𑁪. 𑀲𑀫𑀘𑀺𑀢𑁆𑀢𑀯𑀕𑁆𑀕𑀯𑀡𑁆𑀡𑀦𑀸

𑁩𑁩. 𑀘𑀢𑀼𑀢𑁆𑀣𑀲𑁆𑀲 𑀧𑀞𑀫𑁂 𑀅𑀲𑀧𑁆𑀧𑀼𑀭𑀺𑀲𑀪𑀽𑀫𑀻𑀢𑀺 𑀅𑀲𑀧𑁆𑀧𑀼𑀭𑀺𑀲𑀸𑀦𑀁 𑀧𑀢𑀺𑀝𑁆𑀞𑀸𑀦𑀝𑁆𑀞𑀸𑀦𑀁. 𑀲𑀧𑁆𑀧𑀼𑀭𑀺𑀲𑀪𑀽𑀫𑀺𑀬𑀫𑁆𑀧𑀺 𑀏𑀲𑁂𑀯 𑀦𑀬𑁄. 𑀅𑀓𑀢𑀜𑁆𑀜𑀽𑀢𑀺 𑀓𑀢𑀁 𑀦 𑀚𑀸𑀦𑀸𑀢𑀺. 𑀅𑀓𑀢𑀯𑁂𑀤𑀻𑀢𑀺 𑀓𑀢𑀁 𑀧𑀸𑀓𑀝𑀁 𑀓𑀢𑁆𑀯𑀸 𑀦 𑀚𑀸𑀦𑀸𑀢𑀺. 𑀉𑀧𑀜𑁆𑀜𑀸𑀢𑀦𑁆𑀢𑀺 𑀯𑀡𑁆𑀡𑀺𑀢𑀁 𑀣𑁄𑀫𑀺𑀢𑀁 𑀧𑀲𑀢𑁆𑀣𑀁. 𑀬𑀤𑀺𑀤𑀦𑁆𑀢𑀺 𑀬𑀸 𑀅𑀬𑀁. 𑀅𑀓𑀢𑀜𑁆𑀜𑀼𑀢𑀸 𑀅𑀓𑀢𑀯𑁂𑀤𑀺𑀢𑀸𑀢𑀺 𑀧𑀭𑁂𑀦 𑀓𑀢𑀲𑁆𑀲 𑀉𑀧𑀓𑀸𑀭𑀲𑁆𑀲 𑀅𑀚𑀸𑀦𑀦𑀜𑁆𑀘𑁂𑀯 𑀧𑀸𑀓𑀝𑀁 𑀓𑀢𑁆𑀯𑀸 𑀅𑀚𑀸𑀦𑀦𑀜𑁆𑀘. 𑀓𑁂𑀯𑀮𑀸𑀢𑀺 𑀲𑀓𑀮𑀸. 𑀲𑀼𑀓𑁆𑀓𑀧𑀓𑁆𑀔𑁂𑀧𑀺 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑁩𑁪. 𑀤𑀼𑀢𑀺𑀬𑁂 𑀫𑀸𑀢𑀼 𑀘 𑀧𑀺𑀢𑀼 𑀘𑀸𑀢𑀺 𑀚𑀦𑀓𑀫𑀸𑀢𑀼 𑀘 𑀚𑀦𑀓𑀧𑀺𑀢𑀼 𑀘. 𑀏𑀓𑁂𑀦, 𑀪𑀺𑀓𑁆𑀔𑀯𑁂, 𑀅𑀁𑀲𑁂𑀦 𑀫𑀸𑀢𑀭𑀁 𑀧𑀭𑀺𑀳𑀭𑁂𑀬𑁆𑀬𑀸𑀢𑀺 𑀏𑀓𑀲𑁆𑀫𑀺𑀁 𑀅𑀁𑀲𑀓𑀽𑀝𑁂 𑀞𑀧𑁂𑀢𑁆𑀯𑀸 𑀫𑀸𑀢𑀭𑀁 𑀧𑀝𑀺𑀚𑀕𑁆𑀕𑁂𑀬𑁆𑀬. 𑀏𑀓𑁂𑀦 𑀅𑀁𑀲𑁂𑀦 𑀧𑀺𑀢𑀭𑀁 𑀧𑀭𑀺𑀳𑀭𑁂𑀬𑁆𑀬𑀸𑀢𑀺 𑀏𑀓𑀲𑁆𑀫𑀺𑀁 𑀅𑀁𑀲𑀓𑀽𑀝𑁂 𑀞𑀧𑁂𑀢𑁆𑀯𑀸 𑀧𑀺𑀢𑀭𑀁 𑀧𑀝𑀺𑀚𑀕𑁆𑀕𑁂𑀬𑁆𑀬. 𑀯𑀲𑁆𑀲𑀲𑀢𑀸𑀬𑀼𑀓𑁄 𑀯𑀲𑁆𑀲𑀲𑀢𑀚𑀻𑀯𑀻𑀢𑀺 𑀯𑀲𑁆𑀲𑀲𑀢𑀸𑀬𑀼𑀓𑀓𑀸𑀮𑁂 𑀚𑀸𑀢𑁄 𑀲𑀓𑀮𑀁 𑀯𑀲𑁆𑀲𑀲𑀢𑀁 𑀚𑀻𑀯𑀦𑁆𑀢𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀲𑀘𑁂 𑀧𑀼𑀢𑁆𑀢𑁄 𑀦𑀸𑀫 ‘‘𑀫𑀸𑀢𑀸𑀧𑀺𑀢𑀽𑀦𑀁 𑀧𑀝𑀺𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀉𑀝𑁆𑀞𑀸𑀬 𑀲𑀫𑀼𑀝𑁆𑀞𑀸𑀬 𑀤𑀓𑁆𑀔𑀺𑀡𑁂 𑀅𑀁𑀲𑀓𑀽𑀝𑁂 𑀫𑀸𑀢𑀭𑀁, 𑀯𑀸𑀫𑁂 𑀧𑀺𑀢𑀭𑀁 𑀞𑀧𑁂𑀢𑁆𑀯𑀸 𑀯𑀲𑁆𑀲𑀲𑀢𑀸𑀬𑀼𑀓𑁄 𑀲𑀓𑀮𑀫𑁆𑀧𑀺 𑀯𑀲𑁆𑀲𑀲𑀢𑀁 𑀚𑀻𑀯𑀫𑀸𑀦𑁄 𑀧𑀭𑀺𑀳𑀭𑁂𑀬𑁆𑀬. 𑀲𑁄 𑀘 𑀦𑁂𑀲𑀁 𑀉𑀘𑁆𑀙𑀸𑀤𑀦𑀧𑀭𑀺𑀫𑀤𑁆𑀤𑀦𑀦𑁆𑀳𑀸𑀧𑀦𑀲𑀫𑁆𑀩𑀸𑀳𑀦𑁂𑀦𑀸𑀢𑀺 𑀲𑁄 𑀘 𑀧𑀼𑀢𑁆𑀢𑁄 𑀦𑁂𑀲𑀁 𑀫𑀸𑀢𑀸𑀧𑀺𑀢𑀽𑀦𑀁 𑀅𑀁𑀲𑀓𑀽𑀝𑁂𑀲𑀼 𑀞𑀺𑀢𑀸𑀦𑀁𑀬𑁂𑀯 𑀤𑀼𑀕𑁆𑀕𑀦𑁆𑀥𑀧𑀝𑀺𑀯𑀺𑀦𑁄𑀤𑀦𑀢𑁆𑀣𑀁 𑀲𑀼𑀕𑀦𑁆𑀥𑀓𑀭𑀡𑁂𑀦 𑀉𑀘𑁆𑀙𑀸𑀤𑀦𑁂𑀦, 𑀧𑀭𑀺𑀲𑁆𑀲𑀫𑀯𑀺𑀦𑁄𑀤𑀦𑀢𑁆𑀣𑀁 𑀳𑀢𑁆𑀣𑀧𑀭𑀺𑀫𑀤𑁆𑀤𑀦𑁂𑀦, 𑀲𑀻𑀢𑀼𑀡𑁆𑀳𑀓𑀸𑀮𑁂 𑀘 𑀉𑀡𑁆𑀳𑁄𑀤𑀓𑀲𑀻𑀢𑁄𑀤𑀓𑀦𑁆𑀳𑀸𑀧𑀦𑁂𑀦, 𑀳𑀢𑁆𑀣𑀧𑀸𑀤𑀸𑀤𑀻𑀦𑀁 𑀆𑀓𑀟𑁆𑀠𑀦𑀧𑀭𑀺𑀓𑀟𑁆𑀠𑀦𑀲𑀗𑁆𑀔𑀸𑀢𑁂𑀦 𑀲𑀫𑁆𑀩𑀸𑀳𑀦𑁂𑀦 𑀉𑀧𑀝𑁆𑀞𑀸𑀦𑀁 𑀓𑀭𑁂𑀬𑁆𑀬. 𑀢𑁂 𑀘 𑀢𑀢𑁆𑀣𑁂𑀯𑀸𑀢𑀺 𑀢𑁂 𑀘 𑀫𑀸𑀢𑀸𑀧𑀺𑀢𑀭𑁄 𑀢𑀢𑁆𑀣𑁂𑀯 𑀢𑀲𑁆𑀲 𑀅𑀁𑀲𑀓𑀽𑀝𑁂𑀲𑀼 𑀦𑀺𑀲𑀺𑀦𑁆𑀦𑀸𑀯 𑀫𑀼𑀢𑁆𑀢𑀓𑀭𑀻𑀲𑀁 𑀘𑀚𑁂𑀬𑁆𑀬𑀼𑀁. 𑀦𑀢𑁆𑀯𑁂𑀯 ,𑀪𑀺𑀓𑁆𑀔𑀯𑁂𑀢𑀺, 𑀪𑀺𑀓𑁆𑀔𑀯𑁂, 𑀏𑀯𑀫𑁆𑀧𑀺 𑀦𑀢𑁆𑀯𑁂𑀯 𑀫𑀸𑀢𑀸𑀧𑀺𑀢𑀽𑀦𑀁 𑀓𑀢𑀁 𑀯𑀸 𑀳𑁄𑀢𑀺 𑀧𑀝𑀺𑀓𑀢𑀁 𑀯𑀸.

𑀇𑀲𑁆𑀲𑀭𑀸𑀥𑀺𑀧𑀘𑁆𑀘𑁂 𑀭𑀚𑁆𑀚𑁂𑀢𑀺 𑀘𑀓𑁆𑀓𑀯𑀢𑁆𑀢𑀺𑀭𑀚𑁆𑀚𑀁 𑀲𑀦𑁆𑀥𑀸𑀬𑁂𑀯𑀫𑀸𑀳. 𑀆𑀧𑀸𑀤𑀓𑀸𑀢𑀺 𑀯𑀟𑁆𑀠𑀓𑀸 𑀅𑀦𑀼𑀧𑀸𑀮𑀓𑀸. 𑀧𑀼𑀢𑁆𑀢𑀸 𑀳𑀺 𑀫𑀸𑀢𑀸𑀧𑀺𑀢𑀽𑀳𑀺 𑀯𑀟𑁆𑀠𑀺𑀢𑀸 𑀘𑁂𑀯 𑀅𑀦𑀼𑀧𑀸𑀮𑀺𑀢𑀸 𑀘. 𑀧𑁄𑀲𑀓𑀸𑀢𑀺 𑀳𑀢𑁆𑀣𑀧𑀸𑀤𑁂 𑀯𑀟𑁆𑀠𑁂𑀢𑁆𑀯𑀸 𑀳𑀤𑀬𑀮𑁄𑀳𑀺𑀢𑀁 𑀧𑀸𑀬𑁂𑀢𑁆𑀯𑀸 𑀧𑁄𑀲𑀓𑀸. 𑀧𑀼𑀢𑁆𑀢𑀸 𑀳𑀺 𑀫𑀸𑀢𑀸𑀧𑀺𑀢𑀽𑀳𑀺 𑀧𑀼𑀝𑁆𑀞𑀸 𑀪𑀢𑀸 𑀅𑀦𑁆𑀦𑀧𑀸𑀦𑀸𑀤𑀻𑀳𑀺 𑀧𑀝𑀺𑀚𑀕𑁆𑀕𑀺𑀢𑀸. 𑀇𑀫𑀲𑁆𑀲 𑀮𑁄𑀓𑀲𑁆𑀲 𑀤𑀲𑁆𑀲𑁂𑀢𑀸𑀭𑁄𑀢𑀺 𑀲𑀘𑁂 𑀳𑀺 𑀫𑀸𑀢𑀸𑀧𑀺𑀢𑀭𑁄 𑀚𑀸𑀢𑀤𑀺𑀯𑀲𑁂𑀬𑁂𑀯 𑀧𑀼𑀢𑁆𑀢𑀁 𑀧𑀸𑀤𑁂 𑀕𑀳𑁂𑀢𑁆𑀯𑀸 𑀅𑀭𑀜𑁆𑀜𑁂 𑀯𑀸 𑀦𑀤𑀺𑀬𑀁 𑀯𑀸 𑀧𑀧𑀸𑀢𑁂 𑀯𑀸 𑀔𑀺𑀧𑁂𑀬𑁆𑀬𑀼𑀁, 𑀇𑀫𑀲𑁆𑀫𑀺𑀁 𑀮𑁄𑀓𑁂 𑀇𑀝𑁆𑀞𑀸𑀦𑀺𑀝𑁆𑀞𑀸𑀭𑀫𑁆𑀫𑀡𑀁 𑀦 𑀧𑀲𑁆𑀲𑁂𑀬𑁆𑀬. 𑀏𑀯𑀁 𑀅𑀓𑀢𑁆𑀯𑀸 𑀆𑀧𑀸𑀤𑀺𑀢𑀢𑁆𑀢𑀸 𑀧𑁄𑀲𑀺𑀢𑀢𑁆𑀢𑀸 𑀏𑀲 𑀇𑀫𑀲𑁆𑀫𑀺𑀁 𑀮𑁄𑀓𑁂 𑀇𑀝𑁆𑀞𑀸𑀦𑀺𑀝𑁆𑀞𑀸𑀭𑀫𑁆𑀫𑀡𑀁 𑀫𑀸𑀢𑀸𑀧𑀺𑀢𑀭𑁄 𑀦𑀺𑀲𑁆𑀲𑀸𑀬 𑀧𑀲𑁆𑀲𑀢𑀻𑀢𑀺 𑀢𑁆𑀬𑀸𑀲𑁆𑀲 𑀇𑀫𑀲𑁆𑀲 𑀮𑁄𑀓𑀲𑁆𑀲 𑀤𑀲𑁆𑀲𑁂𑀢𑀸𑀭𑁄 𑀦𑀸𑀫 𑀳𑁄𑀦𑁆𑀢𑀺. 𑀲𑀫𑀸𑀤𑀧𑁂𑀢𑀻𑀢𑀺 𑀕𑀡𑁆𑀳𑀸𑀧𑁂𑀢𑀺. 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀲𑀤𑁆𑀥𑀸𑀲𑀻𑀮𑀘𑀸𑀕𑀧𑀜𑁆𑀜𑀸 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀫𑀺𑀲𑁆𑀲𑀓𑀸 𑀓𑀣𑀺𑀢𑀸. 𑀥𑀫𑁆𑀫𑀲𑁂𑀦𑀸𑀧𑀢𑀺𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀲𑀤𑀺𑀲𑁄𑀯 𑀪𑀺𑀓𑁆𑀔𑀼 𑀢𑁂𑀲𑀼 𑀧𑀢𑀺𑀝𑁆𑀞𑀸𑀧𑁂𑀢𑀺 𑀦𑀸𑀫𑀸𑀢𑀺 𑀯𑁂𑀤𑀺𑀢𑀩𑁆𑀩𑁄.

𑁩𑁫. 𑀢𑀢𑀺𑀬𑁂 𑀢𑁂𑀦𑀼𑀧𑀲𑀗𑁆𑀓𑀫𑀻𑀢𑀺 𑀲𑁄 𑀳𑀺 𑀩𑁆𑀭𑀸𑀳𑁆𑀫𑀡𑁄 ‘‘𑀲𑀫𑀡𑁄 𑀓𑀺𑀭 𑀕𑁄𑀢𑀫𑁄 𑀓𑀣𑀺𑀢𑀁 𑀯𑀺𑀲𑁆𑀲𑀚𑁆𑀚𑁂𑀢𑀺, 𑀧𑀼𑀘𑁆𑀙𑀸𑀬𑀲𑁆𑀲 𑀯𑀺𑀭𑀚𑁆𑀛𑀦𑀁 𑀦𑀸𑀫 𑀦𑀢𑁆𑀣𑀺. 𑀅𑀳𑀫𑀲𑁆𑀲 𑀯𑀺𑀭𑀚𑁆𑀛𑀦𑀧𑀜𑁆𑀳𑀁 𑀅𑀪𑀺𑀲𑀗𑁆𑀔𑀭𑀺𑀲𑁆𑀲𑀸𑀫𑀻’’𑀢𑀺 𑀧𑀡𑀻𑀢𑀪𑁄𑀚𑀦𑀁 𑀪𑀼𑀜𑁆𑀚𑀺𑀢𑁆𑀯𑀸 𑀕𑀩𑁆𑀪𑀤𑁆𑀯𑀸𑀭𑀁 𑀧𑀺𑀤𑀳𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑁄 𑀘𑀺𑀦𑁆𑀢𑁂𑀢𑀼𑀁 𑀆𑀭𑀪𑀺. 𑀅𑀣𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀇𑀫𑀲𑁆𑀫𑀺𑀁 𑀞𑀸𑀦𑁂 𑀉𑀘𑁆𑀘𑀸𑀲𑀤𑁆𑀤𑀫𑀳𑀸𑀲𑀤𑁆𑀤𑁄 𑀯𑀢𑁆𑀢𑀢𑀺, 𑀘𑀺𑀢𑁆𑀢𑀁 𑀦 𑀏𑀓𑀕𑁆𑀕𑀁 𑀳𑁄𑀢𑀺, 𑀪𑀽𑀫𑀺𑀖𑀭𑀁 𑀓𑀸𑀭𑁂𑀲𑁆𑀲𑀸𑀫𑀻’’𑀢𑀺 𑀪𑀽𑀫𑀺𑀖𑀭𑀁 𑀓𑀸𑀭𑁂𑀢𑁆𑀯𑀸 𑀢𑀢𑁆𑀣 𑀧𑀯𑀺𑀲𑀺𑀢𑁆𑀯𑀸 𑁋 ‘‘𑀏𑀯𑀁 𑀧𑀼𑀝𑁆𑀞𑁄 𑀏𑀯𑀁 𑀓𑀣𑁂𑀲𑁆𑀲𑀢𑀺, 𑀏𑀯𑀁 𑀧𑀼𑀝𑁆𑀞𑁄 𑀏𑀯𑀁 𑀓𑀣𑁂𑀲𑁆𑀲𑀢𑀻’’𑀢𑀺 𑀏𑀓𑀁 𑀕𑀡𑁆𑀳𑀺𑀢𑁆𑀯𑀸 𑀏𑀓𑀁 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑁄 𑀲𑀓𑀮𑀤𑀺𑀯𑀲𑀁 𑀓𑀺𑀜𑁆𑀘𑀺 𑀧𑀲𑁆𑀲𑀺𑀢𑀼𑀁 𑀦𑀸𑀲𑀓𑁆𑀔𑀺. 𑀢𑀲𑁆𑀲 𑀇𑀫𑀺𑀦𑀸𑀯 𑀦𑀻𑀳𑀸𑀭𑁂𑀦 𑀘𑀢𑁆𑀢𑀸𑀭𑁄 𑀫𑀸𑀲𑀸 𑀯𑀻𑀢𑀺𑀯𑀢𑁆𑀢𑀸. 𑀲𑁄 𑀘𑀢𑀼𑀦𑁆𑀦𑀁 𑀫𑀸𑀲𑀸𑀦𑀁 𑀅𑀘𑁆𑀘𑀬𑁂𑀦 𑀉𑀪𑀢𑁄𑀓𑁄𑀝𑀺𑀓𑀁 𑀧𑀜𑁆𑀳𑀁 𑀦𑀸𑀫 𑀅𑀤𑁆𑀤𑀲. 𑀏𑀯𑀁 𑀓𑀺𑀭𑀲𑁆𑀲 𑀅𑀳𑁄𑀲𑀺 𑁋 ‘‘𑀅𑀳𑀁 𑀲𑀫𑀡𑀁 𑀕𑁄𑀢𑀫𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘𑀓𑀺𑀁𑀯𑀸𑀤𑀻 𑀪𑀯’𑀦𑁆𑀢𑀺 𑀧𑀼𑀘𑁆𑀙𑀺𑀲𑁆𑀲𑀸𑀫𑀺. 𑀲𑀘𑁂 ‘𑀓𑀺𑀭𑀺𑀬𑀯𑀸𑀤𑀺𑀫𑁆𑀳𑀻’𑀢𑀺 𑀯𑀓𑁆𑀔𑀢𑀺, ‘𑀲𑀩𑁆𑀩𑀸𑀓𑀼𑀲𑀮𑀸𑀦𑀁 𑀦𑀸𑀫 𑀢𑀼𑀫𑁆𑀳𑁂 𑀓𑀺𑀭𑀺𑀬𑀁 𑀯𑀤𑁂𑀣𑀸’𑀢𑀺 𑀦𑀁 𑀦𑀺𑀕𑁆𑀕𑀡𑁆𑀳𑀺𑀲𑁆𑀲𑀸𑀫𑀺. 𑀲𑀘𑁂 ‘𑀅𑀓𑀺𑀭𑀺𑀬𑀯𑀸𑀤𑀺𑀫𑁆𑀳𑀻’𑀢𑀺 𑀯𑀓𑁆𑀔𑀢𑀺, ‘𑀓𑀼𑀲𑀮𑀥𑀫𑁆𑀫𑀸𑀦𑀁 𑀦𑀸𑀫 𑀢𑀼𑀫𑁆𑀳𑁂 𑀅𑀓𑀺𑀭𑀺𑀬𑀁 𑀯𑀤𑁂𑀣𑀸’𑀢𑀺 𑀦𑀁 𑀦𑀺𑀕𑁆𑀕𑀡𑁆𑀳𑀺𑀲𑁆𑀲𑀸𑀫𑀺. 𑀇𑀤𑀜𑁆𑀳𑀺 𑀉𑀪𑀢𑁄𑀓𑁄𑀝𑀺𑀓𑀁 𑀧𑀜𑁆𑀳𑀁 𑀧𑀼𑀝𑁆𑀞𑁄 𑀦𑁂𑀯 𑀉𑀕𑁆𑀕𑀺𑀮𑀺𑀢𑀼𑀁 𑀲𑀓𑁆𑀔𑀺𑀲𑁆𑀲𑀢𑀺 𑀦 𑀦𑀺𑀕𑁆𑀕𑀺𑀮𑀺𑀢𑀼𑀁. 𑀏𑀯𑀁 𑀫𑀫 𑀚𑀬𑁄 𑀪𑀯𑀺𑀲𑁆𑀲𑀢𑀺, 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀧𑀭𑀸𑀚𑀬𑁄’’𑀢𑀺 𑀉𑀝𑁆𑀞𑀸𑀬 𑀅𑀧𑁆𑀨𑁄𑀝𑁂𑀢𑁆𑀯𑀸 𑀪𑀽𑀫𑀺𑀖𑀭𑀸 𑀦𑀺𑀓𑁆𑀔𑀫𑁆𑀫 ‘‘𑀏𑀯𑀭𑀽𑀧𑀁 𑀧𑀜𑁆𑀳𑀁 𑀧𑀼𑀘𑁆𑀙𑀦𑁆𑀢𑁂𑀦 𑀦 𑀏𑀓𑀓𑁂𑀦 𑀕𑀦𑁆𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀦𑀕𑀭𑁂 𑀖𑁄𑀲𑀦𑀁 𑀓𑀸𑀭𑁂𑀢𑁆𑀯𑀸 𑀲𑀓𑀮𑀦𑀸𑀕𑀭𑁂𑀳𑀺 𑀧𑀭𑀺𑀯𑀼𑀢𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺. 𑀓𑀺𑀁𑀯𑀸𑀤𑀻𑀢𑀺 𑀓𑀺𑀁𑀮𑀤𑁆𑀥𑀺𑀓𑁄. 𑀓𑀺𑀫𑀓𑁆𑀔𑀸𑀬𑀻𑀢𑀺 𑀓𑀺𑀁 𑀦𑀸𑀫 𑀲𑀸𑀯𑀓𑀸𑀦𑀁 𑀧𑀝𑀺𑀧𑀤𑀁 𑀅𑀓𑁆𑀔𑀸𑀬𑀻𑀢𑀺 𑀧𑀼𑀘𑁆𑀙𑀺. 𑀅𑀣𑀲𑁆𑀲 𑀪𑀕𑀯𑀸 𑀘𑀢𑀽𑀳𑀺 𑀫𑀸𑀲𑁂𑀳𑀺 𑀧𑀜𑁆𑀳𑀁 𑀅𑀪𑀺𑀲𑀗𑁆𑀔𑀭𑀺𑀢𑁆𑀯𑀸 ‘‘𑀤𑀺𑀝𑁆𑀞𑁄 𑀫𑁂 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀧𑀭𑀸𑀚𑀬𑀧𑀜𑁆𑀳𑁄’’𑀢𑀺 𑀫𑀸𑀦𑀁 𑀧𑀕𑁆𑀕𑀬𑁆𑀳 𑀆𑀕𑀢𑀪𑀸𑀯𑀁 𑀜𑀢𑁆𑀯𑀸 𑀏𑀓𑀧𑀤𑁂𑀦𑁂𑀯 𑀢𑀁 𑀧𑀜𑁆𑀳𑀁 𑀪𑀺𑀦𑁆𑀤𑀦𑁆𑀢𑁄 𑀓𑀺𑀭𑀺𑀬𑀯𑀸𑀤𑀻 𑀘𑀸𑀳𑀁, 𑀩𑁆𑀭𑀸𑀳𑁆𑀫𑀡𑀸𑀢𑀺𑀆𑀤𑀺𑀫𑀸𑀳. 𑀅𑀣 𑀩𑁆𑀭𑀸𑀳𑁆𑀫𑀡𑁄 𑀅𑀢𑁆𑀢𑀦𑁄 𑀫𑀸𑀦𑀁 𑀅𑀧𑀦𑁂𑀢𑁆𑀯𑀸 𑀪𑀕𑀯𑀦𑁆𑀢𑀁 𑀆𑀬𑀸𑀘𑀦𑁆𑀢𑁄 𑀬𑀣𑀸𑀓𑀣𑀁 𑀧𑀦𑀸𑀢𑀺𑀆𑀤𑀺𑀫𑀸𑀳. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑁩𑁬. 𑀘𑀢𑀼𑀢𑁆𑀣𑁂 𑀤𑀓𑁆𑀔𑀺𑀡𑁂𑀬𑁆𑀬𑀸𑀢𑀺 𑀤𑀓𑁆𑀔𑀺𑀡𑀸 𑀯𑀼𑀘𑁆𑀘𑀢𑀺 𑀤𑀸𑀦𑀁, 𑀢𑀲𑁆𑀲 𑀧𑀝𑀺𑀕𑁆𑀕𑀳𑀡𑀬𑀼𑀢𑁆𑀢𑀸 𑀓𑀢𑀺 𑀧𑀼𑀕𑁆𑀕𑀮𑀸𑀢𑀺 𑀧𑀼𑀘𑁆𑀙𑀢𑀺. 𑀲𑁂𑀔𑁄𑀢𑀺 𑀇𑀫𑀺𑀦𑀸 𑀲𑀢𑁆𑀢 𑀲𑁂𑀓𑁆𑀔𑁂 𑀤𑀲𑁆𑀲𑁂𑀢𑀺. 𑀏𑀢𑁆𑀣 𑀘 𑀲𑀻𑀮𑀯𑀦𑁆𑀢𑀧𑀼𑀣𑀼𑀚𑁆𑀚𑀦𑁄𑀧𑀺 𑀲𑁄𑀢𑀸𑀧𑀦𑁆𑀦𑁂𑀦𑁂𑀯 𑀲𑀗𑁆𑀕𑀳𑀺𑀢𑁄. 𑀆𑀳𑀼𑀦𑁂𑀬𑁆𑀬𑀸 𑀬𑀚𑀫𑀸𑀦𑀸𑀦𑀁 𑀳𑁄𑀦𑁆𑀢𑀻𑀢𑀺 𑀤𑀸𑀦𑀁 𑀤𑀤𑀦𑁆𑀢𑀸𑀦𑀁 𑀆𑀳𑀼𑀦𑀲𑁆𑀲 𑀅𑀭𑀳𑀸 𑀤𑀸𑀦𑀧𑀝𑀺𑀕𑁆𑀕𑀸𑀳𑀓𑀸 𑀦𑀸𑀫 𑀳𑁄𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀔𑁂𑀢𑁆𑀢𑀦𑁆𑀢𑀺 𑀯𑀢𑁆𑀣𑀼 𑀧𑀢𑀺𑀝𑁆𑀞𑀸, 𑀧𑀼𑀜𑁆𑀜𑀲𑁆𑀲 𑀯𑀺𑀭𑀼𑀳𑀦𑀝𑁆𑀞𑀸𑀦𑀦𑁆𑀢𑀺 𑀅𑀢𑁆𑀣𑁄.

