𑁪. 𑀘𑀢𑀼𑀢𑁆𑀣𑀧𑀡𑁆𑀡𑀸𑀲𑀓𑀁

𑁧𑁫𑁫. 𑀘𑀢𑀼𑀢𑁆𑀣𑀲𑁆𑀲 𑀧𑀞𑀫𑀸𑀤𑀻𑀦𑀺 𑀉𑀢𑁆𑀢𑀸𑀦𑀢𑁆𑀣𑀸𑀦𑁂𑀯𑀸𑀢𑀺.

𑁮. 𑀓𑀫𑁆𑀫𑀦𑀺𑀤𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁭𑁪. 𑀅𑀝𑁆𑀞𑀫𑁂 𑀮𑁄𑀪𑀳𑁂𑀢𑀼𑀓𑀫𑁆𑀧𑀻𑀢𑀺 𑀧𑀸𑀡𑀸𑀢𑀺𑀧𑀸𑀢𑀲𑁆𑀲 𑀮𑁄𑀪𑁄 𑀉𑀧𑀦𑀺𑀲𑁆𑀲𑀬𑀓𑁄𑀝𑀺𑀬𑀸 𑀳𑁂𑀢𑀼 𑀳𑁄𑀢𑀺 𑀤𑁄𑀲𑀫𑁄𑀳𑀲𑀫𑁆𑀧𑀬𑀼𑀢𑁆𑀢𑁄𑀧𑀺. 𑀇𑀫𑀺𑀦𑀸 𑀉𑀧𑀸𑀬𑁂𑀦 𑀲𑀩𑁆𑀩𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑁯. 𑀧𑀭𑀺𑀓𑁆𑀓𑀫𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁭𑁫. 𑀦𑀯𑀫𑁂 𑀧𑀭𑀺𑀓𑁆𑀓𑀫𑀦𑀁 𑀳𑁄𑀢𑀻𑀢𑀺 𑀧𑀭𑀺𑀯𑀚𑁆𑀚𑀦𑀁 𑀳𑁄𑀢𑀺.

𑁧𑁦. 𑀘𑀼𑀦𑁆𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁭𑁬. 𑀤𑀲𑀫𑁂 𑀓𑀫𑁆𑀫𑀸𑀭𑀧𑀼𑀢𑁆𑀢𑀲𑁆𑀲𑀸𑀢𑀺 𑀲𑀼𑀯𑀡𑁆𑀡𑀓𑀸𑀭𑀧𑀼𑀢𑁆𑀢𑀲𑁆𑀲. 𑀓𑀲𑁆𑀲 𑀦𑁄 𑀢𑁆𑀯𑀦𑁆𑀢𑀺 𑀓𑀲𑁆𑀲 𑀦𑀼 𑀢𑁆𑀯𑀁. 𑀧𑀘𑁆𑀙𑀸𑀪𑀽𑀫𑀓𑀸𑀢𑀺 𑀧𑀘𑁆𑀙𑀸𑀪𑀽𑀫𑀺𑀯𑀸𑀲𑀺𑀓𑀸. 𑀓𑀫𑀡𑁆𑀟𑀮𑀼𑀓𑀸𑀢𑀺 𑀓𑀫𑀡𑁆𑀟𑀮𑀼𑀥𑀸𑀭𑀺𑀦𑁄. 𑀲𑁂𑀯𑀸𑀮𑀫𑀸𑀮𑀺𑀓𑀸𑀢𑀺 𑀲𑁂𑀯𑀸𑀮𑀫𑀸𑀮𑀸 𑀯𑀺𑀬 𑀥𑀸𑀭𑁂𑀦𑁆𑀢𑀺. 𑀲𑁂𑀯𑀸𑀮𑀧𑀝𑀦𑀺𑀯𑀸𑀲𑀺𑀢𑀸𑀢𑀺𑀧𑀺 𑀯𑀼𑀢𑁆𑀢𑀫𑁂𑀯. 𑀉𑀤𑀓𑁄𑀭𑁄𑀳𑀓𑀸𑀢𑀺 𑀲𑀸𑀬𑀢𑀢𑀺𑀬𑀓𑀁 𑀉𑀤𑀓𑁄𑀭𑁄𑀳𑀦𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑀸. 𑀆𑀫𑀲𑁂𑀬𑁆𑀬𑀸𑀲𑀻𑀢𑀺 𑀳𑀢𑁆𑀣𑁂𑀦 𑀧𑀭𑀺𑀫𑀚𑁆𑀚𑁂𑀬𑁆𑀬𑀸𑀲𑀺.

