𑁧. 𑀆𑀦𑀺𑀲𑀁𑀲𑀯𑀕𑁆𑀕𑁄

𑁧. 𑀓𑀺𑀫𑀢𑁆𑀣𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁧. 𑀤𑀲𑀓𑀦𑀺𑀧𑀸𑀢𑀲𑁆𑀲 𑀧𑀞𑀫𑁂 𑀓𑀼𑀲𑀮𑀸𑀦𑀺 𑀲𑀻𑀮𑀸𑀦𑀻𑀢𑀺 𑀅𑀦𑀯𑀚𑁆𑀚𑀲𑀻𑀮𑀸𑀦𑀺. 𑀅𑀫𑀗𑁆𑀓𑀼𑀪𑀸𑀯𑀲𑁆𑀲 𑀅𑀯𑀺𑀧𑁆𑀧𑀝𑀺𑀲𑀸𑀭𑀲𑁆𑀲 𑀅𑀢𑁆𑀣𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀅𑀯𑀺𑀧𑁆𑀧𑀝𑀺𑀲𑀸𑀭𑀢𑁆𑀣𑀸𑀦𑀺. 𑀲𑁄 𑀦𑁂𑀲𑀁 𑀆𑀦𑀺𑀲𑀁𑀲𑁄𑀢𑀺 𑀅𑀯𑀺𑀧𑁆𑀧𑀝𑀺𑀲𑀸𑀭𑀸𑀦𑀺𑀲𑀁𑀲𑀸𑀦𑀺. 𑀬𑀣𑀸𑀪𑀽𑀢𑀜𑀸𑀡𑀤𑀲𑁆𑀲𑀦𑀢𑁆𑀣𑁄𑀢𑀺𑀆𑀤𑀻𑀲𑀼 𑀬𑀣𑀸𑀪𑀽𑀢𑀜𑀸𑀡𑀤𑀲𑁆𑀲𑀦𑀁 𑀦𑀸𑀫 𑀢𑀭𑀼𑀡𑀯𑀺𑀧𑀲𑁆𑀲𑀦𑀸, 𑀦𑀺𑀩𑁆𑀩𑀺𑀤𑀸 𑀦𑀸𑀫 𑀩𑀮𑀯𑀯𑀺𑀧𑀲𑁆𑀲𑀦𑀸, 𑀯𑀺𑀭𑀸𑀕𑁄 𑀦𑀸𑀫 𑀫𑀕𑁆𑀕𑁄, 𑀯𑀺𑀫𑀼𑀢𑁆𑀢𑀺 𑀦𑀸𑀫 𑀅𑀭𑀳𑀢𑁆𑀢𑀨𑀮𑀁, 𑀜𑀸𑀡𑀤𑀲𑁆𑀲𑀦𑀁 𑀦𑀸𑀫 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀁. 𑀅𑀕𑁆𑀕𑀸𑀬 𑀧𑀭𑁂𑀦𑁆𑀢𑀻𑀢𑀺 𑀅𑀭𑀳𑀢𑁆𑀢𑀢𑁆𑀣𑀸𑀬 𑀕𑀘𑁆𑀙𑀦𑁆𑀢𑀺.

𑁨. 𑀘𑁂𑀢𑀦𑀸𑀓𑀭𑀡𑀻𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁨. 𑀤𑀼𑀢𑀺𑀬𑁂 𑀦 𑀘𑁂𑀢𑀦𑀸𑀬 𑀓𑀭𑀡𑀻𑀬𑀦𑁆𑀢𑀺 𑀦 𑀘𑁂𑀢𑁂𑀢𑁆𑀯𑀸 𑀓𑀧𑁆𑀧𑁂𑀢𑁆𑀯𑀸 𑀧𑀓𑀧𑁆𑀧𑁂𑀢𑁆𑀯𑀸 𑀓𑀸𑀢𑀩𑁆𑀩𑀁. 𑀥𑀫𑁆𑀫𑀢𑀸 𑀏𑀲𑀸𑀢𑀺 𑀥𑀫𑁆𑀫𑀲𑀪𑀸𑀯𑁄 𑀏𑀲𑁄 𑀓𑀸𑀭𑀡𑀦𑀺𑀬𑀫𑁄 𑀅𑀬𑀁. 𑀅𑀪𑀺𑀲𑀦𑁆𑀤𑁂𑀦𑁆𑀢𑀻𑀢𑀺 𑀧𑀯𑀢𑁆𑀢𑁂𑀦𑁆𑀢𑀺. 𑀧𑀭𑀺𑀧𑀽𑀭𑁂𑀦𑁆𑀢𑀻𑀢𑀺 𑀧𑀭𑀺𑀧𑀼𑀡𑁆𑀡𑀁 𑀓𑀭𑁄𑀦𑁆𑀢𑀺. 𑀅𑀧𑀸𑀭𑀸 𑀧𑀸𑀭𑀁 𑀕𑀫𑀦𑀸𑀬𑀸𑀢𑀺 𑀑𑀭𑀺𑀫𑀢𑀻𑀭𑀪𑀽𑀢𑀸 𑀢𑁂𑀪𑀽𑀫𑀓𑀯𑀝𑁆𑀝𑀸 𑀦𑀺𑀩𑁆𑀩𑀸𑀦𑀧𑀸𑀭𑀁 𑀕𑀫𑀦𑀢𑁆𑀣𑀸𑀬.

𑁩-𑁫. 𑀉𑀧𑀦𑀺𑀲𑀲𑀼𑀢𑁆𑀢𑀢𑁆𑀢𑀬𑀯𑀡𑁆𑀡𑀦𑀸

𑁩-𑁫. 𑀢𑀢𑀺𑀬𑁂 𑀳𑀢𑀽𑀧𑀦𑀺𑀲𑁄𑀢𑀺 𑀳𑀢𑀓𑀸𑀭𑀡𑁄. 𑀘𑀢𑀼𑀢𑁆𑀣𑀧𑀜𑁆𑀘𑀫𑁂𑀲𑀼 𑀤𑁆𑀯𑀻𑀳𑀺 𑀣𑁂𑀭𑁂𑀳𑀺 𑀓𑀣𑀺𑀢𑀪𑀸𑀯𑁄𑀯 𑀯𑀺𑀲𑁂𑀲𑁄.

𑁬. 𑀲𑀫𑀸𑀥𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁬. 𑀙𑀝𑁆𑀞𑁂 𑀦𑁂𑀯 𑀧𑀣𑀯𑀺𑀬𑀁 𑀧𑀣𑀯𑀻𑀲𑀜𑁆𑀜𑀻 𑀅𑀲𑁆𑀲𑀸𑀢𑀺 𑀧𑀣𑀯𑀺𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀧𑀣𑀯𑀻𑀢𑀺 𑀏𑀯𑀁 𑀉𑀧𑁆𑀧𑀦𑁆𑀦𑀸𑀬 𑀲𑀜𑁆𑀜𑀸𑀬 𑀲𑀜𑁆𑀜𑀻 𑀦 𑀪𑀯𑁂𑀬𑁆𑀬. 𑀆𑀧𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀦 𑀇𑀥𑀮𑁄𑀓𑁂𑀢𑀺 𑀇𑀥𑀮𑁄𑀓𑁂 𑀉𑀧𑁆𑀧𑀚𑁆𑀚𑀦𑀓𑀘𑀢𑀼𑀓𑁆𑀓𑀧𑀜𑁆𑀘𑀓𑀚𑁆𑀛𑀸𑀦𑀲𑀜𑁆𑀜𑀸𑀬 𑀦 𑀲𑀜𑁆𑀜𑀻 𑀪𑀯𑁂𑀬𑁆𑀬. 𑀦 𑀧𑀭𑀮𑁄𑀓𑁂𑀢𑀺 𑀧𑀭𑀮𑁄𑀓𑁂 𑀉𑀧𑁆𑀧𑀚𑁆𑀚𑀦𑀓𑀘𑀢𑀼𑀓𑁆𑀓𑀧𑀜𑁆𑀘𑀓𑀚𑁆𑀛𑀸𑀦𑀲𑀜𑁆𑀜𑀸𑀬 𑀦 𑀲𑀜𑁆𑀜𑀻 𑀪𑀯𑁂𑀬𑁆𑀬. 𑀲𑀜𑁆𑀜𑀻 𑀘 𑀧𑀦 𑀅𑀲𑁆𑀲𑀸𑀢𑀺 𑀅𑀣 𑀘 𑀧𑀦𑀲𑁆𑀲 𑀲𑀫𑀸𑀧𑀢𑁆𑀢𑀺 𑀲𑀯𑀺𑀢𑀓𑁆𑀓𑀲𑀫𑀸𑀧𑀢𑁆𑀢𑀺𑀬𑁂𑀯 𑀅𑀲𑁆𑀲𑀸𑀢𑀺 𑀯𑀼𑀘𑁆𑀘𑀢𑀺. 𑀏𑀢𑀁 𑀲𑀦𑁆𑀢𑀁 𑀏𑀢𑀁 𑀧𑀡𑀻𑀢𑀦𑁆𑀢𑀺 𑀲𑀦𑁆𑀢𑀁 𑀲𑀦𑁆𑀢𑀦𑁆𑀢𑀺 𑀅𑀧𑁆𑀧𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑀲𑁆𑀲 𑀤𑀺𑀯𑀲𑀫𑁆𑀧𑀺 𑀘𑀺𑀢𑁆𑀢𑀼𑀧𑁆𑀧𑀸𑀤𑁄 ‘‘𑀲𑀦𑁆𑀢𑀁 𑀲𑀦𑁆𑀢’’𑀦𑁆𑀢𑁂𑀯 𑀧𑀯𑀢𑁆𑀢𑀢𑀺, 𑀧𑀡𑀻𑀢𑀁 𑀧𑀡𑀻𑀢𑀦𑁆𑀢𑀺 𑀅𑀧𑁆𑀧𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑀲𑁆𑀲 𑀤𑀺𑀯𑀲𑀫𑁆𑀧𑀺 𑀘𑀺𑀢𑁆𑀢𑀼𑀧𑁆𑀧𑀸𑀤𑁄 ‘‘𑀧𑀡𑀻𑀢𑀁 𑀧𑀡𑀻𑀢’’𑀦𑁆𑀢𑁂𑀯 𑀧𑀯𑀢𑁆𑀢𑀢𑀺. 𑀬𑀤𑀺𑀤𑀁 𑀲𑀩𑁆𑀩𑀲𑀗𑁆𑀔𑀸𑀭𑀲𑀫𑀣𑁄𑀢𑀺 𑀦𑀺𑀩𑁆𑀩𑀸𑀦𑀁 𑀦𑀺𑀩𑁆𑀩𑀸𑀦𑀦𑁆𑀢𑀺 𑀅𑀧𑁆𑀧𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑀲𑁆𑀲 𑀤𑀺𑀯𑀲𑀫𑁆𑀧𑀺 𑀘𑀺𑀢𑁆𑀢𑀼𑀧𑁆𑀧𑀸𑀤𑁄 ‘‘𑀦𑀺𑀩𑁆𑀩𑀸𑀦𑀁 𑀦𑀺𑀩𑁆𑀩𑀸𑀦’’𑀦𑁆𑀢𑁂𑀯 𑀧𑀯𑀢𑁆𑀢𑀢𑀻𑀢𑀺 𑀲𑀩𑁆𑀩𑀫𑁆𑀧𑁂𑀢𑀁 𑀨𑀮𑀲𑀫𑀸𑀧𑀢𑁆𑀢𑀺𑀲𑀫𑀸𑀥𑀺𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁.

𑁭. 𑀲𑀸𑀭𑀺𑀧𑀼𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁭. 𑀲𑀢𑁆𑀢𑀫𑁂 𑀲𑀜𑁆𑀜𑀻 𑀘 𑀧𑀦𑀸𑀳𑀁, 𑀆𑀯𑀼𑀲𑁄, 𑀢𑀲𑁆𑀫𑀺𑀁 𑀲𑀫𑀬𑁂 𑀅𑀳𑁄𑀲𑀺𑀦𑁆𑀢𑀺, 𑀆𑀯𑀼𑀲𑁄, 𑀢𑀲𑁆𑀫𑀺𑀁 𑀲𑀫𑀬𑁂 𑀅𑀳𑀁 ‘‘𑀪𑀯𑀦𑀺𑀭𑁄𑀥𑁄 𑀦𑀺𑀩𑁆𑀩𑀸𑀦’’𑀦𑁆𑀢𑀺 𑀇𑀫𑀸𑀬 𑀨𑀮𑀲𑀫𑀸𑀧𑀢𑁆𑀢𑀺𑀲𑀜𑁆𑀜𑀸𑀬 𑀲𑀜𑁆𑀜𑀻 𑀅𑀳𑁄𑀲𑀺𑀁. 𑀲𑀘𑀺𑀢𑁆𑀢𑀓𑀸 𑀫𑁂 𑀲𑀸 𑀲𑀫𑀸𑀧𑀢𑁆𑀢𑀺 𑀅𑀳𑁄𑀲𑀻𑀢𑀺 𑀧𑀘𑁆𑀘𑀯𑁂𑀓𑁆𑀔𑀡𑀸 𑀓𑀣𑀺𑀢𑀸.

𑁮. 𑀛𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁮. 𑀅𑀝𑁆𑀞𑀫𑁂 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑁄𑀢𑀺 𑀧𑀲𑀸𑀤𑀸𑀯𑀳𑀸𑀦𑀁𑀬𑁂𑀯 𑀓𑀸𑀬𑀓𑀫𑁆𑀫𑀸𑀤𑀻𑀦𑀁 𑀲𑀩𑁆𑀪𑀸𑀯𑀢𑁄 𑀲𑀫𑀦𑁆𑀢𑁄 𑀧𑀸𑀲𑀸𑀤𑀺𑀓𑁄. 𑀲𑀩𑁆𑀩𑀸𑀓𑀸𑀭𑀧𑀭𑀺𑀧𑀽𑀭𑁄𑀢𑀺 𑀲𑀩𑁆𑀩𑁂𑀳𑀺 𑀓𑀸𑀭𑀡𑁂𑀳𑀺 𑀧𑀭𑀺𑀧𑀼𑀡𑁆𑀡𑁄.

𑁯. 𑀲𑀦𑁆𑀢𑀯𑀺𑀫𑁄𑀓𑁆𑀔𑀲𑀼𑀢𑁆𑀢𑀯𑀡𑁆𑀡𑀦𑀸

𑁯. 𑀦𑀯𑀫𑁂 𑀲𑀦𑁆𑀢𑀸𑀢𑀺 𑀆𑀭𑀫𑁆𑀫𑀡𑀲𑀦𑁆𑀢𑀢𑀸𑀬𑀧𑀺 𑀅𑀗𑁆𑀕𑀲𑀦𑁆𑀢𑀢𑀸𑀬𑀧𑀺 𑀲𑀦𑁆𑀢𑀸. 𑀯𑀺𑀫𑁄𑀓𑁆𑀔𑀸𑀢𑀺 𑀧𑀘𑁆𑀘𑀦𑀻𑀓𑀥𑀫𑁆𑀫𑁂𑀳𑀺 𑀯𑀺𑀫𑀼𑀢𑁆𑀢𑀢𑁆𑀢𑀸 𑀆𑀭𑀫𑁆𑀫𑀡𑁂 𑀘 𑀦𑀺𑀭𑀸𑀲𑀗𑁆𑀓𑀪𑀸𑀯𑁂𑀦 𑀲𑀼𑀝𑁆𑀞𑀼 𑀫𑀼𑀢𑁆𑀢𑀢𑁆𑀢𑀸 𑀏𑀯𑀁𑀮𑀤𑁆𑀥𑀦𑀸𑀫𑀸. 𑀅𑀢𑀺𑀓𑁆𑀓𑀫𑁆𑀫 𑀭𑀽𑀧𑁂𑀢𑀺 𑀭𑀽𑀧𑀚𑁆𑀛𑀸𑀦𑀸𑀦𑀺 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀧𑀯𑀢𑁆𑀢𑀸. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀆𑀦𑀺𑀲𑀁𑀲𑀯𑀕𑁆𑀕𑁄 𑀧𑀞𑀫𑁄.

𑁨. 𑀦𑀸𑀣𑀯𑀕𑁆𑀕𑁄

𑁧. 𑀲𑁂𑀦𑀸𑀲𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁧. 𑀤𑀼𑀢𑀺𑀬𑀲𑁆𑀲 𑀧𑀞𑀫𑁂 𑀧𑀜𑁆𑀘𑀗𑁆𑀕𑀲𑀫𑀦𑁆𑀦𑀸𑀕𑀢𑁄𑀢𑀺 𑀧𑀜𑁆𑀘𑀳𑀺 𑀕𑀼𑀡𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄. 𑀦𑀸𑀢𑀺𑀤𑀽𑀭𑀁 𑀳𑁄𑀢𑀺 𑀦𑀸𑀘𑁆𑀘𑀸𑀲𑀦𑁆𑀦𑀦𑁆𑀢𑀺 𑀬𑀜𑁆𑀳𑀺 𑀅𑀢𑀺𑀤𑀽𑀭𑁂 𑀳𑁄𑀢𑀺, 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀢𑀢𑁆𑀣 𑀕𑀘𑁆𑀙𑀦𑁆𑀢𑀲𑁆𑀲 𑀓𑀸𑀬𑀘𑀺𑀢𑁆𑀢𑀤𑀭𑀣𑀸 𑀳𑁄𑀢𑀺, 𑀢𑀢𑁄 𑀅𑀦𑀼𑀧𑁆𑀧𑀦𑁆𑀦𑀁 𑀯𑀸 𑀲𑀫𑀸𑀥𑀺𑀁 𑀉𑀧𑁆𑀧𑀸𑀤𑁂𑀢𑀼𑀁 𑀉𑀧𑁆𑀧𑀦𑁆𑀦𑀁 𑀯𑀸 𑀣𑀺𑀭𑀁 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀅𑀘𑁆𑀘𑀸𑀲𑀦𑁆𑀦𑀁 𑀩𑀳𑀼𑀚𑀦𑀸𑀓𑀺𑀡𑁆𑀡𑀁 𑀳𑁄𑀢𑀺. 𑀘𑀢𑁆𑀢𑀸𑀮𑀻𑀲𑀉𑀲𑀪𑀫𑀢𑁆𑀢𑁂 𑀧𑀦 𑀧𑀤𑁂𑀲𑁂 𑀯𑀲𑀢𑀁 𑀤𑀽𑀭𑀸𑀲𑀦𑁆𑀦𑀤𑁄𑀲𑀯𑀺𑀫𑀼𑀢𑁆𑀢𑀜𑁆𑀘 𑀕𑀫𑀦𑀸𑀕𑀫𑀦𑀲𑀫𑁆𑀧𑀦𑁆𑀦𑀁 𑀦𑀸𑀫 𑀳𑁄𑀢𑀺. 𑀤𑀺𑀯𑀸𑀅𑀧𑁆𑀧𑀸𑀓𑀺𑀡𑁆𑀡𑀦𑁆𑀢𑀺 𑀤𑀺𑀯𑀲𑀪𑀸𑀕𑁂 𑀫𑀳𑀸𑀚𑀦𑁂𑀦 𑀅𑀦𑀸𑀓𑀺𑀡𑁆𑀡𑀁.

𑁨. 𑀧𑀜𑁆𑀘𑀗𑁆𑀕𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁨. 𑀤𑀼𑀢𑀺𑀬𑁂 𑀓𑁂𑀯𑀮𑀻𑀢𑀺 𑀓𑁂𑀯𑀮𑁂𑀳𑀺 𑀲𑀓𑀮𑁂𑀳𑀺 𑀕𑀼𑀡𑁂𑀳𑀺 𑀲𑀫𑀦𑁆𑀦𑀸𑀕𑀢𑁄. 𑀯𑀼𑀲𑀺𑀢𑀯𑀸𑀢𑀺 𑀯𑀼𑀢𑁆𑀣𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄. 𑀅𑀲𑁂𑀔𑁂𑀦𑀸𑀢𑀺 𑀅𑀲𑁂𑀔𑀥𑀫𑁆𑀫𑀧𑀭𑀺𑀬𑀸𑀧𑀦𑁆𑀦𑁂𑀦 𑀮𑁄𑀓𑀼𑀢𑁆𑀢𑀭𑁂𑀦. 𑀲𑀻𑀮𑀓𑁆𑀔𑀦𑁆𑀥𑁂𑀦𑀸𑀢𑀺 𑀲𑀻𑀮𑀭𑀸𑀲𑀺𑀦𑀸. 𑀯𑀺𑀫𑀼𑀢𑁆𑀢𑀺𑀓𑁆𑀔𑀦𑁆𑀥𑁂𑀦𑀸𑀢𑀺 𑀏𑀢𑁆𑀣 𑀞𑀧𑁂𑀢𑁆𑀯𑀸 𑀲𑀻𑀮𑀸𑀤𑀬𑁄 𑀢𑀬𑁄 𑀲𑁂𑀲𑀸 𑀨𑀮𑀥𑀫𑁆𑀫𑀸 𑀯𑀺𑀫𑀼𑀢𑁆𑀢𑀺 𑀦𑀸𑀫, 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀁 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀁, 𑀢𑀁 𑀮𑁄𑀓𑀺𑀬𑀫𑁂𑀯.

𑁩-𑁪. 𑀲𑀁𑀬𑁄𑀚𑀦𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁩-𑁧𑁪. 𑀢𑀢𑀺𑀬𑁂 𑀑𑀭𑀫𑁆𑀪𑀸𑀕𑀺𑀬𑀸𑀦𑀻𑀢𑀺 𑀳𑁂𑀝𑁆𑀞𑀸𑀪𑀸𑀕𑀺𑀬𑀸𑀦𑀺. 𑀉𑀤𑁆𑀥𑀫𑁆𑀪𑀸𑀕𑀺𑀬𑀸𑀦𑀻𑀢𑀺 𑀉𑀧𑀭𑀺𑀪𑀸𑀕𑀺𑀬𑀸𑀦𑀺. 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀯𑀝𑁆𑀝𑀫𑁂𑀯 𑀓𑀣𑀺𑀢𑀁. 𑀘𑀢𑀼𑀢𑁆𑀣𑁂 𑀔𑀺𑀮𑀯𑀺𑀦𑀺𑀩𑀦𑁆𑀥𑀸 𑀧𑀜𑁆𑀘𑀓𑀦𑀺𑀧𑀸𑀢𑁂 𑀯𑀺𑀢𑁆𑀣𑀸𑀭𑀺𑀢𑀸𑀬𑁂𑀯. 𑀆𑀭𑁄𑀳𑀧𑀭𑀺𑀡𑀸𑀳𑁂𑀦𑀸𑀢𑀺 𑀤𑀻𑀖𑀧𑀼𑀣𑀼𑀮𑀦𑁆𑀢𑁂𑀦.

𑁫. 𑀅𑀧𑁆𑀧𑀫𑀸𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁫. 𑀧𑀜𑁆𑀘𑀫𑁂 𑀏𑀯𑀫𑁂𑀯 𑀔𑁄𑀢𑀺 𑀬𑀣𑀸 𑀲𑀩𑁆𑀩𑀲𑀢𑁆𑀢𑀸𑀦𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀅𑀕𑁆𑀕𑁄, 𑀏𑀯𑀁 𑀲𑀩𑁆𑀩𑁂𑀲𑀁 𑀓𑀼𑀲𑀮𑀥𑀫𑁆𑀫𑀸𑀦𑀁 𑀓𑀸𑀭𑀸𑀧𑀓𑀅𑀧𑁆𑀧𑀫𑀸𑀤𑁄 𑀅𑀕𑁆𑀕𑁄𑀢𑀺 𑀤𑀝𑁆𑀞𑀩𑁆𑀩𑁄. 𑀦𑀦𑀼 𑀘𑁂𑀲 𑀮𑁄𑀓𑀺𑀬𑁄𑀯, 𑀓𑀼𑀲𑀮𑀥𑀫𑁆𑀫𑀸 𑀧𑀦 𑀮𑁄𑀓𑀼𑀢𑁆𑀢𑀭𑀸𑀧𑀺. 𑀅𑀬𑀜𑁆𑀘 𑀓𑀸𑀫𑀸𑀯𑀘𑀭𑁄𑀯, 𑀓𑀼𑀲𑀮𑀥𑀫𑁆𑀫𑀸 𑀧𑀦 𑀘𑀢𑀼𑀪𑀽𑀫𑀓𑀸. 𑀓𑀣𑀫𑁂𑀲 𑀢𑁂𑀲𑀁 𑀅𑀕𑁆𑀕𑁄𑀢𑀺? 𑀧𑀝𑀺𑀮𑀸𑀪𑀓𑀢𑁆𑀢𑁂𑀦. 𑀅𑀧𑁆𑀧𑀫𑀸𑀤𑁂𑀦 𑀳𑀺 𑀢𑁂 𑀧𑀝𑀺𑀮𑀪𑀦𑁆𑀢𑀺, 𑀢𑀲𑁆𑀫𑀸 𑀲𑁄 𑀢𑁂𑀲𑀁 𑀅𑀕𑁆𑀕𑁄. 𑀢𑁂𑀦𑁂𑀯 𑀯𑀼𑀢𑁆𑀢𑀁 𑁋 𑀲𑀩𑁆𑀩𑁂 𑀢𑁂 𑀅𑀧𑁆𑀧𑀫𑀸𑀤𑀫𑀽𑀮𑀓𑀸𑀢𑀺.

𑀚𑀗𑁆𑀕𑀮𑀸𑀦𑀦𑁆𑀢𑀺 𑀧𑀣𑀯𑀺𑀢𑀮𑀘𑀸𑀭𑀻𑀦𑀁. 𑀧𑀸𑀡𑀸𑀦𑀦𑁆𑀢𑀺 𑀲𑀧𑀸𑀤𑀓𑀧𑀸𑀡𑀸𑀦𑀁. 𑀧𑀤𑀚𑀸𑀢𑀸𑀦𑀻𑀢𑀺 𑀧𑀤𑀸𑀦𑀺. 𑀲𑀫𑁄𑀥𑀸𑀦𑀁 𑀕𑀘𑁆𑀙𑀦𑁆𑀢𑀻𑀢𑀺 𑀑𑀥𑀸𑀦𑀁 𑀧𑀓𑁆𑀔𑁂𑀧𑀁 𑀕𑀘𑁆𑀙𑀦𑁆𑀢𑀺. 𑀅𑀕𑁆𑀕𑀫𑀓𑁆𑀔𑀸𑀬𑀢𑀻𑀢𑀺 𑀲𑁂𑀝𑁆𑀞𑀫𑀓𑁆𑀔𑀸𑀬𑀢𑀺. 𑀬𑀤𑀺𑀤𑀁 𑀫𑀳𑀦𑁆𑀢𑀢𑁆𑀢𑁂𑀦𑀸𑀢𑀺 𑀫𑀳𑀦𑁆𑀢𑀪𑀸𑀯𑁂𑀦 𑀅𑀕𑁆𑀕𑀫𑀓𑁆𑀔𑀸𑀬𑀢𑀺, 𑀦 𑀕𑀼𑀡𑀕𑁆𑀕𑁂𑀦𑀸𑀢𑀺 𑀅𑀢𑁆𑀣𑁄. 𑀯𑀲𑁆𑀲𑀺𑀓𑀦𑁆𑀢𑀺 𑀲𑀼𑀫𑀦𑀧𑀼𑀧𑁆𑀨𑀁. 𑀇𑀤𑀁 𑀓𑀺𑀭 𑀲𑀼𑀢𑁆𑀢𑀁 𑀲𑀼𑀢𑁆𑀯𑀸 𑀪𑀸𑀢𑀺𑀬𑀫𑀳𑀸𑀭𑀸𑀚𑀸 𑀯𑀻𑀫𑀁𑀲𑀺𑀢𑀼𑀓𑀸𑀫𑀢𑀸𑀬 𑀏𑀓𑀲𑁆𑀫𑀺𑀁 𑀕𑀩𑁆𑀪𑁂 𑀘𑀢𑀼𑀚𑀸𑀢𑀺𑀕𑀦𑁆𑀥𑁂𑀳𑀺 𑀧𑀭𑀺𑀪𑀡𑁆𑀟𑀁 𑀓𑀢𑁆𑀯𑀸 𑀲𑀼𑀕𑀦𑁆𑀥𑀧𑀼𑀧𑁆𑀨𑀸𑀦𑀺 𑀆𑀳𑀭𑀸𑀧𑁂𑀢𑁆𑀯𑀸 𑀏𑀓𑀲𑁆𑀲 𑀲𑀫𑀼𑀕𑁆𑀕𑀲𑁆𑀲 𑀫𑀚𑁆𑀛𑁂 𑀲𑀼𑀫𑀦𑀧𑀼𑀧𑁆𑀨𑀫𑀼𑀝𑁆𑀞𑀺𑀁 𑀞𑀧𑁂𑀢𑁆𑀯𑀸 𑀲𑁂𑀲𑀸𑀦𑀺 𑀢𑀲𑁆𑀲 𑀲𑀫𑀦𑁆𑀢𑀢𑁄 𑀫𑀼𑀝𑁆𑀞𑀺𑀁 𑀓𑀢𑁆𑀯𑀸 𑀞𑀧𑁂𑀢𑁆𑀯𑀸 𑀤𑁆𑀯𑀸𑀭𑀁 𑀧𑀺𑀥𑀸𑀬 𑀩𑀳𑀺 𑀦𑀺𑀓𑁆𑀔𑀦𑁆𑀢𑁄. 𑀅𑀣𑀲𑁆𑀲 𑀫𑀼𑀳𑀼𑀢𑁆𑀢𑀁 𑀩𑀳𑀺 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀤𑁆𑀯𑀸𑀭𑀁 𑀯𑀺𑀯𑀭𑀺𑀢𑁆𑀯𑀸 𑀧𑀯𑀺𑀲𑀦𑁆𑀢𑀲𑁆𑀲 𑀲𑀩𑁆𑀩𑀧𑀞𑀫𑀁 𑀲𑀼𑀫𑀦𑀧𑀼𑀧𑁆𑀨𑀕𑀦𑁆𑀥𑁄 𑀖𑀸𑀦𑀁 𑀧𑀳𑀭𑀺. 𑀲𑁄 𑀫𑀳𑀸𑀢𑀮𑀲𑁆𑀫𑀺𑀁𑀬𑁂𑀯 𑀫𑀳𑀸𑀘𑁂𑀢𑀺𑀬𑀸𑀪𑀺𑀫𑀼𑀔𑁄 𑀦𑀺𑀧𑀚𑁆𑀚𑀺𑀢𑁆𑀯𑀸 ‘‘𑀯𑀲𑁆𑀲𑀺𑀓𑀁 𑀢𑁂𑀲𑀁 𑀅𑀕𑁆𑀕𑀦𑁆𑀢𑀺 𑀓𑀣𑁂𑀦𑁆𑀢𑁂𑀦 𑀲𑀼𑀓𑀣𑀺𑀢𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦𑀸’’𑀢𑀺 𑀘𑁂𑀢𑀺𑀬𑀁 𑀯𑀦𑁆𑀤𑀺. 𑀔𑀼𑀤𑁆𑀤𑀭𑀸𑀚𑀸𑀦𑁄𑀢𑀺 𑀔𑀼𑀤𑁆𑀤𑀓𑀭𑀸𑀚𑀸𑀦𑁄. 𑀓𑀽𑀝𑀭𑀸𑀚𑀸𑀦𑁄𑀢𑀺𑀧𑀺 𑀧𑀸𑀞𑁄.

𑁬. 𑀆𑀳𑀼𑀦𑁂𑀬𑁆𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁬. 𑀙𑀝𑁆𑀞𑁂 𑀕𑁄𑀢𑁆𑀭𑀪𑀽𑀢𑀺 𑀲𑀺𑀔𑀸𑀧𑀢𑁆𑀢𑀯𑀺𑀧𑀲𑁆𑀲𑀦𑀸𑀪𑀽𑀢𑁂𑀦 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑁂𑀦 𑀕𑁄𑀢𑁆𑀭𑀪𑀼𑀜𑀸𑀡𑁂𑀦 𑀲𑀫𑀦𑁆𑀦𑀸𑀕𑀢𑁄.

𑁭. 𑀧𑀞𑀫𑀦𑀸𑀣𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁭. 𑀲𑀢𑁆𑀢𑀫𑁂 𑀲𑀦𑀸𑀣𑀸𑀢𑀺 𑀲𑀜𑀸𑀢𑀓𑀸 𑀩𑀳𑀼𑀜𑀸𑀢𑀺𑀯𑀕𑁆𑀕𑀸 𑀳𑀼𑀢𑁆𑀯𑀸 𑀯𑀺𑀳𑀭𑀣. 𑀦𑀸𑀣𑀁 𑀓𑀭𑁄𑀦𑁆𑀢𑀻𑀢𑀺 𑀦𑀸𑀣𑀓𑀭𑀡𑀸, 𑀅𑀢𑁆𑀢𑀦𑁄 𑀲𑀦𑀸𑀣𑀪𑀸𑀯𑀓𑀭𑀸 𑀧𑀢𑀺𑀝𑁆𑀞𑀸𑀓𑀭𑀸𑀢𑀺 𑀅𑀢𑁆𑀣𑁄. 𑀓𑀮𑁆𑀬𑀸𑀡𑀫𑀺𑀢𑁆𑀢𑁄𑀢𑀺𑀆𑀤𑀻𑀲𑀼 𑀲𑀻𑀮𑀸𑀤𑀺𑀕𑀼𑀡𑀲𑀫𑁆𑀧𑀦𑁆𑀦𑀸 𑀓𑀮𑁆𑀬𑀸𑀡𑀸 𑀫𑀺𑀢𑁆𑀢𑀸 𑀅𑀲𑁆𑀲𑀸𑀢𑀺 𑀓𑀮𑁆𑀬𑀸𑀡𑀫𑀺𑀢𑁆𑀢𑁄. 𑀢𑁂𑀯𑀲𑁆𑀲 𑀞𑀸𑀦𑀦𑀺𑀲𑀚𑁆𑀚𑀸𑀤𑀻𑀲𑀼 𑀲𑀳 𑀅𑀬𑀦𑀢𑁄 𑀲𑀳𑀸𑀬𑀸𑀢𑀺 𑀓𑀮𑁆𑀬𑀸𑀡𑀲𑀳𑀸𑀬𑁄. 𑀘𑀺𑀢𑁆𑀢𑁂𑀦 𑀘𑁂𑀯 𑀓𑀸𑀬𑁂𑀦 𑀘 𑀓𑀮𑁆𑀬𑀸𑀡𑀫𑀺𑀢𑁆𑀢𑁂𑀲𑀼𑀬𑁂𑀯 𑀲𑀫𑁆𑀧𑀯𑀗𑁆𑀓𑁄 𑀑𑀡𑀢𑁄𑀢𑀺 𑀓𑀮𑁆𑀬𑀸𑀡𑀲𑀫𑁆𑀧𑀯𑀗𑁆𑀓𑁄. 𑀲𑀼𑀯𑀘𑁄 𑀳𑁄𑀢𑀻𑀢𑀺 𑀲𑀼𑀔𑁂𑀦 𑀯𑀢𑁆𑀢𑀩𑁆𑀩𑁄 𑀳𑁄𑀢𑀺, 𑀲𑀼𑀔𑁂𑀦 𑀅𑀦𑀼𑀲𑀸𑀲𑀺𑀢𑀩𑁆𑀩𑁄. 𑀔𑀫𑁄𑀢𑀺 𑀕𑀸𑀴𑁆𑀳𑁂𑀦 𑀨𑀭𑀼𑀲𑁂𑀦 𑀓𑀓𑁆𑀔𑀴𑁂𑀦 𑀯𑀼𑀢𑁆𑀢𑁄 𑀔𑀫𑀢𑀺 𑀦 𑀓𑀼𑀧𑁆𑀧𑀢𑀺. 𑀧𑀤𑀓𑁆𑀔𑀺𑀡𑀕𑁆𑀕𑀸𑀳𑀻 𑀅𑀦𑀼𑀲𑀸𑀲𑀦𑀺𑀦𑁆𑀢𑀺 𑀬𑀣𑀸 𑀏𑀓𑀘𑁆𑀘𑁄 𑀑𑀯𑀤𑀺𑀬𑀫𑀸𑀦𑁄 𑀯𑀸𑀫𑀢𑁄 𑀕𑀡𑁆𑀳𑀸𑀢𑀺, 𑀧𑀝𑀺𑀧𑁆𑀨𑀭𑀢𑀺 𑀯𑀸, 𑀅𑀲𑁆𑀲𑀼𑀡𑀦𑁆𑀢𑁄 𑀯𑀸 𑀕𑀘𑁆𑀙𑀢𑀺, 𑀏𑀯𑀁 𑀅𑀓𑀢𑁆𑀯𑀸 ‘‘𑀑𑀯𑀤𑀣, 𑀪𑀦𑁆𑀢𑁂, 𑀅𑀦𑀼𑀲𑀸𑀲𑀣, 𑀢𑀼𑀫𑁆𑀳𑁂𑀲𑀼 𑀅𑀦𑁄𑀯𑀤𑀦𑁆𑀢𑁂𑀲𑀼 𑀓𑁄 𑀅𑀜𑁆𑀜𑁄 𑀑𑀯𑀤𑀺𑀲𑁆𑀲𑀢𑀻’’𑀢𑀺 𑀧𑀤𑀓𑁆𑀔𑀺𑀡𑀁 𑀕𑀡𑁆𑀳𑀸𑀢𑀺.

𑀉𑀘𑁆𑀘𑀸𑀯𑀘𑀸𑀦𑀻𑀢𑀺 𑀉𑀘𑁆𑀘𑀦𑀻𑀘𑀸𑀦𑀺. 𑀓𑀺𑀁𑀓𑀭𑀡𑀻𑀬𑀸𑀦𑀻𑀢𑀺 ‘‘𑀓𑀺𑀁 𑀓𑀭𑁄𑀫𑀻’’𑀢𑀺 𑀏𑀯𑀁 𑀯𑀢𑁆𑀯𑀸 𑀓𑀢𑁆𑀢𑀩𑁆𑀩𑀓𑀫𑁆𑀫𑀸𑀦𑀺. 𑀢𑀢𑁆𑀣 𑀉𑀘𑁆𑀘𑀓𑀫𑁆𑀫𑀁 𑀦𑀸𑀫 𑀘𑀻𑀯𑀭𑀲𑁆𑀲 𑀓𑀭𑀡𑀁 𑀭𑀚𑀦𑀁, 𑀘𑁂𑀢𑀺𑀬𑁂 𑀲𑀼𑀥𑀸𑀓𑀫𑁆𑀫𑀁, 𑀉𑀧𑁄𑀲𑀣𑀸𑀕𑀸𑀭𑀘𑁂𑀢𑀺𑀬𑀖𑀭𑀩𑁄𑀥𑀺𑀖𑀭𑁂𑀲𑀼 𑀓𑀢𑁆𑀢𑀩𑁆𑀩𑀓𑀫𑁆𑀫𑀦𑁆𑀢𑀺 𑀏𑀯𑀫𑀸𑀤𑀺. 𑀅𑀯𑀘𑀓𑀫𑁆𑀫𑀁 𑀦𑀸𑀫 𑀧𑀸𑀤𑀥𑁄𑀯𑀦𑀫𑀓𑁆𑀔𑀦𑀸𑀤𑀺𑀔𑀼𑀤𑁆𑀤𑀓𑀓𑀫𑁆𑀫𑀁. 𑀢𑀢𑁆𑀭𑀽𑀧𑀸𑀬𑀸𑀬𑀸𑀢𑀺 𑀢𑀢𑁆𑀭𑀼𑀧𑀕𑀫𑀦𑀺𑀬𑀸𑀬. 𑀅𑀮𑀁 𑀓𑀸𑀢𑀼𑀦𑁆𑀢𑀺 𑀓𑀸𑀢𑀼𑀁 𑀲𑀫𑀢𑁆𑀣𑁄 𑀳𑁄𑀢𑀺. 𑀅𑀮𑀁 𑀲𑀁𑀯𑀺𑀥𑀸𑀢𑀼𑀦𑁆𑀢𑀺 𑀯𑀺𑀘𑀸𑀭𑁂𑀢𑀼𑀁 𑀲𑀫𑀢𑁆𑀣𑁄 𑀳𑁄𑀢𑀺.

𑀥𑀫𑁆𑀫𑁂 𑀅𑀲𑁆𑀲 𑀓𑀸𑀫𑁄 𑀲𑀺𑀦𑁂𑀳𑁄𑀢𑀺 𑀥𑀫𑁆𑀫𑀓𑀸𑀫𑁄, 𑀢𑁂𑀧𑀺𑀝𑀓𑀁 𑀩𑀼𑀤𑁆𑀥𑀯𑀘𑀦𑀁 𑀧𑀺𑀬𑀸𑀬𑀢𑀻𑀢𑀺 𑀅𑀢𑁆𑀣𑁄. 𑀧𑀺𑀬𑀲𑀫𑀼𑀤𑀸𑀳𑀸𑀭𑁄𑀢𑀺 𑀧𑀭𑀲𑁆𑀫𑀺𑀁 𑀓𑀣𑁂𑀦𑁆𑀢𑁂 𑀲𑀓𑁆𑀓𑀘𑁆𑀘𑀁 𑀲𑀼𑀡𑀸𑀢𑀺, 𑀲𑀬𑀜𑁆𑀘 𑀧𑀭𑁂𑀲𑀁 𑀤𑁂𑀲𑁂𑀢𑀼𑀓𑀸𑀫𑁄 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀅𑀪𑀺𑀥𑀫𑁆𑀫𑁂 𑀅𑀪𑀺𑀯𑀺𑀦𑀬𑁂𑀢𑀺 𑀏𑀢𑁆𑀣 𑀥𑀫𑁆𑀫𑁄 𑀅𑀪𑀺𑀥𑀫𑁆𑀫𑁄, 𑀯𑀺𑀦𑀬𑁄 𑀅𑀪𑀺𑀯𑀺𑀦𑀬𑁄𑀢𑀺 𑀘𑀢𑀼𑀓𑁆𑀓𑀁 𑀯𑁂𑀤𑀺𑀢𑀩𑁆𑀩𑀁. 𑀢𑀢𑁆𑀣 𑀥𑀫𑁆𑀫𑁄𑀢𑀺 𑀲𑀼𑀢𑁆𑀢𑀦𑁆𑀢𑀧𑀺𑀝𑀓𑀁. 𑀅𑀪𑀺𑀥𑀫𑁆𑀫𑁄𑀢𑀺 𑀲𑀢𑁆𑀢 𑀧𑀓𑀭𑀡𑀸𑀦𑀺. 𑀯𑀺𑀦𑀬𑁄𑀢𑀺 𑀉𑀪𑀢𑁄𑀯𑀺𑀪𑀗𑁆𑀕𑁄. 𑀅𑀪𑀺𑀯𑀺𑀦𑀬𑁄𑀢𑀺 𑀔𑀦𑁆𑀥𑀓𑀧𑀭𑀺𑀯𑀸𑀭𑀸. 𑀅𑀣 𑀯𑀸 𑀲𑀼𑀢𑁆𑀢𑀦𑁆𑀢𑀧𑀺𑀝𑀓𑀫𑁆𑀧𑀺 𑀅𑀪𑀺𑀥𑀫𑁆𑀫𑀧𑀺𑀝𑀓𑀫𑁆𑀧𑀺 𑀥𑀫𑁆𑀫𑁄 𑀏𑀯, 𑀫𑀕𑁆𑀕𑀨𑀮𑀸𑀦𑀺 𑀅𑀪𑀺𑀥𑀫𑁆𑀫𑁄. 𑀲𑀓𑀮𑀯𑀺𑀦𑀬𑀧𑀺𑀝𑀓𑀁 𑀯𑀺𑀦𑀬𑁄, 𑀓𑀺𑀮𑁂𑀲𑀯𑀽𑀧𑀲𑀫𑀓𑀭𑀡𑀁 𑀅𑀪𑀺𑀯𑀺𑀦𑀬𑁄. 𑀇𑀢𑀺 𑀲𑀩𑁆𑀩𑀲𑁆𑀫𑀺𑀫𑁆𑀧𑀺 𑀏𑀢𑁆𑀣 𑀥𑀫𑁆𑀫𑁂 𑀘 𑀅𑀪𑀺𑀥𑀫𑁆𑀫𑁂 𑀘 𑀯𑀺𑀦𑀬𑁂 𑀘 𑀅𑀪𑀺𑀯𑀺𑀦𑀬𑁂 𑀘 𑀉𑀴𑀸𑀭𑀧𑀸𑀫𑁄𑀚𑁆𑀚𑁄 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀽𑀢𑀺 𑀓𑀸𑀭𑀡𑀢𑁆𑀣𑁂 𑀪𑀼𑀫𑁆𑀫𑀁, 𑀘𑀸𑀢𑀼𑀪𑀽𑀫𑀓𑀓𑀼𑀲𑀮𑀥𑀫𑁆𑀫𑀓𑀸𑀭𑀡𑀸 𑀢𑁂𑀲𑀁 𑀅𑀥𑀺𑀕𑀫𑀢𑁆𑀣𑀸𑀬 𑀅𑀦𑀺𑀓𑁆𑀔𑀺𑀢𑁆𑀢𑀥𑀼𑀭𑁄 𑀳𑁄𑀢𑀻𑀢𑀺 𑀅𑀢𑁆𑀣𑁄.

