𑁧𑁪. 𑀏𑀢𑀤𑀕𑁆𑀕𑀯𑀕𑁆𑀕𑁄

(𑁧𑁪) 𑁭. 𑀲𑀢𑁆𑀢𑀫𑀏𑀢𑀤𑀕𑁆𑀕𑀯𑀕𑁆𑀕𑁄

𑀲𑀼𑀚𑀸𑀢𑀸𑀯𑀢𑁆𑀣𑀼

𑁨𑁫𑁮. 𑀉𑀧𑀸𑀲𑀺𑀓𑀸𑀧𑀸𑀴𑀺𑀬𑀸 𑀧𑀞𑀫𑁂 𑀧𑀞𑀫𑀁 𑀲𑀭𑀡𑀁 𑀕𑀘𑁆𑀙𑀦𑁆𑀢𑀻𑀦𑀦𑁆𑀢𑀺 𑀲𑀩𑁆𑀩𑀧𑀞𑀫𑀁 𑀲𑀭𑀡𑁂𑀲𑀼 𑀧𑀢𑀺𑀝𑁆𑀞𑀺𑀢𑀸𑀦𑀁 𑀉𑀧𑀸𑀲𑀺𑀓𑀸𑀦𑀁, 𑀲𑀼𑀚𑀸𑀢𑀸 𑀦𑀸𑀫, 𑀲𑁂𑀦𑀺𑀬𑀥𑀻𑀢𑀸 𑀅𑀕𑁆𑀕𑀸𑀢𑀺 𑀤𑀲𑁆𑀲𑁂𑀢𑀺. 𑀲𑀸𑀧𑀺 𑀧𑀤𑀼𑀫𑀼𑀢𑁆𑀢𑀭𑀩𑀼𑀤𑁆𑀥𑀓𑀸𑀮𑁂 𑀳𑀁𑀲𑀯𑀢𑀺𑀬𑀁 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑀸 𑀅𑀧𑀭𑀪𑀸𑀕𑁂 𑀲𑀢𑁆𑀣𑀼 𑀥𑀫𑁆𑀫𑀓𑀣𑀁 𑀲𑀼𑀡𑀦𑁆𑀢𑀻 𑀲𑀢𑁆𑀣𑀸𑀭𑀁 𑀏𑀓𑀁 𑀉𑀧𑀸𑀲𑀺𑀓𑀁 𑀧𑀞𑀫𑀁 𑀲𑀭𑀡𑀁 𑀕𑀘𑁆𑀙𑀦𑁆𑀢𑀻𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀦𑁆𑀢𑀁 𑀤𑀺𑀲𑁆𑀯𑀸 𑀅𑀥𑀺𑀓𑀸𑀭𑀁 𑀓𑀢𑁆𑀯𑀸 𑀢𑀁 𑀞𑀸𑀦𑀦𑁆𑀢𑀭𑀁 𑀧𑀢𑁆𑀣𑁂𑀲𑀺. 𑀲𑀸 𑀓𑀧𑁆𑀧𑀲𑀢𑀲𑀳𑀲𑁆𑀲𑀁 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀺𑀢𑁆𑀯𑀸 𑀅𑀫𑁆𑀳𑀸𑀓𑀁 𑀲𑀢𑁆𑀣𑀼 𑀦𑀺𑀩𑁆𑀩𑀢𑁆𑀢𑀺𑀢𑁄 𑀧𑀼𑀭𑁂𑀢𑀭𑀫𑁂𑀯 𑀉𑀭𑀼𑀯𑁂𑀮𑀸𑀬𑀁 𑀲𑁂𑀦𑀸𑀦𑀺𑀕𑀫𑁂 𑀲𑁂𑀦𑀺𑀬𑀓𑀼𑀝𑀼𑀫𑁆𑀩𑀺𑀓𑀲𑁆𑀲 𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑀸 𑀏𑀓𑀲𑁆𑀫𑀺𑀁 𑀦𑀺𑀕𑁆𑀭𑁄𑀥𑀫𑀽𑀮𑁂 𑀧𑀢𑁆𑀣𑀦𑀁 𑀅𑀓𑀸𑀲𑀺 𑁋 ‘‘𑀲𑀘𑁂 𑀲𑀫𑀚𑀸𑀢𑀺𑀓𑀁 𑀓𑀼𑀮𑀖𑀭𑀁 𑀕𑀦𑁆𑀢𑁆𑀯𑀸 𑀧𑀞𑀫𑀕𑀩𑁆𑀪𑁂 𑀧𑀼𑀢𑁆𑀢𑀁 𑀮𑀪𑀺𑀲𑁆𑀲𑀸𑀫𑀺, 𑀅𑀦𑀼𑀲𑀁𑀯𑀘𑁆𑀙𑀭𑀁 𑀩𑀮𑀺𑀓𑀫𑁆𑀫𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺. 𑀢𑀲𑁆𑀲𑀸 𑀲𑀸 𑀧𑀢𑁆𑀣𑀦𑀸 𑀲𑀫𑀺𑀚𑁆𑀛𑀺.

𑀲𑀸 𑀫𑀳𑀸𑀲𑀢𑁆𑀢𑀲𑁆𑀲 𑀤𑀼𑀓𑁆𑀓𑀭𑀓𑀸𑀭𑀺𑀓𑀁 𑀓𑀭𑁄𑀦𑁆𑀢𑀲𑁆𑀲 𑀙𑀝𑁆𑀞𑁂 𑀯𑀲𑁆𑀲𑁂 𑀧𑀭𑀺𑀧𑀼𑀡𑁆𑀡𑁂 𑀯𑀺𑀲𑀸𑀔𑀧𑀼𑀡𑁆𑀡𑀫𑀤𑀺𑀯𑀲𑁂 ‘‘𑀧𑀸𑀢𑁄𑀯 𑀩𑀮𑀺𑀓𑀫𑁆𑀫𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀭𑀢𑁆𑀢𑀺𑀬𑀸 𑀧𑀘𑁆𑀘𑀽𑀲𑀲𑀫𑀬𑀁 𑀧𑀘𑁆𑀘𑀼𑀝𑁆𑀞𑀸𑀬 𑀥𑁂𑀦𑀼𑀬𑁄 𑀤𑀼𑀳𑀸𑀧𑁂𑀲𑀺. 𑀯𑀘𑁆𑀙𑀓𑀸 𑀥𑁂𑀦𑀽𑀦𑀁 𑀣𑀦𑀫𑀽𑀮𑀁 𑀦 𑀆𑀕𑀫𑀁𑀲𑀼, 𑀣𑀦𑀫𑀽𑀮𑁂 𑀦𑀯𑀪𑀸𑀚𑀦𑀫𑁆𑀳𑀺 𑀉𑀧𑀦𑀻𑀢𑀫𑀢𑁆𑀢𑁂 𑀅𑀢𑁆𑀢𑀦𑁄𑀯 𑀥𑀫𑁆𑀫𑀢𑀸𑀬 𑀔𑀻𑀭𑀥𑀸𑀭𑀸 𑀧𑀢𑀺𑀁𑀲𑀼. 𑀢𑀁 𑀅𑀘𑁆𑀙𑀭𑀺𑀬𑀁 𑀤𑀺𑀲𑁆𑀯𑀸, 𑀲𑀼𑀚𑀸𑀢𑀸, 𑀲𑀳𑀢𑁆𑀣𑁂𑀦𑁂𑀯 𑀔𑀻𑀭𑀁 𑀕𑀡𑁆𑀳𑀺𑀢𑁆𑀯𑀸 𑀦𑀯𑀪𑀸𑀚𑀦𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀲𑀳𑀢𑁆𑀣𑁂𑀦𑁂𑀯 𑀅𑀕𑁆𑀕𑀺𑀁 𑀓𑀢𑁆𑀯𑀸 𑀧𑀘𑀺𑀢𑀼𑀁 𑀆𑀭𑀪𑀺. 𑀢𑀲𑁆𑀫𑀺𑀁 𑀧𑀸𑀬𑀸𑀲𑁂 𑀧𑀘𑁆𑀘𑀫𑀸𑀦𑁂 𑀫𑀳𑀦𑁆𑀢𑀫𑀳𑀦𑁆𑀢𑀸 𑀩𑀼𑀩𑁆𑀩𑀼𑀴𑀸 𑀉𑀝𑁆𑀞𑀳𑀺𑀢𑁆𑀯𑀸 𑀤𑀓𑁆𑀔𑀺𑀡𑀸𑀯𑀢𑁆𑀢𑀸 𑀳𑀼𑀢𑁆𑀯𑀸 𑀲𑀜𑁆𑀘𑀭𑀦𑁆𑀢𑀺, 𑀏𑀓𑀨𑀼𑀲𑀺𑀢𑀫𑁆𑀧𑀺 𑀩𑀳𑀺 𑀦 𑀦𑀺𑀕𑁆𑀕𑀘𑁆𑀙𑀢𑀺. 𑀫𑀳𑀸𑀩𑁆𑀭𑀳𑁆𑀫𑀸 𑀙𑀢𑁆𑀢𑀁 𑀥𑀸𑀭𑁂𑀲𑀺, 𑀘𑀢𑁆𑀢𑀸𑀭𑁄 𑀮𑁄𑀓𑀧𑀸𑀮𑀸 𑀔𑀕𑁆𑀕𑀳𑀢𑁆𑀣𑀸 𑀆𑀭𑀓𑁆𑀔𑀁 𑀕𑀡𑁆𑀳𑀺𑀁𑀲𑀼, 𑀲𑀓𑁆𑀓𑁄 𑀅𑀮𑀸𑀢𑀸𑀦𑀺 𑀲𑀫𑀸𑀦𑁂𑀦𑁆𑀢𑁄 𑀅𑀕𑁆𑀕𑀺𑀁 𑀚𑀸𑀮𑁂𑀲𑀺. 𑀤𑁂𑀯𑀢𑀸 𑀘𑀢𑀽𑀲𑀼 𑀤𑀻𑀧𑁂𑀲𑀼 𑀑𑀚𑀁 𑀲𑀁𑀳𑀭𑀺𑀢𑁆𑀯𑀸 𑀢𑀢𑁆𑀣 𑀧𑀓𑁆𑀔𑀺𑀧𑀺𑀁𑀲𑀼. 𑀲𑀼𑀚𑀸𑀢𑀸, 𑀏𑀓𑀤𑀺𑀯𑀲𑁂𑀬𑁂𑀯 𑀇𑀫𑀸𑀦𑀺 𑀅𑀘𑁆𑀙𑀭𑀺𑀬𑀸𑀦𑀺 𑀤𑀺𑀲𑁆𑀯𑀸 𑀧𑀼𑀡𑁆𑀡𑀸𑀤𑀸𑀲𑀺𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀅𑀫𑁆𑀫, 𑀧𑀼𑀡𑁆𑀡𑁂 𑀅𑀚𑁆𑀚 𑀅𑀫𑁆𑀳𑀸𑀓𑀁 𑀤𑁂𑀯𑀢𑀸 𑀅𑀢𑀺𑀯𑀺𑀬 𑀧𑀲𑀦𑁆𑀦𑀸, 𑀫𑀬𑀸 𑀏𑀢𑁆𑀢𑀓𑀁 𑀓𑀸𑀮𑀁 𑀏𑀯𑀭𑀽𑀧𑀁 𑀅𑀘𑁆𑀙𑀭𑀺𑀬𑀁 𑀦𑀸𑀫 𑀦 𑀤𑀺𑀝𑁆𑀞𑀧𑀼𑀩𑁆𑀩𑀁, 𑀯𑁂𑀕𑁂𑀦 𑀕𑀦𑁆𑀢𑁆𑀯𑀸 𑀤𑁂𑀯𑀝𑁆𑀞𑀸𑀦𑀁 𑀧𑀝𑀺𑀚𑀕𑁆𑀕𑀸𑀳𑀻’’𑀢𑀺. 𑀲𑀸 ‘‘𑀲𑀸𑀥𑀼, 𑀅𑀬𑁆𑀬𑁂’’𑀢𑀺 𑀢𑀲𑁆𑀲𑀸 𑀯𑀘𑀦𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀢𑀼𑀭𑀺𑀢𑀢𑀼𑀭𑀺𑀢𑀸 𑀭𑀼𑀓𑁆𑀔𑀫𑀽𑀮𑀁 𑀅𑀕𑀫𑀸𑀲𑀺.

𑀩𑁄𑀥𑀺𑀲𑀢𑁆𑀢𑁄𑀧𑀺 𑀔𑁄 𑀪𑀺𑀓𑁆𑀔𑀸𑀘𑀸𑀭𑀓𑀸𑀮𑀁 𑀆𑀕𑀫𑀬𑀫𑀸𑀦𑁄 𑀧𑀸𑀢𑁄𑀯 𑀕𑀦𑁆𑀢𑁆𑀯𑀸 𑀭𑀼𑀓𑁆𑀔𑀫𑀽𑀮𑁂 𑀦𑀺𑀲𑀻𑀤𑀺. 𑀭𑀼𑀓𑁆𑀔𑀫𑀽𑀮𑀁 𑀲𑁄𑀥𑀦𑀢𑁆𑀣𑀸𑀬 𑀕𑀢𑀸 𑀧𑀼𑀡𑁆𑀡𑀸 𑀆𑀕𑀦𑁆𑀢𑁆𑀯𑀸 𑀲𑀼𑀚𑀸𑀢𑀸𑀬 𑀆𑀭𑁄𑀘𑁂𑀲𑀺 𑁋 ‘‘𑀤𑁂𑀯𑀢𑀸 𑀭𑀼𑀓𑁆𑀔𑀫𑀽𑀮𑁂 𑀦𑀺𑀲𑀺𑀦𑁆𑀦𑀸’’𑀢𑀺. 𑀲𑀼𑀚𑀸𑀢𑀸, ‘‘𑀲𑀘𑁂 𑀚𑁂 𑀲𑀘𑁆𑀘𑀁 𑀪𑀡𑀲𑀺, 𑀅𑀤𑀸𑀲𑀺𑀁 𑀓𑀭𑁄𑀫𑀻’’𑀢𑀺 𑀯𑀢𑁆𑀯𑀸 𑀲𑀩𑁆𑀩𑀧𑀲𑀸𑀥𑀦𑀁 𑀧𑀲𑀸𑀥𑁂𑀢𑁆𑀯𑀸 𑀲𑀢𑀲𑀳𑀲𑁆𑀲𑀕𑁆𑀖𑀦𑀓𑁂 𑀲𑀼𑀯𑀡𑁆𑀡𑀣𑀸𑀮𑁂 𑀧𑀸𑀬𑀸𑀲𑀁 𑀯𑀟𑁆𑀠𑁂𑀢𑁆𑀯𑀸 𑀅𑀧𑀭𑀸𑀬 𑀲𑀼𑀯𑀡𑁆𑀡𑀧𑀸𑀢𑀺𑀬𑀸 𑀧𑀺𑀤𑀳𑀺𑀢𑁆𑀯𑀸 𑀲𑁂𑀢𑀯𑀢𑁆𑀣𑁂𑀦 𑀲𑀫𑁆𑀧𑀮𑀺𑀯𑁂𑀞𑁂𑀢𑁆𑀯𑀸 𑀲𑀫𑀦𑁆𑀢𑀸 𑀕𑀦𑁆𑀥𑀤𑀸𑀫𑀫𑀸𑀮𑀸𑀤𑀸𑀫𑀸𑀦𑀺 𑀑𑀲𑀸𑀭𑁂𑀢𑁆𑀯𑀸 𑀉𑀓𑁆𑀔𑀺𑀧𑀺𑀢𑁆𑀯𑀸 𑀕𑀦𑁆𑀢𑁆𑀯𑀸 𑀫𑀳𑀸𑀧𑀼𑀭𑀺𑀲𑀁 𑀤𑀺𑀲𑁆𑀯𑀸 𑀩𑀮𑀯𑀧𑀻𑀢𑀺𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀤𑀺𑀝𑁆𑀞𑀝𑁆𑀞𑀸𑀦𑀢𑁄 𑀧𑀝𑁆𑀞𑀸𑀬 𑀑𑀡𑀢𑁄𑀡𑀢𑀸 𑀕𑀦𑁆𑀢𑁆𑀯𑀸 𑀲𑀻𑀲𑀢𑁄 𑀣𑀸𑀮𑀁 𑀑𑀢𑀸𑀭𑁂𑀢𑁆𑀯𑀸 𑀯𑀺𑀯𑀭𑀺𑀢𑁆𑀯𑀸 𑀲𑀳𑁂𑀯 𑀧𑀸𑀢𑀺𑀬𑀸 𑀧𑀸𑀬𑀸𑀲𑀁 𑀫𑀳𑀸𑀧𑀼𑀭𑀺𑀲𑀲𑁆𑀲 𑀳𑀢𑁆𑀣𑁂 𑀞𑀧𑁂𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 ‘‘𑀬𑀣𑀸 𑀫𑀬𑁆𑀳𑀁 𑀫𑀦𑁄𑀭𑀣𑁄 𑀦𑀺𑀧𑁆𑀨𑀦𑁆𑀦𑁄, 𑀏𑀯𑀁 𑀢𑀼𑀫𑁆𑀳𑀸𑀓𑀫𑁆𑀧𑀺 𑀦𑀺𑀧𑁆𑀨𑀚𑁆𑀚𑀢𑀽’’𑀢𑀺 𑀯𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀩𑁄𑀥𑀺𑀲𑀢𑁆𑀢𑁄 𑀦𑁂𑀭𑀜𑁆𑀚𑀭𑀸𑀬 𑀦𑀤𑀺𑀬𑀸 𑀢𑀻𑀭𑀁 𑀕𑀦𑁆𑀢𑁆𑀯𑀸 𑀲𑀼𑀯𑀡𑁆𑀡𑀣𑀸𑀮𑀁 𑀢𑀻𑀭𑁂 𑀞𑀧𑁂𑀢𑁆𑀯𑀸 𑀦𑁆𑀳𑀢𑁆𑀯𑀸 𑀧𑀘𑁆𑀘𑀼𑀢𑁆𑀢𑀭𑀺𑀢𑁆𑀯𑀸 𑀏𑀓𑀽𑀦𑀧𑀡𑁆𑀡𑀸𑀲 𑀧𑀺𑀡𑁆𑀟𑁂 𑀓𑀭𑁄𑀦𑁆𑀢𑁄 𑀧𑀸𑀬𑀸𑀲𑀁 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀲𑀼𑀯𑀡𑁆𑀡𑀧𑀸𑀢𑀺𑀁 𑀦𑀤𑀺𑀬𑀸 𑀲𑀫𑁆𑀧𑀯𑀸𑀳𑁂𑀢𑁆𑀯𑀸 𑀅𑀦𑀼𑀓𑁆𑀓𑀫𑁂𑀦 𑀩𑁄𑀥𑀺𑀫𑀡𑁆𑀟𑀁 𑀆𑀭𑀼𑀬𑁆𑀳 𑀲𑀩𑁆𑀩𑀜𑁆𑀜𑀼𑀢𑀁 𑀧𑀢𑁆𑀯𑀸 𑀲𑀢𑁆𑀢𑀲𑀢𑁆𑀢𑀸𑀳𑀁 𑀩𑁄𑀥𑀺𑀫𑀡𑁆𑀟𑁂 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀇𑀲𑀺𑀧𑀢𑀦𑁂 𑀫𑀺𑀕𑀤𑀸𑀬𑁂 𑀧𑀯𑀢𑁆𑀢𑀺𑀢𑀯𑀭𑀥𑀫𑁆𑀫𑀘𑀓𑁆𑀓𑁄 𑀲𑀼𑀚𑀸𑀢𑀸𑀬 𑀧𑀼𑀢𑁆𑀢𑀲𑁆𑀲 𑀬𑀲𑀤𑀸𑀭𑀓𑀲𑁆𑀲 𑀉𑀧𑀦𑀺𑀲𑁆𑀲𑀬𑀁 𑀤𑀺𑀲𑁆𑀯𑀸 𑀕𑀦𑁆𑀢𑁆𑀯𑀸 𑀅𑀜𑁆𑀜𑀢𑀭𑀲𑁆𑀫𑀺𑀁 𑀭𑀼𑀓𑁆𑀔𑀫𑀽𑀮𑁂 𑀦𑀺𑀲𑀻𑀤𑀺.

𑀬𑀲𑁄𑀧𑀺 𑀓𑀼𑀮𑀧𑀼𑀢𑁆𑀢𑁄 𑀭𑀢𑁆𑀢𑀺𑀪𑀸𑀕𑀲𑀫𑀦𑀦𑁆𑀢𑀭𑁂 𑀯𑀺𑀯𑀝𑀁 𑀇𑀢𑁆𑀣𑀸𑀕𑀸𑀭𑀁 𑀤𑀺𑀲𑁆𑀯𑀸 𑀲𑀜𑁆𑀚𑀸𑀢𑀲𑀁𑀯𑁂𑀕𑁄 ‘‘𑀉𑀧𑀤𑁆𑀤𑀼𑀢𑀁 𑀯𑀢, 𑀪𑁄, 𑀉𑀧𑀲𑀝𑁆𑀞𑀁 𑀯𑀢, 𑀪𑁄’’𑀢𑀺 𑀯𑀢𑁆𑀯𑀸 𑀦𑀺𑀯𑁂𑀲𑀦𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸𑀯 𑀩𑀳𑀺𑀦𑀕𑀭𑁂 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀢𑀻𑀡𑀺 𑀫𑀕𑁆𑀕𑀨𑀮𑀸𑀦𑀺 𑀧𑀝𑀺𑀯𑀺𑀚𑁆𑀛𑀺. 𑀅𑀣𑀲𑁆𑀲 𑀧𑀺𑀢𑀸 𑀧𑀤𑀸𑀦𑀼𑀧𑀤𑀺𑀓𑀁 𑀕𑀦𑁆𑀢𑁆𑀯𑀸 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀬𑀲𑀲𑁆𑀲 𑀧𑀯𑀢𑁆𑀢𑀺𑀁 𑀧𑀼𑀘𑁆𑀙𑀺. 𑀲𑀢𑁆𑀣𑀸 𑀬𑀲𑀁 𑀓𑀼𑀮𑀧𑀼𑀢𑁆𑀢𑀁 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀲𑁄 𑀲𑁂𑀝𑁆𑀞𑀺𑀕𑀳𑀧𑀢𑀺 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀸𑀲𑀺, 𑀬𑀲𑁄 𑀅𑀭𑀳𑀢𑁆𑀢𑀨𑀮𑀁 𑀧𑀸𑀧𑀼𑀡𑀺. 𑀢𑀁 𑀪𑀕𑀯𑀸 ‘‘𑀏𑀳𑀺 𑀪𑀺𑀓𑁆𑀔𑀽’’𑀢𑀺 𑀆𑀳, 𑀢𑀸𑀯𑀤𑁂𑀯𑀲𑁆𑀲 𑀕𑀺𑀳𑀺𑀮𑀺𑀗𑁆𑀕𑀁 𑀅𑀦𑁆𑀢𑀭𑀥𑀸𑀬𑀺, 𑀇𑀤𑁆𑀥𑀺𑀫𑀬𑀧𑀢𑁆𑀢𑀘𑀻𑀯𑀭𑀥𑀭𑁄 𑀅𑀳𑁄𑀲𑀺. 𑀧𑀺𑀢𑀸𑀧𑀺𑀲𑁆𑀲 𑀲𑀢𑁆𑀣𑀸𑀭𑀁 𑀦𑀺𑀫𑀦𑁆𑀢𑁂𑀲𑀺. 𑀲𑀢𑁆𑀣𑀸 𑀬𑀲𑀁 𑀓𑀼𑀮𑀧𑀼𑀢𑁆𑀢𑀁 𑀧𑀘𑁆𑀙𑀸𑀲𑀫𑀡𑀁 𑀓𑀢𑁆𑀯𑀸 𑀢𑀲𑁆𑀲 𑀖𑀭𑀁 𑀕𑀦𑁆𑀢𑁆𑀯𑀸 𑀓𑀢𑀪𑀢𑁆𑀢𑀓𑀺𑀘𑁆𑀘𑁄 𑀥𑀫𑁆𑀫𑀁 𑀤𑁂𑀲𑁂𑀲𑀺, 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀬𑀲𑀲𑁆𑀲 𑀫𑀸𑀢𑀸, 𑀲𑀼𑀚𑀸𑀢𑀸, 𑀧𑀼𑀭𑀸𑀡𑀤𑀼𑀢𑀺𑀬𑀺𑀓𑀸 𑀘 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺𑀁𑀲𑀼. 𑀢𑀁𑀤𑀺𑀯𑀲𑀁 𑀅𑀬𑀁, 𑀲𑀼𑀚𑀸𑀢𑀸, 𑀢𑁂𑀯𑀸𑀘𑀺𑀓𑀲𑀭𑀡𑁂 𑀧𑀢𑀺𑀝𑁆𑀞𑀸𑀲𑀺 𑀲𑀤𑁆𑀥𑀺𑀁 𑀲𑀼𑀡𑀺𑀲𑀸𑀬. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑀢𑁄 𑀧𑀦𑁂𑀢𑀁 𑀯𑀢𑁆𑀣𑀼 𑀔𑀦𑁆𑀥𑀓𑁂 (𑀫𑀳𑀸𑀯. 𑁨𑁫-𑁨𑁮) 𑀆𑀕𑀢𑀫𑁂𑀯. 𑀲𑀢𑁆𑀣𑀸 𑀅𑀧𑀭𑀪𑀸𑀕𑁂 𑀧𑀝𑀺𑀧𑀸𑀝𑀺𑀬𑀸 𑀉𑀧𑀸𑀲𑀺𑀓𑀸𑀬𑁄 𑀞𑀸𑀦𑀦𑁆𑀢𑀭𑁂𑀲𑀼 𑀞𑀧𑁂𑀦𑁆𑀢𑁄 𑀇𑀫𑀁 𑀉𑀧𑀸𑀲𑀺𑀓𑀁 𑀧𑀞𑀫𑀁 𑀲𑀭𑀡𑀁 𑀕𑀘𑁆𑀙𑀦𑁆𑀢𑀻𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀲𑀻𑀢𑀺.

𑀯𑀺𑀲𑀸𑀔𑀸𑀯𑀢𑁆𑀣𑀼

𑁨𑁫𑁯. 𑀤𑀼𑀢𑀺𑀬𑁂 𑀤𑀸𑀬𑀺𑀓𑀸𑀦𑀦𑁆𑀢𑀺 𑀤𑀸𑀦𑀸𑀪𑀺𑀭𑀢𑀸𑀦𑀁 𑀉𑀧𑀸𑀲𑀺𑀓𑀸𑀦𑀁, 𑀯𑀺𑀲𑀸𑀔𑀸 𑀫𑀺𑀕𑀸𑀭𑀫𑀸𑀢𑀸, 𑀅𑀕𑁆𑀕𑀸𑀢𑀺 𑀤𑀲𑁆𑀲𑁂𑀢𑀺. 𑀲𑀸 𑀓𑀺𑀭 𑀧𑀤𑀼𑀫𑀼𑀢𑁆𑀢𑀭𑀩𑀼𑀤𑁆𑀥𑀓𑀸𑀮𑁂 𑀳𑀁𑀲𑀯𑀢𑀺𑀬𑀁 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑀸 𑀅𑀧𑀭𑀪𑀸𑀕𑁂 𑀲𑀢𑁆𑀣𑀼 𑀥𑀫𑁆𑀫𑀤𑁂𑀲𑀦𑀁 𑀲𑀼𑀡𑀦𑁆𑀢𑀻 𑀲𑀢𑁆𑀣𑀸𑀭𑀁 𑀏𑀓𑀁 𑀉𑀧𑀸𑀲𑀺𑀓𑀁 𑀤𑀸𑀬𑀺𑀓𑀸𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀦𑁆𑀢𑀁 𑀤𑀺𑀲𑁆𑀯𑀸 𑀅𑀥𑀺𑀓𑀸𑀭𑀓𑀫𑁆𑀫𑀁 𑀓𑀢𑁆𑀯𑀸 𑀢𑀁 𑀞𑀸𑀦𑀦𑁆𑀢𑀭𑀁 𑀧𑀢𑁆𑀣𑁂𑀲𑀺. 𑀲𑀸 𑀓𑀧𑁆𑀧𑀲𑀢𑀲𑀳𑀲𑁆𑀲𑀁 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀺𑀢𑁆𑀯𑀸 𑀓𑀲𑁆𑀲𑀧𑀩𑀼𑀤𑁆𑀥𑀓𑀸𑀮𑁂 𑀓𑀺𑀓𑀺𑀲𑁆𑀲 𑀓𑀸𑀲𑀺𑀭𑀜𑁆𑀜𑁄 𑀕𑁂𑀳𑁂 𑀲𑀢𑁆𑀢𑀦𑁆𑀦𑀁 𑀪𑀕𑀺𑀦𑀻𑀦𑀁 𑀲𑀩𑁆𑀩𑀓𑀦𑀺𑀝𑁆𑀞𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀢𑀤𑀸 𑀓𑀺𑀭 𑁋

‘‘𑀲𑀫𑀡𑀻 𑀲𑀫𑀡𑀕𑀼𑀢𑁆𑀢𑀸 𑀘, 𑀪𑀺𑀓𑁆𑀔𑀼𑀦𑀻 𑀪𑀺𑀓𑁆𑀔𑀼𑀤𑀸𑀬𑀺𑀓𑀸;

𑀥𑀫𑁆𑀫𑀸 𑀘𑁂𑀯 𑀲𑀼𑀥𑀫𑁆𑀫𑀸 𑀘, 𑀲𑀗𑁆𑀖𑀤𑀸𑀲𑀻 𑀘 𑀲𑀢𑁆𑀢𑀫𑀸’’𑀢𑀺.

𑀇𑀫𑀸 𑀲𑀢𑁆𑀢 𑀪𑀕𑀺𑀦𑀺𑀬𑁄 𑀅𑀳𑁂𑀲𑀼𑀁. 𑀢𑀸 𑀏𑀢𑀭𑀳𑀺 𑁋

‘‘𑀔𑁂𑀫𑀸 𑀉𑀧𑁆𑀧𑀮𑀯𑀡𑁆𑀡𑀸 𑀘, 𑀧𑀝𑀸𑀘𑀸𑀭𑀸 𑀘 𑀕𑁄𑀢𑀫𑀻;

𑀥𑀫𑁆𑀫𑀤𑀺𑀦𑁆𑀦𑀸 𑀫𑀳𑀸𑀫𑀸𑀬𑀸, 𑀯𑀺𑀲𑀸𑀔𑀸 𑀘𑁂𑀯 𑀲𑀢𑁆𑀢𑀫𑀻’’𑀢𑀺. 𑁋

𑀏𑀯𑀁𑀦𑀸𑀫𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀸. 𑀢𑀢𑁆𑀭𑀸𑀬𑀁 𑀲𑀗𑁆𑀖𑀤𑀸𑀲𑀻 𑀏𑀓𑀁 𑀩𑀼𑀤𑁆𑀥𑀦𑁆𑀢𑀭𑀁 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀅𑀗𑁆𑀕𑀭𑀝𑁆𑀞𑁂 𑀪𑀤𑁆𑀤𑀺𑀬𑀦𑀕𑀭𑁂 𑀫𑁂𑀡𑁆𑀟𑀓𑀲𑁂𑀝𑁆𑀞𑀺𑀧𑀼𑀢𑁆𑀢𑀲𑁆𑀲 𑀥𑀦𑀜𑁆𑀘𑀬𑀲𑁂𑀝𑁆𑀞𑀺𑀦𑁄 𑀅𑀕𑁆𑀕𑀫𑀳𑁂𑀲𑀺𑀬𑀸 𑀲𑀼𑀫𑀦𑀤𑁂𑀯𑀺𑀬𑀸 𑀦𑀸𑀫 𑀓𑀼𑀘𑁆𑀙𑀺𑀲𑁆𑀫𑀺𑀁 𑀦𑀺𑀩𑁆𑀩𑀢𑁆𑀢𑀺, 𑀯𑀺𑀲𑀸𑀔𑀸𑀢𑀺𑀲𑁆𑀲𑀸 𑀦𑀸𑀫𑀁 𑀅𑀓𑀁𑀲𑀼. 𑀢𑀲𑁆𑀲𑀸 𑀲𑀢𑁆𑀢𑀯𑀲𑁆𑀲𑀺𑀓𑀓𑀸𑀮𑁂 𑀤𑀲𑀩𑀮𑁄 𑀲𑁂𑀮𑀩𑁆𑀭𑀸𑀳𑁆𑀫𑀡𑀲𑁆𑀲 𑀘 𑀅𑀜𑁆𑀜𑁂𑀲𑀜𑁆𑀘 𑀩𑁄𑀥𑀦𑁂𑀬𑁆𑀬𑀩𑀦𑁆𑀥𑀯𑀸𑀦𑀁 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀢𑁆𑀢𑀺𑀁 𑀤𑀺𑀲𑁆𑀯𑀸 𑀫𑀳𑀸𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀸𑀭𑁄 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀢𑀲𑁆𑀫𑀺𑀁 𑀭𑀝𑁆𑀞𑁂 𑀢𑀁 𑀦𑀕𑀭𑀁 𑀧𑀸𑀧𑀼𑀡𑀺.

𑀢𑀲𑁆𑀫𑀺𑀜𑁆𑀘 𑀲𑀫𑀬𑁂 𑀫𑁂𑀡𑁆𑀟𑀓𑁄 𑀕𑀳𑀧𑀢𑀺 𑀢𑀲𑁆𑀫𑀺𑀁 𑀦𑀕𑀭𑁂 𑀧𑀜𑁆𑀘𑀦𑁆𑀦𑀁 𑀫𑀳𑀸𑀧𑀼𑀜𑁆𑀜𑀸𑀦𑀁 𑀚𑁂𑀝𑁆𑀞𑀓𑁄 𑀳𑀼𑀢𑁆𑀯𑀸 𑀲𑁂𑀝𑁆𑀞𑀺𑀝𑁆𑀞𑀸𑀦𑀁 𑀓𑀸𑀭𑁂𑀲𑀺. 𑀧𑀜𑁆𑀘 𑀫𑀳𑀸𑀧𑀼𑀜𑁆𑀜𑀸 𑀦𑀸𑀫 𑀫𑁂𑀡𑁆𑀟𑀓𑁄 𑀲𑁂𑀝𑁆𑀞𑀺, 𑀘𑀦𑁆𑀤𑀧𑀤𑀼𑀫𑀸 𑀦𑀸𑀫 𑀢𑀲𑁆𑀲𑁂𑀯 𑀅𑀕𑁆𑀕𑀫𑀳𑁂𑀲𑀻, 𑀢𑀲𑁆𑀲 𑀘 𑀧𑀼𑀢𑁆𑀢𑁄 𑀥𑀦𑀜𑁆𑀘𑀬𑁄 𑀦𑀸𑀫, 𑀢𑀲𑁆𑀲 𑀪𑀭𑀺𑀬𑀸 𑀲𑀼𑀫𑀦𑀤𑁂𑀯𑀻 𑀦𑀸𑀫, 𑀫𑁂𑀡𑁆𑀟𑀓𑀲𑁂𑀝𑁆𑀞𑀺𑀲𑁆𑀲 𑀤𑀸𑀲𑁄 𑀧𑀼𑀡𑁆𑀡𑁄 𑀦𑀸𑀫𑀸𑀢𑀺. 𑀦 𑀓𑁂𑀯𑀮𑀜𑁆𑀘 𑀫𑁂𑀡𑁆𑀟𑀓𑀲𑁂𑀝𑁆𑀞𑀺𑀬𑁂𑀯, 𑀩𑀺𑀫𑁆𑀩𑀺𑀲𑀸𑀭𑀫𑀳𑀸𑀭𑀸𑀚𑀲𑁆𑀲 𑀧𑀦 𑀆𑀡𑀸𑀧𑀯𑀢𑁆𑀢𑀺𑀝𑁆𑀞𑀸𑀦𑁂 𑀧𑀜𑁆𑀘 𑀅𑀫𑀺𑀢𑀪𑁄𑀕𑀸 𑀦𑀸𑀫 𑀅𑀳𑁂𑀲𑀼𑀁 𑀚𑁄𑀢𑀺𑀓𑁄 𑀚𑀝𑀺𑀮𑁄 𑀫𑁂𑀡𑁆𑀟𑀓𑁄 𑀧𑀼𑀡𑁆𑀡𑁄 𑀓𑀸𑀓𑀯𑀮𑀺𑀬𑁄𑀢𑀺. 𑀢𑁂𑀲𑀼 𑀅𑀬𑀁 𑀫𑁂𑀡𑁆𑀟𑀓𑀲𑁂𑀝𑁆𑀞𑀺 𑀤𑀲𑀩𑀮𑀲𑁆𑀲 𑀅𑀢𑁆𑀢𑀦𑁄 𑀦𑀕𑀭𑀁 𑀲𑀫𑁆𑀧𑀢𑁆𑀢𑀪𑀸𑀯𑀁 𑀲𑀼𑀢𑁆𑀯𑀸 𑀧𑀼𑀢𑁆𑀢𑀲𑁆𑀲 𑀥𑀦𑀜𑁆𑀘𑀬𑀲𑁂𑀝𑁆𑀞𑀺𑀦𑁄 𑀥𑀻𑀢𑀭𑀁 𑀯𑀺𑀲𑀸𑀔𑀸𑀤𑀸𑀭𑀺𑀓𑀁 𑀧𑀓𑁆𑀓𑁄𑀲𑀺𑀢𑁆𑀯𑀸 𑀏𑀯𑀫𑀸𑀳 𑁋 ‘‘𑀅𑀫𑁆𑀫, 𑀢𑀼𑀬𑁆𑀳𑀫𑁆𑀧𑀺 𑀫𑀗𑁆𑀕𑀮𑀁 𑀅𑀫𑁆𑀳𑀸𑀓𑀫𑁆𑀧𑀺 𑀫𑀗𑁆𑀕𑀮𑀁, 𑀢𑀯 𑀧𑀭𑀺𑀘𑀸𑀭𑀺𑀓𑀸𑀳𑀺 𑀧𑀜𑁆𑀘𑀤𑀸𑀭𑀺𑀓𑀸𑀲𑀢𑁂𑀳𑀺 𑀲𑀤𑁆𑀥𑀺𑀁 𑀧𑀜𑁆𑀘 𑀭𑀣𑀲𑀢𑀸𑀦𑀺 𑀆𑀭𑀼𑀬𑁆𑀳 𑀧𑀜𑁆𑀘𑀳𑀺 𑀤𑀸𑀲𑀺𑀲𑀢𑁂𑀳𑀺 𑀧𑀭𑀺𑀯𑀼𑀢𑀸 𑀤𑀲𑀩𑀮𑀲𑁆𑀲 𑀧𑀘𑁆𑀘𑀼𑀕𑁆𑀕𑀫𑀦𑀁 𑀓𑀭𑁄𑀳𑀻’’𑀢𑀺. 𑀲𑀸 𑀧𑀺𑀢𑀸𑀫𑀳𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀢𑀣𑀸 𑀅𑀓𑀸𑀲𑀺. 𑀓𑀸𑀭𑀡𑀸𑀓𑀸𑀭𑀡𑁂𑀲𑀼 𑀧𑀦 𑀓𑀼𑀲𑀮𑀢𑁆𑀢𑀸 𑀬𑀸𑀯𑀢𑀺𑀓𑀸 𑀬𑀸𑀦𑀲𑁆𑀲 𑀪𑀽𑀫𑀺, 𑀬𑀸𑀦𑁂𑀦 𑀕𑀦𑁆𑀢𑁆𑀯𑀸 𑀬𑀸𑀦𑀸 𑀧𑀘𑁆𑀘𑁄𑀭𑁄𑀳𑀺𑀢𑁆𑀯𑀸 𑀧𑀢𑁆𑀢𑀺𑀓𑀸𑀯 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀅𑀣𑀲𑁆𑀲𑀸 𑀘𑀭𑀺𑀢𑀯𑀲𑁂𑀦 𑀲𑀢𑁆𑀣𑀸 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀧𑀜𑁆𑀘𑀳𑀺 𑀤𑀸𑀭𑀺𑀓𑀸𑀲𑀢𑁂𑀳𑀺 𑀲𑀤𑁆𑀥𑀺𑀁 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀸𑀲𑀺. 𑀫𑁂𑀡𑁆𑀟𑀓𑀲𑁂𑀝𑁆𑀞𑀺𑀧𑀺 𑀔𑁄 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀅𑀣 𑀲𑀢𑁆𑀣𑀸 𑀢𑀲𑁆𑀲𑀧𑀺 𑀘𑀭𑀺𑀢𑀯𑀲𑁂𑀦 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀲𑁄 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀸𑀬 𑀲𑀢𑁆𑀣𑀸𑀭𑀁 𑀲𑁆𑀯𑀸𑀢𑀦𑀸𑀬 𑀦𑀺𑀫𑀦𑁆𑀢𑁂𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀅𑀢𑁆𑀢𑀦𑁄 𑀦𑀺𑀯𑁂𑀲𑀦𑁂 𑀧𑀡𑀻𑀢𑁂𑀦 𑀔𑀸𑀤𑀦𑀻𑀬𑁂𑀦 𑀪𑁄𑀚𑀦𑀻𑀬𑁂𑀦 𑀩𑀼𑀤𑁆𑀥𑀧𑁆𑀧𑀫𑀼𑀔𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀭𑀺𑀯𑀺𑀲𑀺𑀢𑁆𑀯𑀸 𑀏𑀢𑁂𑀦𑀼𑀧𑀸𑀬𑁂𑀦 𑀅𑀟𑁆𑀠𑀫𑀸𑀲𑀁 𑀫𑀳𑀸𑀤𑀸𑀦𑀁 𑀅𑀤𑀸𑀲𑀺. 𑀲𑀢𑁆𑀣𑀸 𑀪𑀤𑁆𑀤𑀺𑀬𑀦𑀕𑀭𑁂 𑀬𑀣𑀸𑀪𑀺𑀭𑀦𑁆𑀢𑀁 𑀯𑀺𑀳𑀭𑀺𑀢𑁆𑀯𑀸 𑀧𑀓𑁆𑀓𑀸𑀫𑀺.

𑀇𑀢𑁄 𑀧𑀭𑀁 𑀅𑀜𑁆𑀜𑀁 𑀓𑀣𑀸𑀫𑀕𑁆𑀕𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀯𑀺𑀲𑀸𑀔𑀸𑀬 𑀉𑀧𑁆𑀧𑀢𑁆𑀢𑀺𑀓𑀣𑀸𑀯 𑀓𑀣𑁂𑀢𑀩𑁆𑀩𑀸. 𑀲𑀸𑀯𑀢𑁆𑀣𑀺𑀬𑀜𑁆𑀳𑀺 𑀓𑁄𑀲𑀮𑀭𑀸𑀚𑀸 𑀩𑀺𑀫𑁆𑀩𑀺𑀲𑀸𑀭𑀲𑁆𑀲 𑀲𑀦𑁆𑀢𑀺𑀓𑀁 𑀧𑁂𑀲𑁂𑀲𑀺 𑁋 ‘‘𑀫𑀫 𑀆𑀡𑀸𑀧𑀯𑀢𑁆𑀢𑀺𑀝𑁆𑀞𑀸𑀦𑁂 𑀅𑀫𑀺𑀢𑀪𑁄𑀕𑀯𑀺𑀦𑁆𑀤𑀦𑀓𑀼𑀮𑀁 𑀦𑀸𑀫 𑀦𑀢𑁆𑀣𑀺, 𑀅𑀫𑁆𑀳𑀸𑀓𑀁 𑀅𑀫𑀺𑀢𑀪𑁄𑀕𑀯𑀺𑀦𑁆𑀤𑀦𑀓𑀼𑀮𑀁 𑀧𑁂𑀲𑁂𑀢𑀽’’𑀢𑀺. 𑀭𑀸𑀚𑀸 𑀅𑀫𑀘𑁆𑀘𑁂𑀳𑀺 𑀲𑀤𑁆𑀥𑀺𑀁 𑀫𑀦𑁆𑀢𑁂𑀲𑀺. 𑀅𑀫𑀘𑁆𑀘𑀸 ‘‘𑀫𑀳𑀸𑀓𑀼𑀮𑀁 𑀧𑁂𑀲𑁂𑀢𑀼𑀁 𑀦 𑀲𑀓𑁆𑀓𑀸, 𑀏𑀓𑀁 𑀧𑀦 𑀲𑁂𑀝𑁆𑀞𑀺𑀧𑀼𑀢𑁆𑀢𑀁 𑀧𑁂𑀲𑁂𑀲𑁆𑀲𑀸𑀫𑀸’’𑀢𑀺 𑀫𑁂𑀡𑁆𑀟𑀓𑀲𑁂𑀝𑁆𑀞𑀺𑀦𑁄 𑀧𑀼𑀢𑁆𑀢𑀁 𑀥𑀦𑀜𑁆𑀘𑀬𑀲𑁂𑀝𑁆𑀞𑀺𑀁 𑀆𑀬𑀸𑀘𑀺𑀁𑀲𑀼. 𑀭𑀸𑀚𑀸 𑀢𑁂𑀲𑀁 𑀯𑀘𑀦𑀁 𑀲𑀼𑀢𑁆𑀯𑀸 𑀢𑀁 𑀧𑁂𑀲𑁂𑀲𑀺. 𑀅𑀣 𑀦𑀁 𑀓𑁄𑀲𑀮𑀭𑀸𑀚𑀸 𑀲𑀸𑀯𑀢𑁆𑀣𑀺𑀢𑁄 𑀲𑀢𑁆𑀢𑀬𑁄𑀚𑀦𑀫𑀢𑁆𑀣𑀓𑁂 𑀲𑀸𑀓𑁂𑀢𑀦𑀕𑀭𑁂 𑀲𑁂𑀝𑁆𑀞𑀺𑀝𑁆𑀞𑀸𑀦𑀁 𑀤𑀢𑁆𑀯𑀸 𑀯𑀸𑀲𑁂𑀲𑀺.

𑀲𑀸𑀯𑀢𑁆𑀣𑀺𑀬𑀜𑁆𑀘 𑀫𑀺𑀕𑀸𑀭𑀲𑁂𑀝𑁆𑀞𑀺𑀦𑁄 𑀧𑀼𑀢𑁆𑀢𑁄 𑀧𑀼𑀡𑁆𑀡𑀯𑀟𑁆𑀠𑀦𑀓𑀼𑀫𑀸𑀭𑁄 𑀦𑀸𑀫 𑀯𑀬𑀧𑁆𑀧𑀢𑁆𑀢𑁄 𑀅𑀳𑁄𑀲𑀺. 𑀅𑀣𑀲𑁆𑀲 𑀧𑀺𑀢𑀸 ‘‘𑀧𑀼𑀢𑁆𑀢𑁄 𑀫𑁂 𑀯𑀬𑀧𑁆𑀧𑀢𑁆𑀢𑁄, 𑀖𑀭𑀸𑀯𑀸𑀲𑁂𑀦𑀲𑁆𑀲 𑀆𑀩𑀦𑁆𑀥𑀦𑀲𑀫𑀬𑁄’’𑀢𑀺 𑀜𑀢𑁆𑀯𑀸 ‘‘𑀅𑀫𑁆𑀳𑀸𑀓𑀁 𑀲𑀫𑀸𑀦𑀚𑀸𑀢𑀺𑀓𑁂 𑀓𑀼𑀮𑁂 𑀤𑀸𑀭𑀺𑀓𑀁 𑀧𑀭𑀺𑀬𑁂𑀲𑀣𑀸’’𑀢𑀺 𑀓𑀸𑀭𑀡𑀸𑀓𑀸𑀭𑀡𑀓𑀼𑀲𑀮𑁂 𑀧𑀼𑀭𑀺𑀲𑁂 𑀧𑁂𑀲𑁂𑀲𑀺. 𑀢𑁂 𑀲𑀸𑀯𑀢𑁆𑀣𑀺𑀬𑀁 𑀅𑀢𑁆𑀢𑀦𑁄 𑀭𑀼𑀘𑀺𑀢𑀁 𑀤𑀸𑀭𑀺𑀓𑀁 𑀅𑀤𑀺𑀲𑁆𑀯𑀸 𑀲𑀸𑀓𑁂𑀢𑀁 𑀅𑀕𑀫𑀁𑀲𑀼. 𑀢𑀁𑀤𑀺𑀯𑀲𑀜𑁆𑀘, 𑀯𑀺𑀲𑀸𑀔𑀸, 𑀅𑀢𑁆𑀢𑀦𑁄 𑀲𑀫𑀸𑀦𑀯𑀬𑁂𑀳𑀺 𑀧𑀜𑁆𑀘𑀳𑀺 𑀓𑀼𑀫𑀸𑀭𑀺𑀓𑀸𑀲𑀢𑁂𑀳𑀺 𑀧𑀭𑀺𑀯𑀸𑀭𑀺𑀢𑀸 𑀦𑀓𑁆𑀔𑀢𑁆𑀢𑀓𑀻𑀴𑀦𑀢𑁆𑀣𑀸𑀬 𑀏𑀓𑀁 𑀫𑀳𑀸𑀕𑀸𑀫𑀁 𑀅𑀕𑀫𑀸𑀲𑀺. 𑀢𑁂𑀧𑀺 𑀧𑀼𑀭𑀺𑀲𑀸 𑀅𑀦𑁆𑀢𑁄𑀦𑀕𑀭𑁂 𑀘𑀭𑀺𑀢𑁆𑀯𑀸 𑀅𑀢𑁆𑀢𑀦𑁄 𑀭𑀼𑀘𑀺𑀢𑀁 𑀤𑀸𑀭𑀺𑀓𑀁 𑀅𑀤𑀺𑀲𑁆𑀯𑀸 𑀩𑀳𑀺𑀦𑀕𑀭𑀤𑁆𑀯𑀸𑀭𑁂 𑀅𑀝𑁆𑀞𑀁𑀲𑀼. 𑀢𑀲𑁆𑀫𑀺𑀁 𑀲𑀫𑀬𑁂 𑀤𑁂𑀯𑁄 𑀯𑀲𑁆𑀲𑀺𑀢𑀼𑀁 𑀆𑀭𑀪𑀺. 𑀅𑀣 𑀢𑀸 𑀯𑀺𑀲𑀸𑀔𑀸𑀬 𑀲𑀤𑁆𑀥𑀺𑀁 𑀦𑀺𑀓𑁆𑀔𑀦𑁆𑀢𑀸 𑀤𑀸𑀭𑀺𑀓𑀸 𑀢𑁂𑀫𑀦𑀪𑀬𑁂𑀦 𑀯𑁂𑀕𑁂𑀦 𑀲𑀸𑀮𑀁 𑀧𑀯𑀺𑀲𑀺𑀁𑀲𑀼. 𑀢𑁂 𑀧𑀼𑀭𑀺𑀲𑀸 𑀢𑀸𑀲𑀫𑁆𑀧𑀺 𑀅𑀦𑁆𑀢𑀭𑁂 𑀬𑀣𑀸𑀭𑀼𑀘𑀺𑀢𑀁 𑀤𑀸𑀭𑀺𑀓𑀁 𑀦 𑀧𑀲𑁆𑀲𑀺𑀁𑀲𑀼. 𑀢𑀸𑀲𑀁 𑀧𑀦 𑀲𑀩𑁆𑀩𑀧𑀘𑁆𑀙𑀢𑁄, 𑀯𑀺𑀲𑀸𑀔𑀸, 𑀤𑁂𑀯𑀁 𑀯𑀲𑁆𑀲𑀦𑁆𑀢𑀫𑁆𑀧𑀺 𑀅𑀕𑀡𑁂𑀢𑁆𑀯𑀸 𑀅𑀢𑀼𑀭𑀺𑀢𑀕𑀫𑀦𑁂𑀦 𑀢𑁂𑀫𑀬𑀫𑀸𑀦𑀸𑀯 𑀲𑀸𑀮𑀁 𑀧𑀸𑀯𑀺𑀲𑀺. 𑀢𑁂 𑀧𑀼𑀭𑀺𑀲𑀸 𑀢𑀁 𑀤𑀺𑀲𑁆𑀯𑀸 𑀘𑀺𑀦𑁆𑀢𑀬𑀺𑀁𑀲𑀼 𑁋 ‘‘𑀭𑀽𑀧𑀯𑀢𑀻 𑀢𑀸𑀯 𑀓𑀜𑁆𑀜𑀸 𑀏𑀢𑀧𑀭𑀫𑀸 𑀪𑀯𑁂𑀬𑁆𑀬, 𑀭𑀽𑀧𑀁 𑀧𑀦𑁂𑀢𑀁 𑀏𑀓𑀘𑁆𑀘𑀸𑀬 𑀓𑀸𑀭𑀺𑀢𑀧𑀢𑁆𑀢𑀁 𑀯𑀺𑀬 𑀳𑁄𑀢𑀺, 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀢𑁆𑀯𑀸 𑀓𑀣𑁂𑀦𑁆𑀢𑀸 𑀚𑀸𑀦𑀺𑀲𑁆𑀲𑀸𑀫 𑀫𑀥𑀼𑀭𑀯𑀘𑀦𑀸 𑀯𑀸 𑀦𑁄 𑀯𑀸’’𑀢𑀺. 𑀢𑀢𑁄 𑀦𑀁 𑀆𑀳𑀁𑀲𑀼 𑁋 ‘‘𑀅𑀢𑀺𑀯𑀺𑀬 𑀧𑀭𑀺𑀡𑀢𑀯𑀬𑀸 𑀇𑀢𑁆𑀣𑀻 𑀯𑀺𑀬 𑀬𑀸𑀲𑀺, 𑀅𑀫𑁆𑀫𑀸’’𑀢𑀺. 𑀓𑀺𑀁 𑀤𑀺𑀲𑁆𑀯𑀸 𑀓𑀣𑁂𑀣, 𑀢𑀸𑀢𑀸𑀢𑀺? 𑀅𑀜𑁆𑀜𑀸 𑀢𑀬𑀸 𑀲𑀤𑁆𑀥𑀺𑀁 𑀓𑀻𑀴𑀦𑀓𑀼𑀫𑀸𑀭𑀺𑀬𑁄 𑀢𑁂𑀫𑀦𑀪𑀬𑁂𑀦 𑀯𑁂𑀕𑁂𑀦 𑀆𑀕𑀦𑁆𑀢𑁆𑀯𑀸 𑀲𑀸𑀮𑀁 𑀧𑀯𑀺𑀝𑁆𑀞𑀸, 𑀢𑁆𑀯𑀁 𑀧𑀦 𑀫𑀳𑀮𑁆𑀮𑀺𑀓𑀸 𑀯𑀺𑀬 𑀧𑀤𑀯𑀸𑀭𑀁 𑀅𑀢𑀺𑀓𑁆𑀓𑀫𑁆𑀫 𑀦𑀸𑀕𑀘𑁆𑀙𑀲𑀺, 𑀲𑀸𑀝𑀓𑀲𑁆𑀲 𑀢𑁂𑀫𑀦𑀪𑀸𑀯𑀫𑁆𑀧𑀺 𑀦 𑀕𑀡𑁂𑀲𑀺. 𑀲𑀘𑁂 𑀢𑀁 𑀳𑀢𑁆𑀣𑀻 𑀯𑀸 𑀅𑀲𑁆𑀲𑁄 𑀯𑀸 𑀅𑀦𑀼𑀩𑀦𑁆𑀥𑁂𑀬𑁆𑀬, 𑀓𑀺𑀁 𑀏𑀯𑀫𑁂𑀯𑀁 𑀓𑀭𑁂𑀬𑁆𑀬𑀸𑀲𑀻𑀢𑀺? 𑀢𑀸𑀢𑀸, 𑀲𑀸𑀝𑀓𑀸 𑀦𑀸𑀫 𑀦 𑀤𑀼𑀮𑁆𑀮𑀪𑀸, 𑀲𑀼𑀮𑀪𑀸 𑀫𑀬𑁆𑀳𑀁 𑀓𑀼𑀮𑁂 𑀲𑀸𑀝𑀓𑀸. 𑀯𑀬𑀧𑁆𑀧𑀢𑁆𑀢𑀸 𑀫𑀸𑀢𑀼𑀕𑀸𑀫𑀸 𑀧𑀦 𑀧𑀡𑀺𑀬𑀪𑀡𑁆𑀟𑀲𑀤𑀺𑀲𑀸, 𑀳𑀢𑁆𑀣𑁂 𑀯𑀸 𑀧𑀸𑀤𑁂 𑀯𑀸 𑀪𑀕𑁆𑀕𑁂 𑀅𑀗𑁆𑀕𑀯𑀺𑀓𑀮𑀁 𑀫𑀸𑀢𑀼𑀕𑀸𑀫𑀁 𑀚𑀺𑀕𑀼𑀘𑁆𑀙𑀦𑁆𑀢𑀸 𑀦𑀺𑀝𑁆𑀞𑀼𑀪𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑀺, 𑀢𑀲𑁆𑀫𑀸 𑀲𑀡𑀺𑀓𑀁 𑀆𑀕𑀢𑀸𑀫𑁆𑀳𑀻𑀢𑀺.

𑀢𑁂 𑀘𑀺𑀦𑁆𑀢𑀬𑀺𑀁𑀲𑀼 𑁋 ‘‘𑀇𑀫𑀸𑀬 𑀲𑀤𑀺𑀲𑀸 𑀇𑀫𑀲𑁆𑀫𑀺𑀁 𑀚𑀫𑁆𑀩𑀼𑀤𑀻𑀧𑁂 𑀇𑀢𑁆𑀣𑀻 𑀦𑀸𑀫 𑀦𑀢𑁆𑀣𑀺, 𑀬𑀸𑀤𑀺𑀲𑀸 𑀭𑀽𑀧𑁂𑀦, 𑀓𑀣𑀸𑀬𑀧𑀺 𑀢𑀸𑀤𑀺𑀲𑀸𑀯. 𑀓𑀸𑀭𑀡𑀸𑀓𑀸𑀭𑀡𑀁 𑀜𑀢𑁆𑀯𑀸 𑀓𑀣𑁂𑀢𑀻’’𑀢𑀺 𑀢𑀲𑁆𑀲𑀸 𑀉𑀧𑀭𑀺 𑀫𑀸𑀮𑀸𑀕𑀼𑀴𑀁 𑀔𑀺𑀧𑀺𑀁𑀲𑀼. 𑀅𑀣, 𑀯𑀺𑀲𑀸𑀔𑀸, 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀳𑀁 𑀧𑀼𑀩𑁆𑀩𑁂 𑀅𑀧𑀭𑀺𑀕𑁆𑀕𑀳𑀺𑀢𑀸, 𑀇𑀤𑀸𑀦𑀺 𑀧𑀦 𑀧𑀭𑀺𑀕𑁆𑀕𑀳𑀺𑀢𑀸𑀫𑁆𑀳𑀻’’𑀢𑀺 𑀯𑀺𑀦𑀻𑀢𑁂𑀦𑀸𑀓𑀸𑀭𑁂𑀦 𑀪𑀽𑀫𑀺𑀬𑀁 𑀦𑀺𑀲𑀻𑀤𑀺. 𑀅𑀣 𑀦𑀁 𑀢𑀢𑁆𑀣𑁂𑀯 𑀲𑀸𑀡𑀺𑀬𑀸 𑀧𑀭𑀺𑀓𑁆𑀔𑀺𑀧𑀺𑀁𑀲𑀼. 𑀲𑀸 𑀧𑀝𑀺𑀘𑁆𑀙𑀦𑁆𑀦𑀪𑀸𑀯𑀁 𑀜𑀢𑁆𑀯𑀸 𑀤𑀸𑀲𑀺𑀕𑀡𑀧𑀭𑀺𑀯𑀼𑀢𑀸 𑀕𑁂𑀳𑀁 𑀅𑀕𑀫𑀸𑀲𑀺. 𑀢𑁂𑀧𑀺 𑀫𑀺𑀕𑀸𑀭𑀲𑁂𑀝𑁆𑀞𑀺𑀦𑁄 𑀧𑀼𑀭𑀺𑀲𑀸 𑀢𑀸𑀬 𑀲𑀤𑁆𑀥𑀺𑀁𑀬𑁂𑀯 𑀥𑀦𑀜𑁆𑀘𑀬𑀲𑁂𑀝𑁆𑀞𑀺𑀲𑁆𑀲 𑀲𑀦𑁆𑀢𑀺𑀓𑀁 𑀅𑀕𑀫𑀁𑀲𑀼. ‘‘𑀓𑀢𑀭𑀕𑀸𑀫𑀯𑀸𑀲𑀺𑀦𑁄, 𑀢𑀸𑀢𑀸, 𑀢𑀼𑀫𑁆𑀳𑁂’’𑀢𑀺 𑀧𑀼𑀘𑁆𑀙𑀺𑀢𑀸 ‘‘𑀲𑀸𑀯𑀢𑁆𑀣𑀺𑀦𑀕𑀭𑁂 𑀫𑀺𑀕𑀸𑀭𑀲𑁂𑀝𑁆𑀞𑀺𑀦𑁄 𑀧𑀼𑀭𑀺𑀲𑀫𑁆𑀳𑀸’’𑀢𑀺 𑀯𑀢𑁆𑀯𑀸 ‘‘𑀫𑀬𑀁 𑀅𑀫𑁆𑀳𑀸𑀓𑀁 𑀲𑁂𑀝𑁆𑀞𑀺𑀦𑀸 𑀢𑀼𑀫𑁆𑀳𑀸𑀓𑀁 𑀕𑁂𑀳𑁂 𑀯𑀬𑀧𑁆𑀧𑀢𑁆𑀢𑀸 𑀤𑀸𑀭𑀺𑀓𑀸 𑀅𑀢𑁆𑀣𑀻𑀢𑀺 𑀲𑀼𑀢𑁆𑀯𑀸 𑀧𑁂𑀲𑀺𑀢𑀸’’𑀢𑀺. 𑀲𑀸𑀥𑀼, 𑀢𑀸𑀢𑀸, 𑀢𑀼𑀫𑁆𑀳𑀸𑀓𑀁 𑀲𑁂𑀝𑁆𑀞𑀺 𑀓𑀺𑀜𑁆𑀘𑀸𑀧𑀺 𑀪𑁄𑀕𑁂𑀦 𑀅𑀫𑁆𑀳𑁂𑀳𑀺 𑀅𑀲𑀤𑀺𑀲𑁄, 𑀚𑀸𑀢𑀺𑀬𑀸 𑀧𑀦 𑀲𑀤𑀺𑀲𑁄. 𑀲𑀩𑁆𑀩𑀸𑀓𑀸𑀭𑀲𑀫𑁆𑀧𑀦𑁆𑀦𑁄 𑀦𑀸𑀫 𑀤𑀼𑀮𑁆𑀮𑀪𑁄 𑀕𑀘𑁆𑀙𑀣 𑀢𑀼𑀫𑁆𑀳𑁂 𑀲𑁂𑀝𑁆𑀞𑀺𑀲𑁆𑀲 𑀅𑀫𑁆𑀳𑁂𑀳𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑀪𑀸𑀯𑀁 𑀆𑀭𑁄𑀘𑁂𑀣𑀸𑀢𑀺.

𑀢𑁂 𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀲𑀸𑀯𑀢𑁆𑀣𑀺𑀁 𑀕𑀦𑁆𑀢𑁆𑀯𑀸 𑀫𑀺𑀕𑀸𑀭𑀲𑁂𑀝𑁆𑀞𑀺𑀲𑁆𑀲 𑀢𑀼𑀝𑁆𑀞𑀺𑀁 𑀯𑀟𑁆𑀠𑀺𑀁 𑀘 𑀧𑀯𑁂𑀤𑁂𑀢𑁆𑀯𑀸 ‘‘𑀮𑀤𑁆𑀥𑀸 𑀦𑁄 𑀲𑀸𑀫𑀺 𑀲𑀸𑀓𑁂𑀢𑁂 𑀥𑀦𑀜𑁆𑀘𑀬𑀲𑁂𑀝𑁆𑀞𑀺𑀲𑁆𑀲 𑀕𑁂𑀳𑁂 𑀤𑀸𑀭𑀺𑀓𑀸’’𑀢𑀺 𑀆𑀳𑀁𑀲𑀼. 𑀢𑀁 𑀲𑀼𑀢𑁆𑀯𑀸 𑀫𑀺𑀕𑀸𑀭𑀲𑁂𑀝𑁆𑀞𑀺 ‘‘𑀫𑀳𑀸𑀓𑀼𑀮𑀕𑁂𑀳𑁂 𑀓𑀺𑀭 𑀦𑁄 𑀤𑀸𑀭𑀺𑀓𑀸 𑀮𑀤𑁆𑀥𑀸’’𑀢𑀺 𑀢𑀼𑀝𑁆𑀞𑀫𑀸𑀦𑀲𑁄 𑀳𑀼𑀢𑁆𑀯𑀸 𑀢𑀸𑀯𑀤𑁂𑀯 𑀥𑀦𑀜𑁆𑀘𑀬𑀲𑁂𑀝𑁆𑀞𑀺𑀲𑁆𑀲 𑀲𑀸𑀲𑀦𑀁 𑀧𑀳𑀺𑀡𑀺 ‘‘𑀇𑀤𑀸𑀦𑁂𑀯 𑀤𑀸𑀭𑀺𑀓𑀁 𑀆𑀦𑀬𑀺𑀲𑁆𑀲𑀸𑀫, 𑀓𑀢𑁆𑀢𑀩𑁆𑀩𑀓𑀺𑀘𑁆𑀘𑀁 𑀓𑀭𑁄𑀦𑁆𑀢𑀽’’𑀢𑀺. 𑀲𑁄𑀧𑀺𑀲𑁆𑀲 𑀧𑀝𑀺𑀲𑀸𑀲𑀦𑀁 𑀧𑁂𑀲𑁂𑀲𑀺 𑁋 ‘‘𑀦𑀬𑀺𑀤𑀁 𑀅𑀫𑁆𑀳𑀸𑀓𑀁 𑀪𑀸𑀭𑀺𑀬𑀁, 𑀲𑁂𑀝𑁆𑀞𑀺 𑀧𑀦 𑀅𑀢𑁆𑀢𑀦𑁄 𑀓𑀢𑁆𑀢𑀩𑁆𑀩𑀓𑀺𑀘𑁆𑀘𑀁 𑀓𑀭𑁄𑀢𑀽’’𑀢𑀺. 𑀲𑁄 𑀓𑁄𑀲𑀮𑀭𑀜𑁆𑀜𑁄 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀆𑀭𑁄𑀘𑁂𑀲𑀺 𑁋 ‘‘𑀤𑁂𑀯, 𑀏𑀓𑀸 𑀫𑁂 𑀫𑀗𑁆𑀕𑀮𑀓𑀺𑀭𑀺𑀬𑀸 𑀅𑀢𑁆𑀣𑀺, 𑀤𑀸𑀲𑀲𑁆𑀲 𑀢𑁂 𑀧𑀼𑀡𑁆𑀡𑀯𑀟𑁆𑀠𑀦𑀲𑁆𑀲 𑀥𑀦𑀜𑁆𑀘𑀬𑀲𑁂𑀝𑁆𑀞𑀺𑀦𑁄 𑀥𑀻𑀢𑀭𑀁 𑀯𑀺𑀲𑀸𑀔𑀁 𑀦𑀸𑀫 𑀤𑀸𑀭𑀺𑀓𑀁 𑀆𑀦𑁂𑀲𑁆𑀲𑀸𑀫𑀺, 𑀲𑀸𑀓𑁂𑀢𑀕𑀫𑀦𑀁 𑀫𑁂 𑀅𑀦𑀼𑀚𑀸𑀦𑀸𑀣𑀸’’𑀢𑀺. 𑀲𑀸𑀥𑀼, 𑀫𑀳𑀸𑀲𑁂𑀝𑁆𑀞𑀺, 𑀓𑀺𑀁 𑀧𑀦 𑀅𑀫𑁆𑀳𑁂𑀳𑀺𑀧𑀺 𑀆𑀕𑀦𑁆𑀢𑀩𑁆𑀩𑀦𑁆𑀢𑀺? 𑀤𑁂𑀯 𑀢𑀼𑀫𑁆𑀳𑀸𑀤𑀺𑀲𑀸𑀦𑀁 𑀕𑀫𑀦𑀁 𑀮𑀤𑁆𑀥𑀼𑀁 𑀲𑀓𑁆𑀓𑀸𑀢𑀺? 𑀭𑀸𑀚𑀸 𑀫𑀳𑀸𑀓𑀼𑀮𑀲𑁆𑀲 𑀲𑀗𑁆𑀕𑀳𑀁 𑀓𑀸𑀢𑀼𑀓𑀸𑀫𑁄 ‘‘𑀳𑁄𑀢𑀼 𑀲𑁂𑀝𑁆𑀞𑀺, 𑀆𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀫𑀺𑀕𑀸𑀭𑀲𑁂𑀝𑁆𑀞𑀺𑀦𑀸 𑀲𑀤𑁆𑀥𑀺𑀁 𑀲𑀸𑀓𑁂𑀢𑀦𑀕𑀭𑀁 𑀅𑀕𑀫𑀸𑀲𑀺. 𑀥𑀦𑀜𑁆𑀘𑀬𑀲𑁂𑀝𑁆𑀞𑀺 ‘‘𑀫𑀺𑀕𑀸𑀭𑀲𑁂𑀝𑁆𑀞𑀺 𑀓𑀺𑀭 𑀓𑁄𑀲𑀮𑀭𑀸𑀚𑀸𑀦𑀁 𑀕𑀳𑁂𑀢𑁆𑀯𑀸 𑀆𑀕𑀢𑁄’’𑀢𑀺 𑀲𑀼𑀢𑁆𑀯𑀸 𑀧𑀘𑁆𑀘𑀼𑀕𑁆𑀕𑀫𑀦𑀁 𑀓𑀢𑁆𑀯𑀸 𑀭𑀸𑀚𑀸𑀦𑀁 𑀕𑀳𑁂𑀢𑁆𑀯𑀸 𑀅𑀢𑁆𑀢𑀦𑁄 𑀦𑀺𑀯𑁂𑀲𑀦𑀁 𑀅𑀕𑀫𑀸𑀲𑀺. 𑀢𑀸𑀯𑀤𑁂𑀯 𑀭𑀜𑁆𑀜𑁄 𑀘 𑀭𑀸𑀚𑀩𑀮𑀲𑁆𑀲 𑀘 𑀫𑀺𑀕𑀸𑀭𑀲𑁂𑀝𑁆𑀞𑀺𑀦𑁄 𑀘 𑀯𑀲𑀦𑀝𑁆𑀞𑀸𑀦𑀁 𑀘𑁂𑀯 𑀫𑀸𑀮𑀸𑀕𑀦𑁆𑀥𑀪𑀢𑁆𑀢𑀸𑀤𑀻𑀦𑀺 𑀘 𑀲𑀩𑁆𑀩𑀸𑀦𑀺 𑀧𑀝𑀺𑀬𑀸𑀤𑁂𑀲𑀺. ‘‘𑀇𑀤𑀁 𑀇𑀫𑀲𑁆𑀲 𑀮𑀤𑁆𑀥𑀼𑀁 𑀯𑀝𑁆𑀝𑀢𑀺, 𑀇𑀤𑀁 𑀇𑀫𑀲𑁆𑀲𑀸’’𑀢𑀺 𑀲𑀩𑁆𑀩𑀁 𑀅𑀢𑁆𑀢𑀦𑀸𑀯 𑀚𑀸𑀦𑀸𑀢𑀺. 𑀢𑁂 𑀢𑁂 𑀚𑀦𑀸 𑀘𑀺𑀦𑁆𑀢𑀬𑀺𑀁𑀲𑀼 𑁋 ‘‘𑀲𑁂𑀝𑁆𑀞𑀺 𑀅𑀫𑁆𑀳𑀸𑀓𑀫𑁂𑀯 𑀲𑀓𑁆𑀓𑀸𑀭𑀁 𑀓𑀭𑁄𑀢𑀻’’𑀢𑀺.

