(𑁧𑁪) 𑁩. 𑀢𑀢𑀺𑀬𑀏𑀢𑀤𑀕𑁆𑀕𑀯𑀕𑁆𑀕𑁄

𑁨𑁦𑁯. 𑀢𑀢𑀺𑀬𑀯𑀕𑁆𑀕𑀲𑁆𑀲 𑀧𑀞𑀫𑁂 𑀲𑀺𑀓𑁆𑀔𑀸𑀓𑀸𑀫𑀸𑀦𑀦𑁆𑀢𑀺 𑀢𑀺𑀲𑁆𑀲𑁄 𑀲𑀺𑀓𑁆𑀔𑀸 𑀓𑀸𑀫𑀬𑀫𑀸𑀦𑀸𑀦𑀁 𑀲𑀫𑁆𑀧𑀺𑀬𑀸𑀬𑀺𑀢𑁆𑀯𑀸 𑀲𑀺𑀓𑁆𑀔𑀦𑁆𑀢𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀭𑀸𑀳𑀼𑀮𑁄𑀢𑀺 𑀅𑀢𑁆𑀢𑀦𑁄 𑀧𑀼𑀢𑁆𑀢𑀁 𑀭𑀸𑀳𑀼𑀮𑀢𑁆𑀣𑁂𑀭𑀁 𑀤𑀲𑁆𑀲𑁂𑀢𑀺. 𑀣𑁂𑀭𑁄 𑀓𑀺𑀭 𑀧𑀩𑁆𑀩𑀚𑀺𑀢𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀧𑀸𑀢𑁄𑀯 𑀉𑀝𑁆𑀞𑀳𑀦𑁆𑀢𑁄 𑀳𑀢𑁆𑀣𑀧𑀽𑀭𑀁 𑀯𑀸𑀮𑀺𑀓𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 ‘‘𑀅𑀳𑁄 𑀯𑀢𑀸𑀳𑀁 𑀅𑀚𑁆𑀚 𑀤𑀲𑀩𑀮𑀲𑁆𑀲 𑀘𑁂𑀯 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸𑀦𑀜𑁆𑀘 𑀲𑀦𑁆𑀢𑀺𑀓𑀸 𑀏𑀢𑁆𑀢𑀓𑀁 𑀑𑀯𑀸𑀤𑀜𑁆𑀘𑁂𑀯 𑀅𑀦𑀼𑀲𑀸𑀲𑀦𑀺𑀜𑁆𑀘 𑀮𑀪𑁂𑀬𑁆𑀬’’𑀦𑁆𑀢𑀺 𑀧𑀢𑁆𑀣𑁂𑀢𑀺. 𑀢𑀲𑁆𑀫𑀸 𑀲𑀺𑀓𑁆𑀔𑀸𑀓𑀸𑀫𑀸𑀦𑀁 𑀅𑀕𑁆𑀕𑁄 𑀦𑀸𑀫 𑀚𑀸𑀢𑁄𑀢𑀺.

𑁨𑁧𑁦. 𑀤𑀼𑀢𑀺𑀬𑁂 𑀲𑀤𑁆𑀥𑀸𑀧𑀩𑁆𑀩𑀚𑀺𑀢𑀸𑀦𑀦𑁆𑀢𑀺 𑀲𑀤𑁆𑀥𑀸𑀬 𑀧𑀩𑁆𑀩𑀚𑀺𑀢𑀸𑀦𑀁. 𑀭𑀝𑁆𑀞𑀧𑀸𑀮𑁄𑀢𑀺 𑀭𑀝𑁆𑀞𑀁 𑀧𑀸𑀮𑁂𑀢𑀼𑀁 𑀲𑀫𑀢𑁆𑀣𑁄, 𑀪𑀺𑀦𑁆𑀦𑀁 𑀯𑀸 𑀭𑀝𑁆𑀞𑀁 𑀲𑀦𑁆𑀥𑀸𑀭𑁂𑀢𑀼𑀁 𑀲𑀫𑀢𑁆𑀣𑁂 𑀓𑀼𑀮𑁂 𑀚𑀸𑀢𑁄𑀢𑀺𑀧𑀺 𑀭𑀝𑁆𑀞𑀧𑀸𑀮𑁄𑀢𑀺 𑀲𑀗𑁆𑀔𑀁 𑀕𑀢𑁄. 𑀲𑁄 𑀳𑀺 𑀲𑀢𑁆𑀣𑀼 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀧𑀝𑀺𑀮𑀤𑁆𑀥𑀲𑀤𑁆𑀥𑁄 𑀘𑀼𑀤𑁆𑀤𑀲𑀪𑀢𑁆𑀢𑀘𑁆𑀙𑁂𑀤𑁂 𑀓𑀢𑁆𑀯𑀸 𑀫𑀸𑀢𑀸𑀧𑀺𑀢𑀭𑁄 𑀧𑀩𑁆𑀩𑀚𑁆𑀚𑀁 𑀅𑀦𑀼𑀚𑀸𑀦𑀸𑀧𑁂𑀢𑁆𑀯𑀸 𑀧𑀩𑁆𑀩𑀚𑀺𑀢𑁄. 𑀢𑀲𑁆𑀫𑀸 𑀲𑀤𑁆𑀥𑀸𑀧𑀩𑁆𑀩𑀚𑀺𑀢𑀸𑀦𑀁 𑀅𑀕𑁆𑀕𑁄 𑀦𑀸𑀫 𑀚𑀸𑀢𑁄.

𑀭𑀸𑀳𑀼𑀮-𑀭𑀝𑁆𑀞𑀧𑀸𑀮𑀢𑁆𑀣𑁂𑀭𑀯𑀢𑁆𑀣𑀼

𑀇𑀫𑁂𑀲𑀁 𑀧𑀦 𑀉𑀪𑀺𑀦𑁆𑀦𑀫𑁆𑀧𑀺 𑀣𑁂𑀭𑀸𑀦𑀁 𑀧𑀜𑁆𑀳𑀓𑀫𑁆𑀫𑁂 𑀅𑀬𑀫𑀦𑀼𑀧𑀼𑀩𑁆𑀩𑀺𑀓𑀣𑀸 𑁋 𑀏𑀢𑁂 𑀓𑀺𑀭 𑀤𑁆𑀯𑁂𑀧𑀺 𑀅𑀢𑀻𑀢𑁂 𑀧𑀤𑀼𑀫𑀼𑀢𑁆𑀢𑀭𑀩𑀼𑀤𑁆𑀥𑀓𑀸𑀮𑁂 𑀳𑀁𑀲𑀯𑀢𑀻𑀦𑀕𑀭𑁂 𑀕𑀳𑀧𑀢𑀺𑀫𑀳𑀸𑀲𑀸𑀮𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀁𑀲𑀼. 𑀢𑁂𑀲𑀁 𑀤𑀳𑀭𑀓𑀸𑀮𑁂 𑀦𑀸𑀫𑀁 𑀯𑀸 𑀕𑁄𑀢𑁆𑀢𑀁 𑀯𑀸 𑀦 𑀓𑀣𑀺𑀬𑀢𑀺. 𑀯𑀬𑀧𑁆𑀧𑀢𑁆𑀢𑀸 𑀧𑀦 𑀖𑀭𑀸𑀯𑀸𑀲𑁂 𑀧𑀢𑀺𑀝𑁆𑀞𑀸𑀬 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀧𑀺𑀢𑀼 𑀅𑀘𑁆𑀘𑀬𑁂𑀦 𑀉𑀪𑁄𑀧𑀺 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀭𑀢𑀦𑀓𑁄𑀝𑁆𑀞𑀸𑀕𑀸𑀭𑀓𑀫𑁆𑀫𑀺𑀓𑁂 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀅𑀧𑀭𑀺𑀫𑀸𑀡𑀁 𑀥𑀦𑀁 𑀤𑀺𑀲𑁆𑀯𑀸 𑁋 ‘‘𑀇𑀫𑀁 𑀏𑀢𑁆𑀢𑀓𑀁 𑀥𑀦𑀭𑀸𑀲𑀺𑀁 𑀅𑀬𑁆𑀬𑀓𑀧𑀬𑁆𑀬𑀓𑀸𑀤𑀬𑁄 𑀅𑀢𑁆𑀢𑀦𑀸 𑀲𑀤𑁆𑀥𑀺𑀁 𑀕𑀳𑁂𑀢𑁆𑀯𑀸 𑀕𑀦𑁆𑀢𑀼𑀁 𑀦𑀸𑀲𑀓𑁆𑀔𑀺𑀁𑀲𑀼, 𑀅𑀫𑁆𑀳𑁂𑀳𑀺 𑀤𑀸𑀦𑀺 𑀬𑁂𑀦 𑀓𑁂𑀦𑀘𑀺 𑀉𑀧𑀸𑀬𑁂𑀦 𑀇𑀫𑀁 𑀥𑀦𑀁 𑀕𑀳𑁂𑀢𑁆𑀯𑀸 𑀕𑀦𑁆𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀢𑁂 𑀉𑀪𑁄𑀧𑀺 𑀚𑀦𑀸 𑀘𑀢𑀽𑀲𑀼 𑀞𑀸𑀦𑁂𑀲𑀼 𑀓𑀧𑀡𑀤𑁆𑀥𑀺𑀓𑀸𑀤𑀻𑀦𑀁 𑀫𑀳𑀸𑀤𑀸𑀦𑀁 𑀤𑀸𑀢𑀼𑀁 𑀆𑀭𑀤𑁆𑀥𑀸. 𑀏𑀓𑁄 𑀅𑀢𑁆𑀢𑀦𑁄 𑀤𑀸𑀦𑀕𑁆𑀕𑁂 𑀆𑀕𑀢𑀸𑀕𑀢𑀚𑀦𑀁 𑀧𑀼𑀘𑁆𑀙𑀺𑀢𑁆𑀯𑀸 𑀬𑀸𑀕𑀼𑀔𑀚𑁆𑀚𑀓𑀸𑀤𑀻𑀲𑀼 𑀬𑀲𑁆𑀲 𑀬𑀁 𑀧𑀝𑀺𑀪𑀸𑀢𑀺, 𑀢𑀲𑁆𑀲 𑀢𑀁 𑀅𑀤𑀸𑀲𑀺, 𑀢𑀲𑁆𑀲 𑀢𑁂𑀦𑁂𑀯 𑀓𑀸𑀭𑀡𑁂𑀦 𑀆𑀕𑀢𑀧𑀸𑀓𑁄𑀢𑀺 𑀦𑀸𑀫𑀁 𑀚𑀸𑀢𑀁. 𑀇𑀢𑀭𑁄 𑀅𑀧𑀼𑀘𑁆𑀙𑀺𑀢𑁆𑀯𑀸𑀯 𑀕𑀳𑀺𑀢𑀕𑀳𑀺𑀢𑀪𑀸𑀚𑀦𑀁 𑀧𑀽𑀭𑁂𑀢𑁆𑀯𑀸 𑀧𑀽𑀭𑁂𑀢𑁆𑀯𑀸 𑀤𑁂𑀢𑀺, 𑀢𑀲𑁆𑀲𑀧𑀺 𑀢𑁂𑀦𑁂𑀯 𑀓𑀸𑀭𑀡𑁂𑀦 𑀅𑀦𑀕𑁆𑀕𑀧𑀸𑀓𑁄𑀢𑀺 𑀦𑀸𑀫𑀁 𑀚𑀸𑀢𑀁, 𑀅𑀧𑁆𑀧𑀫𑀸𑀡𑀧𑀸𑀓𑁄𑀢𑀺 𑀅𑀢𑁆𑀣𑁄.

𑀢𑁂 𑀉𑀪𑁄𑀧𑀺 𑀏𑀓𑀤𑀺𑀯𑀲𑀁 𑀧𑀸𑀢𑁄𑀯 𑀫𑀼𑀔𑀥𑁄𑀯𑀦𑀢𑁆𑀣𑀁 𑀩𑀳𑀺𑀕𑀸𑀫𑀁 𑀅𑀕𑀫𑀁𑀲𑀼. 𑀢𑀲𑁆𑀫𑀺𑀁 𑀲𑀫𑀬𑁂 𑀳𑀺𑀫𑀯𑀦𑁆𑀢𑀢𑁄 𑀤𑁆𑀯𑁂 𑀫𑀳𑀺𑀤𑁆𑀥𑀺𑀓𑀸 𑀢𑀸𑀧𑀲𑀸 𑀪𑀺𑀓𑁆𑀔𑀸𑀘𑀸𑀭𑀢𑁆𑀣𑀸𑀬 𑀆𑀓𑀸𑀲𑁂𑀦 𑀆𑀕𑀦𑁆𑀢𑁆𑀯𑀸 𑀢𑁂𑀲𑀁 𑀲𑀳𑀸𑀬𑀓𑀸𑀦𑀁 𑀅𑀯𑀺𑀤𑀽𑀭𑁂 𑀑𑀢𑀭𑀺𑀢𑁆𑀯𑀸 ‘‘𑀫𑀸 𑀦𑁄 𑀏𑀢𑁂 𑀧𑀲𑁆𑀲𑀺𑀁𑀲𑀽’’𑀢𑀺 𑀏𑀓𑀧𑀲𑁆𑀲𑁂 𑀅𑀝𑁆𑀞𑀁𑀲𑀼. 𑀢𑁂 𑀉𑀪𑁄𑀧𑀺 𑀚𑀦𑀸 𑀢𑁂𑀲𑀁 𑀮𑀸𑀩𑀼𑀪𑀸𑀚𑀦𑀸𑀤𑀺𑀧𑀭𑀺𑀓𑁆𑀔𑀸𑀭𑀁 𑀲𑀁𑀯𑀺𑀥𑀸𑀬 𑀅𑀦𑁆𑀢𑁄𑀕𑀸𑀫𑀁 𑀲𑀦𑁆𑀥𑀸𑀬 𑀪𑀺𑀓𑁆𑀔𑀸𑀬 𑀕𑀢𑀸𑀦𑀁 𑀲𑀦𑁆𑀢𑀺𑀓𑀁 𑀆𑀕𑀫𑁆𑀫 𑀯𑀦𑁆𑀤𑀺𑀁𑀲𑀼. 𑀅𑀣 𑀦𑁂 𑀢𑀸𑀧𑀲𑀸 ‘‘𑀓𑀸𑀬 𑀯𑁂𑀮𑀸𑀬 𑀆𑀕𑀢𑀢𑁆𑀣 𑀫𑀳𑀸𑀧𑀼𑀜𑁆𑀜𑀸’’𑀢𑀺 𑀆𑀳𑀁𑀲𑀼. 𑀢𑁂 ‘‘𑀅𑀥𑀼𑀦𑀸𑀯, 𑀪𑀦𑁆𑀢𑁂’’𑀢𑀺 𑀯𑀢𑁆𑀯𑀸 𑀢𑁂𑀲𑀁 𑀳𑀢𑁆𑀣𑀢𑁄 𑀮𑀸𑀩𑀼𑀪𑀸𑀚𑀦𑀁 𑀕𑀳𑁂𑀢𑁆𑀯𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀕𑁂𑀳𑀁 𑀦𑁂𑀢𑁆𑀯𑀸 𑀪𑀢𑁆𑀢𑀓𑀺𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀦𑀺𑀩𑀤𑁆𑀥𑀁 𑀪𑀺𑀓𑁆𑀔𑀸𑀕𑀳𑀡𑀢𑁆𑀣𑀁 𑀧𑀝𑀺𑀜𑁆𑀜𑀁 𑀕𑀡𑁆𑀳𑀺𑀁𑀲𑀼.

𑀢𑁂𑀲𑀼 𑀏𑀓𑁄 𑀢𑀸𑀧𑀲𑁄 𑀲𑀧𑀭𑀺𑀴𑀸𑀳𑀓𑀸𑀬𑀥𑀸𑀢𑀼𑀓𑁄 𑀳𑁄𑀢𑀺. 𑀲𑁄 𑀅𑀢𑁆𑀢𑀦𑁄 𑀆𑀦𑀼𑀪𑀸𑀯𑁂𑀦 𑀫𑀳𑀸𑀲𑀫𑀼𑀤𑁆𑀤𑀉𑀤𑀓𑀁 𑀤𑁆𑀯𑁂𑀥𑀸 𑀓𑀢𑁆𑀯𑀸 𑀧𑀣𑀯𑀺𑀦𑁆𑀥𑀭𑀦𑀸𑀕𑀭𑀸𑀚𑀲𑁆𑀲 𑀪𑀯𑀦𑀁 𑀕𑀦𑁆𑀢𑁆𑀯𑀸 𑀤𑀺𑀯𑀸𑀯𑀺𑀳𑀸𑀭𑀁 𑀦𑀺𑀲𑀻𑀤𑀢𑀺. 𑀲𑁄 𑀉𑀢𑀼𑀲𑀧𑁆𑀧𑀸𑀬𑀁 𑀕𑀳𑁂𑀢𑁆𑀯𑀸 𑀧𑀘𑁆𑀘𑀸𑀕𑀦𑁆𑀢𑁆𑀯𑀸 𑀅𑀢𑁆𑀢𑀦𑁄 𑀉𑀧𑀝𑁆𑀞𑀸𑀓𑀲𑁆𑀲 𑀕𑁂𑀳𑁂 𑀪𑀢𑁆𑀢𑀸𑀦𑀼𑀫𑁄𑀤𑀦𑀁 𑀓𑀭𑁄𑀦𑁆𑀢𑁄 ‘‘𑀧𑀣𑀯𑀺𑀦𑁆𑀥𑀭𑀦𑀸𑀕𑀪𑀯𑀦𑀁 𑀯𑀺𑀬 𑀳𑁄𑀢𑀽’’𑀢𑀺 𑀯𑀤𑀢𑀺. 𑀅𑀣 𑀦𑀁 𑀏𑀓𑀤𑀺𑀯𑀲𑀁 𑀉𑀧𑀝𑁆𑀞𑀸𑀓𑁄 𑀧𑀼𑀘𑁆𑀙𑀺 𑁋 ‘‘𑀪𑀦𑁆𑀢𑁂, 𑀢𑀼𑀫𑁆𑀳𑁂 𑀅𑀦𑀼𑀫𑁄𑀤𑀦𑀁 𑀓𑀭𑁄𑀦𑁆𑀢𑀸 ‘𑀧𑀣𑀯𑀺𑀦𑁆𑀥𑀭𑀦𑀸𑀕𑀪𑀯𑀦𑀁 𑀯𑀺𑀬 𑀳𑁄𑀢𑀽’𑀢𑀺 𑀯𑀤𑀣, 𑀫𑀬𑀫𑀲𑁆𑀲 𑀅𑀢𑁆𑀣𑀁 𑀦 𑀚𑀸𑀦𑀸𑀫, 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺 𑀇𑀤𑀁, 𑀪𑀦𑁆𑀢𑁂’’𑀢𑀺? 𑀆𑀫, 𑀓𑀼𑀝𑀼𑀫𑁆𑀩𑀺𑀬 𑀅𑀳𑀁 ‘‘𑀢𑀼𑀫𑁆𑀳𑀸𑀓𑀁 𑀲𑀫𑁆𑀧𑀢𑁆𑀢𑀺 𑀧𑀣𑀯𑀺𑀦𑁆𑀥𑀭𑀦𑀸𑀕𑀭𑀸𑀚𑀲𑀫𑁆𑀧𑀢𑁆𑀢𑀺𑀲𑀤𑀺𑀲𑀸 𑀳𑁄𑀢𑀽’’𑀢𑀺 𑀯𑀤𑀸𑀫𑀻𑀢𑀺. 𑀓𑀼𑀝𑀼𑀫𑁆𑀩𑀺𑀓𑁄 𑀢𑀢𑁄 𑀧𑀝𑁆𑀞𑀸𑀬 𑀧𑀣𑀯𑀺𑀦𑁆𑀥𑀭𑀦𑀸𑀕𑀭𑀸𑀚𑀪𑀯𑀦𑁂 𑀘𑀺𑀢𑁆𑀢𑀁 𑀞𑀧𑁂𑀲𑀺.

𑀇𑀢𑀭𑁄 𑀢𑀸𑀧𑀲𑁄 𑀢𑀸𑀯𑀢𑀺𑀁𑀲𑀪𑀯𑀦𑀁 𑀕𑀦𑁆𑀢𑁆𑀯𑀸 𑀲𑀼𑀜𑁆𑀜𑁂 𑀲𑁂𑀭𑀺𑀲𑀓𑀯𑀺𑀫𑀸𑀦𑁂 𑀤𑀺𑀯𑀸𑀯𑀺𑀳𑀸𑀭𑀁 𑀓𑀭𑁄𑀢𑀺. 𑀲𑁄 𑀆𑀕𑀘𑁆𑀙𑀦𑁆𑀢𑁄 𑀕𑀘𑁆𑀙𑀦𑁆𑀢𑁄 𑀘 𑀲𑀓𑁆𑀓𑀲𑁆𑀲 𑀤𑁂𑀯𑀭𑀸𑀚𑀲𑁆𑀲 𑀲𑀫𑁆𑀧𑀢𑁆𑀢𑀺𑀁 𑀤𑀺𑀲𑁆𑀯𑀸 𑀅𑀢𑁆𑀢𑀦𑁄 𑀉𑀧𑀝𑁆𑀞𑀸𑀓𑀲𑁆𑀲 𑀅𑀦𑀼𑀫𑁄𑀤𑀦𑀁 𑀓𑀭𑁄𑀦𑁆𑀢𑁄 ‘‘𑀲𑀓𑁆𑀓𑀯𑀺𑀫𑀸𑀦𑀁 𑀯𑀺𑀬 𑀳𑁄𑀢𑀽’’𑀢𑀺 𑀯𑀤𑀢𑀺. 𑀅𑀣 𑀦𑀁 𑀲𑁄𑀧𑀺 𑀓𑀼𑀝𑀼𑀫𑁆𑀩𑀺𑀬𑁄 𑀇𑀢𑀭𑁄 𑀲𑀳𑀸𑀬𑀓𑁄 𑀢𑀁 𑀢𑀸𑀧𑀲𑀁 𑀯𑀺𑀬 𑀧𑀼𑀘𑁆𑀙𑀺. 𑀲𑁄 𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀲𑀓𑁆𑀓𑀪𑀯𑀦𑁂 𑀘𑀺𑀢𑁆𑀢𑀁 𑀞𑀧𑁂𑀲𑀺. 𑀢𑁂 𑀉𑀪𑁄𑀧𑀺 𑀧𑀢𑁆𑀣𑀺𑀢𑀝𑁆𑀞𑀸𑀦𑁂𑀲𑀼𑀬𑁂𑀯 𑀦𑀺𑀩𑁆𑀩𑀢𑁆𑀢𑀸.

𑀧𑀣𑀯𑀺𑀦𑁆𑀥𑀭𑀪𑀯𑀦𑁂 𑀦𑀺𑀩𑁆𑀩𑀢𑁆𑀢𑁄 𑀧𑀣𑀯𑀺𑀦𑁆𑀥𑀭𑀦𑀸𑀕𑀭𑀸𑀚𑀸 𑀦𑀸𑀫 𑀚𑀸𑀢𑁄. 𑀲𑁄 𑀦𑀺𑀩𑁆𑀩𑀢𑁆𑀢𑀓𑁆𑀔𑀡𑁂 𑀅𑀢𑁆𑀢𑀦𑁄 𑀅𑀢𑁆𑀢𑀪𑀸𑀯𑀁 𑀤𑀺𑀲𑁆𑀯𑀸 ‘‘𑀅𑀫𑀦𑀸𑀧𑀲𑁆𑀲 𑀯𑀢 𑀫𑁂 𑀞𑀸𑀦𑀲𑁆𑀲 𑀓𑀼𑀮𑀼𑀧𑀓𑀢𑀸𑀧𑀲𑁄 𑀯𑀡𑁆𑀡𑀁 𑀓𑀣𑁂𑀲𑀺, 𑀉𑀭𑁂𑀦 𑀧𑀭𑀺𑀲𑀓𑁆𑀓𑀺𑀢𑁆𑀯𑀸 𑀯𑀺𑀘𑀭𑀡𑀝𑁆𑀞𑀸𑀦𑀫𑁂𑀢𑀁, 𑀦𑀽𑀦 𑀲𑁄 𑀅𑀜𑁆𑀜𑀁 𑀞𑀸𑀦𑀁 𑀦 𑀚𑀸𑀦𑀸𑀢𑀻’’𑀢𑀺 𑀯𑀺𑀧𑁆𑀧𑀝𑀺𑀲𑀸𑀭𑀻 𑀅𑀳𑁄𑀲𑀺. 𑀅𑀣𑀲𑁆𑀲 𑀢𑀁𑀔𑀡𑁂𑀬𑁂𑀯 𑀅𑀮𑀗𑁆𑀓𑀢𑀧𑀝𑀺𑀬𑀢𑁆𑀢𑀸𑀦𑀺 𑀦𑀸𑀕𑀦𑀸𑀝𑀓𑀸𑀦𑀺 𑀲𑀩𑁆𑀩𑀤𑀺𑀲𑀸𑀲𑀼 𑀢𑀽𑀭𑀺𑀬𑀸𑀦𑀺 𑀧𑀕𑁆𑀕𑀡𑁆𑀳𑀺𑀁𑀲𑀼. 𑀲𑁄 𑀢𑀲𑁆𑀫𑀺𑀁𑀬𑁂𑀯 𑀔𑀡𑁂 𑀢𑀁 𑀅𑀢𑁆𑀢𑀪𑀸𑀯𑀁 𑀯𑀺𑀚𑀳𑀺𑀢𑁆𑀯𑀸 𑀫𑀸𑀡𑀯𑀓𑀯𑀡𑁆𑀡𑀻 𑀅𑀳𑁄𑀲𑀺. 𑀅𑀦𑁆𑀯𑀤𑁆𑀥𑀫𑀸𑀲𑀜𑁆𑀘 𑀘𑀢𑁆𑀢𑀸𑀭𑁄 𑀫𑀳𑀸𑀭𑀸𑀚𑀸𑀦𑁄 𑀲𑀓𑁆𑀓𑀲𑁆𑀲 𑀉𑀧𑀝𑁆𑀞𑀸𑀦𑀁 𑀕𑀘𑁆𑀙𑀦𑁆𑀢𑀺. 𑀢𑀲𑁆𑀫𑀸 𑀲𑁄𑀧𑀺 𑀯𑀺𑀭𑀽𑀧𑀓𑁆𑀔𑁂𑀦 𑀦𑀸𑀕𑀭𑀜𑁆𑀜𑀸 𑀲𑀤𑁆𑀥𑀺𑀁 𑀲𑀓𑁆𑀓𑀲𑁆𑀲 𑀉𑀧𑀝𑁆𑀞𑀸𑀦𑀁 𑀕𑀢𑁄. 𑀲𑀓𑁆𑀓𑁄 𑀢𑀁 𑀤𑀽𑀭𑀢𑁄𑀯 𑀆𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 𑀲𑀜𑁆𑀚𑀸𑀦𑀺. 𑀅𑀣 𑀦𑀁 𑀲𑀫𑀻𑀧𑁂 𑀆𑀕𑀦𑁆𑀢𑁆𑀯𑀸 𑀞𑀺𑀢𑀓𑀸𑀮𑁂 ‘‘𑀓𑀳𑀁 𑀦𑀺𑀩𑁆𑀩𑀢𑁆𑀢𑁄𑀲𑀺 𑀲𑀫𑁆𑀫𑀸’’𑀢𑀺 𑀧𑀼𑀘𑁆𑀙𑀺. 𑀫𑀸 𑀓𑀣𑁂𑀲𑀺, 𑀫𑀳𑀸𑀭𑀸𑀚, 𑀉𑀭𑁂𑀦 𑀧𑀭𑀺𑀲𑀓𑁆𑀓𑀦𑀝𑁆𑀞𑀸𑀦𑁂 𑀦𑀺𑀩𑁆𑀩𑀢𑁆𑀢𑁄𑀫𑁆𑀳𑀺, 𑀢𑀼𑀫𑁆𑀳𑁂 𑀧𑀦 𑀓𑀮𑁆𑀬𑀸𑀡𑀫𑀺𑀢𑁆𑀢𑀁 𑀮𑀪𑀺𑀢𑁆𑀣𑀸𑀢𑀺. 𑀲𑀫𑁆𑀫, 𑀢𑁆𑀯𑀁 ‘‘𑀅𑀝𑁆𑀞𑀸𑀦𑁂 𑀦𑀺𑀩𑁆𑀩𑀢𑁆𑀢𑁄𑀫𑁆𑀳𑀻’’𑀢𑀺 𑀫𑀸 𑀯𑀺𑀢𑀓𑁆𑀓𑀬𑀺, 𑀧𑀤𑀼𑀫𑀼𑀢𑁆𑀢𑀭𑀤𑀲𑀩𑀮𑁄 𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑁄, 𑀢𑀲𑁆𑀲 𑀅𑀥𑀺𑀓𑀸𑀭𑀓𑀫𑁆𑀫𑀁 𑀓𑀢𑁆𑀯𑀸 𑀇𑀫𑀁𑀬𑁂𑀯 𑀞𑀸𑀦𑀁 𑀧𑀢𑁆𑀣𑁂𑀳𑀺, 𑀉𑀪𑁄 𑀲𑀼𑀔𑀁 𑀯𑀲𑀺𑀲𑁆𑀲𑀸𑀫𑀸𑀢𑀺. 𑀲𑁄 ‘‘𑀏𑀯𑀁, 𑀤𑁂𑀯, 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀕𑀦𑁆𑀢𑁆𑀯𑀸 𑀧𑀤𑀼𑀫𑀼𑀢𑁆𑀢𑀭𑀤𑀲𑀩𑀮𑀁 𑀦𑀺𑀫𑀦𑁆𑀢𑁂𑀢𑁆𑀯𑀸 𑀅𑀢𑁆𑀢𑀦𑁄 𑀦𑀸𑀕𑀪𑀯𑀦𑁂 𑀦𑀸𑀕𑀧𑀭𑀺𑀲𑀸𑀬 𑀲𑀤𑁆𑀥𑀺𑀁 𑀲𑀩𑁆𑀩𑀭𑀢𑁆𑀢𑀺𑀁 𑀲𑀓𑁆𑀓𑀸𑀭𑀲𑀫𑁆𑀫𑀸𑀦𑀁 𑀲𑀚𑁆𑀚𑁂𑀲𑀺.

𑀲𑀢𑁆𑀣𑀸 𑀧𑀼𑀦𑀤𑀺𑀯𑀲𑁂 𑀉𑀝𑁆𑀞𑀺𑀢𑁂 𑀅𑀭𑀼𑀡𑁂 𑀅𑀢𑁆𑀢𑀦𑁄 𑀉𑀧𑀝𑁆𑀞𑀸𑀓𑀁 𑀲𑀼𑀫𑀦𑀢𑁆𑀣𑁂𑀭𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀲𑀼𑀫𑀦, 𑀅𑀚𑁆𑀚 𑀢𑀣𑀸𑀕𑀢𑁄 𑀤𑀽𑀭𑀁 𑀪𑀺𑀓𑁆𑀔𑀸𑀘𑀸𑀭𑀁 𑀕𑀫𑀺𑀲𑁆𑀲𑀢𑀺, 𑀫𑀸 𑀧𑀼𑀣𑀼𑀚𑁆𑀚𑀦𑀪𑀺𑀓𑁆𑀔𑀽 𑀆𑀕𑀘𑁆𑀙𑀦𑁆𑀢𑀼, 𑀢𑁂𑀧𑀺𑀝𑀓𑀸 𑀧𑀝𑀺𑀲𑀫𑁆𑀪𑀺𑀤𑀸𑀧𑁆𑀧𑀢𑁆𑀢𑀸 𑀙𑀴𑀪𑀺𑀜𑁆𑀜𑀸𑀯 𑀆𑀕𑀘𑁆𑀙𑀦𑁆𑀢𑀽’’𑀢𑀺. 𑀣𑁂𑀭𑁄 𑀲𑀢𑁆𑀣𑀼 𑀯𑀘𑀦𑀁 𑀲𑀼𑀢𑁆𑀯𑀸 𑀲𑀩𑁆𑀩𑁂𑀲𑀁 𑀆𑀭𑁄𑀘𑁂𑀲𑀺. 𑀲𑀢𑁆𑀣𑀸𑀭𑀸 𑀲𑀤𑁆𑀥𑀺𑀁 𑀲𑀢𑀲𑀳𑀲𑁆𑀲𑀸 𑀪𑀺𑀓𑁆𑀔𑀽 𑀆𑀓𑀸𑀲𑀁 𑀧𑀓𑁆𑀔𑀦𑁆𑀤𑀺𑀁𑀲𑀼. 𑀧𑀣𑀯𑀺𑀦𑁆𑀥𑀭𑁄 𑀦𑀸𑀕𑀧𑀭𑀺𑀲𑀸𑀬 𑀲𑀤𑁆𑀥𑀺𑀁 𑀤𑀲𑀩𑀮𑀲𑁆𑀲 𑀧𑀘𑁆𑀘𑀼𑀕𑁆𑀕𑀫𑀦𑀁 𑀆𑀕𑀢𑁄 𑀲𑀢𑁆𑀣𑀸𑀭𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀲𑀫𑀼𑀤𑁆𑀤𑀫𑀢𑁆𑀣𑀓𑁂 𑀫𑀡𑀺𑀯𑀡𑁆𑀡𑀸 𑀊𑀫𑀺𑀬𑁄 𑀫𑀤𑁆𑀤𑀫𑀸𑀦𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀑𑀮𑁄𑀓𑁂𑀢𑁆𑀯𑀸 𑀆𑀤𑀺𑀢𑁄 𑀲𑀢𑁆𑀣𑀸𑀭𑀁, 𑀧𑀭𑀺𑀬𑁄𑀲𑀸𑀦𑁂 𑀲𑀗𑁆𑀖𑀦𑀯𑀓𑀁 𑀢𑀣𑀸𑀕𑀢𑀲𑁆𑀲 𑀧𑀼𑀢𑁆𑀢𑀁 𑀉𑀧𑀭𑁂𑀯𑀢𑀲𑀸𑀫𑀡𑁂𑀭𑀁 𑀦𑀸𑀫 𑀑𑀮𑁄𑀓𑁂𑀦𑁆𑀢𑁄 ‘‘𑀅𑀦𑀘𑁆𑀙𑀭𑀺𑀬𑁄 𑀲𑁂𑀲𑀲𑀸𑀯𑀓𑀸𑀦𑀁 𑀏𑀯𑀭𑀽𑀧𑁄 𑀇𑀤𑁆𑀥𑀸𑀦𑀼𑀪𑀸𑀯𑁄, 𑀇𑀫𑀲𑁆𑀲 𑀧𑀦 𑀢𑀭𑀼𑀡𑀩𑀸𑀮𑀤𑀸𑀭𑀓𑀲𑁆𑀲 𑀏𑀯𑀭𑀽𑀧𑁄 𑀇𑀤𑁆𑀥𑀸𑀦𑀼𑀪𑀸𑀯𑁄 𑀅𑀢𑀺𑀯𑀺𑀬 𑀅𑀘𑁆𑀙𑀭𑀺𑀬𑁄’’𑀢𑀺 𑀧𑀻𑀢𑀺𑀧𑀸𑀫𑁄𑀚𑁆𑀚𑀁 𑀉𑀧𑁆𑀧𑀸𑀤𑁂𑀲𑀺.

𑀅𑀣𑀲𑁆𑀲 𑀪𑀯𑀦𑁂 𑀤𑀲𑀩𑀮𑁂 𑀦𑀺𑀲𑀺𑀦𑁆𑀦𑁂 𑀲𑁂𑀲𑀪𑀺𑀓𑁆𑀔𑀽𑀲𑀼 𑀓𑁄𑀝𑀺𑀢𑁄 𑀧𑀝𑁆𑀞𑀸𑀬 𑀦𑀺𑀲𑀻𑀤𑀦𑁆𑀢𑁂𑀲𑀼 𑀲𑀢𑁆𑀣𑀼 𑀲𑀫𑁆𑀫𑀼𑀔𑀝𑁆𑀞𑀸𑀦𑁂𑀬𑁂𑀯 𑀉𑀧𑀭𑁂𑀯𑀢𑀲𑀸𑀫𑀡𑁂𑀭𑀲𑁆𑀲 𑀆𑀲𑀦𑀁 𑀧𑀸𑀧𑀼𑀡𑀺. 𑀦𑀸𑀕𑀭𑀸𑀚𑀸 𑀬𑀸𑀕𑀼𑀁 𑀤𑁂𑀦𑁆𑀢𑁄𑀧𑀺 𑀔𑀚𑁆𑀚𑀓𑀁 𑀤𑁂𑀦𑁆𑀢𑁄𑀧𑀺 𑀲𑀓𑀺𑀁 𑀤𑀲𑀩𑀮𑀁 𑀑𑀮𑁄𑀓𑁂𑀢𑀺, 𑀲𑀓𑀺𑀁 𑀉𑀧𑀭𑁂𑀯𑀢𑀲𑀸𑀫𑀡𑁂𑀭𑀁. 𑀢𑀲𑁆𑀲 𑀓𑀺𑀭 𑀲𑀭𑀻𑀭𑁂 𑀲𑀢𑁆𑀣𑀼 𑀲𑀭𑀻𑀭𑁂 𑀯𑀺𑀬 𑀤𑁆𑀯𑀢𑁆𑀢𑀺𑀁𑀲 𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀸𑀦𑀺 𑀧𑀜𑁆𑀜𑀸𑀬𑀦𑁆𑀢𑀺. 𑀢𑀢𑁄 𑀦𑀸𑀕𑀭𑀸𑀚𑀸 ‘‘𑀅𑀬𑀁 𑀲𑀸𑀫𑀡𑁂𑀭𑁄 𑀩𑀼𑀤𑁆𑀥𑀸𑀦𑀁 𑀲𑀤𑀺𑀲𑁄 𑀧𑀜𑁆𑀜𑀸𑀬𑀢𑀺, 𑀓𑀺𑀁 𑀦𑀼 𑀔𑁄 𑀳𑁄𑀢𑀻’’𑀢𑀺 𑀅𑀯𑀺𑀤𑀽𑀭𑁂 𑀦𑀺𑀲𑀺𑀦𑁆𑀦𑀁 𑀅𑀜𑁆𑀜𑀢𑀭𑀁 𑀪𑀺𑀓𑁆𑀔𑀼𑀁 𑀧𑀼𑀘𑁆𑀙𑀺 𑁋 ‘‘𑀅𑀬𑀁, 𑀪𑀦𑁆𑀢𑁂, 𑀲𑀸𑀫𑀡𑁂𑀭𑁄 𑀤𑀲𑀩𑀮𑀲𑁆𑀲 𑀓𑀺𑀁 𑀳𑁄𑀢𑀻’’𑀢𑀺? 𑀧𑀼𑀢𑁆𑀢𑁄, 𑀫𑀳𑀸𑀭𑀸𑀚𑀸𑀢𑀺. 𑀲𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀫𑀳𑀸 𑀯𑀢𑀸𑀬𑀁 𑀪𑀺𑀓𑁆𑀔𑀼, 𑀏𑀯𑀭𑀽𑀧𑀲𑁆𑀲 𑀲𑁄𑀪𑀕𑁆𑀕𑀧𑁆𑀧𑀢𑁆𑀢𑀲𑁆𑀲 𑀢𑀣𑀸𑀕𑀢𑀲𑁆𑀲 𑀧𑀼𑀢𑁆𑀢𑀪𑀸𑀯𑀁 𑀮𑀪𑀺. 𑀲𑀭𑀻𑀭𑀫𑁆𑀧𑀺𑀲𑁆𑀲 𑀏𑀓𑀤𑁂𑀲𑁂𑀦 𑀩𑀼𑀤𑁆𑀥𑀸𑀦𑀁 𑀲𑀭𑀻𑀭𑀲𑀤𑀺𑀲𑀁 𑀧𑀜𑁆𑀜𑀸𑀬𑀢𑀺, 𑀫𑀬𑀸𑀧𑀺 𑀅𑀦𑀸𑀕𑀢𑁂 𑀏𑀯𑀭𑀽𑀧𑁂𑀦 𑀪𑀯𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀲𑀢𑁆𑀢𑀸𑀳𑀁 𑀫𑀳𑀸𑀤𑀸𑀦𑀁 𑀤𑀢𑁆𑀯𑀸, ‘‘𑀪𑀦𑁆𑀢𑁂, 𑀅𑀳𑀁 𑀇𑀫𑀲𑁆𑀲 𑀅𑀥𑀺𑀓𑀸𑀭𑀓𑀫𑁆𑀫𑀲𑁆𑀲𑀸𑀦𑀼𑀪𑀸𑀯𑁂𑀦 𑀅𑀬𑀁 𑀉𑀧𑀭𑁂𑀯𑀢𑁄 𑀯𑀺𑀬 𑀅𑀦𑀸𑀕𑀢𑁂 𑀏𑀓𑀲𑁆𑀲 𑀩𑀼𑀤𑁆𑀥𑀲𑁆𑀲 𑀧𑀼𑀢𑁆𑀢𑁄 𑀪𑀯𑁂𑀬𑁆𑀬’’𑀦𑁆𑀢𑀺 𑀧𑀢𑁆𑀣𑀦𑀁 𑀅𑀓𑀸𑀲𑀺. 𑀲𑀢𑁆𑀣𑀸 𑀅𑀦𑀦𑁆𑀢𑀭𑀸𑀬𑀁 𑀤𑀺𑀲𑁆𑀯𑀸 ‘‘𑀅𑀦𑀸𑀕𑀢𑁂 𑀕𑁄𑀢𑀫𑀩𑀼𑀤𑁆𑀥𑀲𑁆𑀲 𑀧𑀼𑀢𑁆𑀢𑁄 𑀪𑀯𑀺𑀲𑁆𑀲𑀲𑀻’’𑀢𑀺 𑀩𑁆𑀬𑀸𑀓𑀭𑀺𑀢𑁆𑀯𑀸 𑀧𑀓𑁆𑀓𑀸𑀫𑀺.