𑁧𑁧. 𑀚𑀸𑀡𑀼𑀲𑁆𑀲𑁄𑀡𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁭𑁭. 𑀏𑀓𑀸𑀤𑀲𑀫𑁂 𑀉𑀧𑀓𑀧𑁆𑀧𑀢𑀽𑀢𑀺 𑀧𑀸𑀧𑀼𑀡𑀸𑀢𑀼. 𑀞𑀸𑀦𑁂𑀢𑀺 𑀑𑀓𑀸𑀲𑁂. 𑀦𑁄 𑀅𑀝𑁆𑀞𑀸𑀦𑁂𑀢𑀺 𑀦𑁄 𑀅𑀦𑁄𑀓𑀸𑀲𑁂. 𑀦𑁂𑀭𑀬𑀺𑀓𑀸𑀦𑀁 𑀆𑀳𑀸𑀭𑁄 𑀦𑀸𑀫 𑀢𑀢𑁆𑀣 𑀦𑀺𑀩𑁆𑀩𑀢𑁆𑀢𑀦𑀓𑀫𑁆𑀫𑀫𑁂𑀯. 𑀢𑁂𑀦𑁂𑀯 𑀳𑀺 𑀢𑁂 𑀢𑀢𑁆𑀣 𑀬𑀸𑀧𑁂𑀦𑁆𑀢𑀺. 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀓𑀸𑀦𑀁 𑀧𑀦 𑀢𑀺𑀡𑀧𑀡𑁆𑀡𑀸𑀤𑀺𑀯𑀲𑁂𑀦 𑀆𑀳𑀸𑀭𑁄 𑀯𑁂𑀤𑀺𑀢𑀩𑁆𑀩𑁄. 𑀫𑀦𑀼𑀲𑁆𑀲𑀸𑀦𑀁 𑀑𑀤𑀦𑀓𑀼𑀫𑁆𑀫𑀸𑀲𑀸𑀤𑀺𑀯𑀲𑁂𑀦, 𑀤𑁂𑀯𑀸𑀦𑀁 𑀲𑀼𑀥𑀸𑀪𑁄𑀚𑀦𑀸𑀤𑀺𑀯𑀲𑁂𑀦, 𑀧𑁂𑀢𑁆𑀢𑀺𑀯𑁂𑀲𑀬𑀺𑀓𑀸𑀦𑀁 𑀔𑁂𑀴𑀲𑀺𑀗𑁆𑀖𑀸𑀡𑀺𑀓𑀸𑀤𑀺𑀯𑀲𑁂𑀦. 𑀬𑀁 𑀯𑀸 𑀧𑀦𑀲𑁆𑀲 𑀇𑀢𑁄 𑀅𑀦𑀼𑀧𑁆𑀧𑀯𑁂𑀘𑁆𑀙𑀦𑁆𑀢𑀻𑀢𑀺 𑀬𑀁 𑀢𑀲𑁆𑀲 𑀫𑀺𑀢𑁆𑀢𑀸𑀤𑀬𑁄 𑀇𑀢𑁄 𑀤𑀤𑀦𑁆𑀢𑀸 𑀅𑀦𑀼𑀧𑀯𑁂𑀲𑁂𑀦𑁆𑀢𑀺. 𑀧𑁂𑀢𑁆𑀢𑀺𑀯𑁂𑀲𑀬𑀺𑀓𑀸 𑀏𑀯 𑀳𑀺 𑀧𑀭𑀤𑀢𑁆𑀢𑀽𑀧𑀚𑀻𑀯𑀺𑀦𑁄 𑀳𑁄𑀦𑁆𑀢𑀺, 𑀦 𑀅𑀜𑁆𑀜𑁂𑀲𑀁 𑀧𑀭𑁂𑀳𑀺 𑀤𑀺𑀦𑁆𑀦𑀁 𑀉𑀧𑀓𑀧𑁆𑀧𑀢𑀺. 𑀤𑀸𑀬𑀓𑁄𑀧𑀺 𑀅𑀦𑀺𑀧𑁆𑀨𑀮𑁄𑀢𑀺 𑀬𑀁 𑀲𑀦𑁆𑀥𑀸𑀬 𑀢𑀁 𑀤𑀸𑀦𑀁 𑀤𑀺𑀦𑁆𑀦𑀁, 𑀢𑀲𑁆𑀲 𑀉𑀧𑀓𑀧𑁆𑀧𑀢𑀼 𑀯𑀸 𑀫𑀸 𑀯𑀸, 𑀤𑀸𑀬𑀓𑁂𑀦 𑀧𑀦 𑀦 𑀲𑀓𑁆𑀓𑀸 𑀦𑀺𑀧𑁆𑀨𑀮𑁂𑀦 𑀪𑀯𑀺𑀢𑀼𑀁, 𑀤𑀸𑀬𑀓𑁄 𑀢𑀲𑁆𑀲 𑀤𑀸𑀦𑀲𑁆𑀲 𑀯𑀺𑀧𑀸𑀓𑀁 𑀮𑀪𑀢𑀺𑀬𑁂𑀯.

