𑁧𑁪. 𑀏𑀢𑀤𑀕𑁆𑀕𑀯𑀕𑁆𑀕𑁄

(𑁧𑁪) 𑁧. 𑀧𑀞𑀫𑀏𑀢𑀤𑀕𑁆𑀕𑀯𑀕𑁆𑀕𑁄

𑀏𑀢𑀤𑀕𑁆𑀕𑀧𑀤𑀯𑀡𑁆𑀡𑀦𑀸

𑁧𑁮𑁮. 𑀏𑀢𑀤𑀕𑁆𑀕𑁂𑀲𑀼 𑀧𑀞𑀫𑀯𑀕𑁆𑀕𑀲𑁆𑀲 𑀧𑀞𑀫𑁂 𑀏𑀢𑀤𑀕𑁆𑀕𑀦𑁆𑀢𑀺 𑀏𑀢𑀁 𑀅𑀕𑁆𑀕𑀁. 𑀏𑀢𑁆𑀣 𑀘 𑀅𑀬𑀁 𑀅𑀕𑁆𑀕𑀲𑀤𑁆𑀤𑁄 𑀆𑀤𑀺𑀓𑁄𑀝𑀺𑀓𑁄𑀝𑁆𑀞𑀸𑀲𑀲𑁂𑀝𑁆𑀞𑁂𑀲𑀼 𑀤𑀺𑀲𑁆𑀲𑀢𑀺. ‘‘𑀅𑀚𑁆𑀚𑀢𑀕𑁆𑀕𑁂, 𑀲𑀫𑁆𑀫 𑀤𑁄𑀯𑀸𑀭𑀺𑀓, 𑀆𑀯𑀭𑀸𑀫𑀺 𑀤𑁆𑀯𑀸𑀭𑀁 𑀦𑀺𑀕𑀡𑁆𑀞𑀸𑀦𑀁 𑀦𑀺𑀕𑀡𑁆𑀞𑀻𑀦’’𑀦𑁆𑀢𑀺𑀆𑀤𑀻𑀲𑀼 (𑀫. 𑀦𑀺. 𑁨.𑁭𑁦) 𑀳𑀺 𑀆𑀤𑀺𑀫𑁆𑀳𑀺 𑀤𑀺𑀲𑁆𑀲𑀢𑀺. ‘‘𑀢𑁂𑀦𑁂𑀯 𑀅𑀗𑁆𑀕𑀼𑀮𑀕𑁆𑀕𑁂𑀦 𑀢𑀁 𑀅𑀗𑁆𑀕𑀼𑀮𑀕𑁆𑀕𑀁 𑀧𑀭𑀸𑀫𑀲𑁂𑀬𑁆𑀬 (𑀓𑀣𑀸. 𑁪𑁪𑁧), 𑀉𑀘𑁆𑀙𑀕𑁆𑀕𑀁 𑀯𑁂𑀴𑀕𑁆𑀕’’𑀦𑁆𑀢𑀺𑀆𑀤𑀻𑀲𑀼 𑀓𑁄𑀝𑀺𑀬𑀁. ‘‘𑀅𑀫𑁆𑀩𑀺𑀮𑀕𑁆𑀕𑀁 𑀯𑀸 𑀫𑀥𑀼𑀭𑀕𑁆𑀕𑀁 𑀯𑀸 𑀢𑀺𑀢𑁆𑀢𑀓𑀕𑁆𑀕𑀁 𑀯𑀸 (𑀲𑀁. 𑀦𑀺. 𑁫.𑁩𑁭𑁪), 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀯𑀺𑀳𑀸𑀭𑀕𑁆𑀕𑁂𑀦 𑀯𑀸 𑀧𑀭𑀺𑀯𑁂𑀡𑀕𑁆𑀕𑁂𑀦 𑀯𑀸 𑀪𑀸𑀚𑁂𑀢𑀼’’𑀦𑁆𑀢𑀺𑀆𑀤𑀻𑀲𑀼 (𑀘𑀽𑀴𑀯. 𑁩𑁧𑁮) 𑀓𑁄𑀝𑁆𑀞𑀸𑀲𑁂. ‘‘𑀬𑀸𑀯𑀢𑀸, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸 𑀅𑀧𑀤𑀸 𑀯𑀸…𑀧𑁂… 𑀢𑀣𑀸𑀕𑀢𑁄 𑀢𑁂𑀲𑀁 𑀅𑀕𑁆𑀕𑀫𑀓𑁆𑀔𑀸𑀬𑀢𑀻’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁪.𑁩𑁪; 𑀇𑀢𑀺𑀯𑀼. 𑁯𑁦) 𑀲𑁂𑀝𑁆𑀞𑁂. 𑀲𑁆𑀯𑀸𑀬𑀫𑀺𑀥 𑀓𑁄𑀝𑀺𑀬𑀫𑁆𑀧𑀺 𑀯𑀝𑁆𑀝𑀢𑀺 𑀲𑁂𑀝𑁆𑀞𑁂𑀧𑀺. 𑀢𑁂 𑀳𑀺 𑀣𑁂𑀭𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀞𑀸𑀦𑁂 𑀓𑁄𑀝𑀺𑀪𑀽𑀢𑀸𑀢𑀺𑀧𑀺 𑀅𑀕𑁆𑀕𑀸, 𑀲𑁂𑀝𑁆𑀞𑀪𑀽𑀢𑀸𑀢𑀺𑀧𑀺. 𑀢𑀲𑁆𑀫𑀸 𑀏𑀢𑀤𑀕𑁆𑀕𑀦𑁆𑀢𑀺 𑀏𑀲𑀸 𑀓𑁄𑀝𑀺 𑀏𑀲𑁄 𑀲𑁂𑀝𑁆𑀞𑁄𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄. 𑀏𑀲𑁂𑀯 𑀦𑀬𑁄 𑀲𑀩𑁆𑀩𑀲𑀼𑀢𑁆𑀢𑁂𑀲𑀼.

𑀅𑀬𑀜𑁆𑀘 𑀏𑀢𑀤𑀕𑁆𑀕𑀲𑀦𑁆𑀦𑀺𑀓𑁆𑀔𑁂𑀧𑁄 𑀦𑀸𑀫 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺 𑀮𑀩𑁆𑀪𑀢𑀺 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀢𑁄 𑀆𑀕𑀫𑀦𑀢𑁄 𑀘𑀺𑀡𑁆𑀡𑀯𑀲𑀺𑀢𑁄 𑀕𑀼𑀡𑀸𑀢𑀺𑀭𑁂𑀓𑀢𑁄𑀢𑀺. 𑀢𑀢𑁆𑀣 𑀓𑁄𑀘𑀺 𑀣𑁂𑀭𑁄 𑀏𑀓𑁂𑀦 𑀓𑀸𑀭𑀡𑁂𑀦 𑀏𑀢𑀤𑀕𑁆𑀕𑀝𑁆𑀞𑀸𑀦𑀁 𑀮𑀪𑀢𑀺, 𑀓𑁄𑀘𑀺 𑀤𑁆𑀯𑀻𑀳𑀺, 𑀓𑁄𑀘𑀺 𑀢𑀻𑀳𑀺, 𑀓𑁄𑀘𑀺 𑀲𑀩𑁆𑀩𑁂𑀳𑁂𑀯 𑀘𑀢𑀽𑀳𑀺𑀧𑀺 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄 𑀯𑀺𑀬. 𑀲𑁄 𑀳𑀺 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀢𑁄𑀧𑀺 𑀫𑀳𑀸𑀧𑀜𑁆𑀜𑀢𑀸𑀬 𑀏𑀢𑀤𑀕𑁆𑀕𑀝𑁆𑀞𑀸𑀦𑀁 𑀮𑀪𑀺 𑀆𑀕𑀫𑀦𑀸𑀤𑀻𑀳𑀺𑀧𑀺. 𑀓𑀣𑀁? 𑀏𑀓𑀲𑁆𑀫𑀺𑀁 𑀳𑀺 𑀲𑀫𑀬𑁂 𑀲𑀢𑁆𑀣𑀸 𑀚𑁂𑀢𑀯𑀦𑀫𑀳𑀸𑀯𑀺𑀳𑀸𑀭𑁂 𑀯𑀺𑀳𑀭𑀦𑁆𑀢𑁄 𑀓𑀡𑁆𑀟𑀫𑁆𑀩𑀭𑀼𑀓𑁆𑀔𑀫𑀽𑀮𑁂 𑀢𑀺𑀢𑁆𑀣𑀺𑀬𑀫𑀤𑁆𑀤𑀦𑀁 𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑀁 𑀤𑀲𑁆𑀲𑁂𑀢𑁆𑀯𑀸 ‘‘𑀓𑀳𑀁 𑀦𑀼 𑀔𑁄 𑀧𑀼𑀭𑀺𑀫𑀩𑀼𑀤𑁆𑀥𑀸 𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑀁 𑀓𑀢𑁆𑀯𑀸 𑀯𑀲𑁆𑀲𑀁 𑀉𑀧𑀕𑀘𑁆𑀙𑀦𑁆𑀢𑀻’’𑀢𑀺 𑀆𑀯𑀚𑁆𑀚𑁂𑀦𑁆𑀢𑁄 ‘‘𑀢𑀸𑀯𑀢𑀺𑀁𑀲𑀪𑀯𑀦𑁂’’𑀢𑀺 𑀜𑀢𑁆𑀯𑀸 𑀤𑁆𑀯𑁂 𑀧𑀤𑀦𑁆𑀢𑀭𑀸𑀦𑀺 𑀤𑀲𑁆𑀲𑁂𑀢𑁆𑀯𑀸 𑀢𑀢𑀺𑀬𑁂𑀦 𑀧𑀤𑁂𑀦 𑀢𑀸𑀯𑀢𑀺𑀁𑀲𑀪𑀯𑀦𑁂 𑀧𑀘𑁆𑀘𑀼𑀝𑁆𑀞𑀸𑀲𑀺. 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 𑀪𑀕𑀯𑀦𑁆𑀢𑀁 𑀤𑀺𑀲𑁆𑀯𑀸 𑀧𑀡𑁆𑀟𑀼𑀓𑀫𑁆𑀩𑀮𑀲𑀺𑀮𑀸𑀢𑁄 𑀉𑀝𑁆𑀞𑀸𑀬 𑀲𑀤𑁆𑀥𑀺𑀁 𑀤𑁂𑀯𑀕𑀡𑁂𑀦 𑀧𑀘𑁆𑀘𑀼𑀕𑁆𑀕𑀫𑀦𑀁 𑀅𑀕𑀫𑀸𑀲𑀺. 𑀤𑁂𑀯𑀸 𑀘𑀺𑀦𑁆𑀢𑀬𑀺𑀁𑀲𑀼 𑁋 ‘‘𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 𑀤𑁂𑀯𑀕𑀡𑀧𑀭𑀺𑀯𑀼𑀢𑁄 𑀲𑀝𑁆𑀞𑀺𑀬𑁄𑀚𑀦𑀸𑀬𑀸𑀫𑀸𑀬 𑀧𑀡𑁆𑀟𑀼𑀓𑀫𑁆𑀩𑀮𑀲𑀺𑀮𑀸𑀬 𑀦𑀺𑀲𑀻𑀤𑀺𑀢𑁆𑀯𑀸 𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀢𑀺, 𑀩𑀼𑀤𑁆𑀥𑀸𑀦𑀁 𑀦𑀸𑀫 𑀦𑀺𑀲𑀺𑀦𑁆𑀦𑀓𑀸𑀮𑀢𑁄 𑀧𑀝𑁆𑀞𑀸𑀬 𑀦 𑀲𑀓𑁆𑀓𑀸 𑀅𑀜𑁆𑀜𑁂𑀦 𑀏𑀢𑁆𑀣 𑀳𑀢𑁆𑀣𑀫𑁆𑀧𑀺 𑀞𑀧𑁂𑀢𑀼’’𑀦𑁆𑀢𑀺. 𑀲𑀢𑁆𑀣𑀸𑀧𑀺 𑀢𑀢𑁆𑀣 𑀦𑀺𑀲𑀺𑀦𑁆𑀦𑁄 𑀢𑁂𑀲𑀁 𑀘𑀺𑀢𑁆𑀢𑀸𑀘𑀸𑀭𑀁 𑀜𑀢𑁆𑀯𑀸 𑀫𑀳𑀸𑀧𑀁𑀲𑀼𑀓𑀽𑀮𑀺𑀓𑁄 𑀯𑀺𑀬 𑀫𑀼𑀡𑁆𑀟𑀧𑀻𑀞𑀓𑀁 𑀲𑀩𑁆𑀩𑀫𑁂𑀯 𑀧𑀡𑁆𑀟𑀼𑀓𑀫𑁆𑀩𑀮𑀲𑀺𑀮𑀁 𑀅𑀯𑀢𑁆𑀣𑀭𑀺𑀢𑁆𑀯𑀸 𑀦𑀺𑀲𑀻𑀤𑀺. 𑀏𑀯𑀁 𑀦𑀺𑀲𑀻𑀤𑀦𑁆𑀢𑁄 𑀧𑀦 𑀅𑀢𑁆𑀢𑀦𑁄 𑀯𑀸 𑀲𑀭𑀻𑀭𑀁 𑀫𑀳𑀦𑁆𑀢𑀁 𑀓𑀢𑁆𑀯𑀸 𑀫𑀸𑀧𑁂𑀲𑀺, 𑀧𑀡𑁆𑀟𑀼𑀓𑀫𑁆𑀩𑀮𑀲𑀺𑀮𑀁 𑀯𑀸 𑀔𑀼𑀤𑁆𑀤𑀓𑀁 𑀅𑀓𑀸𑀲𑀻𑀢𑀺 𑀦 𑀲𑀮𑁆𑀮𑀓𑁆𑀔𑁂𑀢𑀩𑁆𑀩𑀁. 𑀅𑀘𑀺𑀦𑁆𑀢𑁂𑀬𑁆𑀬𑁄 𑀳𑀺 𑀩𑀼𑀤𑁆𑀥𑀯𑀺𑀲𑀬𑁄. 𑀏𑀯𑀁 𑀦𑀺𑀲𑀺𑀦𑁆𑀦𑁄 𑀧𑀦 𑀫𑀸𑀢𑀭𑀁 𑀓𑀸𑀬𑀲𑀓𑁆𑀔𑀺𑀁 𑀓𑀢𑁆𑀯𑀸 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀤𑁂𑀯𑀢𑀸𑀦𑀁 ‘‘𑀓𑀼𑀲𑀮𑀸 𑀥𑀫𑁆𑀫𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀩𑁆𑀬𑀸𑀓𑀢𑀸 𑀥𑀫𑁆𑀫𑀸’’𑀢𑀺 𑀅𑀪𑀺𑀥𑀫𑁆𑀫𑀧𑀺𑀝𑀓𑀁 𑀤𑁂𑀲𑁂𑀲𑀺.

𑀧𑀸𑀝𑀺𑀳𑀸𑀭𑀺𑀬𑀝𑁆𑀞𑀸𑀦𑁂𑀧𑀺 𑀲𑀩𑁆𑀩𑀸𑀧𑀺 𑀤𑁆𑀯𑀸𑀤𑀲𑀬𑁄𑀚𑀦𑀺𑀓𑀸 𑀧𑀭𑀺𑀲𑀸 𑀅𑀦𑀼𑀭𑀼𑀤𑁆𑀥𑀢𑁆𑀣𑁂𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀓𑀳𑀁, 𑀪𑀦𑁆𑀢𑁂, 𑀤𑀲𑀩𑀮𑁄 𑀕𑀢𑁄’’𑀢𑀺 𑀧𑀼𑀘𑁆𑀙𑀺. 𑀢𑀸𑀯𑀢𑀺𑀁𑀲𑀪𑀯𑀦𑁂 𑀧𑀡𑁆𑀟𑀼𑀓𑀫𑁆𑀩𑀮𑀲𑀺𑀮𑀸𑀬𑀁 𑀯𑀲𑁆𑀲𑀁 𑀉𑀧𑀕𑀦𑁆𑀢𑁆𑀯𑀸 𑀅𑀪𑀺𑀥𑀫𑁆𑀫𑀓𑀣𑀁 𑀤𑁂𑀲𑁂𑀢𑀼𑀁 𑀕𑀢𑁄𑀢𑀺. 𑀪𑀦𑁆𑀢𑁂, 𑀦 𑀫𑀬𑀁 𑀲𑀢𑁆𑀣𑀸𑀭𑀁 𑀅𑀤𑀺𑀲𑁆𑀯𑀸 𑀕𑀫𑀺𑀲𑁆𑀲𑀸𑀫. 𑀓𑀤𑀸 𑀲𑀢𑁆𑀣𑀸 𑀆𑀕𑀫𑀺𑀲𑁆𑀲𑀢𑀻𑀢𑀺 𑀲𑀢𑁆𑀣𑀼 𑀆𑀕𑀫𑀦𑀓𑀸𑀮𑀁 𑀚𑀸𑀦𑀸𑀣𑀸𑀢𑀺? 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑀲𑁆𑀲 𑀪𑀸𑀭𑀁 𑀓𑀭𑁄𑀣, 𑀲𑁄 𑀩𑀼𑀤𑁆𑀥𑀸𑀦𑀁 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀲𑀸𑀲𑀦𑀁 𑀆𑀳𑀭𑀺𑀲𑁆𑀲𑀢𑀻𑀢𑀺. 𑀓𑀺𑀁 𑀧𑀦 𑀣𑁂𑀭𑀲𑁆𑀲 𑀢𑀢𑁆𑀣 𑀕𑀦𑁆𑀢𑀼𑀁 𑀩𑀮𑀁 𑀦𑀢𑁆𑀣𑀻𑀢𑀺? 𑀅𑀢𑁆𑀣𑀺, 𑀯𑀺𑀲𑁂𑀲𑀯𑀦𑁆𑀢𑀸𑀦𑀁 𑀧𑀦 𑀯𑀺𑀲𑁂𑀲𑀁 𑀧𑀲𑁆𑀲𑀦𑁆𑀢𑀽𑀢𑀺 𑀏𑀯𑀫𑀸𑀳. 𑀫𑀳𑀸𑀚𑀦𑁄 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀲𑀢𑁆𑀣𑀼 𑀲𑀸𑀲𑀦𑀁 𑀕𑀳𑁂𑀢𑁆𑀯𑀸 𑀆𑀕𑀫𑀦𑀢𑁆𑀣𑀸𑀬 𑀬𑀸𑀘𑀺. 𑀣𑁂𑀭𑁄 𑀧𑀲𑁆𑀲𑀦𑁆𑀢𑁂𑀬𑁂𑀯 𑀫𑀳𑀸𑀚𑀦𑁂 𑀧𑀣𑀯𑀺𑀬𑀁 𑀦𑀺𑀫𑀼𑀚𑁆𑀚𑀺𑀢𑁆𑀯𑀸 𑀅𑀦𑁆𑀢𑁄𑀲𑀺𑀦𑁂𑀭𑀼𑀦𑀸 𑀕𑀦𑁆𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀆𑀳 𑁋 ‘‘𑀪𑀦𑁆𑀢𑁂, 𑀫𑀳𑀸𑀚𑀦𑁄 𑀢𑀼𑀫𑁆𑀳𑀸𑀓𑀁 𑀤𑀲𑁆𑀲𑀦𑀓𑀸𑀫𑁄, 𑀆𑀕𑀫𑀦𑀤𑀺𑀯𑀲𑀁 𑀯𑁄 𑀚𑀸𑀦𑀺𑀢𑀼𑀁 𑀇𑀘𑁆𑀙𑀢𑀻’’𑀢𑀺. 𑀢𑁂𑀦 𑀳𑀺 ‘‘𑀇𑀢𑁄 𑀢𑁂𑀫𑀸𑀲𑀘𑁆𑀘𑀬𑁂𑀦 𑀲𑀗𑁆𑀓𑀲𑁆𑀲𑀦𑀕𑀭𑀤𑁆𑀯𑀸𑀭𑁂 𑀧𑀲𑁆𑀲𑀣𑀸’’𑀢𑀺𑀲𑁆𑀲 𑀯𑀤𑁂𑀳𑀻𑀢𑀺. 𑀣𑁂𑀭𑁄 𑀪𑀕𑀯𑀢𑁄 𑀲𑀸𑀲𑀦𑀁 𑀆𑀳𑀭𑀺𑀢𑁆𑀯𑀸 𑀫𑀳𑀸𑀚𑀦𑀲𑁆𑀲 𑀓𑀣𑁂𑀲𑀺. 𑀫𑀳𑀸𑀚𑀦𑁄 𑀢𑀢𑁆𑀣𑁂𑀯 𑀢𑁂𑀫𑀸𑀲𑀁 𑀔𑀦𑁆𑀥𑀸𑀯𑀸𑀭𑀁 𑀩𑀦𑁆𑀥𑀺𑀢𑁆𑀯𑀸 𑀯𑀲𑀺. 𑀘𑀽𑀴𑀅𑀦𑀸𑀣𑀧𑀺𑀡𑁆𑀟𑀺𑀓𑁄 𑀤𑁆𑀯𑀸𑀤𑀲𑀬𑁄𑀚𑀦𑀸𑀬 𑀧𑀭𑀺𑀲𑀸𑀬 𑀢𑁂𑀫𑀸𑀲𑀁 𑀬𑀸𑀕𑀼𑀪𑀢𑁆𑀢𑀁 𑀆𑀤𑀸𑀲𑀺.

𑀲𑀢𑁆𑀣𑀸𑀧𑀺 𑀲𑀢𑁆𑀢𑀧𑁆𑀧𑀓𑀭𑀡𑀸𑀦𑀺 𑀤𑁂𑀲𑁂𑀢𑁆𑀯𑀸 𑀫𑀦𑀼𑀲𑁆𑀲𑀮𑁄𑀓𑀁 𑀆𑀕𑀫𑀦𑀢𑁆𑀣𑀸𑀬 𑀆𑀓𑀧𑁆𑀧𑀁 𑀤𑀲𑁆𑀲𑁂𑀲𑀺. 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 𑀯𑀺𑀲𑁆𑀲𑀓𑀫𑁆𑀫𑀁 𑀆𑀫𑀦𑁆𑀢𑁂𑀢𑁆𑀯𑀸 𑀢𑀣𑀸𑀕𑀢𑀲𑁆𑀲 𑀑𑀢𑀭𑀡𑀢𑁆𑀣𑀸𑀬 𑀲𑁄𑀧𑀸𑀦𑀁 𑀫𑀸𑀧𑁂𑀢𑀼𑀁 𑀆𑀡𑀸𑀧𑁂𑀲𑀺. 𑀲𑁄 𑀏𑀓𑀢𑁄 𑀲𑁄𑀯𑀡𑁆𑀡𑀫𑀬𑀁 𑀏𑀓𑀢𑁄 𑀭𑀚𑀢𑀫𑀬𑀁 𑀲𑁄𑀧𑀸𑀦𑀁 𑀫𑀸𑀧𑁂𑀢𑁆𑀯𑀸 𑀫𑀚𑁆𑀛𑁂 𑀫𑀡𑀺𑀫𑀬𑀁 𑀫𑀸𑀧𑁂𑀲𑀺. 𑀲𑀢𑁆𑀣𑀸 𑀫𑀡𑀺𑀫𑀬𑁂 𑀲𑁄𑀧𑀸𑀦𑁂 𑀞𑀢𑁆𑀯𑀸 ‘‘𑀫𑀳𑀸𑀚𑀦𑁄 𑀫𑀁 𑀧𑀲𑁆𑀲𑀢𑀽’’𑀢𑀺 𑀅𑀥𑀺𑀝𑁆𑀞𑀸𑀲𑀺. 𑀅𑀢𑁆𑀢𑀦𑁄 𑀆𑀦𑀼𑀪𑀸𑀯𑁂𑀦𑁂𑀯 ‘‘𑀫𑀳𑀸𑀚𑀦𑁄 𑀅𑀯𑀻𑀘𑀺𑀫𑀳𑀸𑀦𑀺𑀭𑀬𑀁 𑀧𑀲𑁆𑀲𑀢𑀽’’𑀢𑀺𑀧𑀺 𑀅𑀥𑀺𑀝𑁆𑀞𑀸𑀲𑀺. 𑀦𑀺𑀭𑀬𑀤𑀲𑁆𑀲𑀦𑁂𑀦 𑀘𑀲𑁆𑀲 𑀉𑀧𑁆𑀧𑀦𑁆𑀦𑀲𑀁𑀯𑁂𑀕𑀢𑀁 𑀜𑀢𑁆𑀯𑀸 𑀤𑁂𑀯𑀮𑁄𑀓𑀁 𑀤𑀲𑁆𑀲𑁂𑀲𑀺. 𑀅𑀣𑀲𑁆𑀲 𑀑𑀢𑀭𑀦𑁆𑀢𑀲𑁆𑀲 𑀫𑀳𑀸𑀩𑁆𑀭𑀳𑁆𑀫𑀸 𑀙𑀢𑁆𑀢𑀁 𑀥𑀸𑀭𑁂𑀲𑀺, 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 𑀧𑀢𑁆𑀢𑀁 𑀕𑀡𑁆𑀳𑀺, 𑀲𑀼𑀬𑀸𑀫𑁄 𑀤𑁂𑀯𑀭𑀸𑀚𑀸 𑀤𑀺𑀩𑁆𑀩𑀁 𑀯𑀸𑀴𑀩𑀻𑀚𑀦𑀺𑀁 𑀩𑀻𑀚𑀺, 𑀧𑀜𑁆𑀘𑀲𑀺𑀔𑁄 𑀕𑀦𑁆𑀥𑀩𑁆𑀩𑀤𑁂𑀯𑀧𑀼𑀢𑁆𑀢𑁄 𑀩𑁂𑀮𑀼𑀯𑀧𑀡𑁆𑀟𑀼𑀯𑀻𑀡𑀁 𑀲𑀫𑀧𑀜𑁆𑀜𑀸𑀲𑀸𑀬 𑀫𑀼𑀘𑁆𑀙𑀦𑀸𑀳𑀺 𑀫𑀼𑀘𑁆𑀙𑀺𑀢𑁆𑀯𑀸 𑀯𑀸𑀤𑁂𑀦𑁆𑀢𑁄 𑀧𑀼𑀭𑀢𑁄 𑀑𑀢𑀭𑀺. 𑀩𑀼𑀤𑁆𑀥𑀸𑀦𑀁 𑀧𑀣𑀯𑀺𑀬𑀁 𑀧𑀢𑀺𑀝𑁆𑀞𑀺𑀢𑀓𑀸𑀮𑁂 ‘‘𑀅𑀳𑀁 𑀧𑀞𑀫𑀁 𑀯𑀦𑁆𑀤𑀺𑀲𑁆𑀲𑀸𑀫𑀺, 𑀅𑀳𑀁 𑀧𑀞𑀫𑀁 𑀯𑀦𑁆𑀤𑀺𑀲𑁆𑀲𑀸𑀫𑀻’’𑀢𑀺 𑀫𑀳𑀸𑀚𑀦𑁄 𑀅𑀝𑁆𑀞𑀸𑀲𑀺. 𑀲𑀳 𑀫𑀳𑀸𑀧𑀣𑀯𑀻𑀅𑀓𑁆𑀓𑀫𑀦𑁂𑀦 𑀧𑀦 𑀪𑀕𑀯𑀢𑁄 𑀦𑁂𑀯 𑀫𑀳𑀸𑀚𑀦𑁄 𑀦 𑀅𑀲𑀻𑀢𑀺𑀫𑀳𑀸𑀲𑀸𑀯𑀓𑀸 𑀧𑀞𑀫𑀓𑀯𑀦𑁆𑀤𑀦𑀁 𑀲𑀫𑁆𑀧𑀸𑀧𑀼𑀡𑀺𑀁𑀲𑀼, 𑀥𑀫𑁆𑀫𑀲𑁂𑀦𑀸𑀧𑀢𑀺 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄𑀬𑁂𑀯 𑀧𑀦 𑀲𑀫𑁆𑀧𑀸𑀧𑀼𑀡𑀺.

𑀅𑀣 𑀲𑀢𑁆𑀣𑀸 𑀤𑁆𑀯𑀸𑀤𑀲𑀬𑁄𑀚𑀦𑀸𑀬 𑀧𑀭𑀺𑀲𑀸𑀬 𑀅𑀦𑁆𑀢𑀭𑁂 ‘‘𑀣𑁂𑀭𑀲𑁆𑀲 𑀧𑀜𑁆𑀜𑀸𑀦𑀼𑀪𑀸𑀯𑀁 𑀚𑀸𑀦𑀦𑁆𑀢𑀽’’𑀢𑀺 𑀧𑀼𑀣𑀼𑀚𑁆𑀚𑀦𑀧𑀜𑁆𑀘𑀓𑀁 𑀧𑀜𑁆𑀳𑀁 𑀆𑀭𑀪𑀺. 𑀧𑀞𑀫𑀁 𑀮𑁄𑀓𑀺𑀬𑀫𑀳𑀸𑀚𑀦𑁄 𑀲𑀮𑁆𑀮𑀓𑁆𑀔𑁂𑀲𑁆𑀲𑀢𑀻𑀢𑀺 𑀧𑀼𑀣𑀼𑀚𑁆𑀚𑀦𑀧𑀜𑁆𑀳𑀁 𑀧𑀼𑀘𑁆𑀙𑀺. 𑀬𑁂 𑀬𑁂 𑀲𑀮𑁆𑀮𑀓𑁆𑀔𑀺𑀁𑀲𑀼, 𑀢𑁂 𑀢𑁂 𑀓𑀣𑀬𑀺𑀁𑀲𑀼. 𑀤𑀼𑀢𑀺𑀬𑀁 𑀧𑀼𑀣𑀼𑀚𑁆𑀚𑀦𑀯𑀺𑀲𑀬𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂 𑀧𑀜𑁆𑀳𑀁 𑀧𑀼𑀘𑁆𑀙𑀺. 𑀧𑀼𑀣𑀼𑀚𑁆𑀚𑀦𑀸 𑀢𑀼𑀡𑁆𑀳𑀻 𑀅𑀳𑁂𑀲𑀼𑀁, 𑀲𑁄𑀢𑀸𑀧𑀦𑁆𑀦𑀸𑀯 𑀓𑀣𑀬𑀺𑀁𑀲𑀼. 𑀢𑀢𑁄 𑀲𑁄𑀢𑀸𑀧𑀦𑁆𑀦𑀸𑀦𑀁 𑀯𑀺𑀲𑀬𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑁂 𑀧𑀜𑁆𑀳𑀁 𑀧𑀼𑀘𑁆𑀙𑀺. 𑀲𑁄𑀢𑀸𑀧𑀦𑁆𑀦𑀸 𑀢𑀼𑀡𑁆𑀳𑀻 𑀅𑀳𑁂𑀲𑀼𑀁, 𑀲𑀓𑀤𑀸𑀕𑀸𑀫𑀺𑀦𑁄𑀯 𑀓𑀣𑀬𑀺𑀁𑀲𑀼. 𑀢𑁂𑀲𑀫𑁆𑀧𑀺 𑀯𑀺𑀲𑀬𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀅𑀦𑀸𑀕𑀸𑀫𑀺𑀫𑀕𑁆𑀕𑁂 𑀧𑀜𑁆𑀳𑀁 𑀧𑀼𑀘𑁆𑀙𑀺. 𑀲𑀓𑀤𑀸𑀕𑀸𑀫𑀺𑀦𑁄 𑀢𑀼𑀡𑁆𑀳𑀻 𑀅𑀳𑁂𑀲𑀼𑀁, 𑀅𑀦𑀸𑀕𑀸𑀫𑀺𑀦𑁄𑀯 𑀓𑀣𑀬𑀺𑀁𑀲𑀼. 𑀢𑁂𑀲𑀫𑁆𑀧𑀺 𑀯𑀺𑀲𑀬𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀅𑀭𑀳𑀢𑁆𑀢𑀫𑀕𑁆𑀕𑁂 𑀧𑀜𑁆𑀳𑀁 𑀧𑀼𑀘𑁆𑀙𑀺. 𑀅𑀦𑀸𑀕𑀸𑀫𑀺𑀦𑁄 𑀢𑀼𑀡𑁆𑀳𑀻 𑀅𑀳𑁂𑀲𑀼𑀁, 𑀅𑀭𑀳𑀦𑁆𑀢𑀸𑀯 𑀓𑀣𑀬𑀺𑀁𑀲𑀼. 𑀢𑀢𑁄 𑀳𑁂𑀝𑁆𑀞𑀺𑀫𑀓𑁄𑀝𑀺𑀢𑁄 𑀧𑀝𑁆𑀞𑀸𑀬 𑀅𑀪𑀺𑀜𑁆𑀜𑀸𑀢𑁂 𑀅𑀪𑀺𑀜𑁆𑀜𑀸𑀢𑁂 𑀲𑀸𑀯𑀓𑁂 𑀧𑀼𑀘𑁆𑀙𑀺, 𑀢𑁂 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀧𑀝𑀺𑀲𑀫𑁆𑀪𑀺𑀤𑀸𑀯𑀺𑀲𑀬𑁂 𑀞𑀢𑁆𑀯𑀸 𑀓𑀣𑀬𑀺𑀁𑀲𑀼. 𑀅𑀣 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀁 𑀧𑀼𑀘𑁆𑀙𑀺, 𑀲𑁂𑀲𑀲𑀸𑀯𑀓𑀸 𑀢𑀼𑀡𑁆𑀳𑀻 𑀅𑀳𑁂𑀲𑀼𑀁, 𑀣𑁂𑀭𑁄𑀯 𑀓𑀣𑁂𑀲𑀺. 𑀢𑀲𑁆𑀲𑀸𑀧𑀺 𑀯𑀺𑀲𑀬𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀲𑁆𑀲 𑀯𑀺𑀲𑀬𑁂 𑀧𑀜𑁆𑀳𑀁 𑀧𑀼𑀘𑁆𑀙𑀺. 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀢𑀼𑀡𑁆𑀳𑀻 𑀅𑀳𑁄𑀲𑀺, 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄𑀯 𑀓𑀣𑁂𑀲𑀺. 𑀣𑁂𑀭𑀲𑁆𑀲𑀸𑀧𑀺 𑀯𑀺𑀲𑀬𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀩𑀼𑀤𑁆𑀥𑀯𑀺𑀲𑀬𑁂 𑀧𑀜𑁆𑀳𑀁 𑀧𑀼𑀘𑁆𑀙𑀺. 𑀥𑀫𑁆𑀫𑀲𑁂𑀦𑀸𑀧𑀢𑀺 𑀆𑀯𑀚𑁆𑀚𑁂𑀦𑁆𑀢𑁄𑀧𑀺 𑀧𑀲𑁆𑀲𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀧𑀼𑀭𑀢𑁆𑀣𑀺𑀫𑀧𑀘𑁆𑀙𑀺𑀫𑀼𑀢𑁆𑀢𑀭𑀤𑀓𑁆𑀔𑀺𑀡𑀸 𑀘𑀢𑀲𑁆𑀲𑁄 𑀤𑀺𑀲𑀸 𑀘𑀢𑀲𑁆𑀲𑁄 𑀅𑀦𑀼𑀤𑀺𑀲𑀸𑀢𑀺 𑀇𑀢𑁄 𑀘𑀺𑀢𑁄 𑀘 𑀑𑀮𑁄𑀓𑁂𑀦𑁆𑀢𑁄 𑀧𑀜𑁆𑀳𑀼𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀁 𑀲𑀮𑁆𑀮𑀓𑁆𑀔𑁂𑀢𑀼𑀁 𑀦𑀸𑀲𑀓𑁆𑀔𑀺.

𑀲𑀢𑁆𑀣𑀸 𑀣𑁂𑀭𑀲𑁆𑀲 𑀓𑀺𑀮𑀫𑀦𑀪𑀸𑀯𑀁 𑀚𑀸𑀦𑀺𑀢𑁆𑀯𑀸 ‘‘𑀲𑀸𑀭𑀺𑀧𑀼𑀢𑁆𑀢𑁄 𑀓𑀺𑀮𑀫𑀢𑀺, 𑀦𑀬𑀫𑀼𑀔𑀫𑀲𑁆𑀲 𑀤𑀲𑁆𑀲𑁂𑀲𑁆𑀲𑀸𑀫𑀻’’𑀢𑀺 ‘‘𑀆𑀕𑀫𑁂𑀳𑀺 𑀢𑁆𑀯𑀁, 𑀲𑀸𑀭𑀺𑀧𑀼𑀢𑁆𑀢𑀸’’𑀢𑀺 𑀯𑀢𑁆𑀯𑀸 ‘‘𑀦𑀸𑀬𑀁 𑀢𑀼𑀬𑁆𑀳𑀁 𑀯𑀺𑀲𑀬𑁄 𑀧𑀜𑁆𑀳𑁄, 𑀩𑀼𑀤𑁆𑀥𑀸𑀦𑀁 𑀏𑀲 𑀯𑀺𑀲𑀬𑁄 𑀲𑀩𑁆𑀩𑀜𑁆𑀜𑀽𑀦𑀁 𑀬𑀲𑀲𑁆𑀲𑀻𑀦’’𑀦𑁆𑀢𑀺 𑀩𑀼𑀤𑁆𑀥𑀯𑀺𑀲𑀬𑀪𑀸𑀯𑀁 𑀆𑀘𑀺𑀓𑁆𑀔𑀺𑀢𑁆𑀯𑀸 ‘‘𑀪𑀽𑀢𑀫𑀺𑀤𑀦𑁆𑀢𑀺, 𑀲𑀸𑀭𑀺𑀧𑀼𑀢𑁆𑀢, 𑀲𑀫𑀦𑀼𑀧𑀲𑁆𑀲𑀲𑀻’’𑀢𑀺 𑀆𑀳. 𑀣𑁂𑀭𑁄 ‘‘𑀘𑀢𑀼𑀫𑀳𑀸𑀪𑀽𑀢𑀺𑀓𑀓𑀸𑀬𑀧𑀭𑀺𑀕𑁆𑀕𑀳𑀁 𑀫𑁂 𑀪𑀕𑀯𑀸 𑀆𑀘𑀺𑀓𑁆𑀔𑀢𑀻’’𑀢𑀺 𑀜𑀢𑁆𑀯𑀸 ‘‘𑀅𑀜𑁆𑀜𑀸𑀢𑀁 𑀪𑀕𑀯𑀸, 𑀅𑀜𑁆𑀜𑀸𑀢𑀁 𑀲𑀼𑀕𑀢𑀸’’𑀢𑀺 𑀆𑀳. 𑀏𑀢𑀲𑁆𑀫𑀺𑀁 𑀞𑀸𑀦𑁂 𑀅𑀬𑀁 𑀓𑀣𑀸 𑀉𑀤𑀧𑀸𑀤𑀺 𑁋 𑀫𑀳𑀸𑀧𑀜𑁆𑀜𑁄 𑀯𑀢, 𑀪𑁄, 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄, 𑀬𑀢𑁆𑀭 𑀳𑀺 𑀦𑀸𑀫 𑀲𑀩𑁆𑀩𑁂𑀳𑀺 𑀅𑀦𑀜𑁆𑀜𑀸𑀢𑀁 𑀧𑀜𑁆𑀳𑀁 𑀓𑀣𑁂𑀲𑀺, 𑀩𑀼𑀤𑁆𑀥𑁂𑀳𑀺 𑀘 𑀤𑀺𑀦𑁆𑀦𑀦𑀬𑁂 𑀞𑀢𑁆𑀯𑀸 𑀩𑀼𑀤𑁆𑀥𑀯𑀺𑀲𑀬𑁂 𑀧𑀜𑁆𑀳𑀁 𑀓𑀣𑁂𑀲𑀺, 𑀇𑀢𑀺 𑀣𑁂𑀭𑀲𑁆𑀲 𑀧𑀜𑁆𑀜𑀸𑀦𑀼𑀪𑀸𑀯𑁄 𑀬𑀢𑁆𑀢𑀓𑀁 𑀞𑀸𑀦𑀁 𑀩𑀼𑀤𑁆𑀥𑀸𑀦𑀁 𑀓𑀺𑀢𑁆𑀢𑀺𑀲𑀤𑁆𑀤𑁂𑀦 𑀑𑀢𑁆𑀣𑀝𑀁, 𑀲𑀩𑁆𑀩𑀁 𑀅𑀚𑁆𑀛𑁄𑀢𑁆𑀣𑀭𑀺𑀢𑁆𑀯𑀸 𑀕𑀢𑁄𑀢𑀺 𑀏𑀯𑀁 𑀢𑀸𑀯 𑀣𑁂𑀭𑁄 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀢𑁄 𑀫𑀳𑀸𑀧𑀜𑁆𑀜𑀢𑀸𑀬 𑀏𑀢𑀤𑀕𑁆𑀕𑀝𑁆𑀞𑀸𑀦𑀁 𑀮𑀪𑀺.

𑀓𑀣𑀁 𑀆𑀕𑀫𑀦𑀢𑁄? 𑀇𑀫𑀺𑀲𑁆𑀲𑀸𑀬𑁂𑀯 𑀳𑀺 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀬𑀸 𑀲𑀢𑁆𑀣𑀸 𑀆𑀳 𑁋 𑀲𑀸𑀭𑀺𑀧𑀼𑀢𑁆𑀢𑁄 𑀦 𑀇𑀤𑀸𑀦𑁂𑀯 𑀧𑀜𑁆𑀜𑀯𑀸, 𑀅𑀢𑀻𑀢𑁂 𑀧𑀜𑁆𑀘 𑀚𑀸𑀢𑀺𑀲𑀢𑀸𑀦𑀺 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸𑀧𑀺 𑀫𑀳𑀸𑀧𑀜𑁆𑀜𑁄𑀯 𑀅𑀳𑁄𑀲𑀺 𑁋

‘‘𑀬𑁄 𑀧𑀩𑁆𑀩𑀚𑀻 𑀚𑀸𑀢𑀺𑀲𑀢𑀸𑀦𑀺 𑀧𑀜𑁆𑀘,

𑀧𑀳𑀸𑀬 𑀓𑀸𑀫𑀸𑀦𑀺 𑀫𑀦𑁄𑀭𑀫𑀸𑀦𑀺;

𑀢𑀁 𑀯𑀻𑀢𑀭𑀸𑀕𑀁 𑀲𑀼𑀲𑀫𑀸𑀳𑀺𑀢𑀺𑀦𑁆𑀤𑁆𑀭𑀺𑀬𑀁,

𑀧𑀭𑀺𑀦𑀺𑀩𑁆𑀩𑀼𑀢𑀁 𑀯𑀦𑁆𑀤𑀣 𑀲𑀸𑀭𑀺𑀧𑀼𑀢𑁆𑀢’’𑀦𑁆𑀢𑀺.

𑀏𑀯𑀁 𑀧𑀩𑁆𑀩𑀚𑁆𑀚𑀁 𑀉𑀧𑀩𑁆𑀭𑀽𑀳𑀬𑀫𑀸𑀦𑁄 𑀏𑀓𑀲𑁆𑀫𑀺𑀁 𑀲𑀫𑀬𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄. 𑀢𑀬𑁄 𑀯𑁂𑀤𑁂 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀢𑀢𑁆𑀣 𑀲𑀸𑀭𑀁 𑀅𑀧𑀲𑁆𑀲𑀦𑁆𑀢𑁄 ‘‘𑀧𑀩𑁆𑀩𑀚𑀺𑀢𑁆𑀯𑀸 𑀏𑀓𑀁 𑀫𑁄𑀓𑁆𑀔𑀥𑀫𑁆𑀫𑀁 𑀕𑀯𑁂𑀲𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑁂𑀲𑀺. 𑀢𑀲𑁆𑀫𑀺𑀁 𑀓𑀸𑀮𑁂 𑀩𑁄𑀥𑀺𑀲𑀢𑁆𑀢𑁄𑀧𑀺 𑀓𑀸𑀲𑀺𑀭𑀝𑁆𑀞𑁂 𑀉𑀤𑀺𑀘𑁆𑀘𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄 𑀯𑀼𑀤𑁆𑀥𑀺𑀫𑀦𑁆𑀯𑀸𑀬 𑀉𑀕𑁆𑀕𑀳𑀺𑀢𑀲𑀺𑀧𑁆𑀧𑁄 𑀓𑀸𑀫𑁂𑀲𑀼 𑀆𑀤𑀻𑀦𑀯𑀁 𑀦𑁂𑀓𑁆𑀔𑀫𑁆𑀫𑁂 𑀘 𑀆𑀦𑀺𑀲𑀁𑀲𑀁 𑀤𑀺𑀲𑁆𑀯𑀸 𑀖𑀭𑀸𑀯𑀸𑀲𑀁 𑀧𑀳𑀸𑀬 𑀳𑀺𑀫𑀯𑀦𑁆𑀢𑀁 𑀧𑀯𑀺𑀲𑀺𑀢𑁆𑀯𑀸 𑀓𑀲𑀺𑀡𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸 𑀧𑀜𑁆𑀘 𑀅𑀪𑀺𑀜𑁆𑀜𑀸 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀯𑀦𑀫𑀽𑀮𑀨𑀮𑀸𑀳𑀸𑀭𑁄 𑀳𑀺𑀫𑀯𑀦𑁆𑀢𑀧𑁆𑀧𑀤𑁂𑀲𑁂 𑀯𑀲𑀢𑀺. 𑀲𑁄𑀧𑀺 𑀫𑀸𑀡𑀯𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀢𑀲𑁆𑀲𑁂𑀯 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺. 𑀧𑀭𑀺𑀯𑀸𑀭𑁄 𑀫𑀳𑀸 𑀅𑀳𑁄𑀲𑀺 𑀧𑀜𑁆𑀘𑀲𑀢𑀫𑀢𑁆𑀢𑀸 𑀇𑀲𑀬𑁄.

