𑁧𑁬. 𑀏𑀓𑀥𑀫𑁆𑀫𑀧𑀸𑀴𑀺

(𑁧𑁬) 𑁧. 𑀏𑀓𑀥𑀫𑁆𑀫𑀧𑀸𑀴𑀺-𑀧𑀞𑀫𑀯𑀕𑁆𑀕𑀯𑀡𑁆𑀡𑀦𑀸

𑁨𑁯𑁬. 𑀏𑀓𑀥𑀫𑁆𑀫𑀧𑀸𑀴𑀺𑀬𑀁 𑀏𑀓𑀥𑀫𑁆𑀫𑁄𑀢𑀺 𑀏𑀓𑀲𑀪𑀸𑀯𑁄. 𑀏𑀓𑀦𑁆𑀢𑀦𑀺𑀩𑁆𑀩𑀺𑀤𑀸𑀬𑀸𑀢𑀺 𑀏𑀓𑀦𑁆𑀢𑁂𑀦 𑀯𑀝𑁆𑀝𑁂 𑀦𑀺𑀩𑁆𑀩𑀺𑀦𑁆𑀤𑀦𑀢𑁆𑀣𑀸𑀬 𑀉𑀓𑁆𑀓𑀡𑁆𑀞𑀦𑀢𑁆𑀣𑀸𑀬. 𑀯𑀺𑀭𑀸𑀕𑀸𑀬𑀸𑀢𑀺 𑀯𑀝𑁆𑀝𑁂 𑀯𑀺𑀭𑀚𑁆𑀚𑀦𑀢𑁆𑀣𑀸𑀬, 𑀭𑀸𑀕𑀸𑀤𑀻𑀦𑀁 𑀯𑀸 𑀓𑀺𑀮𑁂𑀲𑀸𑀦𑀁 𑀯𑀺𑀭𑀚𑁆𑀚𑀦𑀸𑀬 𑀯𑀺𑀕𑀫𑀸𑀬. 𑀦𑀺𑀭𑁄𑀥𑀸𑀬𑀸𑀢𑀺 𑀭𑀸𑀕𑀸𑀤𑀻𑀦𑀁 𑀦𑀺𑀭𑁄𑀥𑀸𑀬 𑀅𑀧𑁆𑀧𑀯𑀢𑁆𑀢𑀺𑀓𑀭𑀡𑀢𑁆𑀣𑀸𑀬, 𑀯𑀝𑁆𑀝𑀲𑁆𑀲𑁂𑀯 𑀯𑀸 𑀦𑀺𑀭𑀼𑀚𑁆𑀛𑀦𑀢𑁆𑀣𑀸𑀬. 𑀉𑀧𑀲𑀫𑀸𑀬𑀸𑀢𑀺 𑀓𑀺𑀮𑁂𑀲𑀯𑀽𑀧𑀲𑀫𑀦𑀢𑁆𑀣𑀸𑀬, 𑀅𑀪𑀺𑀜𑁆𑀜𑀸𑀬𑀸𑀢𑀺 𑀅𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀮𑀓𑁆𑀔𑀡𑀢𑁆𑀢𑀬𑀁 𑀆𑀭𑁄𑀧𑁂𑀢𑁆𑀯𑀸 𑀅𑀪𑀺𑀚𑀸𑀦𑀦𑀢𑁆𑀣𑀸𑀬. 𑀲𑀫𑁆𑀩𑁄𑀥𑀸𑀬𑀸𑀢𑀺 𑀘𑀢𑀼𑀦𑁆𑀦𑀁 𑀲𑀘𑁆𑀘𑀸𑀦𑀁 𑀩𑀼𑀚𑁆𑀛𑀦𑀢𑁆𑀣𑀸𑀬, ‘‘𑀩𑁄𑀥𑀺 𑀯𑀼𑀘𑁆𑀘𑀢𑀺 𑀘𑀢𑀽𑀲𑀼 𑀫𑀕𑁆𑀕𑁂𑀲𑀼 𑀜𑀸𑀡’’𑀦𑁆𑀢𑀺 (𑀫𑀳𑀸𑀦𑀺. 𑁧𑁯𑁧; 𑀘𑀽𑀴𑀦𑀺. 𑀔𑀕𑁆𑀕𑀯𑀺𑀲𑀸𑀡𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑁄 𑁧𑁨𑁧) 𑀏𑀯𑀁 𑀯𑀼𑀢𑁆𑀢𑀲𑁆𑀲 𑀯𑀸 𑀘𑀢𑀼𑀫𑀕𑁆𑀕𑀜𑀸𑀡𑀲𑁆𑀲 𑀧𑀝𑀺𑀯𑀺𑀚𑁆𑀛𑀦𑀢𑁆𑀣𑀸𑀬. 𑀦𑀺𑀩𑁆𑀩𑀸𑀦𑀸𑀬𑀸𑀢𑀺 𑀅𑀧𑁆𑀧𑀘𑁆𑀘𑀬𑀦𑀺𑀩𑁆𑀩𑀸𑀦𑀲𑁆𑀲 𑀲𑀘𑁆𑀙𑀺𑀓𑀭𑀡𑀢𑁆𑀣𑀸𑀬.

𑀇𑀢𑀺 𑀪𑀕𑀯𑀸 𑀇𑀫𑁂𑀳𑀺 𑀲𑀢𑁆𑀢𑀳𑀺 𑀧𑀤𑁂𑀳𑀺 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺𑀓𑀫𑁆𑀫𑀝𑁆𑀞𑀸𑀦𑀲𑁆𑀲 𑀯𑀡𑁆𑀡𑀁 𑀓𑀣𑁂𑀲𑀺. 𑀓𑀲𑁆𑀫𑀸? 𑀫𑀳𑀸𑀚𑀦𑀲𑁆𑀲 𑀉𑀲𑁆𑀲𑀸𑀳𑀚𑀦𑀦𑀢𑁆𑀣𑀁 𑀯𑀺𑀲𑀓𑀡𑁆𑀝𑀓𑀯𑀸𑀡𑀺𑀚𑁄 𑀯𑀺𑀬 𑀅𑀢𑁆𑀢𑀦𑁄 𑀧𑀡𑀺𑀬𑀲𑁆𑀲. 𑀯𑀺𑀲𑀓𑀡𑁆𑀝𑀓𑀯𑀸𑀡𑀺𑀚𑁄 𑀦𑀸𑀫 𑀕𑀼𑀴𑀯𑀸𑀡𑀺𑀚𑁄 𑀯𑀼𑀘𑁆𑀘𑀢𑀺. 𑀲𑁄 𑀓𑀺𑀭 𑀕𑀼𑀴𑀨𑀸𑀡𑀺𑀢𑀔𑀡𑁆𑀟𑀲𑀓𑁆𑀓𑀭𑀸𑀤𑀻𑀦𑀺 𑀲𑀓𑀝𑁂𑀦𑀸𑀤𑀸𑀬 𑀧𑀘𑁆𑀘𑀦𑁆𑀢𑀕𑀸𑀫𑀁 𑀕𑀦𑁆𑀢𑁆𑀯𑀸 ‘‘𑀯𑀺𑀲𑀓𑀡𑁆𑀝𑀓𑀁 𑀕𑀡𑁆𑀳𑀣, 𑀯𑀺𑀲𑀓𑀡𑁆𑀝𑀓𑀁 𑀕𑀡𑁆𑀳𑀣𑀸’’𑀢𑀺 𑀉𑀕𑁆𑀖𑁄𑀲𑁂𑀲𑀺. 𑀢𑀁 𑀲𑀼𑀢𑁆𑀯𑀸 𑀕𑀸𑀫𑀺𑀓𑀸 ‘‘𑀯𑀺𑀲𑀁 𑀦𑀸𑀫 𑀓𑀓𑁆𑀔𑀴𑀁 𑀖𑁄𑀭𑀁. 𑀬𑁄 𑀦𑀁 𑀔𑀸𑀤𑀢𑀺, 𑀲𑁄 𑀫𑀭𑀢𑀺. 𑀓𑀡𑁆𑀝𑀓𑀫𑁆𑀧𑀺 𑀯𑀺𑀚𑁆𑀛𑀺𑀢𑁆𑀯𑀸 𑀫𑀸𑀭𑁂𑀢𑀺, 𑀉𑀪𑁄𑀧𑁂𑀢𑁂 𑀓𑀓𑁆𑀔𑀴𑀸. 𑀓𑁄 𑀏𑀢𑁆𑀣 𑀆𑀦𑀺𑀲𑀁𑀲𑁄’’𑀢𑀺 𑀕𑁂𑀳𑀤𑁆𑀯𑀸𑀭𑀸𑀦𑀺 𑀣𑀓𑁂𑀲𑀼𑀁, 𑀤𑀸𑀭𑀓𑁂 𑀘 𑀧𑀮𑀸𑀧𑁂𑀲𑀼𑀁. 𑀢𑀁 𑀤𑀺𑀲𑁆𑀯𑀸 𑀯𑀸𑀡𑀺𑀚𑁄 ‘𑀅𑀯𑁄𑀳𑀸𑀭𑀓𑀼𑀲𑀮𑀸 𑀇𑀫𑁂 𑀕𑀸𑀫𑀺𑀓𑀸, 𑀳𑀦𑁆𑀤 𑀦𑁂 𑀉𑀧𑀸𑀬𑁂𑀦 𑀕𑀸𑀳𑀸𑀧𑁂𑀫𑀻’’𑀢𑀺 ‘‘𑀅𑀢𑀺𑀫𑀥𑀼𑀭𑀁 𑀕𑀡𑁆𑀳𑀣, 𑀅𑀢𑀺𑀲𑀸𑀤𑀼𑀁 𑀕𑀡𑁆𑀳𑀣, 𑀕𑀼𑀴𑀁 𑀨𑀸𑀡𑀺𑀢𑀁 𑀲𑀓𑁆𑀓𑀭𑀁 𑀲𑀫𑀕𑁆𑀖𑀁 𑀮𑀩𑁆𑀪𑀢𑀺, 𑀓𑀽𑀝𑀫𑀸𑀲𑀓𑀓𑀽𑀝𑀓𑀳𑀸𑀧𑀡𑀸𑀤𑀻𑀳𑀺 𑀯𑀸𑀧𑀺 𑀮𑀩𑁆𑀪𑀢𑀻’’𑀢𑀺 𑀉𑀕𑁆𑀖𑁄𑀲𑁂𑀲𑀺. 𑀢𑀁 𑀲𑀼𑀢𑁆𑀯𑀸 𑀕𑀸𑀫𑀺𑀓𑀸 𑀢𑀼𑀝𑁆𑀞𑀧𑀳𑀝𑁆𑀞𑀸 𑀯𑀕𑁆𑀕𑀯𑀕𑁆𑀕𑀸 𑀕𑀦𑁆𑀢𑁆𑀯𑀸 𑀩𑀳𑀼𑀫𑁆𑀧𑀺 𑀫𑀽𑀮𑀁 𑀤𑀢𑁆𑀯𑀸 𑀅𑀕𑁆𑀕𑀳𑁂𑀲𑀼𑀁.

𑀢𑀢𑁆𑀣 𑀯𑀺𑀲𑀓𑀡𑁆𑀝𑀓𑀯𑀸𑀡𑀺𑀚𑀲𑁆𑀲 ‘‘𑀯𑀺𑀲𑀓𑀡𑁆𑀝𑀓𑀁 𑀕𑀡𑁆𑀳𑀣𑀸’’𑀢𑀺 𑀉𑀕𑁆𑀖𑁄𑀲𑀦𑀁 𑀯𑀺𑀬 𑀪𑀕𑀯𑀢𑁄 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺𑀓𑀫𑁆𑀫𑀝𑁆𑀞𑀸𑀦𑀓𑀣𑀦𑀁, 𑀯𑀺𑀲𑀓𑀡𑁆𑀝𑀓𑁂 𑀯𑀡𑁆𑀡𑀁 𑀓𑀣𑁂𑀢𑁆𑀯𑀸 𑀢𑀲𑁆𑀲 𑀕𑀳𑀡𑀢𑁆𑀣𑀸𑀬 𑀫𑀳𑀸𑀚𑀦𑀲𑁆𑀲 𑀉𑀲𑁆𑀲𑀸𑀳𑀓𑀭𑀡𑀁 𑀯𑀺𑀬 𑀇𑀫𑁂𑀳𑀺 𑀲𑀢𑁆𑀢𑀳𑀺 𑀧𑀤𑁂𑀳𑀺 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺𑀓𑀫𑁆𑀫𑀝𑁆𑀞𑀸𑀦𑀲𑁆𑀲 𑀯𑀡𑁆𑀡𑀪𑀡𑀦𑁂𑀦 𑀢𑀲𑁆𑀲 𑀫𑀳𑀸𑀚𑀦𑀲𑁆𑀲 𑀉𑀲𑁆𑀲𑀸𑀳𑀓𑀭𑀡𑀁.

𑀓𑀢𑀫𑁄 𑀏𑀓𑀥𑀫𑁆𑀫𑁄𑀢𑀺 𑀓𑀣𑁂𑀢𑀼𑀓𑀫𑁆𑀬𑀢𑀸𑀧𑀼𑀘𑁆𑀙𑀸. 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀻𑀢𑀺 𑀩𑀼𑀤𑁆𑀥𑀁 𑀆𑀭𑀩𑁆𑀪 𑀉𑀧𑁆𑀧𑀦𑁆𑀦𑀸 𑀅𑀦𑀼𑀲𑁆𑀲𑀢𑀺, 𑀩𑀼𑀤𑁆𑀥𑀕𑀼𑀡𑀸𑀭𑀫𑁆𑀫𑀡𑀸𑀬 𑀲𑀢𑀺𑀬𑀸 𑀏𑀢𑀁 𑀅𑀥𑀺𑀯𑀘𑀦𑀁. 𑀢𑀁 𑀧𑀦𑁂𑀢𑀁 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺𑀓𑀫𑁆𑀫𑀝𑁆𑀞𑀸𑀦𑀁 𑀤𑀼𑀯𑀺𑀥𑀁 𑀳𑁄𑀢𑀺 𑀘𑀺𑀢𑁆𑀢𑀲𑀫𑁆𑀧𑀳𑀁𑀲𑀦𑀢𑁆𑀣𑀜𑁆𑀘𑁂𑀯 𑀯𑀺𑀧𑀲𑁆𑀲𑀦𑀢𑁆𑀣𑀜𑁆𑀘. 𑀓𑀣𑀁? 𑀬𑀤𑀸 𑀳𑀺 𑀅𑀲𑀼𑀪𑀸𑀭𑀫𑁆𑀫𑀡𑁂𑀲𑀼 𑀅𑀜𑁆𑀜𑀢𑀭𑀁 𑀪𑀸𑀯𑁂𑀦𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀘𑀺𑀢𑁆𑀢𑀼𑀧𑁆𑀧𑀸𑀤𑁄 𑀉𑀧𑀳𑀜𑁆𑀜𑀢𑀺 𑀉𑀓𑁆𑀓𑀡𑁆𑀞𑀢𑀺 𑀦𑀺𑀭𑀲𑁆𑀲𑀸𑀤𑁄 𑀳𑁄𑀢𑀺, 𑀯𑀻𑀣𑀺𑀁 𑀦𑀧𑁆𑀧𑀝𑀺𑀧𑀚𑁆𑀚𑀢𑀺, 𑀓𑀽𑀝𑀕𑁄𑀡𑁄 𑀯𑀺𑀬 𑀇𑀢𑁄 𑀘𑀺𑀢𑁄 𑀘 𑀯𑀺𑀥𑀸𑀯𑀢𑀺. 𑀢𑀲𑁆𑀫𑀺𑀁 𑀔𑀡𑁂 𑀏𑀲 𑀫𑀽𑀮𑀓𑀫𑁆𑀫𑀝𑁆𑀞𑀸𑀦𑀁 𑀧𑀳𑀸𑀬 ‘‘𑀇𑀢𑀺𑀧𑀺 𑀲𑁄 𑀪𑀕𑀯𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀢𑀣𑀸𑀕𑀢𑀲𑁆𑀲 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀕𑀼𑀡𑁂 𑀅𑀦𑀼𑀲𑁆𑀲𑀭𑀢𑀺. 𑀢𑀲𑁆𑀲𑁂𑀯𑀁 𑀩𑀼𑀤𑁆𑀥𑀁 𑀅𑀦𑀼𑀲𑁆𑀲𑀭𑀦𑁆𑀢𑀲𑁆𑀲 𑀘𑀺𑀢𑁆𑀢𑀼𑀧𑁆𑀧𑀸𑀤𑁄 𑀧𑀲𑀻𑀤𑀢𑀺, 𑀯𑀺𑀦𑀻𑀯𑀭𑀡𑁄 𑀳𑁄𑀢𑀺. 𑀲𑁄 𑀢𑀁 𑀘𑀺𑀢𑁆𑀢𑀁 𑀏𑀯𑀁 𑀤𑀫𑁂𑀢𑁆𑀯𑀸 𑀧𑀼𑀦 𑀫𑀽𑀮𑀓𑀫𑁆𑀫𑀝𑁆𑀞𑀸𑀦𑀁𑀬𑁂𑀯 𑀫𑀦𑀲𑀺 𑀓𑀭𑁄𑀢𑀺. 𑀓𑀣𑀁? 𑀬𑀣𑀸 𑀦𑀸𑀫 𑀩𑀮𑀯𑀸 𑀧𑀼𑀭𑀺𑀲𑁄 𑀓𑀽𑀝𑀸𑀕𑀸𑀭𑀓𑀡𑁆𑀡𑀺𑀓𑀢𑁆𑀣𑀸𑀬 𑀫𑀳𑀸𑀭𑀼𑀓𑁆𑀔𑀁 𑀙𑀺𑀦𑁆𑀤𑀦𑁆𑀢𑁄 𑀲𑀸𑀔𑀸𑀧𑀮𑀸𑀲𑀘𑁆𑀙𑁂𑀤𑀦𑀫𑀢𑁆𑀢𑁂𑀦𑁂𑀯 𑀨𑀭𑀲𑀼𑀥𑀸𑀭𑀸𑀬 𑀯𑀺𑀧𑀦𑁆𑀦𑀸𑀬 𑀫𑀳𑀸𑀭𑀼𑀓𑁆𑀔𑀁 𑀙𑀺𑀦𑁆𑀤𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄𑀧𑀺 𑀥𑀼𑀭𑀦𑀺𑀓𑁆𑀔𑁂𑀧𑀁 𑀅𑀓𑀢𑁆𑀯𑀸𑀯 𑀓𑀫𑁆𑀫𑀸𑀭𑀲𑀸𑀮𑀁 𑀕𑀦𑁆𑀢𑁆𑀯𑀸 𑀢𑀺𑀔𑀺𑀡𑀁 𑀨𑀭𑀲𑀼𑀁 𑀓𑀸𑀭𑀸𑀧𑁂𑀢𑁆𑀯𑀸 𑀧𑀼𑀦 𑀢𑀁 𑀙𑀺𑀦𑁆𑀤𑁂𑀬𑁆𑀬. 𑀏𑀯𑀁𑀲𑀫𑁆𑀧𑀤𑀫𑀺𑀤𑀁 𑀤𑀝𑁆𑀞𑀩𑁆𑀩𑀁. 𑀲𑁄 𑀏𑀯𑀁 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺𑀯𑀲𑁂𑀦 𑀘𑀺𑀢𑁆𑀢𑀁 𑀧𑀭𑀺𑀤𑀫𑁂𑀢𑁆𑀯𑀸 𑀧𑀼𑀦 𑀫𑀽𑀮𑀓𑀫𑁆𑀫𑀝𑁆𑀞𑀸𑀦𑀁 𑀫𑀦𑀲𑀺𑀓𑀭𑁄𑀦𑁆𑀢𑁄 𑀅𑀲𑀼𑀪𑀸𑀭𑀫𑁆𑀫𑀡𑀁 𑀧𑀞𑀫𑀚𑁆𑀛𑀸𑀦𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀛𑀸𑀦𑀗𑁆𑀕𑀸𑀦𑀺 𑀲𑀫𑁆𑀫𑀲𑀺𑀢𑁆𑀯𑀸 𑀅𑀭𑀺𑀬𑀪𑀽𑀫𑀺𑀁 𑀑𑀓𑁆𑀓𑀫𑀢𑀺. 𑀏𑀯𑀁 𑀢𑀸𑀯 𑀘𑀺𑀢𑁆𑀢𑀲𑀫𑁆𑀧𑀳𑀁𑀲𑀦𑀢𑁆𑀣𑀁 𑀳𑁄𑀢𑀺.