𑀅𑀝𑁆𑀞𑀸𑀦𑁂𑀧𑀺 𑀪𑀯𑀁 𑀕𑁄𑀢𑀫𑁄 𑀧𑀭𑀺𑀓𑀧𑁆𑀧𑀁 𑀯𑀤𑀢𑀻𑀢𑀺 𑀅𑀦𑁄𑀓𑀸𑀲𑁂 𑀉𑀧𑁆𑀧𑀦𑁆𑀦𑁂𑀧𑀺 𑀢𑀲𑁆𑀫𑀺𑀁 𑀜𑀸𑀢𑀓𑁂 𑀪𑀯𑀁 𑀕𑁄𑀢𑀫𑁄 𑀤𑀸𑀦𑀲𑁆𑀲 𑀨𑀮𑀁 𑀧𑀭𑀺𑀓𑀧𑁆𑀧𑁂𑀢𑀺𑀬𑁂𑀯 𑀧𑀜𑁆𑀜𑀸𑀧𑁂𑀢𑀺𑀬𑁂𑀯𑀸𑀢𑀺 𑀧𑀼𑀘𑁆𑀙𑀢𑀺. 𑀩𑁆𑀭𑀸𑀳𑁆𑀫𑀡𑀲𑁆𑀲 𑀳𑀺 ‘‘𑀏𑀯𑀁 𑀤𑀺𑀦𑁆𑀦𑀲𑁆𑀲 𑀤𑀸𑀦𑀲𑁆𑀲 𑀨𑀮𑀁 𑀤𑀸𑀬𑀓𑁄 𑀦 𑀮𑀪𑀢𑀻’’𑀢𑀺 𑀮𑀤𑁆𑀥𑀺. 𑀅𑀣𑀲𑁆𑀲 𑀪𑀕𑀯𑀸 𑀧𑀜𑁆𑀳𑀁 𑀧𑀝𑀺𑀚𑀸𑀦𑀺𑀢𑁆𑀯𑀸 ‘‘𑀤𑀸𑀬𑀓𑁄 𑀦𑀸𑀫 𑀬𑀢𑁆𑀣 𑀓𑀢𑁆𑀣𑀘𑀺 𑀧𑀼𑀜𑁆𑀜𑀨𑀮𑀽𑀧𑀚𑀻𑀯𑀺𑀝𑁆𑀞𑀸𑀦𑁂 𑀦𑀺𑀩𑁆𑀩𑀢𑁆𑀢𑁄 𑀤𑀸𑀦𑀲𑁆𑀲 𑀨𑀮𑀁 𑀮𑀪𑀢𑀺𑀬𑁂𑀯𑀸’’𑀢𑀺 𑀤𑀲𑁆𑀲𑁂𑀢𑀼𑀁 𑀇𑀥 𑀩𑁆𑀭𑀸𑀳𑁆𑀫𑀡𑀸𑀢𑀺𑀆𑀤𑀺𑀫𑀸𑀳. 𑀲𑁄 𑀢𑀢𑁆𑀣 𑀮𑀸𑀪𑀻 𑀳𑁄𑀢𑀻𑀢𑀺 𑀲𑁄 𑀢𑀢𑁆𑀣 𑀳𑀢𑁆𑀣𑀺𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑁄𑀧𑀺 𑀫𑀗𑁆𑀕𑀮𑀳𑀢𑁆𑀣𑀺𑀝𑁆𑀞𑀸𑀦𑀁 𑀧𑀢𑁆𑀯𑀸 𑀮𑀸𑀪𑀻 𑀳𑁄𑀢𑀺. 𑀅𑀲𑁆𑀲𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀲𑀸𑀥𑀼𑀯𑀕𑁆𑀕𑁄 𑀉𑀢𑁆𑀢𑀸𑀦𑀢𑁆𑀣𑁄𑀬𑁂𑀯𑀸𑀢𑀺.