𑀅𑀣𑀲𑁆𑀲 𑀲𑁄 𑀚𑁂𑀝𑁆𑀞𑀦𑁆𑀢𑁂𑀯𑀸𑀲𑀺𑀓𑁄 𑀏𑀓𑀤𑁂𑀲𑀁 𑀧𑀭𑀺𑀲𑀁 𑀕𑀳𑁂𑀢𑁆𑀯𑀸 𑀮𑁄𑀡𑀫𑁆𑀩𑀺𑀮𑀲𑁂𑀯𑀦𑀢𑁆𑀣𑀁 𑀫𑀦𑀼𑀲𑁆𑀲𑀧𑀣𑀁 𑀅𑀕𑀫𑀸𑀲𑀺. 𑀢𑀲𑁆𑀫𑀺𑀁 𑀲𑀫𑀬𑁂 𑀩𑁄𑀥𑀺𑀲𑀢𑁆𑀢𑁄 𑀢𑀲𑁆𑀫𑀺𑀁𑀬𑁂𑀯 𑀳𑀺𑀫𑀯𑀦𑁆𑀢𑀧𑁆𑀧𑀤𑁂𑀲𑁂 𑀓𑀸𑀮𑀁 𑀅𑀓𑀸𑀲𑀺. 𑀓𑀸𑀮𑀓𑀺𑀭𑀺𑀬𑀲𑀫𑀬𑁂𑀯 𑀦𑀁 𑀅𑀦𑁆𑀢𑁂𑀯𑀸𑀲𑀺𑀓𑀸 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀧𑀼𑀘𑁆𑀙𑀺𑀁𑀲𑀼 𑁋 ‘‘𑀅𑀢𑁆𑀣𑀺 𑀢𑀼𑀫𑁆𑀳𑁂𑀳𑀺 𑀓𑁄𑀘𑀺 𑀯𑀺𑀲𑁂𑀲𑁄 𑀅𑀥𑀺𑀕𑀢𑁄’’𑀢𑀺. 𑀩𑁄𑀥𑀺𑀲𑀢𑁆𑀢𑁄 ‘‘𑀦𑀢𑁆𑀣𑀺 𑀓𑀺𑀜𑁆𑀘𑀻’’𑀢𑀺 𑀯𑀢𑁆𑀯𑀸 𑀅𑀧𑀭𑀺𑀳𑀻𑀦𑀚𑁆𑀛𑀸𑀦𑁄 𑀆𑀪𑀲𑁆𑀲𑀭𑀩𑁆𑀭𑀳𑁆𑀫𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑁄. 𑀲𑁄 𑀓𑀺𑀜𑁆𑀘𑀸𑀧𑀺 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑁆𑀲 𑀮𑀸𑀪𑀻, 𑀩𑁄𑀥𑀺𑀲𑀢𑁆𑀢𑀸𑀦𑀁 𑀧𑀦 𑀅𑀭𑀽𑀧𑀸𑀯𑀘𑀭𑁂 𑀧𑀝𑀺𑀲𑀦𑁆𑀥𑀺 𑀦𑀸𑀫 𑀦 𑀳𑁄𑀢𑀺. 𑀓𑀲𑁆𑀫𑀸? 𑀅𑀪𑀩𑁆𑀩𑀝𑁆𑀞𑀸𑀦𑀢𑁆𑀢𑀸. 𑀇𑀢𑀺 𑀲𑁄 𑀅𑀭𑀽𑀧𑀲𑀫𑀸𑀧𑀢𑁆𑀢𑀺𑀮𑀸𑀪𑀻 𑀲𑀫𑀸𑀦𑁄𑀧𑀺 𑀭𑀽𑀧𑀸𑀯𑀘𑀭𑁂 𑀦𑀺𑀩𑁆𑀩𑀢𑁆𑀢𑀺. 𑀅𑀦𑁆𑀢𑁂𑀯𑀸𑀲𑀺𑀓𑀸𑀧𑀺𑀲𑁆𑀲 ‘‘𑀆𑀘𑀭𑀺𑀬𑁄 ‘𑀦𑀢𑁆𑀣𑀺 𑀓𑀺𑀜𑁆𑀘𑀻’𑀢𑀺 𑀆𑀳, 𑀫𑁄𑀖𑀸 𑀢𑀲𑁆𑀲 𑀓𑀸𑀮𑀓𑀺𑀭𑀺𑀬𑀸’’𑀢𑀺 𑀦 𑀓𑀺𑀜𑁆𑀘𑀺 𑀲𑀓𑁆𑀓𑀸𑀭𑀲𑀫𑁆𑀫𑀸𑀦𑀁 𑀅𑀓𑀁𑀲𑀼. 𑀅𑀣 𑀲𑁄 𑀚𑁂𑀝𑁆𑀞𑀦𑁆𑀢𑁂𑀯𑀸𑀲𑀺𑀓𑁄 𑀅𑀢𑀺𑀓𑁆𑀓𑀦𑁆𑀢𑁂 𑀯𑀲𑁆𑀲𑀸𑀯𑀸𑀲𑁂 𑀆𑀕𑀦𑁆𑀢𑁆𑀯𑀸 ‘‘𑀓𑀳𑀁 𑀆𑀘𑀭𑀺𑀬𑁄’’𑀢𑀺 𑀧𑀼𑀘𑁆𑀙𑀺. 𑀓𑀸𑀮𑀁 𑀓𑀢𑁄𑀢𑀺. 𑀅𑀧𑀺 𑀦𑀼 𑀆𑀘𑀭𑀺𑀬𑁂𑀦 𑀮𑀤𑁆𑀥𑀕𑀼𑀡𑀁 𑀧𑀼𑀘𑁆𑀙𑀺𑀢𑁆𑀣𑀸𑀢𑀺? 𑀆𑀫 𑀧𑀼𑀘𑁆𑀙𑀺𑀫𑁆𑀳𑀸𑀢𑀺. 𑀓𑀺𑀁 𑀯𑀤𑁂𑀢𑀻𑀢𑀺? 𑀦𑀢𑁆𑀣𑀺 𑀓𑀺𑀜𑁆𑀘𑀻𑀢𑀺. 𑀫𑀬𑀫𑁆𑀧𑀺 ‘‘𑀆𑀘𑀭𑀺𑀬𑁂𑀦 𑀮𑀤𑁆𑀥𑀕𑀼𑀡𑁄 𑀦𑀸𑀫 𑀦𑀢𑁆𑀣𑀻’’𑀢𑀺 𑀦𑀸𑀲𑁆𑀲 𑀲𑀓𑁆𑀓𑀸𑀭𑀲𑀫𑁆𑀫𑀸𑀦𑀁 𑀓𑀭𑀺𑀫𑁆𑀳𑀸𑀢𑀺. 𑀢𑀼𑀫𑁆𑀳𑁂 𑀪𑀸𑀲𑀺𑀢𑀲𑁆𑀲 𑀅𑀢𑁆𑀣𑀁 𑀦 𑀚𑀸𑀦𑀺𑀢𑁆𑀣, 𑀆𑀘𑀭𑀺𑀬𑁄 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑁆𑀲 𑀮𑀸𑀪𑀻𑀢𑀺.

𑀅𑀣 𑀢𑁂 𑀚𑁂𑀝𑁆𑀞𑀦𑁆𑀢𑁂𑀯𑀸𑀲𑀺𑀓𑀲𑁆𑀲 𑀓𑀣𑀁 𑀦 𑀲𑀤𑁆𑀤𑀳𑀺𑀁𑀲𑀼. 𑀲𑁄 𑀧𑀼𑀦𑀧𑁆𑀧𑀼𑀦𑀁 𑀓𑀣𑁂𑀦𑁆𑀢𑁄𑀧𑀺 𑀲𑀤𑁆𑀤𑀳𑀸𑀧𑁂𑀢𑀼𑀁 𑀦𑀸𑀲𑀓𑁆𑀔𑀺. 𑀅𑀣 𑀩𑁄𑀥𑀺𑀲𑀢𑁆𑀢𑁄 𑀆𑀯𑀚𑁆𑀚𑀫𑀸𑀦𑁄 ‘‘𑀅𑀦𑁆𑀥𑀩𑀸𑀮𑁄 𑀫𑀳𑀸𑀚𑀦𑁄 𑀫𑀬𑁆𑀳𑀁 𑀚𑁂𑀝𑁆𑀞𑀦𑁆𑀢𑁂𑀯𑀸𑀲𑀺𑀓𑀲𑁆𑀲 𑀓𑀣𑀁 𑀦 𑀕𑀡𑁆𑀳𑀸𑀢𑀺, 𑀇𑀫𑀁 𑀓𑀸𑀭𑀡𑀁 𑀧𑀸𑀓𑀝𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀩𑁆𑀭𑀳𑁆𑀫𑀮𑁄𑀓𑀢𑁄 𑀑𑀢𑀭𑀺𑀢𑁆𑀯𑀸 𑀅𑀲𑁆𑀲𑀫𑀧𑀤𑀫𑀢𑁆𑀣𑀓𑁂 𑀞𑀺𑀢𑁄 𑀆𑀓𑀸𑀲𑀕𑀢𑁄𑀯 𑀚𑁂𑀝𑁆𑀞𑀦𑁆𑀢𑁂𑀯𑀸𑀲𑀺𑀓𑀲𑁆𑀲 𑀧𑀜𑁆𑀜𑀸𑀦𑀼𑀪𑀸𑀯𑀁 𑀯𑀡𑁆𑀡𑁂𑀢𑁆𑀯𑀸 𑀇𑀫𑀁 𑀕𑀸𑀣𑀁 𑀅𑀪𑀸𑀲𑀺 𑁋

‘‘𑀧𑀭𑁄𑀲𑀳𑀲𑁆𑀲𑀫𑁆𑀧𑀺 𑀲𑀫𑀸𑀕𑀢𑀸𑀦𑀁,

𑀓𑀦𑁆𑀤𑁂𑀬𑁆𑀬𑀼𑀁 𑀢𑁂 𑀯𑀲𑁆𑀲𑀲𑀢𑀁 𑀅𑀧𑀜𑁆𑀜𑀸;

𑀏𑀓𑁄𑀯 𑀲𑁂𑀬𑁆𑀬𑁄 𑀧𑀼𑀭𑀺𑀲𑁄 𑀲𑀧𑀜𑁆𑀜𑁄,

𑀬𑁄 𑀪𑀸𑀲𑀺𑀢𑀲𑁆𑀲 𑀯𑀺𑀚𑀸𑀦𑀸𑀢𑀺 𑀅𑀢𑁆𑀣’’𑀦𑁆𑀢𑀺. (𑀚𑀸. 𑁧.𑁧.𑁧𑁦𑁧);

𑀏𑀯𑀁 𑀇𑀲𑀺𑀕𑀡𑀁 𑀲𑀜𑁆𑀜𑀸𑀧𑁂𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑁄 𑀩𑁆𑀭𑀳𑁆𑀫𑀮𑁄𑀓𑀫𑁂𑀯 𑀕𑀢𑁄. 𑀲𑁂𑀲𑀇𑀲𑀺𑀕𑀡𑁄𑀧𑀺 𑀅𑀧𑀭𑀺𑀳𑀻𑀦𑀚𑁆𑀛𑀸𑀦𑁄 𑀳𑀼𑀢𑁆𑀯𑀸 𑀓𑀸𑀮𑀁 𑀓𑀢𑁆𑀯𑀸 𑀩𑁆𑀭𑀳𑁆𑀫𑀮𑁄𑀓𑀧𑀭𑀸𑀬𑀡𑁄 𑀚𑀸𑀢𑁄. 𑀢𑀢𑁆𑀣 𑀩𑁄𑀥𑀺𑀲𑀢𑁆𑀢𑁄 𑀲𑀩𑁆𑀩𑀜𑁆𑀜𑀼𑀢𑀁 𑀧𑀢𑁆𑀢𑁄, 𑀚𑁂𑀝𑁆𑀞𑀦𑁆𑀢𑁂𑀯𑀸𑀲𑀺𑀓𑁄 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄 𑀚𑀸𑀢𑁄, 𑀲𑁂𑀲𑀸 𑀇𑀲𑀬𑁄 𑀩𑀼𑀤𑁆𑀥𑀧𑀭𑀺𑀲𑀸 𑀚𑀸𑀢𑀸𑀢𑀺 𑀏𑀯𑀁 𑀅𑀢𑀻𑀢𑁂𑀧𑀺 𑀲𑀸𑀭𑀺𑀧𑀼𑀢𑁆𑀢𑁄 𑀫𑀳𑀸𑀧𑀜𑁆𑀜𑁄𑀯 𑀲𑀁𑀔𑀺𑀢𑁆𑀢𑁂𑀦 𑀪𑀸𑀲𑀺𑀢𑀲𑁆𑀲 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀚𑀸𑀦𑀺𑀢𑀼𑀁 𑀲𑀫𑀢𑁆𑀣𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀇𑀤𑀫𑁂𑀯 𑀘 𑀧𑀼𑀣𑀼𑀚𑁆𑀚𑀦𑀧𑀜𑁆𑀘𑀓𑀁 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀁 𑀓𑀢𑁆𑀯𑀸 𑁋

‘‘𑀧𑀭𑁄𑀲𑀢𑀜𑁆𑀘𑁂𑀧𑀺 𑀲𑀫𑀸𑀕𑀢𑀸𑀦𑀁,

𑀛𑀸𑀬𑁂𑀬𑁆𑀬𑀼𑀁 𑀢𑁂 𑀯𑀲𑁆𑀲𑀲𑀢𑀁 𑀅𑀧𑀜𑁆𑀜𑀸;

𑀏𑀓𑁄𑀯 𑀲𑁂𑀬𑁆𑀬𑁄 𑀧𑀼𑀭𑀺𑀲𑁄 𑀲𑀧𑀜𑁆𑀜𑁄,

𑀲𑁄 𑀪𑀸𑀲𑀺𑀢𑀲𑁆𑀲 𑀯𑀺𑀚𑀸𑀦𑀸𑀢𑀺 𑀅𑀢𑁆𑀣’’𑀦𑁆𑀢𑀺. (𑀚𑀸. 𑁧.𑁧.𑁧𑁦𑁧) 𑁋

𑀇𑀫𑀫𑁆𑀧𑀺 𑀚𑀸𑀢𑀓𑀁 𑀓𑀣𑁂𑀲𑀺. 𑀢𑀲𑁆𑀲 𑀧𑀼𑀭𑀺𑀫𑀚𑀸𑀢𑀓𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀅𑀧𑀭𑀫𑁆𑀧𑀺 𑀇𑀤𑀫𑁂𑀯 𑀧𑀼𑀣𑀼𑀚𑁆𑀚𑀦𑀧𑀜𑁆𑀘𑀓𑀁 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀁 𑀓𑀢𑁆𑀯𑀸 𑁋

‘‘𑀬𑁂 𑀲𑀜𑁆𑀜𑀺𑀦𑁄 𑀢𑁂𑀧𑀺 𑀤𑀼𑀕𑁆𑀕𑀢𑀸, 𑀬𑁂𑀧𑀺 𑀅𑀲𑀜𑁆𑀜𑀺𑀦𑁄 𑀢𑁂𑀧𑀺 𑀤𑀼𑀕𑁆𑀕𑀢𑀸;

𑀏𑀢𑀁 𑀉𑀪𑀬𑀁 𑀯𑀺𑀯𑀚𑁆𑀚𑀬, 𑀢𑀁 𑀲𑀫𑀸𑀧𑀢𑁆𑀢𑀺𑀲𑀼𑀔𑀁 𑀅𑀦𑀗𑁆𑀕𑀡’’𑀦𑁆𑀢𑀺. (𑀚𑀸. 𑁧.𑁧.𑁧𑁩𑁪) 𑁋

𑀇𑀫𑀁 𑀅𑀦𑀗𑁆𑀕𑀡𑀚𑀸𑀢𑀓𑀁 𑀓𑀣𑁂𑀲𑀺. 𑀏𑀢𑁆𑀣 𑀘 𑀆𑀘𑀭𑀺𑀬𑁄 𑀓𑀸𑀮𑀁 𑀓𑀭𑁄𑀦𑁆𑀢𑁄 𑀅𑀦𑁆𑀢𑁂𑀯𑀸𑀲𑀺𑀓𑁂𑀳𑀺 𑀧𑀼𑀘𑁆𑀙𑀺𑀢𑁄 ‘‘𑀦𑁂𑀯𑀲𑀜𑁆𑀜𑀻 𑀦𑀸𑀲𑀜𑁆𑀜𑀻’’𑀢𑀺 𑀆𑀳. 𑀲𑁂𑀲𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑀅𑀧𑀭𑀫𑁆𑀧𑀺 𑀇𑀤𑀫𑁂𑀯 𑀧𑀼𑀣𑀼𑀚𑁆𑀚𑀦𑀧𑀜𑁆𑀘𑀓𑀁 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀁 𑀓𑀢𑁆𑀯𑀸 𑁋

‘‘𑀘𑀦𑁆𑀤𑀸𑀪𑀁 𑀲𑀽𑀭𑀺𑀬𑀸𑀪𑀜𑁆𑀘, 𑀬𑁄𑀥 𑀧𑀜𑁆𑀜𑀸𑀬 𑀕𑀸𑀥𑀢𑀺;

𑀅𑀯𑀺𑀢𑀓𑁆𑀓𑁂𑀦 𑀛𑀸𑀦𑁂𑀦, 𑀳𑁄𑀢𑀺 𑀆𑀪𑀲𑁆𑀲𑀭𑀽𑀧𑀕𑁄’’𑀢𑀺. (𑀚𑀸. 𑁧.𑁧.𑁧𑁩𑁫) 𑁋

𑀇𑀤𑀁 𑀘𑀦𑁆𑀤𑀸𑀪𑀚𑀸𑀢𑀓𑀁 𑀓𑀣𑁂𑀲𑀺. 𑀏𑀢𑁆𑀣𑀸𑀧𑀺 𑀆𑀘𑀭𑀺𑀬𑁄 𑀓𑀸𑀮𑀁 𑀓𑀭𑁄𑀦𑁆𑀢𑁄 𑀅𑀦𑁆𑀢𑁂𑀯𑀸𑀲𑀺𑀓𑁂𑀳𑀺 𑀧𑀼𑀘𑁆𑀙𑀺𑀢𑁄 ‘‘𑀑𑀤𑀸𑀢𑀓𑀲𑀺𑀡𑀁 𑀘𑀦𑁆𑀤𑀸𑀪𑀁 𑀦𑀸𑀫, 𑀧𑀻𑀢𑀓𑀲𑀺𑀡𑀁 𑀲𑀽𑀭𑀺𑀬𑀸𑀪𑀁 𑀦𑀸𑀫𑀸𑀢𑀺 𑀢𑀁 𑀉𑀪𑀬𑀁 𑀬𑁄 𑀧𑀜𑁆𑀜𑀸𑀬 𑀕𑀸𑀥𑀢𑀺 𑀧𑀯𑀺𑀲𑀢𑀺 𑀧𑀓𑁆𑀔𑀦𑁆𑀤𑀢𑀺, 𑀲𑁄 𑀅𑀯𑀺𑀢𑀓𑁆𑀓𑁂𑀦 𑀤𑀼𑀢𑀺𑀬𑀚𑁆𑀛𑀸𑀦𑁂𑀦 𑀆𑀪𑀲𑁆𑀲𑀭𑀽𑀧𑀕𑁄 𑀳𑁄𑀢𑀺, 𑀢𑀸𑀤𑀺𑀲𑁄 𑀅𑀳’’𑀦𑁆𑀢𑀺 𑀲𑀦𑁆𑀥𑀸𑀬 𑁋 ‘‘𑀘𑀦𑁆𑀤𑀸𑀪𑀁 𑀲𑀽𑀭𑀺𑀬𑀸𑀪’’𑀦𑁆𑀢𑀺 𑀆𑀳. 𑀲𑁂𑀲𑀁 𑀧𑀼𑀭𑀺𑀫𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑀇𑀤𑀫𑁂𑀯 𑀘 𑀧𑀼𑀣𑀼𑀚𑁆𑀚𑀦𑀧𑀜𑁆𑀘𑀓𑀁 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀁 𑀓𑀢𑁆𑀯𑀸 𑁋

‘‘𑀆𑀲𑀻𑀲𑁂𑀣𑁂𑀯 𑀧𑀼𑀭𑀺𑀲𑁄, 𑀦 𑀦𑀺𑀩𑁆𑀩𑀺𑀦𑁆𑀤𑁂𑀬𑁆𑀬 𑀧𑀡𑁆𑀟𑀺𑀢𑁄;

𑀧𑀲𑁆𑀲𑀸𑀫𑀺 𑀯𑁄𑀳𑀁 𑀅𑀢𑁆𑀢𑀸𑀦𑀁, 𑀬𑀣𑀸 𑀇𑀘𑁆𑀙𑀺𑀁 𑀢𑀣𑀸 𑀅𑀳𑀼.

‘‘𑀆𑀲𑀻𑀲𑁂𑀣𑁂𑀯 𑀧𑀼𑀭𑀺𑀲𑁄, 𑀦 𑀦𑀺𑀩𑁆𑀩𑀺𑀦𑁆𑀤𑁂𑀬𑁆𑀬 𑀧𑀡𑁆𑀟𑀺𑀢𑁄;

𑀧𑀲𑁆𑀲𑀸𑀫𑀺 𑀯𑁄𑀳𑀁 𑀅𑀢𑁆𑀢𑀸𑀦𑀁, 𑀉𑀤𑀓𑀸 𑀣𑀮𑀫𑀼𑀩𑁆𑀪𑀢𑀁.

‘‘𑀯𑀸𑀬𑀫𑁂𑀣𑁂𑀯 𑀧𑀼𑀭𑀺𑀲𑁄, 𑀦 𑀦𑀺𑀩𑁆𑀩𑀺𑀦𑁆𑀤𑁂𑀬𑁆𑀬 𑀧𑀡𑁆𑀟𑀺𑀢𑁄;

𑀧𑀲𑁆𑀲𑀸𑀫𑀺 𑀯𑁄𑀳𑀁 𑀅𑀢𑁆𑀢𑀸𑀦𑀁, 𑀬𑀣𑀸 𑀇𑀘𑁆𑀙𑀺𑀁 𑀢𑀣𑀸 𑀅𑀳𑀼.

‘‘𑀯𑀸𑀬𑀫𑁂𑀣𑁂𑀯 𑀧𑀼𑀭𑀺𑀲𑁄, 𑀦 𑀦𑀺𑀩𑁆𑀩𑀺𑀦𑁆𑀤𑁂𑀬𑁆𑀬 𑀧𑀡𑁆𑀟𑀺𑀢𑁄;

𑀧𑀲𑁆𑀲𑀸𑀫𑀺 𑀯𑁄𑀳𑀁 𑀅𑀢𑁆𑀢𑀸𑀦𑀁, 𑀉𑀤𑀓𑀸 𑀣𑀮𑀫𑀼𑀩𑁆𑀪𑀢𑀁.

‘‘𑀤𑀼𑀓𑁆𑀔𑀽𑀧𑀦𑀻𑀢𑁄𑀧𑀺 𑀦𑀭𑁄 𑀲𑀧𑀜𑁆𑀜𑁄,

𑀆𑀲𑀁 𑀦 𑀙𑀺𑀦𑁆𑀤𑁂𑀬𑁆𑀬 𑀲𑀼𑀔𑀸𑀕𑀫𑀸𑀬;

𑀩𑀳𑀽 𑀳𑀺 𑀨𑀲𑁆𑀲𑀸 𑀅𑀳𑀺𑀢𑀸 𑀳𑀺𑀢𑀸 𑀘,

𑀅𑀯𑀺𑀢𑀓𑁆𑀓𑀺𑀢𑀸 𑀫𑀘𑁆𑀘𑀫𑀼𑀧𑀩𑁆𑀩𑀚𑀦𑁆𑀢𑀺.

‘‘𑀅𑀘𑀺𑀦𑁆𑀢𑀺𑀢𑀫𑁆𑀧𑀺 𑀪𑀯𑀢𑀺, 𑀘𑀺𑀦𑁆𑀢𑀺𑀢𑀫𑁆𑀧𑀺 𑀯𑀺𑀦𑀲𑁆𑀲𑀢𑀺;

𑀦 𑀳𑀺 𑀘𑀺𑀦𑁆𑀢𑀸𑀫𑀬𑀸 𑀪𑁄𑀕𑀸, 𑀇𑀢𑁆𑀣𑀺𑀬𑀸 𑀧𑀼𑀭𑀺𑀲𑀲𑁆𑀲 𑀯𑀸.

‘‘𑀲𑀭𑀪𑀁 𑀕𑀺𑀭𑀺𑀤𑀼𑀕𑁆𑀕𑀲𑁆𑀫𑀺𑀁, 𑀬𑀁 𑀢𑁆𑀯𑀁 𑀅𑀦𑀼𑀲𑀭𑀻 𑀧𑀼𑀭𑁂;

𑀅𑀮𑀻𑀦𑀘𑀺𑀢𑁆𑀢𑀲𑁆𑀲 𑀢𑀼𑀯𑀁, 𑀯𑀺𑀓𑁆𑀓𑀦𑁆𑀢𑀫𑀦𑀼𑀚𑀻𑀯𑀲𑀺.

‘‘𑀬𑁄 𑀢𑀁 𑀯𑀺𑀤𑀼𑀕𑁆𑀕𑀸 𑀦𑀭𑀓𑀸 𑀲𑀫𑀼𑀤𑁆𑀥𑀭𑀺,

𑀲𑀺𑀮𑀸𑀬 𑀬𑁄𑀕𑁆𑀕𑀁 𑀲𑀭𑀪𑁄 𑀓𑀭𑀺𑀢𑁆𑀯𑀸;

𑀤𑀼𑀓𑁆𑀔𑀽𑀧𑀦𑀻𑀢𑀁 𑀫𑀘𑁆𑀘𑀼𑀫𑀼𑀔𑀸 𑀧𑀫𑁄𑀘𑀬𑀺,

𑀅𑀮𑀻𑀦𑀘𑀺𑀢𑁆𑀢𑀁 𑀢 𑀫𑀺𑀕𑀁 𑀯𑀤𑁂𑀲𑀺.

‘‘𑀓𑀺𑀁 𑀢𑁆𑀯𑀁 𑀦𑀼 𑀢𑀢𑁆𑀣𑁂𑀯 𑀢𑀤𑀸 𑀅𑀳𑁄𑀲𑀺,

𑀉𑀤𑀸𑀳𑀼 𑀢𑁂 𑀓𑁄𑀘𑀺 𑀦𑀁 𑀏𑀢𑀤𑀓𑁆𑀔𑀸;

𑀯𑀺𑀯𑀝𑁆𑀝𑀘𑁆𑀙𑀤𑁆𑀤𑁄 𑀦𑀼𑀲𑀺 𑀲𑀩𑁆𑀩𑀤𑀲𑁆𑀲𑀻,

𑀜𑀸𑀡𑀁 𑀦𑀼 𑀢𑁂 𑀩𑁆𑀭𑀸𑀳𑁆𑀫𑀡 𑀪𑀺𑀁𑀲𑀭𑀽𑀧𑀁.

‘‘𑀦 𑀘𑁂𑀯𑀳𑀁 𑀢𑀢𑁆𑀣 𑀢𑀤𑀸 𑀅𑀳𑁄𑀲𑀺𑀁,

𑀦 𑀘𑀸𑀧𑀺 𑀫𑁂 𑀓𑁄𑀘𑀺 𑀦𑀁 𑀏𑀢𑀤𑀓𑁆𑀔𑀸;

𑀕𑀸𑀣𑀸𑀧𑀤𑀸𑀦𑀜𑁆𑀘 𑀲𑀼𑀪𑀸𑀲𑀺𑀢𑀸𑀦𑀁,

𑀅𑀢𑁆𑀣𑀁 𑀢𑀤𑀸𑀦𑁂𑀦𑁆𑀢𑀺 𑀚𑀦𑀺𑀦𑁆𑀤 𑀥𑀻𑀭𑀸’’𑀢𑀺. (𑀚𑀸. 𑁧.𑁧𑁩.𑁧𑁩𑁪-𑁧𑁪𑁩) 𑁋

𑀇𑀫𑀁 𑀢𑁂𑀭𑀲𑀦𑀺𑀧𑀸𑀢𑁂 𑀲𑀭𑀪𑀚𑀸𑀢𑀓𑀜𑁆𑀘 𑀓𑀣𑁂𑀲𑀺. 𑀇𑀫𑀸𑀦𑀺 𑀧𑀦 𑀧𑀜𑁆𑀘𑀧𑀺 𑀚𑀸𑀢𑀓𑀸𑀦𑀺 𑀅𑀢𑀻𑀢𑁂𑀧𑀺 𑀲𑀁𑀔𑀺𑀢𑁆𑀢𑁂𑀦 𑀪𑀸𑀲𑀺𑀢𑀲𑁆𑀲 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀫𑀬𑁆𑀳𑀁 𑀧𑀼𑀢𑁆𑀢𑁄 𑀚𑀸𑀦𑀸𑀢𑀻𑀢𑀺 𑀲𑀢𑁆𑀣𑀸𑀭𑀸 𑀥𑀫𑁆𑀫𑀲𑁂𑀦𑀸𑀧𑀢𑀺𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀲𑁆𑀲 𑀧𑀜𑁆𑀜𑀸𑀦𑀼𑀪𑀸𑀯𑀧𑁆𑀧𑀓𑀸𑀲𑀦𑀢𑁆𑀣𑀫𑁂𑀯 𑀓𑀣𑀺𑀢𑀸𑀦𑀻𑀢𑀺 𑀏𑀯𑀁 𑀆𑀕𑀫𑀦𑀢𑁄𑀧𑀺 𑀣𑁂𑀭𑁄 𑀫𑀳𑀸𑀧𑀜𑁆𑀜𑀢𑀸𑀬 𑀏𑀢𑀤𑀕𑁆𑀕𑀝𑁆𑀞𑀸𑀦𑀁 𑀮𑀪𑀺.

𑀓𑀣𑀁 𑀘𑀺𑀡𑁆𑀡𑀯𑀲𑀺𑀢𑁄𑀢𑀺? 𑀘𑀺𑀡𑁆𑀡𑀁 𑀓𑀺𑀭𑁂𑀢𑀁 𑀣𑁂𑀭𑀲𑁆𑀲 𑀘𑀢𑀼𑀧𑀭𑀺𑀲𑀫𑀚𑁆𑀛𑁂 𑀥𑀫𑁆𑀫𑀁 𑀓𑀣𑁂𑀦𑁆𑀢𑁄 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀅𑀫𑀼𑀜𑁆𑀘𑀺𑀢𑁆𑀯𑀸 𑀓𑀣𑁂𑀢𑀻𑀢𑀺 𑀏𑀯𑀁 𑀘𑀺𑀡𑁆𑀡𑀯𑀲𑀺𑀢𑁄𑀧𑀺 𑀣𑁂𑀭𑁄 𑀫𑀳𑀸𑀧𑀜𑁆𑀜𑀢𑀸𑀬 𑀏𑀢𑀤𑀕𑁆𑀕𑀝𑁆𑀞𑀸𑀦𑀁 𑀮𑀪𑀺.

𑀓𑀣𑀁 𑀕𑀼𑀡𑀸𑀢𑀺𑀭𑁂𑀓𑀢𑁄𑀢𑀺? 𑀞𑀧𑁂𑀢𑁆𑀯𑀸 𑀳𑀺 𑀤𑀲𑀩𑀮𑀁 𑀅𑀜𑁆𑀜𑁄 𑀓𑁄𑀘𑀺 𑀏𑀓𑀲𑀸𑀯𑀓𑁄𑀧𑀺 𑀫𑀳𑀸𑀧𑀜𑁆𑀜𑀢𑀸𑀬 𑀥𑀫𑁆𑀫𑀲𑁂𑀦𑀸𑀧𑀢𑀺𑀦𑀸 𑀲𑀤𑀺𑀲𑁄 𑀦𑀸𑀫 𑀦𑀢𑁆𑀣𑀻𑀢𑀺 𑀏𑀯𑀁 𑀕𑀼𑀡𑀸𑀢𑀺𑀭𑁂𑀓𑀢𑁄𑀧𑀺 𑀣𑁂𑀭𑁄 𑀫𑀳𑀸𑀧𑀜𑁆𑀜𑀢𑀸𑀬 𑀏𑀢𑀤𑀕𑁆𑀕𑀝𑁆𑀞𑀸𑀦𑀁 𑀮𑀪𑀺.

𑀬𑀣𑀸 𑀘 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄, 𑀏𑀯𑀁 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑁄𑀧𑀺 𑀲𑀩𑁆𑀩𑁂𑀳𑁂𑀯 𑀘𑀢𑀽𑀳𑀺𑀧𑀺 𑀇𑀫𑁂𑀳𑀺 𑀓𑀸𑀭𑀡𑁂𑀳𑀺 𑀏𑀢𑀤𑀕𑁆𑀕𑀝𑁆𑀞𑀸𑀦𑀁 𑀮𑀪𑀺. 𑀓𑀣𑀁? 𑀣𑁂𑀭𑁄 𑀳𑀺 𑀫𑀳𑀺𑀤𑁆𑀥𑀺𑀓𑁄 𑀫𑀳𑀸𑀦𑀼𑀪𑀸𑀯𑁄 𑀦𑀦𑁆𑀤𑁄𑀧𑀦𑀦𑁆𑀤𑀲𑀤𑀺𑀲𑀫𑁆𑀧𑀺 𑀦𑀸𑀕𑀭𑀸𑀚𑀸𑀦𑀁 𑀤𑀫𑁂𑀲𑀻𑀢𑀺 𑀏𑀯𑀁 𑀢𑀸𑀯 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀢𑁄 𑀮𑀪𑀺. 𑀦 𑀧𑀦𑁂𑀲 𑀇𑀤𑀸𑀦𑁂𑀯 𑀫𑀳𑀺𑀤𑁆𑀥𑀺𑀓𑁄 𑀫𑀳𑀸𑀦𑀼𑀪𑀸𑀯𑁄, 𑀅𑀢𑀻𑀢𑁂 𑀧𑀜𑁆𑀘 𑀚𑀸𑀢𑀺𑀲𑀢𑀸𑀦𑀺 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁄𑀧𑀺 𑀫𑀳𑀺𑀤𑁆𑀥𑀺𑀓𑁄 𑀫𑀳𑀸𑀦𑀼𑀪𑀸𑀯𑁄 𑀅𑀳𑁄𑀲𑀻𑀢𑀺.

‘‘𑀬𑁄 𑀧𑀩𑁆𑀩𑀚𑀻 𑀚𑀸𑀢𑀺𑀲𑀢𑀸𑀦𑀺 𑀧𑀜𑁆𑀘,

𑀧𑀳𑀸𑀬 𑀓𑀸𑀫𑀸𑀦𑀺 𑀫𑀦𑁄𑀭𑀫𑀸𑀦𑀺;

𑀢𑀁 𑀯𑀻𑀢𑀭𑀸𑀕𑀁 𑀲𑀼𑀲𑀫𑀸𑀳𑀺𑀢𑀺𑀦𑁆𑀤𑁆𑀭𑀺𑀬𑀁,

𑀧𑀭𑀺𑀦𑀺𑀩𑁆𑀩𑀼𑀢𑀁 𑀯𑀦𑁆𑀤𑀣 𑀫𑁄𑀕𑁆𑀕𑀮𑁆𑀮𑀸𑀦’’𑀦𑁆𑀢𑀺. 𑁋

𑀏𑀯𑀁 𑀆𑀕𑀫𑀦𑀢𑁄𑀧𑀺 𑀮𑀪𑀺. 𑀘𑀺𑀡𑁆𑀡𑀁 𑀘𑁂𑀢𑀁 𑀣𑁂𑀭𑀲𑁆𑀲 𑀦𑀺𑀭𑀬𑀁 𑀕𑀦𑁆𑀢𑁆𑀯𑀸 𑀅𑀢𑁆𑀢𑀦𑁄 𑀇𑀤𑁆𑀥𑀺𑀩𑀮𑁂𑀦 𑀦𑀺𑀭𑀬𑀲𑀢𑁆𑀢𑀸𑀦𑀁 𑀅𑀲𑁆𑀲𑀸𑀲𑀚𑀦𑀦𑀢𑁆𑀣𑀁 𑀲𑀻𑀢𑀁 𑀅𑀥𑀺𑀝𑁆𑀞𑀸𑀬 𑀘𑀓𑁆𑀓𑀫𑀢𑁆𑀢𑀁 𑀧𑀤𑀼𑀫𑀁 𑀫𑀸𑀧𑁂𑀢𑁆𑀯𑀸 𑀧𑀤𑀼𑀫𑀓𑀡𑁆𑀡𑀺𑀓𑀸𑀬𑀁 𑀦𑀺𑀲𑀻𑀤𑀺𑀢𑁆𑀯𑀸 𑀥𑀫𑁆𑀫𑀓𑀣𑀁 𑀓𑀣𑁂𑀢𑀺, 𑀤𑁂𑀯𑀮𑁄𑀓𑀁 𑀕𑀦𑁆𑀢𑁆𑀯𑀸 𑀤𑁂𑀯𑀲𑀗𑁆𑀖𑀁 𑀓𑀫𑁆𑀫𑀕𑀢𑀺𑀁 𑀚𑀸𑀦𑀸𑀧𑁂𑀢𑁆𑀯𑀸 𑀲𑀘𑁆𑀘𑀓𑀣𑀁 𑀓𑀣𑁂𑀢𑀻𑀢𑀺 𑀏𑀯𑀁 𑀘𑀺𑀡𑁆𑀡𑀯𑀲𑀺𑀢𑁄 𑀮𑀪𑀺. 𑀞𑀧𑁂𑀢𑁆𑀯𑀸 𑀘 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁 𑀅𑀜𑁆𑀜𑁄 𑀲𑀸𑀯𑀓𑁄 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀯𑀺𑀬 𑀫𑀳𑀺𑀤𑁆𑀥𑀺𑀓𑁄 𑀫𑀳𑀸𑀦𑀼𑀪𑀸𑀯𑁄 𑀦𑀢𑁆𑀣𑀻𑀢𑀺 𑀏𑀯𑀁 𑀕𑀼𑀡𑀸𑀢𑀺𑀭𑁂𑀓𑀢𑁄 𑀮𑀪𑀺.

𑀬𑀣𑀸 𑀘𑁂𑀲, 𑀏𑀯𑀁 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑁄𑀧𑀺 𑀲𑀩𑁆𑀩𑁂𑀳𑁂𑀯𑀺𑀫𑁂𑀳𑀺 𑀓𑀸𑀭𑀡𑁂𑀳𑀺 𑀏𑀢𑀤𑀕𑁆𑀕𑀝𑁆𑀞𑀸𑀦𑀁 𑀮𑀪𑀺. 𑀓𑀣𑀁? 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀳𑀺 𑀣𑁂𑀭𑀲𑁆𑀲 𑀢𑀺𑀕𑀸𑀯𑀼𑀢𑀁 𑀫𑀕𑁆𑀕𑀁 𑀧𑀘𑁆𑀘𑀼𑀕𑁆𑀕𑀫𑀦𑀁 𑀓𑀢𑁆𑀯𑀸 𑀢𑀻𑀳𑀺 𑀑𑀯𑀸𑀤𑁂𑀳𑀺 𑀉𑀧𑀲𑀫𑁆𑀧𑀸𑀤𑁂𑀢𑁆𑀯𑀸 𑀘𑀻𑀯𑀭𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀅𑀤𑀸𑀲𑀺. 𑀢𑀲𑁆𑀫𑀺𑀁 𑀲𑀫𑀬𑁂 𑀫𑀳𑀸𑀧𑀣𑀯𑀻 𑀉𑀤𑀓𑀧𑀭𑀺𑀬𑀦𑁆𑀢𑀁 𑀓𑀢𑁆𑀯𑀸 𑀓𑀫𑁆𑀧𑀺, 𑀫𑀳𑀸𑀚𑀦𑀲𑁆𑀲 𑀅𑀩𑁆𑀪𑀦𑁆𑀢𑀭𑁂 𑀣𑁂𑀭𑀲𑁆𑀲 𑀓𑀺𑀢𑁆𑀢𑀺𑀲𑀤𑁆𑀤𑁄 𑀅𑀚𑁆𑀛𑁄𑀢𑁆𑀣𑀭𑀺𑀢𑁆𑀯𑀸 𑀕𑀢𑁄. 𑀏𑀯𑀁 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀢𑁄 𑀮𑀪𑀺. 𑀦 𑀘𑁂𑀲 𑀇𑀤𑀸𑀦𑁂𑀯 𑀥𑀼𑀢𑀥𑀭𑁄, 𑀅𑀢𑀻𑀢𑁂 𑀧𑀜𑁆𑀘 𑀚𑀸𑀢𑀺𑀲𑀢𑀸𑀦𑀺 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁄𑀧𑀺 𑀥𑀼𑀢𑀥𑀭𑁄𑀯 𑀅𑀳𑁄𑀲𑀺.

‘‘𑀬𑁄 𑀧𑀩𑁆𑀩𑀚𑀻 𑀚𑀸𑀢𑀺𑀲𑀢𑀸𑀦𑀺 𑀧𑀜𑁆𑀘,

𑀧𑀳𑀸𑀬 𑀓𑀸𑀫𑀸𑀦𑀺 𑀫𑀦𑁄𑀭𑀫𑀸𑀦𑀺;

𑀢𑀁 𑀯𑀻𑀢𑀭𑀸𑀕𑀁 𑀲𑀼𑀲𑀫𑀸𑀳𑀺𑀢𑀺𑀦𑁆𑀤𑁆𑀭𑀺𑀬𑀁,

𑀧𑀭𑀺𑀦𑀺𑀩𑁆𑀩𑀼𑀢𑀁 𑀯𑀦𑁆𑀤𑀣 𑀫𑀳𑀸𑀓𑀲𑁆𑀲𑀧’’𑀦𑁆𑀢𑀺. 𑁋

𑀏𑀯𑀁 𑀆𑀕𑀫𑀦𑀢𑁄𑀧𑀺 𑀮𑀪𑀺. 𑀘𑀺𑀡𑁆𑀡𑀁 𑀘𑁂𑀢𑀁 𑀣𑁂𑀭𑀲𑁆𑀲 𑀘𑀢𑀼𑀧𑀭𑀺𑀲𑀫𑀚𑁆𑀛𑀕𑀢𑁄 𑀥𑀫𑁆𑀫𑀁 𑀓𑀣𑁂𑀦𑁆𑀢𑁄 𑀤𑀲 𑀓𑀣𑀸𑀯𑀢𑁆𑀣𑀽𑀦𑀺 𑀅𑀯𑀺𑀚𑀳𑀺𑀢𑁆𑀯𑀸𑀯 𑀓𑀣𑁂𑀢𑀻𑀢𑀺 𑀏𑀯𑀁 𑀘𑀺𑀡𑁆𑀡𑀯𑀲𑀺𑀢𑁄 𑀮𑀪𑀺. 𑀞𑀧𑁂𑀢𑁆𑀯𑀸 𑀘 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁 𑀅𑀜𑁆𑀜𑁄 𑀲𑀸𑀯𑀓𑁄 𑀢𑁂𑀭𑀲𑀳𑀺 𑀥𑀼𑀢𑀕𑀼𑀡𑁂𑀳𑀺 𑀫𑀳𑀸𑀓𑀲𑁆𑀲𑀧𑀲𑀤𑀺𑀲𑁄 𑀦𑀢𑁆𑀣𑀻𑀢𑀺 𑀏𑀯𑀁 𑀕𑀼𑀡𑀸𑀢𑀺𑀭𑁂𑀓𑀢𑁄 𑀮𑀪𑀺. 𑀇𑀫𑀺𑀦𑀸𑀯 𑀦𑀺𑀬𑀸𑀫𑁂𑀦 𑀢𑁂𑀲𑀁 𑀢𑁂𑀲𑀁 𑀣𑁂𑀭𑀸𑀦𑀁 𑀬𑀣𑀸𑀮𑀸𑀪𑀢𑁄 𑀕𑀼𑀡𑁂 𑀓𑀺𑀢𑁆𑀢𑁂𑀢𑀼𑀁 𑀯𑀝𑁆𑀝𑀢𑀺.

𑀕𑀼𑀡𑀯𑀲𑁂𑀦𑁂𑀯 𑀳𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀬𑀣𑀸 𑀦𑀸𑀫 𑀭𑀸𑀚𑀸 𑀘𑀓𑁆𑀓𑀯𑀢𑁆𑀢𑀻 𑀘𑀓𑁆𑀓𑀭𑀢𑀦𑀸𑀦𑀼𑀪𑀸𑀯𑁂𑀦 𑀘𑀓𑁆𑀓𑀯𑀸𑀴𑀕𑀩𑁆𑀪𑁂 𑀭𑀚𑁆𑀚𑀲𑀺𑀭𑀺𑀁 𑀧𑀢𑁆𑀯𑀸 ‘‘𑀧𑀢𑁆𑀢𑀩𑁆𑀩𑀁 𑀫𑁂 𑀧𑀢𑁆𑀢𑀁, 𑀓𑀺𑀁 𑀫𑁂 𑀇𑀤𑀸𑀦𑀺 𑀫𑀳𑀸𑀚𑀦𑁂𑀦 𑀑𑀮𑁄𑀓𑀺𑀢𑁂𑀦𑀸’’𑀢𑀺 𑀦 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑁄 𑀳𑀼𑀢𑁆𑀯𑀸 𑀭𑀚𑁆𑀚𑀲𑀺𑀭𑀺𑀁𑀬𑁂𑀯 𑀅𑀦𑀼𑀪𑁄𑀢𑀺, 𑀓𑀸𑀮𑁂𑀦 𑀧𑀦 𑀓𑀸𑀮𑀁 𑀯𑀺𑀦𑀺𑀘𑁆𑀙𑀬𑀝𑁆𑀞𑀸𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀦𑀺𑀕𑁆𑀕𑀳𑁂𑀢𑀩𑁆𑀩𑁂 𑀦𑀺𑀕𑁆𑀕𑀡𑁆𑀳𑀸𑀢𑀺, 𑀧𑀕𑁆𑀕𑀳𑁂𑀢𑀩𑁆𑀩𑁂 𑀧𑀕𑁆𑀕𑀡𑁆𑀳𑀸𑀢𑀺, 𑀞𑀸𑀦𑀦𑁆𑀢𑀭𑁂𑀲𑀼 𑀘 𑀞𑀧𑁂𑀢𑀩𑁆𑀩𑀬𑀼𑀢𑁆𑀢𑀓𑁂 𑀞𑀸𑀦𑀦𑁆𑀢𑀭𑁂𑀲𑀼 𑀞𑀧𑁂𑀢𑀺, 𑀏𑀯𑀫𑁂𑀯𑀁 𑀫𑀳𑀸𑀩𑁄𑀥𑀺𑀫𑀡𑁆𑀟𑁂 𑀅𑀥𑀺𑀕𑀢𑀲𑁆𑀲 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑁆𑀲 𑀆𑀦𑀼𑀪𑀸𑀯𑁂𑀦 𑀅𑀦𑀼𑀧𑁆𑀧𑀢𑁆𑀢𑀥𑀫𑁆𑀫𑀭𑀚𑁆𑀚𑁄 𑀥𑀫𑁆𑀫𑀭𑀸𑀚𑀸𑀧𑀺 ‘‘𑀓𑀺𑀁 𑀫𑁂 𑀇𑀤𑀸𑀦𑀺 𑀮𑁄𑀓𑁂𑀦 𑀑𑀮𑁄𑀓𑀺𑀢𑁂𑀦, 𑀅𑀦𑀼𑀢𑁆𑀢𑀭𑀁 𑀨𑀮𑀲𑀫𑀸𑀧𑀢𑁆𑀢𑀺𑀲𑀼𑀔𑀁 𑀅𑀦𑀼𑀪𑀯𑀺𑀲𑁆𑀲𑀸𑀫𑀻’’𑀢𑀺 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑀢𑀁 𑀅𑀦𑀸𑀧𑀚𑁆𑀚𑀺𑀢𑁆𑀯𑀸 𑀘𑀢𑀼𑀧𑀭𑀺𑀲𑀫𑀚𑁆𑀛𑁂 𑀧𑀜𑁆𑀜𑀢𑁆𑀢𑀯𑀭𑀩𑀼𑀤𑁆𑀥𑀸𑀲𑀦𑁂 𑀦𑀺𑀲𑀺𑀦𑁆𑀦𑁄 𑀅𑀝𑁆𑀞𑀗𑁆𑀕𑀲𑀫𑀦𑁆𑀦𑀸𑀕𑀢𑀁 𑀩𑁆𑀭𑀳𑁆𑀫𑀲𑁆𑀲𑀭𑀁 𑀦𑀺𑀘𑁆𑀙𑀸𑀭𑁂𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑀬𑀫𑀸𑀦𑁄 𑀦𑀺𑀕𑁆𑀕𑀳𑁂𑀢𑀩𑁆𑀩𑀬𑀼𑀢𑁆𑀢𑁂 𑀓𑀡𑁆𑀳𑀥𑀫𑁆𑀫𑁂 𑀧𑀼𑀕𑁆𑀕𑀮𑁂 𑀲𑀺𑀦𑁂𑀭𑀼𑀧𑀸𑀤𑁂 𑀧𑀓𑁆𑀔𑀺𑀧𑀦𑁆𑀢𑁄 𑀯𑀺𑀬 𑀅𑀧𑀸𑀬𑀪𑀬𑀲𑀦𑁆𑀢𑀚𑁆𑀚𑀦𑁂𑀦 𑀦𑀺𑀕𑁆𑀕𑀳𑁂𑀢𑁆𑀯𑀸 𑀧𑀕𑁆𑀕𑀳𑁂𑀢𑀩𑁆𑀩𑀬𑀼𑀢𑁆𑀢𑁂 𑀓𑀮𑁆𑀬𑀸𑀡𑀥𑀫𑁆𑀫𑁂 𑀧𑀼𑀕𑁆𑀕𑀮𑁂 𑀉𑀓𑁆𑀔𑀺𑀧𑀺𑀢𑁆𑀯𑀸 𑀪𑀯𑀕𑁆𑀕𑁂 𑀦𑀺𑀲𑀻𑀤𑀸𑀧𑁂𑀦𑁆𑀢𑁄 𑀯𑀺𑀬 𑀧𑀕𑁆𑀕𑀡𑁆𑀳𑀺𑀢𑁆𑀯𑀸 𑀞𑀸𑀦𑀦𑁆𑀢𑀭𑁂𑀲𑀼 𑀞𑀧𑁂𑀢𑀩𑁆𑀩𑀬𑀼𑀢𑁆𑀢𑀓𑁂 𑀅𑀜𑁆𑀜𑀸𑀲𑀺𑀓𑁄𑀡𑁆𑀟𑀜𑁆𑀜𑀢𑁆𑀣𑁂𑀭𑀸𑀤𑀬𑁄 𑀲𑀸𑀯𑀓𑁂 𑀬𑀸𑀣𑀸𑀯𑀲𑀭𑀲𑀕𑀼𑀡𑀯𑀲𑁂𑀦𑁂𑀯 𑀞𑀸𑀦𑀦𑁆𑀢𑀭𑁂𑀲𑀼 𑀞𑀧𑁂𑀦𑁆𑀢𑁄 𑀏𑀢𑀤𑀕𑁆𑀕𑀁, 𑀪𑀺𑀓𑁆𑀔𑀯𑁂, 𑀫𑀫 𑀲𑀸𑀯𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀭𑀢𑁆𑀢𑀜𑁆𑀜𑀽𑀦𑀁, 𑀬𑀤𑀺𑀤𑀁 𑀅𑀜𑁆𑀜𑀸𑀲𑀺𑀓𑁄𑀡𑁆𑀟𑀜𑁆𑀜𑁄𑀢𑀺𑀆𑀤𑀺𑀫𑀸𑀳.

