𑁧𑁫. 𑀅𑀝𑁆𑀞𑀸𑀦𑀧𑀸𑀴𑀺

(𑁧𑁫) 𑁧. 𑀅𑀝𑁆𑀞𑀸𑀦𑀧𑀸𑀴𑀺-𑀧𑀞𑀫𑀯𑀕𑁆𑀕𑀯𑀡𑁆𑀡𑀦𑀸

𑁨𑁬𑁮. 𑀅𑀝𑁆𑀞𑀸𑀦𑀧𑀸𑀴𑀺𑀬𑀸 𑀅𑀝𑁆𑀞𑀸𑀦𑀦𑁆𑀢𑀺 𑀳𑁂𑀢𑀼𑀧𑀝𑀺𑀓𑁆𑀔𑁂𑀧𑁄. 𑀅𑀦𑀯𑀓𑀸𑀲𑁄𑀢𑀺 𑀧𑀘𑁆𑀘𑀬𑀧𑀝𑀺𑀓𑁆𑀔𑁂𑀧𑁄. 𑀉𑀪𑀬𑁂𑀦𑀸𑀧𑀺 𑀓𑀸𑀭𑀡𑀫𑁂𑀯 𑀧𑀝𑀺𑀓𑁆𑀔𑀺𑀧𑀢𑀺. 𑀓𑀸𑀭𑀡𑀜𑁆𑀳𑀺 𑀢𑀤𑀸𑀬𑀢𑁆𑀢𑀯𑀼𑀢𑁆𑀢𑀺𑀢𑀸𑀬 𑀅𑀢𑁆𑀢𑀦𑁄 𑀨𑀮𑀲𑁆𑀲 𑀞𑀸𑀦𑀦𑁆𑀢𑀺 𑀘 𑀅𑀯𑀓𑀸𑀲𑁄𑀢𑀺 𑀘 𑀯𑀼𑀘𑁆𑀘𑀢𑀺. 𑀬𑀦𑁆𑀢𑀺 𑀬𑁂𑀦 𑀓𑀸𑀭𑀡𑁂𑀦. 𑀤𑀺𑀝𑁆𑀞𑀺𑀲𑀫𑁆𑀧𑀦𑁆𑀦𑁄𑀢𑀺 𑀫𑀕𑁆𑀕𑀤𑀺𑀝𑁆𑀞𑀺𑀬𑀸 𑀲𑀫𑁆𑀧𑀦𑁆𑀦𑁄 𑀲𑁄𑀢𑀸𑀧𑀦𑁆𑀦𑁄 𑀅𑀭𑀺𑀬𑀲𑀸𑀯𑀓𑁄. 𑀢𑀲𑁆𑀲 𑀳𑀺 𑀤𑀺𑀝𑁆𑀞𑀺𑀲𑀫𑁆𑀧𑀦𑁆𑀦𑁄 𑀇𑀢𑀺𑀧𑀺, 𑀤𑀲𑁆𑀲𑀦𑀲𑀫𑁆𑀧𑀦𑁆𑀦𑁄 𑀇𑀢𑀺𑀧𑀺, 𑀆𑀕𑀢𑁄 𑀇𑀫𑀁 𑀲𑀤𑁆𑀥𑀫𑁆𑀫𑀁 𑀇𑀢𑀺𑀧𑀺, 𑀧𑀲𑁆𑀲𑀢𑀺 𑀇𑀫𑀁 𑀲𑀤𑁆𑀥𑀫𑁆𑀫𑀁 𑀇𑀢𑀺𑀧𑀺, 𑀲𑁂𑀓𑁆𑀔𑁂𑀦 𑀜𑀸𑀡𑁂𑀦 𑀲𑀫𑀦𑁆𑀦𑀸𑀕𑀢𑁄 𑀇𑀢𑀺𑀧𑀺, 𑀲𑁂𑀓𑁆𑀔𑀸𑀬 𑀯𑀺𑀚𑁆𑀚𑀸𑀬 𑀲𑀫𑀦𑁆𑀦𑀸𑀕𑀢𑁄 𑀇𑀢𑀺𑀧𑀺, 𑀥𑀫𑁆𑀫𑀲𑁄𑀢𑀲𑀫𑀸𑀧𑀦𑁆𑀦𑁄 𑀇𑀢𑀺𑀧𑀺, 𑀅𑀭𑀺𑀬𑁄 𑀦𑀺𑀩𑁆𑀩𑁂𑀥𑀺𑀓𑀧𑀜𑁆𑀜𑁄 𑀇𑀢𑀺𑀧𑀺, 𑀅𑀫𑀢𑀤𑁆𑀯𑀸𑀭𑀁 𑀆𑀳𑀘𑁆𑀘 𑀢𑀺𑀝𑁆𑀞𑀢𑀺 𑀇𑀢𑀺𑀧𑀺𑀢𑀺 𑀩𑀳𑀽𑀦𑀺 𑀦𑀸𑀫𑀸𑀦𑀺 𑀳𑁄𑀦𑁆𑀢𑀺. 𑀓𑀜𑁆𑀘𑀺 𑀲𑀗𑁆𑀔𑀸𑀭𑀦𑁆𑀢𑀺 𑀘𑀢𑀼𑀪𑀽𑀫𑀓𑁂𑀲𑀼 𑀲𑀗𑁆𑀔𑀢𑀲𑀗𑁆𑀔𑀸𑀭𑁂𑀲𑀼 𑀓𑀜𑁆𑀘𑀺 𑀏𑀓𑀁 𑀲𑀗𑁆𑀔𑀸𑀭𑀫𑁆𑀧𑀺. 𑀦𑀺𑀘𑁆𑀘𑀢𑁄 𑀉𑀧𑀕𑀘𑁆𑀙𑁂𑀬𑁆𑀬𑀸𑀢𑀺 𑀦𑀺𑀘𑁆𑀘𑁄𑀢𑀺 𑀕𑀡𑁆𑀳𑁂𑀬𑁆𑀬. 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀻𑀢𑀺 𑀏𑀢𑀁 𑀓𑀸𑀭𑀡𑀁 𑀦𑀢𑁆𑀣𑀺 𑀦 𑀉𑀧𑀮𑀩𑁆𑀪𑀢𑀺. 𑀬𑀁 𑀧𑀼𑀣𑀼𑀚𑁆𑀚𑀦𑁄𑀢𑀺 𑀬𑁂𑀦 𑀓𑀸𑀭𑀡𑁂𑀦 𑀧𑀼𑀣𑀼𑀚𑁆𑀚𑀦𑁄. 𑀞𑀸𑀦𑀫𑁂𑀢𑀁 𑀯𑀺𑀚𑁆𑀚𑀢𑀻𑀢𑀺 𑀏𑀢𑀁 𑀓𑀸𑀭𑀡𑀁 𑀅𑀢𑁆𑀣𑀺. 𑀲𑀲𑁆𑀲𑀢𑀤𑀺𑀝𑁆𑀞𑀺𑀬𑀸 𑀳𑀺 𑀲𑁄 𑀢𑁂𑀪𑀽𑀫𑀓𑁂𑀲𑀼 𑀲𑀗𑁆𑀔𑀢𑀲𑀗𑁆𑀔𑀸𑀭𑁂𑀲𑀼 𑀓𑀜𑁆𑀘𑀺 𑀲𑀗𑁆𑀔𑀸𑀭𑀁 𑀦𑀺𑀘𑁆𑀘𑀢𑁄 𑀕𑀡𑁆𑀳𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀘𑀢𑀼𑀢𑁆𑀣𑀪𑀽𑀫𑀓𑀲𑀗𑁆𑀔𑀸𑀭𑀸 𑀧𑀦 𑀢𑁂𑀚𑀼𑀲𑁆𑀲𑀤𑀢𑁆𑀢𑀸 𑀤𑀺𑀯𑀲𑀁𑀲𑀦𑁆𑀢𑀢𑁆𑀢𑁄 𑀅𑀬𑁄𑀕𑀼𑀴𑁄 𑀯𑀺𑀬 𑀫𑀓𑁆𑀔𑀺𑀓𑀸𑀦𑀁, 𑀤𑀺𑀝𑁆𑀞𑀺𑀬𑀸 𑀯𑀸 𑀅𑀜𑁆𑀜𑁂𑀲𑀁 𑀯𑀸 𑀅𑀓𑀼𑀲𑀮𑀸𑀦𑀁 𑀆𑀭𑀫𑁆𑀫𑀡𑀁 𑀦 𑀳𑁄𑀦𑁆𑀢𑀺. 𑀇𑀫𑀺𑀦𑀸 𑀦𑀬𑁂𑀦 𑀓𑀜𑁆𑀘𑀺 𑀲𑀗𑁆𑀔𑀸𑀭𑀁 𑀲𑀼𑀔𑀢𑁄𑀢𑀺𑀆𑀤𑀻𑀲𑀼𑀧𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑁨𑁬𑁯. 𑀲𑀼𑀔𑀢𑁄 𑀉𑀧𑀕𑀘𑁆𑀙𑁂𑀬𑁆𑀬𑀸𑀢𑀺 ‘‘𑀏𑀓𑀦𑁆𑀢𑀲𑀼𑀔𑀻 𑀅𑀢𑁆𑀢𑀸 𑀳𑁄𑀢𑀺 𑀆𑀭𑁄𑀕𑁄 𑀧𑀭𑀫𑁆𑀫𑀭𑀡𑀸’’𑀢𑀺 (𑀤𑀻. 𑀦𑀺. 𑁧.𑁭𑁬, 𑁭𑁯; 𑀫. 𑀦𑀺. 𑁩.𑁨𑁧, 𑁨𑁨) 𑀏𑀯𑀁 𑀅𑀢𑁆𑀢𑀤𑀺𑀝𑁆𑀞𑀺𑀯𑀲𑁂𑀦 𑀲𑀼𑀔𑀢𑁄 𑀕𑀸𑀳𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀤𑀺𑀝𑁆𑀞𑀺𑀯𑀺𑀧𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑁂𑀦 𑀧𑀦 𑀅𑀭𑀺𑀬𑀲𑀸𑀯𑀓𑁄 𑀧𑀭𑀺𑀴𑀸𑀳𑀸𑀥𑀺𑀪𑀽𑀢𑁄 𑀧𑀭𑀺𑀴𑀸𑀳𑀯𑀽𑀧𑀲𑀫𑀢𑁆𑀣𑀁 𑀫𑀢𑁆𑀢𑀳𑀢𑁆𑀣𑀺𑀧𑀭𑀺𑀢𑁆𑀢𑀸𑀲𑀺𑀢𑁄 𑀯𑀺𑀬 𑀘𑁄𑀓𑁆𑀔𑀩𑁆𑀭𑀸𑀳𑁆𑀫𑀡𑁄 𑀕𑀽𑀣𑀁 𑀓𑀜𑁆𑀘𑀺 𑀲𑀗𑁆𑀔𑀸𑀭𑀁 𑀲𑀼𑀔𑀢𑁄 𑀉𑀧𑀕𑀘𑁆𑀙𑀢𑀺.

𑁨𑁭𑁦. 𑀅𑀢𑁆𑀢𑀯𑀸𑀭𑁂 𑀓𑀲𑀺𑀡𑀸𑀤𑀺𑀧𑀡𑁆𑀡𑀢𑁆𑀢𑀺𑀲𑀗𑁆𑀕𑀳𑀢𑁆𑀣𑀁 ‘‘𑀲𑀗𑁆𑀔𑀸𑀭’’𑀦𑁆𑀢𑀺 𑀅𑀯𑀢𑁆𑀯𑀸 𑀓𑀜𑁆𑀘𑀺 𑀥𑀫𑁆𑀫𑀦𑁆𑀢𑀺 𑀯𑀼𑀢𑁆𑀢𑀁. 𑀇𑀥𑀸𑀧𑀺 𑀅𑀭𑀺𑀬𑀲𑀸𑀯𑀓𑀲𑁆𑀲 𑀘𑀢𑀼𑀪𑀽𑀫𑀓𑀯𑀲𑁂𑀦 𑀧𑀭𑀺𑀘𑁆𑀙𑁂𑀤𑁄 𑀯𑁂𑀤𑀺𑀢𑀩𑁆𑀩𑁄, 𑀧𑀼𑀣𑀼𑀚𑁆𑀚𑀦𑀲𑁆𑀲 𑀢𑁂𑀪𑀽𑀫𑀓𑀯𑀲𑁂𑀦. 𑀲𑀩𑁆𑀩𑀯𑀸𑀭𑁂𑀲𑀼 𑀯𑀸 𑀅𑀭𑀺𑀬𑀲𑀸𑀯𑀓𑀲𑁆𑀲𑀸𑀧𑀺 𑀢𑁂𑀪𑀽𑀫𑀓𑀯𑀲𑁂𑀦𑁂𑀯 𑀧𑀭𑀺𑀘𑁆𑀙𑁂𑀤𑁄 𑀯𑀝𑁆𑀝𑀢𑀺. 𑀬𑀁 𑀬𑀁 𑀳𑀺 𑀧𑀼𑀣𑀼𑀚𑁆𑀚𑀦𑁄 𑀕𑀡𑁆𑀳𑀸𑀢𑀺, 𑀢𑀢𑁄 𑀢𑀢𑁄 𑀅𑀭𑀺𑀬𑀲𑀸𑀯𑀓𑁄 𑀕𑀸𑀳𑀁 𑀯𑀺𑀦𑀺𑀯𑁂𑀞𑁂𑀢𑀺. 𑀧𑀼𑀣𑀼𑀚𑁆𑀚𑀦𑁄 𑀳𑀺 𑀬𑀁 𑀬𑀁 𑀦𑀺𑀘𑁆𑀘𑀁 𑀲𑀼𑀔𑀁 𑀅𑀢𑁆𑀢𑀸𑀢𑀺 𑀕𑀡𑁆𑀳𑀸𑀢𑀺, 𑀢𑀁 𑀢𑀁 𑀅𑀭𑀺𑀬𑀲𑀸𑀯𑀓𑁄 𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀅𑀦𑀢𑁆𑀢𑀸𑀢𑀺 𑀕𑀡𑁆𑀳𑀦𑁆𑀢𑁄 𑀢𑀁 𑀕𑀸𑀳𑀁 𑀯𑀺𑀦𑀺𑀯𑁂𑀞𑁂𑀢𑀺. 𑀇𑀢𑀺 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑀢𑁆𑀢𑀬𑁂 𑀧𑀼𑀣𑀼𑀚𑁆𑀚𑀦𑀢𑁆𑀢𑀕𑁆𑀕𑀸𑀳𑀯𑀺𑀦𑀺𑀯𑁂𑀞𑀦𑀁 𑀦𑀸𑀫 𑀓𑀣𑀺𑀢𑀁.

𑁨𑁭𑁧. 𑀫𑀸𑀢𑀭𑀦𑁆𑀢𑀺𑀆𑀤𑀻𑀲𑀼 𑀚𑀦𑀺𑀓𑀸𑀯 𑀫𑀸𑀢𑀸, 𑀚𑀦𑀓𑁄𑀯 𑀧𑀺𑀢𑀸, 𑀫𑀦𑀼𑀲𑁆𑀲𑀪𑀽𑀢𑁄𑀯 𑀔𑀻𑀡𑀸𑀲𑀯𑁄 𑀅𑀭𑀳𑀸𑀢𑀺 𑀅𑀥𑀺𑀧𑁆𑀧𑁂𑀢𑁄. 𑀓𑀺𑀁 𑀧𑀦 𑀅𑀭𑀺𑀬𑀲𑀸𑀯𑀓𑁄 𑀅𑀜𑁆𑀜𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀬𑁆𑀬𑀸𑀢𑀺? 𑀏𑀢𑀫𑁆𑀧𑀺 𑀅𑀝𑁆𑀞𑀸𑀦𑀁. 𑀲𑀘𑁂𑀧𑀺 𑀪𑀯𑀦𑁆𑀢𑀭𑀕𑀢𑀁 𑀅𑀭𑀺𑀬𑀲𑀸𑀯𑀓𑀁 𑀅𑀢𑁆𑀢𑀦𑁄 𑀅𑀭𑀺𑀬𑀲𑀸𑀯𑀓𑀪𑀸𑀯𑀁 𑀅𑀚𑀸𑀦𑀦𑁆𑀢𑀫𑁆𑀧𑀺 𑀓𑁄𑀘𑀺 𑀏𑀯𑀁 𑀯𑀤𑁂𑀬𑁆𑀬 ‘‘𑀇𑀫𑀁 𑀓𑀼𑀦𑁆𑀣𑀓𑀺𑀧𑀺𑀮𑁆𑀮𑀺𑀓𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀢𑁆𑀯𑀸 𑀲𑀓𑀮𑀘𑀓𑁆𑀓𑀯𑀸𑀴𑀕𑀩𑁆𑀪𑁂 𑀘𑀓𑁆𑀓𑀯𑀢𑁆𑀢𑀺𑀭𑀚𑁆𑀚𑀁 𑀧𑀝𑀺𑀧𑀚𑁆𑀚𑀸𑀳𑀻’’𑀢𑀺, 𑀦𑁂𑀯 𑀲𑁄 𑀢𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀬𑁆𑀬. 𑀅𑀣𑀸𑀧𑀺 𑀦𑀁 𑀏𑀯𑀁 𑀯𑀤𑁂𑀬𑁆𑀬𑀼𑀁 ‘‘𑀲𑀘𑁂 𑀇𑀫𑀁 𑀦 𑀖𑀸𑀢𑁂𑀲𑁆𑀲𑀲𑀺, 𑀲𑀻𑀲𑀁 𑀢𑁂 𑀙𑀺𑀦𑁆𑀤𑀺𑀲𑁆𑀲𑀸𑀫𑀸’’𑀢𑀺. 𑀲𑀻𑀲𑀫𑁂𑀯𑀲𑁆𑀲 𑀙𑀺𑀦𑁆𑀤𑁂𑀬𑁆𑀬𑀼𑀁, 𑀦 𑀘 𑀲𑁄 𑀢𑀁 𑀖𑀸𑀢𑁂𑀬𑁆𑀬. 𑀧𑀼𑀣𑀼𑀚𑁆𑀚𑀦𑀪𑀸𑀯𑀲𑁆𑀲 𑀧𑀦 𑀫𑀳𑀸𑀲𑀸𑀯𑀚𑁆𑀚𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀅𑀭𑀺𑀬𑀲𑀸𑀯𑀓𑀲𑁆𑀲 𑀘 𑀩𑀮𑀯𑀤𑀻𑀧𑀦𑀢𑁆𑀣𑀫𑁂𑀢𑀁 𑀯𑀼𑀢𑁆𑀢𑀁. 𑀅𑀬𑀜𑁆𑀳𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑁋 𑀲𑀸𑀯𑀚𑁆𑀚𑁄 𑀧𑀼𑀣𑀼𑀚𑁆𑀚𑀦𑀪𑀸𑀯𑁄, 𑀬𑀢𑁆𑀭 𑀳𑀺 𑀦𑀸𑀫 𑀧𑀼𑀣𑀼𑀚𑁆𑀚𑀦𑁄 𑀫𑀸𑀢𑀼𑀖𑀸𑀢𑀸𑀤𑀻𑀦𑀺𑀧𑀺 𑀆𑀦𑀦𑁆𑀢𑀭𑀺𑀬𑀸𑀦𑀺 𑀓𑀭𑀺𑀲𑁆𑀲𑀢𑀺. 𑀫𑀳𑀸𑀩𑀮𑁄 𑀘 𑀅𑀭𑀺𑀬𑀲𑀸𑀯𑀓𑁄, 𑀬𑁄 𑀏𑀢𑀸𑀦𑀺 𑀓𑀫𑁆𑀫𑀸𑀦𑀺 𑀦 𑀓𑀭𑁄𑀢𑀻𑀢𑀺.

𑁨𑁭𑁪. 𑀧𑀤𑀼𑀝𑁆𑀞𑀘𑀺𑀢𑁆𑀢𑁄𑀢𑀺 𑀯𑀥𑀓𑀘𑀺𑀢𑁆𑀢𑁂𑀦 𑀧𑀤𑀼𑀝𑁆𑀞𑀘𑀺𑀢𑁆𑀢𑁄. 𑀮𑁄𑀳𑀺𑀢𑀁 𑀉𑀧𑁆𑀧𑀸𑀤𑁂𑀬𑁆𑀬𑀸𑀢𑀺 𑀚𑀻𑀯𑀫𑀸𑀦𑀓𑀲𑀭𑀻𑀭𑁂 𑀔𑀼𑀤𑁆𑀤𑀓𑀫𑀓𑁆𑀔𑀺𑀓𑀸𑀬 𑀧𑀺𑀯𑀦𑀫𑀢𑁆𑀢𑀫𑁆𑀧𑀺 𑀮𑁄𑀳𑀺𑀢𑀁 𑀉𑀧𑁆𑀧𑀸𑀤𑁂𑀬𑁆𑀬.