𑁩𑁭. 𑀧𑀜𑁆𑀘𑀫𑁂 𑀧𑀼𑀩𑁆𑀩𑀸𑀭𑀸𑀫𑁂𑀢𑀺 𑀲𑀸𑀯𑀢𑁆𑀣𑀺𑀢𑁄 𑀧𑀼𑀭𑀢𑁆𑀣𑀺𑀫𑀤𑀺𑀲𑀸𑀪𑀸𑀕𑁂 𑀆𑀭𑀸𑀫𑁂. 𑀫𑀺𑀕𑀸𑀭𑀫𑀸𑀢𑀼𑀧𑀸𑀲𑀸𑀤𑁂𑀢𑀺 𑀯𑀺𑀲𑀸𑀔𑀸𑀬 𑀉𑀧𑀸𑀲𑀺𑀓𑀸𑀬 𑀧𑀸𑀲𑀸𑀤𑁂. 𑀲𑀸 𑀳𑀺 𑀫𑀺𑀕𑀸𑀭𑀲𑁂𑀝𑁆𑀞𑀺𑀦𑀸 𑀫𑀸𑀢𑀼𑀝𑁆𑀞𑀸𑀦𑁂 𑀞𑀧𑀺𑀢𑀢𑁆𑀢𑀸𑀧𑀺, 𑀲𑀩𑁆𑀩𑀚𑁂𑀝𑁆𑀞𑀓𑀲𑁆𑀲 𑀧𑀼𑀢𑁆𑀢𑀲𑁆𑀲 𑀅𑀬𑁆𑀬𑀓𑀲𑁂𑀝𑁆𑀞𑀺𑀦𑁄𑀯 𑀲𑀫𑀸𑀦𑀦𑀸𑀫𑀓𑀢𑁆𑀢𑀸𑀧𑀺 𑀫𑀺𑀕𑀸𑀭𑀫𑀸𑀢𑀸𑀢𑀺 𑀯𑀼𑀘𑁆𑀘𑀢𑀺. 𑀢𑀸𑀬 𑀓𑀸𑀭𑀺𑀢𑁄 𑀲𑀳𑀲𑁆𑀲𑀕𑀩𑁆𑀪𑁄 𑀧𑀸𑀲𑀸𑀤𑁄 𑀫𑀺𑀕𑀸𑀭𑀫𑀸𑀢𑀼𑀧𑀸𑀲𑀸𑀤𑁄 𑀦𑀸𑀫. 𑀣𑁂𑀭𑁄 𑀢𑀲𑁆𑀫𑀺𑀁 𑀯𑀺𑀳𑀭𑀢𑀺. 𑀢𑀢𑁆𑀭 𑀔𑁄 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄𑀢𑀺 𑀢𑀲𑁆𑀫𑀺𑀁 𑀧𑀸𑀲𑀸𑀤𑁂 𑀯𑀺𑀳𑀭𑀦𑁆𑀢𑁄 𑀥𑀫𑁆𑀫𑀲𑁂𑀦𑀸𑀧𑀢𑀺𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄.

𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀻𑀢𑀺 𑀓𑀲𑁆𑀫𑀺𑀁 𑀓𑀸𑀮𑁂 𑀆𑀫𑀦𑁆𑀢𑁂𑀲𑀺? 𑀓𑀸𑀦𑀺𑀘𑀺 𑀳𑀺 𑀲𑀼𑀢𑁆𑀢𑀸𑀦𑀺 𑀧𑀼𑀭𑁂𑀪𑀢𑁆𑀢𑁂 𑀪𑀸𑀲𑀺𑀢𑀸𑀦𑀺 𑀅𑀢𑁆𑀣𑀺, 𑀓𑀸𑀦𑀺𑀘𑀺 𑀧𑀘𑁆𑀙𑀸𑀪𑀢𑁆𑀢𑁂, 𑀓𑀸𑀦𑀺𑀘𑀺 𑀧𑀼𑀭𑀺𑀫𑀬𑀸𑀫𑁂, 𑀓𑀸𑀦𑀺𑀘𑀺 𑀫𑀚𑁆𑀛𑀺𑀫𑀬𑀸𑀫𑁂, 𑀓𑀸𑀦𑀺𑀘𑀺 𑀧𑀘𑁆𑀙𑀺𑀫𑀬𑀸𑀫𑁂. 𑀇𑀤𑀁 𑀧𑀦 𑀲𑀫𑀘𑀺𑀢𑁆𑀢𑀧𑀝𑀺𑀧𑀤𑀸𑀲𑀼𑀢𑁆𑀢𑀁 𑀧𑀘𑁆𑀙𑀸𑀪𑀢𑁆𑀢𑁂 𑀪𑀸𑀲𑀺𑀢𑀁. 𑀢𑀲𑁆𑀫𑀸 𑀲𑀸𑀬𑀦𑁆𑀳𑀲𑀫𑀬𑁂 𑀆𑀫𑀦𑁆𑀢𑁂𑀲𑀺.

𑀦 𑀓𑁂𑀯𑀮𑀁 𑀘𑁂𑀢𑀁 𑀣𑁂𑀭𑁂𑀦𑁂𑀯 𑀪𑀸𑀲𑀺𑀢𑀁, 𑀢𑀣𑀸𑀕𑀢𑁂𑀦𑀸𑀧𑀺 𑀪𑀸𑀲𑀺𑀢𑀁. 𑀓𑀢𑁆𑀣 𑀦𑀺𑀲𑀻𑀤𑀺𑀢𑁆𑀯𑀸𑀢𑀺? 𑀯𑀺𑀲𑀸𑀔𑀸𑀬 𑀭𑀢𑀦𑀧𑀸𑀲𑀸𑀤𑁂 𑀦𑀺𑀲𑀻𑀤𑀺𑀢𑁆𑀯𑀸. 𑀢𑀣𑀸𑀕𑀢𑁄 𑀳𑀺 𑀧𑀞𑀫𑀩𑁄𑀥𑀺𑀬𑀁 𑀯𑀻𑀲𑀢𑀺 𑀯𑀲𑁆𑀲𑀸𑀦𑀺 𑀅𑀦𑀺𑀩𑀤𑁆𑀥𑀯𑀸𑀲𑁄 𑀳𑀼𑀢𑁆𑀯𑀸 𑀬𑀢𑁆𑀣 𑀬𑀢𑁆𑀣 𑀨𑀸𑀲𑀼𑀓𑀁 𑀳𑁄𑀢𑀺, 𑀢𑀢𑁆𑀣 𑀢𑀢𑁆𑀣𑁂𑀯 𑀕𑀦𑁆𑀢𑁆𑀯𑀸 𑀯𑀲𑀺. 𑀧𑀞𑀫𑀁 𑀅𑀦𑁆𑀢𑁄𑀯𑀲𑁆𑀲𑀜𑁆𑀳𑀺 𑀇𑀲𑀺𑀧𑀢𑀦𑁂 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁂𑀢𑁆𑀯𑀸 𑀅𑀝𑁆𑀞𑀸𑀭𑀲 𑀫𑀳𑀸𑀩𑁆𑀭𑀳𑁆𑀫𑀓𑁄𑀝𑀺𑀬𑁄 𑀅𑀫𑀢𑀧𑀸𑀦𑀁 𑀧𑀸𑀬𑁂𑀢𑁆𑀯𑀸 𑀩𑀸𑀭𑀸𑀡𑀲𑀺𑀁 𑀉𑀧𑀦𑀺𑀲𑁆𑀲𑀸𑀬 𑀇𑀲𑀺𑀧𑀢𑀦𑁂 𑀯𑀲𑀺. 𑀤𑀼𑀢𑀺𑀬𑀁 𑀅𑀦𑁆𑀢𑁄𑀯𑀲𑁆𑀲𑀁 𑀭𑀸𑀚𑀕𑀳𑀁 𑀉𑀧𑀦𑀺𑀲𑁆𑀲𑀸𑀬 𑀯𑁂𑀴𑀼𑀯𑀦𑁂, 𑀢𑀢𑀺𑀬𑀘𑀢𑀼𑀢𑁆𑀣𑀸𑀦𑀺𑀧𑀺 𑀢𑀢𑁆𑀣𑁂𑀯, 𑀧𑀜𑁆𑀘𑀫𑀁 𑀅𑀦𑁆𑀢𑁄𑀯𑀲𑁆𑀲𑀁 𑀯𑁂𑀲𑀸𑀮𑀺𑀁 𑀉𑀧𑀦𑀺𑀲𑁆𑀲𑀸𑀬 𑀫𑀳𑀸𑀯𑀦𑁂 𑀓𑀽𑀝𑀸𑀕𑀸𑀭𑀲𑀸𑀮𑀸𑀬𑀁, 𑀙𑀝𑁆𑀞𑀁 𑀅𑀦𑁆𑀢𑁄𑀯𑀲𑁆𑀲𑀁 𑀫𑀓𑀼𑀮𑀧𑀩𑁆𑀩𑀢𑁂, 𑀲𑀢𑁆𑀢𑀫𑀁 𑀢𑀸𑀯𑀢𑀺𑀁𑀲𑀪𑀯𑀦𑁂, 𑀅𑀝𑁆𑀞𑀫𑀁 𑀪𑀕𑁆𑀕𑁂 𑀲𑀼𑀲𑀼𑀫𑀸𑀭𑀕𑀺𑀭𑀁 𑀦𑀺𑀲𑁆𑀲𑀸𑀬 𑀪𑁂𑀲𑀓𑀴𑀸𑀯𑀦𑁂, 𑀦𑀯𑀫𑀁 𑀓𑁄𑀲𑀫𑁆𑀩𑀺𑀬𑀁, 𑀤𑀲𑀫𑀁 𑀧𑀸𑀮𑀺𑀮𑁂𑀬𑁆𑀬𑀓𑁂 𑀯𑀦𑀲𑀡𑁆𑀟𑁂, 𑀏𑀓𑀸𑀤𑀲𑀫𑀁 𑀦𑀸𑀮𑀸𑀬𑀁 𑀩𑁆𑀭𑀸𑀳𑁆𑀫𑀡𑀕𑀸𑀫𑁂, 𑀤𑁆𑀯𑀸𑀤𑀲𑀫𑀁 𑀯𑁂𑀭𑀜𑁆𑀚𑀸𑀬𑀁, 𑀢𑁂𑀭𑀲𑀫𑀁 𑀘𑀸𑀮𑀺𑀬𑀧𑀩𑁆𑀩𑀢𑁂, 𑀘𑀼𑀤𑁆𑀤𑀲𑀫𑀁 𑀚𑁂𑀢𑀯𑀦𑁂, 𑀧𑀜𑁆𑀘𑀤𑀲𑀫𑀁 𑀓𑀧𑀺𑀮𑀯𑀢𑁆𑀣𑀼𑀲𑁆𑀫𑀺𑀁, 𑀲𑁄𑀴𑀲𑀫𑀁 𑀆𑀴𑀯𑀓𑀁 𑀤𑀫𑁂𑀢𑁆𑀯𑀸 𑀘𑀢𑀼𑀭𑀸𑀲𑀻𑀢𑀺𑀧𑀸𑀡𑀲𑀳𑀲𑁆𑀲𑀸𑀦𑀺 𑀅𑀫𑀢𑀧𑀸𑀦𑀁 𑀧𑀸𑀬𑁂𑀢𑁆𑀯𑀸 𑀆𑀴𑀯𑀺𑀬𑀁, 𑀲𑀢𑁆𑀢𑀭𑀲𑀫𑀁 𑀭𑀸𑀚𑀕𑀳𑁂𑀬𑁂𑀯, 𑀅𑀝𑁆𑀞𑀸𑀭𑀲𑀫𑀁 𑀘𑀸𑀮𑀺𑀬𑀧𑀩𑁆𑀩𑀢𑁂𑀬𑁂𑀯, 𑀢𑀣𑀸 𑀏𑀓𑀽𑀦𑀯𑀻𑀲𑀢𑀺𑀫𑀁, 𑀯𑀻𑀲𑀢𑀺𑀫𑀁 𑀧𑀦 𑀅𑀦𑁆𑀢𑁄𑀯𑀲𑁆𑀲𑀁 𑀭𑀸𑀚𑀕𑀳𑀁𑀬𑁂𑀯 𑀉𑀧𑀦𑀺𑀲𑁆𑀲𑀸𑀬 𑀯𑀲𑀺. 𑀏𑀯𑀁 𑀯𑀻𑀲𑀢𑀺 𑀯𑀲𑁆𑀲𑀸𑀦𑀺 𑀅𑀦𑀺𑀩𑀤𑁆𑀥𑀯𑀸𑀲𑁄 𑀳𑀼𑀢𑁆𑀯𑀸 𑀬𑀢𑁆𑀣 𑀬𑀢𑁆𑀣 𑀨𑀸𑀲𑀼𑀓𑀁 𑀳𑁄𑀢𑀺, 𑀢𑀢𑁆𑀣 𑀢𑀢𑁆𑀣𑁂𑀯 𑀯𑀲𑀺.

𑀢𑀢𑁄 𑀧𑀝𑁆𑀞𑀸𑀬 𑀧𑀦 𑀤𑁆𑀯𑁂 𑀲𑁂𑀦𑀸𑀲𑀦𑀸𑀦𑀺 𑀥𑀼𑀯𑀧𑀭𑀺𑀪𑁄𑀕𑀸𑀦𑀺 𑀅𑀓𑀸𑀲𑀺. 𑀓𑀢𑀭𑀸𑀦𑀺 𑀤𑁆𑀯𑁂? 𑀚𑁂𑀢𑀯𑀦𑀜𑁆𑀘 𑀧𑀼𑀩𑁆𑀩𑀸𑀭𑀸𑀫𑀜𑁆𑀘. 𑀓𑀲𑁆𑀫𑀸? 𑀤𑁆𑀯𑀺𑀦𑁆𑀦𑀁 𑀓𑀼𑀮𑀸𑀦𑀁 𑀕𑀼𑀡𑀫𑀳𑀦𑁆𑀢𑀢𑀸𑀬. 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀳𑀺 𑀯𑀺𑀲𑀸𑀔𑀸𑀬 𑀘 𑀕𑀼𑀡𑀁 𑀲𑀦𑁆𑀥𑀸𑀬 𑀕𑀼𑀡𑀁 𑀧𑀝𑀺𑀘𑁆𑀘 𑀲𑀢𑁆𑀣𑀸 𑀢𑀸𑀦𑀺 𑀲𑁂𑀦𑀸𑀲𑀦𑀸𑀦𑀺 𑀥𑀼𑀯𑀧𑀭𑀺𑀪𑁄𑀕𑁂𑀦 𑀧𑀭𑀺𑀪𑀼𑀜𑁆𑀚𑀺. 𑀉𑀢𑀼𑀯𑀲𑁆𑀲𑀁 𑀘𑀸𑀭𑀺𑀓𑀁 𑀘𑀭𑀺𑀢𑁆𑀯𑀸𑀧𑀺 𑀳𑀺 𑀅𑀦𑁆𑀢𑁄𑀯𑀲𑁆𑀲𑁂 𑀤𑁆𑀯𑀻𑀲𑀼𑀬𑁂𑀯 𑀲𑁂𑀦𑀸𑀲𑀦𑁂𑀲𑀼 𑀯𑀲𑀢𑀺. 𑀏𑀯𑀁 𑀯𑀲𑀦𑁆𑀢𑁄 𑀧𑀦 𑀚𑁂𑀢𑀯𑀦𑁂 𑀭𑀢𑁆𑀢𑀺𑀁 𑀯𑀲𑀺𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑁄 𑀤𑀓𑁆𑀔𑀺𑀡𑀤𑁆𑀯𑀸𑀭𑁂𑀦 𑀲𑀸𑀯𑀢𑁆𑀣𑀺𑀁 𑀧𑀺𑀡𑁆𑀟𑀸𑀬 𑀧𑀯𑀺𑀲𑀺𑀢𑁆𑀯𑀸 𑀧𑀸𑀘𑀻𑀦𑀤𑁆𑀯𑀸𑀭𑁂𑀦 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀼𑀩𑁆𑀩𑀸𑀭𑀸𑀫𑁂 𑀤𑀺𑀯𑀸𑀯𑀺𑀳𑀸𑀭𑀁 𑀓𑀭𑁄𑀢𑀺. 𑀧𑀼𑀩𑁆𑀩𑀸𑀭𑀸𑀫𑁂 𑀭𑀢𑁆𑀢𑀺𑀁 𑀯𑀲𑀺𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀧𑀸𑀘𑀻𑀦𑀤𑁆𑀯𑀸𑀭𑁂𑀦 𑀲𑀸𑀯𑀢𑁆𑀣𑀺𑀁 𑀧𑀺𑀡𑁆𑀟𑀸𑀬 𑀧𑀯𑀺𑀲𑀺𑀢𑁆𑀯𑀸 𑀤𑀓𑁆𑀔𑀺𑀡𑀤𑁆𑀯𑀸𑀭𑁂𑀦 𑀦𑀺𑀓𑁆𑀔𑀫𑀺𑀢𑁆𑀯𑀸 𑀚𑁂𑀢𑀯𑀦𑁂 𑀤𑀺𑀯𑀸𑀯𑀺𑀳𑀸𑀭𑀁 𑀓𑀭𑁄𑀢𑀺. 𑀢𑀲𑁆𑀫𑀺𑀁 𑀧𑀦 𑀤𑀺𑀯𑀲𑁂 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀚𑁂𑀢𑀯𑀦𑁂𑀬𑁂𑀯 𑀯𑀲𑀺. 𑀬𑀢𑁆𑀣 𑀓𑀢𑁆𑀣𑀘𑀺 𑀯𑀲𑀦𑁆𑀢𑀲𑁆𑀲 𑀘𑀲𑁆𑀲 𑀧𑀜𑁆𑀘𑀯𑀺𑀥𑀓𑀺𑀘𑁆𑀘𑀁 𑀅𑀯𑀺𑀚𑀳𑀺𑀢𑀫𑁂𑀯 𑀳𑁄𑀢𑀺. 𑀢𑀁 𑀳𑁂𑀝𑁆𑀞𑀸 𑀯𑀺𑀢𑁆𑀣𑀸𑀭𑀺𑀢𑀫𑁂𑀯. 𑀢𑁂𑀲𑀼 𑀓𑀺𑀘𑁆𑀘𑁂𑀲𑀼 𑀧𑀘𑁆𑀙𑀺𑀫𑀬𑀸𑀫𑀓𑀺𑀘𑁆𑀘𑀓𑀸𑀮𑁂 𑀪𑀕𑀯𑀸 𑀮𑁄𑀓𑀁 𑀑𑀮𑁄𑀓𑁂𑀦𑁆𑀢𑁄 𑀲𑀸𑀯𑀢𑁆𑀣𑀺𑀯𑀸𑀲𑀻𑀦𑀜𑁆𑀘 𑀲𑀫𑀦𑁆𑀢𑀸 𑀘 𑀲𑀸𑀯𑀢𑁆𑀣𑀺𑀬𑀸 𑀕𑀸𑀯𑀼𑀢𑀅𑀟𑁆𑀠𑀬𑁄𑀚𑀦𑀬𑁄𑀚𑀦𑀧𑀭𑀫𑁂 𑀞𑀸𑀦𑁂 𑀅𑀧𑀭𑀺𑀫𑀸𑀡𑀸𑀦𑀁 𑀲𑀢𑁆𑀢𑀸𑀦𑀁 𑀅𑀪𑀺𑀲𑀫𑀬𑀪𑀸𑀯𑀁 𑀅𑀤𑁆𑀤𑀲.

𑀢𑀢𑁄 ‘‘𑀓𑀲𑁆𑀫𑀺𑀁 𑀦𑀼 𑀔𑁄 𑀓𑀸𑀮𑁂 𑀅𑀪𑀺𑀲𑀫𑀬𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀑𑀮𑁄𑀓𑁂𑀦𑁆𑀢𑁄 ‘‘𑀲𑀸𑀬𑀦𑁆𑀳𑀲𑀫𑀬𑁂’’𑀢𑀺 𑀤𑀺𑀲𑁆𑀯𑀸 ‘‘𑀫𑀬𑀺 𑀦𑀼 𑀔𑁄 𑀓𑀣𑁂𑀦𑁆𑀢𑁂 𑀅𑀪𑀺𑀲𑀫𑀬𑁄 𑀪𑀯𑀺𑀲𑁆𑀲𑀢𑀺, 𑀲𑀸𑀯𑀓𑁂 𑀓𑀣𑁂𑀦𑁆𑀢𑁂 𑀪𑀯𑀺𑀲𑁆𑀲𑀢𑀻’’𑀢𑀺 ‘‘𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁂 𑀓𑀣𑁂𑀦𑁆𑀢𑁂 𑀪𑀯𑀺𑀲𑁆𑀲𑀢𑀻’’𑀢𑀺 𑀅𑀤𑁆𑀤𑀲. 𑀢𑀢𑁄 ‘‘𑀓𑀢𑁆𑀣 𑀦𑀺𑀲𑀻𑀤𑀺𑀢𑁆𑀯𑀸 𑀓𑀣𑁂𑀦𑁆𑀢𑁂 𑀪𑀯𑀺𑀲𑁆𑀲𑀢𑀻’’𑀢𑀺 𑀑𑀮𑁄𑀓𑁂𑀦𑁆𑀢𑁄 ‘‘𑀯𑀺𑀲𑀸𑀔𑀸𑀬 𑀭𑀢𑀦𑀧𑀸𑀲𑀸𑀤𑁂 𑀦𑀺𑀲𑀻𑀤𑀺𑀢𑁆𑀯𑀸’’𑀢𑀺 𑀤𑀺𑀲𑁆𑀯𑀸 ‘‘𑀩𑀼𑀤𑁆𑀥𑀸𑀦𑀁 𑀦𑀸𑀫 𑀢𑀬𑁄 𑀲𑀸𑀯𑀓𑀲𑀦𑁆𑀦𑀺𑀧𑀸𑀢𑀸 𑀳𑁄𑀦𑁆𑀢𑀺, 𑀅𑀕𑁆𑀕𑀲𑀸𑀯𑀓𑀸𑀦𑀁 𑀏𑀓𑁄. 𑀢𑁂𑀲𑀼 𑀅𑀚𑁆𑀚 𑀥𑀫𑁆𑀫𑀲𑁂𑀦𑀸𑀧𑀢𑀺𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀲𑁆𑀲 𑀲𑀸𑀯𑀓𑀲𑀦𑁆𑀦𑀺𑀧𑀸𑀢𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀅𑀤𑁆𑀤𑀲. 𑀤𑀺𑀲𑁆𑀯𑀸 𑀧𑀸𑀢𑁄𑀯 𑀲𑀭𑀻𑀭𑀧𑀝𑀺𑀚𑀕𑁆𑀕𑀦𑀁 𑀓𑀢𑁆𑀯𑀸 𑀦𑀺𑀯𑀢𑁆𑀣𑀦𑀺𑀯𑀸𑀲𑀦𑁄 𑀲𑀼𑀕𑀢𑀘𑀻𑀯𑀭𑀁 𑀧𑀸𑀭𑀼𑀧𑀺𑀢𑁆𑀯𑀸 𑀲𑁂𑀮𑀫𑀬𑀧𑀢𑁆𑀢𑀁 𑀆𑀤𑀸𑀬 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑁄 𑀤𑀓𑁆𑀔𑀺𑀡𑀤𑁆𑀯𑀸𑀭𑁂𑀦 𑀦𑀕𑀭𑀁 𑀧𑀯𑀺𑀲𑀺𑀢𑁆𑀯𑀸 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑁄 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀲𑀼𑀮𑀪𑀧𑀺𑀡𑁆𑀟𑀧𑀸𑀢𑀁 𑀓𑀢𑁆𑀯𑀸 𑀯𑀸𑀢𑀧𑁆𑀧𑀳𑀢𑀸 𑀯𑀺𑀬 𑀦𑀸𑀯𑀸 𑀧𑀝𑀺𑀦𑀺𑀯𑀢𑁆𑀢𑀺𑀢𑁆𑀯𑀸 𑀤𑀓𑁆𑀔𑀺𑀡𑀤𑁆𑀯𑀸𑀭𑁂𑀦 𑀦𑀺𑀓𑁆𑀔𑀫𑀺𑀢𑁆𑀯𑀸 𑀩𑀳𑀺𑀤𑁆𑀯𑀸𑀭𑁂 𑀅𑀝𑁆𑀞𑀸𑀲𑀺. 𑀢𑀢𑁄 𑀅𑀲𑀻𑀢𑀺 𑀫𑀳𑀸𑀲𑀸𑀯𑀓𑀸 𑀪𑀺𑀓𑁆𑀔𑀼𑀦𑀺𑀧𑀭𑀺𑀲𑀸 𑀉𑀧𑀸𑀲𑀓𑀧𑀭𑀺𑀲𑀸 𑀉𑀧𑀸𑀲𑀺𑀓𑀸𑀧𑀭𑀺𑀲𑀸𑀢𑀺 𑀘𑀢𑀲𑁆𑀲𑁄 𑀧𑀭𑀺𑀲𑀸 𑀲𑀢𑁆𑀣𑀸𑀭𑀁 𑀧𑀭𑀺𑀯𑀸𑀭𑀬𑀺𑀁𑀲𑀼.

𑀲𑀢𑁆𑀣𑀸 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀲𑀸𑀭𑀺𑀧𑀼𑀢𑁆𑀢, 𑀢𑀬𑀸 𑀧𑀼𑀩𑁆𑀩𑀸𑀭𑀸𑀫𑀁 𑀕𑀦𑁆𑀢𑀼𑀁 𑀯𑀝𑁆𑀝𑀢𑀺, 𑀢𑀯 𑀘 𑀧𑀭𑀺𑀲𑀁 𑀕𑀳𑁂𑀢𑁆𑀯𑀸 𑀕𑀘𑁆𑀙𑀸𑀳𑀻’’𑀢𑀺. ‘‘𑀲𑀸𑀥𑀼, 𑀪𑀦𑁆𑀢𑁂’’𑀢𑀺 𑀣𑁂𑀭𑁄 𑀅𑀢𑁆𑀢𑀦𑁄 𑀧𑀭𑀺𑀯𑀸𑀭𑁂𑀳𑀺 𑀧𑀜𑁆𑀘𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺 𑀧𑀭𑀺𑀯𑀼𑀢𑁄 𑀧𑀼𑀩𑁆𑀩𑀸𑀭𑀸𑀫𑀁 𑀅𑀕𑀫𑀸𑀲𑀺. 𑀏𑀢𑁂𑀦𑁂𑀯 𑀦𑀺𑀬𑀸𑀫𑁂𑀦 𑀅𑀲𑀻𑀢𑀺 𑀫𑀳𑀸𑀲𑀸𑀯𑀓𑁂 𑀧𑀼𑀩𑁆𑀩𑀸𑀭𑀸𑀫𑀫𑁂𑀯 𑀧𑁂𑀲𑁂𑀢𑁆𑀯𑀸 𑀲𑀬𑀁 𑀏𑀓𑁂𑀦 𑀆𑀦𑀦𑁆𑀤𑀢𑁆𑀣𑁂𑀭𑁂𑀦𑁂𑀯 𑀲𑀤𑁆𑀥𑀺𑀁 𑀚𑁂𑀢𑀯𑀦𑀁 𑀅𑀕𑀫𑀸𑀲𑀺. 𑀆𑀦𑀦𑁆𑀤𑀢𑁆𑀣𑁂𑀭𑁄𑀧𑀺 𑀯𑀺𑀳𑀸𑀭𑁂 𑀲𑀢𑁆𑀣𑀼 𑀯𑀢𑁆𑀢𑀁 𑀓𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 ‘‘𑀧𑀼𑀩𑁆𑀩𑀸𑀭𑀸𑀫𑀁 𑀕𑀘𑁆𑀙𑀸𑀫𑀺, 𑀪𑀦𑁆𑀢𑁂’’𑀢𑀺 𑀆𑀳. 𑀏𑀯𑀁 𑀓𑀭𑁄𑀳𑀺 𑀆𑀦𑀦𑁆𑀤𑀸𑀢𑀺. 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀢𑀢𑁆𑀣𑁂𑀯 𑀅𑀕𑀫𑀸𑀲𑀺. 𑀲𑀢𑁆𑀣𑀸 𑀏𑀓𑀓𑁄𑀯 𑀚𑁂𑀢𑀯𑀦𑁂 𑀑𑀳𑀻𑀦𑁄.

