.𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲.

𑀅𑀗𑁆𑀕𑀼𑀢𑁆𑀢𑀭𑀦𑀺𑀓𑀸𑀬𑁂

𑀏𑀓𑀸𑀤𑀲𑀓𑀦𑀺𑀧𑀸𑀢-𑀅𑀝𑁆𑀞𑀓𑀣𑀸

𑁧. 𑀦𑀺𑀲𑁆𑀲𑀬𑀯𑀕𑁆𑀕𑁄

𑁧-𑁬. 𑀓𑀺𑀫𑀢𑁆𑀣𑀺𑀬𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧-𑁬. 𑀏𑀓𑀸𑀤𑀲𑀓𑀦𑀺𑀧𑀸𑀢𑀲𑁆𑀲 𑀧𑀞𑀫𑀸𑀤𑀻𑀦𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀸𑀦𑁂𑀯. 𑀓𑁂𑀯𑀮𑀜𑁆𑀘𑁂𑀢𑁆𑀣 𑀆𑀤𑀺𑀢𑁄 𑀧𑀜𑁆𑀘𑀲𑀼 𑀦𑀺𑀩𑁆𑀩𑀺𑀤𑀸𑀯𑀺𑀭𑀸𑀕𑀁 𑀤𑁆𑀯𑀺𑀥𑀸 𑀪𑀺𑀦𑁆𑀤𑀺𑀢𑁆𑀯𑀸 𑀏𑀓𑀸𑀤𑀲𑀗𑁆𑀕𑀸𑀦𑀺 𑀓𑀢𑀸𑀦𑀺. 𑀙𑀝𑁆𑀞𑁂 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀁 𑀅𑀥𑀺𑀓𑀁.

𑁭-𑁮. 𑀧𑀞𑀫𑀲𑀜𑁆𑀜𑀸𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁭-𑁮. 𑀲𑀢𑁆𑀢𑀫𑁂 𑀅𑀢𑁆𑀣𑁂𑀦 𑀅𑀢𑁆𑀣𑁄𑀢𑀺 𑀅𑀢𑁆𑀣𑁂𑀦 𑀲𑀤𑁆𑀥𑀺𑀫𑀢𑁆𑀣𑁄. 𑀩𑁆𑀬𑀜𑁆𑀚𑀦𑁂𑀦 𑀩𑁆𑀬𑀜𑁆𑀚𑀦𑀦𑁆𑀢𑀺 𑀩𑁆𑀬𑀜𑁆𑀚𑀦𑁂𑀦 𑀲𑀤𑁆𑀥𑀺𑀁 𑀩𑁆𑀬𑀜𑁆𑀚𑀦𑀁. 𑀲𑀁𑀲𑀦𑁆𑀤𑀺𑀲𑁆𑀲𑀢𑀻𑀢𑀺 𑀲𑀫𑁆𑀧𑀯𑀢𑁆𑀢𑀺𑀲𑁆𑀲𑀢𑀺. 𑀲𑀫𑁂𑀲𑁆𑀲𑀢𑀻𑀢𑀺 𑀲𑀫𑀸𑀦𑀁 𑀪𑀯𑀺𑀲𑁆𑀲𑀢𑀺. 𑀦 𑀯𑀺𑀕𑁆𑀕𑀬𑁆𑀳𑀺𑀲𑁆𑀲𑀢𑀻𑀢𑀺 𑀦 𑀯𑀺𑀭𑀚𑁆𑀛𑀺𑀲𑁆𑀲𑀢𑀺. 𑀅𑀕𑁆𑀕𑀧𑀤𑀲𑁆𑀫𑀺𑀦𑁆𑀢𑀺 𑀦𑀺𑀩𑁆𑀩𑀸𑀦𑁂. 𑀅𑀝𑁆𑀞𑀫𑁂 𑀧𑀘𑁆𑀘𑀯𑁂𑀓𑁆𑀔𑀡𑀸 𑀓𑀣𑀺𑀢𑀸.

𑁯. 𑀲𑀤𑁆𑀥𑀲𑀼𑀢𑁆𑀢𑀯𑀡𑁆𑀡𑀦𑀸

𑁯. 𑀦𑀯𑀫𑁂 𑀤𑁄𑀡𑀺𑀬𑀸 𑀩𑀤𑁆𑀥𑁄𑀢𑀺 𑀬𑀯𑀲𑀲𑁆𑀲𑀤𑁄𑀡𑀺𑀬𑀸 𑀲𑀫𑀻𑀧𑁂 𑀩𑀤𑁆𑀥𑁄. 𑀅𑀦𑁆𑀢𑀭𑀁 𑀓𑀭𑀺𑀢𑁆𑀯𑀸𑀢𑀺 𑀅𑀩𑁆𑀪𑀦𑁆𑀢𑀭𑁂 𑀓𑀢𑁆𑀯𑀸. 𑀛𑀸𑀬𑀢𑀻𑀢𑀺 𑀘𑀺𑀦𑁆𑀢𑁂𑀢𑀺. 𑀧𑀚𑁆𑀛𑀸𑀬𑀢𑀻𑀢𑀺 𑀇𑀢𑁄 𑀘𑀺𑀢𑁄 𑀘 𑀦𑀸𑀦𑀧𑁆𑀧𑀓𑀸𑀭𑀓𑀁 𑀛𑀸𑀬𑀢𑀺. 𑀦𑀺𑀚𑁆𑀛𑀸𑀬𑀢𑀻𑀢𑀺 𑀦𑀺𑀭𑀦𑁆𑀢𑀭𑀯𑀲𑁂𑀦 𑀦𑀺𑀩𑀤𑁆𑀥𑀁 𑀛𑀸𑀬𑀢𑀺. 𑀧𑀣𑀯𑀺𑀫𑁆𑀧𑀺 𑀦𑀺𑀲𑁆𑀲𑀸𑀬 𑀛𑀸𑀬𑀢𑀻𑀢𑀺 𑀲𑀫𑀸𑀧𑀢𑁆𑀢𑀺𑀬𑀁 𑀲𑀦𑀺𑀓𑀦𑁆𑀢𑀺𑀓𑀯𑀲𑁂𑀦𑁂𑀢𑀁 𑀯𑀼𑀢𑁆𑀢𑀁. 𑀲𑀫𑀸𑀧𑀢𑁆𑀢𑀺𑀬𑀜𑁆𑀳𑀺 𑀲𑀦𑀺𑀓𑀦𑁆𑀢𑀺𑀓𑀢𑁆𑀢𑀸 𑀏𑀲 𑀔𑀴𑀼𑀗𑁆𑀓𑁄 𑀦𑀸𑀫 𑀓𑀢𑁄. 𑀆𑀧𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀓𑀣𑀜𑁆𑀘 𑀲𑀤𑁆𑀥 𑀆𑀚𑀸𑀦𑀻𑀬𑀛𑀸𑀬𑀺𑀢𑀁 𑀳𑁄𑀢𑀻𑀢𑀺 𑀓𑀣𑀁 𑀓𑀸𑀭𑀡𑀸𑀓𑀸𑀭𑀡𑀁 𑀚𑀸𑀦𑀦𑁆𑀢𑀲𑁆𑀲 𑀲𑀺𑀦𑁆𑀥𑀯𑀲𑁆𑀲 𑀛𑀸𑀬𑀺𑀢𑀁 𑀳𑁄𑀢𑀺. 𑀬𑀣𑀸 𑀇𑀡𑀦𑁆𑀢𑀺𑀆𑀤𑀻𑀲𑀼 𑀇𑀡𑀲𑀤𑀺𑀲𑀁 𑀩𑀦𑁆𑀥𑀦𑀲𑀤𑀺𑀲𑀁 𑀥𑀦𑀚𑀸𑀦𑀺𑀲𑀤𑀺𑀲𑀁 𑀓𑀮𑀺𑀲𑀗𑁆𑀔𑀸𑀢𑀫𑀳𑀸𑀧𑀭𑀸𑀥𑀲𑀤𑀺𑀲𑀜𑁆𑀘 𑀓𑀢𑁆𑀯𑀸 𑀅𑀢𑁆𑀢𑀦𑁄 𑀅𑀪𑀺𑀫𑀼𑀔𑀲𑁆𑀲 𑀧𑀢𑁄𑀤𑀲𑁆𑀲 𑀅𑀚𑁆𑀛𑁄𑀳𑀭𑀡𑀲𑀗𑁆𑀔𑀸𑀢𑀁 𑀧𑀢𑀦𑀁 𑀯𑀺𑀧𑀲𑁆𑀲𑀢𑀻𑀢𑀺 𑀅𑀢𑁆𑀣𑁄. 𑀦𑁂𑀯 𑀧𑀣𑀯𑀺𑀁 𑀦𑀺𑀲𑁆𑀲𑀸𑀬 𑀛𑀸𑀬𑀢𑀻𑀢𑀺 𑀲𑀫𑀸𑀧𑀢𑁆𑀢𑀺𑀲𑀼𑀔𑀦𑀺𑀓𑀦𑁆𑀢𑀺𑀬𑀸 𑀅𑀪𑀸𑀯𑁂𑀦 𑀧𑀣𑀯𑀺𑀆𑀭𑀫𑁆𑀫𑀡𑀸𑀬 𑀘𑀢𑀼𑀓𑁆𑀓𑀧𑀜𑁆𑀘𑀓𑀚𑁆𑀛𑀸𑀦𑀲𑀜𑁆𑀜𑀸𑀬 𑀦 𑀛𑀸𑀬𑀢𑀺, 𑀦𑀺𑀬𑀦𑁆𑀢𑀺𑀬𑀸 𑀅𑀪𑀸𑀯𑁂𑀦𑁂𑀯 𑀲𑁄 𑀆𑀚𑀸𑀦𑀻𑀬𑁄 𑀦𑀸𑀫 𑀳𑁄𑀢𑀻𑀢𑀺. 𑀛𑀸𑀬𑀢𑀺 𑀘 𑀧𑀦𑀸𑀢𑀺 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀸𑀬 𑀨𑀮𑀲𑀫𑀸𑀧𑀢𑁆𑀢𑀺𑀬𑀸 𑀛𑀸𑀬𑀢𑀺. 𑀧𑀣𑀯𑀺𑀬𑀁 𑀧𑀣𑀯𑀺𑀲𑀜𑁆𑀜𑀸 𑀯𑀺𑀪𑀽𑀢𑀸 𑀳𑁄𑀢𑀻𑀢𑀺 𑀧𑀣𑀯𑀸𑀭𑀫𑁆𑀫𑀡𑁂 𑀉𑀧𑁆𑀧𑀦𑁆𑀦𑀸 𑀘𑀢𑀼𑀓𑁆𑀓𑀧𑀜𑁆𑀘𑀓𑀚𑁆𑀛𑀸𑀦𑀲𑀜𑁆𑀜𑀸 𑀯𑀺𑀪𑀽𑀢𑀸 𑀧𑀸𑀓𑀝𑀸 𑀳𑁄𑀢𑀺. ‘‘𑀯𑀺𑀪𑀽𑀢𑀸, 𑀪𑀦𑁆𑀢𑁂, 𑀭𑀽𑀧𑀲𑀜𑁆𑀜𑀸 𑀅𑀯𑀺𑀪𑀽𑀢𑀸 𑀅𑀝𑁆𑀞𑀺𑀓𑀲𑀜𑁆𑀜𑀸’’𑀢𑀺 𑀇𑀫𑀲𑁆𑀫𑀺𑀜𑁆𑀳𑀺 𑀲𑀼𑀢𑁆𑀢𑁂 𑀲𑀫𑀢𑀺𑀓𑁆𑀓𑀫𑀲𑁆𑀲 𑀅𑀢𑁆𑀣𑀺𑀢𑀸𑀬 𑀯𑀺𑀪𑀽𑀢𑀢𑀸 𑀯𑀼𑀢𑁆𑀢𑀸, 𑀇𑀥 𑀧𑀦 𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀅𑀦𑀺𑀘𑁆𑀘𑀤𑀼𑀓𑁆𑀔𑀸𑀦𑀢𑁆𑀢𑀢𑁄 𑀤𑀺𑀝𑁆𑀞𑀢𑁆𑀢𑀸 𑀯𑀺𑀪𑀽𑀢𑀸 𑀦𑀸𑀫 𑀚𑀸𑀢𑀸. 𑀆𑀧𑁄𑀲𑀜𑁆𑀜𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀏𑀯𑀫𑁂𑀢𑁆𑀣 𑀳𑁂𑀝𑁆𑀞𑀸 𑀯𑀺𑀬 𑀲𑀫𑀸𑀧𑀢𑁆𑀢𑀺𑀯𑀲𑁂𑀦 𑀲𑀫𑀢𑀺𑀓𑁆𑀓𑀫𑀁 𑀅𑀯𑀢𑁆𑀯𑀸 𑀯𑀺𑀧𑀲𑁆𑀲𑀦𑀸𑀘𑀸𑀭𑀯𑀲𑁂𑀦 𑀲𑀫𑀢𑀺𑀓𑁆𑀓𑀫𑁄 𑀯𑀼𑀢𑁆𑀢𑁄. 𑀏𑀯𑀁 𑀛𑀸𑀬𑀻𑀢𑀺 𑀏𑀯𑀁 𑀯𑀺𑀧𑀲𑁆𑀲𑀦𑀸𑀧𑀝𑀺𑀧𑀸𑀝𑀺𑀬𑀸 𑀆𑀕𑀦𑁆𑀢𑁆𑀯𑀸 𑀉𑀧𑁆𑀧𑀸𑀤𑀺𑀢𑀸𑀬 𑀨𑀮𑀲𑀫𑀸𑀧𑀢𑁆𑀢𑀺𑀬𑀸 𑀛𑀸𑀬𑀦𑁆𑀢𑁄.

𑁧𑁦. 𑀫𑁄𑀭𑀦𑀺𑀯𑀸𑀧𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦. 𑀤𑀲𑀫𑁂 𑀅𑀘𑁆𑀘𑀦𑁆𑀢𑀦𑀺𑀝𑁆𑀞𑁄𑀢𑀺 𑀅𑀦𑁆𑀢𑀁 𑀅𑀢𑀻𑀢𑀢𑁆𑀢𑀸 𑀅𑀘𑁆𑀘𑀦𑁆𑀢𑀲𑀗𑁆𑀔𑀸𑀢𑀁 𑀅𑀯𑀺𑀦𑀸𑀲𑀥𑀫𑁆𑀫𑀁 𑀦𑀺𑀩𑁆𑀩𑀸𑀦𑀁 𑀦𑀺𑀝𑁆𑀞𑀸 𑀅𑀲𑁆𑀲𑀸𑀢𑀺 𑀅𑀘𑁆𑀘𑀦𑁆𑀢𑀦𑀺𑀝𑁆𑀞𑁄. 𑀇𑀫𑀺𑀦𑀸 𑀦𑀬𑁂𑀦 𑀲𑁂𑀲𑀧𑀤𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀚𑀦𑁂𑀢𑀲𑁆𑀫𑀺𑀦𑁆𑀢𑀺 𑀚𑀦𑀺𑀢𑀲𑁆𑀫𑀺𑀁, 𑀧𑀚𑀸𑀬𑀸𑀢𑀺 𑀅𑀢𑁆𑀣𑁄. 𑀬𑁂 𑀕𑁄𑀢𑁆𑀢𑀧𑀝𑀺𑀲𑀸𑀭𑀺𑀦𑁄𑀢𑀺 𑀬𑁂 𑀚𑀦𑀸 𑀢𑀲𑁆𑀫𑀺𑀁 𑀕𑁄𑀢𑁆𑀢𑁂 𑀧𑀝𑀺𑀲𑀭𑀦𑁆𑀢𑀺 ‘‘𑀅𑀳𑀁 𑀕𑁄𑀢𑀫𑁄, 𑀅𑀳𑀁 𑀓𑀲𑁆𑀲𑀧𑁄’’𑀢𑀺, 𑀢𑁂𑀲𑀼 𑀮𑁄𑀓𑁂 𑀕𑁄𑀢𑁆𑀢𑀧𑀝𑀺𑀲𑀸𑀭𑀻𑀲𑀼 𑀔𑀢𑁆𑀢𑀺𑀬𑁄 𑀲𑁂𑀝𑁆𑀞𑁄. 𑀅𑀦𑀼𑀫𑀢𑀸 𑀫𑀬𑀸𑀢𑀺 𑀫𑀫 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑁂𑀦 𑀲𑀤𑁆𑀥𑀺𑀁 𑀲𑀁𑀲𑀦𑁆𑀤𑁂𑀢𑁆𑀯𑀸 𑀤𑁂𑀲𑀺𑀢𑀸 𑀫𑀬𑀸 𑀅𑀦𑀼𑀜𑁆𑀜𑀸𑀢𑀸. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀦𑀺𑀲𑁆𑀲𑀬𑀯𑀕𑁆𑀕𑁄 𑀧𑀞𑀫𑁄.

𑁨. 𑀅𑀦𑀼𑀲𑁆𑀲𑀢𑀺𑀯𑀕𑁆𑀕𑁄

𑁧-𑁨. 𑀫𑀳𑀸𑀦𑀸𑀫𑀲𑀼𑀢𑁆𑀢𑀤𑁆𑀯𑀬𑀯𑀡𑁆𑀡𑀦𑀸

𑁧𑁧-𑁧𑁨. 𑀤𑀼𑀢𑀺𑀬𑀲𑁆𑀲 𑀧𑀞𑀫𑁂 𑀦𑀸𑀦𑀸𑀯𑀺𑀳𑀸𑀭𑁂𑀳𑀺 𑀯𑀺𑀳𑀭𑀢𑀦𑁆𑀢𑀺 𑀕𑀺𑀳𑀻𑀦𑀁 𑀦𑀺𑀩𑀤𑁆𑀥𑁄 𑀏𑀓𑁄 𑀯𑀺𑀳𑀸𑀭𑁄 𑀦𑀸𑀫 𑀦𑀢𑁆𑀣𑀺, 𑀢𑀲𑁆𑀫𑀸 𑀅𑀫𑁆𑀳𑀸𑀓𑀁 𑀅𑀦𑀺𑀩𑀤𑁆𑀥𑀯𑀺𑀳𑀸𑀭𑁂𑀦 𑀯𑀺𑀳𑀭𑀦𑁆𑀢𑀸𑀦𑀁 𑀓𑁂𑀦 𑀯𑀺𑀳𑀸𑀭𑁂𑀦 𑀓𑀢𑀭𑁂𑀦 𑀦𑀺𑀩𑀤𑁆𑀥𑀯𑀺𑀳𑀸𑀭𑁂𑀦 𑀯𑀺𑀳𑀸𑀢𑀩𑁆𑀩𑀦𑁆𑀢𑀺 𑀧𑀼𑀘𑁆𑀙𑀢𑀺. 𑀆𑀭𑀸𑀥𑀓𑁄𑀢𑀺 𑀲𑀫𑁆𑀧𑀸𑀤𑀓𑁄 𑀧𑀭𑀺𑀧𑀽𑀭𑀓𑁄. 𑀥𑀫𑁆𑀫𑀲𑁄𑀢𑀲𑀫𑀸𑀧𑀦𑁆𑀦𑁄 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺𑀁 𑀪𑀸𑀯𑁂𑀢𑀻𑀢𑀺 𑀥𑀫𑁆𑀫𑀲𑁄𑀢𑀲𑀫𑀸𑀧𑀦𑁆𑀦𑁄 𑀳𑀼𑀢𑁆𑀯𑀸 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺𑀁 𑀪𑀸𑀯𑁂𑀢𑀺. 𑀤𑀼𑀢𑀺𑀬𑁂 𑀕𑀺𑀮𑀸𑀦𑀸 𑀯𑀼𑀝𑁆𑀞𑀺𑀢𑁄𑀢𑀺 𑀕𑀺𑀮𑀸𑀦𑁄 𑀳𑀼𑀢𑁆𑀯𑀸 𑀯𑀼𑀝𑁆𑀞𑀺𑀢𑁄.

𑁩. 𑀦𑀦𑁆𑀤𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁩. 𑀢𑀢𑀺𑀬𑁂 𑀓𑀮𑁆𑀬𑀸𑀡𑀫𑀺𑀢𑁆𑀢𑁂𑀢𑀺 𑀲𑀼𑀫𑀺𑀢𑁆𑀢𑁂. 𑀏𑀯𑀫𑁂𑀢𑁆𑀣 𑀓𑀮𑁆𑀬𑀸𑀡𑀫𑀺𑀢𑁆𑀢𑀯𑀲𑁂𑀦 𑀲𑀗𑁆𑀖𑀸𑀦𑀼𑀲𑁆𑀲𑀢𑀺 𑀓𑀣𑀺𑀢𑀸. 𑀓𑀩𑀴𑀻𑀓𑀸𑀭𑀸𑀳𑀸𑀭𑀪𑀓𑁆𑀔𑀸𑀦𑀦𑁆𑀢𑀺 𑀓𑀸𑀫𑀸𑀯𑀘𑀭𑀤𑁂𑀯𑀸𑀦𑀁. 𑀅𑀲𑀫𑀬𑀯𑀺𑀫𑀼𑀢𑁆𑀢𑁄𑀢𑀺 𑀅𑀲𑀫𑀬𑀯𑀺𑀫𑀼𑀢𑁆𑀢𑀺𑀬𑀸 𑀯𑀺𑀫𑀼𑀢𑁆𑀢𑁄 𑀔𑀻𑀡𑀸𑀲𑀯𑁄.