𑁨𑁭𑁫. 𑀲𑀗𑁆𑀖𑀁 𑀪𑀺𑀦𑁆𑀤𑁂𑀬𑁆𑀬𑀸𑀢𑀺 𑀲𑀫𑀸𑀦𑀲𑀁𑀯𑀸𑀲𑀓𑀁 𑀲𑀫𑀸𑀦𑀲𑀻𑀫𑀸𑀬 𑀞𑀺𑀢𑀁 𑀧𑀜𑁆𑀘𑀳𑀺 𑀓𑀸𑀭𑀡𑁂𑀳𑀺 𑀲𑀗𑁆𑀖𑀁 𑀪𑀺𑀦𑁆𑀤𑁂𑀬𑁆𑀬. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 ‘‘𑀧𑀜𑁆𑀘𑀳𑀼𑀧𑀸𑀮𑀺, 𑀆𑀓𑀸𑀭𑁂𑀳𑀺 𑀲𑀗𑁆𑀖𑁄 𑀪𑀺𑀚𑁆𑀚𑀢𑀺 𑁋 𑀓𑀫𑁆𑀫𑁂𑀦, 𑀉𑀤𑁆𑀤𑁂𑀲𑁂𑀦, 𑀯𑁄𑀳𑀭𑀦𑁆𑀢𑁄, 𑀅𑀦𑀼𑀲𑁆𑀲𑀸𑀯𑀦𑁂𑀦, 𑀲𑀮𑀸𑀓𑀕𑁆𑀕𑀸𑀳𑁂𑀦𑀸’’𑀢𑀺 (𑀧𑀭𑀺. 𑁪𑁫𑁮).

𑀢𑀢𑁆𑀣 𑀓𑀫𑁆𑀫𑁂𑀦𑀸𑀢𑀺 𑀅𑀧𑀮𑁄𑀓𑀦𑀸𑀤𑀻𑀲𑀼 𑀘𑀢𑀽𑀲𑀼 𑀓𑀫𑁆𑀫𑁂𑀲𑀼 𑀅𑀜𑁆𑀜𑀢𑀭𑁂𑀦 𑀓𑀫𑁆𑀫𑁂𑀦. 𑀉𑀤𑁆𑀤𑁂𑀲𑁂𑀦𑀸𑀢𑀺 𑀧𑀜𑁆𑀘𑀲𑀼 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑁂𑀲𑀼 𑀅𑀜𑁆𑀜𑀢𑀭𑁂𑀦 𑀉𑀤𑁆𑀤𑁂𑀲𑁂𑀦. 𑀯𑁄𑀳𑀭𑀦𑁆𑀢𑁄𑀢𑀺 𑀓𑀣𑀬𑀦𑁆𑀢𑁄, 𑀢𑀸𑀳𑀺 𑀢𑀸𑀳𑀺 𑀉𑀧𑁆𑀧𑀢𑁆𑀢𑀻𑀳𑀺 𑀅𑀥𑀫𑁆𑀫𑀁 𑀥𑀫𑁆𑀫𑁄𑀢𑀺𑀆𑀤𑀻𑀦𑀺 𑀅𑀝𑁆𑀞𑀸𑀭𑀲 𑀪𑁂𑀤𑀓𑀭𑀯𑀢𑁆𑀣𑀽𑀦𑀺 𑀤𑀻𑀧𑁂𑀦𑁆𑀢𑁄. 𑀅𑀦𑀼𑀲𑁆𑀲𑀸𑀯𑀦𑁂𑀦𑀸𑀢𑀺 ‘‘𑀦𑀦𑀼 𑀢𑀼𑀫𑁆𑀳𑁂 𑀚𑀸𑀦𑀸𑀣 𑀫𑀬𑁆𑀳𑀁 𑀉𑀘𑁆𑀘𑀸𑀓𑀼𑀮𑀸 𑀧𑀩𑁆𑀩𑀚𑀺𑀢𑀪𑀸𑀯𑀁 𑀩𑀳𑀼𑀲𑁆𑀲𑀼𑀢𑀪𑀸𑀯𑀜𑁆𑀘, 𑀫𑀸𑀤𑀺𑀲𑁄 𑀦𑀸𑀫 𑀉𑀤𑁆𑀥𑀫𑁆𑀫𑀁 𑀉𑀩𑁆𑀩𑀺𑀦𑀬𑀁 𑀲𑀢𑁆𑀣𑀼 𑀲𑀸𑀲𑀦𑀁 𑀕𑀸𑀳𑁂𑀬𑁆𑀬𑀸𑀢𑀺 𑀘𑀺𑀢𑁆𑀢𑀫𑁆𑀧𑀺 𑀉𑀧𑁆𑀧𑀸𑀤𑁂𑀢𑀼𑀁 𑀦 𑀢𑀼𑀫𑁆𑀳𑀸𑀓𑀁 𑀬𑀼𑀢𑁆𑀢𑀁, 𑀓𑀺𑀁 𑀫𑀬𑁆𑀳𑀁 𑀅𑀯𑀻𑀘𑀺 𑀦𑀻𑀮𑀼𑀧𑁆𑀧𑀮𑀯𑀦𑀁 𑀯𑀺𑀬 𑀲𑀻𑀢𑀮𑀸, 𑀓𑀺𑀁 𑀅𑀳𑀁 𑀅𑀧𑀸𑀬𑀢𑁄 𑀦 𑀪𑀸𑀬𑀸𑀫𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀓𑀡𑁆𑀡𑀫𑀽𑀮𑁂 𑀯𑀘𑀻𑀪𑁂𑀤𑀁 𑀓𑀢𑁆𑀯𑀸 𑀅𑀦𑀼𑀲𑁆𑀲𑀸𑀯𑀦𑁂𑀦. 𑀲𑀮𑀸𑀓𑀕𑁆𑀕𑀸𑀳𑁂𑀦𑀸𑀢𑀺 𑀏𑀯𑀁 𑀅𑀦𑀼𑀲𑁆𑀲𑀸𑀯𑁂𑀢𑁆𑀯𑀸 𑀢𑁂𑀲𑀁 𑀘𑀺𑀢𑁆𑀢𑀁 𑀉𑀧𑀢𑁆𑀣𑀫𑁆𑀪𑁂𑀢𑁆𑀯𑀸 𑀅𑀦𑀺𑀯𑀢𑁆𑀢𑀺𑀥𑀫𑁆𑀫𑁂 𑀓𑀢𑁆𑀯𑀸 ‘‘𑀕𑀡𑁆𑀳𑀣 𑀇𑀫𑀁 𑀲𑀮𑀸𑀓’’𑀦𑁆𑀢𑀺 𑀲𑀮𑀸𑀓𑀕𑁆𑀕𑀸𑀳𑁂𑀦.

𑀏𑀢𑁆𑀣 𑀘 𑀓𑀫𑁆𑀫𑁂𑀯 𑀉𑀤𑁆𑀤𑁂𑀲𑁄 𑀯𑀸 𑀧𑀫𑀸𑀡𑀁, 𑀯𑁄𑀳𑀸𑀭𑀸𑀦𑀼𑀲𑁆𑀲𑀸𑀯𑀦𑀲𑀮𑀸𑀓𑀕𑁆𑀕𑀸𑀳𑀸 𑀧𑀦 𑀧𑀼𑀩𑁆𑀩𑀪𑀸𑀕𑀸. 𑀅𑀝𑁆𑀞𑀸𑀭𑀲𑀯𑀢𑁆𑀣𑀼𑀤𑀻𑀧𑀦𑀯𑀲𑁂𑀦 𑀳𑀺 𑀯𑁄𑀳𑀭𑀦𑁆𑀢𑁂𑀦 𑀢𑀢𑁆𑀣 𑀭𑀼𑀘𑀺𑀚𑀦𑀦𑀢𑁆𑀣𑀁 𑀅𑀦𑀼𑀲𑁆𑀲𑀸𑀯𑁂𑀢𑁆𑀯𑀸 𑀲𑀮𑀸𑀓𑀸𑀬 𑀕𑀳𑀺𑀢𑀸𑀬𑀧𑀺 𑀅𑀪𑀺𑀦𑁆𑀦𑁄𑀯 𑀳𑁄𑀢𑀺 𑀲𑀗𑁆𑀖𑁄. 𑀬𑀤𑀸 𑀧𑀦 𑀏𑀯𑀁 𑀘𑀢𑁆𑀢𑀸𑀭𑁄 𑀯𑀸 𑀅𑀢𑀺𑀭𑁂𑀓𑀸 𑀯𑀸 𑀲𑀮𑀸𑀓𑀁 𑀕𑀳𑁂𑀢𑁆𑀯𑀸 𑀆𑀯𑁂𑀡𑀺𑀓𑀁 𑀓𑀫𑁆𑀫𑀁 𑀯𑀸 𑀉𑀤𑁆𑀤𑁂𑀲𑀁 𑀯𑀸 𑀓𑀭𑁄𑀦𑁆𑀢𑀺, 𑀢𑀤𑀸 𑀲𑀗𑁆𑀖𑁄 𑀪𑀺𑀦𑁆𑀦𑁄 𑀦𑀸𑀫 𑀳𑁄𑀢𑀺. 𑀏𑀯𑀁 𑀤𑀺𑀝𑁆𑀞𑀺𑀲𑀫𑁆𑀧𑀦𑁆𑀦𑁄 𑀧𑀼𑀕𑁆𑀕𑀮𑁄 𑀲𑀗𑁆𑀖𑀁 𑀪𑀺𑀦𑁆𑀤𑁂𑀬𑁆𑀬𑀸𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺. 𑀏𑀢𑁆𑀢𑀸𑀯𑀢𑀸 𑀫𑀸𑀢𑀼𑀖𑀸𑀢𑀸𑀤𑀻𑀦𑀺 𑀧𑀜𑁆𑀘 𑀆𑀦𑀦𑁆𑀢𑀭𑀺𑀬𑀓𑀫𑁆𑀫𑀸𑀦𑀺 𑀤𑀲𑁆𑀲𑀺𑀢𑀸𑀦𑀺 𑀳𑁄𑀦𑁆𑀢𑀺, 𑀬𑀸𑀦𑀺 𑀧𑀼𑀣𑀼𑀚𑁆𑀚𑀦𑁄 𑀓𑀭𑁄𑀢𑀺, 𑀦 𑀅𑀭𑀺𑀬𑀲𑀸𑀯𑀓𑁄. 𑀢𑁂𑀲𑀁 𑀆𑀯𑀺𑀪𑀸𑀯𑀢𑁆𑀣𑀁 𑁋

‘‘𑀓𑀫𑁆𑀫𑀢𑁄 𑀤𑁆𑀯𑀸𑀭𑀢𑁄 𑀘𑁂𑀯, 𑀓𑀧𑁆𑀧𑀝𑁆𑀞𑀺𑀢𑀺𑀬𑀢𑁄 𑀢𑀣𑀸;

𑀧𑀸𑀓𑀲𑀸𑀥𑀸𑀭𑀡𑀸𑀤𑀻𑀳𑀺, 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄’’.

𑀢𑀢𑁆𑀣 𑀓𑀫𑁆𑀫𑀢𑁄 𑀢𑀸𑀯 𑁋 𑀏𑀢𑁆𑀣 𑀳𑀺 𑀫𑀦𑀼𑀲𑁆𑀲𑀪𑀽𑀢𑀲𑁆𑀲𑁂𑀯 𑀫𑀦𑀼𑀲𑁆𑀲𑀪𑀽𑀢𑀁 𑀫𑀸𑀢𑀭𑀁 𑀯𑀸 𑀧𑀺𑀢𑀭𑀁 𑀯𑀸 𑀅𑀧𑀺 𑀧𑀭𑀺𑀯𑀢𑁆𑀢𑀮𑀺𑀗𑁆𑀕𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀦𑁆𑀢𑀲𑁆𑀲 𑀓𑀫𑁆𑀫𑀁 𑀆𑀦𑀦𑁆𑀢𑀭𑀺𑀬𑀁 𑀳𑁄𑀢𑀺, 𑀢𑀲𑁆𑀲 𑀯𑀺𑀧𑀸𑀓𑀁 𑀧𑀝𑀺𑀩𑀸𑀳𑀺𑀲𑁆𑀲𑀸𑀫𑀻𑀢𑀺 𑀲𑀓𑀮𑀘𑀓𑁆𑀓𑀯𑀸𑀴𑀁 𑀫𑀳𑀸𑀘𑁂𑀢𑀺𑀬𑀧𑁆𑀧𑀫𑀸𑀡𑁂𑀳𑀺𑀧𑀺 𑀓𑀜𑁆𑀘𑀦𑀣𑀽𑀧𑁂𑀳𑀺 𑀧𑀽𑀭𑁂𑀢𑁆𑀯𑀸𑀧𑀺 𑀲𑀓𑀮𑀘𑀓𑁆𑀓𑀯𑀸𑀴𑀁 𑀧𑀽𑀭𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀫𑀳𑀸𑀤𑀸𑀦𑀁 𑀤𑀢𑁆𑀯𑀸𑀧𑀺 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀲𑀗𑁆𑀖𑀸𑀝𑀺𑀓𑀡𑁆𑀡𑀁 𑀅𑀫𑀼𑀜𑁆𑀘𑀦𑁆𑀢𑁄 𑀯𑀺𑀘𑀭𑀺𑀢𑁆𑀯𑀸𑀧𑀺 𑀓𑀸𑀬𑀲𑁆𑀲 𑀪𑁂𑀤𑀸 𑀦𑀺𑀭𑀬𑀫𑁂𑀯 𑀉𑀧𑀧𑀚𑁆𑀚𑀢𑀺. 𑀬𑁄 𑀧𑀦 𑀲𑀬𑀁 𑀫𑀦𑀼𑀲𑁆𑀲𑁄 𑀢𑀺𑀭𑀘𑁆𑀙𑀸𑀦𑀪𑀽𑀢𑀁 𑀫𑀸𑀢𑀭𑀁 𑀯𑀸 𑀧𑀺𑀢𑀭𑀁 𑀯𑀸, 𑀲𑀬𑀁 𑀯𑀸 𑀢𑀺𑀭𑀘𑁆𑀙𑀸𑀦𑀪𑀽𑀢𑁄 𑀫𑀦𑀼𑀲𑁆𑀲𑀪𑀽𑀢𑀁, 𑀢𑀺𑀭𑀘𑁆𑀙𑀸𑀦𑀪𑀽𑀢𑁄𑀬𑁂𑀯 𑀯𑀸 𑀢𑀺𑀭𑀘𑁆𑀙𑀸𑀦𑀪𑀽𑀢𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀢𑀺, 𑀢𑀲𑁆𑀲 𑀓𑀫𑁆𑀫𑀁 𑀆𑀦𑀦𑁆𑀢𑀭𑀺𑀬𑀁 𑀦 𑀳𑁄𑀢𑀺, 𑀪𑀸𑀭𑀺𑀬𑀁 𑀧𑀦 𑀳𑁄𑀢𑀺, 𑀆𑀦𑀦𑁆𑀢𑀭𑀺𑀬𑀁 𑀆𑀳𑀘𑁆𑀘𑁂𑀯 𑀢𑀺𑀝𑁆𑀞𑀢𑀺. 𑀫𑀦𑀼𑀲𑁆𑀲𑀚𑀸𑀢𑀺𑀓𑀸𑀦𑀁𑀯 𑀧𑀦 𑀯𑀲𑁂𑀦 𑀅𑀬𑀁 𑀧𑀜𑁆𑀳𑁄 𑀓𑀣𑀺𑀢𑁄.

𑀢𑀢𑁆𑀣 𑀏𑀴𑀓𑀘𑀢𑀼𑀓𑁆𑀓𑀁, 𑀲𑀗𑁆𑀕𑀸𑀫𑀘𑀢𑀼𑀓𑁆𑀓𑀁, 𑀘𑁄𑀭𑀘𑀢𑀼𑀓𑁆𑀓𑀜𑁆𑀘 𑀓𑀣𑁂𑀢𑀩𑁆𑀩𑀁. 𑀏𑀴𑀓𑀁 𑀫𑀸𑀭𑁂𑀲𑁆𑀲𑀸𑀫𑀻𑀢𑀺 𑀅𑀪𑀺𑀲𑀦𑁆𑀥𑀺𑀦𑀸𑀧𑀺 𑀳𑀺 𑀏𑀴𑀓𑀝𑁆𑀞𑀸𑀦𑁂 𑀞𑀺𑀢𑀁 𑀫𑀦𑀼𑀲𑁆𑀲𑁄 𑀫𑀦𑀼𑀲𑁆𑀲𑀪𑀽𑀢𑀁 𑀫𑀸𑀢𑀭𑀁 𑀯𑀸 𑀧𑀺𑀢𑀭𑀁 𑀯𑀸 𑀫𑀸𑀭𑁂𑀦𑁆𑀢𑁄 𑀆𑀦𑀦𑁆𑀢𑀭𑀺𑀬𑀁 𑀨𑀼𑀲𑀢𑀺. 𑀏𑀴𑀓𑀸𑀪𑀺𑀲𑀦𑁆𑀥𑀺𑀦𑀸 𑀫𑀸𑀢𑀸𑀧𑀺𑀢𑀺𑀅𑀪𑀺𑀲𑀦𑁆𑀥𑀺𑀦𑀸 𑀯𑀸 𑀏𑀴𑀓𑀁 𑀫𑀸𑀭𑁂𑀦𑁆𑀢𑁄 𑀆𑀦𑀦𑁆𑀢𑀭𑀺𑀬𑀁 𑀦 𑀨𑀼𑀲𑀢𑀺, 𑀫𑀸𑀢𑀸𑀧𑀺𑀢𑀺𑀅𑀪𑀺𑀲𑀦𑁆𑀥𑀺𑀦𑀸 𑀫𑀸𑀢𑀸𑀧𑀺𑀢𑀭𑁄 𑀫𑀸𑀭𑁂𑀦𑁆𑀢𑁄 𑀨𑀼𑀲𑀢𑁂𑀯. 𑀏𑀲 𑀦𑀬𑁄 𑀇𑀢𑀭𑀲𑁆𑀫𑀺𑀫𑁆𑀧𑀺 𑀘𑀢𑀼𑀓𑁆𑀓𑀤𑁆𑀯𑀬𑁂. 𑀬𑀣𑀸 𑀘 𑀫𑀸𑀢𑀸𑀧𑀺𑀢𑀽𑀲𑀼, 𑀏𑀯𑀁 𑀅𑀭𑀳𑀦𑁆𑀢𑁂𑀧𑀺 𑀏𑀢𑀸𑀦𑀺 𑀘𑀢𑀼𑀓𑁆𑀓𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀫𑀦𑀼𑀲𑁆𑀲𑀅𑀭𑀳𑀦𑁆𑀢𑀫𑁂𑀯 𑀘 𑀫𑀸𑀭𑁂𑀢𑁆𑀯𑀸 𑀆𑀦𑀦𑁆𑀢𑀭𑀺𑀬𑀁 𑀨𑀼𑀲𑀢𑀺, 𑀦 𑀬𑀓𑁆𑀔𑀪𑀽𑀢𑀁. 𑀓𑀫𑁆𑀫𑀁 𑀧𑀦 𑀪𑀸𑀭𑀺𑀬𑀁, 𑀆𑀦𑀦𑁆𑀢𑀭𑀺𑀬𑀲𑀤𑀺𑀲𑀫𑁂𑀯. 𑀫𑀦𑀼𑀲𑁆𑀲𑀅𑀭𑀳𑀦𑁆𑀢𑀲𑁆𑀲 𑀘 𑀧𑀼𑀣𑀼𑀚𑁆𑀚𑀦𑀓𑀸𑀮𑁂𑀬𑁂𑀯 𑀲𑀢𑁆𑀣𑀧𑁆𑀧𑀳𑀸𑀭𑁂 𑀯𑀸 𑀯𑀺𑀲𑁂 𑀯𑀸 𑀤𑀺𑀦𑁆𑀦𑁂𑀧𑀺 𑀬𑀤𑀺 𑀲𑁄 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀢𑁂𑀦𑁂𑀯 𑀫𑀭𑀢𑀺, 𑀅𑀭𑀳𑀦𑁆𑀢𑀖𑀸𑀢𑀓𑁄 𑀳𑁄𑀢𑀺𑀬𑁂𑀯. 𑀬𑀁 𑀧𑀦 𑀧𑀼𑀣𑀼𑀚𑁆𑀚𑀦𑀓𑀸𑀮𑁂 𑀤𑀺𑀦𑁆𑀦𑀁 𑀤𑀸𑀦𑀁 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀢𑀺, 𑀧𑀼𑀣𑀼𑀚𑁆𑀚𑀦𑀲𑁆𑀲𑁂𑀯 𑀢𑀁 𑀤𑀺𑀦𑁆𑀦𑀁 𑀳𑁄𑀢𑀺. 𑀲𑁂𑀲𑀅𑀭𑀺𑀬𑀧𑀼𑀕𑁆𑀕𑀮𑁂 𑀫𑀸𑀭𑁂𑀦𑁆𑀢𑀲𑁆𑀲 𑀆𑀦𑀦𑁆𑀢𑀭𑀺𑀬𑀁 𑀦𑀢𑁆𑀣𑀺, 𑀓𑀫𑁆𑀫𑀁 𑀧𑀦 𑀪𑀸𑀭𑀺𑀬𑀁, 𑀆𑀦𑀦𑁆𑀢𑀭𑀺𑀬𑀲𑀤𑀺𑀲𑀫𑁂𑀯.