𑀢𑀁 𑀤𑀺𑀯𑀲𑀜𑁆𑀳𑀺 𑀘𑀢𑀲𑁆𑀲𑁄 𑀧𑀭𑀺𑀲𑀸 𑀣𑁂𑀭𑀲𑁆𑀲𑁂𑀯 𑀥𑀫𑁆𑀫𑀓𑀣𑀁 𑀲𑁄𑀢𑀼𑀓𑀸𑀫𑀸 𑀅𑀳𑁂𑀲𑀼𑀁. 𑀓𑁄𑀲𑀮𑀫𑀳𑀸𑀭𑀸𑀚𑀸𑀧𑀺 𑀩𑀮𑀓𑀸𑀬𑁂𑀦 𑀧𑀭𑀺𑀯𑀼𑀢𑁄 𑀧𑀼𑀩𑁆𑀩𑀸𑀭𑀸𑀫𑀫𑁂𑀯 𑀕𑀢𑁄. 𑀢𑀣𑀸 𑀧𑀜𑁆𑀘𑀲𑀢𑀉𑀧𑀸𑀲𑀓𑀧𑀭𑀺𑀯𑀸𑀭𑁄 𑀅𑀦𑀸𑀣𑀧𑀺𑀡𑁆𑀟𑀺𑀓𑁄. 𑀯𑀺𑀲𑀸𑀔𑀸 𑀧𑀦 𑀫𑀳𑀸𑀉𑀧𑀸𑀲𑀺𑀓𑀸 𑀤𑁆𑀯𑀻𑀳𑀺 𑀚𑀗𑁆𑀖𑀲𑀳𑀲𑁆𑀲𑁂𑀳𑀺 𑀧𑀭𑀺𑀯𑀼𑀢𑁄 𑀅𑀕𑀫𑀸𑀲𑀺. 𑀲𑀢𑁆𑀢𑀧𑀡𑁆𑀡𑀸𑀲𑀸𑀬 𑀓𑀼𑀮𑀲𑀢𑀲𑀳𑀲𑁆𑀲𑀸𑀦𑀁 𑀯𑀲𑀦𑀝𑁆𑀞𑀸𑀦𑁂 𑀲𑀸𑀯𑀢𑁆𑀣𑀺𑀦𑀕𑀭𑁂 𑀕𑁂𑀳𑀧𑀸𑀮𑀓𑀤𑀸𑀭𑀓𑁂 𑀞𑀧𑁂𑀢𑁆𑀯𑀸 𑀲𑁂𑀲𑀚𑀦𑁄 𑀕𑀦𑁆𑀥𑀘𑀼𑀡𑁆𑀡𑀫𑀸𑀮𑀸𑀤𑀻𑀦𑀺 𑀕𑀳𑁂𑀢𑁆𑀯𑀸 𑀧𑀼𑀩𑁆𑀩𑀸𑀭𑀸𑀫𑀫𑁂𑀯 𑀅𑀕𑀫𑀸𑀲𑀺. 𑀘𑀢𑀽𑀲𑀼 𑀤𑁆𑀯𑀸𑀭𑀕𑀸𑀫𑁂𑀲𑀼 𑀕𑀸𑀯𑀼𑀢𑀅𑀟𑁆𑀠𑀬𑁄𑀚𑀦𑀬𑁄𑀚𑀦𑀧𑀭𑀫𑀝𑁆𑀞𑀸𑀦𑁂 𑀲𑀩𑁆𑀩𑁂𑀬𑁂𑀯 𑀫𑀦𑀼𑀲𑁆𑀲𑀸 𑀕𑀦𑁆𑀥𑀘𑀼𑀡𑁆𑀡𑀫𑀸𑀮𑀸𑀤𑀺𑀳𑀢𑁆𑀣𑀸 𑀧𑀼𑀩𑁆𑀩𑀸𑀭𑀸𑀫𑀫𑁂𑀯 𑀅𑀕𑀫𑀁𑀲𑀼. 𑀲𑀓𑀮𑀯𑀺𑀳𑀸𑀭𑁄 𑀫𑀺𑀲𑁆𑀲𑀓𑀧𑀼𑀧𑁆𑀨𑁂𑀳𑀺 𑀅𑀪𑀺𑀓𑀺𑀡𑁆𑀡𑁄 𑀯𑀺𑀬 𑀅𑀳𑁄𑀲𑀺.

𑀥𑀫𑁆𑀫𑀲𑁂𑀦𑀸𑀧𑀢𑀺𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄𑀧𑀺 𑀔𑁄 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀯𑀺𑀳𑀸𑀭𑀧𑀭𑀺𑀯𑁂𑀡𑁂 𑀅𑀗𑁆𑀕𑀡𑀝𑁆𑀞𑀸𑀦𑁂 𑀅𑀝𑁆𑀞𑀸𑀲𑀺. 𑀪𑀺𑀓𑁆𑀔𑀽 𑀣𑁂𑀭𑀲𑁆𑀲 𑀆𑀲𑀦𑀁 𑀧𑀜𑁆𑀜𑀸𑀧𑀬𑀺𑀁𑀲𑀼. 𑀣𑁂𑀭𑁄 𑀢𑀢𑁆𑀣 𑀦𑀺𑀲𑀻𑀤𑀺𑀢𑁆𑀯𑀸 𑀉𑀧𑀝𑁆𑀞𑀸𑀓𑀢𑁆𑀣𑁂𑀭𑁂𑀦 𑀯𑀢𑁆𑀢𑁂 𑀓𑀢𑁂 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀑𑀯𑀸𑀤𑀁 𑀓𑀢𑁆𑀯𑀸 𑀕𑀦𑁆𑀥𑀓𑀼𑀝𑀺𑀁 𑀧𑀯𑀺𑀲𑀺𑀢𑁆𑀯𑀸 𑀲𑀫𑀸𑀧𑀢𑁆𑀢𑀺𑀁 𑀅𑀧𑁆𑀧𑁂𑀢𑁆𑀯𑀸 𑀦𑀺𑀲𑀻𑀤𑀺. 𑀲𑁄 𑀧𑀭𑀺𑀘𑁆𑀙𑀺𑀦𑁆𑀦𑀓𑀸𑀮𑀯𑀲𑁂𑀦 𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀬 𑀅𑀘𑀺𑀭𑀯𑀢𑀺𑀁 𑀕𑀦𑁆𑀢𑁆𑀯𑀸 𑀭𑀚𑁄𑀚𑀮𑁆𑀮𑀁 𑀧𑀯𑀸𑀳𑁂𑀢𑁆𑀯𑀸 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀤𑀭𑀣𑁄 𑀑𑀢𑀺𑀡𑁆𑀡𑀢𑀺𑀢𑁆𑀣𑁂𑀦𑁂𑀯 𑀉𑀢𑁆𑀢𑀭𑀺𑀢𑁆𑀯𑀸 𑀦𑀺𑀯𑀢𑁆𑀣𑀦𑀺𑀯𑀸𑀲𑀦𑁄 𑀲𑀗𑁆𑀖𑀸𑀝𑀺𑀁 𑀧𑀸𑀭𑀼𑀧𑀺𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀪𑀺𑀓𑁆𑀔𑀼𑀲𑀗𑁆𑀖𑁄𑀧𑀺 𑀲𑀫𑁆𑀫𑀼𑀔𑀲𑀫𑁆𑀫𑀼𑀔𑀝𑁆𑀞𑀸𑀦𑁂𑀦 𑀑𑀢𑀭𑀺𑀢𑁆𑀯𑀸 𑀲𑀭𑀻𑀭𑁂 𑀭𑀚𑁄𑀚𑀮𑁆𑀮𑀁 𑀧𑀯𑀸𑀳𑁂𑀢𑁆𑀯𑀸 𑀧𑀘𑁆𑀘𑀼𑀢𑁆𑀢𑀭𑀺𑀢𑁆𑀯𑀸 𑀣𑁂𑀭𑀁 𑀧𑀭𑀺𑀯𑀸𑀭𑀬𑀺𑀁𑀲𑀼. 𑀅𑀦𑁆𑀢𑁄𑀯𑀺𑀳𑀸𑀭𑁂𑀧𑀺 𑀣𑁂𑀭𑀲𑁆𑀲 𑀥𑀫𑁆𑀫𑀸𑀲𑀦𑀁 𑀧𑀜𑁆𑀜𑀸𑀧𑀬𑀺𑀁𑀲𑀼. 𑀘𑀢𑀲𑁆𑀲𑁄𑀧𑀺 𑀧𑀭𑀺𑀲𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀑𑀓𑀸𑀲𑀁 𑀜𑀢𑁆𑀯𑀸 𑀫𑀕𑁆𑀕𑀁 𑀞𑀧𑁂𑀢𑁆𑀯𑀸 𑀦𑀺𑀲𑀻𑀤𑀺𑀁𑀲𑀼. 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄𑀧𑀺 𑀧𑀜𑁆𑀘𑀪𑀺𑀓𑁆𑀔𑀼𑀲𑀢𑀧𑀭𑀺𑀯𑀸𑀭𑁄 𑀥𑀫𑁆𑀫𑀲𑀪𑀁 𑀆𑀕𑀦𑁆𑀢𑁆𑀯𑀸 𑀲𑀻𑀳𑀫𑀢𑁆𑀣𑀓𑀧𑁆𑀧𑀢𑀺𑀝𑁆𑀞𑀺𑀢𑁂 𑀲𑀫𑀼𑀲𑁆𑀲𑀺𑀢𑀲𑁂𑀢𑀘𑁆𑀙𑀢𑁆𑀢𑁂 𑀭𑀢𑀦𑀧𑀮𑁆𑀮𑀗𑁆𑀓𑁂 𑀘𑀺𑀢𑁆𑀢𑀩𑀻𑀚𑀦𑀺𑀁 𑀕𑀳𑁂𑀢𑁆𑀯𑀸 𑀧𑀼𑀭𑀢𑁆𑀣𑀸𑀪𑀺𑀫𑀼𑀔𑁄 𑀦𑀺𑀲𑀻𑀤𑀺. 𑀦𑀺𑀲𑀻𑀤𑀺𑀢𑁆𑀯𑀸 𑀧𑀭𑀺𑀲𑀁 𑀑𑀮𑁄𑀓𑁂𑀢𑁆𑀯𑀸 𑁋 ‘‘𑀫𑀳𑀢𑀻 𑀯𑀢𑀸𑀬𑀁 𑀧𑀭𑀺𑀲𑀸, 𑀇𑀫𑀺𑀲𑁆𑀲𑀸 𑀦 𑀅𑀧𑁆𑀧𑀫𑀢𑁆𑀢𑀺𑀓𑀸 𑀧𑀭𑀺𑀢𑁆𑀢𑀓𑀥𑀫𑁆𑀫𑀤𑁂𑀲𑀦𑀸 𑀅𑀦𑀼𑀘𑁆𑀙𑀯𑀺𑀓𑀸, 𑀓𑀢𑀭𑀥𑀫𑁆𑀫𑀤𑁂𑀲𑀦𑀸 𑀦𑀼 𑀔𑁄 𑀅𑀦𑀼𑀘𑁆𑀙𑀯𑀺𑀓𑀸 𑀪𑀯𑀺𑀲𑁆𑀲𑀢𑀻’’𑀢𑀺 𑀢𑀻𑀡𑀺 𑀧𑀺𑀝𑀓𑀸𑀦𑀺 𑀆𑀯𑀚𑁆𑀚𑀫𑀸𑀦𑁄 𑀇𑀫𑀁 𑀲𑀁𑀬𑁄𑀚𑀦𑀧𑀭𑀺𑀬𑀸𑀬 𑀥𑀫𑁆𑀫𑀤𑁂𑀲𑀦𑀁 𑀅𑀤𑁆𑀤𑀲.

𑀏𑀯𑀁 𑀤𑁂𑀲𑀦𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀢𑀁 𑀤𑁂𑀲𑁂𑀢𑀼𑀓𑀸𑀫𑁄 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑀆𑀯𑀼𑀲𑁄, 𑀪𑀺𑀓𑁆𑀔𑀯𑁂𑀢𑀺. 𑀆𑀯𑀼𑀲𑁄𑀢𑀺 𑀳𑀺 𑀅𑀯𑀢𑁆𑀯𑀸, 𑀪𑀺𑀓𑁆𑀔𑀯𑁂𑀢𑀺 𑀯𑀘𑀦𑀁 𑀩𑀼𑀤𑁆𑀥𑀸𑀮𑀸𑀧𑁄 𑀦𑀸𑀫 𑀳𑁄𑀢𑀺, 𑀅𑀬𑀁 𑀧𑀦𑀸𑀬𑀲𑁆𑀫𑀸 ‘‘𑀤𑀲𑀩𑀮𑁂𑀦 𑀲𑀫𑀸𑀦𑀁 𑀆𑀮𑀧𑀦𑀁 𑀦 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀲𑀢𑁆𑀣𑀼 𑀕𑀸𑀭𑀯𑀯𑀲𑁂𑀦 𑀲𑀸𑀯𑀓𑀸𑀮𑀸𑀧𑀁 𑀓𑀭𑁄𑀦𑁆𑀢𑁄, ‘‘𑀆𑀯𑀼𑀲𑁄 𑀪𑀺𑀓𑁆𑀔𑀯𑁂’’𑀢𑀺 𑀆𑀳. 𑀏𑀢𑀤𑀯𑁄𑀘𑀸𑀢𑀺 𑀏𑀢𑀁 ‘‘𑀅𑀚𑁆𑀛𑀢𑁆𑀢𑀲𑀁𑀬𑁄𑀚𑀦𑀜𑁆𑀘, 𑀆𑀯𑀼𑀲𑁄, 𑀧𑀼𑀕𑁆𑀕𑀮𑀁 𑀤𑁂𑀲𑁂𑀲𑁆𑀲𑀸𑀫𑀺 𑀩𑀳𑀺𑀤𑁆𑀥𑀸𑀲𑀁𑀬𑁄𑀚𑀦𑀜𑁆𑀘𑀸’’𑀢𑀺 𑀥𑀫𑁆𑀫𑀤𑁂𑀲𑀦𑀸𑀧𑀤𑀁 𑀅𑀯𑁄𑀘.

𑀢𑀲𑁆𑀫𑀺𑀁 𑀧𑀦 𑀭𑀢𑀦𑀧𑀸𑀲𑀸𑀤𑁂 𑀅𑀥𑀺𑀯𑀢𑁆𑀣𑁄 𑀏𑀓𑁄 𑀲𑁄𑀢𑀸𑀧𑀦𑁆𑀦𑁄 𑀤𑁂𑀯𑀧𑀼𑀢𑁆𑀢𑁄 𑀅𑀢𑁆𑀣𑀺, 𑀲𑁄 𑀩𑀼𑀤𑁆𑀥𑁂𑀳𑀺 𑀯𑀸 𑀲𑀸𑀯𑀓𑁂𑀳𑀺 𑀯𑀸 𑀤𑁂𑀲𑀦𑀸𑀬 𑀆𑀭𑀤𑁆𑀥𑀫𑀢𑁆𑀢𑀸𑀬𑀬𑁂𑀯 𑀚𑀸𑀦𑀸𑀢𑀺 𑁋 ‘‘𑀅𑀬𑀁 𑀤𑁂𑀲𑀦𑀸 𑀉𑀢𑁆𑀢𑀸𑀦𑀺𑀓𑀸 𑀪𑀯𑀺𑀲𑁆𑀲𑀢𑀺, 𑀅𑀬𑀁 𑀕𑀫𑁆𑀪𑀻𑀭𑀸. 𑀅𑀬𑀁 𑀛𑀸𑀦𑀦𑀺𑀲𑁆𑀲𑀺𑀢𑀸 𑀪𑀯𑀺𑀲𑁆𑀲𑀢𑀺, 𑀅𑀬𑀁 𑀯𑀺𑀧𑀲𑁆𑀲𑀦𑀸𑀦𑀺𑀲𑁆𑀲𑀺𑀢𑀸. 𑀅𑀬𑀁 𑀫𑀕𑁆𑀕𑀦𑀺𑀲𑁆𑀲𑀺𑀢𑀸 𑀅𑀬𑀁 𑀨𑀮𑀦𑀺𑀲𑁆𑀲𑀺𑀢𑀸, 𑀅𑀬𑀁 𑀦𑀺𑀩𑁆𑀩𑀸𑀦𑀦𑀺𑀲𑁆𑀲𑀺𑀢𑀸’’𑀢𑀺. 𑀲𑁄 𑀢𑀲𑁆𑀫𑀺𑀫𑁆𑀧𑀺 𑀤𑀺𑀯𑀲𑁂 𑀣𑁂𑀭𑁂𑀦 𑀤𑁂𑀲𑀦𑀸𑀬 𑀆𑀭𑀤𑁆𑀥𑀫𑀢𑁆𑀢𑀸𑀬 𑀏𑀯𑀁 𑀅𑀜𑁆𑀜𑀸𑀲𑀺 𑁋 ‘‘𑀬𑁂𑀦 𑀦𑀻𑀳𑀸𑀭𑁂𑀦 𑀫𑀬𑁆𑀳𑀁 𑀅𑀬𑁆𑀬𑁂𑀦 𑀥𑀫𑁆𑀫𑀲𑁂𑀦𑀸𑀧𑀢𑀺𑀦𑀸 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁂𑀦 𑀤𑁂𑀲𑀦𑀸 𑀆𑀭𑀤𑁆𑀥𑀸, 𑀅𑀬𑀁 𑀤𑁂𑀲𑀦𑀸 𑀯𑀺𑀧𑀲𑁆𑀲𑀦𑀸𑀕𑀸𑀴𑁆𑀳𑀸 𑀪𑀯𑀺𑀲𑁆𑀲𑀢𑀺, 𑀙𑀳𑀺 𑀫𑀼𑀔𑁂𑀳𑀺 𑀯𑀺𑀧𑀲𑁆𑀲𑀦𑀁 𑀓𑀣𑁂𑀲𑁆𑀲𑀢𑀺. 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀓𑁄𑀝𑀺𑀲𑀢𑀲𑀳𑀲𑁆𑀲𑀤𑁂𑀯𑀢𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀲𑁆𑀲𑀦𑁆𑀢𑀺, 𑀲𑁄𑀢𑀸𑀧𑀦𑁆𑀦𑀸𑀤𑀻𑀦𑀁 𑀧𑀦 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀧𑀭𑀺𑀘𑁆𑀙𑁂𑀤𑁄 𑀦 𑀪𑀯𑀺𑀲𑁆𑀲𑀢𑀺. 𑀤𑁂𑀲𑀦𑀸𑀬 𑀅𑀦𑀼𑀘𑁆𑀙𑀯𑀺𑀓𑀁 𑀓𑀢𑁆𑀯𑀸 𑀫𑀬𑁆𑀳𑀁 𑀅𑀬𑁆𑀬𑀲𑁆𑀲 𑀲𑀸𑀥𑀼𑀓𑀸𑀭𑀁 𑀤𑀲𑁆𑀲𑀸𑀫𑀻’’𑀢𑀺 𑀤𑁂𑀯𑀸𑀦𑀼𑀪𑀸𑀯𑁂𑀦 𑀫𑀳𑀦𑁆𑀢𑀁 𑀲𑀤𑁆𑀤𑀁 𑀓𑀢𑁆𑀯𑀸 𑁋 ‘‘𑀲𑀸𑀥𑀼 𑀲𑀸𑀥𑀼 𑀅𑀬𑁆𑀬𑀸’’𑀢𑀺 𑀆𑀳.

𑀤𑁂𑀯𑀭𑀸𑀚𑁂𑀦 𑀲𑀸𑀥𑀼𑀓𑀸𑀭𑁂 𑀤𑀺𑀦𑁆𑀦𑁂 𑀧𑀭𑀺𑀯𑀸𑀭𑀓𑀧𑀸𑀲𑀸𑀤𑀲𑀳𑀲𑁆𑀲𑁂 𑀅𑀥𑀺𑀯𑀢𑁆𑀣𑀸 𑀤𑁂𑀯𑀢𑀸 𑀲𑀩𑁆𑀩𑀸𑀯 𑀲𑀸𑀥𑀼𑀓𑀸𑀭𑀁 𑀅𑀤𑀁𑀲𑀼. 𑀢𑀸𑀲𑀁 𑀲𑀸𑀥𑀼𑀓𑀸𑀭𑀲𑀤𑁆𑀤𑁂𑀦 𑀲𑀩𑁆𑀩𑀸 𑀧𑀼𑀩𑁆𑀩𑀸𑀭𑀸𑀫𑁂 𑀯𑀲𑀦𑀤𑁂𑀯𑀢𑀸, 𑀢𑀸𑀲𑀁 𑀲𑀤𑁆𑀤𑁂𑀦 𑀕𑀸𑀯𑀼𑀢𑀫𑀢𑁆𑀢𑁂 𑀤𑁂𑀯𑀢𑀸, 𑀢𑀢𑁄 𑀅𑀟𑁆𑀠𑀬𑁄𑀚𑀦𑁂 𑀬𑁄𑀚𑀦𑁂𑀢𑀺 𑀏𑀢𑁂𑀦𑀼𑀧𑀸𑀬𑁂𑀦 𑀏𑀓𑀘𑀓𑁆𑀓𑀯𑀸𑀴𑁂, 𑀤𑁆𑀯𑀻𑀲𑀼 𑀘𑀓𑁆𑀓𑀯𑀸𑀴𑁂𑀲𑀼, 𑀢𑀻𑀲𑀼 𑀘𑀓𑁆𑀓𑀯𑀸𑀴𑁂𑀲𑀽𑀢𑀺 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑁂𑀲𑀼 𑀤𑁂𑀯𑀢𑀸 𑀲𑀸𑀥𑀼𑀓𑀸𑀭𑀫𑀤𑀁𑀲𑀼. 𑀢𑀸𑀲𑀁 𑀲𑀸𑀥𑀼𑀓𑀸𑀭𑀲𑀤𑁆𑀤𑁂𑀦 𑀧𑀣𑀯𑀺𑀝𑁆𑀞𑀓𑀦𑀸𑀕𑀸 𑀘 𑀆𑀓𑀸𑀲𑀝𑁆𑀞𑀓𑀤𑁂𑀯𑀢𑀸 𑀘. 𑀢𑀢𑁄 𑀅𑀩𑁆𑀪𑀯𑀮𑀸𑀳𑀓𑀸, 𑀉𑀡𑁆𑀳𑀯𑀮𑀸𑀳𑀓𑀸, 𑀲𑀻𑀢𑀯𑀮𑀸𑀳𑀓𑀸, 𑀯𑀲𑁆𑀲𑀯𑀮𑀸𑀳𑀓𑀸, 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸 𑀘𑀢𑁆𑀢𑀸𑀭𑁄 𑀫𑀳𑀸𑀭𑀸𑀚𑀸𑀦𑁄, 𑀢𑀸𑀯𑀢𑀺𑀁𑀲𑀸 𑀤𑁂𑀯𑀢𑀸, 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸, 𑀬𑀸𑀫𑀸 𑀤𑁂𑀯𑀢𑀸, 𑀲𑀼𑀬𑀸𑀫𑁄 𑀤𑁂𑀯𑀭𑀸𑀚𑀸, 𑀢𑀼𑀲𑀺𑀢𑀸 𑀤𑁂𑀯𑀢𑀸, 𑀲𑀦𑁆𑀢𑀼𑀲𑀺𑀢𑁄 𑀤𑁂𑀯𑀭𑀸𑀚𑀸, 𑀦𑀺𑀫𑁆𑀫𑀸𑀦𑀭𑀢𑀻 𑀤𑁂𑀯𑀢𑀸, 𑀲𑀼𑀦𑀺𑀫𑁆𑀫𑀺𑀢𑁄 𑀤𑁂𑀯𑀭𑀸𑀚𑀸, 𑀯𑀲𑀯𑀢𑁆𑀢𑀻 𑀤𑁂𑀯𑀢𑀸, 𑀯𑀲𑀯𑀢𑁆𑀢𑀻 𑀤𑁂𑀯𑀭𑀸𑀚𑀸, 𑀩𑁆𑀭𑀳𑁆𑀫𑀧𑀸𑀭𑀺𑀲𑀚𑁆𑀚𑀸, 𑀩𑁆𑀭𑀳𑁆𑀫𑀧𑀼𑀭𑁄𑀳𑀺𑀢𑀸, 𑀫𑀳𑀸𑀩𑁆𑀭𑀳𑁆𑀫𑀸𑀦𑁄, 𑀧𑀭𑀺𑀢𑁆𑀢𑀸𑀪𑀸, 𑀅𑀧𑁆𑀧𑀫𑀸𑀡𑀸𑀪𑀸, 𑀆𑀪𑀲𑁆𑀲𑀭𑀸, 𑀧𑀭𑀺𑀢𑁆𑀢𑀲𑀼𑀪𑀸, 𑀅𑀧𑁆𑀧𑀫𑀸𑀡𑀲𑀼𑀪𑀸, 𑀲𑀼𑀪𑀓𑀺𑀡𑁆𑀳𑀸, 𑀯𑁂𑀳𑀧𑁆𑀨𑀮𑀸, 𑀅𑀯𑀺𑀳𑀸, 𑀅𑀢𑀧𑁆𑀧𑀸, 𑀲𑀼𑀤𑀲𑁆𑀲𑀸, 𑀲𑀼𑀤𑀲𑁆𑀲𑀻, 𑀅𑀓𑀦𑀺𑀝𑁆𑀞𑀸 𑀤𑁂𑀯𑀢𑀸𑀢𑀺 𑀅𑀲𑀜𑁆𑀜𑁂 𑀘 𑀅𑀭𑀽𑀧𑀸𑀯𑀘𑀭𑀲𑀢𑁆𑀢𑁂 𑀘 𑀞𑀧𑁂𑀢𑁆𑀯𑀸 𑀲𑁄𑀢𑀸𑀬𑀢𑀦𑀧𑀯𑀢𑁆𑀢𑀺𑀝𑁆𑀞𑀸𑀦𑁂 𑀲𑀩𑁆𑀩𑀸 𑀤𑁂𑀯𑀢𑀸 𑀲𑀸𑀥𑀼𑀓𑀸𑀭𑀫𑀤𑀁𑀲𑀼.