𑀧𑀣𑀯𑀺𑀦𑁆𑀥𑀭𑁄𑀧𑀺 𑀧𑀼𑀦 𑀅𑀤𑁆𑀥𑀫𑀸𑀲𑁂 𑀲𑀫𑁆𑀧𑀢𑁆𑀢𑁂 𑀯𑀺𑀭𑀽𑀧𑀓𑁆𑀔𑁂𑀦 𑀲𑀤𑁆𑀥𑀺𑀁 𑀲𑀓𑁆𑀓𑀲𑁆𑀲 𑀉𑀧𑀝𑁆𑀞𑀸𑀦𑀁 𑀕𑀢𑁄. 𑀅𑀣 𑀦𑀁 𑀲𑀫𑀻𑀧𑁂 𑀞𑀺𑀢𑀁 𑀲𑀓𑁆𑀓𑁄 𑀧𑀼𑀘𑁆𑀙𑀺 𑁋 ‘‘𑀧𑀢𑁆𑀣𑀺𑀢𑁄 𑀢𑁂, 𑀲𑀫𑁆𑀫, 𑀅𑀬𑀁 𑀤𑁂𑀯𑀮𑁄𑀓𑁄’’𑀢𑀺? 𑀦 𑀧𑀢𑁆𑀣𑀺𑀢𑁄 𑀫𑀳𑀸𑀭𑀸𑀚𑀸𑀢𑀺. 𑀓𑀺𑀁 𑀤𑁄𑀲𑀁 𑀅𑀤𑁆𑀤𑀲𑀸𑀢𑀺? 𑀤𑁄𑀲𑁄 𑀦𑀢𑁆𑀣𑀺, 𑀫𑀳𑀸𑀭𑀸𑀚, 𑀅𑀳𑀁 𑀧𑀦 𑀤𑀲𑀩𑀮𑀲𑁆𑀲 𑀧𑀼𑀢𑁆𑀢𑀁 𑀉𑀧𑀭𑁂𑀯𑀢𑀲𑀸𑀫𑀡𑁂𑀭𑀁 𑀧𑀲𑁆𑀲𑀺𑀁. 𑀢𑀲𑁆𑀲 𑀫𑁂 𑀤𑀺𑀝𑁆𑀞𑀓𑀸𑀮𑀢𑁄 𑀧𑀝𑁆𑀞𑀸𑀬 𑀅𑀜𑁆𑀜𑀢𑁆𑀣 𑀘𑀺𑀢𑁆𑀢𑀁 𑀦 𑀦𑀫𑀺, 𑀲𑁆𑀯𑀸𑀳𑀁 ‘‘𑀅𑀦𑀸𑀕𑀢𑁂 𑀏𑀓𑀲𑁆𑀲 𑀩𑀼𑀤𑁆𑀥𑀲𑁆𑀲 𑀏𑀯𑀭𑀽𑀧𑁄 𑀧𑀼𑀢𑁆𑀢𑁄 𑀪𑀯𑁂𑀬𑁆𑀬’’𑀦𑁆𑀢𑀺 𑀧𑀢𑁆𑀣𑀦𑀁 𑀅𑀓𑀸𑀲𑀺𑀁. 𑀢𑁆𑀯𑀫𑁆𑀧𑀺, 𑀫𑀳𑀸𑀭𑀸𑀚, 𑀏𑀓𑀁 𑀧𑀢𑁆𑀣𑀦𑀁 𑀓𑀭𑁄𑀳𑀺, 𑀢𑁂 𑀫𑀬𑀁 𑀦𑀺𑀩𑁆𑀩𑀢𑁆𑀢𑀝𑁆𑀞𑀸𑀦𑁂 𑀦 𑀯𑀺𑀦𑀸 𑀪𑀯𑀺𑀲𑁆𑀲𑀸𑀫𑀸𑀢𑀺. 𑀲𑀓𑁆𑀓𑁄 𑀢𑀲𑁆𑀲 𑀯𑀘𑀦𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀏𑀓𑀁 𑀫𑀳𑀸𑀦𑀼𑀪𑀸𑀯𑀁 𑀪𑀺𑀓𑁆𑀔𑀼𑀁 𑀤𑀺𑀲𑁆𑀯𑀸 ‘‘𑀓𑀢𑀭𑀓𑀼𑀮𑀸 𑀦𑀼 𑀔𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀬𑀁 𑀓𑀼𑀮𑀧𑀼𑀢𑁆𑀢𑁄 𑀧𑀩𑁆𑀩𑀚𑀺𑀢𑁄’’𑀢𑀺 𑀆𑀯𑀚𑁆𑀚𑁂𑀦𑁆𑀢𑁄 ‘‘𑀅𑀬𑀁 𑀪𑀺𑀦𑁆𑀦𑀁 𑀭𑀝𑁆𑀞𑀁 𑀲𑀦𑁆𑀥𑀸𑀭𑁂𑀢𑀼𑀁 𑀲𑀫𑀢𑁆𑀣𑀲𑁆𑀲 𑀓𑀼𑀮𑀲𑁆𑀲 𑀧𑀼𑀢𑁆𑀢𑁄 𑀳𑀼𑀢𑁆𑀯𑀸 𑀘𑀼𑀤𑁆𑀤𑀲 𑀪𑀢𑁆𑀢𑀘𑁆𑀙𑁂𑀤𑁂 𑀓𑀢𑁆𑀯𑀸 𑀫𑀸𑀢𑀸𑀧𑀺𑀢𑀭𑁄 𑀧𑀩𑁆𑀩𑀚𑁆𑀚𑀁 𑀅𑀦𑀼𑀚𑀸𑀦𑀸𑀧𑁂𑀢𑁆𑀯𑀸 𑀧𑀩𑁆𑀩𑀚𑀺𑀢𑁄’’𑀢𑀺 𑀅𑀜𑁆𑀜𑀸𑀲𑀺. 𑀜𑀢𑁆𑀯𑀸 𑀘 𑀧𑀦 𑀅𑀚𑀸𑀦𑀦𑁆𑀢𑁄 𑀯𑀺𑀬 𑀤𑀲𑀩𑀮𑀁 𑀧𑀼𑀘𑁆𑀙𑀺𑀢𑁆𑀯𑀸 𑀲𑀢𑁆𑀢𑀸𑀳𑀁 𑀫𑀳𑀸𑀲𑀓𑁆𑀓𑀸𑀭𑀁 𑀓𑀢𑁆𑀯𑀸, ‘‘𑀪𑀦𑁆𑀢𑁂, 𑀅𑀳𑀁 𑀇𑀫𑀲𑁆𑀲 𑀓𑀮𑁆𑀬𑀸𑀡𑀓𑀫𑁆𑀫𑀲𑁆𑀲 𑀦𑀺𑀲𑁆𑀲𑀦𑁆𑀤𑁂𑀦 𑀢𑀼𑀫𑁆𑀳𑀸𑀓𑀁 𑀲𑀸𑀲𑀦𑁂 𑀅𑀬𑀁 𑀓𑀼𑀮𑀧𑀼𑀢𑁆𑀢𑁄 𑀯𑀺𑀬 𑀅𑀦𑀸𑀕𑀢𑁂 𑀏𑀓𑀲𑁆𑀲 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑁂 𑀲𑀤𑁆𑀥𑀸𑀧𑀩𑁆𑀩𑀚𑀺𑀢𑀸𑀦𑀁 𑀅𑀕𑁆𑀕𑁄 𑀪𑀯𑁂𑀬𑁆𑀬’’𑀦𑁆𑀢𑀺 𑀧𑀢𑁆𑀣𑀦𑀁 𑀅𑀓𑀸𑀲𑀺. 𑀲𑀢𑁆𑀣𑀸 𑀅𑀦𑀦𑁆𑀢𑀭𑀸𑀬𑀁 𑀤𑀺𑀲𑁆𑀯𑀸 ‘‘𑀢𑁆𑀯𑀁, 𑀫𑀳𑀸𑀭𑀸𑀚, 𑀅𑀦𑀸𑀕𑀢𑁂 𑀕𑁄𑀢𑀫𑀲𑁆𑀲 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑁂 𑀲𑀤𑁆𑀥𑀸𑀧𑀩𑁆𑀩𑀚𑀺𑀢𑀸𑀦𑀁 𑀅𑀕𑁆𑀕𑁄 𑀪𑀯𑀺𑀲𑁆𑀲𑀲𑀻’’𑀢𑀺 𑀩𑁆𑀬𑀸𑀓𑀭𑀺𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀲𑀓𑁆𑀓𑁄𑀧𑀺 𑀅𑀢𑁆𑀢𑀦𑁄 𑀤𑁂𑀯𑀧𑀼𑀭𑀫𑁂𑀯 𑀕𑀢𑁄.

𑀢𑁂 𑀉𑀪𑁄𑀧𑀺 𑀦𑀺𑀩𑁆𑀩𑀢𑁆𑀢𑀝𑁆𑀞𑀸𑀦𑀢𑁄 𑀘𑀯𑀺𑀢𑁆𑀯𑀸 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑀸 𑀅𑀦𑁂𑀓𑀲𑀳𑀲𑁆𑀲𑀓𑀧𑁆𑀧𑁂 𑀅𑀢𑀺𑀓𑁆𑀓𑀫𑀺𑀁𑀲𑀼. 𑀇𑀢𑁄 𑀧𑀦 𑀤𑁆𑀯𑀸𑀦𑀯𑀼𑀢𑀺𑀓𑀧𑁆𑀧𑀫𑀢𑁆𑀣𑀓𑁂 𑀨𑀼𑀲𑁆𑀲𑁄 𑀦𑀸𑀫 𑀩𑀼𑀤𑁆𑀥𑁄 𑀮𑁄𑀓𑁂 𑀉𑀤𑀧𑀸𑀤𑀺. 𑀢𑀲𑁆𑀲 𑀧𑀺𑀢𑀸 𑀫𑀳𑀺𑀦𑁆𑀤𑁄 𑀦𑀸𑀫 𑀭𑀸𑀚𑀸 𑀅𑀳𑁄𑀲𑀺, 𑀯𑁂𑀫𑀸𑀢𑀺𑀓𑀸 𑀢𑀬𑁄 𑀓𑀦𑀺𑀝𑁆𑀞𑀪𑀸𑀢𑀭𑁄. 𑀭𑀸𑀚𑀸 𑀤𑀺𑀯𑀲𑁂 𑀤𑀺𑀯𑀲𑁂 ‘‘𑀫𑀬𑁆𑀳𑀁𑀬𑁂𑀯 𑀩𑀼𑀤𑁆𑀥𑁄 𑀫𑀬𑁆𑀳𑀁 𑀥𑀫𑁆𑀫𑁄 𑀫𑀬𑁆𑀳𑀁 𑀲𑀗𑁆𑀖𑁄’’𑀢𑀺 𑀫𑀫𑀸𑀬𑀦𑁆𑀢𑁄 𑀲𑀬𑀫𑁂𑀯 𑀤𑀲𑀩𑀮𑀁 𑀦𑀺𑀩𑀤𑁆𑀥𑀁 𑀪𑁄𑀚𑀦𑀁 𑀪𑁄𑀚𑁂𑀢𑀺.

𑀅𑀣𑀲𑁆𑀲 𑀏𑀓𑀤𑀺𑀯𑀲𑀁 𑀧𑀘𑁆𑀘𑀦𑁆𑀢𑁄 𑀓𑀼𑀧𑀺𑀢𑁄. 𑀲𑁄 𑀧𑀼𑀢𑁆𑀢𑁂 𑀆𑀫𑀦𑁆𑀢𑁂𑀲𑀺 𑁋 ‘‘𑀢𑀸𑀢𑀸, 𑀧𑀘𑁆𑀘𑀦𑁆𑀢𑁄 𑀓𑀼𑀧𑀺𑀢𑁄, 𑀢𑀼𑀫𑁆𑀳𑁂𑀳𑀺 𑀯𑀸 𑀫𑀬𑀸 𑀯𑀸 𑀕𑀦𑁆𑀢𑀩𑁆𑀩𑀁. 𑀬𑀤𑀺 𑀅𑀳𑀁 𑀕𑀘𑁆𑀙𑀸𑀫𑀺, 𑀢𑀼𑀫𑁆𑀳𑁂𑀳𑀺 𑀇𑀫𑀺𑀦𑀸 𑀦𑀺𑀬𑀸𑀫𑁂𑀦 𑀤𑀲𑀩𑀮𑁄 𑀧𑀭𑀺𑀘𑀭𑀺𑀢𑀩𑁆𑀩𑁄’’𑀢𑀺. 𑀢𑁂 𑀢𑀬𑁄𑀧𑀺 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀆𑀳𑀁𑀲𑀼 𑁋 ‘‘𑀢𑀸𑀢, 𑀢𑀼𑀫𑁆𑀳𑀸𑀓𑀁 𑀕𑀫𑀦𑀓𑀺𑀘𑁆𑀘𑀁 𑀦𑀢𑁆𑀣𑀺, 𑀫𑀬𑀁 𑀘𑁄𑀭𑁂 𑀯𑀺𑀥𑀫𑀺𑀲𑁆𑀲𑀸𑀫𑀸’’𑀢𑀺 𑀧𑀺𑀢𑀭𑀁 𑀯𑀦𑁆𑀤𑀺𑀢𑁆𑀯𑀸 𑀧𑀘𑁆𑀘𑀦𑁆𑀢𑀁 𑀕𑀦𑁆𑀢𑁆𑀯𑀸 𑀘𑁄𑀭𑁂 𑀯𑀺𑀥𑀫𑀺𑀢𑁆𑀯𑀸 𑀯𑀺𑀚𑀺𑀢𑀲𑀗𑁆𑀕𑀸𑀫𑀸 𑀳𑀼𑀢𑁆𑀯𑀸 𑀦𑀺𑀯𑀢𑁆𑀢𑀺𑀁𑀲𑀼. 𑀢𑁂 𑀅𑀦𑁆𑀢𑀭𑀸𑀫𑀕𑁆𑀕𑁂 𑀧𑀸𑀤𑀫𑀽𑀮𑀺𑀓𑁂𑀳𑀺 𑀲𑀤𑁆𑀥𑀺𑀁 𑀫𑀦𑁆𑀢𑀬𑀺𑀁𑀲𑀼 𑁋 ‘‘𑀢𑀸𑀢𑀸, 𑀅𑀫𑁆𑀳𑀸𑀓𑀁 𑀕𑀢𑀓𑁆𑀔𑀡𑁂𑀬𑁂𑀯 𑀧𑀺𑀢𑀸 𑀯𑀭𑀁 𑀤𑀲𑁆𑀲𑀢𑀺, 𑀓𑀢𑀭𑀁 𑀯𑀭𑀁 𑀕𑀡𑁆𑀳𑀸𑀫𑀸’’𑀢𑀺? 𑀅𑀬𑁆𑀬𑀸, 𑀢𑀼𑀫𑁆𑀳𑀸𑀓𑀁 𑀧𑀺𑀢𑀼 𑀅𑀘𑁆𑀘𑀬𑁂𑀦 𑀤𑀼𑀮𑁆𑀮𑀪𑀁 𑀦𑀸𑀫 𑀦𑀢𑁆𑀣𑀺, 𑀢𑀼𑀫𑁆𑀳𑀸𑀓𑀁 𑀧𑀦 𑀚𑁂𑀝𑁆𑀞𑀪𑀸𑀢𑀺𑀓𑀁 𑀨𑀼𑀲𑁆𑀲𑀩𑀼𑀤𑁆𑀥𑀁 𑀧𑀝𑀺𑀚𑀕𑁆𑀕𑀦𑀯𑀭𑀁 𑀕𑀡𑁆𑀳𑀣𑀸’’𑀢𑀺 𑀆𑀳𑀁𑀲𑀼. 𑀢𑁂 ‘‘𑀓𑀮𑁆𑀬𑀸𑀡𑀁 𑀢𑀼𑀫𑁆𑀳𑁂𑀳𑀺 𑀯𑀼𑀢𑁆𑀢’’𑀦𑁆𑀢𑀺 𑀲𑀩𑁆𑀩𑁂𑀧𑀺 𑀏𑀓𑀘𑀺𑀢𑁆𑀢𑀸 𑀳𑀼𑀢𑁆𑀯𑀸 𑀕𑀦𑁆𑀢𑁆𑀯𑀸 𑀧𑀺𑀢𑀭𑀁 𑀅𑀤𑁆𑀤𑀲𑀁𑀲𑀼. 𑀢𑀤𑀸 𑀧𑀺𑀢𑀸 𑀢𑁂𑀲𑀁 𑀧𑀲𑀻𑀤𑀺𑀢𑁆𑀯𑀸 𑀯𑀭𑀁 𑀅𑀤𑀸𑀲𑀺. 𑀢𑁂 ‘‘𑀢𑁂𑀫𑀸𑀲𑀁 𑀢𑀣𑀸𑀕𑀢𑀁 𑀧𑀝𑀺𑀚𑀕𑁆𑀕𑀺𑀲𑁆𑀲𑀸𑀫𑀸’’𑀢𑀺 𑀯𑀭𑀁 𑀬𑀸𑀘𑀺𑀁𑀲𑀼. 𑀭𑀸𑀚𑀸 ‘‘𑀅𑀬𑀁 𑀤𑀸𑀢𑀼𑀁 𑀦 𑀲𑀓𑁆𑀓𑀸, 𑀅𑀜𑁆𑀜𑀁 𑀯𑀭𑀁 𑀕𑀡𑁆𑀳𑀣𑀸’’𑀢𑀺 𑀆𑀳. 𑀢𑀸𑀢, 𑀅𑀫𑁆𑀳𑀸𑀓𑀁 𑀅𑀜𑁆𑀜𑁂𑀦 𑀯𑀭𑁂𑀦 𑀓𑀺𑀘𑁆𑀘𑀁 𑀦𑀢𑁆𑀣𑀺, 𑀲𑀘𑁂 𑀢𑀼𑀫𑁆𑀳𑁂 𑀤𑀸𑀢𑀼𑀓𑀸𑀫𑀸, 𑀏𑀢𑀁𑀬𑁂𑀯 𑀦𑁄 𑀯𑀭𑀁 𑀤𑁂𑀣𑀸𑀢𑀺. 𑀭𑀸𑀚𑀸 𑀢𑁂𑀲𑀼 𑀧𑀼𑀦𑀧𑁆𑀧𑀼𑀦𑀁 𑀓𑀣𑁂𑀦𑁆𑀢𑁂𑀲𑀼 𑀅𑀢𑁆𑀢𑀦𑀸 𑀧𑀝𑀺𑀜𑁆𑀜𑀸𑀢𑀢𑁆𑀢𑀸 ‘‘𑀦 𑀲𑀓𑁆𑀓𑀸 𑀦 𑀤𑀸𑀢𑀼’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀆𑀳 𑁋 ‘‘𑀢𑀸𑀢𑀸, 𑀅𑀳𑀁 𑀢𑀼𑀫𑁆𑀳𑀸𑀓𑀁 𑀯𑀭𑀁 𑀤𑁂𑀫𑀺, 𑀅𑀧𑀺𑀘 𑀔𑁄 𑀧𑀦 𑀩𑀼𑀤𑁆𑀥𑀸 𑀦𑀸𑀫 𑀤𑀼𑀭𑀸𑀲𑀤𑀸 𑀳𑁄𑀦𑁆𑀢𑀺 𑀲𑀻𑀳𑀸 𑀯𑀺𑀬 𑀏𑀓𑀘𑀭𑀸, 𑀤𑀲𑀩𑀮𑀁 𑀧𑀝𑀺𑀚𑀕𑁆𑀕𑀦𑁆𑀢𑀸 𑀅𑀧𑁆𑀧𑀫𑀢𑁆𑀢𑀸 𑀪𑀯𑁂𑀬𑁆𑀬𑀸𑀣𑀸’’𑀢𑀺.

𑀢𑁂 𑀘𑀺𑀦𑁆𑀢𑀬𑀺𑀁𑀲𑀼 𑁋 ‘‘𑀅𑀫𑁆𑀳𑁂𑀳𑀺 𑀢𑀣𑀸𑀕𑀢𑀁 𑀧𑀝𑀺𑀚𑀕𑁆𑀕𑀦𑁆𑀢𑁂𑀳𑀺 𑀅𑀦𑀼𑀘𑁆𑀙𑀯𑀺𑀓𑀁 𑀓𑀢𑁆𑀯𑀸 𑀧𑀝𑀺𑀚𑀕𑁆𑀕𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀲𑀩𑁆𑀩𑁂𑀧𑀺 𑀏𑀓𑀘𑀺𑀢𑁆𑀢𑀸 𑀳𑀼𑀢𑁆𑀯𑀸 𑀤𑀲𑀲𑀻𑀮𑀸𑀦𑀺 𑀲𑀫𑀸𑀤𑀸𑀬 𑀦𑀺𑀭𑀸𑀫𑀕𑀦𑁆𑀥𑀸 𑀳𑀼𑀢𑁆𑀯𑀸 𑀲𑀢𑁆𑀣𑀼 𑀤𑀸𑀦𑀕𑁆𑀕𑀧𑀭𑀺𑀯𑀳𑀦𑀓𑁂 𑀢𑀬𑁄 𑀧𑀼𑀭𑀺𑀲𑁂 𑀞𑀧𑀬𑀺𑀁𑀲𑀼. 𑀢𑁂𑀲𑀼 𑀏𑀓𑁄 𑀥𑀦𑀥𑀜𑁆𑀜𑀼𑀧𑁆𑀧𑀸𑀤𑀓𑁄 𑀅𑀳𑁄𑀲𑀺, 𑀏𑀓𑁄 𑀫𑀸𑀧𑀓𑁄, 𑀏𑀓𑁄 𑀤𑀸𑀦𑀲𑀁𑀯𑀺𑀥𑀸𑀬𑀓𑁄. 𑀢𑁂𑀲𑀼 𑀥𑀦𑀥𑀜𑁆𑀜𑀼𑀧𑁆𑀧𑀸𑀤𑀓𑁄 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀩𑀺𑀫𑁆𑀩𑀺𑀲𑀸𑀭𑁄 𑀫𑀳𑀸𑀭𑀸𑀚𑀸 𑀚𑀸𑀢𑁄, 𑀫𑀸𑀧𑀓𑁄 𑀯𑀺𑀲𑀸𑀔𑁄 𑀉𑀧𑀸𑀲𑀓𑁄, 𑀤𑀸𑀦𑀲𑀁𑀯𑀺𑀥𑀸𑀬𑀓𑁄 𑀭𑀝𑁆𑀞𑀧𑀸𑀮𑀢𑁆𑀣𑁂𑀭𑁄𑀢𑀺. 𑀲𑁄 𑀢𑀢𑁆𑀣 𑀬𑀸𑀯𑀚𑀻𑀯𑀁 𑀓𑀼𑀲𑀮𑀁 𑀓𑀢𑁆𑀯𑀸 𑀤𑁂𑀯𑀧𑀼𑀭𑁂 𑀦𑀺𑀩𑁆𑀩𑀢𑁆𑀢𑁄. 𑀅𑀬𑀁 𑀧𑀦 𑀭𑀸𑀳𑀼𑀮𑀢𑁆𑀣𑁂𑀭𑁄 𑀦𑀸𑀫 𑀓𑀲𑁆𑀲𑀧𑀤𑀲𑀩𑀮𑀲𑁆𑀲 𑀓𑀸𑀮𑁂 𑀓𑀺𑀓𑀺𑀲𑁆𑀲 𑀓𑀸𑀲𑀺𑀭𑀜𑁆𑀜𑁄 𑀚𑁂𑀝𑁆𑀞𑀧𑀼𑀢𑁆𑀢𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺, 𑀧𑀣𑀯𑀺𑀦𑁆𑀥𑀭𑀓𑀼𑀫𑀸𑀭𑁄𑀢𑀺𑀲𑁆𑀲 𑀦𑀸𑀫𑀁 𑀅𑀓𑀁𑀲𑀼. 𑀢𑀲𑁆𑀲 𑀲𑀢𑁆𑀢 𑀪𑀕𑀺𑀦𑀺𑀬𑁄 𑀅𑀳𑁂𑀲𑀼𑀁. 𑀢𑀸 𑀤𑀲𑀩𑀮𑀲𑁆𑀲 𑀲𑀢𑁆𑀢 𑀧𑀭𑀺𑀯𑁂𑀡𑀸𑀦𑀺 𑀓𑀸𑀭𑀬𑀺𑀁𑀲𑀼. 𑀧𑀣𑀯𑀺𑀦𑁆𑀥𑀭𑁄 𑀑𑀧𑀭𑀚𑁆𑀚𑀁 𑀮𑀪𑀺. 𑀲𑁄 𑀢𑀸 𑀪𑀕𑀺𑀦𑀺𑀬𑁄 𑀆𑀳 𑁋 ‘‘𑀢𑀼𑀫𑁆𑀳𑁂𑀳𑀺 𑀓𑀸𑀭𑀺𑀢𑀧𑀭𑀺𑀯𑁂𑀡𑁂𑀲𑀼 𑀫𑀬𑁆𑀳𑀫𑁆𑀧𑀺 𑀏𑀓𑀁 𑀤𑁂𑀣𑀸’’𑀢𑀺. 𑀪𑀸𑀢𑀺𑀓, 𑀢𑀼𑀫𑁆𑀳𑁂 𑀉𑀧𑀭𑀸𑀚𑀝𑁆𑀞𑀸𑀦𑁂 𑀞𑀺𑀢𑀸, 𑀢𑀼𑀫𑁆𑀳𑁂𑀳𑀺 𑀦𑀸𑀫 𑀅𑀫𑁆𑀳𑀸𑀓𑀁 𑀤𑀸𑀢𑀩𑁆𑀩𑀁, 𑀢𑀼𑀫𑁆𑀳𑁂 𑀅𑀜𑁆𑀜𑀁 𑀧𑀭𑀺𑀯𑁂𑀡𑀁 𑀓𑀭𑁄𑀣𑀸𑀢𑀺. 𑀲𑁄 𑀢𑀸𑀲𑀁 𑀯𑀘𑀦𑀁 𑀲𑀼𑀢𑁆𑀯𑀸 𑀧𑀜𑁆𑀘 𑀯𑀺𑀳𑀸𑀭𑀲𑀢𑀸𑀦𑀺 𑀓𑀸𑀭𑁂𑀲𑀺. 𑀧𑀜𑁆𑀘 𑀧𑀭𑀺𑀯𑁂𑀡𑀲𑀢𑀸𑀦𑀻𑀢𑀺𑀧𑀺 𑀯𑀤𑀦𑁆𑀢𑀺. 𑀲𑁄 𑀢𑀢𑁆𑀣 𑀬𑀸𑀯𑀚𑀻𑀯𑀁 𑀓𑀼𑀲𑀮𑀁 𑀓𑀢𑁆𑀯𑀸 𑀤𑁂𑀯𑀧𑀼𑀭𑁂 𑀦𑀺𑀩𑁆𑀩𑀢𑁆𑀢𑀺. 𑀇𑀫𑀲𑁆𑀫𑀺𑀁 𑀧𑀦 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀧𑀣𑀯𑀺𑀦𑁆𑀥𑀭𑀓𑀼𑀫𑀸𑀭𑁄 𑀅𑀫𑁆𑀳𑀸𑀓𑀁 𑀩𑁄𑀥𑀺𑀲𑀢𑁆𑀢𑀲𑁆𑀲 𑀅𑀕𑁆𑀕𑀫𑀳𑁂𑀲𑀺𑀬𑀸 𑀓𑀼𑀘𑁆𑀙𑀺𑀲𑁆𑀫𑀺𑀁 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺, 𑀢𑀲𑁆𑀲 𑀲𑀳𑀸𑀬𑀓𑁄 𑀓𑀼𑀭𑀼𑀭𑀝𑁆𑀞𑁂 𑀣𑀼𑀮𑁆𑀮𑀓𑁄𑀝𑁆𑀞𑀺𑀢𑀦𑀺𑀕𑀫𑁂 𑀭𑀝𑁆𑀞𑀧𑀸𑀮𑀲𑁂𑀝𑁆𑀞𑀺𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑀺.

𑀅𑀣 𑀅𑀫𑁆𑀳𑀸𑀓𑀁 𑀤𑀲𑀩𑀮𑁄 𑀅𑀪𑀺𑀲𑀫𑁆𑀩𑁄𑀥𑀺𑀁 𑀧𑀢𑁆𑀯𑀸 𑀧𑀯𑀢𑁆𑀢𑀺𑀢𑀯𑀭𑀥𑀫𑁆𑀫𑀘𑀓𑁆𑀓𑁄 𑀅𑀦𑀼𑀧𑀼𑀩𑁆𑀩𑁂𑀦 𑀓𑀧𑀺𑀮𑀯𑀢𑁆𑀣𑀼𑀁 𑀆𑀕𑀦𑁆𑀢𑁆𑀯𑀸 𑀭𑀸𑀳𑀼𑀮𑀓𑀼𑀫𑀸𑀭𑀁 𑀧𑀩𑁆𑀩𑀸𑀚𑁂𑀲𑀺. 𑀢𑀲𑁆𑀲 𑀧𑀩𑁆𑀩𑀚𑁆𑀚𑀸𑀯𑀺𑀥𑀸𑀦𑀁 𑀧𑀸𑀴𑀺𑀬𑀁 (𑀫𑀳𑀸𑀯. 𑁧𑁦𑁫) 𑀆𑀕𑀢𑀫𑁂𑀯. 𑀏𑀯𑀁 𑀧𑀩𑁆𑀩𑀚𑀺𑀢𑀲𑁆𑀲 𑀧𑀦𑀲𑁆𑀲 𑀲𑀢𑁆𑀣𑀸 𑀅𑀪𑀺𑀡𑁆𑀳𑀑𑀯𑀸𑀤𑀯𑀲𑁂𑀦 𑀭𑀸𑀳𑀼𑀮𑁄𑀯𑀸𑀤𑀲𑀼𑀢𑁆𑀢𑀁 𑀅𑀪𑀸𑀲𑀺. 𑀭𑀸𑀳𑀼𑀮𑁄𑀧𑀺 𑀧𑀸𑀢𑁄𑀯 𑀯𑀼𑀝𑁆𑀞𑀸𑀬 𑀳𑀢𑁆𑀣𑁂𑀦 𑀯𑀸𑀮𑀼𑀓𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 ‘‘𑀤𑀲𑀩𑀮𑀲𑁆𑀲 𑀘𑁂𑀯 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸𑀦𑀜𑁆𑀘 𑀲𑀦𑁆𑀢𑀺𑀓𑀸 𑀅𑀚𑁆𑀚 𑀏𑀢𑁆𑀢𑀓𑀁 𑀑𑀯𑀸𑀤𑀁 𑀮𑀪𑁂𑀬𑁆𑀬’’𑀦𑁆𑀢𑀺 𑀯𑀤𑀢𑀺. 𑀪𑀺𑀓𑁆𑀔𑀼𑀲𑀗𑁆𑀖𑀫𑀚𑁆𑀛𑁂 𑀓𑀣𑀸 𑀉𑀤𑀧𑀸𑀤𑀺 ‘‘𑀑𑀯𑀸𑀤𑀓𑁆𑀔𑀫𑁄 𑀯𑀢 𑀭𑀸𑀳𑀼𑀮𑀲𑀸𑀫𑀡𑁂𑀭𑁄 𑀧𑀺𑀢𑀼 𑀅𑀦𑀼𑀘𑁆𑀙𑀯𑀺𑀓𑁄 𑀧𑀼𑀢𑁆𑀢𑁄’’𑀢𑀺. 𑀲𑀢𑁆𑀣𑀸 𑀪𑀺𑀓𑁆𑀔𑀽𑀦𑀁 𑀘𑀺𑀢𑁆𑀢𑀸𑀘𑀸𑀭𑀁 𑀜𑀢𑁆𑀯𑀸 ‘‘𑀫𑀬𑀺 𑀕𑀢𑁂 𑀏𑀓𑀸 𑀥𑀫𑁆𑀫𑀤𑁂𑀲𑀦𑀸 𑀘 𑀯𑀟𑁆𑀠𑀺𑀲𑁆𑀲𑀢𑀺, 𑀭𑀸𑀳𑀼𑀮𑀲𑁆𑀲 𑀘 𑀕𑀼𑀡𑁄 𑀧𑀸𑀓𑀝𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀕𑀦𑁆𑀢𑁆𑀯𑀸 𑀥𑀫𑁆𑀫𑀲𑀪𑀸𑀬𑀁 𑀩𑀼𑀤𑁆𑀥𑀸𑀲𑀸𑀦𑁂 𑀦𑀺𑀲𑀺𑀦𑁆𑀦𑁄 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺. 𑀭𑀸𑀳𑀼𑀮𑀲𑀸𑀫𑀡𑁂𑀭𑀲𑁆𑀲 𑀑𑀯𑀸𑀤𑀓𑁆𑀔𑀫𑀪𑀸𑀯𑀁 𑀓𑀣𑁂𑀫 𑀪𑀕𑀯𑀸𑀢𑀺. 𑀲𑀢𑁆𑀣𑀸 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀞𑀢𑁆𑀯𑀸 𑀭𑀸𑀳𑀼𑀮𑀲𑁆𑀲 𑀕𑀼𑀡𑀤𑀻𑀧𑀦𑀢𑁆𑀣𑀁 𑀫𑀺𑀕𑀚𑀸𑀢𑀓𑀁 𑀆𑀳𑀭𑀺𑀢𑁆𑀯𑀸 𑀓𑀣𑁂𑀲𑀺 𑁋

‘‘𑀫𑀺𑀕𑀁 𑀢𑀺𑀧𑀮𑁆𑀮𑀢𑁆𑀣𑀫𑀦𑁂𑀓𑀫𑀸𑀬𑀁,

𑀅𑀝𑁆𑀞𑀓𑁆𑀔𑀼𑀭𑀁 𑀅𑀟𑁆𑀠𑀭𑀢𑁆𑀢𑀸 𑀧𑀧𑀸𑀬𑀺𑀁;

𑀏𑀓𑁂𑀦 𑀲𑁄𑀢𑁂𑀦 𑀙𑀫𑀸’𑀲𑁆𑀲𑀲𑀦𑁆𑀢𑁄,

𑀙𑀳𑀺 𑀓𑀮𑀸𑀳𑀺𑀢𑀺𑀪𑁄𑀢𑀺 𑀪𑀸𑀕𑀺𑀦𑁂𑀬𑁆𑀬𑁄’’𑀢𑀺. (𑀚𑀸. 𑁧.𑁧.𑁧𑁬);

𑀅𑀣𑀲𑁆𑀲 𑀲𑀢𑁆𑀢𑀯𑀲𑁆𑀲𑀺𑀓𑀲𑀸𑀫𑀡𑁂𑀭𑀓𑀸𑀮𑁂 ‘‘𑀫𑀸 𑀳𑁂𑀯 𑀔𑁄 𑀭𑀸𑀳𑀼𑀮𑁄 𑀤𑀳𑀭𑀪𑀸𑀯𑁂𑀦 𑀓𑀻𑀴𑀦𑀢𑁆𑀣𑀸𑀬𑀧𑀺 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀸𑀲𑁂𑀬𑁆𑀬𑀸’’𑀢𑀺 𑀅𑀫𑁆𑀩𑀮𑀝𑁆𑀞𑀺𑀬𑀭𑀸𑀳𑀼𑀮𑁄𑀯𑀸𑀤𑀁 (𑀫. 𑀦𑀺. 𑁨.𑁧𑁦𑁭 𑀆𑀤𑀬𑁄) 𑀤𑁂𑀲𑁂𑀲𑀺. 𑀅𑀝𑁆𑀞𑀸𑀭𑀲𑀯𑀲𑁆𑀲𑀺𑀓𑀲𑀸𑀫𑀡𑁂𑀭𑀓𑀸𑀮𑁂 𑀢𑀣𑀸𑀕𑀢𑀲𑁆𑀲 𑀧𑀘𑁆𑀙𑀢𑁄 𑀧𑀺𑀡𑁆𑀟𑀸𑀬 𑀧𑀯𑀺𑀲𑀦𑁆𑀢𑀲𑁆𑀲 𑀲𑀢𑁆𑀣𑀼 𑀘𑁂𑀯 𑀅𑀢𑁆𑀢𑀦𑁄 𑀘 𑀭𑀽𑀧𑀲𑀫𑁆𑀧𑀢𑁆𑀢𑀺𑀁 𑀤𑀺𑀲𑁆𑀯𑀸 𑀕𑁂𑀳𑀲𑀺𑀢𑀁 𑀯𑀺𑀢𑀓𑁆𑀓𑀁 𑀯𑀺𑀢𑀓𑁆𑀓𑁂𑀦𑁆𑀢𑀲𑁆𑀲 ‘‘𑀬𑀁𑀓𑀺𑀜𑁆𑀘𑀺, 𑀭𑀸𑀳𑀼𑀮, 𑀭𑀽𑀧’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀫𑀳𑀸𑀭𑀸𑀳𑀼𑀮𑁄𑀯𑀸𑀤𑀲𑀼𑀢𑁆𑀢𑀦𑁆𑀢𑀁 (𑀫. 𑀦𑀺. 𑁨.𑁧𑁧𑁩) 𑀓𑀣𑁂𑀲𑀺. 𑀲𑀁𑀬𑀼𑀢𑁆𑀢𑀓𑁂 (𑀲𑀁. 𑀦𑀺. 𑁪.𑁧𑁨𑁧) 𑀧𑀦 𑀭𑀸𑀳𑀼𑀮𑁄𑀯𑀸𑀤𑁄𑀧𑀺 𑀅𑀗𑁆𑀕𑀼𑀢𑁆𑀢𑀭𑁂 (𑀅. 𑀦𑀺. 𑁪.𑁧𑁭𑁭) 𑀭𑀸𑀳𑀼𑀮𑁄𑀯𑀸𑀤𑁄𑀧𑀺 𑀣𑁂𑀭𑀲𑁆𑀲 𑀯𑀺𑀧𑀲𑁆𑀲𑀦𑀸𑀘𑀸𑀭𑁄𑀬𑁂𑀯. 𑀅𑀣𑀲𑁆𑀲 𑀲𑀢𑁆𑀣𑀸 𑀜𑀸𑀡𑀧𑀭𑀺𑀧𑀸𑀓𑀁 𑀜𑀢𑁆𑀯𑀸 𑀅𑀯𑀲𑁆𑀲𑀺𑀓𑀪𑀺𑀓𑁆𑀔𑀼𑀓𑀸𑀮𑁂 𑀅𑀦𑁆𑀥𑀯𑀦𑁂 𑀦𑀺𑀲𑀺𑀦𑁆𑀦𑁄 𑀘𑀽𑀴𑀭𑀸𑀳𑀼𑀮𑁄𑀯𑀸𑀤𑀁 (𑀫. 𑀦𑀺. 𑁩.𑁪𑁧𑁬 𑀆𑀤𑀬𑁄) 𑀓𑀣𑁂𑀲𑀺. 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀭𑀸𑀳𑀼𑀮𑀢𑁆𑀣𑁂𑀭𑁄 𑀓𑁄𑀝𑀺𑀲𑀢𑀲𑀳𑀲𑁆𑀲𑀤𑁂𑀯𑀢𑀸𑀳𑀺 𑀲𑀤𑁆𑀥𑀺𑀁 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺, 𑀲𑁄𑀢𑀸𑀧𑀦𑁆𑀦𑀲𑀓𑀤𑀸𑀕𑀸𑀫𑀺𑀅𑀦𑀸𑀕𑀸𑀫𑀺𑀤𑁂𑀯𑀢𑀸𑀦𑀁 𑀕𑀡𑀦𑀸 𑀦𑀢𑁆𑀣𑀺. 𑀅𑀣 𑀲𑀢𑁆𑀣𑀸 𑀅𑀧𑀭𑀪𑀸𑀕𑁂 𑀅𑀭𑀺𑀬𑀲𑀗𑁆𑀖𑀫𑀚𑁆𑀛𑁂 𑀦𑀺𑀲𑀺𑀦𑁆𑀦𑁄 𑀣𑁂𑀭𑀁 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀲𑀺𑀓𑁆𑀔𑀸𑀓𑀸𑀫𑀸𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀲𑀺.