𑀬𑀤𑀸 𑀧𑀦𑁂𑀲 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺𑀁 𑀅𑀦𑀼𑀲𑁆𑀲𑀭𑀺𑀢𑁆𑀯𑀸 ‘‘𑀓𑁄 𑀅𑀬𑀁 𑀇𑀢𑀺𑀧𑀺 𑀲𑁄 𑀪𑀕𑀯𑀸𑀢𑀺𑀆𑀤𑀺𑀦𑀸 𑀦𑀬𑁂𑀦 𑀅𑀦𑀼𑀲𑁆𑀲𑀭𑀺, 𑀇𑀢𑁆𑀣𑀺 𑀦𑀼 𑀔𑁄 𑀧𑀼𑀭𑀺𑀲𑁄 𑀦𑀼 𑀔𑁄 𑀤𑁂𑀯𑀫𑀦𑀼𑀲𑁆𑀲𑀫𑀸𑀭𑀩𑁆𑀭𑀳𑁆𑀫𑀸𑀦𑀁 𑀅𑀜𑁆𑀜𑀢𑀭𑁄 𑀦𑀼 𑀔𑁄’’𑀢𑀺 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑁄 ‘‘𑀦 𑀅𑀜𑁆𑀜𑁄 𑀓𑁄𑀘𑀺, 𑀲𑀢𑀺𑀲𑀫𑁆𑀧𑀬𑀼𑀢𑁆𑀢𑀁 𑀧𑀦 𑀘𑀺𑀢𑁆𑀢𑀫𑁂𑀯 𑀅𑀦𑀼𑀲𑁆𑀲𑀭𑀻’’𑀢𑀺 𑀤𑀺𑀲𑁆𑀯𑀸 ‘‘𑀢𑀁 𑀔𑁄 𑀧𑀦𑁂𑀢𑀁 𑀘𑀺𑀢𑁆𑀢𑀁 𑀔𑀦𑁆𑀥𑀢𑁄 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄 𑀳𑁄𑀢𑀺, 𑀢𑁂𑀦 𑀲𑀫𑁆𑀧𑀬𑀼𑀢𑁆𑀢𑀸 𑀯𑁂𑀤𑀦𑀸 𑀯𑁂𑀤𑀦𑀸𑀓𑁆𑀔𑀦𑁆𑀥𑁄, 𑀢𑁂𑀦 𑀲𑀫𑁆𑀧𑀬𑀼𑀢𑁆𑀢𑀸 𑀲𑀜𑁆𑀜𑀸 𑀲𑀜𑁆𑀜𑀸𑀓𑁆𑀔𑀦𑁆𑀥𑁄, 𑀲𑀳𑀚𑀸𑀢𑀸 𑀨𑀲𑁆𑀲𑀸𑀤𑀬𑁄 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄𑀢𑀺 𑀇𑀫𑁂 𑀘𑀢𑁆𑀢𑀸𑀭𑁄 𑀅𑀭𑀽𑀧𑀓𑁆𑀔𑀦𑁆𑀥𑀸 𑀳𑁄𑀦𑁆𑀢𑀻’’𑀢𑀺 𑀅𑀭𑀽𑀧𑀜𑁆𑀘 𑀯𑀯𑀢𑁆𑀣𑀧𑁂𑀢𑁆𑀯𑀸 𑀢𑀲𑁆𑀲 𑀦𑀺𑀲𑁆𑀲𑀬𑀁 𑀧𑀭𑀺𑀬𑁂𑀲𑀦𑁆𑀢𑁄 𑀳𑀤𑀬𑀯𑀢𑁆𑀣𑀼𑀁 𑀤𑀺𑀲𑁆𑀯𑀸 𑀢𑀲𑁆𑀲 𑀦𑀺𑀲𑁆𑀲𑀬𑀸𑀦𑀺 𑀘𑀢𑁆𑀢𑀸𑀭𑀺 𑀫𑀳𑀸𑀪𑀽𑀢𑀸𑀦𑀺, 𑀢𑀸𑀦𑀺 𑀉𑀧𑀸𑀤𑀸𑀬 𑀧𑀯𑀢𑁆𑀢𑀸𑀦𑀺 𑀲𑁂𑀲𑀉𑀧𑀸𑀤𑀸𑀭𑀽𑀧𑀸𑀦𑀺 𑀘 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 ‘‘𑀲𑀩𑁆𑀩𑀫𑁆𑀧𑁂𑀢𑀁 𑀭𑀽𑀧𑀁 𑀭𑀽𑀧𑀓𑁆𑀔𑀦𑁆𑀥𑁄’’𑀢𑀺 𑀯𑀯𑀢𑁆𑀣𑀧𑁂𑀢𑁆𑀯𑀸 ‘‘𑀇𑀤𑀜𑁆𑀘 𑀭𑀽𑀧𑀁 𑀧𑀼𑀭𑀺𑀫𑀜𑁆𑀘 𑀅𑀭𑀽𑀧’’𑀦𑁆𑀢𑀺 𑀲𑀗𑁆𑀔𑁂𑀧𑀢𑁄 𑀭𑀽𑀧𑀸𑀭𑀽𑀧𑀁, 𑀧𑀪𑁂𑀤𑀢𑁄 𑀧𑀜𑁆𑀘𑀓𑁆𑀔𑀦𑁆𑀥𑁂 𑀧𑀼𑀦 ‘‘𑀲𑀗𑁆𑀔𑁂𑀧𑀢𑁄 𑀧𑀜𑁆𑀘𑀧𑁂𑀢𑁂 𑀔𑀦𑁆𑀥𑀸 𑀤𑀼𑀓𑁆𑀔𑀲𑀘𑁆𑀘’’𑀦𑁆𑀢𑀺 𑀤𑀼𑀓𑁆𑀔𑀲𑀘𑁆𑀘𑀁 𑀯𑀯𑀢𑁆𑀣𑀧𑁂𑀢𑁆𑀯𑀸 ‘‘𑀢𑀲𑁆𑀲 𑀧𑀪𑀸𑀯𑀺𑀓𑀸 𑀢𑀡𑁆𑀳𑀸 𑀲𑀫𑀼𑀤𑀬𑀲𑀘𑁆𑀘𑀁, 𑀢𑀲𑁆𑀲𑀸 𑀦𑀺𑀭𑁄𑀥𑁄 𑀦𑀺𑀭𑁄𑀥𑀲𑀘𑁆𑀘𑀁, 𑀦𑀺𑀭𑁄𑀥𑀧𑀚𑀸𑀦𑀦𑀸 𑀧𑀝𑀺𑀧𑀤𑀸 𑀫𑀕𑁆𑀕𑀲𑀘𑁆𑀘’’𑀦𑁆𑀢𑀺 𑀏𑀯𑀁 𑀧𑀼𑀩𑁆𑀩𑀪𑀸𑀕𑁂 𑀘𑀢𑁆𑀢𑀸𑀭𑀺 𑀘 𑀲𑀘𑁆𑀘𑀸𑀦𑀺 𑀯𑀯𑀢𑁆𑀣𑀧𑁂𑀢𑁆𑀯𑀸 𑀧𑀝𑀺𑀧𑀸𑀝𑀺𑀬𑀸 𑀅𑀭𑀺𑀬𑀪𑀽𑀫𑀺𑀁 𑀑𑀓𑁆𑀓𑀫𑀢𑀺. 𑀢𑀤𑀸𑀲𑁆𑀲 𑀇𑀫𑀁 𑀓𑀫𑁆𑀫𑀝𑁆𑀞𑀸𑀦𑀁 𑀯𑀺𑀧𑀲𑁆𑀲𑀦𑀢𑁆𑀣𑀁 𑀦𑀸𑀫 𑀳𑁄𑀢𑀺. 𑀅𑀬𑀁 𑀔𑁄𑀢𑀺𑀆𑀤𑀺 𑀅𑀧𑁆𑀧𑀦𑀸𑀯𑀸𑀭𑁄 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄.

𑁨𑁯𑁭. 𑀥𑀫𑁆𑀫𑀸𑀦𑀼𑀲𑁆𑀲𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀅𑀬𑀁 𑀧𑀦𑁂𑀢𑁆𑀣 𑀯𑀘𑀦𑀢𑁆𑀣𑁄 𑁋 𑀥𑀫𑁆𑀫𑀁 𑀆𑀭𑀩𑁆𑀪 𑀉𑀧𑁆𑀧𑀦𑁆𑀦𑀸 𑀅𑀦𑀼𑀲𑁆𑀲𑀢𑀺 𑀥𑀫𑁆𑀫𑀸𑀦𑀼𑀲𑁆𑀲𑀢𑀺, 𑀲𑁆𑀯𑀸𑀓𑁆𑀔𑀸𑀢𑀢𑀸𑀤𑀺𑀥𑀫𑁆𑀫𑀕𑀼𑀡𑀸𑀭𑀫𑁆𑀫𑀡𑀸𑀬 𑀲𑀢𑀺𑀬𑀸 𑀏𑀢𑀁 𑀅𑀥𑀺𑀯𑀘𑀦𑀁. 𑀲𑀗𑁆𑀖𑀁 𑀆𑀭𑀩𑁆𑀪 𑀉𑀧𑁆𑀧𑀦𑁆𑀦𑀸 𑀅𑀦𑀼𑀲𑁆𑀲𑀢𑀺 𑀲𑀗𑁆𑀖𑀸𑀦𑀼𑀲𑁆𑀲𑀢𑀺, 𑀲𑀼𑀧𑁆𑀧𑀝𑀺𑀧𑀦𑁆𑀦𑀢𑀸𑀤𑀺𑀲𑀗𑁆𑀖𑀕𑀼𑀡𑀸𑀭𑀫𑁆𑀫𑀡𑀸𑀬 𑀲𑀢𑀺𑀬𑀸 𑀏𑀢𑀁 𑀅𑀥𑀺𑀯𑀘𑀦𑀁. 𑀲𑀻𑀮𑀁 𑀆𑀭𑀩𑁆𑀪 𑀉𑀧𑁆𑀧𑀦𑁆𑀦𑀸 𑀅𑀦𑀼𑀲𑁆𑀲𑀢𑀺 𑀲𑀻𑀮𑀸𑀦𑀼𑀲𑁆𑀲𑀢𑀺, 𑀅𑀔𑀡𑁆𑀟𑀢𑀸𑀤𑀺𑀲𑀻𑀮𑀕𑀼𑀡𑀸𑀭𑀫𑁆𑀫𑀡𑀸𑀬 𑀲𑀢𑀺𑀬𑀸 𑀏𑀢𑀁 𑀅𑀥𑀺𑀯𑀘𑀦𑀁. 𑀘𑀸𑀕𑀁 𑀆𑀭𑀩𑁆𑀪 𑀉𑀧𑁆𑀧𑀦𑁆𑀦𑀸 𑀅𑀦𑀼𑀲𑁆𑀲𑀢𑀺 𑀘𑀸𑀕𑀸𑀦𑀼𑀲𑁆𑀲𑀢𑀺, 𑀫𑀼𑀢𑁆𑀢𑀘𑀸𑀕𑀢𑀸𑀤𑀺𑀘𑀸𑀕𑀕𑀼𑀡𑀸𑀭𑀫𑁆𑀫𑀡𑀸𑀬 𑀲𑀢𑀺𑀬𑀸 𑀏𑀢𑀁 𑀅𑀥𑀺𑀯𑀘𑀦𑀁. 𑀤𑁂𑀯𑀢𑀸 𑀆𑀭𑀩𑁆𑀪 𑀉𑀧𑁆𑀧𑀦𑁆𑀦𑀸 𑀅𑀦𑀼𑀲𑁆𑀲𑀢𑀺 𑀤𑁂𑀯𑀢𑀸𑀦𑀼𑀲𑁆𑀲𑀢𑀺, 𑀤𑁂𑀯𑀢𑀸 𑀲𑀓𑁆𑀔𑀺𑀝𑁆𑀞𑀸𑀦𑁂 𑀞𑀧𑁂𑀢𑁆𑀯𑀸 𑀅𑀢𑁆𑀢𑀦𑁄 𑀲𑀤𑁆𑀥𑀸𑀤𑀺𑀕𑀼𑀡𑀸𑀭𑀫𑁆𑀫𑀡𑀸𑀬 𑀲𑀢𑀺𑀬𑀸 𑀏𑀢𑀁 𑀅𑀥𑀺𑀯𑀘𑀦𑀁. 𑀆𑀦𑀸𑀧𑀸𑀦𑁂 𑀆𑀭𑀩𑁆𑀪 𑀉𑀧𑁆𑀧𑀦𑁆𑀦𑀸 𑀲𑀢𑀺 𑀆𑀦𑀸𑀧𑀸𑀦𑀲𑁆𑀲𑀢𑀺, 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀦𑀺𑀫𑀺𑀢𑁆𑀢𑀸𑀭𑀫𑁆𑀫𑀡𑀸𑀬 𑀲𑀢𑀺𑀬𑀸 𑀏𑀢𑀁 𑀅𑀥𑀺𑀯𑀘𑀦𑀁. 𑀫𑀭𑀡𑀁 𑀆𑀭𑀩𑁆𑀪 𑀉𑀧𑁆𑀧𑀦𑁆𑀦𑀸 𑀲𑀢𑀺 𑀫𑀭𑀡𑀲𑁆𑀲𑀢𑀺, 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀼𑀧𑀘𑁆𑀙𑁂𑀤𑀸𑀭𑀫𑁆𑀫𑀡𑀸𑀬 𑀲𑀢𑀺𑀬𑀸 𑀏𑀢𑀁 𑀅𑀥𑀺𑀯𑀘𑀦𑀁. 𑀓𑁂𑀲𑀸𑀤𑀺𑀪𑁂𑀤𑀁 𑀭𑀽𑀧𑀓𑀸𑀬𑀁 𑀕𑀢𑀸, 𑀓𑀸𑀬𑁂 𑀯𑀸 𑀕𑀢𑀸𑀢𑀺 𑀓𑀸𑀬𑀕𑀢𑀸, 𑀓𑀸𑀬𑀕𑀢𑀸 𑀘 𑀲𑀸 𑀲𑀢𑀺 𑀘𑀸𑀢𑀺 𑀓𑀸𑀬𑀕𑀢𑀸𑀲𑀢𑀻𑀢𑀺 𑀯𑀢𑁆𑀢𑀩𑁆𑀩𑁂 𑀭𑀲𑁆𑀲𑀁 𑀅𑀓𑀢𑁆𑀯𑀸 𑀓𑀸𑀬𑀕𑀢𑀸𑀲𑀢𑀻𑀢𑀺 𑀯𑀼𑀢𑁆𑀢𑀸. 𑀓𑁂𑀲𑀸𑀤𑀺𑀓𑀸𑀬𑀓𑁄𑀝𑁆𑀞𑀸𑀲𑀦𑀺𑀫𑀺𑀢𑁆𑀢𑀸𑀭𑀫𑁆𑀫𑀡𑀸𑀬 𑀲𑀢𑀺𑀬𑀸 𑀏𑀢𑀁 𑀅𑀥𑀺𑀯𑀘𑀦𑀁. 𑀉𑀧𑀲𑀫𑀁 𑀆𑀭𑀩𑁆𑀪 𑀉𑀧𑁆𑀧𑀦𑁆𑀦𑀸 𑀅𑀦𑀼𑀲𑁆𑀲𑀢𑀺 𑀉𑀧𑀲𑀫𑀸𑀦𑀼𑀲𑁆𑀲𑀢𑀺, 𑀲𑀩𑁆𑀩𑀤𑀼𑀓𑁆𑀔𑀽𑀧𑀲𑀫𑀸𑀭𑀫𑁆𑀫𑀡𑀸𑀬 𑀲𑀢𑀺𑀬𑀸 𑀏𑀢𑀁 𑀅𑀥𑀺𑀯𑀘𑀦𑀁. 𑀤𑀼𑀯𑀺𑀥𑁄 𑀯𑀸 𑀉𑀧𑀲𑀫𑁄 𑀅𑀘𑁆𑀘𑀦𑁆𑀢𑀽𑀧𑀲𑀫𑁄 𑀘 𑀔𑀬𑀽𑀧𑀲𑀫𑁄 𑀘. 𑀢𑀢𑁆𑀣 𑀅𑀘𑁆𑀘𑀦𑁆𑀢𑀽𑀧𑀲𑀫𑁄 𑀦𑀸𑀫 𑀦𑀺𑀩𑁆𑀩𑀸𑀦𑀁, 𑀔𑀬𑀽𑀧𑀲𑀫𑁄 𑀦𑀸𑀫 𑀫𑀕𑁆𑀕𑁄. 𑀏𑀯𑀫𑁂𑀢𑀁 𑀤𑀼𑀯𑀺𑀥𑀫𑁆𑀧𑀺 𑀉𑀧𑀲𑀫𑀁 𑀅𑀦𑀼𑀲𑁆𑀲𑀭𑀦𑁆𑀢𑀲𑁆𑀲 𑀉𑀧𑁆𑀧𑀦𑁆𑀦𑀸 𑀲𑀢𑀺 𑀉𑀧𑀲𑀫𑀸𑀦𑀼𑀲𑁆𑀲𑀢𑀻𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄. 𑀇𑀢𑀺 𑀇𑀫𑁂𑀲𑀼 𑀤𑀲𑀲𑀼 𑀓𑀫𑁆𑀫𑀝𑁆𑀞𑀸𑀦𑁂𑀲𑀼 𑀆𑀦𑀸𑀧𑀸𑀦𑀲𑁆𑀲𑀢𑀺 𑀫𑀭𑀡𑀲𑁆𑀲𑀢𑀺 𑀓𑀸𑀬𑀕𑀢𑀸𑀲𑀢𑀻𑀢𑀺 𑀇𑀫𑀸𑀦𑀺 𑀢𑀻𑀡𑀺 𑀯𑀺𑀧𑀲𑁆𑀲𑀦𑀢𑁆𑀣𑀸𑀦𑁂𑀯 𑀳𑁄𑀦𑁆𑀢𑀺, 𑀲𑁂𑀲𑀸𑀦𑀺 𑀲𑀢𑁆𑀢 𑀘𑀺𑀢𑁆𑀢𑀲𑀫𑁆𑀧𑀳𑀁𑀲𑀦𑀢𑁆𑀣𑀸𑀦𑀺𑀧𑀺 𑀳𑁄𑀦𑁆𑀢𑀻𑀢𑀺.

𑀧𑀞𑀫𑀯𑀕𑁆𑀕𑀯𑀡𑁆𑀡𑀦𑀸.

𑁧𑁬. 𑀏𑀓𑀥𑀫𑁆𑀫𑀧𑀸𑀴𑀺

(𑁧𑁬) 𑁨. 𑀏𑀓𑀥𑀫𑁆𑀫𑀧𑀸𑀴𑀺-𑀤𑀼𑀢𑀺𑀬𑀯𑀕𑁆𑀕𑀯𑀡𑁆𑀡𑀦𑀸

𑁨𑁯𑁮. 𑀤𑀼𑀢𑀺𑀬𑁂 𑀫𑀺𑀘𑁆𑀙𑀸𑀤𑀺𑀝𑁆𑀞𑀻𑀢𑀺 𑀤𑁆𑀯𑀸𑀲𑀝𑁆𑀞𑀺𑀯𑀺𑀥𑀸𑀬𑀧𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑀸 𑀏𑀢𑀁 𑀅𑀥𑀺𑀯𑀘𑀦𑀁. 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀲𑁆𑀲𑀸𑀢𑀺 𑀢𑀸𑀬 𑀤𑀺𑀝𑁆𑀞𑀺𑀬𑀸 𑀲𑀫𑀦𑁆𑀦𑀸𑀕𑀢𑀲𑁆𑀲.

𑁨𑁯𑁯. 𑀲𑀫𑁆𑀫𑀸𑀤𑀺𑀝𑁆𑀞𑀻𑀢𑀺 𑀧𑀜𑁆𑀘𑀯𑀺𑀥𑀸𑀬𑀧𑀺 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀏𑀢𑀁 𑀅𑀥𑀺𑀯𑀘𑀦𑀁. 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑀲𑁆𑀲𑀸𑀢𑀺 𑀢𑀸𑀬 𑀤𑀺𑀝𑁆𑀞𑀺𑀬𑀸 𑀲𑀫𑀦𑁆𑀦𑀸𑀕𑀢𑀲𑁆𑀲.

𑁩𑁦𑁨. 𑀅𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑁄𑀢𑀺 𑀅𑀦𑀼𑀧𑀸𑀬𑀫𑀦𑀲𑀺𑀓𑀸𑀭𑁄.

𑁩𑁦𑁩. 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑁄𑀢𑀺 𑀉𑀧𑀸𑀬𑀫𑀦𑀲𑀺𑀓𑀸𑀭𑁄. 𑀢𑀢𑁆𑀣 𑀅𑀬𑁄𑀦𑀺𑀲𑁄 𑀫𑀦𑀲𑀺𑀓𑀭𑁄𑀢𑁄 𑀧𑀼𑀩𑁆𑀩𑁂 𑀅𑀦𑀼𑀧𑁆𑀧𑀦𑁆𑀦𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀉𑀧𑁆𑀧𑀚𑁆𑀚𑀢𑀺, 𑀉𑀧𑁆𑀧𑀦𑁆𑀦𑀸 𑀧𑀦 𑀬𑀸𑀯 𑀦𑀺𑀬𑀸𑀫𑁄𑀓𑁆𑀓𑀫𑀦𑀸 𑀧𑀯𑀟𑁆𑀠𑀢𑀺. 𑀦𑀺𑀬𑀸𑀫𑁂 𑀑𑀓𑁆𑀓𑀦𑁆𑀢𑁂 𑀯𑀟𑁆𑀠𑀺𑀢𑀸 𑀦𑀸𑀫 𑀳𑁄𑀢𑀺. 𑀬𑁄𑀦𑀺𑀲𑁄 𑀫𑀦𑀲𑀺𑀓𑀭𑁄𑀢𑁄 𑀧𑀼𑀩𑁆𑀩𑁂 𑀅𑀦𑀼𑀧𑁆𑀧𑀦𑁆𑀦𑀸 𑀲𑀫𑁆𑀫𑀸𑀤𑀺𑀝𑁆𑀞𑀺 𑀉𑀧𑁆𑀧𑀚𑁆𑀚𑀢𑀺, 𑀉𑀧𑁆𑀧𑀦𑁆𑀦𑀸 𑀧𑀦 𑀬𑀸𑀯 𑀅𑀭𑀳𑀢𑁆𑀢𑀫𑀕𑁆𑀕𑀸 𑀧𑀯𑀟𑁆𑀠𑀢𑀺. 𑀅𑀭𑀳𑀢𑁆𑀢𑀨𑀮𑁂 𑀧𑀢𑁆𑀢𑁂 𑀯𑀟𑁆𑀠𑀺𑀢𑀸 𑀦𑀸𑀫 𑀳𑁄𑀢𑀺.