𑀅𑀜𑁆𑀜𑀸𑀲𑀺𑀓𑁄𑀡𑁆𑀟𑀜𑁆𑀜𑀢𑁆𑀣𑁂𑀭𑀯𑀢𑁆𑀣𑀼

𑀢𑀢𑁆𑀣 𑀏𑀢𑀤𑀕𑁆𑀕𑀦𑁆𑀢𑀺 𑀧𑀤𑀁 𑀯𑀼𑀢𑁆𑀢𑀢𑁆𑀣𑀫𑁂𑀯. 𑀭𑀢𑁆𑀢𑀜𑁆𑀜𑀽𑀦𑀦𑁆𑀢𑀺 𑀭𑀢𑁆𑀢𑀺𑀬𑁄 𑀚𑀸𑀦𑀦𑁆𑀢𑀸𑀦𑀁. 𑀞𑀧𑁂𑀢𑁆𑀯𑀸 𑀳𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁 𑀅𑀜𑁆𑀜𑁄 𑀲𑀸𑀯𑀓𑁄 𑀅𑀜𑁆𑀜𑀸𑀲𑀺𑀓𑁄𑀡𑁆𑀟𑀜𑁆𑀜𑀢𑁆𑀣𑁂𑀭𑀢𑁄 𑀧𑀞𑀫𑀢𑀭𑀁 𑀧𑀩𑁆𑀩𑀚𑀺𑀢𑁄 𑀦𑀸𑀫 𑀦𑀢𑁆𑀣𑀻𑀢𑀺 𑀧𑀩𑁆𑀩𑀚𑀺𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀣𑁂𑀭𑁄 𑀘𑀺𑀭𑀓𑀸𑀮𑀁 𑀭𑀢𑁆𑀢𑀺𑀬𑁄 𑀚𑀸𑀦𑀸𑀢𑀻𑀢𑀺 𑀭𑀢𑁆𑀢𑀜𑁆𑀜𑀽. 𑀲𑀩𑁆𑀩𑀧𑀞𑀫𑀁 𑀥𑀫𑁆𑀫𑀲𑁆𑀲 𑀧𑀝𑀺𑀯𑀺𑀤𑁆𑀥𑀢𑁆𑀢𑀸 𑀬𑀤𑀸 𑀢𑁂𑀦 𑀥𑀫𑁆𑀫𑁄 𑀧𑀝𑀺𑀯𑀺𑀤𑁆𑀥𑁄, 𑀘𑀺𑀭𑀓𑀸𑀮𑀢𑁄 𑀧𑀝𑁆𑀞𑀸𑀬 𑀢𑀁 𑀭𑀢𑁆𑀢𑀺𑀁 𑀚𑀸𑀦𑀸𑀢𑀻𑀢𑀺𑀧𑀺 𑀭𑀢𑁆𑀢𑀜𑁆𑀜𑀽. 𑀅𑀧𑀺𑀘 𑀔𑀻𑀡𑀸𑀲𑀯𑀸𑀦𑀁 𑀭𑀢𑁆𑀢𑀺𑀤𑀺𑀯𑀲𑀧𑀭𑀺𑀘𑁆𑀙𑁂𑀤𑁄 𑀧𑀸𑀓𑀝𑁄𑀯 𑀳𑁄𑀢𑀺, 𑀅𑀬𑀜𑁆𑀘 𑀧𑀞𑀫𑀔𑀻𑀡𑀸𑀲𑀯𑁄𑀢𑀺 𑀏𑀯𑀫𑁆𑀧𑀺 𑀭𑀢𑁆𑀢𑀜𑁆𑀜𑀽𑀦𑀁 𑀲𑀸𑀯𑀓𑀸𑀦𑀁 𑀅𑀬𑀫𑁂𑀯 𑀅𑀕𑁆𑀕𑁄 𑀧𑀼𑀭𑀺𑀫𑀓𑁄𑀝𑀺𑀪𑀽𑀢𑁄 𑀲𑁂𑀝𑁆𑀞𑁄. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀭𑀢𑁆𑀢𑀜𑁆𑀜𑀽𑀦𑀁 𑀬𑀤𑀺𑀤𑀁 𑀅𑀜𑁆𑀜𑀸𑀲𑀺𑀓𑁄𑀡𑁆𑀟𑀜𑁆𑀜𑁄’’𑀢𑀺.

𑀏𑀢𑁆𑀣 𑀘 𑀬𑀤𑀺𑀤𑀦𑁆𑀢𑀺 𑀦𑀺𑀧𑀸𑀢𑁄, 𑀢𑀲𑁆𑀲 𑀣𑁂𑀭𑀁 𑀅𑀯𑁂𑀓𑁆𑀔𑀺𑀢𑁆𑀯𑀸 𑀬𑁄 𑀏𑀲𑁄𑀢𑀺, 𑀅𑀕𑁆𑀕𑀲𑀤𑁆𑀤𑀁 𑀅𑀯𑁂𑀓𑁆𑀔𑀺𑀢𑁆𑀯𑀸 𑀬𑀁 𑀏𑀢𑀦𑁆𑀢𑀺 𑀅𑀢𑁆𑀣𑁄. 𑀅𑀜𑁆𑀜𑀸𑀲𑀺𑀓𑁄𑀡𑁆𑀟𑀜𑁆𑀜𑁄𑀢𑀺 𑀜𑀸𑀢𑀓𑁄𑀡𑁆𑀟𑀜𑁆𑀜𑁄 𑀧𑀝𑀺𑀯𑀺𑀤𑁆𑀥𑀓𑁄𑀡𑁆𑀟𑀜𑁆𑀜𑁄. 𑀢𑁂𑀦𑁂𑀯𑀸𑀳 𑁋 ‘‘𑀅𑀜𑁆𑀜𑀸𑀲𑀺 𑀯𑀢, 𑀪𑁄, 𑀓𑁄𑀡𑁆𑀟𑀜𑁆𑀜𑁄, 𑀅𑀜𑁆𑀜𑀸𑀲𑀺 𑀯𑀢, 𑀪𑁄, 𑀓𑁄𑀡𑁆𑀟𑀜𑁆𑀜𑁄𑀢𑀺. 𑀇𑀢𑀺 𑀳𑀺𑀤𑀁 𑀆𑀬𑀲𑁆𑀫𑀢𑁄 𑀓𑁄𑀡𑁆𑀟𑀜𑁆𑀜𑀲𑁆𑀲 𑀅𑀜𑁆𑀜𑀸𑀲𑀺𑀓𑁄𑀡𑁆𑀟𑀜𑁆𑀜𑁄 𑀢𑁆𑀯𑁂𑀯 𑀦𑀸𑀫𑀁 𑀅𑀳𑁄𑀲𑀻’’𑀢𑀺 (𑀲𑀁. 𑀦𑀺. 𑁫.𑁧𑁦𑁮𑁧; 𑀫𑀳𑀸𑀯. 𑁧𑁭).

𑀅𑀬𑀁 𑀧𑀦 𑀣𑁂𑀭𑁄 𑀓𑀢𑀭𑀩𑀼𑀤𑁆𑀥𑀓𑀸𑀮𑁂 𑀧𑀼𑀩𑁆𑀩𑀧𑀢𑁆𑀣𑀦𑀁 𑀅𑀪𑀺𑀦𑀻𑀳𑀸𑀭𑀁 𑀅𑀓𑀸𑀲𑀺, 𑀓𑀤𑀸 𑀧𑀩𑁆𑀩𑀚𑀺𑀢𑁄, 𑀓𑀤𑀸𑀦𑁂𑀦 𑀧𑀞𑀫𑀁 𑀥𑀫𑁆𑀫𑁄 𑀅𑀥𑀺𑀕𑀢𑁄, 𑀓𑀤𑀸 𑀞𑀸𑀦𑀦𑁆𑀢𑀭𑁂 𑀞𑀧𑀺𑀢𑁄𑀢𑀺 𑀇𑀫𑀺𑀦𑀸 𑀦𑀬𑁂𑀦 𑀲𑀩𑁆𑀩𑁂𑀲𑀼𑀧𑀺 𑀏𑀢𑀤𑀕𑁆𑀕𑁂𑀲𑀼 𑀧𑀜𑁆𑀳𑀓𑀫𑁆𑀫𑀁 𑀯𑁂𑀤𑀺𑀢𑀩𑁆𑀩𑀁.

𑀢𑀢𑁆𑀣 𑀇𑀫𑀲𑁆𑀲 𑀢𑀸𑀯 𑀣𑁂𑀭𑀲𑁆𑀲 𑀧𑀜𑁆𑀳𑀓𑀫𑁆𑀫𑁂 𑀅𑀬𑀫𑀦𑀼𑀧𑀼𑀩𑁆𑀩𑀺𑀓𑀣𑀸 𑁋 𑀇𑀢𑁄 𑀓𑀧𑁆𑀧𑀲𑀢𑀲𑀳𑀲𑁆𑀲𑀫𑀢𑁆𑀣𑀓𑁂 𑀧𑀤𑀼𑀫𑀼𑀢𑁆𑀢𑀭𑁄 𑀦𑀸𑀫 𑀩𑀼𑀤𑁆𑀥𑁄 𑀮𑁄𑀓𑁂 𑀉𑀤𑀧𑀸𑀤𑀺, 𑀢𑀲𑁆𑀲 𑀧𑀝𑀺𑀯𑀺𑀤𑁆𑀥𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑁆𑀲 𑀫𑀳𑀸𑀩𑁄𑀥𑀺𑀧𑀮𑁆𑀮𑀗𑁆𑀓𑀢𑁄 𑀉𑀝𑁆𑀞𑀳𑀦𑁆𑀢𑀲𑁆𑀲 𑀫𑀳𑀸𑀧𑀣𑀯𑀺𑀬𑀁 𑀞𑀧𑁂𑀢𑀼𑀁 𑀧𑀸𑀤𑁂 𑀉𑀓𑁆𑀔𑀺𑀢𑁆𑀢𑀫𑀢𑁆𑀢𑁂 𑀧𑀸𑀤𑀲𑀫𑁆𑀧𑀝𑀺𑀘𑁆𑀙𑀦𑀢𑁆𑀣𑀁 𑀫𑀳𑀦𑁆𑀢𑀁 𑀧𑀤𑀼𑀫𑀧𑀼𑀧𑁆𑀨𑀁 𑀉𑀕𑁆𑀕𑀜𑁆𑀙𑀺, 𑀢𑀲𑁆𑀲 𑀥𑀼𑀭𑀧𑀢𑁆𑀢𑀸𑀦𑀺 𑀦𑀯𑀼𑀢𑀺𑀳𑀢𑁆𑀣𑀸𑀦𑀺 𑀳𑁄𑀦𑁆𑀢𑀺, 𑀓𑁂𑀲𑀭𑀁 𑀢𑀺𑀁𑀲𑀳𑀢𑁆𑀣𑀁, 𑀓𑀡𑁆𑀡𑀺𑀓𑀸 𑀤𑁆𑀯𑀸𑀤𑀲𑀳𑀢𑁆𑀣𑀸, 𑀧𑀸𑀤𑁂𑀦 𑀧𑀢𑀺𑀝𑁆𑀞𑀺𑀢𑀝𑁆𑀞𑀸𑀦𑀁 𑀏𑀓𑀸𑀤𑀲𑀳𑀢𑁆𑀣𑀁. 𑀢𑀲𑁆𑀲 𑀧𑀦 𑀪𑀕𑀯𑀢𑁄 𑀲𑀭𑀻𑀭𑀁 𑀅𑀝𑁆𑀞𑀧𑀡𑁆𑀡𑀸𑀲𑀳𑀢𑁆𑀣𑀼𑀩𑁆𑀩𑁂𑀥𑀁 𑀅𑀳𑁄𑀲𑀺. 𑀢𑀲𑁆𑀲 𑀧𑀤𑀼𑀫𑀓𑀡𑁆𑀡𑀺𑀓𑀸𑀬 𑀤𑀓𑁆𑀔𑀺𑀡𑀧𑀸𑀤𑁂 𑀧𑀢𑀺𑀝𑁆𑀞𑀳𑀦𑁆𑀢𑁂 𑀫𑀳𑀸𑀢𑀼𑀫𑁆𑀩𑀫𑀢𑁆𑀢𑀸 𑀭𑁂𑀡𑀼 𑀉𑀕𑁆𑀕𑀦𑁆𑀢𑁆𑀯𑀸 𑀲𑀭𑀻𑀭𑀁 𑀑𑀓𑀺𑀭𑀫𑀸𑀦𑀸 𑀑𑀢𑀭𑀺, 𑀯𑀸𑀫𑀧𑀸𑀤𑀲𑁆𑀲 𑀞𑀧𑀦𑀓𑀸𑀮𑁂𑀧𑀺 𑀢𑀣𑀸𑀭𑀽𑀧𑀁𑀬𑁂𑀯 𑀧𑀤𑀼𑀫𑀁 𑀉𑀕𑁆𑀕𑀦𑁆𑀢𑁆𑀯𑀸 𑀧𑀸𑀤𑀁 𑀲𑀫𑁆𑀧𑀝𑀺𑀘𑁆𑀙𑀺. 𑀢𑀢𑁄𑀧𑀺 𑀉𑀕𑁆𑀕𑀦𑁆𑀢𑁆𑀯𑀸 𑀯𑀼𑀢𑁆𑀢𑀧𑁆𑀧𑀫𑀸𑀡𑀸𑀯 𑀭𑁂𑀡𑀼 𑀲𑀭𑀻𑀭𑀁 𑀑𑀓𑀺𑀭𑀺. 𑀢𑀁 𑀧𑀦 𑀭𑁂𑀡𑀼𑀁 𑀅𑀪𑀺𑀪𑀯𑀫𑀸𑀦𑀸 𑀢𑀲𑁆𑀲 𑀪𑀕𑀯𑀢𑁄 𑀲𑀭𑀻𑀭𑀧𑁆𑀧𑀪𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀬𑀦𑁆𑀢𑀦𑀸𑀴𑀺𑀓𑀸𑀬 𑀯𑀺𑀲𑁆𑀲𑀝𑁆𑀞𑀲𑀼𑀯𑀡𑁆𑀡𑀭𑀲𑀥𑀸𑀭𑀸 𑀯𑀺𑀬 𑀲𑀫𑀦𑁆𑀢𑀸 𑀤𑁆𑀯𑀸𑀤𑀲𑀬𑁄𑀚𑀦𑀝𑁆𑀞𑀸𑀦𑀁 𑀏𑀓𑁄𑀪𑀸𑀲𑀁 𑀅𑀓𑀸𑀲𑀺. 𑀢𑀢𑀺𑀬𑀧𑀸𑀤𑀼𑀤𑁆𑀥𑀭𑀡𑀓𑀸𑀮𑁂 𑀧𑀣𑀫𑀼𑀕𑁆𑀕𑀢𑀁 𑀧𑀤𑀼𑀫𑀁 𑀅𑀦𑁆𑀢𑀭𑀥𑀸𑀬𑀺, 𑀧𑀸𑀤𑀲𑀫𑁆𑀧𑀝𑀺𑀘𑁆𑀙𑀦𑀢𑁆𑀣𑀁 𑀅𑀜𑁆𑀜𑀁 𑀦𑀯𑀁 𑀧𑀤𑀼𑀫𑀁 𑀉𑀕𑁆𑀕𑀜𑁆𑀙𑀺. 𑀇𑀫𑀺𑀦𑀸𑀯 𑀦𑀺𑀬𑀸𑀫𑁂𑀦 𑀬𑀢𑁆𑀣 𑀬𑀢𑁆𑀣 𑀕𑀦𑁆𑀢𑀼𑀓𑀸𑀫𑁄 𑀳𑁄𑀢𑀺, 𑀢𑀢𑁆𑀣 𑀢𑀢𑁆𑀣𑀸𑀧𑀺 𑀫𑀳𑀸𑀧𑀤𑀼𑀫𑀁 𑀉𑀕𑁆𑀕𑀘𑁆𑀙𑀢𑀺. 𑀢𑁂𑀦𑁂𑀯𑀲𑁆𑀲 ‘‘𑀧𑀤𑀼𑀫𑀼𑀢𑁆𑀢𑀭𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄’’𑀢𑀺 𑀦𑀸𑀫𑀁 𑀅𑀳𑁄𑀲𑀺.

𑀏𑀯𑀁 𑀲𑁄 𑀪𑀕𑀯𑀸 𑀮𑁄𑀓𑁂 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀪𑀺𑀓𑁆𑀔𑀼𑀲𑀢𑀲𑀳𑀲𑁆𑀲𑀧𑀭𑀺𑀯𑀸𑀭𑁄 𑀫𑀳𑀸𑀚𑀦𑀲𑁆𑀲 𑀲𑀗𑁆𑀕𑀳𑀢𑁆𑀣𑀸𑀬 𑀕𑀸𑀫𑀦𑀺𑀕𑀫𑀭𑀸𑀚𑀥𑀸𑀦𑀻𑀲𑀼 𑀪𑀺𑀓𑁆𑀔𑀸𑀬 𑀘𑀭𑀦𑁆𑀢𑁄 𑀳𑀁𑀲𑀯𑀢𑀻𑀦𑀕𑀭𑀁 𑀲𑀫𑁆𑀧𑀸𑀧𑀼𑀡𑀺. 𑀢𑀲𑁆𑀲 𑀆𑀕𑀢𑀪𑀸𑀯𑀁 𑀲𑀼𑀢𑁆𑀯𑀸 𑀧𑀺𑀢𑀸 𑀫𑀳𑀸𑀭𑀸𑀚𑀸 𑀧𑀘𑁆𑀘𑀼𑀕𑁆𑀕𑀫𑀦𑀁 𑀅𑀓𑀸𑀲𑀺. 𑀲𑀢𑁆𑀣𑀸 𑀢𑀲𑁆𑀲 𑀥𑀫𑁆𑀫𑀓𑀣𑀁 𑀓𑀣𑁂𑀲𑀺. 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀓𑁂𑀘𑀺 𑀲𑁄𑀢𑀸𑀧𑀦𑁆𑀦𑀸 𑀓𑁂𑀘𑀺 𑀲𑀓𑀤𑀸𑀕𑀸𑀫𑀻 𑀓𑁂𑀘𑀺 𑀅𑀦𑀸𑀕𑀸𑀫𑀻 𑀓𑁂𑀘𑀺 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀁𑀲𑀼. 𑀭𑀸𑀚𑀸 𑀲𑁆𑀯𑀸𑀢𑀦𑀸𑀬 𑀤𑀲𑀩𑀮𑀁 𑀦𑀺𑀫𑀦𑁆𑀢𑁂𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀓𑀸𑀮𑀁 𑀆𑀭𑁄𑀘𑀸𑀧𑁂𑀢𑁆𑀯𑀸 𑀪𑀺𑀓𑁆𑀔𑀼𑀲𑀢𑀲𑀳𑀲𑁆𑀲𑀧𑀭𑀺𑀯𑀸𑀭𑀲𑁆𑀲 𑀪𑀕𑀯𑀢𑁄 𑀲𑀓𑀦𑀺𑀯𑁂𑀲𑀦𑁂 𑀫𑀳𑀸𑀤𑀸𑀦𑀁 𑀅𑀤𑀸𑀲𑀺. 𑀲𑀢𑁆𑀣𑀸 𑀪𑀢𑁆𑀢𑀸𑀦𑀼𑀫𑁄𑀤𑀦𑀁 𑀓𑀢𑁆𑀯𑀸 𑀯𑀺𑀳𑀸𑀭𑀫𑁂𑀯 𑀕𑀢𑁄. 𑀢𑁂𑀦𑁂𑀯 𑀦𑀺𑀬𑀸𑀫𑁂𑀦 𑀧𑀼𑀦𑀤𑀺𑀯𑀲𑁂 𑀦𑀸𑀕𑀭𑀸, 𑀧𑀼𑀦𑀤𑀺𑀯𑀲𑁂 𑀭𑀸𑀚𑀸𑀢𑀺 𑀤𑀻𑀖𑀫𑀤𑁆𑀥𑀸𑀦𑀁 𑀤𑀸𑀦𑀁 𑀅𑀤𑀁𑀲𑀼.

𑀢𑀲𑁆𑀫𑀺𑀁 𑀓𑀸𑀮𑁂 𑀅𑀬𑀁 𑀣𑁂𑀭𑁄 𑀳𑀁𑀲𑀯𑀢𑀻𑀦𑀕𑀭𑁂 𑀕𑀳𑀧𑀢𑀺𑀫𑀳𑀸𑀲𑀸𑀮𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄. 𑀏𑀓𑀤𑀺𑀯𑀲𑀁 𑀩𑀼𑀤𑁆𑀥𑀸𑀦𑀁 𑀥𑀫𑁆𑀫𑀤𑁂𑀲𑀦𑀸𑀓𑀸𑀮𑁂 𑀳𑀁𑀲𑀯𑀢𑀻𑀦𑀕𑀭𑀯𑀸𑀲𑀺𑀦𑁄 𑀕𑀦𑁆𑀥𑀫𑀸𑀮𑀸𑀤𑀺𑀳𑀢𑁆𑀣𑁂 𑀬𑁂𑀦 𑀩𑀼𑀤𑁆𑀥𑁄, 𑀬𑁂𑀦 𑀥𑀫𑁆𑀫𑁄, 𑀬𑁂𑀦 𑀲𑀗𑁆𑀖𑁄, 𑀢𑀦𑁆𑀦𑀺𑀦𑁆𑀦𑁂 𑀢𑀧𑁆𑀧𑁄𑀡𑁂 𑀢𑀧𑁆𑀧𑀩𑁆𑀪𑀸𑀭𑁂 𑀕𑀘𑁆𑀙𑀦𑁆𑀢𑁂 𑀤𑀺𑀲𑁆𑀯𑀸 𑀢𑁂𑀦 𑀫𑀳𑀸𑀚𑀦𑁂𑀦 𑀲𑀤𑁆𑀥𑀺𑀁 𑀥𑀫𑁆𑀫𑀤𑁂𑀲𑀦𑀝𑁆𑀞𑀸𑀦𑀁 𑀅𑀕𑀫𑀸𑀲𑀺. 𑀢𑀲𑁆𑀫𑀺𑀜𑁆𑀘 𑀲𑀫𑀬𑁂 𑀧𑀤𑀼𑀫𑀼𑀢𑁆𑀢𑀭𑁄 𑀪𑀕𑀯𑀸 𑀅𑀢𑁆𑀢𑀦𑁄 𑀲𑀸𑀲𑀦𑁂 𑀧𑀞𑀫𑀁 𑀧𑀝𑀺𑀯𑀺𑀤𑁆𑀥𑀥𑀫𑁆𑀫𑀁 𑀏𑀓𑀁 𑀪𑀺𑀓𑁆𑀔𑀼𑀁 𑀏𑀢𑀤𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀲𑀺. 𑀲𑁄 𑀓𑀼𑀮𑀧𑀼𑀢𑁆𑀢𑁄 𑀢𑀁 𑀓𑀸𑀭𑀡𑀁 𑀲𑀼𑀢𑁆𑀯𑀸 ‘‘𑀫𑀳𑀸 𑀯𑀢𑀸𑀬𑀁 𑀪𑀺𑀓𑁆𑀔𑀼, 𑀞𑀧𑁂𑀢𑁆𑀯𑀸 𑀓𑀺𑀭 𑀩𑀼𑀤𑁆𑀥𑀁 𑀅𑀜𑁆𑀜𑁄 𑀇𑀫𑀺𑀦𑀸 𑀧𑀞𑀫𑀢𑀭𑀁 𑀧𑀝𑀺𑀯𑀺𑀤𑁆𑀥𑀥𑀫𑁆𑀫𑁄 𑀦𑀸𑀫 𑀦𑀢𑁆𑀣𑀺. 𑀅𑀳𑁄 𑀯𑀢𑀸𑀳𑀫𑁆𑀧𑀺 𑀅𑀦𑀸𑀕𑀢𑁂 𑀏𑀓𑀲𑁆𑀲 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑁂 𑀧𑀞𑀫𑀁 𑀥𑀫𑁆𑀫𑀁 𑀧𑀝𑀺𑀯𑀺𑀚𑁆𑀛𑀦𑀲𑀫𑀢𑁆𑀣𑁄 𑀪𑀯𑁂𑀬𑁆𑀬’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀲𑁆𑀯𑁂 𑀫𑀬𑁆𑀳𑀁 𑀪𑀺𑀓𑁆𑀔𑀁 𑀕𑀡𑁆𑀳𑀣𑀸’’𑀢𑀺 𑀦𑀺𑀫𑀦𑁆𑀢𑁂𑀲𑀺. 𑀲𑀢𑁆𑀣𑀸 𑀅𑀥𑀺𑀯𑀸𑀲𑁂𑀲𑀺.

𑀲𑁄 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀲𑀓𑀦𑀺𑀯𑁂𑀲𑀦𑀁 𑀕𑀦𑁆𑀢𑁆𑀯𑀸 𑀲𑀩𑁆𑀩𑀭𑀢𑁆𑀢𑀺𑀁 𑀩𑀼𑀤𑁆𑀥𑀸𑀦𑀁 𑀦𑀺𑀲𑀚𑁆𑀚𑀦𑀝𑁆𑀞𑀸𑀦𑀁 𑀕𑀦𑁆𑀥𑀤𑀸𑀫𑀫𑀸𑀮𑀸𑀤𑀸𑀫𑀸𑀤𑀻𑀳𑀺 𑀅𑀮𑀗𑁆𑀓𑀭𑀺𑀢𑁆𑀯𑀸 𑀧𑀡𑀻𑀢𑀁 𑀔𑀸𑀤𑀦𑀻𑀬𑀁 𑀪𑁄𑀚𑀦𑀻𑀬𑀁 𑀧𑀝𑀺𑀬𑀸𑀤𑀸𑀧𑁂𑀢𑁆𑀯𑀸 𑀢𑀲𑁆𑀲𑀸 𑀭𑀢𑁆𑀢𑀺𑀬𑀸 𑀅𑀘𑁆𑀘𑀬𑁂𑀦 𑀲𑀓𑀦𑀺𑀯𑁂𑀲𑀦𑁂 𑀪𑀺𑀓𑁆𑀔𑀼𑀲𑀢𑀲𑀳𑀲𑁆𑀲𑀧𑀭𑀺𑀯𑀸𑀭𑀲𑁆𑀲 𑀪𑀕𑀯𑀢𑁄 𑀯𑀺𑀘𑀺𑀢𑁆𑀭𑀬𑀸𑀕𑀼𑀔𑀚𑁆𑀚𑀓𑀧𑀭𑀺𑀯𑀸𑀭𑀁 𑀦𑀸𑀦𑀸𑀭𑀲𑀲𑀽𑀧𑀩𑁆𑀬𑀜𑁆𑀚𑀦𑀁 𑀕𑀦𑁆𑀥𑀲𑀸𑀮𑀺𑀪𑁄𑀚𑀦𑀁 𑀤𑀢𑁆𑀯𑀸 𑀪𑀢𑁆𑀢𑀓𑀺𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀢𑀺𑀘𑀻𑀯𑀭𑀧𑀳𑁄𑀦𑀓𑁂 𑀯𑀗𑁆𑀕𑀧𑀝𑁆𑀝𑁂 𑀢𑀣𑀸𑀕𑀢𑀲𑁆𑀲 𑀧𑀸𑀤𑀫𑀽𑀮𑁂 𑀞𑀧𑁂𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀦𑀸𑀳𑀁 𑀧𑀭𑀺𑀢𑁆𑀢𑀓𑀲𑁆𑀲 𑀞𑀸𑀦𑀲𑁆𑀲𑀢𑁆𑀣𑀸𑀬 𑀘𑀭𑀸𑀫𑀺, 𑀫𑀳𑀦𑁆𑀢𑀁 𑀞𑀸𑀦𑀁 𑀧𑀢𑁆𑀣𑁂𑀦𑁆𑀢𑁄 𑀘𑀭𑀸𑀫𑀺, 𑀦 𑀔𑁄 𑀧𑀦 𑀲𑀓𑁆𑀓𑀸 𑀏𑀓𑀫𑁂𑀯 𑀤𑀺𑀯𑀲𑀁 𑀤𑀸𑀦𑀁 𑀤𑀢𑁆𑀯𑀸 𑀢𑀁 𑀞𑀸𑀦𑀦𑁆𑀢𑀭𑀁 𑀧𑀢𑁆𑀣𑁂𑀢𑀼’’𑀦𑁆𑀢𑀺 ‘‘𑀅𑀦𑀼𑀧𑀝𑀺𑀧𑀸𑀝𑀺𑀬𑀸 𑀲𑀢𑁆𑀢 𑀤𑀺𑀯𑀲𑀸𑀦𑀺 𑀫𑀳𑀸𑀤𑀸𑀦𑀁 𑀤𑀢𑁆𑀯𑀸 𑀧𑀢𑁆𑀣𑁂𑀲𑁆𑀲𑀸𑀫𑀻’’𑀢𑀺. 𑀲𑁄 𑀢𑁂𑀦𑁂𑀯 𑀦𑀺𑀬𑀸𑀫𑁂𑀦 𑀲𑀢𑁆𑀢 𑀤𑀺𑀯𑀲𑀸𑀦𑀺 𑀫𑀳𑀸𑀤𑀸𑀦𑀁 𑀤𑀢𑁆𑀯𑀸 𑀪𑀢𑁆𑀢𑀓𑀺𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀤𑀼𑀲𑁆𑀲𑀓𑁄𑀝𑁆𑀞𑀸𑀕𑀸𑀭𑀁 𑀯𑀺𑀯𑀭𑀸𑀧𑁂𑀢𑁆𑀯𑀸 𑀉𑀢𑁆𑀢𑀫𑀲𑀼𑀔𑀼𑀫𑀯𑀢𑁆𑀣𑀁 𑀩𑀼𑀤𑁆𑀥𑀸𑀦𑀁 𑀧𑀸𑀤𑀫𑀽𑀮𑁂 𑀞𑀧𑁂𑀢𑁆𑀯𑀸 𑀪𑀺𑀓𑁆𑀔𑀼𑀲𑀢𑀲𑀳𑀲𑁆𑀲𑀁 𑀢𑀺𑀘𑀻𑀯𑀭𑁂𑀦 𑀅𑀘𑁆𑀙𑀸𑀤𑁂𑀢𑁆𑀯𑀸 𑀢𑀣𑀸𑀕𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸, ‘‘𑀪𑀦𑁆𑀢𑁂, 𑀬𑁄 𑀢𑀼𑀫𑁆𑀳𑁂𑀳𑀺 𑀇𑀢𑁄 𑀲𑀢𑁆𑀢𑀤𑀺𑀯𑀲𑀫𑀢𑁆𑀣𑀓𑁂 𑀪𑀺𑀓𑁆𑀔𑀼 𑀏𑀢𑀤𑀕𑁆𑀕𑁂 𑀞𑀧𑀺𑀢𑁄, 𑀅𑀳𑀫𑁆𑀧𑀺 𑀲𑁄 𑀪𑀺𑀓𑁆𑀔𑀼 𑀯𑀺𑀬 𑀅𑀦𑀸𑀕𑀢𑁂 𑀉𑀧𑁆𑀧𑀚𑁆𑀚𑀦𑀓𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀧𑀞𑀫𑀁 𑀥𑀫𑁆𑀫𑀁 𑀧𑀝𑀺𑀯𑀺𑀚𑁆𑀛𑀺𑀢𑀼𑀁 𑀲𑀫𑀢𑁆𑀣𑁄 𑀪𑀯𑁂𑀬𑁆𑀬’’𑀦𑁆𑀢𑀺 𑀯𑀢𑁆𑀯𑀸 𑀲𑀢𑁆𑀣𑀼 𑀧𑀸𑀤𑀫𑀽𑀮𑁂 𑀲𑀻𑀲𑀁 𑀓𑀢𑁆𑀯𑀸 𑀦𑀺𑀧𑀚𑁆𑀚𑀺.

𑀲𑀢𑁆𑀣𑀸 𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 ‘‘𑀇𑀫𑀺𑀦𑀸 𑀓𑀼𑀮𑀧𑀼𑀢𑁆𑀢𑁂𑀦 𑀫𑀳𑀸𑀅𑀥𑀺𑀓𑀸𑀭𑁄 𑀓𑀢𑁄, 𑀲𑀫𑀺𑀚𑁆𑀛𑀺𑀲𑁆𑀲𑀢𑀺 𑀦𑀼 𑀔𑁄 𑀏𑀢𑀲𑁆𑀲 𑀅𑀬𑀁 𑀧𑀢𑁆𑀣𑀦𑀸 𑀦𑁄’’𑀢𑀺 𑀅𑀦𑀸𑀕𑀢𑀁𑀲𑀜𑀸𑀡𑀁 𑀧𑁂𑀲𑁂𑀢𑁆𑀯𑀸 𑀆𑀯𑀚𑁆𑀚𑁂𑀦𑁆𑀢𑁄 ‘‘𑀲𑀫𑀺𑀚𑁆𑀛𑀺𑀲𑁆𑀲𑀢𑀻’’𑀢𑀺 𑀧𑀲𑁆𑀲𑀺. 𑀩𑀼𑀤𑁆𑀥𑀸𑀦𑀜𑁆𑀳𑀺 𑀅𑀢𑀻𑀢𑀁 𑀯𑀸 𑀅𑀦𑀸𑀕𑀢𑀁 𑀯𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀯𑀸 𑀆𑀭𑀩𑁆𑀪 𑀆𑀯𑀚𑁆𑀚𑁂𑀦𑁆𑀢𑀸𑀦𑀁 𑀆𑀯𑀭𑀡𑀁 𑀦𑀸𑀫 𑀦𑀢𑁆𑀣𑀺, 𑀅𑀦𑁂𑀓𑀓𑀧𑁆𑀧𑀓𑁄𑀝𑀺𑀲𑀢𑀲𑀳𑀲𑁆𑀲𑀦𑁆𑀢𑀭𑀫𑁆𑀧𑀺 𑀘 𑀅𑀢𑀻𑀢𑀁 𑀯𑀸 𑀅𑀦𑀸𑀕𑀢𑀁 𑀯𑀸 𑀘𑀓𑁆𑀓𑀯𑀸𑀴𑀲𑀳𑀲𑁆𑀲𑀦𑁆𑀢𑀭𑀫𑁆𑀧𑀺 𑀘 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀯𑀸 𑀆𑀯𑀚𑁆𑀚𑀦𑀧𑀝𑀺𑀩𑀤𑁆𑀥𑀫𑁂𑀯 𑀫𑀦𑀲𑀺𑀓𑀸𑀭𑀧𑀝𑀺𑀩𑀤𑁆𑀥𑀫𑁂𑀯 𑀳𑁄𑀢𑀺. 𑀏𑀯𑀁 𑀅𑀧𑁆𑀧𑀝𑀺𑀯𑀢𑁆𑀢𑀺𑀬𑁂𑀦 𑀜𑀸𑀡𑁂𑀦 𑀲𑁄 𑀪𑀕𑀯𑀸 𑀇𑀤𑀁 𑀅𑀤𑁆𑀤𑀲 𑁋 ‘‘𑀅𑀦𑀸𑀕𑀢𑁂 𑀲𑀢𑀲𑀳𑀲𑁆𑀲𑀓𑀧𑁆𑀧𑀧𑀭𑀺𑀬𑁄𑀲𑀸𑀦𑁂 𑀕𑁄𑀢𑀫𑁄 𑀦𑀸𑀫 𑀩𑀼𑀤𑁆𑀥𑁄 𑀮𑁄𑀓𑁂 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀢𑀤𑀸 𑀇𑀫𑀲𑁆𑀲 𑀧𑀢𑁆𑀣𑀦𑀸 𑀲𑀫𑀺𑀚𑁆𑀛𑀺𑀲𑁆𑀲𑀢𑀻’’𑀢𑀺. 𑀅𑀣 𑀦𑀁 𑀏𑀯𑀫𑀸𑀳 𑁋 ‘‘𑀅𑀫𑁆𑀪𑁄, 𑀓𑀼𑀮𑀧𑀼𑀢𑁆𑀢, 𑀅𑀦𑀸𑀕𑀢𑁂 𑀲𑀢𑀲𑀳𑀲𑁆𑀲𑀓𑀧𑁆𑀧𑀧𑀭𑀺𑀬𑁄𑀲𑀸𑀦𑁂 𑀕𑁄𑀢𑀫𑁄 𑀦𑀸𑀫 𑀩𑀼𑀤𑁆𑀥𑁄 𑀮𑁄𑀓𑁂 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀢𑁆𑀯𑀁 𑀢𑀲𑁆𑀲 𑀧𑀞𑀫𑀓𑀥𑀫𑁆𑀫𑀤𑁂𑀲𑀦𑀸𑀬 𑀢𑁂𑀧𑀭𑀺𑀯𑀝𑁆𑀝𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑀲𑀼𑀢𑁆𑀢𑀦𑁆𑀢𑀧𑀭𑀺𑀬𑁄𑀲𑀸𑀦𑁂 𑀅𑀝𑁆𑀞𑀸𑀭𑀲𑀳𑀺 𑀩𑁆𑀭𑀳𑁆𑀫𑀓𑁄𑀝𑀻𑀳𑀺 𑀲𑀤𑁆𑀥𑀺𑀁 𑀲𑀳𑀲𑁆𑀲𑀦𑀬𑀲𑀫𑁆𑀧𑀦𑁆𑀦𑁂 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺𑀲𑁆𑀲𑀲𑀻’’𑀢𑀺.

𑀇𑀢𑀺 𑀲𑀢𑁆𑀣𑀸 𑀢𑀁 𑀓𑀼𑀮𑀧𑀼𑀢𑁆𑀢𑀁 𑀩𑁆𑀬𑀸𑀓𑀭𑀺𑀢𑁆𑀯𑀸 𑀘𑀢𑀼𑀭𑀸𑀲𑀻𑀢𑀺 𑀥𑀫𑁆𑀫𑀓𑁆𑀔𑀦𑁆𑀥𑀲𑀳𑀲𑁆𑀲𑀸𑀦𑀺 𑀤𑁂𑀲𑁂𑀢𑁆𑀯𑀸 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀧𑀭𑀺𑀦𑀺𑀩𑁆𑀩𑀸𑀬𑀺. 𑀢𑀲𑁆𑀲 𑀧𑀭𑀺𑀦𑀺𑀩𑁆𑀩𑀼𑀢𑀲𑁆𑀲 𑀲𑀭𑀻𑀭𑀁 𑀲𑀼𑀯𑀡𑁆𑀡𑀓𑁆𑀔𑀦𑁆𑀥𑁄 𑀯𑀺𑀬 𑀏𑀓𑀕𑁆𑀖𑀦𑀁 𑀅𑀳𑁄𑀲𑀺, 𑀲𑀭𑀻𑀭𑀘𑁂𑀢𑀺𑀬𑀁 𑀧𑀦𑀲𑁆𑀲𑀼𑀩𑁆𑀩𑁂𑀥𑁂𑀦 𑀲𑀢𑁆𑀢𑀬𑁄𑀚𑀦𑀺𑀓𑀁 𑀅𑀓𑀁𑀲𑀼. 𑀇𑀝𑁆𑀞𑀓𑀸 𑀲𑀼𑀯𑀡𑁆𑀡𑀫𑀬𑀸 𑀅𑀳𑁂𑀲𑀼𑀁, 𑀳𑀭𑀺𑀢𑀸𑀮𑀫𑀦𑁄𑀲𑀺𑀮𑀸𑀬 𑀫𑀢𑁆𑀢𑀺𑀓𑀸𑀓𑀺𑀘𑁆𑀘𑀁, 𑀢𑁂𑀮𑁂𑀦 𑀉𑀤𑀓𑀓𑀺𑀘𑁆𑀘𑀁 𑀲𑀸𑀥𑀬𑀺𑀁𑀲𑀼. 𑀩𑀼𑀤𑁆𑀥𑀸𑀦𑀁 𑀥𑀭𑀫𑀸𑀦𑀓𑀸𑀮𑁂 𑀲𑀭𑀻𑀭𑀧𑁆𑀧𑀪𑀸 𑀤𑁆𑀯𑀸𑀤𑀲𑀬𑁄𑀚𑀦𑀺𑀓𑀁 𑀨𑀭𑀺, 𑀧𑀭𑀺𑀦𑀺𑀩𑁆𑀩𑀼𑀢𑀸𑀦𑀁 𑀧𑀦 𑀢𑁂𑀲𑀁 𑀭𑀲𑁆𑀫𑀺 𑀦𑀺𑀓𑁆𑀔𑀫𑀺𑀢𑁆𑀯𑀸 𑀲𑀫𑀦𑁆𑀢𑀸 𑀬𑁄𑀚𑀦𑀲𑀢𑀁 𑀅𑀯𑀢𑁆𑀣𑀭𑀺.

𑀅𑀬𑀁 𑀲𑁂𑀝𑁆𑀞𑀺 𑀩𑀼𑀤𑁆𑀥𑀸𑀦𑀁 𑀲𑀭𑀻𑀭𑀘𑁂𑀢𑀺𑀬𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀲𑀳𑀲𑁆𑀲𑀭𑀢𑀦𑀕𑁆𑀖𑀺𑀬𑀸𑀦𑀺 𑀓𑀸𑀭𑁂𑀲𑀺. 𑀘𑁂𑀢𑀺𑀬𑀧𑀢𑀺𑀝𑁆𑀞𑀸𑀧𑀦𑀤𑀺𑀯𑀲𑁂 𑀅𑀦𑁆𑀢𑁄𑀘𑁂𑀢𑀺𑀬𑁂 𑀭𑀢𑀦𑀖𑀭𑀁 𑀓𑀸𑀭𑁂𑀲𑀺. 𑀲𑁄 𑀯𑀲𑁆𑀲𑀲𑀢𑀲𑀳𑀲𑁆𑀲𑀁 𑀫𑀳𑀦𑁆𑀢𑀁 𑀤𑀸𑀦𑀸𑀤𑀺𑀫𑀬𑀁 𑀓𑀮𑁆𑀬𑀸𑀡𑀓𑀫𑁆𑀫𑀁 𑀓𑀢𑁆𑀯𑀸 𑀢𑀢𑁄 𑀘𑀼𑀢𑁄 𑀤𑁂𑀯𑀧𑀼𑀭𑁂 𑀦𑀺𑀩𑁆𑀩𑀢𑁆𑀢𑀺. 𑀢𑀲𑁆𑀲 𑀤𑁂𑀯𑁂𑀲𑀼 𑀘 𑀫𑀦𑀼𑀲𑁆𑀲𑁂𑀲𑀼 𑀘 𑀲𑀁𑀲𑀭𑀦𑁆𑀢𑀲𑁆𑀲𑁂𑀯 𑀦𑀯𑀦𑀯𑀼𑀢𑀺 𑀓𑀧𑁆𑀧𑀲𑀳𑀲𑁆𑀲𑀸𑀦𑀺 𑀦𑀯 𑀓𑀧𑁆𑀧𑀲𑀢𑀸𑀦𑀺 𑀦𑀯 𑀘 𑀓𑀧𑁆𑀧𑀸 𑀲𑀫𑀢𑀺𑀓𑁆𑀓𑀦𑁆𑀢𑀸. 𑀏𑀢𑁆𑀢𑀓𑀲𑁆𑀲 𑀓𑀸𑀮𑀲𑁆𑀲 𑀅𑀘𑁆𑀘𑀬𑁂𑀦 𑀇𑀢𑁄 𑀏𑀓𑀦𑀯𑀼𑀢𑀺𑀓𑀧𑁆𑀧𑀫𑀢𑁆𑀣𑀓𑁂 𑀅𑀬𑀁 𑀓𑀼𑀮𑀧𑀼𑀢𑁆𑀢𑁄 𑀩𑀦𑁆𑀥𑀼𑀫𑀢𑀻𑀦𑀕𑀭𑀲𑁆𑀲 𑀤𑁆𑀯𑀸𑀭𑀲𑀫𑀻𑀧𑁂 𑀕𑀸𑀫𑁂 𑀓𑀼𑀝𑀼𑀫𑁆𑀩𑀺𑀬𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄. 𑀢𑀲𑁆𑀲 𑀫𑀳𑀸𑀓𑀸𑀮𑁄𑀢𑀺 𑀦𑀸𑀫𑀁 𑀅𑀳𑁄𑀲𑀺, 𑀓𑀦𑀺𑀝𑁆𑀞𑀪𑀸𑀢𑀸 𑀧𑀦𑀲𑁆𑀲 𑀘𑀽𑀴𑀓𑀸𑀮𑁄 𑀦𑀸𑀫.

