𑀬𑀁 𑀕𑀫𑁆𑀪𑀻𑀭𑀸. 𑀅𑀬𑀁 𑀛𑀸𑀦𑀦𑀺𑀲𑁆𑀲𑀺𑀢𑀸 𑀪𑀯𑀺𑀲𑁆𑀲𑀢𑀺, 𑀅𑀬𑀁 𑀯𑀺𑀧𑀲𑁆𑀲𑀦𑀸𑀦𑀺𑀲𑁆𑀲𑀺𑀢𑀸. 𑀅𑀬𑀁 𑀫𑀕𑁆𑀕𑀦𑀺𑀲𑁆𑀲𑀺𑀢𑀸 𑀅𑀬𑀁 𑀨𑀮𑀦𑀺𑀲𑁆𑀲𑀺𑀢𑀸, 𑀅𑀬𑀁 𑀦𑀺𑀩𑁆𑀩𑀸𑀦𑀦𑀺𑀲𑁆𑀲𑀺𑀢𑀸’’𑀢𑀺. 𑀲𑁄 𑀢𑀲𑁆𑀫𑀺𑀫𑁆𑀧𑀺 𑀤𑀺𑀯𑀲𑁂 𑀣𑁂𑀭𑁂𑀦 𑀤𑁂𑀲𑀦𑀸𑀬 𑀆𑀭𑀤𑁆𑀥𑀫𑀢𑁆𑀢𑀸𑀬 𑀏𑀯𑀁 𑀅𑀜𑁆𑀜𑀸𑀲𑀺 𑁋 ‘‘𑀬𑁂𑀦 𑀦𑀻𑀳𑀸𑀭𑁂𑀦 𑀫𑀬𑁆𑀳𑀁 𑀅𑀬𑁆𑀬𑁂𑀦 𑀥𑀫𑁆𑀫𑀲𑁂𑀦𑀸𑀧𑀢𑀺𑀦𑀸 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁂𑀦 𑀤𑁂𑀲𑀦𑀸 𑀆𑀭𑀤𑁆𑀥𑀸, 𑀅𑀬𑀁 𑀤𑁂𑀲𑀦𑀸 𑀯𑀺𑀧𑀲𑁆𑀲𑀦𑀸𑀕𑀸𑀴𑁆𑀳𑀸 𑀪𑀯𑀺𑀲𑁆𑀲𑀢𑀺, 𑀙𑀳𑀺 𑀫𑀼𑀔𑁂𑀳𑀺 𑀯𑀺𑀧𑀲𑁆𑀲𑀦𑀁 𑀓𑀣𑁂𑀲𑁆𑀲𑀢𑀺. 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀓𑁄𑀝𑀺𑀲𑀢𑀲𑀳𑀲𑁆𑀲𑀤𑁂𑀯𑀢𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀲𑁆𑀲𑀦𑁆𑀢𑀺, 𑀲𑁄𑀢𑀸𑀧𑀦𑁆𑀦𑀸𑀤𑀻𑀦𑀁 𑀧𑀦 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀧𑀭𑀺𑀘𑁆𑀙𑁂𑀤𑁄 𑀦 𑀪𑀯𑀺𑀲𑁆𑀲𑀢𑀺. 𑀤𑁂𑀲𑀦𑀸𑀬 𑀅𑀦𑀼𑀘𑁆𑀙𑀯𑀺𑀓𑀁 𑀓𑀢𑁆𑀯𑀸 𑀫𑀬𑁆𑀳𑀁 𑀅𑀬𑁆𑀬𑀲𑁆𑀲 𑀲𑀸𑀥𑀼𑀓𑀸𑀭𑀁 𑀤𑀲𑁆𑀲𑀸𑀫𑀻’’𑀢𑀺 𑀤𑁂𑀯𑀸𑀦𑀼𑀪𑀸𑀯𑁂𑀦 𑀫𑀳𑀦𑁆𑀢𑀁 𑀲𑀤𑁆𑀤𑀁 𑀓𑀢𑁆𑀯𑀸 𑁋 ‘‘𑀲𑀸𑀥𑀼 𑀲𑀸𑀥𑀼 𑀅𑀬𑁆𑀬𑀸’’𑀢𑀺 𑀆𑀳.