𑁩𑁦𑁪. 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑀸, 𑀪𑀺𑀓𑁆𑀔𑀯𑁂, 𑀲𑀫𑀦𑁆𑀦𑀸𑀕𑀢𑀸 𑀲𑀢𑁆𑀢𑀸𑀢𑀺 𑀏𑀢𑁆𑀣 𑀏𑀓𑀘𑁆𑀘𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀲𑀕𑁆𑀕𑀸𑀯𑀭𑀡𑀸 𑀘𑁂𑀯 𑀳𑁄𑀢𑀺 𑀫𑀕𑁆𑀕𑀸𑀯𑀭𑀡𑀸 𑀘, 𑀏𑀓𑀘𑁆𑀘𑀸 𑀫𑀕𑁆𑀕𑀸𑀯𑀭𑀡𑀸𑀯, 𑀦 𑀲𑀕𑁆𑀕𑀸𑀯𑀭𑀡𑀸, 𑀏𑀓𑀘𑁆𑀘𑀸 𑀦𑁂𑀯 𑀲𑀕𑁆𑀕𑀸𑀯𑀭𑀡𑀸 𑀦 𑀫𑀕𑁆𑀕𑀸𑀯𑀭𑀡𑀸. 𑀢𑀢𑁆𑀣 𑀅𑀳𑁂𑀢𑀼𑀓𑀤𑀺𑀝𑁆𑀞𑀺, 𑀅𑀓𑀺𑀭𑀺𑀬𑀤𑀺𑀝𑁆𑀞𑀺, 𑀦𑀢𑁆𑀣𑀺𑀓𑀤𑀺𑀝𑁆𑀞𑀻𑀢𑀺 𑀅𑀬𑀁 𑀢𑀺𑀯𑀺𑀥𑀸 𑀲𑀕𑁆𑀕𑀸𑀯𑀭𑀡𑀸 𑀘𑁂𑀯 𑀳𑁄𑀢𑀺 𑀫𑀕𑁆𑀕𑀸𑀯𑀭𑀡𑀸 𑀘. 𑀤𑀲𑀯𑀢𑁆𑀣𑀼𑀓𑀸 𑀅𑀦𑁆𑀢𑀕𑁆𑀕𑀸𑀳𑀺𑀓𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀫𑀕𑁆𑀕𑀸𑀯𑀭𑀡𑀸𑀯 𑀳𑁄𑀢𑀺 𑀦 𑀲𑀕𑁆𑀕𑀸𑀯𑀭𑀡𑀸. 𑀯𑀻𑀲𑀢𑀺𑀯𑀢𑁆𑀣𑀼𑀓𑀸 𑀲𑀓𑁆𑀓𑀸𑀬𑀤𑀺𑀝𑁆𑀞𑀺 𑀦𑁂𑀯 𑀲𑀕𑁆𑀕𑀸𑀯𑀭𑀡𑀸 𑀦 𑀫𑀕𑁆𑀕𑀸𑀯𑀭𑀡𑀸. 𑀇𑀤𑀁 𑀧𑀦 𑀯𑀺𑀥𑀸𑀦𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 ‘‘𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑀸, 𑀪𑀺𑀓𑁆𑀔𑀯𑁂, 𑀲𑀫𑀦𑁆𑀦𑀸𑀕𑀢𑀸’’𑀢𑀺 𑀯𑀘𑀦𑀢𑁄 𑀅𑀦𑁆𑀢𑀫𑀲𑁄 𑀯𑀻𑀲𑀢𑀺𑀯𑀢𑁆𑀣𑀼𑀓𑀁 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀁 𑀉𑀧𑀸𑀤𑀸𑀬 𑀤𑀺𑀝𑁆𑀞𑀺 𑀦𑀸𑀫 𑀲𑀕𑁆𑀕𑀁 𑀉𑀧𑀦𑁂𑀢𑀼𑀁 𑀲𑀫𑀢𑁆𑀣𑀸 𑀦𑀸𑀫 𑀦𑀢𑁆𑀣𑀺, 𑀏𑀓𑀦𑁆𑀢𑀁 𑀦𑀺𑀭𑀬𑀲𑁆𑀫𑀺𑀁𑀬𑁂𑀯 𑀦𑀺𑀫𑀼𑀚𑁆𑀚𑀸𑀧𑁂𑀢𑀻𑀢𑀺 𑀯𑀼𑀢𑁆𑀢𑀁. 𑀬𑀣𑀸 𑀳𑀺 𑀫𑀼𑀕𑁆𑀕𑀫𑀸𑀲𑀧𑁆𑀧𑀫𑀸𑀡𑀸𑀧𑀺 𑀧𑀸𑀲𑀸𑀡𑀲𑀓𑁆𑀔𑀭𑀸 𑀉𑀤𑀓𑁂 𑀧𑀓𑁆𑀔𑀺𑀢𑁆𑀢𑀸 𑀉𑀧𑁆𑀧𑀺𑀮𑀯𑀫𑀸𑀦𑀸 𑀦𑀸𑀫 𑀦𑀢𑁆𑀣𑀺, 𑀏𑀓𑀦𑁆𑀢𑀁 𑀳𑁂𑀝𑁆𑀞𑀸𑀯 𑀧𑀯𑀺𑀲𑀢𑀺, 𑀏𑀯𑀫𑁂𑀯𑀁 𑀅𑀦𑁆𑀢𑀫𑀲𑁄 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀧𑀺 𑀲𑀕𑁆𑀕𑀁 𑀉𑀧𑀦𑁂𑀢𑀼𑀁 𑀲𑀫𑀢𑁆𑀣𑀸 𑀦𑀸𑀫 𑀦𑀢𑁆𑀣𑀺, 𑀏𑀓𑀦𑁆𑀢𑀁 𑀅𑀧𑀸𑀬𑁂𑀲𑀼𑀬𑁂𑀯 𑀦𑀺𑀫𑀼𑀚𑁆𑀚𑀸𑀧𑁂𑀢𑀻𑀢𑀺.

𑁩𑁦𑁫. 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀲𑀫𑀦𑁆𑀦𑀸𑀕𑀢𑀸𑀢𑀺 𑀏𑀢𑁆𑀣 𑀓𑀫𑁆𑀫𑀲𑁆𑀲𑀓𑀢𑀲𑀫𑁆𑀫𑀸𑀤𑀺𑀝𑁆𑀞𑀺, 𑀛𑀸𑀦𑀲𑀫𑁆𑀫𑀸𑀤𑀺𑀝𑁆𑀞𑀺, 𑀯𑀺𑀧𑀲𑁆𑀲𑀦𑀸𑀲𑀫𑁆𑀫𑀸𑀤𑀺𑀝𑁆𑀞𑀺, 𑀫𑀕𑁆𑀕𑀲𑀫𑁆𑀫𑀸𑀤𑀺𑀝𑁆𑀞𑀺, 𑀨𑀮𑀲𑀫𑁆𑀫𑀸𑀤𑀺𑀝𑁆𑀞𑀻𑀢𑀺 𑀧𑀜𑁆𑀘𑀯𑀺𑀥𑀸 𑀲𑀫𑁆𑀫𑀸𑀤𑀺𑀝𑁆𑀞𑀺. 𑀢𑀢𑁆𑀣 𑀓𑀫𑁆𑀫𑀲𑁆𑀲𑀓𑀢𑀲𑀫𑁆𑀫𑀸𑀤𑀺𑀝𑁆𑀞𑀺 𑀲𑀫𑁆𑀧𑀢𑁆𑀢𑀺𑀪𑀯𑀁 𑀆𑀓𑀟𑁆𑀠𑀢𑀺, 𑀛𑀸𑀦𑀲𑀫𑁆𑀫𑀸𑀤𑀺𑀝𑁆𑀞𑀺 𑀭𑀽𑀧𑀸𑀭𑀽𑀧𑀪𑀯𑁂 𑀧𑀝𑀺𑀲𑀦𑁆𑀥𑀺𑀁 𑀤𑁂𑀢𑀺, 𑀫𑀕𑁆𑀕𑀲𑀫𑁆𑀫𑀸𑀤𑀺𑀝𑁆𑀞𑀺 𑀯𑀝𑁆𑀝𑀁 𑀯𑀺𑀤𑁆𑀥𑀁𑀲𑁂𑀢𑀺, 𑀨𑀮𑀲𑀫𑁆𑀫𑀸𑀤𑀺𑀝𑁆𑀞𑀺 𑀪𑀯𑀁 𑀧𑀝𑀺𑀩𑀸𑀳𑀢𑀺. 𑀯𑀺𑀧𑀲𑁆𑀲𑀦𑀸𑀲𑀫𑁆𑀫𑀸𑀤𑀺𑀝𑁆𑀞𑀺 𑀓𑀺𑀁 𑀓𑀭𑁄𑀢𑀻𑀢𑀺? 𑀲𑀸𑀧𑀺 𑀧𑀝𑀺𑀲𑀦𑁆𑀥𑀺𑀁 𑀦𑀸𑀓𑀟𑁆𑀠𑀢𑀺. 𑀢𑀺𑀧𑀺𑀝𑀓𑀘𑀽𑀴𑀸𑀪𑀬𑀢𑁆𑀣𑁂𑀭𑁄 𑀧𑀦𑀸𑀳 ‘‘𑀲𑀘𑁂 𑀯𑀺𑀧𑀲𑁆𑀲𑀦𑀸𑀲𑀫𑁆𑀫𑀸𑀤𑀺𑀝𑁆𑀞𑀺 𑀪𑀸𑀯𑀺𑀢𑀸 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀅𑀭𑀳𑀢𑁆𑀢𑀁 𑀧𑀸𑀧𑁂𑀢𑀼𑀁 𑀲𑀓𑁆𑀓𑁄𑀢𑀺, 𑀇𑀘𑁆𑀘𑁂𑀢𑀁 𑀓𑀼𑀲𑀮𑀁. 𑀲𑀘𑁂 𑀦 𑀲𑀓𑁆𑀓𑁄𑀢𑀺, 𑀲𑀢𑁆𑀢 𑀪𑀯𑁂 𑀤𑁂𑀢𑀺, 𑀆𑀯𑀼𑀲𑁄’’𑀢𑀺. 𑀏𑀯𑀫𑀬𑀁 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀸 𑀲𑀫𑁆𑀫𑀸𑀤𑀺𑀝𑁆𑀞𑀺 𑀓𑀣𑀺𑀢𑀸. 𑀇𑀫𑀲𑁆𑀫𑀺𑀁 𑀧𑀦𑀢𑁆𑀣𑁂 𑀮𑁄𑀓𑀺𑀓𑀸 𑀪𑀯𑀦𑀺𑀧𑁆𑀨𑀸𑀤𑀺𑀓𑀸𑀯 𑀯𑁂𑀤𑀺𑀢𑀩𑁆𑀩𑀸.

𑁩𑁦𑁬. 𑀬𑀜𑁆𑀘𑁂𑀯 𑀓𑀸𑀬𑀓𑀫𑁆𑀫𑀁 𑀬𑀣𑀸𑀤𑀺𑀝𑁆𑀞𑀺 𑀲𑀫𑀢𑁆𑀢𑀁 𑀲𑀫𑀸𑀤𑀺𑀦𑁆𑀦𑀦𑁆𑀢𑀺 𑀏𑀢𑁆𑀣 𑀬𑀣𑀸𑀤𑀺𑀝𑁆𑀞𑀻𑀢𑀺 𑀬𑀸 𑀬𑀸 𑀤𑀺𑀝𑁆𑀞𑀺, 𑀢𑀲𑁆𑀲𑀸 𑀢𑀲𑁆𑀲𑀸 𑀅𑀦𑀼𑀭𑀽𑀧𑀁. 𑀲𑀫𑀢𑁆𑀢𑀦𑁆𑀢𑀺 𑀧𑀭𑀺𑀧𑀼𑀡𑁆𑀡𑀁. 𑀲𑀫𑀸𑀤𑀺𑀦𑁆𑀦𑀦𑁆𑀢𑀺 𑀕𑀳𑀺𑀢𑀁. 𑀢𑀤𑁂𑀢𑀁 𑀬𑀣𑀸𑀤𑀺𑀝𑁆𑀞𑀺𑀬𑀁 𑀞𑀺𑀢𑀓𑀸𑀬𑀓𑀫𑁆𑀫𑀁, 𑀤𑀺𑀝𑁆𑀞𑀺𑀲𑀳𑀚𑀸𑀢𑀁 𑀓𑀸𑀬𑀓𑀫𑁆𑀫𑀁, 𑀤𑀺𑀝𑁆𑀞𑀸𑀦𑀼𑀮𑁄𑀫𑀺𑀓𑀁 𑀓𑀸𑀬𑀓𑀫𑁆𑀫𑀦𑁆𑀢𑀺 𑀢𑀺𑀯𑀺𑀥𑀁 𑀳𑁄𑀢𑀺. 𑀢𑀢𑁆𑀣 ‘‘𑀧𑀸𑀡𑀁 𑀳𑀦𑀢𑁄 𑀅𑀤𑀺𑀦𑁆𑀦𑀁 𑀆𑀤𑀺𑀬𑀢𑁄 𑀫𑀺𑀘𑁆𑀙𑀸𑀘𑀸𑀭𑀁 𑀘𑀭𑀢𑁄 𑀦𑀢𑁆𑀣𑀺 𑀢𑀢𑁄𑀦𑀺𑀤𑀸𑀦𑀁 𑀧𑀸𑀧𑀁, 𑀦𑀢𑁆𑀣𑀺 𑀧𑀸𑀧𑀲𑁆𑀲 𑀆𑀕𑀫𑁄’’𑀢𑀺 𑀬𑀁 𑀏𑀯𑀁𑀮𑀤𑁆𑀥𑀺𑀓𑀲𑁆𑀲 𑀲𑀢𑁄 𑀧𑀸𑀡𑀸𑀢𑀺𑀧𑀸𑀢-𑀅𑀤𑀺𑀦𑁆𑀦𑀸𑀤𑀸𑀦-𑀫𑀺𑀘𑁆𑀙𑀸𑀘𑀸𑀭𑀲𑀗𑁆𑀔𑀸𑀢𑀁 𑀓𑀸𑀬𑀓𑀫𑁆𑀫𑀁, 𑀇𑀤𑀁 𑀬𑀣𑀸𑀤𑀺𑀝𑁆𑀞𑀺𑀬𑀁 𑀞𑀺𑀢𑀓𑀸𑀬𑀓𑀫𑁆𑀫𑀁 𑀦𑀸𑀫. ‘‘𑀧𑀸𑀡𑀁 𑀳𑀦𑀢𑁄 𑀅𑀤𑀺𑀦𑁆𑀦𑀁 𑀆𑀤𑀺𑀬𑀢𑁄 𑀫𑀺𑀘𑁆𑀙𑀸𑀘𑀸𑀭𑀁 𑀘𑀭𑀢𑁄 𑀦𑀢𑁆𑀣𑀺 𑀢𑀢𑁄𑀦𑀺𑀤𑀸𑀦𑀁 𑀧𑀸𑀧𑀁, 𑀦𑀢𑁆𑀣𑀺 𑀧𑀸𑀧𑀲𑁆𑀲 𑀆𑀕𑀫𑁄’’𑀢𑀺 𑀇𑀫𑀸𑀬 𑀧𑀦 𑀮𑀤𑁆𑀥𑀺𑀬𑀸 𑀇𑀫𑀺𑀦𑀸 𑀤𑀲𑁆𑀲𑀦𑁂𑀦 𑀲𑀳𑀚𑀸𑀢𑀁 𑀓𑀸𑀬𑀓𑀫𑁆𑀫𑀁 𑀤𑀺𑀝𑁆𑀞𑀺𑀲𑀳𑀚𑀸𑀢𑀁 𑀓𑀸𑀬𑀓𑀫𑁆𑀫𑀁 𑀦𑀸𑀫. 𑀢𑀤𑁂𑀯 𑀧𑀦 𑀲𑀫𑀢𑁆𑀢𑀁 𑀲𑀫𑀸𑀤𑀺𑀦𑁆𑀦𑀁 𑀕𑀳𑀺𑀢𑀁 𑀧𑀭𑀸𑀫𑀝𑁆𑀞𑀁 𑀤𑀺𑀝𑁆𑀞𑀸𑀦𑀼𑀮𑁄𑀫𑀺𑀓𑀁 𑀓𑀸𑀬𑀓𑀫𑁆𑀫𑀁 𑀦𑀸𑀫. 𑀯𑀘𑀻𑀓𑀫𑁆𑀫𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀬𑀣𑀸 𑀧𑀦𑁂𑀢𑁆𑀣 ‘‘𑀧𑀸𑀡𑀁 𑀳𑀦𑀢𑁄 𑀅𑀤𑀺𑀦𑁆𑀦𑀁 𑀆𑀤𑀺𑀬𑀢𑁄 𑀫𑀺𑀘𑁆𑀙𑀸𑀘𑀸𑀭𑀁 𑀘𑀭𑀢𑁄 𑀦𑀢𑁆𑀣𑀺 𑀢𑀢𑁄𑀦𑀺𑀤𑀸𑀦𑀁 𑀧𑀸𑀧’’𑀦𑁆𑀢𑀺 𑀬𑁄𑀚𑀦𑀸 𑀓𑀢𑀸, 𑀏𑀯𑀁 𑀯𑀘𑀻𑀓𑀫𑁆𑀫𑀫𑀦𑁄𑀓𑀫𑁆𑀫𑁂𑀲𑀼 ‘‘𑀫𑀼𑀲𑀸 𑀪𑀡𑀢𑁄, 𑀧𑀺𑀲𑀼𑀡𑀁 𑀓𑀣𑁂𑀦𑁆𑀢𑀲𑁆𑀲, 𑀨𑀭𑀼𑀲𑀁 𑀓𑀣𑁂𑀦𑁆𑀢𑀲𑁆𑀲, 𑀲𑀫𑁆𑀨𑀁 𑀧𑀮𑀧𑀦𑁆𑀢𑀲𑁆𑀲, 𑀅𑀪𑀺𑀚𑁆𑀛𑀸𑀮𑀼𑀦𑁄, 𑀩𑁆𑀬𑀸𑀧𑀦𑁆𑀦𑀘𑀺𑀢𑁆𑀢𑀲𑁆𑀲, 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀲𑁆𑀲 𑀘 𑀲𑀢𑁄 𑀦𑀢𑁆𑀣𑀺 𑀢𑀢𑁄𑀦𑀺𑀤𑀸𑀦𑀁 𑀧𑀸𑀧’’𑀦𑁆𑀢𑀺 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸.

𑀬𑀸 𑀘 𑀘𑁂𑀢𑀦𑀸𑀢𑀺𑀆𑀤𑀻𑀲𑀼 𑀤𑀺𑀝𑁆𑀞𑀺𑀲𑀳𑀚𑀸𑀢𑀸𑀯 𑀘𑁂𑀢𑀦𑀸 𑀘𑁂𑀢𑀦𑀸 𑀦𑀸𑀫, 𑀤𑀺𑀝𑁆𑀞𑀺𑀲𑀳𑀚𑀸𑀢𑀸𑀯 𑀧𑀢𑁆𑀣𑀦𑀸 𑀧𑀢𑁆𑀣𑀦𑀸 𑀦𑀸𑀫, 𑀘𑁂𑀢𑀦𑀸𑀧𑀢𑁆𑀣𑀦𑀸𑀦𑀁 𑀯𑀲𑁂𑀦 𑀘𑀺𑀢𑁆𑀢𑀝𑁆𑀞𑀧𑀦𑀸 𑀧𑀡𑀺𑀥𑀺 𑀦𑀸𑀫, 𑀢𑁂𑀳𑀺 𑀧𑀦 𑀘𑁂𑀢𑀦𑀸𑀤𑀻𑀳𑀺 𑀲𑀫𑁆𑀧𑀬𑀼𑀢𑁆𑀢𑀸 𑀨𑀲𑁆𑀲𑀸𑀤𑀬𑁄 𑀲𑀗𑁆𑀔𑀸𑀭𑀸 𑀦𑀸𑀫. 𑀤𑀺𑀝𑁆𑀞𑀺 𑀳𑀺𑀲𑁆𑀲, 𑀪𑀺𑀓𑁆𑀔𑀯𑁂, 𑀧𑀸𑀧𑀺𑀓𑀸𑀢𑀺 𑀬𑀲𑁆𑀫𑀸 𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀤𑀺𑀝𑁆𑀞𑀺 𑀧𑀸𑀧𑀺𑀓𑀸 𑀮𑀸𑀫𑀺𑀓𑀸. 𑀦𑀺𑀓𑁆𑀔𑀺𑀢𑁆𑀢𑀦𑁆𑀢𑀺 𑀭𑁄𑀧𑀺𑀢𑀁. 𑀉𑀧𑀸𑀤𑀺𑀬𑀢𑀻𑀢𑀺 𑀕𑀡𑁆𑀳𑀸𑀢𑀺. 𑀓𑀝𑀼𑀓𑀢𑁆𑀢𑀸𑀬𑀸𑀢𑀺 𑀇𑀤𑀁 𑀧𑀼𑀭𑀺𑀫𑀲𑁆𑀲𑁂𑀯 𑀯𑁂𑀯𑀘𑀦𑀁.

‘‘𑀯𑀡𑁆𑀡𑀕𑀦𑁆𑀥𑀭𑀲𑀽𑀧𑁂𑀢𑁄, 𑀅𑀫𑁆𑀩𑁄𑀬𑀁 𑀅𑀳𑀼𑀯𑀸 𑀧𑀼𑀭𑁂;

𑀢𑀫𑁂𑀯 𑀧𑀽𑀚𑀁 𑀮𑀪𑀫𑀸𑀦𑁄, 𑀓𑁂𑀦𑀫𑁆𑀩𑁄 𑀓𑀝𑀼𑀓𑀧𑁆𑀨𑀮𑁄.

‘‘𑀧𑀼𑀘𑀺𑀫𑀦𑁆𑀤𑀧𑀭𑀺𑀯𑀸𑀭𑁄, 𑀅𑀫𑁆𑀩𑁄 𑀢𑁂 𑀤𑀥𑀺𑀯𑀸𑀳𑀦;

𑀫𑀽𑀮𑀁 𑀫𑀽𑀮𑁂𑀦 𑀲𑀁𑀲𑀝𑁆𑀞𑀁, 𑀲𑀸𑀔𑀸 𑀲𑀸𑀔𑀸 𑀦𑀺𑀲𑁂𑀯𑀭𑁂;

𑀅𑀲𑀸𑀢𑀲𑀦𑁆𑀦𑀺𑀯𑀸𑀲𑁂𑀦, 𑀢𑁂𑀦𑀫𑁆𑀩𑁄 𑀓𑀝𑀼𑀓𑀧𑁆𑀨𑀮𑁄’’𑀢𑀺. (𑀚𑀸. 𑁧.𑁨.𑁭𑁧-𑁭𑁨) 𑁋

𑀆𑀕𑀢𑀝𑁆𑀞𑀸𑀦𑁂 𑀯𑀺𑀬 𑀳𑀺 𑀇𑀥𑀸𑀧𑀺 𑀓𑀝𑀼𑀓𑀦𑁆𑀢𑀺 𑀢𑀺𑀢𑁆𑀢𑀓𑀁 𑀯𑁂𑀤𑀺𑀢𑀩𑁆𑀩𑀁. 𑀅𑀲𑀸𑀢𑀢𑁆𑀢𑀸𑀬𑀸𑀢𑀺 𑀅𑀫𑀥𑀼𑀭𑀢𑁆𑀢𑀸𑀬.