𑀅𑀣𑁂𑀓𑀤𑀺𑀯𑀲𑀁 𑀭𑀸𑀚𑀸 𑀥𑀦𑀜𑁆𑀘𑀬𑀲𑁂𑀝𑁆𑀞𑀺𑀲𑁆𑀲 𑀲𑀸𑀲𑀦𑀁 𑀧𑀳𑀺𑀡𑀺 ‘‘𑀦 𑀲𑀓𑁆𑀓𑀸 𑀲𑁂𑀝𑁆𑀞𑀺𑀦𑀸 𑀘𑀺𑀭𑀓𑀸𑀮𑀁 𑀅𑀫𑁆𑀳𑀸𑀓𑀁 𑀪𑀭𑀡𑀧𑁄𑀲𑀦𑀁 𑀓𑀸𑀢𑀼𑀁, 𑀤𑀸𑀭𑀺𑀓𑀸𑀬 𑀕𑀫𑀦𑀓𑀸𑀮𑀁 𑀚𑀸𑀦𑀸𑀢𑀽’’𑀢𑀺. 𑀲𑁄𑀧𑀺 𑀭𑀜𑁆𑀜𑁄 𑀲𑀸𑀲𑀦𑀁 𑀧𑁂𑀲𑁂𑀲𑀺 𑁋 ‘‘𑀇𑀤𑀸𑀦𑀺 𑀯𑀲𑁆𑀲𑀓𑀸𑀮𑁄 𑀆𑀕𑀢𑁄, 𑀦 𑀲𑀓𑁆𑀓𑀸 𑀘𑀢𑀼𑀫𑀸𑀲𑀁 𑀯𑀺𑀘𑀭𑀺𑀢𑀼𑀁, 𑀢𑀼𑀫𑁆𑀳𑀸𑀓𑀁 𑀩𑀮𑀓𑀸𑀬𑀲𑁆𑀲 𑀬𑀁 𑀬𑀁 𑀮𑀤𑁆𑀥𑀼𑀁 𑀯𑀝𑁆𑀝𑀢𑀺, 𑀲𑀩𑁆𑀩𑀁 𑀢𑀁 𑀫𑀫 𑀪𑀸𑀭𑁄. 𑀓𑁂𑀯𑀮𑀁 𑀤𑁂𑀯𑁄 𑀫𑀬𑀸 𑀧𑁂𑀲𑀺𑀢𑀓𑀸𑀮𑁂 𑀕𑀘𑁆𑀙𑀢𑀽’’𑀢𑀺. 𑀢𑀢𑁄 𑀧𑀝𑁆𑀞𑀸𑀬 𑀲𑀸𑀓𑁂𑀢𑀦𑀕𑀭𑀁 𑀦𑀺𑀘𑁆𑀘𑀦𑀓𑁆𑀔𑀢𑁆𑀢𑀕𑀸𑀫𑁄 𑀯𑀺𑀬 𑀅𑀳𑁄𑀲𑀺. 𑀏𑀯𑀁 𑀢𑀬𑁄 𑀫𑀸𑀲𑀸 𑀅𑀢𑀺𑀓𑁆𑀓𑀦𑁆𑀢𑀸. 𑀥𑀦𑀜𑁆𑀘𑀬𑀲𑁂𑀝𑁆𑀞𑀺𑀦𑁄 𑀧𑀦 𑀥𑀻𑀢𑀸𑀬 𑀫𑀳𑀸𑀮𑀢𑀸𑀧𑀲𑀸𑀥𑀦𑀁 𑀦 𑀢𑀸𑀯 𑀦𑀺𑀝𑁆𑀞𑀁 𑀕𑀘𑁆𑀙𑀢𑀺. 𑀅𑀣𑀲𑁆𑀲 𑀓𑀫𑁆𑀫𑀦𑁆𑀢𑀸𑀥𑀺𑀝𑁆𑀞𑀸𑀬𑀓𑀸 𑀆𑀕𑀦𑁆𑀢𑁆𑀯𑀸 𑀆𑀭𑁄𑀘𑀬𑀺𑀁𑀲𑀼 𑁋 ‘‘𑀲𑁂𑀲𑀁 𑀅𑀲𑀦𑁆𑀢𑀁 𑀦𑀸𑀫 𑀦𑀢𑁆𑀣𑀺, 𑀩𑀮𑀓𑀸𑀬𑀲𑁆𑀲 𑀧𑀦 𑀪𑀢𑁆𑀢𑀧𑀘𑀦𑀤𑀸𑀭𑀽𑀦𑀺 𑀦𑀧𑁆𑀧𑀳𑁄𑀦𑁆𑀢𑀻’’𑀢𑀺. ‘‘𑀕𑀘𑁆𑀙𑀣, 𑀢𑀸𑀢𑀸, 𑀳𑀢𑁆𑀣𑀺𑀲𑀸𑀮𑀸 𑀅𑀲𑁆𑀲𑀲𑀸𑀮𑀸 𑀯𑀺𑀬𑁄𑀚𑁂𑀢𑁆𑀯𑀸 𑀪𑀢𑁆𑀢𑀁 𑀧𑀘𑀣𑀸’’𑀢𑀺. 𑀏𑀯𑀁 𑀧𑀘𑀦𑁆𑀢𑀸𑀦𑀫𑁆𑀧𑀺 𑀅𑀟𑁆𑀠𑀫𑀸𑀲𑁄 𑀅𑀢𑀺𑀓𑁆𑀓𑀦𑁆𑀢𑁄. 𑀢𑀢𑁄 𑀧𑀼𑀦 𑀆𑀭𑁄𑀘𑀬𑀺𑀁𑀲𑀼 𑁋 ‘‘𑀤𑀸𑀭𑀽𑀦𑀺 𑀲𑀸𑀫𑀺 𑀦𑀧𑁆𑀧𑀳𑁄𑀦𑁆𑀢𑀻’’𑀢𑀺. ‘‘𑀢𑀸𑀢𑀸, 𑀇𑀫𑀲𑁆𑀫𑀺𑀁 𑀓𑀸𑀮𑁂 𑀤𑀸𑀭𑀽𑀦𑀺 𑀮𑀤𑁆𑀥𑀼𑀁 𑀦 𑀲𑀓𑁆𑀓𑀸, 𑀤𑀼𑀲𑁆𑀲𑀓𑁄𑀝𑁆𑀞𑀸𑀕𑀸𑀭𑀁 𑀧𑀦 𑀯𑀺𑀯𑀭𑀺𑀢𑁆𑀯𑀸 𑀣𑀽𑀮𑀲𑀸𑀝𑀓𑁂 𑀕𑀳𑁂𑀢𑁆𑀯𑀸 𑀯𑀝𑁆𑀝𑀺𑀬𑁄 𑀓𑀢𑁆𑀯𑀸 𑀢𑁂𑀮𑀘𑀸𑀝𑀺𑀬𑀁 𑀢𑁂𑀫𑁂𑀢𑁆𑀯𑀸 𑀪𑀢𑁆𑀢𑀁 𑀧𑀘𑀣𑀸’’𑀢𑀺. 𑀇𑀫𑀺𑀦𑀸 𑀦𑀺𑀬𑀸𑀫𑁂𑀦 𑀧𑀘𑀦𑁆𑀢𑀸𑀦𑀁 𑀘𑀢𑁆𑀢𑀸𑀭𑁄 𑀫𑀸𑀲𑀸 𑀧𑀽𑀭𑀬𑀺𑀁𑀲𑀼.

𑀢𑀢𑁄 𑀥𑀦𑀜𑁆𑀘𑀬𑀲𑁂𑀝𑁆𑀞𑀺 𑀥𑀻𑀢𑀼𑀬𑀸 𑀫𑀳𑀸𑀮𑀢𑀸𑀧𑀲𑀸𑀥𑀦𑀲𑁆𑀲 𑀦𑀺𑀝𑁆𑀞𑀺𑀢𑀪𑀸𑀯𑀁 𑀜𑀢𑁆𑀯𑀸 ‘‘𑀲𑁆𑀯𑁂 𑀤𑀸𑀭𑀺𑀓𑀁 𑀧𑁂𑀲𑁂𑀲𑁆𑀲𑀸𑀫𑀻’’𑀢𑀺 𑀥𑀻𑀢𑀭𑀁 𑀲𑀫𑀻𑀧𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 ‘‘𑀅𑀫𑁆𑀫 𑀧𑀢𑀺𑀓𑀼𑀮𑁂 𑀯𑀲𑀦𑁆𑀢𑀺𑀬𑀸 𑀦𑀸𑀫 𑀇𑀫𑀜𑁆𑀘𑀺𑀫𑀜𑁆𑀘 𑀆𑀘𑀸𑀭𑀁 𑀲𑀺𑀓𑁆𑀔𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀑𑀯𑀸𑀤𑀁 𑀅𑀤𑀸𑀲𑀺. 𑀅𑀬𑀁 𑀫𑀺𑀕𑀸𑀭𑀲𑁂𑀝𑁆𑀞𑀺 𑀅𑀦𑀦𑁆𑀢𑀭𑀕𑀩𑁆𑀪𑁂 𑀦𑀺𑀲𑀺𑀦𑁆𑀦𑁄 𑀥𑀦𑀜𑁆𑀘𑀬𑀲𑁂𑀝𑁆𑀞𑀺𑀦𑁄 𑀑𑀯𑀸𑀤𑀁 𑀅𑀲𑁆𑀲𑁄𑀲𑀺. 𑀲𑁄𑀧𑀺 𑀲𑁂𑀝𑁆𑀞𑀺 𑀥𑀻𑀢𑀭𑀁 𑀏𑀯𑀁 𑀑𑀯𑀤𑀺 𑁋

‘‘𑀅𑀫𑁆𑀫 𑀲𑀲𑀼𑀭𑀓𑀼𑀮𑁂 𑀯𑀲𑀦𑁆𑀢𑀺𑀬𑀸 𑀦𑀸𑀫 𑀅𑀦𑁆𑀢𑁄𑀅𑀕𑁆𑀕𑀺 𑀩𑀳𑀺 𑀦 𑀦𑀻𑀳𑀭𑀺𑀢𑀩𑁆𑀩𑁄, 𑀩𑀳𑀺𑀅𑀕𑁆𑀕𑀺 𑀅𑀦𑁆𑀢𑁄 𑀦 𑀧𑀯𑁂𑀲𑁂𑀢𑀩𑁆𑀩𑁄, 𑀤𑀤𑀦𑁆𑀢𑀲𑁆𑀲𑁂𑀯 𑀤𑀸𑀢𑀩𑁆𑀩𑀁, 𑀅𑀤𑀤𑀦𑁆𑀢𑀲𑁆𑀲 𑀦 𑀤𑀸𑀢𑀩𑁆𑀩𑀁, 𑀤𑀤𑀦𑁆𑀢𑀲𑁆𑀲𑀧𑀺 𑀅𑀤𑀤𑀦𑁆𑀢𑀲𑁆𑀲𑀧𑀺 𑀤𑀸𑀢𑀩𑁆𑀩𑀁, 𑀲𑀼𑀔𑀁 𑀦𑀺𑀲𑀻𑀤𑀺𑀢𑀩𑁆𑀩𑀁, 𑀲𑀼𑀔𑀁 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀁, 𑀲𑀼𑀔𑀁 𑀦𑀺𑀧𑀚𑁆𑀚𑀺𑀢𑀩𑁆𑀩𑀁, 𑀅𑀕𑁆𑀕𑀺 𑀧𑀭𑀺𑀘𑀭𑀺𑀢𑀩𑁆𑀩𑁄, 𑀅𑀦𑁆𑀢𑁄𑀤𑁂𑀯𑀢𑀸 𑀦𑀫𑀲𑁆𑀲𑀺𑀢𑀩𑁆𑀩𑀸’’𑀢𑀺.

𑀇𑀫𑀁 𑀤𑀲𑀯𑀺𑀥𑀁 𑀑𑀯𑀸𑀤𑀁 𑀤𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀲𑀩𑁆𑀩𑀸 𑀲𑁂𑀦𑀺𑀬𑁄 𑀲𑀦𑁆𑀦𑀺𑀧𑀸𑀢𑁂𑀢𑁆𑀯𑀸 𑀭𑀸𑀚𑀲𑁂𑀦𑀸𑀬 𑀫𑀚𑁆𑀛𑁂 𑀅𑀝𑁆𑀞 𑀓𑀼𑀝𑀼𑀫𑁆𑀩𑀺𑀓𑁂 𑀧𑀸𑀝𑀺𑀪𑁄𑀕𑁂 𑀕𑀳𑁂𑀢𑁆𑀯𑀸 ‘‘𑀲𑀘𑁂 𑀫𑁂 𑀥𑀻𑀢𑀼 𑀕𑀢𑀝𑁆𑀞𑀸𑀦𑁂 𑀤𑁄𑀲𑁄 𑀉𑀧𑁆𑀧𑀚𑁆𑀚𑀢𑀺, 𑀢𑀼𑀫𑁆𑀳𑁂𑀳𑀺 𑀲𑁄𑀥𑁂𑀢𑀩𑁆𑀩𑁄’’𑀢𑀺 𑀯𑀢𑁆𑀯𑀸 𑀦𑀯𑀓𑁄𑀝𑀺𑀅𑀕𑁆𑀖𑀦𑀓𑁂𑀦 𑀫𑀳𑀸𑀮𑀢𑀸𑀧𑀲𑀸𑀥𑀦𑁂𑀦 𑀥𑀻𑀢𑀭𑀁 𑀧𑀲𑀸𑀥𑁂𑀢𑁆𑀯𑀸 𑀦𑁆𑀳𑀸𑀦𑀘𑀼𑀡𑁆𑀡𑀫𑀽𑀮𑀁 𑀘𑀢𑀼𑀧𑀡𑁆𑀡𑀸𑀲𑀲𑀓𑀝𑀲𑀢𑀁 𑀥𑀦𑀁 𑀤𑀢𑁆𑀯𑀸 𑀥𑀻𑀢𑀸𑀬 𑀲𑀤𑁆𑀥𑀺𑀁 𑀦𑀺𑀩𑀤𑁆𑀥𑀁 𑀕𑀫𑀦𑀘𑀸𑀭𑀺𑀦𑀺𑀬𑁄 𑀧𑀜𑁆𑀘𑀲𑀢𑀸 𑀤𑀸𑀲𑀺𑀬𑁄 𑀧𑀜𑁆𑀘 𑀆𑀚𑀜𑁆𑀜𑀭𑀣𑀲𑀢𑀸𑀦𑀺 𑀲𑀩𑁆𑀩𑀽𑀧𑀓𑀸𑀭𑀜𑁆𑀘 𑀲𑀢𑀁 𑀲𑀢𑀁 𑀤𑀢𑁆𑀯𑀸 𑀓𑁄𑀲𑀮𑀭𑀸𑀚𑀸𑀦𑀜𑁆𑀘 𑀫𑀺𑀕𑀸𑀭𑀲𑁂𑀝𑁆𑀞𑀺𑀜𑁆𑀘, 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀥𑀻𑀢𑀼 𑀕𑀫𑀦𑀯𑁂𑀮𑀸𑀬𑀁 𑀯𑀚𑀸𑀥𑀺𑀝𑁆𑀞𑀸𑀬𑀓𑁂 𑀧𑀼𑀭𑀺𑀲𑁂 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸, ‘‘𑀢𑀸𑀢𑀸, 𑀫𑀫 𑀥𑀻𑀢𑀸𑀬 𑀕𑀢𑀝𑁆𑀞𑀸𑀦𑁂 𑀔𑀻𑀭𑀧𑀸𑀦𑀢𑁆𑀣𑀁 𑀥𑁂𑀦𑀽𑀳𑀺, 𑀬𑀸𑀦𑀬𑁄𑀚𑀦𑀢𑁆𑀣𑀁 𑀉𑀲𑀪𑁂𑀳𑀺 𑀘 𑀅𑀢𑁆𑀣𑁄 𑀳𑁄𑀢𑀺, 𑀢𑀲𑁆𑀫𑀸 𑀫𑀫 𑀥𑀻𑀢𑀼 𑀕𑀫𑀦𑀫𑀕𑁆𑀕𑁂 𑀯𑀚𑀤𑁆𑀯𑀸𑀭𑀁 𑀯𑀺𑀯𑀭𑀺𑀢𑁆𑀯𑀸 𑀧𑀼𑀣𑀼𑀮𑀢𑁄 𑀅𑀝𑁆𑀞 𑀉𑀲𑀪𑀸𑀦𑀺 𑀕𑁄𑀕𑀡𑁂𑀦 𑀧𑀽𑀭𑁂𑀢𑁆𑀯𑀸 𑀢𑀺𑀕𑀸𑀯𑀼𑀢𑀫𑀢𑁆𑀣𑀓𑁂 𑀅𑀲𑀼𑀓𑀸 𑀦𑀸𑀫 𑀓𑀦𑁆𑀤𑀭𑀸 𑀅𑀢𑁆𑀣𑀺, 𑀅𑀕𑁆𑀕𑀕𑁄𑀬𑀽𑀣𑁂 𑀢𑀁 𑀞𑀸𑀦𑀁 𑀧𑀢𑁆𑀢𑁂 𑀪𑁂𑀭𑀺𑀲𑀜𑁆𑀜𑀸𑀬 𑀯𑀚𑀤𑁆𑀯𑀸𑀭𑀁 𑀧𑀺𑀤𑀳𑁂𑀬𑁆𑀬𑀸𑀣𑀸’’𑀢𑀺. 𑀢𑁂 ‘‘𑀲𑀸𑀥𑀽’’𑀢𑀺 𑀲𑁂𑀝𑁆𑀞𑀺𑀲𑁆𑀲 𑀯𑀘𑀦𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀢𑀣𑀸 𑀅𑀓𑀁𑀲𑀼. 𑀯𑀚𑀤𑁆𑀯𑀸𑀭𑁂 𑀯𑀺𑀯𑀝𑁂 𑀉𑀴𑀸𑀭𑀼𑀴𑀸𑀭𑀸𑀬𑁂𑀯 𑀕𑀸𑀯𑀺𑀬𑁄 𑀦𑀺𑀓𑁆𑀔𑀫𑀺𑀁𑀲𑀼. 𑀤𑁆𑀯𑀸𑀭𑁂 𑀧𑀺𑀤𑀳𑀺𑀢𑁂 𑀧𑀦 𑀯𑀺𑀲𑀸𑀔𑀸𑀬 𑀧𑀼𑀜𑁆𑀜𑀩𑀮𑁂𑀦 𑀩𑀮𑀯𑀕𑀸𑀯𑁄 𑀘 𑀤𑀫𑁆𑀫𑀕𑀸𑀯𑁄 𑀘 𑀩𑀳𑀺 𑀮𑀗𑁆𑀖𑀺𑀢𑁆𑀯𑀸 𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀺𑀁𑀲𑀼. 𑀅𑀣, 𑀯𑀺𑀲𑀸𑀔𑀸, 𑀲𑀸𑀯𑀢𑁆𑀣𑀺𑀦𑀕𑀭𑀤𑁆𑀯𑀸𑀭𑀁 𑀧𑀢𑁆𑀢𑀓𑀸𑀮𑁂 𑀘𑀺𑀦𑁆𑀢𑁂𑀲𑀺 𑁋 ‘‘𑀧𑀝𑀺𑀘𑁆𑀙𑀦𑁆𑀦𑀬𑀸𑀦𑀲𑁆𑀫𑀺𑀁 𑀦𑀼 𑀔𑁄 𑀦𑀺𑀲𑀻𑀤𑀺𑀢𑁆𑀯𑀸 𑀧𑀯𑀺𑀲𑀸𑀫𑀺, 𑀉𑀤𑀸𑀳𑀼 𑀭𑀣𑁂 𑀞𑀢𑁆𑀯𑀸’’𑀢𑀺. 𑀅𑀣𑀲𑁆𑀲𑀸 𑀏𑀢𑀤𑀳𑁄𑀲𑀺 𑁋 ‘‘𑀧𑀝𑀺𑀘𑁆𑀙𑀦𑁆𑀦𑀬𑀸𑀦𑁂𑀦 𑀫𑁂 𑀧𑀯𑀺𑀲𑀦𑁆𑀢𑀺𑀬𑀸 𑀫𑀳𑀸𑀮𑀢𑀸𑀧𑀲𑀸𑀥𑀦𑀲𑁆𑀲 𑀯𑀺𑀲𑁂𑀲𑁄 𑀦 𑀧𑀜𑁆𑀜𑀸𑀬𑀺𑀲𑁆𑀲𑀢𑀻’’𑀢𑀺. 𑀲𑀸 𑀲𑀓𑀮𑀦𑀕𑀭𑀲𑁆𑀲 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀦𑁆𑀢𑀻 𑀭𑀣𑁂 𑀞𑀢𑁆𑀯𑀸 𑀦𑀕𑀭𑀁 𑀧𑀸𑀯𑀺𑀲𑀺. 𑀲𑀸𑀯𑀢𑁆𑀣𑀺𑀯𑀸𑀲𑀺𑀦𑁄 𑀯𑀺𑀲𑀸𑀔𑀸𑀬 𑀲𑀫𑁆𑀧𑀢𑁆𑀢𑀺𑀁 𑀤𑀺𑀲𑁆𑀯𑀸 ‘‘𑀏𑀲𑀸 𑀓𑀺𑀭, 𑀯𑀺𑀲𑀸𑀔𑀸, 𑀦𑀸𑀫 𑀏𑀯𑀭𑀽𑀧𑀸, 𑀅𑀬𑀜𑁆𑀘 𑀲𑀫𑁆𑀧𑀢𑁆𑀢𑀺 𑀏𑀢𑀺𑀲𑁆𑀲𑀸𑀯 𑀅𑀦𑀼𑀘𑁆𑀙𑀯𑀺𑀓𑀸’’𑀢𑀺 𑀆𑀳𑀁𑀲𑀼. 𑀇𑀢𑀺 𑀲𑀸 𑀫𑀳𑀸𑀲𑀫𑁆𑀧𑀢𑁆𑀢𑀺𑀬𑀸 𑀫𑀺𑀕𑀸𑀭𑀲𑁂𑀝𑁆𑀞𑀺𑀦𑁄 𑀕𑁂𑀳𑀁 𑀧𑀸𑀯𑀺𑀲𑀺. 𑀆𑀕𑀢𑀤𑀺𑀯𑀲𑁂 𑀘𑀲𑁆𑀲𑀸 𑀲𑀓𑀮𑀦𑀕𑀭𑀯𑀸𑀲𑀺𑀦𑁄 ‘‘𑀅𑀫𑁆𑀳𑀸𑀓𑀁, 𑀥𑀦𑀜𑁆𑀘𑀬𑀲𑁂𑀝𑁆𑀞𑀺, 𑀅𑀢𑁆𑀢𑀦𑁄 𑀦𑀕𑀭𑀁 𑀲𑀫𑁆𑀧𑀢𑁆𑀢𑀸𑀦𑀁 𑀫𑀳𑀸𑀲𑀓𑁆𑀓𑀸𑀭𑀁 𑀅𑀓𑀸𑀲𑀻’’𑀢𑀺 𑀬𑀣𑀸𑀩𑀮𑀁 𑀧𑀡𑁆𑀡𑀸𑀓𑀸𑀭𑀁 𑀧𑀳𑀺𑀡𑀺𑀁𑀲𑀼. 𑀯𑀺𑀲𑀸𑀔𑀸, 𑀧𑀳𑀺𑀢𑀧𑀳𑀺𑀢𑀁 𑀧𑀡𑁆𑀡𑀸𑀓𑀸𑀭𑀁 𑀢𑀲𑁆𑀫𑀺𑀁𑀬𑁂𑀯 𑀦𑀕𑀭𑁂 𑀅𑀜𑁆𑀜𑀫𑀜𑁆𑀜𑁂𑀲𑀼 𑀓𑀼𑀮𑁂𑀲𑀼 𑀲𑀩𑁆𑀩𑀢𑁆𑀣𑀓𑀫𑁂𑀯 𑀤𑀸𑀧𑁂𑀲𑀺. 𑀅𑀣𑀲𑁆𑀲𑀸 𑀭𑀢𑁆𑀢𑀺𑀪𑀸𑀕𑀲𑀫𑀦𑀦𑁆𑀢𑀭𑁂 𑀏𑀓𑀺𑀲𑁆𑀲𑀸 𑀆𑀚𑀜𑁆𑀜𑀯𑀴𑀯𑀸𑀬 𑀕𑀩𑁆𑀪𑀯𑀼𑀝𑁆𑀞𑀸𑀦𑀁 𑀅𑀳𑁄𑀲𑀺. 𑀲𑀸 𑀤𑀸𑀲𑀻𑀳𑀺 𑀤𑀡𑁆𑀟𑀤𑀻𑀧𑀺𑀓𑀸 𑀕𑀸𑀳𑀸𑀧𑁂𑀢𑁆𑀯𑀸 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀯𑀴𑀯𑀁 𑀉𑀡𑁆𑀳𑁄𑀤𑀓𑁂𑀦 𑀦𑁆𑀳𑀸𑀧𑁂𑀢𑁆𑀯𑀸 𑀢𑁂𑀮𑁂𑀦 𑀫𑀓𑁆𑀔𑀸𑀧𑁂𑀢𑁆𑀯𑀸 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀫𑁂𑀯 𑀅𑀕𑀫𑀸𑀲𑀺.

𑀫𑀺𑀕𑀸𑀭𑀲𑁂𑀝𑁆𑀞𑀺𑀧𑀺 𑀲𑀢𑁆𑀢𑀸𑀳𑀁 𑀧𑀼𑀢𑁆𑀢𑀲𑁆𑀲 𑀆𑀯𑀸𑀳𑀲𑀓𑁆𑀓𑀸𑀭𑀁 𑀓𑀭𑁄𑀦𑁆𑀢𑁄 𑀥𑀼𑀭𑀯𑀺𑀳𑀸𑀭𑁂 𑀯𑀲𑀦𑁆𑀢𑀫𑁆𑀧𑀺 𑀢𑀣𑀸𑀕𑀢𑀁 𑀅𑀫𑀦𑀲𑀺𑀓𑀢𑁆𑀯𑀸 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀲𑀓𑀮𑀦𑀺𑀯𑁂𑀲𑀦𑀁 𑀧𑀽𑀭𑁂𑀦𑁆𑀢𑁄 𑀦𑀕𑁆𑀕𑀲𑀫𑀡𑀓𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 ‘‘𑀆𑀕𑀘𑁆𑀙𑀢𑀼 𑀫𑁂 𑀥𑀻𑀢𑀸, 𑀅𑀭𑀳𑀦𑁆𑀢𑁂 𑀯𑀦𑁆𑀤𑀢𑀽’’𑀢𑀺 𑀯𑀺𑀲𑀸𑀔𑀸𑀬 𑀲𑀸𑀲𑀦𑀁 𑀧𑀳𑀺𑀡𑀺. 𑀲𑀸 ‘‘𑀅𑀭𑀳𑀦𑁆𑀢𑀸’’𑀢𑀺 𑀯𑀘𑀦𑀁 𑀲𑀼𑀢𑁆𑀯𑀸 𑀲𑁄𑀢𑀸𑀧𑀦𑁆𑀦𑀸 𑀅𑀭𑀺𑀬𑀲𑀸𑀯𑀺𑀓𑀸 𑀳𑀝𑁆𑀞𑀢𑀼𑀝𑁆𑀞𑀸 𑀳𑀼𑀢𑁆𑀯𑀸 𑀢𑁂𑀲𑀁 𑀦𑀺𑀲𑀺𑀦𑁆𑀦𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀢𑁂 𑀑𑀮𑁄𑀓𑁂𑀢𑁆𑀯𑀸 ‘‘𑀦 𑀏𑀯𑀭𑀽𑀧𑀸 𑀦𑀸𑀫 𑀅𑀭𑀳𑀦𑁆𑀢𑀸 𑀳𑁄𑀦𑁆𑀢𑀺, 𑀳𑀺𑀭𑁄𑀢𑁆𑀢𑀧𑁆𑀧𑀯𑀺𑀯𑀚𑁆𑀚𑀺𑀢𑀸𑀦𑀁 𑀦𑀸𑀫 𑀲𑀦𑁆𑀢𑀺𑀓𑀁 𑀓𑀲𑁆𑀫𑀸 𑀫𑀁 𑀲𑀲𑀼𑀭𑁄 𑀧𑀓𑁆𑀓𑁄𑀲𑀸𑀧𑁂𑀢𑀻’’𑀢𑀺 ‘‘𑀥𑀻, 𑀥𑀻’’𑀢𑀺 𑀕𑀭𑀳𑀺𑀢𑁆𑀯𑀸 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀫𑁂𑀯 𑀕𑀢𑀸. 𑀦𑀕𑁆𑀕𑀲𑀫𑀡𑀸 𑀢𑀁 𑀤𑀺𑀲𑁆𑀯𑀸 𑀲𑀩𑁆𑀩𑁂 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀲𑁂𑀝𑁆𑀞𑀺𑀁 𑀕𑀭𑀳𑀺𑀁𑀲𑀼 𑁋 ‘‘𑀓𑀺𑀁 𑀢𑁆𑀯𑀁, 𑀕𑀳𑀧𑀢𑀺, 𑀅𑀜𑁆𑀜𑀁 𑀦𑀸𑀮𑀢𑁆𑀣, 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀲𑀸𑀯𑀺𑀓𑀁 𑀫𑀳𑀸𑀓𑀸𑀴𑀓𑀡𑁆𑀡𑀺𑀁 𑀓𑀲𑁆𑀫𑀸 𑀇𑀫𑀁 𑀕𑁂𑀳𑀁 𑀧𑀯𑁂𑀲𑁂𑀲𑀺, 𑀯𑁂𑀕𑁂𑀦 𑀦𑀁 𑀇𑀫𑀲𑁆𑀫𑀸 𑀕𑁂𑀳𑀸 𑀦𑀻𑀳𑀭𑀸𑀳𑀻’’𑀢𑀺. 𑀢𑀢𑁄 𑀲𑁂𑀝𑁆𑀞𑀺 ‘‘𑀦 𑀲𑀓𑁆𑀓𑀸 𑀫𑀬𑀸 𑀇𑀫𑁂𑀲𑀁 𑀯𑀘𑀦𑁂𑀦 𑀇𑀫𑀁 𑀕𑁂𑀳𑀸 𑀦𑀻𑀳𑀭𑀺𑀢𑀼𑀁, 𑀫𑀳𑀸𑀓𑀼𑀮𑀲𑁆𑀲 𑀥𑀻𑀢𑀸 𑀅𑀬’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑁋 ‘‘𑀆𑀘𑀭𑀺𑀬𑀸 𑀤𑀳𑀭𑀸 𑀦𑀸𑀫 𑀚𑀸𑀦𑀺𑀢𑁆𑀯𑀸 𑀯𑀸 𑀅𑀚𑀸𑀦𑀺𑀢𑁆𑀯𑀸 𑀯𑀸 𑀓𑀭𑁂𑀬𑁆𑀬𑀼𑀁, 𑀢𑀼𑀫𑁆𑀳𑁂 𑀢𑀼𑀡𑁆𑀳𑀻 𑀳𑁄𑀣𑀸’’𑀢𑀺 𑀦𑀕𑁆𑀕𑁂 𑀉𑀬𑁆𑀬𑁄𑀚𑁂𑀢𑁆𑀯𑀸 𑀫𑀳𑀸𑀧𑀮𑁆𑀮𑀗𑁆𑀓𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀲𑀼𑀯𑀡𑁆𑀡𑀓𑀝𑀘𑁆𑀙𑀼𑀁 𑀕𑀳𑁂𑀢𑁆𑀯𑀸 𑀯𑀺𑀲𑀸𑀔𑀸𑀬 𑀧𑀭𑀺𑀯𑀺𑀲𑀺𑀬𑀫𑀸𑀦𑁄 𑀲𑀼𑀯𑀡𑁆𑀡𑀧𑀸𑀢𑀺𑀬𑀁 𑀅𑀧𑁆𑀧𑁄𑀤𑀓𑀫𑀥𑀼𑀧𑀸𑀬𑀸𑀲𑀁 𑀧𑀭𑀺𑀪𑀼𑀜𑁆𑀚𑀺.

𑀢𑀲𑁆𑀫𑀺𑀁 𑀲𑀫𑀬𑁂 𑀏𑀓𑁄 𑀧𑀺𑀡𑁆𑀟𑀘𑀸𑀭𑀺𑀓𑁄 𑀣𑁂𑀭𑁄 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑁄 𑀲𑁂𑀝𑁆𑀞𑀺𑀲𑁆𑀲 𑀖𑀭𑀤𑁆𑀯𑀸𑀭𑀁 𑀧𑀸𑀧𑀼𑀡𑀺. 𑀯𑀺𑀲𑀸𑀔𑀸, 𑀢𑀁 𑀤𑀺𑀲𑁆𑀯𑀸 ‘‘𑀲𑀲𑀼𑀭𑀲𑁆𑀲 𑀆𑀘𑀺𑀓𑁆𑀔𑀺𑀢𑀼𑀁 𑀦 𑀬𑀼𑀢𑁆𑀢’’𑀦𑁆𑀢𑀺 𑀬𑀣𑀸 𑀲𑁄 𑀣𑁂𑀭𑀁 𑀧𑀲𑁆𑀲𑀢𑀺, 𑀏𑀯𑀁 𑀅𑀧𑀕𑀦𑁆𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀲𑁄 𑀧𑀦 𑀩𑀸𑀮𑁄 𑀣𑁂𑀭𑀁 𑀤𑀺𑀲𑁆𑀯𑀸𑀧𑀺 𑀅𑀧𑀲𑁆𑀲𑀦𑁆𑀢𑁄 𑀯𑀺𑀬 𑀳𑀼𑀢𑁆𑀯𑀸 𑀅𑀥𑁄𑀫𑀼𑀔𑁄 𑀧𑀸𑀬𑀸𑀲𑀫𑁂𑀯 𑀪𑀼𑀜𑁆𑀚𑀢𑀺. 𑀯𑀺𑀲𑀸𑀔𑀸, ‘‘𑀣𑁂𑀭𑀁 𑀤𑀺𑀲𑁆𑀯𑀸𑀧𑀺 𑀫𑁂 𑀲𑀲𑀼𑀭𑁄 𑀲𑀜𑁆𑀜𑀁 𑀦 𑀓𑀭𑁄𑀢𑀻’’𑀢𑀺 𑀜𑀢𑁆𑀯𑀸 𑀣𑁂𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀅𑀢𑀺𑀘𑁆𑀙𑀣, 𑀪𑀦𑁆𑀢𑁂, 𑀫𑀬𑁆𑀳𑀁 𑀲𑀲𑀼𑀭𑁄 𑀧𑀼𑀭𑀸𑀡𑀁 𑀔𑀸𑀤𑀢𑀻’’𑀢𑀺 𑀆𑀳. 𑀲𑁄 𑀦𑀺𑀕𑀡𑁆𑀞𑁂𑀳𑀺 𑀢𑀸𑀯 𑀓𑀣𑀺𑀢𑀓𑀸𑀮𑁂 𑀅𑀥𑀺𑀯𑀸𑀲𑁂𑀲𑀺, ‘‘𑀧𑀼𑀭𑀸𑀡𑀁 𑀔𑀸𑀤𑀢𑀻’’𑀢𑀺 𑀯𑀼𑀢𑁆𑀢𑀓𑁆𑀔𑀡𑁂𑀬𑁂𑀯 𑀧𑀦 𑀳𑀢𑁆𑀣𑀁 𑀅𑀧𑀦𑁂𑀢𑁆𑀯𑀸 ‘‘𑀇𑀫𑀁 𑀧𑀸𑀬𑀸𑀲𑀁 𑀇𑀢𑁄 𑀳𑀭𑀣, 𑀏𑀢𑀜𑁆𑀘 𑀇𑀫𑀲𑁆𑀫𑀸 𑀕𑁂𑀳𑀸 𑀦𑀻𑀳𑀭𑀣. 𑀅𑀬𑀜𑁆𑀳𑀺 𑀫𑀁 𑀏𑀯𑀭𑀽𑀧𑁂 𑀫𑀗𑁆𑀕𑀮𑀕𑁂𑀳𑁂 𑀅𑀲𑀼𑀘𑀺𑀔𑀸𑀤𑀓𑀁 𑀦𑀸𑀫 𑀓𑀭𑁄𑀢𑀻’’𑀢𑀺 𑀆𑀳. 𑀢𑀲𑁆𑀫𑀺𑀁 𑀔𑁄 𑀧𑀦 𑀦𑀺𑀯𑁂𑀲𑀦𑁂 𑀲𑀩𑁆𑀩𑁂𑀧𑀺 𑀤𑀸𑀲𑀓𑀫𑁆𑀫𑀓𑀭𑀸 𑀯𑀺𑀲𑀸𑀔𑀸𑀬 𑀲𑀦𑁆𑀢𑀓𑀸𑀯, 𑀓𑁄 𑀦𑀁 𑀳𑀢𑁆𑀣𑁂 𑀯𑀸 𑀧𑀸𑀤𑁂 𑀯𑀸 𑀕𑀡𑁆𑀳𑀺𑀲𑁆𑀲𑀢𑀺, 𑀫𑀼𑀔𑁂𑀦 𑀓𑀣𑁂𑀢𑀼𑀁 𑀲𑀫𑀢𑁆𑀣𑁄𑀧𑀺 𑀦𑀸𑀫 𑀦𑀢𑁆𑀣𑀺. 𑀢𑀢𑁄, 𑀯𑀺𑀲𑀸𑀔𑀸, 𑀲𑀲𑀼𑀭𑀲𑁆𑀲 𑀓𑀣𑀁 𑀲𑀼𑀢𑁆𑀯𑀸 𑀆𑀳 𑁋 ‘‘𑀢𑀸𑀢, 𑀦 𑀏𑀢𑁆𑀢𑀓𑁂𑀦 𑀯𑀘𑀦𑁂𑀦 𑀫𑀬𑀁 𑀦𑀺𑀓𑁆𑀔𑀫𑀸𑀫, 𑀦𑀸𑀳𑀁 𑀢𑀼𑀫𑁆𑀳𑁂𑀳𑀺 𑀉𑀤𑀓𑀢𑀺𑀢𑁆𑀣𑀢𑁄 𑀓𑀼𑀫𑁆𑀪𑀤𑀸𑀲𑀺𑀓𑀸 𑀯𑀺𑀬 𑀆𑀦𑀻𑀢𑀸. 𑀥𑀭𑀫𑀸𑀦𑀓𑀫𑀸𑀢𑀸𑀧𑀺𑀢𑀽𑀦𑀁 𑀥𑀻𑀢𑀭𑁄 𑀦𑀸𑀫 𑀦 𑀏𑀢𑁆𑀢𑀓𑁂𑀦𑁂𑀯 𑀦𑀺𑀓𑁆𑀔𑀫𑀦𑁆𑀢𑀺, 𑀏𑀢𑁂𑀦𑁂𑀯 𑀫𑁂 𑀓𑀸𑀭𑀡𑁂𑀦 𑀧𑀺𑀢𑀸 𑀇𑀥𑀸𑀕𑀫𑀦𑀤𑀺𑀯𑀲𑁂 𑀅𑀝𑁆𑀞 𑀓𑀼𑀝𑀼𑀫𑁆𑀩𑀺𑀓𑁂 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘𑀲𑀘𑁂 𑀫𑁂 𑀥𑀻𑀢𑀭𑀁 𑀉𑀧𑀸𑀤𑀸𑀬 𑀤𑁄𑀲𑁄 𑀉𑀧𑁆𑀧𑀚𑁆𑀚𑀢𑀺, 𑀲𑁄𑀥𑁂𑀬𑁆𑀬𑀸𑀣𑀸’𑀢𑀺 𑀯𑀢𑁆𑀯𑀸 𑀢𑁂𑀲𑀁 𑀳𑀢𑁆𑀣𑁂 𑀞𑀧𑁂𑀲𑀺. 𑀢𑁂 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀫𑀬𑁆𑀳𑀁 𑀤𑁄𑀲𑀸𑀤𑁄𑀲𑀁 𑀲𑁄𑀥𑀸𑀧𑁂𑀣𑀸’’𑀢𑀺.

𑀢𑀢𑁄 𑀲𑁂𑀝𑁆𑀞𑀺 ‘‘𑀓𑀮𑁆𑀬𑀸𑀡𑀁 𑀏𑀲𑀸 𑀓𑀣𑁂𑀢𑀻’’𑀢𑀺 𑀅𑀝𑁆𑀞 𑀓𑀼𑀝𑀼𑀫𑁆𑀩𑀺𑀓𑁂 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀅𑀬𑀁 𑀤𑀸𑀭𑀺𑀓𑀸 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀅𑀧𑀭𑀺𑀧𑀼𑀡𑁆𑀡𑁂𑀬𑁂𑀯 𑀫𑀗𑁆𑀕𑀮𑀕𑁂𑀳𑁂 𑀦𑀺𑀲𑀺𑀦𑁆𑀦𑀁 𑀫𑀁 ‘𑀅𑀲𑀼𑀘𑀺𑀔𑀸𑀤𑀓𑁄’𑀢𑀺 𑀯𑀤𑀢𑀻’’𑀢𑀺 𑀆𑀳. 𑀏𑀯𑀁 𑀓𑀺𑀭, 𑀅𑀫𑁆𑀫𑀸𑀢𑀺? ‘‘𑀢𑀸𑀢𑀸, 𑀫𑀬𑁆𑀳𑀁 𑀲𑀲𑀼𑀭𑁄 𑀅𑀲𑀼𑀘𑀺𑀁 𑀔𑀸𑀤𑀺𑀢𑀼𑀓𑀸𑀫𑁄 𑀪𑀯𑀺𑀲𑁆𑀲𑀢𑀺, 𑀅𑀳𑀁 𑀧𑀦 𑀏𑀯𑀁 𑀓𑀢𑁆𑀯𑀸 𑀦 𑀓𑀣𑁂𑀫𑀺. 𑀏𑀓𑀲𑁆𑀫𑀺𑀁 𑀧𑀦 𑀧𑀺𑀡𑁆𑀟𑀧𑀸𑀢𑀺𑀓𑀢𑁆𑀣𑁂𑀭𑁂 𑀖𑀭𑀤𑁆𑀯𑀸𑀭𑁂 𑀞𑀺𑀢𑁂 𑀅𑀬𑀁 𑀅𑀧𑁆𑀧𑁄𑀤𑀓𑀫𑀥𑀼𑀧𑀸𑀬𑀸𑀲𑀁 𑀪𑀼𑀜𑁆𑀚𑀦𑁆𑀢𑁄 𑀦 𑀢𑀁 𑀫𑀦𑀲𑀺 𑀓𑀭𑁄𑀢𑀺, 𑀅𑀳𑀁 𑀇𑀫𑀺𑀦𑀸 𑀓𑀸𑀭𑀡𑁂𑀦 ‘𑀅𑀢𑀺𑀘𑁆𑀙𑀣, 𑀪𑀦𑁆𑀢𑁂, 𑀫𑀬𑁆𑀳𑀁 𑀲𑀲𑀼𑀭𑁄 𑀇𑀫𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂 𑀧𑀼𑀜𑁆𑀜𑀁 𑀦 𑀓𑀭𑁄𑀢𑀺, 𑀧𑀼𑀭𑀸𑀡𑀧𑀼𑀜𑁆𑀜𑀁 𑀔𑀸𑀤𑀢𑀻’𑀢𑀺 𑀏𑀢𑁆𑀢𑀓𑀁 𑀓𑀣𑀬𑀺𑀦𑁆𑀢𑀺 𑀆𑀳. 𑀅𑀬𑁆𑀬, 𑀇𑀥 𑀤𑁄𑀲𑁄 𑀦𑀢𑁆𑀣𑀺, 𑀅𑀫𑁆𑀳𑀸𑀓𑀁 𑀥𑀻𑀢𑀸 𑀓𑀸𑀭𑀡𑀁 𑀓𑀣𑁂𑀢𑀺, 𑀢𑁆𑀯𑀁 𑀓𑀲𑁆𑀫𑀸 𑀓𑀼𑀚𑁆𑀛𑀲𑀻𑀢𑀺? 𑀅𑀬𑁆𑀬𑀸, 𑀏𑀲 𑀢𑀸𑀯 𑀤𑁄𑀲𑁄 𑀫𑀸 𑀳𑁄𑀢𑀼, 𑀅𑀬𑀁 𑀧𑀦 𑀤𑀸𑀭𑀺𑀓𑀸 𑀆𑀕𑀢𑀤𑀺𑀯𑀲𑁂𑀬𑁂𑀯 𑀫𑀫 𑀧𑀼𑀢𑁆𑀢𑁂 𑀲𑀜𑁆𑀜𑀁 𑀅𑀓𑀢𑁆𑀯𑀸 𑀅𑀢𑁆𑀢𑀦𑁄 𑀇𑀘𑁆𑀙𑀺𑀢𑀝𑁆𑀞𑀸𑀦𑀁 𑀅𑀕𑀫𑀸𑀲𑀻𑀢𑀺. 𑀏𑀯𑀁 𑀓𑀺𑀭, 𑀅𑀫𑁆𑀫𑀸𑀢𑀺? 𑀢𑀸𑀢𑀸, 𑀦𑀸𑀳𑀁 𑀇𑀘𑁆𑀙𑀺𑀢𑀝𑁆𑀞𑀸𑀦𑀁 𑀕𑀘𑁆𑀙𑀸𑀫𑀺, 𑀇𑀫𑀲𑁆𑀫𑀺𑀁 𑀧𑀦 𑀕𑁂𑀳𑁂 𑀆𑀚𑀸𑀦𑀻𑀬𑀯𑀴𑀯𑀸𑀬 𑀯𑀺𑀚𑀸𑀢𑀸𑀬 𑀲𑀜𑁆𑀜𑀫𑁆𑀧𑀺 𑀅𑀓𑀢𑁆𑀯𑀸 𑀦𑀺𑀲𑀻𑀤𑀦𑀁 𑀦𑀸𑀫 𑀅𑀬𑀼𑀢𑁆𑀢𑀦𑁆𑀢𑀺 𑀤𑀡𑁆𑀟𑀤𑀻𑀧𑀺𑀓𑀸 𑀕𑀸𑀳𑀸𑀧𑁂𑀢𑁆𑀯𑀸 𑀤𑀸𑀲𑀻𑀳𑀺 𑀧𑀭𑀺𑀯𑀼𑀢𑀸 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀯𑀴𑀯𑀸𑀬 𑀯𑀺𑀚𑀸𑀢𑀧𑀭𑀺𑀳𑀸𑀭𑀁 𑀓𑀸𑀭𑀸𑀧𑁂𑀲𑀺𑀦𑁆𑀢𑀺. 𑀅𑀬𑁆𑀬, 𑀅𑀫𑁆𑀳𑀸𑀓𑀁 𑀥𑀻𑀢𑀸 𑀢𑀯 𑀕𑁂𑀳𑁂 𑀤𑀸𑀲𑀻𑀳𑀺𑀧𑀺 𑀅𑀓𑀢𑁆𑀢𑀩𑁆𑀩𑀓𑀫𑁆𑀫𑀁 𑀅𑀓𑀸𑀲𑀺, 𑀢𑁆𑀯𑀁 𑀏𑀢𑁆𑀣 𑀓𑀺𑀁 𑀤𑁄𑀲𑀁 𑀧𑀲𑁆𑀲𑀲𑀻𑀢𑀺?

𑀅𑀬𑁆𑀬𑀸, 𑀏𑀲 𑀢𑀸𑀯 𑀕𑀼𑀡𑁄 𑀳𑁄𑀢𑀼, 𑀇𑀫𑀺𑀲𑁆𑀲𑀸 𑀧𑀦 𑀧𑀺𑀢𑀸 𑀇𑀥𑀸𑀕𑀫𑀦𑀤𑀺𑀯𑀲𑁂 𑀑𑀯𑀸𑀤𑀁 𑀤𑁂𑀦𑁆𑀢𑁄 ‘‘𑀅𑀦𑁆𑀢𑁄𑀅𑀕𑁆𑀕𑀺 𑀩𑀳𑀺 𑀦 𑀦𑀻𑀳𑀭𑀺𑀢𑀩𑁆𑀩𑁄’’𑀢𑀺 𑀆𑀳, 𑀓𑀺𑀁 𑀧𑀦 𑀲𑀓𑁆𑀓𑀸 𑀅𑀫𑁆𑀳𑁂𑀳𑀺 𑀉𑀪𑀢𑁄 𑀧𑀝𑀺𑀯𑀺𑀲𑁆𑀲𑀓𑀕𑁂𑀳𑀸𑀦𑀁 𑀅𑀕𑁆𑀕𑀺𑀁 𑀅𑀤𑀢𑁆𑀯𑀸 𑀯𑀲𑀺𑀢𑀼𑀦𑁆𑀢𑀺? 𑀏𑀯𑀁 𑀓𑀺𑀭, 𑀅𑀫𑁆𑀫𑀸𑀢𑀺? 𑀢𑀸𑀢𑀸, 𑀦 𑀫𑀬𑁆𑀳𑀁 𑀧𑀺𑀢𑀸 𑀏𑀢𑀁 𑀅𑀕𑁆𑀕𑀺𑀁 𑀉𑀧𑀸𑀤𑀸𑀬 𑀓𑀣𑁂𑀲𑀺, 𑀬𑀸 𑀧𑀦 𑀅𑀦𑁆𑀢𑁄𑀦𑀺𑀯𑁂𑀲𑀦𑁂 𑀲𑀲𑁆𑀲𑀼𑀆𑀤𑀻𑀦𑀁 𑀭𑀳𑀲𑁆𑀲𑀓𑀣𑀸 𑀉𑀧𑁆𑀧𑀚𑁆𑀚𑀢𑀺, 𑀲𑀸 𑀤𑀸𑀲𑀺𑀤𑀸𑀲𑀸𑀦𑀁 𑀦 𑀓𑀣𑁂𑀢𑀩𑁆𑀩𑀸. 𑀏𑀯𑀭𑀽𑀧𑀸 𑀳𑀺 𑀓𑀣𑀸 𑀯𑀟𑁆𑀠𑀫𑀸𑀦𑀸 𑀓𑀮𑀳𑀸𑀬 𑀲𑀁𑀯𑀢𑁆𑀢𑀢𑀺, 𑀇𑀤𑀁 𑀲𑀦𑁆𑀥𑀸𑀬 𑀫𑀬𑁆𑀳𑀁 𑀧𑀺𑀢𑀸 𑀓𑀣𑁂𑀲𑀺, 𑀢𑀸𑀢𑀸𑀢𑀺.

𑀅𑀬𑁆𑀬𑀸, 𑀏𑀢𑀁 𑀢𑀸𑀯 𑀏𑀯𑀁 𑀳𑁄𑀢𑀼, 𑀇𑀫𑀺𑀲𑁆𑀲𑀸 𑀧𑀺𑀢𑀸 ‘‘𑀩𑀸𑀳𑀺𑀭𑀢𑁄 𑀅𑀕𑁆𑀕𑀺 𑀦 𑀅𑀦𑁆𑀢𑁄 𑀧𑀯𑁂𑀲𑁂𑀢𑀩𑁆𑀩𑁄’’𑀢𑀺 𑀆𑀳, 𑀓𑀺𑀁 𑀲𑀓𑁆𑀓𑀸 𑀅𑀫𑁆𑀳𑁂𑀳𑀺 𑀅𑀦𑁆𑀢𑁄𑀅𑀕𑁆𑀕𑀺𑀫𑁆𑀳𑀺 𑀦𑀺𑀩𑁆𑀩𑀼𑀢𑁂 𑀩𑀸𑀳𑀺𑀭𑀢𑁄 𑀅𑀕𑁆𑀕𑀺𑀁 𑀅𑀦𑀸𑀳𑀭𑀺𑀢𑀼𑀦𑁆𑀢𑀺? 𑀏𑀯𑀁 𑀓𑀺𑀭, 𑀅𑀫𑁆𑀫𑀸𑀢𑀺? 𑀢𑀸𑀢𑀸, 𑀫𑀬𑁆𑀳𑀁 𑀧𑀺𑀢𑀸 𑀏𑀢𑀁 𑀅𑀕𑁆𑀕𑀺𑀁 𑀲𑀦𑁆𑀥𑀸𑀬 𑀦 𑀓𑀣𑁂𑀲𑀺, 𑀬𑀁 𑀧𑀦 𑀤𑁄𑀲𑀁 𑀤𑀸𑀲𑀓𑀫𑁆𑀫𑀓𑀸𑀭𑁂𑀳𑀺 𑀓𑀣𑀺𑀢𑀁 𑀳𑁄𑀢𑀺, 𑀢𑀁 𑀅𑀦𑁆𑀢𑁄𑀫𑀸𑀦𑀼𑀲𑀓𑀸𑀦𑀁 𑀦 𑀓𑀣𑁂𑀢𑀩𑁆𑀩𑀁…𑀧𑁂….

𑀬𑀫𑁆𑀧𑀺 𑀢𑁂𑀦 ‘‘𑀬𑁂 𑀤𑀤𑀦𑁆𑀢𑀺, 𑀢𑁂𑀲𑀁𑀬𑁂𑀯 𑀤𑀸𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁, 𑀢𑀁 ‘‘𑀬𑀸𑀘𑀺𑀢𑀓𑀁 𑀉𑀧𑀓𑀭𑀡𑀁 𑀕𑀳𑁂𑀢𑁆𑀯𑀸 𑀬𑁂 𑀧𑀝𑀺𑀤𑀤𑀦𑁆𑀢𑀺, 𑀢𑁂𑀲𑀁𑀬𑁂𑀯 𑀤𑀸𑀢𑀩𑁆𑀩’’𑀦𑁆𑀢𑀺 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁.

‘‘𑀬𑁂 𑀦 𑀤𑀤𑀦𑁆𑀢𑀻’’𑀢𑀺 𑀇𑀤𑀫𑁆𑀧𑀺 𑀬𑀸𑀘𑀺𑀢𑀓𑀁 𑀉𑀧𑀓𑀭𑀡𑀁 𑀕𑀳𑁂𑀢𑁆𑀯𑀸 𑀬𑁂 𑀦 𑀧𑀝𑀺𑀤𑀤𑀦𑁆𑀢𑀺, 𑀢𑁂𑀲𑀁 𑀦 𑀤𑀸𑀢𑀩𑁆𑀩𑀦𑁆𑀢𑀺 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁.

‘‘𑀤𑀤𑀦𑁆𑀢𑀲𑁆𑀲𑀧𑀺 𑀅𑀤𑀤𑀦𑁆𑀢𑀲𑁆𑀲𑀧𑀺 𑀤𑀸𑀢𑀩𑁆𑀩’’𑀦𑁆𑀢𑀺, 𑀇𑀤𑀁 𑀧𑀦 𑀤𑀼𑀕𑁆𑀕𑀢𑁂𑀲𑀼 𑀜𑀸𑀢𑀺𑀫𑀺𑀢𑁆𑀢𑁂𑀲𑀼 𑀲𑀫𑁆𑀧𑀢𑁆𑀢𑁂𑀲𑀼 𑀧𑀝𑀺𑀤𑀸𑀢𑀼𑀁 𑀲𑀓𑁆𑀓𑁄𑀦𑁆𑀢𑀼 𑀯𑀸 𑀫𑀸 𑀯𑀸, 𑀤𑀸𑀢𑀼𑀫𑁂𑀯 𑀯𑀝𑁆𑀝𑀢𑀻𑀢𑀺 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁.

‘‘𑀲𑀼𑀔𑀁 𑀦𑀺𑀲𑀻𑀤𑀺𑀢𑀩𑁆𑀩’’𑀦𑁆𑀢𑀺 𑀇𑀤𑀫𑁆𑀧𑀺 𑀲𑀲𑁆𑀲𑀼𑀲𑀲𑀼𑀭𑁂 𑀤𑀺𑀲𑁆𑀯𑀸 𑀉𑀝𑁆𑀞𑀸𑀢𑀩𑁆𑀩𑀝𑁆𑀞𑀸𑀦𑁂 𑀦𑀺𑀲𑀻𑀤𑀺𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁.

‘‘𑀲𑀼𑀔𑀁 𑀪𑀼𑀜𑁆𑀚𑀺𑀢𑀩𑁆𑀩’’𑀦𑁆𑀢𑀺 𑀇𑀤𑀁 𑀧𑀦 𑀲𑀲𑁆𑀲𑀼𑀲𑀲𑀼𑀭𑀲𑀸𑀫𑀺𑀓𑁂𑀳𑀺 𑀧𑀼𑀭𑁂𑀢𑀭𑀁 𑀅𑀪𑀼𑀜𑁆𑀚𑀺𑀢𑁆𑀯𑀸 𑀢𑁂 𑀧𑀭𑀺𑀯𑀺𑀲𑀺𑀢𑁆𑀯𑀸 𑀲𑀩𑁆𑀩𑁂𑀳𑀺 𑀮𑀤𑁆𑀥𑀸𑀮𑀤𑁆𑀥𑀁 𑀜𑀢𑁆𑀯𑀸 𑀧𑀘𑁆𑀙𑀸 𑀲𑀬𑀁 𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁.

‘‘𑀲𑀼𑀔𑀁 𑀦𑀺𑀧𑀚𑁆𑀚𑀺𑀢𑀩𑁆𑀩’’𑀦𑁆𑀢𑀺 𑀇𑀤𑀫𑁆𑀧𑀺 𑀲𑀲𑁆𑀲𑀼𑀲𑀲𑀼𑀭𑀲𑀸𑀫𑀺𑀓𑁂𑀳𑀺 𑀧𑀼𑀭𑁂𑀢𑀭𑀫𑁂𑀯 𑀲𑀬𑀦𑀁 𑀆𑀭𑀼𑀬𑁆𑀳 𑀦 𑀦𑀺𑀧𑀚𑁆𑀚𑀺𑀢𑀩𑁆𑀩𑀁, 𑀢𑁂𑀲𑀁 𑀓𑀢𑁆𑀢𑀩𑁆𑀩𑀬𑀼𑀢𑁆𑀢𑀓𑀁 𑀯𑀢𑁆𑀢𑀧𑀝𑀺𑀯𑀢𑁆𑀢𑀁 𑀓𑀢𑁆𑀯𑀸 𑀧𑀘𑁆𑀙𑀸 𑀲𑀬𑀁 𑀦𑀺𑀧𑀚𑁆𑀚𑀺𑀢𑀼𑀁 𑀬𑀼𑀢𑁆𑀢𑀦𑁆𑀢𑀺 𑀇𑀤𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁.

‘‘𑀅𑀕𑁆𑀕𑀺 𑀧𑀭𑀺𑀘𑀭𑀺𑀢𑀩𑁆𑀩𑁄’’𑀢𑀺 𑀇𑀤𑀁 𑀧𑀦 𑀲𑀲𑁆𑀲𑀼𑀫𑁆𑀧𑀺 𑀲𑀲𑀼𑀭𑀫𑁆𑀧𑀺 𑀲𑀸𑀫𑀺𑀓𑀫𑁆𑀧𑀺 𑀅𑀕𑁆𑀕𑀺𑀓𑁆𑀔𑀦𑁆𑀥𑀁 𑀯𑀺𑀬 𑀉𑀭𑀕𑀭𑀸𑀚𑀸𑀦𑀁 𑀯𑀺𑀬 𑀘 𑀓𑀢𑁆𑀯𑀸 𑀧𑀲𑁆𑀲𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀇𑀤𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺.

𑀏𑀢𑁂 𑀢𑀸𑀯 𑀏𑀢𑁆𑀢𑀓𑀸 𑀕𑀼𑀡𑀸 𑀳𑁄𑀦𑁆𑀢𑀼, 𑀇𑀫𑀺𑀲𑁆𑀲𑀸 𑀧𑀦 𑀧𑀺𑀢𑀸 𑀅𑀦𑁆𑀢𑁄𑀤𑁂𑀯𑀢𑀸 𑀦𑀫𑀲𑁆𑀲𑀸𑀧𑁂𑀢𑀺, 𑀇𑀫𑀲𑁆𑀲 𑀓𑁄 𑀅𑀢𑁆𑀣𑁄𑀢𑀺? 𑀏𑀯𑀁 𑀓𑀺𑀭, 𑀅𑀫𑁆𑀫𑀸𑀢𑀺? 𑀆𑀫, 𑀢𑀸𑀢𑀸, 𑀏𑀢𑀫𑁆𑀧𑀺 𑀳𑀺 𑀫𑁂 𑀧𑀺𑀢𑀭𑀸 𑀇𑀤𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋 ‘‘𑀆𑀯𑁂𑀡𑀺𑀓𑀖𑀭𑀸𑀯𑀸𑀲𑀁 𑀯𑀲𑀦𑀓𑀸𑀮𑀢𑁄 𑀧𑀝𑁆𑀞𑀸𑀬 𑀅𑀢𑁆𑀢𑀦𑁄 𑀖𑀭𑀤𑁆𑀯𑀸𑀭𑀁 𑀲𑀫𑁆𑀧𑀢𑁆𑀢𑀧𑀩𑁆𑀩𑀚𑀺𑀢𑀁 𑀤𑀺𑀲𑁆𑀯𑀸 𑀬𑀁 𑀖𑀭𑁂 𑀔𑀸𑀤𑀦𑀻𑀬𑀁 𑀪𑁄𑀚𑀦𑀻𑀬𑀁 𑀅𑀢𑁆𑀣𑀺, 𑀢𑀢𑁄 𑀧𑀩𑁆𑀩𑀚𑀺𑀢𑀸𑀦𑀁 𑀤𑀢𑁆𑀯𑀸𑀯 𑀔𑀸𑀤𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺. 𑀅𑀣 𑀦𑀁 𑀢𑁂 𑀆𑀳𑀁𑀲𑀼 𑁋 ‘‘𑀢𑀼𑀬𑁆𑀳𑀁 𑀧𑀦 𑀫𑀳𑀸𑀲𑁂𑀝𑁆𑀞𑀺 𑀧𑀩𑁆𑀩𑀚𑀺𑀢𑁂 𑀤𑀺𑀲𑁆𑀯𑀸 𑀅𑀤𑀸𑀦𑀫𑁂𑀯 𑀭𑀼𑀘𑁆𑀘𑀢𑀺 𑀫𑀜𑁆𑀜𑁂𑀢𑀺. 𑀲𑁄 𑀅𑀜𑁆𑀜𑀁 𑀧𑀝𑀺𑀯𑀘𑀦𑀁 𑀅𑀧𑀲𑁆𑀲𑀦𑁆𑀢𑁄 𑀅𑀥𑁄𑀫𑀼𑀔𑁄 𑀦𑀺𑀲𑀻𑀤𑀺’’.