𑁪. 𑀲𑀼𑀪𑀽𑀢𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁪. 𑀘𑀢𑀼𑀢𑁆𑀣𑁂 𑀓𑁄 𑀦𑀸𑀫𑀸𑀬𑀁 𑀲𑀼𑀪𑀽𑀢𑀻 𑀪𑀺𑀓𑁆𑀔𑀽𑀢𑀺 𑀚𑀸𑀦𑀦𑁆𑀢𑁄𑀧𑀺 𑀲𑀢𑁆𑀣𑀸 𑀓𑀣𑀸𑀲𑀫𑀼𑀝𑁆𑀞𑀸𑀧𑀦𑀢𑁆𑀣𑀁 𑀧𑀼𑀘𑁆𑀙𑀢𑀺. 𑀲𑀼𑀤𑀢𑁆𑀢𑀲𑁆𑀲 𑀉𑀧𑀸𑀲𑀓𑀲𑁆𑀲 𑀧𑀼𑀢𑁆𑀢𑁄𑀢𑀺 𑀅𑀦𑀸𑀣𑀧𑀺𑀡𑁆𑀟𑀺𑀓𑀁 𑀲𑀦𑁆𑀥𑀸𑀬𑀸𑀳. 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀳𑀺 𑀧𑀼𑀢𑁆𑀢𑁄 𑀅𑀢𑁆𑀢𑀦𑁄 𑀘𑀽𑀴𑀧𑀺𑀢𑀼 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑁄, 𑀅𑀣 𑀦𑀁 𑀲𑀼𑀪𑀽𑀢𑀺𑀢𑁆𑀣𑁂𑀭𑁄 𑀆𑀤𑀸𑀬 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀅𑀕𑀫𑀸𑀲𑀺. 𑀲𑀤𑁆𑀥𑀸𑀧𑀤𑀸𑀦𑁂𑀲𑀽𑀢𑀺 𑀲𑀤𑁆𑀥𑀸𑀦𑀁 𑀧𑀼𑀕𑁆𑀕𑀮𑀸𑀦𑀁 𑀅𑀧𑀤𑀸𑀦𑁂𑀲𑀼 𑀮𑀓𑁆𑀔𑀡𑁂𑀲𑀼.

𑁫. 𑀫𑁂𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁫. 𑀧𑀜𑁆𑀘𑀫𑁂 𑀲𑀼𑀔𑀁 𑀲𑀼𑀧𑀢𑀻𑀢𑀺 𑀬𑀣𑀸 𑀲𑁂𑀲𑀚𑀦𑀸 𑀲𑀫𑁆𑀧𑀭𑀺𑀯𑀢𑁆𑀢𑀫𑀸𑀦𑀸 𑀓𑀸𑀓𑀘𑁆𑀙𑀫𑀸𑀦𑀸 𑀤𑀼𑀓𑁆𑀔𑀁 𑀲𑀼𑀧𑀦𑁆𑀢𑀺, 𑀏𑀯𑀁 𑀅𑀲𑀼𑀧𑀺𑀢𑁆𑀯𑀸 𑀲𑀼𑀔𑀁 𑀲𑀼𑀧𑀢𑀺. 𑀦𑀺𑀤𑁆𑀤𑀁 𑀑𑀓𑁆𑀓𑀫𑀦𑁆𑀢𑁄𑀧𑀺 𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀦𑁆𑀦𑁄 𑀯𑀺𑀬 𑀳𑁄𑀢𑀺. 𑀲𑀼𑀔𑀁 𑀧𑀝𑀺𑀩𑀼𑀚𑁆𑀛𑀢𑀻𑀢𑀺 𑀬𑀣𑀸 𑀅𑀜𑁆𑀜𑁂 𑀦𑀺𑀢𑁆𑀣𑀼𑀦𑀦𑁆𑀢𑀸 𑀯𑀺𑀚𑀫𑁆𑀪𑀫𑀸𑀦𑀸 𑀲𑀫𑁆𑀧𑀭𑀺𑀯𑀢𑁆𑀢𑀦𑁆𑀢𑀸 𑀤𑀼𑀓𑁆𑀔𑀁 𑀧𑀝𑀺𑀩𑀼𑀚𑁆𑀛𑀦𑁆𑀢𑀺, 𑀏𑀯𑀁 𑀅𑀧𑁆𑀧𑀝𑀺𑀩𑀼𑀚𑁆𑀛𑀺𑀢𑁆𑀯𑀸 𑀯𑀺𑀓𑀲𑀫𑀸𑀦𑀁 𑀯𑀺𑀬 𑀧𑀤𑀼𑀫𑀁 𑀲𑀼𑀔𑀁 𑀦𑀺𑀩𑁆𑀩𑀺𑀓𑀸𑀭𑁄 𑀧𑀝𑀺𑀩𑀼𑀚𑁆𑀛𑀢𑀺. 𑀦 𑀧𑀸𑀧𑀓𑀁 𑀲𑀼𑀧𑀺𑀦𑀁 𑀧𑀲𑁆𑀲𑀢𑀻𑀢𑀺 𑀲𑀼𑀧𑀺𑀦𑀁 𑀧𑀲𑁆𑀲𑀦𑁆𑀢𑁄𑀧𑀺 𑀪𑀤𑁆𑀤𑀓𑀫𑁂𑀯 𑀲𑀼𑀧𑀺𑀦𑀁 𑀧𑀲𑁆𑀲𑀢𑀺, 𑀘𑁂𑀢𑀺𑀬𑀁 𑀯𑀦𑁆𑀤𑀦𑁆𑀢𑁄 𑀯𑀺𑀬 𑀧𑀽𑀚𑀁 𑀓𑀭𑁄𑀦𑁆𑀢𑁄 𑀯𑀺𑀬 𑀘 𑀥𑀫𑁆𑀫𑀁 𑀲𑀼𑀡𑀦𑁆𑀢𑁄 𑀯𑀺𑀬 𑀘 𑀳𑁄𑀢𑀺. 𑀬𑀣𑀸 𑀧𑀦𑀜𑁆𑀜𑁂 𑀅𑀢𑁆𑀢𑀸𑀦𑀁 𑀘𑁄𑀭𑁂𑀳𑀺 𑀲𑀫𑁆𑀧𑀭𑀺𑀯𑀸𑀭𑀺𑀢𑀁 𑀯𑀺𑀬 𑀯𑀸𑀴𑁂𑀳𑀺 𑀉𑀧𑀤𑁆𑀤𑀼𑀢𑀁 𑀯𑀺𑀬 𑀧𑀧𑀸𑀢𑁂 𑀧𑀢𑀦𑁆𑀢𑀁 𑀯𑀺𑀬 𑀘 𑀧𑀲𑁆𑀲𑀦𑁆𑀢𑀺, 𑀦 𑀏𑀯𑀁 𑀧𑀸𑀧𑀓𑀁 𑀲𑀼𑀧𑀺𑀦𑀁 𑀧𑀲𑁆𑀲𑀢𑀺.

𑀫𑀦𑀼𑀲𑁆𑀲𑀸𑀦𑀁 𑀧𑀺𑀬𑁄 𑀳𑁄𑀢𑀻𑀢𑀺 𑀉𑀭𑁂 𑀆𑀫𑀼𑀓𑁆𑀓𑀫𑀼𑀢𑁆𑀢𑀸𑀳𑀸𑀭𑁄 𑀯𑀺𑀬 𑀲𑀻𑀲𑁂 𑀧𑀺𑀴𑀦𑁆𑀥𑀺𑀢𑀫𑀸𑀮𑀸 𑀯𑀺𑀬 𑀘 𑀫𑀦𑀼𑀲𑁆𑀲𑀸𑀦𑀁 𑀧𑀺𑀬𑁄 𑀳𑁄𑀢𑀺 𑀫𑀦𑀸𑀧𑁄. 𑀅𑀫𑀦𑀼𑀲𑁆𑀲𑀸𑀦𑀁 𑀧𑀺𑀬𑁄 𑀳𑁄𑀢𑀻𑀢𑀺 𑀬𑀣𑁂𑀯 𑀫𑀦𑀼𑀲𑁆𑀲𑀸𑀦𑀁, 𑀅𑀫𑀦𑀼𑀲𑁆𑀲𑀸𑀦𑀫𑁆𑀧𑀺 𑀧𑀺𑀬𑁄 𑀳𑁄𑀢𑀺 𑀯𑀺𑀲𑀸𑀔𑀢𑁆𑀣𑁂𑀭𑁄 𑀯𑀺𑀬. 𑀯𑀢𑁆𑀣𑀼 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁧.𑁨𑁫𑁮) 𑀫𑁂𑀢𑁆𑀢𑀸𑀓𑀫𑁆𑀫𑀝𑁆𑀞𑀸𑀦𑀦𑀺𑀤𑁆𑀤𑁂𑀲𑁂 𑀯𑀺𑀢𑁆𑀣𑀸𑀭𑀺𑀢𑀫𑁂𑀯. 𑀤𑁂𑀯𑀢𑀸 𑀭𑀓𑁆𑀔𑀦𑁆𑀢𑀻𑀢𑀺 𑀧𑀼𑀢𑁆𑀢𑀫𑀺𑀯 𑀫𑀸𑀢𑀸𑀧𑀺𑀢𑀭𑁄 𑀤𑁂𑀯𑀢𑀸 𑀭𑀓𑁆𑀔𑀦𑁆𑀢𑀺. 𑀦𑀸𑀲𑁆𑀲 𑀅𑀕𑁆𑀕𑀺 𑀯𑀸 𑀯𑀺𑀲𑀁 𑀯𑀸 𑀲𑀢𑁆𑀣𑀁 𑀯𑀸 𑀓𑀫𑀢𑀻𑀢𑀺 𑀫𑁂𑀢𑁆𑀢𑀸𑀯𑀺𑀳𑀸𑀭𑀺𑀲𑁆𑀲 𑀓𑀸𑀬𑁂 𑀉𑀢𑁆𑀢𑀭𑀸𑀬 𑀉𑀧𑀸𑀲𑀺𑀓𑀸𑀬 𑀯𑀺𑀬 𑀅𑀕𑁆𑀕𑀺 𑀯𑀸, 𑀲𑀁𑀬𑀼𑀢𑁆𑀢𑀪𑀸𑀡𑀓𑀘𑀽𑀴𑀲𑀻𑀯𑀢𑁆𑀣𑁂𑀭𑀲𑁆𑀲𑁂𑀯 𑀯𑀺𑀲𑀁 𑀯𑀸, 𑀲𑀁𑀓𑀺𑀘𑁆𑀘𑀲𑀸𑀫𑀡𑁂𑀭𑀲𑁆𑀲𑁂𑀯 𑀲𑀢𑁆𑀣𑀁 𑀯𑀸 𑀦 𑀓𑀫𑀢𑀺 𑀦𑀧𑁆𑀧𑀯𑀺𑀲𑀢𑀺, 𑀦𑀸𑀲𑁆𑀲 𑀓𑀸𑀬𑀁 𑀯𑀺𑀓𑁄𑀧𑁂𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀥𑁂𑀦𑀼𑀯𑀢𑁆𑀣𑀼𑀫𑁆𑀧𑀺 𑀘𑁂𑀢𑁆𑀣 𑀓𑀣𑀬𑀦𑁆𑀢𑀺. 𑀏𑀓𑀸 𑀓𑀺𑀭 𑀥𑁂𑀦𑀼 𑀯𑀘𑁆𑀙𑀓𑀲𑁆𑀲 𑀔𑀻𑀭𑀥𑀸𑀭𑀁 𑀫𑀼𑀜𑁆𑀘𑀫𑀸𑀦𑀸 𑀅𑀝𑁆𑀞𑀸𑀲𑀺. 𑀏𑀓𑁄 𑀮𑀼𑀤𑁆𑀤𑀓𑁄 ‘‘𑀢𑀁 𑀯𑀺𑀚𑁆𑀛𑀺𑀲𑁆𑀲𑀸𑀫𑀻’’𑀢𑀺 𑀳𑀢𑁆𑀣𑁂𑀦 𑀲𑀫𑁆𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀤𑀻𑀖𑀤𑀡𑁆𑀟𑀁 𑀲𑀢𑁆𑀢𑀺𑀁 𑀫𑀼𑀜𑁆𑀘𑀺. 𑀲𑀸 𑀢𑀲𑁆𑀲𑀸 𑀲𑀭𑀻𑀭𑀁 𑀆𑀳𑀘𑁆𑀘 𑀢𑀸𑀮𑀧𑀡𑁆𑀡𑀁 𑀯𑀺𑀬 𑀯𑀝𑁆𑀝𑀫𑀸𑀦𑀸 𑀕𑀢𑀸, 𑀦𑁂𑀯 𑀉𑀧𑀘𑀸𑀭𑀩𑀮𑁂𑀦 𑀦 𑀅𑀧𑁆𑀧𑀦𑀸𑀩𑀮𑁂𑀦, 𑀓𑁂𑀯𑀮𑀁 𑀯𑀘𑁆𑀙𑀓𑁂 𑀩𑀮𑀯𑀳𑀺𑀢𑀘𑀺𑀢𑁆𑀢𑀢𑀸𑀬. 𑀏𑀯𑀁 𑀫𑀳𑀸𑀦𑀼𑀪𑀸𑀯𑀸 𑀫𑁂𑀢𑁆𑀢𑀸.

𑀢𑀼𑀯𑀝𑀁 𑀘𑀺𑀢𑁆𑀢𑀁 𑀲𑀫𑀸𑀥𑀺𑀬𑀢𑀻𑀢𑀺 𑀫𑁂𑀢𑁆𑀢𑀸𑀯𑀺𑀳𑀸𑀭𑀺𑀦𑁄 𑀔𑀺𑀧𑁆𑀧𑀫𑁂𑀯 𑀘𑀺𑀢𑁆𑀢𑀁 𑀲𑀫𑀸𑀥𑀺𑀬𑀢𑀺, 𑀦𑀢𑁆𑀣𑀺 𑀢𑀲𑁆𑀲 𑀤𑀦𑁆𑀥𑀸𑀬𑀺𑀢𑀢𑁆𑀢𑀁. 𑀫𑀼𑀔𑀯𑀡𑁆𑀡𑁄 𑀯𑀺𑀧𑁆𑀧𑀲𑀻𑀤𑀢𑀻𑀢𑀺 𑀩𑀦𑁆𑀥𑀦𑀸 𑀧𑀯𑀼𑀢𑁆𑀢𑀢𑀸𑀮𑀧𑀓𑁆𑀓𑀁 𑀯𑀺𑀬 𑀘𑀲𑁆𑀲 𑀯𑀺𑀧𑁆𑀧𑀲𑀦𑁆𑀦𑀯𑀡𑁆𑀡𑀁 𑀫𑀼𑀔𑀁 𑀳𑁄𑀢𑀺. 𑀅𑀲𑀫𑁆𑀫𑀽𑀴𑁆𑀳𑁄 𑀓𑀸𑀮𑀁 𑀓𑀭𑁄𑀢𑀻𑀢𑀺 𑀫𑁂𑀢𑁆𑀢𑀸𑀯𑀺𑀳𑀸𑀭𑀺𑀦𑁄 𑀲𑀫𑁆𑀫𑁄𑀳𑀫𑀭𑀡𑀁 𑀦𑀸𑀫 𑀦𑀢𑁆𑀣𑀺, 𑀅𑀲𑀫𑁆𑀫𑀽𑀴𑁆𑀳𑁄 𑀧𑀦 𑀦𑀺𑀤𑁆𑀤𑀁 𑀑𑀓𑁆𑀓𑀫𑀦𑁆𑀢𑁄 𑀯𑀺𑀬 𑀓𑀸𑀮𑀁 𑀓𑀭𑁄𑀢𑀺. 𑀉𑀢𑁆𑀢𑀭𑀺 𑀅𑀧𑁆𑀧𑀝𑀺𑀯𑀺𑀚𑁆𑀛𑀦𑁆𑀢𑁄𑀢𑀺 𑀫𑁂𑀢𑁆𑀢𑀸𑀲𑀫𑀸𑀧𑀢𑁆𑀢𑀺𑀢𑁄 𑀉𑀢𑁆𑀢𑀭𑀺 𑀅𑀭𑀳𑀢𑁆𑀢𑀁 𑀅𑀥𑀺𑀕𑀦𑁆𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀇𑀢𑁄 𑀘𑀯𑀺𑀢𑁆𑀯𑀸 𑀲𑀼𑀢𑁆𑀢𑀧𑁆𑀧𑀩𑀼𑀤𑁆𑀥𑁄 𑀯𑀺𑀬 𑀩𑁆𑀭𑀳𑁆𑀫𑀮𑁄𑀓𑀁 𑀉𑀧𑀧𑀚𑁆𑀚𑀢𑀻𑀢𑀺.

𑁬. 𑀅𑀝𑁆𑀞𑀓𑀦𑀸𑀕𑀭𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁬. 𑀙𑀝𑁆𑀞𑁂 𑀤𑀲𑀫𑁄𑀢𑀺 𑀚𑀸𑀢𑀺𑀕𑁄𑀢𑁆𑀢𑀯𑀲𑁂𑀦 𑀘𑁂𑀯 𑀲𑀸𑀭𑀧𑀢𑁆𑀢𑀓𑀼𑀮𑀕𑀡𑀦𑀸𑀬 𑀘 𑀤𑀲𑀫𑁂 𑀞𑀸𑀦𑁂 𑀕𑀡𑀻𑀬𑀢𑀺, 𑀢𑁂𑀦𑀲𑁆𑀲 𑀤𑀲𑀫𑁄𑀢𑁆𑀯𑁂𑀯 𑀦𑀸𑀫𑀁 𑀚𑀸𑀢𑀁. 𑀅𑀝𑁆𑀞𑀓𑀦𑀸𑀕𑀭𑁄𑀢𑀺 𑀅𑀝𑁆𑀞𑀓𑀦𑀕𑀭𑀯𑀸𑀲𑀻. 𑀓𑀼𑀓𑁆𑀓𑀼𑀝𑀸𑀭𑀸𑀫𑁂𑀢𑀺 𑀓𑀼𑀓𑁆𑀓𑀼𑀝𑀲𑁂𑀝𑁆𑀞𑀺𑀦𑀸 𑀓𑀸𑀭𑀺𑀢𑁂 𑀆𑀭𑀸𑀫𑁂.