𑀇𑀫𑀲𑁆𑀫𑀺 𑀧𑀦 𑀩𑀻𑀚𑀽𑀧𑀫𑀲𑀼𑀢𑁆𑀢𑁂 ‘‘𑀤𑀺𑀝𑁆𑀞𑀻𑀢𑀺 𑀦𑀺𑀬𑀢𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀕𑀳𑀺𑀢𑀸’’𑀢𑀺 𑀧𑁄𑀭𑀸𑀡𑀓𑀢𑁆𑀣𑁂𑀭𑀸 𑀆𑀳𑀁𑀲𑀼. 𑀢𑀁 𑀧𑀦 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 ‘‘𑀲𑀩𑁆𑀩𑀸𑀦𑀺𑀧𑀺 𑀤𑁆𑀯𑀸𑀲𑀝𑁆𑀞𑀺 𑀤𑀺𑀝𑁆𑀞𑀺𑀕𑀢𑀸𑀦𑀺 𑀕𑀳𑀺𑀢𑀸𑀦𑀻’’𑀢𑀺 𑀯𑀼𑀢𑁆𑀢𑀁. 𑀅𑀦𑀦𑁆𑀢𑀭𑀲𑀼𑀢𑁆𑀢𑁂 ‘‘𑀧𑀸𑀡𑀸𑀢𑀺𑀧𑀸𑀢𑀸 𑀯𑀺𑀭𑀫𑀦𑁆𑀢𑀲𑁆𑀲, 𑀅𑀤𑀺𑀦𑁆𑀦𑀸𑀤𑀸𑀦𑀸 𑀯𑀺𑀭𑀫𑀦𑁆𑀢𑀲𑁆𑀲, 𑀫𑀺𑀘𑁆𑀙𑀸𑀘𑀸𑀭𑀸 𑀯𑀺𑀭𑀫𑀦𑁆𑀢𑀲𑁆𑀲 𑀦𑀢𑁆𑀣𑀺 𑀢𑀢𑁄𑀦𑀺𑀤𑀸𑀦𑀁 𑀧𑀼𑀜𑁆𑀜’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀬𑀣𑀸𑀤𑀺𑀝𑁆𑀞𑀺𑀬𑀁 𑀞𑀺𑀢𑀓𑀸𑀬𑀓𑀫𑁆𑀫𑀸𑀤𑀻𑀦𑀺 𑀬𑁄𑀚𑁂𑀢𑁆𑀯𑀸 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀇𑀥 𑀧𑀦 𑀲𑀫𑁆𑀫𑀸𑀤𑀺𑀝𑁆𑀞𑀺𑀲𑀳𑀚𑀸𑀢𑀸 𑀘𑀺𑀢𑁆𑀢𑀝𑁆𑀞𑀧𑀦𑀸𑀯 𑀧𑀢𑁆𑀣𑀦𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀲𑀫𑁆𑀫𑀸𑀤𑀺𑀝𑁆𑀞𑀺 𑀧𑀦𑁂𑀢𑁆𑀣 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀸 𑀓𑀣𑀺𑀢𑀸. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀤𑀼𑀢𑀺𑀬𑀯𑀕𑁆𑀕𑀯𑀡𑁆𑀡𑀦𑀸.

𑁧𑁬. 𑀏𑀓𑀥𑀫𑁆𑀫𑀧𑀸𑀴𑀺

(𑁧𑁬) 𑁩. 𑀏𑀓𑀥𑀫𑁆𑀫𑀧𑀸𑀴𑀺-𑀢𑀢𑀺𑀬𑀯𑀕𑁆𑀕𑀯𑀡𑁆𑀡𑀦𑀸

𑁩𑁦𑁮. 𑀢𑀢𑀺𑀬𑀲𑁆𑀲 𑀧𑀞𑀫𑁂 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑁄𑀢𑀺 𑀅𑀬𑀸𑀣𑀸𑀯𑀤𑀺𑀝𑁆𑀞𑀺𑀓𑁄. 𑀯𑀺𑀧𑀭𑀻𑀢𑀤𑀲𑁆𑀲𑀦𑁄𑀢𑀺 𑀢𑀸𑀬𑁂𑀯 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑀸 𑀯𑀺𑀧𑀭𑀻𑀢𑀤𑀲𑁆𑀲𑀦𑁄. 𑀲𑀤𑁆𑀥𑀫𑁆𑀫𑀸 𑀯𑀼𑀝𑁆𑀞𑀸𑀧𑁂𑀢𑁆𑀯𑀸𑀢𑀺 𑀤𑀲𑀓𑀼𑀲𑀮𑀓𑀫𑁆𑀫𑀧𑀣𑀥𑀫𑁆𑀫𑀢𑁄 𑀯𑀼𑀝𑁆𑀞𑀸𑀧𑁂𑀢𑁆𑀯𑀸. 𑀅𑀲𑀤𑁆𑀥𑀫𑁆𑀫𑁂 𑀧𑀢𑀺𑀝𑁆𑀞𑀸𑀧𑁂𑀢𑀻𑀢𑀺 𑀤𑀲𑀅𑀓𑀼𑀲𑀮𑀓𑀫𑁆𑀫𑀧𑀣𑀲𑀗𑁆𑀔𑀸𑀢𑁂 𑀅𑀲𑀤𑁆𑀥𑀫𑁆𑀫𑁂 𑀧𑀢𑀺𑀝𑁆𑀞𑀸𑀧𑁂𑀢𑀺. 𑀏𑀓𑀧𑀼𑀕𑁆𑀕𑀮𑁄𑀢𑀺 𑀘𑁂𑀢𑁆𑀣 𑀙𑀳𑀺 𑀲𑀢𑁆𑀣𑀸𑀭𑁂𑀳𑀺 𑀲𑀤𑁆𑀥𑀺𑀁 𑀤𑁂𑀯𑀤𑀢𑁆𑀢𑁄 𑀘 𑀅𑀜𑁆𑀜𑁂 𑀘 𑀏𑀯𑀭𑀽𑀧𑀸 𑀯𑁂𑀤𑀺𑀢𑀩𑁆𑀩𑀸.

𑁩𑁦𑁯. 𑀤𑀼𑀢𑀺𑀬𑁂 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑁄𑀢𑀺 𑀬𑀸𑀣𑀸𑀯𑀤𑀺𑀝𑁆𑀞𑀺𑀓𑁄. 𑀅𑀯𑀺𑀧𑀭𑀻𑀢𑀤𑀲𑁆𑀲𑀦𑁄𑀢𑀺 𑀢𑀸𑀬𑁂𑀯 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀅𑀯𑀺𑀧𑀭𑀻𑀢𑀤𑀲𑁆𑀲𑀦𑁄. 𑀅𑀲𑀤𑁆𑀥𑀫𑁆𑀫𑀸𑀢𑀺 𑀤𑀲𑀅𑀓𑀼𑀲𑀮𑀓𑀫𑁆𑀫𑀧𑀣𑀢𑁄. 𑀲𑀤𑁆𑀥𑀫𑁆𑀫𑁂𑀢𑀺 𑀤𑀲𑀓𑀼𑀲𑀮𑀓𑀫𑁆𑀫𑀧𑀣𑀲𑀗𑁆𑀔𑀸𑀢𑁂 𑀲𑀤𑁆𑀥𑀫𑁆𑀫𑁂. 𑀏𑀓𑀧𑀼𑀕𑁆𑀕𑀮𑁄𑀢𑀺 𑀘𑁂𑀢𑁆𑀣 𑀅𑀦𑀼𑀧𑁆𑀧𑀦𑁆𑀦𑁂 𑀩𑀼𑀤𑁆𑀥𑁂 𑀘𑀓𑁆𑀓𑀯𑀢𑁆𑀢𑀻 𑀭𑀸𑀚𑀸 𑀲𑀩𑁆𑀩𑀜𑁆𑀜𑀼𑀩𑁄𑀥𑀺𑀲𑀢𑁆𑀢𑁄𑀢𑀺 𑀏𑀯𑀫𑀸𑀤𑀬𑁄 𑀮𑀩𑁆𑀪𑀦𑁆𑀢𑀺, 𑀉𑀧𑁆𑀧𑀦𑁆𑀦𑁂 𑀩𑀼𑀤𑁆𑀥𑁂 𑀩𑀼𑀤𑁆𑀥𑁄 𑀘𑁂𑀯 𑀩𑀼𑀤𑁆𑀥𑀲𑀸𑀯𑀓𑀸 𑀘.

𑁩𑁧𑁦. 𑀢𑀢𑀺𑀬𑁂 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀧𑀭𑀫𑀸𑀦𑀻𑀢𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀧𑀭𑀫𑀸 𑀏𑀢𑁂𑀲𑀦𑁆𑀢𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀧𑀭𑀫𑀸𑀦𑀺. 𑀧𑀜𑁆𑀘 𑀳𑀺 𑀆𑀦𑀦𑁆𑀢𑀭𑀺𑀬𑀓𑀫𑁆𑀫𑀸𑀦𑀺 𑀫𑀳𑀸𑀲𑀸𑀯𑀚𑁆𑀚𑀸𑀦𑀺 𑀦𑀸𑀫, 𑀢𑁂𑀳𑀺𑀧𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑁂𑀯 𑀫𑀳𑀸𑀲𑀸𑀯𑀚𑁆𑀚𑀢𑀭𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀓𑀲𑁆𑀫𑀸? 𑀢𑁂𑀲𑀜𑁆𑀳𑀺 𑀧𑀭𑀺𑀘𑁆𑀙𑁂𑀤𑁄 𑀅𑀢𑁆𑀣𑀺. 𑀘𑀢𑁆𑀢𑀸𑀭𑀺 𑀳𑀺 𑀆𑀦𑀦𑁆𑀢𑀭𑀺𑀬𑀓𑀫𑁆𑀫𑀸𑀦𑀺 𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀸𑀧𑁂𑀦𑁆𑀢𑀻𑀢𑀺 𑀯𑀼𑀢𑁆𑀢𑀸𑀦𑀺. 𑀲𑀗𑁆𑀖𑀪𑁂𑀤𑀓𑀫𑁆𑀫𑀫𑁆𑀧𑀺 𑀦𑀺𑀭𑀬𑁂 𑀓𑀧𑁆𑀧𑀝𑁆𑀞𑀺𑀢𑀺𑀓𑀫𑁂𑀯 𑀳𑁄𑀢𑀺. 𑀏𑀯𑀫𑁂𑀢𑁂𑀲𑀁 𑀧𑀭𑀺𑀘𑁆𑀙𑁂𑀤𑁄 𑀅𑀢𑁆𑀣𑀺, 𑀓𑁄𑀝𑀺 𑀧𑀜𑁆𑀜𑀸𑀬𑀢𑀺. 𑀦𑀺𑀬𑀢𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑀸 𑀧𑀦 𑀧𑀭𑀺𑀘𑁆𑀙𑁂𑀤𑁄 𑀦𑀢𑁆𑀣𑀺. 𑀲𑀸 𑀳𑀺 𑀯𑀝𑁆𑀝𑀲𑁆𑀲 𑀫𑀽𑀮𑀁, 𑀢𑀸𑀬 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀯𑀢𑁄 𑀯𑀼𑀝𑁆𑀞𑀸𑀦𑀁 𑀦𑀢𑁆𑀣𑀺. 𑀬𑁂 𑀢𑀲𑁆𑀲 𑀲𑁄𑀢𑀩𑁆𑀩𑀁 𑀫𑀜𑁆𑀜𑀦𑁆𑀢𑀺, 𑀢𑁂𑀧𑀺 𑀯𑀺𑀧𑁆𑀧𑀝𑀺𑀧𑀸𑀤𑁂𑀢𑀺. 𑀢𑀸𑀬 𑀘 𑀲𑀫𑀦𑁆𑀦𑀸𑀕𑀢𑀲𑁆𑀲 𑀦𑁂𑀯 𑀲𑀕𑁆𑀕𑁄 𑀅𑀢𑁆𑀣𑀺 𑀦 𑀫𑀕𑁆𑀕𑁄. 𑀓𑀧𑁆𑀧𑀯𑀺𑀦𑀸𑀲𑁂 𑀫𑀳𑀸𑀚𑀦𑁂 𑀩𑁆𑀭𑀳𑁆𑀫𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑁂𑀧𑀺 𑀦𑀺𑀬𑀢𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑁄 𑀢𑀢𑁆𑀣 𑀅𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀧𑀺𑀝𑁆𑀞𑀺𑀘𑀓𑁆𑀓𑀯𑀸𑀴𑁂 𑀦𑀺𑀩𑁆𑀩𑀢𑁆𑀢𑀢𑀺. 𑀓𑀺𑀁 𑀧𑀦 𑀧𑀺𑀝𑁆𑀞𑀺𑀘𑀓𑁆𑀓𑀯𑀸𑀴𑀁 𑀦 𑀛𑀸𑀬𑀢𑀻𑀢𑀺? 𑀛𑀸𑀬𑀢𑀺, 𑀢𑀲𑁆𑀫𑀺𑀁 𑀛𑀸𑀬𑀫𑀸𑀦𑁂𑀧𑀺 𑀏𑀲 𑀆𑀓𑀸𑀲𑁂 𑀏𑀓𑀲𑁆𑀫𑀺𑀁 𑀑𑀓𑀸𑀲𑁂 𑀧𑀘𑁆𑀘𑀢𑀺𑀬𑁂𑀯𑀸𑀢𑀺 𑀯𑀤𑀦𑁆𑀢𑀺.

𑁩𑁧𑁧. 𑀘𑀢𑀼𑀢𑁆𑀣𑁂 𑀫𑀓𑁆𑀔𑀮𑀻𑀢𑀺 ‘‘𑀫𑀸 𑀔𑀮𑀻’’𑀢𑀺 𑀯𑀘𑀦𑀁 𑀉𑀧𑀸𑀤𑀸𑀬 𑀏𑀯𑀁𑀮𑀤𑁆𑀥𑀦𑀸𑀫𑁄 𑀢𑀺𑀢𑁆𑀣𑀓𑀭𑁄. 𑀦𑀤𑀻𑀫𑀼𑀔𑁂𑀢𑀺 𑀤𑁆𑀯𑀺𑀦𑁆𑀦𑀁 𑀦𑀤𑀻𑀦𑀁 𑀲𑀫𑀸𑀕𑀢𑀝𑁆𑀞𑀸𑀦𑁂. 𑀤𑁂𑀲𑀦𑀸𑀫𑀢𑁆𑀢𑀫𑁂𑀯𑁂𑀢𑀁, 𑀤𑁆𑀯𑀺𑀦𑁆𑀦𑀁 𑀓𑀦𑁆𑀤𑀭𑀸𑀦𑀁, 𑀤𑁆𑀯𑀺𑀦𑁆𑀦𑀁 𑀉𑀤𑀓𑀸𑀦𑀁, 𑀲𑀫𑀼𑀤𑁆𑀤𑀲𑁆𑀲 𑀘, 𑀮𑁄𑀡𑀺𑀬𑀸 𑀘, 𑀲𑀫𑀼𑀤𑁆𑀤𑀲𑁆𑀲 𑀘 𑀦𑀤𑀺𑀬𑀸 𑀘𑀸𑀢𑀺 𑀏𑀢𑁂𑀲𑀫𑁆𑀧𑀺 𑀬𑀲𑁆𑀲 𑀓𑀲𑁆𑀲𑀘𑀺 𑀲𑀫𑀸𑀕𑀢𑀝𑁆𑀞𑀸𑀦𑀁, 𑀅𑀜𑁆𑀜𑀫𑁆𑀧𑀺 𑀢𑀣𑀸𑀭𑀽𑀧𑀁 𑀉𑀤𑀓𑀁. 𑀔𑀺𑀧𑀦𑁆𑀢𑀺 𑀓𑀼𑀫𑀺𑀦𑀁. 𑀉𑀟𑁆𑀟𑁂𑀬𑁆𑀬𑀸𑀢𑀺 𑀑𑀟𑁆𑀟𑁂𑀬𑁆𑀬. 𑀫𑀦𑀼𑀲𑁆𑀲𑀸 𑀳𑀺 𑀦𑀴𑁂𑀳𑀺 𑀯𑀸 𑀉𑀘𑁆𑀙𑀽𑀳𑀺 𑀯𑀸 𑀯𑁂𑀴𑀽𑀳𑀺 𑀯𑀸 𑀧𑀮𑀸𑀲𑀦𑁆𑀢𑀺𑀲𑀮𑀸𑀓𑀸𑀬 𑀯𑀸 𑀏𑀓𑀁 𑀤𑁆𑀯𑁂 𑀢𑀬𑁄 𑀯𑀸 𑀓𑀼𑀫𑁆𑀪𑁂 𑀕𑀡𑁆𑀳𑀦𑀧𑁆𑀧𑀫𑀸𑀡𑀓𑀼𑀫𑀺𑀦𑀁 𑀓𑀢𑁆𑀯𑀸 𑀫𑀼𑀔𑀯𑀝𑁆𑀝𑀺𑀬𑀸 𑀬𑁄𑀢𑁆𑀢𑁂𑀦 𑀩𑀦𑁆𑀥𑀺𑀢𑁆𑀯𑀸 𑀦𑀤𑀻𑀫𑀼𑀔𑀁 𑀦𑁂𑀢𑁆𑀯𑀸 𑀤𑁆𑀯𑀻𑀲𑀼 𑀧𑀲𑁆𑀲𑁂𑀲𑀼 𑀔𑀸𑀡𑀼𑀓𑁂 𑀓𑁄𑀝𑁆𑀝𑁂𑀢𑁆𑀯𑀸 𑀬𑁄𑀢𑁆𑀢𑁂𑀳𑀺 𑀢𑀢𑁆𑀣 𑀩𑀦𑁆𑀥𑀦𑁆𑀢𑀺, 𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀢𑀲𑁆𑀫𑀺𑀜𑁆𑀳𑀺 𑀧𑀯𑀺𑀝𑁆𑀞𑀲𑁆𑀲 𑀔𑀼𑀤𑁆𑀤𑀓𑀲𑁆𑀲 𑀫𑀘𑁆𑀙𑀲𑁆𑀲𑀸𑀧𑀺 𑀫𑁄𑀓𑁆𑀔𑁄 𑀦𑀢𑁆𑀣𑀺. 𑀅𑀦𑀬𑀸𑀬𑀸𑀢𑀺 𑀅𑀯𑀟𑁆𑀠𑀺𑀬𑀸. 𑀩𑁆𑀬𑀸𑀲𑀦𑀸𑀬𑀸𑀢𑀺 𑀯𑀺𑀦𑀸𑀲𑀸𑀬. 𑀫𑀓𑁆𑀔𑀮𑀺 𑀫𑁄𑀖𑀧𑀼𑀭𑀺𑀲𑁄𑀢𑀺 𑀅𑀬𑀁 𑀫𑀓𑁆𑀔𑀮𑀺 𑀕𑁄𑀲𑀸𑀮𑁄 𑀢𑀼𑀘𑁆𑀙𑀧𑀼𑀭𑀺𑀲𑁄. 𑀫𑀦𑀼𑀲𑁆𑀲𑀔𑀺𑀧𑁆𑀧𑀁 𑀫𑀜𑁆𑀜𑁂 𑀮𑁄𑀓𑁂 𑀉𑀧𑁆𑀧𑀦𑁆𑀦𑁄𑀢𑀺 𑀫𑀳𑀸𑀚𑀦𑀲𑁆𑀲 𑀲𑀕𑁆𑀕𑀫𑁄𑀓𑁆𑀔𑀕𑀫𑀦𑀫𑀕𑁆𑀕𑁂 𑀢𑀢𑁆𑀣 𑀕𑀫𑀦𑀦𑀺𑀯𑀸𑀭𑀡𑀢𑁆𑀣𑀁 𑀫𑀦𑀼𑀲𑁆𑀲𑀓𑀼𑀫𑀺𑀦𑀁 𑀯𑀺𑀬 𑀮𑁄𑀓𑁂 𑀉𑀧𑁆𑀧𑀦𑁆𑀦𑁄.

𑁩𑁧𑁨. 𑀧𑀜𑁆𑀘𑀫𑀸𑀤𑀻𑀲𑀼 𑀤𑀼𑀭𑀓𑁆𑀔𑀸𑀢𑁂, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀯𑀺𑀦𑀬𑁂𑀢𑀺 𑀤𑀼𑀭𑀓𑁆𑀔𑀸𑀢𑀥𑀫𑁆𑀫𑀯𑀺𑀦𑀬𑁄 𑀦𑀸𑀫 𑀩𑀸𑀳𑀺𑀭𑀓𑀲𑀸𑀲𑀦𑀁. 𑀢𑀢𑁆𑀣 𑀳𑀺 𑀲𑀢𑁆𑀣𑀸𑀧𑀺 𑀅𑀲𑀩𑁆𑀩𑀜𑁆𑀜𑀽 𑀳𑁄𑀢𑀺, 𑀥𑀫𑁆𑀫𑁄𑀧𑀺 𑀤𑀼𑀭𑀓𑁆𑀔𑀸𑀢𑁄, 𑀕𑀡𑁄𑀧𑀺 𑀤𑀼𑀧𑁆𑀧𑀝𑀺𑀧𑀦𑁆𑀦𑁄. 𑀬𑁄 𑀘 𑀲𑀫𑀸𑀤𑀧𑁂𑀢𑀻𑀢𑀺 𑀬𑁄 𑀆𑀘𑀭𑀺𑀬𑀧𑀼𑀕𑁆𑀕𑀮𑁄 𑀲𑀫𑀸𑀤𑀧𑁂𑀢𑀺. 𑀬𑀜𑁆𑀘 𑀲𑀫𑀸𑀤𑀧𑁂𑀢𑀻𑀢𑀺 𑀬𑀁 𑀅𑀦𑁆𑀢𑁂𑀯𑀸𑀲𑀺𑀓𑀁 𑀲𑀫𑀸𑀤𑀧𑁂𑀢𑀺. 𑀬𑁄 𑀘 𑀲𑀫𑀸𑀤𑀧𑀺𑀢𑁄 𑀢𑀣𑀢𑁆𑀢𑀸𑀬 𑀧𑀝𑀺𑀧𑀚𑁆𑀚𑀢𑀻𑀢𑀺 𑀬𑁄 𑀅𑀦𑁆𑀢𑁂𑀯𑀸𑀲𑀺𑀓𑁄 𑀆𑀘𑀭𑀺𑀬𑁂𑀦 𑀲𑀫𑀸𑀤𑀧𑀺𑀢𑁄 𑀢𑀲𑁆𑀲 𑀯𑀘𑀦𑀁 𑀓𑀭𑁄𑀦𑁆𑀢𑁄 𑀢𑀣𑀸𑀪𑀸𑀯𑀸𑀬 𑀧𑀝𑀺𑀧𑀚𑁆𑀚𑀢𑀺. 𑀩𑀳𑀼𑀁 𑀅𑀧𑀼𑀜𑁆𑀜𑀁 𑀧𑀲𑀯𑀦𑁆𑀢𑀻𑀢𑀺 𑀲𑀫𑀸𑀤𑀧𑀓𑁄 𑀳𑀺 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀲𑀼 𑀚𑀗𑁆𑀖𑀲𑀢𑀁 𑀲𑀫𑀸𑀤𑀧𑁂𑀦𑁆𑀢𑁄 𑀢𑁂𑀲𑀁 𑀲𑀩𑁆𑀩𑁂𑀲𑀫𑁆𑀧𑀺 𑀅𑀓𑀼𑀲𑀮𑁂𑀦 𑀲𑀫𑀓𑀫𑁂𑀯 𑀅𑀓𑀼𑀲𑀮𑀁 𑀧𑀸𑀧𑀼𑀡𑀸𑀢𑀺. 𑀢𑁂𑀦𑀸𑀳 𑁋 ‘‘𑀲𑀩𑁆𑀩𑁂 𑀢𑁂 𑀩𑀳𑀼𑀁 𑀅𑀧𑀼𑀜𑁆𑀜𑀁 𑀧𑀲𑀯𑀦𑁆𑀢𑀻’’𑀢𑀺.