𑀤𑁂𑀯𑀭𑀸𑀚𑁂𑀦 𑀲𑀸𑀥𑀼𑀓𑀸𑀭𑁂 𑀤𑀺𑀦𑁆𑀦𑁂 𑀧𑀭𑀺𑀯𑀸𑀭𑀓𑀧𑀸𑀲𑀸𑀤𑀲𑀳𑀲𑁆𑀲𑁂 𑀅𑀥𑀺𑀯𑀢𑁆𑀣𑀸 𑀤𑁂𑀯𑀢𑀸 𑀲𑀩𑁆𑀩𑀸𑀯 𑀲𑀸𑀥𑀼𑀓𑀸𑀭𑀁 𑀅𑀤𑀁𑀲𑀼. 𑀢𑀸𑀲𑀁 𑀲𑀸𑀥𑀼𑀓𑀸𑀭𑀲𑀤𑁆𑀤𑁂𑀦 𑀲𑀩𑁆𑀩𑀸 𑀧𑀼𑀩𑁆𑀩𑀸𑀭𑀸𑀫𑁂 𑀯𑀲𑀦𑀤𑁂𑀯𑀢𑀸, 𑀢𑀸𑀲𑀁 𑀲𑀤𑁆𑀤𑁂𑀦 𑀕𑀸𑀯𑀼𑀢𑀫𑀢𑁆𑀢𑁂 𑀤𑁂𑀯𑀢𑀸, 𑀢𑀢𑁄 𑀅𑀟𑁆𑀠𑀬𑁄𑀚𑀦𑁂 𑀬𑁄𑀚𑀦𑁂𑀢𑀺 𑀏𑀢𑁂𑀦𑀼𑀧𑀸𑀬𑁂𑀦 𑀏𑀓𑀘𑀓𑁆𑀓𑀯𑀸𑀴𑁂, 𑀤𑁆𑀯𑀻𑀲𑀼 𑀘𑀓𑁆𑀓𑀯𑀸𑀴𑁂𑀲𑀼, 𑀢𑀻𑀲𑀼 𑀘𑀓𑁆𑀓𑀯𑀸𑀴𑁂𑀲𑀽𑀢𑀺 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑁂𑀲𑀼 𑀤𑁂𑀯𑀢𑀸 𑀲𑀸𑀥𑀼𑀓𑀸𑀭𑀫𑀤𑀁𑀲𑀼. 𑀢𑀸𑀲𑀁 𑀲𑀸𑀥𑀼𑀓𑀸𑀭𑀲𑀤𑁆𑀤𑁂𑀦 𑀧𑀣𑀯𑀺𑀝𑁆𑀞𑀓𑀦𑀸𑀕𑀸 𑀘 𑀆𑀓𑀸𑀲𑀝𑁆𑀞𑀓𑀤𑁂𑀯𑀢𑀸 𑀘. 𑀢𑀢𑁄 𑀅𑀩𑁆𑀪𑀯𑀮𑀸𑀳𑀓𑀸, 𑀉𑀡𑁆𑀳𑀯𑀮𑀸𑀳𑀓𑀸, 𑀲𑀻𑀢𑀯𑀮𑀸𑀳𑀓𑀸, 𑀯𑀲𑁆𑀲𑀯𑀮𑀸𑀳𑀓𑀸, 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸 𑀘𑀢𑁆𑀢𑀸𑀭𑁄 𑀫𑀳𑀸𑀭𑀸𑀚𑀸𑀦𑁄, 𑀢𑀸𑀯𑀢𑀺𑀁𑀲𑀸 𑀤𑁂𑀯𑀢𑀸, 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸, 𑀬𑀸𑀫𑀸 𑀤𑁂𑀯𑀢𑀸, 𑀲𑀼𑀬𑀸𑀫𑁄 𑀤𑁂𑀯𑀭𑀸𑀚𑀸, 𑀢𑀼𑀲𑀺𑀢𑀸 𑀤𑁂𑀯𑀢𑀸, 𑀲𑀦𑁆𑀢𑀼𑀲𑀺𑀢𑁄 𑀤𑁂𑀯𑀭𑀸𑀚𑀸, 𑀦𑀺𑀫𑁆𑀫𑀸𑀦𑀭𑀢𑀻 𑀤𑁂𑀯𑀢𑀸, 𑀲𑀼𑀦𑀺𑀫𑁆𑀫𑀺𑀢𑁄 𑀤𑁂𑀯𑀭𑀸𑀚𑀸, 𑀯𑀲𑀯𑀢𑁆𑀢𑀻 𑀤𑁂𑀯𑀢𑀸, 𑀯𑀲𑀯𑀢𑁆𑀢𑀻 𑀤𑁂𑀯𑀭𑀸𑀚𑀸, 𑀩𑁆𑀭𑀳𑁆𑀫𑀧𑀸𑀭𑀺𑀲𑀚𑁆𑀚𑀸, 𑀩𑁆𑀭𑀳𑁆𑀫𑀧𑀼𑀭𑁄𑀳𑀺𑀢𑀸, 𑀫𑀳𑀸𑀩𑁆𑀭𑀳𑁆𑀫𑀸𑀦𑁄, 𑀧𑀭𑀺𑀢𑁆𑀢𑀸𑀪𑀸, 𑀅𑀧𑁆𑀧𑀫𑀸𑀡𑀸𑀪𑀸, 𑀆𑀪𑀲𑁆𑀲𑀭𑀸, 𑀧𑀭𑀺𑀢𑁆𑀢𑀲𑀼𑀪𑀸, 𑀅𑀧𑁆𑀧𑀫𑀸𑀡𑀲𑀼𑀪𑀸, 𑀲𑀼𑀪𑀓𑀺𑀡𑁆𑀳𑀸, 𑀯𑁂𑀳𑀧𑁆𑀨𑀮𑀸, 𑀅𑀯𑀺𑀳𑀸, 𑀅𑀢𑀧𑁆𑀧𑀸, 𑀲𑀼𑀤𑀲𑁆𑀲𑀸, 𑀲𑀼𑀤𑀲𑁆𑀲𑀻, 𑀅𑀓𑀦𑀺𑀝𑁆𑀞𑀸 𑀤𑁂𑀯𑀢𑀸𑀢𑀺 𑀅𑀲𑀜𑁆𑀜𑁂 𑀘 𑀅𑀭𑀽𑀧𑀸𑀯𑀘𑀭𑀲𑀢𑁆𑀢𑁂 𑀘 𑀞𑀧𑁂𑀢𑁆𑀯𑀸 𑀲𑁄𑀢𑀸𑀬𑀢𑀦𑀧𑀯𑀢𑁆𑀢𑀺𑀝𑁆𑀞𑀸𑀦𑁂 𑀲𑀩𑁆𑀩𑀸 𑀤𑁂𑀯𑀢𑀸 𑀲𑀸𑀥𑀼𑀓𑀸𑀭𑀫𑀤𑀁𑀲𑀼.