𑁮. 𑀤𑀼𑀢𑀺𑀬𑀦𑀸𑀣𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁮. 𑀅𑀝𑁆𑀞𑀫𑁂 𑀣𑁂𑀭𑀸𑀦𑀼𑀓𑀫𑁆𑀧𑀺𑀢𑀲𑁆𑀲𑀸𑀢𑀺 𑀣𑁂𑀭𑁂𑀳𑀺 𑀑𑀯𑀸𑀤𑀸𑀦𑀼𑀲𑀸𑀲𑀦𑀺𑀤𑀸𑀦𑀲𑀫𑀼𑀲𑁆𑀲𑀸𑀳𑀺𑀢𑀸𑀬 𑀳𑀺𑀢𑀨𑀭𑀡𑀸𑀬 𑀅𑀦𑀼𑀓𑀫𑁆𑀧𑀺𑀢𑀲𑁆𑀲.

𑁯. 𑀧𑀞𑀫𑀅𑀭𑀺𑀬𑀸𑀯𑀸𑀲𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁯. 𑀦𑀯𑀫𑁂 𑀅𑀭𑀺𑀬𑀯𑀸𑀲𑀸𑀢𑀺 𑀅𑀭𑀺𑀬𑀸𑀦𑀁 𑀆𑀯𑀸𑀲𑁄, 𑀢𑁂 𑀆𑀯𑀲𑀺𑀁𑀲𑀼 𑀆𑀯𑀲𑀦𑁆𑀢𑀺 𑀆𑀯𑀲𑀺𑀲𑁆𑀲𑀦𑁆𑀢𑀻𑀢𑀺 𑀅𑀭𑀺𑀬𑀸𑀯𑀸𑀲𑀸. 𑀬𑀤𑀭𑀺𑀬𑀸𑀢𑀺 𑀬𑁂 𑀯𑀸𑀲𑁂 𑀅𑀭𑀺𑀬𑀸.

𑁧𑁦. 𑀤𑀼𑀢𑀺𑀬𑀅𑀭𑀺𑀬𑀸𑀯𑀸𑀲𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁦. 𑀤𑀲𑀫𑀁 𑀬𑀲𑁆𑀫𑀸 𑀓𑀼𑀭𑀼𑀭𑀝𑁆𑀞𑀯𑀸𑀲𑀺𑀦𑁄 𑀪𑀺𑀓𑁆𑀔𑀽 𑀕𑀫𑁆𑀪𑀻𑀭𑀧𑀜𑁆𑀜𑀸𑀓𑀸𑀭𑀓𑀸 𑀬𑀼𑀢𑁆𑀢𑀧𑁆𑀧𑀬𑀼𑀢𑁆𑀢𑀸, 𑀢𑀲𑁆𑀫𑀸 𑀬𑀣𑀸 𑀢𑁂𑀲𑀁 𑀤𑀻𑀖𑀦𑀺𑀓𑀸𑀬𑀸𑀤𑀻𑀲𑀼 𑀫𑀳𑀸𑀦𑀺𑀤𑀸𑀦𑀸𑀤𑀻𑀦𑀺 𑀓𑀣𑀺𑀢𑀸𑀦𑀺, 𑀏𑀯𑀫𑀺𑀤𑀫𑁆𑀧𑀺 𑀕𑀫𑁆𑀪𑀻𑀭𑀁 𑀲𑀼𑀔𑀼𑀫𑀁 𑀢𑀺𑀮𑀓𑁆𑀔𑀡𑀸𑀳𑀢𑀁 𑀲𑀼𑀢𑁆𑀢𑀁 𑀢𑀢𑁆𑀣𑁂𑀯 𑀅𑀯𑁄𑀘. 𑀢𑀢𑁆𑀣 𑀧𑀜𑁆𑀘𑀗𑁆𑀕𑀯𑀺𑀧𑁆𑀧𑀳𑀻𑀦𑁄𑀢𑀺 𑀧𑀜𑁆𑀘𑀳𑀺 𑀅𑀗𑁆𑀕𑁂𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑁄 𑀳𑀼𑀢𑁆𑀯𑀸 𑀔𑀻𑀡𑀸𑀲𑀯𑁄 𑀅𑀯𑀲𑀺 𑀯𑀲𑀢𑀺 𑀯𑀲𑀺𑀲𑁆𑀲𑀢𑀺. 𑀢𑀲𑁆𑀫𑀸 𑀅𑀬𑀁 𑀧𑀜𑁆𑀘𑀗𑁆𑀕𑀯𑀺𑀧𑁆𑀧𑀳𑀻𑀦𑀢𑀸 𑀅𑀭𑀺𑀬𑀸𑀯𑀸𑀲𑁄𑀢𑀺 𑀯𑀼𑀢𑁆𑀢𑁄. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀙𑀴𑀗𑁆𑀕𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀻𑀢𑀺 𑀙𑀴𑀗𑁆𑀕𑀼𑀧𑁂𑀓𑁆𑀔𑀸𑀬 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺. 𑀙𑀴𑀗𑁆𑀕𑀼𑀧𑁂𑀓𑁆𑀔𑀸 𑀥𑀫𑁆𑀫𑀸 𑀦𑀸𑀫 𑀓𑁂𑀢𑀺? 𑀜𑀸𑀡𑀸𑀤𑀬𑁄. ‘‘𑀜𑀸𑀡’’𑀦𑁆𑀢𑀺 𑀯𑀼𑀢𑁆𑀢𑁂 𑀓𑀺𑀭𑀺𑀬𑀢𑁄 𑀘𑀢𑁆𑀢𑀸𑀭𑀺 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑀸𑀦𑀺 𑀮𑀩𑁆𑀪𑀦𑁆𑀢𑀺, ‘‘𑀲𑀢𑀢𑀯𑀺𑀳𑀸𑀭𑁄’’𑀢𑀺 𑀯𑀼𑀢𑁆𑀢𑁂 𑀅𑀝𑁆𑀞 𑀫𑀳𑀸𑀘𑀺𑀢𑁆𑀢𑀸𑀦𑀺, ‘‘𑀭𑀚𑁆𑀚𑀦𑀤𑀼𑀲𑁆𑀲𑀦𑀁 𑀦𑀢𑁆𑀣𑀻’’𑀢𑀺 𑀯𑀼𑀢𑁆𑀢𑁂 𑀤𑀲 𑀘𑀺𑀢𑁆𑀢𑀸𑀦𑀺 𑀮𑀩𑁆𑀪𑀦𑁆𑀢𑀺. 𑀲𑁄𑀫𑀦𑀲𑁆𑀲𑀁 𑀆𑀲𑁂𑀯𑀦𑀯𑀲𑁂𑀦 𑀮𑀩𑁆𑀪𑀢𑀺. 𑀲𑀢𑀸𑀭𑀓𑁆𑀔𑁂𑀦 𑀘𑁂𑀢𑀲𑀸𑀢𑀺 𑀔𑀻𑀡𑀸𑀲𑀯𑀲𑁆𑀲 𑀳𑀺 𑀢𑀻𑀲𑀼 𑀤𑁆𑀯𑀸𑀭𑁂𑀲𑀼 𑀲𑀩𑁆𑀩𑀓𑀸𑀮𑁂 𑀲𑀢𑀺 𑀆𑀭𑀓𑁆𑀔𑀓𑀺𑀘𑁆𑀘𑀁 𑀲𑀸𑀥𑁂𑀢𑀺. 𑀢𑁂𑀦𑁂𑀯𑀲𑁆𑀲 𑀘𑀭𑀢𑁄 𑀘 𑀢𑀺𑀝𑁆𑀞𑀢𑁄 𑀘 𑀲𑀼𑀢𑁆𑀢𑀲𑁆𑀲 𑀘 𑀚𑀸𑀕𑀭𑀲𑁆𑀲 𑀘 𑀲𑀢𑀢𑀁 𑀲𑀫𑀺𑀢𑀁 𑀜𑀸𑀡𑀤𑀲𑁆𑀲𑀦𑀁 𑀧𑀘𑁆𑀘𑀼𑀧𑀝𑁆𑀞𑀺𑀢𑀁 𑀳𑁄𑀢𑀻𑀢𑀺 𑀯𑀼𑀘𑁆𑀘𑀢𑀺.

𑀧𑀼𑀣𑀼𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀦𑁆𑀢𑀺 𑀩𑀳𑀽𑀦𑀁 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁. 𑀏𑀢𑁆𑀣 𑀲𑀫𑀡𑀸𑀢𑀺 𑀧𑀩𑁆𑀩𑀚𑁆𑀚𑀽𑀧𑀕𑀢𑀸, 𑀩𑁆𑀭𑀸𑀳𑁆𑀫𑀡𑀸𑀢𑀺 𑀪𑁄𑀯𑀸𑀤𑀺𑀦𑁄. 𑀧𑀼𑀣𑀼𑀧𑀘𑁆𑀘𑁂𑀓𑀲𑀘𑁆𑀘𑀸𑀦𑀻𑀢𑀺 𑀩𑀳𑀽𑀦𑀺 𑀧𑀸𑀝𑁂𑀓𑁆𑀓𑀲𑀘𑁆𑀘𑀸𑀦𑀺. ‘‘𑀇𑀤𑀫𑁂𑀯 𑀤𑀲𑁆𑀲𑀦𑀁 𑀲𑀘𑁆𑀘𑀁, 𑀇𑀤𑀫𑁂𑀯 𑀲𑀘𑁆𑀘’’𑀦𑁆𑀢𑀺 𑀏𑀯𑀁 𑀧𑀸𑀝𑀺𑀬𑁂𑀓𑁆𑀓𑀁 𑀕𑀳𑀺𑀢𑀸𑀦𑀺 𑀩𑀳𑀽𑀦𑀺 𑀲𑀘𑁆𑀘𑀸𑀦𑀻𑀢𑀺 𑀅𑀢𑁆𑀣𑁄. 𑀦𑀼𑀡𑁆𑀡𑀸𑀦𑀻𑀢𑀺 𑀦𑀻𑀳𑀝𑀸𑀦𑀺. 𑀧𑀦𑀼𑀡𑁆𑀡𑀸𑀦𑀻𑀢𑀺 𑀲𑀼𑀝𑁆𑀞𑀼 𑀦𑀻𑀳𑀝𑀸𑀦𑀺. 𑀘𑀢𑁆𑀢𑀸𑀦𑀻𑀢𑀺 𑀯𑀺𑀲𑁆𑀲𑀝𑁆𑀞𑀸𑀦𑀺. 𑀯𑀦𑁆𑀢𑀸𑀦𑀻𑀢𑀺 𑀯𑀫𑀺𑀢𑀸𑀦𑀺. 𑀫𑀼𑀢𑁆𑀢𑀸𑀦𑀻𑀢𑀺 𑀙𑀺𑀦𑁆𑀦𑀩𑀦𑁆𑀥𑀦𑀸𑀦𑀺 𑀓𑀢𑀸𑀦𑀺. 𑀧𑀳𑀻𑀦𑀸𑀦𑀻𑀢𑀺 𑀧𑀚𑀳𑀺𑀢𑀸𑀦𑀺. 𑀧𑀝𑀺𑀦𑀺𑀲𑁆𑀲𑀝𑁆𑀞𑀸𑀦𑀻𑀢𑀺 𑀬𑀣𑀸 𑀦 𑀧𑀼𑀦 𑀘𑀺𑀢𑁆𑀢𑀁 𑀆𑀭𑁄𑀳𑀦𑁆𑀢𑀺, 𑀏𑀯𑀁 𑀧𑀝𑀺𑀦𑀺𑀲𑁆𑀲𑀚𑁆𑀚𑀺𑀢𑀸𑀦𑀺. 𑀲𑀩𑁆𑀩𑀸𑀦𑁂𑀯 𑀢𑀸𑀦𑀺 𑀕𑀳𑀺𑀢𑀕𑁆𑀕𑀳𑀡𑀲𑁆𑀲 𑀯𑀺𑀲𑁆𑀲𑀝𑁆𑀞𑀪𑀸𑀯𑀯𑁂𑀯𑀘𑀦𑀸𑀦𑀺.

𑀲𑀫𑀯𑀬𑀲𑀝𑁆𑀞𑁂𑀲𑀦𑁄𑀢𑀺 𑀏𑀢𑁆𑀣 𑀅𑀯𑀬𑀸𑀢𑀺 𑀅𑀦𑀽𑀦𑀸, 𑀲𑀝𑁆𑀞𑀸𑀢𑀺 𑀯𑀺𑀲𑁆𑀲𑀝𑁆𑀞𑀸. 𑀲𑀫𑁆𑀫𑀸 𑀅𑀯𑀬𑀸 𑀲𑀝𑁆𑀞𑀸 𑀏𑀲𑀦𑀸 𑀅𑀲𑁆𑀲𑀸𑀢𑀺 𑀲𑀫𑀯𑀬𑀲𑀝𑁆𑀞𑁂𑀲𑀦𑁄, 𑀲𑀼𑀝𑁆𑀞𑀼𑀯𑀺𑀲𑁆𑀲𑀝𑁆𑀞𑀲𑀩𑁆𑀩𑀏𑀲𑀦𑁄𑀢𑀺 𑀅𑀢𑁆𑀣𑁄. 𑀭𑀸𑀕𑀸 𑀘𑀺𑀢𑁆𑀢𑀁 𑀯𑀺𑀫𑀼𑀢𑁆𑀢𑀦𑁆𑀢𑀺𑀆𑀤𑀻𑀳𑀺 𑀫𑀕𑁆𑀕𑀲𑁆𑀲 𑀓𑀺𑀘𑁆𑀘𑀦𑀺𑀧𑁆𑀨𑀢𑁆𑀢𑀺 𑀓𑀣𑀺𑀢𑀸. 𑀭𑀸𑀕𑁄 𑀫𑁂 𑀧𑀳𑀻𑀦𑁄𑀢𑀺𑀆𑀤𑀻𑀳𑀺 𑀧𑀘𑁆𑀘𑀯𑁂𑀓𑁆𑀔𑀡𑀨𑀮𑀁 𑀓𑀣𑀺𑀢𑀁. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀦𑀸𑀣𑀯𑀕𑁆𑀕𑁄 𑀤𑀼𑀢𑀺𑀬𑁄.

𑁩. 𑀫𑀳𑀸𑀯𑀕𑁆𑀕𑁄

𑁧. 𑀲𑀻𑀳𑀦𑀸𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁧. 𑀢𑀢𑀺𑀬𑀲𑁆𑀲 𑀧𑀞𑀫𑁂 𑀯𑀺𑀲𑀫𑀕𑀢𑁂𑀢𑀺 𑀯𑀺𑀲𑀫𑀝𑁆𑀞𑀸𑀦𑁂𑀲𑀼 𑀕𑁄𑀘𑀭𑁂𑀲𑀼 𑀕𑀢𑁂. 𑀲𑀗𑁆𑀖𑀸𑀢𑀁 𑀆𑀧𑀸𑀤𑁂𑀲𑀺𑀦𑁆𑀢𑀺 𑀖𑀸𑀢𑀁 𑀯𑀥𑀁 𑀧𑀸𑀧𑁂𑀲𑀺𑀁. 𑀢𑀲𑁆𑀲 𑀳𑀺 𑀉𑀲𑁆𑀲𑀦𑁆𑀦𑀢𑁂𑀚𑀢𑀸𑀬 𑀔𑀼𑀤𑁆𑀤𑀓𑁂𑀲𑀼 𑀧𑀸𑀡𑁂𑀲𑀼 𑀅𑀦𑀼𑀓𑀫𑁆𑀧𑀸 𑀳𑁄𑀢𑀺. 𑀢𑀲𑁆𑀫𑀸 𑀬𑁂 𑀧𑀝𑀺𑀲𑀢𑁆𑀢𑀼𑀪𑀸𑀯𑁂𑀦 𑀲𑀡𑁆𑀞𑀸𑀢𑀼𑀁 𑀲𑀓𑁆𑀔𑀺𑀲𑁆𑀲𑀦𑁆𑀢𑀺, 𑀬𑁂 𑀤𑀼𑀩𑁆𑀩𑀮𑀸 𑀧𑀮𑀸𑀬𑀺𑀢𑀼𑀓𑀸𑀫𑀸 𑀪𑀯𑀺𑀲𑁆𑀲𑀦𑁆𑀢𑀺, 𑀢𑁂 𑀧𑀮𑀸𑀬𑀺𑀲𑁆𑀲𑀦𑁆𑀢𑀻𑀢𑀺 𑀲𑀻𑀳𑀦𑀸𑀤𑀁 𑀦𑀤𑀺𑀢𑁆𑀯𑀸𑀯 𑀕𑁄𑀘𑀭𑀸𑀬 𑀧𑀓𑁆𑀓𑀫𑀢𑀺. 𑀢𑀣𑀸𑀕𑀢𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀦𑁆𑀢𑀺 𑀬𑀤𑀺 𑀳𑀺 𑀲𑀳𑀦𑀢𑀸𑀬 𑀳𑀦𑀦𑀢𑀸𑀬 𑀘 𑀲𑀻𑀳𑁄, 𑀢𑀣𑀸𑀕𑀢𑁄 𑀳𑀺 𑀲𑀩𑁆𑀩𑀸𑀦𑀺 𑀘 𑀇𑀝𑁆𑀞𑀸𑀦𑀺𑀝𑁆𑀞𑀸𑀦𑀺 𑀲𑀳𑀢𑀺, 𑀲𑀩𑁆𑀩𑀧𑀭𑀧𑁆𑀧𑀯𑀸𑀤𑀺𑀦𑁄 𑀘 𑀯𑀸𑀤𑀸𑀦𑀁 𑀦𑀺𑀫𑁆𑀫𑀣𑀦𑁂𑀦 𑀳𑀦𑀢𑀺. 𑀇𑀤𑀫𑀲𑁆𑀲 𑀳𑁄𑀢𑀺 𑀲𑀻𑀳𑀦𑀸𑀤𑀲𑁆𑀫𑀺𑀦𑁆𑀢𑀺 𑀅𑀬𑀫𑀲𑁆𑀲 𑀲𑀻𑀳𑀦𑀸𑀤𑁄.

𑀢𑀣𑀸𑀕𑀢𑀩𑀮𑀸𑀦𑀻𑀢𑀺 𑀅𑀜𑁆𑀜𑁂𑀳𑀺 𑀅𑀲𑀸𑀥𑀸𑀭𑀡𑀸𑀦𑀺 𑀢𑀣𑀸𑀕𑀢𑀲𑁆𑀲𑁂𑀯 𑀩𑀮𑀸𑀦𑀺. 𑀬𑀣𑀸 𑀯𑀸 𑀧𑀼𑀩𑁆𑀩𑀩𑀼𑀤𑁆𑀥𑀸𑀦𑀁 𑀩𑀮𑀸𑀦𑀺 𑀧𑀼𑀜𑁆𑀜𑀲𑀫𑁆𑀧𑀢𑁆𑀢𑀺𑀬𑀸 𑀆𑀕𑀢𑀸𑀦𑀺, 𑀢𑀣𑀸 𑀆𑀕𑀢𑀩𑀮𑀸𑀦𑀻𑀢𑀺𑀧𑀺 𑀅𑀢𑁆𑀣𑁄. 𑀢𑀢𑁆𑀣 𑀤𑀼𑀯𑀺𑀥𑀁 𑀢𑀣𑀸𑀕𑀢𑀲𑁆𑀲 𑀩𑀮𑀁 𑀓𑀸𑀬𑀩𑀮𑀁 𑀜𑀸𑀡𑀩𑀮𑀁. 𑀢𑁂𑀲𑀼 𑀓𑀸𑀬𑀩𑀮𑀁 𑀳𑀢𑁆𑀣𑀺𑀓𑀼𑀮𑀸𑀦𑀼𑀲𑀸𑀭𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀧𑁄𑀭𑀸𑀡𑁂𑀳𑀺 𑁋

‘‘𑀓𑀸𑀮𑀸𑀯𑀓𑀜𑁆𑀘 𑀕𑀗𑁆𑀕𑁂𑀬𑁆𑀬𑀁, 𑀧𑀡𑁆𑀟𑀭𑀁 𑀢𑀫𑁆𑀩𑀧𑀺𑀗𑁆𑀕𑀮𑀁;

𑀕𑀦𑁆𑀥𑀫𑀗𑁆𑀕𑀮𑀳𑁂𑀫𑀜𑁆𑀘, 𑀉𑀧𑁄𑀲𑀣𑀙𑀤𑁆𑀤𑀦𑁆𑀢𑀺𑀫𑁂 𑀤𑀲𑀸’’𑀢𑀺.

𑀇𑀫𑀸𑀦𑀺 𑀤𑀲 𑀳𑀢𑁆𑀣𑀺𑀓𑀼𑀮𑀸𑀦𑀺. 𑀢𑀢𑁆𑀣 𑀓𑀸𑀮𑀸𑀯𑀓𑀦𑁆𑀢𑀺 𑀧𑀓𑀢𑀺𑀳𑀢𑁆𑀣𑀺𑀓𑀼𑀮𑀁 𑀤𑀝𑁆𑀞𑀩𑁆𑀩𑀁. 𑀬𑀁 𑀤𑀲𑀦𑁆𑀦𑀁 𑀧𑀼𑀭𑀺𑀲𑀸𑀦𑀁 𑀓𑀸𑀬𑀩𑀮𑀁, 𑀢𑀁 𑀏𑀓𑀲𑁆𑀲 𑀓𑀸𑀮𑀸𑀯𑀓𑀲𑁆𑀲 𑀳𑀢𑁆𑀣𑀺𑀦𑁄. 𑀬𑀁 𑀤𑀲𑀦𑁆𑀦𑀁 𑀓𑀸𑀮𑀸𑀯𑀓𑀸𑀦𑀁 𑀩𑀮𑀁, 𑀢𑀁 𑀏𑀓𑀲𑁆𑀲 𑀕𑀗𑁆𑀕𑁂𑀬𑁆𑀬𑀲𑁆𑀲. 𑀬𑀁 𑀤𑀲𑀦𑁆𑀦𑀁 𑀕𑀗𑁆𑀕𑁂𑀬𑁆𑀬𑀸𑀦𑀁, 𑀢𑀁 𑀏𑀓𑀲𑁆𑀲 𑀧𑀡𑁆𑀟𑀭𑀲𑁆𑀲. 𑀬𑀁 𑀤𑀲𑀦𑁆𑀦𑀁 𑀧𑀡𑁆𑀟𑀭𑀸𑀦𑀁, 𑀢𑀁 𑀏𑀓𑀲𑁆𑀲 𑀢𑀫𑁆𑀩𑀲𑁆𑀲. 𑀬𑀁 𑀤𑀲𑀦𑁆𑀦𑀁 𑀢𑀫𑁆𑀩𑀸𑀦𑀁, 𑀢𑀁 𑀏𑀓𑀲𑁆𑀲 𑀧𑀺𑀗𑁆𑀕𑀮𑀲𑁆𑀲. 𑀬𑀁 𑀤𑀲𑀦𑁆𑀦𑀁 𑀧𑀺𑀗𑁆𑀕𑀮𑀸𑀦𑀁, 𑀢𑀁 𑀏𑀓𑀲𑁆𑀲 𑀕𑀦𑁆𑀥𑀳𑀢𑁆𑀣𑀺𑀦𑁄. 𑀬𑀁 𑀤𑀲𑀦𑁆𑀦𑀁 𑀕𑀦𑁆𑀥𑀳𑀢𑁆𑀣𑀻𑀦𑀁, 𑀢𑀁 𑀏𑀓𑀲𑁆𑀲 𑀫𑀗𑁆𑀕𑀮𑀲𑁆𑀲. 𑀬𑀁 𑀤𑀲𑀦𑁆𑀦𑀁 𑀫𑀗𑁆𑀕𑀮𑀸𑀦𑀁, 𑀢𑀁 𑀏𑀓𑀲𑁆𑀲 𑀳𑁂𑀫𑀲𑁆𑀲. 𑀬𑀁 𑀤𑀲𑀦𑁆𑀦𑀁 𑀳𑁂𑀫𑀸𑀦𑀁, 𑀢𑀁 𑀏𑀓𑀲𑁆𑀲 𑀉𑀧𑁄𑀲𑀣𑀲𑁆𑀲. 𑀬𑀁 𑀤𑀲𑀦𑁆𑀦𑀁 𑀉𑀧𑁄𑀲𑀣𑀸𑀦𑀁, 𑀢𑀁 𑀏𑀓𑀲𑁆𑀲 𑀙𑀤𑁆𑀤𑀦𑁆𑀢𑀲𑁆𑀲. 𑀬𑀁 𑀤𑀲𑀦𑁆𑀦𑀁 𑀙𑀤𑁆𑀤𑀦𑁆𑀢𑀸𑀦𑀁, 𑀢𑀁 𑀏𑀓𑀲𑁆𑀲 𑀢𑀣𑀸𑀕𑀢𑀲𑁆𑀲. 𑀦𑀸𑀭𑀸𑀬𑀦𑀲𑀗𑁆𑀖𑀸𑀢𑀩𑀮𑀦𑁆𑀢𑀺𑀧𑀺 𑀇𑀤𑀫𑁂𑀯 𑀯𑀼𑀘𑁆𑀘𑀢𑀺. 𑀢𑀤𑁂𑀢𑀁 𑀧𑀓𑀢𑀺𑀳𑀢𑁆𑀣𑀺𑀕𑀡𑀦𑀸𑀬 𑀳𑀢𑁆𑀣𑀻𑀦𑀁 𑀓𑁄𑀝𑀺𑀲𑀳𑀲𑁆𑀲𑀸𑀦𑀁, 𑀧𑀼𑀭𑀺𑀲𑀕𑀡𑀦𑀸𑀬 𑀤𑀲𑀦𑁆𑀦𑀁 𑀧𑀼𑀭𑀺𑀲𑀓𑁄𑀝𑀺𑀲𑀳𑀲𑁆𑀲𑀸𑀦𑀁 𑀩𑀮𑀁 𑀳𑁄𑀢𑀺. 𑀇𑀤𑀁 𑀢𑀸𑀯 𑀢𑀣𑀸𑀕𑀢𑀲𑁆𑀲 𑀓𑀸𑀬𑀩𑀮𑀁.

𑀜𑀸𑀡𑀩𑀮𑀁 𑀧𑀦 𑀧𑀸𑀴𑀺𑀬𑀁 𑀢𑀸𑀯 𑀆𑀕𑀢𑀫𑁂𑀯. 𑀤𑀲𑀩𑀮𑀜𑀸𑀡𑀁, 𑀫𑀚𑁆𑀛𑀺𑀫𑁂 𑀆𑀕𑀢𑀁 𑀘𑀢𑀼𑀯𑁂𑀲𑀸𑀭𑀚𑁆𑀚𑀜𑀸𑀡𑀁, 𑀅𑀝𑁆𑀞𑀲𑀼 𑀧𑀭𑀺𑀲𑀸𑀲𑀼 𑀅𑀓𑀫𑁆𑀧𑀦𑀜𑀸𑀡𑀁, 𑀘𑀢𑀼𑀬𑁄𑀦𑀺𑀧𑀭𑀺𑀘𑁆𑀙𑁂𑀤𑀜𑀸𑀡𑀁, 𑀧𑀜𑁆𑀘𑀕𑀢𑀺𑀧𑀭𑀺𑀘𑁆𑀙𑁂𑀤𑀜𑀸𑀡𑀁, 𑀲𑀁𑀬𑀼𑀢𑁆𑀢𑀓𑁂 (𑀲𑀁. 𑀦𑀺. 𑁨.𑁩𑁩) 𑀆𑀕𑀢𑀸𑀦𑀺 𑀢𑁂𑀲𑀢𑁆𑀢𑀢𑀺 𑀜𑀸𑀡𑀸𑀦𑀺 𑀲𑀢𑁆𑀢𑀲𑀢𑁆𑀢𑀢𑀺 𑀜𑀸𑀡𑀸𑀦𑀻𑀢𑀺, 𑀏𑀯𑀁 𑀅𑀜𑁆𑀜𑀸𑀦𑀺𑀧𑀺 𑀅𑀦𑁂𑀓𑀸𑀦𑀺 𑀜𑀸𑀡𑀩𑀮𑀁 𑀦𑀸𑀫. 𑀇𑀥𑀸𑀧𑀺 𑀜𑀸𑀡𑀩𑀮𑀫𑁂𑀯 𑀅𑀥𑀺𑀧𑁆𑀧𑁂𑀢𑀁. 𑀜𑀸𑀡𑀜𑁆𑀳𑀺 𑀅𑀓𑀫𑁆𑀧𑀺𑀬𑀝𑁆𑀞𑁂𑀦 𑀉𑀧𑀢𑁆𑀣𑀫𑁆𑀪𑀦𑀝𑁆𑀞𑁂𑀦 𑀘 𑀩𑀮𑀦𑁆𑀢𑀺 𑀯𑀼𑀢𑁆𑀢𑀁.

𑀆𑀲𑀪𑀁 𑀞𑀸𑀦𑀦𑁆𑀢𑀺 𑀲𑁂𑀝𑁆𑀞𑀝𑁆𑀞𑀸𑀦𑀁 𑀉𑀢𑁆𑀢𑀫𑀝𑁆𑀞𑀸𑀦𑀁. 𑀆𑀲𑀪𑀸 𑀯𑀸 𑀧𑀼𑀩𑁆𑀩𑀩𑀼𑀤𑁆𑀥𑀸, 𑀢𑁂𑀲𑀁 𑀞𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀅𑀧𑀺𑀘 𑀕𑀯𑀲𑀢𑀚𑁂𑀝𑁆𑀞𑀓𑁄 𑀉𑀲𑀪𑁄, 𑀕𑀯𑀲𑀳𑀲𑁆𑀲𑀚𑁂𑀝𑁆𑀞𑀓𑁄 𑀯𑀲𑀪𑁄. 𑀯𑀚𑀲𑀢𑀚𑁂𑀝𑁆𑀞𑀓𑁄 𑀯𑀸 𑀉𑀲𑀪𑁄, 𑀯𑀚𑀲𑀳𑀲𑁆𑀲𑀚𑁂𑀝𑁆𑀞𑀓𑁄 𑀯𑀲𑀪𑁄. 𑀲𑀩𑁆𑀩𑀕𑀯𑀲𑁂𑀝𑁆𑀞𑁄 𑀲𑀩𑁆𑀩𑀧𑀭𑀺𑀲𑁆𑀲𑀬𑀲𑀳𑁄 𑀲𑁂𑀢𑁄 𑀧𑀸𑀲𑀸𑀤𑀺𑀓𑁄 𑀫𑀳𑀸𑀪𑀸𑀭𑀯𑀳𑁄 𑀅𑀲𑀦𑀺𑀲𑀢𑀲𑀤𑁆𑀤𑁂𑀳𑀺𑀧𑀺 𑀅𑀲𑀫𑁆𑀧𑀓𑀫𑁆𑀧𑀺𑀬𑁄 𑀦𑀺𑀲𑀪𑁄, 𑀲𑁄 𑀇𑀥 𑀉𑀲𑀪𑁄𑀢𑀺 𑀅𑀥𑀺𑀧𑁆𑀧𑁂𑀢𑁄. 𑀇𑀤𑀫𑁆𑀧𑀺 𑀳𑀺 𑀢𑀲𑁆𑀲 𑀧𑀭𑀺𑀬𑀸𑀬𑀯𑀘𑀦𑀁. 𑀉𑀲𑀪𑀲𑁆𑀲 𑀇𑀤𑀦𑁆𑀢𑀺 𑀆𑀲𑀪𑀁. 𑀞𑀸𑀦𑀦𑁆𑀢𑀺 𑀘𑀢𑀽𑀳𑀺 𑀧𑀸𑀤𑁂𑀳𑀺 𑀧𑀣𑀯𑀺𑀁 𑀉𑀧𑁆𑀧𑀻𑀴𑁂𑀢𑁆𑀯𑀸 𑀅𑀘𑀮𑀝𑁆𑀞𑀸𑀦𑀁. 𑀇𑀤𑀁 𑀧𑀦 𑀆𑀲𑀪𑀁 𑀯𑀺𑀬𑀸𑀢𑀺 𑀆𑀲𑀪𑀁. 𑀬𑀣𑁂𑀯 𑀳𑀺 𑀦𑀺𑀲𑀪𑀲𑀗𑁆𑀔𑀸𑀢𑁄 𑀉𑀲𑀪𑁄 𑀉𑀲𑀪𑀩𑀮𑁂𑀦 𑀲𑀫𑀦𑁆𑀦𑀸𑀕𑀢𑁄 𑀘𑀢𑀽𑀳𑀺 𑀧𑀸𑀤𑁂𑀳𑀺 𑀧𑀣𑀯𑀺𑀁 𑀉𑀧𑁆𑀧𑀻𑀴𑁂𑀢𑁆𑀯𑀸 𑀅𑀘𑀮𑀝𑁆𑀞𑀸𑀦𑁂𑀦 𑀢𑀺𑀝𑁆𑀞𑀢𑀺, 𑀏𑀯𑀁 𑀢𑀣𑀸𑀕𑀢𑁄𑀧𑀺 𑀤𑀲𑀳𑀺 𑀢𑀣𑀸𑀕𑀢𑀩𑀮𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀘𑀢𑀽𑀳𑀺 𑀯𑁂𑀲𑀸𑀭𑀚𑁆𑀚𑀧𑀸𑀤𑁂𑀳𑀺 𑀅𑀝𑁆𑀞𑀧𑀭𑀺𑀲𑀧𑀣𑀯𑀺𑀁 𑀉𑀧𑁆𑀧𑀻𑀴𑁂𑀢𑁆𑀯𑀸 𑀲𑀤𑁂𑀯𑀓𑁂 𑀮𑁄𑀓𑁂 𑀓𑁂𑀦𑀘𑀺 𑀧𑀘𑁆𑀘𑀢𑁆𑀣𑀺𑀓𑁂𑀦 𑀧𑀘𑁆𑀘𑀸𑀫𑀺𑀢𑁆𑀢𑁂𑀦 𑀅𑀓𑀫𑁆𑀧𑀺𑀬𑁄 𑀅𑀘𑀮𑀝𑁆𑀞𑀸𑀦𑁂𑀦 𑀢𑀺𑀝𑁆𑀞𑀢𑀺. 𑀏𑀯𑀁 𑀢𑀺𑀝𑁆𑀞𑀫𑀸𑀦𑁄 𑀘 𑀢𑀁 𑀆𑀲𑀪𑀁 𑀞𑀸𑀦𑀁 𑀧𑀝𑀺𑀚𑀸𑀦𑀸𑀢𑀺 𑀉𑀧𑀕𑀘𑁆𑀙𑀢𑀺 𑀦 𑀧𑀘𑁆𑀘𑀓𑁆𑀔𑀸𑀢𑀺 𑀅𑀢𑁆𑀢𑀦𑀺 𑀆𑀭𑁄𑀧𑁂𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀆𑀲𑀪𑀁 𑀞𑀸𑀦𑀁 𑀧𑀝𑀺𑀚𑀸𑀦𑀸𑀢𑀻’’𑀢𑀺.

𑀧𑀭𑀺𑀲𑀸𑀲𑀽𑀢𑀺 𑀅𑀝𑁆𑀞𑀲𑀼 𑀧𑀭𑀺𑀲𑀸𑀲𑀼. 𑀲𑀻𑀳𑀦𑀸𑀤𑀁 𑀦𑀤𑀢𑀻𑀢𑀺 𑀲𑁂𑀝𑁆𑀞𑀦𑀸𑀤𑀁 𑀦𑀤𑀢𑀺, 𑀅𑀪𑀻𑀢𑀦𑀸𑀤𑀁 𑀦𑀤𑀢𑀺, 𑀲𑀻𑀳𑀦𑀸𑀤𑀲𑀤𑀺𑀲𑀁 𑀯𑀸 𑀦𑀸𑀤𑀁 𑀦𑀤𑀢𑀺. 𑀢𑀢𑁆𑀭𑀸𑀬𑀁 𑀉𑀧𑀫𑀸 𑁋 𑀬𑀣𑀸 𑀲𑀻𑀳𑁄 𑀲𑀻𑀳𑀩𑀮𑁂𑀦 𑀲𑀫𑀦𑁆𑀦𑀸𑀕𑀢𑁄 𑀲𑀩𑁆𑀩𑀢𑁆𑀣 𑀯𑀺𑀲𑀸𑀭𑀤𑁄 𑀯𑀺𑀕𑀢𑀮𑁄𑀫𑀳𑀁𑀲𑁄 𑀲𑀻𑀳𑀦𑀸𑀤𑀁 𑀦𑀤𑀢𑀺, 𑀏𑀯𑀁 𑀢𑀣𑀸𑀕𑀢𑀲𑀻𑀳𑁄𑀧𑀺 𑀢𑀣𑀸𑀕𑀢𑀩𑀮𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀅𑀝𑁆𑀞𑀲𑀼 𑀧𑀭𑀺𑀲𑀸𑀲𑀼 𑀯𑀺𑀲𑀸𑀭𑀤𑁄 𑀯𑀺𑀕𑀢𑀮𑁄𑀫𑀳𑀁𑀲𑁄 ‘‘𑀇𑀢𑀺 𑀲𑀓𑁆𑀓𑀸𑀬𑁄’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀦𑀸𑀦𑀸𑀯𑀺𑀥𑀤𑁂𑀲𑀦𑀸𑀯𑀺𑀮𑀸𑀲𑀲𑀫𑁆𑀧𑀦𑁆𑀦𑀁 𑀲𑀻𑀳𑀦𑀸𑀤𑀁 𑀦𑀤𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀧𑀭𑀺𑀲𑀸𑀲𑀼 𑀲𑀻𑀳𑀦𑀸𑀤𑀁 𑀦𑀤𑀢𑀻’’𑀢𑀺.