𑀢𑀲𑁆𑀫𑀺𑀁 𑀲𑀫𑀬𑁂 𑀯𑀺𑀧𑀲𑁆𑀲𑀻 𑀩𑁄𑀥𑀺𑀲𑀢𑁆𑀢𑁄 𑀢𑀼𑀲𑀺𑀢𑀧𑀼𑀭𑀸 𑀘𑀯𑀺𑀢𑁆𑀯𑀸 𑀩𑀦𑁆𑀥𑀼𑀫𑀢𑀻𑀦𑀕𑀭𑁂 𑀩𑀦𑁆𑀥𑀼𑀫𑀲𑁆𑀲 𑀭𑀜𑁆𑀜𑁄 𑀅𑀕𑁆𑀕𑀫𑀳𑁂𑀲𑀺𑀬𑀸 𑀓𑀼𑀘𑁆𑀙𑀺𑀲𑁆𑀫𑀺𑀁 𑀦𑀺𑀩𑁆𑀩𑀢𑁆𑀢𑁄. 𑀅𑀦𑀼𑀓𑁆𑀓𑀫𑁂𑀦 𑀲𑀩𑁆𑀩𑀜𑁆𑀜𑀼𑀢𑀁 𑀧𑀢𑁆𑀯𑀸 𑀥𑀫𑁆𑀫𑀤𑁂𑀲𑀦𑀢𑁆𑀣𑀸𑀬 𑀫𑀳𑀸𑀩𑁆𑀭𑀳𑁆𑀫𑀼𑀦𑀸 𑀆𑀬𑀸𑀘𑀺𑀢𑁄 ‘‘𑀓𑀲𑁆𑀲 𑀦𑀼 𑀔𑁄 𑀧𑀞𑀫𑀁 𑀥𑀫𑁆𑀫𑀁 𑀤𑁂𑀲𑁂𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀅𑀢𑁆𑀢𑀦𑁄 𑀓𑀦𑀺𑀝𑁆𑀞𑀁 𑀔𑀡𑁆𑀟𑀁 𑀦𑀸𑀫 𑀭𑀸𑀚𑀓𑀼𑀫𑀸𑀭𑀁 𑀢𑀺𑀲𑁆𑀲𑀜𑁆𑀘 𑀧𑀼𑀭𑁄𑀳𑀺𑀢𑀧𑀼𑀢𑁆𑀢𑀁 ‘‘𑀧𑀞𑀫𑀁 𑀥𑀫𑁆𑀫𑀁 𑀧𑀝𑀺𑀯𑀺𑀚𑁆𑀛𑀺𑀢𑀼𑀁 𑀲𑀫𑀢𑁆𑀣𑀸’’𑀢𑀺 𑀤𑀺𑀲𑁆𑀯𑀸 ‘‘𑀢𑁂𑀲𑀜𑁆𑀘 𑀥𑀫𑁆𑀫𑀁 𑀤𑁂𑀲𑁂𑀲𑁆𑀲𑀸𑀫𑀺, 𑀧𑀺𑀢𑀼 𑀘 𑀲𑀗𑁆𑀕𑀳𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀩𑁄𑀥𑀺𑀫𑀡𑁆𑀟𑀢𑁄 𑀆𑀓𑀸𑀲𑁂𑀦𑁂𑀯 𑀆𑀕𑀦𑁆𑀢𑁆𑀯𑀸 𑀔𑁂𑀫𑁂 𑀫𑀺𑀕𑀤𑀸𑀬𑁂 𑀑𑀢𑀺𑀡𑁆𑀡𑁄 𑀢𑁂 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀢𑁂 𑀤𑁆𑀯𑁂𑀧𑀺 𑀚𑀦𑀸 𑀘𑀢𑀼𑀭𑀸𑀲𑀻𑀢𑀺𑀬𑀸 𑀧𑀸𑀡𑀲𑀳𑀲𑁆𑀲𑁂𑀳𑀺 𑀲𑀤𑁆𑀥𑀺𑀁 𑀅𑀭𑀳𑀢𑁆𑀢𑀨𑀮𑁂 𑀧𑀢𑀺𑀝𑁆𑀞𑀳𑀺𑀁𑀲𑀼.

𑀅𑀣𑀸𑀧𑀭𑁂𑀧𑀺 𑀩𑁄𑀥𑀺𑀲𑀢𑁆𑀢𑀓𑀸𑀮𑁂 𑀅𑀦𑀼𑀧𑀩𑁆𑀩𑀚𑀺𑀢𑀸 𑀘𑀢𑀼𑀭𑀸𑀲𑀻𑀢𑀺𑀲𑀳𑀲𑁆𑀲𑀸 𑀓𑀼𑀮𑀧𑀼𑀢𑁆𑀢𑀸 𑀢𑀁 𑀧𑀯𑀢𑁆𑀢𑀺𑀁 𑀲𑀼𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀆𑀕𑀦𑁆𑀢𑁆𑀯𑀸 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀅𑀭𑀳𑀢𑁆𑀢𑀨𑀮𑁂 𑀧𑀢𑀺𑀝𑁆𑀞𑀳𑀺𑀁𑀲𑀼. 𑀲𑀢𑁆𑀣𑀸 𑀢𑀁 𑀢𑀢𑁆𑀣𑁂𑀯 𑀔𑀡𑁆𑀟𑀢𑁆𑀣𑁂𑀭𑀁 𑀅𑀕𑁆𑀕𑀲𑀸𑀯𑀓𑀝𑁆𑀞𑀸𑀦𑁂, 𑀢𑀺𑀲𑁆𑀲𑀢𑁆𑀣𑁂𑀭𑀁 𑀤𑀼𑀢𑀺𑀬𑀲𑀸𑀯𑀓𑀝𑁆𑀞𑀸𑀦𑁂 𑀞𑀧𑁂𑀲𑀺. 𑀭𑀸𑀚𑀸𑀧𑀺 𑀢𑀁 𑀧𑀯𑀢𑁆𑀢𑀺𑀁 𑀲𑀼𑀢𑁆𑀯𑀸 ‘‘𑀧𑀼𑀢𑁆𑀢𑀁 𑀧𑀲𑁆𑀲𑀺𑀲𑁆𑀲𑀸𑀫𑀻’’𑀢𑀺 𑀉𑀬𑁆𑀬𑀸𑀦𑀁 𑀕𑀦𑁆𑀢𑁆𑀯𑀸 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀢𑀻𑀲𑀼 𑀲𑀭𑀡𑁂𑀲𑀼 𑀧𑀢𑀺𑀝𑁆𑀞𑀸𑀬 𑀲𑀢𑁆𑀣𑀸𑀭𑀁 𑀲𑁆𑀯𑀸𑀢𑀦𑀸𑀬 𑀦𑀺𑀫𑀦𑁆𑀢𑁂𑀢𑁆𑀯𑀸 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀧𑀓𑁆𑀓𑀸𑀫𑀺.

𑀲𑁄 𑀧𑀸𑀲𑀸𑀤𑀯𑀭𑀕𑀢𑁄 𑀦𑀺𑀲𑀻𑀤𑀺𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀫𑀬𑁆𑀳𑀁 𑀚𑁂𑀝𑁆𑀞𑀧𑀼𑀢𑁆𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀩𑀼𑀤𑁆𑀥𑁄 𑀚𑀸𑀢𑁄, 𑀤𑀼𑀢𑀺𑀬𑀧𑀼𑀢𑁆𑀢𑁄 𑀫𑁂 𑀅𑀕𑁆𑀕𑀲𑀸𑀯𑀓𑁄, 𑀧𑀼𑀭𑁄𑀳𑀺𑀢𑀧𑀼𑀢𑁆𑀢𑁄 𑀤𑀼𑀢𑀺𑀬𑀲𑀸𑀯𑀓𑁄. 𑀇𑀫𑁂 𑀘 𑀅𑀯𑀲𑁂𑀲𑀪𑀺𑀓𑁆𑀔𑀽 𑀕𑀺𑀳𑀺𑀓𑀸𑀮𑁂𑀧𑀺 𑀫𑀬𑁆𑀳𑀁 𑀧𑀼𑀢𑁆𑀢𑀫𑁂𑀯 𑀧𑀭𑀺𑀯𑀸𑀭𑁂𑀢𑁆𑀯𑀸 𑀯𑀺𑀘𑀭𑀺𑀁𑀲𑀼, 𑀇𑀫𑁂 𑀧𑀼𑀩𑁆𑀩𑁂𑀧𑀺 𑀤𑀸𑀦𑀺𑀧𑀺 𑀫𑀬𑁆𑀳𑀫𑁂𑀯 𑀪𑀸𑀭𑀸, 𑀅𑀳𑀫𑁂𑀯 𑀢𑁂 𑀘𑀢𑀽𑀳𑀺 𑀧𑀘𑁆𑀘𑀬𑁂𑀳𑀺 𑀉𑀧𑀝𑁆𑀞𑀳𑀺𑀲𑁆𑀲𑀸𑀫𑀺, 𑀅𑀜𑁆𑀜𑁂𑀲𑀁 𑀑𑀓𑀸𑀲𑀁 𑀦 𑀤𑀲𑁆𑀲𑀸𑀫𑀻’’𑀢𑀺. 𑀯𑀺𑀳𑀸𑀭𑀤𑁆𑀯𑀸𑀭𑀓𑁄𑀝𑁆𑀞𑀓𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀭𑀸𑀚𑀕𑁂𑀳𑀤𑁆𑀯𑀸𑀭𑀸 𑀉𑀪𑁄𑀲𑀼 𑀧𑀲𑁆𑀲𑁂𑀲𑀼 𑀔𑀤𑀺𑀭𑀧𑀸𑀓𑀸𑀭𑀁 𑀓𑀸𑀭𑁂𑀢𑁆𑀯𑀸 𑀯𑀢𑁆𑀣𑁂𑀳𑀺 𑀧𑀝𑀺𑀘𑁆𑀙𑀸𑀤𑀸𑀧𑁂𑀢𑁆𑀯𑀸 𑀉𑀧𑀭𑀺 𑀲𑀼𑀯𑀡𑁆𑀡𑀢𑀸𑀭𑀓𑀯𑀺𑀘𑀺𑀢𑁆𑀢𑀁 𑀲𑀫𑁄𑀮𑀫𑁆𑀩𑀺𑀢𑀢𑀸𑀮𑀓𑁆𑀔𑀦𑁆𑀥𑀫𑀢𑁆𑀢𑀯𑀺𑀯𑀺𑀥𑀧𑀼𑀧𑁆𑀨𑀤𑀸𑀫𑀯𑀺𑀢𑀸𑀦𑀁 𑀓𑀸𑀭𑁂𑀢𑁆𑀯𑀸 𑀳𑁂𑀝𑁆𑀞𑀸𑀪𑀽𑀫𑀺𑀁 𑀯𑀺𑀘𑀺𑀢𑁆𑀢𑀢𑁆𑀣𑀭𑀡𑁂𑀳𑀺 𑀲𑀦𑁆𑀣𑀭𑀸𑀧𑁂𑀢𑁆𑀯𑀸 𑀅𑀦𑁆𑀢𑁄 𑀉𑀪𑁄𑀲𑀼 𑀧𑀲𑁆𑀲𑁂𑀲𑀼 𑀫𑀸𑀮𑀸𑀕𑀘𑁆𑀙𑀓𑁂𑀲𑀼 𑀧𑀼𑀡𑁆𑀡𑀖𑀝𑁂 𑀲𑀓𑀮𑀫𑀕𑁆𑀕𑀯𑀸𑀲𑀢𑁆𑀣𑀸𑀬 𑀘 𑀕𑀦𑁆𑀥𑀦𑁆𑀢𑀭𑁂𑀲𑀼 𑀧𑀼𑀧𑁆𑀨𑀸𑀦𑀺 𑀧𑀼𑀧𑁆𑀨𑀦𑁆𑀢𑀭𑁂𑀲𑀼 𑀕𑀦𑁆𑀥𑁂 𑀘 𑀞𑀧𑀸𑀧𑁂𑀢𑁆𑀯𑀸 𑀪𑀕𑀯𑀢𑁄 𑀓𑀸𑀮𑀁 𑀆𑀭𑁄𑀘𑀸𑀧𑁂𑀲𑀺. 𑀪𑀕𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑁄 𑀅𑀦𑁆𑀢𑁄𑀲𑀸𑀡𑀺𑀬𑀸𑀯 𑀭𑀸𑀚𑀕𑁂𑀳𑀁 𑀕𑀦𑁆𑀢𑁆𑀯𑀸 𑀪𑀢𑁆𑀢𑀓𑀺𑀘𑁆𑀘𑀁 𑀓𑀢𑁆𑀯𑀸 𑀯𑀺𑀳𑀸𑀭𑀁 𑀧𑀘𑁆𑀘𑀸𑀕𑀘𑁆𑀙𑀢𑀺. 𑀅𑀜𑁆𑀜𑁄 𑀓𑁄𑀘𑀺 𑀤𑀝𑁆𑀞𑀼𑀫𑁆𑀧𑀺 𑀦 𑀮𑀪𑀢𑀺, 𑀓𑀼𑀢𑁄 𑀧𑀦 𑀪𑀺𑀓𑁆𑀔𑀁 𑀯𑀸 𑀤𑀸𑀢𑀼𑀁 𑀧𑀽𑀚𑀁 𑀯𑀸 𑀓𑀸𑀢𑀼𑀁.

𑀦𑀸𑀕𑀭𑀸 𑀘𑀺𑀦𑁆𑀢𑁂𑀲𑀼𑀁 𑁋 ‘‘𑀅𑀚𑁆𑀚 𑀲𑀢𑁆𑀣𑀼 𑀮𑁄𑀓𑁂 𑀉𑀧𑁆𑀧𑀦𑁆𑀦𑀲𑁆𑀲 𑀲𑀢𑁆𑀢𑀫𑀸𑀲𑀸𑀥𑀺𑀓𑀸𑀦𑀺 𑀲𑀢𑁆𑀢 𑀲𑀁𑀯𑀘𑁆𑀙𑀭𑀸𑀦𑀺, 𑀫𑀬𑀜𑁆𑀘 𑀤𑀝𑁆𑀞𑀼𑀫𑁆𑀧𑀺 𑀦 𑀮𑀪𑀸𑀫, 𑀧𑀕𑁂𑀯 𑀪𑀺𑀓𑁆𑀔𑀁 𑀯𑀸 𑀤𑀸𑀢𑀼𑀁 𑀧𑀽𑀚𑀁 𑀯𑀸 𑀓𑀸𑀢𑀼𑀁 𑀥𑀫𑁆𑀫𑀁 𑀯𑀸 𑀲𑁄𑀢𑀼𑀁. 𑀭𑀸𑀚𑀸 ‘𑀫𑀬𑁆𑀳𑀁 𑀏𑀯 𑀩𑀼𑀤𑁆𑀥𑁄, 𑀫𑀬𑁆𑀳𑀁 𑀥𑀫𑁆𑀫𑁄, 𑀫𑀬𑁆𑀳𑀁 𑀲𑀗𑁆𑀖𑁄’𑀢𑀺 𑀫𑀫𑀸𑀬𑀺𑀢𑁆𑀯𑀸 𑀲𑀬𑀫𑁂𑀯 𑀉𑀧𑀝𑁆𑀞𑀳𑀢𑀺. 𑀲𑀢𑁆𑀣𑀸 𑀘 𑀉𑀧𑁆𑀧𑀚𑁆𑀚𑀫𑀸𑀦𑁄 𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲 𑀅𑀢𑁆𑀣𑀸𑀬 𑀉𑀧𑁆𑀧𑀦𑁆𑀦𑁄, 𑀦 𑀭𑀜𑁆𑀜𑁄𑀬𑁂𑀯 𑀅𑀢𑁆𑀣𑀸𑀬. 𑀦 𑀳𑀺 𑀭𑀜𑁆𑀜𑁄𑀬𑁂𑀯 𑀦𑀺𑀭𑀬𑁄 𑀉𑀡𑁆𑀳𑁄, 𑀅𑀜𑁆𑀜𑁂𑀲𑀁 𑀦𑀻𑀮𑀼𑀧𑁆𑀧𑀮𑀯𑀦𑀲𑀤𑀺𑀲𑁄. 𑀢𑀲𑁆𑀫𑀸 𑀭𑀸𑀚𑀸𑀦𑀁 𑀏𑀯𑀁 𑀯𑀤𑀸𑀫 ‘𑀲𑀘𑁂 𑀦𑁄 𑀲𑀢𑁆𑀣𑀸𑀭𑀁 𑀤𑁂𑀢𑀺, 𑀇𑀘𑁆𑀘𑁂𑀢𑀁 𑀓𑀼𑀲𑀮𑀁. 𑀦𑁄 𑀘𑁂 𑀤𑁂𑀢𑀺, 𑀭𑀜𑁆𑀜𑀸 𑀲𑀤𑁆𑀥𑀺𑀁 𑀬𑀼𑀚𑁆𑀛𑀺𑀢𑁆𑀯𑀸 𑀲𑀗𑁆𑀖𑀁 𑀕𑀳𑁂𑀢𑁆𑀯𑀸 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺 𑀓𑀭𑁄𑀫. 𑀦 𑀲𑀓𑁆𑀓𑀸 𑀔𑁄 𑀧𑀦 𑀲𑀼𑀤𑁆𑀥𑀦𑀸𑀕𑀭𑁂𑀳𑁂𑀯 𑀏𑀯𑀁 𑀓𑀸𑀢𑀼𑀁, 𑀏𑀓𑀁 𑀚𑁂𑀝𑁆𑀞𑀓𑀧𑀼𑀭𑀺𑀲𑀫𑁆𑀧𑀺 𑀕𑀡𑁆𑀳𑀸𑀫𑀸’’’𑀢𑀺 𑀲𑁂𑀦𑀸𑀧𑀢𑀺𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀲𑁆𑀲 𑀢𑀫𑀢𑁆𑀣𑀁 𑀆𑀭𑁄𑀘𑁂𑀢𑁆𑀯𑀸 ‘‘𑀲𑀸𑀫𑀺 𑀓𑀺𑀁 𑀅𑀫𑁆𑀳𑀸𑀓𑀁 𑀧𑀓𑁆𑀔𑁄 𑀳𑁄𑀳𑀺𑀲𑀺, 𑀉𑀤𑀸𑀳𑀼 𑀭𑀜𑁆𑀜𑁄’’𑀢𑀺 𑀆𑀳𑀁𑀲𑀼. 𑀲𑁄 𑀆𑀳 𑁋 ‘‘𑀢𑀼𑀫𑁆𑀳𑀸𑀓𑀁 𑀧𑀓𑁆𑀔𑁄 𑀳𑁄𑀫𑀺, 𑀅𑀧𑀺𑀘 𑀔𑁄 𑀧𑀦 𑀧𑀞𑀫𑀤𑀺𑀯𑀲𑁄 𑀫𑀬𑁆𑀳𑀁 𑀤𑀸𑀢𑀩𑁆𑀩𑁄’’𑀢𑀺. 𑀢𑁂 𑀲𑀫𑁆𑀧𑀝𑀺𑀘𑁆𑀙𑀺𑀁𑀲𑀼.

𑀲𑁄 𑀭𑀸𑀚𑀸𑀦𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀦𑀸𑀕𑀭𑀸, 𑀤𑁂𑀯, 𑀢𑀼𑀫𑁆𑀳𑀸𑀓𑀁 𑀓𑀼𑀧𑀺𑀢𑀸’’𑀢𑀺 𑀆𑀳. 𑀓𑀺𑀫𑀢𑁆𑀣𑀁 𑀢𑀸𑀢𑀸𑀢𑀺? 𑀲𑀢𑁆𑀣𑀸𑀭𑀁 𑀓𑀺𑀭 𑀢𑀼𑀫𑁆𑀳𑁂𑀯 𑀉𑀧𑀝𑁆𑀞𑀳𑀣, 𑀅𑀫𑁆𑀳𑁂 𑀦 𑀮𑀪𑀸𑀫𑀸𑀢𑀺. 𑀲𑀘𑁂 𑀇𑀤𑀸𑀦𑀺𑀧𑀺 𑀮𑀪𑀦𑁆𑀢𑀺, 𑀦 𑀓𑀼𑀧𑁆𑀧𑀦𑁆𑀢𑀺. 𑀅𑀮𑀪𑀦𑁆𑀢𑀸 𑀢𑀼𑀫𑁆𑀳𑁂𑀳𑀺 𑀲𑀤𑁆𑀥𑀺𑀁 𑀬𑀼𑀚𑁆𑀛𑀺𑀢𑀼𑀓𑀸𑀫𑀸, 𑀤𑁂𑀯𑀸𑀢𑀺. 𑀬𑀼𑀚𑁆𑀛𑀸𑀫𑀺, 𑀢𑀸𑀢, 𑀦 𑀪𑀺𑀓𑁆𑀔𑀼𑀲𑀗𑁆𑀖𑀁 𑀤𑁂𑀫𑀻𑀢𑀺. 𑀤𑁂𑀯, 𑀢𑀼𑀫𑁆𑀳𑀸𑀓𑀁 𑀤𑀸𑀲𑀸 𑀢𑀼𑀫𑁆𑀳𑁂𑀳𑀺 𑀲𑀤𑁆𑀥𑀺𑀁 𑀬𑀼𑀚𑁆𑀛𑀸𑀫𑀸𑀢𑀺 𑀯𑀤𑀦𑁆𑀢𑀺, 𑀢𑀼𑀫𑁆𑀳𑁂 𑀓𑀁 𑀕𑀡𑁆𑀳𑀺𑀢𑁆𑀯𑀸 𑀬𑀼𑀚𑁆𑀛𑀺𑀲𑁆𑀲𑀣𑀸𑀢𑀺? 𑀦𑀦𑀼 𑀢𑁆𑀯𑀁 𑀲𑁂𑀦𑀸𑀧𑀢𑀻𑀢𑀺? 𑀦𑀸𑀕𑀭𑁂𑀳𑀺 𑀯𑀺𑀦𑀸 𑀅𑀲𑀫𑀢𑁆𑀣𑁄 𑀅𑀳𑀁, 𑀤𑁂𑀯𑀸𑀢𑀺. 𑀢𑀢𑁄 𑀭𑀸𑀚𑀸 ‘‘𑀩𑀮𑀯𑀦𑁆𑀢𑁄 𑀦𑀸𑀕𑀭𑀸, 𑀲𑁂𑀦𑀸𑀧𑀢𑀺𑀧𑀺 𑀢𑁂𑀲𑀁𑀬𑁂𑀯 𑀧𑀓𑁆𑀔𑁄’’𑀢𑀺 𑀜𑀢𑁆𑀯𑀸 ‘‘𑀅𑀜𑁆𑀜𑀸𑀦𑀺 𑀲𑀢𑁆𑀢𑀫𑀸𑀲𑀸𑀥𑀺𑀓𑀸𑀦𑀺 𑀲𑀢𑁆𑀢 𑀲𑀁𑀯𑀘𑁆𑀙𑀭𑀸𑀦𑀺 𑀫𑀬𑁆𑀳𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀤𑁂𑀦𑁆𑀢𑀽’’𑀢𑀺 𑀆𑀳. 𑀦𑀸𑀕𑀭𑀸 𑀦 𑀲𑀫𑁆𑀧𑀝𑀺𑀘𑁆𑀙𑀺𑀁𑀲𑀼. 𑀭𑀸𑀚𑀸 ‘‘𑀙𑀩𑁆𑀩𑀲𑁆𑀲𑀸𑀦𑀺 𑀧𑀜𑁆𑀘𑀯𑀲𑁆𑀲𑀸𑀦𑀻’’𑀢𑀺 𑀏𑀯𑀁 𑀳𑀸𑀧𑁂𑀢𑁆𑀯𑀸 𑀅𑀜𑁆𑀜𑁂 𑀲𑀢𑁆𑀢 𑀤𑀺𑀯𑀲𑁂 𑀬𑀸𑀘𑀺. 𑀦𑀸𑀕𑀭𑀸 ‘‘𑀅𑀢𑀺𑀓𑀓𑁆𑀔𑀴𑀁 𑀤𑀸𑀦𑀺 𑀭𑀜𑁆𑀜𑀸 𑀲𑀤𑁆𑀥𑀺𑀁 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀻’’𑀢𑀺 𑀅𑀦𑀼𑀚𑀸𑀦𑀺𑀁𑀲𑀼. 𑀭𑀸𑀚𑀸 𑀲𑀢𑁆𑀢𑀫𑀸𑀲𑀸𑀥𑀺𑀓𑀸𑀦𑀁 𑀲𑀢𑁆𑀢𑀦𑁆𑀦𑀁 𑀲𑀁𑀯𑀘𑁆𑀙𑀭𑀸𑀦𑀁 𑀲𑀚𑁆𑀚𑀺𑀢𑀁 𑀤𑀸𑀦𑀫𑀼𑀔𑀁 𑀲𑀢𑁆𑀢𑀦𑁆𑀦𑀫𑁂𑀯 𑀤𑀺𑀯𑀲𑀸𑀦𑀁 𑀲𑀚𑁆𑀚𑁂𑀢𑁆𑀯𑀸 𑀙 𑀤𑀺𑀯𑀲𑁂 𑀓𑁂𑀲𑀜𑁆𑀘𑀺 𑀅𑀧𑀲𑁆𑀲𑀦𑁆𑀢𑀸𑀦𑀁𑀬𑁂𑀯 𑀤𑀸𑀦𑀁 𑀤𑀢𑁆𑀯𑀸 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀦𑀸𑀕𑀭𑁂 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀲𑀓𑁆𑀔𑀺𑀲𑁆𑀲𑀣, 𑀢𑀸𑀢𑀸, 𑀏𑀯𑀭𑀽𑀧𑀁 𑀤𑀸𑀦𑀁 𑀤𑀸𑀢𑀼’’𑀦𑁆𑀢𑀺 𑀆𑀳. 𑀢𑁂𑀧𑀺 ‘‘𑀦𑀦𑀼 𑀅𑀫𑁆𑀳𑁂𑀬𑁂𑀯 𑀦𑀺𑀲𑁆𑀲𑀸𑀬𑁂𑀢𑀁 𑀤𑁂𑀯𑀲𑁆𑀲 𑀉𑀧𑁆𑀧𑀦𑁆𑀦’’𑀦𑁆𑀢𑀺 𑀯𑀢𑁆𑀯𑀸 ‘‘𑀲𑀓𑁆𑀔𑀺𑀲𑁆𑀲𑀸𑀫𑀸’’𑀢𑀺 𑀆𑀳𑀁𑀲𑀼. 𑀭𑀸𑀚𑀸 𑀧𑀺𑀝𑁆𑀞𑀺𑀳𑀢𑁆𑀣𑁂𑀦 𑀅𑀲𑁆𑀲𑀽𑀦𑀺 𑀧𑀼𑀜𑁆𑀙𑀫𑀸𑀦𑁄 𑀪𑀕𑀯𑀦𑁆𑀢𑀁 𑀯𑀦𑁆𑀤𑀺𑀢𑁆𑀯𑀸, ‘‘𑀪𑀦𑁆𑀢𑁂, 𑀅𑀝𑁆𑀞𑀲𑀝𑁆𑀞𑀺𑀪𑀺𑀓𑁆𑀔𑀼𑀲𑀢𑀲𑀳𑀲𑁆𑀲𑀁 𑀅𑀜𑁆𑀜𑀲𑁆𑀲𑀼 𑀪𑀸𑀭𑀁 𑀅𑀓𑀢𑁆𑀯𑀸 𑀬𑀸𑀯𑀚𑀻𑀯𑀁 𑀘𑀢𑀽𑀳𑀺 𑀧𑀘𑁆𑀘𑀬𑁂𑀳𑀺 𑀉𑀧𑀝𑁆𑀞𑀳𑀺𑀲𑁆𑀲𑀸𑀫𑀻𑀢𑀺 𑀘𑀺𑀦𑁆𑀢𑁂𑀲𑀺𑀁, 𑀦𑀸𑀕𑀭𑀸𑀦𑀁 𑀤𑀸𑀦𑀺 𑀫𑁂 𑀅𑀦𑀼𑀜𑁆𑀜𑀸𑀢𑀁, 𑀦𑀸𑀕𑀭𑀸 𑀳𑀺 ‘𑀫𑀬𑀁 𑀤𑀸𑀦𑀁 𑀤𑀸𑀢𑀼𑀁 𑀦 𑀮𑀪𑀸𑀫𑀸’𑀢𑀺 𑀪𑀕𑀯𑀸 𑀓𑀼𑀧𑁆𑀧𑀦𑁆𑀢𑀺. 𑀲𑁆𑀯𑁂𑀯 𑀧𑀝𑁆𑀞𑀸𑀬 𑀢𑁂𑀲𑀁 𑀅𑀦𑀼𑀕𑁆𑀕𑀳𑀁 𑀓𑀭𑁄𑀣𑀸’’𑀢𑀺 𑀆𑀳.

𑀅𑀣 𑀤𑀼𑀢𑀺𑀬𑀤𑀺𑀯𑀲𑁂 𑀲𑁂𑀦𑀸𑀧𑀢𑀺 𑀫𑀳𑀸𑀤𑀸𑀦𑀁 𑀅𑀤𑀸𑀲𑀺. 𑀢𑀢𑁄 𑀦𑀸𑀕𑀭𑀸 𑀭𑀜𑁆𑀜𑀸 𑀓𑀢𑀲𑀓𑁆𑀓𑀸𑀭𑀢𑁄 𑀉𑀢𑁆𑀢𑀭𑀺𑀢𑀭𑀁 𑀲𑀓𑁆𑀓𑀸𑀭𑀲𑀫𑁆𑀫𑀸𑀦𑀁 𑀓𑀢𑁆𑀯𑀸 𑀤𑀸𑀦𑀁 𑀅𑀤𑀁𑀲𑀼. 𑀏𑀢𑁂𑀦𑁂𑀯 𑀦𑀺𑀬𑀸𑀫𑁂𑀦 𑀲𑀓𑀮𑀦𑀕𑀭𑀲𑁆𑀲 𑀧𑀝𑀺𑀧𑀸𑀝𑀺𑀬𑀸 𑀕𑀢𑀸𑀬 𑀤𑁆𑀯𑀸𑀭𑀕𑀸𑀫𑀯𑀸𑀲𑀺𑀦𑁄 𑀲𑀓𑁆𑀓𑀸𑀭𑀲𑀫𑁆𑀫𑀸𑀦𑀁 𑀲𑀚𑁆𑀚𑀬𑀺𑀁𑀲𑀼. 𑀫𑀳𑀸𑀓𑀸𑀮𑀓𑀼𑀝𑀼𑀫𑁆𑀩𑀺𑀓𑁄 𑀘𑀽𑀴𑀓𑀸𑀮𑀁 𑀆𑀳 𑁋 ‘‘𑀤𑀲𑀩𑀮𑀲𑁆𑀲 𑀲𑀓𑁆𑀓𑀸𑀭𑀲𑀫𑁆𑀫𑀸𑀦𑀁 𑀲𑁆𑀯𑁂𑀯 𑀅𑀫𑁆𑀳𑀸𑀓𑀁 𑀧𑀸𑀧𑀼𑀡𑀸𑀢𑀺, 𑀓𑀺𑀁 𑀲𑀓𑁆𑀓𑀸𑀭𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺? 𑀢𑁆𑀯𑀫𑁂𑀯 𑀪𑀸𑀢𑀺𑀓 𑀚𑀸𑀦𑀸𑀳𑀻𑀢𑀺. 𑀲𑀘𑁂 𑀫𑀬𑁆𑀳𑀁 𑀭𑀼𑀘𑀺𑀬𑀸 𑀓𑀭𑁄𑀲𑀺, 𑀅𑀫𑁆𑀳𑀸𑀓𑀁 𑀲𑁄𑀴𑀲𑀓𑀭𑀻𑀲𑀫𑀢𑁆𑀢𑁂𑀲𑀼 𑀔𑁂𑀢𑁆𑀢𑁂𑀲𑀼 𑀕𑀳𑀺𑀢𑀕𑀩𑁆𑀪𑀸 𑀲𑀸𑀮𑀺𑀬𑁄 𑀅𑀢𑁆𑀣𑀺. 𑀲𑀸𑀮𑀺𑀕𑀩𑁆𑀪𑀁 𑀨𑀸𑀮𑁂𑀢𑁆𑀯𑀸 𑀆𑀤𑀸𑀬 𑀩𑀼𑀤𑁆𑀥𑀸𑀦𑀁 𑀅𑀦𑀼𑀘𑁆𑀙𑀯𑀺𑀓𑀁 𑀧𑀘𑀸𑀧𑁂𑀫𑀸𑀢𑀺. 𑀏𑀯𑀁 𑀓𑀬𑀺𑀭𑀫𑀸𑀦𑁂 𑀓𑀲𑁆𑀲𑀘𑀺 𑀉𑀧𑀓𑀸𑀭𑁄 𑀦 𑀳𑁄𑀢𑀺, 𑀢𑀲𑁆𑀫𑀸 𑀦𑁂𑀢𑀁 𑀫𑀬𑁆𑀳𑀁 𑀭𑀼𑀘𑁆𑀘𑀢𑀻𑀢𑀺. 𑀲𑀘𑁂 𑀢𑁆𑀯𑀁 𑀏𑀯𑀁 𑀦 𑀓𑀭𑁄𑀲𑀺, 𑀅𑀳𑀁 𑀫𑀬𑁆𑀳𑀁 𑀲𑀦𑁆𑀢𑀓𑀁 𑀫𑀫𑀸𑀬𑀺𑀢𑀼𑀁 𑀮𑀪𑀸𑀫𑀻𑀢𑀺 𑀲𑁄𑀴𑀲𑀓𑀭𑀻𑀲𑀫𑀢𑁆𑀢𑀁 𑀔𑁂𑀢𑁆𑀢𑀁 𑀫𑀚𑁆𑀛𑁂 𑀪𑀺𑀦𑁆𑀤𑀺𑀢𑁆𑀯𑀸 𑀅𑀝𑁆𑀞𑀓𑀭𑀻𑀲𑀝𑁆𑀞𑀸𑀦𑁂 𑀲𑀻𑀫𑀁 𑀞𑀧𑁂𑀢𑁆𑀯𑀸 𑀲𑀸𑀮𑀺𑀕𑀩𑁆𑀪𑀁 𑀨𑀸𑀮𑁂𑀢𑁆𑀯𑀸 𑀆𑀤𑀸𑀬 𑀅𑀲𑀫𑁆𑀪𑀺𑀦𑁆𑀦𑁂 𑀔𑀻𑀭𑁂 𑀧𑀘𑀸𑀧𑁂𑀢𑁆𑀯𑀸 𑀘𑀢𑀼𑀫𑀥𑀼𑀭𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀲𑀗𑁆𑀖𑀲𑁆𑀲 𑀅𑀤𑀸𑀲𑀺. 𑀓𑀼𑀝𑀼𑀫𑁆𑀩𑀺𑀓𑀲𑁆𑀲 𑀔𑁄 𑀕𑀩𑁆𑀪𑀁 𑀨𑀸𑀮𑁂𑀢𑁆𑀯𑀸 𑀕𑀳𑀺𑀢𑀕𑀳𑀺𑀢𑀝𑁆𑀞𑀸𑀦𑀁 𑀧𑀼𑀦 𑀧𑀽𑀭𑀢𑀺. 𑀧𑀼𑀣𑀼𑀓𑀓𑀸𑀮𑁂 𑀧𑀼𑀣𑀼𑀓𑀕𑁆𑀕𑀁 𑀦𑀸𑀫 𑀅𑀤𑀸𑀲𑀺, 𑀕𑀸𑀫𑀯𑀸𑀲𑀻𑀳𑀺 𑀲𑀤𑁆𑀥𑀺𑀁 𑀅𑀕𑁆𑀕𑀲𑀲𑁆𑀲𑀁 𑀦𑀸𑀫 𑀅𑀤𑀸𑀲𑀺, 𑀮𑀸𑀬𑀦𑁂 𑀮𑀸𑀬𑀦𑀕𑁆𑀕𑀁, 𑀯𑁂𑀡𑀺𑀓𑀭𑀡𑁂 𑀯𑁂𑀡𑀕𑁆𑀕𑀁, 𑀓𑀮𑀸𑀧𑀸𑀤𑀻𑀲𑀼 𑀓𑀮𑀸𑀧𑀕𑁆𑀕𑀁 𑀔𑀮𑀕𑁆𑀕𑀁 𑀔𑀮𑀪𑀡𑁆𑀟𑀕𑁆𑀕𑀁 𑀓𑁄𑀝𑁆𑀞𑀕𑁆𑀕𑀦𑁆𑀢𑀺. 𑀏𑀯𑀁 𑀲𑁄 𑀏𑀓𑀲𑀲𑁆𑀲𑁂𑀯 𑀦𑀯 𑀯𑀸𑀭𑁂 𑀅𑀕𑁆𑀕𑀤𑀸𑀦𑀁 𑀅𑀤𑀸𑀲𑀺. 𑀢𑀫𑁆𑀧𑀺 𑀲𑀲𑁆𑀲𑀁 𑀅𑀢𑀺𑀭𑁂𑀓𑀁 𑀉𑀝𑁆𑀞𑀸𑀦𑀲𑀫𑁆𑀧𑀦𑁆𑀦𑀁 𑀅𑀳𑁄𑀲𑀺.

𑀬𑀸𑀯 𑀩𑀼𑀤𑁆𑀥𑀸 𑀥𑀭𑀢𑀺, 𑀬𑀸𑀯 𑀘 𑀲𑀗𑁆𑀖𑁄 𑀥𑀭𑀢𑀺, 𑀏𑀢𑁂𑀦𑁂𑀯 𑀦𑀺𑀬𑀸𑀫𑁂𑀦 𑀓𑀮𑁆𑀬𑀸𑀡𑀓𑀫𑁆𑀫𑀁 𑀓𑀢𑁆𑀯𑀸 𑀢𑀢𑁄 𑀘𑀼𑀢𑁄 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀤𑁂𑀯𑁂𑀲𑀼 𑀘𑁂𑀯 𑀫𑀦𑀼𑀲𑁆𑀲𑁂𑀲𑀼 𑀘 𑀲𑀁𑀲𑀭𑀦𑁆𑀢𑁄 𑀏𑀓𑀦𑀯𑀼𑀢𑀺𑀓𑀧𑁆𑀧𑁂 𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀺𑀢𑁆𑀯𑀸 𑀅𑀫𑁆𑀳𑀸𑀓𑀁 𑀲𑀢𑁆𑀣𑀼 𑀮𑁄𑀓𑁂 𑀉𑀧𑁆𑀧𑀦𑁆𑀦𑀓𑀸𑀮𑁂 𑀓𑀧𑀺𑀮𑀯𑀢𑁆𑀣𑀼𑀦𑀕𑀭𑀲𑁆𑀲 𑀅𑀯𑀺𑀤𑀽𑀭𑁂 𑀤𑁄𑀡𑀯𑀢𑁆𑀣𑀼𑀩𑁆𑀭𑀸𑀳𑁆𑀫𑀡𑀕𑀸𑀫𑁂 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺. 𑀢𑀲𑁆𑀲 𑀦𑀸𑀫𑀕𑁆𑀕𑀳𑀡𑀤𑀺𑀯𑀲𑁂 𑀓𑁄𑀡𑁆𑀟𑀜𑁆𑀜𑀫𑀸𑀡𑀯𑁄𑀢𑀺 𑀦𑀸𑀫𑀁 𑀅𑀓𑀁𑀲𑀼. 𑀲𑁄 𑀯𑀼𑀟𑁆𑀠𑀺𑀫𑀦𑁆𑀯𑀸𑀬 𑀢𑀬𑁄 𑀯𑁂𑀤𑁂 𑀉𑀕𑁆𑀕𑀳𑁂𑀢𑁆𑀯𑀸 𑀮𑀓𑁆𑀔𑀡𑀫𑀦𑁆𑀢𑀸𑀦𑀁 𑀧𑀸𑀭𑀁 𑀅𑀕𑀫𑀸𑀲𑀺. 𑀢𑁂𑀦 𑀲𑀫𑀬𑁂𑀦 𑀅𑀫𑁆𑀳𑀸𑀓𑀁 𑀩𑁄𑀥𑀺𑀲𑀢𑁆𑀢𑁄 𑀢𑀼𑀲𑀺𑀢𑀧𑀼𑀭𑀸 𑀘𑀯𑀺𑀢𑁆𑀯𑀸 𑀓𑀧𑀺𑀮𑀯𑀢𑁆𑀣𑀼𑀧𑀼𑀭𑁂 𑀦𑀺𑀩𑁆𑀩𑀢𑁆𑀢𑀺. 𑀢𑀲𑁆𑀲 𑀦𑀸𑀫𑀕𑁆𑀕𑀳𑀡𑀤𑀺𑀯𑀲𑁂 𑀅𑀝𑁆𑀞𑀼𑀢𑁆𑀢𑀭𑀁 𑀩𑁆𑀭𑀸𑀳𑁆𑀫𑀡𑀲𑀢𑀁 𑀅𑀳𑀢𑀯𑀢𑁆𑀣𑁂𑀳𑀺 𑀅𑀘𑁆𑀙𑀸𑀤𑁂𑀢𑁆𑀯𑀸 𑀅𑀧𑁆𑀧𑁄𑀤𑀓𑀁 𑀫𑀥𑀼𑀧𑀸𑀬𑀸𑀲𑀁 𑀧𑀸𑀬𑁂𑀢𑁆𑀯𑀸 𑀢𑁂𑀲𑀁 𑀅𑀦𑁆𑀢𑀭𑁂 𑀅𑀝𑁆𑀞 𑀚𑀦𑁂 𑀉𑀘𑁆𑀘𑀺𑀦𑀺𑀢𑁆𑀯𑀸 𑀫𑀳𑀸𑀢𑀮𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀅𑀮𑀗𑁆𑀓𑀢𑀧𑀝𑀺𑀬𑀢𑁆𑀢𑀁 𑀩𑁄𑀥𑀺𑀲𑀢𑁆𑀢𑀁 𑀤𑀼𑀓𑀽𑀮𑀘𑀼𑀫𑁆𑀩𑀝𑀓𑁂 𑀦𑀺𑀧𑀚𑁆𑀚𑀸𑀧𑁂𑀢𑁆𑀯𑀸 𑀮𑀓𑁆𑀔𑀡𑀧𑀭𑀺𑀕𑁆𑀕𑀳𑀡𑀢𑁆𑀣𑀁 𑀢𑁂𑀲𑀁 𑀲𑀦𑁆𑀢𑀺𑀓𑀁 𑀆𑀦𑀬𑀺𑀁𑀲𑀼. 𑀥𑀼𑀭𑀸𑀲𑀦𑁂 𑀦𑀺𑀲𑀺𑀦𑁆𑀦𑀩𑁆𑀭𑀸𑀳𑁆𑀫𑀡𑁄 𑀫𑀳𑀸𑀧𑀼𑀭𑀺𑀲𑀲𑁆𑀲 𑀲𑀭𑀻𑀭𑀲𑀫𑁆𑀧𑀢𑁆𑀢𑀺𑀁 𑀑𑀮𑁄𑀓𑁂𑀢𑁆𑀯𑀸 𑀤𑁆𑀯𑁂 𑀅𑀗𑁆𑀕𑀼𑀮𑀺𑀬𑁄 𑀉𑀓𑁆𑀔𑀺𑀧𑀺. 𑀏𑀯𑀁 𑀧𑀝𑀺𑀧𑀸𑀝𑀺𑀬𑀸 𑀲𑀢𑁆𑀢 𑀚𑀦𑀸 𑀉𑀓𑁆𑀔𑀺𑀧𑀺𑀁𑀲𑀼. 𑀢𑁂𑀲𑀁 𑀧𑀦 𑀲𑀩𑁆𑀩𑀦𑀯𑀓𑁄 𑀓𑁄𑀡𑁆𑀟𑀜𑁆𑀜𑀫𑀸𑀡𑀯𑁄, 𑀲𑁄 𑀩𑁄𑀥𑀺𑀲𑀢𑁆𑀢𑀲𑁆𑀲 𑀮𑀓𑁆𑀔𑀡𑀯𑀭𑀦𑀺𑀧𑁆𑀨𑀢𑁆𑀢𑀺𑀁 𑀑𑀮𑁄𑀓𑁂𑀢𑁆𑀯𑀸 ‘‘𑀅𑀕𑀸𑀭𑀫𑀚𑁆𑀛𑁂 𑀞𑀸𑀦𑀓𑀸𑀭𑀡𑀁 𑀦𑀢𑁆𑀣𑀺, 𑀏𑀓𑀦𑁆𑀢𑁂𑀦𑁂𑀲 𑀯𑀺𑀯𑀝𑁆𑀝𑀘𑁆𑀙𑀤𑁄 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀏𑀓𑀫𑁂𑀯 𑀅𑀗𑁆𑀕𑀼𑀮𑀺𑀁 𑀉𑀓𑁆𑀔𑀺𑀧𑀺. 𑀇𑀢𑀭𑁂 𑀧𑀦 𑀲𑀢𑁆𑀢 𑀚𑀦𑀸 ‘‘𑀲𑀘𑁂 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀺𑀲𑁆𑀲𑀢𑀺, 𑀭𑀸𑀚𑀸 𑀪𑀯𑀺𑀲𑁆𑀲𑀢𑀺 𑀘𑀓𑁆𑀓𑀯𑀢𑁆𑀢𑀻. 𑀲𑀘𑁂 𑀧𑀩𑁆𑀩𑀚𑀺𑀲𑁆𑀲𑀢𑀺, 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀤𑁆𑀯𑁂 𑀕𑀢𑀺𑀬𑁄 𑀤𑀺𑀲𑁆𑀯𑀸 𑀤𑁆𑀯𑁂 𑀅𑀗𑁆𑀕𑀼𑀮𑀺𑀬𑁄 𑀉𑀓𑁆𑀔𑀺𑀧𑀺𑀁𑀲𑀼. 𑀅𑀬𑀁 𑀧𑀦 𑀓𑁄𑀡𑁆𑀟𑀜𑁆𑀜𑁄 𑀓𑀢𑀸𑀥𑀺𑀓𑀸𑀭𑁄 𑀧𑀘𑁆𑀙𑀺𑀫𑀪𑀯𑀺𑀓𑀲𑀢𑁆𑀢𑁄 𑀧𑀜𑁆𑀜𑀸𑀬 𑀇𑀢𑀭𑁂 𑀲𑀢𑁆𑀢 𑀚𑀦𑁂 𑀅𑀪𑀺𑀪𑀯𑀺𑀢𑁆𑀯𑀸 ‘‘𑀇𑀫𑁂𑀳𑀺 𑀮𑀓𑁆𑀔𑀡𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀅𑀕𑀸𑀭𑀫𑀚𑁆𑀛𑁂 𑀞𑀸𑀦𑀓𑀭𑀡𑀁 𑀦𑀸𑀫 𑀦𑀢𑁆𑀣𑀺, 𑀦𑀺𑀲𑁆𑀲𑀁𑀲𑀬𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀏𑀓𑀫𑁂𑀯 𑀕𑀢𑀺𑀁 𑀅𑀤𑁆𑀤𑀲, 𑀢𑀲𑁆𑀫𑀸 𑀏𑀓𑀁 𑀅𑀗𑁆𑀕𑀼𑀮𑀺𑀁 𑀉𑀓𑁆𑀔𑀺𑀧𑀺. 𑀢𑀢𑁄 𑀩𑁆𑀭𑀸𑀳𑁆𑀫𑀡𑀸 𑀅𑀢𑁆𑀢𑀦𑁄 𑀖𑀭𑀸𑀦𑀺 𑀕𑀦𑁆𑀢𑁆𑀯𑀸 𑀧𑀼𑀢𑁆𑀢𑁂 𑀆𑀫𑀦𑁆𑀢𑀬𑀺𑀁𑀲𑀼 𑁋 ‘‘𑀢𑀸𑀢𑀸, 𑀅𑀫𑁆𑀳𑁂 𑀫𑀳𑀮𑁆𑀮𑀓𑀸, 𑀲𑀼𑀤𑁆𑀥𑁄𑀤𑀦𑀫𑀳𑀸𑀭𑀸𑀚𑀲𑁆𑀲 𑀧𑀼𑀢𑁆𑀢𑀁 𑀲𑀩𑁆𑀩𑀜𑁆𑀜𑀼𑀢𑀧𑁆𑀧𑀢𑁆𑀢𑀁 𑀫𑀬𑀁 𑀲𑀫𑁆𑀪𑀸𑀯𑁂𑀬𑁆𑀬𑀸𑀫 𑀯𑀸 𑀦𑁄 𑀯𑀸. 𑀢𑀼𑀫𑁆𑀳𑁂 𑀢𑀲𑁆𑀫𑀺𑀁 𑀓𑀼𑀫𑀸𑀭𑁂 𑀲𑀩𑁆𑀩𑀜𑁆𑀜𑀼𑀢𑀁 𑀧𑀢𑁆𑀢𑁂 𑀢𑀲𑁆𑀲 𑀲𑀸𑀲𑀦𑁂 𑀧𑀩𑁆𑀩𑀚𑁂𑀬𑁆𑀬𑀸𑀣𑀸’’𑀢𑀺.