𑀢𑀢𑁄 𑀔𑀻𑀡𑀸𑀲𑀯𑀫𑀳𑀸𑀩𑁆𑀭𑀳𑁆𑀫𑀸𑀦𑁄 𑁋 ‘‘𑀫𑀳𑀸 𑀯𑀢𑀸𑀬𑀁 𑀲𑀸𑀥𑀼𑀓𑀸𑀭𑀲𑀤𑁆𑀤𑁄, 𑀧𑀣𑀯𑀺𑀢𑀮𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀅𑀓𑀦𑀺𑀝𑁆𑀞𑀮𑁄𑀓𑀁 𑀆𑀕𑀢𑁄, 𑀓𑀺𑀫𑀢𑁆𑀣𑀁 𑀦𑀼 𑀔𑁄 𑀏𑀲𑁄’’𑀢𑀺 𑀆𑀯𑀚𑁆𑀚𑁂𑀦𑁆𑀢𑁄 ‘‘𑀥𑀫𑁆𑀫𑀲𑁂𑀦𑀸𑀧𑀢𑀺𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄 𑀧𑀼𑀩𑁆𑀩𑀸𑀭𑀸𑀫𑁂 𑀯𑀺𑀲𑀸𑀔𑀸𑀬 𑀭𑀢𑀦𑀧𑀸𑀲𑀸𑀤𑁂 𑀦𑀺𑀲𑀻𑀤𑀺𑀢𑁆𑀯𑀸 𑀲𑀁𑀬𑁄𑀚𑀦𑀧𑀭𑀺𑀬𑀸𑀬𑀥𑀫𑁆𑀫𑀤𑁂𑀲𑀦𑀫𑀸𑀭𑀪𑀺, 𑀅𑀫𑁆𑀳𑁂𑀳𑀺𑀧𑀺 𑀢𑀢𑁆𑀣 𑀓𑀸𑀬𑀲𑀓𑁆𑀔𑀻𑀳𑀺 𑀪𑀯𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀢𑀢𑁆𑀣 𑀅𑀕𑀫𑀁𑀲𑀼. 𑀧𑀼𑀩𑁆𑀩𑀸𑀭𑀸𑀫𑁄 𑀤𑁂𑀯𑀢𑀸𑀳𑀺 𑀧𑀭𑀺𑀧𑀼𑀡𑁆𑀡𑁄, 𑀲𑀫𑀦𑁆𑀢𑀸 𑀧𑀼𑀩𑁆𑀩𑀸𑀭𑀸𑀫𑀲𑁆𑀲 𑀕𑀸𑀯𑀼𑀢𑀁 𑀅𑀟𑁆𑀠𑀬𑁄𑀚𑀦𑀁, 𑀬𑁄𑀚𑀦𑀦𑁆𑀢𑀺 𑀲𑀓𑀮𑀘𑀓𑁆𑀓𑀯𑀸𑀴𑀁 𑀳𑁂𑀝𑁆𑀞𑀸 𑀧𑀣𑀯𑀺𑀢𑀮𑁂𑀦 𑀢𑀺𑀭𑀺𑀬𑀁 𑀘𑀓𑁆𑀓𑀯𑀸𑀴𑀧𑀭𑀺𑀬𑀦𑁆𑀢𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑀁 𑀤𑀲𑀳𑀺 𑀘𑀓𑁆𑀓𑀯𑀸𑀴𑀲𑀳𑀲𑁆𑀲𑁂𑀳𑀺 𑀲𑀦𑁆𑀦𑀺𑀧𑀢𑀺𑀢𑀸𑀳𑀺 𑀤𑁂𑀯𑀢𑀸𑀳𑀺 𑀦𑀺𑀭𑀦𑁆𑀢𑀭𑀫𑀳𑁄𑀲𑀺, 𑀆𑀭𑀕𑁆𑀕𑀦𑀺𑀢𑀼𑀤𑀦𑀫𑀢𑁆𑀢𑁂 𑀞𑀸𑀦𑁂 𑀉𑀧𑀭𑀺𑀫𑀓𑁄𑀝𑀺𑀬𑀸 𑀲𑀝𑁆𑀞𑀺 𑀤𑁂𑀯𑀢𑀸 𑀲𑀼𑀔𑀼𑀫𑀢𑁆𑀢𑀪𑀸𑀯𑁂 𑀫𑀸𑀧𑁂𑀢𑁆𑀯𑀸 𑀅𑀝𑁆𑀞𑀁𑀲𑀼.