𑀮𑁄𑀳𑀺𑀢𑀼𑀧𑁆𑀧𑀸𑀤𑁂 𑀢𑀣𑀸𑀕𑀢𑀲𑁆𑀲 𑀅𑀪𑁂𑀚𑁆𑀚𑀓𑀸𑀬𑀢𑀸𑀬 𑀧𑀭𑀽𑀧𑀓𑁆𑀓𑀫𑁂𑀦 𑀘𑀫𑁆𑀫𑀘𑁆𑀙𑁂𑀤𑀁 𑀓𑀢𑁆𑀯𑀸 𑀮𑁄𑀳𑀺𑀢𑀧𑀕𑁆𑀖𑀭𑀡𑀁 𑀦𑀸𑀫 𑀦𑀢𑁆𑀣𑀺, 𑀲𑀭𑀻𑀭𑀲𑁆𑀲 𑀧𑀦 𑀅𑀦𑁆𑀢𑁄𑀬𑁂𑀯 𑀏𑀓𑀲𑁆𑀫𑀺𑀁 𑀞𑀸𑀦𑁂 𑀮𑁄𑀳𑀺𑀢𑀁 𑀲𑀫𑁄𑀲𑀭𑀢𑀺. 𑀤𑁂𑀯𑀤𑀢𑁆𑀢𑁂𑀦 𑀧𑀯𑀺𑀤𑁆𑀥𑀲𑀺𑀮𑀢𑁄 𑀪𑀺𑀚𑁆𑀚𑀺𑀢𑁆𑀯𑀸 𑀕𑀢𑀸 𑀲𑀓𑀮𑀺𑀓𑀸𑀧𑀺 𑀢𑀣𑀸𑀕𑀢𑀲𑁆𑀲 𑀧𑀸𑀤𑀦𑁆𑀢𑀁 𑀧𑀳𑀭𑀺, 𑀨𑀭𑀲𑀼𑀦𑀸 𑀧𑀳𑀝𑁄 𑀯𑀺𑀬 𑀧𑀸𑀤𑁄 𑀅𑀦𑁆𑀢𑁄𑀮𑁄𑀳𑀺𑀢𑁄𑀬𑁂𑀯 𑀅𑀳𑁄𑀲𑀺. 𑀢𑀣𑀸 𑀓𑀭𑁄𑀦𑁆𑀢𑀲𑁆𑀲 𑀆𑀦𑀦𑁆𑀢𑀭𑀺𑀬𑀁 𑀳𑁄𑀢𑀺. 𑀚𑀻𑀯𑀓𑁄 𑀧𑀦 𑀢𑀣𑀸𑀕𑀢𑀲𑁆𑀲 𑀭𑀼𑀘𑀺𑀬𑀸 𑀲𑀢𑁆𑀣𑀓𑁂𑀦 𑀘𑀫𑁆𑀫𑀁 𑀙𑀺𑀦𑁆𑀤𑀺𑀢𑁆𑀯𑀸 𑀢𑀫𑁆𑀳𑀸 𑀞𑀸𑀦𑀸 𑀤𑀼𑀝𑁆𑀞𑀮𑁄𑀳𑀺𑀢𑀁 𑀦𑀻𑀳𑀭𑀺𑀢𑁆𑀯𑀸 𑀨𑀸𑀲𑀼𑀓𑀫𑀓𑀸𑀲𑀺. 𑀢𑀣𑀸 𑀓𑀭𑁄𑀦𑁆𑀢𑀲𑁆𑀲 𑀧𑀼𑀜𑁆𑀜𑀓𑀫𑁆𑀫𑀫𑁂𑀯 𑀳𑁄𑀢𑀺.

𑀅𑀣 𑀬𑁂 𑀧𑀭𑀺𑀦𑀺𑀩𑁆𑀩𑀼𑀢𑁂 𑀢𑀣𑀸𑀕𑀢𑁂 𑀘𑁂𑀢𑀺𑀬𑀁 𑀪𑀺𑀦𑁆𑀤𑀦𑁆𑀢𑀺, 𑀩𑁄𑀥𑀺𑀁 𑀙𑀺𑀦𑁆𑀤𑀦𑁆𑀢𑀺, 𑀥𑀸𑀢𑀼𑀫𑁆𑀳𑀺 𑀉𑀧𑀓𑁆𑀓𑀫𑀦𑁆𑀢𑀺, 𑀢𑁂𑀲𑀁 𑀓𑀺𑀁 𑀳𑁄𑀢𑀻𑀢𑀺? 𑀪𑀸𑀭𑀺𑀬𑀁 𑀓𑀫𑁆𑀫𑀁 𑀳𑁄𑀢𑀺, 𑀆𑀦𑀦𑁆𑀢𑀭𑀺𑀬𑀲𑀤𑀺𑀲𑀁. 𑀲𑀥𑀸𑀢𑀼𑀓𑀁 𑀧𑀦 𑀣𑀽𑀧𑀁 𑀯𑀸 𑀧𑀝𑀺𑀫𑀁 𑀯𑀸 𑀩𑀸𑀥𑀬𑀫𑀸𑀦𑀁 𑀩𑁄𑀥𑀺𑀲𑀸𑀔𑀁 𑀙𑀺𑀦𑁆𑀤𑀺𑀢𑀼𑀁 𑀯𑀝𑁆𑀝𑀢𑀺. 𑀲𑀘𑁂𑀧𑀺 𑀢𑀢𑁆𑀣 𑀦𑀺𑀮𑀻𑀦𑀸 𑀲𑀓𑀼𑀡𑀸 𑀘𑁂𑀢𑀺𑀬𑁂 𑀯𑀘𑁆𑀘𑀁 𑀧𑀸𑀢𑁂𑀦𑁆𑀢𑀺, 𑀙𑀺𑀦𑁆𑀤𑀺𑀢𑀼𑀁 𑀯𑀝𑁆𑀝𑀢𑀺𑀬𑁂𑀯. 𑀧𑀭𑀺𑀪𑁄𑀕𑀘𑁂𑀢𑀺𑀬𑀢𑁄 𑀳𑀺 𑀲𑀭𑀻𑀭𑀘𑁂𑀢𑀺𑀬𑀁 𑀫𑀳𑀦𑁆𑀢𑀢𑀭𑀁. 𑀘𑁂𑀢𑀺𑀬𑀯𑀢𑁆𑀣𑀼𑀁 𑀪𑀺𑀦𑁆𑀤𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑀁 𑀩𑁄𑀥𑀺𑀫𑀽𑀮𑀫𑁆𑀧𑀺 𑀙𑀺𑀦𑁆𑀤𑀺𑀢𑁆𑀯𑀸 𑀳𑀭𑀺𑀢𑀼𑀁 𑀯𑀝𑁆𑀝𑀢𑀺. 𑀬𑀸 𑀧𑀦 𑀩𑁄𑀥𑀺𑀲𑀸𑀔𑀸 𑀩𑁄𑀥𑀺𑀖𑀭𑀁 𑀩𑀸𑀥𑀢𑀺, 𑀢𑀁 𑀕𑁂𑀳𑀭𑀓𑁆𑀔𑀡𑀢𑁆𑀣𑀁 𑀙𑀺𑀦𑁆𑀤𑀺𑀢𑀼𑀁 𑀦 𑀮𑀪𑀢𑀺. 𑀩𑁄𑀥𑀺𑀅𑀢𑁆𑀣𑀜𑁆𑀳𑀺 𑀕𑁂𑀳𑀁, 𑀦 𑀕𑁂𑀳𑀢𑁆𑀣𑀸𑀬 𑀩𑁄𑀥𑀺. 𑀆𑀲𑀦𑀖𑀭𑁂𑀧𑀺 𑀏𑀲𑁂𑀯 𑀦𑀬𑁄. 𑀬𑀲𑁆𑀫𑀺𑀁 𑀧𑀦 𑀆𑀲𑀦𑀖𑀭𑁂 𑀥𑀸𑀢𑀼 𑀦𑀺𑀳𑀺𑀢𑀸 𑀳𑁄𑀢𑀺, 𑀢𑀲𑁆𑀲 𑀭𑀓𑁆𑀔𑀡𑀢𑁆𑀣𑀸𑀬 𑀩𑁄𑀥𑀺𑀲𑀸𑀔𑀁 𑀙𑀺𑀦𑁆𑀤𑀺𑀢𑀼𑀁 𑀯𑀝𑁆𑀝𑀢𑀺. 𑀩𑁄𑀥𑀺𑀚𑀕𑁆𑀕𑀦𑀢𑁆𑀣𑀁 𑀑𑀚𑀸𑀳𑀭𑀡𑀲𑀸𑀔𑀁 𑀯𑀸 𑀧𑀽𑀢𑀺𑀲𑀸𑀔𑀁 𑀯𑀸 𑀙𑀺𑀦𑁆𑀤𑀺𑀢𑀼𑀁 𑀯𑀝𑁆𑀝𑀢𑀺𑀬𑁂𑀯, 𑀲𑀭𑀻𑀭𑀧𑀝𑀺𑀚𑀕𑁆𑀕𑀦𑁂 𑀯𑀺𑀬 𑀧𑀼𑀜𑁆𑀜𑀫𑁆𑀧𑀺 𑀳𑁄𑀢𑀺.

𑀲𑀗𑁆𑀖𑀪𑁂𑀤𑁂𑀧𑀺 𑀲𑀻𑀫𑀝𑁆𑀞𑀓𑀲𑀗𑁆𑀖𑁂 𑀅𑀲𑀦𑁆𑀦𑀺𑀧𑀢𑀺𑀢𑁂 𑀯𑀺𑀲𑀼𑀁 𑀧𑀭𑀺𑀲𑀁 𑀕𑀳𑁂𑀢𑁆𑀯𑀸 𑀓𑀢𑀯𑁄𑀳𑀸𑀭𑀸𑀦𑀼𑀲𑁆𑀲𑀸𑀯𑀦𑀲𑀮𑀸𑀓𑀕𑁆𑀕𑀸𑀳𑀲𑁆𑀲 𑀓𑀫𑁆𑀫𑀁 𑀯𑀸 𑀓𑀭𑁄𑀦𑁆𑀢𑀲𑁆𑀲 𑀉𑀤𑁆𑀤𑁂𑀲𑀁 𑀯𑀸 𑀉𑀤𑁆𑀤𑀺𑀲𑀦𑁆𑀢𑀲𑁆𑀲 𑀪𑁂𑀤𑁄 𑀘 𑀳𑁄𑀢𑀺 𑀆𑀦𑀦𑁆𑀢𑀭𑀺𑀬𑀓𑀫𑁆𑀫𑀜𑁆𑀘. 𑀲𑀫𑀕𑁆𑀕𑀲𑀜𑁆𑀜𑀸𑀬 𑀧𑀦 𑀯𑀝𑁆𑀝𑀢𑀻𑀢𑀺 𑀲𑀜𑁆𑀜𑀸𑀬 𑀯𑀸 𑀓𑀭𑁄𑀦𑁆𑀢𑀲𑁆𑀲 𑀪𑁂𑀤𑁄𑀯 𑀳𑁄𑀢𑀺, 𑀦 𑀆𑀦𑀦𑁆𑀢𑀭𑀺𑀬𑀓𑀫𑁆𑀫𑀁. 𑀢𑀣𑀸 𑀦𑀯𑀢𑁄 𑀊𑀦𑀧𑀭𑀺𑀲𑀸𑀬. 𑀲𑀩𑁆𑀩𑀦𑁆𑀢𑀺𑀫𑁂𑀦 𑀧𑀭𑀺𑀘𑁆𑀙𑁂𑀤𑁂𑀦 𑀦𑀯𑀦𑁆𑀦𑀁 𑀚𑀦𑀸𑀦𑀁 𑀬𑁄 𑀲𑀗𑁆𑀖𑀁 𑀪𑀺𑀦𑁆𑀤𑀢𑀺, 𑀢𑀲𑁆𑀲 𑀆𑀦𑀦𑁆𑀢𑀭𑀺𑀬𑀓𑀫𑁆𑀫𑀁 𑀳𑁄𑀢𑀺. 𑀢𑀲𑁆𑀲 𑀅𑀦𑀼𑀯𑀢𑁆𑀢𑀓𑀸𑀦𑀁 𑀅𑀥𑀫𑁆𑀫𑀯𑀸𑀤𑀻𑀦𑀁 𑀫𑀳𑀸𑀲𑀸𑀯𑀚𑁆𑀚𑀓𑀫𑁆𑀫𑀁, 𑀥𑀫𑁆𑀫𑀯𑀸𑀤𑀺𑀦𑁄 𑀧𑀦 𑀅𑀦𑀯𑀚𑁆𑀚𑀸. 𑀢𑀢𑁆𑀣 𑀦𑀯𑀦𑁆𑀦𑀫𑁂𑀯 𑀲𑀗𑁆𑀖𑀪𑁂𑀤𑁂 𑀇𑀤𑀁 𑀲𑀼𑀢𑁆𑀢𑀁 𑁋 ‘‘𑀏𑀓𑀢𑁄, 𑀉𑀧𑀸𑀮𑀺, 𑀘𑀢𑁆𑀢𑀸𑀭𑁄 𑀳𑁄𑀦𑁆𑀢𑀺, 𑀏𑀓𑀢𑁄 𑀘𑀢𑁆𑀢𑀸𑀭𑁄, 𑀦𑀯𑀫𑁄 𑀅𑀦𑀼𑀲𑁆𑀲𑀸𑀯𑁂𑀢𑀺, 𑀲𑀮𑀸𑀓𑀁 𑀕𑀸𑀳𑁂𑀢𑀺 ‘𑀅𑀬𑀁 𑀥𑀫𑁆𑀫𑁄 𑀅𑀬𑀁 𑀯𑀺𑀦𑀬𑁄 𑀇𑀤𑀁 𑀲𑀢𑁆𑀣𑀼 𑀲𑀸𑀲𑀦𑀁, 𑀇𑀫𑀁 𑀕𑀡𑁆𑀳𑀣, 𑀇𑀫𑀁 𑀭𑁄𑀘𑁂𑀣𑀸’𑀢𑀺. 𑀏𑀯𑀁 𑀔𑁄, 𑀉𑀧𑀸𑀮𑀺, 𑀲𑀗𑁆𑀖𑀭𑀸𑀚𑀺 𑀘𑁂𑀯 𑀳𑁄𑀢𑀺 𑀲𑀗𑁆𑀖𑀪𑁂𑀤𑁄 𑀘. 𑀦𑀯𑀦𑁆𑀦𑀁 𑀯𑀸, 𑀉𑀧𑀸𑀮𑀺, 𑀅𑀢𑀺𑀭𑁂𑀓𑀦𑀯𑀦𑁆𑀦𑀁 𑀯𑀸 𑀲𑀗𑁆𑀖𑀭𑀸𑀚𑀺 𑀘𑁂𑀯 𑀳𑁄𑀢𑀺 𑀲𑀗𑁆𑀖𑀪𑁂𑀤𑁄 𑀘𑀸’’𑀢𑀺 (𑀘𑀽𑀴𑀯. 𑁩𑁫𑁧). 𑀏𑀢𑁂𑀲𑀼 𑀘 𑀧𑀦 𑀧𑀜𑁆𑀘𑀲𑀼 𑀲𑀗𑁆𑀖𑀪𑁂𑀤𑁄 𑀯𑀘𑀻𑀓𑀫𑁆𑀫𑀁, 𑀲𑁂𑀲𑀸𑀦𑀺 𑀓𑀸𑀬𑀓𑀫𑁆𑀫𑀸𑀦𑀻𑀢𑀺 𑀏𑀯𑀁 𑀓𑀫𑁆𑀫𑀢𑁄 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄.

𑀤𑁆𑀯𑀸𑀭𑀢𑁄𑀢𑀺 𑀲𑀩𑁆𑀩𑀸𑀦𑁂𑀯 𑀘𑁂𑀢𑀸𑀦𑀺 𑀓𑀸𑀬𑀤𑁆𑀯𑀸𑀭𑀢𑁄𑀧𑀺 𑀯𑀘𑀻𑀤𑁆𑀯𑀸𑀭𑀢𑁄𑀧𑀺 𑀲𑀫𑀼𑀝𑁆𑀞𑀳𑀦𑁆𑀢𑀺. 𑀧𑀼𑀭𑀺𑀫𑀸𑀦𑀺 𑀧𑀦𑁂𑀢𑁆𑀣 𑀘𑀢𑁆𑀢𑀸𑀭𑀺 𑀆𑀡𑀢𑁆𑀢𑀺𑀓𑀯𑀺𑀚𑁆𑀚𑀸𑀫𑀬𑀧𑁆𑀧𑀬𑁄𑀕𑀯𑀲𑁂𑀦 𑀯𑀘𑀻𑀤𑁆𑀯𑀸𑀭𑀢𑁄 𑀲𑀫𑀼𑀝𑁆𑀞𑀳𑀺𑀢𑁆𑀯𑀸𑀧𑀺 𑀓𑀸𑀬𑀤𑁆𑀯𑀸𑀭𑀫𑁂𑀯 𑀧𑀽𑀭𑁂𑀦𑁆𑀢𑀺, 𑀲𑀗𑁆𑀖𑀪𑁂𑀤𑁄 𑀳𑀢𑁆𑀣𑀫𑀼𑀤𑁆𑀥𑀸𑀬 𑀪𑁂𑀤𑀁 𑀓𑀭𑁄𑀦𑁆𑀢𑀲𑁆𑀲 𑀓𑀸𑀬𑀤𑁆𑀯𑀸𑀭𑀢𑁄 𑀲𑀫𑀼𑀝𑁆𑀞𑀳𑀺𑀢𑁆𑀯𑀸𑀧𑀺 𑀯𑀘𑀻𑀤𑁆𑀯𑀸𑀭𑀫𑁂𑀯 𑀧𑀽𑀭𑁂𑀢𑀻𑀢𑀺 𑀏𑀯𑀫𑁂𑀢𑁆𑀣 𑀤𑁆𑀯𑀸𑀭𑀢𑁄𑀧𑀺 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄.