𑁩𑁧𑁩. 𑀲𑁆𑀯𑀸𑀓𑁆𑀔𑀸𑀢𑁂𑀢𑀺 𑀲𑀼𑀝𑁆𑀞𑀼 𑀅𑀓𑁆𑀔𑀸𑀢𑁂 𑀲𑀼𑀤𑁂𑀲𑀺𑀢𑁂. 𑀏𑀯𑀭𑀽𑀧𑁂 𑀳𑀺 𑀥𑀫𑁆𑀫𑀯𑀺𑀦𑀬𑁂 𑀲𑀢𑁆𑀣𑀸 𑀘 𑀲𑀩𑁆𑀩𑀜𑁆𑀜𑀽 𑀳𑁄𑀢𑀺, 𑀥𑀫𑁆𑀫𑁄 𑀘 𑀲𑁆𑀯𑀸𑀓𑁆𑀔𑀸𑀢𑁄, 𑀕𑀡𑁄 𑀘 𑀲𑀼𑀧𑁆𑀧𑀝𑀺𑀧𑀦𑁆𑀦𑁄. 𑀲𑀩𑁆𑀩𑁂 𑀢𑁂 𑀩𑀳𑀼𑀁 𑀧𑀼𑀜𑁆𑀜𑀁 𑀧𑀲𑀯𑀦𑁆𑀢𑀻𑀢𑀺 𑀲𑀫𑀸𑀤𑀧𑀓𑁄 𑀳𑀺 𑀪𑀺𑀓𑁆𑀔𑀽 𑀧𑀺𑀡𑁆𑀟𑀸𑀬 𑀧𑀯𑀺𑀝𑁆𑀞𑁂 𑀤𑀺𑀲𑁆𑀯𑀸 𑀬𑀸𑀕𑀼𑀪𑀢𑁆𑀢𑀸𑀤𑀻𑀦𑀺 𑀲𑀫𑀸𑀤𑀧𑁂𑀦𑁆𑀢𑁄 𑀲𑀩𑁆𑀩𑁂𑀲𑀫𑁆𑀧𑀺 𑀤𑀸𑀬𑀓𑀸𑀦𑀁 𑀓𑀼𑀲𑀮𑁂𑀦 𑀲𑀫𑀓𑀁 𑀓𑀼𑀲𑀮𑀁 𑀧𑀸𑀧𑀼𑀡𑀸𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀩𑀳𑀼𑀁 𑀧𑀼𑀜𑁆𑀜𑀁 𑀧𑀲𑀯𑀦𑁆𑀢𑀻’’𑀢𑀺.

𑁩𑁧𑁪. 𑀤𑀸𑀬𑀓𑁂𑀦 𑀫𑀢𑁆𑀢𑀸 𑀚𑀸𑀦𑀺𑀢𑀩𑁆𑀩𑀸𑀢𑀺 𑀤𑀸𑀬𑀓𑀧𑀼𑀕𑁆𑀕𑀮𑁂𑀦 𑀧𑀫𑀸𑀡𑀁 𑀚𑀸𑀦𑀺𑀢𑀩𑁆𑀩𑀁, 𑀧𑀫𑀸𑀡𑁂𑀦 𑀤𑀸𑀢𑀩𑁆𑀩𑀁, 𑀧𑀽𑀭𑁂𑀢𑁆𑀯𑀸 𑀅𑀢𑀺𑀭𑁂𑀓𑀁 𑀦 𑀤𑀸𑀢𑀩𑁆𑀩𑀁. 𑀦 𑀤𑀸𑀢𑀩𑁆𑀩𑀦𑁆𑀢𑀺 𑀳𑀺 𑀅𑀯𑀢𑁆𑀯𑀸 𑀧𑀫𑀸𑀡𑀯𑀲𑁂𑀦 𑀣𑁄𑀓𑀁 𑀤𑀸𑀢𑀩𑁆𑀩𑀦𑁆𑀢𑀺 𑀯𑀼𑀢𑁆𑀢𑀁. 𑀓𑀲𑁆𑀫𑀸? 𑀧𑀽𑀭𑁂𑀢𑁆𑀯𑀸 𑀅𑀢𑀺𑀭𑁂𑀓𑁂 𑀤𑀺𑀦𑁆𑀦𑁂𑀧𑀺 𑀳𑀺 𑀅𑀢𑀺𑀭𑁂𑀓𑀸 𑀫𑀦𑀼𑀲𑁆𑀲𑀲𑀫𑁆𑀧𑀢𑁆𑀢𑀺 𑀯𑀸 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺 𑀯𑀸 𑀦𑀺𑀩𑁆𑀩𑀸𑀦𑀲𑀫𑁆𑀧𑀢𑁆𑀢𑀺 𑀯𑀸 𑀦𑀢𑁆𑀣𑀺. 𑀦𑁄 𑀧𑀝𑀺𑀕𑁆𑀕𑀸𑀳𑀓𑁂𑀦𑀸𑀢𑀺 𑀧𑀝𑀺𑀕𑁆𑀕𑀸𑀳𑀓𑀲𑁆𑀲 𑀧𑀦 𑀫𑀢𑁆𑀢𑀁 𑀚𑀸𑀦𑀺𑀢𑁆𑀯𑀸 𑀧𑀝𑀺𑀕𑁆𑀕𑀳𑀡𑀓𑀺𑀘𑁆𑀘𑀁 𑀦𑀸𑀫 𑀦𑀢𑁆𑀣𑀺. 𑀓𑀲𑁆𑀫𑀸? 𑀢𑀲𑁆𑀲 𑀳𑀺 𑀫𑀢𑁆𑀢𑀁 𑀜𑀢𑁆𑀯𑀸 𑀧𑀽𑀭𑁂𑀢𑀩𑁆𑀩𑀸 𑀫𑀢𑁆𑀢𑀧𑀝𑀺𑀕𑁆𑀕𑀳𑀡𑀫𑀽𑀮𑀺𑀓𑀸 𑀅𑀧𑁆𑀧𑀺𑀘𑁆𑀙𑀧𑀝𑀺𑀧𑀤𑀸 𑀦𑀸𑀫 𑀦𑀢𑁆𑀣𑀺. 𑀬𑀢𑁆𑀢𑀓𑀁 𑀧𑀦 𑀮𑀪𑀢𑀺, 𑀢𑀢𑁆𑀢𑀓𑀁 𑀕𑀳𑁂𑀢𑀩𑁆𑀩𑀁. 𑀅𑀢𑀺𑀭𑁂𑀓𑀕𑁆𑀕𑀳𑀡𑀫𑀽𑀮𑀁 𑀳𑀺𑀲𑁆𑀲 𑀧𑀼𑀢𑁆𑀢𑀤𑀸𑀭𑀪𑀭𑀡𑀁 𑀪𑀯𑀺𑀲𑁆𑀲𑀢𑀺.

𑁩𑁧𑁫. 𑀧𑀝𑀺𑀕𑁆𑀕𑀸𑀳𑀓𑁂𑀦 𑀫𑀢𑁆𑀢𑀸 𑀚𑀸𑀦𑀺𑀢𑀩𑁆𑀩𑀸𑀢𑀺 𑀧𑀝𑀺𑀕𑁆𑀕𑀸𑀳𑀓𑀧𑀼𑀕𑁆𑀕𑀮𑁂𑀦 𑀧𑀫𑀸𑀡𑀁 𑀚𑀸𑀦𑀺𑀢𑀩𑁆𑀩𑀁. 𑀓𑀣𑀁? 𑀢𑁂𑀦 𑀳𑀺 𑀤𑀸𑀬𑀓𑀲𑁆𑀲 𑀯𑀲𑁄 𑀯𑁂𑀤𑀺𑀢𑀩𑁆𑀩𑁄, 𑀤𑁂𑀬𑁆𑀬𑀥𑀫𑁆𑀫𑀲𑁆𑀲 𑀯𑀲𑁄 𑀯𑁂𑀤𑀺𑀢𑀩𑁆𑀩𑁄, 𑀅𑀢𑁆𑀢𑀦𑁄 𑀣𑀸𑀫𑁄 𑀯𑁂𑀤𑀺𑀢𑀩𑁆𑀩𑁄. 𑀬𑀤𑀺 𑀳𑀺 𑀤𑁂𑀬𑁆𑀬𑀥𑀫𑁆𑀫𑁄 𑀩𑀳𑀼 𑀳𑁄𑀢𑀺, 𑀤𑀸𑀬𑀓𑁄 𑀅𑀧𑁆𑀧𑀁 𑀤𑀸𑀢𑀼𑀓𑀸𑀫𑁄, 𑀤𑀸𑀬𑀓𑀲𑁆𑀲 𑀯𑀲𑁂𑀦 𑀅𑀧𑁆𑀧𑀁 𑀕𑀡𑁆𑀳𑀺𑀢𑀩𑁆𑀩𑀁. 𑀤𑁂𑀬𑁆𑀬𑀥𑀫𑁆𑀫𑁄 𑀅𑀧𑁆𑀧𑁄, 𑀤𑀸𑀬𑀓𑁄 𑀩𑀳𑀼𑀁 𑀤𑀸𑀢𑀼𑀓𑀸𑀫𑁄, 𑀤𑁂𑀬𑁆𑀬𑀥𑀫𑁆𑀫𑀲𑁆𑀲 𑀯𑀲𑁂𑀦 𑀅𑀧𑁆𑀧𑀁 𑀕𑀡𑁆𑀳𑀺𑀢𑀩𑁆𑀩𑀁. 𑀤𑁂𑀬𑁆𑀬𑀥𑀫𑁆𑀫𑁄𑀧𑀺 𑀩𑀳𑀼, 𑀤𑀸𑀬𑀓𑁄𑀧𑀺 𑀩𑀳𑀼𑀁 𑀤𑀸𑀢𑀼𑀓𑀸𑀫𑁄, 𑀅𑀢𑁆𑀢𑀦𑁄 𑀣𑀸𑀫𑀁 𑀜𑀢𑁆𑀯𑀸 𑀧𑀫𑀸𑀡𑁂𑀦𑁂𑀯 𑀕𑀡𑁆𑀳𑀺𑀢𑀩𑁆𑀩𑀁. 𑀏𑀯𑀁 𑀫𑀢𑁆𑀢𑀁 𑀜𑀢𑁆𑀯𑀸 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑁄 𑀳𑀺 𑀅𑀧𑁆𑀧𑀺𑀘𑁆𑀙𑀧𑀝𑀺𑀧𑀤𑀁 𑀧𑀽𑀭𑁂𑀢𑀺. 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀮𑀸𑀪𑁄 𑀉𑀧𑁆𑀧𑀚𑁆𑀚𑀢𑀺, 𑀉𑀧𑁆𑀧𑀦𑁆𑀦𑁄 𑀮𑀸𑀪𑁄 𑀣𑀸𑀯𑀭𑁄𑀯 𑀳𑁄𑀢𑀺. 𑀅𑀧𑁆𑀧𑀲𑀦𑁆𑀦𑀸 𑀧𑀲𑀻𑀤𑀦𑁆𑀢𑀺, 𑀧𑀲𑀦𑁆𑀦𑀸𑀧𑀺 𑀪𑀺𑀬𑁆𑀬𑁄 𑀧𑀲𑀸𑀤𑀫𑀸𑀧𑀚𑁆𑀚𑀦𑁆𑀢𑀺, 𑀫𑀳𑀸𑀚𑀦𑀲𑁆𑀲 𑀘𑀓𑁆𑀔𑀼𑀪𑀽𑀢𑁄 𑀳𑁄𑀢𑀺, 𑀲𑀸𑀲𑀦𑀁 𑀘𑀺𑀭𑀝𑁆𑀞𑀺𑀢𑀺𑀓𑀁 𑀓𑀭𑁄𑀢𑀺.

𑀢𑀢𑁆𑀭𑀺𑀫𑀸𑀦𑀺 𑀯𑀢𑁆𑀣𑀽𑀦𑀺 𑁋 𑀭𑁄𑀳𑀡𑀚𑀦𑀧𑀤𑁂 𑀓𑀺𑀭 𑀓𑀼𑀝𑀺𑀫𑁆𑀩𑀺𑀬𑀯𑀺𑀳𑀸𑀭𑁂 𑀏𑀓𑁄 𑀤𑀳𑀭𑁄 𑀤𑀼𑀩𑁆𑀪𑀺𑀓𑁆𑀔𑀲𑀫𑀬𑁂 𑀢𑀲𑁆𑀫𑀺𑀁 𑀕𑀸𑀫𑁂 𑀏𑀓𑀲𑁆𑀲 𑀓𑀫𑁆𑀫𑀓𑀸𑀭𑀲𑁆𑀲 𑀕𑁂𑀳𑁂 𑀪𑀼𑀜𑁆𑀚𑀦𑀢𑁆𑀣𑀸𑀬 𑀓𑀝𑀘𑁆𑀙𑀼𑀪𑀢𑁆𑀢𑀁 𑀕𑀳𑁂𑀢𑁆𑀯𑀸 𑀕𑀫𑀦𑀢𑁆𑀣𑀸𑀬 𑀘 𑀓𑀝𑀘𑁆𑀙𑀼𑀪𑀢𑁆𑀢𑀫𑁂𑀯 𑀮𑀪𑀢𑀺. 𑀲𑁄 𑀏𑀓𑀤𑀺𑀯𑀲𑀁 𑀢𑀲𑁆𑀫𑀺𑀁 𑀕𑁂𑀳𑁂 𑀏𑀓𑀁 𑀆𑀕𑀦𑁆𑀢𑀼𑀓𑀁 𑀤𑀺𑀲𑁆𑀯𑀸 𑀏𑀓𑀫𑁂𑀯 𑀓𑀝𑀘𑁆𑀙𑀼𑀪𑀢𑁆𑀢𑀁 𑀕𑀡𑁆𑀳𑀺. 𑀅𑀣𑀲𑁆𑀲 ‘‘𑀓𑁂𑀦 𑀓𑀸𑀭𑀡𑁂𑀦𑀸’’𑀢𑀺 𑀯𑀼𑀢𑁆𑀢𑁂 𑀢𑀫𑀢𑁆𑀣𑀁 𑀯𑀢𑁆𑀯𑀸 𑀲𑁄 𑀓𑀼𑀮𑀧𑀼𑀢𑁆𑀢𑁄 𑀧𑀲𑀻𑀤𑀺𑀢𑁆𑀯𑀸 ‘‘𑀅𑀫𑁆𑀳𑀸𑀓𑀁 𑀓𑀼𑀮𑀽𑀧𑀓𑀪𑀤𑀦𑁆𑀢𑁄 𑀏𑀯𑀭𑀽𑀧𑁄 𑀦𑀸𑀫𑀸’’𑀢𑀺 𑀭𑀸𑀚𑀤𑁆𑀯𑀸𑀭𑁂 𑀫𑀺𑀢𑁆𑀢𑀸𑀫𑀘𑁆𑀘𑀸𑀦𑀁 𑀓𑀣𑁂𑀲𑀺. 𑀢𑁂 𑀲𑀩𑁆𑀩𑁂𑀧𑀺 𑀢𑀲𑁆𑀲 𑀅𑀧𑁆𑀧𑀺𑀘𑁆𑀙𑀕𑀼𑀡𑁂 𑀧𑀲𑀦𑁆𑀦𑀸 𑀏𑀓𑀤𑀺𑀯𑀲𑁂𑀦𑁂𑀯 𑀲𑀝𑁆𑀞𑀺 𑀥𑀼𑀭𑀪𑀢𑁆𑀢𑀸𑀦𑀺 𑀞𑀧𑁂𑀲𑀼𑀁. 𑀏𑀯𑀁 𑀅𑀧𑁆𑀧𑀺𑀘𑁆𑀙𑁄 𑀅𑀦𑀼𑀧𑁆𑀧𑀦𑁆𑀦𑀮𑀸𑀪𑀁 𑀉𑀧𑁆𑀧𑀸𑀤𑁂𑀢𑀺.

𑀲𑀤𑁆𑀥𑀸𑀢𑀺𑀲𑁆𑀲𑀫𑀳𑀸𑀭𑀸𑀚𑀸𑀧𑀺 𑀘𑀽𑀴𑀼𑀧𑀝𑁆𑀞𑀸𑀓𑀁 𑀢𑀺𑀲𑁆𑀲𑀸𑀫𑀘𑁆𑀘𑀁 𑀯𑀻𑀫𑀁𑀲𑀺𑀢𑁆𑀯𑀸 𑀢𑁂𑀦 𑀏𑀓𑀁 𑀢𑀺𑀢𑁆𑀢𑀺𑀭𑀁 𑀧𑀘𑀸𑀧𑁂𑀢𑁆𑀯𑀸 𑀆𑀳𑀭𑀸𑀧𑁂𑀲𑀺. 𑀅𑀣 𑀧𑀭𑀺𑀪𑁄𑀕𑀲𑀫𑀬𑁂 ‘‘𑀅𑀕𑁆𑀕𑀁 𑀤𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀲𑁆𑀲𑀸𑀫𑀻’’𑀢𑀺 𑀅𑀝𑁆𑀞𑀓𑀲𑀸𑀮𑀧𑀭𑀺𑀯𑁂𑀡𑁂 𑀫𑀳𑀸𑀣𑁂𑀭𑀲𑁆𑀲 𑀪𑀡𑁆𑀟𑀕𑁆𑀕𑀸𑀳𑀲𑀸𑀫𑀡𑁂𑀭𑀲𑁆𑀲 𑀢𑀺𑀢𑁆𑀢𑀺𑀭𑀫𑀁𑀲𑀁 𑀤𑁂𑀦𑁆𑀢𑁄 𑀢𑀲𑁆𑀫𑀺𑀁 𑀣𑁄𑀓𑀁𑀬𑁂𑀯 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑁂 𑀢𑀲𑁆𑀲 𑀅𑀧𑁆𑀧𑀺𑀘𑁆𑀙𑀕𑀼𑀡𑁂 𑀧𑀲𑀻𑀤𑀺𑀢𑁆𑀯𑀸 ‘‘𑀧𑀲𑀦𑁆𑀦𑁄𑀲𑁆𑀫𑀺, 𑀢𑀸𑀢, 𑀅𑀝𑁆𑀞 𑀢𑁂 𑀥𑀼𑀭𑀪𑀢𑁆𑀢𑀸𑀦𑀺 𑀤𑁂𑀫𑀻’’𑀢𑀺 𑀆𑀳. 𑀫𑀳𑀸𑀭𑀸𑀚, 𑀉𑀧𑀚𑁆𑀛𑀸𑀬𑀲𑁆𑀲 𑀤𑁂𑀫𑀻𑀢𑀺. 𑀅𑀧𑀭𑀸𑀦𑀺𑀧𑀺 𑀅𑀝𑁆𑀞 𑀤𑁂𑀫𑀻𑀢𑀺. 𑀢𑀸𑀦𑀺 𑀅𑀫𑁆𑀳𑀸𑀓𑀁 𑀆𑀘𑀭𑀺𑀬𑀲𑁆𑀲 𑀤𑁂𑀫𑀻𑀢𑀺. 𑀅𑀧𑀭𑀸𑀦𑀺𑀧𑀺 𑀅𑀝𑁆𑀞 𑀤𑀫𑁆𑀫𑀻𑀢𑀺. 𑀢𑀸𑀦𑀺 𑀲𑀫𑀸𑀦𑀼𑀧𑀚𑁆𑀛𑀸𑀬𑀸𑀦𑀁 𑀤𑀫𑁆𑀫𑀻𑀢𑀺. 𑀅𑀧𑀭𑀸𑀦𑀺𑀧𑀺 𑀅𑀝𑁆𑀞 𑀤𑀫𑁆𑀫𑀻𑀢𑀺. 𑀢𑀸𑀦𑀺 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀤𑀫𑁆𑀫𑀻𑀢𑀺. 𑀅𑀧𑀭𑀸𑀦𑀺𑀧𑀺 𑀅𑀝𑁆𑀞 𑀤𑀫𑁆𑀫𑀻𑀢𑀺. 𑀲𑀸𑀫𑀡𑁂𑀭𑁄 𑀅𑀥𑀺𑀯𑀸𑀲𑁂𑀲𑀺. 𑀏𑀯𑀫𑀲𑁆𑀲 𑀉𑀧𑁆𑀧𑀦𑁆𑀦𑁄 𑀮𑀸𑀪𑁄 𑀣𑀸𑀯𑀭𑁄 𑀳𑁄𑀢𑀺.