𑀅𑀣𑀸𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 ‘‘𑀫𑀳𑀦𑁆𑀢𑀁 𑀯𑀢𑀺𑀤𑀁 𑀳𑀮𑀸𑀳𑀮𑀁, 𑀓𑀺𑀁 𑀦𑀼 𑀔𑁄 𑀏𑀢’’𑀦𑁆𑀢𑀺 𑀆𑀯𑀚𑁆𑀚𑁂𑀦𑁆𑀢𑁄 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑁂 𑀞𑀺𑀢𑀸𑀦𑀁 𑀤𑁂𑀯𑀢𑀸𑀦𑀁 𑀏𑀓𑀘𑀓𑁆𑀓𑀯𑀸𑀴𑁂 𑀲𑀦𑁆𑀦𑀺𑀧𑀢𑀺𑀢𑀪𑀸𑀯𑀁 𑀅𑀤𑁆𑀤𑀲. 𑀅𑀣 𑀬𑀲𑁆𑀫𑀸 𑀩𑀼𑀤𑁆𑀥𑀸𑀦𑀁 𑀅𑀥𑀺𑀝𑁆𑀞𑀸𑀦𑀓𑀺𑀘𑁆𑀘𑀁 𑀦𑀢𑁆𑀣𑀺, 𑀧𑀭𑀺𑀲𑀧𑀭𑀺𑀫𑀸𑀡𑁂𑀦𑁂𑀯 𑀧𑀲𑁆𑀲𑀦𑁆𑀢𑀺 𑀘𑁂𑀯 𑀲𑀤𑁆𑀤𑀜𑁆𑀘 𑀲𑀸𑀯𑁂𑀦𑁆𑀢𑀺. 𑀲𑀸𑀯𑀓𑀸𑀦𑀁 𑀧𑀦 𑀅𑀥𑀺𑀝𑁆𑀞𑀸𑀦𑀁 𑀯𑀝𑁆𑀝𑀢𑀺. 𑀢𑀲𑁆𑀫𑀸 𑀣𑁂𑀭𑁄 𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀬 𑀫𑀳𑀕𑁆𑀕𑀢𑀘𑀺𑀢𑁆𑀢𑁂𑀦 𑀅𑀥𑀺𑀝𑁆𑀞𑀸𑀲𑀺 𑁋 ‘‘𑀘𑀓𑁆𑀓𑀯𑀸𑀴𑀧𑀭𑀺𑀬𑀦𑁆𑀢𑀸 𑀧𑀭𑀺𑀲𑀸 𑀲𑀩𑁆𑀩𑀸𑀧𑀺 𑀫𑀁 𑀧𑀲𑁆𑀲𑀢𑀼, 𑀥𑀫𑁆𑀫𑀜𑁆𑀘 𑀫𑁂 𑀤𑁂𑀲𑁂𑀦𑁆𑀢𑀲𑁆𑀲 𑀲𑀤𑁆𑀤𑀁 𑀲𑀼𑀡𑀸𑀢𑀽’’𑀢𑀺. 𑀅𑀥𑀺𑀝𑁆𑀞𑀺𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀤𑀓𑁆𑀔𑀺𑀡𑀚𑀸𑀡𑀼𑀧𑀲𑁆𑀲𑁂 𑀘 𑀘𑀓𑁆𑀓𑀯𑀸𑀴𑀫𑀼𑀔𑀯𑀝𑁆𑀝𑀺𑀬𑀜𑁆𑀘 𑀦𑀺𑀲𑀻𑀤𑀺𑀢𑁆𑀯𑀸 ‘‘𑀥𑀫𑁆𑀫𑀲𑁂𑀦𑀸𑀧𑀢𑀺𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄 𑀦𑀸𑀫 𑀓𑀻𑀤𑀺𑀲𑁄 𑀤𑀻𑀖𑁄 𑀭𑀲𑁆𑀲𑁄 𑀲𑀸𑀫𑁄 𑀑𑀤𑀸𑀢𑁄’’𑀢𑀺 𑀯𑀢𑁆𑀢𑀩𑁆𑀩𑀓𑀸𑀭𑀡𑀁 𑀦𑀸𑀳𑁄𑀲𑀺, 𑀲𑀩𑁆𑀩𑁂𑀲𑀫𑁆𑀧𑀺 𑀲𑀩𑁆𑀩𑀤𑀺𑀲𑀸𑀲𑀼 𑀦𑀺𑀲𑀺𑀦𑁆𑀦𑀸𑀦𑀁 𑀅𑀪𑀺𑀫𑀼𑀔𑁂𑀬𑁂𑀯 𑀧𑀜𑁆𑀜𑀸𑀬𑀺𑀢𑁆𑀣, 𑀦𑀪𑀫𑀚𑁆𑀛𑁂 𑀞𑀺𑀢𑀘𑀦𑁆𑀤𑁄 𑀯𑀺𑀬 𑀅𑀳𑁄𑀲𑀺. 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀲𑁆𑀲𑀸𑀧𑀺𑀲𑁆𑀲 𑀤𑀓𑁆𑀔𑀺𑀡𑀚𑀸𑀡𑀼𑀧𑀲𑁆𑀲𑁂 𑀘 𑀘𑀓𑁆𑀓𑀯𑀸𑀴𑀫𑀼𑀔𑀯𑀝𑁆𑀝𑀺𑀬𑀜𑁆𑀘 𑀦𑀺𑀲𑀺𑀦𑁆𑀦𑀸 𑀲𑀩𑁆𑀩𑁂 𑀏𑀓𑀓𑀁𑀲𑁂𑀦𑁂𑀯 𑀲𑀤𑁆𑀤𑀁 𑀲𑀼𑀡𑀺𑀁𑀲𑀼.