𑀲𑀼𑀤𑁆𑀥𑁄𑀤𑀦𑀫𑀳𑀸𑀭𑀸𑀚𑀸𑀧𑀺 𑀩𑁄𑀥𑀺𑀲𑀢𑁆𑀢𑀲𑁆𑀲 𑀥𑀸𑀢𑀺𑀬𑁄 𑀆𑀤𑀺𑀁 𑀓𑀢𑁆𑀯𑀸 𑀧𑀭𑀺𑀳𑀸𑀭𑀁 𑀉𑀧𑀝𑁆𑀞𑀧𑁂𑀦𑁆𑀢𑁄 𑀩𑁄𑀥𑀺𑀲𑀢𑁆𑀢𑀁 𑀯𑀼𑀤𑁆𑀥𑀺𑀁 𑀆𑀧𑀸𑀤𑁂𑀲𑀺. 𑀫𑀳𑀸𑀲𑀢𑁆𑀢𑁄𑀧𑀺 𑀯𑀼𑀤𑁆𑀥𑀺𑀧𑁆𑀧𑀢𑁆𑀢𑁄 𑀤𑁂𑀯𑁄 𑀯𑀺𑀬 𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀺𑀢𑁆𑀯𑀸 𑀧𑀭𑀺𑀧𑀓𑁆𑀓𑁂 𑀜𑀸𑀡𑁂 𑀓𑀸𑀫𑁂𑀲𑀼 𑀆𑀤𑀻𑀦𑀯𑀁 𑀦𑁂𑀓𑁆𑀔𑀫𑁆𑀫𑁂 𑀘 𑀆𑀦𑀺𑀲𑀁𑀲𑀁 𑀤𑀺𑀲𑁆𑀯𑀸 𑀭𑀸𑀳𑀼𑀮𑀓𑀼𑀫𑀸𑀭𑀲𑁆𑀲 𑀚𑀸𑀢𑀤𑀺𑀯𑀲𑁂 𑀙𑀦𑁆𑀦𑀲𑀳𑀸𑀬𑁄 𑀓𑀡𑁆𑀟𑀓𑀁 𑀆𑀭𑀼𑀬𑁆𑀳 𑀤𑁂𑀯𑀢𑀸𑀳𑀺 𑀯𑀺𑀯𑀝𑁂𑀦 𑀤𑁆𑀯𑀸𑀭𑁂𑀦 𑀫𑀳𑀸𑀪𑀺𑀦𑀺𑀓𑁆𑀔𑀫𑀦𑀁 𑀦𑀺𑀓𑁆𑀔𑀫𑀺𑀢𑁆𑀯𑀸 𑀢𑁂𑀦𑁂𑀯 𑀭𑀢𑁆𑀢𑀺𑀪𑀸𑀕𑁂𑀦 𑀢𑀻𑀡𑀺 𑀭𑀚𑁆𑀚𑀸𑀦𑀺 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀅𑀦𑁄𑀫𑀸𑀦𑀤𑀻𑀢𑀻𑀭𑁂 𑀧𑀩𑁆𑀩𑀚𑀺𑀢𑁆𑀯𑀸 𑀖𑀝𑀺𑀓𑀸𑀭𑀫𑀳𑀸𑀩𑁆𑀭𑀳𑁆𑀫𑀼𑀦𑀸 𑀆𑀪𑀢𑁂 𑀅𑀭𑀳𑀤𑁆𑀥𑀚𑁂 𑀕𑀳𑀺𑀢𑀫𑀢𑁆𑀢𑁂𑀬𑁂𑀯 𑀯𑀲𑁆𑀲𑀲𑀝𑁆𑀞𑀺𑀓𑀢𑁆𑀣𑁂𑀭𑁄 𑀯𑀺𑀬 𑀧𑀸𑀲𑀸𑀤𑀺𑀓𑁂𑀦 𑀇𑀭𑀺𑀬𑀸𑀧𑀣𑁂𑀦 𑀭𑀸𑀚𑀕𑀳𑀁 𑀧𑀢𑁆𑀯𑀸 𑀢𑀢𑁆𑀣 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀧𑀡𑁆𑀟𑀯𑀧𑀩𑁆𑀩𑀢𑀘𑁆𑀙𑀸𑀬𑀸𑀬 𑀧𑀺𑀡𑁆𑀟𑀧𑀸𑀢𑀁 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀭𑀜𑁆𑀜𑀸 𑀫𑀸𑀕𑀥𑁂𑀦 𑀭𑀚𑁆𑀚𑀲𑀺𑀭𑀺𑀬𑀸 𑀦𑀺𑀫𑀦𑁆𑀢𑀺𑀬𑀫𑀸𑀦𑁄𑀧𑀺 𑀢𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀅𑀦𑀼𑀓𑁆𑀓𑀫𑁂𑀦 𑀉𑀭𑀼𑀯𑁂𑀮𑀁 𑀕𑀦𑁆𑀢𑁆𑀯𑀸 ‘‘𑀭𑀫𑀡𑀻𑀬𑁄 𑀯𑀢 𑀅𑀬𑀁 𑀪𑀽𑀫𑀺𑀪𑀸𑀕𑁄, 𑀅𑀮𑀁 𑀯𑀢𑀺𑀤𑀁 𑀓𑀼𑀮𑀧𑀼𑀢𑁆𑀢𑀲𑁆𑀲 𑀧𑀥𑀸𑀦𑀢𑁆𑀣𑀺𑀓𑀲𑁆𑀲 𑀧𑀥𑀸𑀦𑀸𑀬𑀸’’𑀢𑀺 𑀧𑀥𑀸𑀦𑀸𑀪𑀺𑀫𑀼𑀔𑀁 𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀢𑀢𑁆𑀣 𑀯𑀸𑀲𑀁 𑀉𑀧𑀕𑀢𑁄.

𑀢𑁂𑀦 𑀲𑀫𑀬𑁂𑀦 𑀇𑀢𑀭𑁂 𑀲𑀢𑁆𑀢 𑀩𑁆𑀭𑀸𑀳𑁆𑀫𑀡𑀸 𑀬𑀣𑀸𑀓𑀫𑁆𑀫𑀁 𑀕𑀢𑀸, 𑀲𑀩𑁆𑀩𑀤𑀳𑀭𑁄 𑀧𑀦 𑀮𑀓𑁆𑀔𑀡𑀧𑀭𑀺𑀕𑁆𑀕𑀸𑀳𑀓𑁄 𑀓𑁄𑀡𑁆𑀟𑀜𑁆𑀜𑀫𑀸𑀡𑀯𑁄 𑀅𑀭𑁄𑀕𑁄. 𑀲𑁄 ‘‘𑀫𑀳𑀸𑀧𑀼𑀭𑀺𑀲𑁄 𑀧𑀩𑁆𑀩𑀚𑀺𑀢𑁄’’𑀢𑀺 𑀲𑀼𑀢𑁆𑀯𑀸 𑀢𑁂𑀲𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀧𑀼𑀢𑁆𑀢𑁂 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀯𑀫𑀸𑀳 𑁋 ‘‘𑀲𑀺𑀤𑁆𑀥𑀢𑁆𑀣𑀓𑀼𑀫𑀸𑀭𑁄 𑀓𑀺𑀭 𑀧𑀩𑁆𑀩𑀚𑀺𑀢𑁄. 𑀲𑁄 𑀳𑀺 𑀦𑀺𑀲𑁆𑀲𑀁𑀲𑀬𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀺. 𑀲𑀘𑁂 𑀢𑀼𑀫𑁆𑀳𑀸𑀓𑀁 𑀧𑀺𑀢𑀭𑁄 𑀅𑀭𑁄𑀕𑀸 𑀅𑀲𑁆𑀲𑀼, 𑀅𑀚𑁆𑀚 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀩𑁆𑀩𑀚𑁂𑀬𑁆𑀬𑀼𑀁. 𑀲𑀘𑁂 𑀢𑀼𑀫𑁆𑀳𑁂𑀧𑀺 𑀇𑀘𑁆𑀙𑀣, 𑀏𑀣 𑀫𑀬𑀁 𑀢𑀁 𑀫𑀳𑀸𑀧𑀼𑀭𑀺𑀲𑀫𑀦𑀼𑀧𑀩𑁆𑀩𑀚𑀺𑀲𑁆𑀲𑀸𑀫𑀸’’𑀢𑀺. 𑀢𑁂 𑀲𑀩𑁆𑀩𑁂 𑀏𑀓𑀘𑁆𑀙𑀦𑁆𑀤𑀸 𑀪𑀯𑀺𑀢𑀼𑀁 𑀦𑀸𑀲𑀓𑁆𑀔𑀺𑀁𑀲𑀼. 𑀢𑀬𑁄 𑀚𑀦𑀸 𑀦 𑀧𑀩𑁆𑀩𑀚𑀺𑀁𑀲𑀼, 𑀓𑁄𑀡𑁆𑀟𑀜𑁆𑀜𑀩𑁆𑀭𑀸𑀳𑁆𑀫𑀡𑀁 𑀚𑁂𑀝𑁆𑀞𑀓𑀁 𑀓𑀢𑁆𑀯𑀸 𑀇𑀢𑀭𑁂 𑀘𑀢𑁆𑀢𑀸𑀭𑁄 𑀧𑀩𑁆𑀩𑀚𑀺𑀁𑀲𑀼. 𑀇𑀫𑁂 𑀧𑀜𑁆𑀘 𑀧𑀩𑁆𑀩𑀚𑀺𑀢𑁆𑀯𑀸 𑀕𑀸𑀫𑀦𑀺𑀕𑀫𑀭𑀸𑀚𑀥𑀸𑀦𑀻𑀲𑀼 𑀪𑀺𑀓𑁆𑀔𑀸𑀬 𑀘𑀭𑀦𑁆𑀢𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀲𑀦𑁆𑀢𑀺𑀓𑀁 𑀅𑀕𑀫𑀺𑀁𑀲𑀼. 𑀢𑁂 𑀙𑀩𑁆𑀩𑀲𑁆𑀲𑀸𑀦𑀺 𑀩𑁄𑀥𑀺𑀲𑀢𑁆𑀢𑁂 𑀫𑀳𑀸𑀧𑀥𑀸𑀦𑀁 𑀧𑀤𑀳𑀦𑁆𑀢𑁂 ‘‘𑀇𑀤𑀸𑀦𑀺 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀺 𑀇𑀤𑀸𑀦𑀺 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀫𑀳𑀸𑀲𑀢𑁆𑀢𑀁 𑀉𑀧𑀝𑁆𑀞𑀳𑀫𑀸𑀦𑀸 𑀲𑀦𑁆𑀢𑀺𑀓𑀸𑀯𑀘𑀭𑀸𑀯𑀲𑁆𑀲 𑀅𑀳𑁂𑀲𑀼𑀁. 𑀬𑀤𑀸 𑀧𑀦 𑀩𑁄𑀥𑀺𑀲𑀢𑁆𑀢𑁄 𑀏𑀓𑀢𑀺𑀮𑀢𑀡𑁆𑀟𑀼𑀮𑀸𑀤𑀻𑀳𑀺 𑀯𑀻𑀢𑀺𑀦𑀸𑀫𑁂𑀦𑁆𑀢𑁄𑀧𑀺 𑀤𑀼𑀓𑁆𑀓𑀭𑀓𑀸𑀭𑀺𑀓𑀸𑀬 𑀅𑀭𑀺𑀬𑀥𑀫𑁆𑀫𑀧𑀝𑀺𑀯𑁂𑀥𑀲𑁆𑀲 𑀅𑀪𑀸𑀯𑀁 𑀜𑀢𑁆𑀯𑀸 𑀑𑀴𑀸𑀭𑀺𑀓𑀁 𑀆𑀳𑀸𑀭𑀁 𑀆𑀳𑀭𑀺, 𑀢𑀤𑀸 𑀢𑁂 𑀧𑀓𑁆𑀓𑀫𑀺𑀢𑁆𑀯𑀸 𑀇𑀲𑀺𑀧𑀢𑀦𑀁 𑀅𑀕𑀫𑀁𑀲𑀼.

𑀅𑀣 𑀩𑁄𑀥𑀺𑀲𑀢𑁆𑀢𑁄 𑀑𑀴𑀸𑀭𑀺𑀓𑀸𑀳𑀸𑀭𑀧𑀭𑀺𑀪𑁄𑀕𑁂𑀦 𑀙𑀯𑀺𑀫𑀁𑀲𑀮𑁄𑀳𑀺𑀢𑀧𑀸𑀭𑀺𑀧𑀽𑀭𑀺𑀁 𑀓𑀢𑁆𑀯𑀸 𑀯𑀺𑀲𑀸𑀔𑀧𑀼𑀡𑁆𑀡𑀫𑀤𑀺𑀯𑀲𑁂 𑀲𑀼𑀚𑀸𑀢𑀸𑀬 𑀤𑀺𑀦𑁆𑀦𑀁 𑀯𑀭𑀪𑁄𑀚𑀦𑀁 𑀪𑀼𑀜𑁆𑀚𑀺𑀢𑁆𑀯𑀸 𑀲𑀼𑀯𑀡𑁆𑀡𑀧𑀸𑀢𑀺𑀁 𑀦𑀤𑀺𑀬𑀸 𑀧𑀝𑀺𑀲𑁄𑀢𑀁 𑀔𑀺𑀧𑀺𑀢𑁆𑀯𑀸 ‘‘𑀅𑀚𑁆𑀚 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀸𑀫𑀻’’𑀢𑀺 𑀓𑀢𑀲𑀦𑁆𑀦𑀺𑀝𑁆𑀞𑀸𑀦𑁄 𑀲𑀸𑀬𑀦𑁆𑀳𑀲𑀫𑀬𑁂 𑀓𑀸𑀮𑁂𑀦 𑀦𑀸𑀕𑀭𑀸𑀚𑁂𑀦 𑀅𑀦𑁂𑀓𑁂𑀳𑀺 𑀣𑀼𑀢𑀺𑀲𑀢𑁂𑀳𑀺 𑀅𑀪𑀺𑀢𑁆𑀣𑀯𑀺𑀬𑀫𑀸𑀦𑁄 𑀫𑀳𑀸𑀩𑁄𑀥𑀺𑀫𑀡𑁆𑀟𑀁 𑀆𑀭𑀼𑀬𑁆𑀳 𑀅𑀘𑀮𑀝𑁆𑀞𑀸𑀦𑁂 𑀧𑀸𑀘𑀻𑀦𑀮𑁄𑀓𑀥𑀸𑀢𑀼𑀅𑀪𑀺𑀫𑀼𑀔𑁄 𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀻𑀤𑀺𑀢𑁆𑀯𑀸 𑀘𑀢𑀼𑀭𑀗𑁆𑀕𑀲𑀫𑀦𑁆𑀦𑀸𑀕𑀢𑀁 𑀯𑀻𑀭𑀺𑀬𑀁 𑀅𑀥𑀺𑀝𑁆𑀞𑀸𑀬 𑀲𑀽𑀭𑀺𑀬𑁂 𑀥𑀭𑀫𑀸𑀦𑁂𑀬𑁂𑀯 𑀫𑀸𑀭𑀩𑀮𑀁 𑀯𑀺𑀥𑀫𑀺𑀢𑁆𑀯𑀸 𑀧𑀞𑀫𑀬𑀸𑀫𑁂 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀺𑀢𑁆𑀯𑀸 𑀫𑀚𑁆𑀛𑀺𑀫𑀬𑀸𑀫𑁂 𑀤𑀺𑀩𑁆𑀩𑀘𑀓𑁆𑀔𑀼𑀁 𑀯𑀺𑀲𑁄𑀥𑁂𑀢𑁆𑀯𑀸 𑀧𑀘𑁆𑀘𑀽𑀲𑀓𑀸𑀮𑀲𑀫𑀦𑀦𑁆𑀢𑀭𑁂 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁂 𑀜𑀸𑀡𑀁 𑀑𑀢𑀸𑀭𑁂𑀢𑁆𑀯𑀸 𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑀁 𑀧𑀘𑁆𑀘𑀬𑀸𑀓𑀸𑀭𑀯𑀝𑁆𑀝𑀁 𑀲𑀫𑁆𑀫𑀲𑀦𑁆𑀢𑁄 𑀲𑀩𑁆𑀩𑀩𑀼𑀤𑁆𑀥𑁂𑀳𑀺 𑀧𑀝𑀺𑀯𑀺𑀤𑁆𑀥𑀁 𑀅𑀲𑀸𑀥𑀸𑀭𑀡𑀁 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀸𑀬 𑀨𑀮𑀲𑀫𑀸𑀧𑀢𑁆𑀢𑀺𑀬𑀸 𑀢𑀢𑁆𑀣𑁂𑀯 𑀲𑀢𑁆𑀢𑀸𑀳𑀁 𑀯𑀻𑀢𑀺𑀦𑀸𑀫𑁂𑀲𑀺.

𑀏𑀢𑁂𑀦𑁂𑀯 𑀉𑀧𑀸𑀬𑁂𑀦 𑀲𑀢𑁆𑀢𑀲𑀢𑁆𑀢𑀸𑀳𑀁 𑀩𑁄𑀥𑀺𑀫𑀡𑁆𑀟𑁂 𑀯𑀺𑀳𑀭𑀺𑀢𑁆𑀯𑀸 𑀭𑀸𑀚𑀸𑀬𑀢𑀦𑀫𑀽𑀮𑁂 𑀫𑀥𑀼𑀧𑀺𑀡𑁆𑀟𑀺𑀓𑀪𑁄𑀚𑀦𑀁 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀧𑀼𑀦 𑀅𑀚𑀧𑀸𑀮𑀦𑀺𑀕𑁆𑀭𑁄𑀥𑀫𑀽𑀮𑀁 𑀆𑀕𑀦𑁆𑀢𑁆𑀯𑀸 𑀢𑀢𑁆𑀣 𑀦𑀺𑀲𑀺𑀦𑁆𑀦𑁄 𑀥𑀫𑁆𑀫𑀕𑀫𑁆𑀪𑀻𑀭𑀢𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑀢𑀸𑀬 𑀘𑀺𑀢𑁆𑀢𑁂 𑀦𑀫𑀦𑁆𑀢𑁂 𑀫𑀳𑀸𑀩𑁆𑀭𑀳𑁆𑀫𑀼𑀦𑀸 𑀬𑀸𑀘𑀺𑀢𑁄 𑀩𑀼𑀤𑁆𑀥𑀘𑀓𑁆𑀔𑀼𑀦𑀸 𑀮𑁄𑀓𑀁 𑀯𑁄𑀮𑁄𑀓𑁂𑀦𑁆𑀢𑁄 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑀸𑀤𑀺𑀪𑁂𑀤𑁂 𑀲𑀢𑁆𑀢𑁂 𑀤𑀺𑀲𑁆𑀯𑀸 𑀫𑀳𑀸𑀩𑁆𑀭𑀳𑁆𑀫𑀼𑀦𑁄 𑀥𑀫𑁆𑀫𑀤𑁂𑀲𑀦𑀸𑀬 𑀧𑀝𑀺𑀜𑁆𑀜𑀁 𑀤𑀢𑁆𑀯𑀸 ‘‘𑀓𑀲𑁆𑀲 𑀦𑀼 𑀔𑁄 𑀅𑀳𑀁 𑀧𑀞𑀫𑀁 𑀥𑀫𑁆𑀫𑀁 𑀤𑁂𑀲𑁂𑀲𑁆𑀲𑀸𑀫𑀻’’𑀢𑀺 𑀆𑀴𑀸𑀭𑀼𑀤𑀓𑀸𑀦𑀁 𑀓𑀸𑀮𑀓𑀢𑀪𑀸𑀯𑀁 𑀜𑀢𑁆𑀯𑀸 𑀧𑀼𑀦 𑀘𑀺𑀦𑁆𑀢𑁂𑀦𑁆𑀢𑁄 ‘‘𑀩𑀳𑀽𑀧𑀓𑀸𑀭𑀸 𑀔𑁄 𑀧𑀦 𑀫𑁂 𑀧𑀜𑁆𑀘𑀯𑀕𑁆𑀕𑀺𑀬𑀸 𑀪𑀺𑀓𑁆𑀔𑀽, 𑀬𑁂 𑀫𑀁 𑀧𑀥𑀸𑀦𑀧𑀳𑀺𑀢𑀢𑁆𑀢𑀁 𑀉𑀧𑀝𑁆𑀞𑀳𑀺𑀁𑀲𑀼. 𑀬𑀁𑀦𑀽𑀦𑀸𑀳𑀁 𑀧𑀜𑁆𑀘𑀯𑀕𑁆𑀕𑀺𑀬𑀸𑀦𑀁 𑀪𑀺𑀓𑁆𑀔𑀽𑀦𑀁 𑀧𑀞𑀫𑀁 𑀥𑀫𑁆𑀫𑀁 𑀤𑁂𑀲𑁂𑀬𑁆𑀬’’𑀦𑁆𑀢𑀺 𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑁂𑀲𑀺. 𑀇𑀤𑀁 𑀧𑀦 𑀲𑀩𑁆𑀩𑀫𑁂𑀯 𑀩𑀼𑀤𑁆𑀥𑀸𑀦𑀁 𑀧𑀭𑀺𑀯𑀺𑀢𑀓𑁆𑀓𑀫𑀢𑁆𑀢𑀫𑁂𑀯, 𑀞𑀧𑁂𑀢𑁆𑀯𑀸 𑀧𑀦 𑀓𑁄𑀡𑁆𑀟𑀜𑁆𑀜𑀩𑁆𑀭𑀸𑀳𑁆𑀫𑀡𑀁 𑀅𑀜𑁆𑀜𑁄 𑀓𑁄𑀘𑀺 𑀧𑀞𑀫𑀁 𑀥𑀫𑁆𑀫𑀁 𑀧𑀝𑀺𑀯𑀺𑀚𑁆𑀛𑀺𑀢𑀼𑀁 𑀲𑀫𑀢𑁆𑀣𑁄 𑀦𑀸𑀫 𑀦𑀢𑁆𑀣𑀺. 𑀲𑁄𑀧𑀺 𑀏𑀢𑀤𑀢𑁆𑀣𑀫𑁂𑀯 𑀓𑀧𑁆𑀧𑀲𑀢𑀲𑀳𑀲𑁆𑀲𑀁 𑀅𑀥𑀺𑀓𑀸𑀭𑀓𑀫𑁆𑀫𑀁 𑀅𑀓𑀸𑀲𑀺, 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀦𑀯 𑀯𑀸𑀭𑁂 𑀅𑀕𑁆𑀕𑀲𑀲𑁆𑀲𑀤𑀸𑀦𑀁 𑀅𑀤𑀸𑀲𑀺.

𑀅𑀣 𑀲𑀢𑁆𑀣𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀅𑀦𑀼𑀧𑀼𑀩𑁆𑀩𑁂𑀦 𑀇𑀲𑀺𑀧𑀢𑀦𑀁 𑀕𑀦𑁆𑀢𑁆𑀯𑀸 𑀬𑁂𑀦 𑀧𑀜𑁆𑀘𑀯𑀕𑁆𑀕𑀺𑀬𑀸 𑀪𑀺𑀓𑁆𑀔𑀽, 𑀢𑁂𑀦𑀼𑀧𑀲𑀗𑁆𑀓𑀫𑀺. 𑀢𑁂 𑀢𑀣𑀸𑀕𑀢𑀁 𑀆𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸𑀯 𑀅𑀢𑁆𑀢𑀦𑁄 𑀓𑀢𑀺𑀓𑀸𑀬 𑀲𑀡𑁆𑀞𑀸𑀢𑀼𑀁 𑀦𑀸𑀲𑀓𑁆𑀔𑀺𑀁𑀲𑀼. 𑀏𑀓𑁄 𑀧𑀢𑁆𑀢𑀘𑀻𑀯𑀭𑀁 𑀧𑀝𑀺𑀕𑁆𑀕𑀳𑁂𑀲𑀺, 𑀏𑀓𑁄 𑀆𑀲𑀦𑀁 𑀧𑀜𑁆𑀜𑀸𑀧𑁂𑀲𑀺, 𑀏𑀓𑁄 𑀧𑀸𑀤𑁄𑀤𑀓𑀁 𑀧𑀘𑁆𑀘𑀼𑀧𑀝𑁆𑀞𑀸𑀧𑁂𑀲𑀺, 𑀏𑀓𑁄 𑀧𑀸𑀤𑁂 𑀥𑁄𑀯𑀺, 𑀏𑀓𑁄 𑀢𑀸𑀮𑀯𑀡𑁆𑀝𑀁 𑀕𑀳𑁂𑀢𑁆𑀯𑀸 𑀩𑀻𑀚𑀫𑀸𑀦𑁄 𑀞𑀺𑀢𑁄. 𑀏𑀯𑀁 𑀢𑁂𑀲𑀼 𑀯𑀢𑁆𑀢𑀁 𑀤𑀲𑁆𑀲𑁂𑀢𑁆𑀯𑀸 𑀲𑀦𑁆𑀢𑀺𑀓𑁂 𑀦𑀺𑀲𑀺𑀦𑁆𑀦𑁂𑀲𑀼 𑀓𑁄𑀡𑁆𑀟𑀜𑁆𑀜𑀢𑁆𑀣𑁂𑀭𑀁 𑀓𑀸𑀬𑀲𑀓𑁆𑀔𑀺𑀁 𑀓𑀢𑁆𑀯𑀸 𑀲𑀢𑁆𑀣𑀸 𑀅𑀦𑀼𑀢𑁆𑀢𑀭𑀁 𑀢𑁂𑀧𑀭𑀺𑀯𑀝𑁆𑀝𑀁 𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑀲𑀼𑀢𑁆𑀢𑀦𑁆𑀢𑀁 𑀆𑀭𑀪𑀺. 𑀫𑀦𑀼𑀲𑁆𑀲𑀧𑀭𑀺𑀲𑀸 𑀧𑀜𑁆𑀘 𑀚𑀦𑀸𑀯 𑀅𑀳𑁂𑀲𑀼𑀁, 𑀤𑁂𑀯𑀧𑀭𑀺𑀲𑀸 𑀅𑀧𑀭𑀺𑀘𑁆𑀙𑀺𑀦𑁆𑀦𑀸. 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀓𑁄𑀡𑁆𑀟𑀜𑁆𑀜𑀢𑁆𑀣𑁂𑀭𑁄 𑀅𑀝𑁆𑀞𑀸𑀭𑀲𑀳𑀺 𑀫𑀳𑀸𑀩𑁆𑀭𑀳𑁆𑀫𑀓𑁄𑀝𑀻𑀳𑀺 𑀲𑀤𑁆𑀥𑀺𑀁 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀺𑀢𑁄. 𑀅𑀣 𑀲𑀢𑁆𑀣𑀸 ‘‘𑀫𑀬𑀸 𑀤𑀼𑀓𑁆𑀓𑀭𑀲𑀢𑀸𑀪𑀢𑀁 𑀥𑀫𑁆𑀫𑀁 𑀧𑀞𑀫𑀫𑁂𑀯 𑀅𑀜𑁆𑀜𑀸𑀲𑀻𑀢𑀺 𑀅𑀜𑁆𑀜𑀸𑀲𑀺𑀓𑁄𑀡𑁆𑀟𑀜𑁆𑀜𑁄 𑀦𑀸𑀫 𑀅𑀬’’𑀦𑁆𑀢𑀺 𑀣𑁂𑀭𑀁 𑀆𑀮𑀧𑀦𑁆𑀢𑁄 ‘‘𑀅𑀜𑁆𑀜𑀸𑀲𑀺 𑀯𑀢, 𑀪𑁄, 𑀓𑁄𑀡𑁆𑀟𑀜𑁆𑀜𑁄, 𑀅𑀜𑁆𑀜𑀸𑀲𑀺 𑀯𑀢, 𑀪𑁄, 𑀓𑁄𑀡𑁆𑀟𑀜𑁆𑀜𑁄’’𑀢𑀺 𑀆𑀳. 𑀢𑀲𑁆𑀲 𑀢𑀤𑁂𑀯 𑀦𑀸𑀫𑀁 𑀚𑀸𑀢𑀁. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀇𑀢𑀺 𑀳𑀺𑀤𑀁 𑀆𑀬𑀲𑁆𑀫𑀢𑁄 𑀓𑁄𑀡𑁆𑀟𑀜𑁆𑀜𑀲𑁆𑀲 𑀅𑀜𑁆𑀜𑀸𑀲𑀺𑀓𑁄𑀡𑁆𑀟𑀜𑁆𑀜𑁄𑀢𑁆𑀯𑁂𑀯 𑀦𑀸𑀫𑀁 𑀅𑀳𑁄𑀲𑀻’’𑀢𑀺.

𑀇𑀢𑀺 𑀣𑁂𑀭𑁄 𑀆𑀲𑀸𑀴𑁆𑀳𑀺𑀧𑀼𑀡𑁆𑀡𑀫𑀸𑀬𑀁 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀺𑀢𑁄, 𑀧𑀸𑀝𑀺𑀧𑀤𑀤𑀺𑀯𑀲𑁂 𑀪𑀤𑁆𑀤𑀺𑀬𑀢𑁆𑀣𑁂𑀭𑁄, 𑀤𑀼𑀢𑀺𑀬𑀧𑀓𑁆𑀔𑀤𑀺𑀯𑀲𑁂 𑀯𑀧𑁆𑀧𑀢𑁆𑀣𑁂𑀭𑁄, 𑀢𑀢𑀺𑀬𑀧𑀓𑁆𑀔𑀤𑀺𑀯𑀲𑁂 𑀫𑀳𑀸𑀦𑀸𑀫𑀢𑁆𑀣𑁂𑀭𑁄, 𑀧𑀓𑁆𑀔𑀲𑁆𑀲 𑀘𑀢𑀼𑀢𑁆𑀣𑀺𑀬𑀁 𑀅𑀲𑁆𑀲𑀚𑀺𑀢𑁆𑀣𑁂𑀭𑁄 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀺𑀢𑁄. 𑀧𑀜𑁆𑀘𑀫𑀺𑀬𑀸 𑀧𑀦 𑀧𑀓𑁆𑀔𑀲𑁆𑀲 𑀅𑀦𑀢𑁆𑀢𑀮𑀓𑁆𑀔𑀡𑀲𑀼𑀢𑁆𑀢𑀦𑁆𑀢𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀲𑀩𑁆𑀩𑁂𑀧𑀺 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀺𑀢𑀸.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀙 𑀮𑁄𑀓𑁂 𑀅𑀭𑀳𑀦𑁆𑀢𑁄 𑀳𑁄𑀦𑁆𑀢𑀺. 𑀢𑀢𑁄 𑀧𑀝𑁆𑀞𑀸𑀬 𑀲𑀢𑁆𑀣𑀸 𑀬𑀲𑀤𑀸𑀭𑀓𑀧𑁆𑀧𑀫𑀼𑀔𑁂 𑀧𑀜𑁆𑀘𑀧𑀜𑁆𑀜𑀸𑀲 𑀧𑀼𑀭𑀺𑀲𑁂, 𑀓𑀧𑁆𑀧𑀸𑀲𑀺𑀬𑀯𑀦𑀲𑀡𑁆𑀟𑁂 𑀢𑀺𑀁𑀲𑀫𑀢𑁆𑀢𑁂 𑀪𑀤𑁆𑀤𑀯𑀕𑁆𑀕𑀺𑀬𑁂, 𑀕𑀬𑀸𑀲𑀻𑀲𑁂 𑀧𑀺𑀝𑁆𑀞𑀺𑀧𑀸𑀲𑀸𑀡𑁂 𑀲𑀳𑀲𑁆𑀲𑀫𑀢𑁆𑀢𑁂 𑀧𑀼𑀭𑀸𑀡𑀚𑀝𑀺𑀮𑁂𑀢𑀺 𑀏𑀯𑀁 𑀫𑀳𑀸𑀚𑀦𑀁 𑀅𑀭𑀺𑀬𑀪𑀽𑀫𑀺𑀁 𑀑𑀢𑀸𑀭𑁂𑀢𑁆𑀯𑀸 𑀩𑀺𑀫𑁆𑀩𑀺𑀲𑀸𑀭𑀧𑁆𑀧𑀫𑀼𑀔𑀸𑀦𑀺 𑀏𑀓𑀸𑀤𑀲𑀦𑀳𑀼𑀢𑀸𑀦𑀺 𑀲𑁄𑀢𑀸𑀧𑀢𑁆𑀢𑀺𑀨𑀮𑁂, 𑀏𑀓𑀁 𑀦𑀳𑀼𑀢𑀁 𑀲𑀭𑀡𑀢𑁆𑀢𑀬𑁂 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀚𑀫𑁆𑀩𑀼𑀤𑀻𑀧𑀢𑀮𑁂 𑀲𑀸𑀲𑀦𑀁 𑀧𑀼𑀧𑁆𑀨𑀺𑀢𑀨𑀮𑀺𑀢𑀁 𑀓𑀢𑁆𑀯𑀸 𑀲𑀓𑀮𑀚𑀫𑁆𑀩𑀼𑀤𑀻𑀧𑀫𑀡𑁆𑀟𑀮𑀁 𑀓𑀸𑀲𑀸𑀯𑀧𑀚𑁆𑀚𑁄𑀢𑀁 𑀇𑀲𑀺𑀯𑀸𑀢𑀧𑀝𑀺𑀯𑀸𑀢𑀁 𑀓𑀭𑁄𑀦𑁆𑀢𑁄 𑀏𑀓𑀲𑁆𑀫𑀺𑀁 𑀲𑀫𑀬𑁂 𑀚𑁂𑀢𑀯𑀦𑀫𑀳𑀸𑀯𑀺𑀳𑀸𑀭𑀁 𑀧𑀢𑁆𑀯𑀸 𑀢𑀢𑁆𑀣 𑀯𑀲𑀦𑁆𑀢𑁄 𑀪𑀺𑀓𑁆𑀔𑀼𑀲𑀗𑁆𑀖𑀫𑀚𑁆𑀛𑁂 𑀧𑀜𑁆𑀜𑀢𑁆𑀢𑀯𑀭𑀩𑀼𑀤𑁆𑀥𑀸𑀲𑀦𑀕𑀢𑁄 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 ‘‘𑀧𑀞𑀫𑀁 𑀥𑀫𑁆𑀫𑀁 𑀧𑀝𑀺𑀯𑀺𑀤𑁆𑀥𑀪𑀺𑀓𑁆𑀔𑀽𑀦𑀁 𑀅𑀦𑁆𑀢𑀭𑁂 𑀫𑀫 𑀧𑀼𑀢𑁆𑀢𑁄 𑀓𑁄𑀡𑁆𑀟𑀜𑁆𑀜𑁄 𑀅𑀕𑁆𑀕𑁄’’𑀢𑀺 𑀤𑀲𑁆𑀲𑁂𑀢𑀼𑀁 𑀏𑀢𑀤𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀲𑀺.

𑀣𑁂𑀭𑁄𑀧𑀺 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑁂 𑀅𑀢𑁆𑀢𑀦𑁄 𑀦𑀺𑀧𑀘𑁆𑀘𑀓𑀸𑀭𑀁 𑀓𑀭𑁄𑀦𑁆𑀢𑁂 𑀤𑀺𑀲𑁆𑀯𑀸 𑀩𑀼𑀤𑁆𑀥𑀸𑀦𑀁 𑀲𑀦𑁆𑀢𑀺𑀓𑀸 𑀅𑀧𑀓𑁆𑀓𑀫𑀺𑀢𑀼𑀓𑀸𑀫𑁄 𑀳𑀼𑀢𑁆𑀯𑀸 ‘‘𑀧𑀼𑀡𑁆𑀡𑀫𑀸𑀡𑀯𑁄 𑀧𑀩𑁆𑀩𑀚𑀺𑀢𑁆𑀯𑀸 𑀲𑀸𑀲𑀦𑁂 𑀅𑀕𑁆𑀕𑀥𑀫𑁆𑀫𑀓𑀣𑀺𑀓𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀤𑀺𑀲𑁆𑀯𑀸 𑀤𑁄𑀡𑀯𑀢𑁆𑀣𑀼𑀩𑁆𑀭𑀸𑀳𑁆𑀫𑀡𑀕𑀸𑀫𑀁 𑀕𑀦𑁆𑀢𑁆𑀯𑀸 𑀅𑀢𑁆𑀢𑀦𑁄 𑀪𑀸𑀕𑀺𑀦𑁂𑀬𑁆𑀬𑀁 𑀧𑀼𑀡𑁆𑀡𑀫𑀸𑀡𑀯𑀁 𑀧𑀩𑁆𑀩𑀸𑀚𑁂𑀢𑁆𑀯𑀸 ‘‘𑀅𑀬𑀁 𑀩𑀼𑀤𑁆𑀥𑀸𑀦𑀁 𑀲𑀦𑁆𑀢𑀺𑀓𑁂 𑀯𑀲𑀺𑀲𑁆𑀲𑀢𑀻’’𑀢𑀺 𑀢𑀲𑁆𑀲 𑀩𑀼𑀤𑁆𑀥𑀸𑀦𑀁 𑀅𑀦𑁆𑀢𑁂𑀯𑀸𑀲𑀺𑀓𑀪𑀸𑀯𑀁 𑀓𑀢𑁆𑀯𑀸 𑀲𑀬𑀁 𑀤𑀲𑀩𑀮𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀪𑀕𑀯𑀸 𑀫𑀬𑁆𑀳𑀁 𑀕𑀸𑀫𑀦𑁆𑀢𑀲𑁂𑀦𑀸𑀲𑀦𑀁 𑀅𑀲𑀧𑁆𑀧𑀸𑀬𑀁, 𑀆𑀓𑀺𑀡𑁆𑀡𑁄 𑀯𑀺𑀳𑀭𑀺𑀢𑀼𑀁 𑀦 𑀲𑀓𑁆𑀓𑁄𑀫𑀺, 𑀙𑀤𑁆𑀤𑀦𑁆𑀢𑀤𑀳𑀁 𑀕𑀦𑁆𑀢𑁆𑀯𑀸 𑀯𑀲𑀺𑀲𑁆𑀲𑀸𑀫𑀻’’𑀢𑀺 𑀪𑀕𑀯𑀦𑁆𑀢𑀁 𑀅𑀦𑀼𑀚𑀸𑀦𑀸𑀧𑁂𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀙𑀤𑁆𑀤𑀦𑁆𑀢𑀤𑀳𑀁 𑀕𑀦𑁆𑀢𑁆𑀯𑀸 𑀙𑀤𑁆𑀤𑀦𑁆𑀢𑀳𑀢𑁆𑀣𑀺𑀓𑀼𑀮𑀁 𑀦𑀺𑀲𑁆𑀲𑀸𑀬 𑀤𑁆𑀯𑀸𑀤𑀲 𑀯𑀲𑁆𑀲𑀸𑀦𑀺 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀢𑀢𑁆𑀣𑁂𑀯 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀧𑀭𑀺𑀦𑀺𑀩𑁆𑀩𑀸𑀬𑀺.

𑀲𑀸𑀭𑀺𑀧𑀼𑀢𑁆𑀢-𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑀯𑀢𑁆𑀣𑀼

𑁧𑁮𑁯-𑁧𑁯𑁦. 𑀤𑀼𑀢𑀺𑀬𑀢𑀢𑀺𑀬𑁂𑀲𑀼 𑀫𑀳𑀸𑀧𑀜𑁆𑀜𑀸𑀦𑀦𑁆𑀢𑀺 𑀫𑀳𑀢𑀺𑀬𑀸 𑀧𑀜𑁆𑀜𑀸𑀬 𑀲𑀫𑀦𑁆𑀦𑀸𑀕𑀢𑀸𑀦𑀁. 𑀇𑀤𑁆𑀥𑀺𑀫𑀦𑁆𑀢𑀸𑀦𑀦𑁆𑀢𑀺 𑀇𑀤𑁆𑀥𑀺𑀬𑀸 𑀲𑀫𑁆𑀧𑀦𑁆𑀦𑀸𑀦𑀁. 𑀲𑀸𑀭𑀺𑀧𑀼𑀢𑁆𑀢𑁄 𑀫𑁄𑀕𑁆𑀕𑀮𑁆𑀮𑀸𑀦𑁄𑀢𑀺 𑀢𑁂𑀲𑀁 𑀣𑁂𑀭𑀸𑀦𑀁 𑀦𑀸𑀫𑀁.

𑀇𑀫𑁂𑀲𑀫𑁆𑀧𑀺 𑀧𑀜𑁆𑀳𑀓𑀫𑁆𑀫𑁂 𑀅𑀬𑀫𑀦𑀼𑀧𑀼𑀩𑁆𑀩𑀺𑀓𑀣𑀸 𑁋 𑀇𑀢𑁄 𑀲𑀢𑀲𑀳𑀲𑁆𑀲𑀓𑀧𑁆𑀧𑀸𑀥𑀺𑀓𑁂 𑀅𑀲𑀗𑁆𑀔𑁆𑀬𑁂𑀬𑁆𑀬𑀓𑀧𑁆𑀧𑀫𑀢𑁆𑀣𑀓𑁂 𑀲𑀸𑀭𑀺𑀧𑀼𑀢𑁆𑀢𑁄 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺, 𑀦𑀸𑀫𑁂𑀦 𑀲𑀭𑀤𑀫𑀸𑀡𑀯𑁄 𑀦𑀸𑀫 𑀅𑀳𑁄𑀲𑀺. 𑀫𑁄𑀕𑁆𑀕𑀮𑁆𑀮𑀸𑀦𑁄 𑀕𑀳𑀧𑀢𑀺𑀫𑀳𑀸𑀲𑀸𑀮𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺, 𑀦𑀸𑀫𑁂𑀦 𑀲𑀺𑀭𑀺𑀯𑀟𑁆𑀠𑀦𑀓𑀼𑀝𑀼𑀫𑁆𑀩𑀺𑀬𑁄 𑀦𑀸𑀫 𑀅𑀳𑁄𑀲𑀺. 𑀢𑁂 𑀉𑀪𑁄𑀧𑀺 𑀲𑀳𑀧𑀁𑀲𑀼𑀓𑀻𑀴𑀺𑀢𑀸𑀯 𑀲𑀳𑀸𑀬𑀓𑀸 𑀅𑀳𑁂𑀲𑀼𑀁. 𑀲𑀭𑀤𑀫𑀸𑀡𑀯𑁄 𑀧𑀺𑀢𑀼 𑀅𑀘𑁆𑀘𑀬𑁂𑀦 𑀓𑀼𑀮𑀲𑀦𑁆𑀢𑀓𑀁 𑀫𑀳𑀸𑀥𑀦𑀁 𑀧𑀝𑀺𑀧𑀚𑁆𑀚𑀺𑀢𑁆𑀯𑀸 𑀏𑀓𑀤𑀺𑀯𑀲𑀁 𑀭𑀳𑁄𑀕𑀢𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀳𑀁 𑀇𑀥𑀮𑁄𑀓𑀢𑁆𑀢𑀪𑀸𑀯𑀫𑁂𑀯 𑀚𑀸𑀦𑀸𑀫𑀺, 𑀦𑁄 𑀧𑀭𑀮𑁄𑀓𑀢𑁆𑀢𑀪𑀸𑀯𑀁, 𑀚𑀸𑀢𑀲𑀢𑁆𑀢𑀸𑀦𑀜𑁆𑀘 𑀫𑀭𑀡𑀁 𑀦𑀸𑀫 𑀥𑀼𑀯𑀁, 𑀫𑀬𑀸 𑀏𑀓𑀁 𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀫𑁄𑀓𑁆𑀔𑀥𑀫𑁆𑀫𑀕𑀯𑁂𑀲𑀦𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺. 𑀲𑁄 𑀲𑀳𑀸𑀬𑀓𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀳 𑁋 ‘‘𑀲𑀫𑁆𑀫 𑀲𑀺𑀭𑀺𑀯𑀟𑁆𑀠𑀦, 𑀅𑀳𑀁 𑀧𑀩𑁆𑀩𑀚𑀺𑀢𑁆𑀯𑀸 𑀫𑁄𑀓𑁆𑀔𑀥𑀫𑁆𑀫𑀁 𑀕𑀯𑁂𑀲𑀺𑀲𑁆𑀲𑀸𑀫𑀺, 𑀢𑁆𑀯𑀁 𑀫𑀬𑀸 𑀲𑀤𑁆𑀥𑀺𑀁 𑀧𑀩𑁆𑀩𑀚𑀺𑀢𑀼𑀁 𑀲𑀓𑁆𑀔𑀺𑀲𑁆𑀲𑀲𑀻’’𑀢𑀺. 𑀦 𑀲𑀓𑁆𑀔𑀺𑀲𑁆𑀲𑀸𑀫𑀺, 𑀲𑀫𑁆𑀫, 𑀢𑁆𑀯𑀁𑀬𑁂𑀯 𑀧𑀩𑁆𑀩𑀚𑀸𑀳𑀻𑀢𑀺. 𑀲𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀧𑀭𑀮𑁄𑀓𑀁 𑀕𑀘𑁆𑀙𑀦𑁆𑀢𑀸 𑀲𑀳𑀸𑀬𑁂 𑀯𑀸 𑀜𑀸𑀢𑀺𑀫𑀺𑀢𑁆𑀢𑁂 𑀯𑀸 𑀕𑀳𑁂𑀢𑁆𑀯𑀸 𑀕𑀢𑀸 𑀦𑀸𑀫 𑀦𑀢𑁆𑀣𑀺, 𑀅𑀢𑁆𑀢𑀦𑀸 𑀓𑀢𑀁 𑀅𑀢𑁆𑀢𑀦𑁄𑀯 𑀳𑁄𑀢𑀻’’𑀢𑀺. 𑀢𑀢𑁄 𑀭𑀢𑀦𑀓𑁄𑀝𑁆𑀞𑀸𑀕𑀸𑀭𑀁 𑀯𑀺𑀯𑀭𑀸𑀧𑁂𑀢𑁆𑀯𑀸 𑀓𑀧𑀡𑀤𑁆𑀥𑀺𑀓𑀯𑀡𑀺𑀩𑁆𑀩𑀓𑀬𑀸𑀘𑀓𑀸𑀦𑀁 𑀫𑀳𑀸𑀤𑀸𑀦𑀁 𑀤𑀢𑁆𑀯𑀸 𑀧𑀩𑁆𑀩𑀢𑀧𑀸𑀤𑀁 𑀧𑀯𑀺𑀲𑀺𑀢𑁆𑀯𑀸 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺. 𑀢𑀲𑁆𑀲 𑀏𑀓𑁄 𑀤𑁆𑀯𑁂 𑀢𑀬𑁄𑀢𑀺 𑀏𑀯𑀁 𑀅𑀦𑀼𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑀸 𑀘𑀢𑀼𑀲𑀢𑁆𑀢𑀢𑀺𑀲𑀳𑀲𑁆𑀲𑀫𑀢𑁆𑀢𑀸 𑀚𑀝𑀺𑀮𑀸 𑀅𑀳𑁂𑀲𑀼𑀁. 𑀲𑁄 𑀧𑀜𑁆𑀘𑀸𑀪𑀺𑀜𑁆𑀜𑀸 𑀅𑀝𑁆𑀞 𑀘 𑀲𑀫𑀸𑀧𑀢𑁆𑀢𑀺𑀬𑁄 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀢𑁂𑀲𑀫𑁆𑀧𑀺 𑀚𑀝𑀺𑀮𑀸𑀦𑀁 𑀓𑀲𑀺𑀡𑀧𑀭𑀺𑀓𑀫𑁆𑀫𑀁 𑀆𑀘𑀺𑀓𑁆𑀔𑀺. 𑀢𑁂𑀧𑀺 𑀲𑀩𑁆𑀩𑁂 𑀧𑀜𑁆𑀘 𑀅𑀪𑀺𑀜𑁆𑀜𑀸 𑀅𑀝𑁆𑀞 𑀘 𑀲𑀫𑀸𑀧𑀢𑁆𑀢𑀺𑀬𑁄 𑀦𑀺𑀩𑁆𑀩𑀢𑁆𑀢𑁂𑀲𑀼𑀁.