𑀢𑁂𑀦 𑀪𑀕𑀯𑀢𑀸…𑀧𑁂… 𑀲𑀫𑁆𑀫𑀤𑀓𑁆𑀔𑀸𑀢𑁄𑀢𑀺 𑀏𑀢𑁆𑀣 𑀅𑀬𑀁 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀬𑁄 𑀲𑁄 𑀪𑀕𑀯𑀸 𑀲𑀫𑀢𑀺𑀁𑀲 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸 𑀲𑀩𑁆𑀩𑀓𑀺𑀮𑁂𑀲𑁂 𑀪𑀜𑁆𑀚𑀺𑀢𑁆𑀯𑀸 𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑁄, 𑀢𑁂𑀦 𑀪𑀕𑀯𑀢𑀸 𑀢𑁂𑀲𑀁 𑀢𑁂𑀲𑀁 𑀲𑀢𑁆𑀢𑀸𑀦𑀁 𑀆𑀲𑀬𑀸𑀦𑀼𑀲𑀬𑀁 𑀚𑀸𑀦𑀢𑀸, 𑀳𑀢𑁆𑀣𑀢𑀮𑁂 𑀞𑀧𑀺𑀢𑀁 𑀆𑀫𑀮𑀓𑀁 𑀯𑀺𑀬 𑀲𑀩𑁆𑀩𑀜𑁂𑀬𑁆𑀬𑀥𑀫𑁆𑀫𑁂 𑀧𑀲𑁆𑀲𑀢𑀸, 𑀅𑀧𑀺𑀘 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀤𑀻𑀳𑀺 𑀚𑀸𑀦𑀢𑀸, 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀧𑀲𑁆𑀲𑀢𑀸, 𑀢𑀻𑀳𑀺 𑀯𑀸 𑀯𑀺𑀚𑁆𑀚𑀸𑀳𑀺 𑀙𑀳𑀺 𑀯𑀸 𑀧𑀦 𑀅𑀪𑀺𑀜𑁆𑀜𑀸𑀳𑀺 𑀚𑀸𑀦𑀢𑀸, 𑀲𑀩𑁆𑀩𑀢𑁆𑀣 𑀅𑀧𑁆𑀧𑀝𑀺𑀳𑀢𑁂𑀦 𑀲𑀫𑀦𑁆𑀢𑀘𑀓𑁆𑀔𑀼𑀦𑀸 𑀧𑀲𑁆𑀲𑀢𑀸, 𑀲𑀩𑁆𑀩𑀥𑀫𑁆𑀫𑀚𑀸𑀦𑀦𑀲𑀫𑀢𑁆𑀣𑀸𑀬 𑀧𑀜𑁆𑀜𑀸𑀬 𑀚𑀸𑀦𑀢𑀸, 𑀲𑀩𑁆𑀩𑀲𑀢𑁆𑀢𑀸𑀦𑀁 𑀘𑀓𑁆𑀔𑀼𑀯𑀺𑀲𑀬𑀸𑀢𑀻𑀢𑀸𑀦𑀺 𑀢𑀺𑀭𑁄𑀓𑀼𑀝𑁆𑀝𑀸𑀤𑀺𑀕𑀢𑀸𑀦𑀺 𑀘𑀸𑀧𑀺 𑀭𑀽𑀧𑀸𑀦𑀺 𑀅𑀢𑀺𑀯𑀺𑀲𑀼𑀤𑁆𑀥𑁂𑀦 𑀫𑀁𑀲𑀘𑀓𑁆𑀔𑀼𑀦𑀸 𑀯𑀸 𑀧𑀲𑁆𑀲𑀢𑀸, 𑀅𑀢𑁆𑀢𑀳𑀺𑀢𑀲𑀸𑀥𑀺𑀓𑀸𑀬 𑀲𑀫𑀸𑀥𑀺𑀧𑀤𑀝𑁆𑀞𑀸𑀦𑀸𑀬 𑀧𑀝𑀺𑀯𑁂𑀥𑀧𑀜𑁆𑀜𑀸𑀬 𑀚𑀸𑀦𑀢𑀸, 𑀧𑀭𑀳𑀺𑀢𑀲𑀸𑀥𑀺𑀓𑀸𑀬 𑀓𑀭𑀼𑀡𑀸𑀧𑀤𑀝𑁆𑀞𑀸𑀦𑀸𑀬 𑀤𑁂𑀲𑀦𑀸𑀧𑀜𑁆𑀜𑀸𑀬 𑀧𑀲𑁆𑀲𑀢𑀸, 𑀅𑀦𑁆𑀢𑀭𑀸𑀬𑀺𑀓𑀥𑀫𑁆𑀫𑁂 𑀯𑀸 𑀚𑀸𑀦𑀢𑀸, 𑀦𑀺𑀬𑁆𑀬𑀸𑀦𑀺𑀓𑀥𑀫𑁆𑀫𑁂 𑀧𑀲𑁆𑀲𑀢𑀸, 𑀅𑀭𑀻𑀦𑀁 𑀳𑀢𑀢𑁆𑀢𑀸 𑀅𑀭𑀳𑀢𑀸, 𑀲𑀫𑁆𑀫𑀸 𑀲𑀸𑀫𑀁 𑀲𑀩𑁆𑀩𑀥𑀫𑁆𑀫𑀸𑀦𑀁 𑀩𑀼𑀤𑁆𑀥𑀢𑁆𑀢𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦𑀸𑀢𑀺 𑀏𑀯𑀁 𑀘𑀢𑀼𑀯𑁂𑀲𑀸𑀭𑀚𑁆𑀚𑀯𑀲𑁂𑀦 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺 𑀣𑁄𑀫𑀺𑀢𑁂𑀦 𑀅𑀢𑁆𑀣𑀺 𑀦𑀼 𑀔𑁄 𑀏𑀓𑁄 𑀥𑀫𑁆𑀫𑁄 𑀅𑀓𑁆𑀔𑀸𑀢𑁄𑀢𑀺.

𑀅𑀪𑀺𑀲𑀗𑁆𑀔𑀢𑀦𑁆𑀢𑀺 𑀓𑀢𑀁 𑀉𑀧𑁆𑀧𑀸𑀤𑀺𑀢𑀁. 𑀅𑀪𑀺𑀲𑀜𑁆𑀘𑁂𑀢𑀬𑀺𑀢𑀦𑁆𑀢𑀺 𑀘𑁂𑀢𑀬𑀺𑀢𑀁 𑀓𑀧𑁆𑀧𑀬𑀺𑀢𑀁. 𑀲𑁄 𑀢𑀢𑁆𑀣 𑀞𑀺𑀢𑁄𑀢𑀺 𑀲𑁄 𑀢𑀲𑁆𑀫𑀺𑀁 𑀲𑀫𑀣𑀯𑀺𑀧𑀲𑁆𑀲𑀦𑀸𑀥𑀫𑁆𑀫𑁂 𑀞𑀺𑀢𑁄. 𑀥𑀫𑁆𑀫𑀭𑀸𑀕𑁂𑀦 𑀥𑀫𑁆𑀫𑀦𑀦𑁆𑀤𑀺𑀬𑀸𑀢𑀺 𑀧𑀤𑀤𑁆𑀯𑀬𑁂𑀦𑀧𑀺 𑀲𑀫𑀣𑀯𑀺𑀧𑀲𑁆𑀲𑀦𑀸𑀲𑀼 𑀙𑀦𑁆𑀤𑀭𑀸𑀕𑁄 𑀯𑀼𑀢𑁆𑀢𑁄. 𑀲𑀫𑀣𑀯𑀺𑀧𑀲𑁆𑀲𑀦𑀸𑀲𑀼 𑀳𑀺 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀙𑀦𑁆𑀤𑀭𑀸𑀕𑀁 𑀧𑀭𑀺𑀬𑀸𑀤𑀺𑀬𑀺𑀢𑀼𑀁 𑀲𑀓𑁆𑀓𑁄𑀦𑁆𑀢𑁄 𑀅𑀭𑀳𑀸 𑀳𑁄𑀢𑀺, 𑀅𑀲𑀓𑁆𑀓𑁄𑀦𑁆𑀢𑁄 𑀅𑀦𑀸𑀕𑀸𑀫𑀻 𑀳𑁄𑀢𑀺. 𑀲𑁄 𑀲𑀫𑀣𑀯𑀺𑀧𑀲𑁆𑀲𑀦𑀸𑀲𑀼 𑀙𑀦𑁆𑀤𑀭𑀸𑀕𑀲𑁆𑀲 𑀅𑀧𑁆𑀧𑀳𑀻𑀦𑀢𑁆𑀢𑀸 𑀘𑀢𑀼𑀢𑁆𑀣𑀚𑁆𑀛𑀸𑀦𑀘𑁂𑀢𑀦𑀸𑀬 𑀲𑀼𑀤𑁆𑀥𑀸𑀯𑀸𑀲𑁂 𑀦𑀺𑀩𑁆𑀩𑀢𑁆𑀢𑀢𑀺. 𑀅𑀬𑀁 𑀆𑀘𑀭𑀺𑀬𑀸𑀦𑀁 𑀲𑀫𑀸𑀦𑀢𑁆𑀣𑀓𑀣𑀸.

𑀯𑀺𑀢𑀡𑁆𑀟𑀯𑀸𑀤𑀻 𑀧𑀦𑀸𑀳 𑁋 ‘‘𑀢𑁂𑀦𑁂𑀯 𑀥𑀫𑁆𑀫𑀭𑀸𑀕𑁂𑀦𑀸𑀢𑀺 𑀯𑀘𑀦𑀢𑁄 𑀅𑀓𑀼𑀲𑀮𑁂𑀦 𑀲𑀼𑀤𑁆𑀥𑀸𑀯𑀸𑀲𑁂 𑀦𑀺𑀩𑁆𑀩𑀢𑁆𑀢𑀢𑀻’’𑀢𑀺. 𑀲𑁄 ‘‘𑀲𑀼𑀢𑁆𑀢𑀁 𑀆𑀳𑀭𑀸𑀳𑀻’’𑀢𑀺 𑀯𑀢𑁆𑀢𑀩𑁆𑀩𑁄. 𑀅𑀤𑁆𑀥𑀸 𑀅𑀜𑁆𑀜𑀁 𑀅𑀧𑀲𑁆𑀲𑀦𑁆𑀢𑁄 𑀇𑀤𑀫𑁂𑀯 𑀆𑀳𑀭𑀺𑀲𑁆𑀲𑀢𑀺. 𑀢𑀢𑁄 𑀯𑀢𑁆𑀢𑀩𑁆𑀩𑁄 ‘‘𑀓𑀺𑀫𑁆𑀧𑀦𑀺𑀤𑀁 𑀲𑀼𑀢𑁆𑀢𑀁 𑀦𑀻𑀢𑀢𑁆𑀣𑀁, 𑀉𑀤𑀸𑀳𑀼 𑀦𑁂𑀬𑁆𑀬𑀢𑁆𑀣’’𑀦𑁆𑀢𑀺. 𑀅𑀤𑁆𑀥𑀸 ‘‘𑀦𑀻𑀢𑀢𑁆𑀣’’𑀦𑁆𑀢𑀺 𑀯𑀓𑁆𑀔𑀢𑀺. 𑀢𑀢𑁄 𑀯𑀢𑁆𑀢𑀩𑁆𑀩𑁄 𑁋 𑀏𑀯𑀁 𑀲𑀦𑁆𑀢𑁂 𑀅𑀦𑀸𑀕𑀸𑀫𑀺𑀨𑀮𑀢𑁆𑀣𑀺𑀓𑁂𑀦 𑀲𑀫𑀣𑀯𑀺𑀧𑀲𑁆𑀲𑀦𑀸𑀲𑀼 𑀙𑀦𑁆𑀤𑀭𑀸𑀕𑁄 𑀓𑀢𑁆𑀢𑀩𑁆𑀩𑁄 𑀪𑀯𑀺𑀲𑁆𑀲𑀢𑀺, 𑀙𑀦𑁆𑀤𑀭𑀸𑀕𑁂 𑀉𑀧𑁆𑀧𑀸𑀤𑀺𑀢𑁂 𑀅𑀦𑀸𑀕𑀸𑀫𑀺𑀨𑀮𑀁 𑀧𑀝𑀺𑀮𑀤𑁆𑀥𑀁 𑀪𑀯𑀺𑀲𑁆𑀲𑀢𑀺, 𑀫𑀸 ‘‘𑀲𑀼𑀢𑁆𑀢𑀁 𑀫𑁂 𑀮𑀤𑁆𑀥’’𑀦𑁆𑀢𑀺 𑀬𑀁 𑀯𑀸 𑀢𑀁 𑀯𑀸 𑀤𑀻𑀧𑁂𑀳𑀺. 𑀧𑀜𑁆𑀳𑀁 𑀓𑀣𑁂𑀦𑁆𑀢𑁂𑀦 𑀳𑀺 𑀆𑀘𑀭𑀺𑀬𑀲𑁆𑀲 𑀲𑀦𑁆𑀢𑀺𑀓𑁂 𑀉𑀕𑁆𑀕𑀳𑁂𑀢𑁆𑀯𑀸 𑀅𑀢𑁆𑀣𑀭𑀲𑀁 𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸 𑀓𑀣𑁂𑀢𑀼𑀁 𑀯𑀝𑁆𑀝𑀢𑀺. 𑀅𑀓𑀼𑀲𑀮𑁂𑀦 𑀳𑀺 𑀲𑀕𑁆𑀕𑁂, 𑀓𑀼𑀲𑀮𑁂𑀦 𑀘 𑀅𑀧𑀸𑀬𑁂 𑀧𑀝𑀺𑀲𑀦𑁆𑀥𑀺 𑀦𑀸𑀫 𑀦𑀢𑁆𑀣𑀺. 𑀯𑀼𑀢𑁆𑀢𑀜𑁆𑀘𑁂𑀢𑀁 𑀪𑀕𑀯𑀢𑀸 𑁋

‘‘𑀦, 𑀪𑀺𑀓𑁆𑀔𑀯𑁂, 𑀮𑁄𑀪𑀚𑁂𑀦 𑀓𑀫𑁆𑀫𑁂𑀦, 𑀤𑁄𑀲𑀚𑁂𑀦 𑀓𑀫𑁆𑀫𑁂𑀦, 𑀫𑁄𑀳𑀚𑁂𑀦 𑀓𑀫𑁆𑀫𑁂𑀦 𑀤𑁂𑀯𑀸 𑀧𑀜𑁆𑀜𑀸𑀬𑀦𑁆𑀢𑀺, 𑀫𑀦𑀼𑀲𑁆𑀲𑀸 𑀧𑀜𑁆𑀜𑀸𑀬𑀦𑁆𑀢𑀺, 𑀬𑀸 𑀯𑀸 𑀧𑀦𑀜𑁆𑀜𑀸𑀧𑀺 𑀓𑀸𑀘𑀺 𑀲𑀼𑀕𑀢𑀺𑀬𑁄. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀮𑁄𑀪𑀚𑁂𑀦 𑀓𑀫𑁆𑀫𑁂𑀦, 𑀤𑁄𑀲𑀚𑁂𑀦 𑀓𑀫𑁆𑀫𑁂𑀦, 𑀫𑁄𑀳𑀚𑁂𑀦 𑀓𑀫𑁆𑀫𑁂𑀦 𑀦𑀺𑀭𑀬𑁄 𑀧𑀜𑁆𑀜𑀸𑀬𑀢𑀺, 𑀢𑀺𑀭𑀘𑁆𑀙𑀸𑀦𑀬𑁄𑀦𑀺 𑀧𑀜𑁆𑀜𑀸𑀬𑀢𑀺, 𑀧𑁂𑀢𑁆𑀢𑀺𑀯𑀺𑀲𑀬𑁄 𑀧𑀜𑁆𑀜𑀸𑀬𑀢𑀺, 𑀬𑀸 𑀯𑀸 𑀧𑀦𑀜𑁆𑀜𑀸𑀧𑀺 𑀓𑀸𑀘𑀺 𑀤𑀼𑀕𑁆𑀕𑀢𑀺𑀬𑁄’’𑀢𑀺 (𑀅. 𑀦𑀺. 𑁬.𑁩𑁯) 𑁋

𑀏𑀯𑀁 𑀲𑀜𑁆𑀜𑀸𑀧𑁂𑀢𑀩𑁆𑀩𑁄. 𑀲𑀘𑁂 𑀲𑀜𑁆𑀚𑀸𑀦𑀸𑀢𑀺, 𑀲𑀜𑁆𑀚𑀸𑀦𑀸𑀢𑀼. 𑀦𑁄 𑀘𑁂 𑀲𑀜𑁆𑀚𑀸𑀦𑀸𑀢𑀺, ‘‘𑀕𑀘𑁆𑀙 𑀧𑀸𑀢𑁄𑀯 𑀯𑀺𑀳𑀸𑀭𑀁 𑀧𑀯𑀺𑀲𑀺𑀢𑁆𑀯𑀸 𑀬𑀸𑀕𑀼𑀁 𑀧𑀺𑀯𑀸’’𑀢𑀺 𑀉𑀬𑁆𑀬𑁄𑀚𑁂𑀢𑀩𑁆𑀩𑁄.

𑀅𑀬𑀁 𑀔𑁄, 𑀕𑀳𑀧𑀢𑀺, 𑀏𑀓𑀥𑀫𑁆𑀫𑁄 𑀅𑀓𑁆𑀔𑀸𑀢𑁄𑀢𑀺 𑀏𑀓𑀁 𑀥𑀫𑁆𑀫𑀁 𑀧𑀼𑀘𑁆𑀙𑀺𑀢𑁂𑀦 ‘‘𑀅𑀬𑀫𑁆𑀧𑀺 𑀏𑀓𑀥𑀫𑁆𑀫𑁄 𑀅𑀓𑁆𑀔𑀸𑀢𑁄, 𑀅𑀬𑀫𑁆𑀧𑀺 𑀏𑀓𑀥𑀫𑁆𑀫𑁄 𑀅𑀓𑁆𑀔𑀸𑀢𑁄’’𑀢𑀺 𑀏𑀯𑀁 𑀧𑀼𑀘𑁆𑀙𑀸𑀯𑀲𑁂𑀦 𑀓𑀣𑀺𑀢𑀢𑁆𑀢𑀸 𑀏𑀓𑀸𑀤𑀲𑀧𑀺 𑀥𑀫𑁆𑀫𑀸 𑀏𑀓𑀥𑀫𑁆𑀫𑁄 𑀦𑀸𑀫 𑀓𑀢𑁄. 𑀅𑀫𑀢𑀼𑀧𑁆𑀧𑀢𑁆𑀢𑀺𑀅𑀢𑁆𑀣𑁂𑀦 𑀯𑀸 𑀲𑀩𑁆𑀩𑁂𑀧𑀺 𑀏𑀓𑀥𑀫𑁆𑀫𑁄𑀢𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺.

𑀦𑀺𑀥𑀺𑀫𑀼𑀔𑀁 𑀕𑀯𑁂𑀲𑀦𑁆𑀢𑁄𑀢𑀺 𑀦𑀺𑀥𑀺𑀁 𑀧𑀭𑀺𑀬𑁂𑀲𑀦𑁆𑀢𑁄. 𑀲𑀓𑀺𑀤𑁂𑀯𑀸𑀢𑀺 𑀏𑀓𑀧𑁆𑀧𑀬𑁄𑀕𑁂𑀦𑁂𑀯. 𑀓𑀣𑀁 𑀧𑀦 𑀏𑀓𑀧𑁆𑀧𑀬𑁄𑀕𑁂𑀦𑁂𑀯 𑀏𑀓𑀸𑀤𑀲𑀦𑁆𑀦𑀁 𑀦𑀺𑀥𑀻𑀦𑀁 𑀅𑀥𑀺𑀕𑀫𑁄 𑀳𑁄𑀢𑀻𑀢𑀺? 𑀇𑀥𑁂𑀓𑀘𑁆𑀘𑁄 𑀅𑀭𑀜𑁆𑀜𑁂 𑀚𑀻𑀯𑀺𑀢𑀯𑀼𑀢𑁆𑀢𑀺𑀁 𑀕𑀯𑁂𑀲𑀫𑀸𑀦𑁄 𑀘𑀭𑀢𑀺. 𑀢𑀫𑁂𑀦𑀁 𑀅𑀜𑁆𑀜𑀢𑀭𑁄 𑀅𑀢𑁆𑀣𑀘𑀭𑀓𑁄 𑀤𑀺𑀲𑁆𑀯𑀸 ‘‘𑀓𑀺𑀁, 𑀪𑁄, 𑀘𑀭𑀲𑀻’’𑀢𑀺 𑀧𑀼𑀘𑁆𑀙𑀢𑀺. 𑀲𑁄 ‘‘𑀚𑀻𑀯𑀺𑀢𑀯𑀼𑀢𑁆𑀢𑀺𑀁 𑀧𑀭𑀺𑀬𑁂𑀲𑀸𑀫𑀻’’𑀢𑀺 𑀆𑀳. 𑀇𑀢𑀭𑁄 ‘‘𑀢𑁂𑀦 𑀳𑀺 𑀲𑀫𑁆𑀫 𑀆𑀕𑀘𑁆𑀙, 𑀏𑀢𑀁 𑀧𑀸𑀲𑀸𑀡𑀁 𑀧𑀯𑀝𑁆𑀝𑁂𑀳𑀻’’𑀢𑀺 𑀆𑀳. 𑀲𑁄 𑀢𑀁 𑀧𑀯𑀝𑁆𑀝𑁂𑀢𑁆𑀯𑀸 𑀉𑀧𑀭𑀽𑀧𑀭𑀺𑀝𑁆𑀞𑀺𑀢𑀸 𑀯𑀸 𑀓𑀼𑀘𑁆𑀙𑀺𑀬𑀸 𑀓𑀼𑀘𑁆𑀙𑀺𑀁 𑀆𑀳𑀘𑁆𑀘 𑀞𑀺𑀢𑀸 𑀯𑀸 𑀏𑀓𑀸𑀤𑀲 𑀓𑀼𑀫𑁆𑀪𑀺𑀬𑁄 𑀧𑀲𑁆𑀲𑀢𑀺. 𑀏𑀯𑀁 𑀏𑀓𑀧𑁆𑀧𑀬𑁄𑀕𑁂𑀦 𑀏𑀓𑀸𑀤𑀲𑀦𑁆𑀦𑀁 𑀅𑀥𑀺𑀕𑀫𑁄 𑀳𑁄𑀢𑀺.

𑀆𑀘𑀭𑀺𑀬𑀥𑀦𑀁 𑀧𑀭𑀺𑀬𑁂𑀲𑀺𑀲𑁆𑀲𑀦𑁆𑀢𑀻𑀢𑀺 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀳𑀺 𑀬𑀲𑁆𑀲 𑀲𑀦𑁆𑀢𑀺𑀓𑁂 𑀲𑀺𑀧𑁆𑀧𑀁 𑀉𑀕𑁆𑀕𑀡𑁆𑀳𑀦𑁆𑀢𑀺, 𑀢𑀲𑁆𑀲 𑀲𑀺𑀧𑁆𑀧𑀼𑀕𑁆𑀕𑀳𑀡𑀢𑁄 𑀧𑀼𑀭𑁂 𑀯𑀸 𑀧𑀘𑁆𑀙𑀸 𑀯𑀸 𑀅𑀦𑁆𑀢𑀭𑀦𑁆𑀢𑀭𑀸 𑀯𑀸 𑀕𑁂𑀳𑀢𑁄 𑀦𑀻𑀳𑀭𑀺𑀢𑁆𑀯𑀸 𑀥𑀦𑀁 𑀤𑁂𑀦𑁆𑀢𑀺. 𑀬𑁂𑀲𑀁 𑀕𑁂𑀳𑁂 𑀦𑀢𑁆𑀣𑀺, 𑀢𑁂 𑀜𑀸𑀢𑀺𑀲𑀪𑀸𑀕𑀢𑁄 𑀧𑀭𑀺𑀬𑁂𑀲𑀦𑁆𑀢𑀺. 𑀬𑁂𑀲𑀁 𑀢𑀫𑁆𑀧𑀺 𑀦𑀢𑁆𑀣𑀺, 𑀢𑁂 𑀲𑀪𑀸𑀕𑀢𑁄 𑀧𑀭𑀺𑀬𑁂𑀲𑀦𑁆𑀢𑀺. 𑀢𑀣𑀸 𑀅𑀮𑀪𑀫𑀸𑀦𑀸 𑀪𑀺𑀓𑁆𑀔𑀫𑁆𑀧𑀺 𑀘𑀭𑀺𑀢𑁆𑀯𑀸 𑀤𑁂𑀦𑁆𑀢𑀺𑀬𑁂𑀯. 𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁.