𑀢𑀢𑁄 𑀔𑀻𑀡𑀸𑀲𑀯𑀫𑀳𑀸𑀩𑁆𑀭𑀳𑁆𑀫𑀸𑀦𑁄 𑁋 ‘‘𑀫𑀳𑀸 𑀯𑀢𑀸𑀬𑀁 𑀲𑀸𑀥𑀼𑀓𑀸𑀭𑀲𑀤𑁆𑀤𑁄, 𑀧𑀣𑀯𑀺𑀢𑀮𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀅𑀓𑀦𑀺𑀝𑁆𑀞𑀮𑁄𑀓𑀁 𑀆𑀕𑀢𑁄, 𑀓𑀺𑀫𑀢𑁆𑀣𑀁 𑀦𑀼 𑀔𑁄 𑀏𑀲𑁄’’𑀢𑀺 𑀆𑀯𑀚𑁆𑀚𑁂𑀦𑁆𑀢𑁄 ‘‘𑀥𑀫𑁆𑀫𑀲𑁂𑀦𑀸𑀧𑀢𑀺𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄 𑀧𑀼𑀩𑁆𑀩𑀸𑀭𑀸𑀫𑁂 𑀯𑀺𑀲𑀸𑀔𑀸𑀬 𑀭𑀢𑀦𑀧𑀸𑀲𑀸𑀤𑁂 𑀦𑀺𑀲𑀻𑀤𑀺𑀢𑁆𑀯𑀸 𑀲𑀁𑀬𑁄𑀚𑀦𑀧𑀭𑀺𑀬𑀸𑀬𑀥𑀫𑁆𑀫𑀤𑁂𑀲𑀦𑀫𑀸𑀭𑀪𑀺, 𑀅𑀫𑁆𑀳𑁂𑀳𑀺𑀧𑀺 𑀢𑀢𑁆𑀣 𑀓𑀸𑀬𑀲𑀓𑁆𑀔𑀻𑀳𑀺 𑀪𑀯𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀢𑀢𑁆𑀣 𑀅𑀕𑀫𑀁𑀲𑀼. 𑀧𑀼𑀩𑁆𑀩𑀸𑀭𑀸𑀫𑁄 𑀤𑁂𑀯𑀢𑀸𑀳𑀺 𑀧𑀭𑀺𑀧𑀼𑀡𑁆𑀡𑁄, 𑀲𑀫𑀦𑁆𑀢𑀸 𑀧𑀼𑀩𑁆𑀩𑀸𑀭𑀸𑀫𑀲𑁆𑀲 𑀕𑀸𑀯𑀼𑀢𑀁 𑀅𑀟𑁆𑀠𑀬𑁄𑀚𑀦𑀁, 𑀬𑁄𑀚𑀦𑀦𑁆𑀢𑀺 𑀲𑀓𑀮𑀘𑀓𑁆𑀓𑀯𑀸𑀴𑀁 𑀳𑁂𑀝𑁆𑀞𑀸 𑀧𑀣𑀯𑀺𑀢𑀮𑁂𑀦 𑀢𑀺𑀭𑀺𑀬𑀁 𑀘𑀓𑁆𑀓𑀯𑀸𑀴𑀧𑀭𑀺𑀬𑀦𑁆𑀢𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑀁 𑀤𑀲𑀳𑀺 𑀘𑀓𑁆𑀓𑀯𑀸𑀴𑀲𑀳𑀲𑁆𑀲𑁂𑀳𑀺 𑀲𑀦𑁆𑀦𑀺𑀧𑀢𑀺𑀢𑀸𑀳𑀺 𑀤𑁂𑀯𑀢𑀸𑀳𑀺 𑀦𑀺𑀭𑀦𑁆𑀢𑀭𑀫𑀳𑁄𑀲𑀺, 𑀆𑀭𑀕𑁆𑀕𑀦𑀺𑀢𑀼𑀤𑀦𑀫𑀢𑁆𑀢𑁂 𑀞𑀸𑀦𑁂 𑀉𑀧𑀭𑀺𑀫𑀓𑁄𑀝𑀺𑀬𑀸 𑀲𑀝𑁆𑀞𑀺 𑀤𑁂𑀯𑀢𑀸 𑀲𑀼𑀔𑀼𑀫𑀢𑁆𑀢𑀪𑀸𑀯𑁂 𑀫𑀸𑀧𑁂𑀢𑁆𑀯𑀸 𑀅𑀝𑁆𑀞𑀁𑀲𑀼.

𑀅𑀣𑀸𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 ‘‘𑀫𑀳𑀦𑁆𑀢𑀁 𑀯𑀢𑀺𑀤𑀁 𑀳𑀮𑀸𑀳𑀮𑀁, 𑀓𑀺𑀁 𑀦𑀼 𑀔𑁄 𑀏𑀢’’𑀦𑁆𑀢𑀺 𑀆𑀯𑀚𑁆𑀚𑁂𑀦𑁆𑀢𑁄 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑁂 𑀞𑀺𑀢𑀸𑀦𑀁 𑀤𑁂𑀯𑀢𑀸𑀦𑀁 𑀏𑀓𑀘𑀓𑁆𑀓𑀯𑀸𑀴𑁂 𑀲𑀦𑁆𑀦𑀺𑀧𑀢𑀺𑀢𑀪𑀸𑀯𑀁 𑀅𑀤𑁆𑀤𑀲. 𑀅𑀣 𑀬𑀲𑁆𑀫𑀸 𑀩𑀼𑀤𑁆𑀥𑀸𑀦𑀁 𑀅𑀥𑀺𑀝𑁆𑀞𑀸𑀦𑀓𑀺𑀘𑁆𑀘𑀁 𑀦𑀢𑁆𑀣𑀺, 𑀧𑀭𑀺𑀲𑀧𑀭𑀺𑀫𑀸𑀡𑁂𑀦𑁂𑀯 𑀧𑀲𑁆𑀲𑀦𑁆𑀢𑀺 𑀘𑁂𑀯 𑀲𑀤𑁆𑀤𑀜𑁆𑀘 𑀲𑀸𑀯𑁂𑀦𑁆𑀢𑀺. 𑀲𑀸𑀯𑀓𑀸𑀦𑀁 𑀧𑀦 𑀅𑀥𑀺𑀝𑁆𑀞𑀸𑀦𑀁 𑀯𑀝𑁆𑀝𑀢𑀺. 𑀢𑀲𑁆𑀫𑀸 𑀣𑁂𑀭𑁄 𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀬 𑀫𑀳𑀕𑁆𑀕𑀢𑀘𑀺𑀢𑁆𑀢𑁂𑀦 𑀅𑀥𑀺𑀝𑁆𑀞𑀸𑀲𑀺 𑁋 ‘‘𑀘𑀓𑁆𑀓𑀯𑀸𑀴𑀧𑀭𑀺𑀬𑀦𑁆𑀢𑀸 𑀧𑀭𑀺𑀲𑀸 𑀲𑀩𑁆𑀩𑀸𑀧𑀺 𑀫𑀁 𑀧𑀲𑁆𑀲𑀢𑀼, 𑀥𑀫𑁆𑀫𑀜𑁆𑀘 𑀫𑁂 𑀤𑁂𑀲𑁂𑀦𑁆𑀢𑀲𑁆𑀲 𑀲𑀤𑁆𑀤𑀁 𑀲𑀼𑀡𑀸𑀢𑀽’’𑀢𑀺. 𑀅𑀥𑀺𑀝𑁆𑀞𑀺𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀤𑀓𑁆𑀔𑀺𑀡𑀚𑀸𑀡𑀼𑀧𑀲𑁆𑀲𑁂 𑀘 𑀘𑀓𑁆𑀓𑀯𑀸𑀴𑀫𑀼𑀔𑀯𑀝𑁆𑀝𑀺𑀬𑀜𑁆𑀘 𑀦𑀺𑀲𑀻𑀤𑀺𑀢𑁆𑀯𑀸 ‘‘𑀥𑀫𑁆𑀫𑀲𑁂𑀦𑀸𑀧𑀢𑀺𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄 𑀦𑀸𑀫 𑀓𑀻𑀤𑀺𑀲𑁄 𑀤𑀻𑀖𑁄 𑀭𑀲𑁆𑀲𑁄 𑀲𑀸𑀫𑁄 𑀑𑀤𑀸𑀢𑁄’’𑀢𑀺 𑀯𑀢𑁆𑀢𑀩𑁆𑀩𑀓𑀸𑀭𑀡𑀁 𑀦𑀸𑀳𑁄𑀲𑀺, 𑀲𑀩𑁆𑀩𑁂𑀲𑀫𑁆𑀧𑀺 𑀲𑀩𑁆𑀩𑀤𑀺𑀲𑀸𑀲𑀼 𑀦𑀺𑀲𑀺𑀦𑁆𑀦𑀸𑀦𑀁 𑀅𑀪𑀺𑀫𑀼𑀔𑁂𑀬𑁂𑀯 𑀧𑀜𑁆𑀜𑀸𑀬𑀺𑀢𑁆𑀣, 𑀦𑀪𑀫𑀚𑁆𑀛𑁂 𑀞𑀺𑀢𑀘𑀦𑁆𑀤𑁄 𑀯𑀺𑀬 𑀅𑀳𑁄𑀲𑀺. 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀲𑁆𑀲𑀸𑀧𑀺𑀲𑁆𑀲 𑀤𑀓𑁆𑀔𑀺𑀡𑀚𑀸𑀡𑀼𑀧𑀲𑁆𑀲𑁂 𑀘 𑀘𑀓𑁆𑀓𑀯𑀸𑀴𑀫𑀼𑀔𑀯𑀝𑁆𑀝𑀺𑀬𑀜𑁆𑀘 𑀦𑀺𑀲𑀺𑀦𑁆𑀦𑀸 𑀲𑀩𑁆𑀩𑁂 𑀏𑀓𑀓𑀁𑀲𑁂𑀦𑁂𑀯 𑀲𑀤𑁆𑀤𑀁 𑀲𑀼𑀡𑀺𑀁𑀲𑀼.

𑀏𑀯𑀁 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀣𑁂𑀭𑁄 𑀅𑀚𑁆𑀛𑀢𑁆𑀢𑀲𑀁𑀬𑁄𑀚𑀦𑀜𑁆𑀘, 𑀆𑀯𑀼𑀲𑁄𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀭𑀪𑀺. 𑀢𑀢𑁆𑀣 𑀅𑀚𑁆𑀛𑀢𑁆𑀢𑀦𑁆𑀢𑀺 𑀓𑀸𑀫𑀪𑀯𑁄. 𑀩𑀳𑀺𑀤𑁆𑀥𑀸𑀢𑀺 𑀭𑀽𑀧𑀸𑀭𑀽𑀧𑀪𑀯𑁄. 𑀓𑀺𑀜𑁆𑀘𑀸𑀧𑀺 𑀳𑀺 𑀲𑀢𑁆𑀢𑀸 𑀓𑀸𑀫𑀪𑀯𑁂 𑀅𑀧𑁆𑀧𑀁 𑀓𑀸𑀮𑀁 𑀯𑀲𑀦𑁆𑀢𑀺 𑀓𑀧𑁆𑀧𑀲𑁆𑀲 𑀘𑀢𑀼𑀢𑁆𑀣𑀫𑁂𑀯 𑀓𑁄𑀝𑁆𑀞𑀸𑀲𑀁, 𑀇𑀢𑀭𑁂𑀲𑀼 𑀢𑀻𑀲𑀼 𑀓𑁄𑀝𑁆𑀞𑀸𑀲𑁂𑀲𑀼 𑀓𑀸𑀫𑀪𑀯𑁄 𑀲𑀼𑀜𑁆𑀜𑁄 𑀳𑁄𑀢𑀺 𑀢𑀼𑀘𑁆𑀙𑁄, 𑀭𑀽𑀧𑀪𑀯𑁂 𑀩𑀳𑀼𑀁 𑀓𑀸𑀮𑀁 𑀯𑀲𑀦𑁆𑀢𑀺, 𑀢𑀣𑀸𑀧𑀺 𑀢𑁂𑀲𑀁 𑀬𑀲𑁆𑀫𑀸 𑀓𑀸𑀫𑀪𑀯𑁂 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀬𑁄 𑀩𑀳𑀼𑀓𑀸 𑀳𑁄𑀦𑁆𑀢𑀺, 𑀅𑀧𑁆𑀧𑀓𑀸 𑀭𑀽𑀧𑀸𑀭𑀽𑀧𑀪𑀯𑁂𑀲𑀼. 𑀬𑀢𑁆𑀣 𑀘 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀬𑁄 𑀩𑀳𑀼𑀓𑀸, 𑀢𑀢𑁆𑀣 𑀆𑀮𑀬𑁄𑀧𑀺 𑀧𑀢𑁆𑀣𑀦𑀸𑀧𑀺 𑀅𑀪𑀺𑀮𑀸𑀲𑁄𑀧𑀺 𑀩𑀳𑀼 𑀳𑁄𑀢𑀺. 𑀬𑀢𑁆𑀣 𑀅𑀧𑁆𑀧𑀸, 𑀢𑀢𑁆𑀣 𑀅𑀧𑁆𑀧𑁄. 𑀢𑀲𑁆𑀫𑀸 𑀓𑀸𑀫𑀪𑀯𑁄 𑀅𑀚𑁆𑀛𑀢𑁆𑀢𑀁 𑀦𑀸𑀫 𑀚𑀸𑀢𑀁, 𑀭𑀽𑀧𑀸𑀭𑀽𑀧𑀪𑀯𑀸 𑀩𑀳𑀺𑀤𑁆𑀥𑀸 𑀦𑀸𑀫. 𑀇𑀢𑀺 𑀅𑀚𑁆𑀛𑀢𑁆𑀢𑀲𑀗𑁆𑀔𑀸𑀢𑁂 𑀓𑀸𑀫𑀪𑀯𑁂 𑀙𑀦𑁆𑀤𑀭𑀸𑀕𑁄 𑀅𑀚𑁆𑀛𑀢𑁆𑀢𑀲𑀁𑀬𑁄𑀚𑀦𑀁 𑀦𑀸𑀫, 𑀩𑀳𑀺𑀤𑁆𑀥𑀸𑀲𑀗𑁆𑀔𑀸𑀢𑁂𑀲𑀼 𑀭𑀽𑀧𑀸𑀭𑀽𑀧𑀪𑀯𑁂𑀲𑀼 𑀙𑀦𑁆𑀤𑀭𑀸𑀕𑁄 𑀩𑀳𑀺𑀤𑁆𑀥𑀸𑀲𑀁𑀬𑁄𑀚𑀦𑀁 𑀦𑀸𑀫. 𑀑𑀭𑀫𑁆𑀪𑀸𑀕𑀺𑀬𑀸𑀦𑀺 𑀯𑀸 𑀧𑀜𑁆𑀘 𑀲𑀁𑀬𑁄𑀚𑀦𑀸𑀦𑀺 𑀅𑀚𑁆𑀛𑀢𑁆𑀢𑀲𑀁𑀬𑁄𑀚𑀦𑀁 𑀦𑀸𑀫, 𑀉𑀤𑁆𑀥𑀫𑁆𑀪𑀸𑀕𑀺𑀬𑀸𑀦𑀺 𑀧𑀜𑁆𑀘 𑀩𑀳𑀺𑀤𑁆𑀥𑀸𑀲𑀁𑀬𑁄𑀚𑀦𑀁 𑀦𑀸𑀫. 𑀢𑀢𑁆𑀭𑀸𑀬𑀁 𑀯𑀘𑀦𑀢𑁆𑀣𑁄 𑁋 𑀑𑀭𑀁 𑀯𑀼𑀘𑁆𑀘𑀢𑀺 𑀓𑀸𑀫𑀥𑀸𑀢𑀼, 𑀢𑀢𑁆𑀣 𑀉𑀧𑀧𑀢𑁆𑀢𑀺𑀦𑀺𑀧𑁆𑀨𑀸𑀤𑀦𑀢𑁄 𑀢𑀁 𑀑𑀭𑀁 𑀪𑀚𑀦𑁆𑀢𑀻𑀢𑀺 𑀑𑀭𑀫𑁆𑀪𑀸𑀕𑀺𑀬𑀸𑀦𑀺. 𑀉𑀤𑁆𑀥𑀁 𑀯𑀼𑀘𑁆𑀘𑀢𑀺 𑀭𑀽𑀧𑀸𑀭𑀽𑀧𑀥𑀸𑀢𑀼, 𑀢𑀢𑁆𑀣 𑀉𑀧𑀧𑀢𑁆𑀢𑀺𑀦𑀺𑀧𑁆𑀨𑀸𑀤𑀦𑀢𑁄 𑀢𑀁 𑀉𑀤𑁆𑀥𑀁 𑀪𑀚𑀦𑁆𑀢𑀻𑀢𑀺 𑀉𑀤𑁆𑀥𑀫𑁆𑀪𑀸𑀕𑀺𑀬𑀸𑀦𑀺.

𑀏𑀯𑀁 𑀯𑀼𑀢𑁆𑀢𑀧𑁆𑀧𑀪𑁂𑀤𑁂𑀦 𑀅𑀚𑁆𑀛𑀢𑁆𑀢𑀲𑀁𑀬𑁄𑀚𑀦𑁂𑀦 𑀲𑀁𑀬𑀼𑀢𑁆𑀢𑁄 𑀧𑀼𑀕𑁆𑀕𑀮𑁄 𑀅𑀚𑁆𑀛𑀢𑁆𑀢𑀲𑀁𑀬𑁄𑀚𑀦𑁄, 𑀩𑀳𑀺𑀤𑁆𑀥𑀸𑀲𑀁𑀬𑁄𑀚𑀦𑁂𑀦 𑀲𑀁𑀬𑀼𑀢𑁆𑀢𑁄 𑀧𑀼𑀕𑁆𑀕𑀮𑁄 𑀩𑀳𑀺𑀤𑁆𑀥𑀸𑀲𑀁𑀬𑁄𑀚𑀦𑁄. 𑀉𑀪𑀬𑀫𑁆𑀧𑀺 𑀘𑁂𑀢𑀁 𑀦 𑀮𑁄𑀓𑀺𑀬𑀲𑁆𑀲 𑀯𑀝𑁆𑀝𑀦𑀺𑀲𑁆𑀲𑀺𑀢𑀫𑀳𑀸𑀚𑀦𑀲𑁆𑀲 𑀦𑀸𑀫𑀁. 𑀬𑁂𑀲𑀁 𑀧𑀦 𑀪𑀯𑁄 𑀤𑁆𑀯𑁂𑀥𑀸 𑀧𑀭𑀺𑀘𑁆𑀙𑀺𑀦𑁆𑀦𑁄, 𑀢𑁂𑀲𑀁 𑀲𑁄𑀢𑀸𑀧𑀦𑁆𑀦𑀲𑀓𑀤𑀸𑀕𑀸𑀫𑀺𑀅𑀦𑀸𑀕𑀸𑀫𑀻𑀦𑀁 𑀅𑀭𑀺𑀬𑀲𑀸𑀯𑀓𑀸𑀦𑀁 𑀏𑀢𑀁 𑀦𑀸𑀫𑀁. 𑀬𑀣𑀸 𑀳𑀺 𑀫𑀳𑀸𑀅𑀭𑀜𑁆𑀜𑁂 𑀔𑀤𑀺𑀭𑀯𑀦𑀲𑀸𑀮𑀯𑀦𑀸𑀤𑀻𑀦𑀺 𑀣𑀫𑁆𑀪𑁄 𑀢𑀼𑀮𑀸𑀲𑀗𑁆𑀖𑀸𑀝𑁄𑀢𑀺 𑀦𑀸𑀫𑀁 𑀦 𑀮𑀪𑀦𑁆𑀢𑀺, 𑀔𑀤𑀺𑀭𑀯𑀦𑀁 𑀲𑀸𑀮𑀯𑀦𑀦𑁆𑀢𑀺 𑀦𑀸𑀫𑀫𑁂𑀯 𑀮𑀪𑀦𑁆𑀢𑀺. 𑀬𑀤𑀸 𑀧𑀦 𑀢𑀢𑁄 𑀭𑀼𑀓𑁆𑀔𑀸 𑀢𑀺𑀡𑁆𑀳𑀸𑀬 𑀓𑀼𑀞𑀸𑀭𑀺𑀬𑀸 𑀙𑀺𑀦𑁆𑀤𑀺𑀢𑁆𑀯𑀸 𑀣𑀫𑁆𑀪𑀸𑀤𑀺𑀲𑀡𑁆𑀞𑀸𑀦𑁂𑀦 𑀢𑀘𑁆𑀙𑀺𑀢𑀸 𑀳𑁄𑀦𑁆𑀢𑀺, 𑀢𑀤𑀸 𑀣𑀫𑁆𑀪𑁄 𑀢𑀼𑀮𑀸𑀲𑀗𑁆𑀖𑀸𑀝𑁄𑀢𑀺 𑀦𑀸𑀫𑀁 𑀮𑀪𑀦𑁆𑀢𑀺. 𑀏𑀯𑀫𑁂𑀯𑀁 𑀅𑀧𑀭𑀺𑀘𑁆𑀙𑀺𑀦𑁆𑀦𑀪𑀯𑁄 𑀩𑀳𑀮𑀓𑀺𑀮𑁂𑀲𑁄 𑀧𑀼𑀣𑀼𑀚𑁆𑀚𑀦𑁄 𑀏𑀢𑀁 𑀦𑀸𑀫𑀁 𑀦 𑀮𑀪𑀢𑀺, 𑀪𑀯𑀁 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀓𑀺𑀮𑁂𑀲𑁂 𑀢𑀦𑀼𑀓𑁂 𑀓𑀢𑁆𑀯𑀸 𑀞𑀺𑀢𑀸 𑀲𑁄𑀢𑀸𑀧𑀦𑁆𑀦𑀸𑀤𑀬𑁄𑀯 𑀮𑀪𑀦𑁆𑀢𑀺.

𑀇𑀫𑀲𑁆𑀲 𑀘 𑀧𑀦𑀢𑁆𑀣𑀲𑁆𑀲 𑀯𑀺𑀪𑀸𑀯𑀦𑀢𑁆𑀣𑀁 𑀇𑀤𑀁 𑀯𑀘𑁆𑀙𑀓𑀲𑀸𑀮𑁄𑀧𑀫𑀁 𑀯𑁂𑀤𑀺𑀢𑀩𑁆𑀩𑀁. 𑀯𑀘𑁆𑀙𑀓𑀲𑀸𑀮𑀁 𑀳𑀺 𑀓𑀢𑁆𑀯𑀸 𑀅𑀦𑁆𑀢𑁄 𑀔𑀸𑀡𑀼𑀓𑁂 𑀓𑁄𑀝𑁆𑀝𑁂𑀢𑁆𑀯𑀸 𑀯𑀘𑁆𑀙𑀓𑁂 𑀬𑁄𑀢𑁆𑀢𑁂𑀳𑀺 𑀩𑀦𑁆𑀥𑀺𑀢𑁆𑀯𑀸 𑀢𑁂𑀲𑀼 𑀉𑀧𑀦𑀺𑀩𑀦𑁆𑀥𑀦𑁆𑀢𑀺, 𑀬𑁄𑀢𑁆𑀢𑁂𑀲𑀼 𑀅𑀧𑁆𑀧𑀳𑁄𑀦𑁆𑀢𑁂𑀲𑀼 𑀓𑀡𑁆𑀡𑁂𑀲𑀼𑀧𑀺 𑀕𑀳𑁂𑀢𑁆𑀯𑀸 𑀢𑀢𑁆𑀣 𑀯𑀘𑁆𑀙𑀓𑁂 𑀧𑀯𑁂𑀲𑁂𑀦𑁆𑀢𑀺, 𑀅𑀦𑁆𑀢𑁄𑀲𑀸𑀮𑀸𑀬 𑀑𑀓𑀸𑀲𑁂 𑀅𑀧𑁆𑀧𑀳𑁄𑀦𑁆𑀢𑁂 𑀩𑀳𑀺 𑀔𑀸𑀡𑀼𑀓𑁂 𑀓𑁄𑀝𑁆𑀝𑁂𑀢𑁆𑀯𑀸𑀧𑀺 𑀏𑀯𑀫𑁂𑀯 𑀓𑀭𑁄𑀦𑁆𑀢𑀺. 𑀢𑀢𑁆𑀣 𑀓𑁄𑀘𑀺 𑀅𑀦𑁆𑀢𑁄𑀩𑀤𑁆𑀥𑁄 𑀯𑀘𑁆𑀙𑀓𑁄 𑀩𑀳𑀺𑀦𑀺𑀧𑀦𑁆𑀦𑁄 𑀳𑁄𑀢𑀺, 𑀓𑁄𑀘𑀺 𑀩𑀳𑀺𑀩𑀤𑁆𑀥𑁄 𑀅𑀦𑁆𑀢𑁄𑀦𑀺𑀧𑀦𑁆𑀦𑁄, 𑀓𑁄𑀘𑀺 𑀅𑀦𑁆𑀢𑁄𑀩𑀤𑁆𑀥𑁄 𑀅𑀦𑁆𑀢𑁄𑀯 𑀦𑀺𑀧𑀦𑁆𑀦𑁄, 𑀓𑁄𑀘𑀺 𑀩𑀳𑀺𑀩𑀤𑁆𑀥𑁄 𑀩𑀳𑀺𑀬𑁂𑀯 𑀦𑀺𑀧𑀦𑁆𑀦𑁄. 𑀓𑁄𑀘𑀺 𑀅𑀦𑁆𑀢𑁄𑀧𑀺 𑀅𑀩𑀤𑁆𑀥𑁄𑀯 𑀘𑀭𑀢𑀺, 𑀩𑀳𑀺𑀧𑀺 𑀅𑀩𑀤𑁆𑀥𑁄𑀯. 𑀢𑀢𑁆𑀣 𑀅𑀦𑁆𑀢𑁄𑀩𑀤𑁆𑀥𑀲𑁆𑀲 𑀩𑀳𑀺𑀦𑀺𑀧𑀦𑁆𑀦𑀲𑁆𑀲 𑀩𑀦𑁆𑀥𑀦𑀁 𑀤𑀻𑀖𑀁 𑀳𑁄𑀢𑀺. 𑀲𑁄 𑀳𑀺 𑀉𑀡𑁆𑀳𑀸𑀤𑀺𑀧𑀻𑀴𑀺𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀩𑀳𑀺 𑀯𑀘𑁆𑀙𑀓𑀸𑀦𑀁 𑀅𑀩𑁆𑀪𑀦𑁆𑀢𑀭𑁂 𑀦𑀺𑀧𑀚𑁆𑀚𑀢𑀺. 𑀩𑀳𑀺𑀩𑀤𑁆𑀥𑁂 𑀅𑀦𑁆𑀢𑁄𑀦𑀺𑀧𑀦𑁆𑀦𑁂𑀧𑀺 𑀏𑀲𑁂𑀯 𑀦𑀬𑁄. 𑀬𑁄 𑀧𑀦 𑀅𑀦𑁆𑀢𑁄𑀩𑀤𑁆𑀥𑁄 𑀅𑀦𑁆𑀢𑁄𑀦𑀺𑀧𑀦𑁆𑀦𑁄, 𑀢𑀲𑁆𑀲 𑀩𑀦𑁆𑀥𑀦𑀁 𑀭𑀲𑁆𑀲𑀁 𑀳𑁄𑀢𑀺. 𑀩𑀳𑀺𑀩𑀤𑁆𑀥𑁂 𑀩𑀳𑀺𑀦𑀺𑀧𑀦𑁆𑀦𑁂𑀧𑀺 𑀏𑀲𑁂𑀯 𑀦𑀬𑁄. 𑀉𑀪𑁄𑀧𑀺 𑀳𑀺 𑀢𑁂 𑀤𑀺𑀯𑀲𑀫𑁆𑀧𑀺 𑀔𑀸𑀡𑀼𑀓𑀁 𑀅𑀦𑀼𑀧𑀭𑀺𑀕𑀦𑁆𑀢𑁆𑀯𑀸 𑀢𑀢𑁆𑀣𑁂𑀯 𑀲𑀬𑀦𑁆𑀢𑀺. 𑀬𑁄 𑀧𑀦 𑀅𑀦𑁆𑀢𑁄 𑀅𑀩𑀤𑁆𑀥𑁄 𑀢𑀢𑁆𑀣𑁂𑀯 𑀯𑀘𑁆𑀙𑀓𑀸𑀦𑀁 𑀅𑀦𑁆𑀢𑀭𑁂 𑀯𑀺𑀘𑀭𑀢𑀺. 𑀅𑀬𑀁 𑀲𑀻𑀮𑀯𑀸 𑀯𑀘𑁆𑀙𑀓𑁄 𑀓𑀡𑁆𑀡𑁂 𑀕𑀳𑁂𑀢𑁆𑀯𑀸 𑀯𑀘𑁆𑀙𑀓𑀸𑀦𑀁 𑀅𑀦𑁆𑀢𑀭𑁂 𑀯𑀺𑀲𑁆𑀲𑀝𑁆𑀞𑁄 𑀤𑀺𑀯𑀲𑀫𑁆𑀧𑀺 𑀅𑀜𑁆𑀜𑀢𑁆𑀣 𑀅𑀕𑀦𑁆𑀢𑁆𑀯𑀸 𑀢𑀢𑁆𑀣𑁂𑀯 𑀘𑀭𑀢𑀺. 𑀩𑀳𑀺 𑀅𑀩𑀤𑁆𑀥𑁂 𑀢𑀢𑁆𑀣𑁂𑀯 𑀯𑀺𑀘𑀭𑀦𑁆𑀢𑁂𑀧𑀺 𑀏𑀲𑁂𑀯 𑀦𑀬𑁄.