𑀢𑁂𑀦 𑀲𑀫𑀬𑁂𑀦 𑀅𑀦𑁄𑀫𑀤𑀲𑁆𑀲𑀻 𑀦𑀸𑀫 𑀩𑀼𑀤𑁆𑀥𑁄 𑀮𑁄𑀓𑁂 𑀉𑀤𑀧𑀸𑀤𑀺. 𑀦𑀕𑀭𑀁 𑀘𑀦𑁆𑀤𑀯𑀢𑀻 𑀦𑀸𑀫 𑀅𑀳𑁄𑀲𑀺, 𑀧𑀺𑀢𑀸 𑀬𑀲𑀯𑀦𑁆𑀢𑁄 𑀦𑀸𑀫 𑀔𑀢𑁆𑀢𑀺𑀬𑁄, 𑀫𑀸𑀢𑀸 𑀬𑀲𑁄𑀥𑀭𑀸 𑀦𑀸𑀫 𑀤𑁂𑀯𑀻, 𑀩𑁄𑀥𑀺 𑀅𑀚𑁆𑀚𑀼𑀦𑀭𑀼𑀓𑁆𑀔𑁄, 𑀦𑀺𑀲𑀪𑀢𑁆𑀣𑁂𑀭𑁄 𑀘 𑀅𑀦𑁄𑀫𑀢𑁆𑀣𑁂𑀭𑁄 𑀘𑀸𑀢𑀺 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑀸, 𑀯𑀭𑀼𑀡𑀢𑁆𑀣𑁂𑀭𑁄 𑀦𑀸𑀫 𑀉𑀧𑀝𑁆𑀞𑀸𑀓𑁄, 𑀲𑀼𑀦𑁆𑀤𑀭𑀸 𑀘 𑀲𑀼𑀫𑀦𑀸 𑀘𑀸𑀢𑀺 𑀤𑁆𑀯𑁂 𑀅𑀕𑁆𑀕𑀲𑀸𑀯𑀺𑀓𑀸, 𑀆𑀬𑀼 𑀯𑀲𑁆𑀲𑀲𑀢𑀲𑀳𑀲𑁆𑀲𑀁 𑀅𑀳𑁄𑀲𑀺, 𑀲𑀭𑀻𑀭𑀁 𑀅𑀝𑁆𑀞𑀧𑀜𑁆𑀜𑀸𑀲𑀳𑀢𑁆𑀣𑀼𑀩𑁆𑀩𑁂𑀥𑀁, 𑀲𑀭𑀻𑀭𑀧𑁆𑀧𑀪𑀸 𑀤𑁆𑀯𑀸𑀤𑀲𑀬𑁄𑀚𑀦𑀁 𑀨𑀭𑀺, 𑀪𑀺𑀓𑁆𑀔𑀼𑀲𑀢𑀲𑀳𑀲𑁆𑀲𑀧𑀭𑀺𑀯𑀸𑀭𑁄 𑀅𑀳𑁄𑀲𑀺.

𑀅𑀣𑁂𑀓𑀤𑀺𑀯𑀲𑀁 𑀧𑀘𑁆𑀘𑀽𑀲𑀓𑀸𑀮𑁂 𑀫𑀳𑀸𑀓𑀭𑀼𑀡𑀸𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀬 𑀮𑁄𑀓𑀁 𑀯𑁄𑀮𑁄𑀓𑁂𑀦𑁆𑀢𑁄 𑀲𑀭𑀤𑀢𑀸𑀧𑀲𑀁 𑀤𑀺𑀲𑁆𑀯𑀸 ‘‘𑀅𑀚𑁆𑀚 𑀫𑀬𑁆𑀳𑀁 𑀲𑀭𑀤𑀢𑀸𑀧𑀲𑀲𑁆𑀲 𑀲𑀦𑁆𑀢𑀺𑀓𑀁 𑀕𑀢𑀧𑀘𑁆𑀘𑀬𑁂𑀦 𑀥𑀫𑁆𑀫𑀤𑁂𑀲𑀦𑀸 𑀘 𑀫𑀳𑀢𑀻 𑀪𑀯𑀺𑀲𑁆𑀲𑀢𑀺, 𑀲𑁄 𑀘 𑀅𑀕𑁆𑀕𑀲𑀸𑀯𑀓𑀝𑁆𑀞𑀸𑀦𑀁 𑀧𑀢𑁆𑀣𑁂𑀲𑁆𑀲𑀢𑀺, 𑀢𑀲𑁆𑀲 𑀲𑀳𑀸𑀬𑀓𑁄 𑀲𑀺𑀭𑀺𑀯𑀟𑁆𑀠𑀦𑀓𑀼𑀝𑀼𑀫𑁆𑀩𑀺𑀬𑁄 𑀤𑀼𑀢𑀺𑀬𑀲𑀸𑀯𑀓𑀝𑁆𑀞𑀸𑀦𑀁, 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀘𑀲𑁆𑀲 𑀧𑀭𑀺𑀯𑀸𑀭𑀸 𑀘𑀢𑀼𑀲𑀢𑁆𑀢𑀢𑀺𑀲𑀳𑀲𑁆𑀲𑀚𑀝𑀺𑀮𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀲𑁆𑀲𑀦𑁆𑀢𑀺, 𑀫𑀬𑀸 𑀢𑀢𑁆𑀣 𑀕𑀦𑁆𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀅𑀢𑁆𑀢𑀦𑁄 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀅𑀜𑁆𑀜𑀁 𑀓𑀜𑁆𑀘𑀺 𑀅𑀦𑀸𑀫𑀦𑁆𑀢𑁂𑀢𑁆𑀯𑀸 𑀲𑀻𑀳𑁄 𑀯𑀺𑀬 𑀏𑀓𑀘𑀭𑁄 𑀳𑀼𑀢𑁆𑀯𑀸 𑀲𑀭𑀤𑀢𑀸𑀧𑀲𑀲𑁆𑀲 𑀅𑀦𑁆𑀢𑁂𑀯𑀸𑀲𑀺𑀓𑁂𑀲𑀼 𑀨𑀮𑀸𑀨𑀮𑀢𑁆𑀣𑀸𑀬 𑀕𑀢𑁂𑀲𑀼 ‘‘𑀩𑀼𑀤𑁆𑀥𑀪𑀸𑀯𑀁 𑀫𑁂 𑀚𑀸𑀦𑀸𑀢𑀽’’𑀢𑀺 𑀢𑀲𑁆𑀲 𑀧𑀲𑁆𑀲𑀦𑁆𑀢𑀲𑁆𑀲𑁂𑀯 𑀲𑀭𑀤𑀢𑀸𑀧𑀲𑀲𑁆𑀲 𑀆𑀓𑀸𑀲𑀢𑁄 𑀑𑀢𑀭𑀺𑀢𑁆𑀯𑀸 𑀧𑀣𑀯𑀺𑀬𑀁 𑀧𑀢𑀺𑀝𑁆𑀞𑀸𑀲𑀺. 𑀲𑀭𑀤𑀢𑀸𑀧𑀲𑁄 𑀩𑀼𑀤𑁆𑀥𑀸𑀦𑀼𑀪𑀸𑀯𑀁 𑀘𑁂𑀯 𑀲𑀭𑀻𑀭𑀲𑀫𑁆𑀧𑀢𑁆𑀢𑀺𑀁 𑀘𑀲𑁆𑀲 𑀤𑀺𑀲𑁆𑀯𑀸 𑀮𑀓𑁆𑀔𑀡𑀫𑀦𑁆𑀢𑁂 𑀲𑀫𑁆𑀫𑀲𑀺𑀢𑁆𑀯𑀸 ‘‘𑀇𑀫𑁂𑀳𑀺 𑀮𑀓𑁆𑀔𑀡𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀦𑀸𑀫 𑀅𑀕𑀸𑀭𑀫𑀚𑁆𑀛𑁂 𑀯𑀲𑀦𑁆𑀢𑁄 𑀭𑀸𑀚𑀸 𑀳𑁄𑀢𑀺 𑀘𑀓𑁆𑀓𑀯𑀢𑁆𑀢𑀻, 𑀧𑀩𑁆𑀩𑀚𑁆𑀚𑀦𑁆𑀢𑁄 𑀮𑁄𑀓𑁂 𑀯𑀺𑀯𑀝𑁆𑀝𑀘𑁆𑀙𑀤𑁄 𑀲𑀩𑁆𑀩𑀜𑁆𑀜𑀼 𑀩𑀼𑀤𑁆𑀥𑁄 𑀳𑁄𑀢𑀺, 𑀅𑀬𑀁 𑀧𑀼𑀭𑀺𑀲𑁄 𑀦𑀺𑀲𑁆𑀲𑀁𑀲𑀬𑀁 𑀩𑀼𑀤𑁆𑀥𑁄’’𑀢𑀺 𑀚𑀸𑀦𑀺𑀢𑁆𑀯𑀸 𑀧𑀘𑁆𑀘𑀼𑀕𑁆𑀕𑀫𑀦𑀁 𑀓𑀢𑁆𑀯𑀸 𑀧𑀜𑁆𑀘𑀧𑀢𑀺𑀝𑁆𑀞𑀺𑀢𑁂𑀦 𑀯𑀦𑁆𑀤𑀺𑀢𑁆𑀯𑀸 𑀆𑀲𑀦𑀁 𑀧𑀜𑁆𑀜𑀸𑀧𑁂𑀢𑁆𑀯𑀸 𑀅𑀤𑀸𑀲𑀺. 𑀦𑀺𑀲𑀻𑀤𑀺 𑀪𑀕𑀯𑀸 𑀧𑀜𑁆𑀜𑀢𑁆𑀢𑀸𑀲𑀦𑁂. 𑀲𑀭𑀤𑀢𑀸𑀧𑀲𑁄𑀧𑀺 𑀅𑀢𑁆𑀢𑀦𑁄 𑀅𑀦𑀼𑀘𑁆𑀙𑀯𑀺𑀓𑀁 𑀆𑀲𑀦𑀁 𑀕𑀳𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺.

𑀢𑀲𑁆𑀫𑀺𑀁 𑀲𑀫𑀬𑁂 𑀘𑀢𑀼𑀲𑀢𑁆𑀢𑀢𑀺𑀲𑀳𑀲𑁆𑀲𑀚𑀝𑀺𑀮𑀸 𑀧𑀡𑀻𑀢𑀧𑀡𑀻𑀢𑀸𑀦𑀺 𑀑𑀚𑀯𑀦𑁆𑀢𑀸𑀦𑀺 𑀨𑀮𑀸𑀨𑀮𑀸𑀦𑀺 𑀕𑀳𑁂𑀢𑁆𑀯𑀸 𑀆𑀘𑀭𑀺𑀬𑀲𑁆𑀲 𑀲𑀦𑁆𑀢𑀺𑀓𑀁 𑀲𑀫𑁆𑀧𑀢𑁆𑀢𑀸 𑀩𑀼𑀤𑁆𑀥𑀸𑀦𑀜𑁆𑀘𑁂𑀯 𑀆𑀘𑀭𑀺𑀬𑀲𑁆𑀲 𑀘 𑀦𑀺𑀲𑀺𑀦𑁆𑀦𑀸𑀲𑀦𑀁 𑀑𑀮𑁄𑀓𑁂𑀢𑁆𑀯𑀸 𑀆𑀳𑀁𑀲𑀼 𑁋 ‘‘𑀆𑀘𑀭𑀺𑀬, 𑀫𑀬𑀁 ‘𑀇𑀫𑀲𑁆𑀫𑀺𑀁 𑀮𑁄𑀓𑁂 𑀢𑀼𑀫𑁆𑀳𑁂𑀳𑀺 𑀫𑀳𑀦𑁆𑀢𑀢𑀭𑁄 𑀦𑀢𑁆𑀣𑀻’𑀢𑀺 𑀯𑀺𑀘𑀭𑀸𑀫, 𑀅𑀬𑀁 𑀧𑀦 𑀧𑀼𑀭𑀺𑀲𑁄 𑀢𑀼𑀫𑁆𑀳𑁂𑀳𑀺 𑀫𑀳𑀦𑁆𑀢𑀢𑀭𑁄 𑀫𑀜𑁆𑀜𑁂’’𑀢𑀺. 𑀢𑀸𑀢𑀸, 𑀓𑀺𑀁 𑀯𑀤𑀣? 𑀲𑀸𑀲𑀧𑁂𑀦 𑀲𑀤𑁆𑀥𑀺𑀁 𑀅𑀝𑁆𑀞𑀲𑀝𑁆𑀞𑀺𑀬𑁄𑀚𑀦𑀲𑀢𑀲𑀳𑀲𑁆𑀲𑀼𑀩𑁆𑀩𑁂𑀥𑀁 𑀲𑀺𑀦𑁂𑀭𑀼𑀁 𑀲𑀫𑀁 𑀓𑀸𑀢𑀼𑀁 𑀇𑀘𑁆𑀙𑀣, 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑁂𑀦 𑀲𑀤𑁆𑀥𑀺𑀁 𑀫𑀬𑁆𑀳𑀁 𑀉𑀧𑀫𑀁 𑀫𑀸 𑀓𑀭𑀺𑀢𑁆𑀣 𑀧𑀼𑀢𑁆𑀢𑀓𑀸𑀢𑀺. 𑀅𑀣 𑀢𑁂 𑀢𑀸𑀧𑀲𑀸 ‘‘𑀲𑀘𑁂 𑀅𑀬𑀁 𑀇𑀢𑁆𑀢𑀭𑀲𑀢𑁆𑀢𑁄 𑀅𑀪𑀯𑀺𑀲𑁆𑀲, 𑀦 𑀅𑀫𑁆𑀳𑀸𑀓𑀁 𑀆𑀘𑀭𑀺𑀬𑁄 𑀏𑀯𑀭𑀽𑀧𑀁 𑀉𑀧𑀫𑀁 𑀆𑀳𑀭𑁂𑀬𑁆𑀬, 𑀬𑀸𑀯 𑀫𑀳𑀸 𑀯𑀢𑀸𑀬𑀁 𑀧𑀼𑀭𑀺𑀲𑁄’’𑀢𑀺 𑀲𑀩𑁆𑀩𑁂𑀯 𑀧𑀸𑀤𑁂𑀲𑀼 𑀦𑀺𑀧𑀢𑀺𑀢𑁆𑀯𑀸 𑀲𑀺𑀭𑀲𑀸 𑀯𑀦𑁆𑀤𑀺𑀁𑀲𑀼.

𑀅𑀣 𑀦𑁂 𑀆𑀘𑀭𑀺𑀬𑁄 𑀆𑀳 𑁋 ‘‘𑀢𑀸𑀢𑀸, 𑀅𑀫𑁆𑀳𑀸𑀓𑀁 𑀩𑀼𑀤𑁆𑀥𑀸𑀦𑀁 𑀅𑀦𑀼𑀘𑁆𑀙𑀯𑀺𑀓𑁄 𑀤𑁂𑀬𑁆𑀬𑀥𑀫𑁆𑀫𑁄 𑀦𑀢𑁆𑀣𑀺, 𑀲𑀢𑁆𑀣𑀸 𑀘 𑀪𑀺𑀓𑁆𑀔𑀸𑀘𑀸𑀭𑀯𑁂𑀮𑀸𑀬 𑀇𑀥𑀸𑀕𑀢𑁄, 𑀫𑀬𑀁 𑀬𑀣𑀸𑀩𑀮𑀁 𑀤𑁂𑀬𑁆𑀬𑀥𑀫𑁆𑀫𑀁 𑀤𑀲𑁆𑀲𑀸𑀫. 𑀢𑀼𑀫𑁆𑀳𑁂 𑀬𑀁 𑀬𑀁 𑀧𑀡𑀻𑀢𑀁 𑀨𑀮𑀸𑀨𑀮𑀁, 𑀢𑀁 𑀢𑀁 𑀆𑀳𑀭𑀣𑀸’’𑀢𑀺. 𑀆𑀳𑀭𑀸𑀧𑁂𑀢𑁆𑀯𑀸 𑀳𑀢𑁆𑀣𑁂 𑀥𑁄𑀯𑀺𑀢𑁆𑀯𑀸 𑀲𑀬𑀁 𑀢𑀣𑀸𑀕𑀢𑀲𑁆𑀲 𑀧𑀢𑁆𑀢𑁂 𑀧𑀢𑀺𑀝𑁆𑀞𑀸𑀧𑁂𑀲𑀺. 𑀲𑀢𑁆𑀣𑀸𑀭𑀸 𑀘 𑀨𑀮𑀸𑀨𑀮𑁂 𑀧𑀝𑀺𑀕𑁆𑀕𑀳𑀺𑀢𑀫𑀢𑁆𑀢𑁂 𑀤𑁂𑀯𑀢𑀸 𑀤𑀺𑀩𑁆𑀩𑁄𑀚𑀁 𑀧𑀓𑁆𑀔𑀺𑀧𑀺𑀁𑀲𑀼. 𑀢𑀸𑀧𑀲𑁄 𑀉𑀤𑀓𑀫𑁆𑀧𑀺 𑀲𑀬𑀫𑁂𑀯 𑀧𑀭𑀺𑀲𑁆𑀲𑀸𑀯𑁂𑀢𑁆𑀯𑀸 𑀅𑀤𑀸𑀲𑀺. 𑀢𑀢𑁄 𑀪𑀢𑁆𑀢𑀓𑀺𑀘𑁆𑀘𑀁 𑀦𑀺𑀝𑁆𑀞𑀸𑀧𑁂𑀢𑁆𑀯𑀸 𑀳𑀢𑁆𑀣𑀁 𑀥𑁄𑀯𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑁂 𑀲𑀢𑁆𑀣𑀭𑀺 𑀲𑀩𑁆𑀩𑁂 𑀅𑀦𑁆𑀢𑁂𑀯𑀸𑀲𑀺𑀓𑁂 𑀧𑀓𑁆𑀓𑁄𑀲𑀺𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀲𑀸𑀭𑀡𑀻𑀬𑀁 𑀓𑀣𑀁 𑀓𑀣𑁂𑀦𑁆𑀢𑁄 𑀦𑀺𑀲𑀻𑀤𑀺. 𑀲𑀢𑁆𑀣𑀸 ‘‘𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀆𑀕𑀘𑁆𑀙𑀦𑁆𑀢𑀽’’𑀢𑀺 𑀘𑀺𑀦𑁆𑀢𑁂𑀲𑀺. 𑀢𑁂 𑀲𑀢𑁆𑀣𑀼 𑀘𑀺𑀢𑁆𑀢𑀁 𑀜𑀢𑁆𑀯𑀸 𑀲𑀢𑀲𑀳𑀲𑁆𑀲𑀔𑀻𑀡𑀸𑀲𑀯𑀧𑀭𑀺𑀯𑀸𑀭𑀸 𑀆𑀕𑀦𑁆𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀁𑀲𑀼.

𑀢𑀢𑁄 𑀲𑀭𑀤𑀢𑀸𑀧𑀲𑁄 𑀅𑀦𑁆𑀢𑁂𑀯𑀸𑀲𑀺𑀓𑁂 𑀆𑀫𑀦𑁆𑀢𑁂𑀲𑀺 𑁋 ‘‘𑀢𑀸𑀢𑀸, 𑀩𑀼𑀤𑁆𑀥𑀸𑀦𑀁 𑀦𑀺𑀲𑀺𑀦𑁆𑀦𑀸𑀲𑀦𑀫𑁆𑀧𑀺 𑀦𑀻𑀘𑀁, 𑀲𑀫𑀡𑀲𑀢𑀲𑀳𑀲𑁆𑀲𑀸𑀦𑀫𑁆𑀧𑀺 𑀆𑀲𑀦𑀁 𑀦𑀢𑁆𑀣𑀺, 𑀢𑀼𑀫𑁆𑀳𑁂𑀳𑀺 𑀅𑀚𑁆𑀚 𑀉𑀴𑀸𑀭𑀁 𑀩𑀼𑀤𑁆𑀥𑀲𑀓𑁆𑀓𑀸𑀭𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺, 𑀧𑀩𑁆𑀩𑀢𑀧𑀸𑀤𑀢𑁄 𑀯𑀡𑁆𑀡𑀕𑀦𑁆𑀥𑀲𑀫𑁆𑀧𑀦𑁆𑀦𑀸𑀦𑀺 𑀧𑀼𑀧𑁆𑀨𑀸𑀦𑀺 𑀆𑀳𑀭𑀣𑀸’’𑀢𑀺. 𑀓𑀣𑀦𑀓𑀸𑀮𑁄 𑀧𑀧𑀜𑁆𑀘𑁄 𑀯𑀺𑀬 𑀳𑁄𑀢𑀺, 𑀇𑀤𑁆𑀥𑀺𑀫𑀦𑁆𑀢𑀸𑀦𑀁 𑀧𑀦 𑀯𑀺𑀲𑀬𑁄 𑀅𑀘𑀺𑀦𑁆𑀢𑁂𑀬𑁆𑀬𑁄𑀢𑀺 𑀫𑀼𑀳𑀼𑀢𑁆𑀢𑀫𑀢𑁆𑀢𑁂𑀦𑁂𑀯 𑀢𑁂 𑀢𑀸𑀧𑀲𑀸 𑀯𑀡𑁆𑀡𑀕𑀦𑁆𑀥𑀲𑀫𑁆𑀧𑀦𑁆𑀦𑀸𑀦𑀺 𑀧𑀼𑀧𑁆𑀨𑀸𑀦𑀺 𑀆𑀳𑀭𑀺𑀢𑁆𑀯𑀸 𑀩𑀼𑀤𑁆𑀥𑀸𑀦𑀁 𑀬𑁄𑀚𑀦𑀧𑁆𑀧𑀫𑀸𑀡𑀁 𑀧𑀼𑀧𑁆𑀨𑀸𑀲𑀦𑀁 𑀧𑀜𑁆𑀜𑀸𑀧𑁂𑀲𑀼𑀁, 𑀉𑀪𑀺𑀦𑁆𑀦𑀁 𑀅𑀕𑁆𑀕𑀲𑀸𑀯𑀓𑀸𑀦𑀁 𑀢𑀺𑀕𑀸𑀯𑀼𑀢𑀁, 𑀲𑁂𑀲𑀪𑀺𑀓𑁆𑀔𑀽𑀦𑀁 𑀅𑀟𑁆𑀠𑀬𑁄𑀚𑀦𑀺𑀓𑀸𑀤𑀺𑀪𑁂𑀤𑀁, 𑀲𑀗𑁆𑀖𑀦𑀯𑀓𑀲𑁆𑀲 𑀉𑀲𑀪𑀫𑀢𑁆𑀢𑀁 𑀅𑀳𑁄𑀲𑀺. 𑀏𑀯𑀁 𑀧𑀜𑁆𑀜𑀢𑁆𑀢𑁂𑀲𑀼 𑀆𑀲𑀦𑁂𑀲𑀼 𑀲𑀭𑀤𑀢𑀸𑀧𑀲𑁄 𑀢𑀣𑀸𑀕𑀢𑀲𑁆𑀲 𑀧𑀼𑀭𑀢𑁄 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸 𑀞𑀺𑀢𑁄, ‘‘𑀪𑀦𑁆𑀢𑁂, 𑀫𑀬𑁆𑀳𑀁 𑀤𑀻𑀖𑀭𑀢𑁆𑀢𑀁 𑀳𑀺𑀢𑀲𑀼𑀔𑀢𑁆𑀣𑀸𑀬 𑀇𑀫𑀁 𑀧𑀼𑀧𑁆𑀨𑀸𑀲𑀦𑀁 𑀅𑀪𑀺𑀭𑀼𑀳𑀣𑀸’’𑀢𑀺 𑀆𑀳.

‘‘𑀦𑀸𑀦𑀸𑀧𑀼𑀧𑁆𑀨𑀜𑁆𑀘 𑀕𑀦𑁆𑀥𑀜𑁆𑀘, 𑀲𑀫𑁆𑀧𑀸𑀤𑁂𑀢𑁆𑀯𑀸𑀦 𑀏𑀓𑀢𑁄;

𑀧𑀼𑀧𑁆𑀨𑀸𑀲𑀦𑀁 𑀧𑀜𑁆𑀜𑀸𑀧𑁂𑀢𑁆𑀯𑀸, 𑀇𑀤𑀁 𑀯𑀘𑀦𑀫𑀩𑁆𑀭𑀯𑀺𑀁.

‘‘𑀇𑀤𑀁 𑀢𑁂 𑀆𑀲𑀦𑀁 𑀯𑀻𑀭, 𑀧𑀜𑁆𑀜𑀢𑁆𑀢𑀁 𑀢𑀯𑀦𑀼𑀘𑁆𑀙𑀯𑀺𑀁;

𑀫𑀫 𑀘𑀺𑀢𑁆𑀢𑀁 𑀧𑀲𑀸𑀤𑁂𑀦𑁆𑀢𑁄, 𑀦𑀺𑀲𑀻𑀤 𑀧𑀼𑀧𑁆𑀨𑀫𑀸𑀲𑀦𑁂.

‘‘𑀲𑀢𑁆𑀢𑀭𑀢𑁆𑀢𑀺𑀤𑀺𑀯𑀁 𑀩𑀼𑀤𑁆𑀥𑁄, 𑀦𑀺𑀲𑀻𑀤𑀺 𑀧𑀼𑀧𑁆𑀨𑀫𑀸𑀲𑀦𑁂;

𑀫𑀫 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑁆𑀯𑀸, 𑀳𑀸𑀲𑀬𑀺𑀢𑁆𑀯𑀸 𑀲𑀤𑁂𑀯𑀓𑁂’’𑀢𑀺.

𑀏𑀯𑀁 𑀦𑀺𑀲𑀺𑀦𑁆𑀦𑁂 𑀲𑀢𑁆𑀣𑀭𑀺 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑀸 𑀘 𑀲𑁂𑀲𑀪𑀺𑀓𑁆𑀔𑀽 𑀘 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀧𑀢𑁆𑀢𑀸𑀲𑀦𑁂𑀲𑀼 𑀦𑀺𑀲𑀻𑀤𑀺𑀁𑀲𑀼. 𑀲𑀭𑀤𑀢𑀸𑀧𑀲𑁄 𑀫𑀳𑀦𑁆𑀢𑀁 𑀧𑀼𑀧𑁆𑀨𑀘𑁆𑀙𑀢𑁆𑀢𑀁 𑀕𑀳𑁂𑀢𑁆𑀯𑀸 𑀢𑀣𑀸𑀕𑀢𑀲𑁆𑀲 𑀫𑀢𑁆𑀣𑀓𑁂 𑀥𑀸𑀭𑀬𑀦𑁆𑀢𑁄 𑀅𑀝𑁆𑀞𑀸𑀲𑀺. 𑀲𑀢𑁆𑀣𑀸 ‘‘𑀚𑀝𑀺𑀮𑀸𑀦𑀁 𑀅𑀬𑀁 𑀲𑀓𑁆𑀓𑀸𑀭𑁄 𑀫𑀳𑀧𑁆𑀨𑀮𑁄 𑀳𑁄𑀢𑀽’’𑀢𑀺 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀺. 𑀲𑀢𑁆𑀣𑀼 𑀲𑀫𑀸𑀧𑀦𑁆𑀦𑀪𑀸𑀯𑀁 𑀜𑀢𑁆𑀯𑀸 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑀸𑀧𑀺 𑀲𑁂𑀲𑀪𑀺𑀓𑁆𑀔𑀽𑀧𑀺 𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀺𑀁𑀲𑀼. 𑀢𑀣𑀸𑀕𑀢𑁂 𑀲𑀢𑁆𑀢𑀸𑀳𑀁 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑁂 𑀅𑀦𑁆𑀢𑁂𑀯𑀸𑀲𑀺𑀓𑀸 𑀪𑀺𑀓𑁆𑀔𑀸𑀘𑀸𑀭𑀓𑀸𑀮𑁂 𑀲𑀫𑁆𑀧𑀢𑁆𑀢𑁂 𑀯𑀦𑀫𑀽𑀮𑀨𑀮𑀸𑀨𑀮𑀁 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀲𑁂𑀲𑀓𑀸𑀮𑁂 𑀩𑀼𑀤𑁆𑀥𑀸𑀦𑀁 𑀅𑀜𑁆𑀚𑀮𑀺𑀁 𑀧𑀕𑁆𑀕𑀬𑁆𑀳 𑀢𑀺𑀝𑁆𑀞𑀦𑁆𑀢𑀺. 𑀲𑀭𑀤𑀢𑀸𑀧𑀲𑁄 𑀧𑀦 𑀪𑀺𑀓𑁆𑀔𑀸𑀘𑀸𑀭𑀫𑁆𑀧𑀺 𑀅𑀕𑀦𑁆𑀢𑁆𑀯𑀸 𑀧𑀼𑀧𑁆𑀨𑀘𑁆𑀙𑀢𑁆𑀢𑀁 𑀕𑀳𑀺𑀢𑀦𑀺𑀬𑀸𑀫𑁂𑀦𑁂𑀯 𑀲𑀢𑁆𑀢𑀸𑀳𑀁 𑀧𑀻𑀢𑀺𑀲𑀼𑀔𑁂𑀦 𑀯𑀻𑀢𑀺𑀦𑀸𑀫𑁂𑀲𑀺.

𑀲𑀢𑁆𑀣𑀸 𑀦𑀺𑀭𑁄𑀥𑀢𑁄 𑀯𑀼𑀝𑁆𑀞𑀸𑀬 𑀤𑀓𑁆𑀔𑀺𑀡𑀧𑀲𑁆𑀲𑁂 𑀦𑀺𑀲𑀺𑀦𑁆𑀦𑀁 𑀅𑀕𑁆𑀕𑀲𑀸𑀯𑀓𑀁 𑀦𑀺𑀲𑀪𑀢𑁆𑀣𑁂𑀭𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀦𑀺𑀲𑀪 𑀲𑀓𑁆𑀓𑀸𑀭𑀓𑀸𑀭𑀓𑀸𑀦𑀁 𑀢𑀸𑀧𑀲𑀸𑀦𑀁 𑀧𑀼𑀧𑁆𑀨𑀸𑀲𑀦𑀸𑀦𑀼𑀫𑁄𑀤𑀦𑀁 𑀓𑀭𑁄𑀳𑀻’’𑀢𑀺. 𑀣𑁂𑀭𑁄 𑀘𑀓𑁆𑀓𑀯𑀢𑁆𑀢𑀺𑀭𑀜𑁆𑀜𑁄 𑀲𑀦𑁆𑀢𑀺𑀓𑀸 𑀧𑀝𑀺𑀮𑀤𑁆𑀥𑀫𑀳𑀸𑀮𑀸𑀪𑁄 𑀫𑀳𑀸𑀬𑁄𑀥𑁄 𑀯𑀺𑀬 𑀢𑀼𑀝𑁆𑀞𑀫𑀸𑀦𑀲𑁄 𑀲𑀸𑀯𑀓𑀧𑀸𑀭𑀫𑀺𑀜𑀸𑀡𑁂 𑀞𑀢𑁆𑀯𑀸 𑀧𑀼𑀧𑁆𑀨𑀸𑀲𑀦𑀸𑀦𑀼𑀫𑁄𑀤𑀦𑀁 𑀆𑀭𑀪𑀺. 𑀢𑀲𑁆𑀲 𑀤𑁂𑀲𑀦𑀸𑀯𑀲𑀸𑀦𑁂 𑀤𑀼𑀢𑀺𑀬𑀲𑀸𑀯𑀓𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀢𑁆𑀯𑀫𑁆𑀧𑀺 𑀥𑀫𑁆𑀫𑀁 𑀤𑁂𑀲𑁂𑀳𑀻’’𑀢𑀺. 𑀅𑀦𑁄𑀫𑀢𑁆𑀣𑁂𑀭𑁄 𑀢𑁂𑀧𑀺𑀝𑀓𑀁 𑀩𑀼𑀤𑁆𑀥𑀯𑀘𑀦𑀁 𑀲𑀫𑁆𑀫𑀲𑀺𑀢𑁆𑀯𑀸 𑀥𑀫𑁆𑀫𑀁 𑀓𑀣𑁂𑀲𑀺. 𑀤𑁆𑀯𑀺𑀦𑁆𑀦𑀁 𑀲𑀸𑀯𑀓𑀸𑀦𑀁 𑀤𑁂𑀲𑀦𑀸𑀬 𑀏𑀓𑀲𑁆𑀲𑀧𑀺 𑀅𑀪𑀺𑀲𑀫𑀬𑁄 𑀦𑀸𑀳𑁄𑀲𑀺. 𑀅𑀣 𑀲𑀢𑁆𑀣𑀸 𑀅𑀧𑀭𑀺𑀫𑀸𑀡𑁂 𑀩𑀼𑀤𑁆𑀥𑀯𑀺𑀲𑀬𑁂 𑀞𑀢𑁆𑀯𑀸 𑀥𑀫𑁆𑀫𑀤𑁂𑀲𑀦𑀁 𑀆𑀭𑀪𑀺. 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀞𑀧𑁂𑀢𑁆𑀯𑀸 𑀲𑀭𑀤𑀢𑀸𑀧𑀲𑀁 𑀲𑀩𑁆𑀩𑁂𑀧𑀺 𑀘𑀢𑀼𑀲𑀢𑁆𑀢𑀢𑀺𑀲𑀳𑀲𑁆𑀲𑀚𑀝𑀺𑀮𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀁𑀲𑀼. 𑀲𑀢𑁆𑀣𑀸 ‘‘𑀏𑀣 𑀪𑀺𑀓𑁆𑀔𑀯𑁄’’𑀢𑀺 𑀳𑀢𑁆𑀣𑀁 𑀧𑀲𑀸𑀭𑁂𑀲𑀺. 𑀢𑁂𑀲𑀁 𑀢𑀸𑀯𑀤𑁂𑀯 𑀓𑁂𑀲𑀫𑀲𑁆𑀲𑀼 𑀅𑀦𑁆𑀢𑀭𑀥𑀸𑀬𑀺, 𑀅𑀝𑁆𑀞 𑀧𑀭𑀺𑀓𑁆𑀔𑀸𑀭𑀸 𑀓𑀸𑀬𑁂 𑀧𑀝𑀺𑀫𑀼𑀓𑁆𑀓𑀸𑀯 𑀅𑀳𑁂𑀲𑀼𑀁.

𑀲𑀭𑀤𑀢𑀸𑀧𑀲𑁄 𑀓𑀲𑁆𑀫𑀸 𑀅𑀭𑀳𑀢𑁆𑀢𑀁 𑀦 𑀧𑀢𑁆𑀢𑁄𑀢𑀺? 𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑀢𑁆𑀢𑀸. 𑀢𑀲𑁆𑀲 𑀓𑀺𑀭 𑀩𑀼𑀤𑁆𑀥𑀸𑀦𑀁 𑀤𑀼𑀢𑀺𑀬𑀸𑀲𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀲𑀸𑀯𑀓𑀧𑀸𑀭𑀫𑀺𑀜𑀸𑀡𑁂 𑀞𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑀬𑀢𑁄 𑀅𑀕𑁆𑀕𑀲𑀸𑀯𑀓𑀲𑁆𑀲 𑀤𑁂𑀲𑀦𑀁 𑀲𑁄𑀢𑀼𑀁 𑀆𑀭𑀤𑁆𑀥𑀓𑀸𑀮𑀢𑁄 𑀧𑀝𑁆𑀞𑀸𑀬 ‘‘𑀅𑀳𑁄 𑀯𑀢𑀸𑀳𑀫𑁆𑀧𑀺 𑀅𑀦𑀸𑀕𑀢𑁂 𑀉𑀧𑁆𑀧𑀚𑁆𑀚𑀦𑀓𑀲𑁆𑀲 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑁂 𑀇𑀫𑀺𑀦𑀸𑀯 𑀲𑀸𑀯𑀓𑁂𑀦 𑀮𑀤𑁆𑀥𑀥𑀼𑀭𑀁 𑀮𑀪𑁂𑀬𑁆𑀬’’𑀦𑁆𑀢𑀺 𑀘𑀺𑀢𑁆𑀢𑀁 𑀉𑀤𑀧𑀸𑀤𑀺. 𑀲𑁄 𑀢𑁂𑀦 𑀧𑀭𑀺𑀯𑀺𑀢𑀓𑁆𑀓𑁂𑀦 𑀫𑀕𑁆𑀕𑀨𑀮𑀧𑀝𑀺𑀯𑁂𑀥𑀁 𑀓𑀸𑀢𑀼𑀁 𑀦𑀸𑀲𑀓𑁆𑀔𑀺. 𑀢𑀣𑀸𑀕𑀢𑀁 𑀧𑀦 𑀯𑀦𑁆𑀤𑀺𑀢𑁆𑀯𑀸 𑀲𑀫𑁆𑀫𑀼𑀔𑁂 𑀞𑀢𑁆𑀯𑀸 𑀆𑀳 𑁋 ‘‘𑀪𑀦𑁆𑀢𑁂, 𑀢𑀼𑀫𑁆𑀳𑀸𑀓𑀁 𑀅𑀦𑀦𑁆𑀢𑀭𑀸𑀲𑀦𑁂 𑀦𑀺𑀲𑀺𑀦𑁆𑀦𑁄 𑀪𑀺𑀓𑁆𑀔𑀼 𑀢𑀼𑀫𑁆𑀳𑀸𑀓𑀁 𑀲𑀸𑀲𑀦𑁂 𑀓𑁄 𑀦𑀸𑀫 𑀳𑁄𑀢𑀻’’𑀢𑀺? 𑀫𑀬𑀸 𑀧𑀯𑀢𑁆𑀢𑀺𑀢𑀁 𑀥𑀫𑁆𑀫𑀘𑀓𑁆𑀓𑀁 𑀅𑀦𑀼𑀧𑁆𑀧𑀯𑀢𑁆𑀢𑁂𑀢𑀸 𑀲𑀸𑀯𑀓𑀧𑀸𑀭𑀫𑀺𑀜𑀸𑀡𑀲𑁆𑀲 𑀓𑁄𑀝𑀺𑀧𑁆𑀧𑀢𑁆𑀢𑁄 𑀲𑁄𑀴𑀲 𑀧𑀜𑁆𑀜𑀸 𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸 𑀞𑀺𑀢𑁄 𑀫𑀬𑁆𑀳𑀁 𑀲𑀸𑀲𑀦𑁂 𑀅𑀕𑁆𑀕𑀲𑀸𑀯𑀓𑁄 𑀦𑀺𑀲𑀪𑀢𑁆𑀣𑁂𑀭𑁄 𑀦𑀸𑀫 𑀏𑀲𑁄𑀢𑀺. ‘‘𑀪𑀦𑁆𑀢𑁂, 𑀬𑁆𑀯𑀸𑀬𑀁 𑀫𑀬𑀸 𑀲𑀢𑁆𑀢𑀸𑀳𑀁 𑀧𑀼𑀧𑁆𑀨𑀘𑁆𑀙𑀢𑁆𑀢𑀁 𑀥𑀸𑀭𑁂𑀦𑁆𑀢𑁂𑀦 𑀲𑀓𑁆𑀓𑀸𑀭𑁄 𑀓𑀢𑁄, 𑀅𑀳𑀁 𑀇𑀫𑀲𑁆𑀲 𑀨𑀮𑁂𑀦 𑀅𑀜𑁆𑀜𑀁 𑀲𑀓𑁆𑀓𑀢𑁆𑀢𑀁 𑀯𑀸 𑀩𑁆𑀭𑀳𑁆𑀫𑀢𑁆𑀢𑀁 𑀯𑀸 𑀦 𑀧𑀢𑁆𑀣𑁂𑀫𑀺, 𑀅𑀦𑀸𑀕𑀢𑁂 𑀧𑀦 𑀅𑀬𑀁 𑀦𑀺𑀲𑀪𑀢𑁆𑀣𑁂𑀭𑁄 𑀯𑀺𑀬 𑀏𑀓𑀲𑁆𑀲 𑀩𑀼𑀤𑁆𑀥𑀲𑁆𑀲 𑀅𑀕𑁆𑀕𑀲𑀸𑀯𑀓𑁄 𑀪𑀯𑁂𑀬𑁆𑀬’’𑀦𑁆𑀢𑀺 𑀧𑀢𑁆𑀣𑀦𑀁 𑀅𑀓𑀸𑀲𑀺.

𑀲𑀢𑁆𑀣𑀸 ‘‘𑀲𑀫𑀺𑀚𑁆𑀛𑀺𑀲𑁆𑀲𑀢𑀺 𑀦𑀼 𑀔𑁄 𑀇𑀫𑀲𑁆𑀲 𑀧𑀼𑀭𑀺𑀲𑀲𑁆𑀲 𑀧𑀢𑁆𑀣𑀦𑀸’’𑀢𑀺 𑀅𑀦𑀸𑀕𑀢𑀁𑀲𑀜𑀸𑀡𑀁 𑀧𑁂𑀲𑁂𑀢𑁆𑀯𑀸 𑀑𑀮𑁄𑀓𑁂𑀦𑁆𑀢𑁄 𑀓𑀧𑁆𑀧𑀲𑀢𑀲𑀳𑀲𑁆𑀲𑀸𑀥𑀺𑀓𑀁 𑀅𑀲𑀗𑁆𑀔𑁆𑀬𑁂𑀬𑁆𑀬𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀲𑀫𑀺𑀚𑁆𑀛𑀦𑀪𑀸𑀯𑀁 𑀅𑀤𑁆𑀤𑀲. 𑀤𑀺𑀲𑁆𑀯𑀸 𑀲𑀭𑀤𑀢𑀸𑀧𑀲𑀁 𑀆𑀳 𑁋 ‘‘𑀦 𑀢𑁂 𑀅𑀬𑀁 𑀧𑀢𑁆𑀣𑀦𑀸 𑀫𑁄𑀖𑀸 𑀪𑀯𑀺𑀲𑁆𑀲𑀢𑀺, 𑀅𑀦𑀸𑀕𑀢𑁂 𑀧𑀦 𑀓𑀧𑁆𑀧𑀲𑀢𑀲𑀳𑀲𑁆𑀲𑀸𑀥𑀺𑀓𑀁 𑀅𑀲𑀗𑁆𑀔𑁆𑀬𑁂𑀬𑁆𑀬𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀕𑁄𑀢𑀫𑁄 𑀦𑀸𑀫 𑀩𑀼𑀤𑁆𑀥𑁄 𑀮𑁄𑀓𑁂 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺. 𑀢𑀲𑁆𑀲 𑀫𑀸𑀢𑀸 𑀫𑀳𑀸𑀫𑀸𑀬𑀸 𑀦𑀸𑀫 𑀤𑁂𑀯𑀻 𑀪𑀯𑀺𑀲𑁆𑀲𑀢𑀺, 𑀧𑀺𑀢𑀸 𑀲𑀼𑀤𑁆𑀥𑁄𑀤𑀦𑁄 𑀦𑀸𑀫 𑀭𑀸𑀚𑀸, 𑀧𑀼𑀢𑁆𑀢𑁄 𑀭𑀸𑀳𑀼𑀮𑁄 𑀦𑀸𑀫, 𑀉𑀧𑀝𑁆𑀞𑀸𑀓𑁄 𑀆𑀦𑀦𑁆𑀤𑁄 𑀦𑀸𑀫, 𑀤𑀼𑀢𑀺𑀬𑀲𑀸𑀯𑀓𑁄 𑀫𑁄𑀕𑁆𑀕𑀮𑁆𑀮𑀸𑀦𑁄 𑀦𑀸𑀫, 𑀢𑁆𑀯𑀁 𑀧𑀦 𑀢𑀲𑁆𑀲 𑀅𑀕𑁆𑀕𑀲𑀸𑀯𑀓𑁄 𑀥𑀫𑁆𑀫𑀲𑁂𑀦𑀸𑀧𑀢𑀺 𑀲𑀸𑀭𑀺𑀧𑀼𑀢𑁆𑀢𑁄 𑀦𑀸𑀫 𑀪𑀯𑀺𑀲𑁆𑀲𑀲𑀻’’𑀢𑀺. 𑀏𑀯𑀁 𑀢𑀸𑀧𑀲𑀁 𑀩𑁆𑀬𑀸𑀓𑀭𑀺𑀢𑁆𑀯𑀸 𑀥𑀫𑁆𑀫𑀓𑀣𑀁 𑀓𑀣𑁂𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀸𑀭𑁄 𑀆𑀓𑀸𑀲𑀁 𑀧𑀓𑁆𑀔𑀦𑁆𑀤𑀺.