𑀅𑀣 𑀦𑀁 𑀓𑀼𑀝𑀼𑀫𑁆𑀩𑀺𑀓𑀸 ‘‘𑀓𑀺𑀁 𑀲𑁂𑀝𑁆𑀞𑀺 𑀅𑀜𑁆𑀜𑁄𑀧𑀺 𑀅𑀫𑁆𑀳𑀸𑀓𑀁 𑀥𑀻𑀢𑀼 𑀤𑁄𑀲𑁄 𑀅𑀢𑁆𑀣𑀻’’𑀢𑀺 𑀧𑀼𑀘𑁆𑀙𑀺𑀁𑀲𑀼. 𑀦𑀢𑁆𑀣𑀺, 𑀅𑀬𑁆𑀬𑀸𑀢𑀺. 𑀓𑀲𑁆𑀫𑀸 𑀧𑀦 𑀦𑀁 𑀦𑀺𑀤𑁆𑀤𑁄𑀲𑀁 𑀅𑀓𑀸𑀭𑀡𑀸 𑀕𑁂𑀳𑀢𑁄 𑀦𑀻𑀳𑀭𑀸𑀧𑁂𑀲𑀻𑀢𑀺? 𑀢𑀲𑁆𑀫𑀺𑀁 𑀔𑀡𑁂, 𑀯𑀺𑀲𑀸𑀔𑀸, 𑀆𑀳 𑁋 ‘‘𑀧𑀞𑀫𑀁 𑀢𑀸𑀯 𑀫𑀬𑁆𑀳𑀁 𑀫𑀫 𑀲𑀲𑀼𑀭𑀲𑁆𑀲 𑀯𑀘𑀦𑁂𑀦 𑀕𑀫𑀦𑀁 𑀦 𑀬𑀼𑀢𑁆𑀢𑀁, 𑀫𑀬𑁆𑀳𑀁 𑀧𑀦 𑀆𑀕𑀫𑀦𑀤𑀺𑀯𑀲𑁂 𑀫𑀫 𑀤𑁄𑀲𑀸𑀤𑁄𑀲𑀁 𑀲𑁄𑀥𑀦𑀢𑁆𑀣𑀸𑀬 𑀫𑀫 𑀧𑀺𑀢𑀸 𑀢𑀼𑀫𑁆𑀳𑀸𑀓𑀁 𑀳𑀢𑁆𑀣𑁂 𑀞𑀧𑁂𑀢𑁆𑀯𑀸 𑀅𑀤𑀸𑀲𑀺, 𑀇𑀤𑀸𑀦𑀺 𑀫𑀬𑁆𑀳𑀁 𑀕𑀦𑁆𑀢𑀼𑀁 𑀲𑀼𑀔’’𑀦𑁆𑀢𑀺 𑀤𑀸𑀲𑀺𑀤𑀸𑀲𑁂 ‘‘𑀬𑀸𑀦𑀸𑀤𑀻𑀦𑀺 𑀲𑀚𑁆𑀚𑀸𑀦𑀺 𑀓𑀭𑁄𑀣𑀸’’𑀢𑀺 𑀆𑀡𑀸𑀧𑁂𑀲𑀺. 𑀅𑀣 𑀦𑀁 𑀲𑁂𑀝𑁆𑀞𑀺 𑀢𑁂 𑀓𑀼𑀝𑀼𑀫𑁆𑀩𑀺𑀓𑁂 𑀕𑀳𑁂𑀢𑁆𑀯𑀸, ‘‘𑀅𑀫𑁆𑀫, 𑀫𑀬𑀸 𑀅𑀚𑀸𑀦𑀺𑀢𑁆𑀯𑀸 𑀓𑀣𑀺𑀢𑀁, 𑀔𑀫𑀸𑀳𑀺 𑀫𑀬𑁆𑀳’’𑀦𑁆𑀢𑀺 𑀆𑀳. ‘‘𑀢𑀸𑀢𑀸, 𑀢𑀼𑀫𑁆𑀳𑀸𑀓𑀁 𑀔𑀫𑀺𑀢𑀩𑁆𑀩𑀁 𑀢𑀸𑀯 𑀔𑀫𑀸𑀫𑀺, 𑀅𑀳𑀁 𑀧𑀦 𑀩𑀼𑀤𑁆𑀥𑀲𑀸𑀲𑀦𑁂 𑀅𑀯𑁂𑀘𑁆𑀘𑀧𑁆𑀧𑀲𑀦𑁆𑀦𑀲𑁆𑀲 𑀓𑀼𑀮𑀲𑁆𑀲 𑀥𑀻𑀢𑀸, 𑀦 𑀫𑀬𑀁 𑀯𑀺𑀦𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀯𑀢𑁆𑀢𑀸𑀫. 𑀲𑀘𑁂 𑀫𑀫 𑀭𑀼𑀘𑀺𑀬𑀸 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀝𑀺𑀚𑀕𑁆𑀕𑀺𑀢𑀼𑀁 𑀮𑀪𑀸𑀫𑀺, 𑀯𑀲𑀺𑀲𑁆𑀲𑀸𑀫𑀻’’𑀢𑀺. ‘‘𑀅𑀫𑁆𑀫, 𑀢𑁆𑀯𑀁 𑀬𑀣𑀸𑀭𑀼𑀘𑀺𑀬𑀸 𑀢𑀯 𑀲𑀫𑀡𑁂 𑀧𑀝𑀺𑀚𑀕𑁆𑀕𑀸𑀳𑀻’’𑀢𑀺.

𑀢𑀢𑁄, 𑀯𑀺𑀲𑀸𑀔𑀸, 𑀤𑀲𑀩𑀮𑀁 𑀦𑀺𑀫𑀦𑁆𑀢𑀸𑀧𑁂𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀦𑀺𑀯𑁂𑀲𑀦𑀁 𑀧𑀽𑀭𑁂𑀦𑁆𑀢𑀻 𑀩𑀼𑀤𑁆𑀥𑀧𑁆𑀧𑀫𑀼𑀔𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀦𑀺𑀲𑀻𑀤𑀸𑀧𑁂𑀲𑀺. 𑀦𑀕𑁆𑀕𑀧𑀭𑀺𑀲𑀸𑀧𑀺 𑀲𑀢𑁆𑀣𑀼 𑀫𑀺𑀕𑀸𑀭𑀲𑁂𑀝𑁆𑀞𑀺𑀦𑁄 𑀕𑁂𑀳𑀁 𑀕𑀢𑀪𑀸𑀯𑀁 𑀲𑀼𑀢𑁆𑀯𑀸 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀕𑁂𑀳𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀦𑀺𑀲𑀻𑀤𑀺𑀁𑀲𑀼. 𑀯𑀺𑀲𑀸𑀔𑀸, 𑀤𑀓𑁆𑀔𑀺𑀡𑁄𑀤𑀓𑀁 𑀤𑀢𑁆𑀯𑀸 ‘‘𑀲𑀩𑁆𑀩𑁄 𑀲𑀓𑁆𑀓𑀸𑀭𑁄 𑀧𑀝𑀺𑀬𑀸𑀤𑀺𑀢𑁄, 𑀲𑀲𑀼𑀭𑁄 𑀫𑁂 𑀆𑀕𑀦𑁆𑀢𑁆𑀯𑀸 𑀤𑀲𑀩𑀮𑀁 𑀧𑀭𑀺𑀯𑀺𑀲𑀢𑀽’’𑀢𑀺 𑀲𑀸𑀲𑀦𑀁 𑀧𑁂𑀲𑁂𑀲𑀺. 𑀲𑁄 𑀦𑀺𑀕𑀡𑁆𑀞𑀸𑀦𑀁 𑀯𑀘𑀦𑀁 𑀲𑀼𑀢𑁆𑀯𑀸 ‘‘𑀫𑀫 𑀥𑀻𑀢𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁 𑀧𑀭𑀺𑀯𑀺𑀲𑀢𑀽’’𑀢𑀺 𑀆𑀳. 𑀯𑀺𑀲𑀸𑀔𑀸, 𑀦𑀸𑀦𑀕𑁆𑀕𑀭𑀲𑁂𑀳𑀺 𑀤𑀲𑀩𑀮𑀁 𑀧𑀭𑀺𑀯𑀺𑀲𑀺𑀢𑁆𑀯𑀸 𑀦𑀺𑀝𑁆𑀞𑀺𑀢𑁂 𑀪𑀢𑁆𑀢𑀓𑀺𑀘𑁆𑀘𑁂 𑀧𑀼𑀦 𑀲𑀸𑀲𑀦𑀁 𑀧𑀳𑀺𑀡𑀺 𑁋 ‘‘𑀲𑀲𑀼𑀭𑁄 𑀫𑁂 𑀆𑀕𑀦𑁆𑀢𑁆𑀯𑀸 𑀤𑀲𑀩𑀮𑀲𑁆𑀲 𑀥𑀫𑁆𑀫𑀓𑀣𑀁 𑀲𑀼𑀡𑀸𑀢𑀽’’𑀢𑀺. 𑀅𑀣 𑀦𑀁 ‘‘𑀇𑀤𑀸𑀦𑀺 𑀅𑀕𑀫𑀦𑀁 𑀦𑀸𑀫 𑀅𑀢𑀺𑀯𑀺𑀬 𑀅𑀓𑀸𑀭𑀡’’𑀦𑁆𑀢𑀺 𑀥𑀫𑁆𑀫𑀓𑀣𑀁 𑀲𑁄𑀢𑀼𑀓𑀫𑁆𑀬𑀢𑀸𑀬 𑀕𑀘𑁆𑀙𑀦𑁆𑀢𑀁 𑀦𑀕𑁆𑀕𑀲𑀫𑀡𑀸 𑀆𑀳𑀁𑀲𑀼 𑁋 ‘‘𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀥𑀫𑁆𑀫𑀁 𑀲𑀼𑀡𑀦𑁆𑀢𑁄 𑀩𑀳𑀺𑀲𑀸𑀡𑀺𑀬𑀁 𑀦𑀺𑀲𑀻𑀤𑀺𑀢𑁆𑀯𑀸 𑀲𑀼𑀡𑀸𑀳𑀻’’𑀢𑀺. 𑀧𑀼𑀭𑁂𑀢𑀭𑀫𑁂𑀯 𑀘 𑀕𑀦𑁆𑀢𑁆𑀯𑀸 𑀲𑀸𑀡𑀺𑀬𑀸 𑀧𑀭𑀺𑀓𑁆𑀔𑀺𑀧𑀺𑀁𑀲𑀼. 𑀫𑀺𑀕𑀸𑀭𑀲𑁂𑀝𑁆𑀞𑀺 𑀕𑀦𑁆𑀢𑁆𑀯𑀸 𑀩𑀳𑀺𑀲𑀸𑀡𑀺𑀬𑀁 𑀦𑀺𑀲𑀻𑀤𑀺. 𑀢𑀣𑀸𑀕𑀢𑁄 ‘‘𑀢𑁆𑀯𑀁 𑀩𑀳𑀺𑀲𑀸𑀡𑀺𑀬𑀁 𑀯𑀸 𑀦𑀺𑀲𑀻𑀤, 𑀧𑀭𑀓𑀼𑀝𑁆𑀝𑁂 𑀯𑀸 𑀧𑀭𑀲𑁂𑀮𑁂 𑀯𑀸 𑀧𑀭𑀘𑀓𑁆𑀓𑀯𑀸𑀴𑁂 𑀯𑀸 𑀦𑀺𑀲𑀻𑀤. 𑀅𑀳𑀁 𑀩𑀼𑀤𑁆𑀥𑁄 𑀦𑀸𑀫 𑀲𑀓𑁆𑀓𑁄𑀫𑀺 𑀢𑀁 𑀫𑀫 𑀲𑀤𑁆𑀤𑀁 𑀲𑀸𑀯𑁂𑀢𑀼’’𑀦𑁆𑀢𑀺 𑀲𑀼𑀯𑀡𑁆𑀡𑀯𑀡𑁆𑀡𑀨𑀮𑀁 𑀅𑀫𑁆𑀩𑀭𑀼𑀓𑁆𑀔𑀁 𑀔𑀦𑁆𑀥𑁂 𑀕𑀳𑁂𑀢𑁆𑀯𑀸 𑀘𑀸𑀮𑁂𑀦𑁆𑀢𑁄 𑀯𑀺𑀬 𑀥𑀫𑁆𑀫𑀓𑀣𑀁 𑀓𑀣𑁂𑀲𑀺, 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀲𑁂𑀝𑁆𑀞𑀺 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀸𑀬 𑀲𑀸𑀡𑀺𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀲𑀢𑁆𑀣𑀼 𑀧𑀸𑀤𑁂 𑀧𑀜𑁆𑀘𑀧𑀢𑀺𑀝𑁆𑀞𑀺𑀢𑁂𑀦 𑀯𑀦𑁆𑀤𑀺𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂𑀬𑁂𑀯 𑀘 ‘‘𑀢𑁆𑀯𑀁, 𑀅𑀫𑁆𑀫, 𑀅𑀚𑁆𑀚 𑀆𑀤𑀺𑀁 𑀓𑀢𑁆𑀯𑀸 𑀫𑀫 𑀫𑀸𑀢𑀸’’𑀢𑀺 𑀯𑀺𑀲𑀸𑀔𑀁 𑀅𑀢𑁆𑀢𑀦𑁄 𑀫𑀸𑀢𑀼𑀝𑁆𑀞𑀸𑀦𑁂 𑀞𑀧𑁂𑀲𑀺. 𑀢𑀢𑁄 𑀧𑀝𑁆𑀞𑀸𑀬, 𑀯𑀺𑀲𑀸𑀔𑀸 𑀫𑀺𑀕𑀸𑀭𑀫𑀸𑀢𑀸, 𑀦𑀸𑀫 𑀚𑀸𑀢𑀸.

𑀲𑀸 𑀏𑀓𑀤𑀺𑀯𑀲𑀁 𑀦𑀓𑁆𑀔𑀢𑁆𑀢𑀲𑀫𑀬𑁂 𑀯𑀢𑁆𑀢𑀦𑁆𑀢𑁂 ‘‘𑀅𑀦𑁆𑀢𑁄𑀦𑀕𑀭𑁂 𑀕𑀼𑀡𑁄 𑀦𑀢𑁆𑀣𑀻’’𑀢𑀺 𑀤𑀸𑀲𑀻𑀳𑀺 𑀧𑀭𑀺𑀯𑀼𑀢𑀸 𑀲𑀢𑁆𑀣𑀼 𑀥𑀫𑁆𑀫𑀓𑀣𑀁 𑀲𑁄𑀢𑀼𑀁 𑀕𑀘𑁆𑀙𑀦𑁆𑀢𑀻 ‘‘𑀩𑀼𑀤𑁆𑀥𑀸𑀦𑀁 𑀲𑀦𑁆𑀢𑀺𑀓𑀁 𑀉𑀤𑁆𑀥𑀢𑀯𑁂𑀲𑁂𑀦 𑀕𑀦𑁆𑀢𑀼𑀁 𑀅𑀬𑀼𑀢𑁆𑀢’’𑀦𑁆𑀢𑀺 𑀫𑀳𑀸𑀮𑀢𑀸𑀧𑀲𑀸𑀥𑀦𑀁 𑀑𑀫𑀼𑀜𑁆𑀘𑀺𑀢𑁆𑀯𑀸 𑀤𑀸𑀲𑀺𑀬𑀸 𑀳𑀢𑁆𑀣𑁂 𑀤𑀢𑁆𑀯𑀸 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺, 𑀲𑀢𑁆𑀣𑀸 𑀥𑀫𑁆𑀫𑀓𑀣𑀁 𑀓𑀣𑁂𑀲𑀺. 𑀲𑀸 𑀥𑀫𑁆𑀫𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀤𑀲𑀩𑀮𑀁 𑀯𑀦𑁆𑀤𑀺𑀢𑁆𑀯𑀸 𑀦𑀕𑀭𑀸𑀪𑀺𑀫𑀼𑀔𑀸 𑀧𑀸𑀬𑀸𑀲𑀺. 𑀲𑀸𑀧𑀺 𑀤𑀸𑀲𑀻 𑀅𑀢𑁆𑀢𑀦𑀸 𑀕𑀳𑀺𑀢𑀧𑀲𑀸𑀥𑀦𑀲𑁆𑀲 𑀞𑀧𑀺𑀢𑀝𑁆𑀞𑀸𑀦𑀁 𑀅𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑀻 𑀧𑀲𑀸𑀥𑀦𑀢𑁆𑀣𑀸𑀬 𑀧𑀝𑀺𑀦𑀺𑀯𑀢𑁆𑀢𑀺. 𑀅𑀣 𑀦𑀁, 𑀯𑀺𑀲𑀸𑀔𑀸, ‘‘𑀓𑀳𑀁 𑀧𑀦 𑀢𑁂 𑀢𑀁 𑀞𑀧𑀺𑀢’’𑀦𑁆𑀢𑀺 𑀧𑀝𑀺𑀧𑀼𑀘𑁆𑀙𑀺. 𑀕𑀦𑁆𑀥𑀓𑀼𑀝𑀺𑀧𑀭𑀺𑀯𑁂𑀡𑁂, 𑀅𑀬𑁆𑀬𑁂𑀢𑀺. 𑀳𑁄𑀢𑀼 𑀚𑁂 𑀕𑀦𑁆𑀢𑁆𑀯𑀸 𑀆𑀳𑀭, 𑀕𑀦𑁆𑀥𑀓𑀼𑀝𑀺𑀧𑀭𑀺𑀯𑁂𑀡𑁂 𑀞𑀧𑀺𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀆𑀳𑀭𑀸𑀧𑀦𑀁 𑀦𑀸𑀫 𑀅𑀫𑁆𑀳𑀸𑀓𑀁 𑀅𑀬𑀼𑀢𑁆𑀢𑀁. 𑀢𑀲𑁆𑀫𑀸 𑀢𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀤𑀡𑁆𑀟𑀓𑀫𑁆𑀫𑀁 𑀓𑀭𑀺𑀲𑁆𑀲𑀸𑀫. 𑀢𑀢𑁆𑀣 𑀧𑀦 𑀞𑀧𑀺𑀢𑁂 𑀅𑀬𑁆𑀬𑀸𑀦𑀁 𑀧𑀮𑀺𑀩𑁄𑀥𑁄 𑀳𑁄𑀢𑀻𑀢𑀺.

𑀧𑀼𑀦𑀤𑀺𑀯𑀲𑁂 𑀲𑀢𑁆𑀣𑀸 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀸𑀭𑁄 𑀯𑀺𑀲𑀸𑀔𑀸𑀬 𑀦𑀺𑀯𑁂𑀲𑀦𑀤𑁆𑀯𑀸𑀭𑀁 𑀲𑀫𑁆𑀧𑀸𑀧𑀼𑀡𑀺. 𑀦𑀺𑀯𑁂𑀲𑀦𑁂 𑀘 𑀦𑀺𑀩𑀤𑁆𑀥𑀧𑀜𑁆𑀜𑀢𑁆𑀢𑀸𑀦𑀺 𑀆𑀲𑀦𑀸𑀦𑀺. 𑀯𑀺𑀲𑀸𑀔𑀸, 𑀲𑀢𑁆𑀣𑀼 𑀧𑀢𑁆𑀢𑀁 𑀕𑀡𑁆𑀳𑀺𑀢𑁆𑀯𑀸 𑀲𑀢𑁆𑀣𑀸𑀭𑀁 𑀕𑁂𑀳𑀁 𑀧𑀯𑁂𑀲𑁂𑀢𑁆𑀯𑀸 𑀧𑀜𑁆𑀜𑀢𑁆𑀢𑀸𑀲𑀦𑁂𑀲𑀼𑀬𑁂𑀯 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀓𑀢𑀪𑀢𑁆𑀢𑀓𑀺𑀘𑁆𑀘𑁂 𑀲𑀢𑁆𑀣𑀭𑀺 𑀢𑀁 𑀧𑀲𑀸𑀥𑀦𑀁 𑀆𑀳𑀭𑀺𑀢𑁆𑀯𑀸 𑀲𑀢𑁆𑀣𑀼 𑀧𑀸𑀤𑀫𑀽𑀮𑁂 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 ‘‘𑀇𑀤𑀁, 𑀪𑀦𑁆𑀢𑁂, 𑀢𑀼𑀫𑁆𑀳𑀸𑀓𑀁 𑀤𑀫𑁆𑀫𑀻’’𑀢𑀺 𑀆𑀳. 𑀲𑀢𑁆𑀣𑀸 ‘‘𑀅𑀮𑀗𑁆𑀓𑀸𑀭𑁄 𑀦𑀸𑀫 𑀧𑀩𑁆𑀩𑀚𑀺𑀢𑀸𑀦𑀁 𑀦 𑀯𑀝𑁆𑀝𑀢𑀻’’𑀢𑀺 𑀧𑀝𑀺𑀓𑁆𑀔𑀺𑀧𑀺. 𑀚𑀸𑀦𑀸𑀫𑀺, 𑀪𑀦𑁆𑀢𑁂, 𑀅𑀳𑀁 𑀧𑀦 𑀇𑀫𑀁 𑀅𑀕𑁆𑀖𑀸𑀧𑁂𑀢𑁆𑀯𑀸 𑀥𑀦𑀁 𑀕𑀳𑁂𑀢𑁆𑀯𑀸 𑀢𑀼𑀫𑁆𑀳𑀸𑀓𑀁 𑀯𑀲𑀦𑀕𑀦𑁆𑀥𑀓𑀼𑀝𑀺𑀁 𑀓𑀸𑀭𑁂𑀲𑁆𑀲𑀸𑀫𑀻𑀢𑀺. 𑀢𑀤𑀸 𑀲𑀢𑁆𑀣𑀸 𑀅𑀥𑀺𑀯𑀸𑀲𑁂𑀲𑀺. 𑀲𑀸𑀧𑀺 𑀢𑀁 𑀅𑀕𑁆𑀖𑀸𑀧𑁂𑀢𑁆𑀯𑀸 𑀦𑀯𑀓𑁄𑀝𑀺𑀥𑀦𑀁 𑀕𑀳𑁂𑀢𑁆𑀯𑀸 𑀕𑀩𑁆𑀪𑀲𑀳𑀲𑁆𑀲𑀧𑀝𑀺𑀫𑀡𑁆𑀟𑀺𑀢𑁂 𑀧𑀼𑀩𑁆𑀩𑀸𑀭𑀸𑀫𑀯𑀺𑀳𑀸𑀭𑁂 𑀢𑀣𑀸𑀕𑀢𑀲𑁆𑀲 𑀯𑀲𑀦𑀕𑀦𑁆𑀥𑀓𑀼𑀝𑀺𑀁 𑀓𑀸𑀭𑁂𑀲𑀺. 𑀯𑀺𑀲𑀸𑀔𑀸𑀬 𑀧𑀦 𑀦𑀺𑀯𑁂𑀲𑀦𑀁 𑀧𑀼𑀩𑁆𑀩𑀡𑁆𑀳𑀲𑀫𑀬𑁂 𑀓𑀸𑀲𑀸𑀯𑀧𑀚𑁆𑀚𑁄𑀢𑀁 𑀇𑀲𑀺𑀯𑀸𑀢𑀧𑀝𑀺𑀯𑀸𑀢𑀫𑁂𑀯 𑀳𑁄𑀢𑀺 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀕𑁂𑀳𑀁 𑀯𑀺𑀬. 𑀢𑀲𑁆𑀲𑀸𑀧𑀺 𑀕𑁂𑀳𑁂 𑀲𑀩𑁆𑀩𑀪𑀢𑁆𑀢𑀸𑀦𑀺 𑀧𑀝𑀺𑀬𑀢𑁆𑀢𑀸𑀦𑁂𑀯 𑀅𑀳𑁂𑀲𑀼𑀁. 𑀲𑀸 𑀧𑀼𑀩𑁆𑀩𑀡𑁆𑀳𑀲𑀫𑀬𑁂 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀆𑀫𑀺𑀲𑀲𑀗𑁆𑀕𑀳𑀁 𑀓𑀢𑁆𑀯𑀸 𑀧𑀘𑁆𑀙𑀸𑀪𑀢𑁆𑀢𑁂 𑀪𑁂𑀲𑀚𑁆𑀚𑀸𑀦𑀺 𑀘𑁂𑀯 𑀅𑀝𑁆𑀞𑀯𑀺𑀥𑀧𑀸𑀦𑀸𑀦𑀺 𑀘 𑀕𑀡𑁆𑀳𑀸𑀧𑁂𑀢𑁆𑀯𑀸 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀤𑀢𑁆𑀯𑀸 𑀧𑀘𑁆𑀙𑀸 𑀲𑀢𑁆𑀣𑀼 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀆𑀕𑀘𑁆𑀙𑀢𑀺. 𑀲𑀢𑁆𑀣𑀸 𑀅𑀧𑀭𑀪𑀸𑀕𑁂 𑀉𑀧𑀸𑀲𑀺𑀓𑀸𑀬𑁄 𑀧𑀝𑀺𑀧𑀸𑀝𑀺𑀬𑀸 𑀞𑀸𑀦𑀦𑁆𑀢𑀭𑁂𑀲𑀼 𑀞𑀧𑁂𑀦𑁆𑀢𑁄 𑀯𑀺𑀲𑀸𑀔𑀁 𑀫𑀺𑀕𑀸𑀭𑀫𑀸𑀢𑀭𑀁 𑀤𑀸𑀬𑀺𑀓𑀸𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀲𑀻𑀢𑀺.

𑀔𑀼𑀚𑁆𑀚𑀼𑀢𑁆𑀢𑀭𑀸-𑀲𑀸𑀫𑀸𑀯𑀢𑀻𑀯𑀢𑁆𑀣𑀼

𑁨𑁬𑁦-𑁨𑁬𑁧. 𑀢𑀢𑀺𑀬𑀘𑀢𑀼𑀢𑁆𑀣𑁂𑀲𑀼 𑀩𑀳𑀼𑀲𑁆𑀲𑀼𑀢𑀸𑀦𑀁 𑀬𑀤𑀺𑀤𑀁, 𑀔𑀼𑀚𑁆𑀚𑀼𑀢𑁆𑀢𑀭𑀸, 𑀫𑁂𑀢𑁆𑀢𑀸𑀯𑀺𑀳𑀸𑀭𑀻𑀦𑀁 𑀬𑀤𑀺𑀤𑀁, 𑀲𑀸𑀫𑀸𑀯𑀢𑀻𑀢𑀺 𑀩𑀳𑀼𑀲𑁆𑀲𑀼𑀢𑀸𑀦𑀁 𑀉𑀧𑀸𑀲𑀺𑀓𑀸𑀦𑀁 𑀔𑀼𑀚𑁆𑀚𑀼𑀢𑁆𑀢𑀭𑀸, 𑀫𑁂𑀢𑁆𑀢𑀸𑀯𑀺𑀳𑀸𑀭𑀻𑀦𑀁 𑀲𑀸𑀫𑀸𑀯𑀢𑀻 𑀅𑀕𑁆𑀕𑀸𑀢𑀺 𑀤𑀲𑁆𑀲𑁂𑀢𑀺. 𑀢𑀸 𑀓𑀺𑀭 𑀤𑁆𑀯𑁂𑀧𑀺 𑀧𑀤𑀼𑀫𑀼𑀢𑁆𑀢𑀭𑀩𑀼𑀤𑁆𑀥𑀓𑀸𑀮𑁂 𑀳𑀁𑀲𑀯𑀢𑀺𑀬𑀁 𑀓𑀼𑀮𑀕𑁂𑀳𑁂 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺𑀢𑁆𑀯𑀸 𑀅𑀧𑀭𑀪𑀸𑀕𑁂 ‘‘𑀲𑀢𑁆𑀣𑀼 𑀥𑀫𑁆𑀫𑀓𑀣𑀁 𑀲𑁄𑀲𑁆𑀲𑀸𑀫𑀸’’𑀢𑀺 𑀯𑀺𑀳𑀸𑀭𑀁 𑀅𑀕𑀫𑀁𑀲𑀼. 𑀢𑀢𑁆𑀣, 𑀔𑀼𑀚𑁆𑀚𑀼𑀢𑁆𑀢𑀭𑀸, 𑀲𑀢𑁆𑀣𑀸𑀭𑀁 𑀏𑀓𑀁 𑀉𑀧𑀸𑀲𑀺𑀓𑀁 𑀩𑀳𑀼𑀲𑁆𑀲𑀼𑀢𑀸𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀦𑁆𑀢𑀁 𑀤𑀺𑀲𑁆𑀯𑀸 𑀅𑀥𑀺𑀓𑀸𑀭𑀓𑀫𑁆𑀫𑀁 𑀓𑀢𑁆𑀯𑀸 𑀢𑀁 𑀞𑀸𑀦𑀦𑁆𑀢𑀭𑀁 𑀧𑀢𑁆𑀣𑁂𑀲𑀺. 𑀲𑀸𑀫𑀸𑀯𑀢𑀻𑀧𑀺 𑀏𑀓𑀁 𑀉𑀧𑀸𑀲𑀺𑀓𑀁 𑀫𑁂𑀢𑁆𑀢𑀸𑀯𑀺𑀳𑀸𑀭𑀻𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀦𑁆𑀢𑀁 𑀤𑀺𑀲𑁆𑀯𑀸 𑀅𑀥𑀺𑀓𑀸𑀭𑀓𑀫𑁆𑀫𑀁 𑀓𑀢𑁆𑀯𑀸 𑀢𑀁 𑀞𑀸𑀦𑀦𑁆𑀢𑀭𑀁 𑀧𑀢𑁆𑀣𑁂𑀲𑀺. 𑀢𑀸𑀲𑀁 𑀤𑁆𑀯𑀺𑀦𑁆𑀦𑀫𑁆𑀧𑀺 𑀬𑀸𑀯𑀚𑀻𑀯𑀁 𑀓𑀼𑀲𑀮𑀁 𑀓𑀢𑁆𑀯𑀸 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑀻𑀦𑀁𑀬𑁂𑀯 𑀓𑀧𑁆𑀧𑀲𑀢𑀲𑀳𑀲𑁆𑀲𑀁 𑀅𑀢𑀺𑀓𑁆𑀓𑀦𑁆𑀢𑀁.

𑀅𑀣 𑀅𑀫𑁆𑀳𑀸𑀓𑀁 𑀲𑀢𑁆𑀣𑀼 𑀦𑀺𑀩𑁆𑀩𑀢𑁆𑀢𑀺𑀢𑁄 𑀧𑀼𑀭𑁂𑀢𑀭𑀫𑁂𑀯 𑀅𑀮𑁆𑀮𑀓𑀧𑁆𑀧𑀭𑀝𑁆𑀞𑁂 𑀅𑀳𑀺𑀯𑀸𑀢𑀓𑀭𑁄𑀕𑁄 𑀦𑀸𑀫 𑀉𑀤𑀧𑀸𑀤𑀺. 𑀏𑀓𑁂𑀓𑀲𑁆𑀫𑀺𑀁 𑀕𑁂𑀳𑁂 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀤𑀲𑀧𑀺 𑀯𑀻𑀲𑀫𑁆𑀧𑀺 𑀢𑀺𑀁𑀲𑀫𑁆𑀧𑀺 𑀚𑀦𑀸 𑀫𑀭𑀦𑁆𑀢𑀺, 𑀢𑀺𑀭𑁄𑀭𑀝𑁆𑀞𑀁 𑀕𑀢𑀸 𑀧𑀦 𑀚𑀻𑀯𑀺𑀢𑀁 𑀮𑀪𑀦𑁆𑀢𑀺. 𑀢𑀁 𑀜𑀢𑁆𑀯𑀸 𑀏𑀓𑁄 𑀧𑀼𑀭𑀺𑀲𑁄 𑀅𑀢𑁆𑀢𑀦𑁄 𑀧𑀼𑀢𑁆𑀢𑀤𑀸𑀭𑀁 𑀆𑀤𑀸𑀬 ‘‘𑀅𑀜𑁆𑀜𑀁 𑀭𑀝𑁆𑀞𑀁 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀢𑀢𑁄 𑀦𑀺𑀓𑁆𑀔𑀫𑀺. 𑀅𑀣𑀲𑁆𑀲 𑀖𑀭𑁂 𑀕𑀳𑀺𑀢𑀧𑀸𑀣𑁂𑀬𑁆𑀬𑀁 𑀅𑀦𑁆𑀢𑀭𑀸𑀫𑀕𑁆𑀕𑁂 𑀓𑀦𑁆𑀢𑀸𑀭𑁂 𑀅𑀦𑀼𑀢𑁆𑀢𑀺𑀡𑁆𑀡𑁂𑀬𑁂𑀯 𑀧𑀭𑀺𑀓𑁆𑀔𑀬𑀁 𑀅𑀕𑀫𑀸𑀲𑀺. 𑀢𑁂𑀲𑀁 𑀲𑀭𑀻𑀭𑀩𑀮𑀁 𑀧𑀭𑀺𑀳𑀸𑀬𑀺, 𑀲𑀓𑀺𑀁 𑀫𑀸𑀢𑀸 𑀧𑀼𑀢𑁆𑀢𑀁 𑀉𑀓𑁆𑀔𑀺𑀧𑀢𑀺, 𑀲𑀓𑀺𑀁 𑀧𑀺𑀢𑀸. 𑀅𑀣𑀲𑁆𑀲 𑀧𑀺𑀢𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀫𑁆𑀳𑀸𑀓𑀁 𑀲𑀭𑀻𑀭𑀩𑀮𑀁 𑀧𑀭𑀺𑀳𑀻𑀦𑀁, 𑀧𑀼𑀢𑁆𑀢𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑀸 𑀓𑀦𑁆𑀢𑀸𑀭𑀁 𑀦𑀺𑀢𑁆𑀣𑀭𑀺𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀸𑀫𑀸’’𑀢𑀺. 𑀲𑁄 𑀢𑀲𑁆𑀲 𑀫𑀸𑀢𑀭𑀁 𑀅𑀚𑀸𑀦𑀸𑀧𑁂𑀢𑁆𑀯𑀸𑀯 𑀉𑀤𑀓𑀓𑀺𑀘𑁆𑀘𑁂𑀦 𑀑𑀳𑀻𑀦𑁄 𑀯𑀺𑀬 𑀧𑀼𑀢𑁆𑀢𑀁 𑀫𑀕𑁆𑀕𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀏𑀓𑀓𑁄𑀯 𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀺. ‘‘𑀅𑀣𑀲𑁆𑀲 𑀪𑀭𑀺𑀬𑀸 𑀆𑀕𑀫𑀦𑀁 𑀑𑀮𑁄𑀓𑀬𑀫𑀸𑀦𑀸 𑀞𑀺𑀢𑀸 𑀳𑀢𑁆𑀣𑁂 𑀧𑀼𑀢𑁆𑀢𑀁 𑀅𑀤𑀺𑀲𑁆𑀯𑀸 𑀯𑀺𑀭𑀯𑀫𑀸𑀦𑀸 𑀕𑀦𑁆𑀢𑁆𑀯𑀸 𑀓𑀳𑀁 𑀫𑁂 𑀲𑀸𑀫𑀺 𑀧𑀼𑀢𑁆𑀢𑁄’’𑀢𑀺 𑀆𑀳. 𑀓𑁄 𑀢𑁂 𑀧𑀼𑀢𑁆𑀢𑁂𑀦 𑀅𑀢𑁆𑀣𑁄? 𑀚𑀻𑀯𑀫𑀸𑀦𑀸 𑀧𑀼𑀢𑁆𑀢𑀁 𑀮𑀪𑀺𑀲𑁆𑀲𑀸𑀫𑀸𑀢𑀺. 𑀲𑀸 ‘‘𑀅𑀢𑀺𑀲𑀸𑀳𑀲𑀺𑀓𑁄 𑀯𑀢𑀸𑀬𑀁 𑀧𑀼𑀭𑀺𑀲𑁄’’𑀢𑀺 𑀯𑀢𑁆𑀯𑀸 ‘‘𑀕𑀘𑁆𑀙 𑀢𑁆𑀯𑀁, 𑀦𑀸𑀳𑀁 𑀢𑀸𑀤𑀺𑀲𑁂𑀦 𑀲𑀤𑁆𑀥𑀺𑀁 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀆𑀳. 𑀲𑁄 ‘‘𑀅𑀦𑀼𑀧𑀥𑀸𑀭𑁂𑀢𑁆𑀯𑀸 𑀫𑁂 𑀪𑀤𑁆𑀤𑁂 𑀓𑀢𑀁, 𑀔𑀫𑁂𑀢𑀁 𑀫𑀬𑁆𑀳’’𑀦𑁆𑀢𑀺 𑀯𑀢𑁆𑀯𑀸 𑀧𑀼𑀢𑁆𑀢𑀁 𑀆𑀤𑀸𑀬𑀸𑀕𑀢𑁄.

𑀢𑁂 𑀢𑀁 𑀓𑀦𑁆𑀢𑀸𑀭𑀁 𑀲𑀫𑀢𑀺𑀓𑁆𑀓𑀫𑀺𑀢𑁆𑀯𑀸 𑀲𑀸𑀬𑀁 𑀏𑀓𑀁 𑀕𑁄𑀧𑀸𑀮𑀓𑀓𑀼𑀮𑀁 𑀲𑀫𑁆𑀧𑀸𑀧𑀼𑀡𑀺𑀁𑀲𑀼. 𑀢𑀁 𑀤𑀺𑀯𑀲𑀜𑁆𑀘 𑀕𑁄𑀧𑀸𑀮𑀓𑀓𑀼𑀮𑀯𑀸𑀲𑀺𑀦𑁄 𑀦𑀺𑀭𑀼𑀤𑀓𑀧𑀸𑀬𑀸𑀲𑀁 𑀧𑀘𑀺𑀁𑀲𑀼. 𑀢𑁂 𑀢𑁂 𑀤𑀺𑀲𑁆𑀯𑀸 ‘‘𑀇𑀫𑁂 𑀅𑀢𑀺𑀯𑀺𑀬 𑀙𑀸𑀢𑀓𑀸’’𑀢𑀺 𑀧𑀸𑀬𑀸𑀲𑀲𑁆𑀲 𑀫𑀳𑀸𑀪𑀸𑀚𑀦𑀁 𑀧𑀽𑀭𑁂𑀢𑁆𑀯𑀸 𑀉𑀴𑀼𑀗𑁆𑀓𑀧𑀽𑀭𑀁 𑀲𑀧𑁆𑀧𑀺𑀁 𑀆𑀲𑀺𑀜𑁆𑀘𑀺𑀢𑁆𑀯𑀸 𑀅𑀤𑀁𑀲𑀼. 𑀢𑁂𑀲𑀼 𑀢𑀁 𑀧𑀸𑀬𑀸𑀲𑀁 𑀪𑀼𑀜𑁆𑀚𑀦𑁆𑀢𑁂𑀲𑀼 𑀲𑀸 𑀇𑀢𑁆𑀣𑀻 𑀧𑀫𑀸𑀡𑁂𑀦𑁂𑀯 𑀪𑀼𑀜𑁆𑀚𑀺, 𑀧𑀼𑀭𑀺𑀲𑁄 𑀧𑀦 𑀧𑀫𑀸𑀡𑀸𑀢𑀺𑀓𑁆𑀓𑀦𑁆𑀢𑀁 𑀪𑀼𑀜𑁆𑀚𑀺𑀢𑁆𑀯𑀸 𑀚𑀻𑀭𑀸𑀧𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀭𑀢𑁆𑀢𑀺𑀪𑀸𑀕𑀲𑀫𑀦𑀦𑁆𑀢𑀭𑁂 𑀓𑀸𑀮𑀫𑀓𑀸𑀲𑀺. 𑀲𑁄 𑀓𑀸𑀮𑀁 𑀓𑀭𑁄𑀦𑁆𑀢𑁄 𑀢𑁂𑀲𑀼 𑀲𑀸𑀮𑀬𑀪𑀸𑀯𑁂𑀦 𑀕𑁄𑀧𑀸𑀮𑀓𑀸𑀦𑀁 𑀕𑁂𑀳𑁂 𑀲𑀼𑀦𑀔𑀺𑀬𑀸 𑀓𑀼𑀘𑁆𑀙𑀺𑀲𑁆𑀫𑀺𑀁 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺. 𑀲𑀼𑀦𑀔𑀻 𑀦𑀘𑀺𑀭𑀲𑁆𑀲𑁂𑀯 𑀯𑀺𑀚𑀸𑀢𑀸. 𑀕𑁄𑀧𑀸𑀮𑀓𑁄 𑀢𑀁 𑀓𑀼𑀓𑁆𑀓𑀼𑀭𑀁 𑀲𑀲𑁆𑀲𑀺𑀭𑀺𑀓𑀁 𑀤𑀺𑀲𑁆𑀯𑀸 𑀧𑀺𑀡𑁆𑀟𑁂𑀦 𑀧𑀮𑁄𑀪𑁂𑀢𑁆𑀯𑀸 𑀅𑀢𑁆𑀢𑀦𑀺 𑀉𑀧𑁆𑀧𑀦𑁆𑀦𑀲𑀺𑀦𑁂𑀳𑀁 𑀕𑀳𑁂𑀢𑁆𑀯𑀸 𑀲𑀤𑁆𑀥𑀺𑀫𑁂𑀯 𑀘𑀭𑀢𑀺.

𑀅𑀣𑁂𑀓𑀤𑀺𑀯𑀲𑀁 𑀏𑀓𑁄 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀪𑀺𑀓𑁆𑀔𑀸𑀘𑀸𑀭𑀯𑁂𑀮𑀸𑀬 𑀕𑁄𑀧𑀸𑀮𑀓𑀲𑁆𑀲 𑀖𑀭𑀤𑁆𑀯𑀸𑀭𑀁 𑀲𑀫𑁆𑀧𑀢𑁆𑀢𑁄. 𑀲𑁄𑀧𑀺 𑀢𑀁 𑀤𑀺𑀲𑁆𑀯𑀸 𑀪𑀺𑀓𑁆𑀔𑀁 𑀤𑀢𑁆𑀯𑀸 𑀅𑀢𑁆𑀢𑀸𑀦𑀁 𑀦𑀺𑀲𑁆𑀲𑀸𑀬 𑀯𑀲𑀦𑀢𑁆𑀣𑀸𑀬 𑀧𑀝𑀺𑀜𑁆𑀜𑀁 𑀕𑀡𑁆𑀳𑀺. 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀕𑁄𑀧𑀸𑀮𑀓𑀓𑀼𑀮𑀲𑁆𑀲 𑀅𑀯𑀺𑀤𑀽𑀭𑁂 𑀞𑀸𑀦𑁂 𑀏𑀓𑀲𑁆𑀫𑀺𑀁 𑀯𑀦𑀲𑀡𑁆𑀟𑁂 𑀯𑀸𑀲𑀁 𑀉𑀧𑀕𑀢𑁄. 𑀕𑁄𑀧𑀸𑀮𑀓𑁄 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀘𑁆𑀙𑀦𑁆𑀢𑁄 𑀢𑀁 𑀓𑀼𑀓𑁆𑀓𑀼𑀭𑀁 𑀕𑀳𑁂𑀢𑁆𑀯𑀸𑀯 𑀕𑀘𑁆𑀙𑀢𑀺, 𑀅𑀦𑁆𑀢𑀭𑀸𑀫𑀕𑁆𑀕𑁂 𑀘 𑀯𑀸𑀴𑀫𑀺𑀕𑀝𑁆𑀞𑀸𑀦𑁂 𑀯𑀸𑀴𑀫𑀺𑀕𑀸𑀦𑀁 𑀧𑀮𑀸𑀬𑀦𑀢𑁆𑀣𑀁 𑀭𑀼𑀓𑁆𑀔𑁂 𑀯𑀸 𑀧𑀸𑀲𑀸𑀡𑁂 𑀯𑀸 𑀧𑀳𑀸𑀭𑀁 𑀤𑁂𑀢𑀺, 𑀲𑁄𑀧𑀺 𑀓𑀼𑀓𑁆𑀓𑀼𑀭𑁄 𑀢𑀲𑁆𑀲 𑀓𑀭𑀡𑀯𑀺𑀥𑀸𑀦𑀁 𑀯𑀯𑀢𑁆𑀣𑀧𑁂𑀢𑀺. 𑀅𑀣𑁂𑀓𑀤𑀺𑀯𑀲𑀁 𑀲𑁄 𑀕𑁄𑀧𑀸𑀮𑀓𑁄 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲 𑀲𑀦𑁆𑀢𑀺𑀓𑁂 𑀦𑀺𑀲𑀻𑀤𑀺𑀢𑁆𑀯𑀸, ‘‘𑀪𑀦𑁆𑀢𑁂, 𑀅𑀫𑁆𑀳𑀸𑀓𑀁 𑀲𑀩𑁆𑀩𑀓𑀸𑀮𑀁 𑀆𑀕𑀫𑀦𑀁 𑀦𑀸𑀫 𑀦 𑀳𑁄𑀢𑀺. 𑀅𑀬𑀁 𑀧𑀦 𑀓𑀼𑀓𑁆𑀓𑀼𑀭𑁄 𑀙𑁂𑀓𑁄, 𑀇𑀫𑀲𑁆𑀲 𑀆𑀕𑀢𑀲𑀜𑁆𑀜𑀸𑀬 𑀅𑀫𑁆𑀳𑀸𑀓𑀁 𑀕𑁂𑀳𑀤𑁆𑀯𑀸𑀭𑀁 𑀆𑀕𑀘𑁆𑀙𑁂𑀬𑁆𑀬𑀸𑀣𑀸’’𑀢𑀺 𑀆𑀳. 𑀲𑁄 𑀏𑀓𑀤𑀺𑀯𑀲𑀁 ‘‘𑀧𑀘𑁆𑀘𑁂𑀓𑀩𑀼𑀤𑁆𑀥𑀁 𑀕𑀡𑁆𑀳𑀺𑀢𑁆𑀯𑀸 𑀏𑀳𑀻’’𑀢𑀺 𑀓𑀼𑀓𑁆𑀓𑀼𑀭𑀁 𑀧𑁂𑀲𑁂𑀲𑀺. 𑀓𑀼𑀓𑁆𑀓𑀼𑀭𑁄 𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀪𑀺𑀓𑁆𑀔𑀸𑀘𑀸𑀭𑀯𑁂𑀮𑀸𑀬 𑀕𑀦𑁆𑀢𑁆𑀯𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲 𑀧𑀸𑀤𑀫𑀽𑀮𑁂 𑀉𑀭𑁂𑀦 𑀦𑀺𑀧𑀚𑁆𑀚𑀺. 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 ‘‘𑀅𑀬𑀁 𑀫𑀫 𑀲𑀦𑁆𑀢𑀺𑀓𑀁 𑀆𑀕𑀢𑁄’’𑀢𑀺 𑀜𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀁 𑀆𑀤𑀸𑀬 𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀺. 𑀲𑁄 𑀢𑀲𑁆𑀲 𑀯𑀻𑀫𑀁𑀲𑀦𑀢𑁆𑀣𑀸𑀬 𑀉𑀓𑁆𑀓𑀫𑀺𑀢𑁆𑀯𑀸 𑀅𑀜𑁆𑀜𑀁 𑀫𑀕𑁆𑀕𑀁 𑀕𑀡𑁆𑀳𑀺, 𑀓𑀼𑀓𑁆𑀓𑀼𑀭𑁄 𑀧𑀼𑀭𑀢𑁄 𑀞𑀢𑁆𑀯𑀸 𑀕𑁄𑀧𑀸𑀮𑀓𑀫𑀕𑁆𑀕𑀁 𑀧𑀝𑀺𑀧𑀦𑁆𑀦𑀓𑀸𑀮𑁂 𑀅𑀧𑀲𑀓𑁆𑀓𑀺. 𑀬𑀲𑁆𑀫𑀺𑀁 𑀘 𑀬𑀲𑁆𑀫𑀺𑀁 𑀘 𑀞𑀸𑀦𑁂 𑀯𑀸𑀴𑀫𑀺𑀕𑀸𑀦𑀁 𑀧𑀮𑀸𑀬𑀦𑀢𑁆𑀣𑀁 𑀕𑁄𑀧𑀸𑀮𑀓𑁄 𑀭𑀼𑀓𑁆𑀔𑀁 𑀯𑀸 𑀧𑀸𑀲𑀸𑀡𑀁 𑀯𑀸 𑀧𑀳𑀭𑀺, 𑀢𑀁 𑀢𑀁 𑀞𑀸𑀦𑀁 𑀧𑀢𑁆𑀯𑀸 𑀓𑀼𑀓𑁆𑀓𑀼𑀭𑁄 𑀫𑀳𑀸𑀯𑀺𑀭𑀯𑀁 𑀯𑀺𑀭𑀯𑀺. 𑀢𑀲𑁆𑀲 𑀲𑀤𑁆𑀤𑁂𑀦 𑀯𑀸𑀴𑀫𑀺𑀕𑀸 𑀧𑀮𑀸𑀬𑀦𑁆𑀢𑀺. 𑀧𑀘𑁆𑀘𑁂𑀓𑀩𑀼𑀤𑁆𑀥𑁄𑀧𑀺 𑀪𑀢𑁆𑀢𑀓𑀺𑀘𑁆𑀘𑀯𑁂𑀮𑀸𑀬 𑀫𑀳𑀦𑁆𑀢𑀁 𑀲𑀺𑀦𑀺𑀤𑁆𑀥𑀧𑀺𑀡𑁆𑀟𑀁 𑀢𑀲𑁆𑀲 𑀤𑁂𑀢𑀺. 𑀲𑁄𑀧𑀺 𑀧𑀺𑀡𑁆𑀟𑀮𑀸𑀪𑁂𑀦 𑀧𑀘𑁆𑀘𑁂𑀓𑀩𑀼𑀤𑁆𑀥𑁂 𑀉𑀢𑁆𑀢𑀭𑀺𑀢𑀭𑀁 𑀲𑀺𑀦𑁂𑀳𑀁 𑀓𑀭𑁄𑀢𑀺.

𑀕𑁄𑀧𑀸𑀮𑀓𑁄 𑀢𑁂𑀫𑀸𑀲𑀁 𑀯𑀼𑀢𑁆𑀣𑀲𑁆𑀲 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲 𑀢𑀺𑀘𑀻𑀯𑀭𑀧𑁆𑀧𑀳𑁄𑀦𑀓𑀁 𑀲𑀸𑀝𑀓𑀁 𑀤𑀢𑁆𑀯𑀸, ‘‘𑀪𑀦𑁆𑀢𑁂, 𑀲𑀘𑁂 𑀯𑁄 𑀭𑀼𑀘𑁆𑀘𑀢𑀺, 𑀇𑀥𑁂𑀯 𑀯𑀲𑀣. 𑀦𑁄 𑀘𑁂 𑀭𑀼𑀘𑁆𑀘𑀢𑀺, 𑀬𑀣𑀸𑀲𑀼𑀔𑀁 𑀕𑀘𑁆𑀙𑀣𑀸’’𑀢𑀺 𑀆𑀳. 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀕𑀫𑀦𑀸𑀓𑀸𑀭𑀁 𑀤𑀲𑁆𑀲𑁂𑀢𑀺. 𑀲𑁄 𑀕𑁄𑀧𑀸𑀮𑀓𑁄 𑀧𑀘𑁆𑀘𑁂𑀓𑀩𑀼𑀤𑁆𑀥𑀁 𑀅𑀦𑀼𑀕𑀦𑁆𑀢𑁆𑀯𑀸 𑀦𑀺𑀯𑀢𑁆𑀢𑀢𑀺. 𑀓𑀼𑀓𑁆𑀓𑀼𑀭𑁄 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲 𑀅𑀜𑁆𑀜𑀢𑁆𑀣 𑀕𑀫𑀦𑀪𑀸𑀯𑀁 𑀜𑀢𑁆𑀯𑀸 𑀅𑀢𑀺𑀲𑀺𑀦𑁂𑀳𑁂𑀦 𑀉𑀧𑁆𑀧𑀦𑁆𑀦𑀩𑀮𑀯𑀲𑁄𑀓𑁄 𑀳𑀤𑀬𑀨𑀸𑀮𑀦𑀁 𑀧𑀢𑁆𑀯𑀸 𑀓𑀸𑀮𑀁 𑀓𑀢𑁆𑀯𑀸 𑀢𑀸𑀯𑀢𑀺𑀁𑀲𑀧𑀼𑀭𑁂 𑀦𑀺𑀩𑁆𑀩𑀢𑁆𑀢𑀺. 𑀅𑀣𑀲𑁆𑀲 𑀧𑀘𑁆𑀘𑁂𑀓𑀩𑀼𑀤𑁆𑀥𑁂𑀦 𑀲𑀤𑁆𑀥𑀺𑀁 𑀕𑀫𑀦𑀓𑀸𑀮𑁂 𑀉𑀘𑁆𑀘𑀸𑀲𑀤𑁆𑀤𑀁 𑀓𑀢𑁆𑀯𑀸 𑀯𑀸𑀴𑀫𑀺𑀕𑀸𑀦𑀁 𑀧𑀮𑀸𑀧𑀺𑀢𑀪𑀸𑀯𑁂𑀦 𑀤𑁂𑀯𑀢𑀸𑀳𑀺 𑀲𑀤𑁆𑀥𑀺𑀁 𑀓𑀣𑁂𑀦𑁆𑀢𑀲𑁆𑀲 𑀲𑀤𑁆𑀤𑁄 𑀲𑀓𑀮𑀤𑁂𑀯𑀧𑀼𑀭𑀁 𑀙𑀸𑀤𑁂𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀲𑁄 𑀢𑁂𑀦𑁂𑀯 𑀦𑀸𑀫𑀥𑁂𑀬𑁆𑀬𑀁 𑀮𑀪𑀺𑀢𑁆𑀯𑀸 𑀖𑁄𑀲𑀓𑀤𑁂𑀯𑀧𑀼𑀢𑁆𑀢𑁄 𑀦𑀸𑀫 𑀚𑀸𑀢𑁄. 𑀅𑀣𑀲𑁆𑀲 𑀢𑀲𑁆𑀫𑀺𑀁 𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀦𑁆𑀢𑀲𑁆𑀲 𑀫𑀦𑀼𑀲𑁆𑀲𑀧𑀣𑁂 𑀓𑁄𑀲𑀫𑁆𑀩𑀺𑀦𑀕𑀭𑁂 𑀉𑀤𑁂𑀦𑁄 𑀦𑀸𑀫 𑀭𑀸𑀚𑀸 𑀭𑀚𑁆𑀚𑀁 𑀧𑀝𑀺𑀧𑀚𑁆𑀚𑀺. 𑀢𑀲𑁆𑀲 𑀯𑀢𑁆𑀣𑀼 𑀫𑀚𑁆𑀛𑀺𑀫𑀧𑀡𑁆𑀡𑀸𑀲𑀓𑁂 𑀩𑁄𑀥𑀺𑀭𑀸𑀚𑀓𑀼𑀫𑀸𑀭𑀲𑀼𑀢𑁆𑀢𑀯𑀡𑁆𑀡𑀦𑀸𑀬𑀁 (𑀫. 𑀦𑀺. 𑀅𑀝𑁆𑀞. 𑁨.𑁩𑁨𑁪 𑀆𑀤𑀬𑁄) 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑀢𑀲𑁆𑀫𑀺𑀁 𑀧𑀦 𑀭𑀚𑁆𑀚𑀁 𑀓𑀸𑀭𑀬𑀫𑀸𑀦𑁂 𑀖𑁄𑀲𑀓𑀤𑁂𑀯𑀧𑀼𑀢𑁆𑀢𑁄 𑀘𑀯𑀺𑀢𑁆𑀯𑀸 𑀓𑁄𑀲𑀫𑁆𑀩𑀺𑀬𑀁 𑀏𑀓𑀺𑀲𑁆𑀲𑀸 𑀭𑀽𑀧𑀽𑀧𑀚𑀻𑀯𑀺𑀦𑀺𑀬𑀸 𑀓𑀼𑀘𑁆𑀙𑀺𑀫𑁆𑀳𑀺 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺. 𑀲𑀸 𑀤𑀲𑀫𑀸𑀲𑀘𑁆𑀘𑀬𑁂𑀦 𑀯𑀺𑀚𑀸𑀬𑀺𑀢𑁆𑀯𑀸 𑀧𑀼𑀢𑁆𑀢𑀪𑀸𑀯𑀁 𑀜𑀢𑁆𑀯𑀸 𑀲𑀗𑁆𑀓𑀸𑀭𑀓𑀽𑀝𑁂 𑀙𑀟𑁆𑀟𑀸𑀧𑁂𑀲𑀺. 𑀢𑀲𑁆𑀫𑀺𑀁 𑀔𑀡𑁂 𑀓𑁄𑀲𑀫𑁆𑀩𑀺𑀲𑁂𑀝𑁆𑀞𑀺𑀦𑁄 𑀓𑀫𑁆𑀫𑀦𑁆𑀢𑀺𑀓𑁄 𑀧𑀸𑀢𑁄𑀯 𑀲𑁂𑀝𑁆𑀞𑀺𑀖𑀭𑀁 𑀕𑀘𑁆𑀙𑀦𑁆𑀢𑁄 ‘‘𑀓𑀺𑀁 𑀦𑀼 𑀔𑁄 𑀇𑀫𑀁 𑀓𑀸𑀓𑁂𑀳𑀺 𑀲𑀫𑁆𑀧𑀭𑀺𑀓𑀺𑀡𑁆𑀡’’𑀦𑁆𑀢𑀺 𑀕𑀦𑁆𑀢𑁆𑀯𑀸 𑀤𑀸𑀭𑀓𑀁 𑀤𑀺𑀲𑁆𑀯𑀸 ‘‘𑀫𑀳𑀸𑀧𑀼𑀜𑁆𑀜𑀯𑀸 𑀏𑀲 𑀤𑀸𑀭𑀓𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀏𑀓𑀲𑁆𑀲 𑀧𑀼𑀭𑀺𑀲𑀲𑁆𑀲 𑀳𑀢𑁆𑀣𑁂 𑀕𑁂𑀳𑀁 𑀧𑁂𑀲𑁂𑀢𑁆𑀯𑀸 𑀲𑁂𑀝𑁆𑀞𑀺𑀖𑀭𑀁 𑀅𑀕𑀫𑀸𑀲𑀺. 𑀲𑁂𑀝𑁆𑀞𑀺𑀧𑀺 𑀭𑀸𑀚𑀽𑀧𑀝𑁆𑀞𑀸𑀦𑀯𑁂𑀮𑀸𑀬 𑀭𑀸𑀚𑀓𑀼𑀮𑀁 𑀕𑀘𑁆𑀙𑀦𑁆𑀢𑁄 𑀅𑀦𑁆𑀢𑀭𑀸𑀫𑀕𑁆𑀕𑁂 𑀧𑀼𑀭𑁄𑀳𑀺𑀢𑀁 𑀤𑀺𑀲𑁆𑀯𑀸 ‘‘𑀅𑀚𑁆𑀚 𑀓𑀺𑀁 𑀦𑀓𑁆𑀔𑀢𑁆𑀢’’𑀦𑁆𑀢𑀺 𑀧𑀼𑀘𑁆𑀙𑀺. 𑀲𑁄 𑀢𑀢𑁆𑀣𑁂𑀯 𑀞𑀺𑀢𑁄 𑀕𑀡𑁂𑀢𑁆𑀯𑀸 ‘‘𑀅𑀲𑀼𑀓𑀁 𑀦𑀸𑀫 𑀦𑀓𑁆𑀔𑀢𑁆𑀢𑀁, 𑀅𑀚𑁆𑀚 𑀇𑀫𑀺𑀦𑀸 𑀦𑀓𑁆𑀔𑀢𑁆𑀢𑁂𑀦 𑀚𑀸𑀢𑀤𑀸𑀭𑀓𑁄 𑀇𑀫𑀲𑁆𑀫𑀺𑀁 𑀦𑀕𑀭𑁂 𑀲𑁂𑀝𑁆𑀞𑀺𑀝𑁆𑀞𑀸𑀦𑀁 𑀮𑀪𑀺𑀲𑁆𑀲𑀢𑀻’’𑀢𑀺 𑀆𑀳. 𑀲𑁄 𑀢𑀲𑁆𑀲 𑀓𑀣𑀁 𑀲𑀼𑀢𑁆𑀯𑀸 𑀯𑁂𑀕𑁂𑀦 𑀖𑀭𑀁 𑀧𑁂𑀲𑁂𑀲𑀺 𑁋 ‘‘𑀇𑀫𑀲𑁆𑀲 𑀧𑀼𑀭𑁄𑀳𑀺𑀢𑀲𑁆𑀲 𑀤𑁆𑀯𑁂 𑀓𑀣𑀸 𑀦𑀸𑀫 𑀦𑀢𑁆𑀣𑀺, 𑀖𑀭𑀡𑀻 𑀘 𑀫𑁂 𑀕𑀭𑀼𑀕𑀩𑁆𑀪𑀸, 𑀚𑀸𑀦𑀸𑀣 𑀢𑀸𑀯 𑀦𑀁 𑀯𑀺𑀚𑀸𑀢𑀸 𑀯𑀸 𑀦𑁄 𑀯𑀸’’𑀢𑀺. 𑀢𑁂 𑀕𑀦𑁆𑀢𑁆𑀯𑀸 𑀚𑀸𑀦𑀺𑀢𑁆𑀯𑀸, ‘‘𑀅𑀬𑁆𑀬, 𑀦 𑀢𑀸𑀯 𑀯𑀺𑀚𑀸𑀢𑀸’’𑀢𑀺 𑀆𑀳𑀁𑀲𑀼. 𑀢𑁂𑀦 𑀳𑀺 𑀕𑀘𑁆𑀙𑀣, 𑀇𑀫𑀲𑁆𑀫𑀺𑀁 𑀦𑀕𑀭𑁂 𑀅𑀚𑁆𑀚 𑀚𑀸𑀢𑀤𑀸𑀭𑀓𑀁 𑀧𑀭𑀺𑀬𑁂𑀲𑀣𑀸𑀢𑀺. 𑀢𑁂 𑀧𑀭𑀺𑀬𑁂𑀲𑀦𑁆𑀢𑀸 𑀢𑀲𑁆𑀲 𑀲𑁂𑀝𑁆𑀞𑀺𑀦𑁄 𑀓𑀫𑁆𑀫𑀦𑁆𑀢𑀺𑀓𑀲𑁆𑀲 𑀕𑁂𑀳𑁂 𑀢𑀁 𑀤𑀸𑀭𑀓𑀁 𑀤𑀺𑀲𑁆𑀯𑀸 𑀲𑁂𑀝𑁆𑀞𑀺𑀦𑁄 𑀆𑀭𑁄𑀘𑀬𑀺𑀁𑀲𑀼. 𑀢𑁂𑀦 𑀳𑀺 𑀕𑀘𑁆𑀙𑀣 𑀪𑀡𑁂, 𑀢𑀁 𑀓𑀫𑁆𑀫𑀦𑁆𑀢𑀺𑀓𑀁 𑀧𑀓𑁆𑀓𑁄𑀲𑀣𑀸𑀢𑀺. 𑀢𑁂 𑀢𑀁 𑀧𑀓𑁆𑀓𑁄𑀲𑀺𑀁𑀲𑀼. 𑀅𑀣 𑀦𑀁 𑀲𑁂𑀝𑁆𑀞𑀺 ‘‘𑀕𑁂𑀳𑁂 𑀓𑀺𑀭 𑀢𑁂 𑀤𑀸𑀭𑀓𑁄 𑀅𑀢𑁆𑀣𑀻’’𑀢𑀺 𑀧𑀼𑀘𑁆𑀙𑀺. ‘‘𑀆𑀫, 𑀅𑀬𑁆𑀬𑀸’’𑀢𑀺. ‘‘𑀢𑀁 𑀤𑀸𑀭𑀓𑀁 𑀅𑀫𑁆𑀳𑀸𑀓𑀁 𑀤𑁂𑀳𑀻’’𑀢𑀺. ‘‘𑀦 𑀤𑁂𑀫𑀺, 𑀅𑀬𑁆𑀬𑀸’’𑀢𑀺. ‘‘𑀳𑀦𑁆𑀤 𑀲𑀳𑀲𑁆𑀲𑀁 𑀕𑀡𑁆𑀳𑀺𑀢𑁆𑀯𑀸 𑀤𑁂𑀳𑀻’’𑀢𑀺. 𑀲𑁄 ‘‘𑀅𑀬𑀁 𑀚𑀻𑀯𑁂𑀬𑁆𑀬 𑀯𑀸 𑀫𑀭𑁂𑀬𑁆𑀬 𑀯𑀸, 𑀤𑀼𑀚𑁆𑀚𑀸𑀦𑀫𑀺𑀤’’𑀦𑁆𑀢𑀺 𑀲𑀳𑀲𑁆𑀲𑀁 𑀕𑀡𑁆𑀳𑀺𑀢𑁆𑀯𑀸 𑀅𑀤𑀸𑀲𑀺.

𑀢𑀢𑁄 𑀲𑁂𑀝𑁆𑀞𑀺 𑀘𑀺𑀦𑁆𑀢𑁂𑀲𑀺 𑁋 ‘‘𑀲𑀘𑁂 𑀫𑁂 𑀪𑀭𑀺𑀬𑀸 𑀥𑀻𑀢𑀭𑀁 𑀯𑀺𑀚𑀸𑀬𑀺𑀲𑁆𑀲𑀢𑀺, 𑀇𑀫𑀫𑁂𑀯 𑀧𑀼𑀢𑁆𑀢𑀁 𑀓𑀭𑀺𑀲𑁆𑀲𑀸𑀫𑀺. 𑀲𑀘𑁂 𑀧𑀼𑀢𑁆𑀢𑀁 𑀯𑀺𑀚𑀸𑀬𑀺𑀲𑁆𑀲𑀢𑀺, 𑀫𑀸𑀭𑁂𑀲𑁆𑀲𑀸𑀫𑀻’’𑀢𑀺. 𑀘𑀺𑀦𑁆𑀢𑁂𑀢𑁆𑀯𑀸 𑀕𑁂𑀳𑁂 𑀧𑁄𑀲𑁂𑀲𑀺. 𑀅𑀣𑀲𑁆𑀲 𑀪𑀭𑀺𑀬𑀸 𑀓𑀢𑀺𑀧𑀸𑀳𑀘𑁆𑀘𑀬𑁂𑀦 𑀧𑀼𑀢𑁆𑀢𑀁 𑀯𑀺𑀚𑀸𑀬𑀺. 𑀢𑀢𑁄 𑀲𑁂𑀝𑁆𑀞𑀺 ‘‘𑀏𑀯𑀁 𑀢𑀁 𑀕𑀸𑀯𑁄 𑀫𑀤𑁆𑀤𑀺𑀢𑁆𑀯𑀸 𑀫𑀸𑀭𑁂𑀲𑁆𑀲𑀦𑁆𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀇𑀫𑀁 𑀤𑀸𑀭𑀓𑀁 𑀯𑀚𑀤𑁆𑀯𑀸𑀭𑁂 𑀦𑀺𑀧𑀚𑁆𑀚𑀸𑀧𑁂𑀣𑀸’’𑀢𑀺 𑀆𑀳. 𑀢𑀁 𑀢𑀢𑁆𑀣 𑀦𑀺𑀧𑀚𑁆𑀚𑀸𑀧𑁂𑀲𑀼𑀁. 𑀅𑀣 𑀦𑀁 𑀬𑀽𑀣𑀧𑀢𑀺 𑀉𑀲𑀪𑁄 𑀧𑀞𑀫𑀁 𑀦𑀺𑀓𑁆𑀔𑀫𑀦𑁆𑀢𑁄 𑀤𑀺𑀲𑁆𑀯𑀸 ‘‘𑀏𑀯𑀁 𑀢𑀁 𑀅𑀜𑁆𑀜𑁂 𑀦 𑀫𑀤𑁆𑀤𑀺𑀲𑁆𑀲𑀦𑁆𑀢𑀻’’𑀢𑀺 𑀘𑀢𑀼𑀦𑁆𑀦𑀁 𑀧𑀸𑀤𑀸𑀦𑀁 𑀅𑀦𑁆𑀢𑀭𑁂 𑀓𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀅𑀣 𑀦𑀁 𑀕𑁄𑀧𑀸𑀮𑀓𑀸 𑀤𑀺𑀲𑁆𑀯𑀸 ‘‘𑀫𑀳𑀸𑀧𑀼𑀜𑁆𑀜𑁄 𑀏𑀲 𑀤𑀸𑀭𑀓𑁄 𑀪𑀯𑀺𑀲𑁆𑀲𑀢𑀺, 𑀬𑀲𑁆𑀲 𑀢𑀺𑀭𑀘𑁆𑀙𑀸𑀦𑀕𑀢𑀸𑀧𑀺 𑀕𑀼𑀡𑀁 𑀚𑀸𑀦𑀦𑁆𑀢𑀺, 𑀧𑀝𑀺𑀚𑀕𑁆𑀕𑀺𑀲𑁆𑀲𑀸𑀫 𑀦’’𑀦𑁆𑀢𑀺 𑀅𑀢𑁆𑀢𑀦𑁄 𑀕𑁂𑀳𑀁 𑀦𑀬𑀺𑀁𑀲𑀼.