𑀓𑀺𑀁 𑀧𑀦𑀸𑀳𑀦𑁆𑀢𑀺 𑀩𑀸𑀳𑀺𑀭𑀓𑀸 𑀢𑀸𑀯 𑀅𑀦𑀺𑀬𑁆𑀬𑀸𑀦𑀺𑀓𑁂𑀧𑀺 𑀲𑀸𑀲𑀦𑁂 𑀲𑀺𑀧𑁆𑀧𑀫𑀢𑁆𑀢𑀤𑀸𑀬𑀓𑀲𑁆𑀲 𑀥𑀦𑀁 𑀧𑀭𑀺𑀬𑁂𑀲𑀦𑁆𑀢𑀺, 𑀅𑀳𑀁 𑀧𑀦 𑀏𑀯𑀁𑀯𑀺𑀥𑁂 𑀦𑀺𑀬𑁆𑀬𑀸𑀦𑀺𑀓𑀲𑀸𑀲𑀦𑁂 𑀏𑀓𑀸𑀤𑀲𑀯𑀺𑀥𑀁 𑀅𑀫𑀢𑀼𑀧𑁆𑀧𑀢𑁆𑀢𑀺𑀧𑀝𑀺𑀧𑀤𑀁 𑀤𑁂𑀲𑁂𑀦𑁆𑀢𑀲𑁆𑀲 𑀆𑀘𑀭𑀺𑀬𑀲𑁆𑀲 𑀧𑀽𑀚𑀁 𑀓𑀺𑀁 𑀦 𑀓𑀭𑀺𑀲𑁆𑀲𑀸𑀫𑀺, 𑀓𑀭𑀺𑀲𑁆𑀲𑀸𑀫𑀺𑀬𑁂𑀯𑀸𑀢𑀺 𑀯𑀤𑀢𑀺. 𑀧𑀘𑁆𑀘𑁂𑀓𑀁 𑀤𑀼𑀲𑁆𑀲𑀬𑀼𑀕𑁂𑀦 𑀅𑀘𑁆𑀙𑀸𑀤𑁂𑀲𑀻𑀢𑀺 𑀏𑀓𑀫𑁂𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀏𑀓𑁂𑀓𑀁 𑀤𑀼𑀲𑁆𑀲𑀬𑀼𑀕𑀁 𑀅𑀤𑀸𑀲𑀻𑀢𑀺 𑀅𑀢𑁆𑀣𑁄. 𑀲𑀫𑀼𑀤𑀸𑀘𑀸𑀭𑀯𑀘𑀦𑀁 𑀧𑀦𑁂𑀢𑁆𑀣 𑀏𑀯𑀭𑀽𑀧𑀁 𑀳𑁄𑀢𑀺, 𑀢𑀲𑁆𑀫𑀸 𑀅𑀘𑁆𑀙𑀸𑀤𑁂𑀲𑀻𑀢𑀺 𑀯𑀼𑀢𑁆𑀢𑀁. 𑀧𑀜𑁆𑀘𑀲𑀢𑀁 𑀯𑀺𑀳𑀸𑀭𑀦𑁆𑀢𑀺 𑀧𑀜𑁆𑀘𑀲𑀢𑀕𑁆𑀖𑀦𑀺𑀓𑀁 𑀧𑀡𑁆𑀡𑀲𑀸𑀮𑀁 𑀓𑀸𑀭𑁂𑀲𑀻𑀢𑀺 𑀅𑀢𑁆𑀣𑁄.

𑁭. 𑀕𑁄𑀧𑀸𑀮𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁭. 𑀲𑀢𑁆𑀢𑀫𑁂 𑀢𑀺𑀲𑁆𑀲𑁄 𑀓𑀣𑀸 𑀏𑀓𑀦𑀸𑀴𑀺𑀓𑀸 𑀘𑀢𑀼𑀭𑀲𑁆𑀲𑀸 𑀦𑀺𑀲𑀺𑀦𑁆𑀦𑀯𑀢𑁆𑀢𑀺𑀓𑀸𑀢𑀺. 𑀢𑀢𑁆𑀣 𑀧𑀸𑀴𑀺𑀁 𑀯𑀢𑁆𑀯𑀸 𑀏𑀓𑁂𑀓𑀲𑁆𑀲 𑀧𑀤𑀲𑁆𑀲 𑀅𑀢𑁆𑀣𑀓𑀣𑀦𑀁 𑀏𑀓𑀦𑀸𑀴𑀺𑀓𑀸 𑀦𑀸𑀫. 𑀅𑀧𑀡𑁆𑀟𑀺𑀢𑀕𑁄𑀧𑀸𑀮𑀓𑀁 𑀤𑀲𑁆𑀲𑁂𑀢𑁆𑀯𑀸, 𑀅𑀧𑀡𑁆𑀟𑀺𑀢𑀪𑀺𑀓𑁆𑀔𑀼𑀁 𑀤𑀲𑁆𑀲𑁂𑀢𑁆𑀯𑀸, 𑀧𑀡𑁆𑀟𑀺𑀢𑀕𑁄𑀧𑀸𑀮𑀓𑀁 𑀤𑀲𑁆𑀲𑁂𑀢𑁆𑀯𑀸, 𑀧𑀡𑁆𑀟𑀺𑀢𑀪𑀺𑀓𑁆𑀔𑀼𑀁 𑀤𑀲𑁆𑀲𑁂𑀢𑁆𑀯𑀸𑀢𑀺 𑀘𑀢𑀼𑀓𑁆𑀓𑀁 𑀩𑀦𑁆𑀥𑀺𑀢𑁆𑀯𑀸 𑀓𑀣𑀦𑀁 𑀘𑀢𑀼𑀭𑀲𑁆𑀲𑀸 𑀦𑀸𑀫. 𑀅𑀧𑀡𑁆𑀟𑀺𑀢𑀕𑁄𑀧𑀸𑀮𑀓𑀁 𑀤𑀲𑁆𑀲𑁂𑀢𑁆𑀯𑀸 𑀧𑀭𑀺𑀬𑁄𑀲𑀸𑀦𑀕𑀫𑀦𑀁, 𑀅𑀧𑀡𑁆𑀟𑀺𑀢𑀪𑀺𑀓𑁆𑀔𑀼𑀁 𑀤𑀲𑁆𑀲𑁂𑀢𑁆𑀯𑀸 𑀧𑀭𑀺𑀬𑁄𑀲𑀸𑀦𑀕𑀫𑀦𑀁, 𑀧𑀡𑁆𑀟𑀺𑀢𑀕𑁄𑀧𑀸𑀮𑀓𑀁 𑀤𑀲𑁆𑀲𑁂𑀢𑁆𑀯𑀸 𑀧𑀭𑀺𑀬𑁄𑀲𑀸𑀦𑀕𑀫𑀦𑀁, 𑀧𑀡𑁆𑀟𑀺𑀢𑀪𑀺𑀓𑁆𑀔𑀼𑀁 𑀤𑀲𑁆𑀲𑁂𑀢𑁆𑀯𑀸 𑀧𑀭𑀺𑀬𑁄𑀲𑀸𑀦𑀕𑀫𑀦𑀦𑁆𑀢𑀺 𑀅𑀬𑀁 𑀦𑀺𑀲𑀺𑀦𑁆𑀦𑀯𑀢𑁆𑀢𑀺𑀓𑀸 𑀦𑀸𑀫. 𑀅𑀬𑀁 𑀇𑀥 𑀲𑀩𑁆𑀩𑀸𑀘𑀭𑀺𑀬𑀸𑀦𑀁 𑀆𑀘𑀺𑀡𑁆𑀡𑀸.

𑀏𑀓𑀸𑀤𑀲𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀻𑀢𑀺 𑀏𑀓𑀸𑀤𑀲𑀳𑀺 𑀅𑀕𑀼𑀡𑀓𑁄𑀝𑁆𑀞𑀸𑀲𑁂𑀳𑀺. 𑀕𑁄𑀕𑀡𑀦𑁆𑀢𑀺 𑀕𑁄𑀫𑀡𑁆𑀟𑀮𑀁. 𑀧𑀭𑀺𑀳𑀭𑀺𑀢𑀼𑀦𑁆𑀢𑀺 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀯𑀺𑀘𑀭𑀺𑀢𑀼𑀁. 𑀨𑀸𑀢𑀺𑀁 𑀓𑀸𑀢𑀼𑀦𑁆𑀢𑀺 𑀯𑀟𑁆𑀠𑀺𑀁 𑀆𑀧𑀸𑀤𑁂𑀢𑀼𑀁. 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀮𑁄𑀓𑁂. 𑀦 𑀭𑀽𑀧𑀜𑁆𑀜𑀽 𑀳𑁄𑀢𑀻𑀢𑀺 𑀕𑀡𑀦𑀢𑁄 𑀯𑀸 𑀯𑀡𑁆𑀡𑀢𑁄 𑀯𑀸 𑀭𑀽𑀧𑀁 𑀦 𑀚𑀸𑀦𑀸𑀢𑀺. 𑀕𑀡𑀦𑀢𑁄 𑀦 𑀚𑀸𑀦𑀸𑀢𑀺 𑀦𑀸𑀫 𑀅𑀢𑁆𑀢𑀦𑁄 𑀕𑀼𑀦𑁆𑀦𑀁 𑀲𑀢𑀁 𑀯𑀸 𑀲𑀳𑀲𑁆𑀲𑀁 𑀯𑀸𑀢𑀺 𑀲𑀗𑁆𑀔𑁆𑀬𑀁 𑀦 𑀚𑀸𑀦𑀸𑀢𑀺, 𑀲𑁄 𑀕𑀸𑀯𑀻𑀲𑀼 𑀳𑀝𑀸𑀲𑀼 𑀯𑀸 𑀧𑀮𑀸𑀢𑀸𑀲𑀼 𑀯𑀸 𑀕𑁄𑀕𑀡𑀁 𑀕𑀡𑁂𑀢𑁆𑀯𑀸 ‘‘𑀅𑀚𑁆𑀚 𑀏𑀢𑁆𑀢𑀓𑀸 𑀦 𑀤𑀺𑀲𑁆𑀲𑀦𑁆𑀢𑀻’’𑀢𑀺 𑀤𑁆𑀯𑁂 𑀢𑀻𑀡𑀺 𑀕𑀸𑀫𑀦𑁆𑀢𑀭𑀸𑀦𑀺 𑀯𑀸 𑀅𑀝𑀯𑀺𑀁 𑀯𑀸 𑀯𑀺𑀘𑀭𑀦𑁆𑀢𑁄 𑀦 𑀧𑀭𑀺𑀬𑁂𑀲𑀢𑀺. 𑀅𑀜𑁆𑀜𑁂𑀲𑀁 𑀕𑀸𑀯𑀻𑀲𑀼 𑀅𑀢𑁆𑀢𑀦𑁄 𑀕𑁄𑀕𑀡𑀁 𑀧𑀯𑀺𑀝𑁆𑀞𑀸𑀲𑀼𑀧𑀺 𑀕𑁄𑀕𑀡𑀁 𑀕𑀡𑁂𑀢𑁆𑀯𑀸 ‘‘𑀇𑀫𑀸 𑀏𑀢𑁆𑀢𑀺𑀓𑀸 𑀕𑀸𑀯𑁄 𑀦 𑀅𑀫𑁆𑀳𑀸𑀓’’𑀦𑁆𑀢𑀺 𑀬𑀝𑁆𑀞𑀺𑀬𑀸 𑀧𑁄𑀣𑁂𑀢𑁆𑀯𑀸 𑀦 𑀦𑀻𑀳𑀭𑀢𑀺. 𑀢𑀲𑁆𑀲 𑀦𑀝𑁆𑀞𑀸 𑀕𑀸𑀯𑀺𑀬𑁄 𑀦𑀝𑁆𑀞𑀸𑀯 𑀳𑁄𑀦𑁆𑀢𑀺. 𑀧𑀭𑀕𑀸𑀯𑀺𑀬𑁄 𑀕𑀳𑁂𑀢𑁆𑀯𑀸 𑀘𑀭𑀢𑀺. 𑀕𑁄𑀲𑀸𑀫𑀺𑀓𑀸 𑀤𑀺𑀲𑁆𑀯𑀸 ‘‘𑀅𑀬𑀁 𑀏𑀢𑁆𑀢𑀓𑀁 𑀓𑀸𑀮𑀁 𑀅𑀫𑁆𑀳𑀸𑀓𑀁 𑀥𑁂𑀦𑀽 𑀤𑀼𑀳𑀻’’𑀢𑀺 𑀢𑀚𑁆𑀚𑁂𑀢𑁆𑀯𑀸 𑀅𑀢𑁆𑀢𑀦𑁄 𑀕𑀸𑀯𑀺𑀬𑁄 𑀕𑀳𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑀺. 𑀢𑀲𑁆𑀲 𑀕𑁄𑀕𑀡𑁄𑀧𑀺 𑀧𑀭𑀺𑀳𑀸𑀬𑀢𑀺, 𑀧𑀜𑁆𑀘 𑀕𑁄𑀭𑀲𑀧𑀭𑀺𑀪𑁄𑀕𑀢𑁄𑀧𑀺 𑀧𑀭𑀺𑀩𑀸𑀳𑀺𑀭𑁄 𑀳𑁄𑀢𑀺. 𑀯𑀡𑁆𑀡𑀢𑁄 𑀦 𑀚𑀸𑀦𑀸𑀢𑀺 𑀦𑀸𑀫 ‘‘𑀏𑀢𑁆𑀢𑀺𑀓𑀸 𑀕𑀸𑀯𑀻 𑀲𑁂𑀢𑀸, 𑀏𑀢𑁆𑀢𑀺𑀓𑀸 𑀭𑀢𑁆𑀢𑀸, 𑀏𑀢𑁆𑀢𑀺𑀓𑀸 𑀓𑀸𑀴𑀸, 𑀏𑀢𑁆𑀢𑀺𑀓𑀸 𑀑𑀤𑀸𑀢𑀸, 𑀏𑀢𑁆𑀢𑀺𑀓𑀸 𑀓𑀩𑀭𑀸, 𑀏𑀢𑁆𑀢𑀺𑀓𑀸 𑀦𑀻𑀮𑀸’’𑀢𑀺 𑀦 𑀚𑀸𑀦𑀸𑀢𑀺. 𑀲𑁄 𑀕𑀸𑀯𑀻𑀲𑀼 𑀳𑀝𑀸𑀲𑀼 𑀯𑀸 𑀧𑀮𑀸𑀢𑀸𑀲𑀼 𑀯𑀸…𑀧𑁂… 𑀧𑀜𑁆𑀘𑀕𑁄𑀭𑀲𑀧𑀭𑀺𑀪𑁄𑀕𑀢𑁄𑀧𑀺 𑀧𑀭𑀺𑀩𑀸𑀳𑀺𑀭𑁄 𑀳𑁄𑀢𑀺.

𑀦 𑀮𑀓𑁆𑀔𑀡𑀓𑀼𑀲𑀮𑁄𑀢𑀺 𑀕𑀸𑀯𑀻𑀦𑀁 𑀲𑀭𑀻𑀭𑁂 𑀓𑀢𑀁 𑀥𑀦𑀼𑀲𑀢𑁆𑀢𑀺𑀲𑀽𑀮𑀸𑀤𑀺𑀪𑁂𑀤𑀁 𑀮𑀓𑁆𑀔𑀡𑀁 𑀦 𑀚𑀸𑀦𑀸𑀢𑀺. 𑀲𑁄 𑀕𑀸𑀯𑀻𑀲𑀼 𑀳𑀝𑀸𑀲𑀼 𑀯𑀸 𑀧𑀮𑀸𑀢𑀸𑀲𑀼 𑀯𑀸 ‘‘𑀅𑀚𑁆𑀚 𑀅𑀲𑀼𑀓𑀮𑀓𑁆𑀔𑀡𑀸 𑀅𑀲𑀼𑀓𑀮𑀓𑁆𑀔𑀡𑀸 𑀘 𑀕𑀸𑀯𑁄 𑀦 𑀤𑀺𑀲𑁆𑀲𑀦𑁆𑀢𑀻’’𑀢𑀺…𑀧𑁂… 𑀧𑀜𑁆𑀘𑀕𑁄𑀭𑀲𑀧𑀭𑀺𑀪𑁄𑀕𑀢𑁄𑀧𑀺 𑀧𑀭𑀺𑀩𑀸𑀳𑀺𑀭𑁄 𑀳𑁄𑀢𑀺.

𑀦 𑀆𑀲𑀸𑀝𑀺𑀓𑀁 𑀳𑀸𑀭𑁂𑀢𑀸𑀢𑀺 𑀕𑀼𑀦𑁆𑀦𑀁 𑀔𑀸𑀡𑀼𑀓𑀡𑁆𑀝𑀓𑀸𑀤𑀻𑀳𑀺 𑀧𑀳𑀝𑀝𑁆𑀞𑀸𑀦𑁂𑀲𑀼 𑀯𑀡𑁄 𑀳𑁄𑀢𑀺. 𑀢𑀢𑁆𑀣 𑀦𑀻𑀮𑀫𑀓𑁆𑀔𑀺𑀓𑀸 𑀅𑀡𑁆𑀟𑀓𑀸𑀦𑀺 𑀞𑀧𑁂𑀦𑁆𑀢𑀺, 𑀢𑁂𑀲𑀁 𑀆𑀲𑀸𑀝𑀺𑀓𑀸𑀢𑀺 𑀦𑀸𑀫𑀁. 𑀢𑀸𑀦𑀺 𑀤𑀡𑁆𑀟𑀓𑁂𑀦 𑀅𑀧𑀦𑁂𑀢𑁆𑀯𑀸 𑀪𑁂𑀲𑀚𑁆𑀚𑀁 𑀤𑀸𑀢𑀩𑁆𑀩𑀁 𑀳𑁄𑀢𑀺, 𑀩𑀸𑀮𑁄 𑀕𑁄𑀧𑀸𑀮𑀓𑁄 𑀢𑀣𑀸 𑀦 𑀓𑀭𑁄𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀦 𑀆𑀲𑀸𑀝𑀺𑀓𑀁 𑀳𑀸𑀭𑁂𑀢𑀸 𑀳𑁄𑀢𑀻’’𑀢𑀺. 𑀢𑀲𑁆𑀲 𑀕𑀼𑀦𑁆𑀦𑀁 𑀯𑀡𑀸 𑀯𑀟𑁆𑀠𑀦𑁆𑀢𑀺, 𑀕𑀫𑁆𑀪𑀻𑀭𑀸 𑀳𑁄𑀦𑁆𑀢𑀺, 𑀧𑀸𑀡𑀓𑀸 𑀓𑀼𑀘𑁆𑀙𑀺𑀁 𑀧𑀯𑀺𑀲𑀦𑁆𑀢𑀺, 𑀕𑀸𑀯𑁄 𑀕𑁂𑀮𑀜𑁆𑀜𑀸𑀪𑀺𑀪𑀽𑀢𑀸 𑀦𑁂𑀯 𑀬𑀸𑀯𑀤𑀢𑁆𑀣𑀁 𑀢𑀺𑀡𑀁 𑀔𑀸𑀤𑀺𑀢𑀼𑀁 𑀦 𑀧𑀸𑀦𑀻𑀬𑀁 𑀧𑀸𑀢𑀼𑀁 𑀲𑀓𑁆𑀓𑁄𑀦𑁆𑀢𑀺. 𑀢𑀢𑁆𑀣 𑀕𑀼𑀦𑁆𑀦𑀁 𑀔𑀻𑀭𑀁 𑀙𑀺𑀚𑁆𑀚𑀢𑀺, 𑀕𑁄𑀡𑀸𑀦𑀁 𑀚𑀯𑁄 𑀳𑀸𑀬𑀢𑀺, 𑀉𑀪𑀬𑁂𑀲𑀫𑁆𑀧𑀺 𑀚𑀻𑀯𑀺𑀢𑀦𑁆𑀢𑀭𑀸𑀬𑁄 𑀳𑁄𑀢𑀺. 𑀏𑀯𑀫𑀲𑁆𑀲 𑀕𑁄𑀕𑀡𑁄𑀧𑀺 𑀧𑀭𑀺𑀳𑀸𑀬𑀢𑀺…𑀧𑁂… 𑀧𑀜𑁆𑀘𑀕𑁄𑀭𑀲𑀢𑁄𑀧𑀺 𑀧𑀭𑀺𑀩𑀸𑀳𑀺𑀭𑁄 𑀳𑁄𑀢𑀺.