𑀲𑀢𑁆𑀣𑀭𑀺 𑀧𑀦 𑀓𑀼𑀭𑀼𑀭𑀝𑁆𑀞𑁂 𑀘𑀸𑀭𑀺𑀓𑀸𑀬 𑀦𑀺𑀓𑁆𑀔𑀫𑀺𑀢𑁆𑀯𑀸 𑀣𑀼𑀮𑁆𑀮𑀓𑁄𑀝𑁆𑀞𑀺𑀢𑀁 𑀅𑀦𑀼𑀧𑁆𑀧𑀢𑁆𑀢𑁂 𑀭𑀝𑁆𑀞𑀧𑀸𑀮𑁄 𑀓𑀼𑀮𑀧𑀼𑀢𑁆𑀢𑁄 𑀲𑀢𑁆𑀣𑀼 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀧𑀝𑀺𑀮𑀤𑁆𑀥𑀲𑀤𑁆𑀥𑁄 𑀫𑀸𑀢𑀸𑀧𑀺𑀢𑀭𑁄 𑀅𑀦𑀼𑀚𑀸𑀦𑀸𑀧𑁂𑀢𑁆𑀯𑀸 𑀤𑀲𑀩𑀮𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀲𑀢𑁆𑀣𑀼 𑀆𑀡𑀢𑁆𑀢𑀺𑀬𑀸 𑀅𑀜𑁆𑀜𑀢𑀭𑀲𑁆𑀲 𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺. 𑀢𑀲𑁆𑀲 𑀧𑀩𑁆𑀩𑀚𑀺𑀢𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀲𑁂𑀝𑁆𑀞𑀺𑀕𑀳𑀧𑀢𑀺 𑀪𑀺𑀓𑁆𑀔𑀽 𑀅𑀢𑁆𑀢𑀦𑁄 𑀦𑀺𑀯𑁂𑀲𑀦𑀤𑁆𑀯𑀸𑀭𑁂𑀦 𑀕𑀘𑁆𑀙𑀦𑁆𑀢𑁂 𑀤𑀺𑀲𑁆𑀯𑀸 ‘‘𑀓𑀺𑀁 𑀢𑀼𑀫𑁆𑀳𑀸𑀓𑀁 𑀇𑀫𑀲𑁆𑀫𑀺𑀁 𑀕𑁂𑀳𑁂 𑀓𑀫𑁆𑀫𑀁, 𑀏𑀓𑁄𑀯 𑀧𑀼𑀢𑁆𑀢𑀓𑁄 𑀅𑀳𑁄𑀲𑀺, 𑀢𑀁 𑀕𑀡𑁆𑀳𑀺𑀢𑁆𑀯𑀸 𑀕𑀢𑀢𑁆𑀣, 𑀇𑀤𑀸𑀦𑀺 𑀓𑀺𑀁 𑀓𑀭𑀺𑀲𑁆𑀲𑀣𑀸’’𑀢𑀺 𑀅𑀓𑁆𑀓𑁄𑀲𑀢𑀺 𑀧𑀭𑀺𑀪𑀸𑀲𑀢𑀺. 𑀲𑀢𑁆𑀣𑀸 𑀅𑀤𑁆𑀥𑀫𑀸𑀲𑀁 𑀣𑀼𑀮𑁆𑀮𑀓𑁄𑀝𑁆𑀞𑀺𑀢𑁂 𑀯𑀲𑀺𑀢𑁆𑀯𑀸 𑀧𑀼𑀦 𑀲𑀸𑀯𑀢𑁆𑀣𑀺𑀫𑁂𑀯 𑀅𑀕𑀫𑀸𑀲𑀺. 𑀢𑀢𑁆𑀣𑀸𑀬𑀲𑁆𑀫𑀸 𑀭𑀝𑁆𑀞𑀧𑀸𑀮𑁄 𑀬𑁄𑀦𑀺𑀲𑁄 𑀫𑀦𑀲𑀺𑀓𑀭𑁄𑀦𑁆𑀢𑁄 𑀓𑀫𑁆𑀫𑀁 𑀓𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀲𑁄 𑀲𑀢𑁆𑀣𑀸𑀭𑀁 𑀅𑀦𑀼𑀚𑀸𑀦𑀸𑀧𑁂𑀢𑁆𑀯𑀸 𑀫𑀸𑀢𑀸𑀧𑀺𑀢𑀭𑁄 𑀤𑀲𑁆𑀲𑀦𑀢𑁆𑀣𑀁 𑀣𑀼𑀮𑁆𑀮𑀓𑁄𑀝𑁆𑀞𑀺𑀢𑀁 𑀕𑀦𑁆𑀢𑁆𑀯𑀸 𑀢𑀢𑁆𑀣 𑀲𑀧𑀤𑀸𑀦𑀁 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑁄 𑀧𑀺𑀢𑀼 𑀦𑀺𑀯𑁂𑀲𑀦𑁂 𑀆𑀪𑀺𑀤𑁄𑀲𑀺𑀓𑀁 𑀓𑀼𑀫𑁆𑀫𑀸𑀲𑀁 𑀮𑀪𑀺𑀢𑁆𑀯𑀸 𑀢𑀁 𑀅𑀫𑀢𑀁 𑀯𑀺𑀬 𑀧𑀭𑀺𑀪𑀼𑀜𑁆𑀚𑀦𑁆𑀢𑁄 𑀧𑀺𑀢𑀭𑀸 𑀦𑀺𑀫𑀦𑁆𑀢𑀺𑀢𑁄 𑀅𑀥𑀺𑀯𑀸𑀲𑁂𑀢𑁆𑀯𑀸 𑀤𑀼𑀢𑀺𑀬𑀤𑀺𑀯𑀲𑁂 𑀧𑀺𑀢𑀼 𑀦𑀺𑀯𑁂𑀲𑀦𑁂 𑀧𑀺𑀡𑁆𑀟𑀧𑀸𑀢𑀁 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀅𑀮𑀗𑁆𑀓𑀢𑀧𑀝𑀺𑀬𑀢𑁆𑀢𑁂 𑀇𑀢𑁆𑀣𑀺𑀚𑀦𑁂 𑀅𑀲𑀼𑀪𑀲𑀜𑁆𑀜𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀞𑀺𑀢𑀓𑁄𑀯 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀚𑀺𑀬𑀸 𑀫𑀼𑀢𑁆𑀢𑁄 𑀯𑀺𑀬 𑀦𑀸𑀭𑀸𑀘𑁄 𑀆𑀓𑀸𑀲𑀁 𑀉𑀧𑁆𑀧𑀢𑀺𑀢𑁆𑀯𑀸 𑀓𑁄𑀭𑀩𑁆𑀬𑀭𑀜𑁆𑀜𑁄 𑀫𑀺𑀕𑀘𑀻𑀭𑀁 𑀕𑀦𑁆𑀢𑁆𑀯𑀸 𑀫𑀗𑁆𑀕𑀮𑀲𑀺𑀮𑀸𑀧𑀝𑁆𑀝𑁂 𑀦𑀺𑀲𑀺𑀦𑁆𑀦𑁄 𑀤𑀲𑁆𑀲𑀦𑀢𑁆𑀣𑀸𑀬 𑀆𑀕𑀢𑀲𑁆𑀲 𑀭𑀜𑁆𑀜𑁄 𑀘𑀢𑀼𑀧𑀸𑀭𑀺𑀚𑀼𑀜𑁆𑀜𑀧𑀝𑀺𑀫𑀡𑁆𑀟𑀺𑀢𑀁 𑀥𑀫𑁆𑀫𑀁 (𑀫. 𑀦𑀺. 𑁨.𑁩𑁦𑁪) 𑀤𑁂𑀲𑁂𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀧𑀼𑀦 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁𑀬𑁂𑀯 𑀆𑀕𑀢𑁄. 𑀏𑀯𑀫𑁂𑀢𑀁 𑀯𑀢𑁆𑀣𑀼 𑀲𑀫𑀼𑀝𑁆𑀞𑀺𑀢𑀁. 𑀅𑀣 𑀲𑀢𑁆𑀣𑀸 𑀅𑀧𑀭𑀪𑀸𑀕𑁂 𑀅𑀭𑀺𑀬𑀕𑀡𑀫𑀚𑁆𑀛𑁂 𑀦𑀺𑀲𑀺𑀦𑁆𑀦𑁄 𑀣𑁂𑀭𑀁 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀲𑀤𑁆𑀥𑀸𑀧𑀩𑁆𑀩𑀚𑀺𑀢𑀸𑀦𑀁 𑀓𑀼𑀮𑀧𑀼𑀢𑁆𑀢𑀸𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀲𑀻𑀢𑀺.

𑀓𑀼𑀡𑁆𑀟𑀥𑀸𑀦𑀢𑁆𑀣𑁂𑀭𑀯𑀢𑁆𑀣𑀼

𑁨𑁧𑁧. 𑀢𑀢𑀺𑀬𑁂 𑀧𑀞𑀫𑀁 𑀲𑀮𑀸𑀓𑀁 𑀕𑀡𑁆𑀳𑀦𑁆𑀢𑀸𑀦𑀦𑁆𑀢𑀺 𑀲𑀩𑁆𑀩𑀧𑀞𑀫𑀁 𑀲𑀮𑀸𑀓𑀕𑀸𑀳𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀓𑀼𑀡𑁆𑀟𑀥𑀸𑀦𑀢𑁆𑀣𑁂𑀭𑁄 𑀅𑀕𑁆𑀕𑁄𑀢𑀺 𑀤𑀲𑁆𑀲𑁂𑀢𑀺. 𑀲𑁄 𑀓𑀺𑀭 𑀣𑁂𑀭𑁄 𑀫𑀳𑀸𑀲𑀼𑀪𑀤𑁆𑀤𑀸𑀬 𑀦𑀺𑀫𑀦𑁆𑀢𑀺𑀢𑀤𑀺𑀯𑀲𑁂 𑀢𑀣𑀸𑀕𑀢𑁂 𑀉𑀕𑁆𑀕𑀦𑀕𑀭𑀁 𑀕𑀘𑁆𑀙𑀦𑁆𑀢𑁂 ‘‘𑀅𑀚𑁆𑀚 𑀲𑀢𑁆𑀣𑀸 𑀤𑀽𑀭𑀁 𑀪𑀺𑀓𑁆𑀔𑀸𑀘𑀸𑀭𑀁 𑀕𑀫𑀺𑀲𑁆𑀲𑀢𑀺, 𑀧𑀼𑀣𑀼𑀚𑁆𑀚𑀦𑀸 𑀲𑀮𑀸𑀓𑀁 𑀫𑀸 𑀕𑀡𑁆𑀳𑀦𑁆𑀢𑀼, 𑀧𑀜𑁆𑀘𑀲𑀢𑀸 𑀔𑀻𑀡𑀸𑀲𑀯𑀸𑀯 𑀕𑀡𑁆𑀳𑀦𑁆𑀢𑀽’’𑀢𑀺 𑀯𑀼𑀢𑁆𑀢𑁂 𑀧𑀞𑀫𑀫𑁂𑀯 𑀲𑀻𑀳𑀦𑀸𑀤𑀁 𑀦𑀤𑀺𑀢𑁆𑀯𑀸 𑀲𑀮𑀸𑀓𑀁 𑀕𑀡𑁆𑀳𑀺. 𑀘𑀽𑀴𑀲𑀼𑀪𑀤𑁆𑀤𑀸𑀬 𑀦𑀺𑀫𑀦𑁆𑀢𑀺𑀢𑀤𑀺𑀯𑀲𑁂 𑀢𑀣𑀸𑀕𑀢𑁂 𑀲𑀸𑀓𑁂𑀢𑀁 𑀕𑀘𑁆𑀙𑀦𑁆𑀢𑁂𑀧𑀺 𑀧𑀜𑁆𑀘𑀦𑁆𑀦𑀁 𑀪𑀺𑀓𑁆𑀔𑀼𑀲𑀢𑀸𑀦𑀁 𑀅𑀦𑁆𑀢𑀭𑁂 𑀧𑀞𑀫𑀫𑁂𑀯 𑀲𑀮𑀸𑀓𑀁 𑀕𑀡𑁆𑀳𑀺, 𑀲𑀼𑀦𑀸𑀧𑀭𑀦𑁆𑀢𑀚𑀦𑀧𑀤𑀁 𑀕𑀘𑁆𑀙𑀦𑁆𑀢𑁂𑀧𑀺. 𑀇𑀫𑁂𑀳𑀺 𑀓𑀸𑀭𑀡𑁂𑀳𑀺 𑀣𑁂𑀭𑁄 𑀧𑀞𑀫𑀁 𑀲𑀮𑀸𑀓𑀁 𑀕𑀡𑁆𑀳𑀦𑁆𑀢𑀸𑀦𑀁 𑀅𑀕𑁆𑀕𑁄 𑀦𑀸𑀫 𑀚𑀸𑀢𑁄. 𑀓𑀼𑀡𑁆𑀟𑀥𑀸𑀦𑁄𑀢𑀺 𑀧𑀦𑀲𑁆𑀲 𑀦𑀸𑀫𑀁.

𑀢𑀲𑁆𑀲 𑀧𑀜𑁆𑀳𑀓𑀫𑁆𑀫𑁂 𑀅𑀬𑀫𑀦𑀼𑀧𑀼𑀩𑁆𑀩𑀺𑀓𑀣𑀸 𑁋 𑀅𑀬𑀁 𑀓𑀺𑀭 𑀧𑀤𑀼𑀫𑀼𑀢𑁆𑀢𑀭𑀩𑀼𑀤𑁆𑀥𑀓𑀸𑀮𑁂 𑀳𑀁𑀲𑀯𑀢𑀻𑀦𑀕𑀭𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀥𑀫𑁆𑀫𑀁 𑀲𑀼𑀡𑀦𑁆𑀢𑁄 𑀲𑀢𑁆𑀣𑀸𑀭𑀁 𑀏𑀓𑀁 𑀪𑀺𑀓𑁆𑀔𑀼𑀁 𑀧𑀞𑀫𑀁 𑀲𑀮𑀸𑀓𑀁 𑀕𑀡𑁆𑀳𑀦𑁆𑀢𑀸𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀦𑁆𑀢𑀁 𑀤𑀺𑀲𑁆𑀯𑀸 𑀩𑀼𑀤𑁆𑀥𑀸𑀦𑀁 𑀅𑀥𑀺𑀓𑀸𑀭𑀓𑀫𑁆𑀫𑀁 𑀓𑀢𑁆𑀯𑀸 𑀢𑀁 𑀞𑀸𑀦𑀦𑁆𑀢𑀭𑀁 𑀧𑀢𑁆𑀣𑁂𑀢𑁆𑀯𑀸 𑀲𑀢𑁆𑀣𑀸𑀭𑀸 𑀅𑀦𑀦𑁆𑀢𑀭𑀸𑀬𑀁 𑀤𑀺𑀲𑁆𑀯𑀸 𑀩𑁆𑀬𑀸𑀓𑀢𑁄 𑀬𑀸𑀯𑀚𑀻𑀯𑀁 𑀓𑀼𑀲𑀮𑀁 𑀓𑀢𑁆𑀯𑀸 𑀤𑁂𑀯𑁂𑀲𑀼 𑀘 𑀫𑀦𑀼𑀲𑁆𑀲𑁂𑀲𑀼 𑀘 𑀲𑀁𑀲𑀭𑀦𑁆𑀢𑁄 𑀓𑀲𑁆𑀲𑀧𑀩𑀼𑀤𑁆𑀥𑀓𑀸𑀮𑁂 𑀪𑀽𑀫𑀝𑁆𑀞𑀓𑀤𑁂𑀯𑀢𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀤𑀻𑀖𑀸𑀬𑀼𑀓𑀩𑀼𑀤𑁆𑀥𑀸𑀦𑀜𑁆𑀘 𑀦𑀸𑀫 𑀦 𑀅𑀦𑁆𑀯𑀤𑁆𑀥𑀫𑀸𑀲𑀺𑀓𑁄 𑀉𑀧𑁄𑀲𑀣𑁄 𑀳𑁄𑀢𑀺. 𑀯𑀺𑀧𑀲𑁆𑀲𑀻𑀤𑀲𑀩𑀮𑀲𑁆𑀲 𑀳𑀺 𑀙𑀩𑁆𑀩𑀲𑁆𑀲𑀦𑁆𑀢𑀭𑁂 𑀙𑀩𑁆𑀩𑀲𑁆𑀲𑀦𑁆𑀢𑀭𑁂 𑀉𑀧𑁄𑀲𑀣𑁄 𑀅𑀳𑁄𑀲𑀺, 𑀓𑀲𑁆𑀲𑀧𑀤𑀲𑀩𑀮𑁄 𑀧𑀦 𑀙𑀝𑁆𑀞𑁂 𑀙𑀝𑁆𑀞𑁂 𑀫𑀸𑀲𑁂 𑀧𑀸𑀢𑀺𑀫𑁄𑀓𑁆𑀔𑀁 𑀑𑀲𑀸𑀭𑁂𑀲𑀺. 𑀢𑀲𑁆𑀲 𑀧𑀸𑀢𑀺𑀫𑁄𑀓𑁆𑀔𑀁 𑀑𑀲𑀸𑀭𑀡𑀓𑀸𑀮𑁂 𑀤𑀺𑀲𑀸𑀯𑀸𑀲𑀺𑀓𑀸 𑀤𑁆𑀯𑁂 𑀲𑀳𑀸𑀬𑀓𑀸 𑀪𑀺𑀓𑁆𑀔𑀽 ‘‘𑀉𑀧𑁄𑀲𑀣𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀕𑀘𑁆𑀙𑀦𑁆𑀢𑀺. 𑀅𑀬𑀁 𑀪𑀼𑀫𑁆𑀫𑀤𑁂𑀯𑀢𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀇𑀫𑁂𑀲𑀁 𑀤𑁆𑀯𑀺𑀦𑁆𑀦𑀁 𑀪𑀺𑀓𑁆𑀔𑀽𑀦𑀁 𑀫𑁂𑀢𑁆𑀢𑀺 𑀅𑀢𑀺𑀯𑀺𑀬 𑀤𑀴𑁆𑀳𑀸, 𑀓𑀺𑀁 𑀦𑀼 𑀔𑁄 𑀪𑁂𑀤𑀓𑁂 𑀲𑀢𑀺 𑀪𑀺𑀚𑁆𑀚𑁂𑀬𑁆𑀬, 𑀦 𑀪𑀺𑀚𑁆𑀚𑁂𑀬𑁆𑀬𑀸’’𑀢𑀺? 𑀢𑁂𑀲𑀁 𑀑𑀓𑀸𑀲𑀁 𑀑𑀮𑁄𑀓𑀬𑀫𑀸𑀦𑀸 𑀢𑁂𑀲𑀁 𑀅𑀯𑀺𑀤𑀽𑀭𑁂𑀦𑁂𑀯 𑀕𑀘𑁆𑀙𑀢𑀺.

𑀅𑀣𑁂𑀓𑁄 𑀣𑁂𑀭𑁄 𑀏𑀓𑀲𑁆𑀲 𑀳𑀢𑁆𑀣𑁂 𑀧𑀢𑁆𑀢𑀘𑀻𑀯𑀭𑀁 𑀤𑀢𑁆𑀯𑀸 𑀲𑀭𑀻𑀭𑀯𑀴𑀜𑁆𑀚𑀦𑀢𑁆𑀣𑀁 𑀉𑀤𑀓𑀨𑀸𑀲𑀼𑀓𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀥𑁄𑀢𑀳𑀢𑁆𑀣𑀧𑀸𑀤𑁄 𑀳𑀼𑀢𑁆𑀯𑀸 𑀕𑀼𑀫𑁆𑀩𑀲𑀪𑀸𑀕𑀢𑁄 𑀦𑀺𑀓𑁆𑀔𑀫𑀢𑀺. 𑀪𑀼𑀫𑁆𑀫𑀤𑁂𑀯𑀢𑀸 𑀢𑀲𑁆𑀲 𑀣𑁂𑀭𑀲𑁆𑀲 𑀧𑀘𑁆𑀙𑀢𑁄 𑀧𑀘𑁆𑀙𑀢𑁄 𑀉𑀢𑁆𑀢𑀫𑀭𑀽𑀧𑀸 𑀇𑀢𑁆𑀣𑀻 𑀳𑀼𑀢𑁆𑀯𑀸 𑀓𑁂𑀲𑁂 𑀯𑀺𑀥𑀼𑀦𑀺𑀢𑁆𑀯𑀸 𑀲𑀁𑀯𑀺𑀥𑀸𑀬 𑀩𑀦𑁆𑀥𑀦𑁆𑀢𑀻 𑀯𑀺𑀬 𑀧𑀺𑀝𑁆𑀞𑀺𑀢𑁄 𑀧𑀁𑀲𑀼𑀁 𑀧𑀼𑀜𑁆𑀙𑀫𑀸𑀦𑀸 𑀯𑀺𑀬 𑀲𑀸𑀝𑀓𑀁 𑀲𑀁𑀯𑀺𑀥𑀸𑀬 𑀦𑀺𑀯𑀸𑀲𑀬𑀫𑀸𑀦𑀸 𑀯𑀺𑀬 𑀘 𑀳𑀼𑀢𑁆𑀯𑀸 𑀣𑁂𑀭𑀲𑁆𑀲 𑀧𑀤𑀸𑀦𑀼𑀧𑀤𑀺𑀓𑀸 𑀳𑀼𑀢𑁆𑀯𑀸 𑀕𑀼𑀫𑁆𑀩𑀢𑁄 𑀦𑀺𑀓𑁆𑀔𑀦𑁆𑀢𑀸. 𑀏𑀓𑀫𑀦𑁆𑀢𑁂 𑀞𑀺𑀢𑁄 𑀲𑀳𑀸𑀬𑀓𑀢𑁆𑀣𑁂𑀭𑁄 𑀇𑀫𑀁 𑀓𑀸𑀭𑀡𑀁 𑀤𑀺𑀲𑁆𑀯𑀸 𑀤𑁄𑀫𑀦𑀲𑁆𑀲𑀚𑀸𑀢𑁄 ‘‘𑀦𑀝𑁆𑀞𑁄 𑀤𑀸𑀦𑀺 𑀫𑁂 𑀇𑀫𑀺𑀦𑀸 𑀪𑀺𑀓𑁆𑀔𑀼𑀦𑀸 𑀲𑀤𑁆𑀥𑀺𑀁 𑀤𑀻𑀖𑀭𑀢𑁆𑀢𑀸𑀦𑀼𑀕𑀢𑁄 𑀲𑀺𑀦𑁂𑀳𑁄. 𑀲𑀘𑀸𑀳𑀁 𑀏𑀯𑀁𑀯𑀺𑀥𑀪𑀸𑀯𑀁 𑀚𑀸𑀦𑁂𑀬𑁆𑀬𑀁, 𑀏𑀢𑁆𑀢𑀓𑀁 𑀅𑀤𑁆𑀥𑀸𑀦𑀁 𑀇𑀫𑀺𑀦𑀸 𑀲𑀤𑁆𑀥𑀺𑀁 𑀯𑀺𑀲𑁆𑀲𑀸𑀲𑀁 𑀦 𑀓𑀭𑁂𑀬𑁆𑀬’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀆𑀕𑀘𑁆𑀙𑀦𑁆𑀢𑀲𑁆𑀲𑁂𑀯𑀲𑁆𑀲 ‘‘𑀳𑀦𑁆𑀤𑀸𑀯𑀼𑀲𑁄, 𑀢𑀼𑀬𑁆𑀳𑀁 𑀧𑀢𑁆𑀢𑀘𑀻𑀯𑀭𑀁, 𑀢𑀸𑀤𑀺𑀲𑁂𑀦 𑀧𑀸𑀧𑁂𑀦 𑀲𑀳𑀸𑀬𑁂𑀦 𑀲𑀤𑁆𑀥𑀺𑀁 𑀏𑀓𑀫𑀕𑁆𑀕𑀁 𑀦 𑀕𑀘𑁆𑀙𑀸𑀫𑀻’’𑀢𑀺 𑀆𑀳. 𑀢𑀁 𑀓𑀣𑀁 𑀲𑀼𑀢𑁆𑀯𑀸 𑀢𑀲𑁆𑀲 𑀮𑀚𑁆𑀚𑀺𑀪𑀺𑀓𑁆𑀔𑀼𑀦𑁄 𑀳𑀤𑀬𑀁 𑀢𑀺𑀔𑀺𑀡𑀲𑀢𑁆𑀢𑀺𑀁 𑀕𑀳𑁂𑀢𑁆𑀯𑀸 𑀯𑀺𑀤𑁆𑀥𑀁 𑀯𑀺𑀬 𑀅𑀳𑁄𑀲𑀺. 𑀢𑀢𑁄 𑀦𑀁 𑀆𑀳 𑁋 ‘‘𑀆𑀯𑀼𑀲𑁄, 𑀓𑀺𑀁 𑀦𑀸𑀫𑁂𑀢𑀁 𑀯𑀤𑀲𑀺, 𑀅𑀳𑀁 𑀏𑀢𑁆𑀢𑀓𑀁 𑀓𑀸𑀮𑀁 𑀤𑀼𑀓𑁆𑀓𑀝𑀫𑀢𑁆𑀢𑀫𑁆𑀧𑀺 𑀆𑀧𑀢𑁆𑀢𑀺𑀁 𑀦 𑀚𑀸𑀦𑀸𑀫𑀺. 𑀢𑁆𑀯𑀁 𑀧𑀦 𑀫𑀁 𑀅𑀚𑁆𑀚 ‘𑀧𑀸𑀧𑁄’𑀢𑀺 𑀯𑀤𑀲𑀺, 𑀓𑀺𑀁 𑀢𑁂 𑀤𑀺𑀝𑁆𑀞’’𑀦𑁆𑀢𑀺? 𑀓𑀺𑀁 𑀅𑀜𑁆𑀜𑁂𑀦 𑀤𑀺𑀝𑁆𑀞𑁂𑀦, 𑀓𑀺𑀁 𑀢𑁆𑀯𑀁 𑀏𑀯𑀁𑀯𑀺𑀥𑁂𑀦 𑀅𑀮𑀗𑁆𑀓𑀢𑀧𑀝𑀺𑀬𑀢𑁆𑀢𑁂𑀦 𑀫𑀸𑀢𑀼𑀕𑀸𑀫𑁂𑀦 𑀲𑀤𑁆𑀥𑀺𑀁 𑀏𑀓𑀝𑁆𑀞𑀸𑀦𑁂 𑀳𑀼𑀢𑁆𑀯𑀸 𑀦𑀺𑀓𑁆𑀔𑀦𑁆𑀢𑁄𑀢𑀺? 𑀦𑀢𑁆𑀣𑁂𑀢𑀁, 𑀆𑀯𑀼𑀲𑁄, 𑀫𑀬𑁆𑀳𑀁, 𑀦𑀸𑀳𑀁 𑀏𑀯𑀭𑀽𑀧𑀁 𑀫𑀸𑀢𑀼𑀕𑀸𑀫𑀁 𑀧𑀲𑁆𑀲𑀸𑀫𑀻𑀢𑀺. 𑀢𑀲𑁆𑀲 𑀬𑀸𑀯𑀢𑀢𑀺𑀬𑀁 𑀓𑀣𑁂𑀦𑁆𑀢𑀲𑁆𑀲𑀸𑀧𑀺 𑀇𑀢𑀭𑁄 𑀣𑁂𑀭𑁄 𑀓𑀣𑀁 𑀅𑀲𑀤𑁆𑀤𑀳𑀺𑀢𑁆𑀯𑀸 𑀅𑀢𑁆𑀢𑀦𑀸 𑀤𑀺𑀝𑁆𑀞𑀓𑀸𑀭𑀡𑀁𑀬𑁂𑀯 𑀅𑀢𑁆𑀣𑀁 𑀕𑀳𑁂𑀢𑁆𑀯𑀸 𑀢𑁂𑀦 𑀲𑀤𑁆𑀥𑀺𑀁 𑀏𑀓𑀫𑀕𑁆𑀕𑁂𑀦 𑀅𑀕𑀦𑁆𑀢𑁆𑀯𑀸 𑀅𑀜𑁆𑀜𑁂𑀦 𑀫𑀕𑁆𑀕𑁂𑀦 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀢𑁄. 𑀇𑀢𑀭𑁄𑀧𑀺 𑀅𑀜𑁆𑀜𑁂𑀦 𑀫𑀕𑁆𑀕𑁂𑀦 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁𑀬𑁂𑀯 𑀕𑀢𑁄.

𑀢𑀢𑁄 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀉𑀧𑁄𑀲𑀣𑀸𑀕𑀸𑀭𑀁 𑀧𑀯𑀺𑀲𑀦𑀯𑁂𑀮𑀸𑀬 𑀲𑁄 𑀪𑀺𑀓𑁆𑀔𑀼 𑀢𑀁 𑀪𑀺𑀓𑁆𑀔𑀼𑀁 𑀉𑀧𑁄𑀲𑀣𑀕𑁆𑀕𑁂 𑀲𑀜𑁆𑀚𑀸𑀦𑀺𑀢𑁆𑀯𑀸 ‘‘𑀇𑀫𑀲𑁆𑀫𑀺𑀁 𑀉𑀧𑁄𑀲𑀣𑀕𑁆𑀕𑁂 𑀏𑀯𑀭𑀽𑀧𑁄 𑀦𑀸𑀫 𑀧𑀸𑀧𑀪𑀺𑀓𑁆𑀔𑀼 𑀅𑀢𑁆𑀣𑀺, 𑀦𑀸𑀳𑀁 𑀢𑁂𑀦 𑀲𑀤𑁆𑀥𑀺𑀁 𑀉𑀧𑁄𑀲𑀣𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀦𑀺𑀓𑁆𑀔𑀫𑀺𑀢𑁆𑀯𑀸 𑀩𑀳𑀺 𑀅𑀝𑁆𑀞𑀸𑀲𑀺. 𑀪𑀼𑀫𑁆𑀫𑀤𑁂𑀯𑀢𑀸 ‘‘𑀪𑀸𑀭𑀺𑀬𑀁 𑀫𑀬𑀸 𑀓𑀫𑁆𑀫𑀁 𑀓𑀢’’𑀦𑁆𑀢𑀺 𑀫𑀳𑀮𑁆𑀮𑀓𑀉𑀧𑀸𑀲𑀓𑀯𑀡𑁆𑀡𑁂𑀦 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀓𑀲𑁆𑀫𑀸, 𑀪𑀦𑁆𑀢𑁂, 𑀅𑀬𑁆𑀬𑁄 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀞𑀺𑀢𑁄’’𑀢𑀺 𑀆𑀳. 𑀉𑀧𑀸𑀲𑀓, 𑀇𑀫𑀁 𑀉𑀧𑁄𑀲𑀣𑀕𑁆𑀕𑀁 𑀏𑀓𑁄 𑀧𑀸𑀧𑀪𑀺𑀓𑁆𑀔𑀼 𑀧𑀯𑀺𑀝𑁆𑀞𑁄, 𑀅𑀳𑀁 𑀢𑁂𑀦 𑀲𑀤𑁆𑀥𑀺𑀁 𑀉𑀧𑁄𑀲𑀣𑀁 𑀦 𑀓𑀭𑁄𑀫𑀻𑀢𑀺 𑀯𑀢𑁆𑀯𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀩𑀳𑀺 𑀞𑀺𑀢𑁄𑀫𑁆𑀳𑀻𑀢𑀺. 𑀪𑀦𑁆𑀢𑁂, 𑀫𑀸 𑀏𑀯𑀁 𑀕𑀡𑁆𑀳𑀣, 𑀧𑀭𑀺𑀲𑀼𑀤𑁆𑀥𑀲𑀻𑀮𑁄 𑀏𑀲 𑀪𑀺𑀓𑁆𑀔𑀼. 𑀢𑀼𑀫𑁆𑀳𑁂𑀳𑀺 𑀤𑀺𑀝𑁆𑀞𑀫𑀸𑀢𑀼𑀕𑀸𑀫𑁄 𑀦𑀸𑀫 𑀅𑀳𑀁, 𑀫𑀬𑀸 𑀢𑀼𑀫𑁆𑀳𑀸𑀓𑀁 𑀯𑀻𑀫𑀁𑀲𑀦𑀢𑁆𑀣𑀸𑀬 ‘‘𑀤𑀴𑁆𑀳𑀸 𑀦𑀼 𑀔𑁄 𑀇𑀫𑁂𑀲𑀁 𑀣𑁂𑀭𑀸𑀦𑀁 𑀫𑁂𑀢𑁆𑀢𑀺, 𑀦𑁄 𑀤𑀴𑁆𑀳𑀸’’𑀢𑀺 𑀮𑀚𑁆𑀚𑀺𑀅𑀮𑀚𑁆𑀚𑀺𑀪𑀸𑀯𑀁 𑀑𑀮𑁄𑀓𑁂𑀦𑁆𑀢𑁂𑀦 𑀢𑀁 𑀓𑀫𑁆𑀫𑀁 𑀓𑀢𑀦𑁆𑀢𑀺. 𑀓𑁄 𑀧𑀦 𑀢𑁆𑀯𑀁 𑀲𑀧𑁆𑀧𑀼𑀭𑀺𑀲𑀸𑀢𑀺? 𑀅𑀳𑀁 𑀏𑀓𑀸 𑀪𑀼𑀫𑁆𑀫𑀤𑁂𑀯𑀢𑀸, 𑀪𑀦𑁆𑀢𑁂𑀢𑀺. 𑀤𑁂𑀯𑀧𑀼𑀢𑁆𑀢𑁄 𑀓𑀣𑁂𑀦𑁆𑀢𑁄𑀯 𑀤𑀺𑀩𑁆𑀩𑀸𑀦𑀼𑀪𑀸𑀯𑁂𑀦 𑀞𑀢𑁆𑀯𑀸 𑀣𑁂𑀭𑀲𑁆𑀲 𑀧𑀸𑀤𑁂𑀲𑀼 𑀧𑀢𑀺𑀢𑁆𑀯𑀸 ‘‘𑀫𑀬𑁆𑀳𑀁, 𑀪𑀦𑁆𑀢𑁂, 𑀔𑀫𑀣, 𑀏𑀢𑀁 𑀤𑁄𑀲𑀁 𑀣𑁂𑀭𑁄 𑀦 𑀚𑀸𑀦𑀸𑀢𑀺, 𑀉𑀧𑁄𑀲𑀣𑀁 𑀓𑀭𑁄𑀣𑀸’’𑀢𑀺 𑀣𑁂𑀭𑀁 𑀬𑀸𑀘𑀺𑀢𑁆𑀯𑀸 𑀉𑀧𑁄𑀲𑀣𑀕𑁆𑀕𑀁 𑀧𑀯𑁂𑀲𑁂𑀲𑀺. 𑀲𑁄 𑀣𑁂𑀭𑁄 𑀉𑀧𑁄𑀲𑀣𑀁 𑀢𑀸𑀯 𑀏𑀓𑀝𑁆𑀞𑀸𑀦𑁂 𑀅𑀓𑀸𑀲𑀺, 𑀫𑀺𑀢𑁆𑀢𑀲𑀦𑁆𑀣𑀯𑀯𑀲𑁂𑀦 𑀦 𑀧𑀼𑀦 𑀢𑁂𑀦 𑀲𑀤𑁆𑀥𑀺𑀁 𑀏𑀓𑀝𑁆𑀞𑀸𑀦𑁂 𑀅𑀳𑁄𑀲𑀻𑀢𑀺. 𑀇𑀫𑀲𑁆𑀲 𑀣𑁂𑀭𑀲𑁆𑀲 𑀓𑀫𑁆𑀫𑀁 𑀦 𑀓𑀣𑀺𑀬𑀢𑀺, 𑀘𑀼𑀤𑀺𑀢𑀓𑀢𑁆𑀣𑁂𑀭𑁄 𑀧𑀦 𑀅𑀧𑀭𑀸𑀧𑀭𑀁 𑀯𑀺𑀧𑀲𑁆𑀲𑀦𑀸𑀬 𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺.

𑀪𑀼𑀫𑁆𑀫𑀤𑁂𑀯𑀢𑀸 𑀢𑀲𑁆𑀲 𑀓𑀫𑁆𑀫𑀲𑁆𑀲 𑀦𑀺𑀲𑁆𑀲𑀦𑁆𑀤𑁂𑀦 𑀏𑀓𑀁 𑀩𑀼𑀤𑁆𑀥𑀦𑁆𑀢𑀭𑀁 𑀅𑀧𑀸𑀬𑀢𑁄 𑀦 𑀫𑀼𑀘𑁆𑀘𑀺𑀢𑁆𑀣. 𑀲𑀘𑁂 𑀧𑀦 𑀓𑀸𑀮𑁂𑀦 𑀓𑀸𑀮𑀁 𑀫𑀦𑀼𑀲𑁆𑀲𑀢𑁆𑀢𑀁 𑀆𑀕𑀘𑁆𑀙𑀢𑀺, 𑀅𑀜𑁆𑀜𑁂𑀦 𑀬𑁂𑀦 𑀓𑁂𑀦𑀘𑀺 𑀓𑀢𑁄 𑀤𑁄𑀲𑁄 𑀢𑀲𑁆𑀲𑁂𑀯 𑀉𑀧𑀭𑀺 𑀧𑀢𑀢𑀺. 𑀲𑁄 𑀅𑀫𑁆𑀳𑀸𑀓𑀁 𑀪𑀕𑀯𑀢𑁄 𑀓𑀸𑀮𑁂 𑀲𑀸𑀯𑀢𑁆𑀣𑀺𑀬𑀁 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺, 𑀥𑀸𑀦𑀫𑀸𑀡𑀯𑁄𑀢𑀺𑀲𑁆𑀲 𑀦𑀸𑀫𑀁 𑀅𑀓𑀁𑀲𑀼. 𑀲𑁄 𑀯𑀬𑀧𑁆𑀧𑀢𑁆𑀢𑁄 𑀢𑀬𑁄 𑀯𑁂𑀤𑁂 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀫𑀳𑀮𑁆𑀮𑀓𑀓𑀸𑀮𑁂 𑀲𑀢𑁆𑀣𑀼 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀧𑀝𑀺𑀮𑀤𑁆𑀥𑀲𑀤𑁆𑀥𑁄 𑀧𑀩𑁆𑀩𑀚𑀺, 𑀢𑀲𑁆𑀲 𑀉𑀧𑀲𑀫𑁆𑀧𑀦𑁆𑀦𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀏𑀓𑀸 𑀅𑀮𑀗𑁆𑀓𑀢𑀧𑀝𑀺𑀬𑀢𑁆𑀢𑀸 𑀇𑀢𑁆𑀣𑀻 𑀢𑀲𑁆𑀫𑀺𑀁 𑀕𑀸𑀫𑀁 𑀧𑀯𑀺𑀲𑀦𑁆𑀢𑁂 𑀲𑀤𑁆𑀥𑀺𑀁𑀬𑁂𑀯 𑀕𑀸𑀫𑀁 𑀧𑀯𑀺𑀲𑀢𑀺, 𑀦𑀺𑀓𑁆𑀔𑀫𑀦𑁆𑀢𑁂 𑀦𑀺𑀓𑁆𑀔𑀫𑀢𑀺. 𑀯𑀺𑀳𑀸𑀭𑀁 𑀧𑀯𑀺𑀲𑀦𑁆𑀢𑁂𑀧𑀺 𑀧𑀯𑀺𑀲𑀢𑀺, 𑀢𑀺𑀝𑁆𑀞𑀦𑁆𑀢𑁂𑀧𑀺 𑀢𑀺𑀝𑁆𑀞𑀢𑀻𑀢𑀺 𑀏𑀯𑀁 𑀦𑀺𑀘𑁆𑀘𑀸𑀦𑀼𑀩𑀦𑁆𑀥𑀸 𑀧𑀜𑁆𑀜𑀸𑀬𑀢𑀺. 𑀣𑁂𑀭𑁄 𑀢𑀁 𑀦 𑀧𑀲𑁆𑀲𑀢𑀺, 𑀢𑀲𑁆𑀲 𑀧𑀦 𑀧𑀼𑀭𑀺𑀫𑀲𑁆𑀲 𑀓𑀫𑁆𑀫𑀲𑁆𑀲 𑀦𑀺𑀲𑁆𑀲𑀦𑁆𑀤𑁂𑀦 𑀲𑀸 𑀅𑀜𑁆𑀜𑁂𑀲𑀁 𑀉𑀧𑀝𑁆𑀞𑀸𑀢𑀺.