𑀚𑀸𑀡𑀼𑀲𑁆𑀲𑁄𑀡𑀺𑀯𑀕𑁆𑀕𑁄 𑀤𑀼𑀢𑀺𑀬𑁄.

𑀘𑀢𑀼𑀢𑁆𑀣𑀧𑀡𑁆𑀡𑀸𑀲𑀓𑀁 𑀦𑀺𑀝𑁆𑀞𑀺𑀢𑀁.

(𑁨𑁧) 𑁧. 𑀓𑀭𑀚𑀓𑀸𑀬𑀯𑀕𑁆𑀕𑁄

𑁨𑁧𑁧. 𑀧𑀜𑁆𑀘𑀫𑀲𑁆𑀲 𑀧𑀞𑀫𑀸𑀤𑀻𑀦𑀺 𑀉𑀢𑁆𑀢𑀸𑀦𑀢𑁆𑀣𑀸𑀦𑁂𑀯.

𑁬. 𑀲𑀁𑀲𑀧𑁆𑀧𑀦𑀻𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁧𑁬. 𑀙𑀝𑁆𑀞𑁂 𑀲𑀁𑀲𑀧𑁆𑀧𑀦𑀻𑀬𑀧𑀭𑀺𑀬𑀸𑀬𑀁 𑀯𑁄, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀧𑀭𑀺𑀬𑀸𑀬𑀦𑁆𑀢𑀺 𑀲𑀁𑀲𑀧𑁆𑀧𑀦𑀲𑁆𑀲 𑀓𑀸𑀭𑀡𑀁 𑀤𑁂𑀲𑀦𑀸𑀲𑀗𑁆𑀔𑀸𑀢𑀁 𑀥𑀫𑁆𑀫𑀤𑁂𑀲𑀦𑀁. 𑀲𑀁𑀲𑀧𑁆𑀧𑀢𑀻𑀢𑀺 𑀢𑀁 𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 𑀆𑀲𑀧𑁆𑀧𑀢𑀺 𑀧𑀭𑀺𑀲𑀧𑁆𑀧𑀢𑀺 𑀯𑀺𑀧𑁆𑀨𑀦𑁆𑀤𑀢𑀺. 𑀚𑀺𑀫𑁆𑀳𑀸 𑀕𑀢𑀻𑀢𑀺 𑀢𑁂𑀦 𑀓𑀫𑁆𑀫𑁂𑀦 𑀬𑀁 𑀕𑀢𑀺𑀁 𑀕𑀫𑀺𑀲𑁆𑀲𑀢𑀺, 𑀲𑀸 𑀚𑀺𑀫𑁆𑀳𑀸 𑀳𑁄𑀢𑀺. 𑀚𑀺𑀫𑁆𑀳𑀼𑀧𑀧𑀢𑁆𑀢𑀻𑀢𑀺 𑀢𑀲𑁆𑀲 𑀬𑀁 𑀕𑀢𑀺𑀁 𑀉𑀧𑀧𑀚𑁆𑀚𑀺𑀲𑁆𑀲𑀢𑀺, 𑀲𑀸𑀧𑀺 𑀚𑀺𑀫𑁆𑀳𑀸𑀯 𑀳𑁄𑀢𑀺. 𑀲𑀁𑀲𑀧𑁆𑀧𑀚𑀸𑀢𑀺𑀓𑀸𑀢𑀺 𑀲𑀁𑀲𑀧𑁆𑀧𑀦𑀲𑀪𑀸𑀯𑀸. 𑀪𑀽𑀢𑀸 𑀪𑀽𑀢𑀲𑁆𑀲 𑀉𑀧𑀧𑀢𑁆𑀢𑀺 𑀳𑁄𑀢𑀻𑀢𑀺 𑀪𑀽𑀢𑀲𑁆𑀫𑀸 𑀲𑀪𑀸𑀯𑀢𑁄 𑀯𑀺𑀚𑁆𑀚𑀫𑀸𑀦𑀓𑀫𑁆𑀫𑀸 𑀲𑀢𑁆𑀢𑀲𑁆𑀲 𑀦𑀺𑀩𑁆𑀩𑀢𑁆𑀢𑀺 𑀳𑁄𑀢𑀺. 𑀨𑀲𑁆𑀲𑀸 𑀨𑀼𑀲𑀦𑁆𑀢𑀻𑀢𑀺 𑀯𑀺𑀧𑀸𑀓𑀨𑀲𑁆𑀲𑀸 𑀨𑀼𑀲𑀦𑁆𑀢𑀺.