𑀩𑁆𑀭𑀳𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁂𑀢𑀻𑀢𑀺 𑀏𑀢𑁆𑀣 𑀩𑁆𑀭𑀳𑁆𑀫𑀦𑁆𑀢𑀺 𑀲𑁂𑀝𑁆𑀞𑀁 𑀉𑀢𑁆𑀢𑀫𑀁 𑀯𑀺𑀲𑀺𑀝𑁆𑀞𑀁. 𑀘𑀓𑁆𑀓𑀦𑁆𑀢𑀺 𑀥𑀫𑁆𑀫𑀘𑀓𑁆𑀓𑀁. 𑀢𑀁 𑀧𑀦𑁂𑀢𑀁 𑀤𑀼𑀯𑀺𑀥𑀁 𑀳𑁄𑀢𑀺 𑀧𑀝𑀺𑀯𑁂𑀥𑀜𑀸𑀡𑀜𑁆𑀘𑁂𑀯 𑀤𑁂𑀲𑀦𑀸𑀜𑀸𑀡𑀜𑁆𑀘. 𑀢𑀢𑁆𑀣 𑀧𑀜𑁆𑀜𑀸𑀧𑀪𑀸𑀯𑀺𑀢𑀁 𑀅𑀢𑁆𑀢𑀦𑁄 𑀅𑀭𑀺𑀬𑀨𑀮𑀸𑀯𑀳𑀁 𑀧𑀝𑀺𑀯𑁂𑀥𑀜𑀸𑀡𑀁, 𑀓𑀭𑀼𑀡𑀸𑀧𑀪𑀸𑀯𑀺𑀢𑀁 𑀲𑀸𑀯𑀓𑀸𑀦𑀁 𑀅𑀭𑀺𑀬𑀨𑀮𑀸𑀯𑀳𑀁 𑀤𑁂𑀲𑀦𑀸𑀜𑀸𑀡𑀁. 𑀢𑀢𑁆𑀣 𑀧𑀝𑀺𑀯𑁂𑀥𑀜𑀸𑀡𑀁 𑀉𑀧𑁆𑀧𑀚𑁆𑀚𑀫𑀸𑀦𑀁 𑀉𑀧𑁆𑀧𑀦𑁆𑀦𑀦𑁆𑀢𑀺 𑀤𑀼𑀯𑀺𑀥𑀁. 𑀢𑀜𑁆𑀳𑀺 𑀅𑀪𑀺𑀦𑀺𑀓𑁆𑀔𑀫𑀦𑀢𑁄 𑀬𑀸𑀯 𑀅𑀭𑀳𑀢𑁆𑀢𑀫𑀕𑁆𑀕𑀸 𑀉𑀧𑁆𑀧𑀚𑁆𑀚𑀫𑀸𑀦𑀁, 𑀨𑀮𑀓𑁆𑀔𑀡𑁂 𑀉𑀧𑁆𑀧𑀦𑁆𑀦𑀁 𑀦𑀸𑀫. 𑀢𑀼𑀲𑀺𑀢𑀪𑀯𑀦𑀢𑁄 𑀯𑀸 𑀬𑀸𑀯 𑀫𑀳𑀸𑀩𑁄𑀥𑀺𑀧𑀮𑁆𑀮𑀗𑁆𑀓𑁂 𑀅𑀭𑀳𑀢𑁆𑀢𑀫𑀕𑁆𑀕𑀸 𑀉𑀧𑁆𑀧𑀚𑁆𑀚𑀫𑀸𑀦𑀁, 𑀨𑀮𑀓𑁆𑀔𑀡𑁂 𑀉𑀧𑁆𑀧𑀦𑁆𑀦𑀁 𑀦𑀸𑀫. 𑀤𑀻𑀧𑀗𑁆𑀓𑀭𑀢𑁄 𑀯𑀸 𑀧𑀝𑁆𑀞𑀸𑀬 𑀬𑀸𑀯 𑀅𑀭𑀳𑀢𑁆𑀢𑀫𑀕𑁆𑀕𑀸 𑀉𑀧𑁆𑀧𑀚𑁆𑀚𑀫𑀸𑀦𑀁, 𑀨𑀮𑀓𑁆𑀔𑀡𑁂 𑀉𑀧𑁆𑀧𑀦𑁆𑀦𑀁 𑀦𑀸𑀫. 𑀤𑁂𑀲𑀦𑀸𑀜𑀸𑀡𑀫𑁆𑀧𑀺 𑀧𑀯𑀢𑁆𑀢𑀫𑀸𑀦𑀁 𑀧𑀯𑀢𑁆𑀢𑀦𑁆𑀢𑀺 𑀤𑀼𑀯𑀺𑀥𑀁. 𑀢𑀜𑁆𑀳𑀺 𑀬𑀸𑀯 𑀅𑀜𑁆𑀜𑀸𑀲𑀺𑀓𑁄𑀡𑁆𑀟𑀜𑁆𑀜𑀲𑁆𑀲 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀸 𑀧𑀯𑀢𑁆𑀢𑀫𑀸𑀦𑀁, 𑀨𑀮𑀓𑁆𑀔𑀡𑁂 𑀧𑀯𑀢𑁆𑀢𑀁 𑀦𑀸𑀫. 𑀢𑁂𑀲𑀼 𑀧𑀝𑀺𑀯𑁂𑀥𑀜𑀸𑀡𑀁 𑀮𑁄𑀓𑀼𑀢𑁆𑀢𑀭𑀁, 𑀤𑁂𑀲𑀦𑀸𑀜𑀸𑀡𑀁 𑀮𑁄𑀓𑀺𑀬𑀁. 𑀉𑀪𑀬𑀫𑁆𑀧𑀺 𑀧𑀦𑁂𑀢𑀁 𑀅𑀜𑁆𑀜𑁂𑀳𑀺 𑀅𑀲𑀸𑀥𑀸𑀭𑀡𑀁, 𑀩𑀼𑀤𑁆𑀥𑀸𑀦𑀁𑀬𑁂𑀯 𑀑𑀭𑀲𑀜𑀸𑀡𑀁.

𑀇𑀤𑀸𑀦𑀺 𑀬𑁂𑀳𑀺 𑀤𑀲𑀳𑀺 𑀩𑀮𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀢𑀣𑀸𑀕𑀢𑁄 𑀆𑀲𑀪𑀁 𑀞𑀸𑀦𑀁 𑀧𑀝𑀺𑀚𑀸𑀦𑀸𑀢𑀺, 𑀢𑀸𑀦𑀺 𑀯𑀺𑀢𑁆𑀣𑀸𑀭𑀢𑁄 𑀤𑀲𑁆𑀲𑁂𑀢𑀼𑀁 𑀓𑀢𑀫𑀸𑀦𑀺 𑀤𑀲? 𑀇𑀥, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄 𑀞𑀸𑀦𑀜𑁆𑀘 𑀞𑀸𑀦𑀢𑁄𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀞𑀸𑀦𑀜𑁆𑀘 𑀞𑀸𑀦𑀢𑁄𑀢𑀺 𑀓𑀸𑀭𑀡𑀜𑁆𑀘 𑀓𑀸𑀭𑀡𑀢𑁄. 𑀓𑀸𑀭𑀡𑀜𑁆𑀳𑀺 𑀬𑀲𑁆𑀫𑀸 𑀢𑀢𑁆𑀣 𑀨𑀮𑀁 𑀢𑀺𑀝𑁆𑀞𑀢𑀺, 𑀢𑀤𑀸𑀬𑀢𑁆𑀢𑀯𑀼𑀢𑁆𑀢𑀺𑀢𑀸𑀬 𑀉𑀧𑁆𑀧𑀚𑁆𑀚𑀢𑀺 𑀘𑁂𑀯 𑀧𑀯𑀢𑁆𑀢𑀢𑀺 𑀘, 𑀢𑀲𑁆𑀫𑀸 𑀞𑀸𑀦𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑀁 𑀪𑀕𑀯𑀸 ‘‘𑀬𑁂 𑀬𑁂 𑀥𑀫𑁆𑀫𑀸 𑀬𑁂𑀲𑀁 𑀬𑁂𑀲𑀁 𑀥𑀫𑁆𑀫𑀸𑀦𑀁 𑀳𑁂𑀢𑀽 𑀧𑀘𑁆𑀘𑀬𑀸 𑀉𑀧𑁆𑀧𑀸𑀤𑀸𑀬, 𑀢𑀁 𑀢𑀁 𑀞𑀸𑀦𑀁. 𑀬𑁂 𑀬𑁂 𑀥𑀫𑁆𑀫𑀸 𑀬𑁂𑀲𑀁 𑀬𑁂𑀲𑀁 𑀥𑀫𑁆𑀫𑀸𑀦𑀁 𑀦 𑀳𑁂𑀢𑀽 𑀦 𑀧𑀘𑁆𑀘𑀬𑀸 𑀉𑀧𑁆𑀧𑀸𑀤𑀸𑀬, 𑀢𑀁 𑀢𑀁 𑀅𑀝𑁆𑀞𑀸𑀦’’𑀦𑁆𑀢𑀺 𑀧𑀚𑀸𑀦𑀦𑁆𑀢𑁄 𑀞𑀸𑀦𑀜𑁆𑀘 𑀞𑀸𑀦𑀢𑁄 𑀅𑀝𑁆𑀞𑀸𑀦𑀜𑁆𑀘 𑀅𑀝𑁆𑀞𑀸𑀦𑀢𑁄 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺. 𑀅𑀪𑀺𑀥𑀫𑁆𑀫𑁂 𑀧𑀦𑁂𑀢𑀁 ‘‘𑀢𑀢𑁆𑀣 𑀓𑀢𑀫𑀁 𑀢𑀣𑀸𑀕𑀢𑀲𑁆𑀲 𑀞𑀸𑀦𑀜𑁆𑀘 𑀞𑀸𑀦𑀢𑁄 𑀅𑀝𑁆𑀞𑀸𑀦𑀜𑁆𑀘 𑀅𑀝𑁆𑀞𑀸𑀦𑀢𑁄 𑀬𑀣𑀸𑀪𑀽𑀢𑀁 𑀜𑀸𑀡’’𑀦𑁆𑀢𑀺𑀆𑀤𑀺𑀦𑀸 (𑀯𑀺𑀪. 𑁮𑁦𑁯) 𑀦𑀬𑁂𑀦 𑀯𑀺𑀢𑁆𑀣𑀸𑀭𑀺𑀢𑀫𑁂𑀯. 𑀬𑀫𑁆𑀧𑀻𑀢𑀺 𑀬𑁂𑀦 𑀜𑀸𑀡𑁂𑀦. 𑀇𑀤𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑀲𑁆𑀲𑀸𑀢𑀺 𑀇𑀤𑀫𑁆𑀧𑀺 𑀞𑀸𑀦𑀸𑀝𑁆𑀞𑀸𑀦𑀜𑀸𑀡𑀁 𑀢𑀣𑀸𑀕𑀢𑀲𑁆𑀲 𑀢𑀣𑀸𑀕𑀢𑀩𑀮𑀁 𑀦𑀸𑀫 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀏𑀯𑀁 𑀲𑀩𑁆𑀩𑀧𑀤𑁂𑀲𑀼 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸.

𑀓𑀫𑁆𑀫𑀲𑀫𑀸𑀤𑀸𑀦𑀸𑀦𑀦𑁆𑀢𑀺 𑀲𑀫𑀸𑀤𑀺𑀬𑀺𑀢𑁆𑀯𑀸 𑀓𑀢𑀸𑀦𑀁 𑀓𑀼𑀲𑀮𑀸𑀓𑀼𑀲𑀮𑀓𑀫𑁆𑀫𑀸𑀦𑀁, 𑀓𑀫𑁆𑀫𑀫𑁂𑀯 𑀯𑀸 𑀓𑀫𑁆𑀫𑀲𑀫𑀸𑀤𑀸𑀦𑀁. 𑀞𑀸𑀦𑀲𑁄 𑀳𑁂𑀢𑀼𑀲𑁄𑀢𑀺 𑀧𑀘𑁆𑀘𑀬𑀢𑁄 𑀘𑁂𑀯 𑀳𑁂𑀢𑀼𑀢𑁄 𑀘. 𑀢𑀢𑁆𑀣 𑀕𑀢𑀺𑀉𑀧𑀥𑀺𑀓𑀸𑀮𑀧𑀬𑁄𑀕𑀸 𑀯𑀺𑀧𑀸𑀓𑀲𑁆𑀲 𑀞𑀸𑀦𑀁, 𑀓𑀫𑁆𑀫𑀁 𑀳𑁂𑀢𑀼. 𑀇𑀫𑀲𑁆𑀲 𑀧𑀦 𑀜𑀸𑀡𑀲𑁆𑀲 𑀯𑀺𑀢𑁆𑀣𑀸𑀭𑀓𑀣𑀸 ‘‘𑀅𑀢𑁆𑀣𑁂𑀓𑀘𑁆𑀘𑀸𑀦𑀺 𑀧𑀸𑀧𑀓𑀸𑀦𑀺 𑀓𑀫𑁆𑀫𑀲𑀫𑀸𑀤𑀸𑀦𑀸𑀦𑀺 𑀕𑀢𑀺𑀲𑀫𑁆𑀧𑀢𑁆𑀢𑀺𑀧𑀝𑀺𑀩𑀸𑀴𑁆𑀳𑀸𑀦𑀺 𑀦 𑀯𑀺𑀧𑀘𑁆𑀘𑀦𑁆𑀢𑀻’’𑀢𑀺𑀆𑀤𑀺𑀦𑀸 (𑀯𑀺𑀪. 𑁮𑁧𑁦) 𑀦𑀬𑁂𑀦 𑀅𑀪𑀺𑀥𑀫𑁆𑀫𑁂 𑀆𑀕𑀢𑀸𑀬𑁂𑀯.

𑀲𑀩𑁆𑀩𑀢𑁆𑀣𑀕𑀸𑀫𑀺𑀦𑀺𑀦𑁆𑀢𑀺 𑀲𑀩𑁆𑀩𑀕𑀢𑀺𑀕𑀸𑀫𑀺𑀦𑀺𑀜𑁆𑀘 𑀅𑀕𑀢𑀺𑀕𑀸𑀫𑀺𑀦𑀺𑀜𑁆𑀘. 𑀧𑀝𑀺𑀧𑀤𑀦𑁆𑀢𑀺 𑀫𑀕𑁆𑀕𑀁. 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀻𑀢𑀺 𑀩𑀳𑀽𑀲𑀼𑀧𑀺 𑀫𑀦𑀼𑀲𑁆𑀲𑁂𑀲𑀼 𑀏𑀓𑀫𑁂𑀯 𑀧𑀸𑀡𑀁 𑀖𑀸𑀢𑁂𑀦𑁆𑀢𑁂𑀲𑀼 ‘‘𑀇𑀫𑀲𑁆𑀲 𑀘𑁂𑀢𑀦𑀸 𑀦𑀺𑀭𑀬𑀕𑀸𑀫𑀺𑀦𑀻 𑀪𑀯𑀺𑀲𑁆𑀲𑀢𑀺, 𑀇𑀫𑀲𑁆𑀲 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀕𑀸𑀫𑀺𑀦𑀻’’𑀢𑀺 𑀇𑀫𑀺𑀦𑀸 𑀦𑀬𑁂𑀦 𑀏𑀓𑀯𑀢𑁆𑀣𑀼𑀲𑁆𑀫𑀺𑀫𑁆𑀧𑀺 𑀓𑀼𑀲𑀮𑀸𑀓𑀼𑀲𑀮𑀘𑁂𑀢𑀦𑀸𑀲𑀗𑁆𑀔𑀸𑀢𑀸𑀦𑀁 𑀧𑀝𑀺𑀧𑀢𑁆𑀢𑀻𑀦𑀁 𑀅𑀯𑀺𑀧𑀭𑀻𑀢𑀢𑁄 𑀲𑀪𑀸𑀯𑀁 𑀚𑀸𑀦𑀸𑀢𑀺. 𑀇𑀫𑀲𑁆𑀲𑀧𑀺 𑀘 𑀜𑀸𑀡𑀲𑁆𑀲 𑀯𑀺𑀢𑁆𑀣𑀸𑀭𑀓𑀣𑀸 ‘‘𑀢𑀢𑁆𑀣 𑀓𑀢𑀫𑀁 𑀢𑀣𑀸𑀕𑀢𑀲𑁆𑀲 𑀲𑀩𑁆𑀩𑀢𑁆𑀣𑀕𑀸𑀫𑀺𑀦𑀺𑀁 𑀧𑀝𑀺𑀧𑀤𑀁 𑀬𑀣𑀸𑀪𑀽𑀢𑀁 𑀜𑀸𑀡𑀁? 𑀇𑀥 𑀢𑀣𑀸𑀕𑀢𑁄 𑀅𑀬𑀁 𑀫𑀕𑁆𑀕𑁄 𑀅𑀬𑀁 𑀧𑀝𑀺𑀧𑀤𑀸 𑀦𑀺𑀭𑀬𑀕𑀸𑀫𑀺𑀦𑀻𑀢𑀺 𑀧𑀚𑀸𑀦𑀸𑀢𑀻’’𑀢𑀺𑀆𑀤𑀺𑀦𑀸 (𑀯𑀺𑀪. 𑁮𑁧𑁧) 𑀦𑀬𑁂𑀦 𑀅𑀪𑀺𑀥𑀫𑁆𑀫𑁂 𑀆𑀕𑀢𑀸𑀬𑁂𑀯.

𑀅𑀦𑁂𑀓𑀥𑀸𑀢𑀼𑀦𑁆𑀢𑀺 𑀘𑀓𑁆𑀔𑀼𑀥𑀸𑀢𑀼𑀆𑀤𑀻𑀳𑀺 𑀓𑀸𑀫𑀥𑀸𑀢𑀼𑀆𑀤𑀻𑀳𑀺 𑀯𑀸 𑀥𑀸𑀢𑀽𑀳𑀺 𑀩𑀳𑀼𑀥𑀸𑀢𑀼𑀁. 𑀦𑀸𑀦𑀸𑀥𑀸𑀢𑀼𑀦𑁆𑀢𑀺 𑀢𑀸𑀲𑀁𑀬𑁂𑀯 𑀥𑀸𑀢𑀽𑀦𑀁 𑀯𑀺𑀮𑀓𑁆𑀔𑀡𑀢𑀸𑀬 𑀦𑀸𑀦𑀧𑁆𑀧𑀓𑀸𑀭𑀥𑀸𑀢𑀼𑀁. 𑀮𑁄𑀓𑀦𑁆𑀢𑀺 𑀔𑀦𑁆𑀥𑀸𑀬𑀢𑀦𑀥𑀸𑀢𑀼𑀮𑁄𑀓𑀁. 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀻𑀢𑀺 𑀢𑀸𑀲𑀁 𑀥𑀸𑀢𑀽𑀦𑀁 𑀅𑀯𑀺𑀧𑀭𑀻𑀢𑀢𑁄 𑀲𑀪𑀸𑀯𑀁 𑀧𑀝𑀺𑀯𑀺𑀚𑁆𑀛𑀢𑀺. 𑀇𑀤𑀫𑁆𑀧𑀺 𑀜𑀸𑀡𑀁 ‘‘𑀢𑀢𑁆𑀣 𑀓𑀢𑀫𑀁 𑀢𑀣𑀸𑀕𑀢𑀲𑁆𑀲 𑀅𑀦𑁂𑀓𑀥𑀸𑀢𑀼𑀦𑀸𑀦𑀸𑀥𑀸𑀢𑀼𑀮𑁄𑀓𑀁 𑀬𑀣𑀸𑀪𑀽𑀢𑀁 𑀜𑀸𑀡𑀁? 𑀇𑀥 𑀢𑀣𑀸𑀕𑀢𑁄 𑀔𑀦𑁆𑀥𑀦𑀸𑀦𑀢𑁆𑀢𑀁 𑀧𑀚𑀸𑀦𑀸𑀢𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀅𑀪𑀺𑀥𑀫𑁆𑀫𑁂 𑀯𑀺𑀢𑁆𑀣𑀸𑀭𑀺𑀢𑀫𑁂𑀯.

𑀦𑀸𑀦𑀸𑀥𑀺𑀫𑀼𑀢𑁆𑀢𑀺𑀓𑀢𑀦𑁆𑀢𑀺 𑀳𑀻𑀦𑀸𑀤𑀻𑀳𑀺 𑀅𑀥𑀺𑀫𑀼𑀢𑁆𑀢𑀻𑀳𑀺 𑀦𑀸𑀦𑀸𑀥𑀺𑀫𑀼𑀢𑁆𑀢𑀺𑀓𑀪𑀸𑀯𑀁. 𑀇𑀤𑀫𑁆𑀧𑀺 𑀜𑀸𑀡𑀁 ‘‘𑀢𑀢𑁆𑀣 𑀓𑀢𑀫𑀁 𑀢𑀣𑀸𑀕𑀢𑀲𑁆𑀲 𑀲𑀢𑁆𑀢𑀸𑀦𑀁 𑀦𑀸𑀦𑀸𑀥𑀺𑀫𑀼𑀢𑁆𑀢𑀺𑀓𑀢𑀁 𑀬𑀣𑀸𑀪𑀽𑀢𑀁 𑀜𑀸𑀡𑀁? 𑀇𑀥 𑀢𑀣𑀸𑀕𑀢𑁄 𑀧𑀚𑀸𑀦𑀸𑀢𑀺 𑀲𑀦𑁆𑀢𑀺 𑀲𑀢𑁆𑀢𑀸 𑀳𑀻𑀦𑀸𑀥𑀺𑀫𑀼𑀢𑁆𑀢𑀺𑀓𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀅𑀪𑀺𑀥𑀫𑁆𑀫𑁂 𑀯𑀺𑀢𑁆𑀣𑀸𑀭𑀺𑀢𑀫𑁂𑀯.

𑀧𑀭𑀲𑀢𑁆𑀢𑀸𑀦𑀦𑁆𑀢𑀺 𑀧𑀥𑀸𑀦𑀲𑀢𑁆𑀢𑀸𑀦𑀁. 𑀧𑀭𑀧𑀼𑀕𑁆𑀕𑀮𑀸𑀦𑀦𑁆𑀢𑀺 𑀢𑀢𑁄 𑀅𑀜𑁆𑀜𑁂𑀲𑀁 𑀳𑀻𑀦𑀲𑀢𑁆𑀢𑀸𑀦𑀁. 𑀏𑀓𑀢𑁆𑀣𑀫𑁂𑀯 𑀯𑀸 𑀏𑀢𑀁 𑀧𑀤𑀤𑁆𑀯𑀬𑀁, 𑀯𑁂𑀦𑁂𑀬𑁆𑀬𑀯𑀲𑁂𑀦 𑀤𑁆𑀯𑀺𑀥𑀸 𑀯𑀼𑀢𑁆𑀢𑀁. 𑀇𑀦𑁆𑀤𑁆𑀭𑀺𑀬𑀧𑀭𑁄𑀧𑀭𑀺𑀬𑀢𑁆𑀢𑀦𑁆𑀢𑀺 𑀲𑀤𑁆𑀥𑀸𑀤𑀻𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀧𑀭𑀪𑀸𑀯𑀜𑁆𑀘 𑀅𑀧𑀭𑀪𑀸𑀯𑀜𑁆𑀘, 𑀯𑀼𑀤𑁆𑀥𑀺𑀜𑁆𑀘 𑀳𑀸𑀦𑀺𑀜𑁆𑀘𑀸𑀢𑀺 𑀅𑀢𑁆𑀣𑁄. 𑀇𑀫𑀲𑁆𑀲𑀸𑀧𑀺 𑀜𑀸𑀡𑀲𑁆𑀲 𑀯𑀺𑀢𑁆𑀣𑀸𑀭𑀓𑀣𑀸 ‘‘𑀢𑀢𑁆𑀣 𑀓𑀢𑀫𑀁 𑀢𑀣𑀸𑀕𑀢𑀲𑁆𑀲 𑀧𑀭𑀲𑀢𑁆𑀢𑀸𑀦𑀁 𑀧𑀭𑀧𑀼𑀕𑁆𑀕𑀮𑀸𑀦𑀁 𑀇𑀦𑁆𑀤𑁆𑀭𑀺𑀬𑀧𑀭𑁄𑀧𑀭𑀺𑀬𑀢𑁆𑀢𑀁 𑀬𑀣𑀸𑀪𑀽𑀢𑀁 𑀜𑀸𑀡𑀁? 𑀇𑀥 𑀢𑀣𑀸𑀕𑀢𑁄 𑀲𑀢𑁆𑀢𑀸𑀦𑀁 𑀆𑀲𑀬𑀁 𑀧𑀚𑀸𑀦𑀸𑀢𑀻’’𑀢𑀺 (𑀯𑀺𑀪. 𑁮𑁧𑁪) 𑀆𑀤𑀺𑀦𑀸 𑀦𑀬𑁂𑀦 𑀅𑀪𑀺𑀥𑀫𑁆𑀫𑁂 𑀆𑀕𑀢𑀸𑀬𑁂𑀯.

𑀛𑀸𑀦𑀯𑀺𑀫𑁄𑀓𑁆𑀔𑀲𑀫𑀸𑀥𑀺𑀲𑀫𑀸𑀧𑀢𑁆𑀢𑀻𑀦𑀦𑁆𑀢𑀺 𑀧𑀞𑀫𑀸𑀤𑀻𑀦𑀁 𑀘𑀢𑀼𑀦𑁆𑀦𑀁 𑀛𑀸𑀦𑀸𑀦𑀁, ‘‘𑀭𑀽𑀧𑀻 𑀭𑀽𑀧𑀸𑀦𑀺 𑀧𑀲𑁆𑀲𑀢𑀻’’𑀢𑀺𑀆𑀤𑀻𑀦𑀁 𑀅𑀝𑁆𑀞𑀦𑁆𑀦𑀁 𑀯𑀺𑀫𑁄𑀓𑁆𑀔𑀸𑀦𑀁, 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑀸𑀤𑀻𑀦𑀁 𑀢𑀺𑀡𑁆𑀡𑀁 𑀲𑀫𑀸𑀥𑀻𑀦𑀁, 𑀧𑀞𑀫𑀚𑁆𑀛𑀸𑀦𑀲𑀫𑀸𑀧𑀢𑁆𑀢𑀺𑀆𑀤𑀻𑀦𑀜𑁆𑀘 𑀦𑀯𑀦𑁆𑀦𑀁 𑀅𑀦𑀼𑀧𑀼𑀩𑁆𑀩𑀲𑀫𑀸𑀧𑀢𑁆𑀢𑀻𑀦𑀁. 𑀲𑀁𑀓𑀺𑀮𑁂𑀲𑀦𑁆𑀢𑀺 𑀳𑀸𑀦𑀪𑀸𑀕𑀺𑀬𑀥𑀫𑁆𑀫𑀁. 𑀯𑁄𑀤𑀸𑀦𑀦𑁆𑀢𑀺 𑀯𑀺𑀲𑁂𑀲𑀪𑀸𑀕𑀺𑀬𑀥𑀫𑁆𑀫𑀁. 𑀯𑀼𑀝𑁆𑀞𑀸𑀦𑀦𑁆𑀢𑀺 ‘‘𑀯𑁄𑀤𑀸𑀦𑀫𑁆𑀧𑀺 𑀯𑀼𑀝𑁆𑀞𑀸𑀦𑀁, 𑀢𑀫𑁆𑀳𑀸 𑀢𑀫𑁆𑀳𑀸 𑀲𑀫𑀸𑀥𑀺𑀫𑁆𑀳𑀸 𑀯𑀼𑀝𑁆𑀞𑀸𑀦𑀫𑁆𑀧𑀺 𑀯𑀼𑀝𑁆𑀞𑀸𑀦’’𑀦𑁆𑀢𑀺 (𑀯𑀺𑀪. 𑁮𑁨𑁮) 𑀏𑀯𑀁 𑀯𑀼𑀢𑁆𑀢𑀁 𑀧𑀕𑀼𑀡𑀚𑁆𑀛𑀸𑀦𑀜𑁆𑀘𑁂𑀯 𑀪𑀯𑀗𑁆𑀕𑀨𑀮𑀲𑀫𑀸𑀧𑀢𑁆𑀢𑀺𑀬𑁄 𑀘. 𑀳𑁂𑀝𑁆𑀞𑀺𑀫𑀁 𑀳𑁂𑀝𑁆𑀞𑀺𑀫𑀜𑁆𑀳𑀺 𑀧𑀕𑀼𑀡𑀚𑁆𑀛𑀸𑀦𑀁 𑀉𑀧𑀭𑀺𑀫𑀲𑁆𑀲 𑀉𑀧𑀭𑀺𑀫𑀲𑁆𑀲 𑀧𑀤𑀝𑁆𑀞𑀸𑀦𑀁 𑀳𑁄𑀢𑀺, 𑀢𑀲𑁆𑀫𑀸 ‘‘𑀯𑁄𑀤𑀸𑀦𑀫𑁆𑀧𑀺 𑀯𑀼𑀝𑁆𑀞𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀪𑀯𑀗𑁆𑀕𑁂𑀦 𑀧𑀦 𑀲𑀩𑁆𑀩𑀚𑁆𑀛𑀸𑀦𑁂𑀳𑀺 𑀯𑀼𑀝𑁆𑀞𑀸𑀦𑀁 𑀳𑁄𑀢𑀺, 𑀨𑀮𑀲𑀫𑀸𑀧𑀢𑁆𑀢𑀺𑀬𑀸 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀦𑀁 𑀳𑁄𑀢𑀺. 𑀢𑀁 𑀲𑀦𑁆𑀥𑀸𑀬 𑀘 ‘‘𑀢𑀫𑁆𑀳𑀸 𑀢𑀫𑁆𑀳𑀸 𑀲𑀫𑀸𑀥𑀺𑀫𑁆𑀳𑀸 𑀯𑀼𑀝𑁆𑀞𑀸𑀦𑀫𑁆𑀧𑀺 𑀯𑀼𑀝𑁆𑀞𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀇𑀤𑀫𑁆𑀧𑀺 𑀜𑀸𑀡𑀁 ‘‘𑀢𑀢𑁆𑀣 𑀓𑀢𑀫𑀁 𑀢𑀣𑀸𑀕𑀢𑀲𑁆𑀲 𑀛𑀸𑀦𑀯𑀺𑀫𑁄𑀓𑁆𑀔𑀲𑀫𑀸𑀥𑀺𑀲𑀫𑀸𑀧𑀢𑁆𑀢𑀻𑀦𑀁 𑀲𑀁𑀓𑀺𑀮𑁂𑀲𑀁 𑀯𑁄𑀤𑀸𑀦𑀁 𑀯𑀼𑀝𑁆𑀞𑀸𑀦𑀁 𑀬𑀣𑀸𑀪𑀽𑀢𑀁 𑀜𑀸𑀡𑀁? 𑀛𑀸𑀬𑀻𑀢𑀺 𑀘𑀢𑁆𑀢𑀸𑀭𑁄 𑀛𑀸𑀬𑀻, 𑀅𑀢𑁆𑀣𑁂𑀓𑀘𑁆𑀘𑁄 𑀛𑀸𑀬𑀻 𑀲𑀫𑁆𑀧𑀢𑁆𑀢𑀺𑀁𑀬𑁂𑀯 𑀲𑀫𑀸𑀦𑀁 𑀯𑀺𑀧𑀢𑁆𑀢𑀻𑀢𑀺 𑀧𑀘𑁆𑀘𑁂𑀢𑀻’’𑀢𑀺𑀆𑀤𑀺𑀦𑀸 (𑀯𑀺𑀪. 𑁮𑁨𑁮) 𑀦𑀬𑁂𑀦 𑀅𑀪𑀺𑀥𑀫𑁆𑀫𑁂 𑀯𑀺𑀢𑁆𑀣𑀸𑀭𑀺𑀢𑀫𑁂𑀯. 𑀲𑀩𑁆𑀩𑀜𑀸𑀡𑀸𑀦𑀁 𑀯𑀺𑀢𑁆𑀣𑀸𑀭𑀓𑀣𑀸𑀬 𑀯𑀺𑀦𑀺𑀘𑁆𑀙𑀬𑁄 𑀲𑀫𑁆𑀫𑁄𑀳𑀯𑀺𑀦𑁄𑀤𑀦𑀺𑀬𑀸 𑀯𑀺𑀪𑀗𑁆𑀕𑀝𑁆𑀞𑀓𑀣𑀸𑀬 𑀯𑀼𑀢𑁆𑀢𑁄, 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀓𑀣𑀸 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀯𑀺𑀢𑁆𑀣𑀸𑀭𑀺𑀢𑀸, 𑀆𑀲𑀯𑀓𑁆𑀔𑀬𑀓𑀣𑀸 𑀳𑁂𑀝𑁆𑀞𑀸 𑀯𑀼𑀢𑁆𑀢𑀸𑀬𑁂𑀯𑀸𑀢𑀺.

𑀢𑀢𑁆𑀣 𑀧𑀭𑀯𑀸𑀤𑀻𑀓𑀣𑀸 𑀳𑁄𑀢𑀺 ‘‘𑀤𑀲𑀩𑀮𑀜𑀸𑀡𑀁 𑀦𑀸𑀫 𑀧𑀸𑀝𑀺𑀬𑁂𑀓𑁆𑀓𑀁 𑀜𑀸𑀡𑀁 𑀦𑀢𑁆𑀣𑀺, 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑁆𑀲𑁂𑀯𑀸𑀬𑀁 𑀧𑀪𑁂𑀤𑁄’’𑀢𑀺. 𑀢𑀁 𑀦 𑀢𑀣𑀸 𑀤𑀝𑁆𑀞𑀩𑁆𑀩𑀁. 𑀅𑀜𑁆𑀜𑀫𑁂𑀯 𑀳𑀺 𑀤𑀲𑀩𑀮𑀜𑀸𑀡𑀁, 𑀅𑀜𑁆𑀜𑀁 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁. 𑀤𑀲𑀩𑀮𑀜𑀸𑀡𑀜𑁆𑀳𑀺 𑀲𑀓𑀲𑀓𑀓𑀺𑀘𑁆𑀘𑀫𑁂𑀯 𑀚𑀸𑀦𑀸𑀢𑀺, 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀢𑀫𑁆𑀧𑀺 𑀢𑀢𑁄 𑀅𑀯𑀲𑁂𑀲𑀫𑁆𑀧𑀺 𑀚𑀸𑀦𑀸𑀢𑀺. 𑀤𑀲𑀩𑀮𑀜𑀸𑀡𑁂𑀲𑀼 𑀳𑀺 𑀧𑀞𑀫𑀁 𑀓𑀸𑀭𑀡𑀸𑀓𑀸𑀭𑀡𑀫𑁂𑀯 𑀚𑀸𑀦𑀸𑀢𑀺, 𑀤𑀼𑀢𑀺𑀬𑀁 𑀓𑀫𑁆𑀫𑀯𑀺𑀧𑀸𑀓𑀦𑁆𑀢𑀭𑀫𑁂𑀯, 𑀢𑀢𑀺𑀬𑀁 𑀓𑀫𑁆𑀫𑀧𑀭𑀺𑀘𑁆𑀙𑁂𑀤𑀫𑁂𑀯, 𑀘𑀢𑀼𑀢𑁆𑀣𑀁 𑀥𑀸𑀢𑀼𑀦𑀸𑀦𑀢𑁆𑀢𑀓𑀸𑀭𑀡𑀫𑁂𑀯, 𑀧𑀜𑁆𑀘𑀫𑀁 𑀲𑀢𑁆𑀢𑀸𑀦𑀁 𑀅𑀚𑁆𑀛𑀸𑀲𑀬𑀸𑀥𑀺𑀫𑀼𑀢𑁆𑀢𑀺𑀫𑁂𑀯, 𑀙𑀝𑁆𑀞𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀢𑀺𑀓𑁆𑀔𑀫𑀼𑀤𑀼𑀪𑀸𑀯𑀫𑁂𑀯, 𑀲𑀢𑁆𑀢𑀫𑀁 𑀛𑀸𑀦𑀸𑀤𑀻𑀳𑀺 𑀲𑀤𑁆𑀥𑀺𑀁 𑀢𑁂𑀲𑀁 𑀲𑀁𑀓𑀺𑀮𑁂𑀲𑀸𑀤𑀺𑀫𑁂𑀯, 𑀅𑀝𑁆𑀞𑀫𑀁 𑀧𑀼𑀩𑁆𑀩𑁂𑀦𑀺𑀯𑀼𑀢𑁆𑀣𑀓𑁆𑀔𑀦𑁆𑀥𑀲𑀦𑁆𑀢𑀢𑀺𑀫𑁂𑀯, 𑀦𑀯𑀫𑀁 𑀲𑀢𑁆𑀢𑀸𑀦𑀁 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀫𑁂𑀯, 𑀤𑀲𑀫𑀁 𑀲𑀘𑁆𑀘𑀧𑀭𑀺𑀘𑁆𑀙𑁂𑀤𑀫𑁂𑀯. 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀧𑀦 𑀏𑀢𑁂𑀳𑀺 𑀚𑀸𑀦𑀺𑀢𑀩𑁆𑀩𑀜𑁆𑀘 𑀢𑀢𑁄 𑀉𑀢𑁆𑀢𑀭𑀺𑀜𑁆𑀘 𑀧𑀚𑀸𑀦𑀸𑀢𑀺, 𑀏𑀢𑁂𑀲𑀁 𑀧𑀦 𑀓𑀺𑀘𑁆𑀘𑀁 𑀦 𑀲𑀩𑁆𑀩𑀁 𑀓𑀭𑁄𑀢𑀺. 𑀢𑀜𑁆𑀳𑀺 𑀛𑀸𑀦𑀁 𑀳𑀼𑀢𑁆𑀯𑀸 𑀅𑀧𑁆𑀧𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀇𑀤𑁆𑀥𑀺 𑀳𑀼𑀢𑁆𑀯𑀸 𑀯𑀺𑀓𑀼𑀩𑁆𑀩𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀫𑀕𑁆𑀕𑁄 𑀳𑀼𑀢𑁆𑀯𑀸 𑀓𑀺𑀮𑁂𑀲𑁂 𑀔𑁂𑀧𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺.

𑀅𑀧𑀺𑀘 𑀧𑀭𑀯𑀸𑀤𑀻 𑀏𑀯𑀁 𑀧𑀼𑀘𑁆𑀙𑀺𑀢𑀩𑁆𑀩𑁄 ‘‘𑀤𑀲𑀩𑀮𑀜𑀸𑀡𑀁 𑀦𑀸𑀫𑁂𑀢𑀁 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑀁 𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑀁 𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑀁, 𑀓𑀸𑀫𑀸𑀯𑀘𑀭𑀁 𑀭𑀽𑀧𑀸𑀯𑀘𑀭𑀁 𑀅𑀭𑀽𑀧𑀸𑀯𑀘𑀭𑀁, 𑀮𑁄𑀓𑀺𑀬𑀁 𑀮𑁄𑀓𑀼𑀢𑁆𑀢𑀭’’𑀦𑁆𑀢𑀺. 𑀚𑀸𑀦𑀦𑁆𑀢𑁄 ‘‘𑀧𑀝𑀺𑀧𑀸𑀝𑀺𑀬𑀸 𑀲𑀢𑁆𑀢 𑀜𑀸𑀡𑀸𑀦𑀺 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑀸𑀦𑀻’’𑀢𑀺 𑀯𑀓𑁆𑀔𑀢𑀺, ‘‘𑀢𑀢𑁄 𑀧𑀭𑀸𑀦𑀺 𑀤𑁆𑀯𑁂 𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑀸𑀦𑀻’’𑀢𑀺 𑀯𑀓𑁆𑀔𑀢𑀺. ‘‘𑀆𑀲𑀯𑀓𑁆𑀔𑀬𑀜𑀸𑀡𑀁 𑀲𑀺𑀬𑀸 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑀁 𑀲𑀺𑀬𑀸 𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑀁, 𑀲𑀺𑀬𑀸 𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭’’𑀦𑁆𑀢𑀺 𑀯𑀓𑁆𑀔𑀢𑀺. 𑀢𑀣𑀸 ‘‘𑀧𑀝𑀺𑀧𑀸𑀝𑀺𑀬𑀸 𑀲𑀢𑁆𑀢 𑀓𑀸𑀫𑀸𑀯𑀘𑀭𑀸𑀦𑀺, 𑀢𑀢𑁄 𑀤𑁆𑀯𑁂 𑀭𑀽𑀧𑀸𑀯𑀘𑀭𑀸𑀦𑀺, 𑀅𑀯𑀲𑀸𑀦𑁂 𑀏𑀓𑀁 𑀮𑁄𑀓𑀼𑀢𑁆𑀢𑀭’’𑀦𑁆𑀢𑀺 𑀯𑀓𑁆𑀔𑀢𑀺. ‘‘𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀧𑀦 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑀫𑁂𑀯 𑀮𑁄𑀓𑀺𑀬𑀫𑁂𑀯𑀸’’𑀢𑀺 𑀯𑀓𑁆𑀔𑀢𑀺.