𑀓𑀧𑁆𑀧𑀝𑁆𑀞𑀺𑀢𑀺𑀬𑀢𑁄𑀢𑀺 𑀲𑀗𑁆𑀖𑀪𑁂𑀤𑁄𑀬𑁂𑀯 𑀘𑁂𑀢𑁆𑀣 𑀓𑀧𑁆𑀧𑀝𑁆𑀞𑀺𑀢𑀺𑀬𑁄. 𑀲𑀡𑁆𑀞𑀳𑀦𑁆𑀢𑁂 𑀳𑀺 𑀓𑀧𑁆𑀧𑁂 𑀯𑀸 𑀓𑀧𑁆𑀧𑀯𑁂𑀫𑀚𑁆𑀛𑁂 𑀯𑀸 𑀲𑀗𑁆𑀖𑀪𑁂𑀤𑀁 𑀓𑀢𑁆𑀯𑀸 𑀓𑀧𑁆𑀧𑀯𑀺𑀦𑀸𑀲𑁂𑀬𑁂𑀯 𑀫𑀼𑀘𑁆𑀘𑀢𑀺. 𑀲𑀘𑁂𑀧𑀺 𑀳𑀺 ‘𑀲𑁆𑀯𑁂 𑀓𑀧𑁆𑀧𑁄 𑀯𑀺𑀦𑀲𑁆𑀲𑀺𑀲𑁆𑀲𑀢𑀻’’𑀢𑀺 𑀅𑀚𑁆𑀚 𑀲𑀗𑁆𑀖𑀪𑁂𑀤𑀁 𑀓𑀭𑁄𑀢𑀺, 𑀲𑁆𑀯𑁂𑀯 𑀫𑀼𑀘𑁆𑀘𑀢𑀺, 𑀏𑀓𑀤𑀺𑀯𑀲𑀫𑁂𑀯 𑀦𑀺𑀭𑀬𑁂 𑀧𑀘𑁆𑀘𑀢𑀺. 𑀏𑀯𑀁 𑀓𑀭𑀡𑀁 𑀧𑀦 𑀦𑀢𑁆𑀣𑀺. 𑀲𑁂𑀲𑀸𑀦𑀺 𑀘𑀢𑁆𑀢𑀸𑀭𑀺 𑀓𑀫𑁆𑀫𑀸𑀦𑀺 𑀆𑀦𑀦𑁆𑀢𑀭𑀺𑀬𑀸𑀦𑁂𑀯 𑀳𑁄𑀦𑁆𑀢𑀺, 𑀦 𑀓𑀧𑁆𑀧𑀝𑁆𑀞𑀺𑀢𑀺𑀬𑀸𑀦𑀻𑀢𑀺 𑀏𑀯𑀫𑁂𑀢𑁆𑀣 𑀓𑀧𑁆𑀧𑀝𑁆𑀞𑀺𑀢𑀺𑀬𑀢𑁄𑀧𑀺 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄.

𑀧𑀸𑀓𑀢𑁄𑀢𑀺 𑀬𑁂𑀦 𑀘 𑀧𑀜𑁆𑀘𑀧𑁂𑀢𑀸𑀦𑀺 𑀓𑀫𑁆𑀫𑀸𑀦𑀺 𑀓𑀢𑀸𑀦𑀺 𑀳𑁄𑀦𑁆𑀢𑀺, 𑀢𑀲𑁆𑀲 𑀲𑀗𑁆𑀖𑀪𑁂𑀤𑁄𑀬𑁂𑀯 𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀯𑀺𑀧𑀘𑁆𑀘𑀢𑀺, 𑀲𑁂𑀲𑀸𑀦𑀺 ‘‘𑀅𑀳𑁄𑀲𑀺𑀓𑀫𑁆𑀫𑀁 𑀦𑀸𑀳𑁄𑀲𑀺 𑀓𑀫𑁆𑀫𑀯𑀺𑀧𑀸𑀓𑁄’’𑀢𑀺 𑀏𑀯𑀫𑀸𑀤𑀻𑀲𑀼 𑀲𑀗𑁆𑀔𑀁 𑀕𑀘𑁆𑀙𑀦𑁆𑀢𑀺. 𑀲𑀗𑁆𑀖𑀪𑁂𑀤𑀸𑀪𑀸𑀯𑁂 𑀮𑁄𑀳𑀺𑀢𑀼𑀧𑁆𑀧𑀸𑀤𑁄, 𑀢𑀤𑀪𑀸𑀯𑁂 𑀅𑀭𑀳𑀦𑁆𑀢𑀖𑀸𑀢𑁄, 𑀢𑀤𑀪𑀸𑀯𑁂 𑀲𑀘𑁂 𑀧𑀺𑀢𑀸 𑀲𑀻𑀮𑀯𑀸 𑀳𑁄𑀢𑀺, 𑀫𑀸𑀢𑀸 𑀤𑀼𑀲𑁆𑀲𑀻𑀮𑀸, 𑀦𑁄 𑀯𑀸 𑀢𑀣𑀸 𑀲𑀻𑀮𑀯𑀢𑀻, 𑀧𑀺𑀢𑀼𑀖𑀸𑀢𑁄 𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀯𑀺𑀧𑀘𑁆𑀘𑀢𑀺. 𑀲𑀘𑁂 𑀫𑀸𑀢𑀸 𑀲𑀻𑀮𑀯𑀢𑀻, 𑀫𑀸𑀢𑀼𑀖𑀸𑀢𑁄. 𑀤𑁆𑀯𑀻𑀲𑀼𑀧𑀺 𑀲𑀻𑀮𑁂𑀦 𑀯𑀸 𑀤𑀼𑀲𑁆𑀲𑀻𑀮𑁂𑀦 𑀯𑀸 𑀲𑀫𑀸𑀦𑁂𑀲𑀼 𑀫𑀸𑀢𑀼𑀖𑀸𑀢𑁄𑀯 𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀯𑀺𑀧𑀘𑁆𑀘𑀢𑀺. 𑀫𑀸𑀢𑀸 𑀳𑀺 𑀤𑀼𑀓𑁆𑀓𑀭𑀓𑀸𑀭𑀺𑀦𑀻 𑀩𑀳𑀽𑀧𑀓𑀸𑀭𑀸 𑀘 𑀧𑀼𑀢𑁆𑀢𑀸𑀦𑀦𑁆𑀢𑀺. 𑀏𑀯𑀫𑁂𑀢𑁆𑀣 𑀧𑀸𑀓𑀢𑁄𑀧𑀺 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄.

𑀲𑀸𑀥𑀸𑀭𑀡𑀸𑀤𑀻𑀳𑀻𑀢𑀺 𑀧𑀼𑀭𑀺𑀫𑀸𑀦𑀺 𑀘𑀢𑁆𑀢𑀸𑀭𑀺 𑀲𑀩𑁆𑀩𑁂𑀲𑀫𑁆𑀧𑀺 𑀕𑀳𑀝𑁆𑀞𑀧𑀩𑁆𑀩𑀚𑀺𑀢𑀸𑀦𑀁 𑀲𑀸𑀥𑀸𑀭𑀡𑀸𑀦𑀺. 𑀲𑀗𑁆𑀖𑀪𑁂𑀤𑁄 𑀧𑀦 ‘‘𑀦 𑀔𑁄, 𑀉𑀧𑀸𑀮𑀺 𑀪𑀺𑀓𑁆𑀔𑀼𑀦𑀻, 𑀲𑀗𑁆𑀖𑀁 𑀪𑀺𑀦𑁆𑀤𑀢𑀺, 𑀦 𑀲𑀺𑀓𑁆𑀔𑀫𑀸𑀦𑀸, 𑀦 𑀲𑀸𑀫𑀡𑁂𑀭𑁄, 𑀦 𑀲𑀸𑀫𑀡𑁂𑀭𑀻, 𑀦 𑀉𑀧𑀸𑀲𑀓𑁄, 𑀦 𑀉𑀧𑀸𑀲𑀺𑀓𑀸 𑀲𑀗𑁆𑀖𑀁 𑀪𑀺𑀦𑁆𑀤𑀢𑀺. 𑀪𑀺𑀓𑁆𑀔𑀼 𑀔𑁄, 𑀉𑀧𑀸𑀮𑀺, 𑀧𑀓𑀢𑀢𑁆𑀢𑁄 𑀲𑀫𑀸𑀦𑀲𑀁𑀯𑀸𑀲𑀓𑁄 𑀲𑀫𑀸𑀦𑀲𑀻𑀫𑀸𑀬𑀁 𑀞𑀺𑀢𑁄 𑀲𑀗𑁆𑀖𑀁 𑀪𑀺𑀦𑁆𑀤𑀢𑀻’’𑀢𑀺 (𑀘𑀽𑀴𑀯. 𑁩𑁫𑁧) 𑀯𑀘𑀦𑀢𑁄 𑀯𑀼𑀢𑁆𑀢𑀧𑁆𑀧𑀓𑀸𑀭𑀲𑁆𑀲 𑀪𑀺𑀓𑁆𑀔𑀼𑀦𑁄𑀯 𑀳𑁄𑀢𑀺, 𑀦 𑀅𑀜𑁆𑀜𑀲𑁆𑀲, 𑀢𑀲𑁆𑀫𑀸 𑀅𑀲𑀸𑀥𑀸𑀭𑀡𑁄. 𑀆𑀤𑀺𑀲𑀤𑁆𑀤𑁂𑀦 𑀲𑀩𑁆𑀩𑁂𑀧𑁂𑀢𑁂 𑀤𑀼𑀓𑁆𑀔𑀯𑁂𑀤𑀦𑀸𑀬 𑀲𑀳𑀕𑀢𑀸 𑀤𑁄𑀲𑀫𑁄𑀳𑀲𑀫𑁆𑀧𑀬𑀼𑀢𑁆𑀢𑀸 𑀘𑀸𑀢𑀺 𑀏𑀯𑀫𑁂𑀢𑁆𑀣 𑀲𑀸𑀥𑀸𑀭𑀡𑀸𑀤𑀻𑀳𑀺𑀧𑀺 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄.

𑁨𑁭𑁬. 𑀅𑀜𑁆𑀜𑀁 𑀲𑀢𑁆𑀣𑀸𑀭𑀦𑁆𑀢𑀺 ‘‘𑀅𑀬𑀁 𑀫𑁂 𑀲𑀢𑁆𑀣𑀸 𑀲𑀢𑁆𑀣𑀼 𑀓𑀺𑀘𑁆𑀘𑀁 𑀓𑀸𑀢𑀼𑀁 𑀅𑀲𑀫𑀢𑁆𑀣𑁄’’𑀢𑀺 𑀪𑀯𑀦𑁆𑀢𑀭𑁂𑀧𑀺 𑀅𑀜𑁆𑀜𑀁 𑀢𑀺𑀢𑁆𑀣𑀓𑀭𑀁 ‘𑀅𑀬𑀁 𑀫𑁂 𑀲𑀢𑁆𑀣𑀸’’𑀢𑀺 𑀏𑀯𑀁 𑀕𑀡𑁆𑀳𑁂𑀬𑁆𑀬, 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀻𑀢𑀺 𑀅𑀢𑁆𑀣𑁄.

𑁨𑁭𑁭. 𑀏𑀓𑀺𑀲𑁆𑀲𑀸 𑀮𑁄𑀓𑀥𑀸𑀢𑀼𑀬𑀸𑀢𑀺 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀬𑀸. 𑀢𑀻𑀡𑀺 𑀳𑀺 𑀔𑁂𑀢𑁆𑀢𑀸𑀦𑀺 𑀚𑀸𑀢𑀺𑀔𑁂𑀢𑁆𑀢𑀁, 𑀆𑀡𑀸𑀔𑁂𑀢𑁆𑀢𑀁 𑀯𑀺𑀲𑀬𑀔𑁂𑀢𑁆𑀢𑀦𑁆𑀢𑀺. 𑀢𑀢𑁆𑀣 𑀚𑀸𑀢𑀺𑀔𑁂𑀢𑁆𑀢𑀁 𑀦𑀸𑀫 𑀤𑀲𑀲𑀳𑀲𑁆𑀲𑀻 𑀮𑁄𑀓𑀥𑀸𑀢𑀼. 𑀲𑀸 𑀳𑀺 𑀢𑀣𑀸𑀕𑀢𑀲𑁆𑀲 𑀫𑀸𑀢𑀼𑀓𑀼𑀘𑁆𑀙𑀺𑀲𑁆𑀫𑀺𑀁 𑀑𑀓𑁆𑀓𑀫𑀦𑀓𑀸𑀮𑁂 𑀦𑀺𑀓𑁆𑀔𑀫𑀦𑀓𑀸𑀮𑁂 𑀲𑀫𑁆𑀩𑁄𑀥𑀺𑀓𑀸𑀮𑁂 𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑁂 𑀆𑀬𑀼𑀲𑀗𑁆𑀔𑀸𑀭𑀯𑁄𑀲𑁆𑀲𑀚𑁆𑀚𑀦𑁂 𑀧𑀭𑀺𑀦𑀺𑀩𑁆𑀩𑀸𑀦𑁂 𑀘 𑀓𑀫𑁆𑀧𑀢𑀺. 𑀓𑁄𑀝𑀺𑀲𑀢𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀁 𑀧𑀦 𑀆𑀡𑀸𑀔𑁂𑀢𑁆𑀢𑀁 𑀦𑀸𑀫. 𑀆𑀝𑀸𑀦𑀸𑀝𑀺𑀬𑀧𑀭𑀺𑀢𑁆𑀢𑀫𑁄𑀭𑀧𑀭𑀺𑀢𑁆𑀢𑀥𑀚𑀕𑁆𑀕𑀧𑀭𑀺𑀢𑁆𑀢𑀭𑀢𑀦𑀧𑀭𑀺𑀢𑁆𑀢𑀸𑀤𑀻𑀦𑀜𑁆𑀳𑀺 𑀏𑀢𑁆𑀣 𑀆𑀡𑀸 𑀧𑀯𑀢𑁆𑀢𑀢𑀺. 𑀯𑀺𑀲𑀬𑀔𑁂𑀢𑁆𑀢𑀲𑁆𑀲 𑀧𑀦 𑀧𑀭𑀺𑀫𑀸𑀡𑀁 𑀦𑀢𑁆𑀣𑀺. 𑀩𑀼𑀤𑁆𑀥𑀸𑀦𑀜𑁆𑀳𑀺 ‘‘𑀬𑀸𑀯𑀢𑀓𑀁 𑀜𑀸𑀡𑀁 𑀢𑀸𑀯𑀢𑀓𑀁 𑀜𑁂𑀬𑁆𑀬𑀁, 𑀬𑀸𑀯𑀢𑀓𑀁 𑀜𑁂𑀬𑁆𑀬𑀁 𑀢𑀸𑀯𑀢𑀓𑀁 𑀜𑀸𑀡𑀁, 𑀜𑀸𑀡𑀧𑀭𑀺𑀬𑀦𑁆𑀢𑀺𑀓𑀁 𑀜𑁂𑀬𑁆𑀬𑀁, 𑀜𑁂𑀬𑁆𑀬𑀧𑀭𑀺𑀬𑀦𑁆𑀢𑀺𑀓𑀁 𑀜𑀸𑀡’’𑀦𑁆𑀢𑀺 (𑀫𑀳𑀸𑀦𑀺. 𑁬𑁯; 𑀘𑀽𑀴𑀦𑀺. 𑀫𑁄𑀖𑀭𑀸𑀚𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲𑁄 𑁮𑁫; 𑀧𑀝𑀺. 𑀫. 𑁩.𑁫) 𑀯𑀘𑀦𑀢𑁄 𑀅𑀯𑀺𑀲𑀬𑁄 𑀦𑀸𑀫 𑀦𑀢𑁆𑀣𑀺.

𑀇𑀫𑁂𑀲𑀼 𑀧𑀦 𑀢𑀻𑀲𑀼 𑀔𑁂𑀢𑁆𑀢𑁂𑀲𑀼 𑀞𑀧𑁂𑀢𑁆𑀯𑀸 𑀇𑀫𑀁 𑀘𑀓𑁆𑀓𑀯𑀸𑀴𑀁 𑀅𑀜𑁆𑀜𑀲𑁆𑀫𑀺𑀁 𑀘𑀓𑁆𑀓𑀯𑀸𑀴𑁂 𑀩𑀼𑀤𑁆𑀥𑀸 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀲𑀼𑀢𑁆𑀢𑀁 𑀦𑀢𑁆𑀣𑀺, 𑀦 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀧𑀦 𑀅𑀢𑁆𑀣𑀺. 𑀢𑀻𑀡𑀺 𑀳𑀺 𑀧𑀺𑀝𑀓𑀸𑀦𑀺 𑁋 𑀯𑀺𑀦𑀬𑀧𑀺𑀝𑀓𑀁, 𑀲𑀼𑀢𑁆𑀢𑀦𑁆𑀢𑀧𑀺𑀝𑀓𑀁, 𑀅𑀪𑀺𑀥𑀫𑁆𑀫𑀧𑀺𑀝𑀓𑀁. 𑀢𑀺𑀲𑁆𑀲𑁄 𑀲𑀗𑁆𑀕𑀻𑀢𑀺𑀬𑁄 𑁋 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑀲𑁆𑀲 𑀲𑀗𑁆𑀕𑀻𑀢𑀺, 𑀬𑀲𑀢𑁆𑀣𑁂𑀭𑀲𑁆𑀲 𑀲𑀗𑁆𑀕𑀻𑀢𑀺, 𑀫𑁄𑀕𑁆𑀕𑀮𑀺𑀧𑀼𑀢𑁆𑀢𑀢𑁆𑀣𑁂𑀭𑀲𑁆𑀲 𑀲𑀗𑁆𑀕𑀻𑀢𑀺. 𑀇𑀫𑀸 𑀢𑀺𑀲𑁆𑀲𑁄 𑀲𑀗𑁆𑀕𑀻𑀢𑀺𑀬𑁄 𑀆𑀭𑀼𑀴𑁆𑀳𑁂 𑀢𑁂𑀧𑀺𑀝𑀓𑁂 𑀩𑀼𑀤𑁆𑀥𑀯𑀘𑀦𑁂 𑀇𑀫𑀁 𑀘𑀓𑁆𑀓𑀯𑀸𑀴𑀁 𑀫𑀼𑀜𑁆𑀘𑀺𑀢𑁆𑀯𑀸 𑀅𑀜𑁆𑀜𑀢𑁆𑀣 𑀩𑀼𑀤𑁆𑀥𑀸 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀲𑀼𑀢𑁆𑀢𑀁 𑀦𑀢𑁆𑀣𑀺, 𑀦 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀧𑀦 𑀅𑀢𑁆𑀣𑀺.

𑀅𑀧𑀼𑀩𑁆𑀩𑀁 𑀅𑀘𑀭𑀺𑀫𑀦𑁆𑀢𑀺 𑀅𑀧𑀼𑀭𑁂 𑀅𑀧𑀘𑁆𑀙𑀸, 𑀏𑀓𑀢𑁄 𑀦 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀧𑀼𑀭𑁂 𑀯𑀸 𑀧𑀘𑁆𑀙𑀸 𑀯𑀸 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀢𑁆𑀣 𑀩𑁄𑀥𑀺𑀧𑀮𑁆𑀮𑀗𑁆𑀓𑁂 ‘‘𑀩𑁄𑀥𑀺𑀁 𑀅𑀧𑁆𑀧𑀢𑁆𑀯𑀸 𑀦 𑀉𑀝𑁆𑀞𑀳𑀺𑀲𑁆𑀲𑀸𑀫𑀻’’𑀢𑀺 𑀦𑀺𑀲𑀺𑀦𑁆𑀦𑀓𑀸𑀮𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀫𑀸𑀢𑀼𑀓𑀼𑀘𑁆𑀙𑀺𑀲𑁆𑀫𑀺𑀁 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑀁, 𑀢𑀸𑀯 𑀧𑀼𑀩𑁆𑀩𑁂𑀢𑀺 𑀦 𑀯𑁂𑀤𑀺𑀢𑀩𑁆𑀩𑀁. 𑀩𑁄𑀥𑀺𑀲𑀢𑁆𑀢𑀲𑁆𑀲 𑀳𑀺 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀓𑀫𑁆𑀧𑀦𑁂𑀦𑁂𑀯 𑀔𑁂𑀢𑁆𑀢𑀧𑀭𑀺𑀕𑁆𑀕𑀳𑁄 𑀓𑀢𑁄, 𑀏𑀢𑁆𑀣𑀦𑁆𑀢𑀭𑁂 𑀅𑀜𑁆𑀜𑀲𑁆𑀲 𑀩𑀼𑀤𑁆𑀥𑀲𑁆𑀲 𑀉𑀧𑁆𑀧𑀢𑁆𑀢𑀺 𑀦𑀺𑀯𑀸𑀭𑀺𑀢𑀸𑀯 𑀳𑁄𑀢𑀺. 𑀧𑀭𑀺𑀦𑀺𑀩𑁆𑀩𑀸𑀦𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀲𑀸𑀲𑀧𑀫𑀢𑁆𑀢𑀸𑀧𑀺 𑀥𑀸𑀢𑀼 𑀢𑀺𑀝𑁆𑀞𑀢𑀺, 𑀢𑀸𑀯 𑀧𑀘𑁆𑀙𑀸𑀢𑀺 𑀦 𑀯𑁂𑀤𑀺𑀢𑀩𑁆𑀩𑀁. 𑀥𑀸𑀢𑀽𑀲𑀼 𑀳𑀺 𑀞𑀺𑀢𑀸𑀲𑀼 𑀩𑀼𑀤𑁆𑀥𑀸 𑀞𑀺𑀢𑀸𑀯 𑀳𑁄𑀦𑁆𑀢𑀺. 𑀢𑀲𑁆𑀫𑀸 𑀏𑀢𑁆𑀣𑀦𑁆𑀢𑀭𑁂 𑀅𑀜𑁆𑀜𑀲𑁆𑀲 𑀩𑀼𑀤𑁆𑀥𑀲𑁆𑀲 𑀉𑀧𑁆𑀧𑀢𑁆𑀢𑀺 𑀦𑀺𑀯𑀸𑀭𑀺𑀢𑀸𑀯 𑀳𑁄𑀢𑀺. 𑀥𑀸𑀢𑀼𑀧𑀭𑀺𑀦𑀺𑀩𑁆𑀩𑀸𑀦𑁂 𑀧𑀦 𑀚𑀸𑀢𑁂 𑀅𑀜𑁆𑀜𑀲𑁆𑀲 𑀩𑀼𑀤𑁆𑀥𑀲𑁆𑀲 𑀉𑀧𑁆𑀧𑀢𑁆𑀢𑀺 𑀦 𑀦𑀺𑀯𑀸𑀭𑀺𑀢𑀸.