𑀦 𑀯𑀡𑀁 𑀧𑀝𑀺𑀘𑁆𑀙𑀸𑀤𑁂𑀢𑀸 𑀳𑁄𑀢𑀻𑀢𑀺 𑀕𑀼𑀦𑁆𑀦𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀲𑀜𑁆𑀚𑀸𑀢𑁄 𑀯𑀡𑁄 𑀪𑁂𑀲𑀚𑁆𑀚𑀁 𑀤𑀢𑁆𑀯𑀸 𑀯𑀸𑀓𑁂𑀦 𑀯𑀸 𑀘𑀻𑀭𑀓𑁂𑀦 𑀯𑀸 𑀩𑀦𑁆𑀥𑀺𑀢𑁆𑀯𑀸 𑀧𑀝𑀺𑀘𑁆𑀙𑀸𑀤𑁂𑀢𑀩𑁆𑀩𑁄 𑀳𑁄𑀢𑀺. 𑀩𑀸𑀮𑀕𑁄𑀧𑀸𑀮𑀓𑁄 𑀢𑀁 𑀦 𑀓𑀭𑁄𑀢𑀺. 𑀅𑀣𑀲𑁆𑀲 𑀕𑀼𑀦𑁆𑀦𑀁 𑀯𑀡𑁂𑀳𑀺 𑀬𑀽𑀲𑀸 𑀧𑀕𑁆𑀖𑀭𑀦𑁆𑀢𑀺, 𑀢𑀸 𑀅𑀜𑁆𑀜𑀫𑀜𑁆𑀜𑀁 𑀦𑀺𑀖𑀁𑀲𑀦𑁆𑀢𑀺. 𑀢𑁂𑀦 𑀅𑀜𑁆𑀜𑁂𑀲𑀫𑁆𑀧𑀺 𑀯𑀡𑀸 𑀚𑀸𑀬𑀦𑁆𑀢𑀺. 𑀏𑀯𑀁 𑀕𑀸𑀯𑁄 𑀕𑁂𑀮𑀜𑁆𑀜𑀸𑀪𑀺𑀪𑀽𑀢𑀸 𑀦𑁂𑀯 𑀬𑀸𑀯𑀤𑀢𑁆𑀣𑀁 𑀢𑀺𑀡𑀸𑀦𑀺 𑀔𑀸𑀤𑀺𑀢𑀼𑀁…𑀧𑁂… 𑀧𑀭𑀺𑀩𑀸𑀳𑀺𑀭𑁄 𑀳𑁄𑀢𑀺.

𑀦 𑀥𑀽𑀫𑀁 𑀓𑀢𑁆𑀢𑀸 𑀳𑁄𑀢𑀻𑀢𑀺 𑀅𑀦𑁆𑀢𑁄𑀯𑀲𑁆𑀲𑁂 𑀟𑀁𑀲𑀫𑀓𑀲𑀸𑀤𑀻𑀦𑀁 𑀉𑀲𑁆𑀲𑀦𑁆𑀦𑀓𑀸𑀮𑁂 𑀕𑁄𑀕𑀡𑁂 𑀯𑀚𑀁 𑀧𑀯𑀺𑀝𑁆𑀞𑁂 𑀢𑀢𑁆𑀣 𑀢𑀢𑁆𑀣 𑀥𑀽𑀫𑁄 𑀓𑀸𑀢𑀩𑁆𑀩𑁄 𑀳𑁄𑀢𑀺. 𑀅𑀧𑀡𑁆𑀟𑀺𑀢𑀕𑁄𑀧𑀸𑀮𑀓𑁄 𑀢𑀁 𑀦 𑀓𑀭𑁄𑀢𑀺, 𑀕𑁄𑀕𑀡𑁄 𑀲𑀩𑁆𑀩𑀭𑀢𑁆𑀢𑀺𑀁 𑀟𑀁𑀲𑀸𑀤𑀻𑀳𑀺 𑀉𑀧𑀤𑁆𑀤𑀼𑀢𑁄 𑀦𑀺𑀤𑁆𑀤𑀁 𑀅𑀮𑀪𑀺𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀅𑀭𑀜𑁆𑀜𑁂 𑀢𑀢𑁆𑀣 𑀢𑀢𑁆𑀣 𑀭𑀼𑀓𑁆𑀔𑀫𑀽𑀮𑀸𑀤𑀻𑀲𑀼 𑀦𑀺𑀧𑀚𑁆𑀚𑀺𑀢𑁆𑀯𑀸 𑀦𑀺𑀤𑁆𑀤𑀸𑀬𑀢𑀺. 𑀦𑁂𑀯 𑀬𑀸𑀯𑀤𑀢𑁆𑀣𑀁 𑀢𑀺𑀡𑀸𑀦𑀺 𑀔𑀸𑀤𑀺𑀢𑀼𑀁…𑀧𑁂… 𑀧𑀭𑀺𑀩𑀸𑀳𑀺𑀭𑁄 𑀳𑁄𑀢𑀺.

𑀦 𑀢𑀺𑀢𑁆𑀣𑀁 𑀚𑀸𑀦𑀸𑀢𑀻𑀢𑀺 𑀢𑀺𑀢𑁆𑀣𑀫𑁆𑀧𑀺 𑀲𑀫𑀦𑁆𑀢𑀺 𑀯𑀸 𑀯𑀺𑀲𑀫𑀦𑁆𑀢𑀺 𑀯𑀸 𑀲𑀕𑀸𑀳𑀦𑁆𑀢𑀺 𑀯𑀸 𑀦𑀺𑀕𑁆𑀕𑀸𑀳𑀦𑁆𑀢𑀺 𑀯𑀸 𑀦 𑀚𑀸𑀦𑀸𑀢𑀺. 𑀲𑁄 𑀅𑀢𑀺𑀢𑁆𑀣𑁂𑀦 𑀕𑀸𑀯𑀺𑀬𑁄 𑀑𑀢𑀸𑀭𑁂𑀢𑀺. 𑀢𑀸𑀲𑀁 𑀯𑀺𑀲𑀫𑀢𑀺𑀢𑁆𑀣𑁂 𑀧𑀸𑀲𑀸𑀡𑀸𑀤𑀻𑀦𑀺 𑀅𑀓𑁆𑀓𑀫𑀦𑁆𑀢𑀻𑀦𑀁 𑀧𑀸𑀤𑀸 𑀪𑀺𑀚𑁆𑀚𑀦𑁆𑀢𑀺. 𑀲𑀕𑀸𑀳𑀁 𑀕𑀫𑁆𑀪𑀻𑀭𑀁 𑀢𑀺𑀢𑁆𑀣𑀁 𑀑𑀢𑀺𑀡𑁆𑀡𑁂 𑀓𑀼𑀫𑁆𑀪𑀻𑀮𑀸𑀤𑀬𑁄 𑀕𑀸𑀯𑁄 𑀕𑀡𑁆𑀳𑀦𑁆𑀢𑀺, ‘‘𑀅𑀚𑁆𑀚 𑀏𑀢𑁆𑀢𑀺𑀓𑀸 𑀕𑀸𑀯𑁄 𑀦𑀝𑁆𑀞𑀸, 𑀅𑀚𑁆𑀚 𑀏𑀢𑁆𑀢𑀺𑀓𑀸’’𑀢𑀺 𑀯𑀢𑁆𑀢𑀩𑁆𑀩𑀢𑀁 𑀆𑀧𑀚𑁆𑀚𑀦𑁆𑀢𑀺. 𑀏𑀯𑀫𑀲𑁆𑀲 𑀕𑁄 𑀕𑀡𑁄𑀧𑀺 𑀧𑀭𑀺𑀳𑀸𑀬𑀢𑀺…𑀧𑁂… 𑀧𑀜𑁆𑀘𑀕𑁄𑀭𑀲𑀢𑁄𑀧𑀺 𑀧𑀭𑀺𑀩𑀸𑀳𑀺𑀭𑁄 𑀳𑁄𑀢𑀺.

𑀦 𑀧𑀻𑀢𑀁 𑀚𑀸𑀦𑀸𑀢𑀻𑀢𑀺 𑀧𑀻𑀢𑀫𑁆𑀧𑀺 𑀅𑀧𑀻𑀢𑀫𑁆𑀧𑀺 𑀦 𑀚𑀸𑀦𑀸𑀢𑀺. 𑀕𑁄𑀧𑀸𑀮𑀓𑁂𑀦 𑀳𑀺 ‘‘𑀇𑀫𑀸𑀬 𑀕𑀸𑀯𑀺𑀬𑀸 𑀧𑀻𑀢𑀁, 𑀇𑀫𑀸𑀬 𑀦 𑀧𑀻𑀢𑀁, 𑀇𑀫𑀸𑀬 𑀧𑀸𑀦𑀻𑀬𑀢𑀺𑀢𑁆𑀣𑁂 𑀑𑀓𑀸𑀲𑁄 𑀮𑀤𑁆𑀥𑁄, 𑀇𑀫𑀸𑀬 𑀦 𑀮𑀤𑁆𑀥𑁄’’𑀢𑀺 𑀏𑀯𑀁 𑀧𑀻𑀢𑀸𑀧𑀻𑀢𑀁 𑀚𑀸𑀦𑀺𑀢𑀩𑁆𑀩𑀁 𑀳𑁄𑀢𑀺. 𑀅𑀬𑀁 𑀧𑀦 𑀤𑀺𑀯𑀲𑀪𑀸𑀕𑁂 𑀅𑀭𑀜𑁆𑀜𑁂 𑀕𑁄𑀕𑀡𑀁 𑀭𑀓𑁆𑀔𑀺𑀢𑁆𑀯𑀸 ‘‘𑀧𑀸𑀦𑀻𑀬𑀁 𑀧𑀸𑀬𑁂𑀲𑁆𑀲𑀸𑀫𑀻’’𑀢𑀺 𑀦𑀤𑀺𑀁 𑀯𑀸 𑀢𑀴𑀸𑀓𑀁 𑀯𑀸 𑀑𑀕𑀸𑀳𑁂𑀢𑁆𑀯𑀸 𑀕𑀘𑁆𑀙𑀢𑀺. 𑀢𑀢𑁆𑀣 𑀫𑀳𑀸𑀉𑀲𑀪𑀸 𑀘 𑀅𑀦𑀼𑀲𑀪𑀸 𑀘 𑀩𑀮𑀯𑀕𑀸𑀯𑀺𑀬𑁄 𑀘 𑀤𑀼𑀩𑁆𑀩𑀮𑀸𑀦𑀺 𑀘𑁂𑀯 𑀫𑀳𑀮𑁆𑀮𑀓𑀸𑀦𑀺 𑀘 𑀕𑁄𑀭𑀽𑀧𑀸𑀦𑀺 𑀲𑀺𑀗𑁆𑀕𑁂𑀳𑀺 𑀯𑀸 𑀨𑀸𑀲𑀼𑀓𑀸𑀳𑀺 𑀯𑀸 𑀧𑀳𑀭𑀺𑀢𑁆𑀯𑀸 𑀅𑀢𑁆𑀢𑀦𑁄 𑀑𑀓𑀸𑀲𑀁 𑀓𑀢𑁆𑀯𑀸 𑀊𑀭𑀼𑀧𑁆𑀧𑀫𑀸𑀡𑀁 𑀉𑀤𑀓𑀁 𑀧𑀯𑀺𑀲𑀺𑀢𑁆𑀯𑀸 𑀬𑀣𑀸𑀓𑀸𑀫𑀁 𑀧𑀺𑀯𑀦𑁆𑀢𑀺. 𑀅𑀯𑀲𑁂𑀲𑀸 𑀑𑀓𑀸𑀲𑀁 𑀅𑀮𑀪𑀫𑀸𑀦𑀸 𑀢𑀻𑀭𑁂 𑀞𑀢𑁆𑀯𑀸 𑀓𑀮𑀮𑀫𑀺𑀲𑁆𑀲𑀓𑀁 𑀉𑀤𑀓𑀁 𑀧𑀺𑀯𑀦𑁆𑀢𑀺 𑀯𑀸 𑀅𑀧𑀻𑀢𑀸 𑀏𑀯 𑀯𑀸 𑀳𑁄𑀦𑁆𑀢𑀺. 𑀅𑀣 𑀲𑁄 𑀕𑁄𑀧𑀸𑀮𑀓𑁄 𑀧𑀺𑀝𑁆𑀞𑀺𑀬𑀁 𑀧𑀳𑀭𑀺𑀢𑁆𑀯𑀸 𑀧𑀼𑀦 𑀅𑀭𑀜𑁆𑀜𑀁 𑀧𑀯𑁂𑀲𑁂𑀢𑀺. 𑀢𑀢𑁆𑀣 𑀅𑀧𑀻𑀢𑀸 𑀕𑀸𑀯𑀺𑀬𑁄 𑀧𑀺𑀧𑀸𑀲𑀸𑀬 𑀲𑀼𑀲𑁆𑀲𑀫𑀸𑀦𑀸 𑀬𑀸𑀯𑀤𑀢𑁆𑀣𑀁 𑀢𑀺𑀡𑀸𑀦𑀺 𑀔𑀸𑀤𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺. 𑀢𑀢𑁆𑀣 𑀕𑀼𑀦𑁆𑀦𑀁 𑀔𑀻𑀭𑀁 𑀙𑀺𑀚𑁆𑀚𑀢𑀺. 𑀕𑁄𑀡𑀸𑀦𑀁 𑀚𑀯𑁄 𑀳𑀸𑀬𑀢𑀺…𑀧𑁂… 𑀧𑀭𑀺𑀩𑀸𑀳𑀺𑀭𑁄 𑀳𑁄𑀢𑀺.

𑀦 𑀯𑀻𑀣𑀺𑀁 𑀚𑀸𑀦𑀸𑀢𑀻𑀢𑀺 ‘‘𑀅𑀬𑀁 𑀫𑀕𑁆𑀕𑁄 𑀲𑀫𑁄 𑀔𑁂𑀫𑁄, 𑀅𑀬𑀁 𑀯𑀺𑀲𑀫𑁄 𑀲𑀸𑀲𑀗𑁆𑀓𑁄 𑀲𑀧𑁆𑀧𑀝𑀺𑀪𑀬𑁄’’𑀢𑀺 𑀦 𑀚𑀸𑀦𑀸𑀢𑀺. 𑀲𑁄 𑀲𑀫𑀁 𑀔𑁂𑀫𑀁 𑀫𑀕𑁆𑀕𑀁 𑀯𑀚𑁆𑀚𑁂𑀢𑁆𑀯𑀸 𑀕𑁄𑀕𑀡𑀁 𑀇𑀢𑀭𑀫𑀕𑁆𑀕𑀁 𑀧𑀝𑀺𑀧𑀸𑀤𑁂𑀢𑀺. 𑀢𑀢𑁆𑀣 𑀕𑀸𑀯𑁄 𑀲𑀻𑀳𑀩𑁆𑀬𑀕𑁆𑀖𑀸𑀤𑀻𑀦𑀁 𑀕𑀦𑁆𑀥𑁂𑀦 𑀘𑁄𑀭𑀧𑀭𑀺𑀲𑁆𑀲𑀬𑁂𑀦 𑀘 𑀅𑀪𑀺𑀪𑀽𑀢𑀸 𑀪𑀦𑁆𑀢𑀫𑀺𑀕𑀲𑀧𑁆𑀧𑀝𑀺𑀪𑀸𑀕𑀸 𑀕𑀻𑀯𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀢𑀺𑀝𑁆𑀞𑀦𑁆𑀢𑀺, 𑀦𑁂𑀯 𑀬𑀸𑀯𑀤𑀢𑁆𑀣𑀁 𑀢𑀺𑀡𑀸𑀦𑀺 𑀔𑀸𑀤𑀦𑁆𑀢𑀺, 𑀦 𑀧𑀸𑀦𑀻𑀬𑀁 𑀧𑀺𑀯𑀦𑁆𑀢𑀺. 𑀢𑀢𑁆𑀣 𑀕𑀼𑀦𑁆𑀦𑀁 𑀔𑀻𑀭𑀁 𑀙𑀺𑀚𑁆𑀚𑀢𑀺…𑀧𑁂… 𑀧𑀭𑀺𑀩𑀸𑀳𑀺𑀭𑁄 𑀳𑁄𑀢𑀺.

𑀦 𑀕𑁄𑀘𑀭𑀓𑀼𑀲𑀮𑁄 𑀳𑁄𑀢𑀻𑀢𑀺 𑀕𑁄𑀧𑀸𑀮𑀓𑁂𑀦 𑀳𑀺 𑀕𑁄𑀘𑀭𑀓𑀼𑀲𑀮𑁂𑀦 𑀪𑀯𑀺𑀢𑀩𑁆𑀩𑀁, 𑀧𑀜𑁆𑀘𑀸𑀳𑀺𑀓𑀘𑀸𑀭𑁄 𑀯𑀸 𑀲𑀢𑁆𑀢𑀸𑀳𑀺𑀓𑀘𑀸𑀭𑁄 𑀯𑀸 𑀚𑀸𑀦𑀺𑀢𑀩𑁆𑀩𑁄. 𑀏𑀓𑀤𑀺𑀲𑀸𑀬 𑀕𑁄𑀕𑀡𑀁 𑀘𑀸𑀭𑁂𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀢𑀢𑁆𑀣 𑀦 𑀘𑀸𑀭𑁂𑀢𑀩𑁆𑀩𑁄. 𑀫𑀳𑀢𑀸 𑀳𑀺 𑀕𑁄𑀕𑀡𑁂𑀦 𑀘𑀺𑀡𑁆𑀡𑀝𑁆𑀞𑀸𑀦𑀁 𑀪𑁂𑀭𑀺𑀢𑀮𑀁 𑀯𑀺𑀬 𑀲𑀼𑀤𑁆𑀥𑀁 𑀳𑁄𑀢𑀺 𑀦𑀺𑀢𑁆𑀢𑀺𑀡𑀁, 𑀉𑀤𑀓𑀫𑁆𑀧𑀺 𑀆𑀮𑀼𑀮𑀻𑀬𑀢𑀺. 𑀢𑀲𑁆𑀫𑀸 𑀧𑀜𑁆𑀘𑀫𑁂 𑀯𑀸 𑀲𑀢𑁆𑀢𑀫𑁂 𑀯𑀸 𑀤𑀺𑀯𑀲𑁂 𑀧𑀼𑀦 𑀢𑀢𑁆𑀣 𑀘𑀸𑀭𑁂𑀢𑀼𑀁 𑀯𑀝𑁆𑀝𑀢𑀺. 𑀏𑀢𑁆𑀢𑀓𑁂𑀦 𑀳𑀺 𑀢𑀺𑀡𑀫𑁆𑀧𑀺 𑀧𑀝𑀺𑀯𑀺𑀭𑀼𑀳𑀢𑀺, 𑀉𑀤𑀓𑀫𑁆𑀧𑀺 𑀧𑀲𑀻𑀤𑀢𑀺, 𑀅𑀬𑀁 𑀧𑀦 𑀇𑀫𑀁 𑀧𑀜𑁆𑀘𑀸𑀳𑀺𑀓𑀘𑀸𑀭𑀁 𑀯𑀸 𑀲𑀢𑁆𑀢𑀸𑀳𑀺𑀓𑀘𑀸𑀭𑀁 𑀯𑀸 𑀦 𑀚𑀸𑀦𑀸𑀢𑀺, 𑀤𑀺𑀯𑀲𑁂 𑀤𑀺𑀯𑀲𑁂 𑀭𑀓𑁆𑀔𑀺𑀢𑀝𑁆𑀞𑀸𑀦𑁂𑀬𑁂𑀯 𑀭𑀓𑁆𑀔𑀢𑀺. 𑀅𑀣𑀲𑁆𑀲 𑀕𑁄𑀕𑀡𑁄 𑀳𑀭𑀺𑀢𑀢𑀺𑀡𑀁 𑀦 𑀮𑀪𑀢𑀺, 𑀲𑀼𑀓𑁆𑀔𑀢𑀺𑀡𑀁 𑀔𑀸𑀤𑀦𑁆𑀢𑁄 𑀓𑀮𑀮𑀫𑀺𑀲𑁆𑀲𑀓𑀁 𑀉𑀤𑀓𑀁 𑀧𑀺𑀯𑀢𑀺. 𑀢𑀢𑁆𑀣 𑀕𑀼𑀦𑁆𑀦𑀁 𑀔𑀻𑀭𑀁 𑀙𑀺𑀚𑁆𑀚𑀢𑀺…𑀧𑁂… 𑀧𑀭𑀺𑀩𑀸𑀳𑀺𑀭𑁄 𑀳𑁄𑀢𑀺.