𑀏𑀯𑀫𑁂𑀢𑁆𑀣 𑀅𑀦𑀼𑀧𑀤𑀯𑀡𑁆𑀡𑀦𑀁 𑀜𑀢𑁆𑀯𑀸 𑀇𑀤𑀸𑀦𑀺 𑀬𑀲𑁆𑀫𑀸 𑀢𑀣𑀸𑀕𑀢𑁄 𑀧𑀞𑀫𑀁𑀬𑁂𑀯 𑀞𑀸𑀦𑀸𑀝𑁆𑀞𑀸𑀦𑀜𑀸𑀡𑁂𑀦 𑀯𑁂𑀦𑁂𑀬𑁆𑀬𑀲𑀢𑁆𑀢𑀸𑀦𑀁 𑀆𑀲𑀯𑀓𑁆𑀔𑀬𑀸𑀥𑀺𑀕𑀫𑀲𑁆𑀲 𑀘𑁂𑀯 𑀅𑀦𑀥𑀺𑀕𑀫𑀲𑁆𑀲 𑀘 𑀞𑀸𑀦𑀸𑀝𑁆𑀞𑀸𑀦𑀪𑀽𑀢𑀁 𑀓𑀺𑀮𑁂𑀲𑀸𑀯𑀭𑀡𑀸𑀪𑀸𑀯𑀁 𑀧𑀲𑁆𑀲𑀢𑀺 𑀮𑁄𑀓𑀺𑀬𑀲𑀫𑁆𑀫𑀸𑀤𑀺𑀝𑁆𑀞𑀺𑀝𑁆𑀞𑀸𑀦𑀸𑀤𑀺𑀤𑀲𑁆𑀲𑀦𑀢𑁄 𑀦𑀺𑀬𑀢𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀝𑁆𑀞𑀸𑀦𑀸𑀪𑀸𑀯𑀤𑀲𑁆𑀲𑀦𑀢𑁄 𑀘. 𑀅𑀣 𑀦𑁂𑀲𑀁 𑀓𑀫𑁆𑀫𑀯𑀺𑀧𑀸𑀓𑀜𑀸𑀡𑁂𑀦 𑀯𑀺𑀧𑀸𑀓𑀸𑀯𑀭𑀡𑀸𑀪𑀸𑀯𑀁 𑀧𑀲𑁆𑀲𑀢𑀺 𑀢𑀺𑀳𑁂𑀢𑀼𑀓𑀧𑁆𑀧𑀝𑀺𑀲𑀦𑁆𑀥𑀺𑀤𑀲𑁆𑀲𑀦𑀢𑁄, 𑀲𑀩𑁆𑀩𑀢𑁆𑀣𑀕𑀸𑀫𑀺𑀦𑀺𑀧𑀝𑀺𑀧𑀤𑀸𑀜𑀸𑀡𑁂𑀦 𑀓𑀫𑁆𑀫𑀸𑀯𑀭𑀡𑀸𑀪𑀸𑀯𑀁 𑀧𑀲𑁆𑀲𑀢𑀺 𑀆𑀦𑀦𑁆𑀢𑀭𑀺𑀬𑀓𑀫𑁆𑀫𑀸𑀪𑀸𑀯𑀤𑀲𑁆𑀲𑀦𑀢𑁄. 𑀏𑀯𑀫𑀦𑀸𑀯𑀭𑀡𑀸𑀦𑀁 𑀅𑀦𑁂𑀓𑀥𑀸𑀢𑀼𑀦𑀸𑀦𑀸𑀥𑀸𑀢𑀼𑀜𑀸𑀡𑁂𑀦 𑀅𑀦𑀼𑀓𑀽𑀮𑀥𑀫𑁆𑀫𑀤𑁂𑀲𑀦𑀢𑁆𑀣𑀁 𑀘𑀭𑀺𑀬𑀸𑀯𑀺𑀲𑁂𑀲𑀁 𑀧𑀲𑁆𑀲𑀢𑀺 𑀥𑀸𑀢𑀼𑀯𑁂𑀫𑀢𑁆𑀢𑀤𑀲𑁆𑀲𑀦𑀢𑁄. 𑀅𑀣 𑀦𑁂𑀲𑀁 𑀦𑀸𑀦𑀸𑀥𑀺𑀫𑀼𑀢𑁆𑀢𑀺𑀓𑀢𑀜𑀸𑀡𑁂𑀦 𑀅𑀥𑀺𑀫𑀼𑀢𑁆𑀢𑀺𑀁 𑀧𑀲𑁆𑀲𑀢𑀺 𑀧𑀬𑁄𑀕𑀁 𑀅𑀦𑀸𑀤𑀺𑀬𑀺𑀢𑁆𑀯𑀸𑀧𑀺 𑀅𑀥𑀺𑀫𑀼𑀢𑁆𑀢𑀺𑀯𑀲𑁂𑀦 𑀥𑀫𑁆𑀫𑀤𑁂𑀲𑀦𑀢𑁆𑀣𑀁. 𑀅𑀣𑁂𑀯𑀁 𑀤𑀺𑀝𑁆𑀞𑀸𑀥𑀺𑀫𑀼𑀢𑁆𑀢𑀻𑀦𑀁 𑀬𑀣𑀸𑀲𑀢𑁆𑀢𑀺 𑀬𑀣𑀸𑀩𑀮𑀁 𑀥𑀫𑁆𑀫𑀁 𑀤𑁂𑀲𑁂𑀢𑀼𑀁 𑀇𑀦𑁆𑀤𑁆𑀭𑀺𑀬𑀧𑀭𑁄𑀧𑀭𑀺𑀬𑀢𑁆𑀢𑀺𑀜𑀸𑀡𑁂𑀦 𑀇𑀦𑁆𑀤𑁆𑀭𑀺𑀬𑀧𑀭𑁄𑀧𑀭𑀺𑀬𑀢𑁆𑀢𑀁 𑀧𑀲𑁆𑀲𑀢𑀺 𑀲𑀤𑁆𑀥𑀸𑀤𑀻𑀦𑀁 𑀢𑀺𑀓𑁆𑀔𑀫𑀼𑀤𑀼𑀪𑀸𑀯𑀤𑀲𑁆𑀲𑀦𑀢𑁄. 𑀏𑀯𑀁 𑀧𑀭𑀺𑀜𑁆𑀜𑀸𑀢𑀺𑀦𑁆𑀤𑁆𑀭𑀺𑀬𑀧𑀭𑁄𑀧𑀭𑀺𑀬𑀢𑁆𑀢𑀸 𑀧𑀦 𑀢𑁂 𑀲𑀘𑁂 𑀤𑀽𑀭𑁂 𑀳𑁄𑀦𑁆𑀢𑀺, 𑀅𑀣 𑀛𑀸𑀦𑀸𑀤𑀺𑀜𑀸𑀡𑁂𑀦 𑀛𑀸𑀦𑀸𑀤𑀻𑀲𑀼 𑀯𑀲𑀻𑀪𑀽𑀢𑀢𑁆𑀢𑀸 𑀇𑀤𑁆𑀥𑀺𑀯𑀺𑀲𑁂𑀲𑁂𑀦 𑀢𑁂 𑀔𑀺𑀧𑁆𑀧𑀁 𑀉𑀧𑀕𑀘𑁆𑀙𑀢𑀺. 𑀉𑀧𑀕𑀦𑁆𑀢𑁆𑀯𑀸 𑀘 𑀦𑁂𑀲𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑁂𑀦 𑀧𑀼𑀩𑁆𑀩𑀚𑀸𑀢𑀺𑀪𑀯𑀁, 𑀤𑀺𑀩𑁆𑀩𑀘𑀓𑁆𑀔𑀸𑀦𑀼𑀪𑀸𑀯𑀢𑁄 𑀧𑀢𑁆𑀢𑀩𑁆𑀩𑁂𑀦 𑀘𑁂𑀢𑁄𑀧𑀭𑀺𑀬𑀜𑀸𑀡𑁂𑀦 𑀲𑀫𑁆𑀧𑀢𑀺 𑀘𑀺𑀢𑁆𑀢𑀯𑀺𑀲𑁂𑀲𑀁 𑀧𑀲𑁆𑀲𑀦𑁆𑀢𑁄 𑀆𑀲𑀯𑀓𑁆𑀔𑀬𑀜𑀸𑀡𑀸𑀦𑀼𑀪𑀸𑀯𑁂𑀦 𑀆𑀲𑀯𑀓𑁆𑀔𑀬𑀕𑀸𑀫𑀺𑀦𑀺𑀬𑀸 𑀧𑀝𑀺𑀧𑀤𑀸𑀬 𑀯𑀺𑀕𑀢𑀲𑀫𑁆𑀫𑁄𑀳𑀢𑁆𑀢𑀸 𑀆𑀲𑀯𑀓𑁆𑀔𑀬𑀸𑀬 𑀥𑀫𑁆𑀫𑀁 𑀤𑁂𑀲𑁂𑀢𑀺. 𑀢𑀲𑁆𑀫𑀸 𑀇𑀫𑀺𑀦𑀸𑀦𑀼𑀓𑁆𑀓𑀫𑁂𑀦 𑀇𑀫𑀸𑀦𑀺 𑀩𑀮𑀸𑀦𑀺 𑀯𑀼𑀢𑁆𑀢𑀸𑀦𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺.

𑁨. 𑀅𑀥𑀺𑀯𑀼𑀢𑁆𑀢𑀺𑀧𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁨. 𑀤𑀼𑀢𑀺𑀬𑁂 𑀬𑁂 𑀢𑁂 𑀥𑀫𑁆𑀫𑀸𑀢𑀺 𑀬𑁂 𑀢𑁂 𑀤𑀲𑀩𑀮𑀜𑀸𑀡𑀁 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀥𑀫𑁆𑀫𑀸. 𑀅𑀥𑀺𑀯𑀼𑀢𑁆𑀢𑀺𑀧𑀤𑀸𑀦𑀦𑁆𑀢𑀺 𑀅𑀥𑀺𑀯𑀘𑀦𑀧𑀤𑀸𑀦𑀁, 𑀔𑀦𑁆𑀥𑀸𑀬𑀢𑀦𑀥𑀸𑀢𑀼𑀥𑀫𑁆𑀫𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀅𑀥𑀺𑀯𑀼𑀢𑁆𑀢𑀺𑀬𑁄𑀢𑀺 𑀳𑀺 𑀅𑀥𑀺𑀯𑀘𑀦𑀸𑀦𑀺 𑀯𑀼𑀘𑁆𑀘𑀦𑁆𑀢𑀺, 𑀢𑁂𑀲𑀁 𑀬𑁂 𑀧𑀤𑀪𑀽𑀢𑀸 𑀤𑁂𑀲𑀦𑀸𑀬 𑀧𑀤𑀝𑁆𑀞𑀸𑀦𑀢𑁆𑀢𑀸. 𑀅𑀢𑀻𑀢𑀸 𑀩𑀼𑀤𑁆𑀥𑀸𑀧𑀺 𑀳𑀺 𑀏𑀢𑁂 𑀥𑀫𑁆𑀫𑁂 𑀓𑀣𑀬𑀺𑀁𑀲𑀼, 𑀅𑀦𑀸𑀕𑀢𑀸𑀧𑀺 𑀏𑀢𑁂𑀯 𑀓𑀣𑀬𑀺𑀲𑁆𑀲𑀦𑁆𑀢𑀺. 𑀢𑀲𑁆𑀫𑀸 𑀔𑀦𑁆𑀥𑀸𑀤𑀬𑁄 𑀅𑀥𑀺𑀯𑀼𑀢𑁆𑀢𑀺𑀧𑀤𑀸𑀦𑀺 𑀦𑀸𑀫. 𑀢𑁂𑀲𑀁 𑀅𑀥𑀺𑀯𑀼𑀢𑁆𑀢𑀺𑀧𑀤𑀸𑀦𑀁. 𑀅𑀣 𑀯𑀸 𑀪𑀽𑀢𑀫𑀢𑁆𑀣𑀁 𑀅𑀪𑀺𑀪𑀯𑀺𑀢𑁆𑀯𑀸 𑀬𑀣𑀸𑀲𑀪𑀸𑀯𑀢𑁄 𑀅𑀕𑁆𑀕𑀳𑁂𑀢𑁆𑀯𑀸 𑀯𑀢𑁆𑀢𑀦𑀢𑁄 𑀅𑀥𑀺𑀯𑀼𑀢𑁆𑀢𑀺𑀬𑁄𑀢𑀺 𑀤𑀺𑀝𑁆𑀞𑀺𑀬𑁄 𑀯𑀼𑀘𑁆𑀘𑀦𑁆𑀢𑀺, 𑀅𑀥𑀺𑀯𑀼𑀢𑁆𑀢𑀻𑀦𑀁 𑀧𑀤𑀸𑀦𑀺 𑀅𑀥𑀺𑀯𑀼𑀢𑁆𑀢𑀺𑀧𑀤𑀸𑀦𑀺, 𑀤𑀺𑀝𑁆𑀞𑀺𑀤𑀻𑀧𑀓𑀸𑀦𑀺 𑀯𑀘𑀦𑀸𑀦𑀻𑀢𑀺 𑀅𑀢𑁆𑀣𑁄. 𑀢𑁂𑀲𑀁 𑀅𑀥𑀺𑀯𑀼𑀢𑁆𑀢𑀺𑀧𑀤𑀸𑀦𑀁 𑀤𑀺𑀝𑁆𑀞𑀺𑀯𑁄𑀳𑀸𑀭𑀸𑀦𑀁. 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀺𑀭𑀺𑀬𑀸𑀬𑀸𑀢𑀺 𑀚𑀸𑀦𑀺𑀢𑁆𑀯𑀸 𑀧𑀘𑁆𑀘𑀓𑁆𑀔𑀓𑀭𑀡𑀢𑁆𑀣𑀸𑀬. 𑀯𑀺𑀲𑀸𑀭𑀤𑁄𑀢𑀺 𑀜𑀸𑀡𑀲𑁄𑀫𑀦𑀲𑁆𑀲𑀧𑁆𑀧𑀢𑁆𑀢𑁄. 𑀢𑀢𑁆𑀣𑀸𑀢𑀺 𑀢𑁂𑀲𑀼 𑀥𑀫𑁆𑀫𑁂𑀲𑀼 𑀢𑁂𑀲𑀁 𑀢𑁂𑀲𑀁 𑀢𑀣𑀸 𑀢𑀣𑀸 𑀥𑀫𑁆𑀫𑀁 𑀤𑁂𑀲𑁂𑀢𑀼𑀦𑁆𑀢𑀺 𑀢𑁂𑀲𑀁 𑀢𑁂𑀲𑀁 𑀤𑀺𑀝𑁆𑀞𑀺𑀕𑀢𑀺𑀓𑀸𑀦𑀁 𑀯𑀸 𑀇𑀢𑀭𑁂𑀲𑀁 𑀯𑀸 𑀆𑀲𑀬𑀁 𑀜𑀢𑁆𑀯𑀸 𑀢𑀣𑀸 𑀢𑀣𑀸 𑀥𑀫𑁆𑀫𑀁 𑀤𑁂𑀲𑁂𑀢𑀼𑀁. 𑀳𑀻𑀦𑀁 𑀯𑀸 𑀳𑀻𑀦𑀦𑁆𑀢𑀺 𑀜𑀲𑁆𑀲𑀢𑀻𑀢𑀺 𑀳𑀻𑀦𑀁 𑀯𑀸 𑀥𑀫𑁆𑀫𑀁 ‘‘𑀳𑀻𑀦𑁄 𑀥𑀫𑁆𑀫𑁄’’𑀢𑀺 𑀚𑀸𑀦𑀺𑀲𑁆𑀲𑀢𑀺. 𑀜𑀸𑀢𑁂𑀬𑁆𑀬𑀦𑁆𑀢𑀺 𑀜𑀸𑀢𑀩𑁆𑀩𑀁. 𑀤𑀝𑁆𑀞𑁂𑀬𑁆𑀬𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀲𑀘𑁆𑀙𑀺𑀓𑀭𑁂𑀬𑁆𑀬𑀦𑁆𑀢𑀺 𑀲𑀘𑁆𑀙𑀺𑀓𑀸𑀢𑀩𑁆𑀩𑀁. 𑀢𑀢𑁆𑀣 𑀢𑀢𑁆𑀣 𑀬𑀣𑀸𑀪𑀽𑀢𑀜𑀸𑀡𑀦𑁆𑀢𑀺 𑀢𑁂𑀲𑀼 𑀢𑁂𑀲𑀼 𑀥𑀫𑁆𑀫𑁂𑀲𑀼 𑀬𑀣𑀸𑀲𑀪𑀸𑀯𑀜𑀸𑀡𑀁. 𑀇𑀫𑀺𑀦𑀸 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀤𑀲𑁆𑀲𑁂𑀢𑀺. 𑀏𑀯𑀁 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀤𑀲𑁆𑀲𑁂𑀢𑁆𑀯𑀸 𑀧𑀼𑀦 𑀤𑀲𑀩𑀮𑀜𑀸𑀡𑀁 𑀤𑀲𑁆𑀲𑁂𑀦𑁆𑀢𑁄 𑀤𑀲𑀬𑀺𑀫𑀸𑀦𑀻𑀢𑀺𑀆𑀤𑀺𑀫𑀸𑀳. 𑀤𑀲𑀩𑀮𑀜𑀸𑀡𑀫𑁆𑀧𑀺 𑀳𑀺 𑀢𑀢𑁆𑀣 𑀢𑀢𑁆𑀣 𑀬𑀣𑀸𑀪𑀽𑀢𑀜𑀸𑀡𑀫𑁂𑀯𑀸𑀢𑀺.

𑁩. 𑀓𑀸𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁩. 𑀢𑀢𑀺𑀬𑁂 𑀆𑀧𑀦𑁆𑀦𑁄 𑀳𑁄𑀢𑀺 𑀓𑀜𑁆𑀘𑀺𑀤𑁂𑀯 𑀤𑁂𑀲𑀦𑁆𑀢𑀺 𑀓𑀜𑁆𑀘𑀺 𑀆𑀧𑀢𑁆𑀢𑀺𑀓𑁄𑀝𑁆𑀞𑀸𑀲𑀁 𑀆𑀧𑀦𑁆𑀦𑁄 𑀳𑁄𑀢𑀺. 𑀅𑀦𑀼𑀯𑀺𑀘𑁆𑀘𑀸𑀢𑀺 𑀅𑀦𑀼𑀧𑀯𑀺𑀲𑀺𑀢𑁆𑀯𑀸 𑀧𑀭𑀺𑀬𑁄𑀕𑀸𑀳𑁂𑀢𑁆𑀯𑀸. 𑀓𑀸𑀬𑀤𑀼𑀘𑁆𑀘𑀭𑀺𑀢𑀦𑁆𑀢𑀺 𑀢𑀺𑀯𑀺𑀥𑀁 𑀓𑀸𑀬𑀤𑀼𑀘𑁆𑀘𑀭𑀺𑀢𑀁. 𑀯𑀘𑀻𑀤𑀼𑀘𑁆𑀘𑀭𑀺𑀢𑀦𑁆𑀢𑀺 𑀘𑀢𑀼𑀩𑁆𑀩𑀺𑀥𑀁 𑀯𑀘𑀻𑀤𑀼𑀘𑁆𑀘𑀭𑀺𑀢𑀁. 𑀧𑀸𑀧𑀺𑀓𑀸 𑀇𑀲𑁆𑀲𑀸𑀢𑀺 𑀮𑀸𑀫𑀺𑀓𑀸 𑀉𑀲𑀽𑀬𑀸. 𑀧𑀜𑁆𑀜𑀸𑀬 𑀤𑀺𑀲𑁆𑀯𑀸𑀢𑀺 𑀲𑀳𑀯𑀺𑀧𑀲𑁆𑀲𑀦𑀸𑀬 𑀫𑀕𑁆𑀕𑀧𑀜𑁆𑀜𑀸𑀬 𑀧𑀲𑁆𑀲𑀺𑀢𑁆𑀯𑀸 𑀧𑀲𑁆𑀲𑀺𑀢𑁆𑀯𑀸 𑀧𑀳𑀸𑀢𑀩𑁆𑀩𑀸. 𑀇𑀚𑁆𑀛𑀢𑀻𑀢𑀺 𑀲𑀫𑀺𑀚𑁆𑀛𑀢𑀺. 𑀉𑀧𑀯𑀸𑀲𑀲𑁆𑀲𑀸𑀢𑀺 𑀦𑀺𑀲𑁆𑀲𑀸𑀬 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀲𑀦𑁆𑀢𑀲𑁆𑀲. 𑀅𑀪𑀺𑀪𑀼𑀬𑁆𑀬𑀸𑀢𑀺 𑀅𑀚𑁆𑀛𑁄𑀢𑁆𑀣𑀭𑀺𑀢𑁆𑀯𑀸 𑀫𑀤𑁆𑀤𑀺𑀢𑁆𑀯𑀸. 𑀇𑀭𑀻𑀬𑀢𑀻𑀢𑀺 𑀯𑀢𑁆𑀢𑀢𑀺. 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀲𑀳𑀯𑀺𑀧𑀲𑁆𑀲𑀦𑀸𑀬 𑀫𑀕𑁆𑀕𑁄 𑀓𑀣𑀺𑀢𑁄.

𑁪. 𑀫𑀳𑀸𑀘𑀼𑀦𑁆𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁪. 𑀘𑀢𑀼𑀢𑁆𑀣𑁂 𑀚𑀸𑀦𑀸𑀫𑀺𑀫𑀁 𑀥𑀫𑁆𑀫𑀦𑁆𑀢𑀺 𑀇𑀫𑀺𑀦𑀸 𑀜𑀸𑀡𑀯𑀸𑀤𑀲𑁆𑀲 𑀯𑀤𑀦𑀸𑀓𑀸𑀭𑁄 𑀯𑀼𑀢𑁆𑀢𑁄. 𑀪𑀸𑀯𑀺𑀢𑀓𑀸𑀬𑁄𑀫𑁆𑀳𑀻𑀢𑀺𑀆𑀤𑀻𑀳𑀺 𑀪𑀸𑀯𑀦𑀸𑀯𑀸𑀤𑀲𑁆𑀲. 𑀢𑀢𑀺𑀬𑀯𑀸𑀭𑁂 𑀤𑁆𑀯𑁂𑀧𑀺 𑀯𑀸𑀤𑀸 𑀏𑀓𑀢𑁄 𑀯𑀼𑀢𑁆𑀢𑀸, 𑀢𑀬𑁄𑀧𑀺 𑀘𑁂𑀢𑁂 𑀅𑀭𑀳𑀢𑁆𑀢𑀫𑁂𑀯 𑀧𑀝𑀺𑀚𑀸𑀦𑀦𑁆𑀢𑀺. 𑀅𑀟𑁆𑀠𑀯𑀸𑀤𑀁 𑀯𑀤𑁂𑀬𑁆𑀬𑀸𑀢𑀺 𑀅𑀟𑁆𑀠𑁄𑀳𑀫𑀲𑁆𑀫𑀻𑀢𑀺 𑀯𑀸𑀤𑀁 𑀯𑀤𑁂𑀬𑁆𑀬. 𑀉𑀧𑀦𑀻𑀳𑀸𑀢𑀼𑀦𑁆𑀢𑀺 𑀦𑀻𑀳𑀭𑀺𑀢𑁆𑀯𑀸 𑀤𑀸𑀢𑀼𑀁.

𑁫. 𑀓𑀲𑀺𑀡𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁫. 𑀧𑀜𑁆𑀘𑀫𑁂 𑀲𑀓𑀮𑀝𑁆𑀞𑁂𑀦 𑀓𑀲𑀺𑀡𑀸𑀦𑀺, 𑀢𑀤𑀸𑀭𑀫𑁆𑀫𑀡𑀸𑀦𑀁 𑀥𑀫𑁆𑀫𑀸𑀦𑀁 𑀔𑁂𑀢𑁆𑀢𑀝𑁆𑀞𑁂𑀦 𑀅𑀥𑀺𑀝𑁆𑀞𑀸𑀦𑀝𑁆𑀞𑁂𑀦 𑀯𑀸 𑀆𑀬𑀢𑀦𑀸𑀦𑀻𑀢𑀺 𑀓𑀲𑀺𑀡𑀸𑀬𑀢𑀦𑀸𑀦𑀺. 𑀉𑀤𑁆𑀥𑀦𑁆𑀢𑀺 𑀉𑀧𑀭𑀺 𑀕𑀕𑀡𑀢𑀮𑀸𑀪𑀺𑀫𑀼𑀔𑀁. 𑀅𑀥𑁄𑀢𑀺 𑀳𑁂𑀝𑁆𑀞𑀸 𑀪𑀽𑀫𑀺𑀢𑀮𑀸𑀪𑀺𑀫𑀼𑀔𑀁. 𑀢𑀺𑀭𑀺𑀬𑀦𑁆𑀢𑀺 𑀔𑁂𑀢𑁆𑀢𑀫𑀡𑁆𑀟𑀮𑀁 𑀯𑀺𑀬 𑀲𑀫𑀦𑁆𑀢𑀸 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸. 𑀏𑀓𑀘𑁆𑀘𑁄 𑀳𑀺 𑀉𑀤𑁆𑀥𑀫𑁂𑀯 𑀓𑀲𑀺𑀡𑀁 𑀯𑀟𑁆𑀠𑁂𑀢𑀺, 𑀏𑀓𑀘𑁆𑀘𑁄 𑀅𑀥𑁄, 𑀏𑀓𑀘𑁆𑀘𑁄 𑀲𑀫𑀦𑁆𑀢𑀢𑁄. 𑀢𑁂𑀦 𑀢𑁂𑀦 𑀯𑀸 𑀓𑀸𑀭𑀡𑁂𑀦 𑀏𑀯𑀁 𑀧𑀲𑀸𑀭𑁂𑀢𑀺 𑀆𑀮𑁄𑀓𑀫𑀺𑀯 𑀭𑀽𑀧𑀤𑀲𑁆𑀲𑀦𑀓𑀸𑀫𑁄. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀧𑀣𑀯𑀻𑀓𑀲𑀺𑀡𑀫𑁂𑀓𑁄 𑀲𑀜𑁆𑀚𑀸𑀦𑀸𑀢𑀺 𑀉𑀤𑁆𑀥𑀁 𑀅𑀥𑁄 𑀢𑀺𑀭𑀺𑀬’’𑀦𑁆𑀢𑀺. 𑀅𑀤𑁆𑀯𑀬𑀦𑁆𑀢𑀺 𑀇𑀤𑀁 𑀧𑀦 𑀏𑀓𑀲𑁆𑀲 𑀅𑀜𑁆𑀜𑀪𑀸𑀯𑀸𑀦𑀼𑀧𑀕𑀫𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀬𑀣𑀸 𑀳𑀺 𑀉𑀤𑀓𑀁 𑀧𑀯𑀺𑀝𑁆𑀞𑀲𑁆𑀲 𑀲𑀩𑁆𑀩𑀤𑀺𑀲𑀸𑀲𑀼 𑀉𑀤𑀓𑀫𑁂𑀯 𑀳𑁄𑀢𑀺 𑀦 𑀅𑀜𑁆𑀜𑀁, 𑀏𑀯𑀫𑁂𑀯 𑀧𑀣𑀯𑀻𑀓𑀲𑀺𑀡𑀁 𑀧𑀣𑀯𑀻𑀓𑀲𑀺𑀡𑀫𑁂𑀯 𑀳𑁄𑀢𑀺. 𑀦𑀢𑁆𑀣𑀺 𑀢𑀲𑁆𑀲 𑀅𑀜𑁆𑀜𑀓𑀲𑀺𑀡𑀲𑀫𑁆𑀪𑁂𑀤𑁄𑀢𑀺. 𑀏𑀲𑁂𑀯 𑀦𑀬𑁄 𑀲𑀩𑁆𑀩𑀢𑁆𑀣. 𑀅𑀧𑁆𑀧𑀫𑀸𑀡𑀦𑁆𑀢𑀺 𑀇𑀤𑀁 𑀢𑀲𑁆𑀲 𑀢𑀲𑁆𑀲 𑀨𑀭𑀡𑀅𑀧𑁆𑀧𑀫𑀸𑀡𑀯𑀲𑁂𑀦 𑀯𑀼𑀢𑁆𑀢𑀁. 𑀢𑀜𑁆𑀳𑀺 𑀘𑁂𑀢𑀲𑀸 𑀨𑀭𑀦𑁆𑀢𑁄 𑀲𑀓𑀮𑀫𑁂𑀯 𑀨𑀭𑀢𑀺, ‘‘𑀅𑀬𑀫𑀲𑁆𑀲 𑀆𑀤𑀺, 𑀇𑀤𑀁 𑀫𑀚𑁆𑀛’’𑀦𑁆𑀢𑀺 𑀧𑀫𑀸𑀡𑀁 𑀦 𑀕𑀡𑁆𑀳𑀸𑀢𑀺. 𑀯𑀺𑀜𑁆𑀜𑀸𑀡𑀓𑀲𑀺𑀡𑀦𑁆𑀢𑀺 𑀘𑁂𑀢𑁆𑀣 𑀓𑀲𑀺𑀡𑀼𑀕𑁆𑀖𑀸𑀝𑀺𑀫𑀸𑀓𑀸𑀲𑁂 𑀧𑀯𑀢𑁆𑀢𑀯𑀺𑀜𑁆𑀜𑀸𑀡𑀁. 𑀢𑀢𑁆𑀣 𑀓𑀲𑀺𑀡𑀯𑀲𑁂𑀦 𑀓𑀲𑀺𑀡𑀼𑀕𑁆𑀖𑀸𑀝𑀺𑀫𑀸𑀓𑀸𑀲𑁂, 𑀓𑀲𑀺𑀡𑀼𑀕𑁆𑀖𑀸𑀝𑀺𑀫𑀸𑀓𑀸𑀲𑀯𑀲𑁂𑀦 𑀢𑀢𑁆𑀣 𑀧𑀯𑀢𑁆𑀢𑀯𑀺𑀜𑁆𑀜𑀸𑀡𑁂 𑀉𑀤𑁆𑀥𑀁𑀅𑀥𑁄𑀢𑀺𑀭𑀺𑀬𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀓𑀫𑁆𑀫𑀝𑁆𑀞𑀸𑀦𑀪𑀸𑀯𑀦𑀸𑀦𑀬𑁂𑀦 𑀧𑀦𑁂𑀢𑀸𑀦𑀺 𑀧𑀣𑀯𑀻𑀓𑀲𑀺𑀡𑀸𑀤𑀻𑀦𑀺 𑀯𑀺𑀢𑁆𑀣𑀸𑀭𑀢𑁄 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁧.𑁫𑁧 𑀆𑀤𑀬𑁄) 𑀯𑀼𑀢𑁆𑀢𑀸𑀦𑁂𑀯.

𑁬. 𑀓𑀸𑀴𑀻𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁬. 𑀙𑀝𑁆𑀞𑁂 𑀓𑀼𑀫𑀸𑀭𑀺𑀧𑀜𑁆𑀳𑁂𑀲𑀽𑀢𑀺 𑀓𑀼𑀫𑀸𑀭𑀻𑀦𑀁 𑀫𑀸𑀭𑀥𑀻𑀢𑀸𑀦𑀁 𑀧𑀼𑀘𑁆𑀙𑀸𑀲𑀼. 𑀅𑀢𑁆𑀣𑀲𑁆𑀲 𑀧𑀢𑁆𑀢𑀺𑀁 𑀳𑀤𑀬𑀲𑁆𑀲 𑀲𑀦𑁆𑀢𑀺𑀦𑁆𑀢𑀺 𑀤𑁆𑀯𑀻𑀳𑀺𑀧𑀺 𑀧𑀤𑁂𑀳𑀺 𑀅𑀭𑀳𑀢𑁆𑀢𑀫𑁂𑀯 𑀓𑀣𑀺𑀢𑀁. 𑀲𑁂𑀦𑀦𑁆𑀢𑀺 𑀭𑀸𑀕𑀸𑀤𑀺𑀓𑀺𑀮𑁂𑀲𑀲𑁂𑀦𑀁. 𑀧𑀺𑀬𑀲𑀸𑀢𑀭𑀽𑀧𑀦𑁆𑀢𑀺 𑀧𑀺𑀬𑀚𑀸𑀢𑀺𑀓𑁂𑀲𑀼 𑀘 𑀲𑀸𑀢𑀚𑀸𑀢𑀺𑀓𑁂𑀲𑀼 𑀘 𑀯𑀢𑁆𑀣𑀽𑀲𑀼 𑀉𑀧𑁆𑀧𑀚𑁆𑀚𑀦𑀢𑁄 𑀏𑀯𑀁𑀮𑀤𑁆𑀥𑀦𑀸𑀫𑀁. 𑀏𑀓𑁄𑀳𑀁 𑀛𑀸𑀬𑀁 𑀲𑀼𑀔𑀫𑀦𑀼𑀩𑁄𑀥𑀺𑀦𑁆𑀢𑀺 𑀏𑀯𑀁 𑀓𑀺𑀮𑁂𑀲𑀲𑁂𑀦𑀁 𑀚𑀺𑀦𑀺𑀢𑁆𑀯𑀸 𑀅𑀳𑀁 𑀏𑀓𑀓𑁄𑀯 𑀛𑀸𑀬𑀦𑁆𑀢𑁄 𑀲𑀼𑀔𑀁 𑀅𑀦𑀼𑀩𑀼𑀚𑁆𑀛𑀺𑀁 𑀲𑀘𑁆𑀙𑀺𑀅𑀓𑀸𑀲𑀺𑀁. 𑀲𑀓𑁆𑀔𑀺𑀦𑁆𑀢𑀺 𑀲𑀓𑁆𑀔𑀺𑀪𑀸𑀯𑀧𑁆𑀧𑀢𑁆𑀢𑀁 𑀥𑀫𑁆𑀫𑀲𑀓𑁆𑀔𑀺𑀁. 𑀦 𑀲𑀫𑁆𑀧𑀚𑁆𑀚𑀢𑀺 𑀓𑁂𑀦𑀘𑀺 𑀫𑁂𑀢𑀺 𑀫𑀬𑁆𑀳𑀁 𑀓𑁂𑀦𑀘𑀺 𑀲𑀤𑁆𑀥𑀺𑀁 𑀫𑀺𑀢𑁆𑀢𑀥𑀫𑁆𑀫𑁄 𑀦𑀸𑀫 𑀦𑀢𑁆𑀣𑀺. 𑀧𑀣𑀯𑀻𑀓𑀲𑀺𑀡𑀲𑀫𑀸𑀧𑀢𑁆𑀢𑀺𑀧𑀭𑀫𑀸 𑀔𑁄, 𑀪𑀕𑀺𑀦𑀺, 𑀏𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀅𑀢𑁆𑀣𑁄𑀢𑀺 𑀅𑀪𑀺𑀦𑀺𑀩𑁆𑀩𑀢𑁆𑀢𑁂𑀲𑀼𑀦𑁆𑀢𑀺 𑀧𑀣𑀯𑀻𑀓𑀲𑀺𑀡𑀲𑀫𑀸𑀧𑀢𑁆𑀢𑀺𑀧𑀭𑀫𑁄 𑀉𑀢𑁆𑀢𑀫𑁄 𑀅𑀢𑁆𑀣𑁄𑀢𑀺 𑀕𑀳𑁂𑀢𑁆𑀯𑀸 𑀅𑀪𑀺𑀦𑀺𑀩𑁆𑀩𑀢𑁆𑀢𑁂𑀲𑀼𑀁. 𑀬𑀸𑀯𑀢𑀸 𑀔𑁄, 𑀪𑀕𑀺𑀦𑀺, 𑀧𑀣𑀯𑀻𑀓𑀲𑀺𑀡𑀲𑀫𑀸𑀧𑀢𑁆𑀢𑀺𑀧𑀭𑀫𑀢𑀸𑀢𑀺 𑀬𑀢𑁆𑀢𑀓𑀸 𑀧𑀣𑀯𑀻𑀓𑀲𑀺𑀡𑀲𑀫𑀸𑀧𑀢𑁆𑀢𑀺𑀬𑀸 𑀉𑀢𑁆𑀢𑀫𑀓𑁄𑀝𑀺. 𑀢𑀤𑀪𑀺𑀜𑁆𑀜𑀸𑀲𑀺 𑀪𑀕𑀯𑀸𑀢𑀺 𑀢𑀁 𑀪𑀕𑀯𑀸 𑀅𑀪𑀺𑀜𑁆𑀜𑀸𑀧𑀜𑁆𑀜𑀸𑀬 𑀅𑀪𑀺𑀜𑁆𑀜𑀸𑀲𑀺. 𑀅𑀲𑁆𑀲𑀸𑀤𑀫𑀤𑁆𑀤𑀲𑀸𑀢𑀺 𑀲𑀫𑀼𑀤𑀬𑀲𑀘𑁆𑀘𑀁 𑀅𑀤𑁆𑀤𑀲. 𑀆𑀤𑀻𑀦𑀯𑀫𑀤𑁆𑀤𑀲𑀸𑀢𑀺 𑀤𑀼𑀓𑁆𑀔𑀲𑀘𑁆𑀘𑀁 𑀅𑀤𑁆𑀤𑀲. 𑀦𑀺𑀲𑁆𑀲𑀭𑀡𑀫𑀤𑁆𑀤𑀲𑀸𑀢𑀺 𑀦𑀺𑀭𑁄𑀥𑀲𑀘𑁆𑀘𑀁 𑀅𑀤𑁆𑀤𑀲. 𑀫𑀕𑁆𑀕𑀸𑀫𑀕𑁆𑀕𑀜𑀸𑀡𑀤𑀲𑁆𑀲𑀦𑀫𑀤𑁆𑀤𑀲𑀸𑀢𑀺 𑀫𑀕𑁆𑀕𑀲𑀘𑁆𑀘𑀁 𑀅𑀤𑁆𑀤𑀲. 𑀅𑀢𑁆𑀣𑀲𑁆𑀲 𑀧𑀢𑁆𑀢𑀻𑀢𑀺 𑀏𑀢𑁂𑀲𑀁 𑀘𑀢𑀼𑀦𑁆𑀦𑀁 𑀲𑀘𑁆𑀘𑀸𑀦𑀁 𑀤𑀺𑀝𑁆𑀞𑀢𑁆𑀢𑀸 𑀅𑀭𑀳𑀢𑁆𑀢𑀲𑀗𑁆𑀔𑀸𑀢𑀲𑁆𑀲 𑀅𑀢𑁆𑀣𑀲𑁆𑀲 𑀧𑀢𑁆𑀢𑀺, 𑀲𑀩𑁆𑀩𑀤𑀭𑀣𑀧𑀭𑀺𑀴𑀸𑀳𑀯𑀽𑀧𑀲𑀦𑁆𑀢𑀢𑀸𑀬 𑀳𑀤𑀬𑀲𑁆𑀲 𑀲𑀦𑁆𑀢𑀻𑀢𑀺.

𑁭. 𑀧𑀞𑀫𑀫𑀳𑀸𑀧𑀜𑁆𑀳𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁭. 𑀲𑀢𑁆𑀢𑀫𑁂 𑀅𑀪𑀺𑀚𑀸𑀦𑀸𑀣𑀸𑀢𑀺 𑀅𑀪𑀺𑀚𑀸𑀦𑀺𑀢𑁆𑀯𑀸 𑀧𑀘𑁆𑀘𑀓𑁆𑀔𑀁 𑀓𑀢𑁆𑀯𑀸 𑀯𑀺𑀳𑀭𑀣. 𑀅𑀪𑀺𑀜𑁆𑀜𑀸𑀬𑀸𑀢𑀺 𑀅𑀪𑀺𑀚𑀸𑀦𑀺𑀢𑁆𑀯𑀸. 𑀇𑀥𑀸𑀢𑀺 𑀇𑀫𑀸𑀬. 𑀥𑀫𑁆𑀫𑀤𑁂𑀲𑀦𑀸𑀬 𑀯𑀸 𑀥𑀫𑁆𑀫𑀤𑁂𑀲𑀦𑀦𑁆𑀢𑀺 𑀬𑀤𑀺𑀤𑀁 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀥𑀫𑁆𑀫𑀤𑁂𑀲𑀦𑀸𑀬 𑀲𑀤𑁆𑀥𑀺𑀁 𑀅𑀫𑁆𑀳𑀸𑀓𑀁 𑀥𑀫𑁆𑀫𑀤𑁂𑀲𑀦𑀁, 𑀅𑀫𑁆𑀳𑀸𑀓𑀁 𑀯𑀸 𑀥𑀫𑁆𑀫𑀤𑁂𑀲𑀦𑀸𑀬 𑀲𑀤𑁆𑀥𑀺𑀁 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀥𑀫𑁆𑀫𑀤𑁂𑀲𑀦𑀁 𑀆𑀭𑀩𑁆𑀪 𑀦𑀸𑀦𑀸𑀓𑀭𑀡𑀁 𑀯𑀼𑀘𑁆𑀘𑁂𑀣, 𑀢𑀁 𑀓𑀺𑀁 𑀦𑀸𑀫𑀸𑀢𑀺 𑀯𑀤𑀦𑁆𑀢𑀺. 𑀤𑀼𑀢𑀺𑀬𑀧𑀤𑁂𑀧𑀺 𑀏𑀲𑁂𑀯 𑀦𑀬𑁄. 𑀇𑀢𑀺 𑀢𑁂 𑀫𑀚𑁆𑀛𑁂 𑀪𑀺𑀦𑁆𑀦𑀲𑀼𑀯𑀡𑁆𑀡𑀁 𑀯𑀺𑀬 𑀲𑀸𑀲𑀦𑁂𑀦 𑀲𑀤𑁆𑀥𑀺𑀁 𑀅𑀢𑁆𑀢𑀦𑁄 𑀮𑀤𑁆𑀥𑀺𑀁 𑀯𑀘𑀦𑀫𑀢𑁆𑀢𑁂𑀦 𑀲𑀫𑀥𑀼𑀭𑀁 𑀞𑀧𑀬𑀺𑀁𑀲𑀼. 𑀦𑁂𑀯 𑀅𑀪𑀺𑀦𑀦𑁆𑀤𑀺𑀁𑀲𑀽𑀢𑀺 ‘‘𑀏𑀯𑀫𑁂𑀢’’𑀦𑁆𑀢𑀺 𑀦 𑀲𑀫𑁆𑀧𑀝𑀺𑀘𑁆𑀙𑀺𑀁𑀲𑀼. 𑀦𑀧𑁆𑀧𑀝𑀺𑀓𑁆𑀓𑁄𑀲𑀺𑀁𑀲𑀽𑀢𑀺 ‘‘𑀦 𑀇𑀤𑀁 𑀏𑀯’’𑀦𑁆𑀢𑀺 𑀦𑀧𑁆𑀧𑀝𑀺𑀲𑁂𑀥𑁂𑀲𑀼𑀁. 𑀓𑀲𑁆𑀫𑀸? 𑀢𑁂 𑀓𑀺𑀭 ‘‘𑀢𑀺𑀢𑁆𑀣𑀺𑀬𑀸 𑀦𑀸𑀫 𑀅𑀦𑁆𑀥𑀲𑀤𑀺𑀲𑀸 𑀚𑀸𑀦𑀺𑀢𑁆𑀯𑀸 𑀯𑀸 𑀅𑀚𑀸𑀦𑀺𑀢𑁆𑀯𑀸 𑀯𑀸 𑀓𑀣𑁂𑀬𑁆𑀬𑀼’’𑀦𑁆𑀢𑀺 𑀦𑀸𑀪𑀺𑀦𑀦𑁆𑀤𑀺𑀁𑀲𑀼.

𑀦 𑀲𑀫𑁆𑀧𑀸𑀬𑀺𑀲𑁆𑀲𑀦𑁆𑀢𑀻𑀢𑀺 𑀲𑀫𑁆𑀧𑀸𑀤𑁂𑀢𑁆𑀯𑀸 𑀓𑀣𑁂𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀦𑁆𑀢𑀺. 𑀉𑀢𑁆𑀢𑀭𑀺 𑀘 𑀯𑀺𑀖𑀸𑀢𑀦𑁆𑀢𑀺 𑀅𑀲𑀫𑁆𑀧𑀸𑀤𑀦𑀢𑁄 𑀉𑀢𑁆𑀢𑀭𑀺𑀫𑁆𑀧𑀺 𑀤𑀼𑀓𑁆𑀔𑀁 𑀆𑀧𑀚𑁆𑀚𑀺𑀲𑁆𑀲𑀦𑁆𑀢𑀺. 𑀲𑀫𑁆𑀧𑀸𑀤𑁂𑀢𑁆𑀯𑀸 𑀓𑀣𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸𑀦𑀜𑁆𑀳𑀺 𑀤𑀼𑀓𑁆𑀔𑀁 𑀉𑀧𑁆𑀧𑀚𑁆𑀚𑀢𑀺. 𑀬𑀣𑀸 𑀢𑀁, 𑀪𑀺𑀓𑁆𑀔𑀯𑁂, 𑀅𑀯𑀺𑀲𑀬𑀲𑁆𑀫𑀺𑀦𑁆𑀢𑀺 𑀏𑀢𑁆𑀣 𑀘 𑀢𑀦𑁆𑀢𑀺 𑀦𑀺𑀧𑀸𑀢𑀫𑀢𑁆𑀢𑀁. 𑀬𑀣𑀸𑀢𑀺 𑀓𑀸𑀭𑀡𑀯𑀘𑀦𑀁, 𑀬𑀲𑁆𑀫𑀸 𑀅𑀯𑀺𑀲𑀬𑁂 𑀧𑀜𑁆𑀳𑀁 𑀧𑀼𑀘𑁆𑀙𑀺𑀢𑀸 𑀳𑁄𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀇𑀢𑁄 𑀯𑀸 𑀧𑀦 𑀲𑀼𑀢𑁆𑀯𑀸𑀢𑀺 𑀇𑀢𑁄 𑀯𑀸 𑀧𑀦 𑀫𑀫 𑀲𑀸𑀲𑀦𑀢𑁄 𑀲𑀼𑀢𑁆𑀯𑀸. 𑀇𑀢𑁄𑀢𑀺 𑀢𑀣𑀸𑀕𑀢𑀢𑁄𑀧𑀺 𑀢𑀣𑀸𑀕𑀢𑀲𑀸𑀯𑀓𑀢𑁄𑀧𑀺. 𑀆𑀭𑀸𑀥𑁂𑀬𑁆𑀬𑀸𑀢𑀺 𑀧𑀭𑀺𑀢𑁄𑀲𑁂𑀬𑁆𑀬, 𑀅𑀜𑁆𑀜𑀣𑀸 𑀆𑀭𑀸𑀥𑀦𑀁 𑀦𑀸𑀫 𑀦𑀢𑁆𑀣𑀻𑀢𑀺 𑀤𑀲𑁆𑀲𑁂𑀢𑀺.