𑁭-𑁮. 𑀲𑀜𑁆𑀘𑁂𑀢𑀦𑀺𑀓𑀲𑀼𑀢𑁆𑀢𑀤𑁆𑀯𑀬𑀯𑀡𑁆𑀡𑀦𑀸

𑁨𑁧𑁭-𑁨𑁧𑁮. 𑀲𑀢𑁆𑀢𑀫𑁂 𑀲𑀜𑁆𑀘𑁂𑀢𑀦𑀺𑀓𑀸𑀦𑀦𑁆𑀢𑀺 𑀘𑁂𑀢𑁂𑀢𑁆𑀯𑀸 𑀧𑀓𑀧𑁆𑀧𑁂𑀢𑁆𑀯𑀸 𑀓𑀢𑀸𑀦𑀁. 𑀉𑀧𑀘𑀺𑀢𑀸𑀦𑀦𑁆𑀢𑀺 𑀘𑀺𑀢𑀸𑀦𑀁 𑀯𑀟𑁆𑀠𑀺𑀢𑀸𑀦𑀁. 𑀅𑀧𑁆𑀧𑀝𑀺𑀲𑀁𑀯𑁂𑀤𑀺𑀢𑁆𑀯𑀸𑀢𑀺 𑀢𑁂𑀲𑀁 𑀓𑀫𑁆𑀫𑀸𑀦𑀁 𑀯𑀺𑀧𑀸𑀓𑀁 𑀅𑀯𑁂𑀤𑀺𑀬𑀺𑀢𑁆𑀯𑀸. 𑀩𑁆𑀬𑀦𑁆𑀢𑀻𑀪𑀸𑀯𑀦𑁆𑀢𑀺 𑀯𑀺𑀕𑀢𑀦𑁆𑀢𑀪𑀸𑀯𑀁 𑀢𑁂𑀲𑀁 𑀓𑀫𑁆𑀫𑀸𑀦𑀁 𑀧𑀭𑀺𑀘𑁆𑀙𑁂𑀤𑀧𑀭𑀺𑀯𑀝𑀼𑀫𑀢𑀸𑀓𑀭𑀡𑀁. 𑀢𑀜𑁆𑀘 𑀔𑁄 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂𑀢𑀺 𑀢𑀜𑁆𑀘 𑀔𑁄 𑀯𑀺𑀧𑀸𑀓𑀁 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂. 𑀉𑀧𑀧𑀚𑁆𑀚𑀦𑁆𑀢𑀺 𑀉𑀧𑀧𑀚𑁆𑀚𑀯𑁂𑀤𑀦𑀻𑀬𑀁 𑀅𑀦𑀦𑁆𑀢𑀭𑁂 𑀅𑀢𑁆𑀢𑀪𑀸𑀯𑁂. 𑀅𑀧𑀭𑁂 𑀯𑀸 𑀧𑀭𑀺𑀬𑀸𑀬𑁂𑀢𑀺 𑀅𑀧𑀭𑀧𑀭𑀺𑀬𑀸𑀬𑀯𑁂𑀤𑀦𑀻𑀬𑀁 𑀧𑀦 𑀲𑀁𑀲𑀸𑀭𑀧𑁆𑀧𑀯𑀢𑁆𑀢𑁂 𑀲𑀢𑀺 𑀲𑀳𑀲𑁆𑀲𑀺𑀫𑁂𑀧𑀺 𑀅𑀢𑁆𑀢𑀪𑀸𑀯𑁂𑀢𑀺. 𑀇𑀫𑀺𑀦𑀸 𑀇𑀤𑀁 𑀤𑀲𑁆𑀲𑁂𑀢𑀺 ‘‘𑀲𑀁𑀲𑀸𑀭𑀧𑁆𑀧𑀯𑀢𑁆𑀢𑁂 𑀧𑀝𑀺𑀮𑀤𑁆𑀥𑀯𑀺𑀧𑀸𑀓𑀸𑀭𑀳𑀓𑀫𑁆𑀫𑁂 𑀦 𑀯𑀺𑀚𑁆𑀚𑀢𑀺 𑀲𑁄 𑀚𑀕𑀢𑀺𑀧𑁆𑀧𑀤𑁂𑀲𑁄, 𑀬𑀢𑁆𑀣 𑀞𑀺𑀢𑁄 𑀫𑀼𑀘𑁆𑀘𑁂𑀬𑁆𑀬 𑀧𑀸𑀧𑀓𑀫𑁆𑀫𑀸’’𑀢𑀺. 𑀢𑀺𑀯𑀺𑀥𑀸𑀢𑀺 𑀢𑀺𑀧𑁆𑀧𑀓𑀸𑀭𑀸. 𑀓𑀸𑀬𑀓𑀫𑁆𑀫𑀦𑁆𑀢𑀲𑀦𑁆𑀤𑁄𑀲𑀩𑁆𑀬𑀸𑀧𑀢𑁆𑀢𑀻𑀢𑀺 𑀓𑀸𑀬𑀓𑀫𑁆𑀫𑀦𑁆𑀢𑀲𑀗𑁆𑀔𑀸𑀢𑀸 𑀯𑀺𑀧𑀢𑁆𑀢𑀺. 𑀇𑀫𑀺𑀦𑀸 𑀦𑀬𑁂𑀦 𑀲𑀩𑁆𑀩𑀧𑀤𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀅𑀝𑁆𑀞𑀫𑁂 𑀅𑀧𑀡𑁆𑀡𑀓𑁄 𑀫𑀡𑀻𑀢𑀺 𑀲𑀫𑀦𑁆𑀢𑀢𑁄 𑀘𑀢𑀼𑀭𑀲𑁆𑀲𑁄 𑀧𑀸𑀲𑀓𑁄.