𑀢𑀢𑁆𑀣 𑀯𑀘𑁆𑀙𑀓𑀲𑀸𑀮𑀸 𑀯𑀺𑀬 𑀢𑀬𑁄 𑀪𑀯𑀸 𑀯𑁂𑀤𑀺𑀢𑀩𑁆𑀩𑀸. 𑀯𑀘𑁆𑀙𑀓𑀲𑀸𑀮𑀸𑀬𑀁 𑀔𑀸𑀡𑀼𑀓𑀸 𑀯𑀺𑀬 𑀅𑀯𑀺𑀚𑁆𑀚𑀸𑀔𑀸𑀡𑀼𑀓𑁄. 𑀯𑀘𑁆𑀙𑀓𑀩𑀦𑁆𑀥𑀦𑀬𑁄𑀢𑁆𑀢𑀁 𑀯𑀺𑀬 𑀤𑀲 𑀲𑀁𑀬𑁄𑀚𑀦𑀸𑀦𑀺. 𑀯𑀘𑁆𑀙𑀓𑀸 𑀯𑀺𑀬 𑀢𑀻𑀲𑀼 𑀪𑀯𑁂𑀲𑀼 𑀦𑀺𑀩𑁆𑀩𑀢𑁆𑀢𑀲𑀢𑁆𑀢𑀸. 𑀅𑀦𑁆𑀢𑁄𑀩𑀤𑁆𑀥𑁄 𑀩𑀳𑀺𑀲𑀬𑀺𑀢𑀯𑀘𑁆𑀙𑀓𑁄 𑀯𑀺𑀬 𑀭𑀽𑀧𑀸𑀭𑀽𑀧𑀪𑀯𑁂𑀲𑀼 𑀲𑁄𑀢𑀸𑀧𑀦𑁆𑀦𑀲𑀓𑀤𑀸𑀕𑀸𑀫𑀺𑀦𑁄. 𑀢𑁂 𑀳𑀺 𑀓𑀺𑀜𑁆𑀘𑀸𑀧𑀺 𑀢𑀢𑁆𑀣𑁂𑀯 𑀯𑀲𑀦𑁆𑀢𑀺, 𑀲𑀁𑀬𑁄𑀚𑀦𑀁 𑀧𑀦 𑀢𑁂𑀲𑀁 𑀓𑀸𑀫𑀸𑀯𑀘𑀭𑀽𑀧𑀦𑀺𑀩𑀤𑁆𑀥𑀫𑁂𑀯. 𑀓𑁂𑀦𑀝𑁆𑀞𑁂𑀦? 𑀅𑀧𑁆𑀧𑀳𑀻𑀦𑀝𑁆𑀞𑁂𑀦. 𑀭𑀽𑀧𑀸𑀭𑀽𑀧𑀪𑀯𑁂𑀲𑀼 𑀧𑀼𑀣𑀼𑀚𑁆𑀚𑀦𑁄𑀧𑀺 𑀏𑀢𑁂𑀳𑁂𑀯 𑀲𑀗𑁆𑀕𑀳𑀺𑀢𑁄. 𑀲𑁄𑀧𑀺 𑀳𑀺 𑀓𑀺𑀜𑁆𑀘𑀸𑀧𑀺 𑀢𑀢𑁆𑀣 𑀯𑀲𑀢𑀺, 𑀲𑀁𑀬𑁄𑀚𑀦𑀁 𑀧𑀦𑀲𑁆𑀲 𑀓𑀸𑀫𑀸𑀯𑀘𑀭𑀽𑀧𑀦𑀺𑀩𑀤𑁆𑀥𑀫𑁂𑀯. 𑀩𑀳𑀺𑀩𑀤𑁆𑀥𑁄 𑀅𑀦𑁆𑀢𑁄𑀲𑀬𑀺𑀢𑀯𑀘𑁆𑀙𑀓𑁄 𑀯𑀺𑀬 𑀓𑀸𑀫𑀸𑀯𑀘𑀭𑁂 𑀅𑀦𑀸𑀕𑀸𑀫𑀻. 𑀲𑁄 𑀳𑀺 𑀓𑀺𑀜𑁆𑀘𑀸𑀧𑀺 𑀓𑀸𑀫𑀸𑀯𑀘𑀭𑁂 𑀯𑀲𑀢𑀺, 𑀲𑀁𑀬𑁄𑀚𑀦𑀁 𑀧𑀦𑀲𑁆𑀲 𑀭𑀽𑀧𑀸𑀭𑀽𑀧𑀪𑀯𑀽𑀧𑀦𑀺𑀩𑀤𑁆𑀥𑀫𑁂𑀯. 𑀅𑀦𑁆𑀢𑁄𑀩𑀤𑁆𑀥𑁄 𑀅𑀦𑁆𑀢𑁄𑀦𑀺𑀧𑀦𑁆𑀦𑁄 𑀯𑀺𑀬 𑀓𑀸𑀫𑀸𑀯𑀘𑀭𑁂 𑀲𑁄𑀢𑀸𑀧𑀦𑁆𑀦𑀲𑀓𑀤𑀸𑀕𑀸𑀫𑀺𑀦𑁄. 𑀢𑁂 𑀳𑀺 𑀲𑀬𑀫𑁆𑀧𑀺 𑀓𑀸𑀫𑀸𑀯𑀘𑀭𑁂 𑀯𑀲𑀦𑁆𑀢𑀺, 𑀲𑀁𑀬𑁄𑀚𑀦𑀫𑁆𑀧𑀺 𑀢𑁂𑀲𑀁 𑀓𑀸𑀫𑀸𑀯𑀘𑀭𑀽𑀧𑀦𑀺𑀩𑀤𑁆𑀥𑀫𑁂𑀯. 𑀩𑀳𑀺𑀩𑀤𑁆𑀥𑁄 𑀩𑀳𑀺𑀦𑀺𑀧𑀦𑁆𑀦𑁄 𑀯𑀺𑀬 𑀭𑀽𑀧𑀸𑀭𑀽𑀧𑀪𑀯𑁂𑀲𑀼 𑀅𑀦𑀸𑀕𑀸𑀫𑀻. 𑀲𑁄 𑀳𑀺 𑀲𑀬𑀫𑁆𑀧𑀺 𑀢𑀢𑁆𑀣 𑀯𑀲𑀢𑀺, 𑀲𑀁𑀬𑁄𑀚𑀦𑀫𑁆𑀧𑀺𑀲𑁆𑀲 𑀭𑀽𑀧𑀸𑀭𑀽𑀧𑀪𑀯𑀽𑀧𑀦𑀺𑀩𑀤𑁆𑀥𑀫𑁂𑀯. 𑀅𑀦𑁆𑀢𑁄𑀅𑀩𑀤𑁆𑀥𑁄 𑀅𑀦𑁆𑀢𑁄𑀯𑀺𑀘𑀭𑀡𑀯𑀘𑁆𑀙𑀓𑁄 𑀯𑀺𑀬 𑀓𑀸𑀫𑀸𑀯𑀘𑀭𑁂 𑀔𑀻𑀡𑀸𑀲𑀯𑁄. 𑀩𑀳𑀺𑀅𑀩𑀤𑁆𑀥𑁄 𑀩𑀳𑀺𑀯𑀺𑀘𑀭𑀡𑀯𑀘𑁆𑀙𑀓𑁄 𑀯𑀺𑀬 𑀭𑀽𑀧𑀸𑀭𑀽𑀧𑀪𑀯𑁂 𑀔𑀻𑀡𑀸𑀲𑀯𑁄. 𑀲𑀁𑀬𑁄𑀚𑀦𑁂𑀲𑀼 𑀧𑀦 𑀲𑀓𑁆𑀓𑀸𑀬𑀤𑀺𑀝𑁆𑀞𑀺 𑀯𑀺𑀘𑀺𑀓𑀺𑀘𑁆𑀙𑀸 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑁄𑀢𑀺 𑀇𑀫𑀸𑀦𑀺 𑀢𑀻𑀡𑀺 𑀕𑀘𑁆𑀙𑀦𑁆𑀢𑀁 𑀦𑀺𑀯𑀸𑀭𑁂𑀦𑁆𑀢𑀺, 𑀕𑀢𑀁 𑀧𑀝𑀺𑀆𑀦𑁂𑀦𑁆𑀢𑀺. 𑀓𑀸𑀫𑀘𑁆𑀙𑀦𑁆𑀤𑁄 𑀩𑁆𑀬𑀸𑀧𑀸𑀤𑁄𑀢𑀺 𑀇𑀫𑀸𑀦𑀺 𑀧𑀦 𑀤𑁆𑀯𑁂 𑀲𑀁𑀬𑁄𑀚𑀦𑀸𑀦𑀺 𑀲𑀫𑀸𑀧𑀢𑁆𑀢𑀺𑀬𑀸 𑀯𑀸 𑀅𑀯𑀺𑀓𑁆𑀔𑀫𑁆𑀪𑁂𑀢𑁆𑀯𑀸 𑀫𑀕𑁆𑀕𑁂𑀦 𑀯𑀸 𑀅𑀲𑀫𑀼𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀭𑀽𑀧𑀸𑀭𑀽𑀧𑀪𑀯𑁂 𑀦𑀺𑀩𑁆𑀩𑀢𑁆𑀢𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺.

𑀓𑀢𑀫𑁄 𑀘𑀸𑀯𑀼𑀲𑁄𑀢𑀺 𑀇𑀤𑀁 𑀣𑁂𑀭𑁄 𑀬𑀣𑀸 𑀦𑀸𑀫 𑀧𑀼𑀭𑀺𑀲𑁄 𑀤𑁆𑀯𑁂 𑀭𑀢𑀦𑀧𑁂𑀴𑀸 𑀧𑀲𑁆𑀲𑁂 𑀞𑀧𑁂𑀢𑁆𑀯𑀸 𑀲𑀫𑁆𑀧𑀢𑁆𑀢𑀧𑀭𑀺𑀲𑀸𑀬 𑀤𑁆𑀯𑁂 𑀳𑀢𑁆𑀣𑁂 𑀧𑀽𑀭𑁂𑀢𑁆𑀯𑀸 𑀲𑀢𑁆𑀢𑀯𑀺𑀥𑀁 𑀭𑀢𑀦𑀁 𑀪𑀸𑀚𑁂𑀢𑁆𑀯𑀸 𑀤𑀤𑁂𑀬𑁆𑀬, 𑀏𑀯𑀁 𑀧𑀞𑀫𑀁 𑀭𑀢𑀦𑀧𑁂𑀴𑀁 𑀤𑀢𑁆𑀯𑀸 𑀤𑀼𑀢𑀺𑀬𑀫𑁆𑀧𑀺 𑀢𑀣𑁂𑀯 𑀤𑀤𑁂𑀬𑁆𑀬. 𑀏𑀯𑀫𑁂𑀯𑀁 ‘‘𑀅𑀚𑁆𑀛𑀢𑁆𑀢𑀲𑀁𑀬𑁄𑀚𑀦𑀜𑁆𑀘, 𑀆𑀯𑀼𑀲𑁄, 𑀧𑀼𑀕𑁆𑀕𑀮𑀁 𑀤𑁂𑀲𑁂𑀲𑁆𑀲𑀸𑀫𑀺 𑀩𑀳𑀺𑀤𑁆𑀥𑀸𑀲𑀁𑀬𑁄𑀚𑀦𑀜𑁆𑀘𑀸’’𑀢𑀺 𑀇𑀫𑀸𑀦𑀺 𑀤𑁆𑀯𑁂 𑀧𑀤𑀸𑀦𑀺 𑀫𑀸𑀢𑀺𑀓𑀸𑀯𑀲𑁂𑀦 𑀞𑀧𑁂𑀢𑁆𑀯𑀸 𑀇𑀤𑀸𑀦𑀺 𑀅𑀝𑁆𑀞𑀯𑀺𑀥𑀸𑀬 𑀧𑀭𑀺𑀲𑀸𑀬 𑀪𑀸𑀚𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 𑀯𑀺𑀢𑁆𑀣𑀸𑀭𑀓𑀣𑀁 𑀆𑀭𑀪𑀺.

𑀢𑀢𑁆𑀣 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂. 𑀲𑀻𑀮𑀯𑀸 𑀳𑁄𑀢𑀻𑀢𑀺 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑁂𑀳𑀺 𑀲𑀻𑀮𑀲𑀫𑁆𑀧𑀦𑁆𑀦𑁄 𑀳𑁄𑀢𑀺. 𑀇𑀢𑀺 𑀣𑁂𑀭𑁄 𑀏𑀢𑁆𑀢𑀸𑀯𑀢𑀸 𑀘 𑀓𑀺𑀭 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀁 𑀉𑀤𑁆𑀤𑀺𑀲𑀺𑀢𑁆𑀯𑀸 ‘‘𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀁𑀯𑀼𑀢𑁄’’𑀢𑀺 𑀇𑀫𑀺𑀦𑀸 𑀢𑀢𑁆𑀣 𑀚𑁂𑀝𑁆𑀞𑀓𑀲𑀻𑀮𑀁 𑀯𑀺𑀢𑁆𑀣𑀸𑀭𑁂𑀢𑁆𑀯𑀸 𑀤𑀲𑁆𑀲𑁂𑀲𑀻𑀢𑀺 𑀤𑀻𑀧𑀯𑀺𑀳𑀸𑀭𑀯𑀸𑀲𑀻 𑀲𑀼𑀫𑁆𑀫𑀢𑁆𑀣𑁂𑀭𑁄 𑀆𑀳. 𑀅𑀦𑁆𑀢𑁂𑀯𑀸𑀲𑀺𑀓𑁄 𑀧𑀦𑀲𑁆𑀲 𑀢𑀺𑀧𑀺𑀝𑀓𑀘𑀽𑀴𑀦𑀸𑀕𑀢𑁆𑀣𑁂𑀭𑁄 𑀆𑀳 𑁋 ‘‘𑀉𑀪𑀬𑀢𑁆𑀣𑀸𑀧𑀺 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑁄𑀯 𑀯𑀼𑀢𑁆𑀢𑁄. 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑁄𑀬𑁂𑀯 𑀳𑀺 𑀲𑀻𑀮𑀁, 𑀇𑀢𑀭𑀸𑀦𑀺 𑀧𑀦 𑀢𑀻𑀡𑀺 𑀲𑀻𑀮𑀦𑁆𑀢𑀺 𑀯𑀼𑀢𑁆𑀢𑀝𑁆𑀞𑀸𑀦𑀁 𑀦𑀸𑀫 𑀅𑀢𑁆𑀣𑀻’’𑀢𑀺 𑀅𑀦𑀦𑀼𑀚𑀸𑀦𑀦𑁆𑀢𑁄 𑀉𑀢𑁆𑀢𑀭𑀺 𑀆𑀳 𑁋 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑁄 𑀦𑀸𑀫 𑀙𑀤𑁆𑀯𑀸𑀭𑀭𑀓𑁆𑀔𑀸𑀫𑀢𑁆𑀢𑀓𑀫𑁂𑀯, 𑀆𑀚𑀻𑀯𑀧𑀸𑀭𑀺𑀲𑀼𑀤𑁆𑀥𑀺 𑀥𑀫𑁆𑀫𑁂𑀦 𑀲𑀫𑁂𑀦 𑀧𑀘𑁆𑀘𑀬𑀼𑀧𑁆𑀧𑀢𑁆𑀢𑀺𑀫𑀢𑁆𑀢𑀓𑀁, 𑀧𑀘𑁆𑀘𑀬𑀲𑀦𑁆𑀦𑀺𑀲𑁆𑀲𑀺𑀢𑀁 𑀧𑀝𑀺𑀮𑀤𑁆𑀥𑀧𑀘𑁆𑀘𑀬𑁂 ‘‘𑀇𑀤𑀫𑀢𑁆𑀣’’𑀦𑁆𑀢𑀺 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀦𑀫𑀢𑁆𑀢𑀓𑀁, 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀧𑀦 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑁄𑀯 𑀲𑀻𑀮𑀁. 𑀬𑀲𑁆𑀲 𑀲𑁄 𑀪𑀺𑀦𑁆𑀦𑁄, 𑀅𑀬𑀁 𑀙𑀺𑀦𑁆𑀦𑀲𑀻𑀲𑁄 𑀯𑀺𑀬 𑀧𑀼𑀭𑀺𑀲𑁄 𑀳𑀢𑁆𑀣𑀧𑀸𑀤𑁂 𑀲𑁂𑀲𑀸𑀦𑀺 𑀭𑀓𑁆𑀔𑀺𑀲𑁆𑀲𑀢𑀻𑀢𑀺 𑀦 𑀯𑀢𑁆𑀢𑀩𑁆𑀩𑁄. 𑀬𑀲𑁆𑀲 𑀧𑀦 𑀲𑁄 𑀅𑀭𑁄𑀕𑁄, 𑀅𑀬𑀁 𑀅𑀘𑁆𑀙𑀺𑀦𑁆𑀦𑀲𑀻𑀲𑁄 𑀯𑀺𑀬 𑀧𑀼𑀭𑀺𑀲𑁄 𑀚𑀻𑀯𑀺𑀢𑀁 𑀲𑁂𑀲𑀸𑀦𑀺 𑀧𑀼𑀦 𑀧𑀸𑀓𑀢𑀺𑀓𑀸𑀦𑀺 𑀓𑀢𑁆𑀯𑀸 𑀭𑀓𑁆𑀔𑀺𑀢𑀼𑀁 𑀲𑀓𑁆𑀓𑁄𑀢𑀺. 𑀢𑀲𑁆𑀫𑀸 𑀲𑀻𑀮𑀯𑀸𑀢𑀺 𑀇𑀫𑀺𑀦𑀸 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀁 𑀉𑀤𑁆𑀤𑀺𑀲𑀺𑀢𑁆𑀯𑀸 𑀢𑀁 𑀯𑀺𑀢𑁆𑀣𑀸𑀭𑁂𑀦𑁆𑀢𑁄 ‘‘𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀁𑀯𑀼𑀢𑁄’’𑀢𑀺𑀆𑀤𑀺𑀫𑀸𑀳𑀸𑀢𑀺.

𑀢𑀢𑁆𑀣 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀁𑀯𑀼𑀢𑁄𑀢𑀺 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀆𑀘𑀸𑀭𑀕𑁄𑀘𑀭𑀲𑀫𑁆𑀧𑀦𑁆𑀦𑁄𑀢𑀺 𑀆𑀘𑀸𑀭𑁂𑀦 𑀘 𑀕𑁄𑀘𑀭𑁂𑀦 𑀘 𑀲𑀫𑁆𑀧𑀦𑁆𑀦𑁄. 𑀅𑀡𑀼𑀫𑀢𑁆𑀢𑁂𑀲𑀽𑀢𑀺 𑀅𑀧𑁆𑀧𑀫𑀢𑁆𑀢𑀓𑁂𑀲𑀼. 𑀯𑀚𑁆𑀚𑁂𑀲𑀽𑀢𑀺 𑀅𑀓𑀼𑀲𑀮𑀥𑀫𑁆𑀫𑁂𑀲𑀼. 𑀪𑀬𑀤𑀲𑁆𑀲𑀸𑀯𑀻𑀢𑀺 𑀪𑀬𑀤𑀲𑁆𑀲𑀻. 𑀲𑀫𑀸𑀤𑀸𑀬𑀸𑀢𑀺 𑀲𑀫𑁆𑀫𑀸 𑀆𑀤𑀺𑀬𑀺𑀢𑁆𑀯𑀸. 𑀲𑀺𑀓𑁆𑀔𑀢𑀺 𑀲𑀺𑀓𑁆𑀔𑀸𑀧𑀤𑁂𑀲𑀽𑀢𑀺 𑀢𑀁 𑀢𑀁 𑀲𑀺𑀓𑁆𑀔𑀸𑀧𑀤𑀁 𑀲𑀫𑀸𑀤𑀺𑀬𑀺𑀢𑁆𑀯𑀸 𑀲𑀺𑀓𑁆𑀔𑀢𑀺. 𑀅𑀧𑀺𑀘 𑀲𑀫𑀸𑀤𑀸𑀬 𑀲𑀺𑀓𑁆𑀔𑀢𑀺 𑀲𑀺𑀓𑁆𑀔𑀸𑀧𑀤𑁂𑀲𑀽𑀢𑀺 𑀬𑀁𑀓𑀺𑀜𑁆𑀘𑀺 𑀲𑀺𑀓𑁆𑀔𑀸𑀧𑀤𑁂𑀲𑀼 𑀲𑀺𑀓𑁆𑀔𑀸𑀓𑁄𑀝𑁆𑀞𑀸𑀲𑁂𑀲𑀼 𑀲𑀺𑀓𑁆𑀔𑀺𑀢𑀩𑁆𑀩𑀁 𑀓𑀸𑀬𑀺𑀓𑀁 𑀯𑀸 𑀯𑀸𑀘𑀲𑀺𑀓𑀁 𑀯𑀸, 𑀢𑀁 𑀲𑀩𑁆𑀩𑀁 𑀲𑀫𑁆𑀫𑀸 𑀆𑀤𑀸𑀬 𑀲𑀺𑀓𑁆𑀔𑀢𑀺. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑀢𑁄 𑀧𑀦 𑀲𑀩𑁆𑀩𑀸𑀦𑁂𑀢𑀸𑀦𑀺 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀸𑀤𑀻𑀦𑀺 𑀧𑀤𑀸𑀦𑀺 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁧.𑁧𑁪 𑀆𑀤𑀬𑁄) 𑀯𑀼𑀢𑁆𑀢𑀸𑀦𑀺, 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀜𑁆𑀘 𑀲𑀩𑁆𑀩𑀸𑀓𑀸𑀭𑁂𑀦 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑀺𑀢𑀁. 𑀅𑀜𑁆𑀜𑀢𑀭𑀁 𑀤𑁂𑀯𑀦𑀺𑀓𑀸𑀬𑀦𑁆𑀢𑀺 𑀙𑀲𑀼 𑀓𑀸𑀫𑀸𑀯𑀘𑀭𑀤𑁂𑀯𑀖𑀝𑀸𑀲𑀼 𑀅𑀜𑁆𑀜𑀢𑀭𑀁 𑀤𑁂𑀯𑀖𑀝𑀁. 𑀆𑀕𑀸𑀫𑀻 𑀳𑁄𑀢𑀻𑀢𑀺 𑀳𑁂𑀝𑁆𑀞𑀸 𑀆𑀕𑀸𑀫𑀻 𑀳𑁄𑀢𑀺. 𑀆𑀕𑀦𑁆𑀢𑀸 𑀇𑀢𑁆𑀣𑀢𑁆𑀢𑀦𑁆𑀢𑀺 𑀇𑀢𑁆𑀣𑀢𑁆𑀢𑀁 𑀫𑀸𑀦𑀼𑀲𑀓𑀧𑀜𑁆𑀘𑀓𑁆𑀔𑀦𑁆𑀥𑀪𑀸𑀯𑀫𑁂𑀯 𑀆𑀕𑀦𑁆𑀢𑀸 𑀳𑁄𑀢𑀺. 𑀢𑀢𑁆𑀭𑀽𑀧𑀧𑀢𑁆𑀢𑀺𑀓𑁄 𑀯𑀸 𑀉𑀧𑀭𑀽𑀧𑀧𑀢𑁆𑀢𑀺𑀓𑁄 𑀯𑀸 𑀦 𑀳𑁄𑀢𑀺, 𑀧𑀼𑀦 𑀳𑁂𑀝𑁆𑀞𑀸𑀕𑀸𑀫𑀻𑀬𑁂𑀯 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀇𑀫𑀺𑀦𑀸 𑀅𑀗𑁆𑀕𑁂𑀦 𑀲𑀼𑀓𑁆𑀔𑀯𑀺𑀧𑀲𑁆𑀲𑀓𑀲𑁆𑀲 𑀥𑀸𑀢𑀼𑀓𑀫𑁆𑀫𑀝𑁆𑀞𑀸𑀦𑀺𑀓𑀪𑀺𑀓𑁆𑀔𑀼𑀦𑁄 𑀳𑁂𑀝𑁆𑀞𑀺𑀫𑀁 𑀫𑀕𑁆𑀕𑀤𑁆𑀯𑀬𑀜𑁆𑀘𑁂𑀯 𑀨𑀮𑀤𑁆𑀯𑀬𑀜𑁆𑀘 𑀓𑀣𑀺𑀢𑀁.

𑀅𑀜𑁆𑀜𑀢𑀭𑀁 𑀲𑀦𑁆𑀢𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀦𑁆𑀢𑀺 𑀅𑀝𑁆𑀞𑀲𑀼 𑀲𑀫𑀸𑀧𑀢𑁆𑀢𑀻𑀲𑀼 𑀅𑀜𑁆𑀜𑀢𑀭𑀁 𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑀫𑀸𑀧𑀢𑁆𑀢𑀺𑀁. 𑀲𑀸 𑀳𑀺 𑀧𑀘𑁆𑀘𑀦𑀻𑀓𑀓𑀺𑀮𑁂𑀲𑀸𑀦𑀁 𑀲𑀦𑁆𑀢𑀢𑁆𑀢𑀸 𑀲𑀦𑁆𑀢𑀸, 𑀢𑁂𑀳𑁂𑀯 𑀘 𑀓𑀺𑀮𑁂𑀲𑁂𑀳𑀺 𑀘𑁂𑀢𑀲𑁄 𑀯𑀺𑀫𑀼𑀢𑁆𑀢𑀢𑁆𑀢𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀻𑀢𑀺 𑀯𑀼𑀘𑁆𑀘𑀢𑀺. 𑀅𑀜𑁆𑀜𑀢𑀭𑀁 𑀤𑁂𑀯𑀦𑀺𑀓𑀸𑀬𑀦𑁆𑀢𑀺 𑀧𑀜𑁆𑀘𑀲𑀼 𑀲𑀼𑀤𑁆𑀥𑀸𑀯𑀸𑀲𑀤𑁂𑀯𑀦𑀺𑀓𑀸𑀬𑁂𑀲𑀼 𑀅𑀜𑁆𑀜𑀢𑀭𑀁. 𑀅𑀦𑀸𑀕𑀦𑁆𑀢𑀸 𑀇𑀢𑁆𑀣𑀢𑁆𑀢𑀦𑁆𑀢𑀺 𑀧𑀼𑀦 𑀇𑀫𑀁 𑀧𑀜𑁆𑀘𑀓𑁆𑀔𑀦𑁆𑀥𑀪𑀸𑀯𑀁 𑀅𑀦𑀸𑀕𑀦𑁆𑀢𑀸, 𑀳𑁂𑀝𑁆𑀞𑀽𑀧𑀧𑀢𑁆𑀢𑀺𑀓𑁄 𑀦 𑀳𑁄𑀢𑀺, 𑀉𑀧𑀭𑀽𑀧𑀧𑀢𑁆𑀢𑀺𑀓𑁄 𑀯𑀸 𑀳𑁄𑀢𑀺 𑀢𑀢𑁆𑀣𑁂𑀯 𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀻𑀢𑀺 𑀤𑀲𑁆𑀲𑁂𑀢𑀺. 𑀇𑀫𑀺𑀦𑀸 𑀅𑀗𑁆𑀕𑁂𑀦 𑀲𑀫𑀸𑀥𑀺𑀓𑀫𑁆𑀫𑀺𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀢𑀬𑁄 𑀫𑀕𑁆𑀕𑀸 𑀢𑀻𑀡𑀺 𑀘 𑀨𑀮𑀸𑀦𑀺 𑀓𑀣𑀺𑀢𑀸𑀦𑀺.