𑀏𑀓𑀥𑀫𑁆𑀫𑁂𑀢𑀺 𑀏𑀓𑀲𑁆𑀫𑀺𑀁 𑀥𑀫𑁆𑀫𑁂. 𑀇𑀫𑀺𑀦𑀸 𑀉𑀤𑁆𑀤𑁂𑀲𑁄 𑀤𑀲𑁆𑀲𑀺𑀢𑁄. 𑀧𑀭𑀢𑁄 𑀓𑀢𑀫𑀲𑁆𑀫𑀺𑀁 𑀏𑀓𑀥𑀫𑁆𑀫𑁂𑀢𑀺 𑀇𑀫𑀺𑀦𑀸 𑀧𑀜𑁆𑀳𑁄 𑀤𑀲𑁆𑀲𑀺𑀢𑁄. 𑀲𑀩𑁆𑀩𑁂 𑀲𑀢𑁆𑀢𑀸 𑀆𑀳𑀸𑀭𑀝𑁆𑀞𑀺𑀢𑀺𑀓𑀸𑀢𑀺 𑀇𑀤𑀁 𑀧𑀦𑁂𑀢𑁆𑀣 𑀯𑁂𑀬𑁆𑀬𑀸𑀓𑀭𑀡𑀁. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀲𑀫𑁆𑀫𑀸 𑀦𑀺𑀩𑁆𑀩𑀺𑀦𑁆𑀤𑀫𑀸𑀦𑁄𑀢𑀺𑀆𑀤𑀻𑀲𑀼 𑀧𑀦 𑀲𑀫𑁆𑀫𑀸 𑀳𑁂𑀢𑀼𑀦𑀸 𑀦𑀬𑁂𑀦 𑀦𑀺𑀩𑁆𑀩𑀺𑀤𑀸𑀦𑀼𑀧𑀲𑁆𑀲𑀦𑀸𑀬 𑀦𑀺𑀩𑁆𑀩𑀺𑀦𑁆𑀤𑀦𑁆𑀢𑁄 𑀉𑀓𑁆𑀓𑀡𑁆𑀞𑀦𑁆𑀢𑁄, 𑀯𑀺𑀭𑀸𑀕𑀸𑀦𑀼𑀧𑀲𑁆𑀲𑀦𑀸𑀬 𑀯𑀺𑀭𑀚𑁆𑀚𑀦𑁆𑀢𑁄, 𑀧𑀝𑀺𑀲𑀗𑁆𑀔𑀸𑀦𑀼𑀧𑀲𑁆𑀲𑀦𑀸𑀬 𑀫𑀼𑀘𑁆𑀘𑀦𑀲𑁆𑀲 𑀉𑀧𑀸𑀬𑀁 𑀓𑀢𑁆𑀯𑀸 𑀯𑀺𑀫𑀼𑀘𑁆𑀘𑀫𑀸𑀦𑁄, 𑀅𑀥𑀺𑀫𑁄𑀓𑁆𑀔𑀯𑀲𑁂𑀦 𑀯𑀸 𑀯𑀺𑀫𑀼𑀘𑁆𑀘𑀫𑀸𑀦𑁄 𑀲𑀦𑁆𑀦𑀺𑀝𑁆𑀞𑀸𑀦𑀁 𑀓𑀼𑀭𑀼𑀫𑀸𑀦𑁄𑀢𑀺 𑀅𑀢𑁆𑀣𑁄. 𑀉𑀤𑀬𑀩𑁆𑀩𑀬𑁂𑀳𑀺 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀧𑀼𑀩𑁆𑀩𑀦𑁆𑀢𑀸𑀧𑀭𑀦𑁆𑀢𑀤𑀲𑁆𑀲𑀦𑁂𑀦 𑀲𑀫𑁆𑀫𑀸 𑀧𑀭𑀺𑀬𑀦𑁆𑀢𑀤𑀲𑁆𑀲𑀸𑀯𑀻. 𑀲𑀫𑁆𑀫𑀤𑀢𑁆𑀣𑀁 𑀅𑀪𑀺𑀲𑀫𑁂𑀘𑁆𑀘𑀸𑀢𑀺 𑀲𑀫𑁆𑀫𑀸 𑀲𑀪𑀸𑀕𑀢𑁆𑀣𑀁 𑀜𑀸𑀡𑁂𑀦 𑀅𑀪𑀺𑀲𑀫𑀸𑀕𑀦𑁆𑀢𑁆𑀯𑀸. 𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀭𑁄 𑀳𑁄𑀢𑀻𑀢𑀺 𑀲𑀓𑀮𑀯𑀝𑁆𑀝𑀤𑀼𑀓𑁆𑀔𑀲𑁆𑀲 𑀧𑀭𑀺𑀬𑀦𑁆𑀢𑀁 𑀧𑀭𑀺𑀯𑀝𑀼𑀫𑀁 𑀓𑀭𑁄 𑀳𑁄𑀢𑀺.

𑀲𑀩𑁆𑀩𑁂 𑀲𑀢𑁆𑀢𑀸𑀢𑀺 𑀓𑀸𑀫𑀪𑀯𑀸𑀤𑀻𑀲𑀼 𑀏𑀓𑀯𑁄𑀓𑀸𑀭𑀪𑀯𑀸𑀤𑀻𑀲𑀼 𑀘 𑀲𑀩𑁆𑀩𑀪𑀯𑁂𑀲𑀼 𑀲𑀩𑁆𑀩𑁂 𑀲𑀢𑁆𑀢𑀸. 𑀆𑀳𑀸𑀭𑀝𑁆𑀞𑀺𑀢𑀺𑀓𑀸𑀢𑀺 𑀆𑀳𑀸𑀭𑀢𑁄 𑀞𑀺𑀢𑀺 𑀏𑀢𑁂𑀲𑀦𑁆𑀢𑀺 𑀆𑀳𑀸𑀭𑀝𑁆𑀞𑀺𑀢𑀺𑀓𑀸. 𑀇𑀢𑀺 𑀲𑀩𑁆𑀩𑀲𑀢𑁆𑀢𑀸𑀦𑀫𑁆𑀧𑀺 𑀞𑀺𑀢𑀺𑀳𑁂𑀢𑀼 𑀆𑀳𑀸𑀭𑁄 𑀦𑀸𑀫 𑀏𑀓𑁄 𑀥𑀫𑁆𑀫𑁄, 𑀢𑀲𑁆𑀫𑀺𑀁 𑀏𑀓𑀥𑀫𑁆𑀫𑁂. 𑀦𑀦𑀼 𑀘 𑀏𑀯𑀁 𑀲𑀦𑁆𑀢𑁂 𑀬𑀁 𑀯𑀼𑀢𑁆𑀢𑀁 𑁋 ‘‘𑀅𑀲𑀜𑁆𑀜𑀲𑀢𑁆𑀢𑀸 𑀤𑁂𑀯𑀸 𑀅𑀳𑁂𑀢𑀼𑀓𑀸 𑀅𑀦𑀸𑀳𑀸𑀭𑀸 𑀅𑀨𑀲𑁆𑀲𑀓𑀸’’𑀢𑀺𑀆𑀤𑀺 (𑀯𑀺𑀪. 𑁧𑁦𑁧𑁭), 𑀢𑀁 𑀯𑀺𑀭𑀼𑀚𑁆𑀛𑀢𑀻𑀢𑀺. 𑀦 𑀯𑀺𑀭𑀼𑀚𑁆𑀛𑀢𑀺. 𑀢𑁂𑀲𑀜𑁆𑀳𑀺 𑀛𑀸𑀦𑀁 𑀆𑀳𑀸𑀭𑁄 𑀳𑁄𑀢𑀺. 𑀏𑀯𑀁 𑀲𑀦𑁆𑀢𑁂𑀧𑀺 ‘‘𑀘𑀢𑁆𑀢𑀸𑀭𑁄𑀫𑁂, 𑀪𑀺𑀓𑁆𑀔𑀯𑁂, 𑀆𑀳𑀸𑀭𑀸’’𑀢𑀺 (𑀲𑀁. 𑀦𑀺. 𑁨.𑁧𑁧) 𑀇𑀤𑀁 𑀯𑀺𑀭𑀼𑀚𑁆𑀛𑀢𑀻𑀢𑀺. 𑀇𑀤𑀫𑁆𑀧𑀺 𑀦 𑀯𑀺𑀭𑀼𑀚𑁆𑀛𑀢𑀺. 𑀏𑀢𑀲𑁆𑀫𑀺𑀜𑁆𑀳𑀺 𑀲𑀼𑀢𑁆𑀢𑁂 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀆𑀳𑀸𑀭𑀮𑀓𑁆𑀔𑀡𑀸 𑀥𑀫𑁆𑀫𑀸 𑀆𑀳𑀸𑀭𑀸𑀢𑀺 𑀯𑀼𑀢𑁆𑀢𑀸, 𑀇𑀥 𑀧𑀦 𑀧𑀭𑀺𑀬𑀸𑀬𑁂𑀦 𑀧𑀘𑁆𑀘𑀬𑁄 𑀆𑀳𑀸𑀭𑁄𑀢𑀺 𑀯𑀼𑀢𑁆𑀢𑁄. 𑀲𑀩𑁆𑀩𑀥𑀫𑁆𑀫𑀸𑀦𑀜𑁆𑀳𑀺 𑀧𑀘𑁆𑀘𑀬𑁄 𑀮𑀤𑁆𑀥𑀼𑀁 𑀯𑀝𑁆𑀝𑀢𑀺. 𑀲𑁄 𑀘 𑀬𑀁 𑀬𑀁 𑀨𑀮𑀁 𑀚𑀦𑁂𑀢𑀺, 𑀢𑀁 𑀢𑀁 𑀆𑀳𑀭𑀢𑀺 𑀦𑀸𑀫. 𑀢𑀲𑁆𑀫𑀸 𑀆𑀳𑀸𑀭𑁄𑀢𑀺 𑀯𑀼𑀘𑁆𑀘𑀢𑀺. 𑀢𑁂𑀦𑁂𑀯𑀸𑀳 𑁋 ‘‘𑀅𑀯𑀺𑀚𑁆𑀚𑀫𑁆𑀧𑀸𑀳𑀁, 𑀪𑀺𑀓𑁆𑀔𑀯𑁂, 𑀲𑀸𑀳𑀸𑀭𑀁 𑀯𑀤𑀸𑀫𑀺, 𑀦𑁄 𑀅𑀦𑀸𑀳𑀸𑀭𑀁. 𑀓𑁄 𑀘, 𑀪𑀺𑀓𑁆𑀔𑀯𑁂, 𑀅𑀯𑀺𑀚𑁆𑀚𑀸𑀬 𑀆𑀳𑀸𑀭𑁄? 𑀧𑀜𑁆𑀘 𑀦𑀻𑀯𑀭𑀡𑀸𑀢𑀺𑀲𑁆𑀲 𑀯𑀘𑀦𑀻𑀬’’𑀦𑁆𑀢𑀺 (𑀅. 𑀦𑀺. 𑁧𑁦.𑁬𑁧). 𑀅𑀬𑀁 𑀇𑀥 𑀅𑀥𑀺𑀧𑁆𑀧𑁂𑀢𑁄. 𑀏𑀢𑀲𑁆𑀫𑀺𑀜𑁆𑀳𑀺 𑀧𑀘𑁆𑀘𑀬𑀸𑀳𑀸𑀭𑁂 𑀕𑀳𑀺𑀢𑁂 𑀧𑀭𑀺𑀬𑀸𑀬𑀸𑀳𑀸𑀭𑁄𑀧𑀺 𑀦𑀺𑀧𑁆𑀧𑀭𑀺𑀬𑀸𑀬𑀸𑀳𑀸𑀭𑁄𑀧𑀺 𑀲𑀩𑁆𑀩𑁄 𑀕𑀳𑀺𑀢𑁄𑀯 𑀳𑁄𑀢𑀺.

𑀢𑀢𑁆𑀣 𑀅𑀲𑀜𑁆𑀜𑀻𑀪𑀯𑁂 𑀧𑀘𑁆𑀘𑀬𑀸𑀳𑀸𑀭𑁄 𑀮𑀩𑁆𑀪𑀢𑀺. 𑀅𑀦𑀼𑀧𑁆𑀧𑀦𑁆𑀦𑁂 𑀳𑀺 𑀩𑀼𑀤𑁆𑀥𑁂 𑀢𑀺𑀢𑁆𑀣𑀸𑀬𑀢𑀦𑁂 𑀧𑀩𑁆𑀩𑀚𑀺𑀢𑀸 𑀯𑀸𑀬𑁄𑀓𑀲𑀺𑀡𑁂 𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸 𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀢𑀢𑁄 𑀯𑀼𑀝𑁆𑀞𑀸𑀬 ‘‘𑀥𑀺 𑀘𑀺𑀢𑁆𑀢𑀁, 𑀥𑀺 𑀯𑀢𑁂𑀢𑀁 𑀘𑀺𑀢𑁆𑀢𑀁, 𑀘𑀺𑀢𑁆𑀢𑀲𑁆𑀲 𑀦𑀸𑀫 𑀅𑀪𑀸𑀯𑁄𑀬𑁂𑀯 𑀲𑀸𑀥𑀼. 𑀘𑀺𑀢𑁆𑀢𑀜𑁆𑀳𑀺 𑀦𑀺𑀲𑁆𑀲𑀸𑀬 𑀯𑀥𑀩𑀦𑁆𑀥𑀸𑀤𑀺𑀧𑀘𑁆𑀘𑀬𑀁 𑀤𑀼𑀓𑁆𑀔𑀁 𑀉𑀧𑁆𑀧𑀚𑁆𑀚𑀢𑀺. 𑀘𑀺𑀢𑁆𑀢𑁂 𑀅𑀲𑀢𑀺 𑀦𑀢𑁆𑀣𑁂𑀢’’𑀦𑁆𑀢𑀺 𑀔𑀦𑁆𑀢𑀺𑀁 𑀭𑀼𑀘𑀺𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀅𑀧𑀭𑀺𑀳𑀻𑀦𑀚𑁆𑀛𑀸𑀦𑀸 𑀓𑀸𑀮𑀁 𑀓𑀢𑁆𑀯𑀸 𑀅𑀲𑀜𑁆𑀜𑀻𑀪𑀯𑁂 𑀦𑀺𑀩𑁆𑀩𑀢𑁆𑀢𑀦𑁆𑀢𑀺. 𑀬𑁄 𑀬𑀲𑁆𑀲 𑀇𑀭𑀺𑀬𑀸𑀧𑀣𑁄 𑀫𑀦𑀼𑀲𑁆𑀲𑀮𑁄𑀓𑁂 𑀧𑀡𑀺𑀳𑀺𑀢𑁄 𑀅𑀳𑁄𑀲𑀺, 𑀲𑁄 𑀢𑁂𑀦 𑀇𑀭𑀺𑀬𑀸𑀧𑀣𑁂𑀦 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀘𑀺𑀢𑁆𑀢𑀭𑀽𑀧𑀲𑀤𑀺𑀲𑁄 𑀳𑀼𑀢𑁆𑀯𑀸 𑀧𑀜𑁆𑀘 𑀓𑀧𑁆𑀧𑀲𑀢𑀸𑀦𑀺 𑀢𑀺𑀝𑁆𑀞𑀢𑀺. 𑀏𑀢𑁆𑀢𑀓𑀁 𑀅𑀤𑁆𑀥𑀸𑀦𑀁 𑀲𑀬𑀺𑀢𑁄 𑀯𑀺𑀬 𑀳𑁄𑀢𑀺. 𑀏𑀯𑀭𑀽𑀧𑀸𑀦𑀫𑁆𑀧𑀺 𑀲𑀢𑁆𑀢𑀸𑀦𑀁 𑀧𑀘𑁆𑀘𑀬𑀸𑀳𑀸𑀭𑁄 𑀮𑀩𑁆𑀪𑀢𑀺. 𑀢𑁂 𑀳𑀺 𑀬𑀁 𑀛𑀸𑀦𑀁 𑀪𑀸𑀯𑁂𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀸, 𑀢𑀤𑁂𑀯 𑀦𑁂𑀲𑀁 𑀧𑀘𑁆𑀘𑀬𑁄 𑀳𑁄𑀢𑀺. 𑀬𑀣𑀸 𑀚𑀺𑀬𑀸𑀯𑁂𑀕𑁂𑀦 𑀔𑀺𑀢𑁆𑀢𑀲𑀭𑁄 𑀬𑀸𑀯 𑀚𑀺𑀬𑀸𑀯𑁂𑀕𑁄 𑀅𑀢𑁆𑀣𑀺, 𑀢𑀸𑀯 𑀕𑀘𑁆𑀙𑀢𑀺. 𑀏𑀯𑀁 𑀬𑀸𑀯 𑀛𑀸𑀦𑀧𑀘𑁆𑀘𑀬𑁄 𑀅𑀢𑁆𑀣𑀺, 𑀢𑀸𑀯 𑀢𑀺𑀝𑁆𑀞𑀦𑁆𑀢𑀺. 𑀢𑀲𑁆𑀫𑀺𑀁 𑀦𑀺𑀝𑁆𑀞𑀺𑀢𑁂 𑀔𑀻𑀡𑀯𑁂𑀕𑁄 𑀯𑀺𑀬 𑀲𑀭𑁄 𑀧𑀢𑀦𑁆𑀢𑀺. 𑀘𑀯𑀦𑀓𑀸𑀮𑁂 𑀘 𑀢𑁂𑀲𑀁 𑀲𑁄 𑀭𑀽𑀧𑀓𑀸𑀬𑁄 𑀅𑀦𑁆𑀢𑀭𑀥𑀸𑀬𑀢𑀺, 𑀓𑀸𑀫𑀸𑀯𑀘𑀭𑀲𑀜𑁆𑀜𑀸 𑀉𑀧𑁆𑀧𑀚𑁆𑀚𑀢𑀺, 𑀢𑁂𑀦 𑀲𑀜𑁆𑀜𑀼𑀧𑁆𑀧𑀸𑀤𑁂𑀦 𑀢𑁂 𑀤𑁂𑀯𑀸 𑀢𑀫𑁆𑀳𑀸 𑀓𑀸𑀬𑀸 𑀘𑀼𑀢𑀸𑀢𑀺 𑀧𑀜𑁆𑀜𑀸𑀬𑀦𑁆𑀢𑀺.

𑀬𑁂 𑀧𑀦 𑀢𑁂 𑀦𑁂𑀭𑀬𑀺𑀓𑀸 𑀦𑁂𑀯 𑀯𑀼𑀝𑁆𑀞𑀸𑀦𑀨𑀮𑀽𑀧𑀚𑀻𑀯𑀻, 𑀦 𑀧𑀼𑀜𑁆𑀜𑀨𑀮𑀽𑀧𑀚𑀻𑀯𑀻𑀢𑀺 𑀯𑀼𑀢𑁆𑀢𑀸, 𑀢𑁂𑀲𑀁 𑀓𑁄 𑀆𑀳𑀸𑀭𑁄𑀢𑀺? 𑀢𑁂𑀲𑀁 𑀓𑀫𑁆𑀫𑀫𑁂𑀯 𑀆𑀳𑀸𑀭𑁄. 𑀓𑀺𑀁 𑀧𑀜𑁆𑀘 𑀆𑀳𑀸𑀭𑀸 𑀅𑀢𑁆𑀣𑀻𑀢𑀺? 𑀧𑀜𑁆𑀘, 𑀦 𑀧𑀜𑁆𑀘𑀸𑀢𑀺 𑀇𑀤𑀁 𑀦 𑀯𑀢𑁆𑀢𑀩𑁆𑀩𑀁, 𑀦𑀦𑀼 ‘‘𑀧𑀘𑁆𑀘𑀬𑁄 𑀆𑀳𑀸𑀭𑁄’’𑀢𑀺 𑀯𑀼𑀢𑁆𑀢𑀫𑁂𑀢𑀁. 𑀢𑀲𑁆𑀫𑀸 𑀬𑁂𑀦 𑀓𑀫𑁆𑀫𑁂𑀦 𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀦𑁆𑀢𑀺, 𑀢𑀤𑁂𑀯 𑀢𑁂𑀲𑀁 𑀞𑀺𑀢𑀺𑀧𑀘𑁆𑀘𑀬𑀢𑁆𑀢𑀸 𑀆𑀳𑀸𑀭𑁄 𑀳𑁄𑀢𑀺. 𑀬𑀁 𑀲𑀦𑁆𑀥𑀸𑀬 𑀇𑀤𑀁 𑀯𑀼𑀢𑁆𑀢𑀁 𑁋 ‘‘𑀦 𑀘 𑀢𑀸𑀯 𑀓𑀸𑀮𑀁 𑀓𑀭𑁄𑀢𑀺, 𑀬𑀸𑀯 𑀦 𑀢𑀁 𑀧𑀸𑀧𑀓𑀫𑁆𑀫𑀁 𑀩𑁆𑀬𑀦𑁆𑀢𑀻 𑀳𑁄𑀢𑀻’’𑀢𑀺 (𑀫. 𑀦𑀺. 𑁩.𑁨𑁫𑁦, 𑁨𑁬𑁮; 𑀅. 𑀦𑀺. 𑁩.𑁩𑁬).

𑀓𑀩𑀴𑀻𑀓𑀸𑀭𑀸𑀳𑀸𑀭𑀁 𑀆𑀭𑀩𑁆𑀪𑀸𑀧𑀺 𑀘𑁂𑀢𑁆𑀣 𑀯𑀺𑀯𑀸𑀤𑁄 𑀦 𑀓𑀸𑀢𑀩𑁆𑀩𑁄. 𑀫𑀼𑀔𑁂 𑀉𑀧𑁆𑀧𑀚𑁆𑀚𑀦𑀔𑁂𑀴𑁄𑀧𑀺 𑀳𑀺 𑀢𑁂𑀲𑀁 𑀆𑀳𑀸𑀭𑀓𑀺𑀘𑁆𑀘𑀁 𑀲𑀸𑀥𑁂𑀢𑀺. 𑀔𑁂𑀴𑁄 𑀳𑀺 𑀦𑀺𑀭𑀬𑁂 𑀤𑀼𑀓𑁆𑀔𑀯𑁂𑀤𑀦𑀻𑀬𑁄 𑀳𑀼𑀢𑁆𑀯𑀸 𑀧𑀘𑁆𑀘𑀬𑁄 𑀳𑁄𑀢𑀺, 𑀲𑀕𑁆𑀕𑁂 𑀲𑀼𑀔𑀯𑁂𑀤𑀦𑀺𑀬𑁄. 𑀇𑀢𑀺 𑀓𑀸𑀫𑀪𑀯𑁂 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀘𑀢𑁆𑀢𑀸𑀭𑁄 𑀆𑀳𑀸𑀭𑀸, 𑀭𑀽𑀧𑀸𑀭𑀽𑀧𑀪𑀯𑁂𑀲𑀼 𑀞𑀧𑁂𑀢𑁆𑀯𑀸 𑀅𑀲𑀜𑁆𑀜𑁂 𑀲𑁂𑀲𑀸𑀦𑀁 𑀢𑀬𑁄, 𑀅𑀲𑀜𑁆𑀜𑀸𑀦𑀜𑁆𑀘𑁂𑀯 𑀅𑀯𑀲𑁂𑀲𑀸𑀦𑀜𑁆𑀘 𑀧𑀘𑁆𑀘𑀬𑀸𑀳𑀸𑀭𑁄𑀢𑀺 𑀇𑀫𑀺𑀦𑀸 𑀆𑀓𑀸𑀭𑁂𑀦 𑀲𑀩𑁆𑀩𑁂 𑀲𑀢𑁆𑀢𑀸 𑀆𑀳𑀸𑀭𑀝𑁆𑀞𑀺𑀢𑀺𑀓𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀢𑀢𑁆𑀣 𑀘𑀢𑁆𑀢𑀸𑀭𑁄 𑀆𑀳𑀸𑀭𑁄 𑀬𑁄 𑀯𑀸 𑀧𑀦 𑀓𑁄𑀘𑀺 𑀧𑀘𑁆𑀘𑀬𑀸𑀳𑀸𑀭𑁄 𑀤𑀼𑀓𑁆𑀔𑀲𑀘𑁆𑀘𑀁, 𑀆𑀳𑀸𑀭𑀲𑀫𑀼𑀝𑁆𑀞𑀸𑀧𑀺𑀓𑀸 𑀧𑀼𑀭𑀺𑀫𑀢𑀡𑁆𑀳𑀸 𑀲𑀫𑀼𑀤𑀬𑀲𑀘𑁆𑀘𑀁, 𑀉𑀪𑀺𑀦𑁆𑀦𑀁 𑀅𑀧𑁆𑀧𑀯𑀢𑁆𑀢𑀺 𑀦𑀺𑀭𑁄𑀥𑀲𑀘𑁆𑀘𑀁, 𑀦𑀺𑀭𑁄𑀥𑀧𑁆𑀧𑀚𑀸𑀦𑀦𑀸 𑀧𑀜𑁆𑀜𑀸 𑀫𑀕𑁆𑀕𑀲𑀘𑁆𑀘𑀦𑁆𑀢𑀺 𑀏𑀯𑀁 𑀘𑀢𑀼𑀲𑀘𑁆𑀘𑀯𑀲𑁂𑀦 𑀲𑀩𑁆𑀩𑀯𑀸𑀭𑁂𑀲𑀼 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸.

𑁮. 𑀤𑀼𑀢𑀺𑀬𑀫𑀳𑀸𑀧𑀜𑁆𑀳𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁮. 𑀅𑀝𑁆𑀞𑀫𑁂 𑀓𑀚𑀗𑁆𑀕𑀮𑀸𑀬𑀦𑁆𑀢𑀺 𑀏𑀯𑀁𑀦𑀸𑀫𑀓𑁂 𑀦𑀕𑀭𑁂. 𑀓𑀚𑀗𑁆𑀕𑀮𑀸𑀢𑀺 𑀓𑀚𑀗𑁆𑀕𑀮𑀸𑀯𑀸𑀲𑀺𑀦𑁄. 𑀫𑀳𑀸𑀧𑀜𑁆𑀳𑁂𑀲𑀽𑀢𑀺 𑀫𑀳𑀦𑁆𑀢𑀅𑀢𑁆𑀣𑀧𑀭𑀺𑀕𑁆𑀕𑀸𑀳𑀓𑁂𑀲𑀼 𑀧𑀜𑁆𑀳𑁂𑀲𑀼. 𑀬𑀣𑀸 𑀫𑁂𑀢𑁆𑀣 𑀔𑀸𑀬𑀢𑀻𑀢𑀺 𑀬𑀣𑀸 𑀫𑁂 𑀏𑀢𑁆𑀣 𑀉𑀧𑀝𑁆𑀞𑀸𑀢𑀺. 𑀲𑀫𑁆𑀫𑀸 𑀲𑀼𑀪𑀸𑀯𑀺𑀢𑀘𑀺𑀢𑁆𑀢𑁄𑀢𑀺 𑀳𑁂𑀢𑀼𑀦𑀸 𑀦𑀬𑁂𑀦 𑀲𑀼𑀝𑁆𑀞𑀼 𑀪𑀸𑀯𑀺𑀢𑀘𑀺𑀢𑁆𑀢𑁄. 𑀏𑀲𑁄 𑀘𑁂𑀯 𑀢𑀲𑁆𑀲 𑀅𑀢𑁆𑀣𑁄𑀢𑀺 𑀓𑀺𑀜𑁆𑀘𑀸𑀧𑀺 𑀪𑀕𑀯𑀢𑀸 ‘‘𑀘𑀢𑁆𑀢𑀸𑀭𑁄 𑀥𑀫𑁆𑀫𑀸’’𑀢𑀺𑀆𑀤𑀬𑁄 𑀧𑀜𑁆𑀳𑀸 ‘‘𑀘𑀢𑁆𑀢𑀸𑀭𑁄 𑀆𑀳𑀸𑀭𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀺𑀲𑁆𑀲𑀚𑁆𑀚𑀺𑀢𑀸, 𑀬𑀲𑁆𑀫𑀸 𑀧𑀦 𑀘𑀢𑀽𑀲𑀼 𑀆𑀳𑀸𑀭𑁂𑀲𑀼 𑀧𑀭𑀺𑀜𑁆𑀜𑀸𑀢𑁂𑀲𑀼 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸 𑀪𑀸𑀯𑀺𑀢𑀸 𑀳𑁄𑀦𑁆𑀢𑀺, 𑀢𑁂𑀲𑀼 𑀘 𑀪𑀸𑀯𑀺𑀢𑁂𑀲𑀼 𑀘𑀢𑁆𑀢𑀸𑀭𑁄 𑀆𑀳𑀸𑀭𑀸 𑀧𑀭𑀺𑀜𑁆𑀜𑀸𑀢𑀸𑀯 𑀳𑁄𑀦𑁆𑀢𑀺. 𑀢𑀲𑁆𑀫𑀸 𑀤𑁂𑀲𑀦𑀸𑀯𑀺𑀮𑀸𑀲𑁂𑀦 𑀩𑁆𑀬𑀜𑁆𑀚𑀦𑀫𑁂𑀯𑁂𑀢𑁆𑀣 𑀦𑀸𑀦𑀁, 𑀅𑀢𑁆𑀣𑁄 𑀧𑀦 𑀏𑀓𑁄𑀬𑁂𑀯. 𑀇𑀦𑁆𑀤𑁆𑀭𑀺𑀬𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀏𑀲𑁄 𑀘𑁂𑀯 𑀢𑀲𑁆𑀲 𑀅𑀢𑁆𑀣𑁄’’𑀢𑀺. 𑀅𑀢𑁆𑀣𑀢𑁄 𑀳𑀺 𑀉𑀪𑀬𑀫𑁆𑀧𑁂𑀢𑀁 𑀫𑀚𑁆𑀛𑁂 𑀪𑀺𑀦𑁆𑀦𑀲𑀼𑀯𑀡𑁆𑀡𑀫𑀺𑀯 𑀳𑁄𑀢𑀺.

𑁯. 𑀧𑀞𑀫𑀓𑁄𑀲𑀮𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁯. 𑀦𑀯𑀫𑁂 𑀬𑀸𑀯𑀢𑀸𑀢𑀺 𑀬𑀢𑁆𑀢𑀓𑀸. 𑀓𑀸𑀲𑀺𑀓𑁄𑀲𑀮𑀸𑀢𑀺 𑀓𑀸𑀲𑀺𑀓𑁄𑀲𑀮𑀚𑀦𑀧𑀤𑀸. 𑀅𑀢𑁆𑀣𑁂𑀯 𑀅𑀜𑁆𑀜𑀣𑀢𑁆𑀢𑀦𑁆𑀢𑀺 𑀞𑀺𑀢𑀲𑁆𑀲 𑀅𑀜𑁆𑀜𑀣𑀢𑁆𑀢𑀁 𑀅𑀢𑁆𑀣𑀺𑀬𑁂𑀯. 𑀅𑀢𑁆𑀣𑀺 𑀯𑀺𑀧𑀭𑀺𑀡𑀸𑀫𑁄𑀢𑀺 𑀫𑀭𑀡𑀫𑁆𑀧𑀺 𑀅𑀢𑁆𑀣𑀺𑀬𑁂𑀯. 𑀢𑀲𑁆𑀫𑀺𑀫𑁆𑀧𑀺 𑀦𑀺𑀩𑁆𑀩𑀺𑀦𑁆𑀤𑀢𑀻𑀢𑀺 𑀢𑀲𑁆𑀫𑀺𑀫𑁆𑀧𑀺 𑀲𑀫𑁆𑀧𑀢𑁆𑀢𑀺𑀚𑀸𑀢𑁂 𑀉𑀓𑁆𑀓𑀡𑁆𑀞𑀢𑀺. 𑀅𑀕𑁆𑀕𑁂 𑀯𑀺𑀭𑀚𑁆𑀚𑀢𑀻𑀢𑀺 𑀲𑀫𑁆𑀧𑀢𑁆𑀢𑀺𑀬𑀸 𑀅𑀕𑁆𑀕𑁂 𑀓𑁄𑀲𑀮𑀭𑀸𑀚𑀪𑀸𑀯𑁂 𑀯𑀺𑀭𑀚𑁆𑀚𑀢𑀺. 𑀧𑀕𑁂𑀯 𑀳𑀻𑀦𑀲𑁆𑀫𑀺𑀦𑁆𑀢𑀺 𑀧𑀞𑀫𑀢𑀭𑀁𑀬𑁂𑀯 𑀳𑀻𑀦𑁂 𑀇𑀢𑁆𑀢𑀭𑀫𑀦𑀼𑀲𑁆𑀲𑀸𑀦𑀁 𑀧𑀜𑁆𑀘 𑀓𑀸𑀫𑀕𑀼𑀡𑀚𑀸𑀢𑁂.

𑀫𑀦𑁄𑀫𑀬𑀸𑀢𑀺 𑀛𑀸𑀦𑀫𑀦𑁂𑀦 𑀦𑀺𑀩𑁆𑀩𑀢𑁆𑀢𑀸. 𑀩𑀸𑀭𑀸𑀡𑀲𑁂𑀬𑁆𑀬𑀓𑀦𑁆𑀢𑀺 𑀩𑀸𑀭𑀸𑀡𑀲𑀺𑀬𑀁 𑀉𑀧𑁆𑀧𑀦𑁆𑀦𑀁. 𑀢𑀢𑁆𑀣 𑀓𑀺𑀭 𑀓𑀧𑁆𑀧𑀸𑀲𑁄𑀧𑀺 𑀫𑀼𑀤𑀼, 𑀲𑀼𑀢𑁆𑀢𑀓𑀦𑁆𑀢𑀺𑀓𑀸𑀬𑁄𑀧𑀺 𑀢𑀦𑁆𑀢𑀯𑀸𑀬𑀸𑀧𑀺 𑀙𑁂𑀓𑀸, 𑀉𑀤𑀓𑀫𑁆𑀧𑀺 𑀲𑀼𑀘𑀺 𑀲𑀺𑀦𑀺𑀤𑁆𑀥𑀁. 𑀉𑀪𑀢𑁄𑀪𑀸𑀕𑀯𑀺𑀫𑀝𑁆𑀞𑀦𑁆𑀢𑀺 𑀤𑁆𑀯𑀻𑀲𑀼𑀧𑀺 𑀧𑀲𑁆𑀲𑁂𑀲𑀼 𑀫𑀝𑁆𑀞𑀁 𑀫𑀼𑀤𑀼 𑀲𑀺𑀦𑀺𑀤𑁆𑀥𑀁 𑀔𑀸𑀬𑀢𑀺. 𑀘𑀢𑀲𑁆𑀲𑁄 𑀧𑀝𑀺𑀧𑀤𑀸 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀫𑀺𑀲𑁆𑀲𑀺𑀓𑀸 𑀓𑀣𑀺𑀢𑀸. 𑀲𑀜𑁆𑀜𑀸𑀲𑀼 𑀧𑀞𑀫𑀸 𑀓𑀸𑀫𑀸𑀯𑀘𑀭𑀲𑀜𑁆𑀜𑀸, 𑀤𑀼𑀢𑀺𑀬𑀸 𑀭𑀽𑀧𑀸𑀯𑀘𑀭𑀲𑀜𑁆𑀜𑀸, 𑀢𑀢𑀺𑀬𑀸 𑀮𑁄𑀓𑀼𑀢𑁆𑀢𑀭𑀲𑀜𑁆𑀜𑀸, 𑀘𑀢𑀼𑀢𑁆𑀣𑀸 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑀜𑁆𑀜𑀸. 𑀬𑀲𑁆𑀫𑀸 𑀧𑀦 𑀲𑀸 𑀲𑀜𑁆𑀜𑀸 𑀅𑀕𑁆𑀕𑀸𑀢𑀺 𑀆𑀕𑀢𑀸, 𑀢𑀢𑁄 𑀧𑀭𑀁 𑀲𑀜𑁆𑀜𑀸𑀧𑀜𑁆𑀜𑀢𑁆𑀢𑀺 𑀦𑀸𑀫 𑀦𑀢𑁆𑀣𑀺, 𑀢𑀲𑁆𑀫𑀸 𑀅𑀕𑁆𑀕𑀦𑁆𑀢𑀺 𑀯𑀼𑀢𑁆𑀢𑀸.

𑀩𑀸𑀳𑀺𑀭𑀓𑀸𑀦𑀦𑁆𑀢𑀺 𑀲𑀸𑀲𑀦𑀢𑁄 𑀩𑀳𑀺𑀤𑁆𑀥𑀸 𑀧𑀯𑀢𑁆𑀢𑀸𑀦𑀁. 𑀦𑁄 𑀘𑀲𑁆𑀲𑀁 𑀦𑁄 𑀘 𑀫𑁂 𑀲𑀺𑀬𑀸𑀢𑀺 𑀲𑀘𑁂 𑀅𑀳𑀁 𑀅𑀢𑀻𑀢𑁂 𑀦 𑀪𑀯𑀺𑀲𑁆𑀲𑀁, 𑀏𑀢𑀭𑀳𑀺𑀧𑀺 𑀫𑁂 𑀅𑀬𑀁 𑀅𑀢𑁆𑀢𑀪𑀸𑀯𑁄 𑀦 𑀲𑀺𑀬𑀸. 𑀦 𑀪𑀯𑀺𑀲𑁆𑀲𑀸𑀫𑀺 𑀦 𑀫𑁂 𑀪𑀯𑀺𑀲𑁆𑀲𑀢𑀻𑀢𑀺 𑀲𑀘𑁂𑀧𑀺 𑀅𑀦𑀸𑀕𑀢𑁂 𑀦 𑀪𑀯𑀺𑀲𑁆𑀲𑀸𑀫𑀺, 𑀦 𑀘 𑀫𑁂 𑀓𑀺𑀜𑁆𑀘𑀺 𑀧𑀮𑀺𑀩𑁄𑀥𑀚𑀸𑀢𑀁 𑀪𑀯𑀺𑀲𑁆𑀲𑀢𑀺. 𑀅𑀕𑁆𑀕𑁂 𑀯𑀺𑀭𑀚𑁆𑀚𑀢𑀻𑀢𑀺 𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀬𑀁 𑀯𑀺𑀭𑀚𑁆𑀚𑀢𑀺. 𑀉𑀘𑁆𑀙𑁂𑀤𑀤𑀺𑀝𑁆𑀞𑀺 𑀳𑀺 𑀇𑀥 𑀦𑀺𑀩𑁆𑀩𑀸𑀦𑀲𑁆𑀲 𑀲𑀦𑁆𑀢𑀢𑀸𑀬 𑀅𑀕𑁆𑀕𑀦𑁆𑀢𑀺 𑀚𑀸𑀢𑀸.

𑀧𑀭𑀫𑀢𑁆𑀣𑀯𑀺𑀲𑀼𑀤𑁆𑀥𑀺𑀦𑁆𑀢𑀺 𑀉𑀢𑁆𑀢𑀫𑀢𑁆𑀣𑀯𑀺𑀲𑀼𑀤𑁆𑀥𑀺𑀁. 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀬𑀸 𑀏𑀢𑀁 𑀅𑀥𑀺𑀯𑀘𑀦𑀁. 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀜𑁆𑀳𑀺 𑀯𑀺𑀧𑀲𑁆𑀲𑀦𑀸𑀧𑀤𑀝𑁆𑀞𑀸𑀦𑀢𑁆𑀢𑀸 𑀅𑀕𑁆𑀕𑀁 𑀦𑀸𑀫 𑀚𑀸𑀢𑀁, 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀤𑀻𑀖𑀸𑀬𑀼𑀓𑀢𑁆𑀢𑀸. 𑀧𑀭𑀫𑀤𑀺𑀝𑁆𑀞𑀥𑀫𑁆𑀫𑀦𑀺𑀩𑁆𑀩𑀸𑀦𑀦𑁆𑀢𑀺 𑀇𑀫𑀲𑁆𑀫𑀺𑀜𑁆𑀜𑁂𑀯 𑀅𑀢𑁆𑀢𑀪𑀸𑀯𑁂 𑀧𑀭𑀫𑀦𑀺𑀩𑁆𑀩𑀸𑀦𑀁. 𑀅𑀦𑀼𑀧𑀸𑀤𑀸 𑀯𑀺𑀫𑁄𑀓𑁆𑀔𑁄𑀢𑀺 𑀘𑀢𑀽𑀳𑀺 𑀉𑀧𑀸𑀤𑀸𑀦𑁂𑀳𑀺 𑀅𑀕𑁆𑀕𑀳𑁂𑀢𑁆𑀯𑀸 𑀘𑀺𑀢𑁆𑀢𑀲𑁆𑀲 𑀯𑀺𑀫𑁄𑀓𑁆𑀔𑁄. 𑀅𑀭𑀳𑀢𑁆𑀢𑀲𑁆𑀲𑁂𑀢𑀁 𑀦𑀸𑀫𑀁. 𑀧𑀭𑀺𑀜𑁆𑀜𑀦𑁆𑀢𑀺 𑀲𑀫𑀢𑀺𑀓𑁆𑀓𑀫𑀁. 𑀢𑀢𑁆𑀣 𑀪𑀕𑀯𑀸 𑀧𑀞𑀫𑀚𑁆𑀛𑀸𑀦𑁂𑀦 𑀓𑀸𑀫𑀸𑀦𑀁 𑀧𑀭𑀺𑀜𑁆𑀜𑀁 𑀧𑀜𑁆𑀜𑀸𑀧𑁂𑀢𑀺, 𑀅𑀭𑀽𑀧𑀸𑀯𑀘𑀭𑁂𑀳𑀺 𑀭𑀽𑀧𑀸𑀦𑀁 𑀧𑀭𑀺𑀜𑁆𑀜𑀁 𑀧𑀜𑁆𑀜𑀸𑀧𑁂𑀢𑀺, 𑀅𑀦𑀼𑀧𑀸𑀤𑀸𑀦𑀺𑀩𑁆𑀩𑀸𑀦𑁂𑀦 𑀯𑁂𑀤𑀦𑀸𑀦𑀁 𑀧𑀭𑀺𑀜𑁆𑀜𑀁 𑀧𑀜𑁆𑀜𑀸𑀧𑁂𑀢𑀺. 𑀦𑀺𑀩𑁆𑀩𑀸𑀦𑀜𑁆𑀳𑀺 𑀲𑀩𑁆𑀩𑀯𑁂𑀤𑀬𑀺𑀢𑀧𑁆𑀧𑀳𑀸𑀦𑀢𑁆𑀢𑀸 𑀯𑁂𑀤𑀦𑀸𑀦𑀁 𑀧𑀭𑀺𑀜𑁆𑀜𑀸 𑀦𑀸𑀫. 𑀅𑀦𑀼𑀧𑀸𑀤𑀸𑀧𑀭𑀺𑀦𑀺𑀩𑁆𑀩𑀸𑀦𑀦𑁆𑀢𑀺 𑀅𑀧𑀘𑁆𑀘𑀬𑀧𑀭𑀺𑀦𑀺𑀩𑁆𑀩𑀸𑀦𑀁. 𑀇𑀤𑀁 𑀧𑀦 𑀲𑀼𑀢𑁆𑀢𑀁 𑀓𑀣𑁂𑀦𑁆𑀢𑁄 𑀪𑀕𑀯𑀸 𑀅𑀦𑀪𑀺𑀭𑀢𑀺𑀧𑀻𑀴𑀺𑀢𑀸𑀦𑀺 𑀧𑀜𑁆𑀘 𑀪𑀺𑀓𑁆𑀔𑀼𑀲𑀢𑀸𑀦𑀺 𑀤𑀺𑀲𑁆𑀯𑀸 𑀢𑁂𑀲𑀁 𑀅𑀦𑀪𑀺𑀭𑀢𑀺𑀯𑀺𑀦𑁄𑀤𑀦𑀢𑁆𑀣𑀁 𑀓𑀣𑁂𑀲𑀺. 𑀢𑁂𑀧𑀺 𑀅𑀦𑀪𑀺𑀭𑀢𑀺𑀁 𑀯𑀺𑀦𑁄𑀤𑁂𑀢𑁆𑀯𑀸 𑀤𑁂𑀲𑀦𑀸𑀦𑀼𑀲𑀸𑀭𑁂𑀦 𑀜𑀸𑀡𑀁 𑀧𑁂𑀲𑁂𑀢𑁆𑀯𑀸 𑀲𑁄𑀢𑀸𑀧𑀦𑁆𑀦𑀸 𑀳𑀼𑀢𑁆𑀯𑀸 𑀅𑀧𑀭𑀪𑀸𑀕𑁂 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀁𑀲𑀽𑀢𑀺.