𑁯. 𑀓𑀭𑀚𑀓𑀸𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁧𑁯. 𑀦𑀯𑀫𑁂 𑀤𑀼𑀓𑁆𑀔𑀲𑁆𑀲𑀸𑀢𑀺 𑀯𑀺𑀧𑀸𑀓𑀤𑀼𑀓𑁆𑀔𑀲𑁆𑀲, 𑀯𑀝𑁆𑀝𑀤𑀼𑀓𑁆𑀔𑀲𑁆𑀲𑁂𑀯 𑀯𑀸. 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀫𑀡𑀺𑀑𑀧𑀫𑁆𑀫𑀁 𑀦𑀢𑁆𑀣𑀺. 𑀏𑀯𑀁 𑀯𑀺𑀕𑀢𑀸𑀪𑀺𑀚𑁆𑀛𑁄𑀢𑀺 𑀏𑀯𑀦𑁆𑀢𑀺 𑀦𑀺𑀧𑀸𑀢𑀫𑀢𑁆𑀢𑀁. 𑀬𑀣𑀸 𑀯𑀸 𑀫𑁂𑀢𑁆𑀢𑀁 𑀪𑀸𑀯𑁂𑀦𑁆𑀢𑀸 𑀯𑀺𑀕𑀢𑀸𑀪𑀺𑀚𑁆𑀛𑀸 𑀪𑀯𑀦𑁆𑀢𑀺, 𑀏𑀯𑀁 𑀯𑀺𑀕𑀢𑀸𑀪𑀺𑀚𑁆𑀛𑁄. 𑀏𑀯𑀫𑀲𑁆𑀲 𑀯𑀺𑀕𑀢𑀸𑀪𑀺𑀚𑁆𑀛𑀢𑀸𑀤𑀻𑀳𑀺 𑀦𑀻𑀯𑀭𑀡𑀯𑀺𑀓𑁆𑀔𑀫𑁆𑀪𑀦𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀅𑀓𑀼𑀲𑀮𑀦𑀺𑀲𑁆𑀲𑀭𑀡𑀸𑀦𑀺 𑀓𑀣𑁂𑀦𑁆𑀢𑁄 𑀫𑁂𑀢𑁆𑀢𑀸𑀲𑀳𑀕𑀢𑁂𑀦𑀸𑀢𑀺𑀆𑀤𑀺𑀫𑀸𑀳. 𑀅𑀧𑁆𑀧𑀫𑀸𑀡𑀦𑁆𑀢𑀺 𑀅𑀧𑁆𑀧𑀫𑀸𑀡𑀲𑀢𑁆𑀢𑀸𑀭𑀫𑁆𑀫𑀡𑀢𑀸𑀬 𑀘𑀺𑀡𑁆𑀡𑀯𑀲𑀺𑀢𑀸𑀬 𑀯𑀸 𑀅𑀧𑁆𑀧𑀫𑀸𑀡𑀁. 𑀧𑀫𑀸𑀡𑀓𑀢𑀁 𑀓𑀫𑁆𑀫𑀁 𑀦𑀸𑀫 𑀓𑀸𑀫𑀸𑀯𑀘𑀭𑀓𑀫𑁆𑀫𑀁. 𑀦 𑀢𑀁 𑀢𑀢𑁆𑀭𑀸𑀯𑀢𑀺𑀝𑁆𑀞𑀢𑀻𑀢𑀺 𑀢𑀁 𑀫𑀳𑁄𑀖𑁄 𑀧𑀭𑀺𑀢𑁆𑀢𑀁 𑀉𑀤𑀓𑀁 𑀯𑀺𑀬 𑀅𑀢𑁆𑀢𑀦𑁄 𑀑𑀓𑀸𑀲𑀁 𑀕𑀳𑁂𑀢𑁆𑀯𑀸 𑀞𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀅𑀣 𑀔𑁄 𑀦𑀁 𑀑𑀖𑁂 𑀧𑀭𑀺𑀢𑁆𑀢𑀁 𑀉𑀤𑀓𑀁 𑀯𑀺𑀬 𑀇𑀤𑀫𑁂𑀯 𑀅𑀧𑁆𑀧𑀫𑀸𑀡𑀁 𑀓𑀫𑁆𑀫𑀁 𑀅𑀚𑁆𑀛𑁄𑀢𑁆𑀣𑀭𑀺𑀢𑁆𑀯𑀸 𑀅𑀢𑁆𑀢𑀦𑁄 𑀯𑀺𑀧𑀸𑀓𑀁 𑀦𑀺𑀩𑁆𑀩𑀢𑁆𑀢𑁂𑀢𑀺. 𑀤𑀳𑀭𑀢𑀕𑁆𑀕𑁂𑀢𑀺 𑀤𑀳𑀭𑀓𑀸𑀮𑀢𑁄 𑀧𑀝𑁆𑀞𑀸𑀬.