𑀅𑀧𑁆𑀧𑀲𑀦𑁆𑀦𑀸 𑀧𑀲𑀻𑀤𑀦𑁆𑀢𑀻𑀢𑀺 𑀏𑀢𑁆𑀣𑀧𑀺 𑁋 𑀤𑀻𑀖𑀩𑁆𑀭𑀸𑀳𑁆𑀫𑀡𑁄 𑀓𑀺𑀭 𑀩𑁆𑀭𑀸𑀳𑁆𑀫𑀡𑁂 𑀪𑁄𑀚𑁂𑀦𑁆𑀢𑁄 𑀧𑀜𑁆𑀘 𑀧𑀜𑁆𑀘 𑀪𑀢𑁆𑀢𑀲𑀭𑀓𑀸𑀦𑀺 𑀤𑀢𑁆𑀯𑀸 𑀲𑀦𑁆𑀢𑀧𑁆𑀧𑁂𑀢𑀼𑀁 𑀦𑀸𑀲𑀓𑁆𑀔𑀺. 𑀅𑀣𑁂𑀓𑀤𑀺𑀯𑀲𑀁 ‘‘𑀲𑀫𑀡𑀸 𑀓𑀺𑀭 𑀦𑀸𑀫 𑀅𑀧𑁆𑀧𑀺𑀘𑁆𑀙𑀸’’𑀢𑀺 𑀓𑀣𑀁 𑀲𑀼𑀢𑁆𑀯𑀸 𑀯𑀻𑀫𑀁𑀲𑀦𑀢𑁆𑀣𑀸𑀬 𑀪𑀢𑁆𑀢𑀁 𑀕𑀸𑀳𑀸𑀧𑁂𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀪𑀢𑁆𑀢𑀓𑀺𑀘𑁆𑀘𑀓𑀭𑀡𑀯𑁂𑀮𑀸𑀬 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀢𑀺𑀁𑀲𑀫𑀢𑁆𑀢𑁂 𑀪𑀺𑀓𑁆𑀔𑀽 𑀪𑁄𑀚𑀦𑀲𑀸𑀮𑀸𑀬𑀁 𑀪𑀼𑀜𑁆𑀚𑀦𑁆𑀢𑁂 𑀤𑀺𑀲𑁆𑀯𑀸 𑀏𑀓𑀁 𑀪𑀢𑁆𑀢𑀲𑀭𑀓𑀁 𑀕𑀳𑁂𑀢𑁆𑀯𑀸 𑀲𑀗𑁆𑀖𑀢𑁆𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑀁 𑀅𑀕𑀫𑀸𑀲𑀺. 𑀣𑁂𑀭𑁄 𑀅𑀗𑁆𑀕𑀼𑀮𑀺𑀁 𑀘𑀸𑀮𑁂𑀢𑁆𑀯𑀸 𑀣𑁄𑀓𑀫𑁂𑀯 𑀅𑀕𑁆𑀕𑀳𑁂𑀲𑀺. 𑀏𑀢𑁂𑀦𑁂𑀯 𑀦𑀺𑀬𑀸𑀫𑁂𑀦 𑀏𑀓𑀁 𑀪𑀢𑁆𑀢𑀲𑀭𑀓𑀁 𑀲𑀩𑁆𑀩𑁂𑀲𑀁 𑀲𑀫𑁆𑀧𑀸𑀧𑀼𑀡𑀺. 𑀢𑀢𑁄 𑀩𑁆𑀭𑀸𑀳𑁆𑀫𑀡𑁄 ‘‘𑀲𑀘𑁆𑀘𑁄𑀬𑁂𑀯 𑀏𑀢𑁂𑀲𑀁 𑀲𑀫𑀡𑀸𑀦𑀁 𑀕𑀼𑀡𑁄’’𑀢𑀺 𑀅𑀧𑁆𑀧𑀺𑀘𑁆𑀙𑀢𑀸𑀬 𑀧𑀲𑀦𑁆𑀦𑁄 𑀲𑀳𑀲𑁆𑀲𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀢𑀲𑁆𑀫𑀺𑀁𑀬𑁂𑀯 𑀯𑀺𑀳𑀸𑀭𑁂 𑀘𑁂𑀢𑀺𑀬𑀁 𑀓𑀸𑀭𑁂𑀲𑀺. 𑀏𑀯𑀁 𑀅𑀧𑁆𑀧𑀲𑀦𑁆𑀦𑀸 𑀧𑀲𑀻𑀤𑀦𑁆𑀢𑀺.

𑀧𑀲𑀦𑁆𑀦𑀸 𑀪𑀺𑀬𑁆𑀬𑁄 𑀧𑀲𑀻𑀤𑀦𑁆𑀢𑀻𑀢𑀺 𑀏𑀢𑁆𑀣 𑀯𑀢𑁆𑀣𑀼𑀦𑀸 𑀓𑀺𑀘𑁆𑀘𑀁 𑀦𑀢𑁆𑀣𑀺. 𑀧𑀲𑀦𑁆𑀦𑀸𑀦𑀜𑁆𑀳𑀺 𑀅𑀧𑁆𑀧𑀺𑀘𑁆𑀙𑀁 𑀤𑀺𑀲𑁆𑀯𑀸 𑀧𑀲𑀸𑀤𑁄 𑀪𑀺𑀬𑁆𑀬𑁄 𑀯𑀟𑁆𑀠𑀢𑀺𑀬𑁂𑀯.

𑀫𑀚𑁆𑀛𑀦𑁆𑀢𑀺𑀓𑀢𑀺𑀲𑁆𑀲𑀢𑁆𑀣𑁂𑀭𑀲𑀤𑀺𑀲𑁂 𑀧𑀦 𑀅𑀧𑁆𑀧𑀺𑀘𑁆𑀙𑁂 𑀤𑀺𑀲𑁆𑀯𑀸 𑀫𑀳𑀸𑀚𑀦𑁄 𑀅𑀧𑁆𑀧𑀺𑀘𑁆𑀙𑁄 𑀪𑀯𑀺𑀢𑀼𑀁 𑀫𑀜𑁆𑀜𑀢𑀻𑀢𑀺 𑀅𑀧𑁆𑀧𑀺𑀘𑁆𑀙𑁄 𑀫𑀳𑀸𑀚𑀦𑀲𑁆𑀲 𑀘𑀓𑁆𑀔𑀼𑀪𑀽𑀢𑁄 𑀦𑀸𑀫 𑀳𑁄𑀢𑀺.

‘‘𑀅𑀧𑁆𑀧𑀺𑀘𑁆𑀙𑀢𑀸, 𑀪𑀺𑀓𑁆𑀔𑀯𑁂, 𑀲𑀤𑁆𑀥𑀫𑁆𑀫𑀲𑁆𑀲 𑀞𑀺𑀢𑀺𑀬𑀸 𑀅𑀲𑀫𑁆𑀫𑁄𑀲𑀸𑀬 𑀅𑀦𑀦𑁆𑀢𑀭𑀥𑀸𑀦𑀸𑀬 𑀲𑀁𑀯𑀢𑁆𑀢𑀢𑀻’’𑀢𑀺 (𑀅. 𑀦𑀺. 𑁧.𑁧𑁧𑁬-𑁧𑁨𑁯) 𑀯𑀘𑀦𑀢𑁄 𑀧𑀦 𑀅𑀧𑁆𑀧𑀺𑀘𑁆𑀙𑁄 𑀲𑀸𑀲𑀦𑀁 𑀘𑀺𑀭𑀝𑁆𑀞𑀺𑀢𑀺𑀓𑀁 𑀓𑀭𑁄𑀢𑀺 𑀦𑀸𑀫.

𑀦𑁄 𑀤𑀸𑀬𑀓𑁂𑀦𑀸𑀢𑀺 𑀲𑁆𑀯𑀸𑀓𑁆𑀔𑀸𑀢𑁂 𑀥𑀫𑁆𑀫𑀯𑀺𑀦𑀬𑁂 𑀧𑀦 𑀤𑀸𑀬𑀓𑀲𑁆𑀲 𑀧𑀫𑀸𑀡𑀁 𑀜𑀢𑁆𑀯𑀸 𑀤𑀸𑀢𑀩𑁆𑀩𑀓𑀺𑀘𑁆𑀘𑀁 𑀦𑀸𑀫 𑀦𑀢𑁆𑀣𑀺. 𑀬𑀢𑁆𑀢𑀓𑁄 𑀤𑁂𑀬𑁆𑀬𑀥𑀫𑁆𑀫𑁄 𑀅𑀢𑁆𑀣𑀺, 𑀢𑀢𑁆𑀢𑀓𑀁 𑀅𑀯𑀢𑁆𑀣𑀭𑀺𑀢𑁆𑀯𑀸 𑀤𑀸𑀢𑀼𑀁 𑀯𑀝𑁆𑀝𑀢𑀺. 𑀅𑀯𑀢𑁆𑀣𑀭𑀺𑀢𑁆𑀯𑀸 𑀤𑀺𑀦𑁆𑀦𑀓𑀸𑀭𑀡𑀸 𑀳𑀺 𑀏𑀲 𑀫𑀦𑀼𑀲𑁆𑀲𑀲𑀫𑁆𑀧𑀢𑁆𑀢𑀺𑀁, 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀁, 𑀦𑀺𑀩𑁆𑀩𑀸𑀦𑀲𑀫𑁆𑀧𑀢𑁆𑀢𑀺𑀜𑁆𑀘 𑀅𑀯𑀢𑁆𑀣𑀭𑀺𑀢𑁆𑀯𑀸 𑀉𑀢𑁆𑀢𑀭𑀼𑀢𑁆𑀢𑀭𑀺 𑀧𑀡𑀻𑀢𑀧𑀡𑀻𑀢𑀫𑁂𑀯 𑀮𑀪𑀢𑀺.

𑁩𑁧𑁬. 𑀬𑁄 𑀆𑀭𑀤𑁆𑀥𑀯𑀻𑀭𑀺𑀬𑁄, 𑀲𑁄 𑀤𑀼𑀓𑁆𑀔𑀁 𑀯𑀺𑀳𑀭𑀢𑀻𑀢𑀺 𑀧𑀜𑁆𑀘𑀸𑀢𑀧𑀢𑀧𑁆𑀧𑀦𑀫𑀭𑀼𑀧𑁆𑀧𑀧𑀸𑀢𑀧𑀢𑀦𑀸𑀤𑀺𑀘𑁆𑀘𑀸𑀦𑀼𑀧𑀭𑀺𑀯𑀢𑁆𑀢𑀦-𑀉𑀓𑁆𑀓𑀼𑀝𑀺𑀓𑀧𑁆𑀧𑀥𑀸𑀦𑀸𑀤𑀻𑀦𑀺 𑀅𑀦𑀼𑀬𑀼𑀜𑁆𑀚𑀦𑁆𑀢𑁄 𑀤𑀺𑀝𑁆𑀞𑁂 𑀘𑁂𑀯 𑀥𑀫𑁆𑀫𑁂 𑀤𑀼𑀓𑁆𑀔𑀁 𑀯𑀺𑀳𑀭𑀢𑀺, 𑀢𑀲𑁆𑀲𑁂𑀯 𑀩𑀸𑀳𑀺𑀭𑀲𑀫𑀬𑁂 𑀲𑀫𑀸𑀤𑀺𑀦𑁆𑀦𑀲𑁆𑀲 𑀢𑀧𑀘𑀭𑀡𑀲𑁆𑀲 𑀯𑀺𑀧𑀸𑀓𑁂𑀦 𑀦𑀺𑀭𑀬𑁂 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀲𑀫𑁆𑀧𑀭𑀸𑀬𑁂𑀧𑀺 𑀤𑀼𑀓𑁆𑀔𑀁 𑀯𑀺𑀳𑀭𑀢𑀺.

𑁩𑁧𑁭. 𑀬𑁄 𑀓𑀼𑀲𑀻𑀢𑁄, 𑀲𑁄 𑀤𑀼𑀓𑁆𑀔𑀁 𑀯𑀺𑀳𑀭𑀢𑀻𑀢𑀺 𑀅𑀬𑀫𑁆𑀧𑀺 𑀤𑀺𑀝𑁆𑀞𑁂 𑀥𑀫𑁆𑀫𑁂 𑀘𑁂𑀯 𑀲𑀫𑁆𑀧𑀭𑀸𑀬𑁂 𑀘 𑀤𑀼𑀓𑁆𑀔𑀁 𑀯𑀺𑀳𑀭𑀢𑀺. 𑀓𑀣𑀁? 𑀬𑀲𑁆𑀲 𑀳𑀺 𑀧𑀩𑁆𑀩𑀚𑀺𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑁄 𑀦𑀢𑁆𑀣𑀺, 𑀩𑀼𑀤𑁆𑀥𑀯𑀘𑀦𑀁 𑀦 𑀉𑀕𑁆𑀕𑀡𑁆𑀳𑀸𑀢𑀺, 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀯𑀢𑁆𑀢𑀁 𑀦 𑀓𑀭𑁄𑀢𑀺, 𑀘𑁂𑀢𑀺𑀬𑀗𑁆𑀕𑀡𑀩𑁄𑀥𑀺𑀬𑀗𑁆𑀕𑀡𑀯𑀢𑁆𑀢𑀁 𑀦 𑀓𑀭𑁄𑀢𑀺. 𑀚𑀦𑀲𑁆𑀲 𑀧𑀦 𑀲𑀤𑁆𑀥𑀸𑀤𑁂𑀬𑁆𑀬𑀁 𑀅𑀧𑀘𑁆𑀘𑀯𑁂𑀓𑁆𑀔𑀺𑀢𑀧𑀭𑀺𑀪𑁄𑀕𑁂𑀦 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀤𑀺𑀯𑀲𑀁 𑀲𑁂𑀬𑁆𑀬𑀲𑀼𑀔𑀁 𑀧𑀲𑁆𑀲𑀲𑀼𑀔𑀁 𑀅𑀦𑀼𑀬𑀼𑀜𑁆𑀚𑀺𑀢𑁆𑀯𑀸 𑀧𑀩𑀼𑀤𑁆𑀥𑀓𑀸𑀮𑁂 𑀢𑀬𑁄 𑀯𑀺𑀢𑀓𑁆𑀓𑁂 𑀯𑀺𑀢𑀓𑁆𑀓𑁂𑀢𑀺. 𑀲𑁄 𑀓𑀢𑀺𑀧𑀸𑀳𑁂𑀦𑁂𑀯 𑀪𑀺𑀓𑁆𑀔𑀼𑀪𑀸𑀯𑀸 𑀘𑀯𑀢𑀺? 𑀏𑀯𑀁 𑀤𑀺𑀝𑁆𑀞𑀥𑀫𑁆𑀫𑁂 𑀘 𑀤𑀼𑀓𑁆𑀔𑀁 𑀯𑀺𑀳𑀭𑀢𑀺. 𑀧𑀩𑁆𑀩𑀚𑀺𑀢𑁆𑀯𑀸 𑀧𑀦 𑀲𑀫𑀡𑀥𑀫𑁆𑀫𑀲𑁆𑀲 𑀲𑀫𑁆𑀫𑀸 𑀅𑀓𑀢𑀢𑁆𑀢𑀸 𑀘 𑁋

‘‘𑀓𑀼𑀲𑁄 𑀬𑀣𑀸 𑀤𑀼𑀕𑁆𑀕𑀳𑀺𑀢𑁄, 𑀳𑀢𑁆𑀣𑀫𑁂𑀯𑀸𑀦𑀼𑀓𑀦𑁆𑀢𑀢𑀺;

𑀲𑀸𑀫𑀜𑁆𑀜𑀁 𑀤𑀼𑀧𑁆𑀧𑀭𑀸𑀫𑀝𑁆𑀞𑀁, 𑀦𑀺𑀭𑀬𑀸𑀬𑀼𑀧𑀓𑀟𑁆𑀠𑀢𑀻’’𑀢𑀺. (𑀥. 𑀧. 𑁩𑁧𑁧) 𑁋

𑀅𑀧𑀸𑀬𑀲𑁆𑀫𑀺𑀁𑀬𑁂𑀯 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀢𑀺. 𑀏𑀯𑀁 𑀲𑀫𑁆𑀧𑀭𑀸𑀬𑁂𑀧𑀺 𑀤𑀼𑀓𑁆𑀔𑀁 𑀯𑀺𑀳𑀭𑀢𑀺.

𑁩𑁧𑁮. 𑀬𑁄 𑀓𑀼𑀲𑀻𑀢𑁄, 𑀲𑁄 𑀲𑀼𑀔𑀁 𑀯𑀺𑀳𑀭𑀢𑀻𑀢𑀺 𑀓𑀸𑀮𑁂𑀦 𑀓𑀸𑀮𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑁂 𑀢𑀧𑀘𑀭𑀡𑁂 𑀓𑀺𑀜𑁆𑀘𑀺 𑀓𑀺𑀜𑁆𑀘𑀺 𑀢𑀧𑀘𑀭𑀡𑀁 𑀓𑀢𑁆𑀯𑀸 𑀓𑀸𑀮𑁂𑀦 𑀓𑀸𑀮𑀁 𑀑𑀤𑀸𑀢𑀯𑀢𑁆𑀣𑀯𑀲𑀦𑁄 𑀫𑀸𑀮𑀸𑀕𑀦𑁆𑀥𑀯𑀺𑀮𑁂𑀧𑀦𑀥𑀭𑁄 𑀫𑀥𑀼𑀭𑀪𑁄𑀚𑀦𑀁 𑀪𑀼𑀜𑁆𑀚𑀦𑁆𑀢𑁄 𑀫𑀼𑀤𑀼𑀓𑀸𑀲𑀼 𑀲𑁂𑀬𑁆𑀬𑀸𑀲𑀼 𑀲𑀬𑀦𑁆𑀢𑁄 𑀤𑀺𑀝𑁆𑀞𑁂 𑀥𑀫𑁆𑀫𑁂 𑀘𑁂𑀯 𑀲𑀼𑀔𑀁 𑀯𑀺𑀳𑀭𑀢𑀺 𑀲𑀫𑁆𑀧𑀭𑀸𑀬𑁂 𑀘. 𑀲𑁄 𑀳𑀺 𑀢𑀲𑁆𑀲 𑀢𑀧𑀘𑀭𑀡𑀲𑁆𑀲 𑀕𑀸𑀴𑁆𑀳𑀁 𑀅𑀕𑁆𑀕𑀳𑀺𑀢𑀢𑁆𑀢𑀸 𑀦𑀸𑀢𑀺𑀩𑀳𑀼𑀁 𑀦𑀺𑀭𑀬𑁂 𑀤𑀼𑀓𑁆𑀔𑀁 𑀅𑀦𑀼𑀪𑀯𑀢𑀺. 𑀢𑀲𑁆𑀫𑀸 𑀲𑀫𑁆𑀧𑀭𑀸𑀬𑁂 𑀲𑀼𑀔𑀁 𑀯𑀺𑀳𑀭𑀢𑀺 𑀦𑀸𑀫.

𑁩𑁧𑁯. 𑀬𑁄 𑀆𑀭𑀤𑁆𑀥𑀯𑀻𑀭𑀺𑀬𑁄, 𑀲𑁄 𑀲𑀼𑀔𑀁 𑀯𑀺𑀳𑀭𑀢𑀻𑀢𑀺 𑀆𑀭𑀤𑁆𑀥𑀯𑀻𑀭𑀺𑀬𑁄 𑀳𑀺 𑀧𑀩𑁆𑀩𑀚𑀺𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀯𑀢𑁆𑀢𑁂𑀲𑀼 𑀧𑀭𑀺𑀧𑀽𑀭𑀓𑀸𑀭𑀻 𑀳𑁄𑀢𑀺, 𑀩𑀼𑀤𑁆𑀥𑀯𑀘𑀦𑀁 𑀉𑀕𑁆𑀕𑀡𑁆𑀳𑀸𑀢𑀺, 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑁂 𑀓𑀫𑁆𑀫𑀁 𑀓𑀭𑁄𑀢𑀺. 𑀅𑀣𑀲𑁆𑀲 𑀯𑀢𑁆𑀢𑀧𑀽𑀭𑀡𑀜𑁆𑀘𑁂𑀯 𑀉𑀕𑁆𑀕𑀳𑀺𑀢𑀩𑀼𑀤𑁆𑀥𑀯𑀘𑀦𑀜𑁆𑀘 𑀲𑀫𑀡𑀥𑀫𑁆𑀫𑀓𑀺𑀭𑀺𑀬𑀜𑁆𑀘 𑀆𑀯𑀚𑁆𑀚𑁂𑀦𑁆𑀢𑀲𑁆𑀲 𑀘𑀺𑀢𑁆𑀢𑀁 𑀧𑀲𑀻𑀤𑀢𑀺. 𑀏𑀯𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀼𑀔𑀁 𑀯𑀺𑀳𑀭𑀢𑀺. 𑀤𑀺𑀝𑁆𑀞𑀥𑀫𑁆𑀫𑁂 𑀧𑀦 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀦𑀺𑀩𑁆𑀩𑀢𑁆𑀢𑀪𑀯𑁂 𑀔𑀺𑀧𑁆𑀧𑀸𑀪𑀺𑀜𑁆𑀜𑁄 𑀳𑁄𑀢𑀻𑀢𑀺 𑀲𑀫𑁆𑀧𑀭𑀸𑀬𑁂𑀧𑀺 𑀲𑀼𑀔𑀁 𑀯𑀺𑀳𑀭𑀢𑀺 𑀦𑀸𑀫.