𑀲𑀭𑀤𑀢𑀸𑀧𑀲𑁄𑀧𑀺 𑀅𑀦𑁆𑀢𑁂𑀯𑀸𑀲𑀺𑀓𑀢𑁆𑀣𑁂𑀭𑀸𑀦𑀁 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀲𑀳𑀸𑀬𑀓𑀲𑁆𑀲 𑀲𑀺𑀭𑀺𑀯𑀟𑁆𑀠𑀦𑀓𑀼𑀝𑀼𑀫𑁆𑀩𑀺𑀓𑀲𑁆𑀲 𑀲𑀸𑀲𑀦𑀁 𑀧𑁂𑀲𑁂𑀲𑀺 𑁋 ‘‘𑀪𑀦𑁆𑀢𑁂, 𑀫𑀫 𑀲𑀳𑀸𑀬𑀓𑀲𑁆𑀲 𑀯𑀤𑁂𑀣 ‘𑀲𑀳𑀸𑀬𑀓𑁂𑀦 𑀢𑁂 𑀲𑀭𑀤𑀢𑀸𑀧𑀲𑁂𑀦 𑀅𑀦𑁄𑀫𑀤𑀲𑁆𑀲𑀺𑀩𑀼𑀤𑁆𑀥𑀲𑁆𑀲 𑀧𑀸𑀤𑀫𑀽𑀮𑁂 𑀅𑀦𑀸𑀕𑀢𑁂 𑀉𑀧𑁆𑀧𑀚𑁆𑀚𑀦𑀓𑀲𑁆𑀲 𑀕𑁄𑀢𑀫𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑁂 𑀅𑀕𑁆𑀕𑀲𑀸𑀯𑀓𑀝𑁆𑀞𑀸𑀦𑀁 𑀧𑀢𑁆𑀣𑀺𑀢𑀁, 𑀢𑁆𑀯𑀁 𑀤𑀼𑀢𑀺𑀬𑀲𑀸𑀯𑀓𑀝𑁆𑀞𑀸𑀦𑀁 𑀧𑀢𑁆𑀣𑁂𑀳𑀻’’’𑀢𑀺. 𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 𑀣𑁂𑀭𑁂𑀳𑀺 𑀧𑀼𑀭𑁂𑀢𑀭𑀫𑁂𑀯 𑀏𑀓𑀧𑀲𑁆𑀲𑁂𑀦 𑀕𑀦𑁆𑀢𑁆𑀯𑀸 𑀲𑀺𑀭𑀺𑀯𑀟𑁆𑀠𑀲𑁆𑀲 𑀦𑀺𑀯𑁂𑀲𑀦𑀤𑁆𑀯𑀸𑀭𑁂 𑀅𑀝𑁆𑀞𑀸𑀲𑀺.

𑀲𑀺𑀭𑀺𑀯𑀟𑁆𑀠𑀦𑁄 ‘‘𑀘𑀺𑀭𑀲𑁆𑀲𑀁 𑀯𑀢 𑀫𑁂 𑀅𑀬𑁆𑀬𑁄 𑀆𑀕𑀢𑁄’’𑀢𑀺 𑀆𑀲𑀦𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀅𑀢𑁆𑀢𑀦𑀸 𑀦𑀻𑀘𑀸𑀲𑀦𑁂 𑀦𑀺𑀲𑀺𑀦𑁆𑀦𑁄 ‘‘𑀅𑀦𑁆𑀢𑁂𑀯𑀸𑀲𑀺𑀓𑀧𑀭𑀺𑀲𑀸 𑀧𑀦 𑀯𑁄, 𑀪𑀦𑁆𑀢𑁂, 𑀦 𑀧𑀜𑁆𑀜𑀸𑀬𑀢𑀻’’𑀢𑀺 𑀧𑀼𑀘𑁆𑀙𑀺. 𑀆𑀫 𑀲𑀫𑁆𑀫, 𑀅𑀫𑁆𑀳𑀸𑀓𑀁 𑀅𑀲𑁆𑀲𑀫𑀁 𑀅𑀦𑁄𑀫𑀤𑀲𑁆𑀲𑀻 𑀦𑀸𑀫 𑀩𑀼𑀤𑁆𑀥𑁄 𑀆𑀕𑀢𑁄, 𑀫𑀬𑀁 𑀢𑀲𑁆𑀲 𑀅𑀢𑁆𑀢𑀦𑁄 𑀩𑀮𑁂𑀦 𑀲𑀓𑁆𑀓𑀸𑀭𑀁 𑀅𑀓𑀭𑀺𑀫𑁆𑀳. 𑀲𑀢𑁆𑀣𑀸 𑀲𑀩𑁆𑀩𑁂𑀲𑀁 𑀥𑀫𑁆𑀫𑀁 𑀤𑁂𑀲𑁂𑀲𑀺, 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀞𑀧𑁂𑀢𑁆𑀯𑀸 𑀫𑀁 𑀲𑁂𑀲𑀸 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀧𑀩𑁆𑀩𑀚𑀺𑀁𑀲𑀽𑀢𑀺. 𑀢𑀼𑀫𑁆𑀳𑁂 𑀓𑀲𑁆𑀫𑀸 𑀦 𑀧𑀩𑁆𑀩𑀚𑀺𑀢𑀸𑀢𑀺? 𑀅𑀳𑀁 𑀲𑀢𑁆𑀣𑀼 𑀅𑀕𑁆𑀕𑀲𑀸𑀯𑀓𑀁 𑀦𑀺𑀲𑀪𑀢𑁆𑀣𑁂𑀭𑀁 𑀤𑀺𑀲𑁆𑀯𑀸 𑀅𑀦𑀸𑀕𑀢𑁂 𑀉𑀧𑁆𑀧𑀚𑁆𑀚𑀦𑀓𑀲𑁆𑀲 𑀕𑁄𑀢𑀫𑀲𑁆𑀲 𑀦𑀸𑀫 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑁂 𑀅𑀕𑁆𑀕𑀲𑀸𑀯𑀓𑀝𑁆𑀞𑀸𑀦𑀁 𑀧𑀢𑁆𑀣𑁂𑀲𑀺𑀁, 𑀢𑁆𑀯𑀫𑁆𑀧𑀺 𑀢𑀲𑁆𑀲 𑀲𑀸𑀲𑀦𑁂 𑀤𑀼𑀢𑀺𑀬𑀲𑀸𑀯𑀓𑀝𑁆𑀞𑀸𑀦𑀁 𑀧𑀢𑁆𑀣𑁂𑀳𑀻𑀢𑀺. 𑀫𑀬𑁆𑀳𑀁 𑀩𑀼𑀤𑁆𑀥𑁂𑀳𑀺 𑀲𑀤𑁆𑀥𑀺𑀁 𑀧𑀭𑀺𑀘𑀬𑁄 𑀦𑀢𑁆𑀣𑀺, 𑀪𑀦𑁆𑀢𑁂𑀢𑀺. 𑀩𑀼𑀤𑁆𑀥𑁂𑀳𑀺 𑀲𑀤𑁆𑀥𑀺𑀁 𑀓𑀣𑀦𑀁 𑀫𑀬𑁆𑀳𑀁 𑀪𑀸𑀭𑁄 𑀳𑁄𑀢𑀼, 𑀢𑁆𑀯𑀁 𑀫𑀳𑀦𑁆𑀢𑀁 𑀅𑀥𑀺𑀓𑀸𑀭𑀁 𑀲𑀚𑁆𑀚𑁂𑀳𑀻𑀢𑀺.

𑀲𑀺𑀭𑀺𑀯𑀟𑁆𑀠𑀦𑁄 𑀲𑀭𑀤𑀢𑀸𑀧𑀲𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀅𑀢𑁆𑀢𑀦𑁄 𑀦𑀺𑀯𑁂𑀲𑀦𑀤𑁆𑀯𑀸𑀭𑁂 𑀭𑀸𑀚𑀫𑀸𑀦𑁂𑀦 𑀅𑀝𑁆𑀞𑀓𑀭𑀻𑀲𑀫𑀢𑁆𑀢𑀁 𑀞𑀸𑀦𑀁 𑀲𑀫𑀢𑀮𑀁 𑀓𑀸𑀭𑁂𑀢𑁆𑀯𑀸 𑀯𑀸𑀮𑀼𑀓𑀁 𑀑𑀓𑀺𑀭𑀸𑀧𑁂𑀢𑁆𑀯𑀸 𑀮𑀸𑀚𑀧𑀜𑁆𑀘𑀫𑀸𑀦𑀺 𑀧𑀼𑀧𑁆𑀨𑀸𑀦𑀺 𑀯𑀺𑀓𑀺𑀭𑀺𑀢𑁆𑀯𑀸 𑀦𑀻𑀮𑀼𑀧𑁆𑀧𑀮𑀘𑁆𑀙𑀤𑀦𑀁 𑀫𑀡𑁆𑀟𑀧𑀁 𑀓𑀸𑀭𑁂𑀢𑁆𑀯𑀸 𑀩𑀼𑀤𑁆𑀥𑀸𑀲𑀦𑀁 𑀧𑀜𑁆𑀜𑀸𑀧𑁂𑀢𑁆𑀯𑀸 𑀲𑁂𑀲𑀪𑀺𑀓𑁆𑀔𑀽𑀦𑀫𑁆𑀧𑀺 𑀆𑀲𑀦𑀸𑀦𑀺 𑀧𑀝𑀺𑀬𑀸𑀤𑀸𑀧𑁂𑀢𑁆𑀯𑀸 𑀫𑀳𑀦𑁆𑀢𑀁 𑀲𑀓𑁆𑀓𑀸𑀭𑀲𑀫𑁆𑀫𑀸𑀦𑀁 𑀲𑀚𑁆𑀚𑁂𑀢𑁆𑀯𑀸 𑀩𑀼𑀤𑁆𑀥𑀸𑀦𑀁 𑀦𑀺𑀫𑀦𑁆𑀢𑀦𑀢𑁆𑀣𑀸𑀬 𑀲𑀭𑀤𑀢𑀸𑀧𑀲𑀲𑁆𑀲 𑀲𑀜𑁆𑀜𑀁 𑀅𑀤𑀸𑀲𑀺. 𑀢𑀸𑀧𑀲𑁄 𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀩𑀼𑀤𑁆𑀥𑀧𑁆𑀧𑀫𑀼𑀔𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀕𑀳𑁂𑀢𑁆𑀯𑀸 𑀢𑀲𑁆𑀲 𑀦𑀺𑀯𑁂𑀲𑀦𑀁 𑀅𑀕𑀫𑀸𑀲𑀺. 𑀲𑀺𑀭𑀺𑀯𑀟𑁆𑀠𑀦𑁄 𑀧𑀘𑁆𑀘𑀼𑀕𑁆𑀕𑀫𑀦𑀁 𑀓𑀢𑁆𑀯𑀸 𑀢𑀣𑀸𑀕𑀢𑀲𑁆𑀲 𑀳𑀢𑁆𑀣𑀢𑁄 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀫𑀡𑁆𑀟𑀧𑀁 𑀧𑀯𑁂𑀲𑁂𑀢𑁆𑀯𑀸 𑀧𑀜𑁆𑀜𑀢𑁆𑀢𑀸𑀲𑀦𑁂𑀲𑀼 𑀦𑀺𑀲𑀺𑀦𑁆𑀦𑀲𑁆𑀲 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀤𑀓𑁆𑀔𑀺𑀡𑁄𑀤𑀓𑀁 𑀤𑀢𑁆𑀯𑀸 𑀧𑀡𑀻𑀢𑁂𑀦 𑀪𑁄𑀚𑀦𑁂𑀦 𑀧𑀭𑀺𑀯𑀺𑀲𑀺𑀢𑁆𑀯𑀸 𑀪𑀢𑁆𑀢𑀓𑀺𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀩𑀼𑀤𑁆𑀥𑀧𑁆𑀧𑀫𑀼𑀔𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀫𑀳𑀸𑀭𑀳𑁂𑀳𑀺 𑀯𑀢𑁆𑀣𑁂𑀳𑀺 𑀅𑀘𑁆𑀙𑀸𑀤𑁂𑀢𑁆𑀯𑀸, ‘‘𑀪𑀦𑁆𑀢𑁂, 𑀦𑀸𑀬𑀁 𑀆𑀭𑀫𑁆𑀪𑁄 𑀅𑀧𑁆𑀧𑀫𑀢𑁆𑀢𑀓𑀝𑁆𑀞𑀸𑀦𑀢𑁆𑀣𑀸𑀬, 𑀇𑀫𑀺𑀦𑀸𑀯 𑀦𑀺𑀬𑀸𑀫𑁂𑀦 𑀲𑀢𑁆𑀢𑀸𑀳𑀁 𑀅𑀦𑀼𑀓𑀫𑁆𑀧𑀁 𑀓𑀭𑁄𑀣𑀸’’𑀢𑀺 𑀆𑀳. 𑀲𑀢𑁆𑀣𑀸 𑀅𑀥𑀺𑀯𑀸𑀲𑁂𑀲𑀺. 𑀲𑁄 𑀢𑁂𑀦𑁂𑀯 𑀦𑀺𑀬𑀸𑀫𑁂𑀦 𑀲𑀢𑁆𑀢𑀸𑀳𑀁 𑀫𑀳𑀸𑀤𑀸𑀦𑀁 𑀧𑀯𑀢𑁆𑀢𑁂𑀢𑁆𑀯𑀸 𑀪𑀕𑀯𑀦𑁆𑀢𑀁 𑀯𑀦𑁆𑀤𑀺𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸 𑀞𑀺𑀢𑁄 𑀆𑀳 𑁋 ‘‘𑀪𑀦𑁆𑀢𑁂, 𑀫𑀫 𑀲𑀳𑀸𑀬𑁄 𑀲𑀭𑀤𑀢𑀸𑀧𑀲𑁄 𑀬𑀲𑁆𑀲 𑀲𑀢𑁆𑀣𑀼 𑀅𑀕𑁆𑀕𑀲𑀸𑀯𑀓𑁄 𑀳𑁄𑀫𑀻𑀢𑀺 𑀧𑀢𑁆𑀣𑁂𑀲𑀺, 𑀅𑀳𑀫𑁆𑀧𑀺 𑀢𑀲𑁆𑀲𑁂𑀯 𑀤𑀼𑀢𑀺𑀬𑀲𑀸𑀯𑀓𑁄 𑀪𑀯𑀸𑀫𑀻’’𑀢𑀺.

𑀲𑀢𑁆𑀣𑀸 𑀅𑀦𑀸𑀕𑀢𑀁 𑀑𑀮𑁄𑀓𑁂𑀢𑁆𑀯𑀸 𑀢𑀲𑁆𑀲 𑀧𑀢𑁆𑀣𑀦𑀸𑀬 𑀲𑀫𑀺𑀚𑁆𑀛𑀦𑀪𑀸𑀯𑀁 𑀤𑀺𑀲𑁆𑀯𑀸 𑀩𑁆𑀬𑀸𑀓𑀸𑀲𑀺 𑁋 ‘‘𑀢𑁆𑀯𑀁 𑀇𑀢𑁄 𑀓𑀧𑁆𑀧𑀲𑀢𑀲𑀳𑀲𑁆𑀲𑀸𑀥𑀺𑀓𑀁 𑀅𑀲𑀗𑁆𑀔𑁆𑀬𑁂𑀬𑁆𑀬𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀕𑁄𑀢𑀫𑀩𑀼𑀤𑁆𑀥𑀲𑁆𑀲 𑀤𑀼𑀢𑀺𑀬𑀲𑀸𑀯𑀓𑁄 𑀪𑀯𑀺𑀲𑁆𑀲𑀲𑀻’’𑀢𑀺. 𑀩𑀼𑀤𑁆𑀥𑀸𑀦𑀁 𑀩𑁆𑀬𑀸𑀓𑀭𑀡𑀁 𑀲𑀼𑀢𑁆𑀯𑀸 𑀲𑀺𑀭𑀺𑀯𑀟𑁆𑀠𑀦𑁄 𑀳𑀝𑁆𑀞𑀧𑀳𑀝𑁆𑀞𑁄 𑀅𑀳𑁄𑀲𑀺. 𑀲𑀢𑁆𑀣𑀸𑀧𑀺 𑀪𑀢𑁆𑀢𑀸𑀦𑀼𑀫𑁄𑀤𑀦𑀁 𑀓𑀢𑁆𑀯𑀸 𑀲𑀧𑀭𑀺𑀯𑀸𑀭𑁄 𑀯𑀺𑀳𑀸𑀭𑀫𑁂𑀯 𑀕𑀢𑁄. 𑀲𑀺𑀭𑀺𑀯𑀟𑁆𑀠𑀦𑁄 𑀢𑀢𑁄 𑀧𑀝𑁆𑀞𑀸𑀬 𑀬𑀸𑀯𑀚𑀻𑀯𑀁 𑀓𑀮𑁆𑀬𑀸𑀡𑀓𑀫𑁆𑀫𑀁 𑀓𑀢𑁆𑀯𑀸 𑀤𑀼𑀢𑀺𑀬𑀢𑁆𑀢𑀯𑀸𑀭𑁂 𑀓𑀸𑀫𑀸𑀯𑀘𑀭𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑁄. 𑀲𑀭𑀤𑀢𑀸𑀧𑀲𑁄 𑀘𑀢𑁆𑀢𑀸𑀭𑁄 𑀩𑁆𑀭𑀳𑁆𑀫𑀯𑀺𑀳𑀸𑀭𑁂 𑀪𑀸𑀯𑁂𑀢𑁆𑀯𑀸 𑀩𑁆𑀭𑀳𑁆𑀫𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑁄.

𑀢𑀢𑁄 𑀧𑀝𑁆𑀞𑀸𑀬 𑀇𑀫𑁂𑀲𑀁 𑀉𑀪𑀺𑀦𑁆𑀦𑀫𑁆𑀧𑀺 𑀅𑀦𑁆𑀢𑀭𑀸𑀓𑀫𑁆𑀫𑀁 𑀦 𑀓𑀣𑀺𑀢𑀁. 𑀅𑀫𑁆𑀳𑀸𑀓𑀁 𑀧𑀦 𑀩𑀼𑀤𑁆𑀥𑀲𑁆𑀲 𑀦𑀺𑀩𑁆𑀩𑀢𑁆𑀢𑀺𑀢𑁄 𑀧𑀼𑀭𑁂𑀢𑀭𑀫𑁂𑀯 𑀲𑀭𑀤𑀢𑀸𑀧𑀲𑁄 𑀭𑀸𑀚𑀕𑀳𑀦𑀕𑀭𑀲𑁆𑀲 𑀅𑀯𑀺𑀤𑀽𑀭𑁂 𑀉𑀧𑀢𑀺𑀲𑁆𑀲𑀕𑀸𑀫𑁂 𑀲𑀸𑀭𑀺𑀩𑁆𑀭𑀸𑀳𑁆𑀫𑀡𑀺𑀬𑀸 𑀓𑀼𑀘𑁆𑀙𑀺𑀲𑁆𑀫𑀺𑀁 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺. 𑀢𑀁𑀤𑀺𑀯𑀲𑀫𑁂𑀯 𑀘𑀲𑁆𑀲 𑀲𑀳𑀸𑀬𑁄𑀧𑀺 𑀭𑀸𑀚𑀕𑀳𑀲𑁆𑀲𑁂𑀯 𑀅𑀯𑀺𑀤𑀽𑀭𑁂 𑀓𑁄𑀮𑀺𑀢𑀕𑀸𑀫𑁂 𑀫𑁄𑀕𑁆𑀕𑀮𑁆𑀮𑀺𑀩𑁆𑀭𑀸𑀳𑁆𑀫𑀡𑀺𑀬𑀸 𑀓𑀼𑀘𑁆𑀙𑀺𑀬𑀁 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺. 𑀢𑀸𑀦𑀺 𑀓𑀺𑀭 𑀤𑁆𑀯𑁂𑀧𑀺 𑀓𑀼𑀮𑀸𑀦𑀺 𑀬𑀸𑀯 𑀲𑀢𑁆𑀢𑀫𑀸 𑀓𑀼𑀮𑀧𑀭𑀺𑀯𑀝𑁆𑀝𑀸 𑀆𑀩𑀤𑁆𑀥𑀧𑀝𑀺𑀩𑀤𑁆𑀥𑀲𑀳𑀸𑀬𑀓𑀸𑀦𑁂𑀯. 𑀢𑁂𑀲𑀁 𑀤𑁆𑀯𑀺𑀦𑁆𑀦𑀫𑁆𑀧𑀺 𑀏𑀓𑀤𑀺𑀯𑀲𑀫𑁂𑀯 𑀕𑀩𑁆𑀪𑀧𑀭𑀺𑀳𑀸𑀭𑀁 𑀅𑀤𑀁𑀲𑀼. 𑀤𑀲𑀫𑀸𑀲𑀘𑁆𑀘𑀬𑁂𑀦 𑀚𑀸𑀢𑀸𑀦𑀫𑁆𑀧𑀺 𑀢𑁂𑀲𑀁 𑀙𑀲𑀝𑁆𑀞𑀺 𑀥𑀸𑀢𑀺𑀬𑁄 𑀉𑀧𑀝𑁆𑀞𑀳𑀺𑀁𑀲𑀼. 𑀦𑀸𑀫𑀕𑁆𑀕𑀳𑀡𑀤𑀺𑀯𑀲𑁂 𑀲𑀸𑀭𑀺𑀩𑁆𑀭𑀸𑀳𑁆𑀫𑀡𑀺𑀬𑀸 𑀧𑀼𑀢𑁆𑀢𑀲𑁆𑀲 𑀉𑀧𑀢𑀺𑀲𑁆𑀲𑀕𑀸𑀫𑁂 𑀚𑁂𑀝𑁆𑀞𑀓𑀼𑀮𑀲𑁆𑀲 𑀧𑀼𑀢𑁆𑀢𑀢𑁆𑀢𑀸 𑀉𑀧𑀢𑀺𑀲𑁆𑀲𑁄𑀢𑀺 𑀦𑀸𑀫𑀁 𑀅𑀓𑀁𑀲𑀼, 𑀇𑀢𑀭𑀲𑁆𑀲 𑀓𑁄𑀮𑀺𑀢𑀕𑀸𑀫𑁂 𑀚𑁂𑀝𑁆𑀞𑀓𑀼𑀮𑀲𑁆𑀲 𑀧𑀼𑀢𑁆𑀢𑀢𑁆𑀢𑀸 𑀓𑁄𑀮𑀺𑀢𑁄𑀢𑀺 𑀦𑀸𑀫𑀁 𑀅𑀓𑀁𑀲𑀼. 𑀢𑁂 𑀉𑀪𑁄𑀧𑀺 𑀯𑀼𑀤𑁆𑀥𑀺𑀫𑀦𑁆𑀯𑀸𑀬 𑀲𑀩𑁆𑀩𑀲𑀺𑀧𑁆𑀧𑀸𑀦𑀁 𑀧𑀸𑀭𑀁 𑀅𑀕𑀫𑀁𑀲𑀼.

𑀉𑀧𑀢𑀺𑀲𑁆𑀲𑀫𑀸𑀡𑀯𑀲𑁆𑀲 𑀓𑀻𑀴𑀦𑀢𑁆𑀣𑀸𑀬 𑀦𑀤𑀺𑀁 𑀯𑀸 𑀉𑀬𑁆𑀬𑀸𑀦𑀁 𑀯𑀸 𑀧𑀩𑁆𑀩𑀢𑀁 𑀯𑀸 𑀕𑀫𑀦𑀓𑀸𑀮𑁂 𑀧𑀜𑁆𑀘 𑀲𑀼𑀯𑀡𑁆𑀡𑀲𑀺𑀯𑀺𑀓𑀸𑀲𑀢𑀸𑀦𑀺 𑀧𑀭𑀺𑀯𑀸𑀭𑀸 𑀳𑁄𑀦𑁆𑀢𑀺, 𑀓𑁄𑀮𑀺𑀢𑀫𑀸𑀡𑀯𑀲𑁆𑀲 𑀧𑀜𑁆𑀘 𑀆𑀚𑀜𑁆𑀜𑀭𑀣𑀲𑀢𑀸𑀦𑀺. 𑀤𑁆𑀯𑁂𑀧𑀺 𑀚𑀦𑀸 𑀧𑀜𑁆𑀘𑀧𑀜𑁆𑀘𑀫𑀸𑀡𑀯𑀓𑀲𑀢𑀧𑀭𑀺𑀯𑀸𑀭𑀸 𑀳𑁄𑀦𑁆𑀢𑀺. 𑀭𑀸𑀚𑀕𑀳𑁂 𑀘 𑀅𑀦𑀼𑀲𑀁𑀯𑀘𑁆𑀙𑀭𑀁 𑀕𑀺𑀭𑀕𑁆𑀕𑀲𑀫𑀚𑁆𑀚𑀁 𑀦𑀸𑀫 𑀳𑁄𑀢𑀺, 𑀢𑁂𑀲𑀁 𑀤𑁆𑀯𑀺𑀦𑁆𑀦𑀫𑁆𑀧𑀺 𑀏𑀓𑀝𑁆𑀞𑀸𑀦𑁂𑀬𑁂𑀯 𑀫𑀜𑁆𑀘𑀁 𑀩𑀦𑁆𑀥𑀦𑁆𑀢𑀺. 𑀤𑁆𑀯𑁂𑀧𑀺 𑀚𑀦𑀸 𑀏𑀓𑀢𑁄𑀯 𑀦𑀺𑀲𑀻𑀤𑀺𑀢𑁆𑀯𑀸 𑀲𑀫𑀚𑁆𑀚𑀁 𑀧𑀲𑁆𑀲𑀦𑁆𑀢𑀸 𑀳𑀲𑀺𑀢𑀩𑁆𑀩𑀝𑁆𑀞𑀸𑀦𑁂 𑀳𑀲𑀦𑁆𑀢𑀺, 𑀲𑀁𑀯𑁂𑀕𑀝𑁆𑀞𑀸𑀦𑁂 𑀲𑀁𑀯𑀺𑀚𑁆𑀚𑀦𑁆𑀢𑀺, 𑀤𑀸𑀬𑀁 𑀤𑀸𑀢𑀼𑀁 𑀬𑀼𑀢𑁆𑀢𑀝𑁆𑀞𑀸𑀦𑁂 𑀤𑀸𑀬𑀁 𑀤𑁂𑀦𑁆𑀢𑀺. 𑀢𑁂𑀲𑀁 𑀇𑀫𑀺𑀦𑀸𑀯 𑀦𑀺𑀬𑀸𑀫𑁂𑀦 𑀏𑀓𑀤𑀺𑀯𑀲𑀁 𑀲𑀫𑀚𑁆𑀚𑀁 𑀧𑀲𑁆𑀲𑀦𑁆𑀢𑀸𑀦𑀁 𑀧𑀭𑀺𑀧𑀸𑀓𑀕𑀢𑀢𑁆𑀢𑀸 𑀜𑀸𑀡𑀲𑁆𑀲 𑀧𑀼𑀭𑀺𑀫𑀤𑀺𑀯𑀲𑁂𑀲𑀼 𑀯𑀺𑀬 𑀳𑀲𑀺𑀢𑀩𑁆𑀩𑀝𑁆𑀞𑀸𑀦𑁂 𑀳𑀸𑀲𑁄 𑀯𑀸 𑀲𑀁𑀯𑁂𑀕𑀝𑁆𑀞𑀸𑀦𑁂 𑀲𑀁𑀯𑁂𑀚𑀦𑀁 𑀯𑀸 𑀤𑀸𑀬𑀁 𑀤𑀸𑀢𑀼𑀁 𑀬𑀼𑀢𑁆𑀢𑀝𑁆𑀞𑀸𑀦𑁂 𑀤𑀸𑀬𑀤𑀸𑀦𑀁 𑀯𑀸 𑀦𑀸𑀳𑁄𑀲𑀺. 𑀤𑁆𑀯𑁂𑀧𑀺 𑀧𑀦 𑀚𑀦𑀸 𑀏𑀯𑀁 𑀘𑀺𑀦𑁆𑀢𑀬𑀺𑀁𑀲𑀼 𑁋 ‘‘𑀓𑀺𑀁 𑀏𑀢𑁆𑀣 𑀑𑀮𑁄𑀓𑁂𑀢𑀩𑁆𑀩𑀁 𑀅𑀢𑁆𑀣𑀺, 𑀲𑀩𑁆𑀩𑁂𑀧𑀺𑀫𑁂 𑀅𑀧𑁆𑀧𑀢𑁆𑀢𑁂 𑀯𑀲𑁆𑀲𑀲𑀢𑁂 𑀅𑀧𑀡𑁆𑀡𑀢𑁆𑀢𑀺𑀓𑀪𑀸𑀯𑀁 𑀕𑀫𑀺𑀲𑁆𑀲𑀦𑁆𑀢𑀺. 𑀅𑀫𑁆𑀳𑁂𑀳𑀺 𑀧𑀦 𑀏𑀓𑀁 𑀫𑁄𑀓𑁆𑀔𑀥𑀫𑁆𑀫𑀁 𑀕𑀯𑁂𑀲𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀆𑀭𑀫𑁆𑀫𑀡𑀁 𑀕𑀳𑁂𑀢𑁆𑀯𑀸 𑀦𑀺𑀲𑀻𑀤𑀺𑀁𑀲𑀼.

𑀢𑀢𑁄 𑀓𑁄𑀮𑀺𑀢𑁄 𑀉𑀧𑀢𑀺𑀲𑁆𑀲𑀁 𑀆𑀳 𑁋 ‘‘𑀲𑀫𑁆𑀫 𑀉𑀧𑀢𑀺𑀲𑁆𑀲, 𑀦 𑀢𑁆𑀯𑀁 𑀅𑀜𑁆𑀜𑀲𑀼 𑀤𑀺𑀯𑀲𑁂𑀲𑀼 𑀯𑀺𑀬 𑀳𑀝𑁆𑀞𑀧𑀳𑀝𑁆𑀞𑁄, 𑀅𑀦𑀢𑁆𑀢𑀫𑀦𑀥𑀸𑀢𑀼𑀓𑁄𑀲𑀺, 𑀓𑀺𑀁 𑀢𑁂 𑀲𑀮𑁆𑀮𑀓𑁆𑀔𑀺𑀢’’𑀦𑁆𑀢𑀺? 𑀲𑀫𑁆𑀫 𑀓𑁄𑀮𑀺𑀢, ‘‘𑀏𑀢𑁂𑀲𑀁 𑀑𑀮𑁄𑀓𑀦𑁂 𑀲𑀸𑀭𑁄 𑀦𑀢𑁆𑀣𑀺, 𑀦𑀺𑀭𑀢𑁆𑀣𑀓𑀫𑁂𑀢𑀁, 𑀅𑀢𑁆𑀢𑀦𑁄 𑀫𑁄𑀓𑁆𑀔𑀥𑀫𑁆𑀫𑀁 𑀕𑀯𑁂𑀲𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀇𑀤𑀁 𑀘𑀺𑀦𑁆𑀢𑀬𑀦𑁆𑀢𑁄 𑀦𑀺𑀲𑀺𑀦𑁆𑀦𑁄𑀫𑁆𑀳𑀻𑀢𑀺, 𑀢𑁆𑀯𑀁 𑀧𑀦 𑀓𑀲𑁆𑀫𑀸 𑀅𑀦𑀢𑁆𑀢𑀫𑀦𑁄𑀲𑀻𑀢𑀺? 𑀲𑁄𑀧𑀺 𑀢𑀣𑁂𑀯 𑀆𑀳. 𑀅𑀣𑀲𑁆𑀲 𑀅𑀢𑁆𑀢𑀦𑀸 𑀲𑀤𑁆𑀥𑀺𑀁 𑀏𑀓𑀚𑁆𑀛𑀸𑀲𑀬𑀢𑀁 𑀜𑀢𑁆𑀯𑀸 𑀉𑀧𑀢𑀺𑀲𑁆𑀲𑁄 𑀢𑀁 𑀏𑀯𑀫𑀸𑀳 𑁋 ‘‘𑀅𑀫𑁆𑀳𑀸𑀓𑀁 𑀉𑀪𑀺𑀦𑁆𑀦𑀫𑁆𑀧𑀺 𑀲𑀼𑀘𑀺𑀦𑁆𑀢𑀺𑀢𑀁, 𑀫𑁄𑀓𑁆𑀔𑀥𑀫𑁆𑀫𑀁 𑀕𑀯𑁂𑀲𑀦𑁆𑀢𑁂𑀳𑀺 𑀧𑀦 𑀏𑀓𑀸 𑀧𑀩𑁆𑀩𑀚𑁆𑀚𑀸 𑀮𑀤𑁆𑀥𑀼𑀁 𑀯𑀝𑁆𑀝𑀢𑀺, 𑀓𑀲𑁆𑀲 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀸𑀫𑀸’’𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀜𑁆𑀘𑀬𑁄 𑀧𑀭𑀺𑀩𑁆𑀩𑀸𑀚𑀓𑁄 𑀭𑀸𑀚𑀕𑀳𑁂 𑀧𑀝𑀺𑀯𑀲𑀢𑀺 𑀫𑀳𑀢𑀺𑀬𑀸 𑀧𑀭𑀺𑀩𑁆𑀩𑀸𑀚𑀓𑀧𑀭𑀺𑀲𑀸𑀬 𑀲𑀤𑁆𑀥𑀺𑀁. 𑀢𑁂 ‘‘𑀢𑀲𑁆𑀲 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀲𑁆𑀲𑀸𑀫𑀸’’𑀢𑀺 𑀧𑀜𑁆𑀘𑀳𑀺 𑀫𑀸𑀡𑀯𑀓𑀲𑀢𑁂𑀳𑀺 𑀲𑀤𑁆𑀥𑀺𑀁 𑀲𑀜𑁆𑀘𑀬𑀲𑁆𑀲 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀁𑀲𑀼. 𑀢𑁂𑀲𑀁 𑀧𑀩𑁆𑀩𑀚𑀺𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀲𑀜𑁆𑀘𑀬𑁄 𑀅𑀢𑀺𑀭𑁂𑀓𑀮𑀸𑀪𑀕𑁆𑀕𑀬𑀲𑀕𑁆𑀕𑀧𑁆𑀧𑀢𑁆𑀢𑁄 𑀅𑀳𑁄𑀲𑀺. 𑀢𑁂 𑀓𑀢𑀺𑀧𑀸𑀳𑁂𑀦𑁂𑀯 𑀲𑀩𑁆𑀩𑀁 𑀲𑀜𑁆𑀘𑀬𑀲𑁆𑀲 𑀲𑀫𑀬𑀁 𑀧𑀭𑀺𑀕𑁆𑀕𑀡𑁆𑀳𑀺𑀢𑁆𑀯𑀸, ‘‘𑀆𑀘𑀭𑀺𑀬, 𑀢𑀼𑀫𑁆𑀳𑀸𑀓𑀁 𑀚𑀸𑀦𑀦𑀲𑀫𑀬𑁄 𑀏𑀢𑁆𑀢𑀓𑁄𑀯, 𑀉𑀤𑀸𑀳𑀼 𑀉𑀢𑁆𑀢𑀭𑀺𑀧𑀺 𑀅𑀢𑁆𑀣𑀻’’𑀢𑀺 𑀧𑀼𑀘𑁆𑀙𑀺𑀁𑀲𑀼. 𑀲𑀜𑁆𑀘𑀬𑁄 ‘‘𑀏𑀢𑁆𑀢𑀓𑁄𑀯, 𑀲𑀩𑁆𑀩𑀁 𑀢𑀼𑀫𑁆𑀳𑁂𑀳𑀺 𑀜𑀸𑀢’’𑀦𑁆𑀢𑀺 𑀆𑀳. 𑀢𑁂 𑀢𑀲𑁆𑀲 𑀓𑀣𑀁 𑀲𑀼𑀢𑁆𑀯𑀸 𑀘𑀺𑀦𑁆𑀢𑀬𑀺𑀁𑀲𑀼 𑁋 ‘‘𑀏𑀯𑀁 𑀲𑀢𑀺 𑀇𑀫𑀲𑁆𑀲 𑀲𑀦𑁆𑀢𑀺𑀓𑁂 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄 𑀦𑀺𑀭𑀢𑁆𑀣𑀓𑁄, 𑀫𑀬𑀁 𑀫𑁄𑀓𑁆𑀔𑀥𑀫𑁆𑀫𑀁 𑀕𑀯𑁂𑀲𑀺𑀢𑀼𑀁 𑀦𑀺𑀓𑁆𑀔𑀦𑁆𑀢𑀸, 𑀲𑁄 𑀇𑀫𑀲𑁆𑀲 𑀲𑀦𑁆𑀢𑀺𑀓𑁂 𑀉𑀧𑁆𑀧𑀸𑀤𑁂𑀢𑀼𑀁 𑀦 𑀲𑀓𑁆𑀓𑀸. 𑀫𑀳𑀸 𑀔𑁄 𑀧𑀦 𑀚𑀫𑁆𑀩𑀼𑀤𑀻𑀧𑁄, 𑀕𑀸𑀫𑀦𑀺𑀕𑀫𑀭𑀸𑀚𑀥𑀸𑀦𑀺𑀬𑁄 𑀘𑀭𑀦𑁆𑀢𑀸 𑀫𑀬𑀁 𑀅𑀯𑀲𑁆𑀲𑀁 𑀫𑁄𑀓𑁆𑀔𑀥𑀫𑁆𑀫𑀤𑁂𑀲𑀓𑀁 𑀏𑀓𑀁 𑀆𑀘𑀭𑀺𑀬𑀁 𑀮𑀪𑀺𑀲𑁆𑀲𑀸𑀫𑀸’’𑀢𑀺. 𑀢𑁂 𑀢𑀢𑁄 𑀧𑀝𑁆𑀞𑀸𑀬 𑀬𑀢𑁆𑀣 𑀬𑀢𑁆𑀣 𑀧𑀡𑁆𑀟𑀺𑀢𑀸 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀅𑀢𑁆𑀣𑀻𑀢𑀺 𑀲𑀼𑀡𑀦𑁆𑀢𑀺, 𑀢𑀢𑁆𑀣 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀧𑀜𑁆𑀳𑀲𑀸𑀓𑀘𑁆𑀙𑀁 𑀓𑀭𑁄𑀦𑁆𑀢𑀺. 𑀢𑁂𑀳𑀺 𑀧𑀼𑀝𑁆𑀞𑀁 𑀧𑀜𑁆𑀳𑀁 𑀅𑀜𑁆𑀜𑁂 𑀓𑀣𑁂𑀢𑀼𑀁 𑀲𑀫𑀢𑁆𑀣𑀸 𑀦𑀢𑁆𑀣𑀺, 𑀢𑁂 𑀧𑀦 𑀢𑁂𑀲𑀁 𑀧𑀜𑁆𑀳𑀁 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑀺. 𑀏𑀯𑀁 𑀲𑀓𑀮𑀚𑀫𑁆𑀩𑀼𑀤𑀻𑀧𑀁 𑀧𑀭𑀺𑀕𑁆𑀕𑀡𑁆𑀳𑀺𑀢𑁆𑀯𑀸 𑀦𑀺𑀯𑀢𑁆𑀢𑀺𑀢𑁆𑀯𑀸 𑀲𑀓𑀝𑁆𑀞𑀸𑀦𑀫𑁂𑀯 𑀆𑀕𑀦𑁆𑀢𑁆𑀯𑀸, ‘‘𑀲𑀫𑁆𑀫 𑀓𑁄𑀮𑀺𑀢, 𑀬𑁄 𑀧𑀞𑀫𑀁 𑀅𑀫𑀢𑀁 𑀅𑀥𑀺𑀕𑀘𑁆𑀙𑀢𑀺, 𑀲𑁄 𑀆𑀭𑁄𑀘𑁂𑀢𑀽’’𑀢𑀺 𑀓𑀢𑀺𑀓𑀁 𑀅𑀓𑀁𑀲𑀼.

𑀢𑁂𑀦 𑀲𑀫𑀬𑁂𑀦 𑀅𑀫𑁆𑀳𑀸𑀓𑀁 𑀲𑀢𑁆𑀣𑀸 𑀧𑀞𑀫𑀸𑀪𑀺𑀲𑀫𑁆𑀩𑁄𑀥𑀺𑀁 𑀧𑀢𑁆𑀯𑀸 𑀧𑀯𑀢𑁆𑀢𑀺𑀢𑀯𑀭𑀥𑀫𑁆𑀫𑀘𑀓𑁆𑀓𑁄 𑀅𑀦𑀼𑀧𑀼𑀩𑁆𑀩𑁂𑀦 𑀭𑀸𑀚𑀕𑀳𑀁 𑀲𑀫𑁆𑀧𑀢𑁆𑀢𑁄 𑀳𑁄𑀢𑀺. 𑀅𑀣 ‘‘𑀏𑀓𑀲𑀝𑁆𑀞𑀺 𑀅𑀭𑀳𑀦𑁆𑀢𑁄 𑀮𑁄𑀓𑁂 𑀉𑀧𑁆𑀧𑀦𑁆𑀦𑀸 𑀳𑁄𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀓𑀸𑀮𑁂 ‘‘𑀘𑀭𑀣, 𑀪𑀺𑀓𑁆𑀔𑀯𑁂, 𑀘𑀸𑀭𑀺𑀓𑀁 𑀩𑀳𑀼𑀚𑀦𑀳𑀺𑀢𑀸𑀬𑀸’’𑀢𑀺 𑀭𑀢𑀦𑀢𑁆𑀢𑀬𑀕𑀼𑀡𑀧𑁆𑀧𑀓𑀸𑀲𑀦𑀢𑁆𑀣𑀁 𑀉𑀬𑁆𑀬𑁄𑀚𑀺𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀅𑀦𑁆𑀢𑀭𑁂 𑀧𑀜𑁆𑀘𑀯𑀕𑁆𑀕𑀺𑀬𑀩𑁆𑀪𑀦𑁆𑀢𑀭𑁄 𑀅𑀲𑁆𑀲𑀚𑀺𑀢𑁆𑀣𑁂𑀭𑁄 𑀧𑀝𑀺𑀦𑀺𑀯𑀢𑁆𑀢𑀺𑀢𑁆𑀯𑀸 𑀭𑀸𑀚𑀕𑀳𑀫𑁂𑀯 𑀆𑀕𑀢𑁄. 𑀧𑀼𑀦𑀤𑀺𑀯𑀲𑁂 𑀧𑀸𑀢𑁄𑀯 𑀧𑀢𑁆𑀢𑀘𑀻𑀯𑀭𑀁 𑀆𑀤𑀸𑀬 𑀭𑀸𑀚𑀕𑀳𑀁 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺.

𑀢𑀲𑁆𑀫𑀺𑀁 𑀲𑀫𑀬𑁂 𑀉𑀧𑀢𑀺𑀲𑁆𑀲𑀧𑀭𑀺𑀩𑁆𑀩𑀸𑀚𑀓𑁄 𑀧𑀸𑀢𑁄𑀯 𑀪𑀢𑁆𑀢𑀓𑀺𑀘𑁆𑀘𑀁 𑀓𑀢𑁆𑀯𑀸 𑀧𑀭𑀺𑀩𑁆𑀩𑀸𑀚𑀓𑀸𑀭𑀸𑀫𑀁 𑀕𑀘𑁆𑀙𑀦𑁆𑀢𑁄 𑀣𑁂𑀭𑀁 𑀤𑀺𑀲𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀫𑀬𑀸 𑀏𑀯𑀭𑀽𑀧𑁄 𑀧𑀩𑁆𑀩𑀚𑀺𑀢𑁄 𑀦𑀸𑀫 𑀦 𑀤𑀺𑀝𑁆𑀞𑀧𑀼𑀩𑁆𑀩𑁄. 𑀬𑁂 𑀯𑀢 𑀮𑁄𑀓𑁂 𑀅𑀭𑀳𑀦𑁆𑀢𑁄 𑀯𑀸 𑀅𑀭𑀳𑀢𑁆𑀢𑀫𑀕𑁆𑀕𑀁 𑀯𑀸 𑀲𑀫𑀸𑀧𑀦𑁆𑀦𑀸, 𑀅𑀬𑀁 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀅𑀜𑁆𑀜𑀢𑀭𑁄, 𑀬𑀁𑀦𑀽𑀦𑀸𑀳𑀁 𑀇𑀫𑀁 𑀪𑀺𑀓𑁆𑀔𑀼𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀳𑀁 𑀧𑀼𑀘𑁆𑀙𑁂𑀬𑁆𑀬𑀁 𑁋 ‘𑀓𑀁𑀲𑀺 𑀢𑁆𑀯𑀁, 𑀆𑀯𑀼𑀲𑁄 𑀉𑀤𑁆𑀤𑀺𑀲𑁆𑀲, 𑀧𑀩𑁆𑀩𑀚𑀺𑀢𑁄, 𑀓𑁄 𑀯𑀸 𑀢𑁂 𑀲𑀢𑁆𑀣𑀸, 𑀓𑀲𑁆𑀲 𑀯𑀸 𑀢𑁆𑀯𑀁 𑀥𑀫𑁆𑀫𑀁 𑀭𑁄𑀘𑁂𑀲𑀻’’’𑀢𑀺. 𑀅𑀣𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀅𑀓𑀸𑀮𑁄 𑀔𑁄 𑀇𑀫𑀁 𑀪𑀺𑀓𑁆𑀔𑀼𑀁 𑀧𑀜𑁆𑀳𑀁 𑀧𑀼𑀘𑁆𑀙𑀺𑀢𑀼𑀁, 𑀅𑀦𑁆𑀢𑀭𑀖𑀭𑀁 𑀧𑀯𑀺𑀝𑁆𑀞𑁄 𑀧𑀺𑀡𑁆𑀟𑀸𑀬 𑀘𑀭𑀢𑀺, 𑀬𑀁𑀦𑀽𑀦𑀸𑀳𑀁 𑀇𑀫𑀁 𑀪𑀺𑀓𑁆𑀔𑀼𑀁 𑀧𑀺𑀝𑁆𑀞𑀺𑀢𑁄 𑀧𑀺𑀝𑁆𑀞𑀺𑀢𑁄 𑀅𑀦𑀼𑀩𑀦𑁆𑀥𑁂𑀬𑁆𑀬𑀁 𑀅𑀢𑁆𑀣𑀺𑀓𑁂𑀳𑀺 𑀉𑀧𑀜𑁆𑀜𑀸𑀢𑀁 𑀫𑀕𑁆𑀕’’𑀦𑁆𑀢𑀺. 𑀲𑁄 𑀣𑁂𑀭𑀁 𑀮𑀤𑁆𑀥𑀧𑀺𑀡𑁆𑀟𑀧𑀸𑀢𑀁 𑀅𑀜𑁆𑀜𑀢𑀭𑀁 𑀑𑀓𑀸𑀲𑀁 𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 𑀦𑀺𑀲𑀻𑀤𑀺𑀢𑀼𑀓𑀸𑀫𑀢𑀜𑁆𑀘𑀲𑁆𑀲 𑀜𑀢𑁆𑀯𑀸 𑀅𑀢𑁆𑀢𑀦𑁄 𑀧𑀭𑀺𑀩𑁆𑀩𑀸𑀚𑀓𑀧𑀻𑀞𑀓𑀁 𑀧𑀜𑁆𑀜𑀸𑀧𑁂𑀢𑁆𑀯𑀸 𑀅𑀤𑀸𑀲𑀺. 𑀪𑀢𑁆𑀢𑀓𑀺𑀘𑁆𑀘𑀧𑀭𑀺𑀬𑁄𑀲𑀸𑀦𑁂𑀧𑀺𑀲𑁆𑀲 𑀅𑀢𑁆𑀢𑀦𑁄 𑀓𑀼𑀡𑁆𑀟𑀺𑀓𑀸𑀬 𑀉𑀤𑀓𑀁 𑀅𑀤𑀸𑀲𑀺.