𑀓𑀲𑁆𑀫𑀸 𑀧𑀦 𑀅𑀧𑀼𑀩𑁆𑀩𑀁 𑀅𑀘𑀭𑀺𑀫𑀁 𑀦 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺? 𑀅𑀦𑀘𑁆𑀙𑀭𑀺𑀬𑀢𑁆𑀢𑀸. 𑀩𑀼𑀤𑁆𑀥𑀸 𑀳𑀺 𑀅𑀘𑁆𑀙𑀭𑀺𑀬𑀫𑀦𑀼𑀲𑁆𑀲𑀸. 𑀬𑀣𑀸𑀳 𑁋 ‘‘𑀏𑀓𑀧𑀼𑀕𑁆𑀕𑀮𑁄, 𑀪𑀺𑀓𑁆𑀔𑀯𑁂, 𑀮𑁄𑀓𑁂 𑀉𑀧𑁆𑀧𑀚𑁆𑀚𑀫𑀸𑀦𑁄 𑀉𑀧𑁆𑀧𑀚𑁆𑀚𑀢𑀺 𑀅𑀘𑁆𑀙𑀭𑀺𑀬𑀫𑀦𑀼𑀲𑁆𑀲𑁄. 𑀓𑀢𑀫𑁄 𑀏𑀓𑀧𑀼𑀕𑁆𑀕𑀮𑁄? 𑀢𑀣𑀸𑀕𑀢𑁄 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄’’𑀢𑀺 (𑀅. 𑀦𑀺. 𑁧.𑁧𑁭𑁨). 𑀬𑀤𑀺 𑀘 𑀤𑁆𑀯𑁂 𑀯𑀸 𑀘𑀢𑁆𑀢𑀸𑀭𑁄 𑀯𑀸 𑀅𑀝𑁆𑀞 𑀯𑀸 𑀲𑁄𑀴𑀲 𑀯𑀸 𑀏𑀓𑀢𑁄 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁, 𑀅𑀦𑀘𑁆𑀙𑀭𑀺𑀬𑀸 𑀪𑀯𑁂𑀬𑁆𑀬𑀼𑀁. 𑀏𑀓𑀲𑁆𑀫𑀺𑀜𑁆𑀳𑀺 𑀯𑀺𑀳𑀸𑀭𑁂 𑀤𑁆𑀯𑀺𑀦𑁆𑀦𑀁 𑀘𑁂𑀢𑀺𑀬𑀸𑀦𑀫𑁆𑀧𑀺 𑀮𑀸𑀪𑀲𑀓𑁆𑀓𑀸𑀭𑁄 𑀉𑀴𑀸𑀭𑀸 𑀦 𑀳𑁄𑀦𑁆𑀢𑀺, 𑀪𑀺𑀓𑁆𑀔𑀽𑀧𑀺 𑀩𑀳𑀼𑀢𑀸𑀬 𑀅𑀦𑀘𑁆𑀙𑀭𑀺𑀬𑀸 𑀚𑀸𑀢𑀸, 𑀏𑀯𑀁 𑀩𑀼𑀤𑁆𑀥𑀸𑀧𑀺 𑀪𑀯𑁂𑀬𑁆𑀬𑀼𑀁. 𑀢𑀲𑁆𑀫𑀸 𑀦 𑀉𑀧𑁆𑀧𑀚𑁆𑀚𑀦𑁆𑀢𑀺.

𑀤𑁂𑀲𑀦𑀸𑀬 𑀘 𑀯𑀺𑀲𑁂𑀲𑀸𑀪𑀸𑀯𑀢𑁄. 𑀬𑀜𑁆𑀳𑀺 𑀲𑀢𑀺𑀧𑀝𑁆𑀞𑀸𑀦𑀸𑀤𑀺𑀓𑀁 𑀥𑀫𑁆𑀫𑀁 𑀏𑀓𑁄 𑀤𑁂𑀲𑁂𑀢𑀺, 𑀅𑀜𑁆𑀜𑁂𑀦 𑀉𑀧𑁆𑀧𑀚𑁆𑀚𑀺𑀢𑁆𑀯𑀸𑀧𑀺 𑀲𑁄𑀯 𑀥𑀫𑁆𑀫𑁄 𑀤𑁂𑀲𑁂𑀢𑀩𑁆𑀩𑁄 𑀲𑀺𑀬𑀸. 𑀢𑀢𑁄 𑀅𑀦𑀘𑁆𑀙𑀭𑀺𑀬𑁄 𑀲𑀺𑀬𑀸. 𑀏𑀓𑀲𑁆𑀫𑀺𑀁 𑀧𑀦 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁂 𑀤𑁂𑀲𑀦𑀸𑀧𑀺 𑀅𑀘𑁆𑀙𑀭𑀺𑀬𑀸𑀯 𑀳𑁄𑀢𑀺.

𑀯𑀺𑀯𑀸𑀤𑀪𑀸𑀯𑀢𑁄 𑀘. 𑀩𑀳𑀽𑀲𑀼 𑀘 𑀩𑀼𑀤𑁆𑀥𑁂𑀲𑀼 𑀉𑀧𑁆𑀧𑀦𑁆𑀦𑁂𑀲𑀼 𑀩𑀳𑀽𑀦𑀁 𑀆𑀘𑀭𑀺𑀬𑀸𑀦𑀁 𑀅𑀦𑁆𑀢𑁂𑀯𑀸𑀲𑀺𑀓𑀸 𑀯𑀺𑀬 ‘‘𑀅𑀫𑁆𑀳𑀸𑀓𑀁 𑀩𑀼𑀤𑁆𑀥𑁄 𑀧𑀸𑀲𑀸𑀤𑀺𑀓𑁄, 𑀅𑀫𑁆𑀳𑀸𑀓𑀁 𑀩𑀼𑀤𑁆𑀥𑁄 𑀫𑀥𑀼𑀭𑀲𑁆𑀲𑀭𑁄 𑀮𑀸𑀪𑀻 𑀧𑀼𑀜𑁆𑀜𑀯𑀸’’𑀢𑀺 𑀯𑀺𑀯𑀤𑁂𑀬𑁆𑀬𑀼𑀁, 𑀢𑀲𑁆𑀫𑀸𑀧𑀺 𑀏𑀯𑀁 𑀦 𑀉𑀧𑁆𑀧𑀚𑁆𑀚𑀦𑁆𑀢𑀺.

𑀅𑀧𑀺𑀘𑁂𑀢𑀁 𑀓𑀸𑀭𑀡𑀁 𑀫𑀺𑀮𑀺𑀦𑁆𑀤𑀭𑀜𑁆𑀜𑀸 𑀧𑀼𑀝𑁆𑀞𑁂𑀦 𑀦𑀸𑀕𑀲𑁂𑀦𑀢𑁆𑀣𑁂𑀭𑁂𑀦 𑀯𑀺𑀢𑁆𑀣𑀸𑀭𑀺𑀢𑀫𑁂𑀯. 𑀯𑀼𑀢𑁆𑀢𑀜𑁆𑀳𑀺 𑀢𑀢𑁆𑀣 (𑀫𑀺. 𑀧. 𑁫.𑁧.𑁧) 𑁋

‘‘𑀪𑀦𑁆𑀢𑁂, 𑀦𑀸𑀕𑀲𑁂𑀦, 𑀪𑀸𑀲𑀺𑀢𑀫𑁆𑀧𑀺 𑀳𑁂𑀢𑀁 𑀪𑀕𑀯𑀢𑀸 𑁋 ‘𑀅𑀝𑁆𑀞𑀸𑀦𑀫𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀦𑀯𑀓𑀸𑀲𑁄, 𑀬𑀁 𑀏𑀓𑀺𑀲𑁆𑀲𑀸 𑀮𑁄𑀓𑀥𑀸𑀢𑀼𑀬𑀸 𑀤𑁆𑀯𑁂 𑀅𑀭𑀳𑀦𑁆𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸 𑀅𑀧𑀼𑀩𑁆𑀩𑀁 𑀅𑀘𑀭𑀺𑀫𑀁 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁, 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀻’𑀢𑀺. 𑀤𑁂𑀲𑁂𑀦𑁆𑀢𑀸 𑀘, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀲𑀩𑁆𑀩𑁂𑀧𑀺 𑀢𑀣𑀸𑀕𑀢𑀸 𑀲𑀢𑁆𑀢𑀢𑀺𑀁𑀲 𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑁂 𑀤𑁂𑀲𑁂𑀦𑁆𑀢𑀺, 𑀓𑀣𑀬𑀫𑀸𑀦𑀸 𑀘 𑀘𑀢𑁆𑀢𑀸𑀭𑀺 𑀅𑀭𑀺𑀬𑀲𑀘𑁆𑀘𑀸𑀦𑀺 𑀓𑀣𑁂𑀦𑁆𑀢𑀺, 𑀲𑀺𑀓𑁆𑀔𑀸𑀧𑁂𑀦𑁆𑀢𑀸 𑀘 𑀢𑀻𑀲𑀼 𑀲𑀺𑀓𑁆𑀔𑀸𑀲𑀼 𑀲𑀺𑀓𑁆𑀔𑀸𑀧𑁂𑀦𑁆𑀢𑀺, 𑀅𑀦𑀼𑀲𑀸𑀲𑀫𑀸𑀦𑀸 𑀘 𑀅𑀧𑁆𑀧𑀫𑀸𑀤𑀧𑀝𑀺𑀧𑀢𑁆𑀢𑀺𑀬𑀁 𑀅𑀦𑀼𑀲𑀸𑀲𑀦𑁆𑀢𑀺. 𑀬𑀤𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀲𑀩𑁆𑀩𑁂𑀲𑀫𑁆𑀧𑀺 𑀢𑀣𑀸𑀕𑀢𑀸𑀦𑀁 𑀏𑀓𑁄 𑀉𑀤𑁆𑀤𑁂𑀲𑁄 𑀏𑀓𑀸 𑀓𑀣𑀸 𑀏𑀓𑀸 𑀲𑀺𑀓𑁆𑀔𑀸 𑀏𑀓𑀸 𑀅𑀦𑀼𑀲𑀺𑀝𑁆𑀞𑀺, 𑀓𑁂𑀦 𑀓𑀸𑀭𑀡𑁂𑀦 𑀤𑁆𑀯𑁂 𑀢𑀣𑀸𑀕𑀢𑀸 𑀏𑀓𑀓𑁆𑀔𑀡𑁂 𑀦 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀏𑀓𑁂𑀦𑀧𑀺 𑀢𑀸𑀯 𑀩𑀼𑀤𑁆𑀥𑀼𑀧𑁆𑀧𑀸𑀤𑁂𑀦 𑀅𑀬𑀁 𑀮𑁄𑀓𑁄 𑀑𑀪𑀸𑀲𑀚𑀸𑀢𑁄, 𑀬𑀤𑀺 𑀤𑀼𑀢𑀺𑀬𑁄𑀧𑀺 𑀩𑀼𑀤𑁆𑀥𑁄 𑀪𑀯𑁂𑀬𑁆𑀬, 𑀤𑁆𑀯𑀺𑀦𑁆𑀦𑀁 𑀧𑀪𑀸𑀬 𑀅𑀬𑀁 𑀮𑁄𑀓𑁄 𑀪𑀺𑀬𑁆𑀬𑁄𑀲𑁄𑀫𑀢𑁆𑀢𑀸𑀬 𑀑𑀪𑀸𑀲𑀚𑀸𑀢𑁄 𑀪𑀯𑁂𑀬𑁆𑀬. 𑀑𑀯𑀤𑀫𑀸𑀦𑀸 𑀘 𑀤𑁆𑀯𑁂 𑀢𑀣𑀸𑀕𑀢𑀸 𑀲𑀼𑀔𑀁 𑀑𑀯𑀤𑁂𑀬𑁆𑀬𑀼𑀁, 𑀅𑀦𑀼𑀲𑀸𑀲𑀫𑀸𑀦𑀸 𑀘 𑀲𑀼𑀔𑀁 𑀅𑀦𑀼𑀲𑀸𑀲𑁂𑀬𑁆𑀬𑀼𑀁. 𑀢𑀢𑁆𑀣 𑀫𑁂 𑀓𑀸𑀭𑀡𑀁 𑀤𑁂𑀲𑁂𑀳𑀺, 𑀬𑀣𑀸𑀳𑀁 𑀦𑀺𑀲𑁆𑀲𑀁𑀲𑀬𑁄 𑀪𑀯𑁂𑀬𑁆𑀬𑀦𑁆𑀢𑀺’’.

‘‘𑀅𑀬𑀁, 𑀫𑀳𑀸𑀭𑀸𑀚, 𑀤𑀲𑀲𑀳𑀲𑁆𑀲𑀻 𑀮𑁄𑀓𑀥𑀸𑀢𑀼 𑀏𑀓𑀩𑀼𑀤𑁆𑀥𑀥𑀸𑀭𑀡𑀻, 𑀏𑀓𑀲𑁆𑀲𑁂𑀯 𑀢𑀣𑀸𑀕𑀢𑀲𑁆𑀲 𑀕𑀼𑀡𑀁 𑀥𑀸𑀭𑁂𑀢𑀺. 𑀬𑀤𑀺 𑀤𑀼𑀢𑀺𑀬𑁄 𑀩𑀼𑀤𑁆𑀥𑁄 𑀉𑀧𑁆𑀧𑀚𑁆𑀚𑁂𑀬𑁆𑀬, 𑀦𑀸𑀬𑀁 𑀤𑀲𑀲𑀳𑀲𑁆𑀲𑀻 𑀮𑁄𑀓𑀥𑀸𑀢𑀼 𑀥𑀸𑀭𑁂𑀬𑁆𑀬, 𑀘𑀮𑁂𑀬𑁆𑀬 𑀓𑀫𑁆𑀧𑁂𑀬𑁆𑀬 𑀦𑀫𑁂𑀬𑁆𑀬 𑀑𑀦𑀫𑁂𑀬𑁆𑀬 𑀯𑀺𑀦𑀫𑁂𑀬𑁆𑀬 𑀯𑀺𑀓𑀺𑀭𑁂𑀬𑁆𑀬 𑀯𑀺𑀥𑀫𑁂𑀬𑁆𑀬 𑀯𑀺𑀤𑁆𑀥𑀁𑀲𑁂𑀬𑁆𑀬, 𑀦 𑀞𑀸𑀦𑀫𑀼𑀧𑀕𑀘𑁆𑀙𑁂𑀬𑁆𑀬.

‘‘𑀬𑀣𑀸, 𑀫𑀳𑀸𑀭𑀸𑀚, 𑀦𑀸𑀯𑀸 𑀏𑀓𑀧𑀼𑀭𑀺𑀲𑀲𑀦𑁆𑀥𑀸𑀭𑀡𑀻 𑀪𑀯𑁂𑀬𑁆𑀬. 𑀏𑀓𑀲𑁆𑀫𑀺𑀁 𑀧𑀼𑀭𑀺𑀲𑁂 𑀅𑀪𑀺𑀭𑀽𑀴𑁆𑀳𑁂 𑀲𑀸 𑀦𑀸𑀯𑀸 𑀲𑀫𑀼𑀧𑀸𑀤𑀺𑀓𑀸 𑀪𑀯𑁂𑀬𑁆𑀬. 𑀅𑀣 𑀤𑀼𑀢𑀺𑀬𑁄 𑀧𑀼𑀭𑀺𑀲𑁄 𑀆𑀕𑀘𑁆𑀙𑁂𑀬𑁆𑀬 𑀢𑀸𑀤𑀺𑀲𑁄 𑀆𑀬𑀼𑀦𑀸 𑀯𑀡𑁆𑀡𑁂𑀦 𑀯𑀬𑁂𑀦 𑀧𑀫𑀸𑀡𑁂𑀦 𑀓𑀺𑀲𑀣𑀽𑀮𑁂𑀦 𑀲𑀩𑁆𑀩𑀗𑁆𑀕𑀧𑀘𑁆𑀘𑀗𑁆𑀕𑁂𑀦, 𑀲𑁄 𑀢𑀁 𑀦𑀸𑀯𑀁 𑀅𑀪𑀺𑀭𑀼𑀳𑁂𑀬𑁆𑀬. 𑀅𑀧𑀺 𑀦𑀼 𑀲𑀸, 𑀫𑀳𑀸𑀭𑀸𑀚, 𑀦𑀸𑀯𑀸 𑀤𑁆𑀯𑀺𑀦𑁆𑀦𑀫𑁆𑀧𑀺 𑀥𑀸𑀭𑁂𑀬𑁆𑀬𑀸𑀢𑀺? 𑀦 𑀳𑀺, 𑀪𑀦𑁆𑀢𑁂, 𑀘𑀮𑁂𑀬𑁆𑀬 𑀓𑀫𑁆𑀧𑁂𑀬𑁆𑀬 𑀦𑀫𑁂𑀬𑁆𑀬 𑀑𑀦𑀫𑁂𑀬𑁆𑀬 𑀯𑀺𑀦𑀫𑁂𑀬𑁆𑀬 𑀯𑀺𑀓𑀺𑀭𑁂𑀬𑁆𑀬 𑀯𑀺𑀥𑀫𑁂𑀬𑁆𑀬 𑀯𑀺𑀤𑁆𑀥𑀁𑀲𑁂𑀬𑁆𑀬, 𑀦 𑀞𑀸𑀦𑀫𑀼𑀧𑀕𑀘𑁆𑀙𑁂𑀬𑁆𑀬, 𑀑𑀲𑀻𑀤𑁂𑀬𑁆𑀬 𑀉𑀤𑀓𑁂𑀢𑀺. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀅𑀬𑀁 𑀤𑀲𑀲𑀳𑀲𑁆𑀲𑀻 𑀮𑁄𑀓𑀥𑀸𑀢𑀼 𑀏𑀓𑀩𑀼𑀤𑁆𑀥𑀥𑀸𑀭𑀡𑀻, 𑀏𑀓𑀲𑁆𑀲𑁂𑀯 𑀢𑀣𑀸𑀕𑀢𑀲𑁆𑀲 𑀕𑀼𑀡𑀁 𑀥𑀸𑀭𑁂𑀢𑀺, 𑀬𑀤𑀺 𑀤𑀼𑀢𑀺𑀬𑁄 𑀩𑀼𑀤𑁆𑀥𑁄 𑀉𑀧𑁆𑀧𑀚𑁆𑀚𑁂𑀬𑁆𑀬, 𑀦𑀸𑀬𑀁 𑀤𑀲𑀲𑀳𑀲𑁆𑀲𑀻 𑀮𑁄𑀓𑀥𑀸𑀢𑀼 𑀥𑀸𑀭𑁂𑀬𑁆𑀬, 𑀘𑀮𑁂𑀬𑁆𑀬…𑀧𑁂… 𑀦 𑀞𑀸𑀦𑀫𑀼𑀧𑀕𑀘𑁆𑀙𑁂𑀬𑁆𑀬.