𑁩𑁨𑁦. 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀫𑀢𑁆𑀢𑀓𑁄𑀧𑀺 𑀕𑀽𑀣𑁄 𑀤𑀼𑀕𑁆𑀕𑀦𑁆𑀥𑁄 𑀳𑁄𑀢𑀻𑀢𑀺 𑀇𑀤𑀁 𑀲𑀼𑀢𑁆𑀢𑀁 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀬𑀁 𑀯𑀼𑀢𑁆𑀢𑀁. 𑀓𑀢𑀭𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀬𑀦𑁆𑀢𑀺? 𑀦𑀯𑀓𑀦𑀺𑀧𑀸𑀢𑁂 (𑀅. 𑀦𑀺. 𑁯.𑁧𑁨) 𑀲𑀢𑁆𑀢𑀼𑀧𑁆𑀧𑀸𑀤𑀲𑀼𑀢𑁆𑀢 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀬𑀁. 𑀢𑀣𑀸𑀕𑀢𑁄 𑀳𑀺 𑀢𑀁 𑀅𑀢𑁆𑀣𑀁 𑀓𑀣𑁂𑀦𑁆𑀢𑁄 𑁋 ‘‘𑀦𑀯 𑀧𑀼𑀕𑁆𑀕𑀮𑀸 𑀦𑀺𑀭𑀬𑀢𑁄 𑀫𑀼𑀢𑁆𑀢𑀸, 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀢𑁄 𑀫𑀼𑀢𑁆𑀢𑀸, 𑀧𑁂𑀢𑁆𑀢𑀺𑀯𑀺𑀲𑀬𑀢𑁄 𑀫𑀼𑀢𑁆𑀢𑀸’’𑀢𑀺 𑀓𑀣𑁂𑀲𑀺. 𑀅𑀣𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀲𑀘𑁂 𑀔𑁄 𑀧𑀦 𑀫𑁂 𑀧𑀼𑀢𑁆𑀢𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀔𑀻𑀡𑀦𑀺𑀭𑀬𑀫𑁆𑀳𑀸 𑀔𑀻𑀡𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀓𑀸 𑀔𑀻𑀡𑀧𑁂𑀢𑁆𑀢𑀺𑀯𑀺𑀲𑀬𑀸 𑀔𑀻𑀡𑀸𑀧𑀸𑀬𑀤𑀼𑀕𑁆𑀕𑀢𑀺𑀯𑀺𑀦𑀺𑀧𑀸𑀢𑀸𑀢𑀺 𑀫𑀜𑁆𑀜𑀫𑀸𑀦𑀸 𑀉𑀧𑀭𑀺𑀫𑀕𑁆𑀕𑀨𑀮𑀢𑁆𑀣𑀸𑀬 𑀯𑀸𑀬𑀫𑀺𑀢𑀼𑀁 𑀦 𑀫𑀜𑁆𑀜𑁂𑀬𑁆𑀬𑀼𑀁, 𑀢𑁂𑀲𑀁 𑀲𑀁𑀯𑁂𑀕𑀁 𑀚𑀦𑁂𑀲𑁆𑀲𑀸𑀫𑀻’’𑀢𑀺 𑀲𑀁𑀯𑁂𑀕𑀚𑀦𑀦𑀢𑁆𑀣𑀁 ‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂’’𑀢𑀺 𑀇𑀫𑀁 𑀲𑀼𑀢𑁆𑀢𑀫𑀸𑀭𑀪𑀺. 𑀢𑀢𑁆𑀣 𑀅𑀧𑁆𑀧𑀫𑀢𑁆𑀢𑀓𑁄𑀢𑀺 𑀣𑁄𑀓𑀫𑀢𑁆𑀢𑀓𑁄 𑀧𑀭𑀺𑀢𑁆𑀢𑀧𑁆𑀧𑀫𑀸𑀡𑁄, 𑀅𑀦𑁆𑀢𑀫𑀲𑁄 𑀓𑀼𑀲𑀕𑁆𑀕𑁂𑀦𑀧𑀺 𑀕𑀳𑁂𑀢𑁆𑀯𑀸 𑀉𑀧𑀲𑀺𑀗𑁆𑀖𑀺𑀬𑀫𑀸𑀦𑁄 𑀤𑀼𑀕𑁆𑀕𑀦𑁆𑀥𑁄𑀯 𑀳𑁄𑀢𑀺. 𑀅𑀧𑁆𑀧𑀫𑀢𑁆𑀢𑀓𑀫𑁆𑀧𑀺 𑀪𑀯𑀁 𑀦 𑀯𑀡𑁆𑀡𑁂𑀫𑀻𑀢𑀺 𑀅𑀧𑁆𑀧𑀫𑀢𑁆𑀢𑀓𑀫𑁆𑀧𑀺 𑀓𑀸𑀮𑀁 𑀪𑀯𑁂 𑀧𑀝𑀺𑀲𑀦𑁆𑀥𑀺𑀁 𑀦 𑀯𑀡𑁆𑀡𑀬𑀸𑀫𑀺. 𑀇𑀤𑀸𑀦𑀺𑀲𑁆𑀲 𑀉𑀧𑀫𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 𑁋 𑀅𑀦𑁆𑀢𑀫𑀲𑁄 𑀅𑀘𑁆𑀙𑀭𑀸𑀲𑀗𑁆𑀖𑀸𑀢𑀫𑀢𑁆𑀢𑀫𑁆𑀧𑀻𑀢𑀺. 𑀲𑀩𑁆𑀩𑀦𑁆𑀢𑀺𑀫𑁂𑀦 𑀧𑀭𑀺𑀘𑁆𑀙𑁂𑀤𑁂𑀦 𑀤𑁆𑀯𑁂 𑀅𑀗𑁆𑀕𑀼𑀮𑀺𑀬𑁄 𑀏𑀓𑀢𑁄 𑀓𑀢𑁆𑀯𑀸 𑀧𑀳𑀭𑀡𑀫𑀢𑁆𑀢𑀫𑁆𑀧𑀺 𑀓𑀸𑀮𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀢𑀢𑀺𑀬𑀯𑀕𑁆𑀕𑀯𑀡𑁆𑀡𑀦𑀸.

𑁧𑁬. 𑀏𑀓𑀥𑀫𑁆𑀫𑀧𑀸𑀴𑀺

(𑁧𑁬) 𑁪. 𑀏𑀓𑀥𑀫𑁆𑀫𑀧𑀸𑀴𑀺-𑀘𑀢𑀼𑀢𑁆𑀣𑀯𑀕𑁆𑀕𑀯𑀡𑁆𑀡𑀦𑀸

𑁩𑁨𑁨. 𑀘𑀢𑀼𑀢𑁆𑀣𑀯𑀕𑁆𑀕𑀲𑁆𑀲 𑀧𑀞𑀫𑁂 𑀚𑀫𑁆𑀩𑀼𑀤𑀻𑀧𑁂𑀢𑀺 𑀚𑀫𑁆𑀩𑀼𑀬𑀸 𑀧𑀜𑁆𑀜𑀸𑀢𑁄 𑀧𑀸𑀓𑀝𑁄 𑀤𑀻𑀧𑁄𑀢𑀺 𑀚𑀫𑁆𑀩𑀼𑀤𑀻𑀧𑁄. 𑀇𑀫𑀲𑁆𑀲 𑀓𑀺𑀭 𑀤𑀻𑀧𑀲𑁆𑀲 𑀲𑀜𑁆𑀜𑀸𑀡𑀪𑀽𑀢𑀸 𑀬𑁄𑀚𑀦𑀲𑀢𑀼𑀩𑁆𑀩𑁂𑀥𑀸 𑀧𑀡𑁆𑀡𑀸𑀲𑀬𑁄𑀚𑀦𑀲𑀸𑀔𑀸 𑀧𑀜𑁆𑀘𑀤𑀲𑀬𑁄𑀚𑀦𑀸𑀯𑀝𑁆𑀝𑀓𑁆𑀔𑀦𑁆𑀥𑀸 𑀳𑀺𑀫𑀯𑀦𑁆𑀢𑀧𑀩𑁆𑀩𑀢𑁂 𑀚𑀸𑀢𑀸 𑀓𑀧𑁆𑀧𑀝𑁆𑀞𑀸𑀬𑀺𑀦𑀻 𑀫𑀳𑀸𑀚𑀫𑁆𑀩𑀽 𑀦𑀸𑀫 𑀅𑀢𑁆𑀣𑀺, 𑀢𑀸𑀬 𑀅𑀬𑀁 𑀤𑀻𑀧𑁄 𑀚𑀫𑁆𑀩𑀼𑀤𑀻𑀧𑁄𑀢𑀺 𑀯𑀼𑀘𑁆𑀘𑀢𑀺. 𑀬𑀣𑀸 𑀘 𑀇𑀫𑀲𑁆𑀫𑀺𑀁 𑀤𑀻𑀧𑁂 𑀚𑀫𑁆𑀩𑀼𑀭𑀼𑀓𑁆𑀔𑁄 𑀓𑀧𑁆𑀧𑀝𑁆𑀞𑀸𑀬𑀻, 𑀢𑀣𑀸 𑀅𑀧𑀭𑀕𑁄𑀬𑀸𑀦𑁂 𑀓𑀤𑀫𑁆𑀩𑀭𑀼𑀓𑁆𑀔𑁄, 𑀉𑀢𑁆𑀢𑀭𑀓𑀼𑀭𑀽𑀲𑀼 𑀓𑀧𑁆𑀧𑀭𑀼𑀓𑁆𑀔𑁄, 𑀧𑀼𑀩𑁆𑀩𑀯𑀺𑀤𑁂𑀳𑁂 𑀲𑀺𑀭𑀻𑀲𑀭𑀼𑀓𑁆𑀔𑁄, 𑀅𑀲𑀼𑀭𑀸𑀦𑀁 𑀘𑀺𑀢𑁆𑀢𑀧𑀸𑀝𑀮𑀺𑀭𑀼𑀓𑁆𑀔𑁄, 𑀲𑀼𑀧𑀡𑁆𑀡𑀸𑀦𑀁 𑀲𑀺𑀫𑁆𑀩𑀮𑀺𑀭𑀼𑀓𑁆𑀔𑁄, 𑀤𑁂𑀯𑀸𑀦𑀁 𑀧𑀸𑀭𑀺𑀘𑁆𑀙𑀢𑁆𑀢𑀓𑁄𑀢𑀺 𑀇𑀫𑁂𑀧𑀺 𑀓𑀧𑁆𑀧𑀝𑁆𑀞𑀸𑀬𑀺𑀦𑁄𑀯.

‘‘𑀧𑀸𑀝𑀮𑀻 𑀲𑀺𑀫𑁆𑀩𑀮𑀻 𑀚𑀫𑁆𑀩𑀽, 𑀤𑁂𑀯𑀸𑀦𑀁 𑀧𑀸𑀭𑀺𑀘𑁆𑀙𑀢𑁆𑀢𑀓𑁄;

𑀓𑀤𑀫𑁆𑀩𑁄 𑀓𑀧𑁆𑀧𑀭𑀼𑀓𑁆𑀔𑁄 𑀘, 𑀲𑀺𑀭𑀻𑀲𑁄 𑀪𑀯𑀢𑀺 𑀲𑀢𑁆𑀢𑀫𑁄’’𑀢𑀺.

𑀆𑀭𑀸𑀫𑀭𑀸𑀫𑀡𑁂𑀬𑁆𑀬𑀓𑀦𑁆𑀢𑀺 𑀧𑀼𑀧𑁆𑀨𑀸𑀭𑀸𑀫𑀨𑀮𑀸𑀭𑀸𑀫𑀸𑀦𑀁 𑀭𑀸𑀫𑀡𑁂𑀬𑁆𑀬𑀓𑀁 𑀯𑁂𑀴𑀼𑀯𑀦-𑀚𑀻𑀯𑀓𑀫𑁆𑀩𑀯𑀦-𑀚𑁂𑀢𑀯𑀦𑀧𑀼𑀩𑁆𑀩𑀸𑀭𑀸𑀫𑀲𑀤𑀺𑀲𑀁. 𑀢𑀁 𑀇𑀫𑀲𑁆𑀫𑀺𑀁 𑀚𑀫𑁆𑀩𑀼𑀤𑀻𑀧𑁂 𑀅𑀧𑁆𑀧𑀫𑀢𑁆𑀢𑀓𑀁 𑀧𑀭𑀺𑀢𑁆𑀢𑀓𑀁, 𑀦 𑀩𑀳𑀼𑀓𑀦𑁆𑀢𑀺 𑀅𑀢𑁆𑀣𑁄. 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀏𑀢𑁆𑀣 𑀯𑀦𑀭𑀸𑀫𑀡𑁂𑀬𑁆𑀬𑀓𑀦𑁆𑀢𑀺 𑀦𑀸𑀕𑀯𑀦𑀲𑀸𑀮𑀯𑀦𑀘𑀫𑁆𑀧𑀓𑀯𑀦𑀸𑀤𑀺𑀲𑀤𑀺𑀲𑀁 𑀯𑀗𑁆𑀓𑀧𑀩𑁆𑀩𑀢𑀳𑀺𑀫𑀯𑀦𑁆𑀢𑀧𑀩𑁆𑀩𑀢𑀧𑀤𑁂𑀲𑀸𑀤𑀻𑀲𑀼 𑀅𑀭𑀜𑁆𑀜𑀯𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀪𑀽𑀫𑀺𑀭𑀸𑀫𑀡𑁂𑀬𑁆𑀬𑀓𑀦𑁆𑀢𑀺 𑀚𑁂𑀢𑀯𑀦𑀯𑀺𑀳𑀸𑀭𑀫𑀕𑀥𑀓𑁆𑀔𑁂𑀢𑁆𑀢𑀸𑀤𑀺𑀲𑀤𑀺𑀲𑀁 𑀲𑀫𑀁 𑀪𑀽𑀫𑀺𑀝𑁆𑀞𑀸𑀦𑀁. 𑀧𑁄𑀓𑁆𑀔𑀭𑀡𑀺𑀭𑀸𑀫𑀡𑁂𑀬𑁆𑀬𑀓𑀦𑁆𑀢𑀺 𑀚𑁂𑀢𑀯𑀦𑀧𑁄𑀓𑁆𑀔𑀭𑀡𑀺𑀕𑀕𑁆𑀕𑀭𑀸𑀧𑁄𑀓𑁆𑀔𑀭𑀡𑀺𑀲𑀤𑀺𑀲𑀸𑀦𑀁 𑀯𑀝𑁆𑀝𑀘𑀢𑀼𑀭𑀲𑁆𑀲𑀤𑀻𑀖𑀯𑀗𑁆𑀓𑀸𑀤𑀺𑀲𑀡𑁆𑀞𑀸𑀦𑀸𑀦𑀁 𑀧𑁄𑀓𑁆𑀔𑀭𑀡𑀻𑀦𑀁 𑀲𑀦𑁆𑀦𑀺𑀯𑁂𑀲𑀦𑀝𑁆𑀞𑀸𑀦𑀁. 𑀉𑀓𑁆𑀓𑀽𑀮𑀯𑀺𑀓𑀽𑀮𑀦𑁆𑀢𑀺 𑀉𑀓𑁆𑀓𑀽𑀮𑀜𑁆𑀘 𑀯𑀺𑀓𑀽𑀮𑀜𑁆𑀘. 𑀢𑀢𑁆𑀣 𑀉𑀓𑁆𑀓𑀽𑀮𑀁 𑀉𑀦𑁆𑀦𑀢𑀝𑁆𑀞𑀸𑀦𑀁, 𑀯𑀺𑀓𑀽𑀮𑀁 𑀦𑀺𑀦𑁆𑀦𑀝𑁆𑀞𑀸𑀦𑀁. 𑀦𑀤𑀻𑀯𑀺𑀤𑀼𑀕𑁆𑀕𑀦𑁆𑀢𑀺 𑀦𑀤𑀻𑀦𑀁 𑀪𑀺𑀦𑁆𑀦𑀝𑁆𑀞𑀸𑀦𑀁 𑀢𑀁 𑀤𑀼𑀕𑁆𑀕𑀫𑀢𑁆𑀢𑀸 𑀦𑀤𑀻𑀯𑀺𑀤𑀼𑀕𑁆𑀕𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀔𑀸𑀡𑀼𑀓𑀡𑁆𑀝𑀓𑀝𑁆𑀞𑀸𑀦𑀦𑁆𑀢𑀺 𑀢𑀢𑁆𑀣𑀚𑀸𑀢𑀓𑀸𑀦𑀜𑁆𑀘𑁂𑀯 𑀆𑀳𑀭𑀺𑀬𑀫𑀸𑀦𑀸𑀦𑀜𑁆𑀘 𑀔𑀸𑀡𑀼𑀓𑀡𑁆𑀝𑀓𑀸𑀤𑀻𑀦𑀁 𑀧𑀢𑀺𑀝𑁆𑀞𑀸𑀦𑀝𑁆𑀞𑀸𑀦𑀁. 𑀧𑀩𑁆𑀩𑀢𑀯𑀺𑀲𑀫𑀦𑁆𑀢𑀺 𑀕𑀺𑀭𑀺𑀯𑀺𑀲𑀫𑀁. 𑀬𑁂 𑀑𑀤𑀓𑀸𑀢𑀺 𑀬𑁂 𑀘 𑀉𑀤𑀓𑁂 𑀚𑀸𑀬𑀦𑁆𑀢𑀺, 𑀢𑁂𑀬𑁂𑀯 𑀩𑀳𑀼𑀢𑀭𑀸. 𑀇𑀢𑁄 𑀓𑀺𑀭 𑀲𑀼𑀯𑀡𑁆𑀡𑀪𑀽𑀫𑀺 𑀲𑀢𑁆𑀢𑀫𑀢𑁆𑀢𑀸𑀦𑀺 𑀬𑁄𑀚𑀦𑀲𑀢𑀸𑀦𑀺 𑀳𑁄𑀢𑀺, 𑀏𑀓𑁂𑀦 𑀯𑀸𑀢𑁂𑀦 𑀕𑀘𑁆𑀙𑀦𑁆𑀢𑀻 𑀦𑀸𑀯𑀸 𑀲𑀢𑁆𑀢𑀳𑀺 𑀅𑀳𑁄𑀭𑀢𑁆𑀢𑁂𑀳𑀺 𑀕𑀘𑁆𑀙𑀢𑀺. 𑀅𑀣𑁂𑀓𑀲𑁆𑀫𑀺𑀁 𑀲𑀫𑀬𑁂 𑀏𑀯𑀁 𑀕𑀘𑁆𑀙𑀦𑁆𑀢𑀻 𑀦𑀸𑀯𑀸 𑀲𑀢𑁆𑀢𑀸𑀳𑀫𑁆𑀧𑀺 𑀦𑀦𑁆𑀤𑀺𑀬𑀸𑀯𑀝𑁆𑀝𑀫𑀘𑁆𑀙𑀧𑀺𑀝𑁆𑀞𑁂𑀦𑁂𑀯 𑀕𑀢𑀸. 𑀏𑀯𑀁 𑀑𑀤𑀓𑀸𑀦𑀁 𑀲𑀢𑁆𑀢𑀸𑀦𑀁 𑀩𑀳𑀼𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄.

𑀅𑀧𑀺𑀘 𑀣𑀮𑀝𑁆𑀞𑀸𑀦𑀲𑁆𑀲 𑀧𑀭𑀺𑀢𑁆𑀢𑀪𑀸𑀯𑁂𑀦 𑀉𑀤𑀓𑀲𑁆𑀲 𑀘 𑀩𑀳𑀼𑀪𑀸𑀯𑁂𑀦𑀸𑀧𑀺 𑀅𑀬𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀬𑀣𑀸 𑀳𑀺 𑀫𑀳𑀸𑀢𑀴𑀸𑀓𑁂 𑀏𑀓𑁄𑀯 𑀉𑀧𑁆𑀧𑀮𑀕𑀘𑁆𑀙𑁄 𑀅𑀲𑁆𑀲, 𑀢𑀲𑁆𑀲 𑀘𑀢𑁆𑀢𑀸𑀭𑀺 𑀘 𑀧𑀡𑁆𑀡𑀸𑀦𑀺, 𑀫𑀚𑁆𑀛𑁂 𑀘 𑀏𑀓𑀁 𑀉𑀧𑁆𑀧𑀮𑀫𑀓𑀼𑀮𑀁 𑀅𑀲𑁆𑀲. 𑀏𑀯𑀫𑁂𑀯𑀁 𑀘𑀢𑁆𑀢𑀸𑀭𑀺 𑀧𑀡𑁆𑀡𑀸𑀦𑀺 𑀯𑀺𑀬 𑀘𑀢𑁆𑀢𑀸𑀭𑁄 𑀤𑀻𑀧𑀸, 𑀫𑀚𑁆𑀛𑁂 𑀉𑀧𑁆𑀧𑀮𑀫𑀓𑀼𑀮𑀁 𑀯𑀺𑀬 𑀲𑀺𑀦𑁂𑀭𑀼𑀧𑀩𑁆𑀩𑀢𑁄, 𑀲𑁂𑀲𑀁 𑀉𑀤𑀓𑀁 𑀯𑀺𑀬 𑀉𑀤𑀓𑀧𑀭𑀺𑀓𑁆𑀔𑀺𑀢𑁆𑀢𑁄 𑀑𑀓𑀸𑀲𑁄. 𑀢𑀲𑁆𑀲 𑀫𑀳𑀦𑁆𑀢𑀪𑀸𑀯𑁄 𑀇𑀤𑁆𑀥𑀺𑀫𑀦𑁆𑀢𑀸𑀦𑀁 𑀧𑀸𑀓𑀝𑁄 𑀳𑁄𑀢𑀺. 𑀢𑁂𑀲𑀜𑁆𑀳𑀺 𑀆𑀓𑀸𑀲𑁂𑀦 𑀕𑀘𑁆𑀙𑀦𑁆𑀢𑀸𑀦𑀁 𑀘𑀢𑁆𑀢𑀸𑀭𑁄 𑀫𑀳𑀸𑀤𑀻𑀧𑀸 𑀘𑀢𑁆𑀢𑀸𑀭𑀺 𑀧𑀡𑁆𑀡𑀸𑀦𑀺 𑀯𑀺𑀬 𑀉𑀧𑀝𑁆𑀞𑀳𑀦𑁆𑀢𑀺, 𑀲𑀺𑀦𑁂𑀭𑀼𑀧𑀩𑁆𑀩𑀢𑁄 𑀫𑀚𑁆𑀛𑁂 𑀉𑀧𑁆𑀧𑀮𑀫𑀓𑀼𑀮𑀁 𑀯𑀺𑀬, 𑀲𑁂𑀲𑀁 𑀉𑀤𑀓𑀁 𑀯𑀺𑀬 𑀉𑀤𑀓𑀧𑀭𑀺𑀓𑁆𑀔𑀺𑀢𑁆𑀢𑁄 𑀑𑀓𑀸𑀲𑁄. 𑀏𑀯𑀁 𑀫𑀳𑀦𑁆𑀢𑁂 𑀉𑀤𑀓𑁂 𑀚𑀸𑀢𑀢𑁆𑀢𑀸 𑀑𑀤𑀓𑀸𑀯 𑀩𑀳𑀼𑀢𑀭𑀸 𑀯𑁂𑀤𑀺𑀢𑀩𑁆𑀩𑀸.

𑁩𑁨𑁩. 𑀤𑀼𑀢𑀺𑀬𑀸𑀤𑀻𑀲𑀼 𑀅𑀜𑁆𑀜𑀢𑁆𑀭 𑀫𑀦𑀼𑀲𑁆𑀲𑁂𑀳𑀻𑀢𑀺 𑀇𑀥 𑀘𑀢𑁆𑀢𑀸𑀭𑁄 𑀅𑀧𑀸𑀬𑀸 𑀅𑀜𑁆𑀜𑀢𑁆𑀭 𑀫𑀦𑀼𑀲𑁆𑀲𑁂𑀳𑀻𑀢𑀺 𑀅𑀥𑀺𑀧𑁆𑀧𑁂𑀢𑀸.