𑀏𑀯𑀁 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀣𑁂𑀭𑁄 𑀅𑀚𑁆𑀛𑀢𑁆𑀢𑀲𑀁𑀬𑁄𑀚𑀦𑀜𑁆𑀘, 𑀆𑀯𑀼𑀲𑁄𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀭𑀪𑀺. 𑀢𑀢𑁆𑀣 𑀅𑀚𑁆𑀛𑀢𑁆𑀢𑀦𑁆𑀢𑀺 𑀓𑀸𑀫𑀪𑀯𑁄. 𑀩𑀳𑀺𑀤𑁆𑀥𑀸𑀢𑀺 𑀭𑀽𑀧𑀸𑀭𑀽𑀧𑀪𑀯𑁄. 𑀓𑀺𑀜𑁆𑀘𑀸𑀧𑀺 𑀳𑀺 𑀲𑀢𑁆𑀢𑀸 𑀓𑀸𑀫𑀪𑀯𑁂 𑀅𑀧𑁆𑀧𑀁 𑀓𑀸𑀮𑀁 𑀯𑀲𑀦𑁆𑀢𑀺 𑀓𑀧𑁆𑀧𑀲𑁆𑀲 𑀘𑀢𑀼𑀢𑁆𑀣𑀫𑁂𑀯 𑀓𑁄𑀝𑁆𑀞𑀸𑀲𑀁, 𑀇𑀢𑀭𑁂𑀲𑀼 𑀢𑀻𑀲𑀼 𑀓𑁄𑀝𑁆𑀞𑀸𑀲𑁂𑀲𑀼 𑀓𑀸𑀫𑀪𑀯𑁄 𑀲𑀼𑀜𑁆𑀜𑁄 𑀳𑁄𑀢𑀺 𑀢𑀼𑀘𑁆𑀙𑁄, 𑀭𑀽𑀧𑀪𑀯𑁂 𑀩𑀳𑀼𑀁 𑀓𑀸𑀮𑀁 𑀯𑀲𑀦𑁆𑀢𑀺, 𑀢𑀣𑀸𑀧𑀺 𑀢𑁂𑀲𑀁 𑀬𑀲𑁆𑀫𑀸 𑀓𑀸𑀫𑀪𑀯𑁂 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀬𑁄 𑀩𑀳𑀼𑀓𑀸 𑀳𑁄𑀦𑁆𑀢𑀺, 𑀅𑀧𑁆𑀧𑀓𑀸 𑀭𑀽𑀧𑀸𑀭𑀽𑀧𑀪𑀯𑁂𑀲𑀼. 𑀬𑀢𑁆𑀣 𑀘 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀬𑁄 𑀩𑀳𑀼𑀓𑀸, 𑀢𑀢𑁆𑀣 𑀆𑀮𑀬𑁄𑀧𑀺 𑀧𑀢𑁆𑀣𑀦𑀸𑀧𑀺 𑀅𑀪𑀺𑀮𑀸𑀲𑁄𑀧𑀺 𑀩𑀳𑀼 𑀳𑁄𑀢𑀺. 𑀬𑀢𑁆𑀣 𑀅𑀧𑁆𑀧𑀸, 𑀢𑀢𑁆𑀣 𑀅𑀧𑁆𑀧𑁄. 𑀢𑀲𑁆𑀫𑀸 𑀓𑀸𑀫𑀪𑀯𑁄 𑀅𑀚𑁆𑀛𑀢𑁆𑀢𑀁 𑀦𑀸𑀫 𑀚𑀸𑀢𑀁, 𑀭𑀽𑀧𑀸𑀭𑀽𑀧𑀪𑀯𑀸 𑀩𑀳𑀺𑀤𑁆𑀥𑀸 𑀦𑀸𑀫. 