𑀦𑀸𑀬𑀁 𑀓𑀸𑀬𑁄 𑀆𑀤𑀸𑀬𑀕𑀫𑀦𑀺𑀬𑁄𑀢𑀺 𑀇𑀫𑀁 𑀓𑀸𑀬𑀁 𑀕𑀳𑁂𑀢𑁆𑀯𑀸 𑀧𑀭𑀮𑁄𑀓𑀁 𑀕𑀦𑁆𑀢𑀼𑀁 𑀦𑀸𑀫 𑀦 𑀲𑀓𑁆𑀓𑀸𑀢𑀺 𑀅𑀢𑁆𑀣𑁄. 𑀘𑀺𑀢𑁆𑀢𑀦𑁆𑀢𑀭𑁄𑀢𑀺 𑀘𑀺𑀢𑁆𑀢𑀓𑀸𑀭𑀡𑁄, 𑀅𑀣 𑀯𑀸 𑀘𑀺𑀢𑁆𑀢𑁂𑀦𑁂𑀯 𑀅𑀦𑁆𑀢𑀭𑀺𑀓𑁄. 𑀏𑀓𑀲𑁆𑀲𑁂𑀯 𑀳𑀺 𑀘𑀼𑀢𑀺𑀘𑀺𑀢𑁆𑀢𑀲𑁆𑀲 𑀅𑀦𑀦𑁆𑀢𑀭𑀸 𑀤𑀼𑀢𑀺𑀬𑁂 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑁂 𑀤𑁂𑀯𑁄 𑀦𑀸𑀫 𑀳𑁄𑀢𑀺, 𑀦𑁂𑀭𑀬𑀺𑀓𑁄 𑀦𑀸𑀫 𑀳𑁄𑀢𑀺, 𑀢𑀺𑀭𑀘𑁆𑀙𑀸𑀦𑀕𑀢𑁄 𑀦𑀸𑀫 𑀳𑁄𑀢𑀺. 𑀧𑀼𑀭𑀺𑀫𑀦𑀬𑁂𑀧𑀺 𑀘𑀺𑀢𑁆𑀢𑁂𑀦 𑀓𑀸𑀭𑀡𑀪𑀽𑀢𑁂𑀦 𑀤𑁂𑀯𑁄 𑀦𑁂𑀭𑀬𑀺𑀓𑁄 𑀯𑀸 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀲𑀩𑁆𑀩𑀁 𑀢𑀁 𑀇𑀥 𑀯𑁂𑀤𑀦𑀻𑀬𑀦𑁆𑀢𑀺 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀓𑁄𑀝𑁆𑀞𑀸𑀲𑀯𑀦𑁂𑀢𑀁 𑀯𑀼𑀢𑁆𑀢𑀁. 𑀦 𑀢𑀁 𑀅𑀦𑀼𑀕𑀁 𑀪𑀯𑀺𑀲𑁆𑀲𑀢𑀻𑀢𑀺 𑀫𑁂𑀢𑁆𑀢𑀸𑀬 𑀉𑀧𑀧𑀚𑁆𑀚𑀯𑁂𑀤𑀦𑀻𑀬𑀪𑀸𑀯𑀲𑁆𑀲 𑀉𑀧𑀘𑁆𑀙𑀺𑀦𑁆𑀦𑀢𑁆𑀢𑀸 𑀉𑀧𑀧𑀚𑁆𑀚𑀯𑁂𑀤𑀦𑀻𑀬𑀯𑀲𑁂𑀦 𑀦 𑀅𑀦𑀼𑀕𑀢𑀁 𑀪𑀯𑀺𑀲𑁆𑀲𑀢𑀺. 𑀇𑀤𑀁 𑀲𑁄𑀢𑀸𑀧𑀦𑁆𑀦𑀲𑀓𑀤𑀸𑀕𑀸𑀫𑀺𑀅𑀭𑀺𑀬𑀧𑀼𑀕𑁆𑀕𑀮𑀸𑀦𑀁 𑀧𑀘𑁆𑀘𑀯𑁂𑀓𑁆𑀔𑀡𑀁 𑀯𑁂𑀤𑀺𑀢𑀩𑁆𑀩𑀁. 𑀅𑀦𑀸𑀕𑀸𑀫𑀺𑀢𑀸𑀬𑀸𑀢𑀺 𑀛𑀸𑀦𑀸𑀦𑀸𑀕𑀸𑀫𑀺𑀢𑀸𑀬. 𑀇𑀥𑀧𑀜𑁆𑀜𑀲𑁆𑀲𑀸𑀢𑀺 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀧𑀜𑁆𑀜𑀸 𑀇𑀥𑀧𑀜𑁆𑀜𑀸 𑀦𑀸𑀫, 𑀲𑀸𑀲𑀦𑀘𑀭𑀺𑀢𑀸𑀬 𑀅𑀭𑀺𑀬𑀧𑀜𑁆𑀜𑀸𑀬 𑀞𑀺𑀢𑀲𑁆𑀲 𑀅𑀭𑀺𑀬𑀲𑀸𑀯𑀓𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀉𑀢𑁆𑀢𑀭𑀺𑀯𑀺𑀫𑀼𑀢𑁆𑀢𑀺𑀦𑁆𑀢𑀺 𑀅𑀭𑀳𑀢𑁆𑀢𑀁. 𑀤𑀲𑀫𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀓𑀭𑀚𑀓𑀸𑀬𑀯𑀕𑁆𑀕𑁄 𑀧𑀞𑀫𑁄.