𑀓𑀸𑀫𑀸𑀦𑀁𑀬𑁂𑀯 𑀦𑀺𑀩𑁆𑀩𑀺𑀤𑀸𑀬𑀸𑀢𑀺 𑀤𑀼𑀯𑀺𑀥𑀸𑀦𑀫𑁆𑀧𑀺 𑀓𑀸𑀫𑀸𑀦𑀁 𑀦𑀺𑀩𑁆𑀩𑀺𑀦𑁆𑀤𑀦𑀢𑁆𑀣𑀸𑀬 𑀉𑀓𑁆𑀓𑀡𑁆𑀞𑀦𑀢𑁆𑀣𑀸𑀬. 𑀯𑀺𑀭𑀸𑀕𑀸𑀬𑀸𑀢𑀺 𑀯𑀺𑀭𑀚𑁆𑀚𑀦𑀢𑁆𑀣𑀸𑀬. 𑀦𑀺𑀭𑁄𑀥𑀸𑀬𑀸𑀢𑀺 𑀅𑀧𑁆𑀧𑀯𑀢𑁆𑀢𑀺𑀓𑀭𑀡𑀢𑁆𑀣𑀸𑀬. 𑀧𑀝𑀺𑀧𑀦𑁆𑀦𑁄 𑀳𑁄𑀢𑀻𑀢𑀺 𑀧𑀝𑀺𑀧𑀢𑁆𑀢𑀺𑀁 𑀧𑀝𑀺𑀧𑀦𑁆𑀦𑁄 𑀳𑁄𑀢𑀺. 𑀏𑀢𑁆𑀢𑀸𑀯𑀢𑀸 𑀲𑁄𑀢𑀸𑀧𑀦𑁆𑀦𑀲𑁆𑀲 𑀘 𑀲𑀓𑀤𑀸𑀕𑀸𑀫𑀺𑀦𑁄 𑀘 𑀧𑀜𑁆𑀘𑀓𑀸𑀫𑀕𑀼𑀡𑀺𑀓𑀭𑀸𑀕𑀓𑁆𑀔𑀬𑀢𑁆𑀣𑀸𑀬 𑀅𑀦𑀸𑀕𑀸𑀫𑀺𑀫𑀕𑁆𑀕𑀯𑀺𑀧𑀲𑁆𑀲𑀦𑀸 𑀓𑀣𑀺𑀢𑀸 𑀳𑁄𑀢𑀺. 𑀪𑀯𑀸𑀦𑀁𑀬𑁂𑀯𑀸𑀢𑀺 𑀢𑀺𑀡𑁆𑀡𑀁 𑀪𑀯𑀸𑀦𑀁. 𑀇𑀫𑀺𑀦𑀸 𑀅𑀦𑀸𑀕𑀸𑀫𑀺𑀦𑁄 𑀪𑀯𑀭𑀸𑀕𑀓𑁆𑀔𑀬𑀢𑁆𑀣𑀸𑀬 𑀅𑀭𑀳𑀢𑁆𑀢𑀫𑀕𑁆𑀕𑀯𑀺𑀧𑀲𑁆𑀲𑀦𑀸 𑀓𑀣𑀺𑀢𑀸 𑀳𑁄𑀢𑀺. 𑀢𑀡𑁆𑀳𑀸𑀓𑁆𑀔𑀬𑀸𑀬 𑀧𑀝𑀺𑀧𑀦𑁆𑀦𑁄 𑀳𑁄𑀢𑀻𑀢𑀺 𑀇𑀫𑀺𑀦𑀸𑀧𑀺 𑀲𑁄𑀢𑀸𑀧𑀦𑁆𑀦𑀲𑀓𑀤𑀸𑀕𑀸𑀫𑀻𑀦𑀁𑀬𑁂𑀯 𑀧𑀜𑁆𑀘𑀓𑀸𑀫𑀕𑀼𑀡𑀺𑀓𑀢𑀡𑁆𑀳𑀸𑀓𑁆𑀔𑀬𑀓𑀭𑀡𑀢𑁆𑀣𑀁 𑀅𑀦𑀸𑀕𑀸𑀫𑀺𑀫𑀕𑁆𑀕𑀯𑀺𑀧𑀲𑁆𑀲𑀦𑀸 𑀓𑀣𑀺𑀢𑀸. 𑀲𑁄 𑀮𑁄𑀪𑀓𑁆𑀔𑀬𑀸𑀬𑀸𑀢𑀺 𑀇𑀫𑀺𑀦𑀸𑀧𑀺 𑀅𑀦𑀸𑀕𑀸𑀫𑀺𑀦𑁄 𑀪𑀯𑀮𑁄𑀪𑀓𑁆𑀔𑀬𑀢𑁆𑀣𑀸𑀬 𑀅𑀭𑀳𑀢𑁆𑀢𑀫𑀕𑁆𑀕𑀯𑀺𑀧𑀲𑁆𑀲𑀦𑀸𑀯 𑀓𑀣𑀺𑀢𑀸. 𑀅𑀜𑁆𑀜𑀢𑀭𑀁 𑀤𑁂𑀯𑀦𑀺𑀓𑀸𑀬𑀦𑁆𑀢𑀺 𑀲𑀼𑀤𑁆𑀥𑀸𑀯𑀸𑀲𑁂𑀲𑁆𑀯𑁂𑀯 𑀅𑀜𑁆𑀜𑀢𑀭𑀁 𑀤𑁂𑀯𑀦𑀺𑀓𑀸𑀬𑀁. 𑀅𑀦𑀸𑀕𑀦𑁆𑀢𑀸 𑀇𑀢𑁆𑀣𑀢𑁆𑀢𑀦𑁆𑀢𑀺 𑀇𑀫𑀁 𑀔𑀦𑁆𑀥𑀧𑀜𑁆𑀘𑀓𑀪𑀸𑀯𑀁 𑀅𑀦𑀸𑀕𑀦𑁆𑀢𑀸, 𑀳𑁂𑀝𑁆𑀞𑀽𑀧𑀧𑀢𑁆𑀢𑀺𑀓𑁄 𑀦 𑀳𑁄𑀢𑀺, 𑀉𑀧𑀭𑀽𑀧𑀧𑀢𑁆𑀢𑀺𑀓𑁄 𑀯𑀸 𑀳𑁄𑀢𑀺, 𑀢𑀢𑁆𑀣𑁂𑀯 𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀢𑀺.

𑀇𑀢𑀺 𑀧𑀞𑀫𑁂𑀦 𑀅𑀗𑁆𑀕𑁂𑀦 𑀲𑀼𑀓𑁆𑀔𑀯𑀺𑀧𑀲𑁆𑀲𑀓𑀲𑁆𑀲 𑀥𑀸𑀢𑀼𑀓𑀫𑁆𑀫𑀝𑁆𑀞𑀸𑀦𑀺𑀓𑀪𑀺𑀓𑁆𑀔𑀼𑀦𑁄 𑀳𑁂𑀝𑁆𑀞𑀺𑀫𑀸𑀦𑀺 𑀤𑁆𑀯𑁂 𑀫𑀕𑁆𑀕𑀨𑀮𑀸𑀦𑀺 𑀓𑀣𑀺𑀢𑀸𑀦𑀺, 𑀤𑀼𑀢𑀺𑀬𑁂𑀦 𑀲𑀫𑀸𑀥𑀺𑀓𑀫𑁆𑀫𑀺𑀓𑀲𑁆𑀲 𑀢𑀻𑀡𑀺 𑀫𑀕𑁆𑀕𑀨𑀮𑀸𑀦𑀺, ‘‘𑀲𑁄 𑀓𑀸𑀫𑀸𑀦’’𑀦𑁆𑀢𑀺 𑀇𑀫𑀺𑀦𑀸 𑀲𑁄𑀢𑀸𑀧𑀦𑁆𑀦𑀲𑀓𑀤𑀸𑀕𑀸𑀫𑀻𑀦𑀁 𑀧𑀜𑁆𑀘𑀓𑀸𑀫𑀕𑀼𑀡𑀺𑀓𑀭𑀸𑀕𑀓𑁆𑀔𑀬𑀸𑀬 𑀉𑀧𑀭𑀺 𑀅𑀦𑀸𑀕𑀸𑀫𑀺𑀫𑀕𑁆𑀕𑀯𑀺𑀧𑀲𑁆𑀲𑀦𑀸, ‘‘𑀲𑁄 𑀪𑀯𑀸𑀦𑀁𑀬𑁂𑀯𑀸’’𑀢𑀺 𑀇𑀫𑀺𑀦𑀸 𑀅𑀦𑀸𑀕𑀸𑀫𑀺𑀲𑁆𑀲 𑀉𑀧𑀭𑀺 𑀅𑀭𑀳𑀢𑁆𑀢𑀫𑀕𑁆𑀕𑀯𑀺𑀧𑀲𑁆𑀲𑀦𑀸, ‘‘𑀲𑁄 𑀢𑀡𑁆𑀳𑀸𑀓𑁆𑀔𑀬𑀸𑀬𑀸’’𑀢𑀺 𑀇𑀫𑀺𑀦𑀸 𑀲𑁄𑀢𑀸𑀧𑀦𑁆𑀦𑀲𑀓𑀤𑀸𑀕𑀸𑀫𑀻𑀦𑀁 𑀧𑀜𑁆𑀘𑀓𑀸𑀫𑀕𑀼𑀡𑀺𑀓𑀢𑀡𑁆𑀳𑀸𑀓𑁆𑀔𑀬𑀸𑀬 𑀉𑀧𑀭𑀺 𑀅𑀦𑀸𑀕𑀸𑀫𑀺𑀫𑀕𑁆𑀕𑀯𑀺𑀧𑀲𑁆𑀲𑀦𑀸, ‘‘𑀲𑁄 𑀮𑁄𑀪𑀓𑁆𑀔𑀬𑀸𑀬𑀸’’𑀢𑀺 𑀇𑀫𑀺𑀦𑀸 𑀅𑀦𑀸𑀕𑀸𑀫𑀺𑀦𑁄 𑀪𑀯𑀮𑁄𑀪𑀓𑁆𑀔𑀬𑀸𑀬 𑀉𑀧𑀭𑀺 𑀅𑀭𑀳𑀢𑁆𑀢𑀫𑀕𑁆𑀕𑀯𑀺𑀧𑀲𑁆𑀲𑀦𑀸 𑀓𑀣𑀺𑀢𑀸𑀢𑀺 𑀏𑀯𑀁 𑀙𑀳𑀺 𑀫𑀼𑀔𑁂𑀳𑀺 𑀯𑀺𑀧𑀲𑁆𑀲𑀦𑀁 𑀓𑀣𑁂𑀢𑁆𑀯𑀸 𑀤𑁂𑀲𑀦𑀁 𑀬𑀣𑀸𑀦𑀼𑀲𑀦𑁆𑀥𑀺𑀁 𑀧𑀸𑀧𑁂𑀲𑀺. 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀓𑁄𑀝𑀺𑀲𑀢𑀲𑀳𑀲𑁆𑀲𑀤𑁂𑀯𑀢𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀁𑀲𑀼, 𑀲𑁄𑀢𑀸𑀧𑀦𑁆𑀦𑀸𑀤𑀻𑀦𑀁 𑀧𑀭𑀺𑀘𑁆𑀙𑁂𑀤𑁄𑀯 𑀦𑀸𑀳𑁄𑀲𑀺. 𑀬𑀣𑀸 𑀘 𑀇𑀫𑀲𑁆𑀫𑀺𑀁 𑀲𑀫𑀸𑀕𑀫𑁂, 𑀏𑀯𑀁 𑀫𑀳𑀸𑀲𑀫𑀬𑀲𑀼𑀢𑁆𑀢𑁂 𑀫𑀗𑁆𑀕𑀮𑀲𑀼𑀢𑁆𑀢𑁂 𑀘 𑀘𑀽𑀴𑀭𑀸𑀳𑀼𑀮𑁄𑀯𑀸𑀤𑀲𑀼𑀢𑁆𑀢𑁂 𑀘 𑀓𑁄𑀝𑀺𑀲𑀢𑀲𑀳𑀲𑁆𑀲𑀤𑁂𑀯𑀢𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀁𑀲𑀼, 𑀲𑁄𑀢𑀸𑀧𑀦𑁆𑀦𑀸𑀤𑀻𑀦𑀁 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀧𑀭𑀺𑀘𑁆𑀙𑁂𑀤𑁄 𑀦𑀸𑀳𑁄𑀲𑀺.

𑀲𑀫𑀘𑀺𑀢𑁆𑀢𑀸 𑀤𑁂𑀯𑀢𑀸𑀢𑀺 𑀘𑀺𑀢𑁆𑀢𑀲𑁆𑀲 𑀲𑀼𑀔𑀼𑀫𑀪𑀸𑀯𑀲𑀫𑀢𑀸𑀬 𑀲𑀫𑀘𑀺𑀢𑁆𑀢𑀸. 𑀲𑀩𑁆𑀩𑀸𑀧𑀺 𑀳𑀺 𑀢𑀸 𑀅𑀢𑁆𑀢𑀦𑁄 𑀅𑀢𑁆𑀢𑀪𑀸𑀯𑁂 𑀲𑀼𑀔𑀼𑀫𑁂 𑀘𑀺𑀢𑁆𑀢𑀲𑀭𑀺𑀓𑁆𑀔𑀓𑁂 𑀓𑀢𑁆𑀯𑀸 𑀫𑀸𑀧𑁂𑀲𑀼𑀁. 𑀢𑁂𑀦 𑀲𑀫𑀘𑀺𑀢𑁆𑀢𑀸 𑀦𑀸𑀫 𑀚𑀸𑀢𑀸. 𑀅𑀧𑀭𑁂𑀦𑀧𑀺 𑀓𑀸𑀭𑀡𑁂𑀦 𑀲𑀫𑀘𑀺𑀢𑁆𑀢𑀸 𑁋 ‘‘𑀣𑁂𑀭𑁂𑀦 𑀲𑀫𑀸𑀧𑀢𑁆𑀢𑀺 𑀢𑀸𑀯 𑀓𑀣𑀺𑀢𑀸, 𑀲𑀫𑀸𑀧𑀢𑁆𑀢𑀺𑀣𑀸𑀫𑁄 𑀧𑀦 𑀦 𑀓𑀣𑀺𑀢𑁄. 𑀫𑀬𑀁 𑀤𑀲𑀩𑀮𑀁 𑀧𑀓𑁆𑀓𑁄𑀲𑀺𑀢𑁆𑀯𑀸 𑀲𑀫𑀸𑀧𑀢𑁆𑀢𑀺𑀬𑀸 𑀣𑀸𑀫𑀁 𑀓𑀣𑀸𑀧𑁂𑀲𑁆𑀲𑀸𑀫𑀸’’𑀢𑀺 𑀲𑀩𑁆𑀩𑀸𑀧𑀺 𑀏𑀓𑀘𑀺𑀢𑁆𑀢𑀸 𑀅𑀳𑁂𑀲𑀼𑀦𑁆𑀢𑀺𑀧𑀺 𑀲𑀫𑀘𑀺𑀢𑁆𑀢𑀸. 𑀅𑀧𑀭𑀫𑁆𑀧𑀺 𑀓𑀸𑀭𑀡𑀁 𑁋 ‘‘𑀣𑁂𑀭𑁂𑀦 𑀏𑀓𑁂𑀦 𑀧𑀭𑀺𑀬𑀸𑀬𑁂𑀦 𑀲𑀫𑀸𑀧𑀢𑁆𑀢𑀺𑀧𑀺 𑀲𑀫𑀸𑀧𑀢𑁆𑀢𑀺𑀣𑀸𑀫𑁄𑀧𑀺 𑀓𑀣𑀺𑀢𑁄, 𑀓𑁄 𑀦𑀼 𑀔𑁄 𑀇𑀫𑀁 𑀲𑀫𑀸𑀕𑀫𑀁 𑀲𑀫𑁆𑀧𑀢𑁆𑀢𑁄, 𑀓𑁄 𑀦 𑀲𑀫𑁆𑀧𑀢𑁆𑀢𑁄’’𑀢𑀺 𑀑𑀮𑁄𑀓𑀬𑀫𑀸𑀦𑀸 𑀢𑀣𑀸𑀕𑀢𑀲𑁆𑀲 𑀅𑀲𑀫𑁆𑀧𑀢𑁆𑀢𑀪𑀸𑀯𑀁 𑀤𑀺𑀲𑁆𑀯𑀸 ‘‘𑀫𑀬𑀁 𑀢𑀣𑀸𑀕𑀢𑀁 𑀧𑀓𑁆𑀓𑁄𑀲𑀺𑀢𑁆𑀯𑀸 𑀧𑀭𑀺𑀲𑀁 𑀧𑀭𑀺𑀧𑀼𑀡𑁆𑀡𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀲𑀩𑁆𑀩𑀸𑀧𑀺 𑀏𑀓𑀘𑀺𑀢𑁆𑀢𑀸 𑀅𑀳𑁂𑀲𑀼𑀦𑁆𑀢𑀺𑀧𑀺 𑀲𑀫𑀘𑀺𑀢𑁆𑀢𑀸. 𑀅𑀧𑀭𑀫𑁆𑀧𑀺 𑀓𑀸𑀭𑀡𑀁 𑁋 𑀅𑀦𑀸𑀕𑀢𑁂 𑀓𑁄𑀘𑀺𑀤𑁂𑀯 𑀪𑀺𑀓𑁆𑀔𑀼 𑀯𑀸 𑀪𑀺𑀓𑁆𑀔𑀼𑀦𑀻 𑀯𑀸 𑀤𑁂𑀯𑁄 𑀯𑀸 𑀫𑀦𑀼𑀲𑁆𑀲𑁄 𑀯𑀸 ‘‘𑀅𑀬𑀁 𑀤𑁂𑀲𑀦𑀸 𑀲𑀸𑀯𑀓𑀪𑀸𑀲𑀺𑀢𑀸’’𑀢𑀺 𑀅𑀕𑀸𑀭𑀯𑀁 𑀓𑀭𑁂𑀬𑁆𑀬, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁 𑀧𑀓𑁆𑀓𑁄𑀲𑀺𑀢𑁆𑀯𑀸 𑀇𑀫𑀁 𑀤𑁂𑀲𑀦𑀁 𑀲𑀩𑁆𑀩𑀜𑁆𑀜𑀼𑀪𑀸𑀲𑀺𑀢𑀁 𑀓𑀭𑀺𑀲𑁆𑀲𑀸𑀫. 𑀏𑀯𑀁 𑀅𑀦𑀸𑀕𑀢𑁂 𑀕𑀭𑀼𑀪𑀸𑀯𑀦𑀻𑀬𑀸 𑀪𑀯𑀺𑀲𑁆𑀲𑀢𑀻𑀢𑀺 𑀲𑀩𑁆𑀩𑀸𑀯 𑀏𑀓𑀘𑀺𑀢𑁆𑀢𑀸 𑀅𑀳𑁂𑀲𑀼𑀦𑁆𑀢𑀺𑀧𑀺 𑀲𑀫𑀘𑀺𑀢𑁆𑀢𑀸. 𑀅𑀧𑀭𑀫𑁆𑀧𑀺 𑀓𑀸𑀭𑀡𑀁 𑁋 𑀲𑀩𑁆𑀩𑀸𑀧𑀺 𑀳𑀺 𑀢𑀸 𑀏𑀓𑀲𑀫𑀸𑀧𑀢𑁆𑀢𑀺𑀮𑀸𑀪𑀺𑀦𑀺𑀬𑁄 𑀯𑀸 𑀅𑀳𑁂𑀲𑀼𑀁 𑀏𑀓𑀸𑀭𑀫𑁆𑀫𑀡𑀮𑀸𑀪𑀺𑀦𑀺𑀬𑁄 𑀯𑀸𑀢𑀺 𑀏𑀯𑀫𑁆𑀧𑀺 𑀲𑀫𑀘𑀺𑀢𑁆𑀢𑀸.

𑀳𑀝𑁆𑀞𑀸𑀢𑀺 𑀢𑀼𑀝𑁆𑀞𑀧𑀳𑀝𑁆𑀞𑀸 𑀆𑀫𑁄𑀤𑀺𑀢𑀸 𑀧𑀫𑁄𑀤𑀺𑀢𑀸. 𑀲𑀸𑀥𑀽𑀢𑀺 𑀆𑀬𑀸𑀘𑀦𑀢𑁆𑀣𑁂 𑀦𑀺𑀧𑀸𑀢𑁄. 𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬𑀸𑀢𑀺 𑀦 𑀣𑁂𑀭𑀲𑁆𑀲 𑀅𑀦𑀼𑀓𑀫𑁆𑀧𑀁 𑀓𑀸𑀭𑀼𑀜𑁆𑀜𑀁 𑀅𑀦𑀼𑀤𑁆𑀤𑀬𑀁 𑀧𑀝𑀺𑀘𑁆𑀘, 𑀦 𑀘 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀣𑁂𑀭𑀲𑁆𑀲 𑀅𑀦𑀼𑀓𑀫𑁆𑀧𑀺𑀢𑀩𑁆𑀩𑀓𑀺𑀘𑁆𑀘𑀁 𑀅𑀢𑁆𑀣𑀺. 𑀬𑀲𑁆𑀫𑀺𑀁 𑀳𑀺 𑀤𑀺𑀯𑀲𑁂 𑀣𑁂𑀭𑁄 𑀲𑀽𑀓𑀭𑀔𑀢𑀮𑁂𑀡𑀤𑁆𑀯𑀸𑀭𑁂 𑀪𑀸𑀕𑀺𑀦𑁂𑀬𑁆𑀬𑀲𑁆𑀲 𑀤𑀻𑀖𑀦𑀔𑀧𑀭𑀺𑀩𑁆𑀩𑀸𑀚𑀓𑀲𑁆𑀲 𑀯𑁂𑀤𑀦𑀸𑀓𑀫𑁆𑀫𑀝𑁆𑀞𑀸𑀦𑁂 (𑀫. 𑀦𑀺. 𑁨.𑁨𑁦𑁬) 𑀓𑀣𑀺𑀬𑀫𑀸𑀦𑁂 𑀢𑀸𑀮𑀯𑀡𑁆𑀝𑀁 𑀕𑀳𑁂𑀢𑁆𑀯𑀸 𑀲𑀢𑁆𑀣𑀸𑀭𑀁 𑀩𑀻𑀚𑀫𑀸𑀦𑁄 𑀞𑀺𑀢𑁄 𑀧𑀭𑀲𑁆𑀲 𑀯𑀟𑁆𑀠𑀺𑀢𑀪𑁄𑀚𑀦𑀁 𑀪𑀼𑀜𑁆𑀚𑀺𑀢𑁆𑀯𑀸 𑀔𑀼𑀤𑀁 𑀯𑀺𑀦𑁄𑀤𑁂𑀦𑁆𑀢𑁄 𑀯𑀺𑀬 𑀧𑀭𑀲𑁆𑀲 𑀲𑀚𑁆𑀚𑀺𑀢𑀧𑀲𑀸𑀥𑀦𑀁 𑀲𑀻𑀲𑁂 𑀧𑀝𑀺𑀫𑀼𑀜𑁆𑀘𑀦𑁆𑀢𑁄 𑀯𑀺𑀬 𑀘 𑀲𑀸𑀯𑀓𑀧𑀸𑀭𑀫𑀺𑀜𑀸𑀡𑀲𑁆𑀲 𑀦𑀺𑀧𑁆𑀧𑀤𑁂𑀲𑀢𑁄 𑀫𑀢𑁆𑀣𑀓𑀁 𑀧𑀢𑁆𑀢𑁄, 𑀢𑀲𑁆𑀫𑀺𑀁𑀬𑁂𑀯 𑀤𑀺𑀯𑀲𑁂 𑀪𑀕𑀯𑀢𑀸 𑀅𑀦𑀼𑀓𑀫𑁆𑀧𑀺𑀢𑁄 𑀦𑀸𑀫. 𑀅𑀯𑀲𑁂𑀲𑀸𑀦𑀁 𑀧𑀦 𑀢𑀁 𑀞𑀸𑀦𑀁 𑀲𑀫𑁆𑀧𑀢𑁆𑀢𑀸𑀦𑀁 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬 𑀕𑀘𑁆𑀙𑀢𑀼 𑀪𑀕𑀯𑀸𑀢𑀺 𑀪𑀕𑀯𑀦𑁆𑀢𑀁 𑀬𑀸𑀘𑀺𑀁𑀲𑀼.

𑀩𑀮𑀯𑀸 𑀧𑀼𑀭𑀺𑀲𑁄𑀢𑀺 𑀤𑀼𑀩𑁆𑀩𑀮𑁄 𑀳𑀺 𑀔𑀺𑀧𑁆𑀧𑀁 𑀲𑀫𑀺𑀜𑁆𑀚𑀦𑀧𑀲𑀸𑀭𑀡𑀁 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀩𑀮𑀯𑀸𑀯 𑀲𑀓𑁆𑀓𑁄𑀢𑀺. 𑀢𑁂𑀦𑁂𑀢𑀁 𑀯𑀼𑀢𑁆𑀢𑀁. 𑀲𑀫𑁆𑀫𑀼𑀔𑁂 𑀧𑀸𑀢𑀼𑀭𑀳𑁄𑀲𑀻𑀢𑀺 𑀲𑀫𑁆𑀫𑀼𑀔𑀝𑁆𑀞𑀸𑀦𑁂 𑀧𑀼𑀭𑀢𑁄𑀬𑁂𑀯 𑀧𑀸𑀓𑀝𑁄 𑀅𑀳𑁄𑀲𑀺. 𑀪𑀕𑀯𑀸 𑀏𑀢𑀤𑀯𑁄𑀘𑀸𑀢𑀺 𑀏𑀢𑀁 ‘‘𑀇𑀥 𑀲𑀸𑀭𑀺𑀧𑀼𑀢𑁆𑀢𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀅𑀢𑁆𑀢𑀦𑁄 𑀆𑀕𑀫𑀦𑀓𑀸𑀭𑀡𑀁 𑀅𑀯𑁄𑀘. 𑀏𑀯𑀁 𑀓𑀺𑀭𑀲𑁆𑀲 𑀅𑀳𑁄𑀲𑀺 𑁋 ‘‘𑀲𑀘𑁂 𑀓𑁄𑀘𑀺 𑀩𑀸𑀮𑁄 𑀅𑀓𑀢𑀜𑁆𑀜𑀽 𑀪𑀺𑀓𑁆𑀔𑀼 𑀯𑀸 𑀪𑀺𑀓𑁆𑀔𑀼𑀦𑀻 𑀯𑀸 𑀉𑀧𑀸𑀲𑀓𑁄 𑀯𑀸 𑀉𑀧𑀸𑀲𑀺𑀓𑀸 𑀯𑀸 𑀏𑀯𑀁 𑀘𑀺𑀦𑁆𑀢𑁂𑀬𑁆𑀬 𑁋 ‘𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄 𑀫𑀳𑀦𑁆𑀢𑀁 𑀧𑀭𑀺𑀲𑀁 𑀅𑀮𑀢𑁆𑀣, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀏𑀢𑁆𑀢𑀓𑀁 𑀅𑀥𑀺𑀯𑀸𑀲𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀉𑀲𑀽𑀬𑀸𑀬 𑀧𑀭𑀺𑀲𑀁 𑀉𑀝𑁆𑀞𑀸𑀧𑁂𑀢𑀼𑀁 𑀆𑀕𑀢𑁄’𑀢𑀺. 𑀲𑁄 𑀇𑀫𑀁 𑀫𑀬𑀺 𑀫𑀦𑁄𑀧𑀤𑁄𑀲𑀁 𑀓𑀢𑁆𑀯𑀸 𑀅𑀧𑀸𑀬𑁂 𑀦𑀺𑀩𑁆𑀩𑀢𑁆𑀢𑁂𑀬𑁆𑀬𑀸’’𑀢𑀺. 𑀅𑀣𑀢𑁆𑀢𑀦𑁄 𑀆𑀕𑀫𑀦𑀓𑀸𑀭𑀡𑀁 𑀓𑀣𑁂𑀦𑁆𑀢𑁄 𑀏𑀢𑀁 ‘‘𑀇𑀥 𑀲𑀸𑀭𑀺𑀧𑀼𑀢𑁆𑀢𑀸’’𑀢𑀺𑀆𑀤𑀺𑀯𑀘𑀦𑀁 𑀅𑀯𑁄𑀘.