𑀅𑀦𑀯𑀲𑁂𑀲𑀤𑁄𑀳𑀻 𑀘 𑀳𑁄𑀢𑀻𑀢𑀺 𑀧𑀡𑁆𑀟𑀺𑀢𑀕𑁄𑀧𑀸𑀮𑀓𑁂𑀦 𑀳𑀺 𑀬𑀸𑀯 𑀯𑀘𑁆𑀙𑀓𑀲𑁆𑀲 𑀫𑀁𑀲𑀮𑁄𑀳𑀺𑀢𑀁 𑀲𑀡𑁆𑀞𑀸𑀢𑀺, 𑀢𑀸𑀯 𑀏𑀓𑀁 𑀤𑁆𑀯𑁂 𑀣𑀦𑁂 𑀞𑀧𑁂𑀢𑁆𑀯𑀸 𑀲𑀸𑀯𑀲𑁂𑀲𑀤𑁄𑀳𑀺𑀦𑀸 𑀪𑀯𑀺𑀢𑀩𑁆𑀩𑀁. 𑀅𑀬𑀁 𑀯𑀘𑁆𑀙𑀓𑀲𑁆𑀲 𑀓𑀺𑀜𑁆𑀘𑀺 𑀅𑀦𑀯𑀲𑁂𑀲𑁂𑀢𑁆𑀯𑀸 𑀤𑀼𑀳𑀢𑀺. 𑀔𑀻𑀭𑀧𑀓𑁄 𑀯𑀘𑁆𑀙𑁄 𑀔𑀻𑀭𑀧𑀺𑀧𑀸𑀲𑀸𑀬 𑀲𑀼𑀲𑁆𑀲𑀢𑀺, 𑀲𑀡𑁆𑀞𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀓𑀫𑁆𑀧𑀫𑀸𑀦𑁄 𑀫𑀸𑀢𑀼 𑀧𑀼𑀭𑀢𑁄 𑀧𑀢𑀺𑀢𑁆𑀯𑀸 𑀓𑀸𑀮𑀁 𑀓𑀭𑁄𑀦𑁆𑀢𑀺. 𑀫𑀸𑀢𑀸 𑀧𑀼𑀢𑁆𑀢𑀓𑀁 𑀤𑀺𑀲𑁆𑀯𑀸, ‘‘𑀫𑀬𑁆𑀳𑀁 𑀧𑀼𑀢𑁆𑀢𑀓𑁄 𑀅𑀢𑁆𑀢𑀦𑁄 𑀫𑀸𑀢𑀼𑀔𑀻𑀭𑀁 𑀧𑀸𑀢𑀼𑀁 𑀦 𑀮𑀪𑀢𑀻’’𑀢𑀺 𑀧𑀼𑀢𑁆𑀢𑀲𑁄𑀓𑁂𑀦 𑀦𑁂𑀯 𑀬𑀸𑀯𑀤𑀢𑁆𑀣𑀁 𑀢𑀺𑀡𑀸𑀦𑀺 𑀔𑀸𑀤𑀺𑀢𑀼𑀁 𑀦 𑀧𑀸𑀦𑀻𑀬𑀁 𑀧𑀸𑀢𑀼𑀁 𑀲𑀓𑁆𑀓𑁄𑀢𑀺, 𑀣𑀦𑁂𑀲𑀼 𑀔𑀻𑀭𑀁 𑀙𑀺𑀚𑁆𑀚𑀢𑀺. 𑀏𑀯𑀫𑀲𑁆𑀲 𑀕𑁄𑀕𑀡𑁄𑀧𑀺 𑀧𑀭𑀺𑀳𑀸𑀬𑀢𑀺…𑀧𑁂… 𑀧𑀜𑁆𑀘𑀕𑁄𑀭𑀲𑀢𑁄𑀧𑀺 𑀧𑀭𑀺𑀩𑀸𑀳𑀺𑀭𑁄 𑀳𑁄𑀢𑀺.

𑀕𑀼𑀦𑁆𑀦𑀁 𑀧𑀺𑀢𑀺𑀝𑁆𑀞𑀸𑀦𑀁 𑀓𑀭𑁄𑀦𑁆𑀢𑀻𑀢𑀺 𑀕𑁄𑀧𑀺𑀢𑀭𑁄. 𑀕𑀸𑀯𑁄 𑀧𑀭𑀺𑀡𑀸𑀬𑀦𑁆𑀢𑀺 𑀬𑀣𑀸𑀭𑀼𑀘𑀺𑀁 𑀕𑀳𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑀻𑀢𑀺 𑀕𑁄𑀧𑀭𑀺𑀡𑀸𑀬𑀓𑀸. 𑀢𑁂 𑀦 𑀅𑀢𑀺𑀭𑁂𑀓𑀧𑀽𑀚𑀸𑀬𑀸𑀢𑀺 𑀧𑀡𑁆𑀟𑀺𑀢𑁄 𑀳𑀺 𑀕𑁄𑀧𑀸𑀮𑀓𑁄 𑀏𑀯𑀭𑀽𑀧𑁂 𑀉𑀲𑀪𑁂 𑀅𑀢𑀺𑀭𑁂𑀓𑀧𑀽𑀚𑀸𑀬 𑀧𑀽𑀚𑁂𑀢𑀺, 𑀧𑀡𑀻𑀢𑀁 𑀕𑁄𑀪𑀢𑁆𑀢𑀁 𑀤𑁂𑀢𑀺, 𑀕𑀦𑁆𑀥𑀧𑀜𑁆𑀘𑀗𑁆𑀕𑀼𑀮𑀺𑀓𑁂𑀳𑀺 𑀫𑀡𑁆𑀟𑁂𑀢𑀺, 𑀫𑀸𑀮𑀁 𑀧𑀺𑀴𑀦𑁆𑀥𑁂𑀢𑀺, 𑀲𑀺𑀗𑁆𑀕𑁂𑀲𑀼 𑀲𑀼𑀯𑀡𑁆𑀡𑀭𑀚𑀢𑀓𑁄𑀲𑀓𑁂 𑀘 𑀥𑀸𑀭𑁂𑀢𑀺, 𑀭𑀢𑁆𑀢𑀺𑀁 𑀤𑀻𑀧𑀁 𑀚𑀸𑀮𑁂𑀢𑁆𑀯𑀸 𑀘𑁂𑀮𑀯𑀺𑀢𑀸𑀦𑀲𑁆𑀲 𑀳𑁂𑀝𑁆𑀞𑀸 𑀲𑀬𑀸𑀧𑁂𑀢𑀺. 𑀅𑀬𑀁 𑀧𑀦 𑀢𑀢𑁄 𑀏𑀓𑀲𑀓𑁆𑀓𑀸𑀭𑀫𑁆𑀧𑀺 𑀦 𑀓𑀭𑁄𑀢𑀺. 𑀉𑀲𑀪𑀸 𑀅𑀢𑀺𑀭𑁂𑀓𑀧𑀽𑀚𑀁 𑀅𑀮𑀪𑀫𑀸𑀦𑀸 𑀕𑁄𑀕𑀡𑀁 𑀦 𑀭𑀓𑁆𑀔𑀦𑁆𑀢𑀺, 𑀧𑀭𑀺𑀲𑁆𑀲𑀬𑀁 𑀦 𑀯𑀸𑀭𑁂𑀦𑁆𑀢𑀺. 𑀏𑀯𑀫𑀲𑁆𑀲 𑀕𑁄𑀕𑀡𑁄𑀧𑀺 𑀧𑀭𑀺𑀳𑀸𑀬𑀢𑀺…𑀧𑁂… 𑀧𑀜𑁆𑀘𑀕𑁄𑀭𑀲𑀢𑁄𑀧𑀺 𑀧𑀭𑀺𑀩𑀸𑀳𑀺𑀭𑁄 𑀳𑁄𑀢𑀺.

𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂. 𑀦 𑀭𑀽𑀧𑀜𑁆𑀜𑀽 𑀳𑁄𑀢𑀻𑀢𑀺 ‘‘𑀘𑀢𑁆𑀢𑀸𑀭𑀺 𑀫𑀳𑀸𑀪𑀽𑀢𑀸𑀦𑀺 𑀘𑀢𑀼𑀦𑁆𑀦𑀜𑁆𑀘 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬𑀭𑀽𑀧’’𑀦𑁆𑀢𑀺 𑀏𑀯𑀁 𑀯𑀼𑀢𑁆𑀢𑀁 𑀭𑀽𑀧𑀁 𑀤𑁆𑀯𑀻𑀳𑀸𑀓𑀸𑀭𑁂𑀳𑀺 𑀦 𑀚𑀸𑀦𑀸𑀢𑀺 𑀕𑀡𑀦𑀢𑁄 𑀯𑀸 𑀲𑀫𑀼𑀝𑁆𑀞𑀸𑀦𑀢𑁄 𑀯𑀸. 𑀕𑀡𑀦𑀢𑁄 𑀦 𑀚𑀸𑀦𑀸𑀢𑀺 𑀦𑀸𑀫 𑁋 ‘‘𑀘𑀓𑁆𑀔𑀸𑀬𑀢𑀦𑀁 𑀲𑁄𑀢𑀸𑀬𑀢𑀦𑀁 𑀖𑀸𑀦𑀸𑀬𑀢𑀦𑀁 𑀚𑀺𑀯𑁆𑀳𑀸𑀓𑀸𑀬𑀭𑀽𑀧𑀲𑀤𑁆𑀤𑀕𑀦𑁆𑀥𑀭𑀲𑀨𑁄𑀝𑁆𑀞𑀩𑁆𑀩𑀸𑀬𑀢𑀦𑀁, 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀁 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀓𑀸𑀬𑀯𑀺𑀜𑁆𑀜𑀢𑁆𑀢𑀺 𑀯𑀘𑀻𑀯𑀺𑀜𑁆𑀜𑀢𑁆𑀢𑀺 𑀆𑀓𑀸𑀲𑀥𑀸𑀢𑀼 𑀆𑀧𑁄𑀥𑀸𑀢𑀼 𑀭𑀽𑀧𑀲𑁆𑀲 𑀮𑀳𑀼𑀢𑀸, 𑀫𑀼𑀤𑀼𑀢𑀸, 𑀓𑀫𑁆𑀫𑀜𑁆𑀜𑀢𑀸, 𑀉𑀧𑀘𑀬𑁄, 𑀲𑀦𑁆𑀢𑀢𑀺, 𑀚𑀭𑀢𑀸, 𑀭𑀽𑀧𑀲𑁆𑀲 𑀅𑀦𑀺𑀘𑁆𑀘𑀢𑀸, 𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄’’𑀢𑀺 (𑀥. 𑀲. 𑁬𑁫𑁭-𑁬𑁬𑁫) 𑀏𑀯𑀁 𑀧𑀸𑀴𑀺𑀬𑀸 𑀆𑀕𑀢𑀸 𑀧𑀜𑁆𑀘𑀯𑀻𑀲𑀢𑀺 𑀭𑀽𑀧𑀓𑁄𑀝𑁆𑀞𑀸𑀲𑀸𑀢𑀺 𑀦 𑀚𑀸𑀦𑀸𑀢𑀺. 𑀲𑁂𑀬𑁆𑀬𑀣𑀸𑀧𑀺 𑀲𑁄 𑀕𑁄𑀧𑀸𑀮𑀓𑁄 𑀕𑀡𑀦𑀢𑁄 𑀕𑀼𑀦𑁆𑀦𑀁 𑀭𑀽𑀧𑀁 𑀦 𑀚𑀸𑀦𑀸𑀢𑀺, 𑀢𑀣𑀽𑀧𑀫𑁄 𑀅𑀬𑀁 𑀪𑀺𑀓𑁆𑀔𑀼. 𑀲𑁄 𑀕𑀡𑀦𑀢𑁄 𑀭𑀽𑀧𑀁 𑀅𑀚𑀸𑀦𑀦𑁆𑀢𑁄 𑀭𑀽𑀧𑀁 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀅𑀭𑀽𑀧𑀁 𑀯𑀯𑀢𑁆𑀣𑀧𑁂𑀢𑁆𑀯𑀸 𑀭𑀽𑀧𑀸𑀭𑀽𑀧𑀁 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀧𑀘𑁆𑀘𑀬𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀮𑀓𑁆𑀔𑀡𑀁 𑀆𑀭𑁄𑀧𑁂𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑀁 𑀫𑀢𑁆𑀣𑀓𑀁 𑀧𑀸𑀧𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀲𑁄 𑀬𑀣𑀸 𑀢𑀲𑁆𑀲 𑀕𑁄𑀧𑀸𑀮𑀓𑀲𑁆𑀲 𑀕𑁄𑀕𑀡𑁄 𑀦 𑀯𑀟𑁆𑀠𑀢𑀺, 𑀏𑀯𑀁 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀲𑀻𑀮𑀲𑀫𑀸𑀥𑀺𑀯𑀺𑀧𑀲𑁆𑀲𑀦𑀸𑀫𑀕𑁆𑀕𑀨𑀮𑀦𑀺𑀩𑁆𑀩𑀸𑀦𑁂𑀳𑀺 𑀦 𑀯𑀟𑁆𑀠𑀢𑀺. 𑀬𑀣𑀸 𑀘 𑀲𑁄 𑀕𑁄𑀧𑀸𑀮𑀓𑁄 𑀧𑀜𑁆𑀘𑀳𑀺 𑀕𑁄𑀭𑀲𑁂𑀳𑀺 𑀧𑀭𑀺𑀩𑀸𑀳𑀺𑀭𑁄 𑀳𑁄𑀢𑀺, 𑀏𑀯𑀫𑁂𑀯𑀸𑀬𑀁 𑀅𑀲𑁂𑀔𑁂𑀦 𑀲𑀻𑀮𑀓𑁆𑀔𑀦𑁆𑀥𑁂𑀦 𑀅𑀲𑁂𑀔𑁂𑀦 𑀲𑀫𑀸𑀥𑀺𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀓𑁆𑀔𑀦𑁆𑀥𑁂𑀦𑀸𑀢𑀺 𑀧𑀜𑁆𑀘𑀳𑀺 𑀥𑀫𑁆𑀫𑀓𑁆𑀔𑀦𑁆𑀥𑁂𑀳𑀺 𑀧𑀭𑀺𑀩𑀸𑀳𑀺𑀭𑁄 𑀳𑁄𑀢𑀺.

𑀲𑀫𑀼𑀝𑁆𑀞𑀸𑀦𑀢𑁄 𑀦 𑀚𑀸𑀦𑀸𑀢𑀺 𑀦𑀸𑀫 𑁋 ‘‘𑀏𑀢𑁆𑀢𑀓𑀁 𑀭𑀽𑀧𑀁 𑀏𑀓𑀲𑀫𑀼𑀝𑁆𑀞𑀸𑀦𑀁, 𑀏𑀢𑁆𑀢𑀓𑀁 𑀤𑁆𑀯𑀺𑀲𑀫𑀼𑀝𑁆𑀞𑀸𑀦𑀁, 𑀏𑀢𑁆𑀢𑀓𑀁 𑀢𑀺𑀲𑀫𑀼𑀝𑁆𑀞𑀸𑀦𑀁, 𑀏𑀢𑁆𑀢𑀓𑀁 𑀘𑀢𑀼𑀲𑀫𑀼𑀝𑁆𑀞𑀸𑀦𑀁, 𑀏𑀢𑁆𑀢𑀓𑀁 𑀦𑀓𑀼𑀢𑁄𑀘𑀺 𑀲𑀫𑀼𑀝𑁆𑀞𑀸𑀢𑀻’’𑀢𑀺 𑀦 𑀚𑀸𑀦𑀸𑀢𑀺. 𑀲𑁂𑀬𑁆𑀬𑀣𑀸𑀧𑀺 𑀲𑁄 𑀕𑁄𑀧𑀸𑀮𑀓𑁄 𑀯𑀡𑁆𑀡𑀢𑁄 𑀕𑀼𑀦𑁆𑀦𑀁 𑀭𑀽𑀧𑀁 𑀦 𑀚𑀸𑀦𑀸𑀢𑀺, 𑀢𑀣𑀽𑀧𑀫𑁄 𑀅𑀬𑀁 𑀪𑀺𑀓𑁆𑀔𑀼. 𑀲𑁄 𑀲𑀫𑀼𑀝𑁆𑀞𑀸𑀦𑀢𑁄 𑀭𑀽𑀧𑀁 𑀅𑀚𑀸𑀦𑀦𑁆𑀢𑁄 𑀭𑀽𑀧𑀁 𑀧𑀭𑀺𑀕𑁆𑀕𑀳𑁂𑀢𑁆𑀯𑀸…𑀧𑁂… 𑀧𑀭𑀺𑀩𑀸𑀳𑀺𑀭𑁄 𑀳𑁄𑀢𑀺.

𑀦 𑀮𑀓𑁆𑀔𑀡𑀓𑀼𑀲𑀮𑁄 𑀳𑁄𑀢𑀻𑀢𑀺 ‘‘𑀓𑀫𑁆𑀫𑀮𑀓𑁆𑀔𑀡𑁄 𑀩𑀸𑀮𑁄, 𑀓𑀫𑁆𑀫𑀮𑀓𑁆𑀔𑀡𑁄 𑀧𑀡𑁆𑀟𑀺𑀢𑁄’’𑀢𑀺 𑀏𑀯𑀁 𑀯𑀼𑀢𑁆𑀢𑀁 𑀓𑀼𑀲𑀮𑀸𑀓𑀼𑀲𑀮𑀓𑀫𑁆𑀫𑀁 𑀧𑀡𑁆𑀟𑀺𑀢𑀩𑀸𑀮𑀮𑀓𑁆𑀔𑀡𑀦𑁆𑀢𑀺 𑀦 𑀚𑀸𑀦𑀸𑀢𑀺. 𑀲𑁄 𑀏𑀯𑀁 𑀅𑀚𑀸𑀦𑀦𑁆𑀢𑁄 𑀩𑀸𑀮𑁂 𑀯𑀚𑁆𑀚𑁂𑀢𑁆𑀯𑀸 𑀧𑀡𑁆𑀟𑀺𑀢𑁂 𑀦 𑀲𑁂𑀯𑀢𑀺. 𑀩𑀸𑀮𑁂 𑀯𑀚𑁆𑀚𑁂𑀢𑁆𑀯𑀸 𑀧𑀡𑁆𑀟𑀺𑀢𑁂 𑀅𑀲𑁂𑀯𑀦𑁆𑀢𑁄 𑀓𑀧𑁆𑀧𑀺𑀬𑀸𑀓𑀧𑁆𑀧𑀺𑀬𑀁 𑀓𑀼𑀲𑀮𑀸𑀓𑀼𑀲𑀮𑀁 𑀲𑀸𑀯𑀚𑁆𑀚𑀸𑀦𑀯𑀚𑁆𑀚𑀁 𑀕𑀭𑀼𑀓𑀮𑀳𑀼𑀓𑀁 𑀲𑀢𑁂𑀓𑀺𑀘𑁆𑀙𑀸𑀢𑁂𑀓𑀺𑀘𑁆𑀙𑀁 𑀓𑀸𑀭𑀡𑀸𑀓𑀸𑀭𑀡𑀁 𑀦 𑀚𑀸𑀦𑀸𑀢𑀺. 𑀢𑀁 𑀅𑀚𑀸𑀦𑀦𑁆𑀢𑁄 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀯𑀟𑁆𑀠𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀲𑁄 𑀬𑀣𑀸 𑀢𑀲𑁆𑀲 𑀕𑁄𑀧𑀸𑀮𑀓𑀲𑁆𑀲 𑀕𑁄𑀕𑀡𑁄 𑀦 𑀯𑀟𑁆𑀠𑀢𑀺, 𑀏𑀯𑀁 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀬𑀣𑀸𑀯𑀼𑀢𑁆𑀢𑁂𑀳𑀺 𑀲𑀻𑀮𑀸𑀤𑀻𑀳𑀺 𑀦 𑀯𑀟𑁆𑀠𑀢𑀺. 𑀲𑁄 𑀕𑁄𑀧𑀸𑀮𑀓𑁄 𑀯𑀺𑀬 𑀘 𑀧𑀜𑁆𑀘𑀳𑀺 𑀕𑁄𑀭𑀲𑁂𑀳𑀺, 𑀧𑀜𑁆𑀘𑀳𑀺 𑀥𑀫𑁆𑀫𑀓𑁆𑀔𑀦𑁆𑀥𑁂𑀳𑀺 𑀧𑀭𑀺𑀩𑀸𑀳𑀺𑀭𑁄 𑀳𑁄𑀢𑀺.

𑀦 𑀆𑀲𑀸𑀝𑀺𑀓𑀁 𑀳𑀸𑀭𑁂𑀢𑀸 𑀳𑁄𑀢𑀻𑀢𑀺 ‘‘𑀉𑀧𑁆𑀧𑀦𑁆𑀦𑀁 𑀓𑀸𑀫𑀯𑀺𑀢𑀓𑁆𑀓’’𑀦𑁆𑀢𑀺 𑀏𑀯𑀁 𑀯𑀼𑀢𑁆𑀢𑁂 𑀓𑀸𑀫𑀯𑀺𑀢𑀓𑁆𑀓𑀸𑀤𑀬𑁄 𑀦 𑀯𑀺𑀦𑁄𑀤𑁂𑀢𑀺. 𑀲𑁄 𑀇𑀫𑀁 𑀅𑀓𑀼𑀲𑀮𑀯𑀺𑀢𑀓𑁆𑀓𑀁 𑀆𑀲𑀸𑀝𑀺𑀓𑀁 𑀅𑀳𑀸𑀭𑁂𑀢𑁆𑀯𑀸 𑀯𑀺𑀢𑀓𑁆𑀓𑀯𑀲𑀺𑀓𑁄 𑀳𑀼𑀢𑁆𑀯𑀸 𑀯𑀺𑀘𑀭𑀦𑁆𑀢𑁄 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀯𑀟𑁆𑀠𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀲𑁄 𑀬𑀣𑀸 𑀢𑀲𑁆𑀲 𑀕𑁄𑀧𑀸𑀮𑀓𑀲𑁆𑀲…𑀧𑁂… 𑀧𑀭𑀺𑀩𑀸𑀳𑀺𑀭𑁄 𑀳𑁄𑀢𑀺.