𑀕𑀸𑀫𑁂 𑀬𑀸𑀕𑀼𑀪𑀺𑀓𑁆𑀔𑀁 𑀤𑀤𑀫𑀸𑀦𑀸 𑀇𑀢𑁆𑀣𑀺𑀬𑁄, ‘‘𑀪𑀦𑁆𑀢𑁂, 𑀅𑀬𑀁 𑀏𑀓𑁄 𑀬𑀸𑀕𑀼𑀉𑀴𑀼𑀗𑁆𑀓𑁄 𑀢𑀼𑀫𑁆𑀳𑀸𑀓𑀁, 𑀏𑀓𑁄 𑀇𑀫𑀺𑀲𑁆𑀲𑀸 𑀅𑀫𑁆𑀳𑀸𑀓𑀁 𑀲𑀳𑀸𑀬𑀺𑀓𑀸𑀬𑀸’’𑀢𑀺 𑀧𑀭𑀺𑀳𑀸𑀲𑀁 𑀓𑀭𑁄𑀦𑁆𑀢𑀺. 𑀣𑁂𑀭𑀲𑁆𑀲 𑀫𑀳𑀢𑀻 𑀯𑀺𑀳𑁂𑀲𑀸 𑀳𑁄𑀢𑀺. 𑀯𑀺𑀳𑀸𑀭𑀁 𑀕𑀢𑀫𑁆𑀧𑀺 𑀦𑀁 𑀲𑀸𑀫𑀡𑁂𑀭𑀸 𑀘𑁂𑀯 𑀤𑀳𑀭𑀪𑀺𑀓𑁆𑀔𑀽 𑀘 𑀧𑀭𑀺𑀯𑀸𑀭𑁂𑀢𑁆𑀯𑀸 ‘‘𑀥𑀸𑀦𑁄 𑀓𑁄𑀡𑁆𑀟𑁄 𑀚𑀸𑀢𑁄’’𑀢𑀺 𑀧𑀭𑀺𑀳𑀸𑀲𑀁 𑀓𑀭𑁄𑀦𑁆𑀢𑀺. 𑀅𑀣𑀲𑁆𑀲 𑀢𑁂𑀦𑁂𑀯 𑀓𑀸𑀭𑀡𑁂𑀦 𑀓𑀼𑀡𑁆𑀟𑀥𑀸𑀦𑀢𑁆𑀣𑁂𑀭𑁄𑀢𑀺 𑀦𑀸𑀫𑀁 𑀚𑀸𑀢𑀁. 𑀲𑁄 𑀉𑀝𑁆𑀞𑀸𑀬 𑀲𑀫𑀼𑀝𑁆𑀞𑀸𑀬 𑀢𑁂𑀳𑀺 𑀓𑀬𑀺𑀭𑀫𑀸𑀦𑀁 𑀓𑁂𑀴𑀺𑀁 𑀲𑀳𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀉𑀫𑁆𑀫𑀸𑀤𑀁 𑀕𑀳𑁂𑀢𑁆𑀯𑀸 ‘‘𑀢𑀼𑀫𑁆𑀳𑁂 𑀓𑁄𑀡𑁆𑀟𑀸, 𑀢𑀼𑀫𑁆𑀳𑀸𑀓𑀁 𑀉𑀧𑀚𑁆𑀛𑀸𑀬𑀸 𑀓𑁄𑀡𑁆𑀟𑀸, 𑀆𑀘𑀭𑀺𑀬𑀸 𑀓𑁄𑀡𑁆𑀟𑀸’’𑀢𑀺 𑀯𑀤𑀢𑀺. 𑀅𑀣 𑀦𑀁 𑀲𑀢𑁆𑀣𑀼 𑀆𑀭𑁄𑀘𑁂𑀲𑀼𑀁 𑁋 ‘‘𑀓𑀼𑀡𑁆𑀟𑀥𑀸𑀦𑁄 𑀤𑀳𑀭𑀲𑀸𑀫𑀡𑁂𑀭𑁂𑀳𑀺 𑀲𑀤𑁆𑀥𑀺𑀁 𑀏𑀯𑀁 𑀨𑀭𑀼𑀲𑀯𑀸𑀘𑀁 𑀯𑀤𑀢𑀻’’𑀢𑀺. 𑀲𑀢𑁆𑀣𑀸 𑀢𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀲𑀘𑁆𑀘𑀁 𑀪𑀺𑀓𑁆𑀔𑀽’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀲𑀘𑁆𑀘𑀁 𑀪𑀕𑀯𑀸’’𑀢𑀺 𑀯𑀼𑀢𑁆𑀢𑁂 ‘‘𑀓𑀲𑁆𑀫𑀸 𑀏𑀯𑀁 𑀯𑀤𑁂𑀲𑀻’’𑀢𑀺 𑀆𑀳. 𑀪𑀦𑁆𑀢𑁂, 𑀦𑀺𑀩𑀤𑁆𑀥𑀁 𑀯𑀺𑀳𑁂𑀲𑀁 𑀅𑀲𑀳𑀦𑁆𑀢𑁄 𑀏𑀯𑀁 𑀓𑀣𑁂𑀫𑀻𑀢𑀺. ‘‘𑀢𑁆𑀯𑀁 𑀧𑀼𑀩𑁆𑀩𑁂 𑀓𑀢𑀓𑀫𑁆𑀫𑀁 𑀬𑀸𑀯𑀚𑁆𑀚𑀤𑀺𑀯𑀲𑀸 𑀚𑀻𑀭𑀸𑀧𑁂𑀢𑀼𑀁 𑀦 𑀲𑀓𑁆𑀓𑁄𑀲𑀺, 𑀧𑀼𑀦 𑀏𑀯𑀭𑀽𑀧𑀁 𑀨𑀭𑀼𑀲𑀁 𑀫𑀸 𑀯𑀤 𑀪𑀺𑀓𑁆𑀔𑀽’’𑀢𑀺 𑀯𑀢𑁆𑀯𑀸 𑀆𑀳 𑁋

‘‘𑀫𑀸𑀯𑁄𑀘 𑀨𑀭𑀼𑀲𑀁 𑀓𑀜𑁆𑀘𑀺, 𑀯𑀼𑀢𑁆𑀢𑀸 𑀧𑀝𑀺𑀯𑀤𑁂𑀬𑁆𑀬𑀼 𑀢𑀁;

𑀤𑀼𑀓𑁆𑀔𑀸 𑀳𑀺 𑀲𑀸𑀭𑀫𑁆𑀪𑀓𑀣𑀸, 𑀧𑀝𑀺𑀤𑀡𑁆𑀟𑀸 𑀨𑀼𑀲𑁂𑀬𑁆𑀬𑀼 𑀢𑀁.

‘‘𑀲𑀘𑁂 𑀦𑁂𑀭𑁂𑀲𑀺 𑀅𑀢𑁆𑀢𑀸𑀦𑀁, 𑀓𑀁𑀲𑁄 𑀉𑀧𑀳𑀢𑁄 𑀬𑀣𑀸;

𑀏𑀲 𑀧𑀢𑁆𑀢𑁄𑀲𑀺 𑀦𑀺𑀩𑁆𑀩𑀸𑀦𑀁, 𑀲𑀸𑀭𑀫𑁆𑀪𑁄 𑀢𑁂 𑀦 𑀯𑀺𑀚𑁆𑀚𑀢𑀻’’𑀢𑀺. (𑀥. 𑀧. 𑁧𑁩𑁩-𑁧𑁩𑁪);

𑀇𑀫𑀜𑁆𑀘 𑀧𑀦 𑀢𑀲𑁆𑀲 𑀣𑁂𑀭𑀲𑁆𑀲 𑀫𑀸𑀢𑀼𑀕𑀸𑀫𑁂𑀦 𑀲𑀤𑁆𑀥𑀺𑀁 𑀯𑀺𑀘𑀭𑀡𑀪𑀸𑀯𑀁 𑀓𑁄𑀲𑀮𑀭𑀜𑁆𑀜𑁄𑀧𑀺 𑀓𑀣𑀬𑀺𑀁𑀲𑀼. 𑀭𑀸𑀚𑀸 ‘‘𑀕𑀘𑁆𑀙𑀣, 𑀪𑀡𑁂, 𑀯𑀻𑀫𑀁𑀲𑀣𑀸’’𑀢𑀺 𑀧𑁂𑀲𑁂𑀢𑁆𑀯𑀸 𑀲𑀬𑀫𑁆𑀧𑀺 𑀫𑀦𑁆𑀤𑁂𑀦𑁂𑀯 𑀧𑀭𑀺𑀯𑀸𑀭𑁂𑀦 𑀲𑀤𑁆𑀥𑀺𑀁 𑀣𑁂𑀭𑀲𑁆𑀲 𑀯𑀲𑀦𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀏𑀓𑀫𑀦𑁆𑀢𑁂 𑀑𑀮𑁄𑀓𑁂𑀦𑁆𑀢𑁄 𑀅𑀝𑁆𑀞𑀸𑀲𑀺. 𑀢𑀲𑁆𑀫𑀺𑀁 𑀔𑀡𑁂 𑀣𑁂𑀭𑁄 𑀲𑀽𑀘𑀺𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺, 𑀲𑀸𑀧𑀺𑀲𑁆𑀲 𑀇𑀢𑁆𑀣𑀻 𑀅𑀯𑀺𑀤𑀽𑀭𑁂 𑀞𑀸𑀦𑁂 𑀞𑀺𑀢𑀸 𑀯𑀺𑀬 𑀧𑀜𑁆𑀜𑀸𑀬𑀢𑀺.

𑀭𑀸𑀚𑀸 𑀢𑀁 𑀤𑀺𑀲𑁆𑀯𑀸 ‘‘𑀅𑀢𑁆𑀣𑀺𑀤𑀁 𑀓𑀸𑀭𑀡’’𑀦𑁆𑀢𑀺 𑀢𑀲𑁆𑀲𑀸 𑀞𑀺𑀢𑀝𑁆𑀞𑀸𑀦𑀁 𑀅𑀕𑀫𑀸𑀲𑀺. 𑀲𑀸 𑀢𑀲𑁆𑀫𑀺𑀁 𑀆𑀕𑀘𑁆𑀙𑀦𑁆𑀢𑁂 𑀣𑁂𑀭𑀲𑁆𑀲 𑀯𑀲𑀦𑀧𑀡𑁆𑀡𑀲𑀸𑀮𑀁 𑀧𑀯𑀺𑀝𑁆𑀞𑀸 𑀯𑀺𑀬 𑀅𑀳𑁄𑀲𑀺. 𑀭𑀸𑀚𑀸𑀧𑀺 𑀢𑀸𑀬 𑀲𑀤𑁆𑀥𑀺𑀁𑀬𑁂𑀯 𑀧𑀡𑁆𑀡𑀲𑀸𑀮𑀁 𑀧𑀯𑀺𑀲𑀺𑀢𑁆𑀯𑀸 𑀲𑀩𑁆𑀩𑀢𑁆𑀣 𑀑𑀮𑁄𑀓𑁂𑀦𑁆𑀢𑁄 𑀅𑀤𑀺𑀲𑁆𑀯𑀸 ‘‘𑀦𑀸𑀬𑀁 𑀫𑀸𑀢𑀼𑀕𑀸𑀫𑁄, 𑀣𑁂𑀭𑀲𑁆𑀲 𑀏𑀓𑁄 𑀓𑀫𑁆𑀫𑀯𑀺𑀧𑀸𑀓𑁄’’𑀢𑀺 𑀲𑀜𑁆𑀜𑀁 𑀓𑀢𑁆𑀯𑀸 𑀧𑀞𑀫𑀁 𑀣𑁂𑀭𑀲𑁆𑀲 𑀲𑀫𑀻𑀧𑁂𑀦 𑀕𑀘𑁆𑀙𑀦𑁆𑀢𑁄𑀧𑀺 𑀣𑁂𑀭𑀁 𑀅𑀯𑀦𑁆𑀤𑀺𑀢𑁆𑀯𑀸 𑀢𑀲𑁆𑀲 𑀓𑀸𑀭𑀡𑀲𑁆𑀲 𑀅𑀪𑀽𑀢𑀪𑀸𑀯𑀁 𑀜𑀢𑁆𑀯𑀸 𑀆𑀕𑀫𑁆𑀫 𑀣𑁂𑀭𑀁 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 ‘‘𑀓𑀘𑁆𑀘𑀺, 𑀪𑀦𑁆𑀢𑁂, 𑀧𑀺𑀡𑁆𑀟𑀓𑁂𑀦 𑀦 𑀓𑀺𑀮𑀫𑀣𑀸’’𑀢𑀺 𑀧𑀼𑀘𑁆𑀙𑀺. 𑀣𑁂𑀭𑁄 ‘‘𑀯𑀝𑁆𑀝𑀢𑀺 𑀫𑀳𑀸𑀭𑀸𑀚𑀸’’𑀢𑀺 𑀆𑀳. ‘‘𑀚𑀸𑀦𑀸𑀫𑀺, 𑀪𑀦𑁆𑀢𑁂, 𑀅𑀬𑁆𑀬𑀲𑁆𑀲 𑀓𑀣𑀁, 𑀏𑀯𑀭𑀽𑀧𑁂𑀦 𑀘 𑀧𑀭𑀺𑀓𑁆𑀓𑀺𑀮𑁂𑀲𑁂𑀦 𑀲𑀤𑁆𑀥𑀺𑀁 𑀘𑀭𑀦𑁆𑀢𑀸𑀦𑀁 𑀢𑀼𑀫𑁆𑀳𑀸𑀓𑀁 𑀓𑁂 𑀦𑀸𑀫 𑀧𑀲𑀻𑀤𑀺𑀲𑁆𑀲𑀦𑁆𑀢𑀺, 𑀇𑀢𑁄 𑀧𑀝𑁆𑀞𑀸𑀬 𑀯𑁄 𑀓𑀢𑁆𑀣𑀘𑀺 𑀕𑀫𑀦𑀓𑀺𑀘𑁆𑀘𑀁 𑀦𑀢𑁆𑀣𑀺, 𑀅𑀳𑀁 𑀘𑀢𑀽𑀳𑀺 𑀧𑀘𑁆𑀘𑀬𑁂𑀳𑀺 𑀉𑀧𑀝𑁆𑀞𑀳𑀺𑀲𑁆𑀲𑀸𑀫𑀺, 𑀢𑀼𑀫𑁆𑀳𑁂 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁂 𑀫𑀸 𑀧𑀫𑀚𑁆𑀚𑀺𑀢𑁆𑀣𑀸’’𑀢𑀺 𑀦𑀺𑀩𑀤𑁆𑀥𑀁 𑀪𑀺𑀓𑁆𑀔𑀁 𑀧𑀝𑁆𑀞𑀧𑁂𑀲𑀺. 𑀣𑁂𑀭𑁄 𑀭𑀸𑀚𑀸𑀦𑀁 𑀉𑀧𑀢𑁆𑀣𑀫𑁆𑀪𑀓𑀁 𑀮𑀪𑀺𑀢𑁆𑀯𑀸 𑀪𑁄𑀚𑀦𑀲𑀧𑁆𑀧𑀸𑀬𑁂𑀦 𑀏𑀓𑀕𑁆𑀕𑀘𑀺𑀢𑁆𑀢𑁄 𑀳𑀼𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀢𑀢𑁄 𑀧𑀝𑁆𑀞𑀸𑀬 𑀲𑀸 𑀇𑀢𑁆𑀣𑀻 𑀅𑀦𑁆𑀢𑀭𑀥𑀸𑀬𑀺.

𑀫𑀳𑀸𑀲𑀼𑀪𑀤𑁆𑀤𑀸 𑀉𑀕𑁆𑀕𑀦𑀕𑀭𑁂 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀼𑀮𑁂 𑀯𑀲𑀫𑀸𑀦𑀸 ‘‘𑀲𑀢𑁆𑀣𑀸 𑀫𑀁 𑀅𑀦𑀼𑀓𑀫𑁆𑀧𑀢𑀽’’𑀢𑀺 𑀉𑀧𑁄𑀲𑀣𑀁 𑀅𑀥𑀺𑀝𑁆𑀞𑀸𑀬 𑀦𑀺𑀭𑀸𑀫𑀕𑀦𑁆𑀥𑀸 𑀳𑀼𑀢𑁆𑀯𑀸 𑀉𑀧𑀭𑀺𑀧𑀸𑀲𑀸𑀤𑀢𑀮𑁂 𑀞𑀺𑀢𑀸 ‘‘𑀇𑀫𑀸𑀦𑀺 𑀧𑀼𑀧𑁆𑀨𑀸𑀦𑀺 𑀅𑀦𑁆𑀢𑀭𑁂 𑀅𑀝𑁆𑀞𑀢𑁆𑀯𑀸 𑀤𑀲𑀩𑀮𑀲𑁆𑀲 𑀫𑀢𑁆𑀣𑀓𑁂 𑀯𑀺𑀢𑀸𑀦𑀁 𑀳𑀼𑀢𑁆𑀯𑀸 𑀢𑀺𑀝𑁆𑀞𑀦𑁆𑀢𑀼, 𑀤𑀲𑀩𑀮𑁄 𑀇𑀫𑀸𑀬 𑀲𑀜𑁆𑀜𑀸𑀬 𑀲𑁆𑀯𑁂 𑀧𑀜𑁆𑀘𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺 𑀲𑀤𑁆𑀥𑀺𑀁 𑀫𑀬𑁆𑀳𑀁 𑀪𑀺𑀓𑁆𑀔𑀁 𑀕𑀡𑁆𑀳𑀢𑀽’’𑀢𑀺 𑀲𑀘𑁆𑀘𑀓𑀺𑀭𑀺𑀬𑀁 𑀓𑀢𑁆𑀯𑀸 𑀅𑀝𑁆𑀞 𑀲𑀼𑀫𑀦𑀧𑀼𑀧𑁆𑀨𑀫𑀼𑀝𑁆𑀞𑀺𑀬𑁄 𑀯𑀺𑀲𑁆𑀲𑀚𑁆𑀚𑁂𑀲𑀺. 𑀧𑀼𑀧𑁆𑀨𑀸𑀦𑀺 𑀕𑀦𑁆𑀢𑁆𑀯𑀸 𑀥𑀫𑁆𑀫𑀤𑁂𑀲𑀦𑀸𑀯𑁂𑀮𑀸𑀬 𑀲𑀢𑁆𑀣𑀼 𑀫𑀢𑁆𑀣𑀓𑁂 𑀯𑀺𑀢𑀸𑀦𑀁 𑀳𑀼𑀢𑁆𑀯𑀸 𑀅𑀝𑁆𑀞𑀁𑀲𑀼. 𑀲𑀢𑁆𑀣𑀸 𑀢𑀁 𑀲𑀼𑀫𑀦𑀧𑀼𑀧𑁆𑀨𑀯𑀺𑀢𑀸𑀦𑀁 𑀤𑀺𑀲𑁆𑀯𑀸 𑀘𑀺𑀢𑁆𑀢𑁂𑀦𑁂𑀯 𑀲𑀼𑀪𑀤𑁆𑀤𑀸𑀬 𑀪𑀺𑀓𑁆𑀔𑀁 𑀅𑀥𑀺𑀯𑀸𑀲𑁂𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀅𑀭𑀼𑀡𑁂 𑀉𑀝𑁆𑀞𑀺𑀢𑁂 𑀆𑀦𑀦𑁆𑀤𑀢𑁆𑀣𑁂𑀭𑀁 𑀆𑀳 𑁋 ‘‘𑀆𑀦𑀦𑁆𑀤, 𑀫𑀬𑀁 𑀅𑀚𑁆𑀚 𑀤𑀽𑀭𑀁 𑀪𑀺𑀓𑁆𑀔𑀸𑀘𑀸𑀭𑀁 𑀕𑀫𑀺𑀲𑁆𑀲𑀸𑀫, 𑀧𑀼𑀣𑀼𑀚𑁆𑀚𑀦𑀸𑀦𑀁 𑀅𑀤𑀢𑁆𑀯𑀸 𑀅𑀭𑀺𑀬𑀸𑀦𑀁𑀬𑁂𑀯 𑀲𑀮𑀸𑀓𑀁 𑀤𑁂𑀳𑀻’’𑀢𑀺. 𑀣𑁂𑀭𑁄 𑀪𑀺𑀓𑁆𑀔𑀽𑀦𑀁 𑀆𑀭𑁄𑀘𑁂𑀲𑀺 𑁋 ‘‘𑀆𑀯𑀼𑀲𑁄, 𑀲𑀢𑁆𑀣𑀸 𑀅𑀚𑁆𑀚 𑀤𑀽𑀭𑀁 𑀪𑀺𑀓𑁆𑀔𑀸𑀘𑀸𑀭𑀁 𑀕𑀫𑀺𑀲𑁆𑀲𑀢𑀺, 𑀧𑀼𑀣𑀼𑀚𑁆𑀚𑀦𑀸 𑀫𑀸 𑀕𑀡𑁆𑀳𑀦𑁆𑀢𑀼, 𑀅𑀭𑀺𑀬𑀸𑀯 𑀲𑀮𑀸𑀓𑀁 𑀕𑀡𑁆𑀳𑀦𑁆𑀢𑀽’’𑀢𑀺. 𑀓𑀼𑀡𑁆𑀟𑀥𑀸𑀦𑀢𑁆𑀣𑁂𑀭𑁄 ‘‘𑀆𑀳𑀭𑀸𑀯𑀼𑀲𑁄, 𑀲𑀮𑀸𑀓’’𑀦𑁆𑀢𑀺 𑀧𑀞𑀫𑀁𑀬𑁂𑀯 𑀳𑀢𑁆𑀣𑀁 𑀧𑀲𑀸𑀭𑁂𑀲𑀺. 𑀆𑀦𑀦𑁆𑀤𑀸 ‘‘𑀲𑀢𑁆𑀣𑀸 𑀢𑀸𑀤𑀺𑀲𑀸𑀦𑀁 𑀪𑀺𑀓𑁆𑀔𑀽𑀦𑀁 𑀲𑀮𑀸𑀓𑀁 𑀦 𑀤𑀸𑀧𑁂𑀢𑀺, 𑀅𑀭𑀺𑀬𑀸𑀦𑀁𑀬𑁂𑀯 𑀤𑀸𑀧𑁂𑀢𑀻’’𑀢𑀺 𑀯𑀺𑀢𑀓𑁆𑀓𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀕𑀦𑁆𑀢𑁆𑀯𑀸 𑀲𑀢𑁆𑀣𑀼 𑀆𑀭𑁄𑀘𑁂𑀲𑀺. 𑀲𑀢𑁆𑀣𑀸 ‘‘𑀆𑀳𑀭𑀸𑀧𑁂𑀦𑁆𑀢𑀲𑁆𑀲 𑀲𑀮𑀸𑀓𑀁 𑀤𑁂𑀳𑀻’’𑀢𑀺 𑀆𑀳. 𑀣𑁂𑀭𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀲𑀘𑁂 𑀓𑀼𑀡𑁆𑀟𑀥𑀸𑀦𑀲𑁆𑀲 𑀲𑀮𑀸𑀓𑀸 𑀤𑀸𑀢𑀼𑀁 𑀦 𑀬𑀼𑀢𑁆𑀢𑀸 𑀅𑀲𑁆𑀲, 𑀅𑀣 𑀲𑀢𑁆𑀣𑀸 𑀧𑀝𑀺𑀩𑀸𑀳𑁂𑀬𑁆𑀬, 𑀪𑀯𑀺𑀲𑁆𑀲𑀢𑀺 𑀏𑀓𑀁 𑀓𑀸𑀭𑀡’’𑀦𑁆𑀢𑀺. ‘‘𑀓𑀼𑀡𑁆𑀟𑀥𑀸𑀦𑀲𑁆𑀲 𑀲𑀮𑀸𑀓𑀁 𑀤𑀲𑁆𑀲𑀸𑀫𑀻’’𑀢𑀺 𑀕𑀫𑀦𑀁 𑀅𑀪𑀺𑀦𑀻𑀳𑀭𑀺. 𑀓𑀼𑀡𑁆𑀟𑀥𑀸𑀦𑀢𑁆𑀣𑁂𑀭𑁄 𑀢𑀲𑁆𑀲 𑀧𑀼𑀭𑁂 𑀆𑀕𑀫𑀦𑀸𑀯 𑀅𑀪𑀺𑀜𑁆𑀜𑀸𑀧𑀸𑀤𑀓𑀁 𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀇𑀤𑁆𑀥𑀺𑀬𑀸 𑀆𑀓𑀸𑀲𑁂 𑀞𑀢𑁆𑀯𑀸 ‘‘𑀆𑀳𑀭𑀸𑀯𑀼𑀲𑁄 𑀆𑀦𑀦𑁆𑀤, 𑀲𑀢𑁆𑀣𑀸 𑀫𑀁 𑀚𑀸𑀦𑀸𑀢𑀺, 𑀫𑀸𑀤𑀺𑀲𑀁 𑀪𑀺𑀓𑁆𑀔𑀼𑀁 𑀧𑀞𑀫𑀁 𑀲𑀮𑀸𑀓𑀁 𑀕𑀡𑁆𑀳𑀦𑁆𑀢𑀁 𑀦 𑀲𑀢𑁆𑀣𑀸 𑀯𑀸𑀭𑁂𑀢𑀻’’𑀢𑀺 𑀳𑀢𑁆𑀣𑀁 𑀧𑀲𑀸𑀭𑁂𑀢𑁆𑀯𑀸 𑀲𑀮𑀸𑀓𑀁 𑀕𑀡𑁆𑀳𑀺. 𑀲𑀢𑁆𑀣𑀸 𑀢𑀁 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀁 𑀓𑀢𑁆𑀯𑀸 𑀣𑁂𑀭𑀁 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀧𑀞𑀫𑀁 𑀲𑀮𑀸𑀓𑀁 𑀕𑀡𑁆𑀳𑀦𑁆𑀢𑀸𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀲𑀻𑀢𑀺.

𑀯𑀗𑁆𑀕𑀻𑀲𑀢𑁆𑀣𑁂𑀭𑀯𑀢𑁆𑀣𑀼

𑁨𑁧𑁨. 𑀘𑀢𑀼𑀢𑁆𑀣𑁂 𑀧𑀝𑀺𑀪𑀸𑀦𑀯𑀦𑁆𑀢𑀸𑀦𑀦𑁆𑀢𑀺 𑀲𑀫𑁆𑀧𑀦𑁆𑀦𑀧𑀝𑀺𑀪𑀸𑀦𑀸𑀦𑀁 𑀯𑀗𑁆𑀕𑀻𑀲𑀢𑁆𑀣𑁂𑀭𑁄 𑀅𑀕𑁆𑀕𑁄𑀢𑀺 𑀤𑀲𑁆𑀲𑁂𑀢𑀺. 𑀅𑀬𑀁 𑀓𑀺𑀭 𑀣𑁂𑀭𑁄 𑀤𑀲𑀩𑀮𑀲𑁆𑀲 𑀲𑀦𑁆𑀢𑀺𑀓𑀁 𑀉𑀧𑀲𑀗𑁆𑀓𑀫𑀦𑁆𑀢𑁄 𑀘𑀓𑁆𑀔𑀼𑀧𑀣𑀢𑁄 𑀧𑀝𑁆𑀞𑀸𑀬 𑀘𑀦𑁆𑀤𑁂𑀦 𑀲𑀤𑁆𑀥𑀺𑀁 𑀉𑀧𑀫𑁂𑀢𑁆𑀯𑀸, 𑀲𑀽𑀭𑀺𑀬𑁂𑀦, 𑀆𑀓𑀸𑀲𑁂𑀦, 𑀫𑀳𑀸𑀲𑀫𑀼𑀤𑁆𑀤𑁂𑀦, 𑀳𑀢𑁆𑀣𑀺𑀦𑀸𑀕𑁂𑀦, 𑀲𑀻𑀳𑁂𑀦 𑀫𑀺𑀕𑀭𑀜𑁆𑀜𑀸 𑀲𑀤𑁆𑀥𑀺𑀁 𑀉𑀧𑀫𑁂𑀢𑁆𑀯𑀸𑀧𑀺 𑀅𑀦𑁂𑀓𑁂𑀳𑀺 𑀧𑀤𑀲𑀢𑁂𑀳𑀺 𑀧𑀤𑀲𑀳𑀲𑁆𑀲𑁂𑀳𑀺 𑀲𑀢𑁆𑀣𑀼 𑀯𑀡𑁆𑀡𑀁 𑀯𑀤𑀦𑁆𑀢𑁄𑀬𑁂𑀯 𑀉𑀧𑀲𑀗𑁆𑀓𑀫𑀢𑀺. 𑀢𑀲𑁆𑀫𑀸 𑀧𑀝𑀺𑀪𑀸𑀦𑀯𑀦𑁆𑀢𑀸𑀦𑀁 𑀅𑀕𑁆𑀕𑁄 𑀦𑀸𑀫 𑀚𑀸𑀢𑁄.

𑀢𑀲𑁆𑀲 𑀧𑀜𑁆𑀳𑀓𑀫𑁆𑀫𑁂 𑀅𑀬𑀫𑀦𑀼𑀧𑀼𑀩𑁆𑀩𑀺𑀓𑀣𑀸 𑁋 𑀅𑀬𑀫𑁆𑀧𑀺 𑀓𑀺𑀭 𑀧𑀤𑀼𑀫𑀼𑀢𑁆𑀢𑀭𑀩𑀼𑀤𑁆𑀥𑀓𑀸𑀮𑁂 𑀳𑀁𑀲𑀯𑀢𑀻𑀦𑀕𑀭𑁂 𑀫𑀳𑀸𑀪𑁄𑀕𑀓𑀼𑀮𑁂 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺𑀢𑁆𑀯𑀸 𑀧𑀼𑀭𑀺𑀫𑀦𑀬𑁂𑀦𑁂𑀯 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀥𑀫𑁆𑀫𑀁 𑀲𑀼𑀡𑀦𑁆𑀢𑁄 𑀲𑀢𑁆𑀣𑀸𑀭𑀁 𑀏𑀓𑀁 𑀪𑀺𑀓𑁆𑀔𑀼𑀁 𑀧𑀝𑀺𑀪𑀸𑀦𑀯𑀦𑁆𑀢𑀸𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀦𑁆𑀢𑀁 𑀤𑀺𑀲𑁆𑀯𑀸 𑀲𑀢𑁆𑀣𑀼 𑀅𑀥𑀺𑀓𑀸𑀭𑀓𑀫𑁆𑀫𑀁 𑀓𑀢𑁆𑀯𑀸 ‘‘𑀅𑀳𑀫𑁆𑀧𑀺 𑀅𑀦𑀸𑀕𑀢𑁂 𑀧𑀝𑀺𑀪𑀸𑀦𑀯𑀦𑁆𑀢𑀸𑀦𑀁 𑀅𑀕𑁆𑀕𑁄 𑀪𑀯𑁂𑀬𑁆𑀬’’𑀦𑁆𑀢𑀺 𑀧𑀢𑁆𑀣𑀦𑀁 𑀓𑀢𑁆𑀯𑀸 𑀲𑀢𑁆𑀣𑀸𑀭𑀸 𑀩𑁆𑀬𑀸𑀓𑀢𑁄 𑀬𑀸𑀯𑀚𑀻𑀯𑀁 𑀓𑀼𑀲𑀮𑀁 𑀓𑀢𑁆𑀯𑀸 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀲𑀸𑀯𑀢𑁆𑀣𑀺𑀬𑀁 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺. 𑀯𑀗𑁆𑀕𑀻𑀲𑀫𑀸𑀡𑀯𑁄𑀢𑀺𑀲𑁆𑀲 𑀦𑀸𑀫𑀁 𑀅𑀓𑀁𑀲𑀼. 𑀲𑁄 𑀯𑀬𑀧𑁆𑀧𑀢𑁆𑀢𑁄 𑀢𑀬𑁄 𑀯𑁂𑀤𑁂 𑀉𑀕𑁆𑀕𑀡𑁆𑀳𑀦𑁆𑀢𑁄 𑀆𑀘𑀭𑀺𑀬𑀁 𑀆𑀭𑀸𑀥𑁂𑀢𑁆𑀯𑀸 𑀙𑀯𑀲𑀻𑀲𑀫𑀦𑁆𑀢𑀁 𑀦𑀸𑀫 𑀲𑀺𑀓𑁆𑀔𑀺𑀢𑁆𑀯𑀸 𑀙𑀯𑀲𑀻𑀲𑀁 𑀦𑀔𑁂𑀦 𑀆𑀓𑁄𑀝𑁂𑀢𑁆𑀯𑀸 ‘‘𑀅𑀬𑀁 𑀲𑀢𑁆𑀢𑁄 𑀅𑀲𑀼𑀓𑀬𑁄𑀦𑀺𑀬𑀁 𑀦𑀸𑀫 𑀦𑀺𑀩𑁆𑀩𑀢𑁆𑀢𑁄’’𑀢𑀺 𑀚𑀸𑀦𑀸𑀢𑀺.

𑀩𑁆𑀭𑀸𑀳𑁆𑀫𑀡𑀸 ‘‘𑀅𑀬𑀁 𑀅𑀫𑁆𑀳𑀸𑀓𑀁 𑀚𑀻𑀯𑀺𑀓𑀫𑀕𑁆𑀕𑁄’’𑀢𑀺 𑀜𑀢𑁆𑀯𑀸 𑀯𑀗𑁆𑀕𑀻𑀲𑀫𑀸𑀡𑀯𑀁 𑀧𑀝𑀺𑀘𑁆𑀙𑀦𑁆𑀦𑀬𑀸𑀦𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀕𑀸𑀫𑀦𑀺𑀕𑀫𑀭𑀸𑀚𑀥𑀸𑀦𑀺𑀬𑁄 𑀘𑀭𑀦𑁆𑀢𑀸 𑀦𑀕𑀭𑀤𑁆𑀯𑀸𑀭𑁂 𑀯𑀸 𑀦𑀺𑀕𑀫𑀤𑁆𑀯𑀸𑀭𑁂 𑀯𑀸 𑀞𑀧𑁂𑀢𑁆𑀯𑀸 𑀫𑀳𑀸𑀚𑀦𑀲𑁆𑀲 𑀭𑀸𑀲𑀺𑀪𑀽𑀢𑀪𑀸𑀯𑀁 𑀜𑀢𑁆𑀯𑀸 ‘‘𑀬𑁄 𑀯𑀗𑁆𑀕𑀻𑀲𑀁 𑀧𑀲𑁆𑀲𑀢𑀺, 𑀲𑁄 𑀥𑀦𑀁 𑀯𑀸 𑀮𑀪𑀢𑀺, 𑀬𑀲𑀁 𑀯𑀸 𑀮𑀪𑀢𑀺, 𑀲𑀕𑁆𑀕𑀁 𑀯𑀸 𑀕𑀘𑁆𑀙𑀢𑀻’’𑀢𑀺 𑀯𑀤𑀦𑁆𑀢𑀺. 𑀢𑁂𑀲𑀁 𑀓𑀣𑀁 𑀲𑀼𑀢𑁆𑀯𑀸 𑀩𑀳𑀽 𑀚𑀦𑀸 𑀮𑀜𑁆𑀚𑀁 𑀤𑀢𑁆𑀯𑀸 𑀧𑀲𑁆𑀲𑀺𑀢𑀼𑀓𑀸𑀫𑀸 𑀳𑁄𑀦𑁆𑀢𑀺. 𑀭𑀸𑀚𑀭𑀸𑀚𑀫𑀳𑀸𑀫𑀢𑁆𑀢𑀸 𑀢𑁂𑀲𑀁 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀓𑁄 𑀆𑀘𑀭𑀺𑀬𑀲𑁆𑀲 𑀚𑀸𑀦𑀯𑀺𑀲𑁂𑀲𑁄’’𑀢𑀺 𑀧𑀼𑀘𑁆𑀙𑀦𑁆𑀢𑀺. 𑀢𑀼𑀫𑁆𑀳𑁂 𑀦 𑀚𑀸𑀦𑀸𑀣, 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀅𑀫𑁆𑀳𑀸𑀓𑀁 𑀆𑀘𑀭𑀺𑀬𑀲𑀤𑀺𑀲𑁄 𑀅𑀜𑁆𑀜𑁄 𑀧𑀡𑁆𑀟𑀺𑀢𑁄 𑀦𑀸𑀫 𑀦𑀢𑁆𑀣𑀺, 𑀢𑀺𑀯𑀲𑁆𑀲𑀫𑀢𑁆𑀣𑀓𑁂 𑀫𑀢𑀓𑀸𑀦𑀁 𑀲𑀻𑀲𑀁 𑀆𑀳𑀭𑀸𑀧𑁂𑀢𑁆𑀯𑀸 𑀦𑀔𑁂𑀦 𑀆𑀓𑁄𑀝𑁂𑀢𑁆𑀯𑀸 ‘‘𑀅𑀬𑀁 𑀲𑀢𑁆𑀢𑁄 𑀅𑀲𑀼𑀓𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑁄’’𑀢𑀺 𑀚𑀸𑀦𑀸𑀢𑀺. 𑀯𑀗𑁆𑀕𑀻𑀲𑁄𑀧𑀺 𑀫𑀳𑀸𑀚𑀦𑀲𑁆𑀲 𑀓𑀗𑁆𑀔𑀙𑁂𑀤𑀦𑀢𑁆𑀣𑀁 𑀢𑁂 𑀢𑁂 𑀚𑀦𑁂 𑀆𑀯𑀸𑀳𑁂𑀢𑁆𑀯𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀕𑀢𑀺𑀁 𑀓𑀣𑀸𑀧𑁂𑀢𑀺. 𑀢𑀁 𑀦𑀺𑀲𑁆𑀲𑀸𑀬 𑀫𑀳𑀸𑀚𑀦𑀲𑁆𑀲 𑀳𑀢𑁆𑀣𑀢𑁄 𑀲𑀢𑀫𑁆𑀧𑀺 𑀲𑀳𑀲𑁆𑀲𑀫𑁆𑀧𑀺 𑀮𑀪𑀢𑀺.

𑀩𑁆𑀭𑀸𑀳𑁆𑀫𑀡𑀸 𑀯𑀗𑁆𑀕𑀻𑀲𑀫𑀸𑀡𑀯𑀁 𑀆𑀤𑀸𑀬 𑀬𑀣𑀸𑀭𑀼𑀘𑀺𑀁 𑀯𑀺𑀘𑀭𑀺𑀢𑁆𑀯𑀸 𑀧𑀼𑀦 𑀲𑀸𑀯𑀢𑁆𑀣𑀺𑀁 𑀆𑀕𑀫𑀁𑀲𑀼. 𑀯𑀗𑁆𑀕𑀻𑀲𑁄 𑀚𑁂𑀢𑀯𑀦𑀫𑀳𑀸𑀯𑀺𑀳𑀸𑀭𑀲𑁆𑀲 𑀅𑀯𑀺𑀤𑀽𑀭𑀝𑁆𑀞𑀸𑀦𑁂 𑀞𑀺𑀢𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀲𑀫𑀡𑁄 𑀕𑁄𑀢𑀫𑁄 𑀧𑀡𑁆𑀟𑀺𑀢𑁄𑀢𑀺 𑀯𑀤𑀦𑁆𑀢𑀺, 𑀦 𑀔𑁄 𑀧𑀦 𑀲𑀩𑁆𑀩𑀓𑀸𑀮𑀁 𑀫𑀬𑀸 𑀇𑀫𑁂𑀲𑀁𑀬𑁂𑀯 𑀯𑀘𑀦𑀁 𑀓𑀭𑁄𑀦𑁆𑀢𑁂𑀦 𑀘𑀭𑀺𑀢𑀼𑀁 𑀯𑀝𑁆𑀝𑀢𑀺, 𑀧𑀡𑁆𑀟𑀺𑀢𑀸𑀦𑀫𑁆𑀧𑀺 𑀲𑀦𑁆𑀢𑀺𑀓𑀁 𑀕𑀦𑁆𑀢𑀼𑀁 𑀯𑀝𑁆𑀝𑀢𑀻’’𑀢𑀺. 𑀲𑁄 𑀩𑁆𑀭𑀸𑀳𑁆𑀫𑀡𑁂 𑀆𑀳 𑁋 ‘‘𑀢𑀼𑀫𑁆𑀳𑁂 𑀕𑀘𑁆𑀙𑀣, 𑀅𑀳𑀁 𑀦 𑀩𑀳𑀼𑀓𑁂𑀳𑀺 𑀲𑀤𑁆𑀥𑀺𑀁 𑀕𑀦𑁆𑀢𑁆𑀯𑀸 𑀲𑀫𑀡𑀁 𑀕𑁄𑀢𑀫𑀁 𑀧𑀲𑁆𑀲𑀺𑀲𑁆𑀲𑀸𑀫𑀻’’𑀢𑀺. 𑀢𑁂 𑀆𑀳𑀁𑀲𑀼 𑁋 ‘‘𑀯𑀗𑁆𑀕𑀻𑀲, 𑀫𑀸 𑀢𑁂 𑀭𑀼𑀘𑁆𑀘𑀺 𑀲𑀫𑀡𑀁 𑀕𑁄𑀢𑀫𑀁 𑀧𑀲𑁆𑀲𑀺𑀢𑀼𑀁. 𑀬𑁄 𑀳𑀺 𑀦𑀁 𑀧𑀲𑁆𑀲𑀢𑀺, 𑀢𑀁 𑀲𑁄 𑀫𑀸𑀬𑀸𑀬 𑀆𑀯𑀝𑁆𑀝𑁂𑀢𑀻’’𑀢𑀺. 𑀯𑀗𑁆𑀕𑀻𑀲𑁄 𑀢𑁂𑀲𑀁 𑀓𑀣𑀁 𑀅𑀦𑀸𑀤𑀺𑀬𑀺𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀫𑀥𑀼𑀭𑀧𑀝𑀺𑀲𑀦𑁆𑀣𑀸𑀭𑀁 𑀓𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺.