𑀲𑁄𑀧𑀺 𑀲𑁂𑀝𑁆𑀞𑀺 𑀢𑀲𑁆𑀲 𑀫𑀢𑀪𑀸𑀯𑀁 𑀅𑀦𑀼𑀯𑀺𑀚𑁆𑀚𑀦𑁆𑀢𑁄 ‘‘𑀕𑁄𑀧𑀸𑀮𑀓𑁂𑀳𑀺 𑀦𑀻𑀢𑁄’’𑀢𑀺 𑀲𑀼𑀢𑁆𑀯𑀸 𑀧𑀼𑀦 𑀲𑀳𑀲𑁆𑀲𑀁 𑀤𑀢𑁆𑀯𑀸 𑀆𑀡𑀸𑀧𑁂𑀢𑁆𑀯𑀸 𑀆𑀫𑀓𑀲𑀼𑀲𑀸𑀦𑁂 𑀙𑀟𑁆𑀟𑀸𑀧𑁂𑀲𑀺. 𑀢𑀲𑁆𑀫𑀺𑀁 𑀘 𑀓𑀸𑀮𑁂 𑀲𑁂𑀝𑁆𑀞𑀺𑀲𑁆𑀲 𑀖𑀭𑁂 𑀅𑀚𑀧𑀸𑀮𑀓𑁄 𑀲𑀼𑀲𑀸𑀦𑀁 𑀦𑀺𑀲𑁆𑀲𑀸𑀬 𑀅𑀚𑀺𑀓𑀸 𑀘𑀸𑀭𑁂𑀢𑀺. 𑀅𑀣𑁂𑀓𑀸 𑀥𑁂𑀦𑀼 𑀅𑀚𑀺𑀓𑀸 𑀤𑀸𑀭𑀓𑀲𑁆𑀲 𑀧𑀼𑀜𑁆𑀜𑁂𑀦 𑀫𑀕𑁆𑀕𑀸 𑀑𑀓𑁆𑀓𑀫𑁆𑀫 𑀕𑀦𑁆𑀢𑁆𑀯𑀸 𑀤𑀸𑀭𑀓𑀲𑁆𑀲 𑀔𑀻𑀭𑀁 𑀤𑀢𑁆𑀯𑀸 𑀕𑀢𑀸. 𑀢𑀢𑁄 𑀦𑀺𑀯𑀢𑁆𑀢𑀫𑀸𑀦𑀸𑀧𑀺 𑀢𑀣𑁂𑀯 𑀕𑀦𑁆𑀢𑁆𑀯𑀸 𑀔𑀻𑀭𑀫𑀤𑀸𑀲𑀺. 𑀅𑀚𑀧𑀸𑀮𑀓𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀬𑀁 𑀅𑀚𑀺𑀓𑀸 𑀧𑀸𑀢𑁄𑀧𑀺 𑀇𑀫𑀲𑁆𑀫𑀸 𑀞𑀸𑀦𑀸 𑀑𑀓𑁆𑀓𑀫𑀺𑀢𑁆𑀯𑀸 𑀕𑀢𑀸, 𑀓𑀺𑀁 𑀦𑀼 𑀔𑁄 𑀏𑀢’’𑀦𑁆𑀢𑀺 𑀕𑀦𑁆𑀢𑁆𑀯𑀸 𑀑𑀮𑁄𑀓𑁂𑀦𑁆𑀢𑁄 𑀢𑀁 𑀤𑀸𑀭𑀓𑀁 𑀤𑀺𑀲𑁆𑀯𑀸 ‘‘𑀫𑀳𑀸𑀧𑀼𑀜𑁆𑀜𑁄 𑀏𑀲 𑀤𑀸𑀭𑀓𑁄, 𑀢𑀺𑀭𑀘𑁆𑀙𑀸𑀦𑀕𑀢𑀸𑀧𑀺𑀲𑁆𑀲 𑀕𑀼𑀡𑀁 𑀚𑀸𑀦𑀦𑁆𑀢𑀺, 𑀧𑀝𑀺𑀚𑀕𑁆𑀕𑀺𑀲𑁆𑀲𑀸𑀫𑀺 𑀦’’𑀦𑁆𑀢𑀺 𑀕𑀳𑁂𑀢𑁆𑀯𑀸 𑀕𑁂𑀳𑀁 𑀕𑀢𑁄.

𑀧𑀼𑀦𑀤𑀺𑀯𑀲𑁂 𑀲𑁂𑀝𑁆𑀞𑀺 ‘‘𑀫𑀢𑁄 𑀦𑀼 𑀔𑁄 𑀤𑀸𑀭𑀓𑁄, 𑀦 𑀫𑀢𑁄’’𑀢𑀺 𑀑𑀮𑁄𑀓𑀸𑀧𑁂𑀦𑁆𑀢𑁄 𑀅𑀚𑀧𑀸𑀮𑀓𑁂𑀦 𑀕𑀳𑀺𑀢𑀪𑀸𑀯𑀁 𑀜𑀢𑁆𑀯𑀸 𑀲𑀳𑀲𑁆𑀲𑀁 𑀤𑀢𑁆𑀯𑀸 𑀆𑀡𑀸𑀧𑁂𑀢𑁆𑀯𑀸 ‘‘𑀲𑁆𑀯𑁂 𑀇𑀫𑀁 𑀦𑀕𑀭𑀁 𑀏𑀓𑁄 𑀲𑀢𑁆𑀣𑀯𑀸𑀳𑀧𑀼𑀢𑁆𑀢𑁄 𑀧𑀯𑀺𑀲𑀺𑀲𑁆𑀲𑀢𑀺, 𑀇𑀫𑀁 𑀤𑀸𑀭𑀓𑀁 𑀦𑁂𑀢𑁆𑀯𑀸 𑀘𑀓𑁆𑀓𑀫𑀕𑁆𑀕𑁂 𑀞𑀧𑁂𑀣, 𑀏𑀯𑀁 𑀢𑀁 𑀲𑀓𑀝𑀘𑀓𑁆𑀓𑀁 𑀙𑀺𑀦𑁆𑀤𑀦𑁆𑀢𑀁 𑀕𑀫𑀺𑀲𑁆𑀲𑀢𑀻’’𑀢𑀺 𑀆𑀳. 𑀢𑀁 𑀢𑀢𑁆𑀣 𑀦𑀺𑀓𑁆𑀔𑀺𑀢𑁆𑀢𑀁 𑀲𑀢𑁆𑀣𑀯𑀸𑀳𑀧𑀼𑀢𑁆𑀢𑀲𑁆𑀲 𑀧𑀼𑀭𑀺𑀫𑀲𑀓𑀝𑁂 𑀕𑁄𑀡𑀸 𑀤𑀺𑀲𑁆𑀯𑀸 𑀘𑀢𑁆𑀢𑀸𑀭𑁄 𑀧𑀸𑀤𑁂 𑀣𑀫𑁆𑀪𑁂 𑀯𑀺𑀬 𑀑𑀢𑀸𑀭𑁂𑀢𑁆𑀯𑀸 𑀅𑀝𑁆𑀞𑀁𑀲𑀼. 𑀲𑀢𑁆𑀣𑀯𑀸𑀳𑁄 ‘‘𑀓𑀺𑀁 𑀦𑀼 𑀔𑁄 𑀏𑀢’’𑀦𑁆𑀢𑀺 𑀢𑁂𑀲𑀁 𑀞𑀺𑀢𑀓𑀸𑀭𑀡𑀁 𑀑𑀮𑁄𑀓𑁂𑀦𑁆𑀢𑁄 𑀤𑀸𑀭𑀓𑀁 𑀤𑀺𑀲𑁆𑀯𑀸 ‘‘𑀫𑀳𑀸𑀧𑀼𑀜𑁆𑀜𑁄 𑀤𑀸𑀭𑀓𑁄, 𑀧𑀢𑀺𑀚𑀕𑁆𑀕𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀕𑀡𑁆𑀳𑀺𑀢𑁆𑀯𑀸 𑀅𑀕𑀫𑀸𑀲𑀺.

𑀲𑁂𑀝𑁆𑀞𑀺𑀧𑀺 𑀢𑀲𑁆𑀲 𑀘𑀓𑁆𑀓𑀧𑀣𑁂 𑀫𑀢𑀪𑀸𑀯𑀁 𑀯𑀸 𑀅𑀫𑀢𑀪𑀸𑀯𑀁 𑀯𑀸 𑀑𑀮𑁄𑀓𑀸𑀧𑁂𑀦𑁆𑀢𑁄 𑀲𑀢𑁆𑀣𑀯𑀸𑀳𑁂𑀦 𑀕𑀳𑀺𑀢𑀪𑀸𑀯𑀁 𑀜𑀢𑁆𑀯𑀸 𑀢𑀲𑁆𑀲𑀧𑀺 𑀲𑀳𑀲𑁆𑀲𑀁 𑀤𑀢𑁆𑀯𑀸 𑀆𑀡𑀸𑀧𑁂𑀢𑁆𑀯𑀸 𑀦𑀕𑀭𑀢𑁄 𑀅𑀯𑀺𑀤𑀽𑀭𑁂 𑀞𑀸𑀦𑁂 𑀧𑀧𑀸𑀢𑁂 𑀧𑀸𑀢𑀸𑀧𑁂𑀲𑀺. 𑀲𑁄 𑀢𑀢𑁆𑀣 𑀧𑀧𑀢𑀦𑁆𑀢𑁄 𑀦𑀴𑀓𑀸𑀭𑀸𑀦𑀁 𑀓𑀫𑁆𑀫𑀓𑀭𑀡𑀝𑁆𑀞𑀸𑀦𑁂 𑀏𑀓𑀲𑀸𑀮𑀸𑀬 𑀧𑀢𑀺𑀢𑁄. 𑀲𑀸 𑀢𑀲𑁆𑀲 𑀧𑀼𑀜𑁆𑀜𑀸𑀦𑀼𑀪𑀸𑀯𑁂𑀦 𑀲𑀢𑀯𑀺𑀳𑀢𑀓𑀧𑁆𑀧𑀸𑀲𑀧𑀺𑀘𑀼𑀲𑀫𑁆𑀨𑀲𑁆𑀲𑀲𑀤𑀺𑀲𑀸 𑀅𑀳𑁄𑀲𑀺. 𑀅𑀣 𑀦𑀁 𑀦𑀴𑀓𑀸𑀭𑀚𑁂𑀝𑁆𑀞𑀓𑁄 ‘‘𑀧𑀼𑀜𑁆𑀜𑀯𑀸 𑀏𑀲 𑀤𑀸𑀭𑀓𑁄, 𑀧𑀝𑀺𑀚𑀕𑁆𑀕𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀕𑀡𑁆𑀳𑀺𑀢𑁆𑀯𑀸 𑀕𑁂𑀳𑀁 𑀕𑀢𑁄. 𑀲𑁂𑀝𑁆𑀞𑀺 𑀤𑀸𑀭𑀓𑀲𑁆𑀲 𑀧𑀧𑀸𑀢𑀢𑁄 𑀧𑀢𑀺𑀢𑀝𑁆𑀞𑀸𑀦𑁂 𑀫𑀢𑀪𑀸𑀯𑀁 𑀯𑀸 𑀅𑀫𑀢𑀪𑀸𑀯𑀁 𑀯𑀸 𑀧𑀭𑀺𑀬𑁂𑀲𑀸𑀧𑁂𑀦𑁆𑀢𑁄 𑀦𑀴𑀓𑀸𑀭𑀚𑁂𑀝𑁆𑀞𑀓𑁂𑀦 𑀕𑀳𑀺𑀢𑀪𑀸𑀯𑀁 𑀜𑀢𑁆𑀯𑀸 𑀢𑀲𑁆𑀲𑀧𑀺 𑀲𑀳𑀲𑁆𑀲𑀁 𑀤𑀢𑁆𑀯𑀸 𑀆𑀡𑀸𑀧𑁂𑀲𑀺.

𑀅𑀧𑀭𑀪𑀸𑀕𑁂 𑀲𑁂𑀝𑁆𑀞𑀺𑀲𑁆𑀲 𑀲𑀓𑀧𑀼𑀢𑁆𑀢𑁄𑀧𑀺 𑀲𑁄𑀧𑀺 𑀉𑀪𑁄 𑀯𑀬𑀧𑁆𑀧𑀢𑁆𑀢𑀸 𑀅𑀳𑁂𑀲𑀼𑀁. 𑀲𑁂𑀝𑁆𑀞𑀺 𑀧𑀼𑀦 𑀖𑁄𑀲𑀓𑀤𑀸𑀭𑀓𑀲𑁆𑀲 𑀫𑀸𑀭𑀡𑀼𑀧𑀸𑀬𑀁 𑀘𑀺𑀦𑁆𑀢𑁂𑀦𑁆𑀢𑁄 𑀅𑀢𑁆𑀢𑀦𑁄 𑀓𑀼𑀫𑁆𑀪𑀓𑀸𑀭𑀲𑁆𑀲 𑀕𑁂𑀳𑀁 𑀕𑀦𑁆𑀢𑁆𑀯𑀸 ‘‘𑀅𑀫𑁆𑀪𑁄 𑀫𑀬𑁆𑀳𑀁 𑀕𑁂𑀳𑁂 𑀏𑀯𑀭𑀽𑀧𑁄 𑀏𑀓𑁄 𑀅𑀯𑀚𑀸𑀢𑀤𑀸𑀭𑀓𑁄 𑀅𑀢𑁆𑀣𑀺, 𑀢𑀁 𑀤𑀸𑀭𑀓𑀁 𑀬𑀁𑀓𑀺𑀜𑁆𑀘𑀺 𑀓𑀢𑁆𑀯𑀸 𑀫𑀸𑀭𑁂𑀢𑀼𑀁 𑀯𑀝𑁆𑀝𑀢𑀺 𑀭𑀳𑀲𑁆𑀲𑁂𑀦𑀸’’𑀢𑀺 𑀆𑀳. 𑀲𑁄 𑀉𑀪𑁄𑀧𑀺 𑀓𑀡𑁆𑀡𑁂 𑀧𑀺𑀤𑀳𑀺𑀢𑁆𑀯𑀸 ‘‘𑀏𑀯𑀭𑀽𑀧𑀁 𑀦𑀸𑀫 𑀪𑀸𑀭𑀺𑀬𑀁 𑀓𑀣𑀁 𑀓𑀣𑁂𑀢𑀼𑀁 𑀦 𑀯𑀝𑁆𑀝𑀢𑀻’’𑀢𑀺 𑀆𑀳. 𑀢𑀢𑁄 𑀲𑁂𑀝𑁆𑀞𑀺 ‘‘𑀅𑀬𑀁 𑀫𑀼𑀥𑀸 𑀦 𑀓𑀭𑀺𑀲𑁆𑀲𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑁋 ‘‘𑀳𑀦𑁆𑀤, 𑀪𑁄, 𑀲𑀳𑀲𑁆𑀲𑀁 𑀕𑀡𑁆𑀳𑀺𑀢𑁆𑀯𑀸 𑀏𑀢𑀁 𑀓𑀫𑁆𑀫𑀁 𑀦𑀺𑀧𑁆𑀨𑀸𑀤𑁂𑀳𑀻’’𑀢𑀺 𑀆𑀳. 𑀮𑀜𑁆𑀚𑀁 𑀦𑀸𑀫 𑀅𑀪𑀺𑀦𑁆𑀦𑀁 𑀪𑀺𑀦𑁆𑀤𑀢𑀺, 𑀢𑀲𑁆𑀫𑀸 𑀲𑁄 𑀲𑀳𑀲𑁆𑀲𑀁 𑀮𑀪𑀺𑀢𑁆𑀯𑀸 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 ‘‘𑀅𑀳𑀁, 𑀅𑀬𑁆𑀬, 𑀅𑀲𑀼𑀓𑀤𑀺𑀯𑀲𑁂 𑀦𑀸𑀫 𑀆𑀯𑀸𑀧𑀁 𑀆𑀮𑀺𑀫𑁆𑀧𑁂𑀲𑁆𑀲𑀸𑀫𑀺, 𑀢𑀤𑀸 𑀢𑀁 𑀤𑀸𑀭𑀓𑀁 𑀅𑀲𑀼𑀓𑀯𑁂𑀮𑀸𑀬 𑀦𑀸𑀫 𑀧𑁂𑀲𑁂𑀳𑀻’’𑀢𑀺 𑀆𑀳. 𑀲𑁂𑀝𑁆𑀞𑀺𑀧𑀺 𑀔𑁄 𑀢𑀲𑁆𑀲 𑀯𑀘𑀦𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀢𑀢𑁄 𑀧𑀝𑁆𑀞𑀸𑀬 𑀤𑀺𑀯𑀲𑁂 𑀕𑀡𑁂𑀦𑁆𑀢𑁄 𑀓𑀼𑀫𑁆𑀪𑀓𑀸𑀭𑁂𑀦 𑀯𑀼𑀢𑁆𑀢𑀤𑀺𑀯𑀲𑀲𑁆𑀲 𑀲𑀫𑁆𑀧𑀢𑁆𑀢𑀪𑀸𑀯𑀁 𑀜𑀢𑁆𑀯𑀸 𑀖𑁄𑀲𑀓𑀓𑀼𑀫𑀸𑀭𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀅𑀫𑁆𑀳𑀸𑀓𑀁, 𑀢𑀸𑀢, 𑀅𑀲𑀼𑀓𑀤𑀺𑀯𑀲𑁂 𑀦𑀸𑀫 𑀩𑀳𑀽𑀳𑀺 𑀪𑀸𑀚𑀦𑁂𑀳𑀺 𑀅𑀢𑁆𑀣𑁄, 𑀢𑁆𑀯𑀁 𑀅𑀫𑁆𑀳𑀸𑀓𑀁 𑀓𑀼𑀫𑁆𑀪𑀓𑀸𑀭𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘𑀧𑀺𑀢𑀭𑀸 𑀓𑀺𑀭 𑀫𑁂 𑀢𑀼𑀫𑁆𑀳𑀸𑀓𑀁 𑀏𑀓𑀁 𑀓𑀣𑀺𑀢𑀁 𑀅𑀢𑁆𑀣𑀺, 𑀢𑀁 𑀅𑀚𑁆𑀚 𑀦𑀺𑀧𑁆𑀨𑀸𑀤𑁂𑀳𑀻’𑀢𑀺 𑀯𑀤𑁂𑀳𑀻’’𑀢𑀺 𑀆𑀳. 𑀲𑁄 ‘‘𑀲𑀸𑀥𑀽’’𑀢𑀺 𑀢𑀲𑁆𑀲 𑀯𑀘𑀦𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀦𑀺𑀓𑁆𑀔𑀫𑀺.

𑀅𑀣 𑀦𑀁 𑀅𑀦𑁆𑀢𑀭𑀸𑀫𑀕𑁆𑀕𑁂 𑀲𑁂𑀝𑁆𑀞𑀺𑀲𑁆𑀲 𑀲𑀓𑀧𑀼𑀢𑁆𑀢𑁄 𑀕𑀼𑀴𑀓𑀻𑀴𑀁 𑀓𑀻𑀴𑀦𑁆𑀢𑁄 𑀤𑀺𑀲𑁆𑀯𑀸 𑀯𑁂𑀕𑁂𑀦 𑀕𑀦𑁆𑀢𑁆𑀯𑀸 ‘‘𑀅𑀳𑀁 𑀪𑀸𑀢𑀺𑀓 𑀤𑀸𑀭𑀓𑁂𑀳𑀺 𑀲𑀤𑁆𑀥𑀺𑀁 𑀓𑀻𑀴𑀦𑁆𑀢𑁄 𑀏𑀢𑁆𑀢𑀓𑀁 𑀦𑀸𑀫 𑀚𑀺𑀢𑁄, 𑀢𑀁 𑀫𑁂 𑀧𑀝𑀺𑀚𑀺𑀦𑀺𑀢𑁆𑀯𑀸 𑀤𑁂𑀳𑀻’’𑀢𑀺 𑀆𑀳. 𑀲𑁄 ‘‘𑀫𑀬𑁆𑀳𑀁 𑀇𑀤𑀸𑀦𑀺 𑀑𑀓𑀸𑀲𑁄 𑀦𑀢𑁆𑀣𑀺, 𑀧𑀺𑀢𑀸 𑀫𑀁 𑀅𑀘𑁆𑀘𑀸𑀬𑀺𑀓𑀓𑀫𑁆𑀫𑁂𑀦 𑀓𑀼𑀫𑁆𑀪𑀓𑀸𑀭𑀲𑁆𑀲 𑀲𑀦𑁆𑀢𑀺𑀓𑀁 𑀧𑀳𑀺𑀡𑀻’’𑀢𑀺 𑀆𑀳. 𑀇𑀢𑀭𑁄 ‘‘𑀅𑀳𑀁 𑀪𑀸𑀢𑀺𑀓 𑀢𑀢𑁆𑀣 𑀕𑀫𑀺𑀲𑁆𑀲𑀸𑀫𑀺, 𑀢𑁆𑀯𑀁 𑀇𑀫𑁂𑀳𑀺 𑀲𑀤𑁆𑀥𑀺𑀁 𑀓𑀻𑀴𑀺𑀢𑁆𑀯𑀸 𑀫𑀬𑁆𑀳𑀁 𑀮𑀓𑁆𑀔𑀁 𑀧𑀘𑁆𑀘𑀸𑀳𑀭𑀺𑀢𑁆𑀯𑀸 𑀤𑁂𑀳𑀻’’𑀢𑀺 𑀆𑀳. ‘‘𑀢𑁂𑀦 𑀳𑀺 𑀕𑀘𑁆𑀙𑀸’’𑀢𑀺 𑀅𑀢𑁆𑀢𑀦𑁄 𑀓𑀣𑀺𑀢𑀲𑀸𑀲𑀦𑀁 𑀢𑀲𑁆𑀲 𑀓𑀣𑁂𑀢𑁆𑀯𑀸 𑀤𑀸𑀭𑀓𑁂𑀳𑀺 𑀲𑀤𑁆𑀥𑀺𑀁 𑀓𑀻𑀴𑀺. 𑀲𑁄𑀧𑀺 𑀓𑀼𑀫𑀸𑀭𑁄 𑀓𑀼𑀫𑁆𑀪𑀓𑀸𑀭𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀢𑀁 𑀲𑀸𑀲𑀦𑀁 𑀆𑀭𑁄𑀘𑁂𑀲𑀺. 𑀲𑁄 ‘‘𑀲𑀸𑀥𑀼, 𑀢𑀸𑀢, 𑀦𑀺𑀧𑁆𑀨𑀸𑀤𑁂𑀲𑁆𑀲𑀸𑀫𑀻’’𑀢𑀺 𑀢𑀁 𑀓𑀼𑀫𑀸𑀭𑀁 𑀕𑀩𑁆𑀪𑀁 𑀧𑀯𑁂𑀲𑁂𑀢𑁆𑀯𑀸 𑀢𑀺𑀔𑀺𑀡𑀸𑀬 𑀯𑀸𑀲𑀺𑀬𑀸 𑀔𑀡𑁆𑀟𑀸𑀔𑀡𑁆𑀟𑀺𑀓𑀁 𑀙𑀺𑀦𑁆𑀤𑀺𑀢𑁆𑀯𑀸 𑀘𑀸𑀝𑀺𑀬𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀘𑀸𑀝𑀺𑀫𑀼𑀔𑀁 𑀧𑀺𑀤𑀳𑀺𑀢𑁆𑀯𑀸 𑀪𑀸𑀚𑀦𑀦𑁆𑀢𑀭𑁂 𑀞𑀧𑁂𑀢𑁆𑀯𑀸 𑀆𑀯𑀸𑀧𑀁 𑀆𑀮𑀺𑀫𑁆𑀧𑁂𑀲𑀺. 𑀖𑁄𑀲𑀓𑀓𑀼𑀫𑀸𑀭𑁄 𑀩𑀳𑀽 𑀚𑀺𑀦𑀺𑀢𑁆𑀯𑀸 𑀓𑀦𑀺𑀝𑁆𑀞𑀲𑁆𑀲 𑀆𑀕𑀫𑀦𑀁 𑀑𑀮𑁄𑀓𑁂𑀦𑁆𑀢𑁄 𑀦𑀺𑀲𑀻𑀤𑀺. 𑀲𑁄 𑀢𑀁 𑀘𑀺𑀭𑀸𑀬𑀫𑀸𑀦𑀁 𑀜𑀢𑁆𑀯𑀸 ‘‘𑀓𑀺𑀁 𑀦𑀼 𑀔𑁄 𑀘𑀺𑀭𑀸𑀬𑀢𑀻’’𑀢𑀺 𑀓𑀼𑀫𑁆𑀪𑀓𑀸𑀭𑀕𑁂𑀳𑀲𑀪𑀸𑀕𑀁 𑀕𑀦𑁆𑀢𑁆𑀯𑀸 𑀓𑀢𑁆𑀣𑀘𑀺 𑀅𑀤𑀺𑀲𑁆𑀯𑀸 ‘‘𑀕𑁂𑀳𑀁 𑀕𑀢𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀦𑀺𑀯𑀢𑁆𑀢𑀺𑀢𑁆𑀯𑀸 𑀕𑁂𑀳𑀁 𑀅𑀕𑀫𑀸𑀲𑀺.

𑀲𑁂𑀝𑁆𑀞𑀺 𑀦𑀁 𑀤𑀽𑀭𑀢𑁄𑀯 𑀆𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 ‘‘𑀓𑀺𑀁 𑀦𑀼 𑀔𑁄 𑀓𑀸𑀭𑀡𑀁 𑀪𑀯𑀺𑀲𑁆𑀲𑀢𑀺, 𑀫𑀬𑀸 𑀏𑀲 𑀫𑀸𑀭𑀡𑀢𑁆𑀣𑀸𑀬 𑀓𑀼𑀫𑁆𑀪𑀓𑀸𑀭𑀲𑁆𑀲 𑀲𑀦𑁆𑀢𑀺𑀓𑀁 𑀧𑀳𑀺𑀢𑁄, 𑀲𑁄 𑀤𑀸𑀦𑀺 𑀧𑀼𑀦 𑀇𑀥𑁂𑀯𑀸𑀕𑀘𑁆𑀙𑀢𑀻’’𑀢𑀺 𑀆𑀕𑀘𑁆𑀙𑀦𑁆𑀢𑀁𑀬𑁂𑀯 𑀦𑀁 ‘‘𑀓𑀺𑀁, 𑀢𑀸𑀢, 𑀓𑀼𑀫𑁆𑀪𑀓𑀸𑀭𑀲𑁆𑀲 𑀲𑀦𑁆𑀢𑀺𑀓𑀁 𑀦 𑀕𑀢𑁄𑀲𑀻’’𑀢𑀺 𑀆𑀳. ‘‘𑀆𑀫, 𑀢𑀸𑀢, 𑀦 𑀕𑀢𑁄𑀫𑁆𑀳𑀻’’𑀢𑀺. ‘‘𑀓𑀲𑁆𑀫𑀸, 𑀢𑀸𑀢𑀸’’𑀢𑀺? 𑀲𑁄 𑀅𑀢𑁆𑀢𑀦𑁄 𑀦𑀺𑀯𑀢𑁆𑀢𑀓𑀸𑀭𑀡𑀜𑁆𑀘 𑀓𑀦𑀺𑀝𑁆𑀞𑀪𑀸𑀢𑀺𑀓𑀲𑁆𑀲 𑀢𑀢𑁆𑀣 𑀕𑀢𑀓𑀸𑀭𑀡𑀜𑁆𑀘 𑀆𑀭𑁄𑀘𑁂𑀲𑀺. 𑀲𑁂𑀝𑁆𑀞𑀺 𑀢𑀲𑁆𑀲 𑀯𑀘𑀦𑀲𑁆𑀲 𑀲𑀼𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀫𑀳𑀸𑀧𑀣𑀯𑀺𑀬𑀸 𑀅𑀚𑁆𑀛𑁄𑀢𑁆𑀣𑀝𑁄 𑀯𑀺𑀬 𑀳𑀼𑀢𑁆𑀯𑀸 ‘‘𑀓𑀺𑀁 𑀦𑀸𑀫𑁂𑀢𑀁 𑀢𑁆𑀯𑀁 𑀯𑀤𑀲𑀻’’𑀢𑀺 𑀯𑀺𑀧𑁆𑀨𑀦𑁆𑀤𑀘𑀺𑀢𑁆𑀢𑁄 𑀯𑁂𑀕𑁂𑀦 𑀓𑀼𑀫𑁆𑀪𑀓𑀸𑀭𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀅𑀜𑁆𑀜𑁂𑀲𑀁 𑀲𑀦𑁆𑀢𑀺𑀓𑁂 𑀅𑀓𑀣𑀦𑀻𑀬𑀪𑀸𑀯𑁂𑀦 ‘‘𑀧𑁂𑀓𑁆𑀔, 𑀪𑁄, 𑀧𑁂𑀓𑁆𑀔, 𑀪𑁄’’𑀢𑀺 𑀆𑀳. ‘‘𑀓𑀺𑀁 𑀧𑁂𑀓𑁆𑀔𑀸𑀧𑁂𑀲𑀺 𑀢𑁆𑀯𑀁’’? 𑀦𑀺𑀝𑁆𑀞𑀺𑀢𑀁 𑀏𑀢𑀁 𑀓𑀫𑁆𑀫𑀦𑁆𑀢𑀺. 𑀲𑁄 𑀢𑀢𑁄𑀯 𑀦𑀺𑀯𑀢𑁆𑀢𑀺𑀢𑁆𑀯𑀸 𑀕𑁂𑀳𑀁 𑀅𑀕𑀫𑀸𑀲𑀺. 𑀢𑀢𑁄 𑀧𑀝𑁆𑀞𑀸𑀬 𑀘𑀲𑁆𑀲 𑀘𑁂𑀢𑀲𑀺𑀓𑀭𑁄𑀕𑁄 𑀉𑀧𑁆𑀧𑀚𑁆𑀚𑀺.

𑀲𑁄 𑀢𑀲𑁆𑀫𑀺𑀁 𑀓𑀸𑀮𑁂 𑀢𑁂𑀦 𑀲𑀤𑁆𑀥𑀺𑀁 𑀅𑀪𑀼𑀜𑁆𑀚𑀺𑀢𑁆𑀯𑀸 𑀆𑀲𑀁 𑀪𑀺𑀦𑁆𑀤𑀺𑀢𑁆𑀯𑀸 ‘‘𑀬𑁂𑀦 𑀓𑁂𑀦𑀘𑀺 𑀉𑀧𑀸𑀬𑁂𑀦 𑀫𑀫 𑀧𑀼𑀢𑁆𑀢𑀲𑁆𑀲 𑀲𑀢𑁆𑀢𑀼𑀦𑁄 𑀅𑀦𑁆𑀢𑀭𑀫𑁂𑀯 𑀧𑀲𑁆𑀲𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀏𑀓𑀁 𑀧𑀡𑁆𑀡𑀁 𑀮𑀺𑀔𑀺𑀢𑁆𑀯𑀸 𑀖𑁄𑀲𑀓𑀓𑀼𑀫𑀸𑀭𑀁 𑀧𑀓𑁆𑀓𑁄𑀲𑀺𑀢𑁆𑀯𑀸 ‘‘𑀢𑁆𑀯𑀁 𑀇𑀫𑀁 𑀧𑀡𑁆𑀡𑀁 𑀆𑀤𑀸𑀬 𑀅𑀲𑀼𑀓𑀕𑀸𑀫𑁂 𑀦𑀸𑀫 𑀅𑀫𑁆𑀳𑀸𑀓𑀁 𑀓𑀫𑁆𑀫𑀦𑁆𑀢𑀺𑀓𑁄 𑀅𑀢𑁆𑀣𑀺, 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀇𑀫𑀁 𑀧𑀡𑁆𑀡𑀁 𑀤𑀢𑁆𑀯𑀸 ‘𑀇𑀫𑀲𑁆𑀫𑀺𑀁 𑀓𑀺𑀭 𑀧𑀡𑁆𑀡𑁂 𑀲𑀸𑀲𑀦𑀁 𑀲𑀻𑀖𑀁 𑀓𑀭𑁄𑀳𑀻’𑀢𑀺 𑀯𑀤. 𑀅𑀦𑁆𑀢𑀭𑀸𑀫𑀕𑁆𑀕𑁂 𑀅𑀫𑁆𑀳𑀸𑀓𑀁 𑀲𑀳𑀸𑀬𑀓𑁄 𑀕𑀸𑀫𑀓𑀲𑁂𑀝𑁆𑀞𑀺 𑀦𑀸𑀫 𑀏𑀓𑁄 𑀲𑁂𑀝𑁆𑀞𑀺 𑀅𑀢𑁆𑀣𑀺, 𑀢𑀲𑁆𑀲 𑀖𑀭𑀁 𑀕𑀦𑁆𑀢𑁆𑀯𑀸 𑀪𑀢𑁆𑀢𑀁 𑀪𑀼𑀜𑁆𑀚𑀺𑀢𑁆𑀯𑀸 𑀕𑀘𑁆𑀙𑁂𑀬𑁆𑀬𑀸𑀲𑀻’’𑀢𑀺 𑀘 𑀫𑀼𑀔𑀲𑀸𑀲𑀦𑀁 𑀅𑀤𑀸𑀲𑀺. 𑀲𑁄 𑀲𑁂𑀝𑁆𑀞𑀺𑀁 𑀯𑀦𑁆𑀤𑀺𑀢𑁆𑀯𑀸 𑀧𑀡𑁆𑀡𑀁 𑀕𑀳𑁂𑀢𑁆𑀯𑀸 𑀦𑀺𑀓𑁆𑀔𑀦𑁆𑀢𑁄 𑀅𑀦𑁆𑀢𑀭𑀸𑀫𑀕𑁆𑀕𑁂 𑀕𑀸𑀫𑀓𑀲𑁂𑀝𑁆𑀞𑀺𑀲𑁆𑀲 𑀯𑀲𑀦𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀢𑀲𑁆𑀲 𑀕𑁂𑀳𑀁 𑀧𑀼𑀘𑁆𑀙𑀺𑀢𑁆𑀯𑀸 𑀢𑀁 𑀩𑀳𑀺𑀤𑁆𑀯𑀸𑀭𑀓𑁄𑀝𑁆𑀞𑀓𑁂 𑀦𑀺𑀲𑀻𑀤𑀺𑀢𑁆𑀯𑀸 𑀫𑀲𑁆𑀲𑀼𑀧𑀭𑀺𑀓𑀫𑁆𑀫𑀁 𑀓𑀭𑁄𑀦𑁆𑀢𑀁 𑀯𑀦𑁆𑀤𑀺𑀢𑁆𑀯𑀸 𑀅𑀝𑁆𑀞𑀸𑀲𑀺. ‘‘𑀓𑀼𑀢𑁄 𑀆𑀕𑀘𑁆𑀙𑀲𑀺, 𑀢𑀸𑀢𑀸’’𑀢𑀺 𑀘 𑀯𑀼𑀢𑁆𑀢𑁂 ‘‘𑀓𑁄𑀲𑀫𑁆𑀩𑀺𑀲𑁂𑀝𑁆𑀞𑀺𑀦𑁄 𑀧𑀼𑀢𑁆𑀢𑁄𑀫𑁆𑀳𑀺, 𑀢𑀸𑀢𑀸’’𑀢𑀺 𑀆𑀳. 𑀲𑁄 ‘‘𑀅𑀫𑁆𑀳𑀸𑀓𑀁 𑀲𑀳𑀸𑀬𑀲𑁂𑀝𑁆𑀞𑀺𑀦𑁄 𑀧𑀼𑀢𑁆𑀢𑁄’’𑀢𑀺 𑀳𑀝𑁆𑀞𑀢𑀼𑀝𑁆𑀞𑁄 𑀅𑀳𑁄𑀲𑀺.

𑀢𑀲𑁆𑀫𑀺𑀁 𑀘 𑀔𑀡𑁂 𑀢𑀲𑁆𑀲 𑀲𑁂𑀝𑁆𑀞𑀺𑀦𑁄 𑀥𑀻𑀢𑀸𑀬 𑀏𑀓𑀸 𑀤𑀸𑀲𑀻 𑀲𑁂𑀝𑁆𑀞𑀺𑀥𑀻𑀢𑀼 𑀧𑀼𑀧𑁆𑀨𑀸𑀦𑀺 𑀆𑀳𑀭𑀺𑀢𑀼𑀁 𑀕𑀘𑁆𑀙𑀢𑀺. 𑀅𑀣 𑀦𑀁 𑀲𑁂𑀝𑁆𑀞𑀺 𑀆𑀳 𑁋 ‘‘𑀢𑁆𑀯𑀁, 𑀅𑀫𑁆𑀫, 𑀏𑀢𑀁 𑀓𑀫𑁆𑀫𑀁 𑀞𑀧𑁂𑀢𑁆𑀯𑀸 𑀖𑁄𑀲𑀓𑀓𑀼𑀫𑀸𑀭𑀲𑁆𑀲 𑀧𑀸𑀤𑁂 𑀥𑁄𑀯𑀺𑀢𑁆𑀯𑀸 𑀲𑀬𑀦𑀁 𑀅𑀢𑁆𑀣𑀭𑀺𑀢𑁆𑀯𑀸 𑀤𑁂𑀳𑀻’’𑀢𑀺. 𑀲𑀸 𑀢𑀣𑀸 𑀓𑀢𑁆𑀯𑀸 𑀆𑀧𑀡𑀁 𑀕𑀦𑁆𑀢𑁆𑀯𑀸 𑀲𑁂𑀝𑁆𑀞𑀺𑀥𑀻𑀢𑀼 𑀧𑀼𑀧𑁆𑀨𑀸𑀦𑀺 𑀆𑀳𑀭𑀺. 𑀲𑁂𑀝𑁆𑀞𑀺𑀥𑀻𑀢𑀸 𑀢𑀁 𑀤𑀺𑀲𑁆𑀯𑀸 ‘‘𑀢𑁆𑀯𑀁 𑀅𑀚𑁆𑀚 𑀘𑀺𑀭𑀁 𑀩𑀳𑀺 𑀧𑀧𑀜𑁆𑀘𑁂𑀲𑀻’’𑀢𑀺 𑀢𑀲𑁆𑀲𑀸 𑀓𑀼𑀚𑁆𑀛𑀺𑀢𑁆𑀯𑀸 ‘‘𑀓𑀺𑀁 𑀢𑁂 𑀏𑀢𑁆𑀢𑀓𑀁 𑀓𑀸𑀮𑀁 𑀏𑀢𑁆𑀣 𑀓𑀢’’𑀦𑁆𑀢𑀺 𑀆𑀳. ‘‘𑀫𑀸 𑀓𑀣𑁂𑀲𑀺, 𑀅𑀬𑁆𑀬𑁂, 𑀫𑀬𑀸 𑀏𑀯𑀭𑀽𑀧𑁄 𑀦𑀤𑀺𑀝𑁆𑀞𑀧𑀼𑀩𑁆𑀩𑁄, 𑀢𑀼𑀬𑁆𑀳𑀁 𑀓𑀺𑀭 𑀧𑀺𑀢𑀼 𑀲𑀳𑀸𑀬𑀓𑀲𑁂𑀝𑁆𑀞𑀺𑀦𑁄 𑀧𑀼𑀢𑁆𑀢𑁄 𑀏𑀓𑁄, 𑀦 𑀲𑀓𑁆𑀓𑀸 𑀢𑀲𑁆𑀲 𑀭𑀽𑀧𑀲𑀫𑁆𑀧𑀢𑁆𑀢𑀺𑀁 𑀓𑀣𑁂𑀢𑀼𑀁. 𑀲𑁂𑀝𑁆𑀞𑀺 𑀫𑀁 𑀧𑀼𑀧𑁆𑀨𑀸𑀦𑀁 𑀅𑀢𑁆𑀣𑀸𑀬 𑀕𑀘𑁆𑀙𑀦𑁆𑀢𑀺𑀁 ‘𑀢𑀲𑁆𑀲 𑀓𑀼𑀫𑀸𑀭𑀲𑁆𑀲 𑀧𑀸𑀤𑁂 𑀥𑁄𑀯𑀺𑀢𑁆𑀯𑀸 𑀲𑀬𑀦𑀁 𑀅𑀢𑁆𑀣𑀭𑀺𑀢𑁆𑀯𑀸 𑀤𑁂𑀳𑀻’𑀢𑀺 𑀆𑀳, 𑀢𑁂𑀦𑀸𑀳𑀁 𑀩𑀳𑀺 𑀘𑀺𑀭𑀁 𑀧𑀧𑀜𑁆𑀘𑁂𑀲𑀺’’𑀦𑁆𑀢𑀺. 𑀲𑀸𑀧𑀺 𑀔𑁄 𑀲𑁂𑀝𑁆𑀞𑀺𑀥𑀻𑀢𑀸 𑀢𑀲𑁆𑀲 𑀓𑀼𑀫𑀸𑀭𑀲𑁆𑀲 𑀘𑀢𑀼𑀢𑁆𑀣𑁂 𑀅𑀢𑁆𑀢𑀪𑀸𑀯𑁂 𑀖𑀭𑀲𑀸𑀫𑀺𑀦𑀻 𑀅𑀳𑁄𑀲𑀺, 𑀢𑀲𑁆𑀫𑀸 𑀢𑀲𑁆𑀲𑀸 𑀯𑀘𑀦𑀲𑁆𑀲 𑀲𑀼𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀦𑁂𑀯 𑀅𑀢𑁆𑀢𑀦𑁄 𑀞𑀺𑀢𑀪𑀸𑀯𑀁, 𑀦 𑀦𑀺𑀲𑀺𑀦𑁆𑀦𑀪𑀸𑀯𑀁 𑀅𑀜𑁆𑀜𑀸𑀲𑀺. 𑀲𑀸 𑀢𑀫𑁂𑀯 𑀤𑀸𑀲𑀺𑀁 𑀕𑀳𑁂𑀢𑁆𑀯𑀸 𑀢𑀲𑁆𑀲 𑀦𑀺𑀧𑀦𑁆𑀦𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀢𑀁 𑀦𑀺𑀤𑁆𑀤𑀸𑀬𑀫𑀸𑀦𑀁 𑀑𑀮𑁄𑀓𑁂𑀢𑁆𑀯𑀸 𑀤𑀼𑀲𑁆𑀲𑀦𑁆𑀢𑁂 𑀧𑀡𑁆𑀡𑀁 𑀤𑀺𑀲𑁆𑀯𑀸 ‘‘𑀓𑀺𑀁 𑀦𑀼 𑀔𑁄 𑀏𑀢𑀁 𑀧𑀡𑁆𑀡’’𑀦𑁆𑀢𑀺 𑀓𑀼𑀫𑀸𑀭𑀁 𑀅𑀦𑀼𑀝𑁆𑀞𑀸𑀧𑁂𑀢𑁆𑀯𑀸𑀯 𑀧𑀡𑁆𑀡𑀁 𑀕𑀳𑁂𑀢𑁆𑀯𑀸 𑀯𑀸𑀘𑁂𑀢𑁆𑀯𑀸 ‘‘𑀅𑀬𑀁 𑀅𑀢𑁆𑀢𑀦𑁄 𑀫𑀭𑀡𑀧𑀡𑁆𑀡𑀁 𑀲𑀬𑀫𑁂𑀯 𑀕𑀳𑁂𑀢𑁆𑀯𑀸 𑀆𑀕𑀘𑁆𑀙𑀢𑀻’’𑀢𑀺 𑀢𑀁 𑀧𑀡𑁆𑀡𑀁 𑀨𑀸𑀮𑁂𑀢𑁆𑀯𑀸 𑀢𑀲𑁆𑀫𑀺𑀁 𑀅𑀧𑁆𑀧𑀩𑀼𑀤𑁆𑀥𑁂𑀬𑁂𑀯 ‘‘𑀫𑀬𑀸 𑀢𑀯 𑀲𑀦𑁆𑀢𑀺𑀓𑀁 𑀧𑀼𑀢𑁆𑀢𑁄 𑀧𑁂𑀲𑀺𑀢𑁄, 𑀲𑀳𑀸𑀬𑀓𑀲𑁆𑀲 𑀫𑁂 𑀕𑀸𑀫𑀓𑀲𑁂𑀝𑁆𑀞𑀺𑀲𑁆𑀲 𑀯𑀬𑀧𑁆𑀧𑀢𑁆𑀢𑀸 𑀤𑀸𑀭𑀺𑀓𑀸 𑀅𑀢𑁆𑀣𑀺, 𑀢𑁆𑀯𑀁 𑀲𑀻𑀖𑀁 𑀅𑀫𑁆𑀳𑀸𑀓𑀁 𑀆𑀡𑀸𑀧𑀯𑀢𑁆𑀢𑀺𑀝𑁆𑀞𑀸𑀦𑁂 𑀉𑀧𑁆𑀧𑀸𑀤𑀁 𑀥𑀦𑀁 𑀕𑀡𑁆𑀳𑀺𑀢𑁆𑀯𑀸 𑀲𑀩𑁆𑀩𑀲𑀢𑁂𑀦 𑀫𑀫 𑀧𑀼𑀢𑁆𑀢𑀲𑁆𑀲 𑀕𑀸𑀫𑀓𑀲𑁂𑀝𑁆𑀞𑀺𑀦𑁄 𑀥𑀻𑀢𑀭𑀁 𑀕𑀳𑁂𑀢𑁆𑀯𑀸 𑀫𑀗𑁆𑀕𑀮𑀁 𑀓𑀭𑁄𑀳𑀺. 𑀫𑀗𑁆𑀕𑀮𑁂 𑀘 𑀦𑀺𑀝𑁆𑀞𑀺𑀢𑁂 ‘𑀇𑀫𑀺𑀦𑀸 𑀫𑁂 𑀯𑀺𑀥𑀸𑀦𑁂𑀦 𑀓𑀢’𑀦𑁆𑀢𑀺 𑀫𑀬𑁆𑀳𑀁 𑀲𑀸𑀲𑀦𑀁 𑀧𑁂𑀲𑁂𑀳𑀺. 𑀅𑀳𑀁 𑀢𑀯 𑀇𑀥 𑀓𑀢𑁆𑀢𑀩𑁆𑀩𑀁 𑀚𑀸𑀦𑀺𑀲𑁆𑀲𑀸𑀫𑀻’’𑀢𑀺 𑀧𑀡𑁆𑀡𑀁 𑀮𑀺𑀔𑀺𑀢𑁆𑀯𑀸 𑀢𑀫𑁂𑀯 𑀮𑀜𑁆𑀙𑀦𑀁 𑀤𑀢𑁆𑀯𑀸 𑀧𑀞𑀫𑀁 𑀩𑀤𑁆𑀥𑀦𑀺𑀬𑀸𑀫𑁂𑀦𑁂𑀯 𑀤𑀼𑀲𑁆𑀲𑀦𑁆𑀢𑁂 𑀩𑀦𑁆𑀥𑀺.

𑀲𑁄𑀧𑀺 𑀔𑁄 𑀓𑀼𑀫𑀸𑀭𑁄 𑀢𑀁𑀤𑀺𑀯𑀲𑀁 𑀢𑀢𑁆𑀣 𑀯𑀲𑀺𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀲𑁂𑀝𑁆𑀞𑀺𑀁 𑀆𑀧𑀼𑀘𑁆𑀙𑀺𑀢𑁆𑀯𑀸 𑀓𑀫𑁆𑀫𑀦𑁆𑀢𑀺𑀓𑀲𑁆𑀲 𑀕𑀸𑀫𑀁 𑀕𑀦𑁆𑀢𑁆𑀯𑀸 𑀧𑀡𑁆𑀡𑀁 𑀅𑀤𑀸𑀲𑀺. 𑀓𑀫𑁆𑀫𑀦𑁆𑀢𑀺𑀓𑁄 𑀧𑀡𑁆𑀡𑀁 𑀯𑀸𑀘𑁂𑀢𑁆𑀯𑀸 𑀕𑀸𑀫𑀺𑀓𑁂 𑀲𑀦𑁆𑀦𑀺𑀧𑀸𑀢𑁂𑀢𑁆𑀯𑀸 ‘‘𑀢𑀼𑀫𑁆𑀳𑁂𑀯 𑀫𑀁 𑀦 𑀕𑀡𑁂𑀣, 𑀫𑀫 𑀲𑀸𑀫𑀻 𑀅𑀢𑁆𑀢𑀦𑁄 𑀚𑁂𑀝𑁆𑀞𑀧𑀼𑀢𑁆𑀢𑀲𑁆𑀲 𑀲𑀩𑁆𑀩𑀲𑀢𑁂𑀦 𑀤𑀸𑀭𑀺𑀓𑀁 𑀆𑀦𑁂𑀢𑀼𑀁 𑀫𑀬𑁆𑀳𑀁 𑀲𑀦𑁆𑀢𑀺𑀓𑀁 𑀧𑁂𑀲𑁂𑀲𑀺, 𑀯𑁂𑀕𑁂𑀦 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀉𑀧𑁆𑀧𑀸𑀤𑀁 𑀲𑀫𑁆𑀧𑀺𑀡𑁆𑀟𑁂𑀣𑀸’’𑀢𑀺 𑀲𑀩𑁆𑀩𑀁 𑀫𑀗𑁆𑀕𑀮𑀲𑀓𑁆𑀓𑀸𑀭𑀁 𑀲𑀚𑁆𑀚𑁂𑀢𑁆𑀯𑀸 𑀕𑀸𑀫𑀓𑀲𑁂𑀝𑁆𑀞𑀺𑀲𑁆𑀲 𑀲𑀸𑀲𑀦𑀁 𑀧𑁂𑀲𑁂𑀢𑁆𑀯𑀸 𑀲𑀫𑁆𑀧𑀝𑀺𑀘𑁆𑀙𑀸𑀧𑁂𑀢𑁆𑀯𑀸 𑀲𑀩𑁆𑀩𑀲𑀢𑁂𑀦 𑀫𑀗𑁆𑀕𑀮𑀓𑀺𑀭𑀺𑀬𑀁 𑀦𑀺𑀝𑁆𑀞𑀸𑀧𑁂𑀢𑁆𑀯𑀸 𑀓𑁄𑀲𑀫𑁆𑀩𑀺𑀲𑁂𑀝𑁆𑀞𑀺𑀲𑁆𑀲 𑀧𑀡𑁆𑀡𑀁 𑀧𑀳𑀺𑀡𑀺 ‘‘𑀫𑀬𑀸 𑀢𑀼𑀫𑁆𑀳𑁂𑀳𑀺 𑀧𑀳𑀺𑀢𑀧𑀡𑁆𑀡𑁂 𑀲𑀸𑀲𑀦𑀁 𑀲𑀼𑀢𑁆𑀯𑀸 𑀇𑀤𑀜𑁆𑀘𑀺𑀤𑀜𑁆𑀘 𑀓𑀢’’𑀦𑁆𑀢𑀺.

𑀲𑁂𑀝𑁆𑀞𑀺 𑀢𑀁 𑀲𑀸𑀲𑀦𑀁 𑀲𑀼𑀢𑁆𑀯𑀸 𑀅𑀕𑁆𑀕𑀺𑀤𑀟𑁆𑀠𑁄 𑀯𑀺𑀬 ‘‘𑀇𑀤𑀸𑀦𑀺 𑀦𑀝𑁆𑀞𑁄𑀫𑁆𑀳𑀻’’𑀢𑀺 𑀘𑀺𑀦𑁆𑀢𑀦𑀯𑀲𑁂𑀦 𑀮𑁄𑀳𑀺𑀢𑀧𑀓𑁆𑀔𑀦𑁆𑀤𑀺𑀓𑀭𑁄𑀕𑀁 𑀧𑀢𑁆𑀯𑀸 ‘‘𑀬𑁂𑀦 𑀓𑁂𑀦𑀘𑀺 𑀢𑀁 𑀉𑀧𑀸𑀬𑁂𑀦 𑀧𑀓𑁆𑀓𑁄𑀲𑀺𑀢𑁆𑀯𑀸 𑀫𑀫 𑀲𑀦𑁆𑀢𑀓𑀲𑁆𑀲 𑀅𑀲𑁆𑀲𑀸𑀫𑀺𑀓𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 ‘‘𑀫𑀗𑁆𑀕𑀮𑀲𑁆𑀲 𑀦𑀺𑀝𑁆𑀞𑀺𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀓𑀲𑁆𑀫𑀸 𑀫𑀬𑁆𑀳𑀁 𑀧𑀼𑀢𑁆𑀢𑁄 𑀩𑀳𑀺 𑀳𑁄𑀢𑀺, 𑀲𑀻𑀖𑀁 𑀆𑀕𑀘𑁆𑀙𑀢𑀽’’𑀢𑀺 𑀲𑀸𑀲𑀦𑀁 𑀧𑁂𑀲𑁂𑀲𑀺. 𑀲𑀸𑀲𑀦𑀁 𑀲𑀼𑀢𑁆𑀯𑀸 𑀓𑀼𑀫𑀸𑀭𑁂 𑀕𑀦𑁆𑀢𑀼𑀁 𑀆𑀭𑀤𑁆𑀥𑁂 𑀲𑁂𑀝𑁆𑀞𑀺𑀥𑀻𑀢𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀬𑀁 𑀩𑀸𑀮𑁄 𑀫𑀁 𑀦𑀺𑀲𑁆𑀲𑀸𑀬 𑀇𑀫𑀁 𑀲𑀫𑁆𑀧𑀢𑁆𑀢𑀺𑀁 𑀅𑀮𑀢𑁆𑀣𑀦𑁆𑀢𑀺 𑀦 𑀚𑀸𑀦𑀸𑀢𑀺, 𑀬𑀁𑀓𑀺𑀜𑁆𑀘𑀺 𑀓𑀢𑁆𑀯𑀸 𑀇𑀫𑀲𑁆𑀲 𑀕𑀫𑀦𑀧𑀝𑀺𑀩𑀸𑀳𑀦𑀼𑀧𑀸𑀬𑁄 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺. 𑀢𑀢𑁄 𑀦𑀁 𑀆𑀳 𑁋 ‘‘𑀓𑀼𑀫𑀸𑀭, 𑀫𑀸 𑀅𑀢𑀺𑀯𑁂𑀕𑁂𑀦 𑀕𑀘𑁆𑀙𑀸𑀳𑀺, 𑀓𑀼𑀮𑀕𑀸𑀫𑀁 𑀕𑀘𑁆𑀙𑀦𑁆𑀢𑁂𑀦 𑀦𑀸𑀫 𑀅𑀢𑁆𑀢𑀦𑁄 𑀧𑀭𑀺𑀯𑀘𑁆𑀙𑀁 𑀓𑀢𑁆𑀯𑀸 𑀕𑀦𑁆𑀢𑀼𑀁 𑀯𑀝𑁆𑀝𑀢𑀻’’𑀢𑀺.

𑀓𑁄𑀲𑀫𑁆𑀩𑀓𑀲𑁂𑀝𑁆𑀞𑀺𑀧𑀺 𑀢𑀲𑁆𑀲 𑀘𑀺𑀭𑀸𑀬𑀦𑀪𑀸𑀯𑀁 𑀜𑀢𑁆𑀯𑀸 𑀧𑀼𑀦 𑀲𑀸𑀲𑀦𑀁 𑀧𑀳𑀺𑀡𑀺 ‘‘𑀓𑀲𑁆𑀫𑀸 𑀫𑁂 𑀧𑀼𑀢𑁆𑀢𑁄 𑀘𑀺𑀭𑀸𑀬𑀢𑀺, 𑀅𑀳𑀁 𑀮𑁄𑀳𑀺𑀢𑀧𑀓𑁆𑀔𑀦𑁆𑀤𑀺𑀓𑀭𑁄𑀕𑀁 𑀧𑀢𑁆𑀢𑁄, 𑀚𑀻𑀯𑀦𑁆𑀢𑀫𑁂𑀯 𑀫𑀁 𑀆𑀕𑀦𑁆𑀢𑁆𑀯𑀸 𑀤𑀝𑁆𑀞𑀼𑀁 𑀯𑀝𑁆𑀝𑀢𑀻’’𑀢𑀺. 𑀢𑀲𑁆𑀫𑀺𑀁 𑀓𑀸𑀮𑁂 𑀲𑁂𑀝𑁆𑀞𑀺𑀥𑀻𑀢𑀸 𑀢𑀲𑁆𑀲 𑀆𑀭𑁄𑀘𑁂𑀲𑀺 𑁋 ‘‘𑀦 𑀏𑀲𑁄 𑀢𑀯 𑀧𑀺𑀢𑀸, 𑀢𑁆𑀯𑀁 𑀧𑀦 ‘𑀧𑀺𑀢𑀸’𑀢𑀺 𑀲𑀜𑁆𑀜𑀁 𑀓𑀭𑁄𑀲𑀺. 𑀏𑀲 𑀢𑀯 𑀫𑀸𑀭𑀡𑀢𑁆𑀣𑀸𑀬 𑀓𑀫𑁆𑀫𑀦𑁆𑀢𑀺𑀓𑀲𑁆𑀲 𑀧𑀡𑁆𑀡𑀁 𑀧𑀳𑀺𑀡𑀺, 𑀅𑀳𑀁 𑀢𑀁 𑀧𑀡𑁆𑀡𑀁 𑀅𑀧𑀦𑁂𑀢𑁆𑀯𑀸 𑀅𑀜𑁆𑀜𑀁 𑀲𑀸𑀲𑀦𑀁 𑀮𑀺𑀔𑀺𑀢𑁆𑀯𑀸 𑀢𑀯 𑀏𑀢𑀁 𑀲𑀫𑁆𑀧𑀢𑁆𑀢𑀺𑀁 𑀉𑀧𑁆𑀧𑀸𑀤𑀬𑀺𑀁. 𑀏𑀲 𑀢𑀁 ‘𑀅𑀧𑀼𑀢𑁆𑀢𑀁 𑀓𑀭𑀺𑀲𑁆𑀲𑀸𑀫𑀻’𑀢𑀺 𑀧𑀓𑁆𑀓𑁄𑀲𑀢𑀺, 𑀏𑀢𑀲𑁆𑀲 𑀓𑀸𑀮𑀓𑀺𑀭𑀺𑀬𑀁 𑀆𑀕𑀫𑁂𑀳𑀻’’𑀢𑀺. 𑀅𑀣𑀲𑁆𑀲 𑀥𑀭𑀫𑀸𑀦𑀓𑀲𑁆𑀲𑁂𑀯 𑀓𑀸𑀮𑀓𑀢𑀪𑀸𑀯𑀁 𑀲𑀼𑀢𑁆𑀯𑀸 𑀓𑁄𑀲𑀫𑁆𑀩𑀺𑀦𑀕𑀭𑀁 𑀅𑀕𑀫𑀸𑀲𑀺. 𑀲𑁂𑀝𑁆𑀞𑀺𑀥𑀻𑀢𑀸𑀧𑀺 𑀢𑀲𑁆𑀲 𑀩𑀳𑀺𑀬𑁂𑀯 𑀲𑀜𑁆𑀜𑀁 𑀅𑀤𑀸𑀲𑀺 ‘‘𑀢𑁆𑀯𑀁 𑀧𑀯𑀺𑀲𑀦𑁆𑀢𑁄 𑀲𑀓𑀮𑀕𑁂𑀳𑁂 𑀢𑀯 𑀆𑀭𑀓𑁆𑀔𑀁 𑀞𑀧𑁂𑀦𑁆𑀢𑁄𑀯 𑀧𑀯𑀺𑀲𑀸𑀳𑀻’’𑀢𑀺. 𑀲𑀬𑀫𑁆𑀧𑀺 𑀲𑁂𑀝𑁆𑀞𑀺𑀧𑀼𑀢𑁆𑀢𑁂𑀦 𑀲𑀤𑁆𑀥𑀺𑀫𑁂𑀯 𑀧𑀯𑀺𑀲𑀺𑀢𑁆𑀯𑀸 𑀉𑀪𑁄 𑀳𑀢𑁆𑀣𑁂 𑀉𑀓𑁆𑀔𑀺𑀧𑀺𑀢𑁆𑀯𑀸 𑀭𑁄𑀤𑀦𑁆𑀢𑀻 𑀯𑀺𑀬 𑀳𑀼𑀢𑁆𑀯𑀸 𑀅𑀦𑁆𑀥𑀓𑀸𑀭𑀝𑁆𑀞𑀸𑀦𑁂 𑀦𑀺𑀧𑀦𑁆𑀦𑀓𑀲𑁆𑀲 𑀲𑁂𑀝𑁆𑀞𑀺𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀲𑀻𑀲𑁂𑀦𑁂𑀯 𑀳𑀤𑀬𑀁 𑀧𑀳𑀭𑀺. 𑀲𑁄 𑀤𑀼𑀩𑁆𑀩𑀮𑀢𑀸𑀬 𑀢𑁂𑀦𑁂𑀯 𑀧𑀳𑀸𑀭𑁂𑀦 𑀓𑀸𑀮𑀫𑀓𑀸𑀲𑀺.

𑀓𑀼𑀫𑀸𑀭𑁄𑀧𑀺 𑀧𑀺𑀢𑀼 𑀲𑀭𑀻𑀭𑀓𑀺𑀘𑁆𑀘𑀁 𑀓𑀢𑁆𑀯𑀸 ‘‘𑀢𑀼𑀫𑁆𑀳𑁂 𑀫𑀳𑀸𑀲𑁂𑀝𑁆𑀞𑀺𑀲𑁆𑀲 𑀫𑀁 𑀲𑀓𑀧𑀼𑀢𑁆𑀢𑁄𑀢𑀺 𑀯𑀤𑀣𑀸’’𑀢𑀺 𑀧𑀸𑀤𑀫𑀽𑀮𑀺𑀓𑀸𑀦𑀁 𑀮𑀜𑁆𑀚𑀁 𑀅𑀤𑀸𑀲𑀺. 𑀢𑀢𑁄 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀭𑀸𑀚𑀸 ‘‘𑀲𑁂𑀝𑁆𑀞𑀺𑀝𑁆𑀞𑀸𑀦𑀸𑀭𑀳𑀁 𑀏𑀓𑀁 𑀮𑀤𑁆𑀥𑀼𑀁 𑀯𑀝𑁆𑀝𑀢𑀻’’𑀢𑀺 ‘‘𑀲𑁂𑀝𑁆𑀞𑀺𑀲𑁆𑀲 𑀲𑀧𑀼𑀢𑁆𑀢𑀓𑀦𑀺𑀧𑀼𑀢𑁆𑀢𑀓𑀪𑀸𑀯𑀁 𑀚𑀸𑀦𑀸𑀣𑀸’’𑀢𑀺 𑀧𑁂𑀲𑁂𑀲𑀺. 𑀲𑁂𑀝𑁆𑀞𑀺𑀧𑀸𑀤𑀫𑀽𑀮𑀺𑀓𑀸 𑀭𑀜𑁆𑀜𑁄 𑀲𑁂𑀝𑁆𑀞𑀺𑀲𑁆𑀲 𑀲𑀧𑀼𑀢𑁆𑀢𑀪𑀸𑀯𑀁 𑀓𑀣𑀬𑀺𑀁𑀲𑀼. 𑀭𑀸𑀚𑀸 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀢𑀲𑁆𑀲 𑀲𑁂𑀝𑁆𑀞𑀺𑀝𑁆𑀞𑀸𑀦𑀁 𑀅𑀤𑀸𑀲𑀺. 𑀲𑁄 𑀖𑁄𑀲𑀓𑀲𑁂𑀝𑁆𑀞𑀺 𑀦𑀸𑀫 𑀚𑀸𑀢𑁄. 𑀅𑀣 𑀦𑀁 𑀪𑀭𑀺𑀬𑀸 𑀆𑀳 𑁋 ‘‘𑀅𑀬𑁆𑀬𑀧𑀼𑀢𑁆𑀢, 𑀢𑁆𑀯𑀫𑁆𑀧𑀺 𑀅𑀯𑀚𑀸𑀢𑁄, 𑀅𑀳𑀫𑁆𑀧𑀺 𑀤𑀼𑀕𑁆𑀕𑀢𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀸. 𑀧𑀼𑀩𑁆𑀩𑁂 𑀓𑀢𑀓𑀼𑀲𑀮𑀯𑀲𑁂𑀦 𑀧𑀦 𑀏𑀯𑀭𑀽𑀧𑀁 𑀲𑀫𑁆𑀧𑀢𑁆𑀢𑀺𑀁 𑀅𑀮𑀪𑀺𑀫𑁆𑀳, 𑀅𑀥𑀼𑀦𑀸𑀧𑀺 𑀓𑀼𑀲𑀮𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺. 𑀲𑁄 ‘‘𑀲𑀸𑀥𑀼 𑀪𑀤𑁆𑀤𑁂’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀤𑁂𑀯𑀲𑀺𑀓𑀁 𑀲𑀳𑀲𑁆𑀲𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀤𑀸𑀦𑀁 𑀧𑀝𑁆𑀞𑀧𑁂𑀲𑀺.