𑀦 𑀯𑀡𑀁 𑀧𑀝𑀺𑀘𑁆𑀙𑀸𑀤𑁂𑀢𑀸 𑀳𑁄𑀢𑀻𑀢𑀺 ‘‘𑀘𑀓𑁆𑀔𑀼𑀦𑀸 𑀭𑀽𑀧𑀁 𑀤𑀺𑀲𑁆𑀯𑀸 𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑀻 𑀳𑁄𑀢𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀲𑀩𑁆𑀩𑀸𑀭𑀫𑁆𑀫𑀡𑁂𑀲𑀼 𑀦𑀺𑀫𑀺𑀢𑁆𑀢𑀁 𑀕𑀡𑁆𑀳𑀦𑁆𑀢𑁄 𑀬𑀣𑀸 𑀲𑁄 𑀕𑁄𑀧𑀸𑀮𑀓𑁄 𑀯𑀡𑀁 𑀦 𑀧𑀝𑀺𑀘𑁆𑀙𑀸𑀤𑁂𑀢𑀺, 𑀏𑀯𑀁 𑀲𑀁𑀯𑀭𑀁 𑀦 𑀲𑀫𑁆𑀧𑀸𑀤𑁂𑀢𑀺. 𑀲𑁄 𑀯𑀺𑀯𑀝𑀤𑁆𑀯𑀸𑀭𑁄 𑀯𑀺𑀘𑀭𑀦𑁆𑀢𑁄 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀯𑀟𑁆𑀠𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺…𑀧𑁂… 𑀧𑀭𑀺𑀩𑀸𑀳𑀺𑀭𑁄 𑀳𑁄𑀢𑀺.

𑀦 𑀥𑀽𑀫𑀁 𑀓𑀢𑁆𑀢𑀸 𑀳𑁄𑀢𑀻𑀢𑀺 𑀲𑁄 𑀕𑁄𑀧𑀸𑀮𑀓𑁄 𑀥𑀽𑀫𑀁 𑀯𑀺𑀬 𑀥𑀫𑁆𑀫𑀤𑁂𑀲𑀦𑀸𑀥𑀽𑀫𑀁 𑀦 𑀓𑀭𑁄𑀢𑀺, 𑀥𑀫𑁆𑀫𑀓𑀣𑀁 𑀯𑀸 𑀲𑀭𑀪𑀜𑁆𑀜𑀁 𑀯𑀸 𑀉𑀧𑀦𑀺𑀲𑀺𑀦𑁆𑀦𑀓𑀓𑀣𑀁 𑀯𑀸 𑀅𑀦𑀼𑀫𑁄𑀤𑀦𑀁 𑀯𑀸 𑀦 𑀓𑀭𑁄𑀢𑀺, 𑀢𑀢𑁄 𑀦𑀁 𑀫𑀦𑀼𑀲𑁆𑀲𑀸 ‘‘𑀩𑀳𑀼𑀲𑁆𑀲𑀼𑀢𑁄 𑀕𑀼𑀡𑀯𑀸’’𑀢𑀺 𑀦 𑀚𑀸𑀦𑀦𑁆𑀢𑀺. 𑀢𑁂 𑀕𑀼𑀡𑀸𑀕𑀼𑀡𑀁 𑀅𑀚𑀸𑀦𑀦𑁆𑀢𑁄 𑀘𑀢𑀽𑀳𑀺 𑀧𑀘𑁆𑀘𑀬𑁂𑀳𑀺 𑀲𑀗𑁆𑀕𑀳𑀁 𑀦 𑀓𑀭𑁄𑀦𑁆𑀢𑀺. 𑀲𑁄 𑀧𑀘𑁆𑀘𑀬𑁂𑀳𑀺 𑀓𑀺𑀮𑀫𑀫𑀸𑀦𑁄 𑀩𑀼𑀤𑁆𑀥𑀯𑀘𑀦𑀁 𑀲𑀚𑁆𑀛𑀸𑀬𑀁 𑀓𑀸𑀢𑀼𑀁 𑀯𑀢𑁆𑀢𑀧𑀝𑀺𑀯𑀢𑁆𑀢𑀁 𑀧𑀽𑀭𑁂𑀢𑀼𑀁 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀯𑀟𑁆𑀠𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺…𑀧𑁂… 𑀧𑀭𑀺𑀩𑀸𑀳𑀺𑀭𑁄 𑀳𑁄𑀢𑀺.

𑀦 𑀢𑀺𑀢𑁆𑀣𑀁 𑀚𑀸𑀦𑀸𑀢𑀻𑀢𑀺 𑀢𑀺𑀢𑁆𑀣𑀪𑀽𑀢𑁂 𑀩𑀳𑀼𑀲𑁆𑀲𑀼𑀢𑀪𑀺𑀓𑁆𑀔𑀽 𑀦 𑀉𑀧𑀲𑀗𑁆𑀓𑀫𑀢𑀺. 𑀅𑀦𑀼𑀧𑀲𑀗𑁆𑀓𑀫𑀦𑁆𑀢𑁄 ‘‘𑀇𑀤𑀁, 𑀪𑀦𑁆𑀢𑁂, 𑀩𑁆𑀬𑀜𑁆𑀚𑀦𑀁 𑀓𑀣𑀁 𑀭𑁄𑀧𑁂𑀢𑀩𑁆𑀩𑀁? 𑀇𑀫𑀲𑁆𑀲 𑀪𑀸𑀲𑀺𑀢𑀲𑁆𑀲 𑀓𑁄 𑀅𑀢𑁆𑀣𑁄? 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀧𑀸𑀴𑀺 𑀓𑀺𑀁 𑀯𑀤𑀢𑀺? 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀅𑀢𑁆𑀣𑁄 𑀓𑀺𑀁 𑀤𑀻𑀧𑁂𑀢𑀻’’𑀢𑀺 𑀏𑀯𑀁 𑀦 𑀧𑀭𑀺𑀧𑀼𑀘𑁆𑀙𑀢𑀺 𑀦 𑀧𑀭𑀺𑀧𑀜𑁆𑀳𑀢𑀺, 𑀦 𑀚𑀸𑀦𑀸𑀧𑁂𑀢𑀻𑀢𑀺 𑀅𑀢𑁆𑀣𑁄. 𑀢𑀲𑁆𑀲 𑀢𑁂 𑀏𑀯𑀁 𑀅𑀧𑀭𑀺𑀧𑀼𑀘𑁆𑀙𑀺𑀢𑀸 𑀅𑀯𑀺𑀯𑀝𑀜𑁆𑀘𑁂𑀯 𑀦 𑀯𑀺𑀯𑀭𑀦𑁆𑀢𑀺, 𑀪𑀸𑀚𑁂𑀢𑁆𑀯𑀸 𑀦 𑀤𑀲𑁆𑀲𑁂𑀦𑁆𑀢𑀺, 𑀅𑀦𑀼𑀢𑁆𑀢𑀸𑀦𑀻𑀓𑀢𑀜𑁆𑀘 𑀦 𑀉𑀢𑁆𑀢𑀸𑀦𑀺𑀁 𑀓𑀭𑁄𑀦𑁆𑀢𑀺, 𑀅𑀧𑀸𑀓𑀝𑀁 𑀦 𑀧𑀸𑀓𑀝𑀁 𑀓𑀭𑁄𑀦𑁆𑀢𑀺. 𑀅𑀦𑁂𑀓𑀯𑀺𑀳𑀺𑀢𑁂𑀲𑀼 𑀘 𑀓𑀗𑁆𑀔𑀸𑀞𑀸𑀦𑀺𑀬𑁂𑀲𑀼 𑀥𑀫𑁆𑀫𑁂𑀲𑀽𑀢𑀺 𑀅𑀦𑁂𑀓𑀯𑀺𑀥𑀸𑀲𑀼 𑀓𑀗𑁆𑀔𑀸𑀲𑀼 𑀏𑀓𑀓𑀗𑁆𑀔𑀫𑁆𑀧𑀺 𑀦 𑀧𑀝𑀺𑀯𑀺𑀦𑁄𑀤𑁂𑀦𑁆𑀢𑀺. 𑀓𑀗𑁆𑀔𑀸𑀬𑁂𑀯 𑀳𑀺 𑀓𑀗𑁆𑀔𑀸𑀞𑀸𑀦𑀺𑀬𑀸 𑀥𑀫𑁆𑀫𑀸 𑀦𑀸𑀫. 𑀢𑀢𑁆𑀣 𑀏𑀓𑀁 𑀓𑀗𑁆𑀔𑀫𑁆𑀧𑀺 𑀦 𑀦𑀻𑀳𑀭𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀲𑁄 𑀏𑀯𑀁 𑀩𑀳𑀼𑀲𑁆𑀲𑀼𑀢𑀢𑀺𑀢𑁆𑀣𑀁 𑀅𑀦𑀼𑀧𑀲𑀗𑁆𑀓𑀫𑀺𑀢𑁆𑀯𑀸 𑀲𑀓𑀗𑁆𑀔𑁄 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀯𑀟𑁆𑀠𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀬𑀣𑀸 𑀯𑀸 𑀲𑁄 𑀕𑁄𑀧𑀸𑀮𑀓𑁄 𑀢𑀺𑀢𑁆𑀣𑀁 𑀦 𑀚𑀸𑀦𑀸𑀢𑀺, 𑀏𑀯𑀁 𑀅𑀬𑀫𑁆𑀧𑀺 𑀪𑀺𑀓𑁆𑀔𑀼 𑀥𑀫𑁆𑀫𑀢𑀺𑀢𑁆𑀣𑀁 𑀦 𑀚𑀸𑀦𑀸𑀢𑀺. 𑀅𑀚𑀸𑀦𑀦𑁆𑀢𑁄 𑀅𑀯𑀺𑀲𑀬𑁂 𑀧𑀜𑁆𑀳𑀁 𑀧𑀼𑀘𑁆𑀙𑀢𑀺, 𑀆𑀪𑀺𑀥𑀫𑁆𑀫𑀺𑀓𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀓𑀧𑁆𑀧𑀺𑀬𑀸𑀓𑀧𑁆𑀧𑀺𑀬𑀁 𑀧𑀼𑀘𑁆𑀙𑀢𑀺, 𑀯𑀺𑀦𑀬𑀥𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀭𑀽𑀧𑀸𑀭𑀽𑀧𑀧𑀭𑀺𑀘𑁆𑀙𑁂𑀤𑀁 𑀧𑀼𑀘𑁆𑀙𑀢𑀺. 𑀢𑁂 𑀅𑀯𑀺𑀲𑀬𑁂 𑀧𑀼𑀝𑁆𑀞𑀸 𑀓𑀣𑁂𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺. 𑀲𑁄 𑀅𑀢𑁆𑀢𑀦𑀸 𑀲𑀓𑀗𑁆𑀔𑁄 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀯𑀟𑁆𑀠𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺…𑀧𑁂… 𑀧𑀭𑀺𑀩𑀸𑀳𑀺𑀭𑁄 𑀳𑁄𑀢𑀺.

𑀦 𑀧𑀻𑀢𑀁 𑀚𑀸𑀦𑀸𑀢𑀻𑀢𑀺 𑀬𑀣𑀸 𑀲𑁄 𑀕𑁄𑀧𑀸𑀮𑀓𑁄 𑀧𑀻𑀢𑀸𑀧𑀻𑀢𑀁 𑀦 𑀚𑀸𑀦𑀸𑀢𑀺, 𑀏𑀯𑀁 𑀥𑀫𑁆𑀫𑀽𑀧𑀲𑀜𑁆𑀳𑀺𑀢𑀁 𑀧𑀸𑀫𑁄𑀚𑁆𑀚𑀁 𑀦 𑀚𑀸𑀦𑀸𑀢𑀺 𑀦 𑀮𑀪𑀢𑀺. 𑀲𑀯𑀦𑀫𑀬𑀁 𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀼𑀁 𑀦𑀺𑀲𑁆𑀲𑀸𑀬 𑀆𑀦𑀺𑀲𑀁𑀲𑀁 𑀦 𑀯𑀺𑀦𑁆𑀤𑀢𑀺, 𑀥𑀫𑁆𑀫𑀲𑁆𑀲𑀯𑀦𑀕𑁆𑀕𑀁 𑀕𑀦𑁆𑀢𑁆𑀯𑀸 𑀲𑀓𑁆𑀓𑀘𑁆𑀘𑀁 𑀦 𑀲𑀼𑀡𑀸𑀢𑀺, 𑀦𑀺𑀲𑀺𑀦𑁆𑀦𑁄 𑀦𑀺𑀤𑁆𑀤𑀸𑀬𑀢𑀺, 𑀓𑀣𑀁 𑀓𑀣𑁂𑀢𑀺, 𑀅𑀜𑁆𑀜𑀯𑀺𑀳𑀺𑀢𑀓𑁄 𑀳𑁄𑀢𑀺. 𑀲𑁄 𑀲𑀓𑁆𑀓𑀘𑁆𑀘𑀁 𑀥𑀫𑁆𑀫𑀁 𑀅𑀲𑁆𑀲𑀼𑀡𑀦𑁆𑀢𑁄 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀯𑀟𑁆𑀠𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺…𑀧𑁂… 𑀧𑀭𑀺𑀩𑀸𑀳𑀺𑀭𑁄 𑀳𑁄𑀢𑀺.

𑀦 𑀯𑀻𑀣𑀺𑀁 𑀚𑀸𑀦𑀸𑀢𑀻𑀢𑀺 𑀲𑁄 𑀕𑁄𑀧𑀸𑀮𑀓𑁄 𑀫𑀕𑁆𑀕𑀸𑀫𑀕𑁆𑀕𑀁 𑀯𑀺𑀬 ‘‘𑀅𑀬𑀁 𑀮𑁄𑀓𑀺𑀬𑁄, 𑀅𑀬𑀁 𑀮𑁄𑀓𑀼𑀢𑁆𑀢𑀭𑁄’’𑀢𑀺 𑀅𑀭𑀺𑀬𑀁 𑀅𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺. 𑀅𑀚𑀸𑀦𑀦𑁆𑀢𑁄 𑀮𑁄𑀓𑀺𑀬𑀫𑀕𑁆𑀕𑁂 𑀅𑀪𑀺𑀦𑀺𑀯𑀺𑀲𑀺𑀢𑁆𑀯𑀸 𑀮𑁄𑀓𑀼𑀢𑁆𑀢𑀭𑀁 𑀦𑀺𑀩𑁆𑀩𑀢𑁆𑀢𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺…𑀧𑁂… 𑀧𑀭𑀺𑀩𑀸𑀳𑀺𑀭𑁄 𑀳𑁄𑀢𑀺.

𑀦 𑀕𑁄𑀘𑀭𑀓𑀼𑀲𑀮𑁄 𑀳𑁄𑀢𑀻𑀢𑀺 𑀲𑁄 𑀕𑁄𑀧𑀸𑀮𑀓𑁄 𑀧𑀜𑁆𑀘𑀸𑀳𑀺𑀓𑀲𑀢𑁆𑀢𑀸𑀳𑀺𑀓𑀘𑀸𑀭𑁂 𑀯𑀺𑀬 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑁂 ‘‘𑀇𑀫𑁂 𑀮𑁄𑀓𑀺𑀬𑀸, 𑀇𑀫𑁂 𑀮𑁄𑀓𑀼𑀢𑁆𑀢𑀭𑀸’’𑀢𑀺 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺. 𑀅𑀚𑀸𑀦𑀦𑁆𑀢𑁄 𑀲𑀼𑀔𑀼𑀫𑀝𑁆𑀞𑀸𑀦𑁂𑀲𑀼 𑀅𑀢𑁆𑀢𑀦𑁄 𑀜𑀸𑀡𑀁 𑀘𑀭𑀸𑀧𑁂𑀢𑁆𑀯𑀸 𑀮𑁄𑀓𑀺𑀬𑀲𑀢𑀺𑀧𑀝𑁆𑀞𑀸𑀦𑁂 𑀅𑀪𑀺𑀦𑀺𑀯𑀺𑀲𑀺𑀢𑁆𑀯𑀸 𑀮𑁄𑀓𑀼𑀢𑁆𑀢𑀭𑀁 𑀦𑀺𑀩𑁆𑀩𑀢𑁆𑀢𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺…𑀧𑁂… 𑀧𑀭𑀺𑀩𑀸𑀳𑀺𑀭𑁄 𑀳𑁄𑀢𑀺.

𑀅𑀦𑀯𑀲𑁂𑀲𑀤𑁄𑀳𑀻 𑀳𑁄𑀢𑀻𑀢𑀺 𑀧𑀝𑀺𑀕𑁆𑀕𑀳𑀡𑁂 𑀫𑀢𑁆𑀢𑀁 𑀅𑀚𑀸𑀦𑀦𑁆𑀢𑁄 𑀅𑀦𑀯𑀲𑁂𑀲𑀁 𑀤𑀼𑀳𑀢𑀺. 𑀦𑀺𑀤𑁆𑀤𑁂𑀲𑀯𑀸𑀭𑁂 𑀧𑀦𑀲𑁆𑀲 𑀅𑀪𑀺𑀳𑀝𑁆𑀞𑀼𑀁 𑀧𑀯𑀸𑀭𑁂𑀦𑁆𑀢𑀻𑀢𑀺 𑀅𑀪𑀺𑀳𑀭𑀺𑀢𑁆𑀯𑀸 𑀧𑀯𑀸𑀭𑁂𑀦𑁆𑀢𑀺. 𑀏𑀢𑁆𑀣 𑀤𑁆𑀯𑁂 𑀅𑀪𑀺𑀳𑀸𑀭𑀸 𑀯𑀸𑀘𑀸𑀪𑀺𑀳𑀸𑀭𑁄 𑀘, 𑀧𑀘𑁆𑀘𑀬𑀸𑀪𑀺𑀳𑀸𑀭𑁄 𑀘. 𑀯𑀸𑀘𑀸𑀪𑀺𑀳𑀸𑀭𑁄 𑀦𑀸𑀫 𑀫𑀦𑀼𑀲𑁆𑀲𑀸 𑀪𑀺𑀓𑁆𑀔𑀼𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀯𑀤𑁂𑀬𑁆𑀬𑀸𑀣, 𑀪𑀦𑁆𑀢𑁂, 𑀬𑁂𑀦𑀢𑁆𑀣𑁄’’𑀢𑀺 𑀧𑀯𑀸𑀭𑁂𑀦𑁆𑀢𑀺. 𑀧𑀘𑁆𑀘𑀬𑀸𑀪𑀺𑀳𑀸𑀭𑁄 𑀦𑀸𑀫 𑀯𑀢𑁆𑀣𑀸𑀤𑀻𑀦𑀺 𑀯𑀸 𑀲𑀧𑁆𑀧𑀺𑀦𑀯𑀦𑀻𑀢𑀨𑀸𑀡𑀺𑀢𑀸𑀤𑀻𑀦𑀺 𑀯𑀸 𑀕𑀳𑁂𑀢𑁆𑀯𑀸 𑀪𑀺𑀓𑁆𑀔𑀼𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀕𑀡𑁆𑀳𑀣, 𑀪𑀦𑁆𑀢𑁂, 𑀬𑀸𑀯𑀢𑀓𑁂𑀦 𑀅𑀢𑁆𑀣𑁄’’𑀢𑀺 𑀯𑀤𑀦𑁆𑀢𑀺. 𑀢𑀢𑁆𑀭 𑀪𑀺𑀓𑁆𑀔𑀼 𑀫𑀢𑁆𑀢𑀁 𑀦 𑀚𑀸𑀦𑀸𑀢𑀻𑀢𑀺 𑀪𑀺𑀓𑁆𑀔𑀼 𑀢𑁂𑀲𑀼 𑀧𑀘𑁆𑀘𑀬𑁂𑀲𑀼 𑀧𑀫𑀸𑀡𑀁 𑀦 𑀚𑀸𑀦𑀸𑀢𑀺. ‘‘𑀤𑀸𑀬𑀓𑀲𑁆𑀲 𑀯𑀲𑁄 𑀯𑁂𑀤𑀺𑀢𑀩𑁆𑀩𑁄, 𑀤𑁂𑀬𑁆𑀬𑀥𑀫𑁆𑀫𑀲𑁆𑀲 𑀯𑀲𑁄 𑀯𑁂𑀤𑀺𑀢𑀩𑁆𑀩𑁄, 𑀅𑀢𑁆𑀢𑀦𑁄 𑀣𑀸𑀫𑁄 𑀯𑁂𑀤𑀺𑀢𑀩𑁆𑀩𑁄’’𑀢𑀺 𑀇𑀫𑀺𑀦𑀸 𑀦𑀬𑁂𑀦 𑀧𑀫𑀸𑀡𑀬𑀼𑀢𑁆𑀢𑀓𑀁 𑀅𑀕𑁆𑀕𑀳𑁂𑀢𑁆𑀯𑀸 𑀬𑀁 𑀆𑀳𑀭𑀦𑁆𑀢𑀺, 𑀢𑀁 𑀲𑀩𑁆𑀩𑀁 𑀕𑀡𑁆𑀳𑀸𑀢𑀻𑀢𑀺 𑀅𑀢𑁆𑀣𑁄. 𑀫𑀦𑀼𑀲𑁆𑀲𑀸 𑀯𑀺𑀧𑁆𑀧𑀝𑀺𑀲𑀸𑀭𑀺𑀦𑁄 𑀦 𑀧𑀼𑀦 𑀅𑀪𑀺𑀳𑀭𑀺𑀢𑁆𑀯𑀸 𑀧𑀯𑀸𑀭𑁂𑀦𑁆𑀢𑀺. 𑀲𑁄 𑀧𑀘𑁆𑀘𑀬𑁂𑀳𑀺 𑀓𑀺𑀮𑀫𑀦𑁆𑀢𑁄 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀯𑀟𑁆𑀠𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺…𑀧𑁂… 𑀧𑀭𑀺𑀩𑀸𑀳𑀺𑀭𑁄 𑀳𑁄𑀢𑀺.