𑁧𑁦. 𑀤𑀼𑀢𑀺𑀬𑀓𑁄𑀲𑀮𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁦. 𑀤𑀲𑀫𑁂 𑀉𑀬𑁆𑀬𑁄𑀥𑀺𑀓𑀸 𑀦𑀺𑀯𑀢𑁆𑀢𑁄 𑀳𑁄𑀢𑀻𑀢𑀺 𑀬𑀼𑀤𑁆𑀥𑀢𑁄 𑀦𑀺𑀯𑀢𑁆𑀢𑁄 𑀳𑁄𑀢𑀺. 𑀮𑀤𑁆𑀥𑀸𑀥𑀺𑀧𑁆𑀧𑀸𑀬𑁄𑀢𑀺 𑀫𑀳𑀸𑀓𑁄𑀲𑀮𑀭𑀜𑁆𑀜𑀸 𑀓𑀺𑀭 𑀩𑀺𑀫𑁆𑀩𑀺𑀲𑀸𑀭𑀲𑁆𑀲 𑀥𑀻𑀢𑀭𑀁 𑀤𑁂𑀦𑁆𑀢𑁂𑀦 𑀤𑁆𑀯𑀺𑀦𑁆𑀦𑀁 𑀭𑀚𑁆𑀚𑀸𑀦𑀁 𑀅𑀦𑁆𑀢𑀭𑁂 𑀲𑀢𑀲𑀳𑀲𑁆𑀲𑀼𑀝𑁆𑀞𑀸𑀦𑁄 𑀓𑀸𑀲𑀺𑀕𑀸𑀫𑁄 𑀦𑀸𑀫 𑀥𑀻𑀢𑀼 𑀤𑀺𑀦𑁆𑀦𑁄. 𑀅𑀚𑀸𑀢𑀲𑀢𑁆𑀢𑀼𑀦𑀸 𑀧𑀺𑀢𑀭𑀺 𑀫𑀸𑀭𑀺𑀢𑁂 𑀫𑀸𑀢𑀸𑀧𑀺𑀲𑁆𑀲 𑀭𑀜𑁆𑀜𑁄 𑀯𑀺𑀬𑁄𑀕𑀲𑁄𑀓𑁂𑀦 𑀦𑀘𑀺𑀭𑀲𑁆𑀲𑁂𑀯 𑀫𑀢𑀸. 𑀢𑀢𑁄 𑀭𑀸𑀚𑀸 𑀧𑀲𑁂𑀦𑀤𑀺𑀓𑁄𑀲𑀮𑁄 ‘‘𑀅𑀚𑀸𑀢𑀲𑀢𑁆𑀢𑀼𑀦𑀸 𑀫𑀸𑀢𑀸𑀧𑀺𑀢𑀭𑁄 𑀫𑀸𑀭𑀺𑀢𑀸, 𑀫𑀫 𑀧𑀺𑀢𑀼 𑀲𑀦𑁆𑀢𑀓𑁄 𑀕𑀸𑀫𑁄’’𑀢𑀺 𑀢𑀲𑁆𑀲𑀢𑁆𑀣𑀸𑀬 𑀅𑀝𑁆𑀝𑀁 𑀓𑀭𑁄𑀢𑀺, 𑀅𑀚𑀸𑀢𑀲𑀢𑁆𑀢𑀼𑀧𑀺 ‘‘𑀫𑀫 𑀫𑀸𑀢𑀼 𑀲𑀦𑁆𑀢𑀓𑁄’’𑀢𑀺 𑀢𑀲𑁆𑀲 𑀕𑀸𑀫𑀲𑁆𑀲𑀢𑁆𑀣𑀸𑀬. 𑀤𑁆𑀯𑁂𑀧𑀺 𑀫𑀸𑀢𑀼𑀮𑀪𑀸𑀕𑀺𑀦𑁂𑀬𑁆𑀬𑀸 𑀘𑀢𑀼𑀭𑀗𑁆𑀕𑀺𑀦𑀺𑀁 𑀲𑁂𑀦𑀁 𑀲𑀦𑁆𑀦𑀬𑁆𑀳𑀺𑀢𑁆𑀯𑀸 𑀬𑀼𑀚𑁆𑀛𑀺𑀁𑀲𑀼. 𑀢𑀢𑁆𑀣 𑀧𑀲𑁂𑀦𑀤𑀺𑀓𑁄𑀲𑀮𑁄 𑀤𑁆𑀯𑁂 𑀯𑀸𑀭𑁂 𑀅𑀚𑀸𑀢𑀲𑀢𑁆𑀢𑀼𑀦𑀸 𑀧𑀭𑀸𑀚𑀺𑀢𑁄 𑀦𑀕𑀭𑀫𑁂𑀯 𑀧𑀸𑀯𑀺𑀲𑀺. 𑀢𑀢𑀺𑀬𑀯𑀸𑀭𑁂 ‘‘𑀓𑀣𑀁 𑀦𑀼 𑀔𑁄 𑀫𑁂 𑀚𑀬𑁄 𑀪𑀯𑁂𑀬𑁆𑀬𑀸’’𑀢𑀺 𑀉𑀧𑀲𑁆𑀲𑀼𑀢𑀺𑀯𑀲𑁂𑀦 𑀬𑀼𑀚𑁆𑀛𑀺𑀢𑀩𑁆𑀩𑀸𑀓𑀸𑀭𑀁 𑀜𑀢𑁆𑀯𑀸 𑀩𑁆𑀬𑀽𑀳𑀁 𑀭𑀘𑀬𑀺𑀢𑁆𑀯𑀸 𑀉𑀪𑁄𑀳𑀺 𑀧𑀲𑁆𑀲𑁂𑀳𑀺 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀅𑀚𑀸𑀢𑀲𑀢𑁆𑀢𑀼𑀁 𑀕𑀡𑁆𑀳𑀺. 𑀢𑀸𑀯𑀤𑁂𑀯 𑀚𑀬𑀸𑀥𑀺𑀧𑁆𑀧𑀸𑀬𑀲𑁆𑀲 𑀮𑀤𑁆𑀥𑀢𑁆𑀢𑀸 𑀮𑀤𑁆𑀥𑀸𑀥𑀺𑀧𑁆𑀧𑀸𑀬𑁄 𑀦𑀸𑀫 𑀅𑀳𑁄𑀲𑀺.

𑀬𑁂𑀦 𑀆𑀭𑀸𑀫𑁄 𑀢𑁂𑀦 𑀧𑀸𑀬𑀸𑀲𑀻𑀢𑀺 𑀩𑀳𑀺𑀦𑀕𑀭𑁂 𑀚𑀬𑀔𑀦𑁆𑀥𑀸𑀯𑀸𑀭𑀁 𑀦𑀺𑀯𑁂𑀲𑁂𑀢𑁆𑀯𑀸 ‘‘𑀬𑀸𑀯 𑀦𑀕𑀭𑀁 𑀅𑀮𑀗𑁆𑀓𑀭𑁄𑀦𑁆𑀢𑀺, 𑀢𑀸𑀯 𑀤𑀲𑀩𑀮𑀁 𑀯𑀦𑁆𑀤𑀺𑀲𑁆𑀲𑀸𑀫𑀺. 𑀦𑀕𑀭𑀁 𑀧𑀯𑀺𑀝𑁆𑀞𑀓𑀸𑀮𑀢𑁄 𑀧𑀝𑁆𑀞𑀸𑀬 𑀳𑀺 𑀧𑀧𑀜𑁆𑀘𑁄 𑀳𑁄𑀢𑀻’’𑀢𑀺 𑀅𑀫𑀘𑁆𑀘𑀕𑀡𑀧𑀭𑀺𑀯𑀼𑀢𑁄 𑀬𑁂𑀦𑀸𑀭𑀸𑀫𑁄 𑀢𑁂𑀦 𑀧𑀸𑀬𑀸𑀲𑀺, 𑀆𑀭𑀸𑀫𑀁 𑀧𑀸𑀯𑀺𑀲𑀺. 𑀓𑀲𑁆𑀫𑀺𑀁 𑀓𑀸𑀮𑁂 𑀧𑀸𑀯𑀺𑀲𑀻𑀢𑀺? 𑀧𑀺𑀡𑁆𑀟𑀧𑀸𑀢𑀧𑁆𑀧𑀝𑀺𑀓𑁆𑀓𑀦𑁆𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀑𑀯𑀸𑀤𑀁 𑀤𑀢𑁆𑀯𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂 𑀕𑀦𑁆𑀥𑀓𑀼𑀝𑀺𑀁 𑀧𑀯𑀺𑀝𑁆𑀞𑁂 𑀪𑀺𑀓𑁆𑀔𑀼𑀲𑀗𑁆𑀖𑁂 𑀘 𑀑𑀯𑀸𑀤𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀭𑀢𑁆𑀢𑀺𑀝𑁆𑀞𑀸𑀦𑀤𑀺𑀯𑀸𑀝𑁆𑀞𑀸𑀦𑀸𑀦𑀺 𑀕𑀢𑁂. 𑀘𑀗𑁆𑀓𑀫𑀦𑁆𑀢𑀻𑀢𑀺 𑀓𑀲𑁆𑀫𑀺𑀁 𑀲𑀫𑀬𑁂 𑀘𑀗𑁆𑀓𑀫𑀦𑁆𑀢𑀺? 𑀧𑀡𑀻𑀢𑀪𑁄𑀚𑀦𑀧𑀘𑁆𑀘𑀬𑀲𑁆𑀲 𑀣𑀺𑀦𑀫𑀺𑀤𑁆𑀥𑀲𑁆𑀲 𑀯𑀺𑀦𑁄𑀤𑀦𑀢𑁆𑀣𑀁, 𑀤𑀺𑀯𑀸 𑀧𑀥𑀸𑀦𑀺𑀓𑀸 𑀯𑀸 𑀢𑁂. 𑀢𑀸𑀤𑀺𑀲𑀸𑀦𑀜𑁆𑀳𑀺 𑀧𑀘𑁆𑀙𑀸𑀪𑀢𑁆𑀢𑀁 𑀘𑀗𑁆𑀓𑀫𑀺𑀢𑁆𑀯𑀸 𑀦𑁆𑀳𑀢𑁆𑀯𑀸 𑀲𑀭𑀻𑀭𑀁 𑀉𑀢𑀼𑀁 𑀕𑀸𑀳𑀸𑀧𑁂𑀢𑁆𑀯𑀸 𑀦𑀺𑀲𑀚𑁆𑀚 𑀲𑀫𑀡𑀥𑀫𑁆𑀫𑀁 𑀓𑀭𑁄𑀦𑁆𑀢𑀸𑀦𑀁 𑀘𑀺𑀢𑁆𑀢𑀁 𑀏𑀓𑀕𑁆𑀕𑀁 𑀳𑁄𑀢𑀺. 𑀬𑁂 𑀢𑁂 𑀪𑀺𑀓𑁆𑀔𑀽𑀢𑀺 𑀲𑁄 𑀓𑀺𑀭 ‘‘𑀓𑀳𑀁 𑀲𑀢𑁆𑀣𑀸 𑀓𑀳𑀁 𑀲𑀼𑀕𑀢𑁄𑀢𑀺 𑀧𑀭𑀺𑀯𑁂𑀡𑁂𑀦 𑀧𑀭𑀺𑀯𑁂𑀡𑀁 𑀆𑀕𑀦𑁆𑀢𑁆𑀯𑀸 𑀧𑀼𑀘𑁆𑀙𑀺𑀢𑁆𑀯𑀸𑀯 𑀧𑀯𑀺𑀲𑀺𑀲𑁆𑀲𑀸𑀫𑀻’’𑀢𑀺 𑀯𑀺𑀮𑁄𑀓𑁂𑀦𑁆𑀢𑁄 𑀅𑀭𑀜𑁆𑀜𑀳𑀢𑁆𑀣𑀻 𑀯𑀺𑀬 𑀫𑀳𑀸𑀘𑀗𑁆𑀓𑀫𑁂 𑀘𑀗𑁆𑀓𑀫𑀫𑀸𑀦𑁂 𑀧𑀁𑀲𑀼𑀓𑀽𑀮𑀺𑀓𑁂 𑀪𑀺𑀓𑁆𑀔𑀽 𑀤𑀺𑀲𑁆𑀯𑀸 𑀢𑁂𑀲𑀁 𑀲𑀦𑁆𑀢𑀺𑀓𑀁 𑀅𑀕𑀫𑀸𑀲𑀺. 𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀤𑀲𑁆𑀲𑀦𑀓𑀸𑀫𑀸𑀢𑀺 𑀧𑀲𑁆𑀲𑀺𑀢𑀼𑀓𑀸𑀫𑀸. 𑀯𑀺𑀳𑀸𑀭𑁄𑀢𑀺 𑀕𑀦𑁆𑀥𑀓𑀼𑀝𑀺𑀁 𑀲𑀦𑁆𑀥𑀸𑀬 𑀆𑀳𑀁𑀲𑀼. 𑀅𑀢𑀭𑀫𑀸𑀦𑁄𑀢𑀺 𑀅𑀢𑀼𑀭𑀺𑀢𑁄, 𑀲𑀡𑀺𑀓𑀁 𑀧𑀤𑀧𑀫𑀸𑀡𑀝𑁆𑀞𑀸𑀦𑁂 𑀧𑀤𑀁 𑀦𑀺𑀓𑁆𑀔𑀺𑀧𑀦𑁆𑀢𑁄 𑀯𑀢𑁆𑀢𑀁 𑀓𑀢𑁆𑀯𑀸 𑀲𑀼𑀲𑀫𑁆𑀫𑀝𑁆𑀞𑀁 𑀫𑀼𑀢𑁆𑀢𑀚𑀸𑀮𑀲𑀺𑀦𑁆𑀤𑀼𑀯𑀸𑀭𑀲𑀤𑀺𑀲𑀁 𑀯𑀸𑀮𑀼𑀓𑀁 𑀅𑀯𑀺𑀦𑀸𑀲𑁂𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀆𑀮𑀺𑀦𑁆𑀤𑀦𑁆𑀢𑀺 𑀧𑀫𑀼𑀔𑀁. 𑀅𑀕𑁆𑀕𑀴𑀦𑁆𑀢𑀺 𑀓𑀯𑀸𑀝𑀁. 𑀉𑀓𑁆𑀓𑀸𑀲𑀺𑀢𑁆𑀯𑀸𑀢𑀺 𑀉𑀓𑁆𑀓𑀸𑀲𑀺𑀢𑀲𑀤𑁆𑀤𑀁 𑀓𑀢𑁆𑀯𑀸. 𑀆𑀓𑁄𑀝𑁂𑀳𑀻𑀢𑀺 𑀅𑀕𑁆𑀕𑀦𑀔𑁂𑀦 𑀈𑀲𑀓𑀁 𑀓𑀼𑀜𑁆𑀘𑀺𑀓𑀸𑀙𑀺𑀤𑁆𑀤𑀲𑀫𑀻𑀧𑁂 𑀓𑁄𑀝𑁂𑀳𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀤𑁆𑀯𑀸𑀭𑀁 𑀓𑀺𑀭 𑀅𑀢𑀺𑀉𑀧𑀭𑀺 𑀅𑀫𑀦𑀼𑀲𑁆𑀲𑀸, 𑀅𑀢𑀺𑀳𑁂𑀝𑁆𑀞𑀸 𑀤𑀻𑀖𑀚𑀸𑀢𑀺𑀓𑀸 𑀓𑁄𑀝𑁂𑀦𑁆𑀢𑀺. 𑀢𑀣𑀸 𑀅𑀓𑁄𑀝𑁂𑀢𑁆𑀯𑀸 𑀫𑀚𑁆𑀛𑁂 𑀙𑀺𑀤𑁆𑀤𑀲𑀫𑀻𑀧𑁂 𑀓𑁄𑀝𑁂𑀢𑀩𑁆𑀩𑀦𑁆𑀢𑀺 𑀇𑀤𑀁 𑀤𑁆𑀯𑀸𑀭𑀓𑁄𑀝𑀦𑀯𑀢𑁆𑀢𑀦𑁆𑀢𑀺 𑀯𑀤𑀦𑁆𑀢𑀺. 𑀯𑀺𑀯𑀭𑀺 𑀪𑀕𑀯𑀸 𑀤𑁆𑀯𑀸𑀭𑀦𑁆𑀢𑀺 𑀦 𑀪𑀕𑀯𑀸 𑀉𑀝𑁆𑀞𑀸𑀬 𑀤𑁆𑀯𑀸𑀭𑀁 𑀯𑀺𑀯𑀭𑀢𑀺, 𑀯𑀺𑀯𑀭𑀢𑀽𑀢𑀺 𑀧𑀦 𑀳𑀢𑁆𑀣𑀁 𑀧𑀲𑀸𑀭𑁂𑀢𑀺. 𑀢𑀢𑁄 ‘‘𑀪𑀕𑀯𑀸 𑀢𑀼𑀫𑁆𑀳𑁂𑀳𑀺 𑀅𑀦𑁂𑀓𑀓𑀧𑁆𑀧𑀓𑁄𑀝𑀻𑀲𑀼 𑀤𑀸𑀦𑀁 𑀤𑀤𑀫𑀸𑀦𑁂𑀳𑀺 𑀦 𑀲𑀳𑀢𑁆𑀣𑀸 𑀤𑁆𑀯𑀸𑀭𑀯𑀺𑀯𑀭𑀡𑀓𑀫𑁆𑀫𑀁 𑀓𑀢’’𑀦𑁆𑀢𑀺 𑀲𑀬𑀫𑁂𑀯 𑀤𑁆𑀯𑀸𑀭𑀁 𑀯𑀺𑀯𑀝𑀁. 𑀢𑀁 𑀧𑀦 𑀬𑀲𑁆𑀫𑀸 𑀪𑀕𑀯𑀢𑁄 𑀫𑀦𑁂𑀦 𑀯𑀺𑀯𑀝𑀁, 𑀢𑀲𑁆𑀫𑀸 ‘‘𑀯𑀺𑀯𑀭𑀺 𑀪𑀕𑀯𑀸 𑀤𑁆𑀯𑀸𑀭’’𑀦𑁆𑀢𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺.

𑀫𑁂𑀢𑁆𑀢𑀽𑀧𑀳𑀸𑀭𑀦𑁆𑀢𑀺 𑀫𑁂𑀢𑁆𑀢𑀸𑀲𑀫𑁆𑀧𑀬𑀼𑀢𑁆𑀢𑀁 𑀓𑀸𑀬𑀺𑀓𑀯𑀸𑀘𑀲𑀺𑀓𑀉𑀧𑀳𑀸𑀭𑀁. 𑀓𑀢𑀜𑁆𑀜𑀼𑀢𑀦𑁆𑀢𑀺 𑀅𑀬𑀜𑁆𑀳𑀺 𑀭𑀸𑀚𑀸 𑀧𑀼𑀩𑁆𑀩𑁂 𑀣𑀽𑀮𑀲𑀭𑀻𑀭𑁄 𑀅𑀳𑁄𑀲𑀺, 𑀤𑁄𑀡𑀧𑀸𑀓𑀁 𑀪𑀼𑀜𑁆𑀚𑀢𑀺. 𑀅𑀣𑀲𑁆𑀲 𑀪𑀕𑀯𑀸 𑀤𑀺𑀯𑀲𑁂 𑀤𑀺𑀯𑀲𑁂 𑀣𑁄𑀓𑀁 𑀣𑁄𑀓𑀁 𑀳𑀸𑀧𑀦𑀢𑁆𑀣𑀸𑀬 𑁋

‘‘𑀫𑀦𑀼𑀚𑀲𑁆𑀲 𑀲𑀤𑀸 𑀲𑀢𑀻𑀫𑀢𑁄,

𑀫𑀢𑁆𑀢𑀁 𑀚𑀸𑀦𑀢𑁄 𑀮𑀤𑁆𑀥𑀪𑁄𑀚𑀦𑁂;

𑀢𑀦𑀼𑀓𑀲𑁆𑀲 𑀪𑀯𑀦𑁆𑀢𑀺 𑀯𑁂𑀤𑀦𑀸,

𑀲𑀡𑀺𑀓𑀁 𑀚𑀻𑀭𑀢𑀺 𑀆𑀬𑀼𑀧𑀸𑀮𑀬’’𑀦𑁆𑀢𑀺. (𑀲𑀁. 𑀦𑀺. 𑁧.𑁧𑁨𑁪) 𑁋

𑀇𑀫𑀁 𑀑𑀯𑀸𑀤𑀁 𑀅𑀤𑀸𑀲𑀺. 𑀲𑁄 𑀇𑀫𑀲𑁆𑀫𑀺𑀁 𑀑𑀯𑀸𑀤𑁂 𑀞𑀢𑁆𑀯𑀸 𑀤𑀺𑀯𑀲𑁂 𑀤𑀺𑀯𑀲𑁂 𑀣𑁄𑀓𑀁 𑀣𑁄𑀓𑀁 𑀳𑀸𑀧𑁂𑀢𑁆𑀯𑀸 𑀅𑀦𑀼𑀓𑁆𑀓𑀫𑁂𑀦 𑀦𑀸𑀴𑀺𑀓𑁄𑀤𑀦𑀧𑀭𑀫𑀢𑀸𑀬 𑀲𑀡𑁆𑀞𑀸𑀲𑀺, 𑀕𑀢𑁆𑀢𑀸𑀦𑀺𑀧𑀺𑀲𑁆𑀲 𑀢𑀦𑀽𑀦𑀺 𑀣𑀺𑀭𑀸𑀦𑀺 𑀚𑀸𑀢𑀸𑀦𑀺. 𑀢𑀁 𑀪𑀕𑀯𑀢𑀸 𑀓𑀢𑀁 𑀉𑀧𑀓𑀸𑀭𑀁 𑀲𑀦𑁆𑀥𑀸𑀬 ‘‘𑀓𑀢𑀜𑁆𑀜𑀼𑀢𑀁 𑀔𑁄 𑀅𑀳𑀁, 𑀪𑀦𑁆𑀢𑁂, 𑀓𑀢𑀯𑁂𑀤𑀺𑀢𑀁 𑀲𑀫𑁆𑀧𑀲𑁆𑀲𑀫𑀸𑀦𑁄’’𑀢𑀺 𑀆𑀳. 𑀅𑀭𑀺𑀬𑁂 𑀜𑀸𑀬𑁂𑀢𑀺 𑀲𑀳𑀯𑀺𑀧𑀲𑁆𑀲𑀦𑀓𑁂 𑀫𑀕𑁆𑀕𑁂. 𑀯𑀼𑀤𑁆𑀥𑀲𑀻𑀮𑁄𑀢𑀺 𑀯𑀟𑁆𑀠𑀺𑀢𑀲𑀻𑀮𑁄. 𑀅𑀭𑀺𑀬𑀲𑀻𑀮𑁄𑀢𑀺 𑀅𑀧𑁄𑀣𑀼𑀚𑁆𑀚𑀦𑀺𑀓𑁂𑀳𑀺 𑀲𑀻𑀮𑁂𑀳𑀺 𑀲𑀫𑀦𑁆𑀦𑀸𑀕𑀢𑁄. 𑀓𑀼𑀲𑀮𑀲𑀻𑀮𑁄𑀢𑀺 𑀅𑀦𑀯𑀚𑁆𑀚𑁂𑀳𑀺 𑀲𑀻𑀮𑁂𑀳𑀺 𑀲𑀫𑀦𑁆𑀦𑀸𑀕𑀢𑁄. 𑀆𑀭𑀜𑁆𑀜𑀓𑁄𑀢𑀺 𑀚𑀸𑀬𑀫𑀸𑀦𑁄𑀧𑀺 𑀅𑀭𑀜𑁆𑀜𑁂 𑀚𑀸𑀢𑁄, 𑀅𑀪𑀺𑀲𑀫𑁆𑀩𑀼𑀚𑁆𑀛𑀫𑀸𑀦𑁄𑀧𑀺 𑀅𑀭𑀜𑁆𑀜𑁂 𑀅𑀪𑀺𑀲𑀫𑁆𑀩𑀼𑀤𑁆𑀥𑁄, 𑀤𑁂𑀯𑀯𑀺𑀫𑀸𑀦𑀓𑀧𑁆𑀧𑀸𑀬 𑀕𑀦𑁆𑀥𑀓𑀼𑀝𑀺𑀬𑀸 𑀯𑀲𑀦𑁆𑀢𑁄𑀧𑀺 𑀅𑀭𑀜𑁆𑀜𑁂𑀬𑁂𑀯 𑀯𑀲𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 𑀏𑀯𑀫𑀸𑀳. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀫𑀳𑀸𑀯𑀕𑁆𑀕𑁄 𑀢𑀢𑀺𑀬𑁄.

𑁪. 𑀉𑀧𑀸𑀮𑀺𑀯𑀕𑁆𑀕𑁄

𑁧. 𑀉𑀧𑀸𑀮𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁧. 𑀘𑀢𑀼𑀢𑁆𑀣𑀲𑁆𑀲 𑀧𑀞𑀫𑁂 𑀲𑀗𑁆𑀖𑀲𑀼𑀝𑁆𑀞𑀼𑀢𑀸𑀬𑀸𑀢𑀺𑀆𑀤𑀻𑀲𑀼 𑀲𑀗𑁆𑀖𑀲𑀼𑀝𑁆𑀞𑀼𑀢𑀸 𑀦𑀸𑀫 𑀲𑀗𑁆𑀖𑀲𑁆𑀲 𑀲𑀼𑀝𑁆𑀞𑀼𑀪𑀸𑀯𑁄, ‘‘𑀲𑀼𑀝𑁆𑀞𑀼 𑀤𑁂𑀯𑀸’’𑀢𑀺 𑀆𑀕𑀢𑀝𑁆𑀞𑀸𑀦𑁂 𑀯𑀺𑀬 ‘‘𑀲𑀼𑀝𑁆𑀞𑀼, 𑀪𑀦𑁆𑀢𑁂’’𑀢𑀺 𑀯𑀘𑀦𑀲𑀫𑁆𑀧𑀝𑀺𑀘𑁆𑀙𑀦𑀪𑀸𑀯𑁄. 𑀬𑁄 𑀘 𑀢𑀣𑀸𑀕𑀢𑀲𑁆𑀲 𑀯𑀘𑀦𑀁 𑀲𑀫𑁆𑀧𑀝𑀺𑀘𑁆𑀙𑀢𑀺, 𑀢𑀲𑁆𑀲 𑀢𑀁 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬 𑀲𑀁𑀯𑀢𑁆𑀢𑀢𑀺. 𑀢𑀲𑁆𑀫𑀸 𑀲𑀗𑁆𑀖𑀲𑁆𑀲 ‘‘𑀲𑀼𑀝𑁆𑀞𑀼, 𑀪𑀦𑁆𑀢𑁂’’𑀢𑀺 𑀯𑀘𑀦𑀲𑀫𑁆𑀧𑀝𑀺𑀘𑁆𑀙𑀦𑀢𑁆𑀣𑀁 𑀧𑀜𑁆𑀜𑀢𑁆𑀢𑀁, 𑀅𑀲𑀫𑁆𑀧𑀝𑀺𑀘𑁆𑀙𑀦𑁂 𑀆𑀤𑀻𑀦𑀯𑀁, 𑀲𑀫𑁆𑀧𑀝𑀺𑀘𑁆𑀙𑀦𑁂 𑀆𑀦𑀺𑀲𑀁𑀲𑀁 𑀤𑀲𑁆𑀲𑁂𑀢𑁆𑀯𑀸, 𑀦 𑀩𑀮𑀓𑁆𑀓𑀸𑀭𑁂𑀦 𑀅𑀪𑀺𑀪𑀯𑀺𑀢𑁆𑀯𑀸𑀢𑀺 𑀏𑀢𑀫𑀢𑁆𑀣𑀁 𑀆𑀯𑀺𑀓𑀭𑁄𑀦𑁆𑀢𑁄 𑀆𑀳 𑁋 𑀲𑀗𑁆𑀖𑀲𑀼𑀝𑁆𑀞𑀼𑀢𑀸𑀬𑀸𑀢𑀺. 𑀲𑀗𑁆𑀖𑀨𑀸𑀲𑀼𑀢𑀸𑀬𑀸𑀢𑀺 𑀲𑀗𑁆𑀖𑀲𑁆𑀲 𑀨𑀸𑀲𑀼𑀪𑀸𑀯𑀸𑀬, 𑀲𑀳𑀚𑀻𑀯𑀺𑀢𑀸𑀬 𑀲𑀼𑀔𑀯𑀺𑀳𑀸𑀭𑀢𑁆𑀣𑀸𑀬𑀸𑀢𑀺 𑀅𑀢𑁆𑀣𑁄.

𑀤𑀼𑀫𑁆𑀫𑀗𑁆𑀓𑀽𑀦𑀁 𑀧𑀼𑀕𑁆𑀕𑀮𑀸𑀦𑀁 𑀦𑀺𑀕𑁆𑀕𑀳𑀸𑀬𑀸𑀢𑀺 𑀤𑀼𑀫𑁆𑀫𑀗𑁆𑀓𑀽𑀦𑀸𑀫 𑀤𑀼𑀲𑁆𑀲𑀻𑀮𑀧𑀼𑀕𑁆𑀕𑀮𑀸, 𑀬𑁂 𑀫𑀗𑁆𑀓𑀼𑀢𑀁 𑀆𑀧𑀸𑀤𑀺𑀬𑀫𑀸𑀦𑀸𑀧𑀺 𑀤𑀼𑀓𑁆𑀔𑁂𑀦 𑀆𑀧𑀚𑁆𑀚𑀦𑁆𑀢𑀺, 𑀯𑀻𑀢𑀺𑀓𑁆𑀓𑀫𑀁 𑀓𑀭𑁄𑀦𑁆𑀢𑀸 𑀯𑀸 𑀓𑀢𑁆𑀯𑀸 𑀯𑀸 𑀦 𑀮𑀚𑁆𑀚𑀦𑁆𑀢𑀺, 𑀢𑁂𑀲𑀁 𑀦𑀺𑀕𑁆𑀕𑀳𑀢𑁆𑀣𑀸𑀬. 𑀢𑁂 𑀳𑀺 𑀲𑀺𑀓𑁆𑀔𑀸𑀧𑀤𑁂 𑀅𑀲𑀢𑀺 ‘‘𑀓𑀺𑀁 𑀢𑀼𑀫𑁆𑀳𑁂𑀳𑀺 𑀤𑀺𑀝𑁆𑀞𑀁, 𑀓𑀺𑀁 𑀲𑀼𑀢𑀁, 𑀓𑀺𑀁 𑀅𑀫𑁆𑀳𑁂𑀳𑀺 𑀓𑀢𑀁, 𑀓𑀢𑀫𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀓𑀢𑀫𑀁 𑀆𑀧𑀢𑁆𑀢𑀺𑀁 𑀭𑁄𑀧𑁂𑀢𑁆𑀯𑀸 𑀅𑀫𑁆𑀳𑁂 𑀦𑀺𑀕𑁆𑀕𑀡𑁆𑀳𑀣𑀸’’𑀢𑀺 𑀲𑀗𑁆𑀖𑀁 𑀯𑀺𑀳𑁂𑀞𑁂𑀬𑁆𑀬𑀼𑀁. 𑀲𑀺𑀓𑁆𑀔𑀸𑀧𑀤𑁂 𑀧𑀦 𑀲𑀢𑀺 𑀢𑁂 𑀲𑀗𑁆𑀖𑁄 𑀲𑀺𑀓𑁆𑀔𑀸𑀧𑀤𑀁 𑀤𑀲𑁆𑀲𑁂𑀢𑁆𑀯𑀸 𑀲𑀳 𑀥𑀫𑁆𑀫𑁂𑀦 𑀦𑀺𑀕𑁆𑀕𑀳𑁂𑀲𑁆𑀲𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀤𑀼𑀫𑁆𑀫𑀗𑁆𑀓𑀽𑀦𑀁 𑀧𑀼𑀕𑁆𑀕𑀮𑀸𑀦𑀁 𑀦𑀺𑀕𑁆𑀕𑀳𑀸𑀬𑀸’’𑀢𑀺.

𑀧𑁂𑀲𑀮𑀸𑀦𑀦𑁆𑀢𑀺 𑀧𑀺𑀬𑀲𑀻𑀮𑀸𑀦𑀁 𑀪𑀺𑀓𑁆𑀔𑀽𑀦𑀁 𑀨𑀸𑀲𑀼𑀯𑀺𑀳𑀸𑀭𑀢𑁆𑀣𑀸𑀬. 𑀧𑀺𑀬𑀲𑀻𑀮𑀸 𑀳𑀺 𑀪𑀺𑀓𑁆𑀔𑀽 𑀓𑀢𑁆𑀢𑀩𑁆𑀩𑀸𑀓𑀢𑁆𑀢𑀩𑁆𑀩𑀁 𑀲𑀸𑀯𑀚𑁆𑀚𑀸𑀦𑀯𑀚𑁆𑀚𑀁 𑀯𑁂𑀮𑀁 𑀫𑀭𑀺𑀬𑀸𑀤𑀜𑁆𑀘 𑀅𑀚𑀸𑀦𑀦𑁆𑀢𑀸 𑀲𑀺𑀓𑁆𑀔𑀸𑀢𑁆𑀢𑀬𑀧𑀸𑀭𑀺𑀧𑀽𑀭𑀺𑀬𑀸 𑀖𑀝𑀫𑀸𑀦𑀸 𑀓𑀺𑀮𑀫𑀦𑁆𑀢𑀺, 𑀢𑁂 𑀧𑀦 𑀲𑀸𑀯𑀚𑁆𑀚𑀸𑀦𑀯𑀚𑁆𑀚𑀁 𑀯𑁂𑀮𑀁 𑀫𑀭𑀺𑀬𑀸𑀤𑀜𑁆𑀘 𑀜𑀢𑁆𑀯𑀸 𑀲𑀺𑀓𑁆𑀔𑀸𑀧𑀸𑀭𑀺𑀧𑀽𑀭𑀺𑀬𑀸 𑀖𑀝𑀫𑀸𑀦𑀸 𑀦 𑀓𑀺𑀮𑀫𑀦𑁆𑀢𑀺. 𑀢𑁂𑀦 𑀢𑁂𑀲𑀁 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀸𑀧𑀦𑀁 𑀨𑀸𑀲𑀼𑀯𑀺𑀳𑀸𑀭𑀸𑀬 𑀲𑀁𑀯𑀢𑁆𑀢𑀢𑀺𑀬𑁂𑀯. 𑀬𑁄 𑀯𑀸 𑀤𑀼𑀫𑁆𑀫𑀗𑁆𑀓𑀽𑀦𑀁 𑀧𑀼𑀕𑁆𑀕𑀮𑀸𑀦𑀁 𑀦𑀺𑀕𑁆𑀕𑀳𑁄, 𑀲𑁆𑀯𑁂𑀯 𑀢𑁂𑀲𑀁 𑀨𑀸𑀲𑀼𑀯𑀺𑀳𑀸𑀭𑁄. 𑀤𑀼𑀲𑁆𑀲𑀻𑀮𑀧𑀼𑀕𑁆𑀕𑀮𑁂 𑀦𑀺𑀲𑁆𑀲𑀸𑀬 𑀳𑀺 𑀉𑀧𑁄𑀲𑀣𑀧𑁆𑀧𑀯𑀸𑀭𑀡𑀸 𑀦 𑀢𑀺𑀝𑁆𑀞𑀦𑁆𑀢𑀺, 𑀲𑀗𑁆𑀖𑀓𑀫𑁆𑀫𑀸𑀦𑀺 𑀦𑀧𑁆𑀧𑀯𑀢𑁆𑀢𑀦𑁆𑀢𑀺, 𑀲𑀸𑀫𑀕𑁆𑀕𑀻 𑀦 𑀳𑁄𑀢𑀺, 𑀪𑀺𑀓𑁆𑀔𑀽 𑀅𑀦𑁂𑀓𑀕𑁆𑀕𑀸 𑀉𑀤𑁆𑀤𑁂𑀲𑀸𑀤𑀻𑀲𑀼 𑀅𑀦𑀼𑀬𑀼𑀜𑁆𑀚𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺. 𑀤𑀼𑀲𑁆𑀲𑀻𑀮𑁂𑀲𑀼 𑀧𑀦 𑀦𑀺𑀕𑁆𑀕𑀳𑀺𑀢𑁂𑀲𑀼 𑀲𑀩𑁆𑀩𑁄𑀧𑀺 𑀅𑀬𑀁 𑀉𑀧𑀤𑁆𑀤𑀯𑁄 𑀦 𑀳𑁄𑀢𑀺, 𑀢𑀢𑁄 𑀧𑁂𑀲𑀮𑀸 𑀪𑀺𑀓𑁆𑀔𑀽 𑀨𑀸𑀲𑀼 𑀯𑀺𑀳𑀭𑀦𑁆𑀢𑀺. 𑀏𑀯𑀁 ‘‘𑀧𑁂𑀲𑀮𑀸𑀦𑀁 𑀪𑀺𑀓𑁆𑀔𑀽𑀦𑀁 𑀨𑀸𑀲𑀼𑀯𑀺𑀳𑀸𑀭𑀸𑀬𑀸’’𑀢𑀺 𑀏𑀢𑁆𑀣 𑀤𑁆𑀯𑀺𑀥𑀸 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀤𑀺𑀝𑁆𑀞𑀥𑀫𑁆𑀫𑀺𑀓𑀸𑀦𑀁 𑀆𑀲𑀯𑀸𑀦𑀁 𑀲𑀁𑀯𑀭𑀸𑀬𑀸𑀢𑀺 𑀤𑀺𑀝𑁆𑀞𑀥𑀫𑁆𑀫𑀺𑀓𑀸 𑀆𑀲𑀯𑀸 𑀦𑀸𑀫 𑀅𑀲𑀁𑀯𑀭𑁂 𑀞𑀺𑀢𑁂𑀦 𑀢𑀲𑁆𑀫𑀺𑀁𑀬𑁂𑀯 𑀅𑀢𑁆𑀢𑀪𑀸𑀯𑁂 𑀧𑀢𑁆𑀢𑀩𑁆𑀩𑀸 𑀧𑀸𑀡𑀺𑀧𑁆𑀧𑀳𑀸𑀭𑀤𑀡𑁆𑀟𑀧𑁆𑀧𑀳𑀸𑀭𑀲𑀢𑁆𑀣𑀧𑁆𑀧𑀳𑀸𑀭𑀳𑀢𑁆𑀣𑀘𑁆𑀙𑁂𑀤𑀧𑀸𑀤𑀘𑁆𑀙𑁂𑀤𑀅𑀓𑀺𑀢𑁆𑀢𑀺𑀅𑀬𑀲𑀯𑀺𑀧𑁆𑀧𑀝𑀺𑀲𑀸𑀭𑀸𑀤𑀬𑁄 𑀤𑀼𑀓𑁆𑀔𑀯𑀺𑀲𑁂𑀲𑁄, 𑀢𑁂𑀲𑀁 𑀲𑀁𑀯𑀭𑀸𑀬 𑀧𑀺𑀤𑀳𑀦𑀸𑀬 𑀆𑀕𑀫𑀦𑀫𑀕𑁆𑀕𑀣𑀓𑀦𑀸𑀬𑀸𑀢𑀺 𑀅𑀢𑁆𑀣𑁄. 𑀲𑀫𑁆𑀧𑀭𑀸𑀬𑀺𑀓𑀸𑀦𑀦𑁆𑀢𑀺 𑀲𑀫𑁆𑀧𑀭𑀸𑀬𑀺𑀓𑀸 𑀆𑀲𑀯𑀸 𑀦𑀸𑀫 𑀅𑀲𑀁𑀯𑀭𑁂 𑀞𑀺𑀢𑁂𑀦 𑀓𑀢𑀧𑀸𑀧𑀓𑀫𑁆𑀫𑀫𑀽𑀮𑀓𑀸 𑀲𑀫𑁆𑀧𑀭𑀸𑀬𑁂 𑀦𑀭𑀓𑀸𑀤𑀻𑀲𑀼 𑀧𑀢𑁆𑀢𑀩𑁆𑀩𑀸 𑀤𑀼𑀓𑁆𑀔𑀯𑀺𑀲𑁂𑀲𑀸, 𑀢𑁂𑀲𑀁 𑀧𑀝𑀺𑀖𑀸𑀢𑀢𑁆𑀣𑀸𑀬 𑀯𑀽𑀧𑀲𑀫𑀢𑁆𑀣𑀸𑀬.