𑀇𑀢𑀺 𑀅𑀚𑁆𑀛𑀢𑁆𑀢𑀲𑀗𑁆𑀔𑀸𑀢𑁂 𑀓𑀸𑀫𑀪𑀯𑁂 𑀙𑀦𑁆𑀤𑀭𑀸𑀕𑁄 𑀅𑀚𑁆𑀛𑀢𑁆𑀢𑀲𑀁𑀬𑁄𑀚𑀦𑀁 𑀦𑀸𑀫, 𑀩𑀳𑀺𑀤𑁆𑀥𑀸𑀲𑀗𑁆𑀔𑀸𑀢𑁂𑀲𑀼 𑀭𑀽𑀧𑀸𑀭𑀽𑀧𑀪𑀯𑁂𑀲𑀼 𑀙𑀦𑁆𑀤𑀭𑀸𑀕𑁄 𑀩𑀳𑀺𑀤𑁆𑀥𑀸𑀲𑀁𑀬𑁄𑀚𑀦𑀁 𑀦𑀸𑀫. 𑀑𑀭𑀫𑁆𑀪𑀸𑀕𑀺𑀬𑀸𑀦𑀺 𑀯𑀸 𑀧𑀜𑁆𑀘 𑀲𑀁𑀬𑁄𑀚𑀦𑀸𑀦𑀺 𑀅𑀚𑁆𑀛𑀢𑁆𑀢𑀲𑀁𑀬𑁄𑀚𑀦𑀁 𑀦𑀸𑀫, 𑀉𑀤𑁆𑀥𑀫𑁆𑀪𑀸𑀕𑀺𑀬𑀸𑀦𑀺 𑀧𑀜𑁆𑀘 𑀩𑀳𑀺𑀤𑁆𑀥𑀸𑀲𑀁𑀬𑁄𑀚𑀦𑀁 𑀦𑀸𑀫. 𑀢𑀢𑁆𑀭𑀸𑀬𑀁 𑀯𑀘𑀦𑀢𑁆𑀣𑁄 𑁋 𑀑𑀭𑀁 𑀯𑀼𑀘𑁆𑀘𑀢𑀺 𑀓𑀸𑀫𑀥𑀸𑀢𑀼, 𑀢𑀢𑁆𑀣 𑀉𑀧𑀧𑀢𑁆𑀢𑀺𑀦𑀺𑀧𑁆𑀨𑀸𑀤𑀦𑀢𑁄 𑀢𑀁 𑀑𑀭𑀁 𑀪𑀚𑀦𑁆𑀢𑀻𑀢𑀺 𑀑𑀭𑀫𑁆𑀪𑀸𑀕𑀺𑀬𑀸𑀦𑀺. 𑀉𑀤𑁆𑀥𑀁 𑀯𑀼𑀘𑁆𑀘𑀢𑀺 𑀭𑀽𑀧𑀸𑀭𑀽𑀧𑀥𑀸𑀢𑀼, 𑀢𑀢𑁆𑀣 𑀉𑀧𑀧𑀢𑁆𑀢𑀺𑀦𑀺𑀧𑁆𑀨𑀸𑀤𑀦𑀢𑁄 𑀢𑀁 𑀉𑀤𑁆𑀥𑀁 𑀪𑀚𑀦𑁆𑀢𑀻𑀢𑀺 𑀉𑀤𑁆𑀥𑀫𑁆𑀪𑀸𑀕𑀺𑀬𑀸𑀦𑀺.

𑀏𑀯𑀁 𑀯𑀼𑀢𑁆𑀢𑀧𑁆𑀧𑀪𑁂𑀤𑁂𑀦 𑀅𑀚𑁆𑀛𑀢𑁆𑀢𑀲𑀁𑀬𑁄𑀚𑀦𑁂𑀦 𑀲𑀁𑀬𑀼𑀢𑁆𑀢𑁄 𑀧𑀼𑀕𑁆𑀕𑀮𑁄 𑀅𑀚𑁆𑀛𑀢𑁆𑀢𑀲𑀁𑀬𑁄𑀚𑀦𑁄, 𑀩𑀳𑀺𑀤𑁆𑀥𑀸𑀲𑀁𑀬𑁄𑀚𑀦𑁂𑀦 𑀲𑀁𑀬𑀼𑀢𑁆𑀢𑁄 𑀧𑀼𑀕𑁆𑀕𑀮𑁄 𑀩𑀳𑀺𑀤𑁆𑀥𑀸𑀲𑀁𑀬𑁄𑀚𑀦𑁄. 𑀉𑀪𑀬𑀫𑁆𑀧𑀺 𑀘𑁂𑀢𑀁 𑀦 𑀮𑁄𑀓𑀺𑀬𑀲𑁆𑀲 𑀯𑀝𑁆𑀝𑀦𑀺𑀲𑁆𑀲𑀺𑀢𑀫𑀳𑀸𑀚𑀦𑀲𑁆𑀲 𑀦𑀸𑀫𑀁. 𑀬𑁂𑀲𑀁 𑀧𑀦 𑀪𑀯𑁄 𑀤𑁆𑀯𑁂𑀥𑀸 𑀧𑀭𑀺𑀘𑁆𑀙𑀺𑀦𑁆𑀦𑁄, 𑀢𑁂𑀲𑀁 𑀲𑁄𑀢𑀸𑀧𑀦𑁆𑀦𑀲𑀓𑀤𑀸𑀕𑀸𑀫𑀺𑀅𑀦𑀸𑀕𑀸𑀫𑀻𑀦𑀁 𑀅𑀭𑀺𑀬𑀲𑀸𑀯𑀓𑀸𑀦𑀁 𑀏𑀢𑀁 𑀦𑀸𑀫𑀁. 