𑀅𑀣 𑀦𑀁 𑀲𑀢𑁆𑀣𑀸 𑀧𑀼𑀘𑁆𑀙𑀺 𑁋 ‘‘𑀯𑀗𑁆𑀕𑀻𑀲, 𑀓𑀺𑀜𑁆𑀘𑀺 𑀲𑀺𑀧𑁆𑀧𑀁 𑀚𑀸𑀦𑀸𑀲𑀻’’𑀢𑀺. 𑀆𑀫, 𑀪𑁄 𑀕𑁄𑀢𑀫, 𑀙𑀯𑀲𑀻𑀲𑀫𑀦𑁆𑀢𑀁 𑀦𑀸𑀫𑁂𑀓𑀁 𑀚𑀸𑀦𑀸𑀫𑀻𑀢𑀺. 𑀓𑀺𑀁 𑀲𑁄 𑀫𑀦𑁆𑀢𑁄 𑀓𑀭𑁄𑀢𑀻𑀢𑀺? 𑀢𑀺𑀯𑀲𑁆𑀲𑀫𑀢𑁆𑀣𑀓𑁂 𑀫𑀢𑀸𑀦𑀫𑁆𑀧𑀺 𑀢𑀁 𑀫𑀦𑁆𑀢𑀁 𑀚𑀧𑁆𑀧𑀺𑀢𑁆𑀯𑀸 𑀲𑀻𑀲𑀁 𑀦𑀔𑁂𑀦 𑀆𑀓𑁄𑀝𑁂𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀝𑁆𑀞𑀸𑀦𑀁 𑀚𑀸𑀦𑀸𑀫𑀻𑀢𑀺. 𑀲𑀢𑁆𑀣𑀸 𑀢𑀲𑁆𑀲 𑀏𑀓𑀁 𑀦𑀺𑀭𑀬𑁂 𑀉𑀧𑁆𑀧𑀦𑁆𑀦𑀲𑁆𑀲 𑀲𑀻𑀲𑀁 𑀤𑀲𑁆𑀲𑁂𑀲𑀺, 𑀏𑀓𑀁 𑀫𑀦𑀼𑀲𑁆𑀲𑁂𑀲𑀼 𑀉𑀧𑁆𑀧𑀦𑁆𑀦𑀲𑁆𑀲, 𑀏𑀓𑀁 𑀤𑁂𑀯𑁂𑀲𑀼, 𑀏𑀓𑀁 𑀧𑀭𑀺𑀦𑀺𑀩𑁆𑀩𑀼𑀢𑀲𑁆𑀲 𑀲𑀻𑀲𑀁 𑀤𑀲𑁆𑀲𑁂𑀲𑀺. 𑀲𑁄 𑀧𑀞𑀫𑀁 𑀲𑀻𑀲𑀁 𑀆𑀓𑁄𑀝𑁂𑀢𑁆𑀯𑀸, ‘‘𑀪𑁄 𑀕𑁄𑀢𑀫, 𑀅𑀬𑀁 𑀲𑀢𑁆𑀢𑁄 𑀦𑀺𑀭𑀬𑀁 𑀕𑀢𑁄’’𑀢𑀺 𑀆𑀳. 𑀲𑀸𑀥𑀼 𑀲𑀸𑀥𑀼, 𑀯𑀗𑁆𑀕𑀻𑀲, 𑀲𑀼𑀤𑀺𑀝𑁆𑀞𑀁 𑀢𑀬𑀸, 𑀅𑀬𑀁 𑀲𑀢𑁆𑀢𑁄 𑀓𑀳𑀁 𑀕𑀢𑁄𑀢𑀺 𑀧𑀼𑀘𑁆𑀙𑀺. 𑀫𑀦𑀼𑀲𑁆𑀲𑀮𑁄𑀓𑀁, 𑀪𑁄 𑀕𑁄𑀢𑀫𑀸𑀢𑀺. 𑀅𑀬𑀁 𑀲𑀢𑁆𑀢𑁄 𑀓𑀳𑀁 𑀕𑀢𑁄𑀢𑀺? 𑀤𑁂𑀯𑀮𑁄𑀓𑀁, 𑀪𑁄 𑀕𑁄𑀢𑀫𑀸𑀢𑀺 𑀢𑀺𑀡𑁆𑀡𑀫𑁆𑀧𑀺 𑀕𑀢𑀝𑁆𑀞𑀸𑀦𑀁 𑀓𑀣𑁂𑀲𑀺. 𑀧𑀭𑀺𑀦𑀺𑀩𑁆𑀩𑀼𑀢𑀲𑁆𑀲 𑀧𑀦 𑀲𑀻𑀲𑀁 𑀦𑀔𑁂𑀦 𑀆𑀓𑁄𑀝𑁂𑀦𑁆𑀢𑁄 𑀦𑁂𑀯 𑀅𑀦𑁆𑀢𑀁 𑀦 𑀓𑁄𑀝𑀺𑀁 𑀧𑀲𑁆𑀲𑀢𑀺. 𑀅𑀣 𑀦𑀁 𑀲𑀢𑁆𑀣𑀸 ‘‘𑀦 𑀲𑀓𑁆𑀓𑁄𑀲𑀺 𑀢𑁆𑀯𑀁, 𑀯𑀗𑁆𑀕𑀻𑀲𑀸’’𑀢𑀺 𑀧𑀼𑀘𑁆𑀙𑀺. ‘‘𑀧𑀲𑁆𑀲𑀣, 𑀪𑁄 𑀕𑁄𑀢𑀫, 𑀉𑀧𑀧𑀭𑀺𑀓𑁆𑀔𑀸𑀫𑀺 𑀢𑀸𑀯𑀸’’𑀢𑀺 𑀧𑀼𑀦𑀧𑁆𑀧𑀼𑀦𑀁 𑀧𑀭𑀺𑀯𑀢𑁆𑀢𑁂𑀢𑀺. 𑀩𑀸𑀳𑀺𑀭𑀓𑀫𑀦𑁆𑀢𑁂𑀦 𑀔𑀻𑀡𑀸𑀲𑀯𑀲𑁆𑀲 𑀕𑀢𑀺𑀁 𑀓𑀣𑀁 𑀚𑀸𑀦𑀺𑀲𑁆𑀲𑀢𑀺, 𑀅𑀣𑀲𑁆𑀲 𑀫𑀢𑁆𑀣𑀓𑀢𑁄 𑀲𑁂𑀤𑁄 𑀫𑀼𑀘𑁆𑀘𑀺. 𑀲𑁄 𑀮𑀚𑁆𑀚𑀺𑀢𑁆𑀯𑀸 𑀢𑀼𑀡𑁆𑀳𑀻𑀪𑀽𑀢𑁄 𑀅𑀝𑁆𑀞𑀸𑀲𑀺. 𑀅𑀣 𑀦𑀁 𑀲𑀢𑁆𑀣𑀸 ‘‘𑀓𑀺𑀮𑀫𑀲𑀺, 𑀯𑀗𑁆𑀕𑀻𑀲𑀸’’𑀢𑀺 𑀆𑀳. 𑀆𑀫, 𑀪𑁄 𑀕𑁄𑀢𑀫, 𑀇𑀫𑀲𑁆𑀲 𑀲𑀢𑁆𑀢𑀲𑁆𑀲 𑀕𑀢𑀝𑁆𑀞𑀸𑀦𑀁 𑀚𑀸𑀦𑀺𑀢𑀼𑀁 𑀦 𑀲𑀓𑁆𑀓𑁄𑀫𑀺. 𑀲𑀘𑁂 𑀢𑀼𑀫𑁆𑀳𑁂 𑀚𑀸𑀦𑀸𑀣, 𑀓𑀣𑁂𑀣𑀸𑀢𑀺. ‘‘𑀯𑀗𑁆𑀕𑀻𑀲, 𑀅𑀳𑀁 𑀏𑀢𑀫𑁆𑀧𑀺 𑀚𑀸𑀦𑀸𑀫𑀺 𑀇𑀢𑁄 𑀉𑀢𑁆𑀢𑀭𑀺𑀢𑀭𑀫𑁆𑀧𑀻’’𑀢𑀺 𑀯𑀢𑁆𑀯𑀸 𑀥𑀫𑁆𑀫𑀧𑀤𑁂 𑀇𑀫𑀸 𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺 𑁋

‘‘𑀘𑀼𑀢𑀺𑀁 𑀬𑁄 𑀯𑁂𑀤𑀺 𑀲𑀢𑁆𑀢𑀸𑀦𑀁, 𑀉𑀧𑀧𑀢𑁆𑀢𑀺𑀁 𑀘 𑀲𑀩𑁆𑀩𑀲𑁄;

𑀅𑀲𑀢𑁆𑀢𑀁 𑀲𑀼𑀕𑀢𑀁 𑀩𑀼𑀤𑁆𑀥𑀁, 𑀢𑀫𑀳𑀁 𑀩𑁆𑀭𑀽𑀫𑀺 𑀩𑁆𑀭𑀸𑀳𑁆𑀫𑀡𑀁.

‘‘𑀬𑀲𑁆𑀲 𑀕𑀢𑀺𑀁 𑀦 𑀚𑀸𑀦𑀦𑁆𑀢𑀺, 𑀤𑁂𑀯𑀸 𑀕𑀦𑁆𑀥𑀩𑁆𑀩𑀫𑀸𑀦𑀼𑀲𑀸;

𑀔𑀻𑀡𑀸𑀲𑀯𑀁 𑀅𑀭𑀳𑀦𑁆𑀢𑀁, 𑀢𑀫𑀳𑀁 𑀩𑁆𑀭𑀽𑀫𑀺 𑀩𑁆𑀭𑀸𑀳𑁆𑀫𑀡’’𑀦𑁆𑀢𑀺. (𑀥. 𑀧. 𑁪𑁧𑁯-𑁪𑁨𑁦);

𑀢𑀢𑁄 𑀯𑀗𑁆𑀕𑀻𑀲𑁄 𑀆𑀳 𑁋 ‘‘𑀪𑁄 𑀕𑁄𑀢𑀫, 𑀯𑀺𑀚𑁆𑀚𑀸𑀬 𑀯𑀺𑀚𑁆𑀚𑀁 𑀤𑁂𑀦𑁆𑀢𑀲𑁆𑀲 𑀦𑀸𑀫 𑀧𑀭𑀺𑀳𑀸𑀦𑀺 𑀦𑀢𑁆𑀣𑀺, 𑀅𑀳𑀁 𑀅𑀢𑁆𑀢𑀦𑀸 𑀚𑀸𑀦𑀦𑀓𑀁 𑀫𑀦𑁆𑀢𑀁 𑀢𑀼𑀫𑁆𑀳𑀸𑀓𑀁 𑀤𑀲𑁆𑀲𑀸𑀫𑀺, 𑀢𑀼𑀫𑁆𑀳𑁂 𑀏𑀢𑀁 𑀫𑀦𑁆𑀢𑀁 𑀫𑀬𑁆𑀳𑀁 𑀤𑁂𑀣𑀸’’𑀢𑀺. 𑀯𑀗𑁆𑀕𑀻𑀲, 𑀦 𑀫𑀬𑀁 𑀫𑀦𑁆𑀢𑁂𑀦 𑀫𑀦𑁆𑀢𑀁 𑀤𑁂𑀫, 𑀏𑀯𑀫𑁂𑀯 𑀤𑁂𑀫𑀸𑀢𑀺. ‘‘𑀲𑀸𑀥𑀼, 𑀪𑁄 𑀕𑁄𑀢𑀫, 𑀤𑁂𑀣 𑀫𑁂 𑀫𑀦𑁆𑀢’’𑀦𑁆𑀢𑀺 𑀅𑀧𑀘𑀺𑀢𑀺𑀁 𑀤𑀲𑁆𑀲𑁂𑀢𑁆𑀯𑀸 𑀳𑀢𑁆𑀣𑀓𑀘𑁆𑀙𑀧𑀓𑀁 𑀓𑀢𑁆𑀯𑀸 𑀦𑀺𑀲𑀻𑀤𑀺. 𑀓𑀺𑀁, 𑀯𑀗𑁆𑀕𑀻𑀲, 𑀢𑀼𑀫𑁆𑀳𑀸𑀓𑀁 𑀲𑀫𑀬𑁂 𑀫𑀳𑀕𑁆𑀖𑀫𑀦𑁆𑀢𑀁 𑀯𑀸 𑀓𑀺𑀜𑁆𑀘𑀺 𑀯𑀸 𑀕𑀡𑁆𑀳𑀦𑁆𑀢𑀸𑀦𑀁 𑀧𑀭𑀺𑀯𑀸𑀲𑁄 𑀦𑀸𑀫 𑀦 𑀳𑁄𑀢𑀻𑀢𑀺? 𑀳𑁄𑀢𑀺, 𑀪𑁄 𑀕𑁄𑀢𑀫𑀸𑀢𑀺. 𑀅𑀫𑁆𑀳𑀸𑀓𑀁 𑀧𑀦 𑀫𑀦𑁆𑀢𑁄 𑀦𑀺𑀧𑁆𑀧𑀭𑀺𑀯𑀸𑀲𑁄𑀢𑀺 𑀲𑀜𑁆𑀜𑀁 𑀓𑀭𑁄𑀲𑀻𑀢𑀺? 𑀩𑁆𑀭𑀸𑀳𑁆𑀫𑀡𑀸 𑀦𑀸𑀫 𑀫𑀦𑁆𑀢𑁂𑀳𑀺 𑀅𑀢𑀺𑀢𑁆𑀢𑀸 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀲𑁄 𑀪𑀕𑀯𑀦𑁆𑀢𑀁 𑀆𑀳 𑁋 ‘‘𑀪𑁄 𑀕𑁄𑀢𑀫, 𑀢𑀼𑀫𑁆𑀳𑁂𑀳𑀺 𑀓𑀣𑀺𑀢𑀦𑀺𑀬𑀸𑀫𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺. 𑀪𑀕𑀯𑀸 𑀆𑀳 𑁋 ‘‘𑀯𑀗𑁆𑀕𑀻𑀲, 𑀫𑀬𑀁 𑀇𑀫𑀁 𑀫𑀦𑁆𑀢𑀁 𑀤𑁂𑀦𑁆𑀢𑀸 𑀅𑀫𑁆𑀳𑁂𑀳𑀺 𑀲𑀫𑀸𑀦𑀮𑀺𑀗𑁆𑀕𑀲𑁆𑀲 𑀤𑁂𑀫𑀸’’𑀢𑀺. 𑀯𑀗𑁆𑀕𑀻𑀲𑁄 ‘‘𑀬𑀁𑀓𑀺𑀜𑁆𑀘𑀺 𑀓𑀢𑁆𑀯𑀸 𑀫𑀬𑀸 𑀇𑀫𑀁 𑀫𑀦𑁆𑀢𑀁 𑀕𑀡𑁆𑀳𑀺𑀢𑁆𑀯𑀸 𑀕𑀦𑁆𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀩𑁆𑀭𑀸𑀳𑁆𑀫𑀡𑁂 𑀆𑀳. 𑀢𑀼𑀫𑁆𑀳𑁂 𑀫𑀬𑀺 𑀧𑀩𑁆𑀩𑀚𑀦𑁆𑀢𑁂 𑀫𑀸 𑀘𑀺𑀦𑁆𑀢𑀬𑀺𑀢𑁆𑀣, 𑀅𑀳𑀁 𑀇𑀫𑀁 𑀫𑀦𑁆𑀢𑀁 𑀕𑀡𑁆𑀳𑀺𑀢𑁆𑀯𑀸 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀚𑁂𑀝𑁆𑀞𑀓𑁄 𑀪𑀯𑀺𑀲𑁆𑀲𑀸𑀫𑀺. 𑀏𑀯𑀁 𑀲𑀦𑁆𑀢𑁂 𑀢𑀼𑀫𑁆𑀳𑀸𑀓𑀫𑁆𑀧𑀺 𑀪𑀤𑁆𑀤𑀓𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀫𑀦𑁆𑀢𑀢𑁆𑀣𑀸𑀬 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺. 𑀲𑀢𑁆𑀣𑀸 ‘‘𑀫𑀦𑁆𑀢𑀧𑀭𑀺𑀯𑀸𑀲𑀁 𑀢𑀸𑀯 𑀯𑀲𑀸𑀳𑀻’’𑀢𑀺 𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭𑀁 𑀆𑀘𑀺𑀓𑁆𑀔𑀺. 𑀧𑀜𑁆𑀜𑀯𑀸 𑀲𑀢𑁆𑀢𑁄 𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭𑀁 𑀲𑀚𑁆𑀛𑀸𑀬𑀦𑁆𑀢𑁄𑀯 𑀢𑀢𑁆𑀣 𑀔𑀬𑀯𑀬𑀁 𑀧𑀝𑁆𑀞𑀧𑁂𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺.

𑀢𑀲𑁆𑀫𑀺𑀁 𑀅𑀭𑀳𑀢𑁆𑀢𑀁 𑀧𑀢𑁆𑀢𑁂 𑀩𑁆𑀭𑀸𑀳𑁆𑀫𑀡𑀸 ‘‘𑀓𑀸 𑀦𑀼 𑀔𑁄 𑀯𑀗𑁆𑀕𑀻𑀲𑀲𑁆𑀲 𑀧𑀯𑀢𑁆𑀢𑀺, 𑀧𑀲𑁆𑀲𑀺𑀲𑁆𑀲𑀸𑀫 𑀦’’𑀦𑁆𑀢𑀺 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀓𑀺𑀁, 𑀪𑁄 𑀯𑀗𑁆𑀕𑀻𑀲, 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀲𑀦𑁆𑀢𑀺𑀓𑁂 𑀲𑀺𑀧𑁆𑀧𑀁 𑀲𑀺𑀓𑁆𑀔𑀺𑀢’’𑀦𑁆𑀢𑀺 𑀧𑀼𑀘𑁆𑀙𑀺𑀁𑀲𑀼. 𑀆𑀫, 𑀲𑀺𑀓𑁆𑀔𑀺𑀢𑀦𑁆𑀢𑀺. 𑀢𑁂𑀦 𑀳𑀺 𑀏𑀳𑀺 𑀕𑀫𑀺𑀲𑁆𑀲𑀸𑀫𑀸𑀢𑀺. 𑀕𑀘𑁆𑀙𑀣 𑀢𑀼𑀫𑁆𑀳𑁂, 𑀢𑀼𑀫𑁆𑀳𑁂𑀳𑀺 𑀲𑀤𑁆𑀥𑀺𑀁 𑀕𑀦𑁆𑀢𑀩𑁆𑀩𑀓𑀺𑀘𑁆𑀘𑀁 𑀫𑀬𑁆𑀳𑀁 𑀦𑀺𑀝𑁆𑀞𑀺𑀢𑀦𑁆𑀢𑀺. 𑀧𑀞𑀫𑀫𑁂𑀯 𑀅𑀫𑁆𑀳𑁂𑀳𑀺 𑀢𑀼𑀬𑁆𑀳𑀁 𑀓𑀣𑀺𑀢𑀁 ‘‘𑀲𑀫𑀡𑁄 𑀕𑁄𑀢𑀫𑁄 𑀅𑀢𑁆𑀢𑀸𑀦𑀁 𑀧𑀲𑁆𑀲𑀺𑀢𑀼𑀁 𑀆𑀕𑀢𑁂 𑀫𑀸𑀬𑀸𑀬 𑀆𑀯𑀝𑁆𑀝𑁂𑀢𑀻’’𑀢𑀺. 𑀢𑁆𑀯𑀁 𑀳𑀺 𑀇𑀤𑀸𑀦𑀺 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀯𑀲𑀁 𑀆𑀧𑀦𑁆𑀦𑁄, 𑀓𑀺𑀁 𑀫𑀬𑀁 𑀢𑀯 𑀲𑀦𑁆𑀢𑀺𑀓𑁂 𑀓𑀭𑀺𑀲𑁆𑀲𑀸𑀫𑀸𑀢𑀺 𑀆𑀕𑀢𑀫𑀕𑁆𑀕𑁂𑀦𑁂𑀯 𑀧𑀓𑁆𑀓𑀫𑀺𑀁𑀲𑀼. 𑀯𑀗𑁆𑀕𑀻𑀲𑀢𑁆𑀣𑁂𑀭𑁄𑀧𑀺 𑀬𑀁 𑀬𑀁 𑀯𑁂𑀮𑀁 𑀤𑀲𑀩𑀮𑀁 𑀧𑀲𑁆𑀲𑀺𑀢𑀼𑀁 𑀕𑀘𑁆𑀙𑀢𑀺, 𑀏𑀓𑀁 𑀣𑀼𑀢𑀺𑀁 𑀓𑀭𑁄𑀦𑁆𑀢𑁄𑀯 𑀕𑀘𑁆𑀙𑀢𑀺. 𑀢𑁂𑀦 𑀢𑀁 𑀲𑀢𑁆𑀣𑀸 𑀲𑀗𑁆𑀖𑀫𑀚𑁆𑀛𑁂 𑀦𑀺𑀲𑀺𑀦𑁆𑀦𑁄 𑀧𑀝𑀺𑀪𑀸𑀦𑀯𑀦𑁆𑀢𑀸𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀲𑀻𑀢𑀺.

𑀉𑀧𑀲𑁂𑀦𑀯𑀗𑁆𑀕𑀦𑁆𑀢𑀧𑀼𑀢𑁆𑀢𑀢𑁆𑀣𑁂𑀭𑀯𑀢𑁆𑀣𑀼

𑁨𑁧𑁩. 𑀧𑀜𑁆𑀘𑀫𑁂 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀦𑀦𑁆𑀢𑀺 𑀲𑀩𑁆𑀩𑀧𑀸𑀲𑀸𑀤𑀺𑀓𑀸𑀦𑀁. 𑀉𑀧𑀲𑁂𑀦𑁄𑀢𑀺 𑀢𑀲𑁆𑀲 𑀣𑁂𑀭𑀲𑁆𑀲 𑀦𑀸𑀫𑀁. 𑀯𑀗𑁆𑀕𑀦𑁆𑀢𑀩𑁆𑀭𑀸𑀳𑁆𑀫𑀡𑀲𑁆𑀲 𑀧𑀦 𑀲𑁄 𑀧𑀼𑀢𑁆𑀢𑁄, 𑀢𑀲𑁆𑀫𑀸 𑀯𑀗𑁆𑀕𑀦𑁆𑀢𑀧𑀼𑀢𑁆𑀢𑁄𑀢𑀺 𑀯𑀼𑀘𑁆𑀘𑀢𑀺. 𑀅𑀬𑀁 𑀧𑀦 𑀣𑁂𑀭𑁄 𑀦 𑀓𑁂𑀯𑀮𑀁 𑀅𑀢𑁆𑀢𑀦𑀸𑀯 𑀧𑀸𑀲𑀸𑀤𑀺𑀓𑁄, 𑀧𑀭𑀺𑀲𑀸𑀧𑀺𑀲𑁆𑀲 𑀧𑀸𑀲𑀸𑀤𑀺𑀓𑀸, 𑀇𑀢𑀺 𑀧𑀭𑀺𑀲𑀁 𑀦𑀺𑀲𑁆𑀲𑀸𑀬 𑀮𑀤𑁆𑀥𑀦𑀸𑀫𑀯𑀲𑁂𑀦 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀦𑀁 𑀅𑀕𑁆𑀕𑁄 𑀦𑀸𑀫 𑀚𑀸𑀢𑁄.

𑀧𑀜𑁆𑀳𑀓𑀫𑁆𑀫𑁂 𑀧𑀦𑀲𑁆𑀲 𑀅𑀬𑀫𑀦𑀼𑀧𑀼𑀩𑁆𑀩𑀺𑀓𑀣𑀸 𑁋 𑀅𑀬𑀫𑁆𑀧𑀺 𑀳𑀺 𑀧𑀤𑀼𑀫𑀼𑀢𑁆𑀢𑀭𑀩𑀼𑀤𑁆𑀥𑀓𑀸𑀮𑁂 𑀳𑀁𑀲𑀯𑀢𑀻𑀦𑀕𑀭𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀯𑀬𑀁 𑀆𑀕𑀫𑁆𑀫 𑀧𑀼𑀭𑀺𑀫𑀦𑀬𑁂𑀦𑁂𑀯 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀥𑀫𑁆𑀫𑀁 𑀲𑀼𑀡𑀫𑀸𑀦𑁄 𑀲𑀢𑁆𑀣𑀸𑀭𑀁 𑀏𑀓𑀁 𑀪𑀺𑀓𑁆𑀔𑀼𑀁 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀦𑁆𑀢𑀁 𑀤𑀺𑀲𑁆𑀯𑀸 𑀲𑀢𑁆𑀣𑀼 𑀅𑀥𑀺𑀓𑀸𑀭𑀓𑀫𑁆𑀫𑀁 𑀓𑀢𑁆𑀯𑀸 𑀢𑀁 𑀞𑀸𑀦𑀦𑁆𑀢𑀭𑀁 𑀧𑀢𑁆𑀣𑁂𑀢𑁆𑀯𑀸 𑀬𑀸𑀯𑀚𑀻𑀯𑀁 𑀓𑀼𑀲𑀮𑀁 𑀓𑀢𑁆𑀯𑀸 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀦𑀸𑀮𑀓𑀩𑁆𑀭𑀸𑀳𑁆𑀫𑀡𑀕𑀸𑀫𑁂 𑀲𑀸𑀭𑀺𑀩𑁆𑀭𑀸𑀳𑁆𑀫𑀡𑀺𑀬𑀸 𑀓𑀼𑀘𑁆𑀙𑀺𑀲𑁆𑀫𑀺𑀁 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺, 𑀉𑀧𑀲𑁂𑀦𑀤𑀸𑀭𑀓𑁄𑀢𑀺𑀲𑁆𑀲 𑀦𑀸𑀫𑀁 𑀅𑀓𑀁𑀲𑀼.

𑀲𑁄 𑀯𑀬𑀧𑁆𑀧𑀢𑁆𑀢𑁄 𑀢𑀬𑁄 𑀯𑁂𑀤𑁂 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀤𑀲𑀩𑀮𑀲𑁆𑀲 𑀲𑀦𑁆𑀢𑀺𑀓𑁂 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀧𑀝𑀺𑀮𑀤𑁆𑀥𑀲𑀤𑁆𑀥𑁄 𑀧𑀩𑁆𑀩𑀚𑀺. 𑀲𑁄 𑀉𑀧𑀲𑀫𑁆𑀧𑀤𑀸𑀬 𑀏𑀓𑀯𑀲𑁆𑀲𑀺𑀓𑁄 𑀳𑀼𑀢𑁆𑀯𑀸 ‘‘𑀅𑀭𑀺𑀬𑀕𑀩𑁆𑀪𑀁 𑀯𑀟𑁆𑀠𑁂𑀫𑀻’’𑀢𑀺 𑀏𑀓𑀁 𑀓𑀼𑀮𑀧𑀼𑀢𑁆𑀢𑀁 𑀅𑀢𑁆𑀢𑀦𑁄 𑀲𑀦𑁆𑀢𑀺𑀓𑁂 𑀧𑀩𑁆𑀩𑀸𑀚𑁂𑀢𑁆𑀯𑀸 𑀉𑀧𑀲𑀫𑁆𑀧𑀸𑀤𑁂𑀲𑀺. 𑀲𑁄 𑀧𑀯𑀸𑀭𑁂𑀢𑁆𑀯𑀸 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀲𑁆𑀲 𑀏𑀓𑀯𑀲𑁆𑀲𑀺𑀓𑀓𑀸𑀮𑁂 𑀅𑀢𑁆𑀢𑀦𑀸 𑀤𑀼𑀯𑀲𑁆𑀲𑁄 ‘‘𑀤𑀲𑀩𑀮𑁄 𑀫𑀁 𑀧𑀲𑁆𑀲𑀺𑀢𑁆𑀯𑀸 𑀢𑀼𑀲𑀺𑀲𑁆𑀲𑀢𑀻’’𑀢𑀺 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀁 𑀆𑀤𑀸𑀬 𑀤𑀲𑀩𑀮𑀁 𑀧𑀲𑁆𑀲𑀺𑀢𑀼𑀁 𑀆𑀕𑀢𑁄. 𑀲𑀢𑁆𑀣𑀸 𑀢𑀁 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑁂 𑀦𑀺𑀲𑀺𑀦𑁆𑀦𑀁 𑀧𑀼𑀘𑁆𑀙𑀺 𑁋 ‘‘𑀓𑀢𑀺𑀯𑀲𑁆𑀲𑁄𑀲𑀺 𑀢𑁆𑀯𑀁 𑀪𑀺𑀓𑁆𑀔𑀽’’𑀢𑀺? 𑀤𑀼𑀯𑀲𑁆𑀲𑁄 𑀅𑀳𑀁 𑀪𑀕𑀯𑀸𑀢𑀺. 𑀅𑀬𑀁 𑀧𑀦 𑀪𑀺𑀓𑁆𑀔𑀼 𑀓𑀢𑀺𑀯𑀲𑁆𑀲𑁄𑀢𑀺? 𑀏𑀓𑀯𑀲𑁆𑀲𑁄 𑀪𑀕𑀯𑀸𑀢𑀺. 𑀓𑀺𑀦𑁆𑀢𑀸𑀬𑀁 𑀪𑀺𑀓𑁆𑀔𑀼 𑀳𑁄𑀢𑀻𑀢𑀺? 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁄 𑀫𑁂 𑀪𑀕𑀯𑀸𑀢𑀺. 𑀅𑀣 𑀦𑀁 𑀲𑀢𑁆𑀣𑀸 ‘‘𑀅𑀢𑀺𑀮𑀳𑀼𑀁 𑀔𑁄 𑀢𑁆𑀯𑀁, 𑀫𑁄𑀖𑀧𑀼𑀭𑀺𑀲, 𑀩𑀸𑀳𑀼𑀮𑁆𑀮𑀸𑀬 𑀆𑀯𑀢𑁆𑀢𑁄’’𑀢𑀺 𑀯𑀢𑁆𑀯𑀸 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀯𑀺𑀕𑀭𑀳𑀺. 𑀣𑁂𑀭𑁄 𑀲𑀢𑁆𑀣𑀼 𑀲𑀦𑁆𑀢𑀺𑀓𑀸 𑀕𑀭𑀳𑀁 𑀮𑀪𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀯𑀦𑁆𑀤𑀺𑀢𑁆𑀯𑀸 ‘‘𑀇𑀫𑀺𑀦𑀸𑀯 𑀧𑀼𑀡𑁆𑀡𑀘𑀦𑁆𑀤𑀲𑀲𑁆𑀲𑀺𑀭𑀺𑀓𑁂𑀦 𑀫𑀼𑀔𑁂𑀦 𑀲𑀢𑁆𑀣𑀸𑀭𑀁 𑀧𑀭𑀺𑀲𑀫𑁂𑀯 𑀦𑀺𑀲𑁆𑀲𑀸𑀬 𑀲𑀸𑀥𑀼𑀓𑀸𑀭𑀁 𑀤𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀢𑀁𑀤𑀺𑀯𑀲𑁂𑀬𑁂𑀯 𑀏𑀓𑀁 𑀞𑀸𑀦𑀁 𑀕𑀦𑁆𑀢𑁆𑀯𑀸 𑀯𑀺𑀧𑀲𑁆𑀲𑀦𑀸𑀬 𑀓𑀫𑁆𑀫𑀁 𑀓𑀢𑁆𑀯𑀸 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺.

𑀢𑀢𑁄 𑀬𑀲𑁆𑀫𑀸 𑀣𑁂𑀭𑁄 𑀫𑀳𑀸𑀓𑀼𑀮𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀩𑁆𑀩𑀚𑀺𑀢𑁄 𑀧𑀣𑀯𑀺𑀖𑀼𑀝𑁆𑀞𑀥𑀫𑁆𑀫𑀓𑀣𑀺𑀓𑁄𑀯, 𑀢𑀲𑁆𑀫𑀸 𑀢𑀲𑁆𑀲 𑀥𑀫𑁆𑀫𑀓𑀣𑀸𑀬 𑀘𑁂𑀯 𑀧𑀲𑀻𑀤𑀺𑀢𑁆𑀯𑀸 𑀫𑀺𑀢𑁆𑀢𑀸𑀫𑀘𑁆𑀘𑀜𑀸𑀢𑀺𑀓𑀼𑀮𑁂𑀳𑀺 𑀘 𑀦𑀺𑀓𑁆𑀔𑀫𑀺𑀢𑁆𑀯𑀸 𑀩𑀳𑀽 𑀓𑀼𑀮𑀤𑀸𑀭𑀓𑀸 𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀦𑁆𑀢𑀺. ‘‘𑀅𑀳𑀁 𑀆𑀭𑀜𑁆𑀜𑀓𑁄, 𑀢𑀼𑀫𑁆𑀳𑁂𑀧𑀺 𑀆𑀭𑀜𑁆𑀜𑀓𑀸 𑀪𑀯𑀺𑀢𑀼𑀁 𑀲𑀓𑁆𑀓𑁄𑀦𑁆𑀢𑀸 𑀧𑀩𑁆𑀩𑀚𑀣𑀸’’𑀢𑀺 𑀢𑁂𑀭𑀲 𑀥𑀼𑀢𑀗𑁆𑀕𑀸𑀦𑀺 𑀆𑀘𑀺𑀓𑁆𑀔𑀺𑀢𑁆𑀯𑀸 ‘‘𑀲𑀓𑁆𑀔𑀺𑀲𑁆𑀲𑀸𑀫, 𑀪𑀦𑁆𑀢𑁂’’𑀢𑀺 𑀯𑀤𑀦𑁆𑀢𑁂 𑀧𑀩𑁆𑀩𑀸𑀚𑁂𑀢𑀺. 𑀢𑁂 𑀅𑀢𑁆𑀢𑀦𑁄 𑀩𑀮𑁂𑀦 𑀢𑀁 𑀢𑀁 𑀥𑀼𑀢𑀗𑁆𑀕𑀁 𑀅𑀥𑀺𑀝𑁆𑀞𑀳𑀦𑁆𑀢𑀺. 𑀣𑁂𑀭𑁄 𑀅𑀢𑁆𑀢𑀦𑁄 𑀤𑀲𑀯𑀲𑁆𑀲𑀓𑀸𑀮𑁂 𑀯𑀺𑀦𑀬𑀁 𑀧𑀕𑀼𑀡𑀁 𑀓𑀢𑁆𑀯𑀸 𑀲𑀩𑁆𑀩𑁂𑀯 𑀉𑀧𑀲𑀫𑁆𑀧𑀸𑀤𑁂𑀲𑀺. 𑀏𑀯𑀁 𑀉𑀧𑀲𑀫𑁆𑀧𑀦𑁆𑀦𑀸 𑀘𑀲𑁆𑀲 𑀧𑀜𑁆𑀘𑀲𑀢𑀫𑀢𑁆𑀢𑀸 𑀪𑀺𑀓𑁆𑀔𑀽 𑀧𑀭𑀺𑀯𑀸𑀭𑀸 𑀅𑀳𑁂𑀲𑀼𑀁.

𑀢𑀲𑁆𑀫𑀺𑀁 𑀲𑀫𑀬𑁂 𑀲𑀢𑁆𑀣𑀸 𑀚𑁂𑀢𑀯𑀦𑀫𑀳𑀸𑀯𑀺𑀳𑀸𑀭𑁂 𑀯𑀲𑀦𑁆𑀢𑁄 ‘‘𑀇𑀘𑁆𑀙𑀸𑀫𑀳𑀁, 𑀪𑀺𑀓𑁆𑀔𑀯𑁂, 𑀅𑀤𑁆𑀥𑀫𑀸𑀲𑀁 𑀧𑀝𑀺𑀲𑀮𑁆𑀮𑀻𑀬𑀺𑀢𑀼’’𑀦𑁆𑀢𑀺 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀆𑀭𑁄𑀘𑁂𑀢𑁆𑀯𑀸 𑀏𑀓𑀯𑀺𑀳𑀸𑀭𑀻 𑀳𑁄𑀢𑀺. 𑀪𑀺𑀓𑁆𑀔𑀼𑀲𑀗𑁆𑀖𑁄𑀧𑀺 ‘‘𑀬𑁄 𑀪𑀕𑀯𑀦𑁆𑀢𑀁 𑀤𑀲𑁆𑀲𑀦𑀸𑀬 𑀉𑀧𑀲𑀗𑁆𑀓𑀫𑀢𑀺, 𑀲𑁄 𑀧𑀸𑀘𑀺𑀢𑁆𑀢𑀺𑀬𑀁 𑀤𑁂𑀲𑀸𑀧𑁂𑀢𑀩𑁆𑀩𑁄’’𑀢𑀺 𑀓𑀢𑀺𑀓𑀁 𑀅𑀓𑀸𑀲𑀺. 𑀢𑀤𑀸 𑀉𑀧𑀲𑁂𑀦𑀢𑁆𑀣𑁂𑀭𑁄 ‘‘𑀪𑀕𑀯𑀦𑁆𑀢𑀁 𑀧𑀲𑁆𑀲𑀺𑀲𑁆𑀲𑀸𑀫𑀻’’𑀢𑀺 𑀅𑀢𑁆𑀢𑀦𑁄 𑀧𑀭𑀺𑀲𑀸𑀬 𑀲𑀤𑁆𑀥𑀺𑀁 𑀚𑁂𑀢𑀯𑀦𑀁 𑀕𑀦𑁆𑀢𑁆𑀯𑀸 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀲𑀢𑁆𑀣𑀸 𑀓𑀣𑀸𑀲𑀫𑀼𑀝𑁆𑀞𑀸𑀧𑀦𑀢𑁆𑀣𑀁 𑀅𑀜𑁆𑀜𑀢𑀭𑀁 𑀣𑁂𑀭𑀲𑁆𑀲 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀫𑀦𑀸𑀧𑀸𑀦𑀺 𑀢𑁂 𑀪𑀺𑀓𑁆𑀔𑀼 𑀧𑀁𑀲𑀼𑀓𑀽𑀮𑀸𑀦𑀻’’𑀢𑀺. ‘‘𑀦 𑀔𑁄 𑀫𑁂, 𑀪𑀦𑁆𑀢𑁂, 𑀫𑀦𑀸𑀧𑀸𑀦𑀺 𑀧𑀁𑀲𑀼𑀓𑀽𑀮𑀸𑀦𑀻’’𑀢𑀺 𑀯𑀢𑁆𑀯𑀸 𑀉𑀧𑀚𑁆𑀛𑀸𑀬𑁂 𑀕𑀸𑀭𑀯𑁂𑀦 𑀧𑀁𑀲𑀼𑀓𑀽𑀮𑀺𑀓𑀪𑀸𑀯𑀁 𑀆𑀭𑁄𑀘𑁂𑀲𑀺. 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀲𑀢𑁆𑀣𑀸 ‘‘𑀲𑀸𑀥𑀼 𑀲𑀸𑀥𑀼, 𑀉𑀧𑀲𑁂𑀦𑀸’’𑀢𑀺 𑀣𑁂𑀭𑀲𑁆𑀲 𑀲𑀸𑀥𑀼𑀓𑀸𑀭𑀁 𑀤𑀢𑁆𑀯𑀸 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀕𑀼𑀡𑀓𑀣𑀁 𑀓𑀣𑁂𑀲𑀺. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑀢𑁄 𑀧𑀦 𑀇𑀤𑀁 𑀯𑀢𑁆𑀣𑀼 𑀧𑀸𑀴𑀺𑀬𑀁 (𑀧𑀸𑀭𑀸. 𑁫𑁬𑁫) 𑀆𑀕𑀢𑀫𑁂𑀯. 𑀅𑀣 𑀲𑀢𑁆𑀣𑀸 𑀅𑀧𑀭𑀪𑀸𑀕𑁂 𑀅𑀭𑀺𑀬𑀕𑀡𑀫𑀚𑁆𑀛𑁂 𑀦𑀺𑀲𑀺𑀦𑁆𑀦𑁄 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀣𑁂𑀭𑀁 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀲𑀻𑀢𑀺.