‘‘𑀬𑀣𑀸 𑀯𑀸 𑀧𑀦, 𑀫𑀳𑀸𑀭𑀸𑀚, 𑀧𑀼𑀭𑀺𑀲𑁄 𑀬𑀸𑀯𑀤𑀢𑁆𑀣𑀁 𑀪𑁄𑀚𑀦𑀁 𑀪𑀼𑀜𑁆𑀚𑁂𑀬𑁆𑀬 𑀙𑀸𑀤𑁂𑀦𑁆𑀢𑀁 𑀬𑀸𑀯 𑀓𑀡𑁆𑀞𑀫𑀪𑀺𑀧𑀽𑀭𑀬𑀺𑀢𑁆𑀯𑀸. 𑀲𑁄 𑀥𑀸𑀢𑁄 𑀧𑀻𑀡𑀺𑀢𑁄 𑀧𑀭𑀺𑀧𑀼𑀡𑁆𑀡𑁄 𑀦𑀺𑀭𑀦𑁆𑀢𑀭𑁄 𑀢𑀦𑁆𑀤𑀺𑀓𑀢𑁄 𑀅𑀦𑁄𑀦𑀫𑀺𑀢𑀤𑀡𑁆𑀟𑀚𑀸𑀢𑁄 𑀧𑀼𑀦𑀤𑁂𑀯 𑀢𑀢𑁆𑀢𑀓𑀁 𑀪𑁄𑀚𑀦𑀁 𑀪𑀼𑀜𑁆𑀚𑁂𑀬𑁆𑀬. 𑀅𑀧𑀺 𑀦𑀼 𑀔𑁄 𑀲𑁄, 𑀫𑀳𑀸𑀭𑀸𑀚, 𑀧𑀼𑀭𑀺𑀲𑁄 𑀲𑀼𑀔𑀺𑀢𑁄 𑀪𑀯𑁂𑀬𑁆𑀬𑀸𑀢𑀺? 𑀦 𑀳𑀺, 𑀪𑀦𑁆𑀢𑁂, 𑀲𑀓𑀺𑀁𑀪𑀼𑀢𑁆𑀢𑁄𑀯 𑀫𑀭𑁂𑀬𑁆𑀬𑀸𑀢𑀺. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀅𑀬𑀁 𑀤𑀲𑀲𑀳𑀲𑁆𑀲𑀻 𑀮𑁄𑀓𑀥𑀸𑀢𑀼 𑀏𑀓𑀩𑀼𑀤𑁆𑀥𑀥𑀸𑀭𑀡𑀻…𑀧𑁂… 𑀦 𑀞𑀸𑀦𑀫𑀼𑀧𑀕𑀘𑁆𑀙𑁂𑀬𑁆𑀬𑀸𑀢𑀺.

‘‘𑀓𑀺𑀁 𑀦𑀼 𑀔𑁄, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀅𑀢𑀺𑀥𑀫𑁆𑀫𑀪𑀸𑀭𑁂𑀦 𑀧𑀣𑀯𑀺 𑀘𑀮𑀢𑀻𑀢𑀺? 𑀇𑀥, 𑀫𑀳𑀸𑀭𑀸𑀚, 𑀤𑁆𑀯𑁂 𑀲𑀓𑀝𑀸 𑀭𑀢𑀦𑀧𑀭𑀺𑀧𑀽𑀭𑀺𑀢𑀸 𑀪𑀯𑁂𑀬𑁆𑀬𑀼𑀁 𑀬𑀸𑀯 𑀫𑀼𑀔𑀲𑀫𑀸. 𑀏𑀓𑀲𑁆𑀫𑀸 𑀲𑀓𑀝𑀢𑁄 𑀭𑀢𑀦𑀁 𑀕𑀳𑁂𑀢𑁆𑀯𑀸 𑀏𑀓𑀲𑁆𑀫𑀺𑀁 𑀲𑀓𑀝𑁂 𑀆𑀓𑀺𑀭𑁂𑀬𑁆𑀬𑀼𑀁, 𑀅𑀧𑀺 𑀦𑀼 𑀢𑀁, 𑀫𑀳𑀸𑀭𑀸𑀚, 𑀲𑀓𑀝𑀁 𑀤𑁆𑀯𑀺𑀦𑁆𑀦𑀫𑁆𑀧𑀺 𑀲𑀓𑀝𑀸𑀦𑀁 𑀭𑀢𑀦𑀁 𑀥𑀸𑀭𑁂𑀬𑁆𑀬𑀸𑀢𑀺? 𑀦 𑀳𑀺, 𑀪𑀦𑁆𑀢𑁂, 𑀦𑀸𑀪𑀺𑀧𑀺 𑀢𑀲𑁆𑀲 𑀨𑀮𑁂𑀬𑁆𑀬, 𑀅𑀭𑀸𑀧𑀺 𑀢𑀲𑁆𑀲 𑀪𑀺𑀚𑁆𑀚𑁂𑀬𑁆𑀬𑀼𑀁, 𑀦𑁂𑀫𑀻𑀧𑀺 𑀢𑀲𑁆𑀲 𑀑𑀧𑀢𑁂𑀬𑁆𑀬𑀼𑀁, 𑀅𑀓𑁆𑀔𑁄𑀧𑀺 𑀢𑀲𑁆𑀲 𑀪𑀺𑀚𑁆𑀚𑁂𑀬𑁆𑀬𑀸𑀢𑀺. 𑀓𑀺𑀁 𑀦𑀼 𑀔𑁄, 𑀫𑀳𑀸𑀭𑀸𑀚, 𑀅𑀢𑀺𑀭𑀢𑀦𑀪𑀸𑀭𑁂𑀦 𑀲𑀓𑀝𑀁 𑀪𑀺𑀚𑁆𑀚𑀢𑀻𑀢𑀺? 𑀆𑀫, 𑀪𑀦𑁆𑀢𑁂𑀢𑀺. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀅𑀢𑀺𑀥𑀫𑁆𑀫𑀪𑀸𑀭𑁂𑀦 𑀧𑀣𑀯𑀻 𑀘𑀮𑀢𑀻𑀢𑀺.

‘‘𑀅𑀧𑀺 𑀘, 𑀫𑀳𑀸𑀭𑀸𑀚, 𑀇𑀫𑀁 𑀓𑀸𑀭𑀡𑀁 𑀩𑀼𑀤𑁆𑀥𑀩𑀮𑀧𑀭𑀺𑀤𑀻𑀧𑀦𑀸𑀬 𑀑𑀲𑀸𑀭𑀺𑀢𑀁. 𑀅𑀜𑁆𑀜𑀫𑁆𑀧𑀺 𑀢𑀢𑁆𑀣 𑀅𑀪𑀺𑀭𑀽𑀧𑀁 𑀓𑀸𑀭𑀡𑀁 𑀲𑀼𑀡𑁄𑀳𑀺, 𑀬𑁂𑀦 𑀓𑀸𑀭𑀡𑁂𑀦 𑀤𑁆𑀯𑁂 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸 𑀏𑀓𑀓𑁆𑀔𑀡𑁂 𑀦 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀬𑀤𑀺, 𑀫𑀳𑀸𑀭𑀸𑀚, 𑀤𑁆𑀯𑁂 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸 𑀏𑀓𑀓𑁆𑀔𑀡𑁂 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁, 𑀧𑀭𑀺𑀲𑀸𑀬 𑀯𑀺𑀯𑀸𑀤𑁄 𑀉𑀧𑁆𑀧𑀚𑁆𑀚𑁂𑀬𑁆𑀬, ‘𑀢𑀼𑀫𑁆𑀳𑀸𑀓𑀁 𑀩𑀼𑀤𑁆𑀥𑁄, 𑀅𑀫𑁆𑀳𑀸𑀓𑀁 𑀩𑀼𑀤𑁆𑀥𑁄’𑀢𑀺 𑀉𑀪𑀢𑁄𑀧𑀓𑁆𑀔𑀚𑀸𑀢𑀸 𑀪𑀯𑁂𑀬𑁆𑀬𑀼𑀁. 𑀬𑀣𑀸, 𑀫𑀳𑀸𑀭𑀸𑀚, 𑀤𑁆𑀯𑀺𑀦𑁆𑀦𑀁 𑀩𑀮𑀯𑀸𑀫𑀘𑁆𑀘𑀸𑀦𑀁 𑀧𑀭𑀺𑀲𑀸𑀬 𑀯𑀺𑀯𑀸𑀤𑁄 𑀉𑀧𑁆𑀧𑀚𑁆𑀚𑀢𑀺, ‘𑀢𑀼𑀫𑁆𑀳𑀸𑀓𑀁 𑀅𑀫𑀘𑁆𑀘𑁄 𑀅𑀫𑁆𑀳𑀸𑀓𑀁 𑀅𑀫𑀘𑁆𑀘𑁄’𑀢𑀺 𑀉𑀪𑀢𑁄𑀧𑀓𑁆𑀔𑀚𑀸𑀢𑀸 𑀳𑁄𑀦𑁆𑀢𑀺. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑀤𑀺 𑀤𑁆𑀯𑁂 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸 𑀏𑀓𑀓𑁆𑀔𑀡𑁂 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁, 𑀧𑀭𑀺𑀲𑀸𑀬 𑀯𑀺𑀯𑀸𑀤𑁄 𑀉𑀧𑁆𑀧𑀚𑁆𑀚𑁂𑀬𑁆𑀬, ‘𑀢𑀼𑀫𑁆𑀳𑀸𑀓𑀁 𑀩𑀼𑀤𑁆𑀥𑁄, 𑀅𑀫𑁆𑀳𑀸𑀓𑀁 𑀩𑀼𑀤𑁆𑀥𑁄’𑀢𑀺 𑀉𑀪𑀢𑁄𑀧𑀓𑁆𑀔𑀚𑀸𑀢𑀸 𑀪𑀯𑁂𑀬𑁆𑀬𑀼𑀁. 𑀇𑀤𑀁 𑀧𑀞𑀫𑀁 𑀓𑀸𑀭𑀡𑀁 𑀲𑀼𑀡𑁄𑀳𑀺, 𑀬𑁂𑀦 𑀓𑀸𑀭𑀡𑁂𑀦 𑀤𑁆𑀯𑁂 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸 𑀏𑀓𑀓𑁆𑀔𑀡𑁂 𑀦 𑀉𑀧𑁆𑀧𑀚𑁆𑀚𑀦𑁆𑀢𑀺.

‘‘𑀅𑀧𑀭𑀫𑁆𑀧𑀺, 𑀫𑀳𑀸𑀭𑀸𑀚, 𑀉𑀢𑁆𑀢𑀭𑀺𑀁 𑀓𑀸𑀭𑀡𑀁 𑀲𑀼𑀡𑁄𑀳𑀺, 𑀬𑁂𑀦 𑀓𑀸𑀭𑀡𑁂𑀦 𑀤𑁆𑀯𑁂 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸 𑀏𑀓𑀓𑁆𑀔𑀡𑁂 𑀦 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀬𑀤𑀺, 𑀫𑀳𑀸𑀭𑀸𑀚, 𑀤𑁆𑀯𑁂 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸 𑀏𑀓𑀓𑁆𑀔𑀡𑁂 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁, 𑀅𑀕𑁆𑀕𑁄 𑀩𑀼𑀤𑁆𑀥𑁄𑀢𑀺 𑀬𑀁 𑀯𑀘𑀦𑀁, 𑀢𑀁 𑀫𑀺𑀘𑁆𑀙𑀸 𑀪𑀯𑁂𑀬𑁆𑀬. 𑀚𑁂𑀝𑁆𑀞𑁄 𑀩𑀼𑀤𑁆𑀥𑁄𑀢𑀺…𑀧𑁂… 𑀲𑁂𑀝𑁆𑀞𑁄 𑀩𑀼𑀤𑁆𑀥𑁄𑀢𑀺. 𑀯𑀺𑀲𑀺𑀝𑁆𑀞𑁄 𑀩𑀼𑀤𑁆𑀥𑁄𑀢𑀺, 𑀉𑀢𑁆𑀢𑀫𑁄 𑀩𑀼𑀤𑁆𑀥𑁄𑀢𑀺, 𑀧𑀯𑀭𑁄 𑀩𑀼𑀤𑁆𑀥𑁄𑀢𑀺, 𑀅𑀲𑀫𑁄 𑀩𑀼𑀤𑁆𑀥𑁄𑀢𑀺, 𑀅𑀲𑀫𑀲𑀫𑁄 𑀩𑀼𑀤𑁆𑀥𑁄𑀢𑀺, 𑀅𑀧𑁆𑀧𑀝𑀺𑀲𑀫𑁄 𑀩𑀼𑀤𑁆𑀥𑁄𑀢𑀺, 𑀅𑀧𑁆𑀧𑀝𑀺𑀪𑀸𑀕𑁄 𑀩𑀼𑀤𑁆𑀥𑁄𑀢𑀺, 𑀅𑀧𑁆𑀧𑀝𑀺𑀧𑀼𑀕𑁆𑀕𑀮𑁄 𑀩𑀼𑀤𑁆𑀥𑁄𑀢𑀺 𑀬𑀁 𑀯𑀘𑀦𑀁, 𑀢𑀁 𑀫𑀺𑀘𑁆𑀙𑀸 𑀪𑀯𑁂𑀬𑁆𑀬. 𑀇𑀫𑀫𑁆𑀧𑀺 𑀔𑁄 𑀢𑁆𑀯𑀁, 𑀫𑀳𑀸𑀭𑀸𑀚, 𑀓𑀸𑀭𑀡𑀁 𑀅𑀢𑁆𑀣𑀢𑁄 𑀲𑀫𑁆𑀧𑀝𑀺𑀘𑁆𑀙, 𑀬𑁂𑀦 𑀓𑀸𑀭𑀡𑁂𑀦 𑀤𑁆𑀯𑁂 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸 𑀏𑀓𑀓𑁆𑀔𑀡𑁂 𑀦 𑀉𑀧𑁆𑀧𑀚𑁆𑀚𑀦𑁆𑀢𑀺.

‘‘𑀅𑀧𑀺𑀘, 𑀫𑀳𑀸𑀭𑀸𑀚, 𑀩𑀼𑀤𑁆𑀥𑀸𑀦𑀁 𑀪𑀕𑀯𑀦𑁆𑀢𑀸𑀦𑀁 𑀲𑀪𑀸𑀯𑀧𑀓𑀢𑀺𑀓𑀸 𑀏𑀲𑀸, 𑀬𑀁 𑀏𑀓𑁄𑀬𑁂𑀯 𑀩𑀼𑀤𑁆𑀥𑁄 𑀮𑁄𑀓𑁂 𑀉𑀧𑁆𑀧𑀚𑁆𑀚𑀢𑀺. 𑀓𑀲𑁆𑀫𑀸? 𑀓𑀸𑀭𑀡𑀫𑀳𑀦𑁆𑀢𑀢𑁆𑀢𑀸 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑀕𑀼𑀡𑀸𑀦𑀁. 𑀅𑀜𑁆𑀜𑀫𑁆𑀧𑀺, 𑀫𑀳𑀸𑀭𑀸𑀚, 𑀬𑀁 𑀫𑀳𑀦𑁆𑀢𑀁 𑀳𑁄𑀢𑀺, 𑀢𑀁 𑀏𑀓𑀁𑀬𑁂𑀯 𑀳𑁄𑀢𑀺. 𑀧𑀣𑀯𑀻, 𑀫𑀳𑀸𑀭𑀸𑀚, 𑀫𑀳𑀦𑁆𑀢𑀻, 𑀲𑀸 𑀏𑀓𑀸𑀬𑁂𑀯. 𑀲𑀸𑀕𑀭𑁄 𑀫𑀳𑀦𑁆𑀢𑁄, 𑀲𑁄 𑀏𑀓𑁄𑀬𑁂𑀯. 𑀲𑀺𑀦𑁂𑀭𑀼 𑀕𑀺𑀭𑀺𑀭𑀸𑀚 𑀫𑀳𑀦𑁆𑀢𑁄, 𑀲𑁄 𑀏𑀓𑁄𑀬𑁂𑀯. 𑀆𑀓𑀸𑀲𑁄 𑀫𑀳𑀦𑁆𑀢𑁄, 𑀲𑁄 𑀏𑀓𑁄𑀬𑁂𑀯. 𑀲𑀓𑁆𑀓𑁄 𑀫𑀳𑀦𑁆𑀢𑁄, 𑀲𑁄 𑀏𑀓𑁄𑀬𑁂𑀯. 𑀩𑁆𑀭𑀳𑁆𑀫𑀸 𑀫𑀳𑀦𑁆𑀢𑁄, 𑀲𑁄 𑀏𑀓𑁄𑀬𑁂𑀯. 𑀢𑀣𑀸𑀕𑀢𑁄 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀫𑀳𑀦𑁆𑀢𑁄, 𑀲𑁄 𑀏𑀓𑁄𑀬𑁂𑀯. 𑀬𑀢𑁆𑀣 𑀢𑁂 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑀢𑁆𑀣 𑀅𑀜𑁆𑀜𑁂𑀲𑀁 𑀑𑀓𑀸𑀲𑁄 𑀦 𑀳𑁄𑀢𑀺. 𑀢𑀲𑁆𑀫𑀸 𑀢𑀣𑀸𑀕𑀢𑁄 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀏𑀓𑁄𑀬𑁂𑀯 𑀮𑁄𑀓𑁂 𑀉𑀧𑁆𑀧𑀚𑁆𑀚𑀢𑀻𑀢𑀺. 𑀲𑀼𑀓𑀣𑀺𑀢𑁄, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀧𑀜𑁆𑀳𑁄 𑀑𑀧𑀫𑁆𑀫𑁂𑀳𑀺 𑀓𑀸𑀭𑀡𑁂𑀳𑀻’’𑀢𑀺.

𑀏𑀓𑀺𑀲𑁆𑀲𑀸 𑀮𑁄𑀓𑀥𑀸𑀢𑀼𑀬𑀸𑀢𑀺 𑀏𑀓𑀲𑁆𑀫𑀺𑀁 𑀘𑀓𑁆𑀓𑀯𑀸𑀴𑁂. 𑀳𑁂𑀝𑁆𑀞𑀸 𑀇𑀫𑀺𑀦𑀸𑀯 𑀧𑀤𑁂𑀦 𑀤𑀲 𑀘𑀓𑁆𑀓𑀯𑀸𑀴𑀲𑀳𑀲𑁆𑀲𑀸𑀦𑀺 𑀕𑀳𑀺𑀢𑀸𑀦𑀺, 𑀢𑀸𑀦𑀺𑀧𑀺 𑀏𑀓𑀘𑀓𑁆𑀓𑀯𑀸𑀴𑁂𑀦𑁂𑀯 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑀼𑀁 𑀯𑀝𑁆𑀝𑀦𑁆𑀢𑀺. 𑀩𑀼𑀤𑁆𑀥𑀸 𑀳𑀺 𑀉𑀧𑁆𑀧𑀚𑁆𑀚𑀫𑀸𑀦𑀸 𑀇𑀫𑀲𑁆𑀫𑀺𑀁𑀬𑁂𑀯 𑀘𑀓𑁆𑀓𑀯𑀸𑀴𑁂 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀉𑀧𑁆𑀧𑀚𑁆𑀚𑀦𑀝𑁆𑀞𑀸𑀦𑁂 𑀧𑀦 𑀯𑀸𑀭𑀺𑀢𑁂 𑀇𑀢𑁄 𑀅𑀜𑁆𑀜𑁂𑀲𑀼 𑀘𑀓𑁆𑀓𑀯𑀸𑀴𑁂𑀲𑀼 𑀦 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀯𑀸𑀭𑀺𑀢𑀫𑁂𑀯 𑀳𑁄𑀢𑀺.

𑀧𑀞𑀫𑀯𑀕𑁆𑀕𑀯𑀡𑁆𑀡𑀦𑀸.