𑀏𑀯𑀁 𑀅𑀢𑁆𑀢𑀦𑁄 𑀆𑀕𑀫𑀦𑀓𑀸𑀭𑀡𑀁 𑀓𑀣𑁂𑀢𑁆𑀯𑀸 𑀇𑀤𑀸𑀦𑀺 𑀲𑀫𑀸𑀧𑀢𑁆𑀢𑀺𑀬𑀸 𑀣𑀸𑀫𑀁 𑀓𑀣𑁂𑀢𑀼𑀁 𑀢𑀸 𑀔𑁄 𑀧𑀦, 𑀲𑀸𑀭𑀺𑀧𑀼𑀢𑁆𑀢, 𑀤𑁂𑀯𑀢𑀸 𑀤𑀲𑀧𑀺 𑀳𑀼𑀢𑁆𑀯𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀬𑀲𑀯𑀲𑁂𑀦 𑀯𑀸 𑀅𑀢𑁆𑀣𑀁 𑀆𑀳𑀭𑀺𑀢𑀼𑀁 𑀯𑀝𑁆𑀝𑀢𑀺 𑀲𑀫𑀸𑀧𑀢𑁆𑀢𑀺𑀯𑀲𑁂𑀦 𑀯𑀸. 𑀬𑀲𑀯𑀲𑁂𑀦 𑀢𑀸𑀯 𑀫𑀳𑁂𑀲𑀓𑁆𑀔𑀸 𑀤𑁂𑀯𑀢𑀸 𑀤𑀲 𑀤𑀲 𑀏𑀓𑀝𑁆𑀞𑀸𑀦𑁂 𑀅𑀝𑁆𑀞𑀁𑀲𑀼, 𑀢𑀸𑀳𑀺 𑀅𑀧𑁆𑀧𑁂𑀲𑀓𑁆𑀔𑀢𑀭𑀸 𑀯𑀻𑀲𑀢𑀺 𑀯𑀻𑀲𑀢𑀺 𑀏𑀓𑀝𑁆𑀞𑀸𑀦𑁂 𑀅𑀝𑁆𑀞𑀁𑀲𑀼, 𑀢𑀸𑀳𑀺 𑀅𑀧𑁆𑀧𑁂𑀲𑀓𑁆𑀔𑀢𑀭𑀸…𑀧𑁂… 𑀲𑀝𑁆𑀞𑀺 𑀲𑀝𑁆𑀞𑀺 𑀏𑀓𑀝𑁆𑀞𑀸𑀦𑁂 𑀅𑀝𑁆𑀞𑀁𑀲𑀼. 𑀲𑀫𑀸𑀧𑀢𑁆𑀢𑀺𑀯𑀲𑁂𑀦 𑀧𑀦 𑀬𑀸𑀳𑀺 𑀧𑀡𑀻𑀢𑀸 𑀲𑀫𑀸𑀧𑀢𑁆𑀢𑀺 𑀪𑀸𑀯𑀺𑀢𑀸, 𑀢𑀸 𑀲𑀝𑁆𑀞𑀺 𑀲𑀝𑁆𑀞𑀺 𑀏𑀓𑀝𑁆𑀞𑀸𑀦𑁂 𑀅𑀝𑁆𑀞𑀁𑀲𑀼. 𑀬𑀸𑀳𑀺 𑀢𑀢𑁄 𑀳𑀻𑀦𑀢𑀭𑀸, 𑀢𑀸 𑀧𑀜𑁆𑀜𑀸𑀲 𑀧𑀜𑁆𑀜𑀸𑀲…𑀧𑁂… 𑀬𑀸𑀳𑀺 𑀢𑀢𑁄 𑀳𑀻𑀦𑀢𑀭𑀸 𑀲𑀫𑀸𑀧𑀢𑁆𑀢𑀺 𑀪𑀸𑀯𑀺𑀢𑀸…𑀧𑁂… 𑀢𑀸 𑀤𑀲 𑀤𑀲 𑀏𑀓𑀝𑁆𑀞𑀸𑀦𑁂 𑀅𑀝𑁆𑀞𑀁𑀲𑀼. 𑀬𑀸𑀳𑀺 𑀯𑀸 𑀳𑀻𑀦𑀸 𑀪𑀸𑀯𑀺𑀢𑀸, 𑀢𑀸 𑀤𑀲 𑀤𑀲 𑀏𑀓𑀝𑁆𑀞𑀸𑀦𑁂 𑀅𑀝𑁆𑀞𑀁𑀲𑀼. 𑀬𑀸𑀳𑀺 𑀢𑀢𑁄 𑀧𑀡𑀻𑀢𑀢𑀭𑀸 𑀪𑀸𑀯𑀺𑀢𑀸, 𑀢𑀸 𑀯𑀻𑀲𑀢𑀺 𑀯𑀻𑀲𑀢𑀺. 𑀬𑀸𑀳𑀺 𑀢𑀢𑁄 𑀧𑀡𑀻𑀢𑀢𑀭𑀸…𑀧𑁂… 𑀢𑀸 𑀲𑀝𑁆𑀞𑀺 𑀲𑀝𑁆𑀞𑀺 𑀏𑀓𑀝𑁆𑀞𑀸𑀦𑁂 𑀅𑀝𑁆𑀞𑀁𑀲𑀼.

𑀆𑀭𑀕𑁆𑀕𑀓𑁄𑀝𑀺𑀦𑀺𑀢𑀼𑀤𑀦𑀫𑀢𑁆𑀢𑁂𑀢𑀺 𑀆𑀭𑀕𑁆𑀕𑀓𑁄𑀝𑀺𑀬𑀸 𑀧𑀢𑀦𑀫𑀢𑁆𑀢𑁂 𑀑𑀓𑀸𑀲𑁂. 𑀦 𑀘 𑀅𑀜𑁆𑀜𑀫𑀜𑁆𑀜𑀁 𑀩𑁆𑀬𑀸𑀩𑀸𑀥𑁂𑀦𑁆𑀢𑀻𑀢𑀺 𑀏𑀯𑀁 𑀲𑀫𑁆𑀩𑀸𑀥𑁂 𑀞𑀸𑀦𑁂 𑀢𑀺𑀝𑁆𑀞𑀦𑁆𑀢𑀺𑀬𑁄𑀧𑀺 𑀅𑀜𑁆𑀜𑀫𑀜𑁆𑀜𑀁 𑀦 𑀩𑁆𑀬𑀸𑀩𑀸𑀥𑁂𑀦𑁆𑀢𑀺 𑀦 𑀖𑀝𑁆𑀝𑁂𑀦𑁆𑀢𑀺, 𑀅𑀲𑀫𑁆𑀧𑀻𑀴𑀸 𑀅𑀲𑀫𑁆𑀩𑀸𑀥𑀸𑀯 𑀅𑀳𑁂𑀲𑀼𑀁. ‘‘𑀢𑀯 𑀳𑀢𑁆𑀣𑁄 𑀫𑀁 𑀩𑀸𑀥𑀢𑀺, 𑀢𑀯 𑀧𑀸𑀤𑁄 𑀫𑀁 𑀩𑀸𑀥𑀢𑀺, 𑀢𑁆𑀯𑀁 𑀫𑀁 𑀫𑀤𑁆𑀤𑀦𑁆𑀢𑀻 𑀞𑀺𑀢𑀸’’𑀢𑀺 𑀯𑀢𑁆𑀢𑀩𑁆𑀩𑀓𑀸𑀭𑀡𑀁 𑀦𑀸𑀳𑁄𑀲𑀺. 𑀢𑀢𑁆𑀣 𑀦𑀽𑀦𑀸𑀢𑀺 𑀢𑀲𑁆𑀫𑀺𑀁 𑀪𑀯𑁂 𑀦𑀽𑀦. 𑀢𑀣𑀸𑀘𑀺𑀢𑁆𑀢𑀁 𑀪𑀸𑀯𑀺𑀢𑀦𑁆𑀢𑀺 𑀢𑁂𑀦𑀸𑀓𑀸𑀭𑁂𑀦 𑀘𑀺𑀢𑁆𑀢𑀁 𑀪𑀸𑀯𑀺𑀢𑀁. 𑀬𑁂𑀦 𑀢𑀸 𑀤𑁂𑀯𑀢𑀸𑀢𑀺 𑀬𑁂𑀦 𑀢𑀣𑀸𑀪𑀸𑀯𑀺𑀢𑁂𑀦 𑀘𑀺𑀢𑁆𑀢𑁂𑀦 𑀢𑀸 𑀤𑁂𑀯𑀢𑀸 𑀤𑀲𑀧𑀺 𑀳𑀼𑀢𑁆𑀯𑀸…𑀧𑁂… 𑀢𑀺𑀝𑁆𑀞𑀦𑁆𑀢𑀺, 𑀦 𑀘 𑀅𑀜𑁆𑀜𑀫𑀜𑁆𑀜𑀁 𑀩𑁆𑀬𑀸𑀩𑀸𑀥𑁂𑀦𑁆𑀢𑀻𑀢𑀺. 𑀇𑀥𑁂𑀯 𑀔𑁄𑀢𑀺 𑀲𑀸𑀲𑀦𑁂 𑀯𑀸 𑀫𑀦𑀼𑀲𑁆𑀲𑀮𑁄𑀓𑁂 𑀯𑀸 𑀪𑀼𑀫𑁆𑀫𑀁, 𑀇𑀫𑀲𑁆𑀫𑀺𑀁𑀬𑁂𑀯 𑀲𑀸𑀲𑀦𑁂 𑀇𑀫𑀲𑁆𑀫𑀺𑀁𑀬𑁂𑀯 𑀫𑀦𑀼𑀲𑁆𑀲𑀮𑁄𑀓𑁂𑀢𑀺 𑀅𑀢𑁆𑀣𑁄. 𑀢𑀸𑀲𑀜𑁆𑀳𑀺 𑀤𑁂𑀯𑀢𑀸𑀦𑀁 𑀇𑀫𑀲𑁆𑀫𑀺𑀁𑀬𑁂𑀯 𑀫𑀦𑀼𑀲𑁆𑀲𑀮𑁄𑀓𑁂 𑀇𑀫𑀲𑁆𑀫𑀺𑀁𑀬𑁂𑀯 𑀘 𑀲𑀸𑀲𑀦𑁂 𑀢𑀁 𑀘𑀺𑀢𑁆𑀢𑀁 𑀪𑀸𑀯𑀺𑀢𑀁, 𑀬𑁂𑀦 𑀢𑀸 𑀲𑀦𑁆𑀢𑁂 𑀭𑀽𑀧𑀪𑀯𑁂 𑀦𑀺𑀩𑁆𑀩𑀢𑁆𑀢𑀸, 𑀢𑀢𑁄 𑀘 𑀧𑀦 𑀆𑀕𑀦𑁆𑀢𑁆𑀯𑀸 𑀏𑀯𑀁 𑀲𑀼𑀔𑀼𑀫𑁂 𑀅𑀢𑁆𑀢𑀪𑀸𑀯𑁂 𑀫𑀸𑀧𑁂𑀢𑁆𑀯𑀸 𑀞𑀺𑀢𑀸. 𑀢𑀢𑁆𑀣 𑀓𑀺𑀜𑁆𑀘𑀸𑀧𑀺 𑀓𑀲𑁆𑀲𑀧𑀤𑀲𑀩𑀮𑀲𑁆𑀲 𑀲𑀸𑀲𑀦𑁂 𑀢𑀻𑀡𑀺 𑀫𑀕𑁆𑀕𑀨𑀮𑀸𑀦𑀺 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀩𑁆𑀭𑀳𑁆𑀫𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀤𑁂𑀯𑀢𑀸𑀧𑀺 𑀅𑀢𑁆𑀣𑀺, 𑀲𑀩𑁆𑀩𑀩𑀼𑀤𑁆𑀥𑀸𑀦𑀁 𑀧𑀦 𑀏𑀓𑀸𑀯 𑀅𑀦𑀼𑀲𑀸𑀲𑀦𑀻 𑀏𑀓𑀁 𑀲𑀸𑀲𑀦𑀦𑁆𑀢𑀺 𑀓𑀢𑁆𑀯𑀸 ‘‘𑀇𑀥𑁂𑀯 𑀔𑁄, 𑀲𑀸𑀭𑀺𑀧𑀼𑀢𑁆𑀢𑀸’’𑀢𑀺 𑀅𑀜𑁆𑀜𑀩𑀼𑀤𑁆𑀥𑀸𑀦𑀁 𑀲𑀸𑀲𑀦𑀫𑁆𑀧𑀺 𑀇𑀫𑀫𑁂𑀯 𑀲𑀸𑀲𑀦𑀁 𑀓𑀭𑁄𑀦𑁆𑀢𑁄 𑀆𑀳. 𑀏𑀢𑁆𑀢𑀸𑀯𑀢𑀸 𑀢𑀣𑀸𑀕𑀢𑁂𑀦 𑀲𑀫𑀸𑀧𑀢𑁆𑀢𑀺𑀬𑀸 𑀣𑀸𑀫𑁄 𑀓𑀣𑀺𑀢𑁄.

𑀇𑀤𑀸𑀦𑀺 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀁 𑀆𑀭𑀩𑁆𑀪 𑀢𑀦𑁆𑀢𑀺𑀯𑀲𑁂𑀦 𑀅𑀦𑀼𑀲𑀸𑀲𑀦𑀺𑀁 𑀓𑀣𑁂𑀦𑁆𑀢𑁄 𑀢𑀲𑁆𑀫𑀸𑀢𑀺𑀳, 𑀲𑀸𑀭𑀺𑀧𑀼𑀢𑁆𑀢𑀸𑀢𑀺 𑀆𑀳. 𑀢𑀢𑁆𑀣 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀢𑀸 𑀤𑁂𑀯𑀢𑀸 𑀇𑀥𑁂𑀯 𑀲𑀦𑁆𑀢𑀁 𑀲𑀫𑀸𑀧𑀢𑁆𑀢𑀺𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀲𑀦𑁆𑀢𑁂 𑀪𑀯𑁂 𑀦𑀺𑀩𑁆𑀩𑀢𑁆𑀢𑀸, 𑀢𑀲𑁆𑀫𑀸. 𑀲𑀦𑁆𑀢𑀺𑀦𑁆𑀤𑁆𑀭𑀺𑀬𑀸𑀢𑀺 𑀧𑀜𑁆𑀘𑀦𑁆𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀲𑀦𑁆𑀢𑀢𑀸𑀬 𑀦𑀺𑀩𑁆𑀩𑀼𑀢𑀢𑀸𑀬 𑀧𑀡𑀻𑀢𑀢𑀸𑀬 𑀲𑀦𑁆𑀢𑀺𑀦𑁆𑀤𑁆𑀭𑀺𑀬𑀸. 𑀲𑀦𑁆𑀢𑀫𑀸𑀦𑀲𑀸𑀢𑀺 𑀫𑀸𑀦𑀲𑀲𑁆𑀲 𑀲𑀦𑁆𑀢𑀢𑀸𑀬 𑀦𑀺𑀩𑁆𑀩𑀼𑀢𑀢𑀸𑀬 𑀧𑀡𑀻𑀢𑀢𑀸𑀬 𑀲𑀦𑁆𑀢𑀫𑀸𑀦𑀲𑀸. 𑀲𑀦𑁆𑀢𑀁𑀬𑁂𑀯 𑀉𑀧𑀳𑀸𑀭𑀁 𑀉𑀧𑀳𑀭𑀺𑀲𑁆𑀲𑀸𑀫𑀸𑀢𑀺 𑀓𑀸𑀬𑀘𑀺𑀢𑁆𑀢𑀽𑀧𑀳𑀸𑀭𑀁 𑀲𑀦𑁆𑀢𑀁 𑀦𑀺𑀩𑁆𑀩𑀼𑀢𑀁 𑀧𑀡𑀻𑀢𑀁𑀬𑁂𑀯 𑀉𑀧𑀳𑀭𑀺𑀲𑁆𑀲𑀸𑀫. 𑀲𑀩𑁆𑀭𑀳𑁆𑀫𑀘𑀸𑀭𑀻𑀲𑀽𑀢𑀺 𑀲𑀫𑀸𑀦𑀁 𑀏𑀓𑀼𑀤𑁆𑀤𑁂𑀲𑀢𑀸𑀤𑀺𑀁 𑀩𑁆𑀭𑀳𑁆𑀫𑀁 𑀘𑀭𑀦𑁆𑀢𑁂𑀲𑀼 𑀲𑀳𑀥𑀫𑁆𑀫𑀺𑀓𑁂𑀲𑀼. 𑀏𑀯𑀜𑁆𑀳𑀺 𑀯𑁄, 𑀲𑀸𑀭𑀺𑀧𑀼𑀢𑁆𑀢, 𑀲𑀺𑀓𑁆𑀔𑀺𑀢𑀩𑁆𑀩𑀦𑁆𑀢𑀺 𑀇𑀫𑀺𑀦𑀸 𑀏𑀢𑁆𑀢𑀓𑁂𑀦 𑀯𑀸𑀭𑁂𑀦 𑀪𑀕𑀯𑀸 𑀤𑁂𑀲𑀦𑀁 𑀲𑀩𑁆𑀩𑀜𑁆𑀜𑀼𑀪𑀸𑀲𑀺𑀢𑀁 𑀅𑀓𑀸𑀲𑀺. 𑀅𑀦𑀲𑁆𑀲𑀼𑀦𑁆𑀢𑀺 𑀦𑀝𑁆𑀞𑀸 𑀯𑀺𑀦𑀝𑁆𑀞𑀸. 𑀬𑁂 𑀇𑀫𑀁 𑀥𑀫𑁆𑀫𑀧𑀭𑀺𑀬𑀸𑀬𑀁 𑀦𑀸𑀲𑁆𑀲𑁄𑀲𑀼𑀦𑁆𑀢𑀺 𑀬𑁂 𑀅𑀢𑁆𑀢𑀦𑁄 𑀧𑀸𑀧𑀺𑀓𑀁 𑀢𑀼𑀘𑁆𑀙𑀁 𑀦𑀺𑀭𑀢𑁆𑀣𑀓𑀁 𑀤𑀺𑀝𑁆𑀞𑀺𑀁 𑀦𑀺𑀲𑁆𑀲𑀸𑀬 𑀇𑀫𑀁 𑀏𑀯𑀭𑀽𑀧𑀁 𑀥𑀫𑁆𑀫𑀤𑁂𑀲𑀦𑀁 𑀲𑁄𑀢𑀼𑀁 𑀦 𑀮𑀪𑀺𑀁𑀲𑀽𑀢𑀺 𑀬𑀣𑀸𑀦𑀼𑀲𑀦𑁆𑀥𑀺𑀦𑀸 𑀤𑁂𑀲𑀦𑀁 𑀦𑀺𑀝𑁆𑀞𑀸𑀧𑁂𑀲𑀺.

𑁩𑁮. 𑀙𑀝𑁆𑀞𑁂 𑀯𑀭𑀡𑀸𑀬𑀁 𑀯𑀺𑀳𑀭𑀢𑀻𑀢𑀺 𑀯𑀭𑀡𑀸 𑀦𑀸𑀫 𑀏𑀓𑀁 𑀦𑀕𑀭𑀁, 𑀢𑀁 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑀢𑀺. 𑀓𑀸𑀫𑀭𑀸𑀕𑀸𑀪𑀺𑀦𑀺𑀯𑁂𑀲𑀯𑀺𑀦𑀺𑀩𑀦𑁆𑀥𑀧𑀮𑀺𑀕𑁂𑀥𑀧𑀭𑀺𑀬𑀼𑀝𑁆𑀞𑀸𑀦𑀚𑁆𑀛𑁄𑀲𑀸𑀦𑀳𑁂𑀢𑀽𑀢𑀺 𑀓𑀸𑀫𑀭𑀸𑀕𑀸𑀪𑀺𑀦𑀺𑀯𑁂𑀲𑀳𑁂𑀢𑀼, 𑀓𑀸𑀫𑀭𑀸𑀕𑀯𑀺𑀦𑀺𑀩𑀦𑁆𑀥𑀳𑁂𑀢𑀼, 𑀓𑀸𑀫𑀭𑀸𑀕𑀧𑀮𑀺𑀕𑁂𑀥𑀳𑁂𑀢𑀼, 𑀓𑀸𑀫𑀭𑀸𑀕𑀧𑀭𑀺𑀬𑀼𑀝𑁆𑀞𑀸𑀦𑀳𑁂𑀢𑀼, 𑀓𑀸𑀫𑀭𑀸𑀕𑀅𑀚𑁆𑀛𑁄𑀲𑀸𑀦𑀳𑁂𑀢𑀽𑀢𑀺 𑀅𑀢𑁆𑀣𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑁆𑀯𑀸𑀬𑀁 𑀧𑀜𑁆𑀘 𑀓𑀸𑀫𑀕𑀼𑀡𑁂 𑀦𑀺𑀲𑁆𑀲𑀸𑀬 𑀉𑀧𑁆𑀧𑀚𑁆𑀚𑀢𑀺 𑀓𑀸𑀫𑀭𑀸𑀕𑁄, 𑀢𑀲𑁆𑀲𑀸𑀪𑀺𑀦𑀺𑀯𑁂𑀲𑀸𑀤𑀺𑀳𑁂𑀢𑀼. 𑀓𑀸𑀫𑀭𑀸𑀕𑁂𑀦 𑀅𑀪𑀺𑀦𑀺𑀯𑀺𑀝𑁆𑀞𑀢𑁆𑀢𑀸 𑀯𑀺𑀦𑀺𑀩𑀤𑁆𑀥𑀢𑁆𑀢𑀸 𑀢𑀲𑁆𑀫𑀺𑀁𑀬𑁂𑀯 𑀘 𑀓𑀸𑀫𑀭𑀸𑀕𑁂 𑀫𑀳𑀸𑀧𑀗𑁆𑀓𑁂 𑀯𑀺𑀬 𑀧𑀮𑀺𑀕𑁂𑀥𑀢𑁆𑀢𑀸 𑀅𑀦𑀼𑀧𑀯𑀺𑀝𑁆𑀞𑀢𑁆𑀢𑀸 𑀢𑁂𑀦𑁂𑀯 𑀘 𑀓𑀸𑀫𑀭𑀸𑀕𑁂𑀦 𑀧𑀭𑀺𑀬𑀼𑀝𑁆𑀞𑀺𑀢𑀢𑁆𑀢𑀸 𑀕𑀳𑀺𑀢𑀢𑁆𑀢𑀸 𑀓𑀸𑀫𑀭𑀸𑀕𑁂𑀦𑁂𑀯 𑀘 𑀅𑀚𑁆𑀛𑁄𑀲𑀺𑀢𑀢𑁆𑀢𑀸 𑀕𑀺𑀮𑀺𑀢𑁆𑀯𑀸 𑀧𑀭𑀺𑀦𑀺𑀝𑁆𑀞𑀧𑁂𑀢𑁆𑀯𑀸 𑀕𑀳𑀺𑀢𑀢𑁆𑀢𑀸𑀢𑀺. 𑀤𑀺𑀝𑁆𑀞𑀺𑀭𑀸𑀕𑀸𑀤𑀺𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀤𑀺𑀝𑁆𑀞𑀺𑀭𑀸𑀕𑁄𑀢𑀺 𑀧𑀦𑁂𑀢𑁆𑀣 𑀤𑁆𑀯𑀸𑀲𑀝𑁆𑀞𑀺 𑀤𑀺𑀝𑁆𑀞𑀺𑀬𑁄 𑀦𑀺𑀲𑁆𑀲𑀸𑀬 𑀉𑀧𑁆𑀧𑀚𑁆𑀚𑀦𑀓𑀭𑀸𑀕𑁄 𑀯𑁂𑀤𑀺𑀢𑀩𑁆𑀩𑁄. 𑀧𑀼𑀭𑀢𑁆𑀣𑀺𑀫𑁂𑀲𑀼 𑀚𑀦𑀧𑀤𑁂𑀲𑀽𑀢𑀺 𑀣𑁂𑀭𑀲𑁆𑀲 𑀯𑀲𑀦𑀝𑁆𑀞𑀸𑀦𑀢𑁄 𑀲𑀸𑀯𑀢𑁆𑀣𑀺𑀚𑀦𑀧𑀤𑁄 𑀧𑀼𑀭𑀢𑁆𑀣𑀺𑀫𑀤𑀺𑀲𑀸𑀪𑀸𑀕𑁂 𑀳𑁄𑀢𑀺, 𑀣𑁂𑀭𑁄 𑀘 𑀦𑀺𑀲𑀻𑀤𑀦𑁆𑀢𑁄𑀧𑀺 𑀢𑀢𑁄𑀫𑀼𑀔𑁄𑀯 𑀦𑀺𑀲𑀺𑀦𑁆𑀦𑁄, 𑀢𑀲𑁆𑀫𑀸 𑀏𑀯𑀫𑀸𑀳. 𑀉𑀤𑀸𑀦𑀁 𑀉𑀤𑀸𑀦𑁂𑀲𑀻𑀢𑀺 𑀉𑀤𑀸𑀳𑀸𑀭𑀁 𑀉𑀤𑀸𑀳𑀭𑀺. 𑀬𑀣𑀸 𑀳𑀺 𑀬𑀁 𑀢𑁂𑀮𑀁 𑀫𑀸𑀦𑀁 𑀕𑀳𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀯𑀺𑀲𑁆𑀲𑀦𑁆𑀤𑀺𑀢𑁆𑀯𑀸 𑀕𑀘𑁆𑀙𑀢𑀺, 𑀢𑀁 𑀅𑀯𑀲𑁂𑀲𑀓𑁄𑀢𑀺 𑀯𑀼𑀘𑁆𑀘𑀢𑀺. 𑀬𑀜𑁆𑀘 𑀚𑀮𑀁 𑀢𑀴𑀸𑀓𑀁 𑀕𑀳𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀅𑀚𑁆𑀛𑁄𑀢𑁆𑀣𑀭𑀺𑀢𑁆𑀯𑀸 𑀕𑀘𑁆𑀙𑀢𑀺, 𑀢𑀁 𑀑𑀖𑁄𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀫𑁂𑀯𑀁 𑀬𑀁 𑀧𑀻𑀢𑀺𑀯𑀘𑀦𑀁 𑀳𑀤𑀬𑀁 𑀕𑀳𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀅𑀥𑀺𑀓𑀁 𑀳𑀼𑀢𑁆𑀯𑀸 𑀅𑀦𑁆𑀢𑁄 𑀅𑀲𑀡𑁆𑀞𑀳𑀺𑀢𑁆𑀯𑀸 𑀩𑀳𑀺 𑀦𑀺𑀓𑁆𑀔𑀫𑀢𑀺, 𑀢𑀁 𑀉𑀤𑀸𑀦𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀭𑀽𑀧𑀁 𑀧𑀻𑀢𑀺𑀫𑀬𑀯𑀘𑀦𑀁 𑀦𑀺𑀘𑁆𑀙𑀸𑀭𑁂𑀲𑀻𑀢𑀺 𑀅𑀢𑁆𑀣𑁄.