𑀬𑀣𑀸 𑀳𑀺 𑀫𑀳𑀸𑀅𑀭𑀜𑁆𑀜𑁂 𑀔𑀤𑀺𑀭𑀯𑀦𑀲𑀸𑀮𑀯𑀦𑀸𑀤𑀻𑀦𑀺 𑀣𑀫𑁆𑀪𑁄 𑀢𑀼𑀮𑀸𑀲𑀗𑁆𑀖𑀸𑀝𑁄𑀢𑀺 𑀦𑀸𑀫𑀁 𑀦 𑀮𑀪𑀦𑁆𑀢𑀺, 𑀔𑀤𑀺𑀭𑀯𑀦𑀁 𑀲𑀸𑀮𑀯𑀦𑀦𑁆𑀢𑀺 𑀦𑀸𑀫𑀫𑁂𑀯 𑀮𑀪𑀦𑁆𑀢𑀺. 𑀬𑀤𑀸 𑀧𑀦 𑀢𑀢𑁄 𑀭𑀼𑀓𑁆𑀔𑀸 𑀢𑀺𑀡𑁆𑀳𑀸𑀬 𑀓𑀼𑀞𑀸𑀭𑀺𑀬𑀸 𑀙𑀺𑀦𑁆𑀤𑀺𑀢𑁆𑀯𑀸 𑀣𑀫𑁆𑀪𑀸𑀤𑀺𑀲𑀡𑁆𑀞𑀸𑀦𑁂𑀦 𑀢𑀘𑁆𑀙𑀺𑀢𑀸 𑀳𑁄𑀦𑁆𑀢𑀺, 𑀢𑀤𑀸 𑀣𑀫𑁆𑀪𑁄 𑀢𑀼𑀮𑀸𑀲𑀗𑁆𑀖𑀸𑀝𑁄𑀢𑀺 𑀦𑀸𑀫𑀁 𑀮𑀪𑀦𑁆𑀢𑀺. 𑀏𑀯𑀫𑁂𑀯𑀁 𑀅𑀧𑀭𑀺𑀘𑁆𑀙𑀺𑀦𑁆𑀦𑀪𑀯𑁄 𑀩𑀳𑀮𑀓𑀺𑀮𑁂𑀲𑁄 𑀧𑀼𑀣𑀼𑀚𑁆𑀚𑀦𑁄 𑀏𑀢𑀁 𑀦𑀸𑀫𑀁 𑀦 𑀮𑀪𑀢𑀺, 𑀪𑀯𑀁 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀓𑀺𑀮𑁂𑀲𑁂 𑀢𑀦𑀼𑀓𑁂 𑀓𑀢𑁆𑀯𑀸 𑀞𑀺𑀢𑀸 𑀲𑁄𑀢𑀸𑀧𑀦𑁆𑀦𑀸𑀤𑀬𑁄𑀯 𑀮𑀪𑀦𑁆𑀢𑀺.

𑀇𑀫𑀲𑁆𑀲 𑀘 𑀧𑀦𑀢𑁆𑀣𑀲𑁆𑀲 𑀯𑀺𑀪𑀸𑀯𑀦𑀢𑁆𑀣𑀁 𑀇𑀤𑀁 𑀯𑀘𑁆𑀙𑀓𑀲𑀸𑀮𑁄𑀧𑀫𑀁 𑀯𑁂𑀤𑀺𑀢𑀩𑁆𑀩𑀁. 𑀯𑀘𑁆𑀙𑀓𑀲𑀸𑀮𑀁 𑀳𑀺 𑀓𑀢𑁆𑀯𑀸 𑀅𑀦𑁆𑀢𑁄 𑀔𑀸𑀡𑀼𑀓𑁂 𑀓𑁄𑀝𑁆𑀝𑁂𑀢𑁆𑀯𑀸 𑀯𑀘𑁆𑀙𑀓𑁂 𑀬𑁄𑀢𑁆𑀢𑁂𑀳𑀺 𑀩𑀦𑁆𑀥𑀺𑀢𑁆𑀯𑀸 𑀢𑁂𑀲𑀼 𑀉𑀧𑀦𑀺𑀩𑀦𑁆𑀥𑀦𑁆𑀢𑀺, 𑀬𑁄𑀢𑁆𑀢𑁂𑀲𑀼 𑀅𑀧𑁆𑀧𑀳𑁄𑀦𑁆𑀢𑁂𑀲𑀼 𑀓𑀡𑁆𑀡𑁂𑀲𑀼𑀧𑀺 𑀕𑀳𑁂𑀢𑁆𑀯𑀸 𑀢𑀢𑁆𑀣 𑀯𑀘𑁆𑀙𑀓𑁂 𑀧𑀯𑁂𑀲𑁂𑀦𑁆𑀢𑀺, 𑀅𑀦𑁆𑀢𑁄𑀲𑀸𑀮𑀸𑀬 𑀑𑀓𑀸𑀲𑁂 𑀅𑀧𑁆𑀧𑀳𑁄𑀦𑁆𑀢𑁂 𑀩𑀳𑀺 𑀔𑀸𑀡𑀼𑀓𑁂 𑀓𑁄𑀝𑁆𑀝𑁂𑀢𑁆𑀯𑀸𑀧𑀺 𑀏𑀯𑀫𑁂𑀯 𑀓𑀭𑁄𑀦𑁆𑀢𑀺. 