𑁧𑁫. 𑀅𑀝𑁆𑀞𑀸𑀦𑀧𑀸𑀴𑀺

(𑁧𑁫) 𑁨. 𑀅𑀝𑁆𑀞𑀸𑀦𑀧𑀸𑀴𑀺-𑀤𑀼𑀢𑀺𑀬𑀯𑀕𑁆𑀕𑀯𑀡𑁆𑀡𑀦𑀸

𑁨𑁭𑁮. 𑀅𑀧𑀼𑀩𑁆𑀩𑀁 𑀅𑀘𑀭𑀺𑀫𑀦𑁆𑀢𑀺 𑀏𑀢𑁆𑀣 𑀘𑀓𑁆𑀓𑀭𑀢𑀦𑀧𑀸𑀢𑀼𑀪𑀸𑀯𑀢𑁄 𑀧𑀼𑀩𑁆𑀩𑁂 𑀧𑀼𑀩𑁆𑀩𑀁, 𑀢𑀲𑁆𑀲𑁂𑀯 𑀅𑀦𑁆𑀢𑀭𑀥𑀸𑀦𑀢𑁄 𑀧𑀘𑁆𑀙𑀸 𑀘𑀭𑀺𑀫𑀁. 𑀢𑀢𑁆𑀣 𑀤𑁆𑀯𑀺𑀥𑀸 𑀘𑀓𑁆𑀓𑀭𑀢𑀦𑀲𑁆𑀲 𑀅𑀦𑁆𑀢𑀭𑀥𑀸𑀦𑀁 𑀳𑁄𑀢𑀺 𑀘𑀓𑁆𑀓𑀯𑀢𑁆𑀢𑀺𑀦𑁄 𑀓𑀸𑀮𑀓𑀺𑀭𑀺𑀬𑀸𑀬 𑀯𑀸 𑀧𑀩𑁆𑀩𑀚𑁆𑀚𑀸𑀬 𑀯𑀸. 𑀅𑀦𑁆𑀢𑀭𑀥𑀸𑀬𑀫𑀸𑀦𑀜𑁆𑀘 𑀧𑀦 𑀢𑀁 𑀓𑀸𑀮𑀓𑀺𑀭𑀺𑀬𑀢𑁄 𑀯𑀸 𑀧𑀩𑁆𑀩𑀚𑁆𑀚𑀢𑁄 𑀯𑀸 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀅𑀦𑁆𑀢𑀭𑀥𑀸𑀬𑀢𑀺, 𑀢𑀢𑁄 𑀧𑀭𑀁 𑀘𑀓𑁆𑀓𑀯𑀢𑁆𑀢𑀺𑀦𑁄 𑀧𑀸𑀢𑀼𑀪𑀸𑀯𑁄 𑀅𑀯𑀸𑀭𑀺𑀢𑁄.

𑀓𑀲𑁆𑀫𑀸 𑀧𑀦 𑀏𑀓𑀘𑀓𑁆𑀓𑀯𑀸𑀴𑁂 𑀤𑁆𑀯𑁂 𑀘𑀓𑁆𑀓𑀯𑀢𑁆𑀢𑀺𑀦𑁄 𑀦 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺? 𑀯𑀺𑀯𑀸𑀤𑀼𑀧𑀘𑁆𑀙𑁂𑀤𑀢𑁄, 𑀅𑀘𑁆𑀙𑀭𑀺𑀬𑀪𑀸𑀯𑀢𑁄, 𑀘𑀓𑁆𑀓𑀭𑀢𑀦𑀲𑁆𑀲 𑀫𑀳𑀸𑀦𑀼𑀪𑀸𑀯𑀢𑁄 𑀘. 𑀤𑁆𑀯𑀻𑀲𑀼 𑀳𑀺 𑀉𑀧𑁆𑀧𑀚𑁆𑀚𑀦𑁆𑀢𑁂𑀲𑀼 ‘‘𑀅𑀫𑁆𑀳𑀸𑀓𑀁 𑀭𑀸𑀚𑀸 𑀫𑀳𑀦𑁆𑀢𑁄, 𑀅𑀫𑁆𑀳𑀸𑀓𑀁 𑀭𑀸𑀚𑀸 𑀫𑀳𑀦𑁆𑀢𑁄’’𑀢𑀺 𑀯𑀺𑀯𑀸𑀤𑁄 𑀉𑀧𑁆𑀧𑀚𑁆𑀚𑁂𑀬𑁆𑀬, ‘‘𑀏𑀓𑀲𑁆𑀫𑀺𑀁 𑀤𑀻𑀧𑁂 𑀘𑀓𑁆𑀓𑀯𑀢𑁆𑀢𑀻, 𑀏𑀓𑀲𑁆𑀫𑀺𑀁 𑀤𑀻𑀧𑁂 𑀘𑀓𑁆𑀓𑀯𑀢𑁆𑀢𑀻’’𑀢𑀺 𑀘 𑀅𑀦𑀘𑁆𑀙𑀭𑀺𑀬𑁄 𑀪𑀯𑁂𑀬𑁆𑀬. 𑀬𑁄 𑀘𑀸𑀬𑀁 𑀘𑀓𑁆𑀓𑀭𑀢𑀦𑀲𑁆𑀲 𑀤𑁆𑀯𑀺𑀲𑀳𑀲𑁆𑀲𑀤𑀻𑀧𑀧𑀭𑀺𑀯𑀸𑀭𑁂𑀲𑀼 𑀘𑀢𑀽𑀲𑀼 𑀫𑀳𑀸𑀤𑀻𑀧𑁂𑀲𑀼 𑀇𑀲𑁆𑀲𑀭𑀺𑀬𑀸𑀦𑀼𑀧𑁆𑀧𑀤𑀸𑀦𑀲𑀫𑀢𑁆𑀣𑁄 𑀫𑀳𑀸𑀦𑀼𑀪𑀸𑀯𑁄, 𑀲𑁄𑀧𑀺 𑀧𑀭𑀺𑀳𑀸𑀬𑁂𑀣. 𑀇𑀢𑀺 𑀯𑀺𑀯𑀸𑀤𑀼𑀧𑀘𑁆𑀙𑁂𑀤𑀢𑁄 𑀅𑀘𑁆𑀙𑀭𑀺𑀬𑀪𑀸𑀯𑀢𑁄 𑀘𑀓𑁆𑀓𑀭𑀢𑀦𑀲𑁆𑀲 𑀫𑀳𑀸𑀦𑀼𑀪𑀸𑀯𑀢𑁄 𑀘 𑀦 𑀏𑀓𑀘𑀓𑁆𑀓𑀯𑀸𑀴𑁂 𑀤𑁆𑀯𑁂 𑀉𑀧𑁆𑀧𑀚𑁆𑀚𑀦𑁆𑀢𑀺.

𑁨𑁭𑁯. 𑀬𑀁 𑀇𑀢𑁆𑀣𑀻 𑀅𑀭𑀳𑀁 𑀅𑀲𑁆𑀲 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄𑀢𑀺 𑀏𑀢𑁆𑀣 𑀢𑀺𑀝𑁆𑀞𑀢𑀼 𑀢𑀸𑀯 𑀲𑀩𑁆𑀩𑀜𑁆𑀜𑀼𑀕𑀼𑀡𑁂 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀮𑁄𑀓𑀦𑀺𑀢𑁆𑀣𑀭𑀡𑀲𑀫𑀢𑁆𑀣𑁄 𑀩𑀼𑀤𑁆𑀥𑀪𑀸𑀯𑁄, 𑀧𑀡𑀺𑀥𑀸𑀦𑀫𑀢𑁆𑀢𑀫𑁆𑀧𑀺 𑀇𑀢𑁆𑀣𑀺𑀬𑀸 𑀦 𑀲𑀫𑁆𑀧𑀚𑁆𑀚𑀢𑀺.

‘‘𑀫𑀦𑀼𑀲𑁆𑀲𑀢𑁆𑀢𑀁 𑀮𑀺𑀗𑁆𑀕𑀲𑀫𑁆𑀧𑀢𑁆𑀢𑀺, 𑀳𑁂𑀢𑀼 𑀲𑀢𑁆𑀣𑀸𑀭𑀤𑀲𑁆𑀲𑀦𑀁;

𑀧𑀩𑁆𑀩𑀚𑁆𑀚𑀸 𑀕𑀼𑀡𑀲𑀫𑁆𑀧𑀢𑁆𑀢𑀺, 𑀅𑀥𑀺𑀓𑀸𑀭𑁄 𑀘 𑀙𑀦𑁆𑀤𑀢𑀸;

𑀅𑀝𑁆𑀞 𑀥𑀫𑁆𑀫𑀲𑀫𑁄𑀥𑀸𑀦𑀸, 𑀅𑀪𑀺𑀦𑀻𑀳𑀸𑀭𑁄 𑀲𑀫𑀺𑀚𑁆𑀛𑀢𑀻’’𑀢𑀺. (𑀩𑀼. 𑀯𑀁. 𑁨.𑁫𑁯) 𑁋

𑀇𑀫𑀸𑀦𑀺 𑀳𑀺 𑀧𑀡𑀺𑀥𑀸𑀦𑀲𑀫𑁆𑀧𑀢𑁆𑀢𑀺𑀓𑀸𑀭𑀡𑀸𑀦𑀺. 𑀇𑀢𑀺 𑀧𑀡𑀺𑀥𑀸𑀦𑀫𑁆𑀧𑀺 𑀲𑀫𑁆𑀧𑀸𑀤𑁂𑀢𑀼𑀁 𑀅𑀲𑀫𑀢𑁆𑀣𑀸𑀬 𑀇𑀢𑁆𑀣𑀺𑀬𑀸 𑀓𑀼𑀢𑁄 𑀩𑀼𑀤𑁆𑀥𑀪𑀸𑀯𑁄𑀢𑀺. ‘‘𑀅𑀝𑁆𑀞𑀸𑀦𑀫𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀦𑀯𑀓𑀸𑀲𑁄, 𑀬𑀁 𑀇𑀢𑁆𑀣𑀻 𑀅𑀭𑀳𑀁 𑀅𑀲𑁆𑀲 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄’’𑀢𑀺 𑀯𑀼𑀢𑁆𑀢𑀁. 𑀲𑀩𑁆𑀩𑀸𑀓𑀸𑀭𑀧𑀭𑀺𑀧𑀽𑀭𑁄𑀯 𑀧𑀼𑀜𑁆𑀜𑀼𑀲𑁆𑀲𑀬𑁄 𑀲𑀩𑁆𑀩𑀸𑀓𑀸𑀭𑀧𑀭𑀺𑀧𑀽𑀭𑀫𑁂𑀯 𑀅𑀢𑁆𑀢𑀪𑀸𑀯𑀁 𑀦𑀺𑀩𑁆𑀩𑀢𑁆𑀢𑁂𑀢𑀻𑀢𑀺 𑀧𑀼𑀭𑀺𑀲𑁄𑀯 𑀅𑀭𑀳𑀁 𑀳𑁄𑀢𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄, 𑀦 𑀇𑀢𑁆𑀣𑀻.

𑁨𑁮𑁦. 𑀭𑀸𑀚𑀸 𑀅𑀲𑁆𑀲 𑀘𑀓𑁆𑀓𑀯𑀢𑁆𑀢𑀻𑀢𑀺𑀆𑀤𑀻𑀲𑀼𑀧𑀺 𑀬𑀲𑁆𑀫𑀸 𑀇𑀢𑁆𑀣𑀺𑀬𑀸 𑀓𑁄𑀲𑁄𑀳𑀺𑀢𑀯𑀢𑁆𑀣𑀕𑀼𑀬𑁆𑀳𑀢𑀸𑀤𑀻𑀦𑀁 𑀅𑀪𑀸𑀯𑁂𑀦 𑀮𑀓𑁆𑀔𑀡𑀸𑀦𑀺 𑀦 𑀧𑀭𑀺𑀧𑀽𑀭𑀦𑁆𑀢𑀺, 𑀇𑀢𑁆𑀣𑀺𑀭𑀢𑀦𑀸𑀪𑀸𑀯𑁂𑀦 𑀲𑀢𑁆𑀢𑀭𑀢𑀦𑀲𑀫𑀗𑁆𑀕𑀺𑀢𑀸 𑀦 𑀲𑀫𑁆𑀧𑀚𑁆𑀚𑀢𑀺, 𑀲𑀩𑁆𑀩𑀫𑀦𑀼𑀲𑁆𑀲𑁂𑀳𑀺 𑀘 𑀅𑀥𑀺𑀓𑁄 𑀅𑀢𑁆𑀢𑀪𑀸𑀯𑁄 𑀦 𑀳𑁄𑀢𑀺. 𑀢𑀲𑁆𑀫𑀸 ‘‘𑀅𑀝𑁆𑀞𑀸𑀦𑀫𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀦𑀯𑀓𑀸𑀲𑁄 𑀬𑀁 𑀇𑀢𑁆𑀣𑀻 𑀭𑀸𑀚𑀸 𑀅𑀲𑁆𑀲 𑀘𑀓𑁆𑀓𑀯𑀢𑁆𑀢𑀻’’𑀢𑀺 𑀯𑀼𑀢𑁆𑀢𑀁.

𑁨𑁮𑁧. 𑀬𑀲𑁆𑀫𑀸 𑀘 𑀲𑀓𑁆𑀓𑀢𑁆𑀢𑀸𑀤𑀻𑀦𑀺 𑀢𑀻𑀡𑀺 𑀞𑀸𑀦𑀸𑀦𑀺 𑀉𑀢𑁆𑀢𑀫𑀸𑀦𑀺, 𑀇𑀢𑁆𑀣𑀺𑀮𑀺𑀗𑁆𑀕𑀜𑁆𑀘 𑀳𑀻𑀦𑀁, 𑀢𑀲𑁆𑀫𑀸 𑀘𑀲𑁆𑀲𑀸 𑀲𑀓𑁆𑀓𑀢𑁆𑀢𑀸𑀤𑀻𑀦𑀺𑀧𑀺 𑀧𑀝𑀺𑀲𑀺𑀤𑁆𑀥𑀸𑀦𑀺.

𑀦𑀦𑀼 𑀘 𑀬𑀣𑀸 𑀇𑀢𑁆𑀣𑀺𑀮𑀺𑀗𑁆𑀕𑀁, 𑀏𑀯𑀁 𑀧𑀼𑀭𑀺𑀲𑀮𑀺𑀗𑁆𑀕𑀫𑁆𑀧𑀺 𑀩𑁆𑀭𑀳𑁆𑀫𑀮𑁄𑀓𑁂 𑀦𑀢𑁆𑀣𑀺. 𑀢𑀲𑁆𑀫𑀸 ‘‘𑀬𑀁 𑀧𑀼𑀭𑀺𑀲𑁄 𑀩𑁆𑀭𑀳𑁆𑀫𑀢𑁆𑀢𑀁 𑀓𑀸𑀭𑁂𑀬𑁆𑀬, 𑀞𑀸𑀦𑀫𑁂𑀢𑀁 𑀯𑀺𑀚𑁆𑀚𑀢𑀻’’𑀢𑀺𑀧𑀺 𑀦 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸𑀢𑀺. 𑀦𑁄 𑀦 𑀯𑀢𑁆𑀢𑀩𑁆𑀩𑀁. 𑀓𑀲𑁆𑀫𑀸? 𑀇𑀥 𑀧𑀼𑀭𑀺𑀲𑀲𑁆𑀲 𑀢𑀢𑁆𑀣 𑀦𑀺𑀩𑁆𑀩𑀢𑁆𑀢𑀦𑀢𑁄. 𑀩𑁆𑀭𑀳𑁆𑀫𑀢𑁆𑀢𑀦𑁆𑀢𑀺 𑀳𑀺 𑀫𑀳𑀸𑀩𑁆𑀭𑀳𑁆𑀫𑀢𑁆𑀢𑀁 𑀅𑀥𑀺𑀧𑁆𑀧𑁂𑀢𑀁. 𑀇𑀢𑁆𑀣𑀻 𑀘 𑀇𑀥 𑀛𑀸𑀦𑀁 𑀪𑀸𑀯𑁂𑀢𑁆𑀯𑀸 𑀓𑀸𑀮𑀁 𑀓𑀢𑁆𑀯𑀸 𑀩𑁆𑀭𑀳𑁆𑀫𑀧𑀸𑀭𑀺𑀲𑀚𑁆𑀚𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑀢𑀺, 𑀦 𑀫𑀳𑀸𑀩𑁆𑀭𑀳𑁆𑀫𑀸𑀦𑀁. 𑀧𑀼𑀭𑀺𑀲𑁄 𑀧𑀦 𑀢𑀢𑁆𑀣 𑀦𑀼𑀧𑁆𑀧𑀚𑁆𑀚𑀢𑀻𑀢𑀺 𑀦 𑀯𑀢𑁆𑀢𑀩𑁆𑀩𑁄. 𑀲𑀫𑀸𑀦𑁂𑀧𑀺 𑀘𑁂𑀢𑁆𑀣 𑀉𑀪𑀬𑀮𑀺𑀗𑁆𑀕𑀸𑀪𑀸𑀯𑁂 𑀧𑀼𑀭𑀺𑀲𑀲𑀡𑁆𑀞𑀸𑀦𑀸𑀯 𑀩𑁆𑀭𑀳𑁆𑀫𑀸𑀦𑁄, 𑀦 𑀇𑀢𑁆𑀣𑀺𑀲𑀡𑁆𑀞𑀸𑀦𑀸. 𑀢𑀲𑁆𑀫𑀸 𑀲𑀼𑀯𑀼𑀢𑁆𑀢𑀫𑁂𑀯𑁂𑀢𑀁.