(𑁨𑁨) 𑁨. 𑀲𑀸𑀫𑀜𑁆𑀜𑀯𑀕𑁆𑀕𑀯𑀡𑁆𑀡𑀦𑀸

𑁨𑁨𑁧. 𑀤𑀼𑀢𑀺𑀬𑀲𑁆𑀲 𑀧𑀞𑀫𑀁 𑀆𑀤𑀺𑀁 𑀓𑀢𑁆𑀯𑀸 𑀲𑀩𑁆𑀩𑀸 𑀧𑁂𑀬𑁆𑀬𑀸𑀮𑀢𑀦𑁆𑀢𑀺 𑀉𑀢𑁆𑀢𑀸𑀦𑀢𑁆𑀣𑀸𑀬𑁂𑀯𑀸𑀢𑀺.

𑀫𑀦𑁄𑀭𑀣𑀧𑀽𑀭𑀡𑀺𑀬𑀸 𑀅𑀗𑁆𑀕𑀼𑀢𑁆𑀢𑀭𑀦𑀺𑀓𑀸𑀬-𑀅𑀝𑁆𑀞𑀓𑀣𑀸𑀬

𑀤𑀲𑀓𑀦𑀺𑀧𑀸𑀢𑀲𑁆𑀲 𑀲𑀁𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.