𑀢𑀲𑁆𑀫𑀺𑀁 𑀲𑀫𑀬𑁂 𑀢𑀸𑀲𑀁 𑀤𑁆𑀯𑀺𑀦𑁆𑀦𑀁 𑀚𑀦𑀸𑀦𑀁 𑀔𑀼𑀚𑁆𑀚𑀼𑀢𑁆𑀢𑀭𑀸 𑀤𑁂𑀯𑀮𑁄𑀓𑀢𑁄 𑀘𑀯𑀺𑀢𑁆𑀯𑀸 𑀖𑁄𑀲𑀓𑀲𑁂𑀝𑁆𑀞𑀺𑀲𑁆𑀲 𑀕𑁂𑀳𑁂 𑀥𑀸𑀢𑀺𑀬𑀸 𑀓𑀼𑀘𑁆𑀙𑀺𑀲𑁆𑀫𑀺𑀁 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺. 𑀲𑀸 𑀚𑀸𑀢𑀓𑀸𑀮𑁂 𑀔𑀼𑀚𑁆𑀚𑀸 𑀅𑀳𑁄𑀲𑀻𑀢𑀺 𑀔𑀼𑀚𑁆𑀚𑀼𑀢𑁆𑀢𑀭𑀸𑀢𑁂𑀯𑀲𑁆𑀲𑀸 𑀦𑀸𑀫𑀁 𑀅𑀓𑀁𑀲𑀼. 𑀲𑀸𑀫𑀸𑀯𑀢𑀻𑀧𑀺 𑀤𑁂𑀯𑀮𑁄𑀓𑀢𑁄 𑀘𑀯𑀺𑀢𑁆𑀯𑀸 𑀪𑀤𑁆𑀤𑀯𑀢𑀺𑀬𑀭𑀝𑁆𑀞𑁂 𑀪𑀤𑁆𑀤𑀺𑀬𑀦𑀕𑀭𑁂 𑀪𑀤𑁆𑀤𑀯𑀢𑀺𑀬𑀲𑁂𑀝𑁆𑀞𑀺𑀲𑁆𑀲 𑀕𑁂𑀳𑁂 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺, 𑀲𑀸𑀫𑀸𑀢𑀺𑀲𑁆𑀲𑀸 𑀦𑀸𑀫𑀁 𑀅𑀓𑀁𑀲𑀼. 𑀅𑀧𑀭𑀪𑀸𑀕𑁂 𑀢𑀲𑁆𑀫𑀺𑀁 𑀦𑀕𑀭𑁂 𑀙𑀸𑀢𑀓𑀪𑀬𑀁 𑀉𑀧𑁆𑀧𑀚𑁆𑀚𑀺, 𑀫𑀦𑀼𑀲𑁆𑀲𑀸 𑀙𑀸𑀢𑀓𑀪𑀬𑀪𑀻𑀢𑀸 𑀬𑁂𑀦 𑀯𑀸 𑀢𑁂𑀦 𑀯𑀸 𑀕𑀘𑁆𑀙𑀦𑁆𑀢𑀺. 𑀢𑀤𑀸 𑀅𑀬𑀁 𑀪𑀤𑁆𑀤𑀯𑀢𑀺𑀬𑀲𑁂𑀝𑁆𑀞𑀺 𑀪𑀭𑀺𑀬𑀸𑀬 𑀲𑀤𑁆𑀥𑀺𑀁 𑀫𑀦𑁆𑀢𑁂𑀲𑀺 𑁋 ‘‘𑀪𑀤𑁆𑀤𑁂 𑀇𑀫𑀲𑁆𑀫𑀺𑀁 𑀙𑀸𑀢𑀓𑀪𑀬𑀲𑁆𑀲 𑀅𑀦𑁆𑀢𑁄 𑀦 𑀧𑀜𑁆𑀜𑀸𑀬𑀢𑀺, 𑀓𑁄𑀲𑀫𑁆𑀩𑀺𑀦𑀕𑀭𑁂 𑀅𑀫𑁆𑀳𑀸𑀓𑀁 𑀲𑀳𑀸𑀬𑀓𑀲𑁆𑀲 𑀖𑁄𑀲𑀓𑀲𑁂𑀝𑁆𑀞𑀺𑀲𑁆𑀲 𑀲𑀦𑁆𑀢𑀺𑀓𑀁 𑀕𑀘𑁆𑀙𑀸𑀫, 𑀦 𑀲𑁄 𑀅𑀫𑁆𑀳𑁂 𑀤𑀺𑀲𑁆𑀯𑀸 𑀧𑀫𑀚𑁆𑀚𑀺𑀲𑁆𑀲𑀢𑀻’’𑀢𑀺. 𑀢𑀲𑁆𑀲 𑀓𑀺𑀭 𑀲𑁄 𑀲𑁂𑀝𑁆𑀞𑀺 𑀅𑀤𑀺𑀝𑁆𑀞𑀲𑀳𑀸𑀬𑀓𑁄 𑀅𑀳𑁄𑀲𑀺, 𑀢𑀲𑁆𑀫𑀸 𑀏𑀯𑀫𑀸𑀳. 𑀲𑁄 𑀲𑁂𑀲𑀚𑀦𑀁 𑀦𑀺𑀯𑀢𑁆𑀢𑀸𑀧𑁂𑀢𑁆𑀯𑀸 𑀪𑀭𑀺𑀬𑀜𑁆𑀘 𑀥𑀻𑀢𑀭𑀜𑁆𑀘 𑀕𑀡𑁆𑀳𑀺𑀢𑁆𑀯𑀸 𑀓𑁄𑀲𑀫𑁆𑀩𑀺𑀦𑀕𑀭𑀲𑁆𑀲 𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀺. 𑀢𑁂 𑀢𑀬𑁄𑀧𑀺 𑀅𑀦𑁆𑀢𑀭𑀸𑀫𑀕𑁆𑀕𑁂 𑀫𑀳𑀸𑀤𑀼𑀓𑁆𑀔𑀁 𑀅𑀦𑀼𑀪𑀯𑀦𑁆𑀢𑀸 𑀅𑀦𑀼𑀧𑀼𑀩𑁆𑀩𑁂𑀦 𑀓𑁄𑀲𑀫𑁆𑀩𑀺𑀁 𑀧𑀢𑁆𑀯𑀸 𑀏𑀓𑀸𑀬 𑀲𑀸𑀮𑀸𑀬 𑀦𑀺𑀯𑀸𑀲𑀁 𑀅𑀓𑀁𑀲𑀼.

𑀖𑁄𑀲𑀓𑀲𑁂𑀝𑁆𑀞𑀺𑀧𑀺 𑀔𑁄 𑀅𑀢𑁆𑀢𑀦𑁄 𑀖𑀭𑀤𑁆𑀯𑀸𑀭𑁂 𑀓𑀧𑀡𑀤𑁆𑀥𑀺𑀓𑀯𑀦𑀺𑀩𑁆𑀩𑀓𑀬𑀸𑀘𑀓𑀸𑀦𑀁 𑀫𑀳𑀸𑀤𑀸𑀦𑀁 𑀤𑀸𑀧𑁂𑀲𑀺. 𑀅𑀣𑀸𑀬𑀁 𑀪𑀤𑁆𑀤𑀯𑀢𑀺𑀬𑀲𑁂𑀝𑁆𑀞𑀺 𑀘𑀺𑀦𑁆𑀢𑁂𑀲𑀺 𑁋 ‘‘𑀦 𑀲𑀓𑁆𑀓𑀸 𑀅𑀫𑁆𑀳𑁂𑀳𑀺 𑀇𑀫𑀺𑀦𑀸𑀯 𑀓𑀧𑀡𑀯𑁂𑀲𑁂𑀦 𑀲𑀳𑀸𑀬𑀓𑀲𑁆𑀲 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀢𑀼𑀁, 𑀲𑀭𑀻𑀭𑁂 𑀧𑀸𑀓𑀢𑀺𑀓𑁂 𑀚𑀸𑀢𑁂 𑀲𑀼𑀦𑀺𑀯𑀢𑁆𑀣𑀸 𑀲𑀼𑀧𑀸𑀭𑀼𑀢𑀸 𑀲𑁂𑀝𑁆𑀞𑀺𑀁 𑀧𑀲𑁆𑀲𑀺𑀲𑁆𑀲𑀸𑀫𑀸’’𑀢𑀺. 𑀢𑁂 𑀉𑀪𑁄𑀧𑀺 𑀥𑀻𑀢𑀭𑀁 𑀖𑁄𑀲𑀓𑀲𑁂𑀝𑁆𑀞𑀺𑀲𑁆𑀲 𑀤𑀸𑀦𑀕𑁆𑀕𑀁 𑀧𑀳𑀺𑀡𑀺𑀁𑀲𑀼. 𑀲𑀸 𑀅𑀢𑁆𑀢𑀦𑁄 𑀪𑀢𑁆𑀢𑀁 𑀆𑀳𑀭𑀡𑀢𑁆𑀣𑀸𑀬 𑀪𑀸𑀚𑀦𑀁 𑀕𑀳𑁂𑀢𑁆𑀯𑀸 𑀤𑀸𑀦𑀕𑁆𑀕𑀁 𑀕𑀦𑁆𑀢𑁆𑀯𑀸 𑀏𑀓𑀲𑁆𑀫𑀺𑀁 𑀑𑀓𑀸𑀲𑁂 𑀮𑀚𑁆𑀚𑀫𑀸𑀦𑀭𑀽𑀧𑀸 𑀅𑀝𑁆𑀞𑀸𑀲𑀺. 𑀢𑀁 𑀤𑀺𑀲𑁆𑀯𑀸 𑀤𑀸𑀦𑀓𑀫𑁆𑀫𑀺𑀓𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀲𑁂𑀲𑀚𑀦𑀸 𑀲𑀫𑁆𑀫𑀼𑀔𑀲𑀫𑁆𑀫𑀼𑀔𑀝𑁆𑀞𑀸𑀦𑁂 𑀓𑁂𑀯𑀝𑁆𑀝𑀸 𑀫𑀘𑁆𑀙𑀯𑀺𑀮𑁄𑀧𑁂 𑀯𑀺𑀬 𑀫𑀳𑀸𑀲𑀤𑁆𑀤𑀁 𑀓𑀢𑁆𑀯𑀸 𑀕𑀡𑁆𑀳𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑀺, 𑀅𑀬𑀁 𑀧𑀦 𑀤𑀸𑀭𑀺𑀓𑀸 𑀓𑀼𑀮𑀥𑀻𑀢𑀸 𑀪𑀯𑀺𑀲𑁆𑀲𑀢𑀺, 𑀉𑀧𑀥𑀺𑀲𑀫𑁆𑀧𑀤𑀸𑀧𑀺𑀲𑁆𑀲𑀸 𑀅𑀢𑁆𑀣𑀻’’𑀢𑀺.

𑀢𑀢𑁄 𑀦𑀁 𑀆𑀳 𑁋 ‘‘𑀢𑁆𑀯𑀁, 𑀅𑀫𑁆𑀫, 𑀓𑀲𑁆𑀫𑀸 𑀲𑁂𑀲𑀚𑀦𑁄 𑀯𑀺𑀬 𑀕𑀡𑁆𑀳𑀺𑀢𑁆𑀯𑀸 𑀦 𑀕𑀘𑁆𑀙𑀲𑀻’’𑀢𑀺? 𑀢𑀸𑀢, 𑀏𑀯𑀭𑀽𑀧𑀁 𑀲𑀫𑁆𑀩𑀸𑀥𑀝𑁆𑀞𑀸𑀦𑀁 𑀓𑀺𑀦𑁆𑀢𑀺 𑀓𑀢𑁆𑀯𑀸 𑀧𑀯𑀺𑀲𑀸𑀫𑀻𑀢𑀺. 𑀅𑀫𑁆𑀫, 𑀓𑀢𑀺 𑀧𑀦 𑀚𑀦𑀸 𑀢𑀼𑀫𑁆𑀳𑁂𑀢𑀺? 𑀢𑀬𑁄 𑀚𑀦𑀸, 𑀢𑀸𑀢𑀸𑀢𑀺. 𑀲𑁄 𑀢𑀬𑁄 𑀪𑀢𑁆𑀢𑀧𑀺𑀡𑁆𑀟𑁂 𑀅𑀤𑀸𑀲𑀺. 𑀲𑀸 𑀢𑀁 𑀪𑀢𑁆𑀢𑀁 𑀫𑀸𑀢𑀸𑀧𑀺𑀢𑀽𑀦𑀁 𑀅𑀤𑀸𑀲𑀺, 𑀧𑀺𑀢𑀸 𑀤𑀻𑀖𑀭𑀢𑁆𑀢𑀁 𑀙𑀸𑀢𑀓𑀢𑁆𑀢𑀸 𑀅𑀢𑀺𑀭𑁂𑀓𑀁 𑀪𑀼𑀜𑁆𑀚𑀺𑀢𑁆𑀯𑀸 𑀓𑀸𑀮𑀫𑀓𑀸𑀲𑀺. 𑀲𑀸 𑀧𑀼𑀦𑀤𑀺𑀯𑀲𑁂 𑀕𑀦𑁆𑀢𑁆𑀯𑀸 𑀤𑁆𑀯𑁂𑀬𑁂𑀯 𑀪𑀢𑁆𑀢𑀧𑀺𑀡𑁆𑀟𑁂 𑀕𑀡𑁆𑀳𑀺. 𑀢𑀁𑀤𑀺𑀯𑀲𑀁 𑀲𑁂𑀝𑁆𑀞𑀺𑀪𑀭𑀺𑀬𑀸 𑀪𑀢𑁆𑀢𑁂𑀦 𑀘 𑀓𑀺𑀮𑀦𑁆𑀢𑀢𑀸𑀬 𑀲𑁂𑀝𑁆𑀞𑀺𑀦𑁄 𑀘 𑀫𑀭𑀡𑀲𑁄𑀓𑁂𑀦 𑀭𑀢𑁆𑀢𑀺𑀪𑀸𑀕𑀲𑀫𑀦𑀦𑁆𑀢𑀭𑁂 𑀓𑀸𑀮𑀫𑀓𑀸𑀲𑀺. 𑀲𑀸 𑀧𑀼𑀦𑀤𑀺𑀯𑀲𑁂 𑀲𑁂𑀝𑁆𑀞𑀺𑀥𑀻𑀢𑀸 𑀏𑀓𑀫𑁂𑀯 𑀪𑀢𑁆𑀢𑀧𑀺𑀡𑁆𑀟𑀁 𑀕𑀡𑁆𑀳𑀺. 𑀤𑀸𑀦𑀓𑀫𑁆𑀫𑀺𑀓𑁄 𑀢𑀲𑁆𑀲𑀸 𑀓𑀺𑀭𑀺𑀬𑀁 𑀉𑀧𑀥𑀸𑀭𑁂𑀢𑁆𑀯𑀸, ‘‘𑀅𑀫𑁆𑀫, 𑀢𑀬𑀸 𑀧𑀞𑀫𑀤𑀺𑀯𑀲𑁂 𑀢𑀬𑁄 𑀧𑀺𑀡𑁆𑀟𑀸 𑀕𑀳𑀺𑀢𑀸, 𑀧𑀼𑀦𑀤𑀺𑀯𑀲𑁂 𑀤𑁆𑀯𑁂, 𑀅𑀚𑁆𑀚 𑀏𑀓𑀫𑁂𑀯 𑀕𑀡𑁆𑀳𑀲𑀺. 𑀓𑀺𑀁 𑀦𑀼 𑀔𑁄 𑀓𑀸𑀭𑀡’’𑀦𑁆𑀢𑀺 𑀧𑀼𑀘𑁆𑀙𑀺. 𑀲𑀸 𑀢𑀁 𑀓𑀸𑀭𑀡𑀁 𑀓𑀣𑁂𑀲𑀺. 𑀓𑀢𑀭𑀕𑀸𑀫𑀯𑀸𑀲𑀺𑀦𑁄 𑀧𑀦, 𑀅𑀫𑁆𑀫, 𑀢𑀼𑀫𑁆𑀳𑁂𑀢𑀺. 𑀲𑀸 𑀢𑀫𑁆𑀧𑀺 𑀓𑀸𑀭𑀡𑀁 𑀦𑀺𑀧𑁆𑀧𑀤𑁂𑀲𑀢𑁄 𑀓𑀣𑁂𑀲𑀺. ‘‘𑀅𑀫𑁆𑀫, 𑀏𑀯𑀁 𑀲𑀦𑁆𑀢𑁂 𑀢𑁆𑀯𑀁 𑀅𑀫𑁆𑀳𑀸𑀓𑀁 𑀲𑁂𑀝𑁆𑀞𑀺𑀥𑀻𑀢𑀸 𑀦𑀸𑀫 𑀅𑀳𑁄𑀲𑀺, 𑀫𑀬𑁆𑀳𑀜𑁆𑀘 𑀅𑀜𑁆𑀜𑀸 𑀤𑀸𑀭𑀺𑀓𑀸 𑀦𑀢𑁆𑀣𑀺, 𑀢𑁆𑀯𑀁 𑀇𑀢𑁄 𑀧𑀝𑁆𑀞𑀸𑀬 𑀫𑀫 𑀥𑀻𑀢𑀸, 𑀅𑀫𑁆𑀫𑀸’’𑀢𑀺 𑀢𑀁 𑀥𑀻𑀢𑀭𑀁 𑀓𑀢𑁆𑀯𑀸 𑀕𑀡𑁆𑀳𑀺.

𑀲𑀸 𑀉𑀝𑁆𑀞𑀸𑀬 𑀲𑀫𑀼𑀝𑁆𑀞𑀸𑀬 𑀤𑀸𑀦𑀕𑁆𑀕𑁂 𑀫𑀳𑀸𑀲𑀤𑁆𑀤𑀁 𑀲𑀼𑀢𑁆𑀯𑀸 ‘‘𑀓𑀲𑁆𑀫𑀸 𑀅𑀬𑀁, 𑀢𑀸𑀢, 𑀉𑀘𑁆𑀘𑀸𑀲𑀤𑁆𑀤𑀫𑀳𑀸𑀲𑀤𑁆𑀤𑁄’’𑀢𑀺 𑀆𑀳. 𑀅𑀫𑁆𑀫, 𑀫𑀳𑀸𑀚𑀦𑀲𑁆𑀲 𑀅𑀦𑁆𑀢𑀭𑁂 𑀦𑀸𑀫 𑀅𑀧𑁆𑀧𑀲𑀤𑁆𑀤𑀁 𑀓𑀸𑀢𑀼𑀁 𑀦 𑀲𑀓𑁆𑀓𑀸𑀢𑀺. 𑀅𑀳𑀫𑁂𑀢𑁆𑀣 𑀉𑀧𑀸𑀬𑀁 𑀚𑀸𑀦𑀸𑀫𑀺, 𑀢𑀸𑀢𑀸𑀢𑀺. 𑀓𑀺𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺, 𑀅𑀫𑁆𑀫𑀸𑀢𑀺? 𑀲𑀫𑀦𑁆𑀢𑀸 𑀯𑀢𑀺𑀁 𑀓𑀢𑁆𑀯𑀸 𑀤𑁆𑀯𑁂 𑀤𑁆𑀯𑀸𑀭𑀸𑀦𑀺 𑀬𑁄𑀚𑁂𑀢𑁆𑀯𑀸 𑀅𑀦𑁆𑀢𑁄 𑀪𑀸𑀚𑀦𑀸𑀦𑀺 𑀞𑀧𑀸𑀧𑁂𑀢𑁆𑀯𑀸 𑀏𑀓𑁂𑀦 𑀤𑁆𑀯𑀸𑀭𑁂𑀦 𑀧𑀯𑀺𑀲𑀺𑀢𑁆𑀯𑀸 𑀪𑀢𑁆𑀢𑀁 𑀕𑀡𑁆𑀳𑀺𑀢𑁆𑀯𑀸 𑀏𑀓𑁂𑀦 𑀤𑁆𑀯𑀸𑀭𑁂𑀦 𑀦𑀺𑀓𑁆𑀔𑀫𑀦𑀁 𑀓𑀭𑁄𑀣, 𑀢𑀸𑀢𑀸𑀢𑀺. 𑀲𑀸𑀥𑀼, 𑀅𑀫𑁆𑀫𑀸𑀢𑀺 𑀧𑀼𑀦𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀢𑀣𑀸 𑀓𑀸𑀭𑁂𑀲𑀺. 𑀢𑀢𑁄 𑀧𑀝𑁆𑀞𑀸𑀬 𑀤𑀸𑀦𑀕𑁆𑀕𑀁 𑀧𑀤𑀼𑀫𑀲𑁆𑀲𑀭𑀁 𑀯𑀺𑀬 𑀲𑀦𑁆𑀦𑀺𑀲𑀺𑀦𑁆𑀦𑀲𑀤𑁆𑀤𑀁 𑀅𑀳𑁄𑀲𑀺.

𑀢𑀢𑁄 𑀖𑁄𑀲𑀓𑀲𑁂𑀝𑁆𑀞𑀺 𑀧𑀼𑀩𑁆𑀩𑁂 𑀤𑀸𑀦𑀕𑁆𑀕𑀲𑁆𑀫𑀺𑀁 𑀉𑀘𑁆𑀘𑀸𑀲𑀤𑁆𑀤𑀫𑀳𑀸𑀲𑀤𑁆𑀤𑀁 𑀲𑀼𑀢𑁆𑀯𑀸 𑀢𑀤𑀸 𑀢𑀁 𑀅𑀲𑀼𑀡𑀦𑁆𑀢𑁄 𑀤𑀸𑀦𑀓𑀫𑁆𑀫𑀺𑀓𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀧𑀼𑀘𑁆𑀙𑀺 𑁋 ‘‘𑀢𑁆𑀯𑀁 𑀅𑀚𑁆𑀚 𑀤𑀸𑀦𑀁 𑀦 𑀤𑀸𑀧𑁂𑀲𑀻’’𑀢𑀺. 𑀤𑀺𑀦𑁆𑀦𑀁, 𑀅𑀬𑁆𑀬𑀸𑀢𑀺. 𑀅𑀣 𑀓𑀲𑁆𑀫𑀸 𑀧𑀼𑀩𑁆𑀩𑁂 𑀯𑀺𑀬 𑀤𑀸𑀦𑀕𑁆𑀕𑁂 𑀲𑀤𑁆𑀤𑁄 𑀦 𑀲𑀼𑀬𑁆𑀬𑀢𑀻𑀢𑀺? 𑀆𑀫, 𑀅𑀬𑁆𑀬, 𑀏𑀓𑀸 𑀫𑁂 𑀥𑀻𑀢𑀸 𑀅𑀢𑁆𑀣𑀺, 𑀅𑀳𑀁 𑀢𑀸𑀬 𑀓𑀣𑀺𑀢𑀉𑀧𑀸𑀬𑁂 𑀞𑀢𑁆𑀯𑀸 𑀤𑀸𑀦𑀕𑁆𑀕𑀁 𑀦𑀺𑀲𑁆𑀲𑀤𑁆𑀤𑀫𑀓𑀸𑀲𑀺𑀦𑁆𑀢𑀺. 𑀢𑀯 𑀥𑀻𑀢𑀸 𑀦𑀸𑀫 𑀦𑀢𑁆𑀣𑀺, 𑀓𑀼𑀢𑁄 𑀢𑁂 𑀥𑀻𑀢𑀸 𑀮𑀤𑁆𑀥𑀸𑀢𑀺? 𑀲𑁄 𑀯𑀜𑁆𑀘𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀪𑀸𑀯𑁂𑀦 𑀲𑁂𑀝𑁆𑀞𑀺𑀲𑁆𑀲 𑀲𑀩𑁆𑀩𑀁 𑀥𑀻𑀢𑀼 𑀆𑀕𑀫𑀦𑀯𑀺𑀥𑀸𑀦𑀁 𑀓𑀣𑁂𑀲𑀺. 𑀓𑀲𑁆𑀫𑀸 𑀧𑀦 𑀪𑁄 𑀢𑁆𑀯𑀁 𑀏𑀯𑀭𑀽𑀧𑀁 𑀪𑀸𑀭𑀺𑀬𑀁 𑀓𑀫𑁆𑀫𑀫𑀓𑀸𑀲𑀺? 𑀢𑁆𑀯𑀁 𑀏𑀢𑁆𑀢𑀓𑀁 𑀅𑀤𑁆𑀥𑀸𑀦𑀁 𑀫𑀫 𑀥𑀻𑀢𑀭𑀁 𑀅𑀢𑁆𑀢𑀦𑁄 𑀲𑀦𑁆𑀢𑀺𑀓𑁂 𑀯𑀲𑀫𑀸𑀦𑀁 𑀦𑀸𑀭𑁄𑀘𑁂𑀲𑀺, 𑀯𑁂𑀕𑁂𑀦 𑀢𑀁 𑀅𑀫𑁆𑀳𑀸𑀓𑀁 𑀕𑁂𑀳𑀁 𑀆𑀡𑀸𑀧𑁂𑀳𑀻𑀢𑀺. 𑀲𑁄 𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀅𑀓𑀸𑀫𑀓𑁄 𑀆𑀡𑀸𑀧𑁂𑀲𑀺. 𑀢𑀢𑁄 𑀧𑀝𑁆𑀞𑀸𑀬 𑀲𑁂𑀝𑁆𑀞𑀺 𑀢𑀁 𑀥𑀻𑀢𑀼𑀝𑁆𑀞𑀸𑀦𑁂 𑀞𑀧𑁂𑀢𑁆𑀯𑀸 ‘‘𑀥𑀻𑀢𑀼 𑀲𑀓𑁆𑀓𑀸𑀭𑀁 𑀓𑀭𑁄𑀫𑀻’’𑀢𑀺 𑀅𑀢𑁆𑀢𑀦𑁄 𑀲𑀫𑀸𑀦𑀚𑀸𑀢𑀺𑀓𑁂𑀳𑀺 𑀓𑀼𑀮𑁂𑀳𑀺 𑀥𑀻𑀢𑀼 𑀲𑀫𑀸𑀦𑀯𑀬𑀸𑀦𑀺 𑀧𑀜𑁆𑀘 𑀓𑀼𑀫𑀸𑀭𑀺𑀓𑀲𑀢𑀸𑀦𑀺 𑀢𑀲𑁆𑀲𑀸 𑀧𑀭𑀺𑀯𑀸𑀭𑀫𑀓𑀸𑀲𑀺.

𑀅𑀣𑁂𑀓𑀤𑀺𑀯𑀲𑀁 𑀉𑀤𑁂𑀦𑁄 𑀭𑀸𑀚𑀸 𑀦𑀕𑀭𑁂 𑀅𑀦𑀼𑀲𑀜𑁆𑀘𑀭𑀦𑁆𑀢𑁄 𑀢𑀁 𑀲𑀸𑀫𑀸𑀯𑀢𑀺𑀁 𑀢𑀸𑀳𑀺 𑀓𑀼𑀫𑀸𑀭𑀻𑀳𑀺 𑀧𑀭𑀺𑀯𑀸𑀭𑀺𑀢𑀁 𑀓𑀻𑀴𑀫𑀸𑀦𑀁 𑀤𑀺𑀲𑁆𑀯𑀸 ‘‘𑀓𑀲𑁆𑀲𑀸𑀬𑀁 𑀤𑀸𑀭𑀺𑀓𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀖𑁄𑀲𑀓𑀲𑁂𑀝𑁆𑀞𑀺𑀲𑁆𑀲 𑀥𑀻𑀢𑀸’’𑀢𑀺 𑀲𑀼𑀢𑁆𑀯𑀸 𑀲𑀲𑁆𑀲𑀸𑀫𑀺𑀓𑀅𑀲𑁆𑀲𑀸𑀫𑀺𑀓𑀪𑀸𑀯𑀁 𑀧𑀼𑀘𑁆𑀙𑀺. 𑀢𑀢𑁄 𑀅𑀲𑁆𑀲𑀸𑀫𑀺𑀓𑀪𑀸𑀯𑁂 𑀓𑀣𑀺𑀢𑁂 ‘‘𑀕𑀘𑁆𑀙𑀣 𑀲𑁂𑀝𑁆𑀞𑀺𑀦𑁄 𑀓𑀣𑁂𑀣 ‘𑀢𑀼𑀫𑁆𑀳𑀸𑀓𑀁 𑀥𑀻𑀢𑀭𑀁 𑀭𑀸𑀚𑀸 𑀇𑀘𑁆𑀙𑀢𑀻’’’𑀢𑀺. 𑀢𑀁 𑀲𑀼𑀢𑁆𑀯𑀸 𑀲𑁂𑀝𑁆𑀞𑀺 ‘‘𑀅𑀫𑁆𑀳𑀸𑀓𑀁 𑀅𑀜𑁆𑀜𑀸 𑀤𑀸𑀭𑀺𑀓𑀸 𑀦𑀢𑁆𑀣𑀺, 𑀏𑀓𑀥𑀻𑀢𑀺𑀓𑀁 𑀲𑀧𑀢𑁆𑀢𑀺𑀯𑀸𑀲𑁂 𑀤𑀸𑀢𑀼𑀁 𑀦 𑀲𑀓𑁆𑀓𑁄𑀫𑀸’’𑀢𑀺. 𑀭𑀸𑀚𑀸 𑀢𑀁 𑀓𑀣𑀁 𑀲𑀼𑀢𑁆𑀯𑀸 𑀲𑁂𑀝𑁆𑀞𑀺𑀁 𑀘 𑀲𑁂𑀝𑁆𑀞𑀺𑀪𑀭𑀺𑀬𑀜𑁆𑀘 𑀩𑀳𑀺 𑀓𑀢𑁆𑀯𑀸 𑀲𑀓𑀮𑀕𑁂𑀳𑀁 𑀮𑀜𑁆𑀙𑀸𑀧𑁂𑀲𑀺. 𑀲𑀸𑀫𑀸𑀯𑀢𑀻 𑀩𑀳𑀺 𑀓𑀻𑀴𑀺𑀢𑁆𑀯𑀸 𑀆𑀕𑀘𑁆𑀙𑀦𑁆𑀢𑀻 𑀫𑀸𑀢𑀸𑀧𑀺𑀢𑀭𑁄 𑀩𑀳𑀺 𑀦𑀺𑀲𑀺𑀦𑁆𑀦𑀓𑁂 𑀤𑀺𑀲𑁆𑀯𑀸 ‘‘𑀅𑀫𑁆𑀫𑀢𑀸𑀢𑀸, 𑀓𑀲𑁆𑀫𑀸 𑀇𑀥 𑀦𑀺𑀲𑀺𑀦𑁆𑀦𑀢𑁆𑀣𑀸’’𑀢𑀺? 𑀢𑁂 𑀢𑀁 𑀓𑀸𑀭𑀡𑀁 𑀓𑀣𑀬𑀺𑀁𑀲𑀼. 𑀅𑀫𑁆𑀫𑀢𑀸𑀢𑀸, 𑀓𑀲𑁆𑀫𑀸 𑀢𑀼𑀫𑁆𑀳𑁂 𑀇𑀫𑀁 𑀧𑀝𑀺𑀯𑀘𑀦𑀁 𑀦 𑀚𑀸𑀦𑀸𑀣 ‘‘𑀫𑀫 𑀥𑀻𑀢𑀸 𑀲𑀧𑀢𑁆𑀢𑀺𑀯𑀸𑀲𑁂 𑀯𑀲𑀦𑁆𑀢𑀻 𑀏𑀓𑀺𑀓𑀸 𑀯𑀲𑀺𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀢𑀺, 𑀲𑀘𑀲𑁆𑀲𑀸 𑀧𑀭𑀺𑀯𑀸𑀭𑀸 𑀧𑀜𑁆𑀘𑀲𑀢𑀸 𑀓𑀼𑀫𑀸𑀭𑀺𑀬𑁄 𑀯𑀲𑀸𑀧𑁂𑀣, 𑀏𑀯𑀁 𑀯𑀲𑀺𑀲𑁆𑀲𑀢𑀻’’𑀢𑀺. 𑀇𑀤𑀸𑀦𑀺 𑀏𑀯𑀁 𑀓𑀣𑀸𑀧𑁂𑀣, 𑀢𑀸𑀢𑀸𑀢𑀺. ‘‘𑀲𑀸𑀥𑀼, 𑀅𑀫𑁆𑀫, 𑀫𑀬𑀁 𑀢𑀯 𑀘𑀺𑀢𑁆𑀢𑀁 𑀦 𑀚𑀸𑀦𑀺𑀫𑁆𑀳𑀸’’𑀢𑀺 𑀯𑀢𑁆𑀯𑀸 𑀢𑁂 𑀢𑀣𑀸 𑀓𑀣𑀬𑀺𑀁𑀲𑀼. 𑀭𑀸𑀚𑀸 𑀉𑀢𑁆𑀢𑀭𑀺𑀢𑀭𑀁 𑀧𑀲𑀻𑀤𑀺𑀢𑁆𑀯𑀸 ‘‘𑀲𑀳𑀲𑁆𑀲𑀫𑁆𑀧𑀺 𑀳𑁄𑀢𑀼, 𑀲𑀩𑁆𑀩𑀸 𑀆𑀦𑁂𑀣𑀸’’𑀢𑀺 𑀆𑀳. 𑀅𑀣 𑀦𑀁 𑀪𑀤𑁆𑀤𑀓𑁂𑀦 𑀦𑀓𑁆𑀔𑀢𑁆𑀢𑀫𑀼𑀳𑀼𑀢𑁆𑀢𑀓𑁂𑀦 𑀧𑀜𑁆𑀘𑀫𑀸𑀢𑀼𑀕𑀸𑀫𑀲𑀢𑀧𑀭𑀺𑀯𑀸𑀭𑀁 𑀭𑀸𑀚𑀕𑁂𑀳𑀁 𑀦𑀬𑀺𑀁𑀲𑀼. 𑀭𑀸𑀚𑀸 𑀢𑀸 𑀧𑀜𑁆𑀘𑀲𑀢𑀸𑀧𑀺 𑀢𑀲𑁆𑀲𑀸𑀬𑁂𑀯 𑀧𑀭𑀺𑀯𑀸𑀭𑀁 𑀓𑀢𑁆𑀯𑀸 𑀅𑀪𑀺𑀲𑁂𑀓𑀁 𑀓𑀢𑁆𑀯𑀸 𑀯𑀺𑀲𑀼𑀁 𑀏𑀓𑀲𑁆𑀫𑀺𑀁 𑀧𑀸𑀲𑀸𑀤𑁂 𑀯𑀲𑀸𑀧𑁂𑀲𑀺.

𑀢𑁂𑀦 𑀘 𑀲𑀫𑀬𑁂𑀦 𑀓𑁄𑀲𑀫𑁆𑀩𑀺𑀬𑀁 𑀖𑁄𑀲𑀓𑀲𑁂𑀝𑁆𑀞𑀺 𑀓𑀼𑀓𑁆𑀓𑀼𑀝𑀲𑁂𑀝𑁆𑀞𑀺 𑀧𑀯𑀸𑀭𑀺𑀓𑀲𑁂𑀝𑁆𑀞𑀻𑀢𑀺 𑀢𑀬𑁄 𑀚𑀦𑀸 𑀅𑀜𑁆𑀜𑀫𑀜𑁆𑀜𑀁 𑀲𑀳𑀸𑀬𑀓𑀸 𑀳𑁄𑀦𑁆𑀢𑀺. 𑀢𑁂 𑀢𑀬𑁄𑀧𑀺 𑀚𑀦𑀸 𑀧𑀜𑁆𑀘𑀲𑀢𑁂 𑀢𑀸𑀧𑀲𑁂 𑀧𑀝𑀺𑀚𑀕𑁆𑀕𑀦𑁆𑀢𑀺. 𑀢𑀸𑀧𑀲𑀸𑀧𑀺 𑀘𑀢𑁆𑀢𑀸𑀭𑁄 𑀫𑀸𑀲𑁂 𑀢𑁂𑀲𑀁 𑀲𑀦𑁆𑀢𑀺𑀓𑁂 𑀯𑀲𑀺𑀢𑁆𑀯𑀸 𑀅𑀝𑁆𑀞 𑀫𑀸𑀲𑁂 𑀳𑀺𑀫𑀯𑀦𑁆𑀢𑁂 𑀯𑀲𑀦𑁆𑀢𑀺. 𑀅𑀣𑁂𑀓𑀤𑀺𑀯𑀲𑀁 𑀢𑁂 𑀢𑀸𑀧𑀲𑀸 𑀳𑀺𑀫𑀯𑀦𑁆𑀢𑀢𑁄 𑀆𑀕𑀘𑁆𑀙𑀦𑁆𑀢𑀸 𑀫𑀳𑀸𑀓𑀦𑁆𑀢𑀸𑀭𑁂 𑀢𑀲𑀺𑀢𑀸 𑀓𑀺𑀮𑀦𑁆𑀢𑀸 𑀏𑀓𑀁 𑀫𑀳𑀦𑁆𑀢𑀁 𑀯𑀝𑀭𑀼𑀓𑁆𑀔𑀁 𑀧𑀢𑁆𑀯𑀸 𑀢𑀢𑁆𑀣 𑀅𑀥𑀺𑀯𑀢𑁆𑀣𑀸𑀬 𑀤𑁂𑀯𑀢𑀸𑀬 𑀲𑀦𑁆𑀢𑀺𑀓𑀸 𑀲𑀗𑁆𑀕𑀳𑀁 𑀧𑀘𑁆𑀘𑀸𑀲𑀻𑀲𑀦𑁆𑀢𑀸 𑀦𑀺𑀲𑀻𑀤𑀺𑀁𑀲𑀼. 𑀤𑁂𑀯𑀢𑀸 𑀲𑀩𑁆𑀩𑀸𑀮𑀗𑁆𑀓𑀸𑀭𑀯𑀺𑀪𑀽𑀲𑀺𑀢𑀁 𑀳𑀢𑁆𑀣𑀁 𑀧𑀲𑀸𑀭𑁂𑀢𑁆𑀯𑀸 𑀢𑁂𑀲𑀁 𑀧𑀸𑀦𑀻𑀬𑀧𑀸𑀦𑀓𑀸𑀤𑀻𑀦𑀺 𑀤𑀢𑁆𑀯𑀸 𑀓𑀺𑀮𑀫𑀣𑀁 𑀧𑀝𑀺𑀯𑀺𑀦𑁄𑀤𑁂𑀲𑀺. 𑀢𑁂 𑀤𑁂𑀯𑀢𑀸𑀬 𑀆𑀦𑀼𑀪𑀸𑀯𑁂𑀦 𑀯𑀺𑀫𑁆𑀳𑀺𑀢𑀸 𑀧𑀼𑀘𑁆𑀙𑀺𑀁𑀲𑀼 𑁋 ‘‘𑀓𑀺𑀁 𑀦𑀼 𑀔𑁄 𑀤𑁂𑀯𑀢𑁂 𑀓𑀫𑁆𑀫𑀁 𑀓𑀢𑁆𑀯𑀸 𑀢𑀬𑀸 𑀅𑀬𑀁 𑀲𑀫𑁆𑀧𑀢𑁆𑀢𑀺 𑀮𑀤𑁆𑀥𑀸’’𑀢𑀺? 𑀤𑁂𑀯𑀢𑀸 𑀆𑀳 𑁋 𑀮𑁄𑀓𑁂 𑀩𑀼𑀤𑁆𑀥𑁄 𑀦𑀸𑀫 𑀪𑀕𑀯𑀸 𑀉𑀧𑁆𑀧𑀦𑁆𑀦𑁄, 𑀲𑁄 𑀏𑀢𑀭𑀳𑀺 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺. 𑀅𑀦𑀸𑀣𑀧𑀺𑀡𑁆𑀟𑀺𑀓𑁄 𑀕𑀳𑀧𑀢𑀺 𑀢𑀁 𑀉𑀧𑀝𑁆𑀞𑀸𑀢𑀺. 𑀲𑁄 𑀉𑀧𑁄𑀲𑀣𑀤𑀺𑀯𑀲𑁂𑀲𑀼 𑀅𑀢𑁆𑀢𑀦𑁄 𑀪𑀢𑀓𑀸𑀦𑀁 𑀧𑀓𑀢𑀺𑀪𑀢𑁆𑀢𑀯𑁂𑀢𑀦𑀫𑁂𑀯 𑀤𑀢𑁆𑀯𑀸 𑀉𑀧𑁄𑀲𑀣𑀁 𑀓𑀸𑀭𑀸𑀧𑁂𑀲𑀺. 𑀅𑀣𑀸𑀳𑀁 𑀏𑀓𑀤𑀺𑀯𑀲𑀁 𑀫𑀚𑁆𑀛𑀦𑁆𑀳𑀺𑀓𑁂 𑀧𑀸𑀢𑀭𑀸𑀲𑀢𑁆𑀣𑀸𑀬 𑀆𑀕𑀢𑁄 𑀓𑀜𑁆𑀘𑀺 𑀪𑀢𑀓𑀁 𑀓𑀫𑁆𑀫𑀁 𑀓𑀭𑁄𑀦𑁆𑀢𑀁 𑀅𑀤𑀺𑀲𑁆𑀯𑀸 ‘‘𑀅𑀚𑁆𑀚 𑀫𑀦𑀼𑀲𑁆𑀲𑀸 𑀓𑀲𑁆𑀫𑀸 𑀓𑀫𑁆𑀫𑀁 𑀦 𑀓𑀭𑁄𑀦𑁆𑀢𑀻’’𑀢𑀺 𑀧𑀼𑀘𑁆𑀙𑀺𑀁. 𑀢𑀲𑁆𑀲 𑀫𑁂 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀣𑀸𑀳𑀁 𑀏𑀢𑀤𑀯𑁄𑀘𑀁 𑁋 ‘‘𑀇𑀤𑀸𑀦𑀺 𑀉𑀧𑀟𑁆𑀠𑀤𑀺𑀯𑀲𑁄 𑀕𑀢𑁄, 𑀲𑀓𑁆𑀓𑀸 𑀦𑀼 𑀔𑁄 𑀉𑀧𑀟𑁆𑀠𑀉𑀧𑁄𑀲𑀣𑀁 𑀓𑀸𑀢𑀼’’𑀦𑁆𑀢𑀺. 𑀢𑀢𑁄 𑀲𑁂𑀝𑁆𑀞𑀺𑀲𑁆𑀲 𑀧𑀝𑀺𑀯𑁂𑀤𑁂𑀢𑁆𑀯𑀸 ‘‘𑀲𑀓𑁆𑀓𑀸 𑀓𑀸𑀢𑀼’’𑀦𑁆𑀢𑀺 𑀆𑀳. 𑀲𑁆𑀯𑀸𑀳𑀁 𑀉𑀧𑀟𑁆𑀠𑀤𑀺𑀯𑀲𑀁 𑀉𑀧𑁄𑀲𑀣𑀁 𑀲𑀫𑀸𑀤𑀺𑀬𑀺𑀢𑁆𑀯𑀸 𑀢𑀤𑀳𑁂𑀯 𑀓𑀸𑀮𑀁 𑀓𑀢𑁆𑀯𑀸 𑀇𑀫𑀁 𑀲𑀫𑁆𑀧𑀢𑁆𑀢𑀺𑀁 𑀧𑀝𑀺𑀮𑀪𑀺𑀦𑁆𑀢𑀺.

𑀅𑀣 𑀢𑁂 𑀢𑀸𑀧𑀲𑀸 ‘‘𑀩𑀼𑀤𑁆𑀥𑁄 𑀓𑀺𑀭 𑀉𑀧𑁆𑀧𑀦𑁆𑀦𑁄’’𑀢𑀺 𑀲𑀜𑁆𑀚𑀸𑀢𑀧𑀻𑀢𑀺𑀧𑀸𑀫𑁄𑀚𑁆𑀚𑀸 𑀢𑀢𑁄 𑀲𑀸𑀯𑀢𑁆𑀣𑀺𑀁 𑀕𑀦𑁆𑀢𑀼𑀓𑀸𑀫𑀸 𑀳𑀼𑀢𑁆𑀯𑀸𑀧𑀺 ‘‘𑀩𑀳𑀽𑀧𑀓𑀸𑀭𑀸 𑀦𑁄 𑀉𑀧𑀝𑁆𑀞𑀸𑀓𑀲𑁂𑀝𑁆𑀞𑀺𑀦𑁄, 𑀢𑁂𑀲𑀫𑁆𑀧𑀺 𑀇𑀫𑀫𑀢𑁆𑀣𑀁 𑀆𑀭𑁄𑀘𑁂𑀲𑁆𑀲𑀸𑀫𑀸’’𑀢𑀺 𑀓𑁄𑀲𑀫𑁆𑀩𑀺𑀁 𑀕𑀦𑁆𑀢𑁆𑀯𑀸 𑀲𑁂𑀝𑁆𑀞𑀻𑀳𑀺 𑀓𑀢𑀲𑀓𑁆𑀓𑀸𑀭𑀩𑀳𑀼𑀫𑀸𑀦𑀸 ‘‘𑀢𑀤𑀳𑁂𑀯 𑀫𑀬𑀁 𑀕𑀘𑁆𑀙𑀸𑀫𑀸’’𑀢𑀺 𑀆𑀳𑀁𑀲𑀼. ‘‘𑀓𑀺𑀁, 𑀪𑀦𑁆𑀢𑁂, 𑀢𑀼𑀭𑀺𑀢𑀢𑁆𑀣, 𑀦𑀦𑀼 𑀢𑀼𑀫𑁆𑀳𑁂 𑀧𑀼𑀩𑁆𑀩𑁂 𑀘𑀢𑁆𑀢𑀸𑀭𑁄 𑀧𑀜𑁆𑀘 𑀫𑀸𑀲𑁂 𑀯𑀲𑀺𑀢𑁆𑀯𑀸 𑀕𑀘𑁆𑀙𑀣𑀸’’𑀢𑀺 𑀯𑀼𑀢𑁆𑀢𑀸 𑀢𑀁 𑀧𑀯𑀢𑁆𑀢𑀺𑀁 𑀆𑀭𑁄𑀘𑁂𑀲𑀼𑀁. ‘‘𑀢𑁂𑀦 𑀳𑀺, 𑀪𑀦𑁆𑀢𑁂, 𑀲𑀳𑁂𑀯 𑀕𑀘𑁆𑀙𑀸𑀫𑀸’’𑀢𑀺 𑀘 𑀯𑀼𑀢𑁆𑀢𑁂 𑁋 ‘‘𑀕𑀘𑁆𑀙𑀸𑀫 𑀫𑀬𑀁, 𑀢𑀼𑀫𑁆𑀳𑁂 𑀲𑀡𑀺𑀓𑀁 𑀆𑀕𑀘𑁆𑀙𑀣𑀸’’𑀢𑀺 𑀲𑀸𑀯𑀢𑁆𑀣𑀺𑀁 𑀕𑀦𑁆𑀢𑁆𑀯𑀸 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀁𑀲𑀼.

𑀢𑁂𑀧𑀺 𑀲𑁂𑀝𑁆𑀞𑀺𑀦𑁄 𑀧𑀘𑁆𑀙𑀸 𑀧𑀜𑁆𑀘𑀲𑀢𑀧𑀜𑁆𑀘𑀲𑀢𑀲𑀓𑀝𑀧𑀭𑀺𑀯𑀸𑀭𑀸 𑀲𑀸𑀯𑀢𑁆𑀣𑀺𑀁 𑀕𑀦𑁆𑀢𑁆𑀯𑀸 𑀚𑁂𑀢𑀯𑀦𑀢𑁄 𑀅𑀯𑀺𑀤𑀽𑀭𑁂 𑀞𑀸𑀦𑁂 𑀔𑀦𑁆𑀥𑀸𑀯𑀸𑀭𑀁 𑀩𑀦𑁆𑀥𑀺𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀧𑀜𑁆𑀘𑀧𑀢𑀺𑀝𑁆𑀞𑀺𑀢𑁂𑀦 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀲𑀢𑁆𑀣𑀸 𑀢𑁂𑀲𑀁 𑀘𑀭𑀺𑀬𑀸𑀯𑀲𑁂𑀦 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀢𑀬𑁄𑀧𑀺 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀸𑀬 𑀲𑁆𑀯𑀸𑀢𑀦𑀸𑀬 𑀦𑀺𑀫𑀦𑁆𑀢𑁂𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀫𑀳𑀸𑀤𑀸𑀦𑀁 𑀤𑀢𑁆𑀯𑀸 𑀢𑁂𑀦𑁂𑀯 𑀦𑀺𑀬𑀸𑀫𑁂𑀦 𑀅𑀚𑁆𑀚𑀢𑀦𑀸𑀬 𑀲𑁆𑀯𑀸𑀢𑀦𑀸𑀬𑀸𑀢𑀺 𑀦𑀺𑀫𑀦𑁆𑀢𑁂𑀢𑁆𑀯𑀸 𑀅𑀤𑁆𑀥𑀫𑀸𑀲𑀁 𑀔𑀦𑁆𑀥𑀸𑀯𑀸𑀭𑀪𑀢𑁆𑀢𑀁 𑀦𑀸𑀫 𑀤𑀢𑁆𑀯𑀸 𑀲𑀢𑁆𑀣𑀸𑀭𑀁 𑀅𑀢𑁆𑀢𑀦𑁄 𑀦𑀕𑀭𑀁 𑀆𑀕𑀫𑀦𑀢𑁆𑀣𑀸𑀬 𑀬𑀸𑀘𑀺𑀁𑀲𑀼. 𑀲𑀢𑁆𑀣𑀸 ‘‘𑀲𑀼𑀜𑁆𑀜𑀸𑀕𑀸𑀭𑁂 𑀢𑀣𑀸𑀕𑀢𑀸 𑀅𑀪𑀺𑀭𑀫𑀦𑁆𑀢𑀻’’𑀢𑀺 𑀓𑀣𑁂𑀲𑀺. 𑀢𑁂 ‘‘𑀅𑀜𑁆𑀜𑀸𑀢𑀁, 𑀪𑀦𑁆𑀢𑁂’’𑀢𑀺 𑀯𑀢𑁆𑀯𑀸 ‘‘𑀢𑀼𑀫𑁆𑀳𑁂 𑀅𑀫𑁆𑀳𑁂𑀳𑀺 𑀧𑀳𑀺𑀢𑀲𑀸𑀲𑀦𑁂𑀦 𑀆𑀕𑀘𑁆𑀙𑁂𑀬𑁆𑀬𑀸𑀣𑀸’’𑀢𑀺 𑀯𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀢𑀺𑀓𑁆𑀔𑀢𑁆𑀢𑀼𑀁 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀅𑀢𑁆𑀢𑀦𑁄 𑀦𑀕𑀭𑀫𑁂𑀯 𑀆𑀕𑀦𑁆𑀢𑁆𑀯𑀸 𑀢𑀬𑁄𑀧𑀺 𑀚𑀦𑀸 𑀲𑀓𑁂 𑀲𑀓𑁂 𑀉𑀬𑁆𑀬𑀸𑀦𑁂 𑀯𑀺𑀳𑀸𑀭𑁂 𑀓𑀸𑀭𑀸𑀧𑁂𑀲𑀼𑀁. 𑀖𑁄𑀲𑀓𑀲𑁂𑀝𑁆𑀞𑀺𑀦𑀸 𑀓𑀸𑀭𑀺𑀢𑁄 𑀖𑁄𑀲𑀺𑀢𑀸𑀭𑀸𑀫𑁄 𑀦𑀸𑀫 𑀚𑀸𑀢𑁄, 𑀓𑀼𑀓𑁆𑀓𑀼𑀝𑀲𑁂𑀝𑁆𑀞𑀺𑀦𑀸 𑀓𑀸𑀭𑀺𑀢𑁄 𑀓𑀼𑀓𑁆𑀓𑀼𑀝𑀸𑀭𑀸𑀫𑁄 𑀦𑀸𑀫 𑀚𑀸𑀢𑁄, 𑀧𑀸𑀯𑀸𑀭𑀺𑀓𑀲𑁂𑀝𑁆𑀞𑀺𑀦𑀸 𑀓𑀸𑀭𑀺𑀢𑀁 𑀧𑀸𑀯𑀸𑀭𑀺𑀓𑀫𑁆𑀩𑀯𑀦𑀁 𑀦𑀸𑀫 𑀚𑀸𑀢𑀁. 𑀢𑁂 𑀯𑀺𑀳𑀸𑀭𑁂 𑀓𑀸𑀭𑀸𑀧𑁂𑀢𑁆𑀯𑀸 𑀲𑀢𑁆𑀣𑀼 𑀤𑀽𑀢𑀁 𑀧𑀳𑀺𑀡𑀺𑀁𑀲𑀼 𑁋 ‘‘𑀲𑀢𑁆𑀣𑀸 𑀅𑀫𑁆𑀳𑀸𑀓𑀁 𑀲𑀗𑁆𑀕𑀳𑀁 𑀓𑀸𑀢𑀼𑀁 𑀇𑀫𑀁 𑀦𑀕𑀭𑀁 𑀆𑀕𑀘𑁆𑀙𑀢𑀽’’𑀢𑀺. 𑀲𑀢𑁆𑀣𑀸 ‘‘𑀓𑁄𑀲𑀫𑁆𑀩𑀺𑀁 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀫𑀳𑀸𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀸𑀭𑁄 𑀘𑀸𑀭𑀺𑀓𑀁 𑀦𑀺𑀓𑁆𑀔𑀫𑀦𑁆𑀢𑁄 𑀅𑀦𑁆𑀢𑀭𑀸𑀫𑀕𑁆𑀕𑁂 𑀫𑀸𑀕𑀡𑁆𑀟𑀺𑀬𑀩𑁆𑀭𑀸𑀳𑁆𑀫𑀡𑀲𑁆𑀲 𑀅𑀭𑀳𑀢𑁆𑀢𑀽𑀧𑀦𑀺𑀲𑁆𑀲𑀬𑀁 𑀤𑀺𑀲𑁆𑀯𑀸 𑀕𑀫𑀦𑀁 𑀯𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀓𑀼𑀭𑀼𑀭𑀝𑁆𑀞𑁂 𑀓𑀫𑁆𑀫𑀸𑀲𑀤𑀫𑁆𑀫𑀁 𑀦𑀸𑀫 𑀦𑀺𑀕𑀫𑀁 𑀅𑀕𑀫𑀸𑀲𑀺.

𑀢𑀲𑁆𑀫𑀺𑀁 𑀲𑀫𑀬𑁂 𑀫𑀸𑀕𑀡𑁆𑀟𑀺𑀬𑁄 𑀲𑀩𑁆𑀩𑀭𑀢𑁆𑀢𑀺𑀁 𑀩𑀳𑀺𑀕𑀸𑀫𑁂 𑀅𑀕𑁆𑀕𑀺𑀁 𑀚𑀼𑀳𑀺𑀢𑁆𑀯𑀸 𑀧𑀸𑀢𑁄𑀯 𑀅𑀦𑁆𑀢𑁄𑀕𑀸𑀫𑀁 𑀧𑀯𑀺𑀲𑀢𑀺. 𑀲𑀢𑁆𑀣𑀸𑀧𑀺 𑀧𑀼𑀦𑀤𑀺𑀯𑀲𑁂 𑀅𑀦𑁆𑀢𑁄𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀯𑀺𑀲𑀦𑁆𑀢𑁄 𑀧𑀝𑀺𑀧𑀣𑁂 𑀫𑀸𑀕𑀡𑁆𑀟𑀺𑀬𑀩𑁆𑀭𑀸𑀳𑁆𑀫𑀡𑀲𑁆𑀲 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀲𑀺. 𑀲𑁄 𑀤𑀲𑀩𑀮𑀁 𑀤𑀺𑀲𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀳𑀁 𑀏𑀢𑁆𑀢𑀓𑀁 𑀓𑀸𑀮𑀁 𑀫𑀫 𑀥𑀻𑀢𑀼 𑀭𑀽𑀧𑀲𑀫𑁆𑀧𑀢𑁆𑀢𑀺𑀬𑀸 𑀲𑀤𑀺𑀲𑀁 𑀤𑀸𑀭𑀓𑀁 𑀧𑀭𑀺𑀬𑁂𑀲𑀦𑁆𑀢𑁄 𑀘𑀭𑀸𑀫𑀺, 𑀭𑀽𑀧𑀲𑀫𑁆𑀧𑀢𑁆𑀢𑀺𑀬𑀸 𑀘 𑀲𑀢𑀺𑀧𑀺 𑀏𑀯𑀭𑀽𑀧𑀁 𑀕𑀳𑀺𑀢𑀧𑀩𑁆𑀩𑀚𑁆𑀚𑀫𑁂𑀯 𑀧𑀢𑁆𑀣𑁂𑀲𑀺𑀁. 𑀅𑀬𑀁 𑀔𑁄 𑀧𑀦 𑀧𑀩𑁆𑀩𑀚𑀺𑀢𑁄 𑀅𑀪𑀺𑀭𑀽𑀧𑁄 𑀤𑀲𑁆𑀲𑀦𑀻𑀬𑁄 𑀫𑀫 𑀥𑀻𑀢𑀼𑀬𑁂𑀯 𑀅𑀦𑀼𑀘𑁆𑀙𑀯𑀺𑀓𑁄’’𑀢𑀺 𑀯𑁂𑀕𑁂𑀦 𑀕𑁂𑀳𑀁 𑀅𑀕𑀫𑀸𑀲𑀺. 𑀢𑀲𑁆𑀲 𑀓𑀺𑀭 𑀩𑁆𑀭𑀸𑀳𑁆𑀫𑀡𑀲𑁆𑀲 𑀧𑀼𑀩𑁆𑀩𑁂 𑀏𑀓𑁄 𑀧𑀩𑁆𑀩𑀚𑀺𑀢𑀯𑀁𑀲𑁄 𑀅𑀢𑁆𑀣𑀺, 𑀢𑁂𑀦𑀲𑁆𑀲 𑀧𑀩𑁆𑀩𑀚𑀺𑀢𑀫𑁂𑀯 𑀤𑀺𑀲𑁆𑀯𑀸 𑀘𑀺𑀢𑁆𑀢𑀁 𑀦𑀫𑀢𑀺. 𑀲𑁄 𑀩𑁆𑀭𑀸𑀳𑁆𑀫𑀡𑀺𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀪𑀤𑁆𑀤𑁂 𑀫𑀬𑀸 𑀏𑀯𑀭𑀽𑀧𑁄 𑀧𑀩𑁆𑀩𑀚𑀺𑀢𑁄 𑀦𑀸𑀫 𑀦𑀤𑀺𑀝𑁆𑀞𑀧𑀼𑀩𑁆𑀩𑁄 𑀲𑀼𑀯𑀡𑁆𑀡𑀯𑀡𑁆𑀡𑁄 𑀩𑁆𑀭𑀳𑁆𑀫𑀯𑀡𑁆𑀡𑁄 𑀫𑀫 𑀥𑀻𑀢𑀼𑀬𑁂𑀯 𑀅𑀦𑀼𑀘𑁆𑀙𑀯𑀺𑀓𑁄, 𑀲𑀻𑀖𑀁 𑀫𑁂 𑀥𑀻𑀢𑀭𑀁 𑀅𑀮𑀗𑁆𑀓𑀭𑁄𑀳𑀻’’𑀢𑀺. 𑀩𑁆𑀭𑀸𑀳𑁆𑀫𑀡𑀺𑀬𑀸 𑀥𑀻𑀢𑀭𑀁 𑀅𑀮𑀗𑁆𑀓𑀭𑁄𑀦𑁆𑀢𑀺𑀬𑀸𑀯 𑀲𑀢𑁆𑀣𑀸 𑀅𑀢𑁆𑀢𑀦𑁄 𑀞𑀺𑀢𑀝𑁆𑀞𑀸𑀦𑁂 𑀧𑀤𑀘𑁂𑀢𑀺𑀬𑀸𑀦𑀺 𑀤𑀲𑁆𑀲𑁂𑀢𑁆𑀯𑀸 𑀅𑀦𑁆𑀢𑁄𑀦𑀕𑀭𑀁 𑀧𑀸𑀯𑀺𑀲𑀺.

𑀅𑀣 𑀩𑁆𑀭𑀸𑀳𑁆𑀫𑀡𑁄 𑀩𑁆𑀭𑀸𑀳𑁆𑀫𑀡𑀺𑀬𑀸 𑀲𑀤𑁆𑀥𑀺𑀁 𑀥𑀻𑀢𑀭𑀁 𑀕𑀳𑁂𑀢𑁆𑀯𑀸 𑀢𑀁 𑀞𑀸𑀦𑀁 𑀆𑀕𑀘𑁆𑀙𑀦𑁆𑀢𑁄 𑀅𑀦𑁆𑀢𑁄𑀕𑀸𑀫𑀁 𑀧𑀯𑀺𑀝𑁆𑀞𑀓𑀸𑀮𑁂 𑀆𑀕𑀢𑀢𑁆𑀢𑀸 𑀇𑀢𑁄 𑀘𑀺𑀢𑁄 𑀘 𑀑𑀮𑁄𑀓𑁂𑀦𑁆𑀢𑁄 𑀤𑀲𑀩𑀮𑀁 𑀅𑀤𑀺𑀲𑁆𑀯𑀸 𑀩𑁆𑀭𑀸𑀳𑁆𑀫𑀡𑀺𑀁 𑀧𑀭𑀺𑀪𑀸𑀲𑀢𑀺 𑁋 ‘‘𑀢𑀯 𑀓𑀸𑀭𑀡𑀁 𑀪𑀤𑁆𑀤𑀓𑀁 𑀦𑀸𑀫 𑀦𑀢𑁆𑀣𑀺, 𑀢𑀬𑀺 𑀧𑀧𑀜𑁆𑀘𑀁 𑀓𑀭𑁄𑀦𑁆𑀢𑀺𑀬𑀸𑀯 𑀲𑁄 𑀧𑀩𑁆𑀩𑀚𑀺𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀕𑀢𑁄’’𑀢𑀺. 𑀩𑁆𑀭𑀸𑀳𑁆𑀫𑀡, 𑀕𑀢𑁄 𑀢𑀸𑀯 𑀳𑁄𑀢𑀼, 𑀓𑀢𑀭𑀤𑀺𑀲𑀸𑀪𑀸𑀕𑁂𑀦 𑀕𑀢𑁄𑀢𑀺? 𑀇𑀫𑀺𑀦𑀸 𑀤𑀺𑀲𑀸𑀪𑀸𑀕𑁂𑀦𑀸𑀢𑀺 𑀲𑀢𑁆𑀣𑀼 𑀕𑀢𑀝𑁆𑀞𑀸𑀦𑀁 𑀑𑀮𑁄𑀓𑁂𑀦𑁆𑀢𑁄𑀯 𑀧𑀤𑀘𑁂𑀢𑀺𑀬𑀸𑀦𑀺 𑀤𑀺𑀲𑁆𑀯𑀸 ‘‘𑀪𑀤𑁆𑀤𑁂 𑀇𑀫𑀸𑀦𑀺 𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀧𑀤𑀸𑀦𑀺, 𑀇𑀢𑁄 𑀕𑀢𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀆𑀳. 𑀅𑀣, 𑀩𑁆𑀭𑀸𑀳𑁆𑀫𑀡𑀻, 𑀲𑀢𑁆𑀣𑀼 𑀧𑀤𑀘𑁂𑀢𑀺𑀬𑀁 𑀤𑀺𑀲𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀩𑀸𑀮𑁄 𑀯𑀢𑀸𑀬𑀁 𑀩𑁆𑀭𑀸𑀳𑁆𑀫𑀡𑁄 𑀅𑀢𑁆𑀢𑀦𑁄 𑀕𑀦𑁆𑀣𑀫𑀢𑁆𑀢𑀲𑁆𑀲𑀸𑀧𑀺 𑀅𑀢𑁆𑀣𑀁 𑀦 𑀚𑀸𑀦𑀸𑀢𑀻’’𑀢𑀺 𑀢𑁂𑀦 𑀲𑀤𑁆𑀥𑀺𑀁 𑀧𑀭𑀺𑀳𑀸𑀲𑀁 𑀓𑀭𑁄𑀦𑁆𑀢𑀻 𑀆𑀳 𑁋 ‘‘𑀬𑀸𑀯 𑀩𑀸𑀮𑁄 𑀘𑀸𑀲𑀺, 𑀩𑁆𑀭𑀸𑀳𑁆𑀫𑀡, 𑀏𑀯𑀭𑀽𑀧𑀲𑁆𑀲 𑀦𑀸𑀫 𑀧𑀼𑀭𑀺𑀲𑀲𑁆𑀲 𑀥𑀻𑀢𑀭𑀁 𑀤𑀲𑁆𑀲𑀸𑀫𑀻𑀢𑀺 𑀯𑀤𑀲𑀺. 𑀭𑀸𑀕𑁂𑀦 𑀳𑀺 𑀭𑀢𑁆𑀢𑀲𑁆𑀲 𑀤𑁄𑀲𑁂𑀦 𑀤𑀼𑀝𑁆𑀞𑀲𑁆𑀲 𑀫𑁄𑀳𑁂𑀦 𑀫𑀽𑀴𑁆𑀳𑀲𑁆𑀲 𑀧𑀼𑀭𑀺𑀲𑀲𑁆𑀲 𑀧𑀤𑀁 𑀦𑀸𑀫 𑀏𑀯𑀭𑀽𑀧𑀁 𑀦 𑀳𑁄𑀢𑀺. 𑀮𑁄𑀓𑁂 𑀧𑀦 𑀯𑀺𑀯𑀝𑀘𑁆𑀙𑀤𑀲𑁆𑀲 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑀲𑁆𑀲 𑀏𑀢𑀁 𑀧𑀤𑀁’’ 𑀧𑀲𑁆𑀲, 𑀩𑁆𑀭𑀸𑀳𑁆𑀫𑀡 𑁋

‘‘𑀭𑀢𑁆𑀢𑀲𑁆𑀲 𑀳𑀺 𑀉𑀓𑁆𑀓𑀼𑀝𑀺𑀓𑀁 𑀧𑀤𑀁 𑀪𑀯𑁂,

𑀤𑀼𑀝𑁆𑀞𑀲𑁆𑀲 𑀳𑁄𑀢𑀺 𑀅𑀯𑀓𑀟𑁆𑀠𑀺𑀢𑀁 𑀧𑀤𑀁;

𑀫𑀽𑀴𑁆𑀳𑀲𑁆𑀲 𑀳𑁄𑀢𑀺 𑀲𑀳𑀲𑀸𑀦𑀼𑀧𑀻𑀴𑀺𑀢𑀁,

𑀯𑀺𑀯𑀝𑀘𑁆𑀙𑀤𑀲𑁆𑀲 𑀇𑀤𑀫𑀻𑀤𑀺𑀲𑀁 𑀧𑀤’’𑀦𑁆𑀢𑀺.