𑁨𑁮𑁪. 𑀓𑀸𑀬𑀤𑀼𑀘𑁆𑀘𑀭𑀺𑀢𑀲𑁆𑀲𑀸𑀢𑀺𑀆𑀤𑀻𑀲𑀼 𑀬𑀣𑀸 𑀦𑀺𑀫𑁆𑀩𑀩𑀻𑀚𑀓𑁄𑀲𑀸𑀢𑀓𑀺𑀩𑀻𑀚𑀸𑀤𑀻𑀦𑀺 𑀫𑀥𑀼𑀭𑀁 𑀨𑀮𑀁 𑀦 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀺, 𑀅𑀲𑀸𑀢𑀁 𑀅𑀫𑀥𑀼𑀭𑀫𑁂𑀯 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀺, 𑀏𑀯𑀁 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀻𑀦𑀺 𑀫𑀥𑀼𑀭𑀁 𑀯𑀺𑀧𑀸𑀓𑀁 𑀦 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀺, 𑀅𑀫𑀥𑀼𑀭𑀫𑁂𑀯 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀺. 𑀬𑀣𑀸 𑀘 𑀉𑀘𑁆𑀙𑀼𑀩𑀻𑀚𑀲𑀸𑀮𑀺𑀩𑀻𑀚𑀸𑀤𑀻𑀦𑀺 𑀫𑀥𑀼𑀭𑀁 𑀲𑀸𑀤𑀼𑀭𑀲𑀫𑁂𑀯 𑀨𑀮𑀁 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀺, 𑀦 𑀅𑀲𑀸𑀢𑀁 𑀓𑀝𑀼𑀓𑀁. 𑀏𑀯𑀁 𑀓𑀸𑀬𑀲𑀼𑀘𑀭𑀺𑀢𑀸𑀤𑀻𑀦𑀺 𑀫𑀥𑀼𑀭𑀫𑁂𑀯 𑀯𑀺𑀧𑀸𑀓𑀁 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀺, 𑀦 𑀅𑀫𑀥𑀼𑀭𑀁. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋

‘‘𑀬𑀸𑀤𑀺𑀲𑀁 𑀯𑀧𑀢𑁂 𑀩𑀻𑀚𑀁, 𑀢𑀸𑀤𑀺𑀲𑀁 𑀳𑀭𑀢𑁂 𑀨𑀮𑀁;

𑀓𑀮𑁆𑀬𑀸𑀡𑀓𑀸𑀭𑀻 𑀓𑀮𑁆𑀬𑀸𑀡𑀁, 𑀧𑀸𑀧𑀓𑀸𑀭𑀻 𑀘 𑀧𑀸𑀧𑀓’’𑀦𑁆𑀢𑀺. (𑀲𑀁. 𑀦𑀺. 𑁧.𑁨𑁫𑁬);

𑀢𑀲𑁆𑀫𑀸 ‘‘𑀅𑀝𑁆𑀞𑀸𑀦𑀫𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀦𑀯𑀓𑀸𑀲𑁄, 𑀬𑀁 𑀓𑀸𑀬𑀤𑀼𑀘𑁆𑀘𑀭𑀺𑀢𑀲𑁆𑀲𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑁨𑁯𑁦-𑁨𑁯𑁫. 𑀓𑀸𑀬𑀤𑀼𑀘𑁆𑀘𑀭𑀺𑀢𑀲𑀫𑀗𑁆𑀕𑀻𑀢𑀺𑀆𑀤𑀻𑀲𑀼 𑀲𑀫𑀗𑁆𑀕𑀻𑀢𑀺 𑀧𑀜𑁆𑀘𑀯𑀺𑀥𑀸 𑀲𑀫𑀗𑁆𑀕𑀺𑀢𑀸 𑁋 𑀆𑀬𑀽𑀳𑀦𑀲𑀫𑀗𑁆𑀕𑀺𑀢𑀸, 𑀘𑁂𑀢𑀦𑀸𑀲𑀫𑀗𑁆𑀕𑀺𑀢𑀸, 𑀓𑀫𑁆𑀫𑀲𑀫𑀗𑁆𑀕𑀺𑀢𑀸, 𑀯𑀺𑀧𑀸𑀓𑀲𑀫𑀗𑁆𑀕𑀺𑀢𑀸, 𑀉𑀧𑀝𑁆𑀞𑀸𑀦𑀲𑀫𑀗𑁆𑀕𑀺𑀢𑀸𑀢𑀺. 𑀢𑀢𑁆𑀣 𑀓𑀼𑀲𑀮𑀸𑀓𑀼𑀲𑀮𑀓𑀫𑁆𑀫𑀸𑀬𑀽𑀳𑀦𑀓𑁆𑀔𑀡𑁂 𑀆𑀬𑀽𑀳𑀦𑀲𑀫𑀗𑁆𑀕𑀺𑀢𑀸𑀢𑀺 𑀯𑀼𑀘𑁆𑀘𑀢𑀺. 𑀢𑀣𑀸 𑀘𑁂𑀢𑀦𑀸𑀲𑀫𑀗𑁆𑀕𑀺𑀢𑀸. 𑀬𑀸𑀯 𑀧𑀦 𑀲𑀢𑁆𑀢𑀸 𑀅𑀭𑀳𑀢𑁆𑀢𑀁 𑀦 𑀧𑀸𑀧𑀼𑀡𑀦𑁆𑀢𑀺, 𑀢𑀸𑀯 𑀲𑀩𑁆𑀩𑁂𑀧𑀺 𑀲𑀢𑁆𑀢𑀸 𑀧𑀼𑀩𑁆𑀩𑁂 𑀉𑀧𑀘𑀺𑀢𑀘𑁂𑀢𑀦𑀸𑀬 𑀲𑀫𑀗𑁆𑀕𑀺𑀢𑀸𑀬 𑀘𑁂𑀢𑀦𑀸𑀲𑀫𑀗𑁆𑀕𑀺𑀦𑁄𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀏𑀲𑀸 𑀘𑁂𑀢𑀦𑀸𑀲𑀫𑀗𑁆𑀕𑀺𑀢𑀸. 𑀬𑀸𑀯 𑀅𑀭𑀳𑀢𑁆𑀢𑀁 𑀦 𑀧𑀸𑀧𑀼𑀡𑀦𑁆𑀢𑀺, 𑀢𑀸𑀯 𑀲𑀩𑁆𑀩𑁂𑀧𑀺 𑀲𑀢𑁆𑀢𑀸 𑀧𑀼𑀩𑁆𑀩𑁂 𑀉𑀧𑀘𑀺𑀢𑀁 𑀯𑀺𑀧𑀸𑀓𑀸𑀭𑀳𑀁 𑀓𑀫𑁆𑀫𑀁 𑀲𑀦𑁆𑀥𑀸𑀬 ‘‘𑀓𑀫𑁆𑀫𑀲𑀫𑀗𑁆𑀕𑀺𑀦𑁄’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀏𑀲𑀸 𑀓𑀫𑁆𑀫𑀲𑀫𑀗𑁆𑀕𑀺𑀢𑀸. 𑀯𑀺𑀧𑀸𑀓𑀲𑀫𑀗𑁆𑀕𑀺𑀢𑀸 𑀯𑀺𑀧𑀸𑀓𑀓𑁆𑀔𑀡𑁂𑀬𑁂𑀯 𑀯𑁂𑀤𑀺𑀢𑀩𑁆𑀩𑀸. 𑀬𑀸𑀯 𑀧𑀦 𑀲𑀢𑁆𑀢𑀸 𑀅𑀭𑀳𑀢𑁆𑀢𑀁 𑀦 𑀧𑀸𑀧𑀼𑀡𑀦𑁆𑀢𑀺, 𑀢𑀸𑀯 𑀢𑁂𑀲𑀁 𑀢𑀢𑁄 𑀢𑀢𑁄 𑀘𑀯𑀺𑀢𑁆𑀯𑀸 𑀦𑀺𑀭𑀬𑁂 𑀉𑀧𑁆𑀧𑀚𑁆𑀚𑀫𑀸𑀦𑀸𑀦𑀁 𑀅𑀕𑁆𑀕𑀺𑀚𑀸𑀮𑀸𑀮𑁄𑀳𑀓𑀼𑀫𑁆𑀪𑀺𑀆𑀤𑀻𑀳𑀺 𑀉𑀧𑀝𑁆𑀞𑀸𑀦𑀸𑀓𑀸𑀭𑁂𑀳𑀺 𑀦𑀺𑀭𑀬𑁄, 𑀕𑀩𑁆𑀪𑀲𑁂𑀬𑁆𑀬𑀓𑀢𑁆𑀢𑀁 𑀆𑀧𑀚𑁆𑀚𑀫𑀸𑀦𑀸𑀦𑀁 𑀫𑀸𑀢𑀼𑀓𑀼𑀘𑁆𑀙𑀺, 𑀤𑁂𑀯𑁂𑀲𑀼 𑀉𑀧𑁆𑀧𑀚𑁆𑀚𑀫𑀸𑀦𑀸𑀦𑀁 𑀓𑀧𑁆𑀧𑀭𑀼𑀓𑁆𑀔𑀯𑀺𑀫𑀸𑀦𑀸𑀤𑀻𑀳𑀺 𑀉𑀧𑀝𑁆𑀞𑀸𑀦𑀸𑀓𑀸𑀭𑁂𑀳𑀺 𑀤𑁂𑀯𑀮𑁄𑀓𑁄𑀢𑀺 𑀏𑀯𑀁 𑀉𑀧𑀧𑀢𑁆𑀢𑀺𑀦𑀺𑀫𑀺𑀢𑁆𑀢𑀁 𑀉𑀧𑀝𑁆𑀞𑀸𑀢𑀺. 𑀇𑀢𑀺 𑀦𑁂𑀲𑀁 𑀇𑀫𑀺𑀦𑀸 𑀉𑀧𑀧𑀢𑁆𑀢𑀺𑀦𑀺𑀫𑀺𑀢𑁆𑀢𑀉𑀧𑀝𑁆𑀞𑀸𑀦𑁂𑀦 𑀅𑀧𑀭𑀺𑀫𑀼𑀢𑁆𑀢𑀢𑀸 𑀉𑀧𑀝𑁆𑀞𑀸𑀦𑀲𑀫𑀗𑁆𑀕𑀺𑀢𑀸 𑀦𑀸𑀫. 𑀲𑀸 𑀘𑀮𑀢𑀺, 𑀲𑁂𑀲𑀸 𑀦𑀺𑀘𑁆𑀘𑀮𑀸. 𑀦𑀺𑀭𑀬𑁂 𑀳𑀺 𑀉𑀧𑀝𑁆𑀞𑀺𑀢𑁂𑀧𑀺 𑀤𑁂𑀯𑀮𑁄𑀓𑁄 𑀉𑀧𑀝𑁆𑀞𑀸𑀢𑀺, 𑀤𑁂𑀯𑀮𑁄𑀓𑁂 𑀉𑀧𑀝𑁆𑀞𑀺𑀢𑁂𑀧𑀺 𑀦𑀺𑀭𑀬𑁄 𑀉𑀧𑀝𑁆𑀞𑀸𑀢𑀺, 𑀫𑀦𑀼𑀲𑁆𑀲𑀮𑁄𑀓𑁂 𑀉𑀧𑀝𑁆𑀞𑀺𑀢𑁂𑀧𑀺 𑀢𑀺𑀭𑀘𑁆𑀙𑀸𑀦𑀬𑁄𑀦𑀺 𑀉𑀧𑀝𑁆𑀞𑀸𑀢𑀺, 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀬𑀸 𑀘 𑀉𑀧𑀝𑁆𑀞𑀺𑀢𑀸𑀬𑀧𑀺 𑀫𑀦𑀼𑀲𑁆𑀲𑀮𑁄𑀓𑁄 𑀉𑀧𑀝𑁆𑀞𑀸𑀢𑀺𑀬𑁂𑀯.

𑀢𑀢𑁆𑀭𑀺𑀤𑀁 𑀯𑀢𑁆𑀣𑀼 𑁋 𑀲𑁄𑀡𑀕𑀺𑀭𑀺𑀧𑀸𑀤𑁂 𑀓𑀺𑀭 𑀅𑀘𑁂𑀮𑀯𑀺𑀳𑀸𑀭𑁂 𑀲𑁄𑀡𑀢𑁆𑀣𑁂𑀭𑁄 𑀦𑀸𑀫 𑀏𑀓𑁄 𑀥𑀫𑁆𑀫𑀓𑀣𑀺𑀓𑁄. 𑀢𑀲𑁆𑀲 𑀧𑀺𑀢𑀸 𑀲𑀼𑀦𑀔𑀯𑀸𑀚𑀺𑀓𑁄 𑀦𑀸𑀫 𑀅𑀳𑁄𑀲𑀺, 𑀣𑁂𑀭𑁄 𑀢𑀁 𑀧𑀝𑀺𑀩𑀸𑀳𑀦𑁆𑀢𑁄𑀧𑀺 𑀲𑀁𑀯𑀭𑁂 𑀞𑀧𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 ‘‘𑀫𑀸 𑀦𑀲𑁆𑀲𑀺 𑀯𑀭𑀸𑀓𑁄’’𑀢𑀺 𑀫𑀳𑀮𑁆𑀮𑀓𑀓𑀸𑀮𑁂 𑀅𑀓𑀸𑀫𑀓𑀁 𑀦𑀁 𑀧𑀩𑁆𑀩𑀸𑀚𑁂𑀲𑀺. 𑀢𑀲𑁆𑀲 𑀕𑀺𑀮𑀸𑀦𑀲𑁂𑀬𑁆𑀬𑀸𑀬 𑀦𑀺𑀧𑀦𑁆𑀦𑀲𑁆𑀲 𑀦𑀺𑀭𑀬𑁄 𑀉𑀧𑀝𑁆𑀞𑀸𑀲𑀺. 𑀲𑁄𑀡𑀕𑀺𑀭𑀺𑀧𑀸𑀤𑀢𑁄 𑀫𑀳𑀦𑁆𑀢𑀸 𑀲𑀼𑀦𑀔𑀸 𑀆𑀕𑀦𑁆𑀢𑁆𑀯𑀸 𑀔𑀸𑀤𑀺𑀢𑀼𑀓𑀸𑀫𑀸 𑀯𑀺𑀬 𑀲𑀫𑁆𑀧𑀭𑀺𑀯𑀸𑀭𑁂𑀲𑀼𑀁. 𑀲𑁄 𑀫𑀳𑀸𑀪𑀬𑀪𑀻𑀢𑁄 ‘‘𑀯𑀸𑀭𑁂𑀳𑀺, 𑀢𑀸𑀢 𑀲𑁄𑀡, 𑀯𑀸𑀭𑁂𑀳𑀺, 𑀢𑀸𑀢 𑀲𑁄𑀡𑀸’’𑀢𑀺 𑀆𑀳. 𑀓𑀺𑀁 𑀫𑀳𑀸𑀣𑁂𑀭𑀸𑀢𑀺? 𑀦 𑀧𑀲𑁆𑀲𑀲𑀺, 𑀢𑀸𑀢𑀸𑀢𑀺 𑀢𑀁 𑀧𑀯𑀢𑁆𑀢𑀺𑀁 𑀆𑀘𑀺𑀓𑁆𑀔𑀺. 𑀲𑁄𑀡𑀢𑁆𑀣𑁂𑀭𑁄 ‘‘𑀓𑀣𑀜𑁆𑀳𑀺 𑀦𑀸𑀫 𑀫𑀸𑀤𑀺𑀲𑀲𑁆𑀲 𑀧𑀺𑀢𑀸 𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀢𑀺, 𑀧𑀢𑀺𑀝𑁆𑀞𑀸𑀲𑁆𑀲 𑀪𑀯𑀺𑀲𑁆𑀲𑀸𑀫𑀻’’𑀢𑀺 𑀲𑀸𑀫𑀡𑁂𑀭𑁂𑀳𑀺 𑀦𑀸𑀦𑀸𑀧𑀼𑀧𑁆𑀨𑀸𑀦𑀺 𑀆𑀳𑀭𑀸𑀧𑁂𑀢𑁆𑀯𑀸 𑀘𑁂𑀢𑀺𑀬𑀗𑁆𑀕𑀡𑀩𑁄𑀥𑀺𑀬𑀗𑁆𑀕𑀡𑁂𑀲𑀼 𑀢𑀮𑀲𑀦𑁆𑀣𑀭𑀡𑀧𑀽𑀚𑀁 𑀆𑀲𑀦𑀧𑀽𑀚𑀜𑁆𑀘 𑀓𑀸𑀭𑁂𑀢𑁆𑀯𑀸 𑀧𑀺𑀢𑀭𑀁 𑀫𑀜𑁆𑀘𑀓𑁂𑀦 𑀘𑁂𑀢𑀺𑀬𑀗𑁆𑀕𑀡𑀁 𑀳𑀭𑀺𑀢𑁆𑀯𑀸 𑀫𑀜𑁆𑀘𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 ‘‘𑀅𑀬𑀁, 𑀫𑀳𑀸𑀣𑁂𑀭, 𑀧𑀽𑀚𑀸 𑀢𑀼𑀫𑁆𑀳𑀸𑀓𑀁 𑀅𑀢𑁆𑀣𑀸𑀬 𑀓𑀢𑀸, ‘𑀅𑀬𑀁 𑀫𑁂 𑀪𑀕𑀯𑀸 𑀤𑀼𑀕𑁆𑀕𑀢𑀧𑀡𑁆𑀡𑀸𑀓𑀸𑀭𑁄’𑀢𑀺 𑀯𑀢𑁆𑀯𑀸 𑀪𑀕𑀯𑀦𑁆𑀢𑀁 𑀯𑀦𑁆𑀤𑀺𑀢𑁆𑀯𑀸 𑀘𑀺𑀢𑁆𑀢𑀁 𑀧𑀲𑀸𑀤𑁂𑀳𑀻’’𑀢𑀺 𑀆𑀳. 𑀲𑀸 𑀫𑀳𑀸𑀣𑁂𑀭𑁄 𑀧𑀽𑀚𑀁 𑀤𑀺𑀲𑁆𑀯𑀸 𑀢𑀣𑀸 𑀓𑀭𑁄𑀦𑁆𑀢𑁄 𑀘𑀺𑀢𑁆𑀢𑀁 𑀧𑀲𑀸𑀤𑁂𑀲𑀺. 𑀢𑀸𑀯𑀤𑁂𑀯𑀲𑁆𑀲 𑀤𑁂𑀯𑀮𑁄𑀓𑁄 𑀉𑀧𑀝𑁆𑀞𑀸𑀲𑀺. 𑀦𑀦𑁆𑀤𑀦𑀯𑀦-𑀘𑀺𑀢𑁆𑀢𑀮𑀢𑀸𑀯𑀦-𑀫𑀺𑀲𑁆𑀲𑀓𑀯𑀦-𑀨𑀸𑀭𑀼𑀲𑀓𑀯𑀦-𑀯𑀺𑀫𑀸𑀦𑀸𑀦𑀺 𑀘𑁂𑀯 𑀤𑁂𑀯𑀦𑀸𑀝𑀓𑀸𑀦𑀺 𑀘 𑀧𑀭𑀺𑀯𑀸𑀭𑁂𑀢𑁆𑀯𑀸 𑀞𑀺𑀢𑀸𑀦𑀺 𑀯𑀺𑀬 𑀅𑀳𑁂𑀲𑀼𑀁. 𑀲𑁄 ‘‘𑀅𑀧𑁂𑀣, 𑀲𑁄𑀡, 𑀅𑀧𑁂𑀣, 𑀲𑁄𑀡𑀸’’𑀢𑀺 𑀣𑁂𑀭𑀁 𑀆𑀳. 𑀓𑀺𑀫𑀺𑀤𑀁, 𑀫𑀳𑀸𑀣𑁂𑀭𑀸𑀢𑀺? 𑀏𑀢𑀸 𑀢𑁂 𑀫𑀸𑀢𑀭𑁄 𑀆𑀕𑀘𑁆𑀙𑀦𑁆𑀢𑀻𑀢𑀺. 𑀣𑁂𑀭𑁄 ‘‘𑀲𑀕𑁆𑀕𑁄 𑀉𑀧𑀝𑁆𑀞𑀺𑀢𑁄 𑀫𑀳𑀸𑀣𑁂𑀭𑀲𑁆𑀲𑀸’’𑀢𑀺 𑀘𑀺𑀦𑁆𑀢𑁂𑀲𑀺. 𑀏𑀯𑀁 𑀉𑀧𑀝𑁆𑀞𑀸𑀦𑀲𑀫𑀗𑁆𑀕𑀺𑀢𑀸 𑀘𑀮𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀏𑀢𑀸𑀲𑀼 𑀲𑀫𑀗𑁆𑀕𑀺𑀢𑀸𑀲𑀼 𑀇𑀥 𑀆𑀬𑀽𑀳𑀦𑀘𑁂𑀢𑀦𑀸𑀓𑀫𑁆𑀫-𑀲𑀫𑀗𑁆𑀕𑀺𑀢𑀸𑀯𑀲𑁂𑀦 ‘‘𑀓𑀸𑀬𑀤𑀼𑀘𑁆𑀘𑀭𑀺𑀢𑀲𑀫𑀗𑁆𑀕𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀢𑀢𑁆𑀣 𑀏𑀓𑁂 𑀆𑀘𑀭𑀺𑀬𑀸 ‘‘𑀬𑀲𑁆𑀫𑀺𑀁 𑀔𑀡𑁂 𑀓𑀫𑁆𑀫𑀁 𑀆𑀬𑀽𑀳𑀢𑀺, 𑀢𑀲𑁆𑀫𑀺𑀁𑀬𑁂𑀯 𑀔𑀡𑁂 𑀢𑀲𑁆𑀲 𑀲𑀕𑁆𑀕𑁄 𑀯𑀸𑀭𑀺𑀢𑁄’’𑀢𑀺 𑀯𑀤𑀦𑁆𑀢𑀺. 𑀅𑀧𑀭𑁂 𑀧𑀦 ‘‘𑀆𑀬𑀽𑀳𑀺𑀢𑀓𑀫𑁆𑀫𑀁 𑀦𑀸𑀫 𑀯𑀺𑀧𑀸𑀓𑀯𑀸𑀭𑀁 𑀮𑀪𑀦𑁆𑀢𑀫𑁆𑀧𑀺 𑀅𑀢𑁆𑀣𑀺 𑀅𑀮𑀪𑀦𑁆𑀢𑀫𑁆𑀧𑀺. 𑀢𑀢𑁆𑀣 𑀬𑀤𑀸 𑀓𑀫𑁆𑀫𑀁 𑀯𑀺𑀧𑀸𑀓𑀯𑀸𑀭𑀁 𑀮𑀪𑀢𑀺, 𑀢𑀲𑁆𑀫𑀺𑀁𑀬𑁂𑀯 𑀓𑀸𑀮𑁂 𑀢𑀲𑁆𑀲 𑀲𑀕𑁆𑀕𑁄 𑀯𑀸𑀭𑀺𑀢𑁄’’𑀢𑀺 𑀯𑀤𑀦𑁆𑀢𑀺. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀅𑀝𑁆𑀞𑀸𑀦𑀧𑀸𑀴𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.