𑀤𑀩𑁆𑀩𑀢𑁆𑀣𑁂𑀭𑀯𑀢𑁆𑀣𑀼

𑁨𑁧𑁪. 𑀙𑀝𑁆𑀞𑁂 𑀲𑁂𑀦𑀸𑀲𑀦𑀧𑀜𑁆𑀜𑀸𑀧𑀓𑀸𑀦𑀦𑁆𑀢𑀺 𑀲𑁂𑀦𑀸𑀲𑀦𑀁 𑀧𑀜𑁆𑀜𑀸𑀧𑁂𑀦𑁆𑀢𑀸𑀦𑀁. 𑀣𑁂𑀭𑀲𑁆𑀲 𑀓𑀺𑀭 𑀲𑁂𑀦𑀸𑀲𑀦𑀧𑀜𑁆𑀜𑀸𑀧𑀦𑀓𑀸𑀮𑁂 𑀅𑀝𑁆𑀞𑀸𑀭𑀲𑀲𑀼 𑀫𑀳𑀸𑀯𑀺𑀳𑀸𑀭𑁂𑀲𑀼 𑀅𑀲𑀫𑁆𑀫𑀝𑁆𑀞𑀁 𑀧𑀭𑀺𑀯𑁂𑀡𑀁 𑀯𑀸 𑀅𑀧𑀝𑀺𑀚𑀕𑁆𑀕𑀺𑀢𑀁 𑀲𑁂𑀦𑀸𑀲𑀦𑀁 𑀯𑀸 𑀅𑀲𑁄𑀥𑀺𑀢𑀁 𑀫𑀜𑁆𑀘𑀧𑀻𑀞𑀁 𑀯𑀸 𑀅𑀦𑀼𑀧𑀝𑁆𑀞𑀺𑀢𑀁 𑀧𑀸𑀦𑀻𑀬𑀧𑀭𑀺𑀪𑁄𑀚𑀦𑀻𑀬𑀁 𑀯𑀸 𑀦𑀸𑀳𑁄𑀲𑀺. 𑀢𑀲𑁆𑀫𑀸 𑀲𑁂𑀦𑀸𑀲𑀦𑀧𑀜𑁆𑀜𑀸𑀧𑀓𑀸𑀦𑀁 𑀅𑀕𑁆𑀕𑁄 𑀦𑀸𑀫 𑀚𑀸𑀢𑁄. 𑀤𑀩𑁆𑀩𑁄𑀢𑀺𑀲𑁆𑀲 𑀦𑀸𑀫𑀁. 𑀫𑀮𑁆𑀮𑀭𑀸𑀚𑀓𑀼𑀮𑁂 𑀧𑀦 𑀉𑀧𑁆𑀧𑀦𑁆𑀦𑀢𑁆𑀢𑀸 𑀫𑀮𑁆𑀮𑀧𑀼𑀢𑁆𑀢𑁄 𑀦𑀸𑀫 𑀚𑀸𑀢𑁄.

𑀢𑀲𑁆𑀲 𑀧𑀜𑁆𑀳𑀓𑀫𑁆𑀫𑁂 𑀅𑀬𑀫𑀦𑀼𑀧𑀼𑀩𑁆𑀩𑀺𑀓𑀣𑀸 𑁋 𑀅𑀬𑀜𑁆𑀳𑀺 𑀧𑀤𑀼𑀫𑀼𑀢𑁆𑀢𑀭𑀩𑀼𑀤𑁆𑀥𑀓𑀸𑀮𑁂 𑀳𑀁𑀲𑀯𑀢𑀻𑀦𑀕𑀭𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀥𑀫𑁆𑀫𑀁 𑀲𑀼𑀡𑀦𑁆𑀢𑁄 𑀲𑀢𑁆𑀣𑀸𑀭𑀁 𑀏𑀓𑀁 𑀪𑀺𑀓𑁆𑀔𑀼𑀁 𑀲𑁂𑀦𑀸𑀲𑀦𑀧𑀜𑁆𑀜𑀸𑀧𑀓𑀸𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀦𑁆𑀢𑀁 𑀤𑀺𑀲𑁆𑀯𑀸 𑀅𑀥𑀺𑀓𑀸𑀭𑀓𑀫𑁆𑀫𑀁 𑀓𑀢𑁆𑀯𑀸 𑀢𑀁 𑀞𑀸𑀦𑀦𑁆𑀢𑀭𑀁 𑀧𑀢𑁆𑀣𑁂𑀢𑁆𑀯𑀸 𑀲𑀢𑁆𑀣𑀸𑀭𑀸 𑀩𑁆𑀬𑀸𑀓𑀢𑁄 𑀬𑀸𑀯𑀚𑀻𑀯𑀁 𑀓𑀼𑀲𑀮𑀁 𑀓𑀢𑁆𑀯𑀸 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀺𑀢𑁆𑀯𑀸 𑀓𑀲𑁆𑀲𑀧𑀤𑀲𑀩𑀮𑀲𑁆𑀲 𑀲𑀸𑀲𑀦𑀲𑁆𑀲 𑀑𑀲𑀓𑁆𑀓𑀦𑀓𑀸𑀮𑁂 𑀧𑀩𑁆𑀩𑀚𑀺, 𑀢𑀤𑀸 𑀢𑁂𑀦 𑀲𑀤𑁆𑀥𑀺𑀁 𑀅𑀧𑀭𑁂 𑀙 𑀚𑀦𑀸𑀢𑀺 𑀲𑀢𑁆𑀢 𑀪𑀺𑀓𑁆𑀔𑀽 𑀏𑀓𑀘𑀺𑀢𑁆𑀢𑀸 𑀳𑀼𑀢𑁆𑀯𑀸 𑀅𑀜𑁆𑀜𑁂 𑀲𑀸𑀲𑀦𑁂 𑀅𑀕𑀸𑀭𑀯𑀁 𑀓𑀭𑁄𑀦𑁆𑀢𑁂 𑀤𑀺𑀲𑁆𑀯𑀸 ‘‘𑀇𑀥 𑀓𑀺𑀁 𑀓𑀭𑁄𑀫, 𑀏𑀓𑀫𑀦𑁆𑀢𑁂 𑀲𑀫𑀡𑀥𑀫𑁆𑀫𑀁 𑀓𑀢𑁆𑀯𑀸 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀦𑀺𑀲𑁆𑀲𑁂𑀡𑀺𑀁 𑀩𑀦𑁆𑀥𑀺𑀢𑁆𑀯𑀸 𑀉𑀘𑁆𑀘𑀧𑀩𑁆𑀩𑀢𑀲𑀺𑀔𑀭𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 ‘‘𑀅𑀢𑁆𑀢𑀦𑁄 𑀘𑀺𑀢𑁆𑀢𑀩𑀮𑀁 𑀚𑀸𑀦𑀦𑁆𑀢𑀸 𑀦𑀺𑀲𑁆𑀲𑁂𑀡𑀺𑀁 𑀧𑀸𑀢𑁂𑀦𑁆𑀢𑀼, 𑀚𑀻𑀯𑀺𑀢𑁂 𑀲𑀸𑀮𑀬𑀸 𑀑𑀢𑀭𑀦𑁆𑀢𑀼, 𑀫𑀸 𑀧𑀘𑁆𑀙𑀸𑀦𑀼𑀢𑀸𑀧𑀺𑀦𑁄 𑀅𑀳𑀼𑀯𑀢𑁆𑀣𑀸’’𑀢𑀺 𑀯𑀢𑁆𑀯𑀸 𑀲𑀩𑁆𑀩𑁂 𑀏𑀓𑀘𑀺𑀢𑁆𑀢𑀸 𑀳𑀼𑀢𑁆𑀯𑀸 𑀦𑀺𑀲𑁆𑀲𑁂𑀡𑀺𑀁 𑀧𑀸𑀢𑁂𑀢𑁆𑀯𑀸 ‘‘𑀅𑀧𑁆𑀧𑀫𑀢𑁆𑀢𑀸 𑀳𑁄𑀣, 𑀆𑀯𑀼𑀲𑁄’’𑀢𑀺 𑀅𑀜𑁆𑀜𑀫𑀜𑁆𑀜𑀁 𑀑𑀯𑀤𑀺𑀢𑁆𑀯𑀸 𑀘𑀺𑀢𑁆𑀢𑀭𑀼𑀘𑀺𑀬𑁂𑀲𑀼 𑀞𑀸𑀦𑁂𑀲𑀼 𑀦𑀺𑀲𑀻𑀤𑀺𑀢𑁆𑀯𑀸 𑀲𑀫𑀡𑀥𑀫𑁆𑀫𑀁 𑀓𑀸𑀢𑀼𑀁 𑀆𑀭𑀪𑀺𑀁𑀲𑀼.

𑀢𑀢𑁆𑀭𑁂𑀓𑁄 𑀣𑁂𑀭𑁄 𑀧𑀜𑁆𑀘𑀫𑁂 𑀤𑀺𑀯𑀲𑁂 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 ‘‘𑀫𑀫 𑀓𑀺𑀘𑁆𑀘𑀁 𑀦𑀺𑀧𑁆𑀨𑀦𑁆𑀦𑀁, 𑀅𑀳𑀁 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀓𑀺𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀇𑀤𑁆𑀥𑀺𑀬𑀸 𑀉𑀢𑁆𑀢𑀭𑀓𑀼𑀭𑀼𑀢𑁄 𑀧𑀺𑀡𑁆𑀟𑀧𑀸𑀢𑀁 𑀆𑀳𑀭𑀺𑀢𑁆𑀯𑀸, ‘‘𑀆𑀯𑀼𑀲𑁄, 𑀇𑀫𑀁 𑀧𑀺𑀡𑁆𑀟𑀧𑀸𑀢𑀁 𑀧𑀭𑀺𑀪𑀼𑀜𑁆𑀚𑀣, 𑀪𑀺𑀓𑁆𑀔𑀸𑀘𑀸𑀭𑀓𑀺𑀘𑁆𑀘𑀁 𑀫𑀫𑀸𑀬𑀢𑁆𑀢𑀁 𑀳𑁄𑀢𑀼, 𑀢𑀼𑀫𑁆𑀳𑁂 𑀅𑀢𑁆𑀢𑀦𑁄 𑀓𑀫𑁆𑀫𑀁 𑀓𑀭𑁄𑀣𑀸’’𑀢𑀺 𑀆𑀳. 𑀓𑀺𑀁 𑀦𑀼 𑀔𑁄 𑀫𑀬𑀁, 𑀆𑀯𑀼𑀲𑁄, 𑀦𑀺𑀲𑁆𑀲𑁂𑀡𑀺𑀁 𑀧𑀸𑀢𑁂𑀦𑁆𑀢𑀸 𑀏𑀯𑀁 𑀅𑀯𑁄𑀘𑀼𑀫𑁆𑀳𑀸 ‘‘𑀬𑁄 𑀧𑀞𑀫𑀁 𑀥𑀫𑁆𑀫𑀁 𑀲𑀘𑁆𑀙𑀺𑀓𑀭𑁄𑀢𑀺, 𑀲𑁄 𑀪𑀺𑀓𑁆𑀔𑀁 𑀆𑀳𑀭𑀢𑀼, 𑀢𑁂𑀦 𑀆𑀪𑀢𑀁 𑀲𑁂𑀲𑀸 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀲𑀫𑀡𑀥𑀫𑁆𑀫𑀁 𑀓𑀭𑀺𑀲𑁆𑀲𑀦𑁆𑀢𑀻’’𑀢𑀺. 𑀦𑀢𑁆𑀣𑀺, 𑀆𑀯𑀼𑀲𑁄𑀢𑀺. 𑀢𑀼𑀫𑁆𑀳𑁂 𑀅𑀢𑁆𑀢𑀦𑁄 𑀧𑀼𑀩𑁆𑀩𑀳𑁂𑀢𑀼𑀦𑀸 𑀮𑀪𑀺𑀢𑁆𑀣, 𑀫𑀬𑀫𑁆𑀧𑀺 𑀲𑀓𑁆𑀓𑁄𑀦𑁆𑀢𑀸 𑀯𑀝𑁆𑀝𑀲𑁆𑀲𑀦𑁆𑀢𑀁 𑀓𑀭𑀺𑀲𑁆𑀲𑀸𑀫, 𑀕𑀘𑁆𑀙𑀣 𑀢𑀼𑀫𑁆𑀳𑁂𑀢𑀺. 𑀣𑁂𑀭𑁄 𑀢𑁂 𑀲𑀜𑁆𑀜𑀸𑀧𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀨𑀸𑀲𑀼𑀓𑀝𑁆𑀞𑀸𑀦𑁂 𑀧𑀺𑀡𑁆𑀟𑀧𑀸𑀢𑀁 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀕𑀢𑁄. 𑀅𑀧𑀭𑁄 𑀣𑁂𑀭𑁄 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀅𑀦𑀸𑀕𑀸𑀫𑀺𑀨𑀮𑀁 𑀧𑀢𑁆𑀯𑀸 𑀢𑀢𑁄 𑀘𑀼𑀢𑁄 𑀲𑀼𑀤𑁆𑀥𑀸𑀯𑀸𑀲𑀩𑁆𑀭𑀳𑁆𑀫𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑁄.

𑀇𑀢𑀭𑁂𑀧𑀺 𑀣𑁂𑀭𑀸 𑀢𑀢𑁄 𑀘𑀼𑀢𑀸 𑀏𑀓𑀁 𑀩𑀼𑀤𑁆𑀥𑀦𑁆𑀢𑀭𑀁 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀢𑁂𑀲𑀼 𑀢𑁂𑀲𑀼 𑀓𑀼𑀮𑁂𑀲𑀼 𑀦𑀺𑀩𑁆𑀩𑀢𑁆𑀢𑀸. 𑀏𑀓𑁄 𑀕𑀦𑁆𑀥𑀸𑀭𑀭𑀝𑁆𑀞𑁂 𑀢𑀓𑁆𑀓𑀲𑀺𑀮𑀦𑀕𑀭𑁂 𑀭𑀸𑀚𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄, 𑀏𑀓𑁄 𑀧𑀩𑁆𑀩𑀢𑁂𑀬𑁆𑀬𑀭𑀝𑁆𑀞𑁂 𑀧𑀭𑀺𑀩𑁆𑀩𑀸𑀚𑀺𑀓𑀸𑀬 𑀓𑀼𑀘𑁆𑀙𑀺𑀫𑁆𑀳𑀺 𑀦𑀺𑀩𑁆𑀩𑀢𑁆𑀢𑁄, 𑀏𑀓𑁄 𑀩𑀸𑀳𑀺𑀬𑀭𑀝𑁆𑀞𑁂 𑀓𑀼𑀝𑀼𑀫𑁆𑀩𑀺𑀓𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄, 𑀏𑀓𑁄 𑀭𑀸𑀚𑀕𑀳𑁂 𑀓𑀼𑀝𑀼𑀫𑁆𑀩𑀺𑀓𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄. 𑀅𑀬𑀁 𑀧𑀦 𑀤𑀩𑁆𑀩𑀢𑁆𑀣𑁂𑀭𑁄 𑀫𑀮𑁆𑀮𑀭𑀝𑁆𑀞𑁂 𑀅𑀦𑀼𑀧𑀺𑀬𑀦𑀕𑀭𑁂 𑀏𑀓𑀲𑁆𑀲 𑀫𑀮𑁆𑀮𑀭𑀜𑁆𑀜𑁄 𑀕𑁂𑀳𑁂 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺. 𑀢𑀲𑁆𑀲 𑀫𑀸𑀢𑀸 𑀉𑀧𑀯𑀺𑀚𑀜𑁆𑀜𑀓𑀸𑀮𑁂 𑀓𑀸𑀮𑀫𑀓𑀸𑀲𑀺, 𑀫𑀢𑀲𑀭𑀻𑀭𑀁 𑀲𑀼𑀲𑀸𑀦𑀁 𑀦𑁂𑀢𑁆𑀯𑀸 𑀤𑀸𑀭𑀼𑀘𑀺𑀢𑀓𑀁 𑀆𑀭𑁄𑀧𑁂𑀢𑁆𑀯𑀸 𑀅𑀕𑁆𑀕𑀺𑀁 𑀅𑀤𑀁𑀲𑀼. 𑀢𑀲𑁆𑀲𑀸 𑀅𑀕𑁆𑀕𑀺𑀯𑁂𑀕𑀲𑀦𑁆𑀢𑀢𑁆𑀢𑀁 𑀉𑀤𑀭𑀧𑀝𑀮𑀁 𑀤𑁆𑀯𑁂𑀥𑀸 𑀅𑀳𑁄𑀲𑀺. 𑀤𑀸𑀭𑀓𑁄 𑀅𑀢𑁆𑀢𑀦𑁄 𑀧𑀼𑀜𑁆𑀜𑀩𑀮𑁂𑀦 𑀉𑀧𑁆𑀧𑀢𑀺𑀢𑁆𑀯𑀸 𑀏𑀓𑀲𑁆𑀫𑀺𑀁 𑀤𑀩𑁆𑀩𑀢𑁆𑀣𑀫𑁆𑀪𑁂 𑀦𑀺𑀧𑀢𑀺. 𑀢𑀁 𑀤𑀸𑀭𑀓𑀁 𑀕𑀳𑁂𑀢𑁆𑀯𑀸 𑀅𑀬𑁆𑀬𑀺𑀓𑀸𑀬 𑀅𑀤𑀁𑀲𑀼. 𑀲𑀸 𑀢𑀲𑁆𑀲 𑀦𑀸𑀫𑀁 𑀕𑀡𑁆𑀳𑀦𑁆𑀢𑀻 𑀤𑀩𑁆𑀩𑀢𑁆𑀣𑀫𑁆𑀪𑁂 𑀦𑀺𑀧𑀢𑀺𑀢𑁆𑀯𑀸 𑀮𑀤𑁆𑀥𑀚𑀻𑀯𑀺𑀢𑀢𑁆𑀢𑀸 𑀤𑀩𑁆𑀩𑁄𑀢𑀺𑀲𑁆𑀲 𑀦𑀸𑀫𑀁 𑀅𑀓𑀸𑀲𑀺.

𑀢𑀲𑁆𑀲 𑀲𑀢𑁆𑀢𑀯𑀲𑁆𑀲𑀺𑀓𑀓𑀸𑀮𑁂 𑀲𑀢𑁆𑀣𑀸 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀸𑀭𑁄 𑀫𑀮𑁆𑀮𑀭𑀝𑁆𑀞𑁂 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀅𑀦𑀼𑀧𑀺𑀬𑀦𑀺𑀕𑀫𑀁 𑀧𑀢𑁆𑀯𑀸 𑀅𑀦𑀼𑀧𑀺𑀬𑀫𑁆𑀩𑀯𑀦𑁂 𑀯𑀺𑀳𑀭𑀢𑀺. 𑀤𑀩𑁆𑀩𑀓𑀼𑀫𑀸𑀭𑁄 𑀲𑀢𑁆𑀣𑀸𑀭𑀁 𑀤𑀺𑀲𑁆𑀯𑀸 𑀤𑀲𑁆𑀲𑀦𑁂𑀦𑁂𑀯 𑀧𑀲𑀻𑀤𑀺𑀢𑁆𑀯𑀸 𑀧𑀩𑁆𑀩𑀚𑀺𑀢𑀼𑀓𑀸𑀫𑁄 𑀳𑀼𑀢𑁆𑀯𑀸 ‘‘𑀅𑀳𑀁 𑀤𑀲𑀩𑀮𑀲𑁆𑀲 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺 𑀅𑀬𑁆𑀬𑀺𑀓𑀁 𑀆𑀧𑀼𑀘𑁆𑀙𑀺. 𑀲𑀸 ‘‘𑀲𑀸𑀥𑀼, 𑀢𑀸𑀢𑀸’’𑀢𑀺 𑀤𑀩𑁆𑀩𑀓𑀼𑀫𑀸𑀭𑀁 𑀆𑀤𑀸𑀬 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸, ‘‘𑀪𑀦𑁆𑀢𑁂, 𑀇𑀫𑀁 𑀓𑀼𑀫𑀸𑀭𑀁 𑀧𑀩𑁆𑀩𑀸𑀚𑁂𑀣𑀸’’𑀢𑀺 𑀆𑀳. 𑀲𑀢𑁆𑀣𑀸 𑀅𑀜𑁆𑀜𑀢𑀭𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀜𑁆𑀜𑀁 𑀅𑀤𑀸𑀲𑀺 ‘‘𑀪𑀺𑀓𑁆𑀔𑀼 𑀇𑀫𑀁 𑀤𑀸𑀭𑀓𑀁 𑀧𑀩𑁆𑀩𑀸𑀚𑁂𑀳𑀻’’𑀢𑀺. 𑀲𑁄 𑀣𑁂𑀭𑁄 𑀲𑀢𑁆𑀣𑀼 𑀯𑀘𑀦𑀁 𑀲𑀼𑀢𑁆𑀯𑀸 𑀤𑀩𑁆𑀩𑀓𑀼𑀫𑀸𑀭𑀁 𑀧𑀩𑁆𑀩𑀸𑀚𑁂𑀦𑁆𑀢𑁄 𑀢𑀘𑀧𑀜𑁆𑀘𑀓𑀁 𑀓𑀫𑁆𑀫𑀝𑁆𑀞𑀸𑀦𑀁 𑀆𑀘𑀺𑀓𑁆𑀔𑀺. 𑀧𑀼𑀩𑁆𑀩𑀳𑁂𑀢𑀼𑀲𑀫𑁆𑀧𑀦𑁆𑀦𑁄 𑀓𑀢𑀸𑀪𑀺𑀦𑀻𑀳𑀸𑀭𑁄 𑀲𑀢𑁆𑀢𑁄 𑀧𑀞𑀫𑀓𑁂𑀲𑀯𑀝𑁆𑀝𑀺𑀬𑀸 𑀑𑀭𑁄𑀧𑀺𑀬𑀫𑀸𑀦𑀸𑀬 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀸𑀲𑀺, 𑀤𑀼𑀢𑀺𑀬𑀓𑁂𑀲𑀯𑀝𑁆𑀝𑀺𑀬𑀸 𑀑𑀭𑁄𑀧𑀺𑀬𑀫𑀸𑀦𑀸𑀬 𑀲𑀓𑀤𑀸𑀕𑀸𑀫𑀺𑀨𑀮𑁂, 𑀢𑀢𑀺𑀬𑀸𑀬 𑀅𑀦𑀸𑀕𑀸𑀫𑀺𑀨𑀮𑁂. 𑀲𑀩𑁆𑀩𑀓𑁂𑀲𑀸𑀦𑀁 𑀧𑀦 𑀑𑀭𑁄𑀧𑀦𑀜𑁆𑀘 𑀅𑀭𑀳𑀢𑁆𑀢𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸 𑀘 𑀅𑀧𑀘𑁆𑀙𑀸 𑀅𑀧𑀼𑀭𑁂 𑀅𑀳𑁄𑀲𑀺.

𑀲𑀢𑁆𑀣𑀸 𑀫𑀮𑁆𑀮𑀭𑀝𑁆𑀞𑁂 𑀬𑀣𑀸𑀪𑀺𑀭𑀦𑁆𑀢𑀁 𑀯𑀺𑀳𑀭𑀺𑀢𑁆𑀯𑀸 𑀭𑀸𑀚𑀕𑀳𑀁 𑀕𑀦𑁆𑀢𑁆𑀯𑀸 𑀯𑁂𑀴𑀼𑀯𑀦𑁂 𑀯𑀸𑀲𑀁 𑀓𑀧𑁆𑀧𑁂𑀲𑀺. 𑀢𑀢𑁆𑀭𑀸𑀬𑀲𑁆𑀫𑀸 𑀤𑀩𑁆𑀩𑁄 𑀫𑀮𑁆𑀮𑀧𑀼𑀢𑁆𑀢𑁄 𑀭𑀳𑁄𑀕𑀢𑁄 𑀅𑀢𑁆𑀢𑀦𑁄 𑀓𑀺𑀘𑁆𑀘𑀦𑀺𑀧𑁆𑀨𑀢𑁆𑀢𑀺𑀁 𑀑𑀮𑁄𑀓𑁂𑀢𑁆𑀯𑀸 𑀲𑀗𑁆𑀖𑀲𑁆𑀲 𑀯𑁂𑀬𑁆𑀬𑀸𑀯𑀘𑁆𑀘𑀓𑀭𑀡𑁂 𑀓𑀸𑀬𑀁 𑀬𑁄𑀚𑁂𑀢𑀼𑀓𑀸𑀫𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀬𑀁𑀦𑀽𑀦𑀸𑀳𑀁 𑀲𑀗𑁆𑀖𑀲𑁆𑀲 𑀲𑁂𑀦𑀸𑀲𑀦𑀜𑁆𑀘 𑀧𑀜𑁆𑀜𑀸𑀧𑁂𑀬𑁆𑀬𑀁, 𑀪𑀢𑁆𑀢𑀸𑀦𑀺 𑀘 𑀉𑀤𑁆𑀤𑀺𑀲𑁂𑀬𑁆𑀬’’𑀦𑁆𑀢𑀺. 𑀲𑁄 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀅𑀢𑁆𑀢𑀦𑁄 𑀧𑀭𑀺𑀯𑀺𑀢𑀓𑁆𑀓𑀁 𑀆𑀭𑁄𑀘𑁂𑀲𑀺. 𑀲𑀢𑁆𑀣𑀸 𑀢𑀲𑁆𑀲 𑀲𑀸𑀥𑀼𑀓𑀸𑀭𑀁 𑀤𑀢𑁆𑀯𑀸 𑀲𑁂𑀦𑀸𑀲𑀦𑀧𑀜𑁆𑀜𑀸𑀧𑀓𑀢𑁆𑀢𑀜𑁆𑀘 𑀪𑀢𑁆𑀢𑀼𑀤𑁆𑀤𑁂𑀲𑀓𑀢𑁆𑀢𑀜𑁆𑀘 𑀲𑀫𑁆𑀧𑀝𑀺𑀘𑁆𑀙𑀺. 𑀅𑀣 𑀦𑀁 ‘‘𑀅𑀬𑀁 𑀤𑀩𑁆𑀩𑁄 𑀤𑀳𑀭𑁄𑀯 𑀲𑀫𑀸𑀦𑁄 𑀫𑀳𑀦𑁆𑀢𑀝𑁆𑀞𑀸𑀦𑁂 𑀞𑀺𑀢𑁄’’𑀢𑀺 𑀲𑀢𑁆𑀢𑀯𑀲𑁆𑀲𑀺𑀓𑀓𑀸𑀮𑁂𑀬𑁂𑀯 𑀉𑀧𑀲𑀫𑁆𑀧𑀸𑀤𑁂𑀲𑀺. 𑀣𑁂𑀭𑁄 𑀉𑀧𑀲𑀫𑁆𑀧𑀦𑁆𑀦𑀓𑀸𑀮𑀢𑁄𑀬𑁂𑀯 𑀧𑀝𑁆𑀞𑀸𑀬 𑀭𑀸𑀚𑀕𑀳𑀁 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑀦𑁆𑀢𑀸𑀦𑀁 𑀲𑀩𑁆𑀩𑀪𑀺𑀓𑁆𑀔𑀽𑀦𑀁 𑀲𑁂𑀦𑀸𑀲𑀦𑀸𑀦𑀺 𑀘 𑀧𑀜𑁆𑀜𑀸𑀧𑁂𑀢𑀺, 𑀪𑀺𑀓𑁆𑀔𑀜𑁆𑀘 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀉𑀤𑁆𑀤𑀺𑀲𑀢𑀺. 𑀢𑀲𑁆𑀲 𑀲𑁂𑀦𑀸𑀲𑀦𑀧𑀜𑁆𑀜𑀸𑀧𑀓𑀪𑀸𑀯𑁄 𑀲𑀩𑁆𑀩𑀤𑀺𑀲𑀸𑀲𑀼 𑀧𑀸𑀓𑀝𑁄 𑀅𑀳𑁄𑀲𑀺 𑁋 ‘‘𑀤𑀩𑁆𑀩𑁄 𑀓𑀺𑀭 𑀫𑀮𑁆𑀮𑀧𑀼𑀢𑁆𑀢𑁄 𑀲𑀪𑀸𑀕𑀲𑀪𑀸𑀕𑀸𑀦𑀁 𑀪𑀺𑀓𑁆𑀔𑀽𑀦𑀁 𑀏𑀓𑀝𑁆𑀞𑀸𑀦𑁂 𑀲𑁂𑀦𑀸𑀲𑀦𑀸𑀦𑀺 𑀧𑀜𑁆𑀜𑀸𑀧𑁂𑀢𑀺, 𑀤𑀽𑀭𑁂𑀧𑀺 𑀲𑁂𑀦𑀸𑀲𑀦𑀁 𑀧𑀜𑁆𑀜𑀸𑀧𑁂𑀢𑀺𑀬𑁂𑀯. 𑀕𑀦𑁆𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁂 𑀇𑀤𑁆𑀥𑀺𑀬𑀸 𑀦𑁂𑀢𑀻𑀢𑀺.

𑀅𑀣 𑀦𑀁 𑀪𑀺𑀓𑁆𑀔𑀽 𑀓𑀸𑀮𑁂𑀧𑀺 𑀯𑀺𑀓𑀸𑀮𑁂𑀧𑀺 ‘‘𑀅𑀫𑁆𑀳𑀸𑀓𑀁, 𑀆𑀯𑀼𑀲𑁄, 𑀚𑀻𑀯𑀓𑀫𑁆𑀩𑀯𑀦𑁂 𑀲𑁂𑀦𑀸𑀲𑀦𑀁 𑀧𑀜𑁆𑀜𑀸𑀧𑁂𑀳𑀺, 𑀅𑀫𑁆𑀳𑀸𑀓𑀁 𑀫𑀤𑁆𑀤𑀓𑀼𑀘𑁆𑀙𑀺𑀲𑁆𑀫𑀺𑀁 𑀫𑀺𑀕𑀤𑀸𑀬𑁂’’𑀢𑀺 𑀏𑀯𑀁 𑀲𑁂𑀦𑀸𑀲𑀦𑀁 𑀉𑀤𑁆𑀤𑀺𑀲𑀸𑀧𑁂𑀢𑁆𑀯𑀸 𑀢𑀲𑁆𑀲 𑀇𑀤𑁆𑀥𑀺𑀁 𑀧𑀲𑁆𑀲𑀦𑁆𑀢𑀸 𑀕𑀘𑁆𑀙𑀦𑁆𑀢𑀺. 𑀲𑁄𑀧𑀺 𑀇𑀤𑁆𑀥𑀺𑀬𑀸 𑀫𑀦𑁄𑀫𑀬𑁂 𑀓𑀸𑀬𑁂 𑀅𑀪𑀺𑀲𑀗𑁆𑀔𑀭𑀺𑀢𑁆𑀯𑀸 𑀏𑀓𑁂𑀓𑀲𑁆𑀲 𑀣𑁂𑀭𑀲𑁆𑀲 𑀏𑀓𑁂𑀓𑀁 𑀅𑀢𑁆𑀢𑀦𑀸 𑀲𑀤𑀺𑀲𑀁 𑀪𑀺𑀓𑁆𑀔𑀼𑀁 𑀦𑀺𑀫𑁆𑀫𑀺𑀦𑀺𑀢𑁆𑀯𑀸 𑀅𑀗𑁆𑀕𑀼𑀮𑀺𑀬𑀸 𑀚𑀮𑀫𑀸𑀦𑀸𑀬 𑀧𑀼𑀭𑀢𑁄 𑀧𑀼𑀭𑀢𑁄 𑀕𑀦𑁆𑀢𑁆𑀯𑀸 ‘‘𑀅𑀬𑀁 𑀫𑀜𑁆𑀘𑁄, 𑀇𑀤𑀁 𑀧𑀻𑀞’’𑀦𑁆𑀢𑀺𑀆𑀤𑀻𑀦𑀺 𑀯𑀢𑁆𑀯𑀸 𑀲𑁂𑀦𑀸𑀲𑀦𑀁 𑀧𑀜𑁆𑀜𑀸𑀧𑁂𑀢𑁆𑀯𑀸 𑀧𑀼𑀦 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀫𑁂𑀯 𑀆𑀕𑀘𑁆𑀙𑀢𑀺. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑀢𑁄 𑀧𑀦𑀺𑀤𑀁 𑀯𑀢𑁆𑀣𑀼 𑀧𑀸𑀴𑀺𑀬𑀁 𑀆𑀕𑀢𑀫𑁂𑀯. 𑀲𑀢𑁆𑀣𑀸 𑀇𑀤𑀫𑁂𑀯 𑀓𑀸𑀭𑀡𑀁 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀁 𑀓𑀢𑁆𑀯𑀸 𑀅𑀧𑀭𑀪𑀸𑀕𑁂 𑀅𑀭𑀺𑀬𑀕𑀡𑀫𑀚𑁆𑀛𑁂 𑀦𑀺𑀲𑀺𑀦𑁆𑀦𑁄 𑀣𑁂𑀭𑀁 𑀲𑁂𑀦𑀸𑀲𑀦𑀧𑀜𑁆𑀜𑀸𑀧𑀓𑀸𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀲𑀻𑀢𑀺.

𑀧𑀺𑀮𑀺𑀦𑁆𑀤𑀯𑀘𑁆𑀙𑀢𑁆𑀣𑁂𑀭𑀯𑀢𑁆𑀣𑀼

𑁨𑁧𑁫. 𑀲𑀢𑁆𑀢𑀫𑁂 𑀤𑁂𑀯𑀢𑀸𑀦𑀁 𑀧𑀺𑀬𑀫𑀦𑀸𑀧𑀸𑀦𑀦𑁆𑀢𑀺 𑀤𑁂𑀯𑀢𑀸𑀦𑀁 𑀧𑀺𑀬𑀸𑀦𑀜𑁆𑀘𑁂𑀯 𑀫𑀦𑀸𑀧𑀸𑀦𑀜𑁆𑀘 𑀧𑀺𑀮𑀺𑀦𑁆𑀤𑀯𑀘𑁆𑀙𑀢𑁆𑀣𑁂𑀭𑁄 𑀅𑀕𑁆𑀕𑁄𑀢𑀺 𑀤𑀲𑁆𑀲𑁂𑀢𑀺. 𑀲𑁄 𑀓𑀺𑀭 𑀅𑀦𑀼𑀧𑁆𑀧𑀦𑁆𑀦𑁂 𑀩𑀼𑀤𑁆𑀥𑁂 𑀘𑀓𑁆𑀓𑀯𑀢𑁆𑀢𑀻 𑀭𑀸𑀚𑀸 𑀳𑀼𑀢𑁆𑀯𑀸 𑀫𑀳𑀸𑀚𑀦𑀁 𑀧𑀜𑁆𑀘𑀲𑀼 𑀲𑀻𑀮𑁂𑀲𑀼 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀲𑀕𑁆𑀕𑀧𑀭𑀸𑀬𑀡𑀁 𑀅𑀓𑀸𑀲𑀺. 𑀬𑁂𑀪𑀼𑀬𑁆𑀬𑁂𑀦 𑀓𑀺𑀭 𑀙𑀲𑀼 𑀓𑀸𑀫𑀲𑀕𑁆𑀕𑁂𑀲𑀼 𑀦𑀺𑀩𑁆𑀩𑀢𑁆𑀢𑀤𑁂𑀯𑀢𑀸 𑀢𑀲𑁆𑀲𑁂𑀯 𑀑𑀯𑀸𑀤𑀁 𑀮𑀪𑀺𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀦𑀺𑀩𑁆𑀩𑀢𑁆𑀢𑀝𑁆𑀞𑀸𑀦𑁂 𑀅𑀢𑁆𑀢𑀦𑁄 𑀲𑀫𑁆𑀧𑀢𑁆𑀢𑀺𑀁 𑀑𑀮𑁄𑀓𑁂𑀢𑁆𑀯𑀸 ‘‘𑀓𑀁 𑀦𑀼 𑀔𑁄 𑀦𑀺𑀲𑁆𑀲𑀸𑀬 𑀇𑀫𑀁 𑀲𑀕𑁆𑀕𑀲𑀫𑁆𑀧𑀢𑁆𑀢𑀺𑀁 𑀮𑀪𑀺𑀫𑁆𑀳𑀸’’𑀢𑀺 𑀆𑀯𑀚𑁆𑀚𑀫𑀸𑀦𑀸 𑀇𑀫𑀁 𑀣𑁂𑀭𑀁 𑀤𑀺𑀲𑁆𑀯𑀸 ‘‘𑀣𑁂𑀭𑀁 𑀦𑀺𑀲𑁆𑀲𑀸𑀬 𑀅𑀫𑁆𑀳𑁂𑀳𑀺 𑀲𑀫𑁆𑀧𑀢𑀺 𑀮𑀤𑁆𑀥𑀸’’𑀢𑀺 𑀲𑀸𑀬𑀁𑀧𑀸𑀢𑀁 𑀣𑁂𑀭𑀁 𑀦𑀫𑀲𑁆𑀲𑀦𑁆𑀢𑀺. 𑀢𑀲𑁆𑀫𑀸 𑀲𑁄 𑀤𑁂𑀯𑀢𑀸𑀦𑀁 𑀧𑀺𑀬𑀫𑀦𑀸𑀧𑀸𑀦𑀁 𑀅𑀕𑁆𑀕𑁄 𑀦𑀸𑀫 𑀚𑀸𑀢𑁄. 𑀧𑀺𑀮𑀺𑀦𑁆𑀤𑁄𑀢𑀺 𑀧𑀦𑀲𑁆𑀲 𑀕𑁄𑀢𑁆𑀢𑀁, 𑀯𑀘𑁆𑀙𑁄𑀢𑀺 𑀦𑀸𑀫𑀁. 𑀢𑀤𑀼𑀪𑀬𑀁 𑀲𑀁𑀲𑀦𑁆𑀤𑁂𑀢𑁆𑀯𑀸 𑀧𑀺𑀮𑀺𑀦𑁆𑀤𑀯𑀘𑁆𑀙𑁄𑀢𑀺 𑀯𑀼𑀘𑁆𑀘𑀢𑀺.

𑀢𑀲𑁆𑀲 𑀧𑀜𑁆𑀳𑀓𑀫𑁆𑀫𑁂 𑀅𑀬𑀫𑀦𑀼𑀧𑀼𑀩𑁆𑀩𑀺𑀓𑀣𑀸 𑁋 𑀅𑀬𑀁 𑀓𑀺𑀭 𑀧𑀤𑀼𑀫𑀼𑀢𑁆𑀢𑀭𑀩𑀼𑀤𑁆𑀥𑀓𑀸𑀮𑁂 𑀳𑀁𑀲𑀯𑀢𑀻𑀦𑀕𑀭𑁂 𑀫𑀳𑀸𑀪𑁄𑀕𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄 𑀧𑀼𑀭𑀺𑀫𑀦𑀬𑁂𑀦𑁂𑀯 𑀲𑀢𑁆𑀣𑀼 𑀥𑀫𑁆𑀫𑀤𑁂𑀲𑀦𑀁 𑀲𑀼𑀡𑀦𑁆𑀢𑁄 𑀲𑀢𑁆𑀣𑀸𑀭𑀁 𑀏𑀓𑀁 𑀪𑀺𑀓𑁆𑀔𑀼𑀁 𑀤𑁂𑀯𑀢𑀸𑀦𑀁 𑀧𑀺𑀬𑀫𑀦𑀸𑀧𑀝𑁆𑀞𑀸𑀦𑁂 𑀞𑀧𑁂𑀦𑁆𑀢𑀁 𑀤𑀺𑀲𑁆𑀯𑀸 𑀢𑀁 𑀞𑀸𑀦𑀦𑁆𑀢𑀭𑀁 𑀧𑀢𑁆𑀣𑁂𑀢𑁆𑀯𑀸 𑀬𑀸𑀯𑀚𑀻𑀯𑀁 𑀓𑀼𑀲𑀮𑀁 𑀓𑀢𑁆𑀯𑀸 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀲𑀸𑀯𑀢𑁆𑀣𑀺𑀬𑀁 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺. 𑀧𑀺𑀮𑀺𑀦𑁆𑀤𑀯𑀘𑁆𑀙𑁄𑀢𑀺𑀲𑁆𑀲 𑀦𑀸𑀫𑀁 𑀅𑀓𑀁𑀲𑀼. 𑀲𑁄 𑀅𑀧𑀭𑁂𑀦 𑀲𑀫𑀬𑁂𑀦 𑀲𑀢𑁆𑀣𑀼 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀧𑀝𑀺𑀮𑀤𑁆𑀥𑀲𑀤𑁆𑀥𑁄 𑀧𑀩𑁆𑀩𑀚𑀺𑀢𑁆𑀯𑀸 𑀉𑀧𑀲𑀫𑁆𑀧𑀦𑁆𑀦𑁄 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀲𑁄 𑀕𑀺𑀳𑀻𑀳𑀺𑀧𑀺 𑀪𑀺𑀓𑁆𑀔𑀽𑀳𑀺𑀧𑀺 𑀲𑀤𑁆𑀥𑀺𑀁 𑀓𑀣𑁂𑀦𑁆𑀢𑁄 ‘‘𑀏𑀳𑀺, 𑀯𑀲𑀮, 𑀕𑀘𑁆𑀙, 𑀯𑀲𑀮, 𑀆𑀳𑀭, 𑀯𑀲𑀮, 𑀕𑀡𑁆𑀳, 𑀯𑀲𑀮𑀸’’𑀢𑀺 𑀯𑀲𑀮𑀯𑀸𑀤𑁂𑀦𑁂𑀯 𑀲𑀫𑀼𑀤𑀸𑀘𑀭𑀢𑀺. 𑀢𑀁 𑀓𑀣𑀁 𑀆𑀳𑀭𑀺𑀢𑁆𑀯𑀸 𑀢𑀣𑀸𑀕𑀢𑀁 𑀧𑀼𑀘𑁆𑀙𑀺𑀁𑀲𑀼 𑁋 ‘‘𑀪𑀕𑀯𑀸 𑀅𑀭𑀺𑀬𑀸 𑀦𑀸𑀫 𑀨𑀭𑀼𑀲𑀯𑀸𑀘𑀸 𑀦 𑀳𑁄𑀦𑁆𑀢𑀻’’𑀢𑀺. 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀸𑀦𑀁 𑀧𑀭𑀯𑀫𑁆𑀪𑀦𑀯𑀲𑁂𑀦 𑀨𑀭𑀼𑀲𑀯𑀸𑀘𑀸 𑀦𑀸𑀫 𑀦𑀢𑁆𑀣𑀺, 𑀅𑀧𑀺𑀘 𑀔𑁄 𑀧𑀦 𑀪𑀯𑀦𑁆𑀢𑀭𑁂 𑀆𑀘𑀺𑀡𑁆𑀡𑀯𑀲𑁂𑀦 𑀪𑀯𑁂𑀬𑁆𑀬𑀸𑀢𑀺. 𑀪𑀦𑁆𑀢𑁂, 𑀧𑀺𑀮𑀺𑀦𑁆𑀤𑀯𑀘𑁆𑀙𑀢𑁆𑀣𑁂𑀭𑁄 𑀉𑀝𑁆𑀞𑀸𑀬 𑀲𑀫𑀼𑀝𑁆𑀞𑀸𑀬 𑀕𑀺𑀳𑀻𑀳𑀺𑀧𑀺 𑀪𑀺𑀓𑁆𑀔𑀽𑀳𑀺𑀧𑀺 𑀲𑀤𑁆𑀥𑀺𑀁 𑀓𑀣𑁂𑀦𑁆𑀢𑁄, ‘‘𑀯𑀲𑀮, 𑀯𑀲𑀮𑀸’’𑀢𑀺 𑀓𑀣𑁂𑀢𑀺, 𑀓𑀺𑀫𑁂𑀢𑁆𑀣 𑀓𑀸𑀭𑀡𑀁 𑀪𑀕𑀯𑀸𑀢𑀺. 𑀪𑀺𑀓𑁆𑀔𑀯𑁂, 𑀦 𑀫𑀬𑁆𑀳𑀁 𑀧𑀼𑀢𑁆𑀢𑀲𑁆𑀲 𑀏𑀢𑀁 𑀇𑀤𑀸𑀦𑁂𑀯 𑀆𑀘𑀺𑀡𑁆𑀡𑀁, 𑀅𑀢𑀻𑀢𑁂 𑀧𑀦𑁂𑀲 𑀧𑀜𑁆𑀘 𑀚𑀸𑀢𑀺𑀲𑀢𑀸𑀦𑀺 𑀯𑀲𑀮𑀯𑀸𑀤𑀺𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺. 𑀇𑀘𑁆𑀘𑁂𑀲 𑀪𑀯𑀸𑀘𑀺𑀡𑁆𑀡𑁂𑀦𑁂𑀯 𑀓𑀣𑁂𑀲𑀺, 𑀦 𑀨𑀭𑀼𑀲𑀯𑀲𑁂𑀦. 𑀅𑀭𑀺𑀬𑀸𑀦𑀜𑁆𑀳𑀺 𑀯𑁄𑀳𑀸𑀭𑁄 𑀨𑀭𑀼𑀲𑁄𑀧𑀺 𑀲𑀫𑀸𑀦𑁄 𑀘𑁂𑀢𑀦𑀸𑀬 𑀅𑀨𑀭𑀼𑀲𑀪𑀸𑀯𑁂𑀦 𑀧𑀭𑀺𑀲𑀼𑀤𑁆𑀥𑁄𑀯, 𑀅𑀧𑁆𑀧𑀫𑀢𑁆𑀢𑀓𑀫𑁆𑀧𑁂𑀢𑁆𑀣 𑀧𑀸𑀧𑀁 𑀦 𑀉𑀧𑀮𑀩𑁆𑀪𑀢𑀻𑀢𑀺 𑀯𑀢𑁆𑀯𑀸 𑀥𑀫𑁆𑀫𑀧𑀤𑁂 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀅𑀓𑀓𑁆𑀓𑀲𑀁 𑀯𑀺𑀜𑁆𑀜𑀸𑀧𑀦𑀺𑀁, 𑀕𑀺𑀭𑀁 𑀲𑀘𑁆𑀘𑀫𑀼𑀤𑀻𑀭𑀬𑁂;

𑀬𑀸𑀬 𑀦𑀸𑀪𑀺𑀲𑀚𑁂 𑀓𑀜𑁆𑀘𑀺, 𑀢𑀫𑀳𑀁 𑀩𑁆𑀭𑀽𑀫𑀺 𑀩𑁆𑀭𑀸𑀳𑁆𑀫𑀡’’𑀦𑁆𑀢𑀺.