𑀲𑁄 𑀩𑁆𑀭𑀸𑀳𑁆𑀫𑀡𑀺𑀬𑀸 𑀏𑀢𑁆𑀢𑀓𑀁 𑀓𑀣𑁂𑀦𑁆𑀢𑀺𑀬𑀸𑀧𑀺 𑀅𑀲𑀼𑀢𑁆𑀯𑀸 ‘‘𑀢𑁆𑀯𑀁 𑀦𑀸𑀫 𑀘𑀡𑁆𑀟𑀸 𑀫𑀼𑀔𑀭𑀸’’𑀢𑀺 𑀆𑀳. 𑀢𑁂𑀲𑀁 𑀤𑁆𑀯𑀺𑀦𑁆𑀦𑀫𑁆𑀧𑀺 𑀅𑀜𑁆𑀜𑀫𑀜𑁆𑀜𑀁 𑀯𑀺𑀯𑀸𑀤𑀁 𑀓𑀭𑁄𑀦𑁆𑀢𑀸𑀦𑀁𑀬𑁂𑀯 𑀲𑀢𑁆𑀣𑀸 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀲𑀤𑁆𑀥𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀓𑀢𑀪𑀢𑁆𑀢𑀓𑀺𑀘𑁆𑀘𑁄 𑀩𑁆𑀭𑀸𑀳𑁆𑀫𑀡𑀲𑁆𑀲 𑀤𑀲𑁆𑀲𑀦𑀽𑀧𑀘𑀸𑀭𑁂𑀦𑁂𑀯 𑀦𑀺𑀓𑁆𑀔𑀫𑀺. 𑀩𑁆𑀭𑀸𑀳𑁆𑀫𑀡𑁄 𑀲𑀢𑁆𑀣𑀸𑀭𑀁 𑀤𑀽𑀭𑀢𑁄𑀯 𑀆𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 𑀩𑁆𑀭𑀸𑀳𑁆𑀫𑀡𑀺𑀁 𑀅𑀧𑀲𑀸𑀤𑁂𑀢𑁆𑀯𑀸 ‘‘𑀅𑀬𑀁 𑀲𑁄 𑀧𑀼𑀭𑀺𑀲𑁄’’𑀢𑀺 𑀳𑀝𑁆𑀞𑀧𑀳𑀝𑁆𑀞𑁄 𑀤𑀲𑀩𑀮𑀲𑁆𑀲 𑀧𑀼𑀭𑀢𑁄 𑀞𑀢𑁆𑀯𑀸 ‘‘𑀪𑁄 𑀧𑀩𑁆𑀩𑀚𑀺𑀢, 𑀅𑀳𑀁 𑀧𑀸𑀢𑁄𑀯 𑀧𑀝𑁆𑀞𑀸𑀬 𑀢𑀁 𑀧𑀭𑀺𑀬𑁂𑀲𑀦𑁆𑀢𑁄 𑀘𑀭𑀸𑀫𑀺, 𑀇𑀫𑀲𑁆𑀫𑀺𑀁 𑀚𑀫𑁆𑀩𑀼𑀤𑀻𑀧𑁂 𑀫𑀫 𑀥𑀻𑀢𑀸𑀬 𑀲𑀫𑀸𑀦𑀭𑀽𑀧𑀸 𑀇𑀢𑁆𑀣𑀻 𑀦𑀸𑀫 𑀦𑀢𑁆𑀣𑀺, 𑀧𑀼𑀭𑀺𑀲𑁄𑀧𑀺 𑀢𑀬𑀸 𑀲𑀤𑁆𑀥𑀺𑀁 𑀲𑀫𑀸𑀦𑀭𑀽𑀧𑁄 𑀦𑀸𑀫 𑀦𑀢𑁆𑀣𑀺, 𑀫𑀫 𑀥𑀻𑀢𑀭𑀁 𑀢𑀼𑀬𑁆𑀳𑀁 𑀧𑁄𑀲𑀦𑀢𑁆𑀣𑀸𑀬 𑀤𑀫𑁆𑀫𑀺, 𑀕𑀡𑁆𑀳𑀸𑀳𑀺 𑀦’’𑀦𑁆𑀢𑀺 𑀆𑀳. 𑀅𑀣 𑀦𑀁 𑀲𑀢𑁆𑀣𑀸 ‘‘𑀅𑀳𑀁, 𑀩𑁆𑀭𑀸𑀳𑁆𑀫𑀡, 𑀓𑀸𑀫𑀕𑁆𑀕𑀯𑀸𑀲𑀺𑀦𑀺𑀬𑁄 𑀉𑀢𑁆𑀢𑀫𑀭𑀽𑀧𑀥𑀭𑀸 𑀦𑀸𑀦𑀸𑀯𑀡𑁆𑀡𑀁 𑀓𑀣𑀁 𑀓𑀣𑁂𑀦𑁆𑀢𑀺𑀬𑁄 𑀫𑀫 𑀧𑀮𑁄𑀪𑀦𑀢𑁆𑀣𑀫𑁂𑀯 𑀆𑀕𑀦𑁆𑀢𑁆𑀯𑀸 𑀲𑀦𑁆𑀢𑀺𑀓𑁂 𑀞𑀺𑀢𑀸 𑀤𑁂𑀯𑀥𑀻𑀢𑀸𑀧𑀺 𑀦 𑀇𑀘𑁆𑀙𑀺𑀁, 𑀓𑀺𑀫𑀗𑁆𑀕𑀁 𑀧𑀦 𑀇𑀫𑀁 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀤𑀺𑀲𑁆𑀯𑀸𑀦 𑀢𑀡𑁆𑀳𑀁 𑀅𑀭𑀢𑀺𑀁 𑀭𑀕𑀜𑁆𑀘,

𑀦𑀸𑀳𑁄𑀲𑀺 𑀙𑀦𑁆𑀤𑁄 𑀅𑀧𑀺 𑀫𑁂𑀣𑀼𑀦𑀲𑁆𑀫𑀺𑀁;

𑀓𑀺𑀁𑀫𑁂𑀯𑀺𑀤𑀁 𑀫𑀼𑀢𑁆𑀢𑀓𑀭𑀻𑀲𑀧𑀼𑀡𑁆𑀡𑀁,

𑀧𑀸𑀤𑀸𑀧𑀺 𑀦𑀁 𑀲𑀫𑁆𑀨𑀼𑀲𑀺𑀢𑀼𑀁 𑀦 𑀇𑀘𑁆𑀙𑁂’’𑀢𑀺. (𑀲𑀼. 𑀦𑀺. 𑁮𑁪𑁧);

𑀫𑀸𑀕𑀡𑁆𑀟𑀺𑀬𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀦𑀢𑁆𑀣𑀺𑀓𑁂𑀦 𑀦𑀸𑀫 ‘𑀅𑀮’𑀦𑁆𑀢𑀺 𑀯𑀢𑁆𑀢𑀼𑀫𑁂𑀯 𑀯𑀝𑁆𑀝𑀢𑀺. 𑀅𑀬𑀁 𑀧𑀦 𑀫𑀫 𑀲𑀭𑀻𑀭𑀁 𑀫𑀼𑀢𑁆𑀢𑀓𑀭𑀻𑀲𑀧𑀼𑀡𑁆𑀡𑀁 𑀦𑀸𑀫 𑀓𑀢𑁆𑀯𑀸 ‘𑀧𑀸𑀤𑀸𑀧𑀺 𑀦𑀁 𑀲𑀫𑁆𑀨𑀼𑀲𑀺𑀢𑀼𑀁 𑀦 𑀇𑀘𑁆𑀙𑁂’𑀢𑀺 𑀅𑀯𑁄𑀘, 𑀏𑀓𑀁 𑀇𑀲𑁆𑀲𑀭𑀺𑀬𑀝𑁆𑀞𑀸𑀦𑀁 𑀮𑀪𑀦𑁆𑀢𑀻 𑀅𑀦𑁆𑀢𑀭𑀫𑁂𑀯𑀲𑁆𑀲 𑀧𑀲𑁆𑀲𑀺𑀲𑁆𑀲𑀸𑀫𑀻’’𑀢𑀺 𑀆𑀖𑀸𑀢𑀁 𑀩𑀦𑁆𑀥𑀺. 𑀲𑀢𑁆𑀣𑀸 𑀢𑀁 𑀅𑀫𑀦𑀲𑀺𑀓𑀢𑁆𑀯𑀸 𑀘𑀭𑀺𑀬𑀯𑀲𑁂𑀦 𑀩𑁆𑀭𑀸𑀳𑁆𑀫𑀡𑀲𑁆𑀲 𑀥𑀫𑁆𑀫𑀤𑁂𑀲𑀦𑀁 𑀆𑀭𑀪𑀺. 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀉𑀪𑁄𑀧𑀺 𑀚𑀸𑀬𑀫𑁆𑀧𑀢𑀺𑀓𑀸 𑀅𑀦𑀸𑀕𑀸𑀫𑀺𑀨𑀮𑁂 𑀧𑀢𑀺𑀝𑁆𑀞𑀸𑀬 ‘‘𑀇𑀤𑀸𑀦𑀺 𑀅𑀫𑁆𑀳𑀸𑀓𑀁 𑀖𑀭𑀸𑀯𑀸𑀲𑁂𑀦 𑀅𑀢𑁆𑀣𑁄 𑀦𑀢𑁆𑀣𑀻’’𑀢𑀺 𑀥𑀻𑀢𑀭𑀁 𑀫𑀸𑀕𑀡𑁆𑀟𑀺𑀬𑀁 𑀘𑀽𑀴𑀧𑀺𑀢𑀭𑀁 𑀲𑀫𑁆𑀧𑀝𑀺𑀘𑁆𑀙𑀸𑀧𑁂𑀢𑁆𑀯𑀸 𑀉𑀪𑁄𑀧𑀺 𑀧𑀩𑁆𑀩𑀚𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀁𑀲𑀼. 𑀅𑀣 𑀭𑀸𑀚𑀸 𑀉𑀤𑁂𑀦𑁄 𑀘𑀽𑀴𑀫𑀸𑀕𑀡𑁆𑀟𑀺𑀬𑁂𑀦 𑀲𑀤𑁆𑀥𑀺𑀁 𑀯𑁄𑀳𑀸𑀭𑀁 𑀓𑀢𑁆𑀯𑀸 𑀫𑀸𑀕𑀡𑁆𑀟𑀺𑀬𑀤𑀸𑀭𑀺𑀓𑀁 𑀭𑀸𑀚𑀸𑀦𑀼𑀪𑀸𑀯𑁂𑀦 𑀕𑁂𑀳𑀁 𑀆𑀦𑁂𑀢𑁆𑀯𑀸 𑀅𑀪𑀺𑀲𑁂𑀓𑀁 𑀓𑀢𑁆𑀯𑀸 𑀢𑀲𑁆𑀲𑀸 𑀧𑀜𑁆𑀘𑀫𑀸𑀢𑀼𑀕𑀸𑀫𑀲𑀢𑀧𑀭𑀺𑀯𑀸𑀭𑀸𑀬 𑀯𑀲𑀦𑀝𑁆𑀞𑀸𑀦𑀁 𑀯𑀺𑀲𑀼𑀁 𑀧𑀸𑀲𑀸𑀤𑀁 𑀅𑀤𑀸𑀲𑀺.

𑀲𑀢𑁆𑀣𑀸𑀧𑀺 𑀔𑁄 𑀅𑀦𑀼𑀧𑀼𑀩𑁆𑀩𑁂𑀦 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀓𑁄𑀲𑀫𑁆𑀩𑀺𑀦𑀕𑀭𑀁 𑀲𑀫𑁆𑀧𑀸𑀧𑀼𑀡𑀺. 𑀲𑁂𑀝𑁆𑀞𑀺𑀦𑁄 𑀲𑀢𑁆𑀣𑀼 𑀆𑀕𑀫𑀦𑀁 𑀲𑀼𑀢𑁆𑀯𑀸 𑀧𑀘𑁆𑀘𑀼𑀕𑁆𑀕𑀫𑀦𑀁 𑀓𑀢𑁆𑀯𑀸 𑀧𑀜𑁆𑀘𑀧𑀢𑀺𑀝𑁆𑀞𑀺𑀢𑁂𑀦 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀇𑀫𑁂, 𑀪𑀦𑁆𑀢𑁂, 𑀢𑀬𑁄 𑀯𑀺𑀳𑀸𑀭𑀸 𑀢𑀼𑀫𑁆𑀳𑁂 𑀉𑀤𑁆𑀤𑀺𑀲𑁆𑀲 𑀓𑀢𑀸, 𑀧𑀝𑀺𑀕𑁆𑀕𑀡𑁆𑀳𑀣, 𑀪𑀦𑁆𑀢𑁂, 𑀯𑀺𑀳𑀸𑀭𑁂 𑀘𑀸𑀢𑀼𑀤𑁆𑀤𑀺𑀲𑀲𑁆𑀲 𑀲𑀗𑁆𑀖𑀲𑁆𑀲 𑀲𑀗𑁆𑀕𑀳𑀢𑁆𑀣𑀸𑀬𑀸’’𑀢𑀺. 𑀧𑀝𑀺𑀕𑁆𑀕𑀳𑁂𑀲𑀺 𑀪𑀕𑀯𑀸 𑀯𑀺𑀳𑀸𑀭𑁂. 𑀢𑁂𑀧𑀺 𑀲𑁂𑀝𑁆𑀞𑀺𑀦𑁄 𑀲𑀢𑁆𑀣𑀸𑀭𑀁 𑀲𑁆𑀯𑀸𑀢𑀦𑀸𑀬 𑀦𑀺𑀫𑀦𑁆𑀢𑁂𑀢𑁆𑀯𑀸 𑀅𑀪𑀺𑀯𑀸𑀤𑁂𑀢𑁆𑀯𑀸 𑀖𑀭𑀁 𑀅𑀕𑀫𑀁𑀲𑀼.

𑀫𑀸𑀕𑀡𑁆𑀟𑀺𑀬𑀸𑀧𑀺 𑀔𑁄 𑀲𑀢𑁆𑀣𑀼 𑀆𑀕𑀢𑀪𑀸𑀯𑀁 𑀲𑀼𑀢𑁆𑀯𑀸 𑀙𑀺𑀦𑁆𑀦𑀪𑀺𑀦𑁆𑀦𑀓𑁂 𑀥𑀼𑀢𑁆𑀢𑁂 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀢𑁂𑀲𑀁 𑀮𑀜𑁆𑀚𑀁 𑀤𑀢𑁆𑀯𑀸 ‘‘𑀢𑀼𑀫𑁆𑀳𑁂 𑀲𑀫𑀡𑀁 𑀕𑁄𑀢𑀫𑀁 𑀇𑀫𑀺𑀦𑀸 𑀇𑀫𑀺𑀦𑀸 𑀘 𑀦𑀺𑀬𑀸𑀫𑁂𑀦 𑀅𑀓𑁆𑀓𑁄𑀲𑀣𑀸’’𑀢𑀺 𑀯𑀢𑁆𑀯𑀸 𑀉𑀬𑁆𑀬𑁄𑀚𑁂𑀲𑀺. 𑀢𑁂 𑀲𑀢𑁆𑀣𑀼 𑀅𑀦𑁆𑀢𑁄𑀕𑀸𑀫𑀁 𑀧𑀯𑀺𑀲𑀦𑀯𑁂𑀮𑀸𑀬 𑀲𑀧𑀭𑀺𑀯𑀸𑀭𑀁 𑀲𑀢𑁆𑀣𑀸𑀭𑀁 𑀦𑀸𑀦𑀸𑀯𑀺𑀥𑁂𑀳𑀺 𑀅𑀓𑁆𑀓𑁄𑀲𑁂𑀳𑀺 𑀅𑀓𑁆𑀓𑁄𑀲𑀺𑀁𑀲𑀼. 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀲𑀢𑁆𑀣𑀸𑀭𑀁 𑀆𑀳 𑁋 ‘‘𑀪𑀦𑁆𑀢𑁂, 𑀏𑀯𑀭𑀽𑀧𑁂 𑀅𑀓𑁆𑀓𑁄𑀲𑀦𑀝𑁆𑀞𑀸𑀦𑁂 𑀦 𑀯𑀲𑀺𑀲𑁆𑀲𑀸𑀫, 𑀅𑀜𑁆𑀜𑀁 𑀦𑀕𑀭𑀁 𑀕𑀘𑁆𑀙𑀸𑀫𑀸’’𑀢𑀺. 𑀲𑀢𑁆𑀣𑀸, ‘‘𑀆𑀦𑀦𑁆𑀤, 𑀢𑀣𑀸𑀕𑀢𑀸 𑀦𑀸𑀫 𑀅𑀝𑁆𑀞𑀳𑀺 𑀮𑁄𑀓𑀥𑀫𑁆𑀫𑁂𑀳𑀺 𑀦 𑀓𑀫𑁆𑀧𑀦𑁆𑀢𑀺, 𑀅𑀬𑀫𑁆𑀧𑀺 𑀲𑀤𑁆𑀤𑁄 𑀲𑀢𑁆𑀢𑀸𑀳𑀁 𑀦𑀸𑀢𑀺𑀓𑁆𑀓𑀫𑀺𑀲𑁆𑀲𑀢𑀺, 𑀅𑀓𑁆𑀓𑁄𑀲𑀓𑀸𑀦𑀁𑀬𑁂𑀯 𑀉𑀧𑀭𑀺 𑀧𑀢𑀺𑀲𑁆𑀲𑀢𑀺, 𑀢𑁆𑀯𑀁 𑀫𑀸 𑀯𑀺𑀢𑀓𑁆𑀓𑀬𑀺𑀢𑁆𑀣𑀸’’𑀢𑀺. 𑀢𑁂𑀧𑀺 𑀢𑀬𑁄 𑀦𑀕𑀭𑀲𑁂𑀝𑁆𑀞𑀺𑀦𑁄 𑀫𑀳𑀸𑀲𑀓𑁆𑀓𑀸𑀭𑁂𑀦 𑀪𑀕𑀯𑀦𑁆𑀢𑀁 𑀧𑀯𑁂𑀲𑁂𑀢𑁆𑀯𑀸 𑀫𑀳𑀸𑀤𑀸𑀦𑀁 𑀅𑀤𑀁𑀲𑀼. 𑀢𑁂𑀲𑀁 𑀅𑀧𑀭𑀸𑀧𑀭𑀁 𑀤𑀸𑀦𑀁 𑀤𑀤𑀦𑁆𑀢𑀸𑀦𑀁𑀬𑁂𑀯 𑀫𑀸𑀲𑁄 𑀅𑀢𑀺𑀓𑁆𑀓𑀫𑀺, 𑀅𑀣 𑀦𑁂𑀲𑀁 𑀏𑀢𑀤𑀳𑁄𑀲𑀺 𑁋 ‘‘𑀩𑀼𑀤𑁆𑀥𑀸 𑀦𑀸𑀫 𑀲𑀩𑁆𑀩𑀮𑁄𑀓𑀁 𑀅𑀦𑀼𑀓𑀫𑁆𑀧𑀫𑀸𑀦𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀅𑀜𑁆𑀜𑁂𑀲𑀫𑁆𑀧𑀺 𑀑𑀓𑀸𑀲𑀁 𑀤𑀲𑁆𑀲𑀸𑀫𑀸’’𑀢𑀺. 𑀢𑀢𑁄 𑀢𑁂 𑀓𑁄𑀲𑀫𑁆𑀩𑀺𑀦𑀕𑀭𑀯𑀸𑀲𑀺𑀦𑁄𑀧𑀺 𑀚𑀦𑀲𑁆𑀲 𑀑𑀓𑀸𑀲𑀁 𑀅𑀓𑀁𑀲𑀼. 𑀢𑀢𑁄 𑀧𑀝𑁆𑀞𑀸𑀬 𑀦𑀸𑀕𑀭𑀸𑀧𑀺 𑀯𑀻𑀣𑀺𑀲𑀪𑀸𑀕𑁂𑀦 𑀕𑀡𑀲𑀪𑀸𑀕𑁂𑀦 𑀫𑀳𑀸𑀤𑀸𑀦𑀁 𑀤𑁂𑀦𑁆𑀢𑀺.

𑀅𑀣𑁂𑀓𑀤𑀺𑀯𑀲𑀁 𑀲𑀢𑁆𑀣𑀸 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑁄 𑀫𑀸𑀮𑀸𑀓𑀸𑀭𑀓𑀚𑁂𑀝𑁆𑀞𑀓𑀲𑁆𑀲 𑀕𑁂𑀳𑁂 𑀦𑀺𑀲𑀻𑀤𑀺. 𑀢𑀲𑁆𑀫𑀺𑀁 𑀔𑀡𑁂 𑀲𑀸𑀫𑀸𑀯𑀢𑀺𑀬𑀸 𑀉𑀧𑀝𑁆𑀞𑀸𑀬𑀺𑀓𑀸 𑀔𑀼𑀚𑁆𑀚𑀼𑀢𑁆𑀢𑀭𑀸 𑀅𑀝𑁆𑀞 𑀓𑀳𑀸𑀧𑀡𑁂 𑀆𑀤𑀸𑀬 𑀫𑀸𑀮𑀢𑁆𑀣𑀸𑀬 𑀢𑀁 𑀕𑁂𑀳𑀁 𑀅𑀕𑀫𑀸𑀲𑀺. 𑀫𑀸𑀮𑀸𑀓𑀸𑀭𑀚𑁂𑀝𑁆𑀞𑀓𑁄 𑀢𑀁 𑀤𑀺𑀲𑁆𑀯𑀸, ‘‘𑀅𑀫𑁆𑀫 𑀉𑀢𑁆𑀢𑀭𑁂, 𑀅𑀚𑁆𑀚 𑀢𑀼𑀬𑁆𑀳𑀁 𑀧𑀼𑀧𑁆𑀨𑀸𑀦𑀺 𑀤𑀸𑀢𑀼𑀁 𑀔𑀡𑁄 𑀦𑀢𑁆𑀣𑀺, 𑀅𑀳𑀁 𑀩𑀼𑀤𑁆𑀥𑀧𑁆𑀧𑀫𑀼𑀔𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀭𑀺𑀯𑀺𑀲𑀸𑀫𑀺. 𑀢𑁆𑀯𑀫𑁆𑀧𑀺 𑀧𑀭𑀺𑀯𑁂𑀲𑀦𑀸𑀬 𑀲𑀳𑀸𑀬𑀺𑀓𑀸 𑀳𑁄𑀳𑀺, 𑀏𑀯𑀁 𑀇𑀢𑁄 𑀧𑀭𑁂𑀲𑀁 𑀯𑁂𑀬𑁆𑀬𑀸𑀯𑀘𑁆𑀘𑀓𑀭𑀡𑀢𑁄 𑀫𑀼𑀘𑁆𑀘𑀺𑀲𑁆𑀲𑀢𑀻’’𑀢𑀺 𑀆𑀳. 𑀢𑀢𑁄 𑀔𑀼𑀚𑁆𑀚𑀼𑀢𑁆𑀢𑀭𑀸 𑀅𑀢𑁆𑀢𑀦𑀸 𑀮𑀤𑁆𑀥𑀁 𑀪𑁄𑀚𑀦𑀁 𑀪𑀼𑀜𑁆𑀚𑀺𑀢𑁆𑀯𑀸 𑀩𑀼𑀤𑁆𑀥𑀸𑀦𑀁 𑀪𑀢𑁆𑀢𑀕𑁆𑀕𑁂 𑀯𑁂𑀬𑁆𑀬𑀸𑀯𑀘𑁆𑀘𑀁 𑀅𑀓𑀸𑀲𑀺. 𑀲𑀸 𑀲𑀢𑁆𑀣𑀸𑀭𑀸 𑀉𑀧𑀦𑀺𑀲𑀺𑀦𑁆𑀦𑀓𑀣𑀸𑀯𑀲𑁂𑀦 𑀓𑀣𑀺𑀢𑀁 𑀥𑀫𑁆𑀫𑀁 𑀲𑀩𑁆𑀩𑀫𑁂𑀯 𑀉𑀕𑁆𑀕𑀡𑁆𑀳𑀺. 𑀅𑀦𑀼𑀫𑁄𑀤𑀦𑀁 𑀧𑀦 𑀲𑀼𑀢𑁆𑀯𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀸𑀲𑀺.

𑀲𑀸 𑀅𑀜𑁆𑀜𑁂𑀲𑀼 𑀤𑀺𑀯𑀲𑁂𑀲𑀼 𑀘𑀢𑁆𑀢𑀸𑀭𑁄𑀯 𑀓𑀳𑀸𑀧𑀡𑁂 𑀤𑀢𑁆𑀯𑀸 𑀧𑀼𑀧𑁆𑀨𑀸𑀦𑀺 𑀕𑀳𑁂𑀢𑁆𑀯𑀸 𑀕𑀘𑁆𑀙𑀢𑀺, 𑀢𑀲𑁆𑀫𑀺𑀁 𑀧𑀦 𑀤𑀺𑀯𑀲𑁂 𑀤𑀺𑀝𑁆𑀞𑀲𑀘𑁆𑀘𑀪𑀸𑀯𑁂𑀦 𑀧𑀭𑀲𑀦𑁆𑀢𑀓𑁂 𑀘𑀺𑀢𑁆𑀢𑀁 𑀅𑀦𑀼𑀧𑁆𑀧𑀸𑀤𑁂𑀢𑁆𑀯𑀸 𑀲𑀩𑁆𑀩𑁂𑀯 𑀅𑀝𑁆𑀞 𑀓𑀳𑀸𑀧𑀡𑁂 𑀤𑀢𑁆𑀯𑀸 𑀧𑀘𑁆𑀙𑀺𑀁 𑀧𑀽𑀭𑁂𑀢𑁆𑀯𑀸 𑀧𑀼𑀧𑁆𑀨𑀸𑀦𑀺 𑀆𑀤𑀸𑀬 𑀲𑀸𑀫𑀸𑀯𑀢𑀺𑀬𑀸 𑀲𑀦𑁆𑀢𑀺𑀓𑀁 𑀅𑀕𑀫𑀸𑀲𑀺. 𑀅𑀣 𑀦𑀁 𑀲𑀸 𑀧𑀼𑀘𑁆𑀙𑀺 𑁋 ‘‘𑀅𑀫𑁆𑀫 𑀉𑀢𑁆𑀢𑀭𑁂, 𑀢𑁆𑀯𑀁 𑀅𑀜𑁆𑀜𑁂𑀲𑀼 𑀤𑀺𑀯𑀲𑁂𑀲𑀼 𑀦 𑀩𑀳𑀽𑀦𑀺 𑀧𑀼𑀧𑁆𑀨𑀸𑀦𑀺 𑀆𑀳𑀭𑀲𑀺, 𑀅𑀚𑁆𑀚 𑀧𑀦 𑀩𑀳𑀼𑀓𑀸𑀦𑀺, 𑀓𑀺𑀁 𑀦𑁄 𑀭𑀸𑀚𑀸 𑀉𑀢𑁆𑀢𑀭𑀺𑀢𑀭𑀁 𑀧𑀲𑀦𑁆𑀦𑁄’’𑀢𑀺? 𑀲𑀸 𑀫𑀼𑀲𑀸𑀯𑀸𑀤𑁂 𑀅𑀪𑀩𑁆𑀩𑀢𑀸𑀬 𑀅𑀢𑀻𑀢𑁂 𑀅𑀢𑁆𑀢𑀦𑀸 𑀓𑀢𑀁 𑀅𑀦𑀺𑀕𑀼𑀳𑀺𑀢𑁆𑀯𑀸 𑀲𑀩𑁆𑀩𑀁 𑀓𑀣𑁂𑀲𑀺. ‘‘𑀅𑀣 𑀓𑀲𑁆𑀫𑀸 𑀅𑀚𑁆𑀚 𑀩𑀳𑀽𑀦𑀺 𑀧𑀼𑀧𑁆𑀨𑀸𑀦𑀺 𑀆𑀳𑀭𑀲𑀻’’𑀢𑀺 𑀯𑀼𑀢𑁆𑀢𑀸 𑀘 𑀏𑀯𑀫𑀸𑀳 𑁋 ‘‘𑀅𑀳𑀁 𑀅𑀚𑁆𑀚 𑀤𑀲𑀩𑀮𑀲𑁆𑀲 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀅𑀫𑀢𑀁 𑀲𑀘𑁆𑀙𑀸𑀓𑀸𑀲𑀺𑀁, 𑀢𑀲𑁆𑀫𑀸 𑀢𑀼𑀫𑁆𑀳𑁂 𑀦 𑀯𑀜𑁆𑀘𑁂𑀫𑀻’’𑀢𑀺. 𑀢𑀁 𑀲𑀼𑀢𑁆𑀯𑀸, ‘‘𑀅𑀫𑁆𑀫 𑀉𑀢𑁆𑀢𑀭𑁂, 𑀢𑀬𑀸 𑀮𑀤𑁆𑀥𑀁 𑀅𑀫𑀢𑀥𑀫𑁆𑀫𑀁 𑀅𑀫𑁆𑀳𑀸𑀓𑀫𑁆𑀧𑀺 𑀤𑁂𑀳𑀻’’𑀢𑀺 𑀲𑀩𑁆𑀩𑀸𑀯 𑀳𑀢𑁆𑀣𑀁 𑀧𑀲𑀸𑀭𑀬𑀺𑀁𑀲𑀼. 𑀅𑀬𑁆𑀬𑁂, 𑀏𑀯𑀁 𑀤𑀸𑀢𑀼𑀁 𑀦 𑀲𑀓𑁆𑀓𑀸, 𑀅𑀳𑀁 𑀧𑀦 𑀲𑀢𑁆𑀣𑀸𑀭𑀸 𑀓𑀣𑀺𑀢𑀦𑀺𑀬𑀸𑀫𑁂𑀦 𑀢𑀼𑀫𑁆𑀳𑀸𑀓𑀁 𑀥𑀫𑁆𑀫𑀁 𑀤𑁂𑀲𑁂𑀲𑁆𑀲𑀸𑀫𑀺, 𑀢𑀼𑀫𑁆𑀳𑁂 𑀅𑀢𑁆𑀢𑀦𑁄 𑀳𑁂𑀢𑀼𑀫𑁆𑀳𑀺 𑀲𑀢𑀺 𑀢𑀁 𑀥𑀫𑁆𑀫𑀁 𑀮𑀪𑀺𑀲𑁆𑀲𑀣𑀸𑀢𑀺. 𑀢𑁂𑀦 𑀳𑀺, 𑀅𑀫𑁆𑀫 𑀉𑀢𑁆𑀢𑀭𑁂, 𑀓𑀣𑁂𑀳𑀻𑀢𑀺. ‘‘𑀏𑀯𑀁 𑀓𑀣𑁂𑀢𑀼𑀁 𑀦 𑀲𑀓𑁆𑀓𑀸, 𑀫𑀬𑁆𑀳𑀁 𑀉𑀘𑁆𑀘𑀁 𑀆𑀲𑀦𑀁 𑀧𑀜𑁆𑀜𑀸𑀧𑁂𑀢𑁆𑀯𑀸 𑀢𑀼𑀫𑁆𑀳𑁂 𑀦𑀻𑀘𑀸𑀲𑀦𑁂𑀲𑀼 𑀦𑀺𑀲𑀻𑀤𑀣𑀸’’𑀢𑀺 𑀆𑀳. 𑀢𑀸 𑀧𑀜𑁆𑀘𑀲𑀢𑀸𑀧𑀺 𑀇𑀢𑁆𑀣𑀺𑀬𑁄 𑀔𑀼𑀚𑁆𑀚𑀼𑀢𑁆𑀢𑀭𑀸𑀬 𑀉𑀘𑁆𑀘𑀸𑀲𑀦𑀁 𑀤𑀢𑁆𑀯𑀸 𑀲𑀬𑀁 𑀦𑀻𑀘𑀸𑀲𑀦𑀸𑀦𑀺 𑀕𑀳𑁂𑀢𑁆𑀯𑀸 𑀦𑀺𑀲𑀻𑀤𑀺𑀁𑀲𑀼. 𑀔𑀼𑀚𑁆𑀚𑀼𑀢𑁆𑀢𑀭𑀸𑀧𑀺 𑀲𑁂𑀓𑁆𑀔𑀧𑀝𑀺𑀲𑀫𑁆𑀪𑀺𑀤𑀸𑀲𑀼 𑀞𑀢𑁆𑀯𑀸 𑀢𑀸𑀲𑀁 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀲𑀸𑀫𑀸𑀯𑀢𑀺𑀁 𑀚𑁂𑀝𑁆𑀞𑀺𑀓𑀁 𑀓𑀢𑁆𑀯𑀸 𑀲𑀩𑁆𑀩𑀸𑀯 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺𑀁𑀲𑀼. 𑀢𑀢𑁄 𑀧𑀝𑁆𑀞𑀸𑀬 𑀔𑀼𑀚𑁆𑀚𑀼𑀢𑁆𑀢𑀭𑀁 𑀯𑁂𑀬𑁆𑀬𑀸𑀯𑀘𑁆𑀘𑀓𑀭𑀡𑀢𑁄 𑀅𑀧𑀦𑁂𑀢𑁆𑀯𑀸 ‘‘𑀢𑁆𑀯𑀁 𑀲𑀢𑁆𑀣𑀼 𑀥𑀫𑁆𑀫𑀓𑀣𑀁 𑀲𑀼𑀢𑁆𑀯𑀸 𑀆𑀳𑀭𑀺𑀢𑁆𑀯𑀸 𑀅𑀫𑁆𑀳𑁂 𑀲𑀸𑀯𑁂𑀳𑀻’’𑀢𑀺 𑀆𑀳𑀁𑀲𑀼. 𑀔𑀼𑀚𑁆𑀚𑀼𑀢𑁆𑀢𑀭𑀸𑀧𑀺 𑀢𑀢𑁄 𑀧𑀝𑁆𑀞𑀸𑀬 𑀢𑀣𑀸 𑀅𑀓𑀸𑀲𑀺.

𑀓𑀲𑁆𑀫𑀸 𑀧𑀦𑁂𑀲𑀸 𑀤𑀸𑀲𑀻 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀸𑀢𑀺? 𑀲𑀸 𑀓𑀺𑀭 𑀓𑀲𑁆𑀲𑀧𑀤𑀲𑀩𑀮𑀲𑁆𑀲 𑀲𑀸𑀲𑀦𑁂 𑀏𑀓𑀸𑀬 𑀲𑀸𑀫𑀡𑁂𑀭𑀺𑀬𑀸 𑀅𑀢𑁆𑀢𑀦𑁄 𑀯𑁂𑀬𑁆𑀬𑀸𑀯𑀘𑁆𑀘𑀁 𑀓𑀸𑀭𑁂𑀲𑀺. 𑀢𑁂𑀦 𑀓𑀫𑁆𑀫𑁂𑀦 𑀧𑀜𑁆𑀘 𑀚𑀸𑀢𑀺𑀲𑀢𑀸𑀦𑀺 𑀧𑀭𑁂𑀲𑀁 𑀤𑀸𑀲𑀻𑀬𑁂𑀯 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀓𑀲𑁆𑀫𑀸 𑀧𑀦 𑀔𑀼𑀚𑁆𑀚𑀸 𑀅𑀳𑁄𑀲𑀻𑀢𑀺? 𑀅𑀦𑀼𑀧𑁆𑀧𑀦𑁆𑀦𑁂 𑀓𑀺𑀭 𑀩𑀼𑀤𑁆𑀥𑁂 𑀅𑀬𑀁 𑀩𑀸𑀭𑀸𑀡𑀲𑀺𑀭𑀜𑁆𑀜𑁄 𑀕𑁂𑀳𑁂 𑀯𑀲𑀦𑁆𑀢𑀻 𑀏𑀓𑀁 𑀭𑀸𑀚𑀓𑀼𑀮𑀽𑀧𑀓𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑀁 𑀔𑀼𑀚𑁆𑀚𑀥𑀸𑀢𑀼𑀓𑀁 𑀤𑀺𑀲𑁆𑀯𑀸 𑀅𑀢𑁆𑀢𑀦𑀸 𑀲𑀳𑀯𑀸𑀲𑀻𑀦𑀁 𑀫𑀸𑀢𑀼𑀕𑀸𑀫𑀸𑀦𑀁 𑀧𑀼𑀭𑀢𑁄 𑀧𑀭𑀺𑀳𑀸𑀲𑀁 𑀓𑀭𑁄𑀦𑁆𑀢𑀻 𑀔𑀼𑀚𑁆𑀚𑀸𑀓𑀸𑀭𑁂𑀦 𑀯𑀺𑀘𑀭𑀺. 𑀢𑀲𑁆𑀫𑀸 𑀔𑀼𑀚𑁆𑀚𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀓𑀺𑀁 𑀧𑀦 𑀓𑀢𑁆𑀯𑀸 𑀲𑀸 𑀧𑀜𑁆𑀜𑀯𑀦𑁆𑀢𑀻 𑀚𑀸𑀢𑀸𑀢𑀺? 𑀅𑀦𑀼𑀧𑁆𑀧𑀦𑁆𑀦𑁂 𑀩𑀼𑀤𑁆𑀥𑁂 𑀅𑀬𑀁 𑀩𑀸𑀭𑀸𑀡𑀲𑀺𑀭𑀜𑁆𑀜𑁄 𑀕𑁂𑀳𑁂 𑀯𑀲𑀦𑁆𑀢𑀻 𑀅𑀝𑁆𑀞 𑀧𑀘𑁆𑀘𑁂𑀓𑀩𑀼𑀤𑁆𑀥𑁂 𑀭𑀸𑀚𑀕𑁂𑀳𑀢𑁄 𑀉𑀡𑁆𑀳𑀧𑀸𑀬𑀸𑀲𑀲𑁆𑀲 𑀧𑀽𑀭𑀺𑀢𑁂 𑀧𑀢𑁆𑀢𑁂 𑀕𑀳𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑁂 𑀤𑀺𑀲𑁆𑀯𑀸 ‘‘𑀏𑀢𑁆𑀣 𑀞𑀧𑁂𑀢𑁆𑀯𑀸 𑀕𑀘𑁆𑀙𑀣, 𑀪𑀦𑁆𑀢𑁂’’𑀢𑀺 𑀅𑀝𑁆𑀞 𑀲𑀼𑀯𑀡𑁆𑀡𑀓𑀝𑀓𑁂 𑀑𑀫𑀼𑀜𑁆𑀘𑀺𑀢𑁆𑀯𑀸 𑀅𑀤𑀸𑀲𑀺. 𑀢𑀲𑁆𑀲 𑀓𑀫𑁆𑀫𑀲𑁆𑀲 𑀦𑀺𑀲𑁆𑀲𑀦𑁆𑀤𑁂𑀦 𑀧𑀜𑁆𑀜𑀯𑀦𑁆𑀢𑀻 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺.

𑀅𑀣 𑀔𑁄 𑀢𑀸 𑀲𑀸𑀫𑀸𑀯𑀢𑀺𑀬𑀸 𑀧𑀭𑀺𑀯𑀸𑀭𑀸 𑀧𑀜𑁆𑀘𑀲𑀢𑀸 𑀇𑀢𑁆𑀣𑀺𑀬𑁄 𑀧𑀝𑀺𑀯𑀺𑀤𑁆𑀥𑀲𑀘𑁆𑀘𑀸𑀧𑀺 𑀲𑀫𑀸𑀦𑀸 𑀭𑀜𑁆𑀜𑁄 𑀅𑀲𑁆𑀲𑀤𑁆𑀥𑀪𑀸𑀯𑁂𑀦 𑀓𑀸𑀮𑁂𑀦 𑀓𑀸𑀮𑀁 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀩𑀼𑀤𑁆𑀥𑀤𑀲𑁆𑀲𑀦𑀁 𑀦 𑀮𑀪𑀦𑁆𑀢𑀺. 𑀢𑀲𑁆𑀫𑀸 𑀤𑀲𑀩𑀮𑁂 𑀅𑀦𑁆𑀢𑀭𑀯𑀻𑀣𑀺𑀁 𑀧𑀝𑀺𑀧𑀦𑁆𑀦𑁂 𑀯𑀸𑀢𑀧𑀸𑀦𑁂𑀲𑀼 𑀦𑀧𑁆𑀧𑀳𑁄𑀦𑁆𑀢𑁂𑀲𑀼 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀕𑀩𑁆𑀪𑁂𑀲𑀼 𑀙𑀺𑀤𑁆𑀤𑀁 𑀓𑀢𑁆𑀯𑀸 𑀢𑁂𑀳𑀺 𑀑𑀮𑁄𑀓𑁂𑀦𑁆𑀢𑀺. 𑀅𑀣𑁂𑀓𑀤𑀺𑀯𑀲𑀁 𑀫𑀸𑀕𑀡𑁆𑀟𑀺𑀬𑀸 𑀅𑀢𑁆𑀢𑀦𑁄 𑀧𑀸𑀲𑀸𑀤𑀢𑀮𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀘𑀗𑁆𑀓𑀫𑀫𑀸𑀦𑀸 𑀢𑀸𑀲𑀁 𑀯𑀲𑀦𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀕𑀩𑁆𑀪𑀘𑁆𑀙𑀺𑀤𑁆𑀤𑀁 𑀤𑀺𑀲𑁆𑀯𑀸 ‘‘𑀓𑀺𑀫𑀺𑀤’’𑀦𑁆𑀢𑀺 𑀧𑀼𑀘𑁆𑀙𑀺. 𑀢𑀸𑀳𑀺 𑀢𑀲𑁆𑀲𑀸 𑀲𑀢𑁆𑀣𑀭𑀺 𑀩𑀤𑁆𑀥𑀸𑀖𑀸𑀢𑀢𑀁 𑀅𑀚𑀸𑀦𑀦𑁆𑀢𑀻𑀳𑀺 𑁋 ‘‘𑀲𑀢𑁆𑀣𑀸 𑀇𑀫𑀁 𑀦𑀕𑀭𑀁 𑀆𑀕𑀢𑁄, 𑀫𑀬𑀁 𑀏𑀢𑁆𑀣 𑀞𑀢𑁆𑀯𑀸 𑀲𑀢𑁆𑀣𑀸𑀭𑀁 𑀧𑀲𑁆𑀲𑀸𑀫 𑀘𑁂𑀯 𑀧𑀽𑀚𑁂𑀫 𑀘𑀸’’𑀢𑀺 𑀯𑀼𑀢𑁆𑀢𑁂 ‘‘𑀇𑀤𑀸𑀦𑀺𑀲𑁆𑀲 𑀓𑀢𑁆𑀢𑀩𑁆𑀩𑀁 𑀚𑀸𑀦𑀺𑀲𑁆𑀲𑀸𑀫𑀺, 𑀇𑀫𑀸𑀧𑀺 𑀢𑀲𑁆𑀲 𑀉𑀧𑀝𑁆𑀞𑀸𑀬𑀺𑀓𑀸, 𑀇𑀫𑀸𑀲𑀫𑁆𑀧𑀺 𑀓𑀢𑁆𑀢𑀩𑁆𑀩𑀁 𑀚𑀸𑀦𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀕𑀦𑁆𑀢𑁆𑀯𑀸 𑀭𑀜𑁆𑀜𑀸 𑀲𑀤𑁆𑀥𑀺𑀁 𑀭𑀳𑁄𑀕𑀢𑀓𑀸𑀮𑁂, ‘‘𑀫𑀳𑀸𑀭𑀸𑀚, 𑀲𑀸𑀫𑀸𑀯𑀢𑀺𑀫𑀺𑀲𑁆𑀲𑀓𑀸𑀦𑀁 𑀩𑀳𑀺𑀤𑁆𑀥𑀸 𑀧𑀢𑁆𑀣𑀦𑀸 𑀅𑀢𑁆𑀣𑀺, 𑀓𑀢𑀺𑀧𑀸𑀳𑁂𑀦𑁂𑀯 𑀢𑁂 𑀚𑀻𑀯𑀺𑀢𑀁 𑀫𑀸𑀭𑁂𑀲𑁆𑀲𑀦𑁆𑀢𑀺, 𑀲𑀸𑀫𑀸𑀯𑀢𑀻, 𑀲𑀧𑀭𑀺𑀯𑀸𑀭𑀸 𑀢𑀼𑀫𑁆𑀳𑁂𑀲𑀼 𑀲𑀺𑀦𑁂𑀳𑀁 𑀯𑀸 𑀧𑁂𑀫𑀁 𑀯𑀸 𑀦 𑀓𑀭𑁄𑀢𑀺, 𑀲𑀫𑀡𑀁 𑀧𑀦 𑀕𑁄𑀢𑀫𑀁 𑀅𑀦𑁆𑀢𑀭𑀯𑀻𑀣𑀺𑀬𑀸 𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 𑀯𑀸𑀢𑀧𑀸𑀦𑁂𑀲𑀼 𑀅𑀧𑁆𑀧𑀳𑁄𑀦𑁆𑀢𑁂𑀲𑀼 𑀢𑀸𑀦𑀺 𑀔𑀡𑁆𑀟𑀺𑀢𑁆𑀯𑀸𑀧𑀺 𑀑𑀓𑀸𑀲𑀁 𑀓𑀢𑁆𑀯𑀸 𑀑𑀮𑁄𑀓𑁂𑀦𑁆𑀢𑀻’’𑀢𑀺 𑀆𑀳. 𑀭𑀸𑀚𑀸 ‘‘𑀦 𑀢𑀸 𑀏𑀯𑀭𑀽𑀧𑀁 𑀓𑀭𑀺𑀲𑁆𑀲𑀦𑁆𑀢𑀻’’𑀢𑀺 𑀦 𑀲𑀤𑁆𑀤𑀳𑀢𑀺. 𑀧𑀼𑀦 𑀯𑀼𑀢𑁆𑀢𑁂𑀧𑀺 𑀦 𑀲𑀤𑁆𑀤𑀳𑀢𑀺𑀬𑁂𑀯. 𑀅𑀣 𑀦𑀁 𑀢𑀺𑀓𑁆𑀔𑀢𑁆𑀢𑀼𑀁 𑀯𑀼𑀢𑁆𑀢𑁂𑀧𑀺 𑀅𑀲𑁆𑀲𑀤𑁆𑀤𑀳𑀦𑁆𑀢𑀁 ‘‘𑀲𑀘𑁂 𑀫𑁂 𑀯𑀘𑀦𑀁 𑀦 𑀲𑀤𑁆𑀤𑀳𑀲𑀺, 𑀢𑀸𑀲𑀁 𑀯𑀲𑀦𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀉𑀧𑀥𑀸𑀭𑁂𑀳𑀺, 𑀫𑀳𑀸𑀭𑀸𑀚𑀸’’𑀢𑀺 𑀆𑀳. 𑀭𑀸𑀚𑀸 𑀕𑀦𑁆𑀢𑁆𑀯𑀸 𑀕𑀩𑁆𑀪𑁂𑀲𑀼 𑀙𑀺𑀤𑁆𑀤𑀁 𑀤𑀺𑀲𑁆𑀯𑀸 ‘‘𑀇𑀤𑀁 𑀓𑀺’’𑀦𑁆𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑀢𑀲𑁆𑀫𑀺𑀁 𑀅𑀢𑁆𑀣𑁂 𑀆𑀭𑁄𑀘𑀺𑀢𑁂 𑀢𑀸𑀲𑀁 𑀅𑀓𑁆𑀓𑀼𑀚𑁆𑀛𑀺𑀢𑁆𑀯𑀸 𑀓𑀺𑀜𑁆𑀘𑀺 𑀅𑀯𑀢𑁆𑀯𑀸 𑀙𑀺𑀤𑁆𑀤𑀸𑀦𑀺 𑀧𑀺𑀤𑀳𑀸𑀧𑁂𑀲𑀺. 𑀭𑀸𑀚𑀸 𑀢𑀢𑁄 𑀧𑀝𑁆𑀞𑀸𑀬 𑀢𑀸𑀲𑀁 𑀧𑀸𑀲𑀸𑀤𑁂 𑀉𑀤𑁆𑀥𑀘𑁆𑀙𑀺𑀤𑁆𑀤𑀓𑀚𑀸𑀮𑀯𑀸𑀢𑀧𑀸𑀦𑀸𑀦𑀺 𑀓𑀸𑀭𑁂𑀲𑀺.

𑀲𑀸 𑀢𑁂𑀦 𑀓𑀸𑀭𑀡𑁂𑀦 𑀭𑀸𑀚𑀸𑀦𑀁 𑀓𑁄𑀧𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀻, ‘‘𑀤𑁂𑀯, 𑀏𑀢𑀸𑀲𑀁 𑀢𑀼𑀫𑁆𑀳𑁂𑀲𑀼 𑀧𑁂𑀫𑀁 𑀅𑀢𑁆𑀣𑀺 𑀯𑀸 𑀦𑀢𑁆𑀣𑀺 𑀯𑀸𑀢𑀺 𑀚𑀸𑀦𑀺𑀲𑁆𑀲𑀸𑀫, 𑀅𑀝𑁆𑀞 𑀓𑀼𑀓𑁆𑀓𑀼𑀝𑁂 𑀧𑁂𑀲𑁂𑀢𑁆𑀯𑀸 𑀢𑀼𑀫𑁆𑀳𑀸𑀓𑀁 𑀅𑀢𑁆𑀣𑀸𑀬 𑀧𑀘𑀸𑀧𑁂𑀣𑀸’’𑀢𑀺 𑀆𑀳. 𑀭𑀸𑀚𑀸 𑀢𑀲𑁆𑀲𑀸 𑀯𑀘𑀦𑀁 𑀲𑀼𑀢𑁆𑀯𑀸 ‘‘𑀇𑀫𑁂 𑀧𑀘𑀺𑀢𑁆𑀯𑀸 𑀧𑁂𑀲𑁂𑀢𑀽’’𑀢𑀺 𑀲𑀸𑀫𑀸𑀯𑀢𑀺𑀬𑀸 𑀅𑀝𑁆𑀞 𑀓𑀼𑀓𑁆𑀓𑀼𑀝𑁂 𑀧𑀳𑀺𑀡𑀺. 𑀲𑁄𑀢𑀸𑀧𑀦𑁆𑀦𑀸 𑀅𑀭𑀺𑀬𑀲𑀸𑀯𑀺𑀓𑀸 𑀚𑀻𑀯𑀫𑀸𑀦𑁂 𑀓𑀼𑀓𑁆𑀓𑀼𑀝𑁂 𑀓𑀺𑀁 𑀧𑀘𑀺𑀲𑁆𑀲𑀢𑀺, 𑀅𑀮𑀦𑁆𑀢𑀺 𑀯𑀢𑁆𑀯𑀸 𑀧𑀦 𑀳𑀢𑁆𑀣𑁂𑀦𑀧𑀺 𑀨𑀼𑀲𑀺𑀢𑀼𑀁 𑀦 𑀇𑀘𑁆𑀙𑀺. 𑀫𑀸𑀕𑀡𑁆𑀟𑀺𑀬𑀸 ‘‘𑀳𑁄𑀢𑀼, 𑀫𑀳𑀸𑀭𑀸𑀚, 𑀏𑀢𑁂𑀬𑁂𑀯 𑀘 𑀓𑀼𑀓𑁆𑀓𑀼𑀝𑁂 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀧𑀘𑀦𑀢𑁆𑀣𑀸𑀬 𑀧𑁂𑀲𑁂𑀳𑀻’’𑀢𑀺. 𑀭𑀸𑀚𑀸 𑀢𑀣𑀸 𑀅𑀓𑀸𑀲𑀺. 𑀫𑀸𑀕𑀡𑁆𑀟𑀺𑀬𑀸 𑀅𑀦𑁆𑀢𑀭𑀸𑀫𑀕𑁆𑀕𑁂𑀬𑁂𑀯 𑀓𑀼𑀓𑁆𑀓𑀼𑀝𑁂 𑀫𑀸𑀭𑀸𑀧𑁂𑀢𑁆𑀯𑀸 ‘‘𑀇𑀫𑁂 𑀓𑀼𑀓𑁆𑀓𑀼𑀝𑁂 𑀧𑀘𑀸𑀧𑁂𑀢𑁆𑀯𑀸 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀤𑁂𑀢𑀽’’𑀢𑀺 𑀧𑀳𑀺𑀡𑀺. 𑀲𑀸 𑀢𑁂𑀲𑀁 𑀫𑀢𑀪𑀸𑀯𑁂𑀦 𑀤𑀲𑀩𑀮𑀜𑁆𑀘 𑀉𑀤𑁆𑀤𑀺𑀲𑁆𑀲 𑀧𑀳𑀺𑀢𑀪𑀸𑀯𑁂𑀦 𑀧𑀘𑀺𑀢𑁆𑀯𑀸 𑀤𑀲𑀩𑀮𑀲𑁆𑀲 𑀧𑁂𑀲𑁂𑀲𑀺. 𑀫𑀸𑀕𑀡𑁆𑀟𑀺𑀬𑀸 ‘‘𑀧𑀲𑁆𑀲, 𑀫𑀳𑀸𑀭𑀸𑀚𑀸’’𑀢𑀺 𑀯𑀢𑁆𑀯𑀸 𑀏𑀢𑁆𑀢𑀓𑁂𑀦𑀧𑀺 𑀭𑀸𑀚𑀸𑀦𑀁 𑀓𑁄𑀧𑁂𑀢𑀼𑀁 𑀦𑀸𑀲𑀓𑁆𑀔𑀺.

𑀅𑀬𑀁 𑀧𑀦 𑀉𑀤𑁂𑀦𑁄 𑀢𑀸𑀲𑀼 𑀏𑀓𑁂𑀓𑀺𑀲𑁆𑀲𑀸 𑀯𑀲𑀦𑀝𑁆𑀞𑀸𑀦𑁂 𑀲𑀢𑁆𑀢 𑀲𑀢𑁆𑀢 𑀤𑀺𑀯𑀲𑀸𑀦𑀺 𑀯𑀲𑀺. 𑀅𑀣𑀸𑀬𑀁 𑀫𑀸𑀕𑀡𑁆𑀟𑀺𑀬𑀸 𑀏𑀓𑀁 𑀓𑀡𑁆𑀳𑀲𑀧𑁆𑀧𑀧𑁄𑀢𑀓𑀁 𑀯𑁂𑀴𑀼𑀧𑀩𑁆𑀩𑁂 𑀧𑀓𑁆𑀔𑀺𑀧𑀸𑀧𑁂𑀢𑁆𑀯𑀸 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑁂 𑀞𑀧𑁂𑀲𑀺. 𑀭𑀜𑁆𑀜𑁄 𑀘 𑀬𑀢𑁆𑀣 𑀓𑀢𑁆𑀣𑀘𑀺 𑀕𑀘𑁆𑀙𑀦𑁆𑀢𑀲𑁆𑀲 𑀳𑀢𑁆𑀣𑀺𑀓𑀦𑁆𑀢𑀯𑀻𑀡𑀁 𑀆𑀤𑀸𑀬𑀬𑁂𑀯 𑀕𑀫𑀦𑀁 𑀆𑀘𑀺𑀡𑁆𑀡𑀁, 𑀫𑀸𑀕𑀡𑁆𑀟𑀺𑀬𑀸 𑀭𑀜𑁆𑀜𑁄 𑀅𑀢𑁆𑀢𑀦𑁄 𑀲𑀦𑁆𑀢𑀺𑀓𑀁 𑀆𑀕𑀫𑀦𑀓𑀸𑀮𑁂 𑀢𑀁 𑀲𑀧𑁆𑀧𑀧𑁄𑀢𑀓𑀁 𑀅𑀦𑁆𑀢𑁄𑀯𑀻𑀡𑀸𑀬 𑀧𑀓𑁆𑀔𑀺𑀧𑀺𑀢𑁆𑀯𑀸 𑀙𑀺𑀤𑁆𑀤𑀁 𑀧𑀺𑀤𑀳𑀸𑀧𑁂𑀲𑀺. 𑀅𑀣 𑀦𑀁 𑀲𑀸𑀫𑀸𑀯𑀢𑀺𑀬𑀸 𑀲𑀦𑁆𑀢𑀺𑀓𑀁 𑀕𑀫𑀦𑀓𑀸𑀮𑁂, ‘‘𑀫𑀳𑀸𑀭𑀸𑀚, 𑀲𑀸𑀫𑀸𑀯𑀢𑀻 𑀦𑀸𑀫 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀧𑀓𑁆𑀔𑀸, 𑀢𑀼𑀫𑁆𑀳𑁂 𑀦 𑀕𑀡𑁂𑀢𑀺. 𑀬𑀁 𑀓𑀺𑀜𑁆𑀘𑀺 𑀓𑀢𑁆𑀯𑀸 𑀢𑀼𑀫𑁆𑀳𑀸𑀓𑀁 𑀤𑁄𑀲𑀫𑁂𑀯 𑀘𑀺𑀦𑁆𑀢𑁂𑀢𑀺, 𑀅𑀧𑁆𑀧𑀫𑀢𑁆𑀢𑀸 𑀳𑁄𑀣𑀸’’𑀢𑀺 𑀆𑀳. 𑀭𑀸𑀚𑀸 𑀲𑀸𑀫𑀸𑀯𑀢𑀺𑀬𑀸 𑀯𑀲𑀦𑀝𑁆𑀞𑀸𑀦𑁂 𑀲𑀢𑁆𑀢𑀸𑀳𑀁 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀧𑀼𑀦 𑀲𑀢𑁆𑀢𑀸𑀳𑁂 𑀫𑀸𑀕𑀡𑁆𑀟𑀺𑀬𑀸𑀬 𑀦𑀺𑀯𑁂𑀲𑀦𑀁 𑀅𑀕𑀫𑀸𑀲𑀺. 𑀲𑀸 𑀢𑀲𑁆𑀫𑀺𑀁 𑀆𑀕𑀘𑁆𑀙𑀦𑁆𑀢𑁂𑀬𑁂𑀯 ‘‘𑀓𑀘𑁆𑀘𑀺 𑀢𑁂, 𑀫𑀳𑀸𑀭𑀸𑀚, 𑀲𑀸𑀫𑀸𑀯𑀢𑀻 𑀑𑀢𑀸𑀭𑀁 𑀦 𑀕𑀯𑁂𑀲𑀢𑀻’’𑀢𑀺 𑀓𑀣𑁂𑀦𑁆𑀢𑀻 𑀯𑀺𑀬 𑀭𑀜𑁆𑀜𑁄 𑀳𑀢𑁆𑀣𑀢𑁄 𑀯𑀻𑀡𑀁 𑀕𑀳𑁂𑀢𑁆𑀯𑀸 𑀘𑀸𑀮𑁂𑀢𑁆𑀯𑀸 ‘‘𑀓𑀺𑀁 𑀦𑀼 𑀔𑁄, 𑀫𑀳𑀸𑀭𑀸𑀚, 𑀏𑀢𑁆𑀣 𑀅𑀩𑁆𑀪𑀦𑁆𑀢𑀭𑁂 𑀯𑀺𑀘𑀭𑀢𑀻’’𑀢𑀺 𑀯𑀢𑁆𑀯𑀸 𑀲𑀧𑁆𑀧𑀲𑁆𑀲 𑀦𑀺𑀓𑁆𑀔𑀫𑀦𑁄𑀓𑀸𑀲𑀁 𑀓𑀢𑁆𑀯𑀸 ‘‘𑀅𑀩𑁆𑀪𑀼𑀫𑁆𑀫𑁂 𑀅𑀦𑁆𑀢𑁄 𑀲𑀧𑁆𑀧𑁄’’𑀢𑀺 𑀯𑀻𑀡𑀁 𑀙𑀟𑁆𑀟𑁂𑀢𑁆𑀯𑀸 𑀧𑀮𑀸𑀬𑀺. 𑀢𑀲𑁆𑀫𑀺𑀁 𑀓𑀸𑀮𑁂 𑀭𑀸𑀚𑀸 𑀧𑀤𑀺𑀢𑁆𑀢𑀁 𑀯𑁂𑀡𑀼𑀯𑀦𑀁 𑀯𑀺𑀬 𑀧𑀓𑁆𑀔𑀺𑀢𑁆𑀢𑀮𑁄𑀡𑀁 𑀉𑀤𑁆𑀥𑀦𑀁 𑀯𑀺𑀬 𑀘 𑀤𑁄𑀲𑁂𑀦 𑀢𑀝𑀢𑀝𑀸𑀬𑀦𑁆𑀢𑁄 ‘‘𑀯𑁂𑀕𑁂𑀦 𑀲𑀧𑀭𑀺𑀯𑀸𑀭𑀁 𑀲𑀸𑀫𑀸𑀯𑀢𑀺𑀁 𑀧𑀓𑁆𑀓𑁄𑀲𑀣𑀸’’𑀢𑀺 𑀆𑀳. 𑀭𑀸𑀚𑀧𑀼𑀭𑀺𑀲𑀸 𑀕𑀦𑁆𑀢𑁆𑀯𑀸 𑀧𑀓𑁆𑀓𑁄𑀲𑀺𑀁𑀲𑀼.

𑀲𑀸 𑀭𑀜𑁆𑀜𑁄 𑀓𑀼𑀤𑁆𑀥𑀪𑀸𑀯𑀁 𑀜𑀢𑁆𑀯𑀸 𑀲𑁂𑀲𑀫𑀸𑀢𑀼𑀕𑀸𑀫𑀸𑀦𑀁 𑀲𑀜𑁆𑀜𑀫𑀤𑀸𑀲𑀺. ‘‘𑀭𑀸𑀚𑀸 𑀢𑀼𑀫𑁆𑀳𑁂 𑀖𑀸𑀢𑁂𑀢𑀼𑀓𑀸𑀫𑁄 𑀧𑀓𑁆𑀓𑁄𑀲𑀢𑀺, 𑀅𑀚𑁆𑀚 𑀤𑀺𑀯𑀲𑀁 𑀑𑀤𑀺𑀲𑁆𑀲𑀓𑁂𑀦 𑀫𑁂𑀢𑁆𑀢𑀸𑀨𑀭𑀡𑁂𑀦 𑀭𑀸𑀚𑀸𑀦𑀁 𑀨𑀭𑀣𑀸’’𑀢𑀺 𑀆𑀳. 𑀭𑀸𑀚𑀸 𑀢𑀸 𑀇𑀢𑁆𑀣𑀺𑀬𑁄 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀲𑀩𑁆𑀩𑀸𑀯 𑀧𑀝𑀺𑀧𑀸𑀝𑀺𑀬𑀸 𑀞𑀧𑁂𑀢𑁆𑀯𑀸 𑀫𑀳𑀸𑀥𑀦𑀼𑀁 𑀆𑀤𑀸𑀬 𑀯𑀺𑀲𑀧𑀻𑀢𑀓𑀡𑁆𑀟𑀁 𑀲𑀦𑁆𑀦𑀬𑁆𑀳𑀺𑀢𑁆𑀯𑀸 𑀥𑀦𑀼𑀁 𑀧𑀽𑀭𑁂𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀢𑀲𑁆𑀫𑀺𑀁 𑀔𑀡𑁂 𑀲𑀩𑁆𑀩𑀸𑀯 𑀢𑀸 𑀲𑀸𑀫𑀸𑀯𑀢𑀺𑀧𑁆𑀧𑀫𑀼𑀔𑀸 𑀇𑀢𑁆𑀣𑀺𑀬𑁄 𑀑𑀥𑀺𑀲𑁄 𑀫𑁂𑀢𑁆𑀢𑀁 𑀨𑀭𑀺𑀁𑀲𑀼. 𑀭𑀸𑀚𑀸 𑀓𑀡𑁆𑀟𑀁 𑀦𑁂𑀯 𑀔𑀺𑀧𑀺𑀢𑀼𑀁 𑀦 𑀅𑀧𑀦𑁂𑀢𑀼𑀁 𑀲𑀓𑁆𑀓𑁄𑀢𑀺, 𑀕𑀢𑁆𑀢𑁂𑀳𑀺 𑀲𑁂𑀤𑀸 𑀫𑀼𑀘𑁆𑀘𑀦𑁆𑀢𑀺, 𑀲𑀭𑀻𑀭𑀁 𑀯𑁂𑀥𑀢𑀺, 𑀫𑀼𑀔𑀢𑁄 𑀔𑁂𑀴𑁄 𑀧𑀢𑀢𑀺, 𑀕𑀳𑁂𑀢𑀩𑁆𑀩𑀕𑀳𑀡𑀁 𑀦 𑀧𑀲𑁆𑀲𑀢𑀺. 𑀅𑀣 𑀦𑀁 𑀲𑀸𑀫𑀸𑀯𑀢𑀻 ‘‘𑀓𑀺𑀁, 𑀫𑀳𑀸𑀭𑀸𑀚, 𑀓𑀺𑀮𑀫𑀲𑀻’’𑀢𑀺 𑀆𑀳. 𑀆𑀫, 𑀤𑁂𑀯𑀺, 𑀓𑀺𑀮𑀫𑀸𑀫𑀺, 𑀅𑀯𑀲𑁆𑀲𑀬𑁄 𑀫𑁂 𑀳𑁄𑀳𑀻𑀢𑀺. 𑀲𑀸𑀥𑀼, 𑀫𑀳𑀸𑀭𑀸𑀚, 𑀓𑀡𑁆𑀟𑀁 𑀫𑀳𑀸𑀧𑀣𑀯𑀺𑀫𑀼𑀔𑀁 𑀓𑀭𑁄𑀳𑀻𑀢𑀺. 𑀭𑀸𑀚𑀸 𑀢𑀣𑀸 𑀅𑀓𑀸𑀲𑀺. 𑀲𑀸 ‘‘𑀭𑀜𑁆𑀜𑁄 𑀳𑀢𑁆𑀣𑀢𑁄 𑀓𑀡𑁆𑀟𑀁 𑀫𑀼𑀘𑁆𑀘𑀢𑀽’’𑀢𑀺 𑀅𑀥𑀺𑀝𑁆𑀞𑀸𑀲𑀺. 𑀢𑀲𑁆𑀫𑀺𑀁 𑀔𑀡𑁂 𑀓𑀡𑁆𑀟𑀁 𑀫𑀼𑀘𑁆𑀘𑀺. 𑀭𑀸𑀚𑀸 𑀢𑀁𑀔𑀡𑀁𑀬𑁂𑀯 𑀉𑀤𑀓𑁂 𑀦𑀺𑀫𑀼𑀚𑁆𑀚𑀺𑀢𑁆𑀯𑀸 𑀆𑀕𑀫𑁆𑀫 𑀅𑀮𑁆𑀮𑀓𑁂𑀲𑁄 𑀅𑀮𑁆𑀮𑀯𑀢𑁆𑀣𑁄 𑀲𑀸𑀫𑀸𑀯𑀢𑀺𑀬𑀸 𑀧𑀸𑀤𑁂𑀲𑀼 𑀧𑀢𑀺𑀢𑁆𑀯𑀸 ‘‘𑀔𑀫, 𑀤𑁂𑀯𑀺, 𑀫𑀬𑁆𑀳𑀁, 𑀪𑁂𑀤𑀓𑀸𑀦𑀁 𑀫𑁂 𑀯𑀘𑀦𑁂𑀦 𑀅𑀦𑀼𑀧𑀥𑀸𑀭𑁂𑀢𑁆𑀯𑀸 𑀏𑀢𑀁 𑀓𑀢’’𑀦𑁆𑀢𑀺 𑀆𑀳. 𑀔𑀫𑀸𑀫𑀺, 𑀤𑁂𑀯𑀸𑀢𑀺. ‘‘𑀲𑀸𑀥𑀼, 𑀤𑁂𑀯𑀺, 𑀏𑀯𑀁 𑀢𑀬𑀸 𑀫𑀬𑁆𑀳𑀁 𑀔𑀫𑀺𑀢𑀁 𑀦𑀸𑀫 𑀳𑁄𑀢𑀺. 𑀇𑀢𑁄 𑀧𑀝𑁆𑀞𑀸𑀬 𑀢𑀼𑀫𑁆𑀳𑀸𑀓𑀁 𑀬𑀣𑀸𑀭𑀼𑀘𑀺𑀬𑀸 𑀤𑀲𑀩𑀮𑀲𑁆𑀲 𑀤𑀸𑀦𑀁 𑀤𑁂𑀣, 𑀧𑀘𑁆𑀙𑀸𑀪𑀢𑁆𑀢𑀁 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀥𑀫𑁆𑀫𑀓𑀣𑀁 𑀲𑀼𑀡𑀸𑀣, 𑀅𑀚𑁆𑀚 𑀯𑁄 𑀧𑀝𑁆𑀞𑀸𑀬 𑀧𑀭𑀺𑀳𑀸𑀭𑀁 𑀤𑀫𑁆𑀫𑀻𑀢𑀺. 𑀢𑁂𑀦 𑀳𑀺, 𑀤𑁂𑀯, 𑀅𑀚𑁆𑀚 𑀧𑀝𑁆𑀞𑀸𑀬 𑀏𑀓𑀁 𑀪𑀺𑀓𑁆𑀔𑀼𑀁 𑀬𑀸𑀘𑀺𑀢𑁆𑀯𑀸 𑀆𑀦𑁂𑀣, 𑀬𑁄 𑀦𑁄 𑀥𑀫𑁆𑀫𑀁 𑀯𑀸𑀘𑁂𑀲𑁆𑀲𑀢𑀻𑀢𑀺. 𑀭𑀸𑀚𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀬𑀸𑀘𑀦𑁆𑀢𑁄 𑀆𑀦𑀦𑁆𑀤𑀢𑁆𑀣𑁂𑀭𑀁 𑀮𑀪𑀺. 𑀢𑀢𑁄 𑀧𑀝𑁆𑀞𑀸𑀬 𑀢𑀸 𑀧𑀜𑁆𑀘𑀲𑀢𑀸 𑀇𑀢𑁆𑀣𑀺𑀬𑁄 𑀣𑁂𑀭𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀲𑀓𑁆𑀓𑀸𑀭𑀲𑀫𑁆𑀫𑀸𑀦𑀁 𑀓𑀢𑁆𑀯𑀸 𑀓𑀢𑀪𑀢𑁆𑀢𑀓𑀺𑀘𑁆𑀘𑀲𑁆𑀲 𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑁂 𑀥𑀫𑁆𑀫𑀁 𑀧𑀭𑀺𑀬𑀸𑀧𑀼𑀡𑀦𑁆𑀢𑀺.

𑀢𑀸 𑀏𑀓𑀤𑀺𑀯𑀲𑀁 𑀣𑁂𑀭𑀲𑁆𑀲 𑀅𑀦𑀼𑀫𑁄𑀤𑀦𑀸𑀬 𑀧𑀲𑀦𑁆𑀦𑀸 𑀣𑁂𑀭𑀲𑁆𑀲 𑀧𑀜𑁆𑀘 𑀉𑀢𑁆𑀢𑀭𑀸𑀲𑀗𑁆𑀕𑀲𑀢𑀸𑀦𑀺 𑀅𑀤𑀁𑀲𑀼. 𑀣𑁂𑀭𑁄 𑀓𑀺𑀭 𑀧𑀼𑀩𑁆𑀩𑁂 𑀢𑀼𑀦𑁆𑀦𑀯𑀸𑀬𑀓𑀸𑀮𑁂 𑀏𑀓𑀲𑁆𑀲 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲 𑀏𑀓𑀸𑀬 𑀲𑀽𑀘𑀺𑀬𑀸 𑀲𑀤𑁆𑀥𑀺𑀁 𑀳𑀢𑁆𑀣𑀢𑀮𑀫𑀢𑁆𑀢𑀁 𑀘𑁄𑀴𑀔𑀡𑁆𑀟𑀁 𑀅𑀤𑀸𑀲𑀺. 𑀲𑁄 𑀲𑀽𑀘𑀺𑀬𑀸 𑀨𑀮𑁂𑀦 𑀇𑀫𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂 𑀫𑀳𑀸𑀧𑀜𑁆𑀜𑁄 𑀅𑀳𑁄𑀲𑀺, 𑀘𑁄𑀴𑀔𑀡𑁆𑀟𑀲𑁆𑀲 𑀨𑀮𑁂𑀦 𑀇𑀫𑀺𑀦𑀸𑀯 𑀦𑀺𑀬𑀸𑀫𑁂𑀦 𑀧𑀜𑁆𑀘𑀲𑀢𑀓𑁆𑀔𑀢𑁆𑀢𑀼𑀁 𑀤𑀼𑀲𑁆𑀲𑀸𑀦𑀺 𑀧𑀝𑀺𑀮𑀪𑀺.