𑁩𑁯. 𑀲𑀢𑁆𑀢𑀫𑁂 𑀕𑀼𑀦𑁆𑀤𑀸𑀯𑀦𑁂𑀢𑀺 𑀏𑀯𑀁 𑀦𑀸𑀫𑀓𑁂 𑀯𑀦𑁂. 𑀉𑀧𑀲𑀗𑁆𑀓𑀫𑀻𑀢𑀺 ‘‘𑀫𑀳𑀸𑀓𑀘𑁆𑀘𑀸𑀦𑀢𑁆𑀣𑁂𑀭𑁄 𑀓𑀺𑀭 𑀦𑀸𑀫 𑀅𑀢𑁆𑀢𑀦𑁄 𑀧𑀺𑀢𑀼𑀫𑀢𑁆𑀢𑀫𑁆𑀧𑀺 𑀅𑀬𑁆𑀬𑀓𑀫𑀢𑁆𑀢𑀫𑁆𑀧𑀺 𑀤𑀺𑀲𑁆𑀯𑀸 𑀦𑁂𑀯 𑀅𑀪𑀺𑀯𑀸𑀤𑁂𑀢𑀺 𑀦 𑀧𑀘𑁆𑀘𑀼𑀝𑁆𑀞𑁂𑀢𑀺 𑀦 𑀆𑀲𑀦𑁂𑀦 𑀦𑀺𑀫𑀦𑁆𑀢𑁂𑀢𑀻’’𑀢𑀺 𑀲𑀼𑀢𑁆𑀯𑀸 ‘‘𑀦 𑀲𑀓𑁆𑀓𑀸 𑀏𑀢𑁆𑀢𑀓𑁂𑀦 𑀦𑀺𑀝𑁆𑀞𑀁 𑀕𑀦𑁆𑀢𑀼𑀁, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀦𑀁 𑀧𑀭𑀺𑀕𑁆𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀪𑀼𑀢𑁆𑀢𑀧𑀸𑀢𑀭𑀸𑀲𑁄 𑀬𑁂𑀦𑀸𑀬𑀲𑁆𑀫𑀸 𑀫𑀳𑀸𑀓𑀘𑁆𑀘𑀸𑀦𑁄 𑀢𑁂𑀦𑀼𑀧𑀲𑀗𑁆𑀓𑀫𑀺. 𑀚𑀺𑀡𑁆𑀡𑁂𑀢𑀺 𑀚𑀭𑀸𑀚𑀺𑀡𑁆𑀡𑁂. 𑀯𑀼𑀤𑁆𑀥𑁂𑀢𑀺 𑀯𑀬𑁄𑀯𑀼𑀤𑁆𑀥𑁂. 𑀫𑀳𑀮𑁆𑀮𑀓𑁂𑀢𑀺 𑀚𑀸𑀢𑀺𑀫𑀳𑀮𑁆𑀮𑀓𑁂. 𑀅𑀤𑁆𑀥𑀕𑀢𑁂𑀢𑀺 𑀤𑀻𑀖𑀓𑀸𑀮𑀤𑁆𑀥𑀸𑀦𑀁 𑀅𑀢𑀺𑀓𑁆𑀓𑀦𑁆𑀢𑁂. 𑀯𑀬𑁄𑀅𑀦𑀼𑀧𑁆𑀧𑀢𑁆𑀢𑁂𑀢𑀺 𑀧𑀘𑁆𑀙𑀺𑀫𑀯𑀬𑀁 𑀅𑀦𑀼𑀧𑁆𑀧𑀢𑁆𑀢𑁂. 𑀢𑀬𑀺𑀤𑀁, 𑀪𑁄 𑀓𑀘𑁆𑀘𑀸𑀦, 𑀢𑀣𑁂𑀯𑀸𑀢𑀺, 𑀪𑁄 𑀓𑀘𑁆𑀘𑀸𑀦, 𑀬𑀁 𑀢𑀁 𑀅𑀫𑁆𑀳𑁂𑀳𑀺 𑀓𑁂𑀯𑀮𑀁 𑀲𑀼𑀢𑀫𑁂𑀯, 𑀢𑀁 𑀇𑀫𑀺𑀦𑀸 𑀤𑀺𑀝𑁆𑀞𑁂𑀦 𑀲𑀫𑁂𑀢𑀺. 𑀢𑀲𑁆𑀫𑀸 𑀢𑀁 𑀢𑀣𑁂𑀯, 𑀦 𑀅𑀜𑁆𑀜𑀣𑀸. 𑀦 𑀳𑀺 𑀪𑀯𑀁 𑀓𑀘𑁆𑀘𑀸𑀦𑁄 𑀩𑁆𑀭𑀸𑀳𑁆𑀫𑀡𑁂𑀢𑀺 𑀇𑀤𑀁 𑀅𑀢𑁆𑀢𑀸𑀦𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀅𑀬𑀁 𑀓𑀺𑀭𑀲𑁆𑀲 𑀅𑀥𑀺𑀧𑁆𑀧𑀸𑀬𑁄 𑁋 𑀅𑀫𑁆𑀳𑁂 𑀏𑀯𑀁 𑀫𑀳𑀮𑁆𑀮𑀓𑁂 𑀤𑀺𑀲𑁆𑀯𑀸 𑀪𑁄𑀢𑁄 𑀓𑀘𑁆𑀘𑀸𑀦𑀲𑁆𑀲 𑀅𑀪𑀺𑀯𑀸𑀤𑀦𑀫𑀢𑁆𑀢𑀫𑁆𑀧𑀺 𑀧𑀘𑁆𑀘𑀼𑀝𑁆𑀞𑀸𑀦𑀫𑀢𑁆𑀢𑀫𑁆𑀧𑀺 𑀆𑀲𑀦𑁂𑀦 𑀦𑀺𑀫𑀦𑁆𑀢𑀦𑀫𑀢𑁆𑀢𑀫𑁆𑀧𑀺 𑀦𑀢𑁆𑀣𑀻𑀢𑀺. 𑀦 𑀲𑀫𑁆𑀧𑀦𑁆𑀦𑀫𑁂𑀯𑀸𑀢𑀺 𑀦 𑀬𑀼𑀢𑁆𑀢𑀫𑁂𑀯 𑀦 𑀅𑀦𑀼𑀘𑁆𑀙𑀯𑀺𑀓𑀫𑁂𑀯.

𑀣𑁂𑀭𑁄 𑀩𑁆𑀭𑀸𑀳𑁆𑀫𑀡𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 ‘‘𑀅𑀬𑀁 𑀩𑁆𑀭𑀸𑀳𑁆𑀫𑀡𑁄 𑀦𑁂𑀯 𑀯𑀼𑀤𑁆𑀥𑁂 𑀚𑀸𑀦𑀸𑀢𑀺 𑀦 𑀤𑀳𑀭𑁂, 𑀆𑀘𑀺𑀓𑁆𑀔𑀺𑀲𑁆𑀲𑀸𑀫𑀺𑀲𑁆𑀲 𑀯𑀼𑀤𑁆𑀥𑁂 𑀘 𑀤𑀳𑀭𑁂 𑀘𑀸’’𑀢𑀺 𑀤𑁂𑀲𑀦𑀁 𑀯𑀟𑁆𑀠𑁂𑀦𑁆𑀢𑁄 𑀅𑀢𑁆𑀣𑀺 𑀩𑁆𑀭𑀸𑀳𑁆𑀫𑀡𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀚𑀸𑀦𑀢𑀸𑀢𑀺 𑀲𑀩𑁆𑀩𑀁 𑀦𑁂𑀬𑁆𑀬𑀁 𑀚𑀸𑀦𑀦𑁆𑀢𑁂𑀦. 𑀧𑀲𑁆𑀲𑀢𑀸𑀢𑀺 𑀢𑀤𑁂𑀯 𑀳𑀢𑁆𑀣𑁂 𑀞𑀧𑀺𑀢𑀁 𑀆𑀫𑀮𑀓𑀁 𑀯𑀺𑀬 𑀧𑀲𑁆𑀲𑀦𑁆𑀢𑁂𑀦. 𑀯𑀼𑀤𑁆𑀥𑀪𑀽𑀫𑀻𑀢𑀺 𑀬𑁂𑀦 𑀓𑀸𑀭𑀡𑁂𑀦 𑀯𑀼𑀤𑁆𑀥𑁄 𑀦𑀸𑀫 𑀳𑁄𑀢𑀺, 𑀢𑀁 𑀓𑀸𑀭𑀡𑀁. 𑀤𑀳𑀭𑀪𑀽𑀫𑀻𑀢𑀺 𑀬𑁂𑀦 𑀓𑀸𑀭𑀡𑁂𑀦 𑀤𑀳𑀭𑁄 𑀦𑀸𑀫 𑀳𑁄𑀢𑀺, 𑀢𑀁 𑀓𑀸𑀭𑀡𑀁. 𑀆𑀲𑀻𑀢𑀺𑀓𑁄𑀢𑀺 𑀅𑀲𑀻𑀢𑀺𑀯𑀲𑁆𑀲𑀯𑀬𑁄. 𑀦𑀸𑀯𑀼𑀢𑀺𑀓𑁄𑀢𑀺 𑀦𑀯𑀼𑀢𑀺𑀯𑀲𑁆𑀲𑀯𑀬𑁄. 𑀓𑀸𑀫𑁂 𑀧𑀭𑀺𑀪𑀼𑀜𑁆𑀚𑀢𑀻𑀢𑀺 𑀯𑀢𑁆𑀣𑀼𑀓𑀸𑀫𑁂 𑀓𑀺𑀮𑁂𑀲𑀓𑀸𑀫𑁂𑀢𑀺 𑀤𑀼𑀯𑀺𑀥𑁂𑀧𑀺 𑀓𑀸𑀫𑁂 𑀓𑀫𑀦𑀯𑀲𑁂𑀦 𑀧𑀭𑀺𑀪𑀼𑀜𑁆𑀚𑀢𑀺. 𑀓𑀸𑀫𑀫𑀚𑁆𑀛𑀸𑀯𑀲𑀢𑀻𑀢𑀺 𑀤𑀼𑀯𑀺𑀥𑁂𑀧𑀺 𑀓𑀸𑀫𑁂 𑀖𑀭𑁂 𑀖𑀭𑀲𑁆𑀲𑀸𑀫𑀺𑀓𑁄 𑀯𑀺𑀬 𑀯𑀲𑀢𑀺 𑀅𑀥𑀺𑀯𑀲𑀢𑀺. 𑀓𑀸𑀫𑀧𑀭𑀺𑀬𑁂𑀲𑀦𑀸𑀬 𑀉𑀲𑁆𑀲𑀼𑀓𑁄𑀢𑀺 𑀤𑀼𑀯𑀺𑀥𑀸𑀦𑀫𑁆𑀧𑀺 𑀓𑀸𑀫𑀸𑀦𑀁 𑀧𑀭𑀺𑀬𑁂𑀲𑀦𑀢𑁆𑀣𑀁 𑀉𑀲𑁆𑀲𑀼𑀓𑁆𑀓𑀫𑀸𑀧𑀦𑁆𑀦𑁄. 𑀩𑀸𑀮𑁄 𑀦 𑀣𑁂𑀭𑁄𑀢𑁆𑀯𑁂𑀯 𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀻𑀢𑀺 𑀲𑁄 𑀦 𑀣𑁂𑀭𑁄 𑀩𑀸𑀮𑁄 𑀫𑀦𑁆𑀤𑁄𑀢𑁆𑀯𑁂𑀯 𑀕𑀡𑀦𑀁 𑀕𑀘𑁆𑀙𑀢𑀺. 𑀯𑀼𑀢𑁆𑀢𑀁 𑀳𑁂𑀢𑀁 𑁋

‘‘𑀦 𑀢𑁂𑀦 𑀣𑁂𑀭𑁄 𑀲𑁄 𑀳𑁄𑀢𑀺, 𑀬𑁂𑀦𑀲𑁆𑀲 𑀧𑀮𑀺𑀢𑀁 𑀲𑀺𑀭𑁄;

𑀧𑀭𑀺𑀧𑀓𑁆𑀓𑁄 𑀯𑀬𑁄 𑀢𑀲𑁆𑀲, 𑀫𑁄𑀖𑀚𑀺𑀡𑁆𑀡𑁄𑀢𑀺 𑀯𑀼𑀘𑁆𑀘𑀢𑀻’’𑀢𑀺. (𑀥. 𑀧. 𑁨𑁬𑁦);

𑀤𑀳𑀭𑁄𑀢𑀺 𑀢𑀭𑀼𑀡𑁄. 𑀬𑀼𑀯𑀸𑀢𑀺 𑀬𑁄𑀩𑁆𑀩𑀦𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀲𑀼𑀲𑀼𑀓𑀸𑀴𑀓𑁂𑀲𑁄𑀢𑀺 𑀲𑀼𑀝𑁆𑀞𑀼 𑀓𑀸𑀴𑀓𑁂𑀲𑁄. 𑀪𑀤𑁆𑀭𑁂𑀦 𑀬𑁄𑀩𑁆𑀩𑀦𑁂𑀦 𑀲𑀫𑀦𑁆𑀦𑀸𑀕𑀢𑁄𑀢𑀺 𑀬𑁂𑀦 𑀬𑁄𑀩𑁆𑀩𑀦𑁂𑀦 𑀲𑀫𑀦𑁆𑀦𑀸𑀕𑀢𑁄 𑀬𑀼𑀯𑀸, 𑀢𑀁 𑀬𑁄𑀩𑁆𑀩𑀦𑀁 𑀪𑀤𑁆𑀭𑀁 𑀮𑀤𑁆𑀥𑀓𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀧𑀞𑀫𑁂𑀦 𑀯𑀬𑀲𑀸𑀢𑀺 𑀧𑀞𑀫𑀯𑀬𑁄 𑀦𑀸𑀫 𑀢𑁂𑀢𑁆𑀢𑀺𑀁𑀲 𑀯𑀲𑁆𑀲𑀸𑀦𑀺, 𑀢𑁂𑀦 𑀲𑀫𑀦𑁆𑀦𑀸𑀕𑀢𑁄𑀢𑀺 𑀅𑀢𑁆𑀣𑁄. 𑀧𑀡𑁆𑀟𑀺𑀢𑁄 𑀣𑁂𑀭𑁄𑀢𑁆𑀯𑁂𑀯 𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀻𑀢𑀺 𑀲𑁄 𑀏𑀯𑀭𑀽𑀧𑁄 𑀧𑀼𑀕𑁆𑀕𑀮𑁄 𑀧𑀡𑁆𑀟𑀺𑀢𑁄𑀢𑀺 𑀘 𑀣𑁂𑀭𑁄𑀢𑀺 𑀘 𑀕𑀡𑀦𑀁 𑀕𑀘𑁆𑀙𑀢𑀺. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋

‘‘𑀬𑀫𑁆𑀳𑀺 𑀲𑀘𑁆𑀘𑀜𑁆𑀘 𑀥𑀫𑁆𑀫𑁄 𑀘, 𑀅𑀳𑀺𑀁𑀲𑀸 𑀲𑀁𑀬𑀫𑁄 𑀤𑀫𑁄;

𑀲 𑀯𑁂 𑀯𑀦𑁆𑀢𑀫𑀮𑁄 𑀥𑀻𑀭𑁄, 𑀣𑁂𑀭𑁄 𑀇𑀢𑀺 𑀧𑀯𑀼𑀘𑁆𑀘𑀢𑀻’’𑀢𑀺. (𑀥. 𑀧. 𑁨𑁬𑁧);

𑁪𑁦. 𑀅𑀝𑁆𑀞𑀫𑁂 𑀘𑁄𑀭𑀸 𑀩𑀮𑀯𑀦𑁆𑀢𑁄 𑀳𑁄𑀦𑁆𑀢𑀻𑀢𑀺 𑀧𑀓𑁆𑀔𑀲𑀫𑁆𑀧𑀦𑁆𑀦𑀸, 𑀧𑀭𑀺𑀯𑀸𑀭𑀲𑀫𑁆𑀧𑀦𑁆𑀦𑀸, 𑀥𑀦𑀲𑀫𑁆𑀧𑀦𑁆𑀦𑀸, 𑀦𑀺𑀯𑀸𑀲𑀝𑁆𑀞𑀸𑀦𑀲𑀫𑁆𑀧𑀦𑁆𑀦𑀸, 𑀯𑀸𑀳𑀦𑀲𑀫𑁆𑀧𑀦𑁆𑀦𑀸 𑀘 𑀳𑁄𑀦𑁆𑀢𑀺. 𑀭𑀸𑀚𑀸𑀦𑁄 𑀢𑀲𑁆𑀫𑀺𑀁 𑀲𑀫𑀬𑁂 𑀤𑀼𑀩𑁆𑀩𑀮𑀸 𑀳𑁄𑀦𑁆𑀢𑀻𑀢𑀺 𑀢𑀲𑁆𑀫𑀺𑀁 𑀲𑀫𑀬𑁂 𑀭𑀸𑀚𑀸𑀦𑁄 𑀢𑀸𑀲𑀁 𑀲𑀫𑁆𑀧𑀢𑁆𑀢𑀻𑀦𑀁 𑀅𑀪𑀸𑀯𑁂𑀦 𑀤𑀼𑀩𑁆𑀩𑀮𑀸 𑀳𑁄𑀦𑁆𑀢𑀺. 𑀅𑀢𑀺𑀬𑀸𑀢𑀼𑀦𑁆𑀢𑀺 𑀩𑀳𑀺𑀤𑁆𑀥𑀸 𑀚𑀦𑀧𑀤𑀘𑀸𑀭𑀺𑀓𑀁 𑀘𑀭𑀺𑀢𑁆𑀯𑀸 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀓𑁆𑀔𑀡𑁂 𑀅𑀦𑁆𑀢𑁄𑀦𑀕𑀭𑀁 𑀧𑀯𑀺𑀲𑀺𑀢𑀼𑀁. 𑀦𑀺𑀬𑁆𑀬𑀸𑀢𑀼𑀦𑁆𑀢𑀺 ‘‘𑀘𑁄𑀭𑀸 𑀚𑀦𑀧𑀤𑀁 𑀯𑀺𑀮𑀼𑀫𑁆𑀧𑀦𑁆𑀢𑀺 𑀫𑀤𑁆𑀤𑀦𑁆𑀢𑀺, 𑀢𑁂 𑀦𑀺𑀲𑁂𑀥𑁂𑀲𑁆𑀲𑀸𑀫𑀸’’𑀢𑀺 𑀧𑀞𑀫𑀬𑀸𑀫𑁂 𑀯𑀸 𑀫𑀚𑁆𑀛𑀺𑀫𑀬𑀸𑀫𑁂 𑀯𑀸 𑀧𑀘𑁆𑀙𑀺𑀫𑀬𑀸𑀫𑁂 𑀯𑀸 𑀦𑀺𑀓𑁆𑀔𑀫𑀺𑀢𑀼𑀁 𑀨𑀸𑀲𑀼𑀓𑀁 𑀦 𑀳𑁄𑀢𑀺. 𑀢𑀢𑁄 𑀉𑀝𑁆𑀞𑀸𑀬 𑀘𑁄𑀭𑀸 𑀫𑀦𑀼𑀲𑁆𑀲𑁂 𑀧𑁄𑀣𑁂𑀢𑁆𑀯𑀸 𑀅𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑀺. 𑀧𑀘𑁆𑀘𑀦𑁆𑀢𑀺𑀫𑁂 𑀯𑀸 𑀚𑀦𑀧𑀤𑁂 𑀅𑀦𑀼𑀲𑀜𑁆𑀜𑀸𑀢𑀼𑀦𑁆𑀢𑀺 𑀕𑀸𑀫𑀁 𑀯𑀸𑀲𑀓𑀭𑀡𑀢𑁆𑀣𑀸𑀬 𑀲𑁂𑀢𑀼𑀁 𑀅𑀢𑁆𑀣𑀭𑀡𑀢𑁆𑀣𑀸𑀬 𑀧𑁄𑀓𑁆𑀔𑀭𑀡𑀺𑀁 𑀔𑀡𑀸𑀧𑀦𑀢𑁆𑀣𑀸𑀬 𑀲𑀸𑀮𑀸𑀤𑀻𑀦𑀁 𑀓𑀭𑀡𑀢𑁆𑀣𑀸𑀬 𑀧𑀘𑁆𑀘𑀦𑁆𑀢𑀺𑀫𑁂 𑀚𑀦𑀧𑀤𑁂 𑀅𑀦𑀼𑀲𑀜𑁆𑀜𑀸𑀢𑀼𑀫𑁆𑀧𑀺 𑀦 𑀲𑀼𑀔𑀁 𑀳𑁄𑀢𑀺. 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸𑀦𑀦𑁆𑀢𑀺 𑀅𑀦𑁆𑀢𑁄𑀦𑀕𑀭𑀯𑀸𑀲𑀻𑀦𑀁 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸𑀦𑀁. 𑀩𑀸𑀳𑀺𑀭𑀸𑀦𑀺 𑀯𑀸 𑀓𑀫𑁆𑀫𑀦𑁆𑀢𑀸𑀦𑀻𑀢𑀺 𑀩𑀳𑀺𑀕𑀸𑀫𑁂 𑀆𑀭𑀸𑀫𑁂 𑀔𑁂𑀢𑁆𑀢𑀓𑀫𑁆𑀫𑀦𑁆𑀢𑀸𑀦𑀺. 𑀧𑀸𑀧𑀪𑀺𑀓𑁆𑀔𑀽 𑀩𑀮𑀯𑀦𑁆𑀢𑁄 𑀳𑁄𑀦𑁆𑀢𑀻𑀢𑀺 𑀧𑀓𑁆𑀔𑀼𑀢𑁆𑀢𑀭𑀸 𑀬𑀲𑀼𑀢𑁆𑀢𑀭𑀸 𑀧𑀼𑀜𑁆𑀜𑀯𑀦𑁆𑀢𑁄 𑀩𑀳𑀼𑀓𑁂𑀳𑀺 𑀉𑀧𑀝𑁆𑀞𑀸𑀓𑁂𑀳𑀺 𑀘 𑀉𑀧𑀝𑁆𑀞𑀸𑀓𑀻𑀳𑀺 𑀘 𑀲𑀫𑀦𑁆𑀦𑀸𑀕𑀢𑀸 𑀭𑀸𑀚𑀭𑀸𑀚𑀫𑀳𑀸𑀫𑀢𑁆𑀢𑀲𑀦𑁆𑀦𑀺𑀲𑁆𑀲𑀺𑀢𑀸. 𑀧𑁂𑀲𑀮𑀸 𑀪𑀺𑀓𑁆𑀔𑀽 𑀢𑀲𑁆𑀫𑀺𑀁 𑀲𑀫𑀬𑁂 𑀤𑀼𑀩𑁆𑀩𑀮𑀸 𑀳𑁄𑀦𑁆𑀢𑀻𑀢𑀺 𑀢𑀲𑁆𑀫𑀺𑀁 𑀲𑀫𑀬𑁂 𑀧𑀺𑀬𑀲𑀻𑀮𑀸 𑀪𑀺𑀓𑁆𑀔𑀽 𑀢𑀸𑀲𑀁 𑀲𑀫𑁆𑀧𑀢𑁆𑀢𑀻𑀦𑀁 𑀅𑀪𑀸𑀯𑁂𑀦 𑀤𑀼𑀩𑁆𑀩𑀮𑀸 𑀳𑁄𑀦𑁆𑀢𑀺. 𑀢𑀼𑀡𑁆𑀳𑀻𑀪𑀽𑀢𑀸 𑀢𑀼𑀡𑁆𑀳𑀻𑀪𑀽𑀢𑀸𑀯 𑀲𑀗𑁆𑀖𑀫𑀚𑁆𑀛𑁂 𑀲𑀗𑁆𑀓𑀲𑀸𑀬𑀦𑁆𑀢𑀻𑀢𑀺 𑀦𑀺𑀲𑁆𑀲𑀤𑁆𑀤𑀸 𑀳𑀼𑀢𑁆𑀯𑀸 𑀲𑀗𑁆𑀖𑀫𑀚𑁆𑀛𑁂 𑀦𑀺𑀲𑀺𑀦𑁆𑀦𑀸 𑀓𑀺𑀜𑁆𑀘𑀺 𑀏𑀓𑀯𑀘𑀦𑀫𑁆𑀧𑀺 𑀫𑀼𑀔𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀓𑀣𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 𑀧𑀚𑁆𑀛𑀸𑀬𑀦𑁆𑀢𑀸 𑀯𑀺𑀬 𑀦𑀺𑀲𑀻𑀤𑀦𑁆𑀢𑀺. 𑀢𑀬𑀺𑀤𑀦𑁆𑀢𑀺 𑀢𑀤𑁂𑀢𑀁 𑀓𑀸𑀭𑀡𑀁. 𑀲𑀼𑀓𑁆𑀓𑀧𑀓𑁆𑀔𑁄 𑀯𑀼𑀢𑁆𑀢𑀯𑀺𑀧𑀮𑁆𑀮𑀸𑀲𑁂𑀦 𑀯𑁂𑀤𑀺𑀢𑀩𑁆𑀩𑁄.

𑁪𑁧. 𑀦𑀯𑀫𑁂 𑀫𑀺𑀘𑁆𑀙𑀸𑀧𑀝𑀺𑀧𑀢𑁆𑀢𑀸𑀥𑀺𑀓𑀭𑀡𑀳𑁂𑀢𑀽𑀢𑀺 𑀫𑀺𑀘𑁆𑀙𑀸𑀧𑀝𑀺𑀧𑀢𑁆𑀢𑀺𑀬𑀸 𑀓𑀸𑀭𑀡𑀳𑁂𑀢𑀼 𑀧𑀝𑀺𑀧𑀚𑁆𑀚𑀦𑀳𑁂𑀢𑀽𑀢𑀺 𑀅𑀢𑁆𑀣𑁄. 𑀜𑀸𑀬𑀁 𑀥𑀫𑁆𑀫𑀁 𑀓𑀼𑀲𑀮𑀦𑁆𑀢𑀺 𑀲𑀳𑀯𑀺𑀧𑀲𑁆𑀲𑀦𑀓𑀁 𑀫𑀕𑁆𑀕𑀁. 𑀏𑀯𑀭𑀽𑀧𑁄 𑀳𑀺 𑀲𑀳𑀯𑀺𑀧𑀲𑁆𑀲𑀦𑀓𑀁 𑀫𑀕𑁆𑀕𑀁 𑀆𑀭𑀸𑀥𑁂𑀢𑀼𑀁 𑀲𑀫𑁆𑀧𑀸𑀤𑁂𑀢𑀼𑀁 𑀧𑀽𑀭𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀲𑀼𑀓𑁆𑀓𑀧𑀓𑁆𑀔𑁄 𑀯𑀼𑀢𑁆𑀢𑀯𑀺𑀧𑀮𑁆𑀮𑀸𑀲𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀲𑀳 𑀯𑀺𑀧𑀲𑁆𑀲𑀦𑀸𑀬 𑀫𑀕𑁆𑀕𑁄 𑀓𑀣𑀺𑀢𑁄.

𑁪𑁨. 𑀤𑀲𑀫𑁂 𑀤𑀼𑀕𑁆𑀕𑀳𑀺𑀢𑁂𑀳𑀻𑀢𑀺 𑀉𑀧𑁆𑀧𑀝𑀺𑀧𑀸𑀝𑀺𑀬𑀸 𑀕𑀳𑀺𑀢𑁂𑀳𑀺. 𑀩𑁆𑀬𑀜𑁆𑀚𑀦𑀧𑁆𑀧𑀢𑀺𑀭𑀽𑀧𑀓𑁂𑀳𑀻𑀢𑀺 𑀩𑁆𑀬𑀜𑁆𑀚𑀦𑀲𑁄 𑀧𑀢𑀺𑀭𑀽𑀧𑀓𑁂𑀳𑀺 𑀅𑀓𑁆𑀔𑀭𑀘𑀺𑀢𑁆𑀭𑀢𑀸𑀬 𑀮𑀤𑁆𑀥𑀓𑁂𑀳𑀺. 𑀅𑀢𑁆𑀣𑀜𑁆𑀘 𑀥𑀫𑁆𑀫𑀜𑁆𑀘 𑀧𑀝𑀺𑀩𑀸𑀳𑀦𑁆𑀢𑀻𑀢𑀺 𑀲𑀼𑀕𑁆𑀕𑀳𑀺𑀢𑀲𑀼𑀢𑁆𑀢𑀦𑁆𑀢𑀸𑀦𑀁 𑀅𑀢𑁆𑀣𑀜𑁆𑀘 𑀧𑀸𑀴𑀺𑀜𑁆𑀘 𑀧𑀝𑀺𑀩𑀸𑀳𑀦𑁆𑀢𑀺, 𑀅𑀢𑁆𑀢𑀦𑁄 𑀤𑀼𑀕𑁆𑀕𑀳𑀺𑀢𑀲𑀼𑀢𑁆𑀢𑀦𑁆𑀢𑀸𑀦𑀁𑀬𑁂𑀯 𑀅𑀢𑁆𑀣𑀜𑁆𑀘 𑀧𑀸𑀴𑀺𑀜𑁆𑀘 𑀉𑀢𑁆𑀢𑀭𑀺𑀢𑀭𑀁 𑀓𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑀺. 𑀲𑀼𑀓𑁆𑀓𑀧𑀓𑁆𑀔𑁄 𑀯𑀼𑀢𑁆𑀢𑀯𑀺𑀧𑀮𑁆𑀮𑀸𑀲𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀲𑀸𑀲𑀦𑀲𑁆𑀲 𑀯𑀼𑀤𑁆𑀥𑀺 𑀘 𑀧𑀭𑀺𑀳𑀸𑀦𑀺 𑀘 𑀓𑀣𑀺𑀢𑀸𑀢𑀺.

𑀲𑀫𑀘𑀺𑀢𑁆𑀢𑀯𑀕𑁆𑀕𑁄 𑀘𑀢𑀼𑀢𑁆𑀣𑁄.