𑀢𑀢𑁆𑀣 𑀓𑁄𑀘𑀺 𑀅𑀦𑁆𑀢𑁄𑀩𑀤𑁆𑀥𑁄 𑀯𑀘𑁆𑀙𑀓𑁄 𑀩𑀳𑀺𑀦𑀺𑀧𑀦𑁆𑀦𑁄 𑀳𑁄𑀢𑀺, 𑀓𑁄𑀘𑀺 𑀩𑀳𑀺𑀩𑀤𑁆𑀥𑁄 𑀅𑀦𑁆𑀢𑁄𑀦𑀺𑀧𑀦𑁆𑀦𑁄, 𑀓𑁄𑀘𑀺 𑀅𑀦𑁆𑀢𑁄𑀩𑀤𑁆𑀥𑁄 𑀅𑀦𑁆𑀢𑁄𑀯 𑀦𑀺𑀧𑀦𑁆𑀦𑁄, 𑀓𑁄𑀘𑀺 𑀩𑀳𑀺𑀩𑀤𑁆𑀥𑁄 𑀩𑀳𑀺𑀬𑁂𑀯 𑀦𑀺𑀧𑀦𑁆𑀦𑁄. 𑀓𑁄𑀘𑀺 𑀅𑀦𑁆𑀢𑁄𑀧𑀺 𑀅𑀩𑀤𑁆𑀥𑁄𑀯 𑀘𑀭𑀢𑀺, 𑀩𑀳𑀺𑀧𑀺 𑀅𑀩𑀤𑁆𑀥𑁄𑀯. 𑀢𑀢𑁆𑀣 𑀅𑀦𑁆𑀢𑁄𑀩𑀤𑁆𑀥𑀲𑁆𑀲 𑀩𑀳𑀺𑀦𑀺𑀧𑀦𑁆𑀦𑀲𑁆𑀲 𑀩𑀦𑁆𑀥𑀦𑀁 𑀤𑀻𑀖𑀁 𑀳𑁄𑀢𑀺. 𑀲𑁄 𑀳𑀺 𑀉𑀡𑁆𑀳𑀸𑀤𑀺𑀧𑀻𑀴𑀺𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀩𑀳𑀺 𑀯𑀘𑁆𑀙𑀓𑀸𑀦𑀁 𑀅𑀩𑁆𑀪𑀦𑁆𑀢𑀭𑁂 𑀦𑀺𑀧𑀚𑁆𑀚𑀢𑀺. 𑀩𑀳𑀺𑀩𑀤𑁆𑀥𑁂 𑀅𑀦𑁆𑀢𑁄𑀦𑀺𑀧𑀦𑁆𑀦𑁂𑀧𑀺 𑀏𑀲𑁂𑀯 𑀦𑀬𑁄. 𑀬𑁄 𑀧𑀦 𑀅𑀦𑁆𑀢𑁄𑀩𑀤𑁆𑀥𑁄 𑀅𑀦𑁆𑀢𑁄𑀦𑀺𑀧𑀦𑁆𑀦𑁄, 𑀢𑀲𑁆𑀲 𑀩𑀦𑁆𑀥𑀦𑀁 𑀭𑀲𑁆𑀲𑀁 𑀳𑁄𑀢𑀺. 𑀩𑀳𑀺𑀩𑀤𑁆𑀥𑁂 𑀩𑀳𑀺𑀦𑀺𑀧𑀦𑁆𑀦𑁂𑀧𑀺 𑀏𑀲𑁂𑀯 𑀦𑀬𑁄. 𑀉𑀪𑁄𑀧𑀺 𑀳𑀺 𑀢𑁂 𑀤𑀺𑀯𑀲𑀫𑁆𑀧𑀺 𑀔𑀸𑀡𑀼𑀓𑀁 𑀅𑀦𑀼𑀧𑀭𑀺𑀕𑀦𑁆𑀢𑁆𑀯𑀸 𑀢𑀢𑁆𑀣𑁂𑀯 𑀲𑀬𑀦𑁆𑀢𑀺. 𑀬𑁄 𑀧𑀦 𑀅𑀦𑁆𑀢𑁄 𑀅𑀩𑀤𑁆𑀥𑁄 𑀢𑀢𑁆𑀣𑁂𑀯 𑀯𑀘𑁆𑀙𑀓𑀸𑀦𑀁 𑀅𑀦𑁆𑀢𑀭𑁂 𑀯𑀺𑀘𑀭𑀢𑀺. 𑀅𑀬𑀁 𑀲𑀻𑀮𑀯𑀸 𑀯𑀘𑁆𑀙𑀓𑁄 𑀓𑀡𑁆𑀡𑁂 𑀕𑀳𑁂𑀢𑁆𑀯𑀸 𑀯𑀘𑁆𑀙𑀓𑀸𑀦𑀁 𑀅𑀦𑁆𑀢𑀭𑁂 𑀯𑀺𑀲𑁆𑀲𑀝𑁆𑀞𑁄 𑀤𑀺𑀯𑀲𑀫𑁆𑀧𑀺 𑀅𑀜𑁆𑀜𑀢𑁆𑀣 𑀅𑀕𑀦𑁆𑀢𑁆𑀯𑀸 𑀢𑀢𑁆𑀣𑁂𑀯 𑀘𑀭𑀢𑀺. 𑀩𑀳𑀺 𑀅𑀩𑀤𑁆𑀥𑁂 𑀢𑀢𑁆𑀣𑁂𑀯 𑀯𑀺𑀘𑀭𑀦𑁆𑀢𑁂𑀧𑀺 𑀏𑀲𑁂𑀯 𑀦𑀬𑁄.