𑀢𑀢𑁄 𑀫𑀸𑀕𑀡𑁆𑀟𑀺𑀬𑀸 𑀅𑀜𑁆𑀜𑀁 𑀓𑀸𑀢𑀩𑁆𑀩𑀁 𑀅𑀧𑀲𑁆𑀲𑀦𑁆𑀢𑀻 ‘‘𑀉𑀬𑁆𑀬𑀸𑀦𑀁 𑀕𑀘𑁆𑀙𑀸𑀫, 𑀫𑀳𑀸𑀭𑀸𑀚𑀸’’𑀢𑀺 𑀆𑀳. 𑀲𑀸𑀥𑀼, 𑀤𑁂𑀯𑀻𑀢𑀺. 𑀲𑀸 𑀭𑀜𑁆𑀜𑁄 𑀲𑀫𑁆𑀧𑀝𑀺𑀘𑁆𑀙𑀺𑀢𑀪𑀸𑀯𑀁 𑀜𑀢𑁆𑀯𑀸 𑀘𑀽𑀴𑀧𑀺𑀢𑀭𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀆𑀳 𑁋 ‘‘𑀅𑀫𑁆𑀳𑀸𑀓𑀁 𑀉𑀬𑁆𑀬𑀸𑀦𑀁 𑀕𑀢𑀓𑀸𑀮𑁂 𑀲𑀸𑀫𑀸𑀯𑀢𑀺𑀬𑀸 𑀯𑀲𑀦𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀲𑀸𑀫𑀸𑀯𑀢𑀺𑀁 𑀲𑀧𑀭𑀺𑀯𑀸𑀭𑀁 𑀅𑀦𑁆𑀢𑁄𑀓𑀭𑀺𑀢𑁆𑀯𑀸 ‘𑀭𑀜𑁆𑀜𑁄 𑀆𑀡𑀸’𑀢𑀺 𑀯𑀢𑁆𑀯𑀸 𑀤𑁆𑀯𑀸𑀭𑀁 𑀧𑀺𑀤𑀳𑀺𑀢𑁆𑀯𑀸 𑀧𑀮𑀸𑀮𑁂𑀦 𑀧𑀮𑀺𑀯𑁂𑀞𑁂𑀢𑁆𑀯𑀸 𑀕𑁂𑀳𑁂 𑀅𑀕𑁆𑀕𑀺𑀁 𑀤𑁂𑀣𑀸’’𑀢𑀺. 𑀫𑀸𑀕𑀡𑁆𑀟𑀺𑀬𑁄 𑀢𑀲𑁆𑀲𑀸 𑀯𑀘𑀦𑀁 𑀲𑀼𑀢𑁆𑀯𑀸 𑀢𑀣𑀸 𑀅𑀓𑀸𑀲𑀺. 𑀢𑀲𑁆𑀫𑀺𑀁 𑀤𑀺𑀯𑀲𑁂 𑀲𑀩𑁆𑀩𑀸𑀧𑀺 𑀢𑀸 𑀇𑀢𑁆𑀣𑀺𑀬𑁄 𑀧𑀼𑀩𑁆𑀩𑁂 𑀓𑀢𑀲𑁆𑀲 𑀉𑀧𑀧𑀻𑀴𑀓𑀓𑀫𑁆𑀫𑀲𑁆𑀲𑀸𑀦𑀼𑀪𑀸𑀯𑁂𑀦 𑀲𑀫𑀸𑀧𑀢𑁆𑀢𑀺𑀁 𑀅𑀧𑁆𑀧𑁂𑀢𑀼𑀁 𑀦𑀸𑀲𑀓𑁆𑀔𑀺𑀁𑀲𑀼, 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀪𑀼𑀲𑀫𑀼𑀝𑁆𑀞𑀺 𑀯𑀺𑀬 𑀛𑀸𑀬𑀺𑀁𑀲𑀼. 𑀢𑀸𑀲𑀁 𑀆𑀭𑀓𑁆𑀔𑀧𑀼𑀭𑀺𑀲𑀸 𑀭𑀜𑁆𑀜𑁄 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸, ‘‘𑀤𑁂𑀯, 𑀇𑀤𑀁 𑀦𑀸𑀫 𑀓𑀭𑀺𑀁𑀲𑀽’’𑀢𑀺 𑀆𑀘𑀺𑀓𑁆𑀔𑀺𑀁𑀲𑀼.

𑀭𑀸𑀚𑀸 ‘‘𑀓𑁂𑀦 𑀓𑀢’’𑀦𑁆𑀢𑀺 𑀧𑀭𑀺𑀬𑁂𑀲𑀦𑁆𑀢𑁄 𑀫𑀸𑀕𑀡𑁆𑀟𑀺𑀬𑀸𑀬 𑀓𑀸𑀭𑀺𑀢𑀪𑀸𑀯𑀁 𑀜𑀢𑁆𑀯𑀸 𑀢𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀪𑀤𑁆𑀤𑁂, 𑀪𑀤𑁆𑀤𑀓𑀁 𑀢𑀬𑀸 𑀓𑀫𑁆𑀫𑀁 𑀓𑀢𑀁 𑀫𑀬𑀸 𑀓𑀸𑀢𑀩𑁆𑀩𑀁 𑀓𑀭𑁄𑀦𑁆𑀢𑀺𑀬𑀸, ‘‘𑀉𑀝𑁆𑀞𑀸𑀬 𑀲𑀫𑀼𑀝𑁆𑀞𑀸𑀬 𑀫𑀬𑁆𑀳𑀁 𑀯𑀥𑀸𑀬 𑀧𑀭𑀺𑀲𑀓𑁆𑀓𑀫𑀸𑀦𑀸 𑀖𑀸𑀢𑀺𑀢𑀸, 𑀧𑀲𑀦𑁆𑀦𑁄𑀲𑁆𑀫𑀺, 𑀢𑀼𑀬𑁆𑀳𑀁 𑀲𑀫𑁆𑀧𑀢𑁆𑀢𑀺𑀁 𑀤𑀲𑁆𑀲𑀸𑀫𑀻𑀢𑀺 𑀢𑀯 𑀜𑀸𑀢𑀓𑁂 𑀧𑀓𑁆𑀓𑁄𑀲𑀸𑀧𑁂𑀳𑀻’’𑀢𑀺 𑀆𑀳. 𑀲𑀸 𑀭𑀜𑁆𑀜𑁄 𑀓𑀣𑀁 𑀲𑀼𑀢𑁆𑀯𑀸 𑀅𑀜𑁆𑀜𑀸𑀢𑀓𑁂𑀧𑀺 𑀜𑀸𑀢𑀓𑁂 𑀓𑀢𑁆𑀯𑀸 𑀧𑀓𑁆𑀓𑁄𑀲𑀸𑀧𑁂𑀲𑀺. 𑀭𑀸𑀚𑀸 𑀲𑀩𑁆𑀩𑁂𑀲𑀁 𑀲𑀦𑁆𑀦𑀺𑀧𑀢𑀺𑀢𑀪𑀸𑀯𑀁 𑀜𑀢𑁆𑀯𑀸 𑀭𑀸𑀚𑀗𑁆𑀕𑀡𑁂 𑀕𑀮𑀧𑁆𑀧𑀫𑀸𑀡𑁂𑀲𑀼 𑀆𑀯𑀸𑀝𑁂𑀲𑀼 𑀦𑀺𑀔𑀦𑀺𑀢𑁆𑀯𑀸 𑀉𑀧𑀭𑀺 𑀞𑀺𑀢𑀸𑀦𑀺 𑀲𑀻𑀲𑀸𑀦𑀺 𑀪𑀺𑀦𑁆𑀤𑀸𑀧𑁂𑀦𑁆𑀢𑁄 𑀫𑀳𑀦𑁆𑀢𑁂𑀳𑀺 𑀅𑀬𑀦𑀗𑁆𑀕𑀮𑁂𑀳𑀺 𑀓𑀲𑀸𑀧𑁂𑀲𑀺. 𑀫𑀸𑀕𑀡𑁆𑀟𑀺𑀬𑀫𑁆𑀧𑀺 𑀔𑀡𑁆𑀟𑀸𑀔𑀡𑁆𑀟𑀺𑀓𑀁 𑀙𑀺𑀦𑁆𑀤𑀸𑀧𑁂𑀢𑁆𑀯𑀸 𑀧𑀽𑀯𑀧𑀘𑀦𑀓𑀝𑀸𑀳𑁂 𑀧𑀘𑀸𑀧𑁂𑀲𑀺.

𑀓𑀺𑀁 𑀧𑀦 𑀲𑀸𑀫𑀸𑀯𑀢𑀺𑀬𑀸 𑀲𑀧𑀭𑀺𑀯𑀸𑀭𑀸𑀬 𑀅𑀕𑁆𑀕𑀺𑀦𑀸 𑀛𑀸𑀧𑀦𑀓𑀫𑁆𑀫𑀦𑁆𑀢𑀺? 𑀲𑀸 𑀓𑀺𑀭 𑀅𑀦𑀼𑀧𑁆𑀧𑀦𑁆𑀦𑁂 𑀩𑀼𑀤𑁆𑀥𑁂 𑀢𑁂𑀳𑁂𑀯 𑀧𑀜𑁆𑀘𑀳𑀺 𑀫𑀸𑀢𑀼𑀕𑀸𑀫𑀲𑀢𑁂𑀳𑀺 𑀲𑀤𑁆𑀥𑀺𑀁 𑀕𑀗𑁆𑀕𑀸𑀬𑀁 𑀓𑀻𑀴𑀺𑀢𑁆𑀯𑀸 𑀩𑀳𑀺𑀢𑀺𑀢𑁆𑀣𑁂 𑀞𑀺𑀢𑀸 𑀲𑀻𑀢𑁂 𑀚𑀸𑀢𑁂 𑀅𑀯𑀺𑀤𑀽𑀭𑀝𑁆𑀞𑀸𑀦𑁂 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲 𑀧𑀡𑁆𑀡𑀲𑀸𑀮𑀁 𑀤𑀺𑀲𑁆𑀯𑀸 𑀅𑀦𑁆𑀢𑁄 𑀅𑀲𑁄𑀥𑁂𑀢𑁆𑀯𑀸𑀯 𑀩𑀳𑀺 𑀅𑀕𑁆𑀕𑀺𑀁 𑀤𑀢𑁆𑀯𑀸 𑀯𑀺𑀲𑀺𑀩𑁆𑀩𑁂𑀲𑀼𑀁. 𑀅𑀦𑁆𑀢𑁄𑀧𑀡𑁆𑀡𑀲𑀸𑀮𑀸𑀬 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑁄. 𑀢𑀸 𑀚𑀸𑀮𑀸𑀲𑀼 𑀧𑀘𑁆𑀙𑀺𑀦𑁆𑀦𑀸𑀲𑀼 𑀧𑀘𑁆𑀘𑁂𑀓𑀩𑀼𑀤𑁆𑀥𑀁 𑀤𑀺𑀲𑁆𑀯𑀸 ‘‘𑀓𑀺𑀁 𑀅𑀫𑁆𑀳𑁂𑀳𑀺 𑀓𑀢𑀁, 𑀅𑀬𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀭𑀜𑁆𑀜𑁄 𑀓𑀼𑀮𑀽𑀧𑀓𑁄, 𑀇𑀫𑀁 𑀤𑀺𑀲𑁆𑀯𑀸 𑀭𑀸𑀚𑀸 𑀅𑀫𑁆𑀳𑀸𑀓𑀁 𑀓𑀼𑀚𑁆𑀛𑀺𑀲𑁆𑀲𑀢𑀺, 𑀇𑀤𑀸𑀦𑀺 𑀦𑀁 𑀲𑀼𑀚𑁆𑀛𑀸𑀧𑀺𑀢𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀅𑀜𑁆𑀜𑀸𑀦𑀺𑀧𑀺 𑀤𑀸𑀭𑀽𑀦𑀺 𑀧𑀓𑁆𑀔𑀺𑀧𑀺𑀢𑁆𑀯𑀸 𑀅𑀕𑁆𑀕𑀺𑀁 𑀅𑀤𑀁𑀲𑀼. 𑀧𑀼𑀦 𑀚𑀸𑀮𑀸𑀬 𑀧𑀘𑁆𑀙𑀺𑀦𑁆𑀦𑀸𑀬 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀬 𑀢𑀸𑀲𑀁 𑀧𑀲𑁆𑀲𑀦𑁆𑀢𑀻𑀦𑀁𑀬𑁂𑀯 𑀘𑀻𑀯𑀭𑀸𑀦𑀺 𑀧𑀧𑁆𑀨𑁄𑀝𑁂𑀢𑁆𑀯𑀸 𑀯𑁂𑀳𑀸𑀲𑀁 𑀉𑀧𑁆𑀧𑀢𑀺𑀢𑁆𑀯𑀸 𑀕𑀢𑁄. 𑀢𑁂𑀦 𑀓𑀫𑁆𑀫𑁂𑀦 𑀦𑀺𑀭𑀬𑁂 𑀧𑀘𑁆𑀘𑀺𑀢𑁆𑀯𑀸 𑀧𑀓𑁆𑀓𑀸𑀯𑀲𑁂𑀲𑁂𑀦 𑀇𑀫𑀁 𑀩𑁆𑀬𑀲𑀦𑀁 𑀧𑀸𑀧𑀼𑀡𑀺𑀁𑀲𑀼. 𑀘𑀢𑀼𑀧𑀭𑀺𑀲𑀫𑀚𑁆𑀛𑁂 𑀧𑀦 𑀓𑀣𑀸 𑀉𑀤𑀧𑀸𑀤𑀺 𑁋 ‘‘𑀩𑀳𑀼𑀲𑁆𑀲𑀼𑀢𑀸 𑀯𑀢 𑀔𑀼𑀚𑁆𑀚𑀼𑀢𑁆𑀢𑀭𑀸, 𑀫𑀸𑀢𑀼𑀕𑀸𑀫𑀅𑀢𑁆𑀢𑀪𑀸𑀯𑁂 𑀞𑀢𑁆𑀯𑀸 𑀧𑀜𑁆𑀘𑀦𑁆𑀦𑀁 𑀫𑀸𑀢𑀼𑀕𑀸𑀫𑀲𑀢𑀸𑀦𑀁 𑀥𑀫𑁆𑀫𑀁 𑀓𑀣𑁂𑀢𑁆𑀯𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀸𑀧𑁂𑀲𑀺. 𑀲𑀸𑀫𑀸𑀯𑀢𑀻𑀧𑀺 𑀭𑀜𑁆𑀜𑀸 𑀅𑀢𑁆𑀢𑀦𑁄 𑀅𑀧𑁆𑀧𑀺𑀢𑀁 𑀓𑀡𑁆𑀟𑀁 𑀫𑁂𑀢𑁆𑀢𑀸𑀨𑀭𑀡𑁂𑀦 𑀨𑀭𑀺𑀢𑁆𑀯𑀸 𑀧𑀝𑀺𑀩𑀸𑀳𑀻’’𑀢𑀺 𑀢𑀲𑁆𑀲𑀸𑀧𑀺 𑀫𑀳𑀸𑀚𑀦𑁄 𑀕𑀼𑀡𑀁 𑀓𑀣𑁂𑀲𑀺. 𑀏𑀯𑀫𑁂𑀢𑀁 𑀯𑀢𑁆𑀣𑀼 𑀲𑀫𑀼𑀝𑁆𑀞𑀺𑀢𑀁. 𑀅𑀣 𑀲𑀢𑁆𑀣𑀸 𑀅𑀧𑀭𑀪𑀸𑀕𑁂 𑀚𑁂𑀢𑀯𑀦𑁂 𑀦𑀺𑀲𑀺𑀦𑁆𑀦𑁄 𑀢𑀤𑁂𑀯 𑀓𑀸𑀭𑀡𑀁 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀁 𑀓𑀢𑁆𑀯𑀸 𑀔𑀼𑀚𑁆𑀚𑀼𑀢𑁆𑀢𑀭𑀁 𑀩𑀳𑀼𑀲𑁆𑀲𑀼𑀢𑀸𑀦𑀁, 𑀲𑀸𑀫𑀸𑀯𑀢𑀺𑀁 𑀫𑁂𑀢𑁆𑀢𑀸𑀯𑀺𑀳𑀸𑀭𑀻𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀲𑀻𑀢𑀺.

𑀉𑀢𑁆𑀢𑀭𑀸𑀦𑀦𑁆𑀤𑀫𑀸𑀢𑀸𑀯𑀢𑁆𑀣𑀼

𑁨𑁬𑁨. 𑀧𑀜𑁆𑀘𑀫𑁂 𑀛𑀸𑀬𑀻𑀦𑀦𑁆𑀢𑀺 𑀛𑀸𑀦𑀸𑀪𑀺𑀭𑀢𑀸𑀦𑀁 𑀉𑀧𑀸𑀲𑀺𑀓𑀸𑀦𑀁, 𑀉𑀢𑁆𑀢𑀭𑀸 𑀦𑀦𑁆𑀤𑀫𑀸𑀢𑀸, 𑀅𑀕𑁆𑀕𑀸𑀢𑀺 𑀤𑀲𑁆𑀲𑁂𑀢𑀺. 𑀲𑀸 𑀓𑀺𑀭 𑀧𑀤𑀼𑀫𑀼𑀢𑁆𑀢𑀭𑀩𑀼𑀤𑁆𑀥𑀓𑀸𑀮𑁂 𑀳𑀁𑀲𑀯𑀢𑀺𑀬𑀁 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑀸 𑀲𑀢𑁆𑀣𑀼 𑀥𑀫𑁆𑀫𑀓𑀣𑀁 𑀲𑀼𑀡𑀦𑁆𑀢𑀻 𑀲𑀢𑁆𑀣𑀸𑀭𑀁 𑀏𑀓𑀁 𑀉𑀧𑀸𑀲𑀺𑀓𑀁 𑀛𑀸𑀦𑀸𑀪𑀺𑀭𑀢𑀸𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀦𑁆𑀢𑀁 𑀤𑀺𑀲𑁆𑀯𑀸 𑀅𑀥𑀺𑀓𑀸𑀭𑀓𑀫𑁆𑀫𑀁 𑀓𑀢𑁆𑀯𑀸 𑀢𑀁 𑀞𑀸𑀦𑀦𑁆𑀢𑀭𑀁 𑀧𑀢𑁆𑀣𑁂𑀲𑀺. 𑀲𑀸 𑀓𑀧𑁆𑀧𑀲𑀢𑀲𑀳𑀲𑁆𑀲𑀁 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀭𑀸𑀚𑀕𑀳𑀦𑀕𑀭𑁂 𑀲𑀼𑀫𑀦𑀲𑁂𑀝𑁆𑀞𑀺𑀁 𑀦𑀺𑀲𑁆𑀲𑀸𑀬 𑀯𑀲𑀦𑁆𑀢𑀲𑁆𑀲 𑀧𑀼𑀡𑁆𑀡𑀲𑀻𑀳𑀲𑁆𑀲 𑀦𑀸𑀫 𑀪𑀭𑀺𑀬𑀸𑀬 𑀓𑀼𑀘𑁆𑀙𑀺𑀲𑁆𑀫𑀺𑀁 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺, 𑀉𑀢𑁆𑀢𑀭𑀸𑀢𑀺𑀲𑁆𑀲𑀸 𑀦𑀸𑀫𑀁 𑀅𑀓𑀁𑀲𑀼.

𑀅𑀣𑁂𑀓𑀲𑁆𑀫𑀺𑀁 𑀦𑀓𑁆𑀔𑀢𑁆𑀢𑀫𑀳𑀤𑀺𑀯𑀲𑁂 𑀭𑀸𑀚𑀕𑀳𑀲𑁂𑀝𑁆𑀞𑀺 𑀧𑀼𑀡𑁆𑀡𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀆𑀳 𑁋 ‘‘𑀢𑀸𑀢 𑀧𑀼𑀡𑁆𑀡, 𑀦𑀓𑁆𑀔𑀢𑁆𑀢𑀁 𑀯𑀸 𑀉𑀧𑁄𑀲𑀣𑁄 𑀯𑀸 𑀤𑀼𑀕𑁆𑀕𑀢𑀲𑁆𑀲 𑀓𑀺𑀁 𑀓𑀭𑀺𑀲𑁆𑀲𑀢𑀺, 𑀏𑀯𑀁 𑀲𑀦𑁆𑀢𑁂𑀧𑀺 𑀯𑀤𑁂𑀳𑀺 ‘𑀓𑀺𑀁 𑀦𑀓𑁆𑀔𑀢𑁆𑀢𑀧𑀭𑀺𑀩𑁆𑀩𑀬𑀁 𑀕𑀳𑁂𑀢𑁆𑀯𑀸 𑀦𑀓𑁆𑀔𑀢𑁆𑀢𑀁 𑀓𑀻𑀴𑀺𑀲𑁆𑀲𑀲𑀺, 𑀩𑀮𑀯𑀕𑁄𑀡𑁂 𑀘 𑀨𑀸𑀮𑀜𑁆𑀘 𑀦𑀗𑁆𑀕𑀮𑀜𑁆𑀘 𑀕𑀳𑁂𑀢𑁆𑀯𑀸 𑀓𑀲𑀺𑀲𑁆𑀲𑀲𑀻’’’𑀢𑀺. ‘‘𑀫𑀫 𑀪𑀭𑀺𑀬𑀸𑀬 𑀲𑀤𑁆𑀥𑀺𑀁 𑀫𑀦𑁆𑀢𑁂𑀢𑁆𑀯𑀸 𑀚𑀸𑀦𑀺𑀲𑁆𑀲𑀸𑀫𑀺, 𑀅𑀬𑁆𑀬𑀸’’𑀢𑀺 𑀢𑀁 𑀓𑀣𑀁 𑀪𑀭𑀺𑀬𑀸𑀬 𑀆𑀭𑁄𑀘𑁂𑀲𑀺. ‘‘𑀲𑁂𑀝𑁆𑀞𑀺 𑀦𑀸𑀫 𑀅𑀬𑁆𑀬𑁄 𑀇𑀲𑁆𑀲𑀭𑁄, 𑀢𑀲𑁆𑀲 𑀢𑀬𑀸 𑀲𑀤𑁆𑀥𑀺𑀁 𑀓𑀣𑁂𑀦𑁆𑀢𑀲𑁆𑀲 𑀓𑀣𑀸 𑀲𑁄𑀪𑀢𑀺, 𑀢𑁆𑀯𑀁 𑀧𑀦 𑀅𑀢𑁆𑀢𑀦𑁄 𑀓𑀲𑀺𑀓𑀫𑁆𑀫𑀁 𑀫𑀸 𑀯𑀺𑀲𑁆𑀲𑀚𑁆𑀚𑁂𑀲𑀻’’𑀢𑀺 𑀆𑀳. 𑀲𑁄 𑀢𑀲𑁆𑀲𑀸 𑀯𑀘𑀦𑀁 𑀲𑀼𑀢𑁆𑀯𑀸 𑀓𑀲𑀺𑀪𑀡𑁆𑀟𑀁 𑀆𑀤𑀸𑀬 𑀓𑀲𑀺𑀢𑀼𑀁 𑀕𑀢𑁄.

𑀢𑀁𑀤𑀺𑀯𑀲𑀜𑁆𑀘 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀬 ‘‘𑀓𑀲𑁆𑀲 𑀅𑀚𑁆𑀚 𑀫𑀬𑀸 𑀲𑀗𑁆𑀕𑀳𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀆𑀯𑀚𑁆𑀚𑁂𑀦𑁆𑀢𑁄 𑀇𑀫𑀲𑁆𑀲 𑀧𑀼𑀡𑁆𑀡𑀲𑁆𑀲 𑀉𑀧𑀦𑀺𑀲𑁆𑀲𑀬𑀁 𑀤𑀺𑀲𑁆𑀯𑀸 𑀪𑀺𑀓𑁆𑀔𑀸𑀘𑀸𑀭𑀯𑁂𑀮𑀸𑀬 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀧𑀼𑀡𑁆𑀡𑀲𑁆𑀲 𑀓𑀲𑀦𑀝𑁆𑀞𑀸𑀦𑀁 𑀕𑀘𑁆𑀙𑀦𑁆𑀢𑁄 𑀅𑀯𑀺𑀤𑀽𑀭𑁂 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀲𑀺. 𑀧𑀼𑀡𑁆𑀡𑁄 𑀣𑁂𑀭𑀁 𑀤𑀺𑀲𑁆𑀯𑀸 𑀓𑀲𑀺𑀁 𑀞𑀧𑁂𑀢𑁆𑀯𑀸 𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀧𑀜𑁆𑀘𑀧𑀢𑀺𑀝𑁆𑀞𑀺𑀢𑁂𑀦 𑀯𑀦𑁆𑀤𑀺. 𑀣𑁂𑀭𑁄 𑀢𑀁 𑀑𑀮𑁄𑀓𑁂𑀢𑁆𑀯𑀸 𑀉𑀤𑀓𑀲𑀪𑀸𑀕𑀁 𑀧𑀼𑀘𑁆𑀙𑀺. 𑀢𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀅𑀬𑁆𑀬𑁄 𑀫𑀼𑀔𑀁 𑀥𑁄𑀯𑀺𑀢𑀼𑀓𑀸𑀫𑁄 𑀪𑀯𑀺𑀲𑁆𑀲𑀢𑀻’’𑀢𑀺. 𑀢𑀢𑁄 𑀯𑁂𑀕𑁂𑀦 𑀕𑀦𑁆𑀢𑁆𑀯𑀸 𑀤𑀦𑁆𑀢𑀓𑀝𑁆𑀞𑀁 𑀆𑀳𑀭𑀺𑀢𑁆𑀯𑀸 𑀓𑀧𑁆𑀧𑀺𑀬𑀁 𑀓𑀢𑁆𑀯𑀸 𑀣𑁂𑀭𑀲𑁆𑀲 𑀅𑀤𑀸𑀲𑀺. 𑀣𑁂𑀭𑁂 𑀤𑀦𑁆𑀢𑀓𑀝𑁆𑀞𑀁 𑀔𑀸𑀤𑀦𑁆𑀢𑁂 𑀧𑀢𑁆𑀢𑁂𑀦 𑀲𑀤𑁆𑀥𑀺𑀁 𑀥𑀫𑁆𑀫𑀓𑀭𑀡𑀁 𑀦𑀻𑀳𑀭𑀺𑀢𑁆𑀯𑀸 𑀉𑀤𑀓𑀲𑁆𑀲 𑀧𑀽𑀭𑁂𑀢𑁆𑀯𑀸 𑀆𑀳𑀭𑀺. 𑀣𑁂𑀭𑁄 𑀫𑀼𑀔𑀁 𑀥𑁄𑀯𑀺𑀢𑁆𑀯𑀸 𑀪𑀺𑀓𑁆𑀔𑀸𑀘𑀸𑀭𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀺. 𑀧𑀼𑀡𑁆𑀡𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀣𑁂𑀭𑁄 𑀅𑀜𑁆𑀜𑁂𑀲𑀼 𑀤𑀺𑀯𑀲𑁂𑀲𑀼 𑀇𑀫𑀁 𑀫𑀕𑁆𑀕𑀁 𑀦 𑀧𑀝𑀺𑀧𑀚𑁆𑀚𑀢𑀺, 𑀅𑀚𑁆𑀚 𑀧𑀦 𑀫𑀬𑁆𑀳𑀁 𑀲𑀗𑁆𑀕𑀳𑀢𑁆𑀣𑀸𑀬 𑀧𑀝𑀺𑀧𑀦𑁆𑀦𑁄 𑀪𑀯𑀺𑀲𑁆𑀲𑀢𑀺. 𑀅𑀳𑁄 𑀯𑀢 𑀫𑁂 𑀪𑀭𑀺𑀬𑀸 𑀫𑀫𑀢𑁆𑀣𑀸𑀬 𑀆𑀳𑀭𑀡𑀓𑀁 𑀆𑀳𑀸𑀭𑀁 𑀣𑁂𑀭𑀲𑁆𑀲 𑀧𑀢𑁆𑀢𑁂 𑀧𑀢𑀺𑀝𑁆𑀞𑀧𑁂𑀬𑁆𑀬𑀸’’𑀢𑀺.

𑀅𑀣𑀲𑁆𑀲 𑀪𑀭𑀺𑀬𑀸 ‘‘𑀅𑀚𑁆𑀚 𑀦𑀓𑁆𑀔𑀢𑁆𑀢𑀤𑀺𑀯𑀲𑁄’’𑀢𑀺 𑀧𑀸𑀢𑁄𑀯 𑀅𑀢𑁆𑀢𑀦𑁄 𑀮𑀪𑀦𑀓𑀦𑀺𑀬𑀸𑀫𑁂𑀦 𑀔𑀸𑀤𑀦𑀻𑀬𑀪𑁄𑀚𑀦𑀻𑀬𑀁 𑀲𑀁𑀯𑀺𑀥𑀸𑀬 𑀕𑀳𑁂𑀢𑁆𑀯𑀸 𑀲𑀸𑀫𑀺𑀓𑀲𑁆𑀲 𑀓𑀲𑀦𑀝𑁆𑀞𑀸𑀦𑀁 𑀆𑀕𑀘𑁆𑀙𑀦𑁆𑀢𑀻 𑀅𑀦𑁆𑀢𑀭𑀸𑀫𑀕𑁆𑀕𑁂 𑀣𑁂𑀭𑀁 𑀤𑀺𑀲𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀜𑁆𑀜𑁂𑀲𑀼 𑀤𑀺𑀯𑀲𑁂𑀲𑀼 𑀫𑀬𑁆𑀳𑀁 𑀣𑁂𑀭𑀁 𑀤𑀺𑀲𑁆𑀯𑀸 𑀤𑁂𑀬𑁆𑀬𑀥𑀫𑁆𑀫𑁄 𑀦 𑀳𑁄𑀢𑀺, 𑀤𑁂𑀬𑁆𑀬𑀥𑀫𑁆𑀫𑁂 𑀲𑀦𑁆𑀢𑁂𑀧𑀺 𑀫𑀫 𑀅𑀬𑁆𑀬𑀁 𑀦 𑀧𑀲𑁆𑀲𑀸𑀫𑀺, 𑀅𑀚𑁆𑀚 𑀧𑀦 𑀤𑁆𑀯𑀺𑀦𑁆𑀦𑀫𑁆𑀧𑀺 𑀲𑀫𑁆𑀫𑀼𑀔𑀻𑀪𑀸𑀯𑁄 𑀚𑀸𑀢𑁄. 𑀫𑀫 𑀲𑀸𑀫𑀺𑀓𑀲𑁆𑀲 𑀧𑀼𑀦 𑀲𑀫𑁆𑀧𑀸𑀤𑁂𑀢𑁆𑀯𑀸 𑀆𑀳𑀭𑀺𑀲𑁆𑀲𑀸𑀫𑀺, 𑀇𑀫𑀁 𑀢𑀸𑀯 𑀆𑀳𑀸𑀭𑀁 𑀣𑁂𑀭𑀲𑁆𑀲 𑀤𑀲𑁆𑀲𑀸𑀫𑀻’’𑀢𑀺 𑀢𑀻𑀳𑀺 𑀘𑁂𑀢𑀦𑀸𑀳𑀺 𑀲𑀫𑁆𑀧𑀬𑀼𑀢𑁆𑀢𑀁 𑀓𑀢𑁆𑀯𑀸 𑀢𑀁 𑀪𑁄𑀚𑀦𑀁 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀲𑁆𑀲 𑀧𑀢𑁆𑀢𑁂 𑀧𑀢𑀺𑀝𑁆𑀞𑀧𑁂𑀢𑁆𑀯𑀸 ‘‘𑀏𑀯𑀁𑀯𑀺𑀥𑀸 𑀤𑀼𑀕𑁆𑀕𑀢𑀚𑀻𑀯𑀺𑀢𑀸 𑀫𑀼𑀘𑁆𑀘𑀸𑀫𑀻’’𑀢𑀺 𑀆𑀳. 𑀣𑁂𑀭𑁄𑀧𑀺 ‘‘𑀢𑀯 𑀅𑀚𑁆𑀛𑀸𑀲𑀬𑁄 𑀧𑀽𑀭𑀢𑀽’’𑀢𑀺 𑀢𑀲𑁆𑀲𑀸𑀦𑀼𑀫𑁄𑀤𑀦𑀁 𑀓𑀢𑁆𑀯𑀸 𑀢𑀢𑁄 𑀦𑀺𑀯𑀢𑁆𑀢𑀺𑀢𑁆𑀯𑀸 𑀯𑀺𑀳𑀸𑀭𑀁 𑀅𑀕𑀫𑀸𑀲𑀺.

𑀲𑀸𑀧𑀺 𑀧𑀼𑀦 𑀅𑀢𑁆𑀢𑀦𑁄 𑀕𑁂𑀳𑀁 𑀕𑀦𑁆𑀢𑁆𑀯𑀸 𑀲𑀸𑀫𑀺𑀓𑀲𑁆𑀲 𑀆𑀳𑀸𑀭𑀁 𑀲𑀫𑁆𑀧𑀸𑀤𑁂𑀢𑁆𑀯𑀸 𑀆𑀤𑀸𑀬 𑀓𑀲𑀦𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀲𑀸𑀫𑀺𑀓𑀲𑁆𑀲 𑀓𑀼𑀚𑁆𑀛𑀦𑀪𑀸𑀯𑀢𑁄 𑀪𑀻𑀢𑀸 ‘‘𑀲𑀸𑀫𑀺, 𑀅𑀚𑁆𑀚 𑀏𑀓𑀤𑀺𑀯𑀲𑀁 𑀢𑀯 𑀫𑀦𑀁 𑀲𑀦𑁆𑀥𑀸𑀭𑁂𑀳𑀻’’𑀢𑀺 𑀆𑀳. 𑀓𑀺𑀁 𑀓𑀸𑀭𑀡𑀸𑀢𑀺? 𑀅𑀳𑀁 𑀅𑀚𑁆𑀚 𑀢𑀸𑀯 𑀆𑀳𑀸𑀭𑀁 𑀆𑀳𑀭𑀦𑁆𑀢𑀻 𑀅𑀦𑁆𑀢𑀭𑀸𑀫𑀕𑁆𑀕𑁂 𑀣𑁂𑀭𑀁 𑀤𑀺𑀲𑁆𑀯𑀸 𑀢𑀯 𑀪𑀸𑀕𑀪𑀢𑁆𑀢𑀁 𑀣𑁂𑀭𑀲𑁆𑀲 𑀧𑀢𑁆𑀢𑁂 𑀧𑀢𑀺𑀝𑁆𑀞𑀧𑁂𑀢𑁆𑀯𑀸 𑀧𑀼𑀦 𑀕𑁂𑀳𑀁 𑀕𑀦𑁆𑀢𑁆𑀯𑀸 𑀆𑀳𑀸𑀭𑀁 𑀧𑀘𑀺𑀢𑁆𑀯𑀸 𑀆𑀤𑀸𑀬 𑀆𑀕𑀢𑀸𑀫𑁆𑀳𑀻𑀢𑀺. 𑀫𑀦𑀸𑀧𑀁 𑀢𑁂, 𑀪𑀤𑁆𑀤𑁂, 𑀓𑀢𑀁, 𑀫𑀬𑀸𑀧𑀺 𑀧𑀸𑀢𑁄𑀯 𑀣𑁂𑀭𑀲𑁆𑀲 𑀤𑀦𑁆𑀢𑀓𑀝𑁆𑀞𑀜𑁆𑀘 𑀫𑀼𑀔𑁄𑀤𑀓𑀜𑁆𑀘 𑀤𑀺𑀦𑁆𑀦𑀁. 𑀅𑀚𑁆𑀚 𑀅𑀫𑁆𑀳𑀸𑀓𑀁 𑀲𑀼𑀧𑁆𑀧𑀪𑀸𑀢𑀁, 𑀲𑀩𑁆𑀩𑀫𑁆𑀧𑀺 𑀣𑁂𑀭𑀲𑁆𑀲 𑀅𑀫𑁆𑀳𑀸𑀓𑀁 𑀲𑀦𑁆𑀢𑀓𑀫𑁂𑀯 𑀚𑀸𑀢𑀦𑁆𑀢𑀺 𑀤𑁆𑀯𑀺𑀦𑁆𑀦𑀫𑁆𑀧𑀺 𑀚𑀦𑀸𑀦𑀁 𑀏𑀓𑀲𑀤𑀺𑀲𑀫𑁂𑀯 𑀘𑀺𑀢𑁆𑀢𑀁 𑀅𑀳𑁄𑀲𑀺. 𑀅𑀣 𑀧𑀼𑀡𑁆𑀡𑁄 𑀆𑀳𑀸𑀭𑀓𑀺𑀘𑁆𑀘𑀁 𑀓𑀢𑁆𑀯𑀸 𑀪𑀭𑀺𑀬𑀸𑀬 𑀊𑀭𑀼𑀫𑁆𑀳𑀺 𑀲𑀻𑀲𑀁 𑀓𑀢𑁆𑀯𑀸 𑀫𑀼𑀳𑀼𑀢𑁆𑀢𑀁 𑀦𑀺𑀧𑀚𑁆𑀚𑀺. 𑀅𑀣𑀲𑁆𑀲 𑀦𑀺𑀤𑁆𑀤𑀸 𑀑𑀓𑁆𑀓𑀫𑀺. 𑀲𑁄 𑀣𑁄𑀓𑀁 𑀦𑀺𑀤𑁆𑀤𑀸𑀬𑀺𑀢𑁆𑀯𑀸 𑀧𑀩𑀼𑀤𑁆𑀥𑁄 𑀓𑀲𑀺𑀢𑀝𑁆𑀞𑀸𑀦𑀁 𑀑𑀮𑁄𑀓𑁂𑀲𑀺, 𑀑𑀮𑁄𑀓𑀺𑀢𑁄𑀮𑁄𑀓𑀺𑀢𑀝𑁆𑀞𑀸𑀦𑀁 𑀫𑀳𑀸𑀓𑁄𑀲𑀸𑀢𑀓𑀺𑀧𑀼𑀧𑁆𑀨𑁂𑀳𑀺 𑀲𑀫𑁆𑀧𑀭𑀺𑀓𑀺𑀡𑁆𑀡𑀁 𑀯𑀺𑀬 𑀅𑀳𑁄𑀲𑀺. 𑀲𑁄 𑀪𑀭𑀺𑀬𑀁 𑀆𑀳 𑁋 ‘‘𑀪𑀤𑁆𑀤𑁂, 𑀓𑀺𑀦𑁆𑀦𑀸𑀫𑁂𑀢𑀁 𑀅𑀚𑁆𑀚 𑀇𑀤𑀁 𑀓𑀲𑀺𑀢𑀝𑁆𑀞𑀸𑀦𑀁 𑀲𑀼𑀯𑀡𑁆𑀡𑀯𑀡𑁆𑀡𑀁 𑀳𑀼𑀢𑁆𑀯𑀸 𑀔𑀸𑀬𑀢𑀻’’𑀢𑀺. 𑀅𑀬𑁆𑀬, 𑀅𑀚𑁆𑀚 𑀢𑁂 𑀲𑀓𑀮𑀤𑀺𑀯𑀲𑀁 𑀓𑀺𑀮𑀦𑁆𑀢𑀢𑀸𑀬 𑀅𑀓𑁆𑀔𑀻𑀦𑀺 𑀫𑀜𑁆𑀜𑁂 𑀪𑀫𑀦𑁆𑀢𑀻𑀢𑀺. 𑀪𑀤𑁆𑀤𑁂, 𑀫𑀬𑁆𑀳𑀁 𑀅𑀲𑁆𑀲𑀤𑁆𑀤𑀳𑀦𑁆𑀢𑀻 𑀲𑀬𑀁 𑀑𑀮𑁄𑀓𑁂𑀳𑀻𑀢𑀺. 𑀢𑀲𑁆𑀫𑀺𑀁 𑀓𑀸𑀮𑁂 𑀲𑀸 𑀑𑀮𑁄𑀓𑁂𑀢𑁆𑀯𑀸 𑀲𑀪𑀸𑀯𑀁 𑀅𑀬𑁆𑀬, 𑀓𑀣𑁂𑀲𑀺, 𑀏𑀯𑀫𑁂𑀢𑀁 𑀪𑀯𑀺𑀲𑁆𑀲𑀢𑀻𑀢𑀺.

𑀧𑀼𑀡𑁆𑀡𑁄 𑀉𑀝𑁆𑀞𑀸𑀬 𑀏𑀓𑀁 𑀓𑀝𑁆𑀞𑀺𑀁 𑀕𑀳𑁂𑀢𑁆𑀯𑀸 𑀦𑀗𑁆𑀕𑀮𑀲𑀻𑀲𑁂 𑀧𑀳𑀭𑀺, 𑀕𑀼𑀴𑀧𑀺𑀡𑁆𑀟𑁄 𑀯𑀺𑀬 𑀦𑀗𑁆𑀕𑀮𑀲𑀻𑀲𑁂 𑀅𑀮𑁆𑀮𑀻𑀬𑀺𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀲𑁄 𑀪𑀭𑀺𑀬𑀁 𑀧𑀓𑁆𑀓𑁄𑀲𑀺𑀢𑁆𑀯𑀸 𑀆𑀳 𑁋 ‘‘𑀪𑀤𑁆𑀤𑁂, 𑀅𑀜𑁆𑀜𑁂𑀲𑀁 𑀯𑀧𑀺𑀢𑀩𑀻𑀚𑀁 𑀦𑀸𑀫 𑀢𑀻𑀳𑀺 𑀯𑀸 𑀘𑀢𑀽𑀳𑀺 𑀯𑀸 𑀫𑀸𑀲𑁂𑀳𑀺 𑀨𑀮𑀁 𑀤𑁂𑀢𑀺, 𑀅𑀫𑁆𑀳𑀸𑀓𑀁 𑀧𑀦 𑀅𑀬𑁆𑀬𑀲𑁆𑀲 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀲𑁆𑀲 𑀅𑀦𑁆𑀢𑀭𑁂 𑀭𑁄𑀧𑀺𑀢𑁂𑀦 𑀲𑀤𑁆𑀥𑀸𑀩𑀻𑀚𑁂𑀦 𑀅𑀚𑁆𑀚𑁂𑀯 𑀅𑀯𑀲𑁆𑀲𑀁 𑀨𑀮𑀁 𑀤𑀺𑀦𑁆𑀦𑀁. 𑀇𑀫𑀲𑁆𑀫𑀺𑀁 𑀓𑀭𑀻𑀲𑀫𑀢𑁆𑀢𑁂 𑀧𑀤𑁂𑀲𑁂 𑀆𑀫𑀮𑀓𑀫𑀢𑁆𑀢𑁄𑀧𑀺 𑀧𑀁𑀲𑀼𑀧𑀺𑀡𑁆𑀟𑁄 𑀅𑀲𑀼𑀯𑀡𑁆𑀡𑁄 𑀦𑀸𑀫 𑀦𑀢𑁆𑀣𑀻’’𑀢𑀺. 𑀇𑀤𑀸𑀦𑀺 𑀓𑀺𑀁 𑀓𑀭𑀺𑀲𑁆𑀲𑀸𑀫, 𑀅𑀬𑁆𑀬𑀸𑀢𑀺? ‘‘𑀪𑀤𑁆𑀤𑁂, 𑀇𑀫𑀁 𑀏𑀢𑁆𑀢𑀓𑀁 𑀲𑀼𑀯𑀡𑁆𑀡𑀁 𑀣𑁂𑀦𑁂𑀢𑁆𑀯𑀸 𑀔𑀸𑀤𑀺𑀢𑀼𑀁 𑀦𑀸𑀫 𑀦 𑀲𑀓𑁆𑀓𑀸’’𑀢𑀺 𑀪𑀭𑀺𑀬𑀁 𑀢𑀲𑁆𑀫𑀺𑀁 𑀞𑀸𑀦𑁂 𑀞𑀧𑁂𑀢𑁆𑀯𑀸 𑀪𑀢𑁆𑀢𑀲𑁆𑀲 𑀧𑀽𑀭𑁂𑀢𑁆𑀯𑀸 𑀆𑀪𑀢𑀁 𑀧𑀸𑀢𑀺𑀁 𑀲𑀼𑀯𑀡𑁆𑀡𑀲𑁆𑀲 𑀧𑀽𑀭𑁂𑀢𑁆𑀯𑀸 𑀕𑀦𑁆𑀢𑁆𑀯𑀸 𑀭𑀜𑁆𑀜𑁄 𑀆𑀭𑁄𑀘𑀸𑀧𑁂𑀲𑀺 𑁋 ‘‘𑀏𑀓𑁄 𑀫𑀦𑀼𑀲𑁆𑀲𑁄 𑀲𑀼𑀯𑀡𑁆𑀡𑀧𑀸𑀢𑀺𑀁 𑀕𑀳𑁂𑀢𑁆𑀯𑀸 𑀞𑀺𑀢𑁄’’𑀢𑀺. 𑀭𑀸𑀚𑀸 𑀢𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀓𑀳𑀁 𑀢𑁂, 𑀢𑀸𑀢, 𑀮𑀤𑁆𑀥’’𑀦𑁆𑀢𑀺 𑀧𑀼𑀘𑁆𑀙𑀺. ‘‘𑀤𑁂𑀯, 𑀫𑀬𑁆𑀳𑀁 𑀏𑀓𑀁 𑀓𑀲𑀺𑀢𑀝𑁆𑀞𑀸𑀦𑀁 𑀲𑀩𑁆𑀩𑀁 𑀲𑀼𑀯𑀡𑁆𑀡𑀫𑁂𑀯 𑀚𑀸𑀢𑀁, 𑀧𑀳𑀺𑀡𑀺𑀢𑁆𑀯𑀸 𑀆𑀳𑀭𑀸𑀧𑁂𑀣𑀸’’𑀢𑀺 𑀆𑀳. 𑀢𑁆𑀯𑀁 𑀓𑀺𑀦𑁆𑀦𑀸𑀫𑁄𑀲𑀻𑀢𑀺? 𑀧𑀼𑀡𑁆𑀡𑁄 𑀦𑀸𑀫 𑀅𑀳𑀁, 𑀤𑁂𑀯𑀸𑀢𑀺. 𑀕𑀘𑁆𑀙𑀣, 𑀪𑀡𑁂, 𑀲𑀓𑀝𑀸𑀦𑀺 𑀬𑁄𑀚𑁂𑀢𑁆𑀯𑀸 𑀧𑀼𑀡𑁆𑀡𑀲𑁆𑀲 𑀓𑀲𑀺𑀢𑀝𑁆𑀞𑀸𑀦𑀢𑁄 𑀲𑀼𑀯𑀡𑁆𑀡𑀫𑀸𑀳𑀭𑀣𑀸𑀢𑀺.

𑀲𑀓𑀝𑁂𑀳𑀺 𑀲𑀤𑁆𑀥𑀺𑀁 𑀕𑀢𑀭𑀸𑀚𑀧𑀼𑀭𑀺𑀲𑀸 ‘‘𑀭𑀜𑁆𑀜𑁄 𑀧𑀼𑀜𑁆𑀜’’𑀦𑁆𑀢𑀺 𑀯𑀢𑁆𑀯𑀸 𑀲𑀼𑀯𑀡𑁆𑀡𑀧𑀺𑀡𑁆𑀟𑁂 𑀕𑀡𑁆𑀳𑀦𑁆𑀢𑀺, 𑀕𑀳𑀺𑀢𑀕𑀳𑀺𑀢𑀫𑁆𑀧𑀺 𑀓𑀲𑀺𑀢𑀮𑁂𑀟𑁆𑀟𑀼𑀬𑁂𑀯 𑀳𑁄𑀢𑀺. 𑀢𑁂 𑀕𑀦𑁆𑀢𑁆𑀯𑀸 𑀭𑀜𑁆𑀜𑁄 𑀆𑀭𑁄𑀘𑁂𑀲𑀼𑀁. 𑀢𑁂𑀦 𑀳𑀺 𑀪𑀡𑁂 𑀕𑀦𑁆𑀢𑁆𑀯𑀸 ‘‘𑀧𑀼𑀡𑁆𑀡𑀲𑁆𑀲 𑀧𑀼𑀜𑁆𑀜’’𑀦𑁆𑀢𑀺 𑀯𑀢𑁆𑀯𑀸 𑀕𑀡𑁆𑀳𑀣𑀸𑀢𑀺. 𑀕𑀳𑀺𑀢𑀕𑀳𑀺𑀢𑀁 𑀲𑀼𑀯𑀡𑁆𑀡𑀫𑁂𑀯 𑀳𑁄𑀢𑀺. 𑀢𑁂 𑀲𑀩𑁆𑀩𑀫𑁆𑀧𑀺 𑀢𑀁 𑀲𑀼𑀯𑀡𑁆𑀡𑀁 𑀆𑀳𑀭𑀺𑀢𑁆𑀯𑀸 𑀭𑀸𑀚𑀗𑁆𑀕𑀡𑁂 𑀭𑀸𑀲𑀺𑀁 𑀅𑀓𑀁𑀲𑀼. 𑀭𑀸𑀲𑀺 𑀉𑀩𑁆𑀩𑁂𑀥𑁂𑀦 𑀢𑀸𑀮𑀧𑁆𑀧𑀫𑀸𑀡𑁄 𑀅𑀳𑁄𑀲𑀺. 𑀭𑀸𑀚𑀸 𑀯𑀸𑀡𑀺𑀚𑁂 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀓𑀲𑁆𑀲 𑀕𑁂𑀳𑁂 𑀏𑀢𑁆𑀢𑀓𑀁 𑀲𑀼𑀯𑀡𑁆𑀡𑀁 𑀅𑀢𑁆𑀣𑀻’’𑀢𑀺 𑀧𑀼𑀘𑁆𑀙𑀺. 𑀦𑀢𑁆𑀣𑀺, 𑀤𑁂𑀯, 𑀓𑀲𑁆𑀲𑀘𑀻𑀢𑀺. 𑀏𑀢𑁆𑀢𑀓𑀲𑁆𑀲 𑀧𑀦 𑀥𑀦𑀲𑁆𑀲 𑀲𑀸𑀫𑀺𑀦𑁄 𑀓𑀺𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻𑀢𑀺? 𑀥𑀦𑀲𑁂𑀝𑁆𑀞𑀺𑀁 𑀦𑀸𑀫 𑀦𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺, 𑀤𑁂𑀯𑀸𑀢𑀺? 𑀢𑁂𑀦 𑀳𑀺 𑀧𑀼𑀡𑁆𑀡𑀁 𑀇𑀫𑀲𑁆𑀫𑀺𑀁 𑀦𑀕𑀭𑁂 𑀥𑀦𑀲𑁂𑀝𑁆𑀞𑀺𑀁 𑀦𑀸𑀫 𑀓𑀭𑁄𑀣𑀸𑀢𑀺 𑀲𑀩𑁆𑀩𑀁 𑀢𑀁 𑀲𑀼𑀯𑀡𑁆𑀡𑀁 𑀢𑀲𑁆𑀲𑁂𑀯 𑀤𑀢𑁆𑀯𑀸 𑀢𑀁𑀤𑀺𑀯𑀲𑀁𑀬𑁂𑀯𑀲𑁆𑀲 𑀲𑁂𑀝𑁆𑀞𑀺𑀝𑁆𑀞𑀸𑀦𑀁 𑀅𑀤𑀸𑀲𑀺. 𑀲𑁄 𑀲𑁂𑀝𑁆𑀞𑀺 𑀫𑀗𑁆𑀕𑀮𑀁 𑀓𑀭𑁄𑀦𑁆𑀢𑁄 𑀲𑀢𑁆𑀢𑀸𑀳𑀁 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀫𑀳𑀸𑀤𑀸𑀦𑀁 𑀅𑀤𑀸𑀲𑀺. 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀤𑀲𑀩𑀮𑀲𑁆𑀲 𑀪𑀢𑁆𑀢𑀸𑀦𑀼𑀫𑁄𑀤𑀦𑀸𑀬 𑀧𑀼𑀡𑁆𑀡𑀲𑁂𑀝𑁆𑀞𑀺𑀧𑀺 𑀪𑀭𑀺𑀬𑀸𑀧𑀺 𑀥𑀻𑀢𑀸𑀧𑀺 𑀲𑀩𑁆𑀩𑁂 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺𑀁𑀲𑀼.

𑀅𑀧𑀭𑀪𑀸𑀕𑁂 𑀭𑀸𑀚𑀕𑀳𑀲𑁂𑀝𑁆𑀞𑀺 ‘‘𑀧𑀼𑀡𑁆𑀡𑀲𑁂𑀝𑁆𑀞𑀺𑀦𑁄 𑀯𑀬𑀧𑁆𑀧𑀢𑁆𑀢𑀸 𑀤𑀸𑀭𑀺𑀓𑀸 𑀅𑀢𑁆𑀣𑀻’’𑀢𑀺 𑀲𑀼𑀢𑁆𑀯𑀸 𑀅𑀢𑁆𑀢𑀦𑁄 𑀧𑀼𑀢𑁆𑀢𑀲𑁆𑀲 𑀓𑀸𑀭𑀡𑀸 𑀢𑀲𑁆𑀲 𑀕𑁂𑀳𑀁 𑀧𑁂𑀲𑁂𑀲𑀺. 𑀲𑁄 𑀢𑀲𑁆𑀲 𑀲𑀸𑀲𑀦𑀁 𑀲𑀼𑀢𑁆𑀯𑀸 ‘‘𑀦𑀸𑀳𑀁 𑀥𑀻𑀢𑀭𑀁 𑀤𑀲𑁆𑀲𑀸𑀫𑀻’’𑀢𑀺 𑀧𑀝𑀺𑀲𑀸𑀲𑀦𑀁 𑀧𑁂𑀲𑁂𑀲𑀺. 𑀲𑀼𑀫𑀦𑀲𑁂𑀝𑁆𑀞𑀺𑀧𑀺 𑀧𑀼𑀦 𑀧𑁂𑀲𑁂𑀲𑀺 𑁋 ‘‘𑀢𑁆𑀯𑀁 𑀫𑀫 𑀕𑁂𑀳𑀁 𑀦𑀺𑀲𑁆𑀲𑀸𑀬 𑀯𑀲𑀺𑀢𑁆𑀯𑀸 𑀇𑀤𑀸𑀦𑀺 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀇𑀲𑁆𑀲𑀭𑁄 𑀳𑀼𑀢𑁆𑀯𑀸 𑀫𑀬𑁆𑀳𑀁 𑀤𑀸𑀭𑀺𑀓𑀁 𑀦 𑀤𑁂𑀲𑀻’’𑀢𑀺. 𑀢𑀢𑁄 𑀧𑀼𑀡𑁆𑀡𑀲𑁂𑀝𑁆𑀞𑀺 𑀆𑀳 𑁋 ‘‘𑀇𑀫𑀁 𑀢𑀸𑀯 𑀢𑀼𑀫𑁆𑀳𑀸𑀓𑀁 𑀲𑁂𑀝𑁆𑀞𑀺 𑀲𑀪𑀸𑀯𑀫𑁂𑀯 𑀓𑀣𑁂𑀲𑀺, 𑀧𑀼𑀭𑀺𑀲𑁄 𑀦𑀸𑀫 𑀲𑀩𑁆𑀩𑀓𑀸𑀮𑁂 𑀏𑀯𑀁𑀯𑀺𑀥𑁄𑀬𑁂𑀯𑀸𑀢𑀺 𑀦 𑀲𑀮𑁆𑀮𑀓𑁆𑀔𑁂𑀢𑀩𑁆𑀩𑁄. 𑀅𑀳𑀜𑁆𑀳𑀺 𑀇𑀤𑀸𑀦𑀺 𑀢𑀸𑀤𑀺𑀲𑁂 𑀧𑀼𑀭𑀺𑀲𑁂 𑀤𑀸𑀲𑁂 𑀓𑀢𑁆𑀯𑀸 𑀕𑀳𑁂𑀢𑀼𑀁 𑀲𑀓𑁆𑀓𑁄𑀫𑀺, 𑀢𑀼𑀬𑁆𑀳𑀁 𑀧𑀦 𑀚𑀸𑀢𑀺𑀁 𑀯𑀸 𑀕𑁄𑀢𑁆𑀢𑀁 𑀯𑀸 𑀦 𑀓𑁄𑀧𑁂𑀫𑀺. 𑀅𑀧𑀺𑀘 𑀔𑁄 𑀫𑀫 𑀥𑀻𑀢𑀸 𑀲𑁄𑀢𑀸𑀧𑀦𑁆𑀦𑀸 𑀅𑀭𑀺𑀬𑀲𑀸𑀯𑀺𑀓𑀸 𑀤𑁂𑀯𑀲𑀺𑀓𑀁 𑀓𑀳𑀸𑀧𑀡𑀕𑁆𑀖𑀦𑀓𑁂𑀳𑀺 𑀧𑀼𑀧𑁆𑀨𑁂𑀳𑀺 𑀧𑀽𑀚𑀁 𑀓𑀭𑁄𑀢𑀺, 𑀢𑀫𑀳𑀁 𑀢𑀼𑀫𑁆𑀳𑀸𑀤𑀺𑀲𑀲𑁆𑀲 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀲𑁆𑀲 𑀕𑁂𑀳𑀁 𑀦 𑀧𑁂𑀲𑁂𑀲𑁆𑀲𑀸𑀫𑀻’’𑀢𑀺. 𑀏𑀯𑀁 𑀧𑀼𑀡𑁆𑀡𑀲𑁂𑀝𑁆𑀞𑀺𑀲𑁆𑀲 𑀧𑀝𑀺𑀩𑀸𑀳𑀓𑀪𑀸𑀯𑀁 𑀜𑀢𑁆𑀯𑀸 𑀭𑀸𑀚𑀕𑀳𑀲𑁂𑀝𑁆𑀞𑀺 𑀧𑀼𑀦 𑀲𑀸𑀲𑀦𑀁 𑀧𑁂𑀲𑁂𑀲𑀺 𑁋 ‘‘𑀧𑁄𑀭𑀸𑀡𑀓𑀁 𑀯𑀺𑀲𑁆𑀲𑀸𑀲𑀁 𑀫𑀸 𑀪𑀺𑀦𑁆𑀤𑀢𑀼, 𑀅𑀳𑀁 𑀫𑀬𑁆𑀳𑀁 𑀲𑀼𑀡𑀺𑀲𑀸𑀬 𑀤𑁂𑀯𑀲𑀺𑀓𑀁 𑀤𑁆𑀯𑀺𑀦𑁆𑀦𑀁 𑀓𑀳𑀸𑀧𑀡𑀸𑀦𑀁 𑀅𑀦𑁆𑀥𑀦𑀓𑀸𑀦𑀺 𑀧𑀼𑀧𑁆𑀨𑀸𑀦𑀺 𑀲𑀚𑁆𑀚𑀸𑀧𑁂𑀲𑁆𑀲𑀸𑀫𑀻’’𑀢𑀺. 𑀲𑁄 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀥𑀻𑀢𑀭𑀁 𑀢𑀲𑁆𑀲 𑀖𑀭𑀁 𑀧𑁂𑀲𑁂𑀲𑀺.

𑀅𑀣𑁂𑀓𑀤𑀺𑀯𑀲𑀁 𑀲𑀸 𑀧𑀼𑀡𑁆𑀡𑀲𑁂𑀝𑁆𑀞𑀺𑀦𑁄 𑀥𑀻𑀢𑀸 𑀉𑀢𑁆𑀢𑀭𑀸 𑀅𑀢𑁆𑀢𑀦𑁄 𑀲𑀸𑀫𑀺𑀓𑀁 𑀏𑀯𑀫𑀸𑀳 𑁋 ‘‘𑀅𑀳𑀁 𑀅𑀢𑁆𑀢𑀦𑁄 𑀓𑀼𑀮𑀕𑁂𑀳𑁂 𑀫𑀸𑀲𑀲𑁆𑀲 𑀅𑀝𑁆𑀞 𑀤𑀺𑀯𑀲𑀸𑀦𑀺 𑀦𑀺𑀩𑀤𑁆𑀥𑀁 𑀉𑀧𑁄𑀲𑀣𑀓𑀫𑁆𑀫𑀁 𑀓𑀭𑁄𑀫𑀺, 𑀇𑀤𑀸𑀦𑀺𑀧𑀺 𑀢𑀼𑀫𑁆𑀳𑁂𑀲𑀼 𑀲𑀫𑁆𑀧𑀝𑀺𑀘𑁆𑀙𑀦𑁆𑀢𑁂𑀲𑀼 𑀉𑀧𑁄𑀲𑀣𑀗𑁆𑀕𑀸𑀦𑀺 𑀅𑀥𑀺𑀝𑁆𑀞𑀳𑁂𑀬𑁆𑀬’’𑀦𑁆𑀢𑀺. 𑀲𑁄 ‘‘𑀦 𑀲𑀓𑁆𑀓𑀸’’𑀢𑀺 𑀢𑀁 𑀦 𑀲𑀫𑁆𑀧𑀝𑀺𑀘𑁆𑀙𑀺. 𑀲𑀸 𑀢𑀁 𑀲𑀜𑁆𑀜𑀸𑀧𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀻 𑀢𑀼𑀡𑁆𑀳𑀻 𑀅𑀳𑁄𑀲𑀺. 𑀧𑀼𑀦 𑀅𑀦𑁆𑀢𑁄𑀯𑀲𑁆𑀲𑁂 ‘‘𑀉𑀧𑁄𑀲𑀣𑀺𑀓𑀸 𑀪𑀯𑀺𑀲𑁆𑀲𑀸𑀫𑀻’’𑀢𑀺 𑀢𑀤𑀸𑀧𑀺 𑀑𑀓𑀸𑀲𑀁 𑀓𑀸𑀭𑁂𑀦𑁆𑀢𑀻 𑀦𑁂𑀯 𑀅𑀮𑀢𑁆𑀣. 𑀲𑀸 𑀅𑀦𑁆𑀢𑁄𑀯𑀲𑁆𑀲𑁂 𑀅𑀟𑁆𑀠𑀢𑀺𑀬𑁂𑀲𑀼 𑀫𑀸𑀲𑁂𑀲𑀼 𑀅𑀢𑀺𑀓𑁆𑀓𑀦𑁆𑀢𑁂𑀲𑀼 𑀅𑀟𑁆𑀠𑀫𑀸𑀲𑁂 𑀅𑀯𑀲𑀺𑀝𑁆𑀞𑁂 𑀫𑀸𑀢𑀸𑀧𑀺𑀢𑀽𑀦𑀁 𑀲𑀸𑀲𑀦𑀁 𑀧𑁂𑀲𑁂𑀲𑀺 𑁋 ‘‘𑀅𑀳𑀁 𑀢𑀼𑀫𑁆𑀳𑁂𑀳𑀺 𑀘𑀸𑀭𑀓𑁂 𑀧𑀓𑁆𑀔𑀺𑀢𑁆𑀢𑀸 𑀏𑀢𑁆𑀢𑀓𑁂 𑀅𑀤𑁆𑀥𑀸𑀦𑁂 𑀏𑀓𑀤𑀺𑀯𑀲𑀫𑁆𑀧𑀺 𑀉𑀧𑁄𑀲𑀣𑀗𑁆𑀕𑀸𑀦𑀺 𑀅𑀥𑀺𑀝𑁆𑀞𑀸𑀢𑀼𑀁 𑀦 𑀮𑀪𑀸𑀫𑀺, 𑀧𑀜𑁆𑀘𑀤𑀲 𑀫𑁂 𑀓𑀳𑀸𑀧𑀡𑀲𑀳𑀲𑁆𑀲𑀸𑀦𑀺 𑀧𑁂𑀲𑁂𑀣𑀸’’𑀢𑀺. 𑀢𑁂 𑀥𑀻𑀢𑀼 𑀲𑀸𑀲𑀦𑀁 𑀲𑀼𑀢𑁆𑀯𑀸 ‘‘𑀓𑀺𑀁𑀓𑀸𑀭𑀡𑀸’’𑀢𑀺 𑀅𑀧𑀼𑀘𑁆𑀙𑀺𑀢𑁆𑀯𑀸𑀯 𑀧𑀳𑀺𑀡𑀺𑀁𑀲𑀼. 𑀉𑀢𑁆𑀢𑀭𑀸 𑀢𑁂 𑀓𑀳𑀸𑀧𑀡𑁂 𑀕𑀡𑁆𑀳𑀺𑀢𑁆𑀯𑀸 𑀢𑀲𑁆𑀫𑀺𑀁 𑀦𑀕𑀭𑁂 𑀲𑀺𑀭𑀺𑀫𑀸 𑀦𑀸𑀫 𑀕𑀡𑀺𑀓𑀸 𑀅𑀢𑁆𑀣𑀺, 𑀢𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀅𑀫𑁆𑀫 𑀲𑀺𑀭𑀺𑀫𑁂, 𑀅𑀳𑀁 𑀇𑀫𑀁 𑀅𑀟𑁆𑀠𑀫𑀸𑀲𑀁 𑀉𑀧𑁄𑀲𑀣𑀗𑁆𑀕𑀸𑀦𑀺 𑀅𑀥𑀺𑀝𑁆𑀞𑀳𑀺𑀲𑁆𑀲𑀸𑀫𑀺, 𑀢𑁆𑀯𑀁 𑀇𑀫𑀸𑀦𑀺 𑀧𑀜𑁆𑀘𑀤𑀲 𑀓𑀳𑀸𑀧𑀡𑀲𑀳𑀲𑁆𑀲𑀸𑀦𑀺 𑀕𑀳𑁂𑀢𑁆𑀯𑀸 𑀇𑀫𑀁 𑀅𑀟𑁆𑀠𑀫𑀸𑀲𑀁 𑀲𑁂𑀝𑁆𑀞𑀺𑀧𑀼𑀢𑁆𑀢𑀁 𑀧𑀭𑀺𑀘𑀭𑀸𑀳𑀻’’𑀢𑀺. 𑀲𑀸 ‘‘𑀲𑀸𑀥𑀼, 𑀅𑀬𑁆𑀬𑁂’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺. 𑀢𑀢𑁄 𑀧𑀝𑁆𑀞𑀸𑀬 𑀲𑁂𑀝𑁆𑀞𑀺𑀧𑀼𑀢𑁆𑀢𑁄 ‘‘𑀅𑀳𑀁 𑀲𑀺𑀭𑀺𑀫𑀸𑀬 𑀲𑀤𑁆𑀥𑀺𑀁 𑀫𑁄𑀤𑀺𑀲𑁆𑀲𑀸𑀫𑀻’’𑀢𑀺 𑀉𑀢𑁆𑀢𑀭𑀸𑀬 𑀅𑀟𑁆𑀠𑀫𑀸𑀲𑀁 𑀉𑀧𑁄𑀲𑀣𑀓𑀫𑁆𑀫𑀁 𑀲𑀫𑁆𑀧𑀝𑀺𑀘𑁆𑀙𑀺.