𑀏𑀯𑀁 𑀆𑀘𑀭𑀺𑀬𑀯𑀢𑁆𑀢𑀁 𑀓𑀢𑁆𑀯𑀸 𑀓𑀢𑀪𑀢𑁆𑀢𑀓𑀺𑀘𑁆𑀘𑁂𑀦 𑀣𑁂𑀭𑁂𑀦 𑀲𑀤𑁆𑀥𑀺𑀁 𑀫𑀥𑀼𑀭𑀧𑀝𑀺𑀲𑀦𑁆𑀣𑀸𑀭𑀁 𑀓𑀢𑁆𑀯𑀸 ‘‘𑀯𑀺𑀧𑁆𑀧𑀲𑀦𑁆𑀦𑀸𑀦𑀺 𑀔𑁄 𑀢𑁂, 𑀆𑀯𑀼𑀲𑁄, 𑀇𑀦𑁆𑀤𑁆𑀭𑀺𑀬𑀸𑀦𑀺, 𑀧𑀭𑀺𑀲𑀼𑀤𑁆𑀥𑁄 𑀙𑀯𑀺𑀯𑀡𑁆𑀡𑁄 𑀧𑀭𑀺𑀬𑁄𑀤𑀸𑀢𑁄, 𑀓𑀁𑀲𑀺 𑀢𑁆𑀯𑀁, 𑀆𑀯𑀼𑀲𑁄 𑀉𑀤𑁆𑀤𑀺𑀲𑁆𑀲, 𑀧𑀩𑁆𑀩𑀚𑀺𑀢𑁄, 𑀓𑁄 𑀯𑀸 𑀢𑁂 𑀲𑀢𑁆𑀣𑀸, 𑀓𑀲𑁆𑀲 𑀯𑀸 𑀢𑁆𑀯𑀁 𑀥𑀫𑁆𑀫𑀁 𑀭𑁄𑀘𑁂𑀲𑀻’’𑀢𑀺 𑀧𑀼𑀘𑁆𑀙𑀺. 𑀣𑁂𑀭𑁄 ‘‘𑀅𑀢𑁆𑀣𑀸𑀯𑀼𑀲𑁄, 𑀫𑀳𑀸𑀲𑀫𑀡𑁄 𑀲𑀓𑁆𑀬𑀧𑀼𑀢𑁆𑀢𑁄 𑀲𑀓𑁆𑀬𑀓𑀼𑀮𑀸 𑀧𑀩𑁆𑀩𑀚𑀺𑀢𑁄, 𑀢𑀸𑀳𑀁 𑀪𑀕𑀯𑀦𑁆𑀢𑀁 𑀉𑀤𑁆𑀤𑀺𑀲𑁆𑀲 𑀧𑀩𑁆𑀩𑀚𑀺𑀢𑁄, 𑀲𑁄 𑀘 𑀫𑁂 𑀪𑀕𑀯𑀸 𑀲𑀢𑁆𑀣𑀸, 𑀢𑀲𑁆𑀲𑁂𑀯𑀸𑀳𑀁 𑀪𑀕𑀯𑀢𑁄 𑀥𑀫𑁆𑀫𑀁 𑀭𑁄𑀘𑁂𑀫𑀻’’𑀢𑀺 𑀆𑀳. 𑀅𑀣 𑀦𑀁 ‘‘𑀓𑀺𑀁𑀯𑀸𑀤𑀻 𑀧𑀦𑀸𑀬𑀲𑁆𑀫𑀢𑁄 𑀲𑀢𑁆𑀣𑀸, 𑀓𑀺𑀫𑀓𑁆𑀔𑀸𑀬𑀻’’𑀢𑀺 𑀧𑀼𑀘𑁆𑀙𑀺. 𑀣𑁂𑀭𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀇𑀫𑁂 𑀧𑀭𑀺𑀩𑁆𑀩𑀸𑀚𑀓𑀸 𑀦𑀸𑀫 𑀲𑀸𑀲𑀦𑀲𑁆𑀲 𑀧𑀝𑀺𑀧𑀓𑁆𑀔𑀪𑀽𑀢𑀸, 𑀇𑀫𑀲𑁆𑀲 𑀲𑀸𑀲𑀦𑀲𑁆𑀲 𑀕𑀫𑁆𑀪𑀻𑀭𑀢𑀁 𑀤𑀲𑁆𑀲𑁂𑀲𑁆𑀲𑀸𑀫𑀻’’𑀢𑀺. 𑀅𑀢𑁆𑀢𑀦𑁄 𑀦𑀯𑀓𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 𑁋 ‘‘𑀅𑀳𑀁 𑀔𑁄, 𑀆𑀯𑀼𑀲𑁄, 𑀦𑀯𑁄 𑀅𑀘𑀺𑀭𑀧𑀩𑁆𑀩𑀚𑀺𑀢𑁄, 𑀅𑀥𑀼𑀦𑀸𑀕𑀢𑁄 𑀇𑀫𑀁 𑀥𑀫𑁆𑀫𑀯𑀺𑀦𑀬𑀁, 𑀦 𑀢𑀸𑀯𑀸𑀳𑀁 𑀲𑀓𑁆𑀓𑁄𑀫𑀺 𑀯𑀺𑀢𑁆𑀣𑀸𑀭𑁂𑀦 𑀥𑀫𑁆𑀫𑀁 𑀤𑁂𑀲𑁂𑀢𑀼’’𑀦𑁆𑀢𑀺. 𑀧𑀭𑀺𑀩𑁆𑀩𑀸𑀚𑀓𑁄 ‘‘𑀅𑀳𑀁 𑀉𑀧𑀢𑀺𑀲𑁆𑀲𑁄 𑀦𑀸𑀫, 𑀢𑁆𑀯𑀁 𑀬𑀣𑀸𑀲𑀢𑁆𑀢𑀺𑀬𑀸 𑀅𑀧𑁆𑀧𑀁 𑀯𑀸 𑀩𑀳𑀼𑀁 𑀯𑀸 𑀯𑀤, 𑀏𑀢𑀁 𑀦𑀬𑀲𑀢𑁂𑀦 𑀦𑀬𑀲𑀳𑀲𑁆𑀲𑁂𑀦 𑀧𑀝𑀺𑀯𑀺𑀚𑁆𑀛𑀺𑀢𑀼𑀁 𑀫𑀬𑁆𑀳𑀁 𑀪𑀸𑀭𑁄’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀆𑀳 𑁋

‘‘𑀅𑀧𑁆𑀧𑀁 𑀯𑀸 𑀩𑀳𑀼𑀁 𑀯𑀸 𑀪𑀸𑀲𑀲𑁆𑀲𑀼, 𑀅𑀢𑁆𑀣𑀁𑀬𑁂𑀯 𑀫𑁂 𑀩𑁆𑀭𑀽𑀳𑀺;

𑀅𑀢𑁆𑀣𑁂𑀦𑁂𑀯 𑀫𑁂 𑀅𑀢𑁆𑀣𑁄, 𑀓𑀺𑀁 𑀓𑀸𑀳𑀲𑀺 𑀩𑁆𑀬𑀜𑁆𑀚𑀦𑀁 𑀩𑀳𑀼’’𑀦𑁆𑀢𑀺. (𑀫𑀳𑀸𑀯. 𑁬𑁦);

𑀏𑀯𑀁 𑀯𑀼𑀢𑁆𑀢𑁂 𑀣𑁂𑀭𑁄 ‘‘𑀬𑁂 𑀥𑀫𑁆𑀫𑀸 𑀳𑁂𑀢𑀼𑀧𑁆𑀧𑀪𑀯𑀸’’𑀢𑀺 (𑀫𑀳𑀸𑀯. 𑁬𑁦; 𑀅𑀧. 𑀣𑁂𑀭. 𑁧.𑁧.𑁨𑁮𑁬) 𑀕𑀸𑀣𑀁 𑀆𑀳. 𑀧𑀭𑀺𑀩𑁆𑀩𑀸𑀚𑀓𑁄 𑀧𑀞𑀫𑀧𑀤𑀤𑁆𑀯𑀬𑀫𑁂𑀯 𑀲𑀼𑀢𑁆𑀯𑀸 𑀲𑀳𑀲𑁆𑀲𑀦𑀬𑀲𑀫𑁆𑀧𑀦𑁆𑀦𑁂 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂 𑀧𑀢𑀺𑀝𑁆𑀞𑀳𑀺. 𑀇𑀢𑀭𑀁 𑀧𑀤𑀤𑁆𑀯𑀬𑀁 𑀲𑁄𑀢𑀸𑀧𑀦𑁆𑀦𑀓𑀸𑀮𑁂 𑀦𑀺𑀝𑁆𑀞𑀸𑀲𑀺.

𑀲𑁄 𑀲𑁄𑀢𑀸𑀧𑀦𑁆𑀦𑁄 𑀳𑀼𑀢𑁆𑀯𑀸 𑀉𑀧𑀭𑀺𑀯𑀺𑀲𑁂𑀲𑁂 𑀅𑀧𑁆𑀧𑀯𑀢𑁆𑀢𑀦𑁆𑀢𑁂 ‘‘𑀪𑀯𑀺𑀲𑁆𑀲𑀢𑀺 𑀏𑀢𑁆𑀣 𑀓𑀸𑀭𑀡’’𑀦𑁆𑀢𑀺 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀣𑁂𑀭𑀁 𑀆𑀳 𑁋 ‘‘𑀪𑀦𑁆𑀢𑁂, 𑀫𑀸 𑀉𑀧𑀭𑀺 𑀥𑀫𑁆𑀫𑀤𑁂𑀲𑀦𑀁 𑀯𑀟𑁆𑀠𑀬𑀺𑀢𑁆𑀣, 𑀏𑀢𑁆𑀢𑀓𑀫𑁂𑀯 𑀳𑁄𑀢𑀼, 𑀓𑀳𑀁 𑀅𑀫𑁆𑀳𑀸𑀓𑀁 𑀲𑀢𑁆𑀣𑀸 𑀯𑀲𑀢𑀻’’𑀢𑀺? 𑀯𑁂𑀴𑀼𑀯𑀦𑁂 𑀧𑀭𑀺𑀩𑁆𑀩𑀸𑀚𑀓𑀸𑀢𑀺. 𑀪𑀦𑁆𑀢𑁂, 𑀢𑀼𑀫𑁆𑀳𑁂 𑀧𑀼𑀭𑀢𑁄 𑀬𑀸𑀣, 𑀫𑀬𑁆𑀳𑀁 𑀏𑀓𑁄 𑀲𑀳𑀸𑀬𑀓𑁄 𑀅𑀢𑁆𑀣𑀺. 𑀅𑀫𑁆𑀳𑁂𑀳𑀺 𑀘 𑀅𑀜𑁆𑀜𑀫𑀜𑁆𑀜𑀁 𑀓𑀢𑀺𑀓𑀸 𑀓𑀢𑀸 ‘‘𑀬𑁄 𑀧𑀞𑀫𑀁 𑀅𑀫𑀢𑀁 𑀅𑀥𑀺𑀕𑀘𑁆𑀙𑀢𑀺, 𑀲𑁄 𑀆𑀭𑁄𑀘𑁂𑀢𑀽’’𑀢𑀺. 𑀅𑀳𑀁 𑀢𑀁 𑀧𑀝𑀺𑀜𑁆𑀜𑀁 𑀫𑁄𑀘𑁂𑀢𑁆𑀯𑀸 𑀲𑀳𑀸𑀬𑀓𑀁 𑀕𑀳𑁂𑀢𑁆𑀯𑀸 𑀢𑀼𑀫𑁆𑀳𑀸𑀓𑀁 𑀕𑀢𑀫𑀕𑁆𑀕𑁂𑀦𑁂𑀯 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀆𑀕𑀫𑀺𑀲𑁆𑀲𑀸𑀫𑀻𑀢𑀺 𑀧𑀜𑁆𑀘𑀧𑀢𑀺𑀝𑁆𑀞𑀺𑀢𑁂𑀦 𑀣𑁂𑀭𑀲𑁆𑀲 𑀧𑀸𑀤𑁂𑀲𑀼 𑀦𑀺𑀧𑀢𑀺𑀢𑁆𑀯𑀸 𑀢𑀺𑀓𑁆𑀔𑀢𑁆𑀢𑀼𑀁 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀣𑁂𑀭𑀁 𑀉𑀬𑁆𑀬𑁄𑀚𑁂𑀢𑁆𑀯𑀸 𑀧𑀭𑀺𑀩𑁆𑀩𑀸𑀚𑀓𑀸𑀭𑀸𑀫𑀸𑀪𑀺𑀫𑀼𑀔𑁄 𑀅𑀕𑀫𑀸𑀲𑀺.

𑀓𑁄𑀮𑀺𑀢𑀧𑀭𑀺𑀩𑁆𑀩𑀸𑀚𑀓𑁄 𑀢𑀁 𑀤𑀽𑀭𑀢𑁄𑀯 𑀆𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 ‘‘𑀅𑀚𑁆𑀚 𑀫𑀬𑁆𑀳𑀁 𑀲𑀳𑀸𑀬𑀓𑀲𑁆𑀲 𑀫𑀼𑀔𑀯𑀡𑁆𑀡𑁄 𑀦 𑀅𑀜𑁆𑀜𑁂𑀲𑀼 𑀤𑀺𑀯𑀲𑁂𑀲𑀼 𑀯𑀺𑀬, 𑀅𑀤𑁆𑀥𑀸 𑀢𑁂𑀦 𑀅𑀫𑀢𑀁 𑀅𑀥𑀺𑀕𑀢𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀅𑀫𑀢𑀸𑀥𑀺𑀕𑀫𑀁 𑀧𑀼𑀘𑁆𑀙𑀺. 𑀲𑁄𑀧𑀺𑀲𑁆𑀲 ‘‘𑀆𑀫 𑀆𑀯𑀼𑀲𑁄, 𑀅𑀫𑀢𑀁 𑀅𑀥𑀺𑀕𑀢’’𑀦𑁆𑀢𑀺 𑀧𑀝𑀺𑀚𑀸𑀦𑀺𑀢𑁆𑀯𑀸 𑀢𑀫𑁂𑀯 𑀕𑀸𑀣𑀁 𑀅𑀪𑀸𑀲𑀺. 𑀕𑀸𑀣𑀸𑀧𑀭𑀺𑀬𑁄𑀲𑀸𑀦𑁂 𑀓𑁄𑀮𑀺𑀢𑁄 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺𑀢𑁆𑀯𑀸 𑀆𑀳 𑁋 ‘‘𑀓𑀳𑀁 𑀓𑀺𑀭, 𑀲𑀫𑁆𑀫, 𑀲𑀢𑁆𑀣𑀸 𑀯𑀲𑀢𑀻’’𑀢𑀺? ‘‘𑀯𑁂𑀴𑀼𑀯𑀦𑁂 𑀓𑀺𑀭, 𑀲𑀫𑁆𑀫, 𑀯𑀲𑀢𑀻’’𑀢𑀺 𑀏𑀯𑀁 𑀦𑁄 𑀆𑀘𑀭𑀺𑀬𑁂𑀦 𑀅𑀲𑁆𑀲𑀚𑀺𑀢𑁆𑀣𑁂𑀭𑁂𑀦 𑀓𑀣𑀺𑀢𑀦𑁆𑀢𑀺. 𑀢𑁂𑀦 𑀳𑀺 𑀲𑀫𑁆𑀫 𑀆𑀬𑀸𑀫, 𑀲𑀢𑁆𑀣𑀸𑀭𑀁 𑀧𑀲𑁆𑀲𑀺𑀲𑁆𑀲𑀸𑀫𑀸𑀢𑀺. 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄 𑀘 𑀦𑀸𑀫𑁂𑀲 𑀲𑀤𑀸𑀧𑀺 𑀆𑀘𑀭𑀺𑀬𑀧𑀽𑀚𑀓𑁄𑀯, 𑀢𑀲𑁆𑀫𑀸 𑀲𑀳𑀸𑀬𑀁 𑀓𑁄𑀮𑀺𑀢𑀫𑀸𑀡𑀯𑀁 𑀏𑀯𑀫𑀸𑀳 𑁋 ‘‘𑀲𑀫𑁆𑀫, 𑀅𑀫𑁆𑀳𑁂𑀳𑀺 𑀅𑀥𑀺𑀕𑀢𑀁 𑀅𑀫𑀢𑀁 𑀅𑀫𑁆𑀳𑀸𑀓𑀁 𑀆𑀘𑀭𑀺𑀬𑀲𑁆𑀲 𑀲𑀜𑁆𑀘𑀬𑀧𑀭𑀺𑀩𑁆𑀩𑀸𑀚𑀓𑀲𑁆𑀲𑀸𑀧𑀺 𑀓𑀣𑁂𑀲𑁆𑀲𑀸𑀫. 𑀩𑀼𑀚𑁆𑀛𑀫𑀸𑀦𑁄 𑀧𑀝𑀺𑀯𑀺𑀚𑁆𑀛𑀺𑀲𑁆𑀲𑀢𑀺, 𑀅𑀧𑁆𑀧𑀝𑀺𑀯𑀺𑀚𑁆𑀛𑀦𑁆𑀢𑁄 𑀅𑀫𑁆𑀳𑀸𑀓𑀁 𑀲𑀤𑁆𑀤𑀳𑀺𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀫𑀺𑀲𑁆𑀲𑀢𑀺, 𑀩𑀼𑀤𑁆𑀥𑀸𑀦𑀁 𑀤𑁂𑀲𑀦𑀁 𑀲𑀼𑀢𑁆𑀯𑀸 𑀫𑀕𑁆𑀕𑀨𑀮𑀧𑀝𑀺𑀯𑁂𑀥𑀁 𑀓𑀭𑀺𑀲𑁆𑀲𑀢𑀻’’𑀢𑀺.

𑀢𑀢𑁄 𑀤𑁆𑀯𑁂𑀧𑀺 𑀚𑀦𑀸 𑀲𑀜𑁆𑀘𑀬𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸, ‘‘𑀆𑀘𑀭𑀺𑀬, 𑀢𑁆𑀯𑀁 𑀓𑀺𑀁 𑀓𑀭𑁄𑀲𑀺, 𑀩𑀼𑀤𑁆𑀥𑁄 𑀮𑁄𑀓𑁂 𑀉𑀧𑁆𑀧𑀦𑁆𑀦𑁄, 𑀲𑁆𑀯𑀸𑀓𑁆𑀔𑀸𑀢𑁄 𑀥𑀫𑁆𑀫𑁄, 𑀲𑀼𑀧𑁆𑀧𑀝𑀺𑀧𑀦𑁆𑀦𑁄 𑀲𑀗𑁆𑀖𑁄. 𑀆𑀬𑀸𑀫, 𑀤𑀲𑀩𑀮𑀁 𑀧𑀲𑁆𑀲𑀺𑀲𑁆𑀲𑀸𑀫𑀸’’𑀢𑀺. 𑀲𑁄 ‘‘𑀓𑀺𑀁 𑀯𑀤𑁂𑀣, 𑀢𑀸𑀢𑀸’’𑀢𑀺 𑀢𑁂𑀧𑀺 𑀯𑀸𑀭𑁂𑀢𑁆𑀯𑀸 𑀮𑀸𑀪𑀕𑁆𑀕𑀬𑀲𑀕𑁆𑀕𑀧𑁆𑀧𑀢𑁆𑀢𑀺𑀫𑁂𑀯 𑀢𑁂𑀲𑀁 𑀤𑀻𑀧𑁂𑀲𑀺. 𑀢𑁂 ‘‘𑀅𑀫𑁆𑀳𑀸𑀓𑀁 𑀏𑀯𑀭𑀽𑀧𑁄 𑀅𑀦𑁆𑀢𑁂𑀯𑀸𑀲𑀺𑀓𑀯𑀸𑀲𑁄 𑀦𑀺𑀘𑁆𑀘𑀫𑁂𑀯 𑀳𑁄𑀢𑀼, 𑀢𑀼𑀫𑁆𑀳𑀸𑀓𑀁 𑀧𑀦 𑀕𑀫𑀦𑀁 𑀯𑀸 𑀅𑀕𑀫𑀦𑀁 𑀯𑀸 𑀚𑀸𑀦𑀸𑀣𑀸’’𑀢𑀺 𑀆𑀳𑀁𑀲𑀼. 𑀲𑀜𑁆𑀘𑀬𑁄 ‘‘𑀇𑀫𑁂 𑀏𑀢𑁆𑀢𑀓𑀁 𑀚𑀸𑀦𑀦𑁆𑀢𑀸 𑀫𑀫 𑀯𑀘𑀦𑀁 𑀦 𑀓𑀭𑀺𑀲𑁆𑀲𑀦𑁆𑀢𑀻’’𑀢𑀺 𑀜𑀢𑁆𑀯𑀸 ‘‘𑀕𑀘𑁆𑀙𑀣 𑀢𑀼𑀫𑁆𑀳𑁂, 𑀢𑀸𑀢𑀸, 𑀅𑀳𑀁 𑀫𑀳𑀮𑁆𑀮𑀓𑀓𑀸𑀮𑁂 𑀅𑀦𑁆𑀢𑁂𑀯𑀸𑀲𑀺𑀓𑀯𑀸𑀲𑀁 𑀯𑀲𑀺𑀢𑀼𑀁 𑀦 𑀲𑀓𑁆𑀓𑁄𑀫𑀻’’𑀢𑀺 𑀆𑀳. 𑀢𑁂 𑀅𑀦𑁂𑀓𑁂𑀳𑀺𑀧𑀺 𑀓𑀸𑀭𑀡𑁂𑀳𑀺 𑀢𑀁 𑀩𑁄𑀥𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 𑀅𑀢𑁆𑀢𑀦𑁄 𑀑𑀯𑀸𑀤𑁂 𑀯𑀢𑁆𑀢𑀫𑀸𑀦𑀁 𑀚𑀦𑀁 𑀆𑀤𑀸𑀬 𑀯𑁂𑀴𑀼𑀯𑀦𑀁 𑀅𑀕𑀫𑀁𑀲𑀼. 𑀅𑀣 𑀢𑁂𑀲𑀁 𑀧𑀜𑁆𑀘𑀲𑀼 𑀅𑀦𑁆𑀢𑁂𑀯𑀸𑀲𑀺𑀓𑀲𑀢𑁂𑀲𑀼 𑀅𑀟𑁆𑀠𑀢𑁂𑀬𑁆𑀬𑀲𑀢𑀸 𑀦𑀺𑀯𑀢𑁆𑀢𑀺𑀁𑀲𑀼, 𑀅𑀟𑁆𑀠𑀢𑁂𑀬𑁆𑀬𑀲𑀢𑀸 𑀢𑁂𑀳𑀺 𑀲𑀤𑁆𑀥𑀺𑀁 𑀅𑀕𑀫𑀁𑀲𑀼.

𑀲𑀢𑁆𑀣𑀸 𑀘𑀢𑀼𑀧𑀭𑀺𑀲𑀫𑀚𑁆𑀛𑁂 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀢𑁂 𑀤𑀽𑀭𑀢𑁄𑀯 𑀤𑀺𑀲𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀏𑀢𑁂, 𑀪𑀺𑀓𑁆𑀔𑀯𑁂, 𑀤𑁆𑀯𑁂 𑀲𑀳𑀸𑀬𑀸 𑀆𑀕𑀘𑁆𑀙𑀦𑁆𑀢𑀺 𑀓𑁄𑀮𑀺𑀢𑁄 𑀘 𑀉𑀧𑀢𑀺𑀲𑁆𑀲𑁄 𑀘, 𑀏𑀢𑀁 𑀫𑁂 𑀲𑀸𑀯𑀓𑀬𑀼𑀕𑀁 𑀪𑀯𑀺𑀲𑁆𑀲𑀢𑀺 𑀅𑀕𑁆𑀕𑀁 𑀪𑀤𑁆𑀤𑀬𑀼𑀕’’𑀦𑁆𑀢𑀺. 𑀅𑀣 𑀢𑁂𑀲𑀁 𑀧𑀭𑀺𑀲𑀸𑀬 𑀘𑀭𑀺𑀬𑀯𑀲𑁂𑀦 𑀥𑀫𑁆𑀫𑀤𑁂𑀲𑀦𑀁 𑀯𑀟𑁆𑀠𑁂𑀲𑀺. 𑀞𑀧𑁂𑀢𑁆𑀯𑀸 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑁂 𑀲𑀩𑁆𑀩𑁂𑀧𑀺 𑀢𑁂 𑀅𑀟𑁆𑀠𑀢𑁂𑀬𑁆𑀬𑀲𑀢𑀸 𑀧𑀭𑀺𑀩𑁆𑀩𑀸𑀚𑀓𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀁𑀲𑀼. 𑀲𑀢𑁆𑀣𑀸 ‘‘𑀏𑀣 𑀪𑀺𑀓𑁆𑀔𑀯𑁄’’𑀢𑀺 𑀳𑀢𑁆𑀣𑀁 𑀧𑀲𑀸𑀭𑁂𑀲𑀺. 𑀲𑀩𑁆𑀩𑁂𑀲𑀁 𑀓𑁂𑀲𑀫𑀲𑁆𑀲𑀼 𑀅𑀦𑁆𑀢𑀭𑀥𑀸𑀬𑀺, 𑀇𑀤𑁆𑀥𑀺𑀫𑀬𑀁 𑀧𑀢𑁆𑀢𑀘𑀻𑀯𑀭𑀁 𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑀁 𑀅𑀳𑁄𑀲𑀺. 𑀤𑁆𑀯𑀺𑀦𑁆𑀦𑀁 𑀅𑀕𑁆𑀕𑀲𑀸𑀯𑀓𑀸𑀦𑀫𑁆𑀧𑀺 𑀇𑀤𑁆𑀥𑀺𑀫𑀬𑀧𑀢𑁆𑀢𑀘𑀻𑀯𑀭𑀁 𑀆𑀕𑀢𑀁, 𑀉𑀧𑀭𑀺𑀫𑀕𑁆𑀕𑀢𑁆𑀢𑀬𑀓𑀺𑀘𑁆𑀘𑀁 𑀧𑀦 𑀦 𑀦𑀺𑀝𑁆𑀞𑀸𑀲𑀺. 𑀓𑀲𑁆𑀫𑀸? 𑀲𑀸𑀯𑀓𑀧𑀸𑀭𑀫𑀺𑀜𑀸𑀡𑀲𑁆𑀲 𑀫𑀳𑀦𑁆𑀢𑀢𑀸𑀬.

𑀅𑀣𑀸𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀧𑀩𑁆𑀩𑀚𑀺𑀢𑀤𑀺𑀯𑀲𑀢𑁄 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀫𑀕𑀥𑀭𑀝𑁆𑀞𑁂 𑀓𑀮𑁆𑀮𑀯𑀸𑀮𑀕𑀸𑀫𑀓𑀁 𑀉𑀧𑀦𑀺𑀲𑁆𑀲𑀸𑀬 𑀲𑀫𑀡𑀥𑀫𑁆𑀫𑀁 𑀓𑀭𑁄𑀦𑁆𑀢𑁄 𑀣𑀺𑀦𑀫𑀺𑀤𑁆𑀥𑁂 𑀑𑀓𑁆𑀓𑀦𑁆𑀢𑁂 𑀲𑀢𑁆𑀣𑀸𑀭𑀸 𑀲𑀁𑀯𑁂𑀚𑀺𑀢𑁄 𑀣𑀺𑀦𑀫𑀺𑀤𑁆𑀥𑀁 𑀯𑀺𑀦𑁄𑀤𑁂𑀢𑁆𑀯𑀸 𑀢𑀣𑀸𑀕𑀢𑁂𑀦 𑀤𑀺𑀦𑁆𑀦𑀁 𑀥𑀸𑀢𑀼𑀓𑀫𑁆𑀫𑀝𑁆𑀞𑀸𑀦𑀁 𑀲𑀼𑀡𑀦𑁆𑀢𑁄𑀯 𑀉𑀧𑀭𑀺𑀫𑀕𑁆𑀕𑀢𑁆𑀢𑀬𑀓𑀺𑀘𑁆𑀘𑀁 𑀦𑀺𑀝𑁆𑀞𑀸𑀧𑁂𑀢𑁆𑀯𑀸 𑀲𑀸𑀯𑀓𑀧𑀸𑀭𑀫𑀺𑀜𑀸𑀡𑀲𑁆𑀲 𑀫𑀢𑁆𑀣𑀓𑀁 𑀧𑀢𑁆𑀢𑁄. 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄𑀧𑀺 𑀧𑀩𑁆𑀩𑀚𑀺𑀢𑀤𑀺𑀯𑀲𑀢𑁄 𑀅𑀤𑁆𑀥𑀫𑀸𑀲𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀲𑀢𑁆𑀣𑀸𑀭𑀸 𑀲𑀤𑁆𑀥𑀺𑀁 𑀢𑀫𑁂𑀯 𑀭𑀸𑀚𑀕𑀳𑀁 𑀉𑀧𑀦𑀺𑀲𑁆𑀲𑀸𑀬 𑀲𑀽𑀓𑀭𑀔𑀢𑀮𑁂𑀡𑁂 𑀯𑀺𑀳𑀭𑀦𑁆𑀢𑁄 𑀅𑀢𑁆𑀢𑀦𑁄 𑀪𑀸𑀕𑀺𑀦𑁂𑀬𑁆𑀬𑀲𑁆𑀲 𑀤𑀻𑀖𑀦𑀔𑀧𑀭𑀺𑀩𑁆𑀩𑀸𑀚𑀓𑀲𑁆𑀲 𑀯𑁂𑀤𑀦𑀸𑀧𑀭𑀺𑀕𑁆𑀕𑀳𑀲𑀼𑀢𑁆𑀢𑀦𑁆𑀢𑁂 (𑀫. 𑀦𑀺. 𑁨.𑁨𑁦𑁫-𑁨𑁦𑁬) 𑀤𑁂𑀲𑀺𑀬𑀫𑀸𑀦𑁂 𑀲𑀼𑀢𑁆𑀢𑀸𑀦𑀼𑀲𑀸𑀭𑁂𑀦 𑀜𑀸𑀡𑀁 𑀧𑁂𑀲𑁂𑀢𑁆𑀯𑀸 𑀧𑀭𑀲𑁆𑀲 𑀯𑀟𑁆𑀠𑀺𑀢𑀪𑀢𑁆𑀢𑀁 𑀪𑀼𑀜𑁆𑀚𑀦𑁆𑀢𑁄 𑀯𑀺𑀬 𑀲𑀸𑀯𑀓𑀧𑀸𑀭𑀫𑀺𑀜𑀸𑀡𑀲𑁆𑀲 𑀫𑀢𑁆𑀣𑀓𑀁 𑀧𑀢𑁆𑀢𑁄. 𑀪𑀸𑀕𑀺𑀦𑁂𑀬𑁆𑀬𑁄 𑀧𑀦𑀲𑁆𑀲 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀺𑀢𑁄. 𑀇𑀢𑀺 𑀤𑁆𑀯𑀺𑀦𑁆𑀦𑀫𑁆𑀧𑀺 𑀫𑀳𑀸𑀲𑀸𑀯𑀓𑀸𑀦𑀁 𑀢𑀣𑀸𑀕𑀢𑁂 𑀭𑀸𑀚𑀕𑀳𑁂 𑀯𑀺𑀳𑀭𑀦𑁆𑀢𑁂𑀬𑁂𑀯 𑀲𑀸𑀯𑀓𑀧𑀸𑀭𑀫𑀺𑀜𑀸𑀡𑀓𑀺𑀘𑁆𑀘𑀁 𑀫𑀢𑁆𑀣𑀓𑀁 𑀧𑀢𑁆𑀢𑀁. 𑀅𑀧𑀭𑀪𑀸𑀕𑁂 𑀧𑀦 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 ‘‘𑀫𑀳𑀸𑀧𑀜𑁆𑀜𑀸𑀦𑀁 𑀬𑀤𑀺𑀤𑀁 𑀲𑀸𑀭𑀺𑀧𑀼𑀢𑁆𑀢𑁄, 𑀇𑀤𑁆𑀥𑀺𑀫𑀦𑁆𑀢𑀸𑀦𑀁 𑀬𑀤𑀺𑀤𑀁 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄’’𑀢𑀺 𑀤𑁆𑀯𑁂𑀧𑀺 𑀫𑀳𑀸𑀲𑀸𑀯𑀓𑁂 𑀞𑀸𑀦𑀦𑁆𑀢𑀭𑁂 𑀞𑀧𑁂𑀲𑀻𑀢𑀺.

𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑀯𑀢𑁆𑀣𑀼

𑁧𑁯𑁧. 𑀘𑀢𑀼𑀢𑁆𑀣𑁂 𑀥𑀼𑀢𑀯𑀸𑀤𑀸𑀦𑀦𑁆𑀢𑀺 𑀏𑀢𑁆𑀣 𑀥𑀼𑀢𑁄 𑀯𑁂𑀤𑀺𑀢𑀩𑁆𑀩𑁄, 𑀥𑀼𑀢𑀯𑀸𑀤𑁄 𑀯𑁂𑀤𑀺𑀢𑀩𑁆𑀩𑁄, 𑀥𑀼𑀢𑀥𑀫𑁆𑀫𑀸 𑀯𑁂𑀤𑀺𑀢𑀩𑁆𑀩𑀸, 𑀥𑀼𑀢𑀗𑁆𑀕𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀢𑀢𑁆𑀣 𑀥𑀼𑀢𑁄𑀢𑀺 𑀥𑀼𑀢𑀓𑀺𑀮𑁂𑀲𑁄 𑀯𑀸 𑀧𑀼𑀕𑁆𑀕𑀮𑁄 𑀓𑀺𑀮𑁂𑀲𑀥𑀼𑀦𑀦𑁄 𑀯𑀸 𑀥𑀫𑁆𑀫𑁄.

𑀥𑀼𑀢𑀯𑀸𑀤𑁄𑀢𑀺 𑀏𑀢𑁆𑀣 𑀧𑀦 𑀅𑀢𑁆𑀣𑀺 𑀥𑀼𑀢𑁄 𑀦 𑀥𑀼𑀢𑀯𑀸𑀤𑁄, 𑀅𑀢𑁆𑀣𑀺 𑀦 𑀥𑀼𑀢𑁄 𑀥𑀼𑀢𑀯𑀸𑀤𑁄, 𑀅𑀢𑁆𑀣𑀺 𑀦𑁂𑀯 𑀥𑀼𑀢𑁄 𑀦 𑀥𑀼𑀢𑀯𑀸𑀤𑁄, 𑀅𑀢𑁆𑀣𑀺 𑀥𑀼𑀢𑁄 𑀘𑁂𑀯 𑀥𑀼𑀢𑀯𑀸𑀤𑁄 𑀘. 𑀢𑀢𑁆𑀣 𑀬𑁄 𑀥𑀼𑀢𑀗𑁆𑀕𑁂𑀦 𑀅𑀢𑁆𑀢𑀦𑁄 𑀓𑀺𑀮𑁂𑀲𑁂 𑀥𑀼𑀦𑀺, 𑀧𑀭𑀁 𑀧𑀦 𑀥𑀼𑀢𑀗𑁆𑀕𑁂𑀦 𑀦 𑀑𑀯𑀤𑀢𑀺 𑀦𑀸𑀦𑀼𑀲𑀸𑀲𑀢𑀺 𑀩𑀸𑀓𑀼𑀮𑀢𑁆𑀣𑁂𑀭𑁄 𑀯𑀺𑀬, 𑀅𑀬𑀁 𑀥𑀼𑀢𑁄 𑀦 𑀥𑀼𑀢𑀯𑀸𑀤𑁄. 𑀬𑀣𑀸𑀳 𑁋 ‘‘𑀢𑀬𑀺𑀤𑀁 𑀆𑀬𑀲𑁆𑀫𑀸 𑀩𑀸𑀓𑀼𑀮𑁄 𑀥𑀼𑀢𑁄 𑀦 𑀥𑀼𑀢𑀯𑀸𑀤𑁄’’𑀢𑀺. 𑀬𑁄 𑀧𑀦 𑀥𑀼𑀢𑀗𑁆𑀕𑁂𑀦 𑀅𑀢𑁆𑀢𑀦𑁄 𑀓𑀺𑀮𑁂𑀲𑁂 𑀦 𑀥𑀼𑀦𑀺, 𑀓𑁂𑀯𑀮𑀁 𑀅𑀜𑁆𑀜𑁂 𑀥𑀼𑀢𑀗𑁆𑀕𑁂𑀦 𑀑𑀯𑀤𑀢𑀺 𑀅𑀦𑀼𑀲𑀸𑀲𑀢𑀺 𑀉𑀧𑀦𑀦𑁆𑀤𑀢𑁆𑀣𑁂𑀭𑁄 𑀯𑀺𑀬, 𑀅𑀬𑀁 𑀦 𑀥𑀼𑀢𑁄 𑀥𑀼𑀢𑀯𑀸𑀤𑁄. 𑀬𑀣𑀸𑀳 𑁋 ‘‘𑀢𑀬𑀺𑀤𑀁 𑀆𑀬𑀲𑁆𑀫𑀸 𑀉𑀧𑀦𑀦𑁆𑀤𑁄 𑀦 𑀥𑀼𑀢𑁄 𑀥𑀼𑀢𑀯𑀸𑀤𑁄’’𑀢𑀺. 𑀬𑁄 𑀧𑀦 𑀉𑀪𑀬𑀯𑀺𑀧𑀦𑁆𑀦𑁄 𑀮𑀸𑀴𑀼𑀤𑀸𑀬𑀻 𑀯𑀺𑀬, 𑀅𑀬𑀁 𑀦𑁂𑀯 𑀥𑀼𑀢𑁄 𑀦 𑀥𑀼𑀢𑀯𑀸𑀤𑁄. 𑀬𑀣𑀸𑀳 𑁋 ‘‘𑀢𑀬𑀺𑀤𑀁 𑀆𑀬𑀲𑁆𑀫𑀸 𑀮𑀸𑀴𑀼𑀤𑀸𑀬𑀻 𑀦𑁂𑀯 𑀥𑀼𑀢𑁄 𑀦 𑀥𑀼𑀢𑀯𑀸𑀤𑁄’’𑀢𑀺. 𑀬𑁄 𑀧𑀦 𑀉𑀪𑀬𑀲𑀫𑁆𑀧𑀦𑁆𑀦𑁄 𑀆𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑁄 𑀯𑀺𑀬, 𑀅𑀬𑀁 𑀥𑀼𑀢𑁄 𑀘𑁂𑀯 𑀥𑀼𑀢𑀯𑀸𑀤𑁄 𑀘. 𑀬𑀣𑀸𑀳 𑁋 ‘‘𑀢𑀬𑀺𑀤𑀁 𑀆𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄 𑀥𑀼𑀢𑁄 𑀘𑁂𑀯 𑀥𑀼𑀢𑀯𑀸𑀤𑁄 𑀘𑀸’’𑀢𑀺.

𑀥𑀼𑀢𑀥𑀫𑁆𑀫𑀸 𑀯𑁂𑀤𑀺𑀢𑀩𑁆𑀩𑀸𑀢𑀺 𑀅𑀧𑁆𑀧𑀺𑀘𑁆𑀙𑀢𑀸 𑀲𑀦𑁆𑀢𑀼𑀝𑁆𑀞𑀺𑀢𑀸 𑀲𑀮𑁆𑀮𑁂𑀔𑀢𑀸 𑀧𑀯𑀺𑀯𑁂𑀓𑀢𑀸 𑀇𑀤𑀫𑀝𑁆𑀞𑀺𑀓𑀢𑀸𑀢𑀺 𑀇𑀫𑁂 𑀥𑀼𑀢𑀗𑁆𑀕𑀘𑁂𑀢𑀦𑀸𑀬 𑀧𑀭𑀺𑀯𑀸𑀭𑀸 𑀧𑀜𑁆𑀘 𑀥𑀫𑁆𑀫𑀸 ‘‘𑀅𑀧𑁆𑀧𑀺𑀘𑁆𑀙𑀁𑀬𑁂𑀯 𑀦𑀺𑀲𑁆𑀲𑀸𑀬𑀸’’𑀢𑀺𑀆𑀤𑀺𑀯𑀘𑀦𑀢𑁄 (𑀅. 𑀦𑀺. 𑁫.𑁧𑁮𑁧; 𑀧𑀭𑀺. 𑁩𑁨𑁫) 𑀥𑀼𑀢𑀥𑀫𑁆𑀫𑀸 𑀦𑀸𑀫. 𑀢𑀢𑁆𑀣 𑀅𑀧𑁆𑀧𑀺𑀘𑁆𑀙𑀢𑀸 𑀘 𑀲𑀦𑁆𑀢𑀼𑀝𑁆𑀞𑀺𑀢𑀸 𑀘 𑀅𑀮𑁄𑀪𑁄, 𑀲𑀮𑁆𑀮𑁂𑀔𑀢𑀸 𑀘 𑀧𑀯𑀺𑀯𑁂𑀓𑀢𑀸 𑀘 𑀤𑁆𑀯𑀻𑀲𑀼 𑀥𑀫𑁆𑀫𑁂𑀲𑀼 𑀅𑀦𑀼𑀧𑀢𑀦𑁆𑀢𑀺 𑀅𑀮𑁄𑀪𑁂 𑀘𑁂𑀯 𑀅𑀫𑁄𑀳𑁂 𑀘, 𑀇𑀤𑀫𑀝𑁆𑀞𑀺𑀢𑀸 𑀜𑀸𑀡𑀫𑁂𑀯. 𑀢𑀢𑁆𑀣 𑀅𑀮𑁄𑀪𑁂𑀦 𑀧𑀝𑀺𑀓𑁆𑀔𑁂𑀧𑀯𑀢𑁆𑀣𑀽𑀲𑀼 𑀮𑁄𑀪𑀁, 𑀅𑀫𑁄𑀳𑁂𑀦 𑀢𑁂𑀲𑁆𑀯𑁂𑀯 𑀆𑀤𑀻𑀦𑀯𑀧𑁆𑀧𑀝𑀺𑀘𑁆𑀙𑀸𑀤𑀓𑀁 𑀫𑁄𑀳𑀁 𑀥𑀼𑀦𑀸𑀢𑀺. 𑀅𑀮𑁄𑀪𑁂𑀦 𑀘 𑀅𑀦𑀼𑀜𑁆𑀜𑀸𑀢𑀸𑀦𑀁 𑀧𑀝𑀺𑀲𑁂𑀯𑀦𑀫𑀼𑀔𑁂𑀦 𑀧𑀯𑀢𑁆𑀢𑀁 𑀓𑀸𑀫𑀲𑀼𑀔𑀮𑁆𑀮𑀺𑀓𑀸𑀦𑀼𑀬𑁄𑀕𑀁, 𑀅𑀫𑁄𑀳𑁂𑀦 𑀥𑀼𑀢𑀗𑁆𑀕𑁂𑀲𑀼 𑀅𑀢𑀺𑀲𑀮𑁆𑀮𑁂𑀔𑀫𑀼𑀔𑁂𑀦 𑀧𑀯𑀢𑁆𑀢𑀁 𑀅𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕𑀁 𑀥𑀼𑀦𑀸𑀢𑀺. 𑀢𑀲𑁆𑀫𑀸 𑀇𑀫𑁂 𑀥𑀫𑁆𑀫𑀸 𑀥𑀼𑀢𑀥𑀫𑁆𑀫𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀥𑀼𑀢𑀗𑁆𑀕𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀻𑀢𑀺 𑀢𑁂𑀭𑀲 𑀥𑀼𑀢𑀗𑁆𑀕𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺 𑀧𑀁𑀲𑀼𑀓𑀽𑀮𑀺𑀓𑀗𑁆𑀕𑀁…𑀧𑁂… 𑀦𑁂𑀲𑀚𑁆𑀚𑀺𑀓𑀗𑁆𑀕𑀦𑁆𑀢𑀺.

𑀥𑀼𑀢𑀯𑀸𑀤𑀸𑀦𑀁 𑀬𑀤𑀺𑀤𑀁 𑀫𑀳𑀸𑀓𑀲𑁆𑀲𑀧𑁄𑀢𑀺 𑀬𑀢𑁆𑀢𑀓𑀸 𑀥𑀼𑀢𑀯𑀸𑀤𑀁 𑀯𑀤𑀦𑁆𑀢𑀺, 𑀢𑁂𑀲𑀁 𑀲𑀩𑁆𑀩𑁂𑀲𑀫𑁆𑀧𑀺 𑀅𑀦𑁆𑀢𑀭𑁂 𑀅𑀬𑀁 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑁄 𑀅𑀕𑁆𑀕𑁄𑀢𑀺 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀲𑀺. 𑀫𑀳𑀸𑀓𑀲𑁆𑀲𑀧𑁄𑀢𑀺 𑀉𑀭𑀼𑀯𑁂𑀴𑀓𑀲𑁆𑀲𑀧𑁄 𑀦𑀤𑀻𑀓𑀲𑁆𑀲𑀧𑁄 𑀕𑀬𑀸𑀓𑀲𑁆𑀲𑀧𑁄 𑀓𑀼𑀫𑀸𑀭𑀓𑀲𑁆𑀲𑀧𑁄𑀢𑀺 𑀇𑀫𑁂 𑀔𑀼𑀤𑁆𑀤𑀸𑀦𑀼𑀔𑀼𑀤𑁆𑀤𑀓𑁂 𑀣𑁂𑀭𑁂 𑀉𑀧𑀸𑀤𑀸𑀬 𑀅𑀬𑀁 𑀫𑀳𑀸, 𑀢𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄𑀢𑀺 𑀯𑀼𑀢𑁆𑀢𑁄.