𑀅𑀣𑁂𑀓𑀤𑀺𑀯𑀲𑀁 𑀣𑁂𑀭𑁄 𑀭𑀸𑀚𑀕𑀳𑀁 𑀧𑀺𑀡𑁆𑀟𑀸𑀬 𑀧𑀯𑀺𑀲𑀦𑁆𑀢𑁄 𑀏𑀓𑀁 𑀧𑀼𑀭𑀺𑀲𑀁 𑀧𑀺𑀧𑁆𑀧𑀮𑀻𑀦𑀁 𑀪𑀸𑀚𑀦𑀁 𑀧𑀽𑀭𑁂𑀢𑁆𑀯𑀸 𑀆𑀤𑀸𑀬 𑀅𑀦𑁆𑀢𑁄𑀦𑀕𑀭𑀁 𑀧𑀯𑀺𑀲𑀦𑁆𑀢𑀁 𑀤𑀺𑀲𑁆𑀯𑀸 ‘‘𑀓𑀺𑀁 𑀢𑁂, 𑀯𑀲𑀮, 𑀪𑀸𑀚𑀦𑁂’’𑀢𑀺 𑀆𑀳. 𑀲𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀬𑀁 𑀲𑀫𑀡𑁄 𑀫𑀬𑀸 𑀲𑀤𑁆𑀥𑀺𑀁 𑀧𑀸𑀢𑁄𑀯 𑀨𑀭𑀼𑀲𑀓𑀣𑀁 𑀓𑀣𑁂𑀲𑀺, 𑀇𑀫𑀲𑁆𑀲 𑀅𑀦𑀼𑀘𑁆𑀙𑀯𑀺𑀓𑀫𑁂𑀯 𑀯𑀢𑁆𑀢𑀼𑀁 𑀯𑀝𑁆𑀝𑀢𑀻’’𑀢𑀺 ‘‘𑀫𑀽𑀲𑀺𑀓𑀯𑀘𑁆𑀘𑀁 𑀫𑁂, 𑀪𑀦𑁆𑀢𑁂, 𑀪𑀸𑀚𑀦𑁂’’𑀢𑀺 𑀆𑀳. 𑀏𑀯𑀁 𑀪𑀯𑀺𑀲𑁆𑀲𑀢𑀺, 𑀯𑀲𑀮𑀸𑀢𑀺. 𑀢𑀲𑁆𑀲 𑀣𑁂𑀭𑀲𑁆𑀲 𑀤𑀲𑁆𑀲𑀦𑀁 𑀯𑀺𑀚𑀳𑀦𑁆𑀢𑀲𑁆𑀲 𑀲𑀩𑁆𑀩𑀁 𑀫𑀽𑀲𑀺𑀓𑀯𑀘𑁆𑀘𑀫𑁂𑀯 𑀅𑀳𑁄𑀲𑀺. 𑀲𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀇𑀫𑀸 𑀧𑀺𑀧𑁆𑀧𑀮𑀺𑀬𑁄 𑀫𑀽𑀲𑀺𑀓𑀯𑀘𑁆𑀘𑀲𑀤𑀺𑀲𑀸 𑀧𑀜𑁆𑀜𑀸𑀬𑀦𑁆𑀢𑀺, 𑀲𑀪𑀸𑀯𑁄 𑀦𑀼 𑀔𑁄 𑀦𑁄’’𑀢𑀺 𑀯𑀻𑀫𑀁𑀲𑀦𑁆𑀢𑁄 𑀳𑀢𑁆𑀣𑁂𑀦 𑀉𑀧𑁆𑀧𑀻𑀴𑁂𑀲𑀺. 𑀅𑀣𑀲𑁆𑀲 𑀉𑀦𑁆𑀤𑀽𑀭𑀯𑀘𑁆𑀘𑀪𑀸𑀯𑀁 𑀜𑀢𑁆𑀯𑀸 𑀩𑀮𑀯𑀤𑁄𑀫𑀦𑀲𑁆𑀲𑀁 𑀉𑀧𑁆𑀧𑀚𑁆𑀚𑀺. 𑀲𑁄 ‘‘𑀇𑀫𑀸𑀬𑁂𑀯 𑀦𑀼 𑀔𑁄 𑀏𑀯𑀭𑀽𑀧𑀸, 𑀉𑀤𑀸𑀳𑀼 𑀲𑀓𑀝𑁂𑀧𑀻’’𑀢𑀺 𑀕𑀦𑁆𑀢𑁆𑀯𑀸 𑀑𑀮𑁄𑀓𑁂𑀦𑁆𑀢𑁄 𑀲𑀩𑁆𑀩𑀸𑀧𑀺 𑀧𑀺𑀧𑁆𑀧𑀮𑀺𑀬𑁄 𑀢𑀸𑀤𑀺𑀲𑀸𑀯 𑀤𑀺𑀲𑁆𑀯𑀸 𑀳𑀤𑀬𑀁 𑀳𑀢𑁆𑀣𑁂𑀦 𑀲𑀦𑁆𑀥𑀸𑀭𑁂𑀢𑁆𑀯𑀸 ‘‘𑀇𑀤𑀁 𑀦 𑀅𑀜𑁆𑀜𑀲𑁆𑀲 𑀓𑀫𑁆𑀫𑀁, 𑀫𑀬𑀸 𑀧𑀸𑀢𑁄𑀯 𑀤𑀺𑀝𑁆𑀞𑀪𑀺𑀓𑁆𑀔𑀼𑀲𑁆𑀲𑁂𑀢𑀁 𑀓𑀫𑁆𑀫𑀁, 𑀅𑀤𑁆𑀥𑀸 𑀏𑀓𑀁 𑀉𑀧𑀸𑀬𑀁 𑀪𑀯𑀺𑀲𑁆𑀲𑀢𑀺, 𑀢𑀲𑁆𑀲 𑀕𑀢𑀝𑁆𑀞𑀸𑀦𑀁 𑀅𑀦𑀼𑀯𑀺𑀘𑀺𑀦𑀺𑀢𑁆𑀯𑀸 𑀏𑀢𑀁 𑀓𑀸𑀭𑀡𑀁 𑀚𑀸𑀦𑀺𑀲𑁆𑀲𑀸𑀫𑀻’’𑀢𑀺 𑀣𑁂𑀭𑀲𑁆𑀲 𑀕𑀢𑀫𑀕𑁆𑀕𑀁 𑀧𑀼𑀘𑁆𑀙𑀺𑀢𑁆𑀯𑀸 𑀧𑀸𑀬𑀸𑀲𑀺.

𑀅𑀣𑁂𑀓𑁄 𑀧𑀼𑀭𑀺𑀲𑁄 𑀢𑀁 𑀅𑀢𑀺𑀯𑀺𑀬 𑀘𑀡𑁆𑀟𑀺𑀓𑀢𑀁 𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸, ‘‘𑀪𑁄 𑀧𑀼𑀭𑀺𑀲, 𑀢𑁆𑀯𑀁 𑀅𑀢𑀺𑀯𑀺𑀬 𑀘𑀡𑁆𑀟𑀺𑀓𑀢𑁄𑀯 𑀕𑀘𑁆𑀙𑀲𑀺, 𑀓𑁂𑀦 𑀓𑀫𑁆𑀫𑁂𑀦 𑀕𑀘𑁆𑀙𑀲𑀻’’𑀢𑀺 𑀧𑀼𑀘𑁆𑀙𑀺. 𑀲𑁄 𑀢𑀲𑁆𑀲 𑀢𑀁 𑀧𑀯𑀢𑁆𑀢𑀺𑀁 𑀆𑀭𑁄𑀘𑁂𑀲𑀺. 𑀲𑁄 𑀢𑀲𑁆𑀲 𑀓𑀣𑀁 𑀲𑀼𑀢𑁆𑀯𑀸 𑀏𑀯𑀫𑀸𑀳 𑁋 ‘‘𑀪𑁄, 𑀫𑀸 𑀘𑀺𑀦𑁆𑀢𑀬𑀺, 𑀫𑀬𑁆𑀳𑀁 𑀅𑀬𑁆𑀬𑁄 𑀧𑀺𑀮𑀺𑀦𑁆𑀤𑀯𑀘𑁆𑀙𑁄 𑀪𑀯𑀺𑀲𑁆𑀲𑀢𑀺, 𑀢𑁆𑀯𑀁 𑀏𑀢𑀤𑁂𑀯 𑀪𑀸𑀚𑀦𑀁 𑀧𑀽𑀭𑁂𑀢𑁆𑀯𑀸 𑀆𑀤𑀸𑀬 𑀕𑀦𑁆𑀢𑁆𑀯𑀸 𑀣𑁂𑀭𑀲𑁆𑀲 𑀧𑀼𑀭𑀢𑁄 𑀢𑀺𑀝𑁆𑀞. ‘𑀓𑀺𑀁 𑀦𑀸𑀫𑁂𑀢𑀁, 𑀯𑀲𑀮𑀸’𑀢𑀺 𑀯𑀼𑀢𑁆𑀢𑀓𑀸𑀮𑁂 𑀘 ‘𑀧𑀺𑀧𑁆𑀧𑀮𑀺𑀬𑁄, 𑀪𑀦𑁆𑀢𑁂’𑀢𑀺 𑀯𑀤, 𑀣𑁂𑀭𑁄 ‘𑀏𑀯𑀁 𑀪𑀯𑀺𑀲𑁆𑀲𑀢𑀺, 𑀯𑀲𑀮𑀸’𑀢𑀺 𑀯𑀓𑁆𑀔𑀢𑀺. 𑀧𑀼𑀦 𑀲𑀩𑁆𑀩𑀸𑀧𑀺 𑀧𑀺𑀧𑁆𑀧𑀮𑀺𑀬𑁄 𑀪𑀯𑀺𑀲𑁆𑀲𑀦𑁆𑀢𑀻’’𑀢𑀺. 𑀲𑁄 𑀢𑀣𑀸 𑀅𑀓𑀸𑀲𑀺. 𑀲𑀩𑁆𑀩𑀸 𑀧𑀺𑀧𑁆𑀧𑀮𑀺𑀬𑁄 𑀧𑀝𑀺𑀧𑀸𑀓𑀢𑀺𑀓𑀸 𑀅𑀳𑁂𑀲𑀼𑀁. 𑀇𑀤𑀫𑁂𑀢𑁆𑀢𑀓𑀁 𑀯𑀢𑁆𑀣𑀼. 𑀅𑀧𑀭𑀪𑀸𑀕𑁂 𑀧𑀦 𑀲𑀢𑁆𑀣𑀸 𑀤𑁂𑀯𑀢𑀸𑀦𑀁 𑀧𑀺𑀬𑀫𑀦𑀸𑀧𑀓𑀸𑀭𑀡𑀫𑁂𑀯 𑀯𑀢𑁆𑀣𑀼𑀁 𑀓𑀢𑁆𑀯𑀸 𑀣𑁂𑀭𑀁 𑀤𑁂𑀯𑀢𑀸𑀦𑀁 𑀧𑀺𑀬𑀫𑀦𑀸𑀧𑀸𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀲𑀻𑀢𑀺.

𑀩𑀸𑀳𑀺𑀬𑀤𑀸𑀭𑀼𑀘𑀻𑀭𑀺𑀬𑀢𑁆𑀣𑁂𑀭𑀯𑀢𑁆𑀣𑀼

𑁨𑁧𑁬. 𑀅𑀝𑁆𑀞𑀫𑁂 𑀔𑀺𑀧𑁆𑀧𑀸𑀪𑀺𑀜𑁆𑀜𑀸𑀦𑀦𑁆𑀢𑀺 𑀔𑀺𑀧𑁆𑀧𑀁 𑀅𑀥𑀺𑀕𑀢𑀅𑀪𑀺𑀜𑁆𑀜𑀸𑀦𑀁 𑀤𑀸𑀭𑀼𑀘𑀻𑀭𑀺𑀬𑀢𑁆𑀣𑁂𑀭𑁄 𑀅𑀕𑁆𑀕𑁄𑀢𑀺 𑀤𑀲𑁆𑀲𑁂𑀢𑀺. 𑀅𑀬𑀜𑁆𑀳𑀺 𑀣𑁂𑀭𑁄 𑀲𑀁𑀔𑀺𑀢𑁆𑀢𑀥𑀫𑁆𑀫𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺, 𑀫𑀕𑁆𑀕𑀨𑀮𑀸𑀦𑀁 𑀧𑀭𑀺𑀓𑀫𑁆𑀫𑀓𑀺𑀘𑁆𑀘𑀁 𑀦𑀸𑀳𑁄𑀲𑀺. 𑀢𑀲𑁆𑀫𑀸 𑀔𑀺𑀧𑁆𑀧𑀸𑀪𑀺𑀜𑁆𑀜𑀸𑀦𑀁 𑀅𑀕𑁆𑀕𑁄 𑀦𑀸𑀫 𑀚𑀸𑀢𑁄. 𑀩𑀸𑀳𑀺𑀬𑀭𑀝𑁆𑀞𑁂 𑀧𑀦 𑀚𑀸𑀢𑀢𑁆𑀢𑀸 𑀩𑀸𑀳𑀺𑀬𑁄𑀢𑀺𑀲𑁆𑀲 𑀦𑀸𑀫𑀁 𑀅𑀳𑁄𑀲𑀺. 𑀲𑁄 𑀅𑀧𑀭𑀪𑀸𑀕𑁂 𑀤𑀸𑀭𑀼𑀘𑀻𑀭𑀁 𑀦𑀺𑀯𑀸𑀲𑁂𑀲𑀺. 𑀢𑀲𑁆𑀫𑀸 𑀤𑀸𑀭𑀼𑀘𑀻𑀭𑀺𑀬𑁄 𑀦𑀸𑀫 𑀚𑀸𑀢𑁄.

𑀢𑀲𑁆𑀲 𑀧𑀜𑁆𑀳𑀓𑀫𑁆𑀫𑁂 𑀅𑀬𑀫𑀦𑀼𑀧𑀼𑀩𑁆𑀩𑀺𑀓𑀣𑀸 𑁋 𑀅𑀬𑀫𑁆𑀧𑀺 𑀳𑀺 𑀧𑀤𑀼𑀫𑀼𑀢𑁆𑀢𑀭𑀩𑀼𑀤𑁆𑀥𑀓𑀸𑀮𑁂 𑀳𑀁𑀲𑀯𑀢𑀻𑀦𑀕𑀭𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀤𑀲𑀩𑀮𑀲𑁆𑀲 𑀥𑀫𑁆𑀫𑀤𑁂𑀲𑀦𑀁 𑀲𑀼𑀡𑀦𑁆𑀢𑁄 𑀲𑀢𑁆𑀣𑀸𑀭𑀁 𑀏𑀓𑀁 𑀪𑀺𑀓𑁆𑀔𑀼𑀁 𑀔𑀺𑀧𑁆𑀧𑀸𑀪𑀺𑀜𑁆𑀜𑀸𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀦𑁆𑀢𑀁 𑀤𑀺𑀲𑁆𑀯𑀸 𑀅𑀥𑀺𑀓𑀸𑀭𑀓𑀫𑁆𑀫𑀁 𑀓𑀢𑁆𑀯𑀸 𑀢𑀁 𑀞𑀸𑀦𑀦𑁆𑀢𑀭𑀁 𑀧𑀢𑁆𑀣𑁂𑀢𑁆𑀯𑀸 𑀬𑀸𑀯𑀚𑀻𑀯𑀁 𑀓𑀼𑀲𑀮𑀁 𑀓𑀢𑁆𑀯𑀸 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀓𑀲𑁆𑀲𑀧𑀤𑀲𑀩𑀮𑀲𑁆𑀲 𑀲𑀸𑀲𑀦𑀲𑁆𑀲 𑀑𑀲𑀓𑁆𑀓𑀦𑀓𑀸𑀮𑁂 𑀳𑁂𑀝𑁆𑀞𑀸 𑀯𑀼𑀢𑁆𑀢𑁂𑀳𑀺 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀲𑀫𑀡𑀥𑀫𑁆𑀫𑀁 𑀓𑀢𑁆𑀯𑀸 𑀧𑀭𑀺𑀧𑀼𑀡𑁆𑀡𑀲𑀻𑀮𑁄 𑀚𑀻𑀯𑀺𑀢𑀓𑁆𑀔𑀬𑀁 𑀧𑀢𑁆𑀯𑀸 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺.

𑀲𑁄 𑀏𑀓𑀁 𑀩𑀼𑀤𑁆𑀥𑀦𑁆𑀢𑀭𑀁 𑀤𑁂𑀯𑀮𑁄𑀓𑁂 𑀯𑀲𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀩𑀸𑀳𑀺𑀬𑀭𑀝𑁆𑀞𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄. 𑀯𑀬𑀁 𑀆𑀕𑀫𑁆𑀫 𑀖𑀭𑀸𑀯𑀸𑀲𑀁 𑀯𑀲𑀦𑁆𑀢𑁄 ‘‘𑀯𑁄𑀳𑀸𑀭𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀲𑀼𑀯𑀡𑁆𑀡𑀪𑀽𑀫𑀺𑀕𑀫𑀦𑀻𑀬𑀁 𑀦𑀸𑀯𑀁 𑀅𑀪𑀺𑀭𑀼𑀳𑀺. 𑀦𑀸𑀯𑀸 𑀇𑀘𑁆𑀙𑀺𑀢𑀁 𑀤𑁂𑀲𑀁 𑀅𑀧𑁆𑀧𑀢𑁆𑀯𑀸𑀯 𑀲𑀫𑀼𑀤𑁆𑀤𑀫𑀚𑁆𑀛𑁂 𑀪𑀺𑀦𑁆𑀦𑀸, 𑀫𑀳𑀸𑀚𑀦𑁄 𑀫𑀘𑁆𑀙𑀓𑀘𑁆𑀙𑀧𑀪𑀓𑁆𑀔𑁄 𑀅𑀳𑁄𑀲𑀺. 𑀅𑀬𑀁 𑀧𑀦 𑀏𑀓𑀁 𑀤𑀸𑀭𑀼𑀔𑀡𑁆𑀟𑀁 𑀕𑀳𑁂𑀢𑁆𑀯𑀸 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀲𑀼𑀧𑁆𑀧𑀸𑀭𑀓𑀧𑀝𑁆𑀝𑀦𑁂 𑀉𑀢𑁆𑀢𑀺𑀡𑁆𑀡𑁄 𑀫𑀦𑀼𑀲𑁆𑀲𑀸𑀯𑀸𑀲𑀁 𑀧𑀢𑁆𑀯𑀸 ‘‘𑀅𑀘𑁂𑀮𑀓𑀦𑀺𑀬𑀸𑀫𑁂𑀦 𑀫𑀦𑀼𑀲𑁆𑀲𑁂 𑀉𑀧𑀲𑀗𑁆𑀓𑀫𑀺𑀢𑀼𑀁 𑀅𑀬𑀼𑀢𑁆𑀢’’𑀦𑁆𑀢𑀺 𑀅𑀯𑀺𑀤𑀽𑀭𑁂 𑀞𑀸𑀦𑁂 𑀏𑀓𑀁 𑀫𑀳𑀸𑀢𑀴𑀸𑀓𑀸 𑀲𑁂𑀯𑀸𑀮𑀁 𑀕𑀳𑁂𑀢𑁆𑀯𑀸 𑀲𑀭𑀻𑀭𑀁 𑀯𑁂𑀞𑁂𑀢𑁆𑀯𑀸 𑀏𑀓𑀲𑁆𑀫𑀺𑀁 𑀞𑀸𑀦𑁂 𑀧𑀢𑀺𑀢𑀁 𑀏𑀓𑀁 𑀓𑀧𑀸𑀮𑀁 𑀆𑀤𑀸𑀬 𑀪𑀺𑀓𑁆𑀔𑀸𑀬 𑀧𑀸𑀯𑀺𑀲𑀺.

𑀫𑀦𑀼𑀲𑁆𑀲𑀸 𑀢𑀁 𑀤𑀺𑀲𑁆𑀯𑀸 𑀘𑀺𑀦𑁆𑀢𑁂𑀲𑀼𑀁 𑁋 ‘‘𑀲𑀘𑁂 𑀮𑁄𑀓𑁂 𑀅𑀭𑀳𑀦𑁆𑀢𑀸 𑀦𑀸𑀫 𑀅𑀢𑁆𑀣𑀺, 𑀏𑀯𑀁𑀯𑀺𑀥𑁂𑀳𑀺 𑀪𑀯𑀺𑀢𑀩𑁆𑀩𑀁. 𑀓𑀺𑀁 𑀦𑀼 𑀔𑁄 𑀅𑀬𑁆𑀬𑁄 𑀉𑀓𑁆𑀓𑀝𑁆𑀞𑀪𑀸𑀯𑁂𑀦 𑀯𑀢𑁆𑀣𑀁 𑀦 𑀕𑀡𑁆𑀳𑀸𑀢𑀺, 𑀉𑀤𑀸𑀳𑀼 𑀤𑀺𑀬𑁆𑀬𑀫𑀸𑀦𑀁 𑀕𑀡𑁆𑀳𑁂𑀬𑁆𑀬𑀸’’𑀢𑀺 𑀯𑀻𑀫𑀁𑀲𑀦𑁆𑀢𑀸 𑀦𑀸𑀦𑀸𑀤𑀺𑀲𑀸𑀳𑀺 𑀯𑀢𑁆𑀣𑀸𑀦𑀺 𑀆𑀳𑀭𑀺𑀁𑀲𑀼. 𑀲𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀲𑀘𑀸𑀳𑀁 𑀦 𑀇𑀫𑀺𑀦𑀸 𑀦𑀺𑀬𑀸𑀫𑁂𑀦 𑀆𑀕𑀫𑀺𑀲𑁆𑀲𑀁, 𑀦 𑀫𑁂 𑀏𑀢𑁂 𑀧𑀲𑀻𑀤𑁂𑀬𑁆𑀬𑀼𑀁, 𑀬𑀁𑀓𑀺𑀜𑁆𑀘𑀺 𑀓𑀢𑁆𑀯𑀸 𑀇𑀫𑁂 𑀯𑀜𑁆𑀘𑁂𑀢𑁆𑀯𑀸 𑀚𑀻𑀯𑀺𑀓𑀼𑀧𑀸𑀬𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀢𑁆𑀣𑀸𑀦𑀺 𑀦 𑀧𑀝𑀺𑀕𑁆𑀕𑀡𑁆𑀳𑀺. 𑀫𑀦𑀼𑀲𑁆𑀲𑀸 𑀪𑀺𑀬𑁆𑀬𑁄𑀲𑁄𑀫𑀢𑁆𑀢𑀸𑀬 𑀧𑀲𑀦𑁆𑀦𑀸 𑀫𑀳𑀸𑀲𑀓𑁆𑀓𑀸𑀭𑀁 𑀓𑀭𑀺𑀁𑀲𑀼. 𑀲𑁄𑀧𑀺 𑀪𑀢𑁆𑀢𑀓𑀺𑀘𑁆𑀘𑀁 𑀓𑀢𑁆𑀯𑀸 𑀅𑀯𑀺𑀤𑀽𑀭𑀝𑁆𑀞𑀸𑀦𑁂 𑀤𑁂𑀯𑀓𑀼𑀮𑀁 𑀕𑀢𑁄. 𑀫𑀳𑀸𑀚𑀦𑁄 𑀢𑁂𑀦 𑀲𑀤𑁆𑀥𑀺𑀁𑀬𑁂𑀯 𑀕𑀦𑁆𑀢𑁆𑀯𑀸 𑀤𑁂𑀯𑀓𑀼𑀮𑀁 𑀧𑀝𑀺𑀚𑀕𑁆𑀕𑀺𑀢𑁆𑀯𑀸 𑀅𑀤𑀸𑀲𑀺. 𑀲𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀇𑀫𑁂 𑀫𑀬𑁆𑀳𑀁 𑀲𑁂𑀯𑀸𑀮𑁂 𑀦𑀺𑀯𑀸𑀲𑀦𑀫𑀢𑁆𑀢𑁂 𑀧𑀲𑀻𑀤𑀺𑀢𑁆𑀯𑀸 𑀏𑀯𑀁𑀯𑀺𑀥𑀁 𑀲𑀓𑁆𑀓𑀸𑀭𑀁 𑀓𑀭𑁄𑀦𑁆𑀢𑀺, 𑀏𑀢𑁂𑀲𑀁 𑀫𑀬𑀸 𑀉𑀓𑁆𑀓𑀝𑁆𑀞𑁂𑀦𑁂𑀯 𑀪𑀯𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀲𑀮𑁆𑀮𑀳𑀼𑀓𑀸𑀦𑀺 𑀭𑀼𑀓𑁆𑀔𑀨𑀮𑀓𑀸𑀦𑀺 𑀕𑀳𑁂𑀢𑁆𑀯𑀸 𑀢𑀘𑁆𑀙𑁂𑀢𑁆𑀯𑀸 𑀯𑀸𑀓𑁂𑀲𑀼 𑀆𑀯𑀼𑀡𑀺𑀢𑁆𑀯𑀸 𑀘𑀻𑀭𑀁 𑀓𑀢𑁆𑀯𑀸 𑀦𑀺𑀯𑀸𑀲𑁂𑀢𑁆𑀯𑀸 𑀧𑀸𑀭𑀼𑀧𑀺𑀢𑁆𑀯𑀸 𑀚𑀻𑀯𑀺𑀓𑀁 𑀓𑀧𑁆𑀧𑁂𑀦𑁆𑀢𑁄 𑀯𑀲𑀺.

𑀅𑀣 𑀬𑁄 𑀲𑁄 𑀓𑀲𑁆𑀲𑀧𑀩𑀼𑀤𑁆𑀥𑀓𑀸𑀮𑁂 𑀲𑀢𑁆𑀢𑀲𑀼 𑀚𑀦𑁂𑀲𑀼 𑀲𑀫𑀡𑀥𑀫𑁆𑀫𑀁 𑀓𑀭𑁄𑀦𑁆𑀢𑁂𑀲𑀼 𑀏𑀓𑁄 𑀪𑀺𑀓𑁆𑀔𑀼 𑀲𑀼𑀤𑁆𑀥𑀸𑀯𑀸𑀲𑀩𑁆𑀭𑀳𑁆𑀫𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑁄. 𑀲𑁄 𑀦𑀺𑀩𑁆𑀩𑀢𑁆𑀢𑀲𑀫𑀦𑀦𑁆𑀢𑀭𑀫𑁂𑀯 𑀅𑀢𑁆𑀢𑀦𑁄 𑀩𑁆𑀭𑀳𑁆𑀫𑀲𑀫𑁆𑀧𑀢𑁆𑀢𑀺𑀁 𑀑𑀮𑁄𑀓𑁂𑀢𑁆𑀯𑀸 𑀆𑀕𑀢𑀝𑁆𑀞𑀸𑀦𑀁 𑀆𑀯𑀚𑁆𑀚𑁂𑀦𑁆𑀢𑁄 𑀲𑀢𑁆𑀢𑀦𑁆𑀦𑀁 𑀚𑀦𑀸𑀦𑀁 𑀧𑀩𑁆𑀩𑀢𑀁 𑀆𑀭𑀼𑀬𑁆𑀳 𑀲𑀫𑀡𑀥𑀫𑁆𑀫𑀓𑀭𑀡𑀝𑁆𑀞𑀸𑀦𑀁 𑀤𑀺𑀲𑁆𑀯𑀸 𑀲𑁂𑀲𑀸𑀦𑀁 𑀙𑀦𑁆𑀦𑀁 𑀦𑀺𑀩𑁆𑀩𑀢𑁆𑀢𑀝𑁆𑀞𑀸𑀦𑀁 𑀆𑀯𑀚𑁆𑀚𑁂𑀦𑁆𑀢𑁄 𑀏𑀓𑀲𑁆𑀲 𑀧𑀭𑀺𑀦𑀺𑀩𑁆𑀩𑀼𑀢𑀪𑀸𑀯𑀁 𑀇𑀢𑀭𑁂𑀲𑀁 𑀧𑀜𑁆𑀘𑀦𑁆𑀦𑀁 𑀓𑀸𑀫𑀸𑀯𑀘𑀭𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀪𑀸𑀯𑀁 𑀜𑀢𑁆𑀯𑀸 𑀓𑀸𑀮𑀸𑀦𑀼𑀓𑀸𑀮𑀁 𑀢𑁂 𑀧𑀜𑁆𑀘 𑀚𑀦𑁂 𑀆𑀯𑀚𑁆𑀚𑁂𑀢𑀺. 𑀇𑀫𑀲𑁆𑀫𑀺𑀁 𑀧𑀦 𑀓𑀸𑀮𑁂 ‘‘𑀓𑀳𑀁 𑀦𑀼 𑀔𑁄’’𑀢𑀺 𑀆𑀯𑀚𑁆𑀚𑁂𑀦𑁆𑀢𑁄 𑀤𑀸𑀭𑀼𑀘𑀻𑀭𑀺𑀬𑀁 𑀲𑀼𑀧𑁆𑀧𑀸𑀭𑀓𑀧𑀝𑁆𑀝𑀦𑀁 𑀉𑀧𑀦𑀺𑀲𑁆𑀲𑀸𑀬 𑀓𑀼𑀳𑀦𑀓𑀫𑁆𑀫𑁂𑀦 𑀚𑀻𑀯𑀺𑀓𑀁 𑀓𑀧𑁆𑀧𑁂𑀦𑁆𑀢𑀁 𑀤𑀺𑀲𑁆𑀯𑀸 ‘‘𑀦𑀝𑁆𑀞𑁄 𑀯𑀢𑀸𑀬𑀁 𑀩𑀸𑀮𑁄, 𑀧𑀼𑀩𑁆𑀩𑁂 𑀲𑀫𑀡𑀥𑀫𑁆𑀫𑀁 𑀓𑀭𑁄𑀦𑁆𑀢𑁄 𑀅𑀢𑀺𑀉𑀓𑁆𑀓𑀝𑁆𑀞𑀪𑀸𑀯𑁂𑀦 𑀅𑀭𑀳𑀢𑀸𑀧𑀺 𑀆𑀪𑀢𑀁 𑀧𑀺𑀡𑁆𑀟𑀧𑀸𑀢𑀁 𑀅𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀇𑀤𑀸𑀦𑀺 𑀉𑀤𑀭𑀢𑁆𑀣𑀸𑀬 𑀅𑀦𑀭𑀳𑀸𑀯 𑀅𑀭𑀳𑀢𑁆𑀢𑀁 𑀧𑀝𑀺𑀚𑀸𑀦𑀺𑀢𑁆𑀯𑀸 𑀮𑁄𑀓𑀁 𑀯𑀜𑁆𑀘𑁂𑀦𑁆𑀢𑁄 𑀯𑀺𑀘𑀭𑀢𑀺, 𑀤𑀲𑀩𑀮𑀲𑁆𑀲 𑀘 𑀦𑀺𑀩𑁆𑀩𑀢𑁆𑀢𑀪𑀸𑀯𑀁 𑀦 𑀚𑀸𑀦𑀸𑀢𑀺, 𑀕𑀘𑁆𑀙𑀸𑀫𑀺 𑀦𑀁 𑀲𑀁𑀯𑁂𑀚𑁂𑀢𑁆𑀯𑀸 𑀤𑀲𑀩𑀮𑀲𑁆𑀲 𑀦𑀺𑀩𑁆𑀩𑀢𑁆𑀢𑀪𑀸𑀯𑀁 𑀚𑀸𑀦𑀸𑀧𑁂𑀫𑀻’’𑀢𑀺 𑀢𑀁𑀔𑀡𑀁𑀬𑁂𑀯 𑀩𑁆𑀭𑀳𑁆𑀫𑀮𑁄𑀓𑀢𑁄 𑀲𑀼𑀧𑁆𑀧𑀸𑀭𑀓𑀧𑀝𑁆𑀝𑀦𑁂 𑀭𑀢𑁆𑀢𑀺𑀪𑀸𑀕𑀲𑀫𑀦𑀦𑁆𑀢𑀭𑁂 𑀤𑀸𑀭𑀼𑀘𑀻𑀭𑀺𑀬𑀲𑁆𑀲 𑀲𑀫𑁆𑀫𑀼𑀔𑁂 𑀧𑀸𑀢𑀼𑀭𑀳𑁄𑀲𑀺.

𑀲𑁄 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑁂 𑀑𑀪𑀸𑀲𑀁 𑀤𑀺𑀲𑁆𑀯𑀸 𑀩𑀳𑀺 𑀦𑀺𑀓𑁆𑀔𑀫𑀺𑀢𑁆𑀯𑀸 𑀞𑀺𑀢𑁄 𑀫𑀳𑀸𑀩𑁆𑀭𑀳𑁆𑀫𑀁 𑀑𑀮𑁄𑀓𑁂𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀬𑁆𑀳 ‘‘𑀓𑁂 𑀢𑀼𑀫𑁆𑀳𑁂’’𑀢𑀺 𑀧𑀼𑀘𑁆𑀙𑀺. 𑀅𑀳𑀁 𑀢𑀼𑀬𑁆𑀳𑀁 𑀧𑁄𑀭𑀸𑀡𑀓𑀲𑀳𑀸𑀬𑁄 𑀅𑀦𑀸𑀕𑀸𑀫𑀺𑀨𑀮𑀁 𑀧𑀢𑁆𑀯𑀸 𑀩𑁆𑀭𑀳𑁆𑀫𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑁄. 𑀅𑀫𑁆𑀳𑀸𑀓𑀁 𑀧𑀦 𑀲𑀩𑁆𑀩𑀚𑁂𑀝𑁆𑀞𑀓𑁄 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀼𑀢𑁄, 𑀢𑀼𑀫𑁆𑀳𑁂 𑀧𑀜𑁆𑀘 𑀚𑀦𑀸 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀸. 𑀲𑁆𑀯𑀸𑀳𑀁 𑀢𑀁 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀓𑀼𑀳𑀦𑀓𑀫𑁆𑀫𑁂𑀦 𑀚𑀻𑀯𑀦𑁆𑀢𑀁 𑀤𑀺𑀲𑁆𑀯𑀸 𑀤𑀫𑁂𑀢𑀼𑀁 𑀆𑀕𑀢𑁄𑀢𑀺 𑀯𑀢𑁆𑀯𑀸 𑀇𑀤𑀁 𑀓𑀸𑀭𑀡𑀫𑀸𑀳 𑁋 ‘‘𑀦 𑀔𑁄 𑀢𑁆𑀯𑀁, 𑀩𑀸𑀳𑀺𑀬 𑀅𑀭𑀳𑀸, 𑀦𑀧𑀺 𑀅𑀭𑀳𑀢𑁆𑀢𑀫𑀕𑁆𑀕𑀁 𑀲𑀫𑀸𑀧𑀦𑁆𑀦𑁄, 𑀲𑀸𑀧𑀺 𑀢𑁂 𑀧𑀝𑀺𑀧𑀤𑀸 𑀦𑀢𑁆𑀣𑀺, 𑀬𑀸𑀬 𑀢𑁆𑀯𑀁 𑀅𑀭𑀳𑀸 𑀯𑀸 𑀅𑀲𑁆𑀲 𑀅𑀭𑀳𑀢𑁆𑀢𑀫𑀕𑁆𑀕𑀁 𑀯𑀸 𑀲𑀫𑀸𑀧𑀦𑁆𑀦𑁄’’𑀢𑀺. 𑀅𑀣𑀲𑁆𑀲 𑀲𑀢𑁆𑀣𑀼 𑀉𑀧𑁆𑀧𑀦𑁆𑀦𑀪𑀸𑀯𑀁 𑀲𑀸𑀯𑀢𑁆𑀣𑀺𑀬𑀁 𑀯𑀲𑀦𑀪𑀸𑀯𑀜𑁆𑀘 𑀆𑀘𑀺𑀓𑁆𑀔𑀺𑀢𑁆𑀯𑀸 ‘‘𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀘𑁆𑀙𑀸𑀳𑀻’’𑀢𑀺 𑀢𑀁 𑀉𑀬𑁆𑀬𑁄𑀚𑁂𑀢𑁆𑀯𑀸 𑀩𑁆𑀭𑀳𑁆𑀫𑀮𑁄𑀓𑀫𑁂𑀯 𑀅𑀕𑀫𑀸𑀲𑀺.