𑀢𑁂 𑀦 𑀅𑀢𑀺𑀭𑁂𑀓𑀧𑀽𑀚𑀸𑀬 𑀧𑀽𑀚𑁂𑀢𑀸 𑀳𑁄𑀢𑀻𑀢𑀺 𑀲𑁄 𑀕𑁄𑀧𑀸𑀮𑀓𑁄 𑀫𑀳𑀸𑀉𑀲𑀪𑁂 𑀯𑀺𑀬 𑀣𑁂𑀭𑁂 𑀪𑀺𑀓𑁆𑀔𑀽 𑀇𑀫𑀸𑀬 𑀆𑀯𑀺 𑀘𑁂𑀯 𑀭𑀳𑁄 𑀘 𑀫𑁂𑀢𑁆𑀢𑀸𑀓𑀸𑀬𑀓𑀫𑁆𑀫𑀸𑀤𑀺𑀓𑀸𑀬 𑀅𑀢𑀺𑀭𑁂𑀓𑀧𑀽𑀚𑀸𑀬 𑀦 𑀧𑀽𑀚𑁂𑀢𑀺. 𑀢𑀢𑁄 𑀣𑁂𑀭𑀸 ‘‘𑀇𑀫𑁂 𑀅𑀫𑁆𑀳𑁂𑀲𑀼 𑀕𑀭𑀼𑀘𑀺𑀢𑁆𑀢𑀻𑀓𑀸𑀭𑀁 𑀦 𑀓𑀭𑁄𑀦𑁆𑀢𑀻’’𑀢𑀺 𑀦𑀯𑀓𑁂 𑀪𑀺𑀓𑁆𑀔𑀽 𑀤𑁆𑀯𑀻𑀳𑀺 𑀲𑀗𑁆𑀕𑀳𑁂𑀳𑀺 𑀦 𑀲𑀗𑁆𑀕𑀡𑁆𑀳𑀦𑁆𑀢𑀺, 𑀦𑁂𑀯 𑀥𑀫𑁆𑀫𑀲𑀗𑁆𑀕𑀳𑁂𑀦 𑀲𑀗𑁆𑀕𑀡𑁆𑀳𑀦𑁆𑀢𑀺, 𑀦 𑀆𑀫𑀺𑀲𑀲𑀗𑁆𑀕𑀳𑁂𑀦, 𑀘𑀻𑀯𑀭𑁂𑀦 𑀯𑀸 𑀧𑀢𑁆𑀢𑁂𑀦 𑀯𑀸 𑀧𑀢𑁆𑀢𑀧𑀭𑀺𑀬𑀸𑀧𑀦𑁆𑀦𑁂𑀦 𑀯𑀸 𑀯𑀲𑀦𑀝𑁆𑀞𑀸𑀦𑁂𑀦 𑀯𑀸 𑀓𑀺𑀮𑀫𑀦𑁆𑀢𑁂𑀧𑀺 𑀦𑀧𑁆𑀧𑀝𑀺𑀚𑀕𑁆𑀕𑀦𑁆𑀢𑀺, 𑀧𑀸𑀴𑀺𑀁 𑀯𑀸 𑀅𑀝𑁆𑀞𑀓𑀣𑀁 𑀯𑀸 𑀥𑀫𑁆𑀫𑀓𑀣𑀸𑀩𑀦𑁆𑀥𑀁 𑀯𑀸 𑀕𑀼𑀴𑁆𑀳𑀕𑀦𑁆𑀣𑀁 𑀯𑀸 𑀦 𑀲𑀺𑀓𑁆𑀔𑀸𑀧𑁂𑀦𑁆𑀢𑀺. 𑀦𑀯𑀓𑀸 𑀣𑁂𑀭𑀸𑀦𑀁 𑀲𑀦𑁆𑀢𑀺𑀓𑀸 𑀲𑀩𑁆𑀩𑀲𑁄 𑀇𑀫𑁂 𑀤𑁆𑀯𑁂 𑀲𑀗𑁆𑀕𑀳𑁂 𑀅𑀮𑀪𑀫𑀸𑀦𑀸 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀧𑀢𑀺𑀝𑁆𑀞𑀸𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺. 𑀬𑀣𑀸 𑀢𑀲𑁆𑀲 𑀕𑁄𑀧𑀸𑀮𑀓𑀲𑁆𑀲 𑀕𑁄𑀕𑀡𑁄 𑀦 𑀯𑀟𑁆𑀠𑀢𑀺, 𑀏𑀯𑀁 𑀲𑀻𑀮𑀸𑀤𑀻𑀳𑀺 𑀦 𑀯𑀟𑁆𑀠𑀦𑁆𑀢𑀺. 𑀬𑀣𑀸 𑀘 𑀲𑁄 𑀕𑁄𑀧𑀸𑀮𑀓𑁄 𑀧𑀜𑁆𑀘𑀳𑀺 𑀕𑁄𑀭𑀲𑁂𑀳𑀺, 𑀏𑀯𑀁 𑀧𑀜𑁆𑀘𑀳𑀺 𑀥𑀫𑁆𑀫𑀓𑁆𑀔𑀦𑁆𑀥𑁂𑀳𑀺 𑀧𑀭𑀺𑀩𑀸𑀳𑀺𑀭𑀸 𑀳𑁄𑀦𑁆𑀢𑀺. 𑀲𑀼𑀓𑁆𑀓𑀧𑀓𑁆𑀔𑁄 𑀓𑀡𑁆𑀳𑀧𑀓𑁆𑀔𑁂 𑀯𑀼𑀢𑁆𑀢𑀯𑀺𑀧𑀮𑁆𑀮𑀸𑀲𑀯𑀲𑁂𑀦 𑀬𑁄𑀚𑁂𑀢𑁆𑀯𑀸 𑀯𑁂𑀤𑀺𑀢𑀩𑁆𑀩𑁄.

𑀅𑀦𑀼𑀲𑁆𑀲𑀢𑀺𑀯𑀕𑁆𑀕𑁄 𑀤𑀼𑀢𑀺𑀬𑁄.

𑀫𑀦𑁄𑀭𑀣𑀧𑀽𑀭𑀡𑀺𑀬𑀸 𑀅𑀗𑁆𑀕𑀼𑀢𑁆𑀢𑀭𑀦𑀺𑀓𑀸𑀬-𑀅𑀝𑁆𑀞𑀓𑀣𑀸𑀬

𑀏𑀓𑀸𑀤𑀲𑀓𑀦𑀺𑀧𑀸𑀢𑀲𑁆𑀲 𑀲𑀁𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀺𑀕𑀫𑀦𑀓𑀣𑀸

𑀏𑀢𑁆𑀢𑀸𑀯𑀢𑀸 𑀘 𑁋

𑀆𑀬𑀸𑀘𑀺𑀢𑁄 𑀲𑀼𑀫𑀢𑀺𑀦𑀸 𑀣𑁂𑀭𑁂𑀦 𑀪𑀤𑀦𑁆𑀢𑀚𑁄𑀢𑀺𑀧𑀸𑀮𑁂𑀦;

𑀓𑀜𑁆𑀘𑀺𑀧𑀼𑀭𑀸𑀤𑀻𑀲𑀼 𑀫𑀬𑀸 𑀧𑀼𑀩𑁆𑀩𑁂 𑀲𑀤𑁆𑀥𑀺𑀁 𑀯𑀲𑀦𑁆𑀢𑁂𑀦.

𑀯𑀭𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑁂 𑀫𑀳𑀸𑀯𑀺𑀳𑀸𑀭𑀫𑁆𑀳𑀺 𑀯𑀲𑀦𑀓𑀸𑀮𑁂𑀧𑀺;

𑀧𑀸𑀓𑀁 𑀕𑀢𑁂 𑀯𑀺𑀬 𑀤𑀼𑀫𑁂 𑀯𑀮𑀜𑁆𑀚𑀫𑀸𑀦𑀫𑁆𑀳𑀺 𑀲𑀤𑁆𑀥𑀫𑁆𑀫𑁂.

𑀧𑀸𑀭𑀁 𑀧𑀺𑀝𑀓𑀢𑁆𑀢𑀬𑀲𑀸𑀕𑀭𑀲𑁆𑀲 𑀕𑀦𑁆𑀢𑁆𑀯𑀸 𑀞𑀺𑀢𑁂𑀦 𑀲𑀼𑀫𑀢𑀺𑀦𑀸;

𑀧𑀭𑀺𑀲𑀼𑀤𑁆𑀥𑀸𑀚𑀻𑀯𑁂𑀦𑀸𑀪𑀺𑀬𑀸𑀘𑀺𑀢𑁄 𑀚𑀻𑀯𑀓𑁂𑀦𑀸𑀧𑀺.

𑀥𑀫𑁆𑀫𑀓𑀣𑀸𑀬 𑀦𑀺𑀧𑀼𑀡𑀧𑀭𑀫𑀦𑀺𑀓𑀸𑀬𑀲𑁆𑀲𑀝𑁆𑀞𑀓𑀣𑀁 𑀆𑀭𑀤𑁆𑀥𑁄;

𑀬𑀫𑀳𑀁 𑀘𑀺𑀭𑀓𑀸𑀮𑀝𑁆𑀞𑀺𑀢𑀺𑀫𑀺𑀘𑁆𑀙𑀦𑁆𑀢𑁄 𑀲𑀸𑀲𑀦𑀯𑀭𑀲𑁆𑀲.

𑀲𑀸 𑀳𑀺 𑀫𑀳𑀸𑀅𑀝𑁆𑀞𑀓𑀣𑀸𑀬 𑀲𑀸𑀭𑀫𑀸𑀤𑀸𑀬 𑀦𑀺𑀝𑁆𑀞𑀺𑀢𑀸 𑀏𑀲𑀸;

𑀘𑀢𑀼𑀦𑀯𑀼𑀢𑀺𑀧𑀭𑀺𑀫𑀸𑀡𑀸𑀬 𑀧𑀸𑀴𑀺𑀬𑀸 𑀪𑀸𑀡𑀯𑀸𑀭𑁂𑀳𑀺.

𑀲𑀩𑁆𑀩𑀸𑀕𑀫𑀲𑀁𑀯𑀡𑁆𑀡𑀦𑀫𑀦𑁄𑀭𑀣𑁄 𑀧𑀽𑀭𑀺𑀢𑁄 𑀘 𑀫𑁂 𑀬𑀲𑁆𑀫𑀸;

𑀏𑀢𑀸𑀬 𑀫𑀦𑁄𑀭𑀣𑀧𑀽𑀭𑀡𑀻𑀢𑀺 𑀦𑀸𑀫𑀁 𑀢𑀢𑁄 𑀅𑀲𑁆𑀲𑀸.

𑀏𑀓𑀽𑀦𑀲𑀝𑁆𑀞𑀺𑀫𑀢𑁆𑀢𑁄 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁄𑀧𑀺 𑀪𑀸𑀡𑀯𑀸𑀭𑁂𑀳𑀺;

𑀅𑀢𑁆𑀣𑀧𑁆𑀧𑀓𑀸𑀲𑀦𑀢𑁆𑀣𑀸𑀬 𑀆𑀕𑀫𑀸𑀦𑀁 𑀓𑀢𑁄 𑀬𑀲𑁆𑀫𑀸.

𑀢𑀲𑁆𑀫𑀸 𑀢𑁂𑀦 𑀲𑀳𑀸𑀬𑀁 𑀕𑀸𑀣𑀸𑀕𑀡𑀦𑀸𑀦𑀬𑁂𑀦 𑀅𑀝𑁆𑀞𑀓𑀣𑀸;

𑀢𑀻𑀳𑀸𑀥𑀺𑀓𑀤𑀺𑀬𑀟𑁆𑀠𑀲𑀢𑀁 𑀯𑀺𑀜𑁆𑀜𑁂𑀬𑁆𑀬𑀸 𑀪𑀸𑀡𑀯𑀸𑀭𑀸𑀦𑀁.

𑀢𑀻𑀳𑀸𑀥𑀺𑀓𑀤𑀺𑀬𑀟𑁆𑀠𑀲𑀢𑀧𑁆𑀧𑀫𑀸𑀡𑀫𑀺𑀢𑀺 𑀪𑀸𑀡𑀯𑀸𑀭𑀢𑁄 𑀏𑀲𑀸;

𑀲𑀫𑀬𑀁 𑀧𑀓𑀸𑀲𑀬𑀦𑁆𑀢𑀻 𑀫𑀳𑀸𑀯𑀺𑀳𑀸𑀭𑀸𑀥𑀺𑀯𑀸𑀲𑀻𑀦𑀁.

𑀫𑀽𑀮𑀝𑁆𑀞𑀓𑀣𑀸𑀲𑀸𑀭𑀁 𑀆𑀤𑀸𑀬 𑀫𑀬𑀸 𑀇𑀫𑀁 𑀓𑀭𑁄𑀦𑁆𑀢𑁂𑀦;

𑀬𑀁 𑀧𑀼𑀜𑁆𑀜𑀫𑀼𑀧𑀘𑀺𑀢𑀁 𑀢𑁂𑀦 𑀳𑁄𑀢𑀼 𑀮𑁄𑀓𑁄 𑀲𑀤𑀸 𑀲𑀼𑀔𑀺𑀢𑁄𑀢𑀺.

𑀧𑀭𑀫𑀯𑀺𑀲𑀼𑀤𑁆𑀥𑀲𑀤𑁆𑀥𑀸𑀩𑀼𑀤𑁆𑀥𑀺𑀯𑀻𑀭𑀺𑀬𑀧𑁆𑀧𑀝𑀺𑀫𑀡𑁆𑀟𑀺𑀢𑁂𑀦 𑀲𑀻𑀮𑀸𑀘𑀸𑀭𑀚𑁆𑀚𑀯𑀫𑀤𑁆𑀤𑀯𑀸𑀤𑀺𑀕𑀼𑀡𑀲𑀫𑀼𑀤𑀬𑀲𑀫𑀼𑀤𑀺𑀢𑁂𑀦 𑀲𑀓𑀲𑀫𑀬𑀲𑀫𑀬𑀦𑁆𑀢𑀭𑀕𑀳𑀦𑀚𑁆𑀛𑁄𑀕𑀸𑀳𑀦𑀲𑀫𑀢𑁆𑀣𑁂𑀦 𑀧𑀜𑁆𑀜𑀸𑀯𑁂𑀬𑁆𑀬𑀢𑁆𑀢𑀺𑀬𑀲𑀫𑀦𑁆𑀦𑀸𑀕𑀢𑁂𑀦 𑀢𑀺𑀧𑀺𑀝𑀓𑀧𑀭𑀺𑀬𑀢𑁆𑀢𑀺𑀧𑁆𑀧𑀪𑁂𑀤𑁂 𑀲𑀸𑀝𑁆𑀞𑀓𑀣𑁂 𑀲𑀢𑁆𑀣𑀼 𑀲𑀸𑀲𑀦𑁂 𑀅𑀧𑁆𑀧𑀝𑀺𑀳𑀢𑀜𑀸𑀡𑀧𑁆𑀧𑀪𑀸𑀯𑁂𑀦 𑀫𑀳𑀸𑀯𑁂𑀬𑁆𑀬𑀸𑀓𑀭𑀡𑁂𑀦 𑀓𑀭𑀡𑀲𑀫𑁆𑀧𑀢𑁆𑀢𑀺𑀚𑀦𑀺𑀢𑀲𑀼𑀔𑀯𑀺𑀦𑀺𑀕𑁆𑀕𑀢𑀫𑀥𑀼𑀭𑁄𑀤𑀸𑀭𑀯𑀘𑀦𑀮𑀸𑀯𑀡𑁆𑀡𑀬𑀼𑀢𑁆𑀢𑁂𑀦 𑀬𑀼𑀢𑁆𑀢𑀫𑀼𑀢𑁆𑀢𑀯𑀸𑀤𑀺𑀦𑀸 𑀯𑀸𑀤𑀻𑀯𑀭𑁂𑀦 𑀫𑀳𑀸𑀓𑀯𑀺𑀦𑀸 𑀧𑀪𑀺𑀦𑁆𑀦𑀧𑀝𑀺𑀲𑀫𑁆𑀪𑀺𑀤𑀸𑀧𑀭𑀺𑀯𑀸𑀭𑁂 𑀙𑀴𑀪𑀺𑀜𑁆𑀜𑀸𑀤𑀺𑀧𑁆𑀧𑀪𑁂𑀤𑀕𑀼𑀡𑀧𑁆𑀧𑀝𑀺𑀫𑀡𑁆𑀟𑀺𑀢𑁂 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑁂 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀩𑀼𑀤𑁆𑀥𑀻𑀦𑀁 𑀣𑁂𑀭𑀸𑀦𑀁 𑀣𑁂𑀭𑀯𑀁𑀲𑀧𑁆𑀧𑀤𑀻𑀧𑀸𑀦𑀁 𑀫𑀳𑀸𑀯𑀺𑀳𑀸𑀭𑀯𑀸𑀲𑀻𑀦𑀁 𑀯𑀁𑀲𑀸𑀮𑀗𑁆𑀓𑀸𑀭𑀪𑀽𑀢𑁂𑀦 𑀲𑀼𑀯𑀺𑀧𑀼𑀮𑀯𑀺𑀲𑀼𑀤𑁆𑀥𑀩𑀼𑀤𑁆𑀥𑀺𑀦𑀸 𑀩𑀼𑀤𑁆𑀥𑀖𑁄𑀲𑁄𑀢𑀺 𑀕𑀭𑀽𑀳𑀺 𑀕𑀳𑀺𑀢𑀦𑀸𑀫𑀥𑁂𑀬𑁆𑀬𑁂𑀦 𑀣𑁂𑀭𑁂𑀦 𑀓𑀢𑀸 𑀅𑀬𑀁 𑀫𑀦𑁄𑀭𑀣𑀧𑀽𑀭𑀡𑀻 𑀦𑀸𑀫 𑀅𑀗𑁆𑀕𑀼𑀢𑁆𑀢𑀭𑀦𑀺𑀓𑀸𑀬𑀝𑁆𑀞𑀓𑀣𑀸 𑁋

𑀢𑀸𑀯 𑀢𑀺𑀝𑁆𑀞𑀢𑀼 𑀮𑁄𑀓𑀲𑁆𑀫𑀺𑀁, 𑀮𑁄𑀓𑀦𑀺𑀢𑁆𑀣𑀭𑀡𑁂𑀲𑀺𑀦𑀁;

𑀤𑀲𑁆𑀲𑁂𑀦𑁆𑀢𑀻 𑀓𑀼𑀮𑀧𑀼𑀢𑁆𑀢𑀸𑀦𑀁, 𑀦𑀬𑀁 𑀘𑀺𑀢𑁆𑀢𑀯𑀺𑀲𑀼𑀤𑁆𑀥𑀺𑀬𑀸.

𑀬𑀸𑀯 𑀩𑀼𑀤𑁆𑀥𑁄𑀢𑀺 𑀦𑀸𑀫𑀫𑁆𑀧𑀺, 𑀲𑀼𑀤𑁆𑀥𑀘𑀺𑀢𑁆𑀢𑀲𑁆𑀲 𑀢𑀸𑀤𑀺𑀦𑁄;

𑀮𑁄𑀓𑀫𑁆𑀳𑀺 𑀮𑁄𑀓𑀚𑁂𑀝𑁆𑀞𑀲𑁆𑀲, 𑀧𑀯𑀢𑁆𑀢𑀢𑀺 𑀫𑀳𑁂𑀲𑀺𑀦𑁄𑀢𑀺.

𑀫𑀦𑁄𑀭𑀣𑀧𑀽𑀭𑀡𑀻 𑀦𑀸𑀫

𑀅𑀗𑁆𑀕𑀼𑀢𑁆𑀢𑀭𑀦𑀺𑀓𑀸𑀬-𑀅𑀝𑁆𑀞𑀓𑀣𑀸 𑀲𑀩𑁆𑀩𑀸𑀓𑀸𑀭𑁂𑀦 𑀦𑀺𑀝𑁆𑀞𑀺𑀢𑀸.