𑀅𑀧𑁆𑀧𑀲𑀦𑁆𑀦𑀸𑀦𑀦𑁆𑀢𑀺 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀬𑀸 𑀳𑀺 𑀲𑀢𑀺 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀁 𑀜𑀢𑁆𑀯𑀸 𑀯𑀸, 𑀬𑀣𑀸𑀧𑀜𑁆𑀜𑀢𑁆𑀢𑀁 𑀧𑀝𑀺𑀧𑀚𑁆𑀚𑀫𑀸𑀦𑁂 𑀪𑀺𑀓𑁆𑀔𑀽 𑀤𑀺𑀲𑁆𑀯𑀸 𑀯𑀸, 𑀬𑁂𑀧𑀺 𑀅𑀧𑁆𑀧𑀲𑀦𑁆𑀦𑀸 𑀧𑀡𑁆𑀟𑀺𑀢𑀫𑀦𑀼𑀲𑁆𑀲𑀸, 𑀢𑁂 ‘‘𑀬𑀸𑀦𑀺 𑀯𑀢 𑀮𑁄𑀓𑁂 𑀫𑀳𑀸𑀚𑀦𑀲𑁆𑀲 𑀭𑀚𑁆𑀚𑀦𑀤𑀼𑀲𑁆𑀲𑀦𑀫𑀼𑀬𑁆𑀳𑀦𑀝𑁆𑀞𑀸𑀦𑀸𑀦𑀺, 𑀢𑁂𑀳𑀺 𑀇𑀫𑁂 𑀲𑀫𑀡𑀸 𑀆𑀭𑀓𑀸 𑀯𑀺𑀭𑀢𑀸 𑀯𑀺𑀳𑀭𑀦𑁆𑀢𑀺, 𑀤𑀼𑀓𑁆𑀓𑀭𑀁 𑀯𑀢 𑀓𑀭𑁄𑀦𑁆𑀢𑀻’’𑀢𑀺 𑀧𑀲𑀸𑀤𑀁 𑀆𑀧𑀚𑁆𑀚𑀦𑁆𑀢𑀺 𑀯𑀺𑀦𑀬𑀧𑀺𑀝𑀓𑀧𑁄𑀢𑁆𑀣𑀓𑀁 𑀤𑀺𑀲𑁆𑀯𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀢𑀯𑁂𑀤𑀺𑀩𑁆𑀭𑀸𑀳𑁆𑀫𑀡𑀸 𑀯𑀺𑀬. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀅𑀧𑁆𑀧𑀲𑀦𑁆𑀦𑀸𑀦𑀁 𑀧𑀲𑀸𑀤𑀸𑀬𑀸’’𑀢𑀺.

𑀧𑀲𑀦𑁆𑀦𑀸𑀦𑀦𑁆𑀢𑀺 𑀬𑁂𑀧𑀺 𑀲𑀸𑀲𑀦𑁂 𑀧𑀲𑀦𑁆𑀦𑀸 𑀓𑀼𑀮𑀧𑀼𑀢𑁆𑀢𑀸, 𑀢𑁂𑀧𑀺 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀁 𑀯𑀸 𑀜𑀢𑁆𑀯𑀸, 𑀬𑀣𑀸𑀧𑀜𑁆𑀜𑀢𑁆𑀢𑀁 𑀧𑀝𑀺𑀧𑀚𑁆𑀚𑀫𑀸𑀦𑁂 𑀪𑀺𑀓𑁆𑀔𑀽 𑀯𑀸 𑀤𑀺𑀲𑁆𑀯𑀸 ‘‘𑀅𑀳𑁄 𑀅𑀬𑁆𑀬𑀸 𑀤𑀼𑀓𑁆𑀓𑀭𑀁 𑀓𑀭𑁄𑀦𑁆𑀢𑀺, 𑀬𑁂 𑀬𑀸𑀯𑀚𑀻𑀯𑀁 𑀏𑀓𑀪𑀢𑁆𑀢𑀸 𑀯𑀺𑀦𑀬𑀲𑀁𑀯𑀭𑀁 𑀧𑀸𑀮𑁂𑀦𑁆𑀢𑀻’’𑀢𑀺 𑀪𑀺𑀬𑁆𑀬𑁄 𑀪𑀺𑀬𑁆𑀬𑁄 𑀧𑀲𑀻𑀤𑀦𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀧𑀲𑀦𑁆𑀦𑀸𑀦𑀁 𑀪𑀺𑀬𑁆𑀬𑁄𑀪𑀸𑀯𑀸𑀬𑀸’’𑀢𑀺.

𑀲𑀤𑁆𑀥𑀫𑁆𑀫𑀝𑁆𑀞𑀺𑀢𑀺𑀬𑀸𑀢𑀺 𑀢𑀺𑀯𑀺𑀥𑁄 𑀲𑀤𑁆𑀥𑀫𑁆𑀫𑁄 𑀧𑀭𑀺𑀬𑀢𑁆𑀢𑀺𑀲𑀤𑁆𑀥𑀫𑁆𑀫𑁄 𑀧𑀝𑀺𑀧𑀢𑁆𑀢𑀺𑀲𑀤𑁆𑀥𑀫𑁆𑀫𑁄 𑀅𑀥𑀺𑀕𑀫𑀲𑀤𑁆𑀥𑀫𑁆𑀫𑁄𑀢𑀺. 𑀢𑀢𑁆𑀣 𑀲𑀓𑀮𑀫𑁆𑀧𑀺 𑀩𑀼𑀤𑁆𑀥𑀯𑀘𑀦𑀁 𑀧𑀭𑀺𑀬𑀢𑁆𑀢𑀺𑀲𑀤𑁆𑀥𑀫𑁆𑀫𑁄 𑀦𑀸𑀫. 𑀢𑁂𑀭𑀲 𑀥𑀼𑀢𑀕𑀼𑀡𑀸 𑀘𑀸𑀭𑀺𑀢𑁆𑀢𑀯𑀸𑀭𑀺𑀢𑁆𑀢𑀲𑀻𑀮𑀲𑀫𑀸𑀥𑀺𑀯𑀺𑀧𑀲𑁆𑀲𑀦𑀸𑀢𑀺 𑀅𑀬𑀁 𑀧𑀝𑀺𑀧𑀢𑁆𑀢𑀺𑀲𑀤𑁆𑀥𑀫𑁆𑀫𑁄 𑀦𑀸𑀫. 𑀦𑀯𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁄 𑀅𑀥𑀺𑀕𑀫𑀲𑀤𑁆𑀥𑀫𑁆𑀫𑁄 𑀦𑀸𑀫. 𑀲𑁄 𑀲𑀩𑁆𑀩𑁄𑀧𑀺 𑀬𑀲𑁆𑀫𑀸 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀬𑀸 𑀲𑀢𑀺 𑀪𑀺𑀓𑁆𑀔𑀽 𑀲𑀺𑀓𑁆𑀔𑀸𑀧𑀤𑀜𑁆𑀘 𑀢𑀲𑁆𑀲 𑀯𑀺𑀪𑀗𑁆𑀕𑀜𑁆𑀘 𑀢𑀤𑀢𑁆𑀣𑀚𑁄𑀢𑀦𑀢𑁆𑀣𑀁 𑀅𑀜𑁆𑀜𑀜𑁆𑀘 𑀩𑀼𑀤𑁆𑀥𑀯𑀘𑀦𑀁 𑀧𑀭𑀺𑀬𑀸𑀧𑀼𑀡𑀦𑁆𑀢𑀺, 𑀬𑀣𑀸𑀧𑀜𑁆𑀜𑀢𑁆𑀢𑀜𑁆𑀘 𑀧𑀝𑀺𑀧𑀚𑁆𑀚𑀫𑀸𑀦𑀸 𑀧𑀝𑀺𑀧𑀢𑁆𑀢𑀺𑀁 𑀧𑀽𑀭𑁂𑀢𑁆𑀯𑀸 𑀧𑀝𑀺𑀧𑀢𑁆𑀢𑀺𑀬𑀸 𑀅𑀥𑀺𑀕𑀦𑁆𑀢𑀩𑁆𑀩𑀁 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀁 𑀅𑀥𑀺𑀕𑀘𑁆𑀙𑀦𑁆𑀢𑀺, 𑀢𑀲𑁆𑀫𑀸 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀬𑀸 𑀲𑀤𑁆𑀥𑀫𑁆𑀫𑁄 𑀘𑀺𑀭𑀝𑁆𑀞𑀺𑀢𑀺𑀓𑁄 𑀳𑁄𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀲𑀤𑁆𑀥𑀫𑁆𑀫𑀝𑁆𑀞𑀺𑀢𑀺𑀬𑀸’’𑀢𑀺.

𑀯𑀺𑀦𑀬𑀸𑀦𑀼𑀕𑁆𑀕𑀳𑀸𑀬𑀸𑀢𑀺 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀬𑀸 𑀲𑀢𑀺 𑀲𑀁𑀯𑀭𑀯𑀺𑀦𑀬𑁄, 𑀧𑀳𑀸𑀦𑀯𑀺𑀦𑀬𑁄, 𑀲𑀫𑀣𑀯𑀺𑀦𑀬𑁄, 𑀧𑀜𑁆𑀜𑀢𑁆𑀢𑀺𑀯𑀺𑀦𑀬𑁄𑀢𑀺 𑀘𑀢𑀼𑀩𑁆𑀩𑀺𑀥𑁄 𑀯𑀺𑀦𑀬𑁄 𑀅𑀦𑀼𑀕𑁆𑀕𑀳𑀺𑀢𑁄 𑀳𑁄𑀢𑀺 𑀲𑀽𑀧𑀢𑁆𑀣𑀫𑁆𑀪𑀺𑀢𑁄. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀯𑀺𑀦𑀬𑀸𑀦𑀼𑀕𑁆𑀕𑀳𑀸𑀬𑀸’’𑀢𑀺.

𑁨. 𑀧𑀸𑀢𑀺𑀫𑁄𑀓𑁆𑀔𑀝𑁆𑀞𑀧𑀦𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁨. 𑀤𑀼𑀢𑀺𑀬𑁂 𑀧𑀸𑀭𑀸𑀚𑀺𑀓𑁄𑀢𑀺 𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺𑀁 𑀆𑀧𑀦𑁆𑀦𑁄. 𑀧𑀸𑀭𑀸𑀚𑀺𑀓𑀓𑀣𑀸 𑀯𑀺𑀧𑁆𑀧𑀓𑀢𑀸 𑀳𑁄𑀢𑀻𑀢𑀺 ‘‘𑀅𑀲𑀼𑀓𑀧𑀼𑀕𑁆𑀕𑀮𑁄 𑀧𑀸𑀭𑀸𑀚𑀺𑀓𑀁 𑀆𑀧𑀦𑁆𑀦𑁄 𑀦𑀼 𑀔𑁄 𑀦𑁄’’𑀢𑀺 𑀏𑀯𑀁 𑀓𑀣𑀸 𑀆𑀭𑀪𑀺𑀢𑁆𑀯𑀸 𑀅𑀦𑀺𑀝𑁆𑀞𑀸𑀧𑀺𑀢𑀸 𑀳𑁄𑀢𑀺. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣.

𑁩. 𑀉𑀩𑁆𑀩𑀸𑀳𑀺𑀓𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁩. 𑀢𑀢𑀺𑀬𑁂 𑀉𑀩𑁆𑀩𑀸𑀳𑀺𑀓𑀸𑀬𑀸𑀢𑀺 𑀲𑀫𑁆𑀧𑀢𑁆𑀢𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑁂𑀢𑀼𑀁 𑀲𑀗𑁆𑀖𑀢𑁄 𑀉𑀩𑁆𑀩𑀸𑀳𑀺𑀢𑁆𑀯𑀸 𑀉𑀤𑁆𑀥𑀭𑀺𑀢𑁆𑀯𑀸 𑀕𑀳𑀡𑀢𑁆𑀣𑀸𑀬. 𑀯𑀺𑀦𑀬𑁂 𑀔𑁄 𑀧𑀦 𑀞𑀺𑀢𑁄 𑀳𑁄𑀢𑀻𑀢𑀺 𑀯𑀺𑀦𑀬𑀮𑀓𑁆𑀔𑀡𑁂 𑀧𑀢𑀺𑀝𑁆𑀞𑀺𑀢𑁄 𑀳𑁄𑀢𑀺. 𑀅𑀲𑀁𑀳𑀻𑀭𑁄𑀢𑀺 𑀦 𑀅𑀜𑁆𑀜𑀲𑁆𑀲 𑀯𑀘𑀦𑀫𑀢𑁆𑀢𑁂𑀦𑁂𑀯 𑀅𑀢𑁆𑀢𑀦𑁄 𑀮𑀤𑁆𑀥𑀺𑀁 𑀯𑀺𑀲𑁆𑀲𑀚𑁆𑀚𑁂𑀢𑀺. 𑀧𑀝𑀺𑀩𑀮𑁄𑀢𑀺 𑀓𑀸𑀬𑀩𑀮𑁂𑀦𑀧𑀺 𑀜𑀸𑀡𑀩𑀮𑁂𑀦𑀧𑀺 𑀲𑀫𑀦𑁆𑀦𑀸𑀕𑀢𑁄. 𑀲𑀜𑁆𑀜𑀸𑀧𑁂𑀢𑀼𑀦𑁆𑀢𑀺 𑀚𑀸𑀦𑀸𑀧𑁂𑀢𑀼𑀁. 𑀧𑀜𑁆𑀜𑀸𑀧𑁂𑀢𑀼𑀦𑁆𑀢𑀺 𑀲𑀫𑁆𑀧𑀚𑀸𑀦𑀸𑀧𑁂𑀢𑀼𑀁. 𑀦𑀺𑀚𑁆𑀛𑀸𑀧𑁂𑀢𑀼𑀦𑁆𑀢𑀺 𑀑𑀮𑁄𑀓𑀸𑀧𑁂𑀢𑀼𑀁. 𑀧𑁂𑀓𑁆𑀔𑀢𑀼𑀦𑁆𑀢𑀺 𑀧𑀲𑁆𑀲𑀸𑀧𑁂𑀢𑀼𑀁. 𑀧𑀲𑀸𑀤𑁂𑀢𑀼𑀦𑁆𑀢𑀺 𑀲𑀜𑁆𑀚𑀸𑀢𑀧𑀲𑀸𑀤𑀁 𑀓𑀸𑀢𑀼𑀁. 𑀅𑀥𑀺𑀓𑀭𑀡𑀦𑁆𑀢𑀺 𑀯𑀺𑀯𑀸𑀤𑀸𑀥𑀺𑀓𑀭𑀡𑀸𑀤𑀺𑀘𑀢𑀼𑀩𑁆𑀩𑀺𑀥𑀁. 𑀅𑀥𑀺𑀓𑀭𑀡𑀲𑀫𑀼𑀤𑀬𑀦𑁆𑀢𑀺 𑀯𑀺𑀯𑀸𑀤𑀫𑀽𑀮𑀸𑀤𑀺𑀓𑀁 𑀅𑀥𑀺𑀓𑀭𑀡𑀓𑀸𑀭𑀓𑀁. 𑀅𑀥𑀺𑀓𑀭𑀡𑀦𑀺𑀭𑁄𑀥𑀦𑁆𑀢𑀺 𑀅𑀥𑀺𑀓𑀭𑀡𑀸𑀦𑀁 𑀯𑀽𑀧𑀲𑀫𑀁. 𑀅𑀥𑀺𑀓𑀭𑀡𑀦𑀺𑀭𑁄𑀥𑀕𑀸𑀫𑀺𑀦𑀺𑀁 𑀧𑀝𑀺𑀧𑀤𑀦𑁆𑀢𑀺 𑀲𑀢𑁆𑀢𑀯𑀺𑀥𑀅𑀥𑀺𑀓𑀭𑀡𑀲𑀫𑀣𑀁.

𑁪. 𑀉𑀧𑀲𑀫𑁆𑀧𑀤𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁪. 𑀘𑀢𑀼𑀢𑁆𑀣𑁂 𑀅𑀦𑀪𑀺𑀭𑀢𑀺𑀦𑁆𑀢𑀺 𑀉𑀓𑁆𑀓𑀡𑁆𑀞𑀺𑀢𑀪𑀸𑀯𑀁. 𑀯𑀽𑀧𑀓𑀸𑀲𑁂𑀢𑀼𑀦𑁆𑀢𑀺 𑀯𑀺𑀦𑁂𑀢𑀼𑀁. 𑀅𑀥𑀺𑀲𑀻𑀮𑁂𑀢𑀺 𑀉𑀢𑁆𑀢𑀫𑀲𑀻𑀮𑁂. 𑀘𑀺𑀢𑁆𑀢𑀧𑀜𑁆𑀜𑀸𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑁭. 𑀲𑀗𑁆𑀖𑀪𑁂𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁭. 𑀲𑀢𑁆𑀢𑀫𑁂 𑀯𑀢𑁆𑀣𑀽𑀳𑀻𑀢𑀺 𑀓𑀸𑀭𑀡𑁂𑀳𑀺. 𑀅𑀯𑀓𑀲𑁆𑀲𑀦𑁆𑀢𑀻𑀢𑀺 𑀧𑀭𑀺𑀲𑀁 𑀆𑀓𑀟𑁆𑀠𑀦𑁆𑀢𑀺 𑀯𑀺𑀚𑀝𑁂𑀦𑁆𑀢𑀺 𑀏𑀓𑀫𑀦𑁆𑀢𑀁 𑀉𑀲𑁆𑀲𑀸𑀭𑁂𑀦𑁆𑀢𑀺. 𑀅𑀧𑀓𑀲𑁆𑀲𑀦𑁆𑀢𑀻𑀢𑀺 𑀅𑀢𑀺𑀯𑀺𑀬 𑀆𑀓𑀟𑁆𑀠𑀦𑁆𑀢𑀺, 𑀬𑀣𑀸 𑀯𑀺𑀲𑀁𑀲𑀝𑁆𑀞𑀸 𑀳𑁄𑀦𑁆𑀢𑀺, 𑀏𑀯𑀁 𑀓𑀭𑁄𑀦𑁆𑀢𑀺. 𑀆𑀯𑁂𑀦𑀺 𑀓𑀫𑁆𑀫𑀸𑀦𑀺 𑀓𑀭𑁄𑀦𑁆𑀢𑀻𑀢𑀺 𑀯𑀺𑀲𑀼𑀁 𑀲𑀗𑁆𑀖𑀓𑀫𑁆𑀫𑀸𑀦𑀺 𑀓𑀭𑁄𑀦𑁆𑀢𑀺.

𑁯-𑁧𑁦. 𑀆𑀦𑀦𑁆𑀤𑀲𑀼𑀢𑁆𑀢𑀤𑁆𑀯𑀬𑀯𑀡𑁆𑀡𑀦𑀸

𑁩𑁯-𑁪𑁦. 𑀦𑀯𑀫𑁂 𑀓𑀧𑁆𑀧𑀝𑁆𑀞𑀺𑀓𑀦𑁆𑀢𑀺 𑀆𑀬𑀼𑀓𑀧𑁆𑀧𑀁 𑀦𑀺𑀭𑀬𑀫𑁆𑀳𑀺 𑀞𑀺𑀢𑀺𑀓𑀸𑀭𑀡𑀁. 𑀓𑀺𑀩𑁆𑀩𑀺𑀲𑀁 𑀧𑀲𑀯𑀢𑀻𑀢𑀺 𑀧𑀸𑀧𑀁 𑀧𑀝𑀺𑀮𑀪𑀢𑀺. 𑀆𑀧𑀸𑀬𑀺𑀓𑁄𑀢𑀺 𑀅𑀧𑀸𑀬𑀕𑀫𑀦𑀻𑀬𑁄. 𑀦𑁂𑀭𑀬𑀺𑀓𑁄𑀢𑀺 𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀦𑀓𑁄. 𑀯𑀕𑁆𑀕𑀭𑀢𑁄𑀢𑀺 𑀪𑁂𑀤𑀭𑀢𑁄. 𑀬𑁄𑀕𑀓𑁆𑀔𑁂𑀫𑀸 𑀧𑀥𑀁𑀲𑀢𑀻𑀢𑀺 𑀬𑁄𑀕𑁂𑀳𑀺 𑀔𑁂𑀫𑀢𑁄 𑀅𑀭𑀳𑀢𑁆𑀢𑀢𑁄 𑀥𑀁𑀲𑀢𑀺 𑀯𑀺𑀕𑀘𑁆𑀙𑀢𑀺. 𑀤𑀲𑀫𑁂 𑀅𑀦𑀼𑀕𑁆𑀕𑀳𑁄𑀢𑀺 𑀅𑀜𑁆𑀜𑀫𑀜𑁆𑀜𑀲𑁆𑀲 𑀲𑀗𑁆𑀕𑀳𑀸𑀦𑀼𑀕𑁆𑀕𑀳𑁄. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀉𑀧𑀸𑀮𑀺𑀯𑀕𑁆𑀕𑁄 𑀘𑀢𑀼𑀢𑁆𑀣𑁄.

𑁫. 𑀅𑀓𑁆𑀓𑁄𑀲𑀯𑀕𑁆𑀕𑁄

𑁪. 𑀓𑀼𑀲𑀺𑀦𑀸𑀭𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁪. 𑀧𑀜𑁆𑀘𑀫𑀲𑁆𑀲 𑀘𑀢𑀼𑀢𑁆𑀣𑁂 𑀓𑀼𑀲𑀺𑀦𑀸𑀭𑀸𑀬𑀦𑁆𑀢𑀺 𑀏𑀯𑀁𑀦𑀸𑀫𑀓𑁂 𑀦𑀕𑀭𑁂. 𑀤𑁂𑀯𑀢𑀸𑀦𑀁 𑀅𑀢𑁆𑀣𑀸𑀬 𑀩𑀮𑀺𑀁 𑀳𑀭𑀦𑁆𑀢𑀺 𑀏𑀢𑁆𑀣𑀸𑀢𑀺 𑀩𑀮𑀺𑀳𑀭𑀡𑁄, 𑀢𑀲𑁆𑀫𑀺𑀁 𑀩𑀮𑀺𑀳𑀭𑀡𑁂. 𑀅𑀘𑁆𑀙𑀺𑀤𑁆𑀤𑁂𑀦 𑀅𑀧𑁆𑀧𑀝𑀺𑀫𑀁𑀲𑁂𑀦𑀸𑀢𑀺𑀆𑀤𑀻𑀲𑀼 𑀬𑁂𑀦 𑀓𑁂𑀦𑀘𑀺𑀤𑁂𑀯 𑀧𑀳𑀝𑁄 𑀯𑀸 𑀳𑁄𑀢𑀺, 𑀯𑁂𑀚𑁆𑀚𑀓𑀫𑁆𑀫𑀸𑀤𑀻𑀦𑀺 𑀯𑀸 𑀓𑀢𑀸𑀦𑀺, 𑀢𑀲𑁆𑀲 𑀓𑀸𑀬𑀲𑀫𑀸𑀘𑀸𑀭𑁄 𑀉𑀧𑀘𑀺𑀓𑀸𑀤𑀻𑀳𑀺 𑀔𑀸𑀬𑀺𑀢𑀢𑀸𑀮𑀧𑀡𑁆𑀡𑀁 𑀯𑀺𑀬 𑀙𑀺𑀤𑁆𑀤𑁄 𑀘, 𑀧𑀝𑀺𑀫𑀲𑀺𑀢𑀼𑀁 𑀬𑀢𑁆𑀣 𑀓𑀢𑁆𑀣𑀘𑀺 𑀕𑀳𑁂𑀢𑁆𑀯𑀸 𑀆𑀓𑀟𑁆𑀠𑀺𑀢𑀼𑀁 𑀲𑀓𑁆𑀓𑀼𑀡𑁂𑀬𑁆𑀬𑀢𑀸𑀬 𑀧𑀝𑀺𑀫𑀁𑀲𑁄 𑀘 𑀳𑁄𑀢𑀺, 𑀯𑀺𑀧𑀭𑀻𑀢𑁄 𑀅𑀘𑁆𑀙𑀺𑀤𑁆𑀤𑁄 𑀅𑀧𑁆𑀧𑀝𑀺𑀫𑀁𑀲𑁄 𑀦𑀸𑀫. 𑀯𑀘𑀻𑀲𑀫𑀸𑀘𑀸𑀭𑁄 𑀧𑀦 𑀫𑀼𑀲𑀸𑀯𑀸𑀤𑀑𑀫𑀲𑀯𑀸𑀤𑀧𑁂𑀲𑀼𑀜𑁆𑀜𑀅𑀫𑀽𑀮𑀓𑀸𑀦𑀼𑀤𑁆𑀥𑀁𑀲𑀦𑀸𑀤𑀻𑀳𑀺 𑀙𑀺𑀤𑁆𑀤𑁄 𑀲𑀧𑁆𑀧𑀝𑀺𑀫𑀁𑀲𑁄 𑀘 𑀳𑁄𑀢𑀺, 𑀯𑀺𑀧𑀭𑀻𑀢𑁄 𑀅𑀘𑁆𑀙𑀺𑀤𑁆𑀤𑁄 𑀅𑀧𑁆𑀧𑀝𑀺𑀫𑀁𑀲𑁄. 𑀫𑁂𑀢𑁆𑀢𑀁 𑀦𑀼 𑀔𑁄 𑀫𑁂 𑀘𑀺𑀢𑁆𑀢𑀦𑁆𑀢𑀺 𑀧𑀮𑀺𑀩𑁄𑀥𑀁 𑀙𑀺𑀦𑁆𑀤𑀺𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑀪𑀸𑀯𑀦𑀸𑀦𑀼𑀬𑁄𑀕𑁂𑀦 𑀅𑀥𑀺𑀕𑀢𑀁 𑀫𑁂 𑀫𑁂𑀢𑁆𑀢𑀘𑀺𑀢𑁆𑀢𑀁. 𑀅𑀦𑀸𑀖𑀸𑀢𑀦𑁆𑀢𑀺 𑀆𑀖𑀸𑀢𑀯𑀺𑀭𑀳𑀺𑀢𑀁, 𑀯𑀺𑀓𑁆𑀔𑀫𑁆𑀪𑀦𑁂𑀦 𑀯𑀺𑀳𑀢𑀸𑀖𑀸𑀢𑀦𑁆𑀢𑀺 𑀅𑀢𑁆𑀣𑁄. 𑀓𑀢𑁆𑀣 𑀯𑀼𑀢𑁆𑀢𑀦𑁆𑀢𑀺 𑀇𑀤𑀁 𑀲𑀺𑀓𑁆𑀔𑀸𑀧𑀤𑀁 𑀓𑀺𑀲𑁆𑀫𑀺𑀁 𑀦𑀕𑀭𑁂 𑀯𑀼𑀢𑁆𑀢𑀁.

𑀓𑀸𑀮𑁂𑀦 𑀯𑀓𑁆𑀔𑀸𑀫𑀻𑀢𑀺𑀆𑀤𑀻𑀲𑀼 𑀏𑀓𑁄 𑀏𑀓𑀁 𑀑𑀓𑀸𑀲𑀁 𑀓𑀸𑀭𑁂𑀢𑁆𑀯𑀸 𑀘𑁄𑀤𑁂𑀦𑁆𑀢𑁄 𑀓𑀸𑀮𑁂𑀦 𑀯𑀤𑀢𑀺 𑀦𑀸𑀫. 𑀲𑀗𑁆𑀖𑀫𑀚𑁆𑀛𑁂 𑀯𑀸 𑀕𑀡𑀫𑀚𑁆𑀛𑁂 𑀯𑀸 𑀲𑀮𑀸𑀓𑀕𑁆𑀕𑀬𑀸𑀕𑀕𑁆𑀕𑀯𑀺𑀢𑀓𑁆𑀓𑀫𑀸𑀴𑀓𑀪𑀺𑀓𑁆𑀔𑀸𑀘𑀸𑀭𑀫𑀕𑁆𑀕𑀆𑀲𑀦𑀲𑀸𑀮𑀸𑀤𑀻𑀲𑀼 𑀯𑀸 𑀉𑀧𑀝𑁆𑀞𑀸𑀓𑁂𑀳𑀺 𑀧𑀭𑀺𑀯𑀸𑀭𑀺𑀢𑀓𑁆𑀔𑀡𑁂 𑀯𑀸 𑀘𑁄𑀤𑁂𑀦𑁆𑀢𑁄 𑀅𑀓𑀸𑀮𑁂𑀦 𑀯𑀤𑀢𑀺 𑀦𑀸𑀫. 𑀢𑀘𑁆𑀙𑁂𑀦 𑀯𑀤𑀦𑁆𑀢𑁄 𑀪𑀽𑀢𑁂𑀦 𑀯𑀤𑀢𑀺 𑀦𑀸𑀫. ‘‘𑀤𑀳𑀭𑀫𑀳𑀮𑁆𑀮𑀓𑀧𑀭𑀺𑀲𑀸𑀯𑀘𑀭𑀓𑀧𑀁𑀲𑀼𑀓𑀽𑀮𑀺𑀓𑀥𑀫𑁆𑀫𑀓𑀣𑀺𑀓𑀧𑀢𑀺𑀭𑀽𑀧𑀁 𑀢𑀯 𑀇𑀤’’𑀦𑁆𑀢𑀺 𑀯𑀤𑀦𑁆𑀢𑁄 𑀨𑀭𑀼𑀲𑁂𑀦 𑀯𑀤𑀢𑀺 𑀦𑀸𑀫. 𑀓𑀸𑀭𑀡𑀦𑀺𑀲𑁆𑀲𑀺𑀢𑀁 𑀧𑀦 𑀓𑀢𑁆𑀯𑀸, ‘‘𑀪𑀦𑁆𑀢𑁂 𑀫𑀳𑀮𑁆𑀮𑀓𑀢𑁆𑀣, 𑀧𑀭𑀺𑀲𑀸𑀯𑀘𑀭𑀓𑀢𑁆𑀣, 𑀧𑀁𑀲𑀼𑀓𑀽𑀮𑀺𑀓𑀢𑁆𑀣, 𑀥𑀫𑁆𑀫𑀓𑀣𑀺𑀓𑀢𑁆𑀣𑀧𑀢𑀺𑀭𑀽𑀧𑀁 𑀢𑀼𑀫𑁆𑀳𑀸𑀓𑀫𑀺𑀤’’𑀦𑁆𑀢𑀺 𑀯𑀤𑀦𑁆𑀢𑁄 𑀲𑀡𑁆𑀳𑁂𑀦 𑀯𑀤𑀢𑀺 𑀦𑀸𑀫. 𑀓𑀸𑀭𑀡𑀦𑀺𑀲𑁆𑀲𑀺𑀢𑀁 𑀓𑀢𑁆𑀯𑀸 𑀯𑀤𑀦𑁆𑀢𑁄 𑀅𑀢𑁆𑀣𑀲𑀁𑀳𑀺𑀢𑁂𑀦 𑀯𑀤𑀢𑀺 𑀦𑀸𑀫. 𑀫𑁂𑀢𑁆𑀢𑀘𑀺𑀢𑁆𑀢𑁄 𑀯𑀓𑁆𑀔𑀸𑀫𑀺 𑀦𑁄 𑀤𑁄𑀲𑀦𑁆𑀢𑀭𑁄𑀢𑀺 𑀫𑁂𑀢𑁆𑀢𑀘𑀺𑀢𑁆𑀢𑀁 𑀧𑀘𑁆𑀘𑀼𑀧𑀝𑁆𑀞𑀧𑁂𑀢𑁆𑀯𑀸 𑀯𑀓𑁆𑀔𑀸𑀫𑀺, 𑀦 𑀤𑀼𑀝𑁆𑀞𑀘𑀺𑀢𑁆𑀢𑁄 𑀳𑀼𑀢𑁆𑀯𑀸.

𑁫. 𑀭𑀸𑀚𑀦𑁆𑀢𑁂𑀧𑀼𑀭𑀧𑁆𑀧𑀯𑁂𑀲𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁫. 𑀧𑀜𑁆𑀘𑀫𑁂 𑀓𑀢𑀁 𑀯𑀸 𑀓𑀭𑀺𑀲𑁆𑀲𑀦𑁆𑀢𑀺 𑀯𑀸𑀢𑀺 𑀫𑁂𑀣𑀼𑀦𑀯𑀻𑀢𑀺𑀓𑁆𑀓𑀫𑀁 𑀓𑀭𑀺𑀁𑀲𑀼 𑀯𑀸 𑀓𑀭𑀺𑀲𑁆𑀲𑀦𑁆𑀢𑀺 𑀯𑀸. 𑀭𑀢𑀦𑀦𑁆𑀢𑀺 𑀫𑀡𑀺𑀭𑀢𑀦𑀸𑀤𑀻𑀲𑀼 𑀬𑀁𑀓𑀺𑀜𑁆𑀘𑀺. 𑀧𑀢𑁆𑀣𑁂𑀢𑀻𑀢𑀺 𑀫𑀸𑀭𑁂𑀢𑀼𑀁 𑀇𑀘𑁆𑀙𑀢𑀺. 𑀳𑀢𑁆𑀣𑀺𑀲𑀫𑁆𑀩𑀸𑀥𑀦𑁆𑀢𑀺 𑀳𑀢𑁆𑀣𑀻𑀳𑀺 𑀲𑀫𑁆𑀩𑀸𑀥𑀁. 𑀳𑀢𑁆𑀣𑀺𑀲𑀫𑁆𑀫𑀤𑁆𑀤𑀦𑁆𑀢𑀺 𑀯𑀸 𑀧𑀸𑀞𑁄, 𑀢𑀲𑁆𑀲𑀢𑁆𑀣𑁄 𑁋 𑀳𑀢𑁆𑀣𑀻𑀳𑀺 𑀲𑀫𑁆𑀫𑀤𑁆𑀤𑁄 𑀏𑀢𑁆𑀣𑀸𑀢𑀺 𑀳𑀢𑁆𑀣𑀺𑀲𑀫𑁆𑀫𑀤𑁆𑀤𑀁. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀭𑀚𑀦𑀻𑀬𑀸𑀦𑀺 𑀭𑀽𑀧𑀲𑀤𑁆𑀤𑀕𑀦𑁆𑀥𑀭𑀲𑀨𑁄𑀝𑁆𑀞𑀩𑁆𑀩𑀸𑀦𑀻𑀢𑀺 𑀏𑀢𑀸𑀦𑀺 𑀭𑀸𑀕𑀚𑀦𑀓𑀸𑀦𑀺 𑀭𑀽𑀧𑀸𑀤𑀻𑀦𑀺 𑀢𑀢𑁆𑀣 𑀧𑀭𑀺𑀧𑀽𑀭𑀸𑀦𑀺 𑀳𑁄𑀦𑁆𑀢𑀺.

𑁬. 𑀲𑀓𑁆𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁬. 𑀙𑀝𑁆𑀞𑁂 𑀲𑁄𑀓𑀲𑀪𑀬𑁂𑀢𑀺 𑀲𑁄𑀓𑁂𑀦 𑀲𑀪𑀬𑁂. 𑀲𑁄𑀓𑀪𑀬𑁂𑀢𑀺 𑀯𑀸 𑀧𑀸𑀞𑁄, 𑀅𑀬𑀫𑁂𑀯𑀢𑁆𑀣𑁄. 𑀤𑀼𑀢𑀺𑀬𑀧𑀤𑁂𑀧𑀺 𑀏𑀲𑁂𑀯 𑀦𑀬𑁄. 𑀬𑁂𑀦 𑀓𑁂𑀦𑀘𑀺 𑀓𑀫𑁆𑀫𑀝𑁆𑀞𑀸𑀦𑁂𑀦𑀸𑀢𑀺 𑀓𑀲𑀺𑀯𑀡𑀺𑀚𑁆𑀚𑀸𑀤𑀺𑀓𑀫𑁆𑀫𑁂𑀲𑀼 𑀬𑁂𑀦 𑀓𑁂𑀦𑀘𑀺 𑀓𑀫𑁆𑀫𑁂𑀦. 𑀅𑀦𑀸𑀧𑀚𑁆𑀚 𑀅𑀓𑀼𑀲𑀮𑀦𑁆𑀢𑀺 𑀓𑀺𑀜𑁆𑀘𑀺 𑀅𑀓𑀼𑀲𑀮𑀁 𑀅𑀦𑀸𑀧𑀚𑁆𑀚𑀺𑀢𑁆𑀯𑀸. 𑀦𑀺𑀩𑁆𑀩𑀺𑀲𑁂𑀬𑁆𑀬𑀸𑀢𑀺 𑀉𑀧𑁆𑀧𑀸𑀤𑁂𑀬𑁆𑀬 𑀆𑀘𑀺𑀦𑁂𑀬𑁆𑀬. 𑀤𑀓𑁆𑀔𑁄𑀢𑀺 𑀙𑁂𑀓𑁄. 𑀉𑀝𑁆𑀞𑀸𑀦𑀲𑀫𑁆𑀧𑀦𑁆𑀦𑁄𑀢𑀺 𑀉𑀝𑁆𑀞𑀸𑀦𑀯𑀻𑀭𑀺𑀬𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀅𑀮𑀁 𑀯𑀘𑀦𑀸𑀬𑀸𑀢𑀺 𑀬𑀼𑀢𑁆𑀢𑁄 𑀯𑀘𑀦𑀸𑀬. 𑀏𑀓𑀦𑁆𑀢𑀲𑀼𑀔𑀧𑁆𑀧𑀝𑀺𑀲𑀁𑀯𑁂𑀤𑀻 𑀯𑀺𑀳𑀭𑁂𑀬𑁆𑀬𑀸𑀢𑀺 𑀏𑀓𑀦𑁆𑀢𑀫𑁂𑀯 𑀓𑀸𑀬𑀺𑀓𑀘𑁂𑀢𑀲𑀺𑀓𑀲𑀼𑀔𑀁 𑀜𑀸𑀡𑁂𑀦 𑀧𑀝𑀺𑀲𑀁𑀯𑁂𑀤𑁂𑀦𑁆𑀢𑁄 𑀯𑀺𑀳𑀭𑁂𑀬𑁆𑀬. 𑀅𑀦𑀺𑀘𑁆𑀘𑀸𑀢𑀺 𑀳𑀼𑀢𑁆𑀯𑀸 𑀅𑀪𑀸𑀯𑀢𑁄. 𑀢𑀼𑀘𑁆𑀙𑀸𑀢𑀺 𑀲𑀸𑀭𑀭𑀳𑀺𑀢𑀸. 𑀫𑀼𑀲𑀸𑀢𑀺 𑀦𑀺𑀘𑁆𑀘𑀲𑀼𑀪𑀲𑀼𑀔𑀸 𑀯𑀺𑀬 𑀔𑀸𑀬𑀫𑀸𑀦𑀸𑀧𑀺 𑀢𑀣𑀸 𑀦 𑀳𑁄𑀦𑁆𑀢𑀻𑀢𑀺 𑀫𑀼𑀲𑀸. 𑀫𑁄𑀲𑀥𑀫𑁆𑀫𑀸𑀢𑀺 𑀦𑀲𑁆𑀲𑀦𑀲𑀪𑀸𑀯𑀸. 𑀢𑀲𑁆𑀫𑀸 𑀢𑁂 𑀧𑀝𑀺𑀘𑁆𑀘 𑀤𑀼𑀓𑁆𑀔𑀁 𑀉𑀧𑁆𑀧𑀚𑁆𑀚𑀢𑀻𑀢𑀺 𑀲𑀦𑁆𑀤𑀲𑁆𑀲𑁂𑀢𑀺. 𑀇𑀥 𑀧𑀦 𑀯𑁄𑀢𑀺 𑀏𑀢𑁆𑀣 𑀯𑁄 𑀢𑀺 𑀦𑀺𑀧𑀸𑀢𑀫𑀢𑁆𑀢𑀁. 𑀅𑀧𑀡𑁆𑀡𑀓𑀁 𑀯𑀸 𑀲𑁄𑀢𑀸𑀧𑀦𑁆𑀦𑁄𑀢𑀺 𑀅𑀯𑀺𑀭𑀸𑀥𑀺𑀢𑀁 𑀏𑀓𑀁𑀲𑁂𑀦 𑀲𑁄𑀢𑀸𑀧𑀦𑁆𑀦𑁄 𑀯𑀸 𑀳𑁄𑀢𑀺. 𑀲𑁄𑀧𑀺 𑀛𑀸𑀦𑀁 𑀦𑀺𑀩𑁆𑀩𑀢𑁆𑀢𑁂𑀢𑀺, 𑀩𑁆𑀭𑀳𑁆𑀫𑀮𑁄𑀓𑀁 𑀯𑀸 𑀕𑀦𑁆𑀢𑁆𑀯𑀸 𑀙𑀲𑀼 𑀯𑀸 𑀓𑀸𑀫𑀲𑀕𑁆𑀕𑁂𑀲𑀼 𑀏𑀓𑀦𑁆𑀢𑀲𑀼𑀔𑀧𑁆𑀧𑀝𑀺𑀲𑀁𑀯𑁂𑀤𑀻 𑀳𑀼𑀢𑁆𑀯𑀸 𑀯𑀺𑀳𑀭𑁂𑀬𑁆𑀬. 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀲𑀢𑁆𑀣𑀸 𑀅𑀝𑁆𑀞𑀗𑁆𑀕𑀼𑀧𑁄𑀲𑀣𑀲𑁆𑀲 𑀕𑀼𑀡𑀁 𑀓𑀣𑁂𑀲𑀺.

𑁭. 𑀫𑀳𑀸𑀮𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁭. 𑀲𑀢𑁆𑀢𑀫𑁂 𑀫𑀺𑀘𑁆𑀙𑀸𑀧𑀡𑀺𑀳𑀺𑀢𑀦𑁆𑀢𑀺 𑀫𑀺𑀘𑁆𑀙𑀸 𑀞𑀧𑀺𑀢𑀁. 𑀅𑀥𑀫𑁆𑀫𑀘𑀭𑀺𑀬𑀸𑀯𑀺𑀲𑀫𑀘𑀭𑀺𑀬𑀸𑀢𑀺 𑀅𑀓𑀼𑀲𑀮𑀓𑀫𑁆𑀫𑀧𑀣𑀯𑀲𑁂𑀦 𑀅𑀥𑀫𑁆𑀫𑀘𑀭𑀺𑀬𑀲𑀗𑁆𑀔𑀸𑀢𑀸 𑀯𑀺𑀲𑀫𑀘𑀭𑀺𑀬𑀸. 𑀓𑀼𑀲𑀮𑀓𑀫𑁆𑀫𑀧𑀣𑀯𑀲𑁂𑀦 𑀇𑀢𑀭𑀸 𑀯𑁂𑀤𑀺𑀢𑀩𑁆𑀩𑀸. 𑀏𑀯𑀫𑀺𑀥 𑀯𑀝𑁆𑀝𑀫𑁂𑀯 𑀓𑀣𑀺𑀢𑀁.