𑀲𑀸 𑀢𑁂𑀦 𑀲𑀫𑁆𑀧𑀝𑀺𑀘𑁆𑀙𑀺𑀢𑀪𑀸𑀯𑀁 𑀜𑀢𑁆𑀯𑀸 𑀤𑀺𑀯𑀲𑁂 𑀤𑀺𑀯𑀲𑁂 𑀧𑀸𑀢𑁄𑀯 𑀤𑀸𑀲𑀺𑀕𑀡𑀧𑀭𑀺𑀯𑀼𑀢𑀸 𑀲𑀢𑁆𑀣𑀼 𑀲𑀳𑀢𑁆𑀣𑀸 𑀔𑀸𑀤𑀦𑀻𑀬𑀪𑁄𑀚𑀦𑀻𑀬𑀁 𑀲𑀁𑀯𑀺𑀤𑀳𑀺𑀢𑁆𑀯𑀸 𑀲𑀢𑁆𑀣𑀭𑀺 𑀪𑀢𑁆𑀢𑀓𑀺𑀘𑁆𑀘𑀁 𑀓𑀢𑁆𑀯𑀸 𑀯𑀺𑀳𑀸𑀭𑀁 𑀕𑀢𑁂 𑀉𑀧𑁄𑀲𑀣𑀗𑁆𑀕𑀸𑀦𑀺 𑀅𑀥𑀺𑀝𑁆𑀞𑀸𑀬 𑀧𑀸𑀲𑀸𑀤𑀯𑀭𑀁 𑀆𑀭𑀼𑀬𑁆𑀳 𑀅𑀢𑁆𑀢𑀦𑁄 𑀲𑀻𑀮𑀸𑀦𑀺 𑀆𑀯𑀚𑁆𑀚𑀫𑀸𑀦𑀸 𑀦𑀺𑀲𑀻𑀤𑀢𑀺. 𑀏𑀯𑀁 𑀅𑀟𑁆𑀠𑀫𑀸𑀲𑀁 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀉𑀧𑁄𑀲𑀣𑀁 𑀯𑀺𑀲𑁆𑀲𑀚𑁆𑀚𑀦𑀤𑀺𑀯𑀲𑁂 𑀧𑀸𑀢𑁄𑀯 𑀬𑀸𑀕𑀼𑀔𑀚𑁆𑀚𑀓𑀸𑀤𑀻𑀦𑀺 𑀲𑀁𑀯𑀺𑀤𑀳𑀦𑁆𑀢𑀻 𑀯𑀺𑀘𑀭𑀢𑀺. 𑀢𑀲𑁆𑀫𑀺𑀁 𑀲𑀫𑀬𑁂 𑀲𑁂𑀝𑁆𑀞𑀺𑀧𑀼𑀢𑁆𑀢𑁄 𑀲𑀺𑀭𑀺𑀫𑀸𑀬 𑀲𑀤𑁆𑀥𑀺𑀁 𑀉𑀧𑀭𑀺𑀧𑀸𑀲𑀸𑀤𑀯𑀭𑀕𑀢𑁄 𑀚𑀸𑀮𑀯𑀸𑀢𑀧𑀸𑀦𑀁 𑀯𑀺𑀯𑀭𑀺𑀢𑁆𑀯𑀸 𑀅𑀦𑁆𑀢𑀭𑀯𑀢𑁆𑀣𑀼𑀁 𑀑𑀮𑁄𑀓𑁂𑀦𑁆𑀢𑁄 𑀅𑀝𑁆𑀞𑀸𑀲𑀺. 𑀉𑀢𑁆𑀢𑀭𑀸, 𑀯𑀸𑀢𑀧𑀸𑀦𑀘𑁆𑀙𑀺𑀤𑁆𑀤𑁂𑀦 𑀉𑀤𑁆𑀥𑀁 𑀑𑀮𑁄𑀓𑁂𑀲𑀺. 𑀲𑁂𑀝𑁆𑀞𑀺𑀧𑀼𑀢𑁆𑀢𑁄 𑀉𑀢𑁆𑀢𑀭𑀁 𑀑𑀮𑁄𑀓𑁂𑀢𑁆𑀯𑀸 ‘‘𑀦𑁂𑀭𑀬𑀺𑀓𑀚𑀸𑀢𑀺𑀓𑀸 𑀯𑀢𑀸𑀬𑀁 𑀏𑀯𑀁𑀯𑀺𑀥𑀁 𑀦𑀸𑀫 𑀲𑀫𑁆𑀧𑀢𑁆𑀢𑀺𑀁 𑀧𑀳𑀸𑀬 𑀉𑀓𑁆𑀔𑀮𑀺𑀓𑀫𑀲𑀺𑀫𑀓𑁆𑀔𑀺𑀢𑀸 𑀳𑀼𑀢𑁆𑀯𑀸 𑀦𑀺𑀓𑁆𑀓𑀸𑀭𑀡𑀸 𑀤𑀸𑀲𑀻𑀦𑀁 𑀅𑀦𑁆𑀢𑀭𑁂 𑀯𑀺𑀘𑀭𑀢𑀻’’𑀢𑀺 𑀲𑀺𑀢𑀁 𑀅𑀓𑀸𑀲𑀺. 𑀉𑀢𑁆𑀢𑀭𑀸, 𑀢𑀲𑁆𑀲 𑀧𑀫𑀸𑀤𑀪𑀸𑀯𑀁 𑀜𑀢𑁆𑀯𑀸 ‘‘𑀅𑀬𑀁 𑀩𑀸𑀮𑁄 𑀦𑀸𑀫 𑀅𑀢𑁆𑀢𑀦𑁄 𑀲𑀫𑁆𑀧𑀢𑁆𑀢𑀺 𑀲𑀩𑁆𑀩𑀓𑀸𑀮𑀁 𑀣𑀸𑀯𑀭𑀸𑀢𑀺 𑀲𑀜𑁆𑀜𑀻 𑀪𑀯𑀺𑀲𑁆𑀲𑀢𑀻’’𑀢𑀺 𑀲𑀬𑀫𑁆𑀧𑀺 𑀲𑀺𑀢𑀁 𑀅𑀓𑀸𑀲𑀺. 𑀢𑀢𑁄 𑀲𑀺𑀭𑀺𑀫𑀸 ‘‘𑀅𑀬𑀁 𑀘𑁂𑀝𑀺𑀓𑀸 𑀫𑀬𑀺 𑀞𑀺𑀢𑀸𑀬 𑀏𑀯𑀁 𑀫𑀫 𑀲𑀸𑀫𑀺𑀓𑁂𑀦 𑀲𑀤𑁆𑀥𑀺𑀁 𑀲𑀺𑀢𑀁 𑀓𑀭𑁄𑀢𑀻’’𑀢𑀺 𑀓𑀼𑀧𑀺𑀢𑀸 𑀯𑁂𑀕𑁂𑀦 𑀑𑀢𑀭𑀺. 𑀉𑀢𑁆𑀢𑀭𑀸, 𑀢𑀲𑁆𑀲𑀸 𑀆𑀕𑀫𑀦𑀸𑀓𑀧𑁆𑀧𑁂𑀦𑁂𑀯 ‘‘𑀅𑀬𑀁 𑀩𑀸𑀮𑀸 𑀅𑀟𑁆𑀠𑀫𑀸𑀲𑀫𑀢𑁆𑀢𑀁 𑀇𑀫𑀲𑁆𑀫𑀺𑀁 𑀕𑁂𑀳𑁂 𑀯𑀲𑀺𑀢𑁆𑀯𑀸 𑀫𑀬𑁆𑀳𑀫𑁂𑀯𑁂𑀢𑀁 𑀕𑁂𑀳𑀦𑁆𑀢𑀺𑀲𑀜𑁆𑀜𑀻 𑀚𑀸𑀢𑀸’’𑀢𑀺 𑀜𑀢𑁆𑀯𑀸 𑀢𑀗𑁆𑀔𑀡𑀜𑁆𑀜𑁂𑀯 𑀫𑁂𑀢𑁆𑀢𑀸𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀲𑀺𑀭𑀺𑀫𑀸𑀧𑀺 𑀤𑀸𑀲𑀻𑀦𑀁 𑀅𑀦𑁆𑀢𑀭𑁂𑀦 𑀆𑀕𑀦𑁆𑀢𑁆𑀯𑀸 𑀉𑀴𑀼𑀗𑁆𑀓𑀁 𑀕𑀳𑁂𑀢𑁆𑀯𑀸 𑀧𑀽𑀯𑀧𑀘𑀦𑀝𑁆𑀞𑀸𑀦𑁂 𑀧𑀓𑁆𑀓𑀼𑀣𑀺𑀢𑀢𑁂𑀮𑀲𑁆𑀲 𑀧𑀽𑀭𑁂𑀢𑁆𑀯𑀸 𑀉𑀢𑁆𑀢𑀭𑀸𑀬 𑀫𑀢𑁆𑀣𑀓𑁂 𑀆𑀲𑀺𑀜𑁆𑀘𑀺, 𑀫𑁂𑀢𑁆𑀢𑀸𑀛𑀸𑀦𑀲𑁆𑀲 𑀯𑀺𑀧𑁆𑀨𑀸𑀭𑁂𑀦 𑀉𑀢𑁆𑀢𑀭𑀸𑀬 𑀫𑀢𑁆𑀣𑀓𑁂 𑀆𑀲𑀺𑀢𑁆𑀢𑀁 𑀧𑀓𑁆𑀓𑀼𑀣𑀺𑀢𑀢𑁂𑀮𑀁 𑀧𑀤𑀼𑀫𑀧𑀢𑁆𑀢𑁂 𑀆𑀲𑀺𑀢𑁆𑀢𑀉𑀤𑀓𑀁 𑀯𑀺𑀬 𑀯𑀺𑀦𑀺𑀯𑀢𑁆𑀢𑀺𑀢𑁆𑀯𑀸 𑀕𑀢𑀁.

𑀢𑀲𑁆𑀫𑀺𑀁 𑀔𑀡𑁂 𑀲𑀺𑀭𑀺𑀫𑀸𑀬 𑀲𑀫𑀻𑀧𑁂 𑀞𑀺𑀢𑀸 𑀤𑀸𑀲𑀺𑀬𑁄 𑀢𑀁 𑀑𑀮𑁄𑀓𑁂𑀢𑁆𑀯𑀸, ‘‘𑀪𑁄 𑀚𑁂, 𑀢𑁆𑀯𑀁 𑀅𑀫𑁆𑀳𑀸𑀓𑀁 𑀅𑀬𑁆𑀬𑀸𑀬 𑀳𑀢𑁆𑀣𑀢𑁄 𑀫𑀽𑀮𑀁 𑀕𑀳𑁂𑀢𑁆𑀯𑀸 𑀆𑀕𑀢𑀸 𑀇𑀫𑀲𑁆𑀫𑀺𑀁 𑀕𑁂𑀳𑁂 𑀯𑀲𑀫𑀸𑀦𑀸 𑀅𑀫𑁆𑀳𑀸𑀓𑀁 𑀅𑀬𑁆𑀬𑀸𑀬 𑀲𑀤𑀺𑀲𑀸 𑀪𑀯𑀺𑀢𑀼𑀁 𑀯𑀸𑀬𑀫𑀲𑀻’’𑀢𑀺 𑀲𑀫𑁆𑀫𑀼𑀔𑀝𑁆𑀞𑀸𑀦𑁂 𑀢𑀁 𑀧𑀭𑀺𑀪𑀸𑀲𑀺𑀁𑀲𑀼. 𑀢𑀲𑁆𑀫𑀺𑀁 𑀔𑀡𑁂 𑀲𑀺𑀭𑀺𑀫𑀸 𑀅𑀢𑁆𑀢𑀦𑁄 𑀆𑀕𑀦𑁆𑀢𑀼𑀓𑀪𑀸𑀯𑀁 𑀅𑀜𑁆𑀜𑀸𑀲𑀺. 𑀲𑀸 𑀢𑀢𑁄𑀯 𑀕𑀦𑁆𑀢𑁆𑀯𑀸 𑀉𑀢𑁆𑀢𑀭𑀸𑀬 𑀧𑀸𑀤𑁂𑀲𑀼 𑀧𑀢𑀺𑀢𑁆𑀯𑀸, ‘‘𑀅𑀬𑁆𑀬𑁂, 𑀅𑀦𑀼𑀧𑀥𑀸𑀭𑁂𑀢𑁆𑀯𑀸 𑀫𑁂 𑀓𑀢𑀁, 𑀔𑀫𑀣 𑀫𑀬𑁆𑀳’’𑀦𑁆𑀢𑀺 𑀆𑀳. 𑀅𑀫𑁆𑀫 𑀲𑀺𑀭𑀺𑀫𑁂, 𑀦𑀸𑀳𑀁 𑀢𑀯 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀔𑀫𑀺𑀲𑁆𑀲𑀸𑀫𑀺, 𑀅𑀳𑀁 𑀲𑀧𑀺𑀢𑀺𑀓𑀸 𑀥𑀻𑀢𑀸, 𑀤𑀲𑀩𑀮𑁂 𑀔𑀫𑀦𑁆𑀢𑁂𑀬𑁂𑀯 𑀔𑀫𑀺𑀲𑁆𑀲𑀸𑀫𑀻𑀢𑀺.

𑀲𑀢𑁆𑀣𑀸𑀧𑀺 𑀔𑁄 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀸𑀭𑁄 𑀆𑀕𑀦𑁆𑀢𑁆𑀯𑀸 𑀉𑀢𑁆𑀢𑀭𑀸𑀬 𑀦𑀺𑀯𑁂𑀲𑀦𑁂 𑀧𑀜𑁆𑀜𑀢𑁆𑀢𑀸𑀲𑀦𑁂 𑀦𑀺𑀲𑀻𑀤𑀺. 𑀲𑀺𑀭𑀺𑀫𑀸 𑀕𑀦𑁆𑀢𑁆𑀯𑀸 𑀲𑀢𑁆𑀣𑀼 𑀧𑀸𑀤𑁂𑀲𑀼 𑀧𑀢𑀺𑀢𑁆𑀯𑀸, ‘‘𑀪𑀦𑁆𑀢𑁂, 𑀫𑀬𑀸 𑀅𑀬𑁆𑀬𑀸𑀬 𑀉𑀢𑁆𑀢𑀭𑀸𑀬 𑀅𑀦𑁆𑀢𑀭𑁂 𑀏𑀓𑁄 𑀤𑁄𑀲𑁄 𑀓𑀢𑁄, 𑀢𑀼𑀫𑁆𑀳𑁂𑀲𑀼 𑀔𑀫𑀦𑁆𑀢𑁂𑀲𑀼 𑀔𑀫𑀺𑀲𑁆𑀲𑀸𑀫𑀻𑀢𑀺 𑀯𑀤𑀢𑀺, 𑀔𑀫𑀣 𑀫𑀬𑁆𑀳𑀁 𑀪𑀕𑀯𑀸’’𑀢𑀺. 𑀔𑀫𑀸𑀫𑀺 𑀢𑁂 𑀲𑀺𑀭𑀺𑀫𑁂𑀢𑀺. 𑀲𑀸 𑀢𑀲𑁆𑀫𑀺𑀁 𑀓𑀸𑀮𑁂 𑀕𑀦𑁆𑀢𑁆𑀯𑀸 𑀉𑀢𑁆𑀢𑀭𑀁 𑀔𑀫𑀸𑀧𑁂𑀲𑀺. 𑀢𑀁𑀤𑀺𑀯𑀲𑀜𑁆𑀘 𑀲𑀺𑀭𑀺𑀫𑀸 𑀤𑀲𑀩𑀮𑀲𑁆𑀲 𑀪𑀢𑁆𑀢𑀸𑀦𑀼𑀫𑁄𑀤𑀦𑀁 𑀲𑀼𑀢𑁆𑀯𑀸 𑁋

‘‘𑀅𑀓𑁆𑀓𑁄𑀥𑁂𑀦 𑀚𑀺𑀦𑁂 𑀓𑁄𑀥𑀁, 𑀅𑀲𑀸𑀥𑀼𑀁 𑀲𑀸𑀥𑀼𑀦𑀸 𑀚𑀺𑀦𑁂;

𑀚𑀺𑀦𑁂 𑀓𑀤𑀭𑀺𑀬𑀁 𑀤𑀸𑀦𑁂𑀦, 𑀲𑀘𑁆𑀘𑁂𑀦𑀸𑀮𑀺𑀓𑀯𑀸𑀤𑀺𑀦’’𑀦𑁆𑀢𑀺. (𑀥. 𑀧. 𑁨𑁨𑁩) 𑁋

𑀕𑀸𑀣𑀸𑀧𑀭𑀺𑀬𑁄𑀲𑀸𑀦𑁂 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀺𑀢𑀸 𑀤𑀲𑀩𑀮𑀁 𑀦𑀺𑀫𑀦𑁆𑀢𑁂𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀫𑀳𑀸𑀤𑀸𑀦𑀁 𑀅𑀤𑀸𑀲𑀺. 𑀏𑀯𑀫𑁂𑀢𑀁 𑀯𑀢𑁆𑀣𑀼 𑀲𑀫𑀼𑀝𑁆𑀞𑀺𑀢𑀁. 𑀅𑀧𑀭𑀪𑀸𑀕𑁂 𑀧𑀦 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀉𑀧𑀸𑀲𑀺𑀓𑀸𑀬𑁄 𑀞𑀸𑀦𑀦𑁆𑀢𑀭𑁂𑀲𑀼 𑀞𑀧𑁂𑀦𑁆𑀢𑁄 𑀉𑀢𑁆𑀢𑀭𑀁 𑀦𑀦𑁆𑀤𑀫𑀸𑀢𑀭𑀁 𑀛𑀸𑀬𑀻𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀲𑀻𑀢𑀺.

𑀲𑀼𑀧𑁆𑀧𑀯𑀸𑀲𑀸𑀯𑀢𑁆𑀣𑀼

𑁨𑁬𑁩. 𑀙𑀝𑁆𑀞𑁂 𑀧𑀡𑀻𑀢𑀤𑀸𑀬𑀺𑀓𑀸𑀦𑀦𑁆𑀢𑀺 𑀧𑀡𑀻𑀢𑀭𑀲𑀤𑀸𑀬𑀺𑀓𑀸𑀦𑀁 𑀉𑀧𑀸𑀲𑀺𑀓𑀸𑀦𑀁, 𑀲𑀼𑀧𑁆𑀧𑀯𑀸𑀲𑀸 𑀓𑁄𑀮𑀺𑀬𑀥𑀻𑀢𑀸, 𑀅𑀕𑁆𑀕𑀸𑀢𑀺 𑀤𑀲𑁆𑀲𑁂𑀢𑀺. 𑀲𑀸 𑀓𑀺𑀭 𑀧𑀤𑀼𑀫𑀼𑀢𑁆𑀢𑀭𑀩𑀼𑀤𑁆𑀥𑀓𑀸𑀮𑁂 𑀳𑀁𑀲𑀯𑀢𑀺𑀬𑀁 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑀸 𑀲𑀢𑁆𑀣𑀼 𑀥𑀫𑁆𑀫𑀤𑁂𑀲𑀦𑀁 𑀲𑀼𑀡𑀦𑁆𑀢𑀻 𑀲𑀢𑁆𑀣𑀸𑀭𑀁 𑀏𑀓𑀁 𑀉𑀧𑀸𑀲𑀺𑀓𑀁 𑀧𑀡𑀻𑀢𑀤𑀸𑀬𑀺𑀓𑀸𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀦𑁆𑀢𑀁 𑀤𑀺𑀲𑁆𑀯𑀸 𑀅𑀥𑀺𑀓𑀸𑀭𑀓𑀫𑁆𑀫𑀁 𑀓𑀢𑁆𑀯𑀸 𑀢𑀁 𑀞𑀸𑀦𑀦𑁆𑀢𑀭𑀁 𑀧𑀢𑁆𑀣𑁂𑀲𑀺. 𑀲𑀸 𑀓𑀧𑁆𑀧𑀲𑀢𑀲𑀳𑀲𑁆𑀲𑀁 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀓𑁄𑀮𑀺𑀬𑀦𑀕𑀭𑁂 𑀔𑀢𑁆𑀢𑀺𑀬𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺, 𑀲𑀼𑀧𑁆𑀧𑀯𑀸𑀲𑀸𑀢𑀺𑀲𑁆𑀲𑀸 𑀦𑀸𑀫𑀁 𑀅𑀓𑀁𑀲𑀼. 𑀲𑀸 𑀯𑀬𑀧𑁆𑀧𑀢𑁆𑀢𑀸 𑀏𑀓𑀲𑁆𑀲 𑀲𑀓𑁆𑀬𑀓𑀼𑀫𑀸𑀭𑀲𑁆𑀲 𑀕𑁂𑀳𑀁 𑀕𑀢𑀸, 𑀧𑀞𑀫𑀤𑀲𑁆𑀲𑀦𑁂𑀬𑁂𑀯 𑀲𑀢𑁆𑀣𑀼 𑀥𑀫𑁆𑀫𑀓𑀣𑀁 𑀲𑀼𑀢𑁆𑀯𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀸𑀲𑀺. 𑀲𑀸 𑀅𑀧𑀭𑀪𑀸𑀕𑁂 𑀲𑀻𑀯𑀮𑀺𑀁 𑀦𑀸𑀫 𑀤𑀸𑀭𑀓𑀁 𑀯𑀺𑀚𑀸𑀬𑀺. 𑀢𑀲𑁆𑀲 𑀯𑀢𑁆𑀣𑀼 𑀳𑁂𑀝𑁆𑀞𑀸 𑀯𑀺𑀢𑁆𑀣𑀸𑀭𑀺𑀢𑀫𑁂𑀯.

𑀲𑀸 𑀏𑀓𑀲𑁆𑀫𑀺𑀁 𑀲𑀫𑀬𑁂 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀦𑀸𑀦𑀕𑁆𑀕𑀭𑀲𑀧𑀡𑀻𑀢𑀪𑁄𑀚𑀦𑀁 𑀅𑀤𑀸𑀲𑀺. 𑀲𑀢𑁆𑀣𑀸 𑀓𑀢𑀪𑀢𑁆𑀢𑀓𑀺𑀘𑁆𑀘𑁄 𑀅𑀦𑀼𑀫𑁄𑀤𑀦𑀁 𑀓𑀭𑁄𑀦𑁆𑀢𑁄 𑀲𑀼𑀧𑁆𑀧𑀯𑀸𑀲𑀸𑀬 𑀇𑀫𑀁 𑀥𑀫𑁆𑀫𑀁 𑀤𑁂𑀲𑁂𑀲𑀺 ‘‘𑀪𑁄𑀚𑀦𑀁 𑀲𑀼𑀧𑁆𑀧𑀯𑀸𑀲𑁂 𑀤𑁂𑀦𑁆𑀢𑀻 𑀅𑀭𑀺𑀬𑀲𑀸𑀯𑀺𑀓𑀸 𑀧𑀝𑀺𑀕𑁆𑀕𑀸𑀳𑀓𑀸𑀦𑀁 𑀧𑀜𑁆𑀘 𑀞𑀸𑀦𑀸𑀦𑀺 𑀤𑁂𑀢𑀺. 𑀆𑀬𑀼𑀁 𑀤𑁂𑀢𑀺, 𑀯𑀡𑁆𑀡𑀁 𑀤𑁂𑀢𑀺, 𑀲𑀼𑀔𑀁 𑀤𑁂𑀢𑀺, 𑀩𑀮𑀁 𑀤𑁂𑀢𑀺, 𑀧𑀝𑀺𑀪𑀸𑀦𑀁 𑀤𑁂𑀢𑀺. 𑀆𑀬𑀼𑀁 𑀔𑁄 𑀧𑀦 𑀤𑀢𑁆𑀯𑀸 𑀆𑀬𑀼𑀲𑁆𑀲 𑀪𑀸𑀕𑀺𑀦𑀻 𑀳𑁄𑀢𑀺 𑀤𑀺𑀩𑁆𑀩𑀲𑁆𑀲 𑀯𑀸 𑀫𑀸𑀦𑀼𑀲𑀲𑁆𑀲 𑀯𑀸…𑀧𑁂… 𑀧𑀝𑀺𑀪𑀸𑀦𑀁 𑀤𑀢𑁆𑀯𑀸 𑀧𑀝𑀺𑀪𑀸𑀦𑀲𑁆𑀲 𑀪𑀸𑀕𑀺𑀦𑀻 𑀳𑁄𑀢𑀺 𑀤𑀺𑀩𑁆𑀩𑀲𑁆𑀲 𑀯𑀸 𑀫𑀸𑀦𑀼𑀲𑀲𑁆𑀲 𑀯𑀸’’𑀢𑀺. 𑀏𑀯𑀫𑁂𑀢𑀁 𑀯𑀢𑁆𑀣𑀼 𑀲𑀫𑀼𑀝𑁆𑀞𑀺𑀢𑀁. 𑀅𑀣 𑀅𑀧𑀭𑀪𑀸𑀕𑁂 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀉𑀧𑀸𑀲𑀺𑀓𑀸𑀬𑁄 𑀞𑀸𑀦𑀦𑁆𑀢𑀭𑁂𑀲𑀼 𑀞𑀧𑁂𑀦𑁆𑀢𑁄 𑀲𑀼𑀧𑁆𑀧𑀯𑀸𑀲𑀁 𑀓𑁄𑀮𑀺𑀬𑀥𑀻𑀢𑀭𑀁 𑀧𑀡𑀻𑀢𑀤𑀸𑀬𑀺𑀓𑀸𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀲𑀻𑀢𑀺.

𑀲𑀼𑀧𑁆𑀧𑀺𑀬𑀸𑀯𑀢𑁆𑀣𑀼

𑁨𑁬𑁪. 𑀲𑀢𑁆𑀢𑀫𑁂 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑀻𑀦𑀦𑁆𑀢𑀺 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑀻𑀦𑀁 𑀉𑀧𑀸𑀲𑀺𑀓𑀸𑀦𑀁, 𑀲𑀼𑀧𑁆𑀧𑀺𑀬𑀸 𑀉𑀧𑀸𑀲𑀺𑀓𑀸, 𑀅𑀕𑁆𑀕𑀸𑀢𑀺 𑀤𑀲𑁆𑀲𑁂𑀢𑀺. 𑀅𑀬𑀁 𑀓𑀺𑀭 𑀧𑀤𑀼𑀫𑀼𑀢𑁆𑀢𑀭𑀩𑀼𑀤𑁆𑀥𑀓𑀸𑀮𑁂 𑀳𑀁𑀲𑀯𑀢𑀺𑀬𑀁 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑀸 𑀅𑀧𑀭𑀪𑀸𑀕𑁂 𑀲𑀢𑁆𑀣𑀼 𑀥𑀫𑁆𑀫𑀤𑁂𑀲𑀦𑀁 𑀲𑀼𑀡𑀦𑁆𑀢𑀻 𑀲𑀢𑁆𑀣𑀸𑀭𑀁 𑀏𑀓𑀁 𑀉𑀧𑀸𑀲𑀺𑀓𑀁 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑀻𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀦𑁆𑀢𑀁 𑀤𑀺𑀲𑁆𑀯𑀸 𑀅𑀥𑀺𑀓𑀸𑀭𑀓𑀫𑁆𑀫𑀁 𑀓𑀢𑁆𑀯𑀸 𑀢𑀁 𑀞𑀸𑀦𑀦𑁆𑀢𑀭𑀁 𑀧𑀢𑁆𑀣𑁂𑀲𑀺. 𑀲𑀸 𑀓𑀧𑁆𑀧𑀲𑀢𑀲𑀳𑀲𑁆𑀲𑀁 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀩𑀸𑀭𑀸𑀡𑀲𑀺𑀬𑀁 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑀺, 𑀲𑀼𑀧𑁆𑀧𑀺𑀬𑀸𑀢𑀺𑀲𑁆𑀲𑀸 𑀦𑀸𑀫𑀁 𑀅𑀓𑀁𑀲𑀼. 𑀅𑀧𑀭𑀪𑀸𑀕𑁂 𑀲𑀢𑁆𑀣𑀸 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀸𑀭𑁄 𑀩𑀸𑀭𑀸𑀡𑀲𑀺𑀁 𑀅𑀕𑀫𑀸𑀲𑀺. 𑀲𑀸 𑀢𑀣𑀸𑀕𑀢𑀲𑁆𑀲 𑀧𑀞𑀫𑀤𑀲𑁆𑀲𑀦𑁂𑀬𑁂𑀯 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀸𑀲𑀺.

𑀅𑀣𑁂𑀓𑀤𑀺𑀯𑀲𑀁 𑀥𑀫𑁆𑀫𑀲𑁆𑀲𑀯𑀦𑀢𑁆𑀣𑀸𑀬 𑀯𑀺𑀳𑀸𑀭𑀁 𑀕𑀢𑀸. 𑀯𑀺𑀳𑀸𑀭𑀘𑀸𑀭𑀺𑀓𑀁 𑀘𑀭𑀫𑀸𑀦𑀸 𑀏𑀓𑀁 𑀪𑀺𑀓𑁆𑀔𑀼𑀁 𑀕𑀺𑀮𑀸𑀦𑀁 𑀤𑀺𑀲𑁆𑀯𑀸 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀝𑀺𑀲𑀦𑁆𑀣𑀸𑀭𑀁 𑀓𑀢𑁆𑀯𑀸 ‘‘𑀅𑀬𑁆𑀬𑀲𑁆𑀲 𑀓𑀺𑀁 𑀮𑀤𑁆𑀥𑀼𑀁 𑀯𑀝𑁆𑀝𑀢𑀻’’𑀢𑀺 𑀧𑀼𑀘𑁆𑀙𑀺. 𑀭𑀲𑀁 𑀮𑀤𑁆𑀥𑀼𑀁 𑀯𑀝𑁆𑀝𑀢𑀺, 𑀉𑀧𑀸𑀲𑀺𑀓𑁂𑀢𑀺. ‘‘𑀳𑁄𑀢𑀼, 𑀪𑀦𑁆𑀢𑁂, 𑀅𑀳𑀁 𑀧𑀳𑀺𑀡𑀺𑀲𑁆𑀲𑀸𑀫𑀻’’𑀢𑀺 𑀣𑁂𑀭𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀅𑀦𑁆𑀢𑁄𑀦𑀕𑀭𑀁 𑀕𑀦𑁆𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀧𑀯𑀢𑁆𑀢𑀫𑀁𑀲𑀢𑁆𑀣𑀸𑀬 𑀤𑀸𑀲𑀺𑀁 𑀅𑀦𑁆𑀢𑀭𑀸𑀧𑀡𑀁 𑀧𑁂𑀲𑁂𑀲𑀺. 𑀲𑀸 𑀲𑀓𑀮𑀦𑀕𑀭𑁂 𑀧𑀯𑀢𑁆𑀢𑀫𑀁𑀲𑀁 𑀅𑀮𑀪𑀺𑀢𑁆𑀯𑀸 𑀅𑀮𑀤𑁆𑀥𑀪𑀸𑀯𑀁 𑀓𑀣𑁂𑀲𑀺. 𑀉𑀧𑀸𑀲𑀺𑀓𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀳𑀁 𑀅𑀬𑁆𑀬𑀲𑁆𑀲 𑀭𑀲𑀁 𑀧𑀳𑀺𑀡𑀺𑀲𑁆𑀲𑀸𑀫𑀻𑀢𑀺 𑀯𑀢𑁆𑀯𑀸 𑀲𑀘𑁂 𑀦 𑀧𑁂𑀲𑁂𑀲𑁆𑀲𑀸𑀫𑀺, 𑀅𑀬𑁆𑀬𑁄 𑀅𑀜𑁆𑀜𑀢𑁄𑀧𑀺 𑀅𑀮𑀪𑀦𑁆𑀢𑁄 𑀓𑀺𑀮𑀫𑀺𑀲𑁆𑀲𑀢𑀺, 𑀬𑀁𑀓𑀺𑀜𑁆𑀘𑀺 𑀓𑀢𑁆𑀯𑀸 𑀧𑁂𑀲𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀕𑀩𑁆𑀪𑀁 𑀧𑀯𑀺𑀲𑀺𑀢𑁆𑀯𑀸 𑀊𑀭𑀼𑀫𑀁𑀲𑀁 𑀙𑀺𑀦𑁆𑀤𑀺𑀢𑁆𑀯𑀸 𑀤𑀸𑀲𑀺𑀬𑀸 𑀅𑀤𑀸𑀲𑀺 ‘‘𑀇𑀤𑀁 𑀫𑀁𑀲𑀁 𑀕𑀳𑁂𑀢𑁆𑀯𑀸 𑀲𑀫𑁆𑀪𑀸𑀭𑁂𑀳𑀺 𑀬𑁄𑀚𑁂𑀢𑁆𑀯𑀸 𑀭𑀲𑀁 𑀓𑀢𑁆𑀯𑀸 𑀯𑀺𑀳𑀸𑀭𑀁 𑀦𑁂𑀢𑁆𑀯𑀸 𑀅𑀬𑁆𑀬𑀲𑁆𑀲 𑀤𑁂𑀳𑀺. 𑀲𑁄 𑀘𑁂 𑀫𑀁 𑀧𑀼𑀘𑁆𑀙𑀢𑀺, 𑀕𑀺𑀮𑀸𑀦𑀸𑀢𑀺 𑀯𑀤𑁂𑀳𑀻’’𑀢𑀺. 𑀲𑀸 𑀢𑀣𑀸 𑀅𑀓𑀸𑀲𑀺.

𑀲𑀢𑁆𑀣𑀸 𑀢𑀁 𑀓𑀸𑀭𑀡𑀁 𑀜𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀪𑀺𑀓𑁆𑀔𑀸𑀘𑀸𑀭𑀯𑁂𑀮𑀸𑀬 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑁄 𑀉𑀧𑀸𑀲𑀺𑀓𑀸𑀬 𑀕𑁂𑀳𑀁 𑀅𑀕𑀫𑀸𑀲𑀺. 𑀲𑀸 𑀢𑀣𑀸𑀕𑀢𑀲𑁆𑀲 𑀆𑀕𑀢𑀪𑀸𑀯𑀁 𑀲𑀼𑀢𑁆𑀯𑀸 𑀲𑀸𑀫𑀺𑀓𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀅𑀬𑁆𑀬𑀧𑀼𑀢𑁆𑀢, 𑀅𑀳𑀁 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑀼𑀁 𑀦 𑀲𑀓𑁆𑀓𑁄𑀫𑀺, 𑀕𑀘𑁆𑀙 𑀢𑁆𑀯𑀁 𑀲𑀢𑁆𑀣𑀸𑀭𑀁 𑀅𑀦𑁆𑀢𑁄𑀕𑁂𑀳𑀁 𑀧𑀯𑁂𑀲𑁂𑀢𑁆𑀯𑀸 𑀦𑀺𑀲𑀻𑀤𑀸𑀧𑁂𑀳𑀻’’𑀢𑀺. 𑀲𑁄 𑀢𑀣𑀸 𑀅𑀓𑀸𑀲𑀺. 𑀲𑀢𑁆𑀣𑀸 ‘‘𑀓𑀳𑀁 𑀲𑀼𑀧𑁆𑀧𑀺𑀬𑀸’’𑀢𑀺 𑀧𑀼𑀘𑁆𑀙𑀺. 𑀕𑀺𑀮𑀸𑀦𑀸, 𑀪𑀦𑁆𑀢𑁂𑀢𑀺. 𑀧𑀓𑁆𑀓𑁄𑀲𑀣, 𑀦𑀦𑁆𑀢𑀺. 𑀅𑀣 𑀢𑁂 𑀕𑀦𑁆𑀢𑁆𑀯𑀸 ‘‘𑀲𑀢𑁆𑀣𑀸 𑀢𑀁 𑀧𑀓𑁆𑀓𑁄𑀲𑀢𑀻’’𑀢𑀺 𑀆𑀳𑀁𑀲𑀼. 𑀲𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀲𑀩𑁆𑀩𑀮𑁄𑀓𑀲𑁆𑀲 𑀳𑀺𑀢𑀸𑀦𑀼𑀓𑀫𑁆𑀧𑀓𑁄 𑀲𑀢𑁆𑀣𑀸 𑀦 𑀇𑀫𑀁 𑀓𑀸𑀭𑀡𑀁 𑀅𑀤𑀺𑀲𑁆𑀯𑀸 𑀧𑀓𑁆𑀓𑁄𑀲𑀸𑀧𑁂𑀲𑁆𑀲𑀢𑀻’’𑀢𑀺 𑀲𑀳𑀲𑀸 𑀫𑀜𑁆𑀘𑀫𑁆𑀳𑀸 𑀯𑀼𑀝𑁆𑀞𑀸𑀲𑀺. 𑀅𑀣𑀲𑁆𑀲𑀸 𑀩𑀼𑀤𑁆𑀥𑀸𑀦𑀼𑀪𑀸𑀯𑁂𑀦 𑀢𑀁𑀔𑀡𑀁𑀬𑁂𑀯 𑀯𑀡𑁄 𑀭𑀼𑀳𑀺𑀢𑁆𑀯𑀸 𑀲𑀼𑀘𑁆𑀙𑀯𑀺 𑀅𑀳𑁄𑀲𑀺 𑀲𑁂𑀲𑀝𑁆𑀞𑀸𑀦𑀢𑁄 𑀅𑀢𑀺𑀭𑁂𑀓𑀢𑀭𑀁 𑀯𑀺𑀧𑁆𑀧𑀲𑀦𑁆𑀦𑀯𑀡𑁆𑀡𑁄. 𑀢𑀲𑁆𑀫𑀺𑀁 𑀔𑀡𑁂 𑀉𑀧𑀸𑀲𑀺𑀓𑀸 𑀲𑀺𑀢𑀁 𑀓𑀢𑁆𑀯𑀸 𑀤𑀲𑀩𑀮𑀁 𑀧𑀜𑁆𑀘𑀧𑀢𑀺𑀝𑁆𑀞𑀺𑀢𑁂𑀦 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀲𑀢𑁆𑀣𑀸 ‘‘𑀇𑀫𑀺𑀲𑁆𑀲𑀸 𑀉𑀧𑀸𑀲𑀺𑀓𑀸𑀬 𑀓𑀺𑀁 𑀅𑀨𑀸𑀲𑀼𑀓’’𑀦𑁆𑀢𑀺 𑀧𑀼𑀘𑁆𑀙𑀺. 𑀲𑀸 𑀅𑀢𑁆𑀢𑀦𑀸 𑀓𑀢𑀓𑀸𑀭𑀡𑀁 𑀲𑀩𑁆𑀩𑀁 𑀓𑀣𑁂𑀲𑀺. 𑀲𑀢𑁆𑀣𑀸 𑀓𑀢𑀪𑀢𑁆𑀢𑀓𑀺𑀘𑁆𑀘𑁄 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀁 𑀲𑀦𑁆𑀦𑀺𑀧𑀸𑀢𑀸𑀧𑁂𑀢𑁆𑀯𑀸 𑀢𑀁 𑀪𑀺𑀓𑁆𑀔𑀼𑀁 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀯𑀺𑀕𑀭𑀳𑀺𑀢𑁆𑀯𑀸 𑀲𑀺𑀓𑁆𑀔𑀸𑀧𑀤𑀁 (𑀫𑀳𑀸𑀯. 𑁨𑁮𑁦) 𑀧𑀜𑁆𑀜𑀧𑁂𑀲𑀺. 𑀏𑀯𑀫𑁂𑀢𑀁 𑀯𑀢𑁆𑀣𑀼 𑀲𑀫𑀼𑀝𑁆𑀞𑀺𑀢𑀁. 𑀅𑀧𑀭𑀪𑀸𑀕𑁂 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀦𑀺𑀲𑀺𑀦𑁆𑀦𑁄 𑀉𑀧𑀸𑀲𑀺𑀓𑀸𑀬𑁄 𑀞𑀸𑀦𑀦𑁆𑀢𑀭𑁂𑀲𑀼 𑀞𑀧𑁂𑀦𑁆𑀢𑁄 𑀲𑀼𑀧𑁆𑀧𑀺𑀬𑀁 𑀉𑀧𑀸𑀲𑀺𑀓𑀁 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑀻𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀲𑀻𑀢𑀺.

𑀓𑀸𑀢𑀺𑀬𑀸𑀦𑀻𑀯𑀢𑁆𑀣𑀼

𑁨𑁬𑁫. 𑀅𑀝𑁆𑀞𑀫𑁂 𑀅𑀯𑁂𑀘𑁆𑀘𑀧𑁆𑀧𑀲𑀦𑁆𑀦𑀸𑀦𑀦𑁆𑀢𑀺 𑀅𑀥𑀺𑀕𑀢𑁂𑀦 𑀅𑀘𑀮𑀧𑁆𑀧𑀲𑀸𑀤𑁂𑀦 𑀲𑀫𑀦𑁆𑀦𑀸𑀕𑀢𑀸𑀦𑀁 𑀉𑀧𑀸𑀲𑀺𑀓𑀸𑀦𑀁, 𑀓𑀸𑀢𑀺𑀬𑀸𑀦𑀻, 𑀅𑀕𑁆𑀕𑀸𑀢𑀺 𑀤𑀲𑁆𑀲𑁂𑀢𑀺. 𑀲𑀸 𑀓𑀺𑀭 𑀧𑀤𑀼𑀫𑀼𑀢𑁆𑀢𑀭𑀩𑀼𑀤𑁆𑀥𑀓𑀸𑀮𑁂 𑀳𑀁𑀲𑀯𑀢𑀺𑀬𑀁 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑀸 𑀲𑀢𑁆𑀣𑀸𑀭𑀁 𑀏𑀓𑀁 𑀉𑀧𑀸𑀲𑀺𑀓𑀁 𑀅𑀯𑁂𑀘𑁆𑀘𑀧𑁆𑀧𑀲𑀦𑁆𑀦𑀸𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀦𑁆𑀢𑀁 𑀤𑀺𑀲𑁆𑀯𑀸 𑀅𑀥𑀺𑀓𑀸𑀭𑀓𑀫𑁆𑀫𑀁 𑀓𑀢𑁆𑀯𑀸 𑀢𑀁 𑀞𑀸𑀦𑀦𑁆𑀢𑀭𑀁 𑀧𑀢𑁆𑀣𑁂𑀲𑀺. 𑀲𑀸 𑀓𑀧𑁆𑀧𑀲𑀢𑀲𑀳𑀲𑁆𑀲𑀁 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀓𑀼𑀭𑀭𑀖𑀭𑀦𑀕𑀭𑁂 𑀦𑀺𑀩𑁆𑀩𑀢𑁆𑀢𑀺, 𑀓𑀸𑀢𑀺𑀬𑀸𑀦𑀻𑀢𑀺𑀲𑁆𑀲𑀸 𑀦𑀸𑀫𑀁 𑀅𑀓𑀁𑀲𑀼.

𑀲𑀸 𑀅𑀧𑀭𑀪𑀸𑀕𑁂 𑀯𑀬𑀧𑁆𑀧𑀢𑁆𑀢𑀸 𑀓𑀼𑀭𑀭𑀖𑀭𑀺𑀓𑀸𑀬, 𑀓𑀸𑀴𑀺𑀬𑀸 𑀲𑀳𑀸𑀬𑀺𑀓𑀸, 𑀤𑀴𑁆𑀳𑀫𑀺𑀢𑁆𑀢𑀸 𑀅𑀳𑁄𑀲𑀺. 𑀬𑀤𑀸 𑀧𑀦 𑀓𑀼𑀝𑀺𑀓𑀡𑁆𑀡𑀲𑁄𑀡𑀢𑁆𑀣𑁂𑀭𑁄 ‘‘𑀤𑀲𑀩𑀮𑀲𑁆𑀲 𑀓𑀣𑀺𑀢𑀦𑀺𑀬𑀸𑀫𑁂𑀦 𑀫𑀬𑁆𑀳𑀫𑁆𑀧𑀺 𑀥𑀫𑁆𑀫𑀁 𑀓𑀣𑁂𑀳𑀻’’𑀢𑀺 𑀫𑀸𑀢𑀭𑀸 𑀬𑀸𑀘𑀺𑀢𑁄 𑀭𑀢𑁆𑀢𑀺𑀪𑀸𑀕𑁂 𑀅𑀦𑁆𑀢𑁄𑀦𑀕𑀭𑁂 𑀅𑀮𑀗𑁆𑀓𑀢𑀥𑀫𑁆𑀫𑀸𑀲𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀫𑀸𑀢𑀭𑀁 𑀓𑀸𑀬𑀲𑀓𑁆𑀔𑀺𑀁 𑀓𑀢𑁆𑀯𑀸 𑀥𑀫𑁆𑀫𑀤𑁂𑀲𑀦𑀁 𑀆𑀭𑀪𑀺, 𑀢𑀤𑀸 𑀅𑀬𑀁 𑀓𑀸𑀢𑀺𑀬𑀸𑀦𑀻 𑀉𑀧𑀸𑀲𑀺𑀓𑀸 𑀓𑀸𑀴𑀺𑀬𑀸 𑀲𑀤𑁆𑀥𑀺𑀁 𑀕𑀦𑁆𑀢𑁆𑀯𑀸 𑀧𑀭𑀺𑀲𑀧𑀭𑀺𑀬𑀦𑁆𑀢𑁂 𑀥𑀫𑁆𑀫𑀁 𑀲𑀼𑀡𑀦𑁆𑀢𑀻 𑀅𑀝𑁆𑀞𑀸𑀲𑀺. 𑀢𑀲𑁆𑀫𑀺𑀁 𑀲𑀫𑀬𑁂 𑀧𑀜𑁆𑀘𑀫𑀢𑁆𑀢𑀸𑀦𑀺 𑀘𑁄𑀭𑀲𑀢𑀸𑀦𑀺 𑀅𑀦𑁆𑀢𑁄𑀦𑀕𑀭𑁂 𑀤𑀺𑀯𑀸 𑀓𑀢𑀲𑀜𑁆𑀜𑀸𑀬 𑀓𑁄𑀝𑀺𑀢𑁄 𑀧𑀝𑁆𑀞𑀸𑀬 𑀉𑀫𑁆𑀫𑀗𑁆𑀕𑀁 𑀔𑀦𑀺𑀢𑁆𑀯𑀸 𑀇𑀫𑀺𑀲𑁆𑀲𑀸 𑀓𑀸𑀢𑀺𑀬𑀸𑀦𑀺𑀬𑀸 𑀖𑀭𑀁 𑀲𑀫𑁆𑀧𑀸𑀧𑀼𑀡𑀺𑀁𑀲𑀼. 𑀢𑁂𑀲𑀁 𑀘𑁄𑀭𑀚𑁂𑀝𑁆𑀞𑀓𑁄 𑀢𑁂𑀳𑀺 𑀲𑀤𑁆𑀥𑀺𑀁 𑀅𑀧𑀯𑀺𑀲𑀺𑀢𑁆𑀯𑀸 ‘‘𑀓𑀺𑀁 𑀦𑀼 𑀔𑁄 𑀅𑀬𑀁 𑀧𑀭𑀺𑀲𑀸 𑀲𑀦𑁆𑀦𑀺𑀧𑀢𑀺𑀢𑀸’’𑀢𑀺 𑀯𑀻𑀫𑀁𑀲𑀦𑀢𑁆𑀣𑀸𑀬 𑀲𑁄𑀡𑀢𑁆𑀣𑁂𑀭𑀲𑁆𑀲 𑀥𑀫𑁆𑀫𑀓𑀣𑀦𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀧𑀭𑀺𑀲𑀧𑀭𑀺𑀬𑀦𑁆𑀢𑁂 𑀢𑀺𑀝𑁆𑀞𑀫𑀸𑀦𑁄 𑀇𑀫𑀺𑀲𑁆𑀲𑀸 𑀓𑀸𑀢𑀺𑀬𑀸𑀦𑀺𑀬𑀸 𑀧𑀺𑀝𑁆𑀞𑀺𑀧𑀲𑁆𑀲𑁂 𑀅𑀝𑁆𑀞𑀸𑀲𑀺.

𑀢𑀲𑁆𑀫𑀺𑀁 𑀲𑀫𑀬𑁂, 𑀓𑀸𑀢𑀺𑀬𑀸𑀦𑀻, 𑀤𑀸𑀲𑀺𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀕𑀘𑁆𑀙 𑀚𑁂, 𑀕𑁂𑀳𑀁 𑀧𑀯𑀺𑀲𑀺𑀢𑁆𑀯𑀸 𑀤𑀻𑀧𑀢𑁂𑀮𑀁 𑀆𑀳𑀭, 𑀫𑀬𑀁 𑀤𑀻𑀧𑁂 𑀚𑀸𑀮𑁂𑀢𑁆𑀯𑀸 𑀥𑀫𑁆𑀫𑀁 𑀲𑁄𑀲𑁆𑀲𑀸𑀫𑀸’’𑀢𑀺. 𑀲𑀸 𑀖𑀭𑀁 𑀕𑀦𑁆𑀢𑁆𑀯𑀸 𑀉𑀫𑁆𑀫𑀗𑁆𑀕𑁂 𑀘𑁄𑀭𑁂 𑀤𑀺𑀲𑁆𑀯𑀸 𑀤𑀻𑀧𑀢𑁂𑀮𑀁 𑀅𑀕𑀡𑁆𑀳𑀺𑀢𑁆𑀯𑀸𑀯 𑀆𑀕𑀦𑁆𑀢𑁆𑀯𑀸 𑀅𑀢𑁆𑀢𑀦𑁄 𑀅𑀬𑁆𑀬𑀸𑀬 𑀆𑀭𑁄𑀘𑁂𑀲𑀺 𑁋 ‘‘𑀅𑀬𑁆𑀬𑁂, 𑀕𑁂𑀳𑁂 𑀘𑁄𑀭𑀸 𑀉𑀫𑁆𑀫𑀗𑁆𑀕𑀁 𑀔𑀦𑀦𑁆𑀢𑀻’’𑀢𑀺. 𑀢𑀁 𑀲𑀼𑀢𑁆𑀯𑀸 𑀘𑁄𑀭𑀚𑁂𑀝𑁆𑀞𑀓𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀲𑀘𑀸𑀬𑀁 𑀇𑀫𑀺𑀲𑁆𑀲𑀸 𑀓𑀣𑀁 𑀕𑀡𑁆𑀳𑀺𑀢𑁆𑀯𑀸 𑀕𑁂𑀳𑀁 𑀕𑀫𑀺𑀲𑁆𑀲𑀢𑀺, 𑀏𑀢𑁆𑀣𑁂𑀯 𑀦𑀁 𑀅𑀲𑀺𑀦𑀸 𑀤𑁆𑀯𑁂𑀥𑀸 𑀙𑀺𑀦𑁆𑀤𑀺𑀲𑁆𑀲𑀸𑀫𑀺. 𑀲𑀘𑁂 𑀧𑀦 𑀕𑀳𑀺𑀢𑀦𑀺𑀫𑀺𑀢𑁆𑀢𑁂𑀦𑁂𑀯 𑀥𑀫𑁆𑀫𑀁 𑀲𑀼𑀡𑀺𑀲𑁆𑀲𑀢𑀺, 𑀘𑁄𑀭𑁂𑀳𑀺 𑀕𑀳𑀺𑀢𑀪𑀡𑁆𑀟𑀓𑀫𑁆𑀧𑀺 𑀧𑀼𑀦 𑀤𑀸𑀧𑁂𑀲𑁆𑀲𑀸𑀫𑀻’’𑀢𑀺. 𑀓𑀸𑀢𑀺𑀬𑀸𑀦𑀻𑀧𑀺 𑀔𑁄 𑀤𑀸𑀲𑀺𑀬𑀸 𑀓𑀣𑀁 𑀲𑀼𑀢𑁆𑀯𑀸, ‘‘𑀅𑀫𑁆𑀫, 𑀫𑀸 𑀲𑀤𑁆𑀤𑀁 𑀓𑀭𑀺, 𑀘𑁄𑀭𑀸 𑀦𑀸𑀫 𑀳𑀭𑀦𑁆𑀢𑀸 𑀅𑀢𑁆𑀢𑀦𑀸 𑀤𑀺𑀝𑁆𑀞𑀫𑁂𑀯 𑀳𑀭𑀺𑀲𑁆𑀲𑀦𑁆𑀢𑀺, 𑀅𑀳𑀁 𑀧𑀦 𑀅𑀚𑁆𑀚 𑀤𑀼𑀮𑁆𑀮𑀪𑀲𑁆𑀲𑀯𑀦𑀁 𑀲𑀼𑀡𑀸𑀫𑀺, 𑀫𑀸 𑀥𑀫𑁆𑀫𑀲𑁆𑀲 𑀅𑀦𑁆𑀢𑀭𑀸𑀬𑀁 𑀓𑀭𑁄𑀳𑀻’’𑀢𑀺 𑀆𑀳. 𑀘𑁄𑀭𑀚𑁂𑀝𑁆𑀞𑀓𑁄 𑀢𑀲𑁆𑀲𑀸 𑀯𑀘𑀦𑀁 𑀲𑀼𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀇𑀫𑀺𑀦𑀸 𑀅𑀚𑁆𑀛𑀸𑀲𑀬𑁂𑀦 𑀞𑀺𑀢𑀸𑀬 𑀦𑀸𑀫 𑀕𑁂𑀳𑁂 𑀪𑀡𑁆𑀟𑀁 𑀳𑀭𑀦𑁆𑀢𑁂𑀳𑀺 𑀅𑀫𑁆𑀳𑁂𑀳𑀺 𑀫𑀳𑀸𑀧𑀣𑀯𑀻 𑀧𑀯𑀺𑀲𑀺𑀢𑀩𑁆𑀩𑀸 𑀪𑀯𑁂𑀬𑁆𑀬𑀸’’𑀢𑀺. 𑀲𑁄 𑀢𑀸𑀯𑀤𑁂𑀯 𑀕𑀦𑁆𑀢𑁆𑀯𑀸 𑀘𑁄𑀭𑁂𑀳𑀺 𑀕𑀳𑀺𑀢𑀪𑀡𑁆𑀟𑀁 𑀙𑀟𑁆𑀟𑀸𑀧𑁂𑀢𑁆𑀯𑀸 𑀘𑁄𑀭𑁂𑀳𑀺 𑀲𑀤𑁆𑀥𑀺𑀁 𑀆𑀕𑀦𑁆𑀢𑁆𑀯𑀸 𑀥𑀫𑁆𑀫𑀁 𑀲𑀼𑀡𑀦𑁆𑀢𑁄 𑀧𑀭𑀺𑀲𑀧𑀭𑀺𑀬𑀦𑁆𑀢𑁂 𑀅𑀝𑁆𑀞𑀸𑀲𑀺. 𑀓𑀸𑀢𑀺𑀬𑀸𑀦𑀻𑀧𑀺 𑀉𑀧𑀸𑀲𑀺𑀓𑀸 𑀣𑁂𑀭𑀲𑁆𑀲 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀸𑀲𑀺.

𑀅𑀣 𑀅𑀭𑀼𑀡𑁂 𑀉𑀕𑁆𑀕𑀢𑁂 𑀘𑁄𑀭𑀚𑁂𑀝𑁆𑀞𑀓𑁄 𑀕𑀦𑁆𑀢𑁆𑀯𑀸 𑀉𑀧𑀸𑀲𑀺𑀓𑀸𑀬 𑀧𑀸𑀤𑁂𑀲𑀼 𑀧𑀢𑀺𑀢𑁆𑀯𑀸, ‘‘𑀅𑀬𑁆𑀬𑁂, 𑀲𑀩𑁆𑀩𑁂𑀲𑀁𑀬𑁂𑀯 𑀦𑁄 𑀔𑀫𑀸𑀳𑀻’’𑀢𑀺 𑀆𑀳. 𑀓𑀺𑀁 𑀧𑀦 𑀢𑀼𑀫𑁆𑀳𑁂𑀳𑀺 𑀫𑀬𑁆𑀳𑀁 𑀓𑀢𑀦𑁆𑀢𑀺? 𑀲𑁄 𑀲𑀩𑁆𑀩𑀁 𑀅𑀢𑁆𑀢𑀦𑀸 𑀓𑀢𑀤𑁄𑀲𑀁 𑀆𑀭𑁄𑀘𑁂𑀲𑀺. 𑀢𑁂𑀦 𑀳𑀺, 𑀢𑀸𑀢𑀸, 𑀔𑀫𑀸𑀫𑀺 𑀢𑀼𑀫𑁆𑀳𑀸𑀓𑀦𑁆𑀢𑀺. 𑀅𑀬𑁆𑀬𑁂, 𑀅𑀫𑁆𑀳𑀸𑀓𑀁 𑀏𑀯𑀁 𑀔𑀫𑀺𑀢𑀁 𑀦𑀸𑀫 𑀦 𑀳𑁄𑀢𑀺, 𑀢𑀼𑀫𑁆𑀳𑀸𑀓𑀁 𑀧𑀦 𑀧𑀼𑀢𑁆𑀢𑀢𑁆𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑁂 𑀲𑀩𑁆𑀩𑁂𑀲𑀁𑀬𑁂𑀯 𑀦𑁄 𑀧𑀩𑁆𑀩𑀚𑁆𑀚𑀁 𑀤𑀸𑀧𑁂𑀳𑀻𑀢𑀺. 𑀲𑀸 𑀲𑀩𑁆𑀩𑁂𑀧𑀺 𑀢𑁂 𑀕𑀳𑁂𑀢𑁆𑀯𑀸 𑀓𑀼𑀝𑀺𑀓𑀡𑁆𑀡𑀲𑁄𑀡𑀢𑁆𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑁂 𑀧𑀩𑁆𑀩𑀸𑀚𑁂𑀲𑀺. 𑀢𑁂𑀧𑀺 𑀔𑁄 𑀘𑁄𑀭𑀸 𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑀸 𑀲𑀩𑁆𑀩𑁂𑀯 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀁𑀲𑀼. 𑀏𑀯𑀫𑁂𑀢𑀁 𑀯𑀢𑁆𑀣𑀼 𑀲𑀫𑀼𑀝𑁆𑀞𑀺𑀢𑀁. 𑀅𑀧𑀭𑀪𑀸𑀕𑁂 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀉𑀧𑀸𑀲𑀺𑀓𑀸𑀬𑁄 𑀞𑀸𑀦𑀦𑁆𑀢𑀭𑁂𑀲𑀼 𑀞𑀧𑁂𑀦𑁆𑀢𑁄 𑀓𑀸𑀢𑀺𑀬𑀸𑀦𑀺𑀁 𑀉𑀧𑀸𑀲𑀺𑀓𑀁 𑀅𑀯𑁂𑀘𑁆𑀘𑀧𑁆𑀧𑀲𑀦𑁆𑀦𑀸𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀲𑀻𑀢𑀺.

𑀦𑀓𑀼𑀮𑀫𑀸𑀢𑀸𑀯𑀢𑁆𑀣𑀼

𑁨𑁬𑁬. 𑀦𑀯𑀫𑁂 𑀯𑀺𑀲𑁆𑀲𑀸𑀲𑀺𑀓𑀸𑀦𑀦𑁆𑀢𑀺 𑀯𑀺𑀲𑁆𑀲𑀸𑀲𑀓𑀣𑀁 𑀓𑀣𑁂𑀦𑁆𑀢𑀻𑀦𑀁 𑀉𑀧𑀸𑀲𑀺𑀓𑀸𑀦𑀁, 𑀦𑀓𑀼𑀮𑀫𑀸𑀢𑀸 𑀕𑀳𑀧𑀢𑀸𑀦𑀻, 𑀅𑀕𑁆𑀕𑀸𑀢𑀺 𑀤𑀲𑁆𑀲𑁂𑀢𑀺. 𑀬𑀁 𑀧𑀦𑁂𑀢𑁆𑀣 𑀯𑀢𑁆𑀢𑀩𑁆𑀩𑀁, 𑀢𑀁 𑀲𑀩𑁆𑀩𑀁 𑀳𑁂𑀝𑁆𑀞𑀸 𑀉𑀧𑀸𑀲𑀓𑀧𑀸𑀴𑀺𑀬𑀁 𑀯𑀼𑀢𑁆𑀢𑀫𑁂𑀯. 𑀓𑁂𑀯𑀮𑀁 𑀇𑀥 𑀦𑀓𑀼𑀮𑀫𑀸𑀢𑀭𑀁 𑀥𑀼𑀭𑀁 𑀓𑀢𑁆𑀯𑀸 𑀯𑁂𑀤𑀺𑀢𑀩𑁆𑀩𑀦𑁆𑀢𑀺.

𑀓𑀸𑀴𑀻𑀓𑀼𑀭𑀭𑀖𑀭𑀺𑀓𑀸𑀯𑀢𑁆𑀣𑀼

𑁨𑁬𑁭. 𑀤𑀲𑀫𑁂 𑀅𑀦𑀼𑀲𑁆𑀲𑀯𑀧𑁆𑀧𑀲𑀦𑁆𑀦𑀸𑀦𑀦𑁆𑀢𑀺 𑀅𑀦𑀼𑀲𑁆𑀲𑀯𑁂𑀦𑁂𑀯 𑀉𑀧𑁆𑀧𑀦𑁆𑀦𑁂𑀦 𑀧𑀲𑀸𑀤𑁂𑀦 𑀲𑀫𑀦𑁆𑀦𑀸𑀕𑀢𑀸𑀦𑀁 𑀉𑀧𑀸𑀲𑀺𑀓𑀸𑀦𑀁 𑀅𑀦𑁆𑀢𑀭𑁂, 𑀓𑀸𑀴𑀻 𑀉𑀧𑀸𑀲𑀺𑀓𑀸, 𑀓𑀼𑀭𑀭𑀖𑀭𑀺𑀓𑀸 𑀅𑀕𑁆𑀕𑀸𑀢𑀺 𑀤𑀲𑁆𑀲𑁂𑀢𑀺. 𑀲𑀸 𑀓𑀺𑀭 𑀧𑀤𑀼𑀫𑀼𑀢𑁆𑀢𑀭𑀩𑀼𑀤𑁆𑀥𑀓𑀸𑀮𑁂 𑀳𑀁𑀲𑀯𑀢𑀺𑀬𑀁 𑀓𑀼𑀭𑀭𑀖𑀭𑀦𑀕𑀭𑁂 𑀦𑀺𑀩𑁆𑀩𑀢𑁆𑀢𑀸 𑀲𑀢𑁆𑀣𑀼 𑀥𑀫𑁆𑀫𑀓𑀣𑀁 𑀲𑀼𑀡𑀦𑁆𑀢𑀻 𑀲𑀢𑁆𑀣𑀸𑀭𑀁 𑀏𑀓𑀁 𑀉𑀧𑀸𑀲𑀺𑀓𑀁 𑀅𑀦𑀼𑀲𑁆𑀲𑀯𑀧𑁆𑀧𑀲𑀦𑁆𑀦𑀸𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀦𑁆𑀢𑀁 𑀤𑀺𑀲𑁆𑀯𑀸 𑀅𑀥𑀺𑀓𑀸𑀭𑀓𑀫𑁆𑀫𑀁 𑀓𑀢𑁆𑀯𑀸 𑀢𑀁 𑀞𑀸𑀦𑀦𑁆𑀢𑀭𑀁 𑀧𑀢𑁆𑀣𑁂𑀲𑀺. 𑀲𑀸 𑀓𑀧𑁆𑀧𑀲𑀢𑀲𑀳𑀲𑁆𑀲𑀁 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀭𑀸𑀚𑀕𑀳𑀦𑀕𑀭𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑀺, 𑀓𑀸𑀴𑀻𑀢𑀺𑀲𑁆𑀲𑀸 𑀦𑀸𑀫𑀁 𑀅𑀓𑀁𑀲𑀼.

𑀲𑀸 𑀯𑀬𑀧𑁆𑀧𑀢𑁆𑀢𑀸 𑀓𑀼𑀭𑀭𑀖𑀭𑀦𑀕𑀭𑁂 𑀓𑀼𑀮𑀕𑁂𑀳𑀁 𑀕𑀢𑀸. 𑀅𑀣𑀲𑁆𑀲𑀸 𑀲𑀁𑀯𑀸𑀲𑁂𑀦 𑀕𑀩𑁆𑀪𑁄 𑀧𑀢𑀺𑀝𑁆𑀞𑀳𑀺. 𑀲𑀸 𑀧𑀭𑀺𑀧𑀼𑀡𑁆𑀡𑀕𑀩𑁆𑀪𑀸 ‘‘𑀧𑀭𑁂𑀲𑀁 𑀕𑁂𑀳𑁂 𑀕𑀩𑁆𑀪𑀯𑀼𑀝𑁆𑀞𑀸𑀦𑀁 𑀦𑀸𑀫 𑀅𑀧𑁆𑀧𑀢𑀺𑀭𑀽𑀧’’𑀦𑁆𑀢𑀺 𑀅𑀢𑁆𑀢𑀦𑁄 𑀓𑀼𑀮𑀦𑀕𑀭𑀫𑁂𑀯 𑀆𑀕𑀦𑁆𑀢𑁆𑀯𑀸 𑀭𑀢𑁆𑀢𑀺𑀪𑀸𑀕𑀲𑀫𑀦𑀦𑁆𑀢𑀭𑁂 𑀅𑀢𑁆𑀢𑀦𑁄 𑀧𑀸𑀲𑀸𑀤𑀲𑁆𑀲 𑀉𑀧𑀭𑀺 𑀆𑀓𑀸𑀲𑁂 𑀞𑀺𑀢𑀸𑀦𑀁 𑀲𑀸𑀢𑀸𑀕𑀺𑀭𑀳𑁂𑀫𑀯𑀢𑀸𑀦𑀁 𑀭𑀢𑀦𑀢𑁆𑀢𑀬𑀲𑁆𑀲 𑀯𑀡𑁆𑀡𑀁 𑀓𑀣𑁂𑀦𑁆𑀢𑀸𑀦𑀁 𑀓𑀣𑀁 𑀲𑀼𑀢𑁆𑀯𑀸 𑀅𑀦𑀼𑀲𑁆𑀲𑀯𑀺𑀓𑀧𑁆𑀧𑀲𑀸𑀤𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀲𑀢𑁆𑀣𑀼 𑀅𑀤𑀲𑁆𑀲𑀦𑁂𑀦𑁂𑀯 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀸𑀲𑀺, 𑀅𑀧𑀭𑀪𑀸𑀕𑁂 𑀧𑀦𑀲𑁆𑀲𑀸 𑀕𑀩𑁆𑀪𑀯𑀼𑀝𑁆𑀞𑀸𑀦𑀁 𑀅𑀳𑁄𑀲𑀻𑀢𑀺 𑀲𑀩𑁆𑀩𑀁 𑀯𑀢𑁆𑀣𑀼 𑀳𑁂𑀝𑁆𑀞𑀸 𑀯𑀺𑀢𑁆𑀣𑀸𑀭𑀺𑀢𑀫𑁂𑀯. 𑀅𑀧𑀭𑀪𑀸𑀕𑁂 𑀧𑀦 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀪𑀺𑀓𑁆𑀔𑀼𑀲𑀗𑁆𑀖𑀫𑀚𑁆𑀛𑁂 𑀦𑀺𑀲𑀻𑀤𑀺𑀢𑁆𑀯𑀸 𑀉𑀧𑀸𑀲𑀺𑀓𑀸𑀬𑁄 𑀞𑀸𑀦𑀦𑁆𑀢𑀭𑁂𑀲𑀼 𑀞𑀧𑁂𑀦𑁆𑀢𑁄 𑀇𑀫𑀁 𑀉𑀧𑀸𑀲𑀺𑀓𑀁 𑀅𑀦𑀼𑀲𑁆𑀲𑀯𑀧𑁆𑀧𑀲𑀦𑁆𑀦𑀸𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀲𑀻𑀢𑀺.

𑀤𑀲𑀲𑀼𑀢𑁆𑀢𑀧𑀭𑀺𑀫𑀸𑀡𑀸𑀬 𑀉𑀧𑀸𑀲𑀺𑀓𑀸𑀧𑀸𑀴𑀺𑀬𑀸 𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀏𑀢𑁆𑀢𑀸𑀯𑀢𑀸 𑀘 𑀫𑀦𑁄𑀭𑀣𑀧𑀽𑀭𑀡𑀺𑀬𑀸

𑀅𑀗𑁆𑀕𑀼𑀢𑁆𑀢𑀭𑀦𑀺𑀓𑀸𑀬-𑀅𑀝𑁆𑀞𑀓𑀣𑀸𑀬

𑀲𑀩𑁆𑀩𑀸𑀧𑀺 𑀏𑀢𑀤𑀕𑁆𑀕𑀧𑀸𑀴𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.