𑀫𑀚𑁆𑀛𑀺𑀫𑁂𑀲𑀼 𑀚𑀦𑀧𑀤𑁂𑀲𑀽𑀢𑀺 ‘‘𑀧𑀼𑀭𑀢𑁆𑀣𑀺𑀫𑀸𑀬 𑀤𑀺𑀲𑀸𑀬 𑀕𑀚𑀗𑁆𑀕𑀮𑀁 𑀦𑀸𑀫 𑀦𑀺𑀕𑀫𑁄, 𑀢𑀲𑁆𑀲 𑀧𑀭𑁂𑀦 𑀫𑀳𑀸𑀲𑀸𑀮𑀸, 𑀢𑀢𑁄 𑀧𑀭𑀸 𑀧𑀘𑁆𑀘𑀦𑁆𑀢𑀺𑀫𑀸 𑀚𑀦𑀧𑀤𑀸, 𑀑𑀭𑀢𑁄 𑀫𑀚𑁆𑀛𑁂. 𑀧𑀼𑀭𑀢𑁆𑀣𑀺𑀫𑀤𑀓𑁆𑀔𑀺𑀡𑀸𑀬 𑀤𑀺𑀲𑀸𑀬 𑀲𑀮𑁆𑀮𑀯𑀢𑀻 𑀦𑀸𑀫 𑀦𑀤𑀻, 𑀢𑀢𑁄 𑀧𑀭𑀸 𑀧𑀘𑁆𑀘𑀦𑁆𑀢𑀺𑀫𑀸 𑀚𑀦𑀧𑀤𑀸, 𑀑𑀭𑀢𑁄 𑀫𑀚𑁆𑀛𑁂. 𑀤𑀓𑁆𑀔𑀺𑀡𑀸𑀬 𑀤𑀺𑀲𑀸𑀬 𑀲𑁂𑀢𑀓𑀡𑁆𑀡𑀺𑀓𑀁 𑀦𑀸𑀫 𑀦𑀺𑀕𑀫𑁄, 𑀢𑀢𑁄 𑀧𑀭𑀸 𑀧𑀘𑁆𑀘𑀦𑁆𑀢𑀺𑀫𑀸 𑀚𑀦𑀧𑀤𑀸, 𑀑𑀭𑀢𑁄 𑀫𑀚𑁆𑀛𑁂. 𑀧𑀘𑁆𑀙𑀺𑀫𑀸𑀬 𑀤𑀺𑀲𑀸𑀬 𑀣𑀽𑀡𑀁 𑀦𑀸𑀫 𑀩𑁆𑀭𑀸𑀳𑁆𑀫𑀡𑀕𑀸𑀫𑁄, 𑀢𑀢𑁄 𑀧𑀭𑀸 𑀧𑀘𑁆𑀘𑀦𑁆𑀢𑀺𑀫𑀸 𑀚𑀦𑀧𑀤𑀸, 𑀑𑀭𑀢𑁄 𑀫𑀚𑁆𑀛𑁂. 𑀉𑀢𑁆𑀢𑀭𑀸𑀬 𑀤𑀺𑀲𑀸𑀬 𑀉𑀲𑀻𑀭𑀤𑁆𑀥𑀚𑁄 𑀦𑀸𑀫 𑀧𑀩𑁆𑀩𑀢𑁄, 𑀢𑀢𑁄 𑀧𑀭𑀸 𑀧𑀘𑁆𑀘𑀦𑁆𑀢𑀺𑀫𑀸 𑀚𑀦𑀧𑀤𑀸, 𑀑𑀭𑀢𑁄 𑀫𑀚𑁆𑀛𑁂’’𑀢𑀺 (𑀫𑀳𑀸𑀯. 𑁨𑁫𑁯) 𑀏𑀯𑀁 𑀧𑀭𑀺𑀘𑁆𑀙𑀺𑀦𑁆𑀦𑁂 𑀚𑀦𑀧𑀤𑁂𑀢𑀺 𑀅𑀢𑁆𑀣𑁄. 𑀅𑀬𑀜𑁆𑀳𑀺 𑀚𑀦𑀧𑀤𑁄 𑀫𑀼𑀤𑀺𑀗𑁆𑀕𑀲𑀡𑁆𑀞𑀸𑀦𑁄 𑀉𑀚𑀼𑀓𑁂𑀦 𑀓𑀢𑁆𑀣𑀘𑀺 𑀅𑀲𑀻𑀢𑀺𑀬𑁄𑀚𑀦𑁄 𑀳𑁄𑀢𑀺, 𑀓𑀢𑁆𑀣𑀘𑀺 𑀬𑁄𑀚𑀦𑀲𑀢𑀺𑀓𑁄, 𑀓𑀢𑁆𑀣𑀘𑀺 𑀤𑁆𑀯𑀺𑀬𑁄𑀚𑀦𑀲𑀢𑀺𑀓𑁄, 𑀫𑀚𑁆𑀛𑁂𑀦 𑀧𑀦 𑀢𑀺𑀬𑁄𑀚𑀦𑀲𑀢𑀺𑀓𑁄, 𑀧𑀭𑀺𑀬𑀦𑁆𑀢𑀧𑀭𑀺𑀓𑁆𑀔𑁂𑀧𑁂𑀦 𑀦𑀯𑀫𑀢𑁆𑀢𑀬𑁄𑀚𑀦𑀲𑀢𑀺𑀓𑁄 𑀳𑁄𑀢𑀺. 𑀏𑀢𑁆𑀢𑀓𑁂 𑀞𑀸𑀦𑁂 𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀫𑀳𑀸𑀲𑀸𑀯𑀓𑀸 𑀩𑀼𑀤𑁆𑀥𑀼𑀧𑀝𑁆𑀞𑀸𑀓𑀸 𑀩𑀼𑀤𑁆𑀥𑀲𑀸𑀯𑀓𑀸 𑀩𑀼𑀤𑁆𑀥𑀫𑀸𑀢𑀸 𑀩𑀼𑀤𑁆𑀥𑀧𑀺𑀢𑀸 𑀘𑀓𑁆𑀓𑀯𑀢𑁆𑀢𑀻 𑀭𑀸𑀚𑀸𑀢𑀺 𑀇𑀫𑁂 𑀲𑀢𑁆𑀢𑀸 𑀦𑀺𑀩𑁆𑀩𑀢𑁆𑀢𑀦𑁆𑀢𑀺. 𑀅𑀧𑀺𑀘 𑀉𑀧𑀸𑀤𑀸𑀬𑀼𑀧𑀸𑀤𑀸𑀬𑀸𑀧𑀺 𑀫𑀚𑁆𑀛𑀺𑀫𑀧𑀤𑁂𑀲𑁄 𑀮𑀩𑁆𑀪𑀢𑀺. 𑀲𑀓𑀮𑁄𑀧𑀺 𑀳𑀺 𑀚𑀫𑁆𑀩𑀼𑀤𑀻𑀧𑁄 𑀫𑀚𑁆𑀛𑀺𑀫𑀧𑀤𑁂𑀲𑁄 𑀦𑀸𑀫, 𑀲𑁂𑀲𑀤𑀻𑀧𑀸 𑀧𑀘𑁆𑀘𑀦𑁆𑀢𑀺𑀫𑀸 𑀚𑀦𑀧𑀤𑀸. 𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑁂 𑀅𑀦𑀼𑀭𑀸𑀥𑀧𑀼𑀭𑀁 𑀫𑀚𑁆𑀛𑀺𑀫𑀧𑀤𑁂𑀲𑁄 𑀦𑀸𑀫, 𑀲𑁂𑀲𑁄 𑀧𑀘𑁆𑀘𑀦𑁆𑀢𑁄𑀢𑀺 𑀏𑀯𑀁 𑀦𑀬𑁄 𑀯𑁂𑀤𑀺𑀢𑀩𑁆𑀩𑁄.

𑁩𑁨𑁪. 𑀧𑀜𑁆𑀜𑀯𑀦𑁆𑀢𑁄 𑀅𑀚𑀴𑀸 𑀅𑀦𑁂𑀴𑀫𑀽𑀕𑀸𑀢𑀺 𑀏𑀢𑁆𑀣 𑀓𑀫𑁆𑀫𑀲𑁆𑀲𑀓𑀢𑀧𑀜𑁆𑀜𑀸, 𑀛𑀸𑀦𑀧𑀜𑁆𑀜𑀸 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸, 𑀫𑀕𑁆𑀕𑀧𑀜𑁆𑀜𑀸, 𑀨𑀮𑀧𑀜𑁆𑀜𑀸𑀢𑀺 𑀏𑀢𑀸𑀳𑀺 𑀲𑀫𑀦𑁆𑀦𑀸𑀕𑀢𑀸 𑀧𑀜𑁆𑀜𑀯𑀦𑁆𑀢𑁄 𑀦𑀸𑀫, 𑀅𑀫𑀽𑀴𑁆𑀳𑀸 𑀅𑀚𑀴𑀸 𑀦𑀸𑀫. 𑀬𑁂𑀲𑀁 𑀏𑀴𑀸 𑀫𑀼𑀔𑀢𑁄 𑀦 𑀕𑀮𑀢𑀺, 𑀢𑁂 𑀅𑀦𑁂𑀴𑀫𑀽𑀕𑀸 𑀦𑀸𑀫, 𑀅𑀦𑁂𑀴𑀫𑀼𑀔𑀸 𑀦𑀺𑀤𑁆𑀤𑁄𑀲𑀫𑀼𑀔𑀸𑀢𑀺 𑀅𑀢𑁆𑀣𑁄. 𑀧𑀝𑀺𑀩𑀮𑀸𑀢𑀺 𑀲𑀫𑀢𑁆𑀣𑀸, 𑀓𑀸𑀬𑀩𑀮𑁂𑀦 𑀘𑁂𑀯 𑀜𑀸𑀡𑀩𑀮𑁂𑀦 𑀘 𑀲𑀫𑀦𑁆𑀦𑀸𑀕𑀢𑀸. 𑀅𑀢𑁆𑀣𑀫𑀜𑁆𑀜𑀸𑀢𑀼𑀦𑁆𑀢𑀺 𑀅𑀢𑁆𑀣𑀸𑀦𑀢𑁆𑀣𑀁 𑀓𑀸𑀭𑀡𑀸𑀓𑀸𑀭𑀡𑀁 𑀚𑀸𑀦𑀺𑀢𑀼𑀁. 𑀤𑀼𑀧𑁆𑀧𑀜𑁆𑀜𑀸𑀢𑀺 𑀅𑀧𑁆𑀧𑀜𑁆𑀜𑀸 𑀦𑀺𑀧𑁆𑀧𑀜𑁆𑀜𑀸. 𑀚𑀴𑀸𑀢𑀺 𑀫𑀦𑁆𑀤𑀸 𑀫𑁄𑀫𑀽𑀳𑀸.

𑁩𑁨𑁫. 𑀅𑀭𑀺𑀬𑁂𑀦 𑀧𑀜𑁆𑀜𑀸𑀘𑀓𑁆𑀔𑀼𑀦𑀸𑀢𑀺 𑀲𑀳𑀯𑀺𑀧𑀲𑁆𑀲𑀦𑁂𑀦 𑀫𑀕𑁆𑀕𑁂𑀦. 𑀅𑀯𑀺𑀚𑁆𑀚𑀸𑀕𑀢𑀸𑀢𑀺 𑀅𑀯𑀺𑀚𑁆𑀚𑀦𑁆𑀥𑀓𑀸𑀭𑁂𑀦 𑀲𑀫𑀦𑁆𑀦𑀸𑀕𑀢𑀸.

𑁩𑁨𑁬. 𑀬𑁂 𑀮𑀪𑀦𑁆𑀢𑀺 𑀢𑀣𑀸𑀕𑀢𑀁 𑀤𑀲𑁆𑀲𑀦𑀸𑀬𑀸𑀢𑀺 𑀬𑁂 𑀢𑀣𑀸𑀕𑀢𑀲𑁆𑀲 𑀕𑀼𑀡𑁂 𑀚𑀸𑀦𑀺𑀢𑁆𑀯𑀸 𑀢𑀣𑀸𑀕𑀢𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑁂𑀦 𑀧𑀲𑁆𑀲𑀺𑀢𑀼𑀁 𑀮𑀪𑀦𑁆𑀢𑀺.

𑁩𑁨𑁭. 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑀦𑁆𑀢𑀺 𑀢𑀣𑀸𑀕𑀢𑁂𑀦 𑀧𑀯𑁂𑀤𑀺𑀢𑀁 𑀧𑀓𑀸𑀲𑁂𑀢𑁆𑀯𑀸 𑀓𑀣𑀺𑀢𑀁. 𑀲𑀯𑀦𑀸𑀬𑀸𑀢𑀺 𑀲𑁄𑀢𑀯𑀺𑀜𑁆𑀜𑀸𑀡𑁂𑀦 𑀲𑁄𑀢𑀼𑀁.

𑁩𑁨𑁮. 𑀥𑀸𑀭𑁂𑀦𑁆𑀢𑀻𑀢𑀺 𑀦 𑀧𑀫𑁆𑀫𑀼𑀲𑁆𑀲𑀦𑁆𑀢𑀺.

𑁩𑁨𑁯. 𑀥𑀸𑀢𑀸𑀦𑀁 𑀥𑀫𑁆𑀫𑀸𑀦𑀁 𑀅𑀢𑁆𑀣𑀁 𑀉𑀧𑀧𑀭𑀺𑀓𑁆𑀔𑀦𑁆𑀢𑀻𑀢𑀺 𑀧𑀕𑀼𑀡𑀸𑀬 𑀧𑀸𑀴𑀺𑀬𑀸 𑀅𑀢𑁆𑀣𑀸𑀦𑀢𑁆𑀣𑀁 𑀉𑀧𑀧𑀭𑀺𑀓𑁆𑀔𑀦𑁆𑀢𑀺.

𑁩𑁩𑁦. 𑀅𑀢𑁆𑀣𑀫𑀜𑁆𑀜𑀸𑀬 𑀥𑀫𑁆𑀫𑀫𑀜𑁆𑀜𑀸𑀬𑀸𑀢𑀺 𑀅𑀝𑁆𑀞𑀓𑀣𑀜𑁆𑀘 𑀧𑀸𑀴𑀺𑀜𑁆𑀘 𑀚𑀸𑀦𑀺𑀢𑁆𑀯𑀸. 𑀥𑀫𑁆𑀫𑀸𑀦𑀼𑀥𑀫𑁆𑀫𑀁 𑀧𑀝𑀺𑀧𑀚𑁆𑀚𑀦𑁆𑀢𑀻𑀢𑀺 𑀅𑀦𑀼𑀮𑁄𑀫𑀧𑀝𑀺𑀧𑀤𑀁 𑀧𑀽𑀭𑁂𑀦𑁆𑀢𑀺.

𑁩𑁩𑁧. 𑀲𑀁𑀯𑁂𑀚𑀦𑀻𑀬𑁂𑀲𑀼 𑀞𑀸𑀦𑁂𑀲𑀽𑀢𑀺 𑀲𑀁𑀯𑁂𑀕𑀚𑀦𑀓𑁂𑀲𑀼 𑀓𑀸𑀭𑀡𑁂𑀲𑀼. 𑀲𑀁𑀯𑀺𑀚𑁆𑀚𑀦𑁆𑀢𑀻𑀢𑀺 𑀲𑀁𑀯𑁂𑀕𑀁 𑀆𑀧𑀚𑁆𑀚𑀦𑁆𑀢𑀺.

𑁩𑁩𑁨. 𑀬𑁄𑀦𑀺𑀲𑁄 𑀧𑀤𑀳𑀦𑁆𑀢𑀻𑀢𑀺 𑀉𑀧𑀸𑀬𑁂𑀦 𑀧𑀥𑀸𑀦𑀯𑀻𑀭𑀺𑀬𑀁 𑀓𑀭𑁄𑀦𑁆𑀢𑀺.

𑁩𑁩𑁩. 𑀯𑀯𑀲𑁆𑀲𑀕𑁆𑀕𑀸𑀭𑀫𑁆𑀫𑀡𑀦𑁆𑀢𑀺 𑀯𑀯𑀲𑁆𑀲𑀕𑁆𑀕𑁄 𑀯𑀼𑀘𑁆𑀘𑀢𑀺 𑀦𑀺𑀩𑁆𑀩𑀸𑀦𑀁, 𑀢𑀁 𑀆𑀭𑀫𑁆𑀫𑀡𑀁 𑀓𑀭𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀮𑀪𑀦𑁆𑀢𑀺 𑀲𑀫𑀸𑀥𑀺𑀦𑁆𑀢𑀺 𑀫𑀕𑁆𑀕𑀲𑀫𑀸𑀥𑀺𑀜𑁆𑀘 𑀨𑀮𑀲𑀫𑀸𑀥𑀺𑀜𑁆𑀘 𑀧𑀸𑀧𑀼𑀡𑀦𑁆𑀢𑀺.

𑁩𑁩𑁪. 𑀅𑀦𑁆𑀦𑀕𑁆𑀕𑀭𑀲𑀕𑁆𑀕𑀸𑀦𑀦𑁆𑀢𑀺 𑀉𑀢𑁆𑀢𑀫𑀦𑁆𑀦𑀸𑀦𑀜𑁆𑀘 𑀉𑀢𑁆𑀢𑀫𑀭𑀲𑀸𑀦𑀜𑁆𑀘. 𑀉𑀜𑁆𑀙𑁂𑀦 𑀓𑀧𑀸𑀮𑀸𑀪𑀢𑁂𑀦 𑀬𑀸𑀧𑁂𑀦𑁆𑀢𑀻𑀢𑀺 𑀉𑀜𑁆𑀙𑀸𑀘𑀸𑀭𑁂𑀦 𑀯𑀦𑀫𑀽𑀮𑀨𑀮𑀸𑀨𑀮𑁂𑀦 𑀯𑀸 𑀓𑀧𑀸𑀮𑁂𑀦 𑀆𑀪𑀢𑀪𑀢𑁆𑀢𑁂𑀦 𑀯𑀸 𑀬𑀸𑀧𑁂𑀦𑁆𑀢𑀺. 𑀏𑀢𑁆𑀣 𑀘 𑀬𑁄 𑀓𑀲𑁆𑀲𑀘𑀺𑀤𑁂𑀯 𑀔𑀸𑀤𑀦𑀻𑀬𑀲𑁆𑀲 𑀪𑁄𑀚𑀦𑀻𑀬𑀲𑁆𑀲 𑀅𑀢𑁆𑀣𑀸𑀬 𑀘𑀺𑀢𑁆𑀢𑁂 𑀉𑀧𑁆𑀧𑀦𑁆𑀦𑁂 𑀢𑀁𑀔𑀡𑀁𑀬𑁂𑀯 𑀦 𑀢𑀁 𑀮𑀪𑀢𑀺, 𑀅𑀬𑀁 𑀅𑀦𑁆𑀦𑀕𑁆𑀕𑀭𑀲𑀕𑁆𑀕𑀸𑀦𑀁 𑀦 𑀮𑀸𑀪𑀻 𑀦𑀸𑀫. 𑀬𑀲𑁆𑀲𑀧𑀺 𑀢𑀁𑀔𑀡𑀁𑀬𑁂𑀯 𑀮𑀪𑀺𑀢𑁆𑀯𑀸 𑀑𑀮𑁄𑀓𑁂𑀦𑁆𑀢𑀲𑁆𑀲 𑀯𑀡𑁆𑀡𑀕𑀦𑁆𑀥𑀭𑀲𑀸 𑀅𑀫𑀦𑀸𑀧𑀸 𑀳𑁄𑀦𑁆𑀢𑀺, 𑀅𑀬𑀫𑁆𑀧𑀺 𑀅𑀦𑁆𑀦𑀕𑁆𑀕𑀭𑀲𑀕𑁆𑀕𑀸𑀦𑀁 𑀦 𑀮𑀸𑀪𑀻 𑀦𑀸𑀫. 𑀬𑀲𑁆𑀲 𑀧𑀦 𑀯𑀡𑁆𑀡𑀕𑀦𑁆𑀥𑀭𑀲𑀸 𑀧𑀝𑀺𑀮𑀪𑀦𑁆𑀢𑀺, 𑀫𑀦𑀸𑀧𑀸 𑀳𑁄𑀦𑁆𑀢𑀺, 𑀅𑀬𑀁 𑀅𑀦𑁆𑀦𑀕𑁆𑀕𑀭𑀲𑀕𑁆𑀕𑀸𑀦𑀁 𑀮𑀸𑀪𑀻 𑀦𑀸𑀫. 𑀲𑁄 𑀉𑀢𑁆𑀢𑀫𑀓𑁄𑀝𑀺𑀬𑀸 𑀘𑀓𑁆𑀓𑀯𑀢𑁆𑀢𑀻 𑀭𑀸𑀚𑀸, 𑀳𑁂𑀝𑁆𑀞𑀺𑀫𑀓𑁄𑀝𑀺𑀬𑀸 𑀥𑀫𑁆𑀫𑀸𑀲𑁄𑀓𑁄 𑀯𑁂𑀤𑀺𑀢𑀩𑁆𑀩𑁄. 𑀲𑀗𑁆𑀔𑁂𑀧𑀢𑁄 𑀳𑀺 𑀬𑀲𑁆𑀲 𑀪𑀢𑁆𑀢𑀲𑁆𑀲 𑀏𑀓𑀧𑀸𑀢𑀺 𑀲𑀢𑀲𑀳𑀲𑁆𑀲𑀁 𑀅𑀕𑁆𑀖𑀢𑀺, 𑀇𑀤𑀁 𑀅𑀦𑁆𑀦𑀕𑁆𑀕𑀭𑀲𑀕𑁆𑀕𑀁 𑀦𑀸𑀫. 𑀬𑀁 𑀧𑀦 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑀁 𑀤𑀺𑀲𑁆𑀯𑀸 𑀫𑀦𑀼𑀲𑁆𑀲𑀸 𑀉𑀢𑁆𑀢𑀫𑀧𑀡𑀻𑀢𑀁 𑀪𑀢𑁆𑀢𑀁 𑀤𑁂𑀦𑁆𑀢𑀺, 𑀇𑀤𑀁 𑀓𑀺𑀁 𑀦𑀸𑀫𑀸𑀢𑀺? 𑀇𑀤𑀁 𑀉𑀜𑁆𑀙𑁂𑀦 𑀓𑀧𑀸𑀮𑀸𑀪𑀢𑁂𑀦 𑀬𑀸𑀧𑁂𑀦𑁆𑀢𑁂 𑀉𑀧𑀸𑀤𑀸𑀬 𑀅𑀦𑁆𑀦𑀕𑁆𑀕𑀭𑀲𑀕𑁆𑀕𑀁 𑀦𑀸𑀫 𑀯𑀼𑀘𑁆𑀘𑀢𑀻𑀢𑀺.

𑁩𑁩𑁫. 𑀅𑀢𑁆𑀣𑀭𑀲𑀲𑁆𑀲𑀸𑀢𑀺𑀆𑀤𑀻𑀲𑀼 𑀅𑀢𑁆𑀣𑀭𑀲𑁄 𑀦𑀸𑀫 𑀘𑀢𑁆𑀢𑀸𑀭𑀺 𑀲𑀸𑀫𑀜𑁆𑀜𑀨𑀮𑀸𑀦𑀺, 𑀥𑀫𑁆𑀫𑀭𑀲𑁄 𑀦𑀸𑀫 𑀘𑀢𑁆𑀢𑀸𑀭𑁄 𑀫𑀕𑁆𑀕𑀸, 𑀯𑀺𑀫𑀼𑀢𑁆𑀢𑀺𑀭𑀲𑁄 𑀦𑀸𑀫 𑀅𑀫𑀢𑀦𑀺𑀩𑁆𑀩𑀸𑀦𑀁. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀘𑀢𑀼𑀢𑁆𑀣𑀯𑀕𑁆𑀕𑀯𑀡𑁆𑀡𑀦𑀸.

𑀚𑀫𑁆𑀩𑀼𑀤𑀻𑀧𑀧𑁂𑀬𑁆𑀬𑀸𑀮𑁄 𑀦𑀺𑀝𑁆𑀞𑀺𑀢𑁄.