𑁮. 𑀧𑀩𑁆𑀩𑀚𑀺𑀢𑀅𑀪𑀺𑀡𑁆𑀳𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁮. 𑀅𑀝𑁆𑀞𑀫𑁂 𑀧𑀩𑁆𑀩𑀚𑀺𑀢𑁂𑀦𑀸𑀢𑀺 𑀖𑀭𑀸𑀯𑀸𑀲𑀁 𑀧𑀳𑀸𑀬 𑀲𑀸𑀲𑀦𑁂 𑀧𑀩𑁆𑀩𑀚𑁆𑀚𑀁 𑀉𑀧𑀕𑀢𑁂𑀦. 𑀅𑀪𑀺𑀡𑁆𑀳𑀦𑁆𑀢𑀺 𑀅𑀪𑀺𑀓𑁆𑀔𑀡𑀁 𑀧𑀼𑀦𑀧𑁆𑀧𑀼𑀦𑀁, 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑀸 𑀑𑀮𑁄𑀓𑁂𑀢𑀩𑁆𑀩𑀸 𑀲𑀮𑁆𑀮𑀓𑁆𑀔𑁂𑀢𑀩𑁆𑀩𑀸. 𑀯𑁂𑀯𑀡𑁆𑀡𑀺𑀬𑀦𑁆𑀢𑀺 𑀯𑀺𑀯𑀡𑁆𑀡𑀪𑀸𑀯𑀁. 𑀢𑀁 𑀧𑀦𑁂𑀢𑀁 𑀯𑁂𑀯𑀡𑁆𑀡𑀺𑀬𑀁 𑀤𑀼𑀯𑀺𑀥𑀁 𑀳𑁄𑀢𑀺 𑀲𑀭𑀻𑀭𑀯𑁂𑀯𑀡𑁆𑀡𑀺𑀬𑀁 𑀧𑀭𑀺𑀓𑁆𑀔𑀸𑀭𑀯𑁂𑀯𑀡𑁆𑀡𑀺𑀬𑀜𑁆𑀘. 𑀢𑀢𑁆𑀣 𑀓𑁂𑀲𑀫𑀲𑁆𑀲𑀼𑀑𑀭𑁄𑀧𑀦𑁂𑀦 𑀲𑀭𑀻𑀭𑀯𑁂𑀯𑀡𑁆𑀡𑀺𑀬𑀁 𑀯𑁂𑀤𑀺𑀢𑀩𑁆𑀩𑀁. 𑀧𑀼𑀩𑁆𑀩𑁂 𑀧𑀦 𑀦𑀸𑀦𑀸𑀯𑀺𑀭𑀸𑀕𑀸𑀦𑀺 𑀲𑀼𑀔𑀼𑀫𑀯𑀢𑁆𑀣𑀸𑀦𑀺 𑀦𑀺𑀯𑀸𑀲𑁂𑀢𑁆𑀯𑀸𑀧𑀺 𑀦𑀸𑀦𑀕𑁆𑀕𑀭𑀲𑀪𑁄𑀚𑀦𑀁 𑀲𑀼𑀯𑀡𑁆𑀡𑀭𑀚𑀢𑀪𑀸𑀚𑀦𑁂𑀲𑀼 𑀪𑀼𑀜𑁆𑀚𑀺𑀢𑁆𑀯𑀸𑀧𑀺 𑀲𑀺𑀭𑀺𑀕𑀩𑁆𑀪𑁂 𑀯𑀭𑀲𑀬𑀦𑀸𑀲𑀦𑁂𑀲𑀼 𑀦𑀺𑀧𑀚𑁆𑀚𑀺𑀢𑁆𑀯𑀸𑀧𑀺 𑀦𑀺𑀲𑀻𑀤𑀺𑀢𑁆𑀯𑀸𑀧𑀺 𑀲𑀧𑁆𑀧𑀺𑀦𑀯𑀦𑀻𑀢𑀸𑀤𑀻𑀳𑀺 𑀪𑁂𑀲𑀚𑁆𑀚𑀁 𑀓𑀢𑁆𑀯𑀸𑀧𑀺 𑀧𑀩𑁆𑀩𑀚𑀺𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀙𑀺𑀦𑁆𑀦𑀲𑀗𑁆𑀖𑀝𑀺𑀢𑀓𑀲𑀸𑀯𑀭𑀲𑀧𑀻𑀢𑀸𑀦𑀺 𑀯𑀢𑁆𑀣𑀸𑀦𑀺 𑀦𑀺𑀯𑀸𑀲𑁂𑀢𑀩𑁆𑀩𑀸𑀦𑀺, 𑀅𑀬𑀧𑀢𑁆𑀢𑁂 𑀯𑀸 𑀫𑀢𑁆𑀢𑀺𑀓𑀧𑀢𑁆𑀢𑁂 𑀯𑀸 𑀫𑀺𑀲𑁆𑀲𑀓𑁄𑀤𑀦𑁄 𑀪𑀼𑀜𑁆𑀚𑀺𑀢𑀩𑁆𑀩𑁄, 𑀭𑀼𑀓𑁆𑀔𑀫𑀽𑀮𑀸𑀤𑀺𑀲𑁂𑀦𑀸𑀲𑀦𑁂 𑀫𑀼𑀜𑁆𑀚𑀢𑀺𑀡𑀲𑀦𑁆𑀣𑀭𑀡𑀸𑀤𑀻𑀲𑀼 𑀦𑀺𑀧𑀚𑁆𑀚𑀺𑀢𑀩𑁆𑀩𑀁, 𑀘𑀫𑁆𑀫𑀔𑀡𑁆𑀟𑀢𑀝𑁆𑀝𑀺𑀓𑀸𑀤𑀻𑀲𑀼 𑀦𑀺𑀲𑀻𑀤𑀺𑀢𑀩𑁆𑀩𑀁, 𑀧𑀽𑀢𑀺𑀫𑀼𑀢𑁆𑀢𑀸𑀤𑀻𑀳𑀺 𑀪𑁂𑀲𑀚𑁆𑀚𑀁 𑀓𑀢𑁆𑀢𑀩𑁆𑀩𑀁 𑀳𑁄𑀢𑀺. 𑀏𑀯𑀫𑁂𑀢𑁆𑀣 𑀧𑀭𑀺𑀓𑁆𑀔𑀸𑀭𑀯𑁂𑀯𑀡𑁆𑀡𑀺𑀬𑀁 𑀯𑁂𑀤𑀺𑀢𑀩𑁆𑀩𑀁. 𑀏𑀯𑀁 𑀧𑀘𑁆𑀘𑀯𑁂𑀓𑁆𑀔𑀢𑁄 𑀓𑁄𑀧𑁄 𑀘 𑀫𑀸𑀦𑁄 𑀘 𑀧𑀳𑀻𑀬𑀢𑀺.

𑀧𑀭𑀧𑀝𑀺𑀩𑀤𑁆𑀥𑀸 𑀫𑁂 𑀚𑀻𑀯𑀺𑀓𑀸𑀢𑀺 𑀫𑀬𑁆𑀳𑀁 𑀧𑀭𑁂𑀲𑀼 𑀧𑀝𑀺𑀩𑀤𑁆𑀥𑀸 𑀧𑀭𑀸𑀬𑀢𑁆𑀢𑀸 𑀘𑀢𑀼𑀧𑀘𑁆𑀘𑀬𑀚𑀻𑀯𑀺𑀓𑀸𑀢𑀺. 𑀏𑀯𑀁 𑀧𑀘𑁆𑀘𑀯𑁂𑀓𑁆𑀔𑀢𑁄 𑀳𑀺 𑀆𑀚𑀻𑀯𑁄 𑀧𑀭𑀺𑀲𑀼𑀚𑁆𑀛𑀢𑀺, 𑀧𑀺𑀡𑁆𑀟𑀧𑀸𑀢𑁄 𑀘 𑀅𑀧𑀘𑀺𑀢𑁄 𑀳𑁄𑀢𑀺, 𑀘𑀢𑀽𑀲𑀼 𑀧𑀘𑁆𑀘𑀬𑁂𑀲𑀼 𑀅𑀧𑀘𑁆𑀘𑀯𑁂𑀓𑁆𑀔𑀺𑀢𑀧𑀭𑀺𑀪𑁄𑀕𑁄 𑀦𑀸𑀫 𑀦 𑀳𑁄𑀢𑀺. 𑀅𑀜𑁆𑀜𑁄 𑀫𑁂 𑀆𑀓𑀧𑁆𑀧𑁄 𑀓𑀭𑀡𑀻𑀬𑁄𑀢𑀺 𑀬𑁄 𑀕𑀺𑀳𑀻𑀦𑀁 𑀉𑀭𑀁 𑀅𑀪𑀺𑀦𑀻𑀳𑀭𑀺𑀢𑁆𑀯𑀸 𑀕𑀻𑀯𑀁 𑀧𑀕𑁆𑀕𑀳𑁂𑀢𑁆𑀯𑀸 𑀮𑀮𑀺𑀢𑁂𑀦𑀸𑀓𑀸𑀭𑁂𑀦 𑀅𑀦𑀺𑀬𑀢𑀧𑀤𑀯𑀻𑀢𑀺𑀳𑀸𑀭𑁂𑀦 𑀕𑀫𑀦𑀸𑀓𑀧𑁆𑀧𑁄 𑀳𑁄𑀢𑀺, 𑀢𑀢𑁄 𑀅𑀜𑁆𑀜𑁄𑀯 𑀆𑀓𑀧𑁆𑀧𑁄 𑀫𑀬𑀸 𑀓𑀭𑀡𑀻𑀬𑁄, 𑀲𑀦𑁆𑀢𑀺𑀦𑁆𑀤𑁆𑀭𑀺𑀬𑁂𑀦 𑀲𑀦𑁆𑀢𑀫𑀸𑀦𑀲𑁂𑀦 𑀬𑀼𑀕𑀫𑀢𑁆𑀢𑀤𑀲𑁆𑀲𑀺𑀦𑀸 𑀯𑀺𑀲𑀫𑀝𑁆𑀞𑀸𑀦𑁂 𑀉𑀤𑀓𑀲𑀓𑀝𑁂𑀦𑁂𑀯 𑀫𑀦𑁆𑀤𑀫𑀺𑀢𑀧𑀤𑀯𑀻𑀢𑀺𑀳𑀸𑀭𑁂𑀦 𑀳𑀼𑀢𑁆𑀯𑀸 𑀕𑀦𑁆𑀢𑀩𑁆𑀩𑀦𑁆𑀢𑀺 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑀁. 𑀏𑀯𑀁 𑀧𑀘𑁆𑀘𑀯𑁂𑀓𑁆𑀔𑀢𑁄 𑀳𑀺 𑀇𑀭𑀺𑀬𑀸𑀧𑀣𑁄 𑀲𑀸𑀭𑀼𑀧𑁆𑀧𑁄 𑀳𑁄𑀢𑀺, 𑀢𑀺𑀲𑁆𑀲𑁄 𑀲𑀺𑀓𑁆𑀔𑀸 𑀧𑀭𑀺𑀧𑀽𑀭𑁂𑀦𑁆𑀢𑀺. 𑀓𑀘𑁆𑀘𑀺𑀦𑀼𑀔𑁄𑀢𑀺 𑀲𑀮𑀓𑁆𑀔𑀡𑁂 𑀦𑀺𑀧𑀸𑀢𑀲𑀫𑀼𑀤𑀸𑀬𑁄. 𑀅𑀢𑁆𑀢𑀸𑀢𑀺 𑀘𑀺𑀢𑁆𑀢𑀁. 𑀲𑀻𑀮𑀢𑁄 𑀦 𑀉𑀧𑀯𑀤𑀢𑀻𑀢𑀺 𑀅𑀧𑀭𑀺𑀲𑀼𑀤𑁆𑀥𑀁 𑀢𑁂 𑀲𑀻𑀮𑀦𑁆𑀢𑀺 𑀲𑀻𑀮𑀧𑀘𑁆𑀘𑀬𑁄 𑀦 𑀉𑀧𑀯𑀤𑀢𑀺. 𑀏𑀯𑀁 𑀧𑀘𑁆𑀘𑀯𑁂𑀓𑁆𑀔𑀢𑁄 𑀳𑀺 𑀅𑀚𑁆𑀛𑀢𑁆𑀢𑀁 𑀳𑀺𑀭𑀻 𑀲𑀫𑀼𑀝𑁆𑀞𑀸𑀢𑀺, 𑀲𑀸 𑀢𑀻𑀲𑀼 𑀤𑁆𑀯𑀸𑀭𑁂𑀲𑀼 𑀲𑀁𑀯𑀭𑀁 𑀲𑀸𑀥𑁂𑀢𑀺, 𑀢𑀻𑀲𑀼 𑀤𑁆𑀯𑀸𑀭𑁂𑀲𑀼 𑀲𑀁𑀯𑀭𑁄 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀁 𑀳𑁄𑀢𑀺, 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑁂 𑀞𑀺𑀢𑁄 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀕𑀡𑁆𑀳𑀸𑀢𑀺. 𑀅𑀦𑀼𑀯𑀺𑀘𑁆𑀘 𑀯𑀺𑀜𑁆𑀜𑀽 𑀲𑀩𑁆𑀭𑀳𑁆𑀫𑀘𑀸𑀭𑀻𑀢𑀺 𑀧𑀡𑁆𑀟𑀺𑀢𑀸 𑀲𑀩𑁆𑀭𑀳𑁆𑀫𑀘𑀸𑀭𑀺𑀦𑁄 𑀅𑀦𑀼𑀯𑀺𑀘𑀸𑀭𑁂𑀢𑁆𑀯𑀸. 𑀏𑀯𑀁 𑀧𑀘𑁆𑀘𑀯𑁂𑀓𑁆𑀔𑀢𑁄 𑀳𑀺 𑀩𑀳𑀺𑀤𑁆𑀥𑀸 𑀑𑀢𑁆𑀢𑀧𑁆𑀧𑀁 𑀲𑀡𑁆𑀞𑀸𑀢𑀺, 𑀢𑀁 𑀢𑀻𑀲𑀼 𑀤𑁆𑀯𑀸𑀭𑁂𑀲𑀼 𑀲𑀁𑀯𑀭𑀁 𑀲𑀸𑀥𑁂𑀢𑀻𑀢𑀺 𑀅𑀦𑀦𑁆𑀢𑀭𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑀦𑀸𑀦𑀸𑀪𑀸𑀯𑁄 𑀯𑀺𑀦𑀸𑀪𑀸𑀯𑁄𑀢𑀺 𑀚𑀸𑀢𑀺𑀬𑀸 𑀦𑀸𑀦𑀸𑀪𑀸𑀯𑁄, 𑀫𑀭𑀡𑁂𑀦 𑀯𑀺𑀦𑀸𑀪𑀸𑀯𑁄. 𑀏𑀯𑀁 𑀧𑀘𑁆𑀘𑀯𑁂𑀓𑁆𑀔𑀢𑁄 𑀳𑀺 𑀢𑀻𑀲𑀼 𑀤𑁆𑀯𑀸𑀭𑁂𑀲𑀼 𑀅𑀲𑀁𑀯𑀼𑀢𑀸𑀓𑀸𑀭𑁄 𑀦𑀸𑀫 𑀦 𑀳𑁄𑀢𑀺, 𑀫𑀭𑀡𑀲𑁆𑀲𑀢𑀺 𑀲𑀽𑀧𑀝𑁆𑀞𑀺𑀢𑀸 𑀳𑁄𑀢𑀺. 𑀓𑀫𑁆𑀫𑀲𑁆𑀲𑀓𑁄𑀫𑁆𑀳𑀻𑀢𑀺𑀆𑀤𑀻𑀲𑀼 𑀓𑀫𑁆𑀫𑀁 𑀫𑀬𑁆𑀳𑀁 𑀲𑀓𑀁 𑀅𑀢𑁆𑀢𑀦𑁄 𑀲𑀦𑁆𑀢𑀓𑀦𑁆𑀢𑀺 𑀓𑀫𑁆𑀫𑀲𑁆𑀲𑀓𑀸. 𑀓𑀫𑁆𑀫𑁂𑀦 𑀤𑀸𑀢𑀩𑁆𑀩𑀁 𑀨𑀮𑀁 𑀤𑀸𑀬𑀁, 𑀓𑀫𑁆𑀫𑀲𑁆𑀲 𑀤𑀸𑀬𑀁 𑀓𑀫𑁆𑀫𑀤𑀸𑀬𑀁, 𑀢𑀁 𑀆𑀤𑀻𑀬𑀸𑀫𑀻𑀢𑀺 𑀓𑀫𑁆𑀫𑀤𑀸𑀬𑀸𑀤𑁄. 𑀓𑀫𑁆𑀫𑀁 𑀫𑀬𑁆𑀳𑀁 𑀬𑁄𑀦𑀺 𑀓𑀸𑀭𑀡𑀦𑁆𑀢𑀺 𑀓𑀫𑁆𑀫𑀬𑁄𑀦𑀺. 𑀓𑀫𑁆𑀫𑀁 𑀫𑀬𑁆𑀳𑀁 𑀩𑀦𑁆𑀥𑀼 𑀜𑀸𑀢𑀓𑁄𑀢𑀺 𑀓𑀫𑁆𑀫𑀩𑀦𑁆𑀥𑀼. 𑀓𑀫𑁆𑀫𑀁 𑀫𑀬𑁆𑀳𑀁 𑀧𑀝𑀺𑀲𑀭𑀡𑀁 𑀧𑀢𑀺𑀝𑁆𑀞𑀸𑀢𑀺 𑀓𑀫𑁆𑀫𑀧𑀝𑀺𑀲𑀭𑀡𑁄. 𑀢𑀲𑁆𑀲 𑀤𑀸𑀬𑀸𑀤𑁄 𑀪𑀯𑀺𑀲𑁆𑀲𑀸𑀫𑀻𑀢𑀺 𑀢𑀲𑁆𑀲 𑀓𑀫𑁆𑀫𑀲𑁆𑀲 𑀤𑀸𑀬𑀸𑀤𑁄 𑀢𑁂𑀦 𑀤𑀺𑀦𑁆𑀦𑀨𑀮𑀁 𑀧𑀝𑀺𑀕𑁆𑀕𑀸𑀳𑀓𑁄 𑀪𑀯𑀺𑀲𑁆𑀲𑀸𑀫𑀺. 𑀏𑀯𑀁 𑀓𑀫𑁆𑀫𑀲𑁆𑀲𑀓𑀢𑀁 𑀧𑀦 𑀧𑀘𑁆𑀘𑀯𑁂𑀓𑁆𑀔𑀢𑁄 𑀧𑀸𑀧𑀓𑀭𑀡𑀁 𑀦𑀸𑀫 𑀦 𑀳𑁄𑀢𑀺. 𑀓𑀣𑀁𑀪𑀽𑀢𑀲𑁆𑀲 𑀫𑁂 𑀭𑀢𑁆𑀢𑀺𑀦𑁆𑀤𑀺𑀯𑀸 𑀯𑀻𑀢𑀺𑀯𑀢𑁆𑀢𑀦𑁆𑀢𑀻𑀢𑀺 𑀓𑀺𑀦𑁆𑀦𑀼 𑀔𑁄 𑀫𑁂 𑀯𑀢𑁆𑀢𑀧𑁆𑀧𑀝𑀺𑀧𑀢𑁆𑀢𑀺𑀁 𑀓𑀭𑁄𑀦𑁆𑀢𑀲𑁆𑀲, 𑀉𑀤𑀸𑀳𑀼 𑀅𑀓𑀭𑁄𑀦𑁆𑀢𑀲𑁆𑀲, 𑀩𑀼𑀤𑁆𑀥𑀯𑀘𑀦𑀁 𑀲𑀚𑁆𑀛𑀸𑀬𑀦𑁆𑀢𑀲𑁆𑀲, 𑀉𑀤𑀸𑀳𑀼 𑀅𑀲𑀚𑁆𑀛𑀸𑀬𑀦𑁆𑀢𑀲𑁆𑀲, 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁂 𑀓𑀫𑁆𑀫𑀁 𑀓𑀭𑁄𑀦𑁆𑀢𑀲𑁆𑀲, 𑀉𑀤𑀸𑀳𑀼 𑀅𑀓𑀭𑁄𑀦𑁆𑀢𑀲𑁆𑀲𑀸𑀢𑀺 𑀓𑀣𑀁𑀪𑀽𑀢𑀲𑁆𑀲 𑀫𑁂 𑀭𑀢𑁆𑀢𑀺𑀦𑁆𑀤𑀺𑀯𑀸 𑀯𑀻𑀢𑀺𑀯𑀢𑁆𑀢𑀦𑁆𑀢𑀺, 𑀧𑀭𑀺𑀯𑀢𑁆𑀢𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀏𑀯𑀁 𑀧𑀘𑁆𑀘𑀯𑁂𑀓𑁆𑀔𑀢𑁄 𑀳𑀺 𑀅𑀧𑁆𑀧𑀫𑀸𑀤𑁄 𑀧𑀭𑀺𑀧𑀽𑀭𑀢𑀺.

𑀲𑀼𑀜𑁆𑀜𑀸𑀕𑀸𑀭𑁂 𑀅𑀪𑀺𑀭𑀫𑀸𑀫𑀻𑀢𑀺 𑀯𑀺𑀯𑀺𑀢𑁆𑀢𑁄𑀓𑀸𑀲𑁂 𑀲𑀩𑁆𑀩𑀺𑀭𑀺𑀬𑀸𑀧𑀣𑁂𑀲𑀼 𑀏𑀓𑀓𑁄𑀯 𑀳𑀼𑀢𑁆𑀯𑀸 𑀓𑀘𑁆𑀘𑀺 𑀦𑀼 𑀔𑁄 𑀅𑀪𑀺𑀭𑀫𑀸𑀫𑀻𑀢𑀺 𑀅𑀢𑁆𑀣𑁄. 𑀏𑀯𑀁 𑀧𑀘𑁆𑀘𑀯𑁂𑀓𑁆𑀔𑀢𑁄 𑀓𑀸𑀬𑀯𑀺𑀯𑁂𑀓𑁄 𑀧𑀭𑀺𑀧𑀽𑀭𑀢𑀺. 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑁄𑀢𑀺 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀸𑀦𑀁 𑀉𑀓𑁆𑀓𑀝𑁆𑀞𑀫𑀦𑀼𑀲𑁆𑀲𑀪𑀽𑀢𑀸𑀦𑀁 𑀛𑀸𑀬𑀻𑀦𑀜𑁆𑀘𑁂𑀯 𑀅𑀭𑀺𑀬𑀸𑀦𑀜𑁆𑀘 𑀛𑀸𑀦𑀸𑀤𑀺𑀥𑀫𑁆𑀫𑁄, 𑀤𑀲𑀓𑀼𑀲𑀮𑀓𑀫𑁆𑀫𑀧𑀣𑀲𑀗𑁆𑀔𑀸𑀢𑀫𑀦𑀼𑀲𑁆𑀲𑀥𑀫𑁆𑀫𑀢𑁄 𑀯𑀸 𑀉𑀢𑁆𑀢𑀭𑀺𑀢𑀭𑁄 𑀯𑀺𑀲𑀺𑀝𑁆𑀞𑀢𑀭𑁄 𑀥𑀫𑁆𑀫𑁄 𑀫𑁂 𑀫𑀫 𑀲𑀦𑁆𑀢𑀸𑀦𑁂 𑀅𑀢𑁆𑀣𑀺 𑀦𑀼 𑀔𑁄, 𑀲𑀦𑁆𑀢𑀺 𑀦𑀼 𑀔𑁄𑀢𑀺 𑀅𑀢𑁆𑀣𑁄. 𑀅𑀮𑀫𑀭𑀺𑀬𑀜𑀸𑀡𑀤𑀲𑁆𑀲𑀦𑀯𑀺𑀲𑁂𑀲𑁄𑀢𑀺 𑀫𑀳𑀕𑁆𑀕𑀢𑀮𑁄𑀓𑀼𑀢𑁆𑀢𑀭𑀧𑀜𑁆𑀜𑀸 𑀧𑀚𑀸𑀦𑀦𑀝𑁆𑀞𑁂𑀦 𑀜𑀸𑀡𑀁, 𑀘𑀓𑁆𑀔𑀼𑀦𑀸 𑀤𑀺𑀝𑁆𑀞𑀫𑀺𑀯 𑀥𑀫𑁆𑀫𑀁 𑀧𑀘𑁆𑀘𑀓𑁆𑀔𑀓𑀭𑀡𑀢𑁄 𑀤𑀲𑁆𑀲𑀦𑀝𑁆𑀞𑁂𑀦 𑀤𑀲𑁆𑀲𑀦𑀦𑁆𑀢𑀺 𑀜𑀸𑀡𑀤𑀲𑁆𑀲𑀦𑀁, 𑀅𑀭𑀺𑀬𑀁 𑀯𑀺𑀲𑀼𑀤𑁆𑀥𑀁 𑀉𑀢𑁆𑀢𑀫𑀁 𑀜𑀸𑀡𑀤𑀲𑁆𑀲𑀦𑀦𑁆𑀢𑀺 𑀅𑀭𑀺𑀬𑀜𑀸𑀡𑀤𑀲𑁆𑀲𑀦𑀁, 𑀅𑀮𑀁 𑀧𑀭𑀺𑀬𑀢𑁆𑀢𑀓𑀁 𑀓𑀺𑀮𑁂𑀲𑀯𑀺𑀤𑁆𑀥𑀁𑀲𑀦𑀲𑀫𑀢𑁆𑀣𑀁 𑀅𑀭𑀺𑀬𑀜𑀸𑀡𑀤𑀲𑁆𑀲𑀦𑀫𑁂𑀢𑁆𑀣, 𑀅𑀲𑁆𑀲 𑀯𑀸𑀢𑀺 𑀅𑀮𑀫𑀭𑀺𑀬𑀜𑀸𑀡𑀤𑀲𑁆𑀲𑀦𑁄, 𑀛𑀸𑀦𑀸𑀤𑀺𑀪𑁂𑀤𑁄 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑁄 𑀅𑀮𑀫𑀭𑀺𑀬𑀜𑀸𑀡𑀤𑀲𑁆𑀲𑀦𑁄 𑀘 𑀲𑁄 𑀯𑀺𑀲𑁂𑀲𑁄 𑀘𑀸𑀢𑀺 𑀅𑀮𑀫𑀭𑀺𑀬𑀜𑀸𑀡𑀤𑀲𑁆𑀲𑀦𑀯𑀺𑀲𑁂𑀲𑁄. 𑀅𑀣 𑀯𑀸 𑀢𑀫𑁂𑀯 𑀓𑀺𑀮𑁂𑀲𑀯𑀺𑀤𑁆𑀥𑀁𑀲𑀦𑀲𑀫𑀢𑁆𑀣𑀁 𑀯𑀺𑀲𑀼𑀤𑁆𑀥𑀁 𑀜𑀸𑀡𑀤𑀲𑁆𑀲𑀦𑀫𑁂𑀯 𑀯𑀺𑀲𑁂𑀲𑁄𑀢𑀺 𑀅𑀮𑀫𑀭𑀺𑀬𑀜𑀸𑀡𑀤𑀲𑁆𑀲𑀦𑀯𑀺𑀲𑁂𑀲𑁄 𑀯𑀸. 𑀅𑀥𑀺𑀕𑀢𑁄𑀢𑀺 𑀧𑀝𑀺𑀮𑀤𑁆𑀥𑁄 𑀫𑁂 𑀅𑀢𑁆𑀣𑀺 𑀦𑀼 𑀔𑁄. 𑀲𑁄𑀳𑀦𑁆𑀢𑀺 𑀧𑀝𑀺𑀮𑀤𑁆𑀥𑀯𑀺𑀲𑁂𑀲𑁄 𑀲𑁄 𑀅𑀳𑀁. 𑀧𑀘𑁆𑀙𑀺𑀫𑁂 𑀓𑀸𑀮𑁂𑀢𑀺 𑀫𑀭𑀡𑀫𑀜𑁆𑀘𑁂 𑀦𑀺𑀧𑀦𑁆𑀦𑀓𑀸𑀮𑁂. 𑀧𑀼𑀝𑁆𑀞𑁄𑀢𑀺 𑀲𑀩𑁆𑀭𑀳𑁆𑀫𑀘𑀸𑀭𑀻𑀳𑀺 𑀅𑀥𑀺𑀕𑀢𑀕𑀼𑀡𑀯𑀺𑀲𑁂𑀲𑀁 𑀧𑀼𑀘𑁆𑀙𑀺𑀢𑁄. 𑀦 𑀫𑀗𑁆𑀓𑀼 𑀪𑀯𑀺𑀲𑁆𑀲𑀸𑀫𑀻𑀢𑀺 𑀧𑀢𑀺𑀢𑀓𑁆𑀔𑀦𑁆𑀥𑁄 𑀦𑀺𑀢𑁆𑀢𑁂𑀚𑁄 𑀦 𑀳𑁂𑀲𑁆𑀲𑀸𑀫𑀻𑀢𑀺. 𑀏𑀯𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲 𑀳𑀺 𑀫𑁄𑀖𑀓𑀸𑀮𑀓𑀺𑀭𑀺𑀬𑀸 𑀦𑀸𑀫 𑀦 𑀳𑁄𑀢𑀺.

𑁯-𑁧𑁦. 𑀲𑀭𑀻𑀭𑀝𑁆𑀞𑀥𑀫𑁆𑀫𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁪𑁯-𑁫𑁦. 𑀦𑀯𑀫𑁂 𑀧𑁄𑀦𑁄𑀩𑁆𑀪𑀯𑀺𑀓𑁄𑀢𑀺 𑀧𑀼𑀦𑀩𑁆𑀪𑀯𑀦𑀺𑀩𑁆𑀩𑀢𑁆𑀢𑀓𑁄. 𑀪𑀯𑀲𑀗𑁆𑀔𑀸𑀭𑁄𑀢𑀺 𑀪𑀯𑀲𑀗𑁆𑀔𑀭𑀡𑀓𑀫𑁆𑀫𑀁. 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀯𑀝𑁆𑀝𑀫𑁂𑀯 𑀓𑀣𑀺𑀢𑀁. 𑀤𑀲𑀫𑁂 𑀲𑀻𑀮𑀩𑀸𑀳𑀼𑀲𑀘𑁆𑀘𑀯𑀻𑀭𑀺𑀬𑀲𑀢𑀺𑀧𑀜𑁆𑀜𑀸 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀸𑀫𑀺𑀲𑁆𑀲𑀺𑀓𑀸 𑀓𑀣𑀺𑀢𑀸. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀅𑀓𑁆𑀓𑁄𑀲𑀯𑀕𑁆𑀕𑁄 𑀧𑀜𑁆𑀘𑀫𑁄.

𑀧𑀞𑀫𑀧𑀡𑁆𑀡𑀸𑀲𑀓𑀁 𑀦𑀺𑀝𑁆𑀞𑀺𑀢𑀁.

𑁨. 𑀤𑀼𑀢𑀺𑀬𑀧𑀡𑁆𑀡𑀸𑀲𑀓𑀁

(𑁬) 𑁧. 𑀲𑀘𑀺𑀢𑁆𑀢𑀯𑀕𑁆𑀕𑁄

𑁧-𑁪. 𑀲𑀘𑀺𑀢𑁆𑀢𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁫𑁧-𑁫𑁪. 𑀤𑀼𑀢𑀺𑀬𑀲𑁆𑀲 𑀧𑀞𑀫𑁂 𑀲𑀘𑀺𑀢𑁆𑀢𑀧𑀭𑀺𑀬𑀸𑀬𑀓𑀼𑀲𑀮𑁄𑀢𑀺 𑀅𑀢𑁆𑀢𑀦𑁄 𑀘𑀺𑀢𑁆𑀢𑀯𑀸𑀭𑀓𑀼𑀲𑀮𑁄. 𑀭𑀚𑀦𑁆𑀢𑀺 𑀆𑀕𑀦𑁆𑀢𑀼𑀓𑀉𑀧𑀓𑁆𑀓𑀺𑀮𑁂𑀲𑀁. 𑀅𑀗𑁆𑀕𑀡𑀦𑁆𑀢𑀺 𑀢𑀢𑁆𑀣𑀚𑀸𑀢𑀓𑀅𑀗𑁆𑀕𑀓𑀸𑀴𑀢𑀺𑀮𑀓𑀸𑀤𑀺𑀁. 𑀆𑀲𑀯𑀸𑀦𑀁 𑀔𑀬𑀸𑀬𑀸𑀢𑀺 𑀅𑀭𑀳𑀢𑁆𑀢𑀢𑁆𑀣𑀸𑀬. 𑀢𑀢𑀺𑀬𑁂 𑀧𑀝𑀺𑀪𑀸𑀦𑁂𑀦𑀸𑀢𑀺 𑀯𑀘𑀦𑀲𑀡𑁆𑀞𑀸𑀦𑁂𑀦. 𑀘𑀢𑀼𑀢𑁆𑀣𑁂 𑀅𑀥𑀺𑀧𑀜𑁆𑀜𑀸𑀥𑀫𑁆𑀫𑀯𑀺𑀧𑀲𑁆𑀲𑀦𑀸𑀬𑀸𑀢𑀺 𑀲𑀗𑁆𑀔𑀸𑀭𑀧𑀭𑀺𑀕𑁆𑀕𑀸𑀳𑀓𑀯𑀺𑀧𑀲𑁆𑀲𑀦𑀸𑀬.

𑁮. 𑀫𑀽𑀮𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁮. 𑀅𑀝𑁆𑀞𑀫𑁂 𑀅𑀫𑀢𑁄𑀕𑀥𑀸𑀢𑀺 𑀏𑀢𑁆𑀣 𑀲𑀉𑀧𑀸𑀤𑀺𑀲𑁂𑀲𑀸 𑀦𑀺𑀩𑁆𑀩𑀸𑀦𑀥𑀸𑀢𑀼 𑀓𑀣𑀺𑀢𑀸, 𑀦𑀺𑀩𑁆𑀩𑀸𑀦𑀧𑀭𑀺𑀬𑁄𑀲𑀸𑀦𑀸𑀢𑀺 𑀏𑀢𑁆𑀣 𑀅𑀦𑀼𑀧𑀸𑀤𑀺𑀲𑁂𑀲𑀸. 𑀅𑀦𑀼𑀧𑀸𑀤𑀺𑀲𑁂𑀲𑀁 𑀧𑀢𑁆𑀢𑀲𑁆𑀲 𑀳𑀺 𑀲𑀩𑁆𑀩𑁂 𑀥𑀫𑁆𑀫𑀸 𑀧𑀭𑀺𑀬𑁄𑀲𑀸𑀦𑀧𑁆𑀧𑀢𑁆𑀢𑀸 𑀦𑀸𑀫 𑀳𑁄𑀦𑁆𑀢𑀺. 𑀲𑁂𑀲𑀧𑀤𑀸𑀦𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀢𑁆𑀣𑀸𑀦𑁂𑀯.

𑁯. 𑀧𑀩𑁆𑀩𑀚𑁆𑀚𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁯. 𑀦𑀯𑀫𑁂 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀏𑀯𑀁 𑀅𑀧𑀭𑀺𑀘𑀺𑀢𑀘𑀺𑀢𑁆𑀢𑀲𑁆𑀲 𑀲𑀸𑀫𑀜𑁆𑀜𑀢𑁆𑀣𑁄 𑀦 𑀲𑀫𑁆𑀧𑀚𑁆𑀚𑀢𑀺, 𑀢𑀲𑁆𑀫𑀸. 𑀬𑀣𑀸𑀧𑀩𑁆𑀩𑀚𑁆𑀚𑀸𑀧𑀭𑀺𑀘𑀺𑀢𑀜𑁆𑀘 𑀦𑁄 𑀘𑀺𑀢𑁆𑀢𑀁 𑀪𑀯𑀺𑀲𑁆𑀲𑀢𑀻𑀢𑀺 𑀬𑀣𑀸 𑀧𑀩𑁆𑀩𑀚𑁆𑀚𑀸𑀦𑀼𑀭𑀽𑀧𑁂𑀦 𑀧𑀭𑀺𑀘𑀺𑀢𑀁. 𑀬𑁂 𑀳𑀺 𑀓𑁂𑀘𑀺 𑀧𑀩𑁆𑀩𑀚𑀦𑁆𑀢𑀺 𑀦𑀸𑀫, 𑀲𑀩𑁆𑀩𑁂 𑀢𑁂 𑀅𑀭𑀳𑀢𑁆𑀢𑀁 𑀧𑀢𑁆𑀣𑁂𑀢𑁆𑀯𑀸. 𑀢𑀲𑁆𑀫𑀸 𑀬𑀁 𑀘𑀺𑀢𑁆𑀢𑀁 𑀅𑀭𑀳𑀢𑁆𑀢𑀸𑀥𑀺𑀕𑀫𑀢𑁆𑀣𑀸𑀬 𑀧𑀭𑀺𑀘𑀺𑀢𑀁 𑀯𑀟𑁆𑀠𑀺𑀢𑀁, 𑀢𑀁 𑀬𑀣𑀸𑀧𑀩𑁆𑀩𑀚𑁆𑀚𑀸𑀧𑀭𑀺𑀘𑀺𑀢𑀁 𑀦𑀸𑀫𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀏𑀯𑀭𑀽𑀧𑀁 𑀧𑀦 𑀘𑀺𑀢𑁆𑀢𑀁 𑀪𑀯𑀺𑀲𑁆𑀲𑀢𑀻𑀢𑀺 𑀲𑀺𑀓𑁆𑀔𑀺𑀢𑀩𑁆𑀩𑀁. 𑀮𑁄𑀓𑀲𑁆𑀲 𑀲𑀫𑀜𑁆𑀘 𑀯𑀺𑀲𑀫𑀜𑁆𑀘𑀸𑀢𑀺 𑀲𑀢𑁆𑀢𑀮𑁄𑀓𑀲𑁆𑀲 𑀲𑀼𑀘𑀭𑀺𑀢𑀤𑀼𑀘𑁆𑀘𑀭𑀺𑀢𑀸𑀦𑀺. 𑀮𑁄𑀓𑀲𑁆𑀲 𑀪𑀯𑀜𑁆𑀘 𑀯𑀺𑀪𑀯𑀜𑁆𑀘𑀸𑀢𑀺 𑀢𑀲𑁆𑀲 𑀯𑀟𑁆𑀠𑀺𑀜𑁆𑀘 𑀯𑀺𑀦𑀸𑀲𑀜𑁆𑀘, 𑀢𑀣𑀸 𑀲𑀫𑁆𑀧𑀢𑁆𑀢𑀺𑀜𑁆𑀘 𑀯𑀺𑀧𑀢𑁆𑀢𑀺𑀜𑁆𑀘. 𑀮𑁄𑀓𑀲𑁆𑀲 𑀲𑀫𑀼𑀤𑀬𑀜𑁆𑀘 𑀅𑀢𑁆𑀣𑀗𑁆𑀕𑀫𑀜𑁆𑀘𑀸𑀢𑀺 𑀧𑀦 𑀲𑀗𑁆𑀔𑀸𑀭𑀮𑁄𑀓𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀔𑀦𑁆𑀥𑀸𑀦𑀁 𑀦𑀺𑀩𑁆𑀩𑀢𑁆𑀢𑀺𑀜𑁆𑀘 𑀪𑁂𑀤𑀜𑁆𑀘𑀸𑀢𑀺 𑀅𑀢𑁆𑀣𑁄.

𑁧𑁦. 𑀕𑀺𑀭𑀺𑀫𑀸𑀦𑀦𑁆𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁬𑁦. 𑀤𑀲𑀫𑁂 𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬𑀸𑀢𑀺 𑀕𑀺𑀭𑀺𑀫𑀸𑀦𑀦𑁆𑀤𑀢𑁆𑀣𑁂𑀭𑁂 𑀅𑀦𑀼𑀓𑀫𑁆𑀧𑀁 𑀧𑀝𑀺𑀘𑁆𑀘. 𑀘𑀓𑁆𑀔𑀼𑀭𑁄𑀕𑁄𑀢𑀺𑀆𑀤𑀬𑁄 𑀯𑀢𑁆𑀣𑀼𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀸. 𑀦𑀺𑀩𑁆𑀩𑀢𑁆𑀢𑀺𑀢𑀧𑁆𑀧𑀲𑀸𑀤𑀸𑀦𑀜𑁆𑀳𑀺 𑀭𑁄𑀕𑁄 𑀦𑀸𑀫 𑀦𑀢𑁆𑀣𑀺. 𑀓𑀡𑁆𑀡𑀭𑁄𑀕𑁄𑀢𑀺 𑀩𑀳𑀺𑀓𑀡𑁆𑀡𑁂 𑀭𑁄𑀕𑁄. 𑀧𑀺𑀦𑀸𑀲𑁄𑀢𑀺 𑀩𑀳𑀺𑀦𑀸𑀲𑀺𑀓𑀸𑀬 𑀭𑁄𑀕𑁄. 𑀦𑀔𑀲𑀸𑀢𑀺 𑀦𑀔𑁂𑀳𑀺 𑀯𑀺𑀮𑁂𑀔𑀺𑀢𑀝𑁆𑀞𑀸𑀦𑁂 𑀭𑁄𑀕𑁄. 𑀧𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀢𑀺 𑀧𑀺𑀢𑁆𑀢𑀲𑀫𑀼𑀝𑁆𑀞𑀺𑀢𑀸. 𑀢𑁂 𑀓𑀺𑀭 𑀤𑁆𑀯𑀢𑁆𑀢𑀺𑀁𑀲 𑀳𑁄𑀦𑁆𑀢𑀺. 𑀲𑁂𑀫𑁆𑀳𑀲𑀫𑀼𑀝𑁆𑀞𑀸𑀦𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀉𑀢𑀼𑀧𑀭𑀺𑀡𑀸𑀫𑀚𑀸𑀢𑀺 𑀉𑀢𑀼𑀧𑀭𑀺𑀡𑀸𑀫𑁂𑀦 𑀅𑀘𑁆𑀘𑀼𑀡𑁆𑀳𑀸𑀢𑀺𑀲𑀻𑀢𑁂𑀦 𑀉𑀧𑁆𑀧𑀚𑁆𑀚𑀦𑀓𑀭𑁄𑀕𑀸. 𑀯𑀺𑀲𑀫𑀧𑀭𑀺𑀳𑀸𑀭𑀚𑀸𑀢𑀺 𑀅𑀢𑀺𑀘𑀺𑀭𑀝𑁆𑀞𑀸𑀦𑀦𑀺𑀲𑀚𑁆𑀚𑀸𑀤𑀺𑀦𑀸 𑀯𑀺𑀲𑀫𑀧𑀭𑀺𑀳𑀸𑀭𑁂𑀦 𑀚𑀸𑀢𑀸. 𑀑𑀧𑀓𑁆𑀓𑀫𑀺𑀓𑀸𑀢𑀺 𑀯𑀥𑀩𑀦𑁆𑀥𑀦𑀸𑀤𑀺𑀦𑀸 𑀉𑀧𑀓𑁆𑀓𑀫𑁂𑀦 𑀚𑀸𑀢𑀸. 𑀓𑀫𑁆𑀫𑀯𑀺𑀧𑀸𑀓𑀚𑀸𑀢𑀺 𑀩𑀮𑀯𑀓𑀫𑁆𑀫𑀯𑀺𑀧𑀸𑀓𑀲𑀫𑁆𑀪𑀽𑀢𑀸. 𑀲𑀦𑁆𑀢𑀦𑁆𑀢𑀺 𑀭𑀸𑀕𑀸𑀤𑀺𑀲𑀦𑁆𑀢𑀢𑀸𑀬 𑀲𑀦𑁆𑀢𑀁. 𑀅𑀢𑀧𑁆𑀧𑀓𑀝𑁆𑀞𑁂𑀦 𑀧𑀡𑀻𑀢𑀁. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀲𑀘𑀺𑀢𑁆𑀢𑀯𑀕𑁆𑀕𑁄 𑀧𑀞𑀫𑁄.

(𑁭) 𑁨. 𑀬𑀫𑀓𑀯𑀕𑁆𑀕𑁄

𑁧. 𑀅𑀯𑀺𑀚𑁆𑀚𑀸𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