𑀤𑀸𑀭𑀼𑀘𑀻𑀭𑀺𑀬𑁄 𑀫𑀳𑀸𑀩𑁆𑀭𑀳𑁆𑀫𑀼𑀦𑀸 𑀲𑀁𑀯𑁂𑀚𑀺𑀢𑁄 ‘‘𑀫𑁄𑀓𑁆𑀔𑀫𑀕𑁆𑀕𑀁 𑀕𑀯𑁂𑀲𑀺𑀲𑁆𑀲𑀸𑀫𑀻’’𑀢𑀺 𑀯𑀻𑀲𑀬𑁄𑀚𑀦𑀲𑀢𑀁 𑀫𑀕𑁆𑀕𑀁 𑀏𑀓𑀭𑀢𑁆𑀢𑀺𑀯𑀸𑀲𑁂𑀦 𑀕𑀦𑁆𑀢𑁆𑀯𑀸 𑀲𑀢𑁆𑀣𑀸𑀭𑀁 𑀧𑀺𑀡𑁆𑀟𑀸𑀬 𑀧𑀯𑀺𑀝𑁆𑀞𑀁 𑀅𑀦𑁆𑀢𑀭𑀖𑀭𑁂 𑀲𑀫𑁆𑀧𑀸𑀧𑀼𑀡𑀺𑀢𑁆𑀯𑀸 𑀲𑀢𑁆𑀣𑀼 𑀧𑀸𑀤𑁂𑀲𑀼 𑀦𑀺𑀧𑀢𑀺𑀢𑁆𑀯𑀸 ‘‘𑀤𑁂𑀲𑁂𑀢𑀼 𑀫𑁂, 𑀪𑀦𑁆𑀢𑁂, 𑀪𑀕𑀯𑀸 𑀥𑀫𑁆𑀫𑀁, 𑀤𑁂𑀲𑁂𑀢𑀼 𑀲𑀼𑀕𑀢𑁄 𑀥𑀫𑁆𑀫’’𑀦𑁆𑀢𑀺 𑀬𑀸𑀯𑀢𑀢𑀺𑀬𑀁 𑀬𑀸𑀘𑀺. 𑀲𑀢𑁆𑀣𑀸 ‘‘𑀏𑀢𑁆𑀢𑀸𑀯𑀢𑀸 𑀩𑀸𑀳𑀺𑀬𑀲𑁆𑀲 𑀜𑀸𑀡𑀁 𑀧𑀭𑀺𑀧𑀸𑀓𑀁 𑀕𑀢’’𑀦𑁆𑀢𑀺 𑀜𑀢𑁆𑀯𑀸 ‘‘𑀢𑀲𑁆𑀫𑀸𑀢𑀺𑀳 𑀢𑁂, 𑀩𑀸𑀳𑀺𑀬, 𑀏𑀯𑀁 𑀲𑀺𑀓𑁆𑀔𑀺𑀢𑀩𑁆𑀩𑀁 𑀤𑀺𑀝𑁆𑀞𑁂 𑀤𑀺𑀝𑁆𑀞𑀫𑀢𑁆𑀢𑀁 𑀪𑀯𑀺𑀲𑁆𑀲𑀢𑀻’’𑀢𑀺 (𑀉𑀤𑀸. 𑁧𑁦) 𑀇𑀫𑀺𑀦𑀸 𑀑𑀯𑀸𑀤𑁂𑀦 𑀑𑀯𑀤𑀺. 𑀲𑁄𑀧𑀺 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀅𑀦𑁆𑀢𑀭𑀯𑀻𑀣𑀺𑀬𑀁 𑀞𑀺𑀢𑁄𑀯 𑀤𑁂𑀲𑀦𑀸𑀦𑀼𑀲𑀸𑀭𑁂𑀦 𑀜𑀸𑀡𑀁 𑀧𑁂𑀲𑁂𑀢𑁆𑀯𑀸 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺.

𑀲𑁄 𑀅𑀢𑁆𑀢𑀦𑁄 𑀓𑀺𑀘𑁆𑀘𑀁 𑀫𑀢𑁆𑀣𑀓𑀧𑁆𑀧𑀢𑁆𑀢𑀁 𑀜𑀢𑁆𑀯𑀸 𑀪𑀕𑀯𑀦𑁆𑀢𑀁 𑀧𑀩𑁆𑀩𑀚𑁆𑀚𑀁 𑀬𑀸𑀘𑀺𑀢𑁆𑀯𑀸 𑀅𑀧𑀭𑀺𑀧𑀼𑀡𑁆𑀡𑀧𑀢𑁆𑀢𑀘𑀻𑀯𑀭𑀢𑀸𑀬 𑀧𑀢𑁆𑀢𑀘𑀻𑀯𑀭𑀁 𑀧𑀭𑀺𑀬𑁂𑀲𑀦𑁆𑀢𑁄 𑀲𑀗𑁆𑀓𑀸𑀭𑀝𑁆𑀞𑀸𑀦𑀢𑁄 𑀘𑁄𑀴𑀓𑁆𑀔𑀡𑁆𑀟𑀸𑀦𑀺 𑀲𑀁𑀓𑀟𑁆𑀠𑀢𑀺. 𑀅𑀣 𑀦𑀁 𑀧𑀼𑀩𑁆𑀩𑀯𑁂𑀭𑀺𑀓𑁄 𑀅𑀫𑀦𑀼𑀲𑁆𑀲𑁄 𑀏𑀓𑀺𑀲𑁆𑀲𑀸 𑀢𑀭𑀼𑀡𑀯𑀘𑁆𑀙𑀸𑀬 𑀕𑀸𑀯𑀺𑀬𑀸 𑀲𑀭𑀻𑀭𑁂 𑀅𑀥𑀺𑀫𑀼𑀘𑁆𑀘𑀺𑀢𑁆𑀯𑀸 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑁂𑀲𑀺. 𑀲𑀢𑁆𑀣𑀸 𑀲𑀸𑀯𑀢𑁆𑀣𑀺𑀢𑁄 𑀦𑀺𑀓𑁆𑀔𑀫𑀦𑁆𑀢𑁄 𑀅𑀦𑁆𑀢𑀭𑀯𑀻𑀣𑀺𑀬𑀁 𑀩𑀸𑀳𑀺𑀬𑀁 𑀲𑀗𑁆𑀓𑀸𑀭𑀝𑁆𑀞𑀸𑀦𑁂 𑀧𑀢𑀺𑀢𑀁 𑀤𑀺𑀲𑁆𑀯𑀸 ‘‘𑀕𑀡𑁆𑀳𑀣, 𑀪𑀺𑀓𑁆𑀔𑀯𑁂, 𑀩𑀸𑀳𑀺𑀬𑀲𑁆𑀲 𑀤𑀸𑀭𑀼𑀘𑀻𑀭𑀺𑀬𑀲𑁆𑀲 𑀲𑀭𑀻𑀭’’𑀦𑁆𑀢𑀺 𑀦𑀻𑀳𑀭𑀸𑀧𑁂𑀢𑁆𑀯𑀸 𑀲𑀭𑀻𑀭𑀓𑀺𑀘𑁆𑀘𑀁 𑀓𑀸𑀭𑁂𑀢𑁆𑀯𑀸 𑀘𑀸𑀢𑀼𑀫𑀳𑀸𑀧𑀣𑁂 𑀘𑁂𑀢𑀺𑀬𑀁 𑀓𑀸𑀭𑀸𑀧𑁂𑀲𑀺. 𑀢𑀢𑁄 𑀲𑀗𑁆𑀖𑀫𑀚𑁆𑀛𑁂 𑀓𑀣𑀸 𑀉𑀤𑀧𑀸𑀤𑀺 𑁋 ‘‘𑀢𑀣𑀸𑀕𑀢𑁄 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀩𑀸𑀳𑀺𑀬𑀲𑁆𑀲 𑀲𑀭𑀻𑀭𑀚𑁆𑀛𑀸𑀧𑀦𑀓𑀺𑀘𑁆𑀘𑀁 𑀓𑀸𑀭𑁂𑀲𑀺, 𑀥𑀸𑀢𑀼𑀬𑁄 𑀕𑀳𑁂𑀢𑁆𑀯𑀸 𑀘𑁂𑀢𑀺𑀬𑀁 𑀓𑀸𑀭𑁂𑀲𑀺, 𑀓𑀢𑀭𑀫𑀕𑁆𑀕𑁄 𑀦𑀼 𑀔𑁄 𑀢𑁂𑀦 𑀲𑀘𑁆𑀙𑀺𑀓𑀢𑁄, 𑀲𑀸𑀫𑀡𑁂𑀭𑁄 𑀦𑀼 𑀔𑁄 𑀲𑁄, 𑀪𑀺𑀓𑁆𑀔𑀼 𑀦𑀼 𑀔𑁄’’𑀢𑀺 𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑀬𑀺𑀁𑀲𑀼. 𑀲𑀢𑁆𑀣𑀸 𑀢𑀁 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀁 𑀓𑀢𑁆𑀯𑀸 ‘‘𑀧𑀡𑁆𑀟𑀺𑀢𑁄, 𑀪𑀺𑀓𑁆𑀔𑀯𑁂, 𑀩𑀸𑀳𑀺𑀬𑁄’’𑀢𑀺 𑀉𑀧𑀭𑀺 𑀥𑀫𑁆𑀫𑀤𑁂𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀢𑀲𑁆𑀲 𑀧𑀭𑀺𑀦𑀺𑀩𑁆𑀩𑀼𑀢𑀪𑀸𑀯𑀁 𑀧𑀓𑀸𑀲𑁂𑀲𑀺. 𑀧𑀼𑀦 𑀲𑀗𑁆𑀖𑀫𑀚𑁆𑀛𑁂 𑀓𑀣𑀸 𑀉𑀤𑀧𑀸𑀤𑀺 ‘‘𑀦 𑀘 𑀲𑀢𑁆𑀣𑀸𑀭𑀸 𑀩𑀸𑀳𑀺𑀬𑀲𑁆𑀲 𑀩𑀳𑀼 𑀥𑀫𑁆𑀫𑁄 𑀤𑁂𑀲𑀺𑀢𑁄, 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄𑀢𑀺 𑀘 𑀯𑀤𑁂𑀢𑀺. 𑀓𑀺𑀁 𑀦𑀸𑀫𑁂𑀢’’𑀦𑁆𑀢𑀺? 𑀲𑀢𑁆𑀣𑀸 ‘‘𑀥𑀫𑁆𑀫𑁄 𑀫𑀦𑁆𑀤𑁄 𑀩𑀳𑀽𑀢𑀺 𑀅𑀓𑀸𑀭𑀡𑀁, 𑀯𑀺𑀲𑀧𑀻𑀢𑀓𑀲𑁆𑀲 𑀅𑀕𑀤𑁄 𑀯𑀺𑀬 𑀘𑁂𑀲𑁄’’𑀢𑀺 𑀯𑀢𑁆𑀯𑀸 𑀥𑀫𑁆𑀫𑀧𑀤𑁂 𑀕𑀸𑀣𑀫𑀸𑀳 𑁋

‘‘𑀲𑀳𑀲𑁆𑀲𑀫𑀧𑀺 𑀘𑁂 𑀕𑀸𑀣𑀸, 𑀅𑀦𑀢𑁆𑀣𑀧𑀤𑀲𑀁𑀳𑀺𑀢𑀸;

𑀏𑀓𑀁 𑀕𑀸𑀣𑀸𑀧𑀤𑀁 𑀲𑁂𑀬𑁆𑀬𑁄, 𑀬𑀁 𑀲𑀼𑀢𑁆𑀯𑀸 𑀉𑀧𑀲𑀫𑁆𑀫𑀢𑀻’’𑀢𑀺. (𑀥. 𑀧. 𑁧𑁦𑁦);

𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀘𑀢𑀼𑀭𑀸𑀲𑀻𑀢𑀺 𑀧𑀸𑀡𑀲𑀳𑀲𑁆𑀲𑀸𑀦𑀺 𑀅𑀫𑀢𑀧𑀸𑀦𑀁 𑀧𑀺𑀯𑀺𑀁𑀲𑀼. 𑀇𑀤𑀜𑁆𑀘 𑀧𑀦 𑀩𑀸𑀳𑀺𑀬𑀢𑁆𑀣𑁂𑀭𑀲𑁆𑀲 𑀯𑀢𑁆𑀣𑀼 𑀲𑀼𑀢𑁆𑀢𑁂 (𑀉𑀤𑀸. 𑁧𑁦) 𑀆𑀕𑀢𑀢𑁆𑀢𑀸 𑀯𑀺𑀢𑁆𑀣𑀸𑀭𑁂𑀦 𑀦 𑀓𑀣𑀺𑀢𑀁. 𑀅𑀧𑀭𑀪𑀸𑀕𑁂 𑀧𑀦 𑀲𑀢𑁆𑀣𑀸 𑀲𑀗𑁆𑀖𑀫𑀚𑁆𑀛𑁂 𑀦𑀺𑀲𑀺𑀦𑁆𑀦𑁄 𑀩𑀸𑀳𑀺𑀬𑀢𑁆𑀣𑁂𑀭𑀁 𑀔𑀺𑀧𑁆𑀧𑀸𑀪𑀺𑀜𑁆𑀜𑀸𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀲𑀻𑀢𑀺.

𑀓𑀼𑀫𑀸𑀭𑀓𑀲𑁆𑀲𑀧𑀢𑁆𑀣𑁂𑀭𑀯𑀢𑁆𑀣𑀼

𑁨𑁧𑁭. 𑀦𑀯𑀫𑁂 𑀘𑀺𑀢𑁆𑀢𑀓𑀣𑀺𑀓𑀸𑀦𑀦𑁆𑀢𑀺 𑀯𑀺𑀘𑀺𑀢𑁆𑀢𑀁 𑀓𑀢𑁆𑀯𑀸 𑀥𑀫𑁆𑀫𑀁 𑀓𑀣𑁂𑀦𑁆𑀢𑀸𑀦𑀁. 𑀣𑁂𑀭𑁄 𑀓𑀺𑀭 𑀏𑀓𑀲𑁆𑀲𑀧𑀺 𑀤𑁆𑀯𑀺𑀦𑁆𑀦𑀫𑁆𑀧𑀺 𑀥𑀫𑁆𑀫𑀁 𑀓𑀣𑁂𑀦𑁆𑀢𑁄 𑀩𑀳𑀽𑀳𑀺 𑀉𑀧𑀫𑀸𑀳𑀺 𑀘 𑀓𑀸𑀭𑀡𑁂𑀳𑀺 𑀘 𑀫𑀡𑁆𑀟𑀬𑀺𑀢𑁆𑀯𑀸 𑀩𑁄𑀥𑁂𑀦𑁆𑀢𑁄 𑀓𑀣𑁂𑀢𑀺. 𑀢𑀲𑁆𑀫𑀸 𑀘𑀺𑀢𑁆𑀢𑀓𑀣𑀺𑀓𑀸𑀦𑀁 𑀅𑀕𑁆𑀕𑁄 𑀦𑀸𑀫 𑀚𑀸𑀢𑁄.

𑀢𑀲𑁆𑀲 𑀧𑀜𑁆𑀳𑀓𑀫𑁆𑀫𑁂 𑀅𑀬𑀫𑀦𑀼𑀧𑀼𑀩𑁆𑀩𑀺𑀓𑀣𑀸 𑁋 𑀅𑀬𑀫𑁆𑀧𑀺 𑀳𑀺 𑀧𑀤𑀼𑀫𑀼𑀢𑁆𑀢𑀭𑀩𑀼𑀤𑁆𑀥𑀓𑀸𑀮𑁂 𑀳𑀁𑀲𑀯𑀢𑀻𑀦𑀕𑀭𑁂 𑀓𑀼𑀮𑀕𑁂𑀳𑁂 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀤𑀲𑀩𑀮𑀲𑁆𑀲 𑀥𑀫𑁆𑀫𑀓𑀣𑀁 𑀲𑀼𑀡𑀦𑁆𑀢𑁄 𑀲𑀢𑁆𑀣𑀸𑀭𑀁 𑀏𑀓𑀁 𑀪𑀺𑀓𑁆𑀔𑀼𑀁 𑀘𑀺𑀢𑁆𑀢𑀓𑀣𑀺𑀓𑀸𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀦𑁆𑀢𑀁 𑀤𑀺𑀲𑁆𑀯𑀸 𑀅𑀥𑀺𑀓𑀸𑀭𑀓𑀫𑁆𑀫𑀁 𑀓𑀢𑁆𑀯𑀸 𑀢𑀁 𑀞𑀸𑀦𑀦𑁆𑀢𑀭𑀁 𑀧𑀢𑁆𑀣𑁂𑀢𑁆𑀯𑀸 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀓𑀲𑁆𑀲𑀧𑀩𑀼𑀤𑁆𑀥𑀲𑀸𑀲𑀦𑁄𑀲𑀓𑁆𑀓𑀦𑀓𑀸𑀮𑁂 𑀲𑀢𑁆𑀢𑀦𑁆𑀦𑀁 𑀪𑀺𑀓𑁆𑀔𑀽𑀦𑀁 𑀅𑀩𑁆𑀪𑀦𑁆𑀢𑀭𑁄 𑀳𑀼𑀢𑁆𑀯𑀸 𑀧𑀩𑁆𑀩𑀢𑀫𑀢𑁆𑀣𑀓𑁂 𑀲𑀫𑀡𑀥𑀫𑁆𑀫𑀁 𑀓𑀢𑁆𑀯𑀸 𑀅𑀧𑀭𑀺𑀳𑀻𑀦𑀲𑀻𑀮𑁄 𑀢𑀢𑁄 𑀘𑀼𑀢𑁄 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀏𑀓𑀁 𑀩𑀼𑀤𑁆𑀥𑀦𑁆𑀢𑀭𑀁 𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀫𑀸𑀦𑁄 𑀅𑀫𑁆𑀳𑀸𑀓𑀁 𑀲𑀢𑁆𑀣𑀼 𑀓𑀸𑀮𑁂 𑀭𑀸𑀚𑀕𑀳𑁂 𑀏𑀓𑀺𑀲𑁆𑀲𑀸 𑀓𑀼𑀮𑀤𑀸𑀭𑀺𑀓𑀸𑀬 𑀓𑀼𑀘𑁆𑀙𑀺𑀫𑁆𑀳𑀺 𑀉𑀧𑁆𑀧𑀦𑁆𑀦𑁄. 𑀲𑀸 𑀘 𑀧𑀞𑀫𑀁 𑀫𑀸𑀢𑀸𑀧𑀺𑀢𑀭𑁄 𑀬𑀸𑀘𑀺𑀢𑁆𑀯𑀸 𑀧𑀩𑁆𑀩𑀚𑁆𑀚𑀁 𑀅𑀮𑀪𑀫𑀸𑀦𑀸 𑀓𑀼𑀮𑀖𑀭𑀁 𑀕𑀢𑀸 𑀕𑀩𑁆𑀪𑀁 𑀕𑀡𑁆𑀳𑀺. 𑀢𑀫𑁆𑀧𑀺 𑀅𑀚𑀸𑀦𑀦𑁆𑀢𑀻 𑀲𑀸𑀫𑀺𑀓𑀁 𑀆𑀭𑀸𑀥𑁂𑀢𑁆𑀯𑀸 𑀢𑁂𑀦 𑀅𑀦𑀼𑀜𑁆𑀜𑀸𑀢𑀸 𑀪𑀺𑀓𑁆𑀔𑀼𑀦𑀻𑀲𑀼 𑀧𑀩𑁆𑀩𑀚𑀺𑀢𑀸. 𑀢𑀲𑁆𑀲𑀸 𑀕𑀩𑁆𑀪𑀦𑀺𑀫𑀺𑀢𑁆𑀢𑀁 𑀤𑀺𑀲𑁆𑀯𑀸 𑀪𑀺𑀓𑁆𑀔𑀼𑀦𑀺𑀬𑁄 𑀤𑁂𑀯𑀤𑀢𑁆𑀢𑀁 𑀧𑀼𑀘𑁆𑀙𑀺𑀁𑀲𑀼, 𑀲𑁄 ‘‘𑀅𑀲𑁆𑀲𑀫𑀡𑀻’’𑀢𑀺 𑀆𑀳. 𑀤𑀲𑀩𑀮𑀁 𑀧𑀼𑀘𑁆𑀙𑀺𑀁𑀲𑀼, 𑀲𑀢𑁆𑀣𑀸 𑀉𑀧𑀸𑀮𑀺𑀢𑁆𑀣𑁂𑀭𑀁 𑀧𑀝𑀺𑀘𑁆𑀙𑀸𑀧𑁂𑀲𑀺. 𑀣𑁂𑀭𑁄 𑀲𑀸𑀯𑀢𑁆𑀣𑀺𑀦𑀕𑀭𑀯𑀸𑀲𑀻𑀦𑀺 𑀓𑀼𑀮𑀸𑀦𑀺 𑀯𑀺𑀲𑀸𑀔𑀜𑁆𑀘 𑀉𑀧𑀸𑀲𑀺𑀓𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀲𑁄𑀥𑁂𑀦𑁆𑀢𑁄 ‘‘𑀧𑀼𑀭𑁂 𑀮𑀤𑁆𑀥𑁄 𑀕𑀩𑁆𑀪𑁄, 𑀧𑀩𑁆𑀩𑀚𑁆𑀚𑀸 𑀅𑀭𑁄𑀕𑀸’’𑀢𑀺 𑀆𑀳. 𑀲𑀢𑁆𑀣𑀸 ‘‘𑀲𑀼𑀯𑀺𑀦𑀺𑀘𑁆𑀙𑀺𑀢𑀁 𑀅𑀥𑀺𑀓𑀭𑀡’’𑀦𑁆𑀢𑀺 𑀣𑁂𑀭𑀲𑁆𑀲 𑀲𑀸𑀥𑀼𑀓𑀸𑀭𑀁 𑀅𑀤𑀸𑀲𑀺.

𑀲𑀸 𑀪𑀺𑀓𑁆𑀔𑀼𑀦𑀻 𑀲𑀼𑀯𑀡𑁆𑀡𑀩𑀺𑀫𑁆𑀩𑀲𑀤𑀺𑀲𑀁 𑀧𑀼𑀢𑁆𑀢𑀁 𑀯𑀺𑀚𑀸𑀬𑀺. 𑀢𑀁 𑀕𑀳𑁂𑀢𑁆𑀯𑀸 𑀭𑀸𑀚𑀸 𑀧𑀲𑁂𑀦𑀤𑀺𑀓𑁄𑀲𑀮𑁄 𑀧𑁄𑀲𑀸𑀧𑁂𑀲𑀺, 𑀓𑀲𑁆𑀲𑀧𑁄𑀢𑀺 𑀘𑀲𑁆𑀲 𑀦𑀸𑀫𑀁 𑀓𑀢𑁆𑀯𑀸 𑀅𑀧𑀭𑀪𑀸𑀕𑁂 𑀅𑀮𑀗𑁆𑀓𑀭𑀺𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀦𑁂𑀢𑁆𑀯𑀸 𑀧𑀩𑁆𑀩𑀸𑀚𑁂𑀲𑀺. 𑀓𑀼𑀫𑀸𑀭𑀓𑀸𑀮𑁂 𑀧𑀦 𑀧𑀩𑁆𑀩𑀚𑀺𑀢𑀢𑁆𑀢𑀸 𑀪𑀕𑀯𑀢𑀸 ‘‘𑀓𑀲𑁆𑀲𑀧𑀁 𑀧𑀓𑁆𑀓𑁄𑀲𑀣, 𑀇𑀤𑀁 𑀨𑀮𑀁 𑀯𑀸 𑀔𑀸𑀤𑀦𑀻𑀬𑀁 𑀯𑀸 𑀓𑀲𑁆𑀲𑀧𑀲𑁆𑀲 𑀤𑁂𑀣𑀸’’𑀢𑀺 𑀯𑀼𑀢𑁆𑀢𑁂 ‘‘𑀓𑀢𑀭𑀓𑀲𑁆𑀲𑀧𑀲𑁆𑀲𑀸𑀢𑀺. 𑀓𑀼𑀫𑀸𑀭𑀓𑀲𑁆𑀲𑀧𑀲𑁆𑀲𑀸’’𑀢𑀺 𑀏𑀯𑀁 𑀕𑀳𑀺𑀢𑀦𑀸𑀫𑀢𑁆𑀢𑀸 𑀢𑀢𑁄 𑀧𑀝𑁆𑀞𑀸𑀬 𑀯𑀼𑀟𑁆𑀠𑀓𑀸𑀮𑁂𑀧𑀺 𑀓𑀼𑀫𑀸𑀭𑀓𑀲𑁆𑀲𑀧𑁄𑀢𑁆𑀯𑁂𑀯 𑀯𑀼𑀘𑁆𑀘𑀢𑀺. 𑀅𑀧𑀺𑀘 𑀭𑀜𑁆𑀜𑁄 𑀧𑁄𑀲𑀸𑀯𑀦𑀺𑀓𑀧𑀼𑀢𑁆𑀢𑀢𑁆𑀢𑀸𑀧𑀺 𑀓𑀼𑀫𑀸𑀭𑀓𑀲𑁆𑀲𑀧𑁄𑀢𑀺 𑀢𑀁 𑀲𑀜𑁆𑀚𑀸𑀦𑀺𑀁𑀲𑀼.

𑀲𑁄 𑀧𑀩𑁆𑀩𑀚𑀺𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀯𑀺𑀧𑀲𑁆𑀲𑀦𑀸𑀬 𑀘𑁂𑀯 𑀓𑀫𑁆𑀫𑀁 𑀓𑀭𑁄𑀢𑀺, 𑀩𑀼𑀤𑁆𑀥𑀯𑀘𑀦𑀜𑁆𑀘 𑀕𑀡𑁆𑀳𑀸𑀢𑀺. 𑀅𑀣 𑀲𑁄 𑀢𑁂𑀦 𑀲𑀤𑁆𑀥𑀺𑀁 𑀧𑀩𑁆𑀩𑀢𑀫𑀢𑁆𑀣𑀓𑁂 𑀲𑀫𑀡𑀥𑀫𑁆𑀫𑀁 𑀓𑀢𑁆𑀯𑀸 𑀅𑀦𑀸𑀕𑀸𑀫𑀺𑀨𑀮𑀁 𑀧𑀢𑁆𑀯𑀸 𑀲𑀼𑀤𑁆𑀥𑀸𑀯𑀸𑀲𑁂 𑀦𑀺𑀩𑁆𑀩𑀢𑁆𑀢𑁄 𑀫𑀳𑀸𑀩𑁆𑀭𑀳𑁆𑀫𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀆𑀯𑀚𑁆𑀚𑁂𑀦𑁆𑀢𑁄 𑀓𑀼𑀫𑀸𑀭𑀓𑀲𑁆𑀲𑀧𑀁 𑀤𑀺𑀲𑁆𑀯𑀸 ‘‘𑀲𑀳𑀸𑀬𑀓𑁄 𑀫𑁂 𑀯𑀺𑀧𑀲𑁆𑀲𑀦𑀸𑀬 𑀓𑀺𑀮𑀫𑀢𑀺, 𑀕𑀦𑁆𑀢𑁆𑀯𑀸 𑀢𑀲𑁆𑀲 𑀯𑀺𑀧𑀲𑁆𑀲𑀦𑀸𑀬 𑀦𑀬𑀫𑀼𑀔𑀁 𑀤𑀲𑁆𑀲𑁂𑀢𑁆𑀯𑀸 𑀫𑀕𑁆𑀕𑀨𑀮𑀧𑀢𑁆𑀢𑀺𑀬𑀸 𑀉𑀧𑀸𑀬𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀩𑁆𑀭𑀳𑁆𑀫𑀮𑁄𑀓𑁂 𑀞𑀺𑀢𑁄𑀯 𑀧𑀜𑁆𑀘𑀤𑀲 𑀧𑀜𑁆𑀳𑁂 𑀅𑀪𑀺𑀲𑀗𑁆𑀔𑀭𑀺𑀢𑁆𑀯𑀸 𑀭𑀢𑁆𑀢𑀺𑀪𑀸𑀕𑀲𑀫𑀦𑀦𑁆𑀢𑀭𑁂 𑀓𑀼𑀫𑀸𑀭𑀓𑀲𑁆𑀲𑀧𑀢𑁆𑀣𑁂𑀭𑀲𑁆𑀲 𑀯𑀲𑀦𑀝𑁆𑀞𑀸𑀦𑁂 𑀅𑀦𑁆𑀥𑀯𑀦𑁂 𑀧𑀸𑀢𑀼𑀭𑀳𑁄𑀲𑀺. 𑀣𑁂𑀭𑁄 𑀆𑀮𑁄𑀓𑀁 𑀤𑀺𑀲𑁆𑀯𑀸 ‘‘𑀓𑁄 𑀏𑀢𑁆𑀣𑀸’’𑀢𑀺 𑀆𑀳. ‘‘𑀅𑀳𑀁 𑀧𑀼𑀩𑁆𑀩𑁂 𑀢𑀬𑀸 𑀲𑀤𑁆𑀥𑀺𑀁 𑀲𑀫𑀡𑀥𑀫𑁆𑀫𑀁 𑀓𑀢𑁆𑀯𑀸 𑀅𑀦𑀸𑀕𑀸𑀫𑀺𑀨𑀮𑀁 𑀧𑀢𑁆𑀯𑀸 𑀲𑀼𑀤𑁆𑀥𑀸𑀯𑀸𑀲𑁂 𑀦𑀺𑀩𑁆𑀩𑀢𑁆𑀢𑀩𑁆𑀭𑀳𑁆𑀫𑀸’’𑀢𑀺 𑀆𑀳. 𑀓𑁂𑀦 𑀓𑀫𑁆𑀫𑁂𑀦 𑀆𑀕𑀢𑀢𑁆𑀣𑀸𑀢𑀺? 𑀫𑀳𑀸𑀩𑁆𑀭𑀳𑁆𑀫𑀸 𑀅𑀢𑁆𑀢𑀦𑁄 𑀆𑀕𑀢𑀓𑀸𑀭𑀡𑀁 𑀤𑀻𑀧𑁂𑀢𑀼𑀁 𑀢𑁂 𑀧𑀜𑁆𑀳𑁂 𑀆𑀘𑀺𑀓𑁆𑀔𑀺𑀢𑁆𑀯𑀸 ‘‘𑀢𑁆𑀯𑀁 𑀇𑀫𑁂 𑀧𑀜𑁆𑀳𑁂 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀅𑀭𑀼𑀡𑁂 𑀉𑀝𑁆𑀞𑀺𑀢𑁂 𑀢𑀣𑀸𑀕𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀼𑀘𑁆𑀙, 𑀞𑀧𑁂𑀢𑁆𑀯𑀸 𑀳𑀺 𑀢𑀣𑀸𑀕𑀢𑀁 𑀅𑀜𑁆𑀜𑁄 𑀇𑀫𑁂 𑀧𑀜𑁆𑀳𑁂 𑀓𑀣𑁂𑀢𑀼𑀁 𑀲𑀫𑀢𑁆𑀣𑁄 𑀦𑀸𑀫 𑀦𑀢𑁆𑀣𑀻’’𑀢𑀺 𑀯𑀢𑁆𑀯𑀸 𑀩𑁆𑀭𑀳𑁆𑀫𑀮𑁄𑀓𑀫𑁂𑀯 𑀕𑀢𑁄.

𑀣𑁂𑀭𑁄𑀧𑀺 𑀧𑀼𑀦𑀤𑀺𑀯𑀲𑁂 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀫𑀳𑀸𑀩𑁆𑀭𑀳𑁆𑀫𑀼𑀦𑀸 𑀓𑀣𑀺𑀢𑀦𑀺𑀬𑀸𑀫𑁂𑀦𑁂𑀯 𑀧𑀜𑁆𑀳𑁂 𑀧𑀼𑀘𑁆𑀙𑀺. 𑀲𑀢𑁆𑀣𑀸 𑀓𑀼𑀫𑀸𑀭𑀓𑀲𑁆𑀲𑀧𑀢𑁆𑀣𑁂𑀭𑀲𑁆𑀲 𑀅𑀭𑀳𑀢𑁆𑀢𑀁 𑀧𑀸𑀧𑁂𑀢𑁆𑀯𑀸 𑀧𑀜𑁆𑀳𑁂 𑀓𑀣𑁂𑀲𑀺. 𑀣𑁂𑀭𑁄 𑀲𑀢𑁆𑀣𑀸𑀭𑀸 𑀓𑀣𑀺𑀢𑀦𑀺𑀬𑀸𑀫𑁂𑀦𑁂𑀯 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀅𑀦𑁆𑀥𑀯𑀦𑀁 𑀕𑀦𑁆𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀕𑀩𑁆𑀪𑀁 𑀕𑀸𑀳𑀸𑀧𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀢𑀢𑁄 𑀧𑀝𑁆𑀞𑀸𑀬 𑀘𑀢𑀼𑀦𑁆𑀦𑀁 𑀧𑀭𑀺𑀲𑀸𑀦𑀁 𑀥𑀫𑁆𑀫𑀓𑀣𑀁 𑀓𑀣𑁂𑀦𑁆𑀢𑁄 𑀩𑀳𑀼𑀓𑀸𑀳𑀺 𑀉𑀧𑀫𑀸𑀳𑀺 𑀘 𑀓𑀸𑀭𑀡𑁂𑀳𑀺 𑀘 𑀫𑀡𑁆𑀟𑁂𑀢𑁆𑀯𑀸 𑀘𑀺𑀢𑁆𑀢𑀓𑀣𑀫𑁂𑀯 𑀓𑀣𑁂𑀢𑀺. 𑀅𑀣 𑀦𑀁 𑀲𑀢𑁆𑀣𑀸 𑀧𑀸𑀬𑀸𑀲𑀺𑀭𑀜𑁆𑀜𑁄 𑀧𑀜𑁆𑀘𑀤𑀲𑀳𑀺 𑀧𑀜𑁆𑀳𑁂𑀳𑀺 𑀧𑀝𑀺𑀫𑀡𑁆𑀟𑁂𑀢𑁆𑀯𑀸 𑀲𑀼𑀢𑁆𑀢𑀦𑁆𑀢𑁂 (𑀤𑀻. 𑀦𑀺. 𑁨.𑁪𑁦𑁬 𑀆𑀤𑀬𑁄) 𑀤𑁂𑀲𑀺𑀢𑁂 𑀢𑀁 𑀲𑀼𑀢𑁆𑀢𑀦𑁆𑀢𑀁 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀁 𑀓𑀢𑁆𑀯𑀸 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀘𑀺𑀢𑁆𑀢𑀓𑀣𑀺𑀓𑀸𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀲𑀻𑀢𑀺.

𑀫𑀳𑀸𑀓𑁄𑀝𑁆𑀞𑀺𑀢𑀢𑁆𑀣𑁂𑀭𑀯𑀢𑁆𑀣𑀼

𑁨𑁧𑁮. 𑀤𑀲𑀫𑁂 𑀧𑀝𑀺𑀲𑀫𑁆𑀪𑀺𑀤𑀸𑀧𑀢𑁆𑀢𑀸𑀦𑀦𑁆𑀢𑀺 𑀘𑀢𑀲𑁆𑀲𑁄 𑀧𑀝𑀺𑀲𑀫𑁆𑀪𑀺𑀤𑀸 𑀧𑀢𑁆𑀯𑀸 𑀞𑀺𑀢𑀸𑀦𑀁 𑀫𑀳𑀸𑀓𑁄𑀝𑁆𑀞𑀺𑀢𑀢𑁆𑀣𑁂𑀭𑁄 𑀅𑀕𑁆𑀕𑁄𑀢𑀺 𑀤𑀲𑁆𑀲𑁂𑀢𑀺. 𑀅𑀬𑀁 𑀳𑀺 𑀣𑁂𑀭𑁄 𑀅𑀢𑁆𑀢𑀦𑁄 𑀧𑀝𑀺𑀲𑀫𑁆𑀪𑀺𑀤𑀸𑀲𑀼 𑀘𑀺𑀡𑁆𑀡𑀯𑀲𑀺𑀪𑀸𑀯𑁂𑀦 𑀅𑀪𑀺𑀜𑁆𑀜𑀸𑀢𑁂 𑀅𑀪𑀺𑀜𑁆𑀜𑀸𑀢𑁂 𑀫𑀳𑀸𑀲𑀸𑀯𑀓𑁂 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀳𑀁 𑀧𑀼𑀘𑁆𑀙𑀦𑁆𑀢𑁄𑀧𑀺 𑀤𑀲𑀩𑀮𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀳𑀁 𑀧𑀼𑀘𑁆𑀙𑀦𑁆𑀢𑁄𑀧𑀺 𑀧𑀝𑀺𑀲𑀫𑁆𑀪𑀺𑀤𑀸𑀲𑀼𑀬𑁂𑀯 𑀧𑀜𑁆𑀳𑀁 𑀧𑀼𑀘𑁆𑀙𑀢𑀺. 𑀇𑀢𑀺 𑀇𑀫𑀺𑀦𑀸 𑀘𑀺𑀡𑁆𑀡𑀯𑀲𑀺𑀪𑀸𑀯𑁂𑀦 𑀧𑀝𑀺𑀲𑀫𑁆𑀪𑀺𑀤𑀸𑀧𑀢𑁆𑀢𑀸𑀦𑀁 𑀅𑀕𑁆𑀕𑁄 𑀦𑀸𑀫 𑀚𑀸𑀢𑁄.

𑀢𑀲𑁆𑀲 𑀧𑀜𑁆𑀳𑀓𑀫𑁆𑀫𑁂 𑀅𑀬𑀫𑀦𑀼𑀧𑀼𑀩𑁆𑀩𑀺𑀓𑀣𑀸 𑁋 𑀅𑀬𑀫𑁆𑀧𑀺 𑀳𑀺 𑀧𑀤𑀼𑀫𑀼𑀢𑁆𑀢𑀭𑀩𑀼𑀤𑁆𑀥𑀓𑀸𑀮𑁂 𑀳𑀁𑀲𑀯𑀢𑀻𑀦𑀕𑀭𑁂 𑀫𑀳𑀸𑀪𑁄𑀕𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄 𑀅𑀧𑀭𑁂𑀦 𑀲𑀫𑀬𑁂𑀦 𑀲𑀢𑁆𑀣𑀼 𑀥𑀫𑁆𑀫𑀓𑀣𑀁 𑀲𑀼𑀡𑀦𑁆𑀢𑁄 𑀲𑀢𑁆𑀣𑀸𑀭𑀁 𑀏𑀓𑀁 𑀪𑀺𑀓𑁆𑀔𑀼𑀁 𑀧𑀝𑀺𑀲𑀫𑁆𑀪𑀺𑀤𑀸𑀧𑀢𑁆𑀢𑀸𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀦𑁆𑀢𑀁 𑀤𑀺𑀲𑁆𑀯𑀸 𑀅𑀥𑀺𑀓𑀸𑀭𑀓𑀫𑁆𑀫𑀁 𑀓𑀢𑁆𑀯𑀸 𑀢𑀁 𑀞𑀸𑀦𑀦𑁆𑀢𑀭𑀁 𑀧𑀢𑁆𑀣𑁂𑀲𑀺. 𑀲𑁄 𑀬𑀸𑀯𑀚𑀻𑀯𑀁 𑀓𑀼𑀲𑀮𑀁 𑀓𑀢𑁆𑀯𑀸 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀲𑀸𑀯𑀢𑁆𑀣𑀺𑀬𑀁 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺. 𑀓𑁄𑀝𑁆𑀞𑀺𑀢𑀫𑀸𑀡𑀯𑁄𑀢𑀺𑀲𑁆𑀲 𑀦𑀸𑀫𑀁 𑀅𑀓𑀁𑀲𑀼. 𑀲𑁄 𑀯𑀬𑀧𑁆𑀧𑀢𑁆𑀢𑁄 𑀢𑀬𑁄 𑀯𑁂𑀤𑁂 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀏𑀓𑀤𑀺𑀯𑀲𑀁 𑀲𑀢𑁆𑀣𑀼 𑀥𑀫𑁆𑀫𑀓𑀣𑀁 𑀲𑀼𑀢𑁆𑀯𑀸 𑀧𑀝𑀺𑀮𑀤𑁆𑀥𑀲𑀤𑁆𑀥𑁄 𑀧𑀩𑁆𑀩𑀚𑀺. 𑀲𑁄 𑀉𑀧𑀲𑀫𑁆𑀧𑀦𑁆𑀦𑀓𑀸𑀮𑀢𑁄 𑀧𑀝𑁆𑀞𑀸𑀬 𑀯𑀺𑀧𑀲𑁆𑀲𑀦𑀸𑀬 𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀦𑀺𑀘𑁆𑀘𑀓𑀸𑀮𑀁 𑀧𑀝𑀺𑀲𑀫𑁆𑀪𑀺𑀤𑀸𑀲𑀼 𑀘𑀺𑀡𑁆𑀡𑀯𑀲𑀻 𑀳𑀼𑀢𑁆𑀯𑀸 𑀧𑀜𑁆𑀳𑀁 𑀧𑀼𑀘𑁆𑀙𑀦𑁆𑀢𑁄 𑀧𑀝𑀺𑀲𑀫𑁆𑀪𑀺𑀤𑀸𑀲𑀼𑀬𑁂𑀯 𑀧𑀼𑀘𑁆𑀙𑀢𑀺. 𑀅𑀣 𑀦𑀁 𑀲𑀢𑁆𑀣𑀸 𑀅𑀧𑀭𑀪𑀸𑀕𑁂 𑀫𑀳𑀸𑀯𑁂𑀤𑀮𑁆𑀮𑀲𑀼𑀢𑁆𑀢𑀁 (𑀫. 𑀦𑀺. 𑁧.𑁪𑁪𑁯 𑀆𑀤𑀬𑁄) 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀁 𑀓𑀢𑁆𑀯𑀸 𑀧𑀝𑀺𑀲𑀫𑁆𑀪𑀺𑀤𑀸𑀧𑀢𑁆𑀢𑀸𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀲𑀻𑀢𑀺.

𑀢𑀢𑀺𑀬𑀯𑀕𑁆𑀕𑀯𑀡𑁆𑀡𑀦𑀸.